rKTs


H115

(e-text produced by ACIP)

see text in transliteration
209b
རྒྱ་གར་སྐད་དུ། ཨཱརྱ་ཀཱ་རུ་ཎཱ་པུ་ཎྜ་རཱི་ཀ་ནཱ་མ་མཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་སྙིང་རྗེ་པདྨ་དཀར་པོ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་
210a
༄#། །རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ། དགེ་སློང་དྲུག་ཁྲི་ཉིས་སྟོང་གི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ་བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པ་ཤ་སྟག་དང་ཐབས་གཅིག་ཏུ་བཞུགས་ཏེ། གང་ཟག་གཅིག་མ་གཏོགས་པ་ནི་འདི་ལྟ་སྟེ། ཚེ་དང་ལྡན་པ་ཀུན་དགའ་བོའོ། །བྱམས་པ་ལ་སོགས་པ་གཟུངས་དང ། བཟོད་པ་དང ། ཏིང་ངེ་འཛིན་ཐོབ་པ། སྟོང་པ་ཉིད་ལ་གནས་པ། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ས་ཡ་ཕྲག་བརྒྱད་དང་ཡང་ཐབས་གཅིག་གོ། མི་མཛད་ཀྱི་བདག་པོ་ཚངས་པ་དང ། ཚངས་རིས་ཀྱི་ལྷའི་བུ་འབུམ་ཕྲག་མང་པོ་དང་ཡང་ཐབས་གཅིག་གོ། །ལྷའི་བུ་གཞན་འཕྲུལ་དང ། གཞན་འཕྲུལ་གྱི་ལྷའི་
210b
བུ་ས་ཡ་ཕྲག་བརྒྱད་དང་ཡང་ཐབས་གཅིག་གོ། །ལྷའི་བུ་འཕྲུལ་དགའ་དང ། འཕྲུལ་དགའི་ལྷའི་བུ་ས་ཡ་ཕྲག་བདུན་དང་ཡང་ཐབས་གཅིག་གོ། །ལྷའི་བུ་ཡོངས་སུ་དགའ་ལྡན་དང ། ཡོངས་སུ་དགའ་ལྡན་གྱི་ལྷའི་བུས་ཡ་ཕྲག་དྲུག་དང་ཡང་ཐབས་གཅིག་གོ། ལྷའི་བུ་རབ་འཐབ་བྲལ་དང ། རབ་འཐབ་བྲལ་གྱི་ལྷའི་བུ་ས་ཡ་ཕྲག་བདུན་དང ། ཉིས་འབུམ་དང་ཡང་ཐབས་གཅིག་གོ།་ལྷའི་དབང་པོ་བརྒྱ་བྱིན་དང ། སུམ་ཅུ་རྩ་གསུམ་པའི་ལྷའི་བུ་ས་ཡ་ཕྲག་བརྒྱད་དང་ཡང་ཐབས་གཅིག་གོ། །རྒྱལ་པོ་ཆེན་པོ་རྣམ་ཐོས་ཀྱི་བུ་གནོད་སྦྱིན་འབུམ་གྱིས་ཡོངས་སུ་བསྐོར་བ་དང་ཡང་ཐབས་གཅིག་གོ། མིག་མི་བཟང་ཀླུ་འབུམ་གྱིས་ཡོངས་སུ་བསྐོར་བ་དང་ཡང་ཐབས་གཅིག་གོ། འཕགས་སྐྱེས་པོ་གྲུལ་བུམ་འབུམ་གྱིས་ཡོངས་སུ་བསྐོར་བ་དང་ཡང་ཐབས་གཅིག་གོ་།ཡུལ་འཁོར་སྲུང་དྲི་ཟ་འབུམ་གྱིས་ཡོངས་སུ་བསྐོར་བ་དང་ཡང་ཐབས་གཅིག་གོ། །ཀླུའི་རྒྱལ་པོ་དགའ་བོ་དང ། ཉེ་དགའ་བོ་ཀླུའི་རྒྱལ་པོ་སྟོང་གིས་ཡོངས་སུ་བསྐོར་བ་དང ། དེ་དག་ལ་སོགས་པ་ཐེག་པ་ཆེན་པོ་ལ་ཡང་དག་པར་ཞུགས་པ། ཕ་རོལ་ཏུ་ཕྱིན་པ་དྲུག་ལ་སྤྱོད་པ། ཕྱིན་ཅི་ལོག་བཞིའི་ཆོས་སྣང་ཞིང་གསལ་བར་རྟོགས་པར་ཁོང་དུ་ཆུད་པ་གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཏིང་ངེ་འཛིན་སྣ་ཚོགས་རབ་ཏུ་འཐོབ་པར་འགྱུར་བ་དང ། གང་གིས་ཉན་ཐོས་དང ། རང་སངས་རྒྱས་ཀྱི་ས་ལས་ཡང་དག་པར་འདའ་བར་འགྱུར་བ་དང །
211a
༄#། །ཏིང་ངེ་འཛིན་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བའི་འཕགས་པའི་བདེན་པ་བཞི་ཡང་དག་པར་རབ་ཏུ་རྟོགས་པར་བྱ་བའི་ཕྱིར་ཆོས་སྟོན་པ་ཤ་སྟག་གིས་ཡོངས་སུ་བསྐོར་ཅིང་མདུན་གྱིས་བལྟས་ཏེ་བཞུགས་སོ། །དེའི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང ། བྱང་ཆུབ་སེམས་དཔའ་མཐོང་བ་དོན་ཡོད་དང ། བྱང་ཆུབ་སེམས་དཔའ་ཆུ་ལྷ་དང ། བྱང་ཆུབ་སེམས་དཔའ་སེངྒའི་བློ་གྲོས་དང ། བྱང་ཆུབ་སེམས་དཔའ་རྣམ་པར་སྣང་བྱེད་བློ་གྲོས་དང ། དེ་དག་ལ་སོགས་པ་བྱང་ཆུབ་སེམས་དཔའ་ཁྲི་ལྷན་ཅིག་ཏུ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་བུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་བ་བཏུད་ནས་ཤར་ལྷོའི་ཕྱོགས་ལོགས་སུ་མངོན་པར་ཕྱོགས་ཏེ། རབ་ཏུ་དགའ་ཞིང་རབ་ཏུ་དང་བའི་ཡིད་ཀྱིས་བལྟས་ནས་ཚིག་འདི་སྐད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པ་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པར་ཆོ་འཕྲུལ་ཆེན་པོ་དག་བསྟན་ནས། སེམས་ཅན་རྣམས་ལས་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་དུ་མ་དག་གི་དགེ་བའི་རྩ་བ་ཡོངས་སུ་སྨིན་པར་མཛད་ཅིང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ལ་བཀོད་པ་ནི། ངོ་མཚར་ཏེ།
211b
ཕྱག་འཚལ་ལོ། །ཕྱག་འཚལ་ལོ་ཞེས་ཀྱང་སྨྲས་སོ། །དེ་ནས་བྱང་ཆུབ་སེམས་དཔའ་རིན་པོ་ཆེ་རྣམ་པར་སྣང་བྱེད་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བུས་མོ་གཡས་པའི་ལྷ་ང་ས་ལ་བཙུག་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། གང་གི་སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་མཐོང་བ་དོན་ཡོད་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སེངྒེའི་བློ་གྲོས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་སྣང་བྱེད་བློ་གྲོས་དང ། དེ་དག་ལ་སོགས་པ་བྱང་ཆུབ་སེམས་དཔའ་ཁྲིས་བཅོམ་ལྡན་འདས་ཀྱིས་ཆོས་བསྟན་པ་བཅད་ནས་ལྷན་ཅིག་ཏུ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་བ་བཏུད་ནས་ཤར་ལྷོའི་ཕྱོགས་ལོགས་སུ་མངོན་པར་ཕྱོགས་ཏེ། རབ་ཏུ་དགའ་ཞིང་རབ་ཏུ་དང་བའི་ཡིད་ཀྱིས་བལྟས་ནས་ཚིག་འདི་སྐད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པ་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པར་ཆོ་འཕྲུལ་ཆེན་པོ་དག་བསྟན་ནས་སྲོག་ཆགས་བྱེ་བ་
212a
༄#། །ཁྲག་ཁྲིག་འབུམ་ཕྲག་དུ་མ་དགེ་བའི་རྩ་བ་དག་ལ་ཡོངས་སུ་སྨིན་པར་མཛད་པ་ནི་ངོ་མཚར་ཏེ་ཕྱག་འཚལ་ལོ། །ཕྱག་འཚལ་ལོ་ཞེས་མཆི། བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པ་ཤུལ་ནི་ཇི་སྲིད་ཅིག་ན་བཞུགས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ནི་ཡུན་ཇི་སྲིད་ཅིག་ལགས། གང་ན་དེ་བཞིན་གཤེགས་པ་པདྨ་དམ་པ་ཞེས་བགྱི་བ་བཞུགས་པའི་འཇིག་རྟེན་གྱི་ཁམས་དེའི་མིང་ཅི་ཞེས་བགྱི། འཇིག་རྟེན་གྱི་ཁམས་དེའི་བཀོད་པ་ནི་ཇི་ལྟ་བུ་ཞིག་གིས་བརྒྱན་པ་ལགས། ཅིའི་སླད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པས་ཆོ་འཕྲུལ་ཆེན་པོ་རྣམ་པ་དེ་ལྟ་བུ་དག་བསྟན་པ་མཛད། རྐྱེན་གང་གིས་ན་བྱང་ཆུབ་སེམས་དཔའ་ཁ་ཅིག་གིས་ནི་ཕྱོགས་བཅུའི་འཇིག་རྟེན་གྱི་ཁམས་བགྲང་བ་ལས་ཡང་དག་པར་འདས་པ་གཞན་དག་ན་བཞུགས་པའི་སངས་རྒྱས་བཅོམ་ལྡན་འདས་རྣམས་མཐོང་ཞིང ། སངས་རྒྱས་བཅོམ་ལྡན་འདས་དེ་དག་གིས་ཆོ་འཕྲུལ་གང་དག་རྣམ་པར་བསྟན་པ་དེ་དག་ཀྱང་མཐོང་ལ་བདག་ཅག་གིས་མི་མཐོང་བར་འགྱུར་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རིན་པོ་ཆེ་རྣམ་པར་སྣང་བྱེད་ལ་འདི་སྐད་ཅེས་བཀའ་
212b
སྩལ་ཏོ། །རིགས་ཀྱི་བུ། ལེགས་སོ། །ལེགས་སོ། །རིགས་ཀྱི་བུ་ཁྱོད་སེམས་ཅན་བྱེ་བ་ཁྲག་ཁྲིག་འབུམ་ཕྲག་མང་བོ་རྣམས་ཀྱི་དགེ་བའི་རྩ་བ་ཡོངས་སུ་སྨིན་པར་བྱ་བའི་དོན་དུ་དེ་བཞིན་གཤེགས་པ་པདྨ་དམ་པས་བྱང་ཆུབ་ཐོབ་པའི་ཆོ་འཕྲུལ་རྣམ་པར་བསྟན་པར་བྱེ་བ་དང ། སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་དྲི་བའི་ཕྱིར་དེ་བཞིན་གཤེགས་པ་ལ་དོན་དེ་ལྟ་བུ་ཡོངས་སུ་ཞུ་བར་སེམས་དཔའ་ནི་ཁྱོད་ཀྱི་སྤོབས་པ་དགེ་བ་ཡིན་ཏེ། ཁྱོད་ཀྱིས་ཡོངས་སུ་ཞུས་པ་ལེགས་པ་ཡིན་ནོ། །རིགས་ཀྱི་བུ། དེའི་ཕྱིར་ཁྱོད་ལེགས་པར་རབ་ཏུ་ཉོན་ལ་ཡིད་ལ་གཟུང་ཞིག་དང་བཤད་པར་བྱའོ། །བྱང་ཆུབ་སེམས་དཔའ་རིན་པོ་ཆེ་རྣམ་པར་སྣང་བྱེད་ཀྱིས་བཅོམ་ལྡན་འདས་དེ་བཞིན་ནོ་ཞེས་གསོལ་ཏེ་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རིན་པོ་ཆེ་རྣམ་པར་སྣང་བྱེད་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། འདི་ནས་ཤར་ལྷོའི་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་གངྒཱའི་ཀླུང་གི་བྱེ་མ་སྙེད་དག་གི་སངས་རྒྱས་ཀྱི་ཞིང་རྣམས་འདས་པ་ན། འཇིག་རྟེན་གྱི་ཁམས་པདྨ་ཞེས་བྱ་བ་ཡོན་ཏན་སྣ་ཚོགས་ཀྱིས་བརྒྱན་བ། མེ་ཏོག་སྣ་ཚོགས་བཀྲམ་པ། སྤོས་སྣ་ཚོགས་ཀྱིས་ཁྱབ་པ། རིན་པོ་ཆེའི་ཤིང་ལྗོན་པ་དག་གིས་བརྒྱན་པ། རིན་པོ་ཆེའི་པདྨ་དག་གིས་ཀུན་ཏུ་གང་བ་ཞིག་ཡོད་དེ། དེ་ན་ས་གཞི་ནི་ ་སྔོན་པོ་ལས་གྲུབ་ཅིང ། བྱང་ཆུབ་
213a
༄#། །སེམས་དཔའ་དག་གིས་ཀུན་ཏུ་གང་ལ་ཆོས་ཀྱི་སྒྲས་ཁྱབ་པ་ཡིན་ནོ། །བཻ་ ་ལས་གྲུབ་པའི་ས་གཞི་དེའང་ཀ་ཙ་ལིནྡི་ཀ་ལྟར་རེག་ན་བདེ་ཞིང་འཇམ་ལ། རྐང་པ་བཞག་ན་ནི་སོར་བཞི་ཙམ་ནེམས་ཞེས་བྱེད། རྐང་པ་བཏེག་ན་ནི་སོར་བཞི་ཙམ་པར་ཅེས་བྱེད་ཅིང ། པདྨ་སྣ་ཚོགས་དག་གིས་ཀུན་ཏུ་གང་བ་ཡིན་ནོ། །དེ་ན་རིན་པོ་ཆེ་སྣ་བདུན་གྱི་ཤིང་ལྗོན་པ་འཕང་དུ་དཔག་ཚད་བདུན་གྱི་སྲིད་ཙམ་པ་དག་ཡོད་དེ། ཤིང་ལྗོན་པ་དེ་དག་ལ་ལྷའི་གོས་ངུར་སྨྲིག་དག་རབ་ཏུ་འཕྱང་ཞིང ། ལྷའི་སིལ་སྙན་ཡིད་དུ་འོང་བའི་སྒྲ་ཡང་དག་པར་འབྱིན་པ་དག་ཀྱང་ཡོད་དོ། །ཤིང་ལྗོན་པ་དེ་དག་ལ་བྱ་སྣ་ཚོགས་དབང་པོ་དང ། སྟོབས་དང ། བྱང་ཆུབ་ཀྱི་ཡན་ལག་གི་སྒྲ་ཡིད་དུ་འོང་བ་རབ་ཏུ་སྒྲོགས་པ་དག་ཀྱང་ཡོད་དེ། ཤིང་ལྗོན་པ་དེ་དག་གི་ལོ་མ་དག་ཕན་ཚུན་ཕྲད་པ་ན་ལྷའི་ལས་ཤིན་ཏུ་འདས་པའི་སིལ་སྙན་ཡན་ལག་ལྔ་དང་ལྡན་པ་དག་གི་སྒྲའང་འབྱུང་ངོ ། །ཤིང་ལྗོན་པ་རེ་རེའི་དྲི་རྒྱ་ཆེན་པོ་ལྷའི་ལས་འདས་པས་ཀྱང་དཔག་ཚད་འབུམ་དུ་ཁྱབ་པར་བྱེད་ཅིང་ཤིང་ལྗོན་པ་དེ་དག་ལ་ལྷའི་རྒྱན་དག་ཀྱང་མངོན་པར་རབ་ཏུ་འཕྱང་ངོ ། །ཤིང་ལྗོན་པ་དེ་དག་གི་བར་དག་ན་རིན་པོ་ཆེ་སྣ་བདུན་གྱི་ཁང་པ་བརྩེགས་པ་འཕང་དུ་ནི་དཔག་ཚད་ལྔ་བརྒྱ། རྒྱར་ནི་དཔག་ཚད་བརྒྱ་པ་དག་ཡོད་དེ། ཁང་པ་བརྩེགས་པ་དེ་དག་ཀུན་ལའང་ཕྱོགས་བཞིན་རྟ་བབས་དག་ཡོད་དོ། །རྟ་
213b
བབས་དེ་དག་གི་ནང་རོལ། ཁང་པ་བརྩེགས་པ་དེ་དག་གི་ཕྱི་རོལ་ན་རྫིང་བུ་སྲིད་དུ་ནི་དཔག་ཚད་བརྒྱད་ཅུ། རྒྱུར་ནི་དཔག་ཚད་ལྔ་བཅུ་པ་དག་ཡོད་དོ། །རྫིང་བུ་དེ་དག་གི་ཕྱོགས་བཞི་ཁོར་ཁོར་ཡུག་ན་རིན་པོ་ཆེ་སྣ་བདུན་ལས་བྱས་པའི་ཐེམ་སྐས་དག་ཀྱང་ཡོད་དོ། །རྗེད་\?\་བུ་དེ་དག་ཀྱང་ཁོར་ཡུག་ཏུ་མེ་ཏོག་ཨུཏྤ་ལ་དང ། པདྨ་དག་གིས་ཀུན་ནས་ཡོག་སྟེ། མེ་ཏོག་རེ་རེ་ལའང་རྒྱར་ནི་དཔག་ཚད་ཙམ་ཡོད་དོ། །མེ་ཏོག་དེ་དག་གི་ཟེ་བ་དག་ལས་བྱང་ཆུབ་སེམས་དཔའ་སེམས་དཔའ་ཆེན་པ་དག་རབ་ཏུ་སྐྱེས་ཏེ། དེ་དག་ཀྱང་ནམ་གྱི་གུང་ཐུན་དང་པོ་ལ་པདྨ་དེ་དག་གི་ཟེ་བ་དག་ལས་སྐྱེ་ཞིང་རྣམ་པར་གྲོལ་བའི་དགའ་བ་དང ། བདེ་བ་མྱོང་བཞིན་དུ་སྐྱིལ་མོ་ཀྲུང་གིས་མཚན་མོ་དེ་འདའ་བར་བྱེད་དེ། དེ་ན་མཚན་མོ་དེའི་ནང་པར་གྱི་དུས་ཀྱི་ཚེ་ཕྱོགས་བཞི་ནས་དྲི་ཞིམ་ཞིང་ཡིད་དུ་འོང་ལ་འཇམ་ཞིང་རེག་ན་བདེ་བར་བྱེད་པའི་རླུང་དག་རབ་ཏུ་ལྡང་སྟེ། དེ་དག་གིས་མེ་ཏོག་ཁ་ཟུམས་པ་རྣམས་མངོན་པར་འབྱེད་པར་བྱེད་ཅིང ། བྱང་ཆུབ་སེམས་དཔའ་དེ་དག་ཀྱང་ཏིང་ངེ་འཛིན་དེ་ལས་ལངས་ཏེ། རྣམ་པར་གྲོལ་བའི་དགའ་བ་དང་བདེ་བ་སྤངས་ནས་པདྨའི་ཟེ་བ་དག་ལས་བབས་ཏེ། ཁང་པ་བརྩེགས་པ་དེ་དག་ཏུ་ཞུགས་ནས་རིན་པོ་ཆེ་སྣ་བདུན་གྱི་སྟན་དག་ལ་སྐྱིལ་མོ་ཀྲུང་བཅས་ཏེ་འདུག་ཅིང་ཆོས་ཉན་པར་བྱེད་དོ། །ཤིང་ལྗོན་པ་དེ་དག་དང ། ཁང་པ་བརྩེགས་པ་དེ་དག་གི་ཕྱོགས་བཞི་ཁོར་ཁོར་ཡུག་དག་ན་རིན་པོ་ཆེ་ཛམྦུ་ཆུ་བོའི་
214a
༄#། །གསེར་གྱི་རི་འཕང་དུ་ནི་དཔག་ཚད་ཉི་ཤུ། རྒྱར་ནི་དཔག་ཚད་གསུམ་པ་དག་ཡོད་དེ། རི་དེ་དག་གི་བར་བར་དག་ན་ཆུ་ཤེལ་དང ། མེ་ཤེལ་དང ། ནད་རྙིལ་དང ། ནོར་བུ་སྐར་མདོག་འབུམ་ཕྲག་དུ་མ་དག་སྣང་ངོ ། །དེ་ན་སངས་རྒྱས་པདྨ་དམ་པའི་འོད་ཀྱིས་རི་དང་ནོར་བུ་དག་ལ་ཕོག་པ་ན་སངས་རྒྱས་ཀྱི་འོད་དེ་དང ། ནོར་བུའི་འོད་དེས་འཇིག་རྟེན་གྱི་ཁམས་པདྨ་དེ་རྟག་ཏུ་སྣང་བ་རྒྱ་ཆེན་པོས་ཁྱབ་པར་བྱས་ཏེ། དེ་ན་ཉི་མ་དང་ཟླ་བ་དག་གི་འོད་ཀྱང་མི་མངོན་ཏེ། གཞན་དུ་ན་གང་གི་ཚེ་པདྨ་རྣམས་ཁ་ཟུམས་ཤིང་བྱ་དག་སྒྲ་ཆུང་བར་གྱུར་པ་དེའི་ཚེ་མཚན་མོ་ཞེས་བྱ་བའི་གྲངས་སུ་འགྱུར་ལ། དེ་ལས་བཟློག་པ་ནི་ཉིན་པར་ཡིན་ནོ། །རི་དེ་དག་གི་སྟེང་ན་ ་སྔོན་པོ་ལས་བྱས་པའི་ཁང་པ་བརྩེགས་པ་འཕང་དུ་ནི་དཔག་ཚད་དྲུག་ཅུ་རྒྱར་ནི་དཔག་ཚད་ཉི་ཤུ་པ་དག་ཡོད་དེ། ཁང་པ་བརྩེགས་པ་དེ་དག་གི་ཕྱོགས་བཞི་ན་རིན་པོ་ཆེ་སྣ་བདུན་ལས་བྱས་པའི་རྟ་བབས་དག་ཀྱང་ཡོད་དེ། ཁང་པ་བརྩེགས་པ་དེ་དག་ན་རིན་པོ་ཆེ་སྣ་བདུན་ལས་བྱས་པའི་ཁྲི་དག་ཡོད་དེ། དེ་ལ་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་དག་འདུག་ཅིང་ཆོས་ཉན་པར་བྱེད་དོ། །རིགས་ཀྱི་བུ། འཇིག་རྟེན་གྱི་ཁམས་པདྨ་དེ་ན་བྱང་ཆུབ་ཀྱི་ཤིང་དབང་པོ་ཞེས་བྱ་བ་འཕང་དུ་ནི་དཔག་ཚད་སུམ་སྟོང ། རྒྱར་ནི་དཔག་ཚད་ལྔ་བརྒྱ། ཡལ་ག་དང ། ལོ་མ་དང ། འདབ་མ་དག་ནི་དཔག་ཚད་སྟོང་དུ་
214b
ལེགས་པར་གནས་པ་ཡོད་དོ། །བྱང་ཆུབ་ཀྱི་ཤིང་དེའི་དྲུང་ན་དངུལ་ལས་བྱས་པའི་པདྨ་སྡོང་བུའི་འཕང་དུ་ནི་དཔག་ཚད་ལྔ་བརྒྱ་ཡོད་ལ། དེའི་འདབ་མ་ནི་གསེར་ལས་བྱས་པ་བྱེ་བ་ཕྲག་འབུམ་ཡོད་དེ། འཕང་དུ་ནི་དཔག་ཚད་ལྔ་ཡོད་དོ། །ཟེ་བ་ཐམས་ཅད་ན་རིན་པོ་ཆེ་རྡོའི་སྙིང་པོ་ལས་བྱས་པའི་ཟེ་འབྲུ་དག་ཡོད་དོ། །ཟེ་བ་རྣམས་ནི་རིན་པོ་ཆེ་སྣ་བདུན་ལས་བྱས་པ་སྟེ། འཕང་དུ་ནི་དཔག་ཚད་བཅུ། རྒྱར་ནི་དཔག་ཚད་བདུན་ཡོད་དོ། །དེར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །སངས་རྒྱས་ཀྱི་གདན་པདྨ་དེའི་ཁོ་ར་ཁོར་ཡུག་ནའང་པདྨ་དག་ཡོད་དེ། དེ་དག་ལ་བྱང་ཆུབ་སེམས་དཔའ་དག་འཁོད་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པའི་ཆོ་འཕྲུལ་དག་མཐོང་བར་གྱུར་ཏོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་བྱང་ཆུབ་སེམས་དཔའ་རིན་པོ་ཆེ་རྣམ་པར་སྣང་བྱེད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པས་ཆོ་འཕྲུལ་ཆེན་པོ་ཇི་ལྟ་བུ་དག་བསྟན་པ་མཛད་པ་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རིན་པོ་ཆེ་རྣམ་པར་སྣང་བྱེད་ལ་འདི་སྐད་ཅེས་བཀའ་སྩལ་ཏོ། །རིགས་
215a
༄#། །ཀྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པ་ནི་མདང་གི་ནམ་གྱི་ཐུན་ཐ་མ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། ད་ནང་ནང་པར་གྱི་དུས་ཀྱི་ཚེ་འདི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་མཛད་དེ། བདག་ཉིད་ཚངས་པའི་འཇིག་རྟེན་གྱི་བར་དུ་མངོན་པར་སྤྲུལ་ནས་དབུའི་གཙུག་ཏོར་ནས་འོད་ཟེར་བྱེ་བ་ཁྲག་ཁྲིག་ཕྲག་འབུམ་རབ་ཏུ་བཀྱེའོ། །འོད་ཟེར་དེ་དག་གིས་སྟེང་གི་ཕྱོགས་ཀྱི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་སྣང་བས་ཁྱབ་པར་མཛད་དོ། །དེའི་ཚེ་སྟེང་གི་ཕྱོགས་ན་བྱང་ཆུབ་སེམས་དཔའ་གང་དག་གནས་པ་དག་གིས་ཐུར་དུ་བལྟས་ན་དེ་དག་ལ་རི་རབ་དང ། ཁོར་ཡུག་དང ། ཁོར་ཡུག་ཆེན་པོ་དང ། རི་ནག་པོ་རྣམས་ཀྱང་སྣང་བར་མ་གྱུར་ཏོ། །འཇིག་རྟེན་གྱི་ཁམས་དེ་དག་ན་བྱང་ཆུབ་སེམས་དཔའ་གང་དག་ལུང་བསྟན་པ་དག་དང་གང་དག་ཏིང་ངེ་འཛིན་ཐོབ་པ་དག་དང ། གང་དག་གཟུངས་ཐོབ་པ་དག་དང ། གང་དག་བཟོད་པ་ཐོབ་པ་དག་དང ། གང་དག་ས་ལས་ཤིན་ཏུ་འདས་པ་དག་དང ། དེ་ན་གང་དག་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་སྣང་བ་དེས་ཁྱབ་པར་གྱུར་ནས་ཐལ་མོ་སྦྱར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
215b
སངས་རྒྱས་པདྨ་དམ་པ་དེའི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང ། དཔེ་བྱད་བཟང་པོ་བརྒྱད་ཅུས་ལེགས་པར་བརྒྱན་པའི་སྐུའང་མཐོང ། བྱང་ཆུབ་སེམས་དཔའ་འཁོར་དེ་དང ། འཇིག་རྟེན་གྱི་ཁམས་པདྨའི་སངས་རྒྱས་ཀྱི་ཞིང་གི་ཡོན་ཏན་བཀོད་པའང་མཐོང་ངོ ། །མཐོང་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་མཆོག་ཏུ་དགའ་བ་དང ། བདེ་བ་སྐྱེས་ཏེ། འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་ནས་བྱང་ཆུབ་སེམས་དཔའ་བགྲང་བ་ལས་ཡང་དག་པར་འདས་པ་དག་རང་རང་གི་སངས་རྒྱས་ཀྱི་ཞིང་བོར་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པ་ལ་མཆོད་པ་བྱ་བ་དང ། ཕྱག་བྱ་བ་དང ། བསྙེན་བཀུར་བྱ་བའི་ཕྱིར་རྫུ་འཕྲུལ་གྱི་མཐུས་འཇིག་རྟེན་གྱི་ཁམས་པདྨར་ལྷགས་སོ། །རིགས་ཀྱི་བུ། དེ་བཞིན་གཤེགས་པ་པདྨ་དམ་པ་དེས་ཀྱང་བཞུགས་པ་དང ། བཞེངས་པ་དང ། འཆག་བཞིན་དུ་ཞལ་གྱི་སྒོ་ནས་ལྗགས་ཀྱི་དབང་པོ་ཕྱུང་སྟེ། ཐམས་ཅད་དང་ལྡན་པའི་གླིང་བཞི་པའི་འཇིག་རྟེན་གྱི་ཁམས་དེ་ལྗགས་ཀྱི་དབང་པོས་ཡོངས་སུ་ཁྱེབས་པར་མཛད་དོ། །དེ་ནས་བྱང་ཆུབ་སེམས་དཔའ་གང་དག་སྙོམས་པར་ཞུགས་པ་དེ་དག་ཀྱང་ཏིང་ངེ་འཛིན་ལས་ལངས་ནས་དེ་བཞིན་གཤེགས་པ་པདྨ་དམ་པ་དང ། ཐམས་ཅད་དང་ལྡན་པའི་འཁོར་ལ་མཆོད་པ་བྱ་བའི་ལས་ལ་བརྩོན་པར་གྱུར་ཏོ། །རིགས་ཀྱི་བུ། དེ་ནས་དེ་བཞིན་གཤེགས་པ་པདྨ་དམ་པས་ལྗགས་ཀྱི་
216a
༄#། །དབང་པོའི་རྫུ་འཕྲུལ་མངོན་པར་འདུ་མཛད་པའི་ཕྱིར་བསྡུས་ནས། གཞན་ཡང་དེ་བཞིན་གཤེགས་པ་པདྨ་དམ་པས་སྐུ་ཐམས་ཅད་ནས་སྤུའི་ཁུང་བུ་ཐམས་ཅད་ཀྱི་སྤུའི་ཁུང་བུའི་སྒོ་རེ་རེ་ནས་ཀྱང ། འོད་ཟེར་བྱེ་བ་ཁྲག་ཁྲིག་འབུམ་ཕྲག་དྲུག་ཅུ་དྲུག་ཅུ་བྱུང་ཞིང ། ཕྱོགས་བཅུའི་ཕྱོགས་རེ་རེར་ཡང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་སྣང་བ་རྒྱ་ཆེན་པོས་ཁྱབ་པར་མཛད་ནས། འཇིག་རྟེན་གྱི་ཁམས་དེ་དག་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ལུང་བསྟན་པ་དག་དང ། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཏིང་ངེ་འཛིན་ཐོབ་པ་དེ་དག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པ་ལ་བལྟ་བ་དང ། ཕྱག་བྱ་བ་དང ། བསྙེན་བཀུར་བྱ་བའི་ཕྱིར་རང་རང་གིས་སངས་རྒྱས་ཀྱི་ཞིང་གི་སྣང་བ་དང ། རྫུ་འཕྲུལ་གྱི་སྟོབས་ཀྱི་འཇིག་རྟེན་གྱི་ཁམས་པདྨར་ལྷགས་སོ། །རིགས་ཀྱི་བུ། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པས་རྫུ་འཕྲུལ་མངོན་པར་འདུ་མཛད་པ་དེ་ཕྱིར་བསྡུས་ནས། སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། ལྷ་དང་མི་རྣམས་ལ་ཕན་པ་དང ། བདེ་བ་དང ། ཐེག་པ་ཆེན་པོ་ཡོངས་སུ་རྫོགས་པར་བྱ་བའི་ཕྱིར་ཐམས་ཅད་དང་ལྡན་པའི་བྱང་ཆུབ་བྱང་ཆུབ་སེམས་དཔའི་
216b
འཁོར་ལ་ཕྱིར་མི་ལྡོག་པའི་འཁོར་ལོ་ཞེས་བྱ་བ་ཆོས་དང་ལྡན་པའི་ཆོས་ཀྱི་འཁོར་ལོ་བསྐོར་ཏོ། །ཐེག་པ་ཆེན་པོའི་མདོ་སྙིང་རྗེ་པདྨ་དཀར་པོ་ལས། ཆོས་ཀྱི་འཁོར་ལོ་བསྐོར་བ་ཞེས་བྱ་བའི་ལེའུ་སྟེ་དང་པོའོ།། །།དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་རིན་པོ་ཆེ་རྣམ་པར་སྣང་བྱེད་ཀྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། འཇིག་རྟེན་གྱི་ཁམས་པདྨ་དེ་ན་མཚན་མོ་དང་ཉིན་མོར་ནི་ཇི་ལྟར་འཚལ། དེ་ན་སྒྲ་ནི་ཇི་ལྟ་བུ་དག་གྲགས། བྱང་ཆུབ་སེམས་དཔའ་དེ་དག་བསམ་པ་ནི་ཇི་ལྟ་བུ་དང་ལྡན། གནས་པ་ནི་གང་གིས་གནས་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། འཇིག་རྟེན་གྱི་ཁམས་པདྨ་ནི་རྟག་ཏུ་སངས་རྒྱས་ཀྱི་འོད་ཀྱིས་སྣང་བར་གྱུར་པ་ཡིན་ཏེ། དེ་ན་གང་གི་ཚེ་མེ་ཏོག་དག་ཁ་ཟུམས་པར་གྱུར་ཅིང ། བྱ་རྣམས་ཀྱང་སྒྲ་ཆུང་བར་གྱུར་པ་དང ། བཅོམ་ལྡན་འདས་དང ། བྱང་ཆུབ་སེམས་དཔའ་དེ་དག་ཀྱང་བསམ་གཏན་དག་གིས་རོལ་ཅིང་རྣམ་པར་གྲོལ་བའི་དགའ་བ་དང་བདེ་བ་མྱོང་བར་མཛད་པ་དེའི་ཚེ་དེ་ན་མཚན་མོ་ཡིན་པར་ཤེས་སོ། །གང་གི་ཚེ་མེ་ཏོག་དེ་རླུང་གིས་ཁ་བྱེ་བར་གྱུར་ཅིང་བྱ་རྣམས་ཀྱང་སྒྲ་ཡིད་དུ་འོང་བ་སྒྲོགས་པར་བྱེད་པ་དང ། དེར་མེ་ཏོག་གི་ཆར་དག་ཀྱང་མངོན་པར་འབབ་པ་དང ། ཕྱོགས་བཞི་ནས་དྲི་མཆོག་ཏུ་ཞིམ་ཞིང་ཡིད་དུ་འོང་ལ་འཇམ་ཞིང ། རེག་ན་བདེ་བར་འགྱུར་བའི་རླུང་དག་ལྡང་བ་དང ། བཅོམ་
217a
༄#། །ལྡན་འདས་ཀྱང་ཏིང་ངེ་འཛིན་ལས་བཞེངས་ལ། བྱང་ཆུབ་སེམས་དཔའ་རྣམས་ཀྱང་ཏིང་ངེ་འཛིན་ལས་ལངས་ཤིང་བཅོམ་ལྡན་འདས་པདྨ་དམ་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཉན་ཐོས་དང ། རང་སངས་རྒྱས་ཀྱི་གཏམ་ལས་ཤིན་ཏུ་འདས་པ་དག་སྟོན་པར་མཛད་པ་དེའི་ཚེ་དེ་ན་ཉིན་མོ་ཡིན་པར་ཤེས་སོ། །རིགས་ཀྱི་བུ། དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སངས་རྒྱས་ཀྱི་སྒྲ་དང ། ཆོས་ཀྱི་སྒྲ་དང ། དགེ་འདུན་གྱི་སྒྲ་དང་མི་འབྲལ་ལོ། །མི་འཇིགས་པའི་སྒྲ་དང ། མངོན་པར་འདུ་བྱེད་པ་མེད་པའི་སྒྲ་དང ། སྐྱེ་བ་མེད་པའི་སྒྲ་དང ། འགག་པ་མེད་པའི་སྒྲ་དང ། ཞི་བའི་སྒྲ་དང ། ཉེ་བར་ཞི་བའི་སྒྲ་དང ། རབ་ཏུ་ཞི་བའི་སྒྲ་དང ། བྱམས་པ་ཆེན་པོའི་སྒྲ་དང ། སྙིང་རྗེ་ཆེན་པོའི་སྒྲ་དང ། མི་སྐྱེ་བའི་ཆོས་ཀྱི་སྒྲ་དང ། དབང་བསྐུར་བའི་ས་ཐོབ་པའི་སྒྲ་དང ། སངས་རྒྱས་དང་བྱང་ཆུབ་སེམས་དཔའི་སྒྲ་དང་མི་འབྲལ་ཏེ། བྱང་ཆུབ་སེམས་དཔའ་དེ་དག་ནི་རྟག་ཏུ་སྒྲ་དེ་ལྟ་བུ་དག་ཉན་པར་བྱེད་དོ། །རིགས་ཀྱི་བུ། གཞན་ཡང་འཇིག་རྟེན་གྱི་ཁམས་པདྨར་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སྐྱེས་པ་དང ། སྐྱེ་བར་འགྱུར་བ་དེ་དག་ཐམས་ཅད་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་ཞིང ། འོད་དཔག་ཚད་བརྒྱ་པ་ཡོད་ལ། བྱང་ཆུབ་ཀྱི་མཐར་ཐུག་གི་བར་དུ་རྣམ་
217b
པར་མི་ལྟུང་བའི་ཆོས་ཅན་ཡིན་ནོ། །བྱང་ཆུབ་སེམས་དཔའ་དེ་དག་ཐམས་ཅད་ནི་བྱམས་པའི་སེམས་དང་ལྡན་པ་དང ། སྣུམ་པའི་སེམས་དང་ལྡན་པ་དང ། རྙོག་པ་མེད་པའི་སེམས་དང་ལྡན་པ་དང ། དུལ་བའི་སེམས་དང་ལྡན་པ་དང ། སྤྲོ་རིང་བའི་སེམས་དང་ལྡན་པ་དང ། མཉམ་པར་བཞག་པའི་སེམས་དང་ལྡན་པ་དང ། རབ་ཏུ་དང་བའི་སེམས་དང་ལྡན་པ་དང ། ཁོང་ཁྲོ་བ་མེད་པའི་སེམས་དང་ལྡན་པ་དང ། དག་པའི་སེམས་དང་ལྡན་པ་དང ། དགེ་བའི་སེམས་དང་ལྡན་པ་དང ། ཆོས་ལ་དགའ་བའི་སེམས་དང་ལྡན་པ་དང ། སེམས་ཅན་ཐམས་ཅད་ཀྱི་ཉོན་མོངས་བ་རབ་ཏུ་ཞི་བར་བྱེད་པའི་སེམས་དང་ལྡན་པ་དང ། ས་དང་མཚུངས་པའི་སེམས་དང་ལྡན་པ་དང ། འཇིག་རྟེན་པའི་གཏམ་ལ་མངོན་པར་མི་དགའ་བའི་སེམས་དང་ལྡན་པ་དང ། འཇིག་རྟེན་ལས་འདས་པའི་གཏམ་ལ་མངོན་པར་དགའ་བའི་སེམས་དང་ལྡན་པ་དང ། དགེ་བའི་ཆོས་ཐམས་ཅད་ཡོངས་སུ་འཚོལ་བའི་སེམས་དང་ལྡན་པ་དང་ཕུང་པོ་མེད་པ་ལ་རྟག་ཏུ་རབ་ཏུ་བརྩོན་པའི་སེམས་དང་ལྡན་པ་དང ། ན་བ་དང ། རྒ་བ་དང ། འཆི་བ་རབ་ཏུ་ཞི་བར་བྱེད་པའི་སེམས་དང་ལྡན་པ་དང ། ཉོན་མོངས་པ་ཐམས་ཅད་སྲེག་པར་བྱེད་པའི་སེམས་དང་ལྡན་པ་དང ། ཀུན་ཏུ་སྦྱོར་བ་ཐམས་ཅད་རབ་ཏུ་ཞི་བར་བྱེད་པའི་སེམས་དང་ལྡན་པ་དང ། ཆོས་ཐམས་ཅད་ལ་རློམ་སེམས་མེད་པའི་སེམས་དང་ལྡན་པ་དང ། བསམ་
218a
༄#། །པའི་སྟོབས་ཅན་དང ། སྦྱོར་བའི་སྟོབས་ཅན་དང ། རྐྱེན་གྱི་སྟོབས་ཅན་དང ། སྨོན་ལམ་གྱི་སྟོབས་ཅན་དང ། སྙིང་པོ་མེད་པ་དང ། མ་འདྲེས་ཤིང་གོང་དུ་སྐྱོད་པར་བྱེད་པའི་སྟོབས་ཅན་དང ། ངེས་པར་རྟོགས་པའི་སྟོབས་ཅན་དང ། དགེ་བའི་རྩ་བའི་སྟོབས་ཅན་དང ། ཏིང་ངེ་འཛིན་གྱི་སྟོབས་ཅན་དང ། ཐོས་པའི་སྟོབས་ཅན་དང ། གཏོང་བའི་སྟོབས་ཅན་དང ། ཚུལ་ཁྲིམས་ཀྱི་སྟོབས་ཅན་དང ། བཟོད་པའི་སྟོབས་ཅན་དང ། བརྩོན་འགྲུས་ཀྱི་སྟོབས་ཅན་དང ། བསམ་གཏན་གྱི་སྟོབས་ཅན་དང ། ཤེས་རབ་ཀྱི་སྟོབས་ཅན་དང ། ཞི་གནས་ཀྱི་སྟོབས་ཅན་དང ། ལྷག་མཐོང་གི་སྟོབས་ཅན་དང ། མངོན་པར་ཤེས་པའི་སྟོབས་ཅན་དང ། དྲན་པའི་སྟོབས་ཅན་དང ། བྱང་ཆུབ་ཀྱི་སྟོབས་ཅན་དང་སྙིང་སྟོབས་ཀྱི་སྟོབས་ཅན་དང ། བདུད་ཐམས་ཅད་རྣམ་པར་འཇོམས་པའི་སྟོབས་ཅན་དང ། བདུད་ཀྱི་དཔུང་ཐམས་ཅད་རབ་ཏུ་འདུལ་བར་བྱེད་པའི་སྟོབས་ཅན་དང ། ཕས་ཀྱི་རྒོལ་བ་ཐམས་ཅད་ཆོས་དང་མཐུན་པས་ཚར་གཅོད་པའི་སྟོབས་ཅན་དང ། ཉོན་མོངས་པ་ཐམས་ཅད་རབ་ཏུ་འདུལ་བར་བྱེད་པའི་སྟོབས་ཅན་ཤ་སྟག་སྟེ། འཇིག་རྟེན་གྱི་ཁམས་པདྨར་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སྐྱེས་པ་དང ། སྐྱེ་བར་འགྱུར་པ་དེ་དག་ནི་སངས་རྒྱས་འབུམ་ཕྲག་མང་པོ་དག་ལ་ལྷག་པར་
218b
བྱ་བ་བྱས་ཤིང་དགེ་བའི་རྩ་བ་རྣམས་བསྐྱེད་བསྐྱེད་པ་ཡིན་ནོ། །སངས་རྒྱས་ཀྱི་ཞིང་འཇིག་རྟེན་གྱི་ཁམས་པདྨ་དེར། བྱང་ཆུབ་སེམས་དཔའ་གང་དག་སྐྱེས་པ་དང ། སྐྱེ་བར་འགྱུར་བའི་བྱང་ཆུབ་སེམས་དཔའ་དེ་དག་ནི་འདི་ལྟ་སྟེ། དཔེར་ན། ཚངས་རིས་ཀྱི་ལྷ་རྣམས་ལ་ཁམ་གྱིས་ཟ་བའི་ཟས་མེད་པ་བཞིན་དུ་བསམ་གཏན་གྱི་ཟས་དང ། ཆོས་ཀྱི་ཟས་དང ། དྲི་ཟའི་ཟས་དང་ལྡན་པ་མ་ཡིན་ནོ། །དེ་ན་རྣམ་པ་ཐམས་ཅད་དུ་མི་དགེ་བའི་མིང་ཡང་མེད་དོ། །དེ་ན་རྣམ་པ་ཐམས་ཅད་དུ་བུད་མེད་ཀྱི་མིང་ཡང་མེད། གདགས་པའང་མེད་དོ། །དེ་ན་རྣམ་པ་ཐམས་ཅད་དུ་སྡུག་བསྔལ་གྱི་སྒྲའང་མེད་པ་རྣམ་པ་ཐམས་ཅད་དུ་དགེ་བ་དང་མི་དགེ་བའི་སྒྲའང་མེད་དོ། །དེ་བཞིན་དུ་སྦྱར་ཏེ་ཉོན་མོངས་པའི་སྒྲའང་མེད། ཡོངས་སུ་འཛིན་པའང་མེད་དོ། །དེ་ན་མུན་པའང་མེད། དྲི་མའང་མེད་དོ། །སེམས་ངལ་བའང་མེད་དོ། །ལུས་ངལ་བའང་མེད་དོ། །སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་གྱི་སྒྲའང་མེད་དོ། །ངན་སོང་དུ་གདགས་པའང་མེད་དོ། །ཚེར་མ་དང ། ཐིབས་པོ་དང ། རྡོ་བ་དང ། གསེག་མའང་མེད་དོ། །མེའང་མེད། ཉི་མ་དང་ཟླ་བའང་མེད། སྐར་མའི་གཟུགས་ཀྱང་མེད་དོ། །རྒྱ་མཚོ་ཆེན་པོའང་མེད། རི་རབ་ཀྱང་མེད། ཁོར་ཡུག་གི་རིའང་མེད། འཇིག་རྟེན་གྱི་བར་ཡང་མེད། རི་ནག་པོ་རྣམས་ཀྱང་མེད་དོ། །རྡོ་བ་མི་གཙང་བ་དག་ཀྱང་མེད། རྡུལ་གྱི་རིའང་མེད་དོ། །
219a
༄#། །སྤྲིན་དང་ཆར་པའི་སྒྲའང་མེད། རླུང་མར་གྱི་སྒྲའང་མེད་དོ། །རྣམ་པ་ཐམས་ཅད་དུ་ངན་སོང་གི་སྒྲའང་མེད། རྣམ་པ་ཐམས་ཅད་དུ་མི་ཁོམ་པའི་སྒྲའང་མེད་དོ། ། གཞན་ཡང་འཇིག་རྟེན་གྱི་ཁམས་པདྨ་ནི་སངས་རྒྱས་ཀྱི་འོད་དང ། བྱང་ཆུབ་སེམས་དཔའི་འོད་དང ། བསོད་ནམས་ཀྱི་འོད་དང ། རིན་པོ་ཆེའི་འོད་ཀྱི་སྣང་བ་རྒྱ་ཆེན་པོས་རྟག་ཏུ་གསལ་བར་གྱུར་ཏོ། །དེ་ན་བྱ་འབྲས་བུ་དང་བཅས་པ་ཞེས་བྱ་བ་དག་རང་རང་གི་སྒྲ་འཇམ་ཞིང་ཡིད་དུ་འོང་བ་དག་གིས་དབང་པོ་དང ། སྟོབས་དང ། བྱང་ཆུབ་ཀྱི་ཡན་ལག་དག། རབ་ཏུ་སྒྲོགས་པར་བྱེད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་རིན་པོ་ཆེ་རྣམ་པར་སྣང་བྱེད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། འཇིག་རྟེན་གྱི་ཁམས་པདྨ་དེ་ཆེ་ཁྱད་ནི་ཇི་ཙམ་ཞིག་ལགས། པདྨ་དམ་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། གང་ང་མངོན་པར་རྫོགས་པར་སངས་རྒྱས་ནས་རིང་པོ་མ་ལགས་པའི་དེ་བཞིན་གཤེགས་པ་པདྨ་དམ་པ་དེའང་ཡུན་ཇི་སྲིད་ཅིག་ཏུ་བཞུགས་ཏེ་འཚོ་ཞིང་གཞེགས་ལ་ཆོས་སྟོན་པར་འགྱུར། ཡོངས་སུ་མྱ་ངན་ལས་འདས་ནས་ནི་དམ་པའི་ཆོས་ཡུན་ཇི་སྲིད་ཅིག་ཏུ་གནས་བར་འགྱུར། འཇིག་རྟེན་གྱི་ཁམས་པདྨའི་སངས་རྒྱས་ཀྱི་ཞིང་དུ་བྱང་ཆུབ་སེམས་དཔའ་གང་དག་སྐྱེས་པ་དང ། སྐྱེ་
219b
བར་འགྱུར་བ་དེ་དག་ནི་ཡུན་ཇི་སྲིད་ཅིག་ཏུ་གནས་པར་འགྱུར། ཅི་བྱང་ཆུབ་སེམས་དཔའ་དེ་དག་སངས་རྒྱས་ལ་ལྟ་བ་དང ། ཆོས་ཉན་པ་དང ། དགེ་འདུན་ལ་བསྙེན་བཀུར་བགྱིད་པ་དང་མི་འབྲལ་ལགས་སམ། འོན་ཏེ་དེ་ལྟ་མ་ལགས། འཇིག་རྟེན་གྱི་ཁམས་པདྨ་དེ་ནི་སྔོན་མིང་ཅི་ཞེས་བགྱི་བར་གྱུར། དེར་རྒྱལ་བའི་ཉི་མ་ནུབ་ནས་ཡུན་ཇི་སྲིད་ཅིག་ལགས་ནས། དེའི་འོག་ཏུ་དེ་བཞིན་གཤེགས་པ་པདྨ་དམ་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས། ཅིའི་རྐྱེན་གྱིས་ན་ཕྱོགས་བཅུའི་སངས་རྒྱས་ཀྱི་ཞིང་གཞན་དག་ན་སངས་རྒྱས་བཅོམ་ལྡན་འདས་གང་དག་ཆོ་འཕྲུལ་དག་མཛད་པའི་སངས་རྒྱས་ཀྱི་རྣམ་པར་འཕྲུལ་པ་དག་དང ། སངས་རྒྱས་ཀྱི་ཆོ་འཕྲུལ་དག་ཁ་ཅིག་གིས་ནི་མཐོང་ལ། ཁ་ཅིག་གིས་ནི་མི་མཐོང་བར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་བ། རིགས་ཀྱི་བུ། འདི་ལྟ་སྟེ། དཔེར་ན། རིའི་རྒྱལ་བོ་རི་རབ་ལ་འཕང་དུ་ནི་དཔག་ཚད་འབུམ་དྲུག་ཁྲི་བརྒྱད་སྟོང་ཡོད་ལ། རྒྱར་ནི་དཔག་ཚད་བརྒྱད་ཁྲི་བཞི་སྟོང་ཡོད་པ་སྐྱེས་བུ་བརྩོན་འགྲུས་དང་ལྡན་པ། སྟོབས་དང་ལྡན་པ་ལ་ལ་ཞིག་འོངས་ནས་སྟིང་ངེ་འཛིན་གྱི་མཐུས་རིའི་རྒྱལ་པོ་རི་རབ་དེ་ཡུངས་འབྲུའི་ཚད་ཙམ་དུ་བཀྲུམ་ནས། ཡུངས་འབྲུ་ཙམ་དུ་གྱུར་པ་དེ་དག་ནི་བགྲང་བ་ལས་ཡང་དག་པར་འདས་པས་ན། ཡུངས་འབྲུ་ཙམ་པོ་དེ་དག་ནི་ཐམས་ཅད་མཁྱེན་པའི་ཡེ་ཤེས་མ་གཏོགས་པར་
220a
༄#། །སུས་ཀྱང་བགྲང་བར་མི་ནུས་ཏེ། ཡུངས་འབྲུ་ཙམ་པོ་དེ་དག་ཇི་སྙེད་པར་དེ་ན་གླིང་བཞི་བའི་ཚད་ཀྱང་དེ་སྙེད་ཡོད་དོ། །འདི་ལྟ་སྟེ། དཔེར་ན། འཇིག་རྟེན་གྱི་ཁམས་བདེ་བ་ཅན་བྱང་ཆུབ་སེམས་དཔའ་དག་གིས་ཀུན་ཏུ་གང་བ་བཞིན་དུ་སངས་རྒྱས་ཀྱི་ཞིང་པདྨའང་བྱང་ཆུབ་སེམས་དཔའ་དག་གིས་ཀུན་ཏུ་གང་བ་ཡིན་ནོ། །རིགས་ཀྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པའི་སྐུ་ཚེའི་ཚད་ནི་བར་གྱི་བསྐལ་པ་སུམ་ཅུར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པར་འགྱུར་དོ། །རིགས་ཀྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པ་ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ནི་བར་གྱི་བསྐལ་པ་བཅུར་གནས་པར་འགྱུར་རོ། །འཇིག་རྟེན་གྱི་ཁམས་པདྨར་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སྐྱེས་པ་དང ། སྐྱེ་བར་འགྱུར་བ་དེ་དག་གི་ཚེའི་ཚད་ནི་བར་གྱི་བསྐལ་པ་བཞི་བཅུར་འགྱུར་རོ། །རིགས་ཀྱི་བུ། འཇིག་རྟེན་གྱི་ཁམས་པདྨ་དེ་སྔོན་ནི་ཙདྡན་ཞེས་བྱ་བར་གྱུར་ཏེ། དེ་ལྟར་གྱི་འཇིག་རྟེན་གྱི་ཁམས་པདྨ་ལྟར་ཡོངས་སུ་དག་པར་ཡང་མ་གྱུར་ལ། དེ་ལྟར་སེམས་ཅན་དག་པ་དག་གིས་གང་བར་ཡང་མ་གྱུར་ཏོ། །རིགས་ཀྱི་བུ། འཇིག་རྟེན་གྱི་ཁམས་ཙནྡན་དུ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་
220b
རྫོགས་པའི་སངས་རྒྱས་ཟླ་བ་དམ་པ་ཞེས་བྱ་བ་རིག་པ་དང་ཞབས་སུ་ལྡན་པ་ཞེས་བྱ་བ་ནས་སངས་རྒྱས་བཅོམ་ལྡན་འདས་ཞེས་བྱ་བའི་བར་དང་ལྡན་པར་གྱུར་ཏེ། དེས་ཀྱང་བར་གྱི་བསྐལ་བ་སུམ་ཅུར་ཆོས་བསྟན་པར་གྱུར་ཏོ། །ཡོངས་སུ་མྱ་ངན་ལས་འདས་པའི་དུས་ཀྱི་ཚེ་ན་བྱང་ཆུབ་སེམས་དཔའ་ཁ་ཅིག་ནི་སྨོན་ལམ་གྱི་དབང་གིས་སངས་རྒྱས་ཀྱི་ཞིང་གཞན་དག་ཏུ་དོང་ངོ ། ། བྱང་ཆུབ་སེམས་དཔའ་ལྷག་མ་གང་དག་དེ་ན་འཁོད་པ་དེ་དག་ནི་འདི་སྙམ་དུ་སེམས་པར་གྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་དམ་པ་ནི་དོ་མདོ་ནམ་གྱི་གུང་ཐུན་ལ་ཡོངས་སུ་མྱ་ངན་ལས་འདའ་བར་འགྱུར་རོ། །བཅོམ་ལྡན་འདས་ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ནི་བར་གྱི་བསྐལ་བ་བཅུར་གནས་པར་གྱུར་ན། དམ་པའི་ཆོས་ནུབ་པའི་འོག་ཏུ་སུ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་སྙམ་དུ་སེམས་པར་གྱུར་ཏོ། ། ཡང་དེའི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་ཕྱག་རྒྱ་ཞེས་བྱ་བ་དེ་སྔོན་གྱི་སྨོན་ལམ་གྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་དམ་པ་ལུང་བསྟན་པར་གྱུར་ཏེ། རིགས་ཀྱི་བུ། ང་ཡོངས་སུ་མྱ་ངན་ལས་འདས་ནས་དམ་པའི་ཆོས་ནི་བར་གྱི་བསྐལ་པ་བཅུར་གནས་པར་འགྱུར་ཏེ། ནམ་གྱི་གུང་ཐུན་ལ་
221a
༄#། །ངའི་དམ་པའི་ཆོས་ནུབ་པར་གྱུར་ནས་དེ་ཉིད་ཀྱི་ནུབ་མོའི་ཐུན་ཐ་མ་ལ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པ་ཞེས་བྱ་བ་རིག་པ་དང་ཞབས་སུ་ལྡན་པ་ཞེས་བྱ་བ་ནས། སངས་རྒྱས་བཅོམ་ལྡན་འདས་ཞེས་བྱ་བའི་བར་དུ་འགྱུར་རོ་ཞེས་ལུང་བསྟན་ཏོ། །དེའི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་དམ་པ་ག་ལ་བ་དེར་སོང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་དམ་པའི་དྲུང་དུ་ལྷགས་པ་དང ། བྱང་ཆུབ་སེམས་དཔའ་དེ་དག་ཐམས་ཅད་ཀྱིས་ཏིང་ངེ་འཛིན་གྱི་སྟོབས་དང ། བྱང་ཆུབ་སེམས་དཔའི་རྣམ་པར་འཕྲུལ་པ་རྣམ་པ་སྣ་ཚོགས་དག་གིས་དེ་བཞིན་གཤེགས་པ་ཟླ་བ་དམ་པ་ལ་མཆོད་དེ་ལན་གསུམ་བསྐོར་བ་བྱས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ཅག་ནི་འགོག་པ་ལ་མཉམ་པར་བཞག་པའི་སེམས་ཀྱིས་བསྐལ་པ་བར་མ་བཅུ་པོ་དེ་དག་འདའ་བར་བགྱི་བར་འཚལ་ལགས་སོ། །རིགས་ཀྱི་བུ། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་དམ་པས་བྱང་
221b
ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་ཕྱག་རྒྱལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། དེ་ལ་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་འདི་ནི་འདས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ཀྱིས་ཀྱང་རྒྱལ་ཚབ་ཏུ་དབང་བསྐུར་བའི་བྱང་ཆུབ་སེམས་དཔའ་རྣམས་ལ་བཤད་པ་ཡིན་ལ། སངས་རྒྱས་བཅོམ་ལྡན་འདས་གང་དག་ད་ལྟར་ཕྱོགས་བཅུའི་འཇིག་རྟེན་གྱི་ཁམས་དག་ན་བཞུགས་ཏེ་འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་དེ་དག་ཀྱང་རྒྱལ་ཚབ་ཏུ་དབང་བསྐུར་བའི་བྱང་ཆུབ་སེམས་དཔའ་རྣམས་ལ་སྟོན་པར་མཛད་ཅིང ། གང་དག་མ་འོངས་པའི་དུས་ན་འབྱུང་བར་འགྱུར་བའི་སངས་རྒྱས་དེ་དག་ཀྱང་རྒྱལ་ཚབ་ཏུ་དབང་བསྐུར་བའི་བྱང་ཆུབ་སེམས་དཔའ་རྣམས་ལ་སྟོན་པར་འགྱུར་བས་ན་ཁྱོད་ཀྱིས་ཀྱང་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་འདི་གཟུང་ཞིག་།ཏ་དྱ་ཐཱ། ཛྭ་ལི་ཛྭ་ལི་ནི། མ་ཧཱ་ཛྭ་ལི་ནི། ཧུཀྐེ། བུཀྐེ། སམ་བ་དེ། མཧཱ་སམ་བ་དེ། དེ་བ་ན་ཨ་ཊི། བ་ཊི། ཊ་ཀེ། ཋ་ར་ཋ་ཀ་ཀེ། ཨ་མི་མ་ཀ་སི། ཧི་ལི་ཙི་ལི་ཏི་ལི། རུ་རུ། ཀེ། མཧཱ་རུ་རུ་ཀེ། ཛ་ཡེ། དུ་རྫ་ཡ། ཛ་ཡ་མ་ཏི། ཤཱནྟེ། ཤཱནྟེ་ནི་ར་གྷེ་ཥ་ཎི། ཨ་མཱུ་ལེ། ཨ་མཱུ་ལ་པ་རི་ཚནྣེ། མཱར་སེ་ནྱ། བིད་ཏྲ་ས་ནེ། མུཀྟེ། མུཀྟ་པ་རི་ཤུདྡྷེ། ཨ་བྷི་ཏཱི། བྷ་ཡ་མོ་ཙ་ནེ། བྷ་ར་ཨོ་ཧ་ར་ཎ། དཱནྟ། བིདྱཱ་བིདྱཱ། བིདྱཱ། དྷ་རུཏྟ་མེ། ནི་ཨ་གྲ་ཧཾ་བ་ར་བཱ་དྭི་ནཱཾ། དྷརྨ་
222a
༄#། །བཱ་དཱི། ནཱ་མ་ཨ་ནུ་གྲ་ཧ་ན། ཨ་རཀྵ་དྷརྨ་བཱ་དཱི་ནཱཾ། ཙ་ཏུརྞཱཾ། སྨྲྀ་ཏྱུ་ཨུ་པ་སྠ་ནཱ་ནཱཾ། ཨ་དྷི་མུཀྟི་པ་ད་པྲ་ཀཱ་ཤ་ན་པ་ད་མི་དན། བུདྡྷ་ཀཱ། ཤ་ཡེ། ཨ་མ་མ། མི་མ་མ། ཨ་བཻ་བི། ཨ་རྠེ། ཨརྠ་ནི། སྟཱི་ར་ཎེ། ལོ་ཀ་ཨ་དྷི་མུཀྟེ། སུནྡྷ་རེ། བ་རི་བྷཱ་བ་ནེ། ཙ་ཏུ་རྞཱཾ། ཨཱ་རྱ་བཾ་ཤ་ནའཾ། ཨ་དྷི་མུ་ཀཏི་པ་ད་པྲ་ཀཱ་ཤ་ན་པ་ད། བྷཱ་ཥ་ཨརྠེ་བྷཱ་ཥ་ནེ། དྷཱ་རེ་དྷ་ར་བ་ཏི། གུཀྟེ། ཤུ་བྷེ་ཤུ་བྷ་པྲ་བྷེ། ཏཏ་པཱ་ལ། ཨ་གྲ་ཕ་ལ། ཨ་ཕ་ལ་ནི་ཥྥ་ལ། ནི་ཧ་ལ། སུམུཀྟ། ཨམུཀྟ། ནིརྨུཀ། ཨ་བ་བྷྲ་མི་ཏ། བུ་མུཀྟ་བ་ཏི། བི་ལ་ཕ་ལ། ཨཱ་ཡུ་དྡྷ། ཨ་བི་ཏི། བི་བི་ཏི། ར་ཏི་ཀུ་ལ། ཏུ་ལ་མན། ཨ་ཧིང་ས་མ་ཨི་ཏི་ཏཱ་བ། ཨནྡྷ་ནནྡྷ་ད། ས་རབ་ལོ་ཀ་ཨ་ན་ཀ་བི་ལིག་ཀ། ཨ་བྷུ་ས་རེ། ཧ་ཏ་མནྟྲི། བེ་ཤ་ཨ་གྲ་མ་ཏེ། ཨ་ཕ་ལ། ཀ་ཕ་ལ། ཏྲ་ཡཱ་ནཱ། ཨཱ་རཀྵི་ཏ་ནཱཾ། ཨ་དྷི་མུཀྟི་པ་ད་མི་ད་ན། ཛ་ད་ཏ། ཨ་ནི་ཧ་ར་བཱ་ཙ་ཏ་བ་བྱོ། ཨི་དམ་པཱ་ལན། ནི་ཡཱ་མ་ཕ་ལན། ས་མུ་དྲ་ན་ཡ། བི་བྷཱུ་ཥ་པ་ཤྱོ་སོ་མནྟ། ཨ་ནུ་མནྟོ། ཨ་ཀུ་མནྟོ། ཙྪེ་ད་བ་ན། མནྟྲ་སྟ། ད་ཤ་བ་ལ། བི་གྲ་ཧ་ཏ། ཨི་སུ་སྠ་ན། སུ་ནི་ཁ་མ། ཏིཀྵྞ་མ་ཏི། ཨཱ་ལོ་ཀ། ཨ་ཏི་ཀྲྀཥྞ། ཨ་ཏི་མི་ཏ། པྲ་ཏྱུ་ད་པནྣ། བུདྡྷ་པཱུ་རྦ་གྲ་ཧ་རེ། ཙ་ཏུ་རྞཱ། སམ་མྱག་པྲ་ཧ་ཎཱ་ནཱཾ། ཨ་དྷི་མུཀྟི་པ་དི་པྲ་ཀ་ཤ་ན་པ་ད་མི་དན། ཨནྣྱ་མནྣྱེ་མ་ནེ། མ་མ་ནྱེ། བཱི་རི་བི་ཏི་རེ་ཤ་མེ། ཤ་མི་ཏི་བི། ཤཱནྟེ། མུཀྟེ། ནིརུཀྟ་མེ། ས་མེ། ས་མ་ས་མེ། ཀྵེ་ཡེ། ཨཀྵ་ཡེ། ཨ་ཛི་ཏི་ཤན་ཏེ། ཤ་ནི་ཥྚེ། དྷ་རེ་ཎེ། ཨཱ་ལོ་ཀ།
222b
་བ་བྷཱ་སེ། རཏྣ་པྲ་ཏེ། རསྨྱ་བ་ཏེ། ཛྙཱ་ན་བ་ཏེ། མེ་རུ་པཾ་ཏི། ཀྵ་ཡ་ནི་དཪྴ་ནེ། ལོ་ཀ་པྲ་དཱི་པ་ནི་དཪྴ་ནེ། ཙ་ཏུརྞཱཾ་པ་ཎི་སཾ་བི་དཱན། ཨ་དྷི་མུཀྟི་པྲ་ད་པྲ་ཀཱ་ཤ་ན་པ་ད་མི་དན། ཙྐཥུ་ཨཱ་བ་ས་ནི། དཪྵེ་ཎེ། ཛྙཱ་ན་ཨཱ་ལོ་ཀ་ནི་རྡ་ཪྵ་ཎེ། པྲ་བྷཱ་ས་ནི། སརྦཻནྡྲི་ཡ། བྷཱུ་མི་ཨ་ཏི་ཀྲནྟེ། ས་པ་ས་བ། བཱ་མཱ་ན། ས་རྦ་པྲ་ཐ་བཱ། ཀཥ་ཡང་ཀ་རེ། ཤོ་ཀ་ཨརྠ་བཱ་ཙ་ནེ། ལོ་ཀ་ཨ་ནུ་དརྞ་ཎ། བི་བྷཱུ་ཙ་ཏུ་རྞཱཾ། རི་དྡྷི་པཱ་དཱ་ནཱཾ། ཨ་དྷི་མུཀྟི་པ་དེ་པྲ་ཀཱ་ཤ་ན་ད་མི་དན། ཨ་ཙི་ལ་བུདྡྷེ། དྷ་བྷ་པྲ་ཙ་ལེ། ས་ཏྭེ་གྲྀ་ཧན། སིདྡྷི་ཀ་མ་པ་ནི་ནི། སིདྡྷི་སྨ་ཏི་ཏེ། པ་རི་ཀ་སེ་རེ། སཽ་མ། ཙཎྜེ་དའྣྟེ། ཨ་ཙ་ལ་ཨ་མ་རེ། བི་ཙི་བ་ལེ། ནེ་བ་རེ། པྲ་ཙ་ཙ་ལེ། པྲ་ས་རེ། ཨ་ན་ཡ། ཨ་བྱ་སེ། ཀརྐ་མེ། པྲ་བྷ་བི་ནི། ཨོ་མེ་ནི་ཛེ་སེ། ཀྲ་གྲ་མེ། ན་ཡུ་ཏེ། ཨིནྡྲི་ཨུ་ནཱཾ། པ་ལ་ནཱཾ། ཨ་དྷི་མུཀྟི་པ་ད་པྲ་ཀཱ་ཤ་ན་པ་ད་མི་དན། པུཥྤ་སུ་པུཥེཔ། དྲུ་མ་པ་རེ་ཧ་རེ། ཨ་བྷ་ཡ་རུ་ཙི་རེ། ཙི་།ཀ་རེཀཥེ། ཨ་ཀཥཱ་ཡ་མ་སྟུ་ན་ནི་ལེ། མ་མ་ལེ། པཉྩ་ཤི་ཤི་རེ། ལོ་ཀ་སྱ་བི་ཛྙཱ་ནེ། ན་ཡ་ས་མྀ་གྲ་ཧི་ཏེ་ཙ་ཡུཀྟེ། ཚནྡེ་ན། སཔྟ་ནཱཾ། བོ་དྷྱཱཾ་ནཱཾ། ཨ་དྷི་མུ་ཀཏི་པ་ད་པྲ་ཀཱ་ཤ་ན་པ་ད་མི་དན། ཙ་ཀྲ་བཛེ། མཻ་ཏྲེ་སྲ་མ་མ་ཏེ་ཀའྲནྟེ། ཀྲེ་ཏེ། ཀཱ་རུ་ཎེ། རུ་དི་ཀཥ་ཡི། པྲི་ཏི་རཱུ་པེཀྵ་སཾ་བནྣེ། ཨ་ར་ཏེ། བ་ར་ཏེ། ཁ་གེ་ཁ་གེ། ཨ་མཱུ་ལེ། མཱུ་ལ་ཤོ་དྷ་ནེ། ཙ་ཏུ་རྞཱཾ་བེ་ཤ་ར་དྱ་ནཱཾ། ཨ་དྷི་མུཀྟི་པ་ད་པྲ་ཀཱ་ཤ་ན་པ་ད་མི་དན། བར་ཏེ། ཙ་ཀྲེ། ཙཀྲཱ་དྷ་རེ། པར་ཙ་ཀྲེ། པ་རེ་པུ་རེ།
223a
༄#། །ཧི་ལེ་ཧི་ལེ། དྷ་རེ་ཨརཱུ་པ་བ་ཏེ། ཧུ་ཧུ་རེ། ཡ་ཐཱ་ཛི་བྷཾ་གན། ནི་མ་བ་རེ། ཡ་ཐ་ཨངེ ། ཡ་ཐ་པ་ར་ན་ཙི་རི་ཏི་རི་ཤ་ཡ་ཐཱ། བ་ཡ་རི་རི་ཤི། སཏྱ་ནི་རྷ་ར། ཛ་ར་བ་བི་ལ།་བཱིརྱ་ནི་རྷ་ར། ཙུ་རེ་མཱ་རྒ་ནི་ར་ཧཱ་ར་ས་མཱ་དྷི་ནི་རྷཱ་ར། པྲ་ཛྙཱ་ནི་རྡཱ་ར། བི་མུཀྟི་ནི་རྷཱ་ར། བི་མུཀྟི། བི་བུཀྟི། ཛྙཱ་ན་དརྷྶ་ན་ནི་རཧཱ་ར། ན་ཀཥ་ཏྲ་ནི་རཧཱ་ར། ཙནྡྲ་ནི་རཧཱ་ར། སཱུ་རྱ་ནི་རཧཱ་ར། པ་དཱ་ཤྩ་ཏུ་རུ་ཀཏ་ཏ་སྟ་ཐཱ་ག་ཏེ་ན། ཨངྦྷཱུ་ཏ། ནི་རདྦྷཱུ་ཏཱཾ། སཾ་བུདྡྷ་མ། ཨ་བུདྡྷ་མ། ཨི་ཧ་བུདྡྷ་མ། ཏ་ཏྲ་བུདྡྷ་མ། ནི་ཧཾ་ག་མ་བུ་རེ། ཨ་ཕ་ལ། ད་ཕ་ལ། པཎ་ཌ་རེ། པཎ་ཌ་རེ། ཏདྲ་ལན། ཏ་ལུ། མཾ་ག་ལ་དྷ་རི་ཎི། པཱུ་ཌ་ཎི། སཾ་པྲ་པཱུ་ཌ་ཎི། ག་ཏ་ག་མ་ཏི་ན་རཱུ་པ། ནཱ་ཤ་ནི། ན་ཤ་བནྡྷ་ནི། ཙི་ད་ཙི་ནི་ཙིང་ཙི་ནི། ས་ཡོ་དྷ། ཧི་དི་ད་ག་མ། པ་རེ་པ་ར། ཧ་ན་ནེ། བྷ་ར་མ་བྷ་རེ། བིན་དེ།་བི་རེ་བི་རེ། རུ་ཥ་རེ། ཤ་ར་ནེ། དྷ་ར་ཎེ། པྲ་བར་ཏེ། བརྞ་ཌ་ཡེ། བི་དུནྡུ་མཱ། པ་ར་ཁུ་མཱ། པྲ་ཧམ་ཙ་རི་ན། ཨིནྡྲ་བ་ནི། དྷི་དྷི་རཱ་ཡ་ནི། མ་ཧེ་ཤཝ་ར་མ་ལ་ནི། མ་མ་སུ་མ། ཨ་ལ་མི་ནི། ཨེ་ཀ་ཨཀྵ་ར་ནི། པཉྩ་ནི་ཙར་སྟེ། ཨ་བྷི་ཙཎྜ་ལ་པུ་རེ། སརྦ་སུ་རེ། ཨ་བ་ར་སུ་ར། པཱུ་རྞྞ་ག་ཏི་ཏན། པཎྜི་ཏ་ན། ཨ་ཡི་ན་ཀ་ཎ་ཌ། ཛམ་བྷ་མེ། གནྡྷ་རེ་ཨཏྟ། ན་ཧ་ནི་མ་ཀ་ར་བྷི་རོ་ཧི་ནི། སིདྡྷ་མནྟྲེ། བི་ལོ་ཀ་མ་ཏྲེ། བུདྡྷ་ཨ་དྷི་ཥྛི་ཏེ། དྷཱ་ར་ཎི་མུ་ཁེ། ད་ཤཱ་ནཱ་མཱ་ལ་ནཱཾ་ཨ་དྷི་མུཀྟི་པྲ་ཀཱ་ཤ་ན་པ་ད་མི་དན། བཅོམ་ལྡན་འདས་ཀྱིས་ཐམས་ཅད་མཁྱེན་པ་ཉིད་
223b
ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་འདི་གསུངས་མ་ཐག་ཏུ། དེ་ནས་དེའི་མོད་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་ཏེ། གཡོས། རབ་ཏུ་གཡོས། ཀུན་ཏུ་རབ་ཏུ་གཡོས་སོ། །འགུལ། རབ་ཏུ་འགུལ། ཀུན་ཏུ་རབ་ཏུ་འགུལ་ཏོ། །འཁྲུགས། རབ་ཏུ་འཁྲུགས། ཀུན་ཏུ་རབ་ཏུ་འཁྲུགས་སོ། །ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་མོ། །མཐོ་བ་དང ། དམའ་བ་དང ། ཀུན་ཏུ་རབ་ཏུ་དམའ་བར་ཡང་གྱུར་ཏོ། །གང་གི་ཕྱིར་ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་བགྲང་བ་ལས་ཡང་དག་པར་འདས་པའི་བྱེ་མ་སྙེད་དག་སྣང་བ་རྒྱ་ཆེན་པོས་ཁྱབ་པར་གྱུར་པ་དེ་ལྟ་བུའི་སྣང་བ་དག་ཀྱང་བྱུང་བར་གྱུར་ཏོ། །དེའི་ཚེ་ན་རི་རབ་དང ། ཁོར་ཡུག་དང ། ཁོར་ཡུག་ཆེན་པོ་དག་ཀྱང་མིག་ལམ་ན་མི་སྣང་ངོ ། །ཕྱོགས་བཅུའི་འཇིག་རྟེན་གྱི་ཁམས་བགྲང་ལ་ལས་ཡང་དག་པར་འདས་པ་དག་ཀྱང་ལག་མཐིལ་ལྟར་མཉམ་པར་ཀུན་ཏུ་སྣང་ངོ ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཕྱོགས་བཅུའི་འཇིག་རྟེན་གྱི་ཁམས་བགྲང་བ་ལས་ཡང་དག་པར་འདས་པ་དག་ན་གནས་པ་དེ་དག་དང ། གང་དག་ཏིང་ངེ་འཛིན་དང ། གཟུངས་དང་བཟོད་པ་ཐོབ་པ་དེ་དག་ཀྱང་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་འདི་ཉན་པའི་ཕྱིར་དེ་བཞིན་གཤེགས་པའི་མཐུས་རང་རང་གི་
224a
༄#། །སངས་རྒྱས་ཀྱི་ཞིང་དག་ནས་མི་སྣང་བར་འགྱུར་ཏེ། བྱ་རྒོད་ཀྱི་ཕུང་པོའི་རི་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། བྱང་ཆུབ་སེམས་དཔའི་རྣམ་པར་འཕྲུལ་བ་རྣམ་པ་ཐ་དད་པ་སྣ་ཚོགས་པ་དག་གི་བཅོམ་ལྡན་འདས་ལ་མཆོད་པ་བྱས་ནས་དེ་ཉིད་དུ་འཁོད་དོ། །ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་དང ། གྲུལ་བུམ་དང ། ཤ་ཟ་བགྲང་བ་ལས་ཡང་དག་པར་འདས་པ་དག་ཀྱང་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པའི་འདི་མཉན་པའི་ཕྱིར་བྱ་རྒོད་ཀྱི་ཕུང་པོའི་རི་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ། ལྷགས་ནས། བཅོམ་ལྡན་འདས་ཀྱིས་ཞབས་ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་འཁོད་དོ། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་འདིར་འདུས་པ་དེ་དག་ཐམས་ཅད་ཀྱིས་སངས་རྒྱས་ཀྱི་ཞིང་པདྨ་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པ་བྱང་ཆུབ་སེམས་པའི་ཚོགས་ཀྱི་ཡོངས་སུ་བསྐོར་བའང་མཐོང་བར་གྱུར་ཏོ།། བཅོམ་ལྡན་འདས་ཀྱིས་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་འདི་གསུངས་མ་ཐག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་གངྒཱའི་
224b
ཀླུང་བདུན་ཅུ་རྩ་གཉིས་ཀྱི་བྱེ་མ་སྙེད་ཀྱིས་གཟུངས་འདི་ཐོབ་བོ། །གཟུངས་ཐོབ་པའི་བྱང་ཆུབ་སེམས་དཔའ་དེ་དག་གིས་ཕྱོགས་བཅུའི་འཇིག་རྟེན་གྱི་ཁམས་བགྲང་བ་ལས་ཡང་དག་པར་འདས་པ་དེ་ན་བཞུགས་པའི་སངས་རྒྱས་བཅོམ་ལྡན་འདས་རྣམས་ཀྱང་མཐོང་བར་གྱུར་ཏོ། །སངས་རྒྱས་ཀྱི་ཞིང་གི་ཡོན་ཏན་བཀོད་པ་ཐམས་ཅད་ཀྱང་མཐོང་བར་གྱུར་ཏེ། དེ་དག་ངོ་མཚར་དུ་འཛིན་པར་གྱུར་ནས་ཏིང་ངེ་འཛིན་གྱི་སྟོབས་དང ། བྱང་ཆུབ་སེམས་དཔའི་རྣམ་པར་འཕྲུལ་བས་སངས་རྒྱས་ལ་མཆོད་པ་བྱས་ཏེ་དེ་ཉིད་དུ་འཁོད་པ་དང ། བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་།ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་འདི་བསྒོམ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་གཟུངས་ཀྱི་སྒོ་བརྒྱད་ཁྲི་བཞི་སྟོང་འཐོབ་བོ། །གཟུངས་ཀྱི་སྒོ་བདུན་ཁྲི་ཉིས་སྟོང་ཡང་འཐོབ་བོ། །ཏིང་ངེ་འཛིན་གྱི་སྒོ་དྲུག་ཁྲིའང་འཐོབ་བོ། །གཟུངས་ཀྱི་སྒོ་འདི་འཐོབ་ཨཱི་བྱང་ཆུབ་སེམས་དཔའ་སེམས་ཆེན་པོ་ནི་བྱམས་པ་ཆེན་པོ་འཐོབ་བོ། །སྙིང་རྗེ་ཆེན་པོའང་ཐོབ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཏིང་ངེ་འཛིན་འདི་འབའ་ཞིག་ཐོབ་པར་བྱ་བའི་ཕྱིར་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་རྟོག་པར་བྱེད་ཅིང ། ཐམས་ཅད་མཁྱེན་པའི་ཡེ་ཤེས་ཀྱང་འཐོབ་སྟེ། འདི་ནི་སངས་རྒྱས་ཀྱི་ཆོས་ཐམས་ཅད་ཡོངས་སུ་འཛིན་པ་ཡིན་
225a
༄#། །ནོ། །སངས་རྒྱས་བཅོམ་ལྡན་འདས་རྣམས་ཀྱིས་ཀྱང་གཟུངས་འདིའི་ངོ་བོ་ཉིད་ཐུགས་སུ་ཆུད་ནས་སེམས་ཅན་རྣམས་ལ་ཆོས་སྟོན་པར་མཛད་ཅིང་ཤིན་ཏུ་མྱུར་བར་ཡོངས་སུ་མྱ་ངན་ལས་འདའ་བར་ཡང་མི་མཛད་དོ། །རིགས་ཀྱི་བུ། ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་འདིའི་གཟུངས་ཀྱི་མཐུས་ས་ཆེན་པོ་འདི་རབ་ཏུ་གཡོས་ཤིང་སྣང་བ་བྱུང་བར་གྱུར་བ་དང ། སྣང་བ་དེས་སངས་རྒྱས་ཀྱི་ཞིང་མཐའ་ཡས་མུ་མེད་པ་དག་སྣང་བ་རྒྱ་ཆེན་པོས་ཁྱབ་པར་གྱུར་པ་དང ། སྣང་བ་དེས་ཀྱང་བྱང་ཆུབ་སེམས་དཔའ་མཐའ་ཡས་མུ་མེད་པ་དེ་དག་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་འདི་མཉན་པའི་ཕྱིར་སངས་རྒྱས་ཀྱི་ཞིང་མཐའ་ཡས་མུ་མེད་པ་དག་ནས་ཀུན་ནས་འདིར་ལྷགས་པ་ལ་ལྟོས།། །།བམ་པོ་གཉིས་པ། འཇིག་རྟེན་གྱི་ཁམས་མི་མཇེད་འདི་ན་འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་དང ། མི་དང ། མི་མ་ཡིན་པ་མཐའ་ཡས་པ་མུ་མེད་པ་གང་དག་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་འདི་ཉན་པར་བྱེད་པ་དེ་དག་ནི་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་འདི་ཐོས་མ་ཐག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་གོ། །ཡི་གེར་འདྲི་བར་བྱེད་ནའང་སངས་རྒྱས་ལ་ལྟ་བ་དང ། ཆོས་ཉན་པ་དང ། དགེ་
225b
འདུན་ལ་བསྙེན་བཀུར་བྱེད་པ་དང ། བླ་ན་མེད་པའི་ཡོངས་སུ་མྱ་ངན་ལས་འདའ་བའི་བར་དང་མི་འབྲལ་ལོ། །ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་འདི་ཁ་ཏོན་ཏུ་བྱེད་པའི་བྱང་ཆུབ་སེམས་དཔའ་ནི་ལས་དང་པོ་རྣམས་མ་ལུས་པར་ཟད་པར་བྱེད་ཅིང་ཚོ་བརྗེས་ནས་ཀྱང་ས་དང་པོ་གནོན་པར་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་འདི་སྒོམ་པར་བྱེད་ན། གལ་ཏེ་བྱང་ཆུབ་སེམས་དཔའ་དེ་ལ་མཚམས་མེད་པ་ལྔའི་ལས་བྱས་ཤིང་བསགས་པ་ཞིག་ཡོད་ནའང་དེའི་ལས་དེ་དག་ཡོངས་སུ་ཟད་ཅིང་གང་གི་ཕྱིར་ཚེ་བརྗེས་ནའངྶ་དང་པོ་གནོན་པར་བྱེད་དོ། །གང་ལ་མཚམས་མེད་པའི་ལས་རྣམས་མེད་པ་དེ་ནི་ཚེ་འདི་ཉིད་ལ་ལས་གཞན་ཐམས་ཅད་མ་ལུས་པར་ཟད་ཅིང་ཚེ་བ་རྗེས་ནས་ཀྱང་ས་དང་པོ་གནོན་པར་བྱེད་དོ། །གང་སྒོམ་པར་མི་བྱེད། །ཁ་ཏོན་ཏུ་མི་བྱེད་ཀྱང་ཉན་ཅིང་ཆོས་སྨྲ་བ་ལ་དར་གྱིས་འཆིང་བ་བྱེད་ན་དེ་ལ་འཇིག་རྟེན་གྱི་ཁམས་གཞན་དག་ན་བཞུགས་པའི་སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་དག་བཞུགས་ཏེ་འཚོ་ཞིང་གཞེས་ ་རྣམས་ཀྱི་ཀྱང་ལེགས་སོ་ཞེས་བྱ་བ་སྦྱིན་པར་འགྱུར་ཞིང ། སངས་རྒྱས་བཅོམ་ལྡན་འདས་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་ཏེ། བྱང་ཆུབ་སེམས་དཔའ་དེ་ནི་དེར་ཡོངས་སུ་བཏང་བས་རིང་པོར་མིག་
226a
༄#། །ཐོགས་པར་རྒྱལ་ཚབ་ཏུ་དབང་བསྐུར་ཞིང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐྱེ་བ་གཅིག་གིས་ཐོགས་པར་འགྱུར་རོ། །དེ་བཞིན་དུ་གང་ལ་ལ་ཆོས་སྨྲ་བ་ལ་སྤོས་ཀྱིས་མཆོད་པ་བྱེད་ན་དེའང་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སྤོས་འཐོབ་བོ། །ཆོས་སྨྲ་བ་ལ་མེ་ཏོག་གིས་མཆོད་པ་བྱེད་ན་བླ་ན་མེད་པ་ཡེ་ཤེས་ཀྱི་མེ་ཏོག་དག་འཐོབ་བོ། །ཆོས་སྨྲ་བ་ལ་འབྲས་ཆན་དང ། བཟའ་བ་དང ། བཏུང་བ་དག་བྱིན་ན་དེ་བཞིན་གཤེགས་པའི་ཟས་བླ་ན་མེད་པ་འཐོབ་པར་འགྱུར་རོ། །བྱང་ཆུབ་སེམས་དཔའ་ཆོས་སྨྲ་བ་ལ་གོས་ཀྱིས་བཀབ་ན་དེ་བཞིན་གཤེགས་པའི་སྐུ་མདོག་བླ་ན་མེད་པ་འཐོབ་བོ། །གང་ཞིག་ཆོས་སྨྲ་བ་ལ་རིན་པོ་ཆེ་དག་གིས་འགེངས་པར་བྱེད་ན་དེའང་རིང་པོ་མི་ཐོགས་པར་བྱང་ཆུབ་ཀྱི་ཕྱོགས་སུམ་ཅུ་རྩ་བདུན་གྱི་ཆོས་རིན་པོ་ཆེ་རྣམས་འཐོབ་སྟེ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་དེ་ནི་དེ་ལྟར་དོན་ཆེ་བ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའི་སྡེ་སྣོད་ཐམས་ཅད་དེར་བསྟན་པས་ན་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་འདིས་བྱང་ཆུབ་སེམས་དཔའ་སེམས་དཔའ་ཆེན་པོ་ཐོགས་པ་མེད་པའི་སྤོབས་པ་འཐོབ་ཅིང་ཡིད་
226b
དུའོང་བའི་ཆོས་བཞིའང་འཐོབ་པར་བྱེད་པའི་ཕྱིར་རོ། །རིགས་ཀྱི་བུ། གང་གི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་དམ་པས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་ཕྱག་རྒྱ་ལ་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་དེ་དག་གིས་གཏམས་པ་དེ་ཉིད་ཀྱི་ཚེའང་དེ་བཞིན་དུ་ས་གཡོས་པར་གྱུར་ཅིང ། འཇིག་རྟེན་དུ་སྣང་བ་ཆེན་པོའང་བྱུང་བར་གྱུར་ཏེ། ཕྱོགས་བཅུའི་སངས་རྒྱས་ཀྱི་ཞིང་བགྲང་བ་ལས་ཡང་དག་པར་འདས་པ་དག་ཀྱང་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །དེ་བཞིན་དུ་ས་ཕྱོགས་མི་མཉམ་པ་དག་ཀྱང་ལག་མཐིལ་ལྟར་མཉམ་པར་སྣང་ངོ ། །དེར་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་འདུས་པ་དེ་དག་གིས་ཀྱང་ཕྱོགས་བཅུའི་སངས་རྒྱས་ཀྱི་ཞིང་བགྲང་བ་ལས་ཡང་དག་པར་འདས་པ་དག་གི་སངས་རྒྱས་བཅོམ་ལྡན་འདས་རྣམས་མཐོང་བར་གྱུར་ཏོ། །དེ་བཞིན་དུ་ཕྱོགས་བཅུའི་སངས་རྒྱས་ཀྱི་ཞིང་བགྲང་བ་ལས་ཡང་དག་པར་འདས་པ་དག་ནས་བྱང་ཆུབ་སེམས་དཔའ་བགྲང་བ་ལས་ཡང་དག་པར་འདས་པ་དག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་དམ་པ་ལ་ཕྱག་བྱ་བ་དང ། བསྙེན་བཀུར་བྱ་བ་དང ། ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་འདི་ཉིད་ཀྱང་མཉན་པའི་ཕྱིར་འཇིག་རྟེན་གྱི་ཁམས་ཙནྡན་དུ་
227a
༄#། །ལྷགས་སོ། །རིགས་ཀྱི་བུ། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་དམ་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་བཀའ་སྩལ་པ། རིགས་ཀྱི་བུ་དག། ངས་མངོན་པར་ཤེས་ཏེ། གང་དག་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་འདི་དག་ནི་འགོག་པ་ལ་མཉམ་པར་བཞག་པའི་སེམས་ཀྱིས་བར་གྱི་བསྐལ་པ་བཅུ་པོ་འདི་དག་འདའ་བར་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་ལྷག་མ་རྣམས་ཀྱིས་ནི་བར་གྱི་བསྐལ་པ་བཅུ་པོ་འདི་དག་ལ། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་ཕྱག་རྒྱ་འདི་ལས་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་ཞེས་བྱ་བ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་འདི་ཉིད་ཐོས་\?\་པར་གྱུར་ཅིང ། བར་གྱི་བསྐལ་པ་བཅུ་པོ་འདི་དག་ལ་ཆོས་རྣམས་ཐོས་ནས་ཀྱང་ཕྱོགས་བཅུའི་སངས་རྒྱས་ཀྱི་ཞིང་བགྲང་བ་ལས་ཡང་དག་པར་འདས་པ་དེ་དག་ན། སངས་རྒྱས་བཅོམ་ལྡན་འདས་བགྲང་བ་ལས་ཡང་དག་པར་འདས་པ་དག་བཞུགས་ཏེ་འཚོ་ཞིང་གཞེས་ལ། དེ་དག་སེམས་མངོན་པར་རབ་ཏུ་དང་བར་བྱས་ཏེ་སེམས་རབ་ཏུ་དང་པའི་རྒྱུ་དེས་དགེ་བའི་རྩ་བ་བསྐྱེད་པར་གྱུར་ནས། བྱང་ཆུབ་སེམས་དཔའི་རྣམ་པར་འཕྲུལ་པ་རྣམ་པ་སྣ་ཚོགས་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་དམ་པ་ལ་
227b
མཆོད་པ་བྱས་ནས། བཅོམ་ལྡན་འདས་ལ་འདི་སྐད་དུ། བཙུན་པ་བཅོམ་ལྡན་འདས། བར་གྱི་བསྐལ་པ་བཅུ་པོ་འདི་དག་འདས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་ཕྱག་རྒྱ་འདི་ཆོས་དང་ལྡན་པའི་ཆོས་ཀྱི་འཁོར་ལོ་བླ་ན་མེད་པ་བསྐོར་བར་འགྱུར་ལགས་སམ་ཞེས་གསོལ་པ་དང ། བཀའ་སྩལ་པ། རིགས་ཀྱི་བུ་དག། །དེ་དེ་བཞིན་ནོ། །དེ་དེ་བཞིན་ཏེ། བར་གྱི་བསྐལ་པ་བཅུ་པོ་འདི་དག་འདས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་ཕྱག་རྒྱ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་གང་གི་ནུབ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་པ་དེ་ཉིད་ཀྱི་ནུབ་མོ་འདས་ནས་ཆོས་དང་ལྡན་པའི་ཆོས་ཀྱི་འཁོར་ལོ་བསྐོར་བར་འགྱུར་ཞིང ། དེར་བྱང་ཆུབ་སེམས་དཔའ་རྣམས་ལ་བར་གྱི་བསྐལ་པ་བཅུར་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་འདི་ཉིད་སྟོན་པར་འགྱུར་རོ། །དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་དེ་ལ་ཆོས་ཉན་པར་འགྱུར་བ་དེ་དག་ནི་ཆོས་དེ་ཐོས་པས་དགེ་བའི་རྩ་བ་དག་བསྐྱེད་ནས། གང་གི་ཚེ་བྱང་ཆུབ་སེམས་དཔའ་ནམ་མཁའི་ཕྱག་རྒྱ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང ། དེས་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས་ཆོས་དང་ལྡན་པའི་ཆོས་ཀྱི་འཁོར་ལོ། རབ་མཆོག་གི་
228a
༄#། །འཁོར་ལོ། ཕྱིར་མི་ལྡོག་པའི་འཁོར་ལོ་བསྐོར་ཏེ། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་མང་པོ་རྣམས་ཕྱིར་མི་ལྡོག་པ་ལ་བཀོད་ཅིང ། དེར་བར་གྱི་བསྐལ་པ་བཅུར་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པའི་ཆོས་འདི་སྟོན་པ་ན་བྱང་ཆུབ་སེམས་དཔའ་དེ་དག་དེ་ལས་ཉན་པར་འགྱུར་ཏེ། དེའི་ཚེ་དེ་དག་གིས་ཆོས་ཐོས་ནས་སྐྱེ་བ་གཅིག་གིས་ཐོགས་པར་འགྱུར་རོ། །གང་དག་བསྐལ་པར་ཉན་པར་འགྱུར་བའི་བྱང་ཆུབ་སེམས་དཔའ་དེ་དག་ནི་དེའི་ཚེ་ནས་ལས་ཡང་དག་པར་འདའ་བར་འགྱུར་ཞིང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་ཏེ་དེ་ཉིད་ཀྱི་ཚེ་ན་གཟུངས་འདིའང་མཐར་ཐུག་པ་ཐོབ་པར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་དམ་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་དེ་སྐད་ཅེས་བཀའ་སྩལ་ཏེ། སངས་རྒྱས་ཀྱི་ཡུལ་གྱི་ཆོ་འཕྲུལ་སྣ་ཚོགས་དག་ཡང་དག་པར་བསྟན་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་ཕྱག་རྒྱ་ལ་ཏིང་ངེ་འཛིན་སྲེད་མེད་ཀྱི་བུ་ཞེས་བྱ་བ་བསྟན་ཏེ། ལུས་རྡོ་རྗེ་ལྟ་བུར་བྱིན་གྱིས་རློབ་པར་མཛད་པ་དང ། ཏིང་ངེ་འཛིན་འོད་བཀོད་པ་ཞེས་བྱ་བ་ངེས་པར་སྟོན་ཅིང ། དེར་བར་གྱི་བསྐལ་པ་བཅུར་བྱང་ཆུབ་སེམས་དཔའ་རྣམས་ལ་ཐམས་ཅད་མཁྱེན་པ་
228b
ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པའི་ཆོས་བསྟན་པ་འདིས་ཆོས་ཀྱི་འཁོར་ལོ་བསྐོར་ཏེ། སངས་རྒྱས་ཀྱི་ཞིང་ཐམས་ཅད་དུ་སངས་རྒྱས་ཀྱི་སྐུ་མཚན་དང་དཔེ་བྱད་བཟང་པོས་བརྒྱན་པ་དག་གསལ་ཞིང་སྣང་བར་བྱེད་པ་དང ། ཏིང་ངེ་འཛིན་རྡོ་རྗེའི་དཀྱིལ་འཁོར་ཞེས་བྱ་བ་ངེས་པར་སྟོན་ཅིང ། དེས་བྱང་ཆུབ་ཀྱི་གདན་ལ་ཆོས་ཀྱི་འཁོར་ལོ་ཤིན་ཏུ་བསྐོར་ཏེ་བྱང་ཆུབ་སེམས་དཔའ་རྣམས་ལ་ཆོས་སྟོན་པར་བྱེད་པ་དང ། ཏིང་ངེ་འཛིན་འཁོར་ལོའི་ཕྲེང་བ་ཞེས་བྱ་བ་ངེས་པར་སྟོན་ཅིང ། དེ་ཆོས་ཀྱི་འཁོར་ལོ་བསྐོར་བ་ན་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་མང་པོ་རྣམས་ཀྱང་ཆོས་ཀྱི་འཁོར་ལོ་བསྐོར་བར་འགྱུར་བའི་ཕྱིར་ཕྱིར་མི་ལྡོག་པ་ཉིད་ལ་འགོད་པར་རིག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་ཕྱག་རྒྱ་དང ། བྱང་ཆུབ་སེམས་དཔའི་དགེ་འདུན་དཔག་ཏུ་མེད་པ་དག་གིས་བཅོམ་ལྡན་འདས་ལ་མཆོད་པ་བྱས་ནས། རང་རང་གི་ཁང་པ་བརྩེགས་པ་དག་ཏུ་ཞུགས་ཏེ་འདུག་གོ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་དམ་པའང་དེ་ཉིད་ཀྱི་ནུབ་མོ་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །བྱང་ཆུབ་སེམས་དཔའ་དེ་དག་ཀྱང་དེ་ཉིད་ཀྱི་མཚན་མོ་འདས་ནས། བཅོམ་ལྡན་འདས་དེའི་སྐུ་གདུང་ལ་མཆོད་པ་བྱས་ཏེ། རང་རང་གི་ཁང་པ་བརྩེགས་པ་དག་ཏུ་ཞུགས་པར་གྱུར་ཏོ། །བྱང་
229a
༄#། །ཆུབ་སེམས་དཔའ་གཞན་དག་ནི་རང་རང་གི་སངས་རྒྱས་ཀྱི་ཞིང་དུ་དོང་ངོ ། །དེ་ན་གང་དག་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་དེ་དག་ནི་འགོག་པ་ལ་སྙོམས་པར་ཞུགས་པ་ཉིད་ཀྱིས་བར་གྱི་བསྐལ་པ་བཅུ་པོ་དེ་དག་འདའ་བར་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་ཕྱག་རྒྱ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལས་བརྩམས་ཏེ་ཆོས་སྟོན་པར་བྱེད་ཅིང ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་ཀྱང་བར་གྱི་བསྐལ་པ་བཅུར་དགེ་བའི་རྩ་བ་དག་བསྐྱེད་པར་འགྱུར་ཏེ། མདང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། དེས་ད་ནང་ཆོས་ཀྱི་འཁོར་ལོ་བསྐོར་ཏེ་ཆོ་འཕྲུལ་ཆེན་པོ་བསྟན་ནས། སྲོག་ཆགས་བྱེ་བ་ཁྲག་ཁྲིག་འབུམ་ཕྲག་དུ་མ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་བཀོད་དོ། །ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་འདི་བཤད་པ་ན་བྱང་ཆུབ་སེམས་དཔའ་ཁྲག་ཁྲིག་ས་ཡ་ཕྲག་བརྒྱད་ཀྱིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སྲོག་ཆགས་དུང་ཕྱུར་ཕྲག་དགུ་དང་བྱེ་བ་ཕྲག་གཉིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ལ་བཀོད་དོ། །བྱང་ཆུབ་སེམས་དཔའ་ཁྲག་ཁྲིག་ཕྲག་བདུན་ཅུ་རྩ་གཉིས་ཀྱིས་ནི་ཐམས་ཅད་མཁྱེན་པ་ཉིད་ཀྱི་རྣམ་པའི་
229b
གཟུངས་ཀྱི་སྒོ་ལ་འཇུག་པའི་གཟུངས་འདི་ཐོབ་བོ། །ལྷ་དང་མི་བགྲང་བ་ལས་ཡང་དག་པར་འདས་པ་རྣམས་ཀྱིས་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེ་རྣམ་པར་སྣང་བྱེད་ཀྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དུ་དང་ལྡན་ན་གཟུངས་འདི་འཐོབ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་གཟུངས་འདི་འཐོབ་སྟེ། བཞི་གང་ཞེ་ན། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པའི་རིགས་བཞི་ལ་ལེགས་པར་གནས་པ་ཡིན་ཏེ། བཞི་གང་ཞེ་ན། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གོས་ངན་ངོན་ཙམ་གྱིས་དགའ་ཞིང་ཆོག་ཤེས་ལ། གོས་ངན་ངོན་ཙམ་གྱིས་ཆོག་ཤེས་པའི་བསྔགས་པའང་བརྗོད་པར་བྱེད་ཅིང ། དེ་གོས་ཀྱི་ཕྱིར་ཚུལ་དང་མི་མཐུན་པར་མི་བྱེད་ལ། གོས་མ་རྙེད་ནའང་ཡོངས་སུ་གདུང་བ་མེད་ཅིང ། གོས་རྙེད་ནའང་ཆགས་པ་མེད་པ་དང ། ཞེན་པ་མེད་པ་དང ། འཁྲེན་པ་མེད་པ་དང ། མདུད་པ་པོར་བ་མེད་པ་དང ། བརྒྱལ་བ་མེད་པ་དང ། ལྷག་པར་ཆགས་པ་མེད་པ་དང ། ལྷག་པར་ཆགས་པར་གྱུར་པ་མེད་པར་ཡོངས་སུ་སྤྱོད་པར་བྱེད་ཅིང ། ཉེས་དམིགས་སུ་ལྟ་ལ་ངེས་པར་འབྱུང་བར་རབ་ཏུ་ཤེས་
230a
༄#། །ཤིང་ཡོངས་སུ་སྤྱོད་པར་བྱེད་པ་སྟེ། དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པའི་རིགས་ལ་ལེགས་པར་གནས་པ་དང་པོ་ཡིན་ནོ། །གོས་ལ་ཇི་ལྟ་བ་བཞིན་དུ་བསོད་སྙོམས་དང ། མལ་ཆ་དང ། སྟན་ལའང་དེ་བཞིན་ནོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ན་བའི་གསོས་སྨན་དང ། ཡོ་བྱད་ངན་ངོན་ཅ་ཙམ་གྱིས་དགའ་ཞིང་ཆོག་ཤེས་ལ། ན་བའི་གསོས་སྨན་དང ། ཡོ་བྱད་ངན་ངོན་ཙམ་གྱིས་ཆོག་ཤེས་པའི་བསྔགས་པའང་རྗོད་པར་བྱེད་ཅིང་དེ་ན་བའི་གསོས་སྨན་དང ། ཡོ་བྱད་ཀྱི་ཕྱིར་ཚུལ་དང་མི་མཐུན་པ་འཚོལ་བར་མི་བྱེད་ལ། དེ་ན་བའི་གསོས་སྨན་དང ། ཡོ་བྱད་མ་རྙེད་ནའང་ཡོངས་སུ་གདུང་བ་མེད་ཅིང་རྙེད་ནའང་ཆགས་པ་མེད་པ་དང ། ཞེན་པ་མེད་པ་དང ། འཁྲེན་པ་མེད་པ་དང ། མདུད་པ་བོར་བ་མེད་པ་དང ། བརྒྱལ་བ་མེད་པ་དང ། ལྷག་པར་ཆགས་པ་མེད་པ་དང ། ལྷག་པར་ཆགས་པར་གྱུར་པ་མེད་པར་ཡོངས་སུ་སྤྱོད་པར་བྱེད་ཅིང ། ཉེས་དམིགས་སུ་ལྟ་བ་ལ་ངེས་པར་འབྱུང་བ་རབ་ཏུ་ཤེས་ཤིང་ཡོངས་སུ་སྤྱོད་པར་བྱེད་པ་སྟེ། འཕགས་པའི་རིགས་བཞི་པོ་དེ་དག་ལ་ལེགས་པར་གནས་ཤིང ། ཆོས་བཞི་པོ་དེ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་གཟུངས་འདི་ཐོབ་ཅིང་སྒོམ་པར་བྱེད་པ་ཡིན་ནོ། །གཞན་ཡང་བྱང་ཆུབ་སེམས་དཔའ་སེམས་
230b
དཔའ་ཆེན་པོ་ཆོས་ལྔ་དང་ལྡན་ན་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པའི་གཟུངས་འདི་འཐོབ་སྟེ། ལྔ་གང་ཞེ་ན། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དག་ཀྱང་ཚུལ་ཁྲིམས་དང་ལྡན་པར་གནས་པ་དང ། སོ་སོ་ཐར་བའི་སྡོམ་པས་བསྡམས་པ་དང ། ཆོ་ག་དང་སྤྱོད་ཡུལ་ཕུན་སུམ་ཚོགས་པ་དང ། ཁ་ན་མ་ཐོ་བ་ཕྲ་རབ་ཙམ་དག་ལའང་འཇིགས་པར་ལྟ་བ་དང ། བསླབ་པའི་གཞི་རྣམས་ཡང་དག་པར་བླངས་ཤིང་སློབ་པར་བྱེད་ལ། གཞན་ཚུལ་ཁྲིམས་དང་བྲལ་པ་དག་མཐོང་ནའང་ཚུལ་ཁྲིམས་ཕུན་སུམ་ཚོགས་པ་ཡང་དག་པར་འཛིན་དུ་འཇུག་ལ་འདུལ་ཞིང་འཛུད་ལ་རབ་ཏུ་འགོད་པར་བྱེད་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དང་པོ་དེ་དག་ལྡན་པ་དང ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ལྟ་བ་ལ་ཞེན་པར་གྱུར་པ་རྣམས་ལོག་པར་ལྟ་བ་ལས་རྣམ་པར་བསླང་ཞིང ། ཡང་དག་པའི་ལྟ་བ་ཡང་དག་པར་འཛིན་དུ་འཇུག་ལ་འདུལ་ཞིང་འཛུད་ལ་རབ་ཏུ་འགོད་པར་བྱེད་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གཉིས་པ་དེ་དང་ལྡན་པ་དང ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ཆོ་ག་མ་ཡིན་པ་ལ་ཞེན་པར་གྱུར་པ་རྣམས་ཡང་དག་པའི་ཆོ་ག་ཡང་དག་པར་འཛིན་དུ་འཇུག་ལ། འདུལ་ཞིང་འཛུད་ལ་རབ་ཏུ་འགོད་པར་བྱེད་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གསུམ་
231a
༄#། །པ་དེ་དང་ལྡན་པ་དང ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་བསམ་པ་ཉམས་པར་གྱུར་པ་རྣམས་བསམ་པ་ཕུན་སུམ་ཚོགས་པ་ཡང་དག་པར་འཛིན་དུ་འཇུག་ལ། འདུལ་ཞིང་འཛུད་ལ་རབ་ཏུ་འགོད་པར་བྱེད་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་པོ་དེ་དང་ལྡན་པ་དང ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ཉན་ཐོས་དང ། རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་འཇུག་ལ་འདུལ་ཞིང་འཛུད་ལ་རབ་ཏུ་འགོད་པར་བྱེད་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ལྔ་པོ་དེ་དག་དང་ལྡན་པ་སྟེ། ཆོས་ལྔ་པོ་དེ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི་གཟུངས་འདི་འཐོབ་བོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དྲུག་དང་ལྡན་ན་གཟུངས་འདི་འཐོབ་སྟེ། དྲུག་གང་ཞེ་ན། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བདག་ཉིད་ཀྱང་ཐོས་པ་མང་བ་དང ། ཐོས་པ་འཛིན་པ་དང ། ཐོས་པ་བསགས་པ་ཡིན་པས་དེས་ཆོས་ཚངས་པར་སྤྱོད་པ་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་གང་
231b
ཡིན་པ་དེ་མངོན་པར་བརྗོད་པས་མངོན་པར་བརྗོད་ཅིང ། དེ་དེ་ལྟ་བུའི་ཆོས་མང་པོ་དག་ཐོས་ནས་བཟུང་སྟེ། ཁ་ཏོན་ཡོངས་སུ་བྱང་བ་དང ། ཡིད་ཀྱིས་བརྟགས་པ་དང ། མཐོང་བས་ཤིན་ཏུ་རྟོགས་པར་བྱས་ཤིང ། དེ་དེ་ལྟར་མང་དུ་ཐོས་པར་གྱུར་པ་ན་ཐོས་པ་ཉུང་བའི་སེམས་ཅན་གཞན་དག་མང་དུ་ཐོས་པ་ཡང་དག་པར་འཛིན་དུ་འཇུག་ལ་འདུལ་ཞིང་འཛུད་ལ་རབ་ཏུ་འགོད་པར་བྱེད་པ་སྟེ། ཆོས་དང་པོ་དེ་དང་ལྡན་པ་དང ། གཞན་ཡང་བྱང་ཆུབ་སེམས་དཔའ་ཕྲག་དོག་དང ། སེར་སྣ་མེད་ཅིང་ཕྲག་དོག་དང ། སེར་སྣས་ཟིལ་གྱིས་ནོན་པའི་སེམས་ཅན་གཞན་དག་ཀྱང་ཕྲག་དོག་མེད་པ་དང ། གཏོང་བ་ཕུན་སུམ་ཚོགས་པ་ཡང་དག་པར་འཛིན་དུ་འཇུག་ལ་རབ་ཏུ་འགོད་པར་བྱེད་པའི་བར་དུ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གཉིས་པ་དེ་དང་ལྡན་པ་དང ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་རྣམས་ལ་འཚེ་བར་མི་བྱེད་ཅིང་མི་འཇིགས་པ་རབ་ཏུ་སྦྱིན་པར་བྱེད་ལ། གནོད་པ་སྣ་ཚོགས་གནོད་པར་གྱུར་པའི་སེམས་ཅན་རྣམས་གནོད་པ་དག་ལས་ཡོངས་སུ་ཐར་བར་བྱེད་པའི་རང་བཞིན་ཅན་ཡིན་པ་དང ། ཚུལ་འཆོས་པ་མེད་ཅིང་ཁ་གསག་མེད་པ་དང ། སྒྱུ་མེད་ཅིང་གཡོ་མེད་པ་དང ། སྟོང་པ་ཉིད་ཀྱིས་ལན་མང་དུ་གནས་པར་བྱེད་པ་སྟེ། ཆོས་དྲུག་པོ་དེ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པའི་
232a
༄#། །གཟུངས་འདི་འཐོབ་བོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དེ་ལྟ་བུ་དག་དང་ལྡན་པས་ལོ་བདུན་དུ་འགྲོ་ལྡིང་བའི་གསང་སྔགས་གཞི་འདི་དག་ཐམས་ཅད་ལ་ཉིན་གཅིག་ཅིང་ལན་གསུམ་གསུམ་ཡན་ལག་ལྔས་མདོ་དང་རྒྱས་པར་ཕྱག་བྱས་ཤིང ། ལུས་སུ་གཏོགས་པའི་དྲན་པ་ཉེ་བར་བཞག་པ་སྟེ། སྟོང་པ་ཉིད་ལ་གནས་པས་འགྲོ་ལྡིང་བའི་གསང་སྔགས་ཀྱི་གཞི་འདི་བརྗོད་པར་བགྱིའོ། །ལངས་ནས་ཀྱང་ཕྱོགས་བཅུ་ཀུན་ནས་བཞུགས་ཏེ་འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་རྣམས་དྲན་པར་བྱེད་པ་དང ། རྟག་ཏུ་སངས་རྒྱས་རྗེས་སུ་དྲན་པ་བསྒོམ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ལོ་བདུན་འདས་ནས་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པའི་གཟུངས་འདི་འཐོབ་བོ། །གཟུངས་འདི་འཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཤེས་རབ་ཀྱི་མིག་གང་གིས་ཕྱོགས་བཅུའི་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དག་ན་སངས་རྒྱས་བཅོམ་ལྡན་འདས་གང་དག་བཞུགས་ཏེ་འཚོ་ཞིང་གཞེས་ལ་ཆོ་འཕྲུལ་ཆེན་པོ་རྣམ་པར་སྟོན་པར་མཛད་པ་ཐམས་ཅད་ཀྱང་མཐོང་བར་འགྱུར་བ་དེ་ལྟ་བུའི་འཕགས་པའི་ཤེས་རབ་ཀྱི་མིག་ཀྱང་འཐོབ་ཅིང ། སངས་རྒྱས་བཅོམ་ལྡན་འདས་དེ་དག་གི་འཛུམ་པ་རྣམ་པར་བསྟན་པ་དག་ཀྱང་མཐོང་ནས།
232b
