rKTs


H125

(e-text produced by ACIP)

see text in transliteration
226b
།།རྒྱ་གར་སྐད་དུ། བུདྡྷ་དྷརྨ་ཀོ་ཥ་ཀཱ་ར། བོད་སྐད་དུ། སངས་རྒྱས་ཀྱི་མཛོད་ཀྱི་ཆོས་ཀྱི་ཡི་གེ། བམ་པོ་གཅིག་པ།་མིང་གཅིག་ནི། ཆོས་སོ་ཅོག་ལས་གདམས་པ་སྩལ་བའོ། །སངས་རྒྱས་ཀྱིས་སངས་རྒྱས་ཀྱི་མཛོད་བཤད་པའི་ཡི་གེའི་ལེའུ་དང་པོ་སྟེ། ཆོས་སོ་ཅོག་གི་བདེན་པའི་མཚན་མའི་ལེའུའོ།། །།འདི་བཞིན་བདག་གིས་ཐོས་པ་དུས་གཅིག་ན། སངས་རྒྱས་མཁར་རྒྱལ་པོའི་ཁབ་ཀྱི་རི་ཁུ་མཐའི་རི་ལ་དགེ་སློང་ཆེན་པོ་རྣམས་དང་ལྷན་ཅིག་ཏུ་
227a
༄#། །བཞུགས་ཏེ། ཀུན་ཀྱང་ཕལ་གྱིས་ཤེས་རིག་པ་དང ། མུ་མེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཤ་སྟག་སྟེ། དཔག་ཏུ་མེད། གྲངས་མེད་དོ། །དེའི་ཚེ་ཤཱ་རིའི་བུ་ཏིང་ངེ་འཛིན་ནས་བྱུང་སྟེ་སངས་རྒྱས་ཀྱི་ཐད་དུ་སོང་ནས་ཕྲག་པ་གཡས་པ་ཕྱུང་སྟེ་མགོ་དང ། གདོང་གིས་ཕྱག་འཚལ་ནས་སངས་རྒྱས་ལ་གསོལ་པ།་བཅོམ་ལྡན་འདས་ཡང་དག་པར་གཤེགས་པས་བཤད་པ། ཆོས་སོ་ཅོག་ཀུན་སྐྱེ་བའང་མེད། འགོག་པའང་མེད། མཚན་མའང་མེད། བྱ་བའང་མེད། མི་རྣམས་ཡིད་ཆེས་ཤིང་ཤེས་པར་བགྱིས་པ་ཡོད་པ་དཀོན་ནོ། །སངས་རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། ཁྱོད་ཀྱིས་བསོད་ནམས་ཅི་ཞིག་མཐོང་ན། ཡང་དག་པར་གཤེགས་པས་བཤད་པ། ཆོས་སོ་ཅོག་ཀུན་ལ་སྐྱེ་བ་མེད། འགོག་པ་མེད། མཚན་མ་མེད། བྱ་བ་མེད་ན། མི་ཀུན་ཡིད་ཆེས་ཤིང་ཤེས་པར་བྱས་པ་དཀོན་ནོ། །ཞེས་བསྟོད། ཤཱ་རིའི་བུས་སངས་རྒྱས་ལ་གསོལ་པ། བཅོམ་ལྡན་འདས། བདེན་པ་མ་མཆིས་ན། ཁོར་མོར་སེམས་འདི་སྙམ་བགྱིད་དོ། །བཅོམ་ལྡན་འདས་ཀྱིས་མིང་དང ། མཚན་མ་མེད་པའི་ཆོས་ལ་ནི། མིང་དང ། མཚན་མས་བཤད། ངག་དང ། ཚིག་མེད་པའི་ཆོས་ལ་ནི། ངག་དང ། ཚིག་གིས་བཤད་པ་དེའི་དོན་བསམ་ན། ཡོད་པ་དཀོན་པའི་
227b
སེམས་སྐྱེས་སོ། །སངས་རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། དེ་ཡིན་ནོ། །དེ་ཡིན་ནོ། །དོན་ཡོད་པ་དཀོན་ཏེ། རབ་ཏུ་ཡོད་པ་དཀོན་པས་ན། སངས་རྒྱས་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཅེས་བྱའོ། །ཤཱ་རིའི་བུ། དཔེར་ན། རི་མོ་མཁན་མཁས་པས་ནམ་མཁའ་ལ་བྲིས་ཏེ། ཁ་དོག་དང་གཟུགས་རྣམ་པ་ཅིའང་སྣང་བར་བྱས་ན། ཁྱོད་ཀྱི་ཡིད་ལ་ཇི་སྙམ་དུ་སེམས། རི་མོ་མཁན་དེ་ཡོད་པ་དཀོན་ནམ་མི་དཀོན། བཅོམ་ལྡན་འདས། དཀོན་ལགས་སོ། །ཤཱ་རིའི་བུ། ཡང་དག་པར་གཤེགས་པས་འཐོབ་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱིས་ཆོས་སོ་ཅོག་ལ་སྐྱེ་བའང་མེད། འགོག་པའང་མེད། མཚན་མའང་མེད། བྱ་བའང་མེད་པར་བཤད་ན། མི་ཀུན་ཡིད་ཆེས་ཤིང་ཤེས་པར་བྱས་པ་ནི། ཕྱེད་ཀྱིས་ཡོད་པ་དཀོན་ནོ། །ཅིའི་ཕྱིར་བྱས་ན། མིང་དང ། མཚན་མ་མེད་པའི་ཆོས་བསམ་པའང་མེད། ཐོབ་པའང་མེད། སྤྱད་པའང་མེད་དེ། བསམ་གྱིས་མི་ཁྱབ་ཅིང་སེམས་ཀྱིས་གནས་ཤིང་རྟེན་པའང་མ་ཡིན། འདྲན་ཏོར་དུ་བརྗོད་པའང་མེད། འདྲན་ཏོར་དུ་བརྗོད་ཅིང ། རྟེན་གནས་སུ་རུང་བའང་མ་ཡིན། ཚོར་བའང་མེད། བརྟགས་པའང་མེད། ཅིས་བསྡུ་བའང་མེད། སེམས་ལའང་མི་འདུག། ཐོབ་པས་ཐོབ་པའང་མེད། ཚུ་ལོགས་ཀྱང་མེད། ཕ་ལོགས་ཀྱང་མེད། རྣམ་པར་རྟོག་པའང་མེད། གཡོ་
228a
༄#། །བའང་མེད། རང་བཞིན་ཡང་མེད། ཕྱི་མོ་ནས་རང་སྟོང་པས་བསམ་དུའང་མི་རུང ། འབྱུང་དུའང་མི་རུང་སྟེ། འཇིག་རྟེན་ཐམས་ཅད་ཀྱིས་ཡིད་ཆེས་པར་མི་ནུས་པ་དེ་ལྟ་བུའི་མིང་དང ། མཚན་མ་མེད་པའི་ཆོས་མིང་དང ། མཚན་མས་བཤད་དེ། དེ་ལྟ་བུའི་ནི། ཆོས་སོ་ཅོག་ཀུན་སྐྱེ་བའང་མེད། འགོག་པའང་མེད། མཚན་མའང་མེད། བྱ་བའང་མེད་པས་མི་ཀུན་ཡིད་ཆེས་ཤིང་ཤེས་པར་བྱ་བ་ནི། ཕྱེད་ཀྱིས་ཡོད་དཀོན་ནོ། །ཤཱ་རིའི་བུ། མི་ལ་ལ་ཞིག་གིས་རི་རབ་རིའི་རྒྱལ་པོ་བལྡང་དེ་མིད་ལ་ཞུ་ཞིང་ཟད་པར་བྱ་ནུས་ལ་ནམ་མཁའ་ལ་འཕུར་ཏེ་སོང་ན། གནོད་པ་མེད་པ་དེ་ཁྱོད་ཀྱི་ཡིད་ལ་ཇི་སྙམ། ཡོད་དཀོན་ནམ་མི་དཀོན། བཅོམ་ལྡན་འདས། དཀོན་ལགས་སོ། །ཤཱ་རིའི་བུ། སངས་རྒྱས་རྣམས་ཀྱིས་བཤད་པ་ལ་ཆོས་སོ་ཅོག་ཀུན་ལ་སྐྱེ་བའང་མེད། འགོག་པའང་མེད། མཚན་མའང་མེད། བྱ་བའང་མེད་ན། མི་ཀུན་ཡིད་ཆེས་ཤིང་ཤེས་པར་བྱས་པ་ནི། ཕྱེད་ཀྱིས་ཡོད་དཀོན་ནོ། །ཤཱ་རིའི་བུ། དཔེར་ན། མིའི་མཁར་ཆུ་ཞེང་མཐོན་དམན་དཔག་ཚད་རེ་རེ་ཡོད་ལ་སྒོ་བཞིར་མེ་ལྕེ་བྱུང་བ་ལ་མི་ཞིག་ཁུར་དུ་རྩཝ་སྐམ་པོ་ཁྱེར་ཏེ་དེའི་ནང་ནས་ཕར་རྒལ་བ་རླུང་དྲག་པོས་བུས་པའི་མེ་ལྕེས་དེའི་ལུས་བསྲེགས་ན། མི་དེས་མེས་རྩཝའང་མ་ཚིག་།ལུས་ཀྱང་ཚིག་པར་བྱ་བ་མ་ནུས་
228b
ཏེ།་དེའི་ནང་ནས་བྱུང་སྟེ་སྔོན་གྱི་དང་མི་མཚུངས་པ་མེད་པ་དེ་ཁྱོད་ཀྱི་ཡིད་ལ་ཇི་སྙམ། ཡོད་དཀོན་ནམ་མི་དཀོན། བཅོམ་ལྡན་འདས། དཀོན་ལགས་སོ། །ཤཱ་རིའི་བུ། ཡང་དག་པར་གཤེགས་པས་བཤད་པ། ཆོས་སོ་ཅོག་ཀུན་ལ་སྐྱེ་བ་མེད། འགོག་པ་མེད། མཚན་མ་མེད། བྱ་བ་མེད་ན། མི་ཀུན་ཡིད་ཆེས་ཤིང་ཤེས་པར་བྱས་པ་ཕྱེད་ཀྱིས་ཡོད་དཀོན་ནོ། །ཤཱ་རིའི་བུ། དཔེར་ན། མི་ལ་ལ་ཞིག་གིས་རྡོ་ལ་གཟིངས་སུ་བྱས་ཏེ་མཚོའི་ཚུ་ལོགས་ཀྱི་འགྲམ་ནས་ཕ་ལོགས་ཀྱི་འགྲམ་དུ་ཕྱིན་པར་རྒལ་ན། དེ་ཁྱོད་ཀྱི་ཡིད་ལ་ཇི་སྙམ། ཡོད་དཀོན་ནམ་མི་དཀོན། བཅོམ་ལྡན་འདས། དཀོན་ལགས་སོ། །ཤཱ་རིའི་བུ་ཡང་དག་པར་གཤེགས་པས་བཤད་པ། ཆོས་སོ་ཅོག་ཀུན་ལ་སྐྱེ་བ་མེད། འགོག་པ་མེད། མཚན་མ་མེད།་བྱ་བ་མེད་ན། མི་ཀུན་ཡིད་ཆེས་ཤིང་ཤེས་པར་བྱས་པ་ཕྱེད་ཀྱིས་ཡོད་དཀོན་ནོ། །ཤཱ་རིའི་བུ། མི་ལ་ལ་ཞིག་གིས་གནམ་ངོས་བཞིའི་འོག་རི་རབ་རིའི་རྒྱལ་པོ་དང ། རི་དང ། ཆུ་བོ་དང ། རྩཝ་དང ། ཤིང་ཀུན་ཁུར་དུ་ཁྱེར་ལ། སྦྲང་བུའི་རྐང་པས་སྐས་བྱས་ཏེ་ཚངས་ལྷའི་ཁམས་སུ་ཐུག་པར་འཛེག་ན། དེ་ཁྱོད་ཀྱི་ཡིད་ལ་ཇི་སྙམ། ཡོད་དཀོན་ནམ་མི་དཀོན། བཅོམ་ལྡན་འདས། དཀོན་ལགས་སོ། །ཤཱ་རིའི་བུ། ཡང་དག་པར་གཤེགས་པས་བཤད་པ། ཆོས་སོ་ཅོག་ཀུན་ལ་སྐྱེ་བའང་མེད། འགོག་པའང་མེད།
229a
༄#། །མཚན་མའང་མེད། བྱ་བའང་མེད་ན། མི་ཀུན་ཡིད་ཆེས་ཤིང་ཤེས་པར་བྱས་པ་ཕྱེད་ཀྱིས་དཀོན་ནོ། །ཤཱ་རིའི་བུ། ཡང་དཔེར་ན། པདྨའི་ཁ་ཆུ་ཆར་གྱི་ཉག་མས་རི་རབ་རིའི་རྒྱལ་པོ་སྤངས་ཏེ་ནམ་མཁའ་ལ་འདུག་ན། དེ་ཁྱོད་ཀྱི་ཡིད་ལ་ཇི་སྙམ། ཡོད་དཀོན་ནམ་མི་དཀོན། བཅོམ་ལྡན་འདས། དཀོན་ལགས་སོ། །ཤཱ་རིའི་བུ།་ཡང་དག་པར་གཤེགས་པས་བཤད་པ། ཆོས་སོ་ཅོག་ཀུན་ལ་སྐྱེ་བའང་མེད། འགོག་པའང་མེད། མཚན་མའང་མེད། བྱ་བའང་མེད་ན། མི་ཀུན་ཡིད་ཆེས་ཤིང་ཤེས་པར་བྱས་པ་ཕྱེད་ཀྱིས་དཀོན་ནོ། །ཤཱ་རིའི་བུ། དཔེར་ན། བསྐལ་པ་ཟད་པའི་མེ་ཆེན་པོས་བསྲེགས་པའི་ཚེ་མི་ཞིག་གིས་མཆིལ་མ་ཐབས་ཅིག་བཏབ་པས་མེ་དེ་ཤི་བར་ནུས། ཡང་ཐབས་ཅིག་བུས་པས་སླར་འཇིག་རྟེན་གྱི་ཁམས་དང ། ལྷ་རྣམས་ཀྱི་ཕོ་བྲང་དུ་གྱུར་པར་ནུས་པ་དེ་ཁྱོད་ཀྱི་ཡིད་ལ་ཇི་སྙམ། ཡོད་དཀོན་ནམ་མི་དཀོན། བཅོམ་ལྡན་འདས།་དཀོན་ལགས་སོ། །ཤཱ་རིའི་བུ། ཡང་དག་པར་གཤེགས་པས་བཤད་པ། ཆོས་སོ་ཅོག་ཀུན་ལ་སྐྱེ་བའང་མེད། འགོག་པའང་མེད། མཚན་མའང་མེད། བྱ་བའང་མེད།་མི་ཀུན་ཡིད་ཆེས་ཤིང་ཤེས་པར་བྱས་པ་ནི། ཕྱེད་ཀྱིས་ཡོད་དཀོན་ནོ། །ཤཱ་རིའི་བུ། ཆུ་བོ་གངྒཱ་ཆེ་ཞིང་ཡངས་པ་ནི། དཔག་ཅིང་ཚད་གཟུང་དུ་མེད་དོ། །བཅོམ་ལྡན་
229b
འདས།་འདི་ལགས་སོ། །ཤཱ་རིའི་བུ། གནམ་ངོས་བཞིའི་འོག་ན་ཆར་པ་ཆེན་པོ་ཁྱབ་པར་བབ་སྟེ། ཆར་པའི་ཐིགས་པ་ནི། ཆུ་བོ་གངྒཱ་ཙམ་ན་མི་ལ་ལ་ཞིག་གིས་ལག་པས་ཆར་པའི་ཐིགས་པ་བཟེད་དེ་ལྷུང་ཞིང་ཟག་པ་མེད་ན། དེ་ཁྱོད་ཀྱི་ཡིད་ལ་ཇི་སྙམ། ཡོད་དཀོན་ནམ་མི་དཀོན། བཅོམ་ལྡན་འདས། དཀོན་ལགས་སོ། །ཤཱ་རིའི་བུ། ཡང་དག་པར་གཤེགས་པས་བཤད་པ། ཆོས་སོ་ཅོག་ཀུན་ལ་སྐྱེ་བའང་མེད། འགོག་པའང་མེད། མཚན་མའང་མེད། བྱ་བའང་མེད་ན། མི་ཀུན་ཡིད་ཆེས་ཤིང་ཤེས་པར་བྱས་པ་ཕྱེད་ཀྱིས་ཡོད་དཀོན་ནོ། །ཤཱ་རིའི་བུ། རི་རབ་རིའི་རྒྱལ་པོ་མཐོ་ཞིང་ཆེའམ་མི་ཆེ། བཅོམ་ལྡན་འདས། མཐོ་ཞིང་ཆེའོ། །ཤཱ་རིའི་བུ། གནམ་ངོས་བཞིའི་ནང་ན་ཁྱབ་པར་རྡོ་ཆེན་པོའི་ཆར་བབ་སྟེ། ཀུན་རི་རབ་རིའི་རྒྱལ་པོ་ཙམ་ན་མི་ལ་ལ་ཞིག་གིས་ལག་པས་རྡོ་དེ་དག་བཟེད་ཅིང་བསྡུས་ཏེ་སྐེ་ཚེའི་འབྲས་བུ་ཙམ་ཡང་ལྷུང་ཞིང་ཟག་པ་མེད་དེ་ཁྱོད་ཀྱི་ཡིད་ལ་ཇི་སྙམ། ཡོད་དཀོན་ནམ་མི་དཀོན། བཅོམ་ལྡན་འདས། དཀོན་ལགས་སོ། །ཤཱ་རིའི་བུ། ཡང་དག་པར་གཤེགས་པས་བཤད་པ། ཆོས་སོ་ཅོག་ཀུན་ལ་སྐྱེ་བའང་མེད། འགོག་པའང་མེད། མཚན་མའང་མེད། བྱ་བའང་མེད་ན། མི་ཀུན་ཡིད་ཆེས་ཤིང་ཤེས་པར་བྱས་པ་ཕྱེད་ཀྱིས་ཡོད་དཀོན་ནོ། ཤཱ་རིའི་བུ། དཔེར་ན། མི་ལ་ལ་
230a
༄#། །ཞིག་གིས་སེམས་ཅན་ཐམས་ཅད་ལག་པ་གཡོན་པར་བཞག་ལ། ལག་པ་གཡས་པས་སྟོང་གསུམ་གྱི་འཇིག་རྟེན་གྱི་ཁམས་དང ། རི་རབ་དང ། ཆུ་བོ་དང ། རྩི་ཤིང་བཏེག་སྟེ་སེམས་ཅན་དེ་རྣམས་ཐམས་ཅད་སེམས་མཐུན་པར་དགའ་སྐྱིད་ཅིང་ཡིད་ལ་ཐ་དད་པ་མེད་པར་བྱ་ནུས་ན། དེ་ཁྱོད་ཀྱི་ཡིད་ལ་ཇི་སྙམ། ཡོད་དཀོན་ནམ་མི་དཀོན། བཅོམ་ལྡན་འདས། དཀོན་ལགས་སོ། །ཤཱ་རིའི་བུ། ཡང་དག་པར་གཤེགས་པས་བཤད་པ། ཆོས་སོ་ཅོག་ཀུན་ལ་སྐྱེ་བའང་མེད། འགོག་པའང་མེད། མཚན་མའང་མེད། བྱ་བའང་མེད་ན། མི་ཀུན་ཡིད་ཆེས་ཤིང་ཤེས་པར་བྱས་པ་ཕྱེད་ཀྱིས་ཡོད་དཀོན་ནོ། །ཤཱ་རིའི་བུ། ཡང་དག་པར་གཤེགས་པས་བཤད་པ། ཆོས་ཀུན་ལ་ངོ་བོ་ཉིད་མེད་དེ། སྟོང་པ་ཅིའང་མེད་པས་འཇིག་རྟེན་ཐམས་ཅད་ཀྱིས་ཡིད་ཆེས་ཤིང་ཤེས་པར་དཀའོ། །ཅིའི་ཕྱིར་ཞེ་ན། ཤཱ་རིའི་བུ། ཆོས་དེ་ལ་འདུ་ཤེས་མེད་དེ།་འདུ་ཤེས་སོ་ཅོག་དང་བྲལ་ལོ། །བསམ་པ་མེད་དེ། བསམ་པའོ་ཅོག་དང་བྲལ་ལོ། །བླང་བའང་མེད་དེ། དོར་བའང་མེད། འདྲན་ཏོར་ཡང་མེད། མྱ་ངན་ཚ་བའང་མེད།་ཚུ་ལོགས་ཀྱི་འགྲམ་ཡང་མེད། ཕ་ལོགས་ཀྱི་འགྲམ་ཡང་མེད། སྐབས་ཀྱང་མེད། གཏི་མུག་ཀྱང་མེད། རིག་པའང་མེད་དེ། ཚད་མེད་པའི་ཡེ་ཤེས་ཀྱིས་ན་གདོད་
230b
ཤེས་པར་རུང་སྟེ། བསམ་པས་ཤེས་པར་ནུས་པ་མ་ཡིན་ནོ། །སྤྱད་པའང་མེད། འདུ་ཤེས་ཀྱང་མེད། མྱ་ངན་ཚ་བའང་མེད་དེ། དེ་བསམ་པ་མེད་ན་བསམ་པ་ཀུན་ལས་འདས། སེམས་མེད་ན་སེམས་ཀུན་ལས་འདས། ཕྱོགས་པའང་མེད། ལོག་པའང་མེད། བཅིང་བའང་མེད། བཀྲོལ་བའང་མེད། བདེན་པའང་མེད། མི་བདེན་པའི་ཆོས་ཀྱང་མེད། གཏི་མུག་ཀྱང་མེད། གཏི་མུག་གི་ཆོས་ཀྱང་མེད། གཏི་མུག་གི་དྲ་བའང་མེད། མིང་ཡང་མེད། ཚིག་མེད། བཤད་པ་མེད། མ་བཤད་པ་མེད། ཟད་པའང་མེད། མ་ཟད་པའང་མེད་སྤྱད་པའང་མེད། ལམ་ཡང་མེད། ལམ་གྱི་འབྲས་བུའང་མེད། བྲལ་བ་མེད་ན་བྲལ་བ་རྣམས་ལས་འདས་ཏེ། བསམ་པའང་མེད། གོ་འདུན་འདྲེས་པའང་མེད། བླང་བའང་མེད། དོར་བའང་མེད། ཐོབ་པའང་མེད། ཐོབ་པར་ཡང་མི་རུང ། བདེན་པ་རྣམས་ཀྱང་བསལ། འདོད་ཆགས་དང ། ཞེ་སྡང་དང ། གཏི་མུག་ཀྱང་བསལ་ཏེ། བདེན་པའང་མེད་རྫུན་པའང་མེད། རྟག་པའང་མེད། མི་རྟག་པའང་མ་ཡིན། སྣང་བའང་མ་ཡིན། མི་སྣང་བའང་མ་ཡིན། མུན་པའང་མ་ཡིན། སྣང་བའང་མ་ཡིན། སེམས་ལ་མི་འདུག། ངོ་བོ་ཉིད་མེད། ངོ་བོ་ཉིད་ཕྱི་མོ་ནས་སྟོང་པས་བདུད་ཕེབས་ཐུལ་བར་ནུས། མྱ་ངན་དང་འཁྲུག་པ་ཕེབས་ཐུལ། ལྔ་ཕུང་ཕེབས་ཐུལ། འདུ་མ་ཆེད་བཅུ་གཉིས་ཕེབས་ཐུལ།
231a
༄#། །ཁམས་བཅོ་བརྒྱད་ཕེབས་ཐུལ། ལྔ་ཕུང་ཡོད་ཅེས་འཆད་པ་ཕེབས་ཐུལ། འདུ་མཆེད་བཅུ་གཉིས་ཡོད་ཅེས་འཆད་པ་ཕེབས་ཐུལ། ཁམས་བཅོ་བརྒྱད་ཡོད་ཅེས་འཆད་པ་ཕེབས་ཐུལ། སེམས་ཅན་ཡོད་ཅེས་འཆད་པ་དང ། གང་ཟག་ཡོད་ཅེས་འཆད་པ་ཕེབས་ཐུལ། ཚེ་ཡོད་ཅེས་འཆད་པ་དང ། སྲོག་ཡོད་ཅེས་འཆད་པ་དང ། ཡོད་པ་ཡོད་ཅེས་འཆད་པ་དང ། ཡོད་པ་མེད་ཅེས་འཆད་པ་ཕེབས་ཐུལ་ལོ། །ཡོན་པོ་ཆད་པ་ཐམས་ཅད་ཕེབས་ཐུལ་ལོ། །ཤཱ་རིའི་བུ། ངའི་འཕྲུལ་གྱི་ཆོས་འདིས་འདོད་ཆགས་ཐམས་ཅད་དང ། ཆོས་ཡོད་ཅེས་འཆད་པ་དང ། ཆོས་སོ་ཅོག་གི་ཡང་དག་པའི་བདེན་པའི་མཚན་མ་ལ་ཡིད་མི་ཆེས་མ་དད་པ་དང ། སངས་རྒྱས་ཀྱི་ཆོས་ལ་ཟློག་པ་ཀུན་ཕེབས་ཐུལ་བར་ནུས་སོ། །ཅིའི་ཕྱིར་ཞེས་བྱས་ན། ཤཱ་རིའི་བུ། སེམས་ཅན་ལ་ལ་ཞིག་བདག་ཏུ་ལྟ་བར་འཆད། གང་ཟག་ཏུ་འཆད། །སེམས་ཅན་ཡོད་པར་འཆད། མེད་པར་འཆད། རྟག་པ་སྙམ་དུ་འཆད། །ཡོད་པ་སྙམ་དུ་འཆད། མེད་པ་སྙམ་དུ་འཆད་ཅིང་ཆོས་རྣམས་འཆད་པ་དང ། བརྙན་མའི་མིང་དུ་འཆད་པ་དང ། འཆད་པ་ཀུན་ལ་སངས་རྒྱས་ལ་ཟློག་ཅིང་གལ་བ་སྟེ། སངས་རྒྱས་དང་རྩོད་པའོ། །ཤཱ་རིའི་བུ། ཆོས་ལ་ཅུང་ཟད་ཅིག་ཐོབ་པར་འཛིན་པ་ཡན་ཆད་སངས་རྒྱས་དང་རྩོད་པའོ། །སངས་རྒྱས་དང་རྩོད་པ་ནི། ཀུན་
231b
ཡོན་པོའི་ལམ་དུ་འཇུག་པ་སྟེ། ངའི་སློབ་མ་མ་ཡིན་ནོ། །ངའི་སློབ་མ་ཡིན་ན། མྱ་ངན་ལས་འདས་པ་དང་རྩོད་པ། སངས་རྒྱས་དང་རྩོད་པ། ཆོས་དང་རྩོད་པ། དགེ་འདུན་དང་རྩོད་པ་སྟེ། ཤཱ་རིའི་བུ། དེ་ལྟར་མཐོང་བའི་མི་ནི། ངས་ཁྱིམ་ནས་བྱུང་ཞིང ། ཚུལ་ཁྲིམས་ནོད་དུ་མ་གནང་ངོ ། །ཤཱ་རིའི་བུ། དེ་ལྟར་མཐོང་བའི་མི་ནི། ངས་ཆུ་རྔུབ་གཅིག་དང ། ཡོན་ལེན་དུའང་མ་གནང་ངོ ། །ཤཱ་རིའི་བུ། མི་ལ་ལ་ཞིག་དེ་ལྟ་བུར་མི་དགེ་བའི་འདོད་ཆགས་ཀྱི་དོན་བསལ་བཏང་བ་ནི། ངའི་ཆོས་ཀྱི་ནང་དུ་ཁྱིམ་ནས་འབྱུང་ཞིང་ཆོས་ལ་མི་ཚོལ་ཏེ། མྱ་ངན་ལས་འདས་པར་ཡང་མི་སེམས། མྱ་ངན་ལས་འདས་པའི་སེམས་ཀྱང་མི་བྱེད། མྱ་ངན་ལས་འདས་པ་ལའང་མ་ཆགས་ཏེ། མཐའ་ཡུན་དུ་སྟོང་པའི་ཆོས་ཀྱིས་མི་དངངས། མི་སྐྲག་པ་དེ་ལྟ་བུའི་མིའང་ཆོས་ཀུན་འཆད་པའི་ཕྱིར་བརྩོན་འགྲུས་པ་ལ་སྤྱོད་ན། མི་དགེ་བ་ལ་འདོད་ཆགས་པ་དེ་ལྟ་བུའི་ལྟ་སྨོས་ཀྱང་ཅི་དགོས། །བདག་ཏུ་ལྟ་བ་ལ་ཆགས་པ་དང ། སེམས་ཅན་ལ་ཆགས་པ་དང ། གང་ཟག་ལ་ཆགས་པ་དང ། ཆོས་ལ་ཆགས་པ་དེ་ལྟ་བུའི་མིས་འདོད་ཆགས་རྣམས་གཅད་པའི་ཕྱིར་མཚན་མ་མེད་པའི་ཏིང་ངེ་འཛིན་འགྲུབ་པར་སྤྱད་སྦྱངས་ཏེ། མཚན་མ་མེད་པའི་ཏིང་ངེ་འཛིན་ལའང་མཚན་མ་མི་ལེན་ཏེ། མི་དེས་ཆོས་སོ་ཅོག་ཐམས་ཅད་ཀྱི་མཚན་ཉིད་གཅིག་ཡིན་པར་ཁོང་དུ་ཆུད་དེ། །དེ་ནི། མཚན་ཉིད་མེད་པའོ། །ཤཱ་རིའི་བུ། དེ་ལྟ་བུ་ནི། མིང་འཕྲུལ་གྱི་
232a
༄#། །ཆོས་ཀྱི་མཉེན་དུལ་བའི་ཆོས་ཀྱི་བཟོད་པ་ཞེས་བྱའོ། །མཉེན་དུལ་བའི་ཆོས་ཀྱི་བཟོད་པ་དེ་ལྟ་བུ་ཐོབ་ན། གདོད་མིང་ངའི་སློབ་མ་ཡིན་ཏེ། ཡོན་ཕུལ་བའང་ཞུ་བར་བྱ་ནུས་ལ་ལུང་སྟོན་པར་མ་མནོས་སོ། །ཅིའི་ཕྱིར་ཞེས་བྱས་ན། ཤཱ་རིའི་བུ། ངའི་ཡང་དག་པའི་བདེན་པའི་མཚན་མའི་ཆོས་འདི་ལ་འཇུག་ཏུའང་མི་རུང ། བླང་དུའང་མི་རུང ། དོར་དུའང་མི་རུང ། ཆགས་སུའང་མི་རུང ། བཤད་དུའང་མི་རུང ། སྨྲ་བའི་ཚིག་གི་ལམ་ཆད། དགའ་བའང་མེད། གཞའ་བའང་མེད། འདོད་ཅིང་དགའ་བའི་སེམས་ཀྱང་ཆད་དེ། རྐྱེན་རྣམས་ཚོགས་པ་མེད། རྐྱེན་རྣམས་དང་བྲལ་བས་ཀྱང་ལམ་མེད། ལམ་ཆད། ལམ་མེད་པ་ལ་ཐུག་པར་སྨྲ་བའི་ཚིག་རྣམས་དང ། བརྗོད་ཅིང་འགྲོ་བ་དང ། སྒྲ་སྐད་ཀུན་ཆད། དེ་གཟུགས་ཀྱང་མེད། ཁ་དོག་ཀྱང་མེད། བླང་བའང་མེད། ཆགས་པའང་མེད། སྤྱད་པའང་མེད། བདེན་པའང་མེད། རྫུན་པའང་མེད། མུན་པའང་མེད། སྣང་བའང་མེད། ཞིག་པའང་མེད། རྩོད་པའང་མེད། འདུས་པའང་མེད། གྱེས་པའང་མེད། གཡོ་བའང་མེད། སེམས་པའང་མེད། རྣམ་པར་རྟོག་པའང་མེད། ཐོབ་པར་མི་རུང་ངོ ། །དྲི་མའང་མེད། གཙང་བའང་མེད། མིང་ཡང་མེད། མཚན་མའང་མེད། སེམས་ཀྱིས་བགྲང་བའི་ཆོས་ཀྱང་མ་ཡིན། སེམས་ཀྱིས་ཤེས་པའང་མ་ཡིན་ཏེ། ངའི་ཆོས་འདིའི་
232b
ནང་ན་སྐྱེས་པའང་མེད། བུད་མེད་ཀྱང་མེད། ལྷའང་མེད། ཀླུའང་མེད། གནོད་སྦྱིན་ཡང་མེད། དྲི་ཟའང་མེད། གྲུལ་བུམ་ཡང་མེད། ཤ་ཟའང་མེད། ཆད་པའང་མེད། རྟག་པའང་མེད། བདག་ཏུ་ལྟ་བའང་མེད། སེམས་ཅན་ཡང་མེད། གང་ཟག་ཀྱང་མེད། འོངས་པའང་མེད། སོང་བའང་མེད། ཞུགས་པའང་མེད། ཚུལ་ཁྲིམས་ཀྱང་མེད། ཉམས་པའང་མེད། གཙང་བའང་མེད། དྲི་མའང་མེད། ཏིང་ངེ་འཛིན་ཀྱང་མེད། ཐུབ་པའང་མེད། ཐུབ་པའི་རྩ་བའང་མེད། བསམ་གཏན་ཡང་མེད། བསམ་གཏན་གྱི་རྩ་བའང་མེད། ཤེས་པའང་མེད། མཐོང་བའང་མེད། འདོད་པའང་མེད། རྩོད་པའང་མེད། ལམ་ཡང་མེད། ལམ་གྱི་འབྲས་བུའང་མེད། ཤེས་རབ་ཀྱང་མེད། ཤེས་རབ་ཀྱི་རྩ་བའང་མེད། སྣང་བའང་མེད། སྣང་བ་མེད་པའང་མེད།་གྲོལ་ཐར་པའང་མེད། གྲོལ་ཐར་པ་མེད་པའང་མེད། འབྲས་བུའང་མེད། འབྲས་བུ་ཐོབ་པའང་མེད། སྟོབས་ཀྱང་མེད། སྟོབས་ཐོབ་པའང་མེད། འཇིགས་པའང་མེད། འཇིགས་པ་མེད་པའང་མེད། སེམས་ཀྱང་མེད། སེམས་ཀྱི་རྩ་བའང་མེད། འདུག་པའང་མེད། འགྲོ་བའང་མེད། ཆོ་གའང་མེད། ཚུ་ལོགས་ཀྱང་མེད། ཕ་ལོགས་ཀྱང་མེད། དྲན་ཞིང་འདུ་ཤེས་ཀྱིས་རྣམ་པར་བརྟགས་པའང་མེད། བྱང་ཆུབ་ཀྱང་མེད། བྱང་ཆུབ་ཀྱི་ཤེས་ཀྱང་མེད། ཤེས་རབ་མེད། ཤེས་རབ་མེད་པའང་མེད། སའང་མེད། ཆུའང་མེད། མེའང་མེད། རླུང་ཡང་མེད། སྡིག་
233a
༄#། །ཀྱང་མེད། དཔལ་ཡོན་ཡང་མེད། ཆོས་ཀྱང་མེད། ཆོས་མེད་པའང་མེད། སྡུག་བསྔལ་ཡང་མེད། སྐྱིད་པའང་མེད་དེ། འདྲན་ཏོར་བརྗོད་པ་ཐམས་ཅད་ཀྱི་རྩ་བའི་ཕྱི་མོ་ཀུན་བྱུང་སྟེ། ཐམས་ཅད་ཡོངས་སུ་བྲལ་བས་གྲངས་ཏེ། དུད་པའང་མེད་དོ། །ཤཱ་རིའི་བུ། གཅེས་པའི་ཚིག་བསྐྱོད་དོ། །ངའི་ཆོས་ཀྱིས་སེམས་སོ་ཅོག་ཐམས་ཅད་དང ། མཐོང་ངོ་ཅོག་ཐམས་ཅད་དང ། བདུད་ཐམས་ཅད་དང ། ལེ་ལོའང་སྐྱེ་བ་ཀུན་བཤིག་སྟེ། དྲན་ཞིང་སེམས་པ་ཐམས་ཅད་ཀུན་གྱི་སེམས་སོ། །སྨྲ་བའི་ཚིག་ཐམས་ཅད་གསལ་ཏོ། །ངའི་ཆོས་དེའི་ནང་ན་རྟག་པ་མེད། རྟག་པ་མེད་པའང་མེད། སྡུག་བསྔལ་མེད། སྐྱིད་པའང་མེད། དྲི་མའང་མེད། གཙང་བའང་མེད། ཆད་པའང་མེད། རྟག་པའང་མེད། བདག་ཏུ་ལྟ་བའང་མེད། སེམས་ཅན་ཡང་མེད། གང་ཟག་ཀྱང་མེད། ཚེའང་མེད། སྲོག་ཀྱང་མེད། སྐྱེ་བའང་མེད། འགོག་པའང་མེད། དེ་ཅིའི་ཕྱིར་ཞེ་ན། ཤཱ་རིའི་བུ། ཡང་དག་པར་གཤེགས་པས་ཆོས་ལ་ཅིའང་ཐོབ་པ་ཡོང་མེད་ཅིང་ཞི་བ་ཡོད་པས་ན། མིང་མྱ་ངན་ལས་འདས་ཞེས་བྱ་ན། མྱ་ངན་ལས་འདས་པ་ཐོབ་པའང་མ་མཐོང ། ཤཱ་རིའི་བུ། སངས་རྒྱས་ཀྱང་མྱ་ངན་ལས་འདས་པར་མི་སེམས་སོ། །མྱ་ངན་ལས་འདས་པའི་སེམས་ཀྱང་མི་བྱེད། །མྱ་ངན་ལས་འདས་པ་ལ་འདོད་ཆགས་ཀྱང་མེད་དོ། །དེ་ལྟ་བས་ན།
233b
དེ་ནི།་རབ་ཏུ་ངོ་མཚར་བར་མངོན་ཏེ། ཡོད་དཀོན་ནོ། །དེ་ནི། ཡང་དག་པར་གཤེགས་པས་བཤད་པ། ཆོས་སོ་ཅོག་སྐྱེ་བའང་མེད། འགོག་པའང་མེད། མཚན་མའང་མེད། བྱ་བའང་མེད་ན། མི་ཀུན་ཡིད་ཆེས་ཤིང་ཤེས་པར་བྱས་པ་ན་ཕྱེད་ཀྱིས་ཡོད་དཀོན་ནོ། །ལེའུ་གཉིས་ཏེ། སངས་རྒྱས་བསམ་པའི་ལེའུའོ།། །།དེའི་ཚེ་ཤཱ་རིའི་བུས་སངས་རྒྱས་ལ་གསོལ་པ། བཅོམ་ལྡན་འདས། ཆོས་འདིའི་ནང་ན་ཇི་ལྟ་བུ་ལ་ངན་པའི་བཤེས་གཉེན་ཞེས་བགྱི། ཇི་ལྟ་བུ་ལ་དགེ་བའི་བཤེས་གཉེན་ཞེས་བགྱི། སངས་རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། དགེ་སློང་ལ་ལ་ཞིག་དགེ་སློང་གཞན་ལ་སྟོན་པ། དགེ་སློང ། ཁྱོད་སངས་རྒྱས་ལ་སོམས་ཤིག་།ཆོས་ལ་སོམས་ཤིག་།དགེ་འདུན་ལ་སོམས་ཤིག་།ཚུལ་ཁྲིམས་ལ་སོམས་ཤིག་།གཏོང་བ་ལ་སོམས་ཤིག་།ལྷ་ལ་སོམས་ཤིག་།དགེ་སློང ། ཁྱེད་ཀྱིས་ལུས་ལ་རྟོགས་ཏེ། ལུས་གཟུགས་དེ་མི་གཙང་བར་སོམས་ཤིག་།བྱ་བ་ཡོད་དོ་ཅོག་གི་ཆོས་ཐམས་ཅད་ཀུན་ནི། རྟག་པ་མེད་པར་རྟོགས་ཤིག་།ཆོས་སོ་ཅོག་ནི། སྟོང་པ་མེད་པར་རྟོགས་ཤིག་།དགེ་སློང ། ཁྱོད་ཀྱིས་རྐྱེན་ཏོ་ཅོག་གི་མཚན་མ་བླངས་ཏེ་སེམས་ཀྱི་རྐྱེན་གྱི་ནང་དུ་བཏགས་པ་བཞིན་དུ་སྟོང་པའི་མཚན་མ་གཅིག་ཏུ་སོམས་ཤིག་།དགེ་བའི་སེམས་ལ་དད་པར་བྱོས་ཤིག་།མི་དགེ་བའི་ཆོས་ཀྱི་མཚན་མ་ལོངས་ལ། མི་དགེ་
234a
༄#། །བའི་ཆོས་ཀྱི་མཚན་མ་བླངས་ཟིན་ནས་གཅད་པར་བྱ་བའི་ཕྱིར་བརྟགས་ཤིང་བསམ་པ་སྤྱད་པ་སྦྱངས་ཏེ། འདོད་ཆགས་གཅད་པའི་ཕྱིར་མི་གཙང་བའི་མཚན་མ་ལ་བརྟག་གོ། །ཞེ་སྡང་གཅད་པའི་ཕྱིར་བྱམས་པའི་སེམས་ཀྱི་མཚན་མ་ལ་བརྟག་གོ། གཏི་མུག་གཅད་པའི་ཕྱིར་རྒྱུ་རྐྱེན་གྱི་ཆོས་ལ་བརྟགས་ཏེ། རྟག་པར་ཚུལ་ཁྲིམས་གཙང་མ་བསམ་པ་ལ་ཟབ་ཏུ་སྟོང་པའི་མཚན་མ་བླངས་ཏེ། བརྩོན་འགྲུས་རྟག་པར་སྤྱད་ལ་བསམ་གཏན་བཞི་ཐོབ་ནས་སེམས་གཅིག་ཏུ་ལམ་བཙལ་ཏེ། མི་དགེ་བའི་ཆོས་ནི།་སྤངས་ནས་ནང་གི་བདེ་སྐྱིད་ཡོད་པར་བརྟག་གོ། །སེམས་གཅིག་ཏུ་ལམ་སྤྱད་དེ། དགེ་མི་དགེའི་བྱེ་བྲག་ཕྱེད་པར་རྟོགས་པར་བརྟག་གོ། །མཚན་མར་རྟོགས་ཏེ་བླངས་ཟིན་ནས་སེམས་གཅིག་ཏུ་བསམ་སྟེ། མྱ་ངན་ལས་འདས་པའི་བདེ་བ་སྟོང་པ་ཞི་བ་བརྟགས་ཏེ་མྱ་ངན་ལས་འདས་པའི་མཐའ་ཡུན་དུ་གཙང་དག་པ་འབའ་ཞིག་བླང་བ་དེ་ལྟ་བུ་སྟོན་པ་ནི། མིང་ཡོན་པོར་སྟོན་པ་སྟེ། དེ་ལྟ་བུའི་དང་པོར་སྟོན་པ་ཡོན་པོར་སྟོན་པ་ཡིན་ནོ། །ཤཱ་རིའི་བུ། དེ་ལྟ་བུར་སྟོན་པ་ནི། མིང་ངན་པའི་བཤེས་གཉེན་ཏེ། མི་དེ་ལྟ་བུའི་མིང་ལ་འཕྱ་སྐུར་བ་ཞེས་བྱ་སྟེ། མུར་འདུག་ལ་སྟོང་པའོ། །མི་གཞན་ལ་ཡོན་པོར་ལམ་གྱི་ཆོས་འཆད་པ་ཞེས་ཀྱང་བྱའོ། །ཤཱ་རིའི་བུ། དེ་ལྟ་བུའི་མིང་ངན་པ་ནི། ངས་ཆུ་
234b
རྔུབ་གཅིག་དང ། ཡོན་ལེན་དུའང་མི་གནང་ངོ ། །ངས་སྟོན་པ་ནི། བཤད་ཀྱི། སློབ་མ་ནི། མ་བཤད་དོ། །ཤཱ་རིའི་བུ། ངའི་ཆོས་ལ་དེ་ལྟ་བུར་ལེ་ལོ་ཡང་སྐྱེ་བ་སྟོན་པ་མང་དུ་ཡོད་དོ། །ཤཱ་རིའི་བུ། བསྟན་པ་ནོད་པ་ནི། ཚུལ་ཁྲིམས་མནོས་ཏེ་ལོ་ལྔའི་བར་དུ་ཀུན་གཏོང་མི་ཕོད་ན། དེ་ལྟ་བུར་བསྟན་པ་ནི། དེ་ལ་སེམས་འགྲུས་པར་སྤྱད་དེ། རང་ལ་ཅིའང་མེད་པ་ཐོབ་པ་ཡོད་དོ། །དགེ་སློང ། སོང་སྟེ་མི་གསོལ་མི་འདྲེ་བ་ངས་བཤད་པ་ལ་མི་དེ་ལོ་ལྔ་ལོན་མོད་ཀྱི། འོན་ཀྱང་མིང་ཡོན་པོ་མཐོང་བ་སྟེ་མུར་འདུག་གི་ཆོས་དང་འདྲེས་ཤིང་བདུད་ཀྱིས་བསྟན་པ་བཞིན་དུ་སྤྱོད་པའོ། །ཤཱ་རིའི་བུ། དགེ་སློང་ལ་ལ་ཞིག་དེ་སྐད་དུ་བསྟན་པ་མནོས་ཟིན་ནས་སྟོང་པ་ཆོས་ཅིའང་ཐོབ་པ་མེད་ཅེས་ཐོས་ནས་མོད་བཞིན་རང་གིས་ཚོར། ཤེས་ཏེ་བདག་གིས་སྔར་མནོས་པ་ནི། ཀུན་ཡོན་པོ་མཐོང་བ་ཡིན་ཏེ། སྟོང་པ་ཅིའང་ཐོབ་པ་མེད་པའི་ཆོས་ལ་ཐེ་ཚོམ་ཡང་མེད། འགྱོད་པའང་མེད་དེ། ཟབ་ཏུ་ཞུགས་ཤིང་ཐོས་པ་མེད། པས་བདག་ཏུ་ལྟ་བ་དང ། གང་ཟག་ཏུ་ལྟ་བ་ཐམས་ཅད་ལ་མི་རྟེན་ཏོ། །ཤཱ་རིའི་བུ། ངས་བཤད་པ་ལ་དེ་ལྟ་བུའི་མི་མིང་གཙང་དག་པའི་ཚངས་པ་སྤྱད་པ་ཞེས་བྱའོ། །ཤཱ་རིའི་བུ། དགེ་སློང་ལ་ལ་ཞིག་གིས་དེ་ལྟ་བུ་ཅིའང་ཐོབ་པ་མེད་པའི་བཟོད་པ་འབྱོར་གྲུབ་ན། འཕྲལ་དུ་ལྷག་མ་མེད་པའི་མྱ་ངན་ལས་འདས་པ་མཐོང་མོད་ཀྱི། ངས་ལུང་བསྟན་ཏེ། མི་དེ་
235a
༄#། །སངས་རྒྱས་བྱམས་པའི་དུས་ཀྱི་ཚོགས་པ་དང་པ་ལ་འཇུག་གོ། །དེའི་ཚེ་སངས་རྒྱས་བྱམས་པའང་ཤིན་ཏུ་དགའ་ནས་ལན་གསུམ་བོས་ཏེ་མི་དེ་སངས་རྒྱས་ཤཱཀྱ་ཐུབ་པའི་ཆོས་ལ་ཅིའང་ཐོབ་པ་མེད་པའི་བཟོད་པའི་འབྱོར་འགྲུབ་པས་ནུས་སོ་ཞེས་བོས་སོ། ཤཱ་རིའི་བུ། ཁྱིམ་ན་འདུག་པའང་རུང ། ཁྱིམ་ནས་བྱུང་བའང་རུང་སྟེ།་དེ་ལྟ་བུ་བཟོད་པ་འབྱོར་གྲུབ་ན། ངས་མི་དེ་མྱ་ངན་ལས་འདས་པ་ཐོབ་པ་ཡང་དག་པར་ལུང་སྟོན་ཏོ། །ཤཱ་རིའི་བུ། མི་ལ་ལ་ཞིག་དེ་སྐད་དུ་བསྟན་པ་མནོས་ཟིན་ནས་སྟོང་པ་ཅིའང་ཐོབ་པ་མེད་པའི་ཆོས་ཐོས་ན། རྨད་བཞིན་དངངས་སྐྲག་ན། མི་དེ་སྙིང་རྗེར་རུང་སྟེ། ར་མདའ་མེད་དོ། །གཉེན་པོ་མེད་དེ། སེམས་ཅན་དམྱལ་བར་ཕྱོགས་སོ། །དེ་ཅིའི་ཕྱིར་ཞེ་ན། ཤཱ་རིའི་བུ། སངས་རྒྱས་ཀྱི་བསྟན་པ་ལ་དངངས་སྐྲག་ཅིང་དོགས་པ་སྟེ། མི་དེས་ངན་པའི་ལམ་ཆོག་ཚང་བའི་ཕྱིར་རོ། །ཇི་ལྟ་ཞེ་ན། ངས་རྟག་པར་བཤད་པ་ཡིན་ནོ་བ་ཡོད་ཅེས་འཆད་པ་ནི། ལམ་ངན་པའི་ཤས་ཡིན་ནོ། །ཇི་ལྟ་ཞེ་ན། ཤཱ་རིའི་བུ། སངས་རྒྱས་ཀྱིས་ཐོབ་པའི་ཆོས་ལ་ཡིན་མ་ཡིན་དང་ཐ་དད་པ་མེད་དོ། །ཐ་དད་དུ་ཟིན་ན། ཐོབ་པ་ཡོད་པ་ཡིན་ནོ། །ཤཱ་རིའི་བུ། མི་ལ་ལ་ཉིས་ན་ལོག་པ་ལྔའི་ཤས་ལྕི་བ་འབྱོར་གྲུབ་ཀྱང་རུང་གི། བདག་ཏུ་ལྟ་བ་དང ། སེམས་ཅན་དུ་
235b
ལྟ་བ་དང ། གང་ཟག་ཏུ་ལྟ་བ་དང ། ཚོར་ལྟ་བ་དང ། སྲོག་ཏུ་ལྟ་བ་དང ། ཕུང་པོ་དང་སྐྱེ་མཆེད་དང ། ཁམས་སུ་ལྟ་བ་འབྱོར་གྲུབ་ཏུ་མི་རུང་ངོ ། །ཚུལ་ཁྲིམས་འཛིན་པ་ལ་འདོད་ཆགས། ཚུལ་ཁྲིམས་འཛིན་པ་ལ་ཆགས་པར་མཐོང་བའོ། །ཏིང་ངེ་འཛིན་ལ་འདོད་ཆགས་ན། ཏིང་ངེ་འཛིན་མཐོང་བ་ལ་ཆགས་པའོ། །སངས་རྒྱས་ཀྱི་འདུ་ཤེས་ལ་བརྟེན་ན། ཆོས་ཀྱི་འདུ་ཤེས་ཐོབ་པའོ། །དགེ་འདུན་གྱི་དོན་གཅོད་ན། ལུས་མཐོང་བ་འབྱོར་གྲུབ་བོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་ཆོས་ལ་ལུས་མཐོང་བ་འབྱོར་གྲུབ་ན། དགེ་འདུན་གྱི་གྲངས་སུ་མི་གཏོགས་སོ། །ཤཱ་རིའི་བུ། སངས་རྒྱས་ཀྱི་སློབ་མ་རྣམས་ནི། སེམས་ལ་རྣམ་པར་བརྟག་པ་མེད་དོ། །ཤཱ་རིའི་བུ། སངས་རྒྱས་ཀྱི་སློབ་མ་རྣམས་ལ་མི་དགེ་བ་མེད་དོ། །ཚུལ་ཁྲིམས་ཞིག་པ་མེད་དོ། །ཞིག་པར་མཐོང་བ་མེད་དོ། །ཆོ་ག་ཞིག་པ་མེད་དོ། ཤཱ་རིའི་བུ། གང་ལ་སོགས་པ་ངན་པ་མི་དགེ་ཞེས་བྱ། སངས་རྒྱས་དང་དགེ་འདུན་གྱི་ནང་ན་དགེ་འདུན་གྱི་གྲངས་སུ་མ་ཆུད་པའི་མིང་ངན་པ་མི་དགེ་བའོ། །སེམས་ཀྱི་སེམས་བགྲང་བའི་ཆོས་ནི། རྐྱེན་རྣམས་དང་འདུས་པ་སྟེ། ཡང་དག་པ་བདེན་པའི་དོན་མེད་དེ།་རྣམ་པར་རྟོག་པ་འབའ་ཞིག་བྱེད་དོ། །རྣམ་པར་རྟོག་པ་སྤྱད་པས་ན། ཐོབ་པ་ཡོད་དུ་འཛིན་ཏེ། གང་ཟག་ཐོབ་པ་ནས་ཚིག་གིས་ཏྦྴད་པ་ཡོད་པ་ཀུན་ལ་ཐུག་གི་བར་དུ་
236a
༄#། །སེམས་ཀྱིས་སམས་མཐུད་དེ། དགེ་མི་དགེའི་ཆོས་ལ་ཐུག་པ་ནི། འཕྲུལ་གྱི་ཆོས་ཀྱི་ནང་ན་མིང་ངན་པ་མི་དགེ་བའི་ཆོས་ཞེས་བྱའོ། །ཅིའི་ཕྱིར་ཞེ་ན། ཤཱ་རིའི་བུ། སྐྱིད་པ་ཡོད་པའི་གནས་ཀྱི་ནང་ན་གདོན་མི་ཟ་བར་ཉོན་མོངས་པ་ཡོད་དོ། །ཡང་དག་པར་གཤེགས་པའི་ཆོས་ལ་དེ་ལྟ་བུའི་སྐྱིད་སྡུག་མེད་དོ། །ཤཱ་རིའི་བུ། ཡང་དག་པར་གཤེགས་པས་ཐོབ་པ་དེའི་ནང་ན་འདོད་པ་མེད། འདོད་པ་མེད་པའང་མེད། སྐྱིད་པའང་མེད། ཉོན་མོངས་པའང་མེད། སེམས་པའང་མེད། འདུ་ཤེས་ཀྱང་མེད། སྤྱོད་པའང་མེད། སྟོང་པའི་འདུ་ཤེས་ལ་ཐུག་གི་བར་དུའང་མེད་དོ། །ཅིའི་ཕྱིར་ཞེས་བྱས་ན། ཤཱ་རིའི་བུ། སྟོང་བའི་འདུ་ཤེས་ཡོད་དུ་ཟིན་ན། བདག་ཏུ་ལྟ་བའི་འདུ་ཤེས་ཡིན། སེམས་ཅན་དུ་ལྟ་བའི་འདུ་ཤེས་ཡིན། རྟག་པའི་འདུ་ཤེས་ཡིན། ཆད་པའི་འདུ་ཤེས་ཡིན་ནོ། །ཅིའི་ཕྱིར་ཞེ་ན། ཤཱ་རིའི་བུ། འདུ་ཤེས་ཡོད་པའི་ཕྱིར་འབྲངས་ན། མཚན་མའོ་ཅོག་སྐྱེས་ཏེ། ཀུན་ཡོན་པོར་ལྟུང་བ་ཡིན་ནོ། །ཤཱ་རིའི་བུ། སྟོང་པའི་མིང་ནི། སེམས་མེད་པ་སྟེ། དེའི་མིང་སྟོང་པ་ཞེས་བྱའོ། །སྟོང་པའི་སེམས་ཀྱང་སྟོང་བ་སྟེ། དེའི་མིང་སྟོང་པ་ཞེས་བྱའོ། །ཤཱ་རིའི་བུ། སྟོང་པའི་ནང་ན་ལེགས་པའང་མེད། ཉེས་པའང་མེད། སྟོང་པའི་འདུ་ཤེས་ལ་ཐུག་གི་བར་དུའང་མེད་དོ། །དེ་ལྟ་བས་ན།
236b
མིང་སྟོང་པའོ། །ཤཱ་རིའི་བུ། བྱ་བ་ཡོད་པའི་ཆོས་ཀུན་ནི། རིག་པར་རུང ། ཤེས་པར་རུང་ངོ ། །སྟོང་པ་ནི། རིག་པར་རུང་བ་མ་ཡིན་ནོ། །ཤེས་པར་རུང་བའང་མ་ཡིན། བསམ་པར་རུང་པའང་མ་ཡིན་ཏེ། དེ་ལྟ་བས་ན། མིང་སྟོང་པའོ། །ཤཱ་རིའི་བུ། སྟོང་པའི་འདུ་ཤེས་ནི། བསམ་པས་ཐོབ་པ་མ་ཡིན་ནོ། །ཅིའི་ཕྱིར་ཞེ་ན། སྟོང་པ་འདུ་ཤེས་མེད་པའི་ཕྱིར་རོ། ། དེ་ལྟ་བས་ན། མིང་སྟོང་པའོ། །ཤཱ་རིའི་བུ། ཅིའི་ཕྱིར་ཞེ་ན། སྟོང་པའི་ལས་སྤྱོད་པ་བཤད། འདུ་ཤེས་ཐམས་ཅད་མི་སེམས། སྟོང་པའི་འདུ་ཤེས་ལ་ཐུག་གི་བར་དུའང་མི་སེམས་པ་དེའི་མིང་སྟོང་པ་སྤྱོད་པ་ཞེས་བྱའོ། །ཤཱ་རིའི་བུ། འདུ་ཤེས་ཀྱི་མིང་སེམས་ལ་བསམ་པ་ཡོད་དོ་ཅོག་གི་མིང་འདུ་ཤེས་ཞེས་བྱའོ། །ཅིའང་བསམ་པ་མེད་པ་ནི། འདུ་ཤེས་མེད་པ་སྟེ། འདུ་ཤེས་དང་བྲལ་བས་ན། མིང་འདུ་ཤེས་མེད་པ་ཞེས་བྱའོ། །འདུ་ཤེས་ལེན་པ་ལ་འབྲང་བ་ནི། ཀུན་ཡོན་པོ་མཐོང་བ་ཡིན་ནོ། །ཅིའི་ཕྱིར་ཞེ་ན། ཤཱ་རིའི་བུ། འཕྲུལ་གྱི་ཆོས་ལ་སྟོང་པ་ཞི་བ་ཐོབ་ཏུ་འཛིན་ན། ཀུན་ཡོན་པོ་མཐོང་བར་ལྟུང་བ་ན་ཚིག་གིས་བཤད་པ་དང ། འཆད་པ་ལྟ་སྨོས་ཀྱང་ཅི་དགོས། དེ་ལྟ་བུའི་སྟོང་པའི་ཆོས་ཅི་སྤྱད་ན་བཤད་དུ་རུང ། ཤཱ་རིའི་བུ། སངས་རྒྱས་ཀྱིས་ཅིའི་ཕྱིར་སྐད་དང་ཚིག་གིས་བཤད་པ་ཀུན་མིང་ཡོན་པོ་ཞེས་བྱའོ། །ཆོས་སོ་ཅོག་ལ་ཁོང་དུ་ཆུད་པར་མི་ནུས་པ་དེ་ནི། ཀུན་ཚིག་
237a
༄#། །བཤད་པས་བསྒྲིབས་པའི་ལན་ཏེ། དེ་ལྟ་བས་ན། ཡང་དག་པར་གཤེགས་པས་སྨྲ་བའི་ཚིག་ཀུན་ཡོན་པོ་ཡིན་པར་མཁྱེན་ཏེ། སྨྲ་བའི་ཚིག་ཅུང་ཟད་ཡན་ཆད་ཀྱང་བདེན་པར་མི་རུང་ངོ ། །ཤཱ་རིའི་བུ། སངས་རྒྱས་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འདུ་ཤེས་ཀྱང་མེད། སེམས་ཀྱང་མེད་དོ། །ཅིའི་ཕྱིར་ཞེ་ན། ཡང་དག་པར་གཤེགས་པས་ཆོས་ལ་ངོ་བོ་ཉིད་ཐོབ་པའང་མེད། སེམས་ཐོབ་པའང་མེད་དོ། །ཤཱ་རིའི་བུ། ཡང་དག་པར་གཤེགས་པས་ཅིའི་ཕྱིར་བསམ་པའི་གནས་ཡོད་པར་བཤད། ཤཱ་རིའི་བུ། ཆོས་ཀྱི་ཡི་གེ་ལས་བཤད་པ། མི་ལ་ལ་ཞིག་གཞི་བསམ་པའི་གནས་ཐོབ་ན། མི་དེས་ཆོས་སོ་ཅོག་གི་ངོ་བོ་ཉིད་ཐོབ་པར་ནུས་ཏེ། རང་གི་ལུས་ཐོབ་པར་ནུས། བདག་ཏུ་ལྟ་བ་ཐོབ། གང་ཟག་ཐོབ་སྟེ། དེ་ནི་བདེན་པ་ཡོང་མེད་དོ། །ཆོས་ཀྱི་མཚན་མ་ཐ་དད། སྟོང་པ་ཐ་དད། སྟོང་པ་བསྟན་པའི་ཕྱིར་བསམ་པའི་གནས་བཤད་དོ། །གཞི་བསམ་པའི་གནས་ཀྱི་ངོ་བོ་ཉིད་ལ་ངོ་བོ་ཉིད་མེད། གནས་མེད། བསམ་པའང་མེད། བཤད་པའང་མེད། འདོད་ཆགས་ཀྱང་མེད་དེ། ། སེམས་ཀྱི་ངོ་བོ་ཉིད་ཀྱང་མེད་ན། སེམས་ཀྱི་གནས་མེད་པ་ལྟ་སྨོས་ཀྱང་ཅི་དགོས། དེ་བས་ན། ཡང་དག་པར་གཤེགས་པས་མིང་སེམས་ཀྱི་གནས་ཞེས་བཤད་དོ། །ཤཱ་རིའི་
237b
བུ། ཆོས་སོ་ཅོག་ལ་ཡང་དག་པར་ངོ་བོ་ཉིད་དེ་སྐྲ་སྤུའི་ཉག་མ་བཅུ་ཚལ་གྱི་བརྒྱ་ཆ་གཅིག་ཙམ་ཞིག་ཡོད་དུ་ཟིན་ན། དེས་སངས་རྒྱས་ཀྱི་ཚིག་རྣམས་འཇིག་རྟེན་དུ་མི་འགྱུར་ཏེ། མཐར་ཆོས་སོ་ཅོག་གི་ངོ་བོ་ཉིད་སྟོང་པར་ཡང་མ་བཤད་དོ། །ཤཱ་རིའི་བུ། སངས་རྒྱས་ཀྱི་ཆོས་སོ་ཅོག་ནི། བདེན་པར་སྟོང་པ་སྟེ། ངོ་བོ་ཉིད་མེད་ཅིང་མཚན་མ་གཅིག་པུ་སྟེ། དེ་ནི། མཚན་མ་མེད་པར་ཡང་དག་པར་གཤེགས་པ་ཀུན་གྱིས་གཟིགས་སོ། །ཡང་དག་པར་གཤེགས་པ་དེའི་ཕྱིར་བསམ་པའི་གནས་ཡོད་ཅེས་བཤད་དོ། །ཤཱ་རིའི་བུ། བསམ་པའི་གནས་ནི། མིང་གནས་མེད། གནས་མེད་པའང་མེད་ཅེས་བྱའོ། །བསམ་པ་མེད། བསམ་པའི་ལས་ཀྱང་མེད། འདུ་ཤེས་མེད། རྣམ་པར་བརྟག་པའང་མེད། ཡིད་མེད། ཡིད་ཀྱི་ལས་ཀྱང་མེད། བསམ་པ་མེད། བསམ་པའི་ལས་ཀྱང་མེད། ཆོས་མེད། ཆོས་ཀྱི་མཚན་མའང་མེད། དེ་ཀུན་འདུས་གྱེས་མེད་པས་ན། མཛངས་ཤིང་འཕྲུལ་པའི་མིང་རྣམ་པར་བརྟགས་པ་མེད་ཅེས་བྱ་སྟེ། དེའི་མིང་བསམ་པའི་གནས་ཞེས་བྱའོ། །ཡང་དག་པར་གཤེགས་པས་དེའི་ཕྱིར་བསམ་པའི་གནས་ཡོད་ཅེས་བཤད་དོ། །ཅིའང་མེད་པའི་ཕྱིར་བསམ་པའི་གནས་ཞེས་བྱའོ། །སངས་རྒྱས་བསམ་པའི་ཕྱིར་མིང་བསམ་པའི་གནས་ཞེས་བྱའོ། །ཤཱ་རིའི་བུ། ཇི་ལྟར་ན། མིང་སངས་རྒྱས་བསམ་པ་ཞེས་བྱ། ཅིའང་མེད་པར་མཐོང་བ་ནི། མིང་
238a
༄#། །སངས་རྒྱས་བསམ་པ་ཞེས་བྱའོ། །ཤཱ་རིའི་བུ། སངས་རྒྱས་ཀུན་ནི། དཔག་ཏུ་མེད། བསམ་གྱིས་མི་ཁྱབ། བརྗོད་ཀྱིས་མི་ལང་ངོ ། །གཞུང་དེ་ལྟ་བས་ན། ཅིའང་མེད་པར་མཐོང་བ་ནི། མིང་སངས་རྒྱས་བསམ་པ་ཞེས་བྱ་སྟེ། བདེན་པར་མིང་རྣམ་པར་བརྟག་པ་མེད་དོ། །སངས་རྒྱས་ཆོས་སོ་ཅོག་ལ་རྣམ་པར་བརྟགས་པ་མེད་པས་ན། སེམས་ལ་རྣམ་པར་བརྟགས་པ་མེད་ན་གདོད་སངས་རྒྱས་བསམ་པ་ཡིན་ཞེས་བྱའོ། །ཡང་གཅིག་ཏུ་ན། ཆོས་སོ་ཅོག་གི་བདེན་པའི་མཚན་མ་མཐོང་ན། མིང་སངས་རྒྱས་མཐོང་ཞེས་བྱའོ། ། གང་ལ་སོགས་པའི་མིང་ཆོས་སོ་ཅོག་གི་བདེན་པའི་མཚན་མ་ཞེས་བྱས་ན། དེ་ནི། ཆོས་སོ་ཅོག་མཐའ་ཡུན་དུ་སྟོང་ཞིང་ཅིའང་མེད་པའོ། །དེ་ལྟ་བས་ན། མཐའ་ཡུན་དུ་སྟོང་ཞིང་ཅིའང་མེད་པའི་ཆོས་ནི། སངས་རྒྱས་བསམ་པའོ། །ཡང་གཅིག་ཏུ་ན། དེ་ལྟ་བུའི་ཆོས་ཀྱི་ནང་ན་སེམས་ཅུང་ཟད་ཡན་ཆད་ཀྱང་ཐོབ་པར་མི་རུང་སྟེ། དེའི་མིང་སངས་རྒྱས་བསམ་པ་ཞེས་བྱའོ། །ཤཱ་རིའི་བུ། དེའི་མིང་སངས་རྒྱས་བསམ་པའི་ཆོས་ཏེ། སྨྲ་བའི་ཚིག་གི་ལམ་ཆད་ལ་སེམས་སོ་ཅོག་ལས་འདས་ཤིང་བྱུང་སྟེ། སེམས་ཐོབ་པར་མི་རུང་བ་དེའི་མིང་སངས་རྒྱས་བསམ་པའོ། །ཤཱ་རིའི་བུ། སེམས་སོ་ཅོག་ཐམས་ཅད་ནི། ཀུན་མཚན་མ་སྟོང་པ་ཞི་བ་སྟེ། ཆོས་དེ་བཞིན་དུ་མ་གལ་ན། དེ་ནི། མིང་སངས་རྒྱས་
238b
བསམ་པ་སྤྱོད་པ་སྦྱོང་བ་ཞེས་བྱའོ། །ཁ་དོག་སྤྱད་དེ་སངས་རྒྱས་བསམ་དུའང་མི་རུང་ངོ ། །ཅིའི་ཕྱིར་ཞེ་ན། ཁ་དོག་བསམ་གཟུགས་བླངས་བྲོ་ལ་ཆགས་ན། རྣམ་པར་ཤེས་པ་ཞེས་བྱའོ། །གཟུགས་མེད། ཁ་དོག་མེད། རྐྱེན་མེད། རང་བཞིན་མེད་ན། མིང་སངས་རྒྱས་བསམ་པའོ། །དེ་ལྟ་བས་ན། རྣམ་པར་བརྟགས་པ་མེད། བླང་བ་མེད། དོར་བ་མེད་ན། སངས་རྒྱས་བསམ་པ་ཡང་དག་པ་ཡིན་པར་མངོན་ནོ། །ལེའུ་གསུམ་སྟེ། ཆོས་བསམ་པའི་ལེའུའོ།། །།དེའི་ཚེ་ཤཱ་རིའི་བུས་སངས་རྒྱས་ལ་གསོལ་པ། བཅོམ་ལྡན་འདས། ཇི་ལྟར་ན། མི་གཞན་ལ་ཆོས་འདི་བཤད་ན། ངན་པའི་བཤེས་གཉེན་ཞེས་བགྱི། བཅོམ་ལྡན་འདས། ཇི་ལྟ་བུར་ན། མི་གཞན་ལ་ཆོས་འདི་བཤད་ན། དགེ་བའི་བཤེས་གཉེན་ཞེས་བགྱི། ཤཱ་རིའི་བུ། མི་ལ་ལ་ཞིག་གིས་དགེ་སློང་གཞན་ལ་བསྟན་པ་ཁྱོད་ཤེས་པར་གྱིས་ཤིག་།སངས་རྒྱས་བསམ་པ་ནི། སྟོང་པའོ། །རྐྱེན་གྱི་གནས་བསམ་པ་དེ་ནི། བསམ་པའི་མི་རིགས་སོ། །ཁྱོད་ཀྱིས་སྟོང་པ་བསམ་ན་བསམ་པའང་སྟོང་པ་སྟེ། རང་བཞིན་མེད་པའི་སྟོང་པ་དེས་ཁ་དོག་གི་འདུ་ཤེས་ཆོད་པར་ནུས། འདུ་ཤེས་ལེན་པ་ཆོད་པར་ནུས་སོ། ། མི་དེས་དེའི་ཚེ་འདུ་ཤེས་མེད་པའང་མ་ཐོབ་ན། སེམས་ལྟ་སྨོས་ཀྱང་ཅི་དགོས། མི་དེས་དེའི་ཚེ་ཅིའང་ཡོད་མེད་ལ་སྟོང་པར་ཞི་སྟེ། རང་བཞིན་མེད་ན། འདུ་ཤེས་རྣམས་
239a
