རྒྱ་གར་སྐད་དུ། ཨཱརྱ་ས་མཱ་དྷི་ཨ་གྲ་ཨུཏྟ་མ། བོད་སྐད་དུ། འཕགས་པ་ཏིང་ངེ་འཛིན་མཆོག་དམ་པ། བམ་པོ་གཅིག་གོ་།འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་དགེ་སློང་ཆེན་པོའི་དགེ་འདུན་སུམ་ཁྲི་དང ། བྱང་ཆུབ་སེམས་དཔའ་སྐྱེས་བུ་ཆེན་པོ་ལྔ་སྟོང་ཙམ་དང ། ལྷ་དང ། ཀླུ་ལ་སོགས་པ་སྡེ་བརྒྱད་དང ། ལྷ་དང ། མི་ལ་སོགས་པ་འཁོར་མང་པོ་དང་ཐབས་ཅིག་ཏུ་བཞུགས་སོ། །དེ་མ་ཡིན་པ་གཞན་ཡང་ཕྱོགས་བཞིའི་མགོན་པོ་བཞི་དང ། སྲིན་པོ་དང ། ཡི་དྭགས་ལ་སོགས་པ་སྡེ་ 276b \?\་འང་འཁོར་དེར་འདུས་པར་གྱུར་ཏོ། །དེའི་ཚེ་ན་བཅོམ་ལྡན་འདས་འོད་ཟེར་གྱི་ཏིང་ངེ་འཛིན་དུ་བཞུགས་ནས་ཅང་མ་གསུང་ཞིང་བཞུགས་པ་ལས་འཁོར་མང་པོ་རྣམས་ཐེ་ཚོམ་དུ་གྱུར་ཏོ། །དེ་ནས་བྱང་ཆུབ་སེམས་དཔའ་འཇམ་དཔལ་གཞོན་ནུ་ཆོས་ཀྱི་རྒྱལ་བུ་འདུག་པ་ལས་ལངས་ཏེ་སངས་རྒྱས་ལ་ལན་གསུམ་བསྐོར་བ་བྱས་ནས་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཤིན་ཏུ་ལེགས་སོ་ཆོས་ཀྱི་རྗེ། །ཏིང་ངེ་འཛིན་ལ་ཞི་བར་བཞུགས། །འཁོར་གྱི་དཀྱིལ་འཁོར་མང་པོ་རྣམས། །ཐམས་ཅད་ཐེ་ཚོམ་སྐྱེས་པར་གྱུར། །ཤིན་ཏུ་ལེགས་སོ་ཉི་ཟླའི་འོད། །ཅང་མི་གསུང་བར་སྣང་མི་མཛད། །ཤིན་ཏུ་ལེགས་སོ་རིན་ཆེན་གཏེར། །དབུལ་ཕོངས་རྣམས་ལ་སྦྱིན་མི་མཛད། །ཤིན་ཏུ་ལེགས་སོ་མི་ཡི་རྒྱལ། །ཏིང་ངེ་འཛིན་ལས་བཞེངས་སུ་གསོལ། །ཤིན་ཏུ་ལེགས་སོ་ཀླུ་ཡི་རྒྱལ། །བདུད་རྩིའི་ཆར་པ་དབབ་ཏུ་གསོལ། །ཤིན་ཏུ་ལེགས་སོ་ལྷ་ཡི་མཆོག་།མྱུར་དུ་ཆོས་རྣམས་བསྟན་དུ་གསོལ། ། ཤིན་ཏུ་ལེགས་སོ་སེམས་ཅན་ལ། །ཐེག་པ་གཅིག་དོན་བསྟན་དུ་གསོལ། །དེ་ནས་བཅོམ་ལྡན་འདས་ཏིང་ངེ་འཛིན་དེ་ལས་བཞེངས་ནས་འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ང་ལ་རིན་པོ་ཆེ་བླ་ན་མེད་པའི་ཡེ་ཤེས་མང་དུ་ཡོད་པ་ཁྱོད་ལ་ཕན་པ་དང་བདེ་བར་མཛད་ཅིང་དབུལ་ཕོངས་པ་དང་བྲལ་བར་བྱ་བ་ཡོད་ཀྱི། ཐེ་ཚོམ་མ་བྱེད་པར་ཅི་ 277a ༄#། །དང་ཅི་འདོད་པ་དྲིས་ཤིག་།དེ་ནས་དགའ་བོ་སྟན་ལས་ལངས་ཏེ་སངས་རྒྱས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ནི། མང་དུ་ཐོས་པས་བླ་ན་མེད་པའི་བྱང་ཆུབ་མྱུར་དུ་འཐོབ་སྙམ་ན། མདོ་སྡེ་དག་ལས་བཤད་པ་ཐོས་པ་ལྟར་ན་མང་དུ་ཐོས་ཤིང་ཤེས་རབ་རྣོ་བའི་དབང་པོ་དང་ལྡན་པ་ནི། བྱང་ཆུབ་ཐོབ་པ་ཤིན་ཏུ་དཀའ་སྟེ། བགེགས་བརྒྱད་དུ་སྐྱེའོ། །ཞེས་འབྱུང་ན། བདག་གིས་ཇི་ལྟར་བླ་ན་མེད་པའི་བྱང་ཆུབ་ཐོབ་པར་འགྱུར། བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། དགའ་བོ།་མང་དུ་ཐོས་པ་ལ་སེམས་རྣམ་པ་གཉིས་ཏེ། གང་ཞེ་ན། ཏིང་ངེ་འཛིན་གྱི་སེམས་དང ། འཁྲུལ་པའི་སེམས་སོ། །སེམས་ཏིང་ངེ་འཛིན་ལ་གནས་ན་ནི། མང་དུ་ཐོས་པས་ཀྱང་གནོད་པ་མེད་དོ། །སེམས་འཁྲུལ་པ་ལ་གནས་ན་ནི། མང་དུ་ཐོས་པས་ཀྱང་ཕན་པ་མེད་དེ། གང་གིས་ཏིང་ངེ་འཛིན་དང ། ཤེས་རབ་དང་ཤིན་ཏུ་ལྡན་ན། མྱུར་དུ་བླ་ན་མེད་པའི་བྱང་ཆུབ་ཐོབ་པར་འགྱུར་རོ། །དགའ་བོས་གསོལ་པ། བཅོམ་ལྡན་འདས། ཅིའི་སླད་དུ་མདོ་ཀུན་ལས་ཏིང་ངེ་འཛིན་དང ། ཤེས་རབ་ནི། མཆོག་དམ་པའོ། །ཞེས་བསྟོད། བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། དགའ་བོ། ཏིང་ངེ་འཛིན་དང ། ཤེས་རབ་ཏུ་ལྡན་པ་ནི། དཔེར་ན། རི་དྭགས་ཀྱི་ནང་ན་སེངྒེ་མཆོག་ཏུ་གྱུར་པ་དང ། སྣང་བ་ 277b ཐམས་ཅད་ཀྱི་ནང་ན་ཉི་མ་མཆོག་ཏུ་གྱུར་པ་དང ། རིའི་ནང་ན་རི་རབ་ལྷུན་པོ་མཆོག་ཏུ་གྱུར་པ་ལྟ་བུའོ། །དེའང་ཅིའི་ཕྱིར་ཞེ་ན། ཏིང་ངེ་འཛིན་དང ། ཤེས་རབ་ཏུ་ལྡན་པའི་ཤུགས་ནི། མཆོག་དམ་པ་ཡིན་པའི་ཕྱིར་རོ། །བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། དགའ་བོ། གལ་ཏེ་མི་ཞིག་གིས་ཤིང་ཙནྡན་ལས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་བའི་གཙུག་ལག་ཁང་བརྩིགས་པ་དང ། མི་གཞན་ཞིག་གིས་རིན་པོ་ཆེ་སྣ་བདུན་ལས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་བའི་གཙུག་ལག་ཁང་བྱས་ན།་མི་དེ་གཉིས་ཀྱི་བསོད་ནམས་མཉམ་པ་ཡིན་ནམ། དགའ་བོས་གསོལ་པ། མི་དེ་གཉིས་ཀྱི་ནང་ན་རིན་པོ་ཆེ་སྣ་བདུན་ལས་བགྱིས་པའི་བསོད་ནམས་མཆོག་གོ་།སངས་རྒྱས་ཀྱིས་དགའ་བོ་ལ་བཀའ་སྩལ་པ། གཞན་ཡང་མི་ཞིག་གིས་གསེར་ཐ་མལ་པ་ལས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་བའི་གཙུག་ལག་ཁང་བྱས་པ་དང ། མི་གཞན་ཞིག་གིས་གསེར་བཙོ་མ་ལས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་བའི་གཙུག་ལག་ཁང་བྱས་ན། དེ་གཉིས་ཀྱི་བསོད་ནམས་མཉམ་པ་ཡིན་ནམ། དགའ་བོས་གསོལ་པ། གསེར་བཙོ་མ་ལས་བྱས་པའི་བསོད་ནམས་རབ་ཏུ་ཆེའོ། །སངས་རྒྱས་ཀྱིས་དགའ་བོ་ལ་བཀའ་སྩལ་པ། གལ་ཏེ་མི་ཞིག་གིས་ཤིང་ཙནྡན་དང ། སྤོས་ཀྱི་ཤིང་གཞན་དག་ལས་སྟོང་ 278a ༄#། །གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་བའི་སྐུ་གཟུགས་བྱས་ཏེ་མཆོད་པ་བྱེད་ཅིང་ཕྱག་འཚལ་བ་དང ། མི་གཞན་ཞིག་གིས་གསེར་བཙོ་མ་དང ། རིན་པོ་ཆེ་སྣ་བདུན་ལས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་བའི་སྐུ་གཟུགས་བྱས་ཏེ་མཆོད་པ་བྱེད་ཅིང་ཕྱག་འཚལ་ན། མི་དེ་གཉིས་ཀྱི་བསོད་ནམས་ལ་ཁྱད་པར་ཡོད་དམ། དགའ་བོས་གསོལ་པ། རིན་པོ་ཆེ་སྣ་བདུན་དང ། གསེར་བཙོ་མ་ལས་སྐུ་གཟུགས་བགྱིས་པའི་བསོད་ནམས་ཆེའོ། །སངས་རྒྱས་ཀྱིས་དགའ་བོ་ལ་བཀའ་སྩལ་པ།་གལ་ཏེ་མི་ཞིག་གིས་སྦྱིན་པ་ཆེན་པོའི་སེམས་བསྐྱེད་དེ་རིན་པོ་ཆེ་སྣ་བདུན་གྱི་བང་མཛོད་དང ། ཆུང་མ་དང ། བུ་སྦྱིན་པ་བྱིན་པ་དང ། མི་གཞན་ཞིག་གིས་ཡན་ལག་གི་དམ་པ་མགོ་དང ། མིག་དང ། ལུས་དང ། རྙེད་དཀའ་བའི་རིན་པོ་ཆེ་སྣ་བདུན་གྱི་བང་མཛོད་ཀྱི་སྦྱིན་པ་བྱིན་ན། མི་དེ་གཉིས་ཀྱི་བསོད་ནམས་ལ་ཁྱད་པར་ཅི་ཡོད། དགའ་བོས་གསོལ་པ།་རིན་པོ་ཆེ་སྣ་བདུན་དང ། ལུས་དང ། ཆུང་མ་དང ། བུར་བཅས་པའི་སྦྱིན་པའི་བསོད་ནམས་ཆེ་བ་ལགས་སོ། །སངས་རྒྱས་ཀྱིས་དགའ་བོ་ལ་བཀའ་སྩལ་པ། གལ་ཏེ་མི་ཞིག་གིས་མདོ་སྡེ་བཅུ་གཉིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་བའི་མི་རྣམས་ལ་འཇིག་རྟེན་དུ་སྤེལ་ཏེ་ཀློག་ཅིང་ཁ་ཏོན་བྱེད་དུ་འཇུག་པ་དང ། དེ་ལ་མི་ཞིག་ 278b གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་བའི་མི་རྣམས་ཡི་གེ་བཞིན་དུ་འདོན་ཅིང་ཡི་གེ་དང་དོན་སྟོང་ཅིང་ཁོང་དུ་ཆུད་ན། མི་དེ་གཉིས་ཀྱི་བསོད་ནམས་གང་ཆེ། དགའ་བོས་གསོལ་པ། ཡི་གེ་བཞིན་དུ་འདོན་ཅིང་ཁོང་དུ་ཆུད་པའི་བསོད་ནམས་ཆེའོ། །སངས་རྒྱས་ཀྱིས་དགའ་བོ་ལ་བཀའ་སྩལ་པ། གལ་ཏེ་མི་ཞིག་གིས་མདོ་སྡེ་བཅུ་གཉིས་ཀྱང་ཐོགས་པ་མེད་པར་ཁ་ཏོན་དུ་ཤེས་ལ་དོན་ཟབ་མོ་མི་ཤེས་པར་མདོ་སྡེ་གླེགས་བམ་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་བ་ཙམ་འཆང་བ་དང ། དེ་ལ་མི་ཞིག་མདོ་སྡེ་བཅུ་གཉིས་ཀྱང་བྱང་བར་ཁ་ཏོན་ཤེས་ལ་དོན་ཟབ་མོའང་རྟོགས་ཏེ། མདོ་སྡེའི་གླེགས་བམ་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་བ་ཙམ་འཆང་ན།་མི་དེ་གཉིས་ཀྱི་བསོད་ནམས་གང་མཆོག་ཏུ་གྱུར་པ་ཡིན། དགའ་བོས་གསོལ་པ། ཁ་ཏོན་བགྱིས་ལ་དོན་ཡང་རྟོགས་ཏེ། གཞན་ལའང་སྟོན་ཅིང་འཆད་པའི་བསོད་ནམས་མཆོག་ཏུ་གྱུར་པ་ལགས་སོ། །སངས་རྒྱས་ཀྱིས་དགའ་བོ་ལ་བཀའ་སྩལ་པ། གལ་ཏེ་མི་ཞིག་གིས་མདོ་སྡེ་བཅུ་གཉིས་འགྲེལ་ཅིང་འཆད་ལ། སྦྱིན་པ་དང ། ཚུལ་ཁྲིམས་དང ། བཟོད་པ་དང ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་མི་སྤྱོད་པ་དང ། གལ་ཏེ་མི་ཞིག་གིས་མདོ་སྡེ་བཅུ་གཉིས་ཀྱང་འགྲེལ་ཅིང་འཆད་ལ། སྦྱིན་པ་དང ། 279a ༄#། །ཚུལ་ཁྲིམས་དང ། བཟོད་པ་དང ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་ཀྱང་རྒྱ་ཆེར་སྤྱོད། སེམས་ཅན་རྣམས་ལ་བུ་གཅིག་པ་དང་འདྲ་བར་སེམས་སྙོམས་ན། མི་དེ་གཉིས་བསོད་ནམས་གང་ཆེ་བ་ཡིན། དགའ་བོས་གསོལ་པ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་དང ། ཚུལ་ཁྲིམས་དང ། བཟོད་པ་སྤྱོད་ཅིང་སེམས་ཅན་ལ་སྦྱིན་པ་བྱིན་པའི་བསོད་ནམས་ཆེ་ཞིང་མང་བ་ལགས་སོ། །བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། གལ་ཏེ་མི་ཞིག་གིས་མདོ་སྡེ་བཅུ་གཉིས་ཀྱང་འགྲེལ་ཅིང་འཆད་ཤེས་ལ་བསྟན་བཅོས་འུ་ཏ་བཅོ་ལྔ་ཡང་བྱང་བར་འཆད་ཤེས་ཏེ་འཇིག་རྟེན་དུ་སྤེལ་བ་དང ། དེ་ལ་མི་ཞིག་གིས་མདོ་སྡེ་བཅུ་གཉིས་ཀྱང་འགྲེལ་ཅིང་འཆད་ཤེས་ལ། བཀྲི་བའི་བསྟན་བཅོས་དང ། ངེས་པའི་བསྟན་བཅོས་དང ། ཕུང་པོ་ལྔའི་བསྟན་བཅོས་དང ། རྟེན་ཅིང་འབྲེལ་པར་འབྱུང་བ་བཅུ་གཉིས་ཀྱི་བསྟན་བཅོས་དང ། ཁམས་བཅོ་བརྒྱད་ཀྱི་བསྟན་བཅོས་དང ། སྟོང་པ་ཆེན་པོའི་བསྟན་བཅོས་དང ། ཉི་ཟླའི་བསྟན་བཅོས་དང ། ཟླ་བ་སྦྲིན་གྱི་བསྟན་བཅོས་དང ། མདོ་སྡེ་རྒྱན་གྱི་བསྟན་བཅོས་དང ། དོན་དམ་པ་ཉིད་ཀྱི་བསྟན་བཅོས་དང ། རྡོ་རྗེ་སྙིང་པོའི་བསྟན་བཅོས་དང ། རྣམ་པ་ཐམས་ཅད་མཁྱེན་པའི་བསྟན་བཅོས་དང ། རྣམ་པར་ཐར་པའི་ 279b སྒོ་གསུམ་གྱི་བསྟན་བཅོས་ལ་སོགས་པ་བསྟན་བཅོས་འུ་ཏ་བཅོ་ལྔའང་ཤེས་ལ། སྦྱིན་བ་དང ། ཚུལ་ཁྲིམས་དང ། བཟོད་པ་དང ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་ཀྱང་སྤྱོད་དེ། ཚུལ་ཁྲིམས་འཆལ་པ་དང ། ཚུལ་ཁྲིམས་སྲུང་བ་དང ། སེམས་གཉིས་སུ་མེད་ཅིང་ནམ་མཁའ་ལྟར་མཉམ་པ་དང ། སེམས་ཅན་གྱི་སྐྱོན་ཐམས་ཅད་མི་མཐོང་ཞིང་སེམས་ཅན་རྣམས་ལ་བུ་གཅིག་པ་དང་འདྲ་བར་སྙོམས་ཏེ་དགྲ་སྡང་བ་ལའང་ནམ་མཁའ་ལྟར་མཉམ་པ་དང ། དེ་ལ་མི་ཞིག་གིས་ཕྱོགས་སུ་རྒྱས་པའི་མདོ་སྡེ་བཅུ་གཉིས་ལ་སྐུར་པ་མི་འདེ་བས་ན། མི་དེ་གཉིས་ཀྱི་བསོད་ནམས་གང་ཆེ་བ་ཡིན། དགའ་བོས་གསོལ་བ། ཕྱོགས་སུ་རྒྱས་པའི་མདོ་སྡེ་བཅུ་གཉིས་ལ་སྐུར་བ་མ་བཏབ་ན། མི་དེའི་བསོད་ནམས་ཚད་མ་མཆིས་གྲངས་མ་མཆིས་ཏེ། བསམ་གྱིས་མི་ཁྱབ་པ་ལགས་སོ། །བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། གཞན་ཡང་མི་ཞིག་གི་གོང་དུ་སྨྲས་པའི་བསོད་ནམས་ཐམས་ཅད་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་བར་བྱེད་ནུས་ལ་མདོ་སྡེ་བཅུ་གཉིས་དང ། བསྟན་བཅོས་འུ་ཏ་བཅོ་ལྔ་སྙེད་ཀྱང་ཁ་ཏོན་དང་འགྲེལ་ཅིང་འཆད་ནུས་ཏེ། ཚུལ་ཁྲིམས་དང ། བཟོད་པ་དང ། བྱམས་པ་ལ་སོགས་པའང་སྤྱོད། སྦྱིན་པའང་བྱེད་དེ། མང་དུ་ཐོས་པའི་མཆོག་ཏུའང་གྱུར་ལ་ཆོས་ཐམས་ཅད་སྟོང་ཞིང་ཞི་བའི་དོན་ཡང་སྟོན་ཏེ། ཉན་ 280a ༄#། །པའི་མངོན་བར་ཤེས་པ་ལྔ་ཐོབ་པར་བྱེད་དེ། དེ་ལྟར་ཕན་པ་དང་དེ་བའི་དོན་བྱས་ཀྱང་དེས་ནི། མི་ཞིག་ཉིན་གཅིག་གམ། མཚན་གཅིག་ཏིང་ངེ་འཛིན་དུ་ཞུགས་པ་ཙམ་དུ་མི་ཕོད་དོ། །དེ་ཅིའི་ཕྱིར་ཞེ་ན། མང་དུ་ཐོས་པའི་གང་ཟག་ནི། རིའམ་རྒྱ་མཚོ་ལྟར་ང་རྒྱལ་གྱི་སེམས་ཆེའོ། །དེ་ལྟར་ང་རྒྱལ་ཆེ་བ་ནི། ངན་སོང་དུ་བསྐལ་པ་གྲངས་མེད་ཀྱི་བར་དུ་སྡུག་བསྔལ་མྱོང་བར་འགྱུར་རོ། །དམྱལ་བ་དེ་ལས་ཐར་ནའང་འདབ་ཆགས་ཀྱི་བྱར་སྐྱེ་བར་འགྱུར་ན། མང་དུ་ཐོས་པ་ལ་ཕན་པ་ཅི་ཡོད། གང་ལ་བསམ་གཏན་གྱི་ཏིང་ངེ་འཛིན་ཡོད་པ་ནི། སྐྱེ་ཤི་འཁོར་བའི་སྡིག་ཁ་ན་མ་ཐོ་བའི་ལས་ལྕི་བ་བྱང་བར་ནུས་སོ། །མང་དུ་ཐོས་པ་ནི། རྩཝ་དང་འདྲའོ། །ཏིང་ངེ་འཛིན་ནི། མེ་དང་འདྲའོ། །མང་དུ་ཐོས་པ་ནི། ལྕགས་དང་འདྲའོ། །བསམ་གཏན་གྱི་ཏིང་ངེ་འཛིན་ནི། གསེར་དང་འདྲའོ། །མང་དུ་ཐོས་པ་ནི། རྩི་བདུག་པ་དང་འདྲའོ། །བསམ་གཏན་གྱི་ཏིང་ངེ་འཛིན་ནི། རྩིའི་སྡོང་པོ་དང་འདྲའོ། །མང་དུ་ཐོས་པ་ནི། གཙང་པོ་དང་འདྲའོ། །བསམ་གཏན་གྱི་ཏིང་ངེ་འཛིན་ནི། རྒྱ་མཚོ་དང་འདྲ་སྟེ། ངས་བསམ་གཏན་གྱི་ཏིང་ངེ་འཛིན་གྱི་བསོད་ནམས་དང ། ཡོན་ཏན་བཤད་ན། ཟད་པའི་མཐའ་མེད་དེ། བསྐལ་པར་ཡང་མི་རྫོགས་སོ། །བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་གངས་མངོན་སུམ་དུ་དྲན་པ་སྔོན་འདས་ 280b པའི་དུས་ན་མང་དུ་ཐོས་པའི་སྐྱེ་བོར་གྱུར་པའི་ཚེ་འཇམ་དཔལ་དང་ང་གཉིས་ཡོད་མེད་གཉིས་ལ་རྩོད་པར་གྱུར་ཏེ། འཇམ་དཔལ་ནི། ཡོད་ཅེས་སྨྲ། ངས་ནི། མེད་དོ། །ཞེས་སྨྲས་ཏེ། ཡོད་མེད་གཉིས་ཀྱི་བདེན་པ་ལ་རྩོད་པར་གྱུར་ཏེ་གཅིག་ཏུ་མ་ཆད་དོ། །ཐ་མ་ཚེ་འཕོས་ནས་ངན་སོང་དུ་སྐྱེས་པར་གྱུར་ཏེ། བསྐལ་པ་གྲངས་མེད་ཀྱི་བར་དུ་ལྕགས་ཀྱི་ཐུ་ལུམ་ཟ་བར་གྱུར་ཏོ། །དམྱལ་བ་དེ་ལས་ཐར་ཏེ་སངས་རྒྱས་འོད་སྲུང་དང་ཕྲད་ནས་ཡོད་པ་དང ། མེད་པའི་བདེན་པ་གཉིས་འོད་སྲུང་གིས་འདི་སྐད་དུ་བཤད་དོ། །ཆོས་ཐམས་ཅད་ཀྱི་རང་བཞིན་ནི། གཅིག་ཏུ་ངེས་ཤིང་ཆད་པ་མེད་དེ། ཁྱེད་ཡོད་པ་དང ། མེད་པར་སྨྲ་བ་ནི། དོན་དེ་ལྟ་བུ་མ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི། སྟོང་པ་ཉིད་ཀྱིས་ཞི་བ་སྟེ། བདེན་པ་འདི་གཉིས་ནི། ཡོད་པའང་མ་ཡིན་ལ། མེད་པའང་མ་ཡིན་ཏེ། ཁྱེད་ཤེས་པ་ནི། ཡི་གེའི་དོན་ཤེས་པར་ཟད་ཀྱི། དོན་ཟབ་མོ་མི་ཤེས་པས་དོན་འདི་ལྟ་བུ་ནི། ཁྱེད་དམུས་ལོང་དམ་འོན་པ་ལྟ་བུ་ཡིན་ན། དོན་ཟབ་མོ་འདི་ལྟ་བུ་ཇི་ལྟར་ཤེས་ཤིང་རྟོགས་པར་གྱུར་ཅེས་བཤད་པ་ཐོས་ནས་རི་དབེན་པར་སོང་སྟེ། བདག་ཉིད་ཡིད་ལ་བྱས་ནས་བསམ་གཏན་གྱི་ཏིང་ངེ་འཛིན་ལ་ཞུགས་སོ། །ཞག་བདུན་ལོན་པ་དང་བསམ་གཏན་ཞི་བའི་ཏིང་ངེ་འཛིན་དང ། ཏིང་ངེ་འཛིན་རྣམ་གསུམ་དང ། ཡེ་ཤེས་རྣམ་གསུམ་དང ། ཆེན་པོ་སྟོང་པ་ཉིད་དང ། 281a ༄#། །དོན་དམ་པ་སྟོང་པ་ཉིད་དང ། སྟོང་པ་ཉིད་སྟོང་པ་ཉིད་འདི་དག་རྟོགས་ཤིང་ཁོང་དུ་ཆུད་པར་གྱུར་ཏེ། ཆོས་ཐམས་ཅད་སྟོང་པ་ཉིད་ཀྱིས་ཞི་བ་ཅིའང་མེད་པར་རྟོགས་སོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི། ངོ་བོ་ཉིད་ཀྱིས་སྟོང་པའི་ཕྱིར་རོ། །དེ་བས་ན། བསམ་གཏན་སྒོམ་པ་ནི། མཆོག་དམ་པར་རིག་པར་བྱ་སྟེ། གང་ཞིག་ཉིན་གཅིག་གམ། མཚན་གཅིག་གམ། ཉིན་ཞག་བདུན་གྱི་བར་དུ་བསམ་གཏན་གྱི་ཏིང་ངེ་འཛིན་བསྒོམས་ན། བསྐལ་པ་གྲངས་མེད་པ་ཚུན་ཆད་ཀྱི་ཁ་ན་མ་ཐོ་བའི་སྡིག་ལྕི་བའང་ཁད་ཀྱིས་ཞི་ཞིང་བྱང་བར་འགྱུར་རོ། །གཞན་ཡང་ཁ་ན་མ་ཐོ་བའི་སྡིག་ལྕི་བའང་འབྱང་བར་འགྱུར་ཏེ། དེའང་གང་ཞེ་ན། ཕ་མ་བསད་པ་དང ། དགྲ་བཅོམ་པ་བསད་པ་དང ། མཆོད་རྟེན་དང ། གཙུག་ལག་ཁང་བཤིག་པ་དང ། དགེ་འདུན་གྱི་གནས་ཁང་མེས་བཏང་བ་ཡིན་ཏེ། ཕས་ཕམ་པ་བཞི་དང ། ཕས་ཕམ་པ་བརྒྱད་དང ། ལྕི་བ་ལྔ་དང ། རང་བཞིན་གྱི་ལྕི་བ་དྲུག་ཉམས་པ་ཡིན། ཕྱོགས་སུ་རྒྱས་པའི་མདོ་སྡེ་ལ་སྐུར་པ་བཏབ་པ་ཡིན། ཕ་རོལ་པོའི་ཉེས་པའི་སྐྱོན་སྨྲ་ཞིང་བཀུར་སྟི་མི་བྱེད་པ་ཡིན། གང་དུ་སྐྱེས་པར་ང་རྒྱལ་ཆེ་བ་དང ། རང་བཞིན་གྱིས་སྡིག་ལྕི་བ་ཡང་ཡིན་ཏེ། དེའང་བསམ་གཏན་གྱི་ཏིང་ངེ་འཛིན་བསྒོམས་ན་རང་ཞི་ཞིང་འབྱང་བར་འགྱུར། དེའང་བསམ་གཏན་གྱི་ཏིང་ངེ་འཛིན་གྱི་ 281b མཐུས་འབྱང་གི་།གཞན་གྱིས་འབྱང་བ་མ་ཡིན་ནོ། །ཉིན་ཞག་བདུན་ཙམ་གྱིས་ཀྱང་དེ་ལྟར་ཡོན་ཏན་དང ། བསོད་ནམས་དཔག་ཏུ་མེད་པ་འཐོབ་ན། ཚེ་གཅིག་ཏུ་དབེན་པར་རི་དང་ཤིང་དྲུང་དུ་འདུག་སྟེ་རྟོག་པ་བསལ་བ་དང ། འཇུག་པ་དང ། སྤོང་བ་ཡིད་ལ་བྱེད་པ་ལྟ་སྨོས་ཀྱང་ཅི་དགོས། དེ་ཅིའི་ཕྱིར་ཞེ་ན། སེམས་ནི་འབབ་ཆུ་དང་འདྲ་སྟེ། སྐད་ཅིག་ཀྱང་མི་སྡོད།་སེམས་ནི། སྤྲེའུ་དང་མཚུངས་ཏེ། གཅིག་བཏང་ཡང་གཅིག་ལ་འཛིན་ཏོ། །མདོར་ན་སེམས་ནི། ཏིང་ངེ་འཛིན་གྱི་དབང་གིས་མི་གཡོའོ། །གལ་ཏེ་སེམས་གཡོ་ན། ཆོས་ཐམས་ཅད་ལ་འཁྲུལ་བའི་འདུ་ཤེས་སྐྱེའོ། །གལ་ཏེ་ཏིང་འཛིན་ལ་གནས་ན་ནི། འཇིག་རྟེན་ན་སྐྱེ་བ་དང ། གནས་པ་དང ། འགོག་པའི་འདུ་ཤེས་ཤིང་རྟོགས་ཏེ། ཆོས་ཐམས་ཅད་སྟོང་པ་ཉིད་ཀྱིས་ཞི་བ། མི་རྟག་པ། འགྱུར་ཞིང་འཕོ་བ། སྟོང་ཞིང་བདག་མེད་པ། སྒྱུ་མ་དང་འདྲ་བ། སྤྲུལ་པ་ལྟ་བུ། གློག་དང ། རླུང་དང ། དྲི་ཟའི་གྲོང་ཁྱེར་ལྟ་བུ། ཆུའི་དབུ་བ་དང ། སྨིག་རྒྱུ་དང ། བྲག་ཅ་དང ། བར་སྣང་གི་བྱའི་རྗེས་ལྟ་བུར་རྟོགས་སོ། །འཇིག་རྟེན་ན་སྲིད་པ་རི་དང ། ཚལ་དང ། གཙང་པོ་དང ། འབབ་ཆུ་དང ། མཚེའུ་དང ། ལྟེང་ཀ་དང ། རྒྱ་མཚོ་ལ་སོགས་པ་ཆུ་ཐམས་ཅད་ཀྱང་མེའི་བསྐལ་པ་ཆེན་པོ་བྱུང་བའི་ཚེ་ཐམས་ཅད་ཚིག་ཅིང་ཟད་པར་འགྱུར་ཡང་བསམ་གཏན་བཞི་དང ། གཟུགས་མེད་པའི་ཏིང་ངེ་འཛིན་བཞི་མ་གཏོགས་ཏ། 282a ༄#། །ཆོས་ཐམས་ཅད་སྟོང་པ་ཉིད་དུ་ཤེས་ན་བསམ་གཏན་གྱི་མཐུ་ནི། ཤིན་ཏུ་བསམ་གྱིས་མི་ཁྱབ་པར་རིག་པར་བྱའོ། །སེམས་ཏིང་ངེ་འཛིན་ལ་གནས་ན། ཕྱོགས་བཅུའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཉི་མ་དང ། ཟླ་བ་དང ། སྐར་མ་དང ། འབབ་ཆུ་དང ། གཙང་པོ་དང ། རྒྱ་མཚོ་དང ། རི་དང ། ཚལ་དང ། ཀླུ་དང ། ལུང་པ་དང ། སྐྱུ་རུ་རའི་འབྲས་བུ་ལག་མཐིལ་དུ་བཞག་པ་བཞིན་དུ་མཐོང་བར་འགྱུར་རོ། །བསམ་གཏན་གྱི་ཏིང་ངེ་འཛིན་ལ་གནས་ན། རྫུ་འཕྲུལ་གྱིས་ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དུའང་ཕྱིན་ཅིང་ཕྱོགས་བཅུའི་འཇིག་རྟེན་གྱི་ཁམས་ཀྱི་རླུང་དང ། མེ་དང ། ས་དང ། ཆུ་དང ། ཉི་མ་དང ། ཟླ་བ་དང ། སྐར་མ་དང ། གཟའ་དང ། རི་དང ། ཚལ་དང ། ཆུ་དང ། ཤིང་དང ། ལྷའི་ཕོ་བྲང་དང ། ཀླུའི་ཕོ་བྲང་ཡང་རྫུ་འཕྲུལ་གྱིས་སྤྲུལ་ནུས་ཏེ། དེ་བས་ན་བསམ་གཏན་གྱི་མཐུ་ནི། ཤིན་ཏུ་བསམ་གྱིས་མི་ཁྱབ་པར་རིག་པར་བྱ། བསམ་གཏན་གྱི་ཏིང་ངེ་འཛིན་གྱི་ཤུགས་ཀྱིས་སྟོང་གསུམ་གྱི་སྟོང་ཆེན་པོའི་ཕྱོགས་བཅུའི་འཇིག་རྟེན་གྱི་ཁམས་ཀྱང་སྤྲུལ་ནུས་སོ། །དགའ་བོ། །མཽངྒལ་གྱི་བུ་ཆེན་པོ་ཏིང་ངེ་འཛིན་དུ་ཞུགས་ནས་ཏིང་ངེ་འཛིན་གྱིས་རྣམ་པ་སྣ་ཚོགས་སུ་སྤྲུལ་ཅིང་ཏིང་ངེ་འཛིན་གྱིས་ས་ཆེན་པོ་འདིའང་མགལ་མེ་བསྐོར་བ་བཞིན་དུ་བསྐྱོད་ནུས་ཏེ། མང་དུ་ཐོས་པས་ནི། 282b དེ་ལྟར་མི་ནུས་པར་རིག་པར་བྱའོ། །བཅོམ་ལྡན་འདས་ཀྱིས་དགའ་བོ་ལ་ཁྱོད་ས་ཆེན་པོ་སྒུལ་ཅིག་ཅས་བཀའ་སྩལ་པ་དང ། དགའ་བོས་གསོལ་པ། བདག་ལ་བསམ་གཏན་གྱི་ཏིང་ངེ་འཛིན་མ་མཆིས་པས་སྒུལ་རྔོ་མི་ཐོགས་སོ། །བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། བསམ་གཏན་གྱི་ཏིང་ངེ་འཛིན་སྒོམ་པ་དགེ་སྦྱོང་གི་འབྲས་བུ་བཞི་མ་ཐོབ་ཀྱང་མང་དུ་ཐོས་པ་ལས་ཁྲི་ཕྲག་བརྒྱ་སྟོང་གིས་འཕགས་སོ། །དེའི་ཚེ་དེའི་དུས་ན་འོད་མའི་ཚལ་ན་གནས་པའི་དགེ་སློང་ལྔ་བརྒྱ་ཙམ་ཞིག་ཐམས་ཅད་མང་དུ་ཐོས་བར་རློམ་པ་ལས། བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། མཽངྒལ་གྱི་བུ་ཆེན་པོའི་རྫུ་འཕྲུལ་དང ། ཏིང་ངེ་འཛིན་མཆོག་གོ་།ཞེས་གསུངས་པ་ཐོས་ནས་སངས་རྒྱས་གང་ན་བ་དེར་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་སངས་རྒྱས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བདག་ཅག་མང་དུ་ཐོས་པ་བསླབ་སྟེ་མདོ་སྡེ་བཅུ་གཉིས་ཀྱང་ཁོད་དུ་ཆུད་པས་རྒྱལ་ཁམས་ཆེན་པོ་བཅུ་དྲུག་སྙེད་ཀྱང་བདག་ཅག་ལ་སངས་རྒྱས་དང་འདྲ་བར་གུས་ཤིང་བཀུར་སྟི་བགྱི་ན། ཅིའི་སླད་དུ་བཅོམ་ལྡན་འདས་ཀྱིས་མང་དུ་ཐོས་པ་ནི། ནམ་ཡང་བླ་ན་མེད་པའི་བྱང་ཆུབ་ཐོབ་པར་མི་འགྱུར་རོ། །ཞེས་གསུངས་ཞེས་གསོལ་པ་དང ། བཅོམ་ལྡན་འདས་ལ་དགེ་སློང་ལྔ་བརྒྱ་པོ་མཐུན་པར་དུས་གཅིག་ཏུ་བདག་ཅག་ནི། མང་དུ་ 283a ༄#། །ཐོས་པ་སྤང་ཞིང་བསམ་གཏན་གྱི་ཏིང་ངེ་འཛིན་ལ་སློབ་བོ་ཞེས་གསོལ་ཏོ། །བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་།ཁྱེད་མང་དུ་ཐོས་པ་སྤངས་ཏེ་བསམ་གཏན་གྱི་ཏིང་ངེ་འཛིན་ལ་འཇུག་གོ། ཞེས་མ་སྨྲ་ཞིག། ངས་བལྟས་ན། ཁྱེད་ཀྱི་ཤེས་རབ་ནི། སྦྲང་བུའི་འདབ་མས་ཉི་ཟླ་སྒྲིབ་པར་འདོད་པ་དང ། དམུས་ལོང་གིས་རི་རབ་ལྷུན་པོ་ལ་འཛེག་པར་འདོད་པ་དང ། གྲུ་གཟིངས་མེད་པར་རྒྱ་མཚོ་ལ་རྒལ་བར་འདོད་པ་དང ། བྱ་འདབ་མ་ཆག་པ་ནམ་མཁའ་ལ་འཕུར་འདོད་པ་བཞིན་ཁྱེད་ཀྱང་དེ་དང་འདྲའོ། །ཞེས་བཀའ་སྩལ་པ་དང ། དགེ་སློང་རྣམས་ཤི་བ་ཙམ་དུ་འཇིགས་ཤིང་སྐྲག་པའི་སེམས་སྐྱེས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་ཁྱོད་མ་འཇིགས་མ་སྐྲག་པར་སེམས་ཏིང་ངེ་འཛིན་ལ་ཞོག་ཅིག་།དགེ་སློང་རྣམས་ཀྱིས་གསོལ་པ། བདག་ཅག་ལ་བསམ་གཏན་གྱི་མཐུའང་མ་མཆིས་ན། ཏིང་ངེ་འཛིན་དུ་ག་ལ་འགྱུར། བཅོམ་ལྡན་འདས་ཀྱིས་བཀའ་སྩལ་པ། ང་ལ་སྨན་དམ་པ་ཡོད་དེ། ཁྱེད་ཏིང་ངེ་འཛིན་ཐོབ་པར་བྱའོ། །ཞེས་བཀའ་སྩལ་པ་དང ། དགེ་སློང་རྣམས་ཀྱིས་བཅོམ་ལྡན་འདས་བསྟན་དུ་གསོལ། བདག་ཅག་གིས་དེ་བཞིན་དུ་སྤྱོད་པར་འཚལ་ལོ། །ཞེས་གསོལ་ཏོ། །བཅོམ་ལྡན་འདས་ཀྱིས་བཀའ་ 283b སྩལ་པ།་སྨན་དམ་པ་ཞེས་བྱ་བ་ནི། འདི་ལྟ་སྟེ། རྟོག་པ་དང ། བསལ་བ་དང ། འཇུག་པ་དང ། སྤོང་བའོ། །དགེ་སློང་རྣམས་ཀྱིས་གསལ་པ། རྟོག་པ་དང ། བསལ་བ་དང ། འཇུག་པ་དང ། སྤོང་བ་ཅི་ལགས་བདག་ཅག་གིས་མ་འཚལ་ན། བཅོམ་ལྡན་འདས་ཀྱིས་བསྟན་དུ་གསོལ། དེ་ནས་སངས་རྒྱས་ཀྱིས་འདི་སྐད་ཅེས་བཀའ་སྩལ་ཏོ། །དང་པོའི་སེམས་ནི། རྟོག་པ་ཞེས་བྱ།་སེམས་གཉིས་བྱུང་བ་ནི། བསལ་བ་ཞེས་བྱ། སེམས་གསུམ་བྱུང་བ་ནི། འཇུག་པ་ཞེས་བྱ། སེམས་བཞི་བྱུང་བ་ནི། སྤོང་བ་ཞེས་བྱའོ། །གཞན་ཡང་འདི་ལྟ་སྟེ། བསམ་གཏན་དང་པོ་ལ་རྟོག་པ་ཞེས་བྱ། བསམ་གཏན་གཉིས་པ་ལ་བསལ་བ་ཞེས་བྱ། བསམ་གཏན་གསུམ་པ་ལ་འཇུག་པ་ཞེས་བྱ། བསམ་གཏན་བཞི་པ་ལ་སྤོང་བ་ཞེས་བྱའོ། །གཞན་ཡང་འདི་ལྟ་སྟེ། བསམ་གཏན་ཞེས་བྱ་བ་ནི། ལུས་དྲན་པ་ཉེ་བར་གཞག་པ་དང ། སེམས་དྲན་པ་ཉེ་བར་གཞག་པ་དང ། ཆོས་དྲན་པ་ཉེ་བར་གཞག་པ་དང ། ཚོར་བ་དྲན་པ་ཉེ་བར་གཞག་པ་ཡིན་ཏེ། དེ་བཞིན་དུ་མངོན་པར་ཤེས་པ་བཞི་དང ། ཆོས་ཐམས་ཅད་ནི། འདི་ལྟར་ཡང་དག་པར་སྤོང་བ་བཞི་དང ། རྫུ་འཕྲུལ་གྱི་རྐང་པ་བཞི་དང ། བདེན་པ་བཞི་དང ། ཏིང་ངེ་འཛིན་བཞི་དང ། མཚན་མ་མེད་པ་བཞི་དང ། བྱང་ཆུབ་བཞི་ཡིན་ན། དགེ་སློང་ཁྱེད་བསམ་གཏན་དང་པོའང་གསལ་བར་མ་རྟོགས་ན། བསམ་གཏན་བཞི་དང ། 284a ༄#། །ཆོས་ཐམས་ཅད་ལྟ་ཅི་སྨོས། དགེ་སློང་དག་ཐབས་སྣ་ཚོགས་ཀྱིས་བསམ་གཏན་གྱི་ཏིང་ངེ་འཛིན་ལ་འཇུག་པར་བྱའོ། །གལ་ཏེ་མི་གཙང་བ་ལ་རྟོག་ན། ལུས་ཀྱི་ཆེན་པོ་བཞི་བགས་པ་དང ། རུས་པ་དང ། ཚིགས་པ་དང ། རང་ཁྲག་ཟགས་པ་དང ། སྣོད་པུ་ག་དགུ་ཡོད་པའི་ནང་དུ་ཆུ་བླུགས་ན་ཟག་པ་བཞིན་དུ་མི་གཙང་བའི་དངོས་པོ་བཤད་གཅི་ཆེ་ཆུང་དང ། བཙོག་ཕ་ཤིན་ཏུ་སྐྱོར་རུང་བ་ཟག་པ་མཐོང་ངོ ། །ཏིང་ངེ་འཛིན་དེ་ལས་ཀྱང་དངོས་པོ་རྣམ་པ་སྣ་ཚོགས་མཐོང་བ་ནི། འདི་ལྟར་གཡོ་བ་དང ། གནས་པ་དང ། རྣམ་པར་སྡོས་པ་དང ། རྣམ་པར་སེར་བ་དང ། རྣམ་པར་དཀར་བ་དང ། རྣམ་པར་ནག་པ་ཐ་དད་པ་སྣ་ཚོགས་མཐོང་བས་སེམས་མ་འཁྲུལ་བར་གྱུར་ན། དངོས་པོ་དེ་དག་མཐོང་བའི་ཚེ་ཕྱིར་བཟློག་པར་བྱའོ། །རུས་པ་དཀར་པོ་དང ། དབུགས་ཕྱི་ནང་དུ་རྒྱུ་བ་བགྲང་བའི་རྟོག་པའང་དེ་དང་འདྲའོ། །གལ་ཏེ་ཚུལ་ཁྲིམས་ཀྱི་རྩ་བ་བཞི་ཉམས་པ་དང ། དགེ་སློང་མས་རྩ་བ་བརྒྱད་ཉམས་པ་དང ། དགེ་བ་སྙེན་མས་ཁྲིམས་ཀྱི་རྩ་བ་ལྔ་ཉམས་པ་དང ། དགེ་ཚུལ་གྱིས་ཁྲིམས་བཅུ་ཉམས་པ་དང ། དགེ་སློང་མས་ལྕི་བ་དྲུག་ཉམས་བ་དང ། སངས་རྒྱས་དང་ཆོས་དང་དགེ་འདུན་གྱི་སྤྱིའི་དཀོར་བརྐུས་པ་དང ། མཁན་པོ་དང ། སློབ་དཔོན་དང ། བླ་མ་དང ། ཕ་མ་དང ། དགེ་འདུན་གྱི་དཀོར་བརྐུས་པ་དང ། 284b ཕྱོགས་སུ་རྒྱས་པའི་མདོ་སྡེ་ལ་སྐུར་བའི་གང་ཟག་དེ་ལྟ་བུ་ནི། བསམ་གཏན་གྱི་ཏིང་ངེ་འཛིན་ལ་འཇུག་པའི་ཚེ་བདག་གི་ལུས་དང ། ངག་རླུང་ནག་པོ་ལྟ་བུ་དང ། ཁྲག་ནི། མེ་རབ་ཏུ་འབར་བ་འདྲ་བ་དང ། རུས་པ་ནི། རི་དང་བྲག་ལྟ་བུ་དང ། རྩཝ་ནི། ཤིང་ལྟ་བུ་དང ། ནང་གྲོལ་ལྔ་ནི། སྤྲུལ་ལམ་རྩངས་པ་ལྟ་བུར་མཐོང་བ་དང ། ལག་ན་མེ་ཆེན་པོ་ཐོགས་ཏེ་རླུང་ཆེན་པོ་ལ་རྒྱུག་པ་དང ། མགོ་ལ་རི་ཆེན་པོ་ཁྱེར་ཞིང་ལངས་ཀྱང་རྡབ་འཆོས་པ་དང ། ཁ་ནས་སེངྒེ་འབྱུང་བ་དང ། མིག་ནས་འབར་བ་མོ་འབྱུང་བ་དང ། སྣ་ནས་སྦྲུལ་ཆེན་པོ་འབྱུང་བ་དང ། རྣ་བ་ནས་འཕར་སྤྱད་འབྱུང་བ་དང ། བཤང་གཅི་ཆེ་ཆུང་ཆུ་ལྟ་བུར་འབབ་ཅིང་རྒྱ་མཚོ་ལྟ་བུར་མཐོང་བ་དང ། གལ་ཏེ་ཕྱོགས་བཅུའི་སངས་རྒྱས་ཐམས་ཅད་ཆོ་འཕྲུལ་རྣམ་པ་མང་པོ་སྟོན་པ་མཐོང་ན། མཚན་མ་དེ་ལྟ་བུ་མཐོང་བའི་ཚེ་བསམ་གཏན་ལས་ལངས་ཏེ་ཚལ་ལམ་རི་དགོན་བར་སོང་སྟེ་ཕྱོགས་སུ་རྒྱས་པའི་མདོ་སྡེ་འདོན་ཅིང་འགྱོད་ཚངས་བྱའོ། ། དེ་ལྟར་སྔོན་གྱི་ཁ་ན་མ་ཐོ་བའི་སྡིག་འགྱོད་ཚངས་བྱ་བའང་ཞག་བདུན་ནམ། བདུན་གཉིས་སམ། བདུན་གསུམ་མམ། བདུན་ ། བདུན་ལྔའམ། བདུན་དྲུག་གམ། བདུན་བདུན་གྱི་བར་དུ་མཐོལ་ཚངས་བྱའོ། །དེ་ལྟར་སྡིག་སྦྱངས་ནས་བསམ་གཏན་བསྒོམ་པར་བྱ་སྟེ། དེ་ལ་སྡིག་ཆུང་བ་ནི། བགས་དཀྱིས་བདག་གི་ལུས་བཻ་ཌཱུརྱའི་རི་ལྟ་བུར་མཐོང་བར་ 285a ༄#། །འགྱུར་རོ། །གང་རྩ་བ་བཞི་མ་ཉམས་པ་ནས་རང་བཞིན་གྱི་ཁྲིམས་ལྕི་བ་ལྔའི་བར་དུ་མ་ཉམས་པ་ནི། ཏིང་ངེ་འཛིན་དུ་འཇུག་པའི་ཚེ་ཕྱོགས་བཅུའི་སངས་རྒྱས་དུས་གཅིག་ཏུ་ཆོས་སྟོན་པ་དང ། དེ་ཡང་ན་བདེན་པ་བཞིའམ། ཡང་དག་པའི་སྤོང་བ་བཞིའམ། རྫུ་འཕྲུལ་གྱི་རྐང་པ་བཞིའམ། སྡུག་བསྔལ་བའམ། བཟོད་པའམ། སྤྱི་བོ་དང ། འཇིག་རྟེན་མཆོག་གི་ཆོས་སྟོན་པ་དང ། ཡང་ན་བྱང་ཆུབ་ཀྱི་ཡན་ལག་བདུན་དང ། བསམ་གཏན་བཞི་དང ། སྐྱེས་བུ་ཡ་བརྒྱད་ཀྱི་ཆོས་དང ། སྟོང་པ་ཉིད་བཞི་དང ། ཏིང་ངེ་འཛིན་གསུམ་དང ། རྣམ་པར་ཐར་པ་བརྒྱད་སྟོན་པར་མཐོང་བ་དང ། ཏིང་ངེ་འཛིན་ལས་མུན་ནག་མཐོང་བ་དང ། སྣང་བ་མཐོང་ན། ཏིང་ངེ་འཛིན་དེ་ལས་ལངས་ཏེ་ཤིན་ཏུ་དགའ་བའི་སེམས་བསྐྱེད་པར་བྱའོ། །ཞེས་བཀའ་སྩལ་པ་དང ། དགེ་སློང་དག་ཕྱིར་གནས་པའི་ཚལ་དུ་དོང་སྟེ་བསམ་གཏན་གྱི་ཏིང་ངེ་འཛིན་ཉིན་ཞག་བདུན་བསྒོམས་པས་ཐམས་ཅད་ཀྱིས་དགྲ་བཅོམ་པ་ཐོབ་པར་གྱུར་ནས་བཅོམ་ལྡན་འདས་གང་ན་བ་དེར་ལྷགས་ཏེ་སངས་རྒྱས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་ནི། སངས་རྒྱས་ཀྱིས་བསྟན་པ་བཞིན་འཁོར་བ་ལས་ཐར་ཏེ་བླ་ན་མེད་པའི་འབྲས་བུ་ཐོབ་བོ། །བཅོམ་ལྡན་འདས་ཀྱིས་བཀའ་སྩལ་པ། དེ་ལྟར་ཐོབ་ན་ཆོ་འཕྲུལ་བསྟན་པའི་དུས་ལ་བབ་བོ། །ཞེས་ 285b བཀའ་སྩལ་པ་དང ། དགེ་སློང་ལྔ་བརྒྱ་རྣམས་སྟེང་གི་བར་སྣང་ལ་འཕགས་ཏེ་ཉལ་བ་དང ། འདུག་པ་དང ། འགྲོ་བ་དང ། སྡོད་པ་དང ། ལུས་ལ་མེ་དང ། ཆུ་ལ་སོགས་པ་འབྱུང་བའི་ཆོ་འཕྲུལ་རྣམ་པ་བཅོ་བརྒྱད་མངོན་པར་བསྟན་ཏེ། དེའི་ཚེ་མང་དུ་ཐོས་པའི་དགེ་སློང་རྣམས་བསམ་གཏན་བསྒོམས་པས་མཽངྒལ་གྱི་བུ་ཆེན་པོ་དང་འདྲ་བར་རྫུ་འཕྲུལ་ཐ་མི་དད་པར་གྱུར་ཏོ། ། དེ་ནས་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དམ་པའི་ཆོས་འདི་དེ་བཞིན་གཤེགས་པ་མྱ་ངན་ལས་འདས་ནས་ཇི་སྲིད་དུ་གནས་ཤིང་དུས་ངན་པའི་ཚེ་སེམས་ཅན་ཇི་སྙེད་ཅིག་ཆོས་འདི་བསྒོམས་པས། དགེ་སྦྱོང་གི་འབྲས་བུ་བཞི་ཐོབ་པར་འགྱུར། བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། ད་ད་ཕྱིན་ཆད་དཔྱིད་ཟླ་འབྲིང་པོ་ལ་རྩཝ་མཆོག་གི་གྲོང་ཁྱེར་དུ་མྱ་ངན་ལས་འདའོ། །ང་མྱ་ངན་ལས་འདས་ནས་ལོ་བརྒྱད་ཅུའི་བར་དུ་ཆོས་ལ་སྤྱོད་པའི་སེམས་ཅན་མང་དུ་འབྱུང་སྟེ། དུར་ཁྲོད་དང་ཤིང་དྲུང་ན་གནས་ཤིང་འདི་ཡིད་ལ་བྱེད་དེ། རྟོག་པ་དང ། བསལ་བ་དང ། འཇུག་པ་དང ། སྤོང་བའི་ཆོས་སྤྱོད་པ་སྟོང་ཕྲག་བཅུ་ལ་སྟོང་ཕྲག་དགུས་དགེ་སྦྱོང་གི་འབྲས་བུ་བཞི་ཐོབ་པར་འགྱུར་རོ། །ལོ་སུམ་བརྒྱའི་བར་དུ་ནི། སེམས་ཅན་སྟོང་ཕྲག་བརྒྱ་ལ་སྟོང་ཕྲག་བཅུས་དགེ་སྦྱོང་གི་འབྲས་བུ་བཞི་འཐོབ་པར་འགྱུར་རོ། །ལོ་སུམ་བརྒྱ་ཕན་ཆད། ལོ་ལྔ་བརྒྱ་ཚུན་ཆད་ནི། 286a ༄#། །ངའི་ཉེ་གནས་རྣམས་བགས་ཀྱིས་མི་དགེ་བའི་ཆོས་སྤྱོད་དོ། །ཕྲག་དོག་གི་སེམས་ཀྱིས་ལོག་པའི་འཚོ་བས་འཚོ་བར་འགྱུར་རོ། །སྟོང་ཕྲག་ལྔ་བརྒྱ་ལ་སྟོང་ཕྲག་བཅུས་དགེ་སྦྱོང་གི་འབྲས་བུ་ཐོབ་བོ། །ལོ་ལྔ་བརྒྱ་ཕན་ཆད། བརྒྱད་བརྒྱ་ཚུན་ཆད་ངའི་ཉེ་གནས་རྣམས་ཁྱིམ་པའི་གོས་གྱོན་ནས་བ་ལང་དང ། ལུག་དང ། བྱི་ལ་དང ། བོང་བུ་དང ། རྟ་གསོ་ཞིང་འབྲུ་མང་པོ་གསོག་སྟེ། རང་གི་ལག་དར་ཞིང་རང་ཟ་བ་དང ། བྲན་ཕོ་དང ། བྲན་མོའང་གསོ་བར་འགྱུར་ཏེ། དེའི་ཚེ་སྟོང་ཕྲག་སྟོང་ལ་སྟོང་ཕྲག་གཅིག་གིས་དགེ་སྦྱོང་གི་འབྲས་བུ་བཞི་ཐོབ་པར་འགྱུར་རོ། །ལོ་བརྒྱད་བརྒྱ་ཕན་ཆད་ནས་ལོ་སྟོང་ཚུན་ཆད་ནི། ངའི་ཉེ་གནས་རྣམས་སྡིག་པའི་ཆོས་བསླབ་སྟེ། རྒྱལ་པོ་དང ། རྒྱལ་བུ་དང ། བློན་པོ་ཆེན་པོ་དང ། ཁྱིམ་བདག་ལ་གྲོགས་པོར་བསྟེན་ཅིང་ཕན་ཚུན་ཐ་ན་འཕྲིན་གྱིས་འདྲུལ་ཞིང ། ཞིང་རྨོ་བརྐོ་བྱེད་དེ། འབྲུ་གཟན་མང་པོ་དང ། གསེར་དང ། དངུལ་དང ། རིན་པོ་ཆེ་སྣ་བདུན་གསོག་ཅིང་ཤ་ཟ་ཞིང་ཆང་འཐུང་སྟེ་ཆེན་པོ་བཞི་གསོ་ཞིང་རྟས་པར་བྱེད་པ་དང ། སྨད་ཚོང་མ་ལྟར་གོས་སྤུ་གུ་གྱོན་ཞིང་འདྲིད་པ་དང ། སླུ་བའི་ལས་བྱེད་དེ།་དེ་ལ་འབུམ་ཕྲག་ཁྲི་ལ་བརྒྱ་ཙམ་ཞིག་གིས་དགེ་སྦྱོང་གི་འབྲས་བུ་བཞི་ཐོབ་བོ། །ལོ་སྟོང་ཕན་ཆད། སུམ་བརྒྱ་ཚུན་ཆད་ནི། ཆེ་ཐང་དུ་འཁྲུགས་ཏེ། ངའི་ཉེ་གནས་རྣམས་ 286b ལུས་ཆོས་གོས་གྱོན་ཡང་ཤིང་གི་ཁ་ལ་འཕན་རྙིང་བཏགས་པ་འདྲ་སྟེ། གཟི་བྱིན་ཡང་མེད། ཁྱིམ་པས་མཐོང་ནའང་བཀུར་སྟི་མི་བྱེད་པས་ཤ་ན་པ་དང་འདྲ་བར་འགྱུར་རོ། །དེའི་དུས་ན་ཡུལ་ཁམས་ཀྱང་འཁྲུགས་ཏེ། གཅིག་ལ་གཅིག་དགྲ་བྱེད་ཅིང་གསོད་པས་རྒྱལ་པོ་དང ། བློན་པོ་དང ། ཕ་མ་དང ། བུ་དང ། བུ་མོའང་གཅིག་ལ་གཅིག་དགྲ་བྱེད་དེ། བྱམས་པ་དང ། སྙིང་བརྩེ་བའི་སེམས་ཀྱང་མེད་པས་བཟའ་བ་དང ། བཏུང་བས་ཉོན་མོངས་ཏེ། ཁྱིམ་ཐབ་མེད་པ་དང ། ཆུང་མ་མེད་པ་དང ། བུ་ཕོ་མེད་པ་དང ། བུ་མོ་མེད་པ་དང ། ལོང་བ་དང ། འོན་པ་དང ། ལྐུགས་པ་དང ། དབང་པོ་མ་ཚང་བ་དང ། བྲན་ཕོ་དང ། བྲན་མོ་ལས་བྲོས་པ། ཡུལ་ཁམས་ཕུང་བར་བྱེད་པ། འཚོ་བས་རང་མི་སོས་པ་དག་ངའི་ཆོས་ལ་ཞུགས་ནས་ཁྱིམ་པ་རྣམས་ཀྱིས་ཀྱང་རྔོན་པ་དང་འདྲ་བར་ལྟ་སྟེ། དཔེར་ན། ལྷའི་གླང་དང ། རྟ་རྒོད་དམ། བལ་གླང་མྱོས་པ་ལྟར་གདུལ་དཀའ་བ། རང་དགར་ཡང་འགྲོ་བ། སློབ་དཔོན་དང ། སློབ་མའང་མི་རྒོད་མ་རུངས་པ་དང་འདྲ་སྟེ། འདོད་ཆགས་ལ་བག་མེད་པར་སྤྱོད་ཅིང ། བླ་མ་དང ། འོག་མའི་རིམ་པའང་མེད་པ་དང ། བཟང་ངན་གྱི་རིམ་པའང་མེད་དེ། དུད་འགྲོ་ཕྱུགས་དང་འདྲ་བ། ཁ་ན་མ་ཐོ་བའི་སྡིག་པ་མང་པོ་བྱེད་ཅིང་ངན་སོང་གསུམ་གྱིས་མི་འཇིགས་པར་གར་སོང་བར་གནས་ཀྱང་ཆང་ཚོང་བ་དང ། ཤན་པ་དང ། རྔོན་པ་དང ། 287a ༄#། །སྨད་ཚོང་མ་དང་སྟེན་ཅིང་འགྲོགས་པ། ཁ་ནས་ཀྱང་ངག་སྡིག་པ་སྨྲ་ཞིང་སེམས་ལའང་སྡིག་པ་སེམས་པ་དང ། ཡང་ན་བློན་པོ་དང་སྟེན་ཅིང་དགེ་བའི་མི་དག་ལ་ཐབས་སྣ་ཚོགས་ཀྱིས་བསྡིགས་ཤིང་ནོར་འཕྲོག་སྟེ་བུ་སྨད་གསོའོ། །ཡང་ན་རྔོན་པའི་ཡོ་བྱད་ཉ་རྒྱ་ལ་སོགས་པ་འཆང་ཞིང་ཉ་ལ་སོགས་པ་བཅུས་ནས་རང་གི་ལག་བདར་ཏེ་གསོད་པ་དང ། སྲེག་པ་དང ། ཟླ་བ་ཉ་བ་དང ། ཤི་བའི་ཚེ་གསོ་སྦྱོང་མི་བྱེད་དེ་རང་ཉམས་སུ་གཏོང་བ་དང ། ཚུལ་ཁྲིམས་ཀྱི་ལས་བྱེད་པ་རྣམས་ཕན་ཚུན་རྩོད་ཅིང ། བླ་མ་དང ། འོག་མ་དང ། གྲོགས་པོ་ལ་ཞེ་སྡང་བ་དང ། གདུག་པའི་སེམས་བསྐྱེད་པ་དང ། སློབ་དཔོན་དང ། སློབ་མའང་གཅིག་ལ་གཅིག་སྐྱོན་འདྲུ་ཞིང་འཕྱ་བ་དང ། སྒྲོག་པའི་གཏམ་སྨྲ་སྟེ།་དཔེར་ན། རྩངས་པ་མང་པོ་ཀུན་གཅིག་ཏུ་འདུས་པ་དང་འདྲ་བ་དང ། ཕན་ཚུན་དཔུང་དང་སྡེ་ཚན་གཅིག་ལ་གཅིག་ཚིག་ངན་གྱིས་སྨ་འབེབས་པ་དང ། བླ་འོག་གི་རིམ་པའང་མེད་པ་དང ། མི་རྒོད་མ་རུངས་པ་ལྟར་དགེ་བ་བྱེད་པ་ལས་འཕྲོག་རློམ་བྱེད་པ་དང ། ཁེ་དང་གྲགས་པ་ལ་ཆགས་ཏེ་ཆོས་མི་ཤེས་པར་གྱུར་པ་དེའི་ཚེ་མདོ་སྡེ་བཅུ་གཉིས་ཀྱང་ནུབ་པར་གྱུར་ཏེ་ཀློག་པ་དང ། འདོན་པའང་མེད་པ་དང ། དེའི་སློབ་མ་རྣམས་ཀྱང་དགྲ་ཆོས་དང ། གཙུག་ལག་དང ། ཡི་གེ་དང ། རྩེ་བ་དང ། བཞོན་པ་དང ། བོན་ 287b ཆོས་དང ། མིག་མང་དང ། གླུ་གར་དང ། འདུ་བ་དང ། སྦྱུགས་པ་དང ། འཕོང་རྩལ་དང ། རྟ་རྒྱུག་པ་ལ་སོགས་པའི་ཆོས་མ་ཡིན་པ་སློབ་ཅིང་སྤྱོད་དེ། དེ་ལྟར་མ་ལེགས་པའི་ཆོས་སྤྱོད་པས་ཚེ་འཕོས་མ་ཐག་ཏུ་ངན་སོང་དུ་ལྷུང་སྟེ། བསྐལ་པ་གྲངས་མེད་པར་ངན་སོང་གི་སྡུག་བསྔལ་མྱོང་ནས་དེ་ལས་ཐར་ནས་ཡང་བྱོལ་སོང་དུ་སྐྱེ་སྟེ། ལྟོགས་པ་དང ། སྐོམ་པ་དང ། སྡུག་བསྔལ་གྱིས་ཉེན་པ་དང ། ཁལ་ལྕི་བ་འགལ་ཞིང་འགྲོ་བར་འགྱུར་རོ། །ཕྱི་ཞིག་ན་སྦྱངས་པའི་ཡོན་ཏན་སློབ་པའང་ཆོས་མ་ཡིན་པ་མང་དུ་བྱེད་དེ། རི་དང ། ཚལ་དང ། དུར་ཁྲོད་དང ། ཤིང་དྲུང་ན་མི་གནས་ཤིང་རྟག་ཏུ་གྲོང་དུ་རྒྱུག་སྟེ། སེམས་ལ་རྟོག་པ་མང་ཞིང་ཁེ་དང་གྲགས་པ་ཚོལ་ཏེ། ནོར་རྫས་དང ། ལོངས་སྤྱོད་ལ་ཆགས་ཤིང་ཆོག་མི་ཤེས་པ་དང ། ཆོས་སྟོན་པའི་བཤད་མཁན་ཞིག་ཡིན་ནའང་སངས་རྒྱས་ཀྱི་ཆོས་སྟོན་པའང་ཁྲི་ཙམ་ལ་གཅིག་ཙམ་ཡང་ཐོག་ཏུ་མི་ཕེབས་ཏེ། འཁོར་མང་པོ་དང་འགྲོགས་ནས་གྲོང་རྒྱུ་ཞིང་ཁྱིམ་པའི་ཁྱིམ་དུ་ཞུགས་ནས་ཁྱིམ་པ་ལ་ཆོས་སྟོན་པའང་ཁེ་དང་གྲགས་པའི་ཕྱིར་ཏེ། ལོངས་སྤྱོད་མང་དུ་གསོག་ཅིང་ཤན་པ་དང་འདྲའོ། །ཤ་དང་ཆང་ལ་མི་སྤྱོད་པ་དག་གིས་དགེ་སློང་དག། ཁྱེད་ནི། བཙུན་པ་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ཡིན་ན། སྙིང་རྗེའི་སེམས་ཀྱང་མེད་དེ། འདི་ལྟར་ཆོས་མ་ཡིན་པ་མང་དུ་ 