གཟུངས་ཀྱི་སྒོ་བརྒྱད་ཁྲི་བཞི་སྟོང་ཡང་འཐོབ་བོ། །ཏིང་ངེ་འཛིན་གྱི་སྒོ་བདུན་ཁྲི་ཉིས་སྟོང་ཡང་འཐོབ་བོ། །ཆོས་ཀྱི་སྒོ་དྲུག་ཁྲིའང་འཐོབ་སྟེ། ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པའི་གཟུངས་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བྱམས་པ་ཆེན་པོའང་འཐོབ་བོ། །སྙིང་རྗེ་ཆེན་པོའང་འཐོབ་བོ། །བྱང་ཆུབ་སེམས་དཔའ་གང་གིས་གཟུངས་འདི་འཐོབ་པར་གྱུར་པ་དེས་གལ་ཏེ་མཚམས་མེད་པ་ལྔའི་ལས་ཞིག་སྤྱད་པར་གྱུར་ནའང་དེའི་ཚེ་ཕྱི་མ་ལ་ཡོངས་སུ་ཟད་པར་གྱུར་ཏེ། ཚེ་གསུམ་གྱིས་ལས་དེ་དག་མ་ལུས་པར་ཟད་པར་འགྱུར་ཞིང་ས་བཅུ་པའང་གནོན་པར་བྱེད་དོ། །བྱང་ཆུབ་སེམས་དཔའ་དེས་མཚམས་མེད་པའི་ལས་དག་མ་བྱས་ནའང་དེའི་ལས་གཞན་ཐམས་ཅད་ཡོངས་སུ་ཟད་པར་འགྱུར་ཞིང ། ཚེ་བརྗེས་ནས་ཀྱང་ས་བཅུ་པ་གནོན་པར་བྱེད་དེ། རིང་པོ་མི་ཐོགས་པར་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་འདི་དག་ཀྱང་འཐོབ་ལ་ཐམས་ཅད་མཁྱེན་པ་ཉིད་ཀྱི་ཡེ་ཤེས་ཀྱང་འཐོབ་པར་འགྱུར་རོ། །རིགས་ཀྱི་བུ། དེ་ལྟར་ན་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པའི་གཟུངས་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གཅེས་སྤྲས་བྱེད་པ་ཡིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོས་རྟག་ཏུ་རྒྱུན་མི་འཆད་པར་སངས་རྒྱས་བཅོམ་ལྡན་འདས་རྣམས་ཀྱི་འཛུམ་པ་རྣམ་པར་བསྟན་པའི་ཆོ་འཕྲུལ་མཐོང་ན། གང་གིས་འཇིག་
233a
༄#། །རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ཏུ་སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་དག་ལ་མཆོད་པ་བྱས་ལ། སངས་རྒྱས་བཅོམ་ལྡན་འདས་དེ་དག་གི་ཆོས་ཉན་ཅིང ། ཏིང་ངེ་འཛིན་དང ། གཟུངས་དང ། བཟོད་པ་ཐོབ་ནས་སངས་རྒྱས་ཀྱི་ཞིང་འདི་ཉིད་དུ་ཕྱིར་འོང་བར་འགྱུར་བ་དེ་ལྟ་བུའི་རྫུ་འཕྲུལ་གྱི་ཡུལ་དང་ཡང་ལྡན་པར་འགྱུར་རོ། །རིགས་ཀྱི་བུ།་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པ་འདི་ནི་ལས་ཡོངས་སུ་ཟད་པར་བྱེད་པ་དང ། དག་པ་མངོན་པར་འཕེལ་བར་བྱེད་པས་ན་དོན་ཆེ་བ་ཡིན་ནོ། །རིགས་ཀྱི་བུ། གང་དག་གིས་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པའི་གཟུངས་འདི་དང ། བཅོམ་ལྡན་འདས་དེ་བཞིན་གཤེགས་པ་ཟླ་བ་དམ་པ་དེའི་མཚན་ཐོས་པ་དེ་དག་ནི་ལས་ཀྱི་སྒྲིབ་པ་ཐམས་ཅད་ཡོངས་སུ་ཟད་པར་འགྱུར་ཞིང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུའང་ངེས་པར་འགྱུར་རོ། །དེ་ནས་བྱང་ཆུབ་སེམས་དཔའ་ཁ་ཅིག་གིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ཅག་གིས་ནི་འདས་པའི་སངས་རྒྱས་བཅོམ་ལྡན་འདས་བཞུགས་ཏེ་འཚོ་ཞིང་གཞེས་པ་གངྒཱའི་ཀླུང་གི་བྱེ་མ་སྙེད་དག་ལས་གཟུངས་འདི་ཐོས་ཤིང་ཐོབ་ལགས་སོ། །ཁ་ཅིག་གིས་ནི་འདི་སྐད་ཅེས་བདག་ཅག་གིས་ནི་གངྒཱའི་ཀླུང་གཉིས་ཀྱི་བྱེ་མ་སྙེད་ལས་སོ་
233b
ཞེས་གསོལ་ཏོ། །ཁ་ཅིག་གིས་ནི་གསུམ་སྙེད་ལས་སོ་ཞེས། ཁ་ཅིག་གིས་ནི་བཞི་སྙེད་ལས་སོ་ཞེས། ཁ་ཅིག་གིས་ནི་ལྔ་སྙེད་ལས་སོ་ཞེས། ཁ་ཅིག་གིས་ནི་དྲུག་སྙེད་ལས་སོ་ཞེས། ཁ་ཅིག་གིས་ནི་བདུན་སྙེད་ལས་སོ་ཞེས། ཁ་ཅིག་གིས་ནི་བརྒྱད་སྙེད་ལས་སོ་ཞེས་གསོལ་ཏོ། །ཁ་ཅིག་གིས་ནི་འདི་སྐད་དུ་བདག་ཅག་གིས་ནི་འདས་པའི་ཡང་དག་པར་རྫོགས་པའི་སངས་རྒྱས་བཞུགས་ཏེ་འཚོ་ཞིང་གཞེས་པ་གངྒཱའི་ཀླུང་དགུའི་བྱེ་མ་སྙེད་\?\་དག་ལས་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པའི་གཟུངས་འདི་ཐོས་ཤིང་རྣམ་པ་ཐམས་ཅད་དུ་ཐོབ་ལགས་སོ་ཞེས་གསོལ་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་གསོལ་པ། བདག་གིས་ནི་བསྐལ་པ་གངྒཱའི་ཀླུང་བཅུའི་བྱེ་མ་སྙེད་འདས་པ་ན་བསྐལ་པ་ཆེན་པོ་ཀུན་ནས་སྒྲོལ་བ་ཞེས་བགྱི་བ་ཞིག་བྱུང་སྟེ། དེ་ན་སངས་རྒྱས་ཀྱི་ཞིང་རྒྱན་ཐམས་ཅད་ཀྱིས་བརྒྱན་པ་ཞེས་བགྱི་བར་གྱུར་པ་དེར་སངས་རྒྱས་སཱ་ལའི་དབང་པོའི་རྒྱལ་པོ་ཞེས་བགྱི་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ།་འཇིག་རྟེན་མཁྱེན་པ། སྐྱེས་བུ་འདུལ་ཞིང་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དགེ་སློང་བྱེ་བ་ཁྲག་ཁྲིག་འབུམ་ཕྲག་མཐའ་ཡས་པའི་དགེ་འདུན་གྱིས་ཡོངས་སུ་བསྐོར་ཅིང ། དེ་བཞིན་དུ་བྱང་ཆུབ་སེམས་དཔའ་བགྲང་པ་ལས་ཡང་དག་པར་འདས་པ་ཞིག་གིས་ཡོངས་སུ་བསྐོར་བ་བཞིག་བྱུང་བས་ཐམས་ཅད་མཁྱེན་པ་ཉིད་ཀྱི་རྣམ་པའི་
234a
༄#། །གཟུངས་ཀྱི་སྒོ་ལ་འཇུག་པའི་གཟུངས་འདི་ཉིད་བཤད་པར་གྱུར་པ་ན། དེ་ལས་གཟུངས་འདི་ཐོས་ནས་བདག་གིས་བསྒོམ་པ་ཡོངས་སུ་རྫོགས་པར་བགྱིས་ཤིང་རྟོགས་པར་བགྱིས་ལགས་སོ། །དེ་བཞིན་དུ་བསྐལ་པ་ཚད་མ་མཆིས་པའི་ཡང་ཆེས་ཚད་མ་མཆིས་པ། གྲངས་མ་མཆིས་པའི་ཡང་ཆེས་གྲངས་མ་མཆིས་པ་དག་ལ་འདས་པའི་ཡང་དག་པར་རྫོགས་པའི་སངས་རྒྱས་བཞུགས་ཏེ་འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་དེ་དག་ལ་བྱང་ཆུབ་སེམས་དཔའི་རྣམ་པར་འཕྲུལ་པ་གྲངས་མ་མཆིས་པ་དག་གིས་མཆོད་པར་བགྱིས་ནས། སངས་རྒྱས་རེ་རེ་ལས་ཀྱང་དགེ་བའི་རྩ་བ་ཚད་མ་མཆིས་པ་དང ། གྲངས་མ་མཆིས་པ་དང ། གཞལ་དུ་མ་མཆིས་པ་དང ། དཔག་ཏུ་མ་མཆིས་པ་དག་བསྲུངས་ཤིང་བསོད་ནམས་ཀྱི་ཕུང་པོ་ཡོངས་སུ་བཟུང་སྟེ། དགེ་བའི་རྩ་བ་དེས་བདག་སངས་རྒྱས་སྟོང་ཕྲག་མང་པོ་དག་གིས་ལུང་བསྟན་ཀྱང ། བདག་ནི་སྨོན་ལམ་གྱི་ཁྱད་པར་གྱིས་དུས་ལ་ལྟ་ཞིང་འདི་ལྟར་ཡུན་རིང་པོར་འཁོར་བ་ན་འཁོར་བར་གྱུར་ཏེ། དེའི་སྐད་དུ་བདག་འཁོར་བ་ན་འཁོར་ཞིང ། སྔར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ལགས་ཏེ། ད་ནི་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱལ་ཚབ་ཏུ་དབང་བསྐུར་ནས། བདག་གི་ཤེས་རབ་ཀྱི་མགོ་ལ་རྣམ་པར་གྲོལ་བའི་ཅོད་པན་བཅིངས་ལགས་
234b
སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་བཀའ་སྩལ་ཏོ། །བྱམས་པ། དེ་དེ་བཞིན་ཏེ། ཁྱོད་ཀྱིས་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སཱ་ལའི་དབང་པོའི་རྒྱལ་པོ་ལས་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པའི་གཟུངས་འདི་ཐོབ་པར་གྱུར་ཏོ། ། བྱམས་པ་ཁྱོད་ནི་རེ་བ་ཇི་ལྟ་བ་བཞིན་ཡོངས་སུ་རྫོགས་པ་ཡིན་པས། བྱམས་པ་ཁྱོད་ནི་འདོད་ན་བསྐལ་པ་བཅུའི་བར་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང ། བྱམས་པ་ཁྱོད་ཀྱིས་ནི་མྱུར་བ་ཉིད་དུ་བླ་ན་མེད་པ་ཡེ་ཤེས་ཀྱི་ཕུང་པོའི་ལྷག་མ་མེད་པའི་མྱ་ངན་འདས་པའི་དབྱིངས་སུ་འཇུག་པར་ཡང་ནུས་མོད་ཀྱི།་བྱམས་པ་ཁྱོད་འདི་སྲིད་དུ་འཁོར་བ་ལ་མངོན་པར་དགའ་བར་གྱུར་པ་དེ་དག་ཐམས་ཅད་ནི་སྨོན་ལམ་གྱི་དབང་གིས་དུས་ལ་ལྟ་བ་ཡིན་ནོ། །བྱམས་པ། དེའི་ཕྱིར་ཁྱོད་ཀྱིས་ད་ལྟར་ང་ལས་རྒྱལ་ཚབ་ཡོངས་སུ་བླངས་པ་ཡིན་ཏེ། ཁྱོད་ཀྱིས་ནི་འདས་པའི་དེ་བཞིན་གཤེགས་པ་རྣམས་ལས་ཀྱང་རྒྱལ་ཚབ་ཡོངས་སུ་བླངས་སོ། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་འཁོར་ལ་གཟིགས་ཏེ། བྱང་ཆུབ་སེམས་དཔའི་འཁོར་དང ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མའི་འཁོར་དང ། ལྷ་དང ། ཀླུ་དང ། གནོད་སྦྱིན་
235a
༄#། །དང ། སྲིན་པོ་དང ། དྲི་ཟ་དང ། མི་དང ། མི་མ་ཡིན་པ་རྣམས་ལ་རྣམ་པར་གཟིགས་ནས། དེའི་ཚེ་གསང་སྔགས་ཀྱི་གཞི་འདི་དག་བཀའ་སྩལ་ཏོ། །དཱནྟ་བྷཱ་མི། ད་མ་ཐ་བྷཱ་མི། སྨྲྀ་ཏི་བྷཱུ་མི། པྲཛྙཱ་བྷཱུ་མི། བཻ་ཤ་རཏྟྱ་བྷཱུ་མི། པྲ་ཏིས་མ་བིདྦྷཱུ་མི། ཨ་ནུ་ཀྵེ་པ་བྷཱུ་མི། ས་མ་ཏཱ་པ་རཱི་ཀྵེ་པ་ཨུ་བེ་ཀྵེ་བྷཱུ་མི། ཛ་ཏེ་ཀྵེ་ཡ་བྷཱུ་མི། མ་མུཾ་ཛ། མིན་ཛ། བིན་བུ་ཛ། མ་ལ་ན་མུ་ཛ། བི་ཤ་ཀྲ། ད་ཤ་བ་ཏེ། བེ་ཤ་ཏ། ཏེ་ར་ཎ། བཻ་ཤ་ལཱ་ཀྲ། ཤ་མུ་ཤ་བ་ཏ། བི་མ་ཏི། ཡོ་པ་ར་ཧི་ཏ། ར་ག་མ་ཏ། བ་ཤི་སང་ཀྲ་མ། ཨ་ཏི་ཙོ་ར་བ་ཏེ། མེ་ཁེ་མུ་དྲ། ད་ཧ་ར་བ་ཏེ། པྲཛྙཱ་ཨ་ག་ཏཱ་བུདྡྷེ། ད་ཧ་ཀྲ་མ་ཏི། ས་དོ་ཥ་བནྡྷ། བ་ལ་ཡ་ཏི་ལ་ཡ། ཨ་ཧུ་ཀ་ཊ། ཨ་མུནྡྷ་མན། ཨརྟ་བ་ཏི། མུ་རུ་བ་ཏི། ཏི་ཧཱི་ནད་བི་དྷ། ཨ་གནྡྷན། པ་ཀ་ན་ཏེ། ས་མ་ཀེ།་བི་ས་བྷ་ཊེ། ཨི་ཊེ། ཨི་ཊ་བ་ལེ། ཨ་ཊྚ། ཏ་ཏྟྲ། ཀུ་རུ་ཥ་ཎ། བ་ལ་ཥ་ཎ། ལ་ཏ་ཐ། རུ་ཐ། སརྦ་ན་ཏ། སརྦ་ཏ་བ། ཨ་ནི་རུདྡྷ། ཨི་ད་ཤ་རི་ཧི་ཕ་ལ། བ་ཧུ་ཕ་ལ། སཏྭ་ཕ་ལ།་ཤི་ཥྚ་པ་ཏེ། བཅོམ་ལྡན་འདས་ཀྱིས་ལྷ་རྣམས་ལའང་རྟེན་ཅིང་འབྲེལ་པར་འབྱུང་བ་དང་ལྡན་པའི་མོས་པའི་ཚིག་རྣམས་བཤད་དེ། དེ་དག་བཤད་པ་ན་ལྷ་ཁྲག་ཁྲིག་ཕྲག་དྲུག་ཅུས་བདེན་པ་མཐོང་བར་གྱུར་ཏོ། །ཏད་ཕ་ལན། ཨ་གྲ་ཕ་ལན། ལ་ལ་ཧུ། ཨ་ལ་ཧུ། ཨ་ལ་ཧ། ནི་ལང་ཧ་རེ། བ་ན་ཏ་ཁྱ། ཨི་ད་ན་ཕ་ལ་ན། ནི་ཡཱ་མ་ཕ་ལ་ན། ན་མུ་ད་ཡ།
235b
བྷི་བྷཱ་ཁ། པྲཛྙཱ་ཙཀྲ་སུ་ནི་རྀ་པྲ་ཏི་ཙཀྲ། མོས་པའི་ཚིག་དེ་དག་གིས་ལྷ་དུང་ཕྱུར་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་དེ་ཉིད་དུ་ཕྱིར་མི་ལྡོག་པར་གྱུར་ཏོ། །ཕ་ཤྱེ། སོ་མ་ཏོ། ཨ་ནུ་མ་ཏོ། ཨ་ཀུ་མ་ཏི། ཚེ་ད་བ་ཀེ། མནྟྲ་སྠ། ད་ཤ་བ་ལ། བི་པྲ་བ་སྠ། ཨི་ཤ་སྠི་ཏ། ཨ་ཏི་མ་ཏི། ཏཱིཀྵྞ་མ་ཏི། ཨཱ་ལོ་ཀེ། སྟེ་རི་ཏུཥྞ། མོས་པའི་ཚིག་དེ་དག་གིས་ཀླུ་དྲུག་ཁྲི་བཞི་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་དེ་ཉིད་དུ་ཕྱིར་མི་ལྡོག་པར་གྱུར་ཏོ། ། པྲ་བྷ། ས་མ་དན། ཨ་ཧ་ད་དྱོ། བྷ་ག་བད་དྱོ། ཀཱ་རུ་ཎྱ་ཨཀྵ། སིདྡྷ་མ་ཏི་ས་མན་ཏཱཀྵོ། ཨ་ལ་བ་ལེ། སི་ཏ་ཀ་རོ། མ་ཧཱ་བ་ལེ། ཨོ་ཛེ་ཧ་རོ། དྷ་ར་ནེ། བིང་གེ་ལཀྵ། ཨུ་དཱ་ཀྵ། ཀུ་གཀྵཿ ་བི་རོ་དྷོ། བི་རཱུ་པ་མུ་ཥ། ཨཀྵི་ཧསྟ། ཤག་ཏི་བ་ལན། ཨ་སུ་རོ་བི་ནཱཾ། ཨ་སུ་རོ་བི་ནཱཾ། ཨ་སུ་རོ་པྲ་མར་དི་ཏེ། མོས་པའི་ཚིག་དེ་དག་གིས་གནོད་སྦྱིན་དུང་ཕྱུར་ཕྲག་གཉིས་དང་བྱེ་བ་ཕྲག་གཉིས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། དེ་ཉིད་དུ་ཕྱིར་མི་ལྡོག་པར་གྱུར་ཏོ། ། ཙི་ཕ་ལི་ལེ། ཏི་ནི་ད་ཚེ། སན་དི་ད་ཚེ། ག་ཏི་ནེ་ན། ཀ་མེ་མ།་ན་མ་སྟེ། ཨུ་བཻ་ར་བེ། མུ་ད་མེ། མ་ད་མེ། མ་ཏི་མེ། ས་ནི་ཧེ། ཤཱུ་རེ། དྷཱ་ར་ནཱི་ཡ། སན་ཏྲ། ས་ནཱ་ག། ས་ཡཀྵ། ཨ་སུ་ར། དེ་བ། ནཱ་གཱ། ནི་རུག་ཏི་པ་རི་
236a
༄#། །བ་ར། ནི་རུ་ག་ཏི་ལ་བྷི། སྨྲྀ་ཏི། པྲཛྙཱ་པ་རི་བ་ར་མ་ཏི། པྲ་ཏི་ལ་བྷི། ག་ཏི་དྷྲྀ་ཏི། པ་རི་བཱ་ར། ག་ཏིདྷྲྀ་ཏི། པྲ་ཏི་ལ་བྷི། བཱུརྦ་ཀེ་ཥུ། ཙི་རྀ་ཏ་བནྡྷཿ ་ཨ་བྷི་སྠཱ་མ་བནྡྷཿ ་ཤཱུ་ར་བནྡྷཿ ་ཙི་ར་བཱིརྱ་བནྡྷ། བི་ཏཱ་བ་ཏི། བྷ་ས་གེ། མཱརྒ་མུ་མྲེ། དྲྀ་ཤ་བ་ཀ་རི་ཥ་ཎི། ཀྵ་མ་ར་ཧུ། ཨོ་ཧ་ར་ཎོ། དེ་བ་རཱ་ཛ་ཏུ། སུ་ར་མུ་དྲ། ཡཀྵ་ས་མུ་དྲ། རཀྵ་ས་མུ་དྲ། བེ་དི་བེ་དི་མེ་ཏབ་བེ། ཏད་ཏབ་པེ། ཨུཥྞ་ན་མེ། པྲ་ཁད་ཏྱེ། ན་ན་བེ། དྷཱ་རི་ཎཱི་ཡ། ཨཱ་བྷི་ཥ། དི་ཤ་ཤོ་དྷ་ནི། བཱཀྱ་ཤུདྡྷེ། ཛི་ཧཝ་ཤུདྡྷེ། བཱ་ཙཱི་བ་རི་ཀརྨ། པྲ་ཛྙཱ། བུདྡྷི། སྨྲྀ་ཏི། མ་ཏི། ག་ཏི། དྷྲྀ་ཏྲི། ག་ཎ་ན། པྲ་ཏིས་ར་ཎ་བུདྡྷི། ཛ་ཡ་ཙ་ཀྲེ། ཤཱུ་ནྱ་ཏ་ཙ་ཀྲེ་བྱ་ཡ། མོས་པའི་ཚིག་དེ་དག་གིས་ལྷ་མ་ཡིན་ལྔ་ཁྲི་དྲུག་སྟོང་གིས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། ཕྱིར་མི་ལྡོག་པ་ལ་གནས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འཇིགས་མེད་ཡང་དག་གཞོལ་ཞེས་བྱ་བ་ལ་བཀའ་སྩལ་པ། རིགས་ཀྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་བ་ནི་རྙེད་པར་དཀའོ། །ཚུལ་ཁྲིམས་དང ། ཏིང་ངེ་འཛིན་དང ། ཤེས་རབ་དང ། རྣམ་པར་གྲོལ་བ་དང ། རྣམ་པར་གྲོལ་བའི་ཡེ་ཤེས་མཐོང་བས་ཡོངས་སུ་བསྒོས་པའི་གསང་སྔགས་ཀྱི་གཞི་འདི་དག་ཀྱང་རྙེད་པར་དཀའོ། །རིགས་ཀྱི་བུ། དེ་བཞིན་
236b
གཤེགས་པས་སེམས་ཅན་རྣམས་ལ་ཕན་པ་དང ། བྱང་ཆུབ་སེམས་དཔའི་ཡོན་ཏན་བསྒྲུབ་པའི་ཕྱིར། སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། སྦྱིན་པ་དང ། དུལ་བ་དང ། ཡང་དག་པར་སྡོམ་པ་དང ། བཟོད་པ་དང ། བརྩོན་འགྲུས་དང ། ཏིང་ངེ་འཛིན་དང ། ཤེས་རབ་ཀྱིས་ཡོངས་སུ་བཟུང་བའི་སངས་རྒྱས་བྱེ་བ་ཁྲག་ཁྲིག་འབུམ་ཕྲག་མང་པོ་རྣམས་ལ་བསྙེན་བཀུར་བྱས་ཏེ། ལ་ལ་ལས་ནི་སྦྱིན་པ་བྱིན། ལ་ལ་ལས་ནི་ཚུལ་ཁྲིམས་བསྲུངས། ལ་ལ་ལས་ནི་ཚངས་པར་སྤྱོད་པ་སྤྱད། ལ་ལ་ལས་ནི་སྒོམ་པ་བསྟེན། ལ་ལ་ལས་ནི་བརྩོན་འགྲུས་བརྩམས། ལ་ལ་ལས་ནི་བཟོད་པ་བསྒོམས། ལ་ལ་ལས་ནི་ཏིང་ངེ་འཛིན་བསྒྲུབས། ལ་ལ་ལས་ནི་ཤེས་རབ་བསྟེན་ཅིང ། དགེ་བའི་ལས་རྣམ་པ་ཐ་དད་པ་སྣ་ཚོགས་དཔག་ཏུ་མེད་པ་མང་དུ་བྱས་པས། དེའི་ཕྱིར་ངས་ད་ལྟར་བླ་ན་མེད་པའི་ཡེ་ཤེས་བརྙེས་སོ། །རིགས་ཀྱི་བུ། དེ་བཞིན་གཤེགས་པ་ལ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། བསྐལ་བ་བྱེ་བ་ཁྲག་ཁྲིག་འབུམ་ཕྲག་དུ་མར་རྫུན་དང ། ཕྲ་མ་དང ། ངག་རྩུབ་མོ་དང ། ཚིག་ཀྱལ་བ་སྤངས་ཏེ། ངག་གིས་ལས་དགེ་བ་རྣམ་པ་དུ་མ་བསྟེན་ཅིང་མང་དུ་བྱས་པས། དེའི་ཕྱིར་ད་ལྟར་ལྗགས་ཤིན་ཏུ་རིང་བ་བརྙེས་ཏེ། རིགས་ཀྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ནི་གཞན་དུ་གསུང་བ་མ་མངའོ། །དེ་ནས་བཅོམ་
237a
༄#། །ལྡན་འདས་ཀྱིས་འཁོར་དེར་ཇི་ལྟ་བུའི་རྫུ་འཕྲུལ་འདུ་བྱ་བ་མངོན་པར་མཛད་པས། ཏིང་ངེ་འཛིན་བསོད་རྣམས་ཐམས་ཅད་ལ་ཡང་དག་པར་གཞོལ་བ་ཞེས་བྱ་བ་ལ་སྙོམས་པར་ཞུགས་ནས། ཞལ་གྱི་སྒོ་ནས་ལྗགས་ཀྱི་དབང་པོ་ཕྱུང་སྟེ། རང་གི་ཞལ་གྱི་དཀྱིལ་འཁོར་རབ་ཏུ་ཡོག་པར་མཛད་ནས་ལྗགས་ཀྱི་དབང་པོ་དེ་ལས་འོད་ཟེར་བྱེ་བ་ཕྲག་དྲུག་ཅུ་རབ་ཏུ་ཕྱུང་སྟེ། འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བ་ཆེན་པོས་ཁྱབ་པར་གྱུར་པ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་མཛད་དོ། །འོད་ཟེར་དེ་དག་གིས་སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དང ། ལྷ་དང་མི་རྣམས་ལ་ཁྱབ་པར་གྱུར་ཏེ། འོད་ཟེར་དེ་དག་གིས་སེམས་ཅན་དམྱལ་བའི་སེམས་ཅན་མེ་རབ་ཏུ་འབར་བས་ལུས་སྲེག་པ་གང་ཡིན་པ་དེ་དག་རླུང་བསིལ་བ་དག་ལངས་ནས་དེ་དག་ལ་རིག་པ་དང ། དེ་དག་ཡུད་ཙམ་ཞིག་བདེ་བའི་ཚོར་བ་སྐྱེས་པར་གྱུར་ཏོ། །སེམས་ཅན་དམྱལ་བའི་སེམས་ཅན་རེ་རེའི་མདུན་ན་ཡང་སངས་རྒྱས་ཀྱི་སྤྲུལ་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱི་ས་སྐུ་ལེགས་པར་བརྒྱན་ཅིང ། དཔེ་བྱད་བཟང་པོ་བརྒྱད་ཅུས་གཟུགས་རྣམ་པར་མཛེས་པར་གྱུར་པ་དག་བཞུགས་ཏེ། སེམས་ཅན་དམྱལ་བ་བའི་སེམས་ཅན་དེ་དག་གིས་དེ་མཐོང་ནས་བདེ་བ་དང་ལྡན་ཞིང་སངས་རྒྱས་
237b
མཐོང་བའི་བདེ་བས་ལུས་རབ་ཏུ་ཚིམ་སྟེ། སངས་རྒྱས་མཐོང་ནས་འདི་སྙམ་དུ་སེམས་ཅན་འདིའི་མཐུས་བདག་ཅག་གིས་བདེ་བའི་ཚོར་བ་ཐོབ་པོ་སྙམ་དུ་སེམས་ཏེ། དེ་དག་བཅོམ་ལྡན་འདས་ལ་དགའ་ཞིང་དད་ལ་གུས་པ་སྐྱེས་པ་དང ། བཅོམ་ལྡན་འདས་ཀྱི་དེ་དག་ལ་བཀའ་སྩལ་པ། ཀྱེ་སེམས་ཅན་དག། སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། ། དགེ་འདུན་ལ་ཕྱག་འཚལ་ལོ་ཞེས་ཚིག་དེ་སྐད་བརྗོད་ཅིག་དང ། རྟག་ཏུ་དེ་ལྟ་བུའི་བདེ་བ་དང་ལྡན་པར་འགྱུར་རོ། །དེ་ནས་སེམས་ཅན་དམྱལ་བ་པ་དེ་དག་གིས་ཐལ་མོ་སྦྱར་ནས་སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ་ཞེས་ཚིག་དེ་སྐད་བརྗོད་དོ། །དེ་ནས་སེམས་ཅན་དམྱལ་བ་པའི་སེམས་ཅན་དེ་དག་དགེ་བའི་རྩ་བ་དེ་དང ། སེམས་དང་བ་དེས་དེ་ནས་ཤི་འཕོས་ནས། ཁ་ཅིག་ནི་ལྷ་རྣམས་ཀྱི་ནང་དུ་སྐྱེས་སོ། །ཁ་ཅིག་ནི་མི་རྣམས་ཀྱི་ནང་དུ་སྐྱེས་སོ། །གང་དག་གྲང་བའི་སེམས་ཅན་དམྱལ་བ་རྣམས་སུ་སྐྱེས་པའི་སེམས་ཅན་དེ་དག་ལ་ནི་རླུང་དྲོན་པོ་དག་ལངས་ནས་སྔ་མ་བཞིན་དུ་མི་རྣམས་ཀྱི་བར་དུ་སྐྱེས་སོ། །དེ་བཞིན་དུ་ཡི་དྭགས་བཀྲེས་པ་དང་སྐོམ་པས་ལུས་རབ་ཏུ་འབར་བར་གྱུར་པ་དེ་དག་ཀྱང་འོད་ཟེར་དེ་དག་གིས་བཀྲེས་པ་དང་སྐོམ་པའི་མེ་ཞི་བར་བྱེད་ཅིང་བདེ་བའི་ཚོར་བ་བསྐྱེད་དེ། ཡི་དྭགས་རེ་རེའི་མདུན་ན་ཡང་སངས་རྒྱས་ཀྱི་སྤྲུལ་པའི་གཟུགས་སྐྱེས་བུ་ཆེན་པོའི་མཚན་
238a
༄#། །སུམ་ཅུ་རྩ་གཉིས་ཀྱིས་སྐུ་ལེགས་པར་བརྒྱན་ཅིང་དཔེ་བྱད་བཟང་པོ་བརྒྱད་ཅུས་རྣམ་པར་མཛེས་པ་དག་བཞུགས་པར་གྱུར་ཏེ། ཡི་དྭགས་དེ་དག་གིས་དེ་མཐོང་ནས་སངས་རྒྱས་མཐོང་བའི་བདེ་བས་ལུས་ཚིམ་པར་གྱུར་ནས་འདི་སྙམ་དུ་སེམས་ཅན་འདིའི་མཐུས་བདག་ཅག་གིས་བདེ་བའི་ཚོར་བ་ཐོབ་པོ་སྙམ་དུ་སེམས་ཏེ། དེ་དག་བཅོམ་ལྡན་འདས་ལ་དགའ་ཞིང་དད་ལ་གུས་པ་སྐྱེས་པ་དང ། བཅོམ་ལྡན་འདས་ཀྱིས་དེ་དག་ལ་བཀའ་སྩལ་པ། སེམས་ཅན་དག་།ཚུར་ཤོག་།ཁྱེད་ཅག་སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ་ཞེས་ཚིག་དེ་སྐད་བརྗོད་ཅིག་དང ། ཞེས་བྱ་བ་ནས། དགེ་བའི་རྩ་བ་དེས་དེ་ནས་ཤི་འཕོས་ནས་ཁ་ཅིག་ནི་ལྷ་རྣམས་ཀྱི་ནང་དུ་སྐྱེས་སོ། །ཁ་ཅིག་ནི་མི་རྣམས་ཀྱི་ནང་དུ་སྐྱེས་པའི་བར་དུ་གྱུར་ཏོ། །དུད་འགྲོ་རྣམས་ལའང་དེ་བཞིན་དུ་བསྐུལ། མི་རྣམས་ལའང་དེ་བཞིན་དུ་བསྐུལ་ནས། ལྷ་དང་མི་བགྲང་བ་ལས་ཡང་དག་པར་འདས་པ་དག་ཆོས་མཉན་པའི་ཕྱིར་བཅོམ་ལྡན་འདས་ཀྱི་དྲུང་དུ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་འཁོད་དོ། །དེའི་ཚེ་ན་ལྷ་དང་\?\་མིའི་ཚོགས་བགྲང་བ་ལས་ཡང་དག་པར་འདས་པ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །བྱང་
238b
ཆུབ་སེམས་དཔའ་བགྲང་བ་ལས་\?\་དག་པར་འདས་པ་དག་གིས་ནི་དེར་ཏིང་ངེ་འཛིན་དང ། བཟོད་པ་དང ། གཟུངས་ཐོབ་པར་གྱུར་ཏོ། །ཐེག་པ་ཆེན་པོའི་མདོ་སྙིང་རྗེ་པདྨ་དཀར་པོ་ལས། གཟུངས་ཀྱི་སྒོའི་ལེའུ་སྟེ་གཉིས་པའོ།། །།དེ་ནས་བཅོམ་ལྡན་འདས་ཀྱིས་རང་གི་རྫུ་འཕྲུལ་མངོན་པར་མཛད་པ་སླར་བསྡུས་པ་དང ། བཅོམ་ལྡན་འདས་ལ། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཞི་བས་འདི་སྐད་ཅེས་གསོལ་ཏོ། །བཅོམ་ལྡན་འདས། རྒྱུ་གང་དང་རྐྱེན་གང་གིས་སངས་རྒྱས་བཅོམ་ལྡན་འདས་གཞན་དག་གི་སངས་རྒྱས་ཀྱི་ཞིང་ནི་ཡོངས་སུ་དག་ཅིང་རྙོག་པ་མ་མཆིས་ལ། སྙིགས་མ་ལྔ་དང་བྲལ་ཞིང་སངས་རྒྱས་ཀྱི་ཞིང་གི་ཡོན་ཏན་བཀོད་པ་སྣ་ཚོགས་དག་མཆིས་ལ། དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱང་ཡོན་ཏན་རྣམ་པ་སྣ་ཚོགས་ཡོངས་སུ་རྫོགས་ཤིང་བདེ་བ་སྣ་ཚོགས་དང་ལྡན་ལ། དེ་ན་ཉན་ཐོས་དང ། རང་སངས་རྒྱས་རྣམས་ཀྱི་མིང་ཡང་མ་མཆིས་ན། སྐྱེ་བ་ལྟ་སྨོས་ཀྱང་ཅི་འཚལ་བར་གྱུར་ལགས་\?\། བཅོམ་ལྡན་འདས། རྒྱུ་གང་དང་རྐྱེན་གང་གིས་བཅོམ་ལྡན་འདས་ནི་སངས་རྒྱས་ཀྱི་ཞིང་སྨད་པར་འཁྲུགས་ཤིང ། ཚེའི་སྙིགས་མ་དང ། དུས་ཀྱི་སྙིགས་མ་དང ། སེམས་ཅན་གྱི་སྙིགས་མ་དང ། ལྟ་བའི་སྙིགས་མ་དང ། ཉོན་མོངས་པའི་སྙིགས་མ་བྱུང་བར་གྱུར་པ་ན་བླ་ན་མེད་པ་ཡང་དག་པར་རྫོགས་
239a
༄#། །པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འཁོར་བཞི་པོ་དག་ལ་ཐེག་པ་གསུམ་ལས་བརྩམས་ཏེ་ཆོས་བསྟན་པར་མཛད་ལགས། ཅིའི་སླད་དུ་བཅོམ་ལྡན་འདས་ཀྱིས་སངས་རྒྱས་ཀྱི་ཞིང་སྙིགས་མ་ལྔ་དང་བྲལ་ཞིང་ཡོངས་སུ་དག་པ་ཡོངས་སུ་མ་བཟུང་ལགས། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། བྱང་ཆུབ་སེམས་དཔའ་རྣམས་ནི་སྨོན་ལམ་གྱི་དབང་གིས་སངས་རྒྱས་ཀྱི་ཞིང་ཡོངས་སུ་དག་པ་ཡོངས་སུ་འཛིན་པར་བྱེད་ཅིང་སྨོན་ལམ་གྱི་དབང་གིས་སངས་རྒྱས་ཀྱི་ཞིང་ཡོངས་སུ་མ་དག་པའང་ཡོངས་སུ་འཛིན་པར་བྱེད་དོ། ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སྙིང་རྗེ་ཆེན་པོ་དང་ལྡན་པའི་ཕྱིར་སངས་རྒྱས་ཀྱི་ཞིང་ཡོངས་སུ་མ་དག་པའང་ཡོངས་སུ་འཛིན་པར་བྱེད་པའོ། ། དེ་ཅིའི་ཕྱིར་ཞེ་ན། འདི་ལྟར་ང་ད་ལྟར་སངས་རྒྱས་ཀྱི་ཞིང་སྨད་པ་འདི་ལྟ་བུར་སྐྱེས་པའང་ངས་དེ་ལྟར་སྨོན་ལམ་བཏབ་པའི་ཕྱིར་ཏེ། དེ་ལེགས་པར་རབ་ཏུ་ཉོན་ལ་ཡིད་ལ་གཟུང་ཞིག་དང ། ངས་ཁྱོད་ལ་བཤད་པར་བྱའོ། །བྱང་ཆུབ་སེམས་དཔའ་བློ་གྲོས་ཞི་བས། བཅོམ་ལྡན་འདས། དེ་བཞིན་ནོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། སྔོན་བྱུང་བ་བསྐལ་པ་གྲངས་མེད་པ་གངྒཱའི་ཀླུང་གཅིག་གི་བྱེ་མ་སྙེད་འདས་པ་ན་སངས་རྒྱས་ཀྱི་ཞིང་འདིར་
239b
བསྐལ་པ་ཆེན་པོ་འཛིན་པ་ཞེས་བྱ་བ་ཞིག་བྱུང་སྟེ། བསྐལ་བ་ཆེན་པོ་དེ་ལ་གླིང་བཞི་པའི་སངས་རྒྱས་ཀྱི་ཞིང་འདིར་གླིང་བཞི་འཁོར་ལོས་བསྒྱུར་བའི་རྒྱལ་པོ་རྩིབས་ཀྱི་མུ་ཁྱུད་ཅེས་བྱ་བ་ཞིག་བྱུང་ངོ ། །རྩིབས་ཀྱི་མུ་ཁྱུད་དེ་ལ་མདུན་ན་འདོན་བྲམ་ཟེ་རྒྱ་མཚོའི་རྡུལ་ཞེས་བྱ་བ་ཞིག་ཡོད་དོ། །དེའི་བུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་ཞིང་དཔེ་བྱད་བཟང་པོ་བརྒྱད་ཅུས་ལུས་རྣམ་པར་མཛེས་ལ་བསོད་ནམས་བརྒྱའི་མཚན་དང་ལྡན་ཞིང་འོད་འདོམ་གང་བ་ཡོད་ལ། ཤིང་ནྱ་གྲོ་དྷ་ལྟར་ཆུ་ཞེང་གབ་ཅིང་ལྟ་བས་ཆོག་མི་ཤེས་པ་ཞིག་བཙས་སོ། །དེ་བཙས་མ་ཐག་ཏུ་ལྷ་འབུམ་གྱིས་མཆོད་པ་བྱས་ནས། རྒྱ་མཚོའི་སྙིང་པོ་ཞེས་བྱ་བར་མིང་བཏགས་སོ། །དེ་དུས་གཞན་ཞིག་ན་ངེས་པར་བྱུང་ནས་སྐྲ་དང་ཁ་སྤུ་བྲེགས་ཏེ་གོས་དུར་སྨྲིག་བགོས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ། དེ་བཞིན་གཤེགས་པ་རིན་པོ་ཆེའི་སྙིང་པོ་ཞེས་བྱ་བར་གྱུར་ནས། བཅོམ་ལྡན་འདས་དེས་ཆོས་ཀྱི་འཁོར་ལོ་བསྐོར་ཏེ་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་མང་པོ་དག་མཐོ་རིས་དང་ཐར་པའི་འབྲས་བུ་ལ་རབ་ཏུ་བཀོད་པར་གྱུར་ཏོ། །དེ་དུས་གཞན་ཞིག་ན་ཉན་ཐོས་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་ཡོངས་སུ་བསྐོར་ཅིང་མདུན་དུ་བདར་ནས་གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། ཡུལ་འཁོར་དང ། རྒྱལ་པོའི་
240a
༄#། །ཕོ་བྲང་འཁོར་རྣམས་སུ་རྒྱུ་ཞིང་གཤེགས་ཏེ། རིམ་གྱིས་གང་ན་འཁོར་ལོས་བསྒྱུར་བའི་རྒྱལ་པོ་དེ་གནས་པའི་གྲོང་ཁྱེར་གཞན་ཞིག་ཏུ་གཤེགས་སོ། །དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་གྲོང་ཁྱེར་གྱི་ཕྱི་རོལ་ནས་ཧ་ཅང་ཡང་མི་རིང་བ་ན་ཛམྦུའི་ཚལ་ཞེས་བྱ་བའི་སྐྱེད་མོས་ཚལ་ཞིག་ཡོད་པ་ན་ཉན་ཐོས་བྱེ་བ་ཁྲག་ཁྲིག་འབུམ་ཕྲག་དུ་མ་དང་ཐབས་གཅིག་ཏུ་བཞུགས་སོ། །རྒྱལ་པོ་རྩིབས་ཀྱི་མུ་ཁྱུད་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་བདག་གི་ཡུལ་དུ་གཤེགས་ནས། ཛམྦུའི་ཚལ་གྱི་སྐྱེད་མོས་ཚལ་ན་ཉན་ཐོས་བྱེ་བ་ཁྲག་ཁྲིག་འབུམ་ཕྲག་དུ་མ་དང་ཐབས་གཅིག་ཏུ་བཞུགས་སོ་ཞེས་ཐོས་ནས་འདི་སྙམ་དུ་སེམས་ཏེ། བདག་སོང་ལ་ཕྱིན་ནས་ཀྱང་དེ་བཞིན་གཤེགས་པ་དེ་ལ་བསྟི་སྟང་དུ་བྱ། བླ་མང་བྱ། རི་མོར་བྱ། མཆོད་པར་བྱ་གོར་མ་ཆག་སྙམ་མོ། །དེ་ནས་རྒྱལ་པོ་རྩིབས་ཀྱི་མུ་ཁྱུད་རྒྱལ་པོའི་འབྱོར་བ་ཆེན་པོ་དང ། རྒྱལ་པོའི་མཐུ་ཆེན་པོས་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ་གྲོང་ཁྱེར་ནས་བྱུང་ཞིང་ཛམྦུའི་ཚལ་གྱི་སྐྱེད་མོས་ཚལ་ག་ལ་བ་དེར་སོང་ནས། བཞོན་པས་བགྲོང་པའི་ས་ཇི་སྲིད་པ་དེ་སྲིད་དུ་བཞོན་པས་སོང་སྟེ་ཕྱིན་པ་དང །
240b
རྐང་པས་ཀུན་དགའི་ར་བར་ཞུགས་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་ག་ལ་བ་དེར་སོང་སྟེ་ཕྱིན་པ་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོའི་ཞབས་ལ་མགོ་བོས་ཕྱག་བཙལ་ཏེ་ལན་གསུམ་དུ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་ནས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོས་རྒྱལ་པོ་རྩིབས་ཀྱི་མུ་ཁྱུད་ལ་ཆོས་ཀྱི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག་ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་ཀྱི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་བར་གྱུར་ཏོ།། །།བམ་པོ་གསུམ་པ། དེ་ནས་རྒྱལ་པོ་རྩིབས་ཀྱི་མུ་ཁྱུད་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་ག་ལ་བདེ་ལོགས་སུ་ཐལ་པོ་སྦྱར་བ་བཏུད་དེ་ཞབས་གཉིས་ལ་གཏུགས་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་དགུང་ཟླ་གསུམ་པོ་འདི་ལ་བཅོམ་ལྡན་
241a
༄#། །འདས་དགེ་སློང་གི་དགེ་འདུན་དང་བཅས་པ་ལན་ང་ཟའ་དང ། བཤོས་དང ། གཟིམས་ཆ་དང ། གདན་དང ། སྙུན་གྱི་གསོས་སྨན་དང ། ཡོ་བྱད་རྣམས་ཀྱིས་བསྙེན་བཀུར་བགྱི་བར་འཚལ་ན་བཅོམ་ལྡན་འདས་དང ། དགེ་སློང་གི་དགེ་འདུན་གྱིས་གནང་བར་མཛད་དུ་གསོལ། རིགས་ཀྱི་བུ། དེ་བཞིན་གཤེགས་པ་རིན་པོ་ཆེའི་སྙིང་པོས་རྒྱལ་པོ་རྩིབས་ཀྱི་མུ་ཁྱུད་ལ་ཅང་མི་གསུང་བས་གནང་བར་མཛད་དོ། །དེ་ནས་རྒྱལ་པོ་རྩིབས་ཀྱི་མུ་ཁྱུད་ཀྱིས་དེ་བཞིན་གཤེགས་པ་རིན་པོ་ཆེའི་སྙིང་པོས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་ཐད་ནས་སོང་ངོ ། །དེ་ནས་རྒྱལ་པོ་རྩིབས་ཀྱི་མུ་ཁྱུད་ཀྱིས་ཁམས་ཀྱི་རྒྱལ་པོ་རྣམས་དང ། བློན་པོ་རྣམས་དང ། སྣ་ཆེན་པོ་ལ་གཏོགས་པ་རྣམས་དང ། བློན་པོ་ཕྲ་མོ་རྣམས་དང ། གྲོང་མི་རྣམས་དང ། ལྗོངས་ཀྱི་མི་རྣམས་དང ། ཞོ་ཤས་འཚོ་བའི་མི་རྣམས་བོས་ཏེ་སྨྲས་པ། གཙོ་བོ་དག་།ཤེས་བར་གྱིས་ཤིག་།ངས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་དགེ་སློང་གི་དགེ་འདུན་དང་བཅས་པ་ཟླ་བ་གསུམ་པོ་འདི་ལ་ཡོ་བྱད་ཐམས་ཅད་ཀྱིས་དེས་པར་སྤྱན་དྲངས་ཏེ། ང་ལ་ཉེ་བར་སྤྱད་པ་དང ། ཡོངས་སུ་སྤྱད་པ་དང ། བསྙེན་
241b
བཀུར་བྱ་བ་དང ། དགའ་མགུར་སྤྱད་པ་དང ། བཙུན་མོའི་འཁོར་གང་ཅི་ཡོད་པ་དེ་དག་ཐམས་ཅད་ཀྱང་ངས་བཅོམ་ལྡན་འདས་དང ། དགེ་སློང་གི་དགེ་འདུན་ལ་གུས་པར་བྱས་ཏེ་ཕུལ་གྱི། ཁྱེད་ཅག་ལ་གང་ཟག་གི་ཉེ་བར་སྤྱད་པ་དང ། ཡོངས་སུ་སྤྱད་པ་དང ། བསྙེན་བཀུར་བྱ་བ་དང ། དགའ་མགུར་སྤྱད་པ་དང ། ཆུང་མའི་འཁོར་ཇི་ཡོད་པ་དེ་དག་ཐམས་ཅད་ཀྱང་བཅོམ་ལྡན་འདས་དང་དགེ་སློང་གི་དགེ་འདུན་ལ་གུས་པར་ཕུལ་ཅིག་ཅེས་བསྒོ་ནས། དེ་དག་གིས་ཀྱང་དེ་བཞིན་དུ་ཕུལ་ལོ། །ཁྱིམ་བདག་རིན་པོ་ཆེས་ཀྱང་སྐྱེད་མོས་ཚལ་བཟང་པོ་ཐམས་ཅད་ཛམྦུའི་ཆུ་བོའི་གསེར་ལས་བྱས་ཤིང་སྐྱེད་མོས་ཚལ་དེ་ཉིད་དུ། བཅོམ་ལྡན་འདས་ཀྱི་ཕྱིར་རིན་པོ་ཆེ་སྣ་བདུན་གྱི་ཁང་བ་བརྩེགས་པ་བརྩིགས་ཏེ། དེའི་ཕྱོགས་བཞི་ཁོར་ཁོར་ཡུག་དག་ཏུ་རིན་པོ་ཆེ་སྣ་བདུན་གྱི་སྒོ་དག་ཀྱང་གཏོད་དོ། །སྐྱེད་མོས་ཚལ་ཐམས་ཅད་ཀྱང་རིན་པོ་ཆེ་སྣ་བདུན་གྱི་ཤིང་ལྗོན་པ་དག་གིས་བརྒྱན་ཏོ། །ཤིང་ལྗོན་པ་དེ་དག་ཀྱང་གོས་སྣ་ཚོགས་དང ། རས་བཅོས་བུ་སྣ་ཚོགས་དང ། གདུགས་སྣ་ཚོགས་དང ། མུ་ཏིག་གི་ལྔ་ལྡི་སྣ་ཚོགས་དང ། རྒྱན་སྣ་ཚོགས་དང ། རིན་པོ་ཆེའི་རྒྱན་སྣ་ཚོགས་དང ། སྤོས་སྣ་ཚོགས་དག་གིས་ལེགས་པར་བརྒྱན་ཏོ། །ཤིང་ལྗོན་པ་དེ་དག་རིན་པོ་ཆེའི་མེ་ཏོག་དང ། འབྲས་བུ་ཐམས་ཅད་ཀྱིས་ཀྱང་བརྒྱན་ཏོ། །སྐྱེད་མོས་ཚལ་དེ་དག་ཐམས་ཅད་ནོར་བུ་རྣམ་པ་དུ་མ་དག་གིས་ཀྱང་
242a
༄#། །བརྒྱན་ནས་མེ་ཏོག་སྣ་ཚོགས་བཀྲམ་ཞིང་དར་དང ། རས་བཅོས་བུ་དང ། བེའུ་རས་དང ། བགོ་བ་སྣ་ཚོགས་དག་གི་གདན་དག་ཀྱང་བཤམས་སོ། །འཁོར་ལོ་རིན་པོ་ཆེ་དེའང་ཁང་པ་བརྩེགས་པའི་ཕྱི་རོལ་གྱི་སྟེང་གི་བར་སྣང་ལ་མིའི་ཚད་ཙམ་དུ་རེད་དེ། བཅོམ་ལྡན་འདས་ཀྱི་སྤྱན་སྔར་བབ་པར་འབར་ཞིང་འདུག་གོ། །གླང་པོ་རིན་པོ་ཆེ་ཐལ་ཀར་ཡན་ལག་བདུན་ལེགས་པར་གནས་པའང་བཅོམ་ལྡན་འདས་ཀྱི་སྣམ་ལོགས་ན། བཅོམ་ལྡན་འདས་ཀྱི་སྟེང་དུ་རིན་པོ་ཆེའི་ཤིང་ལྗོན་པ་འཛིན་ཅིང་འདུག་སྟེ། ཤིང་ལྗོན་པ་དེའང་རིན་པོ་ཆེ་སྣ་བདུན་དང ། མུ་ཏིག་གི་ལྡ་ལྡི་སྣ་ཚོགས་དང ། རྒྱན་སྣ་ཚོགས་དང ། མེ་ཏོག་ཕྲེང་སྣ་ཚོགས་དག་གིས་བརྒྱན་ཅིང ། དར་སྣ་ཚོགས་དང ། རས་བཅོས་བུ་སྣ་ཚོགས་དག་གིས་ལེགས་པར་བརྒྱན་ནས་ཤིང་ལྗོན་པ་དེ་ལ་རིན་པོ་ཆེ་སྣ་བདུན་གྱི་གདུགས་དག་ཀྱང་དཔྱངས་པར་གྱུར་ཏོ། །རྒྱལ་པོ་རྩིབས་ཀྱི་མུ་ཁྱུད་ཀྱི་བཙུན་མོ་དམ་པ་གང་ཡིན་པ་དེའང་བཅོམ་ལྡན་འདས་ཀྱི་སྤྱན་སྔར་འདུག་ནས། བཅོམ་ལྡན་འདས་ལ་ཙནྡན་ས་མཆོག་པ་དང ། ཙནྡན་སྦྲུལ་གྱི་སྙིང་པོའི་ཕྱེ་མ་དག་འཐོར་བར་བྱེད་དོ། །རྒྱལ་པོ་རྩིབས་ཀྱི་མུ་ཁྱུད་ཀྱི་ནོར་བུ་རིན་པོ་ཆེ་འོད་གསལ་བར་གྱུར་པ་གང་ཡིན་པ་དེའང་རང་གིས་བཅོམ་ལྡན་འདས་ཀྱི་སྤྱན་སྔར་བཞག་གོ་།དེ་ནས་ནོར་བུ་རིན་པོ་ཆེ་དེའི་འོད་ཀྱིས་སྐྱེད་མོས་ཚལ་དེ་དག་ཐམས་ཅད་རྟག་པར་
242b
རྒྱུན་དུ་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །སངས་རྒྱས་ཀྱི་འོད་ཀྱིས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཐམས་ཅད་རྟག་པར་རྒྱུན་དུ་ཁྱབ་པར་གྱུར་ཏོ། །ཉན་ཐོས་རེ་རེ་ལའང་ཙནྡན་ས་མཆོག་པའི་རྐང་རྟེན་དག་བཞག་གོ་།ཉན་ཐོས་རེ་རེའི་རྒྱབ་ཏུའང་གླང་པོ་ཆེའི་གཙོ་བོ་ཐལ་ཀར་སྔ་མ་ལྟ་བུ་དག་དང ། ཇི་ལྟར་བཅོམ་ལྡན་འདས་ལ་འཁོར་ལོ་རིན་པོ་ཆེ་མིའི་ཚད་ཙམ་པ་བཞག་པ་དེ་ལྟ་བུ་དག་ཀྱང་བཞག་གོ་།ཉན་ཐོས་རེ་རེའི་མདུན་དུའང་བུ་མོ་རྒྱན་ཐམས་ཅད་ཀྱིས་བརྒྱན་པ་དག་བཀོད་ནས་ཙནྡན་ས་མཆོག་པའི་ཕྱེ་མ་དག་ཀྱང་འཐོར་བར་བྱེད་དོ། །ཉན་ཐོས་རེ་རེའི་མདུན་དུ་ནོར་བུ་བཻཌཱུརྱ་དག་ཀྱང་བཞག་གོ་།སྐྱེད་མོས་ཚལ་གྱི་ནང་གི་ཁོ་ར་ཁོར་ཡུག་དག་ཏུ་རོལ་མོའི་སྒྲ་སྣ་ཚོགས་དག་ཀྱང་བསྒྲགས་སོ། །སྐྱེད་མོས་ཚལ་གྱི་ཕྱི་རོལ་གྱི་ཁོ་ར་ཁོར་ཡུག་དག་ན་བློན་པོ་རིན་པོ་ཆེ་དཔུང་གི་ཚོགས་ཡན་ལག་བཞི་དང་བཅས་པ་དག་ཀྱང་གནས་སོ། །རིགས་ཀྱི་བུ། དེ་ནས་རྒྱལ་པོ་རྩིབས་ཀྱི་མུ་ཁྱུད་དེ་བཅོམ་ལྡན་འདས་ལ་བལྟ་བ་དང ། བཅོམ་ལྡན་འདས་ལ་བསྙེན་བཀུར་བྱ་བའི་ཕྱིར་ཉིན་གཅིག་བཞིན་དུ་གྲོང་ཁྱེར་ནས་བྱུང་སྟེ། དེ་བཞོན་པས་བགྲོད་པའི་ས་ཇི་སྲིད་པ་དེ་སྲིད་དུ་བཞོན་པས་སོང་ནས་བཞོན་པ་ལས་བབས་ཏེ། རྐང་པས་སྐྱེད་མོས་ཚལ་དུ་ཞུགས་སོ། །ཞུགས་ནས་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོ་ག་ལ་བ་དེར་སོང་སྟེ་ཕྱིན་པ་དང ། དེ་བཞིན་
243a
༄#། །གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོའི་ཞབས་ལ་མགོ་བོས་ཕྱག་བཙལ་ཏེ། ལན་གསུམ་བསྐོར་བ་བྱས་ནས། རང་གིས་དེ་བཞིན་གཤེགས་པ་རིན་པོ་ཆེའི་སྙིང་པོ་ལ་ཕྱག་ཆབ་གསོལ་ཏེ། བདག་ཉིད་ལག་དར་ནས་བཟའ་བ་དང ། བཅའ་བ་དང ། བལྡག་པ་དང ། བསོད་པ་མང་པོ་དག་ལེགས་པར་བསྟབས་ཤིང་ཚིམ་པར་བྱས་སོ། །བདག་ཉིད་ལག་དར་ཏེ་ལེགས་པར་བསྟབས་ཤིང་ཚིམ་པར་བྱས་ནས་ཀྱང་བཅོམ་ལྡན་འདས་ཀྱིས་ཕྱག་ནས་ལྷུང་བཟེད་བཞག་སྟེ་ཕྱག་བཅབས་པར་རིག་ནས། བདག་ཉིད་ཀྱིས་བསིལ་ཡབ་བླངས་ཏེ་བཅོམ་ལྡན་འདས་ལ་གཡབས་སོ། །རྒྱལ་བུ་སྟོང་དང ། ཁམས་ཀྱི་རྒྱལ་པོ་སྟོང་གིས་ཀྱང་ཉན་ཐོས་རེ་རེ་ལ་དེ་ལྟ་བུའི་བསྙེན་བཀུར་བྱས་ནས་བསིལ་ཡབ་བླངས་ཏེ་ཉན་ཐོས་རྣམས་ལ་གཡབས་སོ། །ཞལ་ཟས་བྲིམ་པ་རྫོགས་ཏེ་གདུགས་ཚོད་རྒྱུ་མ་ཐག་ཏུ་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་དུ་མ་དག་ཀྱང་ཆོས་མཉན་པའི་ཕྱིར་ཀུན་དགའ་ར་བར་ལྷགས་སོ། །ལྷ་བྱེ་བ་ཁྲག་ཁྲིག་འབུམ་ཕྲག་དུ་མ་དག་གིས་ཀྱང་ནམ་མཁའི་དཀྱིལ་ནས་མེ་ཏོག་གི་ཆར་དག་མངོན་པར་རབ་ཏུ་ཕབ་ནས། ལྷའི་རོལ་མོའི་སྒྲ་དག་ཀྱང་རབ་ཏུ་བསྒྲགས་སོ། །ལྷའི་གདུགས་དང ། གོས་དང ། རྒྱན་དག་ཀྱང་རབ་ཏུ་དཔྱངས་སོ། །གནོད་སྦྱིན་གོས་སྔོན་པོ་ཅན་ས་
243b
ཡ་ཕྲག་བཞིས་ཀྱང་བཅོམ་ལྡན་འདས་དང ། དགེ་སློང་གི་དགེ་འདུན་བསྲུང་བའི་ཕྱིར་ཙནྡན་གྱི་ཚལ་ནས་ཙནྡན་ས་མཆོག་བའི་སྡོང་པོ་དག་བླངས་ནས་ཐུན་དུ་བླགས་ཏེ་མེལ་ཚེ་བྱེད་དེ། རྒྱལ་པོ་རྩིབས་ཀྱི་མུ་ཁྱུད་ཉིད་ཀྱིས་ཀྱང་མཚན་མོ་བཅོམ་ལྡན་འདས་དང ། དགེ་སློང་གི་དགེ་འདུན་རྣམས་ཀྱི་སྤྱན་སྔར་མར་མེ་ཁ་བྱེ་བ་ཁྲག་ཁྲིག་འབུམ་ཕྲག་དུ་མ་དག་བུས་སོ། །རིགས་ཀྱི་བུ། དེ་ནས་རྒྱལ་པོ་རྩིབས་ཀྱི་མུ་ཁྱུད་བཅོམ་ལྡན་འདས་ཀྱི་སྤྱན་སྔར་འདུག་ནས་མགོའི་སྟེང་དུའང་མར་མེའི་ཀོང་བུ་གཅིག་བཞག་།ཕྲག་པ་གཉིས་དང ། ལག་པ་གཉིས་དང ། རྐང་པ་གཉིས་སུའང་མར་མེའི་ཀོང་བུ་རེ་རེ་བཞག་སྟེ། བཅོམ་ལྡན་འདས་ཀྱི་སྤྱན་སྔར་མཚན་ཡལ་ནངས་སུ་མར་མེ་བཏང་ཡང་བཅོམ་ལྡན་འདས་ཀྱི་མཐུས་ལུས་ལ་ངལ་བ་མེད་ཅིང ། འདི་ལྟ་སྟེ། དཔེར་ན། དགེ་སློང་བསམ་གཏན་གསུམ་པ་ལ་སྙོམས་པར་ཞུགས་པ་དེ་ལྟ་བུར་ལུས་ཀྱི་བདེ་བ་ཚོར་བར་གྱུར་ཏེ། དེ་ལྟར་ལུས་ངལ་བ་མེད་པ་དང ། སེམས་ངལ་བ་མེད་པར་ཟླ་བ་གསུམ་དུ་བཅོམ་ལྡན་འདས་ལ་བསྙེན་བཀུར་བྱས་སོ། །དེ་བཞིན་དུ་རྒྱལ་བུ་སྟོང་དང ། ཁམས་ཀྱི་རྒྱལ་པོ་བརྒྱད་ཁྲི་བཞི་སྟོང་དང ། གཞན་ཡང་སྲོག་ཆགས་བྱེ་བ་ཁྲག་ཁྲིག་ཕྲག་འབུམ་གྱིས་ཀྱང་ཉན་ཐོས་རེ་རེ་ལ་ཟླ་བ་གསུམ་དུ་རྒྱལ་པོའི་ཡོ་བྱད་དང་དེ་ལྟ་བུའི་བསྙེན་བཀུར་གྱིས་བསྙེན་བཀུར་བྱས་སོ། །ཇི་ལྟར་རྒྱལ་པོ་རྩིབས་ཀྱི་མུ་ཁྱུད་ཀྱིས་དེ་བཞིན་གཤེགས་པ་རིན་པོ་ཆེའི་
244a
༄#། །སྙིང་པོ་ལ་བསྙེན་བཀུར་བྱས་བ་དེ་བཞིན་དུ་བཙུན་མོ་དམ་པ་ལྷ་མོ་དཔལ་གྱིས་ཀྱང་ཟླ་གསུམ་དུ་སྤོས་དང ། མེ་ཏོག་དག་གིས་བསྙེན་བཀུར་བྱས་སོ། །དེ་བཞིན་དུ་བུ་མོ་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་ཀྱང་ཉན་ཐོས་རེ་རེ་ལ་ཟླ་བ་གསུམ་དུ་མེ་ཏོག་དང ། བདུག་པ་དང ། སྤོས་དག་གིས་བསྙེན་བཀུར་བྱས་སོ། །རིགས་ཀྱི་བུ།་དེ་ནས་རྒྱལ་པོ་རྩིབས་ཀྱི་མུ་ཁྱུད་ཀྱི་ཟླ་བ་གསུམ་པོ་འདས་ནས་བཅོམ་ལྡན་འདས་ལ་ཛམྦུའི་ཆུ་བོའི་གསེར་ལས་བྱས་པའི་རྒྱན་བརྒྱད་ཁྲི་བཞི་སྟོང་ཕུལ་ལོ། །བཅོམ་ལྡན་འདས་ལ་འཁོར་ལོ་རིན་པོ་ཆེ་ལ་སོགས་པ་གསེར་གྱི་འཁོར་ལོ་རིན་པོ་ཆེ་བརྒྱད་ཁྲི་བཞི་སྟོང་ཡང་ཕུལ་ལོ། །བཅོམ་ལྡན་འདས་ལ་གླང་པོ་རིན་པོ་ཆེ་ལ་སོགས་པ་གླང་པོ་ཆེ་ཐལ་ཀར་བརྒྱད་ཁྲི་བཞི་སྟོང་ཡང་ཕུལ་ལོ། །བཅོམ་ལྡན་འདས་ལ་རྟ་རིན་པོ་ཆེ་ལ་སོགས་པ་རྟ་བརྒྱད་ཁྲི་བཞི་སྟོང་ཡང་ཕུལ་ལོ། །བཅོམ་ལྡན་འདས་ལ་ནོར་བུ་རིན་པོ་ཆེ་ལ་སོགས་པ་ནོར་བུ་མེ་ཤེལ་བརྒྱད་ཁྲི་བཞི་སྟོང་ཡང་ཕུལ་ལོ། །བཅོམ་ལྡན་འདས་དེ་ལ་བསྙེན་བཀུར་བྱ་བའི་ཕྱིར་ཁྱིམ་བདག་རིན་པོ་ཆེ་ལ་སོགས་པ་རྒྱལ་བུ་བརྒྱད་ཁྲི་བཞི་སྟོང་ཡང་ཕུལ་ལོ། །བཅོམ་ལྡན་འདས་ལ་བསྙེན་བཀུར་བྱ་བའི་ཕྱིར་བློན་པོ་རིན་པོ་ཆེ་ལ་སོགས་པ་ཁམས་ཀྱི་རྒྱལ་པོ་བརྒྱད་ཁྲི་བཞི་སྟོང་ཡང་ཕུལ་ལོ། །བཅོམ་ལྡན་འདས་དང ། དགེ་
244b
སློང་གི་དགེ་འདུན་གྱི་འཚོ་བའི་ཕྱིར་བཙུན་མེའི་འཁོར་གྱི་གྲོང་ཁྱེར་ལ་སོགས་གྲོང་ཁྱེར་བརྒྱད་ཁྲི་བཞི་སྟོང་ཡང་ཕུལ་ལོ། །བཅོམ་ལྡན་འདས་ལ་རིན་པོ་ཆེའི་དཔག་བསམ་གྱི་ཤིང་བརྒྱད་ཁྲི་བཞི་སྟོང་དང ། རིན་པོ་ཆེའི་མེ་ཏོག་གི་ཕུང་པོ་བརྒྱད་ཁྲི་བཞི་སྟོང་དང ། རིན་པོ་ཆེ་སྣ་བདུན་གྱི་གདུགས་བརྒྱད་ཁྲི་བཞི་སྟོང་དང ། རྒྱལ་པོ་ལ་འོས་པའི་གོས་རྒྱན་ཆེན་པོ་བརྒྱད་ཁྲི་བཞི་སྟོང་དང ། རིན་པོ་ཆེའི་ཕྲེང་བ་བརྒྱད་ཁྲི་བཞི་སྟོང་དང ། རྒྱན་དང ། ཁྲེའུ་དང ། མགོ་ལྟ་བུ་དང ། མིག་ལྟ་བུ་དང ། སྙན་ཆ་གདུབ་འཁོར་དང ། གསེར་གྱི་ཙོང་ཙོང་དང ། མུ་ཏིག་གི་དོ་ཤལ་དང ། ཆགས་དང ། གཟིམས་ཆ་དང ། ཞབས་རྟེན་དང ། སྣོད་དང ། རྔ་བོ་ཆེ་དང ། རོལ་མོའི་སྒྲ་དང ། དུང་དང ། དྲིལ་བུ་དང ། རྒྱལ་མཚན་དང ། རིལ་བ་བྷྲིད་ག་ར་དང ། ཀུན་དགའི་ར་བ་དང ། མར་མེའི་ཀོང་བུ་དག་ཀྱང་ཕུལ་ལོ། །བཅོམ་ལྡན་འདས་ལ་རིན་པོ་ཆེའི་བྱ་དང ། རིན་པོ་ཆེའི་རི་དྭགས་དང ། བསིལ་ཡབ་བརྒྱད་ཁྲི་བཞི་སྟོང་ཡང་ཕུལ་ལོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་ལ་སྨན་བཅུད་ཀྱི་ལེན་བརྒྱད་ཁྲི་བཞི་སྟོང་ཡང་ཕུལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ནི་བགྱི་བ་མང་ཞིང་བགྱིད་བ་མང་བ་ལགས་ན་བཅོམ་ལྡན་འདས་ཀྱིས་བདག་ལ་བཟོད་པ་མཛད་ཅིང ། བདག་ཅག་གི་སྐྱེད་མོས་ཚལ་དུ་བཞུགས་པ་དང ། བཅོམ་
245a
༄#། །ལྡན་འདས་སྐྱེད་མོས་ཚལ་འདིར་རྟག་ཏུ་དགྱེས་པར་མཛད་དུ་གསོལ། གཅོམ་ལྡན་འདས་ལ་བལྟ་བ་དང ། ཕྱག་བགྱི་བ་དང ། བསྙེན་བཀུར་བགྱི་བའི་སླད་དུ་བདག་སླད་ཀྱིས་ཀྱང་མཆིའོ། །རྒྱལ་པོ་རྩིབས་ཀྱི་མུ་ཁྱུད་ཀྱི་བུ་སྟོང་པོ་གང་ཡིན་པ་དེ་དག་གིས་ཀྱང་བཅོམ་ལྡན་འདས་ཀྱི་ཞབས་ལ་གཏུགས་ནས་སོ་སོ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ཅག་རེ་རེས་ཀྱང་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལ་དགུང་ཟླ་གསུམ་ཞིག་ཡོ་བྱད་ཐམས་ཅད་ཀྱི་ས་བསྙེན་བཀུར་བགྱི་བར་འཚལ་ན། བཅོམ་ལྡན་འདས་ཀྱི་བདག་ཅག་ལ་གནང་བར་མཛད་དུ་གསོལ། བཅོམ་ལྡན་འདས་ཀྱིས་ཅང་མི་གསུང་བས་རྒྱལ་བུ་དེ་དག་ལ་གནང་བར་མཛད་དོ། །དེ་ནས་རྒྱལ་པོ་རྩིབས་ཀྱི་མུ་ཁྱུད་ཀྱིས་གནང་བར་རིག་ནས། བཅོམ་ལྡན་འདས་དང ། དགེ་སློང་གི་དགེ་འདུན་གྱི་ཞབས་ལ་མགོ་བོས་ཕྱག་བཙལ་ཏེ། ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔ་ནས་ཕྱིར་སོང་ངོ ། །དེ་ནས་རྒྱལ་བུ་དེ་དག་གི་ཐུ་བོ་མིག་མི་འཛུམ་ཞེས་བྱ་བས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལ་ཟླ་བ་གསུམ་གྱི་བར་དུ་ཇི་ལྟར་རྒྱལ་བོ་རྩིབས་ཀྱི་མུ་ཁྱུད་ཀྱིས་བསྙེན་བཀུར་བྱ་བ་དེ་ལྟ་བུའི་བསྙེན་བཀུར་བྱ་བས་བསྙེན་བཀུར་བྱས་སོ། །རྒྱལ་པོ་རྩིབས་ཀྱི་མུ་ཁྱུད་ཀྱང་བཅོམ་ལྡན་འདས་དང ། དགེ་སློང་གི་དགེ་འདུན་ལ་ལྟ་
245b
བ་དང ། ཆོས་མཉན་པའི་ཕྱིར་ཉིན་མོ་སྐབས་སྐབས་སུ་འོང་ངོ ། །རིགས་ཀྱི་བུ་དེ་ནས་དེ་བཞིན་གཤེགས་པ་རིན་པོ་ཆེའི་སྙིང་པོའི་ཡབ་བྲམ་ཟེ་རྒྱ་མཚོའི་རྡུལ་ཅེས་བྱ་བ་དེའང་ཛམྦུའི་གླིང་ཐམས་ཅད་ཉུལ་ཞིང་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་དག་ལས་ཟས་སློང་བར་བྱེད་དེ། །དེ་ལ་ཟས་དེ་སྦྱིན་པ་ན་ཇི་སྲིད་དུ་ཁྱེའུ་དང ། བུ་མོ་དེ་དག་གསུམ་ལ་སྐྱབས་སུ་འགྲོ་བ་ལ་རབ་ཏུ་འགོད་ཅིང ། རབ་ཏུ་བཀོད་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་མི་བྱེད་པ་དེ་སྲིད་དུ་ལེན་པར་མི་བྱེད་དོ། །དེ་ལྟར་ཉུལ་བ་ན་ཛམྦུའི་གླིང་ན་བྲམ་ཟེ་རྒྱ་མཚོའི་རྡུལ་དེས་གང་ཟས་ཀྱིས་ཡོངས་སུ་མ་བཟུང་བ་དང ། གང་དཀོན་མཆོག་གསུམ་ལ་སྐྱབས་སུ་འགྲོ་བ་ལ་མ་བཀོད་པ་དང ། གང་\?\བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་བསྐྱེད་པ་དང ། གང་བླ་ན་མེད་པའི་ཡེ་ཤེས་ལ་རབ་ཏུ་མ་བཀོད་ཅིང་ཡང་དག་པར་འཛིན་དུ་མ་བཅུག་པའི་མིར་གྱུར་པ་འགའ་ཡང་མེད་དེ། སྲོག་ཆགས་བྱེ་བ་ཁྲག་ཁྲིག་འབུམ་ཕྲག་མང་པོ་དག་གསུམ་ལ་སྐྱབས་སུ་འགྲོ་བའི་གནས་ལ་བཀོད་དོ། །དེ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །རྒྱལ་བུ་གཞོན་ནུ་མིག་མི་འཛུམ་གྱིས་ཀྱང་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཟླ་བ་གསུམ་དུ་སྤྱན་དྲངས་ཤིང ། ཇི་ལྟར་རྒྱལ་བོ་རྩིབས་ཀྱི་
246a
༄#། །མུ་ཁྱུད་ཀྱིས་བསྙེན་བཀུར་བྱས་པ་དེ་ལྟ་བུའི་བསྙེན་བཀུར་ཀྱིས། བསྙེན་བཀུར་བྱས་ནས་ཟླ་བ་གསུམ་འདས་པ་དང ། དེས་ཀྱང་བཅོམ་ལྡན་འདས་ལ་འཁོར་ལོ་རིན་པོ་ཆེ་རྩིབས་ཐམས་ཅད་གསེར་ལས་བྱས་པ་བརྒྱད་ཁྲི་བཞི་སྟོང་ཕུལ་ལོ། །གླང་པོ་ཆེ་དང ། རྟ་དང ། ནོར་བུ་དང ། བུད་མེད་དང ། ཁྱིམ་བདག་དང ། བློན་པོ་རིན་པོ་ཆེ་རྣམས་མ་གཏོགས་པ་གླང་པོ་ཆེ་དང ། རྟ་བརྒྱད་ཁྲི་བཞི་སྟོང་དང ། དེ་བཞིན་དུ་ནོར་བུ་མེ་ཤེལ་དང ། ཁྱེའུ་དང ། བུ་མོ་དང ། དཔག་བསམ་གྱི་ཤིང་དང ། མེ་ཏོག་གི་ཕུང་པོ་དང ། གདུགས་དང ། གོས་དང ། མེ་ཏོག་ཕྲེང་བ་དང ། རྒྱན་དང ། རིན་པོ་ཆེའི་ཁྲིའུ་དང ། མགོ་ལྟ་བུ་དང ། མིག་ལྟ་བུ་དང ། སྙན་ཆ་གདུབ་འཁོར་དང ། གསེར་གྱི་ཙོང་ཙོང་དང ། མུ་ཏིག་གི་དོ་ཤལ་དང ། ཆགས་དང ། གཟིམས་ཆ་དང ། གདན་དང ། ཞབས་རྟེན་དང ། སྣོད་དང ། རྔ་བོ་ཆེ་དང ། རོལ་མོའི་སྒྲ་དང ། དུང་དང ། རྔ་པ་ཊ་ཧ་དང ། རྒྱལ་མཚན་དང ། རིལ་བ་བྷྲིངྒ་ར་དང ། ཀུན་དགའི་ར་བ་དང ། མར་མེའི་ཀོང་བུ་དང ། རིན་པོ་ཆེའི་བྱ་སྣ་ཚོགས་དང ། རིན་པོ་ཆེའི་རི་དྭགས་སྣ་ཚོགས་དང ། སྨན་བཅུད་ཀྱིས་ལེན་ལ་སོགས་པ་སྣ་རེ་རེ་ཞིང་ཡང་བརྒྱད་ཁྲི་བཞི་སྟོང་བཞི་སྟོང་ཡང་ཕུལ་ལོ། །དགེ་སློང་གི་དགེ་འདུན་ལའང་དེ་སྙེད་ཕུལ་ལོ། །དེ་ནས་རྒྱལ་བུ་གཞོན་ནུ་མིག་མི་
246b
འཛུམ་གྱིས་བཅོམ་ལྡན་འདས་དང ། དགེ་སློང་གི་དགེ་འདུན་ལ་བཟོད་པ་གསོལ་ཏེ། རྒྱལ་བུ་གཞོན་ནུ་མིག་མི་འཛུམ་ཀྱིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལ་ཇི་ལྟར་རྒྱལ་པོ་རྩིབས་ཀྱི་མུ་ཁྱུད་ཀྱིས་བསྙེན་བཀུར་བྱས་པ་དེ་ལྟ་བུའི་བསྙེན་བཀུར་གྱིས་བསྙེན་བཀུར་བྱས་ཤིང་དེ་ལས་མི་ཉུང་བའི་ཡོན་ཡང་ཕུལ་ལོ། །དེ་བཞིན་དུ་རྒྱལ་བུ་གཞོན་ནུ་དབང་པོའི་ཚོགས་ཀྱིས་ཀྱང་བཅོམ་ལྡན་འདས་དང ། དགེ་སློང་གི་དགེ་འདུན་ལ་ཟླ་བ་གསུམ་གྱི་བར་དུ་འབྱོར་པ་ཡོངས་སུ་བཏང་ཞིང་བསྙེན་བཀུར་བྱས་སོ། །དེ་བཞིན་དུ་སྦྱར་ཏེ་རྒྱལ་བུ་གཞོན་ནུ་ཉོན་མོངས་མེད་དང ། འཇིགས་མེད་དང ། ནམ་མཁའ་དང ། ཡང་དག་སྐྱེས་དང ། གྲུབ་པ་དང ། འགྲན་མེད་དང ། མཉེན་དེས་དང ། གྲུམ་པོར་འགྲང་བ་དང ། འདྲོན་པ་ཅན་དང ། ཤེད་བུ་དང ། ཤ་བོ་ཆེ་དང ། འདུས་པ་ཅན་དང ། རྩིབས་ཅན་དང ། ཤེས་པ་ཅན་དང ། གདོང་ཅན་དང ། ནོར་མང་དང ། དགྲ་དབང་དང ། མིག་ཅན་དང ། གླང་པོ་འཐོབ་དང ། ཟླ་བའི་མུ་ཁྱུད་དང ། ཉི་མའི་མུ་ཁྱུད་དང ། དབང་པོའི་མུ་ཁྱུད་དང ། རྡོ་རྗེའི་མུ་ཁྱུད་དང ། བཟོད་པའི་མུ་ཁྱུད་དང ། གནས་ཀྱི་མུ་ཁྱུད་དང ། ཤུགས་ཀྱི་མུ་ཁྱུད་དང།་གཡུལ་གྱི་མུ་ཁྱུད་དང ། སྒྲ་གཅན་དང ། སྒྲ་གཅན་སྟོབས་མེད་དང ། སྒྲ་གཅན་དགྲ་མེད་དང ། ཆུན་པོ་སྣ་ཚོགས་དང ། རྒྱལ་པོར་གནས་དང ། འདོད་ཆགས་མི་
247a
༄#། །གནས་དང ། ནོར་བདག་དང ། སྲུང་བ་པོ་དང ། ལུས་བཟང་དང ། བསམ་པ་དཔོག་དང ། སྡོམ་བརྩོན་འཁོར་དང ། སྤྲིན་ཆུང་དང ། ཡར་མ་ཐ་དང ། འགྲོ་བའི་རྒྱལ་མཚན་དང ། ངེས་མཚོ་དང ། ཡ་སྱ་ན་དང ། སྐར་མ་འདུད་དང ། ཆགས་མེད་རྣམས་ཀྱིས་ཀྱང་དེ་བཞིན་དུ་བྱས་ཏེ། རྒྱལ་པོ་རྩིབས་ཀྱི་མུ་ཁྱུད་ཀྱི་བུ་སྟོང་གི་བར་དུ་རེ་རེས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་དགེ་སློང་གི་དགེ་འདུན་དཔག་ཏུ་མེད་པ་དང་བཅས་པ་ལ་ཟླ་བ་གསུམ་གསུམ་དུ་ན་བཟའ་དང ། བཤོས་དང ། གཟིམས་ཆ་དང ། གདན་དང ། སྙུན་གྱི་གསོས་སྨན་ཡོ་བྱད་ཀྱི་ཚོགས་དེ་ལྟ་བུ་དག་གིས་བསྙེན་བཀུར་བྱ་བས་བསྙེན་བཀུར་བྱས་ནས་རྒྱལ་བུ་ཐུ་བོས་ཇི་ལྟར་བྱས་པ་དེ་བཞིན་དུ་རེ་རེས་ཀྱང་བཅོམ་ལྡན་འདས་དང ། དགེ་སློང་གི་དགེ་འདུན་ལ་གསེར་གྱི་འཁོར་ལོ་བརྒྱད་ཁྲི་བཞི་སྟོང་དང ། སྨན་བཅུད་ཀྱིས་ལེན་བརྒྱད་ཁྲི་བཞི་སྟོང་གི་བར་དུ་རྒྱ་ཆེར་ཕུལ་ལོ། །དེ་ལྟ་བུའི་སྦྱིན་པ་ཆེན་པོ་བྱས་ནས་དེ་དག་ཁ་ཅིག་ནི་བརྒྱ་བྱིན་ཉིད་དུ་སྨོན། ཁ་ཅིག་ནི་ཚངས་པ་ཉིད་དུ་སྨོན། ཁ་ཅིག་ནི་འཁོར་ལོས་བསྒྱུར་བའི་རྒྱལ་པོར། ཁ་ཅིག་ནི་ལོངས་སྤྱོད་ཆེན་པོར། ཁ་ཅིག་ནི་ཉན་ཐོས་ཀྱི་ཐེག་པར་སྨོན་ཅིང ། ལོ་ཉིས་བརྒྱ་ལྔ་བཅུར་བཅོམ་ལྡན་འདས་དང ། དགེ་སློང་
247b
གི་དགེ་འདུན་ལ་བཟོད་པར་གསོལ་ཏོ། །དེའི་ཚེ་ན་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་འོངས་ནས་འདི་ལྟ་སྟེ། ན་བཟའ་དང ། བཤོས་དང ། གཟིམས་ཆ་དང ། གདན་དང།་སྙུན་གྱི་གསོས་སྨན་དང ། ཡོ་བྱད་རྣམས་དང ། འཚོག་ཆས་ཐམས་ཅད་ཀྱིས་ལོ་བདུན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་དགེ་སློང་གི་དགེ་འདུན་དང་བཅས་པ་སྤྱན་དྲངས་པ་དང ། བཅོམ་ལྡན་འདས་ཅང་མི་གསུང་བས་ཡབ་འདུན་ན་འདོན་གྱི་གཙོ་བོ་ལ་གནང་བར་མཛད་དོ། །དེ་ནས་བྲམ་ཟེ་རྒྱ་མཚོའི་རྡུལ་གྱིས་དེ་བཞིན་གཤེགས་པ་རིན་པོ་ཆེའི་སྙིང་པོ་དགེ་སློང་གི་དགེ་འདུན་དང་བཅས་པ་ལ། ཇི་ལྟར་རྒྱལ་པོ་རྩིབས་ཀྱི་མུ་ཁྱུད་ཀྱིས་བསྙེན་བཀུར་བྱས་པ་དེ་ལྟ་བུའི་ཡོ་བྱད་ཕུན་སུམ་ཚོགས་པ་ཐམས་ཅད་ཀྱིས་བསྙེན་བཀུར་བྱས་བས་བསྙེན་བཀུར་བྱས་སོ། །རིགས་ཀྱི་བུ། དེ་ནས་དུས་གཞན་ཞིག་ན་བྲམ་ཟེ་རྒྱ་མཚོའི་རྡུལ་གྱི་སེམས་ལ་འདི་ལྟ་བུའི་ཡོངས་སུ་རྟོག་པ་སྐྱེས་ཏེ། བདག་གི་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་མང་པོ་དེ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཀྱང་བདག་གིས་རྒྱལ་པོ་རྩིབས་ཀྱི་མུ་ཁྱུད་འདི་ལྷའི་རྒྱལ་སྲིད་དམ། མིའི་རྒྱལ་སྲིད་འདོད་དམ། ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པ་འདོད་དམ། བླ་ན་མེད་པ་ཡང་
248a
༄#། །དག་པར་རྫོགས་པའི་བྱང་ཆུབ་འདོད་དམ། འདི་ཅི་འདོད་པའི་སྨོན་ལམ་མི་ཤེས་ན། ཇི་སྟེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་ཞིང་སྐྱེ་བ་དང ། རྒ་བ་དང ། ན་བ་དང ། འཆི་བ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་དག་ལས་མ་བརྒལ་བའི་སེམས་ཅན་རྣམས་སྒྲོལ་བར་བྱེད་པ་དང ། མཐར་བ་རྣམས་ཐར་བར་བྱེད་པ་དང ། ཡོངས་སུ་མྱ་ངན་ལས་མ་འདས་པའི་སེམས་ཅན་རྣམས་ཡོངས་སུ་མྱ་ངན་ལས་འདའ་བར་བྱེད་པར་ལྟ་ན་རྒྱལ་པོ་འདི་ལྷའི་དཔལ་འདོད་དམ། འོན་ཏེ་མིའི་དཔལ་ལམ། འོན་ཏེ་ཉན་ཐོས་ཉིད་དམ། འོན་ཏེ་རང་སངས་རྒྱས་ཀྱི་སའམ། འོན་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་དམ། ཅི་འདོད་པ་ལྷའམ། ཀླུའམ། གནོད་སྦྱིན་ནམ། སངས་རྒྱས་སམ། ཉན་ཐོས་སམ། བྲམ་ཟེ་འགའ་ཞིག་གིས་བདག་གི་རྨི་ལམ་དུ་སྦྲོན་གྲང་སྙམ་མོ། །རིགས་ཀྱི་བུ། དེ་ནས་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་གྱི་རྨི་ལམ་ན་སྣང་བ་གང་གིས་ཕྱོགས་བཅུའི་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དག་གིས་སངས་རྒྱས་བཅོམ་ལྡན་འདས་རྣམས་མཐོང་བ་དེ་ལྟ་བུའི་སྣང་བ་མཐོང་ཞིང ། སངས་རྒྱས་བཅོམ་ལྡན་འདས་དེ་དག་གིས་བྲམ་ཟེ་དེ་ལ་པདྨ་འདབ་མ་རྣམས་ནི་
248b
གསེར། སྡོང་བུ་རྣམས་ནི་དངུལ། སྙིང་པོ་རྣམས་ནི་བཻཌཱུརྱ། ཟེ་པ་རྣམས་ནི་རྡོའི་སྟིང་པོ་ལས་བྱས་པ་དག་བསྐུར་ཏེ། པདྨ་དེ་དག་ཐམས་ཅད་ལའང་ཉི་མའི་དཀྱིལ་འཁོར་དག་ཀུན་ཏུ་སྣང་ཞིང ། ཉི་མའི་དཀྱིལ་འཁོར་དེ་དག་གི་སྟེང་ན་རིན་པོ་ཆེ་སྣ་བདུན་གྱི་གདུགས་དག་ཀུན་ནས་གནས་པ་དང ། ཉི་མའི་དཀྱིལ་འཁོར་རེ་རེ་ལས་ཀྱང་འོད་ཟེར་བྱེ་བ་ཕྲག་དྲུག་ཅུ་དྲུག་ཅུ་བྱུང་བར་གྱུར་ནས་འོད་ཟེར་དེ་དག་ཐམས་ཅད་བྲམ་ཟེ་དེའི་ཁར་ཞུགས་པ་དང ། བདག་གིས་ལུས་དཔག་ཚད་སྟོང་གི་ཚད་ཙམ་དུ་གྱུར་ཅིང་འདི་ལྟ་སྟེ། དཔེར་ན། མེ་ལོང་གི་དཀྱིལ་འཁོར་ཡོངས་སུ་དག་པ་བཞིན་དུ་ཡོངས་སུ་དག་པར་མཐོང་བ་དང ། ལུས་ཀྱི་ཁོང་པ་ནའང་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དྲུག་ཅུ་པདྨ་དག་ལ་སྐྱིལ་མོ་ཀྲུང་བཅས་ཏེ་འདུག་ཅིང་བསམ་གཏན་བསྒོམ་པ་དག་ཀྱང་མཐོང་ངོ ། །ཉི་མའི་དཀྱིལ་འཁོར་གྱི་གཟུགས་དེ་དག་ཀྱང་བདག་གི་མགོ་ལ་ཕྲེང་བ་དངར་བར་མཐོང་ཞིང་གདུགས་རྣམས་ཀྱང་སྟེང་གི་ནམ་མཁའ་ལ་ཆེངས་པའི་འཇིག་རྟེན་གྱི་མཐར་ཐུག་པའི་བར་དུ་གནས་པ་མཐོང་ངོ ། །ཁོ་ར་ཁོར་ཡུག་ནའང་པདྨ་སྣ་ཚོགས་དག་ཡོད་པར་མཐོང་ཞིང་པདྨ་དེ་དག་ལས་ལྷའི་སིལ་སྙན་མིའི་ལས་ཤིན་ཏུ་འདས་པ་དག་བྱུང་སྟེ་སྒྲའང་གྲག་གོ་།དེ་ནས་རྒྱལ་པོ་རྩིབས་ཀྱི་མུ་ཁྱུད་ལུས་ཁྲག་གིས་བསྐུས་ཤིང་ཕག་གི་གདོང་དུ་གྱུར་ནས་རྒྱུག་ཅིང་སྲོག་ཆགས་རྣམ་པ་མང་པོ་དག་ལ་
249a
༄#། །ཟ་བ་དང ། ཟོས་ནས་ཀྱང་ཨེ་རཎྜའི་ཤིང་དྲུང་ན་སྙེས་ཤིང་འདུག་པ་དང ། སྲོག་ཆགས་སྣ་ཚོགས་དག་འོངས་ཏེ་རྒྱལ་པོ་དེ་ཟོས་པ་ནས་ཀེང་རུས་ཀྱི་བར་ལ་ཐུག་པར་བྱས་ཏེ་བོར་བ་དང ། དེ་བཞིན་དུ་ཡང་དང་ཡང་ཕྱིར་སྐྱེས་པས་ཕག་གི་གདོང་དུ་གྱུར་ཅིང་ལུས་ཁྲག་གིས་བསྐུས་ཏེ་སྲོག་ཆགས་རྣམ་པ་མང་པོ་དག་ཟོས་ནས་ཨེ་རཎྜ་འི་ཤིང་དྲུང་ན་འདུས་པ་དང ། སྲོག་ཆགས་སྣ་ཚོགས་དག་གིས་ཟོས་ཤིང་རྐེང་རུས་ལ་ཐུག་པར་བྱས་ཏེ་བོར་བ་དག་མཐོང་ངོ ། །གཞན་ཡང་རྒྱལ་བུ་དག་ཀྱང་ལ་ལ་ནི་ཕག་གི་གདོང ། ལ་ལ་ནི་གླང་པོ་ཆེའི་གདོང ། ལ་ལ་ནི་མ་ཧེའི་གདོང ། ལ་ལ་ནི་སེང་གེའི་གདོང ། ལ་ལ་ནི་སྤྱང་ཀིའི་གདོང ། ལ་ལ་ནི་ཝའི་གདོང ། ལ་ལ་ནི་ཁྱིའི་གདོང ། ལ་ལ་ནི་སྤྲེའུའི་གདོང་དུ་གྱུར་པར་མཐོང་ཞིང་ལུས་དག་ལ་ཁྲག་གིས་གཏོར་ཏེ་སྲོག་ཆགས་རྣམ་པ་མང་པོ་དག་ཟོས་ནས་ཨེ་རཎྜའི་ཤིང་དྲུང་ན་འདུག་པ་དང ། སྲོག་ཆགས་རྣམ་པ་མང་པོ་དག་གིས་ཟོས་ཤིང་ཀེང་རུས་ལ་ཐུག་པར་བྱས་ཏེ་བོར་བ་མཐོང་ངོ ། །ཡང་ལུས་དེ་ཉིད་ལ་གནས་ཤིང་སྲོག་ཆགས་དག་ལ་ཟ་བར་ཡང་མཐོང་ངོ ། །རྒྱལ་བུ་ཁ་ཅིག་ནི་སྣ་མའི་མེ་ཏོག་གིས་བརྒྱན་ཅིང་མ་ཧེའི་ཤིང་རྟ་དག་ལ་ཞོན་ཏེ་ལམ་གོལ་བར་ཞུགས་ནས་གཡས་ཕྱོགས་སུ་བལྟས་ཤིང་དོང་བར་མཐོང་ངོ ། །བརྒྱ་
249b
བྱིན་དང ། ཚངས་པ་དང ། འཇིག་རྟེན་སྐྱོང་བ་དག་ཀྱང་འོངས་ནས་བྲམ་ཟེ་ལ་སྨྲས་པ། ཀྱེ་བྲམ་ཟེ་ཁྱོད་ཀྱི་ཁོ་ར་ཁོར་ཡུག་ན་པདྨ་ཡོད་པ་གང་ཡིན་པ་དེ་དག་ལས་ཁྱོད་ཀྱིས་དང་པོར་པདྨ་གཅིག་ནི་རྒྱལ་པོའི་སྐལ་བར་ཕུལ་ཅིག་།དེ་ནས་རྒྱལ་བུ་འདི་དག་ལའང་པདྨ་རེ་རེ་བྱིན་ཅི་ལྷག་མ་རྣམས་ནི་ཁམས་ཀྱི་གྱལ་པོ་རྣམས་ལ་བྱིན་ཅིག་།གཞན་དག་ནི་སྐྱེ་པོ་རྣམས་ལ་བྱིན་ཅིག་།དེ་ཐོས་ནས་བྲམ་ཟེ་ལྷ་རྣམས་ཀྱིས་བསྒོ་\?\་བ་བཞིན་དུ་བྱའོ་ཞེས་སྨྲས་ཏེ། དེ་ནས་བྲམ་ཟེ་དེ་པདྨ་རྣམས་འགོད་བཞིན་པ་ལས་སད་པ་དང ། དེ་མལ་ནས་ལངས་ཏེ་རྨི་ལམ་དྲན་ཞིང་འདུག་པ་ན་དེ་འདི་སྙམ་དུ་སེམས་ཏེ། འཁོར་ལོས་བསྒྱུར་བའི་རྒྱལ་པོ་དེ་དང ། རྒྱལ་བུ་ཁ་ཅིག་ནི་སྨོན་ལམ་དམན་ཞིང་འཁོར་བའི་བདེ་བ་ལ་མངོན་པར་དགའ་བ་སྟེ། དེ་དག་ནི་དམན་པ་ལ་མོས་པ་ཡིན་ནོ། །གང་དག་བདག་གིས་རྨི་ལམ་ན་སྣ་མའི་མེ་ཏོག་གིས་བརྒྱན་ཅིང་མ་ཧེའི་ཤིང་རྟ་དག་ལ་ཞོན་ཏེ། ལམ་གོལ་བར་ཞུགས་ནས་གཡས་ཕྱོགས་སུ་བལྟས་ཤིང་དོང་བར་མཐོང་བའི་རྒྱལ་བུ་ཁ་ཅིག་ནི་ཉན་ཐོས་ཀྱི་ཐེག་པ་འདོད་པ་ཡིན་ནོ། །བདག་གིས་སྣང་བ་ཆེན་པོ་མཐོང་ཞིང་སྣང་བ་དེས་ཕྱོགས་བཅུའི་སངས་རྒྱས་བཅོམ་ལྡན་འདས་རྣམས་མཐོང་བ་གང་ཡིན་པ་དེ་ནི་བདག་གིས་ཛམྦུའི་གླིང་ཐམས་ཅད་ན་གནས་པའི་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་དུ་མ་དག་བསོད་
250a
༄#། །ནམས་བྱ་བའི་དངོས་པོ་གསུམ་པོ་དག་ཡང་དག་པར་འཛིན་དུ་དབྱུག་\?\་ཅིང་བཙུད་དེ་རབ་ཏུ་བཀོད་པ་དེའི་མཚན་མ་ཡིན་ཏེ། གང་གི་ཕྱིར་བདག་གི་ཛམྦུའི་གླིང་མྱུལ་ཅིང་སེམས་ཅན་བགྲང་བ་ལས་ཡང་དག་པར་འདས་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་འཛིན་དུ་བཅུག་ནས་བཏུལ་ཅིང་བཙུན་དེ་རབ་ཏུ་བཀོད་པ་གང་ཡིན་པ་དང ། བདག་གི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་སློང་གི་དགེ་འདུན་དང་བཅས་པ་ཡོ་བྱད་ཐམས་ཅད་ཀྱིས་ལོ་བདུན་དུ་སྤྱན་དྲངས་པ་དེས་ན། བདག་གིས་སྣང་བ་ཆེན་པོ་མཐོང་ཞིང་ཕྱོགས་བཅུའི་སངས་རྒྱས་བཅོམ་ལྡན་འདས་རྣམས་ཀྱང་མཐོང་ལ། ཕྱོགས་བཅུའི་སངས་རྒྱས་ཀྱི་ཞིང་གཞན་དག་ནས་སངས་རྒྱས་བཅོམ་ལྡན་འདས་རྣམས་ཀྱིས་པདྨ་དག་བསྐུར་ཞིང ། བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་པ་གང་ཡིན་པ་དེས་སངས་རྒྱས་བཅོམ་ལྡན་འདས་དེ་དག་གིས་བདག་ལ་གདུགས་དག་བསྐུར་བ་ཡིན་ན། བདག་གིས་པདྨ་དེ་དག་ལ་ཉི་མའི་གཟུགས་དག་མཐོང་བ་གང་ཡིན་པ་དང ། བདག་གིས་འོད་ཟེར་དེ་དག་རང་གི་ཁར་ཞུགས་པར་མཐོང་བ་གང་ཡིན་པ་དང ། ལུས་ཆེན་པོར་རྒྱུར་པར་མཐོང་བ་གང་ཡིན་པ་དང ། ཉི་
250b
མའི་གཟུགས་རྣམས་ཕྲེང་པ་དང་རབ་མཐོང་བ་གང་ཡིན་པ་དང ། ཁོང་པ་ན་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དྲུག་ཅུ་པདྨ་དག་ལ་སྐྱིལ་མོ་ཀྲུང་བཅས་ཏེ་འདུག་ཅིང་བསམ་གཏན་བྱེད་པ་གང་ཡིན་པ་དེ་ལྟ་བུའི་རྨི་ལམ་དག་རྨི་བ་དང ། བདག་གིས་བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དག་མཐོང་ཞིང་པདྨ་འདི་དག་བགོས་ཤིག་ཅེས་བསྒོ་བ་གང་ཡིན་པ་དང ། བདག་གིས་པདྨ་དེ་དག་བགོས་ཏེ་བྱིན་པ་གང་ཡིན་པའི་རྨི་ལམ་དེ་དག་བདག་གིས་བཅོམ་ལྡན་འདས་ལ་གསོལ་ཞིང ། རྒྱུ་གང་དང་རྐྱེན་གང་གིས་ན་བདག་ལ་དེ་ལྟ་བུའི་རྨི་ལམ་དག་རྨིས་ཞེས་བདག་གིས་དེ་བཞིན་གཤེགས་པ་ལ་ཞུའོ་སྙམ་མོ། །དེ་ནས་བྲམ་ཟེ་རྒྱ་མཚོའི་རྡུལ་གྱིས་དེ་ཉིད་ཀྱི་མཚན་མོ་འདས་པ་དང་ཞལ་ཟས་སྦྱར་ནས། ནང་པར་སྔར་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། བདག་ཉིད་ཀྱིས་བཅོམ་ལྡན་འདས་དང ། དགེ་སློང་གི་དགེ་འདུན་ཕྱག་ཆབ་གསོལ་ཏོ། །ཕྱག་ཆབ་གསོལ་ནས་ཀྱང་བདག་ཉིད་ལག་དར་ཏེ་བཟའ་བ་དང་བཅའ་བ་མང་པོ་དག་ལེགས་པར་བསྟབས་ཤིང་ཚིམ་པར་བྱས་སོ། །ལེགས་པར་བསྟབས་ཤིང་ཚིམ་པར་བྱས་ནས་ཀྱང་དགེ་སློང་གི་དགེ་འདུན་ལའང་རྣམ་གྲངས་དུ་མས་ལེགས་པར་བསྟབས་ཞིང་ཚིམ་པར་བྱས་སོ། །རྣམ་གྲངས་དུ་མས་ལེགས་པར་བསྟབས་ཤིང་ཚིམ་པར་བྱས། བཅོམ་ལྡན་འདས་དང་དགེ་
251a
༄#། །སློང་གི་དགེ་བདུན་བཤོས་གསོལ་ལགས་ཏེ། ལྷུང་བཟེད་བཞག་ཅིང་ཕྱག་བཅབས་པར་རིག་ནས། སྟན་ཤིན་ཏུ་དམའ་བ་ཞིག་བླངས་ནས་ཆོས་མཉན་པའི་ཕྱིར་བཅོམ་ལྡན་འདས་ཀྱིས་སྤྱན་སྔར་འདུག་གོ། །དེ་ནས་རྒྱལ་པོ་རྩིབས་ཀྱི་མུ་ཁྱུད་ཀྱང་བུ་སྟོང་དང་ལྷན་ཅིག་ཏུ་སྲོག་ཆགས་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ། དེ་ཉིད་དུ་འོངས་ནས་དེ་བཞོན་པས་བགྲོད་པའི་ས་ཇི་སྲིད་པ་དེ་སྲིད་དུ་བཞོན་པས་སོང་སྟེ། བཞོན་པ་ལས་བབས་ནས་རྐང་པས་ཀུན་དགའི་ར་བར་ཞུགས་སོ། །ཞུགས་ནས་ཀྱང་བཅོམ་ལྡན་འདས་ག་ལ་དེར་སོང་སྟེ་ཕྱིན་པ་དང ། བཅོམ་ལྡན་འདས་དང ། དགེ་སློང་གི་དགེ་འདུན་གྱི་ཞབས་ལ་མགོ་བོས་ཕྱག་བཙལ་ཏེ། ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ་།དེ་ནས་བཅོམ་ལྡན་འདས་ལ་བྲམ་ཟེ་རྒྱ་མཚོའི་རྡུལ་གྱིས་རྨི་ལམ་ཇི་རྨིས་པ་དག་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་གང་ཁྱོད་ཀྱིས་སྣང་བ་ཆེན་པོ་དང ། སྣང་བ་དེས་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དག་གི་སངས་རྒྱས་བཅོམ་ལྡན་འདས་རྣམས་མཐོང་ནས་ཁྱོད་ལ་པདྨ་དག་བསྐུར་བ་དང ། པདྨ་དེ་དག་ལ་ཉི་མའི་གཟུགས་འོད་ཟེར་རབ་ཏུ་འབྱུང་བ་དག་མཐོང་བ་དང ། འོད་ཟེར་དེ་དག་ཁྱོད་ཀྱི་ཁར་ཞུགས་པར་མཐོང་
251b
བ་ནི་བྲམ་ཟེ་གང་ཁྱོད་ལོ་ཉིས་བརྒྱ་ལྔ་བཅུར་ཛམྦུའི་གླིང་ཉུལ་བར་བྱེད་པ་ནི་ཁྱོད་ཀྱིས་མྱུལ་བ་དེས་སེམས་ཅན་བགྲང་བ་ལས་ཡང་དག་པར་འདས་པ་དག་བསོད་ནམས་བྱ་བའི་དངོས་པོ་གསུམ་པོ་དག་ལ་བཙུད་ཅིང་རབ་ཏུ་བཀོད་པ་དང ། སེམས་ཅན་བགྲང་བ་ལས་ཡང་དག་པར་འདས་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་སྟེ་བརྟུལ་ཅིང་བཙུད་དེ་རབ་ཏུ་བཀོད་པ་དང ། ཐེག་པ་ཆེན་པོ་འདི་ལ་བརྩམ་པ་བྱས་པ་དེ་ན་གང་དག་གིས་ཁྱོད་ལ་པདྨ་གང་དག་ལ་ཉི་མའི་གཟུགས་དག་སྣང་བའི་པདྨ་འདབ་མ་རྣམས་ནི་གསེར། སྡོང་བུ་རྣམས་ནི་དངུལ། སྙིང་པོ་རྣམས་ནི་བཻཌཱུརྱ། ཟེ་བ་རྣམས་ནི་རྡོའི་སྙིང་པོ་ལས་བྱས་པ་དག་བསྐུར་བའི་སངས་རྒྱས་བཅོམ་ལྡན་འདས་ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པ་དེ་དག་གིས་བྲམ་ཟེ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་གྱུར་ཏེ། རྨི་ལམ་དེ་ནི་དེའི་སྔ་ལྟས་ཡིན་ནོ། །བྲམ་ཟེ་གང་ཁྱོད་ཀྱི་རྨི་ལམ་ན་ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་སངས་རྒྱས་བཅོམ་ལྡན་འདས་གང་དག་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་གིས་ཁྱོད་ལ་རིན་པོ་ཆེ་སྣ་བདུན་གྱི་གདུགས་དག་བསྐུར་ཞིང ། གདུགས་
252a
༄#། །དེ་དག་ཀྱང་སྟེང་གི་བར་སྣང་ལ་ཚངས་པའི་འཇིག་རྟེན་གྱི་མཐར་ཐུག་པའི་བར་དུ་གནས་པ་དག་མཐོང་བ་ནི་བྲམ་ཟེ་གང་གི་ནུབ་མོ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེ་ཉིད་ཀྱི་ནུབ་མོ་ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ཏུ་ཁྱོད་ཀྱི་གྲགས་པ་དང ། སྒྲ་དང ། ཚིགས་སུ་བཅད་པ་རྒྱ་ཆེན་པོ་དག་མངོན་པར་འཕགས་པར་འགྱུར་ཞིང ། ཁྱོད་ཀྱི་སྤྱི་གཙུག་ཀྱང་ཚངས་པའི་འཇིག་རྟེན་གྱི་མཐར་ཐུག་པའི་བར་དུ་གྱེན་དུ་མངོན་པར་འཕགས་ཤིང་བ་ལྟར་མི་ནུས་པར་གྱུར་ཏེ། བྲམ་ཟེ་རྨི་ལམ་དེ་ནི་དེའི་སྔ་ལྟས་ཡིན་ནོ། །བྲམ་ཟེ་གང་ཁྱོད་ཀྱིས་ཚངས་པའི་འཇིག་རྟེན་གྱི་བར་དུ་ཐུག་པའི་ལུས་ཆེན་པོ་དང ། ཉི་མའི་དཀྱིལ་འཁོར་གྱི་ཕྲེང་བ་དག་མགོ་ལ་བཅིངས་པར་མཐོང་བ་གང་ཡིན་པ་དེ་ནི་བྲམ་ཟེ་ཁྱོད་ཀྱིས་སེམས་ཅན་བགྲང་བ་ལས་ཡང་དག་པར་འདས་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་པ་གང་ཡིན་པ་དེ་དག་ཀྱང་ཁྱོད་བྱང་ཆུབ་མངོན་པར་རྫོགས་པར་སངས་རྒྱས་པ་ན། ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་རྡུལ་ཕྲ་རབ་ཀྱི་རྡུལ་སྙེད་དག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་
252b
རྒྱ་བར་འགྱུར་ཏེ། ཁྱོད་ཀྱི་བྱང་ཆུབ་ཡང་དག་པར་འཛིན་དུ་བཅུག་པ་གང་ཡིན་པ་དེ་དག་ཐམས་ཅད་ཡང་དང་ཡང་དུ་ཁྱོད་ཀྱི་བསྔགས་པ་བརྗོད་པར་གྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེས་བདག་ཅག་དང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་པས་ན། དེས་དེ་ལྟར་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་ནི་བདག་ཅག་གི་དགེ་བའི་བཤེས་གཉེན་ཡིན་ནོ་ཞེས་བསྔགས་པ་བརྗོད་པར་འགྱུར་ཞིང་སངས་རྒྱས་བཅོམ་ལྡན་འདས་དེ་དག་གིས་ཁྱོད་ལ་མཆོད་པ་བྱ་བའི་ཕྱིར་བྱང་ཆུབ་སེམས་དཔའ་དག་གཏོང་བར་འགྱུར་ཏེ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་བྱང་ཆུབ་སེམས་དཔའི་རྣམ་པར་འཕྲུལ་པ་སྣ་ཚོགས་དག་གིས་ཁྱོད་ལ་མཆོད་པ་བྱས་ཤིང ། དེར་ཁྱོད་ལས་ཆོས་ཐོས་ནས་ཏིང་ངེ་འཛིན་དང ། གཟུངས་དང ། བཟོད་པ་རྣམ་པ་སྣ་ཚོགས་དག་ཐོབ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་རང་རང་གི་སངས་རྒྱས་ཀྱི་ཞིང་དག་ཏུ་དོང་སྟེ། ཁྱོད་ཀྱི་བསྔགས་པ་བརྗོད་པར་འགྱུར་ཞིང་དབྱངས་རྗེས་སུ་སྒྲོགས་པར་འགྱུར་ཏེ། བྲམ་ཟེ་ཁྱོད་ཀྱི་རྨི་ལམ་དེ་ནི་དེའི་སྔ་ལྟས་ཡིན་ནོ། །བྲམ་ཟེ་གང་ཁྱོད་ཀྱི་རྨི་ལམ་ན་བྱང་ཆུབ་སེམས་དཔའ་བྱེ་བ་
253a
༄#། །ཁྲག་ཁྲིག་འབུམ་ཕྲག་དྲུག་ཅུ་ཁོང་པར་ཞུགས་ནས་དེ་དག་པདྨ་དག་ལ་སྐྱིལ་མོ་ཀྲུང་བཅས་ཏེ་འདུག་ཅིང་བསམ་གཏན་སྒོམ་པ་དག་མཐོང་བ་ནི་བྲམ་ཟེ་ཁྱོད་བྱང་ཆུབ་མངོན་པར་རྫོགས་པར་སངས་རྒྱས་པ་ན། གང་དག་སྲོག་ཆགས་བྱེ་བ་ཁྲག་ཁྲིག་འབུམ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་པར་འགྱུར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་དག་ལ་འགོད་པར་འགྱུར་བ་དེ་དག་ཀྱང་བྲམ་ཟེ་ཁྱོད་བླ་ན་མེད་པའི་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདས་ནས། བསྐལ་པ་སངས་རྒྱས་ཀྱི་ཞིང་རྡུལ་བྲ་རབ་ཀྱི་རྡུལ་སྙེད་འདས་པའི་འོག་ཏུ་ཕྱོགས་བཅུའི་སངས་རྒྱས་ཀྱི་ཞིང་གཞན་དག་ཏུ་ཆོས་ཀྱི་རྒྱལ་སྲིད་མཛད་པའི་སངས་རྒྱས་བཅོམ་ལྡན་འདས་སུ་འགྱུར་བ་ན། འདི་སྐད་དུ་བསྐལ་པ་གྲངས་མེད་པ་འདས་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་འདི་ཞེས་བྱ་བ་ཞིག་བྱུང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེས་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་སྟེ་བརྟུལ་ཅིང་བཙུད་དེ་རབ་ཏུ་བཀོད་ནས་ཕྱིར་མི་ལྡོག་པ་ལ་བཀོད་པས་ན་དེས་ད་ལྟར་བདག་
253b
ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཤིང་ཆོས་ཀྱི་རྒྱལ་སྲིད་ཀྱང་བརྙེས་སོ་ཞེས་ཁྱོད་ཀྱི་བསྔགས་པ་བརྗོད་པར་འགྱུར་ཏེ། བྲམ་ཟེ་ཁྱོད་ཀྱི་རྨི་ལམ་དེ་ནི་དེའི་སྔ་ལྟས་ཡིན་ནོ། །བྲམ་ཟེ་གང་ཁྱོད་ཀྱི་རྨི་ལམ་ན་ཕག་གི་གདོང་དང ། ཁྱིའི་གདོང་གི་བར་དུ་གྱུར་ཅིང་ལུས་ཁྲག་གིས་བསྐུས་ཏེ་སྲོག་ཆགས་རྣམ་པ་དུ་མ་དག་ཟོས་ནས་ཨེ་རཎྜའི་ཤིང་ངན་པའི་དྲུང་ན་འདུག་པ་དང ། དེའང་སྲོག་ཆགས་རྣམ་པ་དུ་མ་གཞན་དག་གིས་ཟོས་ཤིང་ཀེང་རུས་ཀྱི་བར་བྱས་ཏེ་བོར་བ་དང ། ཡང་ལུས་ཕྱིར་སྐྱེས་ནས་ལུས་ཁྲག་གིས་བསྐུས་ཤིང་ཁྱིའི་གདོང་གི་བར་དུ་གྱུར་བས་སྲོག་ཆགས་རྣམ་པ་མང་པོ་དག་ཟོས་ནས་ཡང་ཨེ་རཎྜའི་ཤིང་ངན་པའི་དྲུང་ན་འདུག་པ་དང ། སྲོག་ཆགས་རྣམ་པ་དུ་མ་དག་གིས་ཟོས་པར་མཐོང་བ་ནི་ཁྱོད་ཀྱིས་སྐྱེས་བུ་བླུན་པ་བསོད་ནམས་བྱ་བའི་དངོས་པོ་གསུམ་པོ་སྦྱིན་པ་དང ། དུལ་བ་དང ། ཡང་དག་པར་སྡོམ་པ་ཡང་དག་པར་འཛིན་དུ་བཅུག་ཅིང་རབ་ཏུ་བཀོད་པ་དེ་དག་ལྷ་རྣམས་ཀྱི་ནང་དུ་འཆི་འཕོ་བའི་སྡུག་བསྔལ་འདོད་པ་དང ། མི་རྣམས་ཀྱི་ནང་དུ་རྒ་བ་དང ། ན་བ་དང ། འཆི་བ་དང ། མི་སྡུག་པ་དང་ཕྲད་པ་དང ། སྡུག་པ་དང་བྲལ་བའི་སྡུག་བསྔལ་དང ། ཡི་དྭགས་རྣམས་ཀྱི་ནང་དུ་བཀྲེས་པ་དང ། སྐོམ་པའི་སྡུག་བསྔལ་དང ། དུད་འགྲོ་རྣམས་ཀྱི་ནང་དུ་གཏི་མུག་གི་མུན་པ་དང ། མགོ་གཅོད་
254a
༄#། །པ་ལ་སོགས་པའི་སྡུག་བསྔལ་དང ། སེམས་ཅན་དམྱལ་བ་རྣམས་ཀྱི་ནང་དུ་གནོད་པ་སྣ་ཚོགས་ལ་སོགས་པའི་སྡུག་བསྔལ་འདོད་པར་འགྱུར་བ་དང ། བསོད་ནམས་བྱ་བའི་དངོས་པོ་རྣམ་པ་གསུམ་པོ་དག་ལ་རབ་ཏུ་བཀོད་པ་རྣམས་ལྷ་རྣམས་ཀྱི་ནང་དུ་ལྷའི་རྒྱལ་སྲིད་འདོད་ལ་མི་རྣམས་ཀྱི་ནང་དུ་ནི་གླིང་གཅིག་གི་དབང་ཕྱུག་འདོད་དེ། དེ་དག་དེར་སེམས་ཅན་ཐམས་ཅད་ལ་ལོངས་སྤྱོད་པར་འགྱུར་ཞིང ། དེ་དག་ཀྱང་སེམས་ཅན་ཐམས་ཅད་ཀྱི་ཁ་ཟས་དང ། ལོངས་སྤྱོད་དུ་འགྱུར་བས་དེ་ལྟར་སྐྱེས་བུ་བླུན་པོ་དེ་དག་ཡུན་རིང་པོར་འཁོར་བར་སྡུག་བསྔལ་ཉམས་སུ་མྱོང་བར་འགྱུར་ཏེ། བྲམ་ཟེ་ཁྱོད་ཀྱི་རྨི་ལམ་དེ་ནི་དེའི་སྔ་ལྟས་ཡིན་ནོ། །བྲམ་ཟེ་གང་ཁྱོད་ཀྱི་རྨི་ལམ་ན་མི་ཁ་ཅིག་སྣ་མའི་མེ་ཏོག་གི་ཕྲེང་བ་དག་གིས་མགོ་བརྒྱན་ཅིང ། མ་ཧེའི་ཤིང་རྟ་དག་ལ་ཞོན་ཏེ་ལམ་གོལ་བར་ཞུགས་ནས་གཡས་ཕྱོགས་སུ་ལྟ་ཞིང་དོང་བར་མཐོང་བ་དེའང་བྲམ་ཟེ་ཁྱོད་ཀྱི་ས་བསོད་ནམས་བྱ་བའི་དངོས་པོ་གསུམ་པོ་དག་ལ་རབ་ཏུ་བཀོད་པའི་རིགས་ཀྱི་བུ་དག་ཅིག་བདག་དུལ་བར་བྱ་བ་དང ། བདག་ཞི་བར་བྱ་བ་འབའ་ཞིག་གི་ཕྱིར་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པར་འགྱུར་ཏེ། བྲམ་ཟེ་དེ་ནི་ཉན་ཐོས་ཀྱི་ཐེག་པ་པའི་གང་ཟག་དེ་དག་གི་སྔ་ལྟས་ཡིན་ནོ། །རིགས་ཀྱི་བུ། དེ་ནས་བྲམ་ཟེ་རྒྱ་མཚོའི་
254b
རྡུལ་གྱིས་རྒྱལ་པོ་རྩིབས་ཀྱི་མུ་ཁྱུད་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ། མིར་སྐྱེ་བ་ནི་རྙེད་པར་དཀའ། དལ་བ་ཕུན་སུམ་ཚོགས་པའང་རྙེད་པར་དཀའ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་བའང་ཨུ་དུམྦ་རའི་མེ་ཏོག་ལྟར་རྙེད་པར་དཀའ། དགེ་བའི་ཆོས་ལ་འདུན་པའང་རྙེད་པར་དཀའ། ཡང་དག་པའི་སྨོན་ལམ་ཡང་རྙེད་པར་དཀའ་ལགས་སོ། །རྒྱལ་པོ་ཆེན་པོ། ལྷའི་རྒྱལ་སྲིད་ནི་སྡུག་བསྔལ་འབྱུང་བའི་རྒྱུ་ལགས་སོ། །གླིང་གཅིག་གི་མི་རྣམས་ཀྱི་རྒྱལ་སྲིད་ཀྱང་སྡུག་བསྔལ་འབྱུང་བའི་རྒྱུ་ལགས་སོ། །གླིང་གཉིས་དང ། གསུམ་དང ། གླིང་བཞི་པའི་རྒྱལ་སྲིད་ཀྱང་སྡུག་བསྔལ་འབྱུང་བའི་རྒྱུ་ལགས་ཏེ། རྒྱལ་པོ་ཆེན་པོ། ཡུན་རིང་པོར་འཁོར་བའི་སྡུག་བསྔལ་ཉམས་སུ་མྱོང་བར་བགྱིད་པ་ལགས་སོ། །རྒྱལ་པོ་ཆེན་པོ། ལྷ་དང་མིའི་འབྱོར་པ་ནི་རླུང་གི་ཤུགས་བཞིན་དུ་གཡོ་ཞིང་མི་གནས་ལགས་སོ། །བྱིས་པ་རྣམས་ནི་ཆུ་ཟླ་ལྟ་བུའི་འདོད་པའི་ཡོན་ཏན་ལྔས་ངོམས་མི་མྱོང་ཞིང་ཡུལ་རྣམས་ལ་མྱོས་ནས་ལྷ་དང་མིའི་དཔལ་འཚལ་བར་བགྱིད་དེ། བྱིས་པ་དེ་དག་ནི་ཡང་དང་ཡང་དུ་སེམས་ཅན་དམྱལ་བ་རྣམས་སུ་གནོད་པའི་སྡུག་བསྔལ་དང ། དུད་འགྲོ་རྣམས་ཀྱི་ནང་དུ་ཀུན་ཏུ་གཏི་མུག་པའི་སྡུག་བསྔལ་དང ། ཡི་དྭགས་རྣམས་ཀྱི་ནང་དུ་བཀྲེས་པ་དང་སྐོམས་པའི་སྡུག་
255a
༄#། །བསྔལ་དང ། མི་རྣམས་ཀྱི་ནང་དུ་སྡུག་པ་དང་བྲལ་བའི་སྡུག་བསྔལ་དང ། ལྷ་རྣམས་ཀྱི་ནང་དུ་འཆི་འཕོའི་སྡུག་བསྔལ་དང ། ཡང་མངལ་དུ་གནས་པའི་སྡུག་བསྔལ་དང ། གཅིག་གིས་གཅིག་མགོ་གཅོད་པའི་སྡུག་བསྔལ་དང ། གཅིག་ལ་གཅིག་འཚལ་བའི་སྡུག་བསྔལ་ཉམས་སུ་མྱོང་བར་འགྱུར་ཏེ། བྱིས་པ་རྣམས་འཁྱམས་པ་ན་དེ་ལྟ་བུའི་སྡུག་བསྔལ་དག་ཉམས་སུ་མྱོང་བར་འགྱུར་རོ། །དེ་ཅིའི་སླད་དུ་ཞེ་ན། དགེ་བའི་བཤེས་གཉེན་དང་བྲལ་བས་མ་ཐོབ་པ་ཐོབ་པར་བགྱི་བ་དང ། མ་རྟོགས་པ་རྟོགས་པར་བགྱི་བ་དང ། མངོན་སུམ་དུ་མ་བགྱིས་པ་མངོན་སུམ་དུ་བགྱི་བའི་སླད་དུ་ཡང་དག་པའི་སྨོན་ལམ་མི་འདེབས་ཤིང་རྩོལ་བར་མི་བགྱིད་པའི་སླད་དུ་སྟེ། དེ་ལྟར་བྱིས་པ་གླེན་པ་དག་ནི་གང་ལ་སྡུག་བསྔལ་ཐམས་ཅད་བས་པར་འགྱུར་བའི་བྱང་ཆུབ་ཀྱི་སེམས་ཀྱིས་སྐྱོ་བར་བགྱིད་ཅིང་གང་ལ་ཡང་དང་ཡང་དུ་སྡུག་བསྔལ་འབྱུང་བར་འགྱུར་བའི་འཁོར་བས་སྐྱོ་བར་མི་བགྱིད་ཅིང་ཡིད་འབྱུང་བར་མི་བགྱིད་དོ། །རྒྱལ་པོ་ཆེན་པོ། དེ་ལྟ་བས་ན་འཁོར་བ་ནི་སྡུག་བསྔལ་ཐམས་ཅད་ཀྱི་སྣོད་དུ་གྱུར་པ་ལགས་པར་ཡོངས་སུ་བརྟག་པ་མཛོད་ཅིག་།རྒྱལ་པོ་ཆེན་པོ། འདི་ལྟར་ཁྱོད་ཀྱིས་ནི་བཅོམ་ལྡན་འདས་ཀྱི་བསྟན་པ་ལ་ལྷག་པར་མཛད་པ་མཛད་དེ། དགེ་བའི་རྩ་བ་ནི་བསྐྲུན། དཀོན་མཆོག་གསུམ་
255b
ལ་དད་པ་ནི་བརྙེས། ལོངས་སྤྱོད་ཆེན་པོའི་ཕྱིར་བཅོམ་ལྡན་འདས་ལ་དབུལ་བ་ནི་ཕུལ། མཐོ་རིས་སུ་སྐྱེ་བ་ཐོབ་པར་བགྱི་བའི་སླད་དུ་ཚུལ་ཁྲིམས་ནི་བསྲུངས། བཅོམ་ལྡན་འདས་ལ་ཆོས་གསན་པས་ཁྱོད་ཤེས་རབ་ཆེན་པོ་བརྙེས་པར་ནི་གྱུར། མཆོད་སྦྱིན་ནི་མཛད་ལགས་ཀྱི། རྒྱལ་པོ་ཆེན་པོ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་སྐྱེད་ཅིག་།སྨྲས་པ། བྲམ་ཟེ། ཁོ་བོའི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མི་འདོད་དེ། བྲམ་ཟེ། ཁོ་བོས་ནི་འཁོར་བ་མངོན་པར་འདོད་པའི་དོན་དུ་སྦྱིན་པ་བྱིན་ཅིང་ཚུལ་ཁྲིམས་བསྲུངས་ལ་ཆོས་ཉན་ཏོ། །བྲམ་ཟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་ཐོབ་པར་དཀའ་བ་ཡིན་པས། བྲམ་ཟེ། མི་དགོས་སོ། །བྲམ་ཟེ་རྒྱ་མཚོའི་རྡུལ་གྱིས་རྒྱལ་པོ་ལ་ལན་གཉིས་སུ་སྨྲས་པ། རྒྱལ་པོ་ཆེན་པོ། བྱང་ཆུབ་ཀྱི་ལམ་ནི་ཡང་དག་པ་ལགས་པས་བསམ་པས་སྨོན་ལམ་བཏབ་པར་བགྱི་བ་སྟེ། ལམ་དེ་ནི་སྒྲིབ་བ་མ་མཆིས་པས་རྫོགས་ཤིང་ཤིན་ཏུ་དང་བ་ལགས་སོ། །ལམ་དེ་ནི་ལྷག་པའི་བསམ་པས་རྣམ་པར་དག་ཅིང་དྲང་པོ་ལགས་སོ། །ལམ་དེ་ནི་ཉོན་མོངས་པ་བསལ་བས་གཡོ་མེད་ཅིང་དག་པ་ལགས་སོ། །ལམ་དེ་ནི་སྒྲིབ་པ་མ་མཆིས་པས་རྒྱ་ཆེ་བ་ལགས་སོ། །ལམ་དེ་ནི་བསམ་པ་ལས་བྱུང་བས་ཡང་དག་པར་གཞོལ་བ་ལགས་སོ། །ལམ་དེ་ནི་སྡིག་པ་ཐམས་
