rKTs


H162

(e-text produced by ACIP)

see text in transliteration
159a
།།རྒྱ་གར་སྐད་དུ། ཨཱརྱ་སུ་བི་ཀྲཱནྟ་ཙིནྟ་དེ་བ་པུ་ཏྲ་པ་རི་པྲྀཙྪཱ་ནཱ་མ་མ་ཧཱ་ཡ་ན་སཱུ་ཏྲ། བོད་སྐད་དུ།
159b
འཕགས་པ་ལྷའི་བུ་རབ་རྩལ་སེམས་ཀྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པ་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་ཀྱི་ཀུན་དགའ་ར་བ་ན་དགེ་སློང་ཁྲིའི་དགེ་སློང་གི་དགེ་འདུན་ཆེན་པོ་དང ། འཇིག་རྟེན་གྱི་ཁམས་གཞན་དག་ནས་འདུས་པའི་བྱང་ཆུབ་སེམས་དཔའ་སྟོང་ཕྲག་རབ་ཏུ་མང་པོ་དང ། འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷའི་བུ་རྣམས་དང ། དེ་ལས་གཞན་པའི་ལྷའི་བུ་རྣམས་དང ། ཀླུའི་རྒྱལ་པོ་རྒྱ་མཚོ་ལ་སོགས་པ་ཀླུའི་འཁོར་མང་པོ་རྣམས་དང ། གནོད་སྦྱིན་གྱི་རྒྱལ་པོ་ལུས་ངན་ལ་སོགས་པ་གནོད་སྦྱིན་གྱི་འཁོར་མང་པོ་རྣམས་དང ། ནམ་མཁའ་ལྡིང་གི་རྒྱལ་པོ་སྟོབས་ཆེན་ལ་སོགས་པ་ནམ་མཁའ་ལྡིང་གི་འཁོར་མང་པོ་རྣམས་དང ། ལྷ་མ་ཡིན་གྱི་དབང་པོ་སྒྲ་གཅན་ལ་སོགས་པ་ལྷ་མ་ཡིན་གྱི་འཁོར་མང་པོ་རྣམས་དང ། མི་འམ་ཅིའི་རྒྱལ་པོ་ལྗོན་པ་ལ་སོགས་པ་མི་འམ་ཅིའི་འཁོར་མང་པོ་རྣམས་དང ། ལྟོ་འཕྱེ་ཆེན་པོའི་དབང་པོ་ལག་བཟང་ལ་སོགས་པ་ལྟོ་འཕྱེ་ཆེན་པོའི་འཁོར་མང་པོ་རྣམས་དང ། རྒྱལ་པོ་ཆེན་པོ་བཞི་འཁོར་དང་བཅས་པ་རྣམས་དང ། ལྷའི་དབང་པོ་བརྒྱ་བྱིན་ལྷའི་བུ་སྟོང་ཕྲག་མང་པོའི་འཁོར་དང་བཅས་པ་དང ། མི་མཇེད་ཀྱི་བདག་པོ་ཚངས་པ་ཚངས་རིས་ཀྱི་ལྷའི་བུ་འབུམ་ཕྲག་དུ་མའི་འཁོར་དང་བཅས་པ་དང ། རྒྱལ་པོ་
160a
༄#། །གསལ་རྒྱལ་འཁོར་སྟོང་ཕྲག་དུ་མ་དང་བཅས་པ་དང ། ཁྱིམ་བདག་མགོན་མེད་ཟས་སྦྱིན་འཁོར་དང་བཅས་པ་དང་ཐབས་གཅིག་ཏུ་བཞུགས་ཏེ། དེ་དག་ལ་སོགས་པ་འཁོར་རྣམ་བཞི་མང་པོ་རྣམས་ཀྱིས་ཡོངས་སུ་བསྐོར་ཅིང་མདུན་གྱིས་བལྟས་ཏེ་ཆོས་སྟོན་ཏོ། །དེའི་ཚེ་ན་འཇམ་དཔལ་གཞོན་ནུར་གྱུར་པ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ་།ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་རབ་རྩལ་སེམས་ཀྱང་འདུས་པར་གྱུར་ཏེ་འདུག་གོ་།དེ་ནས་ལྷའི་བུ་རབ་རྩལ་སེམས་ཀྱིས་འཁོར་ཕལ་པོ་ཆེ་དེ་འདུས་པར་རིག་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ལ་གཞན་གྱི་དྲིང་མི་འཇོག་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བརྩམས་པ་ཐམས་ཅད་ལ་བརྩོན་འགྲུས་བརྟན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བསོད་ནམས་དག་གིས་མངོན་པར་འཕགས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་ཀྱིས་ཆགས་པ་མ་མཆིས་པར་སྤྱོད་པ་རྣམས་ལགས། ཇི་ལྟར་ན་བྱང་
160b
ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱིས་མུན་པ་དང་བྲལ་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་རྣམས་ཀྱི་ནང་དུ་འཇིགས་པ་དང་བྲལ་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐོས་པས་དོན་ལ་རྟོན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་ཚུལ་གྱིས་ཆོས་ལ་རྟོན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་བཅོམ་ལྡན་འདས་རྣམས་ཀྱིས་གསུངས་པ་བཞིན་དུ་སྨྲ་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་རྣམས་ལ་ཆོས་སྨྲ་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པ་རྣམས་ཀྱིས་མངོན་པར་འཕགས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བདུད་ཐམས་ཅད་ཀྱིས་ཐུབ་པར་དཀའ་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་གཏིང་དཔག་དཀའ་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གྱི་ཆོས་བརྒྱད་ཀྱིས་མི་གོས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་གཏིང་དཔག་དཀའ་ཞིང་ཟབ་མོ་ལ་སྤྱོད་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སྟོན་པས་དབང་པོ་ལ་མཁས་པ་
161a
༄#། །རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འདུས་མ་བྱས་པ་དང་མ་འདྲེས་པས་རྣམ་པར་ཐར་པའི་སྒོར་གནས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ལྷག་པའི་ང་རྒྱལ་ཅན་ཚར་གཅོད་པའི་སླད་དུ་སྣརེལ་ཞིར་བསྒྲུབ་པ་ལ་མཁས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ལས་ཀྱི་བགྱི་པ་ཐམས་ཅད་ཀྱི་རྒྱུ་ལ་མཁས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ལྟ་བའི་རྣམ་པ་དང་བྲལ་ཞིང་རྟེན་ཅིང་འབྲེལ་པར་འབྱུང་བ་ལ་མཁས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཡོངས་སུ་སྨིན་པར་བགྱིད་པ་དག་ལ་མཁས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་པ་ཡོངས་སུ་དག་པས་བརྟུལ་ཞུགས་གྲུབ་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཞེ་འགྲས་པའི་སེམས་མ་མཆིས་ཤིང་བཟོད་པའི་སྟོབས་དང་ལྡན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་ཐམས་ཅད་ཀྱི་ཕ་རོལ་ཏུ་སོན་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱི་ཉེ་བར་འཚོ་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་ཐམས་ཅད་མངོན་པར་
161b
འདུ་བར་འགྱུར་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྲོག་ཆགས་ཐམས་ཅད་ཀྱིས་བསྔགས་པར་འགྱུར་བ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་སྤྱོད་པ་ཐམས་ཅད་ལ་རྨས་པ་མ་མཆིས་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་དག་ལ་རྒྱ་མཚོ་ལྟ་བུ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ལ་དབང་སྒྱུར་བས་དབང་ཕྱུག་ཏུ་གྱུར་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བགྱི་བ་ཐམས་ཅད་ལ་སློབ་དཔོན་དུ་གྱུར་པ་རྣམས་ལགས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་དུ་ཁ་ན་མ་ཐོ་བ་མ་མཆིས་ཤིང་ཡོན་ཏན་རྣམ་པ་ཐམས་ཅད་དང་ལྡན་པ་རྣམས་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ལྷའི་བུ་རབ་རྩལ་སེམས་ལ་འདི་སྐད་ཅེས་བཀའ་སྩལ་ཏོ། །རབ་རྩལ་སེམས། ལེགས་སོ། །ལེགས་སོ། །ལྷའི་བུ། ཁྱོད་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་ཐམས་ཅད་ལས་མངོན་པར་འཕགས་པ། འཇིག་རྟེན་གྱི་ཡོངས་སུ་འདྲེན་པ། སྙིང་རྗེ་ཆེན་པོ་དང་ལྡན་པ། བསྐལ་པ་གྲངས་མེད་པ་ནས་གོ་ཆ་བགོས་པ། བརྩོན་འགྲུས་ཤིན་ཏུ་བརྟན་པ། དེད་དཔོན་ཆེན་པོ། སེམས་ཅན་དཔག་ཏུ་མེད་པའི་དོན་བྱེད་པ། སེམས་ཅན་དཔག་ཏུ་མེད་པ་ཐམས་ཅད་ཀྱང་བདེ་བ་ལ་རབ་ཏུ་འགོད་པ་ལ་མཁས་པ། ཡོན་ཏན་དཔག་ཏུ་མེད་པ་དང་ལྡན་པ་རྣམས་ཀྱི་དོན་དུ་དེ་བཞིན་གཤེགས་པ་ལ་
162a
༄#། །ཡོངས་སུ་ཞུ་བ་ནི་ཡང་ཁྱོད་ལེགས་སོ། །ལྷའི་བུ། དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང ། ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཡོན་ཏན་གྱི་ཁྱད་པར་དེ་དག་དང ། གཞན་དག་ཀྱང་འཐོབ་པར་འགྱུར་བ་ངས་ཁྱོད་ལ་བཤད་པར་བྱའོ། །ལྷའི་བུ་རབ་རྩལ་སེམས་ཀྱིས། བཅོམ་ལྡན་འདས། དེ་ལྟར་འཚལ་ལོ་ཞེས་གསོལ་ཏེ་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་ཐེག་པ་ཆེན་པོ་ལ་གཞན་གྱི་དྲིང་མི་འཇོག་པ་རྣམས་ཡིན་ཏེ། བཞི་གང་ཞེ་ན། ཐབས་ལ་མཁས་པས་མངོན་པར་བསྒྲུབ་པའི་ཤེས་རབ་དང ། སྙིང་རྗེ་ཆེན་པོས་མངོན་པར་བསྒྲུབ་པའི་བྱམས་པ་དང ། དོན་དང ། ཆོས་ཀྱིས་མངོན་པར་བསྒྲུབ་པའི་སྤོབས་པ་དང ། བྱང་ཆུབ་ཀྱི་ཡན་ལག་གི་རྣམ་པས་མངོན་པར་བསྒྲུབ་པའི་མངོན་པར་ཤེས་པ་ལྔ་པོ་དག་སྟེ། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན་ཐེག་པ་ཆེན་པོ་ལ་གཞན་གྱི་དྲིང་མི་འཇོག་པ་རྣམས་ཡིན་ནོ། །དེ་ལ་འདི་སྐད་ཅེས་བྱ་སྟེ། ཐབས་ལ་མཁས་པ་མངོན་པར་སྒྲུབ་པར་བྱེད་པ་ཡི། །མངོན་སུམ་ཤེས་རབ་རྟོགས་པར་ཁོང་དུ་ཆུད་གྱུར་ཅིང ། །ཐམས་ཅད་སྐྱབས་ཕྱིར་སྙིང་རྗེ་ཆེན་པོ་ཡངས་པ་ལ། གནས་པའི་བྱམས་པ་མངོན་པར་སྒྲུབ་པར་བྱེད་གྱུར་ལ། །དོན་དང་ཆོས་ལ་ཤིན་ཏུ་མཁས་པར་འགྱུར་བ་ཡི། སོ་སོ་ཡང་
162b
དག་རིག་ལ་སྤོབས་པ་ཐོབ་གྱུར་ལ། །བྱང་ཆུབ་ལམ་ལ་མངོན་ཤེས་དག་གིས་རྣམ་རྩེ་ན། །དེས་ནི་གཞན་གྱི་དྲིང་ལ་འཇོག་པར་མི་འགྱུར་རོ། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་བརྩམ་པ་ཐམས་ཅད་ལ་བརྩོན་འགྲུས་བརྟན་པ་རྣམས་ཡིན་ཏེ། བཞི་གང་ཞེ་ན། ཕྱིར་མི་ལྡོག་པའི་བརྩོན་འགྲུས་དང ། བསམ་པ་དག་པའི་བརྟུལ་བ་དང ། བྱང་ཆུབ་ལ་འདུན་པ་དྲག་པོ་དང་ལྡན་པ་དང ། སངས་རྒྱས་ཀྱི་ཆོས་ཡོངས་སུ་བསྒྲུབ་པ་ལ་ཡིད་ཡོངས་སུ་མི་སྐྱོ་བ་དང་ལྡན་པ་སྟེ། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན་བརྩམ་པ་ཐམས་ཅད་ལ་བརྩོན་འགྲུས་བརྟན་པ་ཡིན་ནོ། །དེ་ལ་འདི་སྐད་ཅེས་བྱ་སྟེ། བརྩོན་འགྲུས་བརྟན་ཞིང་རབ་ཏུ་གནས་པར་མེད་གྱུར་ཅིང ། །བསམ་པ་རྙོག་པ་མེད་ཅིང་ཡོངས་སུ་དག་གྱུར་ལ། །སངས་རྒྱས་ཡེ་ཤེས་དོན་ཕྱིར་འདུན་པ་གྲགས་ལྡན་ཞིང ། །སངས་རྒྱས་ཆོས་རྣམས་འདོད་ཅིང་རྟག་ཏུ་ཡོངས་མི་སྐྱོ། །གང་ལ་ཆོས་བཞི་རྒྱ་ཆེན་ཁྱད་པར་དེ་ཡོད་པ། །དེ་ནི་བྱང་ཆུབ་ལམ་དུ་མངོན་འབྱུང་བརྟན་འགྱུར་ཞིང ། །བྱང་ཆུབ་ཡན་ལག་མཐིལ་བཞག་པ་བཞིན་གྱུར་ལ། །རིང་པོ་མི་ཐོགས་འཇིག་རྟེན་གསུམ་གྱི་ཆོས་རྒྱལ་འགྱུར། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་བསོད་ནམས་དག་གིས་མངོན་པར་འཕགས་པ་རྣམས་ཡིན་ཏེ། བཞི་གང་ཞེ་ན། བྱང་ཆུབ་སེམས་དཔའ་རྣམས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་འདོམས་པར་བྱེད་པ་དང ། སེམས་
163a
༄#། །ཅན་གང་དག་བྱང་ཆུབ་ཏུ་སེམས་མ་བསྐྱེད་པ་དེ་དག་བྱང་ཆུབ་ཏུ་སེམས་བསྐྱེད་དུ་འཇུག་པ་དང ། སྤྲུལ་པ་ལྟ་བུར་དུས་གསུམ་ཡོངས་སུ་བསྔོ་བ་དང ། བྱང་ཆུབ་ཀྱི་སེམས་དང་མ་བྲལ་བས་དགེ་བའི་རྩ་བ་ཐམས་ཅད་སྐྱེད་པ་མངོན་པར་འདུ་བྱེད་པ་སྟེ། ཆོས་བཞི་པོ་དེ་དག་དང་ལྡན་པའོ། །དེ་ལ་འདི་སྐད་ཅེས་བྱ་སྟེ། མཁས་པ་གང་དག་ཤེས་རབ་ཕ་རོལ་ཕྱིན་འདོམས་ཤིང ། །བྱང་ཆུབ་ཞུགས་པས་བྱང་ཆུབ་སེམས་འཛིན་འཇུག་བྱེད་པ། །གང་དག་བྱང་ཆུབ་ཞུགས་པས་དུས་གསུམ་ཡི་རང་ཞིང ། །ཡིད་དང་མ་བྲལ་སྤྲུལ་འདྲ་བྱང་ཆུབ་འདོད་བྱེད་པ། །དགེ་བ་གང་ཡིན་ཅུང་ཟད་བྱེད་པ་ཐམས་ཅད་ནི། །ཐམས་ཅད་མཁྱེན་ཉིད་སེམས་ལ་རྟེན་པར་བྱེད་པ་ཡིན། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་ཡེ་ཤེས་ཀྱིས་ཆགས་པ་མེད་པར་སྤྱོད་པ་རྣམས་ཡིན་ཏེ། བཞི་གང་ཞེ་ན། ཤེས་པས་བྱིས་པའི་བྱ་བ་རྣམས་བྱེད་ཅིང་ང་རྒྱལ་གྱིས་བྱས་པ་རྣམས་མི་བྱེད་པ་དང ། ཆོས་ཐམས་ཅད་རྐྱེན་ལས་རག་ལས་ཤིང་བྱིན་གྱིས་རློབ་པ་མེད་ལ་གང་ཟག་དང་བྲལ་བར་ཤེས་པ་དང ། སྟོང་པ་ཉིད་སྤྱོད་ཡུལ་དུ་གྱུར་ཅིང་སེམས་ཅན་ཐམས་ཅད་མི་གཏོང་བའི་བསམ་པ་དང་ལྡན་པ་དང ། ཆགས་པ་ཐམས་ཅད་ལས་ཡང་དག་པར་འདས་ཤིང་སྐྱེ་མཆེད་དྲུག་ཡོངས་སུ་ཤེས་པ་སྲུང་བ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། ཤེས་པས་ལས་བྱེད་དེ་དག་ང་རྒྱལ་ཡོད་མིན་ཞིང ། །བརྟེན་ལ་མཁས་པ་
163b
ཡིན་ཞིང་དེ་དག་ལྟ་མེད་ལ། །སྟོང་ཉིད་སྤྱོད་ཡུལ་དེ་དག་སེམས་ཅན་མི་གཏོང་ཞིང ། །ཆགས་པ་ཀུན་ལས་འདས་ཤིང་ཕྱི་ནང་གནས་པ་མེད། །ཆོས་མཆོག་བཞི་པོ་དེ་ལ་ཤིན་ཏུ་རབ་གནས་པ། །ཤེས་པས་ཕ་རོལ་ཕྱིན་ཅིང་ཆགས་མེད་སྤྱོད་པ་ཡིན། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་ཤེས་རབ་ཀྱི་མུན་པ་དང་བྲལ་བ་རྣམས་ཡིན་ཏེ། བཞི་གང་ཞེ་ན།་ཐོས་པས་ངོམས་པ་མེད་ཅིང་ཚུལ་བཞིན་ལ་རབ་ཏུ་སྦྱོར་བ་དང ། ཟང་ཟིང་མེད་པའི་སེམས་ཀྱིས་ཆོས་སྟོན་པ་དང ། ཆོས་ཀྱི་དབྱིངས་དབྱེར་མེད་པ་ཤེས་པར་བྱ་བའི་ཕྱིར་ཉོན་མོངས་པ་ཐམས་ཅད་ལ་སྒྱུ་མ་ལྟ་བུར་སོ་སོར་རྟོག་པ་དང ། ཚུལ་གཅིག་ལ་འཇུག་པས་ཐམས་ཅད་ཀྱི་འཇུག་པ་ལ་འཇུག་པ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། དེ་དག་ཐོས་འཚོལ་ངོམས་མེད་ཚུལ་བཞིན་རྟོགས་བྱེད་ཅིང ། །དེ་མཉམ་སྟོན་ཅིང་ཀློག་འཛིན་རྙེད་པ་འཚོལ་མི་བྱེད། །ཉོན་མོངས་སྤྲིན་འདྲ་སྒྱུ་མ་རྨི་ལམ་ལྟ་བུར་བལྟ། །ཆོས་ཉིད་ཐ་དད་མི་བྱེད་དེ་དག་ཚུལ་གཅིག་འཇུག་།ཚེ་བདག་ཆོས་བཞི་དེ་བརྟེན་ཁྱད་པར་ཐོབ་འགྱུར་ཞིང ། །ཤེས་རབ་སྒྲོན་འདས་མུན་བསལ་ཟླ་ལྟར་འཇིག་རྟེན་རྒྱུ། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་འཁོར་རྣམས་ཀྱི་ནང་དུ་འཇིགས་པ་དང་བྲལ་བ་རྣམས་ཡིན་ཏེ། བཞི་གང་ཞེ་ན། ཐོས་པ་ཐམས་ཅད་འཛིན་པའི་གཟུངས་ཐོབ་པ་དང ། སེམས་ཅན་ཐམས་ཅད་ཀྱི་ཐེ་
164a
༄#། །ཚོམ་གཅོད་པའི་སྤོབས་པ་ཐོབ་པ་དང ། སེམས་ཅན་ཐམས་ཅད་ལ་བདག་མེད་པ་སྟོན་པའི་སྙིང་རྗེ་ཆེན་པོ་དང ། བདུད་དང་ཉོན་མོངས་པ་དང་བྲལ་བ་མངོན་པར་ཤེས་པའི་ཡེ་ཤེས་ཀྱི་གོ་ཆ་བགོས་པ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། ཐོས་ཀུན་ཆུད་མི་ཟ་བར་འགྱུར་བའི་གཟུངས་ཐོབ་ཅིང ། །དེ་དག་སྤོབས་ལྡན་སེམས་ཅན་སོམ་ཉི་གཅོད་པར་བྱེད། །སྙིང་རྗེས་ཆོས་འདི་ཐམས་ཅད་བདག་མེད་སྟོན་བྱེད་ཅིང ། །མངོན་ཤེས་ཤེས་པའི་གོ་བགོས་བདུད་ཀྱིས་མི་ཉམས་ལ། །བྱང་ཆུབ་སེམས་དཔའ་ཆོས་བཞི་དེ་དག་གིས་འཇུག་ན། །འཁོར་ཀུན་ནང་དུ་སོང་ཡང་དེ་ལ་འཇིགས་པ་མེད། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་ཐོས་པས་དོན་ལ་རྟོན་པ་རྣམས་ཡིན་ཏེ། བཞི་གང་ཞེ་ན། ཐོས་པས་ཐམས་ཅད་མི་འཛིན་པས་ཐོས་པ་དང་མི་ལྡན་ཞིང་སྒྲུབ་པ་ཉམས་པའི་བྱིས་པ་ཐམས་ཅད་ཡོངས་སུ་སྤོང་བ་དང ། ཡི་གེ་དང་སྒྲ་དང ། སྐད་དང ། ཚིག་གི་ལམ་ཐམས་ཅད་མངོན་དུ་རྣམ་པར་ཤེས་པར་བྱ་བའི་ཕྱིར། གཅ་\?\་དང་མཚུངས་པ་ཉིད་དུ་ཁོང་དུ་ཆུད་པ་དང ། དོན་འདོད་པ་ཉིད་ཀྱི་ཕྱིར་ཐོས་པ་ཡོངས་སུ་འཚོལ་ཞིང་དགའ་མགུར་བྱ་བའི་ཕྱིར་མ་ཡིན་པ་དང ། བརྗོད་དུ་མེད་པའི་དོན་ལ་འཇུག་ཅིང་བརྗོད་པའི་དོན་མ་ཡིན་པ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་
164b
སྐད་ཅེས་བྱ་སྟེ། ཇི་ཙམ་མང་དུ་ཐོས་ཀྱང་དོན་ལ་མི་རྟོག་པས། །བྱིས་པ་ཐོས་དང་མི་ལྡན་རྟག་ཏུ་སྒྲུབ་ཆོས་ཉམས། །སྲིད་གསུམ་སྒྲ་སྐད་དབྱངས་དང་ཚིག་ལམ་གང་ཡོད་པ། །བྲག་ཅ་འདྲ་བར་དེ་ལས་དོན་ལྡན་སྒྲ་ཐོས་ནས། །དོན་ཉིད་རྟོགས་ཤིང་དགའ་མགུར་ཉེས་ཀུན་ཕྱིར་མི་འཇུག་།ཆོས་ཉིད་འདི་ནི་དོན་མཆོག་ཡིན་ཏེ་བརྗོད་དུ་མེད། །འདི་ནི་དོན་དང་སྒྲ་སྐད་ཐོས་པར་གྱུར་པ་ལས། །འགྲོ་བ་རྣམས་སུ་འགྲོ་བར་བྱེད་ཅིང་འགྲོ་བར་འགྱུར། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་འཇིག་རྟེན་གྱི་ཚུལ་གྱིས་ཆོས་ལ་སྟོན་པ་རྣམས་ཡིན་ཏེ། བཞི་གང་ཞེ་ན། བྲེ་མོ་གཏམ་བྱེད་པ་རྣམས་ལ་ཆོས་སྟོན་པ་དང ། སྐྱེ་བོ་ཕལ་པོ་ཆེ་འདུས་པ་དག་ལ་འཆི་བ་རྗེས་སུ་དྲན་པ་དང ། གཏོང་བ་ཆེན་པོ་དག་ལ་རྗེས་སུ་ཡི་རང་ཞིང་བྱང་ཆུབ་ཏུ་ཡོངས་སུ་བསྔོ་བ་དང ། འདུ་འཛི་ཐམས་ཅད་ལ་དབེན་པར་གཞོལ་བ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། གང་ཚེ་སྐྱེ་བོ་མང་པོའི་དབུས་སུ་སོན་གྱུར་པ། །དེར་ནི་མཁས་པས་ཆོས་ཀྱི་གཏམ་ལ་འཇུག་པར་བྱ། །སྐྱེ་བོ་མང་པོ་འདུས་པར་གྱུར་པའི་ཚོགས་རྣམས་ལ། །འཆི་བར་འགྱུར་བའི་འདུ་ཤེས་རྣམ་པར་བསྒོམ་པར་བྱ། །དེས་ནི་བག་ཡོད་གཞན་གྱི་གཏོང་བ་རྣམ་ལྔ་ཡི། །གཏོང་ལ་ཡི་རངས་བྱས་ནས་བྱང་ཆུབ་བསྔོ་བྱ་ཞིང ། །གང་ཚེ་འདུ་འཛི་དག་དང་ཕྲད་པར་གྱུར་པའི་ཚེ། །དེར་ནི་
165a
༄#། །དབེན་པར་གཞོལ་བར་རབ་ཏུ་འདོད་པར་བྱ། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་སངས་རྒྱས་བཅོམ་ལྡན་འདས་རྣམས་ཀྱིས་གསུངས་པ་བཞིན་དུ་སྨྲ་བ་རྣམས་ཡིན་ཏེ། བཞི་གང་ཞེ་ན། བྱང་ཆུབ་ཀྱི་སེམས་མི་གཏོང་བ་དང ། ཐོས་པ་བསྒྲུབ་པ་སྙིང་པོར་བྱེད་པ་དང ། ཇི་སྐད་སྨྲས་པ་དེ་བཞིན་དུ་བྱེད་པ་དང ། རང་བཞིན་གྱིས་བདག་མེད་པ་ལ་འཇུག་པ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། ཉམ་ང་གནོད་པར་གྱུར་ཀྱང་བྱང་ཆུབ་སེམས་མི་གཏོང ། །དེ་དག་སྐྱོབ་པའི་ཆོས་ཐོས་སྒྲུབ་པ་སྙིང་པོར་བྱེད། །བཀའ་བློ་བདེ་མཐུན་ཇི་སྐད་སྨྲས་པ་དེ་བཞིན་བྱེད། །མཁས་པ་དེ་དག་ཆོས་ཀུན་རང་བཞིན་བདག་མེད་འཇུག ། དེ་ལྟར་བརྩོན་པའི་ཤེས་ལྡན་སྨྲས་བཞིན་བྱེད་འགྱུར་ཞིང ། །རྟག་བརྩོན་མི་འདོར་རྗེས་མཐུན་བདག་མེད་ཅི་ཡང་མེད། །རྟག་ཏུ་སྙན་པའི་ཕྲེང་བ་ཕྱོགས་བཅུར་གྲགས་འགྱུར་ཞིང ། ། དེ་ལྟར་ཆོས་སྨྲ་དེ་དག་ཆོས་ཀྱི་ཤེས་པས་འཕགས། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་སེམས་ཅན་རྣམས་ལ་ཆོས་སྨྲ་བ་རྣམས་ཡིན་ཏེ།་བཞི་གང་ཞེ་ན། བདག་ཉིད་སྒྲུབ་པས་གནས་ཤིང་སེམས་ཅན་རྣམས་ལ་ཆོས་སྟོན་པ་དང ། བདག་ཉིད་དུལ་བ་དང ། བསྲུང་བ་དང ། གྲོལ་བ་དང ། བརྟུལ་བ་དང །
165b
ཡོངས་སུ་མྱ་ངན་ལས་འདས་ཤིང་སེམས་ཅན་གཞན་དག་དུལ་བར་བྱ་བ་དང ། བསྲུང་བ་དང ། དགྲོལ་བ་དང ། གདུལ་བ་དང ། ཡོངས་སུ་མྱ་ངན་ལས་འདའ་བའི་ཕྱིར་ཆོས་སྟོན་པར་བྱེད་པ་དང ། བདག་ཉིད་ཡང་དག་པར་རྫོགས་པའི་བྱང་ཆུབ་ཏུ་བསམ་པ་ངེས་པར་གྱུར་ཅིང་སེམས་ཅན་རྣམས་ཀྱང་ཐེག་པ་ཆེན་པོ་ལ་རབ་ཏུ་འགོད་པར་བྱེད་པ་དང ། བདག་ཉིད་ཆོས་འདོད་ཅིང་ཆོས་འདོད་པས་གཞན་དག་ལའང་སྟོན་པར་བྱེད་པ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། སྒྲུབ་པ་སྙིང་པོར་བྱེད་ཅིང་འགྲོ་ལ་ཆོས་སྟོན་ལ། །དུལ་བསྲུང་ལེགས་བཏུལ་ཤིན་ཏུ་མྱ་ངན་འདས་གནས་ཀྱང ། །གང་དག་མ་དུལ་མ་བསྲུངས་མ་བཏུལ་མྱ་ངན་ལས། །མ་འདས་དེ་དག་ཆོས་ཀྱི་དཀོན་མཆོག་འབྱོར་པར་འཛུད། །དེ་དག་བྱང་ཆུབ་སེམས་ལ་བསམ་པ་ངེས་གྱུར་ཅིང ། །ཐེག་པ་དེ་ལ་འགྲོ་བ་རྣམས་ཀྱང་འགོད་པར་བྱེད། །རྟག་ཏུ་ཆོས་འདོད་དོན་ལྡན་བླ་མ་གུས་བྱེད་ཅིང ། །སེམས་ཅན་རྣམས་ལ་དེ་དང་མཐུན་པའི་ཆོས་རྣམས་སྟོན། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་མངོན་པར་ཤེས་པ་རྣམས་ཀྱིས་མངོན་པར་འཕགས་པ་རྣམས་ཡིན་ཏེ། བཞི་གང་ཞེ་ན། ཡང་དང་ཡང་དུ་ཚངས་པའི་གནས་པ་བཞིའི་གནས་པ་དང ། རྟག་པར་རྒྱུན་དུ་རབ་ཏུ་དབེན་པར་གནས་
166a
༄#། །པ་དང ། ཆོས་ཟབ་མོ་ལ་བཟོད་པ་དང ། ལུས་དང ། སེམས་མཉམ་པ་ཉིད་དུ་ཤེས་པ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། ཚངས་པའི་གནས་པ་དག་ལ་རྟག་ཏུ་རབ་གནས་ཤིང ། །དབེན་པར་གནས་པ་ལ་ཡང་དགའ་བ་སྐྱེད་བྱེད་ལ། །ཤེས་པས་ཟབ་མོའི་བཟོད་ལས་ངེས་པ་ཐོབ་གྱུར་ཅིང ། །མཁའ་དང་མཉམ་པའི་སེམས་དང་ལྡན་པར་གྱུར་པ་སྟེ། །དེ་ལྟར་མངོན་པར་བརྩོན་པའི་འཇིག་པ་མེད་པ་རྣམས། །མངོན་ཤེས་ལྔ་པོ་དག་གིས་མངོན་པར་འཕགས་གྱུར་ཅིང ། ། དེ་དག་སངས་རྒྱས་རྣམས་ཀྱི་སྤྱན་སྔར་འདུག་འདྲ་ལ། །སེམས་ཅན་མང་པོ་རྣམས་ཀྱང་ཡོངས་སུ་སྨིན་བྱེད་འགྱུར། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་བདུད་ཐམས་ཅད་ཀྱིས་ཐུབ་པ་དཀའ་བ་རྣམས་ཡིན་ཏེ། བཞི་གང་ཞེ་ན། སྟོང་པ་ཉིད་ཀྱི་རྣམ་པས་མངོན་པར་བསྒྲུབ་པའི་བསམ་གཏན་བཞི་དང ། སེམས་ཅན་ཐམས་ཅད་མི་གཏོང་བའི་སྙིང་རྗེ་ཆེན་པོ་དང ། དཀོན་མཆོག་གསུམ་གྱི་གདུང་རྒྱུན་མི་གཅོད་པའི་བརྩོན་འགྲུས་དང ། ཐབས་ལ་མཁས་པ་མངོན་པར་བསྒྲུབ་པའི་ཕ་རོལ་ཏུ་ཕྱིན་པ་དྲུག་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། མཚན་མེད་སྟོང་པས་ངེས་པའི་བསམ་གཏན་བཞི་བསྒོམ་ཞིང ། །སེམས་ཅན་ཡོངས་སུ་སྐྱབས་ཕྱིར་
166b
རྟག་ཏུ་སྙིང་རྗེ་ལྡན། །དཀོན་མཆོག་གསུམ་རྒྱུན་མི་གཅོད་བརྩོན་འགྲུས་ཐོབ་གྱུར་ཅིང ། །ཀུན་ཏུ་ཐབས་ལྡན་ཕ་རོལ་ཕྱིན་པ་དྲུག་ལ་འཇུག་།དེ་ལྟར་སྤྱོད་མཁས་བློ་ལྡན་ཆེ་བདག་ཡིད་གཞུངས་པ། ། དེ་དག་བདུད་བཞི་དག་ལས་ཡང་དག་འདས་གྱུར་ཅིང ། །བདུད་ཀྱི་ལྕགས་ཀྱུས་ཟིན་པའི་འགྲོ་བ་མགོན་མེད་རྣམས། །མྱ་ངན་འདའ་བར་འགྲོ་བའི་ལམ་ལ་འགོད་པར་བྱེད། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་བཞི་དང་ལྡན་ན་བློས་གཏིང་དཔག་དཀའ་བ་རྣམས་ཡིན་ཏེ། བཞི་གང་ཞེ་ན། ཆོས་ཟབ་མོའི་ཚུལ་ལ་འཇུག་པ་དང ། རྟག་ཏུ་དོན་དང་ལྡན་ཞིང་བསྙེན་པར་དཀའ་བ་དང ། རྟག་ཏུ་ཡིད་བྱུང་ཞིང་ཆོས་སེམས་པར་བྱེད་པ་དང ། སངས་རྒྱས་ཀྱི་ཡེ་ཤེས་སྒྲིབ་པ་མེད་པ་ལ་སེམས་ཀྱིས་ངེས་པར་རྟོགས་པར་བྱེད་པ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། ཟབ་མོའི་ཆོས་ཀྱི་ཚུལ་ལ་ཞུགས་པར་གྱུར་པ་དང ། །རྟག་ཏུ་དོན་དང་ལྡན་ཞིང་བསྙེན་པར་དཀའ་འགྱུར་ལ། །རྟག་ཏུ་ཡིད་བྱུང་ཆོས་ལ་བསམ་པ་ཞུགས་གྱུར་ཅིང ། །སེམས་ཀྱིས་ངེས་པར་རྟོགས་པར་བྱེད་པ་གང་ཡིན་པའི། །མཁས་པ་ཐེག་པ་ཆེ་ལ་བརྟེན་པ་རབ་གནས་པ། །བློ་རྣམས་དག་གིས་གཏིང་དཔག་དཀའ་བར་རབ་འགྱུར་ཞིང ། ཆགས་པ་མེད་པའི་ཡེ་ཤེས་ཡང་དག་སྒྲུབ་བྱེད་པ། །དེ་ཕྱིར་བློ་རྣམས་དག་གིས་གཏིང་དཔག་དཀའ་བ་ཡིན། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན། འཇིག་རྟེན་གྱི་ཆོས་བརྒྱད་ཀྱིས་