༄#། །མི་འདུའོ། །ཆོས་སོ་ཅོག་ཞི་བར་བྱས་ན། དེའི་བསམ་པའི་སྤྱོད་པ་སྦྱོང་བ་ཞེས་བྱའོ། །སངས་རྒྱས་པའི་མིང་ནི། དགེ་མི་དགེ་དང ། ཚོར་བ་དང་བརྟག་པ་ཐམས་ཅད་ཞི་བ་ཞེས་བྱའོ། །ཚོར་བའང་མེད་བརྟག་པའང་མེད་ལ་སྟོང་ཞིང་འདུ་ཤེས་མེད་ན། མིང་སངས་རྒྱས་བསམ་པ་ཞེས་བྱའོ། །ཅིའི་ཕྱིར་ཞེ་ན། ཚོར་བ་དང ། བརྟག་པ་སྤྱད་དེ། སངས་རྒྱས་རྣམས་བསམ་པའི་མི་རིགས་སོ། །ཚོར་བའང་མེད། བརྟག་པའང་མེད་ན། མི་གཙང་དག་པས་སངས་རྒྱས་བསམ་པ་ཞེས་བྱའོ། །སེམས་དེའི་ནང་ན་ཕྲ་ཤས་བསམ་པའི་སེམས་ཀྱི་ལས་ཀྱང་མེད་ལ། ལུས་དང ། ཁའི་ལས་མེད་པ་ལྟ་སྨོས་ཀྱང་ཅི་དགོས། ཡང་སངས་རྒྱས་བསམ་པ་ཞེས་བྱ་བ་ནི། འདུ་ཤེས་ཐམས་ཅད་དང་བྲལ་ཏེ། འདུ་ཤེས་ཐམས་ཅད་སེམས་ལ་མི་འདུག་ཅིང་རྣམ་པར་བརྟག་པ་མེད། མིང་མཁན་མེད། བསྒྲིབས་ཤིང་ཐོགས་པ་མེད། འདོད་པ་མེད། ཐོབ་པ་མེད། ཚོར་བ་དང ། བརྟག་པ་མི་གཡོ། ཅིའི་ཕྱིར་ཞེ་ན། ཤཱ་རིའི་བུ། བསམ་པ་བཞིན་དུ་འདུ་ཤེས་གཡོས་པ་ཐམས་ཅད་ནི། ཀུན་ཡོན་པོ་མཐོང་བ་ཡིན་ནོ། །ཤཱ་རིའི་བུ། ཅིའང་མེད་པ་དེ་བཞིན་དུ་ཚོར་བའང་མེད། བརྟག་པའང་མེད། སྐྱེ་བའང་མེད། འགོག་པའང་མེད་པ་དེ་ལྟ་བུ་ཁོང་དུ་ཆུད་པ་ནི། མིང་སངས་རྒྱས་བསམ་པ་ཞེས་བྱ་སྟེ། དེ་ལྟ་བུའི་སེམས་
239b
ཀྱི་ནང་ན་འདོད་པའང་མེད། ཆགས་པའང་མེད། ལོག་པའང་མེད། མ་ལོག་པའང་མེད། མིང་མེད། མཚན་མའང་མེད་དོ། །ཤཱ་རིའི་བུ། འདུ་ཤེས་ཀྱང་མེད། སྨྲ་བའང་མེད་ན། གདོད་མིང་སངས་རྒྱས་བསམ་པའོ། །དེའི་ནང་ན་སེམས་ཕྲ་ཤས་ཆུང་ངུའང་མེད་ན། སྦོམ་པོ་དང ། ཁ་དང ། ལུས་དང ། ཡིད་ཀྱི་ལས་ལྟ་སྨོས་ཀྱང་ཅི་དགོས་ཏེ། ལུས་དང ། ཁ་དང ། ཡིད་ཀྱི་གནས་ཀྱང་མེད་པའོ། །བླངས་པའང་མེད། བསྡུས་པའང་མེད། འཐབ་པའང་མེད། རྩོད་པའང་མེད། བསམ་པའང་མེད། རྣམ་པར་བརྟག་པའང་མེད། སྟོང་པ་མི་གཡོ་ཞིང་རང་བཞིན་མེད་ལ། ཚོར་བ་དང ། བརྟག་པ་ཀུན་ཞི་བ་དེའི་མིང་སངས་རྒྱས་བསམ་པའོ། །ཤཱ་རིའི་བུ། མི་ལ་ལ་ཞིག་གིས་དེ་ལྟ་བུའི་སེམས་འབྱོར་གྲུབ་ན། གླིང་བཞིའི་ས་བསྒྱུར་བར་བྱ་ནའང་ཡིད་བཞིན་དུ་བསྒྱུར་ནུས་སོ། །བརྒྱ་སྟོང་འབུམ་གྱི་བདུད་ཀྱང་ཕེབས་པར་ནུས། ནམ་རིག་པས་བསྒྲིབས་པ་ལྟ་སྨོས་ཀྱང་ཅི་དགོས་ཏེ། མི་བདེན་པས་བསླུས་པའི་རྐྱེན་ལས་ལངས་པ་སྟེ། མི་འགྱུར་བའི་མཚན་མ་མེད་པ་ཆོས་དེ་ལྟ་ཡིན་ཏེ། འདུ་ཤེས་མེད། འདྲན་ཏོར་མེད། སྐྱེ་བ་མེད། འགོག་པ་མེད་དེ། བཤད་དུའང་མི་རུང ། རྣམ་པར་བརྟག་ཏུའང་མེད། མུན་པའང་མེད། སྣང་བའང་མེད། བདུད་དང ། བདུད་ཕལ་ཀུན་གྱིས་ཀྱང་ཚོད་གཟུང་མི་ནུས་ན། འཇིག་རྟེན་གྱི་ཐ་མལ་བས་ཚིག་གིས་བཤད་པ་འབའ་ཞིག་གིས་སྤྱད་དེ་བསྟན་བསླབ་པ་ཡོད་པས་ཚིག་དེ་
240a
༄#། །སྐད་དུ་བྱས་སུ་ཟད་དོ། །ཁྱོད་སངས་རྒྱས་བསམ་པའི་ཚེ་འདུ་ཤེས་ཅུང་ཟད་མ་བླངས་ཤིག་།འདྲན་ཏོར་མ་སྐྱེ་ཞིག་།རྣམ་པར་བརྟག་པ་མ་བྱེད་ཅིག་།ཅིའི་ཕྱིར་ཞེ་ན།་ཆོས་དེ་ཀུན་སྟོང་པ་སྟེ། ཉིད་ཀྱི་མཚན་མའང་མེད། གཅིག་གི་མཚན་མ་བསམ་པའང་མི་རུང་སྟེ། མཚན་མ་མེད་པའོ། །དེའི་མིང་ཡང་དག་པར་དབེན་པར་སངས་རྒྱས་བསམ་པ་སྟེ། དེ་ནི། སྐྱེ་བའང་མེད། འགོག་པའང་མེད། མཚན་མ་མེད་པའོ། །ཅིའི་ཕྱིར་ཞེ་ན། ཡང་དག་པར་གཤེགས་པའི་མིང་ཁ་དོག་ཅེས་མི་བྱའོ། །མིང་གཟུགས་ཞེས་མི་བྱའོ། ། མིང་སེམས་ཞེས་མི་བྱའོ། །མིང་རྣམ་པར་རྟོག་པ་ཞེས་མི་བྱའོ། །ལོག་པའང་མ་ཡིན། མ་ལོག་པའང་མ་ཡིན། མ་བླངས། མ་བོར། ཐུབ་པའང་མ་ཡིན། ཤེས་རབ་ཀྱང་མ་ཡིན། རིག་པའང་མ་ཡིན། མ་རིག་པའང་མ་ཡིན། ཡང་དག་པར་གཤེགས་པ་བཤད་དུ་མི་རུང ། བསམ་གྱིས་ཀྱང་མི་ཁྱབ་སྟེ། འདུ་ཤེས་མེད་དོ། །ཁྱོད་ད་མཚན་མ་ལེགས་པ་ལ་མ་སྲེད་ཅིག་།འདྲན་ཏོར་བརྗོད་པ་ལ་མ་སྲེད་ཅིག་།སངས་རྒྱས་ནི། ཆོས་སོ་ཅོག་ལ་ཆགས་པ་མེད། ཆོས་ཡོད་ཅིང་ཆགས་སུ་རུང་བ་དང ། དཔག་ཏུ་རུང་བའང་མ་མཐོང་ངོ ། །དེ་ལྟ་བུའི་མིས་སངས་རྒྱས་ལའང་ཐོབ་པར་རུང་ན། སེམས་ལྟ་སྨོས་ཀྱང་ཅི་དགོས། ཤཱ་རིའི་བུ། སྟོན་པ་མིང་དགེ་བའི་བཤེས་གཉེན་ཞེས་བྱའོ། །མཆོག་གི་གཞུང་གི་ནང་ན་
240b
ནི། འདི་ནི། དགེ་བའི་བཤེས་གཉེན་ཡིན། །འདི་ནི། ངན་པའི་བཤེས་གཉེན་ཡིན་ཞེས་གཅིག་ཏུ་ཆད་པ་མེད་དོ། །ཡང་ཤཱ་རིའི་བུ། དགེ་སློང་ལ་ལ་ཞིག་དགེ་སློང་གཞན་ལ་སྟོན་པ་དགེ་སློང ། ཁྱོད་ཀྱིས་རྣམ་པར་ཕྱེ་ལ་ཆོས་རྣམས་ལ་ཞིབ་ཏུ་རྟོགས་ཏེ། ཆོས་ཀྱི་མཚན་མའང་མ་སེམས་ཤིག་ཅེས་བསྟན་ཏོ། །དགེ་སློང་དེས་དེ་ལྟ་བུར་སྤྱད་སྦྱངས་པས་སེམས་ལ་ཐོགས་ཤིང་ཆགས་པ་མེད་པས་ཆོས་སོ་ཅོག་གི་མཚན་མའང་གཅིག་པར་ཁོང་དུ་ཆུད་དེ། དེ་ནི། མཚན་མ་མེད་པའོ། །མི་དེ་ལ་ཆོས་ཀྱི་འདུ་ཤེས་ཀྱང་མི་སྐྱེ་ན། བདག་ཏུ་ལྟ་བ་དང ། གང་ཟག་ཏུ་ལྟ་བའི་འདུ་ཤེས་མི་སྐྱེ་བ་ལྟ་སྨོས་ཀྱང་ཅི་དགོས། ཤཱ་རིའི་བུ། ཁྱོད་ཀྱི་ཡིད་ལ་ཇི་སྙམ། ཆོས་ཀྱི་འདུ་ཤེས་སེམས་དེ་ཆོས་སོ་ཅོག་གི་ཞི་བར་ནུས་སམ། བཅོམ་ལྡན་འདས། མི་ནུས་སོ། །ཤཱ་རིའི་བུ། དཔེར་ན། སྡོང་པོ་རྩ་བ་མེད་པས་ཡལ་ག་དང ། འདབ་མ་དང ། མེ་ཏོག་དང ། འབྲས་བུ་སྨིན་པར་ནུས་པ་ཡོད་དམ་མེད། བཅོམ་ལྡན་འདས། མ་མཆིས་སོ། ། འདི་ལྟ་སྟེ། ཤཱ་རིའི་བུ། མི་ལ་ལ་ཞིག་གིས་ཆོས་སོ་ཅོག་གི་རྩ་བའི་ཕྱི་མོ་མ་ཐོབ་པར་མི་དེས་ཆོས་སོ་ཅོག་གི་འདུ་ཤེས་སྐྱེ་བར་ནུས་སམ་མི་ནུས། བཅོམ་ལྡན་འདས། མི་ནུས་ལགས་སོ། །ཤཱ་རིའི་བུ། མི་ལ་ལ་ཞིག་གིས་ཆོས་ཀྱི་འདུ་ཤེས་མི་བསམ་པ་ཐོབ་ན། མི་དེས་ཆོས་སོ་ཅོག་ཞི་བར་ནུས་སམ། བཅོམ་ལྡན་འདས། མི་ནུས་ལགས་སོ། །མི་དེས་ཆོས་
241a
༄#། །སོ་ཅོག་མ་ཐོབ། ཆོས་ཀྱི་མཚན་མ་མ་ཐོབ། ཞི་བ་མ་ཐོབ། རྣམ་པར་ཡང་མི་རྟོག་སྟེ། སྐྱེ་བའང་མེད། འགོག་པའང་མེད་ན། མི་དེས་དེའི་ཚེ་མི་སྐྱེ་མི་འགོག་པས་མིང་མྱ་ངན་ལས་འདས་པ་ཐོབ་པ་ཞེས་མི་བྱའོ། །མིང་སྔོན་མྱ་ངན་ལས་འདས་པ་ཐོབ་པ་ཞེས་ཀྱང་མི་བྱའོ། །ཤཱ་རིའི་བུ། དེ་ལྟ་བུར་སྟོན་པ་ནི། མིང་དགེ་བའི་བཤེས་གཉེན་ཞེས་བྱའོ། །མཆོག་གི་གཞུང་གི་ནང་ན་ནི། དགེ་བའི་བཤེས་གཉེན་ཡང་མེད། ངན་པའི་བཤེས་གཉེན་ཡང་མེད་དོ། །ཤཱ་རིའི་བུ། མི་ལ་ལ་ཞིག་གིས་དེ་ལྟ་བུའི་མཚན་མ་འབྱོར་གྲུབ་ན། འཇིག་རྟེན་ཡོད་དཀོན་ཏེ། ཕྱིན་ཅི་མ་ལོག་པ་ཐོབ་པས་ཡང་དག་པའི་བདེན་པ་མཐོང་སྟེ། དེ་ནི། དྲང་པོ་མཐོང་བ་ཞེས་བྱའོ། །ཡང་ཤཱ་རིའི་བུ། དྲང་པོ་མཐོང་བ་ནི། མིང་དྲང་པོ་བྱེད། དྲང་པོ་སྤྱོད། དྲང་པོའི་ལམ་དྲང་པོ་ཤེས་ཞེས་བྱ་སྟེ། ཕྱིན་ཅི་ལོག་མེད་ལ་བདེན་པ་བཞིན་དུ་མཐོང་བས་ན། ཡང་དག་པར་གཤེགས་པས་དྲང་པོ་མཐོང་བ་ཞེས་བཤད་དོ། །ཤཱ་རིའི་བུ། སེམས་ཅན་ལ་ལ་ཞིག་ཕྱིན་ཅི་ལོག་མེད་པ་བདེན་པ་བཞིན་དུ་རྟོགས་པ་ནི། དྲང་པོ་མཐོང་བ་ཡོད་དོ། །ལ་ལ་ཞིག་བདག་ཏུ་ལྟ་བའི་འདུ་ཤེས་དང ། གང་ཟག་གི་འདུ་ཤེས་དང ། སེམས་ཅན་གྱི་འདུ་ཤེས་སྐྱེས་ན། དེ་ལྟ་བུའི་མི་ཀུན་ཡོན་པོའི་ལམ་དུ་སྤྱོད་པར་མངོན་ནོ། །ཤཱ་རིའི་བུ། སངས་རྒྱས་དང ། སློབ་
241b
མས་ནི། བདག་ཏུ་ལྟ་བ་ཡོད་པར་མ་བཤད། གང་ཟག་ཡོད་པར་མ་བཤད། སེམས་ཅན་མ་བཤད། ཚེ་སྲོག་ཡོད་པར་མ་བཤད། རྟག་ཆད་མ་བཤད། དེ་ལྟ་བས་ན། སངས་རྒྱས་དང ། སློབ་མ་ནི། དྲང་པོ་མཐོང་བ་ཞེས་བྱའོ། །ཅིའི་ཕྱིར་ཞེ་ན། དྲང་པོར་བརྟགས་ཏེ། ཕྱིན་ཅི་མ་ལོག་པའི་ཕྱིར་རོ། །ཤཱ་རིའི་བུ། ཐ་མལ་བ་ཐམས་ཅད་ཀྱིས་ནི། འདིའི་ནང་དུ་འཇུག་ནུས་པ་མེད་དོ། །ཅིའི་ཕྱིར་ཞེ་ན། ཐ་མལ་པ་ཐམས་ཅད་ལ་དྲང་པོ་མཐོང་བ་ཡོད་མེད་དོ། །ཡིད་བཞིན་འབྲང་བའི་དྲང་པོ་མཐོང་བ་འབའ་ཞིག་ཡོད་དོ། །མཉེན་དེས་པའི་བཟོད་པ་ཐོབ་ན། བདེན་པ་བཞིན་དུ་མ་ནུས་སོ། །ཤཱ་རིའི་བུ། དེའི་མིང་དྲང་པོ་མཐོང་བ་དང ། ཡོན་པོ་མཐོང་བ་ཐ་དད་ཅེས་བྱ་སྟེ། བདེན་པ་བཞིན་དུ་མཐོང་བས་ན། མིང་དྲང་པོ་མཐོང་བ་ཞེས་བྱའོ། །འཇིག་རྟེན་གྱི་སྐྱེད་པ་ནོར་ཁེ་སྐྱེ་ཞིང་འཕེལ་བའི་ཞར་ལས་མཐོང་བ་ནི། འཇིག་རྟེན་གྱི་དྲང་པོ་མཐོང་བ་ཡིན་ཏེ། དེ་ཀུན་བརྙས་བསླུས་པ་ཡིན་གྱི། སྐྱེ་ཤི་ལས་མི་ཐར་རོ། །ཤཱ་རིའི་བུ། སངས་རྒྱས་ཀྱིས་བཤད་པ་ལ་འཇིག་རྟེན་གྱི་དྲང་པོ་མཐོང་བ་ནི། ལེ་ལོ་བླ་དྲོད་དང་ཐ་མ་ཞན་པའི་ཆོས་ཡིན་ཞེས་བཤད་དོ། །མཛངས་ཤིང་འཕྲུལ་པ་ནི། དེ་ལྟ་བུའི་སེམས་མི་བྱེད་དེ། དེ་དྲང་པོ་མཐོང་བ་ཡིན་ནོ། །དེ་ནི། ཡོན་པོ་མཐོང་བ་ཡིན་ནོ། །ཅི་ལྟ་ཞེ་ན། མཐོང་ངོ་ཅོག་ཐམས་ཅད་ནི། ཀུན་སྒྱུ་མ་མི་བདེན་པའི་རྐྱེན་ལས་ལང་
242a
༄#། །སོ། །ཤཱ་རིའི་བུ། འདི་སྙམ་དུ་བསམ་སྟེ། འདི་ནི། དྲང་པོ་མཐོང་བ་སྙམ་དུ་བྱེད་ན། མི་དེ་ནི། ཡོན་པོ་མཐོང་བ་ཡིན་ནོ། །ཤཱ་རིའི་བུ། འཕྲུལ་གྱི་ཆོས་ཀྱི་ནང་ན་མཐོང་ངོ་ཅོག་གི་རྩ་བའི་ཕྱི་མོ་ཕྱུང་སྟེ་བཅད། སྨྲ་བའི་ཚིག་གོ་ཅོག་གི་ལམ་བཅད་དེ། དཔེར་ན། ནམ་མཁའི་ནང་གི་ལག་པ་དང ། མཚུངས་ཏེ། ཅིའང་རེག་ཅིང་ཐོགས་པ་མེད་དོ། །དགེ་སྦྱོང་རྣམས་ཀྱི་ཆོས་ནི། ཀུན་དེ་བཞིན་པའི་རིགས་སོ། །ལེའུ་བཞི་སྟེ། དགེ་འདུན་བསམ་པའི་ལེའུའོ།། །།ཤཱ་རིའི་བུས་སངས་རྒྱས་ལ་གསོལ་པ། བཅོམ་ལྡན་འདས། གང་ལ་སོགས་པ་འཕྲུལ་གྱི་དགེ་འདུན་ཞེས་བགྱི། ཤཱ་རིའི་བུ། མི་ལ་ལ་ཞིག་གིས་ཆོས་སོ་ཅོག་ཐམས་ཅད་ཀུན་སྐྱེ་བའང་མེད། འགོག་པའང་མེད་ལྡང་བའང་མེད། མཚན་མའང་མེད་པར་ཡིད་ཆས་ཤིང་ཤེས་ལ་ཁོང་དུ་ཆུད་པར་ནུས་པ་དེ་ལྟ་བུའི་བཟོད་པ་འབྱོར་གྲུབ་པས་ངའང་མི་ཐོབ་ན། རྒྱུན་དུ་ཞུགས་པ་དང ། ལན་གཅིག་ཕྱིར་འོང་བ་དང ། ཕྱིར་མི་འོང་བ་ཐོབ་པ་ལྟ་སྨོས་ཀྱང་ཅི་དགོས། དགྲ་བཅོམ་པ་ལྟ་སྨོས་ཀྱང་ཅི་དགོས། ཆོས་མི་ཐོབ་པ་ལྟ་སྨོས་ཀྱང་ཅི་དགོས། ཕྱི་མོ་མི་ཐོབ་པ་ལྟ་སྨོས་ཀྱང་ཅི་དགོས། ལམ་མི་ཐོབ་པ་ལྟ་སྨོས་ཀྱང་ཅི་དགོས། དེ་ལྟ་བུ་ལ་སོགས་པའི་དོན་མི་ཐོབ་པ་ལྟ་སྨོས་ཀྱང་ཅི་དགོས་ཏེ། དེའི་མིང་འཕྲུལ་གྱི་དགེ་འདུན་ཏེ།
242b
དེས་ཀྱང་མི་འཐོབ་བོ། །ཡང་ཤཱ་རིའི་བུ་སེམས་ཅན་ལ་སྐྱེ་བ་མེད་པ་དང ། འགོག་པ་མེད་པ་དང ། མཚན་མ་མེད་པའི་ཆོས་ཡིད་ཆེས་ཤིང་ཤེས་པ་ཉུང་ངོ ། །ལ་ལ་ཞིག་གིས་སྐྱེ་བའང་མེད། འགོག་པའང་མེད། མཚན་མའང་མེད་པའི་ཆོས་ཡིད་ཆེས་པར་ཤེས་པར་ནུས་ན། སེམས་ལ་ཕྱིན་ཅི་ལོག་མེད་དེ། གཅིག་གིས་གཅིག་ཤེས་རིག་ལ་ཆོས་སྤྱད་དེ། འབྱོར་འདུན་པས་ཕྱིས་ཡོད་པ་མི་མྱོང་ངོ ། །འཇིག་རྟེན་ཐམས་ཅད་སྒྱུ་མ་མི་བདེན་པའི་རྐྱེན་འབའ་ཞིག་ལས་བྱུང་བར་རིག་པས། མི་དེ་ཕྱིན་ཆད་ད་ལྟར་གྱི་ལུས་ལ་མི་འདུག་གོ་།རྒྱུ་རྐྱེན་དེ་ལྟ་བས་ན། མིང་འཕྲུལ་གྱི་དགེ་འདུན་ཞེས་བྱར་རུང་ངོ ། །མི་དེས་སྨྲ་བའི་ཚིག་དེ་ལ་ཐོབ་པའང་མེད། མིང་མཚན་མ་རྣམས་ལས་འདུས་པ་དྲན་གྱི། མཚན་མ་དང་འདྲན་ཏོར་གྱི་དོན་ཀྱང་མེད་དོ། །དེའི་མིང་དགེ་འདུན་དཀོན་མཆོག་ཅེས་བྱ་སྟེ། ཡོན་ལེན་པའི་རིགས་ཏེ། ཕྱིན་ཅི་ལོག་མེད་པའི་ཡང་དག་པའི་བདེན་པ་གཞུང་ཐོབ་བོ། །མི་དེས་དེ་ལྟ་བུའི་ཐབས་སྤྱད་པས་དགེ་འདུན་བསམ་ན། དོན་དེའང་སྟོང་པའོ། །ཤཱ་རིའི་བུ། དེ་ལྟ་བུར་སྟོན་པ་ནི། མིང་དགེ་བའི་བཤེས་གཉེན་ནོ། །ཤཱ་རིའི་བུ། སྨྲ་བའི་ཚིག་ཐམས་ཅད་ཀྱི་ལམ་ཆོད་ན། མིང་འཕྲུལ་གྱི་དགེ་འདུན་ཞེས་བྱའོ། །ཅིའི་ཕྱིར་ཞེ་ན། འཕྲུལ་གྱི་ཆོས་ཀྱི་ནང་ན་སྨྲ་བའི་ཚིག་རྒྱུས་ཡང་དག་པའི་བདེན་པའི་གཞུང་བཤད་ན། དེ་ལྟ་
243a
༄#། །བུའི་སྨྲ་བའི་ཚིག་ཀྱང་ཐོབ་པར་མི་རུང་ངོ ། །དེ་ལྟ་བས་ན། སྨྲ་བའི་ཚིག་རྣམས་ཆོད་པ་ནི། འཕྲུལ་གྱི་དགེ་འདུན་ཞེས་བྱ་བར་མངོན་ནོ། །ཤཱ་རིའི་བུ། མི་ལ་ལ་ཞིག་ན་རེ། ཆོས་འདིའི་ནང་ན་ཚིག་གིས་བཤད་པ་མེད། ངེས་པ་མེད་ན། ཇི་ལྟར་མིང་དགེ་འདུན་ཞེས་བྱ་ཞེས་ཟེར་བ་ཞིག་ཡོད་ན། ཤཱ་རིའི་བུ། ངའི་འདིའི་ནང་ན་ལན་འདི་སྐད་ཅེས་གླན་པ་ཡོད་དེ། དགེ་འདུན་གྱི་མིང་བདེན་པ་བཞིན་དུ་དོན་སྟོན་པ་ཞེས་བྱས་ན། དོན་དེ་ངེས་པར་ཐོབ་པའང་མི་རུང་ངོ ། །སློབ་པའི་གྲཝ་ལྷན་ཅིག་ལ་བཟོད་པའང་གཅིག་།རོའང་གཅིག་པ་དེའི་དོན་ཀྱང་འཇིག་རྟེན་གྱི་ཐ་མལ་པའི་ཚིག་བཤད་པས་སྤྱད་ཀྱི། མཆོག་གི་གཞུང་མ་ཡིན་ནོ། །མཆོག་གི་གཞུང་གི་ནང་ན་ངེས་པར་བདེན་པ་མེད་དེ། མིང་དགེ་འདུན་ང་ཆོས་རྟག་སྟེ། མི་འཇིགས་ཞེས་བྱའོ། །འཕྲུལ་གྱི་མིས་ཆོས་འདི་ཡོད་ཅེས་བཤད་དུ་ཟིན་ན། དེ་ནི། གོས་པའོ། །ཅིའི་ཕྱིར་ཞེས་བྱས་ན། མི་དེས་དེ་ལྟ་བུའི་རྣམ་པར་བརྟག་པར་བྱ་སྟེ། སྐྱེས་པ་ཡིན། བུད་མེད་ཡིན། ལྷ་ཡིན། ཀླུ་ཡིན། གནོད་སྦྱིན་ཡིན། དྲི་ཟ་ཡིན། གྲུལ་བུམ་ཡིན། ཆོས་ཡིན། ཆོས་མ་ཡིན་ཞེས་དེ་ལྟ་བུར་རྣམ་པར་བརྟག་པ་བྱས་ནས་དོན་རྣམ་པ་མང་པོ་ཐོབ་སྟེ། དོན་རྣམ་པ་མང་པོ་ཐོབ་པས་ནི། ཚིག་འདི་སྐད་བྱས་སོ། །འདུག་པ་ཡིན། ཉལ་
243b
བ་ཡིན། སོང་བ་ཡིན། སྡོད་པ་ཡིན་ཞེས་ཟེར་རོ། །འཕྲུལ་གྱི་མིས་ནི། ཆོས་སོ་ཅོག་གི་བདེན་པའི་མཚན་མ་ཐོབ་པས་ན། རྣམ་པར་མི་རྟོག་སྟེ། སྐྱེས་པ་ཡིན། བུད་མེད་ཡིན། ལྷ་ཡིན། ཀླུ་ཡིན་པ་དང ། ཆོས་ཡིན་པ་དང ། ཆོས་མ་ཡིན་པ་ལ་ཐུག་གི་བར་དུ་རྣམ་པར་ཡང་མི་རྟོག་གོ་།རྣམ་པར་མི་རྟོག་པས་ན། ཆོས་སོ་ཅོག་མ་ཐོབ་བོ། ཆོས་སོ་ཅོག་མ་ཐོབ་པས་འདི་སྐད་དུ་འདུག་པ་ཡིན། ཉལ་པ་ཡིན། འགྲོ་བ་ཡིན། སྡོད་པ་ཡིན་ཞེས་བཤད་པར་བྱ་ནུས་སམ་མི་ནུས། བཅོམ་ལྡན་འདས། མི་ནུས་ལགས་སོ། །ཤཱ་རིའི་བུ། མི་ལ་ལ་ཞིག་ན་རེ། སྐྱེས་པ་ཡིན། བུད་མེད་ཡིན། ལྷ་ཡིན། ཀླུ་ཡིན་པ་དང ། ཆོས་ཡིན་པ་དང ། ཆོས་མ་ཡིན་པ་ལ་ཐུག་པ་ཡིན་ཞེས་ཟེར་ན། མི་དེས་བཤད་དོ་ཅོག་སྒྱུ་མ་བདེན་པ་ཡིན་ནམ། བཅོམ་ལྡན་འདས། སྒྱུ་མ་མི་བདེན་པ་ལགས་སོ། །ཤཱ་རིའི་བུ། སྒྱུ་མ་མི་བདེན་པ་དེའི་ནང་དུ་མ་གཏོགས་པ་ནི། མིང་འཕྲུལ་གྱི་དགེ་འདུན་ཞེས་བྱའོ། །ཕྱིན་ཅི་མ་ལོག་པས་ནི། མིང་འཕྲུལ་གྱི་དགེ་འདུན་ཞེས་བྱའོ། །ཤཱ་རིའི་བུ། མི་དགེ་བ་ཡོད་དོ་ཅོག་དང ། ཤེས་པར་རུང་བ་ཡོད་དོ་ཅོག་དང ། དེ་ལྟ་བུའི་མི་དགེ་བའི་ཆོས་ཐམས་ཅད་ནི། མིང་མཚན་མ་སྤྱད་པས་ཕྱི་མོ་བྱས་སོ། །མཛངས་ཤིང་འཕྲུལ་པའི་ཆོས་འདིའི་ནང་ན་མིང་དང་མཚན་མ་རྣམས་ཆད་དོ། །མིང་དང་མཚན་མའང་མི་སེམས་ཏེ། མིང་དང་མཚན་མ་ཐོབ་ན། ཇི་
244a
༄#། །ལྟ་བུར་འཕྲུལ་གྱི་དགེ་འདུན་ཡིན་ཞེས་ཟེར་ན། མིང་དང་མཚན་མ་ཀུན་ཆོད་ན། མིང་འཕྲུལ་གྱི་དགེ་འདུན་ཞེས་བྱའོ། །ཆོས་ཀྱི་གནས་ཡོད་ཟིན་ན། གཞིག་ཏུའང་རུང ། གཅད་དུའང་རུང་ངོ ། །འཕྲུལ་གྱི་ཆོས་ཀྱི་ནང་ན་མིང་མེད། མཚན་མ་མེད། སྨྲ་བའི་ཚིག་མེད་དེ། སྨྲ་བའི་ཚིག་ཀུན་ཆད་དེ། འདུས་ཤིང་གྱེས་པ་མེད་དོ། །ལ་ལ་ཞིག་ན་རེ། དགེ་འདུན་མེད་ཅེས་ཟེར་ན། འཕྲུལ་གྱི་དགེ་འདུན་གཤིག་པ་སྟེ། དེའང་མི་རུང་ངོ ། །དེ་ནི། མིང་དང་མཚན་མ་སྒྱུ་མ་མི་བདེན་པའི་འདུ་ཤེས་ཀྱི་ལན་ཏེ། ཡོན་པོ་མཐོང་བ་རྣམས་མང་པོ་ལ་ཆགས་སོ། །ཡོན་པོ་མཐོང་བ་དེའི་ལན་གྱིས་ཡང་ཕྱི་མའི་ལུས་མནོས་ཏེ། མཐོང་བ་རྣམས་ལ་འདོད་ཆགས་པས་ལྔ་ཕུང་སྐྱེས་སོ། །ཤཱ་རིའི་རུ། ལྔ་ཕུང་གི་ཀུན་སྒྱུ་མ་མི་བདེན་པ་ལ་ཆགས་པ་ཡིན་ཏེ། དེའི་མིང་ངན་པའི་ལམ་མོ། །དེའི་མིང་ཡོན་པོའི་ལམ་མོ། །མཛངས་འཕྲུལ་པའི་དགེ་འདུན་ལ་ནི། དེ་ལྟ་བུའི་དོན་མེད་དོ། །སྒྱུ་མ་མི་བདེན་པའི་རྐྱེན་འབའ་ཞིག་ལས་ཁམས་གསུམ་བྱུང་བར་ཤེས་སོ། །དེ་ལྟ་བུའི་དོན་ཤེས་པས་ན། མིང་འཕྲུལ་གྱི་དགེ་འདུན་ཞེས་བྱའོ། །ཤཱ་རིའི་བུ། ཡོད་མཐོང་བ་ཡོད་དོ། །ཚེག་ནི། འཕྲུལ་གྱི་དགེ་འདུན་གྱི་ནང་ན་ཀུན་ཐོབ་པར་མི་རུང་ངོ ། །བདག་ཏུ་ལྟ་བ་དང ། སེམས་ཅན་དུ་ལྟ་བ་དང ། སྲོག་ཏུ་ལྟ་བ་དང ། གང་ཟག་ཏུ་ལྟ་
244b
པ་དང ། སྐྱེས་པར་མཐོང་བ་དང ། བུད་མེད་དུ་མཐོང་བ་དང ། ལྷར་མཐོང་བ་དང ། སེམས་ཅན་དམྱལ་བར་མཐོང་བ་དང ། བྱོལ་སོང་དུ་མཐོང་བ་དང ། ཡི་དྭགས་སུ་མཐོང་བ་དང ། ཕུང་པོ་དང ། འདུ་ཤེས་དང ། ཁམས་སུ་མཐོང་བ་དང ། དུང་གི་སྒྲར་མཐོང ། རྔའི་སྒྲར་མཐོང ། སའི་སྒྲར་མཐོང ། ཆུ་དང ། མེ་དང ། རླུང་གི་སྒྲར་མཐོང ། ཚུལ་ཁྲིམས་འཛིན་པའི་སྒྲར་མཐོང་ཚུལ་ཁྲིམས་ཞིག་པའི་སྒྲར་མཐོང ། དྲང་པོའི་ལམ་གྱི་སྒྲར་མཐོང ། ཡོན་པོའི་ལམ་གྱི་སྒྲར་མཐོང ། དྲི་མའི་སྒྲར་མཐོང ། གཙང་མའི་སྒྲར་མཐོང ། བསམ་གཏན་ཐུབ་པ་དང ། ཏིང་ངེ་འཛིན་དང ། འཕྲུལ་བརྒྱད་ཀྱི་ལམ་གྱི་སྒྲ་དང ། རྒྱུན་དུ་ཞུགས་པའི་འབྲས་བུ་དང ། ལན་གཅིག་ཕྱིར་འོང་བའི་འབྲས་བུ་དང ། ཕྱིར་མི་འོང་བའི་འབྲས་བུ་དང ། དགྲ་བཅོམ་པའི་འབྲས་བུའི་སྒྲར་མཐོང་བ་དང ། གྲོལ་ཐར་གྱི་སྒྲར་མཐོང་བ་དང ། འབྲས་བུ་ཐོབ་པའི་སྒྲར་མཐོང་བ་དང ། སངས་རྒྱས་ཀྱི་སྒྲར་མཐོང་བ་དང ། ཆོས་ཀྱི་སྒྲར་མཐོང་བ་དང ། དགེ་འདུན་གྱི་སྒྲར་མཐོང་བ་དང ། འགོག་པའི་སྒྲར་མཐོང་བ་དང ། མྱ་ངན་ལས་འདས་པའི་སྒྲར་མཐོང་བའོ། །ཤཱ་རིའི་བུ། དེའི་མིང་མི་བདེན་པའི་སྒྲ་སྐད་ལ་སོགས་པ་མཐོང་ཞེས་བྱའོ། །མཛངས་འཕྲུལ་པའི་དགེ་འདུན་གྱིས་ནི། མཆོག་གི་གཞུང་ལ་དེ་ལྟ་བུའི་མཐོང་བ་མ་ཐོབ་པ་སྟེ། སྒྲ་སྐད་ཀྱི་རྣམ་པ་ཐམས་ཅད་མཚན་ཉིད་གཅིག་པར་ཁོང་དུ་ཆུད་དེ།
245a
༄#། །དེ་ནི། མཚན་ཉིད་གལ་བ་མེད། རྩོད་པ་མེད་པའོ། །ཕྱིན་ཅི་མ་ལོག་པའི་ཆོས་ཀྱི་བཟོད་པ་འབྱོར་གྲུབ་པས་ན། མིང་འཕྲུལ་གྱི་དགེ་འདུན་ཞེས་བྱའོ། །ཤཱ་རིའི་བུ། ཕྱིན་ཅི་མ་ལོག་པའི་ཆོས་ཀྱི་བཟོད་པ་དེ་ནི། མཚན་མ་མེད་པ་ཡིན་ནོ། །མཚན་མ་མེད་པས་ན། བླང་བའང་མེད། དོར་བའང་མེད། ལོག་པའང་མེད། མ་ལོག་པའང་མེད། སྐྱེ་བའང་མེད། འགོག་པའང་མེད། དེའི་ནང་རང་བཞིན་པ་ལ་ཕྱོགས་པས་སྤྱད་པའང་མེད། ཞིག་པའང་མེད། ལྡང་བའང་མེད། ཐོབ་པའང་མེད། ཕན་ཚུན་ཞེས་རྣམ་པར་ཡང་མི་རྟོག་པས་ན། སེམས་རྟག་པར་གཏང་ཕྲལ་ལོ། །ཅིའི་ཕྱིར་ཞེ་ན། དེ་ལྟ་བུའི་བཟོད་པའི་ནང་ན་ཕ་ལོགས་ཀྱི་འགྲམ་ཡང་མེད། ཚུ་ལོགས་ཀྱི་འགྲམ་ཡང་མེད། རྣམ་པར་རྟོག་པའང་མེད། རྣམ་པར་རྟོག་པ་མེད་པའང་མེད་དོ། །མཚན་མ་མེད་པ་ཁོང་དུ་ཆུད་དེ་འབྱོར་གྲུབ་པས། མིང་འཕྲུལ་གྱི་དགེ་འདུན་ཞེས་བྱའོ། །འདུས་ཚོགས་པ་བཤིག་པས་ན། མིང་འཕྲུལ་གྱི་དགེ་འདུན་ཞེས་བྱའོ། །ཤཱ་རིའི་བུ། ངའི་ཆོས་ཀྱི་ཡི་གེ་གཞན་ལ་བཤད་པ་མི་ལ་ལས་ཆོས་མཐོང་དུ་ཟིན་ན། དེ་ནི། བདག་ཏུ་ལྟ་བ་ཡིན་ནོ། ། ཡང་དག་པར་གཤེགས་པ་ཆོས་མ་ཡིན། ཆོས་མ་ཡིན་པའང་མ་ཡིན། ཅིའི་ཕྱིར་ཞེ་ན། ལྷས་བྱིན་བླན་པོ་དང ། མུར་འདུག་ཀུན་གྱིས་ཁ་དོག་གི་ལུས་སྤྱད་དེ། སངས་རྒྱས་
245b
མཐོང་ཞེས་ཟེར་རོ། །ཤཱ་རིའི་བུ། ཡང་དག་པར་གཤེགས་པ་ནི། ཁ་དོག་གི་ལུས་སྤྱད་པས་མཐོང་བ་མི་རིགས་སོ། །སྒྲ་སྐད་སྤྱད་པས་ཀྱང་མཐོང་བ་མི་རིགས་སོ། །ཤཱ་རིའི་བུ། མི་ལ་ལ་ཞིག་ཁ་དོག་གི་ལུས་སྤྱད་པས་སངས་རྒྱས་མཐོང་ན། དེ་ནི། སངས་རྒྱས་དང་རྒྱང་རིང་ངོ ། །ཅིའི་ཕྱིར་ཞེས་བྱས་ན། སངས་རྒྱས་ཀྱི་མིང་ཁ་དོག་མཐོང་བ་ཞེས་མི་བྱ་བས་ན། དེའི་མིང་སངས་རྒྱས་མཐོང་བ་ཞེས་བྱའོ། །ཤཱ་རིའི་བུ། མི་ལ་ལ་ཞིག་གིས་ཆོས་སོ་ཅོག་ལ་མཚན་མ་མེད། མིང་མེད། རེག་པ་མེད། དྲན་པ་མེད། སེམས་མེད། སྐྱེ་བའང་མེད། འགོག་པའང་མེད། འདྲན་ཏོར་མེད། ཆོས་སོ་ཅོག་ལ་ནི། མི་སེམས། མྱ་ངན་ལས་འདས་པ་མི་སེམས། མྱ་ངན་ལས་འདའ་བའི་སེམས་ཀྱང་མི་བྱ། མྱ་ངན་ལས་འདས་པ་ལ་མི་ཆགས་ཏེ། ཆོས་སོ་ཅོག་ཀུན་མཚན་ཉིད་གཅིག་ཡིན་པར་ཡིད་ཆེས་ཤིང་མཐོང་བར་ནུས་ན། དེ་ནི། མཚན་ཉིད་མེད་པའོ། །ཤཱ་རིའི་བུ། དེའི་མིང་ཡང་དག་པར་སངས་རྒྱས་མཐོང་བའོ། །ཆོས་སོ་ཅོག་ལ་ཚོལ་པའང་མེད། འདྲན་ཏོར་ཡང་མེད། སྐྱེ་བ་མེད་ལ། དོན་དེ་ལའང་མི་སེམས། རྣམ་པར་མི་རྟོག་ན། དེའི་མིང་སངས་རྒྱས་མཐོང་བའོ། །མི་ལ་ལ་ཞིག་ཆོས་འདི་ལ་དྲན་པའི་འདུ་ཤེས་ཀྱིས་རྣམ་པར་བརྟག་པ་མེད། བླང་པ་མེད། དོར་བ་མེད། གལ་བ་མེད་།འདུ་ཤེས་མེད། འདུ་ཤེས་ཀྱིས་ལས་མེད། ཚིག་གིས་བཤད། བཤད་པའང་མི་ཆགས། ཆོས་
246a
༄#། །ཀྱི་མིང་བརྙན་མ་ཡིན་ལ་ཀུན་ཅིའང་མེད་པར་རིག་སྟེ། སྨྲ་བའི་ཚིག་གི་ལམ་ཆད་ཅིང་ཐ་དད་པ་མེད། འདྲན་ཏོར་བརྗོད་པ་མེད། རིག་པ་མེད། དེའི་མིང་སྐྱེ་བའང་མེད། འདུ་ཤེས་སྤྱོད་པ་མེད་པ་ཞེས་བྱ་སྟེ། འཇིག་རྟེན་གྱི་ནང་ན་མིང་འཕྲུལ་གྱི་དགེ་འདུན་ཞེས་བྱའོ། །ཤཱ་རིའི་བུ། ཆོས་གང་མཐོང་ན་མིང་སངས་རྒྱས་མཐོང་ཞེས་བྱ། དེ་ནི།་འདུ་ཤེས་མེད། རྣམ་པར་རྟོག་པའང་མེད། འདྲན་ཏོར་བརྗོད་པ་མེད་དེ། ཆོས་སོ་ཅོག་མི་ལེན་པའོ། །སྟོང་པའི་སྒོ་མོ་དང ། སྟོང་པ་ཞི་བའི་སྒོ་མོ་དང་བྲལ་བའི་སྒོ་སྤྱོད་པ་ནི།་མཐོང་བ་མི་སེམས། མཐོང་བ་མི་ཐོབ། དེའི་དོན་ཀྱང་མི་ཐོབ་སྟེ། དེ་ནི། མིང་མཁན་ཡིན་ནོ། །དེའི་གནས་ཀྱང་མི་ཐོབ་སྟེ། དེ་ནི། མྱ་ངན་ལས་འདས་པའོ། །དེ་ཅིའི་ཕྱིར་ཞེ་ན། ཤཱ་རིའི་བུ། ངའང་མྱ་ངན་ལས་འདས་པ་མི་སེམས་ན། དེ་ལྟ་བུར་ཁྱོད་ལ་སོགས་པ་མྱ་ངན་ལས་འདས་པ་སོམས་ཤིག་དང ། མྱ་ངན་ལས་འདའ་བ་ཐོབ་པ་བཤད།་ཤཱ་རིའི་བུ། མི་ལ་ལ་ཞིག་མྱ་ངན་ལས་འདས་པ་ཐོབ་སྙམ་བྱེད་ན། མི་དེ་ནི། ཡང་དག་པར་གཤེགས་པའི་ཕྱིར་འབྲངས་ཏེ་ཁྱིམ་ནས་མ་བྱུང་གི། མཁན་པོ་དྲུག་གི་ཕྱིར་འབྲངས་ཏེ་ཁྱིམ་ནས་བྱུང་བའོ། །ཤཱ་རིའི་བུ། ཤེས་པར་བྱོས་ཤིག་།དེ་ནི། ཆོས་ཀྱི་དགྲ་ཡིན་ཏེ། ངའི་ཆོས་ཀྱི་ནང་དུ་ཞུགས་སོ། །དེ་ལྟ་བུའི་མིས་ངའི་ཆོས་མ་བསྒོམས་
246b
པར་མངོན་ནོ། །དེ་ལྟ་བུའི་མི་དགྲ་ཆེན་པོ་ཡིན་པར་མངོན་ཏེ་མཁར་དང ། ཡུལ་ཆེན་པོའི་ནང་ན་དགྲ་ཆེན་པོ་ཡོད་པ་དང་མཚུངས་སོ། །ཇི་ལྟ་ཞེས་བྱས་ན། དེ་ལྟ་བུའི་གཏི་མུག་གི་མིས་མྱ་ངན་ལས་འདས་པ་ཐོབ་པར་འཛིན་ན། བདག་ཏུ་ལྟ་བ་དང ། གང་ཟག་ཐོབ་པར་འཛིན་པ་ལྟ་སྨོས་ཀྱང་ཅི་དགོས། ཤཱ་རིའི་བུ། དེ་ལྟ་བུའི་མི་གཏི་མུག་གི་མི་ནི། ངའི་ལག་པས་བཀག་སྟེ། ངའི་སློབ་མ་མ་ཡིན་ནོ། །དགེ་འདུན་གྱི་གྲངས་སུ་མ་ཆུད་དོ། །ངའང་དེའི་མཁན་པོ་མ་ཡིན་ནོ། །ཤཱ་རིའི་བུ། ལ་ལ་ཞིག་ཆོས་སོ་ཅོག་སྐྱེ་བའང་མེད། འགོག་པའང་མེད། སེམས་པའང་མེད། འདུ་ཤེས་མེད་པར་རིག་པ་སྟེ། དེ་ལྟ་བུའི་ཆོས་ཀྱི་བཟོད་པ་ཐོབ་པས་ནི། མྱ་ངན་ལས་འདས་པ་མི་ཐོབ་ན། བདག་ཏུ་ལྟ་བ་དང ། གང་ཟག་མི་ཐོབ་པ་ལྟ་སྨོས་ཀྱང་ཅི་དགོས། ཤཱ་རིའི་བུ། སངས་རྒྱས་ཀྱིས་བཤད་པ་ལ་དེ་ལྟ་བུའི་མིང་ནི། ཆོས་མཐོང་བ་ཞེས་བྱ་སྟེ། དོན་དེ་མཐོང་བར་ནུས་པས་མིང་སངས་རྒྱས་མཐོང་བ་ཞེས་བྱའོ། །ཤཱ་རིའི་བུ། ཇི་ལྟ་བུའི་མིང་སངས་རྒྱས་ཞེས་བྱ། ཆོས་སོ་ཅོག་ཐམས་ཅད་ཀྱི་མི་གཡོ་ཞིང་ཐ་དད་པ་མི་ཞིག་ན། དེའི་མིང་ཡང་དག་པར་གཤེགས་པ་ཞེས་བྱའོ། །མི་ལ་ལ་ཞིག་དེ་ལྟ་བུའི་ཆོས་ལ་ཐེ་ཚོམ་དང ། འགྱོད་པ་མེད་ན། དེའི་མིང་འཕྲུལ་གྱི་དགེ་འདུན་ཞེས་བྱའོ། །ཤཱ་རིའི་བུ། ཚེ་རབས་སྔ་མ་འདས་པ་ན་མི་གཏི་མུག་པ་ཞིག་ཡོད་པས། སྤྲེའུ་ངོ་མ་ཤེས་ཏེ། ཚལ་
247a
༄#། །ཆེན་པོ་ཞིག་གི་ནང་དུ་ཞུགས་ཏེ། སྤྲེའུའི་ཁྱུ་ཞིག་འདུས་ཏེ་གནས་གཅིག་ན་འདུག་པ་མཐོང་ནས་མི་དེས་སུམ་ཅུ་རྩ་གསུམ་གྱི་ལྷ་ཡོད་པར་ཐོས་མྱོང་བས། ཐལ་བྱུང་དུ་སུམ་ཅུ་རྩ་གསུམ་གྱི་ལྷ་རྣམས་ཡིན་ནོ། །ཞེས་ཟེར་ཏེ། མོད་བཞིན་ཚལ་ནས་བྱུང་ནས་སླར་སྔོན་གྱི་གྲོང་ཁྱིམ་ཕལ་མང་པོའི་ནང་དུ་ཚིག་འདི་སྐད་བྱས་སོ། །ཁྱེད་ལ་སོགས་པས་སུམ་ཅུ་རྩ་གསུམ་གྱི་ལྷ་མཐོང་མྱོང་ངམ་མ་མྱོང ། མི་ཕལ་གྱིས་ལན་གླན་པ། མཐོང་མ་མྱོང་དོ། །མོད་བཞིན་ཚིག་སྨྲས་པ། ངས་མཐོང་ཟིན་ན། ཁྱོད་མཐོང་བར་འདོད་དམ་མི་འདོད། ཀུན་གྱིས་ཀྱང་མཐོང་བར་འདོད་དོ། །ཞེས་བྱས་ནས་མོད་བཞིན་ཕལ་མང་པོ་ཁྲིད་དེ་ཚལ་དེའི་ནང་དུ་ཕྱིན་ནས་སྤྲེའུ་བསྟན་ཏེ། ཁྱེད་ལ་སོགས་པས་སུམ་ཅུ་རྩ་གསུམ་གྱི་ལྷ་ཡིན་གྱི་ལྷ་འདི་རྣམས་ལ་ལྟོས་ཤིག་བྱས་ན། མི་ཕལ་ཀུན་ན་རེ། སུམ་ཅུ་རྩ་གསུམ་གྱི་ལྷ་མ་ཡིན་གྱི། འདི་ནི། སྤྲེའུ་ཡིན་ཏེ། ཚལ་གྱི་ནང་དུ་འདུག་པ་ལ་སྲེད་དོ། །ཁྱེད་གཏི་མུག་ཕྱིན་ཅི་ལོག་པས་སྤྲེའུ་མི་ཤེས་པའི་སྟེང་དུ་སུམ་ཅུ་རྩ་གསུམ་གྱི་ལྷ་རྣམས་ཀྱང་མ་ཤེས་སོ། །ཤཱ་རིའི་བུ། མི་དེས་ཕལ་མོའི་སྟོང་རྡབ་ཏུ་ཚལ་དེའི་ནང་དུ་ཕྱིན་ཏོ། །འདི་ལྟ་སྟེ། ཤཱ་རིའི་བུ། ད་དུང་མ་འོངས་པའི་དུས་ན་དགེ་སློང་ཞིག་ཡོད་པ་གོས་སྐྱ་བོ་ཅན་གྱི་ཁྱིམ་དུ་ཕྱིན་ཏེ། ཚིག་འདི་སྐད་བྱས་སོ། །ཁྱོད་
247b
སངས་རྒྱས་དང་འཕྲུལ་གྱི་དགེ་འདུན་མཐོང་ཞིང་སངས་རྒྱས་ཀྱི་ཆོས་ཉན་པར་འདོད་དམ། མི་འདོད་ཅེས་བྱས་ན། གོས་སྐྱ་བོ་ཅན་དེའི་ནང་ན་སངས་རྒྱས་ཀྱི་ཆོས་ལ་ཡིད་ཆེས་པ་ཡོད་པ་རྣམས་ཀུན་ན་རེ། མཐོང་བར་འདོད་ཀྱི། སངས་རྒྱས་ཀྱི་ཆོས་མཉན་ཅིང་མ་ནོས་ཞེས་ཟེར་ཏོ། །ཤཱ་རིའི་བུ། དེའི་ནང་ན་གོས་སྐྱ་བོ་ཅན་སྨྲ་བའི་ཚིག་ལ་ཆགས་ཤིང་སྲེད་པ་ཡོད་དོ། ། མཆོད་རྟེན་དང་གཙུག་ལག་ཁང་གི་ནང་དུ་ཕྱིན་ན། དགེ་སློང་དག་ཅིག་ཡོད་པ་ཚིག་གིས་བཤད་ཅིང་ཡི་གེ་རྣམས་ལ་མཁས་པར་ཤེས་ཏེ། སྨྲ་བའི་ཚིག་ལ་རྟེན་ཅིང་ཡི་གེ་རི་མོ་ལ་སྲེད་པའང་ཡོད་ནས་དགེ་སློང་དེ་གཞན་ཡང་དེ་བཞིན་དུ་འཆད་དེ། ཡང་དེ་དག་པའི་ལམ་ཡིན་སྙམ་སྟེ། དགེ་འདུན་གྱི་གྲངས་སུ་ཞུགས་སོ། །མི་ཕྱུགས་རྫི་དང་མཚུངས་ཏེ། ཆོས་ཀྱི་ཡི་གེ་ཀློག་པ་ལ་སྲེད་དུ་ཟད་ཀྱི། ཡང་དག་པའི་དབྱིངས་སུ་མི་འཇུག་སྟེ། མི་ཡིད་དགའ་ཞིང་མིང་སྙན་པར་རིན་ཆེར་འཛིན་དུ་ཟད་དོ། །འཇིག་རྟེན་གྱི་དོན་ལ་བཟོ་མཁས་ཀྱི། ཆོས་འཆད་པ་མི་གཙང་ངོ ། །བཟོའི་ཚིག་ལ་མཁས་པས་འཇིག་རྟེན་གྱི་ལམ་སྤྱད་དུ་ཟད་ཀྱི། ལེགས་པའི་བརྗིད་མེད་དོ། །མྱ་ངན་ལས་འདས་པའི་རྒྱུ་བཤིག་པ་ལས་རྒྱུ་བཏང་སྟེ། ཁ་རོག་ནས་བསམ་གཏན་ཐུབ་པ་ལ་མ་དད་དེ། ཉིན་མཚན་དུ་རྟག་པར་བཤད་ཅིང་བརྗོད་པ་དང ། འཐབ་རྩོད་པ་དང ། ཐུབ་པ་དང ། སྟན་སྟུག་པོར་ཉལ་སྲེད་དེ། བསམ་གཏན་
248a
༄#། །ཐུབ་པ་བཞིན་པའི་སེམས་ཀྱང་སྐད་ཅིག་མེད་ན། དགེ་སྦྱོང་གི་འབྲས་བུར་གྲུབ་པར་ཐོབ་པ་མི་ནུས་པ་ལྟ་སྨོས་ཀྱང་ཅི་དགོས། མི་དེ་གཉིད་ཀྱིས་ལོག་ནའང་རྟག་པར་ཐ་མལ་པའི་སེམས་དང་མཐུན་ཏེ། སྲོད་དང་ཐོ་རངས་ལ་མི་འགལ་བའི་བཟོད་པ་མི་སྤྱོད་ཀྱི། མ་རབས་ཀྱི་ཆོས་ལ་སྲེད་ན། མི་དེ་ལྟ་བུས་ཀྱང་ཡོན་གོས་དང ། ཁ་ཟས་མང་དུ་ཐོབ་བོ། །ཅིའི་ཕྱིར་ཞེ་ན། མི་དེས་ཁོར་མོར་བདུད་ངན་པ་བསླུས་པས་ཚིག་ཉེ་བར་མི་ཟབ་པ་ལ་སྲེད་དོ། །མཆོག་གི་གདམས་པའི་གཞུང་ལ་འགྲུས་པར་སློབ་མི་ནུས་སོ། །མཆོག་གི་ཟབ་མོའི་ཆོས་ཡི་གེ་ཁ་ཏོན་ལ་གཟུངས་སུ་འཛིན་མི་ནུས་ཏེ། ཐོས་ན་དངངས་སྐྲག་ནས་བཅུད་དཀར་པོ་བཏང་ལ་པང་རྣ་ལེན་ཏོ། །ཕལ་ཐ་མལ་པ་གཞན་གྱི་གསོ་བའི་ཁེ་རྙེད་པ་མཐོང་ན་འདོད་ཆགས་ཀྱི་སེམས་སྐྱེས་ཏེ། སེམས་ལ་འདི་སྙམ་བྱེད་དོ། །བདག་ལ་སོགས་པའང་དེ་ལྟ་བུའི་ཚིག་བརྗོད་པ་བསླབ་པར་རིགས་ཞེས་ཟེར་རོ། །ཤཱ་རིའི་བུ། དེ་ལྟ་བུའི་མིས་བླ་ན་མེད་པའི་ཆོས་ཀྱི་དཀོན་མཆོག་བཏང་སྟེ་ཡོན་པོ་མཐོང་བར་ལྷུང་ཞིང་འདུག་པ་ནི། དགེ་སྦྱོང་གི་དགྲ་ཡིན་ནོ། །གོས་སྐྱ་བོ་ཅན་ཁ་དོག་ཡོད་པ་དེའི་གན་དུ་དོང་སྟེ། དེ་ལྟ་བུའི་མི་ངན་པས་དེ་དག་ལ་ཆོས་བཤད་དེ་གསོ་བའི་ཁེའི་ཕྱིར་སངས་རྒྱས་དང ། ཆོས་དང ། དགེ་འདུན་ལ་སྙན་པར་བསྟོད་དེ། སྲོག་གསོ་བའི་ནོར་
248b
དང་གཡོག་བྲན་བཅོལ་བ་འབའ་ཞིག་གི་ཕྱིར་རོ། །གོས་དང་ཟས་ལ་འདོད་ཅིང་ལྕི་བས་བདག་ཅི་ལ་སྲེད་པ་བཞིན་དུ་བསྟོད་དེ་སྦྱིན་པ་བྱས་པས་ནི། གནམ་གྱི་སྟེང་དུ་སྐྱེ་བ་ཐོབ་བོ། །ཞེས་ཟེར། སངས་རྒྱས་ཀྱི་ཆོས་ཀྱི་ནང་ན་ནི། སྦྱིན་པ་སྨད། རིམས་ཀྱི་ཆོས་ནི། བསྟོད། ཕལ་ནི། ནང་གི་མ་ཆོག་གོ། ཞེས་བྱ་སྟེ། ཚིག་དེ་སྐད་དུ་སྦྱིན་པ་ཆེན་པོའི་རྒྱུ་རྐྱེན་གྱིས་གནམ་གྱི་སྟེང་དུ་སྐྱེ་བ་ཐོབ་བོ། །ཞེས་བྱ་སྟེ། ཚིག་འབྲུ་མ་རིག། གཞུང་ཕྱོགས་པ་མི་ཤེས། ཐོག་མ་ཉེ་ཞིང་མི་ཟབ་པའི་ཆོས་ཐ་མལ་ཞུགས་པ་འབའ་ཞིག་ཤེས་པས་བདག་ཏུ་ལྟ་བ་དང ། གང་ཟག་ཏུ་འདོད་ཆགས་ཏེ། མཆོག་གི་གཞུང་བཏང་ངོ ། །ཤཱ་རིའི་བུ། དེ་ལྟ་བུའི་ཆོས་བཤད་པས་བར་བར་ནི། མི་ལ་ལ་ཡིད་ཆེས་པ་སྐྱེས་ཏེ། ཁྱིམ་ནས་བྱུང་ནས་མི་ངན་པ་རྣམས་དང་འདུས་ཚོགས་ཏེ། མཆོག་གི་ཟབ་མོའི་གཞུང་ནི། འགྲུས་པར་ཚོལ་མི་ནུས་སོ། །ཐོབ་པར་ཡོང་པ་དང ། བདག་ཏུ་ལྟ་བ་དང ། གང་ཟག་དང ། ཚེ་དང ། སྲོག་ཡོད་པར་བཤད་དོ། །དྲན་པ་དང ། འདུ་ཤེས་ཀྱིས་ཅིའང་མེད་པའི་ཆོས་ལ་རྣམ་པར་བརྟགས་ཏེ། རྨད་དུ་བྱུང་བའི་སྡེ་དང ། མདོའི་སྡེ་རང་གིས་འགྲོས་བཤད་དེ། བར་བར་ནི། རྟག་པ་དང ། ཆད་པ་བཤད། བར་བར་ནི། བྱ་བ་མེད་པ་བཤད། ཤཱ་རིའི་བུ། ངའི་ཆོས་དེའི་ཚེ་མུར་འདུག་གི་ཆོས་མང་སྟེ། སེམས་ཅན་རྣམས་དྲང་པོ་མཐོང་བའི་སེམས་ཞིག་པར་
249a
༄#། །བྱས་སོ། །དེ་ལྟ་སྟེ། ཤཱ་རིའི་བུ། ང་ཆོས་གཙང་དག་པའི་ཆོས་དེ་ལྟ་བུའི་རྒྱུ་རྐྱེན་གྱིས་ཁད་ཀྱིས་ཞི་ཞིང་ཟད་དོ། །ཤཱ་རིའི་བུ། ང་ཡུན་རིང་དུ་སྐྱེ་ཤིའི་ནང་དུ་འདུག་ཅིང་སྡུག་བསྔལ་རྣམས་ཀྱིས་ཉོན་མོངས་ནས་བྱང་ཆུབ་གྲུབ་ན་གང་ཟག་མ་ནོས་པ་དེའི་ཚེ་དེངས་ཤིང་ཞིགས་སོ། །ཤཱ་རིའི་བུ། དགེ་སློང་ལ་ལ་ཞིག་ཐོབ་པ་ཡོད་པ་མཐོང་བ་དང།་བདག་ཏུ་ལྟ་བ་མཐོང་བ་དང ། གང་ཟག་མཐོང་བ་པ་དེ། གཏོང་མ་ནུས་ན་ཡང་དག་པར་གཤེགས་པས་སྤྱོད་པ་བཞིན་དུ་བཤད་པ་མི་ཤེས་སོ། །ཡང་དག་པར་བདག་ཏུ་ལྟ་བ་དང ། གང་ཟག་དང ། ཆོས་ཡོད་ཅེས་ཟེར་ན། དེ་ལྟ་བུའི་མི་ནི། ཆུ་རྔུབ་གཅིག་ལེན་དུའང་མི་གནང་ངོ ། །གལ་ཏེ་མི་དེས་སྟོང་པའི་ཆོས་ཐོས་ལ་ཡིད་ཆེས་ཤིང་སེམས་གཙང་དག་སྟེ། མི་དངང་མི་དོགས་ན། མོད་བཞིན་སླར་མི་ཕལ་དཀྲིས་དྲངས་ཏེ་བདེན་པའི་མཚན་མའི་གཞུང་དུ་འཇུག་པར་རིགས་སོ། །ཡང་ཁྱིམ་ནས་བྱུང་སྟེ་ཚུལ་ཁྲིམས་ཆོག་ཚང་པར་མནོས་པའོ། །ཅིའི་ཕྱིར་ཞེ་ན། ཤཱ་རིའི་བུ། མི་ལ་ལ་ཞིག་དེ་ལྟ་བའི་མཐོང་བ་མ་བཏང་ན། དེའི་མིང་མུར་འདུག་ཅེས་བྱའོ། །ཤཱ་རིའི་བུ། ངས་འཇིག་རྟེན་གྱི་ཐ་མལ་པའི་རྒྱུ་རྐྱེན་སྤྱད་ནས་སྒྱུ་མར་པ་ཡོད་པར་བཤད་པ་ནི། མཆོག་གི་གཞུང་མ་ཡིན་ནོ། །ཡང་མི་ལ་ལ་ཞིག་ན་རེ། ངས་ཀྱང་འཇིག་རྟེན་གྱི་ཐ་མལ་པའི་རྒྱུ་
249b
རྐྱེན་སྤྱད་དེ་ང་ཡོད་པར་བཤད་དོ། །ཞེས་ཟེར་ན། མི་དེས་སྐྱེ་བ་མེད་པ་དང ། འགོག་པ་མེད་པ་དང ། མཚན་མ་མེད་པའི་ཆོས་ཁོང་དུ་ཆུད་མ་ནུས་ཏེ། ཡང་བཤད་དོ་ཅོག་དང་འགལ་ན། ངའི་སློབ་མ་མ་ཡིན་ནོ། །ཤཱ་རིའི་བུ། མི་ལ་ལ་ཞིག་ན་རེ། ཡང་དག་པར་གཤེགས་པས་ཅིའི་ཕྱིར་འཇིག་རྟེན་གྱི་རྒྱུ་རྐྱེན་བཞིན་དུ་ང་མེད་པའི་ཆོས་ལ་ཟག་པ་མེད་པར་བཤད། ཡང་དག་པར་བཤེགས་པས་ནི། འཇིག་རྟེན་གྱི་ཕྱིར་མི་བདེན་པའི་ཚིག་གིས་བཤད་པའི་མི་རིགས་ཀྱི་སྟེང་དུ་ཆོས་ཀྱི་ཡི་གེ་གཞན་གྱི་ནང་ནའང་གང་ཟག་ཡོད་ཅེས་བཤད་པ་མང་སྟེ། སངས་རྒྱས་ཀྱིས་བཤད་པ་ནི། རྫུན་པ་མི་རིགས་སོ། །ཞེས་ཟེར་བ་ཞིག་ཡོད་ན། ཤཱ་རིའི་བུ། དེ་ལ་ལན་གླན་པ་སངས་རྒྱས་ཀྱིས་བཤད་པ་ལ་ཆོས་སོ་ཅོག་སྟོང་པ་སྟེ། བདག་པོའང་མེད། རང་བཞིན་ཡང་མེད་དེ། ཐ་མལ་པ་ནི། སྒྱུ་མ་མི་བདེན་པ་སྟེ། མཆོག་གི་གཞུང་མ་ཡིན་ནོ། ཡང་དག་པར་གཤེགས་པས་མཆོག་གི་གཞུང་དེ་བཤད། བདག་ཏུ་ལྟ་བ་དང ། གང་ཟག་ཡོད་པར་མ་བཤད་དོ། །འཕྲུལ་གྱི་མིས་ཚིག་བཤད་པ་ལ་འདོད་ཅིང་ཆགས་པ་མེད་དོ། །ཤེས་རབ་མེད་པའི་མི་ནི། སངས་རྒྱས་དང་མཚུངས་པ་མེད་དེ། འདས་པའང་མེད་དོ། །ཤཱ་རིའི་བུ། ཡང་དག་པར་གཤེགས་པའི་ཤེས་རབ་ནི། བསམ་གྱིས་མི་ཁྱབ་བོ། །ཤེས་རབ་དེ་སྤྱད་པས་ན། སེམས་ཀྱིས་སེམས་
250a
༄#། །རིག་སྟེ།་ཉིས་ན་མི་ལ་ལ་ཞིག་སངས་རྒྱས་དང་མཉམ་ཞེས་ཟེར་པ་ནི། བླའི་སངས་རྒྱས་ཀླུ་ཆེན་པོ་ཆོས་ཆེན་པོའི་རྒྱལ་པོ་ལ་སངས་རྒྱས་ཀྱིས་གང་ཟག་ཡོད་པར་བཤད་དོ། །ཞེས་བཟློག་པ་མི་རིགས་སོ། །འཇིག་རྟེན་ཐམས་ཅད་ནི། རྟག་པར་ང་དང་རྩོད་དོ། །ང་ནི། རྟག་པར་འཇིག་རྟེན་དང་མི་རྩོད་དོ། །ཤཱ་རིའི་བུ། ང་ཡོད་པར་བཤད་པ་ནི། ཤིན་ཏུ་སྙིང་རྗེས་རུང་ངོ ། །འདིའི་ནང་ན་ཆོས་ཀྱང་མེད། ངའང་མེད་ན། སེམས་ཅན་གྱིས་ཡང་དག་པར་གཤགས་པས་སྤྲོས་པ་བཞིན་དུ་བཤད་པ་མི་ཤེས་པ་མང་སྟེ། ཆོས་ཀྱི་དཀོན་མཆོག་དང ། ལོག་གལ་བས་ངན་པའི་ལམ་དུ་ལྷུང་བ་མང་ངོ ། །ཤཱ་རིའི་བུ། ངས་ཡོན་པོ་མཐོང་བར་ཤེས་པ་ནི། ཡོན་པོ་མཐོང་བ་ཞེས་བྱའོ། །ཡོན་པོ་མཐོང་བར་ཤེས་པ་དེ་ནི། དྲང་པོ་མཐོང་བ་ཡིན་ནོ། །ཤཱ་རིའི་བུ། ཡོན་པོ་མཐོང་བ་མཐར་དྲང་པོ་མཐོང་བར་གྱུར་ན། མཐོང་བ་མི་ཤེས་སོ། །ཤཱ་རིའི་བུ། ཡང་དག་པར་གཤེགས་པ་སངས་རྒྱས་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི། འཇིག་རྟེན་ཐམས་ཅད་ཀྱིས་ཡིད་ཆེས་དཀའོ། །ང་ནི། ལྷ་རྣམས་དང ། འཇིག་རྟེན་ཐམས་ཅད་ལ་ནང་ན་ཡིད་ཆེས་པ་ཡིན་ཏེ། ཡིད་མི་ཆེས་པ་མ་ཡིན་ཏེ། ཤཱ་རིའི་བུ། ངས་ཆོས་བཤད་དོ་ཅོག་ནི། ཕ་ལོགས་ཀྱི་འགྲམ་དུ་ཕྱིན་པའི་ཕྱིར་ན་དེའི་ནང་
250b
ན་ཕ་ལོགས་ཀྱི་འགྲམ་དུ་ཕྱིན་པའང་མེད་དོ། །ངས་ཆོས་བཤད་དོ་ཅོག་ནི། སྤྱད་པ་རྣམས་ཟད་པའི་ཕྱིར་ན་དེའི་ནང་ན་སྤྱད་པ་རྣམས་ཟད་པའང་མེད་དོ། །ངས་ཆོས་བཤད་དོ་ཅོག་ནི། སྟོང་པ་ཞི་བའི་ཕྱིར་ན་དེའི་ནང་ན་སྟོང་པ་ཞི་བའང་མེད་དོ། །ངས་ཆོས་བཤད་དོ་ཅོག་ནི། མེད་པར་བསྒྲལ་བའི་ཕྱིར་ན་དྲེའི་ནང་ན་མེད་པར་བསྒྲལ་བའང་མེད་དོ། །ངས་ཆོས་བཤད་དེ་ཅོག་ནི། གྲོལ་ཐར་པའི་ཕྱིར་ན་དེའི་ནང་ན་གྲོལ་ཐར་པའང་མེད་དོ། །ངས་ཆོས་བཤད་དོ་ཅོག་ནི། ཤེས་རབ་ཅན་རྣམས་ཀྱི་ཕྱིར་ན་དེའི་ནང་ན་ཤེས་རབ་རྣམས་ཀྱང་མེད་དོ། ། ངས་ཆོས་བཤད་དོ་ཅོག་ནི། དྲི་མ་དག་པའི་ཕྱིར་ན་དེའི་ནང་ན་དྲི་མ་དག་པའང་མེད་དོ། །ཤཱ་རིའི་བུ། ཡང་དག་པར་གཤེགས་པས་ལྷའི་ཕྱིར་ཆོས་བཤད་ན། ལྷའང་མེད་དོ། མིའི་ཕྱིར་ཆོས་བཤད་ན། མིའང་མེད་དོ། །སེམས་ཅན་གྱི་ཕྱིར་ཆོས་བཤད་ན། སེམས་ཅན་ཡང་མེད་དོ། །ཤཱ་རིའི་བུ། ཡང་དག་པར་གཤེགས་པས་རིག་པ་གྲོལ་ཐར་པར་བཤད་ན། དེའི་ནང་ན་རིག་པ་དང་གྲོལ་ཐར་པའང་མེད་དོ། །ངས་སངས་རྒྱས་བསམ་པ་བཤད་དེ་སངས་རྒྱས་བསམ་དུ་མི་རུང་ངོ ། །ངས་སྟོང་པ་སྤྱོད་པ་བཤད་དེ། སྟོང་པ་བཤད་དུ་མི་རུང་ངོ ། ། བསམ་དུའང་མི་རུང་ངོ ། །ཤཱ་རིའི་བུ། དེའི་མིང་ཡང་དག་པར་གཤེགས་པས་ཆོག་ཀྱི་ཡི་གེ་བཤད་དོ་ཅོག་གི་ལེའུ་དང ། ཚིག་གི་ནང་ན་བཤད་པ་མེད་ཅེས་བྱ་བ་ཡིན་ན། མི་ངན་པ་
251a