256a
༄#། །ཅད་མི་བགྱིད་པས་འཇིགས་པ་མ་མཆིས་པ་ལགས་སོ། །ལམ་དེ་ནི་སྦྱིན་པའི་ཕ་རོལ་ཏུ་ཕྱིན་པས་ཡང་དག་པར་འབྱོར་པ་ལགས་སོ། །ལམ་དེ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པས་བསིལ་བ་ལགས་སོ། །ལམ་དེ་ནི་བཟོད་པའི་ཕ་རོལ་ཏུ་ཕྱིན་པས་གཞི་མ་མཆིས་པ་ལགས་སོ། །ལམ་དེ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པས་བྱིན་གྱི་རླབས་ཀྱི་རྟེན་ལགས་སོ། །ལམ་དེ་ནི་བསམ་གཏན་གྱི་ཕ་རོལ་ཏུ་ཕྱིན་པས་རྙོག་པ་མ་མཆིས་པ་ལགས་སོ། །ལམ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པས་ཤིན་ཏུ་རྟོགས་པ་ལགས་སོ། །ལམ་དེ་ནི་སྙིང་རྗེ་ཆེན་པོས་ངོ་བོ་ཉིད་ཀྱི་ཤེས་པ་རྗེས་སུ་རྟོགས་པ་ལགས་སོ། །ལམ་དེ་ནི་དགའ་བ་ཆེན་པོས་མཆོག་ཏུ་དགའ་བ་ཐོབ་པ་ལགས་སོ། །ལམ་དེ་ནི་བཏང་སྙོམས་ཆེན་པོས་སྙིང་པོ་དང་མཐུན་པ་ལགས་སོ། །ལམ་དེ་ནི་འདོད་པ་དང ། གནོད་སེམས་དང ། རྣམ་པར་འཚེ་བའི་རྣམ་པར་རྟོག་པ་དག་མ་མཆིས་པས་ཚེར་མ་དང་བྲལ་བ་ལགས་སོ། །ལམ་དེ་ནི་ཁོང་ཁྲོ་བའི་སེམས་མ་མཆིས་པས་བགྲོད་བདེ་བ་ལགས་སོ། །ལམ་དེ་ནི་གཟུགས་དང ། སྒྲ་དང ། དྲི་དང ། རོ་དང ། རེག་བྱ་རྣམ་པར་རིག་པས་གཡོ་དང་བྲལ་བ་ལགས་སོ། །ལམ་དེ་ནི་ཁམས་དང་སྐྱེ་མཆེད་ཤིན་ཏུ་མཐོང་བས་བདུད་དང་ཕྱིར་རྒོལ་བ་ངེས་པར་བཅོམ་པ་ལགས་སོ། །ལམ་དེ་ནི་ཉོན་མོངས་པ་ཐམས་ཅད་དང་བྲལ་བས་བདུད་དང་
256b
བྲ། ལགས་སོ། །ལམ་དེ་ནི་ཉན་ཐོས་དང་རང་སངས་རྒྱས་ཀྱི་ཡིད་ལ་བགྱིད་པ་དང་བྲལ་པས་སེམས་རྒྱ་ཆེན་པོས་མཆི་བ་ལགས་སོ། །ལམ་དེ་ནི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པས་སྤྲོ་བ་དང་བཅས་པ་ལགས་སོ། །ལམ་དེ་ནི་ཐམས་ཅད་མཁྱེན་པ་ཉིད་ཀྱི་རིན་པོ་ཆེ་དང་མཐུན་པས་རིན་པོ་ཆེ་ཆེན་པོ་ངེས་པར་སྒྲུབ་པ་ལགས་སོ། །ལམ་དེ་ནི་བཅོམ་ལྡན་འདས་ཀྱི་ཡེ་ཤེས་ཆགས་པ་མི་མངའ་བས་རྟག་ཏུ་བསྟན་པ་ལགས་སོ། །ལམ་དེ་ནི་དགེ་བའི་བཤེས་གཉེན་གྱིས་རྗེས་སུ་ཟིན་པས་དགེ་བའི་རྩ་བ་སྟོན་ཅིང་རྗེས་སུ་སྤྱད་པ་ལགས་སོ། །ལམ་དེ་ནི་རྗེས་སུ་ཆགས་པ་དང ། ཁོང་ཁྲོ་བ་སྤངས་པས་མཐོ་དམན་དང་བྲལ་བ་ལགས་སོ། །ལམ་དེ་ནི་གནོད་སེམས་དང ། ཐ་བ་དང ། ཁྲོ་བ་མ་མཆིས་པས་རྡུལ་ངེས་པར་བཅོམ་པ་ལགས་སོ། །ལམ་དེ་ནི་མི་དགེ་བ་ཐམས་ཅད་དང་བྲལ་བས་བདེ་འགྲོར་མཆི་བ་ལ་སྨན་པ་ལགས་སོ། །རྒྱལ་པོ་ཆེན་པོ། བྱང་ཆུབ་ཀྱི་ལམ་དེ་ནི་མྱ་ངན་ལས་འདས་པའི་མཐར་ཐུག་པས་བདེ་བ་འཐོབ་པ་ལགས་ཀྱི། རྒྱལ་པོ་ཆེན་པོ། བྱང་ཆུབ་ཏུ་ཐུགས་སྐྱེད་ཅིག་།རྒྱལ་པོས་སྨྲས་པ། བྲམ་ཟེ། དེ་བཞིན་གཤེགས་པ་འདི་ནི་སྐྱེ་དགུ་ལོ་བརྒྱད་ཁྲི་པ་རྣམས་ཀྱི་ནང་དུ་འཇིག་རྟེན་དུ་བྱུང་བས་ན་དེ་བཞིན་གཤེགས་པས་ངན་སོང་ཐམས་ཅད་ཞི་བར་མཛད་པ་ལ་སྤྱོད་དེ། སེམས་ཅན་གང་དག་གིས་དགེ་བའི་རྩ་བ་བསྐྱེད་པའི་སེམས་ཅན་
257a
༄#། །དེ་དག་ནི་འབྲས་བུ་ལ་གནས་པར་གྱུར་ལ་ལས་ནི་ཏིང་ངེ་འཛིན་དང ། གཟུངས་དང ། བཟོད་པ་བསྒྲུབས། གང་དག་དགེ་བའི་རྩ་བ་མཆོག་ཏུ་གྱུར་པའི་བྱང་ཆུབ་སེམས་དཔའ་དེ་དག་ནི་བྱང་ཆུབ་ལས་ཕྱིར་མི་ལྡོག་པར་གྱུར། དགེ་བའི་རྩ་བ་བསྐྱེད་པ་ཁ་ཅིག་གིས་ནི་ལྷ་དང་མིའི་དཔལ་ཉམས་སུ་མྱོང་བར་གྱུར་ཏེ། སེམས་ཅན་རྣམས་རང་རང་གི་དགེ་བ་དང ། མི་དགེ་བའི་ལས་རྣམས་ཀྱི་འཕྱན་པར་གྱུར་པས་ན། འདི་ལྟར་སེམས་ཅན་གཅིག་ཙམ་གྱི་སྡུག་བསྔལ་ཡང་རབ་ཏུ་ཞི་བར་མ་མཛད་ན་བཅོམ་ལྡན་འདས་ཀྱིས་བཏུལ་བའི་སེམས་ཅན་གང་ཞིག་ཡིན། བཅོམ་ལྡན་འདས་ཀྱི་སྐུ་ནི་ཞིང་དུ་གྱུར་པ་འབའ་ཞིག་ཏུ་ཟད་ཀྱི། དགེ་བའི་རྩ་བ་མ་བསྐྱེད་པའི་སེམས་ཅན་རྣམས་སྡུག་བསྔལ་ལས་ཐར་བར་ནི་མི་མཛད་དོ། །ཁོ་བོ་ནི་བྱང་ཆུབ་ཏུ་སེམས་བསྐྱེད་ཅིང་བྱང་ཆུབ་སེམས་དཔའི་སྤྱད་པའང་སྤྱོད་ལ། ཁོ་བོ་ཡེ་ཤེས་ཆེན་པོ་བསགས་པ་དང ། ཆོས་ཀྱི་སྒོ་ཆེན་པོ་བསམ་གྱིས་མི་ཁྱབ་པར་འཇུག་པ་དེས་སེམས་ཅན་རྣམས་འདུལ་ཞིང་སངས་རྒྱས་ཀྱི་མཛད་པའང་བྱེད་མོད་ཀྱི་སངས་རྒྱས་ཀྱི་ཞིང་ཉོན་མོངས་པ་ཅན་འདི་ལྟ་བུར་བྱང་ཆུབ་ཀྱི་ཕྱིར་སེམས་ཡོངས་སུ་བསྔོ་བ་འབའ་ཞིག་ནི་མི་བྱེད་དོ། །གལ་ཏེ་གང་གི་ཚེ་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རེག་པར་འགྱུར་པའི་སངས་རྒྱས་ཀྱི་ཞིང་དེར་ཁོ་བོས་
257b
སེམས་ཅན་རྣམས་ཀྱི་སྡུག་བསྔལ་ཐམས་ཅད་རབ་ཏུ་ཞི་བར་བྱེད་པར་འགྱུར་བ་དེ་ལྟ་བུའི་སངས་རྒྱས་ཀྱི་ཞིང་ཞིག་འཐོབ་པར་འགྱུར་བ་ལྟ་ན། དེའི་ཚེ་ཁོ་བོ་བྱང་ཆུབ་ཏུ་སེམས་བསྐྱེད་ཅིང་ཁོ་བོས་བྱང་ཆུབ་སེམས་དཔའི་སྤྱོད་པའང་སྤྱད་པར་བྱའོ། །རིགས་ཀྱི་བུ། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོས་འདི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་དེ། དེའི་ཚེ་ཏིང་ངེ་འཛིན་མེ་ལོང་བཀོད་པ་ཞེས་བྱ་བ་ལ་སྙོམས་པར་ཞུགས་སོ། །དེ་ལྟར་བཅོམ་ལྡན་འདས་ཀྱིས་ཏིང་ངེ་འཛིན་མེ་ལོང་བཀོད་པ་ལ་མཉམ་པར་བཞག་པ་དང ། འདི་ལྟ་བུའི་སྣང་བ་བྱུང་བར་གྱུར་ཏེ། སྣང་བ་དེས་ཕྱོགས་བཅུའི་ཕྱོགས་རེ་རེར་ཡང་འཇིག་རྟེན་གྱི་ཁམས་འདི་སངས་རྒྱས་ཀྱི་ཞིང་སྟོང་གི་འཇིག་རྟེན་གྱི་རྡུལ་སྙེད་དག་གི་ཡོན་ཏན་བཀོད་པ་ཐམས་ཅད་སྣང་བར་གྱུར་ཏེ། ལ་ལ་དག་ན་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་པ་དང ། ལ་ལ་དག་ན་ཡོངས་སུ་མྱ་ངན་ལས་འདའ་བའི་ཕྱིར་ཡང་དག་པར་ཞུགས་པ་དང ། གང་དག་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་ཤིང་དྲུང་ན་འདུག་ནས་བདུད་ཕམ་པར་བྱེད་པ་རྣམས་དང ། གང་དག་ན་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པར་ཆོས་ཀྱི་འཁོར་ལོ་བསྐོར་བ་རྣམས་དང ། གང་དག་ན་ཆོས་
258a
༄#། །ཀྱི་འཁོར་ལོ་བསྐོར་ནས་རིང་པོ་མ་ལོན་པར་ཆོས་སྟོན་པ་རྣམས་དང ། སངས་རྒྱས་ཀྱི་ཞིང་གང་དག་ན་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཁྱབ་པ་དང ། གང་དག་ན་ཉན་ཐོས་དང་རང་སངས་རྒྱས་རྣམས་འབྱུང་བ་མེད་པ་དང ། གང་དག་ན་ཉན་ཐོས་དང་རང་སངས་རྒྱས་རྣམས་འབྱུང་བ་དང ། སངས་རྒྱས་ཀྱི་ཞིང་གང་དག་ན་སངས་རྒྱས་དང ། བྱང་ཆུབ་སེམས་དཔའ་དང ། ཉན་ཐོས་དང ། རང་སངས་རྒྱས་རྣམས་ཀྱིས་སྟོང་པ་དང ། སངས་རྒྱས་ཀྱི་ཞིང་ཁ་ཅིག་སྙིགས་མ་ལྔས་ཉོན་མོངས་པ་ཅན་དུ་གྱུར་པ་དང ། ཁ་ཅིག་སྙིགས་མ་ལྔ་དང་བྲལ་བའི་ཡོངས་སུ་དག་པ་དང ། ཁ་ཅིག་ན་སེམས་ཅན་མཆོག་རྣམས་དང ། ཁ་ཅིག་ན་དམན་པ་རྣམས་དང ། ཁ་ཅིག་ན་ཚེ་རིང་བ་རྣམས་དང ། ཁ་ཅིག་ན་ཚེ་ཐུང་བ་རྣམས་དང ། སངས་རྒྱས་ཀྱི་ཞིང་ཁ་ཅིག་མེས་འཇིག་པ་རྣམས་དང ། ཁ་ཅིག་ཆུ་དང ། ཁ་ཅིག་རླུང་གིས་འཇིག་པ་རྣམས་དང ། ཁ་ཅིག་ཆགས་པ་རྣམས་དང ། ཁ་ཅིག་ཆགས་ཤིང་གནས་པ་དེ་དག་ཐམས་ཅད་སྣང་བ་རྒྱ་ཆེན་པོས་ཁྱབ་པར་ཀུན་ཏུ་སྣང་ངོ ། །ཐམས་ཅད་དང་ལྡན་པའི་འཁོར་དེས་སངས་རྒྱས་ཀྱི་ཞིང་གི་ཡོན་ཏན་བཀོད་པ་དེ་དག་མཐོང་ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་པོ་ལ་སྨྲས་པ། རྒྱལ་པོ་ཆེན་པོ། སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་ལ་
258b
གཟིགས་ལ། རྒྱལ་པོ་ཆེན་པོ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་སྐྱེད་ཅིག་།རྒྱལ་པོ་ཆེན་པོ། སངས་རྒྱས་ཀྱི་ཞིང་ཇི་ལྟ་བུ་བཞེད་པར་ཡང་གཟུང་བར་མཛོད་ཅིག་།དེ་ནས་རྒྱལ་པོ་རྩིབས་ཀྱི་མུ་ཁྱུད་ཀྱིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ལས་གང་གིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་ཡོངས་སུ་དག་པ་ཡོངས་སུ་འཛིན་པ་ནས། གང་གིས་སེམས་ཅན་བསམ་པ་ཡོངས་སུ་དག་པ་དང ། གང་གིས་སེམས་ཅན་རྣམས་ཚེ་རིང་པོར་འགྱུར་བའི་བར་དུ་རྒྱ་ཆེར་གསོལ་བ་དང ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྨོན་ལམ་གྱི་དབང་གིས་སངས་རྒྱས་ཀྱི་ཞིང་སྙིགས་མ་ལྔ་དང་བྲལ་ཞིང་ཡོངས་སུ་དག་པ་དང ། སྨོན་ལམ་གྱི་དབང་གིས་ཡོངས་སུ་དག་པའང་ཡོངས་སུ་འཛིན་ཏོ། །རྒྱལ་པོས་གསོལ་པ། བཙུན་པ་བཅོམ་ལྡན་འདས། བདག་གྲོང་ཁྱེར་དུ་ཞུགས་ཏེ། རྩེ་གཅིག་ཏུ་མཆིས་ནས་སྨོན་ལམ་བསམ་པར་བགྱི་ཞིང་བདག་སྙིགས་མ་ལྔ་དང་བྲལ་བའི་སངས་རྒྱས་ཀྱི་ཞིང་ཇི་ལྟ་བུ་ལ་དགའ་བ་དེར་དགེ་བའི་སྤྱོད་པ་འདི་དག་ཡོངས་སུ་བསྔོ་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེའི་དུས་ལ་བབ་པར་ཤེས་པར་གྱིས་
259a
༄#། །ཤིག་།རིགས་ཀྱི་བུ། དེ་ནས་རྒྱལ་པོ་རྩིབས་ཀྱི་མུ་ཁྱུད་ཀྱིས་བཅོམ་ལྡན་འདས་དང་དགེ་སློང་གི་དགེ་འདུན་གྱི་ཞབས་ལ་མགོ་བོས་ཕྱག་བཙལ་ཏེ། ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་ཐད་ནས་སོང་སྟེ། གྲོང་ཁྱེར་དུ་ཞུགས་ནས་རང་གི་ཁྱིམ་དུ་ནང་དུ་ཡང་དག་འཇོག་ལ་རྩེ་གཅིག་ཏུ་འདུག་ནས་སངས་རྒྱས་ཀྱི་ཞིང་ཡོན་ཏན་བཀོད་པ་དག་སེམས་པར་བྱེད་དོ།། །།བམ་པོ་བཞི་པ། དེ་ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་བུ་ཐུ་བོ་མིག་མི་འཛུམ་ལ་སྨྲས་པ། མིག་མི་འཛུམ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ལ། ཁྱོད་ཀྱིས་བསོད་ནམས་བྱ་བའི་དངོས་པོ་གསུམ་པོ་དག་གི་དགེ་བ་སྤྱད་ཅིང་བསོད་ནམས་བསྒྲུབས་པ་གང་ཡིན་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་ཤིག་།དེས་སྨྲས་པ། མཁན་པོ། བདག་ཀྱང་རང་གི་ཁྱིམ་དུ་མཆིས་ལ་གཅིག་པུ་དབེན་པར་མཆིས་ནས་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་བསམ་པར་བགྱི་སྟེ། གལ་ཏེ་བྱང་ཆུབ་ཀྱི་སླད་དུ་སེམས་སྐྱེ་བར་འགྱུར་བ་ལྟ་ན་བཅོམ་ལྡན་འདས་ཀྱི་དྲུང་དུ་སླར་མཆིས་ནས་བྱང་ཆུབ་ཏུ་སེམས་ཡོངས་སུ་བསྔོ་བར་བགྱིའོ། །དེ་ནས་རྒྱལ་བུ་དེས་ཀྱང་བཅོམ་ལྡན་འདས་དང་དགེ་སློང་གི་དགེ་འདུན་གྱི་ཞབས་ལ་མགོ་བོས་ཕྱག་
259b
བཙལ་ཏེ། ལན་གསུམ་སྐོར་བ་བྱས་ནས་བཅོམ་ལྡན་འདས་ཀྱི་དྲུང་ནས་སོང་སྟེ། རང་གི་གནས་སུ་སོང་ནས་གཅིག་ཏུ་དབེན་པར་སོང་སྟེ་འཇུག་ནས་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་སེམས་པར་བྱེད་དོ། །རིགས་ཀྱི་བུ། དེ་ནས་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་གྱིས་རྒྱལ་བུ་གཉིས་པ་ལ་བོས་ཏེ་སྨྲས་པ། གཞོན་ནུ་ཁྱོད་བྱང་ཆུབ་ཏུ་སེམས་སྐྱེད་ཅིག་ཅེས་བྱ་བ་ནས་སྔ་མ་བཞིན་དུ་རྒྱ་ཆེར་སྦྱར་ཏེ། རྒྱལ་བུ་སྟོང་གི་བར་དུ་ཐམས་ཅད་བྱང་ཆུབ་ཡང་དག་པར་འཛིན་དུ་བཅུག་གོ་།ཁམས་ཀྱི་རྒྱལ་པོ་བརྒྱད་ཁྲི་བཞི་སྟོང་དང ། གཞན་ཡང་སེམས་ཅན་དུང་ཕྱུར་ཕྲག་དགུ་དང ། བྱེ་བ་ཕྲག་གཉིས་ཀྱང་བྱང་ཆུབ་ཡང་དག་པར་འཛིན་དུ་བཅུག་པ་དང ། དེ་དག་ཐམས་ཅད་ཀྱིས་ཀྱང་འདི་སྐད་ཅེས་སྨྲས་སོ། །བདག་ཅག་ཀྱང་རང་རང་གི་ཁྱིམ་དུ་མཆིས་ལ་གཅིག་པུ་དབེན་པར་མཆིས་ནས་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་བསམ་པར་བགྱིའོ། །དེ་སྐད་ཅེས་སྨྲས་ནས་ཐམས་ཅད་རང་རང་གི་ཁྱིམ་དག་ཏུ་དོང་སྟེ། གཅིག་པུ་དབེན་པར་འདུག་ནས་ལོ་བདུན་གྱི་བར་དུ་སངས་རྒྱས་ཀྱི་ཞིང་གི་ཡོན་ཏན་བཀོད་པའི་སྨོན་ལམ་སེམས་པར་བྱེད་དོ། །རིགས་ཀྱི་བུ། དེ་ནས་དུས་གཞན་ཞིག་ན་བྲམ་ཟེ་རྒྱ་མཚོའི་རྡུལ་གྱི་སེམས་ལ་འདི་ལྟ་བུའི་རྣམ་པར་རྟོག་པ་སྐྱེས་ཏེ། བདག་གིས་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་མང་པོ་དག་བླ་ན་མེད་པ་ཡང་དག་པར་རྫོགས་
260a
༄#། །པའི་བྱང་ཆུབ་ཡང་དག་པར་འཛིན་དུ་བཅུག་ཅིང ། བདག་གིས་སངས་རྒྱས་བཅོམ་ལྡན་འདས་དགེ་སློང་གི་དགེ་འདུན་དཔག་ཏུ་མེད་པ་དང་བཅས་པ་འདི་ཡང་ལོ་བདུན་གྱི་བར་དུ་ཡོ་བྱད་ཐམས་ཅད་ཀྱིས་སྤྱན་དྲངས་པས། གལ་ཏ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བདག་གིས་བསམ་པ་ཡོངས་སུ་རྫོགས་པར་འགྱུར་ཞིང ། དེ་བཞིན་དུ་སྨོན་ལམ་འདིའང་འགྲུབ་པ་ལྟ་ན་དེའི་ཕྱིར་བདག་གིས་ལྷ་དང ། ལྷ་མ་ཡིན་དང ། དྲི་ཟ་དང ། གནོད་སྦྱིན་དང ། སྲིན་པོ་དང ། གྲུལ་བུམ་རྣམས་མཆོད་སྦྱིན་ཆེན་པོ་འདི་ལ་ཡང་དག་པར་གཟུད་པར་བྱའོ་སྙམ་མོ། །རིགས་ཀྱི་བུ། དེ་ནས་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་རྒྱལ་པོ་རྣམ་ཐོས་ཀྱི་བུ་མཐོང་བར་འདོད་པ་དང ། དེ་ནས་རྒྱལ་པོ་ཆེན་པོ་རྣམས་ཐོས་ཀྱི་བུ་གནོད་སྦྱིན་འབུམ་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ནས། བྲམ་ཟེ་རྒྱ་མཚོའི་རྡུལ་ག་ལ་བ་དེར་སོང་སྟེ་ཕྱིན་པ་དང ། བྲམ་ཟེ་རྒྱ་མཚོའི་རྡུལ་གྱི་མདུན་དུ་འདུག་ནས་འདི་སྐད་ཅེས་སྨྲས་སོ། །བྲམ་ཟེ། ཁྱོད་ཁོ་བོ་ལས་ཇི་ཞིག་འདོད། བྲམ་ཟེས་སྨྲས་པ། ཁྱོད་སུ་ཞིག་ཡིན། རྣམ་ཐོས་ཀྱི་བུས་སྨྲས་པ། བྲམ་ཟ་ཆེན་པོ་ཁྱོད་ཀྱིས་གནོད་སྦྱིན་གྱི་བདག་པོ་རྣམ་ཐོས་ཀྱི་བུ་ཞེས་བྱ་བ་ཞིག་ཡོད་པར་ཐོས་པ་དེ་ནི་ཁོ་བོ་ཡིན་ན། བྲམ་ཟེ། བསྒོ་བ་ཅི་ཡོད། ཅི་ཞིག་བགྱི། བྲམ་
260b
ཟེས་སྨྲས་པ། རྒྱལ་པོ་ཆེན་པོ་ཁྱོད་ཀྱང་མཆོད་སྦྱིན་ཆེན་པོ་འདི་ལ་སྤྲོ་བ་སྐྱེད་ཅིང་།དེས་སྨྲས་དང ། བྲམ་ཟེ་ཁྱོད་ཇི་ལྟར་འདོད་པ་དེ་ལྟར་བྱའོ། །སྨྲས་པ། རྒྱལ་པོ་ཆེན་པོ། དེའི་ཕྱིར་ཁྱོད་ཀྱིས་ཁོ་བོའི་ཚིག་གིས་གནོད་སྦྱིན་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ལ། འདི་སྐད་ཅེས་ཀྱང་བསྒོ་ཤིག་།གལ་ཏེ་གནོད་སྦྱིན་ཁྱེད་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པ་ལྟ་ན། ཁྱེད་ཅག་དེང་ལ་རྒྱ་མཚོའི་ཕ་རོལ་ནས་ཙནྡན་ས་མཆོག་པ་དང ། ཙནྡན་སྤྲུལ་གྱི་སྙིང་པོ་དག་ལོར་ཞིག་།ཁ་ཅིག་གིས་ནི་སྤོས་སྣ་ཚོགས་དང ། ཁ་ཅིག་གིས་ནི་མེ་ཏོག་སྣ་ཚོགས་དག་ལོང་ཞིག་ཅེས་བསྒོ་ཞིག་དང ། དེས་ཁོ་བོས་ཉིན་གཅིག་བཞིན་དུ་བཅོམ་ལྡན་འདས་ལ་མཆོད་པ་བྱའོ། ། རྒྱལ་པོ་ཆེན་པོ། རྣམ་ཐོས་ཀྱི་བུ། བྲམ་ཟེ། དེ་ལྟར་བྱའོ་ཞེས་བྲམ་ཟེ་དེའི་ལྟར་མཉན་ནས་དེ་ཉིད་དུ་མི་སྣང་བར་གྱུར་ཏེ། རྔ་བོ་ཆེ་བརྡུང་ནས་གནོད་སྦྱིན་དང ། སྲིན་པོ་དག་བསྡུས་ཏེ་འདི་སྐད་ཅེས་སྨྲས་སོ། །གྲོགས་པོ་དག་།ཤེས་པར་གྱིས་ཤིག་།གང་ཛམྦུའི་གླིང་འདི་ན་རྒྱལ་པོ་རྩིབས་ཀྱི་མུ་ཁྱུད་ཀྱི་མདུན་ན་འདོན་གྱི་གཙོ་བོ་བྲམ་ཟེ་རྒྱལ་མཚོའི་རྡུལ་ཅེས་བྱ་བ་དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་དགེ་སློང་གི་དགེ་འདུན་དང་བཅས་པ་ལ་ལོ་བདུན་དུ་ཡོ་བྱད་ཐམས་ཅད་ཀྱིས་
261a
༄#། །བསྙེན་བཀུར་བྱེད་ཀྱི། དེའི་ཕྱིར་ཁྱེད་ཅག་གིས་དེའི་དགེ་བའི་རྩ་བ་ལ་རྗེས་སུ་ཡི་རང་བར་བྱ་ཞིང་དགེ་བའི་རྩ་བ་དེས་ཁྱེད་ཅག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་ཅིག་།དེའི་ཚེ་ན་གནོད་སྦྱིན་དང ། སྲིན་པོ་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་ཐལ་མོ་སྦྱར་ཏེ་སྨྲས་པ། བྲམ་ཟེ་རྒྱ་མཚོའི་རྡུལ་གྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་དགེ་སློང་གི་དགེ་འདུན་དཔག་ཏུ་མེད་པ་དང་བཅས་པ་ལ་ལོ་བདུན་དུ་ཡོ་བྱད་ཐམས་ཅད་ཀྱིས་བསྙེན་བཀུར་བྱས་པའི་བསོད་ནམས་ཀྱི་རྒྱུན་དང ། དགེ་བའི་རྒྱུན་གང་ཡིན་པའི་བསོད་ནམས་ཀྱི་ཕུང་པོ་དེ་དག་ཐམས་ཅད་ལ་བདག་ཅག་རྗེས་སུ་ཡི་རང་ངོ ། ། དགེ་བའི་རྩ་བ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་མངོན་པར་རྫོགས་པར་འཚང་རྒྱ་བར་བྱའོ། །རྒྱལ་པོ་ཆེན་པོ་རྣམ་ཐོས་ཀྱི་བུས་སྨྲས་པ། ཁྱེད་ཅག་ཉོན་ཅིག ། ཁྱེད་ཅག་ལས་གང་སུ་དགེ་བའི་རྩ་བ་འདོད་པ་དང ། བསོད་ནམས་འདོད་པས་ལོ་བདུན་དུ་གང་གི་ཕྱིར་བྲམ་ཟེ་རྒྱ་མཚོའི་རྡུལ་གྱིས་བཅོམ་ལྡན་འདས་དང ། དགེ་སློང་གི་དགེ་འདུན་གྱི་ཞལ་ཟས་སྦྱོར་བར་འགྱུར་བའི་ཙནྡན་ས་མཆོག་བ་དང ། ཙནྡན་སྦྲུལ་གྱི་སྙིང་པོ་དག་རྒྱ་མཚོའི་ཕ་རོལ་ནས་ལོང་ཞིག་།དེ་ནས་གནོད་སྦྱིན་དགུ་ཁྲི་ཉིས་སྟོང་གིས་ཚིག་མཐུན་པར་
261b
སྨྲས་པ། གྲོགས་པོ་དག་།བདག་ཅག་གིས་ལོ་བདུན་པོ་འདི་ལ་གང་གི་ཕྱིར་བྲམ་ཟེ་རྒྱ་མཚོའི་རྡུལ་གྱིས་བཅོམ་ལྡན་འདས་དང ། དགེ་སློང་གི་དགེ་འདུན་གྱི་ཕྱིར་ཞལ་ཟས་སྦྱོར་བར་འགྱུར་བའི་ཙནྡན་ས་མཆོག་པ་དང ། ཙནྡན་སྦྲུལ་གྱི་སྙིང་པོ་དག་བླང་བར་བྱའོ། །གནོད་སྦྱིན་བཞི་ཁྲི་དྲུག་སྟོང་གིས་སྨྲས་པ། བདག་ཅག་གིས་ནི་སྤོས་བླང་བར་བྱའོ། །གནོད་སྦྱིན་ལྔ་ཁྲི་ཉིས་སྟོང་གིས་སྨྲས་པ། བདག་ཅག་གིས་ནི་མེ་ཏོག་སྣ་ཚོགས་དག་བླང་བར་བྱའོ། །གནོད་སྦྱིན་ཉི་ཁྲིས་སྨྲས་པ། བདག་ཅག་གིས་ནི་བཅོམ་ལྡན་འདས་དང ། དགེ་སློང་གི་དགེ་འདུན་གྱི་ཕྱིར་སྨན་བཅུད་ཀྱིས་ལེན་སྣ་ཚོགས་དག་གི་མཐུ་བླངས་ལ་ཞལ་ཟས་དང ། གཙང་ནན་སྦྱོར་བར་འགྱུར་བ་གང་ཡིན་པ་དེར་མཐུ་གཞུག་པར་བྱའོ། །གནོད་སྦྱིན་བདུན་ཁྲིས་སྨྲས་པ། གྲོགས་པོ་དག་།བདག་ཅག་གིས་ནི་བཅོམ་ལྡན་འདས་དང ། དགེ་སློང་གི་དགེ་འདུན་གྱི་ཞལ་ཟས་སྦྱར་བར་བྱའོ། །རིགས་ཀྱི་བུ། དེ་ནས་བྲམ་ཟེ་རྒྱ་མཚོའི་རྡུལ་རྒྱལ་པོ་ཆེན་པོ་འཕགས་སྐྱེས་པོ་མཐོང་བར་འདོད་པ་དང ། དེ་ནས་རྒྱལ་པོ་ཆེན་པོ་འཕགས་སྐྱེས་པོ་བྲམ་ཟེ་རྒྱ་མཚོའི་རྡུལ་ག་ལ་བ་དེར་སོང་སྟེ་ཕྱིན་ཅིང་གྲུལ་བུམ་བྱེ་བ་ཁྲག་ཁྲིག་འབུམ་ཕྲག་དུ་མ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་བར་དང ། དེ་བཞིན་དུ་རྒྱལ་པོ་ཆེན་པོ་མིག་མི་བཟང་དང ། མུལ་འཁོར་སྲུང་དང ། ཀླུ་
262a
༄#། །དང།་དྲི་ཟ་བྱེ་བ་ཁྲག་ཁྲིག་འབུམ་ཕྲག་དུ་མ་དག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་བར་དུ་སྔ་མ་བཞིན་ནོ། །དེ་ནས་སངས་རྒྱས་ཀྱི་མཐུས་གླིང་བཞི་པ་གཉིས་པའི་འཇིག་རྟེན་སྐྱོང་བ་རྣམས་ཀྱང་བྲམ་ཟེ་རྒྱ་མཚོའི་རྡུལ་གྱི་གན་དུ་འོངས་པ་དང ། བྲམ་ཟེ་རྒྱ་མཚོའི་རྡུལ་གྱིས་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་འཛིན་དུ་བཅུག་ནས་དེ་དག་ཀྱང་དོང་སྟེ། རང་རང་གི་འཁོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་གོ་།སྟོང་གསུམ་གྱི་སྟོང་ཆེན་པོའི་སངས་རྒྱས་ཀྱི་ཞིང་གི་རྣམ་ཐོས་ཀྱི་བུ་ཐེར་འབུམ་འཁོར་དང་བཅས་པའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་གོ། འཕགས་སྐྱེས་བོ་ཐེར་འབུམ་དང ། མིག་མི་བཟང་ཐེར་འབུམ་དང ། ཡུལ་འཁོར་སྲུང་ཐེར་འབུམ་འཁོར་དང་བཅས་པ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་གོ། །རིགས་ཀྱི་བུ། དེ་ནས་བྲམ་ཟེ་མཚོའི་རྡུལ་འདི་སྙམ་དུ་སེམས་ཏེ། གལ་ཏེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང་བདག་གི་རེ་བའང་ཡང་དག་པར་འགྲུབ་པར་འགྱུར་ལ། གལ་ཏེ་བདག་གི་སྨོན་ལམ་ཡང་དག་པར་འགྲུབ་པར་འགྱུར་བ་ལྟ་ན། བདག་འདོད་པ་ན་སྤྱོད་
262b
པའི་ལྷ་རྣམས་ལ་མཆོད་སྦྱིན་ཆེན་པོ་འདིའི་བསོད་ནམས་ཡང་དག་པར་བགོ་བཤའ་བྱེད་པར་གྱུར་ཅིག་།བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་འཇུག་པར་གྱུར་ཅིག་།གལ་ཏེ་བདག་བསོད་ནམས་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་ལྟ་ན། དེང་ལྷའི་དབང་པོ་བརྒྱ་བྱིན་བདག་ལ་ལྟ་བའི་ཕྱིར་འདིར་འོང་བར་གྱུར་ཅིག་།ལྷའི་བུ་རབ་འཐབ་བྲལ་དང ། ལྷའི་བུ་ཡོངས་སུ་དགའ་ལྡན་དང ། ལྷའི་བུ་རབ་འཕྲུལ་དང ། ལྷའི་བུ་གཞན་འཕྲུལ་དབང་བྱེད་ཀྱང་བདག་ལ་བལྟ་བའི་ཕྱིར་འདིར་འོང་བར་གྱུར་ཅིག་སྙམ་མོ། །རིགས་ཀྱི་བུ། བྲམ་ཟེ་རྒྱ་མཚོའི་རྡུལ་གྱི་ས་དེ་སྙམ་དུ་སེམས་བསྐྱེད་མ་ཐག་ཏུ་ལྷའི་དབང་པོ་བརྒྱ་བྱིན་བྲམ་ཟེ་དེ་ལྟ་བའི་ཕྱིར་འོངས་སོ། །ལྷའི་བུ་རབ་འཐབ་བྲལ་དང ། ལྷའི་བུ་ཡོངས་སུ་དགའ་ལྡན་དང ། ལྷའི་བུ་རབ་འཕྲུལ་དང ། ལྷའི་བུ་གཞན་འཕྲུལ་དབང་བྱེད་ཀྱང་བྲམ་ཟེ་དེ་ལྟ་བའི་ཕྱིར་འོངས་ནས། བྲམ་ཟེ་རྒྱ་མཚོའི་རྡུལ་གྱིས་དེ་དག་ལ་ཁྱེད་ཅག་སུ་ཡིན་ཞེས་དྲིས་པ་དང ། ལྷའི་རྒྱལ་པོ་ལྔ་པོ་དག་གིས་རང་རང་གི་མིང་རུས་བསྟན་ནས་འདི་སྐད་ཅེས་སྨྲས་སོ། །ཀྱེ་བྲམ་ཟེ། ཁོ་བོ་ཅག་ལ་བསྒོ་བ་ནི་ཅི་ཞིག་ཡོད། མཆོད་སྦྱིན་ཆེན་པོ་འདི་ལ་ཁོ་བོ་ཅག་གིས་ཡོ་བྱད་དག་སྦྱར་བར་བྱ་བ་ལྟ་ཅི་ཡོད། བྲམ་ཟེས་སྨྲས་པ། བཅོམ་ལྡན་འདས་དང ། དགེ་སློང་གི་དགེ་འདུན་གྱི་ཕྱིར་ཁྱེད་
263a
༄#། །ཅག་ལྷའི་འཇིག་རྟེན་ན་ཐམས་ཅད་ལས་ཁྱད་པར་དུ་འཕགས་པའི་རིན་པོ་ཆེའི་ཁང་པ་བརྩེགས་པ་དག་དང ། རིན་པོ་ཆེའི་ཤིང་ལྗོན་པ་དག་དང ། དཔག་བསམ་གྱི་ཤིང་ལྗོན་པ་དག་དང ། སྤོས་ཀྱི་ཤིང་ལྗོན་པ་དག་དང ། མེ་ཏོག་གི་ཤིང་ལྗོན་པ་དག་དང ། འབྲས་བུའི་ཤིང་ལྗོན་པ་དག་དང ། ལྷའི་ན་བཟའ་དག་དང ། ལྷའི་གདན་དག་དང ། ལྷའི་གདིང་བ་དག་དང ། ལྷའི་རིན་པོ་ཆེའི་སྣོད་དག་དང ། ལྷའི་རྒྱན་དག་དང ། གདུགས་དང ། རྒྱལ་མཚན་དང ། བདན་དང ། ལྷབ་ལྷུབ་དག་དང ། ལྷའི་རོལ་མོའི་སྒྲ་གང་དག་ཡོད་པ་དེ་དག་ཐམས་ཅད་ཀྱིས་ཛམྦུའི་ཚལ་ཐམས་ཅད་བརྒྱན་པར་གྱིས་ཤིག་།ལྷའི་རྒྱལ་པོ་ལྔ་པོ་དེ་དག་གིས་གྲོགས་པོ་དེ་ལྟར་བྱའོ་ཞེས་བྲམ་ཟེའི་ལྟར་མཉན་ཏེ། བྲམ་ཟེའི་དྲུང་ནས་ཕྱིར་ལོག་ནས་ལྷའི་འཇིག་རྟེན་དུ་དོང་སྟེ་ཕྱིན་པ་དང ། ལྷའི་བུ་འཁྲི་བྱེད་དང ། ལྷའི་བུ་འཁྱིལ་བྱེད་དང ། ལྷའི་བུ་སྣར་མ་སྐྱེས་དང ། ལྷའི་བུ་ས་རྩོམ་དགའ་རྣམས་བོས་ཏེ་འདི་སྐད་ཅེས་སྨྲས་སོ། །གྲོགས་པོ་དག་།ཁྱེད་ཅག་དེང་ལ་ཛམྦུའི་གླིང་དུ་བབས་ཏེ། བཅོམ་ལྡན་འདས་ཀྱི་ཕྱིར་ཛམྦུའི་ཚལ་གྱི་སྐྱེད་མོས་ཚལ་རྒྱན་ཁྱད་པར་སྣ་ཚོགས་དག་དང ། གདན་དང ། གདིང་བ་སྣ་ཚོགས་དག་གིས་ཇི་ལྟར་ལྷའི་འཇིག་རྟེན་འདི་རྒྱན་པ་དེ་ལྟ་བུ་དག་གིས་བརྒྱན་པར་གྱིས་ཤིག་།གྲོགས་པོ་དག་།རིན་པོ་ཆེའི་ཁང་པ་བརྩེགས་
263b
པ་འདི་ལྟ་བུའང་བརྩིག་ཏུ་ཆུག་ཅིག་།འདི་ལྟ་སྟེ། ཁང་པ་བརྩེགས་པ་རིན་པོ་ཆེའི་པ་གམ་ཅན་འདི་ཅི་འདྲ་བ་དེ་ལྟ་བུའི་རིན་པོ་ཆེའི་ཁང་པ་བརྩེགས་པ་བརྩིག་ཏུ་ཆུག་ཅིག་།ལྷའི་བུ་དེ་ལྔས་ལྷའི་རྒྱལ་པོ་རྣམས་ཀྱི་ལྟར་མཉན་ནས་ཛམྦུའི་གླིང་དུ་བབས་ཏེ། བཅོམ་ལྡན་འདས་ཀྱི་ཕྱིར་མཚན་གཅིག་གིས་ཛམྦུའི་ཚལ་གྱི་སྐྱེད་མོས་ཚལ་ཐམས་ཅད་རིན་པོ་ཆེའི་ཤིང་ལྗོན་པ་དག་དང ། རྒྱལ་མཚན་གྱི་བར་དག་གི་རྒྱན་དེ་ལྟ་བུ་དག་གིས་བརྒྱན་ཏོ། །འདི་ལྟ་སྟེ། དཔེར་ན། ལྷའི་དབང་པོ་བརྒྱ་བྱིན་གྱི་ཁང་པ་བརྩེགས་པ་རིན་པོ་ཆེའི་བ་གམ་ཅན་ཅི་འདྲ་བ་དེ་ལྟ་བུའི་ཁང་པ་བརྩེགས་པའང་བརྩིགས་ཏེ། ཛམྦུའི་ཚལ་ཐམས་ཅད་ལྷའི་རྒྱན་གྱིས་རྣམ་པ་ཐམས་ཅད་དུ་ཡོངས་སུ་མཐར་ཐུག་པར་བརྒྱན་ནས་ལྷའི་རྒྱལ་པོ་རྣམས་ཀྱི་གན་དུ་སོང་སྟེ་སྨྲས་པ། གྲོགས་པོ་དག་།མཁྱེན་པར་མཛོད་ཅིག་།ཇི་ལྟར་ལྷའི་འཇིག་རྟེན་འདི་ལེགས་པར་བརྒྱན་པ་དེ་བཞིན་དུ། བཅོམ་ལྡན་འདས་ཀྱི་ཕྱིར་ཛམྦུ་ཚལ་གྱི་སྐྱེད་མོས་ཚལ་ཡང་ལྷའི་རྒྱན་གྱི་ཁྱད་པར་རྣམས་ཀྱིས་རྣམ་པ་ཐམས་ཅད་དུ་ཡོངས་སུ་མཐར་ཐུག་པར་བརྒྱན་ཅིང་འདི་ལྟ་སྟེ། དཔེར་ན། ལྷའི་དབང་པོ་བརྒྱ་བྱིན་གྱི་ཁང་པ་བརྩེགས་པ་རིན་པོ་ཆེའི་བ་གམ་ཅན་ཅི་འདྲ་བ་དེ་ལྟ་བུའི་རིན་པོ་ཆེ་ཐམས་ཅད་ཀྱི་ཁང་པ་བརྩེགས་པའང་བརྩིགས་ལགས་ཏེ། གྲོགས་པོ་དག་།ལྷའི་འཇིག་རྟེན་དང ། ཛམྦུའི་གླིང་གི་ཛམྦུའི་ཚལ་གྱི་སྐྱེད་
264a
༄#། །མོས་ཚལ་ནི་ཁྱད་པར་ཅུང་ཟད་ཀྱང་མ་མཆིས་སོ། །དེ་ནས་ལྷའི་རྒྱལ་པོ་ལྔ་པོ་བརྒྱ་བྱིན་དང ། རབ་འཐབ་བྲལ་དང ། ཡོངས་སུ་དགའ་ལྡན་དང ། རབ་འཕྲུལ་དང ། གཞན་འཕྲུལ་དབང་བྱེད་དེ་དག་ཛམྦུའི་གླིང་དུ་བབས་ནས་བྲམ་ཟེ་རྒྱ་མཚོའི་རྡུལ་གྱི་དྲུང་དུ་སོང་སྟེ་འདི་སྐད་ཅེས་སྨྲས་སོ། །བྲམ་ཟེ། བཅོམ་ལྡན་འདས་དང ། དགེ་སློང་གི་དགེ་འདུན་གྱི་ཕྱིར་ཛམྦུའི་ཚལ་ནི་བརྒྱན་ཟིན་ན་ཡང་ཁོ་བོ་ཅག་གིས་བྱ་བ་ལྟ་ཅི་ཡོད། དེ་སྐད་ཅེས་སྨྲས་པ་དང ། བྲམ་ཟེ་རྒྱ་མཚོའི་རྡུལ་གྱིས་ལྷའི་བུ་ལྔ་པོ་དག་ལ་འདི་སྐད་ཅེས་སྨྲས་སོ། །ལྷའི་རྒྱལ་པོ་ཁྱེད་ལྔ་ནི་ལྷའི་རིས་སོ་སོ་ན་རྒྱལ་སྲིད་བྱེད་པ་ཡིན་པས་དེས་ན་ཁྱེད་ཅག་གི་དབང་དུ་འགྱུར་གྱི། ལྷའི་རྒྱལ་པོ་དག་།དེང་ལ་རང་རང་གི་ལྷའི་འཁོར་རྣམས་བསྡུས་ཏེ། བཅོམ་ལྡན་འདས་དང ། དགེ་སློང་གི་དགེ་འདུན་ལ་བལྟ་བ་དང ། ཕྱག་བྱ་བ་དང ། བསྙེན་བཀུར་བྱ་བའི་ཕྱིར་ཛམྦུའི་གླིང་དུ་ཤོག་ལ་བཅོམ་ལྡན་འདས་ལས་ཆོས་ཀྱང་ཉོན་ཅིག་།དེ་ནས་ལྷའི་རྒྱལ་པོ་དེ་ལྔ་རང་རང་གི་གནས་ཀྱི་ཁྱད་པར་རྣམས་སུ་དོང་སྟེ་ཕྱིན་པ་དང ། ལྷའི་དབང་པོ་བརྒྱ་བྱིན་གྱིས་སུམ་ཅུ་རྩ་གསུམ་པའི་ལྷ་རྣམས་བསྡུས་ཏེ་འདི་སྐད་ཅེས་སྨྲས་སོ། །གྲོགས་པོ་དག་།ཤེས་པར་གྱིས་ཤིག་།ཛམྦུའི་གླིང་ན་རྒྱལ་པོ་རྩིབས་ཀྱི་མུ་ཁྱུད་ཀྱི་མདུན་ན་འདོན་གྱི་གཙོ་བོ་
264b
བྲམ་ཟེ་རྒྱ་མཚོའི་རྡུལ་ཅེས་བྱ་བ་དེས་དེ་བཞིན་གཤེགས་པ་རིན་པོ་ཆེའི་སྙིང་པོ་དགེ་སློང་གི་དགེ་འདུན་དཔག་ཏུ་མེད་པ་དང་བཅས་པ་ལ་ལོ་བདུན་ཡོ་བྱད་ཐམས་ཅད་ཀྱིས་སྤྱན་དྲངས་ཤིང་རི་མོར་བྱེད་དེ། བྲམ་ཟེ་རྒྱ་མཚོའི་རྡུལ་གྱིས་ཡང་དག་པར་འཛིན་དུ་བཅུག་པས་ཁོ་བོ་ཅག་གིས་ཀྱང་བཅོམ་ལྡན་འདས་དང ། དགེ་སློང་གི་དགེ་འདུན་གྱི་ཕྱིར་སྐྱེད་མོས་ཚལ་ཐམས་ཅད་བརྒྱན་ཟིན་གྱི། དེའི་ཕྱིར་ཁྱོད་ཀྱིས་ཀྱང་དགེ་བའི་རྩ་བ་དེ་ལ་རྗེས་སུ་ཡི་རང་བར་གྱིས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་ཅིག ། དེའི་ཚེ་ན་སུམ་ཅུ་རྩ་གསུམ་པའི་ལྷ་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་ཐལ་མོ་སྦྱར་ཏེ་ཚིག་ཏུ་སྨྲས་པ། གྲོགས་པོ། བདག་ཅག་གིས་བསོད་ནམས་ཀྱི་ཕུང་པོ་དེ་ལ་རྗེས་སུ་ཡི་རང་བར་བྱ་ཞིང་རྗེས་སུ་ཡི་རང་བ་དེ་ལས་བྱུང་བའི་བསོད་ནམས་གང་ཡིན་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱའོ། །ལྷའི་བུ་རབ་འཐབ་བྲལ་གྱིས་ཀྱང་འཐབ་བྲལ་གྱི་ལྷའི་བུ་རྣམས་བསྡུས་ཏེ། རྒྱ་ཆེར་སྔ་མ་བཞིན་དུ་སྦྱར་བར་བྱའོ། །ལྷའི་བུ་ཡོངས་སུ་དགའ་ལྡན་དང ། ལྷའི་བུ་འཕྲུལ་དགའ་དང ། ལྷའི་བུ་གཞན་འཕྲུལ་དབང་བྱེད་ཀྱིས་ཀྱང་གཞན་འཕྲུལ་དབང་བྱེད་ཀྱི་བར་གྱི་ལྷའི་བུ་དག་བསྡུས་ནས་ལྟར་བུ་བྱ་བ་ཁྲག་ཁྲིག་འབུམ་ཕྲག་མང་པོ་དག་གིས་ཐལ་མོ་སྦྱར་ཏེ་ཚིག་ཏུ་སྨྲས་པ།
265a
༄#། །གྲོགས་པོ་དག། བདག་ཅག་གིས་དགེ་བའི་རྩ་བ་རྣམས་ཀྱི་བསོད་ནམས་གང་ཡིན་པ་དེ་ལ་རྗེས་སུ་ཡི་རང་བར་བྱ་ཞིང་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱའི། །གྲོགས་པོ་དག་།དེའི་ཕྱིར་ཛམྦུའི་གླིང་དུ་འབབ་ཅིང་བཅོམ་ལྡན་འདས་དང ། དགེ་སློང་གི་དགེ་འདུན་ལ་ལྟ་བ་དང ། ཕྱག་བྱ་བ་དང ། བསྙེན་བཀུར་བྱ་བ་དང ། ཆོས་མཉན་པའི་ཕྱིར་འདོང་ངོ ། །ལྷའི་རྒྱལ་པོ་དེ་ལྔ་ནུབ་མོ་ལྷའི་རྒྱལ་པོ་རེ་རེ་ཞིང་ཡང་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་བྱེ་བ་ཁྲག་ཁྲིག་འབུམ་ཕྲག་མང་པོ་དག་དང་ལྷན་ཅིག་ཏུ་ཛམྦུའི་གླིང་དུ་བབས་ཏེ། བཅོམ་ལྡན་འདས་དང ། དགེ་སློང་གི་དགེ་འདུན་གྱི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས་ལ་ཆོས་ཉན་ཏོ། །ནམ་མཁའི་དཀྱིལ་ན་གནས་པའི་ལྷ་རྣམས་ཀྱང་བཅོམ་ལྡན་འདས་ལ་ལྷའི་མེ་ཏོག་ཨུཏྤལ་དང ། པདྨ་དང ། ཀུ་མུ་ད་དང ། པདྨ་དཀར་པོ་དང ། སྣར་མ་དང ། བིཪྴ་ཀ་དང ། ་ཏི་མུ་ཀཏ་ཀ་དང ། ཙམ་པ་ཀ་དང ། མནད་ར་བ་དང ། མནད་ར་བ་ཆེན་པོའི་མེ་ཏོག་གི་ཆར་དག་འབེབས་ཤིང་ལྷའི་རོལ་མོའི་སྒྲ་དག་ཀྱང་རབ་ཏུ་སྒྲོགས་པར་བྱེད་དོ། །རིགས་ཀྱི་བུ། གཞན་ཡང་བྲམ་ཟེ་རྒྱ་མཚོའི་རྡུལ་གྱི་སེམས་ལ་སེམས་ཀྱི་ཡོངས་སུ་རྟོག་པ་འདི་ལྟ་བུ་སྐྱེས་ཏེ། གལ་ཏེ་བླ་ན་མེད་པ་ཡང་དག་
265b
པར་རྫོགས་པའི་བྱང་ཆུབ་ལ་བདག་གི་རེ་བ་ཡོངས་སུ་རྫོགས་པར་འགྱུར་ཞིང་སྨོན་ལམ་འདིའང་འགྲུབ་པ་ལྟ་ན། འདི་ལྟར་ལྷ་མ་ཡིན་དག་ཀྱང་བྱང་ཆུབ་ཡང་དག་པར་འཛིན་དུ་འཇུག་པར་གྱུར་ཅིག་སྙམ་མོ། །རིགས་ཀྱི་བུ། དེས་སེམས་བསྐྱེད་མ་ཐག་ཏུ་གནོད་སྦྱིན་གྱི་དབང་པོ་ལྔ་བྲམ་ཟེ་དེ་ག་ལ་བ་དེར་དོང་སྟེ་ལྷགས་པ་ནས། བྲམ་ཟེའི་ཚིག་གིས་ལྷ་མ་ཡིན་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་དང་བཅས་པ་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིང།་བཅོམ་ལྡན་འདས་ཀྱི་དྲུང་དུ་འོངས་ནས་ཆོས་ཉན་པའི་བར་དུ་སྔ་མ་བཞིན་དུ་རྒྱ་ཆེར་སྦྱར་རོ། །དེ་བཞིན་དུ་བྲམ་ཟེ་དེ་བདུད་འདོད་པ་དང ། དེའི་ཚེ་ན་བདུད་གང་པོ་ཞེས་བྱ་བ་འོངས་པ་ནས་བདུད་ཀྱི་རིས་ཀྱི་ལྷའི་བུ་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་དང་བཅས་པ་བྱེ་བ་ཁྲག་ཁྲིག་འབུམ་ཕྲག་དུ་མ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་བར་དང ། ཆོས་མཉན་པའི་ཕྱིར་ལྷགས་པའི་བར་དུ་སྔ་མ་བཞིན་དུ་སྦྱར་རོ། །རིགས་ཀྱི་བུ། དེ་ནས་ཡང་བྲམ་ཟེ་རྒྱ་མཚོའི་རྡུལ་ཚངས་པ་ཆེན་པོ་གནས་པའི་གྲོང་ཁྱེར་ཞེས་བྱ་བ་འོང་བར་འདོད་པ་ནས་བྲམ་ཟེ་ལས་མཉན་ཅིང་ཚངས་པའི་འཇིག་རྟེན་དུ་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་དག་གིས་བླ་ན་མེད་
266a
༄#། །པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་བཅོམ་ལྡན་འདས་དང ། དགེ་སློང་གི་དགེ་འདུན་ལ་བལྟ་བ་དང ། ཕྱག་བྱ་བ་དང ། བསྙེན་བཀུར་བྱ་བ་དང ། བཅོམ་ལྡན་འདས་ལས་ཆོས་མཉན་པའི་ཕྱིར་དེ་ནས་བབས་པའི་བར་དུ་སྔ་མ་བཞིན་དུ་སྦྱར་རོ། །རིགས་ཀྱི་བུ། དེ་ནས་ཡང་བྲམ་ཟེ་རྒྱ་མཚོའི་རྡུལ་གླིང་བཞི་པ་གཉིས་པའི་བརྒྱ་བྱིན་མཐོང་བར་འདོད་ཅིང་ལྷའི་བུ་རབ་འཐབ་བྲལ་དང ། ཡོངས་སུ་དགའ་ལྡན་དང ། རབ་འཕྲུལ་དང ། གཞན་འཕྲུལ་དབང་བྱེད་རྣམས་དང་མཐོང་བར་འདོད་པ་དང ། བཅོམ་ལྡན་འདས་ཀྱི་མཐུས་ལྟའི་རྒྱལ་པོ་དེ་ལྔའང་བྲམ་ཟེའི་དྲུང་དུ་ལྷགས་ནས་བྲམ་ཟེ་དེས་དེ་དག་ཡང་དག་པར་རྗེས་སུ་བསྟན་པ་དང ། དེ་དག་ཀྱང་རང་རང་གི་ལྷའི་གནས་དག་ཏུ་དོང་ནས་བྲམ་ཟེའི་ཚིག་གིས་རང་རང་གི་འཁོར་རྣམས་ཀྱང་ཡང་དག་པར་འཛིན་དུ་བཅུག་གོ་།དེ་བཞིན་དུ་སུམ་ཅུ་རྩ་གསུམ་པའི་ལྷའི་བུ་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་དང་བཅས་པ་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་དེ་དག་ཀྱང་བརྒྱ་བྱིན་དང་ལྷན་ཅིག་ཏུ་བཅོམ་ལྡན་འདས་དང ། དགེ་སློང་གི་དགེ་འདུན་ལ་བལྟ་བ་དང ། ཕྱག་བྱ་བ་དང ། བསྙེན་བཀུར་བྱ་བ་དང ། བཅོམ་ལྡན་འདས་
266b
ལས་ཆོས་མཉན་པའི་ཕྱིར་གླིང་བཞི་པ་འདིར་ལྷགས་སོ། །དེ་བཞིན་དུ་ལྷའི་བུ་རབ་འཐབ་བྲལ་དང ། ཡོངས་སུ་དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་རྣམས་ཀྱིས་ཀྱང་གཞན་འཕྲུལ་དབང་བྱེད་ཀྱི་བར་གྱི་ལྷའི་བུ་རྣམས་བྱང་ཆུབ་ཡང་དག་པར་འཛིན་དུ་བཅུག་ནས། གཞན་འཕྲུལ་དབང་བྱེད་ཀྱི་བར་གྱི་ལྷའི་བུ་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་དང་བཅས་པ་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། བཅོམ་ལྡན་འདས་དང ། དགེ་སློང་གི་དགེ་འདུན་ལ་བལྟ་བ་དང ། ཕྱག་བྱ་བ་དང ། ཕྲད་པར་བྱ་བ་དང ། བསྙེན་བཀུར་བྱ་བ་དང ། བཅོམ་ལྡན་འདས་ལས་ཆོས་མཉན་པའི་ཕྱིར་གླིང་བཞི་པ་འདིར་ལྷགས་སོ། །གླིང་བཞི་པ་གཉིས་པའི་ལྷ་མ་ཡིན་གྱི་དབང་པོ་དང ། བདུད་དང ། ཚངས་པ་རྣམས་ཀྱང་དེ་བཞིན་ནོ། །དེ་བཞིན་དུ་གླིང་བཞི་པ་གསུམ་པ་དང ། བཞི་པ་དང ། ལྔ་པའི་བར་དག་གི་བརྒྱ་བྱིན་དང ། ལྷའི་བུ་རབ་འཐབ་བྲལ་དང ། ཡོངས་སུ་དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་དང ། ལྷ་མ་ཡིན་གྱི་དབང་པོ་དང ། བདུད་དང།་ཚངས་པ་རྣམས་ཀྱང་བཅོམ་ལྡན་འདས་ཀྱི་མཐུས་ཆོས་མཉན་པའི་བར་གྱི་ཕྱིར་དེ་དག་འཁོར་དང་བཅས་ཏེ་གླིང་བཞི་པ་འདིར་ལྷགས་སོ། །དེ་བཞིན་དུ་སྟོང་གསུམ་གྱི་
267a
༄#། །སྟོང་ཆེན་པོའི་སངས་རྒྱས་ཀྱི་ཞིང་གི་བར་དག་ནས་ཀྱང་བརྒྱ་བྱིན་ཐེར་འབུམ་དང ། ལྷའི་བུ་རབ་འཐབ་བྲལ་ཐེར་འབུམ་དང ། ཡོངས་སུ་དགའ་ལྡན་ཐེར་འབུམ་དང ། འཕྲུལ་དགའ་ཐེར་འབུམ་དང ། གཞན་འཕྲུལ་དབང་བྱེད་ཐེར་འབུམ་དང ། ལྷ་མ་ཡིན་གྱི་དབང་པོ་ཐེར་འབུམ་དང ། བདུད་ཐེར་འབུམ་དང ། ཚངས་པ་ཆེན་པོ་ཐེར་འབུམ་དག་ཀྱང་བཅོམ་ལྡན་འདས་ཀྱི་མཐུས་ཚངས་པ་ཆེན་པོའི་བར་དུ་རེ་རེ་ཞིང་ཡང་ཚངས་རིས་ཀྱི་ལྷ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་བྱེ་བ་ཁྲག་ཁྲིག་འབུམ་ཕྲག་དུ་མའི་བར་དག་གིས་ཡོངས་སུ་བསྐོར་ཅིང་མདུན་དུ་བདར་ནས་བཅོམ་ལྡན་འདས་དང ། དགེ་སློང་གི་དགེ་འདུན་ལ་བལྟ་བ་དང ། ཕྲད་པར་བྱ་བ་དང ། ཕྱག་བྱ་བ་དང ། བསྙེན་བཀུར་བྱ་བ་དང ། བཅོམ་ལྡན་འདས་ལ་ཆོས་མཉན་པའི་ཕྱིར་གླིང་བཞི་པ་འདིར་ལྷགས་སོ། །དེའི་ཚེ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དག་ཀྱང་ཁྱབ་པར་མ་གྱུར་པའི་ས་ཕྱོགས་དེ་ནི་ཅུང་ཟད་ཀྱང་མེད་དོ། །རིགས་ཀྱི་བུ། དེ་ནས་བྲམ་ཟེ་རྒྱ་མཚོའི་རྡུལ་འདི་སྙམ་དུ་སེམས་ཏེ། གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བདག་གིར་བ་ཡོངས་སུ་རྫོགས་པར་འགྱུར་ཞིང ། ཇི་ལྟར་རྣམ་ཐོས་ཀྱི་བུ་ཐེར་འབུམ་དང ། ཚངས་པ་ཆེན་པོ་ཐར་འབུམ་གྱི་བར་འདི་
267b
དག་བདག་དང་མཐུན་པར་འཇུག་པ་དེ་བཞིན་དུ་བཅོམ་ལྡན་འདས་ཀྱང་བདག་དང་མཐུན་པར་མཛད་པ་ལྟ་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་བར་གྱི་མི་དང ། དུད་འགྲོ་དང ། གཤིན་རྗེའི་འཇིག་རྟེན་པ་དང ། སེམས་ཅན་དམྱལ་བ་དེ་དག་ཐམས་ཅད་ཀྱི་སྡུག་བསྔལ་གྱི་ཚོར་བ་རབ་ཏུ་ཞི་བར་མཛད་ལ་བདེ་བའི་ཚོར་བ་བསྐྱེད་ནས་དེ་དག་རེ་རེའི་མདུན་ནའང་སངས་རྒྱས་ཀྱི་སྤྲུལ་པ་བཞུགས་ཤིང་དེས་སེམས་ཅན་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་པར་འགྱུར་བ་དེ་ལྟ་བུའི་ཆོ་འཕྲུལ་ཆེན་པོ་མཛད་པར་གྱུར་ཅིག་སྙམ་མོ། །རིགས་ཀྱི་བུ། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོས་བྲམ་ཟེ་རྒྱ་མཚོའི་རྡུལ་གྱི་སེམས་ཀྱི་ཡོངས་སུ་རྟོག་པ་ཐུགས་ཀྱིས་མཁྱེན་ནས་དེའི་ཚེ་ཏིང་ངེ་འཛིན་རབ་ཏུ་གདུང་བ་ཞེས་བྱ་བ་ལ་སྙོམས་པར་ཞུགས་སོ། །འདི་ལྟར་བཅོམ་ལྡན་འདས་ཀྱིས་ཏིང་ངེ་འཛིན་རབ་ཏུ་གདུང་བ་ལ་ཐུགས་མཉམ་པར་བཞག་པས་བཅོམ་ལྡན་འདས་ཀྱི་སྐུ་ལས་སྤུའི་ཁུང་བུ་རེ་རེ་ནས་ཀྱང་འོད་ཟེར་བགྲང་བ་ལས་ཡང་དག་པར་འདས་པ་སྙེད་དག་བྱུང་སྟེ། འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཁྱབ་པར་གྱུར་ཏོ། །དེ་ལ་འོད་ཟེར་ཁ་ཅིག་ནི་སེམས་ཅན་དམྱལ་བར་དོང་
268a
༄#། །ནས་གྲང་བའི་སེམས་ཅན་དམྱལ་བར་སྐྱེས་པའི་སེམས་ཅན་རྣམས་ལ་རླུང་དྲོན་པོ་དག་ལངས་སོ། །གང་དག་ཚ་བའི་སེམས་ཅན་དམྱལ་བར་སྐྱེས་པའི་སེམས་ཅན་དེ་དག་ལ་ནི་རླུང་བསིལ་བ་དག་ལངས་ཏེ། དེས་སེམས་ཅན་དམྱལ་བའི་སེམས་ཅན་དེ་དག་གི་བཀྲེས་པ་དང ། སྐོམ་པ་དང ། ངལ་བའི་སྡུག་བསྔལ་ཐམས་ཅད་རབ་ཏུ་ཞི་བར་བྱས་ནས་བདེ་བའི་ཚོར་བ་བསྐྱེད་དོ། །སེམས་ཅན་དམྱལ་བ་པ་རེ་རེའི་མདུན་ནའང་སངས་རྒྱས་ཀྱི་སྤྲུལ་པའི་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་སྐུ་བརྒྱན་ཅིང་དཔེ་བྱད་བཟང་པོ་བརྒྱད་ཅུས་གཟུགས་ལེགས་པར་སྤྲས་པ་བཞུགས་སོ། །དེ་ནས་སེམས་ཅན་དམྱལ་བ་པ་བདེ་བ་དང་ལྡན་པ་དེ་དག་འདི་སྙམ་དུ་སེམས་ཏེ། རྐྱེན་གང་གིས་བདག་ཅག་གི་སྡུག་བསྔལ་རབ་ཏུ་ཞི་ཞིང་བདེ་བ་སྐྱེས་པར་གྱུར་སྙམ་པ་དང ། དེ་དག་གིས་བཅོམ་ལྡན་འདས་ཀྱི་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལེགས་པར་བརྒྱན་ཅིང་དཔེ་བྱད་བཟང་པོ་བརྒྱད་ཅུས་རྣམ་པར་མཛེས་པ་དེ་མཐོང་ངོ ། །དེ་དག་གིས་དེ་མཐོང་ནས་འདི་སྐད་དུ་སྙིང་རྗེ་ཆེན་པོ་དང་ལྡན་པའི་བདག་ཉིད་ཆེན་པོ་འདིའི་མཐུས་བདག་ཅག་འདི་ལྟར་བདེ་བར་གྱུར་ཏོ་ཞེས་ཟེར་ཞིང ། དེ་དག་དགའ་བ་དང་བདེ་བ་སྐྱེས་ནས་རབ་ཏུ་དང་བའི་ཡིད་ཀྱིས་བཅོམ་ལྡན་འདས་ལ་བལྟ་བ་དང །
268b
བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས། སེམས་ཅན་དག་།ཁྱེད་ཅག་སངས་རྒྱས་ལ་ཕྱག་འཚལ་ལོ་ཞེས་ལེགས་པར་ཚིག་ཏུ་བརྗོད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་ཅིག་དང ། ཁྱེད་ཅག་ཕྱིས་སྡུག་བསྔལ་གྱི་ཚོར་བ་མྱོང་བར་མི་འགྱུར་ཞིང་རྟག་ཏུ་བདེ་བའི་ཚོར་བ་འདི་ལྟ་བུ་དག་འཐོབ་པར་འགྱུར་རོ་ཞེས་བཀའ་སྩལ་པ་དང ། དེ་དག་གིས་ཀྱང་འདི་སྐད་ཅེས་བདག་ཅག་སངས་རྒྱས་ལ་ཕྱག་འཚལ་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཀྱི། དགེ་བའི་རྩ་བ་དེས་བདག་ཅག་གི་ལས་ཀྱི་སྒྲིབ་པ་ཟད་པར་གྱུར་ཅིག་ཅེས་སྨྲས་སོ། །དེ་ནས་ཁ་ཅིག་ཤི་འཕོས་ནས་ཀྱང་མི་རྣམས་དང་སྐལ་པ་མཉམ་པར་སྐྱེས་སོ། །སེམས་ཅན་དམྱལ་བ་པའི་སེམས་ཅན་གང་དག་མེས་བསྲེག་པ་དེ་དག་ལའང་འོད་ཟེར་དེ་དག་གིས་རླུང་བསིལ་བདག་རབ་ཏུ་བཏང་སྟེ། དེ་དག་གིས་དེ་ལ་རེག་པ་དང་བཀྲེས་པ་དང ། སྐོམ་པ་རབ་ཏུ་ཞི་ཞིང་སྡུག་བསྔལ་མེད་པར་གྱུར་ནས། ཁ་ཅིག་དེ་ནས་ཤི་འཕོས་ནས་མི་རྣམས་དང་སྐལ་པ་མཉམ་པར་སྐྱེས་པའི་བར་དུ་གྱུར་ཏོ། །དེ་བཞིན་དུ་དུད་འགྲོའི་སྐྱེ་གནས་རྣམས་ལའང་བརྗོད་པར་བྱའོ། །དེ་བཞིན་དུ་མི་རྣམས་ཀྱི་བར་ལའང་བརྗོད་པར་བྱའོ། །འོད་དེ་ཡང་ཕྱིར་ལོག་སྟེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་དབུའི་གཙུག་ཏུ་
269a
༄#། །ནུབ་པ་ལྷ་དང ། གནོད་སྦྱིན་དང ། སྲིན་པོ་དང ། ཀླུ་དང ། ལྷ་མ་ཡིན་བགྲང་བ་ལས་ཡང་དག་པར་འདས་པ་དག་གིས་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ལ་གནས་པར་གྱུར་ཏོ། །སེམས་ཅན་བགྲང་བ་ལས་ཡང་དག་པར་འདས་པ་དག་གིས་ཀྱང་ཏིང་ངེ་འཛིན་དང ། བཟོད་པ་དང ། གཟུངས་ཐོབ་པར་གྱུར་ཏོ། །ཛམྦུའི་གླིང་གི་མི་རྣམས་ཀྱིས་བཅོམ་ལྡན་འདས་དང ། དགེ་སློང་གི་དགེ་འདུན་གྱི་ཆེད་ཀྱི་ཕྱིར་ལྷ་རྣམས་ཀྱིས་རྒྱལ་པོའི་ཕོ་བྲང་གྲོང་ཁྱེར་ཡིད་འོང་འཛིན་གྱི་ཛམྦུའི་ཚལ་གྱི་སྐྱེད་མོས་ཚལ་ལྷའི་རྒྱན་དང ། ལྷབ་ལྷུབ་དག་གིས་བརྒྱན་ཏོ་ཞེས་ཐོས་ནས་བདག་ཅག་དོང་སྟེ་བལྟ་ཞིང་དེར་དེ་བཞིན་གཤེགས་པ་རིན་པོ་ཆེའི་སྙིང་པོ་དང ། དགེ་སློང་གི་དགེ་འདུན་ཡང་བལྟའོ། །དེར་སོང་ནས་བཅོམ་ལྡན་འདས་ལས་ཆོས་ཀྱང་མཉན་པར་བྱའོ་ཞེས་སྨྲས་ནས། དེའི་ཚེ་ན་མི་རྣམས་ལས་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་བྱེ་བ་ཁྲག་ཁྲིག་འབུམ་ཕྲག་དུ་མ་དག་བཅོམ་ལྡན་འདས་དང ། དགེ་སློང་གི་དགེ་འདུན་ལ་བལྟ་བ་དང ། ཕྱག་བྱ་བ་དང ། ཕྲད་པར་བྱ་བ་དང ། བསྙེན་བཀུར་བྱ་བ་དང ། སྐྱེད་མོས་ཚལ་དེའང་མཐོང་བར་འདོད་པའི་ཕྱིར་ཉིན་གཅིག་བཞིན་དུ་གྲོང་ཁྱེར་ཡིད་འོང་འཛིན་དུ་འོང་ངོ ། །སྐྱེད་མོས་ཚལ་དེ་
269b
ལའང་རིན་པོ་ཆེ་སྣ་བདུན་ལས་བྱས་པའི་སྒོ་ཉི་ཁྲི་ཡོད་དེ། སྐྱེད་མོས་ཚལ་གྱི་སྒོ་རེ་རེ་ཞིང་རིན་པོ་ཆེའི་ཁྲིའུ་ལྔ་བརྒྱ་ལྔ་བརྒྱ་པ་ཤམས་ནས་དེ་དག་ལ་བྲམ་ཟེའི་ཁྱེའུ་ལྔ་བརྒྱ་ལྔ་བརྒྱ་འཁོད་ནས་སེམས་ཅན་གང་དག་འོངས་ཤིང་སྐྱེད་མོས་ཚལ་དེར་འཇུག་པ་དེ་དག་བྲམ་ཟེའི་ཁྱེའུ་དེ་དག་གིས་སངས་རྒྱས་ལ་སྐྱབས་སུ་གཏོང ། ཆོས་དང་དགེ་འདུན་ལ་སྐྱབས་སུ་གཏོང་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་འཇུག་སྟེ། འཛུད་ཅིང་སེམས་ཀྱང་བསྐྱེད་དུ་འཇུག་གོ། །གང་དག་ཉེ་བ་ན་གནས་པ་རྣམས་དང ། གང་དག་རིང་བ་ན་གནས་པ་རྣམས་ཀྱང་བཅོམ་ལྡན་འདས་ལ་བལྟ་བ་དང ། ཕྱག་བྱ་བ་དང ། དགེ་སློང་གི་དགེ་འདུན་ཡང་བལྟ་བའི་ཕྱིར་ཕྱིས་སྐྱེད་མོས་ཚལ་དེར་འཇུག་གོ་།དེ་ལྟར་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་གྱིས་ལོ་བདུན་པོ་དེ་དག་ལས་ལྷ་བགྲང་བ་ལས་འདས་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་སྟེ་བཏུལ་ཅིང་བཙུད་དེ་རབ་ཏུ་བཀོད་དོ། །ཀླུ་དང ། ལྷ་མ་ཡིན་དང་།གནོད་སྦྱིན་དང ། སྲིན་པོ་དང ། གྲུལ་བུམ་དང ། དྲི་ཟ་དང ། ཡི་དྭགས་དང ། ཤ་ཟ་དང ། སེམས་ཅན་དམྱལ་བ་དང ། དུད་འགྲོའི་སྐྱེ་གནས་སུ་སྐྱེས་པ་བགྲང་བ་ལས་འདས་པའི་བར་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་
270a
༄#། །འཛིན་དུ་བཅུག་སྟེ་བཏུལ་ཅིང་བཙུད་དེ་རབ་ཏུ་བཀོད་དོ། །བྲམ་ཟེ་རྒྱ་མཚོའི་རྡུལ་དེ་ལོ་བདུན་པོ་དེ་དག་འདས་ནས་ཀྱང་ལྷའི་འཁོར་ལོ་རིན་པོ་ཆེ་མ་གཏོགས་པར་འཁོར་ལོ་བརྒྱད་ཁྲི་བཞི་སྟོང་དང ། གླང་པོ་རིན་པོ་ཆེ་མ་གཏོགས་པ་རིན་པོ་ཆེ་སྣ་བདུན་གྱི་རྒྱན་གྱི་བརྒྱན་པའི་གླང་པོ་ཆེ་བརྒྱད་ཁྲི་བཞི་སྟོང་དང ། ཤིང་རྟ་བརྒྱད་ཁྲི་བཞི་སྟོང་གི་བར་དག་ཀྱང་འབུལ་བར་འདོད་དོ། །རྒྱལ་པོ་རྩིབས་ཀྱི་མུ་ཁྱུད་ཀྱང་ལོ་བདུན་པོ་དེ་དག་འདས་འདས་སུ་འདོད་ཆགས་ལ་འདུན་པ་མ་སྐྱེས་སོ། །ཞེ་སྡང་ལ་འདུན་པ་མེད། གཏི་མུག་ལ་འདུན་པ་མེད། རྒྱལ་སྲིད་ལ་འདུན་པ་མེད། ནོར་ལ་འདུན་པ་མེད། བུ་ལ་འདུན་པ་མེད། བུ་མོ་ལ་འདུན་པ་མེད། ཟས་ལ་འདུན་པ་མེད།་སྐོམ་ལ་འདུན་པ་མེད། གོས་ལ་འདུན་པ་མེད། སྤོས་ལ་འདུན་པ་མེད། གཞོན་པ་ལ་འདུན་པ་མེད། གཉིད་ལ་འདུན་པ་མེད། བདག་ཏུ་འདུན་པ་མེད། གཞན་དུ་འདུན་པ་མེད་པར་གྱུར་ཏོ། །ལོ་བདུན་དུ་གློས་ཕབ་སྟེ་ཉལ་བར་མ་གྱུར་ཀྱང ། དེ་ལ་མཚན་མོའི་འདུ་ཤེས་མ་སྐྱེས། ཉིན་མོའི་འདུ་ཤེས་མ་སྐྱེས་སོ། །གཟུགས་ཀྱི་འདུ་ཤེས་མ་ཡིན། སྒྲའི་འདུ་ཤེས་མ་ཡིན། དྲིའི་འདུ་ཤེས་མ་ཡིན། རོའི་འདུ་ཤེས་མ་ཡིན། རེག་བྱའི་འདུ་ཤེས་ཀྱང་མ་སྐྱེས་སོ། །ལོ་བདུན་དུ་དེ་དག་གིས་ལུས་ལ་ངལ་བ་མ་
270b
སྐྱེས་ཏེ། རྟག་པར་རྒྱུན་དུ་ཕྱོགས་བཅུའི་ཕྱོགས་རེ་རེར་ཡང་འཇིག་རྟེན་གྱི་ཁམས་སངས་རྒྱས་ཀྱི་ཞིང་སྟོང་གི་རྡུལ་ཕྲ་རབ་ཀྱི་རྡུལ་སྙེད་དག་གི་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་མཐོང་ཡང་དེའི་མིག་ལམ་དུ་རི་རབ་སྣང་བར་མ་གྱུར། རི་གཞན་དག་ཀྱང་མ་ཡིན། ཁོར་ཡུག་ཀྱང་མ་ཡིན། ཁོར་ཡུག་ཆེན་པོ་དག་ཀྱང་མ་ཡིན། འཇིག་རྟེན་གྱི་བར་དག་ཀྱང་མ་ཡིན། ཉི་མ་དང་ཟླ་བ་དག་ཀྱང་མ་ཡིན་ཏེ། ལྷའི་གཞལ་མེད་ཁང་དག་ཀྱང་མིག་ལམ་དུ་སྣང་བར་མ་གྱུར་ཅིང་ཇི་ལྟར་སངས་རྒྱས་ཀྱི་ཞིང་ཡོངས་སུ་དག་པ་དེ་དག་མཐོང་བ་དེ་བཞིན་དུ་སངས་རྒྱས་ཀྱི་ཞིང་ཡོངས་སུ་དག་པའི་ཡོན་ཏན་བཀོད་པ་དག་ལ་ལྟ་ཞིང་སྨོན་ལམ་སེམས་པར་བྱེད་དོ། །ཇི་ལྟར་རྒྱལ་པོ་རྩིབས་ཀྱི་མུ་ཁྱུད་དེ་ལྟ་བུའི་བདེ་བའི་ཡོན་ཏན་གྱི་གནས་པས་ལོ་བདུན་དུ་གནས་པ་དང ། དེ་ལྟ་བུའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་མཐོང་ཞིང་སངས་རྒྱས་ཀྱི་ཞིང་ཡོངས་སུ་དག་པའི་ཡོན་ཏན་བཀོད་པའི་སྨོན་ལམ་སེམས་ཤིང་འདུག་པ་དེ་བཞིན་དུ་རྒྱལ་བུ་ཐུ་བོ་མིག་མི་འཛུམ་དང ། མུ་ཁྱུད་དང ། དབང་པོའི་ཚོགས་དང ། དེ་བཞིན་དུ་རྒྱལ་བུ་སྟོང་པོ་དེ་དག་ཐམས་ཅད་དང ། ཁམས་ཀྱི་རྒྱལ་པོ་བརྒྱད་ཁྲི་བཞི་སྟོང་དང ། གཞན་ཡང་སྲོག་ཆགས་དུང་ཕྱུར་ཕྲག་དགུ་དང ། བྱེ་བ་ཕྲག་གཉིས་པོ་ཐམས་ཅད་ཀྱང་དེ་ལྟར་ལོ་བདུན་དུ་གཅིག་པུ་དབེན་བར་
271a
༄#། །སོང་སྟེ་ནང་དུ་ཡང་དག་འཇོག་ལ་ཞུགས་ནས། ཕྱོགས་བཅུའི་ཕྱོགས་རེ་རེར་ཡང་འཇིག་རྟེན་གྱི་ཁམས་སངས་རྒྱས་ཀྱི་ཞིང་སྟོང་གི་རྡུལ་ཕྲ་རབ་ཀྱི་རྡུལ་སྙེད་དག་ཀྱང་མཐོང་ལ། ལོ་བདུན་གྱི་བར་དུ་དེ་དག་འདོད་ཆགས་ལ་འདུན་པ་མ་སྐྱེས་ཤིང ། ཞེ་སྡང་ལ་འདུན་པ་མེད། གཏི་མུག་ལ་འདུན་པ་མེད། དེ་དག་ལ་ངལ་བའི་གནས་སྐྱེས་པར་མ་གྱུར་པའི་བར་དུ་སྟེ། རྟག་པར་རྒྱུན་དུ་ཕྱོགས་བཅུའི་ཕྱོགས་རེ་རེར་ཡང་སངས་རྒྱས་ཀྱི་ཞིང་གི་ཡོན་ཏན་བཀོད་པ་སངས་རྒྱས་ཀྱི་ཞིང་སྟོང་གི་རྡུལ་ཕྲ་རབ་སྙེད་དག་མཐོང་ཡང་དེ་དག་གི་མིག་ལམ་དུ་རི་རབ་ཀྱང་སྣང་བར་མ་གྱུར། རི་གཞན་དག་ཀྱང་མ་ཡིན། ལྷའི་གཞལ་མེད་ཁང་གི་བར་དག་ཀྱང་མིག་ལམ་དུ་སྣང་བར་མ་གྱུར་ཏེ། དེ་དག་གིས་ཇི་ལྟར་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་མཐོང་བ་དེ་བཞིན་དུ་སངས་རྒྱས་ཀྱི་ཞིང་ཡོངས་སུ་དག་པའི་ཡོན་ཏན་བཀོད་པའི་སྨོན་ལམ་སེམས་ཤིང་ཐམས་ཅད་ཀྱང་ཡོན་ཏན་གྱི་གནས་པ་དེ་ལྟ་བུས་ལོ་བདུན་དུ་གནས་ཏེ། ཁ་ཅིག་ནི་སངས་རྒྱས་ཀྱི་ཞིང་ཡོངས་སུ་དག་པའི་ཡོན་ཏན་བཀོད་པ་དག་སེམས་སོ། །ཁ་ཅིག་ནི་སངས་རྒྱས་ཀྱི་ཞིང་ཡོངས་སུ་མ་དག་པའི་ཡོན་ཏན་བཀོད་པ་དག་སེམས་སོ། །དེ་ནས་བྲམ་ཟེ་རྒྱ་མཚོའི་རྡུལ་གྱིས་ལོ་བདུན་པོ་དེ་དག་ཐལ་ཞིང་རྫོགས་པར་རིག་ནས་རིན་པོ་
271b
ཆེ་སྣ་བདུན་འབུལ་བར་འདོད་པའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་ག་ལ་པ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་གིས་རྒྱལ་པོ་རྩིབས་ཀྱི་མུ་ཁྱུད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་སྩལ་ནས། དེ་རང་གི་ཁྱིམ་དུ་མཆིས་ཏེ། གཅིག་པུ་དབེན་པར་མཆིས་ནས་ནང་དུ་ཡང་དག་འཇོག་ལ་གནས་ཤིང་དེར་མི་སུའང་མཆིར་མི་སྟེར་ལགས་སོ། །དེ་བཞིན་དུ་བདག་གིས་རྒྱལ་བུ་སྟོང་པོ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་སྩལ་ཅིང་གཟེངས་བསྟོད་ནས་དེ་བཞིན་དུ་སོ་སོ་རང་རང་གི་ཁྱིམ་དག་ཏུ་མཆིས་ཏེ་གཅིག་པུ་ནང་དུ་ཡང་དག་འཇོག་ལ་གནས་ཤིང ། དེར་ཡང་སུའང་མཆིར་མི་སྟེར་ལགས་སོ། །དེ་བཞིན་དུ་ཁམས་ཀྱི་རྒྱལ་པོ་བརྒྱད་ཁྲི་བཞི་སྟོང་དང ། དེ་བཞིན་དུ་གཞན་ཡང་སྲོག་ཆགས་དུང་ཕྱུར་ཕྲག་དགུ་དང ། བྱེ་བ་ཕྲག་གཉིས་ཀྱི་བར་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་སྩལ་ཅིང་བཙུད་དེ་རབ་ཏུ་བཀོད་ནས་ཐམས་ཅད་ཀྱང་རང་རང་གི་ཁྱིམ་དག་ཏུ་མཆིས་ཏེ། གཅིག་པུ་དཔེན་པར་མཆིས་ནས་ནང་དུ་ཡང་དག་འཇོག་ལ་གནས་ཤིང་དེར་ཡང་སུའང་
272a
༄#། །མཆིར་མི་སྟེར་ལགས་ན། བཅོམ་ལྡན་འདས་ཀྱིས་ཅི་ནས་ཀྱང་རྒྱལ་པོ་རྩིབས་ཀྱི་མུ་ཁྱུད་ནང་དུ་ཡང་དག་འཇོག་དེ་ལས་ལངས་ཏེ་འདིར་མཆི་བར་འགྱུར་བ་དང ། གང་དག་བདག་གིས་བྱང་ཆུབ་ཡང་དག་པར་འཛིན་དུ་སྩལ་བ་དེ་དག་ཐམས་ཅད་ཀྱང་འདིར་མཆི་བར་འགྱུར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་བློས་མི་གཡོ་བ་འཛིན་པར་འགྱུར་བ་དང ། བཅོམ་ལྡན་འདས་ལས་ལུང་བསྟན་པ་འཐོབ་པར་འགྱུར་བ་དང ། མིང་དང ། རུས་དང ། སངས་རྒྱས་ཀྱི་ཞིང་ཡང་ཡོངས་སུ་འཛིན་པར་འགྱུར་བ་དེ་དག་ལ་དགོངས་སུ་གསོལ། རིགས་ཀྱི་བུ། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་ཏིང་ངེ་འཛིན་བློ་གྲོས་སྒྲུབ་པ་ཞེས་བྱ་བ་ལ་སྙོམས་པར་ཞུགས་སོ། །དེ་ལྟར་ཏིང་ངེ་འཛིན་ལ་སྙོམས་པར་ཞུགས་པས་ཞལ་ནས་འོད་ཟེར་སྔོན་པོ་དང ། སེར་ཕོ་དང ། དམར་པོ་དང ། དཀར་པོ་དང ། བརྩོད་ཁ་དང ། ཤེལ་དང ། དངུལ་གྱི་ཁ་དོག་ལྟ་བུ་དག་བྱུང་ངོ ། །དེ་དག་བྱུང་ནས་ཀྱང་ནང་དུ་ཡང་དག་འཇོག་ལ་གནས་པ་དེ་དག་གི་མདུན་དུ་ཚངས་པར་སྤྲུལ་ཏེ་འདུག་ནས་འདི་སྐད་ཅེས་སྨྲས་སོ། །གྲོགས་པོ་དང་།ལོངས་ཤིག་།བྲལ་ཟེ་རྒྱ་མཚོའི་རྡུལ་གྱིས་ལོ་བདུན་དུ་མཆོད་སྦྱིན་བྱ་
272b
བ་ནི་ཟིན་ཏེ། བཅོམ་ལྡན་འདས་ཀྱང་གཞན་དུ་རྒྱུ་ཞིང་གཤེགས་པར་འགྱུར་གྱི། གྲོགས་པོ་དག་།བཅོམ་ལྡན་འདས་དང ། དགེ་སློང་གི་དགེ་འདུན་ལ་བལྟ་བ་དང ། ཕྱག་བྱ་བ་དང ། བསྙེན་བཀུར་བྱ་བའི་ཕྱིར་དེངས་ཤིག་།དེ་ནས་དེ་དག་ཐམས་ཅད་ལ་འོད་ཟེར་དེ་དག་གིས་བསྐུལ་བ་དང ། ལངས་ནས་རྒྱལ་པོ་རྩིབས་ཀྱི་མུ་ཁྱུད་ལ་སྐུལ་བར་བྱེད་དོ། །དེའང་དེ་དག་གིས་བསྐུལ་བ་དང ། ལངས་ཏེ་ཆས་སོ། །རྒྱལ་པོ་དེ་ཆས་པ་དང་ལྷ་རྣམས་ཀྱིས་ནམ་མཁའི་དཀྱིལ་ནས་རྔ་བོ་ཆེ་དང ། རྫ་རྔ་དང ། རྔ་པ་ཊ་ཧ་ལ་སོགས་པ་རོལ་མོའི་སྒྲ་དག་ཀྱང་རབ་ཏུ་བསྒྲགས་སོ། །དེ་ནས་རྒྱལ་པོ་རྩིབས་ཀྱི་མུ་ཁྱུད་བཅོམ་ལྡན་འདས་ལ་བལྟ་བ་དང ། བཅོམ་ལྡན་འདས་ལ་བསྙེན་བཀུར་བྱ་བའི་བར་གྱི་ཕྱིར་ཤིང་རྟ་ལ་ཞོན་ནས་བུ་སྟོང་པོ་དེ་དག་དང ། ཁམས་ཀྱི་རྒྱལ་པོ་བརྒྱད་ཁྲི་བཞི་སྟོང་དང ། སྲོག་ཆགས་དུང་ཕྱུར་ཕྲག་དགུ་དང ། བྱེ་བ་ཕྲག་གཉིས་པོ་རྣམས་ཀྱིས་ཡོངས་སུ་བསྐོར་ཅིང་མདུན་དུ་བདར་ནས་གྲོང་ཁྱེར་ནས་བྱུང་སྟེ་བཅོམ་ལྡན་འདས་ཀྱི་དྲུང་དུ་སོང་ངོ ། །དེ་བཞོན་པས་བགྲོད་པའི་ས་ཇི་སྲིད་པ་དེ་སྲིད་དུ་བཞོན་པས་སོང་ནས་བཞོན་པ་ལས་བབས་སོ། །བཞེན་པ་ལས་བབས་ནས་རྐང་པས་ཛ་མྦུའི་ཚལ་དུ་ཞུགས་སོ། །ཞུགས་ནས་ཀྱང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་དང་དགེ་སློང་གི་དགེ་འདུན་གྱི་ཞབས་ལ་མགོ་བོས་ཕྱག་བཙལ་ནས། སྲོག་ཆགས་བྱེ་བ་ཕྲག་དུ་མ་དག་དང་
273a
༄#། །བཅས་ཏེ་ཕྱོགས་གཅིག་ཏུ་འཁོད་དོ། །དེ་ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་པོ་རྩིབས་ཀྱི་མུ་ཁྱུད་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ། གང་ཁྱོད་ཀྱིས་བཅོམ་ལྡན་འདས་དང ། དགེ་སློང་གི་དགེ་འདུན་དཔག་ཏུ་མེད་པ་དག་ལ་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་བསྙེན་བཀུར་བྱས་ཤིང ། རིན་པོ་ཆེ་རྣམ་པ་སྣ་ཚོགས་པ་དག་དང ། གྲོང་ཁྱེར་བརྒྱད་ཁྲི་བཞི་སྟོང་དག་ཀྱང་ཕུལ་བ་དེ་ལ་རྗེས་སུ་ཡི་རང་བར་གྱིས་ལ། རྗེས་སུ་ཡི་རང་བ་དང་ལྡན་པའི་བསོད་ནམས་ཀྱི་ཕུང་པོ་དེ་དང ། ཡོངས་སུ་གཏོང་བ་དང་ལྡན་པའི་བསོད་ནམས་ཀྱི་ཕུང་པོ་གང་ཡིན་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་ཤིག་།དེ་བཞིན་དུ་རྒྱལ་བུ་སྟོང་པོ་དེ་དག་དང ། དེ་བཞིན་དུ་ཁམས་ཀྱི་རྒྱལ་པོ་བརྒྱད་ཁྲི་བཞི་སྟོང་དང ། གཞན་ཡང་སྲོག་ཆགས་དུང་ཕྱུར་ཕྲག་དགུ་དང ། བྱེ་བ་ཕྲག་གཉིས་པོ་རྣམས་ཀྱང་ཡང་དག་པར་འཛིན་དུ་བཅུག་ནས་རྗེས་སུ་ཡི་རང་བ་དང་ལྡན་པའི་བསོད་ནམས་ཀྱི་ཕུང་པོ་དེས་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་ནས་འདི་སྐད་ཅེས་ཀྱང་སྨྲས་སོ། །ཁྱེད་ཀྱིས་ཡོན་ཏན་འདི་ལ་རྗེས་སུ་ཡི་རང་བར་བྱས་ཏེ་ཕུལ་ལ་འདི་སྐད་ཅེས་ཀྱང་སྨྲོས་ཤིག་།སྦྱིན་པ་འདིས་བདག་དབང་
273b
པའི་གནས་མིན་ཚངས་པའི་འཇིག་རྟེན་འབྲས་བུ་མི་འདོད་ན། །རླུང་གི་ཤུགས་ལྟར་མགྱོགས་ཤིང་གཡོ་བ་རྒྱལ་པོའི་སྲིད་ཀྱི་དཔལ་ལྟ་སྨོས་ཅི་དགོས། །བདག་གི་གུས་པ་ཆེན་པོའི་སྦྱིན་པ་འདི་ཡི་འབྲས་བུ་གང་ཡིན་དེ་ཡིས་ནི། སེམས་ལ་དབང་བྱེད་མཚུངས་མེད་བྱང་ཆུབ་འཐོབ་ཅིང་སེམས་ཅན་རྣམས་ཀྱང་སྒྲོལ་གྱུར་ཅིག་།སྙིང་རྗེ་པདྨ་དཀར་པོ་ལས་སྦྱིན་པ་གཏོང་པའི་ལེའུ་ཞེས་བྱ་བ་སྟེ་གསུམ་པའོ།། །།རིགས་ཀྱི་བུ། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་འདི་སྙམ་དུ་དགོངས་ཏེ། བྲམ་ཟེ་རྒྱ་མཚོའི་རྡུལ་འདིས་སྲོག་ཆགས་བྱེ་བ་ཕྲག་མང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་ནས་ཕྱིར་མི་ལྡོག་པའི་ས་ལ་བཀོད་པ་དེ་དག་ངས་ལུང་བསྟན་པར་བྱ་ཞིང་སངས་རྒྱས་ཀྱི་ཞིང་དེ་དག་ཀྱང་བསྟན་པར་བྱའོ་སྙམ་མོ། །དེ་ནས་བཅོམ་ལྡན་འདས་ཏིང་ངེ་འཛིན་བྱང་ཆུབ་ཀྱི་སེམས་མི་བརྗེད་པ་ཞེས་བྱ་བ་ལ་སྙོམས་པར་ཞུགས་ནས་འཛུམ་པ་མཛད་དོ། །འཛུམ་པ་མཛད་པ་དེས་སངས་རྒྱས་ཀྱི་ཞིང་མཐའ་ཡས་མུ་མེད་པ་དག་སྣང་བ་རྒྱ་ཆེན་པོས་སྣང་བར་མཛད་ནས། རྒྱལ་པོ་རྩིབས་ཀྱི་མུ་ཁྱུད་དང ། གཞན་ཡང་སྲོག་ཆགས་བྱེ་བ་ཕྲག་མང་པོ་དག་ལ་སངས་རྒྱས་ཀྱི་ཞིང་གི་ཡོན་ཏན་བཀོད་པ་རྣམས་ཀྱང་བསྟན་
274a
༄#། །ཏོ། །དེའི་ཚེ་ན་ཕྱོགས་བཅུའི་སངས་རྒྱས་ཀྱི་ཞིང་བགྲང་པ་ལས་ཡང་དག་པར་འདས་པ་དག་གི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་སྣང་བ་དེ་མཐོང་ནས་སངས་རྒྱས་ཀྱི་མཐུས་བཅོམ་ལྡན་འདས་དང ། དགེ་སློང་གི་དགེ་འདུན་ལ་བལྟ་བ་དང ། ཕྱག་བྱ་བ་དང ། བསྙེན་བཀུར་བྱ་བའི་ཕྱིར་འཇིག་རྟེན་གྱི་ཁམས་འདིར་ལྷགས་ནས། དེ་དག་གིས་ཀྱང་བྱང་ཆུབ་སེམས་དཔའི་རྣམ་པར་འཕྲུལ་པ་རྣམ་པ་སྣ་ཚོགས་དག་གིས་བཅོམ་ལྡན་འདས་ལ་མཆོད་པ་བྱས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཅིང་བསྙེན་བཀུར་བྱས་ནས་བྱང་ཆུབ་སེམས་དཔའི་སྨོན་ལམ་ལུང་བསྟན་པ་ཐོས་པར་འདོད་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འཁོད་དོ། །རིགས་ཀྱི་བུ། དེ་ནས་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་གྱིས་རྒྱལ་པོ་རྩིབས་ཀྱི་མུ་ཁྱུད་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཁྱོད་ཀྱིས་ཇེ་དང་པོར་སངས་རྒྱས་ཀྱི་ཞིང་གི་ཡོན་ཏན་བཀོད་པ་གཟུང་ཞིག་།དེ་ནས་རྒྱལ་པོ་རྩིབས་ཀྱི་མུ་ཁྱུད་ཀྱིས་བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ནི་བྱང་ཆུབ་དོན་དུ་གཉེར་བ་ལགས་ཏེ། འདི་ལྟར་བདག་གིས་བཅོམ་ལྡན་འདས་
274b
དང ། དགེ་སློང་གི་དགེ་འདུན་དཔག་ཏུ་མ་མཆིས་པ་དག་ལ་དགུང་ཟླ་གསུམ་དུ་ཡོ་བྱད་རྣམ་པ་སྣ་ཚོགས་དག་གིས་བསྙེན་བཀུར་བགྱིས་ནས་དགེ་བའི་རྩ་བ་དེའང་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་ཤིང ། བཅོམ་ལྡན་འདས། བདག་གིས་དགུང་ལོ་བདུན་པོ་འདི་དག་ལའང་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་བསམས་ལགས་ན། བཅོམ་ལྡན་འདས། བདག་སངས་རྒྱས་ཀྱི་ཞིང་གང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེར་སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དག་འབྱུང་བར་མ་གྱུར་ཅིག་།སེམས་ཅན་གང་དག་དེ་ནས་འཆི་འཕོ་བར་འགྱུར་བ་དེ་དག་ངན་འགྲོ་རྣམས་སུ་སྐྱེ་བར་མ་གྱུར་ཅིག་།དེ་ན་སེམས་ཅན་ཐམས་ཅད་གསེར་གྱི་མདོག་ལྟ་བུར་གྱུར་ཅིག། དེ་ན་ལྷ་དང་མི་ཐམས་ཅད་ཀྱང་ཁྱད་པར་མ་མཆིས་པར་གྱུར་ཅིག་།དེ་ན་སེམས་ཅན་ཐམས་ཅད་ཚེ་རབས་དྲན་པར་གྱུར་ཅིག་།སེམས་ཅན་ཐམས་ཅད་འཇིག་རྟེན་གྱི་ཁམས་གཞན་དག་ན་སངས་རྒྱས་བྱེ་བ་ཁྲག་ཁྲིག་འབུམ་དག་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པ་རྣམས་མཐོང་བར་འགྱུར་བ་དེ་ལྟ་བུའི་ལྷའི་མིག་དང་ལྡན་པར་གྱུར་ཅིག་།སེམས་ཅན་ཐམས་ཅད་སངས་རྒྱས་བྱེ་བ་ཁྲག་ཁྲིག་
275a
༄#། །ཕྲག་འབུམ་དག་གི་ཆོས་སྟོན་པ་ཐོས་པར་འགྱུར་བ་དེ་ལྟ་བུའི་ལྷའི་རྣ་བ་དང་ལྡན་པར་གྱུར་ཅིག་།སེམས་ཅན་ཐམས་ཅད་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་མང་པོ་དག་ན་གནས་པའི་སེམས་ཅན་དེ་དག་གི་སེམས་ཀྱི་སྤྱོད་པ་ཀུན་ཤེས་པར་འགྱུར་བ་དེ་ལྟ་བུའི་ཕ་རོལ་གྱི་སེམས་ཤེས་པ་ལ་མཁས་པ་དང་ལྡན་པར་གྱུར་ཅིག་།སེམས་ཅན་ཐམས་ཅད་སེམས་བསྐྱེད་པ་གཅིག་གིས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་དག་ཏུ་མཆི་བར་འགྱུར་བ་དེ་ལྟ་བུའི་རྫུ་འཕྲུལ་བྱ་བ་ལ་མཁས་པ་དང་ལྡན་པར་གྱུར་ཅིག་།དེ་ན་སེམས་ཅན་རྣམས་ཡོངས་སུ་འཛིན་པ་དང་ལྡན་པ་མ་མཆིས་ཤིང་ཐ་ན་རང་གི་ལུས་ལ་ཡིད་ཀྱི་འཛིན་པའང་མ་མཆིས་པར་གྱུར་ཅིག་།སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་སླར་མི་ལྡོག་པར་གྱུར་ཅིག་།སེམས་ཅན་ཐམས་ཅད་བརྫུས་ཏེ་སྐྱེ་བར་གྱུར་ཅིག་།དེ་ན་བུད་མེད་དུ་གདགས་པའང་མ་མཆིས་པར་གྱུར་ཅིག་།དེ་ན་སེམས་ཅན་རྣམས་སྨོན་ལམ་གྱི་དབང་མ་གཏོགས་པར་ཚེའི་ཚད་ཀྱི་མཐའ་མ་མཆིས་པར་གྱུར་ཅིག་།དེ་ན་སེམས་ཅན་རྣམས་ལ་མི་དགེ་བའི་མིང་ཡང་འབྱུང་བར་མ་གྱུར་ཅིག་།སངས་རྒྱས་ཀྱི་ཞིང་དེར་དྲིང་བ་འབྱུང་བར་མ་གྱུར་ཅིག།
275b
བཅོམ་ལྡན་འདས། སངས་རྒྱས་ཀྱི་ཞིང་དེ་ལྷའི་ལས་ཤིན་ཏུ་འདས་པའི་སྤོས་ཀྱིས་ཁྱབ་པར་གྱུར་ཅིག་།སེམས་ཅན་ཐམས་ཅད་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལེགས་པར་བརྒྱན་པར་གྱུར་ཅིག་།སེམས་ཅན་ཐམས་ཅད་སྨོན་ལམ་མ་གཏོགས་པར་སྐྱེ་བ་གཅིག་གིས་ཐོགས་པར་གྱུར་ཅིག་།དེ་ན་སངས་རྒྱས་ཀྱི་མཐུས་སེམས་ཅན་ཐམས་ཅད་སྔ་དྲོ་གཅིག་གིས་སངས་རྒྱས་བགྲང་བ་ལས་ཡང་དག་པར་འདས་པ་སྙེད་དག་ལ་བསྙེན་བཀུར་བགྱིད་པར་འགྱུར་ཞིང ། བྱང་ཆུབ་སེམས་དཔའི་རྣམ་པར་འཕྲུལ་པ་སྣ་ཚོགས་ཀྱི་བར་དག་གིས་སངས་རྒྱས་རྣམས་ལ་མཆོད་པ་བགྱིད་པར་འཚལ་ནའང་དེ་དག་ལ་དེ་བཞིན་དུ་འགྲུབ་པར་འགྱུར་ལ་དེ་ཉིད་ཀྱི་སྔ་དྲོས་སླར་ལྡོག་པར་གྱུར་ཅིག་།སེམས་ཅན་ཐམས་ཅད་སངས་རྒྱས་ཀྱི་སྡེ་སྣོད་སྨྲ་བར་གྱུར་ཅིག། །།བམ་པོ་ལྔ་པ། སེམས་ཅན་ཐམས་ཅད་སྲེད་མེད་ཀྱི་བུའི་སྟོབས་དང་ལྡན་པར་གྱུར་ཅིག་།སེམས་ཅན་གང་གིས་ཀྱང་ཆེར་ནི་ལྷའི་མིག་གིས་ཀྱང་སངས་རྒྱས་ཀྱི་ཞིང་གི་ཡོན་ཏན་གྱི་རྒྱན་གྱིས་བསྔགས་པའི་མཐའ་ཚད་འཛིན་པའི་རྔོ་མི་ཐོག་པར་གྱུར་ཅིག་།དེ་ན་སེམས་ཅན་ཐམས་ཅད་སོ་སོ་ཡང་དག་པར་རིག་པ་དང ། སྤོ་བས་པ་གྲངས་མ་མཆིས་པ་དག་ཐོབ་པར་གྱུར་ཅིག་།བྱང་ཆུབ་སེམས་དཔའ་རེ་རེའི་ལུས་ཀྱང་དཔག་ཚད་སྟོང་གི་ཚད་ཙམ་དུ་གྱུར་ཅིག་།སངས་རྒྱས་ཀྱི་ཞིང་དེའི་
276a
༄#། །འོད་གསལ་བར་གྱུར་ཅིག་།དེའི་ཁོར་ཡུག་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་བགྲང་བ་ལས་འདས་པ་དག་གདའ་བར་གྱུར་ཅིག་།སེམས་ཅན་གང་དག་དེར་སྐྱེ་བར་འགྱུར་བ་རྣམས་བྱང་ཆུབ་ཀྱི་མཐར་ཐུག་གི་བར་དུ་ཚངས་པར་སྤྱོད་པར་གྱུར་ཅིག་།སེམས་ཅན་ཐམས་ཅད་བྱང་ཆུབ་ཀྱི་མཐར་ཐུག་གི་བར་དུ་ལྷ་དང་བཅས་པའི་འཇིག་རྟེན་གྱིས་ཕྱག་བགྱི་བའི་འོས་སུ་གྱུར་ཅིག་།དབང་པོ་མ་ཚང་བར་མ་གྱུར་ཅིག་།དེར་སེམས་ཅན་རྣམས་སྐྱེས་མ་ཐག་ཏུ་ལྷའི་ལས་ཤིན་ཏུ་འདས་པ་འཕགས་པའི་དགའ་བ་དང ། བདེ་བ་ཐོབ་པར་གྱུར་ཅིག་།དེ་ན་སེམས་ཅན་ཐམས་ཅད་དགེ་བའི་རྩ་བ་དང་འགྲོགས་པར་གྱུར་ཅིག་།དེ་ན་སེམས་ཅན་ཐམས་ཅད་གོས་ངུར་སྨྲིག་སར་བ་གྱོན་པར་གྱུར་ཅིག་།དེ་ན་སེམས་ཅན་རྣམས་སྐྱེས་མ་ཐག་ཏུ་ཤིན་ཏུ་རྣམ་པར་འབྱེད་པ་དང་ལྡན་པའི་ཏིང་ངེ་འཛིན་ཐོབ་པར་གྱུར་ཅིག་།ཏིང་ངེ་འཛིན་དེ་ཐོབ་པས་སངས་རྒྱས་ཀྱི་ཞིང་བགྲང་བ་ལས་འདས་པ་དག་ཏུ་མཆིས་ནས་སངས་རྒྱས་རྣམས་ལ་བསྙེན་བཀུར་བགྱིད་པར་འགྱུར་ཞིང་བྱང་ཆུབ་ཀྱི་མཐར་ཐུག་གི་བར་དུ་ཐམས་ཅད་མཐོང་བར་གྱུར་ཅིག། དེར་བྱང་ཆུབ་སེམས་དཔའ་གང་དག་སྐྱེས་པར་གྱུར་པ་དེ་དག་གིས་སངས་རྒྱས་ཀྱི་ཞིང་གི་ཡོན་ཏན་བཀོད་པའི་རང་བཞིན་ཇི་ལྟ་བུ་དག་འཚལ་བ་དེ་ལྟ་བུའི་སངས་རྒྱས་
276b
ཀྱི་ཞིང་གི་ཡོན་ཏན་བཀོད་པའི་རང་བཞིན་དག་རིན་པོ་ཆེའི་ཤིང་ལྗོན་པ་དེ་དག་ལས་མཐོང་བར་གྱུར་ཅིག་།སེམས་ཅན་རྣམས་ཀྱེས་མ་ཐག་ཏུ་ཏིང་ངེ་འཛིན་འཐོབ་པར་འགྱུར་ཞིང་ཏིང་ངེ་འཛིན་དེ་ཐོབ་པས་ཕྱོགས་བཅུའི་སངས་རྒྱས་ཀྱི་ཞིང་བགྲང་བ་ལས་འདས་པ་གཞན་དག་ན་སངས་རྒྱས་བཅོམ་ལྡན་འདས་དག་བཞུགས་ཏེ། འཚོ་ཞིང་གཞེན་ལ་ཆོས་ཀྱང་སྟོན་པ་རྣམས་རྟག་ཏུ་མཐོང་བར་གྱུར་ཅིག་།སེམས་ཅན་གང་དག་དེར་སྐྱེ་བར་འགྱུར་བ་དེ་དག་ཐམས་ཅད་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་གོས་དང ། གཞལ་མེད་ཁང་དང ། རྒྱན་དང ། སྦུད་པ་དང ། ཁ་དོག་དང ། གཟུགས་ཅི་འདྲ་བ་དེ་ལྟ་བུར་གྱུར་ཅིག་།སངས་རྒྱས་ཀྱི་ཞིང་དེ་ན་རྡུལ་དང ། གོར་མ་དང ། རི་ནག་པོ་རྣམས་མ་མཆིས་ལ། ཁོར་ཡུག་ཀྱང་མ་མཆིས། ཁོར་ཡུག་ཆེན་པོའང་མ་མཆིས། རི་རབ་ཀྱང་མ་མཆིས། རྒྱ་མཚོ་ཆེན་པོའང་མ་མཆིས་པར་གྱུར་ཅིག་།དེ་ན་སྒྲིབ་པ་དང ། ཆོད་པ་དང ། ཉོན་མོངས་པའི་སྒྲིབ་པ་དག་ཐམས་ཅད་ཀྱི་ཐམས་ཅད་དུ་མ་མཆིས་པ་དང ། དེ་ན་སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་གྱི་སྒྲ་དག་ཀྱང་ཐམས་ཅད་ཀྱི་ཐམས་ཅད་དུ་མ་མཆིས་པ་དང ། མི་ཁོམ་པའི་སྒྲ་དང ། སྡུག་བསྔལ་བའི་སྒྲ་དང ། སྡུག་བསྔལ་ཡང་མ་ལགས། བདེ་བའང་མ་ལགས་པའི་སྒྲ་དག་ཀྱང་མ་མཆིས་པར་གྱུར་ཅིག།
277a
༄#། །བཅོམ་ལྡན་འདས། བདག་ནི་དེ་ལྟ་བུའི་སངས་རྒྱས་ཀྱི་ཞིང་དོན་དུ་གཉེར་བ་ལགས་ཏེ། བཙུན་པ་བཅོམ་ལྡན་འདས། བདག་ནི་ཇི་སྲིད་དུ་དེ་ལྟ་བུའི་ཡོན་ཏན་དག་གིས་སངས་རྒྱས་ཀྱི་ཞིང་ཡོངས་སུ་དག་པར་མ་བགྱིས་པ་དེ་སྲིད་བྱང་ཆུབ་སེམས་དཔར་གྱུར་ཅིང་དཀའ་བ་སྤྱོད་པར་བགྱིད་ལགས་སོ། །བཙུན་པ་བཅོམ་ལྡན་འདས། བདག་གིས་སྐྱེས་བུའི་རྩལ་དེ་ལྟ་བུ་བགྱིས་ནས། དེའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་ར་བགྱི་སྟེ། བདག་གིས་བྱང་ཆུབ་ཀྱི་ཤིང་ནི་དཔག་ཚད་ཁྲི་མཆིས་པར་གྱུར་ལ། བདག་དེར་མཆིས་ནས་སེམས་བསྐྱེད་པའི་སྐད་ཅིག་གཅིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་།བདག་གིས་འོད་ནི་ཚད་མ་མཆིས་ཤིང་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་དག་སྣང་བར་བགྱིད་པར་གྱུར་ཅིག་།བདག་གི་ཚེའི་ཚད་ནི་དཔག་ཏུ་མ་མཆིས་ཏེ། བསྐལ་བ་བྱེ་བ་ཁྲག་ཁྲིག་འབུམ་ཕྲག་ཚད་མ་མཆིས་པར་གྱུར་ལ་ཐམས་ཅད་མཁྱེན་པའི་ཡེ་ཤེས་མ་གཏོགས་པ་དེ་སུས་ཀྱང་བགྲང་བར་རྔོ་མི་ཐོགས་པར་གྱུར་ཅིག་།བདག་གིས་བྱང་ཆུབ་སེམས་དཔའི་དགེ་འདུན་ནི་ཉན་ཐོས་དང་རང་སངས་རྒྱས་སྤངས་ཤིང་དཔག་ཏུ་མ་མཆིས་ལ། ཐམས་ཅད་མཁྱེན་པའི་ཡེ་
277b
མ་གཏོགས་པར་དེ་སུས་ཀྱང་བགྲང་བར་རྔོ་མི་ཐོག་པར་གྱུར་ཅིག་།བདག་གིས་བྱང་ཆུབ་ཐོབ་པ་ན་སངས་རྒྱས་ཀྱི་ཞིང་ཚད་མ་མཆིས་གྲངས་མ་མཆིས་པ་གཞན་དག་གིས་སངས་རྒྱས་བཅོམ་ལྡན་འདས་རྣམས་བདག་གི་བསྔགས་པ་གསུང་བར་འགྱུར་བ་དང ། དབྱངས་རྗེས་སུ་སྒྲོག་པར་འགྱུར་བ་དང ། སྙན་པ་བརྗོད་པར་གྱུར་ཅིག་།བདག་གིས་བྱང་ཆུབ་ཐོབ་པ་ན་སངས་རྒྱས་ཀྱི་ཞིང་ཚད་མ་མཆིས་གྲངས་མ་མཆིས་པ་གཞན་དག་མཚམས་མ་མཆིས་པ་བགྱིད་པ་དང ། དམ་པའི་ཆོས་སྤོང་བ་རྣམས་མ་གཏོགས་པའི་སེམས་ཅན་གང་དག་གིས་བདག་གི་མིང་ཐོས་པར་གྱུར་པ་དེ་དག་ཐམས་ཅད་དགེ་བའི་རྩ་བ་སངས་རྒས་ཀྱི་ཞིང་དུ་ཡོངས་སུ་བསྔོ་བ་བགྱིས་ནས་བདག་གིས་སངས་རྒྱས་ཀྱི་ཞིང་དུ་སྐྱེས་བར་གྱུར་ཅིག་།བདག་གིས་བྱང་ཆུབ་ཐོབ་པ་ན་འཇིག་རྟེན་གྱི་ཁམས་བགྲང་བ་ལས་འདས་པ་གཞན་དག་གིས་བྱང་ཆུབ་སེམས་དཔའ་དག་བདག་གི་སངས་རྒྱས་ཀྱི་ཞིང་དུ་སྐྱེ་བར་འཚལ་ཞིང ། བྱང་ཆུབ་ཏུ་སེམས་བསྐྱེད་པར་འགྱུར་ལ་དགེ་བའི་རྩ་བའང་དེར་ཡོངས་སུ་བསྔོ་བ་གྱུར་ཅིག་།དེ་དག་འགུམ་པའི་དུས་ཀྱི་ཚེ་ནའང་བདག་བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ཅིང་མདུན་དུ་མཆིས་ལ་དེ་དག་གིས་ཀྱང་བདག་མཐོང་ནས་བདག་ལ་དགའ་བ་དང ། དང་བ་སྐྱེས་པར་འགྱུར་ཞིང་དེ་དག་གི་ལས་སྒྲིབ་པ་རྣམས་ཀྱང་ལྡོག་པར་གྱུར་ཅིག་།འགུམ་པའི་
278a
༄#། །དུས་བགྱིད་ནས་ཀྱང་བདག་གིས་སངས་རྒྱས་ཀྱི་ཞིང་དུ་སྐྱེ་བར་འགྱུར་ཅིང ། དེར་ཡང་བྱང་ཆུབ་སེམས་དཔའ་དེ་དག་སྔོན་མ་ཐོས་པའི་ཆོས་བསྟན་པ་དག་བདག་ལས་ཉན་འཚབ་བར་འགྱུར་བ་དང ། དེ་དག་ཇི་ལྟ་བུ་འཚལ་བར་འགྱུར་བ་དེ་ལྟ་བུ་ཐོས་པར་གྱུར་ཅིག་།བདག་གིས་བྱང་ཆུབ་འཐོབ་པ་ན་སངས་རྒྱས་ཀྱི་ཞིང་བགྲང་བ་ལས་འདས་པ་སྙེད་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་གིས་བདག་གི་མིང་ཐོས་པར་གྱུར་པ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་ཅིང་བཟོད་པ་དང་པོ་དང ། དེ་བཞིན་དུ་གཉིས་པའང་ཐོབ་པར་འགྱུར་ཞིང ། ཏིང་ངེ་འཛིན་དང ། གཟུངས་ཇི་ལྟ་བུ་འཚལ་བ་དེ་ལྟ་བུའི་ཏིང་ངེ་འཛིན་དང ། གཟུངས་ཀྱང་ཐོབ་པར་གྱུར་ཅིག་།བདག་ཡོངས་སུ་མྱ་ངན་ལས་འདས་ནས་ཀྱང་བསྐལ་བ་བགྲང་བ་ལས་འདས་པ་སྙེད་དག་ན་སངས་རྒྱས་ཀྱི་ཞིང་བགྲང་བ་ལས་འདས་པ་སྙེད་དག་གི་བྱང་ཆུབ་སེམས་དཔའ་རྣམས་ཀྱིས་བདག་གི་མིང་ཐོས་ནས་ཤིན་ཏུ་དགའ་བ་དང ། རབ་ཏུ་དགའ་བ་དང ། མཆོག་ཏུ་དགའ་བ་ཐོབ་པར་འགྱུར་བ་དང ། ངོ་མཚར་ཐོབ་པར་གྱུར་ནས་བདག་ཉིད་ལ་ཕྱག་འཚལ་ཞིང་སྙན་པ་དང་གྲགས་པ་བརྗོད་པར་གྱུར་ཅིག་གང་གི་ཚེ་བདག་བྱང་ཆུབ་སེམས་དཔར་གྱུར་ནའང་སངས་རྒྱས་
278b
ཀྱི་མཛད་པ་དག་མངོན་པར་བསྒྲུབས་ནས་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་།མངོན་པར་རྫོགས་པར་སངས་རྒྱས་ནས་ཀྱང་བདག་ལ་མཆོག་ཏུ་དད་པ་ཐོབ་པའི་བྱང་ཆུབ་སེམས་དཔའ་རྣམས་ཀྱིས་བཟོད་པ་དང་པོ་དང ། གཉིས་པ་དང ། གསུམ་པ་འཐོབ་པར་འགྱུར་ཞིང ། ཏིང་ངེ་འཛིན་དང ། གཟུངས་དང་བཟོད་པ་ཇི་ལྟ་བུ་འཚལ་བ་དེ་ལྟ་བུ་ཐོབ་པར་གྱུར་ནས། བྱང་ཆུབ་ཀྱི་མཐའི་བར་དུ་རྗེས་སུ་མཐོང་བར་གྱུར་ཅིག་།བདག་བྱང་ཆུབ་ཐོབ་པ་ན་སངས་རྒྱས་ཀྱི་ཞིང་བགྲང་བ་ལས་འདས་པ་དག་གི་བུད་མེད་གང་དག་གིས་བདག་གི་མིང་ཐོས་པར་གྱུར་པ་དེ་དག་ཤིན་ཏུ་དགའ་བ་དང ། མཆོག་ཏུ་དགའ་བ་དང ། དང་བ་ཐོབ་པར་འགྱུར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སེམས་བསྐྱེད་པར་གྱུར་ནས་སླན་ཆད་བྱང་ཆུབ་ཀྱི་མཐར་ཐུག་གི་བར་དུ་བུད་མེད་ཉིད་མི་འཐོབ་པར་གྱུར་ཅིག་།བདག་ཡོངས་སུ་མྱ་ངན་ལས་འདས་ནས་ཀྱང་བསྐལ་བ་བགྲང་བ་ལས་འདས་པ་སྙེད་དག་གི་བུད་མེད་བགྲང་བ་ལས་འདས་པ་སྙེད་དག་གིས་བདག་གི་མིང་ཐོས་པར་གྱུར་པ་དེ་དག་ཤིན་ཏུ་དགའ་བ་དང ། མཆོག་ཏུ་དགའ་བ་དང ། དང་བ་ཐོབ་པར་འགྱུར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ནས་བླ་ན་མེད་པ་བྱང་ཆུབ་ཀྱི་མཐར་ཐུག་གི་བར་དུ་བུད་མེད་ཉིད་མི་འཐོབ་
279a