167a
༄#། །མི་གོས་པ་རྣམས་ཡིན་ཏེ། །བརྒྱད་གང་ཞེ་ན། རྙེད་པ་དང ། སྙན་པ་དང ། བསྟོད་པ་དང ། བདེ་བས་ཁེངས་པ་མེད་པ་དང ། མ་རྙེད་པ་དང ། མི་སྙན་པ་དང ། སྨད་པ་དང ། སྡུག་བསྔལ་གྱིས་ཞུམ་པ་མེད་པ་དང ། སེམས་ཅན་ཡོངས་སུ་སྨིན་པར་བྱ་བའི་ཕྱིར་ཕུང་པོ་རྣམས་ལ་ཡོངས་སུ་སྤྱོད་པར་བྱེད་པ་དང ། ཕུང་པོ་ཡོངས་སུ་ཤེས་པ་སྲུང་ཞིང་དབེན་པར་ལྟ་བ་སྟེ། ཆོས་བརྒྱད་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། རྙེད་དང་སྙན་དང་བསྟོད་དང་བདེ་བ་ཀུན་ཐོབ་ཀྱང ། །དེ་དག་ལ་ནི་ནམ་ཡང་ཁེངས་པར་འགྱུར་བ་མེད། །མ་རྙེད་མི་སྙན་སྨད་དང་སྡུག་བསྔལ་ཐོབ་གྱུར་ཀྱང ། །དེ་དག་པདྨ་བཞིན་དུ་ཆགས་མེད་འཇིག་རྟེན་སྤྱོད། །སེམས་ཅན་སྨིན་པར་བྱ་ཕྱིར་ཕུང་པོ་ཡོངས་སུ་སྤྱོད་ཅིང ། ། ཕུང་པོ་སྒྱུ་མ་གསོག་འདྲ་ཡ་མ་བརླར་ཤེས་པ། །སེམས་ཅན་ཕན་བདེའི་དོན་དུ་འཇིག་རྟེན་སྤྱོད་བྱེད་ཀྱང ། །འཇིག་རྟེན་ཆོས་ཀྱིས་མི་གོས་ཚུལ་ཁྲིམས་སྤོས་ངད་ལྡན། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་གཏིང་དཔག་དཀའ་ཞིང་ཟབ་མོ་ལ་སྤྱོད་པ་རྣམས་ཡིན་ཏེ། བཞི་གང་ཞེ་ན། བདག་ལ་བདག་མེད་པ་དང ། སེམས་ཅན་ལ་སེམས་ཅན་མེད་པ་དང ། ཆོས་དབེན་པ་དང ། ཤེས་པ་ཆགས་པ་མེད་པ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། བདག་ལ་བདག་མེད་ཉིད་དུ་ཡོངས་
167b
སུ་ཤེས་གྱུར་ཅིང ། །སེམས་ཅན་སེམས་ཅན་མེད་པར་རྗེས་སུ་རྟོགས་གྱུར་ལ། །ཆོས་རྣམས་དབེན་པ་ཉིད་དུ་ཡོངས་སུ་ཤེས་གྱུར་ཅིང ། །མཁའ་ལ་ལག་བཞིན་ཤེས་རབ་ཆགས་པ་ཡོད་མིན་པའི། །དཔའ་རྣམས་ཟབ་མོ་དག་ལ་ཡོངས་སུ་སྤྱོད་བྱེད་ལ། །སྤྱད་པ་མེད་ལ་རྟག་ཏུ་སྤྱོད་པར་བྱེད་གྱུར་ཅིང ། །འཛིན་དང་ཀུན་འཛིན་ཀུན་དང་རྣམ་པར་བྲལ་གྱུར་པས། །སེམས་ཅན་དག་པ་དེ་དག་དེ་ཕྱིར་གཏིང་དཔག་དཀའ། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་ཆོས་སྟོན་པས་དབང་པོ་རྣམས་ལ་མཁས་པ་རྣམས་ཡིན་ཏེ། བཞི་གང་ཞེ་ན། མངོན་པར་ཤེས་པ་ཐོབ་པ་དང ། སོ་སོ་ཡང་དག་པར་རིག་པ་ཤེས་པ་དང ། ཤེས་རབ་རྣོབ་དང ། སྔོན་གྱི་སྨོན་ལམ་རྣམ་པར་དག་པ་སྟེ། ཆོས་བཞི་པོ་དེ་དག་དང་ངོ ། ། དེ་ལ་འདི་སྐད་ཅེས་བྱ་སྟེ། མངོན་པར་ཤེས་པ་རྣམས་ནི་རབ་ཏུ་ཐོབ་གྱུར་ཅིང ། །ཤེས་པས་སོ་སོ་ཡང་དག་རིག་པས་མི་ཟད་གྱུར། །རྟག་ཏུ་ཤེས་རབ་རྣོན་པོར་གྱུར་ཅིང་སྔོན་ཡང་ནི། །ཡང་དག་བསགས་པ་ཡོངས་སུ་དག་པ་ཐོབ་གྱུར་པ། །སེམས་ཅན་རྣམས་ཀྱི་དབང་པོ་ཡོངས་སུ་ཤེས་བྱས་ནས། །དེ་དང་འདྲ་བའི་ཆོས་རྣམས་ཡོངས་སུ་སྟོན་པར་བྱེད། །དེ་དག་བསྟན་པ་འབྲས་བུ་མེད་པ་མ་ཡིན་ཏེ། །དེ་ཕྱིར་མྱ་ངན་འདས་ནས་མྱ་ངན་འདའ་བར་བྱེད། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་འདུས་མ་བྱས་དང་
168a
༄#། །མ་འདྲེས་པས་རྣམ་པར་ཐར་པའི་སྒོར་ཞུགས་པ་རྣམས་ཡིན་ཏེ། བཞི་གང་ཞེ་ན། སྟོང་པ་ཉིད་སྤྱོད་ཡུལ་དུ་གྱུར་ཅིང ། ལྟ་བའི་འཆིང་བས་བཅིངས་པའི་སེམས་ཅན་རྣམས་ཐར་བར་བྱེད་པ་དང ། མཚན་མ་མེད་པ་ལ་གནས་ཤིང་རྣམ་པར་རྟོག་པ་སྤྱོད་པ་རྣམས་ཡོངས་སུ་མྱ་ངན་ལས་འདའ་བར་བྱད་པ་དང ། སྨོན་པ་མེད་པ་ལ་གནས་ཞིང་སེམས་ཅན་ཡོངས་སུ་སྨིན་པར་བྱ་བའི་ཕྱིར་བསམ་བཞིན་དུ་སྐྱེ་བ་ལེན་པ་དང ། ཐབས་ལ་མཁས་ཤིང་ཤེས་རབ་ཀྱི་ངེས་པར་བྱུང་བ་སྟེ། ཆོས་བཞི་པོ་དེ་དག་དང་ངོ། །དེ་ལ་འདི་སྐད་ཅེས་བྱ་སྟེ། སྟོང་ཉིད་སྤྱོད་ཡུལ་དེ་དག་ལྟས་བཅིང་གྲོལ་བྱེད་ཅིང ། །མཚན་མེད་གནས་ཤིང་སེམས་ཅན་འདི་དག་ཡོངས་སྨིན་བྱེད། །སྨོན་པ་མེད་ལ་གནས་ཤིང་སེམས་ཅན་སྨིན་བྱའི་ཕྱིར། །བསམ་བཞིན་སྐྱེ་ཞིང་གང་དུ་འདོད་པ་དེར་སྐྱེ་འགྱུར། །ཤེས་རབ་ཐབས་ཀྱིས་ངེས་བྱུང་རྣམ་ཐར་སྒོར་གནས་ཀྱང ། འདུས་མ་བྱས་པའི་དབྱིངས་ནི་དུས་མིན་ཐོབ་མི་བྱེད། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་ལྷག་པའི་ང་རྒྱལ་ཅན་ཚར་གཅོད་པའི་ཕྱིར་སྣརེལ་ཞིར་བསྒྲུབ་པ་ལ་མཁས་པ་རྣམས་ཡིན་ཏེ། བཞི་གང་ཞེ་ན། ཆོས་ཀྱི་དབྱིངས་ཀུན་ནས་སྒོ་ཡང་དག་པར་ཤེས་པ་དང ། ཆོས་ཐམས་ཅད་སྒྲིབ་པ་མེད་པར་མོས་པ་དང ། ཀུན་ཏུ་རྟོག་པའི་རྩ་བ་ལས་བྱུང་བའི་
168b
ཉོན་མོངས་པ་རྣམས་ཡོངས་སུ་ཤེས་པ་དང ། མྱ་ངན་ལས་འདས་པའི་རང་བཞིན་ཅན་གྱི་ཆོས་ཐམས་ཅད་ལ་ནེམ་ནུར་མེད་པ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ།་སེམས་མཉམ་ཆོས་ཀྱི་དབྱིངས་སུ་ངེས་པར་བྱུང་གྱུར་ཅིང ། །དེ་དག་རྣམས་ཀྱིས་སྒྲིབ་པ་འགའ་ཡང་མཐོང་མི་འགྱུར། །ཉོན་མོངས་ཀུན་ཏུ་རྟོག་པའི་རྩ་ལས་རབ་བྱུང་བར།། ཤེས་ནས་དེ་ལས་སྣརེལ་ཞིར་ཀུན་ཏུ་སྟོན་མི་བྱེད། །ཆོས་འདི་ཐམས་ཅད་རང་བཞིན་མྱ་ངན་འདས་པ་དང ། །མ་སྐྱེས་མ་འགག་ངོ་བོ་ཉིད་ཀྱིས་དག་པ་ཡིན། །དེ་དག་ཀུན་མཁྱེན་ཡོངས་བཙལ་མྱ་ངན་འདས་གྱུར་ནས། །ལྷག་པའི་ང་རྒྱལ་ཅན་དག་ཚར་གཅོད་བྱེད་པ་ཡིན། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་ལས་ཀྱི་བྱ་བ་ཐམས་ཅད་ཀྱི་རྒྱུ་ལ་མཁས་པ་རྣམས་ཡིན་ཏེ། བཞི་གང་ཞེ་ན། ལོངས་སྤྱོད་ཆེན་པོའི་རྒྱུ་སྦྱིན་པ་མི་སྤོང་བ་དང ། མཐོ་རིས་སུ་སྐྱེ་བའི་རྒྱུ་ཚུལ་ཁྲིམས་མི་སྤོང་བ་དང ། ཤེས་རབ་ཆེན་པོའི་རྒྱུ་ཐོས་པ་མི་སྤོང་བ་དང ། བྲལ་བའི་རྒྱུ་སྒོམ་པ་མི་སྤོང་བ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། ལོངས་སྤྱོད་ཆེ་རྒྱུ་སྦྱིན་པ་མི་སྤོང་དེའི་འབྲས་དེ། །མཐོ་རིས་སྐྱེ་རྒྱུ་ཚུལ་ཁྲིམས་ཐོབ་ཅིང་དེའི་འབྲས་དེ། །ཤེས་རབ་ཉོན་མོངས་འཇོམས་རྒྱུ་ཐོས་པ་དེའི་འབྲས་དེ། །རྣམ་གྲོལ་རིག་རྒྱུ་སྒོམ་པར་བྱེད་ཅིང་དེ་འབྲས་དེ། །རྒྱུ་བཞི་དེ་ལ་རྟོག་བརྩོན་
169a
༄#། །མཁས་པ་དེ་དག་ནི། །བྱང་ཆུབ་སྙིང་པོར་དབང་བསྐུར་འབྲས་ཕྱིར་ཉིན་མཚན་སྤྱོད། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ལྟ་བའི་རྣམ་པ་དང་བྲལ་ཞིང་རྟེན་ཅིང་འབྲེལ་བར་འབྱུང་བ་ལ་མཁས་པ་རྣམས་ཡིན་ཏེ། བཞི་གང་ཞེ་ན། ཆད་པར་སྨྲ་བ་མ་ཡིན་པ་དང ། རྟག་པར་སྨྲ་བ་མ་ཡིན་པ་དང ། མ་རིག་པ་བྱང་ན་རྒ་ཤིའི་བར་དུ་འབྱུང་བར་ལྟ་ཞིང་བདག་ཏུ་ལྟ་བར་མི་བྱེད་པ་དང ། མ་རིག་པ་འགགས་ན་རྒ་ཤིའི་བར་དུ་འགགས་པར་ལྟ་ཞིང་སྲིད་པ་འགོག་པར་ཡང་མི་བྱེད་པ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། ནམ་ཡང་རྟག་པར་མི་ལྟ་ཆད་པར་ལྟུང་མི་བྱེད། །དེས་ནི་ཆོས་རྣམས་རྐྱེན་བྱུང་བྱེད་པ་པོ་དང་ནི། །ཚོར་བ་པོ་མེད་རང་བཞིན་རྣམ་པར་དག་པར་ཤེས། །མ་རིག་རྩ་ལས་རྒ་ཤིའི་བར་དུ་འབྱུང་འགྱུར་བ། །རྒྱལ་བ་ཀུན་གྱིས་གསུངས་ཏེ་དེ་འགགས་རྒྱུ་དང་ནི། ། རྐྱེན་ཟད་དེ་ཕྱིར་ཕྱིན་ཆད་སྐྱེ་མི་འགྱུར་ཞེས་གསུངས། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་སེམས་ཅན་ཡོངས་སུ་སྨིན་པར་བྱ་བའི་ཐབས་ལ་མཁས་པ་རྣམས་ཡིན་ཏེ། བཞི་གང་ཞེ་ན། བྱང་ཆུབ་སེམས་དཔའ་སེམས་ཅན་ཐམས་ཅད་ལ་རག་ལས་པར་ལྟ་བ་དང ། དགེ་བའི་རྩ་བ་ཡང་དག་པར་བསགས་པ་ལ་སྐྱོ་བ་
169b
མེད་པ་དང ། འཁྲོ་བའི་སྒོ་ནས་མྱ་ངན་ལས་འདས་པའི་སྒོ་ཡོངས་སུ་འཚོལ་བ་དང ། སེམས་ཅན་རྣམས་ཀྱི་མོས་པ་ཇི་ལྟ་བ་དེ་ལྟ་བུའི་མོས་པ་ཐབས་གྱིས་ཉམས་སུ་མྱོང་བར་བྱེད་ཅིང་ཉོན་མོངས་པ་རྣམས་ཀྱིས་མ་ཡིན་པ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། སངས་རྒྱས་བྱང་ཆུབ་འདི་ནི་སེམས་ཅན་རྣམས་ལ་རྟེན། དགེ་བ་གསོག་ཅིང་འདོད་པས་ཡོངས་སུ་སྐྱོ་བ་མེད། །འཁོར་བའི་སྒོ་ནས་མྱ་ངན་འདས་པ་ཡོངས་འཚོལ་ཞིང ། །སེམས་ཅན་ཇི་བཞིན་མོས་པ་ཐབས་ཀྱིས་ཡོངས་སུ་ཤེས། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་སེམས་ཅན་ཐམས་ཅད་ཀྱི་ཉེ་བར་འཚོ་བ་རྣམས་ཡིན་ཏེ། བཞི་གང་ཞེ་ན། ལོངས་སྤྱོད་མི་ཟད་པ་དང ། ཆོས་སྟོན་པ་མི་ཟད་པ་དང ། མངོན་པར་ཤེས་པ་ཐོབ་པ་དང ། སེམས་ས་ལྟར་མཉམ་པ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། དེ་དག་རྣམས་ཀྱི་ལོངས་སྤྱོད་རྟག་ཏུ་མི་ཟད་ཅིང ། །རྟག་ཏུ་ཆོས་ཀྱི་མི་ཟད་རྒྱ་མཚོ་འདྲ་བ་ཡིན། །དེ་དག་མངོན་ཤེས་ལྔ་པོ་མི་ཟད་རྟག་མི་གཡོ། །རྟག་ཏུ་དྲན་ལྡན་བསམ་པས་དང་འདྲ་བ་ཡིན། །མཉམ་མེད་བྱང་ཆུབ་ཕྱིར་ནི་ཡང་དག་ཞུགས་གྱུར་ཅིང ། །མྱ་ངན་མ་འདས་གང་ལ་ཆོས་རྣམས་དེ་ཡོད་པ། །དེ་དག་འགྲོ་བ་ཀུན་གྱི་ཉེ་བར་འཚོ་འགྱུར་ཞིང ། །བྱང་ཆུབ་མཆོག་ཕྱིར་མྱུར་དུ་ངེས་
170a
༄#། །པར་འབྱུང་བར་འགྱུར། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་འཇིག་རྟེན་ཐམས་ཅད་མངོན་པར་འདུ་བར་འགྱུར་བ་རྣམས་ཡིན་ཏེ། བཞི་གང་ཞེ་ན། ཚངས་པའི་གནས་པ་བཞིས་ནས་པ་དང ། བསྡུ་བའི་དངོས་པོ་བཞིས་སྡུད་པ་དང ། བདེན་པ་བཞི་ཤེས་པ་དང ། སོ་སོ་ཡང་དག་པར་རིག་པ་བཞི་ཐོབ་པ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། ཚངས་པའི་གནས་པ་བཞི་པོ་དག་གིས་གནས་བྱེད་ཅིང ། །བསྡུ་བའི་དངོས་པོ་དག་ལ་རྟག་ཏུ་དགའ་བྱེད་ལ། །བདེན་པ་བཞི་པོ་དག་ལ་འཇིག་མེད་དཔའ་བོ་རྣམས། །འགྲོ་བས་རི་མོ་བྱས་ཤིང་མཆོད་པ་བྱས་པར་འགྱུར། །སོ་སོ་ཡང་དག་རིག་པའི་ཕ་རོལ་སོན་གྱུར་ཅིང ། །འཆད་དང་ཀློག་པ་དག་ལ་རྟག་ཏུ་བརྩོན་གྱུར་ལ། །ཕ་རོལ་བདེ་བར་གྱུར་བའི་བདེ་བས་མགུ་བྱེད་ན། །དེ་ཕྱིར་དེ་དག་ཡིད་དུ་འོང་ཞིང་སྡུག་པར་འགྱུར། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལན་ན་སྲོག་ཆགས་ཐམས་ཅད་ཀྱིས་བསྔགས་པར་འགྱུར་བ་རྣམས་ཡིན་ཏེ། བཞི་གང་ཞེ་ན། ཐོས་པ་དང་ཚུལ་ཁྲིམས་དང་ལྡན་ཞིང་ཚུལ་འཆོས་པ་མེད་པ་དང ། དེས་ཤིང་འགྲོགས་ན་བདེ་བ་དང ། དབེན་པ་ལ་དགའ་ཤིང་དབང་པོ་བསྲུང་བ་དང ། བདག་ཉིད་བདེ་
170b
བ་ལ་ལྷག་པར་ཆགས་པ་མེད་ཅིང་རྟག་ཏུ་ཁ་ན་མ་ཐོ་བ་ལ་ལྟ་བ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། ཐོས་པའི་ཡོན་ཏན་ཐོབ་ཅིང་ཚུལ་ཁྲིམས་ཕ་རོལ་སོན།། ཚུལ་འཆོས་མེད་ཅིང་རྟག་ཏུ་དེས་ལ་བརྟུལ་ཞུགས་བཟང ། །ནགས་དང་ནགས་རབ་གནས་ཤིང་དབང་པོ་སྡོམ་བྱེད་ལ། །དྲན་ལྡན་བདག་པ་དེ་མི་ལྟོས་ཁ་ན་མ་ཐོ་སྟེ། །གང་ལ་རྟག་ཏུ་དགེ་བའི་ཡོན་ཏན་དེ་ཡོད་པ། །དེ་དག་རྟག་ཏུ་སེམས་ཅན་ཕན་ཕྱིར་བརྩོན་འགྲུས་ཞིང ། །དེ་དག་སེམས་ཅན་དོན་ཡང་རྟག་ཏུ་བྱེད་འགྱུར་ལ། །དེ་དག་རྟག་ཏུ་བྱང་ཆུབ་ཕྱིར་ནི་ཡིད་གཞོལ་འགྱུར། །ལྷའི་བུ། །བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་དགེ་བའི་སྦྱོར་བ་ཐམས་ཅད་ལ་སྨད་པ་མེད་པ་རྣམས་ཡིན་ཏེ། བཞི་གང་ཞེ་ན།་དད་པ་ཕུན་སུམ་ཚོགས་པ་དང ། བརྩོན་འགྲུས་ཕུན་སུམ་ཚོགས་པ་དང ། སྙིང་རྗེ་ཆེན་པོ་ཕུན་སུམ་ཚོགས་པ་དང ། ཐེག་པ་ཆེན་པོར་ཡོངས་སུ་བསྔོ་བ་ལ་མཁས་པ་རྣམས་ཡིན་ཏེ། བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། དེ་དག་དད་དང་ལྡན་ལ་བརྟུལ་བ་བརྟན་ལྡན་ཞིང ། །དེ་དག་བརྩོན་འགྲུས་མཐུ་དང་སྟོབས་དང་ལྡན་པ་ཡིན། །འགྲོ་བ་ཀུན་ལ་བྱམས་དང་སྙིང་རྗེ་ཆེ་ལྡན་ཞིང ། །བྱང་ཆུབ་ཆེད་དུ་ཡོངས་སུ་བསྔོ་ལ་མཁས་པ་སྟེ། །དེ་ཕྱིར་དགེ་བ་ཀུན་ལ་སྨྲས་པ་ཡོད་མིན་ཞིང ། །ཟླ་བ་ཉ་བའི་ཟླ་བ་མཁའ་ལ་སྐར་མ་
171a
༄#། །ཡི། །ཚོགས་ཀྱི་དབུས་ན་གནས་པ་རྣམ་པར་མཛེས་པ་དག་།ཡང་དང་ཡང་དུ་དགེ་བ་ཀུན་ལ་རྣམ་འཕེལ་འགྱུར། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་ཤེས་རབ་དག་ལ་རྒྱ་མཚོ་ལྟ་བུ་རྣམས་ཡིན་ཏེ། བཞི་གང་ཞེ་ན། ཇི་སྐད་སྨྲས་པ་དེ་བཞིན་དུ་བྱེད་པ་དང ། སྒྲུབ་པ་སྙིང་པོར་བྱེད་པ་དང ། བློ་རབ་ཏུ་གནས་པ་དང ། ལྷག་པའི་བསམ་པ་རྡོ་རྗེ་ལྟར་བརྟན་པ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། མཁས་པ་དེ་དག་ཇི་སྐད་སྨྲས་པ་དེ་བཞིན་བྱེད། །དེ་དག་སྒྲུབ་པ་སྙིང་པོར་བྱེད་ཅིང་བློ་རབ་གནས། །གང་དག་བརྩོན་པ་དེ་དག་རྡོ་རྗེ་ལྟ་བུ་ཡི། །ལྷག་པའི་བསམ་པ་བརྟན་པ་དག་དང་ལྡན་པར་འགྱུར། །མཁས་པ་གང་དག་ཆོས་བཞི་དེ་དག་སྟོན་བྱེད་པ། །དེ་དག་རྟག་ཏུ་དགེ་བའི་བཤེས་གཉེན་སྟེན་བྱེད་ཅིང ། །དམ་བཅས་རྣམས་ལ་སྙིང་པོར་བྱེད་པར་འགྱུར་བ་དང ། །རྟག་ཏུ་སངས་རྒྱས་གསུང་ཡང་འཛིན་པར་བྱེད་པ་ཡིན། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་ཆོས་ལ་དབང་བསྒྱུར་བས་དབང་ཕྱུག་ཏུ་གྱུར་པ་རྣམས་ཡིན་ཏེ། བཞི་གང་ཞེ་ན། ཡེ་ཤེས་ཀྱི་སྟོབས་ཅན་རྣམས་ཡིན་ཞིང་ཉོན་མོངས་པའི་སྟོབས་ཅན་རྣམས་མ་ཡིན་པ་དང ། སེམས་ལ་དབང་སྒྱུར་བ་རྣམས་ཡིན་ཞིང་བདུད་ཀྱི་དབང་སྒྱུར་བ་མ་ཡིན་པ་དང ། གཟུངས་
171b
དང ། སྤོབས་པ་ཕུན་སུམ་ཚོགས་པ་རྣམས་ཡིན་པ་དང ། འབྲས་བུ་ཡོད་པར་ཆོས་སྟོན་པ་རྣམས་ཡིན་ཏེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། དེ་དག་ཡེ་ཤེས་སྟོབས་ལྡན་ཉོན་མོངས་དབང་མི་འགྲོ། ཤེས་རབ་སྟོབས་ཀྱིས་བླུན་སྤངས་ལྟ་རྣམས་ཀུན་ཏུ་བྲལ། །སེམས་ལ་དབང་སྒྱུར་བྱེད་ཅིང་བདུད་བཞི་སྤངས་གྱུར་ལ། །སྤོབས་པ་བརྟན་པར་གྱུར་ཅིང་གཟུངས་གྱིས་འཁྲུག་པ་མེད། །དེ་དག་སྟོན་པ་འབྲས་བུ་མེད་པར་མི་འགྱུར་ཏེ། །དེ་ཕྱིར་མྱུར་དུ་དབང་ཕྱུག་ཉིད་དང་ལྡན་པར་འགྱུར། །ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་བྱ་བ་ཐམས་ཅད་ལ་སློབ་དཔོན་དུ་གྱུར་པ་རྣམས་ཡིན་ཏེ། བཞི་གང་ཞེ་ན། ང་རྒྱལ་མེད་པ་དང ། བླ་མ་ལ་གུས་པ་དང ། བག་ཡོད་པ་དང ། འདུན་པ་དྲག་པོ་སྟེ། ཆོས་བཞི་པོ་དེ་དག་དང ། །དེ་ལ་འདི་སྐད་ཅེས་བྱ་སྟེ། ང་རྒྱལ་མེད་ཅིང་བླ་མར་གུས་པས་གནས་གྱུར་ལ། །ཀུན་ནས་བག་ཡོད་བྱང་ཆུབ་མཆོག་ལ་འདུན་དྲག་ཅིང ། །བསམ་པ་ཐག་པས་སྨོན་ཅིང་རྟག་ཏུ་དྲང་གྱུར་ལ། །སློབ་དཔོན་དཔེ་མཁྱུད་མེད་པ་རྟག་ཏུ་སློབ་དཔོན་འགྱུར། །མཁས་པ་འཇིག་རྟེན་འཇིག་རྟེན་འདས་པའི་དོན་མཁས་ཤིང ། །ཚུལ་དང་ཚུལ་མ་ཡིན་པའི་མཁས་པས་བརྟན་པ་རྣམས། །འཇིག་རྟེན་ཀུན་མཛའ་ཐམས་ཅད་རྟོགས་པར་ཁོང་དུ་ཆུད། །དེ་ཕྱིར་འགྲོ་བ་སྤྱི་བོར་ཐལ་སྦྱར་དེ་ལ་འདུད། །ལྷའི་བུ། བྱང་ཆུབ་སེམས་དཔའ་སེམས་
172a
༄#། །དཔའ་ཆེན་པོ་ཆོས་བཞི་དང་ལྡན་ན་ཐམས་ཅད་དུ་ཁ་ན་མ་ཐོ་བ་མེད་ཅིང་ཡོན་ཏན་རྣམ་པ་ཐམས་ཅད་དང་ལྡན་པ་རྣམས་ཡིན་ཏེ། བཞི་གང་ཞེ་ན་མངོན་པར་ཤེས་པའི་ཡེ་ཤེས་ཀྱིས་རྣམ་པར་བརྩེ་བ་དང ། སངས་རྒྱས་ཐམས་ཅད་ཀྱི་དགོངས་པའི་སྤོབས་པ་དང ། དགེ་བ་ཐམས་ཅད་དང་མི་འབྲལ་ཞིང་བག་ཆགས་དང་བྲལ་བ་དང ། དགེ་བའི་ཆོས་ཐམས་ཅད་དང་ལྡན་ཞིང་དབང་བསྐུར་བ་ཐོབ་པ་སྟེ། ཆོས་བཞི་པོ་དེ་དག་དང་ངོ ། །དེ་ལ་འདི་སྐད་ཅེས་བྱ་སྟེ། སེམས་ཅན་དག་པ་རྒྱ་ཆེན་མངོན་ཤེས་ཤེས་པས་བརྩེ། །བདེ་གཤེགས་ཀུན་གྱིས་དགོངས་པ་མཁའ་འདྲའི་སྤོབས་དང་ལྡན། །བརྩོན་འགྲུས་ཐོགས་མེད་མི་དགེ་བག་ཆགས་ཀུན་སྤངས་ཤིང ། །དགེ་དང་ལྡན་ཞིང་དབང་བསྐུར་ཐོབ་པར་གྱུར་པ་སྟེ། །ཆོས་རྣམས་དེ་དག་ལ་ནི་རབ་ཏུ་གནས་གྱུར་པ། །དེ་དག་ཁ་ན་མ་ཐོ་མེད་པའི་ཡོན་ཏན་ལྡན། །བཅོམ་ལྡན་འདས་ཀྱིས་བཞི་པ་བསྒྲུབ་པ་འདི་བསྟན་པ་ན་ལྷ་དང ། མི་རྣམས་ལ་སྲོག་ཆགས་ས་ཡ་ཉིས་འབུམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བྱང་ཆུབ་སེམས་དཔའ་ཉི་ཁྲི་ལྔ་སྟོང་གིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ལྷ་དང ། མི་རྣམས་ཀྱི་སྐྱེ་དགུ་ལས་སྲོག་ཆགས་འབུམ་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་
172b
དྲི་མ་དང་བྲལ་བ་རྣམ་པར་དག་གོ་།སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའང་རྣམ་པ་དྲུག་ཏུ་རབ་ཏུ་གཡོས་ཤིང་འཇིག་རྟེན་ཐམས་ཅད་སྣང་བ་ཆེན་པོས་ཁྱབ་པར་ཡང་གྱུར་ཏོ། །ལྷ་རྣམས་ཀྱིས་ཀྱང་ལྷའི་མེ་ཏོག་གི་ཆར་རབ་ཏུ་ཕབ་ཅིང ། ལྷའི་སིལ་སྙན་དག་གི་སྒྲའང་བྱུང་བར་གྱུར་རོ། །ཀླུ་རྣམས་ཀྱིས་ཀྱང་མུ་ཏིག་དམར་པོ་དང ། ཀླུའི་མེ་ཏོག་གི་ཆར་རབ་ཏུ་ཕབ་བོ། །ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། གནོད་སྦྱིན་རྣམས་ཀྱིས་ཀྱང་བཅོམ་ལྡན་འདས་ལ་ལྷའི་མཆོད་པ་དག་གིས་མཆོད་པ་བྱས། ཐམས་ཅད་དང་ལྡན་པའི་འཁོར་རྣམས་ཀྱིས་ཀྱང ། ་ལ་ལ་ཆོས། ཨ་ལ་ལ་ཆོས། ཨ་ལ་ལ་ཆོས་ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་ནས་མཆོད་པ་ཆེན་པོ་དག་ཀྱང་བྱས་སོ། །དེ་ནས་ལྷའི་བུར་བརྩལ་སེམས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། བཅོམ་ལྡན་འདས་ཀྱིས་ཆོས་སུམ་ཅུ་རྩ་གཉིས་པོ་དེ་དག་གི་དོན་དང ། ཚིག་རྣམ་པར་གཏན་ལ་འབེབས་པ་བསྟན་པར་བཀའ་སྩལ་གྱི། འཇམ་དཔལ། ཁྱོད་ཀྱང་ཆོས་སུམ་ཅུ་རྩ་གཉིས་པོ་དེ་དག་གི་དོན་དང ། ཚིག་རྣམ་པར་གཏན་ལ་དབབ་པ་དེ་ལ་སྤོབས་པར་གྱིས་ཤིག་།འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ལ་གཞན་གྱི་དྲིང་མི་འཇོག་པ་རྣམས་
173a
༄#། །ཡིན།་འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གཞན་གྱི་རྐྱེན་གྱིས་མི་འགྲོ་བ་དེ་ལྟ་ན་ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ལ་གཞན་གྱི་དྲིང་མི་འཇོག་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བརྩམ་པ་ཐམས་ཅད་ལ་བརྩོན་འགྲུས་བརྟན་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཆེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཉོན་མོངས་པ་ཐམས་ཅད་ངེས་པར་འཇོམས་པར་བྱེད་པ་དེ་ལྟ་ན་ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་བརྩམ་པ་ཐམས་ཅད་ལ་བརྩོན་འགྲུས་བརྟན་པ་རྣམས་ཡིན་ན། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བསོད་ནམས་དག་གིས་མངོན་པར་འཕགས་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཀྱི་དབྱིངས་མི་གཡོ་བ་རྗེས་སུ་རྟོགས་པ་དེ་ལྟ་ན་ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་བསོད་ནམས་དག་གིས་མངོན་པར་འཕགས་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་
173b
སེམས་དཔའ་སེམས་དཔའ་ཆེན་པོ་ཡེ་ཤེས་ཀྱི་ཆགས་པ་མེད་པར་སྤྱོད་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡུལ་ཐམས་ཅད་ལ་ཆགས་པར་མི་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་ཀྱི་ཆགས་པ་མེད་པར་སྤྱད་པ་རྣམས་ཡིན་ནོ། ། ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་མུན་པ་དང་བྲལ་བ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་རང་བཞིན་གྱིས་ཡོངས་སུ་དག་པར་ཤེས་པར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་མུན་པ་དང་བྲལ་བ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་རྣམས་ཀྱི་ནང་དུ་འཇིགས་པ་དང་བྲལ་བ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་རྣམ་པར་ཕྱེ་ན་མི་རྙེད་པར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་རྣམས་ཀྱི་ནང་དུ་འཇིགས་པ་དང་བྲལ་བ་རྣམས་ཡིན་ནོ། །ལྷའི་བུའི་སྨྲས་པ།
174a
༄#། །འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐོས་པས་དོན་ལ་རྟོན་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་བརྗོད་དུ་མེད་པར་ཤེས་པར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཐོས་པས་དོན་ལ་རྟོན་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གྱི་ཚུལ་གྱིས་ཆོས་ལ་རྟོན་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཀྱི་དབྱིངས་ཞི་བ་ཉིད་དུ་ཤེས་པར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གྱི་ཚུལ་གྱིས་ཆོས་ལ་རྟོན་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་བཅོམ་ལྡན་འདས་རྣམས་ཀྱིས་གསུངས་པ་བཞིན་དུ་སྨྲ་བ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སྒྲ་ཐམས་ཅད་ལ་རྟེན་པར་མི་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་བཅོམ་
174b