288a ༄#། །སྤྱོད་པས་ཁྱེད་ནི། ཤན་པ་དང་འདྲའོ། །ཞེས་སྤྱོད་ཞིང་བརྒྱད་པར་འགྱུར་རོ། །དགེ་སློང་དེ་དག་དེ་སྐད་གཤེ་བ་ཐོས་ནས་ཀུན་ལོག་སྟེ། དེ་ལ་རྡེག་པ་དང ། གཤེ་བ་དང ། བརྒྱད་བཀག་སྟེ་གཅིག་ལ་གཅིག་འདི་སྐད་དུ་སྨྲའོ། །དེ་བཞིན་གཤེགས་པ་བཞུགས་པའི་ཚེ་ན་ནི། ངེད་ཤ་དང་ཆང་འཐུང་བ་མ་གནང་སྟེ། ད་ངེད་དེ་བཞིན་གཤེགས་པ་མྱ་ངན་ལས་འདས་ནས་ད་ནི། ཅིའང་གནང་བ་དེང་ཤ་དང་ཆང་འཐུང་བ་ཡིན་ནོ། །ཁྱིམ་པ་དང་བྲལ་བའི་འོག་ཏུ་དེ་དག་གཅིག་ལ་གཅིག་བདག་ཅག་གིས་ཤེས་པ་ནི།་སངས་རྒྱས་ཀྱི་ཞལ་ནས་གསུངས་པ་དང་འདྲའོ། །ཞེས་སྨྲ་ཞིང ། ལ་ལ་ནི། ཚིག་ཀྱལ་པ་དང ། དོན་མེད་པའི་ཚིག་དང ། འགྲན་དོར་གྱི་ཚིག་དང ། འཁྲུལ་པའི་ཚིག་ཏུ་གཏམ་སྨྲ་ཞིང་དཔེར་ན། དམུས་ལོང་ཞིག་མཛུབ་མོ་གཉིས་ཉི་མ་ལ་བཙུགས་ཏེ། ཉི་མ་ཡ་གི་ནི། བྱིན་ཆུང་ངོ ། །ཡངས་སོ། །དོག་གོ ། ཞེས་སྨྲ་བའམ། མི་འོན་པ་ཞིག་བདག་གིས་གནམ་གྱི་སྟེང་ན་ཆོས་འཆད་པའི་སྒྲ་ཐོས་སོ། །ཞེས་ཟེར་བ་དང་འདྲ་བར་དམུས་ལོང་མང་པོ་ཚོགས་ཏེ་འཇིག་རྟེན་ན་འཇམ་དཔལ་དང ། འོད་སྲུང་ཆེན་པོ་ལ་སོགས་པ་སྤྲུལ་ཏེ། དེའི་ནང་ན་བཞུགས་ཀྱང་ཀུན་གྱིས་རྡེག་ཅིང་གཤེ་སྟེ། དེ་ནས་སྐྲོད་ཅིང་འདུག་ཏུ་མི་སྟེར་རོ། །གཞན་ཡང་དཔེར་ན། སེངྒེ་ནི། སྤོས་ཀྱི་རི་ལ་གནས་ཏེ། རི་དྭགས་དང ། གཅན་གཟན་གང་ 288b ཡང་གནས་དེར་ཉེ་མི་བཟོད་དོ། །སེངྒེ་རི་དེ་ལས་བྱུང་སྟེ་སོང་བའི་འོག་ཏུ་ནི། གཅན་གཟན་གདུག་པ་ཁྲོ་བ་ལ་སོགས་པ་གཅིག་གིས་གཅིག་བོས་ཏེ་སྤོས་ཀྱི་རི་ལ་ལྷགས་ནས་འབྲས་བུ་ཞིམ་པོ་ཟ་ཞིང་ཆུ་མིག་ལ་འཐུང་ངོ ། །དེ་ལྟར་ཟ་ཞིང་འཐུང་བ་ལས་ཐམས་ཅད་བསྐམས་ཤིང་མེད་པར་གྱུར་ཏེ། སྤོས་ཀྱི་རི་ལ་གནས་པའི་ལྷ་རྣམས་ཀྱང་སྐྱོ་བ་པར་མི་འགྱུར་བས་རྩཝ་གདུག་པ་སྐྱེས་ཏེ་ཟོས་མ་ཐག་ཏུ་ཚེའི་དུས་བྱས་པར་འགྱུར་རོ། །ང་མྱ་ངན་ལས་འདས་པའི་འོག་ཏུ་དགེ་སློང་ཐམས་ཅད་ཀྱིས་ངས་བསྟན་པའི་མདོ་སྡེ་བཅུ་གཉིས་འདོན་ཅིང་ཀློག་པའང་གོང་མ་ནི། བར་དུ་བཅུག། བར་མ་ནི། འོག་ཏུ་བཅུག། འོག་མ་ནི། གོང་དུ་བཅུག། བར་མ་ནི། འོག་དང ། ཐ་མར་བཅུག་སྟེ། དོན་མ་ཡིན་པ་ལ་དོན་ཞེས་ཟེར། དོན་ལ་ནི། དོན་མ་ཡིན་ཞེས་ཟེར་ཏེ། ཇི་ལྟར་མུ་སྟེགས་ཅན་དག་སོ་སོ་ནས་ངའི་གཞུང་ནི། བདེན་པ་ཡིན་ནོ། །ཞེས་ཟེར་བ་དང་འདྲའོ། །དེའི་དུས་ན་མདོ་སྡེ་བཅུ་གཉིས་འཇིག་རྟེན་ན་སྤྱོད་ཀྱང་གཟི་བརྗིད་དང ། མཐུ་མེད་དོ། །ལ་ལ་ཞིག་འདོན་ཏམ་ཀློག་ཀྱང་མི་གཅིག་འགའ་ཡང་དགེ་སྦྱོང་གི་འབྲས་བུ་བཞི་ཐོབ་པ་མེད་དོ། །དེ་ལྟར་ངའི་སློབ་མ་རྣམས་ཀྱང་རྒྱལ་པོ་སྲིད་སྟོར་པའམ། བྱ་འདབ་མ་མེད་པ་དང་འདྲ་སྟེ། གཙུག་ལག་ཁང་དང ། མཆོད་རྟེན་ཡང་སྟོངས་ཤིང་ཞིག་རལ་གསོ་བའང་མེད་དོ། །དེ་ལྟར་སྐུ་གཟུགས་དང ། བ་དན་དང ། རིན་པོ་ཆེའི་ 289a ༄#། །གདུགས་ཡོད་པའང་དགྲ་ཆ་ཞིག་པ་དང་འདྲ་སྟེ། ཕུག་རོན་དང ། བྱེའུ་དང ། ཕག་དང ། ཁྱི་དང ། ལུག་ལ་སོགས་པའི་ཚང་དང ། གནས་སུ་འགྱུར་རོ། །དགེ་སློང་སོ་སོ་ན་འདུག་པའི་གནས་ནི། བྱི་དོར་བཟང་དུ་བྱེད་དོ། །བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། འདིའང་ཁྱེད་ལ་མདོ་ཙམ་ཞིག་བཤད་པ་ཡིན་ནོ། །དགའ་བོས་སངས་རྒྱས་ཀྱིས་གསུངས་པ་ཐོས་ནས་མཆི་མ་བླགས་ཏེ་ངུས་སོ། །དེ་ལྟར་དགའ་བོས་ཡིད་གདུང་ཞིང་དུ་བ་མ་བཏང་བ་ལས། བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ།་ཁྱོད་དེ་ལྟར་མ་དུ་བར་མདོ་སྡེ་འདི་གཟུངས་སུ་བཟུང་ལ་འཇིག་རྟེན་དུ་རྒྱས་པར་སྤེལ་ཅིག། དེ་ནས་དགའ་བོས་གདོང་མཆི་མ་ཕྱིས་ནས་བཅོམ་ལྡན་འདས་ལ་བདག་གིས་གཟུངས་སུ་གཟུང་ངོ ། །ཞེས་གསོལ་ཏོ། །བརྒྱ་བྱིན་དང ། ལྷ་དང ། མི་རྣམས་ཀྱིས་ཀྱང་དགའ་བོ་ལ་འདི་སྐད་ཅེས་སྨྲས་སོ། །བཙུན་པ། བདག་ཅག་གིས་ཡོངས་སུ་བཟུང་སྟེ། གང་ཞིག་མདོ་སྡེ་འདི་རིའམ། ཚལ་ལམ། ཤིང་དྲུང་ངམ། པས་མཐའ་མ། དུར་ཁྲོད་ན་གནས་ཏེ་འདོན་ཏམ། ཀློག་ན། བདག་ཅག་གིས་ལྷ་དང་མིའི་འཁོར་དང ། མི་མ་ཡིན་བ་དང་བཅས་ཏེ་གནས་དེར་འགྲོ་ཞིང་ཆུང་ངུ་ན་ཚིགས་སུ་བཅད་པ་གཅིག་གམ། ཚིག་གཅིག་ཙམ་ཡང་མི་བརྗེད་མི་ཉམས་པར་གཟུང་ངོ ། །ཞེས་གསོལ་ཏོ། །མདོ་སྡེ་འདི་ 289b གསུངས་པའི་ཚེ་དགེ་སློང་སྟོང་སྙེད་ཀྱིས་དགེ་སྦྱོང་གི་འབྲས་བུ་བཞི་ཐོབ་པར་གྱུར་ཏོ། །དགེ་སློང་མ་སྟོང་ལྔ་བརྒྱས་རྒྱུན་དུ་ཞུགས་པའི་འབྲས་བུ་ཐོབ་པར་གྱུར་ཏོ། །དགེ་བསྙེན་ལྔ་བརྒྱ་ཡོངས་སུ་དག་པར་གྱུར་ཏེ། ལྷ་དང ། མི་དང ། ལྷ་མ་ཡིན་ལ་སོགས་པས་ཕྱག་བྱས་ནས་ཕྱིར་དོང་ངོ ། །འཕགས་པ་ཏིང་ངེ་འཛིན་མཆོག་དམ་པ་རྫོགས་སོ།། །། |