༄#། །རྣམས་ཀྱིས་ལེའུ་དང ། ཚིག་འདི་ཐོབ་ནས་མི་གཞན་ལ་བཤད་པ་ལའང་ཁོའི་མཁན་པོ་ཡིན་ནོ། །ཡང་དག་པར་གཤེགས་པ་དང ། འཕྲུལ་གྱི་དགེ་འདུན་གྱི་ལེགས་དོན་ཀྱང་མེད་ཅེས་ཟེར་ཏེ། རང་གིས་དགེ་འདུན་གྱི་གྲངས་སུ་བཅུག་གོ། །ཤཱ་རིའི་བུ། དཔེར་ན། སྤྲེའུ་འདུས་པའི་ཁྱུ་ནི། སུམ་ཅུ་རྩ་གསུམ་གྱི་ལྷ་དང་མི་འདྲའོ། །དེ་ལྟ་བུའི་མི་ཕལ་ངན་པ་ནི། ངའི་འཕྲུལ་གྱི་དགེ་འདུན་དང་མི་འདྲའོ། །ཤཱ་རིའི་བུ། དེ་ལྟ་བུའི་མི་ངན་པ་རྣམས་ནི། སྒྲ་སྐད་དང་སྨྲ་བའི་ཚིག་འབའ་ཞིག་གིས་བདག་དགེ་སྦྱོང་ཡིན་ཟེར་ཏེ། དཔེར་ན། མི་གཏི་མུག་གིས་སྦྲེའུའི་ཁྱུ་མཐོང་ན། སུམ་ཅུ་རྩ་གསུམ་གྱི་ལྷ་ཡིན་ཞེས་ཟེར་བ་དང་མཚུངས་སོ། །ཤཱ་རིའི་བུ། དེའི་ནང་ན་ཁྱིམ་ནས་བྱུང་བའི་མི་ཀླན་ཀ་ཚོལ་བ་དང ། དགའ་སྲེད་པ་ཞིག་ཡོད་དེ། མཁན་པོ་མཁས་པ་དང་ཕྲད་ལ་དེ་ལ་མིང་དང་ཁ་དོག་སྟོང་པར་ཞི་སྟེ། སྨྲ་བའི་ཚིག་གི་ལམ་བཤད། སྡང་བའང་མེད། སྟོང་བའང་མེད། ཆོས་བཤད་དེ། མཚན་མ་མེད་པ་ཁོང་དུ་ཆུད་དེ། དེ་ལྟ་བུའི་སྐྱེ་བ་མེད། འགག་པ་མེད། མཚན་མ་མེད་པའི་ཆོས་ཐོས་ན། མི་དངངས་མི་འཇིགས་ན། དེ་ལྟ་བུའི་མི་ནི།་དཔག་ཏུ་མེད་པའི་སངས་རྒྱས་རྣམས་ལ་ཡོན་གསོལ་མྱོང་ཟིན་པར་མངོན་ཏེ་ངའི་ཆོས་ཤེས་པར་ནུས་པས། དེའི་མིང་ནི། འཕྲུལ་གྱི་དགེ་འདུན་ཞེས་བྱའོ། །སངས་རྒྱས་
251b
ཀྱི་མཛོད་ཀྱི་ལེའུ་སྟེ། གཙང་མའི་ལེའུའོ།། །།སངས་རྒྱས་ཀྱི་མཛོད་ཀྱི་ཆོས་ཀྱི་ཡི་གེ། །བམ་པོ་གཉིས་པ། སངས་རྒྱས་\?\མཛོད་ཀྱི་ཡི་གེ་ལེའུ་ལྔ་སྟེ། ཚུལ་ཁྲིམས་གཙང་མའི་ལེའུའོ། །སངས་རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། ཚུལ་ཁྲིམས་ཞིག་པའི་དགེ་སློང་ལ་མྱ་ངན་འཁྲུགས་པའི་མདའ་བཅུ་ཡོད་དེ། བཟོད་པར་མནགས་པར་དཀའོ། ། དགེ་སློང་གིས་མྱ་ངན་འཁྲུགས་པའི་མདའ་བཅུ་འབྱོར་གྲུབ་ན། སངས་རྒྱས་ཀྱི་ཆོས་ཞིམ་པོའི་རོ་མི་ཐོབ་སྟེ། ཆོས་འཆད་པ་ལ་སྡང་ཞིང་ཉེ་བསྙེན་པ་ལ་མི་སྲེད་དོ། །བཅུ་གང་ལ་སོགས་པ་ཞེས་བྱས་ན། ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་གིས་དགེ་འདུན་འབྱོར་འདུན་པ་མཐོང་ན། དགའ་བའི་སེམས་མི་སྐྱེའོ། །ཅིའི་ཕྱིར་ཞེ་ན། འདུས་ཚོགས་ཏེ་གསོ་སྦྱིན་བྱས་ན། བདག་ནི། བསྐྲད་དེ་ཕྱུང ། ཡང་དག་ཆེས་དགེ་སློང་ངན་པ་དེ་བདག་ལ་ཉེས་པ་ཡོད་པར་ཤེས་པས་རྟག་པར་མྱ་ངན་འཁྲུག་པ་སྲེལ་ཏེ། ཚུལ་ཁྲིམས་འཛིན་པ་ལ་གཤེ་འཁོན་ཅིང་མི་དགའོ། །ཤཱ་རིའི་བུ། དེའི་མིང་མྱ་ངན་འཁྲུག་པའི་དགེ་སློང་གི་ཐོག་མའི་མྱ་ངན་འཁྲུག་པའི་མདའ་ཞེས་བྱ་སྟེ། ཡང་དག་པར་ལམ་ངན་པར་ལྟུང་ངོ ། །ཡང་དག་པའི་བུ་ཚུལ་ཁྲིམས་ཞིག་པའི་དགེ་སློང་ནི། ཕལ་ཀུན་ཀྱང་སྡང་ཞིང་མི་འདོད་པས་ཉེ་བསྙེན་པར་མི་དགའ་སྟེ། ཕྱུགས་ངན་པ་རྡུང་ཁུས་རཝ་རྣོན་པོ་མིའོ་ཅོག་
252a
༄#། །གིས་བཏང་བ་བསྲིངས་པ་དང་མཚུངས་སོ། །དགེ་སློང་ངན་པ་དེ་རང་ལ་ཉེས་པ་ཡོད་པར་ཤེས་པས་རྟག་པར་དོགས་པ་དང་མྱ་ངན་འཁྲུག་པ་སྲེལ་ཏེ། ཤཱ་རིའི་བུ།་དེའི་མིང་ཚུལ་ཁྲིམས་ཞིག་པའི་དགེ་སློང་གི་མྱ་ངན་འཁྲུག་པའི་མདའ་གཉིས་ཞེས་བྱ་སྟེ། ཡང་དག་པར་ལམ་ངན་པར་ལྟུང་ངོ ། །ཡང་ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་ཕལ་དང་ཕྲད་ན། སེམས་ངན་པ་མི་མཐུན་ཞིང་བཏང་སྤངས་པར་རང་ཤེས་ཏེ། ངོ་ཚ་ཞིང་གནོད་སྲེལ་པས་པལ་གྱི་ནང་དུ་འཇུག་མི་ཕོད་དོ། །ཤཱ་རིའི་བུ། དེ་ལྟ་བུའི་མིང་ཚུལ་ཁྲིམས་ཞིག་པའི་དགེ་སློང་གི་མྱ་ངན་འཁྲུག་པའི་མདའ་གསུམ་ཞེས་བྱ་སྟེ། ཡང་དག་པར་ལམ་ངན་པར་ལྟུང་ངོ ། །ཡང་ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་མྱ་ངན་འཁྲུག་པའི་སེམས་བདོ་བས་བསྟན་བཅོས་སུ་མི་རུང་སྟེ། མུར་འདུག་གི་ཆོས་ཀྱི་ཁྲིམས་ཀྱི་ཆོས་ཀྱང་མེད་ན། གཙང་མའི་ཚུལ་ཁྲིམས་མེད་པ་ལྟ་སྨོས་ཀྱང་ཅི་དགོས། ཚུལ་ཁྲིམས་ཞིག་པའི་རྒྱུ་རྐྱེན་དེ་ལྟ་བུ་སྤྱད་པས་མིས་མི་ཉེ་མི་བསྙེན། ཤཱ་རིའི་བུ། དེའི་མིང་ཚུལ་ཁྲིམས་ཞིག་པའི་དགེ་སློང་གི་མྱ་ངན་འཁྲུག་པའི་མདའ་བཞི་ཞེས་བྱ་སྟེ། ཡང་དག་པར་ལམ་ངན་པར་ལྟུང་ངོ ། །ཡང་ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་གིས་གཞན་གྱི་ནོར་རྫས་སྤྱོད་དེ་རང་གི་ལུས་གསོས་
252b
ན།་ངས་བཤད་པ་ལ་མེད་དེ་ཁུར་ལྕི་བ་ཁྱེར་ཞེས་བྱའོ། །ཅིའི་ཕྱིར་ཞེ་ན། སྤྱོད་པའང་ཐོབ་པ་ནི། ཡོན་ལེན་པ་རིགས་ཞེས་བྱ་ན། ཚུལ་ཁྲིམས་ཞིག་པའི་དགེ་སློང་སྤྱོད་པའང་མ་ཡིན། ཐོབ་པའང་མ་ཡིན་པས་ན། ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་བསྐལ་པ་གྲངས་བརྒྱ་སྟོང་ཁྲི་འབུམ་གྱི་བར་དུ་ལུས་ཀྱི་ཤ་བཅད་གཏུབས་ཏེ་སྦྱིན་བདག་ལ་འཇལ་ལོ། །ཕྱུགས་ཀྱི་ལུས་སུ་སྐྱེས་ནའང་རྟག་ཏུ་ཁལ་ལྕི་བ་ཁྱེར་བར་འོང་ངོ ། །ཇི་ལྟར་ཞེས་བྱས་ན། སྐྲའི་ཉག་མ་གཅིག་གི་ཆུ་ཚལ་གཅིག་གི་སྟོང་གསུམ་གྱི་སྟོང་འབུམ་གྱི་ཤས་གཅིག་ཙམ་གྱི་ཡོན་ཡང་ཚུལ་ཁྲིམས་ཞིག་པའི་དགེ་སློང་གིས་ཞུ་བར་མི་ནུས་ན། གཞན་གྱི་གོས་དང ། ཁ་ཟས་དང ། མལ་ཆ་དང ། རྩི་སྨན་ཞུ་བར་མི་ནུས་པ་ལྟ་སྨོས་ཀྱང་ཅི་དགོས། ཤཱ་རིའི་བུ།་ཚུལ་ཁྲིམས་ཞིག་པའི་དགེ་སློང་འཕྲུལ་གྱི་ཆོས་གོས་གྱོན་ཀྱང་གཙུག་ལག་ཁང་གི་ནང་དུ་གོམ་པ་གཅིག་ཀྱང་འགྲོ་བ་མི་རིགས་ན། ཆུ་རྔུབ་གཅིག་དང ། ཁྲི་སྟན་ཡན་ཆད་ལ་འདུག་ཏུ་མི་དབང་བ་ལྟ་སྨོས་ཀྱང་ཅི་དགོས། ཅིའི་ཕྱིར་ཞེ་ན། ཤཱ་རིའི་བུ། དེ་ལྟ་བུའི་མི་ངན་པ་ནི། ལྷའི་ནང་ནའང་དགྲ་ཆེན་པོ་ཡིན་ཞེས་བྱ་སྟེ། འཇིག་རྟེན་ཐམས་ཅད་ཀུན་གྱིས་ཀྱང་བསང་སྤང་བའི་རིགས་སོ། །དེ་ལྟ་བུར་སུན་ཕྱུང་བའི་མི་ནི། ཀུན་གྱི་དགྲ་ཡིན་ནོ། །ཡང་དག་པར་གཤེགས་པས་འཇིག་རྟེན་ཐམས་ཅད་ངའི་ཐད་དུ་འོང་བར་གནང་
253a
༄#། །ན།་ཚུལ་ཁྲིམས་ཞིག་པའི་མི་ནི། ཡང་དག་པར་གཤེགས་པས་ཕྱག་གིས་བཀག་སྟེ། ངའི་སློབ་མ་ཡིན་ན་ཉིན་གཅིག་ངའི་ཆོས་ཀྱི་ནང་ན་མི་འཇུག་པ་ལྟ་སྨོས་ཀྱང་ཅི་དགོས། ཤཱ་རིའི་བུ། དཔེར་ན། མི་ཤི་བ་དང ། སྦྲུལ་ཤི་བ་དང ། ཁྱི་ཤི་བ་ནི། ནང་ན་མནམ་སྨེ་བ་སྟེ། གཙང་གདང་བའི་ལྷ་རྣམས་རྩེན་ཅིང་དགོད་པའི་ཚེ་མཐོང་དུ་མི་རུང་ངོ ། །མཐོང་དུ་ཟིན་ཀྱང་བསྲིང་ངོ ། །འདི་ལྟ་སྟེ། ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་ནི། རོ་དེ་གསུམ་མནམ་སྨེ་བ་དང་མཚུངས་ཏེ། མི་གཙང་བས་ཤེས་རབ་ཅན་གྱིས་བསྲིངས་སྤངས་ཏེ། ལྷན་ཅིག་ཏུ་གསོ་སྦྱིན་རང་གསང་བ་མི་བྱེད་དོ། །ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་ནི། ངའི་ཆོས་ཀྱི་ནང་ན་མི་ཤེས་པ་མ་ཡིན་ཞེས་བྱ་སྟེ། ཚུལ་ཁྲིམས་འཛིན་པའི་དགེ་སློང་གིས་ཚུལ་ཁྲིམས་བཤིག་པ་འདི་ལྟ་བུ་མཐོང་ན། མདོ་བཞིན་རིང་དུ་སྤངས་སོ། །ཅིའི་ཕྱིར་ཞེ་ན། ཚུལ་ཁྲིམས་ཞིག་པའི་དགེ་སློང་གིས་ལག་གིས་རེག་པའི་རྫས་བླངས་སོ་ཅོག་ཚུལ་ཁྲིམས་འཛིན་པའི་ངན་དུག་པར་གྱུར་ཏེ། ཤཱ་རིའི་བུ། རོ་གསུམ་མནམ་སྨེ་བས་གང་བ་དེའི་ནང་ན་ངའི་ཆོ་ག་བཞིན་སྤྱོད་པ་ནི། ཕོད་ཀྱི། ཚུལ་ཁྲིམས་ཞིག་པའི་དགེ་སློང་འདི་དང་སྐད་ཅིག་ལྷན་ཅིག་འདུག་ན་ནི། མི་ཕོད་དོ། །ཅིའི་ཕྱིར་ཞེ་ན། ཤཱ་རིའི་བུ། དེ་ནི། དགེ་སྦྱོང་གི་ནང་ན་
253b
ངན་པ་ཐ་མ་སྟེ། དགེ་སྦྱོང་གི་ནང་ན་རུལ་ཞིགས་ལ་ངན་པ་ཐ་མའོ། །དགེ་སྦྱོང་གི་ནང་ན་ཕུབ་མ་ཤིན་པའོ། །དགེ་སྦྱོང་གི་ནང་ན་དྲི་མའོ། །དགེ་སྦྱོང་གི་ནང་ན་རྙོག་པའོ། །དགེ་སྦྱོང་གི་ནང་ན་གོས་པའོ། །དགེ་སྦྱོང་གི་ནང་ན་འཁོར་བའོ། །དགེ་སྦྱོང་གི་ནང་ན་རྫིང་བའོ། །དགེ་སྦྱོང་གི་ནང་ན་འཕྲུལ་གྱི་ལམ་སྟོར་བ་སྟེ། དེ་ལྟ་བུ་ལ་སོགས་པའི་མིས་ངའི་ཆོས་ཀྱི་ནང་དུ་ཁྱིམ་ནས་བྱུང་སྟེ་ལམ་བཙལ་ན། སྡིག་ལྕི་བ་ཐོབ་བོ། །ཤཱ་རིའི་བུ། དེ་ལྟ་བུའི་མི་ནི། ངའི་ཆོས་ཀྱི་ནང་ན་ལོག་པའི་དགྲ་ཞེས་བྱའོ། །ཆོས་ཀྱི་དགྲ་ཡིན་ཞེས་བྱའོ། །བརྙས་བསླུ་ཞིང་གཡོ་སྒྱུ་བྱེད་པའི་མི་ཡིན་ཞེས་བྱའོ། །སྲོག་གསོ་བའི་ཕྱིར་གོས་དང ། ཟས་ལ་སྐོམ་ལྕི་སྟེ། དེའི་མིང་ཡང་འཇིག་རྟེན་གྱི་བྲན་གཡོག་ལ་སྲེད་པ་ཞེས་བྱའོ། །ཤཱ་རིའི་བུ། དཔེ་ཉུང་རུམ་སྐྱེས་པའང་མ་ཡིན། བུད་མེད་ཀྱང་མ་ཡིན་པ་དང་འདྲ་སྟེ། ཚུལ་ཁྲིམས་ཞིག་པའི་དགེ་སློང་དེའང་དེ་དང་མཚུངས་པས་མིང་ཁྱིམ་ན་འདུག་པ་ཞེས་ཀྱང་མི་བྱ། མིང་ཁྱིམ་ནས་བྱུང་བ་ཞེས་མི་བྱ་སྟེ། ཚེ་ཟད་ཕྱིན་ཆད་ཐལ་བྱུང་སེམས་ཅན་དམྱལ་བར་འགྲོའོ། །ཤཱ་རིའི་བུ། དཔེར་ཕ་ཝང་དང་མཚུངས་ཏེ། བྱས་གཟུང་ཞེས་བྱས་ན་ནི། བྱི་བ་བཞིན་དུ་ཁུང་བུར་སོང ། བྱི་བས་གཟུང་ཞེས་བྱས་ན་ནི། ནམ་མཁའ་ལ་འཕུར་ཏེ་བྱར་བྱེད་དོ། །བདེན་པར་བྱ་ན་བྱ་ཆེན་པོར་སྤྱོད་པ་མེད་པ་དེ་ནི། ལུས་རྣམས་མནམ་སྨེ་སྟེ། མུན་
254a
༄#། །པ་མི་སྣང་བ་འབའ་ཞིག་ལ་སྲེད་དོ། །ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་ཡང་དེ་དང་མཚུངས་ཏེ། གསོ་སྦྱིན་རང་གསང་བར་ཡང་མི་འཇུག། རྒྱལ་པོས་བཀོལ་བའི་གྲལ་དུའང་མི་འཇུག་སྟེ། མིང་གོས་སྐྱ་བོ་ཅན་ཞེས་ཀྱང་མི་བྱ། མིང་ཁྱིམ་ནས་བྱུང་ཞེས་ཀྱང་མི་བྱའོ། །དཔེར་ན། རོ་བསྲེགས་པའི་ཤིང་གི་ལྷག་མ་དང་མཚུངས་ཏེ། ཕྱིས་ཅིར་ཡང་སྤྱད་དུ་མི་རུང་ངོ ། །དེ་ལྟ་བུའི་དགེ་སློང་ཚུལ་ཁྲིམས་ཀྱི་རིམ་པའང་མེད། ཐུབ་པའི་རིམ་པའང་མེད། ཤེས་རབ་ཀྱི་རིམ་པའང་མེད། གྲོལ་ཐར་གྱི་རིམ་པའང་མེད། གྲོལ་ཐར་ཤེས་མཐོང་བའི་རིམ་པའང་མེད་དེ། ཚུལ་ཁྲིམས་གཙང་མ་བཤིག་པ། ཆོ་ག་འཚང་བ་འབའ་ཞིག་གི་རིམ་པ་ཡོད་དོ། །ཤིན་ཏུ་ཟབ་མོ་དམ་པའི་སྒྲ་སྐད་དང ། ཚུལ་ཁྲིམས་ཀྱི་སྒྲ་དང ། ཐུབ་པའི་སྒྲ་དང ། ཤེས་རབ་ཀྱི་སྒྲ་དང ། གྲོལ་ཐར་གྱི་སྒྲ་དང ། ཤེས་མཐོང་བ་ལ་གྲོལ་ཐར་པའི་སྒྲ་ནི། མི་ནུས་ཀྱི། ཚུལ་ཁྲིམས་ཞིག་པའི་ངན་པའི་སྒྲ་སྐད་འབའ་ཞིག་འབྱིན་ཏེ། ངན་པ་མཐུན་གཞན་དང་ལྷན་ཅིག་ཏུ་ངན་པའི་སྒྲ་འབྱིན་ཅིང་གོས་དང ། ཁ་ཟས་དང ། ཉལ་བའི་ཁྲི་དང ། སྦྱིན་པ་མནོད་བླང་བ་དང ། ཤིང་དང ། མེ་ཏོག་དང ། འབྲས་བུ་ཆེད་ཆེར་བྱ་བ་འབའ་ཞིག་བརྗོད་ཅིང་མི་མངག་པ་དང ། ལུས་ཀྱི་ནང་གི་དགེ་མི་དགེ་དང ། བདེ་མི་བདེ་དང་
254b
རྩེད་མོ་རྒོད་པའི་དོན་དང་མི་དགེ་བའི་ཚིག་རྣམས་བརྗོད་དོ། །རྟག་པར་ཉིན་མཚན་དུ་དགེ་སློང་དེ་བཞིན་ལུས་ཀྱི་ལས་མི་གཙང ། ཁའི་ལས་མི་གཙང ། ཡིད་ཀྱི་ལས་མི་གཙང་ན། སེམས་ཅན་དམྱལ་བར་ལྟུང་ངོ ། །ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་དེ་མུན་པ་མི་སྣང་བ་ལ་སྨྲ་བ་ནི། ད་ཅིའི་ཕ་ཝང་དང་མཚུངས་ཏེ། དྲང་པོའི་ཆོས་ཡི་གེ་བཤད་པ་ཐོས་ན།་མྱ་ངན་འཁྲུག་པར་འགྱུར་རོ། །ཅིའི་ཕྱིར་ཞེ་ན། བདེན་བཞིན་དུ་བཤད་པའི་ཕྱིར་རོ། །འཇིག་རྟེན་གྱི་མི་ནི། བདེན་པར་བཤད་པ་ལ་མི་དགའ་སྟེ། བདག་གི་ཡིད་དང་མི་འགལ་བ་འབའ་ཞིག་ལ་སྲེད་དོ། །དེ་ལྟ་བུའི་དགེ་སློང་ནི། ཆོས་འཆད་པ་ལ་སེམས་མི་གཙང་མི་གདང་སྟེ། སྡིག་རྗེ་ལྕི་བར་གྱུར་ཅིང་སེམས་ཅན་དམྱལ་བར་སྐྱེ་བ་ལ་ཕན་ནོ། །ཤཱ་རིའི་བུ། དེའི་མིང་ཚུལ་ཁྲིམས་ཞིག་པའི་དགེ་སློང་མྱ་ངན་འཁྲུག་པའི་མདའ་ལྔ་ཞེས་བྱ་སྟེ། ཡང་དག་པར་སེམས་ཅན་དམྱལ་བར་ལྟུང་ངོ ། །ཡང་ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་ལ་ཁྲེལ་ཞིང་ངོ་ཚ་མེད་དེ། དབང་པོའི་རྣམས་ཀྱིས་འཁྲུག་ནས་མི་གཙང་བའི་ལུས་དང་ཁ་དང ། ཡིད་ཀྱི་ལས་དང ། མི་གཙང་བའི་ཆོག་འབྱོར་གྲུབ་བོ། །གོས་གྱོན་ཏོ་ཅོག་ཀྱང་ཀུན་ཆོས་དང་མི་མཐུན་རྫུན་གྱི་ཚིག་ལ་དགའ་སྲེད་དེ། ཁའི་བག་བྱ་མི་ནུས་སེམས་རྟོག་པར་རྒྱུད་རྒོད་པས་དྲི་མ་སྨེ་བ་ཞེན་ཏོ། །ཤཱ་རིའི་བུ། གྱོ་མོའི་སྣོད་གསར་པའི་ནང་དུ་
255a
༄#། །སྐྱག་རྫབ་དང ། རྣག་ཁྲག་རུལ་པ་མནམ་པ་བླུགས་པ་དང་མཚུངས་ཏེ་ཕྱིར་མི་གཙང་བ་པོར་ལ་སྤོས་ཙནྡན་བླུགས། ཕྱིས་ཀྱང་སྤོས་ཙནྡན་བོར་ན། དེ་ལྟ་བུའི་གྱོ་མོའི་སྣོད་ལ་སོགས་པ་དྲི་བྲོ། བཅོམ་ལྡན་འདས། དེ་ལྟ་བུའི་གྱོ་མོའི་སྣོད་གསར་པར་སྐྱག་རྫབ་མནམ་པོ་བླུགས་ཏེ་སྲ་བར་ཆགས་ན། མནམ་པོའི་དྲི་འབའ་ཞིག་མཆིས་ཀྱི། ཙནྡན་གྱི་བསུང་མ་མཆིས་སོ། །ཤཱ་རིའི་བུ། མིས་གཙང་དག་པའི་ཡིད་ཆེས་པ་ལ་སོགས་པའི་དབང་པོ་རྣམས་སྤྱད་དེ་ཁྱིམ་ནས་བྱུང་ལ་ཆོས་ལ་མ་བསླབ་པ་ལས་ངན་པའི་བཤེས་གཉེན་དང་ཕྲད་ན། དེས་བསྟན་པ་བཞིན་དུ་འབྲང་ངོ ། །ཤཱ་རིའི་བུ། གང་ལ་སོགས་པ་ངན་པའི་བཤེས་གཉེན་ཞེས་བྱས་ན། ངན་པའི་བཤེས་གཉེན་ནི།་རྟག་པར་རྩེད་མོ་འདྲན་ཏོར་ལ་སྲེད་ཅིང་ཡང་རྒོད་ལ་ཁྲེལ་མེད། སྨྲ་བའི་ཚིག་གིས་འཁྲུག་།དབང་པོ་རྣམས་མི་སྡུད། སེམས་རྩེ་གཅིག་ཏུ་མི་མཐུན་ཞིང ། གཏི་མུག་ལུག་བཞིན་པ་དེ་ལྟ་བུའི་ངན་པའི་བཤེས་གཉེན་ལ་ཉེ་བསྙེན་ན། རྒྱུན་དུ་ཞུགས་པའི་འབྲས་བུ་དང ། ལན་གཅིག་ཕྱིར་འོང་བའི་འབྲས་བུ་དང ། ཕྱིར་མི་འོང་བའི་འབྲས་བུ་དང ། དགྲ་བཅོམ་པའི་འབྲས་བུ་དང ། ལྷར་སྐྱེ་བ་ལ་ཐུག་ཡན་ཆད་ཀྱང་སྟོར་ན། མྱ་ངན་ལས་འདས་པའི་ལམ་ལྟ་སྨོས་ཀྱང་ཅི་དགོས། ཆོས་བཤིག་པའི་སྡིག་གི་ལས་སྤྱོད་
255b
སྦྱོང་འབའ་ཞིག་ལ་མཁས་ཏེ་ཆོས་འཇིག་པ་དང་འགྲོགས་ཤིང་སྡོད་དོ། །མི་དེས་ལུས་ཀྱི་ལས་མི་གཙང་བ། ཁའི་ལས་མི་གཙང་བ། ཡིད་ཀྱི་ལས་མི་གཙང་བ། ཚུལ་ཁྲིམས་འཛིན་པའི་མི་གཙང་བ་འབྱོར་གྲུབ་པས་ལུས་ཤི་ན་ལམ་ངན་པར་ཞུགས་སོ། །ལམ་ངན་པ་ཇི་ལྟ་བུ་ཞེས་བྱས་ན། ལམ་ངན་པ་ནི། སེམས་ཅན་དམྱལ་བ་དང ། ཡི་དྭགས་དང ། བྱོལ་སོང་དང ། ལྷ་མ་ཡིན་གྱི་ལམ་མོ། །ཡང་ལམ་ངན་པ་ཡོད་དེ། སྲིན་བུ་ཨ་སུ་ལིངྒ། སྲིན་བུ་བག་ལ་འབོག་།སྲིན་བུ་འབྱིན་རྩེའི་ཛ་ཀ་།སྲིན་བུ་ཅི་འགོག་ཀ་དང ། མི་དེ་སྲིན་བུ་དེ་རྣམས་ཀྱི་ནང་དུ་ལན་མང་དུ་སྐྱེའོ། །ཤཱ་རིའི་བུ། མི་དེ་ངན་པའི་བཤེས་གཉེན་གྱི་ཕྱིར་འབྲང་བས་མིའི་ནང་དུ་སྐྱེས་ཟིན་ཀྱང་ཕ་མ་དང་གསོན་པོར་བྲལ་ལ་ཤི་བརླགས་ཏེ། ཁྱིམ་ཚེས་ཉེ་བ་ལ་གནོད་ཅིང་ཡུལ་ས་ཞིག་རལ་ཏེ། བགེགས་བརྒྱད་ཀྱི་ནང་དུ་སྐྱེ་བར་འོང་ངོ ། །སྐྱིད་པ་བརྒྱད་ཀྱི་གནས་བཏང་ལ་འདོད་པ་མང་དུ་ཁྲོ་བླུན་ལ་རྟག་པར་རྩེད་མོ་འདྲན་ཏོར་ལ་སྲེད། ཁོང་ཡང་རྒོད་ཅིང་ངོ་ཚ་བའང་མེད། ཚིག་འཆོལ་པར་སྨྲ། སེམས་བསྡུ་མི་ནུས་ཏེ། གཏི་མུག་ལུག་བཞིན། འདོད་ཆགས་ཞེ་སྡང་གཏི་མུག་གིས་འོན།་ལྐུགས། ལོང ། ཞར། རྐང་ལག་འཇས་འགྲུམས་ནས་ངན་པའི་བཤེས་གཉེན་དེས་སངས་རྒྱས་མེད་པའི་གནས་སུ་སྐྱེའོ། །སངས་རྒྱས་ཀྱི་དུས་དང་ཕྲད་དུ་ཟིན་ནའང་
256a
༄#། །བདག་རང་མཐོང་བར་མི་དགའ། ཆོས་ཐོས་པར་མི་དགའ། སངས་རྒྱས་དང ། དགེ་འདུན་དང་ལྷན་ཅིག་ཏུ་མི་འདུག་སྟེ། དེ་ལྟ་བུའི་ངན་པས་ཡོངས་ནས་མི་ངན་པ་དང་བསྡོངས་ཏེ་མི་ཐ་མ་ངན་པ་ལ་སྲེད་པ་སྐྱེས་ནས་དྲང་པོར་མཐོང་བ་ལ་ཡོན་པོར་མཐོང་བའི་འདུ་ཤེས་སྐྱེས། ཡོན་པོར་མཐོང་བ་ལ་དྲང་པོར་མཐོང་བའི་འདུ་ཤེས་སྐྱེས་ཏེ།་དེའི་མིང་འདོད་པ་ཐ་མ་ཞེས་བྱའོ། །ཤཱ་རིའི་བུ། ཤེས་རབ་ཐ་མའི་མཐར་འགོག་པ་དང ། ལམ་དང ། མྱ་ངན་ལས་འདས་པ་སྐྱོ་བྲལ་བའི་སེམས་སྐྱོ་བར་མི་ནུས་སོ། །ཤཱ་རིའི་བུ།་ངན་པའི་བཤེས་གཉེན་དང་ཕྲད་དེ། དེ་ལྟ་བུའི་རྒུད་པའི་མྱ་ངན་གྱི་ནད་རྣམས་ཐོབ་པ་དེ་ལྟ་བུའི་ལྟས་མཚན་ཡོད་པའི་མི་དེས་ཆོས་ཀྱི་ཡི་གེ་ཟབ་མོ་འདི་ཐོས་ན། དངངས་དོགས་ཤིང་འཇིགས་སྐྲག་པ་ནི། ཁུང་ཟབ་མོར་ལྷུང་བ་དང་མཚུངས་པས། སྡིག་ཆེན་པོའི་དོང་ཁུང་ཟབ་མོའི་ནང་དུ་ལྟུང་ངོ ། །ཅིའི་ཕྱིར་ཞེ་ན། ཤཱ་རིའི་བུ། ཆོས་ཀྱི་ཡི་གེ་ལ་དེ་བཞིན་བཤད་པ་ཡིན་ཏེ། ཚུལ་ཁྲིམས་ཞིག་པའི་དགེ་སློང་ལ་སྡིག་ལྕི་བ་ཆེན་པོ་ཡོད་དོ། །ཅིའི་རྒྱུ་རྐྱེན་གྱིས་ནི། མིང་ཚུལ་ཁྲིམས་ཞིག་པ་ཞེས་བྱ། ཚུལ་ཁྲིམས་མནོས་སོ་ཅོག་ཞིག་ཅིང་ཚིག་གིས་བསྟན་པ་བཀའ་ལ་བྱེད་དོ་ཅོག་ལ་བརྟག་བསྟན་པ་མེད་དེ་གཞལ་ཞིང་ལྡོག་པ་དང ། ཁོར་མོར་འདོད་ཆགས་སྤྱོད་ལ་སྤྱོད་པ་གོ་འདུན་མང་སྟེ། འདོད་
256b
ཆགས་ཞེ་སྡང་གཏི་མུག་སྤྱོད་ཅིང་ཚིག་གཞན་གོ་འདུན་ལ་སྲེད་པས་ན། མིང་ཚུལ་ཁྲིམས་ཞིག་པ་ཞེས་བྱའོ། །ཡང་གཅིག་ཏུ་ན་འཚོ་ནམ་གྱི་འདོད་པ་མང་པོ་ལ་སྲེད། ལྕེ་རྐྱང་གི་ཁ་ཏོན་ལ་སྲེད། གཉིད་ཆེན་པོ་ལ་སྲེད། ཟེར་རོ་ཅོག་འགལ་ལ་གོ་རིམ་མེད། མི་གཙང་བར་འཆད་དེ་བདག་ཏུ་ལྟ་བ་དང ། གང་ཟག་དང་ཚེ་སོག་ལ་འདོད་ཆགས་པས་ན། མིང་དགེ་སློང་ངན་པ་ཞེས་བྱའོ། །ཚིག་དང་དཔག་པ་མི་ཤེས། དགེ་སྦྱོང་གི་ཆོས་མི་ཤེས། བྲམ་ཟེའི་ཆོས་མི་ཤེས། སྨན་གྱི་དཔྱད་བྱེད་པ་དང ། ཚོང་སྤོགས་བྱེད་ཅིང་ཁེ་ཚོལ་བ་ལ་སྲེད། ཡུལ་གྱི་ཕོ་ཉ་བྱེད་པ་དང ། གཞན་ལ་གོས་ཞིང་ཞེན་པར་བྱ་བ་ལ་སྲེད། གོས་སྐྱ་བོ་ཅན་གྱི་འཚོ་ནམ་བྱ་བའི་མངག་གཞུག་དང ། ཤིང་རྣམས་ཀྱི་འདབ་མ་དང ། མེ་ཏོག་དང ། རྡོ་གུ་འཕྲུལ་པ་ལ་སྲེད། གོས་སྐྱ་བོ་ཅན་ལ་མུར་འདུག་གི་ཆོས་བཤད་པ་ལ་སྲེད་དེ། སེམས་ལ་རྟག་པར་འཇིག་རྟེན་ལས་བྱུང་བའི་ཆོས་བཏང་སྤངས་ཏེ། ལོ་ཉི་ཤུ་མ་ལོན་པར་ཚུལ་ཁྲིམས་རྫོགས་པར་མནོས་ནས་ཚུལ་ཁྲིམས་མནོས་པའི་ནང་ན་ཞན་པ་མ་ལྡན་པ་ཡོད་དེ། ལས་ཉམས། བྱད་ཉམས་ཤིང་མཚང་མི་རིགས་མི་ཆོས་ཏེ། ཁྲེ་འབྲས་རྗེན་པ་དང ། དོང་ཅེ་དང ། དར་དང ། གསེར་དངུལ་ལེན། བསྟན་བཅོས་པ་བཞིན་དུ་མི་བྱེད། མཁན་པོའི་ཚིག་ལ་སླར་བསྡོ་ལ་བཟློག། བདག་གི་ལུས་ཀྱང་མི་ཤེས། གཞན་ཡང་མི་ཤེས།
257a
༄#། །ཆེ་ཆུང་ཐ་དད་པའི་རིམ་པར་བྱེད་མི་ནུས། རྫུན་ཚིག་ལ་དགའ་སྲེད། ཚུལ་ཁྲིམས་ལེན་པ་ལ་འདོད་ཆགས་སྤྱོད་པའི་དོན་ཀུན་གྱིས་འཁྲུགས་ཏེ་སེམས་གཅིག་ཏུ་མ་མཐུན། གདོང་ལ་ཁྲོ་བའི་གཟུགས་ཡོད་ཅིང་འཇུངས་ཤིང་བརྐམ་པ་ཡིད་མི་ཆེས་གཞུང་བས་བསམ་པ་མི་ཤེས། བརྐམ་འདོད་མང་དུ་སྤེལ། གཉིད་ཆེ་ཞིང་རྩེད་མོ་འདྲན་ཏོར་སྲེད། དོགས་འགྱོད་གཤེ་འཁོན་ཏེ། སྡིག་ངན་པ་སྦས་བཅབས་ནས་རང་དུས་ཆེ་བ་ལ་སྲེད། ཕྲག་དོག་དང་གཅམ་རྒྱུ་ཆེ། ཁྲེལ་དྲིན་མེད། རང་ཉམས་ཆེ། དྲེགས་པའི་ལེ་ལོ་དང ། ངའི་ལེ་ལོ་དང ། ལེ་ལོ་ཆེན་པོ་དང ། ཡོན་པོའི་ལེ་ལོ་བྱེད། བརྙས་སླུ་བ་ལ་སྲེད། བདག་གི་ལུས་ལ་ལེགས་ཞེས་བསྟོད། ཐབས་མང་དུ་བྱས་ཏེ་གསོ་བའི་ཁེའི་སྒོ་མོ་ཕྱེ། གོས་སྐྱ་བོ་ཅན་བརྙས་སྨྲས་ཏེ། སྒྱུ་མའི་མི་གཉེན་པ་བྱས་ན་བསྙེན་པ་ཞར་གྱིས་ནོར་འཐོབ་སྟེ། མི་ཕལ་ལ་ངོམ་ཞིང་ཚུལ་ཁྲིམས་ཀྱི་རིམ་པ་དང ། ཐུབ་པ་དང ། ཤེས་རབ་དང ། གྲོལ་བའི་རིམ་པ་དང ། ཤེས་མཐོང་བ་ལས་གྲོལ་ཐར་པ་རིམ་པ་ཉམས་ཞིག་པ་སྟེ། སངས་རྒྱས་དང ། ཆོས་དང ། དགེ་འདུན་ལ་སེམས་ངེས་པར་ཡིད་མི་སེམས་སོ། །ལས་ཀྱི་ལན་ལ་ཡིད་མི་ཆེས་ཏེ། འཕྲལ་ཁེ་རིན་ཆེར་འཛིན་ལ་དུས་ཕྱི་མ་མེད་ཅེས་ཟེར་ཞིང་དོགས་འགྱོད་པ་རྣམ་པ་མང་ལ་སེམས་ཀྱི་རང་བཞིན་སྲབ་
257b
ཞན་པས་རྟག་པར་དངངས་སྐྲག་པ་ལ་སྲེད་དོ། །ཤཱ་རིའི་བུ། དེའི་མིང་དགེ་སློང་ངན་པ་ཞེས་བྱ་སྟེ། དེ་ལྟ་བུའི་མི་གཏི་མུག་ནི། ངའི་ཆོས་ཀྱི་ནང་ན་སྐྱག་རྫབ་མནམ་སྨེ་ཞིང་མི་གཙང་བ་ཡིན་ནོ། །མི་དེས་ལུས་དང ། ཁ་དང ། ཡིད་ཀྱི་ངན་པའི་ལས་འབྱོར་འགྲུབ་སྟེ། མི་གཙང་མི་སྡངས་པས་ན། ཚེ་ཟད་ཀྱི་འོག་ཏུ་ལམ་ངན་པར་ལྟུང་སྟེ། དམྱལ་བ་ཆེན་པོར་སོང་ངོ ། །ད་ལྟ་བུའི་དགེ་སློང་ནི། ཡང་དག་པར་གཤེགས་པ་སངས་རྒྱས་རྣམས་དང ། སློབ་མ་རྣམས་ཀྱིས་རྟག་པར་བསྲིངས་སྤངས་སོ། །གཞན་ཆོས་ལམ་ལ་སྲེད་པ་དང ། ཞི་བ་འདས་པར་ཚོར་བའང་ཀུན་གྱིས་མི་བསྙེན་ཏོ། །ཤཱ་རིའི་བུ། དཔེར་ན། སྤོས་ཙནྡན་གྱི་སྣོད་གཙང་མའི་ནང་དུ་མི་གཙང་བ་ལྷན་ཅིག་བཞག་པ་དང་མཚུངས་ཏེ། ཕྱིས་ཅིར་ཡང་སྤྱད་དུ་མི་རུང་བའོ། །དེ་སྟེ་ཤཱ་རིའི་བུ། ཁྱིམ་ན་འདུག་པ་དང ། ཁྱིམ་ནས་བྱུང་བ་ལ་ལ་ཞིག་གིས་མི་དེ་ལ་ཉེ་བསྙེན་ཏེ་ཅི་བྱེད་པ་བསླབ་སྦྱངས་ན། ཚུལ་ཁྲིམས་ཞིག་པའི་ལེའུ་དང་ཡང་རིང་པོ་མི་ཐོགས་པར་ངན་པ་མཐུད་དེ། ཁ་དོག་གི་མདངས་ཉམས་ཤིང་གྲམ་ལ་ཆོས་གཞིག་སྟོར་ཏེ། ཚེ་ཟད་ཀྱི་འོག་ཏུ་སེམས་ཅན་དམྱལ་བའི་ནང་དུ་སྐྱེའོ། །ཤཱ་རིའི་བུ། དེ་ལྟ་བུའི་མི་ངན་པ་ནི། ཡང་དག་པར་གཤེགས་པས་སངས་རྒྱས་སོ་ཅོག་དང ། སློབ་མ་རྣམས་གཞན་ཆོས་ལམ་འཚལ་བ་དང ། ཞི་བར་ཐར་པའི་སྲེད་པ་ཀུན་གྱིས་བསྲིངས་སྤངས་པའོ།
258a
༄#། །ཤཱ་རིའི་བུ། དཔེར་ན། སྤོས་ཙནྡན་གྱི་སྣོད་མི་གཙང་བའི་ནང་དུ་བླུགས་པ་དང་མཚུངས་ཏེ། ཕྱིས་ཅིར་ཡང་སྤྱད་དུ་མི་རུང་ངོ ། །དེ་ལྟ་སྟེ། ཤཱ་རིའི་བུ། ཁྱིམ་ན་འདུག་ཀྱང་རུང ། ཁྱིམ་ནས་བྱུང་ཡང་རུང་སྟེ། ལུས་ལ་བསྐུས་མོད་ཀྱི། འོན་ཀྱང་མི་གཙང་བ་དང་འདྲེས་སོ། །ཤཱ་རིའི་བུ། དགེ་སློང་ངན་པའང་དེ་དང་མཚུངས་ཏེ། དགེ་འདུན་ཕལ་གྱི་ནང་ན་འདུག་ཅིང་འཕྲུལ་གྱི་ཆོས་གོས་གྱོན་མོད་ཀྱི། འོན་ཀྱང་དགེ་སློང་ངན་པའི་གཟུགས་མངོན་ནོ། །ཚངས་པར་སྤྱོད་པའི་དགེ་སློང་དེས་མི་གཙང་བའི་འདི་མཐོང་ན། བསྲིངས་ཏེ་མ་བསྙེན་ཏོ། །གཞན་གྱིས་བསྲིངས་སྤངས་པ་མཐོང་ནས་སེམས་ལ་གཤེ་འཁོན་ཏེ། དེའི་རྒྱུ་རྐྱེན་གྱིས་ཤི་ན། དམྱལ་བར་སོང་ངོ ། །ཤཱ་རིའི་བུ། དེ་ལྟ་བུའི་མི་ཚུལ་ཁྲིམས་ཞིག་པའི་དགེ་སློང་མྱ་ངན་འཁྲུག་པའི་མདའ་དྲུག་ཅེས་བྱ་སྟེ། ཡང་དག་པར་སེམས་ཅན་དམྱལ་བར་ལྟུང་ངོ ། །ཚུལ་ཁྲིམས་གཙང་མའི་ལེའུ་འོག་མའོ།། །། ཡང་ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་གིས་དེ་ལྟ་བུ་ལ་སོགས་པའི་ཆོས་ཡིག་སངས་རྒྱས་ཀྱིས་བཤད་དོ་ཅོག་ཐོས་ན། སེམས་མི་གཙང་མི་སྡངས་ཏེ། མི་དགའ་ཞིང་ཡིད་མི་ཆེས་མ་དད་དེ། བདག་ལ་ཉེས་ཡོད་པར་ཤེས་པས་ཆོས་ཀྱི་ཡི་གེ་འདི་ལ་ཡིད་མི་ཆེས་ནས་བདག་ལ་སོགས་པའི་ཕྱིར་བཤད་ཀྱི། མི་གཞན་གྱི་ཕྱིར་མ་ཡིན་ནོ། །ཅིའི་
258b
ཕྱིར་ཞེ་ན། བདག་ལ་སོགས་པ་སྔོན་ཆད་དོན་དེ་ལ་འདུག་པའི་ཕྱིར་རོ། ཤཱ་རིའི་བུ། དེ་ལྟ་བུའི་དམ་པའི་མཆོག་བསྒྲུན་དུ་མེད་པའི་ཆོས་ལ་ཚུལ་ཁྲིམས་ཞིག་པའི་དགེ་སློང་གཤེ་འཁོན་ཏེ། ཆོས་འཆད་པ་ལ་ཡང་དག་པར་ཡིད་མི་ཆེས་པ་མང་ན། དེ་ལྟ་བུའི་སངས་རྒྱས་ཀྱི་བཤད་དོ་ཅོག་ཐོས་ནས་ལོག་གལ་ཞིང་མི་ནོད་ཅིང་ཚིག་མ་ཡིན་ནོ། །འདི་ནི། སངས་རྒྱས་ཀྱིས་བཤད་དེ། མི་གཞན་བསྟན་པའི་ཚིག་མ་ཡིན་ཞེས་ཟེར་རོ། །ཅིའི་ཕྱིར་ཞེ་ན། ཚུལ་ཁྲིམས་ཞིག་པའི་དགེ་སློང་གི་ལམ་སྤྱོད་པ་ལ་མི་སྲིད། ལམ་སྤྱོད་པའི་དགེ་སློང་ནི།་སངས་རྒྱས་ཀྱི་ཚིག་དང་མི་འགལ་ལོ། །དེ་ཀུན་ནི། ཚུལ་ཁྲིམས་ཞིག་པ་བླུན་གླེན་ཞིང་ཆོས་ངན་པ་བྱེད་པ་སེམས་ཡིད་མི་ཆེས་ཏེ། སངས་རྒྱས་ཀྱི་ཚིག་དང་ལོག་གལ་པ་དེ་ལྟ་བུའི་དགེ་སློང་ཉེས་ཡོད་པར་བདག་རང་ཤེས་པས་གཤེ་འཁོན་དང ། དྲེགས་ཤིང་ལེ་ལོ་དང་གཏུམ་ཞིང་དུས་ཆེ་བ་དང ། ངན་པ་ཡོན་པོ་དང ། ལེ་ལོ་སེམས་སྐྱེས་ཏེ། སངས་རྒྱས་དང ། ཆོས་དང ། དགེ་འདུན་ལ་འཕྱ་ཞིང་སྐུར་ཏོ། །ཤཱ་རིའི་བུ། དེ་ན་དགེ་སློང་དེས་ཆོས་ཀྱི་ཡི་གེ་དེ་ཀུན་ཐོས་ན། ལོག་གལ་བ་ཡིད་མི་ཆེས་ནས་སེམས་ཀྱིས་བླ་ན་མེད་པའི་བྱང་ཆུབ་ཁོང་དུ་མ་ཆུད་པས་མི་གཞན་ལ་སངས་རྒྱས་བཤད་པ་མ་ཡིན་ཞེས་སྟོན་ཏོ། །ཤཱ་རིའི་བུ། སངས་རྒྱས་ཀྱིས་བཤད་པ་ལ་མི་དེ་ལྟ་བུའི་ཆོས་ལ་སྐུར་པ་ཞེས་བྱའོ།།
259a
༄#། །དགེ་སྦྱོང་མ་ཡིན། ཤཱཀྱའི་རིགས་ཀྱི་བུ་མ་ཡིན་ཏེ། མེད་པར་འགོང་ཏོར་བྱུང་བའི་རིགས་སོ། །དེ་ལྟ་བུ་ལ་སོགས་པའི་དགེ་སློང་ནི། བརྒྱ་སྟོང་ཁྲི་འབུམ་གྱི་སངས་རྒྱས་རྣམས་ཀྱིས་ལན་གསུམ་དུ་བསྒྱུར་ཏེ་མངོན་པར་བསྟན་དུ་ཟིན་ཀྱང་གོ་བར་བྱ་བ་དང ། ལམ་གྱི་འབྲས་བུ་ཐོབ་པར་མི་ནུས་སོ། །ཅིའི་ཕྱིར་ཞེ་ན། ཤཱ་རིའི་བུ། མི་ངན་པ་ནི། ཆོས་འདི་ལ་རང་གི་ལམ་བསྒྲིབས་པ་ཞེས་བྱ་སྟེ། སྐྱེ་བའི་སྐལ་པའང་མེད། ཡིད་ཆེས་པའི་སེམས་ཀྱང་མེད་ལ་གོས་དང་ཟས་འབའ་ཞིག་ལ་སྲེད་ཅིང་འཇིག་རྟེན་གྱི་ཁེ་ལ་བརྐམ་དད་པས་ངས་མི་འདི་ཡང་དག་པར་གཤེགས་པས་སེམས་ཅན་དམྱལ་བར་ལྟུང་ཞེས་བཤད་དོ། །ཤཱ་རིའི་བུ། ད་ངས་མངོན་ཞིང་བྱེ་བྲག་ཕྱེད་པར་བསྒོའོ། ། མི་ལ་ལ་ཞིག་འདི་ལྟ་བུའི་ཆོས་ཀྱི་དཀོན་མཆོག་ལ་ལོག་ཅིང་གལ་ན། ལེགས་པར་སྐྱེ་བའི་གནས་ལ་གཞར་སྐལ་པ་ཡོང་མེད་དེ། ངན་པའི་གནས་འབའ་ཞིག་ཏུ་སྐྱེ་ལ་རྟག་པར་ལོང་སྟེ་མིག་མེད་དོ། །ཤཱ་རིའི་བུ། དགེ་སློང་དག་དྲེགས་ཤིང་ལེ་ལོ་བདོའོ། །དར་ཏེ་ངེས་པར་འཆང་མི་ནུས་པས་ངའི་དྲང་པོའི་ཆོས་བཤིག་གོ། མི་ཕལ་གཞན་འཚེ་བ་མི་ནུས་ཏེ། གསོ་བ་ཁེའི་ཕྱིར་ངའི་ཆོས་བཤིག་གོ། །ཤཱ་རིའི་བུ། འདི་ལྟ་བུའི་ཆོས་ཀྱི་དཀོན་མཆོག་ནི། དེའི་ཆེ་མེད་པར་བཤིག་གོ། ཅིའི་ཕྱིར་ཞེ་ན།
259b
དེ་ལྟ་བུའི་ཆོས་ཀྱི་དཀོན་མཆོག་ནི། སངས་རྒྱས་ཐམས་ཅད་ཀུན་གྱིས་རི་མོ་གུས་པ་སྟེ། རང་སངས་རྒྱས་དང་དགྲ་བཅོམ་པ་ལ་སོགས་པ་ཀུན་གྱིས་རི་མོ་གུས་པར་བྱ་བ་ནི། ཚུལ་ཁྲིམས་ཞིག་པའི་དགེ་སློང་ལེ་ལོ་ཡར་སྐྱེ་བས་ཆོས་ངེས་པར་མ་བཤད་དེ། དགེ་སློང་གཞན་ལ་སོགས་པས་དེའི་ཚེ་ཀུན་གྱིས་ངའི་ཆོས་ལ་བརྙས་ཤིང་ལེ་ལོ་བྱས་ནས་ཀུན་གྱིས་བསྲིངས་སྤངས་ཏེ་འཇུངས་བརྐམ་ཆེར་སྲེད་ཅིང ། འཚོ་ནམ་གྱི་ལས་ལ་གཅིག་ཏུ་སེམས་ཤིང་ནོར་ཁེ་རིན་ཆེར་འཛིན། ཕྲག་དོག་གིས་བཅིངས་པས་རྟག་པར་འཐབ་རྩོད་ལ་སྲེད་ཅིང་རེས་ཀྱི་ཤ་འཁོན་སྐྱེས་ལ་གཅིག་ལ་གཅིག་གུས་པའི་བག་མི་བྱེད་དོ། །སེམས་ཀྱི་རང་བཞིན་ཡང་རྒོད་པ་སྤྲེའུ་དང་མཚུངས་ཏེ། ཆོག་བསྒྱུར་བཅོས་ནས་ངན་པའི་ལས་རྣམས་སྤྱོད་དེ། དགེ་སློང་གི་ཆོས་ལས་ནི། ཕྱིར་ནུར། མཇངས་ཤིང་འཕྲུལ་པ་ནི། བསྲིངས་སོ། །ཤཱ་རིའི་བུ། འདི་ལྟ་བུའི་མི་ངན་པས་དེ་ལྟ་བུའི་ཉེས་པ་\?\་བཅབས་ཏེ་འདོད་པ་མང ། བཙལ་བ་མང་བས་ནོར་སྤྱད་དེ། དེ་རང་གསོས་པས་བདུད་ངན་པས་དེའི་སེམས་རིག་སྟེ། ཐབས་སྤྱད་པས་ཐ་དད་པར་བྱས་ཏེ་སོ་སོར་གྱེས་བཤིག་ནས་རོ་གཅིག་པའི་དགེ་འདུན་དཀོན་མཆོག་ལ་སྡེ་ལྔར་བགོས་ཏེ། སྡེ་ལྔར་ཡོད་པས་འཐབ་རྩོད་པ་སྐྱེས་ཤིང་གཅིག་ལ་གཅིག་ཡིན་མ་ཡིན་པ་དང ། ཉེས་འཁྲུལ་པ་སྨོས་
260a
༄#། །བརྗོད་དོ། །ཤཱ་རིའི་བུ། ད་ལྟར་གྱི་དགེ་སློང་ནི། གཅིག་གིས་གཅིག་བསྟན་བསླབ་སྟེ་གཅིག་ལ་གཅིག་གི་རི་མོ་གུས་ཤིང་སེམས་གཅིག་ཏུ་མཐུན་པར་སྤྱོད་དེ། སངས་རྒྱས་ཀྱིས་བཤད་པ་བཞིན་དུ་མི་འགལ་ལོ། །དེ་ཙམ་གྱི་ཚེའི་དགེ་སློང་ནི། གཅིག་ལ་གཅིག་མི་སྟོན་མི་སློབ། གཅིག་ལ་གཅིག་རི་མོ་མི་གུས། ངན་པ་བྱེད་པ་མཐོང་ན། དེས་འཇིགས་ཏེ་བཏང་ནས་ཆོས་སུ་སྤྱད་དེ། གཅིག་ལ་གཅིག་བསྟན་བསླབ་པར་མི་ནུས་སོ། །ལ་ལ་མང་པོ་ཐོས་པ་དང ། ཤེས་རབ་ཟབ་མོ་ཡོད་མོད་ཀྱི། འོན་ཀྱང་དྲེགས་ཤིང་ལེ་ལོ་སྲེད་དོ། །མི་གཞན་ལ་བརྙས་སྨད་ནས་སོ་སོའི་སྤྱོད་ཅིང་རང་གིས་བརྗོད་པ་བཙུགས་ཏེ་གཅིག་གིས་གཅིག་མཐོང་བར་མི་དགའ་ན། བསྟན་པ་མནོད་མི་ནུས་པ་ལྟ་སྨོས་ཀྱང་ཅི་དགོས། ཤཱ་རིའི་བུ། ཡང་དག་པར་གཤེགས་པ་འཇིག་རྟེན་ན་བཞུགས་པའི་ཚེ་ན་དཀོན་མཆོག་གསུམ་རོ་གཅིག་ན། ང་མེད་པར་འདས་པའི་ཕྱི་ན་བགོས་ཏེ་སྡེ་ལྔར་བྱས་སོ། །ཤཱ་རིའི་བུ། བདུད་ངན་པ་ད་རུང་ལུས་སྦས་ཏེ། ལྷས་བྱིན་ལ་བསྒྲོགས་བསྟངས་ནས་ངའི་ཆོས་དང ། དགེ་འདུན་བཤིག་གོ། །ཡང་དག་པར་གཤེགས་པ་ཡེ་ཤེས་ཆེན་པོ་ད་ལྟར་འཇིག་རྟེན་ན་བཞུགས་བཞིན་པས་ན། བདུད་ངན་པ་ཆེན་པོས་འབྱོར་པར་མི་ནུས་སོ། །མ་འོངས་པའི་དུས་ན་བདུད་ངན་པས་
260b
ལུས་བསྒྱུར་ལ་དགེ་སྦྱོང་གི་གཟུགས་སུ་བྱས་ཏེ། དགེ་འདུན་གྱི་ནང་དུ་ཞུགས་ནས་ཡོན་པོ་རྣམ་པ་མང་པོ་བཤད་དེ། སེམས་ཅན་མང་དུ་ཡོན་པོ་མཐོང་བར་འཇུག་པར་བྱས་ནས་དེ་ལ་ཡོན་པོའི་ཆོས་བཤད་དེ། འབྱི་ལེའུ་ད་ལག་པ་ལ་དོན་གྱིས་འདྲན་ཏོ་ཞེས་ཟེར་ཏེ། ཤེས་ལྔའི་དོན་བསམ་བཞིན་དུ་ཞི་བའི་དོན་ཡོད་པ་ཐམས་ཅད་ཀྱི་དོན་ཡང་ཡོད་པའི་དོན་ཐོབ་པར་ཡོད་དོ་ཅོག་གི་དོན་ཏོ། །དེའི་ཚེ་བདུད་ངན་པས་འདི་ལྟ་བུ་ལ་སོགས་པ་ཡོན་པོ་འདོད་ཆགས་པའི་དོན་བཤད་དེ། དེ་ལྟ་བུའི་དོན་ནི། སངས་རྒྱས་རྣམས་དང ། སངས་རྒྱས་ཀྱི་སློབ་མས་བཤད་པ་མ་ཡིན་ནོ། །དེའི་ཚེ་མྱ་ངན་པ་རྣམས་བདུད་ཀྱིས་བསླད་པས་སོ་སོར་ཅི་མཐོང་བ་ལ་ཆགས་ཏེ། བདག་གི་ཡིན། ཕའི་བུ་མ་ཡིན་ཞེས་ཟེར་རོ། །ཤཱ་རིའི་བུ།་ཡང་དག་པར་གཤེགས་པས་སྔ་ནས་ད་དུང་མ་འོངས་པའི་དུས་ཀྱི་ནང་ན་དེ་ལྟ་བུ་ལ་སོགས་པ་ཆོས་འཇིག་པའི་དོན་ཡོད་པ་མཐོང་བས་ན་ཆེད་ཀར་ཆོས་ཟབ་མོ་འདི་བཤད་དེ། བདུད་ངན་པར་ཆགས་པར་བྱས་པའི་དོན་རྣམས་ཀུན་བཅད་དོ། །ཤཱ་རིའི་བུ། དེ་ཙམ་གྱི་ཚེ་ན་ཛམྦུའི་གླིང་གི་ནང་ན་ལེ་ལོ་ཡར་སྐྱེ་བའི་མི་དེ་མང་སྟེ། དགེ་བའི་ལེགས་པ་ཅུང་ཞིག་བྱས་པས་ཀྱང་ཐལ་བྱུང་ཆོས་ལ་མ་ཐོབ་བོ། །ཞེས་ཟེར་ཏེ། ཚེ་ཟད་པའི་འོག་ཏུ་ལམ་ངན་པར་ལྟུང་ངོ ། །དེ་ཅིའི་ཕྱིར་ཞེ་ན། མི་དེ་ཉིད་མཚན་དུ་བདག་གིས་ཀྱང་ལམ་ཐོབ་ཅེས་ཟེར།
261a
༄#། །མི་གཞན་གྱིས་ཀྱང་ལམ་ཐོབ་བོ། །ཞེས་ཟེར་བརྗོད་ཅིང་བཤད་དེ། འཕྲུལ་གྱི་མིས་ཡོན་ཕུལ་བ་ཐུགས་ཐུབ་པར་ལེན་ཏེ། དེ་ལྟ་བུའི་མི་ནི། ལྷ་དང ། མི་དང ། འཇིག་རྟེན་ཐམས་ཅད་ཀྱི་དགྲ་ངན་པ་ཆེན་པོ་ཞེས་བྱའོ། །དེ་ལྟ་བུའི་མི་གཏི་མུག་གིས་མཆོག་གི་བདེན་པའི་གཞུང་བཤད་པ་ཐོས་ན། དངངས་དོགས་ཤིང་འཇིགས་སྐྲག་པ་ནི། ཁུང་ཟབ་མོར་ལྟུང་བ་དང་མཚུངས་སོ། །ཤཱ་རིའི་བུ། དགེ་སློང་གཞན་དོན་འདི་ལྟ་བུ་ལ་སྲེད་པ་ཡོད་དེ། ལྷན་ཅིག་ཏུ་འདུས་ཚོགས་ནས་སངས་རྒྱས་རྣམས་ཀྱི་བླ་ན་མེད་པའི་བྱང་ཆུབ་དྲལ་བཤིག་གོ། དེའི་ཚེ་ལེ་ལོ་ཡར་སྐྱེ་བའི་མི་ཡོན་པོ་ཆགས་པ་མང་སྟེ། བདུད་ངན་པས་ཀྱང་ཁྱིམ་ན་འདུག་པ་དང ། ཁྱིམ་ནས་བྱུང་བའི་སེམས་བསླད་དཀྲུགས་ཏེ། ཆོས་མ་ཡིན་པ་ལ་ཆགས་པར་བྱས་སོ། །དྲང་པོའི་ཆོས་འཆད་པ་ལ་ནི། ར་མདའ་གཏོང་བ་ཉུང་བས་ཐལ་བྱུང་གྱེས་ཞིག་སྟེ་སླར་ཚུགས་པར་མི་རུང་ངོ ། །ཤཱ་རིའི་བུ། དེའི་ཚེ་འཇིག་རྟེན་ན་དགེ་སློང་གཞོན་ནུ་མང་དུ་ཡོད་དེ། དབང་པོ་རྣོ་བ་ཡོད་དོ། །ཇི་ལྟ་ཞེས་བྱས་ན། ཁྱིམ་ནས་བྱུང་བ་གཞན་ནི། ངན་འཁྲུག་པའི་ལྷག་མ་ཡོད་པས་སླར་མིའི་ནང་དུ་སྐྱེས་ནས་གདོད་ཡང་སླར་ཁྱིམ་ནས་བྱུང་སྟེ། དགེ་སློང་དེ་དག་རྟོག་ཅིང་འདྲི་བ་ལ་དགའ་ཞིང་མོས་པས་སངས་རྒྱས་ཀྱི་ཆོས་མཆོག་གི་བདེན་པའི་གཞུང་རྗེས་གཅོད་
261b
ཅིང་ཚོལ་ལོ། །ཤཱ་རིའི་བུ། ལེ་ལོ་ཡར་སྐྱེ་བ་རྣམས་ནི། བདུད་ཀྱིས་བསླད་དཀྲུགས་པས་སྲོག་གསོ་བ་འབའ་ཞིག་ཚོལ་ཏེ། བདེན་པར་མི་ཐ་མལ་པ་ཡིན་ན། བདག་ན་རེ། དགྲ་བཅོམ་པའོ། །ཞེས་ཟེར་ཏེ། དགེ་སློང་གཞོན་ནུ་རྣམས་ལ་སོགས་པ་ལ་ཟེར་པ། ལུས་དང ། ཁ་དང ། ཡིད་དགེ་ན། དེ་ནི། སངས་རྒྱས་ཀྱི་ཆོས་ཀྱི་མཆོག་གི་བདེན་པའི་གཞུང་ཡིན་ནོ། ། ཚུལ་ཁྲིམས་གཙང་མ་ལེགས་པར་བསྲུངས་ལ་ཆོས་ཀྱི་ཡི་གེ་ཁ་དོན་དང་བཀླགས་ཏེ་མང་པོ་ཐོས་པ་འགྲུས་པར་སྤྱད་ན། དེའི་མིང་མི་འགལ་བར་བརྗོད་པའི་རྒྱུ་ཞེས་བྱ་སྟེ། དེ་ནི། སེམས་གཙང་ཞིང་སངས་རྒྱས་ལ་ཡིད་ཆེས་པའོ། །གཅིག་ཏུ་ན་མཆོག་གི་བདེན་པའི་གཞུང་ཡོད་ཀྱི། སེམས་ཀྱི་ནང་དུ་བཏགས་པ་བཞིན། གཅིག་ཏུ་ན་མྱ་ངན་ལས་འདས་པ་བསམ་ན། སྡུག་བསྔལ་རྣམ་གསུམ་འགགས་ཏེ། ལྔ་ཕུང་དང་ཞུགས་པ་བཅུ་གཉིས། ཁམས་བཅོ་བརྒྱ་སྐྱོ་བྲལ་བར་ནུས་སོ། །ཁྱེད་ལ་སོགས་པ་གནས་དབེན་པ་ན་ཕུང་པོ་དང ། ཁམས་དང ། ཞུགས་པའི་ཆོས་འདི་ལ་རྟོགས་ཤིག་དང ། ཀུན་རྟོགས་པ་མེད་པའོ། །བདག་གི་ལུས་ལ་བརྟགས་ན། མི་གཙང་བ་རྣམ་པ་མང་སྟེ། ཁྱེད་ལ་སོགས་བས་དེ་ལྟ་བུར་བརྟག་ནུས་ན། རྒྱུན་དུ་ཞུགས་པའི་འབྲས་བུ་ཐོབ་བོ། །ཡང་གཅིག་ཏུ་ན་ལྔ་ཕུང་ལ་སོགས་པའི་ཆོས་འདི་ལ་རྟག་པ་མེད། སྡུག་བསྔལ་སྟོང་པ་སྟེ། ཡང་དག་པའི་ང་མེད། སྲ་མཁྲང་བ་
262a
༄#། །མེད་པར་ཟབ་ཏུ་རྟོགས་ན། གདོང་ལན་གཅིག་ཕྱིར་འོང་བ་ཐོབ་བོ། །བསྒྱུར་ཏེ་ཡང་ཟབ་ཏུ་རྟོགས་ན། ཕྱིར་མི་འོང་བ་དང ། དགྲ་བཅོམ་པ་ཐོབ་སྟེ། དེ་ནི། མཆོག་གི་བདེན་པ་གཞུང་ཡིན་ཞེས་ཟེར་རོ། །དེའི་ནང་ན་དགེ་སློང་གཞོན་ནུས་སླར་དྲིས་ན། སངས་རྒྱས་ཀྱི་ཆོས་ཀྱི་ན་དགྲ་བཅོམ་པའི་འབྲས་བུ་ཐལ་བྱུང་དུ་མཆོག་གི་གཞུང་ཞེས་བྱའམ་ངེད་ལ་སོགས་པའང་དེའི་དོན་ཤེས་ཏེ། དགྲ་བཅོམ་པ་ནི། མཆོག་གི་གཞུང་མ་ཡིན་ནོ། །ད་ལྟར་གྱི་ལྔ་ཕུང་འདི་དྲན་ཞིང་བསམ་པས་སྐྱེས་སམ། མི་དྲན་པ་བསམ་པས་སྐྱེས། ལན་གླན་པ་ལྔ་ཕུང་གིས་དྲན་པ་བསམ་པས་སྐྱེས་སོ། །མི་དྲན་མ་བསམ་པས་མི་སྐྱེའོ། །ཡང་དྲིས་པ། དྲན་པ་བསམ་པ་དང་ལྔ་ཕུང་ཐ་དད་དམ་ཐ་མི་དད། ལན་སྨྲས་པ། ལྔ་ཕུང་དང་མཚུངས་ཏེ། དྲན་པ་བསམ་པའང་དེ་བཞིན་ནོ། །ཡང་དྲིས་པ། ལྔ་ཕུང་དང་མཚུངས་ཏེ། དྲན་པ་བསམ་པའང་དེ་བཞིན་དུ་ཟིན་ན། ལྔ་ཕུང་སེམས་པ་སུ་ཡིན། ལན་སྨྲས་པ། ལྔ་ཕུང་སེམས་པ་མེད་དུ་ཟིན་ན། མྱ་ངན་ལས་འདས་པའང་མེད་དོ། །བདེན་པར་ན་ལྔ་ཕུང་སེམས་པ་མེད་དོ། །དེ་ལྟ་བས་ན། དྲང་པོའི་འཕགས་པའི་ལམ་བརྒྱད་སྤྱད་དེ། མྱ་ངན་ལས་འདས་པར་ཆུད་པ་ཡོད་དོ། །ཞེས་ཟེར་རོ། །ཤཱ་རིའི་བུ། མ་འོངས་པའི་དུས་ན་དགེ་སློང་འདི་ལྟ་བུའི་བཟོད་པ་འབྱོར་གྱུར་བ་མང་ངོ ། །ཤཱ་རིའི་བུ། དེའི་ཚེ་ཚོགས་
262b
པའི་ནང་ན་ལྷ་ཕལ་མང་དུ་ཡོད་དེ། སངས་རྒྱས་ཀྱི་ཆོས་མཆོག་གི་བདེན་པའི་གཞུང་ཐོས་པར་དགའ་ན། ལེ་ལོ་ཡར་སྐྱེ་བ་དེས་བཤད་པ་ཐོས་པ་དང ། སེམས་ལ་དོགས་ཤིང་འགྱོད་པ་སྐྱེས་ཏེ། ཁུང་ཟབ་མོར་ལྟུང་བ་དང་མཚུངས་ནས་ཀུན་འདི་སྐད་ཟེར་རོ། །ཀཝའི་སངས་རྒྱས་ཤཱཀྱ་ཐུབ་པའི་ཆོས་ནི། ད་མྱུར་དུ་མེད་ལ་ཐུག་གོ། ཞེས་ཟེར་རོ། །ཤཱ་རིའི་བུ། དེའི་ནང་ན་དགེ་བ་འཕྱོར་གྲུབ་པའི་དགེ་སློང་ཡོད་པས། དགེ་སློང་འདི་ལ་འདི་སྐད་བྱས་སོ། །མི་གཏི་མུག་སྟོང་པར་རྒས་པ་ལེ་ལོ་ཡར་སྐྱེ་བ་ལྔའི་མཚན་མ་དང ། ལྔ་ཕུང་གི་མཚན་མ་དང ། ཞུགས་པ་བཅུ་གཉིས་དང ། ཁམས་བཅོ་བརྒྱད་ཀྱི་མཚན་མ་ཡོད་དུ་ཟིན་ན། ཚིག་དེ་ཉན་ཏོ། །ཞེས་ཟེར་ཏེ། མི་དགའ་ནས་རང་སྟན་ལ་འདུག་པ་ལངས་ཏེ་སོང་ངོ ། །ཤཱ་རིའི་བུ། དེའི་ཚེ་ན་ལྷ་རྣམས་སེམས་ཤིན་ཏུ་དགའ་ཞིང་གཞའ་སྟེ་ཕྱོགས་པ་ཞིར་སྐད་ཕྱུང་སྨྲས་པ། སངས་རྒྱས་ཤཱཀྱ་ཐུབ་པའི་སློབ་མ་མཁས་པ་ད་དུང་ཡོད་དོ། །ཞེས་ཟེར་ཏོ། །དེའི་ཚེ་མི་གཞན་ལ་སོགས་པའང་དགེ་བའི་རྩ་བ་མི་ཉུང་བས་མི་གཙང་བ་དེ་བཤད་པ་ཐོས་པར་མི་དགའ་སྟེ། དེ་ནི། བདག་ཏུ་ལྟ་བ་དང ། གང་ཟག་ཏུ་ལྟ་བའོ། །ལྷ་རྣམས་ཀྱིས་འདི་ཐོས་པ་དང ། ཀུན་ཤིན་ཏུ་དགའ་སྟེ། དབང་པོ་རྣོ་བ་དེ་སྙན་པར་བསྟོད་པ་བསྔགས་ཏེ་འདྲི་ཞིང་ལན་ལྡོན་པ་ལ་དགའ་སྲེད་པས། ཀུན་གྱིས་སྐྱེ་བ་མེད་པའི་ཆོས་ཀྱི་བཟོད་པ་ཐོབ་པ་ཡང་
263a