ལྡན་འདས་རྣམས་ཀྱིས་གསུངས་པ་བཞིན་དུ་སྨྲས་བ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་རྣམ་ལ་ཆོས་སྨྲ་བ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སྨྲ་བ་ཐམས་ཅད་ལས་ལྡོག་པར་བྱེད་པ་དེ་ལྟ་ན།་ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་རྣམས་ལ་ཆོས་སྨྲ་བ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པ་རྣམས་ཀྱིས་མངོན་པར་འཕགས་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ལས་གཡོ་བར་མི་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པ་རྣམས་ཀྱིས་མངོན་པར་འཕགས་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བདུད་ཐམས་ཅད་ཀྱིས་ཐུབ་པར་དཀའ་བ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སྟོང་པ་ཉིད་རྗེས་སུ་རྟོགས་པར་བྱ་བའི་ཕྱིར་ཉོན་མོངས་པ་ཉིད་བྱང་ཆུབ་ཡིན་པར་
175a
༄#། །ཡོངས་སུ་འཚོལ་བར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་བདུད་ཐམས་ཅད་ཀྱིས་ཐུབ་པར་དཀའ་བ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བློས་གཏིང་དཔག་དཀའ་བ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སངས་རྒྱས་ཀྱི་ཆོས་ཐམས་ཅད་ཀྱིས་གཏིང་རྟོགས་པར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོས་བློས་གཏིང་དཔག་དཀའ་བ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གྱི་ཆོས་བརྒྱད་ཀྱིས་མི་གོས་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འཇིག་རྟེན་ན་སྤྱོད་ཀྱང་འཇིག་རྟེན་གྱི་ཆོས་རྣམས་ཀྱིས་གོས་པར་མི་འགྱུར་བ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གྱི་ཆོས་བརྒྱད་ཀྱིས་མི་གོས་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་གཏིང་དཔག་དཀའ་ཞིང་ཟབ་མོ་ལ་སྤྱོད་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ།
175b
གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བདག་ལ་བདག་མེད་པས་སྒྱིད་ལུག་པར་མི་འགྱུར་བ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་གཏིང་དཔག་དཀའ་ཞིང་ཟབ་མོ་ལ་སྤྱོད་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སྟོན་པས་དབང་པོ་ལ་མཁས་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དབང་པོ་དྲུག་གིས་དབང་པོ་ཐམས་ཅད་ལ་ལྟ་བར་བྱེད་པར་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སྟོན་པས་དབང་པོ་ལ་མཁས་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འདུས་མ་བྱས་དང་མ་འདྲེས་པས་རྣམ་པར་ཐར་པའི་སྒོར་གནས་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སྒོ་ཐམས་ཅད་ནས་ཐར་པ་སྟོན་པར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་འདུས་མ་བྱས་དང་མ་འདྲེས་པས་རྣམ་པར་ཐར་པའི་སྒོར་གནས་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་
176a
༄#། །པོ་ལྷག་པའི་ང་རྒྱལ་ཅན་ཚར་གཅོད་པའི་ཕྱིར་སྣརེལ་ཞིར་བསྒྲུབ་པ་ལ་མཁས་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འཁོར་བ་ལས་མྱ་ངན་ལས་འདས་པ་ཚོལ་ཞིང་ལྟ་བར་བྱེད་ལ། མྱ་ངན་ལས་འདས་པ་ལས་ཀྱང་འཁོར་བ་ཚོལ་ཞིང་ལྟ་བར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ལྷག་པའི་ང་རྒྱལ་ཅན་ཚར་གཅོད་པའི་ཕྱིར་སྣརེལ་ཞིར་བསྒྲུབ་པ་ལ་མཁས་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ལས་ཀྱི་བྱ་བ་ཐམས་ཅད་ཀྱི་རྒྱུ་ལ་མཁས་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ།་གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་མི་འཕོ་བར་ལྟ་བར་བྱེད་པ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ལས་ཀྱི་བྱ་བ་ཐམས་ཅད་ཀྱི་རྒྱུ་ལ་མཁས་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ལྟ་བའི་རྣམ་པ་དང་བྲལ་ཞིང་རྟེན་ཅིང་འབྲེལ་བར་འབྱུང་བ་ལ་མཁས་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་
176b
ཐམས་ཅད་བདག་པོ་མེད་པར་ཤེས་པར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ལྟ་བའི་རྣམ་པ་དང་དྲལ་ཞིང་རྟེན་ཅིང་འབྲེལ་བར་འབྱུང་བ་ལ་མཁས་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཡོངས་སུ་སྨིན་པར་བྱ་བ་དག་ལ་ཐབས་ལ་མཁས་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འཇིག་རྟེན་གྱི་ཚུལ་ལ་སྨོད་པར་མི་བྱེད་པ་དེ་ལྟ་ན། ལྷའི་བུ།་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཡོངས་སུ་སྨིན་པར་བྱ་བདག་ལ་ཐབས་མཁས་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་པ་ཡོངས་སུ་དག་པས་བརྟུལ་ཞུགས་གྲུབ་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྟོགས་པ་ཉིད་བྱང་ཆུབ་ཡིན་པར་ཤེས་པར་བྱད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་བསམ་པ་ཡོངས་སུ་དག་པས་བརྟུལ་ཞུགས་གྲུབ་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་འགྲས་པའི་སེམས་མེད་ཅིང་བཟོད་པའི་སྟོབས་
177a
༄#། །དང་ལྡན་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་གཏན་དུ་ཡོངས་སུ་མྱ་ངན་ལས་འདས་པར་ཤེས་པར་བྱེད། ལྟ་བར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཞེ་འགྲས་པའི་སེམས་མེད་ཅིང་བཟོད་བའི་སྟོབས་དང་ལྡན་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་ཐམས་ཅད་ཀྱི་ཕ་རོལ་ཏུ་སོན་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ཕ་རོལ་ལས་མཐོང་བར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་ཐམས་ཅད་ཀྱི་ཕ་རོལ་ཏུ་སོན་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱི་ཉེ་བར་འཚོ་བ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཀྱི་དབྱིངས་མི་ཟད་པ་རབ་ཏུ་རྟོགས་པར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་
177b
ཅད་གྱི་ཉེ་བར་འཚོ་བ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་ཐམས་ཅད་མངོན་པར་འདུ་བར་འགྱུར་བ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མི་སྣང་བའི་ཚུལ་གྱིས་སངས་རྒྱས་ཀྱི་ཞིང་ཐམས་ཅད་སྣང་བ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་ཐམས་ཅད་མངོན་པར་འདུ་བར་འགྱུར་བ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྲོག་ཆགས་ཐམས་ཅད་ཀྱིས་བསྔགས་པར་འགྱུར་བ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་འགའ་ཡང་ལེན་པར་མི་བྱེད། སྤོང་བར་མི་བྱེད་པ་དེ་ལྟ་ན། ལྷའི་བུ། བྱང་ཆུབ་ཆུབ་སེམས་དཔའ་སེམས་དཔའ་ཆེན་པོ་སྲོག་ཆགས་ཐམས་ཅད་ཀྱིས་བསྔགས་པར་འགྱུར་བ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་སྤྱོད་པ་ཐམས་ཅད་ལ་སྨྲས་པ་མེད་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ནམ་
178a
༄#། །མཁའ་དང་མཚུངས་ཤིང་འདྲ་བར་ཤེས་པར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་སྤྱོད་པ་ཐམས་ཅད་ལ་སྨྲས་པ་མེད་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་དག་ལ་སྙིང་པོར་གྱུར་པ་རྣམས་ཡིན།་འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཀྱི་དབྱིངས་ཀུན་ཏུ་འབྱེད་པར་མི་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་དག་ལ་སྙིང་པོར་གྱུར་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ལ་དབང་སྒྱུར་བས་དབང་ཕྱུག་ཏུ་གྱུར་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསམ་དུ་མེད་པ་སེམས་པས་སེམས་ཐམས་ཅད་ཤེས་པར་བྱེད་པ་དེ་ལྟ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ལ་དབང་སྒྱུར་བས་དབང་ཕྱུག་ཏུ་གྱུར་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱ་བ་ཐམས་ཅད་ལ་སློབ་དཔོན་དུ་གྱུར་པ་རྣམས་ཡིན། འཇམ་
178b
དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཚུལ་གཅིག་གིས་ཚུལ་ཐམས་ཅད་ཤེས་པར་བྱེད་ཅིང ། ཚུལ་ཐམས་ཅད་ཀྱིས་ཀྱང་ཚུལ་གཅིག་ཤེས་པར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་བྱ་བ་ཐམས་ཅད་ལ་སློབ་དཔོན་དུ་གྱུར་པ་རྣམས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་དུ་ཁ་ན་མ་ཐོ་བ་མེད་ཅིང་ཡོན་ཏན་ཐམས་ཅད་དང་ལྡན་པ་རྣམས་ཡིན། འཇམ་དཔལ་གྱིས་སྨྲས་པ། ལྷའི་བུ།་གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་གཉེན་པོ་མེད་པར་རྟོགས་ནས་ཆོས་འགའ་ཡང་བསྒྲུབ་པར་མི་བྱེད། ཆོས་འགའ་ཡང་སེལ་བར་མི་བྱེད་པ་དེ་ལྟ་ན།་ལྷའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་དུ་ཁ་ན་མ་ཐོ་བ་མེད་ཅིང་ཡོན་ཏན་རྣམ་པ་ཐམས་ཅད་དང་ལྡན་པ་རྣམས་ཡིན་ནོ། །འཇམ་དཔལ་གཞོན་ནུར་གྱུར་པས་བསྟན་པ་འདི་བཤད་པ་ན་བྱང་ཆུབ་སེམས་དཔའ་ལྔ་ཁྲི་བརྒྱད་སྟོང་གིས་མི་སྐྱེ་བའི་ཆོས་ལུང་བསྟན་པ་ལ་བཟོད་པ་ཐོབ་པར་གྱུར་ཏོ། །ལྷ་དང ། མི་རྣམས་ཀྱི་སྐྱེ་དགུ་བདུན་ཁྲི་ཉིས་སྟོང་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།སྲོག་ཆགས་འབུམ་ལྷག་ཙམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་
179a
༄#། །བསྐྱེད་དོ། །འཇམ་དཔལ་གཞོན་ནུར་གྱུར་པ་ལ་མཆོད་པའི་ཕྱིར་ལྷ་རྣམས་ཀྱིས་ཀྱང་སྟེང་གི་བར་སྣང་ལས་ལྷའི་མེ་ཏོག་གི་ཆར་དག་མངོན་པར་རབ་ཏུ་ཕབ་བོ། །ཐམས་ཅད་དང་ལྡན་པའི་འཁོར་རྣམས་ཀྱིས་ཀྱང་འཇམ་དཔལ་གཞོན་ནུར་གྱུར་པས་བསྟན་པ་འདི་ཐོས་ནས་ཡི་རངས་པ་དང ། དགའ་བ་དང ། ཡིད་བདེ་བ་སྐྱེས་ནས་ཚིག་འདི་སྐད་ཅེས་བདག་ཅག་གིས་ཀྱང་ཆོས་དེ་དག་ཐོབ་པར་གྱུར་ཅིག་།འཇམ་དཔལ་གཞོན་ནུར་གྱུར་པའི་སྤོབས་པ་ཇི་ལྟ་བ་དེ་ལྟ་བུའི་སྤོབས་པ་མི་ཆོད་པའང་ཐོབ་པར་གྱུར་ཅིག་ཅེས་སྨྲས་སོ། །བཅོམ་ལྡན་འདས་ཀྱིས་ཀྱང་འཇམ་དཔལ་གཞོན་ནུར་གྱུར་པ་ལ། འཇམ་དཔལ་ཁྱོད་ཀྱིས་ཆོས་རྣམ་པར་གཏན་ལ་དབབ་པ་བསྟན་པ་འདི་ལེགས་པར་སྨྲས་ཏེ། ལེགས་སོ། །ལེགས་སོ་ཞེས་བྱ་བ་བྱིན་ནོ།། །།བམ་པོ་གཉིས་པ། དེ་ནས་ལྷའི་བུ་རབ་རྩལ་སེམས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། ཅི་ཁྱོད་ཁོ་བོ་ལས་ཆོས་ཀྱིས་དགབ་པ་འདོད་དམ། འཇམ་དཔལ་གྱིས་སྨྲས་པ། ལྷའི་བུ། འདི་སྐད་དུ་ཁྱོད་ཆོས་ཀྱི་དགབ་པ་འདོད་དམ་ཞེས་ཟེར་པ་ནི། ལྷའི་བུ། ལེགས་པར་གསུངས་པའི་ཆོས་འདུལ་བ་འདི་ལ་ཆོས་ཀྱི་དགབ་པ་ཞེས་བྱ་བ་ནི་སྲེད་པ་དང ། འདོད་པ་སྤངས་པ་ཡིན་ཏེ། ཆོས་འདི་ནི་སོ་སོར་རྟོགས་པ་མེད་
179b
པའི་ཕྱིར་འདོད་པ་མེད་པ་ཡིན་ནོ། །ཆོས་འདི་ནི་མིག་གི་ལམ་ལས་ཡང་དག་པར་འདས་པའི་ཕྱིར་ལྟར་མི་སྣང་བ་ཡིན་ནོ། །ཆོས་འདི་ནི་མངོན་པར་གྲུབ་པ་མེད་པའི་ཕྱིར་མ་བྱས་པ་ཡིན་ནོ། །ཆོས་འདི་ནི་ཡུལ་དྲུག་དང་མ་འདྲེས་པའི་ཕྱིར་མི་མཐོང་བ་ཡིན་ནོ། །ཆོས་འདི་ནི་སེམས་དང ། ཡིད་དང ། རྣམ་པར་ཤེས་པ་དང་བྲལ་བའི་ཕྱིར་བདག་གི་བ་མེད་པ་ཡིན་ནོ། །ཆོས་འདི་ནི་གཏན་ཡོངས་སུ་མ་གྲུབ་པའི་ཕྱིར་གཟུང་བ་མེད་པ་ཡིན་ནོ། །ཆོས་འདི་ནི་ཡུལ་མེད་པའི་ཡུལ་དུ་འགྲོ་བའི་ཕྱིར་གཞི་མེད་པ་ཡིན་ནོ། །ཆོས་འདི་ནི་རང་བཞིན་གྱིས་དབེན་པའི་ཕྱིར་ཟག་པ་མེད་པ་ཡིན་ནོ། །ཆོས་འདི་ནི་སྔོན་གྱི་མཐའ་རྣམ་པར་དག་པའི་ཕྱིར་འོང་བ་མེད་པ་ཡིན་ནོ། །ཆོས་འདི་ནི་ཕྱི་མའི་མཐའ་རྣམ་པར་དག་པའི་ཕྱིར་འགྲོ་བ་མེད་པ་ཡིན་ནོ། །ཆོས་འདི་ནི་ད་ལྟར་བྱུང་བ་རྣམ་པར་དག་པའི་ཕྱིར་གནས་པ་མེད་པ་ཡིན་ནོ། །ཆོས་འདི་ནི་བརྟག་ཅིང་སེལ་བ་དང་བྲལ་བའི་ཕྱིར་རྩོལ་བ་མེད་པ་ཡིན་ནོ། །ཆོས་འདི་ནི་ནམ་མཁའ་དང་མཉམ་པའི་ཕྱིར་མཉམ་པ་མེད་པ་ཡིན་ནོ། །ཆོས་འདི་ནི་གཉེན་པོ་མེད་པའི་ཕྱིར་མི་མཉམ་པ་དང ། མཉམ་པ་མེད་པ་ཡིན་ནོ། །ཆོས་འདི་ནི་བདུད་ཀྱི་ཡུལ་ཐམས་ཅད་ལས་ཡང་དག་པར་འདས་པའི་ཕྱིར་གཡོ་བ་མེད་པ་དང ། རློམ་སེམས་མེད་པ་དང ། མ་བརྟག་པ་དང ། རྣམ་པར་མ་བརྟག་པ་དང ། རྣམ་པར་མ་བསྒྲུབ་པ་དང ། ཀུན་ཏུ་མ་བསྟན་
180a
༄#། །པ་ཡིན་ནོ། །ཆོས་འདི་ནི་སྐྱེ་བ་དང ། འཇིག་པ་དང་བྲལ་བའི་ཕྱིར་བླང་བ་མེད་པ་དང ། དོར་བ་མེད་པ་ཡིན་ནོ། །ཆོས་འདི་ནི་ཆོས་ཀྱི་དབྱིངས་སུ་ཡང་དག་པར་གཞོལ་བའི་ཕྱིར་གནས་པ་མེད་པར་གནས་པ་ཡིན་ནོ། །ཆོས་འདི་ནི་ཡང་དག་པར་མ་བྱུང་བའི་ཕྱིར་དབྱེར་མེད་པ་ཡིན་ནོ། །ཆོས་འདི་ནི་སྤྲོས་པ་དང་བྲལ་བའི་ཕྱིར་རབ་ཏུ་སྤྱོད་པ་མེད་པ་ཡིན་ནོ། །ཆོས་འདི་ནི་རང་བཞིན་གྱིས་ཉེ་བར་ཞི་བའི་ཕྱིར་སྤྲོས་པ་དང་བྲལ་བ་ཡིན་ནོ། །ཆོས་འདི་ནི་རྣམ་པར་རྟོག་པ་ཐམས་ཅད་དང་བྲལ་བའི་ཕྱིར་ཉེ་བར་ཞི་བ་ཡིན་ནོ། །ཆོས་འདི་ནི་ཕས་ཀྱི་རྒོལ་བ་ཐམས་ཅད་ངེས་པར་བཅོམ་པའི་ཕྱིར་རྣམ་པར་རྟོག་པ་མེད་པ་ཡིན་ནོ། །ཆོས་འདི་ནི་འདོད་པའི་འདོད་ཆགས་ཀྱི་རྡུལ་དང་བྲལ་བའི་ཕྱིར་ཤིན་ཏུ་འཕགས་པ་ཡིན་ནོ། །ཆོས་འདི་ནི་སྟོང་པ་ཉིད་ཀྱི་ཕྱིར་སྟོང་པ་མེད་པ་ཡིན་ནོ། །ཆོས་འདི་ནི་ངེས་པར་མ་བརྟགས་པའི་ཕྱིར་མཚན་མ་མེད་པ་ཡིན་ནོ། །ཆོས་འདི་ནི་རྣམ་པར་ཤེས་པ་མི་གནས་པའི་ཕྱིར་སྨོན་པ་མེད་པ་ཡིན་ནོ། །ཆོས་འདི་ནི་རྩ་བ་ཡོངས་སུ་ཆད་པའི་ཕྱིར་མི་གནས་པ་ཡིན་ནོ། །ཆོས་འདི་ནི་གྲོགས་མེད་པའི་ཕྱིར་མི་རྟེན་པ་ཡིན་ནོ། ། ཆོས་འདི་ནི་མི་རྟེན་པའི་ཕྱིར་མི་གཡོ་བ་ཡིན་ནོ། །ཆོས་འདི་ནི་བཟོད་མ་ནས་རྣམ་པར་དག་པའི་ཕྱིར་བདག་མེད་པ་ཡིན་ནོ། །ཆོས་འདི་ནི་གཏན་མངོན་པར་གྲུབ་པ་མེད་པའི་
180b
ཕྱིར་སེམས་ཅན་མེད་པ་ཡིན་ནོ། །ཆོས་འདི་ནི་གཟོད་མ་ནས་མ་བྱུང་བའི་ཕྱིར་རྟག་པ་མེད་པ་ཡིན་ནོ། །ཆོས་འདི་ནི་གཟོད་མ་ནས་མ་སྐྱེས་པའི་ཕྱིར་མ་བྱུང་བ་ཡིན་ནོ། །ཆོས་འདི་ནི་མཚན་ཉིད་དང་བྲལ་བའི་ཕྱིར་མ་སྐྱེས་པ་ཡིན་ནོ། །ཆོས་འདི་ནི་མཚན་ཉིད་ཐམས་ཅད་དང་བྲལ་བའི་ཕྱིར་མཚན་ཉིད་མེད་པ་ཡིན་ནོ། །ཆོས་འདི་ནི་གཟོད་མ་ནས་ཡང་དག་པར་རྒྱུན་ཆད་པའི་ཕྱིར་ཞི་བ་ཡིན་ནོ། །ཆོས་འདི་ནི་གཟོད་མ་ནས་ཉེ་བར་ཞི་བའི་ཕྱིར་ཡང་དག་པར་རྒྱུན་ཆད་པ་མེད་པ་ཡིན་ནོ། །ཆོས་འདི་ནི་མི་ཕྱེད་པ་དང ། མི་སྣང་བའི་ཕྱིར་ནམ་མཁའི་མཚན་ཉིད་ལྟ་བུ་ཡིན་ནོ། །ལྷའི་བུ། ཆོས་དེ་ལྟ་བུ་ལ་ཆོས་ཀྱི་དགབ་པ་དེ་ལྟ་བུ་ཞིག་ཡོད། ལྷའི་བུས་སྨྲས་པ། འཇམ་དཔལ། ཆོས་འདིའི་དགབ་པ་ནི་ཀུན་ཏུ་འཕྲོ་བ་མེད་པ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ། ལེགས་སོ། །ལེགས་སོ། །ཇི་སྐད་སྨྲས་པ་དེ་བཞིན་ཏེ། ཆོས་འདིའི་དགབ་པ་ནི་གང་ལ་ལུས་དང ། ངག་དང ། སེམས་ཀྱིས་རྟུལ་བ་མེད་པ་དེ་ལྟ་བུ་ཡིན་ནོ། །དེ་ཅིའི་ཕྱིར་ཞེ་ན། ཆོས་འདི་ནི་གསལ་བ་རྙོག་པ་མེད་པ་ཡིན་པས་དེ་ནི་སེམས་རྙོག་པ་ཅན་གྱིས་ཆོད་པར་མི་ནུས་པའི་ཕྱིར་རོ། །ལྷའི་བུས་སྨྲས་པ།་འཇམ་དཔལ། ཇི་ལྟར་ན་སེམས་རྙོག་པ་ཅན་ཡིན། འཇམ་དཔལ་གྱིས་སྨྲས་པ། ལྷའི་བུ། གཟུགས་ཀྱི་མཚན་མ་རྗེས་སུ་དྲན་པས་སངས་རྒྱས་རྗེས་སུ་དྲན་པར་བྱེད་པའི་
181a
༄#། །སེམས་ནི་སེམས་རྙོག་པ་ཅན་ཡིན་ནོ། །སྒྲ་དང ། སྐད་དང ། དབྱངས་དང ། ཚིག་གི་ལམ་གྱིས་ཆོས་རྗེས་སུ་དྲན་པར་བྱེད་པའི་སེམས་ནི་སེམས་རྙོག་པ་ཅན་ཡིན་ནོ། །འབྲས་བུ་ཐོབ་པ་མངོན་དུ་བྱེད་པས་དགེ་འདུན་རྗེས་སུ་དྲན་པར་བྱེད་པའི་སེམས་ནི་སེམས་རྙོག་པ་ཅན་ཡིན་ནོ། །ཉོན་མོངས་པ་གཏན་སྤོང་བ་རྗེས་སུ་དྲན་པར་བྱེད་པའི་སེམས་ནི་སེམས་རྙོག་པ་ཅན་ཡིན་ནོ། །སྐྱེ་བ་ལ་རྟེན་པས་ལྷ་རྗེས་སུ་དྲན་པར་བྱེད་པའི་སེམས་ནི་སེམས་རྙོག་པ་ཅན་ཡིན་ནོ། །མ་དུལ་བའི་སྦྱིན་པའི་སེམས་ནི་སེམས་རྙོག་པ་ཅན་ཡིན་ནོ། །མ་ཞི་བའི་ཚུལ་ཁྲིམས་ཀྱི་སེམས་ནི་སེམས་རྙོག་པ་ཅན་ཡིན་ནོ། །སེམས་ཅན་ལ་བརྟེན་པའི་བཟོད་པའི་སེམས་ནི་སེམས་རྙོག་པ་ཅན་ཡིན་ནོ། །སྤྲོས་པ་དང་བཅས་པའི་ཤེས་རབ་ཀྱི་སེམས་ནི་སེམས་རྙོག་པ་ཅན་ཡིན་ནོ། །བདག་ཏུ་འཛིན་པ་ལ་གནས་པའི་བྱམས་པའི་སེམས་ནི་སེམས་རྙོག་པ་ཅན་ཡིན་ནོ། ། སེམས་ལ་ངེས་པར་མ་བསམ་པའི་བསམ་གཏན་གྱི་སེམས་ནི་སེམས་རྙོག་པ་ཅན་ཡིན་ནོ། །ཐེ་ཚོམ་གྱི་སྙིང་རྗེའི་སེམས་ནི་སེམས་རྙོག་པ་ཅན་ཡིན་ནོ། །མྱ་ངན་ལས་འདས་པའི་ལམ་དང་བྲལ་བའི་དགའ་བའི་སེམས་ནི་སེམས་རྙོག་པ་ཅན་ཡིན་ནོ། །གཉིས་ལ་གནས་པའི་བཏང་སྙོམས་ཀྱི་སེམས་ནི་སེམས་རྙོག་པ་ཅན་ཡིན་ནོ། །ལུས་སུ་འདུ་
181b
ཤེས་པའི་ཚོར་བའི་སེམས་ནི་སེམས་རྙོག་པ་ཅན་ཡིན་ནོ། །ཆོས་སུ་འདུ་ཤེས་པའི་དྲན་པ་ཉེ་བར་གཞག་པའི་སེམས་ནི་སེམས་རྙོག་པ་ཅན་ཡིན་ནོ། །སྐྱེ་བ་དང ། འཇིག་པར་འདུ་ཤེས་པའི་ཡང་དག་པར་སྤོང་བའི་སེམས་ནི་སེམས་རྙོག་པ་ཅན་ཡིན་ནོ། །ལུས་དང་སེམས་ལ་རྟེན་པའི་རྫུ་འཕྲུལ་གྱི་རྐང་པའི་སེམས་ནི་སེམས་རྙོག་པ་ཅན་ཡིན་ནོ། །དབང་པོ་དྲུག་ལ་རྟེན་པའི་དབང་པོ་ལྔའི་སེམས་ནི་སེམས་རྙོག་པ་ཅན་ཡིན་ནོ། །ལྟ་བའི་སྟོབས་དང་ལྡན་པའི་སྟོབས་ལྔའི་སེམས་ནི་སེམས་རྙོག་པ་ཅན་ཡིན་ནོ། །ཆོས་སུ་འདུ་ཤེས་པ་ལ་གནས་པའི་བྱང་ཆུབ་ཀྱི་ཡན་ལག་གི་སེམས་ནི་སེམས་རྙོག་པ་ཅན་ཡིན་ནོ། །འདུ་བྱེད་ཡིད་ལ་བྱེད་པ་ལ་བརྩོན་པའི་ལམ་སྒོམ་པའི་སེམས་ནི་སེམས་རྙོག་པ་ཅན་ཡིན་ནོ། ། སྡུག་བསྔལ་ལ་ཡོངས་སུ་རྟོག་པའི་འདུ་ཤེས་ཅན་གྱི་སེམས་ནི་སེམས་རྙོག་པ་ཅན་ཡིན་ནོ། །ཀུན་འབྱུང་བ་ལ་སྒོམ་པའི་འདུ་ཤེས་ཅན་གྱི་སེམས་ནི་སེམས་རྙོག་པ་ཅན་ཡིན་ནོ།། འགོག་པ་ཟད་པར་འདུ་ཤེས་པའི་སེམས་ནི་སེམས་རྙོག་པ་ཅན་ཡིན་ནོ། །ལམ་ལ་སྒོམ་པར་འདུ་ཤེས་པའི་སེམས་ནི་སེམས་རྙོག་པ་ཅན་ཡིན་ཏེ། ལྷའི་བུ། ཇི་ཙམ་དུ་རང་བཞིན་གྱིས་ཡོངས་སུ་དག་པ་ཉིད་ལ་སྒྲོ་འདོགས་པར་བྱེད་པ་དེ་ཙམ་དུ་སེམས་རྙོག་པ་ཅན་ཡིན་ནོ། །ལྷའི་བུས་སྨྲས་པ། འཇམ་དཔལ། སེམས་རྙོག་པ་མེད་པ་གང་དག་ཡིན། འཇམ་
182a
༄#། །དཔལ་གྱིས་སྨྲས་པ། ལྷའི་བུ། གང་དག་སེམས་ནམ་མཁའ་དང་མཉམ་པ་དག་གོ་།ལྷའི་བུས་སྨྲས་པ། འཇམ་དཔལ། ནམ་མཁའ་ལ་སེམས་ཅུང་ཟད་ཀྱང་ཡོད་དམ། འཇམ་དཔལ་གྱིས་སྨྲས་པ། ལྷའི་བུ། ཇི་ལྟར་ནམ་མཁའ་ལ་སེམས་མེད་པ་བཞིན་དུ་སེམས་དེའང་དེ་དང་འདྲ་སྟེ། གང་གི་སེམས་དེ་འདྲ་བ་དེ་ནི་སེམས་ནམ་མཁའ་དང་མཉམ་པ་ཡིན་ནོ། །ལྷའི་བུས་སྨྲས་པ། འཇམ་དཔལ། གནས་དེ་ལ་སུ་ཞིག་མོས་པར་འགྱུར། འཇམ་དཔལ་གྱིས་སྨྲས་པ། ལྷའི་བུ། ལྷག་པར་བྱེད་པ་ལ་བརྩོན་པ་རྣམས་ཀྱིས་མོས་པར་དཀའ་བ་ཡིན་ནོ། །ལྷའི་བུས་སྨྲས་པ། འཇམ་དཔལ། ལྷག་པར་བྱེད་པ་ཞེས་བྱ་བ་དེ་ཇི་ལྟ་བུ་ཡིན། འཇམ་དཔལ་གྱིས་སྨྲས་པ། ལྷའི་བུ། གང་སེམས་ནམ་མཁའ་དང་མཉམ་པ་ཉིད་ཀྱི་ཕྱིར་ལྷག་པར་བྱེད་པའོ། །ལྷའི་བུས་སྨྲས་པ། འཇམ་དཔལ། ཅི་ཞིག་ལྷག་པར་བྱེད་པ་ཡིན། འཇམ་དཔལ་གྱིས་སྨྲས་པ། ལྷའི་བུ། རྟག་པར་བྱེད་པ་ནི་ལྷག་པར་བྱེད་པ་ཡིན་ནོ། །མི་རྟག་པར་བྱེད་པ་ནི་ལྷག་པར་བྱེད་པ་ཡིན་ནོ། །དེ་བཞིན་དུ་བདེ་བ་དང ། སྡུག་བསྔལ་དང ། སྡུག་པ་དང ། མི་སྡུག་པ་དང ། བདག་དང ། བདག་མེད་པར་བྱེད་པ་ནི་ལྷག་པར་བྱེད་པ་ཡིན་ནོ། །སྟོང་པ་ཞེས་བྱ་བ་དང ། གང་ཟག་ཅེས་བྱ་བ་དེ་ནི་ལྷག་པར་བྱེད་པ་ཡིན་ནོ། །མཚན་མ་མེད་པ་ཞེས་བྱ་བ་དང ། སྨོན་པ་མེད་པ་ཞེས་བྱ་བ་
182b
དེ་ནི་ལྷག་པར་བྱེད་པ་ཡིན་ནོ། །སྒྱུ་མ་དང ། རྨི་ལམ་དང ། མིག་ཡོར་དང ། གཟུགས་བརྙན་དང ། བྲག་ཅ་དང ། ཆུ་ཟླ་དང ། སྨིག་རྒྱུ་དང ། སྤྲུལ་པའི་དཔེ་ཉེ་བར་དགོད་པ་དག་གི་ཆོས་རྣམ་པར་འཇོག་པར་བྱེད། མཚོན་པར་བྱེད། འཇུག་པར་བྱེད། སྟོན་པར་བྱེད་པ་དེ་ནི་ལྷག་པར་བྱེད་པ་ཡིན་ནོ། །དེ་ཇི་ཙམ་དུ་ཆོས་རྣམ་པར་འཇོག་པར་བྱེད་པ་དེ་ཙམ་དུ་ལྷག་པར་བྱེད་པ་ཡིན་ཏེ། ཀུན་ནས་ཉོན་མོངས་པ་ལ་སྐྱོན་དུ་བྱེད་པ་དང ། རྣམ་པར་བྱང་བ་ལ་སྐྱོན་མེད་པར་བྱེད་པ་དེ་ནི་ལྷག་པར་བྱེད་པ་ཡིན་ནོ། །འཁོར་བ་ལ་སྐྱོན་དུ་ལྟ་བར་བྱེད་པ་དང ། མྱ་ངན་ལས་འདས་པ་ལ་ཕན་ཡོན་དུ་ལྟ་བར་བྱེད་པ་དེ་ནི་ལྷག་པར་བྱེད་པ་ཡིན་ཏེ། ལྷའི་བུ། དེ་དག་ནི་ལྷག་པའི་ང་རྒྱལ་ཅན་རྣམས་ཀྱིས་ལྷག་པར་བྱེད་པ་དག་ཡིན་ནོ། །ལྷའི་བུས་སྨྲས་པ།་འཇམ་དཔལ། ཇི་ལྟར་ན་ལྷག་པའི་ང་རྒྱལ་མེད་པ་ཡིན། འཇམ་དཔལ་གྱིས་སྨྲས་པ། ལྷའི་བུ་གང་གིས་ངེས་པར་འབྱུང་བའི་དབྱིངས་རྟོགས་ཤིང་ཉོན་མོངས་པ་ཐམས་ཅད་འགོག་པ་བསྒྲུབས་ཏེ་གནས་ཀྱང་འགོག་པ་འགོག་པར་ཡང་མི་བྱེད་ལ། སྐྱེ་བ་མེད་པ་བསྐྱེད་པར་ཡང་མི་བྱེད་ཅིང ། སྒྲ་ཐམས་ཅད་ཀྱིས་སྐྲག་པར་ཡང་མི་བྱེད་ལ། ཀུན་ནས་ཉོན་མོངས་པའི་རང་བཞིན་གང་ཡིན་པ་དེ་ཉིད་རྣམ་པར་བྱང་བའི་རང་བཞིན་ཡིན་པ་དེ་ལྟར་ཤེས་ཤིང་ཆོས་ཐམས་ཅད་ལ་གཉིས་དང་བྲལ་བ་དང ། བླང་བ་མེད་པ་དང ། དོར་བ་
183a
