rKTs


H119

(e-text produced by ACIP)

see text in transliteration
314b
།།རྒྱ་གར་སྐད་དུ། ཨཱརྱ་ཀ་རཎྜ་བྱཱུ་ཧ་ནཱ་མ་མྷཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཟ་མ་ཏོག་བཀོད་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་པ་ལ་ཟས་སྦྱིན་པའི་ཀུན་དགའ་ར་བ་ན་དགེ་སློང་བརྒྱ་ཕྲག་ཕྱེད་དང་བཅུ་གསུམ་གྱི་དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་རྣམས་དང་ཡང་ཐབས་གཅིག་པ་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་བློ་གྲོས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་མཐོང་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྡེ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་གསང་སྦེད་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་སྙིང་པོ་དང ། བྱང་ཆུབ་སེམས་དཔའ་སེམས་
315a
༄#། །དཔའ་ཆེན་པོ་བརྩོན་འགྲུས་མི་གཏོང་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རིན་པོ་ཆེ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་དཔའ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་སྡེ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྒྱ་མཚོ་མཆིང་རྣམ་བློ་གྲོས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཛིན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྤྱན་མཆོག་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དབུགས་ཕྱིན་པའི་ལག་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང ། དེ་ལྟ་བུ་དག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་རྣམས་ཀྱང་ཚོགས་སོ། །གཞན་ཡང་དབང་ཕྱུག་དང ། མཐུ་བོ་ཆེ་ལ་སོགས་པ་ལྷའི་སྡེ་སུམ་ཅུ་རྩ་གཉིས་ཀྱི་ལྷའི་སྲས་པོ་རྣམས་ཀྱང་ཚོགས་སོ། །གཞན་
315b
ཡང་ལྷའི་སྡེ་སུམ་ཅུ་རྩ་གསུམ་གྱི་ལྷའི་བུ་རྣམས་ཚོགས་ཏེ། ལྷའི་བུ་དབང་ཕྱུག་ཆེན་པོ་དང ། ཉི་མ་དང ། ཟླ་བ་དང ། རླུང་གི་ལྷ་དང ། ཆུའི་ལྷ་ལ་སོགས་པ་ལྷའི་བུ་དེ་དག་ཚོགས་པ་དང་ལྷན་ཅིག་ཏུ་བརྒྱ་བྱིན་ལྷའི་དབང་པོ་དང ། ཚངས་པ་མི་མཇེད་ཀྱི་བདག་པོ་དག་ཀྱང་ཚོགས་སོ། །འཁོར་དེ་ན་ཀླུའི་རྒྱལ་པོ་བརྒྱ་སྟོང་དུ་མ་ཚོགས་པ་རྣམས་འདི་ལྟ་སྟེ། ཀླུའི་རྒྱལ་པོ་ཨུཏྤ་ལ་དང ། ཀླུའི་རྒྱལ་པོ་ཤིང་ཨེ་ལའི་ལོ་མ་ཅན་དང ། ཀླུའི་རྒྱལ་པོ་ཉ་ཟན་དང ། ཀླུའི་རྒྱལ་པོ་བ་ལང་གི་བདག་པོ་དང ། ཀླུའི་རྒྱལ་པོ་མགོ་བརྒྱ་པ་དང ། ཀླུའི་རྒྱལ་པོ་ཧུ་ལུ་ཏ་དང ། ཀླུའི་རྒྱལ་པོ་འཇོག་པོ་དང ། ཀླུའི་རྒྱལ་པོ་གླང་མགོ་དང ། ཀླུའི་རྒྱལ་པོ་རི་དྭགས་མགོ་དང ། ཀླུའི་རྒྱལ་པོ་དགའ་བོ་དང ། ཀླུའི་རྒྱལ་པོ་བསྙེན་དགའ་བོ་དང ། ཀླུའི་རྒྱལ་པོ་བད་སའི་རིགས་ཀྱི་བུ་དང ། ཀླུའི་རྒྱལ་པོ་མ་དྲོས་པ་དང ། ཀླུའི་རྒྱལ་པོ་རྒྱ་མཚོ་མཆིང་རྣམ་དང ། དེ་ལྟ་བུ་དག་ལ་སོགས་པ་ཀླུའི་རྒྱལ་པོ་བརྒྱ་སྟོང་དུ་མ་དག་ཀྱང་ཚོགས་སོ། །དྲི་ཟའི་རྒྱལ་པོ་བརྒྱ་སྟོང་དུ་མ་དག་ཀྱང་ཚོགས་པ་འདི་ལྟ་སྟེ། དྲི་ཟའི་རྒྱལ་པོ་རྔའི་དབྱངས་ཀྱི་རྒྱལ་པོ་དང ། དྲི་ཟའི་རྒྱལ་པོ་ཡིད་དུ་འོང་བའི་དབྱངས་དང ། དྲི་ཟའི་རྒྱལ་པོ་ལག་པ་སྟོང་བ་དང ། དྲི་ཟའི་རྒྱལ་པོ་བློ་གྲོས་ཆེན་པོ་དང ། དྲི་ཟའི་རྒྱལ་པོ་ལུས་སིམ་པར་བྱེད་པ་དང ། དྲི་ཟའི་རྒྱལ་པོ་སིལ་སྙན་སྒྲ་བསྒྲགས་དང ། དྲི་ཟའི་རྒྱལ་པོ་རྒྱན་གྱིས་བརྒྱན་པ་དང ། དྲི་
316a
༄#། །ཟའི་རྒྱལ་པོ་གཞོན་ནུར་སྣང་བ་དང ། དྲི་ཟའི་རྒྱལ་པོ་ལག་པ་བཟང་པོ་དང་ལྡན་པ་དང ། དྲི་ཟའི་རྒྱལ་པོ་ཆོས་དགའ་དང ། དེ་ལྟ་བུ་ལ་སོགས་པ་དྲི་ཟའི་རྒྱལ་པོ་བརྒྱ་སྟོང་དུ་མ་དག་ཚོགས་སོ། །འཁོར་དེར་མིའམ་ཅི་བརྒྱ་སྟོང་དུ་མ་ཚོགས་པ་འདི་ལྟ་སྟེ། མིའམ་ཅིའི་རྒྱལ་པོ་བཞིན་བཟང ། མིའམ་ཅིའི་རྒྱལ་པོ་ཅོད་པན་ཅན་དང ། མིའམ་ཅིའི་རྒྱལ་པོ་ས་རིའི་བཞིན་དང ། མིའམ་ཅིའི་རྒྱལ་པོ་རབ་ཏུ་དགའ་བྱས་དང ། མིའམ་ཅིའི་རྒྱལ་པོ་འཁོར་ལོ་བཀོད་པ་དང ། མིའམ་ཅིའི་རྒྱལ་པོ་མེ་ཏོག་གཏོར་བ་དང ། མིའམ་ཅིའི་རྒྱལ་པོ་ནོར་བུ་དང ། མིའམ་ཅིའི་རྒྱལ་པོ་གསུས་ཤོལ་དང ། མིའམ་ཅིའི་རྒྱལ་པོ་བརྩོན་འགྲུས་བརྟན་པ་དང ། མིའམ་ཅིའི་རྒྱལ་པོ་ཤིན་ཏུ་འཐད་པ་དང ། མིའམ་ཅིའི་རྒྱལ་པོ་བཞིན་བརྒྱ་བ་དང ། མིའམ་ཅིའི་རྒྱལ་པོ་ཤིང་རློན་དང ། དེ་ལྟ་བུ་ལ་སོགས་པ་མིའམ་ཅིའི་རྒྱལ་པོ་བརྒྱ་སྟོང་དུ་མ་དག་ཚོགས་སོ། །ལྷའི་བུ་མོ་བརྒྱ་སྟོང་ཕྲག་དུ་མ་དག་ཚོགས་པ་འདི་ལྟ་སྟེ། ལྷའི་བུ་མོ་ཏི་ལ་མཆོག་ཅེས་བྱ་བ་དང ། ལྷའི་བུ་མོ་ཤིན་ཏུ་བཀོད་པ་ཞེས་བྱ་བ་དང ། ལྷའི་བུ་མོ་གསེར་གྱི་སྐ་རགས་ཞེས་བྱ་བ་དང ། ལྷའི་བུ་མོ་རྒྱན་པ་ཞེས་བྱ་བ་དང ། ལྷའི་བུ་མོ་གདོས་འཛིན་ཅེས་བྱ་བ་དང ། ལྷའི་བུ་མོ་བདུད་རྩིའི་ཐིགས་པ་ཞེས་བྱ་བ་དང ། ལྷའི་བུ་མོ་ལུས་ཡོངས་སུ་མཛེས་པ་ཞེས་བྱ་བ་དང ། ལྷའི་བུ་མོ་
316b
ནོར་བུའི་འོད་ཅེས་བྱ་བ་དང ། ལྷའི་བུ་མོ་གཙུག་ཕུད་ཅན་ཞེས་བྱ་བ་དང ། ལྷའི་བུ་མོ་ལྷའི་བཞིན་སྟོན་པ་ཞེས་བྱ་བ་དང ། ལྷའི་བུ་མོ་སིལ་སྙན་ལྔ་མངོན་པ་ཞེས་བྱ་བ་དང ། ལྷའི་བུ་མོ་དགའ་བར་བྱེད་པ་ཞེས་བྱ་བ་དང ། ལྷའི་བུ་མོ་གསེར་གྱི་ཕྲེང་བ་ཞེས་བྱ་བ་དང ། ལྷའི་བུ་མོ་མེ་ཏོག་ཨུཏྤ་ལ་སྔོན་པོ་ཞེས་བྱ་བ་དང ། ལྷའི་བུ་མོ་ཆོས་མངོན་པ་ཞེས་བྱ་བ་དང ། ལྷའི་བུ་མོ་ཤིན་ཏུ་རོལ་བ་ཞེས་བྱ་བ་དང ། ལྷའི་བུ་མོ་མ་ལུས་འབྱུང་གནས་ཞེས་བྱ་བ་དང ། ལྷའི་བུ་མོ་ཤིན་ཏུ་བཀོད་པའི་བློ་གྲོས་ཞེས་བྱ་བ་དང ། ལྷའི་བུ་མོ་དཔུང་རྒྱན་འཛིན་པ་ཞེས་བྱ་བ་དང ། ལྷའི་བུ་མོ་སྦྱིན་པ་སྦྱིན་བྱེད་ཅེས་བྱ་བ་དང ། ལྷའི་བུ་མོ་ཟླ་བ་ཅན་དང ། དེ་ལྟ་བུ་ལ་སོགས་པ་ལྷའི་བུ་མོ་བརྒྱ་ཕྲག་དུ་མ་དག་ཚོགས་སོ། །ཀླུའི་བུ་མོ་བརྒྱ་ཕྲག་དུ་མ་དག་ཀྱང་ཚོགས་པ་འདི་ལྟ་སྟེ། ཀླུའི་བུ་མོ་རྒྱན་འཛིན་ཅེས་བྱ་བ་དང ། ཀླུའི་བུ་མོ་པུ་ལིང་ད་ཞེས་བྱ་བ་དང ། ཀླུའི་བུ་མོ་རལ་པ་གསུམ་པ་ཞེས་བྱ་བ་དང ། ཀླུའི་བུ་མོ་ས་རིའི་བཞིན་ཞེས་བྱ་བ་དང ། ཀླུའི་བུ་མོ་རྒྱལ་བའི་དཔལ་ཞེས་བྱ་བ་དང ། ཀླུའི་བུ་མོ་གློག་གི་མིག་ཅེས་བྱ་བ་དང ། ཀླུའི་བུ་མོ་གློག་འོད་ཅེས་བྱ་བ་དང ། ཀླུའི་བུ་མོ་ས་རི་ཞེས་བྱ་བ་དང ། ཀླུའི་བུ་མོ་གཡོག་བརྒྱ་པ་ཞེས་བྱ་བ་དང ། ཀླུའི་བུ་མོ་སྨན་ཆེན་པོ་ཞེས་བྱ་བ་དང ། ཀླུའི་བུ་མོ་ཐིགས་པ་ཞེས་བྱ་བ་དང ། ཀླུའི་བུ་མོ་མགོ་གཅིག་མ་ཞེས་བྱ་བ་དང ། ཀླུའི་བུ་མོ་བཞོན་པ་བརྒྱ་པ་ཞེས་བྱ་བ་
317a
༄#། །\?\་དང ། ཀླུའི་བུ་མོ་ཟ་བྱེད་ཅེས་བྱ་བ་དང ། ཀླུའི་བུ་མོ་མ་ལུས་འོངས་ཞེས་བྱ་བ་དང ། ཀླུའི་བུ་མོ་ཤིན་ཏུ་བརྒྱན་མ་ཞེས་བྱ་བ་དང ། ཀླུའི་བུ་མོ་ཐིག་ལེ་ཞེས་བྱ་བ་དང ། ཀླུའི་བུ་མོ་སྤྲིན་དཀར་མོ་ཞེས་བྱ་བ་དང ། ཀླུའི་བུ་མོ་དེ་བཞིན་དུ་ཆགས་པ་ཞེས་བྱ་བ་དང ། ཀླུའི་བུ་མོ་གཏོང་ལྡན་མ་ཞེས་བྱ་བ་དང ། ཀླུའི་བུ་མོ་འཁོར་མི་ཕྱེད་པ་ཞེས་བྱ་བ་དང ། ཀླུའི་བུ་མོ་བུ་ལིན་ད་ཞེས་བྱ་བ་དང ། ཀླུའི་བུ་མོ་རྒྱ་མཚོ་མཆིང་རྣམ་མངལ་ཞེས་བྱ་བ་དང ། ཀླུའི་བུ་མོ་གདུགས་ཀྱི་བཞིན་ཞེས་བྱ་བ་དང ། ཀླུའི་བུ་མོ་ཆོས་ལ་དགའ་བ་ཞེས་བྱ་བ་དང ། ཀླུའི་བུ་མོ་བདེ་བྱེད་ཅེས་བྱ་བ་དང ། ཀླུའི་བུ་མོ་བརྩོན་འགྲུས་ཞེས་བྱ་བ་དང ། ཀླུའི་བུ་མོ་རྒྱ་མཚོ་མཆིང་རྣམ་ལྟར་ཟབ་པ་ཞེས་བྱ་བ་དང ། ཀླུའི་བུ་མོ་རི་རབ་ལྷུན་པོའི་དཔལ་ཞེས་བྱ་བ་དང ། དེ་ལྟ་བུ་ལ་སོགས་ཏེ་ཀླུའི་བུ་མོ་བརྒྱ་སྟོང་དུ་མ་དག་ཚོགས་སོ། །དྲི་ཟའི་བུ་མོ་བརྒྱ་སྟོང་དུ་མ་དག་ཀྱང་ཚོགས་པ་འདི་ལྟ་སྟེ། དྲི་ཟའི་བུ་མོ་དགའ་བའི་བཞིན་ཞེས་བྱ་བ་དང ། དྲི་ཟའི་བུ་མོ་དགའ་བའི་སྦྱིན་བྱེད་ཅེས་བྱ་བ་དང ། དྲི་ཟའི་བུ་མོ་མི་སྟོན་པ་ཞེས་བྱ་བ་དང ། དྲི་ཟའི་བུ་མོ་རྡོ་རྗེའི་དཔལ་ཞེས་བྱ་བ་དང ། དྲི་ཟའི་བུ་མོ་རྡོ་རྗེའི་ཕྲེང་བ་ཞེས་བྱ་བ་དང ། དྲི་ཟའི་བུ་མོ་ཕྲེང་བ་བཟང་པོ་ཅན་ཞེས་བྱ་བ་དང ། དྲི་ཟའི་བུ་མོ་ནགས་ཚལ་བདག་མོ་ཞེས་བྱ་བ་དང ། དྲི་ཟའི་བུ་མོ་མེ་ཏོག་བརྒྱ་པ་ཞེས་བྱ་བ་དང །
317b
དྲི་ཟའི་བུ་མོ་མེ་ཏོག་འབུས་པ་ཞེས་བྱ་བ་དང ། དྲི་ཟའི་བུ་མོ་རིན་ཆེའི་ཕྲེང་བ་ཞེས་བྱ་བ་དང ། དྲི་ཟའི་བུ་མོ་དུས་བའི་མེ་ཏོག་ཅེས་བྱ་བ་དང ། དྲི་ཟའི་བུ་མོ་མངལ་བཟང་མ་ཞེས་བྱ་བ་དང ། དྲི་ཟའི་བུ་མོ་རྒྱལ་པོའི་དཔལ་ཞེས་བྱ་བ་དང ། དྲི་ཟའི་བུ་མོ་རྔ་ཞེས་བྱ་བ་དང ། དྲི་ཟའི་བུ་མོ་ཕྲེང་བ་བཟང་མོ་ཞེས་བྱ་བ་དང ། དྲི་ཟའི་བུ་མོ་རྒྱན་གྱིས་བརྒྱན་ཅེས་བྱ་བ་དང།་དྲི་ཟའི་བུ་མོ་མངོན་པར་བཏུད་པ་ཞེས་བྱ་བ་དང ། དྲི་ཟའི་བུ་མོ་ཆོས་འདོད་ཅེས་བྱ་བ་དང ། དྲི་ཟའི་བུ་མོ་ཆོས་སྦྱིན་ཞེས་བྱ་བ་དང ། དྲི་ཟའི་བུ་མོ་མེ་ཏོག་ཨུ་དུམྦཱ་རའི་ལྟོ་བ་ཞེས་བྱ་བ་དང ། དྲི་ཟའི་བུ་མོ་རྣམ་པ་བརྒྱ་པ་ཞེས་བྱ་བ་དང ། དྲི་ཟའི་བུ་མོ་མེ་ཏོག་པདྨའི་དཔལ་ཞེས་བྱ་བ་དང ། དྲི་ཟའི་བུ་མོ་མེ་ཏོག་པདྨའི་དམིགས་ཞེས་བྱ་བ་དང ། དྲི་ཟའི་བུ་མོ་ལུས་ཡོངས་སུ་མཛེས་པ་ཞེས་བྱ་བ་དང ། དྲི་ཟའི་བུ་མོ་ཆེ་བས་དབང་པོ་བཞིན་དུ་འགྲོ་བ་ཞེས་བྱ་བ་དང ། དྲི་ཟའི་བུ་མོ་ས་སྦྱིན་ཞེས་བྱ་བ་དང ། དྲི་ཟའི་བུ་མོ་འབྲས་བུ་སྦྱིན་ཞེས་བྱ་བ་དང ། དྲི་ཟའི་བུ་མོ་སེང་གེ་འགྲོས་ཞེས་བྱ་བ་དང ། དྲི་ཟའི་བུ་མོ་མེ་ཏོག་ཀུ་མུ་ད་ཞེས་བྱ་བ་དང ། དྲི་ཟའི་བུ་མོ་ཡིད་དགའ་ཞེས་བྱ་བ་དང ། དྲི་ཟའི་བུ་མོ་སྦྱིན་བྱེད་ཅེས་བྱ་བ་དང ། དྲི་ཟའི་བུ་མོ་ལྷའི་ཚིག་ཅེས་བྱ་བ་དང ། དྲི་ཟའི་བུ་མོ་བཟོད་དགའ་ཞེས་བྱ་བ་དང ། དྲི་ཟའི་བུ་མོ་མྱ་ངན་འདས་དགའ་ཞེས་བྱ་བ་དང ། དྲི་ཟའི་བུ་མོ་
318a
༄#། །རིན་ཆེན་མྱུ་གུ་ཞེས་བྱ་བ་དང ། དྲི་ཟའི་བུ་མོ་དབང་པོའི་དཔལ་ཞེས་བྱ་བ་དང ། དྲི་ཟའི་བུ་མོ་སྐྱེ་དགུའི་བདག་མོའི་གནས་ཞེས་བྱ་བ་དང ། དྲི་ཟའི་བུ་མོ་རི་དྭགས་ཀྱི་རྒྱལ་པོ་ཅན་ཞེས་བྱ་བ་དང ། དྲི་ཟའི་བུ་མོ་དཔལ་འདབ་ཅེས་བྱ་བ་དང ། དྲི་ཟའི་བུ་མོ་འབར་བའི་རྩེ་མོ་ཞེས་བྱ་བ་དང ། དྲི་ཟའི་བུ་མོ་འདོད་ཆགས་ལས་ཡོངས་སུ་གྲོལ་ཞེས་བྱ་བ་དང ། དྲི་ཟའི་བུ་མོ་ཞེ་སྡང་ལས་ཡོངས་སུ་གྲོལ་ཞེས་བྱ་བ་དང ། དྲི་ཟའི་བུ་མོ་གཏི་མུག་ལས་ཡོངས་སུ་གྲོལ་ཞེས་བྱ་བ་དང ། དྲི་ཟའི་བུ་མོ་འཁོར་བསྲུངས་མ་ཞེས་བྱ་བ་དང ། དྲི་ཟའི་བུ་མོ་རིན་པོ་ཆེའི་ཁྲིའུ་ཞེས་བྱ་བ་དང ། དྲི་ཟའི་བུ་མོ་འོང་བ་དང་འགྲོ་བ་ཞེས་བྱ་བ་དང ། དྲི་ཟའི་བུ་མོ་མེའི་འོད་ཅེས་བྱ་བ་དང ། དྲི་ཟའི་བུ་མོ་ཟླ་བའི་གཟུགས་ཀྱི་འོད་ཅེས་བྱ་བ་དང ། དྲི་ཟའི་བུ་མོ་ཉི་མའི་མིག་ཅེས་བྱ་བ་དང ། དྲི་ཟའི་བུ་མོ་གསེར་ལྟར་སྣང་བ་ཞེས་བྱ་བ་དང ། དྲི་ཟའི་བུ་མོ་འཁོར་གྱིས་ཡོངས་སུ་བསྐོར་བ་ཅེས་བྱ་བ་དང ། དྲི་ཟའི་བུ་མོ་མཆོག་དགའ་ཞེས་བྱ་བ་དང ། དྲི་ཟའི་བུ་མོ་དམ་པའི་དཔལ་ཞེས་བྱ་བ་དང ། དེ་ལྟ་བུ་ལ་སོགས་པ་དྲི་ཟའི་བུ་མོ་བརྒྱ་ཕྲག་དུ་མ་དག་ཚོགས་སོ། །འཁོར་དེར་མིའམ་ཅིའི་བུ་མོ་བརྒྱ་ཕྲག་དུ་མ་དག་ཚོགས་པ་འདི་ལྟ་སྟེ། མིའམ་ཅིའི་བུ་མོ་ཡིད་ཅེས་བྱ་བ་དང ། མིའམ་ཅིའི་བུ་མོ་ཡིད་ལས་བྱུང་བ་ཞེས་བྱ་བ་
318b
དང ། མིའམ་ཅིའི་བུ་མོ་རླུང་གི་ཤུགས་ཞེས་བྱ་བ་དང ། མིའམ་ཅིའི་བུ་མོ་ཆུའི་ཤུགས་ཞེས་བྱ་བ་དང ། མིའམ་ཅིའི་བུ་མོ་ནམ་མཁའི་གཟིངས་ཞེས་བྱ་བ་དང ། མིའམ་ཅིའི་བུ་མོ་མགྱོགས་པའི་ཤུགས་ཞེས་བྱ་བ་དང ། མིའམ་ཅིའི་བུ་མོ་དཔལ་སྦྱིན་པ་ཞེས་བྱ་བ་དང ། མིའམ་ཅིའི་བུ་མོ་མཆེ་བ་བཟང་མོ་ཞེས་བྱ་བ་དང ། མིའམ་ཅིའི་བུ་མོ་མི་གཡོ་བའི་དཔལ་ཞེས་བྱ་བ་དང ། མིའམ་ཅིའི་བུ་མོ་ཁམས་ལ་དགའ་བ་ཞེས་བྱ་བ་དང ། མིའམ་ཅིའི་བུ་མོ་འབར་བ་ལ་དགའ་བ་ཞེས་བྱ་བ་དང ། མིའམ་ཅིའི་བུ་མོ་ཤིན་ཏུ་དཔལ་ཞེས་བྱ་བ་དང ། མིའམ་ཅིའི་བུ་མོ་རིན་པོ་ཆེ་འབྱུང་གནས་ཞེས་བྱ་བ་དང ། མིའམ་ཅིའི་བུ་མོ་སྤྱན་རས་གཟིགས་ཀྱི་དཔལ་ཞེས་བྱ་བ་དང ། མིའམ་ཅིའི་བུ་མོ་སྟན་ཅན་ཞེས་བྱ་བ་དང ། མིའམ་ཅིའི་བུ་མོ་རྡོ་རྗེའི་ཁུ་ཚུར་ཞེས་བྱ་བ་དང ། མིའམ་ཅིའི་བུ་མོ་སེར་སྐྱ་ཞེས་བྱ་བ་དང ། མིའམ་ཅིའི་བུ་མོ་རྒྱན་རབ་བརྒྱན་པ་ཞེས་བྱ་བ་དང ། མིའམ་ཅིའི་བུ་མོ་དཔྲལ་བ་དབྱེས་ཆེན་ཞེས་བྱ་བ་དང ། མིའམ་ཅིའི་བུ་མོ་ངེས་པ་ཡོངས་སུ་བསྟེན་པ་ཞེས་བྱ་བ་དང ། མིའམ་ཅིའི་བུ་མོ་བློ་གྲོས་ཆེན་མོ་ཞེས་བྱ་བ་དང ། མིའམ་ཅིའི་བུ་མོ་ནམ་མཁའ་སྲུང་ཞེས་བྱ་བ་དང ། མིའམ་ཅིའི་བུ་མོ་བཀོད་པ་རྒྱལ་པོའི་དབང་ཞེས་བྱ་བ་དང ། མིའམ་ཅིའི་བུ་མོ་གཙུག་ན་ནོར་བུ་ཞེས་བྱ་བ་དང ། མིའམ་ཅིའི་བུ་མོ་ནོར་བུ་འཛིན་ཅེས་བྱ་བ་དང ། མིའམ་ཅིའི་བུ་མོ་ནོར་བུ་
319a
༄#། །འབར་མ་ཞེས་བྱ་བ་དང ། མིའམ་ཅིའི་བུ་མོ་སྐྱེ་བོ་མཁས་པས་བསྟེན་ཅེས་བྱ་བ་དང ། མིའམ་ཅིའི་བུ་མོ་མདོག་མ་ཞེས་བྱ་བ་དང ། མིའམ་ཅིའི་བུ་མོ་ཚེ་སྦྱིན་ཞེས་བྱ་བ་དང ། མིའམ་ཅིའི་བུ་མོ་དེ་བཞིན་གཤེགས་པའི་མཛོད་ཡོངས་སུ་སྐྱོང་མ་ཞེས་བྱ་བ་དང ། མིའམ་ཅིའི་བུ་མོ་ཆོས་ཀྱི་དབྱིངས་ཡོངས་སུ་སྲུང་བ་ཞེས་བྱ་བ་དང ། མིའམ་ཅིའི་བུ་མོ་རྐང་པའི་གདུ་བུའི་རྔ་ཞེས་བྱ་བ་དང ། མིའམ་ཅིའི་བུ་མོ་སྐད་ཅིག་སྒྲོལ་ཞེས་བྱ་བ་དང ། མིའམ་ཅིའི་བུ་མོ་རྟག་ཏུ་ཆོས་ལེན་པར་འདོད་ཅེས་བྱ་བ་དང ། མིའམ་ཅིའི་བུ་མོ་རྟག་ཏུ་དུས་དུས་སུ་སྟོན་མ་ཞེས་བྱ་བ་དང ། མིའམ་ཅིའི་བུ་མོ་དབུགས་འབྱིན་ཅེས་བྱ་བ་དང ། མིའམ་ཅིའི་བུ་མོ་རྣམ་པར་ཐར་བྱེད་ཅེས་བྱ་བ་དང ། མིའམ་ཅིའི་བུ་མོ་ཡོད་པ་མི་འཕྲོགས་པ་ཞེས་བྱ་བ་དང ། མིའམ་ཅིའི་བུ་མོ་སྐྱོ་འཛིན་ཅེས་བྱ་བ་དང ། མིའམ་ཅིའི་བུ་མོ་རལ་གྲི་འབར་ཞེས་བྱ་བ་དང ། མིའམ་ཅིའི་བུ་མོ་ས་ལ་འགྲོ་ཞེས་བྱ་བ་དང ། མིའམ་ཅིའི་བུ་མོ་ལྷ་དབང་ཕྲེང་བ་ཞེས་བྱ་བ་དང ། མིའམ་ཅིའི་བུ་མོ་ལྷ་མ་ཡིན་གྱི་དབང་མོ་ཞེས་བྱ་བ་དང ། མིའམ་ཅིའི་བུ་མོ་ནོར་བུའི་དབང་མོ་ཞེས་བྱ་བ་དང ། མིའམ་ཅིའི་བུ་མོ་རུས་བཟོད་ཅེས་བྱ་བ་དང ། མིའམ་ཅིའི་བུ་མོ་སྦྱིན་ལྡན་ཞེས་བྱ་བ་དང ། མིའམ་ཅིའི་བུ་མོ་མང་པོའི་གནས་ཞེས་བྱ་བ་དང ། མིའམ་ཅིའི་བུ་མོ་ལག་ཆ་བརྒྱ་པ་ཞེས་
319b
བྱ་བ་དང ། མིའམ་ཅིའི་བུ་མོ་རྒྱན་གྱིས་བརྒྱན་པ་ཞེས་བྱ་བ་དང ། མིའམ་ཅིའི་བུ་མོ་ཡིད་འཕྲོག་ཅེས་བྱ་བ་དང ། དེ་ལྟ་བུ་ལ་སོགས་པ་མིའམ་ཅིའི་བུ་མོ་བརྒྱ་ཕྲག་དུ་མ་དག་ཚོགས་སོ། །དགེ་བསྙེན་དང ། དགེ་བསྙེན་མ་བརྒྱ་ཕྲག་དུ་མ་དག་ཚོགས་སོ། །མུར་འདུག་སྤྱོད་པ་དང ། ཀུན་ཏུ་རྒྱུ་བ་དང ། གཅེར་བུ་པ་བརྒྱ་ཕྲག་དུ་མ་དག་ཀྱང་ཚོགས་ཏེ། གང་གི་ཚེ་ན་འདུས་པ་ཆེར་གྱུར་པ་དེའི་ཚེ་སེམས་ཅན་དམྱལ་བ་ཆེན་པོ་མནར་མེད་པར་འོད་ཟེར་བྱུང་ངོ ། །བྱུང་ནས་ཛེ་ཏའི་ཚལ་གྱི་གཙུག་ལག་ཁང་དུ་སོང་བ་དང ། དེ་དག་གིས་གཙུག་ལག་ཁང་དེ་ཡོངས་སུ་མཛེས་པར་སྣང་སྟེ། ཀ་བ་ནི་ལྷའི་ནོར་བུ་རིན་པོ་ཆེས་བརྒྱན་པར་སྣང་ངོ ། །རྩིག་པ་བརྒྱ་དག་ཀྱང་གསེར་གྱིས་མཛེས་བར་བྱས་པར་སྣང་ངོ ། །གནས་ཁང་སོ་སོ་དག་ན་ནི་གསེར་དང་དངུལ་ལས་བྱས་པའི་སྒོ་དག་སྣང་ངོ ། །གནས་ཁང་སོ་སོ་ན་སྐས་གསེར་དང ། དངུལ་ལས་བྱས་པ་དག་ཀྱང་སྣང་ངོ ། །དངུལ་གྱི་ཁང་པ་དག་ན་ནི་གསེར་གྱི་ཀ་བ་རིན་པོ་ཆེས་བརྒྱན། གསེར་གྱི་ཁང་པ་དག་ན་ནི་དངུལ་གྱི་ཀ་བ་རིན་པོ་ཆེས་བརྒྱན་པ་དང ། ཛེ་ཏའི་ཚལ་གྱི་ཕྱི་རོལ་ན་ཤིང་དཔག་བསམ་རྣམ་པ་སྣ་ཚོགས་དག་སྣང་སྟེ། གསེར་གྱི་སྡོང་པོ་དང ། དངུལ་གྱི་ལོ་མ་དང ། རྒྱན་རྣམ་པ་སྣ་ཚོགས་རབ་ཏུ་འཕྱང་བ་དག་དང ། ཡུལ་ཀ་ཤི་ཀ་ནས་བྱུང་བའི་གོས་རབ་ཏུ་འཕྱང་བ་དག་དང ། རྒྱའི་གོས་བརྒྱ་
320a
༄#། །སྟོང་རབ་ཏུ་འཕྱང་བ་དང ། མུ་ཏིག་གི་སེ་མོ་དོ་བརྒྱ་སྟོང་རབ་ཏུ་འཕྱང་བ་དང ། ཅོད་པན་དང ། རྣ་ཆ་དང ། ཕྲེང་བའི་ལྡ་ལྡི་དང ། དཔུང་རྒྱན་དང ། རྐང་པའི་གདུ་བུ་བརྒྱ་སྟོང་རབ་ཏུ་འཕྱང་བ་དང ། ཕྱི་རོལ་ན་རིན་པོ་ཆེའི་གདུ་བུ་སྟེང་རིན་པོ་ཆེ་ལས་བྱས་པ། དེ་ལ་འཕྱང་བའི་ཤིང་དཔག་བསམ་གྱི་ཤིང་དེ་ལྟ་བུ་བརྒྱ་དག་ཀྱང་བྱུང་ངོ ། །ཛེ་ཏའི་ཚལ་གྱི་གཙུག་ལག་ཁང་དེ་ཉིད་ན་སྐས་དག་ཀྱང་རྡོ་རྗེ་ལས་བྱས་པར་སྣང་ངོ ། །སྒོ་རྒྱབ་ན་མུ་ཏིག་དང ། དར་གྱི་ཚོགས་རབ་ཏུ་དབྱངས་སོ། །རྫིང་བུ་དུ་མ་དག་ཀྱང་བྱུང་སྟེ། ལ་ལ་ནི་ཆུ་ཡན་ལག་བརྒྱད་དང་ལྡན་པས་ཡོངས་སུ་གང ། ལ་ལ་ནི་མེ་ཏོག་རྣམ་པ་སྣ་ཚོགས་ཀྱིས་ཡོངས་སུ་གང་བ་དག་འདི་ལྟ་སྟེ། མེ་ཏོག་ཨུཏྤ་ལ་དང ། པདྨ་དང ། ཀུ་མུ་ད་དང ། པུཎྜ་རི་ཀ་དང ། མནྡཱ་ར་བ་དང ། མནྡཱ་ར་པ་ཆེན་པོ་དང ། ུ་དུམྦཱ་ར་དག་གིས་ཡོངས་སུ་གང་ངོ ། །གཞན་ཡང་ཤིང་གི་མེ་ཏོག་རྣམ་པ་སྣ་ཚོགས་སྐྱེ་བ་འདི་ལྟ་སྟེ། མེ་ཏོག་ཙམྤ་ཀ་དང ། ཀ་ར་བཱི་ར་དང ། པ་ཏ་ལ་དང ། ་ཏི་མུཀྟ་ཀ་དང ། དབྱར་གྱི་དྲི་དང ། གཞན་ཡང་ཤིང་གི་མེ་ཏོག་ཡིད་དགའ་བ་དག་བྱུང་སྟེ། ཛེ་ཏའི་ཚལ་གྱི་གཙུག་ལག་ཁང་དེ་ཡོངས་སུ་མཛེས་པར་བྱས་པ་ཉིད་དུ་སྣང་ངོ ། །དེ་ནས་འཁོར་དེ་ཉིད་ཀྱི་ནང་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་སྟན་ལས་ལངས་ཏེ་བླ་གོས་
320b
ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ནི་ཤིན་ཏུ་ངོ་མཚར་རྨད་དུ་བྱུང་བ་ཐོབ་བོ། །བཅོམ་ལྡན་འདས། འོད་ཟེར་ཆེན་པོ་འདི་དག་ག་ལས་མཆིས། རྫུ་འཕྲུལ་གྱི་ཡུལ་གྱི་མཐུ་འདི་སུའི་ལགས་བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་འདི་ནི་མནར་མེད་པའི་སེམས་ཅན་དམྱལ་བ་ཆེན་པོར་ཞུགས་ནས་སེམས་ཅན་རྣམས་ཡོངས་སུ་སྨིན་པར་བྱེད་དེ། ཡོངས་སུ་སྨིན་པར་བྱས་ནས་ཡི་དྭགས་ཀྱི་གྲོང་ཁྱེར་དུ་འདུག་གོ་།དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། མནར་མ་མཆིས་པའི་སེམས་ཅན་དམྱལ་བ་ཆེན་པོ་ན་མནར་མི་གདའ་ན། བཅོམ་ལྡན་འདས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་འཇུག་པར་བགྱིད། སེམས་ཅན་དམྱལ་བ་ཆེན་པོ་ལྕགས་ཀྱི་རྩིག་པས་བསྐོར་ལ། ལྕགས་ཀྱི་ངོག་ས་ལ་ཤིན་ཏུ་འབར་བ། མེ་ལྕེ་གཅིག་ཏུ་འདུས་པ། རྣམ་པར་གཡོ་བ་དེ་ན་འབོད་སྒྲོགས་པ་དག་གནས་པའི་སྣོད་ཟ་མ་ཏོག་འདྲ་བ་མཆིས་ཏེ། སྣོད་དེར་སེམས་ཅན་བྱེ་བ་ཁྲག་ཁྲིག་བརྒྱ་སྟོང་
321a
༄#། །ཕྲག་དུ་མ་སྩལ་ཏོ། །ནམ་ཆུ་མང་པོ་མཆིས་པའི་སྣོད་ན་སྲན་ཆུང་ཀ་རུའམ། ན་གུ་གྱེན་དུ་མཆི་ན་ཡང་བྲེལ་བ་དང ། སྨིན་པར་འགྱུར། ཐུར་དུ་མཆི་ནའང་བྲེལ་བ་དང ། སྨིན་པར་འགྱུར་བ་དེ་བཞིན་དུ་སེམས་ཅན་དེ་དག་ཀྱང་མནར་མ་མཆིས་པའི་སེམས་ཅན་དམྱལ་བ་ཆེན་པོ་དེར་ལུས་ཀྱི་སྡུག་བསྔལ་ཉམས་སུ་མྱོང་ན། བཅོམ་ལྡན་འདས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་མནར་མ་མཆིས་པའི་སེམས་ཅན་དམྱལ་བ་ཆེན་པོར་འཇུག་པར་བགྱིད། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ཇི་ལྟར་འཁོར་ལོས་སྒྱུར་བའི་རྒྱལ་པོ་ལྷའི་ནོར་བུ་རིན་པོ་ཆེ་ལས་བྱས་པའི་སྐྱེད་མོས་ཚལ་དུ་འཇུག་པ་དེ་བཞིན་དུ། རིགས་ཀྱི་བུ།་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོའང་མནར་མེད་པའི་སེམས་ཅན་དམྱལ་བ་ཆེན་པོར་འཇུག་མོད་ཀྱི། དེའི་ལུས་ལ་གཞན་དུ་འགྱུར་བ་མེད་དོ། ། ནམ་མནར་མེད་པའི་སེམས་ཅན་དམྱལ་བ་ཆེན་པོ་དང་ཉེ་བར་འགྲོ་བ་དེའི་ཚེ་མནར་མེད་པའི་སེམས་ཅན་དམྱལ་བ་ཆེན་པོ་དེ་བསིལ་བར་འགྱུར་ཏེ། དེའི་ཚེ་གཤིན་རྗེའི་མི་དེ་དག་མནར་མེད་པའི་སེམས་ཅན་དམྱལ་བ་ཆེན་པོར་ཅི་མི་དགེ་བའི་ལྟས་ཤིག་བྱུང་ན། ནམ་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་འོངས་པ་དེའི་ཚེ་མེ་ཏོག་
321b
པདྨ་ཤིང་རྟའི་འཁོར་ལོ་ཙམ་བྱུང་ཞིང་སྣོད་དེའང་གསལ། མེ་དེའི་འོབས་དེ་ཉིད་དུའང་རྫིང་བུ་བྱུང་བར་གྱུར་ཅེས་སྐྱོ་བར་གྱུར་ཏོ། །དེ་ནས་གཤིན་རྗེའི་སྐྱེས་བུ་དེ་དག་རལ་གྲི་དང ། གཏུན་དང ། མཚོན་ཆ་བྷིཎྜི་པཱ་ལ་དང ། ཏོ་མ་ར་དང ། འགའ་དཱ་དང ། འཁོར་ལོ་དང ། རྩེ་གསུམ་པ་ལ་སོགས་པ་ཐོགས་ནས་གཤིན་རྗེའི་རྒྱལ་པོ་ག་ལ་བ་དེར་སོང་སྟེ། ཕྱིན་ནས་འདི་སྐད་ཅེས་སྨྲས་སོ། །ལྷ།་བདག་ཅག་གི་སུག་ལས་ཀྱི་དོག་ས་དེ་ཡོངས་སུ་བས་པར་མཁྱེན་པར་མཛོད་ཅིག་།ཅིའི་ཕྱིར་ཁྱེད་ཀྱི་ལས་ཀྱི་ཡོངས་སུ་ཟད་དམ། ལྷ། ཅི་ལགས། མི་མཁྱེན་ཏམ། མནར་མ་མཆིས་པའི་སེམས་ཅན་དམྱལ་བ་དེར་ཐོག་མ་ཁོ་ནར་མི་དགེ་བའི་ལྟས་བྱུང་སྟེ། སྐྱེས་བུ་ཇི་ལྟར་འདོད་པའི་གཟུགས་ཅན། རལ་པའི་ཅོད་པན་ཅན་ལུས་རྒྱན་ཐམས་ཅད་ཀྱིས་བརྒྱན་པ་ཕྱིན་པ་དང་བསིལ་བར་གྱུར་ཏོ། །གང་གི་ཚེ་དེ་ཕྱིན་པ་དེའི་ཚེ་མེ་ཏོག་པདྨ་ཤིང་རྟའི་འཁོར་ལོ་ཙམ་ཡང་བྱུང ། སྣོད་དེའང་གས། ཞུགས་ཀྱི་འོབས་དེར་ཡང་རྫིང་བུ་བྱུང་བར་གྱུར་ཏོ། །དེ་ནས་གཤིན་རྗེའི་རྒྱལ་པོ་སེམས་པར་གྱུར་ཏེ། མཐུ་འདི་ལྷ་གང་གི་ཡིན། ཡང་ན་ལྷའི་བུ་དབང་ཕྱུག་ཆེན་པོ་དང ། མཐུ་བོ་ཆེ་ལས་དམ་པ་ཐོབ་པ་ཞིག་ས་འདིར་འོངས་སམ། ཡང་ན་སྲིན་པོ་མཐུ་བོ་ཆེ་ལྷའི་བལ་གླང་གི་སྟོབས་དང་འགྲན་པ་ཉིད་སྐྱེས་སམ་ཞེས་དེས་ལྷའི་མིག་གིས་རྣམ་པར་བལྟས་ན་
322a
༄#། །ལྷའི་སྡེའི་ནང་ན་དམ་པ་དེ་ལྟ་བུ་མ་མཐོང་ངོ ། །དེ་ནས་སླར་ཡང་མནར་མེད་པའི་སེམས་ཅན་དམྱལ་བ་ཆེན་པོར་བལྟས་སོ། །དེར་བལྟས་པ་དང་མནར་མེད་པའི་སེམས་ཅན་དམྱལ་བ་ཆེན་པོ་དེ་ན་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་བཞུགས་པ་ཉིད་མཐོང་ངོ ། །དེ་ནས་གཤིན་རྗེའི་རྒྱལ་པོ་བྱང་ཆུབ་སེམས་དཔའ་སེམས་དཔའ་ཆེན་པོ་ག་ལ་བ་དེར་དོང་སྟེ་ཕྱིན་པ་དང ། ཞབས་ལ་མགོ་བོས་ཕྱག་འཚལ་ནས་བསྟོད་པའི་ཁྱད་པར་བྱེད་པར་བརྩོན་པ། སྤྱན་རས་གཟིགས་ཀྱི་དབང་པོ་དབང་ཕྱུག་ཆེན་པོ། པདྨ་ལ་དགྱེས་པ། དམ་པ་སྩོལ་པ། དབང་དུ་མཛད་པ། སའི་སྤྱན་དམ་པ་མཛད་པ། དབུགས་འབྱིན་པར་མཛད་པ། ཕྱག་བརྒྱ་སྟོང་པ། སྤྱན་བྱེ་བ་བརྒྱ་སྟོང་པ། དབུ་བཅུ་གཅིག་པ། རྒོད་མའི་བཞིན་ལྟ་བུའི་མཐར་ཕྱིན་པ། ཆོས་ལ་དགྱེས་པ། སེམས་ཅན་ཐམས་ཅད་ཡོངས་སུ་ཐར་བར་མཛད་པ། རུས་སྦལ་དང ། ཆུ་སྲིན་དང ། ཉ་རྣམས་དབུགས་འབྱིན་པར་མཛད་པ། ཡེ་ཤེས་ཀྱི་ཕུང་པོ་དམ་པ་མཛད་པ། དགའ་བ་སྩོལ་པ། རིན་པོ་ཆེའི་དཔལ་དམ་པ། མནར་མེད་པ་ཀུན་སྐེམས་པར་མཛད་པ། ཡེ་ཤེས་ཀྱི་དཔལ་གྱིས་བརྒྱན་པ། ཡེ་ཤེས་ལ་དགྱེས་པ། ལྷ་ཐམས་ཅད་ཀྱིས་མཆོད་པ། ཕྱག་འཚལ་བ། བཀུར་སྟི་བགྱིས་པ། མི་འཇིགས་པ་
322b
སྩོལ་བ། ཕ་རོལ་ཏུ་ཕྱིན་པ་དྲུག་སྟོན་པར་མཛད་པ། ཉི་མ་ལྟ་བུའི་སྤྱན་མཆོག་མཛད་པ། ཆོས་ཀྱི་སྒྲོན་མ་མཛད་པ། ཇི་ལྟར་དགྱེས་པའི་གཟུགས་ཀྱི་གཟུགས་མཆོག་།དྲི་ཟའི་གཟུགས་དང་ལྡན་པ། གསེར་གྱི་རིའི་གཟུགས་དང་མཚུངས་པ། རྒྱ་མཚོ་མཆིང་རྣམ་གྱི་ཀློང་བཞིན་དུ་ཟབ་པ། དོན་དམ་པའི་རྣལ་འབྱོར་རྗེས་སུ་ཐོབ་པ། བདག་གི་ཞལ་སྟོན་པར་མཛད་པ། ཏིང་ངེ་འཛིན་བརྒྱ་སྟོང་དུ་མ་དང་ལྡན་པ། མངོན་པར་དགྱེས་པར་མཛད་པ། སྐུ་རྒྱན་པ་སྐྱེས་བུའི་ཁྱུ་མཆོག་།ཁུ་སྒོ་དང ། ཁོང་སྒྲིལ་དང ། འཁྲུལ་འཁོར་གྱི་ལམ་ལས་ཡོངས་སུ་ཐར་བར་མཛད་པ། སྲིད་པ་ཐམས་ཅད་དང་མ་འབྲེལ་བ། འཁོར་མང་པོ་འབྱུང་བར་འགྱུར་བ་ཉེ་བར་བསགས་པ། ཡིད་བཞིན་གྱི་ནོར་བུ་རིན་པོ་ཆེ་མཛད་པ། མྱ་ངན་ལས་འདས་པའི་ལམ་སྟོན་པར་མཛད་པ། ཡི་དྭགས་ཀྱི་གྲོང་ཁྱེར་སྐེམས་པར་མཛད་པ། སྐྱེ་བོ་ལ་གདུགས་སུ་གྱུར་བར་མཛད་པ། ནད་ལས་ཡོངས་སུ་ཐར་བར་མཛད་པ། ཀླུའི་རྒྱལ་པོ་དགའ་བོ་དང་ཉེ་དགའ་བོའི་མཆོད་ཕྱིར་ཐོགས་པ། དོན་ཡོད་པར་འགྱུར་བའི་ཞགས་པ་སྟོན་པར་མཛད་པ། སྔགས་བརྒྱ་ཕྲག་དུ་མ་དང་ལྡན་པ། ལག་ན་རྡོ་རྗེ་སྐྲག་པར་མཛད་པ། འཇིག་རྟེན་གསུམ་པོ་སྐྲག་པར་མཛད་པ། གནོད་སྦྱིན་དང ། སྲིན་པོ་དང ། འབྱུང་པོ་དང ། ཤ་ཟ་དང ། ཕྲ་མེན་ཕ་དང ། ཕྲ་མེན་མ་དང ། རོ་ལངས་དང ། མཁའ་འགྲོ་མ་དང ། གྲུལ་
323a
༄#། །བུམ་དང ། བརྗེད་བྱེད་རྣམས་སྐྲག་པར་མཛད་པ། སྤྱན་ཨུཏྤ་ལ་སྔོན་པོ་ལྟ་བུ། ཟབ་ཅིང་བརྟན་པར་མཛད་པ། རིག་པའི་བདག་པོ་ཉོན་མོངས་པ་ཐམས་ཅད་ལས་རྣམ་པར་གྲོལ་བར་མཛད་པ། བྱང་ཆུབ་ཀྱི་ལམ་སྣ་ཚོགས་བསགས་པ། ཐར་བའི་དམ་པ་ལ་ཞུགས་པ། སྐུ་ལ་བྱང་ཆུབ་ཀྱི་ལམ་བསགས་པ། ཡི་དྭགས་ཡོངས་སུ་ཐར་བར་མཛད་པ། ཏིང་ངེ་འཛིན་རྡུལ་ཕྲ་རབ་ལྟ་བུ་བརྒྱ་སྟོང་དང་ལྡན་པ་ལ་ཕྱག་འཚལ་ལོ་ཞེས་དེ་ལྟར་གཤིན་རྗེའི་རྒྱལ་པོས་ཁྱད་པར་དམ་པའི་བསྟོད་པས་བསྟོད་ནས།་སླར་ཡང་གཤིན་རྗེའི་རྒྱལ་པོས་ལན་གསུམ་བསྐོར་ཏེ་དེ་ཉིད་ནས་སོང་ངོ ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་མཆིའམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། དེ་ནི་མནར་མེད་པའི་སེམས་ཅན་དམྱལ་བ་ཆེན་པོ་ནས་བྱུང་སྟེ། ཡི་དྭགས་ཀྱི་གྲོང་ཁྱེར་དུ་སོང་ནས་མགལ་ཤིང་ལྟ་བུ་དང ། ཀེང་རུས་བསྒྲེང་བ་དང ། བདག་གི་སྐྲ་དང་སྤུས་གཡོགས་པ་དང ། ལྟོ་རི་དང་འདྲ་བ་དང ། ཁ་ཁབ་ཀྱི་མིག་ལྟ་བུའི་ཡི་དྭགས་བརྒྱ་སྟོང་དུ་མ་མདུན་ནས་རྒྱུག་གོ་།བྱང་ཆུབ་སེམས་དཔའ་སེམས་དཔའ་
323b