༄#། །དག་ཆེས་ཟེར་ཏོ། །དེ་ལྟ་བུ་ལ་སོགས་པ་མི་གནས་གཅིག་ཏུ་འདུག་སྟེ་ལྷན་ཅིག་ཏུ་བསྡོངས་ཏེ་འགྲོགས་ལ་མི་ཕལ་ཉུང་ལ་དཔུང་སྡོམས་ཀྱང་ཞན་ཏོ། ། ཤཱ་རིའི་བུ། དེའི་ཚེ་བའི་བུ་ཡང་དག་པ་རྣམས་ཀྱང་རིགས་ཀྱི་རྒྱུད་ལ་ཚིག་ནོར་བ་མེད་ན། ཡོན་མི་ཐོབ་པ་དང ། མཆོད་རྟེན་དང ། གཙུག་ལག་ཁང་དུ་མི་གནས་པ་ལྟ་སྨོས་ཀྱང་ཅི་དགོས། ཤཱ་རིའི་བུ། ཁྱོད་རེ་ཞིག་ལྟོས་ཤིག་།དེ་ནས་ཡང་དག་པར་གཤེགས་པས་ཐལ་བྱུང་བརྙས་བཤུད་པ་བྱས་ཏེ། ང་མེད་པར་འདས་པའི་ཕྱི་ན་ངའི་བུ་རྣམས་ལ་སོགས་པ་ཅིའང་ཐོབ་པ་མེད་པའི་བཟོད་པ་ཞི་བ་ལ་མཁས་པས་ཀྱང་དེའི་ཚེ་ང་ལ་བརྙས་སྨད་དོ། །དེ་ལྟ་བས་ན། བསྐལ་པ་གྲངས་མེད་པའི་བར་དུ་དགྲ་རྣམས་ཕུལ་ནས་ལྷའི་བུ་རྒྱལ་པོ་རྣམས་ཐམས་ཅད་བསྟན་ཏེ་སེམས་གཙང་དག་པར་བྱས་སོ། །དེ་ནས་གདོད་ངའི་བུ་རྣམས་ཀྱིས་ཕའི་གྲལ་བདེ་བར་ཐོབ་པར་བྱས་སོ། །ཤཱ་རིའི་བུ། ཡང་དག་པར་གཤེགས་པས་འཇིག་རྟེན་གྱི་མི་དང ། ལྷ་ཐམས་ཅད་དབང་དུ་བྱས་ཏེ། ཡང་དག་པར་གཤེགས་པས་ཆོས་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་སྟེ་བླ་ན་མེད་པའི་ཆོས་ཀྱི་འཁོར་ལོ་བསྐོར་ཏོ། །དགེ་སྦྱོང་དང ། བྲམ་ཟེ་དང ། ལྷ་དང ། བདུད་དང ། ཚངས་པས་བསྐོར་མི་ནུས་སོ། །ཤཱ་རིའི་བུ། དེ་ལྟར་མངོན་པར་བསྟན་པ་ཡང་
263b
དག་པར་ཤེགས་པ་འདས་པའི་ཕྱི་ན་ངའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ངའི་སློབ་མ་རྣམས་ལ་སོགས་པས་རྒྱ་ཆེར་བཀྲམ་ཞིང་ཁྱབ་པར་བྱས་ན། མི་ངན་གཞན་རྣམས་ཀྱིས་མངོན་པའི་དབང་བྱ་མི་ནུས། འཇིགས་པ་མེད་པའི་སྦྱིན་པའང་མི་ནུས་སོ། །ཤཱ་རིའི་བུ། དཔེར་ན། སྦྲང་རྩི་བུམ་པ་ལམ་གྱི་བཞི་མདོར་བཞག་སྟེ་ཚིག་འདི་སྐད་བྱས་པ་དང་མཚུངས་སོ། །མི་ལ་ལ་ཞིག་གིས་སྤུ་ཉག་མ་གཅིག་གིས་ཐོག་མ་ཙམ་ཞིག་ཟ་ཕོད་ན། རྟག་པར་མི་རྒ་མི་འཆིའོ། །དེ་ནས་ལྷ་དང་འཇིག་རྟེན་གྱི་མི་རྣམས་སོ་སོར་རལ་གྲི་མཚོན་ཆ་ཐོགས་ཏེ་བུམ་པའི་དྲུང་ན་དེའི་ཚེ་སྲུང་བ་རྣམས་སོ་སོ་ནས་ཚིག་འདི་སྐད་འཛེར་ཏོ། །མི་ལ་ལ་སྤུ་ཉག་མ་གཅིག་ཟ་བ་ཡོད་ན། བདག་ཅག་གིས་གསད་དོ་ཞེས་འཛེར་ཏོ། ། ཤཱ་རིའི་བུ། དེའི་ནང་ན་མི་གཅིག་མཁྱུད་པུར་འདི་སྙམ་དུ་སེམས་སོ། །བུམ་པ་འདིའི་ནང་གི་སྦྲང་རྩི་ལ་སྤུ་ཉག་མ་གཅིག་ཐོག་མ་ཙམ་ཞིག་ཟོས་ན། མི་རྒ་མི་ཤི་ན། བདག་ད་ཅིའི་ཕྱི་ནས་ཤི་བས་འཇིགས་ཤིང་མི་ཟ། ཐོབ་ཏུ་ཟིན་ཏེ་མི་ཟ་ན། མོད་བཞིན་སྲུང་མ་རྣམས་ཀྱིས་འཇིགས་པ་མེད་པ་ལ་བརྟགས་ཏེ། རྒ་བ་དང ། ན་འཆི་མེད་པར་ཡང་ཐོབ་པར་རུང་ན། དེ་བཞིན་དུ་སེམས་བཏུལ་ཏེ་ཚེ་སྲོག་མི་ཕངས་པར་ཐལ་བྱུང་བུམ་པའི་ནང་དུ་སོང་ན། སྲུང་མ་རྣམས་སོ་སོར་རལ་གྲི་དང ། མཚོན་ཆ་ཁྱེར་ཏེ་བརྟོད་ནས་བསད་པར་བྱས་སོ། །ཤཱ་
264a
༄#། །རིའི་བུ། མི་དེས་རལ་གྲི་མཚོན་ཆས་མ་ཕོག་པར་རྟུལ་ནུས་ཏེ། ཐིགས་པ་གཅིག་ཟོས་སུ་ཟིན་ན། རྒུད་པའི་ནད་པས་ཐར་ཏེ། རྒ་ཤིའང་མེད་དོ། །དེ་ལྟ་སྟེ། ཤཱ་རིའི་བུ། མི་ངན་པ་མང་དུ་ཡོད་པས། བདུད་དང་བདུད་ཕལ་རྣམས་ཀྱིས་ངའི་ཆོས་མེད་པར་བྱ་བར་བྱས་སོ། །ཡང་དག་པར་གཤེགས་པ་འདས་པའི་ཕྱི་ནས་མི་ལ་ལ་ཞིག་སྟོང་པ་ཉིད་ཆོས་བཞིན་དུ་ནུས་ཏེ། ཁོང་དུ་ཆུད་ལ་ཐེ་ཚོམ་མེད་ན། གདོད་ཆོས་སོ་ཅོག་ལ་སེམས་ཀྱིས་ཅིའང་ཐོགས་པ་མེད་དོ། །བླ་མའི་བཟོད་པ་འབྱོར་གྲུབ་པོ། །དེའི་ཚེ་མི་ངན་པས་བརྙས་ཏེ་ཆོས་ལམ་དེ་དྲལ་བཤིག་པར་བྱས་མོད་ཀྱི། མི་དེས་ལུས་དང་སྲོག་མི་ཕངས་པར་ནུས་ན། བརྩོན་འགྲུས་རྟག་ཏུ་སྤྱོད་ན་ཆོས་སོ་ཅོག་ཀུན་ཆུད་ལ་སྐྱེ་བའང་མེད། བྱ་བའང་མེད་དེ། སྐྱེ་རྒ་ན་འཆི་ལས་གྲོལ་ཐར་པ་ཐོབ་པོ། །ཤཱ་རིའི་བུ། སྦྲང་རྩིའི་བུམ་པ་ནི། སངས་རྒྱས་ཀྱི་ཆོས་ཀྱི་གཞུང་ཡིན་ནོ། །ལྷ་དང་འཇིག་རྟེན་གྱི་མི་རྣམས་ཀྱིས་བུམ་པ་བསྲུངས་པ་ནི། མི་ངན་བདུད་ཀྱི་དོན་ལ་སྲེད་པ་ཡིན་ཏེ། བདག་གི་བསོད་ནམས་ཆེན་པོའང་སྟོར། མི་གཞན་ཡང་དག་པའི་མཚན་མ་སྤྱད་པའང་བཀབ་སྟེ། བསོད་ནམས་ཆེན་པོ་སྟོར་བར་བྱས་སོ། །ཤཱ་རིའི་བུ། ལེ་ལོ་ཡར་སྐྱེ་བ་ནི། ཀུན་བདུད་ཀྱི་གྲོགས་པོ་ཡིན་ཏེ། བདུད་ཀྱི་དོན་གྲུབ་པར་སྟོན་ཅིང་ཀུན་སྐྱེ་བ་མེད་པའི་ཆོས་ལ་འཕྱ་ཞིང་
264b
གཤེའོ། །ཡང་ཤཱ་རིའི་བུ། མི་གཙང་བ་འཆད་པ་ནི། བདག་ཏུ་ལྟ་བ་དང ། གང་ཟག་ཏུ་ལྟ་བ་དང ། སམས་ཅན་དུ་ལྟ་བ་དང ། ལྔ་ཕུང་དང ། ཞུགས་པ་བཅུ་གཉིས་དང ། ཁམས་བཅོ་བརྒྱད་དུ་ལྟ་བ་སྟེ། མཐོང་བར་ཐོབ་ཅེས་ཟེར་ཞིང་སེམས་ལ་ལམ་ཐོབ་པར་འཛིན། མྱ་ངན་ལས་འདས་པ་ཐོབ་པར་འཛིན་ཏེ། ཀུན་གྱིས་ཀྱང་འདི་ལྟ་བུ་དྲང་པོ་ཆོས་ལ་འཕྱ་ཞིང་སྐྲོད་དོ། །ཅིའི་ཕྱིར་ཞེ་ན། མི་དེ་དག་ཁང་སྟོང་པ་ལ་འདོད་ཆགས་པའི་ཕྱིར་བདུད་རྣམས་ཀྱང་མ་ཡིན་ལ། བདུད་ཀྱིས་ཀྱང་བསླད་དཀྲུགས་པས་ངའི་དྲང་པོའི་ཆོས་ནི། བདུད་ཀྱི་དོན་དུ་བྱས་སོ། །ཤཱ་རིའི་བུ། ཁྱིམ་ན་འདུག་པའང་རུང ། ཁྱིམ་ནས་བྱུང་བའང་རུང་སྟེ། བདག་ཏུ་ལྟ་བ་མེད། གང་ཟག་ཏུ་ལྟ་བ་མེད། སེམས་ཅན་མེད་དེ། མཐའ་ཡུན་དུ་སྟོང་པའི་ཆོས་ཐོས་ལ་དངངས་དོགས་ཤིང་སྐྲག་ན། དེ་ལྟ་བུའི་མི་ནི། བདུད་ཀྱིས་བསྟན་བསླབ་པར་མངོན་ཏེ། རི་མོའི་དགེ་སློང་ཡིན། ཆོས་རྐུ་བའི་ཆོག་ངན་པ་ཡིན་ནོ། །ཤཱ་རིའི་བུ། དེ་ལྟ་བུའི་མི་ནི། བདག་ཏུ་ལྟ་བ་དང ། སེམས་ཅན་དུ་ལྟ་བ་དང ། ཡོད་པར་མཐོང་བ་དང ། མེད་པར་མཐོང་བ་དང ། རྟག་པར་མཐོང་བ་དང ། ཆད་པར་མཐོང་བ་ཡིན། ཀུན་བདུད་ཀྱི་མི་སྟེ། སངས་རྒྱས་ཀྱི་སློབ་མ་མ་ཡིན་ནོ། །ཇི་ལྟ་ཞེ་ན། ངའི་ཆོས་ཀྱི་ཡི་གེའི་ནང་ནས་བཤད་པ་འཇིག་རྟེན་ཐམས་ཅད་ཀུན་ནི། སྟོང་པ་སྟེ། ངའི་མེད་པའི་གནས་ཀྱང་མེད། ཟག་པ་
265a
༄#། །མེད། སེམས་ཅན་མེད། རྟག་པ་མེད། མི་འགྱུར་བ་མེད། མི་འཇིགས་པའི་ཆོས་མེད་ན། དེ་ལྟ་བུའི་མི་ངན་པས་ཀྱང་ཀུན་གྱིས་ཆོས་ཀྱི་ཡི་གེ་དང ། ཁ་ཏོན་དུ་བཀླགས་ཏེ་མི་གཞན་ལ་བཤད་ན། སེམས་ཅན་ནི། བདག་ཏུ་ལྟ་བ་དང ། གང་ཟག་ཏུ་ལྟ་བ་ལ་ཆགས་པ་དེ་ལྟ་བུའི་མི་གཏི་མུག་ནི། མིང་སྡུག་བསྔལ་གྱི་རྒྱུ་བྱེད་པ་ཞེས་བྱའོ། །མིང་མགོ་གཉིས་བསྒྱུར་བ་ལ་བཟློག་པ་ཞེས་བྱའོ། །མིང་འཐབ་འཁྲུག་ཅིག་དགེ་འདུན་འཇིག་པ་ཞེས་བྱའོ། །མིང་ལམ་གྱི་ཆོས་བསྒོས་པ་སྦགས་པ་ཞེས་བྱའོ། །མིང་དགེ་སྦྱོང་ནང་གི་རྟོག་པ་ཞེས་བྱའོ། །མིང་སྡིག་པ་ངན་པ་སྨེ་བཙོག་པ་ཞེས་བྱའོ། །མིང་ཚིག་གི་བཤད་པ་འབའ་ཞིག་ཡོད་ཅེས་བྱའོ། །མིང་སྒྱུ་མའི་དགེ་སྦྱོང་ཞེས་བྱའོ། །མིང་དགེ་སྦྱོང་གི་ནང་གི་དབུལ་པོ་ཞེས་བྱའོ། །མིང་ཁུར་ལྕི་བ་ཁྱེར་ཞེས་བྱའོ། །མིང་སངས་རྒྱས་རྣམས་ལ་བརྙས་བསླུས་པ་ཞེས་བྱའོ། །མིང་ལོག་པའི་སྡིག་མཐོང་བ་ཞེས་བྱའོ། །ཤཱ་རིའི་བུ། དེ་ལྟ་བུའི་མི་མིང་ལོག་པའི་དགྲ་ངན་པ་ཆེན་པོ་ཞེས་བྱའོ། །མིང་ངན་པའི་བཤེས་གཉེན་ཞེས་བྱའོ། །མིང་ཚུལ་ཁྲིམས་ཞིག་པ་ཞེས་བྱའོ། །མིང་ཡོན་པོ་ཐོབ་པ་ཞེས་བྱའོ། །མིང་མུར་འདུག་ཅེས་བྱའོ། །མིང་བདེན་པ་སྤྱད་པ་མེད་པ་ཞེས་བྱའོ། །མིང་གྲོགས་ངན་པ་ཞེས་བྱའོ། །མིང་གསེད་པའི་འདྲེ་ཞེས་བྱའོ། །མིང་
265b
མཛེ་རྨ་ཞེས་བྱའོ། །མིང་མནམ་སྨེ་ཞེས་བྱའོ། །མིང་ཚ་བས་སྲེག་ཞེས་བྱའོ། །མིང་གཅམ་སྒྱུ་ཞེས་བྱའོ། །མིང་མུན་གནག་ལྟུང་ཞིང་འདུག་ཅེས་བྱའོ། །མིང་ཚལ་ནགས་སྟུག་པོར་ཞུགས་ཞེས་བྱའོ། །མིང་སྐྱེ་ཤི་བཞིན་དུ་འབབ་ཅེས་བྱའོ། །མིང་ངན་པ་རིས་ཀྱིས་འབྱུང་ཞེས་བྱའོ། །མིང་སེམས་ཅན་དམྱལ་བ་ཞེས་བྱའོ། །མིང་བྱོལ་སོང་ཞེས་བྱའོ། །མིང་ཡི་དྭགས་ཞེས་བྱའོ། །མིང་ལྷ་མ་ཡིན་ཞེས་བྱའོ། །མིང་ལམ་དུ་མི་འཇུག་པ་ཞེས་བྱའོ། །མིང་མི་ལ་བརྙས་བསླས་ཞེས་བྱའོ། །མིང་རང་གི་ལུས་ལ་སྟོང་པ་ཞེས་བྱའོ། །མིང་མོ་དང་མཚན་སྤྱོད་པ་ཞེས་བྱའོ། །མིང་སྒྲ་ཆེན་པོ་འབོད་འགྲོགས་ཞེས་བྱའོ། །མིང་ཁེའི་ཞར་ལ་ཁེ་ཚོལ་བ་ཞེས་བྱའོ། །མིང་གཞན་ལ་འགོ་ཞིང་ཞེན་པ་ཞེས་བྱའོ། །མིང་རྟག་པར་འདྲན་ཏོར་བྱེད་པ་ཞེས་བྱའོ། །མིང་སེམས་འཁྲག་འཁྲུགས་པ་ཞེས་བྱའོ། །མིང་གནོད་དོ་ཅོག་ལ་བརྐམ་པ་ཞེས་བྱའོ། །མིང་གཤེ་ཞིང་གནོད་པ་ཞེས་བྱའོ། །མིང་གཏི་མུག་སྨོད་པ་ཞེས་བྱའོ། །མིང་ནོར་བརྙས་པ་ལ་སྲེད་པ་ཞེས་བྱའོ། །མིང་རྒུད་པའི་མྱ་ངན་གྱི་གནས་ཞེས་བྱའོ། །མིང་གྲོལ་ཐར་མེད་པ་ཞེས་བྱའོ། །མིང་མྱ་ངན་འཁྲུགས་པས་བཅིངས་པ་ཞེས་བྱའོ། །མིང་དགེ་སྦྱོང་གི་ལུས་མ་ཡིན་ཏེ་རི་མོའི་དགེ་སྦྱོང་ཞེས་བྱའོ། །དགེ་སྦྱོང་དག་།དགེ་སྦྱོང་མནམ་སྨེ་བ། དགེ་སྦྱོང་སྦང་རྣ་ཞེས་བྱའོ། །མིང་དགང་པར་དཀའ་ཞེས་
266a
༄#། །བྱའོ། །མིང་གསོ་དཀའ་བ་ཞེས་བྱའོ། །མིང་ཆོག་ཞིག་པ་ཞེས་བྱའོ། །མིང་ཁྲེལ་བསལ་མེད་པ་ཞེས་བྱའོ། །མིང་མགོ་གཏུབས་བཅད་པ་ཞེས་བྱའོ། །མིང་ལུས་གཟུགས་ཞིག་པ་ཞེས་བྱའོ། །མིང་ཆོས་གོས་མགུལ་བར་བཏགས་པ་ཞེས་བྱའོ། །མིང་རང་མུན་ནག་ཏུ་ཞུགས་པ་ཞེས་བྱའོ། །མིང་འདོད་ཆགས་མང་པོ་ཞེས་བྱའོ། །མིང་ཞེ་སྡང་མང་པོ་ཞེས་བྱའོ། །མིང་གཏི་མུག་ཆེན་པོ་ཞེས་བྱའོ། །མིང་བཀབ་པ་ལྔས་བསྒྲིབས་གཡོགས་པ་ཞེས་བྱའོ། །མིང་ནུབ་པ་ཞེས་བྱའོ། །མིང་སྒྱུ་མ་ཞེས་བྱའོ། །མིང་སྟོང་པ་ཞེས་བྱའོ། །མིང་མུགས་པ་ཞེས་བྱའོ། །ཤཱ་རིའི་བུ། དེ་ལྟ་བུའི་མི་སྟོང་པ་ཞེས་བྱ་བ་སངས་རྒྱས་ཆོས་སོ་ཅོག་གིས་དགེ་བར་བསྟོད་པའི་མིའི་མཚན་ལས་ལོག་སྟོར་བས་ན།་མིང་སྟོར་བ་ཞེས་བྱའོ། །དགེ་སྦྱོང་ངོ་ཅོག་གི་ལེགས་པའི་དོན་དང ། དགེ་སྦྱོང་གི་ཆོས་ཀྱི་དོན་ལ་ལོག་སྟོར་བས་ན། མིང་སྟོར་བ་ཞེས་བྱའོ། །ཇི་ལྟ་བུར་ན་སྒྱུ་མ་ཞེས་བྱ་འཕགས་པ་ཆོས་ཀྱི་ཕྱི་ལོགས་ན་འདུག་པས་ནི། མིང་སྒྱུ་མ་ཞེས་བྱའོ། །སྟོང་པ་དང་མཚན་མ་མེད་པ་དང་སྨོན་པ་མེད་པའི་ཆོས་བསྲིངས་སྤངས་པས་ན། མིང་སྒྱུ་མ་ཞེས་བྱའོ། །ཤཱ་རིའི་བུ། དེ་ལྟ་བུའི་མི་ངན་པ་ནི། བདུད་དགའ་བར་བྱ་ནུས་ཏེ། སྒྱུ་མ་མི་བདེན་པའི་ཆོས་ལ་སྲན་ཐུབ་པར་འདོད་ཆགས་ནུས་པས་ན། ཐ་མལ་བ་དང་
266b
མཚུངས་ཏེ། སྡོག་ངན་པའི་མིའི་མཚན་ནོ་ཅོག་ཚང་སྟེ་ལྡན་པར་ཡོད་པས་ཆོས་ཀྱི་བཟོད་པ་ཐོབ་པ་མི་འདྲའོ། །དགེ་སྦྱོང་གི་ཆོས་ཀྱི་དོན་དང ། དགེ་སྦྱོང་གི་ལེགས་པའི་དོན་དང ། བརྒྱ་སྟོང་ཁྲི་དེའི་ཆ་གཅིག་ཀྱང་མེད་དོ། །ཤཱ་རིའི་བུ། དེ་ལྟ་བས་ན། མིང་སྟོང་པ་ཞེས་བྱའོ། །སྒྱུ་མ་ཞེས་བྱའོ། །འཇིག་རྟེན་གྱི་ཁེ་སྲེང་པ་འབའ་ཞིག་ལ་འདོད་ཆགས་ཏེ། དགེ་སྦྱོང་མ་ཡིན་པར་ནི། བདག་རང་དགེ་སྦྱོང་ཞེས་ཟེར། ཡོན་མི་བླང་པའི་རིགས་པ་ནི། ཡོན་བླངས་ཏེ་མི་རྟག་པའི་དགྲས་དགྲའི་མཚན་མའི་རྒྱལ་མཚན་བཙུགས་ཞེས་བྱའོ། །ཡང་མིང་རང་དབང་གིས་མི་ལ་གསོད་ཅིང་གནོད་པའི་དགྲ་ཞེས་བྱའོ། །མི་དེས་ཟས་ཁམ་གཅིག་ཟོས་པ་ཀུན་གཙང་གདང་བ་མེད་དོ། །ལམ་ལ་ཕྱོགས་པ་དང ། ལམ་གྱི་འབྲས་བུ་ཐོབ་པ་འབའ་ཞིག་གིས་ཡོན་ཕུལ་བ་ཞུ་བར་ནུས་ན། མི་དེ་ལ་དེ་ལྟ་བུ་མེད་པས་ན་མིང་ཟོས་པ་མི་གཙང་བ་ཞེས་བྱའོ། །ཤཱ་རིའི་བུ། དེ་ལྟ་བས་ན། མིང་སྟོང་པ་ཞེས་བྱའོ། །སྒྱུ་མ་ཞེས་བྱའོ།། ཤཱ་རིའི་བུ། ཁྱོད་ཀྱི་ཡིད་ལ་ཇི་སྙམ། མི་ལ་ལ་ཞིག་གིས་སྲོག་གཅོད་རྐུ་འཕྲོག་ཡོན་པོར་གཡེམ་རྫུན་ཟེར་ལྕེ་གཉིས་བྱེད་ཁ་ངན་ཁྱལ་བ་ཟེར་འདོད་ཅིང་ཕྲག་དོག་ཞེ་སྡང་ཡོན་པོ་ལ་ལྷ་ན། མི་དེ་རྟག་པར་སྲོག་གཅོད་དམ། རྟག་པར་ཚེ་སྲོག་མི་འཕྲོག་།བཅོམ་ལྡན་འདས། མི་འཕྲོག་གོ་།ཁྱིམ་ན་འདུག་ན་སྲོག་གཅོད་དེ། རྟག་པར་སྲོག་མི་འཕྲོག་པས་
267a
༄#། །སྲོག་གཅོད་པའི་དུས་ནི། ཉུང ། སྲོག་མི་གཅོད་པའི་དུས་ནི། མང་ངོ ། །ཤཱ་རིའི་བུ། ཁྱོད་ཀྱི་ཡིད་ལ་ཇི་སྙམ། མི་ལ་ལ་ཞིག་རྐུ་འཕྲོག་ན། འཕྲོག་པའི་དུས་མང་ངམ།་བཅོམ་ལྡན་འདས། རྐུ་བའི་དུས་མང་ངོ ། །ཤཱ་རིའི་བུ། ཁྱོད་ཀྱི་ཡིད་ལ་ཇི་སྙམ། མི་ལ་ལ་ཞིག་ཡོན་པོར་གཡེམ་ན། ཡོན་པོར་གཡེམ་པའི་དུས་མང་ངམ། ཡོན་པོར་མི་གཡེམ་པའི་དུས་མང་ངོ ། །རྫུན་ཟེར་བ་དང ། ཁ་ངན་དང ། ལྕེ་གཉིས་དང ། ཚིག་ཁྱལ་བར་ཟེར་བ་དང ། འདོད་ཅིང་ཕྲག་དོག་དང ། ཞེ་སྡང་གི་དུས་མང་ངམ། བཅོམ་ལྡན་འདས་ཞེ་སྡང་བའི་དུས་མང་ངོ ། །ཤཱ་རིའི་བུ། མི་དགེ་བ་ལམ་འདི་བཅུའི་ནང་ན་གང་སྡིག་ལྕི། བཅོམ་ལྡན་འདས། མི་དགེ་བ་བཅུའི་ནང་ན་ཡོན་པོ་མཐོང་བ་ནི། སྡིག་ལྕིའོ། །ཅིའི་ཕྱིར་ཞེས་བགྱིས་ན། བཅོམ་ལྡན་འདས། ཡོན་པོ་མཐོང་བ་ནི། རྟག་པར་སེམས་ལ་དྲི་མ་ཆགས་ཏེ། སེམས་མི་གཙང་མི་གདང་ངོ ། །ཤཱ་རིའི་བུས། ངས་ད་ཁྱོད་ལ་བསྒོའོ། །མི་ལ་ལ་ཞིག་གིས་ཉི་མ་གཅིག་ལ་སེམས་ཅན་བརྒྱ་སྟོང་ཁྲི་འབུམ་བསད། ཉི་མ་གཅིག་ལ་གསེར་དངུལ་དང ། ནོར་རིན་པོ་ཆེ་རྣམ་པ་བརྒྱ་སྟོང་ཁྲི་བརྐུས། ཡོན་པོར་གཡེམ་པ་ནི། ཉིན་མཚན་དུ་མི་གཏོང ། རྫུན་ཟེར་བ་ནི། རྟག་པར་མི་ལ་བརྙས་བསླུས་ཏེ། ཁའི་ལས་མི་གཙང་བས་ཚིག་བདེན་པ་མེད། ལྕེ་གཉིས་རྟག་པར་འབྱོར་འདུམ་པ་འཇིག་ཅིང་འཇིག་
267b
པའི་སྟོངས་མོའང་བྱེད། ཁ་ངན་པ་ནི། ཁར་རྟག་པར་ངན་པའི་ལོག་པ་ཟེར་ཏེ། མཉེན་དེས་པ་ཚིག་གཅིག་མི་སྨྲ། ཚིག་ཁྱལ་བ་ཟེར་བ་ནི། རྟ་བའི་ཕྱི་མོ་མེད་དེ། མིས་དོན་དེ་ཐོས་ན་གྲངས་མེད་པའི་ཚིག་སྨྲས་ཏེ། འཆལ་འཁྲུགས་སོ། །འདོད་ཆིང་ཕྲག་དོག་ནི། །ཁོང་གཞན་ནོར་ལ་ཆོས་མ་ཡིན་པའི་སེམས་སྐྱེས་སོ། །ཞེ་སྡང་ནི། རྒྱུ་རྐྱེན་མིད་པ་ལས་གློ་བུར་དུ་ཞེ་སྡང་ལངས་ཏེ་འཁོན་པ་སྲེལ་བ་ལས་སེམས་གདང་ངོ ། །ཡོན་པོ་མཐོང་བ་ནི། ལམ་མ་ཡིན་པས་སྦྱང་བ་ལ་སྲེད་དོ། །ཤཱ་རིའི་བུ། ཁྱོད་ཀྱི་ཡིད་ལ་ཇི་སྙམ། མི་ལ་ལ་ཞིག་གིས་དེ་ལྟ་བུའི་མི་དགེ་བའི་ཆོས་འབྱོར་གྲུབ་ན་སྡིག་མང་ངམ་མི་མང ། བཅོམ་ལྡན་འདས། ཤིན་ཏུ་མང་ངོ ། །ཤཱ་རིའི་བུ། ངས་ཁྱོད་ལ་བསྒོའོ། །མི་ལ་ལ་ཞིག་གིས་ལོ་བརྒྱའི་བར་དུ་འདི་ལྟ་བུ་མི་དགེ་བ་སྡིག་པ་བཅུའི་སྡིག་འབྱོར་གྲུབ་པ་བས་ནི། ཚུལ་ཁྲིམས་ཞིག་པའི་དགེ་སློང་གིས། \?\་ཉིན་གཅིག་མཚན་གཅིག་གི་བར་དུ་ཁོང་གཞན་གྱི་ཡོན་བླངས་པ་སྡིག་པ་དེ་བས་ཆེའོ། །ཅིའི་ཕྱིར་ཞེ་ན། སྲོག་གཅོད་པ་དེ་ནི། མི་གཞན་གྱིས་རིག་པ་མང ། མི་གཞན་གྱིས་ཤེས་པ་མང ། མིའོ་ཅོག་གི་མི་སྡིག་པའི་དགྲ་སྟེ།་མི་ཀུན་གྱིས་གསོད་ཅིང་སྲོག་འཕྲོག་པ་ཡིན་པར་ཤེས་ཏེ། སྡིག་མི་སྨྲ། རྙོག་ཅིང་བསྒོམས་ཞེན་པ་ཡིན་ཏེ། མི་དགེ་མི་དེས་བས་མིའོ་ཅོག་གིས་སྤངས་སོ། །ཡང་ཤཱ་
268a
༄#། །རིའི་བུ། སྲོག་གཅོད་པའི་མི་གཞན་གྱིས་སྲོག་འཕྲོག་པ་མང་བས་བར་བར་སྐྱེ་བའི་སེམས་སྐྱེས་ཏེ། མི་རིགས་པ་དང ། མཐར་སྡིག་གི་ལམ་ཐོབ་པར་རང་གིས་ཤེས་སོ། །མི་ཀུན་གྱིས་ཀྱང་ངན་ཅིང་ཚུལ་ཁྲིམས་མེད། སྨེ་བར་ཤེས་སོ། །མི་དེ་ལ་ལེགས་པའི་སྤུའི་ཉག་མའི་བཅུ་ཚལ་གྱི་བརྒྱ་ཆ་གཅིག་ཙམ་ཡང་མི་རེག་ན། དཔལ་ཞིང་གི་ཡོན་མི་ཐོབ་པ་ལྟ་སྨོས་ཀྱང་ཅི་དགོས། ཡང་ཤཱ་རིའི་བུ། སྲོག་གཅོད་པ་མི་དེའི་བུ་སྨད་ནི། མི་ཀུན་གྱིས་ཤེས་རིག་སྟེ། བཀུར་སྟི་མི་བྱ། འདུག་ཏུའང་མི་སྟེར་ན། ཡོན་མི་སྦྱིན་པ་ལྟ་སྨོས་ཀྱང་ཅི་དགོས། སྲོག་གཅོད་པའི་མི་ནི། ནོར་གྱིས་རང་འཚོ་ཞིང་བུ་སྨད་གསོ་སྐྱེད་དོ། །བར་བར་དགེ་སྦྱོང་དང་བྲམ་ཟེ་ལ་ཡོན་ཕུལ་ཏེ། དེའི་ལན་གྱིས་མཛངས་ཤིང་འཕྲུལ་བའི་དགེ་སྦྱོང་དང་ཕྲད་ནས་དེ་ལ་ལམ་གྱི་ཆོས་བཤད་ནས་སྲོག་གཅོད་པ་སྤངས་པར་བསྟན་ནས་སྲོག་གཅོད་པའི་ལས་དེ་བཏང་སྟེ། སངས་རྒྱས་ཀྱི་ཆོས་ལ་ཁྱིམ་ནས་བྱུང་ནས་བསྒྲིབས་ཤིང་ཐོགས་པ་མེད། ཁྱིམ་ནས་བྱུང་ཟིན་པ་དང ། དགེ་བའི་བཤེས་གཉེན་ལ་ཉེ་བར་བསྙེན་ཏེ་དགེ་སྦྱོང་གི་འབྲས་བུ་ཐོབ་ནས་མི་དེས་འཕྲུལ་ཆེ་ལ་སྡིག་ཡང་བའི་ལམ་ཐོབ་སྟེ། འཕྲུལ་གྱི་ལམ་བསྒྲུབས་པས་ལམ་ངན་པ་གསུམ་ལས་ཐར་ཏོ། །ཤཱ་རིའི་བུ། ངའི་ཆོས་ཀྱི་ནང་ན་དགེ་སློང་དག་ཅིག་ཡོད་པ། དགེ་
268b
སློང་མ་ཡིན་པར་རང་དགེ་སྦྱོང་ཞེས་ཟེར། ཚངས་པར་སྤྱད་པ་མ་ཡིན་པར་ཚངས་པར་སྤྱད་པ་ཡིན་ཞེས་ཟེར་ཏེ། དགེ་བའི་རྩ་བ་རྣམས་བཅད་ལ་མྱ་ངན་ལས་འདས་པ་འཇུག་པ་བསྒྲིབས་ཏེ་སླད་རྨོངས་པས་ལམ་སྟོར་ཏོ། །ལམ་ཞིག་པའི་རྒྱུ་རྐྱེན་གྱིས་དགེ་བའི་ཆོས་རྣམས་བཤིག་སྟེ། མུར་འདུག་གི་དོན་སྤྱོད་ཅིང་ལམ་ངན་པར་ཞུགས་པས་དགྲ་ངན་པ་རྣམས་མང་སྟེ། སྐྱེ་བ་སྟོང་པར་མནོས་ནས་དཔེར་ན། མི་ཤི་བ་དང་མཚུངས་ཏེ། ལུས་ཀྱི་ཁ་དོག་ཉམས་གྲམ་ལ་དྲང་པོའི་ཆོས་སྟོར་ཏེ་ངའི་ཆོས་ཀྱི་ནང་ན་བསྒོས་པ་སྤགས་པ་ཞེས་བྱའོ། །མིང་ཆོས་ཀྱི་དགྲ་ཞེས་བྱའོ། །མིང་ལོག་པའི་མི་ཞེས་བྱའོ། །མིང་བདུད་ཀྱིས་བཀོལ་བ་ཞེས་བྱའོ། །དཔེར་ན། མི་ཕྱི་ས་ཀུན་དང་མཚུངས། མི་རོ་དང་མཚུངས། ཁྱི་རོ་དང་མཚུངས། རི་མོའི་དགེ་སྦྱོང་དང་མཚུངས་ཏེ། གོས་དགེ་སྦྱོང་དང་མཚུངས་མཐུན་ཀྱང་དགེ་སྦྱོང་གི་དོན་མེད་དོ། །ཤཱ་རིའི་བུ། དཔེར་ན། ཝ་སེངྒེའི་ཁྱུ་ན་འདུག་པ་དང་མཚུངས། གཅིག་ཏུ་ན་ཉུང་རུམ་འཕྲུལ་གྱི་འཁོར་ལོའི་རྒྱལ་པོའི་ནང་ན་འདུག་པ་དང་མཚུངས། སྤྲེའུ་ལྷ་རྣམས་ཀྱི་ནང་ན་འདུག་པ་དང་མཚུངས། ཡང་གཅིག་ཏུ་ན་བོང་བུ་བལ་བླང་གི་རྒྱལ་པོ་མང་པོའི་ནང་དུ་འཇུག་པ་དང་མཚུངས། མི་ལོང་བ་ལྷའི་མིག་ཅན་གྱི་ནང་ན་འདུག་པ་དང་མཚུངས། གཅིག་ཏུ་ན་པ་ཝ་ང་ནམ་མཁའ་ལྡིང་གི་ནང་ན་འདུག་པ་དང་མཚུངས། ཤཱ་རིའི་བུ།
269a
༄#། །ཚུལ་ཁྲིམས་ཞིག་པའི་དགེ་སློང་དགེ་འདུན་གྱི་ནང་ན་འདུག་ན་བརྒྱ་སྟོང་ཁྲི་འབུམ་གྱི་ལྷ་རྣམས་ཕལ་མང་པོས་དགེ་སློང་དེ་དགེ་འདུན་གྱི་ནང་ན་འདུག་བ་མཐོང་ན།་ཀུན་ཀྱང་ཤིན་ཏུ་མྱ་ངན་འཁྲུགས་ཏེ་ཚིག་འདི་སྐད་འཛེར་ཏོ། །འདི་ལྟ་བུའི་མི་ངན་པ་གསོ་སྤྱིན་པ་ཅི་དགོས། བདུད་ཀྱི་གྲོགས་དང ། ཁམས་ཏེ། དེ་ལྟ་བུའི་བླ་ན་མེད་པ་སངས་རྒྱས་ལམ་མཐོང་བར་འདོད་པ་དེ་གོས་སྐྱ་བོ་ཅན་ལ་བཤད་ན། ལ་ལ་སངས་རྒྱས་ཀྱི་ཆོས་ལ་ཡིད་ཆེས་ཤིང་དད་པ་ཞིག་ཡོད་ན། ཀླུ་དང ། ལྷ་མ་སྲིན་ལ་སོགས་པ་རྣམས་ཀྱིས་སྐད་ཆེན་པོས་བོས་ཏེ་ཤིན་ཏུ་བསྟོད་དེ་དགེ་སློང་ངན་པ་དེ་ཅིའི་ཕྱིར་དེས་ལུས་གབ་སྟེ། དཔེར་ན། རྟ་ངན་པ་དུལ་བ་གཡུང་པོའི་ནང་ན་འདུག་པ་དང་མཚུངས་ཏེ། དེ་ལྟ་བུའི་མི་གཏི་མུག་བདག་རང་ན་རེ། ཅིའང་མཐོང་ཞིང་ཤེས་པ་དང ། བདག་ཏུ་ལྟ་བ་ངན་པ་མེད་ཅེས་ཟེར་ཏེ། རང་གིས་དེར་སྦས་བཅབས་ནས་ལྷ་དང ། མི་ལ་བརྙས་བསླུས་པ་ནི། མི་དང་ལྷ་ཐམས་ཅད་ཀྱི་ནང་གི་དགྲ་ཡིན་ན། ཕལ་གྱིས་མཐོང་བ་དང ། ཀུན་གྱིས་ཀྱང་མི་བསྔགས་སོ། །ཤཱ་རིའི་བུ། དེ་ལྟ་བུའི་ངན་སྡིག་པའི་དགེ་སློང་ནི། དགྲ་ཡིན་པར་ལྷ་རྣམས་ཀྱིས་ཀྱང་རིག་སྟེ། གོས་སྐྱ་བོ་ཅན་དང་མཚུངས་པ་མེད་ན། ཡོན་ལེན་ཅིང་ཕས་བསུ་བསྐྱལ་དང ། ཕྱག་འཚལ་ཏེ་ཐལ་མོ་སྦྱར་ནས་རི་མོ་གུས་པར་བྱས་སོ། །མི་ངན་པ་གཏི་
269b
མུག་ཤི་བའི་རོ་དང་མཚུངས་པ་གོས་གྱོན་ཏོ་ཅོག་ནི། ཀུན་བརྐུས་ཏེ་ཐོབ་པ་ཡིན། ལྷུང་བཟེད་ཀྱི་ནང་གི་ཟས་ནི། ཀུན་བརྐུས་ཏེ་བླངས་པ་ཡིན། མིས་བྱིན་པ་མེད་དོ། །ཆུ་ཉུང་ངུ་ཡན་ཆད་ཀྱང་བརྐུས་ཏེ་ཐོབ་པ་ཡིན་ནོ། །ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་གིས་གར་ཕྱིན་པའི་ཕྱོགས་ཤར་ཕྱོགས་སུ་ཕྱིན་ནས་ལྷོ་དང ། ནུབ་དང ། བྱང་ཕྱོགས་གར་ཕྱིན་ཀྱང་རུང་སྟེ། ཀུན་བརྐུས་ཏེ་འགྲོ་བ་ཡིན་ནོ། །ཅིའི་ཕྱིར་ཞེ་ན། མི་དེ་ལ་ཆོ་ག་དང ། ཆོས་སྤྱད་པ་ཡོད་དོ་ཅོག་ཀུན་རྐུ་བ་སྒྱུ་མ་ཡིན་ནོ། །འགྲོ་བ་དང ། འགྲེང་བ་དང ། འདུག་པ་དང ། ཉལ་བ་དང་སོང་བ་དང ། འོངས་པ་དང ། ལྟ་བ་དང ། སྨྱང་བསྐུམ་དང ། དགྱེ་རྒུ་དང ། གོས་གྱོན་པ་དང ། ལྷུང་བཟེད་ཁྱེར་བ་དང ། བྱེད་དོ་ཅོག་ད་མདོ་ཙམ་ཞིག་བཤད་དེ། ལུས་དེང ། ཁ་དང ། ཡིད་ཀྱི་ལས་སྤྱད་ཅིང་བྱེད་པ་ཡོད་དོ་ཅོག་ཀུན་རྐུན་པོའི་དགྲ་ཡིན་ནོ། །ལ་ལ་ཞིག་གིས་མི་དེ་ལྟ་བུ་སྐྲ་བྲེགས་ན། དགྲའི་སྐྲ་བྲེགས་པ་ཡིན་ནོ། གཅིག་གི་མདོ་གཙེས་པ་ཙམ་ཞིག་སྐྱེར་དོ། །ཚུལ་ཁྲིམས་ཞིག་པའི་དགེ་སློང་གིས་བྱས་པ་ཡོད་དོ་ཅོག་ནི། ཀུན་དགྲས་བྱས་པ་ཡིན་ནོ། །ཤཱ་རིའི་བུ། དགེ་སློང་ངན་པས་ཕྱི་ས་ཆེ་ཆུང་དང་ལག་བརྙལ་བ་ཡན་ཆད་དགྲའི་ཆོས་ཡིན་ནོ། །ཅིའི་ཕྱིར་ཞེ་ན། ཤཱ་རིའི་བུ། ཛམྦུའི་གླིང་གི་ནང་ན་རྒྱལ་པོ་ཆེན་པོ་དང ། བློན་པོ་ཆེན་པོ་དང ། མི་ཕལ་དང ། མི་མ་ཡིན་པའི་ཁམས་དང ། ཡོད་དོ་ཅོག་ཐམས་ཅད་ལ་
270a
༄#། །དགེ་སློང་ངན་པ་དེས་དགྲ་བྱས་སོ། །ཤཱ་རིའི་བུ། རྒྱལ་པོ་དང ། བློན་པོ་དགྲ་ངན་པ་ལ་ལེགས་པའི་དོན་མི་རེའོ། །བདག་དང་མཚུངས་ཞེས་མི་ཟེར་རོ། །བདག་པས་ལྷག་ཅེས་ཟེར་རོ། །ཚུལ་ཁྲིམས་ཞིག་པའི་དགེ་སློང་འཕགས་པའི་ཆོས་གོས་གྱོན་པས་མི་དེ་ལ་ལེགས་པའི་དོན་ཐོབ་ཏུ་རེ་བས་ན། ཡུལ་ས་ན་གནས་ཤིང་འདུག་ཏུ་གནང་བྱས་སོ། །དེས་ངན་པར་ཤེས་སུ་ཟིན་ན། མཆིལ་མ་ས་ལ་དོར་བ་ཡན་ཆད་ཀྱང་མི་གནང་ངོ ། །དེ་ལྟ་བས་ན། ཤཱ་རིའི་བུ། དགེ་སློང་ངན་པས་ལུས་གཡོས་ཏེ་བྱས་སོ་ཅོག་ཀུན་དགྲས་བྱས་པ་ཡིན་ཏེ། མིང་དགྲ་རྟག་པ། མིང་དགྲ་ཆེན་པོའོ། །དགྲའི་རྒྱལ་མཚན་བཅུགས་པ། འཇིག་རྟེན་གྱི་མིའོ་ཅོག་ཐམས་ཅད་ལ་བཙོག་ཅིང་གནོད་པ་ཞེས་བྱའོ། །ཅིའི་ཕྱིར་ཞེ་ན། ངན་པ་མ་བྱས་པ་མེད་པའི་ཕྱིར་རོ། །དེ་ལྟ་བས་ན། ཤཱ་རིའི་བུ། དགེ་སློང་ངན་པ་དེ་འཇིག་རྟེན་གྱི་ལྷ་དང ། མི་ཐམས་ཅད་ཀུན་གྱི་དགྲ་ཆེན་པོ་ཡིན་ཞེས་བྱའོ། །ཤཱ་རིའི་བུ།་མི་དང ། ལྷ་དང ། འཇིག་རྟེན་ཐམས་ཅད་ཀྱི་མི་དགྲ་ཆེན་པོ་ཡིན་ན། དེ་ལྟ་བུའི་མིས་ཡོན་ཆུ་རྡུབ་གཅིག་ཞུ་བར་ནུས་སམ་མི་ནུས། བཅོམ་ལྡན་འདས། མི་ནུས་ལགས་སོ། །ཤཱ་རིའི་བུ། ཁྱོད་ཀྱི་ཡིད་ལ་ཇི་སྙམ། དེ་ལྟ་བུའི་མི་ངན་པ་ཆེན་པོ་མ་ཡིན་ནམ། བཅོམ་ལྡན་འདས། དེ་ལགས་སོ། །ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་གིས་ལྷ་
270b
དང ། མིའི་འཇིག་རྟེན་ཐམས་ཅད་ལ་ངན་པའི་སྡིག་ཆེན་པོ་ཡོད་དེ། གཞུང་དེ་ལྟ་བུས་ན། ངས་ཚིགས་སུ་བཅད་པ་འདི་བཤད་དོ། །གཉིས་ན་རྡོ་བསྲེགས་ཟ་བ་དང ། ཟངས་ཞུན་ཁུ་བ་འཐུང་ཡང་རུང ། །བདག་ལ་ཚུལ་ཁྲིམས་མེད་པ་རུ། །ཡིད་ཆེས་མི་ཟས་བཟའ་མི་ཕོད། །ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་དེ་ལ་ཁ་དོག་མེད། ལེགས་པ་མེད། སེམས་དག་པའི་སྨོན་ལམ་ཡང་མེད་དེ། ལུས་དང་སེམས་གདུག་པས་རྨི་ལམ་ངན་པ་མཐོང་བར་དགའ་བཞིན་གནས་ལ་མི་སྲིད་པར་དགའ་ཞིག་འགྲོ་ན། ལུས་འཇིགས་ཤིང་འདར། ཚུལ་ཁྲིམས་གཙང་མ་མཐོང་ན། གོལ་བར་གབ་ལ་རྒྱུ་ཞིང་བྱོལ། །རང་གནོད་པས་སེམས་འདར་ཏེ་དེ་ཕྲད་དུ་མི་དགའ། །ཡོན་ལེན་པའི་ཚེ་དང་དས་དོགས་འཇིགས་སྐྲག་སྟེ། སེམས་རྟག་པར་རྒྱུག་འབྲོས་ཤིང་འདུ་ཤེས་ཀྱིས་བསམ་པ་རྣམ་པར་མང ། ནོར་གྱི་ཁེ་ལ་རབ་ཏུ་བརྐམ་ཞིང་ཟས་ཞིམ་པོ་ལ་དགའ་སྲིད་དོ། །དེ་ལྟ་བུའི་དགེ་སློང་ནི། ཚེ་ཟད་པའི་འོག་ཏུ་ཡང་དག་པར་སེམས་ཅན་དམྱལ་བར་འགྲོའོ། །ཤཱ་རིའི་བུ། དེའི་མིང་ཚུལ་ཁྲིམས་ཞིག་པའི་དགེ་སློང་གི་མྱ་ངན་འཁྲུགས་པའི་མདའ་བདུན་ཞེས་བྱའོ། །ཡང་དག་པར་སེམས་ཅན་དམྱལ་བར་ལྟུང་ངོ ། །ཡང་ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་ཕལ་གྱི་ནང་ན་འདུག་ཅིང་གྱེས་འཁྲུགས་པའི་ཚིག་མང་པོ་ལ་སྲེད། རང་བཞིན་ནས་ཕྲག་དོག་ལ་དགའ་བས་
271a
༄#། །ཚུལ་ཁྲིམས་ཞིག་པ་དང་གྲོགས་པོ་མཛའ་བོར་བྱས་ནས་རྟག་པར་ཚུལ་ཁྲིམས་ཞིག་པའི་ངན་པའི་དོན་བརྗོད་ཅིང་བཤད་པ་ལ་སྲེད་དེ། བདག་སྐྱིད་པར་འཛིན་ཅིང་ངོ་ཚ་མི་ཤེས། ཆོས་ཡིག་ཟབ་མོ་ལས་ལོག། གལ་ཏེ་སེམས་ལ་དོགས་ཤིང་ཡིད་མི་ཤེས། བར་བར་དེ་ལྟ་བུ་ལ་སོགས་པའི་ཆོས་ཡི་གེ་བཤད་པ་ཐོས་ན། ལོག་པར་ཡིད་ཆེས་ཤིང ། འཐབ་རྩོད་པ་ལ་ཉན་ཅིང་ནོད་པ་ལ་མི་སྲེད་དེ། ཤར་ནུབ་ཏུ་ཕྱོགས་ཤིང་ལྟ་ལ་སེམས་གཅིག་ཏུ་མི་མཐུན་ཏེ། ཁ་ལག་པས་བཀབ་སྟེ་ཡར་ནམ་མཁའ་ལ་བལྟས་ཤིང་འདུག་པ་ལས་ལངས་ཏེ་སངས་རྒྱས་ཀྱིས་བསྟན་པའི་ཆོས་ལ་སྐུར་གཤེ་ཞིང་འཁོན་ལ་སྲེལ་ཏེ། ཆོས་འཆད་པ་ལ་རྒྱ་བ་དེ་ལྟ་བུ་ལ་སོགས་པའི་བླུན་ངན་པའི་རྒྱུ་རྐྱེན་སྤྱད་པས་ཚེ་ཟད་པའི་འོག་ཏུ་ཤིན་ཏུ་ཟབ་པའི་སེམས་ཅན་དམྱལ་བར་ལྟུང་ངོ ། །ཤཱ་རིའི་བུ། དེའི་མིང་ཚུལ་ཁྲིམས་ཞིག་པའི་དགེ་སློང་མྱ་ངན་འཁྲུག་པའི་མདའ་བརྒྱད་ཅེས་བྱ་སྟེ། ཡང་དག་པར་སེམས་ཅན་དམྱལ་བར་ལྟུང་ངོ ། །ཡང་ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་ནི། མཁན་པོ་དང ། བླ་མ་ཨ་ཙརྱར་བཀུར་བསྟོད་པ་ལ་དགའ་སྟེ། དེའི་ལེགས་པའི་དོན་ལ་བསྟན་པར་བསྟོད་དེ། མིང་གི་ཁེ་བཙལ་ན་ཚུལ་ཁྲིམས་འཛིན་པ་ཞེས་ཟེར་ཅིང་དེའི་རྒྱུས་རང་གསོས་ཏེ། ནོར་ལ་ཆགས་པ་སྤོས་བ་
271b
བཞིན་བཟོ་ལ་མཁས་ཏེ་ཁྲེལ་སླ་བ་མེད་པ་ནི། དཔེར་ན། བྱ་རོག་དང་མཚུངས་སོ། །དགེ་འདུན་གྱི་རྒྱུ་རྐྱེན་གྱིས་གོས་མང་དུ་བཙལ་ཏེ། ཁ་ཟས་རང་ཉམ་དུ་ཟོས་པས་ལུས་ཀྱི་སྟོབས་བདེ་སྟེ། ཁྲེལ་དྲིན་མི་ཤེས་ཤིང་ཚིག་གོ། གོ་རིམ་ཡང་མེད་དོ། །རྐང་ལག་སྦོམ་རྩུབ་ལ་མདངས་ཀྱི་ཁ་དོག་ཉམས་གྱུར་ཏེ། བུད་མེད་ལ་ལྟ་བར་སྲེད། སྐྱེས་པ་ལ་མི་བསྙེན་ཏེ། དེ་ལྟ་བུའི་མི་ངན་པ་ནི། ཕལ་ཀུན་གྱིས་ཀྱང་བརྙས་སྨད་དོ། །ལྷ་དང ། ཀླུ་དང ། ལྷ་མ་ཡིན་གྱིས་ཀྱང་མི་བསྟོད་དོ། །སངས་རྒྱས་རྣམས་ཀྱིས་ཀྱང་སྙན་པར་ཡང་མི་བཤད་དོ། །སེམས་ཀྱི་རང་བཞིན་རིངས་བརྟགས་ལ་རྟག་པར་ཞེ་སྡང་ལ་སྲེད་དོ། །དགེ་འདུན་གྱིས་དོན་གཅོད་ན། དཔུང་གི་མཐུ་སྙེམས་སོ། །ཤཱ་རིའི་བུ། དེ་ལྟ་བུའི་ཚུལ་ཁྲིམས་ཞིག་པའི་དགེ་སློང་ནི། དགེ་འདུན་གྱི་ནང་མཆོད་ཀྱི་མཐུ་ཡོད་པ་ཚོལ་བ་མང་སྟེ། མ་དྲིས་པར་ལན་གློན་ཞིང་རྟག་པར་གཞན་གྱི་ཉེས་པ་ཚོལ་ལོ། །ཚུལ་ཁྲིམས་གཙང་མ་པ་མཐོང་ན། སྙེམས་ཤིང་སླུ་བ་ཡིན་ཞེས་ཟེར། འགྲུས་པར་ལམ་ཚོལ་བ་མཐོང་ན། དེའི་ཆོས་མི་འདྲ་བར་ཐ་དད་པ་གཞན་ལ་དགའ་ཞིང་དང ། རྩོད་པ་མཐོང་ན། དགའ་བས་བསྟངས་སོ། །ཤཱ་རིའི་བུ། དེའི་མིང་ནི། ཚུལ་ཁྲིམས་ཞིག་པའི་དགེ་སློང་གི་མྱ་ངན་འཁྲུགས་པའི་མདའ་དགུ་ཞེས་བྱ་སྟེ། ཡང་དག་པར་སེམས་ཅན་དམྱལ་བར་ལྟུང་ངོ ། །ཡང་ཤཱ་རིའི་བུ། ཚུལ་ཁྲིམས་ཞིག་པའི་དགེ་
272a
༄#། །སློང་གཞན་གྱི་དོན་ལ་སྲེད་མོས་ཏེ། དེའི་གཞུང་ཅི་དགར་བཟུང་ནས་འཐབ་རྩོད་པ་ཡོད་ན། དགའ་སྐྱིད་པར་འཛིན་ཏོ། །གོས་ཟས་ཀྱིས་ལུས་བརྒྱན་ལ་གཞན་གྱི་ཆོ་ག་སློབ་ཅིང་མལ་ཆ་བཟང་པོ་བཙལ་ཏེ། ཁེས་གསོ་ཞིང་ལུས་བདེ་བར་བྱས། མི་གཞན་གྱིས་བསྟོད་པ་ལ་སྲེད། སྦྱིན་བདག་ལ་མཁྲེན་ཅིང་འདུག་པའི་གནས་ལ་ཕངས་པར་འཛིན་ཏེ། དགེ་སློང་མཁན་པོ་འོངས་ན། བདག་གི་ཉེས་པ་མཐོང་གིས་དོགས་ཏེ། ཚུལ་ཁྲིམས་འཛིན་པ་ལ་སྡང ། ཚུལ་ཁྲིམས་ཞིག་པ་ལ་ནི། ཉེ་བསྙེན། སྦྱིན་པ་བྱེད་པ་ལ་རྟག་པར་བསྟོད། ཚུལ་ཁྲིམས་འཛིན་པ་དང ། བཟོད་པ་དང ། བརྩོན་འགྲུས་དང ། བསམ་གཏན་དང ། ཤེས་རབ་ལ་ནི། མི་བསྟོད། སྟོང་པ་ཞི་བ་ལའང་མི་བསྟོང ། འབའ་ཞིག་གནས་པ་ནི། བསྲིངས་སྤངས་ཏེ་རྟག་པར་ཚུལ་ཁྲིམས་འཛིན་པ་ལ་ཉེས་པར་བརྗོད་པ་ལ་དབྱེ་བར་སྲེད། སྦྱངས་པའི་ཡོན་ཏན་འཛིན་པ་ལའང་སྙན་པར་མི་བསྟོད། བར་བར་ངའི་དོན་ལ་དཔྱས་ཏེ་བཤད། བར་བར་ཁ་ངན་པས་མི་རིགས་པར་བསྐྱེད། བར་བར་དྲན་པའི་འདུ་ཤེས་ཀྱི་རྫུན་པ་བཤད། རིགས་བཟང་པོ་རྟེན་སྙེམས་ཏེ་ཕ་ཚན་གྱི་གཉེན་ལ་བརྟུད་པར་དྲིས། རྒྱུ་རྐྱེན་ཆུང་དུ་སྤྱད་དེ་དབུལ་པོ་ལ་ཆོས་བཤད་ན། རྟག་པར་སེམས་མི་དྲང་བས་དངངས་ཤིང་དོགས་པ་སྲེལ་ཏེ་ཕལ་ཀུན་སྡང་ཞིང་སྐྱོ་བས་ཡུན་
272b
དུ་བརྙས་སྨད་པ་ལ་ཕན་ནོ། །ཚུལ་ཁྲིམས་འཛིན་པ་ལ་ནི། རྟག་པར་དཔྱས་བཤད་པ་ལ་སྲེད་དོ། །གཏན་ལ་བབ་པ་བདེན་པར་འཆད་པ་ལ་ནི། ཉེ་བསྙེན་པས་མི་འདོད་དེ། ཡིད་ལ་དེ་ལྟ་བུའི་ཆོས་ཀྱི་ཡི་གེ་ཐོས་པར་མི་དགའོ། །དེ་ལྟ་བུའི་ཆོས་ཀྱི་ཡི་གེ་གཟུངས་སུ་བཟུང་སྟེ་ཀློག་ཅིང་ཁ་ཏོན་ལ་སྲེད་པ་དང ། ཆོས་ཀྱི་ཡི་གེ་དེ་ལྟ་བུ་བཤད་པ་ཐོས་ན་སེམས་དགའ་གཞའ་བ་དེ་ལྟ་བུའང་མཐོང་དུ་མི་དགའོ། །གཅིག་ཏུ་ནི། ཚུལ་ཁྲིམས་འཛིན་པའི་ཆོས་ལ་བསྟོད་པ་ཐོས་སུ་མི་དགའ་སྟེ། དེ་ལྟ་བུ་ལ་སོགས་པའི་ཆོས་ཀྱི་ཡི་གེ་བཤད་ན་ཉན་ཅིང་ནོད་དུའང་མི་འོང ། ཉན་ཅིང་ནོད་དུ་ཟིན་ནའང་རིང་པོར་མ་ལོན་པར་སླར་སོང་སྟེ་གོས་སྐྱ་བོ་ཅན་དང་བཤེས་གཉེན་དུ་བྱས་པ་མང་ལ་རྟག་པར་ཁྲིམས་འཛིན་པའི་དགེ་སློང་ལ་བརྗོད་ཅིང་བཤད་པ་ལ་སྲེད་དེ་རང་ཉམ་བྱེད་པས་བརྙས་པ་དང ། ཁ་མདའ་སྤྱོད་དོ། །ཤཱ་རིའི་བུ། དེའི་མིང་ཚུལ་ཁྲིམས་ཞིག་པའི་དགེ་སློང་གི་མྱ་ངན་འཁྲུག་པའི་མདའ་བཅུ་ཞེས་བྱ་སྟེ། ཡང་དག་པར་ལམ་ངན་པར་ལྟུང་ངོ ། །ཤཱ་རིའི་བུ། ང་མེད་པར་འདས་པའི་ཕྱི་ན་དེ་ལྟ་བུ་ལ་སོགས་པའི་མིས་ཛམྦུའི་གླིང་གང་སྟེ། ཁེ་ཚོལ་བ་འབའ་ཞིག་སྤྱོད་ཅིང་རང་འཚོ་གསོ་བྱེད་དོ། ། སངས་རྒྱས་ཀྱི་མཛོད་བཤད་པ་ཆོས་ཀྱི་ཡི་གེ། བམ་པོ་གསུམ་པ། སངས་རྒྱས་ཀྱིས་སངས་རྒྱས་ཀྱི་མཛོད་བཤད་པའི་ཆོས་ཀྱི་ཡི་གེ་ལེའུ་དྲུག་སྟེ། གཙང་མའི་ཆོས་ཀྱི་ལེའུའོ།། །།སངས་
273a
༄#། །རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། གནའ་སངས་རྒྱས་བསོད་སྐྱབས་ཀྱིས་སྔ་ནས་ང་ལ་ལུང་བསྟན་པ་སངས་རྒྱས་ཤཱཀྱ་ཐུབ་པ་ཡོན་མང་དུ་བླངས་ན།་ཆོས་མྱུར་དུ་མེད་པར་འགྱུར་རོ། །ཞེས་གསུངས་སོ། ཤཱ་རིའི་བུ། ངའི་ཆོས་ལ་བདེན་པར་ཡོན་འབུལ་བ་མང་བས་ཕྱིས་མྱུར་དུ་མེད་པར་འགྱུར་རོ། །ཤཱ་རིའི་བུ། དཔེར་ན། མི་དབུལ་པོས་ནོར་བུ་རིན་པོ་ཆེའི་མཛོད་རྙེད་པ་དང་མཚུངས་ཏེ། སེམས་ཤིན་ཏུ་དགའོ། །འདི་ལྟ་སྟེ། ཤཱ་རིའི་བུ། མ་འོངས་པའི་དུས་ན་གོས་སྐྱ་བོ་ཅན་ལ་ཉེ་བསྙེན་ཅིང་ཡོན་ལེན་པའི་དགེ་སློང་མང་དུ་ཡོད་དེ། ཁྱད་ཀྱིས་གཅིག་གིས་གཅིག་བསྟན་པ་བསླབ་སྟེ་གྲོགས་སུ་བྱས་ནས་སེམས་དགའ་ཞིང་དང ། སྐྱིད་པར་འཛིན། དཔེར་ན། མི་དབུལ་པོས་ནོར་བུ་རིན་པོ་ཆེའི་མཛོད་རྙེད་པ་དང་མཚུངས་ཏེ། དེ་ལྟ་བུའི་མི་གཏི་མུག་ནི། འཇིག་རྟེན་གྱི་ཁེ་རིན་ཆེ་ཞིང་འཇིག་རྟེན་གྱི་བྲན་འཁོར་བ་ལ་སྲེད་དོ། །དགེ་སློང་གིས་ཡོན་མང་དུ་སྤྱད་པ་མཐོང་ན། སེམས་ལ་ཐལ་བྱུང་དུ་དགྲ་བཅོམ་པ་ཐོབ་ཅེས་ཟེར་རོ། །ཉུང་ངུའི་བཤེས་གཉེན་མཐོང་ན། མོད་བཞིན་མིང་ངན་པ་ཞེས་བྱའོ། །ཞེས་ཟེར་རོ། །དེ་ལྟ་བུའི་དགེ་སློང་ནི། གསོ་བའི་ཁེའི་ཕྱིར་བླ་ན་མེད་པའི་སངས་རྒྱས་ཀྱི་ལམ་བཏང་སྟེ། ཅི་ལ་སྲེད་པ་བཞིན་དུ་དེའི་དོན་གྲུབ་བོ། །ཤཱ་རིའི་བུ། དེ་བཞིན་གཤེགས་པས་གཏི་མུག་དེའི་
273b
ཕྱིར་འདི་ལྟ་བུ་ལ་སོགས་པ་ཆོས་ཀྱི་ཡི་གེ་བཤད་དོ། །ཅིའི་ཕྱིར་ཞེ་ན། ཚུལ་ཁྲིམས་ཞིག་པའི་དགེ་སློང་གིས་ཆོས་ཀྱི་ཡི་གེ་འདི་ལྟ་བུ་བཤད་པ་ཐོས་ན། འགྱོད་པའི་སེམས་སྐྱེས་ཏེ། ཚུལ་ཁྲིམས་བཏང་བ་སླར་དྲན་ཏེ་དགྲ་ཆེན་པོ་མི་བྱེད། གཞན་གྱི་ཡོན་མི་ལེན་ཏོ། །ཤཱ་རིའི་བུ། དགེ་སློང་ལ་ལ་ཆོས་ཀྱི་ཡི་གེ་འདི་ལྟ་བུ་ཐོས་ནས་སེམས་མི་གཙང་མི་གདང་སྟེ།་མི་དགའ་མི་སྐྱིད་པ་དེ་ལྟ་བུའི་མིང་ནི། དགེ་སློང་ངན་པ་ཞེས་བྱའོ། །ཅིའི་ཕྱིར་ཞེ་ན། ཤཱ་རིའི་བུ། ཚུལ་ཁྲིམས་གཙང་མའི་དགེ་སློང་ལ་ནི། ཆོས་ཀྱང་མེད། སྐྱིད་པ་ཡང་མེད། སྦྱིན་པ་བཤད་ཀྱང་རུང ། ཚུལ་ཁྲིམས་བཤད་ཀྱང་རུང ། བཟོད་པ་བཤད་ཀྱང་རུང ། བརྩོན་འགྲུས་བཤད་ཀྱང་རུང ། བསམ་གཏན་བཤད་ཀྱང་རུང ། ཤེས་རབ་བཤད་ཀྱང་རུང་སྟེ། དེ་ལྟ་བུའི་སྐྱོ་ཞིང་འཇིགས་པའི་ཆོས་ཀྱི་ཡི་གེ་བཤད་ན། ཀུན་ལའང་སེམས་དགའ་སྲེད་དོ། །ཤཱ་རིའི་བུ། མི་རྣམ་གསུམ་ཞིག་ཡོད་པས་ཆོས་ཀྱི་ཡི་གེ་འདི་བཤད་པ་ཐོས་ན། སེམས་ལ་མྱ་ངན་འཁྲུག་གོ། །གསུམ་གང་ལ་སོགས་པ་ཞེས་བྱས་ན། གཅིག་ནི། ཚུལ་ཁྲིམས་ཞིག་པའི་དགེ་སློང་ངོ ། །གཉིས་ནི། ལེ་ལོ་ཡར་སྐྱེ་བའི་མིའོ། །གསུམ་ནི། ཆོས་བཤད་པ་མི་གཙང་བའོ། །ཡང་མི་རྣམ་གསུམ་ཡོད་པས་ཆོས་ཀྱི་ཡི་གེ་འདི་ཐོས་ན། སེམས་ལ་མྱ་ངན་འཁྲུག་གོ་།གསུམ་གང་ལ་སོགས་པ་ཞེས་བྱས་ན། གཅིག་ནི། གང་
274a
༄#། །ཟག་ཏུ་མཐོང་བའོ། །གཉིས་ནི། སྲོག་མཐོང་བའོ། །གསུམ་ནི། བདག་ཏུ་མཐོང་བའོ། །ཤཱ་རིའི་བུ། ངས་ད་ཁྱོད་ལ་བྱེ་བྲག་ཕྱེད་པར་བསྒོའོ། །དགེ་བའི་བཤེས་གཉེན་དེས་པ་བྱམས་ཤིང་སྙིང་རྗེ་བའི་སེམས་ཀྱིས་མི་གཞན་གྱི་བསོད་ནམས་བཙལ་བ་དེ་བཙལ་བ་དང་མཚུངས་སོ། །ཁྱོད་ལ་སོགས་པ་ངའི་ཚིག་གཅིག་ཏུ་ཉོན་ནོས་ལ་རྟག་པར་དགེ་བའི་བསོད་ནམས་ཚོལ་ལ་སེམས་ལ་རང་ཉམ་མ་བྱེད་ཅིག། །ཤཱ་རིའི་བུ། ཆོས་འཆད་པ་མི་གཙང་བ་ལ་ནི། འཁྲུག་པ་ལྔ་ཡོད་དོ། །ལྔ་གང་ལ་སོགས་པ་ཞེས་བྱ་བ་བྱས་ན། གཅིག་ནི། རང་ན་རེ། སངས་རྒྱས་ཀྱི་ཆོས་ཟད་པར་ཤེས་ཤིང་ཟེར་རོ། །གཉིས་ནི། སངས་རྒྱས་ཀྱི་ཆོས་ཡིག་བཤད་པའི་ཚེ་ཆོས་ཡིག་གཞན་གྱི་ནང་ནས་འབྱུང་བ་དང་འགལ་བའི་ཉེས་འཁྲུལ་བའོ། །གསུམ་ནི། ཆོས་གཞན་ལ་སེམས་དོགས་ཤིང་ཡིད་མི་ཆེས་པའོ། །བཞི་ནི། བདག་གིས་ཅི་ཤེས་པ་སྤྱད་དེ་ཆོས་ཡིག་གཞན་ལྟར་མ་བྱས་པའོ། །ལྔ་ནི།་གསོ་བའི་ཁེའི་ཕྱིར་མི་གཞན་ལ་ཆོས་བཤད་པའོ། །ཤཱ་རིའི་བུ། དེ་ལྟ་བུར་ཆོས་འཆད་པ་ནི། ངས་མི་དེ་མཐར་སེམས་ཅན་དམྱལ་བར་ལྟུང་སྟེ། མྱ་ངན་ལས་འདས་པར་མི་ཕྱིན་ཅེས་བཤད་དོ། །ཡང་ཤཱ་རིའི་བུ། ཆོས་འཆད་པའི་དགེ་སློང་ནི། ཕལ་མང་པོའི་མང་དུ་གནས་ཏེ་ཆོས་ལ་ཡིད་ཆེས་ཤིང་དད་པས་སྟན་མཐོང་པོ་བཏིང་ན་སངས་རྒྱས་
274b
ཀྱི་དྲང་པོའི་ཆོས་བཏད་སྟེ། མུར་འདུག་གི་ཡི་གེ་དང་ཚིག་གིས་བརྒྱན་པ་འཆད་དོ། །ངས་ཡུན་རིང་དུ་འགྲུས་ཤིང་ཉོན་མོངས་པར་ཆོས་དཀོན་མཆོག་དེ་བཙལ་ན། མི་ངན་པ་འདིས་བཏང་བཞག་ནས་མ་བཤད་དེ། ཆོས་ཡིག་ནང་དང་འགལ་བའི་ཚིག་གི་གཞུང་འབའ་ཞིག་སྤྱད་དེ། གཅིག་ལ་གཅིག་ཡིན་མ་ཡིན་དང ། དྲང་པོའི་ཆོས་དང་འགལ་བ་འཕགས་པའི་ཆོས་ལ་སེམས་མཐོན་པོ་བདག་ཆེ་བའི་ཡིད་བཞིན་དུ་བཤད་དེ། གསོ་བའི་ཁེ་བཙལ་བའི་ཕྱིར་རོ། །ཤཱ་རིའི་བུ། དགེ་སློང་ལ་ལས་ཆོས་མུར་འདུག་གི་གཞུང་དང་འདྲེས་པར་བཤད།་དགེ་སློང་དགེ་བའི་ལམ་ཚོལ་བ་ལ་འགྲུས་པ་ཞིག་ཡོད་ན། འདུག་པ་ལས་ལངས་ཏེ་འགྲོ་བར་རིགས་སོ། །ཅིའི་ཕྱིར་ཞེ་ན། ཤཱ་རིའི་བུ། གོས་སྐྱ་བོ་ཅན་ཡིད་ཆེས་པ་ཡོད་པས་སྟན་མཐོན་པོ་བཏིང་མུར་འདུག་གི་ཚིག་དྲང་ཞིང་བཤད་པ་མི་རིགས་སོ། །དེ་ལྟ་མ་ཡིན་དུ་ཟིན་ན། དགེ་སློང་དགེ་བ་མ་ཡིན་ནོ། །མིང་སངས་རྒྱས་བཤད་པ་བསྟན་པ་བཞིན་ནོ། ། ཞེས་ཀྱང་མི་བྱའོ། །ཤཱ་རིའི་བུ། ཆོས་བཤད་པའང་ཤིན་ཏུ་དཀའ་སྟེ། དེ་ལྟ་བུར་འཆད་པ་ནི། ངས་བཤད་པ་ལ་དེའི་མིང་མུར་འདུག་འཛི་གེན་གྱི་སློབ་མ་ཞེས་བྱ་སྟེ། སངས་རྒྱས་ཀྱི་སློབ་མ་མ་ཡིན་ནོ། །དེ་ལྟར་ཆོས་འཆད་པ་ནི། ཚེ་ཟད་ཀྱི་འོག་ཏུ་འཛི་གེན་ཇིའི་ལམ་དུ་སྐྱེའོ། །གང་ལ་སོགས་པ་འཛི་གེན་ཇིའི་ལམ་ཡིན་ཞེས་བྱས་ན། ཡོན་པོ་མཐོང་བ་འཛི་