༄#། །མེད་པ་ཐོབ་པ་དེ་ནི། ལྷའི་བུ། ལྷག་པའི་ང་རྒྱལ་མེད་པ་ཡིན་ནོ། །འཇམ་དཔལ་གཞོན་ནུར་གྱུར་པས་བསྟན་པ་འདི་བཤད་པ་ན་ལྷའི་བུ་ཉི་ཁྲི་ཉིས་སྟོང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།དགེ་སློང་ལྔ་སྟོང་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །བྱང་ཆུབ་སེམས་དཔའ་ཉི་ཁྲི་ཉིས་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སྲོག་ཆགས་སྟོང་ཕྲག་རབ་ཏུ་མང་པོ་དག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དགེ་བསྙེན་སྟོང་ཡང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།ཁྱིམ་པ་དང ། རབ་ཏུ་བྱུང་བ་ལས་བུད་མེད་ཉིས་སྟོང་ཡང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།དེ་ནས་ལྷའི་བུ་རབ་རྩལ་སེམས་ཀྱིས་ཉན་ཐོས་ཆེན་པོ་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག། ཁྱེད་ཅག་ཀྱང་ཐེ་ཚོམ་ཅི་ཡོད་པ་དག་འཇམ་དཔལ་གཞོན་ནུར་གྱུར་པ་ལ་དྲིས་ཤིག་།དེ་ནས་གནས་བརྟན་འོད་སྲུང་ཆེན་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། དགེ་སློང་རྣམ་པར་ཐར་པ་བརྒྱད་ལ་བསམ་གཏན་བྱེད་པ་ཇི་ཞིག་ལ་བསམ་གཏན་བྱེད་པ་ཡིན། འཇམ་དཔལ་གྱིས་སྨྲས་པ།
183b
བཙུན་པ་འོད་སྲུང་ཆེན་པོ། དགེ་སློང་རྣམ་པར་ཐར་པ་བརྒྱད་ལ་བསམ་གཏན་བྱེད་པ་ནི་རྩ་བ་མེད་པ་དང ། མཐའ་མེད་པ་དང ། གནས་མེད་པ་ལ་བསམ་གཏན་བྱེད་པ་དང ། མི་འཁྲུགས་པ་ལ་བསམ་གཏན་བྱེད་པ་དང ། ཡང་དག་པ་ལ་བསམ་གཏན་བྱེད་པ་ཡིན་ནོ། །འོད་སྲུང་ཆེན་པོས་སྨྲས་པ། འཇམ་དཔལ། ཅི་ལས་བསམས་ཏེ་དེ་སྐད་སྨྲ། འཇམ་དཔལ་གྱིས་སྨྲས་པ། བཙུན་པ་འོད་སྲུང་ཆེན་པོ། རྩ་བ་ནི་རང་གི་ལུས་ཡིན། མཐའ་ནི་ངར་འཛིན་པ་ཡིན། གནས་ནི་ཁམས་གསུམ་པ་ཡིན། འཁྲུགས་པ་ནི་ཉོན་མོངས་པ་རྣམས་ཡིན། མི་མཉམ་པ་ནི་གཉིས་ཡིན་ཏེ། དེ་ལ་དེས་ལུས་ནི་རྩ་བ་མེད་པར་ཤེས། ངར་འཛིན་པ་ནི་མཐའ་མེད་པར་ཤེས། ཁམས་གསུམ་ནི་གནས་མེད་པར་ཤེས། ཉོན་མོངས་པ་རྣམས་ནི་མི་འཁྲུགས་པར་ཤེས། བསམ་གཏན་རྣམས་ནི་གཉིས་སུ་མེད་པར་ཤེས་པས་ན། བཙུན་པ་འོད་སྲུང་ཆེན་པོ། ཁོ་བོས་དེ་ལས་བསམས་ནས་དགེ་སློང་རྣམ་པར་ཐར་པ་བརྒྱད་ལ་བསམ་གཏན་བྱེད་པ་ནི་རྩ་བ་མེད་པ་དང ། མཐའ་མེད་པ་དང ། གནས་མེད་པ་ལ་བསམ་གཏན་བྱེད་པ་དང ། མི་འཁྲུགས་པ་ལ་བསམ་གཏན་བྱེད་པ་དང ། ཡང་དག་པ་ལ་བསམ་གཏན་བྱེད་པ་ཡིན་ནོ་ཞེས་སྨྲས་སོ། །ཤཱ་རིའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ཆགས་པ་མེད་པའི་ཤེས་རབ་དང་ལྡན་པ་ཡིན། འཇམ་
184a
༄#། །དཔལ་གྱིས་སྨྲས་པ། བཙུན་པ་ཤཱ་རིའི་བུ། བྱང་ཆུབ་སེམས་དཔའ་གང་ཆགས་པ་ཐམས་ཅད་ལ་སྤྱོད་པར་བྱེད་ཀྱང་ཆགས་པ་ཐམས་ཅད་ཀྱིས་གོས་པར་མི་འགྱུར་ཞིང ། ཉོན་མོངས་པ་ཐམས་ཅད་ལ་མངོན་སུམ་དུ་བྱེད་ཀྱང་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཉོན་མོངས་པ་དེ་དག་གི་རང་བཞིན་གང་ཡིན་པའི་ཉོན་མོངས་པ་དེ་དག་ཀྱང་སྤོང་བར་མི་བྱེད་ན། དེ་ཙམ་གྱིས་ན་བྱང་ཆུབ་སེམས་དཔའ་ཆགས་པ་མེད་པའི་ཤེས་རབ་དང་ལྡན་པ་ཡིན་ནོ། །མཽངྒལ་གྱི་བུ་ཆེན་པོས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་རྫུ་འཕྲུལ་ཆེ་བ་ཡིན། འཇམ་དཔལ་གྱིས་སྨྲས་པ། བཙུན་པ་མཽངྒལ་གྱི་བུ་ཆེན་པོ། བྱང་ཆུབ་སེམས་དཔའ་གང་འདུས་བྱས་ཀྱང་མ་ཐོབ། འདུས་མ་བྱས་ཀྱང་མ་ཐོབ་ལ་སློབ་པ་དང ། མི་སློབ་པ་རྣམས་ཀྱང་འདུལ་བར་བྱེད་ན་དེ་ཙམ་གྱིས་ན་བྱང་ཆུབ་སེམས་དཔའ་རྫུ་འཕྲུལ་ཆེ་བ་ཡིན་ནོ། །རབ་འབྱོར་གྱིས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ཉོན་མོངས་པ་མེད་པར་གནས་པ་ཡིན། འཇམ་དཔལ་གྱིས་སྨྲས་པ། བཙུན་པ་རབ་འབྱོར། གང་གི་ཚེ་བྱང་ཆུབ་སེམས་དཔའ་ཆོས་ཐམས་ཅད་སྒྲིབ་པ་མེད་པར་ཤེས་པར་བྱེད་པ། ཕ་རོལ་དང ། ཚུར་རོལ་དང་བྲལ་བར་བྱེད་ཅིང ། བྱང་ཆུབ་ཀྱི་སྒྲིབ་པའང་མི་སྤོང་ལ་ཏིང་ངེ་
184b
འཛིན་ལས་ཀྱང་མི་ལྡང་ཞིང་བྱ་བ་ཐམས་ཅད་སྟོན་པར་བྱེད་ན། དེ་ཙམ་གྱིས་ན་བྱང་ཆུབ་སེམས་དཔའ་ཉོན་མོངས་པ་མེད་པར་གནས་པ་ཡིན་ནོ། །བྱམས་མའི་བུ་གང་པོས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ཆོས་སྨྲ་བ་ཡིན། འཇམ་དཔལ་གྱིས་སྨྲས་པ། བཙུན་པ་གང་པོ། གང་གི་ཚེ་བྱང་ཆུབ་སེམས་དཔའ་དབང་པོ་ཐམས་ཅད་ཀྱིས་སྤོབས་པར་བྱེད་ཅིང་འདུ་བྱེད་ཐམས་ཅད་མི་རྟག་གོ་ཞེས་འབྲས་བུ་ཡོད་པར་ཆོས་སྟོན་པར་བྱེད་ལ། བསྐལ་པ་སྟོང་ཕྲག་རྣམས་སུ་དོན་དང ། ཚིག་དང ། ཡི་གེ་སྟོན་པ་རྣམས་ཀྱིས་རྒྱས་པར་བྱེད་ཀྱང་མཐར་ཐུག་པར་མི་འགྱུར་ན་དེ་ཙམ་གྱིས་ན་བྱང་ཆུབ་སེམས་དཔའ་ཆོས་སྟོན་པ་ཡིན་ནོ། །ནམ་གྲུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་བསམ་གཏན་པ་ཡིན། འཇམ་དཔལ་གྱིས་སྨྲས་པ། བཙུན་པ་ནམ་གྲུ། གང་གི་ཚེ་བྱང་ཆུབ་སེམས་དཔའ་ཆོས་ཐམས་ཅད་རང་བཞིན་གྱིས་མཉམ་པར་བཞག་པ་ཉིད་ཡིན་པར་ཡང་ཤེས་པར་བྱེད་ལ་སེམས་རྣམ་པར་གཡེངས་པ་རྣམས་ལ་སྙིང་རྗེ་ཆེན་པོ་བསྐྱེད་དེ། ཕྱི་མའི་མཐའི་མུར་ཐུག་པའི་བར་དུ་སྤྱོད་པར་བྱེད་ཅིང་བསམ་གཏན་ལ་གནས་པ་ལས་གཡོ་བར་མི་འགྱུར་ན་དེ་ཙམ་གྱིས་ན་བྱང་ཆུབ་སེམས་དཔའ་བསམ་གཏན་པ་ཡིན་ནོ། །ཉེ་བར་འཁོར་གྱིས་སྨྲས་པ། འཇམ་དཔལ། ཇི་ལྟར་
185a
༄#། །ན་བྱང་ཆུབ་སེམས་དཔའ་འདུལ་བ་འཛིན་པ་ཡིན། འཇམ་དཔལ་གྱིས་སྨྲས་པ། བཙུན་པ་ཉེ་བར་འཁོར། གང་གི་ཚེ་བྱང་ཆུབ་སེམས་དཔའ་ཆོས་རྣམས་གཏན་དུལ་བ་ཉིད་དུའང་ཤེས་པར་བྱེད་ཅིང་ལྟུང་བ་དང ། ཉོན་མོངས་པ་དང་བྲལ་ལ། ལྟུང་བ་དང ། ཉོན་མོངས་པ་གདུལ་བའི་ཕྱིར་ཆོས་སྟོན་པར་བྱེད་ཅིང ། དེ་ལྟར་ཉོན་མོངས་རྣམས་རྟོགས་པར་ཡང་བྱེད་ལ་བྱང་ཆུབ་ཀྱང་ཚོལ་བར་བྱེད་ན་དེ་ཙམ་གྱིས་ན་བྱང་ཆུབ་སེམས་དཔའ་འདུལ་བ་འཛིན་པ་ཡིན་ནོ། །མ་འགགས་པས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ལྷའི་མིག་དང་ལྡན་པ་ཡིན། འཇམ་དཔལ་གྱིས་སྨྲས་པ། བཙུན་པ་མ་འགགས་པ། གང་གི་ཚེ་བྱང་ཆུབ་སེམས་དཔའ་ཕྱོགས་བཅུའི་གཟུགས་སྣང་བ་ཐམས་ཅད་ཀྱང་མཐོང་བར་བྱེད་ལ། གཟུགས་དབེན་པར་མཐོང་བས་ཆོས་ཐམས་ཅད་དབེན་པར་མཐོང་བ་རྗེས་སུ་རྟོགས་པར་བྱེད་ན་དེ་ཙམ་གྱིས་ན་བྱང་ཆུབ་སེམས་དཔའ་ལྷའི་མིག་དང་ལྡན་པ་ཡིན་ནོ། །བ་ཀུ་ལས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་དབང་པོ་བསྲུང་བ་ཡིན། འཇམ་དཔལ་གྱིས་སྨྲས་པ། གང་གི་ཚེ་བྱང་ཆུབ་སེམས་དཔའ་ཡུལ་ཐམས་ཅད་སངས་རྒྱས་ཀྱི་ཡུལ་ཡིན་པར་ལྟ་ཞིང་སངས་རྒྱས་ཀྱི་ཡུལ་ཡང་མེད་པར་ལྟ་ན་དེ་
185b
ཙམ་གྱིས་ན་བྱང་ཆུབ་སེམས་དཔའ་དབང་པོ་བསྲུང་བ་ཡིན་ནོ། །སོར་མོའི་ཕྲེང་བས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་དབང་པོ་རྣོ་བ་ཡིན། འཇམ་དཔལ་གྱིས་སྨྲས་པ།་གང་གི་ཚེ་བྱང་ཆུབ་སེམས་དཔའ་བྱང་ཆུབ་རང་བཞིན་གྱིས་མ་སྐྱེས་པའི་ཕྱིར་མཚམས་མེད་པ་དང་མཉམ་པར་ལྟ་བར་བྱེད་ན་དེ་ཙམ་གྱིས་ན་བྱང་ཆུབ་སེམས་དཔའ་དབང་པོ་རྣོ་བ་ཡིན་ནོ། །ཀཱ་ཏྱཱའི་བུ་ཆེན་པོས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་མདོ་སྡེ་རྣམ་པར་འབྱེད་པ་ལ་མཁས་པ་ཡིན། འཇམ་དཔལ་གྱིས་སྨྲས་པ། བཙུན་པ་ཀཱ་ཏྱཱའི་བུ་ཆེན་པོ། གང་གི་ཚེ་བྱང་ཆུབ་སེམས་དཔའ་སོ་སོ་ཡང་དག་པར་རིག་པ་མི་ཟད་པ་བཞི་ཐོབ་ཅིང ། ཚིག་གཅིག་གིས་ཀྱང་བསྐལ་པ་འབུམ་གྱི་བར་དུ་རྒྱ་ཆེར་རྣམ་པར་འབྱེད་ཅིང་སྟོན་ལ། ཅི་ནས་ཀྱང་ཀུན་ནས་ཉོན་མོངས་པ་སྤོང་བར་ནི་བྱེད་པ་དང ། རྣམ་པར་བྱང་བ་ལེན་པར་མི་བྱེད་པ་དེ་ལྟར་སྟོན་པར་བྱེད་པ་དང ། ཆོས་ཉིད་གནས་པ་ལས་ཀྱང་མི་གཡོ་ལ་གནས་ཐམས་ཅད་ལའང་མི་རྟེན་པ་དེ་ལྟར་སྟོན་པར་བྱེད་ན་དེ་ཙམ་གྱིས་ན་བྱང་ཆུབ་སེམས་དཔའ་མདོ་སྡེ་རྣམ་པར་འབྱེད་པ་ལ་མཁས་པ་ཡིན་ནོ། །གསུས་པོ་ཆེ་ཆེན་པོས་སྨྲས་པ།་འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སོ་སོར་ཡང་དག་པར་རིག་པ་ཐོབ་པ་ཡིན། འཇམ་དཔལ་གྱིས་སྨྲས་པ། གང་གི་ཚེ་བྱང་ཆུབ་སེམས་དཔའ་བརྗོད་དུ་མེད་པའི་
186a
༄#། །དོན་གྱིས་དོན་སོ་སོ་ཡང་དག་པར་རིག་པ་སྟོན་པ་དང ། ཆོས་ཀྱི་དབྱིངས་གནས་པ་ཉིད་ཀྱི་ཆོས་སོ་སོ་ཡང་དག་པར་རིག་པ་སྟོན་པ་དང ། མིང་དང ། མཚན་མ་མེད་པ་ཉིད་ཀྱིས་ངེས་པའི་ཚིག་སོ་སོ་ཡང་དག་པར་རིག་པ་སྟོན་པ་དང ། བྲག་ཅ་དང་མཉམ་པ་ཉིད་ཀྱིས་སྤོབས་པ་སོ་སོ་ཡང་དག་པར་རིག་པ་སྟོན་པར་བྱེད་ན་དེ་ཙམ་གྱིས་ན་བྱང་ཆུབ་སེམས་དཔའ་སོ་སོ་ཡང་དག་པར་རིག་པ་ཐོབ་པ་ཡིན་ནོ། །སྒྲ་གཅན་ཟིན་གྱིས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ཚུལ་ཁྲིམས་དང་ལྡན་པ་ཡིན། འཇམ་དཔལ་གྱིས་སྨྲས་པ། བཙུན་པ་སྒྲ་གཅན་ཟིན། གང་གི་ཚེ་བྱང་ཆུབ་སེམས་དཔའ་ཚུལ་ཁྲིམས་དང་བརྟུལ་ཞུགས་ཡང་དག་པར་བླངས་ཤིང་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཚུལ་ཁྲིམས་འཆལ་བའི་འགྲོ་བ་གང་ཡིན་པར་འགྲོ་བར་བྱེད་ན་དེ་ཙམ་གྱིས་ན་བྱང་ཆུབ་སེམས་དཔའ་ཚུལ་ཁྲིམས་དང་ལྡན་པ་ཡིན་ནོ། །ཀུན་དགའ་བོས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་མང་དུ་ཐོས་པ་ཡིན། འཇམ་དཔལ་གྱིས་སྨྲས་པ། བཙུན་པ་ཀུན་དགའ་བོ། གང་གི་ཚེ་བྱང་ཆུབ་སེམས་དཔའ་སངས་རྒྱས་ཐམས་ཅད་ཀྱིས་གསུངས་པ་ཉན་པར་བྱེད་ཅིང་ཐོས་པ་ཐམས་ཅད་ཀྱི་དོན་ཀྱང་རྟོགས་པར་བྱེད་ལ་ཇི་ལྟར་ཐོས་པའང་འཛིན་པར་བྱེད་ཅིང ། ཇི་ལྟར་བཟུང་བ་བཞིན་
186b
སྟོན་པར་ཡང་བྱེད་ན་དེ་ཙམ་གྱིས་ན་བྱང་ཆུབ་སེམས་དཔའ་མང་དུ་ཐོས་པ་ཡིན་ནོ། །དེ་ནས་ལྷའི་བུ་རབ་རྩལ་སེམས་ཀྱིས་ཉན་ཐོས་ཆེན་པོ་དེ་དག་ལ་འདི་སྐད་སྨྲས་སོ། །ཚེ་དང་ལྡན་པ་དག་།ཁྱེད་ཅག་འཇམ་དཔལ་གཞོན་ནུར་གྱུར་པས་འདི་སྐད་བསྟན་པ་དེ་ལྟ་བུའི་ཆོས་འགའ་དང་ལྡན་ནམ། དེ་དག་གིས་སྨྲས་པ། ལྷའི་བུ། བདག་ཅག་ལ་ནི་ཆོས་དེ་དག་ལས་འགའ་ཙམ་ཡང་མེད་དོ། །ལྷའི་བུས་སྨྲས་པ། ཚེ་དང་ལྡན་པ་དག་དེ་ལྟ་ན་ཁྱེད་ཅག་ཉན་ཐོས་ཆེན་པོ་མཆོག་ཏུ་གྱུར་པ་མ་ཡིན་པར་མི་འགྱུར་རམ། ཤཱ་རིའི་བུས་སྨྲས་པ།་ལྷའི་བུ། འདི་ལྟ་སྟེ། དཔེར་ན། གང་རྗེས་ལས་བརྟེན་ན་རྫིད་བུ་མཆོག་ཡིན་པ་དེ་བཞིན་དུ་ཉན་ཐོས་གཞན་དག་ལས་བརྟེན་ན་ཁོ་བོ་ཅག་ཀྱང་མཆོག་ཡིན་ནོ། །འདི་ལྟ་སྟེ ། དཔེར་ན། རྒྱ་མཚོ་ཆེན་པོ་ལས་བརྟེན་ན་འོག་གི་ཆུའི་ཕུང་པོ་མཆོག་ཡིན་པ་དེ་བཞིན་དུ་ཉན་ཐོས་དང ། རང་སངས་རྒྱས་ཐམས་ཅད་ལས་བརྟེན་ན་བྱང་ཆུབ་སེམས་དཔའ་མཆོག་ཡིན་ནོ། །ལྷའི་བུས་སྨྲས་པ། བཙུན་པ་ཤཱ་རིའི་བུས་དེ་ནི་ཉན་ཐོས་མངོན་པའི་ང་རྒྱལ་མེད་པ་རྣམས་ཀྱིས་བསྟན་པ་ཡིན་ཏེ། ལེགས་སོ། །ལེགས་སོ། །འཇམ་དཔལ་གྱིས་སྨྲས་པ། ལྷའི་བུ།་དེ་དེ་བཞིན་ཏེ། ཉན་ཐོས་ནི་ལྷག་པའི་ང་རྒྱལ་མེད་པ་ཡིན་ནོ། །བྱང་ཆུབ་སེམས་དཔའ་ནི་ལྷག་པའི་ང་རྒྱལ་ཅན་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལས་བསམས་
187a
༄#། །ཏེ་དེ་སྐད་སྨྲ། འཇམ་དཔལ་གྱིས་སྨྲས་པ། ལྷའི་བུ། འདི་ལྟར་ཉན་ཐོས་རྣམས་ནི་སངས་རྒྱས་ལ་བརྟེན་ནས་ང་རྒྱལ་སྤངས་པ་ཡིན་གྱི། བྱང་ཆུབ་སེམས་དཔའ་ནི་ལྷག་པའི་ང་རྒྱལ་ཅན་ཡིན་ལ་ང་རྒྱལ་དེས་སངས་རྒྱས་ཀྱི་ཆོས་རྣམས་ཡང་དག་པར་སྒྲུབ་པར་བྱེད་པས་ན་དེའི་ཕྱིར་བྱང་ཆུབ་སེམས་དཔའ་ནི་ལྷག་པའི་ང་རྒྱལ་ཅན་ཡིན་ནོ། །ལྷའི་བུས་སྨྲས་པ། འཇམ་དཔལ། ལྷག་པའི་ང་རྒྱལ་ཅན་ནི་བདག་ལ་བསྟོད་པར་བྱེད་ཅིང་གཞན་ལ་སྨོད་པར་བྱེད་པ་ཡིན་ན། བྱང་ཆུབ་སེམས་དཔའ་ཡང་དེ་ལྟ་བུར་མི་འགྱུར་རམ། འཇམ་དཔལ་གྱིས་སྨྲས་པ། ལྷའི་བུ། དེ་བཞིན་ཏེ། བྱང་ཆུབ་སེམས་དཔའ་ནི་བདག་ལ་བསྟོད་པར་བྱེད་ཅིང་གཞན་ལ་སྨོད་པར་བྱེད་པ་ཡིན་ནོ། །ལྷའི་བུས་སྨྲས་པ། འཇམ་དཔལ། ཅི་ལས་བསམས་ཏེ་དེ་སྐད་སྨྲ། འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་སེམས་དཔའ་ནི་རྣམ་གྲངས་དུ་མར་ཐེག་པ་ཆེན་པོའི་བསྔགས་པ་རྗོད་པར་བྱེད་ཅིང་ཉན་ཐོས་ཀྱི་ཐེག་པ་བའི་བསྔགས་པ་མ་ཡིན་པར་རྗོད་པར་བྱེད་པ་དང ། ཇི་ལྟར་སེམས་ཅན་རྣམས་བྱང་ཆུབ་ཏུ་སེམས་བསྐྱེད་པར་འགྱུར་སྙམ་ནས་བདག་ཉིད་ཀྱི་ཡོན་ཏན་གྱི་ཆོས་རྗོད་པར་བྱེད་ཅིང ། འདི་ལ་དགའ་བའི་སེམས་བསྐྱེད་པར་མི་འགྱུར་བར་བྱའོ་སྙམ་ནས་ཐེག་པ་དམན་པ་ལ་རྣམ་པར་སྡང་བར་བྱེད་པ་ཡིན་པས། ལྷའི་བུ། དེ་
187b
ལྟར་ན་བྱང་ཆུབ་སེམས་དཔའ་ནི་ཐེག་པ་ཆེན་པོ་ལ་བསྟོད་པར་བྱེད་པ་དང ། ཉན་ཐོས་ཀྱི་ཐེག་པ་ལ་སྨོད་པར་བྱེད་པ་ཡིན་ནོ། །ལྷའི་བུས་སྨྲས་པ། འཇམ་དཔལ། དེ་ལྟར་ན་བྱང་ཆུབ་སེམས་དཔའ་ལྟུང་བ་དང་བཅས་པར་མི་འགྱུར་རམ། འཇམ་དཔལ་གྱིས་སྨྲས་པ། ལྷའི་བུ། གང་གིས་ནོར་བུ་མཆིང་བུའི་བསྔགས་པ་མ་ཡིན་པར་བརྗོད་ཅིང་ནོར་བུ་རིན་པོ་ཆེ་བཻ་ཌཱུརྱའི་བསྔགས་པར་རྗོད་པར་གྱུར་ན་དེའང་ལྟུང་བ་དང་བཅས་པར་འགྱུར་རམ། ལྷའི་བུས་སྨྲས་པ། འཇམ་དཔལ། དེ་ནི་མི་འགྱུར་རོ། །འཇམ་དཔལ་གྱིས་སྨྲས་པ། ལྷའི་བུ། དེ་བཞིན་དུ་བྱང་ཆུབ་སེམས་དཔའི་ཐེག་པ་ཆེན་པོའི་བསྔགས་པ་རྗོད་པར་བྱེད་ཅིང་ཉན་ཐོས་ཀྱི་ཐེག་པའི་བསྔགས་པ་མ་ཡིན་རྗོད་པར་བྱེད་པའང་ལྟུང་བ་དང་བཅས་པར་མི་འགྱུར་རོ། །ལྷའི་བུ། འདི་ལྟ་སྟེ། དཔེར་ན། སྐྱེས་བུ་ཤིན་ཏུ་སྟོབས་དང་ལྡན་པ་གང་ཞིག་གིས་འཁོར་ལོས་བསྒྱུར་བའི་རྒྱལ་པོའི་བསྔགས་པ་བརྗོད་ཅིང་ཁམས་ཀྱི་རྒྱལ་པོ་ལ་དེ་ལྟ་བུ་ཡིན་ན།་དེ་སྨད་པའི་འོས་སུ་འགྱུར་བ་ཡིན་སྙམ་མམ། ལྷའི་བུས་སྨྲས་པ། འཇམ་དཔལ། དེ་ལྟ་མ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ། དེ་བཞིན་དུ་བྱང་ཆུབ་སེམས་དཔའ་ཐེག་པ་ཆེན་པོ་ལ་བསྟོད་པར་བྱེད་ཅིང་ཉན་ཐོས་ཀྱི་ཐེག་པ་ལ་སྨོད་པར་བྱེད་པའང་སྨད་པའི་འོས་སུ་མི་འགྱུར་རོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་
188a
༄#། །ལེགས་སོ་ཞེས་བྱ་བ་བྱིན་ཏེ། འཇམ་དཔལ། ལེགས་སོ། །ལེགས་སོ། །ཁྱོད་ཀྱི་ཚིག་དེ་ནི་ལེགས་པར་སྨྲས་ཏེ། འཇམ་དཔལ། ཐེག་པ་ཆེན་པོའི་བསྔགས་པ་བརྗོད་པས་ནི་ཐེག་པ་ཐམས་ཅད་ཀྱིས་བསྔགས་པ་བརྗོད་པར་འགྱུར་རོ། །དེ་ཅིའི་ཕྱིར་ཞེ་ན། འཇམ་དཔལ། ཐེག་པ་ཐམས་ཅད་ནི་དེ་ལས་ངེས་པར་བྱུང་བ་ཡིན་པའི་ཕྱིར་རོ། །གཞན་ཡང ། ལྷའི་བུ་རབ་རྩལ་སེམས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། བྱང་ཆུབ་སེམས་དཔའ་གང་ལ་བརྟེན་ནས་བྱང་ཆུབ་ཏུ་སེམས་སྐྱེད་པར་བྱེད། འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་སེམས་དཔའ་ནི་སེམས་ཅན་ཐམས་ཅད་ཀྱི་ཉོན་མོངས་པ་ལ་བརྟེན་ནས་བྱང་ཆུབ་ཏུ་སེམས་བསྐྱེད་པར་བྱེད་དོ། །ལྷའི་བུས་སྨྲས་པ། འཇམ་དཔལ། ཅིའི་ཕྱིར་ན་བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་ཉོན་མོངས་པ་ལ་བརྟེན་ནས་བྱང་ཆུབ་ཏུ་སེམས་སྐྱེད་པར་བྱེད། འཇམ་དཔལ་གྱིས་སྨྲས་པ། ལྷའི་བུ། གལ་ཏེ་སེམས་ཅན་རྣམས་ཀྱི་ཉོན་མོངས་པ་དག་བྱང་ཆུབ་ཀྱི་ཐེག་པ་མ་ཡིན་དུ་ཟིན་ན་ནི་བྱང་ཆུབ་སེམས་དཔའ་ཡང་བྱང་ཆུབ་ཏུ་སེམས་བསྐྱེད་ནས་གོ་ཆ་གྱོན་པར་མི་འགྱུར་རོ། །ལྷའི་བུས་སྨྲས་པ། འཇམ་དཔལ། བྱང་ཆུབ་ཀྱི་སེམས་ཅི་ཞིག་ལ་བརྟེན། འཇམ་དཔལ་གྱིས་སྨྲས་པ། ལྷའི་བུ། བྱང་
188b
ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ལ་བརྩོན་ཏོ། །དེ་ཅིའི་ཕྱིར་ཞེ་ན། ལྷའི་བུ། སངས་རྒྱས་ཀྱི་ཆོས་ཐམས་ཅད་ནི་བྱང་ཆུབ་ཀྱི་སེམས་ཀྱི་རྩ་བ་ལ་བརྟེན་ནས་སྐྱེ་བར་འགྱུར་བའི་ཕྱིར་རོ། །ལྷའི་བུས་སྨྲས་པ། འཇམ་དཔལ། ཆོས་ཐམས་ཅད་ཅི་ལ་བརྟེན། འཇམ་དཔལ་གྱིས་སྨྲས་པ། ལྷའི་བུ། ཆོས་ཐམས་ཅད་ནི་རྩ་བ་མེད་པའི་གནས་ལ་བརྟེན་པ་ཡིན་ནོ། །དེ་ཅིའི་ཕྱིར་ཞེ་ན། ལྷའི་བུ། ཆོས་ཐམས་ཅད་ནི་མཐའ་ཡས་པའི་ཕྱིར་རྩ་བ་མེད་པ་དང ། མངོན་པར་སྐབས་ཡོད་པ་དང ། ནམ་མཁའ་ལ་བརྟེན་པའང་ཡིན་པའི་ཕྱིར་རོ། ། ལྷའི་བུས་སྨྲས་པ། འཇམ་དཔལ། སངས་རྒྱས་ཀྱི་ཆོས་རྣམས་ཇི་སྙེད་ཡོད། འཇམ་དཔལ་གྱིས་སྨྲས་པ། ལྷའི་བུ། ཆོས་ཐམས་ཅད་ཇི་སྙེད་པ་དེ་སྙེད་ཡོད་དོ། །དེ་ཅིའི་ཕྱིར་ཞེ་ན།་དེ་བཞིན་གཤེགས་པས་ནི་ཆོས་ཐམས་ཅད་སངས་རྒྱས་བས་ན། ལྷའི་བུ། དེའི་ཕྱིར་ཆོས་ཐམས་ཅད་ཇི་སྙེད་པ་སངས་རྒྱས་ཀྱི་ཆོས་རྣམས་ཀྱང་དེ་སྙེད་དོ། །ལྷའི་བུས་སྨྲས་པ། འཇམ་དཔལ། འོ་ན་ཅི། འདོད་ཆགས་དང ། ཞེ་སྡང་དང ། གཏི་མུག་རྣམས་ཀྱང་སངས་རྒྱས་ཀྱི་ཆོས་ཡིན་ནམ། འཇམ་དཔལ་གྱིས་སྨྲས་པ། ལྷའི་བུ། དེ་དེ་བཞིན་ཏེ། འདོད་ཆགས་དང ། ཞེ་སྡང་དང ། གཏི་མུག་རྣམས་ཀྱང་སངས་རྒྱས་ཀྱི་ཆོས་ཡིན་ནོ། །དེ་ཅིའི་ཕྱིར་ཞེ་ན། ཉོན་མོངས་པ་དེ་དག་གི་རྩ་བའི་གནས་རྗེས་སུ་རྟོགས་པ་ནི་སངས་རྒྱས་ཡིན་ནོ་
189a
༄#། །ཞེས་སྟོན་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ། གང་གིས་སེམས་ཅན་ཐམས་ཅད་སངས་རྒྱས་སུ་འགྱུར་བའི་རྣམ་གྲངས་ཡོད་དམ། འཇམ་དཔལ་གྱིས་སྨྲས་པ། ལྷའི་བུ། རྣམ་གྲངས་མེད་པས་སེམས་ཅན་ཐམས་ཅད་སངས་རྒྱས་སུ་འགྱུར་གྱི། རྣམ་གྲངས་ཀྱིས་ནི་མ་ཡིན་ནོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་ནི་སེམས་ཅན་ཐམས་ཅད་རྟོགས་པར་ཐུགས་སུ་ཆུད་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ། ཇི་ལྟར་རྟོགས་པར་ཐུགས་སུ་ཆུད། འཇམ་དཔལ་གྱིས་སྨྲས་པ། ལྷའི་བུ། སེམས་ཅན་མེད་པའི་རྣམ་པ་དང ། སྟོང་པ་ཉིད་ཀྱིས་རྣམ་པས་སོ། །ལྷའི་བུས་སྨྲས་པ། འཇམ་དཔལ། སྟོང་པ་ཉིད་ཀྱིས་ཅི་ཞིག་རྟོགས་པར་བྱེད། འཇམ་དཔལ་གྱིས་སྨྲས་པ། ལྷའི་བུ། གལ་ཏེ་ཅུང་ཟད་རྗེས་སུ་རྟོགས་པར་བྱེད་ན་ནི། དེ་སྟོང་པ་ཉིད་དུ་མི་འགྱུར་རོ། །དེ་ཅིའི་ཕྱིར་ཞེ་ན། ལྷའི་བུ། སྟོང་པ་ཉིད་ནི་རྣམ་པར་རྟོག་པ་མེད་པ་དང ། རྩོལ་བ་མེད་པ་ཡིན་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ། དེ་བཞིན་གཤེགས་པས་སྟོང་པ་ཉིད་རྗེས་སུ་རྟོགས་པ་ནི་བྱང་ཆུབ་ཡིན་ནོ་ཞེས་མ་གསུངས་སམ། འཇམ་དཔལ་གྱིས་སྨྲས་པ། ལྷའི་བུ། སྟོང་པ་ཉིད་གང་ཡིན་པ་དེ་ཉིད་བྱང་ཆུབ་ཡིན་པས་ན་བཅོམ་ལྡན་འདས་ཀྱིས་ཀྱང་སྟོང་པ་ཉིད་རྗེས་སུ་རྟོགས་
189b
པ་ཁོ་ན་བྱང་ཆུབ་ཡིན་ནོ་ཞེས་གསུངས་སོ། །ལྷའི་བུས་སྨྲས་པ། འཇམ་དཔལ། སྟོང་པ་ཉིད་ལ་གནས་པ་ཇི་ཞིག་ལ་གནས་པ་ཡིན། འཇམ་དཔལ་གྱིས་སྨྲས་པ། ལྷའི་བུ ། སྟོང་པ་ཉིད་ལ་གནས་པ་ནི་འདོད་པ་དང ། གཟུགས་དང ། གཟུགས་མེད་པ་ལ་གནས་པ་མ་ཡིན། ཕུང་པོ་དང ། ཁམས་དང ། སྐྱེ་མཆེད་ལ་གནས་པ་མ་ཡིན། ལུས་དང ། སེམས་ལ་གནས་པ་མ་ཡིན་ནོ། །དེ་ཅིའི་ཕྱིར་ཞེ་ན། ལྷའི་བུ། དེ་གནས་པ་གང་གིས་གནས་པར་འགྱུར་བའི་གནས་པ་དེའང་སྟོང་པས་ན་སྟོང་པ་ཉིད་ནི་སྟོང་པ་ཉིད་ལ་མི་གནས་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ། དེ་བཞིན་གཤེགས་པ་དོན་དམ་པ་སྟོང་པ་ཉིད་ཀྱི་གནས་པས་གནས་པར་མི་མཛད་དམ། འཇམ་དཔལ་གྱིས་སྨྲས་པ། ལྷའི་བུ།་དེ་བཞིན་གཤེགས་པ་ཉིད་སྟོང་པ་ཉིད་ཡིན་ལ། སྟོང་པ་ཉིད་གང་ཡིན་པ་དེ་ནི་གཉིས་སུ་མེད་པ་ཡིན་པས་ན་དེ་བཞིན་གཤེགས་པ་ནི་གཉིས་སུ་མེད་པའི་གནས་པར་མཛད་དོ། །ལྷའི་བུས་སྨྲས་པ། འཇམ་དཔལ། གཉིས་སུ་མེད་པའི་གནས་པས་གནས་པ་གང་ཡིན། འཇམ་དཔལ་གྱིས་སྨྲས་པ། ལྷའི་བུ་གཉིས་སུ་མེད་པའི་གནས་པ་ནི་གཉིས་སུ་མེད་པ་ཉིད་ཡིན་གྱི། དེ་ལ་གནས་པ་གཞན་མེད་དེ། དེའི་གནས་པ་གཉིས་སུ་མེད་པ་ལས་གཞན་མེད་པ་དེ་ཉིད་ཀྱང་གཉིས་སུ་མེད་པ་ཉིད་ཡིན་ནོ། །ལྷའི་བུས་
190a
༄#། །སྨྲས་པ། འཇམ་དཔལ། གཉིས་ཞེས་བྱ་བ་ནི་གང ། གཉིས་སུ་མེད་པ་ཞེས་བྱ་བ་ནི་གང ། འཇམ་དཔལ་གྱིས་སྨྲས་པ། ལྷའི་བུ། འདོད་ཆགས་དང ། འདོད་ཆགས་དང་བྲལ་བར་བྱེད་པ་དེ་ནི་གཉིས་སོ། །འདོད་ཆགས་ཀྱི་རང་བཞིན་ནི་གཉིས་སུ་མེད་པའོ། །ཞེ་སྡང་དང ། ཞེ་སྡང་མེད་པར་བྱེད་པ་དེ་ནི་གཉིས་སོ།། ཞེ་སྡང་གི་རང་བཞིན་ནི་གཉིས་སུ་མེད་པའོ། །གཏི་མུག་དང ། གཏི་མུག་མེད་པར་བྱེད་པ་དེ་ནི་གཉིས་སོ། །གཏི་མུག་གི་རང་བཞིན་ནི་གཉིས་སུ་མེད་པའོ། །ཉོན་མོངས་པ་དང ། ཉོན་མོངས་པ་མེད་པར་བྱེད་པ་དེ་ནི་གཉིས་སོ། །ཉོན་མོངས་པའི་རང་བཞིན་ནི་གཉིས་སུ་མེད་པའོ། །བདག་དང ། བདག་མེད་པར་བྱེད་པ་དེ་ནི་གཉིས་སོ། ། བདག་གི་རང་བཞིན་ནི་གཉིས་སུ་མེད་པའོ། །ལྷའི་བུས་སྨྲས་པ། འཇམ་དཔལ། བདག་གིས་རང་བཞིན་གང་ཡིན། འཇམ་དཔལ་གྱིས་སྨྲས་པ། ལྷའི་བུ། བདག་གི་རང་བཞིན་ནི་བཟོད་མ་ནས་དག་པའི་ཕྱིར་བདག་མེད་པ་ཉིད་ཡིན་ནོ། །བདག་གི་རང་བཞིན་ནི་བཟོད་མ་ནས་དག་པའི་ཕྱིར་གཟོད་མ་ནས་དབེན་པ་ཉིད་དང ། གཟོད་མ་ནས་མ་སྐྱེས་པ་ཉིད་དང ། གཟོད་མ་ནས་མ་བྱུང་བ་ཉིད་ཡིན་ནོ། །ལྷའི་བུས་སྨྲས་པ། འཇམ་དཔལ། ཅིའི་ཕྱིར་རང་བཞིན་ཞེས་བྱ། འཇམ་དཔལ་གྱིས་སྨྲས་པ།
190b