༄#། །པར་གྱུར་ཅིག་།བཙུན་པ་བཅོམ་ལྡན་འདས། བདག་ནི་དེ་འདྲ་བའི་སངས་རྒྱས་ཀྱི་ཞིང་དང ། དེ་འདྲ་བའི་སེམས་ཅན་བསམ་པ་ཡོངས་སུ་དག་པ་དག་འཚལ་ཏེ། བཙུན་པ་བཅོམ་ལྡན་འདས། བདག་ནི་དེ་ལྟ་བུའི་སངས་རྒྱས་ཀྱི་ཞིང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བགྱིའོ། ། རིགས་ཀྱི་བུ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོས་རྒྱལ་བ་རྩིབས་ཀྱི་མུ་ཁྱུད་ལ་ལེགས་སོ་ཞེས་བྱ་བ་བྱིན་ཏེ་རྒྱལ་པོ་ཆེན་པོ། ལེགས་སོ། །ལེགས་སོ། །རྒྱལ་པོ་ཆེན་ཁྱོད་ཀྱིས་སངས་རྒྱས་ཀྱི་ཞིང་ཡོངས་སུ་དག་པ་ཡོངས་སུ་བཟུང་བ་ནི་ཁྱོད་ཀྱི་སྨོན་ལམ་ཟབ་བོ། །རྒྱལ་པོ་ཆེན་པོ། ལྟོས་ཤིག་དང ། ནུབ་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་ཕྲག་འབུམ་འདས་པ་ན་འཇིག་རྟེན་གྱི་ཁམས་དབང་པོ་ལྟར་ཤིན་ཏུ་མཛེས་པ་ཞེས་བྱ་བ་ཞིག་ཡོད་དེ། དེ་ན་དེ་བཞི་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་པོའི་དབྱངས་ཀྱི་དབང་ཕྱུག་རྒྱལ་པོ་ཞེས་བྱ་བ་བཞུགས་ཏེ། འཚོ་ཞིང་གཞེས་ལ་སེམས་ཅན་ཡོངས་སུ་དག་པ་རྣམས་ལ་ཆོས་ཀྱང་སྟོན་ཏོ། །སངས་རྒྱས་ཀྱི་ཞིང་དེ་ན་ཉན་ཐོས་དང ། རང་སངས་རྒྱས་རྣམས་འབྱུང་བ་གདགས་སུའང་མེད་ཅིང་
279b
དེ་ན་ཉན་ཐོས་དང་རང་སངས་རྒྱས་ཀྱི་གཏམ་བརྗོད་པའང་མེད་དོ། །དེ་ན་ཐེག་པ་ཆེན་པོའི་གཏམ་འབའ་ཞིག་བརྗོད་དོ། །དེ་ན་སེམས་ཅན་རྣམས་ནི་ཐམས་ཅད་ཀྱང་བརྫུས་ཏེ་སྐྱེས་པ་ཤ་སྟག་གོ། །དེ་ན་བུད་མེད་ཀྱི་མིང་ཡང་གྲག་སྟེ། སངས་རྒྱས་ཞིང་དེ་ན་ཇི་ལྟར་རྒྱལ་པོ་སངས་རྒྱས་ཀྱི་ཞིང་གི་ཡོན་ཏན་བཀོད་པའི་སྨོན་ལམ་དཔག་ཏུ་མེད་པ་བཏབ་ཅིང་འདུལ་བའི་སེམས་ཅན་བསམ་པ་དཔག་ཏུ་མེད་པ་དག་ཡོངས་སུ་བཟུང་བ་དེ་ལྟ་བུའི་ཡོན་ཏན་ཐམས་ཅད་ཡོད་དོ། །རྒྱལ་པོ་ཆེན་པོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔང་པོའི་དབྱངས་ཀྱིས་དབང་ཕྱུག་རྒྱལ་པོ་ཡོངས་སུ་མྱ་ང་ལས་འདས་ཤིང་དེར་དམ་པའི་ཆོས་ནུབ་ནས་བར་གྱི་བསྐལ་བ་དྲུག་ཅུ་འདས་པ་ན་འཇིག་རྟེན་གྱི་ཁྱམས་དེ་ནི་ལྷུན་པོའི་འོད་ཅེས་བྱ་བར་འགྱུར་རོ། །དེར་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བློ་གྲོས་བསམ་ཡས་ཡོན་ཏན་རྒྱལ་པོ་ཞེས་བྱ་བ་འབྱུང་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་པོའི་དབྱངས་ཀྱི་དབང་ཕྱུག་རྒྱལ་པོའི་འཇིག་རྟེན་ཁམས་དབང་པོ་ལྟར་ཤིན་ཏུ་མཛེས་པའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཅི་འདྲ་བར་དེ་བཞིན་གཤེགས་པ་བློ་གྲོས་བསམ་ཡས་ཡོན་ཏན་རྒྱལ་པོའི་འཇིག་རྟེན་གྱི་ཁམས་ལྷུན་པོའི་
280a
༄#། །འོད་ཀྱི་ཡོན་ཏན་བཀོད་པའང་དེ་དང་འདྲ་བར་འགྱུར་རོ། །དེ་བཞིན་གཤེགས་པ་བློ་གྲོས་བསམ་ཡས་ཡོན་ཏན་རྒྱལ་པོ་དེའི་ཚེ་ཚད་ནི་བར་གྱི་བསྐལ་པ་དྲུག་ཅུར་འགྱུར་རོ། །གང་གི་ཚེ་དེ་བཞིན་གཤེགས་པ་བློ་གྲོས་བསམ་ཡས་ཡོན་ཏན་རྒྱལ་པོ་ཡོངས་སུ་མྱ་ངན་ལས་འདས་པ་ན། དེའི་དམ་པའི་ཆོས་ནི་བར་གྱི་བསྐལ་པ་བཅུ་དྲུག་ཏུ་གནས་པར་འགྱུར་ཏེ། དེའི་དམ་པའི་ཆོས་ནུབ་ནས་བར་གྱི་བསྐལ་པ་སྟོང་འདས་པ་ན་འཇིག་རྟེན་གྱི་ཁམས་དེ་ནི་རྣམ་པར་དགའ་བ་ཞེས་བྱ་བར་འགྱུར་རོ། །དེར་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་ཞེས་བྱ་བ་འབྱུང་བར་འགྱུར་ཏེ། དེའང་སྔ་མ་དང་ཚེའི་ཚད་མཉམ་པ་དང ། འཇིག་རྟེན་གྱི་ཁྱམས་མཚུངས་པར་འགྱུར་བར་སྦྱར་རོ། །དེ་བཞིན་དུ་ཡོངས་སུ་མྱ་ངན་ལས་འདས་ནས་དམ་པའི་ཆོས་ནུབ་པ་ན། འཇིག་རྟེན་གྱི་ཁམས་དེ་ནི་རྩིབས་ཞེས་བྱ་བར་འགྱུར་རོ། །དེའང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་དབང་ཕྱུག་དབྱངས་ཞེས་བྱ་བ་འབྱུང་བར་འགྱུར་ཏེ། སངས་རྒྱས་ཀྱི་ཞིང་གི་ཡོན་ཏན་བཀོད་པ་ནི་མཚུངས་སོ། །དེའང་བར་གྱི་བསྐལ་བ་ལྔར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པར་
280b
འགྱུར་རོ། །དེ་ཡོངས་སུ་མྱ་ངན་ལས་འདས་པ་ན་དེའི་དམ་པའི་ཆོས་ནི་བར་གྱི་བསྐལ་པ་བདུན་དུ་གནས་པར་འགྱུར་རོ། །དེར་དམ་པའི་ཆོས་ནུབ་པ་ན་སྔ་མ་བཞིན་སྦྱར་ཏེ། སངས་རྒྱས་ཀྱི་ཞིང་དེར་དེ་བཞིན་གཤེགས་པ་ཚད་མེད་པ་དཔག་ཏུ་མེད་པ་དག་བྱུང་ཞིང་ཡོངས་སུ་མྱ་ངན་ལས་འདས་པར་མཐོང་ཡང་འཇིག་རྟེན་གྱི་ཁམས་དེ་ནི་འཇིག་པའང་མེད། འཆགས་པའང་མེད་དོ། །དེར་མ་འོངས་པའི་དུས་ཀྱི་བསྐལ་བ་གྲངས་མེད་པ་གངྒཱའི་ཀླུང་གཅིག་གི་བྱེ་མ་སྙེད་ནི་འདས། བསྐལ་པ་གྲངས་མེད་པ་གངྒཱའི་ཀླུང་གི་བྱེ་མ་སྙེད་གཉིས་ལ་བབ་པ་ན་འཇིག་རྟེན་གྱི་ཁམས་དེ་ནི་བདེ་བ་ཅན་ཞེས་བྱ་བར་འགྱུར་ཏེ། རྒྱལ་པོ་ཆེན་པོ་ཁྱོད་དེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཅེས་བྱ་བར་འགྱུར་རོ། །རྒྱལ་པོ་རྩིབས་ཀྱི་མུ་ཁྱུད་ཀྱི་གསོལ་བ། བཙུན་པ་བཅོམ་ལྡན་འདས།་གང་དག་འཇིག་རྟེན་གྱི་ཁམས་དེར་བདག་པས་ཆེས་སྔར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གང་ནས་མཆིས་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། གང་དག་ཕྱོགས་བཅུའི་འཇིག་རྟེན་གྱི་ཁམས་
281a
༄#། །ཚད་མེད། གྲངས་མེད། གཞལ་དུ་མེད། དཔག་ཏུ་མེད་པ་དེ་དང་དེ་དག་ནས། ང་ལ་ཕྱག་བྱ་བ་དང ། བསྙེན་བཀུར་བྱ་བ་དང ། ཆོས་མཉན་པའི་ཕྱིར་དང་པོར་ལྷགས་ནས་གང་དག་ངའི་མདུན་ན་འཁོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ཡིན་ཏེ། རིགས་ཀྱི་བུ་འདི་དག་ནི་འདས་པའི་སངས་རྒྱས་རྣམས་ཀྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། འདི་དག་ནི་ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏེ། འདི་དག་ནི་སངས་རྒྱས་ཀྱི་ཞིང་དེར་དང་པོ་ཁོ་ནར་བླ་ན་མེད་པ་ཡང་དག་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །རྒྱལ་པོ་ཆེན་པོ། བྱང་ཆུབ་སེམས་དཔའ་འདི་དག་ནི་རེ་རེས་ཀྱང་སངས་རྒྱས་བྱེ་བ་ཁྲག་ཁྲིག་འབུམ་ཕྲག་དུ་མ་དག་ལ་ལྷག་པར་བྱ་བ་བྱས་ཤིང་དགེ་བའི་རྩ་བ་བསྐྱེད་ལ་ཤེས་རབ་བསྒོམ་པ་ཡིན་ཏེ། རྒྱལ་པོ་ཆེན་པོ། གང་དག་སངས་རྒྱས་ཀྱི་ཞིང་དེར་དང་པོ་ཁོ་ནར་སངས་རྒྱས་སུ་འགྱུར་བ་ནི་རིགས་ཀྱི་བུ་འདི་དག་ཡིན་ནོ། །རྒྱལ་པོ་རྩིབས་ཀྱི་མུ་ཁྱུད་ཀྱིས་གསོལ་བ། བཙུན་པ་བཅོམ་ལྡན་འདས། གང་གིས་བདག་འཁོར་དང་བཅས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་
281b
པར་འཛིན་དུ་རྩལ་བའི་བྲམ་ཟེ་རྒྱ་མཚོའི་རྡུལ་དེ་དུས་ཇི་སྲིད་ཅིག་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། བྲམ་ཟེ་རྒྱ་མཚོའི་རྡུལ་འདི་ནི་སྙིང་རྗེ་ཆེན་པོ་དང་ལྡན་པ་ཡིན་ཏེ། འདིས་ཇི་ལྟར་སེང་གེའི་སྒྲ་སྒྲོགས་པར་འགྱུར་པ་ནི་ཁྱོད་ཀྱིས་ཀྱང་ཐོས་པར་འགྱུར་རོ། །རྒྱལ་པོས་གསོལ་བ། གལ་ཏེ་བདག་ཅི་ནས་བཅོམ་ལྡན་འདས་ཀྱིས་ལུང་བསྟན་པ་དང ། བདག་གི་སྨོན་ལམ་དེ་གྲུབ་པ་ལྟ་ན། དེའི་སླད་དུ་གང་གི་ཚེ་བདག་བཅོམ་ལྡན་འདས་ཀྱི་ཞབས་ལ་ཡན་ལག་ལྡས་ཕྱག་བགྱིད་པ་དེའི་ཚེ་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་རབ་ཏུ་འགུལ་ཞིང་རབ་ཏུ་གཡོ་བར་གྱུར་ལ་སངས་རྒྱས་ཀྱི་ཞིང་དེ་དག་ན་སངས་རྒྱས་བཅོམ་ལྡན་འདས་གང་དག་བཞུགས་ཏེ། འཚོ་ཞིང་གཞེས་པ་དེ་དག་གིས་ཀྱང་བདག་ལ་ལུང་སྟོན་པར་གྱུར་ཅིག་།རིགས་ཀྱི་བུ། དེ་ནས་རྒྱལ་པོ་རྩིབས་ཀྱི་མུ་ཁྱུད་ཀྱིས་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྔས་གཏུགས་སོ། །གང་གི་ཚེ་རྒྱལ་པོའི་མགོ་བོ་ས་ལ་རེག་པ་དེའི་ཚེ། སངས་རྒྱས་གྱི་ཞིང་གངྒཱའི་ཀླུང་གི་བྱེ་མ་སྙེད་དག་ཀྱང་འགུལ། རབ་ཏུ་འགུལ། གཡོས། རབ་ཏུ་གཡོས། འཁྲུགས། རབ་འཁྲུགས་ནས། སངས་རྒྱས་གངྒཱའི་ཀླུང་གི་བྱེ་མ་སྙེད་དག་
282a
༄#། །ཀྱང་ལུང་སྟོན་པར་མཛད་དེ། བསྐལ་པ་འཛིན་པ་ཞེས་བྱ་བ་ལ་སངས་རྒྱས་ཀྱི་ཞིང་ཡང་དག་པར་སྒྲོལ་བ་ཞེས་བྱ་བར་སྐྱེ་དགུའི་ཚེ་ལོ་བརྒྱད་ཁྲི་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོས་རྒྱལ་པོ་རྩིབས་ཀྱི་མུ་ཁྱུད་ལ་ཁྱོད་མ་འོངས་པའི་དུས་ན་བསྐལ་པ་གྲངས་མེད་པ་གངྒཱའི་ཀླུང་གི་བྱེ་མ་སྙེད་འདས་ནས་བསྐལ་པ་གྲངས་མེད་པ་གཉིས་པ་ལ་བབ་པ་ན། འཇིག་རྟེན་གྱི་ཁམས་བདེ་བ་ཅན་ཞེས་བྱ་བ་དག་པ་དཔག་ཏུ་མེད་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཅེས་བྱ་བར་འགྱུར་ཏེ། ཕྱོགས་བཅུ་ཁོ་ར་ཁོར་ཡུག་ཏུ་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ཀྱང་སྣང་བར་བྱེད་པར་འགྱུར་རོ་ཞེས་ལུང་བསྟན་ནས། བཅོམ་ལྡན་འདས་ཀྱིས་བཀའ་སྩལ་པ། བྱ་བ་ཤེས་པའི་སེམས་ཅན་མཆོག་རབ་ལོངས། སྟོབས་བཅུ་གངྒཱ་སྙེད་ཀྱིས་ཁྱོད་ལུང་བསྟན། །རི་དང་བཅས་པའི་ས་ཡང་གཡོས་གྱུར་ཏེ། །མི་མཆོག་འདུལ་བའི་ཁ་ལོ་སྒྱུར་བར་འགྱུར། །རིགས་ཀྱི་བུ། དེ་ནས་རྒྱལ་པོ་རྩིབས་ཀྱི་མུ་ཁྱུད་དགའ་ཞིང་མགུ་ལ། རབ་ཏུ་དགའ་བ་དང ། ཡིད་བདེ་བ་སྐྱེས་ནས་ཕྱིར་ནུར་ཏེ་ཆོས་མཉན་པའི་ཕྱིར་ཧ་ཅང་ཡང་མི་རིང་བར་ཕྱོགས་གཅིག་ཏུ་འདུག་གོ། །རིགས་ཀྱི་བུ། དེ་
282b
ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་པོ་རྩིབས་ཀྱི་མུ་ཁྱུད་ཀྱི་བུ་ཐུ་བོ་མིག་མི་འཛུམ་ལ་བོས་པ་དང ། མིག་མི་འཛུམ་གྱིས་གསོལ་པ་ཡང་སྔ་མ་བཞིན་དུ་སྦྱར་ཏེ། བཅོམ་ལྡན་འདས། བདག་གིས་ངན་སོང་རྣམས་ལ་བལྟས་ལགས་ན། སེམས་ཅན་གང་དག་དེར་སྐྱེས་པ་དེ་དག་ནི་སྡུག་བསྔལ་དྲག་པོ་རབ་ཏུ་མི་བཟད་པ་ཉམས་སུ་མྱོང་བར་འགྱུར་ལགས་སོ། །བདག་གིས་མཐོ་རིས་རྣམས་སུ་བལྟས་ལགས་ན། སེམས་ཅན་གང་དག་དེར་སྐྱེས་པ་དེ་དག་ནི་ཀུན་ན་ཉོན་མོངས་པར་འགྱུར་བའི་སེམས་ཀྱིས་སླར་ངན་སོང་རྣམས་སུ་ལྟུང་ལགས་སོ། །བདག་གིས་སེམས་ཅན་ཐམས་ཅད་ལའང་བལྟས་ལགས་ན། མི་དགེ་བའི་བཤེས་གཉེན་དང་འདྲེས་པར་གནས་ཤིང་ཆོས་ཀྱི་མུ་གེའི་མུན་པ་ན་དགེ་བའི་རྩ་བ་ཡོངས་སུ་བས་བས་ལྟ་བའི་ཆུ་སྲིན་འཛིན་ཁྲིས་ཟིན་ཅིང་ཤུལ་ངན་པ་ན་གནས་པ་ལགས་ཏེ། བཅོམ་ལྡན་འདས། བདག་གིས་སེམས་ཅན་དེ་དག་ལ་ཚིག་གིས་རྒྱ་ཆེར་གོ་བར་བགྱི་ཞིང ། དགེ་བའི་རྩ་བ་ཐམས་ཅད་ཀྱང་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱི་ལགས་སོ། །གང་གི་ཚེ་བདག་བྱང་ཆུབ་སེམས་དཔའི་སྤྱད་པ་སྤྱོད་པ་ན་སེམས་ཅན་གང་དག་སྡུག་བསྔལ་གྱིས་གནོད་པར་གྱུར་པ་རྣམས་དང ། འཇིགས་པས་སྐྲག་པ་རྣམས་དང ། ཆོས་ཀྱི་མུ་གེའི་མུན་པར་ཞུགས་པ་རྣམས་དང ། ཞུམ་པ་
283a
༄#། །རྣམས་དང ། ཞན་པ་རྣམས་དང ། སྐྱོབ་པ་མ་མཆིས་པ་དང ། སྐྱབས་མ་མཆིས་པ་རྣམས་དང ། དཔུང་གཉེན་མ་མཆིས་པ་རྣམས་ཀྱིས་བདག་རྔེས་སུ་དྲན་པར་འགྱུར་ཞིང་མིང་ནས་ཀྱང་བརྗོད་པར་གྱུར་ཅིག་།བདག་གིས་ཀྱང་ལྷའི་རྣ་བས་ཐོས་ཤིང ། ལྷའི་མིག་གིས་མཐོང་བར་གྱུར་ཅིག་།སེམས་ཅན་དེ་དག་སྡུག་བསྔལ་དག་ལས་ཡོངས་སུ་ཐར་པར་མ་བགྱིས་པར་བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ་བར་གྱུར་ཅིག་།བཙུན་པ་བཅོམ་ལྡན་འདས། གང་གི་ཚེ་བདག་སྨོན་ལམ་གྱི་ཁྱད་པར་གྱིས་སེམས་ཅན་གྱི་སླད་དུ་ཡུན་རིང་པོར་བྱང་ཆུབ་སེམས་དཔའི་སྤྱད་པ་སྤྱོད་པར་འགྱུར་བ་དེའི་ཚེ་བདག་གི་རེ་བ་ཡོངས་སུ་རྫོགས་པར་གྱུར་ཅིག་།བཙུན་པ་བཅོམ་ལྡན་འདས། གང་གི་ཚེ་རྒྱལ་པོ་ཆེན་པོ་རྩིབས་ཀྱི་མུ་ཁྱུད་འདི་བསྐལ་པ་གྲངས་མ་མཆིས་པ་གངྒཱའི་ཀླུང་གཅིག་གི་བྱེ་མ་སྙེད་འདས་པ་ནས་གྲངས་མ་མཆིས་པ་གཉིས་པ་ལ་བབ་པ་ན་འཇིག་རྟེན་གྱི་ཁམས་བདེ་བ་ཅན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཅེས་བགྱི་བར་གྱུར་ནས། སངས་རྒྱས་ཀྱི་ཞིང་ཡོངས་སུ་
283b
དག་པ་ན་སེམས་ཅན་ཡོངས་སུ་དག་པ་རྣམས་ལ་སངས་རྒྱས་ཀྱི་མཛད་པ་མཛད་པར་འགྱུར་ཏེ། དེ་བཞིན་གཤེགས་པ་ཚེ་དཔག་མེད་ཀྱིས་བསྐལ་པ་དཔག་ཏུ་མ་མཆིས་པ་ཇི་སྲིད་ཅིག་ཏུ་སངས་རྒྱས་ཀྱི་མཛད་པ་མཛད་ཅིང་སངས་རྒྱས་ཀྱི་མཛད་པ་ཡོངས་སུ་མཐར་ཐུག་ནས་ཕུང་པོའི་ལྷག་མ་མ་མཆིས་པའི་མྱ་ངན་ལས་འདས་པའི་དབྱིངས་སུ་འཇུག་པར་འགྱུར་ཞིང ། དེར་ཞུགས་ནས་ཀྱང་དམ་པའི་ཆོས་ཇི་སྲིད་དུ་གནས་པར་འགྱུར་བའི་ཡུན་དེ་སྲིད་དུ། བདག་གིས་བྱང་ཆུབ་སེམས་དཔའི་སྤྱད་པ་སྤྱོད་པར་བགྱི་ཞིང་བདག་བྱང་ཆུབ་སེམས་དཔར་གྱུར་ནས་སངས་རྒྱས་ཀྱི་མཛད་པའང་བགྱི་ལགས་སོ། །གང་གི་ཚེ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཀྱི་དམ་པའི་ཆོས་ནམ་གྱི་སྲོད་ལ་ནུབ་པར་གྱུར་པ་དེ་ཉིད་ཀྱི་ནམ་གྱི་ཐོ་རངས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བགྱི་ན། བཅོམ་ལྡན་འདས་ཀྱིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་དུ་གསོལ། དེ་བཞིན་དུ་བདག་གིས་ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན། སངས་རྒྱས་བཅོམ་ལྡན་འདས་གང་དག་བཞུགས་ཏེ་འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་དེ་དག་ལའང་བདག་སངས་རྒྱས་བཅོམ་ལྡན་འདས་དེ་
284a
༄#། །དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་དུ་གསོལ་ཞེས་ཚིག་གིས་གསོལ་བ་གདབ་པར་བགྱི་ལགས་སོ། །རིགས་ཀྱི་བུ།་དེ་བཞིན་གཤེགས་པ་རིན་པོ་ཆེའི་སྙིང་པོས་རྒྱལ་བུ་མིག་མི་འཛུམ་ལུང་བསྟན་ནས་འདི་སྐད་ཅེས་ཀྱང་བཀའ་སྩལ་ཏོ། །རིགས་ཀྱི་བུ། གང་གི་ཕྱིར་ཁྱོད་ཀྱིས་ངན་སོང་རྣམ་སུའང་བལྟས། མཐོ་རིས་རྣམས་སུའང་བལྟས། སེམས་ཅན་ཐམས་ཅད་ཀྱི་སྡུག་བསྔལ་ཡང་བལྟས་ཤིང ། སེམས་ཅན་ཐམས་ཅད་སྡུག་བསྔལ་ལས་ཐར་བར་བྱ་བ་དང ། ཉོན་མོངས་པ་རབ་ཏུ་ཞི་བར་བྱ་བའི་ཕྱིར་སྙིང་རྗེའི་སེམས་བསྐྱེད་པས་ན། རིགས་ཀྱི་བུ། དེའི་ཕྱིར་ཁྱོད་སྤྱན་རས་གཟིགས་དབང་ཕྱུག་ཅེས་བྱའོ། །སྤྱན་རས་གཟིགས་དབང་ཕྱུག་ཁྱོད་ནི་སེམས་ཅན་བྱེ་བ་ཁྲག་ཁྲིག་འབུམ་ཕྲག་མང་པོ་རྣམས་སྡུག་བསྔལ་ལས་ཐར་བར་བྱེད་པར་འགྱུར་ཏེ། རིགས་ཀྱི་བུ་ཁྱོད་ནི་བྱང་ཆུབ་སེམས་དཔར་གྱུར་པ་ནའང་སངས་རྒྱས་ཀྱི་མཛད་པ་བྱེད་པར་འགྱུར་རོ། །རིགས་ཀྱི་བུ་ཁྱོད་ནི་དེ་བཞིན་གཤེགས་པ་འོད་དཔག་མེད་ཡོངས་སུ་མྱ་ངན་ལས་འདས་ནས་བསྐལ་པ་གྲངས་མེད་པ་གངྒཱའི་ཀླུང་གི་བྱེ་མ་སྙེད་གཉིས་པ་ལུས་པ་ན་ནམ་གང་གི་སྲོད་ལ་དམ་པའི་ཆོས་ནུབ་པར་གྱུར་པ་དེ་ཉིད་ཀྱི་རྣམ་གྱི་ཐོ་རངས་བྱང་ཆུབ་ཀྱི་ཤིང་བཀོད་པ་དུ་མའི་དྲུང་དུ་རྡོ་རྗེའི་གདན་ལ་འདུག་ནས་བླ་ན་མེད་པ་ཡང་
284b
དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་ཀུན་ནས་འཕགས་པ་དཔལ་བརྩེགས་རྒྱལ་པོ་ཞེས་བྱ་བར་འགྱུར་རོ། །ཁྱོད་ཀྱི་ཚེའི་ཚད་ནི་བསྐལ་པ་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་དྲུག་ཏུ་འགྱུར་ཏོ། །ཁྱོད་ཡོངས་སུ་མྱ་ངན་འདས་ནས་ཀྱང་དམ་པའི་ཆོས་ནི་\?\་ལ་པ་དུང་ཕྱུར་ཕྲག་དྲུག་དང་བྱེ་བ་ཕྲག་གསུམ་དུ་གནས་པར་འགྱུར་རོ། །སྤྱན་རས་གཟིགས་དབང་ཕྱུག་གིས་གསོལ་པ། བཅོམ་ལྡན་འདས་གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན། དེའི་སླད་དུ་གང་གི་ཚེ་བདག་བཅོམ་ལྡན་འདས་ཀྱི་ཞབས་ལ་ཕྱག་འཚལ་བ་དེའི་ཚེ། ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་སངས་རྒྱས་བཅོམ་ལྡན་འདས་གང་དག་བཞུགས་ཏེ། འཚོ་ཞིང་གཞེས་པ་དེ་དག་གིས་བདག་ལ་ལུང་སྟོན་པར་མཛད་ཅིང ། ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་པོ་ཐམས་ཅད་ཀྱི་སའང་གཡོ་བར་གྱུར་ལ། རི་ཐམས་ཅད་ཀྱི་གོར་མ་དང ། ཤིང་ལྗོན་པའི་རྩེ་མོ་དག་ལས་ཀྱང་ཡན་ལག་ལྔ་དང་ལྡན་པའི་སིལ་སྙན་གྱི་སྒྲའང་འབྱུང་བར་གྱུར་ཅིག་།སེམས་ཅན་ཐམས་ཅད་ཀྱིས་ཀྱང་འདོད་ཆགས་དང་བྲལ་བའི་སེམས་\?\་པར་གྱུར་ཅིག་།གང་ ་ཚེ་བྱང་ཆུབ་སེམས་དཔའ་
285a
༄#། །སྤྱན་རས་གཟིགས་ཀྱི་དབང་ཕྱུག་གིས་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྔས་ཕྱག་བྱས་པ་དེའི་ཚེ་སྔ་མ་བཞིན་དུ་སྦྱར་ཏེ།་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དག་གི་སའང་རབ་ཏུ་གཡོས། སངས་རྒྱས་བཅོམ་ལྡན་འདས་དེ་དག་ཀྱང་ལུང་སྟོན་པར་མཛད། རི་ཐམས་ཅད་ཀྱི་རྡོ་དང་།ཤིང་ལྗོན་པའི་རྩེ་མོ་དག་ལས་ཀྱང་ཡན་ལག་ལྔ་དང་ལྡན་པའི་སིལ་སྙན་གྱི་སྒྲ་བྱུང་བར་གྱུར། སེམས་ཅན་ཐམས་ཅད་ཀྱང་འདོད་ཆགས་དང་བྲལ་བའི་སེམས་ལ་གནས་པར་གྱུར་པ་དང།་བཅོམ་ལྡན་འདས་ཀྱིས་བཀའ་སྩལ་པ། སྙིང་རྗེ་ལྡན་པ་བསོད་ནམས་དག་ལ་ཡིད་དགའ་ལོངས། །ཕྱོགས་བཅུའི་སྐུ་མཆོག་མངའ་བ་རྣམས་ཀྱིས་ལུང་བསྟན་ཏེ། ཞིང་དང།་བཅས་པའི་ས་ཡང་རྣམ་དྲུག་རབ་ཏུ་གཡོས། །རྒྱལ་བ་གང་ཟག་གཙོ་བོ་དྲང་སྲོང་ཆེན་པོར་འགྱུར། །དེ་ནས་རྒྱལ་པོའི་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་གྱིས་རྒྱལ་བུ་གཉིས་པ་མུ་ཁྱུད་ཅེས་བྱ་བ་ལ་སྨྲས་པ། རིགས་ཀྱི་བུ་ཁྱོད་ཀྱིས་ཀྱང་དེ་བཞིན་དུ་ཡོངས་སུ་གཏོང་བ་ཆེན་པོ་འདི་ལ་རྗེས་སུ་ཡི་རང་བར་གྱིས་ཤིག། ཁྱོད་ཀྱིས་དགེ་བ་ཉེ་བར་བསྒྲུབས་པ་གང་ཡིན་པ་དེའང་སེམས་ཅན་ཐམས་ཅད་ཀྱི་ཕྱིར་ཐམས་ཅད་མཁྱེན་པ་ཉིད་དུ་ཡོངས་སུ་བསྔོས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
285b
སེམས་སྐྱེད་ཅིག་།དེ་ནས་རྒྱལ་བུ་གཞོན་ནུ་མུ་ཁྱུད་བཅོམ་ལྡན་འདས་ཀྱི་སྤྱན་སྔར་འདུག་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་བཅོམ་ལྡན་འདས་དགེ་སློང་གི་དགེ་འདུན་དཔག་ཏུ་མ་མཆིས་པ་དང་བཅས་པ་ལ་ཡོ་བྱད་ཐམས་ཅད་ཀྱིས་བསྙེན་བཀུར་བགྱིས་པ་གང་ལགས་པ་དང ། རྗེས་སུ་ཡི་རང་བ་ལས་བྱུང་བའི་བསོད་ནམས་ཀྱི་ཕུང་པོ་གང་ལགས་པ་དང ། ལུས་དང་ངག་དང་ཡིད་ཀྱིས་ལེགས་པར་སྤྱད་པའི་བསོད་ནམས་ཀྱི་ཕུང་པོ་གང་ལགས་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱི་སྟེ། སངས་རྒྱས་ཀྱི་ཞིང་ཉོན་མོངས་པ་ཅན་འདི་འབའ་ཞིག་ཏུ་བདག་གིས་བྱང་ཆུབ་ལ་རེག་པར་མི་བགྱི་བར། གཞོན་ནུ་སྤྱན་རས་གཟིགས་ཀྱི་དབང་ཕྱུག་འཇིག་རྟེན་གྱི་ཁམས་རིན་པོ་ཆེ་ཐམས་ཅད་ཡང་དག་པར་བསགས་པ་ཞེས་བགྱི་བ་དེར་བྱང་ཆུབ་ཀྱི་ཤིང་རིན་པོ་ཆེ་དུ་མས་བཀོད་པའི་དྲུང་དུ་མཆིས་ནས། བླ་ན་མེ་དང་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང ། དེ་བཞིན་གཤེགས་པ་འོད་ཟེར་ཀུན་ནས་འཕགས་པ་དཔལ་བརྩེགས་རྒྱལ་པོ་ཞེས་བགྱི་བར་འགྱུར་བ་ཆོས་འཆད་པར་བགྱི་བའི་སླད་དུ་བདག་གིས་དེ་ལ་གསོལ་བ་གདབ་པར་བགྱི་ཞིང ། ཇི་སྲིད་དུ་དེ་བཞིན་གཤེགས་པ་དེ་ཆོས་སྟོན་པར་མཛད་པ་དེ་སྲིད་
286a
༄#། །དུ་བདག་གིས་བྱང་ཆུབ་སེམས་དཔའི་སྤྱོད་པ་སྤྱད་པར་བགྱིའོ། །དེ་བཞིན་གཤེགས་པ་དེ་འདས་ཤིང་དམ་པའི་ཆོས་ནུབ་པ་ན་དེའི་འོག་ཏུ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང ། དེ་བཞིན་གཤེགས་པ་འོད་ཟེར་ཀུན་ནས་འཕགས་པ་དཔལ་བརྩེགས་རྒྱལ་པོའི་ཡོན་ཏན་བཀོད་པ་ཐམས་ཅད་ཇི་ལྟ་བར་བདག་གི་སངས་རྒྱས་ཀྱི་ཞིང་གི་ཡོན་ཏན་བཀོད་པའང་དེ་ལྟ་བུར་གྱུར་ཅིག་།དེ་བཞིན་དུ་བདག་ཀྱང་སངས་རྒྱས་ཀྱི་མཛད་པ་བགྱིད་པ་འགྱུར་ཞིང་དེ་བཞིན་དུ་ཡོངས་སུ་མྱ་ངན་ལས་འདས་པར་བགྱིའོ། །ཡོངས་སུ་མྱ་ངན་ལས་འདས་ནས་ཀྱང་དེ་བཞིན་དུ་དམ་པའི་ཆོས་ཀྱང་ཡུན་རིང་དུ་གནས་པར་གྱུར་ཅིག་།བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་ཀྱིས་ནི་གནས་པ་ཆེན་པོ་དོན་དུ་གཉེར་ཏེ། རིགས་ཀྱི་བུ་ཁྱོད་ཀྱིས་ཇི་ལྟར་རང་གིས་ཡོངས་སུ་བཟུང་བ་དེ་ལྟ་བུའི་གནས་འཐོབ་པར་འགྱུར་རོ། །རིགས་ཀྱི་བུ་ཁྱོད་ཀྱིས་ནི་སངས་རྒྱས་ཀྱི་ཞིང་དེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་པར་འགྱུར་ཏེ། དེ་བཞིན་གཤེགས་པ་རབ་ཏུ་བརྟན་པ་ཡོན་ཏན་ནོར་བུ་བརྩེགས་པའི་རྒྱལ་པོ་ཞེས་བྱ་བར་འགྱུར་རོ། །རིགས་ཀྱི་བུ་ཁྱོད་ཀྱིས་དེ་ལྟར་གནས་ཆེན་པོ་ཡོངས་སུ་བཟུང་བ་དེའི་ཕྱིར་རིགས་
286b
ཀྱི་བུ་ཁྱོད་མཐུ་ཆེན་ཐོབ་ཅེས་བྱ་བར་གྱུར་ཅིག་།དེས་གསོལ་བ། བཅོམ་ལྡན་འདས། གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་པ་ལྟ་ན། དེའི་སླད་དུ་གང་གི་ཚེ་བདག་བཅོམ་ལྡན་འདས་ཀྱི་ཞབས་ལ་ལུས་ཀྱི་ཡན་ལག་ལྔས་ཕྱག་འཚལ་བ་དེའི་ཚེ། ཕྱོགས་བཅུའི་སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་དག་གིས་བདག་ལ་ལུང་སྟོན་པར་མཛད་ཅིང ། སྣ་མའི་མེ་ཏོག་གི་ཆར་ཡང་རབ་ཏུ་འབབ་པར་གྱུར་ཅིག་།རིགས་ཀྱི་བུ། གང་གི་ཚེ་སྐྱེས་བུ་དམ་པ་མཐུ་ཆེན་ཐོབ་ཀྱིས། དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྔས་ཕྱག་བྱས་པ་དེའི་ཚེ། ཕྱོགས་བཅུའི་སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་ཀྱིས་ལུང་བསྟན་ཅིང་ས་ཆེན་པོའང་རྣམ་པ་དྲུག་ཏུ་རབ་ཏུ་གཡོས། སྣ་མའི་མེ་ཏོག་གི་ཆར་ཡང་བབ་པར་གྱུར་པ་དང ། བཅོམ་ལྡན་འདས་ཀྱིས་བཀའ་སྩལ་པ། བསོད་ནམས་མཐུ་ཤུགས་བརྟན་པར་གྱུར་པ་ལོངས། ཕྱོགས་བཅུའི་འཇིག་རྟེན་མགོན་པོས་ལུང་བསྟན་ཏེ། །ས་ཆེན་གཡོས་ཤིང་སྣ་མའི་ཆར་ཡང་བབ། །ཁྱོད་ནི་ལྷ་ཡི་ཚངས་པ་ལྟ་བུར་འགྱུར། །དེ་ནས་བྲམ་ཟེ་རྒྱ་མཚོའི་རྡུལ་གྱིས་སྔ་མ་བཞིན་དུ་སྦྱར་ཏེ། རྒྱལ་བུ་གསུམ་པ་དབང་པོའི་ཚོགས་ཞེས་བྱ་བ་ལ་སྨྲས་པ་དང ། ཐལ་མོ་སྦྱར་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་ལ་འདི་སྐད་ཅེས་གསོལ་ཏོ། །
287a
༄#། །བཅོམ་ལྡན་འདས། བདག་གིས་བཅོམ་ལྡན་འདས་དགེ་སློང་གིས་དགེ་འདུན་དང་བཅས་པ་ལ་ཡོ་བྱད་ཐམས་ཅད་ཀྱིས་བསྙེན་བཀུར་བགྱིས་པ་གང་ལགས་པ་དང ། བདག་གི་ལུས་དང་ངག་དང་ཡིད་ཀྱིས་ལེགས་པར་སྤྱད་པ་གང་ལགས་པ་དང ། རྗེས་སུ་ཡི་རང་བ་འདི་དང་ལྡན་པའི་བསོད་ནམས་ཀྱི་ཕུང་པོ་གང་ལགས་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །སངས་རྒྱས་ཀྱི་ཞིང་ཉོན་མོངས་པ་ཅན་དུ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་བགྱི་ཞིང་ཤིན་ཏུ་མྱུར་བར་ཐོབ་པར་ཡང་མི་བགྱི་ལགས་སོ། །ཇི་སྲིད་དུ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ་བ་དེ་སྲིད་དུ་བྱང་ཆུབ་ཀྱི་སྤྱད་པ་སྤྱོད་ཅིང ། ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་གཞན་དང་གཞན་དག་གི་སངས་རྒྱས་བཅོམ་ལྡན་འདས་རྣམས་མཐོང་བར་གྱུར་ཅིག་།བདག་བྱང་ཆུབ་སེམས་དཔའི་སྤྱད་པ་སྤྱོད་པ་ན་གང་དག་བདག་གིས་དང་པོར་བྱང་ཆུབ་ཡང་དག་པར་འཛིན་དུ་སྩལ་པ་དང ། བདག་གིས་གང་དག་དེར་དང་པོར་བྱང་ཆུབ་མཆོག་ཏུ་སེམས་བསྐྱེད་དེ་བྱང་ཆུབ་ཀྱི་སེམས་ལ་རབ་ཏུ་བཀོད་པ་དང ། གང་དག་བདག་གིས་ཕ་རོལ་ཏུ་ཕྱིན་པ་རྣམས་
287b
ཡང་དག་པར་འཛིན་དུ་སྩལ་ཅིང་བཙུད་དེ་རབ་ཏུ་བཀོད་པའི་སངས་རྒྱས་བཅོམ་ལྡན་འདས་གང་དག་བདག་གིས་བྱང་ཆུབ་ཡང་དག་པར་འཛིན་དུ་སྩལ་པ་དེ་དག་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་ཞིང་དག་ན་ཆོས་སྟོན་པར་མཛད་པ་རྣམས་ཀྱང་བདག་གི་ལྷའི་མིག་གིས་མཐོང་བར་གྱུར་ཅིག་།བདག་བྱང་ཆུབ་སེམས་དཔའི་སྤྱད་པ་སྤྱོད་པ་ན་དེ་ལྟར་སངས་རྒྱས་ཀྱི་མཛད་པ་བགྱིད་ཅིང ། ཇི་སྲིད་དུ་བདག་གིས་སངས་རྒྱས་ཀྱི་ཞིང་དུ་སེམས་ཅན་གང་དག་སྐྱེ་བར་འགྱུར་བ་དེ་དག་འདི་ལྟ་སྟེ། དཔེར་བགྱི་ན། ཚངས་རིས་ཀྱི་ལྷ་རྣམས་ལྟ་བུར་འགྱུར་བ་དེ་སྲིད་དུ་བདག་གིས་སེམས་ཅན་རྣམས་ཀྱི་བསམ་པ་ཡོངས་སུ་སྦྱོར་བར་བགྱི་ཞིང་བྱང་ཆུབ་སེམས་དཔའི་སྤྱོད་པ་སྤྱད་པར་བགྱིའོ། །ཅི་ནས་ཀྱང་སྟོང་གསུམ་གྱི་སྟོང་ཆེན་པོ་གངྒཱའི་ཀླུང་གི་བྱེ་མ་སྙེད་དག་སངས་རྒྱས་ཀྱི་ཞིང་གཅིག་ཏུ་འགྱུར་བ་དེ་ལྟར་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་སྦྱང་བར་བགྱི་སྟེ། སངས་རྒྱས་ཀྱི་ཞིང་དེའི་ར་བ་དག་ཀྱང་སྲིད་པའི་རྩེ་མོའི་མཐར་ཐུག་ཅིང་རིན་པོ་ཆེ་དུ་མ་ཀུན་ནས་གནས་པ་དང ། རིན་པོ་ཆེ་སྣ་ཚོགས་དག་གིས་སྤྲས་པར་གྱུར་ཅིག་།སངས་རྒྱས་ཀྱི་ཞིང་དེའི་ས་གཞི་ཐམས་ཅད་ནི་བེ་ཌཱུརྱ་འབའ་ཞིག་ལས་བགྱིས་པར་གྱུར་ཅིང་རྡུལ་དང ། གོར་མ་དང ། གསེག་མ་མ་མཆིས་ཤིང་ས་གཞི་རྙོག་པ་དང་འདྲེས་པ་མ་མཆིས་པར་གྱུར་ཅིག་།དེ་ན་བུད་
288a
༄#། །མེད་ནི་མིང་དུ་གདགས་པའང་མ་མཆིས་པར་གྱུར་ཅིག་།སེམས་ཅན་ཐམས་ཅད་ནི་བརྫུས་ཏེ་སྐྱེ་བར་གྱུར་ཅིག་།དེ་ན་སེམས་ཅན་རྣམས་ཟས་ཁམས་གྱིས་བཟའ་འཚལ་བ་མ་མཆིས་པར་གྱུར་ཅིག་།དེ་ནས་སེམས་ཅན་ཐམས་ཅད་དགའ་བའི་ཟས་དང་ཆོས་ཀྱི་ཟས་དང་ལྡན་པར་གྱུར་ཅིག་།སངས་རྒྱས་ཀྱི་ཞིང་དེ་ནི་ཉན་ཐོས་དང་རང་སངས་རྒྱས་རྣམས་ནི་གདགས་སུའང་མ་མཆིས་པར་གྱུར་ཅིག་།སངས་རྒྱས་ཀྱི་ཞིང་དེ་ཐ་བ་དང ། དྲི་མ་དང ། ཞེ་སྡང་དང ། འཆབ་པ་དང་བྲལ་ཞིང་ཚངས་པར་སྤྱོད་པ་ཡོངས་སུ་དག་པ་ལ་གནས་པའི་བྱང་ཆུབ་སེམས་དཔའ་འབའ་ཞིག་གིས་ཡོངས་སུ་གང་བར་གྱུར་ཅིག་།དེ་ན་བྱང་ཆུབ་སེམས་དཔའ་ཐམས་ཅད་ཀྱང་སྐྲ་བྲེགས་ཤིང་ཆོས་གོས་ངུར་སྨིག་འཚལ་བ་ཤ་སྟག་འབྱུང་བར་གྱུར་ཅིག་།སྐྱེས་མ་ཐག་ཏུ་འོད་ཆེན་པོ་དང་ལྡན་པར་གྱུར་ཅིག་།དེ་དག་གི་སུ་ག་པར་རིན་པོ་ཆེའི་ལྷུང་བཞེད་རོ་བྲོ་བ་སྣ་ཚོགས་ཀྱིས་ཡོངས་སུ་གཏམས་པ་དག་འབྱུང་བར་གྱུར་ཅིག་།བྱུང་མ་ཐག་ཏུ་འདི་སྙམ་དུ་གང་བདག་ཅག་ཟས་ཁམས་ཀྱིས་ཟ་བ་ནི་བདག་ཅག་གི་ཆ་མ་ཡིན་གྱི། གང་བདག་ཅག་འཇིག་རྟེན་གྱི་ཁམས་གཞན་དག་ཏུ་དོང་ལ་སངས་རྒྱས་བཅོམ་ལྡན་འདས་བཞུགས་ཏེ་འཚོ་ཞིང་གཞེས་པ་དག་ལ་ཞལ་ཟས་འདི་འབུལ་བར་བྱའོ། །སངས་རྒྱས་ཀྱི་ཉན་ཐོས་རྣམས་དང ། སྐྱེ་བོ་སྡུག་བསྔལ་
288b
པ་རྣམས་ལའང་སྦྱིན་པར་བྱའོ། །ཡི་དྭགས་ཀྱི་གནས་རྣམས་སུ་སོང་ལ་བཀྲེས་པ་དང ། སྐོམ་པས་ལུས་རབ་ཏུ་འབར་བའི་སེམས་ཅན་རྣམས་ལའང་ཟས་འདི་སྦྱིན་པར་བྱའོ་སྙམ་པའི་དྲན་པ་ཐོབ་པར་གྱུར་ཅིག་།བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་དེ་ལྟར་སེམས་བསྐྱེད་མ་ཐག་ཏུ་བསམ་གྱིས་མི་ཁྱབ་པའི་སྤྱོད་པ་དང་ལྡན་པའི་ཏིང་ངེ་འཛིན་ཀྱང་ཐོབ་པར་གྱུར་ཅིག་།ཏིང་ངེ་འཛིན་དེ་ཐོབ་ནས་ཕྱོགས་བཅུའི་སངས་རྒྱས་ཀྱི་ཞིང་དཔག་ཏུ་མ་མཆིས། གྲངས་མ་མཆིས་པ་གཞན་དག་ཏུ་ཐོགས་པ་མ་མཆིས་པར་མཆི་བར་འགྱུར་ཞིང ། སངས་རྒྱས་བཅོམ་ལྡན་འདས་བཞུགས་ཏེ་འཚོ་ཞིང་གཞེས་པ་དག་དང ། ཉན་ཐོས་དང ། སེམས་ཅན་གཞན་དག་ལའང་ཞལ་ཟས་འབུལ་བར་གྱུར་ཅིག་།དགའ་བས་ཕུལ་ནས་ཀྱང་ཆོས་བཤད་པར་བགྱིས་ནས་དེ་ཉིད་ཀྱི་སྔ་དྲོས་རང་གི་སངས་རྒྱས་ཀྱི་ཞིང་དུ་སླར་མཆི་བར་གྱུར་ཅིག་།གོས་རིན་པོ་ཆེ་དག་ལའང་དེ་བཞིན་དུ་སྦྱར་ཏེ། དེ་ཉིད་ཀྱི་སྔ་དྲོའི་བར་གྱིས་རང་གི་སངས་རྒྱས་ཀྱི་ཞིང་དུ་སླར་མཆིས་ནས་གཅིག་ལ་གཅིག་གོས་དག་བསྐོན་པར་ཡང་གྱུར་ཅིག་།སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་དེ་དག་ལ་ལོངས་སྤྱོད་དང ། ཡོངས་སུ་སྤྱོད་པ་གང་ཇི་སྙེད་མཆིས་པ་དེ་དག་ཐམས་ཅད་ཀྱང་སངས་རྒྱས་བཅོམ་ལྡན་འདས་རྣམས་དང ། ཉན་ཐོས་རྣམས་དང ། སེམས་ཅན་གཞན་དག་དང་ཐུན་མོང་དུ་བགྱིས་ནས་སླད་ཀྱིས་
289a
༄#། །བདག་ཡོངས་སུ་སྤྱོད་པར་གྱུར་ཅིག་།སངས་རྒྱས་ཀྱི་ཞིང་དེ་མ་ཁོམ་པ་བརྒྱད་དང་བྲལ་པར་གྱུར་ཅིག་།དེ་ན་སྡུག་བསྔལ་གྱི་སྒྲ་མ་མཆིས་པར་གྱུར་ཅིག། བསླབ་པ་བླང་བའི་སྒྲ་མ་མཆིས་པར་གྱུར་ཅིག་།ལྟུང་བྱེད་ལས་བསླང་བའི་སྒྲ་མ་མཆིས་པར་གྱུར་ཅིག་།སངས་རྒྱས་ཀྱི་ཞིང་དེར་རིན་པོ་ཆེ་འབུམ་ཕྲག་དུ་མ་དག་བསགས་པར་གྱུར་ཅིག་།རིན་པོ་ཆེ་དུ་མས་སྤྲས་ཤིང་ནོར་བུ་ལྟར་ཀུན་ཏུ་སྣང་བར་གྱུར་ཅིག་།ནོར་བུ་རིན་པོ་ཆེ་གང་དག་ཕྱོགས་བཅུ་རྣམས་སུ་སྔོན་མ་མཐོང་བ་དང ། སྔོན་མ་ཐོས་པའི་ནོར་བུ་རིན་པོ་ཆེ་དེ་དག་སྤྱོད་པར་གྱུར་ཅིག་།ནོར་བུ་རིན་པོ་ཆེ་དག་གི་མིང་བརྗོད་ན་ལོ་བྱེ་བས་ཀྱང་མི་བས་པར་གྱུར་ཅིག་།བྱང་ཆུབ་སེམས་དཔའ་གང་དག་སངས་རྒྱས་ཀྱི་ཞིང་གསེར་ལས་གྲུབ་པར་མཐོང་བར་འཚལ་ནའང་དེ་གསེར་ལས་གྲུབ་པར་གནས་པར་འགྱུར་བ་དང ། གང་དངུལ་ལས་གྲུབ་པར་འཚལ་བ་དེས་དངུལ་ལས་གྲུབ་པར་མཐོང་ཡང་དེ་ལ་གསེར་ལས་གྲུབ་པའང་ཉམས་པར་མི་འགྱུར་བ་དང ། དེ་བཞིན་དུ་སྦྱར་ཏེ། གང་ཤེལ་ལས་གྲུབ་པ་དང ། བཻ་ཌཱུརྱ་ལས་གྲུབ་པ་དང ། རྡོའི་སྙིང་པོ་ལས་གྲུབ་པ་དང ། མུ་ཏིག་དམར་པོ་ལས་གྲུབ་པ་དང ། སྤུག་ལས་གྲུབ་པར་འཚལ་ན་སངས་རྒྱས་ཀྱི་ཞིང་དེ་རིན་པོ་ཆེ་རྣམ་པ་དེ་ལྟ་བུ་དག་ཏུ་མཐོང་བར་གྱུར་ཅིག་།བྱང་ཆུབ་སེམས་དཔའི་སངས་རྒྱས་ཀྱི་
289b
ཞིང་དེ་ཨ་ག་རུ་ལས་གྲུབ་པ་དང ། རྒྱ་སྤོས་ལས་གྲུབ་པ་དང ། ཏ་མ་ལའི་ལོ་མ་ལས་གྲུབ་དང་ཙནྡན་སྤྲུལ་གྱི་སྙིང་པོ་ལས་གྲུབ་པ་དང ། ཙནྡན་ས་མཆོག་པ་ལས་གྲུབ་པར་མཐོང་བར་འཚལ་ནའང་དེ་ལ་དེ་བཞིན་དུ་གྱུར་ཅིག་།ཇི་ལྟ་ཇི་ལྟར་ཅི་འདྲ་བར་མཐོང་བར་འཚལ་བ་དེ་ལྟ་དེ་ལྟར་དེ་དང་འདྲ་བར་མཐོང་བར་གྱུར་ཅིག་།གཅིག་གིས་གཉིས་པའི་སྨོན་ལམ་མཐོང་བར་མི་འགྱུར་ཞིང ། ཐམས་ཅད་ཀྱི་སྨོན་ལམ་ཡང་ཡོངས་སུ་རྫོགས་པར་གྱུར་ཅིག་།སངས་རྒྱས་ཀྱི་ཞིང་དེ་ན་ཉི་མ་དང་ཟླ་བར་མངོན་པའང་མ་མཆིས་ཤིང ། དེར་བྱང་ཆུབ་སེམས་དཔའ་འོད་ཅན་དག་སྐྱེ་བར་གྱུར་ཅིག་།གཞན་ཡང་འོད་ཇི་ལྟ་བུ་དག་འཚལ་བ་དེ་ལྟ་བུ་དག་ཐ་ན་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཚུན་ཆད་དུའང་གཏོང་བར་གྱུར་ཅིག་།སངས་རྒྱས་ཀྱི་ཞིང་དེ་ན་མེ་ཏོག་ཁ་བྱེ་བ་མ་གཏོགས་པར་མཚན་མོ་དང ། ཉིན་མོ་དག་མིང་ཡང་མ་མཆིས་པར་གྱུར་ཅིག་།སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་གང་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་བ་དེ་དགའ་ལྡན་དག་ཏུ་ཚེ་བས་པར་བགྱིས་ནས་འཇིག་རྟེན་གྱི་ཁམས་གཞན་དག་ཏུ་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་མ་གཏོགས་པར་གྲང་བ་དང ། ཚ་བ་དང ། ནད་དང ། མི་བདེ་བ་དང ། རྒ་བ་དང ། འགུམ་པའང་མ་མཆིས་པར་གྱུར་ཅིག་།སངས་རྒྱས་ཀྱི་
290a
༄#། །ཞིང་དེ་ན་འགུམ་པ་མ་མཆིས་པར་འགྱུར་ཞིང་སྟེང་གི་བར་སྣང་ལ་དེ་བཞིན་གཤེགས་པ་ལྟར་བླ་ན་མེད་པའི་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་གྱུར་ཅིག་།བྱང་ཆུབ་སེམས་དཔའ་རྣམས་ཀྱང་ལོངས་སྤྱོད་དང ། ཡོངས་སུ་སྤྱོད་པ་ཇི་ལྟ་བུ་དག་འཚལ་བ་དེ་ལྟ་བུ་དག་མངོན་པར་འགྲུབ་པར་གྱུར་ཅིག། སངས་རྒྱས་ཀྱི་ཞིང་ཀུན་ཏུ་ནམ་མཁའི་དཀྱིལ་ནས་སིལ་སྙན་བྱེ་བ་ཁྲག་ཁྲིག་འབུམ་ཕྲག་དུ་མ་དག་སྒྲ་འཁྲོལ་བར་གྱུར་ཅིག་།སིལ་སྙན་དེ་དག་ལས་ཀྱང་ཕ་རོལ་ཏུ་ཕྱིན་པ་རྣམས་ཀྱི་སྒྲ་འབྱུང་བ་དང ། སངས་རྒྱས་ཀྱི་སྒྲ་དང ། ཆོས་ཀྱི་སྒྲ་དང ། དགེ་འདུན་གྱི་སྒྲ་དང ། བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཀྱི་སྒྲ་འབྱུང་བར་འགྱུར་བ་དང ། བྱང་ཆུབ་སེམས་དཔའ་རྣམས་ཇི་ལྟར་མོས་པ་དེ་ལྟ་བུའི་སྒྲ་ཐོས་པར་འགྱུར་བ་མ་གཏོགས་པར་འདོད་པ་དང་ལྡན་པའི་སྒྲ་དག་མི་འབྱུང་བར་གྱུར་ཅིག་།བཅོམ་ལྡན་འདས་བདག་བྱང་ཆུབ་སེམས་དཔའི་སྤྱད་པ་སྤྱོད་པ་ན་བདག་གིས་སངས་རྒྱས་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མ་མཆིས། གྲངས་མ་མཆིས་པ་དག་གི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཇི་སྙེད་མཐོང་བར་དག་ལས་ཉན་ཐོས་དང ། སངས་རྒྱས་ཀྱི་བཀོད་པ་རྣམས་དང ། སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པའི་བཀོད་པ་རྣམས་མ་
290b
གཏོགས་པར་བཀོད་པ་དེ་དག་དང ། རྒྱན་དེ་དག་དང ། རྟགས་དེ་དག་དང ། མཚན་མ་དེ་དག་དང ། གནས་དེ་དག་དང ། ངོ་མཚར་དེ་དག་དང ། སྨོན་ལམ་དེ་དག་ཐམས་ཅད་བདག་གིས་སངས་རྒྱས་ཀྱི་ཞིང་ན་མཆིས་པར་གྱུར་ཅིག་།སངས་རྒྱས་ཀྱི་ཞིང་དེ་ན་སེམས་ཅན་དམྱལ་བ་དང ། དུད་འགྲོ་དང ། ཡི་དྭགས་རྣམས་མ་མཆིས་པར་གྱུར་ཅིག་།རི་རབ་དང ། ཁོར་ཡུག་དང ། ཁོར་ཡུག་ཆེན་པོ་རྣམས་དང ། གོར་མ་དང ། རྡུལ་གྱི་རི་རྣམས་ཀྱང་མ་མཆིས་པར་གྱུར་ཅིག་།རྒྱ་མཚོ་ཆེན་པོའང་མ་མཆིས་པར་གྱུར་ཅིག་།སངས་རྒྱས་ཀྱི་ཞིང་དེ་ལྷའི་ལས་ཤིན་ཏུ་འདས་པའི་ཤིང་ལྗོན་པ་སྣ་ཚོགས་དག་དང ། ལྷའི་མེ་ཏོག་མནྡར་བ་དང ། མནད་ར་བ་ཆེན་པོ་དག་གིས་ཀུན་ཏུ་གང་བར་གྱུར་པ་མ་གཏོགས་པར་ཤིང་ལས་གྲུབ་པའི་ལྗོན་པ་གཞན་དག་མ་མཆིས་པར་གྱུར་ཅིག་།དེ་ན་དྲི་ང་བ་མ་མཆིས་པར་གྱུར་ཅིག་།སངས་རྒྱས་ཀྱི་ཞིང་དེ་སྤོས་རྒྱ་ཆེ་ཞིང་ཡངས་པ་སྣ་ཚོགས་དག་གིས་ཁྱབ་པར་གྱུར་ཅིག་།དེར་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་ཤ་སྟགས་འབྱུང་བར་གྱུར་ཅིག་།དེ་ན་སེམས་ཅན་གཅིག་ཀྱང་དེ་ནས་ཤི་འཕོས་ནས་དགའ་ལྡན་མ་གཏོགས་པར་གཞན་དུ་སྐྱེ་བར་མི་འགྱུར་ཞིང ། དེ་ནས་ཤི་འཕོས་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་།བཙུན་པ་བཅོམ་
291a
༄#། །ལྡན་འདས། བདག་གིས་ཇི་སྲིད་དུ་སྐྱེས་བུ་ཆེན་པོའི་རྩལ་རྣམ་པ་དེ་ལྟ་བུ་དག་མངོན་པར་མ་བསྒྲུབས་པ་དེ་སྲིད་དུ་བྱང་ཆུབ་སེམས་དཔའི་སྤྱོད་པ་སྤྱད་པར་བགྱིའོ། །སངས་རྒྱས་ཀྱི་ཞིང་དེ་ལྟར་གཞག་པར་བགྱི་སྟེ། སངས་རྒྱས་ཀྱི་ཞིང་དེ་དེ་ལྟ་བུའི་སེམས་ཅན་བསམ་པ་དག་པ་དག་དང ། བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་དང་བཅས་པ་དག་གིས་ཀུན་ཏུ་བལྟམས་ཏེ་གཞག་པར་བགྱིའོ། །དེར་བྱང་ཆུབ་སེམས་དཔའ་གང་བདག་གིས་དང་པོར་བྱང་ཆུབ་ཡང་དག་པར་འཛིན་དུ་མ་སྩལ་པ་དང ། ཕ་རོལ་ཏུ་ཕྱིན་པ་རྣམས་ལ་མ་བཙུད་པ་དག་མ་མཆིས་པར་གྱུར་ཅིག་།གང་དག་བདག་གིས་དང་པོར་བྱང་ཆུབ་ཡང་དག་པར་འཛིན་དུ་སྩལ་པ་དང ། ཕ་རོལ་ཏུ་ཕྱིན་པ་རྣམས་ལ་བཙུད་པའི་བྱང་ཆུབ་སེམས་དཔའ་ཐམས་ཅད་དེར་སྐྱེ་བར་གྱུར་ཅིག་།སངས་རྒྱས་ཀྱི་ཞིང་འདིའང་དེ་ཉིད་ཀྱི་ཁོངས་སུ་གཏོགས་པར་བགྱི་ཞིང་འདི་དག་ཐམས་ཅད་ཀྱི་སྡུག་བསྔལ་ཡང་རབ་ཏུ་ཞི་བར་བགྱིའོ། །བཙུན་པ་བཅོམ་ལྡན་འདས། བདག་བྱང་ཆུབ་སེམས་དཔར་གྱུར་ཅིང་སྐྱེས་བུའི་རྩལ་དེ་ལྟ་བུ་དག་བསྒྲུབས་ནས་དེའི་འོག་ཏུ་སངས་རྒྱས་ཀྱི་ཞིང་དེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་།བདག་གི་བྱང་ཆུབ་ཀྱི་ཤིང་ནི་རིན་པོ་ཆེ་སྣ་བདུན་
291b
རྣམ་པར་བཀྲ་བར་སྣང་བ་ཞེས་བགྱི་བར་འགྱུར་ཞིང ། སྦོམས་སུ་ནི་གླིང་བཞི་པ་ཁྲི་མཆིས་པར་གུར་པ་ལ། ཁོར་ཁོར་ཡུག་གི་ཁྱོན་ནི་སྟོང་གསུམ་པ་བཅུ་མཆིས་པར་གྱུར་ཅིག ། བྱང་ཆུབ་ཀྱི་ཤིང་དེའི་དྲི་དང ། འོད་ཀྱིས་སངས་རྒྱས་ཀྱི་ཞིང་མཐའ་དག་ཁྱབ་པར་གྱུར་ཅིག་།དེའི་དྲུང་དུ་རིན་པོ་ཆེ་སྣ་ཚོགས་ཀྱིས་སྤྲས་པའི་རྡོ་རྗེའི་གདན་རབ་ཏུ་ཞི་བ་བཟོད་པའི་ཡེ་ཤེས་ཤིན་ཏུ་འབྱེད་པའི་དྲི་མ་ཡང་དག་པར་གཞོལ་བ་ཞེས་བགྱི་བ་གླིང་བཞི་པ་ལྔའི་ཁྱོན་ཙམ་མཆིས་ལ་འཕང་དུ་ནི་དཔག་ཚད་བརྒྱད་སྟོང་བཞི་བརྒྱ་མཆིས་པར་གྱུར་ཅིག། བྱང་ཆུབ་ཀྱི་ཤིང་དེའི་དྲུང་དུ་རྡོ་རྗེའི་གདན་ལ་བདག་སྐྱིལ་མོ་ཀྲུང་བཅས་ཏེ་མཆིས་ནས། ཡུད་ཙམ་དེ་ཉིད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་།ཡོངས་སུ་མྱ་ངན་ལས་འདས་པའི་དུས་ཀྱི་བར་དུ་སྐྱིལ་མོ་ཀྲུང་དེ་མི་འཇིག་མི་འགྲོལ་བར་འགྱུར་ཞིང ། བྱང་ཆུབ་ཀྱི་ཤིང་དེའི་དྲུང་ནས་མི་ལྡང་བར་གྱུར་ཅིག་།བདག་བྱང་ཆུབ་ཀྱི་ཤིང་དྲུང་དུ་གནས་ཤིང་རྡོ་རྗེའི་གདན་ལ་མཆིས་བཞིན་དུ་སངས་རྒྱས་དང་བྱང་ཆུབ་སེམས་དཔའ་སྤྲུལ་པ་དག་སངས་རྒྱས་ཀྱི་ཞིང་བགྲང་བ་ལས་འདས་པ་གཞན་དག་ཏུ་འགྱེད་པར་གྱུར་ཅིག་།སངས་རྒྱས་རེ་རེས་ཀྱང་སྔ་དྲོ་གཅིག་ལ་སེམས་ཅན་རྣམས་ལ་ཆོས་སྟོན་ཅིང་དེ་ཉིད་ཀྱི་སྔ་དྲོ་ལའང་སེམས་ཅན་བགྲང་བ་ལས་འདས་པ་
292a
༄#། །སྙེད་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་སྩོལ་དང ། རབ་ཏུ་འགོད་པ་དང ། ཕྱིར་མི་ལྡོག་པ་ལ་འགོད་པར་གྱུར་ཅིག་།དེ་བཞིན་དུ་བྱང་ཆུབ་སེམས་དཔའི་སྤྲུལ་པ་དག་ཀྱང་བྱང་ཆུབ་སེམས་དཔའི་བྱ་བ་བགྱིད་པར་གྱུར་ཅིག་།བདག་གིས་བྱང་ཆུབ་ཐོབ་པ་ན་ཕྱོགས་བཅུའི་འཇིག་རྟེན་གྱི་ཁམས་བགྲང་བ་ལས་ཡང་དག་པར་འདས་པ་གཞན་དག་ཏུའང་བདག་གི་ལུས་གདའ་བར་གྱུར་ཅིག་།སེམས་ཅན་གང་དག་གི་མིག་གི་དབང་པོས་བདག་གི་ལུས་མཚན་གྱིས་བརྒྱན་པ་མཐོང་བར་གྱུར་པའི་སེམས་ཅན་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་ཅིག་།སེམས་ཅན་དེ་དག་བྱང་ཆུབ་ཅིང་ཡོངས་སུ་མྱ་ངན་ལས་འདས་ཀྱི་བར་དུའང་སངས་རྒྱས་བཅོམ་ལྡན་འདས་རྣམས་དང་མི་འབྲལ་བར་འགྱུར་ཞིང་དེར་དབང་པོ་རྣམས་མ་ཚང་བར་མ་གྱུར་ཅིག་།དེ་ན་བྱང་ཆུབ་སེམས་དཔའ་གང་དག་བདག་ལ་བལྟ་བར་འཚལ་བ་དེ་དག་གང་དང་གང་དུ་མཆི་བ་དང ། སླར་ལྡོག་པ་དང ། འཆག་པ་དང ། འགྲེང་བ་དང ། མཆིས་པ་ན་བྱང་ཆུབ་སེམས་དཔའ་དེ་དག་ཐམས་ཅད་ཀྱིས་སངས་རྒྱས་ཡིད་ལ་བགྱིད་པའི་སེམས་བསྐྱེད་མ་ཐག་ཏུ་བདག་བྱང་ཆུབ་ཀྱི་ཤིང་དྲུང་ན་མཆིས་པ་མཐོང་བར་གྱུར་ཅིག་།མཐོང་ནས་ཀྱང་གང་
292b
དག་ཆོས་ལ་ཐེ་ཚོམ་དུ་གྱུར་པ་དེས་མཐོང་མ་ཐག་ཏུ་དེ་དང་བྲལ་བར་གྱུར་ནས། ཐེ་ཚོམ་ལས་གྲོལ་བར་གྱུར་ཅིང་ཆོས་ཀྱི་ཚིག་མ་བསྟན་པའི་དོན་ཀྱང་འཚལ་བར་གྱུར་ཅིག་།བདག་གི་ཚེ་ནི་དཔག་ཏུ་མ་མཆིས་པར་གྱུར་ལ། ཐམས་ཅད་མཁྱེན་པའི་ཡེ་ཤེས་མ་གཏོགས་པར་གཞན་སུས་ཀྱང་བགྲང་བར་རྔོ་མི་ཐོགས་པར་གྱུར་ཅིག་།དེ་ན་བྱང་ཆུབ་སེམས་དཔའ་དག་ཀྱང་དཔག་ཏུ་མ་མཆིས་པར་གྱུར་ཅིག་།སྐད་ཅིག་གང་ལ་བདག་སངས་རྒྱས་ཀྱི་ཞིང་དེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དང།་ཡོངས་སུ་མྱ་ངན་ལས་འདའ་བ་ཆེན་པོའི་བར་གྱི་སྐད་ཅིག་དེ་ཉིད་ལ་སངས་རྒྱས་ཀྱི་ཞིང་དེར་བྱང་ཆུབ་སེམས་དཔའ་རྣམས་ཀྱང་སྐྲ་བྲེགས་ཤིང་ཆོས་གོས་ངུར་སྨྲིག་འཚལ་བ་ཤ་སྟག་འབྱུང་བར་གྱུར་ཅིག་།སངས་རྒྱས་ཀྱི་ཞིང་དེར་སེམས་ཅན་གཅིག་ཀྱང་སྐྲ་རིང་ཞིང་གོས་དཀར་པོ་འཚལ་བར་མི་འགྱུར་ལ། ཐམས་ཅད་ཀྱང་དགེ་སྦྱོང་གི་ཁ་དོག་ཏུ་འགྱུར་ཞིང་དགེ་སྦྱོང་གི་ཚུལ་དུ་གནས་པར་གྱུར་ཅིག་།བཅོམ་ལྡན་འདས་ཀྱིས་བཀའ་སྩལ་པ། སྐྱེས་བུ་དམ་པ། ལེགས་སོ། །ལེགས་སོ། །ཁྱོད་ཀྱང་མཁས་ཤིང་གསལ་ལ་ཡིད་གཞུངས་པ་ཡིན་ཏེ། ཁྱོད་ཀྱིས་ནི་སྨོན་ལམ་ཤིན་ཏུ་བཟང་པོར་བཏབ་བོ། །རིགས་ཀྱི་བུ་ཁྱོད་ནི་ཤིན་ཏུ་ཡོན་ཏན་དང་ལྡན་ཞིང་ཤིན་ཏུ་ཡེ་ཤེས་དང་ལྡན་པས་ནི་གང་གི་ཕྱིར་
293a
༄#། །སེམས་ཅན་ཐམས་ཅད་ཀྱི་དོན་གྱི་ཕྱིར་རབ་མཆོག་གི་བློ་གྲོས་བཀྲ་ཤིས་པར་བྱས་ཞིང ། སངས་རྒྱས་ཀྱི་ཞིང་གི་ཡོན་ཏན་བཀོད་པ་རབ་མཆོག་ཡོང་སུ་བཟུང་བས་དེའི་ཕྱིར་རིགས་ཀྱི་བུ་ཁྱོད་འཇམ་དཔལ་ཞེས་བྱ་བར་གྱུར་ཅིག་།འཇམ་དཔལ་ཁྱོད་ནི་མ་འོངས་པའི་དུས་ན་བསྐལ་པ་གྲངས་མེད་པ་གངྒཱའི་ཀླུང་གཉིས་ཀྱི་བྱེ་མ་སྙེད་འདས་ནས་གྲངས་མེད་པ་གསུམ་པ་ལ་བབ་པ་ན་ལྷོ་ཕྱོགས་ལོགས་སུ་འཇིག་རྟེན་གྱི་ཁམས་དག་པ་རྡུལ་བྲལ་ཡང་དག་བསགས་ཞེས་བྱ་བ་ཞིག་འབྱུང་བར་འགྱུར་ཏེ། དེར་འཇིག་རྟེན་གྱི་ཁམས་མི་མཇེད་ཀྱང་འདུས་ཤིང་ཁོངས་སུ་ཆུད་པར་འགྱུར་ལ། སངས་རྒྱས་ཀྱི་ཞིང་དེར་དེ་ལྟ་བུའི་ཡོན་ཏན་བཀོད་པ་འབྱུང་བར་འགྱུར་ཏེ། འཇམ་དཔལ་ཁྱོད་ནི་དེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་གཟིགས་ཞེས་བྱ་བར་འགྱུར་རོ། །ཁྱོད་ཀྱི་བྱང་ཆུབ་སེམས་དཔའི་འཁོར་ཀྱང་དེ་ལྟ་བུར་ཡོངས་སུ་དག་པར་འགྱུར་རོ། །ཁྱོད་བྱང་ཆུབ་སེམས་དཔར་གྱུར་པ་ན་ཇི་ལྟར་སྨོན་ལམ་བཏབ་པ་ལྟར་ཁྱོད་ཀྱི་སྨོན་ལམ་དེ་དག་ཐམས་ཅད་ཀྱང་འགྲུབ་པར་འགྱུར་ཏེ། དེ་བས་ན་ཁྱོད་ནི་སངས་རྒྱས་བྱེ་བ་ཕྲག་མང་པོ་ལས་དགེ་བའི་རྩ་བ་བསྐྱེད་
293b
པར་འགྱུར་རོ། །འཇམ་དཔལ། དེའི་ཕྱིར་ཁྱོད་ནི་སེམས་ཅན་རྣམས་ཀྱི་སྨན་ལྟ་བུར་འགྱུར་ཞིང་བསམ་པ་ཡོངས་སུ་སྦྱོང་བར་བྱེད་པར་འགྱུར་ལ། ཉོན་མོངས་པ་ཡོངས་སུ་འཇོམས་པར་བྱེད་པ་དང ། དགེ་བའི་ཕྱོགས་རྣམ་པར་འཕེལ་བར་བྱེད་པར་ཡང་འགྱུར་རོ། །འཇམ་དཔལ་གྱིས་གསོལ་པ། བཅོམ་ལྡན་འདས། གལ་ཏེ་བདག་གིས་ཇི་ལྟར་སྨོན་ལམ་བཏབ་པའི་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན། དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས་པ་དག་ན་སངས་རྒྱས་བཅོམ་ལྡན་འདས་གང་དག་བཞུགས་ཏེ་འཚོ་ཞིང་གཞེས་ལ་སེམས་ཅན་རྣམས་ལ་ཆོས་ཀྱང་སྟོན་པ་རྣམས་ཀྱིས་བདག་ལུང་སྟོན་པར་མཛད་ཅིང ། དེ་བཞིན་དུ་སངས་རྒྱས་ཀྱི་ཞིང་དཔག་ཏུ་མ་མཆིས། གྲངས་མ་མཆིས་པ་དག་ཀྱང་རབ་ཏུ་གཡོ་བར་གྱུར་ཅིག་།སེམས་ཅན་ཐམས་ཅད་ཀྱང་འདི་ལྟ་སྟེ། དཔེར་བགྱི་ན། བྱང་ཆུབ་སེམས་དཔའ་བསམ་གཏན་གཉིས་པ་ལ་རྩེ་བའི་བཀོད་པ་ལ་སྙོམས་པར་ཞུགས་པ་དེ་ལྟ་བུའི་བདེ་བ་དང་ལྡན་པར་གྱུར་ཅིག་།དེ་བཞིན་དུ་སངས་རྒྱས་ཀྱི་ཞིང་དཔག་ཏུ་མ་མཆིས་གྲངས་མ་མཆིས་པ་དག་ནས་ཀྱང་ལྷའི་མེ་ཏོག་མནད་ར་བདག་གི་ཆར་ཡང་རབ་ཏུ་འབབ་པར་གྱུར་ཅིག་།མེ་ཏོག་མནད་ར་བ་དེ་དག་ལས་ཀྱང་འདི་ལྟ་བུའི་སྒྲ་འབྱུང་བར་གྱུར་ཅིག་།འདི་ལྟ་སྟེ། སངས་རྒྱས་ཀྱི་སྒྲ་
294a
༄#། །དང ། ཆོས་ཀྱི་སྒྲ་དང ། དགེ་འདུན་གྱི་སྒྲ་དང ། ཕ་རོལ་ཏུ་ཕྱིན་པ་རྣམས་ཀྱི་སྒྲ་དང ། སྟོབས་དང ། མི་འཇིགས་པའི་སྒྲ་དག་འབྱུང་བར་གྱུར་ཅིག། གང་གི་ཚེ་བདག་བཅོམ་ལྡན་འདས་ཀྱི་ཞབས་ལ་ཡན་ལག་ལྔས་ཕྱག་འཚལ་བ་དེའི་ཚེ་དེ་ལྟ་བུའི་མཚན་མ་དག་འབྱུང་བར་གྱུར་ཅིག་།གང་གི་ཚེ་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་པ་དེའི་ཚེ་སྐད་ཅིག་དེ་ཉིད་ལ་སངས་རྒྱས་ཀྱི་ཞིང་དཔག་ཏུ་མེད་གྲངས་མེད་པ་དག་ཀྱང་རབ་ཏུ་གཡོས། ལྷའི་མེ་ཏོག་མནད་ར་བ་དག་གི་ཆར་ཡང་རབ་ཏུ་བབ། སེམས་ཅན་ཐམས་ཅད་ཀྱང་ཇི་ལྟར་སྨོན་ལམ་བཏབ་པ་དེ་ལྟ་བུའི་བདེ་བ་དང་ལྡན་པར་གྱུར་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སངས་རྒྱས་རྣམས་ལ་ཆོས་ཉན་པ་དེ་དག་གིས་སངས་རྒྱས་བཅོམ་ལྡན་འདས་དེ་དག་ལ་རྒྱུ་གང་དག་དང་རྐྱེན་གང་གིས་ན་འདི་ལྟ་བུའི་མཚན་མ་དག་བྱུང་བར་གྱུར་ཅེས་ཡོངས་སུ་ཞུས་ནས། སངས་རྒྱས་བཅོམ་ལྡན་འདས་དེ་དག་གིས་ཀྱང་འཇམ་དཔལ་གཞོན་ནུར་གྱུར་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དང ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་མཆོག་རབ་ཡངས་པའི་བློ་དང་ལྡན་པ་ལོངས། །ཕྱོགས་བཅུའི་འཇིག་རྟེན་མགོན་པོ་
294b
རྣམས་ཀྱིས་ཁྱོད་ལུང་བསྟན། །ས་གཡོས་སེམས་ཅན་རྣམས་ཀྱང་བདེ་བས་ཚིམ་པར་གྱུར། །མེ་ཏོག་ཆར་པ་རབ་འབབ་འཇིག་རྟེན་སངས་རྒྱས་འགྱུར།། །།བམ་པོ་དྲུག་པ། རིགས་ཀྱི་བུ། དེ་ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་བུ་བཞི་པ་ཉོན་མོངས་མེད་ཅེས་བྱ་བ་ལ་བོས་པ་དང ། ཇི་ལྟར་འཇམ་དཔལ་གྱིས་སྨོན་ལམ་བཏབ་པ་ལྟར་སྔ་མ་བཞིན་དུ་སྦྱར་རོ། །བཅོམ་ལྡན་འདས་ཀྱིས་དེ་ལ་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ། ལེགས་སོ། །ལེགས་སོ། །རིགས་ཀྱི་བུ་ཁྱོད་བྱང་ཆུབ་སེམས་དཔར་གྱུར་པ་ན་སེམས་ཅན་དཔག་ཏུ་མེད་གྲངས་མེད་པ་དག་གི་ཉོན་མོངས་པའི་རི་འཇོམས་པར་འགྱུར་ཞིང ། སངས་རྒྱས་ཀྱི་མཛད་པའང་བྱེད་པར་འགྱུར་ལ། དེའི་འོག་ཏུ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བས། རིགས་ཀྱི་བུ། དེའི་ཕྱིར་ཁྱོད་རྡོ་རྗེས་གཅོད་པའི་ཤེས་རབ་སྣང་བའི་དཔལ་ཞེས་བྱ་བར་གྱུར་ཅིག་།རྡོ་རྗེས་གཅོད་པ་ཤེས་རབ་སྣང་བའི་དཔལ་ཁྱོད་ནི་མ་འོངས་པའི་དུས་ན་བསྐལ་པ་གངྒཱའི་ཀླུང་གཅིག་གི་བྱེ་མ་སྙེད་འདས་ནས་བསྐལ་པ་གྲངས་མེད་པ་གངྒཱའི་ཀླུང་གི་བྱེ་མ་སྙེད་གཉིས་པ་ལ་བབ་པ་ན་ཤར་ཕྱོགས་ལོགས་སུ་འཇིག་རྟེན་གྱི་ཁམས་སངས་རྒྱས་ཀྱི་ཞིང་གངྒཱའི་ཀླུང་བཅུའི་བྱེ་མ་སྙེད་ཀྱི་རྡུལ་ཕྲ་རབ་ཀྱི་རྡུལ་སྙེད་འདས་པ་དེ་ན་འཇིག་
295a
༄#། །རྟེན་གྱི་ཁམས་མིག་མི་འཛུམ་ཞེས་བྱ་བ་ཞིག་ཡོད་དེ། རིགས་ཀྱི་བུ་ཁྱོད་དེར་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་བཟང་པོ་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སུ་འགྱུར་རོ། །ཁྱོད་ཀྱི་སངས་རྒྱས་ཀྱི་ཞིང་ཡང་སྨོན་ལམ་ཇི་ལྟར་བཏབ་པ་དེ་ལྟ་བུའི་ཡོན་ཏན་བཀོད་པ་དུ་མ་དང་ལྡན་པར་འགྱུར་རོ། །རིགས་ཀྱི་བུ། དེ་བཞིན་གཤེགས་པ་རིན་པོ་ཆེའི་སྙིང་པོས། བྱང་ཆུབ་སེམས་དཔའ་རྡོ་རྗེས་གཅོད་པ་ཤེས་རབ་སྣང་བའི་དཔལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་མ་ཐག་ཏུ་ནམ་མཁའི་དཀྱིལ་ནས་ལྷ་བྱེ་བ་ཁྲག་ཁྲིག་འབུམ་ཕྲག་དུ་མ་དག་གིས་ལེགས་སོ་ཞེས་བྱ་བ་བྱིན་ནས་ཙནྡན་ས་མཆོག་པ་དང ། ཙནྡན་སྤྲུལ་གྱི་སྙིང་པོ་དང ། ་ག་རུ་དང ། རྒྱ་སྤོས་དང ། ཏ་མ་ལའི་ཕྱེ་མའི་ཆར་ཡང་རབ་ཏུ་ཕབ་བོ། །དེས་གསོལ་པ། བཙུན་པ་བཅོམ་ལྡན་འདས། གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན། དེའི་སླད་དུ་གང་གི་ཚེ་བདག་བཅོམ་ལྡན་འདས་ཀྱི་ཞབས་ལ་ཡན་ལག་ལྔས་
295b
ཕྱག་བཙལ་བ་དེའི་ཚེ་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ལྷའི་ལས་ཤིན་ཏུ་འདས་པའི་སྤོས་རྒྱ་ཆེན་པོས་ཁྱབ་པར་གྱུར་ཅིག་།འཇིག་རྟེན་གྱི་ཁམས་དེར་སེམས་ཅན་དམྱལ་བའམ། དུད་འགྲོའི་སྐྱེ་གནས་པའམ་གཤིན་རྗེའི་འཇིག་རྟེན་པའམ། ལྷའམ། མིའམ། སེམས་ཅན་གང་དག་སྐྱེས་པར་གྱུར་པའི་སེམས་ཅན་དེ་དག་ཐམས་ཅད་ཀྱི་ས་དྲི་དེ་ཚོར་བར་འགྱུར་ཞིང ། ཇི་སྲིད་དུ་བདག་གི་མགོ་བོ་ས་ལ་རེག་པ་དེ་སྲིད་དུ་དེ་དག་གི་ལུས་ཀྱི་ནད་དང ། ལུས་ཀྱི་སྡུག་བསྔལ་བ་དང ། སེམས་ཀྱི་ནད་དང ། སེམས་ཀྱི་སྡུག་བསྔལ་བ་དག་ཀྱང་མྱུར་དུ་རབ་ཏུ་ཞི་བར་གྱུར་ཅིག་།རིགས་ཀྱི་བུ། དེ་ནས་བྱང་ཆུབ་སེམས་དཔའ་རྡོ་རྗེས་གཅོད་པ་ཤེས་རབ་སྣང་བའི་དཔལ་གྱིས་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྔས་ཕྱག་བྱས་པ་དང ། དེ་ནས་དེའི་མོད་ལ་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ཀྱང་ལྷའི་ལས་ཤིན་ཏུ་འདས་པའི་སྤོས་རྒྱ་ཆེན་པོས་ཁྱབ་པར་གྱུར། སེམས་ཅན་ཐམས་ཅད་ཀྱི་ལུས་ཀྱི་ནད་དང ། སེམས་ཀྱི་ནད་དང ། ལུས་ཀྱི་སྡུག་བསྔལ་དང ། སེམས་ཀྱི་སྡུག་བསྔལ་བའང་རབ་ཏུ་ཞི་ཞིང་རྒྱུན་ཆད་པར་གྱུར་པ་དང ། བཅོམ་ལྡན་འདས་ཀྱིས་བཀའ་སྩལ་པ། རྡོ་རྗེ་འཇོམས་པར་བྱེད་པ་ལོངས། །ཞིང་མང་སྤོས་ཀྱིས་ཁྱབ་གྱུར་ཏེ། །སེམས་ཅན་བདེ་དང་དགའ་བྱེད་
296a
༄#། །པ། །འཇིག་རྟེན་མཆོག་གི་ཡབ་ཏུ་འགྱུར། །རིགས་ཀྱི་བུ། དེ་ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་བུ་ལྔ་པ་འཇིགས་མེད་ཅེས་བྱ་བ་ལའང་སྔ་མ་བཞིན་དུ་སྦྱར་ཏེ། བཙུན་པ་བཅོམ་ལྡན་འདས་བདག་ནི་སངས་རྒྱས་ཀྱི་ཞིང་ཉོན་མོངས་པ་ཅན་འདི་འབའ་ཞིག་ཏུ་མ་ལགས་ཀྱི། གང་ན་སེམས་ཅན་དམྱལ་བ་མ་མཆིས་པ་དང ། དུད་འགྲོའི་སྐྱེ་གནས་མ་མཆིས་པ་དང ། གཤིན་རྗེའི་འཇིག་རྟེན་མ་མཆིས་པར་འགྱུར་བ་དང ། གང་ན་ས་གཞི་བཻཌཱུརྱ་སྔོན་པོ་ལས་གྲུབ་པར་འགྱུར་བ་དང ། རྒྱ་ཆེར་ནི་འཇིག་རྟེན་གྱི་ཁམས་པདྨའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཇི་ལྟ་བུ་དེ་ལྟར་བརྗོད་པར་བྱ་སྟེ། དེར་བྱང་ཆུབ་མངོན་པར་རྫོགས་པར་འཚང་རྒྱ་བར་བགྱིའོ་ཞེས་རྒྱལ་བུ་འཇིགས་མེད་ཀྱིས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་པདྨ་བཞག་སྟེ་གསོལ་པ། བཙུན་པ་བཅོམ་ལྡན་འདས། གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན། དེའི་སླད་དུ་བཅོམ་ལྡན་འདས་ཀྱི་མཐུས་བདག་གིས་ཏིང་ངེ་འཛིན་བཀོད་པ་སྣང་བ་ཞེས་བགྱི་བ་ཐོབ་པར་འགྱུར་ཞིང ། དེས་བདག་གིས་བཅོམ་ལྡན་འདས་ཀྱི་སྤྱན་སྔ་ནས་ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ཏུའང་པདྨ་ཤིང་རྟའི་ཕང་ལོ་ཙམ་པའི་མེ་ཏོག་གི་ཆར་སངས་
296b
རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་རབ་ཏུ་འབེབས་པར་འགྱུར་ལ། བདག་གིས་ཀྱང་མཐོང་བར་འགྱུར་ཅིག་།ཚིག་དེ་བརྗོད་མ་ཐག་ཏུ་སངས་རྒྱས་ཀྱི་མཐུས་ཏིང་ངེ་འཛིན་སྣང་བ་བཀོད་པ་ཞེས་བྱ་བ་ཐོབ་པར་གྱུར་ནས། ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ཏུ་པདྨ་ཤིང་རྟའི་ཕང་ལོ་ཙམ་པའི་མེ་ཏོག་གི་ཆར་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་ཀྱང་རབ་ཏུ་བབ་པར་གྱུར་རོ། །རྒྱལ་བུ་གཞོན་ནུ་འཇིག་མེད་ཀྱིས་དེ་མཐོང་ནས་ཤིན་ཏུ་དགའ་ཞིང་ཡིད་བདེ་བ་སྐྱེས་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་ཀྱིས་ནི་ཤིན་ཏུ་སྨོན་ལམ་བཟང་པོ་བཏབ་སྟེ། སངས་རྒྱས་ཀྱི་ཞིང་བཟང་པོའང་ཡོངས་སུ་བླངས། ཁྱོད་ཀྱིས་ཏིང་ངེ་འཛིན་ཀྱང་ཤིན་ཏུ་མྱུར་བར་ཐོབ། བདེན་པའི་ཚིག་གིས་པདྨའི་ཆར་ཡང་རབ་ཏུ་བབ་བོ། །དེས་གསོལ་པ། གལ་ཏེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རེ་བ་ཡོངས་སུ་རྫོགས་པར་འགྱུར་བ་ལྟ་ན། དེའི་སླད་དུ་པདྨ་འདི་དག་ནམ་མཁའ་ལ་གནས་པར་གྱུར་ལ། དེ་ལྟར་ནམ་མཁའ་ལ་གནས་ནས་ཆར་བཞིན་དུའང་བབ་པར་གྱུར་ཅིག་།བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ནམ་མཁའ་ལ་པདྨ་དག་གིས་ཤིན་ཏུ་མྱུར་བར་རྒྱས་བཏབ་པས་ན་དེའི་ཕྱིར་རིགས་ཀྱི་བུ་ཁྱོད་ཀྱང་ནམ་མཁའི་ཕྱག་རྒྱ་ཞེས་བྱ་བར་གྱུར་
297a
༄#། །ཅིག་།ནམ་མཁའི་ཕྱག་རྒྱ་ཁྱོད་ནི་མ་འོངས་པའི་དུས་ན་བསྐལ་པ་གྲངས་མེད་པ་གངྒཱའི་ཀླུང་གཅིག་གི་བྱེ་མ་སྙེད་འདས་ནས་གྲངས་མེད་པ་གཉིས་པ་ལ་བབ་པ་ན་ཤར་ལྷོའི་ཕྱོགས་ལོགས་སུ་སངས་རྒྱས་ཀྱི་ཞིང་གངྒཱའི་ཀླུང་བྱེ་བ་ཕྲག་འབུམ་གྱི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་པདྨ་ཞེས་བྱ་བ་ཞིག་ཡོད་དེ། ཁྱོད་དེར་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པ་ཞེས་བྱ་བ་རིག་པ་དང་ཞབས་སུ་ལྡན་པ་སངས་རྒྱས་བཅོམ་ལྡན་འདས་ཞེས་བྱ་བའི་བར་དུ་འགྱུར་རོ། །བྱང་ཆུབ་སེམས་དཔའ་འབའ་ཞིག་གི་དགེ་འདུན་ཡང་ཚད་མེད་པར་འགྱུར་ལ། ཁྱོད་ཀྱི་ཚེའང་དཔག་ཏུ་མེད་པར་འགྱུར་ཏེ། ཇི་ལྟར་སྨོན་ལམ་བཏབ་པའི་ཡོན་ཏན་དེ་དག་ཐམས་ཅད་དང་ལྡན་པའང་ཐོབ་པར་འགྱུར་རོ། །བྱང་ཆུབ་སེམས་དཔའ་ནམ་མཁའི་ཕྱག་རྒྱས་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་མགོ་བོས་གཏུགས་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཉོན་མོངས་རྙོག་པ་ཞི་བར་བྱེད་གྱུར་ཅིང ། །ཞིང་རྡུལ་སྙེད་ཀྱི་ཡོན་ཏན་འཆད་གྱུར་པ། །སྔོན་གྱི་རྒྱལ་བཞིན་བྱང་ཆུབ་འཐོབ་འགྱུར་ཞིང ། །འགྲོ་བ་དག་ལ་ཕན་པ་བྱེད་པར་འགྱུར། །རིགས་ཀྱི་བུ།
297b
དེ་ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་བུ་དྲུག་པ་ནམ་མཁའ་ཞེས་བྱ་བ་ལ་སྨྲས་པ་དང ། སངས་རྒྱས་ཀྱི་ཞིང་ཉོན་མོངས་པ་ཅན་འདི་འབའ་ཞིག་ཏུ་མ་ལགས་ཀྱི་ཞེས་བྱ་བ་དང ། བྱང་ཆུབ་སེམས་དཔའ་ནམ་མཁའི་ཕྱག་རྒྱས་སྨོན་ལམ་ཇི་ལྟར་བཏབ་པ་བཞིན་ནོ་ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །བཙུན་པ་བཅོམ་ལྡན་འདས། གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན། དེའི་སླད་དུ་ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་ནམ་མཁའ་ཐམས་ཅད་ལས་རིན་པོ་ཆེ་སྣ་བདུན་གྱི་གདུགས་གསེར་གྱི་དྲ་བ་དག་གིས་གཡོགས་པ། རིན་པོ་ཆེ་སྣ་བདུན་གྱི་དྲིལ་བུ་དག་གིས་བརྒྱན་པ་དག་བྱུང་བར་འགྱུར་ཞིང ། གདུགས་དང ། དྲིལ་བུ་དང ། དྲ་བ་དེ་དག་ལས་ཀྱང་འདི་ལྟ་བུའི་སྒྲ་འབྱུང་བར་གྱུར་ཅིག་།འདི་ལྟ་སྟེ། སངས་རྒྱས་ཀྱི་སྒྲ་དང ། ཆོས་ཀྱི་སྒྲ་དང ། དགེ་འདུན་གྱི་སྒྲ་དང ། ཕ་རོལ་ཏུ་ཕྱིན་པའི་སྒྲ་དང ། སྟོབས་ཀྱི་སྒྲ་དང ། མངོན་པར་ཤེས་པའི་སྒྲ་དང ། མི་འཇིགས་པའི་སྒྲ་དག་འབྱུང་ཞིང་སེམས་ཅན་དེ་དག་ཐམས་ཅད་ཀྱིས་ཀྱང་སྒྲ་དེ་ལྟ་བུ་དག་ཐོས་པར་གྱུར་ཅིག་།དེ་དག་གིས་ཐོས་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཅིག་།སེམས་ཅན་གང་དག་སྔོན་འདིར་སེམས་བསྐྱེད་པར་གྱུར་པ་དེ་དག་ཀྱང་བླ་ན་མེད་པ་ཡང་དག་པར་རྫོགས་
298a
༄#། །པའི་བྱང་ཆུབ་ལས་ཕྱིར་མི་ལྡོག་པར་གྱུར་ཅིག་།ཚིག་དེ་སྐད་སྨྲས་མ་ཐག་ཏུ་ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་གི་ནམ་མཁའི་དཀྱིལ་ཐམས་ཅད་ལས་དེ་ལྟ་བུའི་སྒྲ་དག་བྱུང་བའི་བར་དུ་སྔ་མ་བཞིན་དུ་སྦྱར་རོ། །བཅོམ་ལྡན་འདས་ཀྱི་མཐུས་བདག་ཉིད་ཀྱིས་ཀྱང་མཐོང་ནས་དེས་ཡང་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། གལ་ཏེ་བདག་གིས་ཇི་ལྟར་སྨོན་ལམ་བཏབ་པ་བཞིན་དུ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན་དེའི་སླད་དུ་བདག་གིས་བཅོམ་ལྡན་འདས་ཀྱི་སྤྱན་སྔར་ཡེ་ཤེས་རྣམ་པར་སྣང་བྱེད་ཅེས་བགྱི་བའི་ཏིང་ངེ་འཛིན་འདི་ཐོབ་པར་འགྱུར་ཟིང་དེས་བདག་གི་དགེ་བའི་ཆོས་རྣམས་གྲུབ་པར་གྱུར་ཅིག་།ཏིང་ངེ་འཛིན་ཐོབ་ནས་ཀྱང་བཅོམ་ལྡན་འདས་ཀྱིས་བདག་ལུང་སྟོན་པར་གྱུར་ཅིག་།བཅོམ་ལྡན་འདས་ཀྱི་མཐུས་ཡེ་ཤེས་རྣམ་པར་སྣང་བྱེད་ཅེས་བྱ་བའི་ཏིང་ངེ་འཛིན་ཐོབ་པ་དང ། བཅོམ་ལྡན་འདས་ཀྱིས་བཀའ་སྩལ་པ། སྐྱེས་བུ་དམ་པ། ལེགས་སོ། །ལེགས་སོ། །ཁྱོད་ཀྱིས་ནི་སྨོན་ལམ་རྒྱ་ཆེན་པོ་བཏབ་སྟེ། ཁྱོད་ཀྱི་བསོད་ནམས་ཀྱི་རྒྱུ་མཐུན་པ་དེས་ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་མང་པོ་དག་ཚད་གཅིག་ཏུ་གྱུར་ལ་ཡིད་དུ་འོང་བའི་སྒྲ་འབུམ་ཕྲག་མང་པོ་
298b
དག་གིས་བསྐུལ་པའི་སངས་རྒྱས་ཀྱི་ཞིང་དེར་རིགས་ཀྱི་བུ་ཁྱོད་རྣམ་པར་སྣང་བྱེད་ཅེས་བྱ་བར་གྱུར་ཅིག་།རྣམ་པར་སྣང་བྱེད་ཁྱོད་ནི་མ་འོངས་པའི་དུས་ན་བསྐལ་པ་གྲངས་མེད་པ་གངྒཱའི་ཀླུང་གི་བྱེ་མ་སྙེད་ནས་གྲངས་མེད་པ་གཉིས་པ་ལ་བབ་པ་ན་ཤར་ཕྱོགས་ལོགས་སུ་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་ཉི་ཟླ་ཞེས་བྱ་བ་ཞིག་ཡོད་དེ། དེར་ཁྱོད་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ལ་དབང་སྒྱུར་དབང་ཕྱུག་རྒྱལ་པོ་ཞེས་བྱ་བ་རིག་པ་དང་ཞབས་སུ་ལྡན་པ་སངས་རྒྱས་བཅོམ་ལྡན་འདས་ཞེས་བྱ་བའི་བར་དུ་འགྱུར་རོ། །བྱང་ཆུབ་སེམས་དཔའ་རྣམ་པར་སྣང་བྱེད་ཀྱིས་བཅོམ་ལྡན་འདས་ཀྱི་ཞབས་ལ་ཡན་ལག་ལྔས་ཕྱག་བྱས་པ་དང ། དེ་བཞིན་གཤེགས་པ་རིན་པོ་ཆེའི་སྙིང་པོས་བཀའ་སྩལ་པ། བརྟུལ་ཞུགས་བཟང་པོ་རབ་དགའ་སེམས་དུལ་ལོངས། །བླ་མེད་སངས་རྒྱས་བྱང་ཆུབ་མ་གཏོགས་པར། །སེམས་ཅན་དག་ལ་སྙིང་རྗེ་ཆེར་སྐྱེད་ལ། །སྡུག་བསྔལ་རྒྱ་མཚོའི་མཐར་གནས་སེམས་ཅན་སྒྲོལ། །རིགས་ཀྱི་བུ། དེ་ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་བུ་བདུན་པ་ཡན་ལག་སྐྱེས་ཞེས་བྱ་བ་ལ་སྨྲས་པ་དང ། སྔ་མ་བཞིན་དུ་སྦྱར་ཏེ། བདག་གི་སངས་རྒྱས་ཀྱི་ཞིང་
299a
༄#། །ཉོན་མོངས་པ་ཅན་འདི་འབའ་ཞིག་ཏུ་མ་ལགས་ཀྱི། གང་ན་སེམས་ཅན་དམྱལ་བ་མ་མཆིས་པ་དང ། དུད་འགྲོའི་སྐྱེ་གནས་མ་མཆིས་པ་དང ། གཤིན་རྗེའི་འཇིག་རྟེན་མ་མཆིས་པ་དང ། བུད་མེད་མ་མཆིས་པ་དང ། སེམས་ཅན་མངལ་ན་གནས་པ་དག་མ་མཆིས་པ་དང ། རི་རབ་མ་མཆིས་པ་དང ། ཁོར་ཡུག་མ་མཆིས་པ་དང ། ཁོར་ཡུག་ཆེན་པོ་དག་མ་མཆིས་པ་དང ། བྲག་དང་རི་དག་མ་མཆིས་པ་དང ། མཐོ་དམན་དང ། གསེག་མ་དང ། གྱོ་མོ་དང ། ཚེར་མ་དང ། ཚང་ཚིང་དག་མ་མཆིས་པ་དང ། ཤིང་ལྗོན་པ་དག་མ་མཆིས་པ་དང ། རྒྱ་མཚོ་ཆེན་པོ་དག་མ་མཆིས་པ་དེར་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་།དེ་ན་ཉི་མ་དང་ཟླ་བ་དག་མ་མཆིས་པ་དང ། སྐར་མའི་གཟུགས་རྣམས་མ་མཆིས་པ་དང ། ཉོན་མོང་དང་མཚན་མོ་མ་མཆིས་པ་དང ། མུན་པ་ཐིབས་པོ་མ་མཆིས་པ་དང ། དེ་ན་སེམས་ཅན་རྣམས་ལ་བཤད་པ་དང ། གཅི་བ་དང ། མཆིལ་མ་དང ། སྣབས་དག་མ་མཆིས་པ་དང ། ལུས་ཀྱི་རྡུལ་དང ། དྲི་ང་བ་མ་མཆིས་པ་དང ། སེམས་ཅན་རྣམས་ལ་ལུས་ངལ་བ་མ་མཆིས་པ་དང ། སེམས་ངལ་བ་མ་མཆིས་པར་གྱུར་ཅིག་།དེ་ན་འཐུལ་བ་མ་མཆིས་པར་གྱུར་ཅིག་།དེ་ན་ས་གཞི་ཐམས་ཅད་རིན་པོ་ཆེའི་རྡོའི་སྙིང་པོ་ལས་གྲུབ་པར་གྱུར་ཅིག་།རིན་པོ་ཆེ་
299b
འབུམ་ཕྲག་དུ་མས་བརྒྱན་ཅིང་མེ་ཏོག་མནད་ར་བ་དང ། མནད་ར་བ་ཆེན་པོ་དག་བཀྲམ་པར་གྱུར་ཅིག་།སངས་རྒྱས་ཀྱི་ཞིང་དེར་རིན་པོ་ཆེའི་ཤིང་ལྗོན་པ་སྣ་ཚོགས་དག་གིས་བརྒྱན་པར་གྱུར་ཅིག་།རིན་པོ་ཆེའི་ཤིང་ལྗོན་པ་དེ་དག་ཀྱང་རིན་པོ་ཆེ་སྣ་ཚོགས་ཀྱི་དྲ་བ་དག་གིས་བརྒྱན་པར་གྱུར་ཅིག་།རིན་པོ་ཆེ་སྣ་ཚོགས་ཀྱི་རས་བཅོས་བུ་དག་དང ། རིན་པོ་ཆེ་སྣ་ཚོགས་ཀྱི་གོས་དག་དང ། རིན་པོ་ཆེ་སྣ་ཚོགས་ཀྱི་ཕྲེང་བ་དག་དང ། རིན་པོ་ཆེ་སྣ་ཚོགས་ཀྱི་ལྷ་བ་ལྷུབ་ཀྱི་རྒྱན་གྱིས་བརྒྱན་པར་གྱུར་ཅིག་།རིན་པོ་ཆེའི་ཤིང་ལྗོན་པ་དེ་དག་ལ་མེ་ཏོག་གི་ཕྲེང་བ་སྣ་ཚོགས་དང ། རོལ་མོའི་སྒྲ་སྣ་ཚོགས་དག་དང ། རིན་པོ་ཆེའི་སྣོད་སྣ་ཚོགས་དག་དང ། རིན་པོ་ཆེའི་མེ་ཏོག་སྣ་ཚོགས་དག་གིས་བརྒྱན་པར་གྱུར་ཅིག་།དེ་ན་གང་གི་ཚེ་མེ་ཏོག་དག་ཁ་ཟུམས་ཤིང་རོལ་མོའི་སྒྲ་དག་མི་གྲག་པ་མ་གཏོགས་པར་མཚན་མོ་མི་མངོན་པར་གྱུར་ཅིག་།མེ་ཏོག་ཁ་ཟུམས་པ་དེ་དག་ལས་བྱང་ཆུབ་སེམས་དཔའ་དག་སྐྱེ་བར་གྱུར་ཅིག ། དེར་བྱང་ཆུབ་སེམས་དཔའ་སྙོམས་པར་ཞུགས་པ་ན་ཏིང་ངེ་འཛིན་སྣང་བ་བཀོད་པ་ཞེས་བགྱི་བ་ཐོབ་པར་གྱུར་ཅིག་།ཏིང་ངེ་འཛིན་དེ་ཐོབ་པས་ཕྱོགས་བཅུའི་འཇིག་རྟེན་གྱི་ཁམས་གཞན་དག་ན་བཞུགས་ཏེ་འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་མཐོང་བར་གྱུར་ཅིག་།སྐད་ཅིག་དེ་ཉིད་ལ་གང་
300a
༄#། །གིས་ཕྱོགས་བཅུའི་འཇིག་རྟེན་གྱི་ཁམས་གཞན་དག་གི་སངས་རྒྱས་ཀྱི་ཞིང་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་ན་སངས་རྒྱས་བཅོམ་ལྡན་འདས་དག་ཆོས་འཆད་པ་ཐོས་པར་འགྱུར་བ་དེ་ལྟ་བུའི་ལྷའི་རྣ་བ་རྣམ་པར་དག་པ་ཐོབ་པར་གྱུར་ཅིག་།སེམས་ཅན་དག་སྐྱེས་མ་ཐག་ཏུ་ཐམས་ཅད་ཀྱིས་ཚེ་རབས་རྗེས་སུ་དྲན་པར་འགྱུར་ཞིང ། དེ་དག་གིས་བསྐལ་པ་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་རྗེས་སུ་དྲན་པར་གྱུར་ཅིག་།སེམས་ཅན་དེ་དག་སྐྱེས་མ་ཐག་ཏུ་ཐམས་ཅད་ཀྱི་ཕྱོགས་བཅུ་ཀུན་ཏུ་སངས་རྒྱས་ཀྱི་ཞིང་གི་ཡོན་ཏན་བཀོད་པ། སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་མཐོང་བར་འགྱུར་བ་དེ་ལྟ་བུའི་ལྷའི་མིག་ཐོབ་པར་གྱུར་ཅིག ། སེམས་ཅན་དེ་དག་སྐྱེས་མ་ཐག་ཏུ་ཐམས་ཅད་ཀྱིས་སྐད་ཅིག་གཅིག་གིས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་གིས་སེམས་ཅན་ཐམས་ཅད་སེམས་ཀྱི་སྤྱོད་པ་འཚལ་བར་འགྱུར་བ་དེ་ལྟ་བུའི་ཕ་རོལ་གྱི་སེམས་ཅན་ཤེས་པ་ལ་མཁས་པ་དང་ལྡན་པར་འགྱུར་ཞིང ། སེམས་ཅན་དེ་དག་ཐམས་ཅད་བྱང་ཆུབ་ཀྱི་ཅིང་ཡོངས་སུ་མྱ་ངན་ལས་འདས་ཀྱི་བར་དུ་ཏིང་ངེ་འཛིན་དེ་ཆུད་མི་ཟ་བར་གྱུར་ཅིག་།ནང་པར་སྔར་ཕྱོགས་བཞི་ནས་དྲི་ཤིན་ཏུ་བདའ་ཞིང་དགའ་བར་བགྱིད་ལ་འཇམ་ཞིང་རེག་ན་བདེ་བའི་བསེར་མའི་ངད་
300b
ལྡང་བར་འགྱུར་ཞིང་མེ་ཏོག་དེ་དག་ཀྱང་ཁ་འབྱེད་པར་གྱུར་ཅིག་།བྱང་ཆུབ་སེམས་དཔའ་དེ་དག་ཀྱང་ཏིང་ངེ་འཛིན་དེ་དག་ལས་ལངས་ཤིང ། མེ་ཏོག་གི་ཟེ་བ་དེ་དག་ལས་ལྡང་བར་གྱུར་ཅིག་།གང་གིས་སེམས་ཀྱི་སྐད་ཅིག་གཅིག་གིས་ཕྱོགས་རེ་རེར་ཡང་འཇིག་རྟེན་གྱི་ཁམས་ཀྱི་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་ཏུ་མཆིས་ཤིང་སངས་རྒྱས་བཅོམ་ལྡན་འདས་བཞུགས་ཏེ། འཚོ་ཞིང་གཞེས་པ་རྣམས་ལ་ཕྱག་བགྱིས་ཤིང་སྙེན་བཀུར་བགྱིས་ནས་སླར་ལྡོག་པར་འགྱུར་བ་དེ་ལྟ་བུའི་རྫུ་འཕྲུལ་གྱི་ཡུལ་ཡང་ཐོབ་པར་གྱུར་ཅིག་།དེ་ན་མེ་ཏོག་མནད་ར་བ་དང ། མནད་ར་བ་ཆེན་པོའི་ཟེ་བ་དག་ལ་སྐྱིལ་མོ་ཀླུང་བཅས་ཏེ་མཆི་བར་འགྱུར་ཟིང་ཆོས་ཀྱི་བདེ་བ་ཡིད་ལ་བགྱིད་པས་དེ་བཞིན་གཤེགས་པ་ལ་ལྟ་བར་གྱུར་ཅིག་།གང་དང་གང་དུ་མཆིས་སམ་ལྡོག་པའི་ཕྱོགས་ཐམས་ཅད་དུས་དག་ཀྱང་མཐོང་བར་གྱུར་ཅིག། དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་དག་ཆོས་རྣམས་ལ་ནམ་ནུར་དང ། ཡིད་གཉིས་དང ། ཐེ་ཚོམ་ཇི་ལྟ་བུ་དག་སྐྱེ་བར་འགྱུར་བ་དེ་དག་ཐམས་ཅད་བདག་ལ་བལྟས་ཤིང་མཐོང་བ་ཙམ་གྱི་བྲལ་བར་གྱུར་ཅིག་།བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཆོས་བསྟན་པ་ཇི་ལྟ་བུ་དག་འཚལ་བ་དེ་ལྟ་བུའི་ཆོས་བསྟན་བ་དག་བདག་ལ་བལྟས་པ་ཙམ་གྱིས་འཚལ་བར་གྱུར་ཅིག་།དེ་
301a
༄#། །ན་སེམས་ཅན་རྣམས་བདག་གི་བ་མ་མཆིས་ཤིང ། ཡོངས་སུ་འཛིན་པ་མ་མཆིས་པར་འགྱུར་ཞིང ། ཐ་ན་རང་གི་ལུས་དང་སྲོག་ལའང་དོན་དུ་གཉེར་བ་མ་མཆིས་པར་གྱུར་ཅིག་།དེ་ན་བྱང་ཆུབ་སེམས་དཔའ་ཐམས་ཅད་ཕྱིར་མི་ལྡོག་པར་ཤ་སྟག་ཏུ་གྱུར་ཅིག་།དེ་ན་མི་དགེ་བའི་མིང་ཡང་མ་མཆིས་པར་གྱུར་ཅིག། སངས་རྒྱས་ཀྱི་ཞིང་དེ་ན་བསླབ་པ་ལེན་པའི་མིང་ཡང་མ་མཆིས་ལ། ལྟུང་བྱེད་ལས་སློང་བའི་བར་གྱི་བཀའ་མཆིད་ཀྱང་མ་མཆིས་པར་གྱུར་ཅིག། སེམས་ཅན་ཐམས་ཅད་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པར་གྱུར་ཅིག། ཐམས་ཅད་སྲེད་མེད་ཀྱི་བུའི་སྟོབས་དང་ལྡན་བར་གྱུར་ཅིག། དེ་ན་བྱང་ཆུབ་ཅིང་ཡོངས་སུ་མྱ་ངན་ལས་འདས་ཀྱི་བར་དུ་སེམས་ཅན་གཅིག་ཀྱང་དབང་པོ་མཚང་བར་མ་གྱུར་ཅིག། དེ་ན་སེམས་ཅན་ཐམས་ཅད་སྐྲ་བྲེགས་ཤིང་གོས་ངུར་སྨིག་སར་པ་དག་འཚལ་བཞིན་དུ་སྐྱེ་བར་གྱུར་ཅིག་།ཤིན་ཏུ་རྣམ་པར་འབྱེད་པའི་ཏིང་ངེ་འཛིན་ཐོབ་པར་འགྱུར་ཞིང་བྱང་ཆུབ་ཀྱི་མཐའི་བར་དུའང་ཆུད་མི་ཟ་བར་གྱུར་ཅིག། དེ་ན་སེམས་ཅན་ཐམས་ཅད་ཀྱང་དགེ་བའི་རྩ་བ་དང་འགྲོགས་པར་གྱུར་ཅིག། སངས་རྒྱས་ཀྱི་ཞིང་དེ་ན་སེམས་ཅན་ཐམས་ཅད་ལ་ན་བ་དང་རྒ་བའི་སྡུག་བསྔལ་མ་མཆིས་པར་གྱུར་ཅིག། སེམས་ཅན་གང་དག་ཚེ་ཡོངས་སུ་བས་པར་
301b
གྱུར་པ་དེ་དག་ཐམས་ཅད་ཀྱང་སྐྱིལ་མོ་ཀྲུང་གིས་ཡོངས་སུ་མྱ་ངན་ལས་འདའ་བར་འགྱུར་ཞིང་རང་གི་ལུས་ལས་མེའི་ཁམས་བྱུང་སྟེ། དེས་རང་གི་ལུས་བསྲེགས་པར་གྱུར་ནས་ཕྱོགས་བཞི་ནས་བསེར་མ་དག་ལངས་ཤིང་དེ་དག་གིས་བྱང་ཆུབ་སེམས་དཔའི་སྐུ་གདུང་དེ་དག་སངས་རྒྱས་ཀྱི་ཞིང་སྟོང་པ་དག་ཏུ་འཐོར་ཞིང ། འདི་ལྟ་སྟེ། དཔེར་བགྱི་ན། འཁོར་ལོས་བསྒྱུར་བའི་རྒྱལ་པོའི་ནོར་བུ་རིན་པོ་ཆེའི་འོད་གསལ་བ་དེ་ལྟ་བུའི་ནོར་བུ་རིན་པོ་ཆེ་དག་ཀྱང་འབྱུང་བར་གྱུར་ཅིག། དེ་ན་སེམས་ཅན་གང་དག་གིས་ནོར་བུ་རིན་པོ་ཆེའི་འོད་དེ་དག་མཐོང་པར་གྱུར་ཏམ། ནོར་བུ་རིན་པོ་ཆེ་དེ་དག་མཐོང་བར་གྱུར་ཏམ། དེ་དག་ལ་རེག་པར་གྱུར་བའི་སེམས་ཅན་དེ་དག་ཐམས་ཅད་ཀྱང་བྱང་ཆུབ་ཅིང་ཡོངས་སུ་མྱ་ངན་ལས་འདས་ཀྱི་བར་དུ་སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་གྱི་སྡུག་བསྔལ་མི་མྱོང་བར་གྱུར་ཅིག། དེ་དག་དེ་ནས་ཤི་འཕོས་ནས་ཀྱང་གང་ན་སངས་རྒྱས་བཅོམ་འདས་དགེ་བཞུགས་ཏེ་འཚོ་ཞིང་གཞེས་ལ་སེམས་ཅན་རྣམས་ལ་ཆོས་ཀྱང་སྟོན་པ་དེར་སྐྱེ་བར་གྱུར་ཅིག། སེམས་ཅན་དེ་དག་དེར་སྐྱེས་ནས་ཀྱང་སངས་རྒྱས་བཅོམ་ལྡན་འདས་དེ་དག་ལས་ཆོས་ཐོས་པར་འགྱུར་ཞིང་དེ་དག་བྱང་ཆུབ་ཏུ་སེམས་བསྐྱེད་པར་ཡང་གྱུར་ཅིག་།སེམས་བསྐྱེད་མཐག་ཏུ་བླ་ན་མེད་པ་ཡང་དག་པར་རྫོགས་
302a
༄#། །པའི་བྱང་ཆུབ་ལས་སླར་མི་ལྡོག་པར་གྱུར་ཅིག། བདག་གི་སངས་རྒྱས་ཀྱི་ཞིང་དུ་སེམས་ཅན་འགའ་ཡང་མཉམ་པར་མ་བཞག་པ་དང ། སྡུག་བསྔལ་གྱི་ཚོར་བ་དང ། གཅིག་ལ་གཅིག་འགུམས་པར་འགྱུར་བའི་གནོད་སེམས་ཀྱི་སེམས་དང་མ་བྲལ་བར་འགུམ་པའི་དུས་བགྱིད་པར་མ་གྱུར་ཅིག། དེ་སླན་ཆད་མི་ཁོམ་པ་རྣམས་སུ་སྐྱེ་བར་མ་གྱུར་ཅིག། སངས་རྒྱས་ཀྱི་ཞིང་སྟོང་པ་རྣམས་སུ་སྐྱེ་བར་མ་གྱུར་ཅིག། བྱང་ཆུབ་ཀྱི་མཐའི་བར་དུ་སངས་རྒྱས་མཐོང་བ་དང་མི་འབྲལ་བར་གྱུར་ཅིག། ཆོས་ཉན་པ་དང ། དགེ་འདུན་ལ་བསྙེན་བཀུར་བགྱིད་བ་དང་མི་འབྲལ་བར་གྱུར་ཅིག། དེ་ན་སེམས་ཅན་ཐམས་ཅད་ཐ་བ་དང ། ཞེ་སྡང་བ་དང ། འཆབ་པ་དང ། ཕྲག་དོག་དང ། སེར་སྣ་དང་བྲལ་བར་གྱུར་ཅིག། སངས་རྒྱས་ཀྱི་ཞིང་དེ་ན་ཉན་ཐོས་དང་རང་སངས་རྒྱས་རྣམ་པར་སྤངས་པར་གྱུར་ཅིག། སངས་རྒྱས་ཀྱི་ཞིང་དེ་བྱང་ཆུབ་སེམས་དཔའ་ཤ་སྟག་གིས་གང་བར་གྱུར་ཅིག། སེམས་ཅན་གང་དག་དེར་སྐྱེ་བར་འགྱུར་བ་དག་འཇམ་པའི་སེམས་དང ། མཉེན་པའི་སེམས་དང ། ཁོ་ན་མེད་པའི་སེམས་དང ། གདུག་པ་མེད་པའི་སེམས་དང ། ཞི་བའི་སེམས་དང ། མཉམ་པར་བཞག་པའི་སེམས་དང་ལྡན་པར་གྱུར་ཅིག་།བདག་གི་སངས་རྒྱས་ཀྱི་ཞིང་དེ་འོད་གསལ་
302b
བར་གྱུར་ཅིག། བདག་གི་སངས་རྒྱས་ཀྱི་ཞིང་དེ་ཡོན་ཏན་ཆེན་པོ་བཀོད་པ་དང་ལྡན་པར་གྱུར་ཅིག། ཕྱོགས་བཅུའི་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་དག་ནས་ཀྱང་བདའ་ཞིང་དྲིས་ཁྱབ་པར་གྱུར་ཅིག། དེ་ན་སེམས་ཅན་དག་རྟག་ཏུ་བདེ་བ་དང་ལྡན་པར་གྱུར་ཅིག། སངས་རྒྱས་ཀྱི་ཞིང་དེ་ ་སྡུག་བསྔལ་གྱི་སྐྲའང་མི་གྲག་པར་གྱུར་ཅིག། ཇི་སྲིད་དུ་བདག་བྱང་ཆུབ་སེམས་དཔར་གྱུར་ཅིང་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་པ་དེ་ལྟ་བུ་དག་གི་སངས་རྒྱས་ཀྱི་ཞིང་ཡོངས་སུ་དག་པ་འཇོག་པར་འགྱུར་བ་དེ་སྲིད་དུ་བདག་གིས་བྱང་ཆུབ་སེམས་དཔའི་སྤྱོད་པ་སྤྱད་པར་བགྱིའོ། །བསམ་པ་ཡོངས་སུ་དག་པའི་སེམས་ཅན་དེ་ལྟ་བུ་དག་གིས་སངས་རྒྱས་ཀྱི་ཞིང་དེ་ཁྱབ་པར་བཀོད་ལ། དེའི་འོག་ཏུ་བདག་སངས་རྒྱས་ཀྱི་ཞིང་དེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བགྱིའོ། །བདག་བྱང་ཆུབ་ཐོབ་པ་ན་འོད་དཔག་ཏུ་མ་མཆིས་པར་གྱུར་ཅིག། ཕྱོགས་བཅུ་གཞན་གྱི་སངས་རྒྱས་ཀྱི་ཞིང་སྟོང་གི་རྡུལ་ཕྲ་རབ་ཀྱི་རྡུལ་སྙེད་དག་ཏུ་བདག་གི་ལུས་མཚན་གྱིས་བརྒྱན་པ་དགའ་བར་གྱུར་ཅིག་།དེ་ན་སེམས་ཅན་གང་གིས་བདག་མཐོང་བར་གྱུར་བའི་སེམས་ཅན་དེ་དག་གི་འདོད་ཆགས་རབ་ཏུ་ཞི་བར་གྱུར་ཅིག། ཞེ་སྡང་དང ། གཏི་མུག་དང ། ཕྲག་དོག་དང ། ང་རྒྱལ་
303a