275a
༄#། །གན་ཇིའི་ལམ་ཡིན་ནོ། །གང་ལ་སོགས་པ་ཡོན་པོ་མཐོང་བ་ཞེས་བྱས་ན། དེ་ནི། སེམས་ཅན་དམྱལ་བ་དང ། བྱོལ་སོང་དང ། ཡི་དྭགས་ཡིན་ནོ། །ཅིའི་ཕྱིར་ཞེ་ན།་ཤཱ་རིའི་བུ། ལུས་ཀྱིས་ཆོས་མ་གྲུབ་པར་སྟན་མཐོན་པོ་ལ་འདུག། རང་གི་ལུས་ཀྱིས་མི་ཤེས་པར་མི་གཞན་གྱི་ཆོས་སྟོན་པ་ནི། སེམས་ཅན་དམྱལ་བར་ལྟུང་ངོ ། །ཤཱ་རིའི་བུ། དེ་ལྟ་བུའི་རྒྱུ་རྐྱེན་ནི། །དེ་བཞིན་གཤེགས་པས་ཟད་པར་མཁྱེན་ཏེ། ངའི་སློབ་མ་རྣམས་ཀྱི་སྒོ་མོ་རྣམ་པ་མང་པོ་དང ། རྒྱུ་རྐྱེན་རྣམ་པ་མང་པོ་དང ། མཐོང་བ་རྣམ་པ་མང་པོ་སྤྱོད་དེ། ངའི་དྲང་པོའི་ཆོས་མེད་པར་བྱས་སོ། །ཤཱ་རིའི་བུ། ལ་ལ་ཞིག་གིས་འདི་ལྟ་བུ་ཆོས་ཀྱི་ཡི་གེའི་མཆོག་གི་གཞུང་སྟོང་པ་ཅིའང་མེད་པའི་ཆོས་ཐོས་ན་སེམས་དགའ་གཞའ་བ་ཞིག་ཡོད་ན། དེ་ལྟ་བུའི་མི་ནི། ཡང་དག་པའི་ངའི་སློབ་མ་ཡིན་པར་མངོན་ནོ། །ཤཱ་རིའི་བུ། སྔ་མ་འདས་པའི་དུས་ན་དམུས་ལོང་ལྔ་བརྒྱ་ཞིག་ཡོད་པ་ལམ་དུ་དོང་བ་ལས་མཁར་ཆེན་པོ་ཞིག་ཏུ་ཕྱིན་ནས་ཤིན་ཏུ་བཀྲེས་སྐོམ་སྟེ་ལོང་བ་མི་གཅིག་ཕྱི་ལོགས་ན་རྫས་སྲུང་དུ་བཅུག། གཞན་མཁར་གྱི་ནང་དུ་ཟན་གྱི་ལྷག་མ་སློང་དུ་དོང་ནས་རིང་པོར་མ་ལོན་པར་མི་རྫུན་མ་གཅིག་ནོར་སྲུང་བའི་གན་དུ་འོངས་ཏེ། ཚིག་སྨྲས་པ། ཀཝའི་མི་འདི་ཅི་ཕྱི་ན་འབའ་ཞིག་འདུག་།ལན་སྨྲས་པ། བདག་ལ་གྲོགས་མང་དུ་ཡོད་དེ། མཁར་དུ་ཟན་
275b
སློང་དུ་དོང་ངོ ། །མི་རྫུན་མས་སྨྲས་པ། ཁྱོད་ཀྱིས་ཤེས་སམ་མི་ཤེས། ཕ་བི་ན་སྦྱིན་པ་ཆེན་པོ་བྱེད་དོ། །གོས་དང ། ཟས་དང ། རྒྱན་གྱི་ནོར་བུ་དང ། མེ་ཏོག་དང ། སྤོས་དང ། ནོར་གོ་འདུན་ཡིད་བཞིན་དུ་ཐོབ་པར་རུང་ངོ ། །ཁྱོད་དགོས་ན། ཁྱོད་དེར་བཀྲི་བར་རུང་ངོ ། །ལན་སྨྲས་པ། དེ་རུང་ངོ ། །དེ་ནས་མི་རྫུན་མས་ལོང་བ་ཁྲིད་དེ་འདུག་པའི་གནས་ལས་ཅུང་ཟད་ཅིག་འཕགས་པ་དང ། ནོར་ཟད་པར་འཕྲོག་ནས་ལོང་བ་གཞན་ཟས་སློང་བ་ཐོབ་སྟེ། སླར་འཁོར་བ་དང་མི་རྫུན་མས་ལོང་བ་ཕལ་རྣམས་ལ་སྨྲས་པ། ཁྱེད་རྣམས་ཀྱིས་མང་པོ་བསགས་ཏེ་སྦྱིན་པ་བྱེད་པ་དང་ཕྲད་དམ། མ་ཕྲད། ལན་སྨྲས་པ། མ་ཕྲད་དོ། །མི་རྫུན་མས་ཚིག་སྨྲས་པ། ཁྱེད་རྣམས་ཀྱིས་ཅི་རྙེད་པ་འདིར་ཞོག་ལ་ངས་ཁྱེད་རྣམས་ཁྲིད་དེ་སྦྱིན་པ་ཆེན་པོ་བྱེད་པར་འདོང་ངོ ། །དེ་ནས་ལོང་བ་རྣམས་ཀུན་གྱི་ནོར་བཞག་ནས་མི་རྫུན་མའི་ཕྱིར་དོང་ངོ ། །དེ་ནས་མི་རྫུན་མས་ལོང་བ་ལྔ་བརྒྱ་རྣམས་ཟད་པར་ཁྲིད་དེ་ཁུང་ཟབ་མོ་ཞིག་གི་ནང་དུ་ཕྱིན་ནས་ཚིག་སྨྲས་པ། ས་འདི་ཐང་བཟང་སྟེ། སྦྱིན་པ་ཆེན་པོ་འདུས་པ་ཡོད་ཀྱི། ཁྱེད་རྣམས་སོ་སོ་གདོད་ཤར་ཕྱོགས་སུ་ལྟོས་ཏེ་དོང་ལ། ཁོང་གིས་ནོར་བྱིན་པ་ལོངས་ཤིག་ཅེས་བསྒོ་ནས་མོད་བཞིན་གཅིག་ཅར་ཁུང་དུ་ལྟུང་སྟེ་དོག་གོ། ཤཱ་རིའི་བུ། མ་འོངས་པའི་དུས་ན་དགེ་སློང་མུར་འདུག་གི་ཆོས་ཀྱི་ཡི་གེ་ཀློག་པ་ལ་སྲེད་པ་ཆོས་འཆད་པའི་ཚེ་ཚིག་བརྙན་མས་
276a
༄#། །བརྒྱན་ཏེ་ཕལ་གཞན་དག་དད་པར་བྱས་ནས་བདུད་ངན་པས་དེའི་ཚེ་ཕལ་དངངས་བསླད་དེ་དགེ་བའི་ཆོས་བསྒྲིབས་གཅོད་དོ། །ལ་ལ་ཞིག་སྒྲ་སྐད་དང ། སྨྲ་བའི་ཚིག་དང ། བཟོ་བཅོས་པའི་སྙན་བསྔགས་པ་ལ་འདོད་ཆགས་ཤིག་ཡོད་དམ། ཡང་མི་ལ་ལ་ཞིག་མུར་འདུག་གི་ཆོས་ཀྱི་ཡི་གེ་ཀློག་པ་ལ་སྲེད་པ་ཞིག་ཡོད་ན། བདུད་ཀྱིས་ཀུན་བསླད་དཀྲུགས་ཏེ་སེམས་མི་བདེ་བར་བྱས་སོ། །དགེ་སློང་ལ་ལ་ཞིག་སངས་རྒྱས་ཀྱི་ཆོས་སྤྱོད་པ་ཞིག་ཡོད་ན། ཐེ་ཚོམ་སྐྱེ་བར་བྱས་ཏེ་མི་ཕལ་གྱིས་ཡོན་མི་འབུལ་བྱས་སོ། །བར་བར་དགེ་སློང་གཉིས་ཀྱང་རུང ། གསུམ་ཡང་རུང་སངས་རྒྱས་ཀྱི་ཆོས་ཀྱི་ཡི་གེ་བཀླགས་ཟིན་པ་ལས་མུར་འདུག་གི་ཆོས་ཀྱི་ཡི་གེ་ཚོལ་བར་བྱས་ཏེ། སྔོན་བདག་གིས་མཐོང་བ་ལ་དགེ་བཟང་པོ་ཞེས་ཟེར་ཏེ་བསྟོད་ནས་མི་དེ་དག་ལ་སོགས་པ་བདུད་ཀྱིས་བསླད་པ་ཤེས་རབ་ཀྱི་མིག་བཀབ་བསྒྲིབས་ནས་གསོ་བའི་ཁེ་ལ་ཤིན་ཏུ་བརྐམ་སྟེ་མུར་འདུག་གི་ཆོས་ཡིག་རྣམས་ལ་ལྟ་བ་ནི། དཔེར་ལོང་བ་ཁྱུ་ཞིག་རྫུན་མས་བསླུས་ཏེ་ཀུན་ཁུང་ཟབ་མོར་ལྷུང་ནས་ཤི་བར་བྱས་པ་དང་མཚུངས་སོ། །ཤཱ་རིའི་བུ། མི་དམུས་ལོང་རྣམས་ནི། དགེ་སློང་ཡིན་ཏེ། སངས་རྒྱས་ཀྱི་བླ་ན་མེད་པའི་ལམ་བཏང་ལ་མུར་འདུག་གི་ཆོས་ཀྱི་ཡི་གེ་ཚོལ་བའོ། །མི་རྫུན་མ་ནི། བདུད་ངན་པ་ཡིན་ནོ། །ཁུང་\?\་ཟབ་མོ་ནི།
276b
ཡོན་པོའི་ལམ་ཡིན་ནོ། །ཤཱ་རིའི་བུ། མི་ལོང་བ་ཁྱུ་གཅིག་དང་མཚུངས་ཏེ། ནོར་རྙེད་དོ་ཅོག་བོར་ལ་སྦྱིན་པ་ཆེན་པོ་བྱེད་པར་འགྲོ་ཞེས་བྱས་པ་དང་ཁུང་ཟབ་མོར་ལྷུང་ངོ ། །ངའི་སློབ་མ་རྣམས་ཀྱང་དེ་དང་མཚུངས་ཏེ། གོས་སྦོམ་པོ་དང་ཟས་ངན་པ་བོར་ལ་སྦྱིན་པ་ཆེན་པོའི་ཕྱིར་འབྲངས་ཏེ། ཡོན་བཟང་པོ་ཚོལ་ཞིང་འཇིག་རྟེན་གྱི་ཁའི་ལན་བྱས་ན། ཤེས་རབ་ཆེན་པོ་སྟོར་ཏེ་ཁུང་ཟབ་མོ་མནར་མེད་པའི་དམྱལ་བར་ལྟུང་ངོ ། །ཡང་ཤཱ་རིའི་བུ། ཆོས་འཆད་མི་གཙང་བས་ནི། དེ་བཞིན་གཤེགས་པའི་ཡིད་བཞིན་དུ་སྤྲོ་བར་ཕྱོགས་པ་མ་རིག་སྟེ། བདག་ཉིད་ཀྱང་མཁས་པར་མི་ཤེས་པར་མི་གཞན་ལ་ཆོས་བཤད་ན། མི་དེས་འཕྲལ་གྱི་ཆེ་ལ་ཉེས་འཁྲུལ་པ་ལྔ་ཐོབ་སྟེ། མི་གཞན་གྱིས་མི་ཤེས། ལྷའི་མིག་ཐོབ་པའི་དགེ་སློང་དང་ལྷ་རྣམས་འབའ་ཞིག་གིས་ཤེས་སོ། །ལྔ་གང་ལ་སོགས་པ་ཞེས་བྱས་ན། གཅིག་ནི། ཆོས་འཆད་པའི་ཚེ་སེམས་ལ་འཇིགས་སྐྲག་པ་སྲེལ་ཏེ། མི་གཞན་གྱིས་\?\་བཅག་གིས་དོགས་པའོ། །གཉིས་ནི། ཁོང་ན་འཇིགས་པའི་མྱ་ངན་སྲེལ་བཞིན་དུ་ཕྱི་རོལ་ཏུ་གཞན་ལ་ཆོས་བཤད་པའོ། །གསུམ་ནི། ཕལ་ཐ་མལ་པ་སྟེ། ཡང་དག་པར་ཤེས་རབ་མེད་པའོ། །བཞི་ནི། བཤད་དོ་ཅོག་མི་གཙང་སྟེ། ཚིག་འབྲུ་ཤ་སྟག་ཡོད་པའོ། །ལྔ་ནི། ཚིག་ལ་གོ་རིམ་མེད་དེ། སོ་སོ་ནས་མདོ་བསྡུས་པའོ། །དེ་ལྟ་བས་ན།
277a
༄#། །ཕལ་གྱི་ནང་ན་འདུག་ལ་སེམས་ལ་འཇིགས་དོགས་པ་སྲེལ་ཏོ། །དེ་ལྟ་བུའི་ཕལ་ཐ་མལ་པ་ནི། ཤེས་རབ་མེད། སེམས་ལ་ངེས་པ་མེད་དེ། དྲེགས་ཤིང་ལེ་ལོ་དང ། རྒྱུ་རྐྱེན་ཆུང་ངུ་སྤྱད་དེ། མིང་གྲགས་པར་བྱ་བ་བཙལ་ཏེ། ངོགས་ཤིང་འགྱོད་པ་སེམས་ལ་འདུག་པས་མི་གཞན་ལ་ཆོས་བཤད་དོ། །མི་དེས་ཉིན་མཚན་དུ་རང་གིས་འདོད་ཆགས་དང ། ཞེ་སྡང་དང ། གཏི་མུག་གི་དུག་མདའ་མ་ནོས་སོ། །ཅིའི་ཕྱིར་ཞེ་ན། ཤཱ་རིའི་བུ། མི་དེས་ཆོས་ཀྱི་རྣམ་གྲངས་ངེས་པར་ཤེས་པར་མི་ནུས་པར་གཞན་ལ་ཆོས་བཤད་དེ། སེམས་མི་དགའ་མི་སྐྱིད་དེ། སྐྱིད་དུ་ཟིན་ནའང་མྱུར་དུ་སྟོན་ཏོ། །ཤཱ་རིའི་བུ། ངས་བཤད་པ་མི་གཙང་བ་ལ་དེ་ལྟ་བུའི་ཉེས་སྡིག་ཡོད་དེ། དྲང་པོའི་ལམ་ཐོབ་པར་མི་ཤེས་སོ། །དེ་ལྟ་བུའི་དོན་ནི། དགེ་སློང་ཐམས་ཅད་ཀྱིས་མི་ཤེས། ལྷ་རྣམས་ཀྱིས་ཀྱང་མི་ཤེས་ཏེ། ང་འབའ་ཞིག་གིས་གདོད་ཤེས་སོ། །ཡང་ཆོས་འཆད་པ་མི་གཙང་བའི་དགེ་སློང་གིས་དེ་བཞིན་གཤེགས་པས་སྤྲོས་པ་བཞིན་དུ་བཤད་པ་མ་ཤེས་ཏེ། མི་གཞན་ལ་བཤད་པ་ཆོས་ཀྱི་ཡི་གེ་གཞན་གྱི་ནང་ན་བདག་ཏུ་ལྟ་བ་མེད། གང་ཟག་ཏུ་ལྟ་བ་མེད། སེམས་ཅན་མེད། ཚེ་སྲོག་མེད་ཅེས་བཤད་པ། མི་ངེས་བདག་གིས་ཚིག་བརྗོད་པ་སྤྱད་དེ། བདག་ཏུ་ལྟ་བ་ཡོད། གང་ཟག་ཏུ་ལྟ་བ་ཡོད། སེམས་ཅན་ཡོད། ཚེ་
277b
སྲོག་ཡོད་ཅེས་བཤད་དེ། སངས་རྒྱས་ལ་སྐུར། ཆོས་ལ་སྐུར། དགེ་འདུན་ལ་སྐུར་ཏེ། དཀོན་མཆོག་གསུམ་ལ་སྐུར་བའི་སྡིག་ནི། ལྷ་རྣམས་དང ། འཇིག་རྟེན་གྱི་མིས་ཤེས་པར་མི་ནུས་ཏེ། སངས་རྒྱས་ཉི་ཚེས་མཁྱེན་ཏོ། །ཤཱ་རིའི་བུ། མི་དེས་ཡང་མི་ཆོས་འཆད་པ་མི་གཙང་བ་ཞེས་བྱ་སྟེ། ངས་དེ་ཉེས་པ་ཤེས་སོ། །གཞན་རྫུ་འཕྲུལ་ཅན་དང ། ལྷ་རྣམས་ཀུན་གྱིས་ཤེས་པར་མི་ནུས་ཏེ། སངས་རྒྱས་ཉི་ཚེས་མཁྱེན་ཏོ། །ཤཱ་རིའི་བུ། ད་ངས་ཁྱོད་ལ་དཔེ་ཚུལ་གྱིས་འགྲོལ་བ་བཤད་དོ། །མི་ལ་ལ་ཞིག་གིས་སངས་རྒྱས་ཀྱི་ལམ་གྱི་གཞུང་གི་མཚན་མ་མི་ཤེས་པར་མི་གཞན་ལ་མི་གཙང་བར་ཆོས་འཆད་ན། མི་དེས་མི་དགེ་བའི་དོན་ཅི་སྲིད་འབྱོར་འགྲུབ། ཤཱ་རིའི་བུ། ཁྱོད་ཀྱི་ཡིད་ལ་ཇི་སྙམ། ཛམྦུའི་གླིང་གི་སེམས་ཅན་མང་ངམ་མི་མང ། བཅོམ་ལྡན་འདས། ཤིན་ཏུ་མང་ལགས་སོ། །ཤཱ་རིའི་བུ། མི་ངན་པ་ལ་ལ་ཞིག་གིས་དེ་ཟད་པར་གྱི་སྲོག་འཕྲོག་ན། མི་དེས་སྡིག་ཐོབ་པ་མང་ངམ་ཉུང ། བཅོམ་ལྡན་འདས། ཤིན་ཏུ་མང་ལགས་སོ། །དེ་ལྟ་བུའི་མི་གཏི་མུག་གིས་སངས་རྒྱས་ཀྱི་ལམ་མི་ཤེས་པར་མི་གཞན་ལ་ཆོས་འཆད་པ་མི་གཙང་བ་ནི། སྡིག་དེ་བས་མང་ངོ ། །ཅིའི་ཕྱིར་ཞེ་ན། མི་ངེས་ཆོས་འཆད་པ་མི་གཙང་བས་བླ་ན་མེད་པའི་སངས་རྒྱས་ཀྱི་ལམ་བཤིག་།སྔ་མ་འདས་པ་དང ། མ་འོངས་པ་དང ། ད་ལྟར་གྱི་སངས་རྒྱས་ལའང་སྐུར་ཏོ། །ཅིའི་ཕྱིར་ཞེ་ན། ཤཱ་རིའི་བུ།
278a
༄#། །མ་འོངས་པའི་སངས་རྒྱས་ཀྱིས་ཀྱང་ཆོས་སོ་ཅོག་ཐམས་ཅད་ཀུན་མཐའ་ཡུན་དུ་ཀུན་སྟོང་པ་སྟེ། བདག་ཏུ་ལྟ་བ་མེད། གང་ཟག་ཏུ་ལྟ་བ་མེད། སེམས་ཅན་མེད། ཚེ་སྲོག་མེད་ཅེས་བཤད་དོ། །ཤཱ་རིའི་བུ། མ་འོངས་པའི་སངས་རྒྱས་རྣམས་ཀྱིས་ཀྱང་ཆོས་སོ་ཅོག་མཐའ་ཡུན་དུ་སྟོང་པ་སྟེ། བདག་ཏུ་ལྟ་བ་མེད། གང་ཟག་ཏུ་ལྟ་བ་མེད།་སེམས་ཅན་མེད། ཚེ་སྲོག་མེད་དོ། །ཤཱ་རིའི་བུ། ད་ལྟར་གྱི་ཕྱོགས་བཅུའི་ཆུ་བོ་གངྒཱའི་བྱེ་མ་སྙེད་ཀྱི་འཇིག་རྟེན་གྱི་ཁམས་ཀྱི་སངས་རྒྱས་རྣམས་ཀྱིས་ཀྱང་ཆོས་སོ་ཅོག་མཐའ་ཡུན་དུ་སྟོང་སྟེ། བདག་ཏུ་ལྟ་བ་མེད། གང་ཟག་ཏུ་ལྟ་བ་མེད། སེམས་ཅན་མེད། ཚེ་སྲོག་མེད་ཅེས་བཤད་དོ། །ཤཱ་རིའི་བུ། དེའི་མིང་སངས་རྒྱས་སོ་ཅོག་གི་བླ་ན་མེད་པའི་ཆོས་ཞེས་བྱ་སྟེ། ཆོས་སོ་ཅོག་ལ་མཚན་ཉིད་མེད་དེ། སྟོང་པ་མེད་པས་ཐོབ་པ་མེད་དོ། །ཕྱི་མོ་ངོ་བོ་ཉིད་སྟོང་པ་ཞི་བས་ན། སྐྱེ་བའང་མེད་དེ། འགོག་པའང་མེད། ཉིད་ཀྱི་མཚན་མ་དང ། རང་བཞིན་གྱི་མཚན་མའང་མེད་དེ། ཀུན་སྟོང་པ་བས་ན། དེ་བཞིན་གཤེགས་པས་དྲན་པའི་འདུ་ཤེས་ཀྱིས་རྣམ་པར་རྟོག་པ་རྣམས་བཅད་པ་འབའ་ཞིག་གི་ཕྱིར་སངས་རྒྱས་རྣམས་ཀྱི་བྱང་ཆུབ་ལ་རྣམ་པར་བརྟག་པ་མེད་ཅེས་བཤད་དོ། །ཤཱ་རིའི་བུ། གང་ལ་སོགས་པ་ལ་རྣམ་པར་རྟོག་ཅེས་བྱ་བ་རྣམ་པར་རྟོག་གོ་ཅོག་བདག་
278b
ཏུ་ལྟ་བ་དང ། གང་ཟག་ཏུ་ལྟ་བ་དང ། སེམས་ཅན་དུ་ལྟ་བ་དང ། ཚེ་སྲོག་ཏུ་ལྟ་བ་དང ། ཆད་པར་མཐོང་བ་དང ། རྟག་པར་མཐོང་བ་དང ། ཕལ་ཐ་མལ་པས་དེ་ལྟ་བུར་རྣམ་པར་རྟོག་པར་འབྱོར་འགྲུབ་པོ། །མི་ལ་ལ་ཞིག་ལ་དེ་ལྟ་བུའི་རྣམ་པར་རྟོག་པ་མེད་དེ། ཆོས་སོ་ཅོག་ཀུན་སྟོང་པ་དང ། བདག་ཏུ་ལྟ་བ་མེད། གང་ཟག་མེད། སེམས་ཅན་མེད། ཚེ་སྲོག་མེད།་ཀུན་བྱེ་བྲག་ཕྱེད་པར་ཤེས་ནུས་ན། དེ་ལྟར་སེམས་པའི་ཚེ་སེམས་དགའ་བ་ཐོབ་སྟེ། མཆོག་གི་གཞུང་སྟོང་བ་ཐོབ་ནས་མི་དངངས་མི་སྐྲག་སྟེ། མི་དེས་ལྔ་ཕུང་སྒྱུ་མ་མི་བདེན་ཞིང་ཡང་དག་པའི་བདེན་པ་མེད་པར་རིག་གོ། ཞུགས་པ་བཅུ་གཉིས་དང ། ཁམས་བཅོ་བརྒྱད་སྒྱུ་མ་མི་བདེན་པ་སྟེ། ཡང་དག་པའི་བདེན་པ་མེད་པར་རིག་གོ། །མི་དེས་མྱ་ངན་ལས་འདས་པ་ལའང་རྣམ་པར་མི་རྟོག་།མྱ་ངན་ལས་འདས་པ་མི་སེམས། ངས་མྱ་ངན་ལས་འདས་པ་བསམ་ནུས་ཏེ། ཆོས་སྤྱད་པས་སྟོང་པ་ཞི་བ་ཐོབ་ཅེས་ཀྱང་མི་ཟེར། ཆོས་དེའི་སྟོང་པ་ཞི་བའི་གནས་ལའང་རྣམ་པར་མི་རྟོག། མི་ཐོབ་པར་ཡང་མི་རྟོག་སྟེ། ཤཱ་རིའི་བུ། དེའི་མིང་མི་འགལ་བའི་བཟོད་པ་ཞེས་བྱའོ། །མི་ངེས་མི་འགལ་བའི་བཟོད་པའི་མཆོག་གི་གཞུང་འདིའི་ནང་ནའང་རང་གི་མཚན་ཐོབ་པ་མེད་དོ། །ཤཱ་རིའི་བུ། གང་ལ་སོགས་པ་བཟོད་པའི་མཚན་མ་ཞེས་བྱ། དེ་ནི། མཚན་མ་མེད་ན། མི་འགལ་བའི་བཟོད་པའི་མཚན་
279a
༄#། །མའི་བཟོད་པ་ཡིན་ནོ། །ཤཱ་རིའི་བུ། ཁྱོད་ཀྱི་ཡིད་ལ་ཇི་སྙམ། མི་ལ་ལ་ཞིག་གིས་འདི་ལྟ་བུའི་བཟོད་པ་ལའང་མཚན་མ་མི་ཐོབ་ན། མི་དེས་བདག་ཏུ་ལྟ་བའི་མཚན་མ་དང ། གང་ཟག་གི་མཚན་མ་དང ། སེམས་ཅན་གྱི་མཚན་མ་དང ། ཚེའི་མཚན་མ་དང ། སྲོག་གི་མཚན་མ་ཐོབ་ཅེ་ན། བདེན་པ་ཡོང་མེད་དོ། །ལ་ལ་ཞིག་གིས་འདི་ལྟ་བུའི་ཤེས་རབ་འབྱོར་གྲུབ་ན། ཡོན་ལེན་པ་རིགས་ཏེ། དེའི་མིང་སངས་རྒྱས་ཀྱི་བུའོ། །དེའི་མིང་མ་ཆགས་པའི་ཐུབ་པར་ཚུད་པའོ། །ཤཱ་རིའི་བུ། དེ་ལྟ་བུའི་མིང་སངས་རྒྱས་ཀྱི་ཆོས་སོ་ཅོག་གི་གཞུང་གི་སྒོ་མོ་སྟེ། དྲན་པའི་འདུ་ཤེས་ཀྱིས་རྣམ་པར་བརྟག་པ་མེད་དེ། འདི་ཞེས་བྱ་བ་མེད། ཕ་བི་ཞེས་བྱ་བ་མེད་པ་ནི། གཏི་མུག་གིས་ཕལ་མང་པོའི་ནང་དུ་འདུག་སྟེ། ཡོན་པོ་མཐོང་བ་བཤད་ནས་རང་གི་དྲན་པའི་འདུ་ཤེས་ཀྱི་རྣམ་པར་རྟོག་པ་སྤྱད་དེ། འདི་ནི། སངས་རྒྱས་ཀྱི་ཆོས་ཡིན། འདི་ནི། འཕགས་པའི་ལམ་ཡིན་ཞེས་མི་ལ་བསྟན་ཏོ། །དེ་ལྟ་བུའི་གཏི་མུག་གིས་སྔ་མ་འདས་པ་དང ། མ་འོངས་པ་དང ། ད་ལྟར་གྱི་སངས་རྒྱས་རྣམས་ལ་འཕྱ་ཞིང་སྐུར་ཏོ། །དེ་ལྟ་བུའི་མི་གཏི་མུག་ནི། མིང་ངན་པའི་བཤེས་གཉེན་ཞེས་བྱ་སྟེ། དགེ་བའི་བཤེས་གཉེན་ཞེས་མི་བྱའོ། །ཤཱ་རིའི་བུ། དགྲས་སྲོག་འཕྲོག་མོད་ཀྱི། ལུས་གཅིག་ཏུ་སྟོར་དུ་ཟད་དོ། །དེ་ལྟ་བུའི་མི་
279b
གཏི་མུག་གིས་ཆོས་བཤད་པ་མི་གཙང་བ་ནི། བསྐལ་པ་སྟོང་ཁྲི་འབུམ་གྱི་བར་དུ་སེམས་ཅན་རྣམས་ཀྱི་རྐུན་པོའི་མྱ་ངན་ཆེན་པོ་བྱས་སོ། །མི་དེ་གཏི་མུག་གི་མུན་གྱིས་སངས་རྒྱས་ཀྱི་བྱང་ཆུབ་བཀབ་པས་སེམས་ཀྱི་ཕྱི་མོ་འདོད་ཆགས་པ་ལ་སླར་ཡང་འདོད་དངར་ནས་གཅིག་གིས་གཅིག་མཐུད་ཅིང་ཆགས་ཏེ་འདོད་ཆགས་སྤྱད་པས་ན། ལམ་རྒྱུད་ལྡར་སོང་ཞིང་འོང་སྟེ། ངོ་ཚ་བའི་ལམ་མེད་ཅིང་སྐྱེ་ཤི་མི་ཆད་དོ། །དེ་ལྟ་བས་ན། ཤཱ་རིའི་བུ། ཆོས་འཆད་པ་མི་གཙང་བ་ནི། སྡིག་ཤིན་ཏུ་མང་པོ་ཐོབ་པོ། །སེམས་ཅན་གྱི་ངན་པའི་བཤེས་གཉེན་ཡང་བྱས་སོ། །སྔ་མ་འདས་པ་དང ། མ་འོངས་པ་དང ། ད་ལྟར་གྱི་སངས་རྒྱས་ལའང་སྐུར་ཏོ། །ཤཱ་རིའི་བུ། དེའི་ཛམྦུའི་གླིང་གི་སེམས་ཅན་ཞིག་སྟེ། མི་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ཀྱི་སྲོག་འཕྲོག་པ་བས་ཆོས་འཆད་པ་མི་གཙང་བའི་སྡིག་དེ་མཐོའོ། །ཅིའི་ཕྱིར་ཞེ་ན། མི་དེས་སངས་རྒྱས་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀུན་བཤིག་སྟེ། བདུད་ཀྱི་དོན་ལ་བསྟངས་ཤིང་སེམས་ཅན་ཚེ་རབས་བརྒྱ་སྟོང་ཁྲིའི་བར་དུ་རྐུན་པོའི་མྱ་ངན་རྣམས་ནོད་པར་ཡང་བྱ་སྟེ། བཅིང་བར་བྱ་བ་འབའ་ཞིག་ནུས་ཀྱི། དགྲོལ་བར་བྱ་མི་ནུས་ཏེ། དེ་ལྟ་བུའི་མི་སེམས་ཅན་རྣམས་ཀྱི་ངན་པའི་བཤེས་གཉེན་ཡིན་པར་མངོན་ནོ། །རྫུན་གྱི་ཚིག་དེས་ཕལ་མང་
280a
༄#། །པའི་ནང་དུ་སངས་རྒྱས་ལ་སྐུར་ཅིང་གཞིག་གོ། རྒྱུ་རྐྱེན་དེ་ལྟ་བས་ན། སེམས་ཅན་དམྱལ་བ་ཆེན་པོར་ལྟུང་ངོ ། །སེམས་ཅན་ཡོན་པོའི་དོན་མཐོང་བ་བསྟན་པ་མང་སྟེ།་དེ་ལྟ་བས་ན། མིང་ངན་པ་ཡོན་པོ་མཐོང་བ་ཞེས་བྱའོ། །ཤཱ་རིའི་བུ། བདག་ཏུ་ལྟ་བ་དང ། གང་ཟག་ཏུ་ལྟ་བ་དང ། སེམས་ཅན་དུ་ལྟ་བ་ནི། ཡོན་པོར་ལྟུང་བ་མང་ངོ ། ། ཞི་བ་མ་མཐོང་བའང་མཆོད་པ་ནི། མྱུར་ཏེ། ལམ་ཐོབ་པ་མང་ངོ ། །ཅིའི་ཕྱིར་ཞེ་ན། ངེས་མཐོང་སླ་བའི་ཕྱིར་རོ། །དེ་ལྟ་བས་ན། ཤེས་པར་བྱོས་ཤིག་།མི་དེ་རང་གི་རལ་གྲི་རྣོན་པོ་བརྡར་ཏེ་ལྕེ་གཅོད་ན་ཕོད་ཀྱི། ཕལ་གྱི་ནང་དུ་མི་གཙང་བར་ཆོས་འཆད་པ་ནི་།མི་རིགས་སོ། །ལེའུ་བདུན་ཏེ། གནའ་འདས་པའི་ལེའུའོ།། །།སངས་རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། གནའ་འདས་པའི་ཡུན་རིང་པོ་དཔག་ཏུ་མེད། མུ་མེད། བསམ་གྱིས་མི་ཁྱབ་པ་བསྐལ་པ་གྲངས་མེད་པའི་ཚེ་སངས་རྒྱས་ཤིག་ཡོད་པ་མཚན་བཟང་པོ་དེ་བཞིན་གཤེགས་པ་གསོལ་བ་ཞེས་རིགས་དྲང་ཁྱབ་མཁྱེན་སྣང་བ་མཛད་ཞབས་བདེ་གཤེགས་འཇིག་རྟེན་སྒྲོལ། བླ་ན་མེད་པའི་དྲི་མ་གདུལ་ཐུལ་སྐྱེས་བུ་ལྷ་དང་མིའི་མཁན་པོ་སངས་རྒྱས་བཅོམ་ལྡན་འདས་ཞེས་བྱ་སྟེ། སངས་རྒྱས་དེ་འཇིག་རྟན་ན་ཚེ་སྲོག་ལོ་འབུམ་ཁྲི་ཕྲག་བརྒྱད་བརྒྱ་དང་དྲུག་ཅུ་ལོན་ཏེ། སློབ་མ་ཆེན་པོ་ཕལ་འབུམ་
280b
ཁྲི་ཕྲག་བརྒྱད་བརྒྱ་དྲུག་ཅུ་པ་ཡོད་དེ། སངས་རྒྱས་དེ་འདས་པའི་ཕྱི་ན་སྐུ་གདུང་ཁྱབ་པར་བཀྲམ་པ་ནི། ང་འདས་པའི་ཕྱི་ན་བ་དང་མཚུངས་ཏེ། ཐ་དད་པ་མེད་དོ། །དྲང་པོའི་ཆོས་འཇིག་རྟེན་ན་འདུག་པའང་ལོ་ལྔ་བརྒྱ་སྟེ། ང་འདས་པའི་ཕྱི་ན་བ་དང་མཚུངས་ཏེ། ཐ་དད་པ་མེད་དོ། །སངས་རྒྱས་འདས་པའི་ཕྱི་ན་ཕལ་ཆེན་པོ་དེ་དག་གི་ནང་ནས་ཉི་མ་གཅིག་ལ་དགེ་སློང་བརྒྱ་མྱ་ངན་ལས་འདས་པར་ཞུགས་པ་ཡོད་དོ། །ཉིས་བརྒྱ་སུམ་བརྒྱ་བཞི་བརྒྱ་ལྔ་བརྒྱ་མྱ་ངན་ལས་འདས་པར་ཞུགས་པ་ཡོད་དོ། །ཉི་མ་གཅིག་ལ་བར་བར་དགེ་སློང་འབུམ་ཁྲི་ཕྲག་བཅུ་མྱ་ངན་ལས་འདས་པར་ཞུགས་པ་ཡོད་དོ། །དེ་ལྟ་བུར་གཅིག་ནས་གཅིག་ཏུ་སངས་རྒྱས་དེ་ལ་ཤེས་པ་མང་པོ་དང ། རིམ་པ་མང་པོ་ཡོད་པའི་རྫུ་འཕྲུལ་ཆེན་པོ་རྣམས་ཟླ་བ་གསུམ་གྱི་ངོ་ལ་ཀུན་མྱ་ངན་ལས་འདས་པར་ཞུགས་སོ། །ཤཱ་རིའི་བུ། སངས་རྒྱས་བཟང་རྒྱན་ཆེན་པོས་དྲང་པོའི་ཆོས་ཁྱབ་པར་བཀྲམ་པ་ལ་ལྷ་དང་མི་མང་པོ་ཀུན་གྱིས་ཡོན་ཕུལ་ལོ། །ཤཱ་རིའི་བུ། སངས་རྒྱས་བཟང་རྒྱན་ཆེན་པོ་དང ། སློབ་མ་ཆེན་པོ་རྣམས་མེད་པར་འདས་པའི་ཕྱི་ན་མི་ལ་ཁད་ཀྱིས་དགེ་སྦྱོང་གི་ཆོས་ཤེས་ཤིང་བདེ་སྐྱིད་པ་ལས་ཁྱིམ་ནས་འབྱུང་ཞིང་ལམ་སློབ་པའང་མང་དུ་ཡོད་ན། སངས་རྒྱས་ཀྱི་ཆོས་ཀྱི་ཡི་གེ་ཤིན་ཏུ་ཟབ་མོ་བསྒྲུན་དུ་མེད་པའི་སྟོང་བའི་གཞུང་དྲངས་ཤིང་བཤད་པ་ཤེས་པར་མི་
281a
༄#། །ནུས་ཏེ། བདུད་ངན་པས་བསླད་རྨོངས་པ་མང་བས། དེའི་ཚེ་ཆོས་འཆད་པའང་སེམས་གཅིག་ཏུ་མི་ཐུབ་པས་བཤད་པའང་མི་གཙང་མི་གདང་སྟེ། བདག་ཏུ་ལྟ་བ་དང ། གང་ཟག་ཏུ་ལྟ་བ་དང ། ཚེ་སྲོག་ཡོད་པར་བཤད་ཀྱི། ཆོས་སོ་ཅོག་ཀུན་སྟོང་པ་ཞི་བར་མ་བཤད་དོ། །སངས་རྒྱས་དེ་མེད་པར་འདས་པའི་ཕྱི་ན་ལོ་བརྒྱ་ལོན་ན་སློབ་མ་རྣམས་ཀྱི་སྡེ་ལྔར་བགོས་ཏེ། གཅིག་གི་མིང་ནི། ཁྱབ་དོན། གཉིས་ཀྱི་མིང་ནི། སྡུག་བསྔལ་བཀྲམ། གསུམ་གྱི་མིང་ནི། ཐམས་ཅད་སྐྱོབ། བཞིའི་མིང་ནི། ཙང་ཀི། ལྔའི་མིང་ནི། བར་འདན་ཏ་ཞེས་བྱའོ། །ཤཱ་རིའི་བུ། དགེ་སློང་ཁྱབ་དོན་དང ། དགེ་སློང་སྡུག་བསྔལ་བཀྲམ་དང ། དགེ་སློང་རྩ་ད་ཏ་དང ། དགེ་སློང་ཙང་ཀི་དང ། དགེ་སློང་བར་འདན་ཏ་དང་དགེ་སློང་འདི་ལྔས་ཕལ་མང་པོའི་མཁན་པོ་བྱས་ན། ཁྱབ་དོན་ཞེས་བྱ་བ་ནི། སངས་རྒྱས་ཀྱིས་ཡང་དག་པའི་བདེན་པའི་སྟོང་པའི་གཞུང་ཅིའང་མེད་པའི་ཆོས་བཤད་དོ་ཅོག་ཤེས་སོ། །དགེ་སློང་བཞི་པོ་གཞན་ནི། ཀུན་ཡོན་པོའི་ལམ་དུ་ལྷུང་ངོ ། །བདག་ཏུ་ལྟ་བ་ཡོད་པར་འཆད་པ་མང ། གང་ཟག་ཡོད་པར་འཆད་པ་མང་ངོ ། །ཤཱ་རིའི་བུ། དགེ་སློང་ཁྱབ་དོན་ནི། སྡེ་བཞིས་བརྙས་ཏེ། དཔུང་དང་མཐུ་མེད་པས་མི་མང་པོས་སྨད་དོ། །དགེ་སློང་ངན་པ་བཞི་ནི། ཕལ་ནི། མང་དུ་ཡོན་པོའི་ལམ་དུ་ལྟ་
281b
བར་བསླབ་སྟེ། སངས་རྒྱས་ཀྱི་ཆོས་གཅིག་ལ་གཅིག་རི་མོ་གུས་པར་མི་བྱེད་དེ། གཅིག་ལ་གཅིག་གལ་བས་ན། སངས་རྒྱས་ཀྱི་ཆོས་མང་བར་གྱུར་ཏོ། ཤཱ་རིའི་བུ། མི་ལ་ལ་ཞིག་དགེ་སློང་ཁྱབ་དོན་གྱིས་སྟོང་པའི་ཆོས་བཤད་དོ་ཅོག་ཤེས་སླ་ཡིད་ཆེས་པར་མནོས་ཏེ། མ་འགལ་ན། ངས་དེ་ལྟ་བུའི་མི་ནི། ཚེ་དུས་སྔ་མ་ལ་སངས་རྒྱས་ལྔ་སྟོང་ལ་ཡོན་གསོལ་མྱོང་བར་མངོན་ཏེ། མི་གྲངས་འདའ་ཡུ་ཏ་འབུམ་ཕྲག་དྲུག་ཅུ་རྩ་བརྒྱད་ཡོད་པ་དང་མྱ་ངན་ལས་འདས་པར་ཞུགས་ཟིན་པའོ། །ཅིའི་ཕྱིར་ཞེ་ན། ཤཱ་རིའི་བུ། མི་དེས་འདས་པའི་དུས་ཀྱི་སངས་རྒྱས་རྣམས་ལ་དགེ་བའི་རྩ་བ་བསྐྱེད་དོ། །ཅིའང་ཐོབ་པ་མེད་པའི་སྟོང་པའི་ཆོས་སྤྱད་སྦྱངས་མྱ་ངན་ལས་འདའ་བར་འཇུག་པའི་རིགས་སོ། །ཤཱ་རིའི་བུ།་དགེ་སློང་ཐམས་ཅད་ཡོད་དང ། དགེ་སློང་ཙང་ཀི་དང ། དགེ་སློང་བར་འདན་ཏ་དང ། དེ་ཀུན་ཐོབ་པ་ཡོད་པར་འཛིན་ཏེ། བདག་ཏུ་ལྟ་བ་དང ། གང་ཟག་དང ། སེམས་ཅན་དང ། ཚེ་སྲོག་ཡོད་པར་འཆད་དོ། །གྲོགས་མང་པོ་མདོ་དར་བས་མི་ངན་པ་དེ་བཞིས་ཁྱིམ་ན་འདུག་པ་དང ། ཁྱིམ་ནས་བྱུང་བ་མང་དུ་ཡོན་པོ་མཐོང་བ་ལ་ཆགས་པར་བྱས་ཏེ། མཆོག་གི་གཞུང་ཅིའང་མེད་པ་མཐའ་ཡུན་དུ་སྟོང་པའི་ཆོས་བཏང་ནས་མུར་འདུག་འཛི་གེ་ན་\?\་གྱིས་ཆོས་བཤད་པ་ལ་དད་ཅིང་ཆགས་སོ། །ཤཱ་རིའི་བུ། མི་ངན་པ་དེ་བཞིས་ཁྱིམ་ན་འདུག་
282a
༄#། །པ་དང ། ཁྱིམ་ནས་བྱུང་བའི་སློབ་མའི་ཆོས་ཟད་ལ་ཐུག་གི་བར་དུ་རྟག་པར་ཕྱི་བཞིན་དུ་ཁྲིད་དོ། །ཤཱ་རིའི་བུ། དེའི་ནང་ན་མི་ལ་ལ་ཆོས་ཀྱི་དོན་མ་ཡིན་པར་ཤེས་ཏེ།་མནོས་ནས་ཆོས་སུ་བྱས་ཏེ་སེམས་ལ་འགྲུས་པར་སྤྱད་ན་འོན་ཀྱང་མི་འགལ་བའི་བཟོད་པ་མ་ཐོབ་ན། རྒྱུན་དུ་ཞུགས་པའི་འབྲས་བུ་མི་ཐོབ་པ་ལྟ་སྨོས་ཀྱང་ཅི་དགོས། མི་དེ་ལྟ་བུའང་ཡོན་ཕུལ་བའི་དོན་ཞུ་བར་མི་བྱེད་ན། མི་འགལ་བའི་བཟོད་པ་སྐྱེ་བར་མི་ནུས་པ་ལྟ་སྨོས་ཀྱང་ཅི་དགོས། ཤཱ་རིའི་བུ། དེའི་ཚེ་ཁྱིམ་ན་འདུག་པ་དང ། ཁྱིམ་ནས་བྱུང་བའི་སློབ་མ་ལམ་ངན་པར་ལྟུང་བ་སྟེ། དགེ་བའི་ལམ་དུ་མ་ཕྱིན་ཏོ། །མི་ངན་པ་དེ་དག་གིས་སངས་རྒྱས་ཀྱི་ཆོས་དྲང་པོ་བགགས་ཏེ། མི་ལ་རྒུད་པའི་མྱ་ངན་གྱི་ཡོན་ཆེན་པོ་མི་མང་པོ་ལ་ཤིན་ཏུ་རྒུད་པའི་མྱ་ངན་ཀྱང་བྱིན་པའི་སྟེང་དུ་མི་ངན་པ་དེ་དག་ཚེ་ཟད་པའི་འོག་ཏུ་མནར་མེད་པའི་སེམས་ཅན་དམྱལ་བར་ལྟུང་སྟེ། ལོ་འབུམ་ཁྲི་ཕྲག་བདུན་གྱི་བར་དུ་ནི། གན་རྐྱལ་དུ་ཉལ་ལོ། །འབུམ་ཁྲི་ཕྲག་དགུ་བརྒྱའི་བར་དུ་ནི། ཁ་སྤུབ་ཏུ་ཉལ་ལོ། །འབུམ་ཕྲག་དགུ་བརྒྱའི་བར་དུ་ནི། རྩིབ་ལོགས་གཡོན་པས་ཉལ་ལོ། །འབུམ་ཁྲི་ཕྲག་དགུ་བརྒྱའི་བར་དུ་ནི། རྩིབ་ལོགས་གཡས་པས་ཉལ་ལོ། །དེ་ལྕགས་ཚ་བའི་ནང་དུ་བསྲེགས་ནས་ཚིག་ཞིག་སྟེ། དེའི་ནང་དུ་ཤི་བ་དང ། ཡང་ཐལ་བའི་སེམས་ཅན་དམྱལ་
282b
བ་དང ། ཐལ་བའི་སེམས་ཅན་དམྱལ་བ་ཆེན་པོར་སྐྱེས་སོ། །གསོད་པའི་སེམས་ཅན་དམྱལ་བ་དང ། ཐག་པ་ནག་པོའི་སེམས་ཅན་དམྱལ་བ་དང ། ཀུན་ཏུའང་ཡན་ཆད་ཀྱི་ལོ་གྲངས་བཞིན་དུ་སྡུག་བསྔལ་ལོ་ཅོག་གིས་ཉོན་མོངས་ནས་ཐག་པ་ནག་པོའི་སེམས་ཅན་དམྱལ་བར་ཤི་ནས་སླར་མནར་མེད་པའི་སེམས་ཅན་དམྱལ་བའི་ནང་དུ་སྐྱེས་སོ། །ཤཱ་རིའི་བུ། རྒྱུ་རྐྱེན་དེ་ལྟ་བས་ན། ཁྱིམ་ན་འདུག་པ་དང ། ཁྱིམ་ནས་བྱུང་བ་ལ་མི་འདི་ལ་ཉེ་བསྙེན་པ་དང ། དགེ་བའི་བཤེས་གཉེན་དང ། སྦྱིན་བདག་ཀུན་སྡོམ་དུ་ཡོངས་སུ་མི་འབུམ་ཁྲི་ཕྲག་དྲུག་བརྒྱ་རྩ་བཞི་ཡོད་དེ། མཁན་པོ་འདི་བཞི་དང་ལྷན་ཅིག་ཏུ་སྐྱེ། ལྷན་ཅིག་ཏུ་འཆི་སྟེ། སེམས་ཅན་དམྱལ་བ་ཆེན་པོ་ན་འཁོད་ཅིང་སྲེག་པ་པོ་ཅོག་གིས་ཉོན་མོངས་སོ། །ཤཱ་རིའི་བུ། མི་དེ་ལ་དགེ་བའི་བཤེས་གཉེན་དང ། སྦྱིན་བདག་དང ། སློབ་མ་དང ། མཁན་པོ་བཞིན་དུ་བྱེད་དོ་ཅོག་ཀུན་གྲངས་དེའི་ནང་དུ་གཏོགས་ཏེ། ཟད་པར་སེམས་ཅན་དམྱལ་བར་སྐྱེའོ། །ཤཱ་རིའི་བུ།་ཁྱོད་ལ་སོགས་པས་དེའི་མང་ཉུང་ཤེས་པར་མི་ནུས་སོ། །ཡང་དག་པར་གཤེགས་པ་ཉི་ཚེས་གདོད་མཁྱེན་པར་ནུས་སོ། །མི་ངན་པ་དེ་དག་སེམས་ཅན་དམྱལ་བར་ལྟུང་སྟེ། ལྷན་ཅིག་ཏུ་སྐྱེས་སོ། །ལྷན་ཅིག་ཏུ་འཆི་བ་སྡོམ་དུ་མི་འབུམ་ཁྲི་ཕྲག་དྲུག་བརྒྱ་རྩ་བཞི་ཡོད་དེ། དེ་ལྟ་བུ་གཅིག་ནས་གཅིག་གི་བར་དུ་བསྐལ་པ་གཅིག་གི་བར་དུ་ཉོན་མོངས་ནས་བསྐལ་
283a
༄#། །པ་ཆེན་པོ་བསྲེགས་ལ་ཐུག་གི་བར་དུ་འོན་ཀྱང་སེམས་ཅན་དམྱལ་བ་ན་འཁོད་དོ། །ཅིའི་ཕྱིར་ཞེ་ན། ཤཱ་རིའི་བུ། ཡང་དག་པར་གཤེགས་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བཤིག་པ་དེའི་སྡིག་ཤིན་ཏུ་ལྕི་སྟེ། ཡང་བ་མ་ཡིན་ནོ། །བསྐལ་བ་ཆེན་པོས་བསྲེགས་སུ་ཟིན་ཀྱང་མི་ངན་པ་དེ་བཞི་དང ། མི་འབུམ་ཁྲི་ཕྲག་དྲུག་བརྒྱ་རྩ་བཞི་ནི། བསྟིར་མེད་པའི་དམྱལ་བ་ཆེན་པོ་འདི་ནས་ཡང་སྐྱེས་ཏེ། ཕྱོགས་གཞན་གྱི་སེམས་ཅན་དམྱལ་བ་ཆེན་པོ་ན་འཁོད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ། སྡིག་ལྕི་བ་ཆོ་ག་ཚད་སྟེ། དེའི་ལན་མི་ཉུང་བས་ཕྱོགས་གཞན་ན་ལོ་གྲངས་མེད་པ་བརྒྱ་སྟོང་ཁྲི་འབུམ་འདའ་ཡུ་ཏའི་བར་དུ་སྡུག་བསྔལ་ཆེན་པོས་ཉོན་མོངས་ཤིང་འཁོད་དོ། །འཇིག་རྟེན་གྱི་ཁམས་སུ་སླར་སྐྱེས་ཀྱང་སྡིག་གི་མི་དེ་བཞི་དང ། མི་ཕལ་འབུམ་ཁྲི་ཕྲག་དྲུག་བརྒྱ་རྩ་བཞི་པོ་དང ། མི་གཞན་སྡིག་མ་བྲལ་བ་རྣམས་ཕ་གིར་ཚེ་ཟད་ན། སླར་ཡང་སེམས་ཅན་དམྱལ་བ་ཆེན་པོའི་ནང་དུ་སྐྱེས་སོ། །ཤཱ་རིའི་བུ། སྡིག་གི་མི་དེ་བཞི་དང ། སེམས་ཅན་ཕལ་འབུམ་ཁྲི་ཕྲག་དྲུག་བརྒྱ་རྩ་བཞི་པོ་ཐ་མར་སེམས་ཅན་དམྱལ་བའི་ནང་དུ་སྡུག་བསྔལ་ལས་ཐར་མོད་ཀྱི། མིའི་ནང་དུ་སྐྱེ་བ་ཐོབ་ན། ཚེ་རབས་ལྔ་བརྒྱའི་བར་དུ་ཐོག་མ་བཙའ་བ་ནས་དམུས་ལོང་སྟེ། དེ་ནས་གདོད་སངས་རྒྱས་ཀུན་སྣང་ཡང་ཡང་དག་པར་
283b
གཤེགས་པ་གསོལ་བཞེངས་རིགས་དྲང་ཁྱབ་མཁྱེན་སྣང་མཛད་ཞབས་བདེ་གཤེགས་འཇིག་རྟེན་སྒྲོལ། བླ་ན་མེད་པའི་དྲ་མ་གདུལ་ཐུལ་སྐྱེས་བུ་ལྷ་དང་མིའི་མཁན་པོ་སངས་རྒྱས་བཅོམ་ལྡན་འདས་དེ་དང་ཕྲད་དོ། །ཤཱ་རིའི་བུ། སངས་རྒྱས་ཐམས་ཅད་སྣང་གི་ཉན་ཐོས་ཀྱི་སློབ་མ་འདའ་ཡུ་ཏ་འབུམ་ཡོད་དོ། །དེའི་ཚེ་མིའོ་ཅོག་ལུས་ཁྲུ་སུམ་བརྒྱ་དགུ་བཅུ་རྩ་དྲུག་ཡོད་དོ། །སངས་རྒྱས་ཀྱི་སྐུ་ལུས་ནི། དེ་ལས་ཕྱེད་ཀྱིས་རིང་ངོ ། །འོད་རྟག་པ་ཟླུམ་པོས་དཔག་ཚད་འབུམ་ཁྲི་ཕྲག་བཅུ་ཚུན་ཆད་སྣང་ངོ ། །ཤཱ་རིའི་བུ། མི་དེ་སངས་རྒྱས་ཐམས་ཅད་སྣང་གི་ཆོས་ཀྱི་ནང་ནས་ཁྱིམ་ནས་བྱུང་སྟེ་ལོ་འབུམ་ཁྲི་ཕྲག་བཅུའི་བར་དུ་བརྩོན་འགྲུས་སྤྱད་དེ། མགོ་མེས་ཚིག་པའི་ར་མདའ་བཞིན་དུ་བྱས་ཀྱང་མི་འགལ་བའི་བཟོད་པ་མ་ཐོབ་ན་ལམ་གྱི་འབྲས་བུ་མ་ཐོབ་པ་ལྟ་སྨོས་ཀྱང་ཅི་དགོས། ཅིའི་ཕྱིར་ཞེ་ན། ཤཱ་རིའི་བུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་བཤིག་པ་གཡོས་པའི་སྡིག་གི་ལས་ཀྱི་རྒྱུ་རྐྱེན་གྱི་ཆོས་དེ་ལྟ་བུའི་རིགས་སོ། །དེ་ཟད་པའི་འོག་ཏུ་སླར་ཡང་མནར་མེད་པའི་སེམས་ཅན་དམྱལ་བ་ཆེན་པོར་སྐྱེའོ། །སྔར་མི་དགེ་བའི་ལྕི་བའི་ལས་ཀྱི་རྐྱེན་གཡོས་པའི་ལན་ནི། ཤཱ་རིའི་བུ་མི་དེ་དག་ལ་སོགས་པ་དེ་བཞིན་དུ་གཅིག་ནས་གཅིག་ཏུ་དང་ལ་ཐུག་གོ་།དེའི་ཕྲག་ན་སངས་རྒྱས་འབུམ་ཕྲག་དགུ་བཅུ་རྩ་དགུ་དང་ཕྲད་ནས་སངས་རྒྱས་དེ་དག་ལས་ཀྱང་མི་
284a
༄#། །འགལ་བའི་བཟོད་པ་མ་ཐོབ་བོ། །ཅིའི་ཕྱིར་ཞེ་ན། སངས་རྒྱས་ཀྱི་ཆོས་ཀྱི་ཡི་གེ་ཟབ་མོ་བཤད་ན། མི་དེ་དག་གིས་ཡིད་མ་ཆེས་ཏེ། བཤིག་དྲལ་ལོག་གལ་ནས་མཛངས་ཤིང་འཕྲུལ་བ་ལ་ནི། འཕྱ་ཞིང་སྐུར། ཚུལ་ཁྲིམས་འཛིན་པའི་དགེ་སློང་ལ་ནི། ཉེས་པའི་ངན་པ་ཕྱུང་སྟེ། ཆོས་བཤིག་པའི་ལས་གཡོས་པའི་རྒྱུ་རྐྱེན་གྱི་ཆོས་ནི། དེ་ལྟ་བུའི་རིགས་སོ། །ཤཱ་རིའི་བུ། ཁྱོད་རེ་ཞིག་ལྟོས་ཤིག་།འཕགས་པའི་མི་ལ་འཕྱ་ཞིང་སྐུར་ཏེ། འཕགས་པའི་ཚིག་ལ་ཡིད་མི་ཆེས་ན། དེ་ལྟ་བུར་དཔག་ཏུ་མེད། མུ་མེད་པའི་སྡུག་བསྔལ་གྱིས་ཉོན་མོངས་ཏེ། གྲོལ་ཐར་པ་མ་ཐོབ་བོ། །ཤཱ་རིའི་བུ། སེམས་ཅན་གཞན་ཆོས་བཤིག་པའི་སྡིག་པའི་ལས་གཡོས་ཏེ་ལོག་གལ་ཞིང་ཡིད་མ་ཆེས་པ་དེ་གྲངས་མེད་དཔག་ཏུ་མེད་པ་ཡོད་ན། སངས་རྒྱས་འབུམ་ཕྲག་དགུ་བཅུ་རྩ་དགུ་ལ་བསྐལ་པ་གྲངས་མེད་པའི་བར་དུ་མི་གཅིག་མྱ་ངན་ལས་འདས་པར་ཆུད་པ་ཡོང་མེད་དོ། །ཤཱ་རིའི་བུ། སངས་རྒྱས་རྣམས་ཀྱི་ཆོས་བཤིག་ཅིང་ཡིད་མི་ཆེས་ཤིང་ལོག་གལ་བར་ནུས། ཐ་མལ་པ་གླེན་པ་དང ། ལེ་ལོ་ཡར་སྐྱེ་བའི་དགེ་སློང་ངན་པ་རྣམས་དང ། ཆོས་འཆད་པ་མི་གཙང་བའི་དགེ་སློང་རྣམས་སོ། །ཅིའི་ཕྱིར་ཞེ་ན། ཤཱ་རིའི་བུ། མི་དེ་རྣམ་གསུམ་ནི། སྤྱོད་པ་ཞེས་ཀྱང་མི་བྱ། མིང་ཐོབ་པ་ཞེས་ཀྱང་མི་བྱ་སྟེ།
284b
མི་དེ་དག་གིས་ཡང་དག་པར་གཤེགས་པའི་ཆོས་ལ་ཡིད་མ་ཆེས་པས་ན། འཕྱ་ཞིང་སྐུར་ཏེ་ལོག་གོ། །ཤཱ་རིའི་བུ། ཁྱོད་ན་རེ། ཇི་ལྟ་བུར་དགེ་སློང་སྡུག་བསྔལ་བཀྲམ་དེས་ཆོས་བཤད་པ་དེ་མི་གཙང་ཞེས་ཟེར་བ་ཉིད་ནི། མི་གཏི་མུག་ལྷས་བྱིན་ཡིན་ནོ། །ཁྱོད་ན་རེ། ཇི་ལྟར་དགེ་སློང་ཐམས་ཅད་ཡོད་ཅེས་འཆད་པ་མི་གཙང་ཞེས་ཟེར་བ་ནི། ཉིད་དགེ་སློང་ཀོ་ཀ་ལི་ཡིན་ནོ། །ཤཱ་རིའི་བུ། ཁྱོད་ན་རེ། ཇི་ལྟ་བུར་དགེ་སློང་ཙང་གི་དེས་ཆོས་བཤད་པ་མི་གཙང་ཞེས་ཟེར་བ་ནི། ཉིད་དགེ་སློང་ཀ་པི་ལ་ཡིན་ནོ། །ཁྱོད་ན་རེ། ཇི་ལྟ་བུར་ན་དགེ་སློང་བར་ཏ་ད་དེས་བཤད་པ་མི་གཙང་ཞེས་ཟེར་བ་ནི། ཉིད་དགེ་སློང་ལུས་སྒྲེ་བ་རི་མ་ད་ཡིན་ནོ། །ཤཱ་རིའི་བུ། ཁྱོད་ན་རེ། དེའི་གཙང་གདང་ཞིང་བདེན་པ་བཞིན་དུ་སངས་རྒྱས་རྣམས་ཀྱི་བྱང་ཆུབ་བཤད་དེ། དཔག་ཏུ་མེད་པའི་སེམས་ཅན་ལ་ཕན་བསོད་དོ། །ཞེས་ཟེར་བ་ནི། དེ་ཉིད་ཕུ་ལི་ཏ་འབྲི་ཏ་ར་འཛིན་འཛི་ཡིན་ཏེ། བཤད་དོ་ཅོག་གཙང་གདང་བས་གཞན་དེ་བཞིན་དུ་སློབ་མ་རྣམས་སངས་རྒྱས་ལྔ་སྟོང་དང་ཕྲད་དེ། མི་འདའ་ཡུ་ཏ་འབུམ་ཕྲག་དྲུག་ཅུ་རྩ་བརྒྱད་ཡོད་པ་ཀུན་ཞི་སྟེ་ཐར་ཟིན་ཏོ། །ཤཱ་རིའི་བུ། མི་ལ་བདེན་པའི་ཚིག་གང་ཡིན་ཞེས་བྱས་ན། ནང་གི་བླ་མའི་ཆོས་ཀྱི་གཞུང་མངོན་པར་མཐོང་བར་རིག་སྟེ། གཙང་གདང་བར་བཤད་པའོ། །བཤད་པ་ནི། ནམ་འཆད་དེ། བུ་ལེའུ་ཏ་ཡིན་ནོ། །
285a
༄#། །ཤཱ་རིའི་བུ། ངུ་ལེའུ་ཏ་ནི། སེམས་ཐུལ་ལ་མངོན་པར་རྟོགས་པར་བཤད་དོ་ཅོག་དགའ་བ་མེད་དེ་ཡིད་མི་ཆེས་པས་ན། བཤད་ཅིང་འགྲོལ་བར་སྐྱེའོ། །ཤཱ་རིའི་བུ། མི་ལ་བདེན་པའི་ཚིག་གང་ཡིན་ཞེ་ན། རྒྱུ་རྐྱེན་ཐམས་ཅད་ཆོས་ཀྱི་མཁན་པོས་ནམ་ཚིག་བཤད་པ་སྟེ། པུ་ལེའུ་ཏ་ཡིན་ནོ། །ཤཱ་རིའི་བུ། པུ་ལེའུ་ཏ་ནི། ཚེ་ཚེ་རབས་རབས་གར་སྐྱེས་རྒུར་རྟག་པར་སེམས་ཅན་གྱི་ཕྱིར་སངས་རྒྱས་ཀྱི་དོན་བྱེད་དོ། །སངས་རྒྱས་དགུ་བཅུ་ཐམས་ཅད་ཀྱི་ཆོས་ཀྱི་ནང་ནའང་རྟག་པར་ཆོས་ཀྱི་མཁན་པོ་བྱེད་དོ། །ཆོས་གཙང་གདང་བར་བཤད་ནས་སངས་རྒྱས་དེ་ཀུན་ལ་ལུས་ཀྱི་ཚེ་ཟད་ཀྱི་བར་དུ་རྟག་པར་ཚངས་པར་སྤྱོད་པ་སྤྱད་དེ། ཆོས་གཙང་གདང་བར་བཤད་དོ། །ཤཱ་རིའི་བུ། པུ་ལེའུ་ཏ་སངས་རྒྱས་དྲུག་གི་ཆོས་ཀྱི་ནང་ནའང་ཆོས་ཀྱི་མཁན་པོ་བྱེད་དོ། །ངའི་ཆོས་ཀྱི་ནང་ནའང་ཆོས་ཀྱི་མཁན་པོ་ཆེན་པོ་བྱེད་དེ། དགྲ་བཅོམ་པ་གྲུབ་ནས་སེམས་གྲོལ་ཐར་པ་ཐོབ་བོ། །མིས་བདེན་པར་བཤད་ན།་ཇི་ལྟ་བུའི་མིས་ཚེ་ཚེ་རབས་རབས་སུ་སངས་རྒྱས་རྣམས་ལ་ཡོན་གསོལ་ཞིང་དགེ་བའི་རྩ་བ་རྣམས་བསྐྲན་པ་ནམ་ཚིག་བཤད་པ་པུ་ལེའུ་ཏ་ཡིན་ནོ། །ཤཱ་རིའི་བུ། པུ་ལེའུ་ཏས་སངས་རྒྱས་འབུམ་ཕྲག་དགུ་བཅུའི་ཆོས་ལ་སེམས་འགྲུས་པར་བཙལ་བསླབ་པས་འགྲོ་བ་བཤད་པ་གཅིག་ཏུ་མི་འགྱུར་བས་ཤེས་རབ་ཟབ་མོ་ཡོད་དོ། །དེ་ལྟ་བས་ན། ཡང་དག་
285b
པར་གཤེགས་པས་ཆོས་ཀྱི་མཁན་པོ་རྣམས་ཀྱི་ནང་ན་རབ་ཅེས་བཤད་དོ། །ཤཱ་རིའི་བུ། ཉིན་གཅིག་མཚན་གཅིག་ཏུ་པུ་ལེའུ་ཏ་འདི་ལེགས་པའི་དོན་བཤད་དུ་ཟིན་ཀྱང་མི་ཟད་དོ། །ཉིན་གཅིག་མཚན་གཅིག་འདས་སུ་ཟིན་ཀྱང་མི་ཟད་དོ། །ཅིའི་ཕྱིར་ཞེ་ན། པུ་ལེའུ་ངའི་ཆོས་ཀྱི་སྦྱིན་པ་ནི། ཐ་མལ་པའི་རྒྱུ་རྐྱེན་མེད་ལ། གསོ་བའི་ཁེ་ལ་མི་ཆགས་པས་ཆོས་ཀྱི་མཁན་པོ་སྟེ། པུ་ལེའུ་ཏ་ལ་ཐོགས་པ་མེད་པ་བཞི་ཤེས་རབ་ཐོབ་སྟེ། ཡང་དག་པར་གཤེགས་པ་མ་གཏོགས་པར་འཇིག་རྟེན་ཀུན་གྱི་ནང་ན་ཚིག་འབྲུ་དང ། ཚུལ་གྱི་གཞུང་ཐོབ་པར་ནུས་པ་མེད་དོ། །ཤཱ་རིའི་བུ། ངས་ཁྱོད་ལ་བསྒོའོ། མི་ལ་ལ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འདོད་ན། མི་གཞན་ལ་ཆོས་བཤད་ན་དཔག་ཏུ་མེད། མུ་མེད་པའི་ལེགས་པའི་དཔལ་ཡོན་ཐོབ་ཅིང་གྲངས་མེད་པའི་སེམས་ཅན་ལའང་ཕན་བསོད་པར་ནུས་སོ། །ཤཱ་རིའི་བུ། མི་ལ་ལ་ཞིག་གིས་ཆོས་འདི་ལ་ཡིད་མ་ཆེས་ཏེ་བཤིག་དྲལ་ལོག་གལ་ན། དཔག་ཏུ་མེད་པའི་སྡིག་ལྕི་བའི་རྒྱུ་རྐྱེན་ལྡང་ངོ ། །ཅིའི་ཕྱིར་ཞེ་ན། ཤཱ་རིའི་བུ། ངན་པ་ལ་ངན་པའི་ལམ་ཡོད། དགེ་བ་ལ་དགེ་བའི་ལམ་ཡོད་དེ། དེ་ལྟ་བས་ན། ངས་ད་ཆོས་ཀྱི་ཡི་གེ་འདི་ཁྱོད་ལ་གཏམས་བཅོལ་གྱིས་ཕལ་སྡེ་བཞི་ལ་བྱེ་བྲག་ཕྱེད་པར་རྒྱ་ཆེར་ཤོད་ཅིག་།ཤཱ་རིའི་བུ། ཆོས་ཀྱི་ཡི་གེ་འདི་ཐོས་ཏེ་སེམས་ཡིད་ཆེས་
286a
༄#། །ཤིང་སེམས་དགའ་གཞན་དཔག་ཏུ་མེད་པའི་དཔལ་ཡོན་ཐོབ་བོ། །ཐོས་ཏེ་ཡིད་མི་ཆེས་ཤིང་སེམས་མི་དགའ་མ་དད་ན། དཔག་ཏུ་མེད་པའི་སྡིག་ལྕི་བ་ཐོབ་བོ། ། ཤཱ་རིའི་བུ། ཤེས་པར་བྱོས་ཤིག་།མི་དེ་ཚུལ་ཁྲིམས་ཞིག་པའི་དགེ་སློང་ཞེས་བྱ་སྟེ། ལེ་ལོ་ཡར་སྐྱེ་ཞིང་ཆོས་འཆད་པའང་མི་གཙང་བའོ། །ཤཱ་རིའི་བུ། མི་ལ་ལ་ཞིག་གིས་དེ་ལྟ་བུར་བསྟན་པ་ལས་ལོག་གལ་ན། ཚེ་ཚེ་རབས་རབས་གར་སྐྱེ་རྒུར་རྟག་པར་ལོང་སྟེ་མིག་མེད་དོ། །ཤཱ་རིའི་བུ། ད་ངས་ཁྱོད་ལ་བྱེ་བྲག་ཕྱེད་པར་བསྒོའོ། །ངས་ད་ལྟར་བཤད་དོ་ཅོག་ནི། རྫ་མཁན་རྫ་སོ་མ་བཏང་བའི་རིམ་གྲོ་བྱེད་པ་དང་མི་མཚུངས་ཀྱི། ངས་ཕལ་སྡེ་བཞི་ལ་མཆོག་གི་གཞུང་མཐའ་ཡུན་དུ་སྟོང་པའི་ཆོས་བྱེ་བྲག་ཕྱེད་པར་རྒྱ་ཆེར་བཤད་ན་སྲན་ཐུབ་པ་ནི། འདུག་གོ་།སྲན་མི་ཐུབ་པ་ནི། ཞིག་གོ་།ཅིའི་ཕྱིར་ཞེ་ན། ཤཱ་རིའི་བུ། སངས་རྒྱས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པ་ནི།་ཡོན་པོ་མཐོང་བ་ལ་མི་ངན་པ་ལ་ཆོས་མི་བཤད། བདག་ཏུ་ལྟ་བ་དང ། གང་ཟག་ཏུ་ལྟ་བ་དང ། སེམས་ཅན་དུ་ལྟ་བ་དང ། ཚེ་སྲོག་ཏུ་ལྟ་བ་ལ་ཆོས་མི་བཤད་དོ། ། ཅིའི་ཕྱིར་ཞེ་ན། དེ་ལྟ་བུར་འདོད་ཆགས་པ་ཀུན་གྱི་མིང་འདོད་ཆགས་པ་ཡོན་པོར་མཐོང་བ་ཞེས་བྱའོ། །ཤཱ་རིའི་བུ། བདག་ཏུ་ལྟ་བ་དང ། གང་ཟག་ཏུ་ལྟ་བས་མི་འགལ་
286b
བའི་བཟོད་པ་ཡང་མི་ཐོབ་ན། ལམ་གྱི་འབྲས་བུ་མི་ཐོབ་པ་ལྟ་སྨོས་ཀྱང་ཅི་དགོས། ཤཱ་རིའི་བུ། བདག་ཏུ་ལྟ་བ་དང ། གང་ཟག་ཏུ་ལྟ་བ་དང ། སེམས་ཅན་དུ་ལྟ་བ་དང ། ཚེ་སྲོག་ཏུ་ལྟ་བ་དང ། ཆད་པར་མཐོང་བ་དང ། རྟག་པར་མཐོང་བས་མི་འགལ་བའི་བཟོད་པ་རབ་ཏུ་ཐོབ་པར་མ་ནུས་ན། ལམ་གྱི་འབྲས་བུ་ཐོབ་པར་ནུས་ཞེས་ཟེར་ན་བདེན་པ་ཡོང་མེད་དོ། །དེ་ལྟ་བས་ན། ཤཱ་རིའི་བུ། མི་ལ་ལ་ཞིག་གིས་དེ་ལྟ་བུ་མཐོང་བ་འབྱོར་གྲུབ་པ་ནི། ངའི་ཆོས་ཀྱི་ནང་ན་ངས་གཞན་གྱི་ཡོན་ལེན་དུ་མི་གནང་སྟེ། དེ་ནི། སྤྱོད་པའང་མ་ཡིན། ཐོབ་པའང་མ་ཡིན་གྱི། ངའི་ཆོས་ལ་རང་གི་སྲོག་གསོ་བར་ཚོར་བར་ཟད་དོ། །ཤཱ་རིའི་བུ། ངས་བཤད་པ་ལ་མུར་འདུག་སངས་རྒྱས་ཀྱི་ཆོས་སུ་འཇུག་འདོད་ན། ཟླ་བ་བཞིའི་བར་དུ་སད་པའི་རིགས་སོ། །ཅིའི་ཕྱིར་ཞེ་ན། མུར་འདུག་གི་མི་རྣམས་ལ་ནི། བདག་ཏུ་ལྟ་བ་དང ། གང་ཟག་ཏུ་ལྟ་བ་དང ། སེམས་ཅན་དུ་ལྟ་བ་དང ། ཚེ་སྲོག་ཏུ་ལྟ་བ་དང ། རྟག་པར་མཐོང་བ་མང་དུ་ཡོད་དོ། །ཤཱ་རིའི་བུ། ངའི་སློབ་མ་ལ་ནི། བདག་ཏུ་ལྟ་བ་དང ། གང་ཟག་ཏུ་ལྟ་བ་དང ། སེམས་ཅན་དུ་ལྟ་བ་དང ། ཚེ་སྲོག་ཏུ་ལྟ་བ་དང ། ཆད་པར་མཐོང་བ་དང ། རྟག་པར་མཐོང་བ་མེད་དེ། ངའི་སློབ་མ་རྣམས་ཀྱིས་སྟོང་པ་དང ། མཚན་མ་མེད་པ་དང ། སྨོན་པ་མེད་པ་དང ། ཅིའང་ཐོབ་པ་མེད་པ་འབའ་ཞིག་བཤད་དེ། སེམས་ལ་འཇུག་པའི་