ལྷའི་བུ། དེ་ནི་འགྱུར་བ་མེད་པས་དེའི་ཕྱིར་རང་བཞིན་ཞེས་བྱའོ། །དེ་ནི་གཟོད་མ་ཉིད་ནས་གསལ་ཞིང་ཉོན་མོངས་པ་ཅན་མ་ཡིན་པས་དེའི་ཕྱིར་རང་བཞིན་ཞེས་བྱའོ། །དེ་ནི་ནམ་མཁའ་དང་མཉམ་པ་ཉིད་ཀྱིས་མཉམ་ཞིང་ཚད་མེད་པས་དེའི་ཕྱིར་རང་བཞིན་ཞེས་བྱའོ། །དེ་ནི་སྤྲོས་པ་དང་བྲལ་བ་དང ། དེ་ནི་རྒྱུ་བ་དང་བྲལ་བ་དང ། དེ་ནི་འོད་གསལ་བས་དེའི་ཕྱིར་རང་བཞིན་ཞེས་བྱའོ། །དེ་ནི་བླང་བ་མེད་པ་དང་དོར་བ་མེད་པས་དེ་ཕྱིར་རང་བཞིན་ཞེས་བྱའོ། །ལྷའི་བུས་སྨྲས་པ། འཇམ་དཔལ། རང་བཞིན་མི་ཤེས་པ་དག་གང་ཡིན། འཇམ་དཔལ་གྱིས་སྨྲས་པ། ལྷའི་བུ། གང་དག་ཆོས་རྣམས་ཀྱི་རང་བཞིན་མི་ཤེས་པ་དག་གོ་།ལྷའི་བུས་སྨྲས་པ། འཇམ་དཔལ། རང་བཞིན་ཤེས་པ་དག་གང་ཡིན། འཇམ་དཔལ་གྱིས་སྨྲས་པ། ལྷའི་བུ། གང་དག་དེ་དག་གི་རང་བཞིན་ཤེས་པ་དག་གོ་།ལྷའི་བུས་སྨྲས་པ། འཇམ་དཔལ། དད་པ་དང་ལྡན་པའི་མཚན་ཉིད་གང་ཡིན། འཇམ་དཔལ་གྱིས་སྨྲས་པ། ལྷའི་བུ། དད་པ་དང་ལྡན་པའི་མཚན་ཉིད་ནི་ཆགས་པ་ཐམས་ཅད་ལས་ཡང་དག་པར་འདས་པ་ཡིན་ནོ། །ལྷའི་བུས་སྨྲས་པ། འཇམ་དཔལ། དགེ་སློང་དད་པ་དང་མི་ལྡན་པ་ཇི་ལྟར་དད་པས་བྱིན་པ་ལ་དད་པར་བྱེད། འཇམ་དཔལ་གྱིས་སྨྲས་པ། ལྷའི་བུ། དད་པ་དང་མི་ལྡན་པ་ཞེས་བྱ་བ་ནི་གང་མངོན་སུམ་དུ་གྱུར་པའི་ཆོས་
191a
༄#། །ཐམས་ཅད་ལ་གཞན་གྱི་དྲིང་མི་འཇོག་ཅིང་གཞན་གྱི་དད་པས་ཡང་དང་ཡང་དུ་མི་འགྲོ་བ་ཡིན་པས་དེའི་ཕྱིར་དད་པ་དང་མི་ལྡན་པ་ཞེས་བྱ་སྟེ། དེ་ནི་དད་པས་བྱིན་པ་སྤྱོད་པར་མི་བྱེད་དོ། །དེ་ཅིའི་ཕྱིར་ཞེ་ན། གཟོད་མ་ནས་དག་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ། དགེ་སློང་གང་དགེ་འདུན་དང་ལྷན་ཅིག་མི་གནས་པ་དེ་ལ་ཇི་སྐད་ཅེས་བྱ། འཇམ་དཔལ་གྱིས་སྨྲས་པ། ལྷའི་བུ། དགེ་སློང་གང་དགེ་འདུན་དང་ལྷན་ཅིག་མི་གནས་པ་དེ་ནི་དེས་ན་འཇིག་རྟེན་གྱི་སྦྱིན་གནས་སུ་འགྱུར་རོ། །དེ་ཅིའི་ཕྱིར་ཞེ་ན། ལྷའི་བུ། དགེ་འདུན་ནི་འདུས་མ་བྱས་པ་ཡིན་ལ། བྱང་ཆུབ་སེམས་དཔའ་ནི་འདུས་མ་བྱས་དང་ལྷན་ཅིག་མི་གནས་པས་དེའི་ཕྱིར་དེ་ནི་འཇིག་རྟེན་གྱི་སྦྱིན་གནས་སུ་འགྱུར་བ་ཡིན་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ། གལ་ཏེ་བྱང་ཆུབ་སེམས་དཔའ་འདུས་མ་བྱས་དང་ལྷན་ཅིག་གནས་པར་གྱུར་ན་ཉེས་པ་ཅིར་འགྱུར། འཇམ་དཔལ་གྱིས་སྨྲས་པ། ལྷའི་བུ། འདུས་མ་བྱས་ཐོབ་ནས་སེམས་ཅན་རྣམས་སྐྱོབ་པར་མི་བྱེད་ཅིང་ཉན་ཐོས་སུ་འགྱུར་བས་དེའི་ཉེས་པ་ནི་དེར་འགྱུར་རོ། །ལྷའི་བུས་སྨྲས་པ། འཇམ་དཔལ། འདུས་བྱས་ནི་སོ་སོ་སྐྱེ་བོའི་ས་ཡིན་ལ། འདུས་མ་བྱས་ནི་འཕགས་པ་རྣམས་ཀྱིས་ཡིན་ན། འོ་ན། ཇི་ལྟར་བྱང་ཆུབ་སེམས་དཔའ་འཕགས་པའི་ས་སྤངས་ཤིང་སོ་སོ་སྐྱེ་བོའི་ས་ལ་
191b
གནས་པ་འཇིག་རྟེན་གྱི་སྦྱིན་གནས་སུ་འགྱུར། འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་སེམས་དཔའ་འདུས་བྱས་ལའང་མི་གནས། འདུས་མ་བྱས་ལའང་མི་གནས་པས་དེའི་ཕྱིར་དེ་ནི་འཇིག་རྟེན་གྱི་སྦྱིན་གནས་སུ་འགྱུར་རོ། །དེ་ཅིའི་ཕྱིར་ཞེ་ན། ལྷའི་བུ། བྱང་ཆུབ་སེམས་དཔའ་ནི་འདུ་བྱེད་ལས་ཡིད་བསྐྱོད་པ་དང ། འདུས་མ་བྱས་ལ་མི་གནས་པ་ཡིན་པས་འདུས་བྱས་ཀྱི་སྐྱོན་དང་བྲལ་བ་དང ། འདུས་མས་བྱས་ཤེས་པ་རྟོགས་པ་ཡིན་ཏེ། དེ་འདུས་བྱས་ཀྱི་སྐྱོན་དང་བྲལ་བས་ནི་འདུས་བྱས་ལ་མི་གནས་ལ། འདུས་མ་བྱས་ཤེས་པ་རྟོགས་པས་ནི་འདུས་མ་བྱས་སུ་མི་ལྟུང་བའི་ཕྱིར་རོ། །ལྷའི་བུ། འདི་ལྟ་སྟེ། དཔེར་ན། ཚན་པོ་ཆེ་ཆེན་པོས་སྟེང་གི་བར་སྣང་ལ་མདའ་འཕངས་པར་གྱུར་ལ་དེ་ནས་མདའ་དེ་ནམ་མཁའ་ལ་མི་གནས་པར་འདུག་ཅིང་ས་ལའང་མི་ལྟུང་ན། ལྷའི་བུ། དེ་ལ་དཀའ་བ་ཅུང་ཟད་ཡོད་དམ། ལྷའི་བུས་སྨྲས་པ། འཇམ་དཔལ། དཀའོ། །འཇམ་དཔལ་གྱིས་སྨྲས་པ། །ལྷའི་བུ། དེ་བས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་འདུས་བྱས་ཀྱང་མི་སྤོང་ཞིང་འདུས་མ་བྱས་ཀྱང་ཐོབ་པར་བྱེད་ལ། འདུས་མ་བྱས་སུའང་མི་ལྟུང་ཞིང་འདུས་བྱས་ཐོབ་པ་རྣམས་ཀྱང་ཡོངས་སུ་སྨིན་པར་བྱེད་པ་ནི་ཆེས་དཀའ་བ་ཡིན་ནོ། །ལྷའི་བུས་སྨྲས་པ། འཇམ་དཔལ། བྱང་ཆུབ་སེམས་དཔའི་འཇིགས་པ་འདུས་བྱས་
192a
༄#། །སམ།་འོན་ཏེ་འདུས་མ་བྱས་སམ། གང་ལས་འབྱུང་བར་འགྱུར། འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་སེམས་དཔའི་འཇིགས་པ་ནི་འདུས་བྱས་ལས་ཀྱང་འབྱུང་བར་འགྱུར། འདུས་མ་བྱས་ལས་ཀྱང་འབྱུང་བར་འགྱུར་རོ། །དེ་ཅིའི་ཕྱིར་ཞེ་ན། ལྷའི་བུ། འདུས་བྱས་ལས་ནི་ཉོན་མོངས་པའི་འཇིགས་པ་འབྱུང་ལ། འདུས་མ་བྱས་ལས་ནི་ཉོན་མོངས་པ་མེད་པའི་འཇིག་པ་འབྱུང་བའི་ཕྱིར་རོ། །ལྷའི་བུས་སྨྲས་པ། འཇམ་དཔལ། ཉོན་མོངས་པ་མེད་པས་འཇིགས་པ་ཅི་ཡོད་འཇམ་དཔལ་གྱིས་སྨྲས་པ། ལྷའི་བུ། ཁམས་གསུམ་ན་ནི་ཉོན་མོངས་པའི་འཇིགས་པ་ཡོད་ལ། བྱང་ཆུབ་སེམས་དཔའ་གང་ཁམས་གསུམ་དུ་ཉོན་མོངས་པར་མི་བྱེད་ན། དེ་ནི་ཉན་ཐོས་སུ་འགྱུར་རོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་འཇིགས་པ་མེད་པ་ཡིན། འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་སེམས་དཔའ་གང་ཤེས་རབ་ཀྱི་ཤེས་པས་འདུས་བྱས་ལ་སྤྱོད་པར་བྱེད་ཅིང ། ཐབས་ཀྱི་ཤེས་པས་འདུས་མ་བྱས་སུ་མི་ལྟུང་བ་དེ་ལྟ་ན། ལྷའི་བུ། བྱང་ཆུབ་སེམས་དཔའི་འཇིགས་པ་མེད་པ་ཡིན་ནོ། །ལྷའི་བུ། གཞན་ཡང ། གང་གི་ཚེ་བྱང་ཆུབ་སེམས་དཔའ་སེམས་ཅན་ལ་ལྟ་བས་འདུས་བྱས་སྤོང་བར་མི་བྱེད་ཅིང ། སངས་རྒྱས་ཀྱི་ཆོས་
192b
ལ་ལྟ་བས་འདུས་མ་བྱས་སུ་མི་ལྟུང་བ་དེ་ལྟ་ན། ལྷའི་བུ། བྱང་ཆུབ་སེམས་དཔའ་འཇིགས་པ་མེད་པ་ཡིན་ནོ། །ལྷའི་བུ། གཞན་ཡང ། གང་གི་ཚེ་བྱང་ཆུབ་སེམས་དཔའ་བསོད་ནམས་ཀྱི་ཚོགས་ཉེ་བར་བསགས་པའི་ཕྱིར་འདུས་བྱས་ལ་སྦྱོར་བར་བྱེད་ཅིང ། སངས་རྒྱས་ཀྱི་ཡེ་ཤེས་ཀྱི་ཚོགས་ཉེ་བར་བསགས་པའི་ཕྱིར་འདུས་མ་བྱས་སུ་མི་ལྟུང་བ་དེ་ལྟ་ན་བྱང་ཆུབ་སེམས་དཔའ་འཇིགས་པ་མེད་པ་ཡིན་ནོ། །ལྷའི་བུ། གཞན་ཡང ། གང་གི་ཚེ་བྱང་ཆུབ་སེམས་དཔའ་འདུས་མ་བྱས་ལ་གནས་ཏེ་བསམ་གཏན་རྣམས་སྐྱེད་པར་བྱེད་ཅིང ། ཐབས་ལ་གནས་ཏེ་བསམ་གཏན་རྣམས་ལས་ལྡོག་པར་བྱེད་པ་དེ་ལྟ་ན་བྱང་ཆུབ་སེམས་དཔའ་འཇིགས་པ་མེད་པ་ཡིན་ནོ། །ལྷའི་བུ། གཞན་ཡང ། གང་གི་ཚེ་བྱང་ཆུབ་སེམས་དཔའ་བྱང་ཆུབ་ཀྱི་སེམས་ལ་གནས་ཏེ་དགེ་བའི་རྩ་བ་ཉེ་བར་གསོག་པར་བྱེད་ཅིང ། སྙིང་རྗེ་ཆེན་པོ་ལ་གནས་ཏེ་སེམས་ཅན་རྣམས་ཡོངས་སུ་སྨིན་པར་བྱེད་པ་དེ་ལྟ་ན་བྱང་ཆུབ་སེམས་དཔའ་འཇིགས་པ་མེད་པ་ཡིན་ནོ། །ལྷའི་བུ། གཞན་ཡང ། གང་གི་ཚེ་བྱང་ཆུབ་སེམས་དཔའ་དབེན་པ་ལ་གནས་ཏེ་བདུད་ཀྱི་ལས་རྣམས་རྟོགས་པར་བྱེད་ཅིང ། ཐབས་ལ་གནས་ཏེ་བདུད་གྱི་ལས་རྣམས་སྤོང་བར་བྱེད་པ་དེ་ལྟར་ན་བྱང་ཆུབ་སེམས་དཔའ་འཇིགས་པ་མེད་པ་ཡིན་ནོ། །ལྷའི་བུ། གཞན་ཡང ། གང་གི་ཚེ་བྱང་ཆུབ་སེམས་དཔའ་བྱམས་པ་ཆེན་པོ་
193a
༄#། །ལ་གནས་ཏེ་ཆོས་སྟོན་པར་བྱེད་ཅིང ། སྙིང་རྗེ་ཆེན་པོ་ལ་གནས་ཏེ་ཟང་ཟིང་གི་སྦྱིན་པ་སྦྱིན་པར་བྱེད་པ་དེ་ལྟར་ན་བྱང་ཆུབ་སེམས་དཔའ་འཇིགས་པ་མེད་པ་ཡིན་ནོ། །ལྷའི་བུ། གཞན་ཡང ། གང་གི་ཚེ་བྱང་ཆུབ་སེམས་དཔའ་འཁོར་བ་ལ་གནས་ཏེ་མྱ་ངན་ལས་འདས་པ་ཡོངས་སུ་སྤྱད་པའི་ལས་བྱེད་ཅིང ། མྱ་ངན་ལས་འདས་པ་ལ་གནས་ཏེ་འཁོར་བ་ཡོངས་སུ་སྤྱད་པའི་ལས་བྱེད་པ་དེ་ཙམ་གྱིས་ན་བྱང་ཆུབ་སེམས་དཔའ་འཇིགས་པ་མེད་པ་ཡིན་ནོ། །ལྷའི་བུ། གཞན་ཡང ། གང་གི་ཚེ་བྱང་ཆུབ་སེམས་དཔའ་སྐྱེ་བ་མེད་པས་སྐྱེ་བར་བྱེད་ཅིང་འཕོ་བ་མེད་པས་འབྱུང་བར་བྱེད་པ་དང ། ཆོས་ལ་ལྟ་བས་སྣང་བར་བྱེད་ཅིང་ཕུང་པོ་དང ། ཁམས་དང ། སྐྱེ་མཆེད་ཀྱིས་རབ་ཏུ་ཕྱེ་བ་མ་ཡིན་པ་དང ། ཐམས་ཅད་དང་རྗེས་སུ་འབྲེལ་ཞིང་ཞི་བ་དང་ཉེ་བར་ཞི་བར་གྱུར་བ་དང ། འབར་བར་བྱེད་ཅིང་འབར་བས་ཚིག་པར་མི་བྱེད་པ་དང ། ཉོན་མོངས་པ་ཐམས་ཅད་ལ་ཡོངས་སུ་སྤྱོད་པར་བྱེད་ཅིང་ཉོན་མོངས་པའི་སྐྱོན་རྣམས་ཀྱིས་མི་གོས་པ་དང ། སློབ་པ་དང ། མི་སློབ་པ་རྣམས་འདུལ་བར་བྱེད་ཅིང་ཉན་ཐོས་ཀྱི་རྣམ་པར་གྲོལ་བ་ལ་རེག་པར་མི་བྱེད་པ་དང ། སེམས་ཅན་རྣམས་ཀྱི་བསམ་པ་ལ་འཇུག་ཅིང་ཆོས་ཀྱི་བསམ་པ་སྤོང་བར་མི་བྱེད་པ་དང ། བདུད་ཀྱི་ལྕགས་ཀྱུ་ཤེས་པར་བྱེད་ཅིང་ཆོས་ཀྱི་ལྕགས་ཀྱུ་སྤོང་བར་
193b
མི་བྱེད་པ་དང ། ཤེས་པས་འཇུག་པར་བྱེད་ཅིང་ཐབས་ཀྱིས་ལྡོག་པར་བྱེད་པ་དང ། འཕགས་པའི་རྣམ་པ་སྟོན་པར་བྱེད་ཅིང་འཕགས་པ་མ་ཡིན་པ་ཡོངས་སུ་སྨིན་པར་བྱ་བ་ལ་སྤྲོ་བར་བྱེད་པ་དང ། སངས་རྒྱས་མཐོང་བ་ལ་མངོན་པར་དགའ་བར་བྱེད་ཅིང་ཆོས་མཐོང་བ་ལ་ཀུན་ཏུ་འདོད་པར་བྱེད་པ་དེ་ཙམ་གྱིས་ན་བྱང་ཆུབ་སེམས་དཔའ་འཇིགས་པ་མེད་པ་ཡིན་ནོ། །འཇམ་དཔལ་གཞོན་ནུར་གྱུར་པས་བསྟན་པ་འདི་བཤད་པ་ན་ལྷའི་བུ་ལྔ་ཁྲི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།ལྷའི་བུ་ཉི་ཁྲི་ལྔ་སྟོང་ནི་ལེན་པ་མེད་པར་ཟག་པ་རྣམས་ལས་སེམས་ཅན་རྣམ་པར་གྲོལ་ལོ། །བྱང་ཆུབ་སེམས་དཔའ་སྔོན་དགེ་བའི་རྩ་བ་བསྐྱེད་པ་ལྔ་ཁྲི་ནི་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །བྱང་ཆུབ་སེམས་དཔའ་ཉི་ཁྲི་ནི་སྤོབས་པ་ཐོགས་པ་མེད་པ་སྐྱེས་སོ། ལྷ་དང ། མི་རྣམས་ཀྱི་སྐྱེ་དགུ་ལས་སྲོག་ཆགས་སྟོང་ཕྲག་རབ་ཏུ་མང་པོ་དག་གིས་ནི་བྱང་ཆུབ་ཏུ་སེམས་བསྐྱེད་ནས། དེ་བཞིན་གཤེགས་པ་དང ། འཇམ་དཔལ་གཞོན་ནུར་གྱུར་པ་ལ་ལྷའི་མཆོད་པ་དག་བྱས་སོ། །གཞན་ཡང ། ལྷའི་བུ་རབ་རྩལ་སེམས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ལམ་ལ་གནས་པ་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་
194a
༄#། །ཚེ་བྱང་ཆུབ་སེམས་དཔའ་འདོད་ཆགས་སྤང་བའི་ཕྱིར་ཡང་ཆོས་སྟོན་པར་བྱེད་ལ་འདོད་ཆགས་དང་བྲལ་བ་མངོན་དུའང་མི་བྱེད་པ་དང ། ཞེ་སྡང་སྤངས་པའི་ཕྱིར་ཡང་ཆོས་སྟོན་པར་བྱེད་ལ་ཞེ་སྡང་སྤོང་བ་མངོན་དུ་མི་བྱེད་པ་དང ། གཏི་མུག་སྤང་པའི་ཕྱིར་ཡང་ཆོས་སྟོན་པར་བྱེད་ལ་གཏི་མུག་སྤོང་བ་མངོན་དུའང་མི་བྱེད་པ་དང ། ཉོན་མོངས་པ་སྤང་བའི་ཕྱིར་ཆོས་སྟོན་པར་ཡང་བྱེད་ལ་ཉོན་མོངས་པ་སྤོང་བ་མངོན་དུའང་མི་བྱེད་པ་དེ་ཙམ་གྱིས་ན། ལྷའི་བུ། བྱང་ཆུབ་སེམས་དཔའ་ལམ་ལ་གནས་པ་ཡིན་ནོ། །ལྷའི་བུ། གཞན་ཡང ། གང་གི་ཚེ་བྱང་ཆུབ་སེམས་དཔའ་སེམས་ཅན་རྣམས་ལ་སྟོང་པ་ཉིད་སྟོན་པར་ཡང་བྱེད་ལ། སྟོང་པ་ཉིད་མངོན་དུའང་མི་བྱེད་པ་དང ། སེམས་ཅན་རྣམས་ལ་མཚན་མ་མེད་པ་སྟོང་པར་ཡང་བྱེད་ལ་མཚན་མ་མེད་པ་མངོན་དུའང་མི་བྱེད་པ་དང ། སེམས་ཅན་རྣམས་ལ་སྨོན་པ་མེད་པ་སྟོན་པར་ཡང་བྱེད་ལ་སྨོན་པ་མེད་པ་མངོན་དུའང་མི་བྱེད་པ་དང ། དེ་བཞིན་དུ་སེམས་ཅན་རྣམས་ལ་མངོན་པར་འདུ་བྱེད་པ་མེད་པ་དང ། སྐྱེ་བ་མེད་པ་དང ། འབྱུང་བ་མེད་པ་དང ། དངོས་པོ་མེད་པ་དང ། འདོད་ཆགས་དང་བྲལ་བ་དང་མི་ལྡན་པ་དང ། འགོག་པའི་ཆོས་སྟོན་པར་ཡང་བྱེད་ལ་འགོག་པ་མངོན་དུའང་མི་བྱེད་པ་དེ་ཙམ་གྱིས་ན་
194b
བྱང་ཆུབ་སེམས་དཔའ་ལམ་ལ་གནས་པ་ཡིན་ནོ། །ལྷའི་བུ། གཞན་ཡང ། གང་གི་ཚེ་བྱང་ཆུབ་སེམས་དཔའ་ཡོངས་སུ་མི་གཏོང་བས་སྦྱིན་པའི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་དང ། ཚུལ་ཁྲིམས་ལས་ཡང་དག་པར་འདའ་བས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་དང ། གནོད་སེམས་ཀྱིས་བཟོད་པའི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་དང ། ལེ་ལོས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་དང ། བརྗེད་ངས་པས་བསམ་གཏན་གྱི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་དང ། བེམས་པེ་དང ། ལུག་ལྟར་ལྐུགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་དེ་ཙམ་གྱིས་ན་བྱང་ཆུབ་སེམས་དཔའ་ལམ་ལ་གནས་པ་ཡིན་ནོ། །ལྷའི་བུས་སྨྲས་པ། འཇམ་དཔལ། ཅི་ལས་བསམས་ཏེ་དེ་སྐད་སྨྲ། འཇམ་དཔལ་གྱིས་སྨྲས་པ། ལྷའི་བུ། བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱིས་ཡོངས་སུ་མི་གཏོང་བ་ཡིན་ཏེ། བཞི་གང་ཞེ་ན། སེམས་ཅན་ཡོངས་སུ་མི་གཏོང་བ་དང ། ཆོས་ཡོངས་སུ་མི་གཏོང་བ་དང ། བྱང་ཆུབ་ཀྱི་སེམས་ཡོངས་སུ་མི་གཏོང་བ་དང ། དགེ་བའི་ཆོས་ཐམས་ཅད་ཡོངས་སུ་མི་གཏོང་བ་སྟེ། བྱང་ཆུབ་སེམས་དཔའ་ནི་ཆོས་བཞི་པོ་དེ་དག་ཡོངས་སུ་མི་གཏོང་བས་སྦྱིན་པའི་ཕ་རོལ་ཏུ་ཕྱིན་པ་སྒྲུབ་པར་བྱེད་དོ། །ལྷའི་བུ། ཚུལ་ཁྲིམས་ལས་ཡང་
195a
༄#། །དག་པར་འདའ་བ་ཞེས་བྱ་བ་དེ་ནི་དེའི་རང་བཞིན་མ་ཡིན་པའི་ཚིག་བླ་དྭགས་ཏེ། ཚུལ་ཁྲིམས་ལས་ཡང་དག་པར་འདའ་བས་ཏིང་ངེ་འཛིན་དང་ཏིང་ངེ་འཛིན་ལས་ཡང་དག་པར་འདའ་བས་ཤེས་རབ་དང ། ཤེས་རབ་ལས་ཡང་དག་པར་འདའ་བས་རྣམ་པར་གྲོལ་བ་ཤེས་པ་སྒྲུབ་པར་བྱེད་དེ། ལྷའི་བུ། ཁྱོད་ཀྱིས་རྣམ་གྲངས་དེས་གང་ཚུལ་ཁྲིམས་ལས་ཡང་དག་པར་འདའ་བ་དེ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་ཡིན་པར་རིག་པར་བྱའོ། །ལྷའི་བུ། བྱང་ཆུབ་སེམས་དཔའ་གང་གནོད་སེམས་ལ་ཞུགས་པ་ནི་ཉན་ཐོས་ཀྱི་ཐེག་པ་ལས་ལོག་པར་ཞུགས་པ་དང ། རང་སངས་རྒྱས་ཀྱི་ཐེག་པ་ལས་ལོག་པར་ཞུགས་པ་ཡིན་པས་དེ་ནི་ཐེག་པ་ཆེན་པོ་ལ་ལེགས་པར་ཞུགས་པ་ཡིན་ཏེ། གང་ཐེག་པ་ཆེན་པོ་ལ་ལེགས་པར་ཞུགས་པ་དེ་ནི་བཟོད་པའི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་ཡིན་ནོ། །ལྷའི་བུ།་གང་གི་ཚེ་བྱང་ཆུབ་སེམས་དཔའ་ལུས་ཀྱི་རྟུལ་བར་མི་བྱེད་ཅིང་ངག་དང་སེམས་ཀྱི་བུ་རྟུལ་བར་མི་བྱེད་པ་དེ་ནི་ལེ་ལོ་ཅན་ཡིན་ལ། གང་དེ་ལྟར་ཆོས་ལ་མངོན་པར་བརྩོན་པ་དེ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་ཡིན་ནོ། །ལྷའི་བུ། གཞན་ཡང ། བྱང་ཆུབ་སེམས་དཔའ་ནི་རྨི་ལམ་ནའང་ས་གཉིས་པོ་དག་ལ་དགའ་
195b
པའི་སེམས་སྐྱེད་པར་མི་བྱེད་པས་དེ་ནི་བརྗེད་ངས་པ་ཡིན་ལ། གང་ཉན་ཐོས་དང ། རང་སངས་རྒྱས་ཀྱི་ཐེག་པ་ལ་བརྗེད་ངས་པ་དེ་ནི་ཐེག་པ་ཆེན་པོ་ལ་མཉམ་པར་བཞག་པ་ཡིན་པས་དེ་ནི་བསམ་གཏན་གྱི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་ཡིན་ནོ། །ལྷའི་བུ་ཆོས་ཐམས་ཅད་ནི་བེམས་པོ་སྟེ། རྩཝ་དང ། ཤིང་དང ། རྩིག་པ་དང ། ལམ་དང ། མིག་ཡོར་དང ། ལུག་ལྟར་ལྐུགས་པ་དང་འདྲ་བར་རང་བཞིན་གྱིས་ནུས་པ་མེད་པ་ཡིན་པས། གང་གི་ཚེ་བྱང་ཆུབ་སེམས་དཔའ་ཤེས་རབ་དང་ཡེ་ཤེས་ཀྱིས་དེ་ལྟར་ཆོས་ཐམས་ཅད་བེམས་པོ་དང ། ལུག་ལྟར་ལྐུགས་པ་ལྟ་བུས་བྱང་ཆུབ་སྒྲུབ་པར་བྱེད་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྒྲུབ་པར་བྱེད་པ་ཡིན་ཏེ། དེ་ལྟར་ཞུགས་པའི་བྱང་ཆུབ་སེམས་དཔའ་ནི་ལམ་སྒྲུབ་པར་བྱེད་པ་ཡིན་ནོ། །ལྷའི་བུ། གཞན་ཡང ། གང་གི་ཚ་བྱང་ཆུབ་སེམས་དཔའ་འཁོར་བའི་ལམ་ཡང་མི་སྤོང་ལ། མྱ་ངན་ལས་འདས་པའི་ལམ་ཡང་ཚོལ་བར་བྱེད་པ་དང ། ལམ་གྱི་ལས་ཀྱི་རྒྱུན་ཡང་མི་གཅོད་ཅིང་ལམ་གྱི་བྱང་བའང་སྒྲུབ་པར་བྱེད་པ་དང ། ལམ་ངན་པར་ཞུགས་པའི་སེམས་ཅན་རྣམས་ཀྱང་ལམ་ལ་འགོད་པར་བྱེད་པ་དེ་ལྟ་ན་བྱང་ཆུབ་སེམས་དཔའ་ལམ་ལ་གནས་པ་ཡིན་ནོ། །ལྷའི་བུ། གཞན་ཡང ། གང་གི་ཚེ་བྱང་ཆུབ་སེམས་དཔའ་སེམས་ཅན་ཐམས་ཅད་དང་ཆོས་ཐམས་ཅད་བཙལ་ཡང་མི་རྙེད་པ་དང ། བྱང་ཆུབ་ཀྱི་
196a
༄#། །ལམ་སྤོང་བར་མི་བྱེད་པ་དང ། འབྲས་བུ་ཡོད་པ་བསམ་གཏན་བྱེད་པ་དེ་ལྟ་ན་བྱང་ཆུབ་སེམས་དཔའ་བྱང་ཆུབ་ཀྱི་ལམ་ཐོབ་པ་ཡིན་ནོ། །ལྷའི་བུ ། གཞན་ཡང ། གང་གི་ཚེ་བྱང་ཆུབ་སེམས་དཔའ་ཉན་ཐོས་ཀྱི་ལམ་ཡང་རབ་ཏུ་ཤེས་ལ་ཉན་ཐོས་ཀྱི་ལམ་གྱིས་ངེས་པར་འབྱུང་བར་ཡང་མི་བྱེད་པ་དང ། རང་སངས་རྒྱས་ཀྱི་ལམ་ཡང་རབ་ཏུ་ཤེས་ལ་རང་སངས་རྒྱས་ཀྱི་ལམ་གྱིས་ངེས་པར་འབྱུང་བར་མི་བྱེད་པ་དང ། བྱང་ཆུབ་སེམས་དཔའི་ལམ་ཡང་ཐོབ་པར་བྱེད་ལ་ལམ་དེས་ཀྱང་དབང་པོ་ཡོངས་སུ་མ་རྫོགས་པར་ངེས་པར་འབྱུང་བར་མི་བྱེད་པ་དེ་ལྟ་ན་བྱང་ཆུབ་སེམས་དཔའ་ལམ་ལ་གནས་པ་ཡིན་ནོ། །ལྷའི་བུ། གཞན་ཡང ། གང་གི་ཚེ་བྱང་ཆུབ་སེམས་དཔའ་དགེ་བའི་རྩ་བ་ཐམས་ཅད་མངོན་པར་འདུ་བྱེད་པ་དང ། མངོན་པར་འདུ་བྱ་བའི་འབྲས་བུ་དོན་དུ་མི་གཉེར་བ་དང ། མངོན་པར་འདུ་བྱེད་པའི་སྐྱོན་གྱིས་མི་གོས་པ་དང ། དགེ་བའི་རྩ་བ་མངོན་པར་འདུ་བྱ་བ་ཐམས་ཅད་བྱང་ཆུབ་ཏུ་ཡོངས་སུ་བསྔོ་བར་བྱེད་པ་དང ། བྱང་ཆུབ་ཀྱི་ཕྱིར་འཕེལ་བ་ཡང་དག་པར་རྗེས་སུ་མི་མཐོང་བ་དང ། འབྲི་བ་ཡང་དག་པར་རྗེས་སུ་མི་མཐོང་བ་དེ་ལྟ་ན་བྱང་ཆུབ་སེམས་དཔའ་ལམ་ལ་གནས་པ་ཡིན་ནོ། །ལྷའི་བུ། གཞན་ཡང ། གང་གི་ཚེ་བྱང་ཆུབ་སེམས་དཔའ་ལམ་ངན་པ་ལས་ལམ་ཡོངས་
196b
སུ་ཚོལ་བར་བྱེད་པ་དང ། ལམ་ཡོངས་སུ་བཙལ་ནས་ཀྱང་ངེས་པར་འབྱུང་བར་མི་བྱེད་པ་དེ་ལྟ་ན་བྱང་ཆུབ་སེམས་དཔའ་ལམ་ལ་གནས་པ་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ལམ་ངན་པ་ལས་ལམ་ཡོངས་སུ་ཚོལ་བར་བྱེད། འཇམ་དཔལ་གྱིས་སྨྲས་པ། ལྷའི་བུ་ལམ་ངན་པ་ཞེས་བྱ་བ་ནི་འཁོར་བ་སྟེ། བྱང་ཆུབ་སེམས་དཔའ་ནི་དེ་ལ་གནས་ནས་སེམས་ཅན་ངེས་པར་འབྱུང་བའི་ཕྱིར་ལམ་ཡོངས་སུ་ཚོལ་བར་བྱེད་ཀྱི། བདག་ཉིད་ངེས་པར་འབྱུང་བའི་ཕྱིར་ནི་མ་ཡིན་ནོ། །ལྷའི་བུས་སྨྲས་པ། འཇམ་དཔལ། བྱང་ཆུབ་སེམས་དཔའི་སྤྱོད་པ་ནི་འཇིག་རྟེན་ཐམས་ཅད་དང་མི་མཐུན་པ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ། འདི་ལྟར་བྱང་ཆུབ་སེམས་དཔའ་རྣམས་ནི་འཇིག་རྟེན་ན་སྤྱོད་ཀྱང་འཇིག་རྟེན་གྱི་ཆོས་རྣམས་ཀྱིས་མི་གོས་པ་དང ། ཉོན་མོངས་པ་མེད་པ་སྟོན་པར་བྱེད་ཀྱང་ཉོན་མོངས་པ་མེད་པ་ཉིད་དུ་མི་ལྟུང་བ་དང ། རྒ་བ་དང ། འཆི་བ་སྟོན་པར་བྱེད་ཀྱང་ཆོས་ཐམས་ཅད་སྐྱེ་བ་མེད་པ་དང ། འབྱུང་བ་མེད་པར་ཤེས་ཤིང་སྐྱོན་མེད་པ་མངོན་དུ་མི་བྱེད་པ་དང ། ཕུང་པོ་དང ། ཁམས་དང ། སྐྱེ་མཆེད་ལ་ཡོངས་སུ་སྤྱོད་པ་བྱེད་ཀྱང་ཕུང་པོ་དང ། ཁམས་དང ། སྐྱེ་མཆེད་དོན་དུ་མི་གཉེར་བ་དང ། ཕུང་པོ་དང ། ཁམས་དང ། སྐྱེ་མཆེད་ཡོངས་སུ་ཤེས་པར་བྱ་བའི་ཕྱིར་སེམས་ཅན་རྣམས་ལ་
197a
༄#། །ཆོས་སྟོན་ཀྱང་ཡོངས་སུ་ཤེས་པ་དེ་དག་ཡོངས་སུ་ཤེས་པར་མི་བྱེད་པ་དང ། བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པ་དང ། མངོན་པར་སྒྲུབ་པར་བྱེད་ཅིང་སེམས་རྣམ་པར་གཡེངས་པ་རྣམས་ཉེ་བར་འཇོག་པར་བྱེད་ཀྱང་ཉེ་བར་འཇོག་པ་ལ་འབྱུང་བར་མི་བྱེད་པ་དང ། བདུད་ཀྱི་ཡུལ་ཉེ་བར་སྟོན་པར་བྱེད་ཀྱང་བདུད་ཀྱི་ལས་རྣམས་ཀྱིས་མི་འཕྲོགས་པ་དང ། སངས་རྒྱས་ཀྱི་ཡུལ་སྤོང་བར་མི་བྱེད་པ་དང ། བདུད་ཀྱི་ཡུལ་གྱི་རྗེས་སུ་མི་འཇུག་པ་དང།་ཆོས་ཀྱི་དབྱིངས་ཀྱི་ཡུལ་ལས་ལྡོག་པར་མི་བྱེད་པ་དང ། སེམས་ཅན་གྱི་ཁམས་ཀྱི་ཡུལ་ཉེ་བར་ལེན་པར་བྱེད་པས་ན་དེའི་ཕྱིར་སེམས་ཅན་ཆེན་པོ་དེ་དག་གི་སྤྱོད་པ་ནི་འཇིག་རྟེན་ཐམས་ཅད་དང་མི་མཐུན་པ་ཡིན་ནོ། །ལྷའི་བུས་སྨྲས་པ། འཇམ་དཔལ། ཁྱོད་བྱང་ཆུབ་སེམས་དཔའ་རྣམས་ཀྱི་སྤྱོད་པ་ལ་སྤོབས་པར་གྱིས་ཤིག་།འཇམ་དཔལ་གྱིས་སྨྲས་པ། ལྷའི་བུ། བསམ་པ་ཡོངས་སུ་དག་ཅིང་ནང་དང ། ཕྱི་རོལ་དབེན་པ་ཉིད་ཀྱིས་ལྷག་པའི་བསམ་པ་ལ་སྤྱོད་པ་དང ། རབ་ཏུ་སྤྱོད་པ་མེད་པ་ཉིད་ཀྱིས་སྦྱོར་བ་ལ་སྤྱོད་པ་དང ། སེམས་མི་བརྗེད་པ་ཉིད་ཀྱིས་བྱང་ཆུབ་ཀྱི་སེམས་མི་བརྗེད་པ་ལ་སྤྱོད་པ་དང ། སེམས་དུལ་བ་ཉིད་ཀྱིས་སྦྱིན་པ་ལ་སྤྱོད་པ་དང ། སེམས་ཞི་བ་ཉིད་ཀྱིས་
197b
ཚུལ་ཁྲིམས་ལ་སྤྱོད་པ་དང ། རྨས་པ་མེད་པ་ཉིད་ཀྱིས་བཟོད་པ་ལ་སྤྱོད་པ་དང ། ལུས་དབེན་པ་ཉིད་ཀྱིས་བརྩོན་འགྲུས་ལ་སྤྱོད་པ་དང ། ཆོས་ཀྱི་དབྱིངས་རྣམ་པར་གཡེང་བ་མེད་པ་ཉིད་ཀྱིས་བསམ་གཏན་ལ་སྤྱོད་པ་དང ། སྤྲོས་པ་མེད་པ་ཉིད་ཀྱིས་ཤེས་རབ་ལ་སྤྱོད་པ་དང ། སེམས་ཅན་ལ་བདག་མེད་པ་ཉིད་ཀྱིས་བྱམས་པ་ལ་སྤྱོད་པ་དང ། ཉོན་མོངས་པ་ཡོད་པ་མ་ཡིན་པར་རབ་ཏུ་ཞི་བ་ཉིད་ཀྱིས་སྙིང་རྗེ་ལ་སྤྱོད་པ་དང ། རང་བཞིན་གྱིས་རྣམ་པར་གྲོལ་བའི་ཕྱིར་དགའ་བ་ལ་སྤྱོད་པ་དང ། མཐའ་གཉིས་དང་བྲལ་བའི་ཕྱིར་བཏང་སྙོམས་ལ་སྤྱོད་པ་དང ། གཟོད་མ་ནས་མ་སྐྱེས་པའི་ཕྱིར་མི་རྟག་པ་ལ་སོ་སོར་རྟོག་པ་ལ་སྤྱོད་པ་དང ། ཡོངས་སུ་རྟོག་པ་སྡུག་བསྔལ་བའི་ཕྱིར་སྡུག་བསྔལ་ལ་སོ་སོར་རྟོག་པ་ལ་སྤྱོད་པ་དང ། ཕྱིན་ཅི་ལོག་རང་བཞིན་མེད་པའི་ཕྱིར་བདག་མེད་པ་ལ་སོ་སོར་རྟོག་པ་ལ་སྤྱོད་པ་དང ། འདུ་ཤེས་ཡོངས་སུ་ཤེས་པའི་ཕྱིར་ཞི་བ་ལ་སོ་སོར་རྟོག་པ་ལ་སྤྱད་པ་དང ། ཕུང་པོ་སྒྱུ་མ་ལྟ་བུར་ཡོངས་སུ་ཤེས་པའི་ཕྱིར་སྡུག་བསྔལ་ཡོངས་སུ་ཤེས་པ་ལ་སྤྱོད་པ་དང ། མ་རིག་པ་སྔོན་དུ་འགྲོ་བའི་ཕྱིར་ཀུན་འབྱུང་བ་ཤེས་པ་ལ་སྤྱོད་པ་དང ། རང་བཞིན་གྱིས་འགག་པའི་ཕྱིར་འགོག་པ་ཤེས་པ་ལ་སྤྱོད་པ་དང ། འདུས་བྱས་ལ་མངོན་པར་ཞེན་པ་མེད་པའི་ཕྱིར་ལམ་ཤེས་པ་ལ་སྤྱོད་
198a