ཆེན་པོ་སྤྱན་རས་གཟིགས་ཀྱི་དབང་པོ་ནམ་ཡི་དྭགས་ཀྱི་གྲོང་ཁྱེར་དུ་སོང་བ་དེའི་ཚེ་ཡི་དྭགས་ཀྱི་གྲོང་ཁྱེར་དེ་བསིལ་བར་འགྱུར། རྡོ་རྗེའི་སེར་བ་དེའང་རབ་ཏུ་ཞི་བར་འགྱུར་རོ། །སྒོ་བ་དེའང་བྱིན་པ་ཐག་ཐུག་ཅན་ལ་མིག་དམར་ཞིང་ལག་ན་འཁར་བ་ཐོགས་པ་ལས་ཀྱི་ས་འདི་འདྲ་བ་ནི་བདག་གི་བྱ་བ་མ་ཡིན་ནོ་ཞེས་བྱམས་པའི་སེམས་བསྐྱེད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཕྱག་གི་སོར་མོ་བཅུ་ལས་ཆུ་བོ་ཆེན་པོ་བཅུ་བྱུང ། ཞབས་ཀྱི་སོར་མོ་བཅུ་ལས་ཆུ་བོ་ཆེན་པོ་བཅུ་བྱུང་སྟེ། བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་ཤིན་ཏུ་ཐུགས་བརྩེ་བའི་ཟིལ་གྱིས་ནོན་ནས་བ་སྤུའི་ཁུང་བུ་ནས་ཆུ་བོ་བྱུང་ངོ ། །གང་གི་ཚེ་ན་དེ་དག་གིས་ཆུ་མྱོང་བ་དེའི་ཚེ་དེ་དག་མགྲིན་པ་ཡངས་པར་གྱུར། ལུས་ཀྱང་ཡོངས་སུ་རྫོགས་པར་གྱུར། ལྷའི་ཟས་རོའི་ནང་ན་རོ་མཆོག་ཏུ་བྱུང་བ་དང་ལྡན་པས་ཚིམ་པར་གྱུར་ནས་དེའི་ཚེ་འཁོར་བའི་བསམ་པ་ལ་སེམས་ཏེ། ཀྱེ་མའོ། །ཛམྦུའི་གླིང་གི་མི་འདི་དག་ནི་གྲིབ་མ་བསིལ་བ་ལ་ཡོངས་སུ་བསྟེན་ཏོ། །གང་ཛམྦུའི་གླིང་གི་མི་འདི་དག་ནི་རྟག་ཏུ་ཕ་མ་ལ་ཡོངས་སུ་འཛིན་ཅིང་བསྙེན་བཀུར་བྱེད་དེ་བདེ་བ་དང་ལྡན་པའོ། །གང་རྟག་ཏུ་དགེ་བའི་བཤེས་གཉེན་དང་བསྟེན་ཅིང་སྐྱོང་བའི་སྐྱེས་བུ་དེ་དག་ནི་བདེ་བ་དང་ལྡན་པའོ། །གང་རྟག་ཏུ་ཐེག་པ་ཆེན་པོ་རྟག་ཏུ་ཁོང་དུ་ཆུད་པར་
324a
༄#། །བྱེད་པའི་སྐྱེས་བུ་དམ་པ་དེ་དག་ནི་བསམ་པ་དང་ལྡན་པའོ། །གང་འཕགས་པའི་ལམ་ཡན་ལག་བརྒྱད་པ་ལ་གནས་པར་བྱེད་པ་དེ་དག་ནི་སྐྱེས་བུ་དམ་པའོ། །གང་ཆོས་ཀྱི་གཎྜི་བརྡུང་པ་དེ་དག་ནི་སྐྱེས་བུ་དམ་པའོ། །གང་གཙུག་ལག་ཁང་གས་པ་དང ། གོགས་པ་རྣམས་སླར་འཆོས་པ་དེ་དག་ནི་སྐྱེས་བུ་དམ་པའོ། །གང་སྔོན་གྱི་མཆོད་རྟེན་གྱི་གཟུགས་གས་པ་དང ། གོགས་པ་རྣམས་སླར་འཆོས་པ་དེ་དག་ནི་སྐྱེས་བུ་དམ་པའོ། །གང་ཆོས་སྨྲ་བ་དང་བསྟེན་པ་དེ་དག་ནི་སྐྱེས་བུ་དམ་པའོ། །གང་དེ་བཞིན་གཤེགས་པ་འཆག་པ་མཐོང་བ་དེ་དག་ནི་སྐྱེས་བུ་དམ་པའོ། །གང་རང་སངས་རྒྱས་འཆག་པ་མཐོང་བ་དེ་དག་ནི་སྐྱེས་བུ་དམ་པའོ། །གང་བྱང་ཆུབ་སེམས་དཔའ་འཆག་པ་མཐོང་བ་དེ་དག་ནི་སྐྱེས་བུ་དམ་པའོ་ཞེས་དེ་ལྟར་ལུས་ཀྱི་རྗེས་སུ་སེམས་པ་དང ། དེའི་ཚེ་ཐེག་པ་ཆེན་པོའི་མདོ་ཟ་མ་ཏོག་བཀོད་པ་དཀོན་མཆོག་གི་རྒྱལ་པོའི་སྒྲ་བྱུང་ངོ ། ། དེའི་ཚེ་དེ་དག་གི་འཇིགས་ཚོགས་ལ་ལྟ་པའི་རིའི་རྩེ་མོ་ཉི་ཤུ་བྱུང་བ་ཡེ་ཤེས་ཀྱི་རྡོ་རྗེས་བཅོམ་ནས་དེ་དག་ཐམས་ཅད་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེ་སྟེ། བྱང་ཆུབ་སེམས་དཔའ་འདོད་པའི་བཞིན་ཞེས་བྱ་བར་སྐྱེས་ནས་གང་གི་ཚེ་དེས་སེམས་ཅན་ཡོངས་སུ་སྨིན་པར་བྱས་པ་དེའི་ཚེ་སླར་ཡང་སོང་ངོ ། །དེ་ནས་བཅོམ་ལྡན་འདས་
324b
ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་མཆིའམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ཉི་མ་རེ་རེའང་སེམས་ཅན་བྱེ་བ་ཁྲག་ཁྲིག་བརྒྱ་སྟོང་དུ་མ་ཡོངས་སུ་སྨིན་པར་བྱེད་དེ། རིགས་ཀྱི་བུ། ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་སྤོབས་པ་དེ་འདྲ་བ་ནི་དེ་བཞིན་གཤེགས་པ་རྣམས་ལ་མེད་དོ། །སྒྲིབ་པ་ཐམས་ཅད་རྣམ་པར་སེལ་བས་གསོལ་པ། བཅོམ་ལྡན་འདས། ཅིའི་སླད་དུ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྷག་མཐོང་ཞེས་བྱ་བ་རིག་པ་དང་རྐང་པར་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སྔོན་འཇིག་རྟེན་དུ་འབྱུང་བར་གྱུར་ཏོ། །དེའི་ཚེ་དེའི་དུས་ན། སྒྲིབ་པ་ཐམས་ཅད་རྣམ་པར་སེལ་བ། ང་ནི་སྤོས་ཀྱི་བཞིན་ཞེས་བྱ་བའི་ཚོང་པའི་བུར་གྱུར་ཏེ། དེའི་ཚེ་ངས་དེ་བཞིན་གཤེགས་པ་ལྷག་མཐོང་ལས་སྤྱན་རས་གཟིགས་ཀྱི་དབང་པོའི་ཡོན་ཏན་བརྗོད་པ་ཐོས་སོ། །དེ་ནས་བཅོམ་ལྡན་འདས་ལ་བྱང་ཆུབ་
325a
༄#། །སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཡོན་ཏན་བརྗོད་པ་ཇི་སྐད་དུ་གསན། བཅོམ་ལྡན་འདས་ཀྱིས་བཀའ་སྩལ་པ། མིག་ལས་ནི་ཉི་མ་དང་ཟླ་བ་བྱུང ། དཔྲལ་བ་ལས་ནི་དབང་ཕྱུག་ཆེན་པོ། ཕྲག་པ་ལས་ནི་ཚངས་པ། སྙིང་ལས་ནི་མཐུ་བོ་ཆེ། མཆེ་བ་གཉིས་ལས་ནི་ལྷ་མོ་དབྱངས་ཅན། ཁ་ནས་ནི་རླུང་རྣམས་བྱུང ། རྐང་པ་ལས་ནི་ས། ལྟོ་བ་ལས་ནི་ཆུའི་ལྷ་བྱུང་སྟེ། གང་གི་ཚེ་སྤྱན་རས་གཟིགས་ཀྱི་དབང་པོའི་ལུས་ལས་ལྷ་དེ་དག་བྱུང་བ་དེའི་ཚེ་བཅོམ་ལྡན་འདས་ཀྱིས་ལྷའི་བུ་དབང་ཕྱུག་ཆེན་པོ་ལ་འདི་སྐད་ཅེས་གསུངས་ཏེ། དབང་ཕྱུག་ཆེན་པོ་ཁྱོད་དུས་ངན་པའི་ཚེ་སེམས་ཅན་གྱི་ཁམས་མ་རུངས་པ་དག་བྱུང་བ་ན་ཁྱོད་ཐོག་མར་བྱེད་པ་པོ་དང ། གཏོང་བ་པོའི་ལྷར་གྲགས་པར་འགྱུར་རོ། །སེམས་ཅན་དེ་དག་ནི་བྱང་ཆུབ་ཀྱི་ལམ་ཡོངས་སུ་སྤངས་པར་འགྱུར་རོ། །སོ་སོའི་སྐྱེ་བོའི་ནང་དུ་གཏམ་བྱེད་པར་འགྱུར་ཏེ། ནམ་མཁའ་ནི་དེའི་རྟགས་སོ། །ས་ནི་དེའི་ཁྲིའོ། །སེམས་ཅན་ཐམས་ཅད་ཀྱི་ནི་གནས་སོ། །ཞུ་བར་འགྱུར་བས་ན་རྟགས་སོ་ཞེས་ཟེར་བར་འགྱུར་རོ་ཞེས། རིགས་ཀྱི་བུ། ངས་དེ་བཞིན་གཤེགས་པ་ལྷག་མཐོང་ལས་དེ་སྐད་ཐོས་སོ། །དེ་འདས་ནས་དེ་བཞིན་གཤེགས་
325b
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཙུག་ལྡན་ཞེས་བྱ་བ་རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སྔོན་འཇིག་རྟེན་དུ་བྱུང་བར་གྱུར་ཏོ། །དེའི་ཚེ་དེའི་དུས་ན་སྒྲིབ་པ་ཐམས་ཅད་རྣམ་པར་སེལ་བ་ང་ནི་བྱང་ཆུབ་སེམས་དཔའ་སྦྱིན་ལ་དཔའ་བ་ཞེས་བྱ་བར་གྱུར་ཏེ། དེ་ལས་ཀྱང་ངས་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོའི་ཡོན་ཏན་བརྗོད་པ་ཐོས་སོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཡོན་ཏན་བརྗོད་པ་ཇི་སྐད་དུ་གསན། བཅོམ་ལྡན་འདས་ཀྱིས་བཀའ་སྩལ་པ། ལྷ་དང ། ཀླུ་དང ། གནོད་སྦྱིན་དང ། སྲིན་པོ་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་ཐམས་ཅད་འདུས་པར་གྱུར་ཏེ། གང་གི་ཚེ་ན་བཅོམ་ལྡན་འདས་ཀྱིས་འདུས་པ་ཆེན་པོ་གཟིགས་ནས་འཁོར་དེའི་ནང་དུ་ཆོས་ཀྱི་གཏམ་བྱ་བར་བརྩམས་པ་དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་གྱི་ཁ་དོག་སྣ་ཚོགས་བྱུང་བ་སྔོན་པོ་དང ། སེར་པོ་དང ། དམར་པོ་དང ། དཀར་པོ་
326a
༄#། །དང ། ཇ་ཧོང་དང ། ཤེལ་དང ། དངུལ་གྱི་ཁ་དོག་རྣམས་བྱུང་སྟེ། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་དུ་སྣང་བར་བྱས་ནས་སླར་འོངས་ཏེ་བསྐོར་ནས་བཅོམ་ལྡན་འདས་ཀྱི་ཞལ་གྱི་སྒོར་སོང་ངོ ། །དེ་ནས་འཁོར་དེར་བྱང་ཆུབ་སེམས་དཔའ་ལག་ན་རིན་པོ་ཆེ་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་ལྟས་འདི་ལྟ་བུ་བསྟན་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་དེ་འཇིག་རྟེན་གྱི་ཁམས་བདེ་བ་ཅན་ནས་འོང་སྟེ། དེ་འོང་བའི་ཚེ་ལྟས་འདི་འདྲ་བ་སྟོན་ཏོ། །གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་འོང་བ་དེའི་ཚེ་ཤིང་དཔག་བསམ་རྣམས་ཀྱང་འཕེལ་བར་འགྱུར། ཤིང་ཙུ་ཏ་ཀའང་འཕེལ་བར་འགྱུར། ཤིང་ཀུནདའི་མེ་ཏོག་ཀྱང་འབྱུང་བར་འགྱུར། །ཤིང་ཙམྤ་ཀའང་འཕྱང་བར་འགྱུར། །རྫིང་བུ་མེ་ཏོག་གིས་ཤིན་ཏུ་གང་བའང་འབྱུང་བར་འགྱུར། དེ་ལས་རིན་པོ་ཆེའི་ཤིང་རྣམས་ཀྱང་འབྱུང་བར་འགྱུར། །ཆར་སྣ་ཚོགས་ཀྱང་
326b
འབབ་པར་འགྱུར་ཏེ། ནོར་བུ་དང ། མུ་ཏིག་དང ། རྡོའི་སྙིང་པོ་དང ། བཻ་ཌཱུརྱ་དང ། དུང་དང ། མན་ཤེལ་དང ། བྱུ་རུ་རིན་པོ་ཆེའི་ཆར་ཡང་འབབ། ལྷའི་གོས་ཀྱི་ཆར་ཡང་འབབ་པར་འགྱུར་རོ། །ལྷ་གང་དེ་དང་ཉེ་བ་ཉིད་དུ་རིན་པོ་ཆེ་བདུན་ཡང་འབྱུང་བ་འདི་ལྟ་སྟེ། འཁོར་ལོ་རིན་པོ་ཆེ་དང ། བལ་གླང་རིན་པོ་ཆེ་དང ། རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། བློན་པོ་རིན་པོ་ཆེ་བདུན་རྣམས་སོ། །དེ་དག་བྱུང་ནས་ས་གསེར་དུ་སྣང་ངོ ། །གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་འཇིག་རྟེན་གྱི་ཁམས་བདེ་བ་ཅན་ནས་བྱུང་བ་དེའི་ཚེ་ས་རྣམ་པ་དྲུག་ཏུ་རབ་ཏུ་གཡོས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལག་ན་རིན་པོ་ཆེས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་གི་ལྟས་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་དེ་འོང་སྟེ། དེའི་ལྟས་འདི་འདྲ་བ་དག་བྱུང་ངོ ། །གང་གི་ཚེ་ན་བསྐྱོད་པ་དེའི་ཚེ་ཡིད་དགའ་བའི་མེ་ཏོག་པདྨའི་ཆར་རབ་ཏུ་བབ་སྟེ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་མེ་ཏོག་པདྨ་འདབ་མ་སྟོང་པ་སྡོང་བུ་གསེར་དུ་སྣང་བ་ཐོགས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། བཅོམ་ལྡན་
327a
༄#། །འདས་ཀྱི་ཞབས་ལ་མགོ་བོས་ཕྱག་བཙལ་ནས་མེ་ཏོག་འདི་དག་དེ་བཞིན་གཤེགས་པ་སྣང་བ་མཐའ་ཡས་ཀྱིས་བསྐུར་ཏོ་ཞེས་པདྨ་ཕུལ་ཏེ་བསྙུང་བ་མ་མཆིས་སམ། འོ་མ་བརྒྱལ་ཏམ། བཞེངས་པ་ཡང་ངམ། བདེ་བ་ལ་རེག་པར་གནས་སམ་ཞེས་ཀྱང་གསུང་ངོ ། །དེས་པདྨ་དེ་བླངས་ཏེ་གཡོན་ཕྱོགས་སུ་བཞག་ནས་དེའི་ཚེ་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོའི་ཡོན་ཏན་བརྗོད་པ་མཛད་དོ། །སྤྱན་རས་གཟིགས་ཀྱི་དབང་པོའི་ལས་ཀྱི་ས་ཇི་ལྟ་བུར་བསྒྲུབས་པ་ཡིན། སེམས་ཅན་ཡི་དྭགས་དག་དང ། བསྟིར་མེད་པར་སྐྱེས་པ་དག་དང ། ཐིག་ནག་པོ་ཅན་དག་དང ། འོ་འདོད་འབོད་པ་དག་དང ། ཧ་ཧ་ཞེས་འབོད་པ་ཐམས་ཅད་དག་དང ། གདུང་བའི་སེམས་ཅན་དམྱལ་བ་ཆེན་པོ་དང ། སྡོང་དུ་མ་ལྟ་བུའི་སེམས་ཅན་དམྱལ་བ་ཆེན་པོ་དང ། མེའི་བུམ་པའི་སེམས་ཅན་དམྱལ་བ་ཆེན་པོ་དང ། སེམས་ཅན་དམྱལ་བ་ཆེན་པོ་ཤམ་པ་ལ་དང ། སེམས་ཅན་དམྱལ་བ་ཆེན་པོ་ཆུ་གྲང་བ་དང ། སེམས་ཅན་དམྱལ་བ་ཆེན་པོ་དེ་དག་ཏུ་སེམས་ཅན་གང་དག་སྐྱེས་པ་དག་ནི་བདག་གི་ལས་ཀྱི་ས་ཏེ། བདག་གིས་སེམས་ཅན་ཡོངས་སུ་སྨིན་པར་བགྱིའོ། །བགྱིས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་དགོད་པར་བགྱིའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་
327b
སྤྱན་རས་གཟིགས་ཀྱི་དབང་པོས་དྲི་བའི་ལན་བཏབ་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་སོང་ངོ ། །སོང་ནས་མེའི་ཕུང་པོ་འབར་བ་བཞིན་དུ་ས་དང་ནམ་མཁའ་ལ་མི་སྣང་བར་སོང་ངོ ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལག་ན་རིན་པོ་ཆེས་འདི་སྐད་ཅེས་གསོལ་ཏོ། །བཅོམ་ལྡན་འདས། ཞུ་བ་ལུང་བསྟན་པ་བཤད་པ་བདག་ཞུ་ན། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་སྙེད་ལ་ལྷའི་བསྐལ་པར་ན་བཟའ་དང ། བཤོས་དང།་མལ་སྟན་དང ། ན་བའི་རྐྱེན་གྱི་སྨན་དང ། ཡོ་བྱད་རྣམས་ཀྱིས་བསྙེན་བཀུར་བྱས་ནས། གང་དེ་བཞིན་གཤེགས་པ་དེ་དག་ལས་བསོད་ནམས་འཕེལ་བར་གྱུར་པའི་བསོད་ནམས་དེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བ་སྤུ་གཅིག་གི་རྩེ་མོ་ལ་གནས་པའི་བསོད་ནམས་ཀྱི་ཕུང་པོ་དང་མཉམ་མོ། །རིགས་ཀྱི་བུ། འདི་ལྟ་སྟེ། དཔེར་ན། གླིང་ཆེན་པོ་བཞིར་ཟླ་བ་བཅུ་གཉིས་ཀྱི་ལོར་ཉིན་མཚན་དུ་ཆར་པ་བབ་ཀྱང་ཐིགས་པ་རེ་རེ་ནས་བགྲང་ནུས་ཀྱི། རིགས་ཀྱི་བུ། བྱང་ཆུབ་སེམས་དཔའ་སེམས་
328a
༄#། །དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་ངས་བགྲང་བར་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། རྒྱ་མཚོ་མཆིང་རྣམ་ཆེན་པོ་ཟབས་སུ་དཔག་ཚད་བརྒྱད་ཁྲི་བཞི་སྟོང་ཡོད་ལ། ཞེང་དུ་དཔག་ཏུ་མེད་ལ། རྟ་རྒོད་མའི་ཁ་ལྟ་བུའི་མཐར་ཐུག་པའི་ཐིགས་པ་རེ་རེ་ནས་ངས་བགྲང་ནུས་ཀྱི། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་ངས་བགྲང་བར་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། གླིང་ཆེན་པོ་བཞིན་སེང་གེ་དང ། སྟག་དང ། དྲེད་དང ། ཏ་རཀྵ་དང ། རི་དྭགས་ལ་སོགས་པ་དང ། བ་ལང་དང ། བོང་བུ་དང ། ཕྱུགས་དང ། བལ་གླང་དང ། རྟ་དང།་མ་ཧེ་དང ། བྱི་ལ་ལ་སོགས་པ་རྐང་པ་བཞི་པ་དེ་དག་གི་སྤུ་རེ་རེ་ནས་ནི་ངས་བགྲང་ནུས་ཀྱི། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་ངས་བགྲང་པར་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། རྡུལ་ཕྲ་རབ་ཀྱི་རྡུལ་སྙེད་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐུ་གཟུགས་ལྷའི་གསེར་རིན་པོ་ཆེ་ལས་བྱས་ནས་ཉིན་གཅིག་བཞིན་དུ་རིང་བསྲེལ་བཅུག་ན། རིགས་ཀྱི་བུ། དེའི་བསོད་ནམས་
328b
ཀྱི་ཕུང་པོ་ནི་ངས་བགྲང་ནུས་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་ངས་བགྲང་བར་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། ཤིང་ཤྲི་ཤ་བའི་ཚལ་གྱི་ལོ་མ་ནི་ངས་བགྲང་ནུས་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་ངས་བགྲང་བར་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། གླིང་ཆེན་པོ་བཞིན་གནས་པའི་བུད་མེད་དང ། སྐྱེས་པ་དང ། ཁྱེའུ་དང ། བུ་མོ་གནས་པ་དེ་དག་ཐམས་ཅད་རྒྱུན་དུ་ཞུགས་པའི་འབྲས་བུ་དང ། ལན་གཅིག་ཕྱིར་འོང་བའི་འབྲས་བུ་དང ། ཕྱིར་མི་འོང་བའི་འབྲས་བུ་དང ། དགྲ་བཅོམ་པ་ཉིད་དང ། རང་བྱང་ཆུབ་ལ་བཀོད་ན། གང་དེ་དག་གི་བསོད་ནམས་ཀྱི་ཕུང་པོ་ནི་སྔ་མ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བ་སྦུའི་རྩེ་མོའི་བསོད་ནམས་ཀྱི་ཕུང་པོ་དང་མཉམ་མོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལག་ན་རིན་པོ་ཆེས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཕུང་པོ་ཅི་འདྲ་བ་དེ་ལྟ་བུ་དེ་བཞིན་གཤེགས་པ་རྣམས་ལ་ཡང་གང་ནའང་མ་མཐོང་མ་ཐོས་ནས་བྱང་ཆུབ་སེམས་དཔར་གྱུར་པ་ལྟ་
329a
༄#། །ཅི་སྨོས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། གང་ང་འདྲ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་སུ་གྱུར་ལ། དེ་དག་ཀྱང་གནས་གཅིག་ཏུ་གཞོག་ཅིང་ན་བཟའ་དང ། བཤོས་དང ། མལ་སྟན་དང ། ན་བའི་རྐྱེན་གྱི་སྨན་དང ། ཡོ་བྱད་རྣམས་ཀྱིས་བསྐལ་པར་གཞོག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཕུང་པོ་བགྲང་མི་ནུས་ན། རིགས་ཀྱི་བུ། ང་གཅིག་པུ་འཇིག་རྟེན་གྱི་ཁམས་འདི་ན་གནས་པས་ལྟ་ཅི་སྨོས། གང་འཇིག་རྟེན་ན་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོའི་མིང་དྲན་པ་དེ་དག་ནི་བདེ་བ་དང་ལྡན་པ་ཡིན་ནོ། །དེ་དག་ནི་རྒ་བ་དང ། འཆི་བ་དང ། ན་བ་དང ། སྡུག་བསྔལ་བ་ལས་ཡོངས་སུ་ཐར་བ་ཡིན་ནོ། །དེ་དག་ནི་འཁོར་བའི་ཐ་མ་གཞན་མེད་པའི་སྡུག་བསྔལ་ལས་ཐར་བར་འགྱུར་རོ། །དེ་དག་ནི་གོས་དཀར་པོ་དང་སྐྱ་བོ་བཞིན་དུ་བྱ་ངང་པའི་རྒྱལ་པོ་མགྱོགས་པ་དང་རླུང་གི་ཤུགས་འོང་བ་བཞིན་དུ་བདེ་བ་ཅན་གྱི་འཇིག་རྟེན་གྱི་ཁམས་སུ་དེ་བཞིན་གཤེགས་པ་སྣང་བ་མཐའ་ཡས་ལས་ཆོས་མངོན་དུ་ཉན་པའི་ཕྱིར་འགྲོའོ། །ཐོས་ནས་ཀྱང་དེ་དག་གི་ལུས་ལ་འཁོར་བའི་སྡུག་བསྔལ་མི་
329b
འབྱུང ། འདོད་ཆགས་དང ། ཞེ་སྡང་དང ། གཏི་མུག་མི་འབྱུང ། རྒ་བ་དང ། ཤི་བར་མི་འགྱུར། དེ་དག་གི་ལུས་ལ་བཀྲེས་པར་མི་འགྱུར། མངལ་ན་གནས་པའི་སྡུག་བསྔལ་བ་ཤེས་པར་མི་འགྱུར་ཏེ། ཆོས་ཀྱི་རོས་བསྐྱེད་ནས་དེ་ཉིད་དུ་པདྨའི་ནང་དུ་སྐྱེ་བར་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཡི་དམ་བརྟན་པོ་ཡོངས་སུ་རྫོགས་པ་དང ། སེམས་ཅན་ཐམས་ཅད་ཐར་པ་ལ་བཞག་གི་བར་དུ་འཇིག་རྟེན་གྱི་ཁམས་དེ་ན་རྟག་ཏུ་འཛིན་ཅིང་གནས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལག་ན་རིན་པོ་ཆེས་འདི་སྐད་གསོལ་ཏོ། །བཅོམ་ལྡན་འདས། གང་གི་དུས་ན་ཡི་དམ་བརྟན་པ་དེ་ཡོངས་སུ་རྫོགས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། སེམས་ཅན་མང་པོ་འཁོར་པ་ན་འཁོར་བའི་སེམས་ཅན་དེ་དག་ཡོངས་སུ་སྨིན་པར་བྱེད་པ་དང ། བྱང་ཆུབ་ཀྱི་ལམ་སྟོན་པར་བྱེད་ཅིང ། གང་དང་གང་གི་གཟུགས་ཀྱིས་འདུལ་བའི་སེམས་ཅན་རྣམས་དུལ་བར་འགྱུར་བ་དེ་དང་དེའི་གཟུགས་ཀྱིས་ཆོས་འཆད་དེ། དེ་བཞིན་གཤེགས་པས་འདུལ་བའི་སེམས་ཅན་རྣམས་ལ་ནི་དེ་བཞིན་གཤེགས་པའི་གཟུགས་ཀྱིས་ཆོས་འཆད། རང་སངས་རྒྱས་ཀྱིས་འདུལ་བའི་སེམས་ཅན་རྣམས་ལ་ནི་རང་སངས་རྒྱས་ཀྱི་གཟུགས་ཀྱིས་ཆོས་འཆད། དགྲ་བཅོམ་པས་འདུལ་བའི་སེམས་
330a
༄#། །ཅན་རྣམས་ལ་ནི་དགྲ་བཅོམ་པའི་གཟུགས་ཀྱིས་ཆོས་འཆད། བྱང་ཆུབ་སེམས་དཔས་འདུལ་བའི་སེམས་ཅན་རྣམས་ལ་ནི་བྱང་ཆུབ་སེམས་དཔའི་གཟུགས་ཀྱིས་ཆོས་འཆད། དབང་ཕྱུག་ཆེན་པོས་འདུལ་བའི་སེམས་ཅན་རྣམས་ལ་ནི་དབང་ཕྱུག་ཆེན་པོའི་གཟུགས་ཀྱིས་ཆོས་འཆད། མཐུ་བོ་ཆེས་འདུལ་བའི་སེམས་ཅན་རྣམས་ལ་ནི་མཐུ་བོ་ཆེའི་གཟུགས་ཀྱིས་ཆོས་འཆད། ཚངས་པས་འདུལ་བའི་སེམས་ཅན་རྣམས་ལ་ནི་ཚངས་པའི་གཟུགས་ཀྱིས་ཆོས་འཆད། དབང་པོས་འདུལ་བའི་སེམས་ཅན་རྣམས་ལ་ནི་དབང་པོའི་གཟུགས་ཀྱིས་ཆོས་འཆད། ཉི་མས་འདུལ་བའི་སེམས་ཅན་རྣམས་ལ་ནི་ཉི་མའི་གཟུགས་ཀྱིས་ཆོས་འཆད། ཟླ་བས་འདུལ་བའི་སེམས་ཅན་རྣམས་ལ་ནི་ཟླ་བའི་གཟུགས་ཀྱིས་ཆོས་འཆད། མེ་ལྷས་འདུལ་བའི་སེམས་ཅན་རྣམས་ལ་ནི་མེ་ལྷའི་གཟུགས་ཀྱིས་ཆོས་འཆད། ཆུ་ལྷའི་གཟུགས་ཀྱིས་འདུལ་བའི་སེམས་ཅན་རྣམས་ལ་ནི་ཆུ་ལྷའི་གཟུགས་ཀྱིས་ཆོས་འཆད། རླུང་གི་ལྷའི་གཟུགས་ཀྱིས་འདུལ་བའི་སེམས་ཅན་རྣམས་ལ་ནི་རླུང་ལྷའི་གཟུགས་ཀྱིས་ཆོས་འཆད། ཀླུས་འདུལ་བའི་སེམས་ཅན་རྣམས་ལ་ནི་ཀླུའི་གཟུགས་ཀྱིས་ཆོས་འཆད། བགེགས་མེད་པའི་བདག་པོས་འདུལ་བའི་སེམས་ཅན་རྣམས་ལ་ནི་བགེགས་མེད་པའི་བདག་པོའི་གཟུགས་
330b
ཀྱིས་ཆོས་འཆད། གནོད་སྦྱིན་གྱིས་འདུལ་བའི་སེམས་ཅན་རྣམས་ལ་ནི་གནོད་སྦྱིན་གྱི་གཟུགས་ཀྱིས་ཆོས་འཆད། ངལ་བསོ་པོའི་གཟུགས་ཀྱིས་འདུལ་བའི་སེམས་ཅན་རྣམས་ལ་ནི་ངལ་བསོ་པོའི་གཟུགས་ཀྱིས་ཆོས་འཆད། རྒྱལ་པོའི་གཟུགས་ཀྱིས་འདུལ་བའི་སེམས་ཅན་རྣམས་ལ་ནི་རྒྱལ་པོའི་གཟུགས་ཀྱིས་ཆོས་འཆད། མཁས་པས་འདུལ་བའི་སེམས་ཅན་རྣམས་ལ་ནི་མཁས་པའི་གཟུགས་ཀྱིས་ཆོས་འཆད། རྒྱལ་པོའི་མིས་འདུལ་བའི་སེམས་ཅན་རྣམས་ལ་ནི་རྒྱལ་པོའི་མིའི་གཟུགས་ཀྱིས་ཆོས་འཆད། ཕ་དང་མས་འདུལ་བའི་སེམས་ཅན་རྣམས་ལ་ནི་ཕ་དང་མའི་གཟུགས་ཀྱིས་ཆོས་འཆད་དེ། སེམས་ཅན་དག་ཇི་ལྟ་ཇི་ལྟར་འདུལ་བ་དེ་ལྟ་དེ་ལྟར་ཆོས་སྟོན་ཏོ། །རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནི་དེ་ལྟར་སེམས་ཅན་ཡོངས་སུ་སྨིན་པར་བྱེད་ཅིང་མྱ་ངན་ལས་འདས་པའི་ཆོས་སྟོན་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལག་ན་རིན་པོ་ཆེས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ནི་ཤིན་ཏུ་ངོ་མཚར་ཐོབ་པར་གྱུར་ཏེ། བདག་ནི་ནམ་ཡང་འདི་འདྲ་བའི་ཡུལ་མཐོང་བའམ་ཐོས་པར་མ་གྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཡུལ་ཇི་འདྲ་བ་དེ་འདྲ་བ་ནི་དེ་བཞིན་གཤེགས་པ་རྣམས་ལའང་མ་མཆིས་
331a
༄#། །སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ཛམྦུའི་གླིང་འདི་ཉིད་ན་རྡོ་རྗེའི་མངལ་ཞེས་བྱ་བའི་ཕུག་ཡོད་པ་དེ་ན་ལྷ་མ་ཡིན་བྱེ་བ་ཁྲག་ཁྲིག་བརྒྱ་སྟོང་དུ་མ་གནས་ཏེ། དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལྷ་མ་ཡིན་རྣམས་ལ་ལྷ་མ་ཡིན་གྱི་གཟུགས་ཀྱིས་ཆོས་འཆད་དེ། ཐེག་པ་ཆེན་པོའི་མདོ་རིན་པོ་ཆེའི་རྒྱལ་པོ་ཟ་མ་ཏོག་བཀོད་པ་འདི་ཉིད་འཆད་དོ། །ཁྱེད་ཅག་ཉོན་ཅིག་།གང་ལྷ་མ་ཡིན་གཞན་པ་དེ་དག་ཀྱང་བྱམས་པའི་སེམས་དང་ཞི་བའི་སེམས་སུ་བྱས་ཤིང ། ལག་པའི་ཐལ་མོ་སྦྱར་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་ཆོས་ཀྱི་རྣམ་གྲངས་འདི་ཉིད་ཉན་ཏོ། །གང་འཇིག་རྟེན་ན་མདོ་སྡེའི་རྒྱལ་པོ་འདི་ལྟ་བུ་མངོན་དུ་བྱེད་པ་དེ་དག་ནི་བདེ་བ་དང་ལྡན་པ་ཡིན་ནོ། །ཐོས་ནས་ཀྱང་མཚམས་མེད་པ་ལྔ་དག་ཟད་པར་བྱེད་དོ། །འཆི་བའི་ཚེའང་དེ་བཞིན་གཤེགས་པ་བཅུ་གཉིས་གཤེགས་ནས་རིགས་ཀྱི་བུ་མ་འཇིགས་ཤིག་།ཁྱོད་ཀྱིས་ཐེག་པ་ཆེན་པོའི་མདོ་སྡེའི་རྒྱལ་པོ་ཟ་མ་ཏོག་བཀོད་པ་ཐོས་སོ། །བདེ་བ་ཅན་དུ་འགྲོ་བའི་ཕྱིར་ལམ་སྣ་ཚོགས་ཀྱང་སྟ་གོན་བྱས་སོ། །གདུགས་སྣ་ཚོགས་དང ། ཅོད་པན་དང ། རྣ་ཆ་དང ། སེ་མོ་དོ་རྣམས་ཀྱང་སྟ་གོན་བྱས་སོ་ཞེས་དབུགས་འབྱིན་པར་མཛད་དོ། །ལྟས་དེ་
331b
ལྟ་བུ་འབྱུང་ཞིང་འཆི་བའི་དུས་ཀྱི་ཚེ་བར་ཆད་མེད་པར་བདེ་བ་ཅན་དུ་འགྲོ་བར་འགྱུར་རོ། །ལག་ན་རིན་པོ་ཆེ། དེ་ལྟར་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་དེ་ནི་ལྷ་མ་ཡིན་རྣམས་ལ་མྱ་ངན་ལས་འདས་པའི་ཆོས་སྟོན་པར་བྱེད། སྒོ་སྟོན་པར་བྱེད་དོ། །དེ་ནས་བྱང་ཆུབ་སེམས་དཔའ་ལག་ན་རིན་པོ་ཆེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་དེ་ཉིད་ནས་སོང་ངོ ། །དེའང་འདས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཐམས་ཅད་སྐྱོབ་པ་ཞེས་བྱ་སྔོན་བྱུང་བར་གྱུར་ཏོ། །དེའི་ཚེ་དེའི་དུས་ན། སྒྲིབ་པ་ཐམས་ཅད་རྣམ་པར་སེལ་བ། ང་ནི་མི་མི་རྒྱུ་བའི་སའི་ཕྱོགས་རི་ཁྲོད་ཀྱི་བར་རི་བྲགས་ཤིག་ན་གནས་ཤིང་བཟོད་པ་སྨྲ་བར་གྱུར་ཏེ། དེའི་ཚེ་དུས་དུས་སུ་ངས་དེ་བཞིན་གཤེགས་པ་ལས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཡོན་ཏན་བརྗོད་པ་ཐོས་ཏེ། འདི་ལྟ་སྟེ། གསེར་གྱིས་ལ་སོང་ནས་སེམས་ཅན་སྤྱིའུ་ཚུགས་སུ་འདུག་པ་རྣམས་ལ་འཕགས་པའི་ལམ་ཡན་ལག་བརྒྱད་པའི་ལམ་མྱ་ངན་ལས་འདའ་བ་སྟོན་པར་བྱེད་པ་དང་ལྡན་པའི་ཆོས་སྟོན་ཏོ། །དེ་
332a
༄#། །ནས་གསེར་གྱི་ས་ལས་བྱུང་སྟེ། དངུལ་གྱི་ས་ལ་སོང་ནས། དེ་ན་སྐྱེས་བུ་གང་ཟག་རྐང་པ་བཞི་ཡོད་པ་དེ་དག་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ཁྱེད་ཅག་བསམ་པ་དམ་པ་རབ་ཀྱིས་མྱ་ངན་ལས་འདའ་བའི་རྒྱགས་ཀྱི་རྗེས་སུ་སེམས་ཤིང་མངོན་དུ་ཕྱོགས་པའི་ཆོས་ཀྱི་རྣམ་གྲངས་ཉོན་ཅིག་ཅེས་ཆོས་འཆད་དོ། །དེ་ནས་སྐྱེས་བུ་དེ་དག་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་མདུན་དུ་འདུག་སྟེ་འདི་སྐད་ཅེས་སྨྲས་སོ། །སེམས་ཅན་ལོང་བ་རྣམས་ལ་ནི་ལམ་སྟོན་ཅིག་།མགོན་མ་མཆིས་པ་རྣམས་ལ་ནི་མགོན་དང་སྐྱབས་མཛོད་ཅིག་།ཕ་དང་མ་མ་མཆིས་པ་རྣམས་ལ་ནི་ཕ་དང་མ་མཛོད་ཅིག་།ངན་སོང་གསུམ་གྱི་མུན་པ་ལ་ནི་སྒྲོན་མེད་མཛོད་ཅིག་།ཚོར་བར་བགྱིད་པའི་ཐར་པའི་ལམ་སྟོན་ཅིག་།སེམས་ཅན་གང་དག་རྟག་ཏུ་ཁྱོད་ཀྱི་མཚན་རྗེས་སུ་དྲན་ཞིང་ཡོངས་སུ་ལེན་པ་དེ་དག་ནི་བདེ་བར་ལྡན་པ་ལགས་སོ། །བདག་ཅག་མྱོང་བ་ལྟ་བུ་སྡུག་བསྔལ་ལས་ཀྱང་ཐར་བར་འགྱུར་རོ། །དེ་ནས་སེམས་ཅན་དེ་དག་གི་རྣ་བའི་བུ་གར་ཐེག་པ་ཆེན་པོའི་མདོ་སྡེ་ཟ་མ་ཏོག་བཀོད་པའི་སྒྲ་བྱུང་བ་དང ། སྐྱེས་བུ་དེ་དག་གིས་དེ་ཐོས་ནས་ཕྱིར་མི་ལྡོག་པའི་ས་བསྒྲུབ་ཅིང་ཤིན་ཏུ་བདེ་བ་དང་ལྡན་པར་གྱུར་ཏོ།། །།བམ་པོ་གཉིས་
332b
པ།་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་བྱུང་ནས་ས་གཞན་ལྕགས་ལས་བྱས་པར་སོང་སྟེ། གང་དུ་ལྷ་མ་ཡིན་གྱི་རྒྱལ་པོ་གཏོར་མ་ཞེས་བྱ་བ་མཆིས་པ་དེར་སོང་བ་དང ། དེ་ནས་ལྷ་མ་ཡིན་གྱི་རྒྱལ་པོ་གཏོར་མས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་རྒྱང་མ་ནས་འོང་བ་མཐོང་ནས་སླས་དང ། འཁོར་དང ། ལྷ་མ་ཡིན་སྒུར་པོ་དང ། ཐུང་དུ་ལ་སོགས་པ་དུ་མ་དང་འགྲོགས་ཤིང་འཁོར་དང་བཅས་ཏེ་དོང་ནས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་རྐང་པ་ལ་ཕྱག་བཙལ་ཏེ་འདི་སྐད་ཅེས་སྨྲས་སོ། །དེ་རིང་དུ་ནི་བདག་གི་ཚེའི་འབྲས་བུ་མཆིས་སོ། །དེ་རིང་དུ་ནི་བདག་གི་བསམ་པ་རྫོགས་སོ། །དེ་རིང་དུ་ནི་བདག་གི་བསམ་པ་ཡོངས་སུ་རྫོགས་ཏེ། གང་བདག་གིས་ཁྱོད་ཡང་དག་པར་མཐོང་བས་དེའི་ཚེ་ལུས་ཐམས་ཅད་བདེ་བ་དང་ལྡན་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་རིན་པོ་ཆེའི་ཁྲི་ཕུལ་ཏེ། བཅོམ་ལྡན་འདས། སྡིག་པ་ལ་དགའ་བ། གཞན་གྱི་ཆུང་མ་ལ་ཆགས་པ། སྲོག་གཅོད་པ་ལ་བརྩོན་པ། ཕ་རོལ་གྱི་སྲོག་གཅོད་པ། རྒ་བ་དང་འཆི་བས་འཇིགས་པ་རྣམས་ལ་ཐུགས་རྗེས་གཟིགས་ཤིག་།འཁོར་བས་སྐྱོ་བ་རྣམས་ལ་སྐྱབས་མཛོད་ཅིག་།མགོན་པོ་ཁྱོད་
333a
༄#། །ནི་ཕ་དང་མར་གྱུར་པ་ལགས་ཀྱི། བདག་ཅག་བཅིང་བས་བཅིངས་པ་རྣམས་ལ་ལ་མ་སྟོན་ཅིག་།རིགས་ཀྱི་བུ། འདི་ལྟ་སྟེ། དཔེར་ན། གང་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བསོད་སྙོམས་འབུལ་བ་དེ་དག་གི་བསོད་ནམས་ཀྱི་ཕུང་པོ་འདི་བཤད་དོ། །རིགས་ཀྱི་བུ། འདི་ལྟ་སྟེ། དཔེར་ན། ང་དང་འདྲ་བའི་བྱང་ཆུབ་སེམས་དཔའ་གངྒཱའི་ཀླུང་གི་བྱེ་མ་སྙེད་བཅུ་གཉིས་ཡོད་པར་གྱུར་ལ། དེ་དག་ཀྱང་གནས་གཅིག་ཏུ་བདེ་བའི་ཡོ་བྱད་ཐམས་ཅད་ཀྱིས་ལྷའི་བསྐལ་པར་གནས་སུ་བཅུག་ན་དེ་དག་གིས་ཀྱང་བསོད་ནམས་ཀྱི་ཕུང་པོ་དེ་བགྲང་བར་མི་ནུས་ན། ང་གཅིག་པུ་ལྷ་མ་ཡིན་གྱི་གནས་ན་གནས་པས་ལྟ་ཅི་སྨོས། རིགས་ཀྱི་བུ། འདི་ལྟ་སྟེ། དཔེར་ན། རྡུལ་ཕྲ་རབ་ཀྱི་ཚད་ནི་ངས་བགྲང་ནུས་ཀྱི། རིགས་ཀྱི་བུ། བསོད་སྙོམས་ཀྱི་བསོད་ནམས་ཀྱི་ཕུང་པོ་ནི་ངས་བགྲང་བར་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། རྒྱ་མཚོ་མཆིང་རྣམ་ཆེན་པོའི་ཐིགས་པ་ནི་ངས་རེ་རེ་ནས་བགྲང་ནུས་ཀྱི། རིགས་ཀྱི་བུ། བསོད་སྙོམས་ཀྱི་བསོད་ནམས་གྱི་ཕུང་པོ་ནི་ངས་བགྲང་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། གླིང་ཆེན་པོ་བཞི་པའི་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་དེ་དག་ཐམས་ཅད་ནམ་གྱི་ལས་