287a
༄#། །གནས་མེད་པར་འཆད་དོ། །ཤཱ་རིའི་བུ། ལ་ལ་ཞིག་དེ་ལྟ་བུའི་བཟོད་པ་འབྱོར་གྲུབ་པ་ཞིག་ཡོད་ན། ངས་མི་དེ་ལྟ་བུའི་ཁྱིམ་ནས་བྱུང་ཞིང་ཚུལ་ཁྲིམས་ནོར་དུ་གནང་སྟེ། ཡོན་གོས་དང ། མལ་ཆ་དང ། རྩི་སྨན་ཕུལ་བ་བླང་དུ་རུང་ངོ ། །མི་དེ་ལྟ་བུ་བཟོད་པ་མེད་པ་ནི། སྔོན་དུ་སད་པའི་རིགས་ཏེ། སྔར་ཆོས་སོ་ཅོག་ལ་ང་མེད་པ་ལ་གནས་སུ་བཅུག་གོ་།ཤཱ་རིའི་བུ། ལ་ལ་ཞིག་དེ་ལྟ་བུའི་བཟོད་པ་ལ་སེམས་མི་དགའ་ཞིང་མཆོག་གི་གཞུང་སྟོང་པ་བཤད་པ་ཐོས་ན། དངངས་ཤིང་དོགས་ལ་ཟུར་ཐེལ་གྱིས་གཤེའོ། །བདག་ཏུ་ལྟ་བ་འཆད་པ་ཐོས་ན། སེམས་དགའ་བར་འཛིན་ན་དེ་ལྟ་བུའི་མི་ནི། བདུད་ཀྱིས་བཀོལ་པར་མངོན་ཏེ། མུར་འདུག་ལས་ཀྱང་འདས་སོ། །ཤཱ་རིའི་བུ།་ཤེས་རབ་ཅན་ནི། དེ་ལྟ་བུ་ལ་ཞེ་སྡང་སྐྱེ་བ་མི་རིགས་ཀྱི། དེ་ལྟ་བུ་ལ་སྙིང་རྗེའི་སེམས་སྐྱེ་བར་རིགས་སོ། །ཅིའི་ཕྱིར་ཞེ་ན། ཤཱ་རིའི་བུ། མི་ལ་ལ་ཞིག་གིས་དེ་ལྟ་བུའི་ངན་པ་འབྱོར་གྲུབ་པ་ནི། ངན་པའི་ལམ་ཐོབ་བོ། །ཆོས་བཤད་ཀྱིས་མི་ཟད་དེ། མི་དེ་ལ་བསོད་ནམས་ཀྱི་སེམས་བསྐྱེད་ཅིང་ཆོས་སོ་ཅོག་ལའང་ང་མེད་པ་དང ། ཆོས་སོ་ཅོག་སྟོང་པ་ཞི་བ་དང ། ཆོས་སོ་ཅོག་ལ་བྱ་བ་མེད་པ་དང ། ཐོབ་པ་མེད་པས་བསྟན་ཏོ། །མི་དེས་སངས་རྒྱས་ཀྱི་ཆོས་མནོས་ལ་དོན་ཐོས་ཏེ། སེམས་དགའ་ཞིང་དད་ན་ནི།
287b
གཞན་སྟོང་པ་སྤྱད་པ་དགེ་སློང་གིས་ཅིའང་ཐོབ་པ་མེད་པ་ཀུན་བསྟན་བསླབ་སྟེ། ཕན་ཞིང་དགའ་བར་སེམས་དགའ་བའི་རིགས་སོ། །ཆོས་སོ་ཅོག་ལ་ཅིའང་མེད་པ་སྟོང་པ་བཤད་པ་ཐོས་ན། དངངས་སྐྲག་སྟེ། ཕལ་མང་པོའི་ནང་ན་མཁན་པོ་བླ་མ་ཨཱ་ཙརྱ་ལ་ཆོས་ཀྱི་ཡི་གེའི་ནང་ན་སྟོང་པའི་ལས་སྤྱོད་བཞིན་དུ་བཤད་པའི་རིགས་ཞེས་ཟེར་རོ། །ཆོས་རྣམས་ཀྱི་མཚན་མ་ཐ་དད་པ་མངོན་པར་ཤེས་ནུས་ན། ངས་མཁན་པོ་བྱའོ། །བདག་ཏུ་ལྟ་བ་དང ། གང་ཟག་ཏུ་ལྟ་བ་དང ། ཕྱིན་ཅི་ལོག་ཡོན་པོར་ལྟ་བ་དང ། ཚུལ་ཁྲིམས་འཛིན་པ་ལ་འདོད་ཆགས་པའི་མཁན་པོ་ཞེས་ནི། མི་བྱའོ། །ཡང་དག་པས་དྲང་པོར་མཐོང་ལྡན་པ་དང་ལྷན་ཅིག་ཏུ་གསོ་སྦྱོང་བྱེད་པར་གནང་ངོ ། །ཚུལ་ཁྲིམས་ཞིག་པའི་མི་ཆོ་ག་ཞིག་པ་དང་ལྷན་ཅིག་ཏུ་གསོ་སྦྱོང་བྱེད་དུ་གནང་ངོ ། །སློབ་མ་རྒན་ཞིང་བཙུན་པས་སྟོང་པ་ཞི་བ་ཅིའང་ཐོབ་པ་མེད་པ་ཆོས་བཤད་པ་ཐོས་ཏེ། སེམས་ཡིད་མི་ཆེས་མ་དད་ལ་སེམས་མུར་འདུག་ལ་འདུག་ན། སངས་རྒྱས་ཀྱིས་མུར་འདུག་དང་གསོ་སྦྱོང་བྱེད་དུ་མི་གནང་ངོ ། །མི་དེ་དེ་ལྟ་བུའི་མཐོང་བ་མ་བཏང་ན། དགེ་འདུན་གྱི་ནང་དུ་འདུག་ཏུ་མི་གནང་བའི་རིགས་སོ། །དེ་ལྟ་བུ་འདོད་པ་མ་བླངས་ཏེ། དེ་ལྟར་བྱས་ཟིན་ཏེ་འོན་ཀྱང་ཡང་མ་བཏང་ན། མི་དེ་ལམ་ལ་གནས་པར་མི་རུང་བར་མངོན་ཏེ། ཐལ་བྱུང་དུ་ཡོང་བོར་ནས་
288a
༄#། །མཁན་པོ་བླ་མ་ཨཱ་ཙརྱས་ཀྱང་ཚིག་མཐུན་པར་སླར་བཅད་བའི་མི་རིགས་སོ། །ཤཱ་རིའི་བུ། དགེ་འདུན་ལ་དེ་བཞིན་ངས་ཡོན་གསོལ་བ་དང ། མུར་འདུག་གི་ཡོན་པོའི་ལམ་ལ་ལྟ་བ་འཇིག་པ་ལ་མཁས་ཏེ། དེའི་མིང་ཚུལ་ཁྲིམས་བཤད་པ་དང ། གསོ་སྦྱོང་གཙང་གདང་ཞེས་བྱའོ། །ཤཱ་རིའི་བུ། ངས་ད་ཁྱོད་ལ་བྱེ་བྲག་ཕྱེད་པར་བསྒོའོ། །མི་ལ་ལ་ཞིག་དེ་ལྟ་བུའི་བདག་ཏུ་ལྟ་བ་དང ། གང་ཟག་ཏུ་ལྟ་བ་དང ། སེམས་ཅན་དུ་ལྟ་བ་དང ། ཡོད་མེད་དུ་ལྟ་བ་དང ། དེ་ལྟ་བུའི་མིའི་མིང་ང་ལ་ཡོན་ཕུལ་བ་ཞེས་ཀྱང་མི་བྱ། མིང་ངའི་ཕྱི་བཞིན་ཁྱིམ་ནས་བྱུང་སྟེ་ཚུལ་ཁྲིམས་མནོས་པ་ཞེས་ཀྱང་མི་བྱའོ། །དེའི་མིང་མཁན་པོ་དྲུག་གི་ཕྱིར་འབྲངས་ལ་ཁྱིམ་ནས་བྱུང་བ་སྟེ། མཁན་པོ་དྲུག་གིས་མཁན་པོ་བྱས་པ་ཞེས་བྱའོ། །ཤཱ་རིའི་བུ། མི་ལ་ལ་ཞིག་གིས་དེ་ལྟ་བུའི་གཙང་གདང་བའི་བདེན་པའི་ཆོས་ལ་བཟོད་པ་ཐོབ་པར་མ་ནུས་ཏེ་ཡོན་བླངས་ན། མི་དེས་ཐོབ་བོ་ཅོག་ཡོན་པོའི་མནོས་ཞེས་བྱའོ། །ཤཱ་རིའི་བུ། མིས་ངའི་ཆོས་ཀྱི་ནང་ནས་ཁྱིམ་ནས་བྱུང་སྟེ་ཚུལ་ཁྲིམས་གཙང་བ་བཟུང་བ་བསྲུངས་མོད་ཀྱི། མཆོག་གི་གཞུང་སྟོང་པ་ཅིའང་ཐོབ་པ་མེད་པའི་ཆོས་ལ་ཡིད་མི་ཆེས་མི་ཤེས་ཏེ། དངངས་སྐྲག་ཅིང་དོགས་འགྱོད་པ་དེ་ལྟ་བུའི་མི་ནི། ཚུལ་ཁྲིམས་འཛིན་པ་དང ། མང་དུ་ཐོས་པ་དང ། བསམ་གཏན་
288b
ཐུབ་པ་ཆེར་ཆེར་འཛིན་པར་མངོན་ནོ། །ཤཱ་རིའི་བུ། དེ་ལྟ་བུའི་མིའི་མིང་ང་ལ་བཙུན་ལྕི་བར་རི་མོ་གུས་ཤིང་ཡོན་དབུལ་བ་ཞེས་མི་བྱའོ། །ཅིའི་ཕྱིར་ཞེ་ན། ཤཱ་རིའི་བུ། ཐོག་མ་ཞེས་བྱ་བ་མེད་པའི་ཚེ་རབས་ཚུན་ཆད་སེམས་ཅན་བསམ་གཏན་བཞི་ནི། མ་ཐོབ་ཀྱི། བསམ་གཏན་བཞི་ཐོབ་པ་འབའ་ཞིག་གིས་དགེ་སློང་གི་བཟོད་པ་བྱ་བ་ནི། མེད་ན། དེ་ལྟ་བུ་ཇི་ལྟ་བུར་ན་མིང་ང་ལ་ཡོན་འབུལ་བ་ཞེས་བྱ། དེ་ལྟ་བས་ན། ཤཱ་རིའི་བུ། ངས་ཁྱོད་ལ་བྱེ་བྲག་ཕྱེད་པར་བསྒོའོ། །མ་འོངས་པའི་དུས་ཀྱི་མིས་ངའི་ཆོས་ལ་འདོད་ཆགས་རྣམ་པ་མང་པོ་དང།་ཡོན་པོ་མཐོང་བ་རྣམ་པ་མང་པོས་ངའི་ཆོས་བཤིག་དྲལ་ལོ། །ཤཱ་རིའི་བུ། མི་ལ་ལ་ཚུལ་ཁྲིམས་འཛིན་པ་དང ། མང་པོ་ཐོས་པ་དང ། བསམ་གཏན་ཐུབ་པ་འབའ་ཞིག་ཆེད་ཆེར་འཛིན་པ་དེ་ལྟ་བུའི་མི་ནི། དགེ་སྦྱོང་གི་ཆོས་རྣམས་གཙང་མར་སྤྱོད་མི་ནུས་པར་མངོན་ཏེ། ངས་མི་དེའི་མིང་དགེ་སྦྱོང་དང ། བྲམ་ཟེ་ཞེས་མ་བཤད་དོ། ཤཱ་རིའི་བུ། མི་ལ་ཆོས་སོ་ཅོག་ལ་ང་མེད་པ་བདེན་པ་བཞིན་དུ་ང་མེད་པར་ཤེས། ཆོས་སོ་ཅོག་ཕྱི་མོ་ནས་ཅིའང་མེད་པའི་སྟོང་པ་སྟེ། བདེན་པ་བཞིན་དུ་ཅིའང་མེད་པའི་སྟོང་པར་ཤེས་ནུས་ན། ད་ནི།་ཚུལ་ཁྲིམས་འཛིན་པ་རབ་ཡིན་པར་མི་འཛིན། མང་པོ་ཐོས་པ་རབ་ཅེས་བྱ་བར་མི་འཛིན། བསམ་གཏན་ཐོབ་པ་རབ་ཅེས་མི་འཛིན་ཏོ། །ཅིའི་ཕྱིར་ཞེ་ན། ཤཱ་རིའི་བུ།
289a
༄#། །ཆོས་སོ་ཅོག་ལ་བདེན་པའི་མཚན་མ་ལ་སྐྱེ་བའང་མེད་དེ། ལྡན་པའང་མེད་དེ། དེའི་ནང་ན་རབ་ཅེས་བྱ་བའི་ཆོས་མེད་དོ། །ཤཱ་རིའི་བུ། ཆོས་སོ་ཅོག་གི་བདེན་པ་བཞིན་གྱི་ནང་ན་ཚུལ་ཁྲིམས་འཛིན་པ་མེད། ཚུལ་ཁྲིམས་བཤིག་པ་མེད། འདོད་ཆགས་ལ་རབ་ཅེས་བྱ་བ་མེད་པ་ལྟ་སྨོས་ཀྱང་ཅི་དགོས། ཤཱ་རིའི་བུ། དེའི་མིང་སངས་རྒྱས་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཅེས་བྱ་སྟེ། ཆོས་སོ་ཅོག་གི་མཚན་མ་དང ། རང་གི་མཚན་མ་མེད། སྟོང་པ་བདག་ཏུ་ལྟ་བ་དང ། གང་ཟག་ཏུ་ལྟ་བ་མེད་དོ། །དེ་ལྟ་བུའི་བཟོད་པ་ཡོད་དུ་ཟིན་ན། དེའི་མིང་སྤྱོད་པ་ཞེས་བྱའོ། །དེའི་མིང་ཐོབ་པ་ཞེས་བྱ་སྟེ། མི་དེའི་མིང་ཡིད་ཆེས་པ་སྤྱད་པ་ཁྱིམ་ནས་བྱུང་བ་སྟེ་ཡོན་ལེན་པའི་རིགས་ཤིང་གཙང་བའི་གསོ་སྦྱོང་བྱེད་པ་སྟེ། མི་དེ་ནི། མིའི་ནང་ན་ལྷ་ཞེས་བྱའོ། །ཤཱ་རིའི་བུ། སངས་རྒྱས་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི།་གཞུང་གཅིག་པ་འབའ་ཞིག་ཡིན་ཏེ། དེ་ནི། བྲལ་བ་ཞེས་བྱའོ། །གང་ལ་སོགས་པ་བྲལ་བ་ཞེས་བྱས་ན། ལྡོངས་སོ་ཅོག་དང ། མཐོང་ངོ་ཅོག་སྟེ། ལྡོངས་པ་ནི། མ་རིག་པ་ཡིན་ནོ། །མཐོང་བ་ནི། དྲན་པ་དང ། སེམས་པ་ཡིན་ནོ། །ཅིའི་ཕྱིར་ཞེ་ན། ཆོས་སོ་ཅོག་ཐམས་ཅད་ནི། དྲན་པ་དང ། སེམས་པས་ཕྱི་མོ་བྱས་ཏེ། སེམས་ཀྱི་འདུ་
289b
ཤེས་ཡོད་དོ་ཅོག་ནི། མཐོང་བ་ཡིན་ཞེས་བྱ་སྟེ། མཐོང་བ་ནི། ཡོན་པོ་ཡིན་ནོ། །ཤཱ་རིའི་བུ། དགེ་བའི་ཆོས་ཀྱི་ནང་ན་མཐོང་བའང་ཡོན་པོ་མཐོང་བ་ཞེས་བྱའོ། །ཅིའི་ཕྱིར་ཞེ་ན། ཤཱ་རིའི་བུ། འདོད་པ་དང་བྲལ་བའི་སྟོང་པ་ཞི་བ་ཆོས་ཀྱི་ནང་ན་ཆོས་མེད། ཆོས་མེད་པའང་མེད། དགེ་བའང་མེད། ངན་པའང་མེད་དེ། དོན་ཏོ་ཅོག་ཀུན་སྟོང་ལ་ཆོས་ཀྱི་ཡི་གེ་རྣམས་དང་བྲལ་ཞིང་སེམས་པ་ཐམས་ཅད་དང་བྲལ་བས་ན། མིང་བྲལ་བ་ཞེས་བྱའོ། །ཤཱ་རིའི་བུ། བླ་ན་མེད་པའི་ནང་ན་འདོད་པ་རྣམས་ཡོང་ཞིའོ། །གང་ལ་སོགས་པ་འདོད་པ་རྣམས་ཞེས་བྱས་ན། དེ་ནི། ཡོན་པོ་མི་དགེ་བའི་སེམས་དང ། ང་དང་ངའི་གནས་དང ། བྱེད་པའི་མཚན་མ་དང ། དོན་གྱི་མཚན་མ་སྟེ། དེའི་མིང་བླ་ན་མེད་པ་ཡང་དག་པར་རྫོགས་པའི་ནང་ན་འདོད་པའོ་ཅོག་ཡོང་ཞི་ཞེས་བྱའོ། །ལེའུ་བརྒྱད་དེ། གཙང་མ་མཐོང་བའི་ལེའུའོ།། །།སངས་རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། ངས་བསམ་པ་འདས་པའི་དུས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཚོལ་བ་ན་སངས་རྒྱས་འབུམ་ཕྲག་སུམ་ཅུ་དང་ཕྲད་དེ། ཀུན་མཚན་ཤཱཀྱ་ཐུབ་པ་ཞེས་བྱའོ། །ང་ནི། དེའི་ཚེ་ཀུན་འཁོར་ལོ་འཕྲུལ་གྱི་རྒྱལ་པོ་བྱེད་དེ། ལུས་ཀྱི་ཚེ་ཟད་ཀྱི་བར་དུ་སློབ་མ་ཀུན་ལ་ཡོན་གོས་དང ། ཁ་ཟས་དང ། མལ་ཆ་དང ། རྩི་སྨན་ཕུལ་ཏེ། བླ་ན་མེད་པ་ཡང་དག་པར་རྫོག་
290a
༄#། །པའི་བྱང་ཆུབ་ཚོལ་བའི་ཕྱིར་ན་སངས་རྒྱས་དེ་རྣམས་ཀྱིས་ང་ལ་ཁྱོད་མ་འོངས་པའི་དུས་ན་སངས་རྒྱས་བྱེད་པ་ཐོབ་བོ་ཞེས་ལུང་མ་བསྟན་ཏོ། །ཅིའི་ཕྱིར་ཞེ་ན། ངས་ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ། ངས་བསམ་པ་འདས་པའི་དུས་ན་སངས་རྒྱས་བརྒྱད་སྟོང་དང་ཕྲད་དེ། ཀུན་མཚན་འདོད་མི་འགྱུར་ཞེས་བྱའོ། །ངས་དེའི་ཚེ་ཀུན་འཁོར་ལོ་འཕྲུལ་གྱི་རྒྱལ་པོ་བྱས་ཏེ། ལུས་ཀྱི་ཚེ་ཟད་ཀྱི་བར་དུ་སློབ་མ་དང ། ཀུན་ལ་ཡོན་གོས་དང ། ཟས་དང ། མལ་ཆ་དང ། རྩི་སྨན་ཕུལ་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཚོལ་བའི་ཕྱིར་ན་སངས་རྒྱས་རྣམས་ཀྱིས་ང་ལ་ཁྱོད་ཀྱིས་མ་འོངས་པའི་དུས་ན་སངས་རྒྱས་བྱེད་པ་ཐོབ་བོ། །ཞེས་ལུང་མ་བསྟན་ཏོ། །ཅིའི་ཕྱིར་ཞེ་ན།་ངས་ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ། ངས་བསམ་པ་འདས་པའི་དུས་ན་སངས་རྒྱས་དྲུག་ཁྲི་དང་ཕྲད་དེ། ཀུན་མཚན་འོད་སྣང་བ་ཞེས་བྱའོ། །ངས་དེའི་ཚེ་ཀུན་གྱི་འཁོར་ལོའི་རྒྱལ་པོ་ཞེས་བྱ་སྟེ། ལུས་ཀྱི་ཚེ་ཟད་ཀྱི་བར་དུ་སློབ་མ་དང ། ཀུན་ལ་ཡོན་གོས་དང ། ཁ་ཟས་དང ། མལ་ཆ་དང ། རྩི་སྨན་ཕུལ་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཚོལ་བའི་ཕྱིར་ན་སངས་རྒྱས་དེ་རྣམས་ཀྱིས་ཀྱང་ང་ལ་ཁྱོད་ཀྱིས་མ་འོངས་པའི་དུས་ན་སངས་རྒྱས་ཐོབ་བོ། །ཞེས་ལུང་མ་བསྟན་ཏོ། །ཅིའི་ཕྱིར་ཞེ་ན།
290b
ངས་ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ། ངས་བསམ་པ་འདས་པའི་དུས་ན་སངས་རྒྱས་སུ་མ་འབུམ་དང་ཕྲད་དེ། ཀུན་མཚན་བུར་ཤ་ཞེས་བྱའོ། །ངས་དེའི་ཚེ་ཀུན་གྱི་འཁོར་ལོ་འཕྲུལ་གྱི་རྒྱལ་པོ་བྱས་ཏེ། རྣམ་བཞིས་ཡོན་གསོལ་ན། ཀུན་གྱིས་ང་ལ་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ། ངས་བསམ་པ་འདས་པའི་དུས་ན་སངས་རྒྱས་བརྒྱད་ཁྲི་བརྒྱད་སྟོང་དང་ཕྲད་དེ། ཀུན་མཚན་རིའི་རྒྱལ་པོ་ཞེས་བྱའོ། །བསྐལ་པའི་མིང་ནི། བླ་བརྒྱད་ཅེས་བྱ་སྟེ། སངས་རྒྱས་ཁྲི་བརྒྱད་སྟོང་དེ་ཀུན་གྱི་ཐད་དུ་སྐྲ་བྲེགས་ཆོས་གོས་གྱོན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྤྱད་པ་སྦྱངས་ན། ཀུན་གྱིས་ང་ལ་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ།་ངས་བསམ་པ་འདས་པའི་དུས་ན་སངས་རྒྱས་ལྔ་བརྒྱ་དང་ཕྲད་དེ། ཀུན་མཚན་མེ་ཏོག་བླ་ཞེས་བྱའོ། །ངས་དེའི་ཚེ་ཀུན་གྱི་འཁོར་ལོ་འཕྲུལ་གྱི་རྒྱལ་པོ་བྱས་ཏེ། ཀུན་ལ་ཡོད་དོ་ཅོག་ཕུལ་ན། སངས་རྒྱས་དེ་རྣམས་དང ། སློབ་མ་རྣམས་ཀུན་གྱིས་ང་ལ་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ། ངས་བསམ་པ་འདས་པའི་དུས་ན་སངས་རྒྱས་ལྔ་བརྒྱ་དང་ཕྲད་དེ། ཀུན་མཚན་ལེགས་པའི་བརྗིད་ཅེས་བྱའོ། །ངས་ཟད་པར་ལ་ཡོན་ཕུལ་ནས་ཀུན་གྱིས་ང་ལ་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་
291a
༄#། །རོ། །ཤཱ་རིའི་བུ། ངས་བསམ་པ་འདས་པའི་དུས་ན་སངས་རྒྱས་ཉིས་སྟོང་དང་ཕྲད་དེ། ཀུན་མཚན་ཅིན་ཞུ་ཞེས་བྱའོ། །ངས་དེའི་ཚེ་ཀུན་གྱི་འཁོར་ལོ་འཕྲུལ་གྱི་རྒྱལ་པོ་བྱས་ཏེ། ཀུན་ལ་ཡོན་ནོ་ཅོག་ཕུལ་ན་སངས་རྒྱས་དེ་ཀུན་གྱིས་ང་ལ་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ། ངས་བསམ་པ་འདས་པའི་དུས་ན་སངས་རྒྱས་དགུ་སྟོང་དང་ཕྲད་དེ། ཀུན་མཚན་བསོད་སྐྱབས་ཞེས་བྱའོ། །ངས་རྣམ་བཞི་སྤྱད་དེ་ཡོན་དུ་གསོལ་ན། སངས་རྒྱས་རྣམས་དང ། སློབ་མ་རྣམས་ཀུན་གྱིས་ང་ལ་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ། ངས་བསམ་པ་འདས་པའི་དུས་ན་སྔ་མ་འདས་པ་བསྐལ་པ་ཁྲིའི་ཚེ་སངས་རྒྱས་བྱུང་བ་མེད་དེ། དེའི་ཐོག་མ་བསྐལ་པ་ལྔ་བརྒྱའི་ནང་ན་རང་སངས་རྒྱས་དགུ་ཁྲི་ཡོད་དེ། ངས་ལུས་ཀྱི་ཚེ་ཟད་ཀྱི་བར་དུ་ཐམས་ཅད་ལ་ཡོན་གོས་དང ། ཟས་དང ། མལ་ཆ་དང ། རྩི་སྨན་ཕུལ་ཏེ། བཙུན་ཞིང་ལྕི་བར་བསྟོད་དོ། །དེའི་འོག་གི་བསྐལ་པ་ལྔ་བརྒྱ་ལའང་རྣམ་པ་བཞི་སྤྱད་དེ། རང་སངས་རྒྱས་བརྒྱད་ཁྲི་བཞི་སྟོང་ལ་ཡོན་ཕུལ་ཏེ། བཙུན་ཞིང་ལྕི་བར་བསྟོད་དོ། །ཤཱ་རིའི་བུ།་བསྐལ་པ་དེ་སྟོང་འདས་ནས་རང་སངས་རྒྱས་ཀྱང་མེད་དེ། ང་དེའི་ཚེ་ཛམྦུའི་གླིང་དུ་ཤི་ནས་ཚངས་པའི་ཁམས་སུ་སྐྱེས་ཏེ། ཚངས་པའི་རྒྱལ་པོ་ཆེན་པོ་བྱས་སོ། །དེ་
291b
ལྟ་བུར་གཅིག་ནས་གཅིག་ཏུ་བསྐལ་པ་ལྔ་བརྒྱའི་བར་དུ་རྟག་པར་ཚངས་པའི་ཁམས་སུ་སྐྱེས་ནས་ཚངས་པའི་རྒྱལ་པོ་བྱས་ཏེ། ཛམྦུའི་གླིང་དུ་མ་སྐྱེས་སོ། །བསྐལ་པ་ལྔ་བརྒྱ་དེ་འདས་ནས་མར་བབས་ཏེ་ཛམྦུའི་གླིང་དུ་སྐྱེས་ནས་ཛམྦུའི་གླིང་དུ་བསྟན་བཅོས་བསྟན་ཏེ། ཚེ་ཟད་ནས་གནམ་ངོས་བཞིའི་ལྷའི་རྒྱལ་པོར་སྐྱེས་སོ། །དེར་ཚེ་ཟད་ནས་སུམ་ཅུ་རྩ་གསུམ་གྱི་ལྷའི་ཁམས་སུ་སྐྱེས་ཏེ་དབང་པོ་བྱས་སོ། །དེ་ལྟ་བུ་གཅིག་ནས་གཅིག་ཏུ་བསྐལ་པ་ལྔ་བརྒྱ་ཚང་ནས་ཛམྦུའི་གླིང་དུ་སྐྱེས་སོ། །དེར་བསྐལ་པ་བརྒྱད་ཚང་ནས་ཚངས་པའི་ཁམས་སུ་སྐྱེས་ནས་ཚངས་པའི་རྒྱལ་པོ་ཆེན་པོ་བྱས་སོ། །ཤཱ་རིའི་བུ། ངས་བསྐལ་པ་དགུ་སྟོང་གི་བར་དུ་རེ་ཞིག་ཛམྦུའི་གླིང་དུ་མ་སྐྱེས་ཏེ། བསྐལ་པ་དགུ་སྟོང་གི་བར་དུ་ལྷའི་ཁམས་ཤ་སྟག་ཏུ་སྐྱེས་སོ། །བསྐལ་པ་ཟད་དེ་བསྲེགས་པའི་འོད་དབྱངས་ལྷའི་ཁམས་སུ་སྐྱེས་སོ། །འཇིག་རྟེན་གྱི་ཁམས་སླར་དེང་ཟིན་ནས་སླར་ཚངས་པའི་ཁམས་སུ་སྐྱེས་ཏེ། བསྐལ་པ་དགུ་སྟོང་གི་བར་དུ་མིའི་ནང་ན་ངན་དུ་མ་སྐྱེས་ཏེ། ཤཱ་རིའི་བུ། བསྐལ་པ་དེ་དགུ་སྟོང་གི་བར་དུ་སངས་རྒྱས་དང ། རང་སངས་རྒྱས་མེད་དེ། སེམས་ཅན་རྣམས་ལ་ལམ་ངན་པར་ལྟུང་ཞིང་འཁོད་པ་མང་ངོ ། །ཤཱ་རིའི་བུ། བསྐལ་པ་ཁྲི་དེ་འདས་ཟིན་ནས་སངས་རྒྱས་ཤིག་འཇིག་རྟེན་དུ་བྱུང་བ་མཚན་ཁྱབ་སྲུང་ཡང་དག་པར་གཤེགས་པ་གསོལ་བཞེངས་
292a
༄#། །རིགས་དྲང་ཁྱབ་མཁྱེན་སྣང་མཛད་ཞབས་བདེ་གཤེགས་འཇིག་རྟེན་སྒྲོལ་བླ་ན་མེད་པའི་དྲ་མ་གདུལ་ཐུལ་སྐྱེས་བུ་ལྷ་དང་མིའི་མཁན་པོ་སངས་རྒྱས་བཅོམ་ལྡན་འདས་ཞེས་བྱ་སྟེ། ང་དེའི་ཚེ་ཚངས་པའི་ཁམས་སུ་ཚེ་ཟད་ནས་ཛམྦུའི་གླིང་དུ་སྐྱེས་ཏེ། འཁོར་ལོ་འཕྲུལ་གྱི་རྒྱལ་པོ་བྱས་ནས་མཁན་པོ་ནི། སྤྱི་ལྷ་ཞེས་བྱ། མིའི་ཚེ་ལོ་དགུ་ཁྲི་ཐུབ་སྟེ། ངས་ལུས་ཀྱི་ཚེ་ཟད་ཀྱི་བར་དུ་སྐྱིད་པའི་ཡོ་བྱད་དོ་ཅོག་གིས་སངས་རྒྱས་དེ་དང ། དགེ་སློང་འབུམ་ཕྲག་དགུ་བཅུ་ལ་ཡོན་དུ་གསོལ་ཏེ། ལོ་དགུ་ཁྲིའི་བར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བཙལ་ན། སངས་རྒྱས་ཁྱབ་སྲུང་དེས་ཀྱང་ང་ལ་ཁྱེད་མ་འོངས་པའི་དུས་ན་སངས་རྒྱས་བྱེད་པ་ཐོབ་བོ། །ཞེས་ལུང་མ་བསྟན་ཏོ། །ཅིའི་ཕྱིར་ཞེ་ན། ངས་དེའི་ཚེ་ཆོས་སོ་ཅོག་གི་བདེན་པའི་མཚན་མ་ཁོང་དུ་ཆུད་མ་ནུས་ཏེ། བདག་ཏུ་ལྟ་བར་འཛིན་པ་ལ་འདོད་ཆགས་ཏེ། ཐོབ་པ་ཡོད་པ་མཐོང་ངོ ། ། ཤཱ་རིའི་བུ། བསྐལ་པ་དེའི་ཚེ་སངས་རྒྱས་བརྒྱ་བྱུང་སྟེ། མིང་མཚན་སོ་སོ་ཐ་དད་དོ། །ངས་དེའི་ཚེ་ཀུན་གྱི་འཁོར་ལོ་འཕྲུལ་གྱི་རྒྱལ་པོ་བྱས་ནས་ལུས་ཀྱི་ཚེ་ཟད་ཀྱི་བར་དུ་སློབ་མ་རྣམས་དང ། ཀུན་ལ་ཡོན་གསོལ་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་བཙལ་ནས་སངས་རྒྱས་དེ་རྣམས་ཀྱིས་ཀྱང་ང་ལ་ཁྱོད་མ་འོངས་པའི་དུས་ན་སངས་
292b
རྒྱས་བྱེད་པ་ཐོབ་བོ། །ཞེས་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ། ངས་བསམ་པ་འདས་པའི་དུས་ན་བསྐལ་པ་གྲངས་མེད་པ་བདུན་བརྒྱའི་ཚེ་སངས་རྒྱས་\?\་ཡང་དང་ཕྲད་དེ། ཀུན་མཚན་ཛམྦུ་ད་ན་ཞེས་བྱ་སྟེ། ངས་ལུས་ཀྱི་ཚེ་ཟད་ཀྱི་བར་དུ་རྣམ་པ་བཞིས་ཡོན་གསོལ་ན། ཡང་ལུང་བསྟན་པ་མེད་དེ། ཡང་ངས་ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ། ངས་བསམ་པ་འདས་པའི་དུས་ན་བསྐལ་པ་བདུན་བརྒྱའི་ཚེ་ནའང་སངས་རྒྱས་ཁྲི་ཕྲག་དྲུག་བརྒྱ་ཉི་ཤུ་དང་ཕྲད་དེ། ཀུན་གྱི་མཚན་ཆོ་ག་ཐམས་ཅད་མཐོང་བ་ཞེས་བྱའོ། །ངས་དེའི་ཚེ་ཀུན་གྱི་འཁོར་ལོ་འཕྲུལ་གྱི་རྒྱལ་པོ་བྱས་ནས་སྐྱིད་པའི་ཡོ་བྱད་དོ་ཅོག་གིས་ལུས་ཀྱི་ཚེ་ཟད་ཀྱི་བར་དུ་སློབ་མ་དང ། ཀུན་ལ་ཡོན་གསོལ་ནའང་ང་ལ་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ། ངས་བསམ་པ་འདས་པའི་དུས་ན་ཡང་བསྐལ་པ་བདུན་བརྒྱའི་ཚེ་སངས་རྒྱས་བརྒྱད་ཅུ་རྩ་བཞི་དང་ཕྲད་དེ། ཀུན་མཁན་པོ་རྒྱལ་པོ་མཚན་ཞེས་བྱའོ། །ངས་དེའི་ཚེ་ཀུན་གྱི་འཁོར་ལོ་འཕྲུལ་གྱི་རྒྱལ་པོ་བྱས་ནས་སྐྱིད་པའི་ཡོ་བྱད་དོ་ཅོག་སྤྱད་དེ་ལུས་ཀྱི་ཚེ་ཟད་ཀྱི་བར་དུ་སློབ་མ་དང ། ཀུན་ལ་ཡོན་གསོལ་ཀྱང་ང་ལ་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ། ངས་བསམ་པ་འདས་པའི་དུས་ན་ཡང་བསྐལ་པ་གྲངས་མེད་པ་བདུན་བརྒྱའི་ཚེ་ན་སངས་རྒྱས་བཅོ་
293a
༄#། །ལྔ་དང་ཕྲད་དེ། ཀུན་གྱི་མཚན་གཉི་སྣང་ཞེས་བྱའོ། །ངས་དེའི་ཚེ་ཀུན་གྱི་འཁོར་ལོ་འཕྲུལ་གྱི་རྒྱལ་པོ་བྱས་ནས་སྐྱིད་པའི་ཡོ་བྱད་དོ་ཅོག་སྤྱད་དེ། ལུས་ཀྱི་ཚེ་ཟད་ཀྱི་བར་དུ་སློབ་མ་དང ། ཀུན་ལ་ཡོན་གསོལ་ནའང་ང་ལ་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །ཤཱ་རིའི་བུ། ངས་བསམ་པ་འདས་པའི་དུས་ན་ཡང་བསྐལ་པ་གྲངས་མེད་པ་བདུན་བརྒྱའི་ཚེ་སངས་རྒྱས་དྲུག་ཅུ་རྩ་གཉིས་དང་ཕྲད་དེ། ཀུན་མཚན་དགེ་ཞེས་བྱའོ། །ངས་དེའི་ཚེ་འཁོར་ལོ་འཕྲུལ་གྱི་རྒྱལ་པོ་བྱས་ནས་སྐྱིད་པའི་ཡོ་བྱད་དོ་ཅོག་སྤྱད་དེ། ཚེ་ཟད་ཀྱི་བར་དུ་ཡོན་གསོལ་ནའང་ང་ལ་ལུང་མ་བསྟན་ཏེ། ཐོབ་པ་ཡོད་པ་སྤྱད་པའི་ཕྱིར་རོ། །དེ་ལྟ་བུར་གཅིག་ནས་གཅིག་ཏུ་སངས་རྒྱས་འོད་མི་འགྱུར་དང་ཕྲད་པ་ལ་ཐུག་ན། གདོད་སྐྱེ་བ་མེད་པའི་བཟོད་པ་ཐོབ་ནས་དེ་ལ་ལུང་བསྟན་པ། ཁྱོད་མ་འོངས་པའི་དུས་བསྐལ་པ་གྲངས་མེད་པ་འདས་པ་ན་སངས་རྒྱས་བྱད་པ་ཐོབ་པ་སྟེ། མཚན་ཤཱཀྱ་ཐུབ་པ་ཡང་དག་པར་གཤེགས་པ་གསོལ་བཞེངས་རིགས་དྲང་ཁྱབ་མཁྱེན་སྣང་མཛད་ཞབས་བདེ་གཤེགས་འཇིག་རྟེན་སྒྲོལ་བླ་ན་མེད་པའི་དྲི་མ་གདུལ་ཐུལ་སྐྱེས་བུ་ལྷ་དང་མིའི་མཁན་པོ་སངས་རྒྱས་བཅོམ་ལྡན་འདས་ཞེས་བསྒོའོ། །ཤཱ་རིའི་བུ། ངས་བསམ་པ་འདས་པའི་དུས་ན་འཁོར་ལོ་
293b
འཕྲུལ་གྱི་རྒྱལ་པོ་འབུམ་ཕྲག་བཅུ་གཉིས་ཡོད་དེ། ཀུན་གྱི་མིང་སྤྱི་བོ་སྐྱེས་ཞེས་བྱའོ། །ཡང་ཤཱ་རིའི་བུ། ངས་བསམ་པ་འདས་པའི་དུས་ན་འཁོར་ལོ་འཕྲུལ་གྱི་རྒྱལ་པོ་འབུམ་ཕྲག་སུམ་ཅུ་ཡོད་དེ། ཀུན་གྱི་མིང་མ་དྷ་ཐ་མ་ཞེས་བྱའོ། །ཤཱ་རིའི་བུ། ངས་བསམ་པ་འདས་པའི་དུས་ན་འཁོར་ལོ་འཕྲུལ་གྱི་རྒྱལ་པོ་འབུམ་ཕྲག་བཞི་བཅུ་ཡོད་དེ། ཀུན་གྱི་མིང་ཞིང་འབྱི་ཞེས་བྱའོ། །ཤཱ་རིའི་བུ། ངས་བསམ་པ་འདས་པའི་དུས་ན་འཁོར་ལོ་འཕྲུལ་གྱི་རྒྱལ་པོ་ཆིག་ཁྲི་ཞིག་ཡོད་པ་ཀུན་གྱི་མིང་མངོན་སྣང་ཞེས་བྱའོ། །ཤཱ་རིའི་བུ། ངས་བསམ་པ་འདས་པའི་དུས་ན་འཁོར་ལོ་འཕྲུལ་གྱི་རྒྱལ་པོ་ཉི་ཁྲི་ཞིག་ཡོད་དེ། མིང་མཁན་སོ་སོ་ཐ་དད་དོ། །ཤཱ་རིའི་བུ། ངས་བསམ་པ་འདས་པའི་དུས་ན་འཁོར་ལོ་འཕྲུལ་གྱི་རྒྱལ་པོ་འབུམ་ཕྲག་བཅུ་དྲུག་ཡོད་པ་མིང་མཁན་ཀུན་སོ་སོ་ཐ་དད་དོ། །རྒྱལ་པོ་དག་ལ་སོགས་པ་ངས་གུད་ན་དགའ་བོ་དག་ལ་བཤད་དོ། །ཤཱ་རིའི་བུ། ཁྱོད་ཀྱི་ཡིད་ལ་ཇི་སྙམ། རྒྱལ་པོ་འདི་རྣམས་མི་གཞན་གྱི་མ་ཡིན་གྱི། ང་ཉིད་ཀྱི་ལུས་ཡིན་ནོ། །ཤཱ་རིའི་བུ། ངས་བསམ་པ་སྔ་མ་འདས་པའི་ཚེ་དུས་ན་སངས་རྒྱས་ཤིག་ཡོད་པ་མཚན་དགེ་སྣང་ཞེས་བྱ་སྟེ། བྱང་ཆུབ་སེམས་དཔའ་བྱམས་པའི་ཚེ་འཁོར་ལོ་འཕྲུལ་གྱི་རྒྱལ་པོ་བྱས་ནས་མིང་མངོན་སྣང་ཞེས་བྱ་སྟེ། ཐོག་མ་བླ་ན་མེད་པ་བྱང་ཆུབ་ཀྱི་སེམས་བསྐྱེད་པ་དེའི་ཚེ་སེམས་ཅན་ཚེ་
294a
༄#། །ལོ་བརྒྱད་ཁྲི་བཞི་སྟོང་ཐུབ་སྟེ། སངས་རྒྱས་དགེ་སྣང་དེས་ལན་གསུམ་བསྡུས་ཏེ་ཆོས་བཤད་ན། ཐོག་མ་བསྡུས་པ་ལ་མི་འབུམ་ཕྲག་དགུ་བཅུ་རྩ་དྲུག་གཅིག་ཅར་ལམ་ཐོབ་བོ། །དེའི་འོག་ཏུ་ཕལ་པོ་ཆེ་བསྡུས་པ་ལ་མི་འབུམ་ཕྲག་དགུ་བཅུ་རྩ་བཞི་གཅིག་ཅར་ལམ་ཐོབ་བོ། །གསུམ་གྱི་ཐ་མར་ཕལ་ཆེ་བསྡུས་པ་ལ་མི་འབུམ་ཕྲག་དགུ་བཅུ་རྩ་གཉིས་གཅིག་ཅར་ལམ་ཐོབ་བོ། །དེའི་རྒྱལ་པོ་སངས་རྒྱས་ཀྱིས་ལན་གསུམ་བསྡུས་ཏེ་ཆོས་བཤད་ནས་དཔག་ཏུ་མེད་པའི་མི་བསྒྲལ་བ་མཐོང་ནས་སེམས་ལ་ཤིན་ཏུ་དགའ་གཞའ་སྟེ། ལོ་ཁྲིའི་བར་དུ་ཡོ་བྱད་ཐམས་ཅད་ཀྱིས་སངས་རྒྱས་དང ། སློབ་མ་ལ་ཡོན་གསོལ་ཏེ། སེམས་སྐྱེས་ནས་བླ་ན་མེད་པ་ཡང་དག་པར་རྫོགས་པའི་སངས་རྒྱས་བཙལ་ཏེ་མ་འོངས་པའི་དུས་ན་སེམས་ཅན་བསྒྲལ་སླའོ། །ང་དམ་ཚིག་སངས་རྒྱས་གྲུབ་པ་དང ། ཚེ་སྲོག་གི་དུས་དཔག་པ་དང ། དགེ་སློང་གི་དགེ་འདུན་གྱི་གྲངས་དང ། འཁོར་བའི་བསྐོར་བ་ནི། དེ་ལྟ་བུ་ཡིན་ནོ། །ཤཱ་རིའི་བུ། ངས་དོན་དེ་ཤེས་པ་ནི། འདི་བས་འདས་ཏེ། དཔག་ཏུ་མེད་དོ། །ཤཱ་རིའི་བུ། སངས་རྒྱས་བྱམས་པས་སེམས་བསྐྱེད་དེ།་བསྐལ་པ་བཞི་བཅུ་ལོན་ཟིན་ནས་ངས་གདོད་སེམས་བསྐྱེད་དེ། སངས་རྒྱས་ཐུབ་མེད་ཀྱི་ཐད་དུ་ཐོག་མ་དགེ་བའི་རྩ་བ་བསྐྱེད་ནས་ངས་ལོ་སྟོང་གི་བར་དུ་སྐྱིད་པའི་ཡོ་
294b
བྱད་ཐམས་ཅད་ཀྱིས་སངས་རྒྱས་དེ་ལ་ཡོན་གསོལ་ནས་རས་ཡུག་ལྔ་བརྒྱ་ཕུལ་ཏེ། སངས་རྒྱས་དེ་འདས་པའི་ཕྱིན་རིན་པོ་ཆེ་སྣ་བདུན་གྱི་མཆོད་རྟེན་བརྩིགས་ནས་འཕང་ནི། དཔག་ཚད་གཅིག། ཆུ་ཞེང་ནི། དཔག་ཚད་ཕྱེད་དེ། ཀུན་གསེར་དངུལ་དང ། བཻཌཱུརྱ་དང ། མརྒད་དང ། གཟི་དང ། སྤུག་དང ། མུ་ཏིག་དམར་པོས་བྱས་སོ། །སེམས་ལ་རྟག་ཏུ་སྨོན་ལམ་སྐྱེད་པ་སེམས་ཅན་སྡུག་བསྔལ་ཏེ་བསྒྲལ་བའི་ར་མདའ་མེད་དེ། ཆོས་ངན་པ་དང་ཕྲད་ཅིང་ལམ་ངན་པར་ལྷུང་བ་མེད་ན། ངས་དེའི་ཚེ་སངས་རྒྱས་གྲུབ་པར་ཤོག་ཅིག་།ཤཱ་རིའི་བུ།་ཁྱོད་ཀྱིས་རེ་ཞིག་ལྟོས་ཤིག་།བླ་ན་མེད་པ་ཡང་དག་པར་རྫོགས་པ་སྤྱད་སྦྱངས་པ་ཤིན་ཏུ་དཀའོ། །ཤཱ་རིའི་བུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྤྱད་སྦྱངས་ན། ཚེ་རབས་གྲངས་མེད་པའི་བར་དུ་སྡུག་བསྔལ་རྣམས་ཀྱིས་ཉོན་མོངས་ཏེ། ངས་བཤད་དུ་ཟིན་ན། ཁྱོད་ཀྱིས་ཐོས་པ་དང ། ཡི་མུག་ཅིང་སྒྱིད་ལུག་ཏུ་རུང་ངོ ། །ངས་སྡུག་བསྔལ་དང ། མྱ་ངན་འཁྲུག་པས་ཉོན་མོངས་སོ་ཅོག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཚོལ་བའི་ཕྱིར་རོ། །ཤཱ་རིའི་བུ། ཁྱོད་ལྟོས་ཤིག་།བྱང་ཆུབ་སེམས་དཔའ་སར་སར་ཝ་དན་དང ། བྱང་ཆུབ་སེམས་དཔའ་ཆོས་ཚོལ་དང ། བྱང་ཆུབ་སེམས་དཔའ་རྟག་ཏུ་སྙིང་རྗེ་དང ། བྱང་ཆུབ་སེམས་དཔའ་རང་མི་ཉན་དང ། བྱང་ཆུབ་སེམས་དཔའ་རྟག་ཏུ་
295a
༄#། །འགྲུས་ཀྱིས་དེ་སྙེད་ཀྱི་སངས་རྒྱས་རྣམས་ལ་ཡོན་གསོལ་ཏེ། སྡུག་བསྔལ་ལོ་ཅོག་གིས་ཉོན་མོངས་ན། འོན་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་དཀའ་ན། མི་གཏི་མུག་གཞན་གྱིས་སྐད་ཅིག་མྱ་ངན་ལས་འདས་པ་བཙལ་བ་མེད་པ་ལྟ་སྨོས་ཀྱང་ཅི་དགོས། །ཤཱ་རིའི་བུ། དེ་ལྟ་བུར་སྤྱད་ན་འོན་ཀྱང་ཤིན་ཏུ་དགའ་ན། མ་སྤྱད་པ་ལྟ་སྨོས་ཀྱང་ཅི་དགོས། དེ་ལྟ་བས་ན། ཤཱ་རིའི་བུ། ངས་བྱེ་བྲག་ཕྱེད་པར་བསྒོའོ། །འོག་མའི་ཆོས་སྤྱད་པས་བླ་མའི་ཆོས་ཐོབ་པར་མི་རུང་སྟེ། བླ་མའི་ཆོས་སྤྱད་ན། གདོད་བླ་མའི་ཆོས་ཐོབ་བོ། །གང་ལ་སོགས་པ་འོག་མའི་ཆོས་དེ་ནི། ལུས་ཀྱི་ངན་པའི་ལས། ཁའི་ངན་པའི་ལས། ཡིད་ཀྱི་ངན་པའི་ལས་སོ། །འོག་མའི་ཆོས་ནི། མིང་སེམས་ལ་དགེ་བའི་ཆོས་འགྲུས་པར་སྤྱོད་སྦྱོང་མི་ནུས་པ་ཞེས་བྱའོ། །འོག་མའི་ཆོས་ནི། ལེ་ལོ་སྙོམ་ལས་བྱེད་ཅིང་ཚུལ་ཁྲིམས་མནོས་སོ་ཅོག་བཤིག་པའོ། །ཞེས་བྱའོ། ། ཤཱ་རིའི་བུ། དེའི་མིང་འོག་མའི་ནང་ནའང་འོག་མ་ཞེས་བྱའོ། །ཡང་འོག་མའི་ནང་ན་འོག་མ་ཞེས་བྱ་བ་ནི། ངའི་ཆོས་ལ་ཁྱིམ་ནས་བྱུང་སྟེ་ཐོབ་པ་མཐོང་བ་དང ། བདག་ཏུ་ལྟ་བ་དང ། གང་ཟག་ཏུ་ལྟ་བ་དང ། སེམས་ཅན་དུ་ལྟ་བའང་སྐྱེས་སོ། །ཅིའི་ཕྱིར་ཞེ་ན། ཤཱ་རིའི་བུ། ཡང་དག་པར་གཤེགས་པས་དེ་ལ་མངོན་པར་སྣང་བ་མཁྱེན་ཏེ། ཐོབ་པ་
295b
ཡོད་པར་འཛིན་པས་ནི། མི་འགལ་བའི་བཟོད་པའང་མེད་ན་ལམ་གྱི་འབྲས་བུ་མི་ཐོབ་པ་ལྟ་སྨོས་ཀྱང་ཅི་དགོས། ཤཱ་རིའི་བུ། ཐོབ་པ་ཡོད་པར་འཛིན་དུ་ཟིན་ན། བརྒྱ་སྟོང་ཁྲི་འབུམ་གྱི་སངས་རྒྱས་ཀྱིས་འཁོར་ལོ་གསུམ་སྤྱད་དེ་མངོན་པར་བསྟན་དུ་ཟིན་ཀྱང་མི་དེས་མཐོང་བ་མ་བཏང་ན། མི་གཞན་གྱི་ཁ་ཟས་ཁམ་གཅིག་ཀྱང་མི་ཞུ་ན་ལམ་གྱི་འབྲས་བུ་མི་ཐོབ་པ་ལྟ་སྨོས་ཀྱང་ཅི་དགོས། ཤཱ་རིའི་བུ། བདག་ཏུ་ལྟ་བ་དང ། གང་ཟག་ཏུ་ལྟ་བས་མྱ་ངན་ལས་འདས་པ་ཐོབ་པ་ནི། ཕལ་ཐ་མལ་པ་ཐམས་ཅད་ཀུན་གྱིས་ཞི་བར་འདས་པའི་རིགས་སོ།། ཅིའི་ཕྱིར་ཞེ་ན། བདག་ཏུ་ལྟ་བ་དང ། གང་ཟག་ཏུ་ལྟ་བ་ནི། ཀུན་ཡོན་པོ་མཐོང་བ་ཡིན་ནོ། །མི་ཕལ་ཐ་མལ་པ་རྣམས་དང ། བདག་ཏུ་ལྟ་བའི་གནས་དང ། གང་ཟག་ཏུ་ལྟ་བ་འདོད་ཆགས་མང་སྟེ། དེ་ལྟ་བུས་ནི། ཐ་མལ་པ་ཐམས་ཅད་ཀྱིས་མྱ་ངན་ལས་འདས་པ་ཐོབ་པའི་རིགས་སོ། །ཞེས་བྱས་སོ། །ཤཱ་རིའི་བུ། མི་ལ་ལ་ཞིག་གིས་བསམ་པ་བྱས་ཏེ། བདག་ཡོད།་གང་ཟག་ཡོད་ཅེས་མི་དེས་དེ་ལྟ་བུའི་མཐོང་བ་མ་བཏང་བར་མྱ་ངན་ལས་འདས་པ་ཆུད་དུ་ཟིན་ན། ཕལ་ཐ་མལ་པ་ཐམས་ཅད་ཀྱིས་འཕགས་པའི་ལམ་ཐོབ་པའི་རིགས་སོ། །དེ་ཅིའི་ཕྱིར་ཞེ་ན། ཕལ་ཐ་མལ་པ་ཐམས་ཅད་ཀུན་ནི། བདག་ཏུ་ལྟ་བ་དང ། གང་ཟག་ཏུ་ལྟ་བ་ཡིན་ཏེ། དེ་ལྟ་བས་ན། བདག་ཏུ་ལྟ་བ་དང ། གང་ཟག་ཏུ་ལྟ་བས་མྱ་ངན་ལས་འདས་
296a
༄#། །པར་ཆུད་ན་ནི། ཕལ་ཐ་མལ་པ་ཀུན་གྱིས་འཕྲུལ་གྱི་ལམ་དུ་ཆུད་དེ། འཕགས་པའི་ནང་ན་ནི། ཅིའང་ཉུང་བ་མེད་དོ། །ཤཱ་རིའི་བུ། མི་ལ་ལ་ཞིག་གིས་སེམས་བྱ་སྟེ། བདག་ཏུ་ལྟ་བ་ཡོད་པ་ལ་མྱ་ངན་ལས་འདས་པ་ཡོད་དུ་ཟིན་ན། མི་དེས་འཕགས་པའི་ལམ་ཐོབ་ཀྱི། གཞན་བསམ་མི་དགོས་སོ། །ཅིའི་ཕྱིར་ཞེ་ན། ཕལ་ཐ་མལ་པ་ཐམས་ཅད་ལ་བདག་ཏུ་ལྟ་བ་དང ། གང་ཟག་ཏུ་ལྟ་བ་མི་ཉུང་བས་ན། དེ་ལྟ་བུའི་མི་གཏི་མུག་ལ་དེ་ལྟ་བུའི་ཉེས་འཁྲུལ་པ་ཡོད་དེ། ཕལ་ཐ་མལ་པ་རྣམས་ཀུན་གྱིས་འཕགས་པའི་ལམ་དུ་ཆུད་ཅེས་ཟེར་རོ། །འཕགས་པའི་འཕྲུལ་གྱི་ལམ་ལ་བཅིང་བ་མེད་དེ། མི་དེས་སྤྱད་པའི་ཚེ་སྲོག་གཅོད་པ་ལྔ་མནོས། ལོག་པ་ལྔའི་སྡིག་བསྐྱོད་པ་རིགས་སོ། །དེ་ལྟ་བས་ན། མི་གཏི་མུག་གིས་འཕགས་པའི་ལམ་ལ་ལོག་པ་ལྔའི་སྡིག་ཡོད་དོ། །ཅིའི་ཕྱིར་ཞེ་ན། ཕལ་ཐ་མལ་པ་ཐམས་ཅད་ཀུན་ནི། བདག་ཏུ་ལྟ་བ་ཡོད། སེམས་ཅན་ཡོད་ཅེས་འཆད་དོ། །མི་ལ་ཚིག་དེ་སྐད་ཟེར་ན། ལོག་པ་ལྔའི་སྡིག་འབྱོར་གྲུབ་སྟེ། མྱ་ངན་ལས་འདས་པར་མི་ཆུད་དོ། །བདག་ཏུ་ལྟ་བ་དང ། གང་ཟག་ཏུ་ལྟ་བར་བཅད་པས་མྱ་ངན་ལས་འདས་པར་ཆུད་ཅེས་ཟེར་ན། རྫུན་གྱི་ཚིག་ཡིན་ཏེ། སངས་རྒྱས་ལའང་སྐུར་བ་ཡིན་ནོ། །གཅིག་ཏུ་ན་ངའི་ཆོས་ཀྱི་ནང་ན་གཙང་གདང་
296b
བར་ཁྱིམ་ནས་བྱུང་སྟེ་ཐོབ་པར་མ་ནུས་པ་ཞེས་ཀྱང་བྱའོ། །སངས་རྒྱས་ཀྱི་མཛོད་བཤད་པའི་ཆོས་ཀྱི་ཡི་གེ། བམ་པོ་བཞི་པ། སངས་རྒྱས་ཀྱི་མཛོད་བཤད་པའི་ཆོས་ཀྱི་ཡི་གེ་གཙང་མ་མཐོང་བའི་ལེའུ་འོག་མའོ།། །།ཤཱ་རིའི་བུ། ངས་ཁྱོད་ལ་བྱེ་བྲག་ཕྱེད་པར་བསྒོའོ། །ཐོབ་པ་ཡོད་དོ་ཅོག་ལ་ནི། མྱ་ངན་ལས་འདས་པ་མེད་དོ། །ཐོབ་པ་ཡོད་དོ་ཅོག་ལ་ནི། མྱ་ངན་ལས་འདས་པ་ཡོད་དུ་མ་ཡིན་ན། དེ་ནི། སངས་རྒྱས་རྣམས་འཇིག་རྟེན་དུའང་མི་འབྱུང་ངོ ། །ཕལ་ཐ་མལ་པ་ཐམས་ཅད་ཀྱིས་ཀྱང་མྱ་ངན་ལས་འདས་པར་ཆུད་དོ། །ཅིའི་ཕྱིར་ཞེ་ན། ཕལ་ཐ་མལ་པ་ཐམས་ཅད་ཀུན་ལ་བདག་ཏུ་ལྟ་བ་དང ། གང་ཟག་ཏུ་ལྟ་བ་ཡོད་དོ། །ཀུན་ལ་ཐོབ་པ་འཛིན་པ་མེད་དེ། དེ་ཀུན་ཡོན་པོ་མཐོང་བ་ཡིན་ནོ། །ཤཱ་རིའི་བུ།་ཁྱོད་ཀྱིས་རེ་ཞིག་ངས་ཇི་སྲིད་ལོན་ན། འབྱོར་པ་ལྟོས་ཤིག་།ཐོབ་པ་དང ། མཐོང་བ་ཡོད་དོ་ཅོག་ནི། མཛངས་ཤིང་འཕྲུལ་པའི་སྤྱོད་པ་མ་ཡིན་ཏེ། སངས་རྒྱས་རྣམས་ཀྱིས་ང་ལ་ཁྱོད་མ་འོངས་པའི་དུས་ན་སངས་རྒྱས་ཕྱེད་པ་ཐོབ་བོ། །ཞེས་ལུང་མ་བསྟན་ཏོ། །ཤཱ་རིའི་བུ། ངས་དེ་ལྟ་བུ་སྤྱད་ན། འོན་ཀྱང་ལུང་བསྟན་པ་མ་ཐོབ་ན་དེ་ལྟ་བུ་མི་གཏི་མུག་གིས་ཚུལ་ཁྲིམས་འཛིན་པ་དང ། མང་པོ་ཐོས་པ་དང ། བསམ་གཏན་དུ་ཐུབ་པ་ལ་སོགས་པ་འབའ་ཞིག་སྤྱད་དེ། བདག་ཏུ་ལྟ་བ་དང ། གང་ཟག་ཏུ་ལྟ་བ་དང ། སེམས་ཅན་དུ་ལྟ་བ་སྐྱེས་
297a
༄#། །པས་མི་ཐོབ་པ་ལྟ་སྨོས་ཀྱང་ཅི་དགོས། ཤཱ་རིའི་བུ། ངས་བཤད་པ་དེ་ལྟ་བུའི་མིང་ནི། མིང་སྤྱོད་པ་ཞེས་ཀྱང་མི་བྱ། མིང་ཐོབ་པ་ཞེས་ཀྱང་མི་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ། ཉིན་མཚན་དེ་ལྟ་བུའི་ཡོན་པོ་མཐོང་བ་ལ་འདོད་ཆགས་དེ་ཞི་བར་འདས་པར་མ་ཐོབ་བོ། །དེ་ལྟ་བུའི་མི་གཏི་མུག་གིས་འདི་སྙམ་དུ་བདག་ལ་སོགས་པ་ཅིའི་ཕྱི་ནས་བདག་དང ། གང་ཟག་གིས་ཆོས་མེད་པ་སྤྱོད་པ་སྦྱངས་ཏེ། མི་དེས་བདག་ལ་སོགས་པ་སྡུག་བསྔལ་མང་པོ་ཕུང་ཆོད་ཀྱང་རུང་སྲིད་ན། འདི་སྙམ་སེམས་བྱས་སོ། །ཤཱ་རིའི་བུ། ཐོག་མ་སྐྱེས་པ་ནས་ལོང་བའི་མི་ཁྱི་ཟ་བ་ལས་བྲོས་ཏེ་བྱོལ་ནས་མེ་དོང་ཟབ་མོར་ལྟུང་བ་དང་མཚུངས་སོ། །ཤཱ་རིའི་བུ། ངས་སྨྲས་པ། མི་གཏི་མུག་གིས་དེ་ལྟ་བུར་བདག་ཏུ་ལྟ་བ་དང ། གང་ཟག་ཏུ་ལྟ་བ་དང ། ཐོབ་པ་ཡོད་པར་མཐོང་བ་སྦྱངས་ཏེ། དེ་ལྟ་བུའི་མཐོང་བ་རྣམས་སྤྱད་དེ་གཙང་གདང་ན། འདོད་ཅིང་རེ་བ་ནི། མི་དེ་འདོད་ཅིང་ཆགས་ལ་འབྲངས་ཏེ། དེ་ལྟ་བུའི་དོན་སྤྱད་པས་མྱ་ངན་ལས་འདས་པ་ཐོབ་པར་འདོད་ན། ངས་མིང་མཐར་ལམ་ངན་པར་ལྷུང་ཞེས་བཤད་དོ། །ཤཱ་རིའི་བུ། དཔེར་མི་ལོང་བ་མེ་དོང་ཟབ་མོ་ལ་བདེ་སྐྱིད་པའི་སེམས་སྐྱེས་པ་དང་མཚུངས་སོ། །དེ་ལྟ་བུའི་མི་གཏི་མུག་ཀྱང་བདག་དང ། གང་ཟག་ཏུ་ལྟ་བ་དང ། ཐོབ་པ་ཡོད་པར་མཐོང་བ་ལ་བདེ་
297b
སྐྱིད་པའི་སེམས་སྐྱེས་ཏེ། མི་དེ་ཉིན་མཚན་དུ་ཆགས་པ་ལ་འབྲེངས་པས་བརྙས་བསླུས་ནས་སླར་དོན་དེ་ལ་ཆགས་ཏེ། ངའི་ཆོས་ཀྱི་ནང་ཡོན་བླངས་ནས་དེ་ལྟ་བུའི་མི་གཏི་མུག་ཉིན་མཚན་དུ་རྒུད་པའི་མྱ་ངན་གྱིས་ལམ་ངན་པའི་ནང་དུ་ལྷུང་ངོ ། །ཤཱ་རིའི་བུ། དཔེར་མི་སྤྱིའི་ལུགས་ཀྱི་རྒྱལ་པོ་ཆེན་པོ་དང་མཚུངས་ཏེ། བདག་གི་ཁམས་ཀྱི་ཡུལ་གྱི་ནང་ན་བརྗིད་ཀྱི་སྟོབས་རང་དབང་སྟེ། མི་དེ་ལྟ་བུ་ཞིག་འཕྲོག་པའི་རིགས། མི་དེ་ལྟ་བུ་ཞིག་བཀོལ་བའི་རིགས་ཞེས་ཟེར་ཏེ། མི་ཕལ་གཞན་རྒྱལ་པོའི་ཡིད་དང་འགལ་ཏེ། རྒྱལ་པོ་ངེས་པ་ངན་པ་བརྗོད་ནས་མིའི་སེམས་གྱེས་ཤིང་ཞིང་བས་མཁར་གྱི་རིམ་གྲོ་མ་ནུས་ཏེ། ལོག་པར་འགྲོས་པ་རྒྱལ་པོས་མི་དེ་དག་དགྲ་ཆེན་པོ་ཡིན་པར་རིག་ནས་ཕལ་མང་པོའི་ནང་དུ་རྔ་སྒྲ་ངན་པ་བརྡུངས་ཏེ། དེའི་ཉེས་པ་ཤིན་ཏུ་བཅོམ་ནས་བསྐྲད་དེ་འགོང་ཐོད་དུ་བྱུང་ངོ ། །དེའི་སྙིང་ཉེ་བ་ཟད་ཀྱིས་བཙལ་ན། མཁར་གྱི་རིམ་གྲོ་བྱ་མ་ནུས་པས་ན་དེ་ལྟ་བུའི་སྡུག་བསྔལ་ཐོབ་བོ། །ཤཱ་རིའི་བུ། སངས་རྒྱས་ཀྱང་དེ་དང་མཚུངས་ཏེ། བསྐལ་པ་གྲངས་མེད་པའི་བར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྤྱད་སྦྱངས་ཏེ། ཆོས་ཀྱི་རྒྱལ་པོ་ཆེན་པོ་བྱས་སོ། །ཆོས་ཀྱི་ཡུལ་ས་བཟུང་གཟི་བརྗིད་ཀྱི་མཐུ་ཆེན་པོ་ཡོད། སློབ་མ་རྣམས་ཀྱི་ནང་ན་ཆོས་ཀྱི་རོ་ཤེས་པ་ཡོད་དེ་སྲོག་སྟོར་ལ་ཐུག་ཀྱང་ངས་བསྟན་པ་མ་ཉམས། ལྷ་དང་
298a
༄#། །འཇིག་རྟེན་མི་རྣམས་ཀྱིས་གཞིག་ནུས་པ་མེད་དེ། བསྟན་པ་མནོས་པའི་ནང་ན་བདག་ལ་ངན་ཅིང་བདག་ལོག་པའང་མེད། གཞན་ལའང་མི་སྟོན་ཏོ། །དཔལ་གྱི་ནང་ན་གཟི་བརྗིད་ཀྱི་མཐུ་ཆེན་པོ་ཡོད་པས་རང་དབང་གིས་ཆོས་བཙུགས་ཏེ། ཆོས་ཀྱི་མཁར་རིམ་གྲོ་བསྲུངས་ནས་དགྲ་ངན་པས་བཤིག་དྲལ་ཅིང་མི་ཆུད་པར་བྱས་སོ། །ཡང་དག་པར་གཤེགས་པའི་གསང་བའི་ཆོས་བཤད་པ་སེམས་ཐག་པ་ནས་མནོས་ཏེ། འཁོན་མི་དགྲ་ཆེན་པོ་མཐོང་བ་རྣམས་ལ་བཤད་དེ། །ཤཱ་རིའི་བུ། ཡང་དག་པར་གཤེགས་པ་དེ་ལྟར་བཞུགས་པས་ཆོས་ཀྱི་མཁར་རིམ་གྲོ་མཁས་ལ་སློབ་མ་ཆེན་པོ་བཞི་ཤེས་རབ་ཟབ་ཅིང་རྒྱང་རིང་བ་ད་ལྟར་ངའི་ཆོས་ཀྱི་མཁར་ཞིག་རལ་མི་དོགས་སོ། །ལ་ལ་ཞིག་ཆོས་ཀྱི་མཁར་ལ་བསྒྲིབས་ཤིང་བགེགས་བྱེད་ན། དགྲ་ཆེན་པོ་ཡིན་ཏེ། ཆོས་ཀྱི་མཁར་བཤིག་དྲལ་ལ་ངའི་ཆོས་གསང་བརྐུས་ཏེ་མུར་འདུག་ལ་འཆད་དོ། །མི་རྟག་པར་ངའི་ཐད་དུ་འོངས་ཏེ་ང་དང་གཏམ་བྱས་ནས་དེ་ལ་ཆོས་བསྟན་ན་གཙང་ཞིང་གཅེས་པ་མ་བཤད་ན། མི་དེས་ཆོས་བསྟན་པ་བཙལ་བའི་ཕྱིར་ཁྱིམ་ནས་བྱུང་སྟེ་ཚུལ་ཁྲིམས་མནོས་པས་ན། ངས་མི་དེས་ཕྱིས་ལམ་ཐོབ་པར་རིགས་པར་ཤེས་པས་ཁྱིམ་ནས་བྱུང་བར་གནང་སྟེ་ཟླ་བ་བཞིའི་བར་དུ་སད་དོ། །དེ་ཅིའི་ཕྱིར་ཞེ་ན། ཆོས་ཀྱི་མཁར་གྱི་རིམ་གྲོ་བྱ་བའི་ཕྱིར་རོ། །གཅིག་
298b