༄#། །པ་དང ། འབྲས་བུ་ཡོངས་སུ་ཤེས་པ་ཉིད་ཀྱིས་རྒྱུ་ཤེས་པ་ལ་སྤྱོད་པ་དང ། རྟེན་ཅིང་འབྲེལ་བར་འབྱུང་བའི་ཕྱིར་རྐྱེན་ཤེས་པ་ལ་སྤྱོད་པ་དང།་དུ་མའི་ཕྱིར་ཚོགས་པ་ལ་སྤྱོད་པ་དང ། བརྗོད་དུ་མེད་པའི་ཕྱིར་དོན་སོ་སོ་ཡང་དག་པར་རིག་པ་ལ་སྤྱོད་པ་དང ། ཆོས་ཀྱི་དབྱིངས་དབྱེར་མེད་པའི་ཕྱིར་ཆོས་སོ་སོ་ཡང་དག་པར་རིག་པ་ལ་སྤྱོད་པ་དང ། མིང་དང ། གཟུགས་འབྱུང་བ་མེད་པའི་ཕྱིར་ངེས་པའི་ཚིག་སོ་སོ་ཡང་དག་པར་རིག་པ་ལ་སྤྱོད་པ་དང ། སྒྲ་བྲག་ཅ་དང་མཚུངས་པའི་ཕྱིར་སྤོབས་པ་སོ་སོ་ཡང་དག་པར་རིག་པ་ལ་སྤྱོད་པ་དང ། ཚིག་འབྲུ་གསལ་བ་ཉིད་ཀྱིས་དོན་ལ་རྟོན་པ་ལ་སྤྱོད་པ་དང ། རྣམ་པར་ཤེས་པའི་སྤྱོད་ཡུལ་མ་སྤངས་པ་ཉིད་ཀྱིས་ཡེ་ཤེས་ལ་རྟོན་པ་ལ་སྤྱོད་པ་དང ། ལས་ཀྱི་རྣམ་པར་སྨིན་པ་སྟོང་ཉིད་ཀྱིས་ངེས་པའི་དོན་གྱི་མདོ་སྡེ་ལ་རྟོན་པ་ལ་སྤྱོད་པ་དང ། གང་ཟག་ཡོངས་སུ་སྨིན་པར་བྱ་བ་ཉིད་ཀྱིས་ཆོས་ལ་རྟོན་པ་ལ་སྤྱོད་པ་དང ། ལས་རྣམ་པར་དག་པའི་ཕྱིར་ལྷའི་མིག་ལ་སྤྱོད་པ་དང ། ཚུལ་ཁྲིམས་རྣམ་པར་དག་པའི་ཕྱིར་ལྷའི་རྣ་བ་ལ་སྤྱོད་པ་དང ། ཏིང་ངེ་འཛིན་རྣམ་པར་དག་པའི་ཕྱིར་ཕ་རོལ་གྱི་སེམས་ཤེས་པ་ལ་སྤྱོད་པ་དང ། དུས་གསུམ་མཉམ་པ་ཉིད་ཀྱི་ཕྱིར་སྔོན་གྱི་གནས་རྗེས་སུ་དྲན་པ་ཤེས་པ་ལ་སྤྱོད་པ་དང །
198b
སེམས་ལ་དབང་སྒྱུར་བའི་ཕྱིར་རྫུ་འཕྲུལ་མངོན་པར་བསྒྲུབ་པ་ལ་སྤྱོད་པ་དང ། མི་ཕྱེད་པའི་ཕྱིར་སྤྱོད་པ་བརྟན་པ་ལ་སྤྱོད་པ་དང ། མི་ལྷོད་པའི་ཕྱིར་སྤྱོད་པ་སྲ་བ་ལ་སྤྱོད་པ་དང ། བསྐྱོད་དུ་མེད་པའི་ཕྱིར་གནས་མེད་པ་ལ་སྤྱོད་པ་དང ། ཐ་དད་པ་མེད་པ་ཉིད་ཀྱིས་སྤྱོད་པ་མཉམ་པ་ལ་སྤྱོད་པ་དང ། ཐམས་ཅད་རྗེས་སུ་མ་བརྟགས་པའི་ཕྱིར་ས་དང ། ཆུ་དང།་མེ་དང ། རླུང་དང ། ནམ་མཁའ་ལྟ་བུར་སྤྱོད་པ་དང ། རྣམ་པར་བསྒྲུབ་པའི་མཚན་ཉིད་ཀྱི་ཕྱིར་སྒྱུ་མ་ལྟ་བུ་ལ་སྤྱོད་པ་དང ། ཡང་དག་པ་མ་ཡིན་པའི་མཚན་ཉིད་ཀྱིས་རྨི་ལམ་ལྟ་བུ་ལ་སྤྱོད་པ་དང ། རྣམ་པར་རྨོངས་པའི་མཚན་ཉིད་ཀྱིས་སྨིག་རྒྱུ་ལྟ་བུ་ལ་སྤྱོད་པ་དང ། བདག་མི་སྦེད་པའི་མཚན་ཉིད་ཀྱིས་སྟོང་པ་ཉིད་ལ་སྤྱོད་པ་དང ། སེམས་རང་བཞིན་མེད་པའི་མཚན་ཉིད་ཀྱིས་མཚན་མ་མེད་པ་ལ་སྤྱོད་པ་དང ། ཁམས་གསུམ་རང་བཞིན་མེད་པའི་མཚན་ཉིད་ཀྱིས་སྨོན་པ་མེད་པ་ལ་སྤྱོད་པ་དང ། འདུས་བྱས་རང་བཞིན་མེད་པའི་མཚན་ཉིད་ཀྱིས་མངོན་པར་འདུ་བྱེད་པ་མེད་པ་ལ་སྤྱོད་པ་དང ། སེམས་དང ། ཡིད་དང ། རྣམ་པར་ཤེས་པ་འཇུག་པ་མེད་པའི་མཚན་ཉིད་ཀྱིས་བདུད་ཚར་བཅད་པ་ལ་སྤྱོད་པ་དང ། སྤྱོད་པ་ཐམས་ཅད་རྣམ་པར་བསྒྲུབ་པའི་མཚན་ཉིད་ཀྱིས་དཀོན་མཆོག་གསུམ་གྱི་གདུང་རྒྱུན་མི་གཅོད་པ་ལ་སྤྱོད་པ་སྟེ། ལྷའི་བུ། དེ་ལྟར་སྤྱོད་
199a
༄#། །པའི་བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་སྤྱད་པ་ལ་སྤྱོད་པ་ཡིན་ནོ།། །།བམ་པོ་གསུམ་པ་སྟེ་ཐ་མ། ལྷའི་བུས་སྨྲས་པ ། འཇམ་དཔལ། བྱང་ཆུབ་སེམས་དཔའི་སྤྱོད་པ་དེ་ནི། ཉན་ཐོས་དང ། རང་སངས་རྒྱས་ཐམས་ཅད་ལས་ཡང་དག་པར་འདས་པ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ།་དེ་དེ་བཞིན་ཏེ། ལྷའི་བུ། ཁོ་བོ་ནི་བྱང་ཆུབ་སེམས་དཔའ་གང་དད་པས་རྗེས་སུ་འབྲང་བ་མ་ཡིན་པ་དང ། ཆོས་ཀྱིས་རྗེས་སུ་འབྲང་བ་མ་ཡིན་པ་དང ། གང་བརྒྱད་པ་མ་ཡིན་པ་དང ། རྒྱུན་དུ་ཞུགས་པ་མ་ཡིན་པ་དང ། ལན་གཅིག་ཕྱིར་འོང་བ་མ་ཡིན་པ་དང ། ཕྱིར་མི་འོང་བ་མ་ཡིན་པ་དང ། དགྲ་བཅོམ་པ་མ་ཡིན་པ་དང ། གང་ཉན་ཐོས་མ་ཡིན་པ་དང ། རང་སངས་རྒྱས་མ་ཡིན་པ་དང ། གང་སངས་རྒྱས་བཅོམ་ལྡན་འདས་མ་ཡིན་པ་དང ། དེ་བཞིན་གཤེགས་པ་མ་ཡིན་པ་དང ། ཡང་དག་པར་རྫོགས་པའི་སངས་རྒྱས་མ་ཡིན་པ་དང ། སྟོན་པ་མ་ཡིན་པ་དེ་ནི་བྱང་ཆུབ་སེམས་དཔའ་ཡིན་པར་མི་སྨྲའོ། །ལྷའི་བུ། ཁོ་བོ་ནི་བྱང་ཆུབ་སེམས་དཔའ་གང་སོ་སོ་སྐྱེ་བོའི་ཆོས་ཅན་མ་ཡིན་པ་དང ། འདོད་ཆགས་ཀྱི་ཆོས་ཅན་མ་ཡིན་པ་དང ། ཞེ་སྡང་གི་ཆོས་ཅན་མ་ཡིན་པ་དང ། གཏི་མུག་གི་ཆོས་ཅན་མ་ཡིན་པ་དང ། གང་འཁོར་བའི་ཆོས་ཅན་མ་ཡིན་
199b
པ་དང ། ཡོངས་སུ་མྱ་ངན་ལས་འདའ་བའི་ཆོས་ཅན་མ་ཡིན་པ་དེ་ནི་བྱང་ཆུབ་སེམས་དཔའ་ཡིན་པར་མི་སྨྲའོ། །ལྷའི་བུས་སྨྲས་པ། འཇམ་དཔལ། ཅི་ལ་བསམས་ཏེ་དེ་སྐད་སྨྲ།་འཇམ་དཔལ། ཇི་ལྟར་ན་བྱང་ཆུབ་སེམས་དཔའ་དད་པས་རྗེས་སུ་འབྲང་བ་དང ། ཆོས་ཀྱི་རྗེས་སུ་འབྲང་བ་དང ། བརྒྱད་པ་དང ། རྒྱུན་དུ་ཞུགས་པ་དང ། ལན་གཅིག་ཕྱིར་འོང་བ་དང ། ཕྱིར་མི་འོང་པ་དང ། དགྲ་བཅོམ་པ་དང ། ཉན་ཐོས་དང ། རང་སངས་རྒྱས་དང ། སངས་རྒྱས་བཅོམ་ལྡན་འདས་དང ། དེ་བཞིན་གཤེགས་པ་དང ། ཡང་དག་པར་རྫོགས་པའི་སངས་རྒྱས་དང ། སྟོན་པ་དང ། སོ་སོ་སྐྱེ་བོའི་ཆོས་ཅན་དང ། འདོད་ཆགས་ཀྱི་ཆོས་ཅན་དང ། ཞེ་སྡང་གི་ཆོས་ཅན་དང ། གཏི་མུག་གི་ཆོས་ཅན་དང ། འཁོར་བའི་ཆོས་ཅན་དང ། ཡོངས་སུ་མྱ་ངན་ལས་འདའ་བའི་ཆོས་ཅན་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་ལ་དད་པར་བྱེད་པ་དང ། ཆགས་པ་ཐམས་ཅད་ལ་དད་པར་བྱེད་ཀྱང་དེ་ལ་ཆགས་པར་མི་འགྱུར་བ་དང ། གཞན་གྱི་དད་པས་མི་འགྲོ་བ་དང ། ཕ་རོལ་ཏུ་ཕྱིན་པ་དྲུག་གི་ལམ་ལ་དད་པ་སྐྱེད་ཅིང་འཛིན་པར་བྱེད་པ་དང ། ཆགས་པས་ཆགས་པར་གྱུར་པ་རྣམས་ཐར་བར་བྱེད་པ་དང ། ཆགས་པ་མེད་པའི་ཡེ་ཤེས་ཡོངས་སུ་ཚོལ་བར་བྱེད་པ་དང ། འཁོར་བ་
200a
༄#། །ལ་ཆགས་པར་མི་བྱེད་པ་དང ། མྱ་ངན་ལས་འདས་པར་མི་ལྟུང་བ་དེ་ཙམ་གྱིས་ན། ལྷའི་བུ། བྱང་ཆུབ་སེམས་དཔའ་དད་པས་རྗེས་སུ་འབྲང་བ་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ཆོས་ཀྱི་རྗེས་སུ་འབྲང་བ་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སངས་རྒྱས་ཐམས་ཅད་ཀྱིས་གསུངས་པ་འཛིན་པར་བྱེད་པ་དང ། ཀུན་འཛིན་པར་བྱེད་པ་དང ། ཆོས་ཀྱི་ཟས་དང་ལྡན་ཞིང་ཟང་ཟིང་གི་ཟས་མེད་པ་དང ། ཆོས་ལ་གནས་ཀྱི་ཉོན་མོངས་པ་ལ་མི་གནས་པ་དང ། ཆོས་ཀྱི་སྟོབས་ཅན་ཡིན་གྱི་ང་རྒྱལ་གྱི་སྟོབས་ཅན་མ་ཡིན་པ་དང ། ཆོས་སྨྲ་བ་ཡིན་གྱི་འཇིག་རྟེན་རྒྱང་པན་པའི་གཏམ་སྨྲ་བ་མ་ཡིན་པ་དང ། ཆོས་ཀྱི་དབང་ཕྱུག་ཡིན་གྱི་ཉོན་མོངས་པའི་དབང་ཕྱུག་མ་ཡིན་པ་དང ། ཆོས་ལ་རྟོན་པ་ཡིན་གྱི་གང་ཟག་ལ་རྟོན་པ་མ་ཡིན་པ་དང ། ཆོས་སྨྲ་བ་ཡིན་གྱི་ཆོས་མ་ཡིན་པར་མི་སྨྲ་བ་དང ། ཆོས་ཀྱི་རྗེས་སུ་མཐུན་པའི་ཆོས་ལ་རྟོན་པ་ཡིན་གྱི་བརྩོན་པ་བཏང་བའི་ཆོས་ལ་མི་གནས་པ་དང ། ཆོས་སྐྱོན་མེད་པ་ཉིད་དུ་ཆོས་ཐམས་ཅད་ཤེས་པར་བྱེད་པ་དང ། གཟུངས་ཀྱི་སྒོ་ཆགས་པ་མེད་པ་དང་ལྡན་པ་དང ། ནོར་བདུན་དང་ལྡན་པ་དང ། དམ་པའི་ཆོས་ཡོངས་སུ་འཛིན་པར་བྱེད་པ་
200b
དང།་ཆོས་ཀྱི་ཁྱད་པར་ལ་གནས་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་ཆོས་ཀྱི་རྗེས་སུ་འབྲང་བ་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་བརྒྱད་པ་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་ལོག་པ་ཉིད་བརྒྱད་ལས་ཡང་དག་པར་འདས་པ་དང ། ཡང་དག་པ་ཉིད་བརྒྱད་ལ་རབ་ཏུ་གནས་པ་དང ། ལམ་ཡན་ལག་བརྒྱད་པ་རྣམ་པར་སྦྱང་བ་ལ་མཁས་པ་དང ། སྦྱོར་བ་ཡོངས་སུ་མ་རྫོགས་པར་ལམ་དེས་ངེས་པར་འབྱུང་བར་མི་བྱེད་པ་དང ། མི་ཁོམ་པ་བརྒྱད་དུ་སྐྱེས་པའི་སེམས་ཅན་རྣམས་དལ་བ་ཕུན་སུམ་ཚོགས་པ་དག་ལ་འགོད་པར་བྱེད་པ་དང ། སྐྱེས་བུ་དམ་པའི་རྣམ་པར་རྟོགས་པ་བརྒྱད་ལ་གནས་པ་དང ། རྣམ་པར་ཐར་པ་བརྒྱད་ལ་བསམ་གཏན་བྱེད་པ་དང ། བྱང་ཆུབ་སེམས་དཔའི་ལྷག་པའི་བསམ་པ་མི་སྤོང་བ་དེ་ལྟ་ན། ལྷའི་བུ། བྱང་ཆུབ་སེམས་དཔའ་བརྒྱད་པ་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན། བྱང་ཆུབ་སེམས་དཔའ་རྒྱུན་དུ་ཞུགས་པ་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་ཅན་རྒྱུན་ཕྱོགས་སུ་དེད་པ་རྣམས་རྒྱུན་ལས་ཟློག་པར་བྱེད་པ་དང ། འཁོར་བའི་རྒྱུན་ཐམས་ཅད་ཀྱང་གཅོད་པར་བྱེད་ལ་འཁོར་བ་མི་གཅོད་པ་དང ། ངན་སོང་ཐམས་ཅད་
201a
༄#། །རྒྱུན་གཅོད་པར་བྱེད་པ་དང ། སེམས་ཅན་རྣམས་བདེ་འགྲོ་དང་མྱ་ངན་ལས་འདས་པ་མངོན་དུ་བྱ་བའི་ལམ་ལ་འགོད་པར་བྱེད་པ་དང ། མཚམས་བཅད་པ་དང ། ལྷ་དང ། མི་ལ་གཞོལ་བ་དང ། བདེན་པ་སྟོན་པར་བྱེད་པ་དང ། རློམ་སེམས་སུ་མི་ལྟུང་བ་དང ། ཐེ་ཚོམ་དང་བྲལ་བ་དང ། ངེས་པ་དང ། སངས་རྒྱས་ཀྱི་ཆོས་ལ་གཞོལ་བ་དང ། སོ་སོ་སྐྱེ་བོའི་ལམ་ལས་ཡང་དག་པར་འདས་པ་དང ། སངས་རྒྱས་ཀྱི་ཆོས་ཀྱི་ལམ་ལ་རབ་ཏུ་གནས་པ་དང ། འཁོར་བའི་གཏིང་རྙེད་པ་དང ། མྱ་ངན་ལས་འདས་པ་ལ་མངོན་དུ་ཕྱོགས་པར་གྱུར་པ་དང ། འཇིག་རྟེན་གྱི་སྦྱིན་གནས་སུ་གྱུར་པ་དང ། འདུས་བྱས་ལ་སྣང་བ་དང ། འདུས་མ་བྱས་པས་རབ་ཏུ་ཕྱེ་བ་དང ། ཕྱིར་ལྡོག་པར་མི་འགྱུར་བ་དང ། དགེ་འདུན་ལ་ཡང་དག་པར་གཞོལ་བ་དེ་ལྟ་ན། ལྷའི་བུ། བྱང་ཆུབ་སེམས་དཔའ་རྒྱུན་དུ་ཞུགས་པ་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ལན་གཅིག་ཕྱིར་འོང་བ་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་ཆོས་ཐམས་ཅད་འོང་བ་མེད་པ་དང ། འགྲོ་བ་མེད་པར་ཤེས་ནས་སེམས་ཅན་ཡོངས་སུ་སྨིན་པར་བྱ་བའི་ཕྱིར་བསམ་བཞིན་དུ་འོང་བ་དང ། སེམས་ཅན་རྣམས་ཡོངས་སུ་སྨིན་པར་བྱེད་པ་དང ། འོང་བ་དང ། འགྲོ་བར་སྟོན་པར་བྱེད་པ་དང །
201b
ཆོས་ཉིད་ལ་འོང་བ་དང ། འགྲོ་བ་མེད་པར་མཐོང་བ་དང ། འོང་ཡང་ཉོན་མོངས་པ་མེད་པས་འོང་བ་དང ། རང་གི་ལས་ཡོངས་སུ་དག་པས་འགྲོ་བ་དང ། འོང་བ་མཉམ་པ་ཉིད་མི་སྤོང་བ་དང ། བདུད་ཀྱི་དབང་གིས་མི་འགྲོ་བ་དང ། བྱང་ཆུབ་ཀྱི་ལམ་ཉེ་བར་སྟོན་པའི་ཕྱིར་འོང་བ་དང ། ཉེ་བར་བླངས་པའི་སེམས་ཅན་བསྒྲལ་བའི་ཕྱིར་འོང་བ་དང ། བྱང་ཆུབ་ཀྱི་ལྷག་པའི་བསམ་པ་སྲ་ཞིང་མི་ཕྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་ལན་གཅིག་ཕྱིར་འོང་བ་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ཕྱིར་མི་འོང་བ་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་ལྟ་བ་རྣམས་དང ། ཕྱིན་ཅི་ལོག་རྣམས་དང ། སྒྲིབ་པ་རྣམས་སུའང་མི་འོང་བ་དང ། འདུན་པ་དང ། འདོད་ཆགས་དང ། ཞེ་སྡང་དང ། འཇིགས་པ་དང ། གཏི་མུག་གིས་ཀྱང་འོང་བ་དང ། འགྲོ་བར་མི་འགྱུར་བ་དང ། བྱས་པ་ངེས་པར་མ་གྱུར་ཅིང་སངས་རྒྱས་ཀྱི་ཆོས་རྣམས་མ་རྫོགས་པར་མི་འོང་བ་དང ། འོང་བ་མེད་པ་དང ། འཕོ་བ་མེད་པ་ལ་མཁས་པ་དང ། རྒ་ཤི་མེད་པ་ལ་ཐོབ་པ་དང ། མཐར་གནས་པ་དང ། བྱས་པ་ངེས་པ་དང ། ལུང་བསྟན་པ་ཐོབ་པ་དང ། དམིགས་སུ་མེད་པ་དང ། རྣམ་པ་མེད་པ་ཐོབ་པ་དང ། ཤེས་པས་གཞན་ལ་རག་མ་ལས་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་
202a
༄#། །ཕྱིར་མི་འོང་བ་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་དགྲ་བཅོམ་པ་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་ཆགས་པ་མེད་ཅིང་འདོད་ཆགས་གདུལ་བའི་ཕྱིར་སེམས་ཅན་རྣམས་ལ་ཆོས་སྟོན་པ་དང ། སྡང་བ་མེད་ཅིང་ཞེ་སྡང་གདུལ་བའི་ཕྱིར་སེམས་ཅན་རྣམས་ལ་ཆོས་སྟོན་པ་དང ། རྨོངས་པ་མེད་ཅིང་གཏི་མུག་གདུལ་བའི་ཕྱིར་སེམས་ཅན་རྣམས་ལ་ཆོས་སྟོན་པ་དང ། ཆོས་ཐམས་ཅད་ལ་ཉོན་མོངས་པ་མེད་པར་གནས་པ་དང ། སེམས་ཅན་ཐམས་ཅད་ལ་སེམས་མ་བཏང་བ་དང ། སངས་རྒྱས་ཀྱི་ཆོས་ཐམས་ཅད་ལ་བརྩོན་འགྲུས་བརྩམས་པ་དང ། འདོད་པའི་ལོངས་སྤྱོད་ཐམས་ཅད་ལ་དགའ་བ་མེད་པས་དགའ་བ་དང ། དགྲ་བཅོམ་པ་དང ། པདྨ་བཞིན་དུ་ཉོན་མོངས་པ་ཐམས་ཅད་ཀྱིས་མ་གོས་པ་དང ། ཤེས་པས་འཕགས་པ་དང་མཉམ་པ་དང ། ཐབས་ཀྱིས་འཕགས་པ་མ་ཡིན་པར་གནས་པ་དང ། ཉེ་བར་ལེན་པ་ཐམས་ཅད་ལ་བདག་གིར་མེད་ཅིང་ཡོངས་སུ་འཛིན་པ་མེད་པ་དང ། སངས་རྒྱས་ཀྱི་ཆོས་ཐམས་ཅད་ལ་བདག་གིར་བྱེད་ཅིང་ཡོངས་སུ་འཛིན་པ་དང ། རང་གི་སེམས་ཀྱི་རྒྱུད་དག་ལ་ཟག་པ་མེད་པའི་སེམས་དང་ལྡན་པ་དང ། གཞན་གྱི་སེམས་ཀྱི་རྒྱུད་དག་ལ་ཟག་པ་མེད་པར་གནས་པར་
202b
བྱེད་པ་དང ། སྔོན་དམ་བཅས་པ་དག་ལ་བརྣག་པ་ཡོངས་སུ་རྫོགས་པ་དང ། ཚུ་རོལ་དང ། ཕ་རོལ་ལ་གནས་པ་རྣམས་ཀྱི་ཕ་རོལ་ཏུ་སོན་པ་དང ། ཚུ་རོལ་གྱི་གནས་མ་སྤངས་པ་དང ། གཞན་གྱིས་སེམས་ཅན་གཞན་ཐར་བར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་དགྲ་བཅོམ་པ་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ཉན་ཐོས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་ཅན་ཐམས་ཅད་ལ་མ་ཐོས་པའི་ཆོས་སྒྲོགས་པར་བྱེད་ཅིང་ཡུལ་རྣམས་ལ་སྤྱོད་པར་མི་བྱེད་པ་དང ། ཡང་དག་པའི་དམ་པའི་ཆོས་དང ། སྐྱེ་བ་མེད་པ་དང ། འགག་པ་མེད་པའི་ཆོས་སྒྲོགས་པར་བྱེད་པ་དང ། རྒྱུ་དང ། རྐྱེན་དང ། བདག་མེད་པ་དང ། སེམས་ཅན་མེད་པ་དང ། རང་བཞིན་གྱིས་གཡོ་བ་མེད་པ་སྒྲོགས་པར་བྱེད་པ་དང ། སངས་རྒྱས་ཀྱི་ཆོས་ཚད་མེད་པ་དང ། ནམ་མཁའ་དང་མཉམ་པའི་ཆོས་རྣམས་སྒྲོགས་པར་བྱེད་པ་དང ། སངས་རྒྱས་ཀྱི་ཡེ་ཤེས་དང ། ཡེ་ཤེས་ཆེན་པོ་ལ་ཆོས་ཐམས་ཅད་རྒྱུས་ཉེ་བར་འགྲོ་བར་རྩོམས་ཤིག་ཅེས་སྒྲོགས་པར་བྱེད་པ་དང ། སྒྲོགས་པའང་གཞན་གྱི་དྲིང་མི་འཇོག་པ་དང ། ཐོས་པས་ཀྱང་རློམ་སེམས་མི་བྱེད་པ་དང ། སྒྲོགས་པ་ཐམས་ཅད་ཀྱི་སྔོན་དང ། ཕྱི་མའི་མཐའ་མི་ཆད་པ་ཡོངས་སུ་ཤེས་པ་དང ། སོ་སོ་ཡང་དག་པར་རིག་
203a
༄#། །པ་མི་ཟད་པ་ཐོབ་པ་དང ། དོན་དང ། ཚིག་དང ། ཡིག་འབྲུ་མི་ཟད་པ་དང ། སེམས་ཅན་ཐམས་ཅད་ཀྱི་སེམས་དང ། སྤྱོད་པ་དང ། ཤེས་པ་སྟོན་པར་བྱེད་པ་དང ། སོ་སོ་ཅི་རིགས་པར་ཆོས་སྟོན་པར་བྱེད་པ་དང ། ཞི་བའི་ས་ལ་གནས་པ་དང ། སྤྲོས་པ་མེད་པ་དང ། སྔོན་གྱི་སྨོན་ལམ་གྱི་སྤྱོད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་ཉན་ཐོས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་རང་སངས་རྒྱས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་ཆོས་ཐམས་ཅད་རྐྱེན་ལ་རག་ལས་པ་དང ། སེམས་ཅན་མེད་པ་དང ། སྲོག་མེད་པ་དང ། གང་ཟག་མེད་པ་དང ། བདག་པོ་མེད་པ་དང ། རྣམ་པར་བསྒྲུབ་པ་ཉེ་བར་གནས་པའི་མཚན་ཉིད་དུ་ཤེས་པ་དང ། དེས་རྐྱེན་རྣམས་ལེགས་པར་མཐོང་བའི་ཕྱིར་བྱང་ཆུབ་འདྲེན་པར་བྱེད་པའི་རྐྱེན། འདི་ལྟ་སྟེ། ཕ་རོལ་ཏུ་ཕྱིན་པ་ཐམས་ཅད་ཀྱི་ཕྱོགས་དང ། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱི་ཕྱོགས་དང ། བསྡུ་བའི་དངོས་པོ་བཞིའི་ཕྱོགས་དང ། ཚད་མེད་པ་བཞིའི་ཕྱོགས་དང ། མངོན་པར་ཤེས་པའི་ཕྱོགས་ཡང་དག་པར་སྒྲུབ་པར་བྱེད་པ་དང ། དེ་རྐྱེན་ཉེ་བར་སྒྲུབ་པར་བྱེད་གཞན་གྱི་དྲིང་མི་འཇོག་པས་བྱང་ཆུབ་མངོན་པར་རྫོགས་པར་འཚང་རྒྱ་བར་བྱེད་པ་དང ། ས་ངན་པ་དག་ལས་
203b
སེམས་སྐྱོ་བར་བྱེད་པ་དང ། ཉེ་ཆེ་བའི་ཤེས་པ་འདུལ་བ་ལ་མཁས་པ་དང ། ཐེག་པ་ཆེན་པོ་ལ་ལེགས་པར་རབ་ཏུ་གནས་པ་དང ། ཆོས་ཐམས་ཅད་ལ་མངོན་དུ་གྱུར་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་རང་སངས་རྒྱས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སངས་རྒྱས་ཡིན། འཇམ་དཔལ་གྱིས་སྨྲས་པ།་ལྷའི་བུ། གང་གི་ཚེ་བྱང་ཆུབ་སེམས་དཔའ་ཆོས་ཐམས་ཅད་གཟོད་མ་ནས་དབེན་པ་ཉིད་དུ་རྟོགས་པར་བྱེད་པ་དང ། སེམས་ཅན་ཐམས་ཅད་གཟོད་མ་ནས་བདག་མེད་པ་ཉིད་དུ་རྟོགས་པར་བྱེད་པ་དང ། མིང་མངོན་པར་རྟོགས་པར་བྱ་བའི་ཕྱིར་སྤྱོད་པ་དམན་པ་དང ། མཆོག་དང ། བར་མ་ཐམས་ཅད་རྟོགས་པར་བྱེད་པ་དང ། རང་གི་ཉོན་མོངས་པ་སྟོང་པ་ཉིད་ཀྱིས་ཉོན་མོངས་པ་ཐམས་ཅད་རྟོགས་པར་བྱེད་པ་དང ། སྐད་ཅིག་གཅིག་ལ་རྗེས་སུ་རྟོགས་པའི་རིམ་གྱིས་ས་དང་སྤྱོད་པ་སྣ་ཚོགས་སྟོན་པར་བྱེད་པ་དང ། སེམས་ཅན་གྱི་དབང་པོ་དང ། མོས་པས་ཆོས་སྟོན་པར་བྱེད་པ་དང ། འབྲས་བུ་ཡོད་པར་ཆོས་སྟོན་པར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སངས་རྒྱས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པ་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་དེ་བཞིན་
204a
༄#། །གཤེགས་པའི་ལམ་དུ་འགྲོ་བ་དང ། དེ་བཞིན་ཉིད་མ་བརྗོད་པ་དང ། དེ་བཞིན་ཉིད་ལ་རབ་ཏུ་གནས་པ་དང ། དེ་བཞིན་ཉིད་ཀྱི་སྦྱིན་པ་དང ། དེ་བཞིན་ཉིད་ཀྱི་ཚུལ་ཁྲིམས་དང ། དེ་བཞིན་ཉིད་ཀྱི་བཟོད་པ་དང ། དེ་བཞིན་ཉིད་ཀྱི་བརྩོན་འགྲུས་དང ། དེ་བཞིན་ཉིད་ཀྱི་བསམ་གཏན་དང ། དེ་བཞིན་ཉིད་ཀྱི་ཤེས་རབ་དང ། དེ་བཞིན་ཉིད་ཀྱི་ཐབས་དང ། དེ་བཞིན་ཉིད་ཀྱི་སྨོན་ལམ་དང ། དེ་བཞིན་ཉིད་ཀྱི་སྟོབས་དང ། དེ་བཞིན་ཉིད་ཀྱི་ཡེ་ཤེས་དང་ལྡན་པ་དང ། དེ་བཞིན་ཉིད་ཀྱི་སེམས་ཅན་མེད་པ་དང ། སེམས་ཅན་ཡོངས་སུ་ཐར་བར་བྱེད་པ་དང ། སེམས་ཅན་གྱི་གནས་དང ། འཁོར་བ་ནའང་སྤྱོད་ལ་སྤྱོད་པ་ཐམས་ཅད་ལས་ཀྱང་ཡང་དག་པར་འདས་པ་དང ། སྤྱོད་པ་ལས་སྒྲོལ་བར་བྱེད་པ་དང ། དེ་ནའང་ཡིན་ལ་དེ་ནའང་མ་ཡིན་པ་དང ། འདི་ནའང་ཡིན་ལ་འདི་ནའང་མ་ཡིན་པ་དང ། གཉིས་ཀ་ལས་དག་པ་དང ། མུན་པ་དང་བྲལ་བ་དང ། རྟག་ཏུ་གསལ་བ་དང ། མུན་པ་མེད་པ་དང ། མུན་པའི་ལིང་ཏོག་དང་བྲལ་བ་དང ། དེ་བཞིན་ཉིད་ཀྱི་རྗེས་སུ་སོང་བ་དང ། དེ་བཞིན་གཤེགས་པའི་སའི་རྗེས་སུ་སོང་བ་དེ་ལྟར་ན།་ལྷའི་བུ། བྱང་ཆུབ་སེམས་དཔའ་དེ་བཞིན་གཤེགས་པ་ཞེས་བྱའོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་བཅོམ་ལྡན་འདས་ཞེས་
204b
གྱི། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་ཉོན་མོངས་པ་བཅོམ་པ་དང ། ཆུ་བོ་ལས་བརྒལ་བ་དང ། སྲིད་པ་མཐོང་བ་དང ། སེམས་ཅན་ཐམས་ཅད་ཀྱི་ཁུར་དང ། སྲིད་པ་འཇོམས་པ་དང ། སྲིད་པའི་འདུ་ཤེས་དང་བྲལ་བ་དང ། བདུད་བཅོམ་པ་དང ། །ཁུར་བོར་བ་དང ། སྲིད་པའི་འགྲོ་བར་འཆི་འཕོ་བ་དང ། སྐྱེ་བ་ཤེས་པ་དང ། བྱ་བ་ཤེས་པ་དང ། སྲིད་པའི་འདོད་ཆགས་བསལ་བ་དང ། ལུས་དང་སེམས་བསྒོམས་པ་དང ། ཚུལ་ཁྲིམས་དང ། ཤེས་རབ་བསྒོམས་པ་དང ། སྲིད་པའི་སྐྱོན་ལེགས་པར་མཐོང་བ་དང ། སྲིད་པའི་སྲེད་པ་དང་བྲལ་བ་དང ། སེམས་ཅན་ལ་བསམ་པ་མ་བཏང་པ་དང ། སྲིད་པའི་རྒྱ་མཚོ་ལས་སྒྲོལ་བ་དང ། ཆུ་ལོན་དང ། ཟམ་པ་ལེགས་པར་བྱས་པ་དང ། མི་གནས་པས་ལེགས་པར་མཐོང་བ་དང ། རྟག་ཏུ་སྒོམ་པ་ལ་ཡིད་ཀྱིས་བརྩོན་པ་དང ། སེམས་ཅན་གྱི་སྲིད་པ་ཟད་པར་བྱེད་པ་དང ། སྲིད་པ་ཐམས་ཅད་ལས་རྣམ་པར་ལོག་པ་དང ། ཐབས་ལ་མཁས་པ་དང ། ཉོན་མོངས་པ་ཐམས་ཅད་ཐལ་བར་རློག་པར་བྱེད་པ་དང ། སྲིད་པས་རྣམ་པར་རྩེ་བ་ལ་མཁས་པ་དང ། སྲིད་པ་གསུམ་ན་ཡོད་པ་རྣམས་ཀྱིས་མཆོད་པ་དེ་ལྟར་ན། ལྷའི་བུ། བྱང་ཆུབ་སེམས་དཔའ་བཅོམ་ལྡན་འདས་ཞེས་བྱའོ། །ལྷའི་བུས་སྨྲས་པ། འཇམ་དཔལ། དེ་ལྟར་ན་བྱང་ཆུབ་སེམས་དཔའ་ཡང་དག་པར་རྫོགས་
205a
༄#། །པའི་སངས་རྒྱས་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་མཚམས་མེད་པ་གང་དང་མཉམ་པ་བྱང་ཆུབ་ཀྱང་དེ་དང་མཉམ་པས་མཉམ་པ་ཉིད་དུ་མངོན་པར་རྫོགས་པར་བྱང་ཆུབ་པར་བྱེད་པ་དང ། ལྟ་བའི་རྣམ་པ་རྣམས་དང ། ཕྱིན་ཅི་ལོག་རྣམས་དང ། སྒྲིབ་པ་རྣམས་དང ། ཆོད་པ་རྣམས་དང།་ཀུན་ནས་ལྡང་བ་རྣམས་གང་དང་མཉམ་པ་བྱང་ཆུབ་ཀྱང་དེ་དང་མཉམ་པས་མཉམ་པ་ཉིད་དུ་མངོན་པར་རྫོགས་པར་བྱང་ཆུབ་པར་བྱེད་པ་དང ། འདོད་ཆགས་དང ། ཞེ་སྡང་དང།་གཏི་མུག་དང་མཉམ་པ་དང ། ཉོན་མོངས་པ་ཐམས་ཅད་གང་དང་མཉམ་པ་བྱང་ཆུབ་ཀྱང་དེ་དང་མཉམ་པས་མཉམ་པ་ཉིད་དུ་མངོན་པར་རྫོགས་པར་བྱང་ཆུབ་པར་བྱེད་པ་དང།་སོ་སོའི་སྐྱེ་བོའི་ཆོས་རྣམས་དང ། སློབ་པའི་ཆོས་རྣམས་དང ། ཉན་ཐོས་ཀྱི་ཆོས་རྣམས་དང ། རང་སངས་རྒྱས་ཀྱི་ཆོས་རྣམས་དང ། བྱང་ཆུབ་སེམས་དཔའི་ཆོས་རྣམས་གང་དང་མཉམ་པ་བྱང་ཆུབ་ཀྱང་དེ་དང་མཉམ་པས་མཉམ་པ་ཉིད་དུ་མངོན་པར་རྫོགས་པར་བྱང་ཆུབ་པར་བྱེད་པ་དང ། མཉམ་པ་ཉིད་རྣམ་པར་འཁྲུག་པར་མི་བྱེད་པ་དང ། རྣམ་པར་ཐར་པའི་སྒོ་གསུམ་མཉམ་པ་ཉིད་ཀྱིས་མཉམ་པ་ཉིད་དུ་ལྟ་བར་བྱེད་པ་དང ། ཆོས་ཐམས་ཅད་གཟོད་མ་ནས་དག་པའི་ཕྱིར་རྐྱེན་ལ་རག་ལས་པ་དང ། ཡོད་པ་མ་ཡིན་པའི་
205b