333b
ལ་བརྩོན་པར་གྱུར་ལ། གླིང་ཆེན་པོ་བཞི་པའི་མི་དེ་དག་རྣམས་གཞན་ནི་མི་བྱེད་ཀྱི་ཡུངས་ཀར་འབའ་ཞིག་བྱེད་ལ། དུས་དུས་སུ་ཀླུའི་རྒྱལ་པོས་ཀྱང་ཆར་པའི་རྒྱུན་ཕབ་སྟེ། ཡུངས་ཀར་དེ་དག་ཀྱང་ལེགས་པར་གྲུབ་ནས་གཡུལ་གཅིག་ཏུ་བྱས་ཏེ། སྐྱེས་པ་དང ། བུད་མེད་དང ། ཁྱེའུ་དང ། བུ་མོ་དེ་དག་ཐམས་ཅད་ཀྱིས་ཁུར་ཤིང་རྟ་དང ། བམ་པོ་དང ། སྐོན་པ་དང།་རྔ་མོ་དང ། བོང་བུ་དང ། བ་ལང་དང ། དེ་དག་ཐམས་ཅད་ལ་བཀལ་ཏེ་གཡུལ་ཆེན་པོ་དེར་སྤུངས་ནས་བོང་བུ་དག་དང ། བ་ལང་དག་གིས་བཅགས་ཏེ་ཕུང་པོ་ཆེན་པོར་བྱས་ཀྱང ། རིགས་ཀྱི་བུ། དེ་ནི་ངས་འབྲུ་རེ་རེ་ནས་བགྲང་ནུས་ཀྱི། རིགས་ཀྱི་བུ། བསོད་སྙོམས་ཀྱི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན།་རི་རབ་ལྷུན་པོ་དཔག་ཚད་བརྒྱ་ཁྲི་བཞི་སྟོང་འོག་ཏུ་ནུབ་པ་དང ། འཕང་གི་སྲིད་དུ་དཔག་ཚད་བརྒྱད་ཁྲི་བཞི་སྟོང་ཡོད་པ་དེ་ནི་རིགས་ཀྱི་བུ་གྲོ་གའི་ཕུང་པོར་གྱུར་ལ། རྒྱ་མཚོ་མཆིང་རྣམ་ཆེན་པོ་ནི་སྣག་ཚས་ཡོངས་སུ་གང་བར་གྱུར། གླིང་བཞི་ན་གནས་པའི་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་དེ་དག་ཐམས་ཅད་ནི་ཡི་གེ་བར་གྱུར་ཏེ། རི་རབ་ལྷུན་པོ་དང་མཉམ་པ་མཐའ་ཡས་མུ་མེད་པ་ཡི་གེར་བྲིས་ཀྱང ། རིགས་ཀྱི་བུ། ཡི་གེར་དེ་རེ་རེ་ནས་ངས་བགྲང་ནུས་ཀྱི། རིགས་ཀྱི་བུ། བསོད་སྙོམས་ཀྱི་བསོད་ནམས་ཀྱི་ཕུང་པོ་དེ་ནི་བགྲང་མི་
334a
༄#། །ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། ཡི་གེ་པ་དེ་དག་ཐམས་ཅད་བྱང་ཆུབ་སེམས་དཔའ་ས་བཅུ་ལ་གནས་པར་གྱུར་ན། གང་བྱང་ཆུབ་སེམས་དཔའ་ས་བཅུ་ལ་གནས་པ་རྣམས་ཀྱི་བསོད་ནམས་ཀྱི་ཕུང་པོ་ཇི་ཙམ་པ་བསོད་སྙོམས་ཀྱི་བསོད་ནམས་ཀྱི་ཕུང་པོ་དེའང་དེ་ཙམ་མོ། །རིགས་ཀྱི་བུ། འདི་ལྟ་སྟེ། དཔེར་ན། རྒྱ་མཚོ་མཆིང་རྣམ་གྱི་བྱེ་མ་ནི་བྱེ་མ་རེ་རེ་ནས་ངས་བགྲང་ནུས་ཀྱི། རིགས་ཀྱི་བུ། བསོད་སྙོམས་ཀྱི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སོ། །དེ་ནས་ལྷ་མ་ཡིན་གཏོར་མ་མ་ཆི་མ་དང་བཅས། ངོམ་ཟུང་གནག་དབུགས་ཀྱིས་བརྣངས་ཤིང་སྐད་ངར་པོར་གྱུར་ལ། ཤུགས་འབྱིན་ཅིང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་འདི་སྐད་ཅེས་གསོལ་ཏོ། །བདག་གཏོར་མ་སླས་དང ། འཁོར་དང་བཅས་པས་སྦྱིན་པ་ཇི་ལྟ་བུ་ཞིག་བགྱིས་ནས། ཚེ་འདི་ཉིད་ལ་བཅིངས་པ་ཐོབ་པར་གྱུར་ཏེ། བདག་གིས་ཞིང་ངན་པ་ལ་སྦྱིན་པ་བྱིན་ཏེ། ལས་དེའི་འབྲས་བུ་མྱོང་བ་འདི་ལགས་པ་ལྟ། ཐམས་ཅད་མཁྱེན་པའི་ཞིང་ལ་ནི་ཐལ་བ་སྤར་བ་གང་གཏོར་ཀྱང་བདུད་རྩི་འགྲུབ་པར་འགྱུར་ན། བདག་གིས་མ་འཚལ་བས་མཆོད་སྦྱིན་མཆོད་པའི་ཚེ་མིའུ་ཐུང་གི་གཟུགས་ཀྱིས་སློང་བ་མཆིས་ནས་བདག་གིས་བལ་གླང་དང ། རྟའི་ཐེག་པ། ཅོད་པན་
334b
དང།་རྣ་ཆ་དང ། སེ་མོ་དོ་མང་པོ་དང་ལྡན་པ་ནི་བཤམས། གཡག་རྔའི་རྡུལ་ཡབ་རིན་པོ་ཆེས་སྤྲས་པ་ནི་དཔྱངས། མུ་ཏིག་གིས་སེ་མོ་དོ་དག་དང་མུ་ཏིག་ལས་བགྱིས་པའི་མཇུག་མ་དག་ནི་མུ་ཏིག་གི་དྲ་བ་དག་གིས་གཡོགས། གསེར་གྱི་དྲིལ་བུ་དག་ནི་དངུལ་གྱིས་བརྒྱུས་ཏེ་སྒྲ་སིལ་སིལ་མཆི་ཞིང ། གཞན་ཡང་གླང་སེར་སྐྱ་སྟོང་དག་རྨིག་པ་ནི་དངུལ་ལས་བགྱིས། རཝ་ནི་གསེར་ལས་བགྱིས་ཤིང་མུ་ཏིག་གི་དྲ་བས་གཡོགས་ཏེ་མཆི་བ་དེ་འདྲ་བའི་གླང་སེར་སྐྱ་དག་དང ། གཞན་ཡང་བུད་མེད་གཞོན་ནུ་ཤིན་ཏུ་ཁ་དོག་བཟང་ཞིང་ཤ་རྒྱས་པ་དང་ལྡན་པ། ཤིན་ཏུ་སྡུག་པ་ལྷའི་བུ་མོ་དང་འདྲ་ཞིང་འགྲན་པ། ལྷའི་རྒྱན་གྱིས་བརྒྱན་པ། ཅོད་པན་དང ། རྣ་ཆ་དང ། སེ་མོ་དེ་མང་པོ་ཐོགས་པ། དཔུང་རྒྱན་དང ། གདུ་བུ་དང ། རྐང་པའི་གདུ་བུ་དང།་རྐེད་པའི་སྐ་རགས་ཀྱི་རྒྱན་དང ། སོར་གདུབ་དང ། སེ་རལ་གྱི་རྒྱན་དང ། མཐེ་བོ་གཡོན་པ་སོར་གདུབ་དང་ལྡན་པ། སྒྲ་སིལ་སིལ་མཆི་བ་དང་ལྡན་པ། གོས་ཚོན་སྣ་ཚོགས་སུ་བཙོས་པ་གྱོན་པ་སྟོང་དག་དང ། གཞན་ཡང་རིན་པོ་ཆེའི་ཁྲིའུ་བརྒྱ་སྟོང་དག་དང ། གསེར་གྱི་ཕུང་པོ་དང ། དངུལ་གྱི་ཕུང་པོ་དང ། རིན་པོ་ཆེའི་ཕུང་པོ་དུ་མ་དག་ནི་བཞག་།གོས་དང་རྒྱན་གྱི་ཕུང་པོ་དུ་མ་དག་ནི་བཞག་།བ་ལང་གི་རིགས་བརྒྱ་སྟོང་དུ་མ་རྫི་དང་ལྡན་པ་དག་ནི་སྟ་གོན་བགྱིས། ཟས་དང་སྐོམ་མང་པོ་དག་ནི་བཞག་།ལྷའི་ཟས་རོའི་རོ་མཆོག་དང་ལྡན་
335a
༄#། །པ་དག་ནི་སྟ་གོན་བགྱིས། གསེར་དང་དངུལ་གྱི་དྲིལ་བུ་རིན་པོ་ཆེས་སྤྲས་པ་དག་ནི་རྟག་ཏུ་བཞག་།གསེར་དང་དངུལ་གྱིས་སེང་གེའི་ཁྲིའུ་དུ་མ་དག་ནི་རིན་པོ་ཆེས་སྤྲས། ལྷའི་གཡག་རྔའི་རྡུལ་ཡབ་ཀྱི་རྩ་བ་དང ། གདུགས་དང ། ལྷ་མ་དག་ནི་གསེར་གྱིས་བརྒྱན། གསེར་གྱི་ཅོད་པན་སྟོང་ཕྲག་དུ་མ་དག་ནི་རིན་པོ་ཆེས་བརྒྱན་ཅིང་བཞག་པ་དང།་དེའི་ཚེ་རྒྱལ་པོ་ནི་སྟོང་ཚོགས། བྲམ་ཟེ་ནི་འབུམ་ཚོགས། རྒྱལ་རིགས་ནི་འབུམ་ཕྲག་དུ་མ་ཚོགས་ཏེ། དེའི་ཚེ་བདག་གིས་སའི་གདུགས་གཅིག་ཏུ་བགྱིས་པ་བདག་ངོ་མཚར་དུ་གྱུར་ཏེ། དེ་བས་ན་ཐོག་མའི་སྡིག་པ་མཐོལ་ལོ་བཤགས་སོ། །རྒྱལ་རིགས་ཀྱི་ཆུང་མ་རྣམས་ནི་སྙིང་གར་དྲལ་ཏེ། ཁྱེའུ་དང་བུ་མོ་གཞོན་ནུ་དག་སྲོག་བཅད། རྒྱལ་རིགས་ཆེན་པོ་དག་ཐམས་ཅད་ནི་ཁུ་སྒོ་དང ། ལྕགས་ཀྱིས་བཅིངས་ནས་ཟངས་ཀྱི་བྲག་ཕུག་ཏུ་ཁྲིད་དེ། རྒྱལ་རིགས་འབུམ་ཕྲག་དུ་མ་ནི་ཟངས་ཀྱི་བྲག་ཕུག་དེར་སྩལ། ཁ་ཤ་དང་པན་ད་པ་ལ་སོགས་པའི་རྒྱལ་རིགས་དེ་དག་ནི་ལྕགས་ཐག་ལྕགས་ཀྱི་ཕུར་པ་དང་ལྡན་པས་རྐང་ལག་བཅིངས་ནས་ཕུག་དེར་བཞག་སྟེ། དེའི་ཚེ་བདག་གིས་ཆབ་སྒོ་ཐམས་ཅད་ཀྱང་བཀུམ་མོ། །དང་པོ་ནི་ཤིང་གི་སྒོའོ། །གཉིས་པ་ནི་སེང་ལྡེང་གི་སྒོའོ། །གསུམ་པ་ནི་འཁར་བའི་སྒོའོ། །བཞི་པ་ནི་ཟངས་ཀྱི་སྒོའོ། །ལྔ་པ་ནི་ལྕགས་ཀྱི་སྒོའོ། །
335b
དྲུག་པ་ནི་དངུལ་གྱི་སྒོའོ། །བདུན་པ་ནི་གསེར་གྱི་སྒོ་སྟེ། གསེར་གྱི་སྒོ་དེར་རི་བདུན་གཅིག་གི་སྟེང་དུ་གཅིག་བརྩེགས་ཏེ་བཞག་གོ་།དེ་ནས་བདག་གིས་ཤིང་རྟ་བཅུ་པའི་བུ་འཚོལ་ཞིང་གདུགས་ལ་ལ་ལ་ནི་སྦྲང་བུའི་གཟུགས་ཀྱིས། གདུགས་ལ་ལ་ལ་ནི་བུང་བའི་གཟུགས་ཀྱིས། གདུགས་ལ་ལ་ལ་ནི་ཕག་གི་གཟུགས་ཀྱིས། གདུགས་ལ་ལ་ལ་ནི་མིའི་གཟུགས་ཀྱིས་དེ་ལྟར་བསྒྱུར་ཏེ། གདུགས་རེ་རེ་ཞིང་གཞན་དང་གཞན་གྱི་གཟུགས་ཀྱིས་མཆིའང་མངོན་དུ་མ་མཐོང་ནས། དེའི་ཚེ་བདག་གིས་རྗེས་སུ་བསམས་ཏེ་མཆོད་སྦྱིན་བགྱི་བར་བརྩམས་པ་དང ། དེའི་ཚེ་ཤིང་རྟ་བཅུ་པའི་བུ་གླགས་འཚོལ་བ་མཆིས་ཏེ། དེས་རི་བདུན་དྲལ་ཅིང་གཤེགས་ནས་མྱུར་དུ་ཕྱོགས་གཞན་དུ་བོར་ཏེ་རྒྱལ་རིགས་དེ་དག་ལ་སྐད་ཆེར་སྨྲས་པ་དང ། རྒྱལ་པོ་དེ་དག་གིས་སྒྲ་དེ་ཐོས་སོ། །ཐོས་ནས་དབུགས་ཕྱིན་པར་གྱུར་ཏེ་གནས་པ་དང ། ཁྱེད་ཅག་གསོན་ནམ་ཤི་ཞེས་སྨྲས་པ་དང།་དེ་དག་གིས། བཅོམ་ལྡན་འདས་བདག་ཅག་ནི་གསོན་ནོ་ཞེས་སྨྲས་སོ། །དེ་ནས་སྐྱེས་བུ་དཔའ་བོ་ཆེན་པོ་དེས་སྒོ་དེ་དག་ཐམས་ཅད་བཅོམ་ནས་ཟངས་ཀྱི་ཕུག་དེ་དག་མཐོང་བ་དང ། རྒྱལ་པོ་བཅིངས་པ་དེ་དག་ཐམས་ཅད་ཀྱིས་མཐུ་བོ་ཆེ་མཐོང་ནས་ཡང་ན་ནི་ལྷ་མ་ཡིན་གཏོར་མ་ཤིའོ། །འཆི་བའི་དུས་བྱས་སོ། །ཡང་ན་ནི་བདག་
336a
༄#། །ཅག་བསད་པའི་དུས་ལ་བབ་པ་ལྟ་ཞིག་ཅེས་ཕན་ཚུན་དུ་སེམས་པ་ལས། དེ་ནས་དེ་དག་གིས་བདག་ཅག་ནི་གཡུལ་གྱི་སར་ཤི་ན་ལེགས་ཀྱི་བཅིང་བས་བཅིངས་བཞིན་དུ་ཤི་ན་མ་ལེགས་ཏེ། བདག་ཅག་ནི་བཅིང་བས་བཅིངས་བཞིན་དུ་ཤི་བའི་དུས་བྱས་པར་གྱུར་ན་རྒྱལ་རིགས་ཀྱི་ཆོས་ཀྱང་མེད་པར་འགྱུར་གྱི། གཡུལ་གྱི་སར་ཤི་བའི་དུས་བྱས་ན་ནི་བདག་ཅག་མཐོ་རིས་སུ་སྐྱེ་བར་འགྱུར་རོ་ཞེས་གཅིག་ལ་གཅིག་དེ་སྐད་སྨྲའོ། །དེ་ནས་རྒྱལ་པོ་ཆེན་པོ་དེ་དག་ཐམས་ཅད་བདག་བདག་གི་ཁབ་ཏུ་དོང་སྟེ། ཤིང་རྟ་འདྲེན་པའི་རྟ་དུ་མ་སྟ་གོན་བགྱིས་སོ། །གང་གི་ཚེ་ན་དེ་དག་གིས་ཤིང་རྟ་དང ། མཚོན་ཆ་རིན་པོ་ཆེ་ཆེན་པོ་དག་སྟ་གོན་བགྱིས་པ་དེའི་ཚེ་ཤིང་རྟ་བཅུ་པའི་བུ་མིའུ་ཐུང་གི་གཟུགས་སུ་སྤྲུལ་ནས་རི་དྭགས་ཀྱི་ཕགས་པ་སེ་རལ་དུ་ཐོགས། སྨྱིག་མའི་འཁར་བ་ཐོགས། ཁྲིའུ་འཚལ་ཏེ་བདག་གིས་དྲུང་དུ་མཆིས་ནས་ཆབ་སྒོར་ཕྱིན་པ་དང ། སྒོ་བས་བྲམ་ཟེ་མིའུ་ཐུང ། མ་འགྲོ་ཞིག་ཅེས་བསྒྲགས་ན། དེས་བདག་ནི་ཤུལ་རིང་པོ་ནས་མཆིས་སོ་ཞེས་སྨྲས་སོ། །དེ་ནས་སྒོ་བས་དེ་ལ། བྲམ་ཟེ། ས་གང་ནས་འོངས་ཞེས་དེ་སྐད་སྨྲས་པ་དང ། བདག་ནི་ཟླ་བའི་གླིང་ནས་རྒྱལ་པོ་དྲང་སྲོང་གི་དྲུང་དུ་མཆིས་སོ། །དེ་ནས་སྐྱེས་བུ་སྒོ་བ་དེ་སོང་སྟེ། གཏོར་མ་ལ་ལྷ་ཁྱོད་ཀྱི་ཞལ་སྔར་
336b
བྲམ་ཟེ་མིའུ་ཐུང་ཞིག་མཆིས་སོ་ཞེས་སྨྲས་སོ། །དེ་ནས་ལྷ་མ་ཡིན་གྱི་དབང་པོ་གཏོར་མས་ཅིའི་དངོས་པོ་ཞིག་སློང་ཞེས་དེ་སྐད་སྨྲས་པ་དང ། ལྷ། མ་འཚལ་ཏོ་ཞེས་སྨྲས་སོ། །དེ་ནས་རྒྱལ་པོ་གཏོར་མས་ཁྱོད་སོང་ལ་བྲམ་ཟེ་དེ་ཁྲིད་དེ་ཤོག་ཅིག་ཅེས་དེ་སྐད་སྨྲས་པ་དང ། སྒོ་བ་དེས་དེ་བོས་ཏེ་བྲམ་ཟེ་ཆེན་པོ་བཞུད་ཅིག་ཅེས་སྨྲས་ནས། དེ་ནང་དུ་སོང་བ་དང་རིན་པོ་ཆེའི་ཁྲིའུ་ལ་བཞག་སྟེ། པ་བ་སངས་ཀྱང་དེའི་ཚེ་ན་དེ་ན་གནས་སོ། །དེའང་དེའི་མཁན་པོར་གྲགས་ནས་དེས་གཏོར་མ་ལ་འདི་ནི་དུས་ཀྱི་སྐྱེས་བུ་འདྲ་བ་ཞིག་ཕྱིན་ཏེ། ཁྱོད་ལ་ངེས་པར་བར་ཆད་བྱེད་དོ་ཞེས་དེ་སྐད་སྨྲས་སོ། །བཅོམ་ལྡན་འདས། ཇི་ལྟར་མཁྱེན། ངས་ནི་ལྟས་དང་མཚན་མ་ལས་ཤེས་སོ། །བདག་ཅག་གི་ཐབས་ཇི་ལྟ་བུ་ཞིག་བགྱི།་དེ་ནས་མཐུ་བོ་ཆེས་ངེས་པར་སྦྱིན་པ་ལ་འགྱོད་པར་འགྱུར་རོ་སྙམ་དུ་བསམས་ནས་དེས་དེའི་ཁར་ས་ར་སཝ་ཏི་བཅུག་པ་དང ། དེའི་ཚེ་དེས་སྨྲས་པ། བྲམ་ཟེ་ཚུར་ཤོག་།ཁྱོད་ཇི་ལྟ་བུར་སེམས། བྲམ་ཟེ་དེས་དེ་ལ་འདི་སྐད་ཅེས་སྨྲས་སོ། །གོམ་པ་གཉིས་ཤིག་གསོལ་ཏོ། །བྲམ་ཟེ་ཆེན་པོ་ཁྱོད་ཀྱིས་ཇི་ལྟར་གོམ་པ་གཉིས་བླངས་ན་ངས་ནི་གོམ་པ་གསུམ་སྦྱིན་ནོ། །དེ་ནས་བླང་བ་བླངས་ནས། བཀྲ་ཤིས་སོ་ཞེས་སྨྲས་ཏེ། དེས་ཆུ་དང་ཏིལ་དང་གསེར་དུ་བཅས་པ་བླངས་སོ། །དེ་ནས་མིའུ་ཐུང་དེའི་གཟུགས་
337a
༄#། །མི་སྣང་བར་བྱས་སོ། །དེ་ནས་པ་བ་སངས་དེས་འདི་སྐད་ཅེས་སྨྲས་སོ། །རྒྱལ་པོའི་དྲང་སྲོང་ཁོ་བོས་དུས་ཀྱི་སྐྱེས་བུ་འོངས་སོ་ཞེས་བྱས་ན་ཁྱོད་ཀྱིས་ངའི་ཚིག་མ་མཉན་ཏེ། ལས་དེའི་འབྲས་བུ་མྱོང་བར་གྱིས་ཤིག་།དེས་བདག་གི་ལུས་ཆེན་པོར་བསྒྱུར་བ་དང ། ཉི་མ་དང་ཟླ་བ་ནི་དེའི་ཕྲག་པ་ལ་གནས། ལག་ན་ནི་རལ་གྲི་དང ། གཞུ་དང ། འཁོར་ལོ་དང ། མཚོན་ཆ་དག་ཐོགས་སོ། །དེ་ནས་ལྷ་མ་ཡིན་གྱི་དབང་པོ་གཏོར་མ་ཁ་བུབ་ཏུ་འགྱེལ་ནས་དྲན་པ་ཉམས་ཏེ་འདར་འདར་པོར་བྱས་ནས་བདག་གིས་ཅི་བགྱིས་རང་གི་ལག་ནས་དུག་འཚལ་བ་ལྟ་ཞེས་སྨྲས་སོ། །གོམ་པ་གཉིས་ནི་ཚང་ན་གསུམ་པ་བྱིན་ཅིག་ཅེས་སྨྲས་པ་དང ། གསུམ་པ་མ་མཆིས་སོ་ཞེས་དེས་སྨྲས་སོ། །ཁོ་བོས་བླང་བའང་བླངས་སོ། །བདག་གིས་ཐབས་ཇི་ལྟ་བུ་ཞིག་བགྱི། ངས་གར་བཞག་པ་དེར་ཁྱོད་ཀྱིས་འདུག་པར་གྱིས་ཤིག་།དེ་ནས་ལྷ་མ་ཡིན་གྱི་དབང་པོ་གཏོར་མས་འདི་སྐད་ཅེས་སྨྲས་སོ། །བདག་ནི་བཀའ་ཅི་སྩལ་པ་དེ་བཞིན་དུ་བགྱིད་དོ། །མད་དོ། །མད་དོ་ཞེས་བགྱིས། དེས་སྨྲས་པ། མད་དོ། །མད་པར་བགྱིད་དོ། ། དེས་བདེན་པའི་ཞགས་པས་བཅིངས་ནས་མཆོད་སྦྱིན་གྱི་གནས་དེའང་བཤིག་གོ་།སྣོད་དེ་དག་ཀྱང་ལྷག་མ་ཅན་དུ་བགྱིས་སོ། །བུ་མོ་གཞོན་ནུ་དེ་དག་ཀྱང་པན་ད་པ་དང ། ཀོའུ་
337b
རབ་དག་གིས་མནོལ་བར་བགྱིས་སོ། །སེང་གེའི་ཁྲི་དེ་དག་དང ། ལྷའི་གདུགས་དེ་དག་དང ། ལྷམ་རིན་པོ་ཆེས་བརྒྱན་པ་དེ་དག་དང ། གོས་དང་རྒྱན་དེ་དག་དང ། གསེར་གྱི་དཔུང་རྒྱན་རིན་པོ་ཆེས་སྤྲས་པ་དེ་དག་དང ། གླང་སེར་སྐྱ་དེ་དག་ཀྱང་པན་ད་པ་དང ། ཀོའུ་ར་བ་དེ་དག་གིས་འཚལ་ཏོ། །བདག་གི་ས་གཞི་དེ་དག་ཀྱང་བཅོམ་མོ། །དེ་ནས་ལྷ་མ་ཡིན་གྱི་དབང་པོ་གཏོར་མ་ལུས་ལ་སེམས་ཤིང་གཏོར་མ་ནི་མཆོད་སྦྱིན་རྒྱ་ཆེར་བགྱིད་ན། ཐབས་མ་འཚལ་བས་དུས་མ་ལགས་པས་སྦྱིན་པ་བྱིན་པས་བཅིངས་པ་ཉིད་ཐོབ་པར་གྱུར་ཏེ། ལྷ་ལ་ཕྱག་འཚལ་ལོ་སྙམ་མོ། །དེ་ཁྲིད་ནས་བྱེད་པ་པོ་བཞིན་དུ་སླས་དང་འཁོར་དང་བཅས་ཏེ་སའི་འོག་ཏུ་བཞག་གོ་།བདག་གིས་སྔོན་ཞིང་ངན་པ་ལ་སྦྱིན་པ་བགྱིས་སོ་ཞེས་གསོལ་བ་ལགས་ཏེ།་ཕྱག་ན་མེ་ཏོག་པདྨ་བཟང་པོ་ཐོགས་པས་སྐྱབས་མཛོད་ཅིག་།པདྨའི་དཔལ་གྱིས་བརྒྱན་པ། སྐྲའི་ཅོད་པན་ཐོགས་པ། ཐམས་ཅད་མཁྱེན་པ་དབུ་ན་བཞུགས་པ། སེམས་ཅན་མང་པོ་དབུགས་འབྱིན་པར་མཛད་པ། དམན་པ་དང་ཕོངས་པ་ལ་ཐུགས་རྗེ་བ། གདུགས་བཞིན་དུ་སྤྱན་བཟང་བ། སའི་སྤྱན་དམ་པ། སྨན་གྱི་རྒྱལ་པོའི་མཆོག་།སེམས་ཅན་ཤིན་ཏུ་དག་པ། རྣལ་འབྱོར་རབ་ཏུ་ཐོབ་པ། ཐར་པ་རབ་མཆོག་ཅན། ཐར་པ་ལ་དགྱེས་པ། ནོར་བུ་ཡིད་བཞིན་དང་འདྲ་བ་ཆོས་ཀྱི་མཛོད་ཡོངས་སུ་སྐྱོང་བར་མཛད་པ། ཕ་
338a
༄#། །རོལ་ཏུ་ཕྱིན་པ་དྲུག་སྟོན་པར་མཛད་པ། བསམ་པ་ལེགས་པར་མཛད་པ་ལ་བདག་གིས་བསྟོད་པ་འདི་བགྱིས་སོ། །གང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ཁྱོད་ཀྱི་མཚན་རྗེས་སུ་དྲན་པའི་སེམས་ཅན་དེ་དག་ནི་བདེ་བ་དང་ལྡན་པ་ལགས་སོ། །ཐིག་ནག་པོ་ཅན་དང་འོ་དོད་འབོད་པ་དང ། སེམས་ཅན་དམྱལ་བར་སྐྱེས་པ་དང ། ཡི་དྭགས་ཀྱི་གྲོང་ཁྱེར་དུ་སྐྱེས་པ་གང་དག་ཁྱོད་ཀྱི་མཚན་རྗེས་སུ་དྲན་པ་དེ་དག་ནི་ངན་སོང་གི་སྡུག་བསྔལ་ཆེན་པོ་ལས་ཐར་བ་ལགས་སོ། །གང་ཁྱོད་ཀྱི་མཚན་རྗེས་སུ་དྲན་པའི་སེམས་ཅན་དེ་དག་ནི་བསམ་པ་ལེགས་པ་དང་ལྡན་པ་ལགས་ཏེ། དེ་དག་ནི་བདེ་བ་ཅན་གྱི་འཇིག་རྟེན་གྱི་ཁམས་སུ་མཆིས་ནས་དེ་བཞིན་གཤེགས་པ་སྣང་བ་མཐའ་ཡས་ལས་ཆོས་ཉན་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་ལྷ་མ་ཡིན་གྱི་དབང་པོ་གཏོར་མ་ལ་ལུང་བསྟན་པ། ཁྱོད་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་རྐང་པར་ལྡན་པ་བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ་སྐྱེས་བུ་འདུལ་པའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ལྷ་མ་ཡིན་གྱི་
338b
དབང་པོའི་དཔལ་ཞེས་བྱ་བར་འགྱུར་ཏེ། ལྷ་མ་ཡིན་ཐམས་ཅད་འདུལ་བར་འགྱུར་རོ། །ཁྱོད་ཀྱི་སངས་རྒྱས་ཀྱི་ཞིང་ན་འདོད་ཆགས་ཀྱི་སྒྲ་མེད། ཞེ་སྡང་གི་སྒྲ་མེད། གཏི་མུག་གི་སྒྲ་མེད་པར་འགྱུར་རོ། །ཡི་གེ་དྲུག་པའི་རིག་པ་ཆེན་པོ་འཐོབ་པ་ཐོབ་པར་འགྱུར་རོ། །དེས་དེ་ལ་ཆོས་ཀྱི་སྦྱིན་པ། མུ་ཏིག་གི་སེ་མོ་དོ་འདོམ་སྟོང་པ་རིན་བརྒྱ་སྟོང་རི་བ་དང ། ཅོད་པན་རན་པོ་ཆེ་སྣ་ཚོགས་ཀྱིས་བརྒྱན་པ་ཕུལ་ལོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ཆོས་འཆད་པར་རྩོམ་སྟེ། རྒྱལ་པོ་ཆེན་པོ་ཉོན་ཅིག་མི་མི་རྟག་པའི་ནང་ན་གང་རྟག་ཏུ་ཡོངས་སུ་ལེན་པར་སེམས་པ་དང ། ལོངས་སྤྱོད་ཆེན་པོའི་རྗེས་སུ་སེམས་པ་དང ། བྲན་ཕོ་དང ། བྲན་མོ་དང ། ལས་བྱེད་པའི་མི་དང ། གལ་ཡང་ནོར་དང ། འབྲུ་དང ། མཛོད་དང ། བང་བ་རིན་པོ་ཆེ་དག་དང ། གང་བུ་དང ། བུ་མོ་དང ། ཆུང་མ་དང ། ཕ་དང ། མ་ལ་སེམས་པའི་སེམས་ཅན་དེ་དག་ནི་མི་ཤེས་པ་ཡིན་ཏེ། གང་དངོས་པོ་དེ་དག་ལ་ཆགས་པའི་སེམས་ཅན་དེ་དག་ནི་རྨི་ལམ་ལྟ་བུར་སྣང་སྟེ། འཆི་བའི་དུས་ཀྱི་ཚེའང་སྐྱབས་བྱེད་པ་སུའང་མེད་པར་འགྱུར་རོ། །གང་གི་ཚེ་ན་སྲོག་དང་བྲལ་བ་དེའི་ཚེ་ཛམྦུའི་གླིང་ལ་ལོག་པར་མཐོང་བར་འགྱུར་རོ། །ཆུ་བོ་ཆེན་པོ་ལའང་ཁྲག་དང་རྣག་གིས་གང་བར་མཐོང་བར་འགྱུར་རོ། །གང་ཤིང་ཆེན་པོ་དེ་དག་ཀྱང་འབར་བ། རབ་ཏུ་
339a
༄#། །འབར་བ། ཡང་དག་པར་ཤིན་ཏུ་འབར་བར་མཐོང་བར་འགྱུར་རོ། །མཐོང་ནས་ཀྱང་སྐྲག་པར་འགྱུར་ཞིང་དེ་ནས་གཞན་གྱིས་ཞགས་པས་བཅིངས་ཏེ་ཁྲིད་པར་འགྱུར་རོ། །སྤུ་གྲིའི་སོའི་ལམ་ཆེན་པོར་རྐང་པའང་འཆད་པར་འགྱུར་རོ། །རྐང་པ་བཏེག་པ་དང་རྐང་པ་གཞན་འབྱུང་བར་འགྱུར་རོ། །བྱ་རོག་དང ། བྱ་རྒོད་དང ། བྱ་ཀུ་ར་ར་དང ། ཁྱི་དུ་མ་དག་གིས་ཀྱང་ཟོས་ཤིང་སེམས་ཅན་དམྱལ་བའི་སྡུག་བསྔལ་གྱི་ཚོར་བ་ཆེན་པོ་མྱོང་བར་འགྱུར་རོ། །དེ་ནས་སྤུ་གྲིའི་སོའི་ལམ་ཆེན་པོ་ལས་བབས་ནས་རྐང་པ་རེ་རེ་ལའང་ཚེར་མ་སོར་བཅུ་དྲུག་ཙམ་ཡོད་པ་ལྔ་བརྒྱ་ལྔ་བརྒྱ་ཟུག་པར་འགྱུར་ཏེ། བདག་ཅག་གིས་སྡིག་པའི་ལས་ཅི་ཞིག་བྱས་ཞེས་འཁོད་པར་འགྱུར་རོ། །དེ་ནས་གཤིན་རྗེའི་མི་དེ་དག་འདི་སྐད་ཅེས་ཟེར་ཏེ། གྲོགས་པོ་ཁྱེད་ཀྱིས་དེ་བཞིན་གཤེགས་པ་ལ་བསོད་སྙོམས་མ་ཕུལ་ལོ། །ཁྱེད་ཀྱིས་གཎྜི་རྡུང་བའང་མ་ཐོས་སོ། །ཁྱོད་ཀྱིས་ས་ཕྱོགས་གང་དུའང་མཆོད་རྟེན་གྱི་གཟུགས་མ་བསྐོར་ཏོ། །དེ་དག་གིས་སྨྲས་པ། བདག་ཅག་ནི་མ་དད་པ་སྡིག་པ་ཅན་སངས་རྒྱས་དང ། ཆོས་དང ། དགེ་འདུན་གྱིས་སྤངས་པར་གྱུར་པའོ། །དེ་དག་གིས་སྨྲས་པ། ལས་དེའི་འབྲས་བུ་འདི་མྱོང་བར་གྱིས་ཤིག་ཅེས་དེ་དག་གཤིན་རྗེའི་སྐྱོང་བས། གཤིན་རྗེའི་རྒྱལ་པོའི་དྲུང་དུ་ཁྲིད་དོ། །ཁྲིད་ནས་
339b
ཕུལ་ལོ། །དེ་ནས་གཤིན་རྗེའི་རྒྱལ་པོས་སྨྲས་པ། ཁྱེད་དེང་ལ་ལས་ཀྱི་ས་འདི་སྟོན་ཅིག་།དེ་ནས་གཤིན་རྗེ་སྐྱོང་བའི་སྐྱེས་བུ་དེ་དག་གིས་དེ་རྣམས་ཁྲིད་ནས་ཐིག་ནག་པོ་ཅན་གྱི་སེམས་ཅན་དམྱལ་བ་ཆེན་པོར་བཅུག་གོ་།བཅུག་ནས་ལུས་ལ་མཚོན་ཤཀྟི་བརྒྱས་བཏབ་ཀྱང་མི་འཆིའོ། །ལུས་ལ་མཚོན་ཤཀྟི་བརྒྱ་པ་གཉིས་པས་བཏབ་ཀྱང་མི་འཆིའོ། །ལུས་ལ་མཚོན་ཤཀྟི་བརྒྱ་པ་གསུམ་པས་བཏབ་ཀྱང་མི་འཆིའོ། །གང་གི་ཚེ་འཆི་བའི་དུས་མི་བྱེད་པ་དེའི་ཚེ་མེའི་འོབས་སུ་འཇུག་སྟེ། འོན་ཀྱང་འཆི་བའི་དུས་མི་བྱེད་པ་དང ། དེ་དག་ཁ་བྱེ་ནས་ལྕགས་ཀྱི་ཐུ་ལུམ་བསྲེགས་པ་འཇུག་སྟེ། མཆུའང་ཚིག་།སོའང་ལྷགས། རྐན་ཡང་གས། གྲེ་བ་དང ། ལྐོག་མ་དང ། སྙིང་དང ། གཞང་དག་ཀྱང་སྒྲ་འུར་འུར་ཟེར་ཞིང་ལུས་ཐམས་ཅད་ཀྱང་ཚིག་པར་འགྱུར་རོ། །དེ་ལྟ་བས་ན། རྒྱལ་པོ་ཆེན་པོ། འཇིག་རྟེན་གཞན་ན་སྐྱབས་བྱེད་པ་སུའང་མེད་ཀྱི། རྒྱལ་པོ་ཆེན་པོ། ད་ནན་ཏན་དུ་བསོད་ནམས་གྱིས་ཤིག་ཅེས་དེ་ལྟར་མཐུན་པའི་ཆོས་བསྟན་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་དེ་ལ། རྒྱལ་པོ་ཆེན་པོ། དེ་རིང་ཛེ་ཏའི་ཚལ་གྱི་གཙུག་ལག་ཁང་འདིར་ཕལ་ཆེར་འདུ་བར་འགྱུར་གྱི། ང་ནི་འགྲོའོ་ཞེས་དེ་སྐད་སྨྲས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་
340a
༄#། །འོད་ཟེར་ཁ་དོག་སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། ཤེལ་དང ། དངུལ་གྱི་ཁ་དོག་རྣམ་པ་དུ་མ་བཏང་བ་དང ། དེ་དག་སོང་སྟེ་དེ་བཞིན་གཤེགས་པ་ཐམས་ཅད་སྐྱོབ་པའི་སྤྱན་སྔར་འདུག་གོ་།དེའི་ཚེ་ལྷ་དང ། ཀླུ་དང ། གནོད་སྦྱིན་དང ། ལྟོ་འཕྱེ་ཆེན་པོ་དང ། མི་དག་ཀྱང་འདུས་སོ། །དེ་ནས་བྱང་ཆུབ་སེམས་དཔའ་དེ་དག་གི་ནང་ནས། ནམ་མཁའ་མཛོད་ཅེས་བྱ་བའི་བྱང་ཆུབ་སེམས་དཔའ་སྟེན་ལས། ལངས་ཏེ། བླ་གོས་ཕྲག་པ་གཅིག་ལ་གཟེར་ནས་པུས་མོ་གཡས་པའི་ལྷ་པ་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འོད་ཟེར་འདི་དག་ག་ལས་མཆིས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་འདི་ལྷ་མ་ཡིན་གྱི་དབང་པོ་གཏོར་མའི་ཁང་པ་ན་གནས་ཏེ་དེ། ལ་འོད་ཟེར་འདི་དག་བྱུང་ངོ ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ནམ་མཁའ་མཛོད་ཀྱིས་འདི་སྐད་ཅེས་གསོལ་ཏོ། །བདག་གིས་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་བལྟ་བའི་ཐབས་གང་ཞིག་མཆིས། བཅོམ་ལྡན་འདས་ཀྱིས་བཀའ་སྩལ་པ། རིགས་
340b
ཀྱི་བུ། དེ་ནི་འདི་ཉིད་དུ་འོང་ངོ ། །གང་གི་ཆེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལྷ་མ་ཡིན་གཏོར་མའི་གནས་ནས་བྱུང་བ་དེའི་ཚེ་ཛི་ཏའི་ཚལ་གྱི་གཙུག་ལག་ཁང་དུ་ལྷའི་མེ་ཏོག་དག་ལྷགས་སོ། །ལྷའི་ཤིང་དཔག་བསམ་ཤིན་ཏུ་མཛེས་པ། རྒྱན་བརྒྱ་སྟོང་དུ་མས་དབྱངས་པ། མུ་ཏིག་གི་སེ་མོ་དོ་བརྒྱ་སྟོང་དུ་མ་དབྱངས་པ། ཡུལ་ཀ་ཤི་ཀའི་གོས་དང ། རྒྱའི་གོས་དང ། ཕྲེང་བའི་ཆུན་པོ་རབ་ཏུ་དབྱངས་པ། སྡོང་པོ་ནི་དམར་པོ། ལོ་མ་ནི་གསེར་དང་དངུལ་ལས་བྱས་པ་དག་དང ། བྱུ་རུའི་ཤིང་དུ་མ་དག་དང ། མེ་ཏོག་གི་ཤིང་དུ་མ་དག་དང ། རྫིང་བུ་མེ་ཏོག་གིས་ཡོངས་སུ་གང་བ་བརྒྱ་ཕྲག་དུ་མ་དག་བྱུང་བར་གྱུར་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ནམ་མཁའ་མཛོད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་མི་མཆིའམ། བཅོམ་ལྡན་འདས་ཀྱིས་བཀའ་སྩལ་པ།་རིགས་ཀྱི་བུ། དེ་ནི་ལྷ་མ་ཡིན་གྱི་དབང་པོ་གཏོར་མའི་ཁང་པ་ནས་བྱུང་སྟེ། མི་མི་རྒྱུ་བའི་ས་ཕྱོགས་མུན་པ་མུན་ནག་ཅེས་བྱ་བའི་སར་འགྲོ་སྟེ། རིགས་ཀྱི་བུ། དེ་ན་ཉི་མ་དང་ཟླ་བ་མི་སྣང་སྟེ། ནོར་བུ་ཡིད་བཞིན་རིན་པོ་ཆེ་དམ་པ་སྦྱིན་པ་ཞེས་བྱ་བ་དེ་སྣང་བར་བྱེད་དོ། །གླིང་དེ་ན་གནོད་སྦྱིན་དང ། སྲིན་པོ་བརྒྱ་སྟོང་དུ་མ་དག་གནས་སོ། །གང་གི་ཚེ་ན་བྱང་
341a
༄#། །ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་སོང་བ་དེའི་ཚེ་དེ་དག་དགའ་མགུ་ཞིང་སྙིང་རབ་ཏུ་དགའ་བར་གྱུར་ནས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་མདུན་དུ་རྒྱུག་གོ་།བརྒྱུགས་ནས་ཀྱང་རྐང་པ་ལ་ཕྱག་བཙལ་ཏེ། ཁྱོད་ནི་མཉེལ་ཏོ། །དུབ་བོ། །ཁྱོད་ནི་ཡུན་རིང་མོ་ཞིག་ནས་མུན་པ་མུན་ནག་གིས་འདིར་གཤེགས་སོ། །ཞེས་དེ་སྐད་སྨྲའོ། །དེས་ཀྱང་ངས་སེམས་ཅན་དུ་མ་ཡོངས་སུ་སྨིན་པར་བྱས་སོ་ཞེས་སྨྲས་ནས། གནོད་སྦྱིན་དང་སྲིན་པོ་དེ་དག་གིས་དེ་ཁྲིད་ནས་ལྷའི་གསེར་དང ། རིན་པོ་ཆེའི་སེང་གེའི་ཁྲི་ལ་བཞག་སྟེ། ངལ་བསོས་ནས་གནོད་སྦྱིན་དང ། སྲིན་པོ་དེ་དག་ལ་ཆོས་འཆད་པ། ཁྱེད་ཅག་ཉོན་ཅིག་།གང་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་འཕགས་པ་ཟ་མ་ཏོག་བཀོད་པ་འདིའི་རྩ་བ་བཞི་པའི་ཚིགས་སུ་བཅད་པ་གཅིག་ཉན་པ་དང ། འཛིན་པ་དང ། ཀུན་ཆུབ་པར་བྱེད་པ་དང ། ཚུལ་བཞིན་ཡིད་ལ་བྱེད་པ་དེ་དག་ནི་བསོད་ནམས་ཀྱི་ཕུང་པོ་ལ་བསྐུལ་བར་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། རྡུལ་ཕྲ་རབ་ཀྱི་ཚད་ནི་ངས་བཟུང་ནུས་ཀྱི། རིགས་ཀྱི་བུ། ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པའི་བསོད་ནམས་ཀྱི་ཕུང་པོ་ནི་བགྲང་མི་ནུས་སོ། །རིགས་ཀྱི་བུ། འདི་ལྟ་སྟེ།
341b
དཔེར་ན། རྒྱ་མཚོ་མཆིང་རྣམ་ཆེན་པོ་ནི་ངས་ཐིགས་པ་རེ་རེ་ནས་བགྲང་ནུས་ཀྱི། རིགས་ཀྱི་བུ། ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པའི་རྩ་བ་བཞི་པའི་ཚིགས་སུ་བཅད་པ་གཅིག་གི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་ཏེ། རིགས་ཀྱི་བུ། འདི་ལྟ་སྟེ། དཔེར་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་ཕྲག་བརྒྱ་བཅུ་གཉིས་སྙེད་གནས་གཅིག་ཏུ་བསྐལ་པ་བཅུ་གཉིས་སུ་ན་བཟའ་དང ། བཤོས་དང ། མལ་སྟན་དང ། ན་བའི་རྐྱེན་གྱི་སྨན་དང ། ཡོ་བྱད་ཀྱིས་བཀུར་སྟི་བྱས་པ་དེ་དག་གིས་ཀྱང་དེ་ལྟར་མི་ནུས་ན་ང་གཅིག་པུ་མུན་པ་མུན་ནག་གི་ནང་དུ་འདུག་པས་ལྟ་ཅི་སྨོས་སོ། །རིགས་ཀྱི་བུ། འདི་ལྟ་སྟེ། དཔེར་ན། གླིང་ཆེན་པོ་བཞིར་ཁྱིམ་རེ་རེ་ཞིང་ཡང་ལྷའི་གསེར་དང་རིན་པོ་ཆེའི་གཙུག་ལག་ཁང་བརྩིགས་ལ། གཙུག་ལག་ཁང་དེར་མཆོད་རྟེན་སྟོང་བྱས་ལ་ཉིན་གཅིག་ཏུ་དེ་དག་གི་ནང་དུ་རིང་བསྲེལ་བཅུག་ན། གང་དེ་དག་ཏུ་རིང་བསྲེལ་བཅུག་པའི་བསོད་ནམས་ཀྱི་ཕུང་པོ་དེ་བས་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པ་འདིའི་བསོད་ནམས་ཀྱི་ཕུང་པོ་ཤིན་ཏུ་མང་བར་འགྱུར་རོ། །རིགས་ཀྱི་བུ།་འདི་ལྟ་སྟེ། དཔེར་ན། ཆུ་བོ་ཆེན་པོ་ལྔ་རྒྱ་མཚོ་མཆིང་རྣམ་ཆེན་པོར་འབབ་པ་དེ་བཞིན་དུ། རིགས་ཀྱི་བུ། ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་
342a
༄#། །པའི་བསོད་ནམས་ཀྱི་ཕུང་པོའང་དེ་དང་འདྲ་བར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་གནོད་སྦྱིན་དང ། སྲིན་པོ་དེ་དག་གིས་འདི་སྐད་ཅེས་སྨྲས་སོ། །སེམས་ཅན་གང་དག་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པ་འདི་འདྲི་བ་དེ་དག་གི་བསོད་ནམས་ཀྱི་ཕུང་པོ་ཇི་ལྟ་བུ་ལགས། རིགས་ཀྱི་བུ། དེ་དག་གི་བསོད་ནམས་ཀྱི་ཕུང་པོ་ནི་དཔག་ཏུ་མེད་པར་འགྱུར་རོ། །གང་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པ་འདྲིར་འཇུག་པ་དེ་དག་ནི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་འདྲིར་འཇུག་པར་འགྱུར་རོ། །འཁོར་ལོས་བསྒྱུར་བའི་རྒྱལ་པོ་གླིང་བཞི་ལ་དབང་བ། བུ་དཔའ་བ། མཐུ་ཆེ་བ། གཟུགས་ཀྱི་ཡན་ལག་མཆོག་དང་ལྡན་པ། ཕ་རོལ་གྱི་སྡེ་འཇོམས་པར་བྱེད་པ་སྟོང་དང་ལྡན་པར་འགྱུར་རོ། །གང་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པ་རྟག་ཏུ་འཛིན་ཅིང་མིང་གི་རྗེས་སུ་དྲན་པར་བྱེད་པ་དེ་དག་ནི་འཁོར་བའི་སྡུག་བསྔལ་ལས་ཡོངས་སུ་ཐར་བར་འགྱུར་རོ། །སྐྱེ་བ་དང ། རྒ་བ་དང ། ན་བ་དང ། འཆི་བ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་ལས་ཡོངས་སུ་ཐར་བར་འགྱུར་རོ། །གང་ལ་ལར\?\་
342b