ཏུ་ན་མ་འོངས་པའི་དུས་ཀྱི་དགྲ་སླར་མི་ལྡང་བ་བྱ་བའི་ཕྱིར་རོ། །དེ་ལྟ་བུར་ཡང་དག་པར་གཤེགས་པར་ཆོས་ཀྱི་མཁར་སྲུང་བ་མཁས་པས་གླགས་མི་རྙེད་པར་བྱས་ཏེ། དེ་ནི། སངས་རྒྱས་ཀྱིས་བསྟན་པ་མནོང་ཅིང་སྔོན་གྱི་ངན་པ་ཡོན་པོ་མཐོང་བར་བྱས་སོ། །དགེ་སློང་ཕལ་མང་པོ་རྣམས་ཀུན་དགའ་གཞའ་སྟེ་ཁྱིམ་ནས་བྱུང་བར་གནང་སྟེ། ཚུལ་ཁྲིམས་ནོད་པ་ཐོབ་ཟིན་ནས་ལྷ་དང ། མི་དང ། འཇིག་རྟེན་གྱིས་བསྐྱོད་ཅིང་བསྒྱུར་མི་ནུས་སོ། །ཤཱ་རིའི་བུ། གང་ལ་སོགས་པ་སད་དུ་རུང་བ་ཞེས་བྱས་ན། དེ་ནི། མུར་འདུག་གི་མིང་དང ། མུར་འདུག་གི་ཆོས་ལ་སྲེད་པའོ། །ཤཱ་རིའི་བུ། གང་ལ་སོགས་པ་མུར་འདུག་གི་ཆོས་ལ་སྲེད་པ་ཡིན། དེ་ནི། ཐོབ་པ་ཡོད་དུ་འཛིན་པ་དང ། བདག་ཏུ་ལྟ་བ་དང ། གང་ཟག་ཏུ་ལྟ་བ་དང ། སེམས་ཅན་དུ་ལྟ་བ་དང ། ཡོན་པོ་ལ་འདོད་ཆགས་པ་དང ། ཉིད་ཀྱི་མཚན་མ་སྟོང་པའི་ཆོས་ལ་ཐེ་ཚོམ་གྱི་སེམས་སྐྱེ་བ་དང ། ཡོན་པོ་སྒྱུ་མ་མི་བདེན་པའི་སེམས་སྒྱུ་མའི་ཆོས་རྣམ་པ་མང་པོ་མནོས་སྤྱད་དེ། མཆོག་གི་གཞུང་སྟོང་པར་འཇུག་མི་ཕོད་ཅིང་ཡོན་པོའི་ལམ་རྣམས་སྤྱོད་པ་སྟེ། མི་དེའི་མིང་མུར་འདུག་གི་ཆོས་ལ་སྲེད་པ་ཞེས་བྱའོ། །ཤཱ་རིའི་བུ། སད་དུ་མི་རུང་བ་ནི། ཁ་དོག་རྣམ་པ་མང་པོ་སྤྱོད་པ་མི་གོས་སྐྱ་བོ་ཅན་ཡང་རུང ། ཆོས་གོས་བགོས་པའང་རུང ། དེ་ལྟ་བུ་མི་བདེན་པ་ཐོབ་བོ། །ཡོད་པར་མཐོང་བ་ཀུན་གྱི་མིང་མུར་འདུག་ཅེས་བྱའོ། །
299a
༄#། །ངའི་ཆོས་ཀྱི་ནང་ནས་བྱུང་ལ་ཚུལ་ཁྲིམས་མནོས་པ་དེ་ལྟ་བུའི་མི་ནི། སད་པའི་རིགས་སོ། །ཅིའི་ཕྱིར་ཞེ་ན། ཐོབ་པ་ཡོད་པར་འཛིན་པ་ནི། ངའི་ཆོས་ཀྱི་ནང་ན་ཡོན་པོ་ལ་ལྟ་བ་ཡིན་ཏེ། དེའི་མིང་དགྲ་ཆེན་པོ་ཞེས་བྱའོ། །འཇིག་རྟེན་ཐམས་ཅད་ཀྱི་ནང་ན་ལྷ་དང ། མིའི་དགྲའོ། །དེའི་མིང་འཇིག་རྟེན་ཐམས་ཅད་ཀྱི་དགྲ་སྡང་བ་སྟེ། སངས་རྒྱས་རྣམས་ཀྱི་དགྲ་ཆེན་པོའོ། །ཤཱ་རིའི་བུ། ཡོན་པོ་ལྟ་བུའི་མི་དེ་ངས་ཀྱང་ཁྱིམ་ནས་བྱུང་ཞིང་ཚུལ་ཁྲིམས་ནོད་དུ་མ་གནང་ངོ ། །ཤཱ་རིའི་བུ། ཆོས་སོ་ཅོག་ཐམས་ཅད་ལ་བདག་ཏུ་ལྟ་བ་མེད་དོ། །མི་ལ་ལ་ཞིག་གིས་དེ་ལ་བཟོད་པ་སྐྱེ་བ་དང ། ཆོས་སོ་ཅོག་སྟོང་པ་དང ། བདག་ཏུ་ལྟ་བ་མེད། གང་ཟག་ཏུ་ལྟ་བ་མེད། སེམས་ཅན་མེད། ཚེ་སྲོག་མེད་པར་མི་ནུས་ཤིང་ཡིད་ཆེས་ཤིང་ཤེས་པར་མ་ནུས་པའི་ཆོས་ཀྱི་ནང་དུ་ཡོན་ལེན་ན། མིང་མི་གཙང་བ་ཞེས་བྱ་སྟེ། མི་དེས་སངས་རྒྱས་ལ་ཡོན་མི་འབུལ། ཆོས་ལ་ཡོན་མི་འབུལ། དགེ་འདུན་ལ་ཡོན་མི་འབུལ་བར་ནན་གྱིས་ངའི་ཆོས་སུ་ཞུགས་ཏེ་ལུས་ནི། དགེ་སྦྱོང་ཡིན་ལ། སེམས་ནི། མུར་འདུག་ཡིན་ཏེ། ཆོས་རྐུ་བའི་མི་ཞེས་བྱའོ། །ཤཱ་རིའི་བུ། མ་འོངས་པའི་དུས་ན་དགེ་སྦྱོང་ཞིག་ཡོད་པ་ལུས་མི་འཆོས། ཚུལ་ཁྲིམས་མི་སྤྱོད། སེམས་མི་འཆོས། ཤེས་རབ་མི་སྤྱོད་དེ། ཡང་དག་པར་གཤེགས་པས་བཤད་དོ་ཅོག་
299b
དང ། ཡང་དག་པར་གཤེགས་པས་སྤྱད་དོ་ཅོག་ལའང་བྲུན་ཏོ། །བརྙས་སོ། །ཡང་དག་པར་གཤེགས་པས་ནི། རྟག་པར་མཆོག་གི་གཞུང་གི་སྟོང་པ་ལ་རི་མོ་གུས་ཤིང་ཡོན་གསོལ་ཏེ་རྟག་པར་སྤྱོད་པ་ལ་སྲེད་ན། དགེ་སློང་དེ་རྣམས་ཀྱིས་ཡང་དག་པར་གཤེགས་པས་ཡང་དག་པའི་དབྱིངས་མཐའ་ཡུན་དུ་སྟོང་པའི་ཆོས་སྤྱོད་པ་ལའང་ཞིང་བྲུན་ཏོ། །ཤཱ་རིའི་བུ། དེའི་ཚེ་དགེ་སློང་ལ་ལ་ཉོན་མོངས་པའི་ལས་སྤྱོད་པ་ཡོད་ནའང་ཀུན་གྱིས་བརྙས་ཏེ་བྲུན་ཏོ། །ད་ངའི་སློབ་མ་སྟོང་པ་སྤྱོད་པ་ཡོད་ན། ངས་དགའོ། །ཞེས་བསྟོད་དེ། སེམས་བདེ་བར་བབ་པ། དེའི་ཚེ་མི་དེས་སྟོང་པ་སྤྱོད་པ་ལའང་བརྙས་ཏེ། མི་སྲ་མི་མཁྲངས་འབའ་ཞིག་གིས་དོན་ཚོལ་ལོ། །བདག་ཏུ་ལྟ་བ་ཡོད་པ་དང ། ཆོས་སོ་ཅོག་ཡོད་པ་སྤྱད། དེ་ལྟ་བུ་ལ་སོགས་པའི་དོན་གྱིས་ཕལ་གྱི་སེམས་དགའ་བར་བྱས་སོ། །ལ་ལ་ཞིག་གིས་ཆོས་སོ་ཅོག་སྟོང་པར་བཤད་ན། མི་དེ་ལའང་བརྙས་སོ། །ཅིའི་ཕྱིར་ཞེ་ན། ཤཱ་རིའི་བུ། ཆོས་ནི། དེ་བཞིན་པའི་རིགས་ཏེ། སེམས་ཀྱི་དགེ་བའི་རྩ་བ་ཆད་དུ་བྱེད་ན། ཕྱི་མོ་གཟུགས་མངོན་པར་བྱུང་ངོ ། །ཡང་དག་པའི་བདེན་པ་དམ་པའི་ཆོས་འཇིག་རྟེན་ན་འདུག་ན་གནོད་པ་མེད་དེ། དཔེར་མི་གཏི་མུག་དེས་སྤོས་ཙནྡན་དང ། ཤིང་ངན་པ་གཉིས་འདྲ་བར་འཛིན་པ་དང་མཚུངས་སོ། །ཤཱ་རིའི་བུ། སངས་རྒྱས་བསོད་སྐྱབས་ཀྱིས་བཤད་པ། མ་འོངས་པའི་དུས་ན་སངས་རྒྱས་ཤཱཀྱ་ཐུབ་
300a
༄#། །པའི་སློབ་མ་རྣམས་ཀྱིས་གསོ་བའི་ཁེའི་ཕྱིར་གོས་སྐྱ་བོ་ཅན་རྣམས་ལ་མཆོག་གི་གཞུང་སྟོང་པ་བཤད་ན། དེའི་ཚེ་ཁྱིམ་ན་འདུག་པ་དང ། ཁྱིམ་ནས་བྱུང་བ་གཏི་མུག་མང་པོས་མ་མནོས་སོ། །ལོག་གལ་ནས་ཡིད་མི་ཆེས་ཤིང་སླར་འཕྱ་སྐུར་ནས་བསོད་ནམས་ཆེན་པོ་སྟོར་ཏོ། །རྒྱུ་རྐྱེན་འདི་ལྟ་བུ་སྤྱད་པས་ན། མཐར་ལམ་ངན་པར་ལྟུང་ངོ ། །ཤཱ་རིའི་བུ། དེའི་ཚེ་འགལ་བ་མང་པོ་ཡོད་དོ། །རྩོད་པ་འཆང ། བདག་ཏུ་ལྟ་བ་འཆང ། གང་ཟག་འཆང ། སེམས་ཅན་འཆང ། ཚེར་འཛིན་པ་འཆང ། སྲོག་ཏུ་འཛིན་པ་འཆང་ངོ ། །དགེ་བའི་ཆོས་ཉུང་དུ་བྱེད་པས་གསོ་བའི་ཁེ་འབའ་ཞིག་ལ་སྲེད་དེ། བདེན་པར་གཏི་མུག་ཡིན་ན། རང་ན་རེ། ཤེས་རབ་ཡོད་ཅེས་ཟེར་རོ། །གཅིག་ལ་གཅིག་ལོག་གལ་ཏེ་རྟག་པར་འཐབ་རྩོད་ཅིང་དོན་ཡོད་པ་ལ་གཅོད་པ་སྲེད་དེ། འཁོན་དང ། ཕྲག་དོག་གི་སེམས་སྐྱེས་ནས་མི་དེས་དགེ་སྦྱོང་གི་སེམས་བཏང་སྟེ་གསོ་བའི་ཁེ་འབའ་ཞིག་ཚོལ་ལོ། །འཚོ་ནམ་གྱི་དོན་མང་པོ་ལ་སྲེད་དེ་སྦྱར་བ་གཅིག་པུ་མ་ཡིན་ནོ། །རྟག་པར་མི་གཞན་གྱི་གཡོ་མཚང་ཚོལ་བ་ལ་སྲེད་དེ། རང་གི་ཉེས་པ་སྦས་ནས་ལེགས་པའི་དོན་བརྗོད་ཅིང་བཤད་དོ། །ད་ལྟར་གྱི་དགེ་སློང་ནི། ལེགས་པའི་དོན་སྦས་བཅབས་ཏེ་རང་གི་ཉེས་པ་ངན་པ་ཕྱུང་ངོ ། །དེ་ཙམ་གྱི་ཚེ་ཀུན་གྱིས་ཚུལ་ཁྲིམས་ལྕི་བས་
300b
བསྲུང་ཞིང་གཟུང་མི་ནུས་ཏེ། ཁོང་དུ་ཆུད་པ་མེད་དོ། །གཞུང་གི་བསོད་ནམས་བཤིག་སྟེ་ཆོས་སོ་ཅོག་མི་འགྱུར་ཞིང་ཉིད་ཀྱི་མཚན་སྟོང་པ་ལ་ཇི་ལྟ་བུར་བྱ་ནུས་ཞེས་འཛེར་ཏོ། །རྩེད་མོ་བྱེད་པའི་མི་འདའ་རས་པ་བསྒྱུར་ཞིང་བསྟན་པ་མང་པོ་བྱས་ན་ཅིའང་ཤེས་པ་མེད་པར་མཐོང་ན། ཤིན་ཏུ་བགད་དོ། །ཅིའི་ཕྱིར་ཞེ་ན། རྩེད་མོའི་ཆོས་མི་ཤེས་པས་འཐབ་སྟེ་ངོ་མཆར་སྙམ་སྟེ། ཡོད་དཀོན་པའི་སེམས་སྐྱེས་ནས་དངངས་དོགས་ཏེ་ཆེར་བགད་དོ། །དེ་ལྟ་སྟེ་ཤཱ་རིའི་བུ། དེའི་ཚེ་ཡང་དག་པའི་བདེན་པའི་དགེ་སློང་གིས་སྟོང་པ་ཞི་བའི་ཆོས་འཆད་ན། སྲོག་གསོ་བའི་ཁེ་ཚོལ་བ་ཀུན་གྱིས་ཁྲེལ་ཏེ་བགད་དོ། །ཅིའི་ཕྱིར་ཞེ་ན། མི་དེས་སངས་རྒྱས་ཀྱི་ཆོས་ཀྱི་གཞུང་མ་རིག་པས་སྟོང་པའི་ཆོས་བཤད་པ་ཐོས་ནས་དངངས་དོགས་ཤིང་འཇིགས་སྐྲག་གོ། །ཤཱ་རིའི་བུ། ཁྱོད་ཀྱིས་མི་འདི་ལ་ལྟོས་དང ། བདེ་སྐྱིད་བའི་གནས་ལ་རྒུད་པའི་མྱ་ངན་སྐྱེས་སོ། །རྒུད་པའི་མྱ་ངན་གྱི་གནས་ལ་ནི། བདེ་སྐྱིད་པའི་སེམས་སྐྱེས་ཏེ། མི་དེ་ཕྱིར་ཅི་ལོག་པས་དགེ་བའི་ཆོས་ནི། ལོག་པར་སྤྱད། ངན་པའི་ཆོས་ནི། མ་ལོག་པར་སྤྱད་དོ། །ཤཱ་རིའི་བུ། མི་གཏི་མུག་ལ་སེར་སྣ་དང ། འདོད་ཆགས་དང ། ཞེ་སྡང་དང ། གཏི་མུག་མང་དུ་སྲེལ་ཏེ། ཆོ་ག་ཚང་ནས་མི་དགེ་བ་གསུམ་གྱི་རྩ་བ་སྤྱད་དོ། །ཤཱ་རིའི་བུ། ངས་ཚུལ་ཁྲིམས་འཛིན་པའི་དགེ་སློང་ལ་ཕན་བསོད་པར་བྱ་བའི་ཕྱིར་ཚུལ་ཁྲིམས་ཉིས་བརྒྱ་ལྔ་བཅུའི་
301a
༄#། །ཆོས་ཡིག་བཤད་དོ། །དེ་ལྟ་བུའི་མི་གཏི་མུག་གིས་འཇིག་རྟེན་གྱི་རྒྱུ་རྐྱེན་ཆུང་དུ་སྤྱད་དེ། ཁྱིམ་ན་འདུག་པ་ལ་བཤད་དེ་ཡི་གེར་ཡང་བྲིས་ནས་གོས་སྐྱ་བོ་ཅན་ལའང་བསྟན་ཏོ། །ཤཱ་རིའི་བུ། དེ་ལྟ་བུའི་མི་གཏི་མུག་གིས་བཤད་པ་ཆོས་སོ་ཅོག་སྟོང་པ་དང ། རང་གི་མཚན་མ་བྱ་ག་ལ་ནུས་ཞེས་འཛེར་ཏོ། །ཅིའི་ཕྱིར་ཞེ་ན། དེ་ལྟ་བུའི་མི་གཏི་མུག་གིས་འཇུག་པ་དང ། བརྐམ་པ་དང ། མྱ་ངན་འཁྲུག་པའང་བསལ་མི་ནུས་ན། མ་རིག་པའོ་ཅོག་ཆོག་མ་ནུས་པ་ལྟ་སྨོས་ཀྱང་ཅི་དགོས། ཤཱ་རིའི་བུ། དེའི་ཚེ་ཚུལ་ཁྲིམས་ལུགས་འཛིན་པའི་དགེ་སློང་དགེ་བ་སློབ་མི་ནུས་སོ། །ཆོས་སོ་ཅོག་སྟོང་པར་ཡང་ལེགས་པར་མི་སློབ་བོ། །མདོ་སྡེ་ཁ་དོན་དང་ལེགས་པར་མི་སློབ་བོ། །ཤཱ་རིའི་བུ། ཚུལ་ཁྲིམས་ལུགས་འཛིན་པའི་དགེ་སློང་གིས་ལེགས་པར་སློབ་མི་ནུས་ཞེས་བྱ། ཡང་དག་གཤེགས་པས་ཆོས་ཡི་གེ་ནང་ན་བསླབ་བཤད་པ་གསུམ་ཡོད་དོ། །དགེ་བའི་ཚུལ་ཁྲིམས་བསླབ། དགེ་བའི་སེམས་བསླབ། དགེ་བའི་ཤེས་རབ་བསླབ་སྟེ། མི་དེས་བསླབ་པ་གསུམ་ལ་དགེ་བའི་བསླབ་མ་ནུས་ཏེ། མང་པོ་ཐོས་པ་རྒྱུ་རྐྱེན་འབའ་ཞིག་སྤྱད་ནས་མི་གཞན་ལའང་བརྙས་ཏེ། མི་དེ་ནི། དགེ་བའི་ཆོས་སྒྲིབ་ཅིང་གཅོད་པ་ཡིན་ཏེ། དེ་ལྟ་བུའི་མི་གཏི་མུག་གིས་ཆོས་བཞིན་དུ་ལན་གློན་ཞིང་འདྲི་བར་ཡང་ནུས་ན། མཐའ་ཡུན་དུ་ཅིའང་མེད་
301b
པ་ལ་བརྩོན་འགྲུས་སྤྱོད་མི་ནུས་པ་ལྟ་སྨོས་ཀྱང་ཅི་དགོས། ཤཱ་རིའི་བུ། དེ་ཙམ་གྱི་ཚེ་ཚུལ་ཁྲིམས་ཞིག་པའི་དགེ་སློང་ནི། གོས་སྐྱ་བོ་ཅན་གྱི་གཡོག་བྱེད་ཅིང ། ཕོ་ཉར་མངགས་ཤིང་གདུལ་བ་དང ། སྨན་གྱི་ཆོས་ཀྱི་སང་བདག་རང་གསོ་བར་བྱེད་དོ། །ཤཱ་རིའི་བུ། ད་ཁྱོད་ལྟོས་ཤིག་དང ། མི་ངན་པ་དེས་ངའི་ཆོས་ལས་ཁྱིམ་ནས་བྱུང་ནས་ཚུལ་ཁྲིམས་མནོས་ནས་ཡོན་ནོད་པ་ཐོབ་ནས་སླར་ང་ལ་དགྲར་འཛིན་ཏོ། །ཤཱ་རིའི་བུ། དེའི་ཚེ་གནམ་ངོས་བཞིའི་ལྷའི་རྒྱལ་པོ་དང ། དབང་པོ་དང ། ཚངས་པའི་རྒྱལ་པོ་ཆེན་པོ་དང ། བརྒྱ་སྟོང་ཁྲི་འབུམ་གྱི་ལྷ་གཞན་ཀུན་ཀྱང་ངའི་ཆོས་ཀྱི་ནང་ན་དེ་ལྟ་བུ་ཞིག་ཉམས་པ་མཐོང་ནས་ཀུན་ཤིན་ཏུ་མྱ་ངན་བྱེད་ཅིང་མི་དགའ་སྟེ། དུས་ནས་མཆི་མ་བབ་བོ། །ཤཱ་རིའི་བུ། དེ་བདེན་པར་ན་ང་ལ་རྟེན་ཅིང་གོས་སྐྱ་བོ་ཅན་གྱི་མཚན་མ་སྦྱར་ཞིང་བྱེད་པའི་མི་རིགས་སོ། །ཅིའི་ཕྱིར་ཞེ་ན། སངས་རྒྱས་ཤཱཀྱ་ཐུབ་པའི་སློབ་མ་རྣམས་དང ། ལྷ་དང ། ཀླུ་དང ། ལྷ་མ་ཡིན་གྱིས་བཀོལ་ཞིང་བདག་པོའང་བྱ་བ་རིགས་ན། ཀླུ་དང ། ལྷ་མ་ཡིན་གྱིས་ངའི་སློབ་མ་ལ་བཀོལ་ཞིང་བདག་པོ་མ་བྱས་ན། དེ་ལྟ་བུའི་མི་གཏི་མུག་གོས་སྐྱ་བོ་ཅན་ལ་ཉེ་བསྙེན་པས་ཆོས་སོ་ཅོག་གི་གཞུང་སྟོང་པ་བཤད་སྤྱངས་ཏེ་ཁོང་དུ་ཆུད་པར་ནུས་ཞེས་ཟེར་ན། བདེན་པ་ཡོང་མེད་དོ། །ཤཱ་རིའི་བུ། དེའི་ཚེ་ཚུལ་ཁྲིམས་ཞིག་པའི་དགེ་སློང་གིས་ཆང་ཕོར་བུ་གང་ཞིག་ཐོབ་ནའང་གོས་སྐྱ་བོ་རྣམས་
302a
༄#། །ལ་སངས་རྒྱས་ཀྱིས་དྲངས་བཤད་དོ། །ཁྱོད་ཀྱི་ཡིད་ལ་ཇི་སྙམ། །འདོད་ཆགས་དང ། ཞེ་སྡང་དང ། གཏི་མུག་མང་པོ་དང ། ཆོས་ཡིག་ཀློག་པ་ལ་སྲེད་པ་མང་བ་དང ། ཐ་མལ་པའི་ཡི་གེའི་ཁེ་ལ་བརྐམ་ཞིང་སྤྱོད་པ་མི་གཙང་མི་གདང་བའི་མི་དེ་ལྟ་བུའི་མིས་ཅིའང་མེད་པ་ཡུན་དུ་སྟོང་པའི་ཆོས་ཡིད་ཆེས་པར་ནུས་ཤིང་།དགེ་སྦྱོང་གི་འབྲས་བུ་ཆོ་ག་ཚང་བ་ཐོབ་པར་ནུས་སམ་མི་ནུས། བཅོམ་ལྡན་འདས། མི་ནུས་ལགས་སོ། །ཤཱ་རིའི་བུ། དགེ་སློང་ལ་ལ་ཞིག་གིས་གོས་དང ། ཁ་ཟས་དང ། མལ་ཆ་དང ། རྩི་སྨན་ཐོབ་པ་ལ་ཕྱོགས་ན། ཚུལ་ཁྲིམས་འཛིན་པ་གཙང་གདང་སྟེ། མང་པོ་འཛིན་པ་དང ། ཅལ་ཅོལ་གྱི་ཚིག་ལ་མི་སྲེད། ཕྱི་ལོགས་ཀྱི་གཞུང་ལ་མ་ཆགས་ཏེ། ཉིན་མཚན་དུ་བརྩོན་འགྲུས་པ་ནི། མགོ་ཚིག་པའི་ར་མདའ་བྱེད་པ་བཞིན་ཏེ། སེམས་གཅིག་ཏུ་དྲང་པོའི་འཕྲུལ་གྱི་ལམ་བརྒྱད་འགྲུས་པར་སྤྱད་ན། མི་དེས་འོན་ཀྱང་སྟོང་པའི་ཆོས་ཅིའང་ཐོབ་པ་མེད་པའི་ཁོང་དུ་ཆུད་པར་དཀའ་ན། དེ་ལྟ་བུའི་མི་གཏི་མུག་ཟབ་མོ་འདོད་པ་མང་བ། ཡིད་ཆེས་ཤིང་ཤེས་པ་མེད་པ་ལྟ་སྨོས་ཀྱང་ཅི་དགོས། ཤཱ་རིའི་བུ། ལྟོས་ཤིག་དང ། མི་དེ་ཡང་དག་པར་གཤེགས་པའི་བླ་ན་མེད་པའི་གཞུང་མ་ཤེས་པས་ན། ངའི་དྲང་པོའི་ཆོས་བཤིག་སྟེ་བདག་རང་གི་ལུས་དང ། མི་གཞན་གྱི་རྒུད་པའི་མྱ་ངན་ཆེན་པོ་བྱས་སོ། །
302b
དེ་ལྟ་བུའི་དགྲ་ཆེན་པོ་ནི། འཇིག་རྟེན་གྱི་དགྲ་ཆེན་པོ་ཡིན་ཏེ། ཆོས་ཀྱི་ཡི་གེ་འདིའི་ནང་ནའང་ཡོང་བྲལ་བའི་རིགས་ཞེས་བཤད་དོ། །དེ་ལྟ་བུའི་མིས་ནི། སངས་རྒྱས་ཀྱི་དྲིན་ཀྱང་མི་ཤེས་ཏེ་རང་གི་བསམ་པ་བདག་ལ་སོགས་པ་ཁྱིམ་ནས་བྱུང་སྟེ། ཆོས་འདིའི་ནང་ན་སྤྱད་པའི་མི་རིགས་པ་རྣམས་ནི། སྤྱད་པ་མི་རིགས་སོ། །དེ་ལྟ་བས་ན། ཤཱ་རིའི་བུ། ཡང་དག་པར་གཤེགས་པས་མ་འོངས་པའི་དུས་ལ་ཇི་ལྟ་བུ་ངན་པ་གཅད་པའི་ཕྱིར་ཆོས་འདི་ལྟ་བུ་བཤད་དོ། །དགེ་སློང་ལ་ལ་ཞིག་ཚུལ་ཁྲིམས་མནོས་སོ་ཅོག་ཞིག་ཅིང ། ཆོས་བཤིག་དྲལ་ལ་དྲང་པོའི་མཐོང་བ་བཤིག་པ་ཞིག་གིས་ཆོས་ཡིག་འདི་ཐོས་ན། འཇིགས་སྐྲག་སྟེ་ཚུལ་ཁྲིམས་སླར་ཟློག་གོ། །ཅིའི་ཕྱིར་ཞེ་ན། ཚུལ་ཁྲིམས་ཞིག་པའི་མི་ནི། སེ་གོལ་གཅིག་གཏོགས་པ་ཙམ་གྱི་བར་དུ་འཕགས་པའི་མི་གཟུགས་དང ། ཆོས་གོས་ཅན་འདུག་པའི་ནང་ན་འདུག་པ་མི་རིགས། ལ་ལ་ཞིག་གིས་ཆོས་ཡིག་འདི་ཐོས་ཏེ་སེམས་དགའ་གཞའ་ན། མི་དེའི་མིང་སངས་རྒྱས་རྣམས་ཡོན་གསོལ། སངས་རྒྱས་ཀྱི་ལམ་སྲུང་ཞིང་རིམ་གྲོ་བྱེད་པ་ཞེས་བྱ་བ་ཅིའི་ཕྱིར་ཞེ་ན། ཤཱ་རིའི་བུ། དེའི་མིང་སངས་རྒྱས་ལམ་ཡང་དག་པའི་དབྱིངས་ཞེས་བྱའོ། ། ཕོ་དགེ་བ། མོ་དགེ་བ་ལ་ལ་ཞིག་དགེ་སྦྱོང་གི་ཆོས་ཐོས་པར་འདོད་ན། ཆོས་ཡིག་འདི་ཉོན་ཅིག་དང ། བརྒྱ་སྟོང་ཁྲི་འབུམ་གྱི་དཔག་ཚད་འདས་པ་རིགས་སོ། །ཅིའི་ཕྱིར་ཞེ་ན། ཡང་དག་
303a
༄#། །པར་གཤེགས་པ་སངས་རྒྱས་རྣམས་ཡུན་རིང་པོ་ཞིག་ལོན་ན། གདོད་འཇིག་རྟེན་དུ་འབྱུང་ངོ ། འཇིག་རྟེན་དུ་བྱུང་མོད་ཀྱི་བར་བར་དུ་ཟད་དོ། །ལེའུ་དགུ་སྟེ།་དོགས་པ་བྱེ་བྲག་ཕྱེད་པའི་ལེའུའོ།། །།སངས་རྒྱས་ཀྱིས་ཤཱ་རིའི་བུ་ལ་བཀའ་སྩལ་པ། མི་རྣམ་གསུམ་ཞིག་ཡོད་པས་ཆོས་ཡིག་བཤད་པ་འདི་ཐོས་ན། སེམས་ལ་མི་དགའ་མི་དད་དོ། །གསུམ་གང་ལ་སོགས་པ་ཞེས་བྱས་ན། གཅིག་ནི། ཚུལ་ཁྲིམས་ཞིག་པའི་དགེ་སློང་ངོ ། །གཉིས་ནི། དགེ་སློང་ཡར་སྐྱེ་བའི་མིའོ། །གསུམ་ནི། ཆོས་འཆད་པ་མི་གཙང་བ་དང ། བདག་ཏུ་ལྟ་བ་འདོད་ཆགས་ཏེ། མི་དེས་འདི་ལྟ་བུ་བདེན་པའི་མཚན་མ་ཟབ་མོ་ཆོས་ཡིག་བཞིན་དུ་མི་འགལ་བ་ཡོང་སྤངས་ནས་དམུས་ལོང་གི་སྡེ་དང ། གྲོགས་ཀྱི་ཚང་བར་གང་རྒྱས་སོ། །དེ་ལྟ་བས་ན། ཤཱ་རིའི་བུ། ངའི་ཆོས་ཡིག་འདི་བསླབ་སྟེ་ཁྱོད་ལ་གཏམས་བཅོལ་ཏོ། །ཅིའི་ཕྱིར་ནས་ཞེས་བྱས་ན། ཆོས་ཀྱི་ཡི་གེ་འདི་ཡང་དག་པར་གཤེགས་པའི་ཕྱི་ན་གཙང་གདང་བར་ཚུལ་ཁྲིམས་འཛིན་པའི་དགེ་སློང་སེམས་ལ་འདི་ལྟ་བུ་ཆོས་ཡིག་ཟབ་མོ་ལ་དགའ་ཞིང་དད་པ་སྐྱེ་བར་ནུས་པ་ཚུལ་ཁྲིམས་གཙང་གདང་བས་རྟག་པར་བསྡུ་ཞིང་འཛིན་པར་བྱའོ། །ཚུལ་ཁྲིམས་ཞིག་པ་ནི། རྟག་པར་བསྲིངས་སྤངས་སོ། །ཅིའི་ཕྱིར་ཞེ་ན། གཏི་མུག་གིས་ཡང་དག་པའི་བདེན་པའི་དྲང་པོའི་
303b
ཚིག་བཤད་པ་ཐོས་ན། སྡུག་བསྔལ་ཡིན་པར་འཛིན་ཏོ། །ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་གིས་བྱད་གཟུགས་ཅིར་གྲུབ་པ་ཡང་དག་པར་གཤེགས་པས་ཞིབ་ཏུ་རྒྱ་ཆེར་བཤད་ཟིན་ཏོ། །ཤཱ་རིའི་བུ། ཚུལ་ཁྲིམས་བཤིག་པའི་དགེ་སློང་ནི། ཆོས་ཀྱི་ཚུལ་ཁྲིམས་འཛིན་པའི་ཆོ་ག་ལ་མ་དད་དོ། །གཏི་མུག་གི་མི་ནི། ཤེས་རབ་ལ་མི་དགའོ། །སེར་སྣ་ཅན་གྱི་ནི། སྦྱིན་པ་བཤད་པ་ལ་ཐོས་པར་མི་དགའོ། །ལེ་ལོ་ཡར་སྐྱེ་བ་ནི། དྲེགས་ཤིང་ལེ་ལོ་མེད་པའི་ཆོས་འདི་ཐོས་སུ་མི་དགའ་སྟེ། ཐོས་སུ་ཟིན་ནའང་དང་ངས་སྐྲག་པ་ནི། ཁུང་ཟབ་མོར་ལྷུང་བ་དང་མཚུངས་སོ། །འཇིག་རྟེན་གྱི་ཁེ་ལ་སྲེད་པ་ནི། ཞིམ་པའི་རོ་ལ་འདོད་ཆགས་སོ། །ཟས་ལ་ཞེ་བསྐྲད་པ་ཐོས་ན། སེམས་ལ་མྱ་ངན་འཁྲུག་གོ་།མི་ལ་ལ་ཞིག་ཐ་མལ་པའི་ཡི་གེ་ཀློག་པ་ལ་སྲེད་ན། དེ་ལས་ན། ཐུབ་ཅིང་བདེན་དུ་ཟིན་པའི་འདུ་ཤེས་སྐྱེའོ། །ཚིག་ལ་འདོད་ཆགས་པ་ནི། ཅལ་ཅོལ་འཆད་པ་ལ་སྲེད་པའོ། །རང་གི་གཟོའི་ཚིག་གི་སྙམ་དངགས་འཆང་བ་ལ་སྲེད་པ་ནི། སངས་རྒྱས་མཆོག་གི་གཞུང་ལ་གཙང་མའི་སེམས་མེད་པའི་སྟེང་དུ་ཆོས་འདི་ལ་ཡིད་མི་ཆེས་མི་གུས་སོ། །ཤཱ་རིའི་བུ། དཔེར་མི་མ་ནིང་དང་མཚུངས་སོ། །སྐྱེས་པའི་སྤྱད་པ་མེད་ན། སྐྱེས་པའི་ནང་དུ་ཕྱིན་པ་དང་མི་ནི་ང་གི་འདུ་ཤེས་སྐྱེད་དེ། སེམས་འདི་སྙམ་དུ་བྱེད་དོ། །མི་འདི་གཞན་ལ་སོགས་པའང་བདག་དང་མི་མཚུངས་པ་མེད་སྙམ་
304a
༄#། །བྱེད་དོ། །དེ་ལྟ་སྟེ་ཐ་མལ་པའི་ཡི་གེ་ལ་སྲེད་ཆགས་པ་ནི། རྟག་པར་ཚིག་རང་བཟོ་བའི་སྙན་དངགས་པ་བརྒྱན་པ་ལ་སྲེད་དེ། སངས་རྒྱས་ཀྱི་མཆོག་གི་གཞུང་ལ་སེམས་ཀྱིས་རི་མོ་མི་ནུས་སོ། །ཤཱ་རིའི་བུ། དེའི་ནང་མི་ལ་ལ་གཙང་གདང་བའི་ཆོས་ཡིག་འཆང་བ་ཡོད་ན། མི་དེ་ལའང་རི་མོ་མི་གུས་ཏེ། གཙང་གདང་བའི་ཚུལ་ཁྲིམས་འཛིན་པའི་དགེ་སློང་ལའང་ཡང་ཞིང་བཏུས་ཏེ། ཅིའི་ཕྱིར་ཞེ་ན། ཤཱ་རིའི་བུ། མུར་འདུག་གི་ཆོས་ཡི་གེ་ལ་ནི། ཡང་དག་པའི་ཚིག་བདེན་པ་མེད་དེ། ཆོས་ཀྱིས་དྲེགས་ཤིང་ལེ་ལོ་དང་མཐོང་ཞིང་རང་ཆེ་འདོད་པའི་རིགས་སོ། །ཅིའི་ཕྱིར་ཞེ་ན། དོན་དེ་ནི། སྐྱོ་བྲལ་བ་མིའི་ཕྱིར་མ་ཡིན། སྟོང་པ་ཞི་བའི་མིའི་ཕྱིར་མ་ཡིན། མྱ་ངན་ལས་འདས་པ་མིའི་ཕྱིར་མ་ཡིན་ཏེ། མི་དེས་ཡིད་ཆེས་པ་ལ་སོགས་པ་རྩ་བ་བཞི་ཉམས་པས་ན། གནས་སོ་ཅོག་ལེགས་པའི་དོན་ཡོད་པར་ཡིད་མི་ཆེས་པ་ནི། མ་ནིང་དང་མཚུངས་ཏེ། མི་གཞན་ཀུན་ལ་བདག་དང་མཚུངས་ཞེས་ཟེར་རོ། །ཤཱ་རིའི་བུ། དམུས་ལོང་གིས་ཁ་དོག་རྣམས་མི་མཐོང་བ་དང་མཚུངས་སོ། །དེ་ནི། ནག་པོའི་ཁ་དོག་དཀར་པོའི་ཁ་དོག་སྟེ། དཀར་ནག་གི་ཁ་དོག་མཐོང་བ་མ་མཐོང་ངོ ། །བཟང་པོའི་ཁ་དོག་མ་མཐོང་ངོ ། །མི་སྡུག་པའི་ཁ་དོག་མི་མཐོང ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། ལེ་བརྒན་རྨ་མཐོང་གའི་ཁ་དོག་མི་མཐོང །
304b
རིང་ཐུང་སྦོམ་ཕྲ་ལ་སོགས་པའི་གཟུགས་མི་མཐོང ། སྐར་མ་ཉི་ཟླ་མ་མཐོང་སྟེ། ཉི་ཟླ་དང་སྐར་མ་མཐོང་བ་དེ་ལྟ་བུའི་མི་ལོང་བས་ཐལ་བྱུང་སེམས་འདི་སྙམ་བྱས་སོ། །དཀར་ནག་གི་ཁ་དོག་མེད། དཀར་ནག་གི་ཁ་དོག་མཐོང་བ་མེད། བཟང་པོ་དང་མི་སྡུག་པའི་ཁ་དོག་བྱས་པ་མེད། སྔོན་པོ་དང ། སེར་པོ་དང ། དམར་པོ་དང ། མཐོང་ག་དང ། རིང་ཐུང་དང ། ཕྲ་སྦོམ་དང ། ཟབ་མི་ཟབ་དང ། ཉི་ཟླ་དང ། སྐར་མའི་ཁ་དོག་མེད། ཉི་ཟླ་སྐར་མ་མཐོང་བ་མེད་པས་ན། གཞན་ཀུན་ཀྱང་བདག་དང་མཚུངས་སྙམ་དུ་འཛིན་ཏོ། །མི་དམུས་ལོང་གི་སེམས་ཕྱིན་ཅི་ལོག་པས་གནས་སོ་ཅོག་ཐམས་ཅད་ཀུན་ལ་མུན་ནག་ཆེ་ཟེར་རོ། །ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་ལེ་ལོ་ཡར་སྐྱེ་བའི་མུར་འདུག་གི་བཤད་པར་ལྟུང་ངོ ། །དགེ་སློང་ཡང་དེ་དང་མཚུངས་ཏེ། སངས་རྒྱས་ཀྱི་ཟབ་མོ་ཆོས་ལ་ཡིད་མ་ཆེས་མ་དད་དེ། ཁོང་དུ་ཆུད་པར་མ་ནུས་སོ། །ཆོས་སོ་ཅོག་སྟོང་ཞིང་ཅིའང་མེད་པ་ཐོས་ན། ཡིད་མི་ཆེས་མ་དད་དོ། ། ཁོང་དུ་ཆུད་པར་མ་ནུས་སོ། །ཤཱ་རིའི་བུ། མི་གཞན་བཞིན་དུ་ཁྱོད་ལ་སོགས་པའང་ཡོན་པོའི་དབྱིངས་སུ་ལྟུང་ཞིང་དྲང་པོའི་ཆོས་མི་ཐོབ་ཀྱིས་དོགས་སོ། །དྲང་པོའི་ཆོས་འདི་སྤྱོད་པ་ནི། མིང་ཡང་དག་པའི་བདེན་པའི་དགེ་སྦྱོང་ཞེས་བྱའོ། །ཁྱོད་ཀྱིས་ཐོབ་བོ་ཅོག་ལ་མི་དེས་ཡིད་མི་ཆེས་པ་དཔེར་མི་དམུས་ལོང་ན་རེ། དཀར་ནག་ལ་སོགས་པའི་ཁ་དོག་མེད་ཅེས་པ་དང་
305a
༄#། །མཚུངས་སོ། །ཤཱ་རིའི་བུ། མི་དེས་དེ་ལྟ་བུའི་ཡོན་པོའི་དབྱིངས་སུ་ཞུགས་ཏེ་མུར་འདུག་གི་བཤད་པ་བཙལ་ནས་མང་པོའི་འཇིགས་པའི་ཚིག་ལ་སྲེད་དེ། མྱ་ངན་འཁྲུག་པའི་རང་བཞིན་ངན་པ་དང ། ཆོས་ངན་པ་སྐྱེས་ཤིང་འཕེལ་ཏོ། །མི་དེས་ཆོས་སོ་ཅོག་སྟོང་ཡང་ཡིད་ཆེས་པར་མི་འགྱུར་ན། ཁོང་དུ་མི་ཆུད་པ་ལྟ་སྨོས་ཀྱང་ཅི་དགོས། ཤཱ་རིའི་བུ། ཁྱོད་ཀྱི་ཡིད་ལ་ཇི་སྙམ། །ཝ་ས་སེངྒེ་ལྟར་བྱས་ནས་བསྒྲགས་ཟིན་ཏམ། ད་སྒྲོག་གམ། ཕྱིས་བསྒྲག་།སེངྒེའི་འགྲོས་བྱས་ན་ད་འགྲོ་བ་དང ། ཕིས་འགྲོ་བ་དང ། འགྲོས་ཟིན་པ་ནུས་སམ་མི་ནུས། །བཅོམ་ལྡན་འདས། མི་ནུས་ལགས་སོ། །ཅིའི་ཕྱིར་ཞེས་བགྱིས་ན། ཝའི་ཁ་དོག་དང ། སྟོབས་དང ། སྒྲ་སྐད་སེངྒེ་ཙམ་མི་ཕོད་དོ། །ཝས་ནི། ཝའི་སྒྲ་འབའ་ཞིག་བགྱི་ནུས་སོ། །སྒྲ་ཞིག་བགྱིར་བཏབ་ན། ཝའི་སྒྲ་འབའ་ཞིག་འབྱུང་སྟེ། སེངྒེའི་སྒྲ་མ་ལགས་སོ། །དེ་ཡིན་ནོ། །ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་ལེ་ལོ་ཡར་སྐྱེ་བའི་དགེ་སློང་རང་དོན་དམ་པ་ཡིན་སྙམ་འཛིན་ཏོ། །ཆོས་འཆད་མི་གཙང་བ་ནི། འཛི་གིན་ཇིའི་བཤད་པ་མནོས་ཏེ། དོན་གཅིག་ལ་ཆགས་ཏེ་དམ་དུ་བཟུང་སྟེ་མ་བཏང་ངོ ། ། འཇིག་རྟེན་གྱི་ཁེ་ལ་བརྐམ་ཞིང་རིན་ཆེ་སྟེ་ཐ་མལ་བའི་ཡི་གེ་ཀློག་པ་ལ་སྲེད་པས་ཆོས་སོ་ཅོག་གི་བདེན་པ་ཁོང་དུ་ཆུད་པར་མ་ནུས་སོ། །མཚན་མ་མེད་པའི་ཆོས་ལ་ཡིད་ཆེས་
305b
ཤིང་མནོད་ནུས་ཤེ་ན། བདེན་པ་ཡོད་མེད་དོ། །ཤཱ་རིའི་བུ། དགེ་སློང་ལ་ལ་ཞིག་ལོ་གྲངས་ཀྱིས་རྒན་ཞིང་ལེགས་པ་ཡོད་པ་དགེ་སློང་གི་ནང་ན་ཀླུ་སྟེ། ཤེས་རབ་ཟབ་མོ་ཡོད་པ་དེ་ལྟ་བུའི་མིས་ཅིའང་མེད་པ་ཉིད་ཀྱི་མཚན་མ་སྟོང་པའི་ཆོས་དང ། བདག་ཏུ་ལྟ་བ་མེད་པ་དང ། གང་ཟག་མེད་པའི་ཆོས་ལ་ཡིད་ཆེས་པར་ནུས་སོ། །ཇི་ལྟ་ཞེ་ན། མི་དེ་མང་པོ་འཇིགས་པའི་ཚིག་གོ་ཅོག་དང ། དགེ་འདུན་ལ་མི་སྲེད་དོ། །ཆོས་ཡིག་ཀློག་པ་དང ། གཉིད་ཀྱིས་ལོག་པ་དང ། དོན་མང་པོ་ལ་མི་སྲེད། གོས་སྐྱ་བོ་ཅན་གྱི་འཚོ་རྣམ་དང ། དོན་མི་བྱེད། ཕོ་ཉར་མངག་ཅིང་ཡི་གེ་ཁྱེར་ཞིང་སྐྱེལ་བ་མི་བྱེད། སྨན་གྱི་ཆོས་མི་བྱེད། སྨན་དཔྱད་མི་ཀློག། ཚོང་སྤོགས་མི་བྱེད། འཇིག་རྟེན་གྱི་ཚིག་བརྗོད་ཅིང་སྨྲ་བ་ལ་མི་སྲེད་དོ། །འཇིག་རྟེན་ལས་འབྱུང་བ་བཤད་པ་འབའ་ཞིག་ལ་དད་ཅིང་དགའོ། །མི་ཆོས་སོ་ཅོག་སྟོང་པར་ཡིད་ཆེས་པར་ནུས་ཏེ། ཆོས་སོ་ཅོག་མེད་ཅིང་མི་ལྡན་མི་འཇུག་གོ། མི་དེ་ལྟ་བས་ན། གདོད་ཡང་དག་པའི་བདེན་པའི་དབྱིངས་སུ་གྲུབ་པར་ནུས་ཏེ། བདེན་པ་བཞིན་གྱི་ཡང་དག་པའི་སེངྒེའི་སྒྲ་ནུས་ཏེ། ཝའི་སྒྲ་མ་ཡིན་ནོ། །ཤཱ་རིའི་བུ། དགེ་སློང་ལ་ལ་ཞིག་ཐ་མལ་པའི་ཡི་གེའི་གཞུང་ལ་ཆགས་པ་ཞིག་ཡོད་ན། མི་དེས་སངས་རྒྱས་ཀྱི་ཟབ་མོ་དམ་པའི་མཆོག་བཏང་སྟེ་མུར་འདུག་གི་ཆོས་ཁ་ཏོན་དང ། གཟུངས་སུ་འཛིན་པ་ཞེས་བྱའོ། །ཕལ་མང་པོའི་ཕྱིར་བཤད་
306a
༄#། །ནའང་ཝའི་སྒྲ་འབའ་ཞིག་ཟེར་རོ། །ཤཱ་རིའི་བུ། དེ་ལྟ་བུའི་མི་ངན་པ་ནི། མིང་རུལ་པའི་དགེ་སྦྱོང་ཞེས་བྱའོ། །ཅིའི་ཕྱིར་ཞེ་ན། མུར་འདུག་གི་གཞུང་ཡིན་གྱི། སངས་རྒྱས་ཀྱི་ཆོས་མ་ཡིན་པའི་ཕྱིར་རོ། །ཤཱ་རིའི་བུ། མུར་འདུག་གི་ཆོས་ལ་ཆགས་པའི་དགེ་སློང་ནི། བདག་རང་སངས་རྒྱས་ཀྱི་སློབ་མ་ཡིན་ཞེས་བརྗོད་པར་མི་རིགས་སོ། །ཅིའི་ཕྱིར་ཞེ་ན།་དགེ་སློང་ཤཱཀྱའི་བུ་ནི། འཛི་གེན་ཇིའི་ཆོས་མི་འཆད་དེ། ཕལ་མང་པོའི་ནང་ན་སངས་རྒྱས་ཀྱི་ཆོས་འབའ་ཞིག་འཆད་དོ། །མི་ལ་ལ་ཞིག་མི་གཙང་བའི་ཚིག་ལ་ཆགས་ན། སེངྒེའི་སྒྲ་བྱས་ཀྱང་བྱས་སོ། །ཝའི་སྒྲ་སྐད་དུ་གྲགས་ཏེ། མི་དེ་སངས་རྒྱས་ཀྱི་མཆོག་གི་གཞུང་ཤེས་པར་མི་ནུས་སོ། །ཤཱ་རིའི་བུ། ངས་ཁྱོད་ལ་བྱེ་བྲག་ཕྱེད་པར་བསྒོའོ། །མི་ལ་ལ་ཞིག་ཚུལ་ཁྲིམས་འཛིན་པ་དང ། བསམ་གཏན་ཐུབ་པ་དང ། ཤེས་རབ་ཆོ་ག་ཚང་སྟེ། མི་འཇུང ། མི་བརྐམ། ཞེ་སྡང་གཏི་མུག་གིས་མ་ཞེ་ན། གཙང་སྒྱུ་མི་སྲེལ། ངན་པས་སྐྱེས་པའི་སེམས་ཡོད། ཡང་དག་པའི་བདེན་པའི་ཚིག་སྨྲ་ཞིང་རྟག་པར་འབའ་ཞིག་གནས་ལ་སྲེད། ཉལ་ཞིང་གཉིད་ལོག་པ་ལ་མི་སྲེད། སྟོང་པ་མཚན་མ་མེད་པ་དང ། སྨོན་པ་མེད་པ་དང ། འགོག་པ་མེད་པ་སྤྱོད་པ་ལ་སྲེད་དོ། །ཟབ་མོ་འདོད་པའི་སེམས་སྐྱེས་ཏེ། སངས་རྒྱས་ཀྱི་མཆོག་གི་གཞུང་ཤེས་པ་བཙལ་ནས་འཇིག་རྟེན་གྱི་ཚིག་ལ་མི་དགའ།
306b
འཇིག་རྟེན་ལས་འབྱུང་བའི་ཚིག་ལ་དད་དེ། ཚུལ་ཁྲིམས་རྣམས་རྫོགས་པར་བཟུང་ནས་དོན་ངན་པ་ཐམས་ཅད་དང ། ངན་པའི་བཤེས་གཉེན་ཀུན་བསྲིངས་སྤངས་ཏེ། དེ་ལྟ་བུའི་ཆོས་ལ་གནས་པས་སྟོང་པ་ཅིའང་མེད་པའི་ཆོས་ཤེས་པར་ནུས་སོ། །ཅིའི་ཕྱིར་ཞེ་ན། ཤཱ་རིའི་བུ། སྤྱད་པ་དེའི་མིང་ནི། མི་ཆེན་པོའི་སྤྱོད་པ་ཞེས་བྱ་སྟེ། གསོ་བའི་ཁེ་ལ་བརྐམ་ཞིང་སྲེད་པའི་ཁེ་མ་ཡིན་ཏེ། གཏི་མུག་བླུན་པོའི་ཐ་མལ་པའི་སྤྱོད་པ་མ་ཡིན་ནོ། །སུན་བྱུང་ཞིང་ཞིག་པའི་དགེ་སྦྱོང་གི་སྤྱོད་པ་མ་ཡིན་ནོ། །སྤང་ཕུབ་ཀྱི་དགེ་སྦྱོང་གི་སྤྱོད་པ་མ་ཡིན་ནོ། །སྒྱུ་མ་མིང་གི་དགེ་སྦྱོང་གི་སྤྱོད་པ་མ་ཡིན་ནོ། །ཤཱ་རིའི་བུ། ཆོས་སོ་ཅོག་གི་བདེན་པའི་མཚན་མའི་མཐའ་ཡུན་དུ་སྟོང་པ་ཉིད་སངས་རྒྱས་ཀྱི་ལམ་ཡིན་ཏེ། འཇིག་རྟེན་གྱི་ནོར་ཁེ་ལ་སྲེད་པ་དང ། ཆོས་མི་གཙང་བ་ཐོབ་པར་མི་ནུས་སོ། །ཤཱ་རིའི་བུ། དེའི་མིང་ནི། ཤེས་རབ་ཆེན་པོའི་ས་ཞེས་བྱ་སྟེ། མུར་འདུག་ལ་བརྐམ་སྲེད་པའི་ཆོས་མ་ཡིན་ནོ། །བདག་ཏུ་ལྟ་བ་དང ། གང་ཟག་ཏུ་འཆད་པའི་ས་ཡིན་ནོ། །ཤཱ་རིའི་བུ།་བདེན་པར་བདག་ཏུ་ལྟ་བ་ཡིན། གང་ཟག་ཏུ་ལྟ་བ་ཡོད་དུ་ཟིན་ན། བདག་ཏུ་ལྟ་བ་དང ། གང་ཟག་ཏུ་ལྟ་བ་འཆད་པ་ལ་བདེན་པའི་མཚན་མ་ཡོད་པའི་རིགས་ཀྱི། བདེན་པ་བཞིན་དུ་འདྲི་བ་རིགས་སོ། །བདག་ཏུ་ལྟ་བ་ཡོད་དུ་ཟིན་ན། ཁ་དོག་ཇི་ལྟ་བུ་ཡིན། སྔོན་པོ། སེར་པོ། དམར་པོ། དཀར་པོའམ། ལུས་ཀྱི་ནང་དུ་འདུག་གམ། ལུས་ཀྱི་ཕྱི་རོལ་ཏུ་འདུག་གམ། ལུས་
307a
༄#། །ཆུབ་པར་འདུག་གམ། མར་གསོ་མ་ལ་འདུག་པ་དང་མཚུངས་སམ། ཤཱ་རིའི་བུ། གསོ་མའི་ནང་ན་མར་ཡོད་པ་ནི། འབྱུང་དུའང་རུང ། བསྟན་དུའང་རུང ། བདག་ཏུ་ལྟ་བ་ནང་ལོགས་ན་འདུག་ཏུ་ཟིན་ན། བདག་ཏུ་ལྟ་བ་ཡོད་པར་འཆད་པས་བཤད་པ་རིགས། བསྟན་པ་རིགས་ཏེ། གསོ་མའི་ནང་ནས་མར་འབྱུང་ཞིང་མར་བསྟན་པ་དང་མཚུངས་སོ། །མཆོག་གི་གཞུང་གི་ནང་ནས་ནི། བདག་ཏུ་ལྟ་བ་བཙལ་ཀྱང་རྙེད་པར་མི་རུང་ངོ ། །དེ་ལྟ་བས་ན། ཤེས་པར་བྱོས་ཤིག་།བདག་ཏུ་ལྟ་བ་དང ། གང་ཟག་ཡོད་པར་འཆད་པའི་མི་དེ་ལ་དགེ་སྦྱོང་གི་ཁྲིམས་ཀྱང་མེད་ན། དགེ་སློང་གི་མེད་པ་ལྟ་སྨོས་ཀྱང་ཅི་དགོས། ཤཱ་རིའི་བུ། ཤེས་པར་བྱོས་ཤིག་།ཡོན་པོ་ལ་འདོད་ཆགས་པ་ནི། བདག་ཏུ་ལྟ་བ་ལ་ཆགས། སེམས་ལ་ཆགས། ཚེ་སྲོག་ལ་ཆགས་ཏེ། སྤྱི་བོའི་ཆོས་སུ་ལྷུང་ངོ ། །མི་དེ་དེ་ལྟ་བུར་ཡོན་པོ་ལ་འདོད་ཆགས་པས་ན། གསོ་བའི་ཁེ་ལ་བརྐམ་པའི་སེམས་ཀྱང་བསམ་མི་ནུས་ན། མྱ་ངན་འཁྲུག་པའི་ཞི་བ་མོ་ལྟ་སྨོས་ཀྱང་ཅི་དགོས། ཤཱ་རིའི་བུ། སྟོང་པ་ཁོང་དུ་ཆུད་པ་ལ་འདོད་ཆགས་དང ། ཞེ་སྡང་དང ། གཏི་མུག་དང ། གསོ་བའི་ཁེ་བཀབ་ཅེས་ཟེར་ན། བདེན་པ་ཡོང་མེད་དོ། །སྤྱི་བོ་ཆོས་སུ་ཡོང་མི་ལྟུང་ངོ ། །ཤཱ་རིའི་བུ། བདག་ཏུ་ལྟ་བའི་སེམས་ལ་ཆགས་པ་ནི། ཚེ་སྲོག་ཡོད་ཅེས་ཟེར་བ་སྟེ། ཚེ་སྲོག་གི་རྒྱུ་རྐྱེན་གྱིས་ན་གསོ་བའི་ཁེས་བཀྲེས་
307b
ཏེ་ལམ་བསྒྲིབས་བཅད་དོ། །ཤཱ་རིའི་བུ། བདག་ཏུ་ལྟ་བ་དང ། གང་ཟག་ཏུ་ལྟ་བ་ནི། ངའི་ཆོས་ལ་ཁྱིམ་ནས་བྱུང་བ་སྟེ་ཆོས་བྱེད་མོད་ཀྱི། དེ་ལྟ་བུའི་མི་གཏི་མུག་གཙང་གདང་བའི་ནང་ནས་ནི།་ཁྱིམ་ནས་བྱུང་བ་མ་ཡིན་ནོ། །ཅིའི་ཕྱིར་ཞེ་ན། འཛི་གན་ཛིའི་ཁྱིམ་ནས་བྱུང་བ་ནི། ཀུན་ངའི་སེམས་ལ་ཆགས་ཏེ་ཐོབ་པ་ཡོད་པར་འཛིན་ཏོ། །ཤཱ་རིའི་བུ། ཐོབ་པ་ཡོད་པར་འཛིན་པ་ནི།་ཐོག་མ་ཞེས་བྱ་བ་མེད་པའི་ཚེ་རབས་ཚུན་ཆད་རྟག་པར་དེ་ལྟ་མཐོང་བ་ཡོད་དེ། ཁྱིམ་ནས་བྱུང་དུ་ཟིན་ཀྱང་ཡོད་དེ་ཅི་མི་འཆད་དོ། །དེའི་མིང་མུར་འདུག་གི་ཞར་ལས་ཁྱིམ་ནས་བྱུང་ཞེས་བྱའི། མིང་འཕགས་པའི་ཞར་ལས་ཁྱིམ་ནས་བྱུང་བ་ཞེས་མི་བྱའོ། །ཅིའི་ཕྱིར་ཞེ་ན། བཀབ་པའི་མིས་ཆེན་པོ་ལ་ཡིད་ཆེས་ཤིང་དད་པར་མི་ནུས་ཏེ། གཙང་གདང་བའི་ཆོས་ཆེན་པོ་ཡང་དག་པའི་བདེན་པའི་འདུ་ཤེས་མེད་དོ། །ཤཱ་རིའི་བུ། དེ་ལྟ་བུའི་ཆོས་བཤིག་པའི་སྡིག་རྩི་བ་རྒྱུ་རྐྱེན་གྱིས་ཁན་མ་ཐོ་བའི་ལྷག་མ་མ་ཟད་པས་ཆོས་སོ་ཅོག་བདེན་པའི་མཚན་མ་ཡིད་ཆེས་ཤིང་ཤེས་པར་མི་ནུས་ཏེ། མི་དགེ་བའི་ལས་གཡོས་ནས་བར་བར་ནི། དྲང་པོའི་འཕྲུལ་གྱི་ལམ་བརྒྱད་ལ་སྐུར། བར་བར་ནི། དགེ་སློང་ལ་དན་པའི་སེམས་བསྐྱེད་དེ། དེའི་མི་བདེན་པའི་ཉེས་པ་བྱུང་སྟེ། བར་བར་ནི། ཚུལ་ཁྲིམས་བཤིག་།མཐོང་བ་བཤིག་།སྲོག་བཤིག་།ཆོ་ག་པ་ཤིག་ཅེས་ཟེར། བར་བར་ནི། གཞན་གྱི་ཉེས་པ་མ་མཐོང་བར་མི་བདེན་པའི་ཡིད་
308a
༄#། །མ་ཡིན་མ་སྐྱེས། བར་བར་ཞེ་སྡང་ཕྲག་དོག་གི་སེམས་རྟོག་པ་སྤྱད་དེ་གཞན་གྱི་ངན་པ་བཤད། བར་བར་ནི། སངས་རྒྱས་ཀྱི་ཆོས་ཡི་གེ་གཞུང་ཚུལ་ཤེས་ཟེར་མ་ནུས་པས་སངས་རྒྱས་ཀྱི་ཆོས་མ་ཡིན་ཞེས་ཟེར་རོ། །དེ་ལྟ་བུའི་མིས་ཆོས་བཤིག་པའི་ངན་པའི་ལམ་འབྱོར་གྲུབ་པས་སངས་རྒྱས་ཀྱི་མཆོག་གི་གཞུང་ལ་སེམས་ཐོགས་པ་མེད་པར་མི་ནུས་ཏེ། མི་འཇུག་མི་དགའོ། །དེ་ལྟ་བུའི་སྡིག་ལྕི་བའི་ལན་གྱི་ལྷག་མའི་རྒྱུ་རྐྱེན་གྱིས་བརྩོན་འགྲུས་སྤྱད་མོད་ཀྱི། འོན་ཀྱང་རྐྱེན་ཏོ་ཅོག་གི་མཚན་མ་ལེན་མི་ནུས་ན། སེམས་ལ་བཏགས་པའི་ལམ་གྱི་འབྲས་བུ་ཐོབ་པར་མི་ནུས་པ་ལྟ་སྨོས་ཀྱང་ཅི་དགོས། གཅིག་ཏུ་ན་བ་དག་ཏུ་ལྟ་བ་དང ། གང་ཟག་ཏུ་ལྟ་བ་ལ་གནས་བརྟེན་ཏེ། དེ་ལྟ་བུའི་ལྟ་བ་ནི། སངས་རྒྱས་མན་ཆད་ཀྱིས་ཀྱང་དེའི་རྩ་བའི་ཕྱི་མོ་ཕྱིན་པར་སེམས་མི་ནུས་ན། འབྲས་བུ་ཐོབ་པར་མི་ནུས་པ་ལྟ་སྨོས་ཀྱང་ཅི་དགོས། ཤཱ་རིའི་བུ། དེ་ལྟ་བུའི་བརྐམ་ཆགས་པའི་མི་དགེ་བ་ཡོན་པོ་མཐོང་བ་ཡོད་ན། དེ་ནི། བདག་ཏུ་ལྟ་བ་དང ། གང་ཟག་ཏུ་ལྟ་བ་དང ། སེམས་ཅན་དུ་ལྟ་བ་དང ། ཚེ་སྲོག་ཏུ་ལྟ་བའོ། །གཅིག་ཏུ་ན་མཆོག་གི་གཞུང་སྟོང་པ་ལ་དངངས་སྐྲག་ཅིང་དོགས་པ་སྟེ། མི་དེས་སྔོན་ཆད་ཀྱི་ཚེ་ལ་ཆོས་བཤིག་པའི་སྡིག་རྐྱེན་འབྱོར་པར་མངོན་ནོ། ཤཱ་རིའི་བུ། མི་ལ་ལ་ཞིག་དེ་ལྟ་བུར་ངན་པ་ཡོན་པོ་མི་དགེ་བའི་འདོད་ཆགས་
308b
ན།་དེ་ནི། བདག་ཏུ་ལྟ་བ་ལ་ཆགས། གང་ཟག་ལ་ཆགས། ཚེ་སྲོག་ལ་ཆགས་ཏེ། མི་དེ་ལྟ་བུ་ནི། བརྒྱ་སྟོང་འབུམ་གྱི་སངས་རྒྱས་ཀྱིས་འཁོར་ལོ་གསུམ་སྤྱད་དེ་མངོན་པར་བསྟན་ཀྱང་གོ་བར་བྱ་བ་དང ། ལམ་གྱི་འབྲས་བུ་ཐོབ་པར་བྱ་མི་ནུས་སོ། །ཤཱ་རིའི་བུ། གཉིས་ན་རལ་གྲི་རྣོན་པོས་ལྕེ་བཅད་ཀྱང་བླའི། གཞན་གྱི་དོན་མཐོང་བ་མི་རིགས་ཏེ། དེའི་ཉེས་པ་ཚུལ་ཁྲིམས་བཤིག་པ།་མཐོང་བ་བཤིག་པ། སྲོག་བཤེག་པ། ཆོ་ག་བཤིག་པ་མི་བརྗོད་དོ། །ཤཱ་རིའི་བུ། མ་འོངས་པའི་དུས་ན་དགེ་སློང་དག་ཅིག་ཡོད་པས་ཚུལ་ཁྲིམས་ཉིས་བརྒྱ་ལྔ་བཅུ་དག་པར་བསྲུངས་ན། མི་དེས་ལེ་ལོའི་སེམས་བསྐྱེད་དེ་འདི་སྙམ་དུ་བསམ་པ་བྱས་སོ། །བདག་ནི། ཚུལ་ཁྲིམས་འཛིན་པ་ཡིན། མི་གཞན་ནི། དེ་ལྟ་མ་ཡིན་གྱི། གཞན་ལ་བརྙས་སོ། །ཞེས་སེམས་ལ་རི་མོ་གུས་པ་མེད་དོ། །བདག་ནི། མང་པོ་ཐོས་པ་ཡིན། ཕ་བི་ནི། མང་པོ་ཐོས་པ་མ་ཡིན་སྙམ་དུ་སེམས་སོ། །ཤཱ་རིའི་བུ། དེའི་ཚེ་ན། དགེ་སློང་ཚུལ་ཁྲིམས་འཛིན་པ་ཆེད་ཆེར་སེམས་པ་མང་སྟེ།་ཨ་ལན་ཞའི་ལས་སྤྱོད་པ་མང་ངོ ། །ཚུལ་ཁྲིམས་དགེ་བར་སྲུང་ནུས་ཏེ་བཤད་པ་བཞིན་དུའང་སྤྱོད་དེ། སེམས་འགྲུས་པར་ཆོས་ཡིག་བཀླགས་ནས་སངས་རྒྱས་ཀྱི་ཆོས་ལ་ཕྱག་འཚལ་ལོ། །དེ་ལྟ་བུའི་མི་ལ་སོགས་པ་མང་པོ་ཐོས་པ་སྐྱེས་པས། ཨ་ལན་ཞ་ལ་ལྟོས་པས་ཞེ་སྡང་ལ་སྲེད་དེ། སེམས་རྟག་པར་དྲི་མ་རྟོག་པས་ཟབ་ཏུ་འཇུག་བརྐམ་པ་དང ། ཞེ་སྡང་གདུག་
309a
༄#། །པའི་སེམས་སྲེལ་ཏོ། །ཐེག་ཆེ་ཞིང་བླུན་པས་ཅིའང་ཤེས་པ་མེད་དེ། རྒྱུ་རྐྱེན་ཆུང་ངུ་སྤྱད་པས་དོན་ཆེན་པོ་གཡོས་ཏེ། དེའི་ཞེ་སྡང་གིས་སེམས་བཀབ་ནས་གཅིག་གི་ཉེས་པ་གཅིག་ཕྱུང་སྟེ། དེ་ནི། ཚུལ་ཁྲིམས་བཤིག་པ་དང ། མཐོང་བ་བཤིག་པ་དང ། སྲོག་བཤིག་པ་དང ། ཆོ་ག་བཤིག་པའོ། །ཤཱ་རིའི་བུ། དེ་ལྟ་བུའི་དགེ་འདུན་གྱི་ནང་ན་དགེ་སློང་དེས་པ་ཡོད་པས་སེམས་ལ་ཡོན་པོ་མེད་དེ་བར་ན་གནས་ཤིང་འདུག་ན། དེའང་ངན་པ་དེ་དག་གི་ནང་ན་འདུག་པས་གཅིག་ལ་གཅིག་སྐུར་བརྗོད་པས་འཐབ་རྩོད་མི་ཆད་དེ། བསམ་གཏན་ན་འདུག་པ་དང ། ཆོས་ཡིག་ཀློག་པའང་བདེན་པ་མ་ཐོས་ནས་ཁྱིམ་ན་འདུག་པ་དང ། ཁྱིམ་ནས་བྱུང་བ་ཀུན་ཀྱང་དཀྲུགས་བསྐྱོད་དོ། །དེ་ལྟ་སྟེ། ཤཱ་རིའི་བུ། དགེ་སློང་ལོ་གཅིག་ལོ་གཉིས་ལོ་གསུམ་ལོ་དགུ་ལ་ཐུག་པ་མང་དུ་ཡོད་ན། སྟེང་ན་འདུག་པའང་ཞིང་བརྙས་ཏེ་རི་མོ་གུས་པ་མེད་དོ། །མི་དེ་ཚུལ་ཁྲིམས་མནོས་ན་དགེ་སྦྱོང་སློབ་མའང་ཆོས་བཞིན་མི་བྱེད་པ་མང ། མཁན་པོ་དང་ཨཱ་ཙརྱ་ལ་རི་མོ་གུས་པ་མི་བྱེད་དོ། །ཤཱ་རིའི་བུ། དེའི་ཚེ་དགེ་སློང་གཞོན་ནུ་དང ། སྔར་ཁྱིམ་ནས་བྱུང་བ་ལ་གནས་རྟེན་མེད་པ་གཅིག་གིས་གཅིག་བརྙས་ཏེ། ལོ་བཅུ་ལོན་པའི་དགེ་སློང་ལ་སློབ་མ་ཕལ་བཅད་པ་རྣམས་གཞན་གྱི་སློབ་མ་ཀུན་གྱིས་རི་མོ་གུས་པ་མེད་དོ། །ཆོ་གའི་ཆོས་ཀྱང་ཆོས་བཞིན་མི་བྱེད་དོ། །
309b
ཤཱ་རིའི་བུ། དེའི་ཚེ་མི་ངན་པ་རྣམས་ཀྱིས་འདོད་ཆགས་ཞེ་སྡང་ཆོ་ག་གཙང་བས་གཅིག་ལ་གཅིག་བརྙས་ཀྱང་སྟེ། རི་མོ་གུས་པ་མེད་ཅིང་གཅིག་ལ་གཅིག་ལོག་གལ་བས་ན། ངའི་ཆོས་དེངས་སོ། །ཤཱ་རིའི་བུ། དེའི་ཚེ་མི་གཏི་མུག་རྣམས་ཀྱིས་ཆོས་བཤིག་པའི་སྡིག་ལས་བསྐྱོད་པ་མང་པོ་སྡིག་བསྐྱོད་པས་མཐར་ལམ་ངན་པར་ལྷུང་ངོ ། །ཤཱ་རིའི་བུ། ཁྱོད་ལ་ངས་བྱེ་བྲག་ཕྱེད་པར་བསྒོའོ། །རང་གི་བསོད་ནམས་བཙལ་དུ་ཟིན་ན། དགེ་སློང་དགེ་བ་ནི། དེའི་ཚེ་ཕལ་གྱི་ནང་དུ་ཞག་གཅིག་ཀྱང་འཇུག་པ་མི་རིགས་སོ། །དགྲ་བཅོམ་པ་མྱ་ངན་ཚོད་ཟིན་པ་དང ། དགེ་སློང་ངན་པའི་དེར་དོན་ཡོད་པ་ནི། མ་གཏོགས་སོ། །ཅིའི་ཕྱིར་ཞེ་ན། ཤཱ་རིའི་བུ། དེ་ཙམ་གྱི་ཚེའི་མི་འདོད་ཆགས་དང ། ཞེ་སྡང ། གཏི་མུག་གདུག་པ་བདོ་སྟེ། མི་གསོན་པས་འཇིགས་སྐྲག་ཕོངས་གཏིང་ལ་ཐུག་པས་དགེ་བ་མི་བཙལ་ཏེ། རང་སོ་སོར་རི་དང་ཚལ་སྟོང་དབེན་པར་གནས་ཏེ། ཚེ་ཟད་ན་གཅན་གཅན་བཞིན་ཤིའོ། །ཤཱ་རིའི་བུ། ཁྱོད་ལ་ངས་བྱེ་བྲག་ཕྱེད་པར་བསྒོའོ། །ངའི་ཡང་དག་པའི་ཆོས་འདི་འཇིག་རྟེན་ན་འདུག་པ་རིང་པོ་མི་ཐོགས་སོ། །ཅིའི་ཕྱིར་ཞེ་ན། སེམས་ཅན་གྱི་ལེགས་པའི་དཔལ་གྱི་དགེ་བའི་རྩ་བ་ཟང་ཟིན་\?\་ཏེ། རྙོག་པའི་དུས་ཉེ་བ་ན་འདུག་གོ། །བདག་གིས་བསོད་ནམས་བཙལ་དུ་ཟིན་ན། དགེ་སློང་དགེ་བས་འདི་ལྟ་བུའི་སྐྱོ་བའི་སེམས་བསྐྱེད་པ་རིགས་སོ། །བདག་ནམ་ཞིག་ཇི་ལྟ་བུར་ཆོས་ཞིགས་འཁྲུགས་པ་མཐོང་
310a