ཡོངས་སུ་རྟོག་པས་ཀུན་ནས་བསླང་བ་ནམ་མཁའ་དང་མཉམ་པ་ཉིད་དུ་མངོན་པར་རྫོགས་པར་བྱང་ཆུབ་པར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་ཡང་དག་པར་རྫོགས་པའི་སངས་རྒྱས་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སྟོན་པ་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་གང་ལ་སྟོན་པ་དང ། རབ་ཏུ་སྟོན་པ་དང ། རྗེས་སུ་སྟོན་པར་བྱེད་པ་དེ་དག་ཐམས་ཅད་མི་གཡོ་བའི་ཆོས་ཅན་དུ་འགྱུར་བ་དང ། བསྟན་པ་ཡོངས་སུ་འཛིན་པར་འགྱུར་བ་དང ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་སྟོན་པ་དང ། རབ་ཏུ་སྟོན་པ་དང ། སྟོན་པ་གཅིག་པུར་འགྱུར་བ་དང ། སེམས་ཅན་ཐམས་ཅད་ཀྱི་སྐྱབས་དང ། གླིང་དང ། དཔུང་གཉེན་དུ་འགྱུར་བ་དང ། མཚན་མ་ཐམས་ཅད་ཞི་བ་དང ། རབ་ཏུ་ཞི་བ་དང ། ཉེ་བར་ཞི་བར་འགྱུར་བ་དང ། ཐེ་ཚོམ་དང་བྲལ་བ་དང ། སེམས་ཅན་ཐམས་ཅད་ཀྱི་ཐེ་ཚོམ་གཅོད་པ་ལ་མཁས་པ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་གྱིས་ཕྱག་བྱས་པ་དང ། ཡང་དག་པར་སྨྲ་བ་དང ། ཁམས་གསུམ་པས་ཕྱག་བྱས་པ་དང ། སེམས་ནམ་མཁའ་དང་མཉམ་ཞིང་ཁེངས་པ་མེད་པ་དང ། ཡང་དག་པའི་མཐའ་ལེགས་པར་མཐོང་བའི་ཕྱིར་སྨད་པ་དང ། བརྡེག་པ་དང ། དགོད་པ་དང ། བཤུང་བ་དང ། ཁྲོ་བ་དང ། སྤྱོ་བ་དང །
206a
༄#། །བསྡིགས་པ་ཐམས་ཅད་དང ། རློམ་སེམས་ཐམས་ཅད་ཀྱིས་ཞུམ་པར་མི་འགྱུར་བ་དང ། སེམས་ཅན་གྱི་རང་བཞིན་ལེགས་པར་མཐོང་བའི་ཕྱིར་སེམས་ཅན་ཐམས་ཅད་ལ་ཕན་ཞིང་སྙིང་བརྩེ་བ་དང ། འཇིག་རྟེན་ལ་སྟོན་པར་གྲགས་པར་འགྱུར་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སྟོན་པ་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སོ་སོ་སྐྱེ་བོའི་ཆོས་ཅན་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་ཐབས་ཀྱི་སོ་སོ་སྐྱེ་བོའི་སྤྱོད་པ་ཐམས་ཅད་ཀྱང་སྟོན་པར་བྱེད་ལ་ཤེས་པས་སོ་སོ་སྐྱེ་བོའི་སྤྱོད་པ་ཐམས་ཅད་ལ་ཆགས་པར་ཡང་མི་འགྱུར་བ་དེ་ལྟ་ན། ལྷའི་བུ། བྱང་ཆུབ་སེམས་དཔའ་སོ་སོ་སྐྱེ་བོའི་ཆོས་ཅན་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་འདོད་ཆགས་ཀྱི་ཆོས་ཅན་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་རྟག་ཏུ་སངས་རྒྱས་ཀྱི་ཆོས་རྣམས་ལ་རྗེས་སུ་ཆགས་པར་འགྱུར་བ་དང ། རྟག་ཏུ་སངས་རྒྱས་ཀྱི་སྐུ་ལ་ཀུན་ཏུ་ཆགས་པར་འགྱུར་བ་དང ། བསམ་གཏན་དང ། ཏིང་ངེ་འཛིན་དང ། སྙོམས་པར་འཇུག་པ་བསྒྲུབ་པའི་ཕྱིར་རྟག་ཏུ་དགོན་པར་གནས་པ་ལ་རྗེས་སུ་ཆགས་པར་འགྱུར་པ་དང ། སེམས་ཅན་རྣམས་བསྡུ་བའི་དངོས་
206b
པོ་བཞིས་བསྡུ་བ་ལ་རྟག་ཏུ་རྗེས་སུ་ཆགས་པར་འགྱུར་བ་དང ། སེམས་ཅན་ཐམས་ཅད་ལ་ཞེ་འགྲས་པའི་སེམས་མེད་པར་འགྱུར་བ་དེ་ལྟ་ན། ལྷའི་བུ། བྱང་ཆུབ་སེམས་དཔའ་འདོད་ཆགས་ཀྱི་ཆོས་ཅན་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ཞེ་སྡང་གི་ཆོས་ཅན་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་འདུས་བྱས་རྣམས་ལ་གཅིག་ཏུ་ཉེས་པའི་སྐྱོན་ཆགས་པར་ལྟ་བར་བྱེད་པ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་ལ་སྡང་བར་བྱེད་པ་དང ། ཉོན་མོངས་པ་ཐམས་ཅད་དང ། འདུ་བྱེད་ཐམས་ཅད་ལ་སྐྱོན་དུའང་འདུ་ཤེས་ལ་ཉོན་མོངས་པ་རྣམས་དང་འདུ་བྱེད་རྣམས་སྤོང་བར་ཡང་མི་བྱེད་པ་དང ། སེམས་ཅན་ཡོངས་སུ་སྨིན་པར་བྱ་བའི་ཕྱིར་བརྩོན་འགྲུས་རྒྱུན་གཅོད་པར་མི་བྱེད་པ་དང ། སྙིང་རྗེ་ཆེན་པོས་ཡང་དག་པར་ཟིན་པའི་ཡིད་ཀྱིས་སྙིང་བརྩེ་བ་རྒྱ་ཆེན་པོ་ཡང་དག་པར་སྐྱེད་པར་བྱེད་པ་དང ། སེམས་ཅན་ཡོངས་སུ་སྨིན་པར་བྱ་བའི་ཕྱིར་སེམས་ཅན་ཉོན་མོངས་པའི་འདམ་རྫབ་ལས་འབྱིན་བར་བྱེད་པ་དང ། སེམས་ཅན་ཞེ་སྡང་ཅན་རྣམས་ལ་བཟོད་པ་ཉེ་བར་བསྒྲུབ་པར་བྱེད་ཅིང་ཉོན་མོངས་པ་རྣམས་ལ་ཉེས་པ་སྦྱིན་པར་བྱེད་པ་དང ། འཆི་འཕོའི་ཐབས་ཐམས་ཅད་དང ། འཁོར་བ་སུན་འབྱིན་པར་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་
207a
༄#། །ཞེ་སྡང་གི་ཆོས་ཅན་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་གཏི་མུག་གི་ཆོས་ཅན་ཡིན། འཇམ་དཔལ་གྱིས་སྨྲས་པ། ལྷའི་བུ། གཏི་མུག་ཅེས་བྱ་བ་ནི་གང་ཅུང་ཟད་ཀྱང་མི་ཤེས་པ་ཡིན་པས་དེ་ལ་གང་གི་ཚེ་བྱང་ཆུབ་སེམས་དཔའ་ཆོས་ཀྱི་ངོ་བོ་ཉིད་ལ་སྙོམས་པར་ཞུགས་པ་དེ་ཤེས་པར་མི་བྱེད། རྣམ་པར་ཤེས་པར་མི་བྱེད། ཀུན་ཏུ་ཤེས་པར་མི་བྱེད། ལེན་པར་མི་བྱེད། སྤོང་བར་མི་བྱེད། འབྱུང་བར་མི་བྱེད། འཇིག་པར་མི་བྱེད། གཡོ་བར་མི་བྱེད། རློམ་སེམས་སུ་མི་བྱེད། སྐྱོད་པར་མི་བྱེད། ཆོས་ཀྱི་རང་བཞིན་གྱིས་འགོག་པ་ལ་སྙོམས་པར་ཞུགས་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་གཏི་མུག་གི་ཆོས་ཅན་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་འཁོར་བའི་ཆོས་ཅན་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་ཁོར་བ་ལས་ཀྱང་མི་གཡོ་ལ་དེ་ཉིད་ལས་སངས་རྒྱས་ཀྱི་ཆོས་རྣམས་ཚོལ་བར་ཡང་བྱེད་པ་དང ། བདུད་ཐམས་ཅད་དང་ཐུན་མོང་མ་ཡིན་ཞིང་སྤྱོད་པ་དམན་པ་རྣམས་དང་མ་འདྲེས་པ་དང ། སེམས་ཅན་རྣམས་སྤྱོད་པ་དམན་པ་ལས་ཕྲལ་ཞིང་སྤྱོད་པ་རྒྱ་ཆེན་པོ་ལ་འགོད་པར་བྱེད་པ་དང ། དོན་མཐུན་པར་བྱེད་པ་དང ། མི་དགེ་བ་ཐམས་
207b
ཅད་ལ་མི་བསྔགས་བརྗོད་པར་བྱེད་ཅིང་འདུན་པ་བཟློག་པ་དང ། ཕྱིར་ཟློག་པར་བྱེད་པ་དང ། བྱང་ཆུབ་འཁོར་བ་ལ་གཞོལ་བར་ཤེས་པར་བྱེད་པ་དང ། འཁོར་བ་མཉམ་པ་ཉིད་ཀྱིས་སངས་རྒྱས་མཉམ་པ་ཉིད་དུ་ལྟ་བར་བྱེད་པ་དང ། འཁོར་བ་ལས་མི་གཡོ་ཞིང་གནས་པའང་མི་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་འཁོར་བའི་ཆོས་ཅན་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ཡོངས་སུ་མྱ་ངན་ལས་འདས་པའི་ཆོས་ཅན་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་སེམས་ཅན་ཐམས་ཅད་རང་བཞིན་གྱིས་ཡོངས་སུ་མྱ་ངན་ལས་འདས་པར་ལྟ་བར་བྱེད་པ་དང ། ཆོས་ཐམས་ཅད་རང་བཞིན་གྱིས་ཉེ་བར་ཞི་བར་ཤེས་པར་བྱེད་པ་དང ། སེམས་ཅན་ཐམས་ཅད་ཡོངས་སུ་མྱ་ངན་ལས་འདའ་བ་དང ། ཉེ་བར་ཞི་བར་བྱ་བའི་ཆོས་སྟོན་པར་བྱེད་པ་དང ། སེམས་ཅན་དཔག་ཏུ་མེད་པ་མེ་གསུམ་གྱིས་འབར་བར་གྱུར་པ་རྣམས་ཉེ་བར་ཞི་བར་བྱེད་ཅིང་ཡོངས་སུ་མྱ་ངན་ལས་འདའ་བར་བྱེད་པ་དང ། ཡོངས་སུ་མྱ་ངན་ལས་འདས་པ་ལ་དང་སྤྱོད་པར་བྱེད་ལ། གཏན་དུ་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་ཡང་མི་བྱེད་པ་དེ་ལྟ་ན། ལྷའི་བུ། བྱང་ཆུབ་སེམས་དཔའ་ཡོངས་སུ་མྱ་ངན་ལས་འདའ་བའི་ཆོས་ཅན་ཡིན་ཏེ། ཐབས་ལ་མཁས་
208a
༄#། །པ་དང ། ཐབས་ཤེས་པ་ལ་ངེས་པར་སྐྱེས་པ་དང ། སེམས་ཅན་ཐམས་ཅད་ལ་ཕན་པ་དང ། རྗེས་སུ་སྙིང་བརྩེ་བ་དང་ལྡན་པ་ཡིན་ནོ། །འཇམ་དཔལ་གཞོན་ནུར་གྱུར་པས་བསྟན་པ་འདི་བཤད་པ་ན་སྲོག་ཆགས་འབུམ་ལྷག་ཙམ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།སྲོག་ཆགས་དྲུག་ཁྲི་ནི་ལེན་པ་མེད་པ་ཟག་པ་རྣམས་ལས་སེམས་རྣམ་པར་གྲོལ་ལོ། །སྔོན་དགེ་བའི་རྩ་བ་བསྐྱེད་ཅིང་སངས་རྒྱས་མང་པོ་ལ་བསྙེན་བཀུར་བྱས་པའི་སེམས་ཅན་རྣམས་ཀྱིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་ཉི་ཁྲི་ལྔ་སྟོང་གིས་ནི་མི་ཟད་པའི་རྣམ་པའི་མཛོད་ཅེས་བྱ་བའི་གཟུངས་སོ་སོར་ཐོབ་པར་གྱུར་ཏོ། །སྲོག་ཆགས་ས་ཡ་ཕྲག་གཉིས་དང་ལྔ་འབུམ་གྱིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །སྟེང་གི་བར་སྣང་ལས་ཀྱང་བཅོམ་ལྡན་འདས་དང ། འཇམ་དཔལ་གཞོན་ནུར་གྱུར་པ་ལ་མཆོད་པར་བྱ་བའི་ཕྱིར་མེ་ཏོག་གི་ཆར་དག་མངོན་པར་རབ་ཏུ་ཕབ་བོ། །དེ་ནས་ལྷའི་བུ་རབ་རྩལ་སེམས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། ཇི་ལྟར་ན་བྱང་ཆུབ་སེམས་དཔའ་ཐབས་དང ། ཤེས་རབ་ཀྱིས་ངེས་པར་འབྱུང་བ་ཡིན། དེ་ནས་འཇམ་
208b
དཔལ་གཞོན་ནུར་གྱུར་པས་ལྷའི་བུ་རབ་རྩལ་སེམས་ལ་ཚིགས་སུ་བཅད་དེ་སྨྲས་པ། གང་ཚེ་སེམས་ནི་ཆགས་མེད་པ། །བླ་མེད་བྱང་ཆུབ་སེམས་ཡིན་ཏེ། །སེམས་ཀྱི་རང་བཞིན་མངོན་སུམ་པ། །དེ་ནི་ཤེས་རབ་མཚན་ཉིད་དོ། །སེམས་རྣམས་བསྐྱེད་པ་ཐམས་ཅད་ནི། །བྱང་ཆུབ་ཏུ་ནི་ཡོངས་བསྔོ་ཞིང ། །བྱང་ཆུབ་སེམས་ལས་རབ་རྟས་པ། །དེ་ནི་ཐབས་ཀྱི་མཚན་ཉིད་དོ། །སེམས་ཅན་ཐམས་ཅད་བདག་མེད་ཅིང ། །མི་བདེན་ཡ་མ་བརླ་གསོག་ཏུ། །གང་ཚེ་ཤེས་པས་ཤེས་བྱེད་པ། །དེ་ནི་ཤེས་རབ་མཚན་ཉིད་དོ། །གང་ཕྱིར་སེམས་ཅན་ཐམས་ཅད་དག་།བྱང་ཆུབ་ཕྱིར་ནི་སྦྱིན་བྱེད་ཅིང ། །བསམ་པ་ཐག་པས་སྡུད་བྱེད་པ། །དེ་ནི་ཐབས་ཀྱི་མཚན་ཉིད་དོ། །གང་ཚེ་བདག་དང་བྱང་ཆུབ་དག། གཏན་དུ་མཐོང་བར་མི་བྱེད་ཅིང ། །འཁོར་གསུམ་ཡོངས་སུ་དག་གྱུར་པ། །དེ་ནི་ཤེས་རབ་མཚན་ཉིད་དོ། །ནང་དང་ཡང་ན་ཕྱི་རོལ་དག་།ཐམས་ཅད་ཡོངས་སུ་གཏོང་བྱེད་ཅིང ། །སེམས་ཅན་ཀུན་ལ་ཡོངས་བསྔོ་བ། །དེ་ནི་ཐབས་ཀྱི་མཚན་ཉིད་དོ། །ཞི་ཞིང་རབ་ཞི་གཙང་དག་ཅིང ། །ཚུལ་ཁྲིམས་རློམ་སེམས་མི་བྱེད་ལ། །ལུས་དང་ངག་ཡིད་ཞི་གྱུར་པ། ། དེ་ནི་ཤེས་རབ་མཚན་ཉིད་དོ། །ཚུལ་ཁྲིམས་ལ་ནི་ཞུགས་གྱུར་ཅིང ། །གཞན་ཡང་ཚུལ་ཁྲིམས་སྦྱོར་བྱེད་ལ། །སངས་རྒྱས་ཚུལ་ཁྲིམས་བསྔོ་བྱེད་པ། །དེ་ཕྱིར་ཐབས་
209a
༄#། །ཞེས་བྱ་བ་ཡིན། །ཆོས་རྣམས་ཐམས་ཅད་རབ་སྟོང་ཞིང ། །བདག་མེད་བཟོད་པ་སྒོམ་བྱེད་ལ། །ལུས་དང་སེམས་ཀྱིས་མ་སྨྲས་པ། །དེ་ནི་ཤེས་རབ་ཕ་རོལ་ཕྱིན། །ལུས་ཀྱིས་སྦྱོར་བར་མི་བྱེད་ཅིང ། །ངག་དང་སེམས་ཀྱིས་མ་ཡིན་ལ། །ཆོས་རྣམས་ཀུན་ལ་དབེན་གྱུར་པ། །དེ་ནི་ཤེས་རབ་ཕ་རོལ་ཕྱིན། །སེམས་ཅན་ཀུན་གྱི་ཁྲོ་བ་དང། །གསོད་དང་འཆིང་བ་བཟོད་བྱེད་ཅིང ། །སེམས་ཅན་དེ་དག་མི་སྤོང་བ། །དེ་ནི་ཐབས་ཀྱི་ཕ་རོལ་ཕྱིན། །སེམས་ཅན་ཡོངས་སུ་སྨིན་བྱའི་ཕྱིར། བ།སམ་གཏན་བདེ་བ་རབ་སྤངས་ནས། །གྲོང་དང་ཡུལ་འཁོར་སྣང་བྱེད་པ། །དེ་ནི་ཐབས་ཀྱི་ཕ་རོལ་ཕྱིན། །ཚུ་རོལ་མ་ཡིན་ཕ་རོལ་མིན། །མཐུན་པའི་ཕ་རོལ་རབ་གནས་ཤིང ། །སྤྲོས་པའི་ལྟ་བ་རྒྱུན་བཅད་པ། །ཤེས་རབ་ཕ་རོལ་ཕྱིན་རྟོགས་ཡིན། །གང་གིས་སྟོང་ཉིད་རྟོགས་གྱུར་ནས། །དེ་ནི་བཏང་སྙོམས་མི་བྱེད་ཅིང ། །སེམས་ཅན་སྟོང་ཉིད་སྦྱོར་བྱེད་པ། །དེ་ནི་ཐབས་ཀྱི་ཚུལ་ཡིན་ནོ། །སངས་རྒྱས་གཟུགས་མེད་མཁའ་འདྲ་བར། །ཆོས་ཀྱིས་སྒོ་ནས་ལྟ་བྱེད་ཅིང ། །དེ་ཚེ་གཟུགས་ལ་ཞེན་མེད་པ། །དེ་ནི་ཤེས་རབ་མཚན་ཉིད་དོ། །སངས་རྒྱས་མཚན་ཉིད་མཆོད་འདོད་ཅིང ། །སངས་རྒྱས་བྱེ་བ་མཆོད་བྱེད་ལ། །འདྲེན་ཀུན་མཆོད་དུ་འཇུག་བྱེད་པ། །དེ་ཕྱིར་ཐབས་ཞེས་བྱ་བ་ཡིན། །ཆོས་རྣམས་རྡུལ་མེད་རྡུལ་བྲལ་ཞིང ། །མཁའ་
209b
དང་མཉམ་པས་མཉམ་གྱུར་ལ། །ཆོས་འགའང་འཛིན་པར་མི་བྱེད་པ། །དེ་ནི་ཤེས་རབ་ཕ་རོལ་ཕྱིན། །ཆོས་ནི་ཡོངས་སུ་གཟུང་བའི་ཕྱིར། །ལུས་དང་སྲོག་ནི་འདོར་བྱེད་ཅིང ། ། འཇིག་རྟེན་ཀུན་གྱིས་དབེན་གྱུར་བ། །དེ་ནི་ཐབས་ཀྱི་སྒོ་ཡིན་ནོ། །ཆོས་དབྱིངས་གནས་པ་ཉིད་ཀྱི་ཕྱིར། །ཡང་དག་མཐའ་ལ་རབ་གནས་ཤིང ། །དེ་བཞིན་ཉིད་ལས་མི་གཡོ་བ། །དེ་ནི་ཤེས་རབ་སྒོ་ཡིན་ནོ། །གང་གི་ཆོས་ཉིད་ཅི་འདྲ་བ། །སེམས་ཅན་དེ་འདྲར་ཤེས་བྱེད་ཅིང ། །དེ་ལྟར་རྟོག་པར་བྱེད་པའི་མཐའ། །དེ་ནི་ཤེས་རབ་ཕ་རོལ་ཕྱིན། །ཆོས་ཀུན་འཆི་འཕོ་ཡོད་མིན་ཞིང ། །སྐྱེ་བ་མེད་པར་ཤེས་བྱེད་ལ། །མི་འགྲོ་རྒྱུག་པར་མི་བྱེད་པ། །དེ་ནི་ཤེས་རབ་ཕ་རོལ་ཕྱིན། །སེམས་ཅན་ཡོངས་སུ་སྨིན་བྱའི་ཕྱིར། །མཁས་པས་འདོད་དང་གཟུགས་རྣམས་སུ། །བསམ་བཞིན་དུ་ནི་སྐྱེ་བྱེད་པ། །དེ་དག་ཐབས་ཀྱི་ཡོན་ཏན་ཡིན། །དགོན་པ་གནས་རབ་གནས་བྱེད་ཅིང ། །ཉོན་མོངས་མེད་ལ་རབ་གནས་ལ། །བསམ་གཏན་རྣམ་ཐར་རྟེན་བྱེད་པ། །དེ་དག་ཤེས་རབ་མཚན་ཉིད་ཡིན། །གྲོང་དང་ཡུལ་འཁོར་རྣམས་སུ་ནི། །སོང་ནས་སྙན་གཏམ་སྟོན་བྱེད་ཅིང ། །མི་ཟད་ཞུམ་པ་ཡོད་མིན་པའི། །མཁས་པ་ཐབས་ལ་མཁས་པ་ཡིན། །འཇིག་རྟེན་གསུམ་པོ་ཐམས་ཅད་ལས། །སྐྲག་ཅིང་འདུ་འཛི་བསྟེན་མེད་ལ། །བདག་ཉིད་དུལ་ཞིང་ཞི་གྱུར་པ། །དེ་ནི་ཤེས་རབ་ཕ་རོལ་ཕྱིན། །འགྲོ་བ་དག་ན་འདུལ་ཆེན་
210a
༄#། །དང། །ཚོགས་དང་འདུ་འཛིན་ཇི་སྙེད་པ། །ཀུན་ན་སྣང་བ་དེ་དག་ནི། །ཐབས་ཀྱིས་སྨྲས་པ་མེད་པ་ཡིན། །བརྟན་པ་ཆགས་མེད་སྤྱོད་བྱེད་ཅིང ། །ཡི་གེ་དོན་གཉེར་མི་བྱེད་ལ། །བརྗོད་མེད་ངེས་དོན་དོན་གཉེར་བ། །དེ་ནི་ཤེས་རབ་ཕ་རོལ་ཕྱིན། །མཁས་པ་ཆགས་པ་ཐམས་ཅད་ན། །སྣང་ཞིང་ཆོས་རྣམས་སྟོན་བྱེད་ལ། །དཀོན་མཆོག་གསུམ་གྱི་བསྔགས་བརྗོད་པ། །དེ་ནི་ཐབས་ཀྱི་ཕ་རོལ་ཕྱིན། །མངོན་ཤེས་ཤེས་ལ་མཁས་གྱུར་ཅིང ། །ཞི་ཞིང་དུལ་ལ་ཟག་པ་མེད། །བདག་མེད་གཞག་པ་ཡོད་མིན་པ། །དེ་ནི་ཤེས་རབ་ཕ་རོལ་ཕྱིན། །མངོན་ཤེས་དག་ལ་རྣམ་འཕྲུལ་ཞིང ། །ཞིང་རྣམས་བྱེ་བར་འགྲོ་བྱེད་ལ། །སངས་རྒྱས་བྱེ་བ་མང་མཆོད་པ། །དེ་ནི་ཐབས་ཀྱི་མཚན་ཉིད་ཡིན། །ཕུང་པོ་སྒྱུ་མ་འདྲར་ཤེས་ཤིང ། །ཉོན་མོངས་དངོས་མེད་ཤེས་བྱེད་ནས། །དེ་དག་བདུད་ཀུན་ཞི་གྱུར་པ། །དེ་ནི་ཤེས་རབ་ཕ་རོལ་ཕྱིན། །བདུད་རྣམས་ཐམས་ཅད་སྟོན་བྱེད་ཅིང ། །བསྟན་ནས་རྒྱལ་བར་བྱེད་གྱུར་ལ། །དེ་ལས་སེམས་ཅན་ཐར་བྱེད་པ། །དེ་ནི་ཐབས་ཀྱི་སྒོ་ཡིན་ནོ། །སྟོང་ཉིད་མཚན་མ་མེད་པ་དང ། །སྨོན་པར་བྱེད་པ་ཡོད་མིན་པའི། །རྣམ་ཐར་སྒོ་ལ་སྟོན་བྱེད་པ། །དེ་ནི་ཤེས་རབ་མཚན་ཉིད་ཡིན། །ཆགས་མེད་སྡང་བ་ཡོད་མིན་ཞིང ། །རྨོངས་མེད་ཤེས་པའི་སྤྱོད་ཡུལ་དང ། །བླང་
210b
མེད་དོར་བ་ཡོད་མིན་པ། །དེ་ནི་ཤེས་རབ་མཚན་ཉིད་ཡིན། །རྣམ་པ་ཀུན་གྱི་མཆོག་ལྡན་ཞིང ། །སྟོང་ཉིད་རབ་ཏུ་སྟེན་གྱུར་ལ། །ཀུན་གྱི་ཕ་རོལ་སོན་གྱུར་པ། །མཉམ་མེད་འགོག་པའི་མཚན་ཉིད་ཡིན། །ཟག་མེད་བརྟུལ་བ་མ་ཡིན་པ། །དེ་དག་ཤེས་རབ་ལྡན་འགྱུར་ཞིང ། །འཁོར་བའི་སྤྱོད་ཡུལ་དེ་དག་ནི། །སེམས་ཅན་ཀུན་གྱི་གྲོགས་སུ་འགྱུར། །བསོད་ནམས་ཚོགས་ཀྱིས་མི་ངོམས་པའི། །མཁས་པ་ཐབས་ལ་མཁས་པ་ཡིན། །ཤེས་རབ་ཐབས་ལ་མཁས་པ་ཡི། །ཡན་ལག་གཉིས་ལྡན་ལམ་དེ་ནི། །ཤེས་ལྡན་བྱང་ཆུབ་སེམས་དཔའ་སྟེ། །དེས་ནི་འདྲེན་རྣམས་ངེས་པར་འབྱུང ། །ཐབས་དང་མི་ལྡན་ཤེས་རབ་ཀྱིས། །མ་བྱུང་འབྱུང་བར་འགྱུར་བ་མེད། །ཤེས་རབ་མེད་པའི་ཐབས་ཀྱིས་ནི། །མཁས་པ་རབ་ཏུ་ཞི་མི་འགྱུར། །ཤེས་རབ་དང་ནི་ཐབས་ཤེས་པ། །དེ་གཉིས་ཀུན་ཏུ་འདྲེས་གྱུར་ཅིང ། །གཉིས་ཀ་ཟུང་དུ་འཇུག་འགྱུར་ན། །དེས་ནི་དམ་པ་རྟོགས་པར་འགྱུར། །གང་དག་བགྲོད་པ་འདིར་འགྲོ་བ། །སངས་རྒྱས་ཀུན་གྱིས་རབ་བསྔགས་ཤིང ། །ཡེ་ཤེས་ཕ་རོལ་ཕྱིན་འགྱུར་ཏེ། །དེ་ནི་ཆོས་རྣམས་ཆོས་ཉིད་དོ། །དེ་དག་སངས་རྒྱས་སྤྱོད་ཡུལ་གྱི། ། ཆོས་དབྱིངས་དབྱེར་མེད་དགའ་བྱེད་ཅིང ། །སངས་རྒྱས་བྱང་ཆུབ་བླ་མེད་པའི། །རྡུལ་མེད་བྱང་ཆུབ་རྟོགས་པར་འགྱུར། །ལྷའི་བུ་རབ་རྩལ་སེམས་ཀྱིས་འཇམ་དཔལ་
211a
༄#། །གཞོན་ནུར་གྱུར་པ་ལ། གཞན་ཡང ། འདི་སྐད་ཅེས་སྨྲས་སོ། །འཇམ་དཔལ། བྱང་ཆུབ་ཀྱི་ཡུལ་གང་ཡིན། །འཇམ་དཔལ་གྱིས་སྨྲས་པ། ལྷའི་བུ་བྱང་ཆུབ་ཀྱི་ཡུལ་ནི་རང་གི་ཡུལ་དབེན་པ་ཉིད་དོ། །ལྷའི་བུས་སྨྲས་པ། །འཇམ་དཔལ། བྱང་ཆུབ་ཀྱི་མཚན་ཉིད་གང་ཡིན། འཇམ་གྱིས་སྨྲས་པ། ལྷའི་བུ། བྱང་ཆུབ་ནི་ནམ་མཁའི་མཚན་ཉིད་དོ། །ལྷའི་བུས་སྨྲས་པ། །འཇམ་དཔལ། བྱང་ཆུབ་ཀྱི་མཐའ་གང་ཡིན། འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་ཀྱི་མཐའ་ནི་སྟོང་པ་ཉིད་ཡིན་ནོ། ལྷའི་བུས་སྨྲས་པ། འཇམ་དཔལ། བྱང་ཆུབ་ཀྱི་གནས་གང་ཡིན། འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་ཀྱི་གནས་ནི་ཆོས་ཐམས་ཅད་ཀྱི་གནས་ཡིན་ནོ། །ལྷའི་བུས་སྨྲས་པ། འཇམ་དཔལ། བྱང་ཆུབ་ཀྱི་སྒོ་གང་ཡིན། འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་ཀྱི་སྒོ་ནི་ཀུན་ནས་སྒོ་ཡིན་ནོ། །ལྷའི་བུས་སྨྲས་པ། འཇམ་དཔལ། བྱང་ཆུབ་ཀྱི་རྩོམ་པ་གང་ཡིན། འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་ཀྱི་རྩོམ་པ་ནི་སེམས་ཅན་ཐམས་ཅད་བདག་མེད་པའོ། །ལྷའི་བུས་སྨྲས་པ། འཇམ་དཔལ། བྱང་ཆུབ་ཅི་དང་མཉམ། འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་ནི་ཆོས་ཐམས་ཅད་མི་སྐྱེ་བ་དང་མཉམ་མོ། །ལྷའི་བུས་སྨྲས་པ། འཇམ་དཔལ། བྱང་ཆུབ་ཀྱི་བགྲོད་པ་གང་ཡིན།
211b
འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་ཀྱི་བགྲོད་པ་ནི་སེམས་ཅན་ཐམས་ཅད་ཀྱི་སེམས་དང་སྤྱོད་པ་ཡིན་ནོ། །བྱང་ཆུབ་ཀྱི་བགྲོད་པ་ནི་འགྲོ་བ་མེད་པར་འགྲོ་བ་དང ། རྒྱུ་བ་མེད་པར་འགྲོ་བ་ཡིན་ནོ། །ལྷའི་བུས་སྨྲས་པ། འཇམ་དཔལ། བྱང་ཆུབ་གང་གི་རྒྱུ་མཐུན་པ་ཡིན། འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་ནི་སྙིང་རྗེ་ཆེན་པོའི་རྒྱུ་མཐུན་པ་ཡིན་ནོ། །ལྷའི་བུས་སྨྲས་པ། འཇམ་དཔལ། སྙིང་རྗེ་ཆེན་པོ་གང་གི་རྒྱུ་མཐུན་པ་ཡིན། འཇམ་དཔལ་གྱིས་སྨྲས་པ། ལྷའི་བུ། སྙིང་རྗེ་ཆེན་པོ་ནི་སེམས་ཅན་ཐམས་ཅད་རབ་ཏུ་ཐར་བར་བྱ་བའི་རྒྱུ་མཐུན་པ་ཡིན་ནོ། །ལྷའི་བུས་སྨྲས་པ། འཇམ་དཔལ། བྱང་ཆུབ་ག་ལས་བཙལ་བར་བྱ། འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་ནི་སེམས་ཅན་ཐམས་ཅད་ཀྱི་ཉོན་མོངས་པ་རྗེས་སུ་རྟོགས་པ་ལས་བཙལ་བར་བྱའོ། །ལྷའི་བུས་སྨྲས་པ། འཇམ་དཔལ། ཉོན་མོངས་པ་རྣམས་ག་ལས་བཙལ་བར་བྱ། འཇམ་དཔལ་གྱིས་སྨྲས་པ། ལྷའི་བུ། ཉོན་མོངས་པ་རྣམས་ནི་འཕགས་པའི་ལམ་ཡན་ལག་བརྒྱད་པ་ལས་བཙལ་བར་བྱའོ། །ལྷའི་བུས་སྨྲས་པ། འཇམ་དཔལ། ཅི་འཕགས་པའི་ལམ་ཉོན་མོངས་པ་རྣམས་དང་ལྷན་ཅིག་གནས་སམ། འཇམ་དཔལ་གྱིས་སྨྲས་པ། ལྷའི་བུ། གལ་ཏེ་འཕགས་པའི་ལམ་གཉིས་སུ་གྱུར་པ་ཞིག་ཡིན་ན་ནི་འཕགས་པའི་
212a
༄#། །ལམ་ཉོན་མོངས་པ་རྣམས་དང་ལྷན་ཅིག་གནས་པར་ཡང་འགྱུར་བ་ཞིག་།ལྷའི་བུ། འཕགས་པའི་ལམ་ནི་གཉིས་སུ་གྱུར་པ་མེད་པ་སྟེ། ཉོན་མོངས་པ་ཚོལ་བ་གང་ཡིན་པ་དེ་ཉིད་འཕགས་པའི་ལམ་ཡིན་ནོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་ལམ་གྱིས་ལམ་གྱི་བྱ་བ་བྱས་པ་ཡིན། འཇམ་དཔལ་གྱིས་སྨྲས་པ། ལྷའི་བུ།་གང་གི་ཚེ་བཙལ་ན་ཉོན་མོངས་པ་རྣམས་མི་རྙེད་ཅིང་འཁོར་བའང་མི་རྙེད། མྱ་ངན་ལས་འདས་པའང་མི་རྙེད་པ་དེ་ལྟར་ན་ལམ་གྱིས་ལམ་གྱི་བྱ་བ་བྱས་པ་ཡིན་ནོ། །ལྷའི་བུས་སྨྲས་པ། འཇམ་དཔལ། བྱང་ཆུབ་སེམས་དཔའི་ལམ་གང་ཡིན། འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་སེམས་དཔའི་ལམ་ནི་ལྟ་བའི་རྣམ་པ་དྲུག་ཅུ་རྩ་གཉིས་དང།་ཕྱིན་ཅི་ལོག་བཞི་དང ། སྒྲིབ་པ་ལྔ་དང ། མི་དགེ་བའི་ཕྱོགས་ཀྱི་ཆོས་ཐམས་ཅད་དོ། །ལྷའི་བུས་སྨྲས་པ། འཇམ་དཔལ། ཅི་ལས་བསམས་ཏེ་དེ་སྐད་སྨྲ། འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་སེམས་དཔའ་ནི་སེམས་ཅན་ལ་སྦྱོར་བ་ཡིན་པས་སེམས་ཅན་རྣམས་ཀྱང་ལྟ་བའི་རྣམ་པ་དང ། ཕྱིན་ཅི་ལོག་དང ། སྒྲིབ་པ་དང ། མི་དགེ་བའི་ཆོས་རྣམས་མ་གཏོགས་པ་གཞན་ལས་བཙལ་བར་མི་བྱའོ། །དེའི་ཕྱིར་བྱང་ཆུབ་སེམས་དཔའ་ནི་གང་གིས་སེམས་ཅན་རྣམས་རབ་ཏུ་ཕྱེ་བའི་ལྟ་བའི་རྣམ་པ་དང ། ཕྱིན་
212b
ཅི་ལོག་དང ། སྒྲིབ་པ་དང ། ཉོན་མོངས་པ་དེ་དག་ཉིད་ཚོལ་བར་བྱེད་དེ། །དེ་ཚོལ་བར་བྱེད་ན་སེམས་ཅན་ཡང་མི་རྙེད། ཉོན་མོངས་པ་རྣམས་ཀྱང་མི་རྙེད་དོ། །མ་རྙེད་ན་སེམས་ཅན་ཡོངས་སུ་སྨིན་པར་བྱ་བ་ལ་སྐྱོ་བར་མི་འགྱུར་བ་སྟེ། ལྷའི་བུ། རྣམ་གྲངས་དེས་ན་ཉོན་མོངས་པ་ཚོལ་བ་ནི་བྱང་ཆུབ་སེམས་དཔའི་ལམ་ཡིན་ལ། སེམས་ཅན་ཚོལ་བའང་བྱང་ཆུབ་སེམས་དཔའི་ལམ་ཡིན། ཕུང་པོ་དང ། ཁམས་དང ། སྐྱེ་མཆེད་དང ། ཉོན་མོངས་པ་ཚོལ་བའང་བྱང་ཆུབ་སེམས་དཔའི་ལམ་ཡིན་ནོ། །ལྷའི་བུས་སྨྲས་པ། འཇམ་དཔལ།་རྣམ་པར་ཐར་པའི་སྒོ་གསུམ་པོ་དག་བྱང་ཆུབ་སེམས་དཔའི་ལམ་མ་ཡིན་ནམ། འཇམ་དཔལ་གྱིས་སྨྲས་པ། ལྷའི་བུ། སྟོང་པ་ཉིད་ནི་བཙལ་བར་མི་ནུས་ལ། མཚན་མ་མེད་པ་དང ། སྨོན་པ་མེད་པའང་བཙལ་བར་ནི་ནུས་སོ། །དེ་ཅིའི་ཕྱིར་ཞེ་ན། ལྷའི་བུ། དེ་ལ་ནི་སེམས་དང ། ཡིད་དང ། རྣམ་པར་ཤེས་པ་འཇུག་པར་མི་འགྱུར་ལ་གང་ལ་སེམས་དང།་ཡིད་དང ། རྣམ་པར་ཤེས་པ་འཇུག་པར་མི་འགྱུར་བ་དེ་ནི་བཙལ་བར་མི་ནུས་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ། ལམ་ཇི་ལྟར་མངོན་པར་རྟོགས་པར་བྱ། འཇམ་དཔལ་གྱིས་སྨྲས་པ། ལྷའི་བུ། ཡང་དག་པའི་ལྟ་བ་གང་དང་མཉམ་པ་ལོག་པའི་ལྟ་བའང་དེ་དང་མཉམ་པ་དེ་ལྟར་མངོན་པར་རྟོགས་པ་གང་ཡིན་པ་དེ་ནི་ལམ་མངོན་
213a
༄#། །པར་རྟོགས་པ་ཡིན་ནོ། །ཡང་དག་པའི་རྟོག་པ་གང་དང་མཉམ་པ་ལོག་པའི་རྟོག་པའང་དེ་དང་མཉམ་པ་དང ། ཡང་དག་པའི་ངག་གང་དང་མཉམ་པ་ལོག་པའི་ངག་ཀྱང་དེ་དང་མཉམ་པ་དང ། ཡང་དག་པའི་ལས་ཀྱི་མཐའ་གང་དང་མཉམ་པ་ལོག་པའི་ལས་ཀྱི་མཐའ་ཡང་དེ་དང་མཉམ་པ་དང ། ཡང་དག་པའི་འཚོ་བ་གང་དང་མཉམ་པ་ལོག་པའི་འཚོ་བའང་དེ་དང་མཉམ་པ་དང ། ཡང་དག་པའི་རྩོལ་པ་གང་དང་མཉམ་པ་ལོག་པའི་རྩོལ་བའང་དེ་དང་མཉམ་པ་དང ། ཡང་དག་པའི་དྲན་པ་གང་དང་མཉམ་པ་ལོག་པའི་དྲན་པའང་དེ་དང་མཉམ་པ་དང ། ཡང་དག་པའི་ཏིང་ངེ་འཛིན་གང་དང་མཉམ་པ་ལོག་པའི་ཏིང་ངེ་འཛིན་ཀྱང་དེ་དང་མཉམ་པ་དེ་ལྟར་མངོན་པར་རྟོགས་པ་གང་ཡིན་པ་དེ་ནི་ལམ་མངོན་པར་རྟོགས་པ་ཡིན་ནོ། །ལྷའི་བུས་སྨྲས་པ། འཇམ་དཔལ། ཡང་དག་པའི་ལྟ་བ་གང་དང་མཉམ། འཇམ་དཔལ་གྱིས་སྨྲས་པ། ལྷའི་བུ། ཡང་དག་པའི་ལྟ་བ་དང ། ལོག་པའི་ལྟ་བ་ནི་སྟོང་པ་ཉིད་དང ། དབེན་པ་ཉིད་དང་མཉམ་པ་ཡིན་ནོ། །ལྷའི་བུས་སྨྲས་པ། འཇམ་དཔལ། སྟོང་པ་ཉིད་དང ། དབེན་པ་ཉིད་ཐ་དད་དུ་བྱ་བ་ཅི་ཡོད། འཇམ་དཔལ་གྱིས་སྨྲས་པ། ལྷའི་བུ། ནམ་མཁའ་དང ། ནམ་མཁའ་ལ་ཐ་དད་དུ་བྱ་བ་ཅི་ཡོད། ལྷའི་བུས་སྨྲས་པ། འཇམ་དཔལ། ཐ་དད་