སྐྱེ་བ་དེ་དང་དེ་དག་ཏུ་ཚེ་རབས་དྲན་པར་འགྱུར་རོ། །དེ་དག་གི་ལུས་ལ་བ་ལང་གི་སྤོས་ཀྱི་ཙནྡན་སྣམ་པར་འགྱུར་རོ། །ཁ་ནས་མེ་ཏོག་ཨུཏྤ་ལ་སྔོན་པོའི་དྲི་འབྱུང་བར་འགྱུར་རོ། ། ལུས་ཡོངས་སུ་རྫོགས་པར་འགྱུར་རོ། །སྟོབས་པོ་ཆེའི་སྟོབས་ཀྱི་ཤུགས་དང་ལྡན་པར་འགྱུར་རོ་ཞེས་དེ་ལྟར་དེ་དག་ལ་མཐུན་པའི་ཆོས་བསྟན་པ་དང ། གནོད་སྦྱིན་དང ། སྲིན་པོ་དེ་དག་ལས་ཁ་ཅིག་ནི་ལན་གཅིག་ཕྱིར་འོང་བའི་འབྲས་བུ་ལ། ཁ་ཅིག་ནི་ཕྱིར་མི་འོང་བའི་འབྲས་བུ་ལ་བཀོད་ནས། དེ་དག་གིས་སྨྲས་པ། གཙུག་ལག་ཁང་འདི་ཉིད་ན་བཞུགས་ཤིག ། གནས་གཞན་གང་དུའང་མ་བཞུད་ཅིང་།མུན་པ་མུན་ནག་གིས་འདི་ཉིད་དུ་བདག་ཅག་གིས་ལྷའི་གསེར་གྱི་མཆོད་རྟེན་བགྱིའོ། །ལྷའི་གསེར་གྱི་འཆགས་བགྱིའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་དེ་དག་ལ་འདི་སྐད་ཅེས་སྨྲས་སོ། །ངས་སེམས་ཅན་དུ་མ་དག་བྱང་ཆུབ་ཀྱི་ལམ་ལ་དགོད་དགོས་སོ། །དེ་ནས་གནོད་སྦྱིན་དང་སྲིན་པོ་དེ་དག་ལག་པ་ལ་འགྲམ་པ་བརྟེན་ཏེ་སེམས་ཤིང་འཁོད་ནས་གཅིག་ལ་གཅིག་འདི་སྐད་སྨྲའོ། །བདག་ཅག་གི་སྤྱན་རས་གཟིགས་ཀྱི་དབང་པོ་གཤེགས་པར་འགྱུར་བས་ཆོས་ཀྱི་གཏམ་སྤོང་བར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་སོང་བ་དང ། གནོད་སྦྱིན་དང ། སྲིན་པོ་དེ་
343a
༄#། །དག་ཀྱང་ཕྱི་བཞིན་དུ་འབྲང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་དེ་དག་ལ་འདི་སྐད་ཅེས་སྨྲས་སོ། ། ཁྱེད་ཤིན་ཏུ་རིང་དུ་འོངས་ཀྱི། སླར་ལོག་ཅིག་།དེ་ནས་གནོད་སྦྱིན་དང་སྲིན་པོ་དེ་དག་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་རྐང་པ་ལ་ཕྱག་བཙལ་ཏེ་དེ་ཉིད་ནས་སླར་ལོག་གོ་།དེ་ནས་སྤྱན་རས་གཟིགས་ཀྱི་དབང་པོ་མེའི་ཕུང་པོ་འབར་བ་བཞིན་དུ་ནམ་མཁའ་ལ་མི་སྣང་བར་གྱུར་ཏོ། །དེ་ནས་བྲམ་ཟེའི་གཟུགས་སུ་སྤྲུལ་ཏེ་གནས་གཙང་མའི་རིས་ཀྱི་ལྷའི་བུ་དག་གི་དྲུང་དུ་སོང་སྟེ་ཕྱིན་ནས། ལྷའི་རིས་དེ་ན་ལྷའི་བུ་རྣ་ཆའི་མཆོག་ཅེས་བྱ་བ་དབུལ་པོ་སྡུག་བསྔལ་བ་ཞིག་འདུག་གོ་།དེ་ནས་སྤྱན་རས་གཟིགས་ཀྱི་དབང་པོ་བྲམ་ཟེ་དེའི་གཟུགས་ཀྱིས་ལྷའི་བུ་དེའི་དྲུང་དུ་སོང་སྟེ། ཕྱིན་ནས་འདི་སྐད་ཅེས་སྨྲས་སོ། །བདག་ནི་བཀྲེས་སོ། །སྐོམ་མོ།། དེ་ནས་ལྷའི་བུ་དེས་བྲམ་ཟེ་དེ་ལ་འདི་སྐད་ཅེས་སྨྲས་སོ། །བྲམ་ཟེ་ཆེན་པོ། བདག་ལ་ནི་ཅུང་ཟད་ཀྱང་མ་མཆིས་སོ། །བདག་ལ་ཅུང་ཟད་ཅིག་ནི་ངེས་པར་སྩལ་འཚལ་ལོ། །དེ་ནས་ལྷའི་བུ་གཞལ་མེད་ཁང་དུ་སོང་སྟེ་སྣོད་དག་བལྟས་པ་དང ། སྣོད་རྣམས་ལྷའི་ནོར་བུ་རིན་པོ་ཆེ་རིན་ཐང་མེད་པས་ཡོངས་སུ་གང་བ་དང ། སྣོད་གཞན་
343b
དག་ཀྱང་རོའི་རོ་མཆོག་གི་ཟས་དག་གིས་ཡོངས་སུ་གང་བ་དང ། གཡོན་ཕྱོགས་ཀྱི་གཞལ་མེད་ཁང་ན་ཡང་གོས་དང་རྒྱན་གྱིས་ཡོངས་སུ་གང་བ་མཐོང་ངོ ། །དེ་ནས་ལྷའི་བུ་དེ་སེམས་པར་གྱུར་ནས་འདི་འདྲ་བའི་དཔལ་ཐོབ་པ་ལས་ན་བདག་གི་སྒོ་ན་ངེས་པར་སྣོད་བཟང་པོ་ཞིག་འདུག་གོ་སྙམ་མོ། །དེ་ནས་དེས་བྲམ་ཟེ་དེ་བོས་ཏེ་གཞལ་མེད་ཁང་གི་ནང་དུ་སོང་ནས་ལྷའི་རིན་པོ་ཆེས་ཀྱང་བསྟབས། ལྷའི་རོའི་རོ་མཆོག་གི་ཟས་ཀྱང་བྱིན་ཏེ་ཟོས་ནས་བཀྲ་ཤིས་པ་བྱས་སོ། །དེ་ནས་ལྷའི་བུ་དེས་དེ་ལ་འདི་སྐད་ཅེས་སྨྲས་སོ། །བྲམ་ཟེ་ཆེན་པོ་ཁྱོད་ས་ག་ལས་འོངས་བདག་ནི་ཇོ་ཏའི་ཚལ་ཞེས་བགྱི་བའི་གཙུག་ལག་ཁང་ནས་མཆིས་སོ། །དེ་ནས་ལྷའི་བུ་དེས་དེ་ལ་འདི་སྐད་ཅེས་སྨྲས་སོ། །ས་དེ་ཇི་ལྟ་བུ་ཞིག ། དེ་ནས་བྲམ་ཟེ་དེས་དེ་ལ་འདི་སྐད་ཅེས་སྨྲས་སོ། །ས་དེ་ནི་དགའ་བར་བྱེད་པ། ལྷའི་ནོར་བུ་རིན་པོ་ཆེས་ཡོངས་སུ་བརྒྱན་པ། ལྷའི་ཤིང་དཔག་བསམ་གྱིས་ཡོངས་སུ་མཛེས་པར་བྱས་པ། མེ་ཏོག་ཡིད་དུ་འོང་བ་དག་བྱུང་བ། རྫིང་བུ་རྣམ་པ་དུ་མ་གདའ་བ། ཚུལ་ཁྲིམས་དང་ལྡན་པ་ཡོན་ཏན་དང་ལྡན་པའི་སྦྱིན་གནས་སྣ་ཚོགས་དག་གདའ་བ། དེ་བཞིན་གཤེགས་པ་ཐམས་ཅད་སྐྱོབ་ཀྱི་ཆོ་འཕྲུལ་དག་གདའ་བ་སྟེ། ལྷའི་བུ། ས་དེ་ནི་དེ་ལྟར་དགའ་བར་བགྱིད་པའོ། །དེ་ནས་ལྷའི་བུ་དེས་དེ་ལ་འདི་སྐད་ཅེས་སྨྲས་སོ། །བྲམ་ཟེ་ཁྱོད་ཀྱིས་ངེས་པར་བདེན་
344a
༄#། །པར་སྨྲོས་ཤིག་།ཅི་ཁྱོད་ལྷ་ཡིན་ནམ། འོན་ཏེ་མི། མི་ལ་ནི་ཇི་ལྟར་ཁྱོད་ལ་ལྟས་སྣང་བ་དེ་འདྲ་བའི་ལྟས་མེད་དོ། །དེ་ནས་དེས་དེ་ལ་འདི་སྐད་ཅེས་སྨྲས་སོ། །ང་ནི་ལྷའང་མ་ཡིན། མིའང་མ་ཡིན་ཏེ། ཕོངས་པ་དང ། བྲེལ་བ་ལ་ཐུགས་རྗེ་བར་བྱེད་པ། བྱང་ཆུབ་ཀྱི་ལམ་སྟོན་པར་བྱེད་པ་སྟེ། བྱང་ཆུབ་སེམས་དཔའོ། །དེ་ནས་ལྷའི་བུས་ཅོད་པན་དང་རྣ་ཆ་ཕུལ་ནས་ཚིགས་སུ་བཅད་དེ་སྨྲས་པ། ཀྱེ་མའོ་ཡོན་ཏན་དག་གི་ཞིང ། །ཉེས་པ་ཐམས་ཅད་རྣམ་སྤངས་པ། །དེ་རིང་ཉིད་དུ་ས་བོན་བཏབ། །དེ་རིང་ཉིད་དུ་འབྲས་བུ་གྲུབ། །དེ་ནས་ལྷའི་བུ་དེས་ཚིགས་སུ་བཅད་པ་དེ་སྨྲས་ནས་དེ་ཉིད་དུ་སོང་ངོ ། །དེ་ནས་བྲམ་ཟེ་ཆེན་པོ་དེ་ལྷའི་རིས་དེ་ནས་བབས་ཏེ་སིངྒྷ་ལའི་གླིང་དུ་སོང་ངོ ། །སོང་ནས་འདོད་པའི་གཟུགས་སུ་སྤྲུལ་ཏེ་སྲིན་མོ་རྣམས་ཀྱི་མདུན་དུ་འདུག་པ་དང ། གཟུགས་བཟང་པོ་མཐོང་ནས་དེའི་ཚེ་འདོད་པའི་སེམས་སྐྱེས་སོ། །གང་གི་ཚེ་ན་འདོད་པའི་སེམས་སྐྱེས་པ་དེའི་ཚེ་དེའི་དྲུང་དུ་སོང་སྟེ་ཕྱིན་ནས་བདག་ཅག་དང་བསྟེན་ཅིག་།བདག་ཅག་ནི་བུད་མེད་གཞོན་ནུའོ། །བདག་ཅག་ལ་ནི་ཁྱིམ་ཐབས་མ་མཆིས་སོ། །བདག་པོ་མ་མཆིས་པའི་ནི་བདག་པོར་གྱུར་ཅིག་།མགོན་མ་མཆིས་པའི་ནི་མགོན་དུ་གྱུར་ཅིག་།རྟེན་མ་མཆིས་པའི་ནི་རྟེན་དུ་གྱུར་ཅིག་།འདི་
344b
ཁྱོད་ཀྱིས་ཟས་ཀྱི་ཁབ་བོ། །ན་བཟའི་ཁབ་བོ། །སྐྱེད་མོས་ཚལ་དགའ་བར་བགྱིད་པ་དག་ལགས་སོ། །རྫིང་བུ་དགའ་བར་བགྱིད་པ་དག་ལགས་སོ། །དེས་སྨྲས་པ། གལ་ཏེ་བདག་གིས་བསྒོ་བ་བཞིན་དུ་བྱེད་ནའོ། །བདག་ཅག་བགྱིད་དོ། །དེས་དེ་དག་ལ་འཕགས་པའི་ཡན་ལག་བརྒྱད་དང་ལྡན་པའི་ལམ་ཡང་བསྟན། ཞལ་ནས་གསུངས་པ་བཞིའང་ཁ་ཏོན་བྱེད་དུ་བཅུག་ནས་ལན་གཅིག་ཕྱིར་འོང་བའི་འབྲས་བུའང་ཐོབ། ཕྱིར་མི་འོང་བའི་འབྲས་བུའང་ཐོབ་ནས་སྲིན་མོ་དེ་དག་ལ་འདོད་ཆགས་ཀྱི་སྡུག་བསྔལ་མི་ལྡང ། སེམས་ཞེ་སྡང་བར་ཡང་མི་བྱེད། སུ་ལའང་སྲོག་གི་བར་ཆད་བྱེད་པར་མི་འདོད། ཆོས་ལ་མངོན་པར་དགའ་ཞིང་གནས་ལ་སྡོམ་པ་བླངས་ཏེ་སླན་ཆད་བདག་ཅག་སྲོག་གཅོད་པར་མི་བགྱིད་དོ། །ཛམྦུའི་གླིང་གི་མི་དག་ཇི་ལྟར་ཟས་དང་སྐོམ་གྱིས་འཚོ་བ་བདག་ཅག་ཀྱང་དེ་བཞིན་དུ་འཚོའོ། །སླན་ཆད་སྲིན་མོའི་ཚུལ་དུ་མི་བགྱིད་དོ་ཞེས་དེ་འདྲ་བའི་བསླབ་ཚིག་གི་སྡོམ་པ་བླངས་ཏེ་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་སིངྒྷ་ལའི་གླིང་ནས་བྱུང་ནས་ཡུལ་འཁོར་མོར་འཇིག་གི་གྲོང་ཁྱེར་ཆེན་པོ་ན་བཤང་བ་དང་གཅི་བའི་གནས་དེ་ན་སྲིན་བུའི་རིགས་བརྒྱ་སྟོང་དུ་མ་གནས་ནས། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་
345a
༄#། །པོ་བུང་བའི་གཟུགས་སུ་སྤྲུལ་ནས་སྒྲ་བུང་བུང་དུ་ཕྱུང་སྟེ། སངས་རྒྱས་ལ་ཕྱག་འཚལ་ལོ་ཞེས་བྱས་པ་དང ། དེ་དག་སངས་རྒྱས་ལ་ཕྱག་འཚལ་ལོ་ཞེས་བྱ་བ་ལ་རྗེས་སུ་དྲན་ནས་འཇིག་ཚོགས་སུ་ལྟ་བའི་རིའི་རྩེ་མོ་ཉི་ཤུ་བྱུང་བ་ཡེ་ཤེས་ཀྱི་རྡོ་རྗེས་བཅོམ་ནས། དེ་དག་ཐམས་ཅད་བྱང་ཆུབ་སེམས་དཔའ་ཁ་ན་སྤོས་ཀྱི་དྲི་ཞེས་བྱ་བར་གྱུར་ཏེ་འཇིག་རྟེན་གྱི་ཁམས་བདེ་བ་ཅན་དུ་སྐྱེས་སོ། །དེའི་ཚེ་སེམས་ཅན་ཡོངས་སུ་སྨིན་པར་བྱས་ཏེ། འཁོར་མོར་འཇིག་གི་གྲོང་ཁྱེར་ཆེན་པོ་ནས་སོང་ནས་ཡུལ་མ་ག་དྷཱར་མངོན་དུ་ཕྱོགས་ཏེ་སོང་བ་དང ། ཡུལ་མ་ག་དྷཱར་ཕྱིན་ནས་ལོ་ཉི་ཤུར་དགོན་པ་ན་གནས་པའི་སེམས་ཅན་གཅིག་ལ་གཅིག་ཤ་ཟ་བ་དག་མཐོང་ངོ ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་བདག་གིས་ཐབས་གང་གིས་སེམས་ཅན་འདི་དག་ཚིམ་པར་བྱ་སྙམ་དུ་སེམས་པར་གྱུར་ཏོ། ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་ལྷའི་ཆར་པ་དབབ་པར་བརྩམས་ཏེ། ཐོག་མར་ནི་ཆུའི་ཆར་བའོ། །གང་གི་ཚེ་ན་ཆུས་ངོམས\?\་པར་གྱུར་པ་དེའི་འོག་ཏུ་ལྷའི་ཞལ་ཟས་རོ་མཆོག་དང་ལྡན་པས་སྟོན་པ་ཡོངས་སུ་གང་བ་དག་བབ་བོ། །གང་གི་ཚེ་ན་ཟས་ཀྱིས་ཡོངས་སུ་ཚིམ་པར་གྱུར་པ་དེའི་ཚེ་འབྲས་ཀྱི་
345b
ཆར་བབ་བོ། །གཞན་ཡང་ཏིལ་དང ། འབྲས་རྨེའུ་དང ། ཀུ་ལང་ཏིའི་འབྲུ་དང ། འབྲས་སོ་བ་དག་བབ་བོ། །གང་དང་གང་གི་ཚེ་ན་སེམས་ཅན་དེ་དག་གི་དགོས་པ་སེམས་པར་གྱུར་པ་དེའི་ཚེ་དེ་དག་གི་བསམ་པ་གྲུབ་པར་གྱུར་ཏོ། །དེ་ནས་ཡུལ་མ་ག་དྷཱའི་སེམས་ཅན་དེ་དག་ངོ་མཚར་དུ་གྱུར་ནས་དེ་ཐམས་ཅད་གནས་གཅིག་ཏུ་ངལ་བསོས་སོ། །ངལ་བསོས་ནས་གཅིག་ལ་གཅིག་འདི་ལྷ་གང་གི་མཐུ་ཞིག་ཅེས་སྨྲས་པ་དང ། དེ་ནས་སྐྱེས་བུ་དེ་དག་གི་ནང་ན་རྙིས་པ་དང ། རྒན་པ། རྒས་པ། སྐུར་བ། བ་ལང་གི་སྣ་ལྟར་གུག་པ། ལོ་བརྒྱ་སྟོང་དུ་མ་ལོན་པ་ཞིག་ཡོད་པ་དེས་དེ་དག་ལ་སྨྲས་པ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་མ་གཏོགས་པར་ལྷ་གཞན་གང་གིའང་མཐུ་འདི་འདྲ་བར་མི་འགྱུར་རོ། །དེ་ནས་འཁོར་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་མཚན་མ་ཇི་ལྟ་བུ་ཞེས་དྲིས་སོ། །དེ་ནས་སྐྱེས་བུ་དེས་ཡོན་ཏན་བཤད་པར་བརྩམས་པ་མུན་པར་གྱུར་པ་རྣམས་ཀྱི་ནི་སྒྲོན་མར་གྱུར་པའོ། །ཉི་མས་གདུངས་ཤིང་ཚིག་པ་རྣམས་ཀྱི་ནི་གདུགས་སུ་གྱུར་པའོ། །སྐོམ་གྱིས་གདུངས་པ་རྣམས་ཀྱི་ནི་ཆུ་བོར་གྱུར་པའོ། །འཇིགས་ཤིང་སྐྲག་པར་གྱུར་པ་རྣམས་ལ་ནི་མི་འཇིགས་པ་སྦྱིན་པར་བྱེད་པའོ། །ནད་ཀྱིས་བཏབ་པ་རྣམས་ལ་ནི་སྨན་པར་གྱུར་པའོ། །སེམས་ཅན་སྡུག་བསྔལ་བ་རྣམས་ཀྱི་ནི་ཕ་དང་མར་གྱུར་
346a
༄#། །པའོ། །སེམས་ཅན་བསྟིར་མེད་པར་སྐྱེས་པ་རྣམས་ལ་ནི་མྱ་ངན་ལས་འདས་པ་སྟོན་པར་བྱེད་པ་སྟེ། དེའི་ཡོན་ཏན་གྱི་ཁྱད་པར་ནི་འདི་ལྟ་བུའོ། །གང་དེའི་མཚན་གྱི་རྗེས་སུ་དྲན་པ་དེ་དག་ནི་འཇིག་རྟེན་ན་བདེ་བ་དང་ལྡན་པ་ཡིན་ནོ། །དེ་དག་ནི་འཁོར་བའི་སྡུག་བསྔལ་གྱི་ཐ་མ་ཡོངས་སུ་སྤོང་བའོ། །གང་སྤྱན་རས་གཟིགས་ཀྱི་དབང་པོ་ལ་རྟག་ཏུ་མེ་ཏོག་དང ། པོག་བསྡུས་ཤིང་འབུལ་བའི་སྐྱེས་བུ་གང་ཟག་དེ་དག་ནི་སེམས་དཔའ་བ་དང་ལྡན་པ་ཡིན་ནོ། །གང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་མདུན་དུ་དཀྱིལ་འཁོར་གྲུ་བཞི་བྱེད་པ་དེ་དག་ནི་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་ལྡན་པར་འགྱུར་ཏེ། འདི་ལྟ་སྟེ། འཁོར་ལོ་རིན་པོ་ཆེ་དང ། རྟ་རིན་པོ་ཆེ་དང ། བལ་གླང་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། བློན་པོ་རིན་པོ་ཆེ་དང་བདུན་ཏེ། རིན་པོ་ཆེ་དེ་བདུན་དང་ལྡན་པར་འགྱུར་རོ། །གང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་མེ་ཏོག་འབུལ་བ་དེ་དག་ནི་ལུས་དྲི་ཞིམ་ཞིང ། གང་ལ་ལར་སྐྱེས་པ་ལུས་ཡོངས་སུ་རྫོགས་པར་འགྱུར་རོ་ཞེས་སྐྱེས་བུ་དེས་དེ་ལྟར་ཡོན་ཏན་གྱི་ཁྱད་པར་བཤད་ནས་འཁོར་དེ་དག་བདག་བདག་གི་ཁང་པར་དོང་ངོ ། །དེ་ནས་སྐྱེས་བུ་རྙིས\?\་
346b
པ་དེས་མཐུན་པའི་ཆོས་བཤད་ནས་དེའང་བདག་གི་ཁང་པར་སོང་ངོ ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་དེ་ཉིད་དུ་ནམ་མཁའ་ལ་མི་སྣང་བར་གྱུར་ཏོ། །དེ་ནས་དེ་ནམ་མཁའ་ལ་གནས་བཞིན་དུ་བདག་གིས་དེ་བཞིན་གཤེགས་པ་ཐམས་ཅད་སྐྱོབ་མ་མཐོང་ནས་ཡུན་རིང་ངོ་སྙམ་དུ་བསམས་ནས། དེ་མཐར་གྱིས་ཛེ་ཏའི་ཚལ་གྱི་གཙུག་ལག་ཁང་དུ་ཕྱིན་པ་དང ། འོང་བ་བཅོམ་ལྡན་འདས་ཀྱིས་གཟིགས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ཛེ་ཏའི་ཚལ་གྱི་གཙུག་ལག་ཁང་དུ་ཕྱིན་ནས་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང་མི་མ་ཡིན་པ་དག་དང།་བྱང་ཆུབ་སེམས་དཔའ་བརྒྱ་ཕྲག་དུ་མ་དག་ཚོགས་པའང་མཐོང་ངོ ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ནམ་མཁའ་མཛོད་ཀྱིས་འདི་སྐད་ཅེས་གསོལ་ཏོ། ། བཅོམ་ལྡན་འདས། བྱང་ཆུབ་སེམས་དཔའ་དེ་གང་ཞིག་མཆི། བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་དེ་འོང་ངོ ། །དེ་ནས་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། ལན་གསུམ་བསྐོར་ནས་གཡོན་ཕྱོགས་
347a
༄#། །སུ་ངལ་བསོས་སོ། །དེ་ནས་བཅོམ་ལྡན་འདས་ཀྱིས་ཁྱོད་ངལ་ལམ། འཆད་དམ། རིགས་ཀྱི་བུ་ཁྱོད་ཀྱིས་ལས་ཀྱིས་ཇི་ལྟ་བུ་ཞིག་བསྒྲུབས། དེས་སྔོན་ཇི་ལྟར་གྱུར་པ་གསོལ་ཏོ། །དེ་ནས་བྱང་ཆུབ་སེམས་དཔའ་ནམ་མཁའ་མཛོད་ཤིན་ཏུ་ངོ་མཚར་དུ་གྱུར་ཏོ། །བདག་གིས་བྱང་ཆུབ་སེམས་དཔའི་ཡུལ་འདི་ལྟ་བུ་མ་མཐོང་ངོ ། །དེ་བཞིན་གཤེགས་པ་དག་ལའང་ཡུལ་འདི་ལྟ་བུ་མ་མཆིས་ན་བྱང་ཆུབ་སེམས་དཔར་གྱུར་པ་ལ་ལྟ་ཅི་སྨོས་སྙམ་མོ། །དེ་ནས་བྱང་ཆུབ་སེམས་དཔའ་ནམ་མཁའ་མཛོད་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་དྲུང་དུ་སོང་སྟེ། མདུན་དུ་འདུག་གོ་།འདུག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་འདི་སྐད་ཅེས་སྨྲས་སོ། །ཁྱོད་ངལ་ལམ། འཆད་དམ། བདག་ནི་མི་ངལ་ལོ། །ཉོན་མ་མོངས་སོ་ཞེས་ཕན་ཚུན་དུ་གཏམ་བྱས་ནས་ཁ་རོག་སྟེ་འཁོད་དོ། །དེ་ནས་བཅོམ་ལྡན་འདས་ཀྱིས་ཕ་རོལ་ཏུ་ཕྱིན་པ་དྲུག་བཤད་པར་བརྩམས་པས། རིགས་ཀྱི་བུ་དག་ཉོན་ཅིག་།བྱང་ཆུབ་སེམས་དཔར་གྱུར་པས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱའོ། །དེ་བཞིན་དུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང ། བཟོད་པའི་ཕ་རོལ་ཏུ་ཕྱིན་པ་དང ། བརྩོན་འགྲུས་ཀྱི་ཕ་རོལ་ཏུ་
347b
ཕྱིན་པ་དང ། བསམ་གཏན་གྱི་ཕ་རོལ་ཏུ་ཕྱིན་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱའོ། །ཞེས་ཆོས་དེ་བཤད་ནས་ཅང་མི་གསུང་བར་བཞུགས་སོ། །དེ་ནས་འཁོར་དེ་དག་བདག་བདག་གི་གནས་སུ་དོང་ངོ ། །བྱང་ཆུབ་སེམས་དཔའ་དེ་དག་ཀྱང་བདག་བདག་གི་སངས་རྒྱས་ཀྱི་ཞིང་དུ་དོང་ངོ ། །འདི་ནི་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པའི་ལེའུ་དང་པོ་སྟེ་རྫོགས་སོ།། །།དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་སྔོན་ཏིང་ངེ་འཛིན་གང་དག་ལ་མཉམ་པར་བཞག་པར་གྱུར་པ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། འདི་ལྟ་སྟེ། རྣམ་པར་བྱེད་ཅེས་བྱ་བའི་ཏིང་ངེ་འཛིན་དང ། འོད་བྱེད་ཅེས་བྱ་བའི་ཏིང་ངེ་འཛིན་དང ། རྡོ་གྱེན་དུ་འཕགས་ཞེས་བྱ་བའི་ཏིང་ངེ་འཛིན་དང ། ཉི་མའི་འོད་ཅེས་བྱ་བའི་ཏིང་ངེ་འཛིན་དང ། འཐོར་བ་ཞེས་བྱ་བའི་ཏིང་ངེ་འཛིན་དང ། དཔུང་རྒྱན་ཅེས་བྱ་བའི་ཏིང་ངེ་འཛིན་དང ། རྡོ་རྗེ་རྒྱལ་མཚན་མཆོག་ཅེས་བྱ་བའི་ཏིང་ངེ་འཛིན་དང ། རྒྱན་ཅེས་བྱ་བའི་ཏིང་ངེ་འཛིན་དང ། བཀོད་པའི་རྒྱལ་པོ་ཞེས་བྱ་བའི་ཏིང་ངེ་འཛིན་དང ། ཕྱོགས་བཅུར་རྣམ་པར་ལྟ་ཞེས་
348a
༄#། །བྱ་བའི་ཏིང་ངེ་འཛིན་དང ། ཡིད་བཞིན་གྱི་ནོར་བུ་ལྟ་བུ་སྤྱན་མཆོག་ཅེས་བྱ་བའི་ཏིང་ངེ་འཛིན་དང ། ཆོས་ཀྱི་རྒྱལ་པོ་ཞེས་བྱ་བའི་ཏིང་ངེ་འཛིན་དང ། ཤིན་ཏུ་གནས་པ་ཞེས་བྱ་བའི་ཏིང་ངེ་འཛིན་དང ། དགའ་བ་སྦྱིན་པར་བྱེད་ཅེས་བྱ་བའི་ཏིང་ངེ་འཛིན་དང ། རྡོ་རྗེ་རྒྱལ་མཚན་ཞེས་བྱ་བའི་ཏིང་ངེ་འཛིན་དང ། འཇིག་རྟེན་གྱི་ཁམས་ཐམས་ཅད་རྣམ་པར་ལྟ་བ་ཞེས་བྱ་བའི་ཏིང་ངེ་འཛིན་དང ། མ་ལུས་པར་འོངས་ཞེས་བྱ་བའི་ཏིང་ངེ་འཛིན་དང ། མངོན་པར་འདུད་ཅེས་བྱ་བའི་ཏིང་ངེ་འཛིན་དང ། སྤྱི་བོར་འཁྱིལ་པ་ཞེས་བྱ་བའི་ཏིང་ངེ་འཛིན་དང ། ཟླ་བ་ལྟར་སྤྱན་མཆོག་ཅེས་བྱ་བའི་ཏིང་ངེ་འཛིན་དང ། གཡོག་སྐྱེ་བོ་མང་པོ་ཞེས་བྱ་བའི་ཏིང་ངེ་འཛིན་དང ། ལྷའི་སྤྱན་ཞེས་བྱ་བའི་ཏིང་ངེ་འཛིན་དང ། བསྐལ་པའི་གླིང་ཞེས་བྱ་བའི་ཏིང་ངེ་འཛིན་དང ། ཆོ་འཕྲུལ་སྟོན་ཅེས་བྱ་བའི་ཏིང་ངེ་འཛིན་དང ། པདྨའི་བླ་ཞེས་བྱ་བའི་ཏིང་ངེ་འཛིན་དང ། རྒྱལ་པོའི་དབང་པོ་ཞེས་བྱ་བའི་ཏིང་ངེ་འཛིན་དང ། བསྟིར་མེད་པ་སྐེམས་ཞེས་བྱ་བའི་ཏིང་ངེ་འཛིན་དང ། འབར་ཞེས་བྱ་བའི་ཏིང་ངེ་འཛིན་དང ། ལྷའི་རྣ་ཆ་ཞེས་བྱ་བའི་ཏིང་ངེ་འཛིན་དང ། བདུད་རྩི་ཐིགས་པ་ཞེས་བྱ་བའི་ཏིང་ངེ་འཛིན་དང ། འོད་ཀྱི་དཀྱིལ་འཁོར་ཞེས་བྱ་བའི་ཏིང་ངེ་འཛིན་དང ། རྒྱ་མཚོར་འཇུག་ཅེས་བྱ་བའི་ཏིང་ངེ་འཛིན་དང །
348b
གཞལ་མེད་ཁང་གི་སྒོ་ཞེས་བྱ་བའི་ཏིང་ངེ་འཛིན་དང ། བྱ་ཀ་ལ་པིངྐའི་སྒྲ་ཞེས་བྱ་བའི་ཏིང་ངེ་འཛིན་དང ། ུཏྤ་ལ་སྔོན་པོའི་དྲི་ཞེས་བྱ་བའི་ཏིང་ངེ་འཛིན་དང ། ཞོན་ཞེས་བྱ་བའི་ཏིང་ངེ་འཛིན་དང ། རྡོ་རྗེའི་གོ་ཆ་ཞེས་བྱ་བའི་ཏིང་ངེ་འཛིན་དང ། བལ་གླང་དགའ་ཞེས་བྱ་བའི་ཏིང་ངེ་འཛིན་དང ། སེང་གེ་རྣམ་པར་རོལ་ཅེས་བྱ་བའི་ཏིང་ངེ་འཛིན་དང ། བླ་ན་མེད་ཅེས་བྱ་བའི་ཏིང་ངེ་འཛིན་དང ། འདུལ་བ་ཞེས་བྱ་བའི་ཏིང་ངེ་འཛིན་དང ། ཟླ་བའི་བླ་ཞེས་བྱ་བའི་ཏིང་ངེ་འཛིན་དང ། སྣང་བར་བྱེད་ཅེས་བྱ་བའི་ཏིང་ངེ་འཛིན་དང ། འོད་ཟེར་བརྒྱ་པ་ཞེས་བྱ་བའི་ཏིང་ངེ་འཛིན་དང ། བསྐུས་པ་ཞེས་བྱ་བའི་ཏིང་ངེ་འཛིན་དང ། འོད་བྱེད་ཅེས་བྱ་བའི་ཏིང་ངེ་འཛིན་དང ། རྣམ་པ་བཟང་པོ་ཞེས་བྱ་བའི་ཏིང་ངེ་འཛིན་དང ། ལྷ་མ་ཡིན་ལ་སྐུལ་པ་ཞེས་བྱ་བའི་ཏིང་ངེ་འཛིན་དང ། བསྒོམ་པ་ཞེས་བྱ་བའི་ཏིང་ངེ་འཛིན་དང ། མྱ་ངན་ལས་འདའ་བ་སྐུལ་བ་ཞེས་བྱ་བའི་ཏིང་ངེ་འཛིན་དང ། གླིང་ཆེན་པོ་ཞེས་བྱ་བའི་ཏིང་ངེ་འཛིན་དང ། ཚོར་བ་རྣམ་པར་གྲོལ་ཞེས་བྱ་བའི་ཏིང་ངེ་འཛིན་དང ། རྣལ་འབྱོར་བྱེད་ཅེས་བྱ་བའི་ཏིང་ངེ་འཛིན་དང ། དོན་དམ་པ་སྟོན་ཅེས་བྱ་བའི་ཏིང་ངེ་འཛིན་དང ། གློག་ཅེས་བྱ་བའི་ཏིང་ངེ་འཛིན་དང ། ཀླུ་བཀོད་པ་ཞེས་བྱ་བའི་ཏིང་ངེ་འཛིན་དང ། སེང་གེ་གླལ་ཞེས་བྱ་བའི་ཏིང་ངེ་འཛིན་དང ། ས་རི་བཀོད་པ་ཞེས་བྱ་བའི་ཏིང་ངེ་འཛིན་དང ། འོད་བ་
349a
༄#། །ཞེས་བྱ་བའི་ཏིང་ངེ་འཛིན་དང ། དྲན་པའི་དབང་པོ་འཕེལ་བ་ཞེས་བྱ་བའི་ཏིང་ངེ་འཛིན་དང ། མོས་པ་ཞེས་བྱ་བའི་ཏིང་ངེ་འཛིན་དང ། རྒྱལ་བའི་ཐེག་པ་ཞེས་བྱ་བའི་ཏིང་ངེ་འཛིན་དང ། ལམ་སྟོན་པ་ཞེས་བྱ་བའི་ཏིང་ངེ་འཛིན་དང ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནི་ཏིང་ངེ་འཛིན་དེ་དག་དང་ལྡན་ཏེ། དེའི་བ་སྤུའི་ཁུང་བུ་རེ་རེ་ནའང་ཏིང་ངེ་འཛིན་བརྒྱ་སྟོང་དག་གནས་སོ། །རིགས་ཀྱི་བུ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་དཔག་ཏུ་མེད་དོ། །བསོད་ནམས་ཀྱི་ཚོགས་དེ་འདྲ་བ་དག་ནི་དེ་བཞིན་གཤེགས་པ་དག་ལའང་མེད་ན་བྱང་ཆུབ་སེམས་དཔའ་དག་ལ་ལྟ་ཅི་སྨོས།། །།བམ་པོ་གསུམ་པ། རིགས་ཀྱི་བུ། སྔོན་བྱུང་བ་ང་བྱང་ཆུབ་སེམས་དཔར་གྱུར་པ་དེའི་ཚེ། ང་ཚོང་པ་ལྔ་བརྒྱ་དང་འགྲོགས་ནས་སིངྒྷ་ལའི་གླིང་དུ་སོང་སྟེ། ཤིང་རྟ་དང ། ཁུར་དང ། བམ་པོ་དང ། སྐོན་པ་དང ། རྔ་མོ་དང ། བ་ལང་དང ། བོང་བུ་ལ་སོགས་པས་ཟོང་མང་དུ་བསྐྱས་ཏེ་སིངྒྷ་ལའི་གླིང་དུ་སོང་བ་ལས། གྲོང་དང ། གྲོང་ཁྱེར་དང ། གྲོང་འདབ་དང ། གྲོང་ཡེའུ་དང ། ཚོང་དུས་དག་ཏུ་སོང་བ་ལས་སིངྒྷ་ལའི་གླིང་དུ་མ་ཕྱིན་པར་གྲུ་བོ་ཆེ་བཟང་པོ་
349b
ཞིག་རྙེད་ནས། ངས་གདོས་འཛིན་པ་ལ་གླིང་གང་ལོགས་སུ་རླུང་ལངས། ཅི་རིན་པོ་ཆེའི་གླིང་དུ་རླུང་ལངས་སམ། ཡང་ན་ནི་ནས་ཀྱི་གླིང་དུ་རླུང་ལངས་སམ། འོན་ཏེ་སྲིན་མོའི་གླིང་དུ་རླུང་ལངས་ཞེས་སྨྲས་པ་དང ། གདོས་འཛིན་པ་འདི་སྐད་ཅེས་ཟེར་ཏེ། བསེར་མ་ནི་སིངྒྷ་ལའི་གླིང་དུ་ལངས་ཀྱི། ལྷ།་མཁྱེན་པར་མཛོད་ཅིག་།དེ་ནས་གྲུ་བོ་ཆེ་བཏང་སྟེ་སིངྒྷ་ལའི་གླིང་དུ་སོང་བ་ལས་སིངྒྷ་ལའི་གླིང་ན་གནས་པའི་སྲིན་མོ་དག་གིས་དུས་མ་ཡིན་པའི་རླུང་བཏང་བ་དང་གྲུ་བོ་ཆེ་དེ་དུམ་བུ་དུམ་བུར་ལྷགས་ནས་ཚོང་པ་དེ་དག་ཆུའི་ནང་དུ་ལྷུང་བ་དང ། བརྐྱལ་ནས་ཆུའི་འགྲམ་དུ་ཉེ་བར་ཕྱིན་ཏོ། །དེ་ནས་སྲིན་མོ་ལྔ་བརྒྱ་གཞོན་ནུའི་གཟུགས་སུ་བསྒྱུར་ཏེ་སྒྲ་ཅ་ཅོ་ཟེར་ཞིང་བྱུང་ནས་ཆུ་འགྲམ་དེ་དང་ཉེ་བ་ཞིག་ཏུ་འོངས་ཏེ། བླ་གོས་ཀྱི་རས་བྱིན་ནས་བསླང་བ་དང ། དེ་དག་བདག་བདག་གི་གོས་འཚིར་རོ། །བཙིར་ནས་དེ་དག་གནས་དེ་ནས་གནས་གཞན་དུ་ཤིང་ཙམྤ་ཀ་ཆེན་པོ་ཡོད་པ་དེའི་དྲུང་དུ་ངལ་བསོས་སོ། །ངལ་བསོས་ནས་བདག་ཅག་ལ་ཐབས་ཅི་ཡོད་ཅེས་གཏམ་བྱས་པ་དང ། དེ་དག་གིས་བདག་ཅག་ལ་ཐབས་མ་མཆིས་སོ་ཞེས་དེ་སྐད་སྨྲས་ནས་ཁ་རོག་སྟེ་འཁོད་དོ། །དེ་ནས་སྲིན་མོ་དེ་དག་དེ་རྣམས་ཀྱི་མདུན་དུ་འདུག་ནས་ཁྱོ་མ་མཆིས་བའི་ནི་ཁྱོ་མཛོད་ཅིག་།གནས་མ་མཆིས་པའི་ནི་གནས་མཛོད་ཅིག་།རྟེན་མ་མཆིས་པའི་ནི་རྟེན་མཛོད་ཅིག་།འདི་དག་ནི་ཁྱོད་ཀྱི་ཟས་
350a
༄#། །ཀྱི་ཁྱིམ་མོ། །སྐོམ་གྱི་ཁྱིམ་མོ། །སྐྱེད་མོས་ཚལ་དགའ་བར་བགྱིད་པའོ། །རྫིང་བུ་དགའ་བར་བགྱིད་པའོ། །ཞེས་དེ་སྐད་སྨྲས་ནས་སྲིན་མོ་དེ་དག་གིས་སྐྱེས་པ་རེ་རེ་ཁྲིད་དེ་བདག་བདག་གི་ཁྱིམ་དུ་སོང་ངོ ། །གང་སྲིན་མོ་དེ་དག་གི་ནང་ན་ཤིན་ཏུ་རྒན་པ་དེས་བདག་གི་ཁྱིམ་དུ་ང་ཁྲིད་ནས་ལྷའི་རོའི་རོ་མཆོག་དང་ལྡན་པས་ཚིམ་པར་བྱས་སོ། །ཚིམ་པར་བྱས་ནས་རྩེ་བར་རྩོམ་སྟེ། དེ་ལ་དེས་མིའི་བདེ་བས་ཚིམ་པར་བྱས་ནས་དེ་བཞིན་དུ་ཉི་མ་གཉིས་གསུམ་ནས་བདུན་འདས་སོ། །རེ་ཞིག་ནུབ་མོ་ཉལ་ཏེ་གཉིད་ཀྱིས་ལོག་པ་དང་གད་མོ་སྙན་པར་དགོད་པ་ངས་མཐོང་ནས་ང་མཚར་དུ་གྱུར་ཏེ། གཉིད་ལོག་བཞིན་དུ་གད་མོ་སྙན་པར་དགོད་པ་ངས་ནམ་ཡང་མ་མཐོང ། མ་ཐོས་སོ། །སྙམ་ནས་དེའི་ཚེ་ངས་དེ་ལ་ཁྱོད་ཅིའི་ཕྱིར་དགོད་ཅེས་སྨྲས་པ་དང ། མོ་ན་རེ། འདི་དག་ནི་སིངྒྷ་ལའི་གླིང་ན་གནས་པའི་སྲིན་མོ་ལགས་ཏེ། ཁྱེད་ཀྱི་སྲོག་བཅད་ད་རེ་ཞེས་ཟེར་ནས་དེའི་ཚེ་ངས་དེ་ལ་འདི་དག་སྲིན་མོ་ཡིན་པར་ཁོ་བོས་ཇི་ལྟར་ཤེས་པར་བྱ་ཞེས་དྲིས་པ་དང ། དེ་སྟེ་ཡིད་མི་ཆེས་ན་གཡས་ཕྱོགས་ཀྱི་ལམ་སྲང་བཟུང་སྟེ་བཞུད་ཅིག་དང ། དེ་ན་ལྕགས་ཀྱི་གྲོང་ཁྱེར་མཐོང་བ་བསྐོར་བ་སྐར་ཁུང་དང་རྟ་བབས་མེད་པ་ཞིག་མཆིས་ཏེ། དེ་ན་ཚོང་པ་བརྒྱ་ཕྲག་དུ་མ་འཚལ་
350b
ཅིང་བོར་ནས་ལ་ལ་ནི་གསོན། ལ་ལ་ནི་གུམ་སྟེ། ཁྱོད་དེ་ལྟར་ཐུགས་མི་ཆེས་ན་ལམ་དེར་བཞུད་ཅིག་།ལམ་དེར་བཞུད་ནས་རྟོགས་ཤིག་དང ། དེའི་ཚེ་ང་ལ་ཡིད་ཆེས་པར་འགྱུར་རོ་ཞེས་ཟེར་ནས། དེའི་ཚེ་དེས་གླེན་པའི་དྲ་བ་ཞེས་བྱ་བའི་གཉིད་ཀྱིས་ནོན་པར་བྱས་སོ། །དེ་ནས་བྱང་ཆུབ་སེམས་དཔའ་དེ་ནུབ་མོའི་དུས་ཀྱི་ཚེ་སོང་ནས་རལ་གྲི་ཟླ་བ་ལྟར་སྣང་བ་བདག་འཚོ་བར་བྱེད་པ་ཞེས་བྱ་བ་ཐོགས་ནས་གཡས་ཕྱོགས་ཀྱི་ལམ་སྲང་བཟུང་སྟེ། སོང་བ་ལས་རིམ་གྱིས་ལྕགས་ཀྱི་གྲོང་ཁྱེར་དུ་ཕྱིན་ནས་ཁོར་ཁོར་ཡུག་ཏུ་བསྐོར་ཀྱང་དེས་སྒོམ་མཐོང་ངོ ། །དེ་ནས་ལྕགས་ཀྱི་གྲོང་ཁྱེར་ཆེན་པོ་དེ་ན་ཤིང་ཙམྤ་ཀ་ཞིག་འདུག་པ་དེ་ལ་འཛེགས་ཏེ། དེ་ནས་ངས་ལུད་པའི་སྒྲ་བྱས་པ་དང ། སྐྱེས་བུ་ཚོང་པ་དེ་དག་ན་རེ། ཚོང་དཔོན་ཆེན་པོ། མཁྱེན་པར་མཛོད་ཅིག་།བདག་ཅག་ནི་ལྕགས་ཀྱི་གྲོང་ཁྱེར་དུ་སྩལ་ཏོ། །ཞེས་སྨྲས་ནས་དེའི་ཚེ་ཉི་མ་རེ་རེ་ཞིང་ཡང་མི་བརྒྱ་བརྒྱ་ཁྲིད་དེ་ཟའོ། །ཟོས་ནས་རུས་པ་རྣམས་ལྕགས་ཀྱི་གྲོང་ཁྱེར་དེ་ཉིད་དུ་འདོར་བའང་དེ་དག་གིས་ང་ལ་སྔོན་བྱུང་བ་བཞིན་དུ་སྨྲས་ནས་ངས་དེའི་ཚེ་ཤིང་ཙམྤ་ཀ་ལས་བབས་ཏེ་གཡས་ཕྱོགས་ཀྱི་ལམ་སྲང་དེ་བཟུང་ནས་མྱུར་དུ་མྱུར་བར་སོང་བ་སྟེ། དེ་ནས་སླར་ཕྱིན་ཏེ། །དེ་ནས་སྙན་པར་བྱེད་པ་དེ་ན་རེ། དེད་དཔོན་ཆེན་པོ་ཁྱོད་ཀྱིས་གཟིགས་སམ་ཞེས་ཟེར་ནས་ངས་མཐོང་ངོ ། །ཞེས་སྨྲས་སོ། །ཁྱོད་ལ་
351a
༄#། །བདག་གིས་གཏམ་བགྱིས་པ་ཁྱོད་ཀྱིས་རྟགས་ལ་བབ་བམ། དེའི་ཚེ་ངས་དེ་ལ་ཐབས་ཅི་ཡོད། །ཅེས་དྲིས་ན། དེ་ནས་སྙན་པར་བྱེད་པ་དེས་འདི་སྐད་ཅེས་སྨྲས་ཏེ། ལྷ།་ཐབས་གང་གིས་བདེ་བ་དང ། ཉོན་མོངས་པ་མེད་པར་སིངྒྷ་ལའི་གླིང་ནས་འབྱུང་ཞིང་སླར་ཛམྦུའི་གླིང་མཐོང་བར་འགྱུར་བའི་ཐབས་མཆིས་སོ། །ངས་དེ་ལ་ལམ་གང་གིས་སིངྒྷ་ལའི་གླིང་ནས་འབྱུང་བར་འགྱུར་བའི་ལམ་དེ་སྟོན་ཅིག་ཅེས་བྱས་པ་དང ། སྙན་པར་བྱེད་པ་དེས་འདི་སྐད་ཅེས་སྨྲས་སོ། །ལྷ།་རྟའི་རྒྱལ་པོ་བ་ལ་ཧ་ཞེས་བགྱི་བ་དམན་པ་དང ། ཕོངས་པ་ལ་སྙིང་རྗེ་བ་དང་ལྡན་པ་ཞིག་མཆིས་ཏེ། རྟའི་རྒྱལ་པོ་བ་ལ་ཧ་དེ་སྨན་སྦེད་ཐམས་ཅད་ཅེས་བགྱི་བ་འཚལ་ཏེ། གསེར་གྱི་བྱེ་མའི་ཐང་བུ་ལ་ཕར་འགྲེ་ཚུར་འགྲེ་བར་བགྱིད་དོ། །ཕར་འགྲེས་ཚུར་འགྲེས་ནས་ལུས་སྤྲུག་གོ་།སྤྲུག་ནས་ཕ་རོལ་ཏུ་སུ་འགྲོ། ཕ་རོལ་ཏུ་སུ་འགྲོ་ཞེས་སྨྲའོ། །ཁྱོད་ཀྱིས། ལྷ།་བདག་ཕ་རོལ་ཏུ་མཆིའོ་ཞེས་བགྱིས་ཤིག་ཅེས་དེ་སྐད་བསྒོ་བ་ཐོས་ནས། དེ་སྲིན་མོའི་དྲུང་དུ་ཉེ་བར་སོང་ནས་ལྷན་ཅིག་ཏུ་ཉལ་བ་དང ། དེ་སད་ནས། འཕགས་པའི་སྲས།་ལུས་རེ་གྲང་བ་ཞིག་ཅེས་ཟེར་ནས། ངས་དེ་ལ་གྲོང་ཁྱེར་གྱི་ཕྱི་རོལ་ཏུ་བཤང་གཅི་བྱེད་དུ་སོང་བས་དེའི་ཕྱིར་ལུས་གྲང་མོ་གྲང་བར་གྱུར་ཏོ། །ཞེས་སྨྲས་སོ། །མོས་
351b
ཀྱང་སྨྲས་ནས་སླར་དེ་གཉིད་ཀྱིས་ལོག་སྟེ་ཉི་མ་ཤར་བའི་ཚེ་ལངས་སོ། །དེ་ནས་སྐྱེས་བུ་ཚོང་པ་རྣམས་ལ་ཁྱེད་ཚུར་ཤོག་ཅིག་།གྲོང་ཁྱེར་གྱི་ཕྱི་རོལ་ཏུ་འདོང་ངོ་ཞེས་བསྒོ་བ་དང ། དེ་དག་ཐམས་ཅད་གྲོང་ཁྱེར་གྱི་ཕྱི་རོལ་ཏུ་འདོང་ངོ ། །དེ་དག་གྲོང་ཁྱེར་གྱི་ཕྱི་རོལ་ཏུ་དོང་ནས་ངལ་བསོས་སོ། །ངལ་བསོས་ནས་སུའི་ཆུང་མ་དག་ཇི་ལྟ་བུས་མཛའ་བར་གྱུར་ཅེས་དྲིས་པ་དང ། ཁ་ཅིག་གིས་ནི་བདག་ལ་ཤིན་ཏུ་མཛའ་བར་བྱེད་དོ་ཞེས་སྨྲས་སོ། །ཁ་ཅིག་གིས་ནི་བདག་ལ་ལྷའི་རོའི་རོ་མཆོག་དང་ལྡན་པའི་ཟས་ཀྱིས་འཛིན་པར་བགྱིད་དོ་ཞེས་སྨྲས་སོ། །ཁ་ཅིག་གིས་ནི་གོས་རྣམ་པ་སྣ་ཚོགས་ཀྱིས་འཛིན་ཏོ་ཞེས་སྨྲས་སོ། །ཁ་ཅིག་གིས་ནི་བདག་ལ་ཅོད་པན་དང ། རྣ་ཆ་དང ། སེ་མོ་དོའི་ཆུན་པོས་འཛིན་ཏོ་ཞེས་སྨྲས་སོ། །ཁ་ཅིག་གིས་ནི་བདག་གི་ལུས་ལ་བྲེལ་བ་མ་མཆིས་སོ་ཞེས་སྨྲས་སོ། །ཁ་ཅིག་གིས་ནི་བདག་ལ་ཙནྡན་དང ། གླ་རྩི་དང ། ག་བུར་གྱིས་འཛིན་ཏོ་ཞེས་སྨྲས་ཏེ། དེ་ལྟར་དེ་དག་གིས་གཏམ་བྱས་ནས་ངས་དེའི་ཚེ་སྐྱེས་བུ་ཚོང་པ་དེ་དག་ལ་གང་བདག་ཅག་སྲིན་མོ་ལ་ཆགས་པར་བྱ་བའི་ནི་མི་རིགས་སོ་ཞེས་སྨྲས་པ་དང ། དེ་དག་མྱོས་ནས། ཚོང་དཔོན་ཆེན་པོ། སིངྒྷ་ལའི་གླིང་ན་གནས་པའི་སྲིན་མོ་ལགས། མད\?\་མད\?\་ཅེས་ཟེར་ནས། དེའི་ཚེ་ངས་དེ་དག་ལ་སངས་རྒྱས་དང ། ཆོས་དང ། དགེ་འདུན་པ་བདེན་ནོ། །བདེན་ནོ། །འདི་ནི་མི་མ་ཡིན་ཏེ། སྲིན་