༄#། །དང ། འཆབ་པ་དང ། ཉོན་མོངས་པ་དང ། ཉེ་བའི་ཉོན་མོངས་པ་ཐམས་ཅད་རབ་ཏུ་ཞི་བར་གྱུར་ཅིག། ཐམས་ཅད་བྱང་ཆུབ་ཏུ་སེམས་བསྐྱེད་པར་གྱུར་ཅིག་།ཏིང་ངེ་འཛིན་དང ། གཟུངས་ཀྱི་སྒོ་རྣམ་པ་ཇི་ལྟ་བུ་དག་འཚལ་བ་དེ་ལྟ་བུ་དག་ཀྱང་བདག་མཐོང་བས་ཐོབ་པར་གྱུར་ཅིག། དེ་ནས་སེམས་ཅན་གང་དག་གྲང་བའི་སེམས་ཅན་དམྱལ་བར་སྐྱེས་པར་གྱུར་བ་དེ་དག་གིས་ཀྱང་བདག་མཐོང་བས་བདེ་བའི་ཚོར་བ་འབྱུང་བར་འགྱུར་ཞིང ། འདི་ལྟ་སྟེ། དཔེར་བགྱི་ན། དགེ་སློང་བསམ་གཏན་གཉིས་པ་ལ་སྙོམས་པར་ཞུགས་པ་དེ་ལྟ་བུའི་བདེ་བའི་ཚོར་བ་ཐོབ་པར་གྱུར་ཅིག། དེ་དག་གིས་བདག་མཐོང་ནས་ལུས་དང་སེམས་ཀྱི་བདེ་བ་མཆོག་དང་ལྡན་པར་གྱུར་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཅིག། དེ་དག་དེ་ནས་ཤི་འཕོས་ནས་ཀྱང་བདག་གི་སངས་རྒྱས་ཀྱི་ཞིང་དུ་སྐྱེ་བར་འགྱུར་ཞིང ། དེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་སླར་མི་ལྡོག་པར་གྱུར་ཅིག། སེམས་ཅན་གང་དག་ཡི་དྭགས་ཀྱི་གནས་རྣམས་སུ་སྐྱེས་པར་གྱུར་པ་དག་གིས་ཀྱང་བདག་མཐོང་བར་གྱུར་ཅིང་སྔ་མ་བཞིན་དུ་སྤྱར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་སླར་མི་ལྡོག་པར་གྱུར་ཅིག། དེ་བཞིན་དུ་དུད་འགྲོའི་སྐྱེ་གནས་སུ་སྐྱེས་པ་རྣམས་ལའང་
303b
བརྗོད་པར་བགྱིའོ། །ལྷ་རྣམས་ལའང་དེ་བཞིན་ཏེ། བདག་གི་འོད་ཀྱང་ཉིས་འགྱུར་དུ་སྣང་བར་གྱུར་ཅིག། བདག་གི་ཚེའང་དཔག་ཏུ་མ་མཆིས་པར་འགྱུར་ལ། ཐམས་ཅད་མཁྱེན་པའི་ཡེ་ཤེས་མ་གཏོགས་པར་སུས་ཀྱང་བགྲང་བར་རྔོ་མི་ཐོག་པར་གྱུར་ཅིག། བདག་བྱང་ཆུབ་ཐོབ་པ་ན་ཕྱོགས་བཅུའི་འཇིག་རྟེན་གྱི་ཁམས་ཚད་མ་མཆིས། གངས་མ་མཆིས་པ་དཔག་ཏུ་མ་མཆིས་པ་གཞན་དག་གི་སངས་རྒྱས་བཅོམ་ལྡན་འདས་དག་གིས་གང་དག་བསྒྲགས་པར་འགྱུར་བ་བདག་གི་བསྔགས་པ་བརྗོད་པར་གྱུར་ཅིག་།དེ་ན་སེམས་ཅན་གང་དག་གི་བདག་གི་བསྔགས་པ་ཐོས་པར་གྱུར་པ་དེ་དག་ཀྱང་བདག་གི་སངས་རྒྱས་ཀྱི་ཞིང་དེར་དགེ་བའི་རྩ་བ་ཡོངས་སུ་བསྔོ་བར་གྱུར་ཅིག། དེ་དག་འགུམ་པའི་དུས་བགྱིས་ནས་ཀྱང་མཚམས་མ་མཆིས་པ་བགྱིད་པ་རྣམས་དང ། དམ་པའི་ཆོས་སྤོང་བ་རྣམས་དང ། འཕགས་པ་ལ་སྐུར་པ་འདེབས་པ་རྣམས་མ་གཏོགས་པ་དག་བདག་གི་སངས་རྒྱས་ཀྱི་ཞིང་དུ་སྐྱེ་བར་གྱུར་ཅིག་།བདག་བྱང་ཆུབ་ཐོབ་པ་ན་གང་དག་འཇིག་རྟེན་གྱི་ཁམས་དཔག་ཏུ་མ་མཆིས་གྲངས་མ་མཆིས་པ་དག་གི་སེམས་ཅན་རྣམས་ཀྱིས་བདག་གི་མིང་ཐོས་པར་འགྱུར་ཞིང་བདག་གི་སངས་རྒྱས་ཀྱི་ཞིང་དུ་སྐྱེ་བ་འཚལ་བར་གྱུར་ཅིག། དེ་དག་འགུམ་པའི་དུས་ཀྱི་ཚེ་ནའང་བདག་ཚོགས་དུ་མས་ཡོངས་སུ་བསྐོར་ཅིང་རབ་རིབ་མ་མཆིས་པའི་ཏིང་ངེ་འཛིན་ལ་
304a
༄#། །སྙོམས་པར་ཞུགས་ནས། གང་སེམས་ཅན་དེ་དག་གི་སྡུག་བསྔལ་ཐམས་ཅད་རབ་ཏུ་ཞི་བར་འགྱུར་བ་དེ་ལྟ་བུའི་ལེགས་པ་བཤད་པས་སེམས་ཅན་དེ་དག་ཚིམ་པར་བགྱིད་པར་གྱུར་ཅིག་།དད་པ་དེ་ཉིད་ཀྱིས་སེམས་མེད་པ་ཞེས་བགྱི་བའི་ཏིང་ངེ་འཛིན་ཐོབ་པར་གྱུར་ཅིག་།སེམས་དགའ་བའི་ཆོས་ཀྱིས་བཟོད་པའང་ཐོབ་པར་གྱུར་ཅིག་།འགུམ་པའི་དུས་བགྱིས་ནས་ཀྱང་བདག་གི་སངས་རྒྱས་ཀྱི་ཞིང་དུ་སྐྱེ་བར་གྱུར་ཅིག་།སངས་རྒྱས་ཀྱི་ཞིང་གཞན་དག་ན་སེམས་ཅན་གང་དག་ནོར་བདུན་དང་བྲལ་པ་རྣམས་དང ། ཐེག་པ་གསུམ་དོན་དུ་མི་གཉེར་བ་རྣམས་དང ། ལྷ་དང་མིའི་ཕུན་སུམ་ཚོགས་པ་དག་དོན་དུ་མི་གཉེར་བ་རྣམས་དང ། དགེ་བ་ཡོངས་སུ་བཙལ་བ་དོན་དུ་མི་གཉེར་པ་རྣམས་དང ། བསོད་ནམས་བགྱི་བའི་དངོས་པོ་གསུམ་པོ་དོན་དུ་མི་གཉེར་བ་རྣམས་དང ། ཆོས་མ་ལགས་པ་དང ། འདོད་ཆགས་ལ་ཆགས་པ་རྣམས་དང ། འདོད་པ་མི་བཟད་པས་ཟིལ་གྱིས་ནོན་པ་རྣམས་དང ། ཆོས་ལོག་པས་སེམས་དཀྲིས་པ་དེ་དག་འགུམ་པའི་དུས་ཀྱི་ཚེ་ན་བདག་ཚོགས་དུ་མས་ཡོངས་སུ་བསྐོར་ཏེ་མདུན་དུ་མཆིས་ནས་འོད་དང་ཏིང་ངེ་འཛིན་གྱིས་ཆོས་སྟོན་པར་གྱུར་ཅིག། དེ་དག་ལ་བདག་གི་སངས་རྒྱས་ཀྱི་ཞིང་ཡང་སྟོན་པར་གྱུར་ཅིག་།བྱང་ཆུབ་ཡང་དག་པར་འཛིན་དུ་སྩོལ་བར་ཡང་གྱུར་
304b
ཅིག་།སེམས་ཅན་དེ་དག་ཀྱང་བདག་ལ་མཆོག་ཏུ་དགའ་ཞིང་དང་བ་ཐོབ་པར་གྱུར་ནས་བྱང་ཆུབ་ཏུ་སེམས་བསྐྱེད་པར་གྱུར་ཅིག་།དེ་དག་གི་སྡུག་བསྔལ་གྱི་ཚོར་བ་ཐམས་ཅད་རབ་ཏུ་ཞིང་བར་གྱུར་ཅིག་།དེ་དག་གིས་ཏིང་ངེ་འཛིན་ཉི་མའི་སྒྲོལ་མ་ཐོབ་པར་གྱུར་ནས་གཏི་མུག་སྤངས་པར་གྱུར་ཅིག་།དེ་དག་འགུམ་པའི་དུས་བགྱིས་ནས་ཀྱང་བདག་གི་སངས་རྒྱས་ཀྱི་ཞིང་དུ་སྐྱེ་བར་གྱུར་ཅིག། བཅོམ་ལྡན་འདས་ཀྱི་བཀའ་སྩལ་བ། སྐྱེས་བུ་དམ་པ། ལེགས་སོ། །ལེགས་སོ། །ཁྱོད་ཀྱིས་ནི་སྨོན་ལམ་བཟང་པོ་བཏབ་པོ། །དེས་གསོལ་པ། བཙུན་པ་བཅོམ་ལྡན་འདས། གལ་ཏེ་བདག་སྨོན་ལམ་དེ་ལྟར་བུ་ཡོངས་སུ་རྫོགས་པར་འགྱུར་བ་ལྟ་ན་དེའི་སླད་དུ་སངས་རྒྱས་ཀྱི་ཞིང་གི་རྡུལ་ཕྲ་རང་ཀྱི་རྡུལ་སྙེད་ཀྱི་ཕྱོགས་བཅུའི་སངས་རྒྱས་ཀྱི་ཞིང་གཞན་དག་ཏུ་ཙནྡན་སྦྲུལ་གྱི་སྙིང་པོའི་ཕྱེ་མའི་ཆར་རབ་ཏུ་འབབ་པར་གྱུར་ཅིག་།སེམས་ཅན་གང་དག་གིས་དྲི་དེ་ཚོར་བར་གྱུར་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་ཅིག་།བདག་གིས་ཀྱང་ཏིང་ངེ་འཛིན་གྱ་ནོམ་སྣང་ཞེས་བགྱི་བ་ཐོབ་པར་གྱུར་ཅིག་།དེའང་བདག་ཉིད་ཀྱིས་མཐོང་བར་གྱུར་ཅིག ། རིགས་ཀྱི་བུ། དེས་ཏིང་ངེ་འཛིན་གྱ་ནོ་མ་སྣང་བ་བསྐྱེད་པ་དང ། སྣགས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ཀྱི་ཕྱོགས་བཅུའི་འཇིག་རྟེན་གྱི་ཁམས་གཞན་དག་ཏུ་ཙནྡན་སྦྲུལ་
305a
༄#། །གྱི་སྙིང་པོའི་ཕྱེ་མའི་ཆར་བབ་པ་དེའང་བདག་ཉིད་ཀྱིས་མཐོང་ལ་ཕྱོགས་བཅུའི་ཕྱོགས་རེ་རེར་ཡང་སེམས་ཅན་བགྲང་བ་ལས་འདས་པ་གང་དག་གི་ཐལ་མོ་སྦྱར་ཏེ་བྱང་ཆུབ་ཏུ་སེམས་བསྐྱེད་པ་དག་ཀྱང་མཐོང་བ་དང ། བཅོམ་ལྡན་འདས་ཀྱི་བཀའ་སྩལ་བ། རིགས་ཀྱི་བུ། ཤིན་ཏུ་མྱུར་བར་སྤོས་ཀྱི་ཆར་ཡབ་བབ་ལ་སེམས་ཅན་བགྲང་བ་ལས་འདས་པ་དག་ཀྱང་བྱང་ཆུབ་ཡང་དག་པར་འཛིན་དུ་བཅུག་པས་ན། རིགས་ཀྱི་བུ། དེའི་ཕྱིར་ཁྱོད་སེང་གེ་སྦོས་ཞེས་བྱ་བར་གྱུར་ཅིག་།སེང་གེ་སྤོས་ཁྱོད་ནི་བསྐལ་བ་གྲངས་མེད་པ་གངྒཱའི་ཀླུང་གཅིག་གི་བྱེ་བ་ཉེད་འདས་ནས་གྲངས་མེད་པ་གཉིས་པ་ལ་བབ་པ་ན་ཤར་ཕྱོགས་ལོགས་སུ་སངས་རྒྱས་ཀྱི་ཞིང་ནས་སྔ་རྒྱས་ཀྱི་ཞིང་གངྒཱི་ཀླུང་བཞི་བཅུ་རྩ་གཉིས་ཀྱི་བྱེ་མ་སྙེད་ཀྱི་རྡུལ་ཕྲ་རབ་ཀྱི་རྡུལ་སྙེད་འདས་པ་དེར་འཇིག་རྟེན་གྱི་ཁམས་དྲི་སྔོ་སྣང་བ་རྡུལ་བྲལ་ཞེས་བྱ་བ་ཞིག་འབྱུང་སྟེ། སེང་གེ་སྤོས་ཁྱོད་ནི་དེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣང་བ་རྡུལ་བྲལ་སྤོས་མཐོ་དབང་ཕྱུག་རྒྱལ་པོ་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་རོ། །རིགས་ཀྱི་བུ། དེ་ནས་
305b
བྱང་ཆུབ་སེམས་དཔའ་སེང་གེའི་སྤོས་ཀྱི་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྡན་ཕྱག་བྱས་པ་དང ། དེ་བཞིན་གཤེགས་པ་རིན་པོ་ཆེའི་སྙིང་བོས་དེ་ལ་བཀའ་སྩལ་པ། ལྷ་མི་ལྷ་མིན་རྣམས་ཀྱིས་མཆོད་པར་འགྱུར་བ་ལོངས། །སྲིད་པའི་འགྲོ་བར་སེམས་ཅན་སྡུག་བསྔལ་ཁྱོད་ཀྱི་སྒྲོལ། སྲིད་པའི་སྡུག་བསྔལ་ཉོན་མོངས་འཆིང་བ་ཁྱོད་ཀྱིས་ཆོད། །མི་ཡི་རྒྱལ་བ་འཕགས་པའི་གང་ཟག་ཉིད་དུ་འགྱུར། །རིགས་ཀྱི་བུ། དེ་ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་བུ་བརྒྱད་པ་གནོད་པ་མེད་ཅེས་བྱ་བ་ལ་སྔ་མ་བཞིན་དུ་སྦྱར་རོ། །བཙུན་པ་བཅོམ་ལྡན་འདས། བདག་ནི་ཇི་སྲིད་དུ་སངས་རྒྱས་ཀྱི་ཞིང་ཉོན་མོངས་པ་ཅན་ཁྲི་སངས་རྒྱས་ཀྱི་ཞིང་དྲི་སྡོ་སྣང་བ་རྡུལ་བྲལ་ཅི་འདྲ་པར་གྱུར་པ་དེ་ལྟར་ཡོངས་སུ་དག་པར་འགོད་པར་འགྱུར་ཞིང་དེ་དེ་ལྟར་དགེ་བའི་རྩ་བ་བསྐྱེད་པ་དང ། བསམ་པ་ཡོངས་སུ་དག་པ་དང ། ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་དག་གིས་ཁྱབ་པར་གནས་པར་འགྱུར་པ་སྲིད་དུ་བྱང་ཆུབ་སེམས་དཔར་གྱུར་ཅིང ། སངས་རྒྱས་ཀྱི་ཞིང་ཉོན་མོངས་པ་ཅན་དུ་བྱང་ཆུབ་སེམས་དཔའི་སྤྱད་པ་སྤྱོད་ན་སླད་ཀྱིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བགྱི་སྟེ། བཙུན་པ་བཅོམ་ལྡན་འདས། བདག་གིས་ནི་ཅི་
306a
༄#། །ནས་ཀྱང་བྱང་ཆུབ་སེམས་དཔའ་གཞན་དག་མི་སྤྱོད་པ་དེ་ལྟ་བུའི་བྱང་ཆུབ་སེམས་དཔའི་སྤྱོད་པ་སྤྱད་པར་བགྱིའོ། །བཙུན་པ་བཅོམ་ལྡན་འདས། གང་གི་ཚེ་བདག་ལོ་བདུན་པོ་འདི་ལ་གཅིག་པུ་དབེན་པར་མཆིས་ནས་སངས་རྒྱས་ཀྱི་ཡོན་ཏན་དང ། བྱང་ཆུབ་སེམས་དཔའི་ཡོན་ཏན་ཡོངས་སུ་དག་པ་དང ། སངས་རྒྱས་ཀྱི་ཞིང་གི་ཡོན་ཏན་ཡོངས་སུ་དག་པ་ལ་སེམས་ཤིང་མཆིས་པ་ན། བདག་གིས་ཏིང་ངེ་འཛིན་སྣང་བ་བཀོད་པ་ལ་སོགས་པ་བྱང་ཆུབ་སེམས་དཔའི་ཏིང་ངེ་འཛིན་ཁྲི་ཆིག་སྟོང་བསྐྱེད་ཅིང་ཐོབ་སྟེ་བསྒོམས་པ་གང་ལགས་པ་དེ་དག་ནི། བཙུན་པ་བཅོམ་ལྡན་འདས། བདག་བྱང་ཆུབ་སེམས་དཔར་གྱུར་པའི་བྱང་ཆུབ་སེམས་དཔའི་སྤྱོད་པ་ལགས་སོ། །སངས་རྒྱས་བཅོམ་ལྡན་འདས་གང་དག་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མ་མཆིས་པ་དག་ན་བཞུགས་ཏེ་འཚོ་ཞིང་གཞེས་ལ་སེམས་ཅན་རྣམས་སྨན་པ་དང་བདེ་བའི་སླད་དུ་ཆོས་སྟོན་པ་དེ་དག་དང ། གང་དག་དུས་གསུམ་ལས་ཡང་དག་པར་འདས་པའི་སངས་རྒྱས་ཀྱི་ཞིང་རྒྱལ་མཚན་གྱི་རྩེ་མོའི་དཔུང་རྒྱན་ཅེས་བགྱི་བ་རྒྱལ་བ་རྣམས་ཀྱིས་ཡོངས་སུ་གཏམས་པ་དེ་དག་མཐོང་ཞིང་དེར་འཇུག་པར་གྱུར་ཅིག་།བཙུན་པ་བཅོམ་ལྡན་འདས། ཏིང་ངེ་འཛིན་དེས་བདག་
306b
གིས་སངས་རྒྱས་བཅོམ་ལྡན་འདས་བྱང་ཆུབ་སེམས་དཔའ་དང ། ཉན་ཐོས་ཀྱི་ཚོགས་ཀྱིས་ཡོངས་སུ་བསྐོར་བ་རྡུལ་ཕྲ་རབ་ཀྱི་རྡུལ་སྙེད་དག་མཐོང་བར་གྱུར་ཅིག་།ཏིང་ངེ་འཛིན་ཀྱི་མཐུས་བདག་གནས་མ་མཆིས་པར་སངས་རྒྱས་ཀྱི་ཞིང་རྡུལ་ཕྲ་རབ་ཀྱི་རྡུལ་སྙེད་ཀྱི་ལུས་ཀྱིས་རེ་རེ་ལའང་ཕྱག་འཚལ་བར་གྱུར་ཅིག་།རེ་རེ་ལའང་བདག་གི་ལུས་རེ་རེས་རིན་པོ་ཆེ་དང ། མེ་ཏོག་སྣ་ཚོགས་བླ་ན་མ་མཆིས་པ་དག། སྤོས་དང ། མེ་ཏོག་ཕྲེང་བ་དང ། ཕྱེ་མ་དང ། བྱུག་པ་དང ། རོལ་མོའི་སྒྲ་བླ་ན་མ་མཆིས་པ་སྣ་ཚོགས་དང ། བཀོད་པ་བླ་ན་མ་མཆིས་པ་ཐམས་ཅད་ཀྱིས་མཆོད་པར་གྱུར་ཅིག་།སངས་རྒྱས་ཀྱི་ཞིང་གཅིག་ཏུའང་བདག་བསྐལ་བ་རྒྱ་མཚོ་བྱེ་བ་སྙེད་དུ་སྤྱོད་པར་གྱུར་ཅིག་།གང་གི་ཚེ་བདག་གིས་ལུས་ཐམས་ཅད་རྣམ་པར་འཇིག་པའི་ཏིང་ངེ་འཛིན་གྱིས་སྐད་ཅིག་གཅིག་གིས་སངས་རྒྱས་ཀྱི་རེ་རེའི་སངས་རྒྱས་ཀྱི་སྤྱོད་ཡུལ་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་འཚལ་བར་གྱུར་ཅིག་།བཙུན་པ་བཅོམ་ལྡན་འདས། ཏིང་ངེ་འཛིན་ཡོན་ཏན་འབྱུང་གནས་ཀྱིས་དེ་དག་གིས་རེ་རེ་ལའང་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ཀྱི་བསྟོད་པ་བླ་ན་མ་མཆིས་པ་དག་གིས་བསྟོད་པར་གྱུར་ཅིག་།བཙུན་པ་བཅོམ་ལྡན་འདས། བདག་གིས་མིག་མི་འཛུམ་པའི་ཏིང་ངེ་འཛིན་གྱིས་རྡུལ་གཅིག་གི་སྟེང་དུ་སེམས་ཀྱི་སྐད་ཅིག་གི་ཚད་ཀྱིས་རྒྱལ་བ་རྣམས་
307a
༄#། །ཀྱིས་གཏམས་པའི་སངས་རྒྱས་ཀྱི་ཞིང་ཐམས་ཅད་མཐོང་བར་གྱུར་ཅིག་།བཙུན་པ་བཅོམ་ལྡན་འདས། བདག་གིས་ཉོན་མོངས་པ་མ་མཆིས་པའི་ཏིང་ངེ་འཛིན་གྱིས་སེམས་ཀྱི་སྐད་ཅིག་གཅིག་གིས་སངས་རྒྱས་ཀྱི་ཞིང་ཐམས་ཅད་དག་ན་འདས་པ་དང ། མ་འོངས་པ་དང ། ད་ལྟར་བྱུང་བའི་བྱང་ཆུབ་སེམས་དཔའ་རྣམས་དང ། སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་མཐོང་བར་གྱུར་ཅིག་།བཙུན་པ་བཅོམ་ལྡན་འདས། བདག་དཔའ་བར་འགྲོ་བའི་ཏིང་ངེ་འཛིན་གྱིས་སེམས་ཅན་དམྱལ་བ་རྣམས་སུ་ཞུགས་ཏེ་སེམས་ཅན་དམྱལ་བ་པའི་ལུས་སུ་སྤྲུལ་ནས་སེམས་ཅན་དམྱལ་བ་བའི་སེམས་ཅན་རྣམས་ལ་ཆོས་སྟོན་པར་འགྱུར་ཞིང་བྱང་ཆུབ་ཡང་དག་པར་འཛིན་དུ་སྩོལ་བར་གྱུར་ཅིག་།དེ་ན་སེམས་ཅན་དེ་དག་ཀྱང་བྱང་ཆུབ་ཏུ་སེམས་བསྐྱེད་པར་གྱུར་ཅིག་།དེ་ནས་ཤི་འཕོས་ནས་ཀྱང་མི་རྣམས་དང་སྐལ་བ་མཉམ་པར་སྐྱེ་བར་འགྱུར་ཞིང་གང་ན་སངས་རྒྱས་བཅོམ་ལྡན་འདས་དག་བཞུགས་པའི་སངས་རྒྱས་བཅོམ་ལྡན་འདས་དེ་དག་ལས་ཆོས་ཉན་པར་འགྱུར་བ་དང ། ཕྱིར་མི་ལྡོག་པའི་ས་ལ་གནས་པར་གྱུར་ཅིག་།དུད་འགྲོ་རྣམས་ལའང་དེ་བཞིན། ཡི་དྭགས་རྣམས་ལའང་དེ་བཞིན། གནོད་སྦྱིན་རྣམས་ལའང་དེ་བཞིན། སྲིན་པོ་རྣམས་ལའང་དེ་བཞིན། ལྷ་མ་ཡིན་རྣམས་ལའང་
307b
དེ་བཞིན། ཀླུ་རྣམས་ལའང་དེ་བཞིན། མིའམ་ཅི་རྣམས་ལའང་དེ་བཞིན། ལྟོ་འཕྱེ་ཆེན་པོ་རྣམས་ལའང་དེ་བཞིན། ཤ་ཟ་རྣམས་ལའང་དེ་བཞིན། སྲུལ་པོ་རྣམས་ལའང་དེ་བཞིན་ལུས་སྲུལ་པོ་རྣམས་ལའང་དེ་བཞིན། མི་གདོལ་པ་རྣམས་ལའང་དེ་བཞིན། ཚོང་པ་རྣམས་དང ། སྨད་འཚོང་མ་རྣམས་ལའང་དེ་བཞིན་ཏེ། བཅོམ་ལྡན་འདས། སེམས་ཅན་རིགས་ཇི་ལྟ་བུར་སྐྱེས་བ་རྣམས་དང ། དེ་དག་གིས་ལུས་ཇི་ལྟ་བུ་ཐོབ་པ་དང ། སེམས་ཅན་ལས་ཀྱི་རྐྱེན་ཇི་ལྟ་བུས་བདེ་བའམ། སྡུག་བསྔལ་གྱི་ཚོར་བ་མྱོང་བ་རྣམས་དང ། བཟོའི་གནས་ཇི་ལྟ་བུ་དག་དང ། ལས་ཀྱི་གནས་ཇི་ལྟ་བུ་དག་ལ་ཆགས་པ་རྣམས་ལ་དེ་ལྟ་བུའི་ལུས་སུ་སྤྲུལ་ནས། བཟོའི་གནས་དང ། ལས་ཀྱི་གནས་དེ་ལྟ་བུ་དག་ལ་བརྩོན་པ་སྟོན་པར་བགྱིད་ཅིང ། དེ་ལྟ་བུའི་ཡི་གེ་བརྗོད་པས་སེམས་ཅན་རྣམས་ཀྱི་སེམས་མགུ་བར་བགྱིད་ཅིང་ཆོས་ཀྱང་སྟོན་པར་གྱུར་ཅིག་།བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་འཇུག་ཅིང་བཙུད་པ་དང ། རབ་ཏུ་འགོད་པར་ཡང་གྱུར་ཅིག་།བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་སླར་མི་ལྡོག་པ་ལ་འགོད་པར་ཡང་གྱུར་ཅིག། བཙུན་པ་བཅོམ་ལྡན་འདས། བདག་གིས་ཕྱོགས་བཅུའི་སངས་རྒྱས་ཀྱི་ཞིང་སྟོང་ཕྲག་བཅུ་པོ་ཐམས་ཅད་དག་ན་སེམས་ཅན་ཐམས་ཅད་ཀྱི་སེམས་ཀྱི་རྒྱུད་ལའང་ཅི་ནས་ཀྱང་སྔོན་
308a
༄#། །སེམས་ཀྱི་རྒྱུད་ལའང་ཅི་ནས་ཀྱང་སྔོན་གྱི་ལས་དང ། ཉོན་མོངས་པ་མ་ལུས་པར་འགྱུར་བ་དང ། སེམས་ཅན་འགའི་སེམས་ཀྱི་རྒྱུད་ཀྱི་ལམ་ཡང་བདུད་བཞིས་རྟོགས་པར་མི་འགྱུར་བ་དེ་ལྟར་སེམས་ཅན་ཐམས་ཅད་ཀྱི་སེམས་ཀྱི་རྒྱུད་ཡོངས་སུ་སྦྱོང་བར་འགྱུར་བ་དེ་སྲིད་དུ་བདག་གིས་བྱང་ཆུབ་ཀྱི་སྤྱོད་པ་སྤྱད་པར་བགྱིའོ། ། དེའི་སླད་དུ་བདག་གིས་སངས་རྒྱས་ཀྱི་ཞིང་ཁྲིའང་ཇི་ལྟར་དེ་བཞིན་གཤེགས་པ་སྣང་བ་རྡུལ་བྲལ་སྤོས་མཐོ་དབང་ཕྱུག་རྒྱལ་པོ་སྐར་མའི་སངས་རྒྱས་ཀྱི་ཞིང་དྲི་སྔོ་སྣང་བ་རྡུལ་བྲལ་གྱི་ཡོན་ཏན་བཀོད་པ་ཅི་འདྲ་བ་དེ་ལྟར་ཡོངས་སུ་དག་པར་འཇོག་པར་གྱུར་ཅིག་།དེ་བཞིན་དུ་བདག་གིས་བདག་གི་སངས་རྒྱས་ཀྱི་ཞིང་དང ། བདག་གི་འཁོར་ཡང་ཇི་ལྟར་བྱང་ཆུབ་སེམས་དཔའ་སེང་གེ་སྤོས་ཀྱིས་སྨོན་ལམ་བཏབ་པ་བཞིན་དུ་གྱུར་ཅིག་།བཙུན་པ་བཅོམ་ལྡན་འདས། གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན་དེའི་སླད་དུ་ཕྱོགས་བཅུའི་སངས་རྒྱས་ཀྱི་ཞིང་དག་གི་སེམས་ཅན་རྣམས་ཀྱི་སྡུག་བསྔལ་ཐམས་ཅད་རབ་ཏུ་ཞི་བར་གྱུར་ཅིག་།ཐམས་ཅད་ཀྱང་སེམས་མཉེན་པར་གྱུར་ཅིག་།སེམས་ལས་སུ་རུང་བར་གྱུར་ཅིག་།རང་རང་གི་གླིང་བཞི་པ་དག་ནས་སངས་རྒྱས་བཞུགས་པ་དག་མཐོང་བར་གྱུར་ཅིག་།སེམས་ཅན་དེ་དག་ལ་རིན་པོ་ཆེ་སྣ་ཚོགས་
308b
དག་དང ། མེ་ཏོག་དང ། སྤོས་དང ། བྱུག་པ་དང ། ཕྱེ་མ་དང ། གདུགས་དང ། རྒྱལ་མཚན་དང ། བ་དན་དག་བདོག་པར་གྱུར་ལ། དེས་སེམས་ཅན་དེ་དག་སངས་རྒྱས་དེ་དག་ལའང་མཆོད་པ་བགྱིད་པར་འགྱུར་ཞིང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཅིག་།བཅོམ་ལྡན་འདས། བདག་གིས་ཀྱང་ཏིང་ངེ་འཛིན་སྣང་བ་བཀོད་པའི་མཐུས་བདག་ཉིད་ཀྱིས་མཐོང་བར་གྱུར་ཅིག་།ཚིག་དེ་བརྗོད་མ་ཐག་ཏུ་ཇི་ལྟར་སྨོན་ལམ་བཏབ་པ་བཞིན་དུ་བདག་ཉིད་ཀྱིས་མཐོང་བར་གྱུར་བ་དང ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ལེགས་སོ། །ལེགས་སོ། །རིགས་ཀྱི་བུ་ཁྱོད་ནི་རང་གི་སངས་རྒྱས་ཀྱི་ཞིང་ཁོ་ར་ཁོར་ཡུག་ཏུ་སངས་རྒྱས་ཀྱི་ཞིང་ཡོངས་སུ་དག་པ་ཁྲི་འཇོག་པར་འགྱུར་རོ།། སེམས་ཅན་དཔག་ཏུ་མེད་གྲངས་མེད་པ་དག་གི་སེམས་ཀྱི་རྒྱུད་ཡོངས་སུ་དག་པར་བྱེད་པར་ཡང་འགྱུར་རོ། །དེ་བཞིན་དུ་སངས་རྒྱས་བཅོམ་ལྡན་འདས་དཔག་ཏུ་མེད་གྲངས་མེད་པ་དག་ལ་མཆོད་པ་དཔག་ཏུ་མེད་གྲངས་མེད་པ་དག་བྱེད་པར་ཡང་སྤྲོ་བར་ཡང་འགྱུར་རོ། །རིགས་ཀྱི་བུ། དེའི་ཕྱིར་ཁྱོད་ཀུན་ཏུ་བཟང་པོ་ཞེས་བྱ་བར་གྱུར་ཅིག་།ཀུན་ཏུ་བཟང་པོ་ཁྱོད་ནི་མ་འོངས་པའི་དུས་ན་བསྐལ་པ་གྲངས་མེད་པ་གངྒཱའི་ཀླུང་གཅིག་གི་བྱེ་མ་སྙེད་འདས་ནས། བསྐལ་བ་གྲངས་མེད་པ་གཉིས་པ་ལ་བབ་པ་ན་བྱང་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་
309a
༄#། །སངས་རྒྱས་ཀྱི་ཞིང་གངྒཱའི་ཀླུང་དྲུག་ཅུའི་བྱེ་མ་སྙེད་འདས་པ་དེ་ན་འཇིག་རྟེན་གྱི་ཁམས་ཡེ་ཤེས་ཀྱི་ཆུ་ཤིན་ཏུ་རྣམ་པར་དག་པའི་ཡོན་ཏན་ཞེས་བྱ་བ་ཞིག་འབྱུང་སྟེ། ཀུན་ཏུ་བཟང་པོ་ཁྱོད་ནི་དེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་རྡོ་རྗེ་རྣམ་པར་བསྒྱིངས་པའི་དབང་ཕྱུག་ཏོག་ཅེས་བྱ་བ་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་རོ། །རིགས་ཀྱི་ཀྱི་བུ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྔས་མགོ་བོས་གཏུགས་པ་དང།་དེ་བཞིན་གཤེགས་པ་རིན་པོ་ཆེའི་སྙིང་པོས་བཀའ་སྩལ་པ། བརྟུལ་ཞུགས་བཟང་པོ་རབ་ཏུ་དགའ་བ་སེམས་དུལ་ལོངས། །དམ་བཅས་བརྟན་པ་སེམས་ཅན་རྣམས་ཀྱི་རྒྱུད་སྦྱོངས་ལ། །ཁྱོད་ཀྱིས་སེམས་ཅན་ཉོན་མོངས་མི་བཟད་ཀླུང་ལས་སྒྲོལ། །ཁྱོད་ནི་འཇིག་རྟེན་ཡེ་ཤེས་སྒྲོན་མཆོག་སངས་རྒྱས་འགྱུར། །རིགས་ཀྱི་བུ། ཡང་དེའི་ཚེ་ན་སྲོག་ཆགས་ལེ་ལོ་ཅན་ཁྲིས་ཚིག་མཐུན་པར་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བསམ་པ་ཤིན་ཏུ་རྣམ་པར་དག་པའི་བྱང་ཆུབ་སེམས་དཔའ་སེམས་
309b
དཔའ་ཆེན་པོ་ཀུན་ཏུ་བཟང་པོས་བྱང་ཆུབ་སེམས་དཔའི་སྤྱད་པ་སྤྱོད་པ་ཅིང་ཡོངས་སུ་དག་པར་འཇོག་པར་འགྱུར་བ་ན་བདག་ཅག་ཀྱང་སངས་རྒྱས་ཀྱི་ཞིང་ཡོངས་སུ་དག་པ་དེར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་བར་བགྱིའོ། །དེ་ལྟར་བདག་ཅག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བགྱིས་ནས་སངས་རྒྱས་ཀྱི་ཞིང་དེར་སྐྱེ་བར་གྱུར་ཅིག་།རིགས་ཀྱི་བུ། དེ་བཞིན་གཤེགས་པ་རིན་པོ་ཆེའི་སྙིང་པོས་སྲོག་ཆགས་ཁྲི་པོ་དེ་དག་ལ་འདི་སྐད་ཅེས་ལུང་བསྟན་ཏེ། གང་གི་ཚེ་བྱང་ཆུབ་སེམས་དཔའ་ཀུན་ཏུ་བཟང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེའི་ཚེ། ཁྱེད་ཅག་འཇིག་རྟེན་གྱི་ཁམས་དེའི་ཁོ་ར་ཁོར་ཡུག་དག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། སྟོང་སྟོང་ཞིང་མཚན་མཐུན་པའི་དེ་བཞིན་གཤེགས་པར་འགྱུར་རོ། །འདི་ལྟ་སྟེ། སྟོང་ནི་དེ་བཞིན་གཤེགས་པ་མེ་ལྕེ་ཐབ་ཁུང་དབང་ཕྱུག་དབྱངས་ཞེས་བྱ་བར་འགྱུར་རོ། །གཞན་ཡང་སྟོང་ནི་དེ་བཞིན་གཤེགས་པ་སྡོམ་པའི་དབང་ཕྱུག་དབྱངས་ཞེས་བྱ་བར་འགྱུར་རོ། །གཞན་ཡང་སྟོང་ནི་དེ་བཞིན་གཤེགས་པ་ཤིན་ཏུ་དྲི་མེད་དབྱངས་ཀྱི་དབང་ཕྱུག་རྒྱལ་པོ་ཞེས་བྱ་བར་འགྱུར་རོ། །གཞན་ཡང་སྟོང་ནི་དེ་བཞིན་
310a
༄#། །གཤེགས་པ་གྱ་ནོམ་འཇིགས་མེད་དབྱངས་ཀྱི་དབང་ཕྱུག་རྒྱལ་པོ་ཞེས་བྱ་བར་འགྱུར་རོ། །གཞན་ཡང་སྟོང་ནི་དེ་བཞིན་གཤེགས་པ་དྲི་མེད་དབྱངས་ཀྱི་གཟི་བརྗིད་དབང་ཕྱུག་རྒྱལ་པོ་ཞེས་བྱ་བར་འགྱུར་རོ། །ལྔ་བརྒྱའམ་མཚན་མཐུན་ཏེ། འདི་ལྟ་སྟེ། ཉི་མའི་དབྱངས་ཞེས་བྱ་བར་འགྱུར་རོ། །དེ་བཞིན་དུ་ཉིས་སྟོང་ལྔ་བརྒྱ་ནི་འཇིགས་བྲལ་གྲགས་པའི་རྒྱལ་པོ་དང ། འོད་ཟེར་བྲལ་དང ། འོད་ཟེར་བྲལ་བའི་དབྱངས་དང ། གྲགས་པའི་དབང་ཕྱུག་དབྱངས་དང ། རྣམ་གྲོལ་ཆོས་གྲགས་དབྱངས་དང ། སྙིང་པོ་གྲགས་པའི་རྒྱལ་པོ་དང ། རིན་ཆེན་རྒྱལ་མཚན་དང ། སྣང་བའི་དབང་ཕྱུག་དང ། ཐུབ་ཆེན་ཡེ་ཤེས་འབར་བའི་དབང་ཕྱུག་དང ། གནས་ཀྱི་གོས་བསགས་རྒྱལ་པོ་དང ། ཡེ་ཤེས་བློ་གྲོས་བསམ་ཡས་སྙིང་པོ་དང ། ཡེ་ཤེས་ལྷུན་པོའི་རྒྱལ་མཚན་དང ། ཡེ་ཤེས་རྒྱ་མཚོའི་རྒྱལ་པོ་དང ། བརྩོན་འགྲུས་ཆེན་པོའི་དབྱངས་ཀྱི་དབང་ཕྱུག་དང ། ལྷུན་པོའི་དཔལ་ལྟ་བུ་དང ། ཡེ་ཤེས་རྡུལ་བྲལ་ཤུགས་དང ། ཅིའི་དབང་ཕྱུག་ས་བོན་དང ། ཡེ་ཤེས་ཤིན་ཏུ་དྲི་མེད་སྒྲོགས་པའི་དབང་ཕྱུག་དང ། ཡོན་ཏན་རྒྱ་མཚོའི་ཟིལ་མནན་རྒྱལ་པོ་དང ། ཡེ་ཤེས་འབྱུང་བ་སྟོབས་ཀྱི་རྒྱལ་པོ་དང ། བྱང་ཆུབ་རྡུལ་བྲལ་རྒྱལ་པོ་དང ། ཐུབ་པ་དཔལ་བརྩེགས་ཤུགས་ཀྱི་མེ་ཏོག་དག། ཡེ་
310b
ཤེས་དཔལ་བརྩེགས་བློ་དང ། རྡོ་རྗེ་སེང་གེ་དང ། ཚུལ་ཁྲིམས་འོད་གསལ་དང ། བཟང་མཆོག་དང ། འོད་ཟེར་མཐའ་ཡས་དང ། སེང་གེ་དགའ་དང ། ཡེ་ཤེས་མི་ཟད་བརྩེགས་དང ། རིན་ཆེན་སྣང་བ་དང ། ཡེ་ཤེས་དྲི་མེད་དང ། ཡེ་ཤེས་རྒྱས་པ་དང ། སེང་གེ་གྲགས་པ་དང ། མངོན་ཤེས་ཡོན་ཏན་རྒྱལ་པོ་དང ། ཆོས་ཀྱི་སྣ་མའི་མེ་ཏོག་ཆར་འབེབས་དང ། འོད་བྱེད་དང ། ལྷུན་པོ་མངོན་འཕགས་དང ། ཆོས་ཡང་དག་འཕགས་རྒྱལ་པོ་དྲི་མེད་དང ། སྤོས་ཀྱི་དབང་ཕྱུག་དང ། དྲི་མེད་སྤྱན་དང ། རབ་ཏུ་ཆེ་བསགས་དང ། ཐོགས་མེད་སྟོབས་སྤོས་ཀྱི་རྒྱལ་པོ་དང ། རང་གི་ཡེ་ཤེས་བསོད་ནམས་སྟོབས་དང ། ཡེ་ཤེས་ཆོས་གོས་དང ། དབང་སྒྱུར་དང ། ཆགས་མེད་ཕམ་བཞེད་དང ། ཡེ་ཤེས་ཡང་དག་འབྱུང་དང ། ལྷུན་པོ་ཆེན་པོ་དང།་སྟོབས་ཀྱི་སྙིང་པོ་དང ། ཡོན་ཏན་འབྱུང་གནས་དང ། འཁྲི་ཤིང་མེ་ཏོག་རྒྱལ་མཚན་དང ། ཡོན་ཏན་འོད་དང ། གཏི་མུག་རྣམ་བྲལ་ཡོན་ཏན་རྒྱལ་པོ་དང ། རྡོ་རྗེ་མཆོག་དང ། ཆོས་ཀྱི་ཏོག་དང ། དབྱངས་ཀྱི་དབང་པོའི་རྒྱལ་པོ་དང ། ལེགས་སྦས་དང ། རྡོ་རྗེ་རྒྱལ་མཚན་དང ། རིན་ཆེན་དབང་ཕྱུག་དང ། མངོན་འཕགས་རྒྱལ་མཚན་དང ། རི་བོ་ལྟ་བུ་དང ། དགའ་སྤྲིན་དང ། ཆོས་བྱེད་དང ། སཱ་ལའི་རྒྱལ་པོ་དང ། ཀུན་སྦེད་དང ། རྒྱ་མཚོའི་རྒྱལ་པོ་དང ། ཡེ་ཤེས་ཡང་དག་བསགས་དང ། ཡེ་ཤེས་འོད་འཕྲོ་དང ། མེ་ཏོག་ཚོགས་ཅན་དང ། གླང་པོ་
311a
༄#། །ཆེའི་དབང་པོའི་དབང་ཕྱུག་དང ། ུ་དུམྦ་རའི་མེ་ཏོག་དང ། གསེར་གྱི་རྒྱལ་མཚན་དང ། ཆོས་ཀྱི་རྒྱལ་མཚན་དང ། སྒྲོགས་པའི་རྒྱལ་པོ་དང ། ཙནྡན་དང ། ཤིན་ཏུ་བརྟན་པ་དང ། མཐུས་གནོན་དང ། རྒྱལ་མཚན་གྱི་རྩེ་མོའི་སྒྲོན་མ་དང ། ཡེ་ཤེས་གོ་རིམ་དང ། རྒྱ་མཚོའི་རྒྱལ་མཚན་དང ། རྣམ་རྒྱལ་ཆོས་གྲགས་དང ། ང་རྒྱལ་སྒྲོགས་དང ། ཡོན་ཏན་འོད་འཕྲོ་དང ། ཡེ་ཤེས་འོད་དང ། ཡེ་ཤེས་སྒྲོན་མ་དང ། བདེ་བའི་རྒྱལ་པོ་དང ། ཡེ་ཤེས་དབྱངས་དང ། རྒྱལ་མཚན་བསྡུས་པ་དང ། རྡོ་རྗེའི་སྒྲོན་མ་དང ། བཀོད་པའི་རྒྱལ་པོ་དང ། རྒྱལ་བའི་གྲངས་དང ། རབ་ཏུ་བརྟན་པ་དང ། བློ་གྲོས་ཟླ་བའི་རྒྱལ་པོ་དང ། རིམ་གྱིས་སྒྲོགས་པའི་རྒྱལ་པོ་དང ། སཱ་ལའི་དབང་པོ་སེང་གེའི་སྒྲ་དང ། སྲེད་མེད་ཀྱི་བུས་རྣམ་པར་རྒྱལ་བའི་སྙིང་པོ་དང ། ཡོན་ཏན་རིན་ཆེན་ཡང་དག་བསགས་དང ། སྐར་མའི་སྙིང་པོ་དང ། སྐར་མ་རྣམ་འཇིག་གྲགས་པ་དང ། བསོད་ནམས་སྟོབས་སཱ་ལའི་རྒྱལ་པོ་དང ། ཡིད་དུ་འོང་བའི་དབྱངས་དང ། ཚངས་མཆོག་དང ། ཡུལ་འཁོར་སྲུང་ཞེས་བྱ་བར་འགྱུར་རོ། །གཞན་ཡང་སྟོང་ནི་སྤོས་ཀྱི་པདྨ་རྣམ་རྒྱལ་གྲགས་པའི་རྒྱལ་པོ་ཞེས་བྱ་བ་དང ། འོད་ཟེར་གྱི་དཀྱིལ་འཁོར་སྣང་བ་དང ། སྣང་བའི་རྒྱལ་པོ་དང ། སྤོས་ཀྱི་པདྨ་དམ་པའི་ཤུགས་དང ། ཡོན་ཏན་རྒྱ་མཚོའི་མཐའ་ཡས་ཡེ་ཤེས་བླ་མ་དང །
311b
ཛམྦུའི་གྲིབ་མ་དང ། ཡོན་ཏན་རི་བོའི་རྒྱལ་མཚན་དང ། སེང་གེའི་ཏོག་དང ། ཀླུས་སྦངས་མེ་ཏོག་གཟི་བརྗིད་རྒྱལ་པོ་དང ། དྲི་ཞིམ་ས་བོན་བདག་མེད་དང ། ཡོན་ཏན་བདུད་རྩི་གཟི་བརྗིད་རྒྱལ་པོ་ཞེས་བྱ་བ་དག་ཏུ་འགྱུར་རོ། །གཞན་ཡང་སྟོང་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་སྦྱིན་རྒྱལ་པོ་ཀླུ་དབང་རྣམ་གྲོལ་སད་བྱེད་འཇིག་རྟེན་རྒྱ་མཚོའི་མིག་གི་རི་བོ་ཞེས་བྱ་བ་ཤ་སྟག་ཏུ་འགྱུར་ཏེ། འཇིག་རྟེན་གྱི་ཁམས་གཞན་དང ། གཞན་དག་ཏུ་ཉི་མ་གཅིག་དང ། དུས་གཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང ། དེ་དག་གི་ཚེའི་ཚད་ནི་བར་གྱི་བསྐལ་བ་བཅུར་འགྱུར་རོ། །སྲོག་ཆགས་ཁྲི་པོ་དེ་དག་གིས་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྔས་མགོས་གཏུགས་པ་དང ། དེ་བཞིན་གཤེགས་པ་རིན་པོ་ཆེའི་སྙིང་པོས་བཀའ་སྩལ་པ། ཀླུ་ལྟར་བརྟན་པར་སྒྲོགས་པ་དག་ནི་རེ་ཞིག་ལོངས། །དགེ་བའི་ནོར་རྣམས་དག་ནི་ཡང་དག་གསོག་གྱིས་ལ། །ཕ་རོལ་ཕྱིན་པ་རྣམས་ལ་མྱུར་དུ་བརྩོན་གྱི་དང ། །ལྷ་མི་འཇིག་རྟེན་རྣམས་ཀྱི་འདྲེན་པ་དག་ཏུ་འགྱུར།། །། བམ་པོ་བདུན་པ། རིགས་ཀྱི་བུ། དེ་ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་བུ་དགུ་པ་སྡིག་མེད་ཅེས་བྱ་བ་ལ་སྨྲས་པ། སྔ་མ་བཞིན་དུ་སྦྱར་ཏེ། དེས་གསོལ་བ། བཙུན་པ་བཅོམ་ལྡན་
312a
༄#། །འདས། ཅི་ནས་ཀྱང་བདག་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན། སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་དག་བཞུགས་ཏེ་འཚོ་ཞིང་གཞེས་པ་རྣམས་བདག་གི་དཔང་ལགས་པར་འགྱུར་བ་དེ་ལྟར་བདག་གིས་བྱང་ཆུབ་སེམས་དཔའི་སྤྱད་པ་སྤྱོད་པར་བགྱི་སྟེ། བཙུན་པ་བཅོམ་ལྡན་འདས། གང་བདག་གིས་ཁྱོད་ཀྱི་སྤྱན་སྔར་བྱང་ཆུབ་ཏུ་སེམས་བསྐྱེད་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེའི་བར་དུ་བདག་བྱང་ཆུབ་སེམས་དཔའི་སྤྱད་པ་སྤྱོད་པ་ན་འགྱོད་པའི་སེམས་སྐྱེ་བར་མ་གྱུར་ཅིག་།བྱང་ཆུབ་ཀྱི་མཐར་ཐུག་པ་ཉེ་བར་བཟུང་བའི་བར་དུ་དམ་བཅས་པ་བརྟན་ཞིང་ཇི་སྐད་སྨྲས་པ་དེ་བཞིན་དུ་བགྱིད་པར་གྱུར་ཅིག་།སེམས་ཅན་གཞན་གྱི་སེམས་འཁྲུག་པར་མི་བགྱིད་པར་གྱུར་ཅིག་།བདག་ཉན་ཐོས་དང་རང་སངས་རྒྱས་ཀྱི་ཐེག་པར་སེམས་མི་བསྐྱེད་པར་གྱུར་ཅིག་།འདོད་པའི་འདོད་ཆགས་ཀྱི་སེམས་དང ། སེམས་ལས་བྱུང་བ་སྐྱེ་བར་མ་གྱུར་ཅིག་།རྨུགས་པ་དང ། གཉིད་དང་ལྡན་པར་མ་གྱུར་ཅིག་།རྒོད་པ་དང་ལྡན་པར་མ་གྱུར་ཅིག། འགྱོད་པ་དང་ལྡན་པར་མ་གྱུར་ཅིག། ཐེ་ཚོམ་དང་ལྡན་པར་མ་གྱུར་ཅིག་།བྱང་ཆུབ་ཀྱི་མཐར་ཐུག་གི་
312b
བར་དུ་བདག་བྱང་ཆུབ་སེམས་དཔའི་སྤྱད་པ་སྤྱད་པ་ན། སྲོག་གཅོད་པ་མ་མཆིས་པ་དང ། མ་བྱིན་པར་ལེན་པ་མ་མཆིས་པ་དང ། མི་ཚངས་པར་སྤྱོད་པ་མ་མཆིས་པ་དང ། བརྫུན་དུ་སྨྲ་བ་མ་མཆིས་པ་དང ། ཕྲ་མ་མ་མཆིས་པ་དང ། ངག་རྩུབ་པོ་མ་མཆིས་པ་དང ། ཚིག་ཀྱལ་བ་མ་མཆིས་པ་དང ། བརྣབ་སེམས་མ་མཆིས་པ་དང ། གནོད་སེམས་མ་མཆིས་པ་དང ། ལོག་པར་ལྟ་བ་མ་མཆིས་པ་དང ། ཐེ་ཚོམ་དང་ལྡན་པ་མ་མཆིས་པ་དང ། ཆོས་ལ་མི་གུས་པའི་སེམས་མ་མཆིས་པ་དང ། སླུ་བའི་སེམས་མ་མཆིས་ཤིང་ཆོས་དེ་དག་མ་མཆིས་པར་གྱུར་ཅིག་།བྱང་ཆུབ་ཀྱི་མཐར་ཐུག་པ་ཉེ་བར་བཟུང་བའི་བར་དུ་གོམ་པ་འདོར་བ་ཙམ་ལའང་རྟག་ཏུ་སངས་རྒྱས་རྗེས་སུ་དྲན་པའི་སེམས་དང་སེམས་ལས་བྱུང་བ་དག་འཇུག་པར་གྱུར་ཅིག་།བདག་བྱང་ཆུབ་ཀྱི་མཐར་ཐུག་གི་བར་དུ་སངས་རྒྱས་མཐོང་བ་དང ། ཆོས་ཉན་པ་དང ། དགེ་འདུན་ལ་བསྙེན་བཀུར་བགྱིད་པ་དང་མི་འབྲལ་བར་གྱུར་ཅིག་།ཚེ་རབས་ཐམས་ཅད་དུའང་རབ་ཏུ་འབྱུང་བ་ཐོབ་པར་གྱུར་ཅིག་།ཚེ་རབས་ཐམས་ཅད་དུ་ཕྱག་དར་ཁྲོད་པར་གྱུར་ཅིག། ཆོས་གོས་གསུམ་པ་དང ། ཤིང་དྲུང་པ་དང ། ཙོག་བུ་པ་དང ། དགོན་པ་པ་དང ། བསོད་སྙོམས་པ་དང ། འདོད་པ་ཆུང་བ་དང ། ཆོག་ཤེས་པ་དང ། ཆོས་སྟོན་པ་དང ། ཚིག་བཙུན་པ་དང ། སྤོབས་པ་དཔག་ཏུ་མ་མཆིས་པ་
313a
༄#། །ཕུན་སུམ་ཚོགས་པར་གྱུར་ཅིག། །ལྟུང་བའི་རྩ་བ་འབྱུང་བར་མ་གྱུར་ཅིག་།བརྫུན་དུ་སྨྲ་བ་དང་ལྡན་པའི་ཚིག་རྣམས་ཀྱིས་ཕས་ཀྱི་རྒོལ་བ་འདུལ་བར་མ་གྱུར་ཅིག། །བུད་མེད་ལ་སྟོང་པ་ཉིད་དང་ལྡན་པའི་ཆོས་སྟོན་པར་མ་གྱུར་ཅིག་།སྟོང་པ་ཉིད་ཡིད་ལ་བགྱིད་པས་བུད་མེད་ལ་ཆོས་སྟོན་པར་བགྱིད་པར་མ་གྱུར་ཅིག། ལག་པ་སྒྱུར་ཞིང་ཆོས་སྟོན་པར་མ་གྱུར་ཅིག་།རྟག་ཏུ་བདག་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་རྣམས་ལ་སྟོན་པའི་འདུ་ཤེས་བསྐྱེད་པར་གྱུར་ཅིག། བདག་ཆོས་སྨྲ་བ་གང་ལ་ཆོས་ཉན་པ་ན་དེ་ལ་སྟོན་པའི་འདུ་ཤེས་ཀྱིས་བསྙེན་བཀུར་བགྱིད་པར་གྱུར་ཅིག། བདག་ཆོས་སྨྲ་བ་དེ་ལ་དེ་བཞིན་གཤེགས་པ་ལ་ཇི་ལྟ་བ་དེ་ལྟར་རིམ་གྲོ་བགྱིད་པ་དང ། བསྙེན་བཀུར་བགྱིད་པ་དང ། བླ་མར་བགྱིད་པ་དང ། རི་མོར་བགྱིད་པ་དང ། མཆོད་པར་བགྱིད་པར་གྱུར་ཅིག་།ཆོས་སྨྲ་བ་ལ་བདག་གི་ཤ་དག་གི་བར་གྱིས་ཀྱང་བསྙེན་བཀུར་བགྱིད་པར་གྱུར་ཅིག་།བདག་སྣོད་དང་སྣོད་མ་ལགས་པར་མི་རྟོག་པར་སྦྱིན་པ་སྦྱིན་པར་གྱུར་ཅིག་།བདག་ཆོས་ཀྱི་སྦྱིན་པ་ལ་སེར་སྣའི་སེམས་དང་སེམས་ལས་བྱུང་བ་དག་སྐྱེད་པར་མ་གྱུར་ཅིག། བདག་བྱང་ཆུབ་དོན་དུ་གཉེར་བའི་སེམས་ཅན་རྣམས་ལ་རང་གི་སྲོག་གི་སྦྱིན་པས་ཡོངས་སུ་སྐྱོབ་པར་གྱུར་ཅིག། བདག་
313b
ཉིད་ཀྱི་བརྩོན་འགྲུས་ཀྱི་སྟོབས་དང ། སྨོན་ལམ་གྱིས་ཉེ་བར་བསྒྲུབས་པའི་རྫས་ཀྱིས་སེམས་ཅན་སྡུག་བསྔལ་བར་གྱུར་བ་རྣམས་སྡུག་བསྔལ་དག་ལས་ཡོངས་སུ་ཐར་པར་བགྱིད་པར་གྱུར་ཅིག་།བདག་རབ་ཏུ་བྱུང་བའི་རྟགས་ཅན་ནམ། ཁྱིམ་པའི་རྟགས་ཅན་ལྟུང་བ་བྱུང་བའམ། ལྟུང་བ་མ་བྱུང་བ་དག་ལ་སྐུར་བར་བགྱིད་པར་མ་གྱུར་ཅིག་།བདག་རྙེད་པ་དང ། བཀུར་སྟི་དང ། ཚིགས་སུ་བཅད་པ་དག་ལ་རྟག་ཏུ་མེད་དང ། དུག་དང ། མཚོན་ཆ་ལྟ་བུར་འདུ་ཤེས་སྐྱེད་པར་གྱུར་ཅིག་།བཙུན་པ་བཅོམ་ལྡན་འདས། གལ་ཏེ་བདག་གིས་ཇི་ལྟར་བཅོམ་ལྡན་འདས་ཀྱི་སྤྱན་སྔར་སྨོན་ལམ་བཏབ་པའི་སྨོན་ལམ་འདི་དག་བྱང་ཆུབ་ཀྱི་མཐར་ཐུག་པ་ཉེ་བར་བཟུང་བའི་བར་དུ་ཡང་དག་པར་འགྲུབ་པར་འགྱུར་བ་ལྟ་ན། དེའི་སླད་དུ་བདག་གི་སུག་པ་གཉིས་སུ་ལྷའི་འཁོར་ལོ་རིན་པོ་ཆེའི་རྩིབས་སྟོང་མཆིས་པ། ལྟེ་བ་དང་བཅས་པ། མུ་ཁྱུད་དང་བཅས་པ། ཉི་མའི་ཁ་དོག་ལྟར་འོད་གསལ་བ་དག་འབྱུང་བར་གྱུར་ཅིག་རྒྱལ་བུ་སྡིག་མེད་ཀྱིས་ཚིག་དེ་སྨྲས་མ་ཐག་ཏུ་ལག་པ་གཉིས་སུ་ཇི་ལྟར་འདོད་པ་དེ་ལྟ་བུའི་འཁོར་ལོ་དག་བྱུང་བར་གྱུར་བ་དང ། ཡང་གསོལ་བ། བཙུན་པ་བཅོམ་ལྡན་འདས། གལ་ཏེ་བྱང་ཆུབ་ཀྱི་མཐར་ཐུག་གི་བར་དུ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན། དེའི་སླད་དུ་འཁོར་ལོ་འདི་དག་འདི་ལྟར་ཐམས་ཅད་དང་ལྡན་པའི་སངས་རྒྱས་ཀྱི་ཞིང་དག་སྒྲས་
314a
༄#། །མངོན་པར་གོ་བར་བགྱི་བ་དང ། བྱང་ཆུབ་སེམས་དཔའ་ལུང་སྟོན་པ་དྲན་པ་མི་བརྗེད་པའི་ཡེ་ཤེས་མཐོང་བ་དང ། སྟོང་པ་ཉིད་བསྒོམ་པ་ལ་སྤྱོད་པ་སངས་རྒྱས་ཀྱི་ཡུལ་གྱི་ཆོས་ཀྱི་རྣམ་གྲངས་འདི་སྤྱོད་དུ་སྩལ་བའི་སླད་དུ་ཇི་ལྟར་ཀླུའི་རྒྱལ་པོ་དགའ་བོ་དང ། ཉེ་དགའ་བོ་གཉིས་མཆིས་པ་དེ་ལྟ་བུའི་སྒྲ་གསང་མཐོན་པོས་སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པ་སྟོང་པ་དག་ཏུ་མཆི་བར་གྱུར་ཅིག། གང་དག་དེར་སྐྱེས་པའི་སེམས་ཅན་དེ་དག་ཐམས་ཅད་ཀྱི་རྣ་བའི་དབང་པོ་དག་ཏུའང་ཆོས་ཀྱི་རྣམ་གྲངས་འདི་གྲག་པར་གྱུར་ཅིག་།གྲགས་མ་ཐག་ཏུའང་སེམས་ཅན་དེ་དག་གི་འདོད་ཆགས་རབ་ཏུ་ཞི་བར་གྱུར་ཅིག། ཞེ་སྡང་དང ། གཏི་མུག་དང ། ང་རྒྱལ་དང ། ཕྲག་དོག་དང ། སེར་སྣ་རབ་ཏུ་ཞི་བར་གྱུར་ཅིག། ཐམས་ཅད་ཀྱང་སངས་རྒྱས་རྗེས་སུ་དྲན་པ་ཡིད་ལ་བགྱིད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཅིག ། རིགས་ཀྱི་བུ། རྒྱལ་བུ་སྡིག་མེད་ཀྱིས་འཁོར་ལོ་རིན་པོ་ཆེ་དེ་དག་བཏང་བ་དང ། དེ་དག་འདི་ལྟར་མགྱོགས་པར་སོང་སྟེ། འདི་ལྟ་སྟེ། དཔེར་ན། སངས་རྒྱས་བཅོམ་ལྡན་འདས་མགྱོགས་པས་གཤེགས་པ་དེ་བཞིན་དུ་འཁོར་ལོ་རིན་པོ་ཆེ་དེ་དག་ཀྱང་སོང་སྟེ། ཕྱོགས་བཅུའི་སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པ་དཔག་ཏུ་མེད་གྲངས་མེད་
314b
པ་དག་ཏུ་སོང་ནས། སེམས་ཅན་རྣམས་བྱང་ཆུབ་སེམས་དཔའ་ལུང་སྟོན་པ་དྲན་པ་མི་བརྗེད་པའི་ཡེ་ཤེས་མཐོང་བ་སྟོང་པ་ཉིད་བསྒོམ་པ་ལ་སྤྱོད་པ་སངས་རྒྱས་ཀྱི་ཡུལ་གྱི་ཆོས་ཀྱི་རྣམ་གྲངས་འདི་སྤྱོད་དུ་བཅུག་གོ་།སེམས་ཅན་གང་དག་གི་རྣ་བའི་དབང་པོར་ཆོས་ཀྱི་རྣམ་གྲངས་འདི་གྲག་པར་གྱུར་བ་དེ་དག་ཐམས་ཅད་ཀྱི་འདོད་ཆགས་དང ། སེར་སྣའི་བར་གྱི་སེམས་དང་སེམས་ལས་བྱུང་བ་དག་རབ་ཏུ་ཞི་བར་གྱུར་ཅིང ། ཐམས་ཅད་ཀྱིས་ཀྱང་སངས་རྒྱས་ཀྱི་ཡེ་ཤེས་ཀྱི་ཡུལ་ཡིད་ལ་བྱེད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་འཁོར་ལོ་དེ་དག་ཀྱང་ཡུད་ཙམ་གཅིག་གིས་ཕྱིར་ལོག་སྟེ་རྒྱལ་བུ་སྡིག་མེད་ཀྱི་མདུན་དུ་འདུག་གོ་།རིགས་ཀྱི་བུ། དེ་ནས་དེ་བཞིན་གཤེགས་པ་རིན་པོ་ཆེའི་སྙིང་པོས་རྒྱལ་བུ་སྡིག་མེད་ལ་ལེགས་སོ། །ཞེས་བྱ་བ་བྱིན་ཏེ། རིགས་ཀྱི་བུ། ལེགས་སོ། ལེགས་སོ། ཁྱོད་ཀྱིས་ནི་སྨོན་ལམ་ཤིན་ཏུ་བཟང་པོ་བཏབ་སྟེ། ལྷའི་འཁོར་ལོ་རིན་པོ་ཆེ་འདི་དག་ཀྱང་སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པ་སྟོང་པ་དག་ཏུ་བཏང་བས་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་མང་པོ་དག་རྙོག་པ་མེད་པའི་སེམས་བཀོད་ཅིང ། བྱང་ཆུབ་ཡང་དག་པར་འཛིན་དུ་བཅུག་པས་ན། རིགས་ཀྱི་བུ། དེའི་ཕྱིར་ཁྱོད་མི་འཁྲུགས་པ་ཞེས་བྱ་བར་གྱུར་ཅིག། མི་འཁྲུགས་པ་ཁྱོད་ནི་འཇིག་རྟེན་གྱི་ཡོངས་སུ་འདྲེན་པར་འགྱུར་གྱི།
315a
༄#། །མི་འཁྲུགས་པ་ཁྱོད་ཀྱིས་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཇི་ལྟ་བུ་དག་འདོད་པ་ལོངས་ཤིག། །མི་འཁྲུགས་པས་གསོལ་བ། བཙུན་པ་བཅོམ་ལྡན་འདས། བདག་ནི་ཇི་ལྟར་ས་གཞི་ཐམས་ཅད་གསེར་ལས་གྲུབ་ཅིང་ལག་མཐིལ་ལྟར་མཉམ་ལ། ལྷའི་ནོར་བུ་རིན་པོ་ཆེ་རྣམ་པར་བཀྲམ་པ་གསེག་མ་དང་གྱོ་མོ་དག་མ་མཆིས། གོར་མའི་ཀ་བ་དང ། ཕ་བོང་དང ། རི་དག་མ་མཆིས་ཤིང ། ཀ་ཙ་ལིན་དི་ཀ་ལྟར་རེག་ན་བདེ་ཞིང་འཇམ་ལ། རྐང་མཐིལ་བཞག་ན་ནི་ནེམས་ཞེས་བགྱིད། རྐང་མཐིལ་བཏེག་ན་ནི་བར་ཅེས་བགྱིད་པ་དེ་ལྟ་བུའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་འཚལ་ཏེ། དེ་ན་སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དང ། ཡི་དྭགས་ཀྱི་ཡུལ་དག་མ་མཆིས་པར་གྱུར་ཅིག། །སངས་རྒྱས་ཀྱི་ཞིང་དེ་ན་དྲི་ང་བ་དག་མ་མཆིས་པར་གྱུར་ལ། སངས་རྒྱས་ཀྱི་ཞིང་དེ་ལྷའི་ལས་ཤིན་ཏུ་འདས་པའི་སྤོས་ཀྱིས་ཁྱབ་པར་གྱུར་ཅིག། སངས་རྒྱས་ཀྱི་ཞིང་དེ་ལྷའི་མེ་ཏོག་མནད་ར་བ་དང ། མནད་ར་བ་ཆེན་པོ་དག་གིས་ཀུན་ཏུ་གང་བར་གྱུར་ཅིག། དེ་ན་སེམས་ཅན་རྣམས་ལ་རྒ་བ་དང ། ན་བ་དང ། འགུམ་པ་མ་མཆིས་པར་གྱུར་ཅིག། གཅིག་གིས་གཅིག་འཇིགས་པ་མ་མཆིས་པ་དང་།གཅིག་ལ་གཅིག་མཐོ་འཚམ་པ་མ་མཆིས་པ་དང ། སེམས་ཅན་
315b
རྣམས་ལ་དུས་མ་ལགས་པར་འགུམ་པ་མ་མཆིས་པ་དང ། འགྱོད་ཅིང་འགུམ་པ་མ་མཆིས་པ་དང ། མཉམ་པར་མ་བཞག་པར་འགུམ་པ་མ་མཆིས་པར་གྱུར་ཅིག། དེ་ན་སེམས་ཅན་རྣམས་སངས་རྒྱས་རྗེས་སུ་དྲན་པ་ཡིད་ལ་བགྱིད་པར་གྱུར་ཅིག་།ངན་འགྲོ་རྣམས་སུ་སྐྱེ་བར་མ་གྱུར་ཅིག་།སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པ་སྟོང་པ་རྣམས་སུ་སྐྱེ་བར་མ་གྱུར་ཅིག་།བྱང་ཆུབ་ཅིང་ཡོངས་སུ་མྱ་ངན་ལས་འདས་ཀྱི་བར་དུ་སངས་རྒྱས་མཐོང་བ་དང་མི་འབྲལ་བར་གྱུར་ཅིག་།ཆོས་ཉན་པ་དང ། དགེ་འདུན་ལ་བསྙེན་བཀུར་བགྱིད་པ་དང་མི་འབྲལ་བར་གྱུར་ཅིག་།དེ་ན་སེམས་ཅན་རྣམས་འདོད་ཆགས་ཆུང་བ་དང ། ཞེ་སྡང་ཆུང་བ་དང ། གཏི་མུག་ཆུང་བར་གྱུར་ཅིག་།དེ་ན་ཐམས་ཅད་ཀྱང་དགེ་བ་བཅུའི་ལས་ཀྱི་ལམ་ཡང་དག་པར་བླངས་ནས་གནས་པར་གྱུར་ཅིག་།སངས་རྒྱས་ཀྱི་ཞིང་དེ་ན་སེམས་ཅན་རྣམས་བཟོ་བགྱིད་པར་མ་གྱུར་ཅིག། དེ་ན་ངན་སོང་གི་རྒྱུ་མཚན་མ་མཆིས་པར་གྱུར་ཅིག ། དེ་ན་སེམས་ཅན་རྣམས་ལ་བདུད་ཀྱིས་གླགས་རྙེད་པའི་ལམ་མ་མཆིས་པར་གྱུར་ཅིག་།དེ་ན་སེམས་ཅན་རྣམས་ལ་མདོག་ངན་པ་མ་མཆིས་པར་གྱུར་ཅིག་།དེ་ན་སེམས་ཅན་རྣམས་ལ་འདི་ལྟ་སྟེ། རྗེ་བོ་དང ། བྲན་གྱི་རིམ་པ་མ་མཆིས་པར་གྱུར་ཅིག་།དེ་ན་སེམས་ཅན་རྣམས་ལ་བདག་གི་བ་མ་མཆིས་ཤིང་ཡོངས་སུ་འཛིན་པ་མ་མཆིས་པར་གྱུར་ཅིག་།དེ་ན་ཉན་
316a
༄#། །ཐོས་དང་བྱང་ཆུབ་སེམས་དཔའ་རྣམས་ལ་ཐ་ན་གཡར་ལམ་ནའང་ཁུ་བ་འབྱིན་པ་མ་མཆིས་པར་གྱུར་ཅིག་།དེ་ན་སེམས་ཅན་ཐམས་ཅད་ཆོས་འཚལ་བ་དང ། ཆོས་ཡོངས་སུ་ཚོལ་བ་ལྷུར་ལེན་པར་གྱུར་ཅིག་།སངས་རྒྱས་ཀྱི་ཞིང་དེ་ན་སེམས་ཅན་འགའ་ཡང་ལོག་པར་ལྟ་བར་མི་འགྱུར་ཞིང་གཞན་མུ་སྟེགས་ཅན་ཡང་མ་མཆིས་པར་གྱུར་ཅིག་།དེ་ན་སེམས་ཅན་རྣམས་ལ་ལུས་ངལ་བ་མ་མཆིས་ཤིང་སེམས་ངལ་བའང་མ་མཆིས་པར་གྱུར་ཅིག་།དེ་ན་སེམས་ཅན་དེ་དག་ཐམས་ཅད་མངོན་པར་ཤེས་པ་ལྔ་དང་ལྡན་པར་གྱུར་ཅིག་།དེ་ན་སེམས་ཅན་ཐམས་ཅད་ལ་བཀྲེས་པ་དང ། སྐོམ་པ་དང ། རྣམ་པར་མཐོ་འཚམ་པར་མ་མཆིས་པར་གྱུར་ཅིག་།ཇི་ལྟར་འདོད་པ་ན་སྤྱོད་པའི་ལྷ་རྣམས་བཞིན་དུ་ཁ་ཟས་ཇི་ལྟ་བུ་དག་འཚལ་བར་འགྱུར་བ་དེ་ལྟ་བུ་དག་མདུན་དུ་རིན་པོ་ཆེའི་སྣོད་དག་ནས་འབྱུང་བར་གྱུར་ཅིག་།བཤད་པ་དང ། གཅི་བ་དང ། མཆིལ་མ་དང ། རྣབས་དང ། མཆི་མ་དང ། ལུས་ཀྱི་རྡུལ་དག་མ་མཆིས་པར་གྱུར་ཅིག་།དེ་ན་གྲང་བ་མ་མཆིས་པ་དང ། ཚ་བ་མ་མཆིས་པར་གྱུར་ཅིག་།དྲི་བདའ་བ་དང ། ཉམས་དགའ་བར་གྱུར་ཅིག་།དེ་ན་རེག་ན་བདེ་བའི་བསེར་མ་དག་ལྡང་བར་འགྱུར་ཞིང ། དེ་དག་ལྷ་དང་མི་རྣམས་སྤོས་ཀྱི་བྱ་བ་བགྱིད་པར་གྱུར་ཅིག་།གང་གི་ཚེ་འཚལ་བར་འགྱུར་བ་དང ། ཇི་ལྟ་
316b
བུ་འཚལ་བར་འགྱུར་བ་དང ། གང་གི་ཚེ་གཅིག་ནི་བསེར་མ་བསིལ་བ་འཚལ་བ། གཅིག་ཤོས་ནི་དྲོན་པོ་འཚལ་བ་དང ། ལ་ལ་ཨུཏྤ་ལའི་དྲི་བདའ་བའི་བསེར་མ་འཚལ་ལ། ལ་ལ་ནི་ཙནྡན་སྤྲུལ་གྱི་སྙིང་པོའི་དྲི་བདའ་བའི་བསེར་མ་འཚལ་བ་དང ། ལ་ལ་ནི་དུས་ཀྱི་རྗེས་སུ་འབྲང་བའི་ཙནྡན་གྱི་དྲི་བདའ་བ་དང ། ལ་ལ་ནི་རྒྱ་སྤོས་ཀྱི་དྲི་བདའ་བ་དང ། ལ་ལ་ནི་ཨ་ག་རུའི་དྲི་བདའ་བའི་བསེར་མ་འཚལ་ལ། ལ་ལ་ནི་ཐམས་ཅད་ཀྱི་ཐམས་ཅད་དུ་བསེར་མ་ཡེ་མི་འཚལ་བ་འཚལ་བར་འགྱུར་ནའང་དེ་དག་གིས་ཇི་ལྟར་སེམས་བསྐྱེད་ཅིང་དམིགས་པ་དེ་བཞིན་དུ་འགྲུབ་པར་གྱུར་ཅིག་།དེ་བཞིན་དུ་འཇིག་རྟེན་གྱི་ཁམས་དེ་སྙིགས་མ་ལྔ་དང་བྲལ་བར་གྱུར་ཅིག་།དེ་ན་སེམས་ཅན་རྣམས་ལ་རིན་པོ་ཆེ་སྣ་བདུན་ལས་བགྱིས་པའི་ཁང་པ་བརྩེགས་པ་དག་མཆིས་པར་འགྱུར་ལ། ཁང་པ་བརྩེགས་པ་དེ་དག་ན་གང་དུ་མི་དག་མཆིས་པར་འགྱུར་བར་རིན་པོ་ཆེ་སྣ་བདུན་གྱི་འཁྲི་ཤིང་བལ་གྱི་སྔས་འཇམ་པོ་དག་གིས་ཀུན་ཏུ་གཡོགས་ཤིང་ཀ་ཙ་ལི་ན་དི་ཀ་ལྟར་རེག་ན་འཇམ་པ་དག་འབྱུང་བར་གྱུར་ཅིག་།ཁང་པ་བརྩེགས་པ་དེ་དག་གི་ཁོར་ཡུག་དག་ཏུ་གང་དུ་མི་དེ་དག་ཆབ་ཀྱི་བྱ་བ་བགྱིད་པར་འགྱུར་བར་ཡན་ལག་བརྒྱད་དང་ལྡན་པའི་ཆབ་ཀྱིས་ཡོངས་སུ་གཏམས་པའི་རྫིང་དག་འབྱུང་བར་གྱུར་ཅིག་།སྣ་མའི་མེ་ཏོག་གི་ཤིང་དང ། ཤིང་ཏ་ལ་དང ། ཤིང་ལྗོན་པའི་ཕྲེང་བ་དག་གིས་བརྒྱན་
317a
༄#། །པར་གྱུར་ཅིག་།ཤིང་ལྗོན་པ་དེ་དག་ཀྱང་མེ་ཏོག་སྣ་ཚོགས་དང ། འབྲས་བུ་སྣ་ཚོགས་དང ། དྲི་སྣ་ཚོགས་དང ། གོས་སྣ་ཚོགས་དང ། གདུགས་སྣ་ཚོགས་དང ། མུ་ཏིག་གི་རྒྱན་ཕྲེང་སྣ་ཚོགས་དང ། རྒྱན་སྣ་ཚོགས་དག་གིས་བརྒྱན་པར་གྱུར་ཅིག་།དེ་ན་སེམས་ཅན་རྣམས་གོས་དང་རྒྱན་ཇི་ལྟ་བུ་འཚལ་བ་དག་དཔག་བསམ་གྱི་ཤིང་དེ་དག་ལས་བླངས་ཏེ་གྱོན་པར་གྱུར་ཅིག་།དེ་བཞིན་དུ་མེ་ཏོག་རྣམས་དང ། རྒྱན་དག་གི་བར་ཡང་བླངས་ཏེ་ཐོགས་པར་གྱུར་ཅིག་།བདག་གི་བྱང་ཆུབ་ཀྱི་ཤིང་ནི་རིན་པོ་ཆེ་སྣ་བདུན་ལས་གྲུབ་པར་གྱུར་ལ། འཕང་དུ་ནི་དཔག་ཚད་སྟོང་མཆིས། སྡོང་པོའི་སྦོམས་སུ་དཔག་ཚད་གཅིག་མཆིས། ཡལ་ག་གྱེས་པའི་ཁྱོན་དུའང་དཔག་ཚད་སྟོང་མཆིས་པར་གྱུར་ཅིག་།བྱང་ཆུབ་ཀྱི་ཤིང་དེ་བསེར་མས་བསྐྱོད་པ་ལས་ཕ་རོལ་ཏུ་ཕྱིན་པ་དང ། མངོན་པར་ཤེས་པ་དང ། དབང་པོ་དང ། སྟོབས་དང ། བྱང་ཆུབ་ཀྱི་ཡན་ལག་གི་སྒྲ་ལྷའི་ལས་ཤིན་ཏུ་འདས་པ་འཇམ་ཞིང་ཡིད་དུ་འོང་བ་དག་འབྱུང་བར་གྱུར་ཅིག་།སེམས་ཅན་གང་དག་གིས་སྒྲ་དེ་ཐོས་པར་གྱུར་པ་དེ་དག་ཀྱང་འདོད་ཆགས་དང་བྲལ་བའི་སེམས་ཀྱི་དྲན་པ་སོ་སོར་ཐོབ་པར་གྱུར་ཅིག་།སངས་རྒྱས་ཀྱི་ཞིང་དེ་ན་བུད་མེད་རྣམས་ནི་འདི་ལྟ་སྟེ། དཔེར་བགྱི་ན། དགའ་ལྡན་གྱི་རིས་ཀྱི་ལྷའི་བུ་མོ་ལྟར་
317b
ཡོན་ཏན་ཐམས་ཅད་དང་ལྡན་པར་གྱུར་ཅིག་།དེ་ན་བུད་མེད་རྣམས་ལ་དྲི་ང་བ་མ་མཆིས་ཤིང ། ལྕེ་གཉིས་དང ། ཕྲག་དོག་དང ། སེར་སྣས་དཀྲིས་པ་མ་མཆིས་པར་གྱུར་ཅིག། དེ་ན་མི་རྣམས་བུད་མེད་དང་ལྷན་ཅིག་ཏུ་ལུས་སྦྱོང་ཞིང་འཁྲིག་པ་སྤྱོད་པ་མ་མཆིས་པར་གྱུར་ཅིག་།དེ་ན་སྐྱེས་པ་གང་དག་ཀུན་ཏུ་ཆགས་པའི་སེམས་སྐྱེས་པར་གྱུར་ན། དེ་མཆིས་ཏེ་ཀུན་ཆགས་པའི་སེམས་ཀྱིས་ཡུད་ཙམ་ཞིག་བུད་མེད་ལ་བལྟས་པས་སྐྱེས་པའི་འདོད་ཆགས་རབ་ཏུ་ཞི་བར་གྱུར་ནས་ཤིན་ཏུ་ཡིད་བྱུང་སྟེ། སླར་ལོག་ཅིང་གཙང་མ་རྡུལ་དང་བྲལ་བའི་ཏིང་ངེ་འཛིན་ཐོབ་པར་གྱུར་ཅིག་།ཏིང་ངེ་འཛིན་དེས་བདུད་ཀྱི་ཞགས་པ་དག་ལས་ཡོངས་སུ་གྲོལ་ནས་སླན་ཆད་འདོད་ཆགས་ཀྱི་སེམས་མི་སྐྱེ་བར་གྱུར་ཅིག་།དེ་ན་བུད་མེད་གང་ལགས་པ་དེ་དག་ཀུན་ཏུ་ཆགས་པས་སྐྱེས་པ་ལ་བརྟགས་པ་ཙམ་གྱིས་སྦྲུམ་པར་འགྱུར་ཞིང ། བརྟགས་པ་ཙམ་གྱིས་གཉིས་ཀའི་འདོད་ཆགས་རབ་ཏུ་ཞི་བར་གྱུར་ཅིག་།མངལ་ན་གནས་པའི་ཁྱེའུའམ། བུ་མོ་གང་ལགས་པ་དེ་དག་ཀྱང་འདི་ལྟ་སྟེ། དཔེར་བགྱི་ན། སུམ་ཅུ་རྩ་གསུམ་པའི་ལྷ་རྣམས་དགའ་བ་དང ། རབ་ཏུ་དགའ་བར་བགྱིད་པས་ལུས་དང་སེམས་ཀྱི་བདེ་བ་མྱོང་བ་དེ་ལྟ་བུའི་ལུས་དང་སེམས་ཀྱི་བདེ་བ་མྱོང་བར་གྱུར་ཅིག་།སངས་རྒྱས་ཀྱི་ཞིང་དེ་ན་མངལ་ན་གནས་པའི་ཁྱེའུ་དང ། བུ་མོ་དག་གདུགས་
318a
༄#། །མཚན་བདུན་དུ་དེ་ལྟ་བུའི་བདེ་བ་ཉམས་སུ་མྱོང་བར་གྱུར་ཅིག་།བུད་མེད་སྦྲུམ་མ་དེ་དག་ཀྱང་འདི་ལྟ་སྟེ། དཔེར་བགྱི་ན། དགེ་སློང་བསམ་གཏན་གཉིས་པ་ལ་སྙོམས་པར་ཞུགས་པ་དེ་ལྟ་བུའི་བདེ་བ་མྱོང་བར་གྱུར་ཅིག་།སེམས་ཅན་དེ་དག་ཀྱང་མངལ་གྱི་དྲི་མ་དང ། མི་གཙང་བས་གོས་པར་མི་འགྱུར་ཞིང ། དགུང་བདུན་པ་ལ་མཆོག་ཏུ་དྲི་བདའ་བ་དང ། བདེ་བའི་ཡོ་བྱད་དམ་པ་དང་ལྡན་བཞིན་དུ་བཙའ་བར་གྱུར་ཅིག་།བུད་མེད་དེའང་སྡུག་བསྔལ་ཉམས་སུ་མྱོང་བར་མི་འགྱུར་ཞིང་གཉིས་ཀ་རྫིང་བུར་ཞུགས་ཏེ་ཁྲུས་བགྱིས་ནས། བུད་མེད་དེས་གང་གིས་འདོད་ཆགས་དང་བྲལ་བ་གཙང་བའི་ཏིང་ངེ་འཛིན་ཐོབ་པར་འགྱུར་བ་དེ་ལྟ་བུའི་དྲན་པ་ཐོབ་པར་གྱུར་ཅིག་།ཏིང་ངེ་འཛིན་དེས་འདོད་ཆགས་ཀྱི་ཆོས་རྣམས་ལས་ཡོངས་སུ་གྲོལ་ཞིང་རྟག་པར་རྒྱུན་དུ་མཉམ་པར་བཞག་པར་གྱུར་ཅིག་།གང་གིས་ཚེ་རབས་སྔ་མ་དག་ལ་བསྐལ་པ་བྱེ་བ་ཕྲག་མང་པོར་བུད་མེད་ཀྱི་ལུས་ཉམས་སུ་མྱོང་བར་འགྱུར་བ་དེ་ལྟ་བུའི་ལས་བགྱིས་ཤིང་བསགས་པ་གང་ལགས་པས་ཀྱང་ཏིང་ངེ་འཛིན་དེ་མངོན་པར་བསྒྲུབ་པས་བུད་མེད་ཀྱི་ལུས་ཐམས་ཅད་ཀྱི་ཐམས་ཅད་ཡོངས་སུ་བས་པར་འགྱུར་ཞིང ། ཡོངས་སུ་མྱ་ངན་ལས་འདས་ཀྱི་བར་དུ་སླན་ཆད་བུད་མེད་ཀྱི་ལུས་ཐོབ་པར་མ་གྱུར་
318b
ཅིག་།སེམས་ཅན་གང་དག་གིས་གང་གི་སླད་དུ་བསྐལ་པ་བགྲང་བ་ལས་འདས་པ་དག་ཏུ་མངལ་ན་གནས་པའི་སྡུག་བསྔལ་ཉམས་སུ་མྱོང་བར་འགྱུར་བ་དེ་ལྟ་བུའི་ལས་བགྱིས་ཤིང་བསགས་པ་དེ་དག་གིས་བདག་གིས་བྱང་ཆུབ་ཐོབ་པའི་མིང་ཐོས་ཤིང་དད་པ་ཐོབ་པར་གྱུར་ནས། དེ་དག་དེ་ནས་ཤི་འཕོས་ནས་ཀྱང་བདག་གི་སངས་རྒྱས་ཀྱི་ཞིང་དུ་སྐྱེ་བར་འགྱུར་ཞིང་མངལ་ན་གནས་པར་སྐྱེ་བར་མ་གྱུར་ཅིག་།དེར་སེམས་ཅན་དེ་དག་གི་ལས་དེ་ཐམས་ཅད་ཀྱི་ཐམས་ཅད་དུ་ཡོངས་སུ་བས་པར་གྱུར་ཅིང ། སེམས་ཅན་དེ་དག་བྱང་ཆུབ་ཀྱི་མཐར་ཐུག་གི་བར་དུ་སླན་ཆད་མངལ་ན་གནས་པར་སྐྱེ་བར་མ་གྱུར་ཅིག་།སེམས་ཅན་གང་དག་གིས་དགེ་བའི་རྩ་བ་བསྐྱེད་པ་དེ་དག་ལས་ཡོངས་སུ་བས་ནས་མངལ་དུ་གནས་པར་སྐྱེ་བར་མ་གྱུར་ཅིག་།བདག་གི་སངས་རྒྱས་ཀྱི་ཞིང་ན་བུད་མེད་དམ། མངལ་ན་གནས་པར་མངོན་པའི་སེམས་ཅན་དེ་དག་ཀྱང་སངས་རྒྱས་ཀྱི་ཞིང་དེར་ཤིན་ཏུ་བདེ་བ་དང་ལྡན་པར་གྱུར་ཅིག་།སྣ་མའི་མེ་ཏོག་གི་ཤིང་དང ། ཤིང་ཏ་ལ་དག་བསེར་མས་བསྐྱོད་པར་གྱུར་པ་ན་མི་རྟག་པ་དང ། སྡུག་བསྔལ་བ་དང ། སྟོང་པ་དང ། བདག་མེད་པའི་སྒྲ་སྐད་ཉམས་དགའ་བར་འགྱུར་བ་དེ་ལྟ་བུ་དག་འབྱུང་བར་གྱུར་ཅིག་།སྒྲ་དེས་མི་རྣམས་ཀྱི་ཏིང་ངེ་འཛིན་སྒྲོན་མ་དང་ལྡན་པ་ཞེས་བགྱི་བ་ཐོབ་པར་གྱུར་ཅིག་།ཏིང་ངེ་འཛིན་དེས་
319a
༄#། །སེམས་ཅན་དེ་དག་གིས་སྟོང་པ་ཉིད་སྣང་བའི་ཆོས་ཟབ་མོ་དག་རྟོགས་པར་གྱུར་ཅིག་།སངས་རྒྱས་ཀྱི་ཞིང་དེ་ན་འདོད་པ་དང་ལྡན་པའི་སྒྲ་མ་མཆིས་པར་གྱུར་ཅིག། བཙུན་པ་བཅོམ་ལྡན་འདས། བདག་བྱང་ཆུབ་ཀྱི་ཤིང་དྲུང་དུ་མཆིས་ནས་ཡུལ་ཙམ་གཅིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་གྱུར་ཅིག་།བདག་བྱང་ཆུབ་ཐོབ་པ་ན་སངས་རྒྱས་ཀྱི་ཞིང་དེ་ན་མེ་ཏོག་ཁ་ཟུམས་པ་མ་གཏོགས་པར་ཉི་མ་དང་ཟླ་བ་དག་གི་འོད་ཀྱང་མི་མངོན་པར་གྱུར་ཅིག་།ལྷའི་མིག་གང་གིས་སངས་རྒྱས་ཀྱི་ཞིང་དཔག་ཏུ་མ་མཆིས་གྲངས་མ་མཆིས་པ་དག་ན་སངས་རྒྱས་བཅོམ་ལྡན་འདས་དག་བཞུགས་ཏེ། འཚོ་ཞིང་གཞེས་པ་རྣམས་མཐོང་བར་འགྱུར་བ་དེ་ལྟ་བུའི་འོད་དག་བདག་གིས་གཏོང་བར་གྱུར་ཅིག་།བདག་བྱང་ཆུབ་ཐོབ་པ་ན་སྒྲ་གང་གིས་སྟོང་གསུམ་གྱི་སྟོང་ཆེན་པོའི་སངས་རྒྱས་ཀྱི་ཞིང་ཀུན་ཏུ་གང་བར་འགྱུར་བ་དེ་ལྟ་བུའི་སྒྲས་ཆོས་སྟོན་པར་གྱུར་ཅིག་།དེ་ན་སེམས་ཅན་གང་དག་མཆིས་པར་གྱུར་པ་དེ་དག་ཐམས་ཅད་ཀྱིས་ཀྱང་སངས་རྒྱས་རྗེས་སུ་དྲན་པ་ཐོབ་པར་གྱུར་ཅིག་།དེ་དག་གང་དང་གང་དུ་མཆི་བ་དང ། འཆབ་པ་དང ། མཆིས་པ་དང ། ལྡོག་པར་འགྱུར་བ་དང ། དེ་དག་གིས་རྟག་པར་རྒྱུན་དུ་བདག་མཐོང་བར་གྱུར་ཅིག་།དེ་དག་ཆོས་
319b
རྣམས་ལ་ཇི་ལྟར་ཐེ་ཚོམ་དུ་གྱུར་པ་ན། དེ་དག་གིས་བདག་ལ་བལྟས་པ་ཙམ་དང ། བདག་མཐོང་བ་ཙམ་གྱིས་དེ་དག་གི་ཐེ་ཚོམ་མ་མཆིས་པར་གྱུར་ཅིག་།བདག་བྱང་ཆུབ་ཐོབ་པ་ན་ཕྱོགས་བཅུའི་སངས་རྒྱས་ཀྱི་ཞིང་དཔག་ཏུ་མ་མཆིས་གྲངས་མ་མཆིས་པ་དག་ན་ཉན་ཐོས་ཀྱི་ཐེག་པ་པའམ། རང་སངས་རྒྱས་ཀྱི་ཐེག་པ་པའམ། བླ་ན་མེད་པའི་ཐེག་པ་པའི་སེམས་ཅན་གང་དག་མཆིས་པ་དེ་དག་གིས་བདག་གི་མིང་དང ། བསྔགས་པ་ཐོས་པར་གྱུར་ཅིག་།དེ་དག་དེ་ནས་ཤི་འཕོས་ནས་ཀྱང་བདག་གི་སངས་རྒྱས་ཀྱི་ཞིང་དུ་སྐྱེ་བར་གྱུར་ཅིག་།དེ་དག་གིས་དེར་བདག་ལས་ཆོས་ཐོས་ནས་ཉན་ཐོས་ཀྱི་ཐེག་པ་གང་ལགས་པ་དེ་དག་ནི་རྣམ་པར་ཐར་པ་བརྒྱད་ཀྱིས་བསམ་གཏན་པའི་དགྲ་བཅོམ་པར་གྱུར་ཅིག་།དེ་ན་གང་དག་ཐེག་པ་ཆེན་པོ་པའི་བྱང་ཆུབ་སེམས་དཔའ་གང་ལགས་པ་དེ་དག་གིས་ནི་བདག་ལས་ཆོས་ཐོས་ནས་ཏིང་ངེ་འཛིན་དང ། གཟུངས་དང ། བཟོད་པ་ཟབ་མོ་དག་ཐོབ་པར་གྱུར་ཅིག་།དེ་དག་དེ་ཉིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་སླར་མི་ལྡོག་པར་ཡང་གྱུར་ཅིག་།བདག་གི་ཉན་ཐོས་ཀྱི་དགེ་འདུན་ནི་དཔག་ཏུ་མ་མཆིས་པར་གྱུར་ལ། དེ་བཞིན་གཤེགས་པ་ཉིད་མ་གཏོགས་པར་སུས་ཀྱང་བགྲང་བར་རྔོ་མི་ཐོགས་པར་གྱུར་ཅིག་།བདག་གིས་བྱང་ཆུབ་ཐོབ་པ་ན་གང་དང་གང་དུ་མཆིས་ཤིང་ས་ཕྱོགས་གང་དང་གང་དུ་རྐང་མཐིལ་བཞག་པ་དེ་དང་དེར་
320a
༄#། །པདྨ་འདབ་མ་སྟོང་མཆིས་ལ། གསེར་གྱི་མདོག་ལྟ་བུར་གདའ་བ་དག་འབྱུང་བར་གྱུར་ཅིག་།པདྨ་དེ་དག་ཀྱང་སངས་རྒྱས་ཀྱི་ཞིང་སྟོང་པ་གཞན་དག་ཏུ་མཆིས་ནས་བདག་གི་བསྔགས་པ་དང ། སྒྲ་དང ། དབྱངས་རྗོད་པར་གྱུར་ཅིག་།སེམས་ཅན་དེ་དག་གིས་བདག་མིང་དང ། བསྔགས་པ་དང ། སྙན་པ་ཐོས་ནས་དགའ་ཞིང་རབ་ཏུ་དགའ་བ་དང ། མཆོག་ཏུ་དགའ་བ་སྐྱེ་བར་གྱུར་ཅིག་།དེ་དག་རབ་ཏུ་དང་བ་སྐྱེས་ནས། བདག་གི་སངས་རྒྱས་ཀྱི་ཞིང་དུ་སྐྱེ་འཚལ་བར་གྱུར་ཅིག་།དགེ་བའི་རྩ་བ་དེ་དག་ཀྱང་དེར་ཡོངས་སུ་བསྔོ་བར་གྱུར་ཅིག་།དེ་དག་དེ་ནས་ཤི་འཕོས་ནས་ཀྱང་བདག་གི་སངས་རྒྱས་ཀྱི་ཞིང་དུ་སྐྱེ་བར་གྱུར་ཅིག་།བདག་གི་ཉན་ཐོས་ཀྱི་དགེ་འདུན་ཡང་དགེ་སྦྱོང་གི་དྲི་མ་དང་བྲལ་བ་དང ། དགེ་སྦྱོང་གི་སྐྱོན་དང ། དགེ་སྦྱོང་གི་གྱ་གྱུ་དང་བྲལ་བ་དང ། དགེ་སྦྱོང་གི་གཡོ་དང་བྲལ་བར་གྱུར་ཅིག ། འཁོར་རྣམས་ཀྱང་ཆོས་ལྷུར་ལེན་ཅིང་ཡོ་བྱད་ལྷུར་ལེན་པ་མ་ལགས་པ་དང ། རྙེད་པ་དང་བཀུར་སྟི་ལྷུར་ལེན་པ་མ་ལགས་པ་དང ། མི་རྟག་པ་དང ། སྡུག་བསྔལ་བ་དང ། སྟོང་པ་དང ། བདག་མེད་པ་ལ་མངོན་པར་དགའ་བར་གྱུར་ཅིག་།བདག་གི་འཁོར་རྣམས་བརྩོན་འགྲུས་བརྩམས་ཤིང་ཆོས་ལ་འབབ་པ་དང ། དགེ་འདུན་ལ་བབ་པར་གྱུར་ཅིག་།དེ་ན་བྱང་ཆུབ་སེམས་དཔའ་གང་དག་ཕྱིར་མི་ལྡོག་པར་
320b
གྱུར་པ་དེ་དག་ཀྱང་མ་འོངས་པ་ལ་ཞུགས་པའི་དྲན་པ་ཐོབ་པར་གྱུར་ཅིག་།དེ་དག་ཚེ་འཕོས་ནས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་གཏམ་བརྗོད་པར་གྱུར་ཅིག་།བྱང་ཆུབ་ཀྱི་མཐའི་བར་དུ་དེ་དག་གིས་ཆོས་དེ་དག་མི་བརྗེད་པར་གྱུར་ཅིག་།བདག་བྱང་ཆུབ་ཐོབ་ནས་ཀྱང་བསྐལ་པ་ཆེན་པོ་ཁྲིའི་བར་དུ་གནས་པར་གྱུར་ཅིག་།ཡོངས་སུ་མྱ་ངན་ལས་འདས་ནས་ཀྱང་བདག་གི་དམ་པའི་ཆོས་བསྐལ་པ་སྟོང་དུ་གནས་པར་གྱུར་ཅིག་།བཅོམ་ལྡན་འདས་ཀྱིས་བཀའ་སྩལ་པ། སྐྱེས་བུ་དམ་པ་ཁྱོད་ཀྱིས་སངས་རྒྱས་ཀྱི་ཞིང་ཡོངས་སུ་དག་པ་ཡོངས་སུ་བླངས་པ་ནི་ལེགས་སོ། །ལེགས་སོ། མི་འཁྲུགས་པ་ཁྱོད་ནི་མ་འོངས་པའི་དུས་ན་བསྐལ་པ་གྲངས་མེད་པ་གངྒཱའི་ཀླུང་གཅིག་གི་བྱེ་མ་སྙེད་འདས་ནས། གྲངས་མེད་པ་གཉིས་པ་ལ་བབ་པ་ན་ཤར་ཕྱོགས་ལོགས་སུ་འདི་ནས་སངས་རྒྱས་ཀྱི་ཞིང་སྟོང་འདས་པ་ན་འཇིག་རྟེན་གྱི་ཁམས་མངོན་པར་དགའ་བ་ཞེས་བྱ་བ་ཇི་ལྟར་ཁྱོད་ཀྱི་སྨོན་ལམ་བཏབ་པ་དེ་ལྟ་བུའི་ཡོན་ཏན་བཀོད་པ་དང་ལྡན་པ་ཞིག་ཡོད་དེ། དེར་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང ། དེ་བཞིན་གཤེགས་པའི་མཚན་ཡང་མི་འཁྲུགས་པ་ཞེས་བྱ་བ་ཉིད་དུ་འགྱུར་ཏེ། སངས་རྒྱས་བཅོམ་ལྡན་འདས་ཀྱི་བར་དུ་འགྱུར་རོ། །མི་འཁྲུགས་པས་གསོལ་པ། བཙུན་པ་བཅོམ་ལྡན་འདས། གལ་ཏེ་བདག་གི་རེ་བ་འདི་
321a
༄#། །ལྟ་བུ་ཡོངས་སུ་རྫོགས་པར་འགྱུར་བ་ལྟ་ན། དེའི་སླད་དུ་འཇིག་རྟེན་གྱི་ཁམས་ཐམས་ཅད་ན་གང་དག་སེམས་ཅན་དུ་བསྡུ་བར་བསྡུས་པའི་སེམས་ཅན་ཕུང་པོ་དང ། ཁམས་དང ། སྐྱེ་མཆེད་ཀྱིས་ཡོངས་སུ་ཟིན་པ་དེ་དག་ཐམས་ཅད་བྱམས་པའི་སེམས་དང་ལྡན་པར་གྱུར་ཅིག་།ཁོན་མ་མཆིས་པའི་སེམས་དང ། རྙོག་པ་མ་མཆིས་པའི་སེམས་སུ་གྱུར་ཅིག་།དེ་དག་འདི་ལྟ་བུའི་ལུས་ཀྱི་བདེ་བ་མྱོང་བར་གྱུར་ཅིག་།འདི་ལྟ་སྟེ། དཔེར་བགྱི་ན། ས་བཅུ་པ་ལ་གནས་པའི་བྱང་ཆུབ་སེམས་དཔའི་ཏིང་ངེ་འཛིན་པདྨ་ལ་སྙོམས་པར་ཞུགས་ཤིང་དེས་བསམ་པ་ལ་སྤོང་བ་རྣམ་པར་དག་པར་གྱུར་པ་དེ་ལྟ་བུར་སེམས་ཅན་རྣམས་ཀྱང་ལུས་དང་སེམས་ཀྱི་བདེ་བ་དང་ལྡན་པར་གྱུར་ཅིག་།གང་གི་ཚེ་བདག་བཅོམ་ལྡན་འདས་ཀྱི་ཞབས་ལ་ཡན་ལག་ལྔས་ཕྱག་འཚལ་བ་དེའི་ཚེ་ས་གཞི་ཐམས་ཅད་གསེར་གྱི་ཁ་དོག་ལྟ་བུར་གདའ་བར་གྱུར་ཅིག་།རིགས་ཀྱི་བུ། དེས་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྔས་ཕྱག་བྱས་པ་དེའི་ཚེ་དེའི་དུས་ན་སེམས་ཅན་ཐམས་ཅད་ཀྱང་ཇི་ལྟར་སྨོན་ལམ་བཏབ་པ་དེ་ལྟ་བུའི་བདེ་བ་དང་ལྡན་པར་གྱུར་པ་དེའི་ཚེ་ས་གཞི་ཐམས་ཅད་ཀྱང་གསེར་གྱི་ཁ་དོག་ལྟ་བུར་སྣང་བར་གྱུར་པ་དང ། དེ་བཞིན་གཤེགས་པ་རིན་པོ་ཆེའི་སྙིང་པོས་
321b
བཀའ་སྩལ་པ། བློ་གྲོས་རབ་མཆོག་སེམས་མི་འཁྲུགས་པ་ལོངས། །ལག་པའི་མཐིལ་ན་འཁོར་ལོ་མཆོག་རབ་གནས། མི་རྣམས་མང་པོ་སྙིང་རྗེའི་སེམས་ལ་བཀོད། །བློ་གྲོས་དགེ་ཁྱོད་འགྲོ་བའི་སྟོན་པར་འགྱུར། །རིགས་ཀྱི་བུ། དེ་ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་བུ་བཅུ་པ་གངས་ཀྱི་ནོར་བུ་ཞེས་བྱ་བ་ལ་སྔ་མ་བཞིན་དུ་སྦྱར་རོ། །རྒྱལ་བུ་གངས་ཀྱི་ནོར་བུས་ཀྱང་ཇི་ལྟར་མི་འཁྲུགས་པས་སྨོན་ལམ་བཏབ་པ་དེ་བཞིན་དུ་སྨོན་ལམ་བཏབ་བོ། །བཙུན་པ་བཅོམ་ལྡན་འདས། གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན་དེའི་སླད་དུ་སེམས་ཅན་ཐམས་ཅད་ཀྱིས་སངས་རྒྱས་ལ་དམིགས་པའི་ཡིད་ལ་བགྱིད་པ་ཐོབ་པར་གྱུར་ཅིག་།ཐམས་ཅད་ཀྱི་སུག་པར་ཡང་ཙནྡན་སྤྲུལ་གྱི་སྙིང་པོའི་དྲི་འབྱུང་བར་གྱུར་ཅིག་།དེ་དག་ཐམས་ཅད་ཀྱིས་དྲི་དེའང་སངས་རྒྱས་ཀྱི་སྐུ་དག་ལ་ཡོངས་སུ་བསྔོ་བར་གྱུར་ཅིག་།བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་ཀྱིས་སྨོན་ལམ་རྒྱ་ཆེན་པོ་བཏབ་པ་ནི་ལེགས་སོ། །ལེགས་སོ། །གང་ཁྱོད་ཀྱིས་སེམས་ཅན་ཐམས་ཅད་ཀྱི་ལག་ཏུ་ཙནྡན་སྤྲུལ་གྱི་སྙིང་པོ་བཞག་པ་དང ། བསམ་པ་ཐག་པས་སངས་རྒྱས་ཡིད་ལ་བྱེད་པ་བསྐྱེད་པས་ན། རིགས་ཀྱི་བུ། དེའི་ཕྱིར་ཁྱོད་སྤོས་ཀྱི་གླང་པོ་ཆེ་ཞེས་བྱ་བར་གྱུར་ཅིག་།སྤོས་ཀྱི་གླང་པོ་ཆེ་ཁྱོད་ནི་བསྐལ་པ་གྲངས་མེད་པ་གངྒཱའི་
322a
༄#། །ཀླུང་གཅིག་གི་བྱེ་མ་སྙེད་འདས་ནས་བསྐལ་པ་གྲངས་མེད་པ་གངྒཱའི་ཀླུང་གི་བྱེ་མ་སྙེད་གཉིས་པ་ལ་བབ་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ཡོངས་སུ་མྱ་ངན་ལས་འདས་ཏེ། དམ་པའི་ཆོས་ནུབ་ནས་ཞག་བདུན་ལོན་པ་དང ། སྤོས་ཀྱི་གླང་པོ་ཆེ་ཁྱོད་འཇིག་རྟེན་གྱི་ཁམས་དེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་གྱི་མེ་ཏོག་ཅེས་བྱ་བ་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་རོ། །སྤོས་ཀྱི་གླང་པོ་ཆེས་ཡང་གསོལ་པ། བཙུན་པ་བཅོམ་ལྡན་འདས། གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན་དེའི་སླད་དུ་གང་གི་ཚེ་བདག་བཅོམ་ལྡན་འདས་ཀྱི་ཞབས་ལ་ཡན་ལག་ལྔས་ཕྱག་འཚལ་བ་དེའི་ཚེ་ཀུན་དགའི་ར་བ་དེ་ཐམས་ཅད་དུ་མེ་ཏོག་ཙམ་པ་ཀའི་ཆར་རབ་ཏུ་འབབ་པར་གྱུར་ཅིག་།རིགས་ཀྱི་བུ། གང་གི་ཚེ་བྱང་ཆུབ་སེམས་དཔའ་སྤོས་ཀྱི་གླང་པོ་ཆེས། དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྔས་ཕྱག་བྱས་པ་དེའི་ཚེ་ཀུན་དགའི་ར་བ་དེ་ཐམས་ཅད་མེ་ཏོག་ཙམ་པ་ཀའི་ཆར་མངོན་པར་
322b
རབ་ཏུ་བབ་པ་དང ། དེ་བཞིན་གཤེགས་པ་རིན་པོ་ཆེའི་སྙིང་པོས་བཀའ་སྩལ་པ། ཤིན་ཏུ་དྲི་ཞིམ་ཚོགས་རབ་མཆོག་སེམས་ལོངས། །མེ་ཏོག་ཙམ་པ་མཆོག་གི་ཆར་འདི་བབས། །རབ་ཏུ་གྱ་ནོམ་དགེ་བའི་ལམ་སྟོན་ལ། །འགྲོ་བ་མང་པོ་འཇིགས་མེད་སྒོར་འཁོད་ཅིག་།རིགས་ཀྱི་བུ། དེ་ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་བུ་བཅུ་གཅིག་པ་སེང་གེ་ཞེས་བྱ་བ་ལ་སྔ་མ་བཞིན་དུ་སྦྱར་རོ། །ཇི་ལྟར་སྤོས་ཀྱི་གླང་པོ་ཆེས་སྨོན་ལམ་བཏབ་པ་བཞིན་དེ་བཞིན་གཤེགས་པ་རིན་པོ་ཆེའི་སྙིང་པོ་ལ་རིན་པོ་ཆེའི་རྒྱལ་མཚན་ཕུལ་བ་དང ། དེ་བཞིན་གཤེགས་པ་རིན་པོ་ཆེའི་སྙིང་པོས་བཀའ་སྩལ་པ། སྐྱེས་བུ་དམ་པ། ལེགས་སོ། །ལེགས་སོ། །ཁྱོད་རིན་པོ་ཆེའི་ཐོག་ཅེས་བྱ་བར་གྱུར་ཅིག་།རིན་པོ་ཆེའི་ཏོག་ཁྱོད་ནི་མ་འོངས་པའི་དུས་ན་བསྐལ་པ་གྲངས་མེད་པ་གངྒཱའི་ཀླུང་གཅིག་གི་བྱེ་མ་སྙེད་འདས་ནས་བསྐལ་པ་གྲངས་མེད་པ་གངྒཱའི་ཀླུང་གི་བྱེ་མ་སྙེད་གཉིས་པ་ལ་བབ་པ་ན་འཇིག་རྟེན་གྱི་ཁམས་མངོན་པར་དགའ་བ་ཞེས་བྱ་བ་དེར་དེ་བཞིན་གཤེགས་པ་གསེར་གྱི་མེ་ཏོག་ཡོངས་སུ་མྱ་ངན་ལས་འདས་ཏེ། དེའི་དམ་པའི་ཆོས་ནུབ་ནས་པར་གྱི་བསྐལ་པ་གསུམ་འདས་པ་ན་སངས་རྒྱས་ཀྱི་ཞིང་དེ་རྒྱལ་བའི་ཟླ་བ་ཞེས་བྱ་བར་འགྱུར་རོ། །དེར་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་
323a
༄#། །གླང་པོ་རྣམ་པར་བསྒྲགས་པའི་དབང་ཕྱུག་དབྱངས་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་རོ། །ཁྱོད་ཀྱི་སངས་རྒྱས་ཀྱི་ཞིང་ཡང་དེ་བཞིན་གཤེགས་པ་མི་འཁྲུགས་པའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཅི་འདྲ་བ་དེ་ལྟ་བུར་འགྱུར་རོ། །རིན་པོ་ཆེའི་ཏོག་གི་ས་གསོལ་པ། བཙུན་པ་བཅོམ་ལྡན་འདས། ། གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན་དེའི་སླད་དུ་གང་གི་ཚེ་བདག་བཅོམ་ལྡན་འདས་ཀྱི་ཞབས་ལ་ཕྱག་འཚལ་བ་དེའི་ཚེ། ཇི་ལྟར་བྱང་ཆུབ་སེམས་དཔའ་གང་དག་བྱང་ཆུབ་ཆེན་པོ་ལ་ཡང་དག་པར་ཞུགས་པ་དག་སེམས་ཅན་ཐམས་ཅད་ཀྱི་དོན་དུ་སྙིང་རྗེ་ཞིང་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་ཏེ། སླར་མི་ལྡོག་པར་འགྱུར་བ་དེ་ལྟའི་དྲན་པ་སེམས་ཅན་ཐམས་ཅད་ཀྱིས་ཐོབ་པར་གྱུར་ཅིག་།རིགས་ཀྱི་བུ། དེ་བཞིན་དུ་བྱང་ཆུབ་སེམས་དཔའ་རིན་པོ་ཆེའི་ཏོག་གིས་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཕྱག་བྱས་པ་དང ། དེ་བཞིན་དུ་སེམས་ཅན་ཐམས་ཅད་ཀྱིས་ཀྱང་འདི་ལྟ་སྟེ། སེམས་ཅན་ཐམས་ཅད་སྙིང་རྗེའི་སེམས་ལ་བཀོད་པར་གྱུར་པ་དེ་ལྟ་བུའི་དྲན་པ་ཐོབ་པར་གྱུར་ཏོ། །རིགས་ཀྱི་བུ། དེ་ནས་དེ་བཞིན་གཤེགས་པ་རིན་པོ་ཆེའི་སྙིང་པོས་བྱང་ཆུབ་སེམས་དཔའ་རིན་པོ་ཆེའི་
323b
ཏོག་ལ་བཀའ་སྩལ་པ། བློ་གྲོས་ལེགས་པ་གཟུགས་མཆོག་བརྟན་པ་ལོངས། །སེམས་ཅན་ཕྱིར་ནི་དམ་བཅས་རབ་བརྟན་བྱས། །སྐྱེ་བོ་མང་པོ་རྡུལ་བྲལ་སེམས་ལ་བཞག་།མི་མཆོག་སངས་རྒྱས་རབ་ཀྱི་མཆོག་ཏུ་འགྱུར། །དེ་ལྟར་སྔ་མ་བཞིན་དུ་སྦྱར་ཏེ། མཉེན་དེས་ལ་སོགས་པ་རྒྱལ་བུ་ལྔ་བརྒྱས་ཀྱང་ཇི་ལྟར་བྱང་ཆུབ་སེམས་དཔའ་ནམ་མཁའི་ཕྱག་རྒྱས་སྨོན་ལམ་བཏབ་ཅིང་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་ཡོངས་སུ་བླངས་པ་དེ་ལྟར་སྨོན་ལམ་བཏབ་ཅིང ། དེ་ལྟ་བུའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་བླངས་ནས།་ཐམས་ཅད་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོས་དུས་གཅིག་ཏུ་འཇིག་རྟེན་གྱི་ཁམས་གཞན་དང་གཞན་དག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རེག་པར་འགྱུར་རོ་ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །གཞན་ཡང་རྒྱལ་བུ་བཞི་བརྒྱས་ཀྱང་རྡོ་རྗེས་གཅོད་པ་ཤེས་རབ་སྣང་བའི་དཔལ་གྱིས་ཇི་ལྟ་བུ་དེ་ལྟ་བུའི་སངས་རྒྱས་ཞིང་གི་ཡོན་ཏན་བཀོད་པ་དག་ཡོངས་སུ་བླངས་ནས། དེ་དག་ཐམས་ཅད་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོས་འཇིག་རྟེན་གྱི་ཁམས་གཞན་དང་གཞན་དག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །གཞན་ཡང་རྒྱལ་བུ་དགུ་བཅུས་ཀྱང་ཀུན་ཏུ་བཟང་པོས་ཇི་ལྟ་བ་དེ་ལྟ་བུའི་སྨོན་
324a
༄#། །ལམ་བཏབ་ཅིང་དེ་ལྟ་བུའི་སངས་རྒྱས་ཀྱི་ཞིང་ཡོངས་སུ་བླངས་སོ། །ཁམས་གྱི་རྒྱལ་པོ་བརྒྱད་ཁྲི་བཞི་སྟོང་པོ་ཐམས་ཅད་ཀྱིས་ཀྱང་སོ་སོ་ནས་སྨོན་ལམ་ཁྱད་པར་ཅན་དག་བཏབ་ཅིང ། སོ་སོ་ནས་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་ཡོངས་སུ་བླངས་ནས་ཐམས་ཅད་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོས་དུས་གཅིག་ཏུ་འཇིག་རྟེན་གྱི་ཁམས་གཞན་དང་གཞན་དག་ཏུ་བྱང་ཆུབ་ཐོབ་པར་འགྱུར་རོ་ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། ། དེ་བཞིན་དུ་སྲོག་ཆགས་དུང་ཕྱུར་ཕྲག་དགུ་དང ། བྱེ་བ་ཕྲག་གཉིས་ཀྱིས་ཀྱང་སོ་སོ་ནས་སྨོན་ལམ་བཏབ་ཅིང་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་ཀྱང་ཡོངས་སུ་བླངས་ནས། ཐམས་ཅད་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོས་དེ་བཞིན་དུ་ཁྱེད་ཅག་ཀྱང་དུས་གཅིག་ཏུ་འཇིག་རྟེན་གྱི་ཁམས་གཞན་དང་གཞན་དག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། ། རིགས་ཀྱི་བུ། དེ་ནས་བྲམ་ཟེ་རྒྱ་མཚོའི་རྡུལ་གྱི་བུ་དེ་བཞིན་གཤེགས་པ་རིན་པོ་ཆེའི་སྙིང་པོའི་གཅེན་གཅུང་པོ་བརྒྱད་ཅུ་པོ་དེ་དག་གི་ཐུ་བོ་བྲམ་ཟེའི་ཁྱེའུ་རྒྱ་མཚོའི་དབང་
324b
ཕྱུག་ཁྱབ་བདག་ཅེས་བྱ་བ་ཞིག་ཡོད་དེ། རིགས་ཀྱི་བུ། དེ་ནས་བྲམ་ཟེ་རྒྱ་མཚོའི་རྡུལ་གྱིས་བྲམ་ཟེའི་ཁྱེའུ་རྒྱ་མཚོའི་དབང་ཕྱུག་ཁྱབ་བདག་ལ་སྨྲས་པ། བྲམ་ཟེའི་ཁྱེའུ་ཁྱེད་ཀྱིས་ཀྱང་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་དག་པ་ཡོངས་སུ་ལོངས་ཤིག་།བྲམ་ཟེའི་ཁྱེའུ་རྒྱ་མཚོའི་དབང་ཕྱུག་ཁྱབ་བདག་གིས་སྨྲས་པ། ཡབ་རྗེ་ཁྱོད་ཀྱིས་སེང་གེའི་སྒྲ་སྒྲོགས་ཤིག་།རྒྱ་མཚོའི་རྡུལ་གྱིས་སྨྲས་པ། བུ་རྗེ་ཁྱོད་ཀྱིས་སྨོན་ལམ་ཐོབ་ཅིག་དང ། ཁོ་བོས་ཕྱིས་སྨོན་ལམ་གདབ་པར་བྱའོ། །དེས་སྨྲས་པ། ཡབ་གཅིག་སངས་རྒྱས་ཀྱི་ཞིང་ཡོངས་སུ་དག་པ་ཡོངས་སུ་བླང་བར་བགྱི་ལགས་སམ། འོན་ཏེ་ཡོངས་སུ་མ་དག་པ་བླང་བར་བགྱི་ལགས། །མདུན་ན་འདོན་གྱི་གཙོ་བོས་སྨྲས་པ། བྲམ་ཟེའི་ཁྱེའུ་གང་དག་སྙིང་རྗེ་ཆེན་པོ་དང་ལྡན་པའི་བྱང་ཆུབ་སེམས་དཔའ་དེ་དག་ནི་སངས་རྒྱས་ཀྱི་ཞིང་ཉོན་མོངས་པ་ཅན་ཡོངས་སུ་ལེན་པར་བྱེད་ཅིང ། སེམས་ཅན་བསམ་པ་ཉོན་མོངས་པ་ཅན་ལྟ་བ་ལོག་པར་གྱུར་པ་དག་འདུལ་བའང་ཡོངས་སུ་ལེན་པར་བྱེད་པས་ཁྱོད་བདག་རང་གིས་ཤེས་པར་གྱིས་ཤིག་།རིགས་ཀྱི་བུ། དེ་ནས་བྲམ་ཟེའི་ཁྱེའུ་རྒྱ་མཚོའི་དབང་ཕྱུག་ཁྱབ་པ་དག་དེ་བཞིན་གཤེགས་པ་རིན་པོ་ཆེའི་སྙིང་པོ་ག་ལ་བ་དེར་དོང་སྟ་ཕྱིན་པ་དང ། དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔ་ན་འདུག་ནས་འདི་སྐད་
325a
༄#། །ཅེས་གསོལ་ཏོ། །བཙུན་པ་བཅོམ་ལྡན་འདས། བདག་གི་སྐྱེ་དགུ་ལོ་བརྒྱད་ཁྲི་ཐུབ་པ་ན་བྱང་ཆུབ་དམ་པ་ལ་རེག་པར་གྱུར་པ་དེ་ལྟ་བུར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བཙལ་ལགས་ཏེ། བཅོམ་ལྡན་འདས། ཇི་ལྟར་ད་ལྟར་གྱི་སེམས་ཅན་རྣམས་འདོད་ཆགས་ཆུང་བ་དང ། ཞེ་སྡང་ཆུང་བ་དང ། གཏི་མུག་ཆུང་བ་དང ། སྐྱོ་བའི་བསམ་པ་ཅན་དང ། འཁོར་བ་ལ་འཇིགས་པ་དང ། སྐྱོན་དུ་ལྟ་བ་དེ་ལྟར་གང་དུ་བདག་མངོན་པར་རྫོགས་པར་འཚང་རྒྱ་བར་འགྱུར་བའི་སངས་རྒྱས་ཀྱི་ཞིང་དེར་སེམས་ཅན་རྣམས་ཀྱང་དེ་ལྟ་བུར་གྱུར་ཅིག་།དེ་དག་ཀྱང་བདག་ལས་རབ་ཏུ་འབྱུང་བར་འགྱུར་ཞིང ། བདག་ཀྱང་སེམས་ཅན་རྣམས་ལ་ཐེག་པ་གསུམ་པོ་དག་གིས་ཆོས་སྟོན་པར་གྱུར་ཅིག་།བཙུན་པ་བཅོམ་ལྡན་འདས། གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན། དེའི་སླད་དུ་བཅོམ་ལྡན་འདས་ཀྱི་བདག་བླ་ན་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་དུ་གསོལ། དེ་བཞིན་གཤེགས་པ་རིན་པོ་ཆེའི་སྙིང་པོས་བཀའ་སྩལ་པ། བྲམ་ཟེའི་ཁྱེའུ་ཁྱོད་ནི་མ་འོངས་པའི་དུས་ན་བསྐལ་པ་གྲངས་མེད་པ་གངྒཱའི་ཀླུང་གཅིག་གི་བྱེ་མ་སྙེད་འདས་ནས། བསྐལ་པ་གྲངས་མེད་པ་གངྒཱའི་ཀླུང་གི་བྱེ་མ་སྙེད་གཉིས་པ་ལ་བ་པ་ན་བསྐལ་པ་ཨུཏྤ་ལ་ཡང་དག་
325b
རྟོག་ཅེས་བྱ་བ་ལ། སངས་རྒྱས་ཀྱི་ཞིང་འདིའི་གླིང་བཞི་པ་མཆོག་ཅེས་བྱ་བར་འགྱུར་ཞིང་སྐྱེ་དགུའི་ལོ་བརྒྱད་ཁྲི་ཐུབ་པ་ན་བྱང་ཆུབ་མངོན་པར་ཐོབ་པར་འགྱུར་ཏེ། དེ་བཞིན་གཤེགས་པ་རིན་པོ་ཆེ་བརྩེགས་པ་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་རོ། །དེས་གསོལ་པ། བཙུན་པ་བཅོམ་ལྡན་འདས། གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན་དེའི་སླད་དུ་ཀུན་དགའི་ར་བ་འདི་ཐམས་ཅད་དུ་མུག་ཏི་དམར་པོའི་ཆར་དག་རབ་ཏུ་འབབ་པར་གྱུར་ཅིག་།ཤིང་ལྗོན་པ་ཐམས་ཅད་ལས་ཀྱང་ཡན་ལག་ལྔ་དང་ལྡན་པའི་སིལ་སྙན་གྱི་སྒྲ་དག་འབྱུང་བར་གྱུར་ཅིག་།རིགས་ཀྱི་བུ། གང་གི་ཆོ་བྲམ་ཟེའི་ཁྱེའུ་རྒྱ་མཚོའི་དབང་ཕྱུག་ཁྱབ་བདག་གིས་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྔ་ས་ཕྱག་བྱས་པ་དེའི་ཚེ་ཀུན་དགའི་ར་བ་དེ་ཐམས་ཅད་དུ་མུ་ཏིག་དམར་པོའི་ཆར་དག་ཀྱང་རབ་ཏུ་བབ། ཤིང་ལྗོན་པ་དེ་ཐམས་ཅད་ལས་ཀྱང་ཡན་ལག་ལྔ་དང་ལྡན་པའི་སིལ་སྙན་གྱི་སྒྲ་དག་བྱུང་བ་དང ། དེ་བཞིན་གཤེགས་པ་རིན་པོ་ཆེའི་སྙིང་པོས་བཀའ་སྩལ་པ། མཐུ་མཆོག་མི་ཟད་ཤེས་རབ་མཛོད་ལོངས་ཤིག། སེམས་ཅན་སྙིང་བརྩེ་ཕན་འདོད་བྱམས་པའི་སེམས། །ཁྱོད་ཀྱི་བསམ་པ་དག་པ་རྫོགས་འགྱུར་ཏེ། །འཇིག་རྟེན་སེམས་ཅན་དོན་མཛད་སངས་རྒྱས་འགྱུར། །བྲམ་ཟེའི་བུ་གཉིས་པ་
326a
༄#། །ཡང་དག་འབྱུང་ཞེས་བྱ་བ་དེས་ཀྱང་རྒྱ་མཚོའི་དབང་ཕྱུག་ཁྱབ་བདག་གིས་ཇི་ལྟ་བ་དེ་བཞིན་དུ་གསོལ་བ་དང ། དེ་བཞིན་གཤེགས་པ་རིན་པོ་ཆེའི་སྙིང་པོས་བཀའ་སྩལ་པ། བྲམ་ཟེའི་ཁྱེའུ་ཁྱོད་ཀྱང་བསྐལ་པ་ཨུཏྤ་ལ་ཡང་དག་རྟོག་ལ་སངས་རྒྱས་ཀྱི་ཞིང་འདི་གླིང་བཞི་བའི་འཇིག་རྟེན་གྱི་ཁམས་མཆོག་ཅེས་བྱ་བར་འགྱུར་ཞིང་སྐྱེ་དགུའི་ལོ་བརྒྱད་ཁྲིར་འཕེལ་བ་ན་དེ་བཞིན་གཤེགས་པ་རྣམ་པར་སྣང་མཛད་མེ་ཏོག་ཅེས་བྱ་བ་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་རོ། །དེ་བཞིན་དུ་སྦྱར་ཏེ། གསུམ་པས་ཀྱང་གསོལ་བ་དང ། ལོ་ཉིས་སྟོང་པ་ན་སྐར་མའི་དྲི་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་རོ་ཞེས་ལུང་བསྟན་ཏོ། །དེ་བཞིན་དུ་སྦྱར་ཏེ། འདི་ལྟར་དེ་བཞིན་གཤེགས་པ་སྣ་མའི་མེ་ཏོག་དང ། རི་བོའི་རྒྱལ་པོ་དང ། སྤྱན་བསྡམས་དང ། ཚངས་མཆོག་དང ། ཛམྦུའི་གྲིབ་མ་དང ། གང་བ་དང ། བླ་མ་དང ། རིན་ཆེན་རི་བོ་དང ། རྒྱ་མཚོའི་སྙིང་པོ་དང ། སྲེད་མེད་ཀྱི་བུ་དང ། གཙུག་ཏོར་ཅན་དང ། གསེར་ཐུབ་དང ། ཐུབ་དབང་དང ། ཀཽཎྜི་ནྱ་དང ། སེང་གེའི་རྩལ་དང ། ཡེ་ཤེས་རྒྱལ་མཚན་དང ། སངས་རྒྱས་སྒྲོགས་དང ། གཞན་གྱིས་མི་ཐུབ་དང ། རྒྱས་པ་དང ། རྒྱལ་བ་དང ། ཕན་བཞད་དང ། ཤེས་རབ་སྣང་བ་དང ། དབང་ཆེན་དང ། ཞི་བ་དང །
326b