213b
དུ་བྱ་བ་ཅུང་ཟད་ཀྱང་མེད་དོ། །འཇམ་དཔལ་གྱིས་སྨྲས་པ། ལྷའི་བུ། དེ་བཞིན་དུ་སྟོང་པ་ཉིད་དང ། དབེན་པ་ཉིད་ལའང་ཐ་དད་དུ་བྱ་བ་ཅུང་ཟད་ཀྱང་མེད་དོ། །ལྷའི་བུས་སྨྲས་པ། འཇམ་དཔལ། ཐ་དད་དུ་བྱ་བ་གང་ལས་རབ་ཏུ་ཕྱེ་བ་ཡིན། འཇམ་དཔལ་གྱིས་སྨྲས་པ། ལྷའི་བུ། ཐ་དད་དུ་བྱ་བ་ནི་མཚན་མ་དང ། དམིགས་པ་དང ། འདུ་ཤེས་དང ། སྤྲོས་པ་ལས་རབ་ཏུ་ཕྱེ་བ་ཡིན་ཏེ། མཚན་མ་དང ། དམིགས་པ་དང ། འདུ་ཤེས་དང ། སྤྲོས་པ་གང་ཡིན་པ་དེའི་ངོ་བོ་ཉིད་ཀྱི་མཚན་ཉིད་རྗེས་སུ་རྟོགས་པ་གང་ཡིན་པ་དེ་ལ་ནི་ཐ་དད་དུ་བྱ་བ་མེད་དོ། །ལྷའི་བུ། འདི་ལྟ་སྟེ། དཔེར་ན། རྒྱ་མཚོ་ཆེན་པོར་མ་ཞུགས་པའི་ཆུ་ལ་ནི་ཐ་དད་དུ་བྱ་བ་ཡོད་ཀྱི་རྒྱ་མཚོ་ཆེན་པོར་ཞུགས་པའི་ཆུ་ལ་ནི་ཐ་དད་དུ་བྱ་བ་མེད་པ་དེ་བཞིན་དུ། ལྷའི་བུ། ཆོས་ཀྱི་དབྱིངས་ཡོངས་སུ་མ་ཤེས་པ་ལ་ནི་ཆོས་ལ་ཐ་དད་དུ་བྱ་བ་ཡོད་ཀྱི་ཆོས་ཀྱི་དབྱིངས་ཡོངས་སུ་ཤེས་པ་ལ་ནི་ཆོས་ཐ་དད་དུ་བྱ་བ་མེད་དོ། །ལྷའི་བུས་སྨྲས་པ། འཇམ་དཔལ། ཅི་ཆོས་ཀྱི་དབྱིངས་ཡོངས་སུ་ཤེས་པར་ནུས་སམ། འཇམ་དཔལ་གྱིས་སྨྲས་པ། ལྷའི་བུ། ཆོས་ཀྱི་དབྱིངས་ནི་ཡོངས་སུ་ཤེས་པར་མི་ནུས་སོ། །དེ་ཅིའི་ཕྱིར་ཞེ་ན། ལྷའི་བུ། ཆོས་ཐམས་ཅད་ནི་ཆོས་ཀྱི་དབྱིངས་སུ་ཡང་དག་པར་འདུ་བ་ཡིན་ལ། ཆོས་ཀྱི་དབྱིངས་ཀྱིས་ནི་ཆོས་ཀྱི་དབྱིངས་ཡོངས་སུ་མི་ཤེས་པའི་ཕྱིར་རོ། །ཆོས་
214a
༄#། །ཀྱི་དབྱིངས་སུ་ཡང་དག་པར་འདུ་བའི་ཆོས་དེ་དག་ལ་གཉིས་སུ་མེད་པར་ཤེས་པ་དེ་དག་གང་ཡིན་པ་དེ་ནི་ཡོངས་སུ་ཤེས་པ་ཞེས་བྱ་སྟེ། སེམས་གཅིག་ནས་གཅིག་ཏུ་བརྒྱུད་པ་ཉེ་བར་ཞི་བར་བྱེད་པའི་ཕྱིར་དེ་ནི་ཡོངས་སུ་ཤེས་པ་ཞེས་བྱའོ། །གཞན་གྱི་རྣམ་པར་རིག་པ་ལ་གནས་པའི་ཕྱིར་དེ་ནི་ཡོངས་སུ་ཤེས་པ་ཞེས་བྱའོ། ། ལྷའི་བུ། འདི་ལྟ་སྟེ། དཔེར་ན། ནམ་མཁའ་གཟུགས་མེད་པའི་སྣང་བ་ལ་གཟུགས་ཐམས་ཅད་སྣང་ཡང་གཟུགས་དེ་དག་ནི་ནམ་མཁའི་ངོ་བོ་ཉིད་ཡིན་པ་དེ་བཞིན་དུ། ལྷའི་བུ། བྱང་ཆུབ་སེམས་དཔས་རང་གིས་སྨྲས་པའི་ཆོས་ཀྱི་དབྱིངས་ཀྱི་སྒོ་ནས་ཆོས་ཐམས་ཅད་མཐོང་ཡང་ཆོས་དེ་དག་ནི་ཆོས་ཀྱི་དབྱིངས་ཀྱི་ངོ་བོ་ཉིད་ཁོ་ན་ཡིན་ནོ། ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་མགོ་སྨོས་པས་གོ་བ་ཡིན། འཇམ་དཔལ་གྱིས་སྨྲས་པ། ལྷའི་བུ། མགོ་སྨོས་པས་གོ་བའི་རང་གི་ལྟ་བས་སེམས་ཅན་ཐམས་ཅད་ཀྱི་ལྟ་བ་སྤང་བའི་ཕྱིར་ཆོས་སྟོན་པར་བྱེད་ནའོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་རྣམ་པར་སྤྲོས་པས་གོ་བ་ཡིན། འཇམ་དཔལ་གྱིས་སྨྲས་པ། ལྷའི་བུ། དབེན་པའི་ཕྱིར་བདག་ཀྱང་གཞན་དུ་མི་བྱེད་ལ། བདག་མེད་པའང་གཞན་དུ་མི་བྱེད་ནའོ། །ལྷའི་བུས་སྨྲས་པ།
214b
འཇམ་དཔལ། ཇི་ལྟར་ན་བྱང་ཆུབ་སེམས་དཔའ་མི་བཀྲི་བ་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་ཆོས་འགའ་ཡང་ཁྲིད་པར་མི་བྱེད་ནའོ། །ལྷའི་བུས་སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་གནས་ལྷུར་ལེན་པ་ཡིན། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་བྱང་ཆུབ་སེམས་དཔའ་མཚན་མ་མེད་པའི་གནས་ལས་གཡོ་བར་མི་བྱེད་ནའོ། །ལྷའི་བུས་སྨྲས་པ། འཇམ་དཔལ། གང་གིས་བྱང་ཆུབ་སེམས་དཔའ་ཚོགས་གསུམ་པོ་ངེས་པ་ཉིད་དང ། མ་ངེས་པ་ཉིད་དང ། ལོག་པ་ཉིད་དུ་ངེས་པའི་ཚོགས་དག་ལ་སྣང་བར་འགྱུར་བའི་རྣམ་གྲངས་ཡོད་དམ། འཇམ་དཔལ་གྱིས་སྨྲས་པ། ལྷའི་བུ། ཡོད་དོ། །ལྷའི་བུས་སྨྲས་པ། འཇམ་དཔལ། ཇི་ལྟ་བུ་ཡིན། འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་སེམས་དཔའ་ངེས་པ་ནི་སངས་རྒྱས་ཀྱི་ཆོས་ཐམས་ཅད་ལའོ། །མ་ངེས་པ་ནི་ཉན་ཐོས་དང ། རང་སངས་རྒྱས་ཀྱིས་ལའོ། །ལོག་པ་ཉིད་དུ་ངེས་པ་ནི་དེ་ལས་སེམས་ཅན་བསྒྲལ་བར་བྱ་བ་ལའོ། །ལྷའི་བུས་སྨྲས་པ། འཇམ་དཔལ། གང་གིས་བྱང་ཆུབ་སེམས་དཔའ་མི་ཁོམ་པ་ཐོབ་ཅིང་ཁོམ་པ་མ་ཐོབ་པའི་རྣམ་གྲངས་ཡོད་དམ། འཇམ་དཔལ་གྱིས་སྨྲས་པ། ལྷའི་བུ། ཡོད་དོ། །ལྷའི་བུས་སྨྲས་པ། འཇམ་དཔལ། འོ་ན་ཅིའི་ཕྱིར་བྱང་ཆུབ་སེམས་དཔའ་མི་ཁོམ་
215a
༄#། །པ་ཐོབ་པ་རྣམས་ལ་སྙིང་རྗེ་ཆེན་པོ་སྐྱེད་པར་བྱེད་ཅིང་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཁོམ་པ་ཐོབ་པ་དེ་དག་ཀྱང་ཡལ་བར་འཇོག་པར་བྱེད།་འཇམ་དཔལ་གྱིས་སྨྲས་པ། ལྷའི་བུ། གང་རྣམ་པར་གྲོལ་བའི་ཚོགས་དེ་དག་ནི་ཁོམ་པ་ཐོབ་པ་ཡིན་པས་དེ་ལ་ནི་བྱང་ཆུབ་སེམས་དཔར་མི་སྣང་ངོ ། །ལྷའི་བུས་སྨྲས་པ། འཇམ་དཔལ། ཁྱོད་མི་ཁོམ་པ་ཐོབ་པ་ཡིན་ནམ། འོན་ཏེ་ཁོམ་པ་ཐོབ་པ་ཡིན། འཇམ་དཔལ་གྱིས་སྨྲས་པ། ལྷའི་བུ། ཁོ་བོ་ནི་ཁོམ་པ་ཐོབ་པའང་མ་ཡིན། མི་ཁོམ་པ་ཐོབ་པའང་མ་ཡིན་ནོ། །ལྷའི་བུས་སྨྲས་པ། འཇམ་དཔལ། ཅིའི་ཕྱིར། འཇམ་དཔལ་གྱིས་སྨྲས་པ། ལྷའི་བུ། ཁོ་བོ་ནི་ཐོབ་པའང་མ་ཡིན། ཡང་དག་པར་ཐོབ་པའང་མ་ཡིན། ཁོམ་པའང་མ་ཡིན། མི་ཁོམ་པའང་མ་ཡིན་ལ། ཁོམ་པ་དང ། མི་ཁོམ་པ་ལ་ཆགས་པར་ཡང་མི་བྱེད་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ། ཆོས་ཀྱི་རྣམ་གྲངས་འདིས་ནི་བདུད་ཀྱི་དཀྱིལ་འཁོར་ཐམས་ཅད་ཚར་གཅོད་དོ། །འཇམ་དཔལ་གྱིས་སྨྲས་པ། ལྷའི་བུ། འདི་ལྟར་ཆོས་ཀྱི་རྣམ་གྲངས་འདི་ལ་ནི་ཕུང་པོ་ཡོངས་སུ་ཤེས་པའང་མེད། ཉོན་མོངས་པ་སེལ་བའང་མེད། བདུད་ལས་ཡང་དག་པར་འདས་པའང་མེད་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ།
215b
ཉེ་བར་སྦྱར་བས་གཞན་མུ་སྟེགས་ཅན་རྣམས་ཕམ་པར་བྱས་སོ། །འཇམ་དཔལ་གྱིས་སྨྲས་པ། ལྷའི་བུ། འདི་ལྟར་འདི་ལ་མུ་སྟེགས་ཅན་ཐམས་ཅད་ཀྱི་སྤྱོད་པ་མེད་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ། ཆོས་ཀྱི་ཏོག་བཙུགས་སོ། །འཇམ་དཔལ་གྱིས་སྨྲས་པ། ལྷའི་བུ། སྣང་བ་མེད་པ་དང ། མུན་པ་མེད་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ། འདིས་ནི་ཆོས་ཀྱི་འཁོར་ལོ་རབ་ཏུ་བསྐོར་ཏོ། །འཇམ་དཔལ་གྱིས་སྨྲས་པ། ལྷའི་བུ། ལྟ་བའི་མཐའ་ཐམས་ཅད་ཡོངས་སུ་གཅད་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ། ཆོས་བསྟན་པ་འདིས་ཆོས་ཀྱི་སྣང་བ་ཇི་སྙེད་ཅིག་བྱས། །འཇམ་དཔལ་གྱིས་སྨྲས་པ། ལྷའི་བུ། གང་དག་ལ་སྣང་བའང་མེད་པ་མུན་པའང་མེད་པ་དེ་དག་ཆོས་ཀྱི་སྣང་བར་བྱས་སོ། །ལྷའི་བུས་སྨྲས་པ། འཇམ་དཔལ། སེམས་ཅན་གང་དག་ཆོས་ཀྱི་རྣམ་གྲངས་འདི་ཐོས་ནས་མོས་པར་འགྱུར་བ་དེ་དག་ནི་དཀོན་ནོ། །འཇམ་དཔལ་གྱིས་སྨྲས་པ། ལྷའི་བུ། དེ་དེ་བཞིན་ནོ། །ལྷའི་བུས་སྨྲས་པ། འཇམ་དཔལ། འདི་ལ་སུ་དག་མོས་པར་འགྱུར། འཇམ་དཔལ་གྱིས་སྨྲས་པ། ལྷའི་བུ། གང་དག་འཆིང་བས་རྣམ་པར་འཁྲུག་པར་མི་འགྱུར་བ་རྣམས་སོ། །ལྷའི་བུས་སྨྲས་པ། འཇམ་དཔལ། འཆིང་བས་རྣམ་པར་འཁྲུག་པར་མི་འགྱུར་བ་དག་གང་ཡིན། འཇམ་དཔལ་གྱིས་སྨྲས་
216a
༄#། །པ།་ལྷའི་བུ། གང་དག་འདོད་ཆགས་དང ། ཞེ་སྡང་དང ། གཏི་མུག་དང ། ཉོན་མོངས་པ་བསལ་བའི་སྒོ་ནས་ཐར་པ་ཚོལ་བར་མི་བྱེད་པ་དང ། གང་དག་འདོད་ཆགས་དང ། ཞེ་སྡང་དང ། གཏི་མུག་དང ། ཉོན་མོངས་པ་མཉམ་པ་ཉིད་ཀྱི་རྣམ་པར་གྲོལ་བ་མཉམ་པར་འགྱུར་པ་དག་སྟེ། དེ་དག་གིས་ནི་འཆིང་བ་མ་དམིགས་པས་རྣམ་པར་འཁྲུག་པའང་མི་འགྱུར་བའི་ཕྱིར་རོ། །འཇམ་དཔལ་གཞོན་ནུར་གྱུར་པས་བསྟན་པ་འདི་བཤད་པ་ན་སྲོག་ཆགས་ལྔ་འབུམ་ཙམ་གྱིས་བྱང་ཆུབ་ཏུ་སེམས་བསྐྱེད་ནས། ཚིག་འདི་སྐད་ཅེས། བདག་ཅག་གིས་ཀྱང་ཅི་ལྟར་འཇམ་དཔལ་གཞོན་ནུར་གྱུར་པ་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་འདི་དག་བརྙེས་པ་དེ་བཞིན་དུ་ཐོབ་པར་གྱུར་ཅིག་ཅེས་ཀྱང་སྨྲས་སོ། །ལྷ་དང ། མི་རྣམས་ཀྱི་སྐྱེ་དགུ་ལས་སྲོག་ཆགས་འབུམ་ལྷག་ཙམ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།གནས་གཙང་མའི་རིས་ཀྱི་ལྷའི་བུ་དྲུག་ཁྲི་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །འདོད་པ་ན་སྤྱོད་པའི་ལྷའི་བུ་བརྒྱད་ཁྲིའང་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །སྲོག་ཆགས་དང ། དགེ་སློང་དང ། དགེ་སློང་མ་དང །
216b
དགེ་བསྙེན་དང ། དགེ་བསྙེན་མ་ཉི་ཁྲིའང་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །བྱང་ཆུབ་སེམས་དཔའ་སྔོན་དགེ་བའི་རྩ་བ་བསྐྱེད་པ་བདུན་ཁྲི་ཉིས་སྟོང་གིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ཐམས་ཅད་དང་ལྡན་པའི་འཁོར་རྣམས་ཀྱང་དགའ་བ་དང ། མགུ་བ་དང ། ཡི་རངས་བ་དང ། རབ་ཏུ་དགའ་བ་དང ། དགའ་བ་དང ། ཡིད་བདེ་བ་སྐྱེས་ནས་ཆེད་དུ་བརྗོད་པ་འདི་ཆེད་དུ་བརྗོད་དོ། །ེ་མའོ་ཀུན་ནས་ཡོངས་གྲོལ་བའི། །དམིགས་མེད་ཆོས་ནི་ལེགས་པར་བཤད། །འཇམ་དཔལ་གཞོན་ནུར་གྱུར་པ་ཡིས། །ཤིན་ཏུ་ལེགས་པར་བཤད་པར་བྱས། །དེ་ནས་བྱང་ཆུབ་སེམས་དཔའ་དེ་དག་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང།་ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་དེ་དག་གིས་ལྷ་དང ། མིའི་མཆོད་པ་དག་བྱས་ཏེ། སྟེང་གི་བར་སྣང་ལས་ཀྱང་ལྷའི་མེ་ཏོག་གི་ཆར་དག་ཀྱང་ཕབ། རིན་པོ་ཆེའི་ཆར་དག་ཀྱང་ཕབ། གོས་ཀྱི་ཆར་དག་ཀྱང་ཕབ། བདུག་སྤོས་ཀྱི་ཆར་དག་དང ། སྤོས་ཆུའི་ཆར་དག་དང ། ཕྱེ་མའི་ཆར་དག་ཀྱང་ཕབ་བོ། །ལྷ་རྣམས་ཀྱིས་སྟེང་གི་བར་སྣང་ལས་ལྷའི་སིལ་སྙན་བརྒྱ་སྟོང་དག་ཀྱང་རབ་ཏུ་གསིལ་བར་གྱུར་ཏོ། །དགེ་བསྙེན་དང ། དགེ་བསྙེན་མ་རྣམས་དང ། རྒྱལ་པོ་གསལ་རྒྱལ་གྱིས་ཀྱང་
217a
༄#། །རང་རང་གི་འབྱོར་པ་ཅི་བདོག་པ་དག་གིས་བཅོམ་ལྡན་འདས་དང ། འཇམ་དཔལ་གཞོན་ནུར་གྱུར་པ་ལ་མཆོད་པ་བྱས་སོ། །ཐམས་ཅད་དང་ལྡན་པའི་འཁོར་རྣམས་ཀྱིས་ཀྱང་ཐལ་མོ་སྦྱར་ཏེ་ཚིག་འདི་སྐད་ཅེས། བཅོམ་ལྡན་འདས། གང་དག་ཆོས་ཀྱི་རྣམ་གྲངས་འདི་ལ་དད་པར་མི་བགྱིད་པ་དེ་དག་ལ་ནི་སངས་རྒྱས་འབྱུང་བ་མ་མཆིས་ལགས་སོ། །གང་དག་ཆོས་ཀྱི་རྣམ་གྲངས་འདི་སྤོང་བར་བགྱིད་པ་དེ་དག་ལ་ནི་རབ་ཏུ་འབྱུང་བ་མ་མཆིས་ལགས་སོ། །གང་དག་ཆོས་ཀྱི་རྣམ་གྲངས་འདི་བསྒྲུབས་ཏེ་གནས་པར་མི་བགྱིད་པ་དེ་དག་ལ་ནི་བསྙེན་པར་རྫོགས་པར་མ་མཆིས་ལགས་སོ། །དེ་དག་ལ་ནི་འཕགས་པའི་བསྙེན་པར་རྫོགས་པས་བསྙེན་པར་རྫོགས་པའང་མ་མཆིས་ལགས་སོ། །གང་དག་ཆོས་ཀྱི་རྣམ་གྲངས་འདི་བགྲོད་པར་མི་མཆི་བ་དེ་དག་ལ་ནི་དགེ་སྦྱོང་གི་ཚུལ་མ་མཆིས་ལགས་སོ། །དེ་དག་ལ་ནི་བྲམ་ཟེའི་ཚུལ་ཡང་མ་མཆིས་ལགས་སོ། །གང་དག་ཆོས་ཀྱི་རྣམ་གྲངས་འདི་ལ་སྐྲག་པར་འགྱུར་བ་དེ་དག་ལ་ནི་ཐོབ་པའང་མ་མཆིས། མངོན་པར་རྟོག་པའང་མ་མཆིས་ལགས་སོ། ། གང་དག་ཆོས་ཀྱི་རྣམ་གྲངས་འདི་ཉན་པར་བགྱིད་པ་དང ། ཐོས་ནས་ཀྱང་མོས་པར་བགྱིད་པ་དང ། ལེན་པར་བགྱིད་པ་དང ། ཀུན་ཆུབ་པར་བགྱིད་པ་དང ། འཛིན་པར་
217b
བགྱིད་པ་དང ། ཀློག་པར་བགྱིད་པ་དང ། ཡི་གེར་འདྲི་བར་བགྱིད་པ་དང ། སྣོད་འཚལ་བར་བགྱིད་ནས་གཞན་དག་ལའང་སྟོན་པར་བགྱིད་པ་དང ། སྐྱོ་བ་མ་མཆིས་པའི་ཡིད་ཀྱིས་འདོམས་པར་བགྱིད་པ་དང ། རྗེས་སུ་སྟོན་པར་བགྱིད་པ་དང ། འདི་ལ་ནན་ཏན་གྱིས་སྒྲུབ་པར་བགྱིད་པ་དང ། གཞན་དག་ཀྱང་ནན་ཏན་གྱིས་སྒྲུབ་དུ་སྩོལ་བ་དང ། ཉམས་པར་མི་བགྱིད་པ་དེ་དག་ནི་སེམས་ཅན་དམ་པ་དང ། སེམས་ཅན་ཆེན་པོ་དང ། དགེ་བའི་རྩ་བ་བསྲུངས་པ་དང ། སངས་རྒྱས་མང་པོ་ལ་བསྙེན་བཀུར་བགྱིས་པ་དང ། གཏིང་རྙེད་པ་དང ། ལོག་པར་ལྟུང་བའི་རྒྱུན་བཀུམ་པ་དང ། ངན་སོང་དང ། ངན་འགྲོའི་སྒོ་བཀུམ་པ་དང ། དགེ་བའི་བཤེས་གཉེན་གྱིས་ཡོངས་སུ་ཟིན་པ་དང ། དགེ་བའི་བཤེས་གཉེན་རྣམས་ལ་ཤིན་ཏུ་གུས་པ་དང ། དགེ་བའི་བཤེས་གཉེན་རྣམས་ལ་བགྱིས་པ་གཟོ་ཞིང་བགྱིས་པ་ཚོར་བ་ལགས་ཤིང ། དེ་དག་ནི་འདས་པ་དང ། མ་འོངས་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་དམ་པའི་ཆོས་ཡོངས་སུ་གཟུང་བའི་སླད་དུ་ཞུགས་པ་ལགས་ཏེ། སྐྱེས་བུ་དམ་པ་དེ་དག་ལ་ནི་སངས་རྒྱས་འབྱུང་བའང་མཆིས་ལགས་སོ། །དེ་དག་ལ་ནི་ཆོས་ཀྱི་འཁོར་ལོ་བསྐོར་བའང་མཆིས་ལགས་སོ། །དེ་དག་ལ་ནི་འབྲས་བུ་མཆིས་པ་དང ། ཁོམ་པ་དང ། ལྡན་པ་ལགས་སོ་ཞེས་ཀྱང་
218a
༄#། །གསོལ་ཏོ། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་འཁོར་དེ་དག་ལ་ལེགས་སོ་ཞེས་བྱ་བ་བྱིན་ནས། བྱང་ཆུབ་སེམས་དཔའ་བྱམས་པ་ལ་བཀའ་སྩལ་པ། བྱམས་པ། ཆོས་ཀྱི་རྣམ་གྲངས་འདི་བཤད་པ་ན་ལྷ་དང ། མི་རྣམས་ཀྱི་སྐྱེ་དགུ་ལས་སྲོག་ཆགས་ཉི་ཁྲི་ཉིས་སྟོང་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།ལྷ་དང ། མི་རྣམས་ཀྱི་སྐྱེ་དགུ་ལས་སྲོག་ཆགས་འབུམ་ཕྲག་བརྒྱད་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་ས་ཡ་ཕྲག་གཉིས་ཀྱིས་ནི་བྱང་ཆུབ་ཏུ་སེམས་བསྐྱེད་དོ། །འདི་ན་གནས་པ་དང ། འཇིག་རྟེན་གྱི་ཁམས་གཞན་དག་ནས་འདུས་པའི་བྱང་ཆུབ་སེམས་དཔའ་ལྔ་འབུམ་གྱིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་བསམ་པ་ཐ་དད་པ་གཉིས་སྟོང་ཙམ་གྱིས་ནི་གཟུངས་ན་ཚོགས་སོ་སོར་ཐོབ་པར་གྱུར་ཏོ། །བྱང་ཆུབ་སེམས་དཔའ་འབུམ་གྱིས་ནི་གཟུངས་དྲི་མ་མེད་པ་སོ་སོར་ཐོབ་པར་གྱུར་ཏོ། །དེ་དག་ལས་བྱང་ཆུབ་སེམས་དཔའ་མང་པོ་དག །
218b
བྱང་ཆུབ་སེམས་དཔའ་བྱམས་པ། ཁྱོད་ཀྱིས་བྱང་ཆུབ་ཐོབ་པའི་དམ་པའི་ཆོས་ཡོངས་སུ་འཛིན་པར་འགྱུར་ཞིང་མདོ་སྡེ་ཟབ་མོ་འདི་ལྟ་བུ་དག་ནོད་པ་དང ། སྟོན་པ་དང ། འཛིན་པ་དང།་ཀློག་པར་ཡང་འགྱུར་ཏེ། དེ་དག་ནི་བྱམས་པ་ཁྱོད་ཉིད་ཀྱིས་བྱང་ཆུབ་ཏུ་ལུང་སྟོན་པར་འགྱུར་རོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུའམ། རིགས་ཀྱི་བུ་མོ་གང་དག་མདོ་སྡེ་འདི་འཛིན་པ་དང ། ཀློག་པ་དང ། སྟོན་པ་དང ། ཡི་གེར་འདྲི་བ་དང ། དམ་པའི་ཆོས་ཡུན་རིང་དུ་གནས་པར་བགྱི་བའི་སླད་དུ་གླེགས་བམ་དུ་བགྱིས་ཏེ་འཆང་བ་དང ། ཐ་ན་ལན་འགའ་ཞིག་ཉན་པར་བགྱིད་པ་དང ། རྣ་ལམ་དུ་གྲགས་པར་བགྱིད་པ་དེ་དག་བསོད་ནམས་ཇི་ཙམ་བསྐྱེད་པར་འགྱུར་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་བྱམས་པ་ལ་འདི་སྐད་ཅེས་བཀའ་སྩལ་ཏོ། །བྱམས་པ། ཁྱོད་དེ་བཞིན་གཤེགས་པ་ལ་དོན་འདི་ཡོངས་སུ་འདྲི་བར་སེམས་པ་ནི་ལེགས་སོ། །ལེགས་སོ། །བྱམས་པ། དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་ཁྱོད་ལ་བཤད་པར་བྱའོ། །བྱམས་པ། ནན་གྱིས་དཔེར་ན། ལྷ་དང ། མི་རྣམས་ཀྱི་སྐྱེ་དགུ་ལས་ལྷའམ། མི་གང་ཞིག་གིས་སངས་རྒྱས་བཅོམ་ལྡན་འདས་འཁོར་གངྒཱའི་ཀླུང་གི་བྱེ་མ་
219a
༄#། །སྙེད་དང་བཅས་པ་གངྒཱའི་ཀླུང་གི་བྱེ་མ་སྙེད་ཅིག་ལ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བདེ་བའི་ཡོ་བྱད་ཐམས་ཅད་ཀྱིས་བསྙེན་བཀུར་བྱས་པར་གྱུར་པ་དེ་བས་ནི་གང་གིས་མདོ་སྡེ་ལེགས་པར་གསུངས་པ་འདི་ཡི་གེར་བྲིས་ཏེ་འཛིན་པ་དང ། ཀློག་པ་དང ། དེ་བཞིན་ཉིད་དུ་སྒྲུབ་པར་བྱེད་པ་དང ། གཞན་དག་ལ་སྟོན་པར་བྱེད་པ་ཆེས་བསོད་ནམས་མང་དུ་བསྐྱེད་པར་འགྱུར་ཏེ། བྱང་ཆུབ་མངོན་པར་རྫོགས་པར་འཚང་རྒྱ་བའི་ཕྱིར་རིང་པོར་མི་ཐོགས་པར་བྱང་ཆུབ་ཀྱི་སྙིང་པོར་ཉེ་བར་འགྲོ་བར་ཡང་འགྱུར་རོ། །བྱམས་པ། ང་ནི་གང་དག་གིས་མདོ་སྡེ་འདི་ཐོས་ནས་སྤོང་བར་མི་བྱེད་ཅིང་མོས་པར་བྱེད་པ་དང ། ཐ་ན་གླེགས་བམ་དུ་འདྲི་བར་བྱེད་པ་དེ་དག་ཀྱང་མོས་པ་ཇི་ལྟ་བ་བཞིན་དུ་ཕྱིར་མི་ལྡོག་པ་ཉིད་དུ་ལུང་སྟོན་ཏོ། །བྱམས་པ། ང་ནི་གང་དག་གི་མདོ་སྡེ་ཟབ་མོ་འདི་ལྟ་བུ་འདི་ནི་མིང་ཙམ་ཐོས་པ་དེ་དག་ཀྱང་འབྲས་བུ་ཡོད་པར་ལུང་སྟོན་པར་བྱེད་ན་གང་དག་མོས་པ་དང ། ཡི་གེར་འདྲི་བ་དང ། ཀློག་པ་དང ། གཞན་དག་ལའང་སྟོན་པར་བྱེད་པ་དག་ལྟ་སྨོས་ཀྱང་ཅི་དགོས། གང་དག་མདོ་སྡེ་འདི་ཡི་གེར་འདྲི་བ་དང ། ལུང་ནོད་པ་དང ། ཁ་ཏོན་བྱེད་པ་དང ། ཀློག་པ་དང ། དེ་བཞིན་ཉིད་དུ་སྒྲུབ་པར་བྱེད་པ་དེ་དག་ནི་སངས་རྒྱས་བཅོམ་ལྡན་འདས་རྣམས་དང་ལྷན་ཅིག་ཏུ་གཏམ་འདྲི་
219b
བར་བྱེད་པ་དང ། ཕེབས་པར་སྨྲ་བར་བྱེད་པར་འགྱུར་ཏེ། དེ་དག་ནི་རྟག་ཏུ་སངས་རྒྱས་བཅོམ་ལྡན་འདས་རྣམས་དང་མི་འབྲལ་བར་འགྱུར་ཞིང་འཇིག་རྟེན་གྱི་ཁམས་གཞན་དག་ན་བཞུགས་པའི་སངས་རྒྱས་བཅོམ་ལྡན་འདས་རྣམས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཀྱང་དེ་དག་ལ་སྟོན་པར་མཛད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། ཆོས་ཀྱི་རྣམ་གྲངས་འདི་ཐོས་པ་དེ་ནི་སངས་རྒྱས་འབྱུང་བ་དང་འདྲ་བ་ཡིན་གྱི། ཀུན་དགའ་བོ། ཁྱོད་ཀྱིས་ཆོས་ཀྱི་རྣམ་གྲངས་འདི་ཟུངས་ཤིག་།གཞན་དག་ལའང་རྒྱ་ཆེར་སྟོན་ཅིག་།ཀུན་དགའ་བོས་གསོལ་པ།་བཅོམ་ལྡན་འདས། ཆོས་ཀྱི་རྣམ་གྲངས་འདིའི་མིང་ཅི་ཞེས་བགྱི། འདི་ཇི་ལྟར་གཟུང་བར་བགྱི། འདིའི་མིང་ཇི་སྐད་བསྟན་པར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། ཆོས་ཀྱི་རྣམ་གྲངས་འདི་ལྷའི་བུ་རབ་རྩལ་སེམས་ཀྱིས་ཞུས་པ་ཞེས་བྱ་བ་དང ། འཇམ་དཔལ་གྱིས་བསྟན་པ་ཆོས་ཐམས་ཅད་རྣམ་པར་གཏན་ལ་དབབ་པ་བསྟན་པ་ཞེས་བྱ་བར་ཡང་ཟུངས་ཤིག་།དེ་ནས་འཁོར་དེ་དག་གིས་ཆོས་ཀྱི་རྣམ་གྲངས་འདིའི་མིང་ཐོས་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་
220a
༄#། །ཏོ། །བཅོམ་ལྡན་འདས། བདག་ཅག་གིས་འཇམ་དཔལ་གཞོན་ནུར་གྱུར་པས་ཆོས་བསྟན་པ་མང་དུ་ཐོས་ལགས་ན་ཇི་ལྟར་ཆོས་ཀྱི་རྣམ་གྲངས་རབ་ཏུ་རྣམ་པར་ཕྱེ་སྟེ་རྒྱ་ཆེར་བསྟན་པ་དེ་ལྟ་བུའི་ཆོས་ནི་ནམ་ཡང་མ་བྱུང་ལགས་སོ། །བདག་ཅག་གིས་ཀྱང་ཆོས་ཀྱི་རྣམ་གྲངས་ལ་དགའ་བ་འདི་ལྟ་བུ་ཐོབ་པ་ནི་སྔོན་མ་མྱོང་ལགས་ཏེ། དེ་ལྟ་ལགས་པས་བཅོམ་ལྡན་འདས་ཡོངས་སུ་མྱ་ངན་ལས་འདས་ནས་ཀྱང་སྐྱེ་བོ་མང་པོ་ལ་སྨན་པ་དང ། མ་འོངས་པའི་སྐྱེ་བོ་རྣམས་ཀྱི་སླད་དུ་ཆོས་ཀྱི་རྣམ་གྲངས་འདི་ཅི་ནས་སངས་རྒྱས་ཀྱི་མཛད་པ་བགྱིད་པར་འགྱུར་བ་དང ། སེམས་ཅན་མོས་པ་ཐ་དད་པ་རྣམས་ཀྱིས་ཆོས་ཀྱི་རྣམ་གྲངས་འདི་ཐོས་ནས་མོས་པ་ཇི་ལྟ་བ་བཞིན་དུ་ཐེག་པ་ཐ་དད་པས་ངེས་པར་འབྱུང་བར་འགྱུར་བ་དང ། དེ་དག་བདེ་འགྲོར་མཆི་བར་བགྱི་བར་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་ལེགས་པར་བྱིན་གྱིས་བརླབ་ཏུ་གསོལ་དེ་ནས་བཅོམ་ལྡན་འདས་ཀྱིས་འཁོར་བཞི་པོ་དེ་དག་གིས་གསོལ་བ་བཏབ་པར་ཐུགས་སུ་ཆུད་ནས་ཕྱོགས་བཅུར་རྣམ་པར་གཟིགས་སོ། །བཅོམ་ལྡན་འདས་ཕྱོགས་བཅུར་རྣམ་པར་གཟིགས་མ་ཐག་ཏུ་དེ་ནས་དེའི་མོད་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་ས་གཞི་ཆེན་པོ་རྣམ་པ་དྲུག་ཏུ་རབ་ཏུ་གཡོས་པར་གྱུར་ཅིང ། ལྷ་
220b
དང།་ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་རྣམས་ཀྱང་དགའ་བ་དང ། མགུ་བ་དང ། ཡི་རངས་པ་དང ། སྤྲོ་བ་དང ། དགའ་བ་དང ། ཡིད་བདེ་བ་སྐྱེས་ནས་ཅི་ནས་ཀྱང་ཕྱི་མའི་དུས་ན་ཆོས་ཀྱི་རྣམ་གྲངས་འདི་ནུབ་བར་མི་འགྱུར་བར་བྱིན་གྱིས་བརླབ་པར་བྱ་བའི་ཕྱིར་དེ་བཞིན་གཤེགས་པ་དང ། བྱང་ཆུབ་སེམས་དཔའ་སེམས་ཅན་ལ་དགའ་བ་རྣམས་དང ། ཉན་ཐོས་ཀྱི་དགེ་འདུན་ལ་ལྷའི་མཆོད་པ་དག་བྱས་ཤིང་སྟེད་གི་བར་སྣང་ལས་མེ་ཏོག་གི་ཆར་དག་ཀྱང་རབ་ཏུ་ཕབ། ལྷའི་སིལ་སྙན་དང ། གླུ་དབྱངས་དག་ཀྱང་རབ་ཏུ་གསིལ་ཅིང་བླངས་སོ། །དེ་ནས་དེ་བཞིན་གཤེགས་པས་ཐམས་ཅད་དང་ལྡན་པའི་འཁོར་དེ་ལ་འདི་སྐད་ཅེས། ང་དང ། འཇམ་དཔལ་གཞོན་ནུར་གྱུར་པས་ཆོས་ཀྱི་རྣམ་གྲངས་འདི་བྱིན་གྱིས་བརླབས་སོ་ཞེས་གོ་བར་མཛད་དོ། །དེ་ནས་ཐམས་ཅད་དང་ལྡན་པའི་འཁོར་དེ་དང ། བྱང་ཆུབ་སེམས་དཔའ་དེ་དག་དགའ་བ་དང ། མགུ་བ་དང ། ཡི་རངས་བ་དང ། རབ་ཏུ་དགའ་བ་དང ། དགའ་བ་དང ། ཡིད་བདེ་བ་སྐྱེས་ནས་བཅོམ་ལྡན་འདས་དང ། འཇམ་དཔལ་གཞོན་ནུར་གྱུར་པ་ལ་མཆོད་པ་བྱས་ཏེ། རང་རང་གི་གནས་སུ་དོང་ངོ ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་བྱམས་པ་དང ། ཚེ་དང་ལྡན་པ་ཀུན་དགའ་བོ་
221a
༄#། །དང ། ཐམས་ཅད་དང་ལྡན་པའི་འཁོར་དེ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ལྷའི་བུ་རབ་རྩལ་སེམས་ཀྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་པྲཛྙཱ་ཝརྨ་དང ། ཞུས་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ཕབ་པ།།