352a
༄#། །མོའོ་ཞེས་སྨྲས་སོ། །དེ་ནས་སྐྱེས་བུ་ཚོང་པ་དེ་དག་གིས་བདག་ཅག་ལ་སྐྱབས་ཅི་ཡོད། རྟེན་ཅི་ཡོད་ཅེས་སྨྲས་པ་དང ། ངས་དེ་དག་ལ་སིངྒྷ་ལའི་གླིང་ན་རྟའི་རྒྱལ་པོ་བ་ལ་ཧ་ཞེས་བྱ་བ་དམན་པ་དང་ཕོངས་པ་ལ་སྙིང་རྗེ་བར་བྱེད་པ་ཞིག་ཡོད་དེ། སྨན་སྦེད་ཐམས་ཅད་ཅེས་བྱ་བ་ཟོས་ནས་གསེར་གྱི་བྱེ་མའི་ཐང་བུ་ལ་ཕར་འགྲེ་ཚུར་འགྲེ་བྱས་ཏེ་ལུས་སྤྲུག་གོ་།ལུས་སྤྲུགས་ནས་དེའི་ཚེ་སུ་ཕ་རོལ་ཏུ་འགྲོ་།སུ་ཕ་རོལ་ཏུ་འགྲོ་ཞེས་ཚིག་ལན་གསུམ་སྨྲས་པ་དང ། བདག་ཅག་དེར་འདོང་ཞེས་སྨྲས་སོ། །དེ་ནས་སྐྱེས་བུ་ཚོང་པ་དེ་དག་ང་ལ་བདག་ཅག་ནམ་བཞུད་ཅེས་ཟེར་ནས། ངས་དེ་དག་ལ་ཉི་མ་གསུམ་ན་ངེས་པར་འདོང་གི་སྐྱེས་བུ་སོ་སོ་ནས་རྒྱགས་དག་ཆོས་ཤིག་ཅེས་དེ་བདག་དང་དམ་བཅས་ནས། སླར་གྲོང་ཁྱེར་དུ་དོང་སྟེ་བདག་བདག་གིས་ཁྱིམ་དུ་ཕྱིན་པ་དང ། དེ་དག་ལ་སྲིན་མོ་རྣམས་ཀྱིས་ངལ་ལམ། ཆད་དམ། ཁྱེད་ཀྱིས་སྐྱེད་མོས་ཚལ་དགའ་བར་བྱེད་པ་མཐོང་ངམ་ཞེས་སྨྲས་པ་དང ། དེ་དག་གིས་ངེད་ཀྱིས་ཅུང་ཟད་ཀྱང་མ་མཐོང་ངོ་ཞེས་སྨྲས་སོ། །དེ་ནས་སྲིན་མོ་དེ་དག་གིས་འདི་སྐད་ཅེས་སྨྲས་སོ། །འཕགས་པའི་སྲས། སིངྒྷ་ལའི་གླིང་འདི་ན་སྐྱེད་མོས་ཚལ་དགའ་བར་བྱེད་པ་མེ་ཏོག་གིས་ཡོངས་སུ་གང་བ་རྣམ་པ་སྣ་ཚོགས་དང ། རྫིང་
352b
བུ་བརྒྱ་ཕྲག་དུ་མ་མཆིས་སོ་ཞེས་སྨྲས་ནས། དེས་ཉི་མ་གསུམ་ན་སྐྱེད་མོས་ཚལ་གྱིས་དེ་དག་དང ། རྫིང་བུ་མེ་ཏོག་གིས་ཡོངས་སུ་གང་བ་རྣམ་པ་སྣ་ཚོགས་དེ་དག་བལྟར་འགྲོའོ། ། དེའི་ཚེ་མེ་ཏོག་བཟང་པོ་དག་ཀྱང་ཁྱེར་ཏེ་འོང་གིས་རྒྱགས་བཟང་དུ་གྱིས་ཤིག་ཅེས་སྨྲས་པ་དང ། དེས།་འཕགས་པའི་སྲས། དེ་བཞིན་དུ་བགྱིའོ་ཞེས་སྨྲས་སོ། །དེ་ནས་དེས་ལུས་ལ་བསམས་ཏེ། སྲིན་མོ་འདི་དག་གིས་རྒྱུས་ཤེས་པར་གྱུར་ན་ནི་བདག་ཅག་གི་སྲོག་གཅོད་དོ་སྙམ་དུ་དེ་ལྟར་ལུས་ཀྱི་རྗེས་སུ་བསམས་ནས་ཁ་རོག་སྟེ་འདུག་པ་དང ། མོས་ཟས་བཟང་པོ་བྱིན་ནས་ཟོས་ཏེ་ཤུགས་ཕྱུང་ནས། སྲིན་མོ་དེས། འཕགས་པའི་སྲས། ཅིའི་སླད་དུ་ཤུགས་འབྱིན་ཅེས་སྨྲས་སོ། །དེ་ནས་དེས་མོ་ལ་ཛམྦུའི་གླིང་གི་མི་དག་ནི་བདག་གི་ཡུལ་ལ་དགའོ། །ཞེས་སྨྲས་པ་དང ། འཕགས་པའི་སྲས། བདག་གི་ཡུལ་གྱིས་ཅི་ཞིག་བགྱི། སིངྒྷ་ལའི་གླིང་འདི་ཉིད་ན་ཁྱོད་ཀྱི་ཟས་ཀྱི་ཁང་པ་དང ། སྐོམ་གྱི་ཁང་པ་དང ། གོས་ཀྱི་ཁང་པ་སྣ་ཚོགས་དང ། ཁྱོད་ཀྱི་སྐྱེད་མོས་ཚལ་དགའ་བར་བགྱིད་པ་སྣ་ཚོགས་མཆིས་ཀྱི་ལྷའི་བདེ་བ་མྱོང་བར་མཛོད་ཅིག་།ཛམྦུའི་གླིང་ལ་མྱ་ངན་བགྱིར་ཅི་མཆིས་ཞེས་ཟེར་ནས་དེའི་ཚེ་ང་ཁ་རོག་སྟེ་འདུག་གོ་།དེའི་ཉིན་མོ་འདས་ནས་ཕྱི་དེ་ཉིན་ཟས་བཟང་པོ་རྒྱགས་དང་ལྡན་པ། དེ་དག་ཐམས་ཅད་སྟ་གོན་བྱས་ནས་ཉི་མ་གསུམ་པ་ལ་ནང་
353a
༄#། །པར་སྔར་དེ་དག་ཐམས་ཅད་དོང་ནས་གྲོང་ཁྱེར་གྱི་སྒོར་བྱུང་ངོ ། །བྱུང་ནས་སླར་སུས་ཀྱང་སིངྒྷ་ལའི་གླིང་དུ་མི་བལྟ་བར་དམ་བཅས་སོ། །དེ་འདྲ་བའི་དམ་བཅས་ནས་མྱུར་བ་མྱུར་བར་སྐྱེན་པ་སྐྱེན་པར་དོང་བ་དང ། རིམ་གྱིས་རྟའི་རྒྱལ་པོ་བ་ལ་ཧ་ག་ལ་བ་དེར་ཕྱིན་ནས། རྟའི་རྒྱལ་པོ་བ་ལ་ཧ་སྨན་སྦོད་ཐམས་ཅད་ཅེས་བྱ་བ་ལ་མྱངས་སོ། །སྨན་མྱངས་ནས་གསེར་གྱི་བྱེ་མའི་ཐང་བུ་ལ་ཕར་འགྲོ་ཚུར་འགྲོ་བར་བྱེད་དོ། །བྱས་ནས་ལུས་སྤྲུག་གོ་།གང་གི་ཚེ་ན་ལུས་སྤྲུགས་པ་དེའི་ཚེ་སིངྒྷ་ལའི་གླིང་ཡང་འགུལ་ལོ། །དེས་ཕ་རོལ་ཏུ་སུ་འགྲོ། ཕ་རོལ་ཏུ་སུ་འགྲོ་ཞེས་ལན་གསུམ་སྨྲས་པ་དང ། དེ་ནས་སྐྱེས་བུ་ཚོང་པ་དེ་དག་གིས་བདག་ཅག་ཕ་རོལ་ཏུ་མཆིའོ་ཞེས་སྨྲས་སོ། །དེ་ནས་རྟའི་རྒྱལ་པོ་བ་ལ་ཧ་དེས་ཁྱེད་ལས་སུས་ཀྱང་སིངྒྷ་ལའི་གླིང་ལ་མི་བལྟ་བར་བྱའོ། །སུས་ཀྱང་མིག་གིས་མི་བལྟ་བར་བྱའོ། །ཞེས་དེ་སྐད་སྨྲས་ཏེ་དེ་འདྲ་བའི་དམ་བཅས་ནས་དེའི་ཚེ་ཐོག་མ་ཁོ་ནར་ང་ཞོན་ནོ། །དེའི་འོག་ཏུ་ཚོང་པ་ལྔ་བརྒྱ་ཞོན་ནོ། །གང་གི་ཚེ་དེ་དག་ཞོན་པ་དེའི་ཚེ་སིངྒྷ་ལའི་གླིང་ན་གནས་པའི་སྲིན་མོ་དག་སྒྲ་ཅ་ཅོ་ཟེར་ཞིང་ཕྱིར་བཞིན་དུ་སྙེག་གོ་།ངུ་ཞིང་སྙིང་རྗེ་རྗེ་ལྟར་སྨྲ་བ་དང ། དེ་ནས་དེ་དག་གིས་ངོ་སླར་ལོག་སྟེ་བལྟས་སོ། །གང་གི་ཚེ་དེ་དག་གིས་བལྟས་པ་དེའི་ཚེ་དེ་དག་ཁ་བུབ་ཏུ་ལྷུང་ངོ ། །གང་གི་ཚེ་
353b
ན་དེ་དག་ཆུའི་ནང་དུ་ལྷུང་བ་དེའི་ཚེ་སྲིན་མོ་དག་གིས་དྲངས་ཤིང་དྲངས་ཤིང་ཟོས་སོ། །དེའི་ཚེ་ང་གཅིག་པུས་ཛམྦུ་གླིང་དུ་ཕྱིན་ཏེ། དེའི་ཚེ་འགྲམ་དུ་ཉེ་བ་དང་རྟའི་རྒྱལ་པོ་བ་ལ་ཧ་ས་ང་ལ་ལན་གསུམ་བསྐོར་ཏེ་ཕྱག་བྱས་ནས་དེ་ཉིད་དུ་སོང་ངོ ། །དེ་ནས་ངའང་སོང་ནས་རིམ་གྱིས་བདག་གི་ཁྱིམ་དུ་ཕྱིན་ཏེ། དེའི་ཚེ་ཕ་དང་མས་ངའི་མགུལ་ནས་འཇུས་ནས་དུས་པ་དང ། རླངས་པས་དེ་གཉིས་ཀྱི་མིག་རུ་གས་ནས་མཐོང་བར་གྱུར་ཏོ། །དེ་ནས་ཕ་མ་དང་ལྷན་ཅིག་ཏུ་ངལ་བསོས་ནས་དེས་དེ་དག་ལ་སྔོན་ཇི་ལྟར་བྱུང་བ་ཐམས་ཅད་བཟླས་པ་དང ། ཕ་མས་དེ་ལ་སྨྲས་པ། བུ་ཁྱོད་གསོན་བཞིན་དུ་རྙེད་དེ། ངེད་ལ་ནོར་ནི་མི་དགོས་སོ། །རྒས་པའི་ཚེ་འཁར་བར་གྱུར་པའོ། །རྒས་པའི་ཚེ་ལམ་སྟོན་པའོ། །འཆི་བའི་ཚེ་ཟས་སྦྱིན་པར་བྱེད་པའོ། ། ཤི་ནས་མགོན་ཡོད་པར་བྱེད་པའོ། །བུ་ནི་རླུང་བསིལ་བར་བྱེད་པའོ། །ཞེས་ཕ་དང་མས་སྨྲས་ཏེ། སྒྲིབ་པ་ཐམས་ཅད་རྣམ་པར་སེལ་བ། ང་དེད་དཔོན་དུ་གྱུར་པའི་ཚེ་འདི་ལྟ་བུའི་སྡུག་བསྔལ་བ་མྱོང་ངོ ། །འདི་ལྟ་སྟེ། སྒྲིབ་པ་ཐམས་ཅད་རྣམ་པར་སེལ་བ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་རྟ་བ་ལ་ཧར་གྱུར་པས་ང་འཆི་བའི་འཇིགས་པ་དེ་འདྲ་བ་ལས་ཡོངས་སུ་ཐར་པར་བྱས་སོ། །འདི་ལྟ་སྟེ། སྒྲིབ་པ་ཐམས་ཅད་རྣམ་པར་སེལ་བ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་ངས་བགྲང་
354a
༄#། །མི་ནུས་ཏེ། བ་སྤུའི་ཁུང་བུ་རེ་རེའི་གཏམ་ཅུང་ཟད་ཅིག་བཤད་དོ། །འདི་ལྟ་སྟེ། སྒྲིབ་པ་ཐམས་ཅད་རྣམ་པར་སེལ་བ། གསེར་ཞེས་བྱ་བའི་བ་སྤུའི་ཁུང་བུ་དེ་ན་དྲི་ཟ་བྱེ་བ་ཁྲག་ཁྲིག་བརྒྱ་སྟོང་དག་གནས་ཏེ། དེ་དག་འཁོར་བའི་སྡུག་བསྔལ་བར་མི་འགྱུར་ཞིང་བདེ་བ་དམ་པ་དང་ལྡན་པ་ཡིན་ཏེ། ལྷའི་དངོས་བོ་དག་འབྱུང་བར་འགྱུར་གྱི། །འདོད་ཆགས་ཅན་དུ་མི་འགྱུར། ཞེ་སྡང་ཅན་དུ་མི་འགྱུར། ཁོང་ཁྲོ་བའི་སེམས་མི་སྐྱེད། དེ་དག་ལས་གང་ལའང་གནོད་པའི་སེམས་མི་སྐྱེད་དོ། །དེ་དག་དུས་ཐམས་ཅད་དུ་འཕགས་པའི་ལམ་ཡན་ལག་བརྒྱད་ལ་གནས་པ་ཡིན་ཏེ། དུས་ཐམས་ཅད་དུ་ཆོས་འདོད་པ་ཡིན་ནོ། །འདི་ལྟ་སྟེ། སྒྲིབ་པ་ཐམས་ཅད་རྣམ་པར་སེལ་བ། གསེར་ཞེས་བྱ་བའི་བ་སྤུའི་ཁུང་བུ་ན་སྣང་བ་ཞེས་བྱ་བའི་ཡིད་བཞིན་གྱི་ནོར་བུ་རིན་པོ་ཆེ་ཡོད་དེ། གང་དང་གང་གི་ཚེ་དྲི་ཟ་དེ་དག་བསམ་པ་སེམས་པ་དེའི་ཚེ་དེ་དག་གི་བསམ་པ་གྲུབ་པར་འགྱུར་རོ། །དེའི་ཚེ་གསེར་ཞེས་བྱ་བའི་བ་སྤུའི་ཁུང་བུ་ལས་འདས་ནས་ནག་པོ་ཞེས་བྱ་བའི་བ་སྤུའི་ཁུང་བུ་དེ་ན་དྲང་སྲོང་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་ཡོད་དེ། ལ་ལཾ་ནི་མངོན་པར་ཤེས་པ་གཅིག་པ། ལ་ལ་ནི་མངོན་པར་ཤེས་པ་གཉིས་པ། ལ་ལ་ནི་མངོན་པར་ཤེས་པ་གསུམ་པ། ལ་ལ་ནི་མངོན་པར་ཤེས་པ་བཞི་པ། ལ་ལ་ནི་མངོན་པར་ཤེས་པ་ལྔ་པ། ལ་ལ་ནི་མངོན་པར་
354b
ཤེས་དྲུག་པའོ། །བ་སྤུའི་ཁུང་བུ་དེ་ན་དངུལ་གྱི་ས་གཞི་ལ་གསེར་གྱི་རི་དངུལ་གྱི་རྩེ་མོ་པདྨ་དམར་པོས་བརྒྱན་པ་དེ་འདྲ་བའི་རི་བདུན་ཅུ་རྩ་བདུན་ཡོད་དོ། །རི་རེ་རེ་ཞིང་ཡང་དྲང་སྲོང་བརྒྱད་ཁྲི་གནས་སོ། །དྲང་སྲོང་དེ་དག་གི་ཤིང་དཔག་བསམ་ནི་འདི་འདྲ་སྟེ། སྡོང་པོ་ནི་དམར་པོ། འདབ་མ་ནི་གསེར་དང་དངུལ་ལས་བྱས་པ་རིན་པོ་ཆེར་སྣང་བའོ། །ཤིང་དཔག་བསམ་རེ་རེ་དང་ཉེ་བ་ན་ནི་རྫིང་བུ་བཞི་ཡོད་དེ། ལ་ལ་ནི་ཆུ་ཡན་ལག་བརྒྱད་དང་ལྡན་པས་ཡོངས་སུ་གང་བ། ལ་ལ་ནི་ལྷའི་མེ་ཏོག་གིས་ཡོངས་སུ་གང་བའོ། །ཕྱོགས་དེ་དང་ཉེ་བ་ན་ལྷའི་བྱུ་རུའི་ཤིང་གིས་ཡོངས་སུ་མཛེས་པར་བྱས་པའི་དཔག་བསམ་གྱི་ཤིང་དག་སྣང་སྟེ། ལྷའི་རྒྱན་དག་ནི་འཕྱང ། ཅོད་པན་དང་རྣ་ཆ་དག་ཀྱང་རབ་ཏུ་འཕྱང ། སེ་མོ་དོ་དང་སེ་མོ་དོའི་ཕྱེད་པ་དག་ཀྱང་རབ་ཏུ་འཕྱང ། གདུ་བུ་དག་ཀྱང་རབ་ཏུ་འཕྱང་སྟེ། ལོ་མ་ནི་རིན་པོ་ཆེ་དང ། གསེར་ལས་བྱས་པའོ། །དེ་ན་ཤིང་དཔག་བསམ་རེ་རེ་ཞིང་ཡང་དྲི་ཟ་བརྒྱ་བརྒྱ་གནས་ཏེ། གང་གི་ཚེ་དེ་དག་གིས་སིལ་སྙན་དཀྲོལ་བ་དེའི་ཚེ་རི་དྭགས་དང ། བྱ་དག་ཀྱང་སེམས་ཅན་འདི་དག་ནི་སྡུག་བསྔལ་ཏེ། ཛམྦུའི་གླིང་ན་ཇི་ལྟ་བུའི་སྡུག་བསྔལ་དག་མྱོང་བར་གྱུར། སྐྱེ་བ་དང ། རྒ་བ་དང ། འཆི་བ་དག་ཀྱང་མཐོང་ངོ ། །སྡུག་ཅིང་མཛའ་བ་དང ། མི་མཛའ་བ་ལས་འདུ་བ་དང་བྲལ་བར་ཡང་མཐོང་ངོ ། །མི་དག་ཀྱང་སྡུག་བསྔལ་མང་དུ་མྱོང་ངོ་ཞེས་སྐྱོ་བར་བྱེད་དོ། །
355a
༄#། །དེ་ལྟར་རི་དྭགས་དང ། བྱ་དག་སྟོང་པའི་རྗེས་སུ་བསམས་པ་དང ། དེའི་ཚེ་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པ་འདི་རྗེས་སུ་དྲན་ནས་དེ་དག་ལ་ལྷའི་རོའི་རོ་མཆོག་གི་ཟས་དག་ཀྱང་འབྱུང་བར་འགྱུར། ལྷའི་རྫས་དྲི་ཞིམ་པོ་དག་ཀྱང་འབྱུང་བར་འགྱུར། ལྷའི་གོས་དག་ཀྱང་འབྱུང་བར་འགྱུར་རོ། །གང་གི་ཚེ་ན་དེ་དག་བསམ་པ་སེམས་པ་དེའི་ཚེ་བསམ་པ་གྲུབ་པར་འགྱུར་རོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། ། བཅོམ་ལྡན་འདས། བདག་ནི་ཤིན་ཏུ་ངོ་མཚར་རྨད་དུ་གྱུར་པ་ཐོབ་བོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ཅིའི་ཕྱིར་ངོ་མཚར་བར་གྱུར། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་གི་ཚེ་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོ་ཟ་མ་ཏོག་བཀོད་པའི་མིང་གི་རྗེས་སུ་དྲན་ན། དེའི་མིང་ཙམ་གྱིས་ཀྱང་འདི་འདྲ་བའི་རྫས་དག་འབྱུང་བར་འགྱུར་ན་གང་ཐེག་པ་ཆེན་པོའི་མདོ་དཀོན་མཆོག་གི་རྒྱལ་པོའི་ཟ་མ་ཏོག་བཀོད་པ་ཉན་བ་དང ། འཛིན་པ་དང ། ཀློག་པ་དང ། ཀུན་ཆུབ་པར་བགྱིད་པ་དང ། ཚུལ་བཞིན་དུ་ཡིད་ལ་བགྱིད་པའི་སེམས་ཅན་དེ་དག་
355b
ནི་བདེ་བ་དང་ལྡན་པ་ལགས་སོ། །གང་ཐེག་པ་ཆེན་པོའི་མདོ་ཟ་མ་ཏོག་བཀོད་པ་ལས་ཡི་གེ་གཅིག་ཀྱང་འདྲིར་འཇུག་པའི་སེམས་ཅན་དེ་དག་ནི་བདེ་བ་དང་ལྡན་པ་ལགས་ཏེ། དེ་དག་ནི་འཁོར་བའི་སྡུག་བསྔལ་འདི་དག་མཐོང་བར་མི་འགྱུར་རོ། །དེ་དག་ནི་ཕྱག་དར་བ་དང ། སྨེ་ཤ་ཅན་གྱི་རིགས་སུ་མི་སྐྱེ། དབང་པོ་ཉམས་པར་མི་འགྱུར། ཐེང་པོ་དང ། སྒུར་པོ་དང ། གུག་པ་དང ། པུས་མོའི་ནང་འཐབ་པ་དང ། ལུས་པོ་ཆེ་དང ། མཛེ་ཅན་དུ་མི་འགྱུར། དེ་དག་གི་ལུས་ལ་ནད་དག་གིས་བཏབ་པར་མི་འགྱུར་ཏེ། ནད་མེད་པ་དང ། མཐུ་ཆེ་བ་དང ། དབང་པོ་གསལ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་ལེགས་སོ་ཞེས་བྱ་བ་བྱིན་ནས་སྒྲིབ་པ་ཐམས་ཅད་རྣམ་པར་སེལ་བ་ཁྱོད་འདི་འདྲ་བའི་སྤོབས་པ་དང།་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང་མི་མ་ཡིན་པ་དང ། དགེ་བསྙེན་དང ། དགེ་བསྙེན་མ་འདུས་པ་ལ་ཁྱོད་ཀྱིས་འདི་འདྲ་བའི་ཆོས་ཀྱི་གཏམ་རྒྱ་ཆེན་པོ་བྱས་པ་ལེགས་སོ། །ལེགས་སོ། །ཞེས་གསུངས་སོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་གི་ཚེ་ན་བདག་གི་ཞུ་བ་འདི་བསྟན་པ་དེའི་ཚེ་ལྷའི་བུ་རྣམས་མི་ཕྱེད་པའི་དད་པ་སྐྱེས་པར་གྱུར་ཏོ། །དེ་
356a
༄#། །ནས་བཅོམ་ལྡན་འདས་ཀྱིས་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ་ཁྱོད་ཕྱི་ཕྱིར་ཞིང་གསོལ་བ་ལེགས་སོ། །ལེགས་སོ། །འདི་ལྟ་སྟེ། སྒྲིབ་པ་ཐམས་ཅད་རྣམ་པར་སེལ་བ། བ་སྤུའི་ཁུང་བུ་ནག་པོ་འདས་ནས་བ་སྤུའི་ཁུང་བུ་རིན་པོ་ཆེའི་རྣ་ཆ་ཞེས་བྱ་བ་དེ་ན་དྲི་ཟའི་བུ་མོ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་གནས་ཏེ།་དྲི་ཟའི་བུ་མོ་དེ་དག་ཀྱང་བྱད་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་ཤིན་ཏུ་བཟང་ཞིང་རྒྱས་པ་དང་ལྡན་པ། ལུས་ལྷའི་རྒྱན་གྱིས་བརྒྱན་པ། ལྷའི་བུ་མོ་འགྲན་པར་བྱེད་པ་དང་འདྲ་བ་དེ་ལྟ་བུར་ཤིན་ཏུ་བཟང་ཡང་འདོད་ཆགས་ཀྱི་སྡུག་བསྔལ་གྱིས་གཟིར་བར་མི་འགྱུར། ཞེ་སྡང་གི་སྡུག་བསྔལ་གྱིས་གཟིར་བར་མི་འགྱུར། གཏི་མུག་གི་སྡུག་བསྔལ་གྱིས་གཟིར་བར་མི་འགྱུར། དེ་དག་གི་ལུས་ལ་མིའི་སྡུག་བསྔལ་ཡང་མེད་དེ། དྲི་ཟའི་བུ་མོ་དེ་དག་དུས་གསུམ་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་མཚན་གྱི་རྗེས་སུ་དྲན་པར་བྱེད་དེ། དེའི་ཚེ་རྫས་དེ་དག་ཐམས་ཅད་འབྱུང་ངོ ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་བ་སྤུའི་ཁུང་བུ་དེ་བལྟ་བར་འཚལ་གྱི་བདག་དེར་མཆིའོ། །བཅོམ་ལྡན་འདས་ཀྱིས་
356b
བཀའ་སྩལ་པ། རིགས་ཀྱི་བུ། བ་སྤུའི་ཁུང་བུ་དེ་ནི་གཟུང་དུ་མི་རུང་སྟེ། ཇི་ལྟར་ནམ་མཁའི་ཁམས་གཟུང་དུ་མི་རུང ། རེག་པར་མི་རུང་བ་དེ་བཞིན་དུ། རིགས་ཀྱི་བུ། བ་སྤུའི་ཁུང་བུ་དེའང་གཟུང་དུ་མི་རུང ། རེག་པར་མི་རུང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་བ་སྤུའི་ཁུང་བུ་དེར་ལོ་བཅུ་གཉིས་སུ་ཀུན་ཏུ་སོང་ཡང་བ་སྤུའི་ཁུང་བུ་དེ་མ་མཐོང་སྟེ། གང་བ་སྤུའི་ཁུང་བུ་རེ་རེ་ན་གནས་པ་དེས་ཀྱང་མ་མཐོང་ན་བྱང་ཆུབ་སེམས་དཔར་གྱུར་པ་གཞན་དག་གིས་ལྟ་ཅི་སྨོས། དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་གི་ཚེ་བྱང་ཆུབ་སེམས་དཔའ་ཀུན་ཏུ་བཟང་པོས་ཀྱང་མ་མཐོང་ན་ཅི་བདག་མཆི་བར་བགྱིའམ། རིགས་ཀྱི་བུ། ང་ནི་གཡོ་མེད་པ། སྒྱུ་མེད་པ། ཕྲ་བ་ཉིད་དུ་སྣང་སྟེ། བལྟར་མེད་པ། གཟུགས་མེད་པ། གཟུགས་ཆེ་བ། ལག་པ་བརྒྱ་སྟོང་པ། མིག་བྱེ་བ་བརྒྱ་སྟོང་པ། མགོ་བཅུ་གཅིག་པ།་རྣལ་འབྱོར་ཆེན་པོ། རྣལ་འབྱོར་དམ་པ། མྱ་ངན་ལས་འདས་པའི་ས་ལ་གནས་པ། སེམས་པ་མེད་པ། ཤེས་རབ་ཆེ་བ། སྲིད་པ་ལས་སྒྲོལ་བར་བྱེད་པ། རིགས་ཀྱི་དབང་པོ།་བལྟར་མི་སྣང་བ་སྟོན་པ་ལ་ཤེས་རབ་དང་ལྡན་པ་དང ། ཆོས་ཐམས་ཅད་ལ་གྲིབ་མར་གྱུར་པའོ། །དེ་བཞིན་དུ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་
357a
༄#། །སྤྱན་རས་གཟིགས་ཀྱི་དབང་པོའང་སུས་ཀྱང་མི་མཐོང་སྟེ། དེའི་རང་བཞིན་གྱི་ལུས་ནི་དེ་བཞིན་གཤེགས་པ་ཉིད་ཀྱིས་ཀྱང་མི་གཟིགས་ན་ཀུན་ཏུ་བཟང་པོ་ལ་སོགས་པ་བྱང་ཆུབ་སེམས་དཔའ་གཞན་གྱིས་ལྟ་ཅི་སྨོས། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི་ཆོ་འཕྲུལ་བསམ་གྱིས་མི་ཁྱབ་པ་དག་སྟོན་ཏོ། །སེམས་ཅན་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མ་དག་ཡོངས་སུ་སྨིན་པར་བྱེད་དོ། །དེ་དག་ཐམས་ཅད་བྱང་ཆུབ་ཀྱི་ལམ་ལ་འཇོག་གོ་།བཞག་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་འགྲོ་ཞིང་དེ་བཞིན་གཤེགས་པ་སྣང་བ་མཐའ་ཡས་པ་ལས་ཆོས་ཉན་ཏོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། ཐབས་གང་གིས་ན་བདག་གིས་མཐོང་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། གལ་ཏེ་ང་ལ་བལྟ་བ་དང ། ཕྱག་བྱ་བ་དང ། བསྙེན་བཀུར་བྱ་བའི་ཕྱིར་མི་མཇེད་པའི་འཇིག་རྟེན་གྱི་ཁམས་འདི་ཉིད་དུ་འོང་ནའོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་མཆི་བར་གནང་བར་མཛོད་ཅིག་།བཅོམ་ལྡན་འདས་ཀྱིས་བཀའ་སྩལ་
357b
པ།་རིགས་ཀྱི་བུ། གང་གི་ཚེ་ན་སེམས་ཅན་ཡོངས་སུ་སྨིན་པར་འགྱུར་བ་དེའི་ཚེ་ཐོག་མ་ཁོ་ནར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་འོང་ངོ ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་བདག་སྡིག་པ་དང་ལྡན་ཞིང་ཡུན་རིང་དུ་གསོན་ལ། སྤྱན་རས་གཟིགས་ཀྱི་དབང་པོ་མཐོང་བ་དང་འབྲལ་ཞིང་ལོང་བར་གྱུར། ལམ་གསུམ་དུ་འགྲོ་བར་གྱུར་པ་ལྟ་ཅི་རུང་སྙམ་དུ་སེམས་ཤིང་འདུག་གོ་།དེ་ནས་བཅོམ་ལྡན་འདས་ལ་ཡང་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་གང་གི་ཚེ་ན་མཆི། དེ་ནས་བཅོམ་ལྡན་འདས་བཞད་ནས། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་འོང་བའི་དུས་མ་ཡིན་ནོ། །འདི་ལྟ་སྟེ། རིགས་ཀྱི་བུ། བ་སྤུའི་ཁུང་བུ་དེ་ནས་བབས་ནས་བདུད་རྩི་ཞེས་བྱ་བའི་བ་སྤུའི་ཁུང་བུ་དེ་ན་ལྷའི་བུ་བྱེ་བ་ཁྲག་ཁྲིག་བརྒྱ་སྟོང་དུ་མ་གནས་ཏེ། ཁ་ཅིག་ནི་ས་གཅིག་པ། ཁ་ཅིག་ནི་ས་གཉིས་པ། ཁ་ཅིག་ནི་ས་གསུམ་པ། ཁ་ཅིག་ནི་ས་བཞི་པ། ཁ་ཅིག་ནི་ས་ལྔ་པ། ཁ་ཅིག་ནི་ས་དྲུག་པ། ཁ་ཅིག་ནི་ས་བདུན་པ། ཁ་ཅིག་ནི་ས་བརྒྱད་པ། ཁ་ཅིག་ནི་ས་དགུ་པ། ཁ་ཅིག་ནི་བྱང་ཆུབ་སེམས་དཔའི་
358a
༄#། །ས་བཅུ་པ་ཡིན་ནོ། །འདི་ལྟ་སྟེ། སྒྲིབ་པ་ཐམས་ཅད་རྣམ་པར་སེལ་བ། བདུད་རྩིའི་ཐིགས་པའི་བ་སྤུའི་ཁུང་བུ་དེ་ན་གསེར་དང་དངུལ་གྱི་རི་དྲུག་ཅུ་ཡོད་དེ། རི་རེ་རེ་ཞིང་ཡང་འཕང་དུ་དཔག་ཚད་དྲུག་ཁྲི་ཡོད་དོ། །རི་རེ་རེ་ཞིང་ཡང་རྩེ་མོ་གསེར་གྱིས་བརྒྱན་པ་དགུ་ཁྲི་ཡོད་དོ། །ངོས་ངོས་དག་ལ་ནི་བྱང་ཆུབ་སེམས་དཔའ་སེམས་དང་པོ་བསྐྱེད་པ་དག་གནས་སོ། །རིའི་རྒྱལ་པོ་དེ་དག་ལ་དྲི་ཟ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་གནས་ཏེ། དེ་དག་བ་སྤུའི་ཁུང་བུ་དེ་ན་རྟག་ཏུ་རྒྱུན་མི་འཆད་པར་སིལ་སྙན་གྱི་སྒྲ་གྲག་པར་འཛིན་ཏོ། །འདི་ལྟ་སྟེ། སྒྲིབ་པ་ཐམས་ཅད་རྣམ་པར་སེལ་བ། བདུད་རྩིའི་ཐིགས་པའི་བ་སྤུའི་ཁུང་བུ་དེ་ན་གཞལ་མེད་ཁང་བརྒྱ་སྟོང་ཕྲག་དུ་མར་ལྷའི་ནོར་བུ་དང་མུ་ཏིག་གིས་ཡོངས་སུ་བརྒྱན་པ། ཤིན་ཏུ་མཛེས་པ། བལྟ་ན་སྡུག་པ་རྣམ་པ་སྣ་ཚོགས་པ། མུ་ཏིག་གི་སེ་མོ་དོ་བརྒྱ་སྟོང་གིས་བརྒྱན་པ་དག་ཡོད་དེ། བྱང་ཆུབ་སེམས་དཔའ་དེ་དག་གཞལ་མེད་ཁང་དེར་ངལ་བསོས་ནས་ཆོས་ཀྱི་གཏམ་བྱེད་དོ། །དེ་ནས་གཞལ་མེད་ཁང་ནས་བྱུང་ནས་བདག་བདག་གི་འཆག་སར་འགྲོ་སྟེ། འཆག་ས་རེ་རེ་ཞིང་ཡང་རྫིང་བུ་བདུན་ཅུ་བདུན་ཅུ་ཡོད་པ་ལ་ལ་ནི་ཆུ་ཡན་ལག་བརྒྱད་དང་ལྡན་པས་ཡོངས་སུ་གང་ངོ ། །ལ་ལ་ནི་མེ་ཏོག་གིས་ཡོངས་སུ་གང་སྟེ། མེ་ཏོག་ཨུཏྤ་ལ་དང ། པདྨ་དང ། ཀུ་མུ་ད་དང ། པུཎྜ་རི་ཀ་
358b
དང།་དྲི་ཞིམ་པ་དང ། མནྡཱ་ར་བ་དང ། མནྡཱ་ར་བ་ཆེན་པོ་དག་གིས་ཡོངས་སུ་གང་ངོ ། །འཆག་ས་དེ་དག་ན་ཤིང་དཔག་བསམ་ཡིད་དུ་འོང་བ་སྡོང་པོ་ནི་དམར་པོ། ལོ་མ་ནི་གསེར་དང་དངུལ་ལས་བྱས་པ་ལྷའི་རྒྱན་གྱིས་བརྒྱན་པ། ཅོད་པན་དང ། རྣ་ཆ་དང ། ཕྲེང་བའི་ཆུན་པོ་རབ་ཏུ་འཕྱང་བ། སེ་མོ་དོ་དང ། སེ་མོ་དོ་ཕྱེད་པ་རབ་ཏུ་འཕྱང་བ། དཔུང་རྒྱན་རབ་ཏུ་འཕྱང་བ། གཞན་ཡང་རྒྱན་སྣ་ཚོགས་དག་རབ་ཏུ་འཕྱང་བ་ཡོད་དོ། །འཆག་ས་དེ་ན་བྱང་ཆུབ་སེམས་དཔའ་དེ་དག་ནུབ་མོ་འཆག་ཅིང་ཐེག་པ་ཆེན་པོ་རྣམ་པ་སྣ་ཚོགས་ཀྱི་རྗེས་སུ་དྲན་པར་བྱེད། མྱ་ངན་ལས་འདའ་བའི་སའི་རྗེས་སུ་དྲན་པར་བྱེད། འཁོར་བའི་སྡུག་བསྔལ་ཀུན་ལ་སེམས་པར་བྱེད་དོ། །བསམས་ནས་བྱམས་པ་ལ་སྒོམ་སྟེ། སྒྲིབ་པ་ཐམས་ཅད་རྣམ་པར་སེལ་བ། དེ་ལྟར་བ་སྤུའི་ཁུང་བུ་དེ་ན་དེ་འདྲ་བའི་བྱང་ཆུབ་སེམས་དཔའ་དག་ཡོད་དོ། །དེ་ལས་བབས་ནས་རྡོ་རྗེའི་སྒོ་ཞེས་བྱ་བའི་བ་སྤུའི་ཁུང་བུ་དེ་ན་མིའམ་ཅི་བརྒྱ་སྟོང་ཕྲག་དུ་མ་གནས་པ། མགུལ་རྒྱན་དང ། རྣ་ཆ་དང ། ཕྲེང་བ་དང ། རྒྱན་སྣ་ཚོགས་དང ། བྱུག་པ་ཤིན་ཏུ་བཟང་བ་དག་སྣང་ངོ ། །དེ་དག་རྟག་ཏུ་སངས་རྒྱས་དང ། ཆོས་དང ། དགེ་འདུན་ལ་མངོན་པར་དང ། ཆོས་ལ་སེམས་རྩེ་གཅིག་པར་བྱེད་པ། བྱམས་པ་ལ་གནས་པར་བྱེད་པ། བཟོད་པ་སྒོམ་པར་བྱེད་པ། མྱ་ངན་ལས་འདའ་བ་སེམས་པར་བྱེད་ལ། མི་དག་
359a
༄#། །གིས་སྐྱོ་བར་བྱེད་པ་སྟེ། རིགས་ཀྱི་བུ། དེ་འདྲ་བའི་མིའམ་ཅི་མངོན་པར་དགའ་བ་དག་གནས་སོ། །བ་སྤུའི་ཁུང་བུ་དེ་ཉིད་ན་རི་བརྒྱ་ཕྲག་དུ་མ་ཡོད་དེ། ཁ་ཅིག་ནི་རྡོ་རྗེའི་འོ། །ཁ་ཅིག་ནི་དངུལ་གྱིའོ། །ཁ་ཅིག་ནི་གསེར་གྱི་འོ། །ཁ་ཅིག་ནི་ཤེལ་གྱི་འོ། །ཁ་ཅིག་ནི་མེ་ཏོག་པདྨ་དམར་པོའི་འོ། །ཁ་ཅིག་ནི་རིན་པོ་ཆེ་ཨིནྡྲ་ནཱི་ལའི་འོ། །ཁ་ཅིག་ནི་རིན་པོ་ཆེ་སྣ་བདུན་གྱི་སྟེ། རིགས་ཀྱི་བུ། བ་སྤུའི་ཁུང་བུ་དེ་ན་མཚན་མ་དེ་འདྲ་བ་དག་སྣང་ངོ ། །རིགས་ཀྱི་བུ། བ་སྤུའི་ཁུང་བུ་དེ་ན་ཤིང་དཔག་བསམ་དུ་མ་དང ། བྱུ་རུའི་ཤིང་དང ། ཙནྡན་གྱི་ཤིང་དང ། སྤོས་ཀྱི་ཤིང་དུ་མ་དག་དང ། རྫིང་བུ་བརྒྱ་སྟོང་ཕྲག་དུ་མ་དག་དང ། ལྷའི་གཞལ་མེད་ཁང་ཤེལ་དང ། དངུལ་དང་ལྡན་པ། ཤིན་ཏུ་བཟང་བ་ཡིད་དུ་འོང་བ་མཛེས་པ། དེ་འདྲ་བའི་གཞལ་མེད་ཁང་དག་ཀྱང་བྱུང་སྟེ། གཞལ་མེད་ཁང་དེ་དག་ཏུ་མིའམ་ཅི་རྣམས་ངལ་བསོ་འོ། །ངལ་བསོས་ནས་ཆོས་ཀྱི་གཏམ་བྱེད་དེ། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པའི་གཏམ་བྱེད། ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་གཏམ་བྱེད། བཟོད་པའི་ཕ་རོལ་ཏུ་ཕྱིན་པའི་གཏམ་བྱེད། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་གཏམ་བྱེད། བསམ་གཏན་གྱི་ཕ་རོལ་ཏུ་ཕྱིན་པའི་གཏན་བྱེད། ཤེས་རབ་ཀྱི་ཕ་རོལ་ཏུ་ཕྱིན་པའི་གཏམ་བྱེད་དེ། དེ་ལྟར་ཕ་རོལ་ཏུ་ཕྱིན་པ་དྲུག་གི་གཏམ་བྱས་
359b
ནས།་བདག་བདག་གི་འཆག་སར་འཆག་སྟེ། འཆག་ས་ཁ་ཅིག་ནི་གསེར་གྱི་རིའོ། །འཆག་ས་ཁ་ཅིག་ནི་དངུལ་གྱི་རིའོ། །འཆག་ས་དེ་དག་གི་ཁོར་ར་ཁོར་ཡུག་ན་དཔག་བསམ་གྱི་ཤིང་སྡོང་པོ་ནི་དམར་པོ། ལོ་མ་ནི་གསེར་དང་དངུལ་ལས་བྱས་པ། ལྷའི་རྒྱན་རབ་ཏུ་འཕྱང་བ། ཅོད་པན་དང ། རྣ་ཆ་དང ། ཕྲེང་བའི་ཆུན་པོ་རབ་ཏུ་འཕྱང་བ། དཔུང་རྒྱན་རབ་ཏུ་འཕྱང་བ།་རྐང་པའི་གདུ་བུ་རབ་ཏུ་འཕྱང་བ། སེ་མོ་ངོ་དང ། སེ་མོ་དོ་ཕྱེད་པ་རབ་ཏུ་འཕྱང་བ། རིན་པོ་ཆེའི་སེ་མོ་དོ་རབ་ཏུ་འཕྱང་བ་དག་ཡོད་དེ། འཆགས་དེ་ན་ཤིང་དཔག་བསམ་དེ་དག་ཁང་པ་བརྩེགས་མ་ལྟ་བུར་འདུག་སྟེ། འཆག་ས་དེ་ན་མི་འམ་ཅི་དག་འཆག་གོ་།འཆག་པའི་ཚེ་འཁོར་བ་ལ་སྐྱོ་བའི་རྗེས་སུ་སེམས་ཏེ། ཀྱེ་མའོ་སྡུག་བསྔལ་ལོ། །ཀྱེ་མའོ་སྡུག་བསྔལ་ལོ། །འཆི་བ་སྡུག་བསྔལ་ལོ། །ཀྱེ་མའོ་སྡུག་བསྔལ་ལོ། །དབུལ་བ་དེའང་སྡུག་བསྔལ་ལོ། །ཀྱེ་མའོ་སྡུག་བསྔལ་ལོ། །འདོད་ཅིང་མཛའ་བ་དང་བྲལ་བ་དང ། མི་འདོད་ཅིང་མི་མཛའ་བ་དང་ཕྲད་པ་དེ་ཤིན་ཏུ་མི་ཟད་པར་སྡུག་བསྔལ་ལོ། །ཐིག་ནག་པོ་གདབ་པར་སྐྱེས་པ་དང ། འོ་དོད་འབོད་པར་སྐྱེས་པ་དང ། ཧ་ཧ་ཞེས་ཟེར་བའི་སེམས་ཅན་དམྱལ་བ་ཆེན་པོར་སྐྱེས་པ་དང ། མིའི་རྫ་མར་སྐྱེས་པ་དང ། རྡོ་རྗེའི་རི་ལ་སྐྱེས་པ་དང ། ཡི་དྭགས་ཀྱི་གྲོང་ཁྱེར་དུ་སྐྱེས་པའི་སེམས་ཅན་དེ་དག་ཤིན་ཏུ་སྡུག་བསྔལ་ལོ། །ཞེས་དེ་ལྟར་མི་འམ་ཅི་དེ་དག་ལུས་ལ་སེམས་སོ། །བསམས་
360a
༄#། །ནས་མྱ་ངན་ལས་འདའ་བའི་དབྱིངས་ལ་སེམས་ཏེ། རིགས་ཀྱི་བུ། དེ་ལྟར་མི་འམ་ཅི་ཆོས་ལ་མངོན་པར་དགའ་བ་དག་རྟག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་མིང་གི་རྗེས་སུ་དྲན་པར་བྱེད་དེ། དེའི་ཚེ་དེ་དག་ལ་ཡོ་བྱད་ཐམས་ཅད་ཀྱིས་བསྙེན་བཀུར་བྱེད་དོ། །རིགས་ཀྱི་བུ། དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནི་དཀོན་པའོ། །སེམས་ཅན་རྣམས་ཀྱི་ཕ་དང་མར་གྱུར་པའོ། །སེམས་ཅན་ཐམས་ཅད་ལ་མི་འཇིགས་པ་སྦྱིན་པར་བྱེད་པའོ། །སེམས་ཅན་ཐམས་ཅད་ལ་ལམ་སྟོན་པར་བྱེད་པའོ། །སེམས་ཅན་ཐམས་ཅད་ལ་དགེ་བའི་བཤེས་གཉེན་དུ་གྱུར་པ་སྟེ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནི་དེ་ལྟ་བུའོ། །དེའི་མིང་འཛིན་པའང་དཀོན་ཏེ། དེ་དག་དེའི་ཡི་གེ་དྲུག་པའི་རིག་སྔགས་ཀྱི་མིང་གི་རྗེས་སུ་དྲན་ན་དེའི་ཚེ་བ་སྤུའི་ཁུང་བུ་དེ་དག་ཏུ་སྐྱེའོ། །སླར་འཁོར་བར་མི་འཁོར་རོ། །བ་སྤུའི་ཁུང་བུ་ནས་བ་སྤུའི་ཁུང་བུར་འགྲོའོ། །བ་སྤུའི་ཁུང་བུ་དེ་དག་ནའང་མྱ་ངན་ལས་འདའ་བའི་ས་ཚོལ་བའི་བར་དུ་གནས་པར་འགྱུར་རོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་ཡི་གེ་
360b
དྲུག་པའི་རིག་སྔགས་ག་ལས་བཙལ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ཡི་གེ་དྲུག་པའི་རིག་སྔགས་ཆེན་མོ་ནི་དེ་བཞིན་གཤེགས་པས་ཀྱང་མི་མཁྱེན་ན་བྱང་ཆུབ་སེམས་དཔས་ལྟ་ཅི་སྨོས། དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་གིས་ཀྱང་མི་མཁྱེན་ཏམ། བཀའ་སྩལ་པ། རིགས་ཀྱི་བུ། ཡི་གེ་དྲུག་པའི་རིག་སྔགས་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་སྙིང་པོ་དམ་པའོ། །གང་དག་སྙིང་པོ་དམ་པ་ཤེས་པ་དེ་དག་ནི་ཐར་པ་ཤེས་པའོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། སེམས་ཅན་འགའ་ལ་ཡང་ཡི་གེ་དྲུག་པའི་རིག་སྔགས་འཚལ་བ་མ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ཡི་གེ་དྲུག་པའི་རིག་སྔགས་ཆེན་མོ་ནི་སུས་ཀྱང་མི་ཤེས་ཏེ། འདི་ནི་རྣལ་འབྱོར་དཔག་ཏུ་མེད་པའི་ཕྱིར་བསྒྲུབ་དཀའ་བའོ། །དེ་བཞིན་གཤེགས་པ་ཉིད་ཀྱང་མི་མཁྱེན་ན་བྱང་ཆུབ་སེམས་དཔར་གྱུར་པས་ལྟ་ཅི་སྨོས། རིགས་ཀྱི་བུ། ཡི་གེ་དྲུག་པའི་རིག་སྔགས་འདིའི་ཕྱིར་དེ་བཞིན་གཤེགས་པ་ཐམས་ཅད་ཀྱང་བསྐལ་པ་བཅུ་