ཤེས་རབ་འབྱུང་གནས་དང ། དགའ་བ་དང ། ནྱ་གྲོ་དྷ་རྒྱལ་པོ་དང ། གསེར་སྤྱན་དང ། ཕན་བཅས་དང ། གཉི་དགའ་དང ། རིན་ཆེན་གཙུག་ཏོར་ཅན་དང ། སྤྱན་བཟང་དང ། ཚངས་པ་དང ། མཛེས་པ་དང ། ཚངས་པ་ཁྱུ་མཆོག་དང ། སྒྲ་རབ་དང ། ཆོས་ཀྱི་ཟླ་བ་དང ། དོན་མཐོང་དང ། སྙན་པ་དང ། དགའ་ཅན་དང ། གྲགས་མཆོག་དང ། གཟུགས་བཟང་དང་དྲི་ཞིམ་དང ། གྲིམས་གཡར་དང ། རབ་མཆོག་སྤྱན་དང ། རབ་སྤོང་དང ། དོན་བཅས་བརྟུལ་ཞུགས་དང ། ཐུགས་ཀྱི་རེ་བ་བཟང་དང ། ཤེས་རབ་མཆོག་དང ། གསེར་གྱི་རྒྱལ་མཚན་དང ། སྤྱན་མཛེས་དང ། དག་པའི་ལྷ་དང ། ཟས་གཙང་དང ། ལེགས་མཐོང་ལྷ་དང ། འཕགས་སྐྱེས་རྒྱལ་མཚན་དང ། མིག་མི་བཟང་དང ། ཚངས་དབྱངས་དང ། དཔལ་འབྱུང་དང ། ང་རྒྱལ་དཔལ་དང ། རྡུལ་བྲལ་དང ། ནོར་བུ་བཟང་དང ། འོད་ཟེར་ཅན་དང ། ཤཱཀྱ་ཐུབ་པ་དང ། དབྱངས་ཀྱི་དབང་ཕྱུག་དང ། བདེ་འབྱུང་བ་དང ། ཐུ་བོ་དང ། ཡང་དག་འབྱུང་དང།་མེ་ཏོག་དང ། ཡང་དག་མེ་ཏོག་དང ། མི་འཁྲུགས་པ་དང ། ཉི་མའི་སྙིང་པོ་དང ། དགའ་བའི་དབང་ཕྱུག་དང ། ཀླུས་བྱིན་དང ། རྡོ་རྗེའི་འོད་དང ། གྲགས་པའི་རྒྱལ་པོ་དང ། སྟག་གི་འོད་ཟེར་དང ། སྤྱད་བཅས་དང ། ཡེ་ཤེས་འབྱུང་དང ། སྤོས་ཀྱི་དབང་ཕྱུག་དང ། སཱ་ལའི་དབང་པོ་དང ། སྲེད་མེད་ཀྱི་བུའི་སྙིང་པོ་དང ། སྐར་མའི་སྙིང་པོ་ཞེས་བྱ་བ་དག་
327a
༄#། །ཏུ་འགྱུར་རོ་ཞེས་ལུང་བསྟན་ཏོ། །རིགས་ཀྱི་བུ། དེ་ནས་མདུན་ན་འདོན་གྱི་བུ་ཐམས་ཅད་ཀྱི་ཐ་ཆུང་འཇིགས་པའི་གདུང་བྲལ་ཞེས་བྱ་བ་གང་ཡིན་པ་དེའང་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་འདུག་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བྲམ་ཟེའི་ཁྱེའུ་བདུན་ཅུ་རྩ་དགུ་པོ་འདི་དག་ཐམས་ཅད་བསྐལ་པ་ཨུཏྤ་ལ་ཡང་དག་རྟོག་གིའང་སྐྱེ་བ་གཉིས་པ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་ལུང་བསྟན་པ་ལགས་པས་ན། བཙུན་པ་བཅོམ་ལྡན་འདས། བདག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱི་སྟེ། བསྐལ་པ་ཨུཏྤ་ལ་ཡང་དག་རྟོག་པས་པར་འགྱུར་བ་ན་ཐམས་ཅད་ཀྱི་ཐ་མར་བྱང་ཆུབ་མཆོག་ལ་རེག་པར་གྱུར་ཅིག་།སངས་རྒྱས་བདུན་ཅུ་རྩ་དགུ་པོ་དེ་དག་གི་སྐུ་ཚེའི་ཚད་ཇི་ཙམ་པ་བདག་བྱང་ཆུབ་ཐོབ་པ་གཅིག་བུའི་ཚེའི་ཚད་ཀྱང་དེ་ཙམ་དུ་གྱུར་ཅིག་།དེ་དག་གི་འདུལ་བ་ཇི་སྙེད་མཆིས་པར་གྱུར་པ་དང ། ཇི་ལྟར་དེ་དག་ཐེག་པ་གསུམ་པོ་དག་གིས་ཆོས་སྟོན་པར་འགྱུར་བ་བདག་གཅིག་པུའི་ཡང་དེ་སྙེད་དུ་གྱུར་ཅིག་།ཇི་ལྟར་དེ་དག་གི་ཉན་ཐོས་ཀྱི་དགེ་འདུན་ཇི་སྙེད་མཆིས་པར་འགྱུར་བ་བདག་བྱང་ཆུབ་ཐོབ་པ་གཅིག་པུའི་ཉན་ཐོས་ཀྱི་
327b
དགེ་འདུན་ཡང་དེ་སྙེད་དུ་གྱུར་ཅིག་།སངས་རྒྱས་བདུན་ཅུ་རྩ་དགུ་པོ་དེ་དག་བྱུང་བའི་བསྐལ་བ་ཨུཏྤ་ལ་ཡང་དག་རྟོག་དེ་ལ་སེམས་ཅན་གང་དག་གིས་མིའི་ལུས་ཐོབ་པར་གྱུར་བའི་སེམས་ཅན་དེ་དག་ཐམས་ཅད་ཀྱང་བསྐལ་བ་བས་པར་འགྱུར་བ་ན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཐེག་པ་གསུམ་པོ་དག་གི་ངེས་པ་ལ་དགོད་པར་བགྱིའོ། །བཙུན་པ་བཅོམ་ལྡན་འདས། གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན། དེའི་སླད་དུ་བཙུན་པ་བཅོམ་ལྡན་འདས་ཀྱིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་དུ་གསོལ། །རིགས་ཀྱི་བུ། དེ་ནས་དེ་བཞིན་གཤེགས་པ་རིན་པོ་ཆེའི་སྙིང་པོས་འཇིགས་པའི་གདུང་བྲལ་ལ་ལེགས་སོ་ཞེས་བྱ་བ་བྱིན་ཏེ། སྐྱེས་བུ་དམ་པ་ཁྱོད་སེམས་ཅན་བགྲང་བ་ལས་འདས་པ་དག་ལ་སྙིང་རྗེ་ཞིང་ཕན་པར་བྱེད་པར་ཞུགས་པ་ནི་ལེགས་སོ། །ལེགས་སོ། །བྲམ་ཟེའི་ཁྱེའུ་ཁྱོད་ནི་མ་འོངས་པའི་དུས་ན་བསྐལ་པ་གྲངས་མེད་པ་གངྒཱའི་ཀླུང་གི་བྱེ་མ་སྙེད་གཅིག་འདས་ནས་བསྐལ་པ་གྲངས་མེད་པ་གངྒཱའི་ཀླུང་གི་བྱེ་མ་སྙེད་གཉིས་པ་ལ་བབ་པ་ན་བསྐལ་པ་ཨུཏྤ་ལ་ཡང་དག་རྟོག་དེ་ཟད་ཀར་ཐམས་ཅད་ཀྱི་ཐ་མར་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་
328a
༄#། །པ་རྡུལ་བྲལ་ཡང་དག་འཕགས་མངོན་འཕགས་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་རོ། །ཇི་ལྟར་སངས་རྒྱས་བདུན་རྩ་དགུ་པོ་དེ་དག་གི་ཚེ་བསྐལ་བ་ཕྱེད་དུ་འགྱུར་བ་དེ་བཞིན་དུ་ཁྱོད་གཅིག་པུའི་ཡང་བསྐལ་པ་ཕྱེད་དུ་འགྱུར་ཏེ། ཇི་ལྟར་སྨོན་ལམ་བཏབ་པའི་སྨོན་ལམ་དེ་དག་ཐམས་ཅད་ཀྱི་བར་ཡང་དག་པར་འགྲུབ་པར་འགྱུར་རོ། །དེས་གསོལ་པ། བཙུན་པ་བཅོམ་ལྡན་འདས། གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན། དེའི་སླད་དུ་གང་གི་ཚེ་བདག་བཅོམ་ལྡན་འདས་ཀྱི་ཞབས་ལ་ཡན་ལག་ལྔས་ཕྱག་འཚལ་བ་དེའི་ཚེ། །སངས་རྒྱས་ཀྱི་ཞིང་འདི་ཐམས་ཅད་དུ་མེ་ཏོག་སྔོན་པོའི་ཆར་ཤིན་ཏུ་དྲི་བདའ་བ་དག་འབབ་པར་གྱུར་ཅིག་།སེམས་ཅན་གང་དག་གིས་དྲི་དེ་ཚོར་བར་གྱུར་པ་དེ་དག་ཐམས་ཅད་ཀྱི་ཁམས་རྣམས་རབ་ཏུ་དང་ཞིང་མི་མཐུན་པ་མ་མཆིས་པར་གྱུར་ཅིག་།སེམས་ཅན་ཐམས་ཅད་ཀྱི་ནད་རྣམས་ཀྱང་རབ་ཏུ་ཞི་བར་གྱུར་ཅིག་།རིགས་ཀྱི་བུ། གང་གི་ཚེ་བྲམ་ཟེའི་ཁྱེའུ་འཇིགས་པའི་གདུང་བྲལ་གྱིས་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྔས་ཕྱག་བྱས་པ་དེའི་ཚེ་དེའི་དུས་ན་སངས་རྒྱས་ཀྱི་ཞིང་དེ་ཐམས་ཅད་དུ་མེ་ཏོག་སྔོན་པོའི་ཚར་དག་ཀྱང་རབ་ཏུ་བྱུང་བ་སེམས་ཅན་ཐམས་ཅད་ཀྱིས་ཀྱང་དྲི་དེ་
328b
ཚོར་བར་གྱུར་ནས་དེ་དག་ཐམས་ཅད་ཀྱི་ཁམས་རྣམས་ཀྱང་སྙོམས་ཤིང་མི་མཐུན་པ་མེད་པར་གནས་པར་གྱུར། དེ་ན་སེམས་ཅན་ཐམས་ཅད་ལ་ནད་མེད་ཅིང་གནོད་པ་མེད་པར་གྱུར་པ་དང ། དེ་བཞིན་གཤེགས་པ་རིན་པོ་ཆེའི་སྙིང་པོས་བཀའ་སྩལ་པ། སྙིང་རྗེ་བརྟུལ་ཞུགས་དུལ་བའི་སེམས་ལོངས་ཤིག་།འཇིག་རྟེན་མགོན་པོ་མང་པོ་མཆོད་འགྱུར་ཞིང ། །ཉོན་མོངས་གཡོ་མདུད་དམ་པོ་གཅོད་འགྱུར་ཏེ། །དགེ་བ་དམ་པ་ཤེས་རབ་མཛོད་དུ་འགྱུར།། །།བམ་པོ་བརྒྱད་པ་རིགས་ཀྱི་བུ་བྲམ་ཟེ་དེའི་སློབ་མ་བྱེ་བ་ཕྲག་གསུམ་ཀུན་དགའི་ར་བའི་སྒོ་ན་འདུག་པ་དེ་དག་གིས་ཀྱང་སེམས་ཅན་འོངས་པ་རྣམས་གསུམ་ལ་སྐྱབས་སུ་འགྲོ་བ་ལ་བཀོད་ཅིང་བྱང་ཆུབ་ཡང་དག་པར་འཛིན་དུ་བཅུག་གོ་།རིགས་ཀྱི་བུ། དེ་ནས་བྲམ་ཟེ་རྒྱ་མཚོའི་རྡུལ་གྱིས་སློབ་མ་དེ་དག་ལ་སྨྲས་པ། ཀྱེ་བྲམ་ཟེའི་ཁྱེའུ་དག་།བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ལ་སངས་རྒྱས་ཀྱི་ཞང་གི་ཡོན་ཏན་བཀོད་པ་ཇི་ལྟ་བུ་འདོད་པ་དག་ཀྱང་ལོངས་ཤིག་།སྨོན་ལམ་ཇི་ལྟ་བུ་འདོད་པ་དག་ཀྱང་བཅོམ་ལྡན་འདས་ཀྱི་སྤྱན་སྔར་ཐོབ་ཅིག་།དེ་ནས་བྲམ་ཟེའི་ཁྱེའུ་སྐར་མའི་ཁྱུ་མཆོག་གིས་སྨྲས་པ། ལམ་ཇི་ལྟ་བུ་དང ། ཚོགས་ཇི་ལྟ་བུ་དང ། སྤྱོད་པ་ཇི་ལྟ་བུ་དང ། རྗེས་སུ་དྲན་པ་ཇི་ལྟ་བུས་བྱང་
329a
༄#། །ཆུབ་འཐོབ་པར་འགྱུར་ལགས། མདུན་ན་འདོན་གྱིས་སྨྲས་པ། བྲམ་ཟེའི་ཁྱེའུ་བྱང་ཆུབ་ཀྱི་ལམ་ལ་ཞུགས་པའི་བྱང་ཆུབ་སེམས་དཔས་མི་ཟད་པའི་མཛོད་བཞི་པོ་འདི་དག་ཡང་དག་པར་བསྒྲུབ་པར་བྱ་སྟེ། བཞི་གང་ཞེ་ན། བསོད་ནམས་ཀྱི་ཚོགས་མི་ཟད་པ་དང ། ཡེ་ཤེས་ཀྱི་ཚོགས་མི་ཟད་པ་དང ། ཤེས་རབ་ཀྱི་ཚོགས་མི་ཟད་པ་དང ། ཆོས་ཐམས་ཅད་ཡང་དག་པར་སྒྲུབ་པའི་ཚོགས་མི་ཟད་པ་སྟེ། རིགས་ཀྱི་བུ། ལམ་དེ་ནི་དེ་ལྟ་བུ་ཡིན་ནོ། །བྲམ་ཟེའི་ཁྱེའུ་དེ་བཞིན་གཤེགས་པས་ཀྱང་འདི་སྐད་དུ་བྱང་ཆུབ་སེམས་དཔའ་རྣམས་ནི་ཚོགས་རྣམ་པར་དག་པ་སྡུད་པ་ཞེས་བྱ་བ་ཚོགས་ཉམས་སུ་ལེན་པར་བྱེད་པ། ཆོས་ཀྱི་སྒོ་སྦྱིན་པའི་ཚོགས་ཡོངས་སུ་གཏོད་བར་བྱེད་དེ། དེས་ནི་འདུལ་བའི་སེམས་ཅན་ཡོངས་སུ་སྨིན་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཀྱི་ཚོགས་ནི་སྨོན་ལམ་ཡོངས་སུ་རྫོགས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བཟོད་པའི་ཚོགས་ནི་མཚན་དང་དཔེ་བྱད་བཟང་པོ་ཡོངས་སུ་རྫོགས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཀྱི་ཚོགས་ནི་དགོས་པ་ཐམས་ཅད་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བསམ་གཏན་གྱི་ཚོགས་ནི་ཅང་ཤེས་ཀྱི་སེམས་སུ་བྱེད་
329b
བར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཤེས་རབ་ཀྱི་ཚོགས་ནི་ཉོན་མོངས་པ་ཐམས་ཅད་ཡོངས་སུ་ཤེས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཐོས་པའི་ཚོགས་ནི་རྟོགས་པ་ཐོགས་པ་མེད་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བསོད་ནམས་ཀྱི་ཚོགས་ནི་སེམས་ཅན་ཐམས་ཅད་ཉེ་བར་འཚོ་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་ཚོགས་ནི་ཤེས་པ་ཐོགས་པ་མེད་པར་བྱེ་དཔར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཞི་གནས་ཀྱི་ཚོགས་ནི་སེམས་ལས་སུ་རུང་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ལྷག་མཐོང་གི་ཚོགས་ནི་ཐེ་ཚོམ་དང་བྲལ་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བྱམས་པའི་ཚོགས་ནི་ཞེ་འགྲས་པ་མེད་པའི་སེམས་སུ་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་སྙིང་རྗེའི་ཚོགས་ནི་འདུལ་བ་ལ་མི་སྐྱོ་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་དགའ་བའི་ཚོགས་ནི་ཆོས་ཀྱི་ཀུན་དགའ་ལ་དགའ་མོས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བཏང་སྙོམས་ཀྱི་ཚོགས་ནི་རྗེས་སུ་ཆགས་པ་དང ། ཁོང་ཁྲོ་བ་སྤོང་བར་བྱེད་པར་འགྱུར་རོ། །བྱང་ཆུབ་སེམས་དཔའི་རྣམས་ཀྱི་ཆོས་ཉན་པའི་ཚོགས་ནི་སྒྲིབ་པ་སྤོང་བར་བྱེད་པར་འགྱུར་རོ། །བྱང་ཆུབ་
330a
༄#། །སེམས་དཔའ་རྣམས་ཀྱི་མངོན་པར་འབྱུང་བའི་ཚོགས་ནི་ཡོངས་སུ་འཛིན་པ་ཐམས་ཅད་སྤོང་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་དགོན་པར་གནས་པའི་ཚོགས་ནི་དགེ་བའི་ལས་བྱས་པ་ཆུད་མི་ཟ་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་དགེ་བ་སྤེལ་བ་སྒོམ་པའི་ཚོགས་ནི་དགེ་བའི་རྩ་བ་ཐམས་ཅད་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་དྲན་པའི་ཚོགས་ནི་གཟུངས་ཐོབ་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བློ་གྲོས་ཀྱི་ཚོགས་ནི་བློའི་བྱེ་བྲག་འབྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་མོས་པའི་ཚོགས་ནི་དོན་གྱི་རྣམ་པའི་རྗེས་སུ་རྟོགས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་དྲན་པ་ཉེ་བར་བཞག་བའི་ཚོགས་ནི་ལུས་དང ། ཚོར་བ་དང ། སེམས་དང ། ཆོས་ལ་སོ་སོར་རྟོག་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཡང་དག་པའི་སྤོང་བའི་ཚོགས་ནི་དགེ་བའི་ཆོས་ཐམས་ཅད་བསྒོམ་པ་ཡོངས་སུ་རྫོགས་པར་བྱེད་པ་འགྱུར་རོ། །བྱང་ཆུབ་སེམས་དཔའ་རྣམས་ཀྱི་རྫུ་འཕྲུལ་གྱི་རྐང་པའི་ཚོགས་ནི་ལུས་དང ། སེམས་ཡང་བ་ཉིད་དུ་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་དབང་པོའི་ཚོགས་ནི་སྡོམ་པ་ཡོངས་སུ་རྫོགས་པར་བྱེད་
330b
པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་སྟོབས་ཀྱི་ཚོགས་ནི་ཉོན་མོངས་པ་ཐམས་ཅད་འཇོམས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་ཡན་ལག་གི་ཚོགས་ནི་ཆོས་ཀྱི་ངོ་བོ་ཉིད་ཁོང་དུ་ཆུད་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་སྙིང་པོར་བྱེད་པ་དྲུག་གི་ཚོགས་ནི་འདུལ་བའི་སེམས་ཅན་རྣམས་ཡོངས་སུ་དག་པར་བྱེད་པར་འགྱུར་རོ། །ཞེས་གསུངས་ཏེ། བྲམ་ཟེའི་ཁྱེའུ་ཚོགས་རྣམ་པར་དག་པ་སྡུད་པ་ཞེས་བྱ་བ་དེ་ནི་ཚོགས་ཉམས་སུ་ལོན་པར་བྱེད་པའི་ཆོས་ཀྱི་སྒོ་ཡིན་ནོ། །དེས་སྨྲས་པ། བཅོམ་ལྡན་འདས་ཀྱིས་སྦྱིན་པའི་ཚོགས་ནི་ལོངས་སྤྱོད་ཆེན་པོ་དང ། གཡོག་འཁོར་མང་པོར་འགྱུར་བར་གསུངས་ལ། བཅོམ་ལྡན་འདས་ཀྱིས་ཚུལ་ཁྲིམས་ནི་མཐོ་རིས་སུ་སྐྱེ་བར་འགྱུར་བ་དང ། ཐོས་པས་ནི་ཤེས་རབ་ཆེན་པོར་འགྱུར་བ་དང ། དད་པ་དང ། འཚོ་བ་དང ། སྒོམ་པ་ནི་འཁོར་བ་ལས་རྒལ་བར་བྱེད་ན་པར་བསྟན་ཏོ། །མདུན་ན་འདོན་གྱིས་སྨྲས་པ་དང ། བྲམ་ཟེའི་ཁྱུརུའ་གང་དག་འཁོར་བ་ལ་མངོན་པར་དགའ་བ་རྣམས་ནི་སྦྱིན་པ་སྤྱིན་པར་བྱེད་དེ། །བྲམ་ཟེའི་ཁྱེའུ། དེའང་འདི་སྐད་དུ་རིགས་ཀྱི་བུའམ། རིགས་ཀྱི་བུ་མོ་གང་དག་བྱང་ཆུབ་ཀྱི་ལམ་ལ་ཞུགས་པ་དེ་དག་གིས་ནི་རུལ་བའི་སེམས་ཀྱི་སྦྱིན་པ་སྦྱིན་པར་བྱའོ། །ཞི་གནས་ཀྱི་སེམས་ཀྱིས་ཚུལ་
331a
༄#། །ཁྲིམས་བསྲུང་བར་བྱའོ། །རྙོག་པ་མེད་པའི་སེམས་ཀྱིས་ཐོས་པ་ཡོངས་སུ་བཙལ་བར་བྱའོ། །སྙིང་རྗེ་ཆེན་པོའི་སེམས་ཀྱིས་བསྒོམ་པ་བསྒོམ་པར་བྱའོ། །ཆོས་ལྷག་མ་རྣམས་ཀྱང་ཤེས་རབ་དང ། ཡེ་ཤེས་དང ། ཐབས་ཀྱི་ཚོགས་ཡང་དག་པར་བསྒྲུབ་པའི་ཕྱིར་ཡོངས་སུ་བཙལ་བར་བྱའོ་ཞེས་གསུངས་པ་ལྟ་བུ་སྟེ།་བྲམ་ཟེའི་ཁྱེའུ། དེ་ནི་བྱང་ཆུབ་ཀྱི་ལམ་ཡིན་ནོ། །ཚོགས་དེ་ལྟ་བུས་བྱང་ཆུབ་ཐོབ་པར་འགྱུར་ཏེ། བྲམ་ཟེའི་ཁྱེའུ། བསྒོམ་པ་ནི་དེ་ལྟ་བུ་ཡིན། དྲན་པ་ནི་དེ་ལྟ་བུ་ཡིན།་བྱང་ཆུབ་ཀྱི་ལམ་གྱི་སྤྱོད་པ་ནི་དེ་ལྟ་བུ་ཡིན་གྱི། བྲམ་ཟེའི་ཁྱེའུ། བྱང་ཆུབ་ཏུ་འདུན་པ་སྐྱེད་ཅིག་།བྲམ་ཟེའི་ཁྱེའུ། བྱང་ཆུབ་ཀྱི་ལམ་ནི་ཡང་དག་པ་ཡིན་གྱི། བསམ་པ་ཐག་པ་ནས་སྨོན་ལམ་ཐོབ་ཅིག་དང་ཡོངས་སུ་རྫོགས་པར་འགྱུར་རོ། །བྲམ་ཟེའི་ཁྱེའུ། བསམ་པ་ཐག་པས་བྱང་ཆུབ་ཀྱི་ལམ་ནི་དང་བ་ཡིན་ནོ། །བྲམ་ཟེའི་ཁྱེའུ། གཡོ་མེད་པས་རྣམ་པར་དག་པ་སྟེ། ཉོན་མོངས་པ་རབ་ཏུ་བསལ་བས་བྱང་ཆུབ་ཀྱི་ལམ་ནི་དྲང་བ་ཡིན་ནོ། །བྲམ་ཟེའི་ཁྱེའུ། བླ་ན་མེད་པའི་མྱ་ངན་ལས་འདས་པའི་མཐར་ཐུག་པས་བྱང་ཆུབ་ཀྱི་ལམ་ནི་གྲུབ་པ་དང ། བདེ་བ་ཡིན་གྱི། སྨོན་ལམ་ཐོབ་ལ་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་དག་པའམ། ཡོངས་སུ་མ་དག་པ་ཇི་
331b
ལྟ་བུ་འདོད་པ་ལོང་ཞིག་།རིགས་ཀྱི་བུ། དེ་ནས་བྲམ་ཟེའི་ཁྱེའུ་སྐར་མའི་ཁྱུ་མཆོག་གིས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་པུས་མོ་གཡས་པའི་ལྷ་ང་ས་ལ་བཙུགས་ཏེ་འདུག་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱི་སྟེ། སེམས་ཅན་འདོད་ཆགས་ཆུང་བ་རྣམས་དང ། ཞེ་སྡང་ཆུང་བ་རྣམས་དང ། གཏི་མུག་ཆུང་བ་རྣམས་དང ། སེམས་འཁྲུལ་པ་མ་མཆིས་ཞིང་མ་འཁྲུལ་བ་རྣམས་དང ། འཁོན་པའི་སེམས་མ་མཆིས་པ་རྣམས་དང ། ཕྲག་དོག་དང་སེར་སྣའི་སེམས་རྣམ་པར་སྤངས་པ་རྣམས་དང ། ལོག་པར་ལྟ་བའི་སེམས་ཡོངས་སུ་སྤངས་པ་རྣམས་དང ། ཡང་དག་པའི་ལྟ་བའི་སེམས་ལ་གནས་པ་རྣམས་དང ། དགེ་བར་སེམས་པ་རྣམས་དང ། དགེ་བ་ཡོངས་སུ་ཚོལ་བར་སེམས་པ་རྣམས་དང ། ངན་སོང་གསུམ་གྱི་ལམ་རྣམ་པར་སྤོང་བར་སེམས་པ་རྣམས་དང ། མཐོ་རིས་ཀྱི་ལམ་གསུམ་ལ་བརྩོན་པར་སེམས་པ་རྣམས་དང ། བསོད་ནམས་བྱ་བའི་དངོས་པོ་གསུམ་པོ་དག་གིས་དགེ་བའི་རྩ་བ་ཡང་དག་པར་སྡུད་པ་རྣམས་དང ། ཐེག་པ་གསུམ་པོ་དག་ལ་བརྩོན་པར་སེམས་དཔའ་རྣམས་ཀྱི་སླད་དུ་བདག་ཀྱང་སངས་རྒྱས་ཀྱི་ཞིང་ཉོན་མོངས་པ་ཅན་འདིར་བླ་ན་མེད་པ་ཡང་དག་རྫོགས་པའི་བྱང་
332a
༄#། །ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་།བཙུན་པ་བཅོམ་ལྡན་འདས། གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན་དེའི་སླད་དུ་བདག་གི་སུག་པ་ལག་པ་གཉིས་སུ་གླང་པོ་ཆེའི་གཙོ་བོ་དག་འབྱུང་བར་གྱུར་ཅིག་།ཚིག་དེ་སྐད་ཅེས་སྨྲས་མ་ཐག་ཏུ་བཅོམ་ལྡན་འདས་ཀྱི་མཐུས་དེའི་ལག་པ་གཉིས་སུ་གླང་པོ་ཆེའི་གཙོ་བོ་ཐལ་ཀར་ཡན་ལག་བདུན་ཤིན་ཏུ་གནས་པ་དག་བྱུང་བར་གྱུར་པ་མཐོང་ནས། དེས་སྨྲས་པ། ཁྱེད་ཅག་ཅུང་ཟད་ཙམ་ཞིག་ཐམས་ཅད་དང་ལྡན་པའི་སངས་རྒྱས་ཀྱི་ཞིང་འདིའི་སྟེང་གི་ནམ་མཁའ་ལ་དེང་ལ། ཡན་ལག་བརྒྱད་དང་ལྡན་པའི་ཆར་ཤིན་ཏུ་དྲི་ཞིམ་པ་དག་གིས་སངས་རྒྱས་ཀྱི་ཞིང་འདི་ནས་སེམས་ཅན་ཐམས་ཅད་སད་པར་གྱིས་ཤིག་།དེའི་ཐིགས་པས་སེམས་ཅན་ཐམས་ཅད་སད་པར་གྱིས་ཤིག་།དེའི་ཐིགས་པས་སེམས་ཅན་གང་དག་གི་ལུས་ལ་ཕོག་གམ། གང་དག་གིས་དྲི་ཚོར་བར་གྱུར་པ་དེ་དག་གི་སྒྲིབ་པ་ལྔ་སྤངས་པར་གྱུར་ཅིག་།འདི་ལྟ་སྟེ། འདོད་པ་ལ་འདུན་པའི་སྒྲིབ་པ་སྤངས་པར་གྱུར་ཅིག་།གནོད་སེམས་དང ། རྨུགས་པ་དང ། གཉིད་དང ། རྒོད་པ་དང ། འགྱོད་པ་དང ། ཐེ་ཚོམ་གྱི་སྒྲིབ་པ་སྦྱངས་པར་གྱུར་ཅིག་།ཚིག་དེ་སྐད་ཅེས་སྨྲས་མ་ཐག་ཏུ་གླང་པོ་ཆེ་དེ་དག་སྟེང་གི་བར་སྣང་ལ་འདི་ལྟར་
332b
མགྱོགས་པར་དོང་སྟེ། འདི་ལྟ་སྟེ། དཔེར་ན། སྐྱེས་བུ་སྟོབས་དང་ལྡན་པས་ལག་པ་བརྐྱད་པ་ལས་བསྐུམ་པའམ། བསྐུམ་པ་ལས་བརྐྱང་པ་དེ་བཞིན་དུ་དེ་ལྟར་མགྱོགས་པར་དོང་ནས།་གླང་པོ་ཆེའི་གཙོ་བོ་དེ་དག་གིས་ཇི་སྐད་སྔར་སྨྲས་པའི་བྱ་བ་དག་བྱས་ནས་ཕྱིར་ལོག་སྟེ་དེའི་མདུན་དུ་ལ་བོད་དོ། །རིགས་ཀྱི་བུ། དེ་ནས་བྲམ་ཟེའི་ཁྱེའུ་སྐར་མའི་ཁྱུ་མཆོག་ཤིན་ཏུ་ཡིད་དགའ་བར་གྱུར་པ་དང ། དེ་ལ་དེ་བཞིན་གཤེགས་པ་རིན་པོ་ཆེའི་སྙིང་པོས་བཀའ་སྩལ་པ། རིགས་ཀྱི་བུ་ཁྱོད་ནི་མ་འོངས་པའི་དུས་ན་བསྐལ་པ་གྲངས་མེད་པ་གངྒཱའི་ཀླུང་གི་བྱེ་མ་སྙེད་གཉིས་པ་ལ་བབ་ན་བསྐལ་པ་སྒྲ་སྣང་ཞེས་བྱ་བ་ལ་གླིང་བཞི་པ་འདིར་སངས་རྒྱས་ཀྱི་ཞིང་སྒྲ་ཡང་དག་པར་བསགས་པ་ཞེས་བྱ་བ་ཞིག་འབྱུང་བར་འགྱུར་བ་དེ་བཞིན་གཤེགས་པ་རིན་པོ་ཆེ་ཆེན་པོའི་གདུགས་མངོན་པར་འཕགས་པའི་འོད་ཟེར་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་རོ། །རིགས་ཀྱི་བུ། དེ་ནས་བྱང་ཆུབ་སེམས་དཔའ་སྐར་མའི་ཁྱུ་མཆོག་གིས། དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྔས་གཏུགས་པ་དང ། དེ་བཞིན་གཤེགས་པ་རིན་པོ་ཆེའི་སྙིང་པོས་བཀའ་སྩལ་པ། རྡུལ་དང་རྣམ་བྲལ་སེམས་ཅན་རྣམ་དག་ལོངས། །ཁྱོད་ཀྱི་སེམས་ཅན་བྱེ་མང་ལུང་བསྟན་ཏོ། །བྱང་ཆུབ་ཕྱིར་ནི་རབ་དག་ལམ་སྦྱོང་ཞིང ། རྒྱལ་མཆོག་སེམས་ཅན་རྣམས་
333a
༄#། །ཀྱི་འདྲེན་པར་འགྱུར། དེ་བཞིན་དུ་སྦྱར་ཏེ། བྲམ་ཟེའི་ཁྱེའུ་སྟོང་དང ། བྲམ་ཟེའི་ཁྱེའུ་བྱེ་བ་ཕྲག་གསུམ་པོ་གང་དག་གིས་སངས་རྒྱས་ཀྱི་ཞིང་འདིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་པ་དེ་དག་ཐམས་ཅད་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོས་ལུང་བསྟན་ཏེ། ཐ་མ་ནི་སངས་རྒྱས་རྣམ་པར་གཟིགས་དང ། གཙུག་ཏོར་ཅན་དང ། ཐམས་ཅད་སྐྱོབ་ཀྱི་བར་དག་ཏུ་འགྱུར་རོ། །བྲམ་ཟེའི་ཁྱེའུ་ལུང་བསྟན་པ་དེ་དག་ཐམས་ཅད་ལས་གང་དག་རིག་བྱེད་ཀློག་པའི་བྲམ་ཟེ་སྟོང་ཞིག་ཡོད་པའི་ཐུ་བོ་མང་པོས་བླ་མར་བཀུར་བ་ཁྱབ་འཇུག་རླུང་ཞེས་བྱ་བ་དེས་གསོལ་པ། བདག་ནི་སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རེག་པར་གྱུར་ཅིག་།འདོད་ཆགས་བདོ་བ་དང ། ཞེ་སྡང་བདོ་བ་དང ། གཏི་མུག་བདོ་བའི་སེམས་ཅན་རྣམས་ལ་ཆོས་སྟོན་པར་གྱུར་ཅིག་།བྲམ་ཟེའི་ཁྱེའུ་སྐར་མ་སྐྱོང་ཞེས་བྱ་བ་དེས་སྨྲས་པ། ཀྱེ་མཁན་པོ་ཁྱབ་འཇུག་རླུང་འདིས་དོན་གྱི་དབང་ཇི་ཞིག་མཐོང་ན་སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པར་སྨོན་ལམ་འདེབས་པར་བགྱིད་ལགས། འདུན་ན་འདོན་གྱིས་སྨྲས་པ། སྙིང་རྗེ་ཆེན་པོ་དང་ལྡན་པའི་བྱང་ཆུབ་སེམས་དཔའ་གང་ཡིན་པ་དེ་ནི་སངས་རྒྱས་ཀྱི་ཞིང་སྙིགས་མ་ལྔ་དང་
333b
ལྡན་པར་བྱང་ཆུབ་ཐོབ་པར་བྱེད་ཅིང ། སེམས་ཅན་སྐྱབས་མེད་པ་རྣམས་དང ། དཔུང་གཉེན་མེད་པ་རྣམས་དང ། ཉོན་མོངས་པ་ངག་གིས་གཙེས་པ་རྣམས་དང ། ལྟ་བས་ཉོན་མོངས་པར་གྱུར་པ་རྣམས་ཀྱི་དོན་བྱེད་ཅིང་སྐྱབས་དང་དཔུང་གཉེན་དུ་འགྱུར་བ་དང ། སེམས་ཅན་རྣམས་སྐྱེ་བའི་རྒྱ་མཚོ་ལས་སྒྲོལ་བར་བྱེད་པ་དང ། ཡང་དག་པའི་ལྟ་བ་ལ་རབ་ཏུ་འགོད་པར་བྱེད་ཅིང་སེམས་ཅན་རྣམས་མྱ་ངན་ལས་འདས་པའི་བདུད་རྩིའི་རོས་ཚིམ་པར་བྱེད་དོ་ཞེས་གྲག་སྟེ། གང་གི་ཕྱིར་སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པར་སྨོན་ལམ་འདེབས་པར་བྱེད་པ་དེ་ནི་བྱང་ཆུབ་སེམས་དཔའི་སྙིང་རྗེ་ཆེན་པོ་ཡིན་པར་སྣང་ངོ ། །དེ་བཞིན་གཤེགས་པ་རིན་པོ་ཆེའི་སྙིང་པོས་བཀའ་སྩལ་པ། ཁྱབ་འཇུག་རླུང་ཁྱོད་ནི་མ་འོངས་པའི་དུས་ན་བསྐལ་པ་གྲངས་མེད་པ་གངྒཱའི་ཀླུང་གཅིག་གི་བྱེ་མ་སྙེད་འདས་ནས་བསྐལ་པ་གྲངས་མེད་པ་གངྒཱའི་ཀླུང་གི་བྱེ་མ་སྙེད་གཉིས་པ་ལ་བབ་པ་ན་ཤར་ཕྱོགས་ལོགས་སུ་སངས་རྒྱས་ཀྱི་ཞིང་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་འདས་པ་དེ་ན་འཇིག་རྟེན་གྱི་ཁམས་ངུར་སྨྲིག་གི་རྒྱལ་མཚན་ཞེས་བྱ་བ་ཞིག་ཡོད་དེ། སྐྱེས་བུ་དམ་པ་ཁྱོད་དེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་རི་དབང་རྒྱལ་པོ་ཞེས་བྱ་བ་སངས་རྒྱས་བཅོམ་
334a
༄#། །ལྡན་འདས་ཀྱི་བར་དུ་འགྱུར་རོ། །ཁྱབ་འཇུག་རླུང་གིས་གསོལ་པ། བཙུན་པ་བཅོམ་ལྡན་འདས། གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན། དེའི་སླད་དུ་གང་གི་ཚེ་བདག་བཅོམ་ལྡན་འདས་ཀྱི་ཞབས་ལ་ཡན་ལག་ལྔས་ཕྱག་འཚལ་བ་དེའི་ཚེ། བཅོམ་ལྡན་འདས་ཀྱི་ཞབས་བསོད་ནམས་བརྒྱའི་མཚན་གྱིས་བརྒྱན་པ་གཉིས་བདག་གི་སྤྱི་བོར་འཇོག་པར་གྱུར་ཅིག་།རིགས་ཀྱི་བུ། གང་གི་ཚེ་བྲམ་ཟེའི་ཁྱེའུ་ཁྱབ་འཇུག་རླུང་གིས་བཅོམ་ལྡན་འདས་ཀྱི་ཞབས་ལ་མགོ་བོས་གཏུགས་པ་དེའི་ཚེ་དེ་བཞིན་གཤེགས་པ་རིན་པོ་ཆེའི་སྙིང་པོས་བྱང་ཆུབ་སེམས་དཔའ་ཁྱབ་འཇུག་རླུང་གི་སྤྱི་བོར་ཞབས་གཉིས་བཞག་སྟེ་བཀའ་སྩལ་པ། སྙིང་རྗེ་བསམ་པ་ཤེས་རབ་རྣོན་པོ་ལོངས། །བྱང་ཆུབ་མཆོག་ཕྱིར་སྤྱད་པ་སྤྱོད་གྱིས་ལ། །བརྟན་པ་ཉོན་མོངས་འཆིང་བ་དམ་ཆོད་ཅིག་།ཁྱོད་ནི་ཕན་པས་སྙིང་བརྩེ་སངས་རྒྱས་འགྱུར། །རིགས་ཀྱི་བུ། དེ་ནས་བྲམ་ཟེའི་ཁྱེའུ་སྐར་མ་སྐྱོང་གིས་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་སྙིང་པོ་ལ་པུས་མོ་གཡས་པའི་ལྷ་ང་ས་ལ་བཙུགས་ཏེ་གསོལ་པ། བཙུན་པ་བཅོམ་ལྡན་འདས། བདག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱི་སྟེ། སངས་རྒྱས་ཀྱི་ཞིང་
334b
འདིར་སེམས་ཅན་འདོད་ཆགས་དང ། ཞེ་སྡང་དང ། གཏི་མུག་གི་སེམས་དུ་མཉམ་པ་རྣམས་དང ། དགེ་བ་དང་མི་དགེ་བའི་བསམ་པ་ལ་མི་གནས་པའི་སྐྱེ་དགུ་ཚེ་ལོ་བཞི་ཁྲི་ཐུབ་པ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བར་གྱུར་ཅིག་།དེ་བཞིན་གཤེགས་པ་རིན་པོ་ཆེའི་སྙིང་པོས་བཀའ་སྩལ་པ། བསྐལ་པ་གྲངས་མེད་པ་གངྒཱའི་ཀླུང་གཅིག་གི་བྱེ་མ་སྙེད་འདས་ནས་བསྐལ་པ་གྲངས་མེད་པ་གཉིས་པ་ལ་བབ་པ་ན་འཇིག་རྟེན་གྱི་ཁམས་འདི་ནི་མི་མཇེད་ཅེས་བྱ་བར་འགྱུར་ཏེ། ཅིའི་ཕྱིར་འཇིག་རྟེན་གྱི་ཁམས་དེ་ནི་མི་མཇེད་ཅེས་བྱ་ཞེ་ན། སེམས་ཅན་དེ་དག་འདོད་ཆགས་ལ་མི་མཇེད་པ་དང ། དེ་དག་ཞེ་སྡང་ལ་མི་མཇེད་པ་དང ། གཏི་མུག་ལ་མི་མཇེད་པ་དང ། ཉོན་མོངས་པའི་འཆིད་བ་རྣམས་ལ་མི་མཇེད་པས་དེའི་ཕྱིར་འཇིག་རྟེན་གྱི་ཁམས་དེ་ནི་མི་མཇེད་ཅེས་བྱའོ། །འཇིག་རྟེན་གྱི་ཁམས་མི་མཇེད་དེར་བསྐལ་པ་ཆེན་པོ་བཟང་པོ་ཞེས་བྱ་འབྱུང་བར་འགྱུར་ཏེ། ཅིའི་ཕྱིར་བཟང་པོ་ཞེས་བྱ་ཞེ་ན། བསྐལ་པ་ཆེན་པོ་བཟང་པོ་དེ་ལ་སེམས་ཅན་འདོད་ཆགས་དང ། ཞེ་སྡང་དང ། གཏི་མུག་སྤྱོད་པ་རྣམས་ཀྱི་ནང་དུ་རྫོགས་པའི་སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་སྟོང་འབྱུང་བར་འགྱུར་བའི་ཕྱིར་ཏེ། སྐྱེས་བུ་དམ་པ་ཁྱོད་ཀྱང་བསྐལ་པ་ཆེན་པོ་བཟང་པོ་བྱུང་ཞིང ། སྐྱེ་དགུའི་ཚེ་ལོ་བཞི་ཁྲི་
335a
༄#། །ཐུབ་པ་ན་ཐམས་ཅད་ཀྱི་དང་པོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚངས་རྒྱ་བར་འགྱུར་ཏེ། དེ་བཞིན་གཤེགས་པ་འཁོར་བ་འཇིག་ཅེས་བྱ་བ་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་ཞིང ། ཐེག་པ་གསུམ་པོ་དག་གི་ཆོས་སྟོན་པར་འགྱུར་ཏེ། འཁོར་བའི་ཆུ་བོས་བདས་པའི་སེམས་ཅན་བགྲང་བ་ལས་འདས་པ་དག་ཀྱང་སྒྲོལ་བར་འགྱུར་ཞིང་མྱ་ངན་ལས་འདས་པའི་ཕ་རོལ་ཏུ་འགོད་པར་ཡང་འགྱུར་རོ། །རིགས་ཀྱི་བུ། དེ་ནས་བྱང་ཆུབ་སེམས་དཔའ་སྐར་མ་སྐྱོང་གིས་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྡས་མགོ་བོས་ཕྱག་བྱས་ནས་ལངས་ཏེ་ཕྱོགས་གཅིག་ཏུ་འདུག་གོ། །རིགས་ཀྱི་བུ། དེ་ནས་བྲམ་ཟེའུ་ཁྱེའུ་གཉིས་པ་ཏམ་བུ་རུ་ཞེས་བྱ་བའང་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་འདུག་སྟེ་གསོལ་པ། བཙུན་པ་བཅོམ་ལྡན་འདས། བདག་ཀྱང་དེ་བཞིན་གཤེགས་པ་འཁོར་བ་འཇིག་གི་རྗེས་སུ་མཚམས་སྦྱོར་ཞིང ། འཇིག་རྟེན་གྱི་སྐྱེ་དགུ་ཚེ་ལོ་སུམ་ཁྲི་ཐུབ་པ་ན་སངས་རྒྱས་སུ་འབྱུང་བར་གྱུར་ཅིག་།དེ་བཞིན་གཤེགས་པ་རིན་པོ་ཆེའི་སྙིང་པོས་བཀའ་སྩལ་པ། བྲམ་ཟེའི་ཁྱེའུ་ཁྱོད་ནི་བསྐལ་པ་གྲངས་མེད་པ་གངྒཱའི་ཀླུང་གཅིག་གི་བྱེ་མ་སྙེད་འདས་ནས་བསྐལ་པ་གྲངས་མེད་པ་གངྒཱའི་ཀླུང་
335b
བྱེ་མ་སྙེད་གཉིས་པ་ལ་བབ་པ་ན་སངས་རྒྱས་ཀྱི་ཞིང་མི་མཇེད་དུ་བསྐལ་པ་བཟང་པོ་བྱུང་བའི་ཏེས། དེ་བཞིན་གཤེགས་པ་འཁོར་བ་འཇིག་གི་རྗེས་སུ་མཚམས་སྦྱོར་ཞིང་སྐྱེ་དགུའི་ཚེ་ལོ་སུམ་ཁྲི་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་ཐུབ་ཅེས་བྱ་བར་འགྱུར་ཏེ། འཇིག་རྟེན་དུ་སྒྲ་རྣམ་པར་གྲགས་པར་འགྱུར་རོ། །དེས་བཅོམ་ལྡན་འདས་ལས་ལུང་བསྟན་པ་ཐོས་ནས། དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་མགོ་བོས་ཕྱག་འཚལ་ཏེ་བསྐོར་བ་བྱས་ནས། དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་འདུག་སྟེ། མེ་ཏོག་དག་གིས་བཅོམ་ལྡན་འདས་ཀྱི་སྐུ་ལ་འཐོར་ཞིང་ཐལ་མོ་སྦྱར་ནས་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། ཤིན་ཏུ་འབྲེལ་པ་ལེགས་བསྒྲགས་རབ་སྙན་གསུང་བ་པོ། །མ་འཁྲུལ་མ་འདྲེས་མ་རྙོགས་དྲི་མ་མི་མངའ་བ། །ཁྱད་འཕགས་ཤིན་ཏུ་སྡོམ་བརྩོན་བློ་རབ་བློ་གྲོས་ལྡན། །དྲང་སྲོང་དམ་པ་ཁྱོད་མཛེས་ཐུབ་གཙོ་ཁྱུ་མཆོག་ལགས། །ཡོན་ཏན་བརྒྱས་གཏམས་ཡོན་ཏན་མང་པོ་སྩོལ་བ་ཁྱོད། །ཐུབ་མཆོག་བདེ་བ་མཛད་པ་མི་ཡི་དམ་པས་བཏུད། །སྲིད་པ་གསུམ་ན་ཁྱོད་འདྲའི་སེམས་གཞན་མ་མཆིས། །དེང་ཁྱོད་སེམས་ཅན་མང་པོ་བྱང་ཆུབ་ལམ་ལུང་བསྟན། །རིགས་ཀྱི་བུ། དེ་ནས་བྲམ་ཟེའི་
336a
༄#། །ཁྱེའུ་ཀུན་གྱིས་བསྲུངས་ཞེས་བྱ་བས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་རིན་པོ་ཆེ་སྣ་བདུན་གྱི་ཁྲིའུ་བཞག་སྟེ། རིན་ཐང་འབུམ་གྱི་བཤམས་པས་བཤམས་ནས་ཁྲིའུ་དེ་ལ་གསེར་གྱི་ལྷུང་བཟེད་རིན་པོ་ཆེ་སྣ་བདུན་གྱིས་ཡོངས་སུ་བཀང་བ་དང ། གསེར་གྱི་རིལ་བ་བྷྲིང་ག་ར་དང ། རིན་པོ་ཆེ་སྣ་བདུན་གྱི་མཆོད་སྡོང་དག་བཞག་སྟེ། སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཕུལ་ནས་དེས་གསོལ་པ། བཙུན་པ་བཅོམ་ལྡན་འདས། བདག་ཀྱང་མ་འོངས་པའི་དུས་ན་བསྐལ་པ་གྲངས་མ་མཆིས་པ་གངྒཱའི་ཀླུང་གཅིག་གི་བྱེ་མ་སྙེད་འདས་ནས་བསྐལ་པ་གྲངས་མ་མཆིས་པ་གངྒཱའི་ཀླུང་གི་བྱེ་མ་སྙེད་གཉིས་པ་ལ་བབ་པ་ན་བསྐལ་པ་བཟང་པོ་དེ་ལ་ཚེ་འགྲིབ་པ་དང ། རྩོད་པའི་དུས་ཀྱི་མཚན་མ་བྱུང་བ་དང ། སེམས་ཅན་འདོད་ཆགས་དང ། ཞེ་སྡང་དང ། གཏི་མུག་བདོ་ཞིང ། ང་རྒྱལ་དང ། ཕྲག་དོག་དང ། སེར་སྣས་ཀུན་ནས་དཀྲིས་པ་རྣམས་དང ། སེམས་ཅན་ལོག་པར་ལྟ་བ་དང ། མི་དགེ་བའི་བཤེས་གཉེན་ལ་རྟེན་པ་དང ། མི་དགེ་བའི་རྩ་བའི་སེམས་ཀུན་ནས་ལངས་པ་དང ། དགེ་བའི་རྩ་བའི་སེམས་ཡོངས་སུ་ཉམས་པ་དང ། ཡང་དག་པའི་ལྟ་བའི་སེམས་རྣམ་པར་སྤངས་པ་དང ། ལོག་པས་འཚོ་ཞིང་མི་དགེ་བའི་སེམས་
336b
དང་ལྡན་པ་རྣམས་ཀྱི་ནང་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པར་འགྱུར་ཞིང ། དེ་བཞིན་གཤེགས་པ་གསེར་ཐུབ་ཡོངས་སུ་མྱ་ངན་ལས་འདས་ཏེ། དམ་པའི་ཆོས་ནུབ་ནས་འཇིག་རྟེན་ལོང་བར་འགྱུར་ཞིང ། འདྲེན་པ་མ་མཆིས་པ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་།རིགས་ཀྱི་བུ། དེ་ནས་དེ་བཞིན་གཤེགས་པ་རིན་པོ་ཆེའི་སྙིང་པོས་བྲམ་ཟེ་ཀུན་གྱི་བསྲུངས་ལ་བཀའ་སྩལ་པ། བྲམ་ཟེ། ལེགས་སོ། །ལེགས་སོ། །སྐྱེས་བུ་དམ་པ་ཁྱོད་ཀྱིས་རྩོད་པའི་དུས་ཀྱི་མཚན་མ་བྱུང་ཞིང་སྐྱེ་དགུའི་ཚེ་ལོ་ཉི་ཁྲི་ཐུབ་པའི་བར་དང ། འཇིག་རྟེན་ལོང་བར་གྱུར་ཅིང་འདྲེན་པ་མེད་པའི་ནང་དུ་སྨོན་ལམ་བཏབ་པ་ནི་རྟོགས་པ་ཆེ་ཞིང་ཡེ་ཤེས་དང་ལྡན་པ་ཡིན་པས། རིགས་ཀྱི་བུ། དེའི་ཕྱིར་ཁྱོད་མཁས་མཛོད་སྙིང་རྗེ་རྟེན་ཅེས་བྱ་བར་གྱུར་ཅིག ། མཁས་མཛོད་སྙིང་རྗེ་རྟེན་ཁྱོད་ནི་མ་འོངས་པའི་དུས་ན་བསྐལ་པ་གྲངས་མེད་པ་གངྒཱའི་ཀླུང་གཅིག་གི་བྱེ་མ་སྙེད་འདས་ནས་བསྐལ་པ་གྲངས་མེད་པ་གཉིས་པ་ལ་བབ་པ་ན་འཇིག་རྟེན་གྱི་ཁམས་མི་མཇེད་དུ་བསྐལ་པ་བཟང་པོ་བྱུང་ཞིང་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་དེ་བཞིན་གཤེགས་པ་འོད་སྲུང་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་རོ། །
337a
༄#། །རིགས་ཀྱི་བུ། དེ་ནས་བྱང་ཆུབ་སེམས་དཔའ་མཁས་མཛོད་སྙིང་རྗེ་རྟེན་གྱིས་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྔས་ཕྱག་བྱས་ཏེ་ཕྱོགས་གཅིག་ཏུ་འདུག་ནས། དེ་བཞིན་གཤེགས་པ་རིན་པོ་ཆེའི་སྙིང་པོ་ལ་མེ་ཏོག་དང ། མེ་ཏོག་ཕྲེང་དང ། སྤོས་དང ། ཕྱེ་མ་དག་གིས་གཏོར་ནས་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །མི་མཆོག་ཕན་པ་མཛད་པ་དགའ་བར་བགྱིད་པ་སྐྱེད་པ་པོ། །ཞལ་འཛུམ་རབ་ཏུ་དགྱེས་པ་ཤིན་ཏུ་སྙན་པའི་གསུང་མངའ་བ། །གནས་མཁྱེན་མཁས་པ་ཕན་པ་མཛད་པ་སྟོབས་བཅུ་རབ་མཆོག་ལྡན། །ཡེ་ཤེས་བསམ་གཏན་རྣམ་པར་མཐར་ཕྱིན་བདེ་གཤེགས་ཁྱོད་ལ་བདུད། །སྤྱོད་པ་མང་པོ་སྤྱོད་པ་ཞལ་ནི་རྣམ་རྒྱས་པ། །ཁྱོད་ཀྱིས་བྱང་ཆུབ་སེམས་དཔའ་ཁྲག་ཁྲིག་ཕྲག་མང་པོ། །གཞལ་ཡས་བྱང་ཆུབ་སླད་དུ་ལུང་ཡང་བསྟན་པ་མཛད། །མི་མཆོག་བདེ་བར་གཤེགས་པ་ཁྱོད་ལ་ཕྱག་འཚལ་ལོ། །རིགས་ཀྱི་བུ། དེ་ནས་བྲམ་ཟེ་རྒྱ་མཚོའི་རྡུལ་གྱིས་བྲམ་ཟེའི་ཁྱེའུ་བཞི་པ་བགྲོད་བྱའི་བུ་དྲི་མ་མེད་ཅེས་བྱ་བ་ལ་ཡང་དག་པར་བསྐུལ་ཏོ། །རིགས་ཀྱི་བུ། དེ་ནས་བྲམ་ཟེའི་ཁྱེའུ་བགྲོད་བྱའི་བུ་དྲི་མ་མེད་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་འདུག་སྟེ་གསོལ་པ། བཙུན་པ་བཅོམ་ལྡན་
337b
འདས། བདག་ཀྱང་དེ་བཞིན་དུ་བསྐལ་པ་བཟང་པོ་དེ་ལ་བྱང་ཆུབ་པར་འཚལ་མོད་ཀྱི། རྩོད་པའི་དུས་དེ་ལྟ་བུ་འབའ་ཞིག་མི་འཚལ་ཏེ། ཇི་ལྟར་དེ་བཞིན་གཤེགས་པ་འོད་སྲུང་ཡོངས་སུ་མྱ་ངན་ལས་འདས་ནས་སྐྱེ་དགུ་ཚེ་ལོ་ཁྲི་ཐུབ་པ་ནས་སེམས་ཅན་སྦྱིན་པ་དང ། དུལ་བ་དང ། ཡང་དག་པར་སྡོམ་པའི་བསམ་པ་བས་པ་རྣམས་དང ། ནོར་བདུན་དང་བྲལ་པ་རྣམས་དང ། མི་དགེ་བའི་བཤེས་གཉེན་ལ་སྟོན་པར་འདུ་ཤེས་པར་སེམས་པ་ལ་ཞུགས་པ་རྣམས་དང ། བསོད་ནམས་བྱ་བའི་དངོས་པོ་གསུམ་པོ་དག་དོན་དུ་མི་གཉེར་བ་རྣམས་དང།་ལེགས་པར་སྤྱོད་པ་གསུམ་དང་བྲེལ་བ་རྣམས་དང ། ཉེས་པར་སྤྱོད་པ་གསུམ་པོ་དག་ལ་བརྩོན་པ་རྣམས་དང ། ཉོན་མོངས་པའི་མུན་པས་སེམས་རྣམ་པར་དཀྲུགས་པ་རྣམས་དང ། ཐེག་པ་གསུམ་པོ་དག་དོན་དུ་མི་གཉེར་བ་དེའི་དུས་སུ་ནི་སུས་ཀྱང་བྱང་ཆུབ་ཀྱི་སྤྱད་པ་སྒྲུབ་པར་རྡོ་མི་ཐོག་ལགས་ན། སྐྱེ་དགུ་ཚེ་ལོ་སྟོང་ཐུབ་པ་ན་ལྟ་སྨོས་ཀྱང་ཅི་འཚལ་ཏེ།་སེམས་ཅན་དེ་དག་ཀྱང་ཚེ་ལོ་བརྒྱ་བའི་བར་དུ་འགྱུར་ཏེ། དེའི་དུས་ན་ནི་སེམས་ཅན་རྣམས་ལ་དགེ་བའི་རྩ་བ་མིང་ཡང་མ་མཆིས་ན་དགེ་བའི་རྩ་བ་སྤྱོད་པ་རྣམས་ལྟ་སྨོས་ཀྱང་ཅི་འཚལ། རེ་ཞིག་སྙིགས་མ་ལྔ་དང་ལྡན་པའི་འཇིག་རྟེན་ཚེ་འབྲི་ཞིང་ལོ་བརྒྱ་པར་གྱུར་ནས། མཚོན་གྱི་བསྐལ་པ་བར་མ་ཉེ་བར་གནས་པར་གྱུར་པ་དེའི་དུས་ན་བདག་ལྷ་རྣམས་
338a
༄#། །ཀྱི་ནང་ནས་བབས་ཤིང་སེམས་ཅན་རྣམས་ཡོངས་སུ་སྐྱོབ་པར་གྱུར་ཅིག་།མི་དགེ་བ་སྤངས་ནས་དགེ་བ་ལ་སྤྱོད་པར་གྱུར་ཅིག་།སེམས་ཅན་རྣམས་དགེ་བ་བཅུའི་ལས་ཀྱི་ལམ་གྱི་བར་དག་ལ་རབ་ཏུ་འགོད་པར་གྱུར་ཅིག་།སེམས་ཅན་རྣམས་ཀྱི་ཉོན་མོངས་པ་དག་ཀྱང་དགེ་བའི་ལས་ཀྱི་ལམ་རྣམས་ཀྱིས་ཡོངས་སུ་སྦྱོང་བར་གྱུར་ཅིག་།ཐེག་པ་གསུམ་པོ་དག་ལ་ཡང་སྦྱོར་བར་གྱུར་ཅིག་།སྙིགས་མ་ལྔ་དག་ཡོངས་སུ་སྤོང་བར་གྱུར་ཅིག་།སྐྱེ་དགུའི་ཚེ་ལོ་བརྒྱད་ཁྲི་ཐུབ་པ་ན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་།འདོད་ཆགས་དང ། ཞེ་སྡང་དང ། གཏི་མུག་དང ། མ་རིག་པ་དང ། ཕྲག་དོག་དང ། སེར་སྣ་ཆུང་བའི་སེམས་ཅན་རྣམས་ལ་ཆོས་སྟོན་ཅིང་ཐེག་པ་གསུམ་པོ་དག་ལ་ཡང་དག་པར་སྦྱོར་བར་གྱུར་ཅིག་།བཙུན་པ་བཅོམ་ལྡན་འདས། གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན་དེའི་སླད་དུ་བཙུན་པ་བཅོམ་ལྡན་འདས་ཀྱིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་དུ་གསོལ། །བཙུན་པ་བཅོམ་ལྡན་འདས། གང་གི་ཚེ་བདག་དེ་ལྟར་ལུང་བསྟན་པ་ཐོབ་ནས་ཐེག་པ་གང་གིས་མྱུར་དུ་འཁོར་བ་ལས་འགྲོལ་བར་འགྱུར་བའི་ཉན་ཐོས་ཀྱི་སའང་དོན་དུ་མི་གཉེར་ལ། རང་སངས་
338b
རྒྱས་ཀྱི་སའང་དོན་མི་གཉེར་ལགས་སོ། །དེ་བཞིན་གཤེགས་པ་རིན་པོ་ཆེའི་སྙིང་པོས་བཀའ་སྩལ་པ། བྲམ་ཟེའི་ཁྱེའུ། བྱང་ཆུབ་སེམས་དཔའ་ལེ་ལོ་ཅན་རྣམས་ཀྱི་དངོས་པོ་ནི་བཞི་པོ་འདི་དག་ཡིན་ཏེ། ལེ་ལོའི་དངོས་པོ་དེ་དག་དང་ལྡན་པའི་བྱང་ཆུབ་སེམས་དཔའ་ཁ་ཅིག་ནི་ཡུན་རིང་པོར་འཁོར་བར་འདོད་དེ། ལྟ་བའི་གཡང་ས་དང ། འཁོར་བའི་བཙོན་རར་སྡུག་བསྔལ་ཉམས་སུ་མྱོང་བར་འགྱུར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མྱུར་དུ་འཐོབ་པར་མི་འགྱུར་རོ། །བཞི་གང་ཞེ་ན། འདི་ལ་བྱང་ཆུབ་སེམས་དཔའ་ལ་ལ་ཆོ་ག་དམན་པ་དང ། གྲོགས་དམན་པ་དང ། ཡོངས་སུ་གཏོང་བ་དམན་པ་དང ། སྨོན་ལམ་དམན་པ་ཡིན་ཏེ། ཇི་ལྟར་ན་བྱང་ཆུབ་སེམས་དཔའ་ཆོ་ག་དམན་པ་ཡིན་ཞེ་ན། འདི་ལ་ལུས་དང ། ངག་དང ། ཡིད་ཀྱི་སྤྱོད་པ་མ་བསྡམས་ཤིང་ཚུལ་ཁྲིམས་འཆལ་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པའི་སེམས་ཅན་རྣམས་དང་ལྷན་ཅིག་འགྲོགས་ཞིང་རྒྱུ་བ་དང ། ཐམས་ཅད་ཡོངས་སུ་མི་གཏོང་ཞིང་ཀུན་ལའང་ཡོངས་སུ་མི་གཏོང་བ་ལྷ་དང་མིའི་དཔལ་དང་བདེ་བ་འདོད་པའི་ཕྱིར་སྦྱིན་པ་སྦྱིན་པར་བྱེད་པ་དང ། ལྷ། པའི་བསམ་པས་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་མི་ལེན་ཅིང་འདུལ་བ་ལ་རྟོག་པའི་སྨོན་ལམ་ཡང་ཡོངས་སུ་མི་ལེན་པ་ཡིན་ཏེ། ཆོས་བཞི་པོ་དེ་དག་དང་
339a
༄#། །ལྡན་པའི་བྱང་ཆུབ་སེམས་དཔའ་ལེ་ལོ་ཅན་ནི་ཡུན་རིང་པོར་འཁོར་བའི་བཙོན་རར་སྡུག་བསྔལ་ཉམས་སུ་མྱོང་བར་འགྱུར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མྱུར་དུ་ཐོབ་པར་མི་འགྱུར་རོ། །བྱང་ཆུབ་སེམས་དཔའ་ཆོས་བཞི་དང་ལྡན་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། བཞི་གང་ཞེ་ན། ལུས་དང་ངག་དང་ཡིད་ཀྱི་སྤྱོད་པ་བསྡམས་ཤིང་ཚུལ་ཁྲིམས་དང་ལྡན་པ་དང ། ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་དང་ལྷན་ཅིག་འགྲོགས་ཤིང་རྒྱུ་བ་དང ། ཐམས་ཅད་ཡོངས་སུ་གཏོང་ཞིང་ཀུན་ལའང་ཡོངས་སུ་གཏོང་ལ་སེམས་ཅན་རྣམས་སྡུག་བསྔལ་ལས་ཡོངས་སུ་ཐར་བར་བྱ་བའི་ཕྱིར་སྙིང་རྗེའི་སེམས་བསྐྱེད་ཅིང་སྦྱིན་པར་བྱེད་པ་དང ། ལྷག་པའི་བསམ་པས་སངས་རྒྱས་ཀྱི་ཞིང་གི་ཡོན་ཏན་བཀོད་པ་དང ། འདུལ་བ་ལ་རྟོག་པའི་སྨོན་ལམ་ཡོངས་སུ་འཛིན་པར་བྱེད་པ་སྟེ། ཆོས་བཞི་པོ་དེ་དག་དང་ལྡན་པའི་བྱང་ཆུབ་སེམས་དཔའ་ནི་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་འཚང་རྒྱ་བར་འགྱུར་རོ། །ཆོས་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལམ་ཉེ་བར་རྟོན་པར་བྱེད་པ་ཡིན་ཏེ། བཞི་གང་ཞེ་ན། ཕ་རོལ་
339b
ཏུ་ཕྱིན་པ་རྣམས་ལ་མངོན་པར་བརྩོན་པ་དང ། སེམས་ཅན་རྣམས་ལ་བསྡུ་བའི་དངོས་པོ་གཏོང་བ་དང ། ཚངས་པའི་གནས་པ་མངོན་པར་སྒྲུབ་པ་དང ། མངོན་པར་ཤེས་པ་རྣམས་ཀྱིས་རྣམ་པར་རྩེ་བ་ཡིན་ནོ། །བྱང་ཆུབ་སེམས་དཔའ་ཆོས་བཞིས་ངོམས་མི་མྱོང་བར་གནས་པར་བྱ་སྟེ། བཞི་གང་ཞེ་ན། སྦྱིན་པས་ངོམས་མི་མྱོང་བ་དང ། ཆོས་ཉན་པས་ངོམས་མི་མྱོང་བ་དང ། བསྒོམ་པས་ངོམས་མི་མྱོང་བ་དང ། སེམས་ཅན་རྣམས་ལ་བསྡུ་བའི་དངོས་པོས་ངོམས་མི་མྱོང་བར་གནས་པར་བྱ་བ་དག་གོ། བྱང་ཆུབ་སེམས་དཔས་མི་ཟད་པའི་གཏེར་བཞི་པོ་འདི་དག་ཡོངས་སུ་རྫོགས་པར་བྱ་སྟེ། བཞི་གང་ཞེ་ན། བྱང་ཆུབ་སེམས་དཔས་དད་པ་མི་ཟད་པའི་གཏེར་ཡོངས་སུ་རྫོགས་པར་བྱ་བ་དང ། ཆོས་བསྟན་པ་དང ། ཡོངས་སུ་བསྔོ་བ་དང ། སེམས་ཅན་དབུལ་པོ་ཡོངས་སུ་གཟུང་བ་མི་ཟད་པའི་གཏེར་ཡོངས་སུ་རྫོགས་པར་བྱ་བ་དག་གོ། །བཞི་པོ་འདི་དག་ནི་བདག་མེད་པའི་ཕྱིར་བྱང་ཆུབ་སེམས་དཔའི་ཡོངས་སུ་དག་པ་ཡིན་ཏེ། བཞི་གང་ཞེ་ན། སེམས་ཅན་མེད་པའི་ཕྱིར་ཚུལ་ཁྲིམས་ཡོངས་སུ་དག་པ་དང ། སྲོག་མེད་པའི་ཕྱིར་ཏིང་ངེ་འཛིན་ཡོངས་སུ་དག་པ་དང ། གང་ཟག་མེད་པའི་ཕྱིར་ཤེས་རབ་ཡོངས་སུ་དག་པ་དང ། རྣམ་པར་གྲོལ་བའི་ཡེ་ཤེས་མཐོང་བའི་ཕྱིར་རྣམ་པར་གྲོལ་བ་ཡོངས་སུ་དག་པ་སྟེ། བྱང་ཆུབ་སེམས་
340a
༄#། །དཔས་ཆོས་བཞི་པོ་དེ་དག་ཡོངས་སུ་རྫོགས་པར་བྱའོ། །དེ་དག་གིས་བྱང་ཆུབ་སེམས་དཔའ་རྣམས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་ཞིང་ནམ་མཁའི་འཁོར་ལོའང་སྐོར་བར་བྱེད། མི་རྟག་པའི་འཁོར་ལོ་དང ། མི་མཉམ་པའི་འཁོར་ལོ་དང ། བརྗོད་དུ་མེད་པའི་འཁོར་ལོ་དང།་ངེས་པར་འབྱིན་པའི་འཁོར་ལོ་དང ། ངེས་པར་འབྱེད་པའི་འཁོར་ལོ་དང ། བསྐོར་དུ་མེད་པའི་འཁོར་ལོའང་སྐོར་བར་བྱེད་དོ། །བགྲོད་བྱའི་བུ་དྲི་མ་མེད་ཁྱོད་ནི་མ་འོངས་པའི་དུས་ན་བསྐལ་པ་གྲངས་མེད་པ་གངྒཱའི་ཀླུང་གཅིག་གི་བྱེ་མ་སྙེད་འདས་ཏེ། བསྐལ་པ་བཟང་པོ་ལ་བབ་ནས་རིང་པོ་མ་ལོན་ཞིང་སྙིགས་མ་ལྔ་རབ་ཏུ་ཞི་བའི་དུས་ལ་བབ་པ་ན་སྐྱེ་དགུ་ཚེ་ལོ་བརྒྱད་ཁྲི་ཐུབ་པ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་བྱམས་པ་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་རོ། །བྲམ་ཟེའི་ཁྱེའུ་བགྲེང་བྱའི་བུ་དྲི་མ་མེད་ཀྱིས་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྔས་ཕྱག་བྱས་ཏེ་ཕྱོགས་གཅིག་ཏུ་འདུག་ནས། བཅོམ་ལྡན་འདས་ལ་མེ་ཏོག་དང ། མེ་ཏོག་ཕྲེང་དང ། ཕྱེ་མ་དག་གིས་མཆོད་པ་བྱེད་པ་ལ་བརྩོན་ཞིང་ཚིགས་སུ་བཅད་པས་མངོན་པར་
340b
བསྟོད་པ། མགོན་པོ་ཁྱོད་ནི་དཔྲལ་བའི་དབྱེས་ཆེ་མཛོད་སྤུ་གངས་མདོག་མཛེས། །ཁྱོད་ནི་གསེར་གྱི་རི་བོ་བརྩེགས་པ་འདྲ་ཞིང་ཡིད་དུ་མཆི། །ཡོན་ཏན་བརྒྱས་གཏམས་པ་དག་དུས་འདི་གསུངས་འགྲོ་ནའང་བདག་འཚང་རྒྱ། །ཐུབ་པ་ཁྱུ་མཆོག་འཇིག་རྟེན་སྒྲོན་ཁྱོད་ལ་ནི་སུ་མི་འདུད། །བྲམ་ཟེ་མདུན་ན་འདོན་རྒྱ་མཚོའི་རྡུལ་གྱིས། བྲམ་ཟེའི་ཁྱེའུ་རིག་བྱེད་ཀློག་པ་སྟོང་པོ་ཐམས་ཅད་བྱང་ཆུབ་ཡང་དག་པར་འཛིན་དུ་བཅུག་ནས། ཇི་ལྟར་འཁོར་བ་འཇིག་དང ། གསེར་ཐུབ་དང ། འོད་སྲུང་དང ། བྱམས་པ་ལུང་བསྟན་པ་དེ་བཞིན་དུ། བྲམ་ཟེའི་ཁྱེའུ་རིག་བྱེད་ཀློག་པ་སེང་གེ་དང ། མཆོག་ཏུ་དགའ་བ་དང ། དགུ་བརྒྱ་དགུ་བཅུ་རྩ་དགུའི་བར་དུ་ཐམས་ཅད་ཀྱིས་ཀྱང་བསྐལ་པ་བཟང་པོ་འདི་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་ནས་ཐམས་ཅད་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོས་བསྐལ་པ་བཟང་པོ་འདི་ཉིད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཀོད་དོ། །དེ་དག་ཐམས་ཅད་ཀྱི་ནུ་བོ་ཐ་ཆུང་གང་ཡིན་པ་དེ་ལའང་མདུན་ན་འདོན་གྱིས་འདི་སྐད་དུ། ཀྱེ་བྲམ་ཟེའི་ཁྱེའུ་སྟོབས་ཆེན་ཤུགས་འཆང་རིང་དུ་བརྟག་ཏུ་ཅི་ཡོད། སེམས་ཅན་རྣམས་ལ་སྙིང་རྗེ་ཆེན་པོ་སྐྱེད་ཅིག་ཅེས་ཡང་དག་པར་བསྐུལ་ནས་ཚིགས་སུ་བཅད་པ་འདི་དག་གིས་ཀྱང་མངོན་པར་གོ་བར་བྱས་སོ། །སེམས་ཅན་གང་དག་རྒ་དང་ནད་དང་
341a
༄#། །འཆི་འཕོའི་འཇིགས་པ་སྲེད་པའི་ཀླུང་དུ་ལྷུང་བ་དང ། །ཕུང་པོ་རྣམས་ལ་ཞེན་པའི་མི་དག་སྲིད་པའི་བཙོན་ར་རབ་ཏུ་འཇིགས་པར་ཆུད་པ་རྣམས། །ཕན་ཚུན་གསོད་པར་བྱེད་པའི་ཉོན་མོངས་དུག་འཐུངས་ནས་ནི་སྡུག་བསྔལ་རྒྱ་མཚོར་རབ་ཏུ་གནས། །གཏི་མུག་གིས་ནི་ལམ་སྟོར་ལོང་བ་བཞིན་དུ་མི་གཙང་འཁྲུལ་འཁོར་དག་ན་འཁྱམས་པར་འགྱུར། །ལོག་པར་ལྟ་ལ་གནས་པས་འབྱུང་པོ་ཐམས་ཅད་སྲིད་པ་གསུམ་ན་སྡུག་བསྔལ་རྣམས་ཀྱིས་འབར། །སྲོག་ཆགས་ཐམས་ཅད་འགྲོ་བ་ལྔ་པོ་དག་ན་ཇི་ལྟར་འཁོར་ལོ་འཁོར་བ་བཞིན་དུ་འཁོར། །འགྲོ་བ་ལྔ་པོ་དག་ན་ཆོས་ཀྱི་མིག་ཉམས་སྐྱབས་མེད་སེམས་ཅན་རྣམས་ནི་དྲན་གྱིས་ལ། །ཡང་དག་ཤེས་རབ་ཀྱི་ནི་ནེ་མ་ནུར་ཡིད་གཉིས་སྤོངས་ལ་བྱང་ཆུབ་དོན་དུ་འདུན་པ་སྐྱེད། །འགྲོ་བ་རྣམས་ཀྱི་སྲེད་པའི་མྱ་ངན་སོལ་ལ་སེམས་ཅན་རྣམས་ཀྱི་གཉེན་དུ་གྱུར་པར་གྱིས། །འགྲོ་བའི་ཉོན་མོངས་འཆིང་བ་དགྲོལ་བར་བྱ་ཕྱིར་བྱང་ཆུབ་དོན་དུ་སེམས་ཀྱང་གཞོལ་གྱིས་ཤིག་།གཏི་མུག་བྲལ་བ་ཆོས་མིག་རྣམ་པར་ཉམས་པ་རྣམས་ལ་ལམ་གྱི་དམ་པ་སྦྱིན་པར་གྱིས། །འཁོར་བའི་སྲིད་པའི་བཙོན་ར་དག་ན་འབར་བ་རྣམས་ལ་ཆོས་ཀྱི་བཅུད་ཀྱིས་ཚིམ་གྱིས་ཤིག་།ཕན་པར་བྱེད་པ་ཁྱེད་ནི་མྱུར་དུ་ཉེ་བར་སོང་ལ་ཐུབ་པའི་ཞབས་ལ་གཏུགས་པ་གྱིས། །རེ་བ་ཐམས་ཅད་
341b
གྲུབ་སྨོན་བཀྲ་ཤིས་ལྡན་པ་རབ་བརྟེན་འདྲེན་པས་སངས་རྒྱས་འགྱུར་བར་བྱས། །འཇིག་རྟེན་དག་ན་སེམས་ཅན་རྣམས་ཀྱི་དབུགས་འབྱིན་གྱིས་ལ་སྲིད་པའི་མཚོ་ལས་སེམས་ཅན་ཐོན། །གྱ་ནོམ་ཐར་པའི་ལམ་དང་དབང་པོའི་སྟོབས་དང་བྱང་ཆུབ་ཡན་ལག་སྦྱིན་བྱེད་འགྱུར་བར་གྱིས། །ཆོས་སྤྲིན་ཆོས་ཀྱི་ཆར་པ་རབ་ཏུ་ཕོབ་སྟེ་སེམས་ཅན་རྣམས་ཀྱི་སྡུག་བསྔལ་ཞི་བར་གྱིས། །རིགས་ཀྱི་བུ། དེ་ནས་བྲམ་ཟེའི་ཁྱེའུ་སྟོབས་ཆེན་ཤུགས་འཆང་དེས་ཀྱང་སྨྲས་པ། མཁན་པོ། བདག་ནི་འཁོར་བ་ལས་མངོན་པར་དགའ་བའི་ངང་ལ་མ་འཚལ་ལ།་ཉན་ཐོས་དང ། རང་སངས་རྒྱས་ཀྱི་ཐེག་པའང་མི་འཚལ་ཏེ། བླ་ན་མེད་པའི་ཐེག་པ་འཚལ་བ་ལགས་ཀྱི། ཀྱེ་མཁན་པོ་ཡུད་ཙམ་ཞིག་གཞེས་ལ་བདག་སེང་གེའི་སྒྲ་སྒྲོགས་པ་ལ་གསོན་ཅིག་།རིགས་ཀྱི་བུ། དེ་ནས་བྲམ་ཟེ་རྒྱ་མཚོའི་རྡུལ་དེ་ནས་ཕྱིར་བྱུང་སྟེ། རང་གི་བསྙེན་བཀུར་བ་བྲམ་ཟེའི་ཁྱེའུ་ལྔ་པོ་དག་ལ་བོས་ཏེ་སྨྲས་པ། ཀྱེ་ཁྱེའུ་དག་།བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་ཅིག་།དེ་དག་གིས་ཀྱང་སྨྲས་པ། བདག་ཅག་ལ་གང་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་དབུལ་བར་བགྱི་བ་ཅུང་ཟད་ཀྱང་མ་མཆིས་ལགས་ན་དགེ་བའི་རྩ་བ་མ་བསྲུངས་པ་བདག་ཅག་གིས་ཇི་ལྟར་བྱང་ཆུབ་ཏུ་སེམས་བསྐྱེད་པར་བགྱི། རིགས་ཀྱི་བུ། དེ་ནས་མདུན་ན་འདོན་གྱི་
342a
༄#། །གཙོ་བོ་བྲམ་ཟེ་རྒྱ་མཚོའི་རྡུལ་གྱིས་བསྙེན་བཀུར་བ་དང་པོ་ལོ་ཐང་སྤྱོད་ཅེས་བྱ་བ་དེ་ལ་ནི་རིན་པོ་ཆེ་སྣ་བདུན་གྱི་ཁ་དོག་གི་རྒྱན་དག་བྱིན། །བསྙེན་བཀུར་བ་གཉིས་པ་ཐང་ལ་སྤྱོད་ཅེས་བྱ་བ་དེ་ལ་རིན་པོ་ཆེ་སྣ་བདུན་གྱི་རྣ་ཆ་བྱིན། །བསྙེན་བཀུར་བ་གསུམ་པ་ཆུ་ལ་སྤྱོད་ཅེས་བྱ་བ་དེ་ལ་ནི་རིན་པོ་ཆེ་སྣ་བདུན་གྱི་ཁྲི་བྱིན། །བསྙེན་བཀུར་བ་བཞི་པ་ཤུགས་ཀྱིས་སྤྱོད་ཅེས་བྱ་བ་དེ་ལ་རིན་པོ་ཆེ་སྣ་བདུན་གྱི་འཁར་བ་བྱིན། བསྙེན་བཀུར་བ་ལྔ་པ་སྙིང་པོ་སྤྱོད་ཅེས་བྱ་བ་དེ་ལ་ནི་གསེར་གྱི་རི་ལ་བ་བྷྲིང་ག་ར་བྱིན་ནས་སྨྲས་པ། བྲམ་ཟེའི་ཁྱེའུ་དག་།ཁྱོད་ཅག་དེང་ལ་དངོས་པོ་འདི་དག་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཕུལ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་ཅིག་།དེ་ནས་བསྙེན་བཀུར་བ་ལྔ་པོ་དེ་དག་བཅོམ་ལྡན་འདས་ཀྱི་དྲུང་དུ་དོང་སྟེ་དེ་ལྟར་བཀུར་བའི་དངོས་པོ་དེ་དག་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཕུལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ཁྱོད་ཀྱིས་བདག་ཅག་བསྐལ་པ་བཟང་པོ་དེ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བར་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་དུ་གསོལ། རིགས་ཀྱི་བུ། སྔ་མ་བཞིན་དུ་སྦྱར་
342b
ཏེ།་དེ་བཞིན་གཤེགས་པ་རིན་པོ་ཆེའི་སྙིང་པོས་བྲམ་ཟེའི་ཁྱེའུ་ལོ་ཐང་སྤྱོད་ནི་བསྐལ་པ་བཟང་པོ་འདི་ལ་དེ་བཞིན་གཤེགས་པ་བརྟན་དབྱངས་ཞེས་བྱ་བར་འགྱུར་རོ་ཞེས་བྱང་ཆུབ་ཏུ་ལུང་བསྟན་ཏོ། །ཐང་ལ་སྤྱོད་ནི་དེའི་འོག་ཏུ་དེ་བཞིན་གཤེགས་པ་བདེ་དབང་བློ་གྲོས་ཞེས་བྱ་བར་འགྱུར་རོ། །ཆུ་ལ་སྤྱོད་ནི་དེའི་འོག་ཏུ་དེ་བཞིན་གཤེགས་པ་དོན་བཅས་གསུང་ཞེས་བྱ་བར་འགྱུར་རོ། །ཤུགས་ཀྱིས་སྤྱོད་ནི་དེའི་འོག་ཏུ་དེ་བཞིན་གཤེགས་པ་དགའ་བ་དང་བ་ཞེས་བྱ་བར་འགྱུར་རོ། །བྲམ་ཟེའི་ཁྱེའུ་སྙིང་པོ་སྤྱོད་ནི་དེའི་འོག་ཏུ་དེ་བཞིན་གཤེགས་པ་སེང་གེའི་བཤེས་གཉེན་གཙུག་ཕུད་ཅེས་བྱ་བར་འགྱུར་རོ་ཞེས་བྱང་ཆུབ་ཏུ་ལུང་བསྟན་ཏོ། །བྲམ་ཟེའི་ཁྱེའུ་ལྔ་པོ་དེ་དག་བསྐལ་བ་བཟང་པོར་ལུང་བསྟན་མ་ཐག་ཏུ་མདུན་ན་འདོན་གྱིས་ཡང་བྲམ་ཟེའི་ཁྱེའུ་སྟོབས་ཆེན་ཤུགས་འཆང་ལ་སྨྲས་པ། སྟོབས་ཆེན་ཤུགས་འཆང ། སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་ལོང་ཞིག་།སྨོན་ལམ་ཇི་ལྟ་བུ་འདོད་པའང་བཅོམ་ལྡན་འདས་ཀྱི་སྤྱན་སྔར་ཐོབ་ཅིག་།སེམས་ཅན་ཐམས་ཅད་ཀྱང་ཆོས་ཀྱི་བཅུད་ཀྱིས་མགྲོན་དུ་གཉེར་ཅིག་།བརྩོན་འགྲུས་བརྟན་པོས་རང་གི་བྱང་ཆུབ་ཀྱི་སྤྱད་པའང་སྤྱོད་ལ། ཡང་དང་ཡང་དུ་རིང་དུ་མ་རྟོག་ཅིག་ཅེས་ལག་པ་ནས་བཟུང་སྟེ་བཅོམ་ལྡན་འདས་ལ་ཕུལ་ལོ། །རིགས་ཀྱི་བུ། དེ་ནས་བྲམ་ཟེའི་ཁྱེའུ་སྟོབས་ཆེན་ཤུགས་འཆད་དེའང་
343a
༄#། །བཅོམ་ལྡན་འདས་ཀྱི་སྤྱན་སྔར་འདུག་སྟེ་གསོལ་བ། བཅོམ་ལྡན་འདས། མ་འོངས་པའི་དུས་ན་བསྐལ་པ་བཟང་པོ་དེ་ལ་ཐུབ་པ་ཉི་མ་མང་ཉུང་ཇི་སྙེད་ཅིག་འབྱུང་བར་འགྱུར་ལགས། དེ་བཞིན་གཤེགས་པ་རིན་པོ་ཆེའི་སྙིང་པྶ་བཀའ་སྩལ་པ། བྲམ་ཟེའི་ཁྱེའུ་བསྐལ་པ་བཟང་པོ་དེ་ལ་ནི་ཐུབ་པ་ཉི་མ་སྟོང་རྩ་བཞི་འབྱུང་བར་འགྱུར་རོ། ། བྲམ་ཟེའི་ཁྱེའུས་གསོལ་བ། བཙུན་པ་བཅོམ་ལྡན་འདས། བསྐལ་པ་ཆེན་པོ་བཟང་པོ་དེ་ལ་རྒྱལ་བ་ཉི་མ་གང་དག་ཡོངས་སུ་མྱ་ངན་ལས་འདས་པ་དེ་དག་གི་ཐ་མར་བྲམ་ཟེའི་ཁྱེའུ་གཅེས་ལག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང་དེ་བཞིན་གཤེགས་པ་སེང་གེའི་བཤེས་གཉེན་གཙུག་ཕུད་ཅེས་བགྱི་བར་འགྱུར་བ་དེ་སྲིད་དུ་ཡུན་རིང་པོར་བདག་གིས་བརྟུལ་ཞུགས་དང ། དཀའ་ཐུབ་དང ། སྤྱོད་པ་དང ། སྦྱིན་པ་དང ། དུལ་བ་དང ། ཡང་དག་པར་སྡོམ་པ་དང ། ཐོས་པ་དང ། བརྩོན་འགྲུས་དང ། བཟོད་པ་དང ། དེས་པ་དང ། བསོད་ནམས་དང ། ཤེས་རབ་ཀྱི་ཚོགས་སྣ་ཚོགས་དག་ཡང་དག་པར་བསྡུ་ཞིང་བྱང་ཆུབ་ཀྱི་སྤྱོད་པ་སྤྱད་པར་བགྱིའོ། །བསྐལ་བ་བཟང་པོ་པ་དེ་དག་ཐམས་ཅད་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པར་དང་པོར་བསོད་སྙོམས་ཀྱང་དབུལ་བར་བགྱིའོ། །ཡོངས་སུ་མྱ་ངན་ལས་འདས་པ་རྣམས་
343b
ཀྱི་སྐུ་གདུང་དག་པའང་མཆོད་པར་བགྱིའོ། །དེ་དག་གིས་དམ་པའི་ཆོས་ཡོངས་སུ་འཛིན་པར་ཡང་གྱུར་ཅིག་།སེམས་ཅན་ཚུལ་ཁྲིམས་དང་བྲལ་བ་རྣམས་ནི་ཚུལ་ཁྲིམས་ཕུན་སུམ་ཚོགས་པ་ཡང་དག་པར་འཛིན་དུ་འཇུག་པ་དང ། འཛུད་ཅིང་རབ་ཏུ་འགོད་པར་གྱུར་ཅིག་།སེམས་ཅན་ལྟ་བ་དང་བྲལ་ཞིང་ཉམ་ང་བ་ཐོབ་པར་གྱུར་པ་རྣམས་ནི་ཡང་དག་པའི་ལྟ་བ་ཡང་དག་པར་འཛིན་དུ་འཇུག་པ་དང ། འཛུད་ཅིང་རབ་ཏུ་འགོད་པར་གྱུར་ཅིག་།དེ་བཞིན་དུ་བསམ་བ་དང་བྲལ་བ་རྣམས་ནི་ཡང་དག་པའི་བསམ་པ་ལ་རབ་ཏུ་འགོད་པར་གྱུར་ཅིག ། དེ་བཞིན་དུ་ཆོ་ག་དང་བྲལ་བ་རྣམས་ནི་ཆོ་ག་ལ་རབ་ཏུ་འགོད་པར་གྱུར་ཅིག་།སེམས་ཅན་རྣམས་ཀྱི་དགེ་བའི་སྤྱོད་པ་རྣམ་པ་སྣ་ཚོགས་དག་ཀྱང་དེས་པར་སྟོན་པར་གྱུར་ཅིག་།སངས་རྒྱས་བཅོམ་ལྡན་འདས་དེ་དག་གི་དམ་པའི་ཆོས་ནུབ་ནས་རིང་པོ་མ་ལོན་པར་བདག་གིས་འཇིག་རྟེན་དུ་དམ་པའི་ཆོས་ཀྱི་ཚུལ་དང ། དམ་པའི་ཆོས་ཡོངས་སུ་བཟུང་བ་དང ། དམ་པའི་ཆོས་འབྱུང་བ་དང ། དམ་པའི་ཆོས་ཀྱི་སྒྲོན་མ་འབར་བར་བགྱིད་པར་གྱུར་ཅིག་།མཚོན་གྱི་བསྐལ་པ་བར་མའི་དུས་ཀྱི་ཚེ་ན་སེམས་ཅན་རྣམས་སྲོག་གཅོད་པ་སྤོང་བ་དང ། ཡང་དག་པའི་ལྟ་བའི་བར་ལ་རབ་ཏུ་འགོད་པར་གྱུར་ཅིག་།སེམས་ཅན་རྣམས་མི་དགེ་བ་བཅུའི་ལས་ཀྱི་ལམ་དང ། ལམ་ངན་པ་དག་ནས་བཏོན་ཅིང་ཡང་དག་པའི་ལམ་དུ་འགོད་པར་གྱུར་
344a
༄#། །ཅིག་།ཉེས་པར་སྤྱོད་པའི་མུན་པ་འཇིག་པར་བགྱིད་པར་གྱུར་ཅིག་།ལེགས་པར་སྤྱོད་པའི་སྣང་བསྟོན་པར་གྱུར་ཅིག་།འཇིག་རྟེན་ན་དུས་ཀྱི་སྙིགས་མ་དང ། ཚེ་དང ། ལྟ་བ་དང ། ཉོན་མོངས་པའི་སྙིགས་མའི་བར་དག་འཇིག་པར་བགྱིད་པར་གྱུར་ཅིག་།མུ་གེའི་བསྐལ་བ་བར་མའི་དུས་ཀྱི་ཚེ་ན་བདག་སེམས་ཅན་རྣམས་སྦྱིན་པའི་ཕ་རོལ་ཏུ་ཕྱིན་པ་ལ་སྦྱོར་བར་གྱུར་ཅིག་།ཤེས་རབ་ཀྱི་ཕ་རོལ་ཏུ་ཕྱིན་པའི་བར་དག་ཀྱང་ཡང་དག་པར་འཛིན་དུ་འཇུག་ཅིག་འཛུད་པར་གྱུར་ཅིག་།བདག་དང་སེམས་ཅན་རྣམས་ཕ་རོལ་ཏུ་ཕྱིན་པ་དྲུག་པོ་དག་ལ་སྦྱོར་བར་བགྱིད་པ་ན་ཐམས་ཅད་དུ་མུ་གེའི་མུན་པ་དང ། འཐབ་པ་དང ། རྙོག་པ་དང ། གཡུལ་ཤོམ་པ་དང ། ཁོན་དང ། རྩོད་པ་དང ། འགྱེད་པ་དག་རབ་ཏུ་ཞི་བར་གྱུར་ཅིག་།སེམས་ཅན་རྣམས་ཀྱི་སེམས་ཀྱི་རྒྱུད་ལ་ཉོན་མོངས་པའི་མེའི་གདུང་བ་དག་ཞི་བར་གྱུར་ཅིག་།ནད་ཀྱི་བསྐལ་པ་བར་མའི་དུས་ཀྱི་ཚེ་ན་བདག་གིས་སེམས་ཅན་རྣམས་སྙིང་པོར་འགྱུར་བ་དང ། མཐུན་པའི་ཆོས་དྲུག་ཡང་དག་པར་འཛིན་དུ་འཇུག་པ་གྱུར་ཅིག་།བསྡུ་བའི་དངོས་པོ་བཞི་པོ་དག་ལ་སྦྱོར་བར་བགྱིད་ཅིང་རབ་ཏུ་འགོད་པར་གྱུར་ཅིག་།སེམས་ཅན་རྣམས་ཀྱི་ནད་ཀྱི་མུན་པ་རྣམ་པར་འཇིག་པར་བགྱིད་པར་གྱུར་ཅིག་།སེམས་ཅན་རྣམས་ཀྱི་སེམས་ཀྱི་རྒྱུད་ལ་ཉོན་མོངས་པ་རབ་ཏུ་ཞི་བར་
344b
བགྱིད་པའི་བར་དུ་གྱུར་ཅིག་།བསྐལ་པ་བཟང་པོ་ལ་སངས་རྒྱས་ཀྱི་ཞིང་མི་མཇེད་དུ་སེམས་ཅན་རྣམས་སྡུག་བསྔལ་དག་ལས་ཡོངས་སུ་ཐར་པར་བགྱིད་པར་གྱུར་ཅིག་།གང་གི་ཚེ་བསྐལ་པ་བཟང་པོ་ལ་སངས་རྒྱས་བཅོམ་ལྡན་འདས་སྟོང་རྩ་བཞི་འབྱུང་བ་དག་ཡོངས་སུ་མྱ་ངན་ལས་འདས་པར་གྱུར་ནས་དམ་པའི་ཆོས་ཀྱི་ཚུལ་ཐམས་ཅད་ཀྱི་ཐམས་ཅད་དུ་ནུབ་པར་གྱུར་པ་ན་དེའི་འོག་ཏུ་གདོད་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་།བསྐལ་པ་བཟང་པོའི་སངས་རྒྱས་བཅོམ་ལྡན་འདས་སྟོང་རྩ་བཞི་པོ་དག་གི་སྐུ་ཚེའི་ཚད་ཇི་ཙམ་པར་བདག་གིས་བྱང་ཆུབ་ཐོབ་པའི་ཚེའི་ཚད་ཀྱང་དེ་ཙམ་དུ་རིང་བར་གྱུར་ཅིག་།དེ་དག་གི་ཉན་ཐོས་ཀྱི་དགེ་འདུན་ཇི་སྙེད་པར་བདག་གཅིག་པུའི་ཉན་ཐོས་ཀྱི་དགེ་འདུན་ཡང་དེ་སྙེད་དུ་གྱུར་ཅིག་།བསྐལ་པ་བཟང་པོ་དེ་ལ་སངས་རྒྱས་སྟོང་རྩ་བཞི་པོ་དེ་དག་གིས་སེམས་ཅན་ཇི་སྙེད་བཏུལ་བར་གྱུར་བའི་སེམས་ཅན་དེ་སྙེད་ཅིག་བདག་གིས་ཀྱང་བཏུལ་བར་གྱུར་ཅིག་།སེམས་ཅན་གང་དག་སངས་རྒྱས་བཅོམ་ལྡན་འདས་དེ་དག་གི་ཉན་ཐོས་ཀྱི་བསླབ་པ་ལ་འཁྲུལ་པར་གྱུར་པ་དང ། ལྟ་བའི་གཡང་སར་ལྷུང་བར་གྱུར་པ་དང ། སངས་རྒྱས་བཅོམ་ལྡན་འདས་རྣམས་ལ་མ་གུས་པའི་སེམས་དང ། རབ་ཏུ་སྡང་བའི་སེམས་སུ་གྱུར་པ་དང ། ཆོས་དང་དགེ་འདུན་ལ།
345a
༄#། །འཁྲུལ་བའི་སེམས་སུ་གྱུར་པ་དང ། འདོད་ཆགས་ཀྱི་སེམས་དག་དང ། འཕགས་པ་ལ་སྐུར་བ་འདེབས་པ་དང ། མཚམས་མེད་པ་བགྱིད་པར་གྱུར་པ་དག་ཀྱང་བདག་གིས་བྱང་ཆུབ་ཐོབ་ནས་འཁོར་བའི་འདམ་ནས་འབྱིན་ཅིང་མི་འཇིགས་པའི་ཁྱིམ་མྱ་ངན་ལས་འདས་པའི་གྲོང་ཁྱེར་དུ་འཛུད་པར་གྱུར་ཅིག་།ཇི་སྲིད་དུ་བདག་ཡོངས་སུ་མྱ་ངན་ལས་འདས་ནས་དམ་པའི་ཆོས་བས་པར་མ་གྱུར་པ་དེ་སྲིད་དུ་བསྐལ་པ་ཆེན་པོ་བཟང་པོའང་བས་པར་མ་གྱུར་ཅིག་།བདག་གི་དམ་པའི་ཆོས་བས་པར་གྱུར་པ་ན་བསྐལ་པ་བཟང་པོའང་བས་པར་གྱུར་ཅིག་།བདག་སྐྱེས་པའི་སྐུ་གདུང་གང་ལགས་པ་དེ་དག་ཀྱང་དེ་བཞིན་གཤེགས་པའི་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་སྐུ་ལེགས་པར་བརྒྱན་ཅིང་མཚན་རེ་རེའང་དཔེ་བྱད་བཟང་པོ་བརྒྱད་ཅུས་ལེགས་པར་བརྒྱན་པ་དཔག་ཏུ་མ་མཆོས། །གྲངས་མ་མཆིས་པ་དག་ཏུ་གྱུར་ཏེ་གནས་པར་གྱུར་ཅིག་།དེ་བཞིན་གཤེགས་པའི་སྐུ་དེ་དག་ཀྱང་ཕྱོགས་བཅུའི་སངས་རྒྱས་ཀྱི་ཞིང་སྟོང་པ་དཔག་ཏུ་མ་མཆིས། གྲངས་མ་མཆིས་པ་གཞན་དག་ཏུ་བཞུད་ནས། སངས་རྒྱས་ཀྱི་སྐུ་རེ་རེས་ཀྱང་སེམས་ཅན་དཔག་ཏུ་མ་མཆིས། གྲངས་མ་མཆིས་པ་རྣམས་ཐེག་པ་གསུམ་པོ་དག་ཡང་དག་པར་འཛིན་དུ་འཇུག་པ་དང ། འཛུད་ཅིང་རབ་ཏུ་འགོད་པར་གྱུར་ཅིག །
345b
སངས་རྒྱས་ཀྱི་ཞིང་གང་ན་བར་གྱི་བསྐལ་པ་ཞིག་པར་མ་གྱུར་པ་དེར་དེ་བཞིན་གཤེགས་པའི་སྐུ་དེ་དག་བཞུད་ནས་ཇི་ལྟར་སྔར་བརྗོད་པ་དེ་ལྟར་སེམས་ཅན་རྣམས་ཡོངས་སུ་སྐྱོབ་པར་འགྱུར་ཞིང་སླད་ཀྱིས་ཡིད་བཞིན་གྱི་ནོར་བུར་གྱུར་ནས། སངས་རྒྱས་ཀྱི་ཞིང་གང་དག་ན་སེམས་ཅན་རྣམས་རིན་པོ་ཆེ་དང་བྲལ་བར་གྱུར་བའི་སངས་རྒྱས་ཀྱི་ཞིང་དེ་དག་ཏུ་མཆིས་ཤིང་རིན་པོ་ཆེའི་ཆར་རབ་ཏུ་འབེབས་པ་དང ། གཏེར་དག་ཀྱང་རབ་ཏུ་སྟོན་པར་གྱུར་ཅིག་།སངས་རྒྱས་ཀྱི་ཞིང་གང་དག་ན་སེམས་ཅན་རྣམས་དགེ་བའི་སྤྱོད་པ་དང་བྲལ་ཞིང་ནད་ཀྱིས་ཉོན་མོངས་པ་ཅན་དུ་གྱུར་པའི་སངས་རྒྱས་ཀྱི་ཞིང་དེ་དག་ཏུའང་ཙནྡན་ས་མཆོག་པ་དང ། སྦྲུལ་གྱི་སྙིང་པོ་དང ། དུས་ཀྱི་རྗེས་སུ་འབྲང་བ་དག་གི་སྤོས་ཀྱི་ཆར་རབ་ཏུ་འབེབས་པར་གྱུར་ཅིག་།སྤོས་ཀྱི་ཆར་དེ་དག་གིས་ཀྱང་སེམས་ཅན་རྣམས་ཀྱི་ཉོན་མོངས་པའི་ནད་རྣམས་དང ། ལྟ་བའི་ནད་རྣམས་དང ། ལུས་ཀྱི་ནད་རྣམས་ཀྱང་རབ་ཏུ་ཞི་བར་བགྱིད་པར་གྱུར་ཅིག་།དེ་ནས་སེམས་ཅན་དེ་དག་ཀྱང་བསོད་ནམས་བགྱི་བའི་དངོས་པོ་དག་ལ་མངོན་པར་བརྩོན་པར་འགྱུར་ཟིང་མཐོ་རིས་ལ་གཞོལ་བར་ཡང་གྱུར་ཅིག་བཙུན་པ་བཅོམ་ལྡན་འདས། བདག་བྱང་ཆུབ་ཀྱི་སྤྱད་པ་སྤྱོད་པ་ན་དེ་ལྟར་སེམས་ཅན་རྣམས་ཡོངས་སུ་སྐྱོབ་པར་གྱུར་ཅིག་།བདག་བྱང་ཆུབ་ཐོབ་ནས་ཀྱང་དེ་ལྟར་སངས་རྒྱས་ཀྱི་མཛད་པ་བགྱིད་པར་གྱུར་ཅིག་།བདག་
346a
༄#། །ཡོངས་སུ་མྱ་ངན་ལས་འདས་ནས་ཀྱང་དེ་ལྟར་སངས་རྒྱས་ཀྱི་ཞིང་མཐའ་ཡས་མུ་མ་མཆིས་པ་དག་གི་སེམས་ཅན་རྣམས་ཡོངས་སུ་སྐྱོབ་པར་གྱུར་ཅིག ། བཙུན་པ་བཅོམ་ལྡན་འདས། གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་མི་འགྱུར་ཞིང ། སེམས་ཅན་རྣམས་ཀྱི་སྨན་དུའང་མི་འགྱུར་བ་ལྟ་ན་བདག་གིས་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མ་མཆིས་པ་དག་ན། སངས་རྒྱས་བཅོམ་ལྡན་འདས་གང་དག་བཞུགས་ཏེ་འཚོ་ཞིང་གཞེས་ལ་སེམས་ཅན་རྣམས་ལ་ཆོས་ཀྱང་སྟོན་པ་དེ་དག་བསླུས་པར་གྱུར་ཅིག་།བཅོམ་ལྡན་འདས་ཀྱིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་ཡང་མ་གྱུར་ཅིག་།བཅོམ་ལྡན་འདས། སྲོག་ཆགས་བྱེ་བ་ཕྲག་མང་པོ་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་ཤིང་ལུང་བསྟན་པའི་སེམས་ཅན་སངས་རྒྱས་བཅོམ་ལྡན་འདས་སུ་གྱུར་པ་དེ་དག་ཀྱང་བདག་གིས་ཐུགས་བྱུང་བར་བགྱིས་པར་གྱུར་ཅིག་།བདག་བྱང་ཆུབ་ཀྱི་སླད་དུ་ཡང་དང་ཡང་དུ་འཁོར་བར་འཁོར་བན་སངས་རྒྱས་ཀྱི་སྒྲ་དང ། ཆོས་ཀྱི་སྒྲ་དང ། དགེ་འདུན་གྱི་སྒྲ་དང ། དགེ་བའི་སྒྲ་དང ། དགེ་བའི་ཆོས་བགྱིད་པའི་སྒྲ་དག་རྣ་ལམ་དུ་གྲག་པར་མ་གྱུར་ཅིག་།གལ་ཏེ་བདག་གི་རེ་བ་འདི་ལྟ་བུར་ཡོངས་སུ་རྫོགས་པར་མི་
346b
འགྱུར་ཞིང་སེམས་ཅན་རྣམས་ཀྱི་སྨན་དུའང་མི་འགྱུར་བ་ལྟ་ན་བདག་རྟག་ཏུ་མནར་མེད་པར་རྟོགས་པར་གྱུར་ཅིག་།རིགས་ཀྱི་བུ། དེ་ནས་དེ་བཞིན་གཤེགས་པ་རིན་པོ་ཆེའི་སྙིང་པོས་བྲམ་ཟེའི་ཁྱེའུ་སྟོབས་ཆེན་ཤུགས་འཆང་ལ་ལེགས་སོ་ཞེས་བྱ་བ་བྱིན་ཏེ། སྐྱེས་བུ་དམ་པ། ལེགས་སོ། ལེགས་སོ། །ཁྱོད་ནི་སེམས་ཅན་རྣམས་ཀྱི་སྨན་དུ་འགྱུར་ཞིང་སྡུག་བསྔལ་དག་ལས་ཡོངས་སུ་ཐར་བར་བྱེད་པར་ཡང་འགྱུར་ཏེ། སྐྱེས་བུ་དམ་པ། དེའི་ཕྱིར་ཁྱོད་སྨན་གྱི་རྒྱལ་པོ་སྐར་མ་དྲི་མ་མེད་པ་ཞེས་བྱ་བར་གྱུར་ཅིག་།སྨན་གྱི་རྒྱལ་པོ་སྐར་མ་དྲི་མ་མེད་པ་ཁྱོད་ནི་མ་འོངས་པའི་དུས་ན་བསྐལ་པ་གྲངས་མེད་པ་གངྒཱའི་ཀླུང་གཅིག་གི་བྱེ་མ་སྙེད་འདས་ནས་བསྐལ་པ་གྲངས་མེད་པ་གངྒཱའི་ཀླུང་གི་བྱེ་མ་སྙེད་གཉིས་པ་ལ་བབ་པ་ན་བསྐལ་པ་བཟང་པོ་ལ་སངས་རྒྱས་སྟོང་རྩ་བཞི་པོ་དག་མངོན་པར་རྫོགས་པར་སངས་རྒྱས་ནས་རིང་པོར་མ་ལོན་པར་རང་གི་སྨོན་ལམ་ཇི་ལྟར་བཏབ་པའི་བར་དག་བཞིན་དུ་བསོད་སྙོམས་འབུལ་བར་འགྱུར་ཞིང ། དེ་བཞིན་གཤེགས་པ་སེང་གེའི་བཤེས་གཉེན་གཙུག་ཕུད་བཟང་པོ་ཡོངས་སུ་མྱ་ངན་ལས་འདས་པའི་དམ་པའི་ཆོས་ནུབ་པ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་གསལ་མཛད་ཅེས་བྱ་བ་སངས་རྒྱས་བཅོམ་ལྡན་འདས་
347a
༄#། །ཀྱི་བར་དུ་འགྱུར་རོ། །ཁྱོད་ཀྱི་ཚེའི་ཚད་ནི་བསྐལ་པ་ཕྱེད་དུ་འགྱུར་རོ། །བསྐལ་པ་བཟང་པོའི་སངས་རྒྱས་སྟོང་རྩ་བཞི་པོ་དེ་དག་གི་ཉན་ཐོས་ཀྱི་དགེ་འདུན་ཇི་སྙེད་དུ་འགྱུར་བ་ཁྱོད་གཅིག་པུའི་ཉན་ཐོས་ཀྱི་དགེ་འདུན་ཡང་དེ་སྙེད་དུ་འགྱུར་ལ། སེམས་ཅན་དེ་སྙེད་ཀྱང་འདུལ་བར་འགྱུར་རོ། །ཡོངས་སུ་མྱ་ངན་ལས་འདས་ནས་ཀྱང་ཇི་སྲིད་དུ་བསྐལ་པ་ཆེན་པོ་བཟང་པོའི་བསྐལ་པ་ཟད་པར་མ་གྱུར་པ་དེ་སྲིད་དུ་དམ་པའི་ཆོས་ནུབ་པར་མི་འགྱུར་ལ། དེ་སྲིད་དུ་སངས་རྒྱས་ཀྱི་སྐུ་དག་ཀྱང་འབྱུང་བར་འགྱུར་ཞིང་སངས་རྒྱས་ཀྱི་ཞིང་གཞན་དག་ཏུ་སྤོས་ཀྱི་ཆར་པས་སེམས་ཅན་རྣམས་ཀྱི་ཉོན་མོངས་པའི་ནད་རྣམས་དང ། ལྟ་བའི་ནད་རྣམས་དང ། ལུས་ཀྱི་ནད་རྣམས་ཀྱི་བར་དག་ཀྱང་རབ་ཏུ་ཞི་བར་བྱེད་པར་འགྱུར་ལ། སེམས་ཅན་རྣམས་ཀྱང་བསོད་ནམས་བྱ་བའི་དངོས་པོ་གསུམ་པོ་དག་ལ་རབ་ཏུ་འགོད་ཅིང་མཐོ་རིས་ལ་གཞོལ་བར་བྱེད་པར་ཡང་འགྱུར་རོ།། །།བམ་པོ་དགུ་པ། རིགས་ཀྱི་བུ་དེ་ནས་བྱང་ཆུབ་སེམས་དཔའ་སྨན་གྱི་རྒྱལ་པོ་སྐར་མ་དྲི་མ་མེད་པས་གསོལ་པ། བཙུན་པ་བཅོམ་ལྡན་འདས། གལ་ཏེ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་བ་ལྟ་ན་དེའི་སླད་དུ་བཅོམ་ལྡན་འདས་ཀྱིས་བསོད་ནམས་ཀྱི་མཚན་གྱིས་བརྒྱན་པའི་ཕྱག་གིས་བདག་
347b
གི་སྤྱི་བོ་ལ་བྱུག་པར་གསོལ། རིགས་ཀྱི་བུ། དེ་ནས་དེ་བཞིན་གཤེགས་པ་རིན་པོ་ཆེའི་སྙིང་པོས་བྱང་ཆུབ་སེམས་དཔའ་སྨན་གྱི་རྒྱལ་པོ་སྐར་མ་དྲི་མ་མེད་པའི་སྤྱི་བོ་ལ་བསོད་ནམས་བརྒྱའི་མཚན་གྱི་བརྒྱན་པའི་ཕྱག་གིས་ཡོངས་སུ་བྱུག་པ་མཛད་ནས་དེ་ན་བཞུགས་སོ། །རིགས་ཀྱི་བུ། དེ་ནས་བྱང་ཆུབ་སེམས་དཔའ་སྨན་གྱི་རྒྱལ་པོ་སྐར་མ་དྲི་མ་མེད་པ་སེམས་དགའ་ཞིང་མགུ་ལ་ཡིད་རངས་ཤིང་རབ་ཏུ་དགའ་བར་གྱུར་ཏེ། དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྔས་མགོ་བོས་ཕྱག་བྱས་ནས་ལངས་ཏེ་ཕྱོགས་གཅིག་ཏུ་འདུག་པ་དང ། བྲམ་ཟེ་རྒྱ་མཚོའི་རྡུལ་གྱིས་ལྷའི་ཀ་ཤི་ཀའི་གོས་བསྐོན་ཏེ་སྨྲས་པ། སྐྱེས་བུ་དམ་པ། ལེགས་སོ། །ལེགས་སོ། །ཁྱོད་ཀྱིས་སྨོན་ལམ་བཟང་པོ་བཏབ་སྟེ། ད་ཕྱིན་ཆད་ཁྱོད་ཀྱིས་ཁོ་བོའི་བསྙེན་བཀུར་བྱ་མི་དགོས་ཀྱི་ཇི་ལྟར་བདེ་བ་ཉིད་དུ་སྤྱོད་ཅིག་།རིགས་ཀྱི་བུ། དེ་ནས་བྲམ་ཟེ་རྒྱ་མཚོའི་རྡུལ་འདི་སྙམ་དུ་སེམས་ཏེ། ཇི་ལྟར་ཐམས་ཅད་དང་ལྡན་པ་འཁོར་འདི་ན་སྣང་བ་ལྟར་བདག་གིས་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་མང་པོ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་གོ་།སེམས་ཅན་ཆེན་པོ་འདི་དག་ཐམས་ཅད་ཀྱིས་ནི་སྨོན་ལམ་རྒྱ་ཆེ་བ་དགུ་བཏབ་ཅིང་སངས་རྒྱས་ཀྱི་ཞིང་རབ་ཏུ་དང་བ་
348a
༄#། །ཤ་སྟག་ཡོངས་སུ་བླངས་ཏེ། ཁྱབ་འཇུག་རླུང་མ་གཏོགས་པ་བྱང་ཆུབ་སེམས་དཔའ་གཞན་དག་གིས་རྩོད་པའི་དུས་ཡོངས་སུ་སྤངས་པས་བདག་གིས་ནི་རྩོད་པའི་དུས་ལ་བབ་པར་གྱུར་པ་ན། སེམས་ཅན་རྣམས་ཆོས་ཀྱི་བཅུད་ཀྱིས་མགྲོན་དུ་གཉེར་བར་བྱ་ཞིང་བརྩོན་འགྲུས་བརྟན་པོར་བྱ་སྟེ། བདག་གིས་ཅི་ནས་ཀྱང་བྱང་ཆུབ་སེམས་དཔའི་འཁོར་འདི་དག་ཐམས་ཅད་ངོ་མཚར་ཐོབ་པར་འགྱུར་བ་དང ། ཐམས་ཅད་དང་ལྡན་པའི་འཁོར་འདི་དང ། ལྷ་དང ། དྲི་ཟ་དང ། མི་དང ། ལྷ་མ་ཡིན་དང་བཅས་པའི་འཇིག་རྟེན་འདི་ཡང་བདག་ལ་ཐལ་མོ་སྦྱར་ཏེ་ཕྱག་འཚལ་ཞིང་མཆོད་པ་བྱེད་པར་འགྱུར་བ་དང ། སངས་རྒྱས་བཅོམ་ལྡན་འདས་འདིའང་བདག་ལ་ལེགས་སོ་ཞེས་བྱ་བ་བྱིན་ཞིང་ལུང་སྟོན་པར་འགྱུར་བ་དང ། དེ་བཞིན་དུ་སངས་རྒྱས་བཅོམ་ལྡན་འདས་གང་དག་ཕྱོགས་བཅུ་ན་བཞུགས་ཏེ་འཚོ་ཞིང་གཞེས་ལ་སེམས་ཅན་རྣམས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་ཀྱང་བདག་གིས་སེང་གེའི་སྒྲ་བསྒྲགས་པ་ལ་ལེགས་སོ་ཞེས་བྱ་བ་བྱིན་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པའང་མཛད་ལ་ཕོ་ཉ་དག་ཀྱང་གཏོང་བར་འགྱུར་བ་དང ། ཐམས་ཅད་དང་ལྡན་པའི་འཁོར་འདིས་ཀྱང་དེ་ཐོས་ཤིང་ཕོ་ཉ་དེ་དག་ཀྱང་མཐོང་བར་
348b
འགྱུར་བ་དང ། གང་ཡང་ཕྱི་མའི་དུས་ན་སྙིང་རྗེ་ཆེན་པོ་དང་ལྡན་པའི་བྱང་ཆུབ་སེམས་དཔའ་དག་འབྱུང་བར་འགྱུར་བ་དེ་དག་ཀྱང་དེ་ལྟ་བུའི་རྩོད་པ་ཆེན་པོའི་དུས་ཀྱི་ཚེ་སངས་རྒྱས་ཀྱི་ཞིང་ཉོན་མོངས་པ་ཅན་དུ་སྨོན་ལམ་གྱིས་བྱང་ཆུབ་ཡོངས་སུ་འཛིན་པར་འགྱུར་ཞིང་ཆོས་ཀྱི་མུ་གེའི་དགོན་པ་དང ། ཉོན་མོངས་པ་དང ། ནད་དག་གི་ས་འདས་པར་གྱུར་པའི་སེམས་ཅན་རྣམས་ལ་ཡོངས་སུ་སྐྱོབ་པར་འགྱུར་ཞིང་སངས་རྒྱས་ཀྱི་མཛད་པའང་མཛད་པར་འགྱུར་ལ་སེམས་ཅན་རྣམས་ལའང་ཆོས་སྟོན་པར་འགྱུར་བ་དང ། བདག་ཡོངས་སུ་མྱ་ངན་ལས་འདས་ནས་ཀྱང་བསྐལ་པ་བྱེ་བ་ཁྲག་ཁྲིག་འབུམ་ཕྲག་བསམ་གྱིས་མི་ཁྱབ་པ་དག་འདས་ཀྱི་བར་དུ་ཕྱོགས་བཅུའི་སངས་རྒྱས་ཀྱི་ཞིང་གཞལ་དུ་མ་མཆིས་པ་དང ། དཔག་ཏུ་མ་མཆིས་པ་དག་ན་སངས་རྒྱས་བཅོམ་ལྡན་འདས་དཔག་ཏུ་མ་མཆིས་པ་དག་བདག་ཡོངས་སུ་མྱ་ངན་ལས་འདས་པའི་བསྔགས་པ་བརྗོད་ཅིང་སྙན་པ་དང་དབྱངས་ཀྱང་སྒྲོག་པར་འགྱུར་ལ། བྱང་ཆུབ་སེམས་དཔའ་རྣམས་ཀྱི་མདུན་དུ་བདག་གི་སྨོན་ལམ་གྱི་ཚུལ་ཡང་བརྗོད་པར་འགྱུར་བ་དང ། བྱང་ཆུབ་སེམས་དཔའ་དེ་དག་གིས་ཀྱང་སྙིང་རྗེ་ཆེན་པོས་ཡོངས་སུ་བསྒོས་ཤིང་བྱིན་གྱིས་བརླབས་པའི་སྨོན་ལམ་ཐོས་ནས་མཆོག་ཏུ་ངོ་མཚར་དུ་འཛིན་པར་འགྱུར་ཞིང ། དེ་དག་ཀྱང་སེམས་ཅན་རྣམས་ལ་སྙིང་རྗེ་ཆེན་པོ་
349a
༄#། །སྐྱེ་བར་འགྱུར་བ་དང ། དེ་ནས་དེ་དག་ཀྱང་སྨོན་ལམ་དེ་ལྟ་བུ་དག་ཉིད་ཡོངས་སུ་འཛིན་པར་འགྱུར་ཞིང་ཇི་ལྟར་དེ་ལྟར་བདག་གིས་ཡོངས་སུ་བཟུང་བ་དེ་ལྟ་བུའི་སངས་རྒྱས་ཀྱི་ཞིང་ཉོན་མོངས་པ་ཅན་དག་ཏུ་དེ་དག་ཀྱང་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དང ། ཆུ་བོ་བཞིས་བདས་པར་གྱུར་པའི་སེམས་ཅན་རྣམས་སྒྲོལ་བར་འགྱུར་ཞིང་ཐེག་པ་གསུམ་པོ་དག་གིས་འདུལ་བར་འགྱུར་བ་དང ། མྱ་ངན་ལས་འདས་པའི་ལམ་གྱི་བར་དག་ལ་འགོད་པར་འགྱུར་བ་དེ་ལྟ་བུའི་སྨོན་ལམ་གྱིས་སེང་གེའི་སྒྲ་བསྒྲག་པར་བྱའོ་སྙམ་མོ། །རིགས་ཀྱི་བུ། མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་གྱིས་སྙིང་རྗེ་ཆེན་པོས་ཡོངས་སུ་བསྒོས་པའི་སྨོན་ལམ་དེ་ལྟ་བུ་དག་ཡང་དག་པར་བསྐྱེད་ནས་ཆོས་གོས་ཕྲག་པ་གཅིག་ཏུ་གཟར་ཏེ་དེ་བཞིན་གཤེགས་པ་རིན་པོ་ཆེའི་སྙིང་པོ་ག་ལ་བ་དེར་སོང་ངོ ། །ཡང་དེའི་ཚེ་ན་ལྷ་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་ནམ་མཁའི་དཀྱིལ་ནས་ལྷའི་སིལ་སྙན་བྱེ་བ་ཁྲག་ཁྲིག་འབུམ་ཕྲག་མང་པོ་\?\་གསིལ་དཀྲོལ་ཞིང ། མེ་ཏོག་གི་ཆར་རབ་ཏུ་ཕབ་ནས་ཚིག་མཐུན་པར་སྨྲས་པ། སྐྱེས་བུ་དམ་པ། ལེགས་སོ། །ལེགས་སོ། །ཁྱོད་བཅོམ་ལྡན་འདས་ཀྱི་དྲུང་དུ་སོང་ལ་སྨོན་ལམ་རབ་མཆོག་དག་ཤོད་ལ་གཟུང་ཞིག་དང ། ཁྱོད་ནི་ཉོན་མོངས་པས་དཀྲུགས་པའི་
349b
འཇིག་རྟེན་དུ་སེམས་ཅན་རྣམས་ཀྱི་སྡུག་བསྔལ་ཡེ་ཤེས་ཀྱི་ཆུས་རབ་ཏུ་ཞི་བར་བྱེད་པར་འགྱུར་རེ། །ཐམས་ཅད་དང་ལྡན་པའི་འཁོར་དེ་དག་ཀྱང་ཐལ་མོ་སྦྱར་ཏེ་མངོན་དུ་ཕྱོགས་ནས་ཚིག་མཐུན་པར་སྨྲས་པ། སྐྱེས་བུ་དམ་པ། ལེགས་སོ། །ལེགས་སོ། །མཁས་པ་རབ་མཆོག་བདག་ཅག་ལ་ཕན་པར་མཛད་པ་བློ་མཆོག་མངའ་བ་སྨོན་ལམ་བརྟན་པོར་ཐོབ་ཅིག་དང ། བདག་ཅག་ཀྱང་ཉན་པར་འཚལ་ལོ། །གང་གི་ཚེ་མདུན་ན་འདོན་སོང་སྟེ། བཅོམ་ལྡན་འདས་ཀྱི་སྤྱན་སྔར་འདུན་ན་འདོན་གྱིས་པུས་མོའི་ལྷ་ང་བཙུགས་པ་དང ། དེའི་མོད་ལ་སངས་རྒྱས་ཀྱི་ཞིང་ཡང་དག་རྟོག་གི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཇི་ཙམ་པ་དེ་ཐམས་ཅད་གཡོས། རབ་ཏུ་གཡོས། འགུལ། རབ་འགུལ། འཁྲུགས། རབ་ཏུ་འཁྲུགས། ལྡེག་རབ་ཏུ་ལྡེག་གོ་།སིལ་སྙན་དག་ཀྱང་མ་དཀྲོལ་བར་སྒྲ་འཁྲོལ་ལོ། །རི་དྭགས་དང ། བྱ་གག་ཇི་སྙེད་པ་དེ་དག་ཐམས་ཅད་ཀྱང་འཇམ་ཞིང་ཡིད་དུ་འོང་བའི་སྒྲ་སྒྲོགས་སོ། །ཤིང་ལྗོན་པ་དག་ལས་ཀྱང་མེ་ཏོག་དག་འབྲུལ་ལོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་སེམས་ཅན་དམྱལ་བ་པ་རྣམས་དང ། གཤིན་རྗེའི་འཇིག་རྟེན་པ་རྣམས་མ་གཏོགས་པར་གང་སུ་དག་ས་ལ་རྟེན་ཅིང་གནས་པའི་འབྱུང་པོ་བྱང་ཆུབ་ཡང་དག་པར་འཛིན་དུ་བཅུག་པ་གང་ཡིན་པ་དང ། བྱང་ཆུབ་ཡང་དག་པར་འཛིན་དུ་མ་བཅུག་པ་གང་ཡིན་པ་དེ་དག་
350a