༄#། །འདི་ལྟ་བུའི་དགེ་སྦྱོང་གི་ཚེ་དུས་ངན་པའི་བགེགས་ལ་བབ་པ་མཐོང་ན། བདག་གིས་བརྩོན་འགྲུས་པའི་སེམས་བསྐྱེད་དེ། མྱུར་དུ་ལམ་གྱི་འབྲས་བུ་ཐོབ་པར་བྱའོ།། ཤཱ་རིའི་བུ། ངའི་ཆོས་ལ་དོན་དཀའ་བ་གཞན་མེད་དེ། གོས་དང ། ཁ་ཟས་དང ། མལ་ཆ་དང ། རྩི་སྨན་མི་བསམ་མོ། །ཁྱེད་ལ་སོགས་པ་ཅི་ནས་ཀྱང་སངས་རྒྱས་ཀྱི་ལམ་གྲུབ་པར་སྤྱོད་པ།་འཇིག་རྟེན་གྱི་ནོར་གྱི་ཁེ་དང ། ཡོན་རིན་པོ་ཆེར་མ་འཛིན་ཅིག་།ཤཱ་རིའི་བུ། ད་ཁྱོད་ལེགས་པར་ཉོན་ཅིག་དང་ངས་ཁྱོད་ལ་བསྒོའོ། །དགེ་སློང་ལ་ལ་ཞིག་སེམས་གཅིག་ཏུ་ལམ་སྤྱོད་ན།་སྟོང་གསུམ་གྱི་གནམ་གྱི་ལྷ་ཀུན་སེམས་མཐུན་པར་སྐྱིད་པའི་ཡོ་བྱད་དོ་སྤྱད་དེ་སྤྱིས་ཡོན་གསོལ་ལོ། །ཤཱ་རིའི་བུ། མི་གཞན་གྱིས་བསམ་གཏན་ན་འདུག་པའི་དགེ་སློང་ལ་ཡོན་ཕུལ་བས་ནི།་གནམ་གྱི་ལྷས་ཡོན་ཕུལ་བ་ཙམ་མི་ཕོད་དོ། །དེ་ལྟ་བས་ན། ཤཱ་རིའི་བུ། ཁྱོད་རང་ཡོན་མི་ཐོབ་པའི་མྱ་ངན་སེམས་པར་བསྟན་བསླབ་པ་བཞིན་དུ་མ་འགལ་བར་སྤྱད་དེ། མཆོག་གི་གཞུང་སྟོང་པ་སྤྱད་པ་ལ་མིའི་ཉེས་པ་མྱ་ངན་མ་འབྱུང་ཞིག་།ཅིའི་ཕྱིར་ཞེ་ན། ཤཱ་རིའི་བུ། བག་ཚ་བའི་བགེགས་ཆེན་པོ་ནི། སྟོང་པ་ཐོབ་པ་སྟེ། དགེ་སློང་ལ་ལ་ནི། ངའི་ཆོས་སྤྱོད་བའི་ཞར་ལས་ཁྱིམ་ནས་བྱུང་སྟེ། ཚུལ་ཁྲིམས་མནོས་ཤིང་ཆོས་འདི་ལ་བརྩོན་འགྲུས་སྤྱོད་ན། ལྷ་དང ། ལྷ་མ་ཡིན་རྣམས་དང ། མི་རྣམས་ཀྱིས་མི་དྲན་མོད་ཀྱི། སེམས་གཅིག་ཏུ་
310b
འགྲུས་པར་ལམ་སྤྱོད་ནུས། མཐར་ཡང་གོས་དང ། ཟས་ཅི་དགོས་པ་མི་སེམས་སོ། །ཅིའི་ཕྱིར་ཞེ་ན། ཡང་དག་པར་གཤེགས་པའི་དཔལ་གྱི་མཛོད་དཔག་ཏུ་མེད་དེ། ཟད་དཀའོ། །ཤཱ་རིའི་བུ།་ཡང་དག་པར་གཤེགས་པ་འདས་པའི་ཕྱི་ན་སྤུ་དཀར་པོའི་མཚན་གྱི་ནང་ན་བརྒྱ་སྟོང་འབུམ་གྱི་ཆ་ལས། དེའི་ཆ་གཅིག་གིས་སྐུ་གདུང་དང ། སློབ་མ་རྣམས་ལ་ཡོན་འབུལ་ལོ། །ཤཱ་རིའི་བུ།་འཇིག་རྟེན་ཐམས་ཅད་ཀྱི་མི་ཀུན་ཁྱིམ་ནས་བྱུང་སྟེ་ཆོས་བཞིན་དུ་སྤྱད་དུ་ཟིན་ཀྱང་སྤུ་དཀར་པོ་མཚན་གྱི་བརྒྱ་སྟོང་འབུམ་གྱི་ཆ་དེ་གཅིག་ཀྱང་མི་ཟད་དོ། །ཤཱ་རིའི་བུ། ཡང་དག་པར་གཤེགས་པ་ནི། དེ་ལྟ་བུའི་དཔལ་ཡོན་དཔག་ཏུ་མེད་དེ། དགེ་སློང་རྣམས་ཀྱིས་ཁ་ཟས་རྫས་ཅི་དགོས་པ་རྣམས་ཐོབ་ན་ཕྱོགས་པས་ཀུན་ཆོག་ཚང་བར་རུང་ངོ ། །ཤཱ་རིའི་བུ། དགེ་སློང་དེ་དག་གི་རྣམས་འདི་སྙམ་དུ་བསམ་པ་རིགས་སོ། །རྫས་ཅི་དགོས་པ་དང ། ཡོན་པོའི་སྲོག་རྣམས་ཀྱི་ཆོས་ངན་པ་སྤྱད་པ་མི་རིགས་སོ། །ཤཱ་རིའི་བུ། གོས་ལྷན་པ་ཅན་གྱི་དགེ་སློང་ལུང་དང ། ཕྱག་དར་གྱི་ནང་ནས་ངན་པ་རྙིང་པ་བསྡུས་ཏེ་བླངས་ན། སེམས་འདི་སྙམ་བགྱིད་པར་རིགས་སོ། །འདི་སྤྱད་དེ་ལྷག་མ་བསྒྲིབས་པ་དང ། འཕགས་པའི་ལམ་སྤྱད་ན་བདག་གི་ད་ངན་པ་རྙིང་པ་འདི་སྤྱད་དེ། དྲུབས་ལ་ཆོས་གོས་སུ་བྱས་ཏེ་བརྩོན་འགྲུས་སུ་སྤྱད་དེ། ཕལ་ཐ་མལ་པ་ནི། ནུབ་གཅིག་ཀྱང་འདི་གྱོན་པ་མི་རིགས་སོ། །དགེ་སློང་དེས་དག་པར་བཀྲུས་ནས་
311a
༄#། །རིང་དུ་གྱོན་ནས་དགེ་སློང་གོས་ལྷན་པ་ཅན་དེ་ལ་འདོད་ཆགས་པའི་སེམས་སྐྱེས་ན། མོད་བཞིན་དོར་བ་རིགས་ཏེ། ངས་གྱོན་དུ་མི་གནང་ན་གོས་གཞན་ལྟ་སྨོས་ཀྱང་ཅི་དགོས། ཅིའི་ཕྱིར་ཞེ་ན། ཤཱ་རིའི་བུ། དགེ་སློང་དེས་གོས་དེ་ལ་དགེ་སློང་གི་ཆོས་མ་ཡིན་པ་བསྐྱེད་དེ། དགེ་སློང་དེའང་འགྲོ་བ་མི་རིགས་པར་འཛིན་ནོ། །རྫས་གཞན་ལྟ་སྨོས་ཀྱང་ཅི་དགོས། ཤཱ་རིའི་བུ། དེའི་ཚེ་དགེ་སློང་དེ་ནི། ལྕགས་དམར་པོ་ཚ་བའི་ཞགས་མས་ལུས་བཅིངས་ཀྱང་བླའི། །གོས་ལྷན་པ་ཅན་འདི་བགོ་བ་མི་རིགས་པར་འཛིན་ཏོ། ། ཇི་ལྟ་ཞེ་ན། གོས་འདི་ལ་སེམས་སྲེད་ཅིང་ཞེན་པའི་ཕྱིར་རོ། །ཤཱ་རིའི་བུ། གོས་ལྷན་པ་ཅན་གྱི་དགེ་སློང་ནི། སེམས་འདི་སྙམ་བྱ་བ་རིགས་སོ། །གོས་ལྷན་པ་ཅན་འདི་བགོས་ཏེ། གྲང་བ་དང་ཚ་བ་བསྒྲིབས་པ་ལམ་སྤྱོད་པ་ལ་བཏང་ན། བདག་སླར་གོས་མ་བགོས་ན་མཐར་རྒྱུན་དུ་ཞུགས་པའི་འབྲས་བུ་དང ། ལན་གཅིག་ཕྱིར་འོང་བའི་འབྲས་བུ་དང ། ཕྱིར་མི་འོང་བའི་འབྲས་བུ་དང ། དགྲ་བཅོམ་པའི་འབྲས་བུ་ཐོབ་བོ། །ཤཱ་རིའི་བུ། དེ་ལྟ་བུའི་གོས་ལྷན་པ་ཅན་གྱི་དགེ་སློང་གཅིག་ཏུ་ལམ་ཚོལ་བ་ངས་ཀྱང་གྱོན་དུ་གནང་ངོ ། །ཤཱ་རིའི་བུ། ཟན་སློང་བའི་དགེ་སློང་ནི། ཆོས་སོ་ཅོག་ལ་རྣམ་པར་བརྟག་པ་མེད་དོ། །རྟག་པར་སེམས་བསྡུས་ཏེ། འགྱོད་ཅིང་འཁྲུག་ཏུ་མི་གཞུག་གོ་།གྲོང་ཁྱིམ་དུ་འཇུག་ན་བསམ་གཏན་གྲུང་
311b
པ་རྣམས་སྤྱད་དེ། རང་བརྒྱན་ལ་ཟན་བསླངས་ཏེ་ཐོབ་ཟིན་པ་དང ། སེམས་མི་ཞེན་མི་བསྒོ་བར་ཟན་ཅི་ཐོབ་པ་ཁྱེར་ཏེ་གྲོང་ཁྱིམ་ནས་བྱུང་ལ་ཆུ་གཙང་མའི་འགྲམ་མམ་སྤྱད་དུ་རུང་བའི་གནས་སུ་འདུག་ལ། ཟས་ངོས་ཤིག་ཏུ་བཞག་སྟེ། རྐང་པ་བཀྲུས་ཏེ་འདུག་ནས་ཟས་མདུན་དུ་བཞག་སྟེ་སྐྱོ་ཞིང་བྲལ་བའི་འདུ་ཤེས་དང ། མི་གཙང་བའི་འདུ་ཤེས་དང ། སྐྱག་རྫབ་ཀྱི་འདུ་ཤེས་དང ། གནམ་རུལ་བའི་འདུ་ཤེས་དང ། སྐྱུག་པའི་འདུ་ཤེས་དང ། རྨ་བསྐུས་པའི་འདུ་ཤེས་དང ། ཐོབ་པས་སྐྱོབ་པའི་འདུ་ཤེས་དང ། བུའི་ཤ་སྙམ་པའི་འདུ་ཤེས་དང ། ཤིང་ཏོག་རུལ་བའི་འདུ་ཤེས་དང ། ཕྱིར་ཞིང་ལྕི་བའི་འདུ་ཤེས་བསྐྱེད་པ་རིགས་སོ། །གཅིག་ཏུ་ན་ལུས་ལ་འཆི་བའི་འདུ་ཤེས་དང ། སྔོ་བའི་འདུ་ཤེས་དང ། རྣགས་པའི་འདུ་ཤེས་དང ། རུལ་ཞིག་པའི་འདུ་ཤེས་བསྐྱེད་པ་རིགས་སོ། །ཤཱ་རིའི་བུ། དགེ་སློང་གིས་འདི་ལྟ་བུའི་འདུ་ཤེས་བསྐྱེད་པའི་རིགས་སོ། །འདོད་ཆགས་ཀྱི་སེམས་མེད་པ་ལ་སྤྱད་ལ་དེ་ནས་གདོད་ཟོས་ཏེ་ལུས་བརྟན་ཞིང་བཀྲེས་སྐོམ་པའི་ནན་བསླད་དུ་ཟད་དོ། །ལམ་སྤྱད་པར་ཐོབ་པར་བྱའོ། །སེམས་འདི་སྙམ་དུ་བྱ་བའི་རིགས་སོ། །ངས་ཟས་འདི་ཐོབ་པ་ནི། སྔོན་ཆད་ཀྱི་སྡུག་བསྔལ་མི་སྐྱེ་ཞིང ། སེམས་དགའ་སྐྱིད་པ་ཐོབ་ལ་ནད་མེད་པ་སྤྱད་དེ། ལུས་ཉམས་ཀྱང་གཞོར་ཞིང་འགྲོ་བ་སྟབས་བདེ་བརྟན་པའི་ཕྱིར་རོ། །ང་ཟན་འདི་ཐོབ་ན། བདག་རྒྱུན་དུ་ཞུགས་པའི་
312a
༄#། །འབྲས་བུ་དང ། ལན་གཅིག་ཕྱིར་འོང་བའི་འབྲས་བུ་དང ། ཕྱིར་མི་འོང་བའི་འབྲས་བུ་དང ། དགྲ་བཅོམ་པའི་འབྲས་བུ་དང ། སྐྱེ་བ་མེད་པའི་ཆོས་ཀྱི་བཟོད་པ་ཐོབ་པར་རིགས་སོ། །ཤཱ་རིའི་བུ། དགེ་སློང་དེ་ལྟ་བུར་ཟ་བའི་ངས་ཟས་སློང་དུ་གནང་ངོ ། །ཤཱ་རིའི་བུ། སློང་བའི་དགེ་སློང་ཟན་ཐོབ་བོ་ཅོག་གི་རོ་ལ་ཆགས་པ་ནི། སེམས་སྐྱེས་ཏེ། ཞིམ་མངར་རོ་སྙམ་དུ་དེ་སྙམ་གྱི་སེམས་བྱེད་ཅིང ། བདག་ཟས་འདི་ཟོས་པས་མདངས་བཟང་པོ་དང ། ཉམས་སྟོབས་དར་བ་ཐོབ་སྙམ་དུ་སེམས་ཏེ། བདག་གི་ཟན་འདི་ཟོས་ལ་འཕགས་པའི་ལམ་འགྲུས་པར་སྤྱོད་དོ། །ཞེས་དེ་སྙམ་གྱི་སེམས་མི་བྱེད་པ་ལྟ་བུའི་དགེ་སློང་ནི། ངས་ཆུ་རྔུབ་ཅིང་ལེན་དུ་མི་གནང་ན། །བ་ཟས་ལྟ་སྨོས་ཀྱང་ཅི་དགོས། ཤཱ་རིའི་བུ། ཟས་ལ་ཉེས་པ་དང ། ངན་པའང་མི་མཐོང་བར་ཐལ་བྱུང་ཟ་བས་ནི། ཉིས་ན་རང་གི་ལག་པས་བརླ་ཤ་ལ་བཅད་དེ་ཟའང་བླའོ། །ཅིའི་ཕྱིར་ཞེ་ན། ངས་སྤྱོད་པ་དང ། ཐོབ་པས་གཞན་གྱི་ཡོན་ལེན་པ་གནང་གི། མི་གཞན་ལེན་དུ་མ་གནང་ངོ ། །ཤཱ་རིའི་བུ། ཇི་ལྟ་བུར་མིང་སྤྱོད་པ་ཞེས་བྱ། དགེ་སློང་ལ་ལ་ཞིག་མི་འགྱུར་བར་བརྟན་ཏེ། སེམས་བསྐྱོད་པ་ལ་ངས་ད་ལྟར་གྱི་དུས་ལ་བདུད་ངན་པས་མངག་པ་རྣམས་བཅད་དེ། ལྷག་པ་མེད་པར་མྱ་ངན་ལས་འདས་པར་འཇུག་པའི་འཕྲུལ་གྱི་ལམ་སྤྱད་པ་ནི། མགོ་མེས་ཚིག་པའི་ར་མདའ་བྱ་བ་བཞིན་ནོ་
312b
གཅིག་ཏུ་ན་མི་དགེ་བ་ངན་པའི་ཆོས་བཅང་བསལ་བ་དེའི་མིང་སྤྱོད་པ་ཞེས་བྱའོ། །ཡང་གཅིག་ཏུ་ན་སེམས་གཅིག་ཏུ་སྟོང་པ་མཚན་མ་མེད་པ་སྨོན་པ་མེད་པར་ཡིད་ཆེས་ཤིང་ཤེས་པར་ནུས་ཏེ། རྒྱུན་དུ་ཞུགས་པའི་འབྲས་བུ་དང ། ལན་གཅིག་ཕྱིར་འོང་བའི་འབྲས་བུ་དང ། ཕྱིར་མི་འོང་བའི་འབྲས་བུ་དང ། དགྲ་བཅོམ་པའི་འབྲས་བུ་ཐོབ་པའི་ཕྱིར་མྱ་ངན་འཁྲུག་པའི་མི་རྣམས་ཆད་པ་དེའི་མིང་སྤྱོད་པ་ཞེས་བྱའོ། །དགེ་བའི་ཆོས་རྣམས་ཚོལ་ཞིང་རྟག་པར་གསོལ་འདྲི་དེའི་མིང་སྤྱོད་པ་ཞེས་བྱའོ། །ཡང་གཅིག་ཏུ་ན་ཐམས་ཅད་གྲོལ་ཐར་པར་སེམས་བསྐྱོད་ནུས་པའི་མིང་སྤྱོད་པ་ཞེས་བྱའོ། །སེམས་འཁྲུག་པར་ལམ་ལ་བཏང་བའི་ཆོས་རྣམས་སྤྱད་སྦྱངས་ཏེ་ཆོས་སོ་ཅོག་གི་བཤད་པ་བཞིན་དུ་སྤྱོད་ཅིང་སེམས་གཅིག་ཏུ་སངས་རྒྱས་ཀྱི་ལམ་ཚོལ་བ་ཡོད་དོ། །ཤཱ་རིའི་བུ། ཡང་སངས་རྒྱས་ཀྱི་ཆོས་ཀྱི་ནང་ན་དེ་ལྟ་བུའི་མིང་སྤྱོད་པ་ཞེས་བྱའོ། །ཇི་ལྟ་བུར་ཐོབ་ཅེས་བྱ་བ་དེ་ནི། རྒྱུན་དུ་ཞུགས་པ་ཐོབ་སྟེ། ལམ་ངན་པ་གསུམ་ལས་ཐར་པའི་མིང་ཐོབ་པ་ཞེས་བྱའོ། །ལན་གཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་མྱ་ངན་འཁྲུག་པ་རྣམས་ཆོད་དེ་ལམ་ཚོལ་བ་ཞི་ཟིན་ཅེས་བྱའོ་ཅོག་འབྱོར་ཟིན་ན། བསླབ་པ་གསུམ་དགེ་བར་ལོབས་པ་དེའི་མིང་སློབ་པ་སྟེ། ངས་མི་དེ་ཡོན་ལེན་དུ་གནང་ངོ ། །མི་དེ་ལྟ་བུས་ཡོན་བླངས་པ་དེའི་དགེ་བར་ཡོན་བླངས་ཞེས་བྱའོ། །
313a
༄#། །ཤཱ་རིའི་བུ། གཙང་གདང་བར་ཚུལ་ཁྲིམས་བསྲུངས་པ་དང ། ཡོན་བདག་ཕྱེ་བསྟན་པ་དང ། མདོ་སྡེའི་ཡི་གེ་ཁ་ཏོན་དང ། ཀློག་པ་ཐོས་ཏེ། དེ་ནི། མདོའི་སྡེ། དབྱངས་ཀྱིས་བསྙད་པའི་སྡེ། ལུང་དུ་བསྟན་པའི་སྡེ། ཚིགས་སུ་བཅད་པའི་སྡེ། ཆེད་དུ་བརྗོད་པའི་སྡེ། གླེང་གཞིའི་སྡེ། དེ་ལྟ་བུའི་ཚིག་གི་ཆོས་ཡིན་ནོ། །སྐྱེས་པ་རབས་ཀྱི་སྡེ། ཤིན་ཏུ་རྒྱས་པའི་སྡེ། རྨད་དུ་བྱུང་བའི་སྡེ། རྟོགས་པ་བརྗོད་པའི་སྡེའོ། །མི་དེས་ཡང་གཅིག་ཏུ་ན་ཚུལ་ཁྲིམས་གཙང་གདང་བར་གཟུང་ནུས་ཏེ། སྐྱོན་མེད་ཅིང་མི་སྨེ་མི་རྙོག། མི་ཆགས་པ་ལ་རང་དབང་བས་མཛངས་པས་བསྔགས་པ་རང་གིས་ཆོག་ཚང་བར་ནུས་ཏེ། བསམ་གཏན་ཐུབ་པ་བཞིན་དུ་མི་འགལ་ལ། དུས་དུས་སུ་བསམ་གཏན་ན་འདུག་པ་སྲེད་པ་དེ་ལྟ་བུའི་དགེ་སློང་ནི། ངས་ཀྱང་ཡོན་དུ་གནང་ངོ ། །ཤཱ་རིའི་བུ། ལུས་ཀྱིས་ཆོས་རིག་ན་དོགས་ཤིང་འགྱོད་པ་མེད་པ་ངས་དེ་ལྟ་བུའི་མི་སྟན་མཐོན་པོར་འདུག་ཅིང་ཆོས་བཤད་དུ་གནང་ངོ ། །ཐ་མལ་པ་ཕལ་ཡིན་མོད་ཀྱི། ཚུལ་ཁྲིམས་གཙང་གདང་བ་བཟུང་ལ་སེམས་མུར་འདུག་གི་ཆོས་ཀྱི་གཞུང་ལ་མ་ཆགས་ཏེ། སེམས་གཅིག་ཏུ་འགྲུས་པར་དགེ་བར་དགེ་སྦྱོང་གི་རབ་ནི། འབྲས་བུ་བཅད་དེ་གསོ་བའི་ཁེ་ལ་མ་ཆགས། ངེས་པར་བཤད་པ་ལ་བཟའ་མཁས་ཏེ། མང་དུ་ཐོས་པའི་དཔེ་རྒྱ་ཡངས་པ་ནི། དཔེ་
313b
རྒྱ་མཚོ་ཆེན་པོ་དང་མཚུངས། སྲོག་སྟོར་ལ་ཐུག་ཀྱང་རྫུན་ཚིག་མི་ཟེར། འཐབ་ཅིང་རྩོད་པ་ལ་མི་སྲེད་དེ། རང་ལའང་ཕན། གཞན་ལའང་ཕན། གཙང་གདང་བའི་མཆོག་གི་གཞུང་འབའ་ཞིག་འཆད་ཅིང་བཤད་དོ། །མཆོག་དེ་བཞིན་ལ་དེ་བཞིན་དུ་སྤྱོད་པའོ། །ཤཱ་རིའི་བུ། དེ་ལྟ་བུར་འཆད་པ་ནི། ངས་ཆོས་འཆད་དུ་གནང་ངོ ། །ཡང་དག་པར་གཤེགས་པས་ཅི་བཤད་པ་ཆོས་སོ་ཅོག་དང་མི་འགལ་མི་ལྡོག་པར་བྱ་ནུས་པ་སྟེ། དེ་ཚུལ་ཁྲིམས་དང ། བསམ་གཏན་དང ། ཤེས་རབ་དང ། གྲོལ་ཐར་དང ། ཤེས་མཐོང་བ་ལས་ཀྱང་གྲོལ་ཐར་ཏོ། །ཤཱ་རིའི་བུ། ཁེ་ཚོལ་བའི་དགེ་སློང་ནི། སངས་རྒྱས་ཀྱི་ཕྱིར་ཁྱིམ་ནས་ཚུལ་ཁྲིམས་ཀྱི་ལེའུ་བཤིག་ན་ཆོས་བཤད་པ་ཅི་དགོས། ཅིའི་ཕྱིར་ཞེ་ན། ཤཱ་རིའི་བུ། ངའི་ཆོས་ཀྱི་ཡི་གེའི་ནང་ན་བཤད་པ་མི་ལ་ལ་ཞིག་བདག་དགེ་བར་མ་ཞི་ལ་བདག་གི་བག་བྱ་མི་ནུས་པར་མི་གཞན་དགེ་བར་ཞི་བ་དང་བདག་གི་བྱ་ནུས་ཤེ་ན། བདེན་པ་ཡོང་མེད་དོ། །དཔེར་ན། མི་ཞིག་བདག་རང་འདམ་རྫབ་ཏུ་ནུབ་ལ། མི་གཞན་དབྱུང་བར་བྱ་བ་དང་མཚུངས་ཏེ། བདེན་པ་ཡོང་མེད་དོ། །མི་ལ་ལ་ཞིག་བདག་གི་དགེ་བར་ཞི་བར་ནུས་ཤིང་འདམ་རྫབ་ན་ཕྱིན་ནུས་པས་མི་གཞན་དབྱུང་བར་བྱ་བ་ནི། བདེན་པ་ཡོད་དོ། །དེ་ལྟ་བས་ན། ཤཱ་རིའི་བུ། ངས་ཁྱོད་ལ་བྱེ་བྲག་ཕྱེད་པར་བསྒོའོ། །ཡང་དག་པར་གཤེགས་པ་ལ་འཕྱ་ཞིང་སྐུར་ན། དེའི་སྡིག་མི་ཡང་ངོ ། །
314a
༄#། །བདེན་པར་སྨྲ་བའི་དགེ་སློང་ནི། ཆོས་འཆད་དུ་གནང་བའི་རིགས་སོ། །རྫུན་མི་ཟེར་བའི་ཚུལ་ཁྲིམས་འཛིན་པའི་དགེ་སློང་གིས་ནི། ཆོས་ཀྱི་སྦྱིན་པ་ནུས་སོ། ། ཤཱ་རིའི་བུ། ཁྲི་སྟན་མཐོན་པོ་ལས་ཆོས་འཆད་ཅིང་ཡང་དག་པར་ངེས་པར་ཐེ་ཚོམ་གཅོད་པ་ནི། ནང་གི་བླ་མའི་དོན་ཡིན་ནོ། །ལ་ལ་ཞིག་ཚུལ་ཁྲིམས་འཛིན་པ་མི་གཙང་ལ། མུར་འདུག་གི་གཞུང་ལ་ཆགས་པ་ནི། ངས་མ་གནང་ངོ ། །རྫུན་ཟེར་བ་དང ། འཇིག་རྟེན་གྱི་སྐྱིད་པ་རིན་ཆེར་འཛིན་པ་དང ། ཡོན་གྱི་ཁེ་ཚོལ་བ་དང ། འཐབ་རྩོད་པ་ལ་སྲེད་པ་ནི། ངས་ཀྱང་མ་གནང་ངོ ། །ངས་གཙང་གདང་བར་ཚུལ་ཁྲིམས་འཛིན་པ་དང ། སེམས་དྲན་དཀོན་པ་དང ། ཆོས་སོ་ཅོག་གི་བདེན་པའི་མཚན་མ་ཁོང་དུ་ཆུད་པ་ནི། ཁྲི་སྟན་མཐོན་པོར་ཆོས་འཆད་དུ་གནང་ངོ ། །ཤཱ་རིའི་བུ། ཚུལ་ཁྲིམས་ཞིག་པའི་དགེ་སློང་ཉིས་ན་ཁྲིམས་བཏང་བླའི། འཕགས་པའི་མཚན་མ་དང ། ཆོས་གོས་སུ་སྡིག་གི་དྲི་མ་སྐྱེས་བཅབས་ལ་གསང་སྟེ། ངན་པ་མང་པོ་བྱ་ཞིང་མི་གཞན་གྱི་ཡིད་ཆེས་པའི་སྦྱིན་པ་ལ་མ་ཆགས་ཤིག་།ཤཱ་རིའི་བུ། རྒྱུ་རྐྱེན་ཆུང་ངུའི་ཕྱིར་ཡུན་རིང་དུ་སེམས་ཅན་དམྱལ་བའི་ལུས་མནོས་པར་འགྱུར་རོ། །ལེའུ་བཅུ་སྟེ། ཐབས་བཅོལ་བའི་ལེའུའོ།། །།དེའི་ཚེ་དགའ་བོས་སངས་རྒྱས་ལ་གསོལ་པ། བཅོམ་ལྡན་འདས། དེ་ཙམ་གྱི་ཚེ་
314b
དུས་ན་དགེ་སློང་རྣམས་ཀྱིས་དགེ་བའི་ཆོས་ལ་ཇི་ལྟ་བུར་བརྩོན་འགྲུས་སྤྱད། སངས་རྒྱས་ཀྱིས་དགའ་བོ་ལ་བཀའ་སྩལ་པ། རེ་ཞིག་ཞོག་ལ་མ་འདྲི་ཞིག་།ཅིའི་ཕྱིར་ཞེ་ན། སངས་རྒྱས་ཀྱིས་དཔག་ཏུ་མེད་པའི་ཡེ་ཤེས་ཆོས་ཡིག་བཤད་དོ་ཅོག་དེ་ཙམ་གྱི་དགེ་སློང་གིས་ཡིད་ཆེས་པར་མི་ནུས་ན། འགྲུས་པར་སྤྱོད་མི་ནུས་པ་ལྟ་སྨོས་ཀྱང་ཅི་དགོས། དགའ་བོ། ཡང་དག་པར་གཤེགས་པའི་བྱ་བ་ཡོད་པའི་ཆོས་ཀྱི་ཤེས་རབ་ཡོད་དོ་ཅོག་རང་སངས་རྒྱས་དང ། དགྲ་བཅོམ་པ་ཐམས་ཅད་ལ་སོགས་པ་གོ་ཞིང་ཤིས་པར་མི་ནུས་སོ། །དགའ་བོ། ཡང་དག་པར་གཤེགས་པས་མཁྱེན་ཏོ་ཅོག་གི་ཆོས་ཁྱོད་ལ་བཤད་དུ་ཟིན་ན་ཁྱོད་བསླད་ཅིང་རྨོངས་སུ་རུང་ན། ཡིད་ཆེས་པར་མི་རུང་བ་ལྟ་སྨོས་ཀྱང་ཅི་དགོས། ཡང་དག་པར་གཤེགས་པས་དེ་ལྟར་དེ་ལྟ་བུའི་ཆོས་ཡིག་བཤད་པ་ནི། དེའི་ཚེ་མི་གཏི་མུག་གིས་ཡིད་ཀྱང་མི་ཆེས་ན། ཡིད་ཆེས་ཤིང་གཏི་མུག་གི་ལན་བཤད་མི་ནུས་པ་ལྟ་སྨོས་ཀྱང་ཅི་དགོས་དགའ་བོ། ཆོས་ཀྱིས་དེ་བཞིན་པའི་རིགས་ཏེ། བདག་གི་ལུས་དང་བ་ཡིན་ན། གཞན་ལའང་ངན་ཞེས་ཟེར་རོ། །ད་ལྟར་གྱི་བར་དུ་ལེ་ལོའི་དགེ་སློང་ལ་དེ་ཙམ་གྱི་ཚེ་རབས་ཀྱི་བར་དུ་བརྩོན་འགྲུས་པའི་དགེ་སློང་གིས་ཐུབ་པར་མི་ནུས་སོ། །ཚུལ་ཁྲིམས་འཛིན་ཏོ་ཅོག་དང ། ཤེས་རབ་བསྐྲུན་དུ་མི་རུང་ངོ ། །ཡང་དག་པར་གཤེགས་པས་མི་དེ་ཉེས་པ་ངན་པ་བྱས་
315a
༄#། །སོ་ཅོག་བཤད་དུ་ཟིན་ན་ལུས་གྱུར་ཅིང་མནོས་སོ་ཅོག་མི་དེས་ཡིད་མི་ཆེས་ཏེ། སྡིག་ལྕི་བ་གཡོ་བར་འགྱུར་རོ། །ཁྱོད་ལ་སོགས་པ་ཡང་འཇིགས་སྐྲག་སྟེ། དེས་ངན་པ་མནོས་སོ་ཅོག་ནི། དཔག་ཏུ་མི་ནུས་སོ། །དགའ་བོ། ཡང་དག་པར་གཤེགས་པས་ཟབ་མོའི་ཆོས་ནོད་པ་ནི། དཀའོ། །ཁྱོད་ཀྱི་ཡིད་ལ་ཇི་སྙམ། ཁྲི་སྟན་བཟང་པོ་ལ་ཕག་གུ་སྲེད་དམ་མི་སྲེད། བཅོམ་ལྡན་འདས། མི་སྲེད་ལགས་སོ། །དགའ་བོ། ངའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆོས་འདི་ཟབ་མོ་དམ་པ་སྟེ། ཤེས་རབ་ཅན་སྲེད་པ་ནི། མི་དེས་ཡིད་ཆེས་ཤིང་ཤེས་ལ་ཁོང་དུ་ཆུབ་པ་མ་ནུས་པས་ཁྱིམ་ནས་བྱུང་ཟིན་པ་དང ། རང་ན་རེ། དགེ་སྦྱོང་ཞེས་ཟེར་ཏེ། བདེན་པ་བཞིན་དུ་བསྟན་བསླབ་པ་ནོད་མ་ནུས་སོ། །ཆོས་འདི་ལ་སེམས་བཅོས་མ་ནུས་སོ། །ཞིབ་མོའི་རོ་མ་ཐོབ་སྟེ་ལག་པ་བརྡབས་ནས་སོང་སྟེ་ལམ་ངན་པར་ལྷུང་ཞིང་འདུག་པ་ནི། དཔེར་ཕག་གུས་ཁྲི་སྟན་བཟང་པོ་བཏང་བ་དང་མཚུངས་སོ། །ཅིའི་ཕྱིར་ཞེ་ན། དགའ་བོ། ངའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཤིན་ཏུ་གཙང་གདང་བ་བསྟན་དཀའ་བས་ཡིད་ཆེས་ཤིང་ཤེས་པར་ནུས་པ་མ་ཡིན་ཏེ། གདུལ་བ་གདབ་དཀའ་བ་དང ། ཤེས་རབ་མེད་པ་དང ། དགང་བར་དཀའ་བ་དང ། གསོ་བར་དཀའ་བ་དང ། ཚུལ་ཁྲིམས་ཞིག་པ་དང ། གདམས་
315b
དཀའ་བ་དང ། ཡོན་པོའི་ཆོས་ལ་ཆགས་པ་དང ། ཡོན་པོའི་སྤྱད་པ་སྤྱོད་པ་དང ། ནོར་གྱི་ཁེ་རིན་ཆེར་འཛིན་པ་དང ། གོས་དང་ཟས་རབ་བོ་སྙམ་དུ་འཛིན་པ་དང ། ཆོ་ག་ཞིག་པ་དང་ཚུལ་ཁྲིམས་ཞིག་པ་དང ། སྤྱི་བོའི་ཆོས་སུ་ལྟུང་བ་དང ། ངན་བཞིག་པ་དང ། ལེ་ལོ་ཅན་དང ། འདོད་རྒྱུ་ཆུང་ངུ་དང ། ཁྲེལ་མེད་པ་ངོ་ཚ་བའི་ཁ་ན་བརྗོད་པ་དང ། མཚོན་ནམ་ལས་ཀྱི་དོན་ལས་འབྲེལ་བ་དང ། དགེ་སྦྱོང་གི་ནང་ན་གོས་སྐྱ་བོ་ཅན་དང ། དགེ་སྦྱོང་གི་ནང་ན་སུན་བྱུང་བ་དང ། དགེ་སྦྱོང་གི་ནང་ན་ཡོན་པོའི་ལམ་སྤྱོད་པ་དང ། དགེ་སྦྱོང་མ་ཡིན་པར་རང་ན་རེ།་དགེ་སྦྱོང་ཡིན་ཞེས་ཟེར་བ་དང ། བདུད་ཀྱིས་མིད་པ་དང ། མུར་འདུག་གི་གཞུང་དང་མཐུན་པ་དང ། བཤད་པ་བཞིན་མི་སྤྱོད་པ་དང ། མང་པོ་འཛིན་པ་ལ་སྲེད་པ་དང ། ཚིག་ཅལ་ཅོལ་ལ་སྲེད་པ་དང ། བདུད་ཀྱི་དོན་ལྡན་པར་སྤྱོད་པ་དང ། བདུད་ཀྱི་རྒྱུ་དཀྲུག་པ་དང ། མྱ་ངན་འཁྲུག་པ་མདོ་རལ་བ་དང ། བདག་ཏུ་ལྟ་བ་དང ། གང་ཟག་ཏུ་ལྟ་བ་དང ། སེམས་ཅན་དུ་ལྟ་བ་དང ། ཕྱིན་ཅི་ལོག་ཅན་གྱིས་ངའི་ཆོས་འདི་ལ་ཡིད་ཆེས་ཤིང་ཤེས་ལ་ཁོང་དུ་ཆུད་པར་ནུས་ཤེ་ན། བདེན་པ་ཡོད་མེད་དོ། །ཅིའི་ཕྱིར་ཞེ་ན། དགའ་བོ། ངའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་གཙང་གདང་བ་སྙིང་ཚིམ་པར་རྒྱ་ཆེ་བས་མི་ངན་པ་འདི་དང་འཚབ་པར་མི་རུང་ངོ ། །དགའ་བོ། དཔེར་ན། བརྒྱ་སྟོང་འབུམ་གྱི་སྟོང་གསུམ་གྱི་སྟོང་ཆེན་པོའི་ཁམས་
316a
༄#། །བར་ཡངས་ཤིང་རིང་བ་དང་མཚུངས་སོ། །ངན་བཞིན་པའི་མི་འདིས་དགེ་སློང་གི་ཆོས་བསྲིངས་པའང་དེ་བཞིན་ནོ། །མི་འགལ་བའི་བཟོད་པ་དང ། མྱ་ངན་ལས་འདས་པ་མི་ཐོབ་པ་ལྟ་སྨོས་ཀྱང་ཅི་དགོས། དགའ་བོ། །དེ་ལྟ་བུའི་དོན་འདི་ནི། བཤད་ཀྱིས་མི་ཟད་དོ། །མ་འོངས་པའི་དུས་ཀྱི་དགེ་སྦྱོང་ངན་བཞིན་པ་ཐ་མ་ཤིན་ཏུ་འཇུད་བརྐམ་སྲེལ་ཏོ། །ཤིན་ཏུ་ཞེ་སྡང་སྲེལ་ཏོ། །ཤིན་ཏུ་ཡིད་མི་ཆེས་པ་སྲེལ་ཏོ། །གདུག་པ་གསུམ་བདོ་བར་སེམས་ལ་སྤྱོད་པ་རྩིང་ཞེ་ནག་པས་བཅོལ་གདུལ་དཀའ་སྟེ། དགའ་བོ། དཔེར་ན། ཞིང་གཤིན་པ་ལེགས་པར་སྨིན་ལ་རང་གི་མེས་བསྲེགས་པ་དང་མཚུངས། ཁ་ཟས་ཞིམ་དཀར་ལ་རང་གིས་དུག་བླུགས་པ་དང་མཚུངས། ཁང་ཁྱིམ་ཅིའང་ཡོད་པ་ལ་རང་གིས་མེས་བསྲེགས་ན། དེ་ལྟ་བུར་རིགས་སམ་མི་རིགས། བཅོམ་ལྡན་འདས། མི་རིགས་སོ། །དགའ་བོ། དེ་ལྟ་སྟེ། མ་འོངས་པའི་དུས་ཀྱི་མི་གཏི་མུག་ངའི་ཆོས་ཀྱི་ཞར་གྱིས་ཡོན་ལེན་པ་ཐོབ་ན། ཡང་དག་པར་གཤེགས་པ་ལེགས་པའི་དོན་ལ་ཡིད་མི་ཆེས་མི་ཤེས་པའི་སྟེང་དུ་འདི་ལྟ་བུ་ལ་སོགས་པའི་ཆོས་ཀྱི་ཡི་གེ་ཡིད་ཆེས་པར་མི་ནུས་སོ། །བདེན་པ་བཞིན་དུ་བཤད་པའི་ཉེས་པར་བཟོད་པར་མནགས་མི་ནུས་སོ། །རྨའི་ཤུ་བ་དང་ཤུས་ན་ངའི་ཚིག་ལ་བཟློག་སྟེ། དེ་ལྟ་བུ་མི་གཏི་མུག་ནི། སངས་
316b
རྒྱས་ལ་བརྟེན་ཅིང་རང་ཚོལ་ཆོས་དེ་ཟློག་གོ། །དགའ་བོ། དེ་ཙམ་གྱི་ཚེ་ན་ཛམྦུའི་གླིང་གི་ནང་ན་དེ་ལྟ་བུའི་མི་གཏི་མུག་གིས་དེ་ན་ལྷག་པོར་གང་ངོ ། །དགའ་བོ། རེ་ཞིག་ཞོག་།དེ་ལྟ་བུའི་མི་གཏི་མུག་ངན་པ་སྐྱེ་བར་འདོད་པ་དང ། རྒ་བར་འདོད་པ་དང ། ངན་པའི་དོན་སྤྱོད་པ་བཙལ་བ་ཅི་དགོས། དེ་ནས་དགའ་བོས་སངས་རྒྱས་ལ་གསོལ་པ། བཅོམ་ལྡན་འདས། ཆོས་ཀྱི་ཡི་གེ་འདི་མིང་ཅི་ཞེས་བགྱི། ཇི་ལྟ་བུ་གུས་པས་གཟུངས་སུ་གཟུང ། སངས་རྒྱས་ཀྱིས་དགའ་བོ་ལ་བཀའ་སྩལ་པ། ཆོས་ཀྱི་ཡི་གེ་འདིའི་མིང་སངས་རྒྱས་མཛོད་ཅེས་བྱའོ།། མིང་བརྩོན་འགྲུས་གཡོ་བ་སྤྱོད་ཅེས་ཀྱང་བྱའོ། །མིང་ཚུལ་ཁྲིམས་ཉམས་ཞིག་པའི་ཁྲིམས་ཐུལ་ཅེས་ཀྱང་བྱའོ། །ཆོས་སོ་ཅོག་ལ་གཏམས་སྩལ་ཅེས་ཀྱང་བྱའོ། །གུས་པར་གཟུངས་སུ་ཟུངས་ཤིག་།དགའ་བོ། མི་ལ་ལ་ཞིག་གིས་ཆོས་ཀྱི་ཡི་གེ་འདི་ཁ་ཏོན་དང ། གཟུངས་སུ་བཟུང་ན་ལེགས་པའི་དོན་ཐོབ་པ་ནི། དཔག་ཏུ་མེད་མུ་མེད་དོ། །ཅིའི་ཕྱིར་ཞེ་ན། ཚུལ་ཁྲིམས་ཞིག་པའི་དགེ་སློང་གིས་ཡིད་ཆེས་ཤིང་ཁ་ཏོན་དང ། བཀླགས་ལ་མི་ལ་བསྟན་པའང་མི་ནུས་ན། དེ་ལ་སེམས་དགའ་གཞའ་བ་མི་ནུས་པ་ལྟ་སྨོས་ཀྱང་ཅི་དགོས། ཅིའི་ཕྱིར་ཞེ་ན། དགའ་བོ།་དཔེར་རྐུན་པོ་ངན་པ་རྒྱལ་པོ་དང ། རྒྱལ་པོ་ཆེན་པོའི་ཐད་དུ་རང་འབྱུང་དུ་མི་སྤོབས་པ་དང་མཚུངས་སོ། །གཞན་གྱི་རྫས་བརྐུས་ན། བདག་རྐུན་པོ་ཡིན་ཞེས་མི་ཟེར་རོ། །དེ་ལྟ་སྟེ།
317a
༄#། །དགའ་བོ། ཚུལ་ཁྲིམས་ཞིག་པའི་དགེ་སློང་གིས་དགེ་སྦྱོང་གི་ཆོས་མ་ཡིན་པར་འབྱོར་གྲུབ་ན། འོན་ཀྱང་བདག་ངན་པ་ཞེས་མི་ཟེར་ན། མི་གཞན་ལ་རང་ན་རེ།་སྡིག་གིས་ཤེས་འཆང་མི་ཕོད་པ་ལྟ་སྨོས་ཀྱང་ཅི་དགོས། དགའ་བོ། འདི་ལྟ་བུའི་ཆོས་ཀྱི་ཡི་གེ་ནི། ཚུལ་ཁྲིམས་ཞིག་པའི་དགེ་སློང་རང་ཐུལ་འཁྲུགས་པར་ནུས་ན། ཁྲེལ་དྲིན་ཡོད་པ་དང ། ཚུལ་ཁྲིམས་འཛིན་པའི་དགེ་སློང་གིས་རང་སྐྱེ་ཞིང་འཕེལ་བ་འཐོབ་བོ། །ཆོས་ཀྱི་ཡི་གེ་འདི་བཤད་པའི་ཚེ་ལྷ་དགུ་ཁྲི་ཀུན་གྱིས་ཆོས་སོ་ཅོག་ལ་ཆོས་ཀྱི་མིག་གཙང་མ་ཐོབ་ནས་བདུད་ངན་པ་དང ། གཉེན་བཤེས་རྣམས་ཀུན་མྱ་ངན་ཆེན་པོ་འཁྲུགས་པ་ནི། དཔེར་ཁུང་ཆེན་པོ་རྣམ་པ་བཅུ་དྲུག་ཏུ་ལྷུང་བ་དང་མཚུངས་ཏེ། སྐད་ཆེར་དུས་ཏེ་སྨྲས་པ། དགེ་སྦྱོང་གཽ་ཏ་མ། ངས་ཤེས་སོ། །ངས་ཚོར་རོ། །ངས་རྟག་པར་ཉིན་མཚན་དུ་སྨོན་པ། སངས་རྒྱས་འདས་པའི་ཕྱི་ན་ཚུལ་ཁྲིམས་འཛིན་པ་བཤིག་སྟེ། ཚུལ་ཁྲིམས་བཤིག་པའང་བསྟངས། དགེ་སློང་ངན་པ་རྣམས་སངས་རྒྱས་ཀྱི་ཆོས་མི་ཤེས་ཤིང་ཁ་ཏོན་དང ། ཀློག་པ་འབའ་ཞིག་ཤེས་པར་བྱའོ། །སངས་རྒྱས་ཀྱི་ཆོས་ལ་བདེན་པའི་སེམས་བཤིག་ལ་ཚིག་གིས་འདི་སངས་རྒྱས་ཀྱི་ཆོས་མ་ཡིན་ཏེ། ཕྱོགས་བཞིའི་གཞུང་མེད་དོ། །ཞེས་བྱའོ། །གཽ་ཏ་མ། ད་ལྟར་ལྷ་དང་མི་དང་ཕལ་མང་པོ་ཀུན་ཚོགས་པའི་ནང་ན་ཆོས་འདི་ལ་སྲུང་བྲན་ཏེ་ངའི་སྨོན་
317b
ལམ་བཀག་གོ་།བདུད་ཀྱིས་བཤད་ཟིན་ནས་མི་དགའ་བའི་མྱ་ངན་འཁྲུག་པ་སྲེལ་ཏེ་ཕྱོད་ཅེས་མི་གནང་ངོ ། །དེ་ནས་བཅོམ་ལྡན་འདས་ཀྱིས་དོན་འདི་གསང་བར་བྱ་བའི་ཕྱིར་ཚིགས་སུ་བཅད་དེ་གསུངས་པ། ངས་སུ་ཆོས་རྣམས་བཤད་དོ་ཅོག་།མཆོག་གི་གཞུང་བཞིན་མི་འགལ་ཏེ། བྱ་བ་ཡོད་པ་མི་སྲ་བ། །དཔེ་རུ་རྨི་ལམ་མཐོང་དང་མཚུངས། །ངས་ད་ཆོས་ཡིག་འདི་བཤད་པ། །མ་འོངས་དོན་ནི་སྤྱད་ཅིང་བསྐྲད། །མཆོག་གི་གཞུང་བཞིན་མི་འགལ་ཏེ། །མྱ་ངན་རྣམས་ཀྱི་ནན་ཏུར་བྱས། །དེ་ཡི་ཚེ་དུས་ངན་པ་ལ། །དགེ་སློང་སེམས་ནི་འཁྲུག་ཅིང་གཡོ། །འཐབ་ཅིང་རྩོད་ཅིང་ཡིད་མི་ཆེས། །མྱ་ངན་འདས་པ་ཐོབ་མི་ནུས། །དགེ་སློང་དང་ནི་གོས་སྐྱ་ཅན། །འཆད་དོ་ཅོག་ལ་མི་མཚུངས་མེད། །དེ་ཚེ་ང་ཡི་ཆོས་འདི་ནི། །ཐ་མལ་ཆོས་དང་ཐ་དད་མེད། །བཤད་ནི་ཁྱིམ་ན་འདུག་ཕྱིར་བཤད། །ཁྱོད་ཀྱིས་ང་ཡི་ཡོད་དཀོན་ཤེས། །ང་ཡི་སངས་རྒྱས་ཆོས་ལས་སུ། །ཐོག་མ་ལམ་གྱི་མཆོག་འབྲས་ཐོབ། །དེ་ནས་དགེ་སློང་ཞིག་ན་རེ། ངས་བཤད་ལམ་དང་མི་མཐུན་ན། །མི་དེ་ང་དང་མཐུན་པ་ཡིན། །ང་ནི་ཡང་དག་ཆོས་མཐོང་བའོ། །ཆོས་མཐོང་དང་ནི་མ་མཐོང་བ། གོས་སྐྱ་ཅན་གྱིར་སྤྱད་པས་སུ། །སོ་སོ་རང་གི་ཆོས་ནང་གི། །དེ་ཡི་འགྲོ་ཞིང་བརྗོད་པ་སྐྱེས། །ལ་ལ་ན་རེ་ཐམས་ཅད་ཡོད། །ལ་ལ་ན་རེ་ཐམས་ཅད་སྟོང ། །དྲང་པོ་ལམ་ལ་མི་གནས་པས། །རང་བཞིན་ངན་པས་ངའི་ཆོས་བཤིག་།ཁྱོད་མི་དེ་ལ་མ་ཉེ་
318a
༄#། །ཞིག་།ང་ལ་འོངས་ཏེ་བསྙེན་པར་རུང ། །ཁྱོད་ལ་ཡང་དག་ཆོས་བཤད་ན། རང་བཞིན་སྨྱུར་ཏེ་ལམ་ཐོབ་བོ། །དེ་ལྟ་བུ་ཡི་སྒྲ་སྐད་རྣམས། །ཉེ་རིང་ཀུན་ཏུ་ཁྱབ་པར་གྲམ། །སེམས་མཐུན་ཞིང་ནི་གྲོགས་ལྡོག་པས། །ངས་སུ་བསྟན་པའི་ཆོས་ཀུན་བཤིག་།དཔེ་རུ་རྐུན་པོ་ངན་པ་རྣམས། །ངན་པ་མཐུན་པ་གྲོགས་སུ་བྱས། །ལོ་གཅིག་འགལ་བ་ཡུལ་ས་དང ། །མཁར་ཡུལ་དང་ནི་གྲོང་ཁྱིམ་བཤིག་།དེ་ཡི་ཚེ་ཡི་དགེ་སློང་རྣམས། །དབྱེ་ཞིང་བསྟན་པ་རུང་ཐོབ་ཀྱང ། །དབང་པོ་རྟུལ་བའི་ཟམ་ཆགས་པས། །ཤེས་རབ་ཉུང་ཞིང་མི་རྟེན་པ། །ཡང་དག་གཤེགས་པ་སྤྱོད་པ་བཞིན། །ཆོས་བཤད་པ་ཡང་མི་ཤེས་ཏེ། །ཟག་པ་མེད་པ་གར་སྐྱེ་བཤད། །ཡང་ན་དེ་ནི་ལམ་ཐོབ་ཡིན། །མང་པོ་ཚོགས་པའི་ནང་དུ་འདུག་།དགེ་སློང་རྣམས་ནི་མང་དུ་ཡོད། །ཀུན་ན་རེ་ནི་ཤེས་རབ་ཡོད། །ཤེས་རབ་ཚོལ་བ་མི་གཅིག་མེད། །མང་པོ་ཚོགས་པ་དེ་ནང་ན། །དགེ་སློང་ལ་ལ་གཅིག་འགའ་ཞིག་།ཡང་དག་བདེན་པ་ཤེས་པ་ཡོད། །ཀུན་གྱིས་སྤྱོད་དེ་ཤེས་རབ་མེད། །ལྷ་དང་ལྷ་མ་སྲིན་གྱིས་མཐོང ། །ཆོས་ཀྱི་རྒྱལ་པོའི་ལམ་ཁྱེ་ཞིག། ཐམས་ཅད་མྱ་ངན་འཁྲུག་པ་སྲེལ། །གཅིག་ལ་གཅིག་ཕྱོགས་མཆི་མས་ངུ ། །དེ་ནང་ཤིང་ལྷ་ཡོད་པ་ཀུན། །ཤིང་གི་ཁ་ལས་ས་ལས་བབས། །ཀུན་ཀྱང་ཤཱཀྱ་སེངྒེ་ཡི། །དམ་པའི་ཆོས་ནི་མཐའ་ཀུན་མེད། །
318b
སངས་རྒྱས་ལ་སོགས་དཀོན་མཆོག་གསུམ། །འཇིག་རྟེན་ཡུན་རིང་མ་ལོན་པར། །ཇི་ལྟ་བུར་ནི་དེ་རིང་ཀུན། །ཟད་པ་ཐམས་ཅད་གྱེས་ཤིང་ཞིག་།ཡང་དག་གཤེགས་པ་ཆོས་བཤད་པ། །ང་ལ་སོགས་པ་སླར་མི་ཐོས། །བླུན་རྨོངས་མེད་པས་ཤེས་པས་སུ། །བླ་མ་ལམ་ནི་མེད་སྙམ་སྟེ། །དེ་ཚེ་ས་ཡི་ལྷ་རྣམས་དང ། །སྒྲ་སྐད་ཆེན་པོ་ཕྱུང་ནས་སུ། །ཡང་དག་གཤེགས་ཀྱི་ཆོས་སྒྲོན་ཆེན། །དེ་ནི་མི་དེ་ཟད་ཅེས་ཟེར། །ལྷ་དང་ལྷ་མ་སྲིན་གྱི་རྣམས། །མ་མཐོང་མ་ཐོས་རྗེས་སུ་འཛེར། །ཕྱིན་ཆད་འགྱོད་པ་མ་བྱེད་ཅིག་།སངས་རྒྱས་ལམ་ནི་མེད་ཟིན་པ། ། སངས་རྒྱས་བསྐལ་པ་གྲངས་མེད་དུ། །བདག་ཀྱང་གསོད་ལ་གཞན་ཡང་གསོད། །སྡུག་བསྔལ་ཐམས་ཅད་བཟོད་པར་མནོས། །སངས་རྒྱས་གྲུབ་པས་སྨོན་ལམ་བསྐྱོད། །ཤཱཀྱ་སེངྒེ་འཕྲུལ་ཅན་གྱིས། །སེམས་ཅན་ཐམས་ཅད་ཀུན་བསྒྲལ་བ། །གཙང་གདང་ཆོས་མེད་ཟད་དུ་བྱེད། །གཏི་མུག་ངན་པའི་དགྲ་རྣམས་ཀུན། །དེ་ནི་དེ་ཡི་མཐུ་ཐོབ་སྟེ། །བྱམས་ཤིང་སྙིང་རྗེའི་སེམས་མེད་པས། །གཅིག་གིས་གཅིག་ལ་སྐུར་ཅིང་དཀྲུགས། །བདུད་ཀྱིས་བཀོལ་བའི་བདུད་མི་རྣམས། །དབང་པོ་རྟུལ་བས་དབྱེ་ཆོས་དཀའ། །གཅམ་སྒྱུ་མི་དྲིན་ལེ་ལོའི་སེམས། །ཞེ་སྡང་སངས་རྒྱས་ཆོས་ཀྱང་བཤིག་།ཚལ་ནག་སྟོང་པ་འབའ་ཞིག་ལ། །བསམ་གཏན་ཐུབ་སྟེ་གསུམ་ལེན་ན། །རང་ན་དེ་ནི་དགྲ་བཅོམ་ཡིན། །བསམ་གཏན་ཐུབ་པ་ཡོད་
319a
༄#། །མེད་ན། །ལམ་ཐོབ་པ་ལྟ་སྨོས་ཅི་དགོས། །ལམ་མཐོང་ཐོབ་ཅེས་བྱ་བ་ནི། །ཤི་ན་མྱ་ངན་འདས་ཞེས་ཟེར། །མི་ཀུན་ཡིད་ཆེས་མཆོད་རྟེན་བརྩིགས། །སེམས་ཅན་དམྱལ་བར་སོང་ཞེས་ཟེར། །དེ་ལྟའི་གཏི་མུག་སྟོང་པ་འགས། །གཅིག་ལ་གཅིག་ནི་བརྙས་ཤིང་ཁྲོ། །ངས་སུ་བསྐལ་པ་གྲངས་མེད་དུ། །ཐོབ་བོ་ཅོག་ནི་ད་ཟད་ཀྱི། །ད་ལྟར་ནམ་མཁའི་ལྷ་རྣམས་ཀྱིས། །ཤཱཀྱའི་རིགས་ཀྱི་སེངྒེ་མཐོང ། །དམ་པའི་ཆོས་ནི་ཉམས་ཤིང་ཞིག་།སྒྲ་བསྐྱོད་ཀུན་གྱིས་མཆི་མས་ངུ ། །ངོས་བཞི་ལྷ་རྗེས་དེ་ཐོས་ན། ཀུན་ཀྱང་མྱ་ངན་འཁྲུག་པ་སྲེལ། །དེ་ཚེ་ལྷ་དང་ལྷ་མ་སྲིན། །ཐམས་ཅད་ཀྱང་ནི་འོངས་ཏེ་བབས། །ཡང་དག་པ་ན་མཁར་གནས་སུ། །འབར་བའི་ལྷ་སྲིན་ཀུན་འོངས་ཏེ། །ཀུན་གྱིས་མ་ཆི་མས་ཆེར་དུས་ཏེ། འཇིགས་སུ་རུང་བའི་སྒྲ་སྐད་ཕྱུང ། །རིན་ཆེན་བདུན་གྱི་མཁར་རྣམས་ཡོད། །བྱི་དོར་བརྒྱན་པ་ཤིན་ཏུ་བཟང ། །ཁ་དོག་སྟོར་ཏེ་ས་དང་མཚུངས། །ལྷ་རྣམས་འཁོར་བར་མ་དད་ནས། །མི་དགའ་ཆོ་ངེ་ཆེ་རུ་ངུས། །རང་གི་གནས་ནས་ཀུན་འོངས་འདུས། །སོ་སོ་མྱ་ངན་འཁྲུག་པ་སྲེལ། །གཅིག་གིས་གཅིག་མཐོང་སྨྲ་མི་ཕོད། །ཀུན་གྱི་གནས་ཀྱི་སྟེང་ནས་འོངས།། ལྷན་ཅིག་ང་སྐྱེ་གནས་སུ་ཕྱིན། །འགྲེ་ལྡོགས་ལ་ཉལ་འདུག་གནས། །འདི་སྐད་ཀྱི་ནི་སྒྲ་དབྱངས་བསྐྱོད། །ལྷན་ཅིག་ཛམྦུའི་གླིང་དུ་དོང ། །དེ་ལྟའི་འཇིགས་སྐྲག་ཆེན་པོ་མཐོང ། །
319b
སངས་རྒྱས་བུ་རྣམས་འཐབ་ཅིང་རྩོད། །ཆོས་བཤིག་སྡེ་ནི་སོ་སོར་གྱེས། །ལྷ་སྲིན་དང་ནི་རིན་ཆེན་མཁར། །ཞག་བདུན་བར་དུ་འོད་མདངས་མེད། །སོ་སོ་ལྷན་ཅིག་འཁོད་ཅིང་ངུ ། ། ཞག་བདུན་བར་དུ་མ་ལངས་སོ། །ཇི་ལྟ་བུ་ནི་བརྩོན་འགྲུས་ཆེ། །དཔའ་ཞིང་རྟུལ་ལ་འཇིག་རྟེན་བཙུན། །བདག་ཅག་ད་ལྟར་འདི་ན་འཁོད། །ད་ཕྱིན་ཆད་ནི་མི་མཐོང་ངོ ། །ཀུན་འགྲོགས་ཏེ་ནི་གྱི་ཧཝན་དོང ། །གཅིག་ལ་གཅིག་ཕྱོགས་ཕྱི་མས་དུ། །སངས་རྒྱས་འདི་རུ་བདེན་བཞིན་བཤད། །བདག་ཅག་རྣམས་ནི་དེ་ནང་ན། །འཇིག་རྟེན་མུན་པའི་ལོང་བ་རྣམས། །གཅིག་ལ་གཅིག་ནི་བརྙས་ཁྲོ་ལྷོད། །ངན་པའི་ལས་རྣམས་འབའ་ཞིག་བསྐྱོད། །སླར་ཡང་ལམ་ངན་པ་རུ་ལྷུང ། །ལྷ་རྣམས་ཕོ་བྲང་བཟང་པོ་ཀུན། །འཕགས་པ་དེ་ནི་སྟོངས་སུ་བྱེད། །བདག་ཅག་ལྷ་དང་ལྷ་མ་སྲིན། །བསྒྲལ་བའི་ར་མདའ་ཡང་མེད་དོ། །དེ་མ་\?\་ཚེ་ནི་ཛམྦུའི་གླིང ། །ཉམས་ཤིང་ཞིག་ལ་བརྗིད་མདངས་མེད། །བགྲོད་པའི་མདངས་དང་ཤིང་དྲུང་དང ། །རི་དང་ཕུག་ན་དགེ་མི་བྱེད། །འཇིག་རྟེན་ཐམས་ཅད་ཟད་པར་ན། །ཀུན་ཀྱང་ཤིན་ཏུ་དཀྲུགས་ཤིང་གཡོ། །ལྷ་དང་ལྷ་མིན་དབང་པོ་རྣམས། །སྒྲ་སྐད་འཇིགས་ཤིང་སྐྲག་ཏུ་རུང ། །དེ་ཚེ་སུམ་ཅུ་རྩ་གསུམ་ལྷ། །ལྷག་བསྒྲེང་བཞིན་དུ་མི་དགའ་ངུ ། །སོ་སོའི་ཕོ་བྲང་ན་ང་ན་ཡང ། །སྐད་ཕྱུང་བསྐྱོད་དེ་ངུ་ཞིང་འབོད། །ལྷ་རྣམས་ཀྱི་ནི་ཕོ་བྲང་ན། །བདག་བདག་བརྗོད་ཅིང་
320a
༄#། །བཤད་པ་དེ། །གཞའ་རུ་འཕྲུལ་ཆེན་རྗེ་དང་བྲལ། །བདག་ཅག་ཕྱི་རུ་ཆོས་བཤད་པ། །རྩ་གསུམ་ལྷ་རྣམས་ཟླ་དྲུག་ཏུ། །རྩེའུ་དེའི་ཁ་ཟས་མི་ཟ་ཞིང ། །སིལ་གྱི་དབྱངས་ནི་མི་སྙན་ཏེ། །མི་དགའ་མི་ངན་ཤི་བ་བཞིན། །ལྷ་མ་ཡིན་པ་ཐམས་ཅད་ཀྱིས། །དེ་ལྟ་བུ་ཡི་གཏམ་ཐོས་ནས། །གཅིག་གིས་གཅིག་བྲན་ཀུན་བསགས་ཏེ། །རྩ་གསུམ་ལྷ་ལ་རྒོལ་དུ་ཆས། །དེ་ཚེ་འཛམ་གླིང་རྒྱལ་པོ་དག་།ཕན་ཚུན་འཐབ་ཅིང་རྩོད་པར་འགྱུར། །ལྷ་རྣམས་དང་ནི་ལྷ་མིན་ཀྱང ། །དེ་བཞིན་ཕན་ཚུན་འཐབ་ཅིང་རྩོད། །དེའི་ཚེ་དགེ་སློང་དགེ་སློང་མ། །ལས་སུ་ལམ་ངན་ལྷུང་བ་མང ། །དེ་ལས་ཐར་པར་ཉུང་དུ་ཡོད། །ཚུལ་ཁྲིམས་བཤིག་པའི་སེམས་ཅན་རྣམས། །དགེ་སློང་ངན་པ་བཞིན་དུ་འབྲང ། །དེ་ཡི་རྒྱུ་རྐྱེན་སྤྱད་པས་ན། །ཀུན་ཀྱང་ལམ་ངན་པ་ལ་ཕྱོགས། །དགེ་བསྙེན་ངན་པ་རྣམས་ཀུན་ཀྱང ། །མཁན་པོ་ངན་པའི་ཕྱིར་འབྲངས་པས། །དེ་ཡང་ལམ་ངན་པ་རུ་སོང ། །འཇིག་རྟེན་ཐམས་ཅད་འཁྲུགས་གཡོས་པས། །ལ་ལ་མཁར་དང་གྲོང་དུ་ཞུགས། །ལ་ལ་རི་དང་ཚལ་དུ་ཕྱིན། །ཤར་ནུབ་ཏུ་ནི་མྱ་ངན་སྲེལ། །དེ་ཡི་ཚེ་དང་སྲོག་ལ་གནོད། །དེ་ཡི་ཚེ་ནི་དགྲ་དག་དང་།། བག་ཚའི་ལམ་ནི་རྣམ་མང་ཡོད། །ཁྲེ་ནས་རྣམ་ལྔ་བསྐྱེད་མི་འཁྲུངས། །འཁྲུངས་སུ་ཟིན་ཀྱང་སྲིན་གྱིས་ཟ། །དེ་ཡི་ཚེ་ནི་འཇིག་རྟེན་རྣམས། །བཀྲེས་པས་ལྟོགས་ཏེ་ཤི་བ་མང ། །ཡི་
320b
དྭགས་ངན་དུ་ལྷུང་བ་རྣམས། །ཡུན་དུ་སྡུག་བསྔལ་ཉོན་ཡང་མོངས། །དེ་ཡི་ཚེ་ན་མི་རྣམས་ཀྱིས། །སངས་རྒྱས་ཀྱི་ནི་མཆོད་རྟེན་དང ། །ཕྱོགས་བཞི་དགེ་འདུན་སྦྱིན་པའི་ནོར། །ཐུགས་ཐུབ་ཏུ་ནི་ཀུན་བགོས་ཟ། །ང་ནི་དགེ་འདུན་དེ་བཞིན་ནོ། །དགའ་བོ་ཁྱོད་ལ་སོགས་པ་རྣམས། །ནུབ་སྟེ་བྱུང་ལ་བརྩོན་འགྲུས་སྤྱོད། །ཕྱི་མའི་ཚེ་དུས་ཟད་པ་ན། །དེ་ལྟ་བུ་ཡི་ཆོས་ངན་རྣམས།། མཐོང་བར་བྱ་བ་མི་རིགས་སོ། །ཐ་མལ་པ་ནི་ཐམས་ཅད་ཀུན། །གཏི་མུག་བླུན་པོ་ཤེས་རབ་མེད། །ཐ་མལ་པ་ཡི་ལས་རྣམས་སྤྱོད། །སྨྱུར་ཏེ་ལམ་ངན་ངན་དུ་ལྷུང ། །ཁྱེད་རྣམས་འཁྲུག་པར་ཁ་ཏོན་ལྷོགས། །དེ་ཡི་མིག་ནི་ཤེས་རབ་རྒྱུ། །ཤེས་རབ་ཀྱི་ནི་ཡོན་གྱིས་སུ། །སྨྱུར་ཏེ་རྒྱལ་བའི་གནས་སུ་ཕྱིན། །ངས་སུ་འཇིག་རྟེན་དྲུག་པོ་མཐོང་བསླབ་པ། །ཁྱེད་རྣམས་ཀྱང་ནི་ང་བཞིན་བསླབ། །འཇིག་རྟེན་བསྒྲིབས་དཔག་དོན་བཅད་ན། །སྨྱུར་ཏེ་རྒྱལ་བའི་གནས་སུ་ཕྱིན། །འཕགས་པའི་ལམ་བརྒྱད་འགྲུས་སྤྱད་ན། །སྨྱུར་ཏེ་མྱ་ངན་འདས་པ་ཐོབ། །ཆོས་བཙལ་བདག་གིས་བསོད་ནམས་བཙལ། །ངས་བཤད་ཅོག་ནི་དེ་བཞིན་ནོ། །བསྐལ་པ་འདི་ནི་འདས་ཕྱིན། །བསྐལ་པ་དྲུག་ཅུར་སངས་རྒྱས་མེད། །སངས་རྒྱས་སྒྲ་དང་སྐད་ཀྱང་མེད། །ལམ་ཐོབ་མེད་པ་སྨོས་ཅི་དགོས། །དེ་ཚེ་དུས་ཀྱི་མི་རྣམས་ཀུན། །བཀྲེས་ལྟོགས་བྲུ་བས་ཉེན་པས་སུ། །སྲི་ཞུ་བྱམས་པ་སེམས་མེད་དེ། །མ་དང་བུ་ཡི་ཤ་ཡང་ཟ། །དེ་ཚེ་ཁྱིམ་གྱི་བྱིས་
321a
༄#། །པ་རྣམས། །གཞན་གྱིས་ཟོས་དོགས་རིམ་གྲོ་རྟག་།དེ་ལྟ་བུ་ཡི་དུས་ངན་ཐོས། །སུ་ཞིག་སྐྱེ་ཤི་ལས་ཀྱང་བསྐྱེད། །སྡུག་བསྔལ་ཕྱི་མོ་གཏི་མུག་ཡིན། །ལྔ་ཕུང་ཕྱི་མོ་འདོད་ཆགས་ཡིན། །འདོད་ཆགས་ལྔ་ལ་མ་དད་ན། །འདོད་ཅིང་ཆགས་པ་རྣམས་ཀུན་ཆོད། །དཔལ་གྱི་འབྲས་བུ་ལམ་ཐོབ་སྟེ། །འདོད་ཅིང་ཆགས་པའི་སེམས་ཟབ་སྐྱེས། ། འདོད་ཆགས་ཀྱི་ནི་རྒྱུ་རྐྱེན་གྱིས། །ངན་པ་གཡོས་པས་ལམ་ངན་ལྷུང ། །ཟག་མེད་ཆོས་ནི་སྟོང་པ་ཞི། །འཇིག་རྟེན་སྲ་མཁྲང་མེད་པར་འགྱུར། །དེ་ལྟ་བུ་ནི་ཤེས་རིག་ན། །ཁྱེད་ལ་སོགས་པས་སྨྱུར་སྤྱོད་རིགས། །སེམས་མེད་སེམས་ཀྱི་འདུ་ཤེས་སྐྱེས། །བདག་ཉིད་ཤིན་ཏུ་འཇིགས་ཤིང་སྐྲག་།བདག་གིས་བྱམས་བསམ་མ་བྱས་པ། །དེ་ཡི་དོན་ནི་ཇི་ལྟ་བུ། ། དེ་ལྟ་བུ་ཡི་ཐ་མལ་རྣམས། །བསམ་ཞིང་མནོས་ཏེ་བགྲོས་དཔག་ན། །བདག་གིས་ཇི་ལྟ་བུ་རུ་བྱས། །དེ་བཞིན་རྟག་པར་མཆི་མས་ངུ ། །ཕུང་མེད་ཕུང་པོའི་འདུ་ཤེས་སྐྱེས། ང་མེད་ང་ཡི་འདུ་ཤེས་སྐྱེས། །ཉིད་ཀྱི་མཚན་མའི་སྟོང་ཆོས་ཐོས། །དེ་ལྟ་བུས་ཀྱང་བསླབ་ཅིང་རྨོངས། །སངས་རྒྱས་ཀྱིས་སུ་བདེན་བཤད་པ། །ཕུང་པོ་རྣམས་ཀྱི་གཞུང་མ་རིག་།ཐོས་ན་མི་འགྱུར་སྙམ་དུ་འཛིན། །འཇིགས་པའི་གནས་འཇིགས་སེམས་པ་མེད། །ངས་འདས་མ་འོངས་ད་ལྟར་བཤད། །ཕུང་པོ་རྣམས་ནི་ཀུན་སྟོང་ཞིང ། །དུས་གསུམ་ཟད་པར་མཉམ་སྙོམ་
321b
ཏེ། །དཔེ་རུ་ནམ་མཁའ་སྟོང་པ་བཞིན། །འདས་པའི་སངས་རྒྱས་ཡོད་དོ་ཅོག་།དེས་ཀྱང་ཉིན་མཚན་སྟོང་པར་བཤད། །མ་འོངས་དུས་ཀྱི་སངས་རྒྱས་རྣམས། །དེས་ཀྱང་ཉིན་མཚན་སྟོང་པར་བཤད། །ང་འདྲ་འཇིག་རྟེན་མངོན་པར་འབྱུང ། །ཆོས་རྣམས་ཐམས་ཅད་ཀུན་བཤད་ཀྱང ། །ངོ་བོ་ཉིད་དང་མཚན་ཉིད་སྟོང ། །དུས་གསུམ་ལ་ནི་མི་མཚུངས་པ། །སངས་རྒྱས་བདེན་གཞུང་བཤད་དོ་ཅོག་།མ་འོངས་མིས་ནི་མི་ཤེས་ཏེ། །ང་དང་སེམས་ཅན་ལ་ཆགས་པས། །མཐའ་རུ་ངན་པའི་ལམ་དུ་ལྷུང ། །མ་འོངས་དུས་ནི་དེ་བཞིན་ཏེ། །ངན་ཆེན་ཤིན་ཏུ་འཇིགས་སྐྲག་རུང ། །ཁྱོད་ལ་སོགས་པ་བརྩོན་འགྲུས་སྤྱོད། །དེ་ལྟའི་དུས་ངན་མ་མཐོང་བྱོས། །སངས་རྒྱས་ཀྱི་ཆོས་ཀྱི་ཡི་གེ་འདི་བཤད་ཟིན་ནས་རྒན་ཞིང་བཙུན་པ་ཤཱ་རིའི་བུ་དང ། དགེ་སློང་དང ། དགེ་སློང་མ་རྣམས་དང ། འཇིག་རྟེན་གྱི་ལྷ་དང ། མི་མང་པོ་ཐམས་ཅད་ཀྱིས་སངས་རྒྱས་ཀྱིས་བཤད་དོ་ཅོག་ཐོས་ནས་ཀུན་ཤིན་ཏུ་དགའ་གཞའ་སྟེ་སངས་རྒྱས་ཀྱི་བཤད་པ་ལ་ཡིད་ཆེས་པར་མནོས་སོ། །སངས་རྒྱས་ཀྱིས་བཤད་པ་སངས་རྒྱས་ཀྱི་མཛོད་རྫོགས་སོ།། །།ཤློ་ཀ་སྟོང་ཉིས་བརྒྱ་སྟེ། བམ་པོ་བཞིར་བྱས་སོ།