361a
༄#། །དྲུག་ཏུ་ཀུན་ཏུ་གཤེགས་ནས་བྱང་ཆུབ་སེམས་དཔར་གྱུར་པ་ལྟ་ཅི་སྨོས་ཏེ་ག་ལ་ཞིག་ཤེས། འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་སྙིང་པོ་དམ་པའོ། །འགྲོ་བའི་དཀྱིལ་འཁོར་ན་ཡོངས་སུ་འཁྱམ་ཡང་སུས་ཀྱང་ཡི་གེ་དྲུག་པའི་རིག་སྔགས་ཆེན་མོ་སུས་ཀྱང་མི་ཤེས་སོ། །གང་ཡང་ཡི་གེ་དྲུག་པའི་རིག་སྔགས་ཆེན་མོ་འདི་རྟག་ཏུ་འཛིན་ཅིང་ཟློས་པ་ལ་བརྩོན་པའི་སེམས་ཅན་དེ་དག་ནི་བསོད་ནམས་དང་ལྡན་པ་ཡིན་ནོ། །དེ་དག་ཟློས་པར་བྱེད་པའི་ཚེ་སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་ཕྲག་དགུ་བཅུ་རྩ་དགུ་འདུ་བར་འགྱུར་རོ། །བྱང་ཆུབ་སེམས་དཔའ་རྡུལ་ཕྲ་བ་དང་མཉམ་པ་དག་འདུ་བར་འགྱུར་རོ། །ཕ་རོལ་ཏུ་ཕྱིན་པ་དྲུག་སྒོ་ན་གནས་པར་འགྱུར་རོ། །གཞན་ཡང་ལྷའི་སྡེ་སུམ་ཅུ་རྩ་གཉིས་ཀྱི་ལྷའི་བུ་དག་འདུ་བར་འགྱུར་རོ། །རྒྱལ་པོ་ཆེན་པོ་བཞི་པོ་དག་ཀྱང་ཕྱོགས་བཞི་སྲུང་བར་འགྱུར་རོ། ། ཀླུའི་རྒྱལ་པོ་རྒྱ་མཚོ་མཆིང་རྣམ་དང ། ཀླུའི་རྒྱལ་པོ་མ་དྲོས་པ་དང ། ཀླུའི་རྒྱལ་པོ་འཇོག་པོ་ལ་སོགས་ཏེ། ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་སྲུང་བར་བྱེད་དོ། ། གཞན་ཡང་ས་བླའི་གནོད་སྦྱིན་དག་ནི་བླ་གབ་མེད་པར་སྲུང་བར་བྱེད་དོ། །རིགས་ཀྱི་བུ། དེའི་བ་སྦུའི་ཁུང་བུ་རེ་རེ་ལའང་དེ་བཞིན་གཤེགས་པ་བྱེ་བ་དག་བཞུགས་སོ། །བཞུགས་
361b
ནས་རིགས་ཀྱི་བུ་ཁྱོད་འདི་འདྲ་བའི་ཡིད་བཞིན་གྱི་ནོར་བུ་རྙེད་པར་བྱ་བ་ཐོབ་པར་གྱུར་ཅིང་ཁྱོད་ཀྱི་རུས་ཀྱིས་རིགས་བདུན་བརྒྱུད་དུ་ཐོབ་པར་བྱས་པ་ལེགས་སོ། །ལེགས་སོ། །རིགས་ཀྱི་བུ་ཁྱོད་ཀྱི་ལྟོ་ན་སྲོག་ཆགས་གནས་པ་དེ་ཐམས་ཅད་ཀྱང་བྱང་ཆུབ་སེམས་དཔའ་ཕྱིར་མི་ལྡོག་པར་འགྱུར་ཏེ་ལེགས་སོ་ཞེས་བྱ་བ་སྦྱིན་པར་མཛད་དོ། །ཡི་གེ་དྲུག་པའི་རིག་སྔགས་ཆེན་མོ་འདི་ལ་ལ་ཞིག་གི་ལུས་ལ་འཆང་ན་རིགས་ཀྱི་བུ་དེའི་ལུས་ནི་རྡོ་རྗེའི་ལུས་སུ་རིག་པར་བྱའོ། །རིང་བསྲེལ་གྱི་མཆོད་རྟེན་དུ་རིག་པར་བྱའོ། །དེ་བཞིན་གཤེགས་པའི་ཡེ་ཤེས་བྱེ་བར་རིག་པར་བྱའོ། །རིགས་ཀྱི་བུའམ་རིགས་ཀྱི་བུ་མོ་ལ་ལ་ཞིག་ཡི་གེ་དྲུག་པའི་རིག་སྔགས་ཆེན་མོ་འདི་ཟློས་པ་བྱེད་ན་དེ་ནི་སྤོབས་པ་མི་ཟད་པར་འགྱུར་རོ། །ཡེ་ཤེས་ཀྱི་ཕུང་པོ་རྣམ་པར་དག་པར་འགྱུར་རོ། །བྱམས་པ་ཆེན་པོ་དང ། སྙིང་རྗེ་ཆེན་པོ་དང་ལྡན་པར་འགྱུར་རོ། །དེ་ཉི་མ་རེ་རེ་ཞིང་ཡང་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །དེ་རིག་འཛིན་གྱི་འཁོར་ལོས་བསྒྱུར་བའི་དབང་ཐོབ་པར་འགྱུར་རོ། །ལ་ལ་ཞིག་ལ་དབུགས་ཕྱིར་འབྱུང་བ་དང ། ནང་དུ་རྔུབ་པར་བྱེད་ན་བྱམས་པས་ཀྱང་རུང ། ཞེ་སྡང་བས་ཀྱང་རུང་སྟེ། དེ་དག་ཐམས་ཅད་བྱང་ཆུབ་སེམས་དཔའ་ཕྱིར་མི་ལྡོག་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མྱུར་དུ་མངོན་པར་རྫོགས་པར་འཚང་རྒྱ་བར་
362a
༄#། །འགྱུར་རོ། །ལ་ལ་ཞིག་ལག་གིས་རེག་པས་ཀྱང་རེག་པར་བྱེད་ན་དེ་དག་ཐམས་ཅད་བྱང་ཆུབ་སེམས་དཔའ་སྲིད་པ་ཐ་མ་པར་འགྱུར་རོ། །བུད་མེད་དང ། སྐྱེས་པ་དང ། ཁྱེའུ་དང ། བུ་མོ་དག་གིས་མཐོང་བ་ཙམ་དང ། རི་དྭགས་དང ། བྱ་དང ། བ་ལང་དང ། བོང་བུ་ལ་སོགས་པས་ཀྱང་མཐོང་ན་དེ་དག་ཐམས་ཅད་བྱང་ཆུབ་སེམས་དཔའ་སྲིད་པ་ཐ་མ་པར་འགྱུར་རོ། །སྐྱེ་བ་དང ། རྒ་བ་དང ། ན་བ་དང ། འཆི་བ་དང ། མཛའ་བ་དང་བྲལ་བའི་སྡུག་བསྔལ་མེད་པར་འགྱུར་རོ། །རྣལ་འབྱོར་བསམ་གྱིས་མི་ཁྱབ་པ་དང་ལྡན་པར་འགྱུར་རོ། །དེ་ལྟར་ཡི་གེ་དྲུག་པའི་རིག་སྔགས་ཆེན་མོ་འདི་ཟློས་པར་བྱེད་ན་བསྐུལ་བར་འགྱུར་རོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། ཡི་གེ་དྲུག་པའི་རིག་སྔགས་ཆེན་མོ་རྣལ་འབྱོར་བསམ་གྱིས་མི་ཁྱབ་པ་དང་བསམ་གཏན་དཔག་ཏུ་མ་མཆིས་པ་ཟིལ་གྱིས་གནོན་པར་བགྱིད་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མྱ་ངན་ལས་འདའ་བ་སྟོན་པར་བགྱིད་པ། ཐར་པར་འཇུག་པར་བགྱིད་པ། ཆོས་ཀྱི་མཛོད་ཡོངས་སུ་གང་བར་བགྱིད་པ། འཁོར་བ་རྩ་བ་ནས་འབྱིན་པར་བགྱིད་པ། འགྲོ་བ་ལྔ་སྐེམ་པར་བགྱིད་པ། སེམས་ཅན་དམྱལ་བ་དང་ཉོན་མོངས་པ་རྣམས་འཇོམས་པར་བགྱིད་པ། བྱོལ་
362b
སོང་གི་སྐྱེ་གནས་སུ་གཏོགས་པ་རྣམས་སྒྲོལ་བར་བགྱིད་པ། ཆོས་ཀྱི་རོ་མྱོང་བར་བགྱིད་པ། ཐམས་ཅད་མཁྱེན་པའི་ཡེ་ཤེས་བཤད་པ་བསམ་འཚལ་བ་བདག་གིས་ཇི་ལྟར་ཐོབ་པར་བགྱི། བཅོམ་ལྡན་འདས། གང་བདག་ལ་ཡི་གེ་དྲུག་པའི་རིག་སྔགས་སྩོལ་བ་དེ་ལ་ཛམྦུའི་གླིང་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ་དབུལ་བར་འཚལ་ལོ། །བཅོམ་ལྡན་འདས། གལ་ཏེ་བྲིར་གྲོ་ག་དང་སྨྱུག་གུ་མ་མཆིས་ན་བདག་གི་ཁྲག་ལས་སྣག་ཚར་བགྱིས། །པགས་པ་བཤུས་ཏེ་གྲོ་གར་བགྱིས། རུས་པ་བཅོམ་སྟེ་སྨྱུག་གུར་བགྱིས་ཀྱང ། བཅོམ་ལྡན་འདས། བདག་གི་ལུས་ལ་སྐྱོ་བ་མ་མཆིས་ཏེ། དེ་ནི་ཕ་མ་དང ། བླ་མའི་ཡང་བླ་མར་འགྱུར་རོ། །དེ་ནས་བཅོམ་ལྡན་འདས་ཀྱིས་སྒྲིབ་པ་ཐམས་ཅད་རྣམ་པར་སེལ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ཡི་གེ་དྲུག་པའི་རིག་སྔགས་འདིའི་ཕྱིར་འཇིག་རྟེན་གྱི་ཁམས་རྡུལ་ཕྲ་རབ་དང་མཉམ་པའི་འཇིག་རྟེན་གྱི་ཁམས་སུ་སོང་བར་ང་དྲན་ཏེ། དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་ལ་བསྙེན་བཀུར་བྱས་པས་ཀྱང་ངས་དེ་བཞིན་གཤེགས་པ་དེ་དག་ལས་མ་ཐོབ་མ་ཐོས་ནས། དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་རྐང་བར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ།
363a
༄#། །བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་དམར་པོའི་མཆོག་ཅེས་བྱ་བ་དེའི་སྤྱན་སྔར་ངས་མཆི་མ་ཕྱུང་བ་དང ། དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས། རིགས་ཀྱི་བུ། དེ་ལྟར་སྙིང་རྗེ་རྗེ་ལྟར་མཆི་མ་མ་འབྱིན་པར། རིགས་ཀྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པ་ཞེས་བྱ་བ་བཞུགས་ཏེ་འཚོ་ཞིང་ཞེས་པ་དེ་ཡི་གེ་དྲུག་པའི་རིག་སྔགས་ཆེན་མོ་འདི་མཁྱེན་གྱི་སོང་ཞིག་ཅེས་བཀའ་སྩལ་ནས། རིགས་ཀྱི་བུ། དེ་བཞིན་གཤེགས་པ་པདྨ་དམ་པའི་དྲུང་དུ་སོང་ངོ ། །དེ་བཞིན་གཤེགས་པ་པདྨ་དམ་པའི་སངས་རྒྱས་ཀྱི་ཞིང་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་སྤྱན་སྔར་ཐལ་མོ་སྦྱར་ནས། བཅོམ་ལྡན་འདས། ཡི་གེ་དྲུག་པའི་རིག་སྔགས་ཆེན་མོ་དེའི་མིང་གི་རྗེས་སུ་དྲན་པ་ཙམ་གྱིས་སྡིག་པ་ཐམས་ཅད་བྱང་བར་འགྱུར་བ། བྱང་ཆུབ་སེམས་དཔའ་རྙེད་པར་དཀའ་བ་ཐོབ་པར་འགྱུར་བ་ཐོབ་པར་འཚལ་ལོ། །དེའི་སླད་དུ་བདག་འཇིག་རྟེན་གྱི་ཁམས་ཉོན་མོངས་པ་ཅན་དུ་མར་ཕྱིན་ཏེ་འདིར་མཆིས་ཀྱང་དོན་མ་མཆིས་པའི་ཚེགས་སུ་གྱུར་ཏོ། །དེ་ནས་དེ་བཞིན་གཤེགས་པ་པདྨའི་མཆོག་ཡི་གེ་དྲུག་པའི་རིག་སྔགས་ཆེན་མོ་འདིའི་ཡོན་ཏན་
363b
བསྔགས་པ་གསུང་བ། རིགས་ཀྱི་བུ། འདི་ལྟ་སྟེ། དཔེར་ན། ངས་རྡུལ་ཕྲ་རབ་ཀྱི་ཚད་ནི་གཟུང་ནུས་ཀྱི། རིགས་ཀྱི་བུ། ཡི་གེ་དྲུག་པའི་རིག་སྔགས་ཆེན་མོ་ལན་གཅིག་ཟློས་པའི་བསོད་ནམས་ཀྱི་ཕུང་པོ་ནི་བགྲང་མི་ནུས་སོ། །རིགས་ཀྱི་བུ། རྒྱ་མཚོ་མཆིང་རྣམ་གྱི་བྱེ་མ་ནི་རེ་རེ་ནས་བགྲང་ནུས་ཀྱི། རིགས་ཀྱི་བུ། ཡི་གེ་དྲུག་པའི་རིག་སྔགས་ཆེན་མོ་ལན་གཅིག་ཟློས་པའི་བསོད་ནམས་ཀྱི་ཕུང་པོ་ནི་བགྲང་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། སྐྱེས་བུ་ལ་ལ་ཞིག་གིས་ཁྱིམ་དཔག་ཚད་བརྒྱ་ཐམ་པར་བྱས་ཏེ། འཕང་དུ་དཔག་ཚད་ལྔ་བརྒྱར་བྱས་ལ། དེ་ཏིལ་གྱི་འབྲས་བུས་ཡོངས་སུ་གང་བར་བྱེད་དེ། དེ་ན་ཁབ་ཙམ་གྱི་བུ་གའང་མེད་ལ། དེའི་སྒོར་སྐྱེས་བུ་མི་རྒ་མི་འཆི་བ་ཞིག་བཞག་སྟེ། དེས་བསྐལ་པ་བརྒྱ་འདས་ཤིང་ཏིལ་གྱི་འབྲས་བུ་གཅིག་ཕྱིར་འདོར་ཏེ། རྣམ་གྲངས་དེས་ཁྱིམ་གྱི་རྨང་དང་གཞི་ཡན་ཆད་ཟད་ཅིང་མེད་པར་འགྱུར་གྱི། རིགས་ཀྱི་བུ། ཡི་གེ་དྲུག་པའི་རིག་སྔགས་ཆེན་མོ་ལན་གཅིག་ཟློས་པའི་བསོད་ནམས་ཀྱི་ཕུང་པོ་ནི་བགྲང་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། གླིང་བཞིར་མི་རྣམས་ཀྱི་ལས་ནས་དང ། གྲོ་དང ། འབྲས་དང ། རྒྱ་སྲན་དང ། བལ་སྲན་ལ་སོགས་པ་དང ། རྒྱ་ཤུག་དང ། སྲན་ཆུང་ལ་སོགས་པ་རྣམ་པ་སྣ་ཚོགས་པ་བྱས་ཏེ། ཀླུའི་རྒྱལ་པོས་ཀྱང་དེར་དུས་དུས་སུ་ཆར་པའི་རྒྱུན་ཕབ་ནས་འབྲུ་དེ་
364a
༄#། །དག་གྲུབ་པ་དང ། སྨིན་ཅིང་སྨིན་ཅིང་བརྔས་ནས་ཛམྦུའི་གླིང་དུ་གཡུལ་གཅིག་བྱས་ལ། ཤིང་རྟ་དང ། ཁུར་དང ། བམ་པོ་དང ། སྐོན་པས་བསྐྱས་ཏེ། གཡུལ་དེའི་ནང་དུ་བཅུག་ནས་བ་ལང་དང་བོང་བུ་དག་གིས་བཅགས་ཏེ་ཕུང་པོ་ཆེན་པོར་བྱས་ཀྱང ། རིགས་ཀྱི་བུ། ངས་འབྲུ་རེ་རེ་ནས་བགྲང་ནུས་ཀྱི། རིགས་ཀྱི་བུ། ཡི་གེ་དྲུག་པའི་རིག་སྔགས་ཆེན་མོ་འདི་ལན་གཅིག་བཟླས་པའི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། ཆུ་བོ་ཆེན་པོ་ཛམྦུའི་གླིང་དུ་ཉིན་མཚན་དུ་འབབ་པ་འདི་ལྟ་སྟེ། སི་ཏ་དང ། གངྒཱ་དང ། ཡ་མུ་ན་དང ། སིནྡྷུ་དང ། པཀྵུ་དང ། ཤ་ཏ་དྲུ་དང ། ཙནྡྲ་བྷ་ག་དང ། ཻ་ར་བ་ཏི་དང ། སུ་མ་ག་ད་དང ། ཧི་མ་ཀ་ལ་དང ། ཀོ་ད་པ་རི་རྣམས་ཆུ་བོ་རེ་རེ་ཞིང་འཁོར་ལྔ་བརྒྱ་ལྔ་བརྒྱ་ཡོད་པ་ཉིན་མཚན་དུ་རྒྱ་མཚོ་མཆིང་རྣམ་དུ་འབབ་བོ། །རིགས་ཀྱི་བུ། ཡི་གེ་དྲུག་པའི་རིག་སྔགས་ཆེན་མོ་ལན་གཅིག་ཟློས་པའི་བསོད་ནམས་ཀྱི་ཕུང་པོའང་དེ་བཞིན་དུ་འཕེལ་ལོ། །དེ་བས་ན་ཆུ་བོ་ཆེན་པོ་དེ་དག་ནི་ངས་ཐིགས་པ་རེ་རེ་ནས་བགྲང་ནུས་ཀྱི། རིགས་ཀྱི་བུ། ཡི་གེ་དྲུག་པའི་རིག་སྔགས་ཆེན་མོ་ལན་གཅིག་ཟློས་པའི་བསོད་ནམས་ཀྱི་ཕུང་པོ་ནི་ངས་བགྲང་བར་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། རྐང་པ་བཞི་པའི་རིགས་པ་
364b
ལང་དང ། བོང་བུ་དང ། མ་ཧེ་དང ། རྟ་དང ། བལ་གླང་དང ། ཁྱི་དང ། ཝ་དང ། ར་དང ། ཕྱུགས་དེ་དག་དང ། དེ་བཞིན་དུ་སེང་གེ་དང ། སྟག་དང ། ཏ་རཀྵ་དང ། རི་དྭགས་དང ། སྤྲེའུ་དང ། རི་བོང་དང ། ཕག་ལ་སོགས་པ་དང ། བྱི་བ་དང ། བྱི་ལ་ལ་སོགས་པ་དེ་དག་གི་སྤུ་ནི་ངས་རེ་རེ་ནས་བགྲང་ནུས་ཀྱི། ཡི་གེ་དྲུག་པའི་རིག་སྔགས་ཆེན་མོ་ལན་གཅིག་ཟློས་པའི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། རྡོ་རྗེའི་ལྕགས་ཀྱུ་ཞེས་བྱ་བའི་རིའི་རྒྱལ་པོ་འཕང་དུ་དཔག་ཚད་དགུ་ཁྲི་དགུ་སྟོང ། འོག་ཏུ་དཔག་ཚད་བརྒྱད་ཁྲི་བཞི་སྟོང་ཡོད་དེ། རིའི་རྒྱལ་པོ་རྡོ་རྗེའི་ལྕགས་ཀྱུ་དེའི་ངོས་རེ་རེ་ཞིང་ཡང་དཔག་ཚད་བརྒྱད་ཁྲི་བཞི་སྟོང་ཡོད་ལ། རིའི་རྒྱལ་པོ་དེའི་ངོས་ལ་སྐྱེས་བུ་མི་རྒ་མི་འཆི་བ་ཞིག་ཡོད་ནས་དེས་བསྐལ་པ་གཅིག་འདས་ཤིང་ཡུལ་ཀ་ཤི་ཀ་ནས་བྱུང་བའི་གོས་ཀྱིས་ལན་གཅིག་ཕྱིས་ཏེ། དེ་ལྟར་བྱས་ཀྱང་དེ་ཟད་ཅིང་དེངས་པར་འགྱུར་གྱི། ཡི་གེ་དྲུག་པའི་རིག་སྔགས་ཆེན་པོ་ལན་གཅིག་བཟླས་པའི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། རྒྱ་མཚོ་མཆིང་རྣམ་ཆེན་པོ་ཟབས་སུ་དཔག་ཚད་བརྒྱད་ཁྲི་བཞི་སྟོང ། ཞེང་དུ་རྟ་རྒོད་མའི་གདོང་གི་མཐའ་བར་དུ་དཔག་ཏུ་མེད་པ་ངས་སྐྲའི་རྩེ་མོའི་བརྒྱའི་ཆས་ཐིགས་པ་རེ་རེ་ནས་བགྲང་ནུས་ཀྱི། རིགས་ཀྱི་བུ། ཡི་གེ་དྲུག་པའི་རིག་སྔགས་ཆེན་
365a
༄#། །མོ་ལན་གཅིག་བཟླས་པའི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། ཤིང་ཤིར་ཥའི་ཚལ་གྱི་ལོ་མ་ནི་རེ་རེ་ནས་ངས་བགྲང་ནུས་ཀྱི། ཡི་གེ་དྲུག་པའི་རིག་སྔགས་ཆེན་མོའི་བསོད་ནམས་ཀྱི་ཕུང་པོ་ངས་བགྲང་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། གླིང་ཆེན་པོ་བཞིན་གནས་པའི་སྐྱེས་པ་དང་བུད་མེད་དང ། ཁྱེའུ་དང ། བུ་མོ་དེ་དག་ཐམས་ཅད་བྱང་ཆུབ་སེམས་དཔའ་ས་བདུན་པ་ལ་གནས་པར་གྱུར་ན། གང་བྱང་ཆུབ་སེམས་དཔའ་དེ་དག་གི་བསོད་ནམས་ཀྱི་ཕུང་པོ་དེ་བས་ཡི་གེ་དྲུག་པའི་རིག་སྔགས་ཆེན་མོ་ལན་གཅིག་བཟླས་པའི་བསོད་ནམས་ཀྱི་ཕུང་པོ་ནི་ཤིན་ཏུ་ཆེའོ། །རིགས་ཀྱི་བུ། འདི་ལྟ་སྟེ། དཔེར་ན། ཟླ་བ་བཅུ་གཉིས་པའི་ལོའམ། ཟླ་བ་ལྷག་པ་དང་བགྲངས་པས་ཟླ་བ་བཅུ་གསུམ་གྱིས་ལོ་ཚང་བར་གྱུར་པར་ཉིན་མཚན་དུ་ཆར་པ་བབ་ན། རིགས་ཀྱི་བུ། ངས་ཐིགས་པ་རེ་རེ་ནས་བགྲང་ནུས་ཀྱི། རིགས་ཀྱི་བུ། ཡི་གེ་དྲུག་པའི་རིག་སྔགས་ཆེན་མོ་ལན་གཅིག་བཟླས་པའི་བསོད་ནམས་ཀྱི་ཕུང་པོ་ནི་ངས་བགྲང་མི་ནུས་སོ། །འདི་ལྟ་སྟེ། རིགས་ཀྱི་བུ། མང་དུ་བརྗོད་མི་དགོས་ཀྱི་ང་དང་འདྲ་བའི་དེ་བཞིན་གཤེགས་པ་བྱེ་བ་གནས་གཅིག་ཏུ་ལྷའི་བསྐལ་པར་ན་བཟའ་དང ། བཤོས་དང ། མལ་སྟན་དང ། ན་བའི་རྐྱེན་གྱི་སྨན་གྱི་ཡོ་བྱད་ཀྱིས་གནས་པར་བྱས་ཏེ། བསྙེན་བཀུར་
365b
ཐམས་ཅད་བྱས་ཀྱང་དེ་བཞིན་གཤེགས་པ་དེ་དག་གིས་ཡི་གེ་དྲུག་པའི་རིག་སྔགས་ཆེན་མོའི་བསོད་ནམས་ཀྱི་ཕུང་པོ་བགྲང་མི་ནུས་ན། ང་གཅིག་པུ་འཇིག་རྟེན་གྱི་ཁམས་འདི་ན་གནས་པས་ལྟ་ཅི་སྨོས། བསམ་གཏན་གྱི་གནས་སུ་ལྡང་བ་ནི་བསམ་གྱིས་མི་ཁྱབ་སྟེ། རིགས་ཀྱི་བུ། ང་ནི་སྒོམ་པའི་བརྩོན་པ་ལ་བརྩོན་པར་གྱུར་པ་ཡིན། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཆོས་དེའང་ཕྲ་བ། མི་གསལ་བའི་ཆོས་མ་འོངས་པ། ཤིན་ཏུ་སྙིང་པོར་གྱུར་པའི་ཆོས་ཏེ། དེ་དགེ་བ་ལ་གནས་པ་དེ་བཞིན་དུ། རིགས་ཀྱི་བུ། ཡི་གེ་དྲུག་པའི་རིག་སྔགས་ཆེན་མོའང་ཐབས་མཁས་པའོ། །རིགས་ཀྱི་བུ། ངས་ཀྱང་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་འཁྱམ་ཞིང་སོང་ནས་དེ་བཞིན་གཤེགས་པ་སྣང་བ་མཐའ་ཡས་ཀྱི་སྤྱན་སྔར་ཐལ་མོ་སྦྱར་ཏེ། ཆོས་ཀྱི་ཤུགས་ཀྱིས་མཆི་མ་བྱུང་བ་དེའི་ཚེ་དེ་བཞིན་གཤེགས་པ་སྣང་བ་མཐའ་ཡས་བས་ད་ལྟར་དང ། མ་འོངས་པ་མཁྱེན་ཏེ། དེས་ཀྱང ། རིགས་ཀྱི་བུ། ཡི་གེ་དྲུག་པའི་རིག་སྔགས་ཆེན་པོའི་རིག་པའི་རྒྱལ་མོ་བསྒོམ་པའི་བརྩོན་འགྲུས་བྱ་བར་འདོད་དམ་ཞེས་བཀའ་སྩལ་ནས། བཅོམ་ལྡན་འདས། བདག་འཚལ་ལོ། །བདེ་བར་གཤེགས་པ། བདག་འཚལ་ཏེ། ཇི་ལྟར་སྐོམ་གྱིས་གདུངས་ནས་ཆབ་འཚོལ་བ་དེ་བཞིན་དུ། བཅོམ་ལྡན་འདས། བདག་ཀྱང་ཡི་གེ་
366a
༄#། །དྲུག་པའི་རིག་སྔགས་ཆེན་མོ་འཚོལ་དུ་འཇིག་རྟེན་གྱི་ཁམས་སུ་མཆིས་ཏེ། དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མ་ལ་བསྙེན་བཀུར་བགྱིས་ཀྱང་གང་ལས་ཀྱང་ཡི་གེ་དྲུག་པའི་རིག་སྔགས་ཆེན་མོའི་རྒྱལ་མོ་མ་ཐོབ་ཀྱི། བཅོམ་ལྡན་འདས། ཁྱོད་ནི་མགོན་ནོ། །ཁྱོད་ནི་སྐྱབས་སོ། །རྟེན་ནོ། །དབང་པོ་ཉམས་པའི་ནི་མིག་ཏུ་གྱུར་ཅིག་།ལམ་སྟོར་བའི་ནི་ལམ་དུ་གྱུར་ཅིག་།ཉི་མ་ཚ་བས་ཚིག་པ་རྣམས་ཀྱི་ནི་གདུགས་སུ་གྱུར་ཅིག་།ཤུལ་གྱི་བཞི་མདོ་ཆེན་པོར་ནི་ཤིང་སཱ་ལ་ཆེན་པོ་བཞིན་དུ་གྱུར་ཅིག ། ཆོས་ཀྱིས་ཡོངས་སུ་སྐོམ་པ་ལ་ནི་མཐའ་ཡས་པ་སྟོན་པར་གྱུར་ཅིག་།སེམས་ཅན་ཤིན་ཏུ་བརྟན་པའི་ནི་གོ་ཆར་གྱུར་ཅིག་།དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣང་བ་མཐའ་ཡས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་བྱ་ཀ་ལ་པིངྐའི་དབྱངས་ཀྱིས་བཀའ་སྩལ་པ།་རིགས་ཀྱི་བུ་ལྟོས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨའི་མཆོག་ཡི་གེ་དྲུག་པའི་རིག་སྔགས་ཆེན་མོའི་ཕྱིར་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མར་གཤེགས་ཀྱི། རིགས་ཀྱི་བུ། ཡི་གེ་དྲུག་པའི་རིག་སྔགས་ཆེན་མོའི་རྒྱལ་མོ་གསོལ་ཅིག་།དེ་བཞིན་གཤེགས་པར་གྱུར་བཞིན་དུ་ཀུན་ཏུ་གཤེགས་
366b
སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོས་འདི་སྐད་ཅེས་གསོལ་ཏོ། །དཀྱིལ་འཁོར་བརྒྱད་ཀྱིས་སྩོལ་བར་བགྱི་སྟེ། བཅོམ་ལྡན་འདས། ཇི་ལྟར་ན་མེ་ཏོག་པདྨ་ལྟ་བུའི་ཕྱག་རྒྱ་འཛིན། ཇི་ལྟར་ན་ནོར་བུ་འཛིན་པའི་ཕྱག་རྒྱ་རྟོགས་པར་འགྱུར། ཇི་ལྟར་ན་རྒྱལ་པོའི་དབང་པོ་ཐམས་ཅད་ཀྱི་ཕྱག་རྒྱ་རྟོགས་པར་འགྱུར། ཇི་ལྟར་ན་དཀྱིལ་འཁོར་ཡོངས་སུ་དག་པ་རྟོགས་པར་འགྱུར་ཞེ་ན། དཀྱིལ་འཁོར་གྱི་མཚན་མ་ནི་འདི་ལགས་ཏེ། གྲུ་བཞི་ལ་ཁྲུ་ལྔ་ཁོར་ཡུག་ཙམ་དུ་བགྱིས་ཏེ། དཀྱིལ་འཁོར་གྱི་དབུས་སུ་ནི་སྣང་བ་མཐའ་ཡས་བྲིའོ། །དེ་བཞིན་གཤེགས་པ་སྣང་བ་མཐའ་ཡས་ཀྱི་སྐུ་ལ་ནོར་བུ་རིན་པོ་ཆེ་ཨིནྡྲ་ནཱི་ལའི་ཕྱེ་མ་དང ། མྲྒད་ཀྱི་ཕྱེ་མ་དང ། པདྨ་རཱ་གའི་ཕྱེ་མ་དང ། ཤེལ་གྱི་ཕྱེ་མ་དང ། གསེར་དང་དངུལ་གྱི་ཕྱེ་མ་གཏོར་བར་བགྱིའོ། །གཡས་ཕྱོགས་སུ་ནི་བྱང་ཆུབ་སེམས་དཔའ་ནོར་བུ་རིན་པོ་ཆེ་འཛིན་པར་བགྱིའོ། །གཡོན་ཕྱོགས་སུ་ནི་ཡི་གེ་དྲུག་པའི་རིག་སྔགས་ཆེན་མོ་བགྱི་སྟེ། ཕྱག་བཞི་པ་ཁ་དོག་འདམ་བུའི་མདའ་རྒྱུ་བཞིན་དུ་དཀར་བ། རྒྱན་སྣ་ཚོགས་ཀྱིས་བརྒྱན་པ། ཕྱག་གཡོན་པར་པདྨ་བགྱིའོ། །པདྨའི་སྟེང་དུ་ནོར་བུ་བགྱིའོ།། ཕྱག་གཡས་པར་སྔགས་ཀྱི་ནོར་བུ་བགྱིའོ། །ཕྱག་གཉིས་ཐལ་མོ་སྦྱར་བ་རྒྱལ་པོའི་དབང་པོ་ཐམས་ཅད་ཅེས་བྱ་བའི་ཕྱག་རྒྱ་བགྱིའོ། །ཡི་གེ་དྲུག་པའི་རིག་སྔགས་ཆེན་མོ་དེའི་ཞབས་ཀྱི་
367a
༄#། །འོག་ཏུ་རིག་འཛིན་བགྱི་སྟེ། ལག་པ་གཡས་པ་ན་པོག་པོར་ཐོགས་ཤིང་བདུག་པར་བགྱིའོ། །ལག་པ་གཡོན་པ་ན་རྒྱན་རྣམ་པ་སྣ་ཚོགས་ཀྱིས་གང་བའི་སྐོན་བུ་ཐོགས་པར་བགྱིའོ། །དཀྱིལ་འཁོར་དེའི་གྲཝ་བཞིར་རྒྱལ་པོ་ཆེན་པོ་བཞི་སྟེ། ལག་ཆ་སྣ་ཚོགས་ཐོགས་པར་བགྱིའོ། །དཀྱིལ་འཁོར་དེའི་གྲཝ་བཞིར་བུམ་པ་གང་བ་ནོར་བུ་རིན་པོ་ཆེ་སྣ་ཚོགས་སྩལ་བ་གཞག་གོ་།རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་དཀྱིལ་འཁོར་དུ་འཇུག་པར་འཚལ་ན་དེས་རུས་ཆགས་ཀྱི་རྒྱུད་ཐམས་ཅད་ཀྱི་མིང་བྲིས་ལ་ཐོག་མཁོ་ནར་དཀྱིལ་འཁོར་དེར་མིང་དེ་དག་སྩལ་བར་བགྱི་སྟེ། དེ་དག་ཐམས་ཅད་མིའི་སྡུག་བསྔལ་ཐམས་ཅད་སྤངས་ཤིང་སྲིད་པ་ཐ་མ་པའི་བྱང་ཆུབ་སེམས་དཔར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མྱུར་དུ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ལ་སློབ་དཔོན་གྱིས་གནས་མ་ལགས་པ་ལ་སྩལ་བར་མི་བགྱི་སྟེ།་ཡང་ན་ནི་དད་པས་མོས་པ་ལ་སྩལ་བར་བགྱིའོ། །ཡང་ན་ནི་ཐེག་པ་ཆེན་པོ་ལ་དད་པས་མོས་པ་དག་ལ་སྩལ་བར་བགྱིའོ། །མུ་སྟེགས་ཅན་ལ་སྩལ་བར་མི་བགྱིའོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣང་བ་མཐའ་ཡས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་
367b
ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། གལ་ཏེ་ནོར་བུ་རིན་པོ་ཆེ་ཨིནྡྲ་ནཱི་ལའི་ཕྱེ་མ་དང ། མར་ཀ་ཏ་དང ། གསེར་དང་དངུལ་གྱི་ཕྱེ་མ་དག་རིགས་ཀྱི་བུའམ་རིགས་ཀྱི་བུ་མོ་དབུལ་པོ་ལ་མེད་དོ། །བཅོམ་ལྡན་འདས། ཕྱེ་མ་དེ་དག་ཚོན་སྣ་ཚོགས་ལས་སྦྱར་ཞིང ། མེ་ཏོག་སྣ་ཚོགས་དང ། བདུག་པ་སྣ་ཚོགས་སུ་བགྱིའོ། །རིགས་ཀྱི་བུ། གལ་ཏེ་ཡུལ་གཞན་དུ་སོང་ངམ། གནས་དང་ཐབས་ལས་བབས་པ་དག་ལ་མེད་དོ། །དེའི་ཚེ་སློབ་དཔོན་གྱིས་ཡིད་ལ་དཀྱིལ་འཁོར་བགྱི་སྟེ། སློབ་དཔོན་གྱིས་ཕྱག་རྒྱའི་མཚན་མ་བསྟན་པར་བགྱིའོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨའི་མཆོག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ཡི་གེ་དྲུག་པའི་རིག་སྔགས་ཆེན་མོའི་རྒྱལ་མོ་ང་ལ་བྱིན་ཅིག་།ངས་སེམས་ཅན་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མ་དག་དེས་འཁོར་བ་ལས་ཡོངས་སུ་ཐར་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨའི་མཆོག་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་ཡི་གེ་དྲུག་པའི་རིག་སྔགས་
368a
༄#། །འདི་བྱིན་ནོ།། །།ོཾ་མ་ཎི་པདྨེ་ཧཱུཾ། བམ་པོ་བཞི་པ་སྟེ་ཐ་མ། གང་གི་ཚེ་ན་ཡི་གེ་དྲུག་པའི་རིག་སྔགས་ཆེན་མོ་འདི་བྱིན་པ་དེའི་ཚེ་གླིང་བཞི་དང་ལྷའི་གནས་དང་བཅས་ཏེ། ཤིང་ཆུ་སྐྱེས་ཀྱི་འདབ་མ་བཞིན་དུ་འགུལ་ལོ། །རྒྱ་མཚོ་མཆིང་རྣམ་བཞིའང་འཁྲུགས་སོ། །བགེགས་དང་བར་ཆད་བྱེད་པ་ཐམས་ཅད་ཀྱང་སྐྲག་གོ ། གནོད་སྦྱིན་དང ། སྲིན་པོ་དང ། ནག་པོ་ཆེན་པོ་བུད་མེད་མང་པོ་དང་བཅས་པའང་བྲོས་སོ། །དེ་ནས་དེ་བཞིན་གཤེགས་པ་པདྨའི་མཆོག་གིས་བལ་གླང་གི་སྣ་དང་འདྲ་བའི་དཔུང་པ་ཕྱུང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་མུ་ཏིག་གི་སེ་མོ་དོ་རིན་བརྒྱ་སྟོང་རི་བ་ཕུལ་ལོ། །དེས་ཀྱང་བླངས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣང་བ་མཐའ་ཡས་ལ་ཕུལ་ལོ། །དས་ཀྱང་བླངས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨའི་མཆོག་ལ་ཕུལ་ལོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨའི་མཆོག་གིས་ཡི་གེ་དྲུག་པའི་རིག་སྔགས་ཆེན་མོ་འདི་བླངས་ནས་འཇིག་རྟེན་གྱི་ཁམས་པདྨ་ག་ལ་བ་དེར་གཤེགས་སོ། །རིགས་ཀྱི་བུ། དེ་ལྟར་ངས་སྔོན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
368b
རྒྱས་པདྨའི་མཆོག་ལས་ཐོས་སོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། ཡི་གེ་དྲུག་པའི་རིག་སྔགས་ཆེན་མོ་རྣལ་འབྱོར་སྤྱོད་པ་བདག་གིས་ཇི་ལྟར་ཐོབ་པར་བགྱི། བཅོམ་ལྡན་འདས། དཔེར་ན། བདུད་རྩི་ཐོབ་ན་རོ་མྱོང་བས་ཆོག་མ་འཚལ་བ་དེ་བཞིན་དུ། བཅོམ་ལྡན་འདས། བདག་ཀྱང་ཡི་གེ་དྲུག་པའི་རིག་སྔགས་ཆེན་པོ་ཐོས་པ་ཙམ་གྱིས་ཆོག་མ་འཚལ་ཏོ། །སེམས་ཅན་གང་དག་ཡི་གེ་དྲུག་པའི་རིག་སྔགས་ཆེན་མོ་འདི་འཛབ་ཏུ་བགྱིད་པ་དང ། ཉན་པ་དང།་སེམས་པ་དང ། བསམ་པ་ལྷག་པས་འཛིན་པ་དེ་དག་ནི་བསོད་ནམས་དང་ལྡན་པ་ལགས་སོ། །བཀའ་སྩལ་པ། རིགས་ཀྱི་བུ། གང་ཡི་གེ་དྲུག་པའི་རིག་སྔགས་ཆེན་མོ་འདི་འདྲིར་འཇུག་པ་དེས་ནི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་འདྲིར་འཇུག་པར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡུལ་ཕྲ་རབ་དང་མཉམ་པ་ལྷའི་གསེར་རིན་པོ་ཆེ་ལས་བྱེད་ཅིང་བྱས་ནས་ཉིན་གཅིག་བཞིན་དུ་རིང་བསྲེལ་འཇུག་པ་དེའི་འབྲས་བུ་རྣམ་པར་སྨིན་པ་ནི། ཡི་གེ་དྲུག་པའི་རིག་སྔགས་ཆེན་མོའི་ཡི་གེ་འབྲུ་གཅིག་གི་འབྲས་བུ་རྣམ་པར་སྨིན་པ་ཙམ་སྟེ། ཡོན་ཏན་བསམ་གྱིས་མི་ཁྱབ་བོ། །ཐར་པར་ཤིན་ཏུ་གནས་པའོ། །རིགས་ཀྱི་བུའམ་རིགས་ཀྱི་བུ་མོ་གང་ཡི་གེ་དྲུག་པའི་རིག་སྔགས་
369a
༄#། །ཆེན་མོ་འདི་ཟློས་པར་བྱེད་པ་དེ་ནི་ཏིང་ངེ་འཛིན་འདི་དག་ཐོབ་པར་འགྱུར་རོ། །འདི་ལྟ་སྟེ། ནོར་བུ་རིན་པོ་ཆེ་འཛིན་ཅེས་བྱ་བའི་ཏིང་ངེ་འཛིན་དང ། སེམས་ཅན་དམྱལ་བ་དང་བྱོལ་སོང་སྐེམ་ཞེས་བྱ་བའི་ཏིང་ངེ་འཛིན་དང ། རྡོ་རྗེའི་གོ་ཆ་ཞེས་བྱ་བའི་ཏིང་ངེ་འཛིན་དང ། རྐང་པ་ཤིན་ཏུ་གནས་པ་ཞེས་བྱ་བའི་ཏིང་ངེ་འཛིན་དང ། ཐབས་མཁས་པ་ཐམས་ཅད་ཅེས་བྱ་བའི་ཏིང་ངེ་འཛིན་དང ། འཐོར་བ་ཞེས་བྱ་བའི་ཏིང་ངེ་འཛིན་དང ། ཆོས་ཐམས་ཅད་འཇུག་པ་ཞེས་བྱ་བའི་ཏིང་ངེ་འཛིན་དང ། བསམ་གཏན་གྱི་རྒྱན་ཅེས་བྱ་བའི་ཏིང་ངེ་འཛིན་དང ། ཆོས་ཀྱི་ཤིང་རྟ་ལ་འཇུག་པ་ཞེས་བྱ་བའི་ཏིང་ངེ་འཛིན་དང ། འདོད་ཆགས་དང་ཞེ་སྡང་ལས་ཡོངས་སུ་ཐར་བར་བྱེད་ཅེས་བྱ་བའི་ཏིང་ངེ་འཛིན་དང ། མཐའ་ཡས་བེའུ་ཞེས་བྱ་བའི་ཏིང་ངེ་འཛིན་དང ། ཕ་རོལ་ཏུ་ཕྱིན་པ་དྲུག་འཆད་ཅེས་བྱ་བའི་ཏིང་ངེ་འཛིན་དང ། རི་རབ་ཆེན་པོ་འཛིན་ཅེས་བྱ་བའི་ཏིང་ངེ་འཛིན་དང ། སེམས་ཅན་སྲིད་པ་ལས་སྒྲོལ་ཞེས་བྱ་བའི་ཏིང་ངེ་འཛིན་དང ། སངས་རྒྱས་ཀྱི་ཞིང་ཐམས་ཅད་སྟོན་ཅེས་བྱ་བའི་ཏིང་ངེ་འཛིན་དང ། དེ་བཞིན་གཤེགས་པ་ཐམས་ཅད་གཟིགས་ཞེས་བྱ་བའི་ཏིང་ངེ་འཛིན་དང ། གནས་ཤིན་ཏུ་གནས་པ་ཞེས་བྱ་བའི་ཏིང་ངེ་འཛིན་རྣམས་ཏེ། རིགས་ཀྱི་བུ། གང་ཡི་གེ་དྲུག་པའི་རིག་སྔགས་ཆེན་པོའི་རྒྱལ་མོ་འཛིན་པ་ནི་དེ་ལྟ་བུ་ལ་སོགས་ཏེ། ཏིང་ངེ་འཛིན་
369b
བརྒྱ་རྩ་བརྒྱད་ཐོབ་པར་འགྱུར་རོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གང་དུ་མཆི་བར་བགྱི། ཡི་གེ་དྲུག་པའི་རིག་སྔགས་ཆེན་མོ་གང་དུ་འཐོབ་པར་འགྱུར། རིགས་ཀྱི་བུ། ཡུལ་ཁོར་མོར་འཇིག་པའི་གྲོང་ཁྱེར་ཆེན་པོ་ན་གང་ཡི་གེ་དྲུག་པའི་རིག་སྔགས་ཆེན་མོ་འཛིན་པར་བྱེད། ཀློག་པར་བྱེད། ཚུལ་བཞིན་ཡིད་ལ་བྱེད་པའི་ཆོས་སྨྲ་བ་ཡོད་དོ། །བཅོམ་ལྡན་འདས། ཡུལ་འཁོར་མོར་འཇིག་གི་གྲོང་ཁྱེར་ཆེན་པོར་ཆོས་སྨྲ་བ་དེ་ལ་བལྟ་བ་དང ། ཕྱག་བགྱི་བ་དང ། བསྙེན་བཀུར་བགྱི་བའི་སླད་དུ་བདག་མཆིའོ། །ལེགས་སོ། །ལེགས་སོ། །རིགས་ཀྱི་བུ། དེ་ལྟར་གྱིས་ཤིག་།གང་ཡི་གེ་དྲུག་པའི་རིག་སྔགས་ཆེན་མོ་འདི་འཛིན་པའི་ཆོས་སྨྲ་བ་དེ་དག་ནི་དཀོན\?\་པའོ། །ཆོས་སྨྲ་བ་དེ་དག་ནི་དེ་བཞིན་གཤེགས་པ་དང་མཉམ་པར་བལྟ་བར་བྱའོ། །འགྲོ་བའི་བསོད་ནམས་ཀྱི་འགྲམ་དང་འདྲ་བར་བལྟ་བར་བྱའོ། །ཕུང་པོ་བཞིན་དུ་བལྟ་བར་བྱའོ།། ཕྱིན་ཅི་མ་ལོག་པར་གསུང་བ་བཞིན་དུ་བལྟ་བར་བྱའོ། །རིན་པོ་ཆེའི་ཕུང་པོ་བཞིན་དུ་བལྟ་བར་བྱའོ། །དམ་པ་སྦྱིན་པར་བྱེད་པའི་ཡིད་བཞིན་གྱི་ནོར་བུ་བཞིན་དུ་བལྟ་བར་བྱའོ། །ཆོས་ཀྱི་མཛོད་བཞིན་དུ་བལྟ་བར་བྱའོ། །འགྲོ་བ་སྒྲོལ་བར་བྱེད་པ་བཞིན་དུ་བལྟ་བར་བྱའོ། །རིགས་ཀྱི་བུ། ཆོས་སྨྲ་བ་དེའི་བྱེད་པ་མཐོང་ནས་ཐེ་ཚོམ་མི་སྐྱེ་བར་བྱའོ། །རིགས་ཀྱི་བུ་ཁྱོད་