༄#། །ཐམས་ཅད་ཀྱང་ཕན་པའི་སེམས་དང ། དགེ་བའི་སེམས་དང ། ཁོ་ན་མེད་པའི་སེམས་དང ། རྙོག་པ་མེད་པའི་སེམས་དང ། བྱམས་པའི་སེམས་དང ། ངོ་མཚར་གྱི་སེམས་དག་ཏུ་གྱུར་ཏོ། །སེམས་ཅན་གང་དག་ནམ་མཁའ་ལ་རྒྱུ་བ་དེ་དག་ཀྱང་བྲམ་ཟེའི་སྨོན་ལམ་སྒྲ་འཇམ་ཞིང་ཡིད་དུ་འོང་བ་མཉན་པའི་ཕྱིར་ནམ་མཁའ་ལ་འཁོད་ནས་འདི་ལྟར་མཆོག་ཏུ་དགའ་བའི་ཡིད་ཀྱིས་མེ་ཏོག་དང ། མེ་ཏོག་ཕྲེང་དང ། སྤོས་དང ། རོལ་མོའི་སྒྲ་དང ། རིན་པོ་ཆེའི་གདུགས་དང ། རྒྱལ་མཚན་དང ། བ་དན་དང ། གོས་དང།་རས་བཅོས་བུ་དག་གིས་མཆོད་པའི་ལས་ལ་བརྩོན་པར་གྱུར་ཏོ། །དེ་བཞིན་དུ་འོག་མིན་གྱི་གནས་མན་ཆད་ཀྱི་ལྷ་གང་ཇི་སྙེད་པ་རྣམས་ཀྱང ། བྲམ་ཟེའི་སྨོན་ལམ་མཉན་པའི་ཕྱིར་ཛམྦུའི་གླིང་དུ་བབས་ཏེ། ནམ་མཁའི་དཀྱིལ་ན་འཁོད་ཅིང ། ལྷའི་སྤོས་དང ། རས་བཅོས་བུའི་བར་དག་གིས་མཆོད་པའི་ལས་ལ་བརྩོན་པར་གྱུར་ཏོ། །བྲམ་ཟེས་ཀྱང་ཐལ་མོ་སྦྱར་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །བསམ་གཏན་དག་གིས་རྣམ་གྲོལ་ཚངས་པ་བཞིན། །གཟུགས་ཀྱིས་འོད་གསལ་བརྒྱ་བྱིན་འདྲ་བ་སྟེ། །རྒྱལ་པོ་བཞིན་དུ་ནོར་འབྲུ་རབ་གཏོང་ཞིང ། །རིན་ཆེན་མཆོག་མངའ་ཐུབ་པ་ཚོང་དཔོན་བཞིན། །ཞི་བ་སྒྲོགས་མཛད་རི་ལ་སེང་གེ་འདྲ། །
350b
མི་འགུལ་བརྟན་པ་ལྷུན་པོ་འདྲ་བ་སྟེ། རྒྱ་མཚོ་བཞིན་དུ་འཁྲུག་པ་མི་མངའ་ཞིང ། །ཡོན་ཏན་སྐྱོན་ལ་ས་བཞིན་མཚུངས་པར་སྤྱོད། །དྲི་མ་ཐམས་ཅད་དེད་པ་ཆུ་བཞིན་ཏེ། །ཐུབ་པ་མེ་ལྟར་ཉོན་མོངས་ནགས་རྣམས་བསྲེག། རླུང་ལྟར་གང་ལའང་ཆགས་པ་མི་མངའ་ཞིང ། །ཐུབ་པ་ལྷ་ལྟར་ཡང་དག་ཉིད་ཀྱང་སྟོན། །ཀླུ་ལྟར་ཐུབ་པ་ཆོས་ཀྱི་ཆར་འབབས་ཤིང ། །ཆར་པ་བཞིན་དུ་འགྲོ་ཀུན་ངོམས་པར་མཛད། །ཕ་རོལ་མུ་སྟེགས་འཇོམས་པ་སེང་གེ་འདྲ། །མེ་ཏོག་བཞིན་དུ་ཡོན་ཏན་དྲི་ཡང་གཏོང ། །ཚངས་པ་བཞིན་དུ་སྙན་པའི་ཚིག་གསུང་ཞིང ། །འགྲོ་བ་སྡུག་བསྔལ་གྲོལ་མཛད་སྨན་པ་བཞིན། །སེམས་མཉམ་ཉེ་བར་གནས་པ་མ་བཞིན་ཏེ། །འགྲོ་བ་རྟག་ཏུ་རྗེས་འཛིན་མཛའ་བཤེས་འདྲ། །ང་རྒྱལ་དགྲ་འཇོམས་རྡོ་རྗེ་བརྟན་བཞིན་ཏེ། །ཐུབ་པ་མཚོན་བཞིན་སྲིད་པའི་འཁྲི་ཤིང་གཅོད། །ཟམ་པའི་ཤིང་བཞིན་འགྲོ་བ་སྒྲོལ་མཛད་ཅིང ། །ཀླུ་ལྟར་ཐུབ་པ་མི་ཤེས་རྩཝ་རྣམས་བསྲེག་།ཐུབ་པ་ཟླ་ལྟར་འོད་བསིལ་གཏོང་མཛད་ཅིང ། །མི་ཡི་པདྨ་ཁ་འབྱེད་ཉི་མ་བཞིན། །འབྲས་བུ་མཆོག་བཞི་སྦྱིན་མཛད་ལྗོན་ཤིང་འདྲ། །ཐུབ་པ་བྱ་བཞིན་དྲང་སྲོང་ཚོགས་ཀྱིས་བསྐོར། །རྒྱལ་བའི་བློ་ཡངས་རྒྱ་མཚོ་འདྲ་བ་སྟེ། །འགྲོ་བ་དག་ལ་སེམས་སྙོམས་རྩཝ་ཤིང་བཞིན། །རྨི་ལམ་བཞིན་དུ་ཆོས་རྣམས་སྟོང་རྟོག་ཅིང ། །འཇིག་རྟེན་རྗེས་སུ་མཐུན་འཇུག་ཆུ་དང་འདྲ། །ཐུབ་པ་མཚན་མཆོག་
351a
༄#། །མངའ་བ་ཐུགས་རྗེ་ཅན། །ཁྱོད་ཀྱིས་སེམས་ཅན་བྱང་ཆུབ་ལུང་ཡང་བསྟན། །སེམས་ཅན་མང་པོ་མཐའ་ཡས་ཁྱོད་ཀྱིས་བཏུལ། །བྱང་ཆུབ་མཆོག་རབ་ཏུ་ནི་བདག་ལུང་སྟོན། །དྲང་སྲོང་ཆེན་པོ་བདེན་བཞེད་ཤེས་རབ་མཆོག་།བདག་ནི་འགྲོ་བའི་ཉོན་མོངས་འཐབ་རྩོད་ཆེ། །སངས་རྒྱས་བྱང་ཆུབ་ལུང་སྟོན་དགོས་ཆེད་ལ། །སེམས་ཅན་བརྒྱ་དག་ཞི་བདེའི་ལམ་དུ་འཁོད། །རིགས་ཀྱི་བུ། གང་གི་ཚེ་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་གྱིས་དེ་བཞིན་གཤེགས་པ་རིན་པོ་ཆེའི་སྙིང་པོ་ལ་ཚིགས་སུ་བཅད་པ་དེ་དག་གིས་མངོན་པར་བསྟོད་དེ། དེ་ན་འདུག་པ་དེའི་མོད་ལ་ལྷ་དང ། དྲི་ཟ་དང ། མི་དང ། ཐམས་ཅད་དང་ལྡན་པའི་འཁོར་དེས་ལེགས་སོ་ཞེས་བྱ་བ་བྱིན་ནོ། །མདུན་ན་འདོན་གྱིས་གསོལ་པ། བཙུན་པ་བཅོམ་ལྡན་འདས། བདག་གིས་སྲོག་ཆགས་བྱེ་བ་ཕྲག་མང་པོ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་སྩལ་ཏེ། དེ་དག་གིས་ཀྱང་རང་རང་གི་སངས་རྒྱས་ཀྱི་ཞིང་རྒྱ་ཆེ་དགུ་དག་ཡོངས་སུ་བཟུང་ཞིང་འདུལ་བའི་སེམས་ཅན་ཡང་བསམ་པ་ཡོངས་སུ་དག་པ་དང ། དགེ་བའི་རྩ་བ་བསྲུངས་པ་དང ། གདུལ་སླ་བ་དག་ཡོངས་སུ་བཟུང་ལགས་སོ། །གང་དག་སྐར་མ་སྐྱོང་ལ་སོགས་པ་བྲམ་ཟེའི་ཁྱེའུ་རིག་བྱེད་ཀློག་པ་སྟོང་རྩ་བཞི་པོ་
351b
འདི་དག་ནི་དེ་བཞིན་གཤེགས་པས་བསྐལ་པ་བཟང་པོར་ལུང་བསྟན་ཏེ། སྐྱེས་བུ་དམ་པ་དེ་དག་གིས་ཀྱང་འདོད་ཆགས་དང ། ཞེ་སྡང་དང ། ང་རྒྱལ་སྤྱོད་པ་དག་ཐེག་པ་གསུམ་པོ་དག་གིས་འདུལ་བར་བགྱིད་ལགས་མོད་ཀྱི། འོན་ཀྱང་དེ་དག་གིས་ཉོན་མོངས་པའི་སྒྲིབ་པ་ཤས་ཆེ་བ་དང ། རྩོད་པའི་དུས་ཀྱི་སྙིགས་མ་དག་ཡོངས་སུ་སྤངས་པས། བཙུན་པ་བཅོམ་ལྡན་འདས། དེ་དག་གིས་ཀྱང་མཚམས་མ་མཆིས་པ་བགྱིད་པ་རྣམས་དང ། དམ་པའི་ཆོས་སྤོང་བ་རྣམས་དང ། འཕགས་པ་ལ་སྐུར་པ་འདེབས་པ་རྣམས་དང།་ལོག་པར་ལྟ་བ་རྣམས་དང ། འཕགས་པའི་ནོར་བདུན་དང་བྲལ་བ་རྣམས་དང ། ཕར་མི་འཛིན་པ་རྣམས་དང ། མར་མི་འཛིན་པ་རྣམས་དང ། དགེ་སྦྱོང་དུ་མི་འཛིན་པ་རྣམས་དང ། བྲམ་ཟེར་མི་འཛིན་པ་རྣམས་དང ། བགྱི་བ་མ་ལགས་པ་བགྱིད་པ་རྣམས་དང ། བསོད་ནམས་མ་ལགས་པ་བགྱིད་པ་རྣམས་དང ། འཇིག་རྟེན་ཕ་རོལ་ལ་འཇིགས་པར་མི་ལྟ་བ་རྣམས་དང ། ལེགས་པར་སྤྱོད་པ་གསུམ་བོ་དག་དོན་དུ་མི་གཉེར་བ་རྣམས་དང ། དེ་བཞིན་དུ་ལྷ་དང ། མི་རྣམས་ཀྱི་དཔལ་དང ། འབྱོར་བ་དག་ལ་བརྩོན་པ་རྣམས་ཉེས་པར་སྤྱོད་པ་གསུམ་པོ་དག་ལ་ཡང་དག་པར་ཞུགས་པ་རྣམས་དང ། དགེ་བ་བཅུའི་ལས་ཀྱི་ལམ་དང་བྲལ་བ་རྣམས་དང ། དགེ་བའི་བཤེས་གཉེན་ཐམས་ཅད་ཀྱིས་སྤངས་པ་
352a
༄#། །རྣམས་དང ། མཁས་པ་ཐམས་ཅད་ཀྱིས་བོར་བ་རྣམས་དང ། སྲིད་པའི་བཙོན་རར་ཆུད་པ་རྣམས་དང ། རྒྱུན་ཕྱོགས་སུ་འདས་པ་རྣམས་དང ། འགྱུར་བྱེད་ཀྱི་ཆུ་ཀླུང་དུ་ནུབ་པ་རྣམས་དང ། འཁོར་བའི་འདམ་དུ་བྱིང་བ་རྣམས་དང ། གཏི་མུག་གི་མུན་པ་དང་མ་བྲལ་བ་རྣམས་དང ། མི་དགེ་བའི་བགྱི་བ་ཐམས་ཅད་མ་བཏང་བ་རྣམས་དང ། སངས་རྒྱས་ཀྱི་ཞིང་སྟོང་པ་ཐམས་ཅད་དུ་བོར་བ་རྣམས་དང ། མི་དགེ་བའི་རྩ་བ་ཐམས་ཅད་དང་འགྲོགས་པར་གྱུར་པ་རྣམས་དང ། ལམ་ངན་པས་བཅོམ་པར་གྱུར་པ་རྣམས་དང ། ཉམ་ང་བ་ཆེན་པོ་ཐོབ་པར་གྱུར་པ་རྣམས་སྤངས་ལགས་ཏེ། དེའི་ཚེ་ན་བསྐལ་པ་བཟང་པོ་ལ་སངས་རྒྱས་ཀྱི་ཞིང་མི་མཇེད་ན་མིའི་ཚེ་ལོ་བཅུ་ཐུབ་པར་འགྱུར་བ་ཐམས་ཅད་སྐྱེས་བུ་དམ་པ་མཁས་པ་འདི་དག་གིས་སྤངས་ཤིང་བོར་བས་དེའི་ཚེ་སྲིད་པའི་དཔའ་ཀློང་དང ། འཁོར་བའི་འཁྲུལ་འཁོར་ན་སྐྱོབ་པ་མ་མཆིས་པ་དང།་སྐྱབས་མ་མཆིས་པ་དང ། དཔུང་གཉེན་མ་མཆིས་པ་དང ། སྡུག་བསྔལ་གྱི་སྣོད་དུ་གྱུར་པའི་སེམས་ཅན་དེ་དག་སྤངས་ནས་རང་རང་གི་སངས་རྒྱས་ཀྱི་ཞིང་བཟང་དགུ་ཡོངས་སུ་བཟུང་ཞིང་ཤིན་ཏུ་དུལ་བ་དང ། བསམ་པ་ཡོངས་སུ་དག་པ་དང ། དགེ་བའི་རྩ་བ་བསྐྲུན་པ་དང ། བརྩོན་འགྲུས་བརྩམས་པ་དང ། སངས་རྒྱས་མང་པོ་ལ་
352b
ལྷག་པར་བགྱི་བ་བགྱིས་པའི་འདུལ་བ་རྣམས་ཡོངས་སུ་བཟུང་བ་དེ་ལྟ་བུ་མ་ལགས་སམ། དེ་བཞིན་གཤེགས་པ་རིན་པོ་ཆེའི་སྙིང་པོས་བཀའ་སྩལ་པ། བྲམ་ཟེ། དེ་བཞིན་ཏེ།་སེམས་ཅན་བསམ་པ་ཇི་ལྟ་བ་བཞིན་དུ་སྨོན་ལམ་འདེབས་པར་བྱེད་ཅིང་སངས་རྒྱས་ཀྱི་ཞིང་གི་ཡོན་ཏན་བཀོད་པའང་ཡོངས་སུ་བཟུང་པ་རྣམས་ངས་ཀྱང་དེ་ཉིད་དུ་ལུང་བསྟན་ཏོ། །བྲམ་ཟེས་གསོལ་པ། བཙུན་པ་བཅོམ་ལྡན་འདས། བདག་ནི། དཔེར་ན། ཤིང་ཀང་ཀུ་ཤའི་འདབ་མ་བཞིན་དུ་སྙིང་འདར་ཞིང་བདག་གི་ཡིད་ནི་ཤིན་ཏུ་སྐྱོ་ལ་བདག་གི་ལུས་ཐམས་ཅད་ནི་ཤ་ཐང་བར་གྱུར་ཅིང་མཆིས་ན། བཙུན་པ་བཅོམ་ལྡན་འདས། གལ་ཏེ་དེའི་ཚེ་བྱང་ཆུབ་སེམས་དཔའ་རྣམས་ཀྱིས་སྤངས་ཤིང་རྩོད་པ་ཆེན་པོའི་དུས་ཀྱི་མུན་པར་འཕངས་ཏེ་ཐམས་ཅད་ཀྱིས་ཡོངས་སུ་སྤངས་པའི་སེམས་ཅན་རྣམས་བདག་གི་སྙིང་རྗེའི་གནས་སུ་འགྱུར་བ་ལྟ་ན། བཙུན་པ་བཅོམ་ལྡན་འདས། བདག་ཀྱང་མ་འོངས་པའི་དུས་བསྐལ་པ་གྲངས་མ་མཆིས་པ་གངྒཱའི་ཀླུང་གཅིག་གི་བྱེ་མ་སྙེད་འདས་ནས་བསྐལ་པ་གྲངས་མ་མཆིས་པ་གངྒཱའི་ཀླུང་གི་བྱེ་མ་སྙེད་གཉིས་པ་ལ་བབ་པ་ན་བསྐལ་པ་བཟང་པོ་དེ་ལ་སྐྱེ་དགུའི་ཚེ་ལོ་སྟོང་ཐུབ་པ་ན་སྡོད་ཅིང་བདག་ཡུན་རིང་པོ་དེ་སྲིད་དུ་བྱང་ཆུབ་ཀྱི་སྤྱད་པ་སྤྱོད་པ་ན་འཁོར་བས་ཡོངས་སུ་མི་སྐྱོ་བར་གྱུར་ཅིག་།བདག་
353a
༄#། །གིས་ཏིང་ངེ་འཛིན་གྱི་སྟོབས་ཀྱིས་ཡུན་རིང་པོས་སྨིན་པར་བགྱི་འཚལ་བའི་འདུལ་བ་རྣམས་ཡོངས་སུ་འཛིན་པ་ལ་སྤྲོ་བར་བགྱི་ཞིང་ཕ་རོལ་ཏུ་ཕྱིན་པ་དྲུག་ལ་སྤྱོད་པ་ན་འདུལ་བ་རྣམས་ཡོངས་སུ་གཟུང་བར་བགྱི་སྟེ། བདག་གིས་བཅོམ་ལྡན་འདས་ལས་དངོས་པོའི་མཚན་མ་ཡོངས་སུ་བཏང་བ་དེ་ནི་སྦྱིན་པའི་ཕ་རོལ་ཏུ་ཕྱིན་པ་ལགས་སོ་ཞེས་ཐོས་པས་བདག་གིས་དེ་ལྟ་བུའི་སྦྱིན་པའི་ཕ་རོལ་ཏུ་ཕྱིན་པ་སྤྱད་པར་བགྱི་སྟེ། ཇི་ལྟར་ཚེ་རབས་གཞན་དག་ན་སློང་མོ་བའི་སེམས་ཅན་དཔག་ཏུ་མ་མཆིས་པ་དག་མཆིས་པར་འགྱུར་ནའང་དེ་དག་ལ་ཡོངས་སུ་གཏོང་བ་འདི་ལྟ་བུ་དག་ཡོངས་སུ་གཏོང་བར་གྱུར་ཅིག་།འདི་ལྟ་སྟེ། ཟས་དང ། སྐོམ་དང ། བཟའ་བ་དང།་བཅའ་བ་དང ། བཏུང་བ་དང ། བལྡག་པ་དང ། གོས་དང ། མལ་ཆ་དང ། སྟན་དང ། གནས་དང ། མེ་ཏོག་ཕྲེང་དང ། སྤོས་དང ། བྱུག་བ་དང ། ན་བའི་གསོས་སྨན་གྱི་སྦྱིན་པ་དང ། གདུགས་དང ། རྒྱལ་མཚན་དང ། བ་དན་དང ། ནོར་དང ། འབྲུ་དང ། གླང་པོ་ཆེ་དང ། རྟ་དང ། ཤིང་རྟ་དང ། གསེར་དང ། དངུལ་དང ། འགྲོན་བུ་དང ། ནོར་བུ་དང ། མུ་ཏིག་དང ། བཻ་ཌཱུརྱ་དང ། མན་ཤེལ་དང ། བྱུ་རུ་དང ། དངུལ་ཆེན་དང ། ས་ལེ་སྦྲམ་གྱི་སྦྱིན་པ་ཐམས་ཅད་ཡང་དང་ཡང་དུ་ཡོངས་སུ་གཏོང་བ་ན་བདག་ཀྱང་འདི་
353b
ལྟར་མཆོག་ཏུ་དགའ་ཞིང་སྙིང་རྗེའི་ཡིད་ཀྱིས་འབྲས་བུ་མི་འཚལ་བར་སེམས་ཅན་རྣམས་ལ་སྩལ་ནས་སེམས་ཅན་ཡོངས་སུ་སྨིན་པར་བགྱི་བའི་དོན་དང ། འདུལ་བས་སེམས་ཅན་རྣམས་ལ་ཕན་གདགས་པའི་སླད་དུ་བཏང་བའི་ཚོགས་རྣམས་ཡོངས་སུ་གཏོང་བར་གྱུར་ཅིག་།གལ་ཏེ་ཡང་བཏང་བར་དཀའ་བ་སློང་བའི་སེམས་ཅན་དག་མཆིས་ནས་འདི་ལྟ་སྟེ། བྲན་དང ། བྲན་མོ་དང ། གྲོང་དང ། གྲོང་ཁྱེར་དང ། རྒྱལ་སྲིད་དང ། མཆིས་བྲང་དང ། བུ་དང ། བུ་མོ་དང ། ལག་པ་ཡོངས་སུ་བཏང་བ་དང ། རྐང་པ་ཡོངས་སུ་བཏང་བ་དང།་རྣ་བ་དང ། སྣ་དང ། མིག་དང ། ལྕེ་དང ། པགས་པ་དང ། ཁྲག་དང ། རུས་པ་དང ། ལུས་དང ། སྲོག་དང ། མགོ་ཡོངས་སུ་བཏང་བ་དེ་ལྟ་བུའི་ཡོངས་སུ་གཏོང་བ་དག་སློང་བར་བགྱིད་ནའང་མཆོག་ཏུ་དགའ་ཞིང་སྙིང་རྗེའི་ཡིད་ཀྱིས་འབྲས་བུ་མི་འཚལ་བར་འདུལ་བ་རྣམས་ལ་ཕན་གདགས་པའི་སླད་དུ་སེམས་ཅན་རྣམས་ལ་སྦྱིན་པ་སྦྱིན་པར་གྱུར་ཅིག་།བདག་གིས་འདི་ལྟ་བུའི་སྦྱིན་པའི་ཕ་རོལ་ཏུ་ཕྱིན་པ་ལའང་སྤྱད་པར་བགྱི་སྟེ། གང་སྔོན་ཆད་ནམ་ཡང་སེམས་ཅན་གང་གིས་ཀྱང་དེ་ལྟ་བུའི་ཡོངས་སུ་གཏོང་བ་ཡོངས་སུ་བཏང་བར་མ་གྱུར་པ་དང ། སླད་ཆད་ཀྱང་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སླད་དུ་སྤྱད་པ་སྤྱོད་པ་གང་ཡང་དེ་ལྟ་བུའི་ཡོངས་སུ་
354a
༄#། །གཏོང་བ་ཡོངས་སུ་གཏོང་བར་མི་འགྱུར་བ་དེ་ལྟ་བུ་ཡོངས་སུ་གཏོང་བ་དག་ཡོངས་སུ་གཏོང་བར་གྱུར་ཅིག་།གང་དག་ཚེ་རབས་གཞན་ན་བསྐལ་པ་བྱེ་བ་ཁྲག་ཁྲིག་འབུམ་ཕྲག་གྲངས་མ་མཆིས་པ་དེ་དང་དེ་དག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སླད་དུ་སྤྱད་པ་སྤྱོད་པ་ནའང་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པར་གྱུར་ཅིག་།བདག་གིས་སླད་མའི་བྱང་ཆུབ་སེམས་དཔའ་སྙིང་རྗེ་ཆེན་པོ་དང་ལྡན་པ་གང་ལགས་པ་རྣམས་ཀྱང་ཡོངས་སུ་གཏོང་བའི་ཚུལ་གྱི་ཡོན་ཏན་ལ་འགོད་པར་གྱུར་ཅིག་།ཉོན་མོངས་པའི་གཡུལ་རབ་ཏུ་ཞི་བ་གང་ལགས་པ་དེ་ནི། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལགས་ཏེ། དེ་ལྟར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སླད་དུ་སྤྱད་པ་སྤྱོད་པ་ན་རྟག་པར་ཚུལ་ཁྲིམས་དང་བརྟུལ་ཞུགས་སྣ་ཚོགས་ཀྱི་དཀའ་བ་སྤྱད་པ་སྤྱོད་པར་གྱུར་ཅིག་།ཇི་ལྟར་སྔར་སྨོས་པ་བཞིན་དུ་ཡུལ་རྣམས་ལ་མི་བཟོད་པ་མ་མཆིས་པ་དང ། བདག་ལ་སོ་སོར་རྟོག་པའི་བར་གང་ལགས་པ་དེ་ནི་བཟོད་པའི་ཕ་རོལ་ཏུ་ཕྱིན་པ་ལགས་ཏེ། བདག་དེ་ལྟ་བུའི་བཟོད་པ་སྒོམ་པར་གྱུར་ཅིག་།ཇི་ལྟར་སྔར་སྨོས་པ་བཞིན་དུ་འདུས་བྱས་ཐམས་ཅད་དབེན་པ་ཉིད་དང ། འདུས་མ་བྱས་ཐམས་ཅད་ཞི་བར་སྒོམ་པ་ལ་བརྩོན་ཞིང་བླ་ན་མེད་པའི་སྤྱོད་པ་ལས་སླར་མི་ལྡོག་པ་གང་
354b
ལགས་པ་དེ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལགས་སོ། འདུ་བྱེད་ཐམས་ཅད་ལ་ཕྱིན་ཅི་ལོག་སྤང་བའི་སླད་དུ་སྟོང་པ་ཉིད་ལ་སྤྱོད་པ་གང་ལགས་པ་དེ་ནི་བསམ་གཏན་གྱི་ཕ་རོལ་ཏུ་ཕྱིན་པ་ལགས་སོ། །རང་བཞིན་གྱིས་མི་སྐྱེ་བའི་ཆོས་ལ་བཟོད་པ་གང་ལགས་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལགས་ཏེ། གང་དག་བསྐལ་པ་བྱེ་བ་ཁྲག་ཁྲིག་དཔག་ཏུ་མ་མཆིས། གྲངས་མ་མཆིས་པ་དག་ཏུ་སྤྲོ་བ་བརྟན་པོའི་སྟོབས་ཀྱི་ཤུགས་ཀྱིས་སྤྱོད་པ་ལ། ཇི་ལྟར་སྔན་ཆད་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སླད་དུ་སྤྱད་པ་སྤྱོད་པ་ལགས་ཀྱང་དེ་ལྟར་སྤྲོ་བ་བརྟན་པོའི་སྟོབས་ཀྱི་ཤུགས་ཀྱིས་ཤེས་རབ་ཀྱི་ཕ་རོལ་ཕྱིན་པ་ལ་མ་སྤྱད་ཅིང ། སླད་ཀྱིས་བྱང་ཆུབ་སེམས་དཔའ་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སླད་དུ་སྤྱད་པ་སྤྱོད་པར་འགྱུར་བ་དག་ཀྱང་དེ་ལྟར་སྤྲོ་བ་བརྩན་པའི་སྟོབས་ཀྱི་ཤུགས་ཀྱིས། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པར་མི་འགྱུར་བ་དེ་ལྟ་བུ་ལ་བདག་སྤྱོད་པར་གྱུར་ཅིག་།སླད་མའི་བྱང་ཆུབ་སེམས་དཔའ་སྙིང་རྗེ་ཆེན་པོ་དང་ལྡན་པ་གང་ལགས་པ་རྣམས་ཀྱང་ཚུལ་གྱི་ཡོན་ཏན་ལ་འགོད་པར་གྱུར་ཅིག་།བདག་གིས་སེམས་དང་པོ་བསྐྱེད་པས་ཀྱང་སླད་མའི་བྱང་ཆུབ་སེམས་དཔའ་རྣམས་ཀྱི་སྙིང་རྗེ་ཆེན་པོ་འགྲུབ་པར་གྱུར་ཅིག་།བླ་ན་མེད་པ་ཡོངས་སུ་མྱ་ངན་ལས་འདས་
355a
༄#། །པའི་བར་དུ་བྱང་ཆུབ་སེམས་དཔའ་རྣམས་ངོ་མཚར་དུ་འཛིན་པར་བགྱི་བའི་སླད་དུ་བདག་སྦྱིན་པ་ལ་རློམ་སེམས་མ་མཆིས་པར་སྤྱོད་པར་གྱུར་ཅིག།་ཚུལ་ཁྲིམས་ལ་གནས་པ་མ་མཆིས་པ་དང ། བཟོད་པ་ལ་རློམ་སེམས་མ་མཆིས་པ་དང ། བརྩོན་འགྲུས་ལ་བླང་བ་མ་མཆིས་པ་དང ། བསམ་གཏན་རྣམས་ལ་གནས་པ་མ་མཆིས་པ་དང ། ཤེས་རབ་ལ་གཉིས་སུ་མ་མཆིས་པར་སྤྱོད་པར་གྱུར་ཅིག་།སེམས་ཅན་འཕགས་པའི་ནོར་བདུན་དང་བྲལ་བ་རྣམས་དང ། སངས་རྒྱས་ཀྱི་ཞིང་སྟོང་པ་ཐམས་ཅད་བོར་བ་རྣམས་དང ། དམ་པའི་ཆོས་སྤོང་བ་རྣམས་དང ། འཕགས་པ་ལ་སྐུར་བ་འདེབས་པ་རྣམས་དང ། ལོག་པར་ལྟ་བ་རྣམས་དང ། མི་དགེ་བའི་རྩ་བ་དང ། འགྲོགས་ཤིང་ཉམ་ང་བ་ཐོབ་པ་རྣམས་དང ། ལམ་ངན་པས་བཅོམ་པར་གྱུར་བའི་སེམས་ཅན་རྣམས་ཀྱི་དོན་དུ་བདག་འབྲས་བུ་མི་འཚལ་བར་སྤྲོ་བ་བརྟན་པོའི་སྟོབས་ཀྱི་ཤུགས་ཀྱིས་ཕ་རོལ་ཏུ་ཕྱིན་པ་རྣམས་ལ་སྤྱོད་པར་གྱུར་ཅིག་།བདག་གིས་སེམས་ཅན་རེ་རེའི་དོན་དུའང་སེམས་ཀྱི་རྒྱུད་ལ་དགེ་བའི་རྩ་བའི་ས་བོན་བཞག་པའི་སླད་དུ་བསྐལ་བ་ཆེན་པོ་བཅུར་ཡང་སེམས་ཅན་དམྱལ་བ་མནར་མེད་པའི་སྡུག་བསྔལ་གྱི་ཚོར་བ་ལ་སྤྲོ་བར་གྱུར་ཅིག་།དེ་བཞིན་དུ་དུད་འགྲོ་རྣམས་དང ། ཡི་དྭགས་རྣམས་དང ། གནོད་སྦྱིན་དབུལ་པོ་
355b
རྣམས་དང ། མི་དབུལ་པོ་རྣམས་ཀྱི་སྡུག་བསྔལ་གྱི་ཚོར་བ་ལའང་སྤྲོ་བར་གྱུར་ཅིག་།ཇི་ལྟར་སེམས་ཅན་གཅིག་གི་སེམས་ཀྱི་རྒྱུད་ལ་དགེ་བའི་རྩ་བའི་ས་བོན་འཇོག་པ་ལྟར་སེམས་ཅན་ཐམས་ཅད་ལའང་དེ་བཞིན་དུ་གྱུར་ཅིག་།ཆད་པ་སྟོང་པ་ལྟ་བུ་དང ། སེམས་ཀྱི་རྒྱུད་ཚིག་པའི་འདུལ་བ་དེ་ལྟ་བུ་དག་ཡོངས་སུ་འཛིན་པར་གྱུར་ཅིག་།བདག་གིས་སྲིད་པ་ཐ་མ་པ་བྱང་ཆུབ་མངོན་པར་རྫོགས་པར་འཚང་རྒྱ་བར་བགྱི་བའི་སླད་དུ་སྐྱེ་བ་གཅིག་གིས་ཐོགས་ཤིང་དགའ་ལྡན་གྱི་གནས་ན་དུས་ལ་སྡོད་ཅིང་མཆིས་པ་མ་གཏོགས་པར་བསྐལ་པའི་མཐའི་བར་དུའང་ལྷའི་བདེ་བ་སྐྱེ་བ་དག་དོན་དུ་མི་གཉེར་བར་བདག་གིས་ཡུན་རིང་པོ་དེ་སྲིད་དུ་འཁོར་བར་སངས་རྒྱས་བཅོམ་ལྡན་འདས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་ལ་བསྙེན་བཀུར་བགྱིས་ནས་བདག་སངས་རྒྱས་རེ་རེ་ལའང་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ཀྱི་མཆོད་པ་རྣམ་པ་སྣ་ཚོགས་དག་བགྱིད་པར་གྱུར་ཅིག་།སངས་རྒྱས་རེ་རེ་ལས་ཀྱང་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ཀྱི་ཡོན་ཏན་དག་རྟོགས་པར་གྱུར་ཅིག་།སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་རྣམས་ཀྱང་བྱང་ཆུབ་ཡང་དག་པར་འཛིན་དུ་སྩོལ་བར་གྱུར་ཅིག་།དེ་བཞིན་དུ་བདག་གིས་རང་སངས་རྒྱས་ཀྱི་ཐེག་པ་དང ། དེ་བཞིན་དུ་ཉན་ཐོས་ཀྱི་ཐེག་པ་པའི་སེམས་ཅན་རྣམས་ཀྱང་བསམ་པ་
356a
༄#། །ཇི་ལྟ་བ་བཞིན་དུ་ཡང་དག་པར་འཛིན་དུ་སྩོལ་བར་གྱུར་ཅིག་།འཇིག་རྟེན་ན་སངས་རྒྱས་འབྱུང་བ་མ་མཆིས་ནའང་བདག་གི་དྲང་སྲོང་གི་བརྟུལ་ཞུགས་ཀྱིས་སེམས་ཅན་རྣམས་དགེ་བ་བཅུའི་ལས་ཀྱི་ལམ་ལ་སྦྱོར་བར་གྱུར་ཅིག་།ཏིང་ངེ་འཛིན་རྣམས་དང ། མངོན་པར་ཤེས་པ་དག་ལའང་སྦྱོར་བར་གྱུར་ཅིག་།བདག་གིས་སེམས་ཅན་ལྟ་བ་ལ་ཆགས་ཤིང་དབང་ཕྱུག་ཆེན་པོ་ལ་དད་པ་རྣམས་དབང་ཕྱུག་ཆེན་པོའི་གཟུགས་ཀྱིས་དགེ་བ་རྣམས་ལ་སྦྱོར་བར་གྱུར་ཅིག་།བདག་གིས་སེམས་ཅན་སྲེད་མེད་ཀྱི་བུ་དང ། ཟླ་བ་དང ། ཉི་མ་དང ། ཚངས་པའི་བར་དག་ལ་དད་པ་རྣམས་ཀྱང་ཚངས་པའི་གཟུགས་ཀྱིས་དགེ་བའི་ཆོས་རྣམས་ལ་སྦྱོར་བར་གྱུར་ཅིག་།དེ་བཞིན་དུ་ནམ་མཁའ་ལྡིང་རྣམས་ལའང་ནམ་མཁའ་ལྡིང་གི་གཟུགས་དང ། བརྒྱ་བྱིན་གྱི་བར་ལའང་བརྒྱ་བྱིན་གྱི་གཟུགས་ཀྱི་ས་དགེ་བའི་སྤྱོད་པ་དག་ལ་སྦྱོར་བར་གྱུར་ཅིག་།སེམས་ཅན་ལྟོགས་པ་རྣམས་ལའང་རང་གི་ཤ་དང ། ཁྲག་གིས་ཚིམ་པར་བགྱིད་པར་གྱུར་ཅིག་།སེམས་ཅན་སྡུག་བསྔལ་བར་གྱུར་པ་རྣམས་ལའང་རང་གི་ལུས་དང་སྲོག་གིས་ཡོངས་སུ་སྐྱོབ་པར་གྱུར་ཅིག་།བཙུན་པ་བཅོམ་ལྡན་འདས། བདག་ཡུན་རིང་པོ་དེ་སྲིད་དུ་སེམས་ཀྱི་རྒྱུད་ཚིག་ཅིང་དགེ་བའི་རྩ་བ་ཡོངས་སུ་ཉམས་པ་རྣམས་ཀྱི་དོན་དུ་སྟོབས་པོ་ཆེའི་
356b
ཤུགས་ཀྱིས་སྤྱད་པ་སྤྱོད་པ་ནི་བདག་གིས་ཡུན་རིང་པོ་དེ་སྲིད་དུ་འཁོར་བར་སེམས་ཅན་རྣམས་ཀྱི་སླད་དུ་གཏུམ་པ་དང ། བརླང་བ་དང ། མི་བཟད་པ་སྣ་ཚོགས་ཀྱི་སྡུག་བསྔལ་དག་ནོད་པར་གྱུར་ཅིག་།བསྐལ་པ་གྲངས་མ་མཆིས་པ་གངྒཱའི་ཀླུང་གཅིག་གི་བྱེ་མ་སྙེད་ཀྱི་བར་དག་འདས་ནས་ལྷག་མ་བསྐལ་པ་གྲངས་མ་མཆིས་པ་གངྒཱའི་ཀླུང་གི་བྱེ་མ་སྙེད་གཉིས་པ་ལ་བབ་སྟེ། བསྐལ་པ་བཟང་པོ་ལ་ཐུག་པ་ན་གང་གི་ཚེ་བྲམ་ཟེའི་ཁྱེའུ་སྐར་མ་སྐྱོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་དེ་བཞིན་གཤེགས་པ་འཁོར་བ་འཇིག་ཅེས་བགྱི་བར་འགྱུར་བ་དེའི་ཚེ་དེའི་དུས་ན་བདག་གིས་འཕགས་པའི་ཤེས་རབ་ཀྱི་མིག་གིས་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་ན། སངས་རྒྱས་བཅོམ་ལྡན་འདས་དག་ཆོས་དང་ལྡན་པའི་ཆོས་ཀྱི་འཁོར་ལོ་བསྐོར་ནས་བཞུགས་ཏེ་འཚོ་ཞིང་གཞེས་པ་དག་མཐོང་པར་གྱུར་ཅིག་།བདག་གིས་སེམས་ཅན་སེམས་ཀྱི་རྒྱུད་ཚིག་པ་རྣམས་དང ། མི་དགེ་བའི་རྩ་བ་དང་འགྲོགས་པ་རྣམས་དང ། ནོར་བདུན་དང་བྲལ་བ་རྣམས་དང ། སངས་རྒྱས་ཀྱི་ཞིང་སྟོང་པར་བོར་བ་རྣམས་དང ། མཚམས་མ་མཆིས་པ་བགྱིད་པ་རྣམས་དང ། དམ་པའི་ཆོས་སྤོང་བ་རྣམས་དང ། ལམ་ངན་པའི་བར་གྱིས་བཅོམ་པ་རྣམས་དང ། ཉམ་ང་བ་
357a
༄#། །ཐོབ་པ་གང་དག་དང་པོར་བླ་ན་མེད་པ་ཡང་དག་པར་རྫོགས་བྱང་ཆུབ་ཡང་དག་པར་འཛིན་དུ་སྩལ་ཅིང་བཙུད་དེ་རབ་ཏུ་བཀོད་པའི་སེམས་ཅན་དེ་དག་བདག་གིས་དང་པོར་སྦྱིན་པའི་ཕ་རོལ་ཏུ་ཕྱིན་པ་ཡང་དག་པར་འཛིན་དུ་སྩོལ་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པའི་བར་དག་ཀྱང་ཡང་དག་པར་འཛིན་དུ་སྩོལ་ལ་འདུལ་ཞིང་འཛུད་དེ་རབ་ཏུ་འགོད་པར་གྱུར་ཅིག་།བདག་གིས་སེམས་ཅན་དེ་དག་གི་དགེ་བའི་རྩ་བའི་ས་བོན་དེའང་བླ་ན་མེད་པའི་མྱ་ངན་ལས་འདས་པ་ལ་འཇོག་ཅིང་ངན་སོང་རྣམས་ལས་ཡོངས་སུ་ཐར་བར་བགྱིད་པར་གྱུར་ཅིག་།ཤེས་རབ་དང་བསོད་ནམས་ཀྱི་ཚོགས་ལ་སྦྱོར་བར་ཡང་གྱུར་ཅིག་།སངས་རྒྱས་བཅོམ་ལྡན་འདས་དག་བཞུགས་ཏེ་འཚོ་ཞིང་གཞེས་པའི་སངས་རྒྱས་ཀྱི་ཞིང་དེ་དག་ཏུ་འབུལ་བར་ཡང་གྱུར་ཅིག་།དེའི་ཚེ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པའང་ཐོབ་པར་གྱུར་ཅིག་།ཏིང་ངེ་འཛིན་དང ། གཟུངས་དང ། བཟོད་པ་དག་ཀྱང་ཐོབ་པར་གྱུར་ཅིག་།ས་ནོན་པར་ཡང་གྱུར་ཅིག་།བདག་གིས་སེམས་ཅན་དེ་དག་སངས་རྒྱས་ཀྱི་ཞིང་གི་ཡོན་ཏན་བཀོད་པའི་སྨོན་ལམ་ཡང་དག་པར་འཛིན་དུ་སྩོལ་ཅིང་སློབ་ཏུ་སྩོལ་པར་ཡང་གྱུར་ཅིག་།དེ་དག་ཀྱང་ཇི་ལྟར་འཚལ་བའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་ཀྱང་འཛིན་པར་གྱུར་ཅིག་།གང་གི་ཚེ་བསྐལ་
357b
པ་བཟང་པོ་ལ་བབ་སྟེ། རྒྱལ་བ་ཉི་མ་འཁོར་བ་འཇིག་ཤར་བ་དེའི་ཚེ་བདག་གིས་ཕྱོགས་བཅུའི་སངས་རྒྱས་ཀྱི་ཞིང་རྡུལ་ཕྲ་རབ་ཀྱི་རྡུལ་སྙེད་དག་ན། སངས་རྒྱས་བཅོམ་ལྡན་འདས་གང་དག་བཞུགས་ཏེ་འཚོ་ཞིང་གཞེས་ལ་སེམས་ཅན་རྣམས་ལ་ཆོས་ཀྱང་སྟོན་པ་དག་ཀྱང་མཐོང་བར་གྱུར་ཅིག་།དེའི་ཚེ་ན་བདག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་བ་འཇིག་མངོན་པར་རྫོགས་པར་སངས་རྒྱས་ནས་རིང་པོར་མ་ལགས་པའི་དྲུང་དུ་མཆི་བར་གྱུར་ཅིག་།མཆིས་ནས་ཀྱང་མཆོད་པ་སྣ་ཚོགས་བགྱིད་པར་གྱུར་ཅིག་།ཞུ་བ་ཡོངས་སུ་ཞུ་བར་ཡང་གྱུར་ཅིག་།རབ་ཏུ་འབྱུང་བར་ཡང་གྱུར་ཅིག་།ཚུལ་ཁྲིམས་དང ། ཐོས་པ་དང ། ཏིང་ངེ་འཛིན་དག་ལ་མངོན་པར་བརྩོན་པར་ཡང་གྱུར་ཅིག་།ཆོས་ཀྱི་མཆོག་སྟོན་པར་ཡང་གྱུར་ཅིག་།དེའི་ཚེ་ན་སེམས་ཅན་གང་དག་སེམས་ཀྱི་རྒྱུད་ཚིག་པ་རྣམས་དང ། མི་དགེ་བའི་རྩ་བ་དང་འགྲོགས་པར་གྱུར་པ་རྣམས་དང ། ལྟ་བའི་ལམ་དུ་ཞུགས་པ་རྣམས་དང ། མཚམས་མ་མཆིས་པ་བགྱིད་པ་རྣམས་དང ། ལམ་ངན་པས་བཅོམ་པར་གྱུར་པ་རྣམས་དང ། ཉམ་ང་བ་ཆེན་པོ་ཐོབ་པར་གྱུར་པའི་སེམས་ཅན་དེ་དག་ལའང་ཆོས་སྟོན་པར་གྱུར་ཅིག་།བདག་འདུལ་བ་དེ་དག་ཀྱང་རབ་ཏུ་འཛིན་པར་གྱུར་ཅིག་།རྒྱལ་བའི་ཉི་མ་ནུབ་པ་དེའི་ཚེ་ན་བདག་ལྷུན་གྱིས་གྲུབ་པས་སངས་རྒྱས་ཀྱི་མཛད་
358a
༄#། །བགྱིད་པར་འགྱུར་ཞིང ། སྐྱེ་དགུ་རྣམས་ཚེ་ལོ་བརྒྱ་བར་གྱུར་གྱི་བར་དུ་སེམས་ཅན་རྣམས་བསོད་ནམས་བགྱི་བའི་དངོས་པོ་གསུམ་པོ་དག་ལ་སྦྱོར་བར་གྱུར་ཅིག་།དུས་དེ་ལ་བབ་པ་ན་ལྷའི་འཇིག་རྟེན་དུ་མཆིས་ནས་ལྷ་རྣམས་ལ་ཆོས་སྟོན་པར་འགྱུར་ཞིང་འདུལ་བ་རྣམས་ཀྱང་རབ་ཏུ་འཛིན་པར་གྱུར་ཅིག་།སེམས་ཅན་རྣམས་ཀྱི་ཚེ་ལོ་བརྒྱ་ཉི་ཤུ་པའི་བར་དུ་གྱུར་པ་ན་བདེ་བ་དང ། དབང་ཕྱུག་དང ། རིགས་དང ། གཟུགས་ཀྱི་དྲེགས་པས་མྱོས་ཤིང་སེར་སྣ་ཅན་དུ་གྱུར་ཏེ། སྙིགས་མ་ལྔའི་མུན་པར་ཆུད་པའི་སེམས་ཅན་འདོད་ཆགས་བདོ་བ། ཞེ་སྡང་བདོ་བ། གཏི་མུག་བདོ་བ། ང་རྒྱལ་བདོ་བ། སྡིག་པ་དང ། ཕྲག་དོག་དང ། སེར་སྣ་བདོ་བ། ཆོས་མ་ལགས་པ་ལ་འདོད་ཆགས་ཀྱིས་ཆགས་པ། ཆོས་མ་ལགས་པའི་ལོངས་སྤྱོད་འཚོལ་བ། ལོག་པར་ལྟ་བ། ཕྱིན་ཅི་ལོག་ཏུ་མཐོང་བ། འཕགས་པའི་ནོར་བདུན་དང་བྲལ་བ། ཕ་ར་མི་འཛིན་པ། མར་མི་འཛིན་པ། དགེ་སྦྱོང་དུ་མི་འཛིན་པ། བྲམ་ཟེར་མི་འཛིན་པ། བགྱི་བ་མ་ལགས་པ་བགྱིད་པ། བསོད་ནམས་མ་ལགས་པ་བགྱིད་པ། འཇིག་རྟེན་ཕ་རོལ་ལ་འཇིགས་པར་མི་བལྟ་བ། བསོད་ནམས་བགྱི་བའི་དངོས་པོ་གསུམ་པོ་དག་ལ་མི་བརྩོན་པ། ཐེག་པ་གསུམ་དོན་དུ་མི་གཉེར་བ། ལེགས་པར་སྤྱོད་པ་གསུམ་ལ་མི་བརྩོན་
358b
པ།་ཉེས་པར་སྤྱོད་པ་གསུམ་ལ་བརྩོན་པ། དགེ་བ་བཅུའི་ལས་ཀྱི་ལམ་ལ་མི་བརྩོན་པ། མི་དགེ་བ་བཅུའི་ལས་ཀྱི་ལམ་ལ་བརྩོན་པ། ཕྱིན་ཅི་ལོག་བཞི་ཉམས་པ། རྒུད་པ་བཞི་ལ་གནས་པ། བདུད་བཞིའི་དབང་དུ་མཆིས་པ། ཆུ་བོ་བཞིས་དེད་པ། སྒྲིབ་པ་ལྔའི་དབང་དུ་མཆིས་པའི་སེམས་ཅན་དག་འབྱུང་བར་འགྱུར་ལགས་སོ། །དབང་པོ་དྲུག་གི་དྲེགས་པས་མྱོས་པ། ལོག་པ་བརྒྱད་ལ་ཞུགས་པ། འདོད་པའི་ཉམ་ང་བ་ཐོབ་པ། བག་ལ་ཉལ་ཀུན་ནས་སློང་བ། ལྷ་དང་མིའི་དཔལ་དང ། འབྱོར་པ་དོན་དུ་མི་གཉེར་བ་ཕྱིན་ཅི་ལོག་གི་ལྟ་བ་ཅན། ལམ་ངན་པས་བཅོམ་པ། མཚམས་མ་མཆིས་པ་བགྱིད་པ། དམ་པའི་ཆོས་སྤོང་བ། འཕགས་པ་ལ་སྐུར་བ་འདེབས་པ། དགེ་བའི་རྩ་བ་ཐམས་ཅད་ལས་ཡོངས་སུ་ཉམས་པ།་ཁཝ་ལྟར་མུ་ཅོར་སྨྲ་བ། བྱས་པ་མི་བཟོ་བ། དྲན་པ་ཉམས་པ། དགེ་བ་ལ་སྨོད་པ། ཤེས་རབ་འཆལ་པ། ཐོས་པ་ཉུང་བ། ཚུལ་ཁྲིམས་འཆལ་པ། ཚུལ་འཆོས་པ། སེར་སྣ་ཅན།་ཕན་ཚུན་མི་སྙན་པ་བརྗོད་པ། གཅིག་ལ་གཅིག་མི་གུས་པ། ལེ་ལོ་ཅན་དབང་པོ་མ་ཚང་བ། ཉམ་ཆུང་བ། གོས་མ་མཆིས་པ། མི་དགེ་བའི་བཤེས་གཉེན་གྱིས་ཟིན་པ། བསམ་སྤ་དང་དྲན་པའི་སྙིང་པོ་ཉམས་པ། ནད་སྣ་ཚོགས་ཀྱིས་ཉེན་པ། ཉོན་མོངས་པར་གྱུར་པ། མདོག་ངན་པ་མི་སྡུག་པ། ངོ་ཚ་མ་མཆིས་པ། ཁྲེལ་མ་མཆིས་པ། གཅིག་གིས་
359a
༄#། །གཅིག་འཇིགས་པ། གང་དག་སྔ་དྲོ་གཅིག་ལ་ལུས་དང་ངག་དང་ཡིད་ཀྱིས་ཉེས་པར་སྤྱོད་པ་མང་དུ་སྤྱོད་པ་དེ་དག་ལ་བསྟོད་ཅིང་ཐེར་ཟུག་ཏུ་བལྟ་བའི་སེམས་ཅན་དག་ཀྱང་འབྱུང་བར་འགྱུར་ལགས་སོ། །ཕུང་པོ་ལྔ་ལ་མངོན་པར་ཞེན་པའི་སེམས་དང ། འདོད་པའི་ཡོན་ཏན་ལྔ་ལ་འཆུམས་པའི་སེམས་དང ། སྡང་བའི་སེམས་དང ། གནོད་སེམས་ཀྱི་སེམས་དང ། ཁོན་དུ་འཛིན་པའི་སེམས་དང ། རྣམ་པར་འཚེ་བའི་སེམས་དང ། རྙོག་པའི་སེམས་དང ། རྩུབ་པའི་སེམས་དང ། འཁྲུགས་པའི་སེམས་དང ། མ་དུལ་བའི་སེམས་དང ། གནོད་པའི་སེམས་དང ། རྒོད་ངའི་སེམས་དང ། ཆོས་མ་ལགས་པ་ལ་མངོན་པར་ཞེན་པའི་སེམས་དང ། ཁྱད་པར་ལ་མི་གནས་པའི་སེམས་དང ། ཕན་ཚུན་ནོངས་པ་རྩོམ་པའི་སེམས་དང ། འཇུངས་པའི་སེམས་དང ། གཅིག་ལ་གཅིག་གསོད་པའི་སེམས་དང ། ཆོས་ཡོངས་སུ་སྤངས་པའི་སེམས་དང ། མི་བརྩོན་པའི་སེམས་དང ། ཆོས་རྣམས་ལ་ནོངས་པར་བརྩོན་པའི་སེམས་དང ། མི་དགེ་བ་སྐྱེད་པའི་སེམས་དང ། མྱ་ངན་ལས་འདས་པ་ཞི་བ་མི་འཚོལ་བའི་སེམས་དང།་སྦྱིན་གནས་མ་ལགས་པའི་སེམས་དང ། ཀུན་ཏུ་སྦྱོར་བ་དང ། འཆིང་བ་ཐམས་ཅད་ཡང་དག་པར་སྒྲུབ་པའི་སེམས་དང ། ནད་དང ། རྒ་བ་དང ། འཆི་བ་ལ་ཡིད་རྟོན་
359b
པའི་སེམས་དང ། ཀུན་ཏུ་སྦྱོར་བ་ཐམས་ཅད་ཀྱིས་གནས་པའི་སེམས་དང ། སྒྲིབ་པ་ཐམས་ཅད་ཡོངས་སུ་འཛིན་པའི་སེམས་དང ། ཆོས་ཀྱི་རྒྱལ་མཚན་བསྒྱེལ་བར་བགྱི་བའི་སེམས་དང ། ལྟ་བའི་རྒྱལ་མཚན་བསྒྲེང་བར་བགྱི་བའི་སེམས་དང ། ཕན་ཚུན་མི་སྙན་པ་རྗོད་པའི་སེམས་དང ། གཅིག་གིས་གཅིག་བཟའ་བའི་སེམས་དང ། ཕན་ཚུན་འཚེ་བ་ལ་དབང་བགྱིད་པའི་སེམས་དང ། ཞེ་སྡང་ཡང་དག་པར་འཛིན་པའི་སེམས་དང ། གཅིག་ལ་གཅིག་ཀུན་ནས་མནར་སེམས་ཀྱི་སེམས་དང ། འདོད་པ་དག་གིས་ངོམས་མི་མྱོང་བའི་སེམས་དང།་ཐམས་ཅད་ཡོངས་སུ་འཛིན་ཅིང་འཇུངས་པའི་སེམས་དང ། བྱས་པ་མི་བཟོ་བའི་སེམས་དང ། གཞན་གྱི་ཆུང་མ་བརྣབ་པའི་སེམས་དང ། གནོད་སེམས་ཀྱིས་འཚེ་བའི་སེམས་དང ། སྨོན་ལམ་མ་མཆིས་པའི་སེམས་དང་ལྡན་པའི་སེམས་ཅན་དག་ཀྱང་དེའི་ཚེ་ན་འབྱུང་བར་འགྱུར་ལགས་སོ། །དེར་སྒྲ་འདི་ལྟ་བུ་དག་ཕན་ཚུན་ཐོས་པར་ཡང་བགྱིད་དེ།་སེམས་ཅན་དམྱལ་བའི་སྒྲ་དང ། དུད་འགྲོའི་སྐྱེ་གནས་པའི་སྒྲ་དང ། གཤིན་རྗེའི་འཇིག་རྟེན་གྱི་སྒྲ་དང ། ནད་ཀྱི་སྒྲ་དང ། རྒ་བའི་སྒྲ་དང ། འཆི་བའི་སྒྲ་དང ། གསོད་པའི་སྒྲ་དང ། མི་ཁོམ་པའི་སྒྲ་དང ། རྟག་ཏུ་སྒྲ་བགྱིད་པའི་སྒྲ་དང ། ཁུང་སྒྲོ་དང ། ཁོང་སྒྲིལ་དང ། འཆིང་བ་དང ། བཙོན་རའི་སྒྲ་དང ། ཆད་པའི་སྒྲ་དང ། གནོད་པའི་སྒྲ་དང ། མི་སྙན་པ་
360a
༄#། །གཤེ་བ་དང ། སྤྱོ་བའི་སྒྲ་དང ། ཁྱིམ་འབུགས་པའི་སྒྲ་དང ། ཚོགས་འབྱེད་པའི་སྒྲ་དང ། ཆོམ་རྐུན་གྱི་སྒྲ་དང ། ཕ་རོལ་གྱི་དམག་ཚོགས་ཀྱི་སྒྲ་དང ། མུ་གེའི་སྒྲ་དང ། འདོད་པ་ལ་ལོག་པར་གཡེམ་པའི་སྒྲ་དང ། བརྫུན་དུ་སྨྲ་བའི་སྒྲ་དང ། ལྟས་ངན་གྱི་སྒྲ་དང ། ཕྲ་མའི་སྒྲ་དང ། ཚིག་རྩུབ་པོའི་སྒྲ་དང ། ཚིག་ཀྱལ་པའི་སྒྲ་དང ། ཕྲག་དོག་དང་སེར་སྣའི་སྒྲ་དང ། ཀུན་ཏུ་འཛིན་པ་དང་ཡོངས་སུ་འཛིན་པའི་སྒྲ་དང ། ངར་འཛིན་པ་དང ། བདག་གིར་འཛིན་པའི་སྒྲ་དང ། སྡུག་པ་དང་མི་སྡུག་པའི་སྒྲ་དང ། འདོད་པ་དང་མི་འདོད་པའི་སྒྲ་དང ། སྡུག་པ་དང་བྲལ་བའི་སྒྲ་དང ། ཉོ་ཚོང་གི་སྒྲ་དང ། གཅིག་གིས་གཅིག་འཁོལ་ཞིང་འཚོ་བའི་སྒྲ་དང ། མངལ་ན་གནས་པའི་སྒྲ་དང ། དྲི་ང་བའི་སྒྲ་དང ། གྲང་བའི་སྒྲ་དང ། ཚ་བའི་སྒྲ་དང ། བཀྲེས་པ་དང་སྐོམ་པའི་སྒྲ་དང ། ངལ་བ་དང་ཆད་པ་ཚོལ་བའི་སྒྲ་དང ། ཞིང་ལས་ཀྱི་སྒྲ་དང ། བཟོའི་ལས་སྣ་ཚོགས་ཀྱིས་ཡོངས་སུ་སྐྱོ་བའི་སྒྲ་དང ། ནད་སྣ་ཚོགས་ཀྱིས་ཉེན་པའི་སྒྲ་དག་སྟེ། སེམས་ཅན་དེ་དག་གཅིག་ལ་གཅིག་སྒྲ་དེ་ལྟ་བུ་དག་ཐོས་པར་ཡང་བགྱིད་ལགས་སོ། །དེའི་ཚེ་ན་འཇིག་རྟེན་གྱི་ཁམས་མི་མཇེད་ནི་སེམས་ཅན་དགེ་བའི་རྩ་བ་ཡོངས་སུ་ཉམས་པ། དགེ་བའི་བཤེས་གཉེན་ཡོངས་སུ་ཉམས་པ། སྡང་བའི་སེམས་དང་ལྡན་པ་དེ་ལྟ་བུ་དག་གིས་ཀུན་ཏུ་གཏམ་པར་
360b
འགྱུར་ཏེ། སེམས་ཅན་དེ་དག་ནི་ཐམས་ཅད་མཁྱེན་པ་དག་གིས་སྟོང་པའི་སངས་རྒྱས་ཀྱི་ཞིང་རྣམས་སུ་བོར་བར་འགྱུར་ཏེ། ཇི་ལྟར་བཟའ་བ་དང ། བཏུང་བ་དང ། དུལ་བ་དང ། ཡང་དག་པར་སྡོམ་པ་དང ། དགེ་བའི་ལས་ཀྱི་བྱ་བ་དང ། འཕགས་པའི་ལམ་ཡན་ལག་བརྒྱད་པ་དང་བྲལ་ཞིང་མི་དགེ་བ་དང་འགྲོགས་ལ། མུན་ཁྲོད་ནས་མུན་ཁྲོད་དུ་མཆི་བའི་སེམས་ཅན་དེ་དག་ནི་དེའི་ཚེ་ན་ལས་ཀྱི་རྐྱེན་རབ་ཏུ་དམ་པོས་བསྐལ་པ་བཟང་པོ་ལ་ལོ་བརྒྱ་ཉི་ཤུ་པ་རྣམས་སུ་སྐྱེ་བར་འགྱུར་ལགས་སོ། །སེམས་ཅན་དེ་དག་གིས་ལས་ཀྱི་རྐྱེན་གྱིས་སངས་རྒྱས་ཀྱི་ཞིང་མི་མཇེད་ཀྱང་དགེ་བའི་རྩ་བ་བསྐྱེད་པའི་སེམས་ཅན་ཐམས་ཅད་ཀྱིས་ཡོངས་སུ་སྤངས་ཤིང་དམན་པར་འགྱུར་ཏེ། ས་གཞི་པ་ཚཝ་ཅན་དུ་འགྱུར། ས་གཞི་གོར་མ་དང ། གསེག་མ་དང ། རྡུལ་དང ། རི་རད་རོད་ཅན་དུ་འགྱུར། ཤ་སྦྲང་དང ། སྦྲང་བུ་མཆུ་རིང་དང ། སྦྲུལ་དང ། གཅན་ཟན་ཁྲོ་བོ་དང ། གདུག་པ་དག་གིས་ཀུན་ཏུ་གཏམ་པར་འགྱུར། དུས་མ་ལགས་པར་རྡུལ་གྱིས་འཁྲིགས་པའི་བསེར་མ་ལྡང་བར་འགྱུར། དུས་མ་ལགས་པར་རོ་མ་མཆིས་པ་དང ། ལན་ཚཝ་དང་འདྲེས་པ་དང ། མི་བསིལ་བའི་ཆར་པ་འབབ་པར་འགྱུར་ཞིང།་དེ་ལྟར་ས་ལ་ལོ་ཐོག་དང ། སྨན་དང ། རྩཝ་དང ། ཤིང་ལྗོན་པ་དང ། ལོ་མ་དང ། མེ་ཏོག་དང ། འབྲས་བུ་དང ། འབྲུ་དང ། ནོར་རྣམས་དང ། སེམས་ཅན་རྣམས་ཀྱི་བཟའ་བ་དང །
361a
༄#། །བཏུང་བ་དང ། ལོངས་སྤྱོད་དང ། ཉེ་བར་སྤྱོད་པ་རྣམས་ཀྱང་ངན་པ་དང ། རྙོག་པ་ཅན་དང ། རུད་རུད་པོ་དང ། རྩུབ་པ་དང ། དུག་དང་འདྲེས་པར་འགྱུར་ཏེ། སེམས་ཅན་དེ་དག་གིས་འཚལ་ནས་ཀྱང་སླར་ཞིང་རྒྱ་ཆེར་རྩུབ་པ་དང ། གདུག་པ་དང ། ཁྲོ་བ་དང ། གཏུམ་པ་དང ། བརླང་བ་དང ། འཇུངས་པ་དང ། གཤེ་བ་དང།་གཅིག་ལ་གཅིག་མི་གུས་པ་དང ། འཇིགས་པའི་སེམས་ཀྱིས་ཀུན་ནས་མནར་སེམས་ཀྱི་སེམས་དང ། གསོད་པའི་སེམས་དང་ལྡན་པར་འགྱུར་ཞིང་ཤ་འཚལ་བ་དང ། ཁྲག་འཚལ་བ་དང ། རི་དྭགས་ཀྱི་པགས་པ་འཚལ་བ་དང ། མཚོན་ཆ་ཐོགས་པ་དང ། སྲོག་ཆགས་འགུམས་པ་ལ་བརྩོན་པ་དང ། བྱད་གཟུགས་དང ། རིགས་དང ། རྒྱུད་དང ། དབང་ཕྱུག་དང ། བསྟན་བཅོས་དང ། ཡི་གེ་དང ། རྟ་རྩལ་དང ། མདའ་གཞུ་དང ། མཚོན་ཆ་ཐོགས་པ་དང ། འཁོར་དང ། སེར་སྣ་དང ། དྲེགས་ངས་པར་འགྱུར་ཏེ། འཇིག་རྟེན་གྱི་དཀའ་ཐུབ་དང ། བརྟུལ་ཞུགས་ངན་པ་རྣམ་པ་སྣ་ཚོགས་ལ་མངོན་པར་བརྩོན་པར་གྱུར་པ་དེའི་ཚེ་ན། བདག་འདུལ་བའི་སེམས་ཅན་རྣམས་ཀྱི་དགེ་བའི་རྩ་བ་ཡོངས་སུ་སྨིན་པར་བགྱི་བའི་སླད་དུ། དགའ་ལྡན་གྱི་གནས་ནས་བབས་ཏེ་འཁོར་ལོས་བསྒྱུར་བའི་རིགས་རྒྱུད་ཁྱད་པར་དུ་འཕགས་པའི་དབང་ཕྱུག་རྒྱལ་
361b
པོའི་རིགས་སུ་བཙུན་མོ་དམ་པའི་ཁོང་དུ་མངལ་ན་གནས་པ་ཉེ་བར་འཛིན་པར་གྱུར་ཅིག་།དེའི་ཚེ་བདག་གིས་ཐམས་ཅད་དང་ལྡན་པའི་སངས་རྒྱས་ཀྱི་ཞིང་མི་མཇེད་སྣང་བ་རྒྱ་ཆེན་པོས་ཁྱབ་པར་བགྱིད་པར་འགྱུར་ཞིང ། སྟེང་དུ་ནི་འོག་མིན་གྱི་གནས་གྱི་བར་གྱི་མཐར་ཐུག་པའི་བར་དང ། འོག་ཏུ་ནི་གསེར་གྱི་འཁོར་ལོའི་མཐར་ཐུག་པའི་བར་དག་ཀྱང་སྣང་བ་རྒྱ་ཆེན་པོས་ཁྱབ་པར་བགྱིད་པར་གྱུར་ཅིག་།དེའི་ཚེ་ན་སངས་རྒྱས་ཀྱི་ཞིང་མི་མཇེད་ན་སེམས་ཅན་གང་དག་སེམས་ཅན་དམྱལ་བ་རྣམས་དང ། དུད་འགྲོའི་སྐྱེ་གནས་དང ། ། གཤིན་རྗེའི་འཇིག་རྟེན་དང ། ལྷ་དང་མི་རྣམས་སུ་སྐྱེས་པར་གྱུར་པ་དེ་དག་ཐམས་ཅད་ཀྱིས་ཀྱང་སྣང་བ་དེ་མཐོང་ཞིང་རེག་པ་དང ། ཀུན་ཏུ་འཚལ་བར་གྱུར་ཅིག་།འཁོར་བ་ལ་རྟོག་ཅིང་སྡུག་བསྔལ་གྱིས་ཡིད་བྱུང་བ་དེ་དག་ཀྱང་མྱ་ངན་ལས་འདས་པར་འཚལ་ཞིང་ཐ་ན་ཉོན་མོངས་པ་ཞི་བར་བགྱི་བ་དེའི་སེམས་སྐྱེད་པར་ཡང་གྱུར་ཅིག་།དང་པོར་ལམ་མཆོག་གི་ས་བོན་འདིའང་སྐྱེད་པར་གྱུར་ཅིག་།གང་གི་ཚེ་བདག་ཆོས་ཐམས་ཅད་ཀྱི་ཚུལ་ལ་མཁས་པའི་ཏིང་ངེ་འཛིན་ཐམས་ཅད་སྟོན་པའི་ཆོས་ཀྱི་སྒོ་གཅིག་གིས་བསྐལ་པ་ཕྱི་མའི་མཐར་སྟོན་ཅིང་སེམས་མཉམ་པར་བཞག་ནས་ཟླ་བ་བཅུར་མའི་མངལ་ན་གནས་པར་གྱུར་ཅིག་།བདག་གིས་སངས་རྒྱས་ཉིད་ཐོབ་ནས་ཡོངས་སུ་སྐྱོ་བའི་སེམས་ཅན་གང་དག་འཁོར་བ་ལས་
362a
༄#། །ཡོངས་སུ་ཐར་བར་བགྱིད་པར་འགྱུར་བའི་སེམས་ཅན་དེ་དག་གིས་བདག་ཟླ་བ་བཅུར་མའི་མངལ་ན་ནོར་བུའི་སྙིང་པོ་ཡང་དག་པར་སྟོན་པ་ལ་སེམས་མཉམ་པར་བཞག་ནས་སྐྱིལ་མོ་ཀྲུང་གིས་མཆིས་པ་མཐོང་བར་གྱུར་ཅིག་།ཟླ་བ་བཅུ་པོ་འདས་ནས་བདག་གིས་བསོད་ནམས་ཐམས་ཅད་ཡང་དག་པར་བསགས་པའི་ཏིང་ངེ་འཛིན་གྱིས་ཐམས་ཅད་དང་ལྡན་པའི་སངས་རྒྱས་ཀྱི་ཞིང་མི་མཇེད་ཀྱི་ས་རྣམ་པ་དྲུག་ཏུ་གཡོ་བར་བགྱིད་པར་འགྱུར་ཞིང ། སྟེང་དུ་ནི་འོག་མིན་གྱི་གནས་ཀྱི་མཐར་ཐུག་པའི་བར་དང ། འོག་ཏུ་ནི་གསེར་གྱི་འཁོར་ལོའི་མཐར་ཐུག་པའི་བར་དག་ཀྱང་རྣམ་པ་དྲུག་ཏུ་གཡོ་བར་བགྱིད་པར་གྱུར་ཅིག་།དེའི་ཚེ་ན་སངས་རྒྱས་ཀྱི་ཞིང་མི་མཇེད་དུ་སེམས་ཅན་གང་དག་སེམས་ཅན་དམྱལ་བ་རྣམས་དང་མི་རྣམས་སུ་སྐྱེས་པར་གྱུར་པ་དེ་དག་ཀྱང་རབ་ཏུ་སད་པར་བགྱིད་པར་གྱུར་ཅིག།། །།བམ་པོ་བཅུ་པ། བདག་མའི་མཆན་ཁུང་གཡས་པ་ནས་མངོན་པར་འབྱུང་བའི་ཚེའང་ཐམས་ཅད་དང་ལྡན་པའི་སངས་རྒྱས་ཀྱི་ཞིང་མི་མཇེད་སྣང་བ་རྒྱ་ཆེན་པོས་ཁྱབ་པར་གྱུར་ཅིག་།དེའི་ཚེ་དེའི་དུས་ན་སངས་རྒྱས་ཀྱི་ཞིང་མི་མཛད་ཐམས་ཅད་ཀྱི་སེམས་ཅན་རྣམས་ལའང་ཡང་དག་པར་སྐུལ་བར་གྱུར་ཅིག་།དགེ་བའི་རྩ་བ་མ་བསྐྲུན་པའི་སེམས་ཅན་རྣམས་ཀྱི་རྒྱུད་ལ་མྱ་ངན་
362b
ལས་འདས་པའི་ས་བོན་འདེབས་པར་གྱུར་ཅིག་།མྱ་ངན་ལས་འདས་པའི་ས་བོན་བསྐྱེད་པའི་སེམས་ཅན་རྣམས་ཀྱི་རྒྱུད་ལ་ཏིང་ངེ་འཛིན་གྱི་མྱུ་གུ་སྐྱེད་པར་གྱུར་ཅིག་།གང་གི་ཚེ་བདག་གི་རྐང་པའི་མཐིལ་གྱིས་ས་ལ་རེག་པར་འགྱུར་བ་དེའི་ཚེ་ན་ཐམས་ཅད་དང་ལྡན་པའི་སངས་རྒྱས་ཀྱི་ཞིང་མི་མཇེད་ཀྱི་ས་གཞི་གསེར་གྱི་འཁོར་ལོའི་མཐར་ཐུག་པའི་བར་དག་རྣམ་པ་དྲུག་ཏུ་གཡོས་པ་དང ། རབ་ཏུ་འགུལ་བ་དང ། འཁྲུག་པར་གྱུར་ཅིག་།དེའི་ཚེ་ན་བདག་གིས་གང་དག་སྐྱེ་གནས་བཞིར་གཏོགས་ཤིང་འགྲོ་བ་ལྔ་ལ་བརྟེན་པའི་སེམས་ཅན་ཆུ་ལ་བརྟེན་པ་རྣམས་དང ། ས་ལ་བརྟེན་པ་རྣམས་དང ། ནམ་མཁའ་ལ་བརྟེན་པ་དེ་དག་ཐམས་ཅད་རབ་ཏུ་སད་པར་བགྱིད་པར་གྱུར་ཅིག་།སེམས་ཅན་གང་དག་གི་རྒྱུད་ལ་ཏིང་ངེ་འཛིན་གྱི་མྱུ་གུ་མ་སྐྱེས་པ་རྣམས་ཀྱང་སྐྱེད་པར་གྱུར་ཅིག་།ཏིང་ངེ་འཛིན་གྱི་མྱུ་གུ་བརྟན་པར་གྱུར་པ་རྣམས་ནི་ཐེག་པ་གསུམ་པོ་དག་གིས་ཕྱིར་མི་ལྡོག་པ་ལ་འགོད་པར་གྱུར་ཅིག་།བདག་བཙས་མ་ཐག་ཏུ་དེའི་མོད་ལ་སངས་རྒྱས་ཀྱི་ཞིང་མི་མཇེད་དེའི་ཚངས་པ་ཆེན་པོ་རྣམས་དང ། བདུད་རྣམས་དང ། བརྒྱ་བྱིན་རྣམས་དང ། ཟླ་བ་རྣམས་དང ། ཉི་མ་རྣམས་དང ། འཇིག་རྟེན་སྐྱོང་བ་རྣམས་དང ། ཀླུའི་རྒྱལ་པོ་ཆེན་པོ་རྣམས་དང ། ལྷ་མ་ཡིན་གྱི་དབང་པོ་རྣམས་དང ། བརྫུས་ཏེ་སྐྱེས་པ་རྣམས་དང ། གནོད་སྦྱིན་དང ། སྲིན་པོ་དང ། ཀླུ་དང ། ལྷ་མ་
363a
༄#། །ཡིན་རྫུ་འཕྲུལ་ཆེན་པོ་ཐམས་ཅད་ཀྱང་བདག་ལ་མཆོད་པ་བགྱི་བའི་སླད་དུ་ཉེ་བར་མཆིས་པར་གྱུར་ཅིག་།བདག་བཙས་མ་ཐག་ཏུ་གོམ་པ་བདུན་འདོར་བར་གྱུར་ཅིག་།བདག་གིས་བསོད་ནམས་ཐམས་ཅད་ཡང་དག་པར་བསགས་པའི་ཏིང་ངེ་འཛིན་གྱིས་ཐམས་ཅད་དང་ལྡན་པའི་འཁོར་གང་ལགས་པ་དེ་ཐེག་པ་གསུམ་པོ་དག་གིས་རབ་ཏུ་དང་བ་ཐོབ་པར་འགྱུར་བ་དེ་ལྟར་ཆོས་སྟོན་པར་གྱུར་ཅིག་།འཁོར་དེ་ན་ཉན་ཐོས་ཀྱི་ཐེག་པ་པའི་སེམས་ཅན་སྲིད་པ་ཐ་མ་པར་གྱུར་པ་གང་ལགས་པ་དེ་དག་བདག་གིས་འདུལ་བར་གྱུར་ཅིག་།དེ་ན་གང་དག་རང་སངས་རྒྱས་ཀྱི་ཐེག་པ་པར་གྱུར་པའི་སེམས་ཅན་དེ་དག་གིས་རྣམ་པར་སྣང་བྱེད་མེ་ཏོག་གི་བཟོད་པ་ཐོབ་པར་གྱུར་ཅིག་།དེ་ནས་གང་དག་བླ་ན་མེད་པའི་ཐེག་པ་ཆེན་པོ་པར་གྱུར་བའི་སེམས་ཅན་དེ་དག་ཐམས་ཅད་ཀྱིས་རྡོ་རྗེའི་ཏིང་ངེ་འཛིན་རྒྱ་མཚོ་འཁྲུགས་ཀྱི་ཏིང་ངེ་འཛིན་ཐོབ་པར་གྱུར་ཅིག་།ཏིང་ངེ་འཛིན་དེས་ས་གསུམ་པོ་དག་ལས་ཡང་དག་པར་འདས་པར་གྱུར་ཅིག་།གང་གི་ཚེ་བདག་ཁྲུས་བགྱིད་པར་འཚལ་བ་ན། དེ་ན་ཀླུའི་རྒྱལ་པོ་ཆེན་པོ་ཁྱད་པར་དུ་འཕགས་པ་གང་དག་མཆིས་པར་གྱུར་པ་དེ་དག་བདག་ལ་ཁྲུས་བགྱིད་པར་གྱུར་ཅིག་།སེམས་ཅན་གང་དག་གིས་བདག་འཁྲུར་བར་མཐོང་བར་གྱུར་པ་དེ་དག་ཐམས་ཅད་ཀྱིས་ཐེག་པ་
363b
གསུམ་པོ་དག་གིས་ཇི་སྐད་སྨོས་པའི་ཡོན་ཏན་དེ་ལྟ་བུ་དག་མངོན་པར་རྟོགས་པར་གྱུར་ཅིག་།སེམས་ཅན་གང་དག་གིས་བདག་ཤིང་རྟ་ལ་འཚལ་བ་མཐོང་བར་གྱུར་པ་དང ། རྒྱ་ཆེར་བགྱིད་ན་སེམས་ཅན་གང་དག་གིས་བདག་གཞོན་ནུ་རྩེ་བ་དག་དང་།བཟོའི་གནས་དང ། ལས་ཀྱི་གནས་དང ། སྐད་སྣ་ཚོགས་སྟོན་པ་དག་དང ། བསླབ་ཏུ་རུང་བ་དང ། བུད་མེད་རྣམས་ཀྱི་གནས་སུ་འདོད་པའི་ཡོན་ཏན་ལྔའི་དགའ་བ་དང ། རྩེད་མོས་ཡིད་བྱུང་ནས་དགུང་ཕྱེད་ན་མངོན་པར་བྱུང་སྟེ། རྒྱན་ལྷབ་ལྷུབ་སྤངས་ནས་ཡང་དང་ཡང་དུ་གོས་དམར་པོ་དང ། ཆོས་གོས་ངུར་སྨིག་ཡོངས་སུ་འཚལ་བ་དང ། བྱང་ཆུབ་ཀྱི་ཤིང་དྲུང་དུ་ཉེ་བར་བགྲོད་པའི་སླད་དུ་མཆི་བ་མཐོང་བར་གྱུར་པའི་སེམས་ཅན་དེ་དག་ལའང་བདག་གིས་བསོད་ནམས་ཐམས་ཅད་ཡང་དག་བར་བསགས་པའི་ཏིང་ངེ་འཛིན་གྱིས་ཅི་ནས་ཀྱང་ཐེག་པ་གསུམ་པོ་དག་གིས་སེམས་ཅན་དེ་དག་འདུན་པ་དྲག་ཅིང་བརྩོན་པར་གྱུར་པ་དེ་ལྟར་ཆོས་སྟོན་པར་གྱུར་ཅིག་།དེ་ན་གང་དག་རང་སངས་རྒྱས་ཀྱི་ཐེག་པ་པར་གྱུར་པའི་སེམས་ཅན་དེ་དག་ཐམས་ཅད་ཀྱིས་རྣམ་པར་སྣང་བྱེད་མེ་ཏོག་གི་ཏིང་ངེ་འཛིན་ཐོབ་པར་གྱུར་ཅིག ། གང་དག་གིས་ཐེག་པ་ཆེན་པོའི་ས་བོན་བཏབ་པར་གྱུར་པ་དེ་དག་ཐམས་ཅད་ཀྱིས་རྡོ་རྗེའི་ཏིང་ངེ་འཛིན་རྒྱ་མཚོ་འཁྲུགས་ཀྱི་ཏིང་ངེ་འཛིན་ཐོབ་པར་གྱུར་ཅིག་།ཏིང་ངེ་འཛིན་དེས་ས་གསུམ་
364a
༄#། །པོ་དག་ལས་ཡང་དག་པར་འདས་པར་གྱུར་ཅིག་།བདག་ཉིད་ཀྱིས་སྟན་བཏིང་བ་བསྡུས་ཏེ། བྱང་ཆུབ་ཀྱི་ཤིང་དུང་དུ་རྡོ་རྗེའི་གདན་བཤམས་པ་ལ་སྐྱིལ་མོ་ཀྲུང་བཅས་ནས་ལུས་དྲང་པོར་བསྲང་སྟེ། མཆིས་ནས་བདག་དབུགས་འབྱུང་བ་དང ། དབུགས་རྡུབ་པ་ཉེ་བར་ཞི་བ་དེ་ལྟ་བུའི་མཁའ་ཁྱབ་ཀྱི་བསམ་གཏན་སྒོམ་པར་གྱུར་ཅིག་།བདག་གདུགས་ལ་ལན་གཅིག་བསམ་གཏན་ལས་ལྡང་བར་གྱུར་ཅིག་།ལངས་ནས་ཀྱང་བྲས་སུ་ཏིལ་གྱི་འབྲས་བུ་ཕྱེད་ཅིག་འཚལ་བར་གྱུར་ཅིག་།ཕྱེད་ནི་སློང་མོ་པ་ལ་སྩོལ་བར་གྱུར་ཅིག་།གང་དག་སངས་རྒྱས་ཀྱི་ཞིང་མི་མཇེད་དུ་གཏོགས་པའི་འོག་མིན་གྱི་གནས་ཀྱི་མཐར་ཐུག་པའི་བར་གྱི་ལྷ་ཇི་སྙེད་པ་དེ་དག་ཐམས་ཅད་ཀྱང་བདག་ལ་མཆོད་པ་བགྱི་བའི་སླད་དུ་ཉེ་བར་མཆི་བར་འགྱུར་ཞིང ། དེ་དག་ཐམས་ཅད་ཀྱང་བདག་དཀའ་བ་སྤྱོད་པའི་དབང་དུ་འགྱུར་བ་དེ་སྲིད་དུ་ཡུན་རིང་པོར་བདག་དེ་ལྟ་བུའི་དཀའ་བ་སྤྱད་པ་སྤྱོད་པར་གྱུར་ཅིག་།བཙུན་པ་བཅོམ་ལྡན་འདས། དེ་ན་གང་དག་གིས་ཉན་ཐོས་ཀྱི་ཐེག་པ་པར་ས་བོན་བཏབ་པར་གྱུར་པར་དེ་དག་གི་རྒྱུད་ལ་ཉོན་མོངས་པ་རབ་ཏུ་ཞི་བར་བགྱིད་པར་གྱུར་ཅིག་།ཇི་ལྟར་སྔར་སྨོས་པ་བཞིན་དུ་རང་སངས་རྒྱས་ཀྱི་ཐེག་པ་པ་གང་ལགས་པ་དག་ཀྱང་བདག་གིས་འདུལ་བའི་སྲིད་པ་ཐ་མར་གྱུར་ཅིག་།དེ་བཞིན་དུ་
364b
ཀླུ་དང ། གནོད་སྦྱིན་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། ཡི་དྭགས་དང ། ཤ་ཟ་དང ། གྲུལ་བུམ་རྣམས་དང ། མངོན་པར་ཤེས་པ་ལྔ་དང་ལྡན་པའི་དྲང་སྲོང་རྣམས་ཀྱང་བདག་ལ་མཆོད་པ་བགྱི་བའི་སླད་དུ་མཆི་བར་འགྱུར་ཞིང་དེ་དག་ཐམས་ཅད་བདག་དཀའ་བ་སྤྱོད་པའི་དབང་དུ་གྱུར་ཅིག་།གང་དག་ཉན་ཐོས་ཀྱི་ཐེག་པ་པ་དག་གི་བར་དུ་ཇི་ལྟར་སྔར་སྨོས་པ་བཞིན་དུ་གྱུར་ཅིག་།གླིང་བཞི་པ་དེ་ན་གཞན་མུ་སྟེགས་ཅན་བརྟུལ་ཞུགས་དང་དཀའ་ཐུབ་ངན་པའི་དཀའ་བ་སྤྱད་པ་སྤྱོད་པ་གང་ལགས་པ་དེ་དག་ལའང་མི་མ་ལགས་པ་དག་གིས་ཁྱེད་ཅག་དཀའ་བ་བྱེད་པ་མ་ཡིན་ཏེ། ཇི་ལྟར་ཕྱོགས་འདི་ན་བྱང་ཆུབ་སེམས་དཔའ་སྲིད་པ་ཐ་མ་པ་དཀའ་བ་སྤྱད་པ་སྤྱོད་པ་དང ། སྙིང་ལ་ཡིད་ལ་བྱེད་པ་འདོགས་ཤིང་ལུས་ཀྱི་འདུ་བྱེད་ཤིན་ཏུ་སྦྱངས་པ་དང ། དག་གི་འདུ་བྱེད་ཤིན་ཏུ་སྦྱངས་པ་དང ། དེའི་དབུགས་དབྱུང་བ་དང ། དབུགས་རྡུབ་པ་དག་རབ་ཏུ་ཞི་པ་དང ། ཉིན་གཅིག་བཞིན་དུ་ལན་རེ་བསམ་གཏན་ལས་ལངས་ནས། ཟས་སུ་ཏིལ་གྱི་འབྲས་བུ་ཕྱེད་ཟ་ཞིང་དེ་ལྟར་བསམ་གཏན་སྒོམ་པའི་དཀའ་བ་སྤྱད་པ་དེ་ནི་མཐུ་ཆེ་བ་ཡིན། དེ་ནི་འབྲས་བུ་ཆེ་བ་ཡིན། དེ་ནི་རྒྱ་ཆེ་བ་ཡིན་ཏེ། དེ་ནི་རིང་པོར་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་
365a
༄#། །རྒྱ་བར་འགྱུར་རོ། །གལ་ཏེ་ཡིད་མི་ཆེས་ན་དེང་ལ་ཉིད་ཀྱིས་ལྟོས་ཤིག་ཅེས་བསྒོ་བར་གྱུར་ཅིག་།དེ་དག་གིས་ཀྱང་དཀའ་བ་སྤྱོད་པ་དེ་བཏང་སྟེ། བདག་དཀའ་བ་སྤྱོད་པ་མཐོང་ནས་གང་དག་གིས་སེམས་ཀྱི་རྒྱུད་ལ་ཉན་ཐོས་ཀྱི་ཐེག་པ་པའི་ས་བོན་གྱི་མྱུ་གུ་གནས་པར་འགྱུར་བའི་བར་དུ་ཇི་ལྟར་སྔར་སྨོས་པ་བཞིན་དུ་གྱུར་ཅིག་།མིའི་རྒྱལ་པོ་རྣམས་དང ། བཀྲབས་པ་རྣམས་དང ། གྲོང་མི་རྣམས་དང ། ལྗོངས་ཀྱི་མི་རྣམས་དང ། ཁྱིམ་ན་གནས་པ་རྣམས་དང ། རབ་ཏུ་བྱུང་བ་རྣམས་དང ། གྲོང་ཁྱིམ་དང་བཅས་པ་གང་ལགས་པ་དེ་དག་ཀྱང་བདག་དཀའ་བ་སྤྱོད་པའི་དྲུང་དུ་མཆི་བར་འགྱུར་ཞིང་ཉན་ཐོས་ཀྱི་ཐེག་པ་པའི་བར་དུ་ཇི་ལྟར་སྔར་སྨོས་པ་བཞིན་དུ་གྱུར་ཅིག་།བུད་མེད་གང་བདག་བལྟ་བའི་སླད་དུ་མཆི་བར་འགྱུར་བ་དེའང་དེའི་བུད་མེད་ཀྱི་ལུས་ཀྱི་ཐ་མ་ཐོབ་པར་འགྱུར་ཞིང ། གང་དག་ཉན་ཐོས་ཀྱི་ཐེག་པ་པའི་བར་དུ་ཇི་ལྟར་སྔར་སྨོས་པ་བཞིན་དུ་གྱུར་ཅིག་།རི་དྭགས་དང ། བྱ་གང་དག་གིས་བདག་དཀའ་བ་སྤྱོད་ཅིང་མཆིས་པ་མཐོང་བར་གྱུར་པ་དེ་དག་ཀྱང་དེ་དག་གི་དུད་འགྲོའི་སྐྱེ་གནས་ཀྱི་ལུས་ཀྱི་ཐ་མ་ཐོབ་པར་གྱུར་ཅིག་།རི་དྭགས་དང ། བྱ་གང་དག་ཉན་ཐོས་ཀྱི་ཐེག་པར་ས་བོན་བཏབ་པར་གྱུར་པ་དག་ཀྱང་བདག་གིས་འདུལ་བ་སྐྱེ་བ་གཅིག་གིས་ཐོགས་པར་འགྱུར་ཞིང ། གང་དག་རང་སངས་རྒྱས་ཀྱིས་ཐེག་པ་པ་
365b
དག་གི་བར་དུ་ཇི་ལྟར་སྔར་སྨོས་པ་བཞིན་དུ་གྱུར་ཅིག་།ཚུལ་དེ་བཞིན་དུ་དུད་འགྲོའི་སྐྱེ་གནས་ཕྲ་མོ་དག་ལའང་བརྗོད་པར་བགྱིའོ། །དེ་བཞིན་དུ་ཡི་དྭགས་རྣམས་ལའང་བརྗོད་པར་བགྱིའོ། །ཇི་སྲིད་དུ་སེམས་ཅན་བྱེ་བ་ཁྲག་ཁྲིག་འབུམ་ཕྲག་མང་པོ་དག་བདག་དཀའ་བ་སྤྱོད་པའི་དབང་དུ་འགྱུར་ཞིང་ངོ་མཚར་དུ་འཛིན་པར་འགྱུར་བ་དཔག་ཏུ་མ་མཆིས་།གྲངས་མ་མཆིས་པ་དེ་དག་གིས་སེམས་ཀྱི་རྒྱུད་ལ་ཐར་པའི་ས་བོན་བསྐྱེད་པར་འགྱུར་པའི་ཡུན་རིང་པོ་དེ་སྲིད་དུ་བདག་སྐྱིལ་མོ་ཀྲུང་གཅིག་གིས་དེ་ལྟ་བུའི་དཀའ་བ་སྤྱད་པ་སྤྱོད་པར་གྱུར་ཅིག་།ཇི་ལྟར་སྔོན་ཆད་སེམས་ཅན་དུ་བགྲང་བ་གཞན་མུ་སྟེགས་ཅན་དང ། ཉན་ཐོས་ཀྱི་ཐེག་པ་པ་དང ། རང་སངས་རྒྱས་ཀྱི་ཐེག་པ་པ་དང ། བླ་ན་མེད་པའི་ཐེག་པ་ཆེན་པོ་པ་སུས་ཀྱང་སྔོན་དེ་ལྟ་བུའི་དཀའ་བ་མ་སྤྱད་ལ། སླན་ཆད་ཀྱང་སེམས་ཅན་དུ་བགྲང་བ་དང ། གཞན་མུ་སྟེགས་ཅན་སུའང་ཇི་ལྟར་བདག་སྤྱོད་པར་འགྱུར་པ་དེ་ལྟ་བུའི་དཀའ་བ་སྤྱད་པ་སྤྱོད་པར་རྔོ་མི་ཐོགས་པ་དེ་ལྟ་བུའི་དཀའ་བ་སྤྱོད་པ་བདག་སྤྱོད་པར་གྱུར་ཅིག་།བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མ་ཐོབ་པ་དེའི་ཚེ་སྐྱེས་བུའི་རྩལ་བགྱིད་ཅིང་བདུད་དཔུང་གི་ཚོགས་དང་བཅས་པ་ཕམ་པར་བགྱིད་པར་གྱུར་ཅིག་།ལས་ཀྱི་འབྲས་བུའི་ལྷག་མ་དང་བཅས་པ་ལ་གནས་པའི་ཉོན་མོངས་པའི་བདུད་ལས་རྒྱལ་ཞིང་བླ་ན་མེད་པ་ཡང་དག་པར་
366a
༄#། །རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་།ཅི་ནས་ཀྱང་བདག་སེམས་ཅན་གཅིག་གི་སེམས་ཀྱི་རྒྱུད་ལ་དགྲ་བཅོམ་པ་ཉིད་འཇོག་པར་འགྱུར་བ་དང ། དེ་བཞིན་དུ་གཉིས་པ་དང ། དེ་བཞིན་དུ་གསུམ་པ་དང ། དེ་བཞིན་དུ་བཞི་པ་ལའང་ཆོས་སྟོན་པར་འགྱུར་ཞིང ། སེམས་ཀྱི་རྒྱུད་ལའང་དགྲ་བཅོམ་པ་ཉིད་འཇོག་པར་གྱུར་ཅིག་།སེམས་ཅན་གཅིག་གི་དོན་གྱི་སླད་དུའང་བདག་ཆོ་འཕྲུལ་འབུམ་ཕྲག་དུ་མ་སྟོན་པར་འགྱུར་ཞིང་དེའི་སེམས་ཀྱི་རྒྱུད་ལ་ཡང་དག་པའི་ལྟ་བ་འཇོག་པར་གྱུར་ཅིག་།ཆོས་ཀྱི་དོན་དང ། ཚིག་འབྲུ་སྟོང་ཕྲག་མང་པོ་དག་ཀྱང་བརྗོད་པར་གྱུར་ཅིག་།ཇི་ལྟར་རྡོ་ཐོགས་པའི་འབྲས་བུ་ལའང་འཇོག་པར་གྱུར་ཅིག་།སེམས་ཅན་རྣམས་ཀྱི་སེམས་ཀྱི་རྒྱུད་ཀྱི་ཉོན་མོངས་པའི་རི་བོ་དག་ཡེ་ཤེས་ཀྱི་རྡོ་རྗེས་འཇོམས་པར་གྱུར་ཅིག་།ཐེག་པ་རྣམ་གསུམ་རྣམ་པར་དགོད་པས་ཆོས་སྟོན་པར་གྱུར་ཅིག་།སེམས་ཅན་གཅིག་གི་དོན་དུ་ཆོས་སྟན་ཅིང་མི་འཇིགས་པའི་གོ་འཕང་ལ་རབ་ཏུ་དགོད་པའི་སླད་དུའང་བདག་དཔག་ཚད་བརྒྱ་ཕྲག་མང་པོ་དག་ཏུ་སུག་པས་མཆི་བར་གྱུར་ཅིག་།བདག་གི་བསྟན་པ་ལ་རབ་ཏུ་འབྱུང་བ་དག་དགག་པ་མ་མཆིས་པར་འགྱུར་ཞིང་ཉམ་ཆུང་བ་དང ། དྲན་པ་ཉམས་པ་དང ། སེམས་རྣམ་པར་འཁྲུལ་པ་དང ། མུ་ཅོར་སྨྲ་བ་དང ། སྤྱི་བརྟོལ་ཅན་གྱི་སེམས་དང །
366b
ཤེས་རབ་འཆལ་པའི་སེམས་དང ། ཉོན་མོངས་པ་མང་པོས་དཀྲུགས་པའི་སེམས་དང་ལྡན་པ་རྣམས་དང ། བུད་མེད་ཀྱང་བདག་གིས་བསྟན་པ་ལ་རབ་ཏུ་འབྱུང་བ་ཕུན་སུམ་ཚོགས་པར་གྱུར་ཅིག་།བདག་ལ་འཁོར་བཞི་པོ་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དག་མཆིས་པར་གྱུར་ཅིག་།སྐྱེ་བོ་མང་པོ་དག་གིས་བདག་གི་བསྟན་པ་རྒྱས་པར་གྱུར་ཅིག་།ལྷ་རྣམས་ཀྱིས་བདེན་པ་མཐོང་བ་དང ། གནོད་སྦྱིན་རྣམས་དང ། ཀླུ་རྣམས་དང ། ལྷ་མ་ཡིན་རྣམས་ཀྱང་འཕགས་པའི་གསོ་སྦྱོང་ཡན་ལག་བརྒྱད་དང་ལྡན་པ་ལ་གནས་པ་དང ། དུད་འགྲོའི་སྐྱེ་གནས་སུ་སྐྱེས་པའི་བར་དག་ཀྱང་ཚངས་པར་སྤྱོད་པ་ལ་གནས་པར་གྱུར་ཅིག་།བཙུན་པ་བཅོམ་ལྡན་འདས། བདག་བྱང་ཆུབ་ཐོབ་པ་ན་སེམས་ཅན་གང་དག་རབ་ཏུ་སྡང་བའི་སེམས་ཀྱིས་བདག་ལ་མཚོན་ཆའམ། ཞུགས་སམ། མདུང་ངམ། ལག་ཆ་རྣམ་པ་སྣ་ཚོགས་དག་གིས་འདེབས་སུ་མཆི་བ་དང ། ཚིག་རྩུབ་པོ་དང ། བརླང་པོ་དག་གིས་གཤེ་ཞིང་སྤྱོ་བར་འགྱུར་བ་དང ། ཕྱོགས་དང་ཕྱོགས་མཚམས་དག་ཏུའང་མི་སྙན་པའི་སྒྲ་སྒྲོག་པར་འགྱུར་བ་དང ། དུག་དང་འདྲེས་པའི་བཟའ་བ་དང ། བཏུང་བ་དག་སྟོབས་པར་འགྱུར་བ་དེ་ལྟ་བུའི་ལས་ཀྱི་འབྲས་བུ་ཡོངས་སུ་མ་བས་པ་ལ་གནས་ནས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་
367a
༄#། །བར་གྱུར་ཅིག་།བདག་བྱང་ཆུབ་ཐོབ་པ་ན་སེམས་ཅན་དག་སྔོན་གྱི་འཁོན་གྱིས་འགུམ་པའི་ཡོ་བྱད་ཀྱི་སྦྱོར་བས་བདག་ལ་ཚིག་རྩུབ་པོ་དང ། མཚོན་ཆ་སྣ་ཚོགས་དང ། དུག་དང་འདྲེས་པའི་བཏུང་བ་དག་སྩོལ་བར་འགྱུར་ཞིང ། ཁྲག་ཀྱང་འབྱིན་པར་འགྱུར་བའི་སེམས་ཅན་དེ་དག་ལ་བདག་གིས་ཚུལ་ཁྲིམས་དང ། ཐོས་པ་དང ། ཏིང་ངེ་འཛིན་དང ། སྙིང་རྗེ་ཆེན་པོ་བསྒོམས་པའི་ཚངས་པའི་སྒྲ་དབྱངས་ཀྱི་རྔ་སྒྲ་བསྒྲགས་པས་དེ་དག་གི་སེམས་རབ་ཏུ་དང་བར་འགྱུར་བ་དེ་ལྟར་ཆོས་སྟོན་པར་འགྱུར་ཞིང་དགེ་བ་ལ་སྦྱོར་བར་ཡང་གྱུར་ཅིག་།དེ་ལྟར་སེམས་ཅན་དག་ཀྱང་ལས་ཀྱི་སྒྲིབ་པ་འཆགས་པར་འགྱུར་ཞིང་སླན་ཆད་ཀྱང་སྡོམ་པ་ལེན་པར་གྱུར་ཅིག་།སེམས་ཅན་དེ་དག་གི་མཐོ་རིས་དང་ཐར་པའི་འབྲས་བུ་དང ། འདོད་ཆགས་དང་བྲལ་བ་དང ། ཟག་པ་ཟད་པ་ལ་སྒྲིབ་པའི་ཆོས་སུའང་མ་གྱུར་ཅིག་།དེར་བདག་གི་ལས་ཀྱི་འབྲས་བུའང་ཡོངས་སུ་བས་པ་དང ། མཐར་ཐུག་པ་དང ། བྱང་བར་གྱུར་ཅིག། བཙུན་པ་བཅོམ་ལྡན་འདས། བདག་བྱང་ཆུབ་ཐོབ་ནས་ཀྱང་གདུགས་གཅིག་བཞིན་དུ་བདག་གི་སྤུའི་ཁུང་བུ་ཇི་སྙེད་པ་དེ་སྙེད་ཀྱི་སངས་རྒྱས་ཀྱི་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང ། དཔེ་བྱད་བཟང་པོ་བརྒྱད་ཅུས་ལེགས་པར་བརྒྱན་པ་དག་སྤྲུལ་ཞིང ། སངས་རྒྱས་ཀྱི་སྐུ་དེ་དག་ཀྱང་བདག་
367b
གིས་སངས་རྒྱས་ཀྱི་ཞིང་སྟོང་པ་དག་ཏུ་འགྱེད་པར་གྱུར་ཅིག་།སྟོང་པ་མ་ལགས་པ་དག་ཏུའང་འགྱེད་པར་གྱུར་ཅིག་།སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པ་དག་ཏུ་འང་འགྱེད་པར་གྱུར་ཅིག་།སངས་རྒྱས་ཀྱི་སྐུ་གཅིག་གིས་ཀྱང་གདུགས་གཅིག་ལའང་སངས་རྒྱས་ཀྱི་ཞིང་དེ་དག་ན་སེམས་ཅན་གང་དག་མཚམས་མ་མཆིས་པ་བགྱིད་པ་རྣམས་དང ། དམ་པའི་ཆོས་སྤོང་བ་རྣམས་དང ། འཕགས་པ་ལ་སྐུར་པ་འདེབས་པ་རྣམས་དང ། མི་དགེ་བ་དང་འགྲོགས་པའི་བར་དག་དང ། དེ་ན་སེམས་ཅན་གང་དག་ཐོན་ཐོས་ཀྱི་ཐེག་པ་ལ་ཡང་དག་པར་ཞུགས་པ་རྣམས་དང ། རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པ་རྣམས་དང ། ཐེག་པ་ཆེན་པོ་ལ་ཡང་དག་པར་ཞུགས་པ་དག་བསླབ་པ་དག་ལ་འདྲེན་མར་བགྱིད་པ་རྣམས་དང ། ཞིག་རལ་དུ་སྤྱོད་པ་རྣམས་དང ། ལྟུང་བའི་རྩ་བ་བྱུང་བ་རྣམས་དང ། སེམས་ཀྱི་རྒྱུད་ཚིག་པ་རྣམས་དང ། དགེ་བའི་ལམ་རབ་ཏུ་ཉམས་པ་རྣམས་དང ། འཁོར་བའི་འབྲོག་དགོན་པར་ཞུགས་པ་རྣམས་དང ། ལམ་ངན་པས་རྣམ་པར་བཅོམ་ཞིང་ཉམ་ང་བ་ཆེན་པོ་ཐོབ་པར་གྱུར་པ་དེ་ལྟ་བུའི་སེམས་ཅན་བྱེ་བ་ཁྲག་ཁྲིག་ཕྲག་འབུམ་དག་ལ་ཆོས་སྟོན་པར་གྱུར་ཅིག་།སེམས་ཅན་གང་དག་དབང་ཕྱུག་ཆེན་པོ་ལ་དད་པའི་སེམས་ཅན་དེ་དག་ལའང་དབང་ཕྱུག་ཆེན་པོའི་གཟུགས་ཀྱིས་ཆོས་སྟོན་པར་གྱུར་ཅིག་།སངས་རྒྱས་ཀྱི་ཞིང་མི་མཇེད་དུ་དེ་
368a
༄#། །བདག་གི་བསྔགས་པ་བརྗོད་པར་ཡང་གྱུར་ཅིག་།དེར་སེམས་ཅན་རྣམས་སྨོན་ལམ་འདེབས་པ་ལ་བརྩོན་པར་ཡང་གྱུར་ཅིག་།སེམས་ཅན་དེ་དག་གིས་བདག་གིས་བསྔགས་པ་ཐོས་ནས། བདག་གི་སངས་རྒྱས་ཀྱི་ཞིང་དུ་སྐྱེ་བར་འཚལ་ཞིང་སྨོན་ལམ་ཡང་འདེབས་པར་གྱུར་ཅིག་།བཙུན་པ་བཅོམ་ལྡན་འདས། གལ་ཏེ་བདག་སེམས་ཅན་དེ་དག་འགུམ་པའི་དུས་ཀྱི་ཚེ་མདུན་དུ་མ་མཆིས་སམ། ཆོས་མ་བསྟན་ཏམ། སེམས་རབ་ཏུ་དང་བར་མ་བགྱིས་ན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མ་གྱུར་ཅིག་།གལ་ཏེ་སེམས་ཅན་དེ་དག་གུམ་ནས་ངན་འགྲོ་རྣམས་སུ་སྐྱེ་བར་འགྱུར་རམ། བདག་གི་སངས་རྒྱས་ཀྱི་ཞིང་དུ་མིའི་ལུས་ཐོབ་པར་མ་གྱུར་ན་བདག་གི་ཆོས་ཐམས་ཅད་ཉམས་པར་གྱུར་ཅིག་།བདག་སླར་ཡང་སྣང་བར་མ་གྱུར་ཅིག་།བདག་གིས་སངས་རྒྱས་ཀྱི་མཛད་པ་མཐའ་དག་སྒྲུབ་པར་ཡང་རྡོ་མི་ཐོགས་པར་གྱུར་ཅིག་།གལ་ཏེ་སེམས་ཅན་གང་དག་སྲེད་མེད་ཀྱི་བུ་ལ་དད་པ་རྣམས་དང ། སེམས་ཅན་དེ་དག་གུམ་ནས་ངན་འགྲོར་ལྟུང་བའི་བར་དུ་གྱུར་ན། བདག་གི་སངས་རྒྱས་ཀྱི་མཛད་པ་མཐའ་དག་སྒྲུབ་པར་རྡོ་མི་ཐོགས་པར་གྱུར་ཅིག་།བདག་བྱང་ཆུབ་ཐོབ་ནས་ཀྱང་སངས་རྒྱས་ཀྱི་ཞིང་ཐམས་ཅད་དག་ན་སེམས་ཅན་མཚམས་མ་མཆིས་པ་བགྱིད་པ་དང །
368b
ལམ་ངན་པས་བཅོམ་ཞིང་ཉམ་ང་བ་ཆེན་པོ་ཐོབ་པར་གྱུར་པའི་སེམས་ཅན་དག་གུམ་ནས་བདག་གི་སངས་རྒྱས་ཀྱི་ཞིང་དུ་སྐྱེ་བར་འགྱུར་བ་དེ་དག་གི་མཚན་མ་ནི་འདི་ལགས་ཏེ། སེམས་ཅན་དེ་དག་གི་ཁ་དོག་ས་ལྟ་བུར་འགྱུར་བ་དང ། ཤ་ཟའི་གདོང་འདྲ་བ་དང ། བསྐྱུད་ངས་པ་དང ། དྲི་མི་བདའ་བ་དང ། ཚུལ་ཁྲིམས་འཆལ་པ་དང ། ཚེ་ཐུང་བ་དང ། ནད་རྣམ་པ་སྣ་ཚོགས་ཀྱིས་ཉེན་པ་དང ། སེམས་ཅན་དེ་དག་གི་ཡོ་བྱད་རྣམས་ཀྱང་ཡོངས་སུ་ཉམས་པར་འགྱུར་བ་སྟེ། སེམས་ཅན་དེ་དག་གི་དོན་དུ་བདག་དེའི་ཚེ་ན་འཇིག་རྟེན་གྱི་ཁམས་མི་མཇེད་ཀྱི་གླིང་བཞི་པ་ཇི་སྙེད་མཆིས་པར་གྱུར་པའི་གླིང་བཞི་པ་ཐམས་ཅད་དུ་ཡོངས་སུ་དགའ་ལྡན་གྱི་གནས་ནས་འབབ་ཅིང་མའི་མངལ་དུ་སྐྱེ་བ་སྟོན་པར་གྱུར་ཅིག་།རྒྱ་ཆེར་བགྱི་ན་གཞོན་ནུ་རྩེ་བ་དང ། བཟོ་དང་ལས་ཀྱི་གནས་དང ། དཀའ་བ་སྤྱོད་པ་དང ། བདུད་འདུལ་བ་དང ། བྱང་ཆུབ་མངོན་པར་རྫོགས་པར་འཚང་རྒྱ་བ་དང ། ཆོས་ཀྱི་འཁོར་ལོ་བསྐོར་བ་དང ། གླིང་བཞི་བ་ཐམས་ཅད་དུ་སངས་རྒྱས་ཀྱི་མཛད་པ་མཐའ་དག་ཉེ་བར་སྟོན་པར་ཡང་གྱུར་ཅིག་།ཡོངས་སུ་མྱ་ངན་ལས་འདའ་བ་དང ། སྐུ་གདུང་འགོད་པའི་བར་དག་ཉེ་བར་སྟོན་པར་ཡང་གྱུར་ཅིག་།བདག་བྱང་ཆུབ་ཐོབ་ནས་ཀྱང་ཚིག་གཅིག་བརྗོད་པས་ཆོས་སྟོན་པར་འགྱུར་ཞིང་ཉན་ཐོས་ཀྱི་ཐེག་པ་པའི་སེམས་ཅན་གང་ལགས་པ་དེ་དག་གི་ས་ནི་ཉན་ཐོས་ཀྱི་ཐེག་
369a
༄#། །པ་པའི་གཏམ་གྱི་སྡེ་སྣོད་ཀྱི་ཆོས་བསྟན་པར་འཚལ་བར་གྱུར་ཅིག་།རང་སངས་རྒྱས་ཀྱིས་འདུལ་བའི་སེམས་ཅན་གང་ལགས་པ་དེ་དག་གིས་ནི་རང་སངས་རྒྱས་ཀྱི་ཐེག་པ་པའི་གཏམ་གྱི་ཆོས་བསྟན་པར་འཚལ་བར་གྱུར་ཅིག་།བླ་ན་མེད་པའི་ཐེག་པ་ཆེན་པོའི་སེམས་ཅན་གང་ལགས་པ་དེ་དག་གིས་ནི་ཐེག་པ་ཆེན་པོའི་གཏམ་གྱི་ཆོས་བསྟན་པར་འཚལ་བར་གྱུར་ཅིག་།ཚོགས་དང་བྲལ་བའི་སེམས་ཅན་གང་ལགས་པ་དེ་དག་ནི་སྦྱིན་པའི་གཏམ་གྱི་ཆོས་བསྟན་པར་འཚལ་བར་གྱུར་ཅིག་།བསོད་ནམས་དང་བྲལ་ཞིང་མཐོ་རིས་ཀྱི་བདེ་བ་འཚལ་བའི་སེམས་ཅན་གང་ལགས་པ་དེ་དག་གིས་ནི་ཚུལ་ཁྲིམས་ཀྱི་གཏམ་གྱི་ཆོས་བསྟན་པར་འཚལ་བར་གྱུར་ཅིག་།གཅིག་ལ་གཅིག་འཇིག་པ་དང ། རྙོག་པའི་སེམས་དང ། རབ་ཏུ་སྡང་བའི་སེམས་དང་ལྡན་པ་གང་ལགས་པ་དེ་དག་གིས་ནི་བྱམས་པ་བརྗོད་པའི་གཏམ་གྱི་ཆོས་བསྟན་པར་འཚལ་བར་གྱུར་ཅིག་།སྲོག་གཅོད་པ་རྣམས་ཀྱིས་ནི་སྙིང་རྗེ་བསྟན་པར་འཚལ་བར་གྱུར་ཅིག་།ཕྲག་དོག་དང ། སེར་སྣས་ཟིལ་གྱིས་ནོན་པ་རྣམས་ཀྱིས་ནི་དགའ་བ་བརྗོད་པའི་གཏམ་གྱི་ཆོས་བསྟན་པར་འཚལ་བར་གྱུར་ཅིག་།གཟུགས་དང་གཟུགས་མ་མཆིས་པའི་དྲེགས་པས་མྱོས་པའི་སེམས་དང་ལྡན་པ་རྣམས་ཀྱིས་ནི་བཏང་སྙོམས་བརྗོད་པའི་གཏམ་གྱི་ཆོས་བསྟན་པར་འཚལ་བར་གྱུར་ཅིག་།འདོད་པ་ལ་འདོད་ཆགས་ཀྱི་དྲེགས་པས་
369b
མྱོས་པའི་སེམས་དང་ལྡན་པ་རྣམས་ཀྱིས་ནི་ཡང་དག་པར་མ་ལགས་པ་བརྗོད་པས་ཆོས་བསྟན་པར་འཚལ་བར་གྱུར་ཅིག་།ཐེག་པ་ཆེན་པོ་པའི་སེམས་ཅན་རྒོད་པས་རྣམ་པར་དཀྲུགས་པའི་སེམས་དང་ལྡན་པ་གང་ལགས་པ་དེ་དག་གིས་ནི་དབུགས་འབྱུང་བ་དང་རྡུབ་པ་དྲན་པ་བརྗོད་པས་ཆོས་བསྟན་པར་འཚལ་བར་གྱུར་ཅིག་།ཤེས་རབ་འཆལ་པ་རྣམས་ཀྱིས་ནི་རྟེན་ཅིང་འབྲེལ་པར་འབྱུང་བ་བརྗོད་པས་ཆོས་སྟོན་པར་འཚལ་པར་གྱུར་ཅིག་།ཐོས་པ་ཉུང་བ་རྣམས་ཀྱིས་ནི་བསྐྱུད་པ་མ་མཆིས་ཤིང་ཐོས་པ་འཛིན་པ་ཆུད་མི་ཟ་བ་བརྗོད་པས་ཆོས་བསྟན་པར་འཚལ་བར་གྱུར་ཅིག་།ལྟ་བ་ངན་པ་ཉམ་ང་བར་གྱུར་པ་རྣམས་ཀྱིས་ནི་སྟོང་པ་ཉིད་བརྗོད་པས་ཆོས་བསྟན་པར་འཚལ་བར་གྱུར་ཅིག་།རྣམ་པར་རྟོག་པ་ཀུན་ཏུ་སྤྱོད་པས་ཉམས་པ་རྣམས་ཀྱིས་ནི་མཚན་མ་མ་མཆིས་པ་བརྗོད་པས་ཆོས་བསྟན་པར་འཚལ་བར་གྱུར་ཅིག་།སྨོན་པ་མ་མཆིས་པའི་ཡོངས་སུ་དག་པ་ཉམས་པ་རྣམས་ཀྱིས་ནི་སྨོན་པ་མ་མཆིས་པ་བརྗོད་པས་ཆོས་བསྟན་པར་འཚལ་པར་གྱུར་ཅིག་།བསམ་པ་ཡོངས་སུ་མ་དག་པ་རྣམས་ཀྱིས་ནི་བསམ་པ་ཡོངས་སུ་དག་པ་བརྗོད་པས་ཆོས་བསན་པར་འཚལ་པར་གྱུར་ཅིག་།རྣམ་པར་འདྲེས་པར་སྤྱོད་པས་ཉམས་པ་རྣམས་ཀྱིས་ནི་བྱང་ཆུབ་ཀྱི་སེམས་མི་བརྗོད་པ་བརྗོད་པས་ཆོས་བསྟན་པར་འཚལ་བར་གྱུར་ཅིག། ཟད་པའི་སྦྱོར་བ་དྲོད་ཉམས་པ་རྣམས་ཀྱི་ས་ནི་བཅོས་མ་མ་
370a
༄#། །ལགས་པ་བརྗོད་པའི་ཆོས་བསྟན་པར་འཚལ་བར་གྱུར་ཅིག་།ལྷག་པའི་བསམ་པ་ཤིན་ཏུ་སྦྱངས་པ་ཉམས་པ་རྣམས་ཀྱིས་ནི་བརྟེན་པ་མ་མཆིས་པ་བརྗོད་པས་ཆོས་བསྟན་པར་འཚལ་བར་གྱུར་ཅིག་།དེ་བཞིན་དུ་སྦྱར་ཏེ། ཉོན་མོངས་པ་ཅན་གྱི་སེམས་དང་ལྡན་པ་རྣམས་ཀྱིས་ནི་དགེ་བའི་སེམས་བརྗོད་པ་དང ། དགེ་བ་མི་བསྐྱུད་པ་རྣམས་ཀྱིས་ནི་རྣམ་པར་སྣང་བྱེད་བརྗོད་པ་དང ། བདུད་ཀྱི་ལས་ལ་བརྩོན་པ་རྣམས་ཀྱིས་ནི་སྟོང་པ་ཉིད་བརྗོད་པ་དང ། དོན་དམ་པ་ལ་ཡང་དག་པར་ཞུགས་པ་རྣམས་ཀྱིས་ནི་མངོན་པར་འཕགས་པ་བརྗོད་པ་དང ། ཉོན་མོངས་པ་སྣ་ཚོགས་ཀྱིས་སེམས་ཉམས་པར་གྱུར་པ་རྣམས་ཀྱིས་ནི་བྲལ་བ་བརྗོད་པ་དང ། ལམ་མི་མཉམ་པར་ཡང་དག་པར་ཞུགས་པ་རྣམས་ཀྱིས་ནི་རྣམ་པར་ལྡོག་པར་བརྗོད་པ་དང ། ཐེག་པ་ཆེན་པོ་ལ་ངོ་མཚར་དུ་རྟོགས་པའི་སེམས་དང་ལྡན་པ་རྣམས་ཀྱིས་ནི་ལྡོག་པ་བརྗོད་པ་དང ། འཁོར་བས་སྐྱོ་བའི་བྱང་ཆུབ་སེམས་དཔའ་རྣམས་ཀྱིས་ནི་དགའ་བ་བརྗོད་པ་དང ། དགེ་བ་དང ། ས་དང ། ཡེ་ཤེས་མ་རྟོགས་པ་རྣམས་ཀྱིས་ནི་མ་རྨོངས་པ་བརྗོད་པ་དང ། དགེ་བའི་རྩ་གཞན་དང་གཞན་དག་གིས་ཆོག་པར་འཛིན་པ་རྣམས་ཀྱིས་ནི་ཐོས་པ་བརྗོད་པ་དང ། གཅིག་ལ་གཅིག་སེམས་མི་མཉམ་པ་རྣམས་ཀྱིས་ནི་འོད་ཟེར་ཐོགས་པ་མེ་དཔ་བརྗོད་པ་དང ། ལས་དགའ་བ་ལ་ཡང་དག་
370b
པར་ཞུགས་པ་རྣམས་ཀྱིས་ནི་བྱ་བ་ལ་འཇུག་པ་བརྗོད་པ་དང ། འཁོར་གྱིས་འཇིགས་པར་གྱུར་པ་རྣམས་ཀྱིས་ནི་སེང་གེའི་རྟོགས་པ་བརྗོད་པ་དང ། བདུད་བཞིས་ཟིལ་གྱིས་ནོན་པའི་སེམས་དང་ལྡན་པ་རྣམས་ཀྱིས་ནི་དཔའ་བ་བརྗོད་པ་དང ། སངས་རྒྱས་ཀྱི་ཞིང་སྣང་བར་མ་གྱུར་པའི་སེམས་ཅན་རྣམས་ཀྱིས་ནི་འོད་བཀོད་པ་བརྗོད་པ་དང ། རྗེས་སུ་ཆགས་པ་དང ། ཁོང་ཁྲོ་བ་རྣམས་ཀྱིས་ནི་རི་བོའི་ཕུང་པོ་བརྗོད་པ་དང ། སངས་རྒྱས་ཀྱི་ཆོས་སྣང་བས་ཟིལ་གྱིས་ནོན་པ་རྣམས་ཀྱིས་ནི་རྒྱལ་མཚན་གྱི་རྩེ་མོའི་དཔུང་རྒྱན་བརྗོད་པ་དང ། ཤེས་རབ་ཆེན་པོ་དང་བྲལ་བ་རྣམས་ཀྱིས་ནི་སྒྲོན་མ་དང་ལྡན་པ་བརྗོད་པ་དང ། གཏི་མུག་གི་མུན་པར་མཆིས་པ་རྣམས་ཀྱིས་ནི་ཉི་མའི་སྒྲོན་མ་བརྗོད་པ་དང ། ཟད་པའི་ངེས་པའི་ཚིག་ལ་བརྩོན་པ་རྣམས་ཀྱིས་ནི་ཡོན་ཏན་འབྱུང་གནས་བརྗོད་པ་དང ། བདག་ལ་དབུ་བ་རྡོས་པ་ལྟ་བུར་འཚལ་བ་རྣམས་ཀྱིས་ནི་སྲེད་མེད་ཀྱི་བུ་བརྗོད་པ་དང ། བློ་གཡོ་ཞིང་འགྱུར་བ་རྣམས་ཀྱིས་ནི་སྙིང་པོ་དང་ལྡན་པ་བརྗོད་པ་དང ། སྤྱི་གཙུག་བལྟར་གདའ་བ་རྣམས་ཀྱིས་ནི་ལྷུན་པོའི་རྒྱལ་མཚན་བརྗོད་པ་དང ། སྔོན་གྱི་དམ་བཅས་པ་བོར་བ་རྣམས་ཀྱིས་ནི་སྙིང་པོ་ཅན་བརྗོད་པ་དང ། མངོན་པར་ཤེས་པ་ཉམས་པ་རྣམས་ཀྱིས་ནི་རྡོ་རྗེའི་ཚིག་བརྗོད་པ་དང ། བྱང་ཆུབ་ཀྱི་སྙིང་པོ་མངོན་པར་འཚལ་བ་རྣམས་ཀྱིས་ནི་རྡོ་རྗེའི་སྙིང་པོ་བརྗོད་པ་དང ། ཆོས་ཐམས་ཅད་སྨོན་པ་རྣམས་ཀྱིས་
371a
༄#། །ནི་རྡོ་རྗེ་ལྟ་བུ་བརྗོད་པ་དང ། སེམས་ཅན་གྱི་སེམས་ཀྱི་སྤྱོད་པ་རབ་ཏུ་འཚལ་བ་རྣམས་ཀྱིས་ནི་སྤྱོད་པ་དང་ལྡན་པ་བརྗོད་པ་དང ། དབང་པོ་མཆོག་དང་མཆོག་མ་ལགས་པར་འཚལ་བ་རྣམས་ཀྱིས་ནི་ཤེས་རབ་སྒྲོན་མ་བརྗོད་པ་དང ། ཕན་ཚུན་དུ་ཚིག་བརྗོད་པ་མ་འཚལ་བ་རྣམས་ཀྱིས་ནི་སྒྲ་ལ་འཇུག་པ་བརྗོད་པ་དང ། ཆོས་ཀྱི་སྐུ་ཐོབ་པ་རྣམས་ཀྱིས་ནི་དམ་པའི་ཆོས་ཀྱི་ཚོགས་བསྒོམ་པ་བརྗོད་པ་དང ། དེ་བཞིན་གཤེགས་པ་མཐོང་བ་དང་བྲལ་བ་རྣམས་ཀྱིས་ནི་མིག་མི་འཛུམ་པ་བརྗོད་པ་དང ། དམིགས་པ་ཐམས་ཅད་ཀྱིས་རྣམ་པར་འཁྲུགས་པ་རྣམས་ཀྱིས་ནི་དགོན་པ་བརྗོད་པ་དང ། ཆོས་ཀྱི་འཁོར་ལོ་མངོན་པར་བསྐོར་བར་འཚལ་བ་རྣམས་ཀྱིས་ནི་འཁོར་ལོ་དྲི་མ་མེད་པ་བརྗོད་པ་དང ། རྒྱུ་མ་མཆིས་པའི་རིག་པ་ལ་ཡང་དག་པར་ཞུགས་པ་རྣམས་ཀྱིས་ནི་རིག་པ་ལ་བརྟེན་པའི་རྗེས་སུ་མཐུན་པ་བརྗོད་པ་དང ། སངས་རྒྱས་ཀྱི་ཞིང་གཅིག་པུ་ཐེར་ཟུག་ཏུ་བལྟ་བ་རྣམས་ཀྱི་ས་ནི་ལེགས་པར་བགྱིད་པ་རྣམ་པར་འབྱེད་པ་བརྗོད་པ་དང ། མཚན་དང་དཔེ་བྱད་ཀྱི་ས་བོན་བསྐྲུན་པ་རྣམས་ཀྱིས་ནི་རྒྱན་དང་ལྡན་པ་བརྗོད་པ་དང ། ཚིག་དང་སྒྲ་རབ་ཏུ་འབྱེད་པར་རྔོ་མི་ཐོགས་པ་རྣམས་ཀྱིས་ནི་སོ་སོར་བསྒྲུབ་པ་བརྗོད་པ་དང ། ཐམས་ཅད་མཁྱེན་པའི་ཡེ་ཤེས་མངོན་པར་འཚལ་བ་རྣམས་ཀྱིས་ནི་ཆོས་ཀྱི་དབྱིངས་
371b
རྣམ་པར་འཁྲུགས་པ་མ་མཆིས་པ་བརྗོད་པ་དང ། ད་ལྟར་བྱུང་བའི་ཆོས་རྣམས་ལ་ཡང་དང་ཡང་དུ་འཇུག་པ་རྣམས་ཀྱིས་ནི་བརྟན་པ་བརྗོད་པ་དང ། ཆོས་ཀྱི་དབྱིངས་རབ་ཏུ་འཚལ་བ་རྣམས་ཀྱི་ས་ནི་མངོན་པར་ཤེས་པ་བརྗོད་པ་དང ། ཤེས་རབ་སྤངས་པ་རྣམས་ཀྱིས་ནི་ཉམས་པ་མ་མཆིས་པ་བརྗོད་པ་དང ། ལམ་རྣམ་པར་འཁྲུགས་པ་རྣམས་ཀྱིས་ནི་འགྱུར་བ་མ་མཆིས་པ་བརྗོད་པ་དང ། ནམ་མཁའ་ལྟ་བུའི་ཡེ་ཤེས་མངོན་པར་འཚལ་བ་རྣམས་ཀྱིས་ནི་ཅིའང་མ་མཆིས་པ་བརྗོད་པ་དང ། ཕ་རོལ་ཏུ་ཕྱིན་པ་ཡོངས་སུ་རྫོགས་པ་རྣམས་ཀྱིས་ནི་ཡོངས་སུ་དག་པ་ལ་རབ་ཏུ་འགོད་པ་བརྗོད་པ་དང ། བསྡུ་བའི་དངོས་པོ་ཡོངས་སུ་མ་རྫོགས་པ་རྣམས་ཀྱིས་ནི་ཤིན་ཏུ་ཡང་དག་པར་གཟུང་བ་བརྗོད་པ་དང ། ཚངས་པའི་གནས་པ་འཚོལ་བ་རྣམས་ཀྱིས་ནི་སྦྱོར་བ་མཉམ་པ་བརྗོད་པ་དང ། བྱང་ཆུབ་ཀྱི་ཕྱོགས་རིན་པོ་ཆེ་ཡོངས་སུ་མ་རྫོགས་པ་རྣམས་ཀྱིས་ནི་རྣམ་པར་གནས་པས་ངེས་པར་འབྱུང་བ་བརྗོད་པ་དང ། ཤེས་པ་མ་བསྒོམས་ཤིང་རབ་ཏུ་སྡང་བའི་སེམས་དང་ལྡན་པ་རྣམས་ཀྱིས་ནི་རྒྱ་མཚོའི་ཕྱག་རྒྱ་བརྗོད་པ་དང ། མི་སྐྱེ་བའི་ཆོས་ཀྱི་བཟོད་པ་ལ་ངོ་མཚར་དུ་སེམས་པ་རྣམས་ཀྱིས་ནི་སེམས་མ་མཆིས་པ་བརྗོད་པ་དང ། ཇི་ལྟར་ཐོས་པའི་ཆོས་རབ་ཏུ་ཉམས་པའི་སེམས་དང་ལྡན་པ་རྣམས་ཀྱིས་ནི་བསྐྱུད་པ་མ་མཆིས་པ་བརྗོད་པ་དང ། ཕན་ཚུན་ལེགས་པར་སྨྲས་པ་ལ་མི་དགའ་བ་རྣམས་ཀྱིས་
372a
༄#། །ནི་རབ་རིབ་མ་མཆིས་པ་བརྗོད་པ་དང ། དཀོན་མཆོག་གསུམ་ལ་རབ་ཏུ་དང་བ་ཐོབ་པ་རྣམས་ཀྱིས་ནི་བསོད་ནམས་ཆེ་བ་བརྗོད་པ་དང ། ཆོས་ཀྱི་སྒོའི་ཆར་རབ་ཏུ་འབབ་པས་ཆོག་མ་འཚལ་བ་རྣམས་ཀྱི་ས་ནི་ཆོས་ཀྱི་སྤྲིན་བརྗོད་པ་དང ། དཀོན་མཆོག་གསུམ་རྒྱུན་ཆད་པར་ལྟ་བ་རྣམས་ཀྱིས་ནི་རིན་ཆེན་བཀོད་པ་བརྗོད་པ་དང ། ཤེས་པ་ཉམས་པའི་ལས་ལ་མངོན་པར་བརྩོན་པ་རྣམས་ཀྱིས་ནི་དཔེ་མ་མཆིས་པ་བརྗོད་པ་དང ། ཀུན་ཏུ་སྦྱོར་བ་དང་འཆིང་བ་ཅན་ཐམས་ཅད་ཀྱིས་ནི་ནམ་མཁའི་སྒོ་བརྗོད་པ་དང ། ཆོས་ཐམས་ཅད་གཞན་མ་ལགས་པར་སེམས་པ་རྣམས་ཀྱིས་ནི་ཡེ་ཤེས་ཀྱི་ཕྱག་རྒྱ་བརྗོད་པ་དང ། དེ་བཞིན་གཤེགས་པའི་ཡོན་ཏན་ཡོངས་སུ་མ་རྫོགས་པ་རྣམས་ཀྱིས་ནི་འཇིག་རྟེན་གྱི་རིག་པ་མངོན་སུམ་དུ་བགྱི་བའི་དངོས་པོ་བརྗོད་པ་དང ། སྔོན་གྱི་སངས་རྒྱས་ལ་ལྷག་པར་བགྱི་བ་བགྱིས་པ་རྣམས་ཀྱིས་ནི་རྣམ་པར་ངེས་པའི་ཆོ་འཕྲུལ་བརྗོད་པ་དང ། ཕྱི་མའི་མཐའི་བསྐལ་པར་ཆོས་ཀྱི་སྒོ་གཅིག་སྟོན་པ་རྣམས་ཀྱིས་ནི་ཆོས་ཐམས་ཅད་ཀྱི་ཚུལ་བརྗོད་པ་དང ། མདོ་སྡེ་ཐམས་ཅད་ལ་རྣམ་པར་ངེས་པ་རྣམས་ཀྱིས་ནི་ཆོས་ཀྱི་རང་བཞིན་མཉམ་པ་ཉིད་དུ་རྣམ་པར་ངེས་པར་བརྗོད་པ་དང ། རྙིང་པར་འགྱུར་བ་དང ། མཐུན་པའི་ཆོས་དྲུག་ཡོངས་སུ་སྤངས་པ་རྣམས་ཀྱིས་ནི་ཆོས་ཐམས་ཅད་ཀྱི་ཚུལ་བརྗོད་པ་དང ། རྣམ་
372b
པར་ཐར་པའི་སེམས་ཀྱི་ཐེག་པ་ལ་མངོན་པར་བརྩོན་པ་རྣམས་ཀྱིས་ནི་མངོན་པར་ཤེས་པས་རྣམ་པར་རྩེ་བ་བརྗོད་པ་པར་རྟོག་པ་རྣམས་ཀྱིས་ནི་གཞན་གྱི་དྲིང་མི་འཇོག་པ་བརྗོད་པ་པར་རྟོག་པ་རྣམས་ཀྱིས་ནི་གཞན་གྱི་དྲིང་མི་འཇོག་པ་བརྗོད་པ་དང ། བྱང་ཆུབ་སེམས་དཔའི་སྤྱོད་པ་ལ་མངོན་པར་མི་བརྩོན་པ་རྣམས་ཀྱིས་ནི་ཡེ་ཤེས་ཐོབ་པར་བརྗོད་པ་དང ། ཉེ་དུ་ལ་ཡང་དག་པར་སྟོན་པ་རྣམས་ཀྱིས་ནི་ཐམས་ཅད་ཀྱི་རྗེས་སུ་སོང་བ་བརྗོད་པ་དང ། བྱང་ཆུབ་སེམས་དཔའི་སྤྱོད་པ་ལྷག་མ་དང་བཅས་པ་རྣམས་ཀྱིས་ནི་དབང་བསྐུར་བ་བརྗོད་པ་དང ། དེ་བཞིན་གཤེགས་པའི་སྟོབས་བཅུ་ཡོངས་སུ་མ་རྫོགས་པ་རྣམས་ཀྱིས་ནི་མི་ཆོམས་པ་བརྗོད་པ་དང ། མི་འཇིགས་པ་བཞི་མ་ཐོབ་པ་རྣམས་ཀྱིས་ནི་མི་ཟད་པ་བརྗོད་པ་དང ། སངས་རྒྱས་ཀྱི་ཆོས་མ་འདྲེས་པ་མ་ཐོབ་པ་རྣམས་ཀྱིས་ནི་མི་འཕྲོགས་པ་བརྗོད་པ་དང ། མཉན་པ་དང་ལྟ་བ་དོན་མ་མཆིས་པ་རྣམས་ཀྱིས་ནི་སྨོན་ལམ་བརྗོད་པ་དང ། སངས་རྒྱས་ཀྱི་ཆོས་ཐམས་ཅད་མངོན་སུམ་དུ་རྗེས་སུ་རྟོགས་པར་བགྱི་བའི་སླད་དུ་རྒྱུན་འཁྲུགས་པ་རྣམས་ཀྱིས་ནི་རྒྱ་མཚོ་དྲི་མ་མེད་པ་བརྗོད་པ་དང ། ཐམས་ཅད་མཁྱེན་པའི་ཡེ་ཤེས་ལྷག་མ་དང་བཅས་པ་རྣམས་ཀྱིས་ནི་སངས་རྒྱས་ཤིན་ཏུ་རྣམ་པར་སངས་རྒྱས་པ་བརྗོད་པ་དང ། དེ་བཞིན་གཤེགས་པ་ཐམས་ཅད་ཀྱི་དགོངས་པ་མ་ཐོབ་པ་རྣམས་ཀྱིས་ནི་མཐའ་མ་མཆིས་པ་དང ། ཐུག་པ་མ་
373a
༄#། །མཆིས་པ་བརྗོད་པས་ཆོས་བསྟན་པར་འཚལ་བར་གྱུར་ཅིག་།བྱང་ཆུབ་སེམས་དཔའ་གང་དག་གཡོ་མ་མཆིས་པ། སྒྱུ་མ་མཆིས་པ། དྲང་བ་དྲང་བའི་རང་བཞིན་ཅན་ཏེ། ཐེག་པ་ཆེན་པོ་ལ་ཡང་དག་པར་ཞུགས་པ་དཔག་ཏུ་མ་མཆིས། གྲངས་མ་མཆིས་པ་དེ་དག་གི་སེམས་ཀྱི་རྒྱུད་ལ་ཚིག་གཅིག་བརྗོད་པས་ཀྱང་ཆོས་ཀྱི་སྒོ་བརྒྱད་ཁྲི་བཞི་སྟོང་དང ། ཏིང་ངེ་འཛིན་གྱི་སྒོ་བརྒྱད་ཁྲི་བཞི་སྟོང་དང ། གཟུངས་བདུན་ཁྲི་ལྔ་སྟོང་པོའི་ཡོན་ཏན་དེ་དག་རབ་ཏུ་འགོད་པར་གྱུར་ཅིག་།དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གོ་ཆ་ཆེན་པོ་འཚལ་བར་གྱུར་ཅིག་།སྨོན་ལམ་གྱི་ཁྱད་པར་བསམ་གྱིས་མི་ཁྱབ་པས་མངོན་པར་འཕགས་པར་གྱུར་ཅིག་།བསམ་གྱིས་མི་ཁྱབ་པའི་ཡེ་ཤེས་མཐོང་བ་དང ། བྱང་ཆུབ་ཀྱི་ཡོན་ཏན་དམ་པས་བརྒྱན་པར་གྱུར་ཅིག་།འདི་ལྟ་སྟེ། ལུས་མཚན་དང་དཔེ་བྱད་རྣམས་ཀྱིས་བརྒྱན་པར་གྱུར་ཅིག་།ངག་ལེགས་པར་སྨྲས་པས་སེམས་ཅན་རྣམས་ཀྱི་བསམ་པ་ཇི་ལྟ་བ་བཞིན་དུ་ཡང་དག་པར་མགུ་བར་བགྱིད་པས་བརྒྱན་པར་གྱུར་ཅིག་།ཏིང་ངེ་འཛིན་ཚིག་མ་མཆིས་པའི་སླད་དུ་ཐོས་པས་བརྒྱན་པ་དང ། གཟུངས་བསྐྱུད་པ་མ་མཆིས་པའི་སླད་དུ་དྲན་པས་བརྒྱན་པ་དང ། འགྲོ་བ་ངན་པ་ཁོང་དུ་ཆུད་པའི་སླད་དུ་ཡིད་ཀྱིས་བརྒྱན་ཅིང་མྱ་ངན་ལས་འདས་པས་བརྒྱན་པ་དང །
373b
དམ་པ་བཅས་པ་ལ་བརྟན་པའི་སླད་དུ་བསམ་པས་བརྒྱན་པ་དང ། དམ་བཅས་པ་ཉམས་སུ་ལོན་པའི་སླད་དུ་སྦྱོར་བས་བརྒྱན་པ་དང ། ས་ནས་སར་འཕར་བའི་སླད་དུ་ལྷག་པའི་བསམ་པས་བརྒྱན་པ་དང ། དངོས་པོ་ཐམས་ཅད་ཡོངས་སུ་གཏོང་བའི་སླད་དུ་སྦྱིན་པས་བརྒྱན་པ་དང ། ལེགས་པར་ཐོས་པ་ཁོང་དུ་ཆུད་པ་དྲི་མ་མཆིས་པའི་སླད་དུ་ཚུལ་ཁྲིམས་ཀྱིས་བརྒྱན་པ་དང ། སེམས་ཅན་ཐམས་ཅད་ལ་ཞེ་འགྲས་པའི་སེམས་མ་མཆིས་པའི་སླད་དུ་བཟོད་པས་བརྒྱན་པ་དང ། ཚོགས་ཐམས་ཅད་ཉེ་བར་བསགས་པའི་སླད་དུ་བརྩོན་འགྲུས་ཀྱིས་བརྒྱན་པ་དང ། སྙོམས་པར་འཇུག་པ་ཐམས་ཅད་དང ། མངོན་པར་ཤེས་པས་རྣམ་པར་རྩེ་བའི་སླད་དུ་བསམ་གཏན་གྱིས་བརྒྱན་པ་དང ། ཉོན་མོངས་པའི་བག་ཆགས་ཡོངས་སུ་འཚལ་བའི་སླད་དུ་ཤེས་རབ་ཀྱིས་བརྒྱན་པར་གྱུར་ཅིག་།སེམས་ཅན་ཐམས་ཅད་ཡང་དག་པར་སྐྱོབ་པའི་རྗེས་སུ་མཆིས་པའི་སླད་དུ་བྱམས་པས་བརྒྱན་པ་དང ། སེམས་ཅན་ཐམས་ཅད་ཡོངས་སུ་མི་གཏོང་བ་ལ་གནས་པའི་སླད་དུ་སྙིང་རྗེས་བརྒྱན་པ་དང ། ཆོས་ཐམས་ཅད་ལ་ཐེ་ཚོམ་མ་མཆིས་པར་འགྱུར་བའི་སླད་དུ་དགའ་བས་བརྒྱན་པ་དང ། མཐོན་དམན་གཉིས་དང་བྲལ་བའི་སླད་དུ་བཏང་སྙོམས་ཀྱིས་བརྒྱན་པ་དང ། མངོན་པར་ཤེས་པ་ཐམས་ཅད་ཀྱིས་རྣམ་པར་རྩེ་བའི་སླད་དུ་མངོན་པར་ཤེས་པས་བརྒྱན་པ་དང །