370a
༄#། །བྱང་ཆུབ་སེམས་དཔའི་ས་ནས་འཕོས་ཤིང་ངན་སོང་དུ་སྐྱེས་ས་རེ། ཆོས་སྨྲ་བ་དེ་ནི་ཚུལ་ཁྲིམས་ཉམས་པ། སྤྱོད་པ་ཉམས་པ། ཆུང་མ་དང ། བུ་དང ། བུ་མོས་ཡོངས་སུ་བསྐོར་བ། ངུར་སྨྲིག་ཀྱང་བཤང་བ་དང་གཅི་བས་ཡོངས་སུ་གང་བ། སྤྱོད་ལམ་མ་བསྔམས་པ་ཡིན་ནོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ་བཞིན་དུ་འཚལ་ལོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་བྱང་ཆུབ་སེམས་དཔའ་ཁྱིམ་པ་དང ། རབ་ཏུ་བྱུང་བ་དང ། ཁྱེའུ་དང ། བུ་མོ་བརྒྱ་ཕྲག་སྟོང་དུ་མས་ཡོངས་སུ་བསྐོར་ཏེ་སོང་ནས་ཆོས་སྨྲ་བ་དེ་ལ་མཆོད་པའི་ལས་བྱ་བའི་ཕྱིར་ལྷའི་གདུགས་དང ། ལྷའི་ལྷམ་དང ། ཅོད་པན་དང ། རྣ་ཆ་དང ། ཕྲེང་བའི་ཆུན་པོ་དང ། དཔུང་རྒྱན་དང ། སེ་མོ་དོ་དང ། སེ་མོ་དོ་ཕྱེད་པ་ཕྲག་པ་ནས་འཕྱང་བ་དང ། སྙན་གྱི་གོང་རྒྱན་དང ། སོར་གདུབ་ཀྱི་རྣམ་པ་དང ། གཞན་ཡང་གོས་རྣམ་པ་སྣ་ཚོགས་པ་རྒྱའི་ཡུལ་ནས་བྱུང་བ་དང ། རིག་འཛིན་གྱིས་བསྐུལ་བ་དང ། ཡུལ་ཀ་ཤི་ཀ་ནས་བྱུང་བའི་གོས་དང ། མེས་བཀྲུ་བའི་གོས་དང ། གཞན་ཡང་མེ་ཏོག་སྣ་ཚོགས་པ་འདི་ལྟ་སྟེ། མེ་ཏོག་ཨུཏྤལ་དང ། ཀུ་མུ་ད་དང ། པུཎྜ་རི་ཀ་དང ། མནྡཱ་ར་བ་དང །
370b
མནྡཱ་ར་བ་ཆེན་པོ་དང ། མཉྫུ་ཥ་ཀ་དང ། མཉྫུ་ཥ་ཀ་ཆེན་པོ་དང ། ུ་དུམྦཱ་ར་དང ། གཞན་ཡང་ཤིང་གི་མེ་ཏོག་རྣམ་པ་སྣ་ཚོགས་པ་ཙམྤ་ཀ་དང ། ཀ་ར་བཱི་ར་དང ། བད་ཏ་ལ་དང ། ་ཏི་མུཀྟ་དང ། པར་ཤི་ཀ་དང ། ཀུནད་དྷྱ་ཤི་ཏ་དང ། སུ་མ་ན་དང ། བི་མཱ་ནི་ཀ་ལ་སོགས་པ་དང ། འདབ་མ་བརྒྱ་པ་ངུར་པས་མཛེས་པར་བྱས་པ། བྱ་ཤཱ་རི་ཀ་དག་མོས་པར་བྱས་པ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། ཤེལ་གྱི་ཁ་དོག་དང ། གཞན་ཡང་འབྲས་བུ་དང ། མེ་ཏོག་གི་རྣམ་པ་སྣ་ཚོགས་དག་ཁྱེར་ནས་ཡུལ་ཁོར་མོར་འཇིག་གི་གྲོང་ཁྱེར་ཆེན་པོ་ག་ལ་བ་དེར་སོང་སྟེ། མཐར་གྱིས་ཁོར་མོར་འཇིག་གི་གྲོང་ཁྱེར་ཆེན་པོར་ཕྱིན་པ་དང ། ཆོས་སྨྲ་བ་ག་ལ་བ་དེར་སོང་སྟེ་ཕྱིན་ནས་རྐང་པ་ལ་མགོ་བོས་ཕྱག་བཙལ་ཏེ། དེས་དེ་ཚུལ་ཁྲིམས་ཉམས་པ། སྤྱོད་པ་ཉམས་པ། སྤྱོད་ལམ་མ་བསྔམས་པ་མཐོང་ནས་གདུགས་དང ། ལྷམ་དེ་དག་དང ། གོས་དང ། རྒྱན་དང ། དྲི་དང ། བྱུག་པ་དག་གིས་མཆོད་པ་ཆེན་པོ་བྱས་ནས་ཆོས་སྨྲ་བ་དེའི་མདུན་དུ་ཐལ་མོ་སྦྱར་ཏེ། ཀྱེ་མའོ། །ཆོས་ཀྱི་གཏེར་མྱོང་བར་མཛད་པ། བདུད་རྩིའི་གཏེར་བསགས་པ་ལྟ་བུ་རྒྱ་མཚོ་དང་མཉམ་པ་ཁྱོད་ལ་དཔག་མི་ནུས་སོ། །མིར་གྱུར་པ་ཐམས་ཅད་ཀྱིས་སྣོད་དུ་གྱུར་པའོ། །ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང །
371a
༄#། །མི་མ་ཡིན་པ་དག་ཁྱོད་ལས་ཆོས་ཉན་ཏེ། ཁྱོད་ལ་ཆོས་ཉན་པའི་ཚེ་ཐམས་ཅད་འདུ་བར་བགྱིད་དོ། །ཁྱོད་ནི་རྡོ་རྗེ་ཆེན་པོ་དང་མཉམ་པའི་ཆོས་ཀྱི་རྣམ་གྲངས་འཆད་པར་མཛད་དོ། །སེམས་ཅན་འཁོར་བས་བཅིངས་པའི་བཅིངས་པ་མང་པོ་དག་ཡོངས་སུ་ཐར་བར་མཛད་དོ། །སེམས་ཅན་གང་ཁོར་མོར་འཇིག་གི་གྲོང་ཁྱེར་ཆེན་པོ་ན་གནས་ཤིང་རྟག་ཏུ་ཡོངས་སུ་སྡུད་པར་མཐོང་བ་དེ་དག་ནི་བསོད་ནམས་དང་ལྡན་པ་ལགས་སོ། །དེ་མཐོང་མ་ཐག་ཏུ་སྡིག་པ་ཐམས་ཅད་འཕྲོག་པར་མཛད་པ། དཔེར་ན། མེས་ནགས་ཀྱི་འདབ་མ་མྱུར་དུ་འཚིག་པར་བགྱིད་པ་དེ་བཞིན་དུ་ཁྱོད་མཐོང་མ་ཐག་ཏུ་སྡིག་པ་ཐམས་ཅད་འཕྲོག་པར་མཛད་དོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀྱང་མཁྱེན་ཏོ། །གཞན་ཡང་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང ། ཚངས་པ་དང ། འཇུག་སྲེད་དང ། དབང་ཕྱུག་ཆེན་པོ་དང ། ཉི་མ་དང ། ཟླ་བ་དང ། རླུང་གི་ལྷ་དང ། ཆུའི་ལྷ་དང ། མེའི་ལྷ་དང ། ཆོས་ཀྱི་རྒྱལ་པོ་གཤིན་རྗེ་དང ། རྒྱལ་པོ་ཆེན་པོ་བཞི་དག་ཀྱང་ཁྱོད་ལ་མཆོད་པའི་ལས་བྱ་བའི་ཕྱིར་མཆིའོ། །དེ་ནས་ཆོས་སྨྲ་བ་དེས་དེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་འགྱོད་པ་མ་སྐྱེད་ཅིག་།གྲོགས་པོ། ཉོན་མོངས་པ་ནི་ཆགས་པའོ། །སྤྱད་པའོ། །འཁོར་བའི་
371b
མཚན་མའོ། །སྐྱེ་དགུའི་འཁོར་ལོ་སྐྱེད་པར་བྱེད་པའོ། །གང་ཡི་གེ་དྲུག་མའི་རིག་སྔགས་ཆེན་མོ་ཤེས་པ་དེ་ནི་འདོད་ཆགས་དང ། ཞེ་སྡང་དང ། གཏི་མུག་གིས་མི་གོས་ཏེ། དཔེར་ན། ཛམྦུའི་ཆུ་བོའི་གསེར་དྲི་མས་མི་གོས་པ་དེ་བཞིན་དུ། རིགས་ཀྱི་བུ། གང་གི་ལུས་ལ་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་ཐོགས་པ་དེའི་ལུས་ལ་འདོད་ཆགས་དང ། ཞེ་སྡང་དང།་གཏི་མུག་གིས་མི་གོས་སོ། །དེ་ནས་སྒྲིབ་པ་ཐམས་ཅད་རྣམ་པར་སེལ་བས་རྐང་པ་ལ་དམ་དུ་བཟུང་སྟེ་འདི་སྐད་ཅེས་གསོལ་ཏོ། །དབང་པོ་ཉམས་པའི་མིག་ཏུ་གྱུར་ཅིག་།ལམ་སྟོར་བ་ལ་ལམ་སྟོན་པར་མཛོད་ཅིག་།བདག་ཆོས་ཀྱིས་སྐོམ་པ་ལ་ཆོས་ཀྱི་རོས་ངོམས་པར་མཛོད་ཅིག་།བདག་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ས་བོན་སྩོལ་ཅིག་།ཆོས་ཀྱི་སྐབས་དང་ཤིན་ཏུ་གནས་པའི་ཚུལ་གྱི་གནས་ཡོངས་སུ་དག་པ་སྩོལ་ཅིག་།མི་ཕྱེད་པའི་དགེ་བ་ཐོབ་པའོ་ཞེས་འགྲོ་བ་ཐམས་ཅད་མཆིའོ། །ཚིག་སྙན་པ་བླ་མས་བདག་ལ་ཡི་གེ་དྲུག་པའི་རིག་སྔགས་ཆེན་མོ་སྩོལ་ཅིག་།དེས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མྱུར་དུ་མངོན་པར་རྫོགས་པར་འཚང་རྒྱ་བར་བགྱིའོ། །ཆོས་ཀྱི་འཁོར་ལོ་རྣམ་པ་བཅུ་གཉིས་བསྐོར་བར་བགྱིའོ། །སེམས་ཅན་ཐམས་ཅད་འཁོར་བའི་སྡུག་བསྔལ་ལས་ཡོངས་སུ་ཐར་བར་བགྱིའོ། །སྔོན་མ་ཐོས་པའི་ཆོས་ཐོས་པར་བགྱིའོ། །ཡི་གེ་དྲུག་
372a
༄#། །པའི་རིག་སྔགས་ཆེན་མོའི་རྒྱལ་མོ་འཐོབ་པ་ཐོབ་པར་བགྱིའོ། །ཡི་གེ་དྲུག་པའི་རིག་སྔགས་ཆེན་མོའི་རྒྱལ་མོ་བདག་ལ་སྩོལ་ཅིག་།མགོན་དང ། སྐྱབས་དང།་རྟེན་དུ་གྱུར་ཅིག་།གནས་མ་མཆིས་པ་རྣམས་ཀྱི་གནས་སུ་གྱུར་ཅིག་།དེ་ནས་ཆོས་སྨྲ་བ་དེས་དེ་ལ་འདི་སྐད་ཅེས་སྨྲས་སོ། །ཡི་གེ་དྲུག་པའི་རིག་སྔགས་ཆེན་མོའི་རྒྱལ་མོ་ནི་དཀོན་པའི་ཚིག་སྟེ། འདི་ནི་རྡོ་རྗེའི་ཚིག་གོ་།འདི་ནི་རྡོ་རྗེ་མི་ཕྱེད་པའི་ཚིག་གོ་།བླ་ན་མེད་པའི་ཡེ་ཤེས་ཀྱི་ཚིག་གོ་།མི་ཟད་པའི་ཡེ་ཤེས་ཀྱི་ཚིག་གོ་།ལྟག་ན་མེད་པའི་ཚིག་གོ་།ཐར་པར་འཇུག་པར་བྱེད་པའི་ཚིག་གོ་།དེ་བཞིན་གཤེགས་པའི་ཡེ་ཤེས་རྣམ་པར་དག་པའི་ཚིག་གོ་།འདོད་ཆགས་དང ། ཞེ་སྡང་དང ། གཏི་མུག་དང ། འཁོར་བའི་སྡུག་བསྔལ་ཡོངས་སུ་སྤོང་བའི་ཚིག་གོ་།ཐབས་མཁས་པ་ཐམས་ཅད་ཀྱི་ཚིག་གོ་།བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་གཞོག་པའི་ཚིག་གོ་།ཆོས་ཐམས་ཅད་ལ་འཇུག་པར་བྱེད་པའི་ཚིག་གོ་།རྟག་ཏུ་ལྷ་རྣམས་འདོད་པར་བྱེད་པའི་ཚིག་གོ་།རིགས་ཀྱི་བུ། གང་ཐར་པར་འདོད་པ་གནས་སྣ་ཚོགས་སུ་རབ་ཏུ་བྱུང་བ། བགོ་བ་སྣ་ཚོགས་སུ་རབ་ཏུ་འབྱུང་བ་འདི་ལྟ་སྟེ། དབང་པོའི་བགོ་བ་དང ། དཀར་པོའི་བགོ་བ་དང ། བསྟེན་པའི་བགོ་བ་སྟེ། ཉི་མ་བརྟགས་ནས་དབང་ཕྱུག་ཆེན་པོ་ལ་རབ་ཏུ་འབྱུང་ངོ ། །འཇུག་སྲེད་དང །
372b
ནམ་མཁའ་ལྡིང་དང ། གཅེར་བུ་པ་དང ། རི་མི་དང ། གནས་དེ་དག་ཏུ་རབ་ཏུ་འབྱུང་སྟེ། དེ་དག་ལའང་ཐར་པ་མེད་དོ། །མགོན་ཡང་མ་ཡིན། བརྟུལ་ཞུགས་ཅན་ཡང་མ་ཡིན་ནོ། །ལྷ་མང་པོ་དང ། ཚངས་པ་དང ། འཇུག་སྲེད་དང ། དབང་ཕྱུག་ཆེན་པོ་དང ། བརྒྱ་བྱིན་ལྷའི་དབང་པོ་དང ། ཉི་མ་དང ། ཟླ་བ་དང ། རླུང་གི་ལྷ་དང ། ཆུའི་ལྷ་དང ། མེའི་ལྷ་དང ། ཆོས་ཀྱི་རྒྱལ་པོ་གཤིན་རྗེ་དང ། རྒྱལ་པོ་ཆེན་པོ་བཞི་དག་རྟག་ཏུ་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་སློང་ངོ ། །དེ་དག་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་ཇི་ལྟར་བསླང་བར་བགྱི། བཅོམ་ལྡན་འདས། ཇི་ལྟར་ན་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་བདག་ཅག་གིས་ཐོབ་པར་འགྱུར། ཐར་པ་ལ་གཞོལ་བར་འགྱུར། སྒྲིབ་པ་ཐམས་ཅད་རྣམ་པར་སེལ་བ། འདི་ལྟ་སྟེ། དཔེར་ན། ཤེས་རབ་ཀྱི་ཕ་རོལ་ཏུ་ཕྱིན་པ་ནི་དེ་བཞིན་གཤེགས་པ་ཐམས་ཅད་སྐྱེད་པར་གྲགས་པ་སྟེ། དེའང་ཐལ་མོ་སྦྱར་ནས་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་ལ་ཕྱག་འཚལ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱང་ཆུབ་སེམས་དཔའ་མང་པོ་དང་བཅས་པ་ལྟ་ཅི་སྨོས། རིགས་ཀྱི་བུ།་འདི་ནི་འབྲས་ལྟ་བུར་སྙིང་པོར་གྱུར་པ་ཡིན་ཏེ། རིགས་ཀྱི་བུ། འདི་ལ་ཅུང་ཟད་བཟླས་པས་ཀྱང་ཐེག་པ་ཆེན་པོའི་རྣམ་པ་མང་པོ་མདོ་དང ། དབྱངས་ཀྱིས་བསྙད་པ་དང ། ལུང་བསྟན་
373a
༄#། །པ་དང ། ཚིགས་སུ་བཅད་པ་དང ། ཆེད་དུ་བརྗོད་པ་དང ། གླེང་གཞི་དང ། རྟོགས་པ་བརྗོད་པ་དང ། འདི་ལྟ་བུ་འདས་པ་དང ། སྐྱེས་པའི་རབས་དང ། ཤིན་ཏུ་རྒྱས་པ་དང ། ཆོས་རྨད་དུ་བྱུང་བ་དང ། གཏན་ལ་ཕབ་པ་བསྟན་པ་དང ། ཞི་བ་དང ། ཐར་པའང་ཐོབ་པར་འགྱུར་རོ། །མང་དུ་བཤད་ཅི་དགོས་ཏེ། གཞན་མ་བྱེད་ཅིག་།སའི་ནང་དུ་གཏོགས་པ་ལ་སྙིང་པོར་འཛིན་པ་ཅི་ཡིན་ཞེ་ན། དེ་ལྟར་འབྲས་ནི་སྙིང་པོར་འཛིན་ཏེ། ཁྱེར་ནས་བདག་གི་ཁྱིམ་དུ་སྣོད་རྣམས་ཡོངས་སུ་བཀང་སྟེ་འཇོག་གོ་།བཞག་ནས་ཉི་མའི་ཚུལ་བཞིན་དུ་ཉི་མ་ཚ་བ་ལ་སྐེམས་སོ། །བསྐམས་ནས་གཏུན་ལ་བརྡུངས་ཤིང་ཕུབ་མ་རྣམས་སེལ་ཏོ། །དེའི་སྙིང་པོ་ནི་འབྲས་རྨེའུ་ཡིན་ནོ་ཞེས་དེ་ལྟར་འཇོག་སྟེ། དེ་བཞིན་དུ་རྣལ་འབྱོར་གཞན་དག་ཕུབ་མ་དང་འདྲའོ། །རྣལ་འབྱོར་ཐམས་ཅད་ཀྱི་ནང་ན་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་འདི་ནི་འབྲས་རྨེའུར་གྱུར་པའོ། །རིགས་ཀྱི་བུ། དེའི་ཕྱིར་བྱང་ཆུབ་སེམས་དཔའ་སྦྱིན་པའི་ཕ་རོལ་ཏུ་ཕྱིན་པའི་ཕྱིར། ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ཕྱིར། བཟོད་པའི་ཕ་རོལ་ཏུ་ཕྱིན་པའི་ཕྱིར། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ཕྱིར།་བསམ་གཏན་གྱི་ཕ་རོལ་ཏུ་ཕྱིན་པའི་ཕྱིར། ཤེས་རབ་ཀྱི་ཕ་རོལ་ཏུ་ཕྱིན་པའི་ཕྱིར་ཚེགས་འབྱིན་ཏོ། །རིགས་ཀྱི་བུ། བཟླས་པ་གཅིག་བྱས་པས་ཕ་རོལ་ཏུ་ཕྱིན་པ་དྲུག་ཡོངས་
373b
སུ་རྫོགས་པར་འགྱུར་རོ། །ལ་ལ་ཞིག་གིས་ལག་པས་རེག་པས་རེག་ན་དེ་དག་ཀྱང་ཕྱིར་མི་ལྡོག་པའི་ས་འཐོབ་པར་འགྱུར་རོ། །རིགས་ཀྱི་བུ། ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་འདིའང་དེ་ལྟ་བུ་སྟེ། དེའི་མིང་འཛིན་པའང་དཀོན་ནོ། །མིང་ལན་གཅིག་བཟུང་ན་དེ་བཞིན་གཤེགས་པ་ཐམས་ཅད་ལ་ན་བཟའ་དང ། བཤོས་དང ། མལ་སྟན་དང ། ན་བའི་རྐྱེན་གྱི་སྨན་གྱི་ཡོ་བྱད་དང ། ཡོ་བྱད་ཐམས་ཅད་ཀྱིས་བཀུར་སྟིར་བྱས་པར་འགྱུར་རོ། །དེ་ནས་ཆོས་སྨྲ་བ་དེ་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་སྨྲས་སོ། །ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་བདག་ལ་སྩོལ་ཅིག་།དེ་ནས་ཆོས་ཀྱི་མཁན་པོ་དེ་སེམས་ཤིང་འདུག་པ་ལས། དེ་ལ་ནམ་མཁའ་ལས་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་བྱིན་ཅིག་ཅེས་སྒྲ་བྱུང་ངོ ། །དེ་ནས་ཆོས་སྨྲ་བ་དེ་སྒྲ་ག་ལས་བྱུང་ཞེས་བསམས་པ་དང ། དེ་ནས་ཡང་ནམ་མཁའ་ལས་བྱང་ཆུབ་སེམས་དཔའ་འདིས་བཀའ་བ་སྤྱོད་པ་དུ་མ་ལ་བརྩོན་པར་བྱས་ཀྱི། ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་བྱིན་ཅིག་ཅེས་སྒྲ་བྱུང་ངོ ། །དེ་ནས་ཆོས་སྨྲ་བ་དེས་ནམ་མཁའ་ལ་བལྟས་པ་དང ། འདམ་བུའི་མདའ་བཞིན་དུ་ཁ་དོག་དཀར་བ། རལ་པའི་ཅོད་པན་འཆང་བ། ཐམས་ཅད་མཁྱེན་པ་མགོ་ལ་བཞག་པ། ལག་པ་ན་མེ་ཏོག་པདྨ་བཟང་པོ་ཐོགས་པ། པདྨའི་དཔལ་གྱིས་བརྒྱན་པ་དེ་འདྲ་བའི་གཟུགས་མཐོང་ནས་བྱང་ཆུབ་
374a
༄#། །སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་ལ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་ཡི་གེ་དྲུག་པའི་རིག་སྔགས་ཀྱི་རྒྱལ་མོ་ཆེན་མོ་ཁྱོད་ལ་སྦྱིན་པར་གནང་ངོ་ཞེས་སྨྲས་པ་དང ། གུས་ཤིང་ཐལ་མོ་སྦྱར་ཏེ་ལེན་པར་རྩོམ་མོ། །ོཾ་མ་ཎི་པདྨེ་ཧཱུཾ། འདི་བྱིན་མ་ཐག་ཏུ་ས་རྣམ་པ་དྲུག་ཏུ་གཡོས་སོ། །ཏིང་ངེ་འཛིན་འདི་དག་ཀྱང་སྒྲིབ་པ་ཐམས་ཅད་རྣམ་པར་སེལ་བས་ཐོབ་སྟེ། མི་ཟད་པའི་ཆོས་ཉིད་ཅེས་བྱ་བའི་ཏིང་ངེ་འཛིན་དང ། བྱམས་པ་དང ། སྙིང་རྗེ་དང ། དགའ་བ་ཞེས་བྱ་བའི་ཏིང་ངེ་འཛིན་དང ། རྣལ་འབྱོར་སྤྱོད་ཅེས་བྱ་བའི་ཏིང་ངེ་འཛིན་དང ། ཐར་པ་ལ་འཇུག་པར་འཇོག་ཅེས་བྱ་བའི་ཏིང་ངེ་འཛིན་དང ། ཐམས་ཅད་སྣང་བར་བྱེད་ཅེས་བྱ་བའི་ཏིང་ངེ་འཛིན་དང ། བཀོད་པའི་རྒྱལ་པོ་ཞེས་བྱ་བའི་ཏིང་ངེ་འཛིན་དང ། ཆོས་འཛིན་པ་ཞེས་བྱ་བའི་ཏིང་ངེ་འཛིན་དང ། ཏིང་ངེ་འཛིན་དེ་དག་ཐོབ་བོ། ། བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བས་བླངས་མ་ཐག་ཏུ་མཁན་པོ་ལ་ཡོན་དུ་གླིང་བཞི་རིན་པོ་ཆེ་སྣ་བདུན་གྱིས་ཡོངས་སུ་གང་བ་འབུལ་བར་རྩོམ་པ་དང ། དེ་ནས་ཆོས་ཀྱི་མཁན་པོ་དེས་དེ་ལ་འདི་སྐད་ཅེས་སྨྲས་སོ། །ཡི་གེ་གཅིག་གི་ཡོན་དུའང་མེད་ན་ཡི་གེ་དྲུག་པའི་རིག་སྔགས་ཆེན་མོའི་ལྟ་ཅི་སྨོས། རིགས་
374b
ཀྱི་བུ།་ང་ནི་ཁྱོད་ལས་ལེན་པའང་མེད་དོ། །ཁྱོད་ཀྱང་བྱང་ཆུབ་སེམས་དཔར་གྱུར་པ་སྟེ། ཁྱོད་ནི་འཕགས་པ་ཡིན་གྱི་མ་འཕགས་པ་མ་ཡིན། རིགས་ཀྱི་བུ་ཁྱོད་ནི་ངས་འདུལ་བ་ཡིན་ནོ། ། དེས་དེ་ལ་མུ་ཏིག་གི་ཕྲེང་བ་རིན་བརྒྱ་སྟོང་རི་བ་ཕུལ་བ་དང ། དེས་སྨྲས་པ། རིགས་ཀྱི་བུ། ངའི་ཚིག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕུལ་ཅིག་།དེ་ནས་སྒྲིབ་པ་ཐམས་ཅད་རྣམ་པར་སེལ་བས་ཆོས་སྨྲ་བ་དེའི་རྐང་པ་ལ་མགོ་བོས་ཕྱག་བཙལ་ཏེ་སོང་ངོ ། །རྙེད་པར་བྱ་བ་རྙེད་ཅིང་བསམ་པ་ཡོངས་སུ་རྫོགས་ནས་ཛེ་ཏའི་ཚལ་གྱི་གཙུག་ལག་ཁང་གང་ལ་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཤཱཀྱ་ཐུབ་པའི་ཞབས་ལ་ཕྱག་བཙལ་ནས་ཕྱོགས་གཅིག་ཏུ་འདུག་གོ་།དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཀྱིས་རྙེད་པ་རྙེད་དམ། བཅོམ་ལྡན་འདས། དེ་བཞིན་ཏེ། ཇི་ལྟར་བཅོམ་ལྡན་འདས་ཀྱིས་མཁྱེན་པ་བཞིན་ནོ། །དེ་ནས་ཡང་དག་པར་རྫོགས་པའི་སངས་རྒྱས་བྱེ་བ་ཕྲག་བདུན་ཅུ་རྩ་བདུན་ཚོགས་ཏེ། དེ་བཞིན་གཤེགས་པ་དེ་དག་གིས་གཟུངས་སྔགས་འདི་གསུངས་སོ། །ན་མཿ ་སཔྟ་ནཱཾ། སཾ་མྱ་ཀྶཾ་བུདྡྷ་ཀོ་ཊི་ནཱཾ། ཏདྱ་ཐཱ། ཨོཾ་ཙ་ལེ་ཙུནྡེ་སཝཱཧཱ། གཟུངས་སྔགས་འདི་ནི་ཡང་དག་པར་རྫོགས་པའི་སངས་རྒྱས་བྱེ་བ་ཕྲག་བདུན་
375a
༄#། །ཅུ་རྩ་བདུན་གྱིས་གསུངས་སོ། །བ་སྤུའི་ཁུང་བུ་དེ་འདས་ནས་ཉི་མའི་འོད་ཅེས་བྱ་བའི་བ་སྤུའི་ཁུང་བུ་དེ་ན་བྱང་ཆུབ་སེམས་དཔའ་བྱ་བ་ཁྲག་ཁྲིག་བརྒྱ་སྟོང་དུ་མ་གནས་ཏེ། ཉི་མའི་འོད་ཅེས་བྱ་བའི་བ་སྤུའི་ཁུང་བུ་དེ་ན་གསེར་གྱི་རི་ཁྲི་ཡོད་དེ། རི་རེ་རེ་ཞིང་ཡང་རྩེ་མོ་ཉི་ཁྲི་ཉིས་སྟོང་ཡོད་ལ། རི་དེ་རེ་རེའི་དོས་ནི་རིན་པོ་ཆེ་པདྨ་རཱ་གས་བརྒྱན། ངོས་རེ་རེ་ཞིང་ཡང་ལྷའི་ནོར་བུ་རིན་པོ་ཆེའི་སྐྱེད་མོས་ཚལ་ཤིན་ཏུ་མཛེས་པ། ཤིན་ཏུ་དགའ་བར་བྱེད་པ་རྣམ་པ་སྣ་ཚོགས་དང་ལྷའི་རྫིང་བུས་བརྒྱན་པ། ཁང་པ་བརྩེགས་མ་བརྒྱ་ཕྲག་སྟོང་དུ་མ་ནི་ལྷའི་གསེར་དང་རིན་པོ་ཆེ་ལས་བྱས་ཤིང་མུ་ཏིག་དང་དར་གྱི་ལྔ་ལྡི་ནི་བྲེས། མུ་ཏིག་གི་སེ་མོ་དོ་བརྒྱ་དག་ནི་འཕྱང་ངོ ། །ཁང་པ་བརྩེགས་མ་དེའི་ནང་ན་ཡིད་བཞིན་གྱི་ནོར་བུ་རིན་པོ་ཆེ་ཤ་རི་ད་ཀ་ཡོད་པས་ནི་བྱང་ཆུབ་སེམས་དཔའ་དེ་དག་ལ་ཡོ་བྱད་ཐམས་ཅད་ཀྱིས་བསྙེན་བཀུར་བྱེད་དོ། །དེའི་ཚེ་བྱང་ཆུབ་སེམས་དཔའ་དེ་དག་ཁང་པ་བརྩེགས་མ་དེར་འགྲོའོ། །དེར་སོང་ནས་ཀྱང་ཡི་གེ་དྲུག་པའི་རིག་སྔགས་ཀྱང་རྗེས་སུ་དྲན་ནོ། །གང་གི་ཚེ་ན་རྗེས་སུ་དྲན་པ་དེའི་ཚེ་མྱ་ངན་ལས་འདའ་བ་རྟོགས་པར་འགྱུར་རོ། །མྱ་ངན་ལས་འདའ་བའི་ས་དེ་ལ་དེ་བཞིན་གཤེགས་པ་བདུན་མཐོང་ངོ ། །བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་དེའང་མཐོང་ངོ ། །མཐོང་ནས་ཀྱང་སེམས་དད་པ་སྐྱེད་
375b
དོ། །བསྐྱེད་ནས་དེའི་ཚེ་བྱང་ཆུབ་སེམས་དཔའ་དེ་དག་ཁང་པ་བརྩེགས་མ་དེ་ནས་འབྱུང་ངོ ། །བྱུང་ནས་ཁ་ཅིག་ནི་འཆག་སར་འགྲོའོ། །ཁ་ཅིག་ནི་ཡིད་བཞིན་གྱི་ནོར་བུ་རིན་པོ་ཆེའི་སྐྱེད་མོས་ཚལ་དུ་འགྲོའོ། །ཁ་ཅིག་ནི་རྫིང་བུ་དག་ཏུ་འགྲོའོ། །ཁ་ཅིག་ནི་ནོར་བུ་རིན་པོ་ཆེ་པདྨ་རཱ་གའི་རིའི་ངོས་ལ་འགྲོའོ། །དོང་ནས་སྐྱིལ་མོ་ཀླུང་བཅས་ལུས་དྲང་པོར་བསྲངས་ཏེ་དྲན་པ་མངོན་པར་བཞག་ནས་འཁོད་དོ། །རིགས་ཀྱི་བུ། བ་སྤུའི་ཁུང་བུ་དེ་ན་བྱང་ཆུབ་སེམས་དཔའ་དེ་ལྟ་བུ་དག་གནས་སོ། །རིགས་ཀྱི་བུ། དེ་འདས་ནས་དབང་པོའི་རྒྱལ་པོ་ཞེས་བྱ་བའི་བ་སྤུའི་ཁུང་བུ་དེ་ན་བྱང་ཆུབ་སེམས་དཔའ་ཕྱིར་མི་ལྡོག་པ་བརྒྱ་ཕྲག་སྟོང་དུ་མ་གནས་ཏེ། དབང་པོའི་རྒྱལ་པོའི་བ་སྤུའི་ཁུང་བུ་དེ་ན་ལྷའི་གསེར་གྱི་རི་བརྒྱད་ཁྲི་ཡོད་དོ། །རི་དེ་དག་གི་དབུས་ན་ནོར་བུ་རིན་པོ་ཆེ་མེ་ཏོག་པདྨ་ལྟར་སྣང་བ་ཞེས་བྱ་བ་ཞིག་ཡོད་དེ། གང་གི་ཚེ་ན་བྱང་ཆུབ་སེམས་དཔའ་དེ་དག་སེམས་པར་གྱུར་པ་དེའི་ཚེ་དེ་དག་གི་བསམ་པ་གྲུབ་པར་འགྱུར་རོ། །དེ་ལྟར་བྱང་ཆུབ་སེམས་དཔའ་དེ་དག་རིའི་རྒྱལ་པོ་དེ་ལ་གནས་ཤིང་ཟས་དང་སྐོམ་གྱི་དྲན་པ་མི་སྒོམ་མོ། །དེ་དག་འཁོར་བའི་སྡུག་བསྔལ་གྱིས་གཟིར་བར་ཡང་མི་འགྱུར་རོ། །དེ་དག་འཁོར་བའི་སྡུག་བསྔལ་གྱིས་གོས་པར་ཡང་མི་འགྱུར་རོ། །དུས་ཐམས་ཅད་དུ་མྱ་ངན་ལས་འདས་པ་ལ་སེམས་ཤིང་གནས་ཀྱི། དེ་དག་གི་ལུས་ལ་གཞན་སེམས་པ་མེད་དོ། །རིགས་ཀྱི་བུ། དེ་འདས་ནས་སྨན་ཆེན་པོ་ཞེས་བྱ་
376a
༄#། །བའི་བ་སྤུའི་ཁུང་བུ་དེ་ན་བྱང་ཆུབ་སེམས་དཔའ་སེམས་ཐོག་མ་བསྐྱེད་པ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་གནས་སོ། །རིགས་ཀྱི་བུ། བ་སྤུའི་ཁུང་བུ་དེ་ན་རི་དགུ་ཁྲི་ཡོད་དེ། ལ་ལ་ནི་རྡོ་རྗེའིའོ། །ལ་ལ་ནི་དངུལ་གྱིའོ། །ལ་ལ་ནི་གསེར་གྱིའོ། །ལ་ལ་ནི་ནོར་བུ་རིན་པོ་ཆེ་ཨིནྡྲ་ནཱི་ལའིའོ། །ལ་ལ་ནི་པདྨ་རཱ་གའིའོ། །ལ་ལ་ནི་མ་ར་ག་ཏའིའོ། །ལ་ལ་ནི་ཤེལ་གྱིའོ། །རིའི་རྒྱལ་པོ་དེ་ལྟ་བུ་དག་ཡོད་དོ། །རི་རེ་རེ་ཞིང་ཡང་རྩེ་མོ་བརྒྱད་ཁྲི་ཡོད་དེ། རིན་པོ་ཆེ་སྣ་ཚོགས་ཀྱིས་བརྒྱན་པ། ཤིན་ཏུ་མཛེས་པར་བྱས་པ་རྣམ་པ་སྣ་ཚོགས་པ་ཡིད་དུ་འོང་བ་དག་གོ་།རྩེ་མོ་དེ་དག་ལ་དྲི་ཟ་དག་གནས་ཏེ། དེ་དག་དུས་ཐམས་ཅད་དུ་བ་སྤུའི་ཁུང་བུ་ནས་སིལ་སྙན་འབྱུང་བ་འཛིན་ཏོ། །གང་སེམས་ཐོག་མ་བསྐྱེད་པའི་བྱང་ཆུབ་སེམས་དཔའ་དེ་དག་ཀྱང་སྟོང་པ་ཉིད་དང ། མཚན་མ་མེད་པ་ལ་སེམས་ཏེ། ཀྱེ་མའོ། །སྡུག་བསྔལ་ལོ། །སྐྱེ་བ་དང ། རྒ་བ་དང ། ན་བ་དང ། འཆི་བ་སྡུག་བསྔལ་ལོ། །སྡུག་ཅིང་མཛའ་བ་དང་བྲལ་ཞིང ། མི་སྡུག་ཅིང་མི་མཛའ་བ་དང་ཕྲད་པ་ནི་སྡུག་བསྔལ་ལོ། །བསྟིར་མེད་པར་སྐྱེས་པ་ནི་སྡུག་བསྔལ་ལོ། །ཐིག་ནག་པོ་འདེབས་པར་སྐྱེས་པ་ནི་སྡུག་བསྔལ་ལོ། །སེམས་ཅན་ཡི་དྭགས་ཀྱི་གྲོང་ཁྱེར་དུ་སྐྱེས་པ་རྣམས་ནི་སྡུག་བསྔལ་ལོ་ཞེས་དེ་ལྟ་བུའི་ལུས་ལ་སྐྱོ་བ་དག་བསམས་ནས་དེའི་ཚེ་སྐྱིལ་མོ་ཀྲུང་བཅས་ཏེ། ལུས་དྲང་པོར་
376b
བསྲངས་ནས་དྲན་པ་མངོན་པར་བཞག་སྟེ་རི་དེ་དག་ལ་གནས་སོ། །རིགས་ཀྱི་བུ། དེ་འདས་ནས་སྣ་ཚོགས་ཀྱི་རྒྱལ་པོ་ཞེས་བྱ་བའི་བ་སྤུའི་ཁུང་བུ་དེ་ན་རང་སངས་རྒྱས་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མ་གནས་ཏེ། དེ་དག་ནི་འབར་བ་དང ། གདུང་བ་དང ། ཆར་འབེབས་པ་དང ། གློག་གཏོང་བའི་ཆོ་འཕྲུལ་དག་བྱེད་དེ། བ་སྤུའི་ཁུང་བུ་དེ་ན་རིའི་རྒྱལ་པོ་བརྒྱ་ཕྲག་སྟོང་དག་ཡོད་དོ། །རིའི་རྒྱལ་པོ་དེ་དག་ཐམས་ཅད་ཀྱང་རིན་པོ་ཆེ་སྣ་བདུན་ལས་བྱས་པའོ། །རིའི་རྒྱལ་པོ་དེ་དག་ལ་ཤིང་དཔག་བསམ་རྣམ་པ་སྣ་ཚོགས་པར་ཡོད་དོ། །སྡོང་པོ་ནི་མུ་ཏིག་དམར་པོ་དང ། ལོ་མ་ནི་གསེར་དང ། དངུལ་ལས་བྱས་པའོ། །རིན་པོ་ཆེ་རྣམ་པ་དུ་མ་དང་རྒྱན་རྣམ་པ་སྣ་ཚོགས་པ་དག་ནི་འཕྱང་ངོ ། །ཅོད་པན་དང ། རྣ་ཆ་དང ། ཕྲེང་བའི་ཆུན་པོ་དང ། དཔུང་རྒྱན་དང ། སེ་མོ་དོ་དང ། སེ་མོ་དོ་ཕྱེད་པ་དག་ཀྱང་རབ་ཏུ་འཕྱང་ངོ ། །ཡུལ་ཀ་ཤི་ཀ་ནས་བྱུང་བའི་གོས་དག་ཀྱང་རབ་ཏུ་འཕྱང་ངོ ། །གསེར་དང་དངུལ་གྱི་དྲིལ་བུ་དག་ཀྱང་སྒྲ་སིལ་སིལ་གྲག་སྟེ། དེ་འདྲ་བའི་རིའི་རྒྱལ་པོ་དེ་དག་ལ་རང་སངས་རྒྱས་དེ་དག་གནས་ཏེ། མདོ་དང ། དབྱངས་ཀྱིས་བསྙད་པ་དང ། ལུང་བསྟན་པ་དང ། ཚིགས་སུ་བཅད་པ་དང ། ཆེད་དུ་བརྗོད་པ་དང ། གླེང་གཞི་དང ། རྟོགས་པ་བརྗོད་པ་དང ། དེ་ལྟ་བུ་འདས་པ་དང ། སྐྱེས་པའི་རབས་དང ། ཤིན་ཏུ་རྒྱས་པ་དང ། ཆོས་རྨད་དུ་བྱུང་བ་དང ། ཆོས་གཏན་ལ་དབབ་པ་བསྟན་པའི་གཏམ་རྣམ་པ་
377a
༄#། །དུ་མ་དག་ཕན་ཚུན་དུ་སྨྲ་སྟེ། དེའི་ཚེ་སྒྲིབ་པ་ཐམས་ཅད་རྣམ་པར་སེལ་བ་བ་སྤུའི་ཁུང་བུ་དེ་འདས་ནས་ཐམས་ཅད་ཀྱི་ཐ་མ་ན་བ་སྤུའི་ཁུང་བུ་རྒྱལ་མཚན་གྱི་རྒྱལ་པོ་ཞེས་བྱ་བ་ཞིག་ཡོད་དེ། བ་སྤུའི་ཁུང་བུ་དེ་ནའང་དཔག་ཚད་བརྒྱད་ཁྲི་བཞི་སྟོང་ཡོད་དོ། །བ་སྤུའི་ཁུང་བུ་དེ་ན་རི་བརྒྱད་ཁྲི་བཞི་སྟོང་ཡོད་དེ། རིན་པོ་ཆེ་སྣ་ཚོགས་ཀྱིས་བརྒྱན་པ་ཡིད་དུ་འོང་བ་རྣམ་པ་སྣ་ཚོགས་པའོ། །རིའི་རྒྱལ་པོ་དེ་ལ་ཤིང་དཔག་བསམ་བརྒྱ་ཕྲག་སྟོང་དུ་མ་ཡོད་དོ། །ཙནྡན་གྱི་ཤིང་བརྒྱ་ཕྲག་སྟོང་དུ་མ་ཡོད་དོ། །བྱུ་རུའི་ཤིང་བརྒྱ་ཕྲག་སྟོང་དུ་མ་དག་ཡོད་དོ། །བ་སྤུའི་ཁུང་བུ་དེ་ནས་ནི་རྡོ་རྗེ་ལས་བྱས་པའོ། །བ་སྤུའི་ཁུང་བུ་དེ་ན་གསེར་དང་རིན་པོ་ཆེ་ལས་བྱས་པའི་ཁང་པ་བརྩེགས་མ་དགུ་ཁྲི་དགུ་སྟོང་ཡོད་དེ། མུ་ཏིག་དང་དར་གྱི་ལྡ་ལྡི་ནི་བྲེས། མུ་ཏིག་གི་སེ་མོ་དོ་ནི་དཔྱངས། དྲིལ་བུའི་ཕྲེང་བ་ནི་དཔྱངས། ཟླ་བ་བཞིན་དུ་བཟང་བའི་རིན་པོ་ཆེས་ནི་སྣང་བར་བྱས་ཏེ། ཁང་པ་བརྩེགས་མ་དེ་ན་གསེར་གྱི་སྐས་རིན་པོ་ཆེས་ཡོངས་སུ་སྤྲས་པ་རྣམ་པ་སྣ་ཚོགས་པ་དགའ་བར་བྱེད་པ་དག་ཀྱང་ཡོད་དོ། །ཁང་པ་བརྩེགས་མ་དེ་དག་ན་དེ་བཞིན་གཤེགས་པའི་སྐུ་ཛམྦུའི་གླིང་དུ་མངོན་པར་ཕྱོགས་ཤིང་ཆོས་འཆད་པའང་བཞུགས་ཏེ། འདི་ལྟ་སྟེ། ཕ་རོལ་ཏུ་ཕྱིན་པ་དྲུག་བསྟན་པ་སྟོན་པར་མཛད་དེ། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་བསྟན་པ་སྟོན་
377b
པར་མཛད། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྟན་པར་མཛད། བཟོད་པའི་ཕ་རོལ་ཏུ་ཕྱིན་པ་བསྟན་པ་སྟོན་པར་མཛད། བརྩོན་འགྲུས་ཀྱི་ཕ་རོལ་ཏུ་ཕྱིན་པ་བསྟན་པ་སྟོན་པར་མཛད། བསམ་གཏན་གྱི་ཕ་རོལ་ཏུ་ཕྱིན་པ་བསྟན་པ་སྟོན་པར་མཛད། ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་སྟོན་པར་མཛད་དེ། དེ་ལྟར་དེ་དག་ཛམྦུའི་གླིང་ན་གནས་པའི་མི་རྣམས་ལ་ཆོས་རྣམ་པ་སྣ་ཚོགས་དག་དུས་དུས་སུ་འཆད་དོ། །དེ་ལྟར་རིགས་ཀྱི་བུ་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བ་སྤུའི་ཁུང་བུ་དེ་དག་ཛེ་ཏའི་ཚལ་གྱི་གཙུག་ལག་ཁང་དུ་ཕྱིན་པའི་ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། མི་དང ། མི་མ་ཡིན་པ་དང ། དབང་ཕྱུག་ཆེན་པོ་དང ། མཐུ་བོ་ཆེ་ལ་སོགས་ཏེ་ལྷའི་བུ་ཚོགས་པ་དག་དང ། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མ་དག་གིས་མཐོང་ངོ ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། བ་སྤུའི་ཁུང་བུ་གཞན་དག་མཆིས་སམ་མ་མཆིས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། དེ་འདས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་རྐང་པ་གཡས་པའི་མཐེ་བོ་དེ་ལས་མཚོ་ཆེན་པོ་བཞི་
378a
༄#། །འབྱུང་སྟེ། གཏིང་དཔོག་མི་ནུས་སོ། །གང་གི་ཚེ་ན་རྐང་པ་གཡས་པའི་མཐེ་བོ་ལས་ཆུ་འབྱུང་བ་དེའི་ཚེ་རྟ་རྒོད་མའི་གདོང་ལྟ་བུར་འབབ་སྟེ། དེའི་ཚེ་ཐལ་བའི་ཕུང་པོར་འགྲོའོ། །རིགས་ཀྱི་བུ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བྱིན་གྱི་རླབས་ནི་དེ་འདྲའོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། བ་སྤུའི་ཁུང་བུ་དེའང་མ་མཆིས་པ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ།་དེའང་མེད་པ་ཡིན་ནོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་མཆིའམ། བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནི་ཛེ་ཏའི་ཚལ་གྱི་གཙུག་ལག་ཁང་འདི་ཉིད་དུ་ང་ལ་བལྟ་བ་དང ། ཕྱག་བྱ་བ་དང ། བསྙེན་བཀུར་བྱ་བ་དང ། དབང་ཕྱུག་ཆེན་པོ་རྒྱུ་དང་བཅས་ཏེ་ལུང་བསྟན་པའི་ཕྱིར་འོང་ངོ ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་ཀྱི་དབང་པོས་འོད་ཟེར་སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། ཤེལ་གྱི་ཁ་དོག་
378b
དང།་དངུལ་གྱི་ཁ་དོག་བཏང་ནས་ཁ་དོག་དེ་དག་ཛེ་ཏའི་ཚལ་གྱི་གཙུག་ལག་ཁང་དུ་སོང་ངོ ། །སོང་ནས་བཅོམ་ལྡན་འདས་ལ་ལན་གསུམ་བསྐོར་ཏེ། བསྟིར་མེད་པའི་སེམས་ཅན་དམྱལ་བ་ཆེན་པོར་སོང་ངོ ། །སོང་ནས་བསྟིར་མེད་པའི་སེམས་ཅན་དམྱལ་བ་ཆེན་པོ་བསིལ་བར་གྱུར་ཏོ། །དེའི་ཚེ་ཛེ་ཏའི་ཚལ་གྱི་གཙུག་ལག་ཁང་དུ་ལྟས་བཟང་པོ་བྱུང་བར་གྱུར་པ་ཛེ་ཏའི་ཚལ་གྱི་གཙུག་ལག་ཁང་དེ་ལྷའི་གསེར་རིན་པོ་ཆེར་སྣང་བར་གྱུར་ཏེ། ཛེ་ཏའི་ཚལ་གྱི་གཙུག་ལག་ཁང་དེ་ལྟར་སྣང་ངོ ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་བདེ་བ་ཅན་གྱི་འཇིག་རྟེན་གྱི་ཁམས་ནས་བྱུང་སྟེ། ཛེ་ཏའི་ཚལ་གྱི་གཙུག་ལག་ཁང་ག་ལ་བ་དེ་ལོགས་སུ་སོང་ནས་རིམ་གྱིས་ཛེ་ཏའི་ཚལ་གྱི་གཙུག་ལག་ཁང་ག་ལ་བ་དེར་ཕྱིན་ཏོ། །དེ་ནས་ཛེ་ཏའི་ཚལ་གྱི་གཙུག་ལག་ཁང་དུ་སོང་བ་དང ། དེའི་ཚེ་བཅོམ་ལྡན་འདས་ཀྱིས་བྱ་ཀ་ལ་པིངྐའི་དབྱངས་ཀྱིས་བཀའ་སྩལ་པ། རིགས་ཀྱི་བུ་ཁྱོད་ངལ་ལམ། ཁྱོད་ཉོན་མོངས་སམ། ཁྱོད་ཀྱིས་སེམས་ཅན་ཡོངས་སུ་སྨིན་པར་བྱས་སམ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཇི་ལྟར་བཀའ་སྩལ་པ་བཞིན་ཏེ། བདག་གིས་དེ་ལྟ་བུའི་ལས་ཀྱིས་བསྒྲུབས་སོ། །དེ་ནས་བཅོམ་ལྡན་
379a
༄#། །འདས་ཀྱིས་རིགས་ཀྱི་བུ་གང་ཁྱོད་ཀྱིས་དེ་འདྲ་བའི་ལས་ཀྱིས་བསྒྲུབས་པ་ལེགས་སོ། །ལེགས་སོ། །ཞེས་བྱ་བ་བྱིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་བཅོམ་ལྡན་འདས་ལ་མེ་ཏོག་པདྨ་ཕུལ་ནས། བཅོམ་ལྡན་འདས་ལ་དེ་བཞིན་གཤེགས་པ་སྣང་བ་མཐའ་ཡས་པས་མེ་ཏོག་པདྨ་འདི་དག་གསོལ་ཏེ་བསྙུང་བ་མ་མཆིས་སམ། འོ་བརྒྱལ་བ་མ་མཆིས་སམ། བཞེངས་པ་ཡང་ངམ། བདེ་བ་ལ་རེག་པར་གནས་སམ་ཞེས་ཀྱང་གསུང་ངོ་ཞེས་སྨྲས་ནས། བཅོམ་ལྡན་འདས་ཀྱིས་བཞེས་ཏེ་གཡོན་ཕྱོགས་སུ་བཞག་གོ་།དེ་ནས་ལྷའི་བུ་དབང་ཕྱུག་ཆེན་པོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་འདི་སྐད་ཅེས་གསོལ་ཏེ། བཅོམ་ལྡན་འདས། བདག་གིས་ལུང་སྟོན་པའི་བཤད་པ་ཐོབ་པར་མཛད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། སོང་ཞིག་དང ། ཁྱོད་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་ལུང་སྟོན་པར་འགྱུར་རོ། །དེ་ནས་ལྷའི་བུ་དབང་ཕྱུག་ཆེན་པོ་སོང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་རྐང་པ་ལ་ཕྱག་བཙལ་ནས་སྤྱན་རས་གཟིགས་ཀྱི་དབང་པོ་དབང་ཕྱུག་ཆེན་པོ་ཆོས་འཛིན་པ།
379b
པདྨའི་ཞལ། པདྨ་ལ་དགྱེས་པ། ཕྱག་ན་མེ་ཏོག་པདྨ་བཟང་པོ་མངའ་བ། པདྨའི་དཔལ་དང་ལྡན་པ། ཡོངས་སུ་བསྐོར་བ། འགྲོ་བ་དབུགས་འབྱིན་པར་མཛད་པ། སའི་སྤྱན་མཆོག་མཛད་པ། སིམ་པར་མཛད་པ་ལ་ཕྱག་འཚལ་ལོ། །ཞེས་ལྷའི་བུ་དབང་ཕྱུག་ཆེན་པོས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་དེ་ལྟར་བསྟོད་ནས་ཁ་རོག་སྟེ་འདུག་པ་དང ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་དབང་ཕྱུག་ཆེན་པོ་དེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཅིའི་ཕྱིར་ཁ་རོག་སྟེ་འདུག་།དེ་ནས་ལྷའི་བུ་དབང་ཕྱུག་ཆེན་པོས་འདི་སྐད་ཅེས་སྨྲས་སོ། །བདག་བླ་ན་མེད་པ་ཡང་དག་པར་རྫོགས་པར་བྱང་ཆུབ་ཏུ་ལུང་བསྟན་པ་སྩལ་དུ་གསོལ། དེ་ནས་སྤྱན་རས་གཟིགས་ཀྱིས་གསུངས་པ། རིགས་ཀྱི་བུ་ཁྱོད་འཇིག་རྟེན་གྱི་ཁམས་ཕྱེ་བ་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིགས་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་དབང་ཕྱུག་ཅེས་བྱ་བར་འགྱུར་རོ། །དེ་ནས་ལྷ་མོ་ཨུ་མ་སོང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་རྐང་པ་ལ་མགོ་
380a
༄#། །བོས་ཕྱག་བཙལ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་བསྟོད་པར་རྩོམ་པ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ཆེན་པོ། སྲོག་སྦྱིན་པར་མཛད་པ། སའི་སྤྱན་མཆོག་མཛད་པ། པདྨ་བཟང་པོ་ཕྱག་ན་མངའ་བ། པདྨའི་དཔལ་དང་ལྡན་པ། ཡོངས་སུ་བསྐོར་བ། མྱ་ངན་ལས་འདའ་བའི་ས་སྟོན་པ། ལེགས་པར་དགོངས་པ་མཛད་པ། ཆོས་འཛིན་པ་ལ་ཕྱག་འཚལ་ལོ། །ཞེས་དེ་ལྟར་ལྷ་མོ་ཨུ་མས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་བསྟོད་དེ་གསོལ་པ། བུད་མེད་ཀྱི་ལུས་སྨད་པ་ལས་བདག་ཡོངས་སུ་ཐར་པར་མཛད་དུ་གསོལ། མངལ་ན་གནས་ཤིང་ཤ་མ་གང་བའི་སྡུག་བསྔལ་བ་དང ། རྟག་ཏུ་འཛིན་པ་ལས་བདག་ཡོངས་སུ་ཐར་པར་མཛད་དུ་གསོལ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་དེ་ལ་འདི་སྐད་ཅེས་སྨྲས་སོ། །སྲིང་མོ་ཁྱོད་འཇིག་རྟེན་གྱི་ཁམས་གངས་ཀྱི་རིའི་གཡས་ཕྱོགས་ཀྱི་ངོས་སུ་ཨུ་མའི་དབང་ཕྱུག་ཅེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་
380b
མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་འབྱུང་བར་འགྱུར་རོ། །དེ་ནས་ལྷ་མོ་ཨུ་མས་ལུང་བསྟན་པ་ཐོབ་བོ། །ལྟོས་ཤིག་།སྒྲིབ་པ་ཐམས་ཅད་རྣམ་པར་སེལ་བ།་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏེ། དབང་ཕྱུག་ཆེན་པོའི་ལེའུ་འདིའང་བཤད་དོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། སྤྱན་རས་གཟིགས་ཀྱི་དབང་པོ་མཆིས་ཏེ། ལོང་བ་དག་གིས་ནི་མིག་ཐོབ་བོ། །དེ་རིང་བདག་ནི་ཚེའི་འབྲས་བུ་མཆིས་པར་གྱུར་ཏོ། །བདག་དེ་རིང་ནི་བསམ་པ་བཞིན་དུ་གྲུབ་བོ། །བདག་དེ་རིང་ནི་བསམ་པ་ཡོངས་སུ་རྫོགས་སོ། །བདག་དེ་རིང་ནི་བྱང་ཆུབ་ཀྱི་ལམ་ལ་བར་ཆད་མ་མཆིས་པར་གྱུར་ཏོ། །ལེགས་པར་དགོངས་པ་ཆོས་ཀྱི་སྐུ་མྱ་ངན་ལས་འདས་པ་སྟོན་ཏོ། །དེ་ནས་བཅོམ་ལྡན་འདས་ལ་ཡང་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་རིང་བདག་ལ་སྤྱན་རས་གཟིགས་ཀྱི་དབང་པོའི་ཡོན་ཏན་གྱི་བྱེ་བྲག་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། སྒྲིབ་པ་ཐམས་ཅད་རྣམ་པར་སེལ་བ། འདི་ལྟ་སྟེ། དཔེར་ན། རིའི་རྒྱལ་པོ་ཁོར་ཡུག་དང ། ཁོར་ཡུག་ཆེན་པོ་དང ། རིའི་རྒྱལ་པོ་མུ་ཙི་ལིན་ད་དང །
381a
༄#། །རིའི་རྒྱལ་པོ་ནག་པོ་དང ། ནག་པོ་ཆེན་པོ་དང ། རིའི་རྒྱལ་པོ་གསུས་ཤོལ་དང ། རིའི་རྒྱལ་པོ་མི་སྟོན་པ་དང ། རིའི་རྒྱལ་པོ་ཐམས་ཅད་དུ་གཏོགས་པ་དང ། རིའི་རྒྱལ་པོ་འབར་བའི་ཁ་དང ། རིའི་རྒྱལ་པོ་རྩེ་མོ་བརྒྱ་པ་དང ། རིའི་རྒྱལ་པོ་ཁང་པ་དང ། རིའི་རྒྱལ་པོ་ནོར་བུ་རིན་པོ་ཆེ་ཆེན་པོ་དང ། རིའི་རྒྱལ་པོ་སྟོན་པ་དང ། རིའི་རྒྱལ་པོ་དུས་མ་ཡིན་པར་སྟོན་པ་དང ། རིའི་རྒྱལ་པོ་དེ་དག་སྲང་གཅིག་ལ་བཏབ་ན། རིགས་ཀྱི་བུ། ངས་རིའི་རྒྱལ་པོ་དེ་དག་སྲང་འདི་སྙེད་ཅིག་གོ་ཞེས་སམ། སྲང་བརྒྱའོ་ཞེས་སམ། སྲང་སྟོང་ངོ་ཞེས་སམ། བྱེ་བ་ཁྲག་ཁྲིག་བརྒྱ་སྟོང་ཞེས་སམ། གྲངས་སུའང ། ཆར་ཡང ། བགྲང་བར་ཡང་ནུས་ཀྱི། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་བསོད་ནམས་ཀྱི་ཕུང་པོ་ནི་བགྲང་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། རྡུལ་ཕྲ་རབ་ཀྱི་ཚད་ནི་ངས་བགྲང་ནུས་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་ངས་བགྲང་བར་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། རྒྱ་མཚོ་མཆིང་རྣམ་ཆེན་པོ་ནི་ངས་ཐིགས་པ་རེ་རེ་ནས་བགྲང་ནུས་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་བགྲང་མི་ནུས་སོ། །རིགས་ཀྱི་བུ། འདི་ལྟ་སྟེ་
381b
དཔེར་ན། ཤིང་ཤིར་ཥའི་ཚལ་ནི་ངས་འདབ་མ་རེ་རེ་ནས་བགྲང་ནུས་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་བགྲང་བར་མི་ནུས་སོ། །སྒྲིབ་པ་ཐམས་ཅད་རྣམ་པར་སེལ་བ། འདི་ལྟ་སྟེ། དཔེར་ན། རི་རབ་རིའི་རྒྱལ་པོ་ནི་གྲོ་གའི་ཕུང་པོར་གྱུར། རྒྱ་མཚོ་མཆིང་རྣམ་ཆེན་པོ་ནི་སྣག་ཚར་གྱུར། གླིང་ཆེན་པོ་བཞི་ན་གནས་པའི་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་དེ་དག་ཐམས་ཅད་ནི་ཡི་གེ་པར་གྱུར་ཏེ། རིའི་རྒྱལ་པོ་མཐའ་ཡས་མུ་མེད་པ་ཡི་གེར་བྲིས་ཀྱང་ཡི་གེ་འབྲུམ་བུ་རེ་རེ་ནས་བགྲང་ནུས་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་བསོད་ནམས་ཀྱི་ཚོགས་ནི་བགྲང་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་ཕྲག་བཅུ་གཉིས་དང་མཉམ་པའི་ན་བཟའ་དང ། བཤོས་དང ། མལ་སྟན་དང ། ན་བའི་རྐྱེན་གྱི་སྨན་གྱི་ཡོ་བྱད་ཐམས་ཅད་ཀྱིས་དེ་བཞིན་གཤེགས་པ་དེ་དག་ལ་བསྙེན་བཀུར་བྱས་ན། དེ་བཞིན་གཤེགས་པ་དེ་དག་ལ་བསྙེན་བཀུར་བྱས་པའི་བསོད་ནམས་ཀྱི་ཕུང་པོ་དེ་ནི། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་སྐྲའི་ཉག་མ་གཅིག་གི་རྩེ་མོ་ལ་གནས་པའི་བསོད་
382a
༄#། །ནམས་དང་མཉམ་མོ། །སྒྲིབ་པ་ཐམས་ཅད་རྣམ་པར་སེལ་བ། འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནི་ཏིང་ངེ་འཛིན་བརྒྱ་ཕྲག་དུ་མ་དང་ལྡན་ཏེ། འདི་ལྟ་སྟེ། རབ་ཏུ་འཇོམས་ཞེས་བྱ་བའི་ཏིང་ངེ་འཛིན་དང ། རྒྱན་པར་བྱེད་ཅེས་བྱ་བའི་ཏིང་ངེ་འཛིན་དང ། རྒྱན་པར་མི་བྱེད་ཅེས་བྱ་བའི་ཏིང་ངེ་འཛིན་དང ། གློག་གི་སྤྱན་ཞེས་བྱ་བའི་ཏིང་ངེ་འཛིན་དང ། བཟོད་པར་བྱེད་ཅེས་བྱ་བའི་ཏིང་ངེ་འཛིན་དང ། གཟི་ཅན་ཆེན་པོ་ཞེས་བྱ་བའི་ཏིང་ངེ་འཛིན་དང ། རྣམ་པར་བྱེད་ཅེས་བྱ་བའི་ཏིང་ངེ་འཛིན་དང ། རྡོ་རྗེའི་ཕྲེང་བ་ཞེས་བྱ་བའི་ཏིང་ངེ་འཛིན་དང ། དམ་པ་སྦྱིན་བྱེད་ཅེས་བྱ་བའི་ཏིང་ངེ་འཛིན་དང ། མཐུ་བརྒྱ་པ་ཞེས་བྱ་བའི་ཏིང་ངེ་འཛིན་དང ། བཀོད་པ་མཐའ་ཡས་པ་ཞེས་བྱ་བའི་ཏིང་ངེ་འཛིན་དང ། སྤོབས་པའི་ཕུང་པོ་ཞེས་བྱ་བའི་ཏིང་ངེ་འཛིན་དང ། རྒྱལ་པོའི་དབང་པོ་ཞེས་བྱ་བའི་ཏིང་ངེ་འཛིན་དང ། རྣམ་པ་མང་པོ་ཞེས་བྱ་བའི་ཏིང་ངེ་འཛིན་དང ། རྡོ་རྗེའི་སྒོ་ཞེས་བྱ་བའི་ཏིང་ངེ་འཛིན་དང ། རྟག་ཏུ་དམ་པ་སྦྱིན་བྱེད་ཅེས་བྱ་བའི་ཏིང་ངེ་འཛིན་དང ། དབང་པོ་ཡོངས་སུ་ཐར་བྱེད་ཅེས་བྱ་བའི་ཏིང་ངེ་འཛིན་དང ། ཞེ་སྡང་ཡོངས་སུ་ཐར་བྱེད་ཅེས་བྱ་བའི་ཏིང་ངེ་འཛིན་དང ། དབང་པོ་དམ་པའི་མིག་ཅེས་བྱ་བའི་ཏིང་ངེ་འཛིན་དང ། ཉིན་བྱེད་དམ་པའི་མིག་ཅེས་བྱ་བའི་ཏིང་ངེ་འཛིན་
382b
དང ། ཆོས་ལ་མངོན་པ་ཞེས་བྱ་བའི་ཏིང་ངེ་འཛིན་དང ། རྡོ་རྗེ་མངལ་ཞེས་བྱ་བའི་ཏིང་ངེ་འཛིན་དང ། ཤིན་ཏུ་སྟོན་པ་ཞེས་བྱ་བའི་ཏིང་ངེ་འཛིན་དང ། མྱ་ངན་འདའ་བྱེད་ཅེས་བྱ་བའི་ཏིང་ངེ་འཛིན་དང ། འོད་ཟེར་མཐའ་ཡས་སྒྲུབ་ཅེས་བྱ་བའི་ཏིང་ངེ་འཛིན་དང ། རྣལ་འབྱོར་བྱེད་ཅེས་བྱ་བའི་ཏིང་ངེ་འཛིན་དང ། འཐོར་བ་ཞེས་བྱ་བའི་ཏིང་ངེ་འཛིན་དང ། ཛམྦུའི་གླིང་གི་དམ་པའི་མིག་ཅེས་བྱ་བའི་ཏིང་ངེ་འཛིན་དང ། སངས་རྒྱས་ཀྱི་ཞིང་གི་དམ་པའི་མིག་ཅེས་བྱ་བའི་ཏིང་ངེ་འཛིན་དང ། བྱ་བ་བྱས་པ་ལ་མངོན་པ་ཞེས་བྱ་བའི་ཏིང་ངེ་འཛིན་དང ། སྐྱེ་དགུའི་གནས་ཞེས་བྱ་བའི་ཏིང་ངེ་འཛིན་དང ། མི་ཟད་པར་བྱེད་ཅེས་བྱ་བའི་ཏིང་ངེ་འཛིན་དང ། བསྟིར་མེད་སྐེམ་ཞེས་བྱ་བའི་ཏིང་ངེ་འཛིན་དང ། རྒྱ་མཚོ་ལྟར་ཟབ་པ་ཞེས་བྱ་བའི་ཏིང་ངེ་འཛིན་དང ། འཁོར་བརྒྱ་པ་ཞེས་བྱ་བའི་ཏིང་ངེ་འཛིན་དང ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནི་ཏིང་ངེ་འཛིན་དེ་དག་དང་ལྡན་ནོ། །སྒྲིབ་པ་ཐམས་ཅད་རྣམ་པར་སེལ་བ། འདི་ལྟ་སྟེ། ལོག་པར་དད་སེལ་ཅེས་བྱ་བའི་དེ་བཞིན་གཤེགས་པ་རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་བ་དེའི་ཚེ་དེའི་དུས་ན་ང་བྱང་ཆུབ་སེམས་དཔར་གྱུར་ཏེ། དེའི་
383a
༄#། །ཚེ་དེ་བཞིན་གཤེགས་པ་དེའི་སྤྱན་སྔར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་ཡོན་ཏན་བརྗོད་པ་དེ་ལྟ་བུ་ངས་ཐོས་སོ། །བྱང་ཆུབ་སེམས་དཔའ་ཀུན་ཏུ་བཟང་པོ་ལ་སོགས་པ་དང་འདི་འདྲ་བར་ཏིང་ངེ་འཛིན་གྱིས་འགྱེད་པའང་ངས་མཐོང་ངོ ། །གང་གི་ཚེ་ན་ཀུན་ཏུ་བཟང་པོ་རྡོ་རྗེ་གྱེན་དུ་འཕགས་པའི་ཏིང་ངེ་འཛིན་ལ་ཞུགས་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་འཐོར་བ་ཞེས་བྱ་བའི་ཏིང་ངེ་འཛིན་ལ་ཞུགས་སོ། །གང་གི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ཟླ་བ་དམ་པའི་མིག་ཅེས་བྱ་བའི་ཏིང་ངེ་འཛིན་ལ་ཞུགས་པ་དེའི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ཉི་མ་དམ་པའི་མིག་ཅེས་བྱ་བའི་ཏིང་ངེ་འཛིན་ལ་ཞུགས་སོ། །གང་གི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་བྱུགས་པ་ཞེས་བྱ་བའི་ཏིང་ངེ་འཛིན་ལ་ཞུགས་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ནམ་མཁའ་མཛོད་ཅེས་བྱ་བའི་ཏིང་ངེ་འཛིན་ལ་ཞུགས་སོ། །གང་གི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་རྣམ་པར་བྱེད་ཅེས་བྱ་བའི་ཏིང་ངེ་འཛིན་ལ་ཞུགས་པ་དེའི་ཚེ་བྱང་ཆུབ་
383b
སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་རྡོ་རྗེའི་ལྕགས་ཀྱུ་ཞེས་བྱ་བའི་ཏིང་ངེ་འཛིན་ལ་ཞུགས་སོ། །གང་གི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དབང་པོའི་འགྲོས་ཞེས་བྱ་བའི་ཏིང་ངེ་འཛིན་ལ་ཞུགས་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་རྒྱ་མཚོ་ལྟར་ཟབ་ཅེས་བྱ་བའི་ཏིང་ངེ་འཛིན་ལ་ཞུགས་སོ། །གང་གི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་སེང་གེ་གླལ་ཅེས་བྱ་བའི་ཏིང་ངེ་འཛིན་ལ་ཞུགས་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་སེང་གེ་རྣམ་པར་རོལ་ཅེས་བྱ་བའི་ཏིང་ངེ་འཛིན་ལ་ཞུགས་སོ། །གང་གི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དམ་པ་སྦྱིན་པར་བྱེད་ཅེས་བྱ་བའི་ཏིང་ངེ་འཛིན་ལ་ཞུགས་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་བསྟིར་མེད་པ་སྐེམ་ཞེས་བྱ་བའི་ཏིང་ངེ་འཛིན་ལ་ཞུགས་སོ། །གང་གི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་བ་སྤུའི་ཁུང་བུ་ཐམས་ཅད་འབྱེད་པར་བྱེད་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའང་བ་སྤུའི་ཁུང་བུ་ཐམས་ཅད་འབྱེད་པར་བྱེད་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་
384a
༄#། །ཆེན་པོ་ཀུན་ཏུ་བཟང་པོས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་ལ་སྤྱན་རས་གཟིགས་ཀྱི་དབང་པོ་ཁྱོད་ཀྱི་སྤོབས་པ་དེ་འདྲ་བ་ལེགས་སོ། །ལེགས་སོ་ཞེས་སྨྲས་སོ། །དེ་ནས་དེ་བཞིན་གཤེགས་པ་ལོག་པར་དད་སེལ་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་སྤོབས་པ་ཅུང་ཟད་ཅིག་མཐོང་དུ་ཟད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོའི་སྤོབས་པ་ཅི་འདྲ་བ་དེ་ལྟ་བུ་ནི་དེ་བཞིན་གཤེགས་པ་དག་ལའང་མི་མངའོ་ཞེས་ངས་ལོག་པར་དད་སེལ་ལས་དེ་སྐད་ཐོས་སོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། ཐེག་པ་ཆེན་པོའི་མདོའི་རྒྱལ་པོ་ཟ་མ་ཏོག་བཀོད་པ་བཤད་དུ་གསོལ། དེའི་སླད་དུ་བདག་ཅག་ཆོས་ཀྱི་རོས་ངོམས་ཤིང་དགའ་བར་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ།་གང་དག་ཐེག་པ་ཆེན་པོའི་མདོའི་རྒྱལ་པོ་ཟ་མ་ཏོག་བཀོད་པའི་མིང་ཐོས་པ་དེ་དག་ལ་སྔོན་གྱི་ལས་ཀྱི་སྒྲིབ་པ་མེད་དོ། །གང་དག་ཕ་རོལ་གྱི་བུད་མེད་ལ་ཆགས་ཤིང་ཞེན་
384b
བའི་ལས་ལ་བརྩོན་པ་དང ། གང་ཕ་དང་མ་གསོད་པ་དང ། དགྲ་བཅོམ་པ་གསོད་པ་དང ། མཆོད་རྟེན་འཇོམས་པ་དང ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པ་དང ། དེ་ལྟ་བུའི་སྡིག་པ་ལ་དགའ་བ་དག་ལའང་ཐེག་པ་ཆེན་པོའི་མདོའི་རྒྱལ་པོ་ཟ་མ་ཏོག་བཀོད་པས་སྡིག་པ་ལས་ཐར་བར་བྱེད་དོ། །དེ་ནས་བཅོམ་ལྡན་འདས་ལ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ཇི་ལྟར་ཐེག་པ་ཆེན་པོའི་མདོ་ཟ་མ་ཏོག་བཀོད་པ་སྡིག་པ་ཐམས་ཅད་ལས་ཐར་བར་བགྱིད་པ་འཚལ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། རི་རབ་རིའི་རྒྱལ་པོའི་གཡས་ཕྱོགས་ཀྱི་ངོས་ལ་ཡང་དག་པར་རྫོགས་པའི་སངས་རྒྱས་དྲུག་གིས་དྲི་མ་དང་དྲི་མ་མེད་པའི་མཐར་བརྟགས་པ་ཡོད་དེ། ད་ལྟར་ངས་ཀྱང་བརྟགས་སོ། །གང་གོས་དཀར་པོ་སྔོན་པོར་འགྱུར་བ་དང ། གང་གོས་སྔོན་པོ་དཀར་པོར་འགྱུར་བ་ནི། གང་གོས་དཀར་པོ་དེ་སྔོན་པོར་འགྱུར་བ་དེ་ནི་སྡིག་པའི་ཕུང་པོར་བལྟའོ། །གང་གོས་སྔོན་པོ་དེ་དཀར་པོར་འགྱུར་བ་དེ་ནི་ཆོས་ཀྱི་ཕུང་པོར་བལྟའོ། །རིགས་ཀྱི་བུ། དེ་བཞིན་དུ་ཐེག་པ་ཆེན་པོའི་མདོའི་རྒྱལ་པོ་ཟ་མ་ཏོག་བཀོད་པ་དེ་ནི་སྡིག་པ་ཐམས་ཅད་སྲེག་ཅིང་དཀར་པོར་བྱེད་དོ། །སྒྲིབ་པ་ཐམས་ཅད་རྣམ་པར་སེལ་བ། འདི་ལྟ་སྟེ། དཔེར་ན། དབྱར་གྱི་དུས་ཀྱི་ཚེ་རྩཝ་དང་ནགས་ཚལ་
385a
༄#། །དག་ཤིན་ཏུ་སྔོ་བར་འགྱུར་ཏེ། དེ་ནས་ཀླུའི་རྒྱལ་པོ་ཁ་བརྒྱ་པ་ཞེས་བྱ་བ་གནས་ནས་ལངས་ཏེ། རྩཝ་དང ། ཤིང་གེལ་བ་དང ། སྨན་དང ། ནགས་ཚལ་དག་སྲེག་པར་བྱེད་དོ། །རིགས་ཀྱི་བུ། དེ་བཞིན་དུ་ཐེག་པ་ཆེན་པོའི་མདོའི་རྒྱལ་པོ་ཟ་མ་ཏོག་བཀོད་པ་འདི་ནི་སྡིག་པ་ཐམས་ཅད་སྲེག་པར་བྱེད་དོ། །གང་ཐེག་པ་ཆེན་པོའི་མདོའི་རྒྱལ་པོ་ཐོས་པའི་སེམས་ཅན་དེ་དག་ནི་བདེ་བ་དང་ལྡན་པ་ཡིན་ཏེ། རིགས་ཀྱི་བུ། དེ་དག་ནི་སོ་སོའི་སྐྱེ་བོ་མ་ཡིན་པར་རིག་པར་བྱའོ། །བྱང་ཆུབ་སེམས་དཔའ་ཕྱིར་མི་ལྡོག་པ་དང་འདྲ་བར་བལྟའོ། །དེ་དག་འཆི་བའི་དུས་ཀྱི་ཚེ་དེ་བཞིན་གཤེགས་པ་བཅུ་གཉིས་གཤེགས་ཏེ། རིགས་ཀྱི་བུ། མ་འཇིགས་ཤིག་།མ་འཇིགས་ཤིག་།ཁྱོད་ཀྱིས་ཐེག་པ་ཆེན་པོའི་མདོའི་རྒྱལ་པོ་ཐོས་སོ། །ཁྱོད་སླར་འཁོར་བར་མི་འཁོར་བར་འགྱུར་རོ། །སླར་སྐྱེ་བ་དང ། རྒ་བ་དང ། ན་བ་དང ། འཆི་བ་མི་མཐོང་བར་འགྱུར་རོ། །འགའ་ཞིག་འདོད་པ་དང་ཕྲད་ལ་མི་དགའ་ཞིང་མི་འདོད་པ་དང་ཕྲད་པར་མི་འགྱུར་རོ། །རིགས་ཀྱི་བུ། བདེ་བ་ཅན་གྱི་འཇིག་རྟེན་གྱི་ཁམས་སུ་སོང་ཞིང་དེ་བཞིན་གཤེགས་པ་སྣང་བ་མཐའ་ཡས་པ་ལས་དམ་པའི་ཆོས་ཐོས་པར་འགྱུར་རོ་ཞེས་དབུགས་འབྱིན་པར་མཛད་དེ། རིགས་ཀྱི་བུ། དེ་ལྟར་སེམས་ཅན་དེ་དག་བདེ་བར་མཆི་བར་འགྱུར་རོ། །དེ་ནས་བྱང་ཆུབ་སེམས་
385b
དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་སོང་ངོ ། །དེ་ནས་སྒྲིབ་པ་ཐམས་ཅད་རྣམ་པར་སེལ་བ་ཅང་མི་ཟེར་བར་འདུག་གོ་།ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང་མི་མ་ཡིན་པ་དེ་དག་ཐམས་ཅད་ཀྱང་དོང་ངོ ། །གང་གི་ཚེ་ན་དེ་དག་དོང་བ་དེའི་ཚེ་བཅོམ་ལྡན་འདས་ལ་ཚེ་དང་ལྡན་པ་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གི་བསླབ་པའི་སྡོམ་པ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གང་དག་བསྙེན་པར་རྫོགས་པར་བྱེད་འདོད་པ་དེས་ཐོག་མ་ཁོ་ནར་སོང་སྟེ། སྣ་ཚོགས་པ་དག་གི་གནས་བརྟག་པར་བྱའོ། །བརྟགས་ནས་དགེ་སློང་དག་ལ། བཙུན་པ། སྣ་ཚོགས་ཀྱི་གནས་ནི་དག་སྟེ། སྣ་ཚོགས་ཀྱི་གནས་དེ་ན་རུས་པའང་མ་མཆིས་སོ། །བཤང་གཅིའང་མ་མཆིས་ཏེ། སྣ་ཚོགས་ཀྱི་གནས་དེ་ནི་ཡོངས་སུ་དག་གོ་།དགེ་སློང་དག་ཀྱང་བསྙེན་པར་རྫོགས་པར་བགྱིར་རུང་ངོ་ཞེས་སྦྲན་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཚུལ་ཁྲིམས་དང་མི་ལྡན་པས་ནི་བསྙེན་པར་རྫོགས་པར་མི་བྱའོ། །གསོལ་བ་དང་བཞི་པའང་སྦྱིན་པར་མི་བྱའོ། །བར་གྱི་གསོལ་བའང་མི་བྱའོ། །མང་དུ་བཤད་ཅི་དགོས་ཏེ། དགེ་སློང་དག་།ཚུལ་
386a
༄#། །ཁྲིམས་དང་མི་ལྡན་པའི་དགེ་སློང་གིས་ནི་སྣ་ཚོགས་ཀྱིས་གནས་སུའང་འགྲོ་བར་མི་བྱ་ན་གསོལ་བ་དང་བཞི་པ་བྱ་བ་ལྟ་ཅི་སྨོས་ཏེ། དེ་དག་ནི་སྟོན་པའི་བསྟན་པ་འཇིག་པར་བྱེད་པའོ། །ཚུལ་ཁྲིམས་དང་མི་ལྡན་པ་དེ་དག་ནི་སྦྱིན་གནས་དག་གི་ནང་དུ་གནས་སྦྱིན་པར་མི་བྱའོ། །དེ་དག་ནི་གཙུག་ལག་ཁང་གི་ཕྱི་རོལ་ཏུ་གནས་སུ་གཞུག་སྟེ། དེ་དག་ལ་དགེ་འདུན་གྱི་ཟས་ཀྱང་མི་སྦྱིན་ནོ། །དེ་དག་ལ་དགེ་འདུན་གྱིས་ཡང་འོས་པ་མ་ཡིན་ནོ། །དེ་དག་ལ་ནི་དགེ་སློང་གི་དངོས་པོ་ཅུང་ཟད་ཀྱང་མེད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་གི་ཚེ་ན་དེ་འདྲ་བའི་སྦྱིན་གནས་དག་འབྱུང་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ང་མྱ་ངན་ལས་འདས་ནས་ལོ་སུམ་བརྒྱ་ན་དེ་འདྲ་བའི་སྦྱིན་གནས་དག་འབྱུང་སྟེ། གང་གཙུག་ལག་ཁང་ལ་ཁྱིམ་དུ་འདུ་ཤེས་པར་འཛིན་པ་དེ་དག་ནི་བུ་ཕོ་དང ། བུ་མོ་དག་གིས་ཡོངས་སུ་བསྐོར་བར་འགྱུར་རོ། །དེ་དག་ནི་དགེ་འདུན་གྱི་ཁྲི་དང ། ཁྲིའུ་དང ། ཚད་ཐུར་དང ། སྔས་དང ། མལ་སྟན་དག་ལ་སྤྱོད་པར་མ་འོས་པ་ལ་སྤྱོད་པར་བྱེད་དོ། །དགེ་འདུན་དག་གི་ཉེ་བར་སྤྱོད་པ་ལ་བཤང་བ་དང་གཅི་བར་བྱེད་དོ། །མཆིལ་མ་དག་ཀྱང་འདོར་ཞིང་ལས་ཀྱི་རྣམ་པར་སྨིན་པ་མི་ཤེས་སོ། །གང་དགེ་འདུན་གྱི་ཉེ་
386b
བར་སྤྱོད་པ་ལ་མཆིལ་མ་འདོར་བ་དེ་དག་ནི་ལོ་བཅུ་གཉིས་སུ་ཤིང་སཱ་ལའི་ཚལ་དུ་ཁ་ཁབ་ཀྱི་མིག་ཙམ་གྱི་སྲོག་ཆགས་སུ་སྐྱེའོ། །གང་དགེ་འདུན་གྱི་སོ་ཤིང་ལ་སྤྱོད་དུ་མ་འོས་པ་ལ་སྤྱོད་པ་དེ་དག་ནི་རུས་སྦལ་དང ། ཆུ་སྲིན་དང ། ཉའི་ནང་དུ་སྐྱེའོ། །གང་དགེ་འདུན་གྱི་ཏིལ་དང ། འབྲས་དང ། རྒྱ་ཤུག་དང ། ཀུ་ལན་ཐ་ལ་སོགས་པ་གང་སྤྱོད་པར་མ་འོས་པ་ལ་སྤྱོད་པ་དེ་དག་ནི་ཡི་དྭགས་ཀྱི་གྲོང་ཁྱེར་དུ་སྐྱེ་སྟེ། མགལ་བ་འདྲ་ཞིང་ཀེང་རུས་བསྒྲེང་བ་ལྟ་བུ་བདག་གི་སྐྲ་དང་སྤུས་ཁེབས་པ། ཁ་ཁབ་ཀྱི་མིག་ཙམ་དུ་གྱུར་པའི་སྡུག་བསྔལ་དེ་དག་ལུས་ལ་མྱོང་བར་འགྱུར་རོ། །གང་དགེ་འདུན་གྱི་ཟས་ཀྱིས་ཁྱི་གསོ་བར་བྱེད་པ་དེ་དག་ནི་རིགས་དམའ་བར་སྐྱེ་བར་འགྱུར་རོ། །དབང་པོ་ཉམས་པར་འགྱུར་རོ། །སྒུར་པོ་དང ། ཁྱོར་པོར་སྐྱེའོ།། གཞན་གྱི་བཞིན་ལ་བལྟ་ཞིང་སློང་མོ་བྱེད་པར་འགྱུར་རོ། །དེ་ནས་ཤི་འཕོས་ནས་ཀྱང་ནད་བུ་ཅན་དུ་འགྱུར་རོ། །ལུས་ལས་རྣག་དང་ཁྲག་འཛག་པར་འགྱུར་རོ། །ཆུ་བ་རྣམས་འཁུམས་པར་འགྱུར་རོ། །གང་གི་ཚེ་ན་ལངས་པ་དེ་ན་ཤ་རྣམས་ས་ལ་ལྷགས་ཤིང་རུས་པ་རྣམས་སྣང་བར་འགྱུར་ཏེ། དེ་ལྟར་དེ་དག་ལོ་མང་པོར། ལོ་བརྒྱ་སྟོང་མང་པོར་ལུས་ཀྱི་སྡུག་བསྔལ་མྱོང་བར་འགྱུར་རོ། །གང་དགེ་འདུན་གྱི་ས་ལ་མི་འོས་པར་སྤྱོད་པ་དེ་དག་ནི་བསྐལ་པ་བཅུ་གཉིས་སུ་འོ་དོད་འབོད་པའི་སེམས་ཅན་དམྱལ་བ་ཆེན་པོར་སྐྱེ་སྟེ། ལྕགས་ཀྱི་ཐུ་ལུམ་
387a
༄#། །བསྲེགས་པ་ཁར་བཅུག་ནས་མཆུ་དང་སོ་དག་ཀྱང་ལྷགས། རྐན་ཡང་གས། མགུལ་པའང་ཚིག་།སྙིང་དང་རྒྱུ་མ་དག་ཀྱང་ཐམས་ཅད་དུ་ཐམས་ཅད་ཚིག་ནས་རུས་པའི་ལྷག་མ་ལུས་པར་འགྱུར་ཏེ། དགེ་སློང་དག་།དེའི་ཚེ་ལས་ཀྱི་རླུང་ལངས་ནས་ཤི་ནས་ཀྱང་སླར་འཚོའོ། །དེ་ནས་སླར་ཡང་གཤིན་རྗེ་སྐྱོང་བའི་སྐྱེས་བུས་བཟུང་ངོ ། ། དེ་ནས་དེ་དག་གི་ལས་བདག་གིར་བྱ་བའི་ལས་ཀྱི་དབང་གིས་ལྕེ་ཆེན་པོ་འབྱུང་བར་འགྱུར་ཞིང་ལྕེ་དེའི་སྟེང་དུ་གཤོལ་བརྒྱ་སྟོང་གིས་རྨོ་བར་འགྱུར་ཏེ། དེ་ལྟར་ལོ་བརྒྱ་ཕྲག་སྟོང་དུ་སེམས་ཅན་དམྱལ་བའི་སྡུག་བསྔལ་མྱོང་བར་འགྱུར་རོ། །དེ་ནས་ཤི་འཕོས་ནས་མེའི་རྫ་མའི་སེམས་ཅན་དམྱལ་བ་ཆེན་པོར་སྐྱེས་ཏེ། དེ་ནས་གཤིན་རྗེ་སྐྱོང་བའི་སྐྱེས་བུ་དག་གིས་བཟུང་ནས་ལྕེ་དེ་ཉིད་ལ་ཁབ་བརྒྱ་སྟོང་གིས་འབིགས་པར་བྱེད་དོ། །དེ་ནས་ཀྱང་ལས་ཀྱི་དབང་གིས་སོས་ནས་མེའི་འོབས་སུ་འདོར་རོ། །མེའི་འོབས་དེ་ནས་ཀྱང་ཕྱུང་ནས་ཆུ་བོ་བྲེའི་ཏ་ར་ནི་ཆེན་པོར་འདོར་རོ། །དེ་ནས་འཆི་བའི་དུས་བྱས་ནས་སེམས་ཅན་དམྱལ་བ་གཞན་དག་ཏུ་སྐྱེས་ཏེ། དེ་ལྟར་འཁྱམ་པ་ལས་བསྐལ་པ་གསུམ་ཟད་ནས་ཤི་འཕོས་ཏེ་ཛམྦུའི་གླིང་དུ་དབུལ་པོ་དང ། དམུས་ལོང་གི་ནང་དུ་སྐྱེ་བར་འགྱུར་རོ། །དགའ་བོ། དེ་ལྟ་བས་ན་དགེ་འདུན་དག་གི་རྫས་ནི་བསྲུང་བར་བྱའོ། །དགེ་སློང་དག་།གང་བསླབ་པ་
387b
སྡོམ་པས་ཆོས་གོས་གསུམ་བཅང་བར་བྱ་སྟེ། ཆོས་གོས་གཅིག་ནི་དགེ་འདུན་ལ་ཡིད་བརྟན་ཅིང་དགེ་འདུན་གྱིས་སྤྱད་པའི་ཕྱིར་རོ། །ཆོས་གོས་གཉིས་པ་ནི་རྒྱལ་པོའི་ཕོ་བྲང་དུ་འགྲོ་བའི་ཕྱིར་རོ། །ཆོས་གོས་གསུམ་པ་ནི་གྲོང་དང ། གྲོང་ཁྱེར་དང ། གྲོང་འདབ་དང ། ཡེ་འུར་འཁོད་པ་དང ། ཚོང་འདུས་དག་གི་ཕྱིར་ཏེ། དགེ་སློང་དག་གིས་ཆོས་གོས་དེ་གསུམ་བཅང་བར་བྱའོ། །གང་ཚུལ་ཁྲིམས་དང་ལྡན་པ་དང ། ཡོན་ཏན་དང་ལྡན་པའི་དགེ་སློང་དག་གིས་ནི་ངས་བསླབ་ཚིགས་བཅས་པ་འདི་གཟུང་བར་བྱའོ། །དགེ་སློང་དག་།དགེ་འདུན་གྱི་རྫས་ལ་སྤྱོད་པར་མི་འོས་པ་དག་གིས་ནི་ཡོངས་སུ་སྤྱད་པར་མི་བྱའོ། །དགེ་འདུན་གྱི་ནི་མེའི་འོབས་ལྟ་བུའོ། །དགེ་འདུན་གྱི་ནི་དུག་ལྟ་བུའོ། །དགེ་འདུན་གྱི་ནི་རྡོ་རྗེ་ལྟ་བུའོ། །དགེ་འདུན་གྱི་ནི་ཁུར་ལྟ་བུའོ། །དུག་ལ་ནི་གཉེན་པོ་བྱ་ནུས་ཀྱི། དགེ་འདུན་གྱི་ལ་ནི་གཉེན་པོ་བྱ་མི་ནུས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་དགའ་བོས་འདི་སྐད་ཅེས་གསོལ་ཏོ། ། བཅོམ་ལྡན་འདས་ཀྱིས་བཀའ་སྩལ་པའི་བསླབ་ཚིགས་ལ་དགེ་སློང་གང་དག་འཛིན་པར་བགྱིད་པ་ནི་སོ་སོར་ཐར་པའི་སྡོམ་པས་བསྡམས་པ་ལགས་སོ། །འདུལ་བ་ལ་མངོན་པར་ལགས་སོ། །བཅོམ་ལྡན་འདས་ཀྱི་བསླབ་ཚིགས་ཀྱི་རྗེས་སུ་བསྲུངས་པ་ལགས་སོ། །དེ་ནས་ཚེ་དང་ལྡན་པ་དགའ་བོས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་
388a
༄#། །སོང་ངོ ། །དེ་ནས་ཉན་ཐོས་ཆེན་པོ་དེ་དག་བདག་བདག་གི་སངས་རྒྱས་ཀྱི་ཞིང་དུ་དོང་ངོ ། །ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང་མི་མ་ཡིན་པ་དེ་དག་ཀྱང་དོང་ངོ ། །བཅོམ་ལྡན་འདས་དགྱེས་ཤིང་དེ་སྐད་ཅེས་བཀའ་སྩལ་པ་དང ། ཐམས་ཅད་དང་ལྡན་པའི་འཁོར་དེ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་རྣམས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའོ། །འཕགས་པ་ཟ་མ་ཏོག་བཀོད་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། དཱ་ན་ཤཱི་ལ་དང ། ཞུས་ཆེན་གྱི་ལོ་ཙཱ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།།