374a
༄#། །ལོངས་སྤྱོད་མི་བས་པའི་རིན་པོ་ཆེའི་ལག་པ་ཐོབ་པའི་སླད་དུ་བསོད་ནམས་ཀྱིས་བརྒྱན་པ་དང ། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་མངོན་པར་འཚལ་བའི་སླད་དུ་ཡེ་ཤེས་ཀྱིས་བརྒྱན་པ་དང ། སེམས་ཅན་ཐམས་ཅད་ཀྱིས་ཆོས་རྟོགས་པར་བགྱི་བ་ལ་མཁས་པའི་སླད་དུ་བློས་བརྒྱན་པ་དང ། ཤེས་རབ་ཀྱི་མིག་གི་སྣང་བ་ཐོབ་པའི་སླད་དུ་སྣང་བས་བརྒྱན་པར་གྱུར་ཅིག་།དོན་དང ། ཆོས་དང ། ངེས་པའི་ཚིག་དང ། སྤོབས་པ་སོ་སོ་ཡང་དག་པར་རིག་པ་ཐོབ་པའི་སླད་དུ་སོ་སོ་ཡང་དག་པར་རིག་པས་བརྒྱན་པར་གྱུར་ཅིག་།བདུད་དང་ཕས་ཀྱི་རྒོལ་བ་ཐམས་ཅད་ཀྱིས་ཟིལ་གྱིས་མི་ནོན་པའི་སླད་དུ་མི་འཇིགས་པས་བརྒྱན་པ་དང ། སངས་རྒྱས་རྣམས་ཀྱི་ཡོན་ཏན་རྗེས་སུ་ཐོབ་པའི་སླད་དུ་ཡོན་ཏན་གྱིས་བརྒྱན་པ་དང ། རྟག་ཏུ་རྒྱུན་མི་འཆད་པར་ཐོགས་པ་མ་མཆིས་པའི་སྤོབས་པས་སེམས་ཅན་རྣམས་ལ་ཆོས་སྟོན་པའི་སླད་དུ་ཆོས་ཀྱིས་བརྒྱན་པར་གྱུར་ཅིག་།སངས་རྒྱས་ཀྱི་ཆོས་ཐམས་ཅད་སྣང་བར་གྱུར་པའི་སླད་དུ་སྣང་བས་བརྒྱན་པ་དང ། སངས་རྒྱས་ཀྱི་ཞིང་ཐམས་ཅད་སྣང་བར་གྱུར་བའི་སླད་དུ་འོད་ཀྱིས་བརྒྱན་པ་དང ། ཁྱད་པར་ལུང་སྟོན་པའི་སླད་དུ་ཀུན་བརྗོད་པའི་ཆོ་འཕྲུལ་གྱིས་བརྒྱན་པ་དང ། ཡང་དག་པ་ཇི་ལྟ་བ་བཞིན་དུ་རྗེས་སུ་སྟོན་པ་སྩོལ་བའི་སླད་དུ་རྗེས་སུ་སྟོན་
374b
པའི་ཆོ་འཕྲུལ་གྱིས་བརྒྱན་པ་དང ། རྫུ་འཕྲུལ་གྱི་རྐང་པ་བཞིའི་དམ་པའི་ཕ་རོལ་ཏུ་སོན་པའི་སླད་དུ་རྫུ་འཕྲུལ་གྱི་ཆོ་འཕྲུལ་གྱིས་བརྒྱན་པ་དང ། དེ་བཞིན་གཤེགས་པའི་གསང་བའི་རྗེས་སུ་ཞུགས་པའི་སླད་དུ་དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་བརྒྱན་པ་དང ། གཞན་ལ་རག་མ་ལས་པའི་ཡེ་ཤེས་ཐོབ་པའི་སླད་དུ་ཆོས་ཀྱི་དབང་ཕྱུག་གིས་བརྒྱན་པ་དང ། ཇི་སྐད་སྨྲས་པ་དེ་བཞིན་དུ་བགྱིད་ཅིང་ཐམས་ཅད་ཀྱིས་མི་ཆོམས་པའི་སླད་དུ་དགེ་བའི་ཆོས་ཐམས་ཅད་ལ་ནན་ཏན་སྙིང་པོར་བགྱིད་པས་བརྒྱན་པར་གྱུར་ཅིག་།ཐེག་པ་ཆེན་པོ་ལ་ཡང་དག་པར་ཞུགས་པའི་སེམས་ཅན་དཔག་ཏུ་མ་མཆིས། གྲངས་མ་མཆིས་པ་དག་ལའང་བདག་གིས་ཚིག་གཅིག་བརྗོད་པས་དགེ་བ་རྣམ་པར་སྦྱོང་བ་ཡང་དག་པར་བསགས་པ་ཆེན་པོས་ཡང་དག་པར་ཚིམ་པར་གྱུར་ཅིག་།དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་ཆོས་ཐམས་ཅད་ལ་གཞན་གྱི་དྲིང་མི་འཇོག་པའི་ཡེ་ཤེས་ཐོབ་པར་གྱུར་ཅིག་།ཆོས་ཀྱི་སྣང་བ་ཆེན་པོ་དང་ཡང་ལྡན་པར་གྱུར་ཅིག་།མྱུར་དུ་བླ་ན་མེད་པར་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཡང་གྱུར་ཅིག་བཙུན་པ་བཅོམ་ལྡན་འདས། འཇིག་རྟེན་གྱི་ཁམས་གཞན་དག་ན་ཉན་ཐོས་ཀྱི་ཐེག་པ་པའམ། རང་སངས་རྒྱས་ཀྱི་ཐེག་པ་པའམ། བླ་ན་མེད་པའི་ཐེག་པ་ཆེན་པོ་པའི་སེམས་ཅན་གང་དག་
375a
༄#། །མཚམས་མ་མཆིས་པ་བགྱིད་པ་དང ། ལྟུང་བའི་རྩ་བའི་བར་གྱི་ནོངས་པ་དང་བཅས་པ་དང ། སེམས་ཀྱི་རྒྱུད་ཚིག་པར་གྱུར་པ་དེ་དག་ཀྱང་སྨོན་ལམ་གྱི་དབང་གིས་བདག་གི་སངས་རྒྱས་ཀྱི་ཞིང་དུ་སྐྱེ་བར་གྱུར་ཅིག་།སེམས་ཅན་མི་དགེ་བའི་རྩ་བ་དང་འགྲོགས་པ། རྩུབ་པ། སྡིག་པ་འཚལ་བ། ཁྲ་ཁྲོ་དང ། དམུ་རྒོད་ཀྱི་རྒྱུད་ཅན། བློ་ལྡོག་པ་ཀུན་འཛིན་པའི་རྒྱུད་ཅན་དེ་དག་ལའང་བདག་གི་སེམས་དང་སྐད་བརྒྱད་ཁྲི་བཞི་སྟོང་དག་སྟོན་པར་གྱུར་ཅིག་།སེམས་ཅན་ལེ་ལོ་ཅན་གྱི་བར་དག་ལའང་བདག་གིས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་དག་རྒྱ་ཆེར་སྟོན་པར་གྱུར་ཅིག་།དེ་ན་སེམས་ཅན་གང་དག་བླ་ན་མེད་པའི་ཐེག་པ་ཆེན་པོར་གྱུར་པ་དེ་དག་ལའང་བདག་གིས་ཕ་རོལ་ཏུ་ཕྱིན་པ་དྲུག་གི་ཆོས་རྣམས་རྒྱ་ཆེར་སྟོན་པར་འགྱུར་ཞིང ། སྦྱིན་པའི་ཕ་རོལ་ཏུ་ཕྱིན་པ་རྒྱ་ཆེར་སྟོན་པར་འགྱུར་བ་དང ། ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་རྒྱ་ཆེར་སྟོན་པར་གྱུར་ཅིག་།ཡང་དེ་ན་སེམས་ཅན་གང་དག་ཉན་ཐོས་ཀྱི་ཐེག་པ་པའམ། རང་སངས་རྒྱས་ཀྱི་ཐེག་པ་པར་གྱུར་པའམ། དགེ་བའི་རྩ་བ་མ་བསྐྲུན་ཅིང་བསྟན་བཅོས་ལ་མངོན་པར་དགའ་བར་མ་གྱུར་པ་དེ་དག་ཀྱང་བདག་གིས་གསུམ་ལ་སྐྱབས་སུ་མཆི་བ་ལ་འགོད་པར་འགྱུར་ཞིང ། སླད་ཀྱིས་ཕ་རོལ་ཏུ་ཕྱིན་པ་དྲུག་པོ་དག་ལའང་སྦྱོར་བར་གྱུར་ཅིག། རྣམ་པར་འཚེ་བ་ལ་དགའ་བ་རྣམས་ནི་སྲོག་གཅོད་པ་
375b
སྤོང་བ་ལ་འགོད་པར་གྱུར་ཅིག་།འདོད་པ་མི་བཟད་པས་ཟིལ་གྱིས་ནོན་པ་རྣམས་ནི་མ་བྱིན་པར་ལེན་པ་སྤོང་བ་ལ་འགོད་པར་གྱུར་ཅིག་།ཆོས་མ་ལགས་པ་ལ་འདོད་པས་ཆགས་པ་རྣམས་ནི་འདོད་པ་ལ་ལོག་པར་གཡེམ་པ་སྤོང་བ་ལ་འགོད་པར་གྱུར་ཅིག་།ཕན་ཚུན་རྫུན་གྱི་ཚིག་སྨྲ་བ་རྣམས་ནི་བརྫུན་དུ་སྨྲ་བ་སྤོང་བ་ལ་འགོད་པར་གྱུར་ཅིག་།མྱོས་པར་འགྱུར་བ་ལ་མངོན་པར་དགའ་བ་རྣམས་ནི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པ་སྤོང་བ་ལ་འགོད་པར་གྱུར་ཅིག་།སེམས་ཅན་གང་དག་ནོངས་པ་ལྔ་པོ་ཐམས་ཅད་བགྱིད་པར་འགྱུར་བ་དེ་དག་ནི་ནོངས་པ་ལྔ་པོ་སྤོང་ཞིང་དགེ་བསྙེན་གྱི་སྡོམ་པ་ལ་འགོད་པ་གྱུར་ཅིག་།སེམས་ཅན་གང་དག་དགེ་བའི་ཆོས་རྣམས་ལ་མངོན་པར་མི་དགའ་བ་དེ་དག་ནི་བདག་གིས་ཉིན་ཞག་གཅིག་ཙམ་ཡང་ཡན་ལག་བརྒྱད་དང་ལྡན་པའི་ཚུལ་ཁྲིམས་ལ་རབ་ཏུ་འགོད་པར་གྱུར་ཅིག་།སེམས་ཅན་གང་དག་དགེ་བའི་རྩ་བ་ཆུང་ངུ་ལ་མངོན་པར་དགའ་བའི་སེམས་དང་ལྡན་པ་དེ་དག་ནི་བདག་གིས་ལེགས་པར་གསུངས་པའི་ཆོས་འདུལ་བ་ལ་ཉེ་བར་སྦྱར་བར་བགྱི་ཞིང ། རབ་ཏུ་བྱུང་བའི་སྡོམ་པ་བསླབ་པའི་གཞི་བཅུའི་ཚངས་པར་སྤྱོད་པ་ལ་འགོད་པར་གྱུར་ཅིག་།སེམས་ཅན་གང་དག་དགེ་བའི་ཆོས་རྣམས་ཡོངས་སུ་འཚོལ་བར་འཚལ་བ་དེ་དག་ནི་བདག་གིས་དགེ་བའི་ཆོས་རྣམས་ལ་ཉེ་བར་བསྒྲུབས་ནས་ཚངས་པར་སྦྱོར་བ་ཐམས་ཅད་ལ་རབ་ཏུ་འགོད་པར་
376a
༄#། །གྱུར་ཅིག་།སེམས་ཅན་མཚམས་མ་མཆིས་པ་བགྱིད་པ་དང ། ཀུན་ནས་འཛིན་པའི་རྒྱུད་ཅན་གྱི་བར་དེ་ལྟ་བུ་དག་གི་དོན་དུ་བདག་གིས་དོན་དང ། ཚིག་དང ། ཡི་གེ་རྣམ་པ་སྣ་ཚོགས་མང་པོ་དག་གི་ཆོ་འཕྲུལ་རྣམས་ཀྱིས་ཆོས་སྟོན་པར་གྱུར་ཅིག་།ཕུང་པོ་དང ། ཁམས་དང ། སྐྱེ་མཆེད་དག་མི་རྟག་པ་དང ། སྡུག་བསྔལ་བ་དང ། བདག་མ་མཆིས་པ་དང ། སྟོང་པར་སྟོན་པར་འགྱུར་ཞིང་བདེ་བ་དང ། དགེ་བ་དང ། ཞི་བ་དང ། ཤིས་པ་དང ། འཇིགས་པ་མ་མཆིས་པའི་གྲོང་ཁྱེར་མྱ་ངན་ལས་འདས་པ་ལ་རབ་ཏུ་འགོད་པར་གྱུར་ཅིག་།དེ་ལྟར་བདག་འཁོར་བཞི་པོ་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དག་ལ་ཆོས་སྟོན་པར་གྱུར་ཅིག་།གང་དག་རྩོད་པ་འཚལ་བར་འགྱུར་བ་དེ་དག་ལ་བདག་གིས་ཆོས་ཀྱིས་བརྩོད་པའི་བསྟན་བཅོས་རབ་ཏུ་སྟོན་པར་གྱུར་ཅིག་།གང་དག་དགེ་བའི་ཆོས་རྣམས་ལ་མངོན་པར་མི་དགའ་བ་དེ་དག་ལ་བདག་གིས་ཞལ་ཏ་བགྱིད་པའི་ལས་སྟོན་པར་གྱུར་ཅིག་།ཁ་ཏོན་ལ་མངོན་པར་དགའ་བ་རྣམས་ལ་ནི་སྟོང་པ་ཉིད་ཀྱི་བསམ་གཏན་གྱི་ཆ་གཅིག་གིས་རྣམ་པར་གྲོལ་བའི་ལམ་སྟོན་པར་གྱུར་ཅིག ། སེམས་ཅན་རེ་རེའི་དོན་གྱི་སླད་དུའང་བདག་དཔག་ཚད་འབུམ་ཕྲག་མང་པོ་དག་ཏུ་སུག་པས་མཆི་བར་འགྱུར་ཞིང ། དོན་དང ། ཚིག་དང ། ཡི་གེ་དང ། ཐབས་དང ། ཆོ་འཕྲུལ་
376b
རྣམ་པ་སྣ་ཚོགས་མང་པོ་དག་གིས་སྐྱོ་བ་མ་མཆིས་ཤིང་སྤྲོ་བར་བགྱིད་པར་འགྱུར་བ་དང ། མྱ་ངན་ལས་འདས་པའི་བར་ལ་འགོད་པར་གྱུར་ཅིག་།ཏིང་ངེ་འཛིན་གྱི་སྟོབས་ཀྱིས་བདག་གི་ཚེའི་འདུ་བྱེད་ཇི་ཙམ་པའི་ལྔ་ཆ་འདོར་བར་གྱུར་ཅིག་།བདག་ཡོངས་སུ་མྱ་ངན་ལས་འདའ་བའི་དུས་ཀྱི་ཚེ་ན་རང་གི་སྐུ་གདུང་བདག་ཉིད་ཀྱིས་ཡུངས་འབྲུའི་ཚད་ཙམ་དུ་གཅོག་པར་འགྱུར་ཞིང ། སེམས་ཅན་རྣམས་ལ་སྙིང་རྗེའི་སླད་དུ་བདག་ནི་སླད་ཀྱིས་ཡོངས་སུ་མྱ་ངན་ལས་འདའ་བར་གྱུར་ཅིག་།བདག་ཡོངས་སུ་མྱ་ངན་ལས་འདས་ནས་ཀྱང་ལོ་སྟོང་དུ་དམ་པའི་ཆོས་གནས་པར་གྱུར་ཅིག་།ཡང་ལོ་ལྔ་བརྒྱར་ནི་དམ་པའི་ཆོས་ཀྱི་གཟུགས་བརྙན་གནས་པར་གྱུར་ཅིག་།སེམས་ཅན་གང་དག་བདག་ཡོངས་སུ་མྱ་ངན་ལས་འདས་པའི་སྐུ་གདུང་རྣམས་ལས་རིན་པོ་ཆེ་རྣམས་དང ། རོལ་མོའི་སྒྲ་དག་གི་བར་གྱིས་མཆོད་པ་བགྱིད་པར་སྤྲོ་བ་སྐྱེ་བར་འགྱུར་བ་དང ། ཐ་ན་སངས་རྒྱས་ཀྱི་མཚན་གཅིག་ཙམ་དང ། ཕྱག་གཅིག་ཙམ་དང ། བསྐོར་བ་གཅིག་ཙམ་དང ། ཐལ་མོ་སྦྱོར་བ་གཅིག་ཙམ་དང ། མེ་ཏོག་གཅིག་ཙམ་གྱི་རྒྱུས་མཆོད་པ་བགྱིད་པར་འགྱུར་བ་དེ་དག་ཐམས་ཅད་ཀྱང་བསམ་པ་ཇི་ལྟ་བ་བཞིན་དུ་ཐེག་པ་གསུམ་པོ་དག་གིས་སླར་མི་ལྡོག་པར་གྱུར་ཅིག་།སེམས་ཅན་གང་དག་བདག་ཡོངས་སུ་མྱ་ངན་ལས་འདས་པའི་བསྟན་པ་ལ་ཐ་ན་བསླབ་པའི་གཞི་གཅིག་ཙམ་
377a
༄#། །འཛིན་པར་འགྱུར་རམ། ཇི་སྐད་བསྟན་པ་བཞིན་དུ་ཡང་དག་པར་བླངས་ནས་གནས་སམ། ཚིག་བཞི་པའི་ཚིགས་སུ་བཅད་པ་གཅིག་ཙམ་གྱི་བར་དག་ཀུན་ཆུབ་པར་བགྱིད་དམ། ཀློག་གམ། གཞན་དག་ལའང་སྟོན་པར་འགྱུར་བ་དང ། གང་དག་གིས་ཐོས་ནས་སེམས་རབ་ཏུ་དང་བར་འགྱུར་ཞིང ། ཐ་ན་དམ་པའི་ཆོས་སྨྲ་བ་ལ་མེ་ཏོག་གཅིག་ཙམ་དང ། ཕྱག་གཅིག་ཙམ་གྱིས་མཆོད་པ་བགྱིད་པར་འགྱུར་བ་དེ་དག་ཐམས་ཅད་ཀྱང་བསམ་པ་ཇི་ལྟ་བ་བཞིན་དུ་ཐེག་པ་གསུམ་པོ་དག་གིས་སླར་མི་ལྡོག་པར་གྱུར་ཅིག་།ཇི་ཙམ་ན་དམ་པའི་ཆོས་ནུབ་སྟེ། ཆོས་ཀྱི་སྒྲོན་མ་ནི་གུམ། ཆོས་ཀྱི་རྒྱལ་མཚན་ནི་འགྱེལ་བར་གྱུར་པ་ན་བདག་སྐྱེས་པའི་སྐུ་གདུང་དེ་དག་ཀྱང་གསེར་གྱི་འཁོར་ལོའི་མཐར་ཐུག་པའི་དོགས་ལ་ལྷགས་པར་འགྱུར་ཞིང ། གང་གི་ཚེ་སངས་རྒྱས་ཀྱི་ཞིང་མི་མཇེད་ན་རིན་པོ་ཆེས་ཕོངས་པར་གྱུར་པ་དེའི་ཚེ་ན། དེ་དག་ནོར་བུ་བཻ་ཌཱུརྱ་ཏོག་གི་བློ་གྲོས་ཞེས་བགྱི་བར་གྱུར་ཏེ་ཞུགས་ལྟར་གདའ་ཞིང་ཀུན་ཏུ་གནས་པར་གྱུར་ཅིག་།དེའང་དེ་ནས་མངོན་པར་འཕགས་ཏེ། གོང་དུ་འོག་མིན་གྱི་གནས་ཀྱི་མཐར་ཐུག་པའི་བར་དུ་གནས་ནས་མེ་ཏོག་སྣ་ཚོགས་ཀྱི་ཆར་རབ་ཏུ་འབེབས་པར་འགྱུར་ཞིང ། མེ་ཏོག་མནད་ར་བ་དང ། མནད་ར་བ་ཆེན་པོ་དང ། པ་རི་ཡ་ཏྲ་ཀ་དང ། མཉྫུ་ཤ་ཀ་དང ། མཉྫུ་ཤ་ཀ་ཆེན་པོ་དང ། །
377b
མདོག་མཛེས་དང ། མདོག་མཛེས་ཆེན་པོ་དང ། མ་ན་པརྞ་དང ། ཟླ་བ་དྲི་མེད་དང ། འདབ་བརྒྱ་པ་དང ། འདབ་སྟོང་པ་དང ། ཀུན་ཏུ་འོད་དང ། ཀུན་ཏུ་དྲི་དང ། ཤིན་ཏུ་མཛེས་པ་དང ། རྟག་ཏུ་འབྲས་བུ་རྒྱས་དང ། སྙིང་དང་མིག་མངོན་པར་དགའ་བ་དང ། སྐར་འོད་དང ། སྐར་མདོག་དང ། ཁ་དོག་མཐའ་ཡས་དང ། དྲི་མཐའ་ཡས་དང ། མེ་ཏོག་དེ་ལྟ་བུ་དག་གི་མེ་ཏོག་གི་ཆར་ཆེན་པོ་མངོན་པར་རབ་ཏུ་འབེབས་པར་གྱུར་ཅིག་།མེ་ཏོག་གི་ཆར་དེ་དག་ལས་ཀྱང་སྒྲ་སྣ་ཚོགས་དག་འབྱུང་བར་འགྱུར་ཞིང ། འདི་ལྟ་སྟེ། སངས་རྒྱས་ཀྱི་སྒྲ་དང ། ཆོས་ཀྱི་སྒྲ་དང ། དགེ་འདུན་གྱི་སྒྲ་དང ། དགེ་བསྙེན་གྱི་སྡོམ་པའི་སྒྲ་དང ། འཕགས་པའི་གསོ་སྦྱོང་གི་ཡན་ལག་བརྒྱད་དང་ལྡན་པའི་སྒྲ་དང ། རབ་ཏུ་བྱུང་བའི་བསླབ་པའི་གཞི་བཅུའི་སྡོམ་པ་སྦྱིན་པའི་སྒྲ་དང ། ཚུལ་ཁྲིམས་ཀྱི་སྒྲ་དང ། ཚངས་པར་སྤྱོད་པ་མཐའ་དག་ཡོངས་སུ་རྫོགས་པ་བསྙེན་པར་རྫོགས་པའི་སྒྲ་དང ། ཞལ་ཏ་བགྱིད་པའི་སྒྲ་དང ། ཀློག་པའི་སྒྲ་དང ། ནང་དུ་ཡང་དག་འཇོག་གི་སྒྲ་དང ། ཚུལ་བཞིན་ཡིད་ལ་བགྱིད་པའི་སྒྲ་དང ། མི་སྡུག་པའི་སྒྲ་དང ། དབུགས་རྒྱུ་བ་དང ། རྡུབ་པའི་སྒྲ་དང ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་སྒྲ་དང།་ཅི་ཡང་མེད་པའི་སྐྱེ་མཆེད་ཀྱི་སྒྲ་དང ། རྣམ་ཤེས་མཐའ་ཡས་སྐྱེ་མཆེད་ཀྱི་སྒྲ་དང ། ནམ་མཁའ་མཐའ་ཡས་སྐྱེ་མཆེད་ཀྱི་སྒྲ་དང ། ཟིལ་གྱིས་གནོན་པའི་སྐྱེ་མཆེད་ཀྱི་སྒྲ་དང ། ཟད་པར་
378a
༄#། །གྱི་སྐྱེ་མཆེད་ཀྱི་སྒྲ་དང ། ཞི་གནས་དང་ལྷག་མཐོང་གི་སྒྲ་དང ། སྟོང་པ་ཉིད་དང་མཚན་མ་མ་མཆིས་པའི་སྒྲ་དང ། སྨོན་པ་མ་མཆིས་པའི་སྒྲ་དང ། རྟེན་ཅིང་འབྲེལ་བར་འབྱུང་བའི་སྒྲ་དང ། ཉན་ཐོས་ཀྱི་སྡེ་སྣོད་མཐའ་དག་གི་སྒྲ་འབྱུང་བ་དང ། རང་སངས་རྒྱས་ཀྱི་ཐེག་པའི་སྡེ་སྣོད་མཐའ་དག་གི་སྒྲ་འབྱུང་བ་དང ། ཐེག་པ་ཆེན་པོའི་གཏམ་ཕ་རོལ་ཏུ་ཕྱིན་པ་མཐའ་དག་གི་སྒྲ་དག་མེ་ཏོག་དེ་དག་ལས་འབྱུང་བར་འགྱུར་ཞིང ། གཟུགས་ན་སྤྱོད་པའི་ལྷ་ཐམས་ཅད་ཀྱིས་ཐོས་པར་གྱུར་ནས། རང་རང་གིས་སྔོན་ཆད་བགྱིས་པའི་དགེ་བའི་རྩ་བ་དག་ཀྱང་རྗེས་སུ་དྲན་པར་འགྱུར་ཞིང ། སེམས་ཅན་ཆེན་པོ་དག་དགེ་བའི་ཆོས་ཐམས་ཅད་ལ་སྨོན་པ་མ་མཆིས་པར་གྱུར་ནས། དེ་དག་དེ་ནས་བབས་ཏེ་འཇིག་རྟེན་གྱི་ཁམས་མི་མཇེད་ཀྱི་མི་ཐམས་ཅད་ཀྱང་དགེ་བ་བཅུའི་ལས་ཀྱི་ལམ་ལ་སྦྱོར་ཞིང་རབ་ཏུ་འགོད་པར་གྱུར་ཅིག་།དེ་བཞིན་དུ་འདོད་པ་ན་སྤྱོད་པའི་ལྷ་ཐམས་ཅད་ཀྱིས་ཀྱང་ཐོས་པར་འགྱུར་ཞིང ། དེ་དག་ཀྱང་སྲེད་པའི་ཀུན་ཏུ་བྱོར་བ་དང ། དགའ་བ་དང ། རྩེད་མོ་དང ། ཡིད་བདེ་བ་ལ་མངོན་པར་དགའ་བའི་སེམས་དང་སེམས་ལས་བྱུང་བ་ཐམས་ཅད་རྒྱུན་ཆད་པར་གྱུར་ཅིག་།དེ་དག་ཐམས་ཅད་ཀྱིས་ཀྱང་རང་རང་གིས་སྔོན་ཆད་བགྱིས་པའི་དགེ་བའི་རྩ་བ་དག་རྗེས་སུ་དྲན་པར་འགྱུར་ཞིང ། དེ་དག་ལྷའི་འཇིག་རྟེན་ནས་བབས་ནས་
378b
འཇིག་རྟེན་གྱི་ཁམས་མི་མཇེད་ཀྱི་མི་ཐམས་ཅད་དགེ་བ་བཅུའི་ལས་ཀྱི་ལམ་ཡང་དག་པར་འཛིན་དུ་འཇུག་ཅིང་རབ་ཏུ་འགོད་པར་གྱུར་ཅིག་།བཙུན་པ་བཅོམ་ལྡན་འདས། མེ་ཏོག་དེ་དག་ཀྱང་ནམ་མཁའ་ལ་རིན་པོ་ཆེ་སྣ་ཚོགས་དག་ཏུ་འགྱུར་ཞིང ། འདི་ལྟ་སྟེ། དངུལ་དང ། འགྲོན་བུ་དང ། གསེར་དང ། ནོར་བུ་དང ། མུ་ཏིག་དང ། བཻ་ཌཱུརྱ་དང ། དུང་དང ། མན་ཤེལ་དང ། བྱུ་རུ་དང ། དངུལ་ཅན་དང ། ས་ལེ་སྦྲམ་དང ། རྡོའི་སྙིང་པོ་དང ། གཡས་སུ་འཁྱིལ་བ་དང ། དེ་ལྟ་བུའི་རིན་པོ་ཆེའི་ཆར་དག་སངས་རྒྱས་ཀྱི་ཞིང་མི་མཇེད་ཐམས་ཅད་དུ་མངོན་པར་རབ་ཏུ་འབབ་པར་གྱུར་ཅིག་།སངས་རྒྱས་ཀྱི་ཞིང་མི་མཇེད་ཐམས་ཅད་འཐབ་མོ་དང ། འཐབ་པ་དང ། རྩོད་པ་དང ། འགྱེད་པ་དང ། མུ་གེ་དང ། ནད་དང ། ཕ་རོལ་གྱི་དམག་ཚོགས་དང ། ཚིག་རྩུབ་ཅིང་བསླང་བ་དང ། དུག་རྣམས་ཐམས་ཅད་ཀྱི་ཐམས་ཅད་རབ་ཏུ་ཞི་བར་གྱུར་ཅིག་།སངས་རྒྱས་ཀྱི་ཞིང་མི་མཇེད་ཐམས་ཅད་དུ་བདེ་བ་དང ། ནད་མ་མཆིས་པ་དང ། འཐབ་མོ་དང ། འཐབ་པ་དང ། རྩོད་པ་དང ། འཆིང་བ་དག་མ་མཆིས་པ་དང ། ལོ་ལེགས་པ་དག་ཀུན་ཏུ་གནས་པར་གྱུར་ཅིག་།སེམས་ཅན་གང་དག་གིས་རིན་པོ་ཆེ་དེ་དག་མཐོང་བ་དང ། རེག་པ་དང ། ལོངས་སྤྱོད་པ་དང ། ཡོངས་སུ་སྤྱོད་པའི་ལས་བགྱིད་པར་འགྱུར་བ་དེ་དག་ཐམས་ཅད་ཀྱང་ཐེག་པ་གསུམ་པོ་དག་གིས་སླར་མི་ལྡོག་པར་གྱུར་ཅིག་།སྐུ་གདུང་དེ་དག་ཀྱང་སླར་གསེར་
379a
༄#། །གྱི་འཁོར་ལོའི་མཐར་ཐུག་པའི་བར་དུ་གནས་པར་གྱུར་ཅིག། །།བམ་པོ་བཅུ་གཅིག་པ། བཙུན་པ་བཅོམ་ལྡན་འདས། དེ་བཞིན་དུ་མཚོན་གྱི་བསྐལ་པ་བར་མའི་དུས་ཀྱི་ཚེ་ནའང་དེ་དག་ནོར་བུ་རིན་པོ་ཆེ་ཨནད་རྙིལ་དག་ཏུ་ཀུན་ནས་གནས་པར་འགྱུར་ཞིང ། དེ་དག་སྟེང་དུ་འོག་མིན་གྱི་གནས་ཀྱི་མཐར་ཐུག་པའི་བར་དུ་གནས་ནས། འདི་ལྟ་སྟེ། མེ་ཏོག་མནད་ར་བ་དང ། མནད་ར་བ་ཆེན་པོ་དང ། པ་རི་ཡ་ཏྲ་ཀ་དང ། མེ་ཏོག་འོད་མཐའ་ཡས་ཀྱི་བར་གྱི་མེ་ཏོག་སྣ་ཚོགས་ཀྱི་ཆར་དག་མངོན་པར་རབ་ཏུ་འབེབས་པར་གྱུར་ཅིག། མེ་ཏོག་གི་ཆར་དེ་དག་ལས་ཀྱང་ཇི་ལྟར་སྔར་སྨོས་པ་བཞིན་དུ་འདི་ལྟ་སྟེ། སངས་རྒྱས་ཀྱི་སྒྲ་དང ། ཆོས་ཀྱི་སྒྲ་དང ། དགེ་འདུན་གྱི་སྒྲ་དང ། སྒྲ་ཡིད་དུ་འོང་བ་རྣམ་པ་སྣ་ཚོགས་དག་འབྱུང་བར་གྱུར་ཅིག་།ཡང་སྐུ་གདུང་དེ་དག་ཀྱང་སླར་འོག་ཏུ་གསེར་གྱི་འཁོར་ལོའི་མཐར་ཐུག་པའི་བར་དུ་ཀུན་ཏུ་གནས་པར་གྱུར་ཅིག་།དེ་བཞིན་དུ་གང་གི་ཚེ་མུ་གེའི་བསྐལ་པ་བར་མའི་དུས་ཀྱི་ཚེ་ནའང་སྐུ་གདུང་དེ་དག་སྟེང་དུ་འོག་མིན་གྱི་གནས་ཀྱི་མཐར་ཐུག་པའི་བར་དུ་གྱེན་དུ་འཕགས་ནས་མེ་ཏོག་གི་ཆར་གྱི་བར་དུ་སྔར་སྨོས་པ་བཞིན་དུ་གྱུར་ཅིག་།ནད་ཀྱི་བསྐལ་པ་བར་མའི་བར་དུའང་ཇི་ལྟར་སྔར་སྨོས་པ་བཞིན་དུ་གྱུར་ཅིག་།ཇི་ལྟར་བསྐལ་པ་ཆེན་པོ་བཟང་པོ་ལ་བདག་ཡོངས་སུ་མྱ་ངན་ལས་འདས་པའི་སྐུ་གདུང་རྣམས་སྟོན་པའི་མཛད་པ་
379b
བགྱིད་པར་འགྱུར་ཞིང ། འདུལ་བ་བགྲང་བ་ལས་ཡང་དག་པར་འདས་པ་དག་ཀྱང་ཐེག་པ་གསུམ་པོ་དག་གིས་སླར་མི་ལྡོག་པ་ལ་འགོད་པར་གྱུར་ཅིག་།དེ་བཞིན་དུ་བསྐལ་པ་ཆེན་པོ་སངས་རྒྱས་ཀྱི་ཞིང་ལྔའི་རྡུལ་ཕྲ་རབ་ཀྱི་རྡུལ་སྙེད་དག་བྱུང་གི་བར་དུའང ། བདག་གི་སྐུ་གདུང་རྣམས་ཀྱིས་འདུལ་བའི་སེམས་ཅན་རྣམས་ཐེག་པ་གསུམ་པོ་དག་གིས་སླར་མི་ལྡོག་པ་ལ་འགོད་པར་གྱུར་ཅིག་།བདག་བྱང་ཆུབ་སེམས་དཔར་གྱུར་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སླད་དུ་སྤྱད་པ་སྤྱོད་པ་ན། གང་དག་བདག་གིས་དང་པོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་སྩལ་ཅིང་རབ་ཏུ་བཀོད་པ་རྣམས་དང ། བདག་གིས་ཕ་རོལ་ཏུ་ཕྱིན་པ་དྲུག་པོ་དག་ཡང་དག་པར་འཛིན་དུ་སྩལ་ཅིང་བཙུད་དེ་རབ་ཏུ་བཀོད་པ་དེ་དག་སླད་ཀྱིས་གང་གི་ཚེ་བསྐལ་པ་གྲངས་མ་མཆིས་པ་གངྒཱའི་ཀླུང་སྟོང་གི་བྱེ་མ་སྙེད་འདས་ནས། ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མ་མཆིས་གྲངས་མ་མཆིས་པ་གཞན་དང་གཞན་དག་ཏུ་སངས་རྒྱས་བཅོམ་ལྡན་འདས་ཤ་སྟག་ཏུ་གྱུར་ཏེ་འབྱུང་བར་གྱུར་ཅིག་།བདག་བྱང་ཆུབ་ཐོབ་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་སྩལ་ཅིང་བཙུད་དེ་རབ་ཏུ་བཀོད་པའི་སེམས་ཅན་རྣམས་དང ། གང་དག་བདག་ཡོངས་སུ་མྱ་ངན་ལས་འདས་པའི་སྐུ་གདུང་གི་རྣམ་པར་འཕྲུལ་པས་བླ་ན་མེད་པ་
380a
༄#། །ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་པའི་བྱང་ཆུབ་སེམས་དཔའ་དེ་དག་ཀྱང་སླད་ཀྱིས་བསྐལ་པ་གྲངས་མ་མཆིས་པ་གངྒཱའི་ཀླུང་སྟོང་གི་བྱེ་མ་སྙེད་བྱུང་ཞིང་འདས་པར་གྱུར་པ་ན། ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས་པ་དག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འདི་སྐད་དུ་གང་ཡུན་རིང་པོ་ན་བསྐལ་པ་བཟང་པོ་ཞེས་བྱ་བ་ཞིག་བྱུང་བར་གྱུར་ཏེ། བསྐལ་པ་བཟང་པོ་དེ་དག་ལ་བབ་པ་ན། རྒྱལ་བ་ཉི་མ་བཞི་པ་དེ་བཞིན་གཤེགས་པ་མཚན་འདི་ཞེས་བྱ་བ་ཞིག་བྱུང་བར་གྱུར་པ་དེས་བདག་ཅག་དང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །བདག་ཅག་ནི་སེམས་ཀྱི་རྒྱུད་ཚིག་པ། མི་དགེ་བ་དང་འགྲོགས་པར་གྱུར་པ་མཚམས་མེད་པ་བྱེད་པ། ལོག་པར་ལྟ་བའི་བར་དུ་གྱུར་པ་ཡིན་ན་དེས་བདག་ཅག་ཕ་རོལ་ཏུ་ཕྱིན་པ་དྲུག་པོ་དག་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་པས་ན་དེའི་ཕྱིར་བདག་ཅག་ད་ལྟར་ཐམས་ཅད་མཁྱེན་པར་གྱུར་ཅིང ། རྣམ་པ་ཐམས་ཅད་དུ་ཆོས་དང་ལྡན་པའི་ཆོས་ཀྱིས་འཁོར་ལོ་བསྐོར་ལ། འགྲོ་བའི་འཁོར་ལོ་ཟློག་ཅིང་སེམས་ཅན་བྱེ་བ་ཁྲག་ཁྲིག་འབུམ་ཕྲག་མང་པོ་དག་མཐོ་རིས་དང་ཐར་པའི་འབྲས་བུ་ལ་
380b
རབ་ཏུ་འགོད་པར་བྱེད་པ་ཡིན་ནོ་ཞེས་བདག་གི་བསྔགས་པ་བརྗོད་ཅིང་སྒྲོགས་ལ་དབྱངས་ཀྱང་བརྗོད་པར་གྱུར་ཅིག་།གང་དག་བྱང་ཆུབ་དོན་དུ་གཉེར་བའི་སེམས་ཅན་རྣམས་ཀྱིས་ཀྱང་དེ་བཞིན་གཤེགས་པ་དེ་དག་ལས་བདག་གིས་བསྔགས་པ་དང ། གྲགས་པ་དང ། སྙན་པ་ཐོས་པར་གྱུར་ནས་དེ་བཞིན་གཤེགས་པ་དེ་དག་ལ་འདི་སྐད་དུ་བཅོམ་ལྡན་འདས་དེ་བཞིན་གཤེགས་པ་དེས་དོན་གྱི་དབང་ཅི་ཞིག་གཟིགས་ན་དེ་ལྟར་རྩོད་པའི་དུས་ལ་བབ་ཅིང་སྙིགས་མ་ལྔ་བྱུང་བར་གྱུར་པ་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ཅིག་ཅེས་ཡོངས་སུ་ཞུ་བར་གྱུར་ཅིག་།དེ་བཞིན་གཤེགས་པ་དེ་དག་གིས་ཀྱང་བྱང་ཆུབ་དོན་དུ་གཉེར་བའི་རིགས་ཀྱི་བུའམ། རིགས་ཀྱི་བུ་མོ་དེ་དག་ལ་བདག་གི་སྙིང་རྗེ་ཆེན་པོ་དང་ལྡན་པའི་སེམས་དང་པོ་བསྐྱེད་པ་དང ། སངས་རྒྱས་ཀྱི་ཞིང་གི་ཡོན་ཏན་བཀོད་པ་དང ། སྔོན་གྱི་སྨོན་ལམ་གྱི་ཚུལ་འདིའང་སྟོན་པར་གྱུར་ཅིག་།བྱང་ཆུབ་དོན་དུ་གཉེར་བའི་རིགས་ཀྱི་བུའམ། རིགས་ཀྱི་བུ་མོ་དེ་དག་ཀྱང་ངོ་མཚར་དུ་འཛིན་པར་འགྱུར་ཞིང ། དེ་དག་ཀྱང་རྒྱ་ཆེན་པོ་ལ་མོས་པར་གྱུར་ཅིག་།དེ་དག་ཀྱང་དེ་བཞིན་དུ་སེམས་ཅན་རྣམས་ལ་སྙིང་རྗེ་ཆེན་པོ་བསྐྱེད་པར་འགྱུར་ཞིང ། དེ་ལྟར་རྩོད་པའི་དུས་སུ་སྙིགས་མ་ལྔ་དང ། ཉོན་མོངས་པའི་སྙིགས་མ་བདོ་བའི་སངས་རྒྱས་ཀྱི་ཞིང་ན་མཚམས་མ་མཆིས་པ་བགྱིད་པ་དང ། མི་དགེ་
381a
༄#། །བའི་བར་དག་དང་འགྲོགས་པའི་འདུལ་བ་རབ་ཏུ་འཛིན་པར་གྱུར་པ་དེ་ལྟ་བུའི་སྨོན་ལམ་ཡང་འདེབས་པར་གྱུར་ཅིག་།སངས་རྒྱས་བཅོམ་ལྡན་འདས་དེ་དག་གིས་ཀྱང་བྱང་ཆུབ་དོན་དུ་གཉེར་བའི་རིགས་ཀྱི་བུའམ། རིགས་ཀྱི་བུ་མོ་དེ་དག་གིས་སྙིགས་མ་ལྔ་དང ། ཉོན་མོངས་པ་བདོ་བའི་རྩོད་པའི་དུས་སུ་སྨོན་ལམ་བཏབ་པ་བཞིན་བྱང་ཆུབ་དོན་དུ་གཉེར་བའི་རིགས་ཀྱི་བུའམ། རིགས་ཀྱི་བུ་མོ་སྙིང་རྗེ་ཆེན་པོ་དང་ལྡན་པ་དེ་དག་གི་བསམ་པ་ཇི་ལྟ་བ་བཞིན་དུ་དེ་ལྟ་བུའི་ལུང་བསྟན་པས་ལུང་སྟོན་པར་གྱུར་ཅིག། སངས་རྒྱས་བཅོམ་ལྡན་འདས་གཞན་དག་ཀྱང་སེམས་ཅན་བྱང་ཆུབ་དོན་དུ་གཉེར་བའི་རིགས་ཀྱི་བུའམ། རིགས་ཀྱི་བུ་མོ་དག་ལ་འདི་སྐད་དུ་ཡུན་རིང་པོ་འདི་སྲིད་ཅིག་ན་རྒྱལ་བ་ཉི་མ་མཚན་འདི་ཞེས་བྱ་བ་ཞིག་བྱུང་བར་གྱུར་པ་དེ་ཡོངས་སུ་མྱ་ངན་ལས་འདས་པའི་སྐུ་གདུང་རྣམས་ཀྱིས་དེ་ལྟར་སྡུག་བསྔལ་བའི་སེམས་ཅན་རྣམས་ཀྱི་དོན་དེ་ལྟ་བུའི་ཆོ་འཕྲུལ་རྣམ་པ་སྣ་ཚོགས་དག་དང ། རྣམ་པར་འཕྲུལ་པ་རྣམ་པ་སྣ་ཚོགས་དག་མཛད་དེ། དེའི་སྐུ་གདུང་གི་རྣམ་པར་འཕྲུལ་པ་དག་གིས་ངེད་ཅག་དང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྐུལ་ནས། ངེད་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་དགེ་བའི་རྩ་བ་དང་འགྲོགས་པས་དང་པོ་སེམས་བསྐྱེད་ཅིང ། ཕ་རོལ་ཏུ་ཕྱིན་པ་འདི་དག་ལ་བརྩོན་པར་
381b
བྱས་སོ་ཞེས་བདག་གི་སྐུ་གདུང་གི་རྣམ་པར་འགྱུར་བའི་སྔོན་གྱི་ཚུལ་དག་རྒྱ་ཆེར་ཇི་ལྟར་སྔར་སྨོས་པའི་བར་དུ་རྒྱ་ཆེར་སྟོན་པར་གྱུར་ཅིག་།དེ་ནས་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་གྱིས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་ལྷ་དང་།དྲི་ཟ་དང ། མི་དང་བཅས་པའི་སྐྱེ་དགུ་ཐམས་ཅད་ཀྱི་དོན་དུ་སྙིང་རྗེ་ཆེན་པོ་དང་ལྡན་པའི་སྨོན་ལམ་ཆེན་པོ་ལྔ་བརྒྱ་པོ་དེ་དག་བཏབ་ནས་དེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། གལ་ཏེ་དེ་ལྟར་བདག་གིས་མ་འོངས་པའི་དུས་ན་བསྐལ་པ་བཟང་པོ་ལ་ཉོན་མོངས་པ་དང ། འཐབ་མོ་དང ། སྙིགས་མ་བདོ་ཞིང་རྩོད་པའི་དུས་ལ་བབ་པ་ན་འཇིག་རྟེན་ལྡོངས་ཤིང་འདྲེན་པ་མ་མཆིས་པ་དང ། ཡོངས་སུ་འདྲེན་པ་མ་མཆིས་པ་དང ། ལྟ་བའི་སྡུག་བསྔལ་གྱི་མུན་པར་ཆུད་པའི་འཇིག་རྟེན་ན་མཚམས་མ་མཆིས་པ་བགྱིད་པ་རྣམས་དང ། སྔར་སྨོས་པ་ལྟ་བུའི་བར་དག་ལ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་ཞིང ། གལ་ཏེ་བདག་གིས་ཇི་ལྟར་སྨོན་ལམ་བཏབ་པ་དེ་ལྟ་བུའི་སངས་རྒྱས་ཀྱི་མཛད་པ་ཐམས་ཅད་སྒྲུབ་པར་རྔོ་ཐོགས་པ་ལྟ་ན་བྱང་ཆུབ་ཀྱི་སླད་དུ་སྨོན་པ་སྤང་བར་མི་བགྱི་ཞིང ། དགེ་བའི་རྩ་བའང་ཞིང་གཞན་དུ་ཡོངས་སུ་བསྔོ་བར་མི་བགྱི་སྟེ། བཙུན་པ་བཅོམ་ལྡན་འདས། དེ་ནི་བདག་གི་ངེས་པ་ལགས་སོ། །ཡང་བདག་ནི་དགེ་བའི་རྩ་བ་དེས་རང་སངས་རྒྱས་ཀྱི་ཐེག་པ་མི་འཚལ། ཉན་ཐོས་ཀྱི་ཐེག་པའང་མི་འཚལ། ལྷ་
382a
༄#། །དང་མིའི་འཇིག་རྟེན་གྱི་རྒྱལ་སྲིད་ཀྱང་མི་འཚལ། ལྷ་དང་མིའི་འཇིག་རྟེན་གྱི་དབང་ཕྱུག་ཀྱང་མི་འཚལ། འདོད་པ་ལྔའི་ཡོན་ཏན་གྱི་ལོངས་སྤྱོད་ཀྱང་མི་འཚལ། ལྷར་སྐྱེ་བའང་མི་འཚལ། དྲི་ཟ་དང ། ལྷ་མ་ཡིན་དང ། གནོད་སྦྱིན་དང ། སྲིན་པོ་དང ། ཀླུ་དང ། ནམ་མཁའ་ལྡིང་དུ་སྐྱེ་བའང་མི་འཚལ་ལ་དགེ་བའི་རྩ་བ་གཞན་དུ་ཡོངས་སུ་བསྔོ་བར་ཡང་མི་བགྱིད་དེ། གང་ཡང་བཅོམ་ལྡན་འདས་ཀྱིས་འདི་སྐད་དུ་སྦྱིན་པས་ནི་ལོངས་སྤྱོད་ཆེན་པོར་འགྱུར། ཚུལ་ཁྲིམས་ཀྱིས་ནི་མཐོ་རིས་སུ་སྐྱེ། ཐོས་པས་ནི་ཤེས་རབ་ཆེན་པོར་འགྱུར། བསྒོམ་པས་ནི་འབྲལ་བར་འགྱུར་རོ་ཞེས་ཀྱང་གསུངས་ལ། ཡང་བཅོམ་ལྡན་འདས་ཀྱིས་འདི་སྐད་དུ་སེམས་ཅན་བསོད་ནམས་དང་ལྡན་པའི་དགེ་བའི་རྩ་བ་ཡོངས་སུ་བསྔོས་པས་ནི་རེ་བའི་བསམ་པ་འགྲུབ་པར་འགྱུར་རོ་ཞེས་ཀྱང་གསུངས་ན། བཙུན་པ་བཅོམ་ལྡན་འདས། གང་བདག་གིས་ཀྱང་སྤྱིན་པ་ལས་བྱུང་བ་དང ། ཚུལ་ཁྲིམས་ལས་བྱུང་བ་དང ། ཐོས་པ་ལས་བྱུང་བ་དང ། བསྒོམ་པ་ལས་བྱུང་བའི་བསོད་ནམས་དག་བསྒྲུབས་པས་ན། གལ་ཏེ་བདག་གིས་སྨོན་ལམ་ཇི་ལྟར་བཏབ་པ་དེ་ལྟར་རེ་བ་ཡོངས་སུ་རྫོགས་པར་འགྱུར་བ་ལྟ་ན། དེའི་སླད་དུ་བདག་གིས་དགེ་བའི་རྩ་བ་དེ་དག་ཐམས་ཅད་སེམས་ཅན་གང་དག་གིས་སེམས་ཅན་དམྱལ་བ་མནར་མེད་པར་རབ་ཏུ་རྩུབ་ཅིང་དྲག་པའི་སྡུག་བསྔལ་ཉམས་སུ་མྱོང་བའི་
382b
སེམས་ཅན་དམྱལ་བ་པའི་སེམས་ཅན་རྣམས་ཀྱི་སླད་དུ་བསྔོ་བར་བགྱིའོ། །དགེ་བའི་རྩ་བ་དེས་དེ་དག་དེ་ནས་ལྡང་བར་འགྱུར་ཞིང་སངས་རྒྱས་ཀྱི་ཞིང་འདིར་མི་འཐོབ་པར་གྱུར་ཅིག། དེ་བཞིན་གཤེགས་པས་གསུངས་པའི་ཆོས་འདུལ་བ་བསྒྲུབ་པར་བགྱིད་པར་འགྱུར་ཞིང་མཆོག་ཉིད་ཀྱིས་ཡོངས་སུ་མྱ་ངན་ལས་འདའ་བར་ཡང་གྱུར་ཅིག་།སེམས་ཅན་དེ་དག་གི་ལས་ཀྱི་འབྲས་བུ་ཡོངས་སུ་མ་བས་པར་གྱུར་ནའང་དེའི་སླད་དུ་བདག་གུམ་ནས་སེམས་ཅན་དམྱལ་བ་ཆེན་པོར་སྐྱེ་བར་འགྱུར་ཞིང་།བདག་གི་ལུས་ཀྱང་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ཀྱི་ཏིང་ངེ་འཛིན་གྱིས་ཀྱང་མི་རྩོལ་བ་དག་འབྱུང་བར་གྱུར་ཅིག་།བདག་གི་ལུས་རེ་རེའི་ཚད་ཀྱང་རིའི་རྒྱལ་པོ་རི་རབ་ཙམ་དུ་ཆེ་བ་དག་འབྱུང་བར་གྱུར་ཅིག་།བདག་གི་ལུས་རེ་རེས་ཀྱང་ཇི་ལྟར་ད་ལྟར་གྱི་ལུས་གཅིག་བུ་འདིས་བདེ་བ་དང ། སྡུག་བསྔལ་གྱི་ཚོར་བ་དག་ཡང་དག་པར་འཚལ་བ་དེ་ལྟ་བུའི་བདེ་བ་དང ། སྡུག་བསྔལ་གྱི་ཚོར་བ་དག་ཡང་དག་པར་འཚལ་བར་གྱུར་ཅིག་།བདག་གི་ལུས་རེ་རེས་ཀྱང་སེམས་ཅན་དམྱལ་བ་བའི་སྡུག་བསྔལ་དྲག་པ་རྩུབ་པ་མི་བཟད་པ་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་མྱོང་བར་གྱུར་ཅིག་།ད་ལྟར་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་རྡུལ་ཕྲ་རབ་ཀྱི་རྡུལ་སྙེད་དག་ན་སེམས་ཅན་གང་དག་མཚམས་མ་མཆིས་པ་བགྱིད་པ་དང ། མནར་མེད་པའི་བར་དག་ལ་གཞོལ་བའི་
383a
༄#། །ལས་ཡང་དག་པར་གསོག་པར་འགྱུར་བ་རྣམས་དང ། སེམས་ཅན་གང་དག་བསྐལ་པ་ཆེན་པོ་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ཀྱི་བར་དག་འདས་ནས་སངས་རྒྱས་ཀྱི་ཞིང་ཕྱོགས་བཅུའི་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་པོ་གཞན་དག་ཏུ་མཚམས་མ་མཆིས་པའི་ལས་ཀྱིས་འཕེན་པར་འགྱུར་བའམ། ཀུན་ནས་སློང་བར་འགྱུར་བ་དེ་དག་ཐམས་ཅད་ཀྱི་དོན་དུ་བདག་ལས་དེས་སེམས་ཅན་དམྱལ་བ་ཆེན་པོ་མནར་མེད་པར་གནས་པ་ཉམས་སུ་མྱོང་བར་འགྱུར་ཞིང་བདག་གི་སེམས་ཅན་དག་ནི་སེམས་ཅན་དམྱལ་བ་རྣམས་སུ་སྐྱེ་བར་མ་གྱུར་ཅིག་།སེམས་ཅན་དེ་དག་ཐམས་ཅད་ཀྱིས་སངས་རྒྱས་བཅོམ་ལྡན་འདས་རྣམས་མཉེས་པར་འགྱུར་བ་དང ། འཁོར་བ་ལས་བརྒལ་བར་འགྱུར་བ་དང ། མྱ་ངན་ལས་འདས་པའི་གྲོང་ཁྱེར་དུ་འཇུག་པར་འགྱུར་བའི་ཡུན་རིང་པོ་དེ་སྲིད་ཀྱིས་བདག་སེམས་ཅན་དམྱལ་བ་ལས་ཡོངས་སུ་ཐར་བར་གྱུར་ཅིག་།སངས་རྒྱས་ཀྱི་ཞིང་ཕྱོགས་བཅུའི་སངས་རྒྱས་ཀྱི་ཞིང་རྡུལ་ཕྲ་རབ་ཀྱི་རྡུལ་སྙེད་ཀྱི་བར་གཞན་དག་ན་སེམས་ཅན་རྣམས་ཀྱིས་དེ་ལྟ་བུའི་ལས་ཀུན་ནས་བསླང་བ་དང ། འཕངས་པ་དང ། མྱོང་བར་འགྱུར་བར་ངེས་པས་སེམས་ཅན་དམྱལ་བ་རབ་ཏུ་ཚ་བར་སྐྱེ་བར་འགྱུར་བ་དང ། དེ་བཞིན་དུ་ཚ་བ་དང ། ངུ་འབོད་ཆེན་པོ་དང ། ངུ་འབོད་དང ། བསྡུས་གཞོམ་དང ། ཐིག་ནག་དང ། ཡང་
383b
སོས་ཀྱི་བར་དག་ལའང་ཇི་ལྟར་སྔར་སྨོས་པ་བཞིན་དུ་བརྗོད་པར་བགྱིའོ། །དེ་བཞིན་དུ་དུད་འགྲོ་སྣ་ཚོགས་དག་ལའང་བརྗོད་པར་བགྱིའོ། །དེ་བཞིན་དུ་གཤིན་རྗེའི་འཇིག་རྟེན་ལའང་བརྗོད་པར་བགྱིའོ། །དེ་བཞིན་དུ་གནོད་སྦྱིན་དབུལ་པོ་ལའང་བརྗོད་པར་བགྱིའོ། །དེ་བཞིན་དུ་གྲུལ་བུམ་དང ། ཤ་ཟ་དང ། ལྷ་མ་ཡིན་དང ། ནམ་མཁའ་ལྡིང་དག་ལའང་བརྗོད་པར་བགྱིའོ། །གང་གི་ཚེ་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་པོ་གཞན་དག་ཏུ་སེམས་ཅན་རྣམས་སྔོན་གྱི་ལས་དེ་ལྟ་བུ་དག་གིས་འཕངས་པར་གྱུར་པ་དང ། དེ་བཞིན་དུ་སྦྱར་ཏེ། གང་དག་མི་རྣམས་ཀྱི་ནང་དུ་འོན་པ་དང ། ལོང་པ་དང ། ལྕེ་མ་མཆིས་པ་དང ། ལག་པ་མ་མཆིས་པ་དང ། རྐང་པ་མ་མཆིས་པ་དང ། དྲན་པ་རབ་ཏུ་ཉམས་པའི་སེམས་དང་ལྡན་པ་དག་ཏུ་སྐྱེ་བར་འགྱུར་བ་དང ། མི་གཙང་བ་ཟ་བ་རྣམས་ལའང་དེ་བཞིན་དུ་སྦྱར་ཏེ། ཇི་ལྟར་སྔར་སྨོས་པ་བཞིན་དུའང་བདག་སེམས་ཅན་དམྱལ་བ་མནར་མེད་པ་དག་ཏུ་སྐྱེ་བར་གྱུར་ཅིག་།གལ་ཏེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རེ་བ་དེ་ལྟ་བུ་ཡོངས་སུ་རྫོགས་པར་མི་འགྱུར་བ་ལྟ་ན། འཁོར་བར་སེམས་ཅན་རྣམས་ཡུན་རིང་པོ་ཇི་སྲིད་དུ་ཁམས་དང ། སྐྱེ་མཆེད་དང ། ཕུང་པོ་ཡོངས་སུ་འཛིན་པར་འགྱུར་བའི་ཡུན་རིང་པོ་དེ་སྲིད་དུ་བདག་ཇི་ལྟར་སྔར་སྨོས་པ་བཞིན་དུ་སེམས་ཅན་དམྱལ་བ་དང ། དུད་འགྲོ་
384a
༄#། །དང།་ཡི་དྭགས་དང ། གནོད་སྦྱིན་དང ། ལྷ་མ་ཡིན་དང ། སྲིན་པོ་རྣམས་སུ་མིའི་བར་གྱི་སྡུག་བསྔལ་སྐྱེ་བ་རྣམ་པ་སྣ་ཚོགས་དེ་ལྟ་བུ་དག་གིས་དེ་ལྟར་སྡུག་བསྔལ་ཉམས་སུ་མྱོང་བར་གྱུར་ཅིག་།ཇི་སྟེ་བདག་གིས་སྔར་སྨོས་པའི་བར་གྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རེ་བ་འདི་དག་ཡོངས་སུ་རྫོགས་པར་འགྱུར་བ་ལྟ་ན་སངས་རྒྱས་བཅོམ་ལྡན་འདས་རྣམས་བདག་གི་དཔང་དུ་གྱུར་ཅིག་།ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མ་མཆིས། གྲངས་མ་མཆིས་པ་གཞན་དག་ན་སངས་རྒྱས་བཅོམ་ལྡན་འདས་དག་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་ཀྱང་བདག་གིས་དཔང་དུ་འགྱུར་ཞིང་ཡེ་ཤེས་སུ་འགྱུར་བར་གྱུར་ཅིག་།བཙུན་པ་བཅོམ་ལྡན་འདས། བདག་གིས་ཇི་ལྟར་དམ་བཅས་པ་དེ་ལྟ་བུའི་སངས་རྒྱས་ཀྱི་མཛད་པ་དག་སྒྲུབ་པར་རྔོ་ཐོགས་ཤིང་བདག་བསྐལ་བ་བཟང་པོ་ལ་སྐྱེ་དགུའི་ཚེ་ལོ་བརྒྱ་ཉི་ཤུ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་ནས། སངས་རྒྱས་བཅོམ་ལྡན་འདས་ཀྱི་བར་དུ་འགྱུར་བ་ལྟ་ན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་དུ་གསོལ། དེ་ནས་དེའི་མོད་ལ་དེ་བཞིན་གཤེགས་པ་མ་གཏོགས་པར་ཐམས་ཅད་དང་ལྡན་པའི་འཁོར་དེ་དང ། ལྷ་དང ། མི་དང ། ལྷ་མ་ཡིན་དུ་
384b
བཅས་པའི་འཇིག་རྟེན་ས་དང་ནམ་མཁའི་ངོས་ལ་གནས་པ་དེ་དག་ཐམས་ཅད་མཆི་མ་རབ་ཏུ་འཛག་བཞིན་དུ་ཡན་ལག་ལྡས་རྐང་པ་ལ་ཕྱག་བྱས་ཏེ་སྨྲས་པ། སྙིང་རྗེ་ཆེན་པོ་དང་ལྡན་པ་ཁྱོད་ཀྱིས་དྲན་པ་ཟབ་མོ་ཐོབ་པ་དང ། སེམས་ཅན་ཟབ་མོ་རྣམས་ལ་སྙིང་རྗེ་ཆེན་པོ་བསྐྱེད་པ་དང ། སྨོན་ལམ་ཆེན་པོ་ཟབ་མོ་བཏབ་པ་ནི་ལེགས་སོ། །ལེགས་སོ། །ལྷག་པའི་བསམ་པ་དེས་སེམས་ཅན་ཐམས་ཅད་ལ་སྙིང་རྗེ་ཆེན་པོས་ཡང་དག་པར་བཀབ་ཅིང་མཚམས་མེད་པ་བྱེད་པ་དང ། མི་དགེ་བའི་རྩ་བའི་བར་དང་འགྲོགས་པའི་འདུལ་བ་རྣམས་ཀྱང་ཕལ་ཆེར་ཡོངས་སུ་བཟུང་བ་ཡིན་ནོ། ། ཇི་ལྟར་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་སྨོན་ལམ་དེས་ན་སེམས་ཅན་རྣམས་ཀྱི་སྨན་དང ། སྐྱབས་དང ། དཔུང་གཉེན་དུ་གྱུར་པར་ཤེས་སོ། ། སེམས་ཅན་རྣམས་སྡུག་བསྔལ་ལས་རབ་ཏུ་ཐར་བར་བྱ་བའི་སྨོན་ལམ་བཏབ་པ་དེ་བཞིན་དུ་ཁྱོད་ཀྱི་བསམ་པ་ཡོངས་སུ་རྫོགས་པར་གྱུར་ཅིག་།བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་ཡང་གྱུར་ཅིག་།རྒྱལ་པོ་བདུད་རྩི་དག་པ་ཉིད་ཀྱང་དུ་ཞིང་བྲམ་ཟེའི་རྐང་པ་ལ་ཡན་ལག་ལྔས་ཕྱག་བྱས་ཏེ་སྨྲས་པ། ཨེ་མའི་མཆོག་ཏུ་ཟབ་པ་པོ།། ཁྱོད་ནི་བདེ་ལ་མི་གནས་ཏེ། །ཁྱོད་ནི་སེམས་ཅན་སྙིང་རྗེ་ལྡན། །ཁྱོད་ནི་བདག་གི་མཚོན་མ་ཡིན། །དེ་བཞིན་དུ་སྦྱར་ཏེ་སྤྱན་རས་གཟིགས་དབང་ཕྱུག་གིས་སྨྲས་པ། སེམས་ཅན་ཆགས་པ་
385a
༄#། །པ་དག་ལ་ཁྱོད་མ་ཆགས། །དབང་པོ་རྟ་ཐུལ་རྣམས་ལས་དབང་རྟ་ཐུལ། །དབང་པོ་འདི་རྣམས་ལ་ནི་དབང་མཛད་དེ། །གཟུངས་དང་ཡེ་ཤེས་ཀྱི་ནི་མཛོད་དུ་འགྱུར། །དེ་བཞིན་དུ་སྦྱར་ཏེ་མཐུ་ཆེན་ཐོབ་ཀྱིས་སྨྲས་པ། སེམས་ཅན་བྱེ་བ་སྟོང་ཕྲག་མང་པོ་རྣམས། །དགེ་བའི་དོན་དུ་ཀུན་ནས་འདས་པ་དག་།མཆོག་ཏུ་དཀའ་བའི་སྡུག་བསྔལ་ཆེན་པོ་ཡི། །ཁྱོད་ནི་སྙིང་རྗེ་ལ་ནི་ངུ་བར་བྱེད། །བྱང་ཆུབ་སེམས་དཔའ་འཇམ་དཔལ་གྱིས་སྨྲས་པ། བརྩོན་འགྲུས་ཏིང་འཛིན་བརྟན་པ་དང ། །མཁས་པ་དང་ནི་ཤེས་རབ་མཆོག་།ཕྲེང་བ་དྲི་དང་བྱུག་པ་ཡིས། །དེ་ཕྱིར་ཁྱོད་ལ་མཆོད་པར་འོས། །བྱང་ཆུབ་སེམས་དཔའ་ནམ་མཁའི་ཕྱག་རྒྱས་སྨྲས་པ། སྙིང་རྗེ་ཆེན་པོས་སེམས་ཅན་ལ། །དེ་ལྟར་ཁྱོད་ཀྱིས་སྦྱིན་པ་བྱིན། །ཁྱོད་ནི་དུས་འདི་ཟད་ནས་ཀྱང ། །མགོན་པོ་མཚན་གྱི་མཆོག་ཏུ་འགྱུར། །བྱང་ཆུབ་སེམས་དཔའ་རྡོ་རྗེས་གཅོད་པ་ཤེས་རབ་སྣང་བའི་དཔལ་གྱིས་འདི་སྐད་ཅེས་སྨྲས་སོ། །ཇི་ལྟར་ནམ་མཁའ་རྒྱ་ཆེ་བ། །དེ་ལྟར་ཁྱོད་ཀྱི་སྙིང་རྗེའི་གནས། །ཁྱོད་ཀྱིས་སེམས་ཅན་འཇིགས་མེད་ལ། །བྱང་ཆུབ་སྤྱོད་པ་དག་ཀྱང་བསྟན། །བྱང་ཆུབ་སེམས་དཔའ་རྣམ་པར་སྣང་བྱེད་ཤུགས་ཀྱིས་སྨྲས་པ། དེ་བཞིན་གཤེགས་པ་མ་གཏོགས་པར། །སེམས་ཅན་ལ་བརྩེ་གཞན་མེད་དེ། །གང་ཕྱིར་ཤེས་རབ་མཁས་པའི་མཆོག་།ཁྱོད་ནི་ཡོན་
385b
ཏན་ཀུན་དང་ལྡན། །སྤོས་ཀྱི་སེང་གེས་སྨྲས་པ། ཁྱོད་ནི་མ་འོངས་དུས་ན་ནི། །བཟང་ལ་ཉོན་མོངས་བདུད་ཀྱི་ཚེ། །སེམས་ཅན་སྡུག་བསྔལ་སྒྲོལ་བྱེད་ཅིང ། །ཁྱོད་ཀྱི་གྲགས་དང་སྙན་པ་འཐོབ། །བྱང་ཆུབ་སེམས་དཔའ་ཀུན་ཏུ་བཟང་པོས་སྨྲས་པ། སྐྱེ་བའི་དགོན་པར་བརྩོན་གྱུར་ཅིང ། །ལོག་སྒྱུས་ཤིན་ཏུ་ཉམ་ང་བ། །ཤ་ཟ་བ་དང་ཁྲག་འཐུང་བའི། །སེམས་རྒྱུད་ཚིག་རྣམས་བཟུང་བར་གྱུར། །མི་འཁྲུགས་པས་སྨྲས་པ། མ་རིག་སྒོ་ངའི་སྦུབས་ཆུད་ཅིང ། །ཉོན་མོངས་འདམ་དུ་བྱིན་གྱུར་ལ། །མཚམས་མེད་པ་དག་བྱེད་པ་པོ། །སེམས་རྒྱུད་ཚིག་རྣམས་བཟུང་བར་གྱུར། །སྤོས་ཀྱི་གླང་པོས་སྨྲས་པ། ཁྱོད་ཀྱིས་མ་འོངས་འཇིགས་མཐོང་བ། །ཇི་ལྟར་མེ་ལོང་དཀྱིལ་འཁོར་བཞིན། །དམ་པའི་ཆོས་ནི་སྤོང་བྱེད་པའི། །སེམས་རྒྱུད་ཚིག་རྣམས་བཟུང་བར་གྱུར། །རིན་པོ་ཆེ་ཏོག་གིས་སྨྲས་པ། ཡེ་ཤེས་ཚུལ་ཁྲིམས་ཏིང་འཛིན་དང ། །སྙིང་རྗེའི་རྒྱན་གྱིས་བརྒྱན་པ་པོ། །འཕགས་ལ་སྐུར་བ་འདེབས་བྱེད་པ། །སེམས་རྒྱུད་ཚིག་རྣམས་བཟུང་བར་གྱུར། །འཇིགས་དང་གདུང་བྲལ་གྱིས་སྨྲས་པ། ཁྱོད་ཀྱིས་ངན་སོང་གསུམ་ལམ་དུ། །སེམས་ཅན་སྡུག་བསྔལ་རྣམས་མཐོང་བ། །ཆང་བ་སྟོང་འདྲར་གནས་གྱུར་པ། །སེམས་རྒྱུད་ཚིག་རྣམས་བཟུང་བ་གྱུར། །ལག་ན་ཨུཏྤ་ལས་སྨྲས་པ། ཁྱོད་ཀྱི་སྙིང་རྗེ་ཡེ་ཤེས་དང ། །བརྩོན་འགྲུས་ཀྱིས་ནི་འཁོར་བ་བཅོམ། སྐྱེ་དང་འཆི་བས་གཟིར་གྱུར་པ། །སེམས་རྒྱུད་
386a
༄#། །ཚིག་རྣམས་བཟུང་བར་གྱུར། །ཡེ་ཤེས་གྲགས་པས་སྨྲས་པ། ནད་མང་དག་གིས་ཉེན་པ་དང ། །ཉོན་མོངས་རླུང་གིས་དེད་པ་དག་།ཡེ་ཤེས་ཆུ་ཡིས་ཞི་བྱས་ཏེ། །བདུད་ཀྱི་སྡེ་རྣམས་རབ་ཏུ་བཅོམ། །གཟུངས་ཀྱི་ཕྱག་རྒྱས་ཀྱང་སྨྲས་པ། ཇི་ལྟར་ཁྱོད་ནི་ཉི་མ་བཞིན། །ཉོན་མོངས་དྲ་བ་རབ་བཅོམ་སྟེ། །ཉོན་མོངས་ཟད་ཅིང་རྣམ་ཐར་པའི། ། བརྩོན་འགྲུས་བརྟན་པ་ངེད་ལ་མེད། །ུཏྤ་ལ་ཟླ་བས་ཀྱང་སྨྲས་པ། ཇི་ལྟར་ཡོན་ཏན་སྙིང་རྗེའི་གནས། །བརྩོན་འགྲུས་བརྟན་པ་ཡང་དག་མོས། །སྲིད་པའི་འཆིང་བས་རབ་བསྡམས་པ། །ཁམས་གསུམ་པོ་དག་གྲོལ་བར་བྱེད། །དྲི་མེད་དབང་པོས་སྨྲས་པ། བྱང་ཆུབ་སེམས་དཔའི་སྤྱོད་ཡུལ་གྱི། །སྙིང་རྗེ་ཆེན་པོ་དག་བསྟན་པ། སྙིང་རྗེའི་རྒྱུ་ལས་བྱུང་བ་པོ། །ཁྱོད་ལ་བདག་ཅག་ཕྱག་འཚལ་ལོ། །སྟོབས་ཆེན་ཤུགས་འཆང་གིས་ཀྱང་སྨྲས་པ། ཉོན་མོངས་ལྡན་པའི་རྩོད་དུས་ཚེ། །བྱང་ཆུབ་གང་དག་ཁྱོད་ལ་རྟེན། །ཁྱོད་ཀྱིས་ཉོན་མོངས་བརྩད་ནས་བཅད། །སྨོན་ལམ་བརྟན་པ་འགྲུབ་པར་འགྱུར། །སྐར་མ་སྐྱོང་གིས་ཀྱང་སྨྲས་པ། ཡེ་ཤེས་མཛོད་དང་མཚུངས་འདྲ་བ། །དྲི་མེད་སྨོན་ལམ་བཏབ་པ་ཡིས། །བྱང་ཆུབ་སྤྱོད་ཕྱིར་སེམས་ཅན་གྱི། །སྨན་དང་རྟེན་དུ་ཁྱོད་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྟོབས་ཡང་དག་པར་སྟོན་པ་ངུ་ཞིང་བྲམ་ཟེའི་རྐང་པ་ལ་ཡན་ལག་
386b
ལྔས་ཕྱག་བྱས་ཏེ་ཐལ་མོ་སྦྱར་ནས་སྨྲས་པ། ཀྱེ་མ་ཤེས་སྒྲོན་སེམས་ཅན་རྣམས། །ཉོན་མོངས་ནད་རྣམས་རྣམ་པར་བཅོམ། །ཁྱོད་ནི་རབ་འབར་སྙིང་རྗེ་ཅན། །སེམས་ཅན་སྡུག་བསྔལ་གྲོལ་བར་མཛད། །རིགས་ཀྱི་བུ། ཐམས་ཅད་དང་ལྡན་པའི་འཁོར་དེ་དང ། ལྷ་དང ། དྲི་ཟ་དང ། མི་དང་བཅས་པ་དག་གིས་ཀྱང་བྲམ་ཟེའི་རྐང་པ་ལ་ཡན་ལག་ལྔས་ཕྱག་བྱས་ནས་ཐལ་མོ་སྦྱར་ཏེ་དོན་དང ། ཚིག་སྣ་ཚོགས་དང་ལྡན་པའི་ཚིགས་སུ་བཅད་པ་དག་གིས་མངོན་པར་བསྟོད་ནས་འཁོད་དོ། །རིགས་ཀྱི་བུ། གང་གི་ཚེ་བྲམ་ཟེ་རྒྱ་མཚོའི་རྡུལ་གྱིས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་པུས་མོ་གཡས་པའི་ལྷ་ང་ས་ལ་བཙུགས་པ་དང ། དེ་ནས་དེའི་མོད་ལ་ས་ཆེར་གཡོས་པར་གྱུར་ཅིང་ཕྱོགས་བཅུ་ཀུན་གྱི་སངས་རྒྱས་ཀྱི་ཞིང་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་གི་སའང་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས། །འཁྲུགས། རབ་ཏུ་འཁྲུགས། །ཀུན་ཏུ་རབ་ཏུ་འཁྲུགས། །ལྡེག། རབ་ཏུ་ལྡེག་།ཀུན་ཏུ་རབ་ཏུ་ལྡེག་ཅིང ། ཀུན་ཏུ་རབ་ཏུ་འུར་འུར་གྱི་བར་དུ་གྱུར་ནས་ཡང་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཞིང་གི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་ཡོངས་སུ་དག་པ་དང ། ཡོངས་སུ་མ་དག་པ་གང་དག་ན་སངས་རྒྱས་བཅོམ་ལྡན་འདས་དག་བཞུགས་ཏེ་འཚོ་ཞིང་གཞེས་ལ་སེམས་ཅན་རྣམས་ལ་ཆོས་ཀྱང་སྟོན་པ་དག་ཏུའང་སྣང་བ་ཆེན་པོ་བྱུང་བར་གྱུར་
387a
༄#། །ཅིང་མེ་ཏོག་སྣ་ཚོགས་ཀྱི་ཆར་དག་ཀྱང་རབ་ཏུ་བབ་པར་གྱུར་ཏེ། འདི་ལྟ་སྟེ། མེ་ཏོག་མནད་ར་བ་དང ། མེ་ཏོག་མནད་ར་བ་དང ། མནད་ར་བ་ཆེན་པོ་དང ། འོད་མཐའ་ཡས་ཀྱི་བར་གྱི་མེ་ཏོག་གི་ཆར་དེ་ལྟ་བུ་དག་ཀྱང་རབ་ཏུ་བབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཆོས་ཉན་པའི་ཕྱིར་སངས་རྒྱས་བཅོམ་ལྡན་འདས་དེ་དག་གི་སྤྱན་སྔ་ན་འདུག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་ས་གཡོས་པ་དེ་མཐོང་ནས་སངས་རྒྱས་བཅོམ་ལྡན་འདས་དེ་དག་ལ་བྱང་ཆུབ་སེམས་དཔའ་དེ་དག་གིས་འདི་སྐད་ཅེས། བཅོམ་ལྡན་འདས། འཇིག་རྟེན་དུ་ས་ཆེར་གཡོས་ཤིང ། མེ་ཏོག་གི་ཆར་ཆེན་པོའང་མངོན་པར་རབ་ཏུ་བབ་པར་གྱུར་པའི་རྒྱུ་ནི་གང་ལགས། རྐྱེན་ནི་གང་ལགས་ཞེས་ཡོངས་སུ་ཞུས་སོ། །ཡང་དེའི་ཚེ་ན་ཤར་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གངྒཱའི་ཀླུང་གཅིག་གི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་རིན་པོ་ཆེ་བསགས་པ་ཞེས་བྱ་བ་ཞིག་ཡོད་དེ། །སངས་རྒྱས་ཀྱི་ཞིང་རིན་པོ་ཆེ་བསགས་པ་དེ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེན་ཟླ་བ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འདི་ལྟ་སྟེ། བྱང་ཆུབ་སེམས་དཔའ་དཔག་ཏུ་མེད་གྲངས་མེད་པ་དག་
387b
གིས་ཡོངས་སུ་བསྐོར་ཅིང་མདུན་གྱིས་བལྟས་ཏེ་ཐེག་པ་ཆེན་པོའི་གཏམ་འབའ་ཞིག་གིས་ཆོས་སྟོན་ཏོ། །སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་ཏོག་དང ། ཟླ་བའི་ཏོག་ཅེས་བྱ་བའི་བྱང་ཆུབ་སེམས་དཔའ་དེ་གཉིས་ཀྱིས་དེ་བཞིན་གཤེགས་པ་རིན་ཆེན་ཟླ་བ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་དེ་བཞིན་གཤེགས་པ་རིན་ཆེན་ཟླ་བ་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། འཇིག་རྟེན་དུ་ས་ཆེན་པོ་གཡོས་ཤིང་མེ་ཏོག་གི་ཆར་ཆེན་པོ་དག་རབ་ཏུ་བབ་པར་གྱུར་པའི་རྒྱུ་ནི་གང་ལགས། རྐྱེན་ནི་གང་ལགས། དེ་བཞིན་གཤེགས་པ་རིན་ཆེན་ཟླ་བས་བཀའ་སྩལ་པ། རིགས་ཀྱི་བུ་དག་།ནུབ་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གངྒའི་ཀླུང་གཅིག་གི་བྱེ་མ་སྙེད་འདས་པ་དེ་ན་འཇིག་རྟེན་གྱི་ཁམས་ཡང་དག་རྟོག་ཅེས་བྱ་བ་ཞིག་ཡོད་དེ། སངས་རྒྱས་ཀྱི་ཞིང་ཡང་དག་རྟོག་དེ་ན་དེ་བཞིན་གཤེགས་པ་རིན་པོ་ཆེའི་སྙིང་པོ་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་ཞིག་བཞུགས་ཏེ་འཚོ་ཞིང་གཞེས་ལ་བྱང་ཆུབ་སེམས་དཔའི་ཡུལ་ཡང་དག་པར་སྟོན་པའི་སྨོན་ལམ་བཀོད་པའི་ཏིང་ངེ་འཛིན་གྱི་ཡུལ་དང ། གཟུངས་ཀྱི་སྒོ་བཀོད་པའི་ཆོས་ཀྱི་རྣམ་གྲངས་འཆད་ཅིང་བྱང་ཆུབ་སེམས་དཔའ་བྱེ་བ་ཕྲག་མང་པོ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་ཏོ། །དེ་ན་བྱང་ཆུབ་སེམས་དཔའ་སེམས་དཔའ་
388a
༄#། །ཆེན་པོ་སྙིང་རྗེ་ཆེན་པོ་དང་ལྡན་པ་གཅིག་ཅིག་ཡོད་པ་དེས་སྨོན་ལམ་འདི་ལྟ་བུ་བཏབ་ཅིང་སྙིང་རྗེ་ཆེན་པོ་ཡོངས་སུ་བསྒོམས་པའི་ཚིག་བརྗོད་དེ། །བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་བ་བཤད་པ་དང ། སྲོག་ཆགས་བྱེ་བ་ཕྲག་མང་པོ་དག་གིས་བྱང་ཆུབ་ཏུ་སྨོན་ལམ་བཏབ་ཅིང་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་ཀྱང་ཡོངས་སུ་བཟུང་བ་དང ། འདུལ་བའི་སེམས་ཅན་རྣམས་ཀྱང་ཡོངས་སུ་བཟུང་བའི་བར་གྱི་སྨོན་ལམ་དེ་ལྟ་བུ་དག་ཀྱང་བརྗོད་པས་ན། གང་གིས་ཐམས་ཅད་དང་ལྡན་པའི་འཁོར་དེ་ཟིལ་གྱིས་མནན་ཅིང་རྩོད་པའི་དུས་ཀྱི་སངས་རྒྱས་ཀྱི་ཞིང་ཉོན་མོངས་པ་ཅན་སྙིགས་མ་ལྔ་དང་ལྡན་ཞིང་ཉོན་མོངས་པའི་སྒྲིབ་པ་ཅན་དང ། མཚམས་མེད་པ་བྱེད་ཅིང་མི་དགེ་བའི་རྩ་བའི་བར་དག་དང་འགྲོགས་ལ། སེམས་ཀྱི་རྒྱུད་ཚིག་པའི་འདུལ་བ་ཐམས་ཅད་ཡོངས་སུ་བཟུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་གཅིག་པུ་རྣམ་པ་ཐམས་ཅད་དུ་སྙིང་རྗེ་ཆེན་པོ་དང་ལྡན་པ་ཡིན་ཏེ། ཐམས་ཅད་དང་ལྡན་པའི་འཁོར་དེ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་གྱིས་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོ་དེ་སྤངས་ནས་སྙིང་རྗེ་ཆེན་པོ་དང་ལྡན་པའི་ཕྱི་མ་དེ་ལ་མཆོད་པ་བྱ་བའི་ཕྱིར་བརྩོན་ཞིང་ཡན་ལག་ལྔས་ཕྱག་བྱས་ཏེ་ཐལ་མོ་སྦྱར་ཞིང་འདུག་
388b
ནས་དེའི་བསྔགས་པའང་རྗོད་པར་བྱེད་དོ། །སེམས་ཅན་ཆེན་པོ་དེའང་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་འདུག་ཅིང་ལུང་བསྟན་པ་ཉན་ཏོ། །གང་གི་ཚེ་སེམས་ཅན་ཆེན་པོ་དེས་བཅོམ་ལྡན་འདས་དེའི་སྤྱན་སྔར་པུས་མོ་གཡས་པའི་ལྷ་ང་ས་ལ་བཙུགས་པར་གྱུར་པ་དེའི་ཚེ་བཅོམ་ལྡན་འདས་དེས་འདི་ལྟ་སྟེ། ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་གཡོས་ཤིང་མེ་ཏོག་ཆར་དག་ཀྱང་མངོན་པར་རབ་ཏུ་བབ་པར་གྱུར་པ་དེ་ལྟ་བུའི་འཛུམ་པ་མཛད་དོ། །སངས་རྒྱས་ཀྱི་ཞིང་དེ་དག་ཐམས་ཅད་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་རབ་ཏུ་སད་པར་བྱ་བ་དང ། སྙིང་རྗེ་ཆེན་པོ་དང་ལྡན་པའི་བྱང་ཆུབ་སེམས་དཔའི་སྨོན་ལམ་གྱི་སྤྱོད་པ་ངེས་པ་བསྟན་པར་བྱ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སངས་རྒྱས་ཀྱི་ཞིང་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་གི་ཕྱོགས་ནས་བསྡུ་བར་བྱ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཏིང་ངེ་འཛིན་གྱི་སྒོ་བསྟན་པའི་སྤྱོད་པ་འཇིགས་པ་མེད་པའི་ཆོས་ཀྱི་རྣམ་གྲངས་བཤད་པར་བྱ་བའི་ཕྱིར་དེ་བཞིན་གཤེགས་པ་དེས་དེ་ལྟ་བུའི་ཆོ་འཕྲུལ་དག་བསྟན་ཏོ། །རིགས་ཀྱི་བུ། དེ་བཞིན་གཤེགས་པ་རིན་ཆེན་ཟླ་བ་ལ་བྱང་ཆུབ་སེམས་དཔའ་དེ་གཉིས་ཀྱིས་ཡོངས་སུ་ཞུས་པ། བཙུན་པ་
389a
༄#། །བཅོམ་ལྡན་འདས། གང་གིས་སྙིགས་མ་ལྔ་དང་ལྡན་པའི་འཇིག་རྟེན་དུ་ཉོན་མོངས་པ་དང ། འཁྲུགས་བདོ་ཞིང་རྩོད་པའི་དུས་ལ་བབ་པའི་དུས་ཡོངས་སུ་བཟུང་སྟེ། མཚམས་མ་མཆིས་པ་བགྱིད་དང ། མི་དགེ་བའི་རྩ་བའི་བར་དང་འགྲོགས་པར་གྱུར་ཅིང ། སེམས་ཀྱི་རྒྱུད་ཚིག་པའི་འདུལ་བའི་སེམས་ཅན་རྣམས་ཀྱང་ཡོངས་སུ་བཟུང་བར་གྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེས་ཡུན་རིང་པོ་ཇི་སྲིད་ཅིག་ནས་བྱང་ཆུབ་ཏུ་སེམས་བསྐྱེད་ཅིང ། ཡུན་རིང་པོ་ཇི་སྲིད་ཅིག་ཏུ་བྱང་ཆུབ་ཀྱི་སྤྱད་པ་སྤྱོད་པ་ལགས། དེ་བཞིན་གཤེགས་པ་རིན་ཆེན་ཟླ་བས་བཀའ་སྩལ་པ། རིགས་ཀྱི་བུ་དག། སྙིང་རྗེ་ཆེན་པོ་དང་ལྡན་པ་དེས་ནི་ད་གདོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་དང་པོ་བསྐྱེད་དོ། །རིགས་ཀྱི་བུ་དག། ཁྱེད་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་དེ་ལ་བལྟ་བ་དང ། ཕྱག་བྱ་བ་དང ། བསྙེན་བཀུར་བྱ་བའི་ཕྱིར་སངས་རྒྱས་ཀྱི་ཞིང་ཡང་དག་རྟོག་དེར་དེང་ལ་ཏིང་ངེ་འཛིན་གྱི་སྒོ་བསྟན་པའི་སྤྱོད་པ་འཇིགས་པ་མེད་པའི་ཆོས་ཀྱི་རྣམ་གྲངས་དེའང་ཉོན་ཅིག་།བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེ་ལ་ངའི་ཚིག་གིས་དྲིས་ལ་འདི་སྐད་དུ་དེ་བཞིན་གཤེགས་
389b
པ་རིན་ཆེན་ཟླ་བ་སྐྱེས་བུ་དམ་པ་ཁྱོད་ལ་འདྲི་བར་མཛད་དེ། །མེ་ཏོག་ཟླ་བ་མདོག་མཛེས་དྲི་མ་མེད་པ་འདིའང་བསྐུར་ཞིང་ལེགས་སོ་ཞེས་བྱ་བ་བྱིན་ཏེ། སྐྱེས་བུ་དམ་པ་ཁྱོད་ཀྱིས་དེ་ལྟར་སེམས་དང་པོ་བསྐྱེད་པ་ནས་སྙིང་རྗེ་ཆེན་པོ་བརྗོད་པས་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་ཀྱི་ཞིང་རྣམས་སུ་སྒྲས་གང་བར་གྱུར་ཏེ། དེས་ན་ཁྱོད་ཀྱིས་ཐམས་ཅད་དུ་སྙིང་རྗེ་ཆེན་པོ་དང་ལྡན་པ་ཞེས་བྱ་བའི་མིང་རབ་ཏུ་ཐོབ་པ་ཡིན་ནོ། །སྐྱེས་བུ་དམ་པ་དེའི་ཕྱིར་ཁྱོད་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པའི་ཕྱི་མ་རྣམས་ལའང་སྙིང་རྗེ་ཆེན་པོ་བརྗོད་པའི་སྨོན་ལམ་གྱིས་ཡང་དང་ཡང་དུ་བྱམས་པའི་རྒྱལ་མཚན་ལེགས་པར་མཛུགས་པར་འགྱུར་ཏེ། སྐྱེས་བུ་དམ་པ། དེའི་ཕྱིར་མ་འོངས་པའི་བསྐལ་པ་གྲངས་མེད་པ་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ན་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་ཏུའང ། ཡང་དང་ཡང་དུ་ཁྱོད་ཀྱི་སྙན་པ་དང་གྲགས་པའི་སྒྲས་ཀུན་ཏུ་གང་བར་འགྱུར་རོ། །གང་ཁྱོད་ཀྱིས་སེམས་ཅན་བྱེ་བ་ཁྲག་ཁྲིག་འབུམ་ཕྲག་མང་པོ་གྲངས་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་ནས། བཅོམ་ལྡན་འདས་ལ་ཕུལ་བ་རྣམས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ལ་
390a
༄#། །བཀོད་པར་གྱུར་ཏེ། དེ་ལ་ཁ་ཅིག་སྨོན་ལམ་གྱིས་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་ཡོངས་སུ་འཛིན་པར་འགྱུར་བ་གང་ཡིན་པ་དག་ནི་ཕྱིས་ལུང་བསྟན་པ་ཐོབ་པར་འགྱུར་རོ། །གང་དག་ཁྱོད་ཀྱིས་བྱང་ཆུབ་ཡང་དག་པར་འཛིན་དུ་བཅུག་པ་དེ་དག་ཐམས་ཅད་ཀྱང་ཕྱིས་བསྐལ་པ་གྲངས་མེད་པ་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ཀྱི་བར་དག་གིས་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་པོ་གཞན་དག་ཏུ་སངས་རྒྱས་ཉིད་ཐོབ་ཅིང་ཆོས་ཀྱི་འཁོར་ལོ་བསྐོར་ནས། དེ་དག་ཁྱོད་ལས་བརྩམས་ནས་བསྔགས་པ་བརྗོད་པར་འགྱུར་ཏེ། རྒྱུ་གསུམ་པོ་དེས་ན་སྐྱེས་བུ་དམ་པ་ཁྱོད་ལེགས་སོ་ཞེས་ཀྱང་སྨྲོས་ཤིག་།ཡང་དེའི་ཚེ་བྱང་ཆུབ་སེམས་དཔའ་དུང་ཕྱུར་ཕྲག་དགུ་དང ། བྱེ་བ་ཕྲག་གཉིས་ཀྱིས་ཚིག་མཐུན་པར་གསོལ་པ། བཙུན་པ་བཅོམ་ལྡན་འདས། བ།དག་ཅག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་དེ་ལ་བལྟ་བ་དང ། ཕྱག་བྱ་བ་དང ། བསྙེན་བཀུར་བགྱི་བ་དང ། དེ་བཞིན་གཤེགས་པས་གང་ལ་ཡན་ལག་གསུམ་གྱིས་ལེགས་སོ་ཞེས་བགྱི་བ་སྤྲིང་ཞིང ། མེ་ཏོག་ཟླ་བ་མདོག་མཛེས་དྲི་མ་མེད་པ་འདི་བསྐུར་བའི་སྐྱེས་བུ་དམ་པ་
390b
དེའང་བལྟ་བའི་སླད་དུ་སངས་རྒྱས་ཀྱི་ཞིང་ཡང་དག་རྟོག་དེར་མཆི་ལགས་སོ། །རིགས་ཀྱི་བུ། དེ་བཞིན་གཤེགས་པ་རིན་ཆེན་ཟླ་བ་དེས་བཀའ་སྩལ་པ། རིགས་ཀྱི་བུ་དག་།དེའི་དུས་ལ་དབབ་པར་ཤེས་ན་དེང་ལ། དེར་དེ་བཞིན་གཤེགས་པ་རིན་པོ་ཆེའི་སྙིང་པོ་ལས་ཏིང་ངེ་འཛིན་གྱི་སྒོ་བསྟན་པའི་སྤྱོད་པ་འཇིགས་པ་མེད་པའི་ཆོས་ཀྱི་རྣམ་གྲངས་དེའང་ཉོན་ཅིག་།རིགས་ཀྱི་བུ། དེ་ནས་རིན་པོ་ཆེའི་ཏོག་དང ། ཟླ་བའི་ཏོག་གཉིས་ཀྱིས་དེ་བཞིན་གཤེགས་པ་རིན་ཆེན་ཟླ་བ་ལས་མེ་ཏོག་ཟླ་བ་མདོག་མཛེས་དྲི་མ་མེད་པ་བླངས་ཏེ། བྱང་ཆུབ་སེམས་དཔའ་དུང་ཕྱུར་ཕྲག་དགུ་དང ། བྱེ་བ་ཕྲག་གཉིས་པོ་དག་དང་ལྷན་ཅིག་ཏུ་འཇིག་རྟེན་གྱི་ཁམས་རིན་ཆེན་བསགས་པ་ནས་འཕགས་ནས། འདི་ལྟ་སྟེ། དཔེར་ན། གློག་བཞིན་དུ་བྱང་ཆུབ་སེམས་དཔའི་འཁོར་དེ་དང ། སངས་རྒྱས་ཀྱི་ཞིང་རིན་ཆེན་བསགས་པ་དེ་ནས་མི་སྣང་བར་གྱུར་ཏེ། སངས་རྒྱས་ཀྱི་ཞིང་ཡང་དག་རྟོག་གི་ཛམྦུའི་ཚལ་གྱི་སྐྱེད་མོས་ཚལ་འདིར་ལྷགས་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་ག་ལ་བ་དེར་དོང་སྟེ་ཕྱིན་པ་དང ། དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་མགོ་བོས་ཕྱག་བཙལ་ཏེ། བྱང་ཆུབ་སེམས་དཔའི་རྣམ་པར་འཕྲུལ་པ་རྣམ་པ་སྣ་ཚོགས་དག་གིས་མཆོད་པ་བྱས་ནས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔ་ན་བྲམ་ཟེ་
391a
༄#། །ལ་ཐམས་ཅད་དང་ལྡན་པའི་བྱང་ཆུབ་སེམས་དཔའི་འཁོར་རྣམས་ཀྱིས་ཐལ་མོ་སྦྱར་ཅིང་བསྡགས་པ་བརྗོད་པ་མཐོང་བ་དང ། བྱང་ཆུབ་སེམས་དཔའ་དེ་གཉིས་འདི་སྙམ་དུ་སེམས་ཏེ་དེ་བཞིན་གཤེགས་པ་རིན་ཆེན་ཟླ་བས་གང་ལ་མེ་ཏོག་ཟླ་བ་མདོག་མཛེས་དྲི་མ་མེད་པ་འདི་དག་བསྐུར་བའི་སྙིང་རྗེ་ཆེན་པོ་དང་ལྡན་པ་དེ་ནི་འདི་ཡིན་པ་ལྟ་སྙམ་མོ། །དེ་ནས་བྱང་ཆུབ་སེམས་དཔའ་དེ་གཉིས་བཅོམ་ལྡན་འདས་ཀྱི་དྲུང་དུ་ཕྱིར་ཕྱོགས་ཏེ། བྲམ་ཟེ་ལ་མེ་ཏོག་ཕུལ་ནས་འདི་སྐད་ཅེས་སྨྲས་སོ། །སྐྱེས་བུ་དམ་པ། དེ་བཞིན་གཤེགས་པ་རིན་ཆེན་ཟླ་བས་ཁྱོད་ལ་མེ་ཏོག་ཟླ་བ་མདོག་མཛེས་དྲི་མ་མེད་པ་འདི་དག་ཀྱང་བསྐུར་ཏེ། སྐྱེས་བུ་དམ་པ་ཁྱོད་ལ་ལེགས་སོ་ཞེས་བྱ་བའང་སྤྲིང་ངོ་ཞེས་བྱ་བའི་བར་དུ་ཇི་ལྟར་སྔར་སྨོས་པ་བཞིན་ནོ། །དེ་བཞིན་དུ་སྦྱར་ཏེ། ཤར་ཕྱོགས་ཀྱི་སངས་རྒྱས་ཀྱི་ཞིང་དཔག་ཏུ་མེད་གྲངས་མེད་པ་དག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མེ་ཏོག་ཟླ་བ་མདོག་མཛེས་དྲི་མ་མེད་པ་དག་ཐོགས་ཏེ། སངས་རྒྱས་ཀྱི་ཞིང་ཡང་དག་རྟོག་ཏུ་ལྷགས་པ་དང ། བྲམ་ཟེ་ལ་མེ་ཏོག་བསྐུར་བ་དང ། ཡན་ལག་གསུམ་གྱིས་ལེགས་སོ་ཞེས་བྱ་བ་སྤྲིང་བའང་ཇི་ལྟར་སྔར་སྨོས་བ་བཞིན་ནོ། །དེ་བཞིན་དུ་ལྷོ་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་
391b
སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་བདུན་འདས་པ་དེ་ན་འཇིག་རྟེན་གྱི་ཁམས་པ་གམ་གྱིས་བསྒྱིངས་པ་ཞེས་བྱ་བ་ཞིག་ཡོད་དེ། སངས་རྒྱས་ཀྱི་ཞིང་བ་གམ་གྱིས་བསྒྱིངས་པ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེངྒེ་ལྟར་བསྒྱིངས་པའི་དབང་ཕྱུག་རྒྱལ་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འབའ་ཞིག་དག་ལ་ཐེག་པ་ཆེན་པོའི་གཏམ་འབའ་ཞིག་གི་ཆོས་སྟོན་ཏོ། །འཁོར་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་གཉིས་ལ་གཅིག་ནི་ཡེ་ཤེས་རྡོ་རྗེའི་ཏོག་ཅེས་བྱ། ཅིག་ཤོས་ནི་སེངྒེ་རྡོ་རྗེའི་ཏོག་ཅེས་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་གཉིས་ཀྱིས་དེ་བཞིན་གཤེགས་པ་སེངྒེ་ལྟར་བ་སྒྱིངས་པའི་དབང་ཕྱུག་རྒྱལ་པོ་ལ་ཡོངས་སུ་ཞུས་པ། བཙུན་པ་བཅོམ་ལྡན་འདས། འཇིག་རྟེན་དུ་ས་ཆེར་གཡོས་ཤིང་མེ་ཏོག་གི་ཆར་ཆེན་པོ་བབ་པར་གྱུར་པའི་རྒྱུ་ནི་གང་ལགས། རྐྱེན་ནི་གང་ལགས་ཞེས་བྱ་བའི་བར་དུ་ཇི་ལྟར་སྔར་སྨོས་པ་བཞིན་ནོ། །དེ་བཞིན་དུ་སྦྱར་ཏེ་ལྷོ་ཕྱོགས་ཀྱི་སངས་རྒྱས་ཀྱི་ཞིང་དཔག་ཏུ་མེད། གྲངས་མེད་པ་གཞན་དང་གཞན་དག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་སངས་རྒྱས་ཀྱི་ཞིང་ཡང་དག་རྟོག་ཏུ་ལྷགས་པའི་
392a
༄#། །བར་དུའང་ཇི་ལྟར་སྔར་སྨོས་པ་བཞིན་ནོ། །ཡང་དེའི་ཚེ་ན་ནུབ་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་གཅིག་འདས་པའི་སངས་རྒྱས་ཀྱི་ཞིང་དེ་ན། སངས་རྒྱས་ཀྱི་ཞིང་རྒྱལ་བ་ཅན་ཞེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་དབང་པོ་ཐུལ་པ་ཡངས་པའི་སྤྱན་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འཁོར་བཞི་པོ་དག་ལ་ཐེག་པ་གསུམ་གྱིས་ཆོས་སྟོན་ཏོ། །དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་སྣང་བྱེད་བཟང་པོ་ཞེས་བྱ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་གཉིས་པ་སེངྒེ་ལྟར་བསྒྱིངས་པ་ཞེས་བྱ་བ་ཞིག་ཡོད་དེ། སྐྱེས་བུ་དམ་པ་དེ་གཉིས་ཀྱིས་དེ་བཞིན་གཤེགས་པ་དབང་པོ་ཐུལ་བ་ཡངས་པའི་སྤྱན་ལ་ས་ཆེར་གཡོས་ཤིང་མེ་ཏོག་གི་ཆར་ཆེན་པོ་བབ་པ་ཅི་ལས་གྱུར་ཅེས་དོན་དེ་ཡོངས་སུ་ཞུས་པའི་བར་དུའང་ཇི་ལྟར་སྔར་སྨོས་པ་བཞིན་ནོ། །ཡང་དེའི་ཚེ་ན་བྱང་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་དགུ་བཅུ་འདས་པ་དེ་ན་འཇིག་རྟེན་གྱི་ཁམས་ངུར་སྨྲིག་ཅེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་འཇིག་རྟེན་དབང་ཕྱུག་རྒྱལ་པོ་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་ཞིག་ཐེག་པ་
392b
ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་འབའ་ཞིག་དག་ལ་ཐེག་པ་ཆེན་པོའི་གཏམ་འབའ་ཞིག་གི་ཆོས་སྟོན་ཏོ། །དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་གཉིས་ལ་གཅིག་ནི་མི་གཡོ་བརྟན་པ་ཞེས་བྱ། ཅིག་ཤོས་ནི་ཤེས་རབ་འཛིན་ཅེས་བྱ་སྟེ། དེ་གཉིས་ཀྱིས་དེ་བཞིན་གཤེགས་པ་འཇིག་རྟེན་དབང་ཕྱུག་རྒྱལ་པོ་ལ། བཙུན་པ་བཅོམ་ལྡན་འདས། འཇིག་རྟེན་དུ་ས་ཆེར་གཡོས་ཤིང་མེ་ཏོག་གི་ཆར་ཆེན་པོ་བབ་པར་གྱུར་པའི་རྒྱུ་ནི་གང་ལགས། རྐྱེན་ནི་གང་ལགས་ཞེས་ཡོངས་སུ་ཞུས་པའི་བར་དུའང་ཇི་ལྟར་སྔར་སྨོས་པ་བཞིན་ནོ། །ཡང་དེའི་ཚེ་ན་འོག་གི་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་ཁྲག་ཁྲིག་ཕྲག་དགུ་བཅུ་རྩ་བརྒྱད་འདས་པ་དེ་ན་འཇིག་རྟེན་གྱི་ཁམས་གཏི་མུག་མུན་བྲལ་ཞེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་ཀུན་ནས་ལྡང་བའི་འཇིགས་པ་དང་བྲལ་བའི་དབྱངས་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འཁོར་བཞི་པོ་དག་ལ་ཐེག་པ་གསུམ་གྱིས་ཆོས་སྟོན་ཏོ། །སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་གཉིས་ལ་གཅིག་ནི་རྣམ་པར་སྣང་བྱེད་རྡུལ་བྲལ་ཞེས་བྱ། ཅིག་ཤོས་ནི་རྣམ་པར་སྣང་བྱེད་ཉི་མ་ཞེས་བྱ་བའི་བར་དུ་ཇི་ལྟར་སྔར་སྨོས་པ་བཞིན་ནོ། །ཡང་དེའི་ཚེ་ན་སྟེང་གི་ཕྱོགས་ལོགས་སུ་སངས་རྒྱས་ཀྱི་ཞིང་དེ་ནས་སངས་རྒྱས་ཀྱི་ཞིང་ཉིས་འབུམ་འདས་
393a
༄#། །པ་དེ་ན་འཇིག་རྟེན་གྱི་ཁམས་མེ་ཏོག་ཀུན་ཏུ་རྒྱས་པ་ཞེས་བྱ་བ་ཞིག་ཡོད་དེ། སངས་རྒྱས་ཀྱི་ཞིང་མེ་ཏོག་ཀུན་ཏུ་རྒྱས་པ་དེ་ན་དེ་བཞིན་གཤེགས་པ་རྣམ་པར་སྣང་མཛད་མེ་ཏོག་རབ་རྒྱས་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་ཞིག་བཞུགས་ཏེ་འཚོ་ཞིང་གཞེས་ལ་འཁོར་བཞི་པོ་དག་ལ་ཐེག་པ་གསུམ་གྱི་ཆོས་སྟོན་ཏོ། །སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་གཉིས་ཤིག་འཁོད་པ་ལ་གཅིག་ནི་རང་གིས་རྣམ་པར་འབྱེད་པས་ཡུལ་ཡང་དག་པར་འཁྲུགས་པ་ཞེས་བྱ། ཅིག་ཤོས་ནི་བྱང་ཆུབ་སེམས་དཔའ་གཟུངས་ཀྱིས་ཡང་དག་པར་རབ་ཏུ་དགའ་བ་རྣམ་པར་འཁྲུགས་པ་ཞེས་བྱ་བ་སྟེ། སྐྱེས་བུ་དམ་པ་དེ་གཉིས་ཀྱིས་དེ་བཞིན་གཤེགས་པ་རྣམ་པར་སྣང་མཛད་མེ་ཏོག་རབ་རྒྱས་ལ། བཙུན་པ་བཅོམ་ལྡན་འདས། འཇིག་རྟེན་དུ་ས་ཆེར་གཡོས་ཤིང་མེ་ཏོག་གི་ཆར་ཆེན་པོ་བབ་པར་གྱུར་བའི་རྒྱུ་གང་ལགས། རྐྱེན་ནི་གང་ལགས་ཞེས་ཞུས་པ་དང ། དེ་བཞིན་གཤེགས་པ་རྣམ་པར་སྣང་མཛད་མེ་ཏོག་རབ་རྒྱས་ཀྱིས་བཀའ་སྩལ་པ། རིགས་ཀྱི་བུ་དག་འདི་ནས་འོག་གི་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་ཉིས་འབུམ་འདས་པ་དེ་ན་འཇིག་རྟེན་གྱི་ཁམས་ཡང་དག་རྟོག་ཅེས་བྱ་བ་ཞིག་ཡོད་
393b
དེ།་དེ་ན་དེ་བཞིན་གཤེགས་པ་རིན་པོ་ཆེའི་སྙིང་པོ་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་ཞིག་བཞུགས་ཏེ་འཚོ་ཞིང་གཞེས་ལ། བྱང་ཆུབ་སེམས་དཔའི་ཡུལ་དང་ཞིང་ཡང་དག་པར་སྟོན་པའི་སྨོན་ལམ་གྱི་ཡུལ་བཀོད་པའི་ཏིང་ངེ་འཛིན་གྱི་ཡུལ་དང ། གཟུངས་ཀྱི་སྒོ་བཀོད་པའི་ཆོས་ཀྱི་རྣམ་གྲངས་འཆད་ཅིང་བྱང་ཆུབ་སེམས་དཔའ་བྱེ་བ་ཕྲག་མང་པོ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་ཏོ། །དེ་ན་བྱང་ཆུབ་སམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་གཅིག་ཅིག་ཡོད་པ་དེས་སྨོན་ལམ་འདི་ལྟ་བུ་བཏབ་ཅིང་སྙིང་རྗེ་ཆེན་པོ་ཡོངས་སུ་བསྒོམས་པའི་ཚིག་བརྗོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་བཤད་པ་དང ། ཅི་ནས་ཀྱང་བྱང་ཆུབ་སེམས་དཔའ་བྱེ་བ་ཕྲག་མང་པོ་དག་གིས་སངས་རྒྱས་ཀྱི་ཞིང་གི་སྨོན་ལམ་བཏབ་ཅིང་སངས་རྒྱས་ཀྱི་ཞིང་གི་ཡོན་ཏན་བཀོད་པ་དང ། འདུལ་བའི་སེམས་ཅན་རྣམས་ཀྱང་ཡོངས་སུ་བཟུང་བའི་སྨོན་ལམ་དེ་ལྟ་བུ་དག་ཀྱང་བརྗོད་པས་ན། གང་གིས་ཐམས་ཅད་དང་ལྡན་པའི་འཁོར་དེ་ཟིལ་གྱིས་མནན་ཅིང་རྩོད་པའི་དུས་ཀྱི་སངས་རྒྱས་ཀྱི་ཞིང་ཉོན་མོངས་པ་ཅན་སྙིགས་མ་ལྔ་དང་ལྡན་ཞིང་ཉོན་མོངས་པའི་སྒྲིབ་པ་ཅན་དང ། མཚམས་མེད་པ་བྱེད་
394a
༄#། །ཅིང་མི་དགེ་བའི་རྩ་བའི་བར་དང་འགྲོགས་ལ། སེམས་ཀྱི་རྒྱུད་ཚིག་པའི་འདུལ་བ་ཐམས་ཅད་ཡོངས་སུ་བཟུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་གཅིག་བུ་རྣམ་པ་ཐམས་ཅད་དུ་སྙིང་རྗེ་ཆེན་པོ་དང་ལྡན་པ་ཡིན་ཏེ། ཐམས་ཅད་དང་ལྡན་པའི་འཁོར་དེ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་གྱིས་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོ་ལ་མཆོད་པ་བྱ་བ་སྤངས་ནས་སྙིང་རྗེ་ཆེན་པོ་དང་ལྡན་པ་ཕྱི་མ་དེ་ལ་མཆོད་པ་བྱ་བའི་ཕྱིར་བརྩོན་ཞིང་ཡན་ལག་ལྡས་ཕྱག་བྱས་ཏེ་ཐལ་མོ་སྦྱར་ཅིང་འདུག་ནས་དེའི་བསྔགས་པའང་རྗོད་པར་བྱེད་དོ། །སེམས་ཅན་ཆེན་པོ་དེའང་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔ་ན་འདུག་ཅིང་ལུང་བསྟན་པ་ཉན་ཏོ། །གང་གི་ཚེ་སེམས་ཅན་ཆེན་པོ་དེས་བཅོམ་ལྡན་འདས་དེའི་སྤྱན་སྔར་པུས་མོ་གཡས་པའི་ལྷ་ང་ས་ལ་བཙུགས་པར་གྱུར་པ་དེའི་ཚེ་བཅོམ་ལྡན་འདས་དེས་འདི་ལྟ་སྟེ། ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་གིས་ཆེན་པོ་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས་ཤིང ། འགུལ་བ་དང ། མེ་ཏོག་གི་ཆར་དག་ཀྱང་མངོན་པར་རབ་ཏུ་བབ་པར་གྱུར་པ་དེ་ལྟ་
394b
བུའི་འཛུམ་པ་མཛད་དོ། །སངས་རྒྱས་ཀྱི་ཞིང་དེ་དག་ཐམས་ཅད་ཀྱི་བྱང་ཆུབ་སེམས་དཔའ་སེམས་དཔའ་སེམས་དཔའ་ཆེན་པོ་དེ་དག་རབ་ཏུ་སད་པར་བྱ་བ་དང ། སྙིང་རྗེ་ཆེན་པོ་དང་ལྡན་པའི་བྱང་ཆུབ་སེམས་དཔའི་སྨོན་ལམ་གྱི་སྤྱོད་པ་ངེས་པར་བསྟན་པར་བྱ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་གིས་ཕྱོགས་ནས་བསྡུ་བར་བྱ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཏིང་ངེ་འཛིན་གྱི་སྒོ་བསྟན་པའི་སྤྱོད་པ་འཇིགས་པ་མེད་པའི་ཆོས་ཀྱི་རྣམ་གྲངས་བཤད་པར་བྱ་བའི་ཕྱིར་དེ་བཞིན་གཤེགས་པ་དེས་དེ་ལྟ་བུའི་ཆོ་འཕྲུལ་བསྟན་ཏོ།། །།བམ་པོ་བཅུ་གཉིས་པ། རིགས་ཀྱི་བུ། དེ་བཞིན་གཤེགས་པ་རྣམ་པར་སྣང་མཛད་མེ་ཏོག་རབ་རྒྱས་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རང་གིས་རྣམ་པར་འབྱེད་པས་ཡུལ་ཡང་དག་པར་འཁྲུགས་པ་དང ། གཟུངས་ཀྱིས་ཡང་དག་པར་རབ་ཏུ་དགའ་བ་རྣམ་པར་འཁྲུགས་པ་ཞེས་བྱ་བའི་རིགས་ཀྱི་བུ་དེ་གཉིས་ཀྱིས་ཡོངས་སུ་ཞུས་པ། བཙུན་པ་བཅོམ་ལྡན་འདས། གང་གིས་སྙིགས་མ་ལྔ་དང་ལྡན་པའི་འཇིག་རྟེན་དུ་ཉོན་མོངས་པ་དང་འཁྲུག་པ་བདོ་ཞིང་རྩོད་པའི་དུས་ལ་བབ་པའི་དུས་ཡོངས་སུ་བཟུང་ཞིང་མཚམས་མ་མཆིས་པ་བགྱིད་པ་དང ། མི་
395a
༄#། །དགེ་བའི་རྩ་བའི་བར་དང་འགྲོགས་པར་གྱུར་ཅིང ། སེམས་ཀྱི་རྒྱུད་ཚིག་པའི་འདུལ་བའི་སེམས་ཅན་རྣམས་ཀྱང་ཡོངས་སུ་བཟུང་བར་གྱུར་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེས་ཡུན་རིང་པོ་ཇི་སྲིད་ཅིག་ནས་བྱང་ཆུབ་ཏུ་སེམས་བསྐྱེད་ཅིང ། ཡུན་རིང་པོ་ཇི་སྲིད་ཅིག་ཏུ་བྱང་ཆུབ་ཀྱི་སྤྱོད་པ་སྤྱད་ལགས། དེ་བཞིན་གཤེགས་པ་རྣམ་པར་སྣང་མཛད་མེ་ཏོག་རབ་རྒྱས་ཀྱིས་བཀའ་སྩལ་པ། རིགས་ཀྱི་བུ་དག་།སྙིང་རྗེ་ཆེན་པོ་དང་ལྡན་པ་དེས་ནི་གདོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །རིགས་ཀྱི་བུ་དག་།ཁྱེད་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་དེ་ལ་བལྟ་བ་དང ། ཕྱག་བྱ་བ་དང ། བསྙེན་བཀུར་བྱ་བ་དང ། ཏིང་ངེ་འཛིན་གྱི་སྒོ་བསྟན་པའི་སྤྱོད་པ་འཇིགས་པ་མེད་པའི་ཆོས་ཀྱི་རྣམ་གྲངས་དེའང་མཉན་པའི་ཕྱིར་འཇིག་རྟེན་གྱི་ཁམས་ཡང་དག་རྟོག་དེར་དེང་ལ། བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེ་ལ་ངའི་ཚིག་གིས་དྲིས་ལ་འདི་སྐད་དུ་དེ་བཞིན་གཤེགས་པ་རྣམ་པར་སྣང་མཛད་མེ་ཏོག་རབ་རྒྱས་སྐྱེས་བུ་དམ་པ་ཁྱོད་ལ་དྲི་བར་མཛད་དེ། མེ་ཏོག་ཟླ་བ་མ་དོག་མཛེས་དྲི་མ་མེད་པ་འདི་དག་
395b
ཀྱང་བསྐུར་ཞིང་ལེགས་སོ་ཞེས་བྱ་བའང་བྱིན་ཏེ། སྐྱེས་བུ་དམ་པ་ཁྱོད་ཀྱིས་དེ་ལྟར་སེམས་དང་པོ་བསྐྱེད་པ་ནས་སྙིང་རྗེ་ཆེན་པོ་བརྗོད་པས་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་ཏུ་སྒྲས་གང་བར་གྱུར་ཅིང ། སྙིང་རྗེ་ཆེན་པོའི་སྒྲའང་རབ་ཏུ་ཐོབ་པ་ཡིན་ནོ། །སྐྱེས་བུ་དམ་པ། དེའི་ཕྱིར་ན་ཁྱོད་ནི་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པའི་ཕྱི་མ་རྣམས་ལའང་སྙིང་རྗེ་ཆེན་པོ་བརྗོད་པའི་སྨོན་ལམ་གྱིས་ཡང་དང་ཡང་དུ་བྱམས་པའི་རྒྱལ་མཚན་ལེགས་པར་འཛུགས་པར་འགྱུར་ཏེ། སྐྱེས་བུ་དམ་པ། དེའི་ཕྱིར་མ་འོངས་པའི་བསྐལ་བ་གྲངས་མེད་པ་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ན་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་ཏུ་ཡང་དང་ཡང་དུ་ཁྱོད་ཀྱི་སྙན་པ་དང ། གྲགས་པའི་སྒྲས་ཀུན་ཏུ་གང་བར་འགྱུར་རོ། །སྐྱེས་བུ་དམ་པ། དེའི་ཕྱིར་ཁྱོད་ཀྱིས་སེམས་ཅན་བྱེ་བ་ཁྲག་ཁྲིག་འབུམ་ཕྲག་མང་པོ་གྲངས་མེད་པ་དག་།བླ་ན་མེད་པ་ཡང་དག་པར་རྡོཟྒྶ་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་ནས་བཅོམ་ལྡན་འདས་ལ་ཕུལ་བ་རྣམས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ལ་བཀོད་
396a
༄#། །པར་གྱུར་ཏེ། དེ་ལ་ཁ་ཅིག་གིས་བཅོམ་ལྡན་འདས་ཀྱི་ཐད་ནས་སྨོན་ལམ་གྱིས་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་ཡོངས་སུ་བཟུང་བ་དག་དང ། འདུལ་བའི་སེམས་ཅན་རྣམས་ཀྱང་སྙིང་རྗེའི་འོད་ཟེར་དག་གིས་ཀུན་ཏུ་བཀབ་པར་གྱུར་ཏོ། །གང་དག་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ནས་ལུང་བསྟན་པ་མ་ཐོབ་པ་དེ་དག་ཀྱང་ཕྱིས་ལུང་བསྟན་པ་ཐོབ་པར་འགྱུར་ཏེ། དེ་དག་ཐམས་ཅད་ཀྱང་ཕྱིས་བསྐལ་པ་གྲངས་མེད་པ་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ཀྱི་བར་དག་གིས་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་པོ་གཞན་དག་ཏུ་སངས་རྒྱས་ཉིད་ཐོབ་ཅིང་ཆོས་དང་ལྡན་པའི་ཆོས་ཀྱི་འཁོར་ལོ་བསྐོར་ནས་ཁྱོད་ཉིད་ལས་བརྩམས་ཤིང་བསྔགས་པ་བརྗོད་པར་འགྱུར་ཏེ། རྒྱུ་གསུམ་པོ་དེས་ན། སྐྱེས་བུ་དམ་པ་ཁྱོད་ལེགས་སོ། །ཞེས་ཀྱང་སྨྲོས་ཤིག་།ཡང་དེའི་ཚེ་ན་བྱང་ཆུབ་སེམས་དཔའ་བྱེ་བ་ཕྲག་མང་པོ་དག་གིས་ཀྱང་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ཅག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་དེ་ལ་བལྟ་བ་དང ། ཕྱག་བགྱི་བ་དང ། བསྙེན་བཀུར་བགྱི་བ་དང །
396b
དེ་བཞིན་གཤེགས་པས་གང་ལ་ཡན་ལག་གསུམ་གྱིས་ལགས་སོ་ཞེས་བགྱི་བ་སྤྲིང་ཞིག་།མེ་ཏོག་ཟླ་བ་མདོག་མཛེས་དྲི་མ་མེད་པ་འདི་དག་བསྐུར་བའི་སྐྱེས་བུ་དམ་པ་དེའང་བལྟ་བའི་སླད་དུ་སངས་རྒྱས་ཀྱི་ཞིང་ཡང་དག་རྟོག་དེར་མཆི་ལགས་སོ། །རིགས་ཀྱི་བུ། དེ་བཞིན་གཤེགས་པ་རྣམ་པར་སྣང་མཛད་མེ་ཏོག་རབ་རྒྱས་དེས་བཀའ་སྩལ་པ། རིགས་ཀྱི་བུ་དག། དེའི་དུས་ལ་དབབ་པར་ཤེས་ན་ཁྱེད་ཅག་དེང་ལ་དེར་དེ་བཞིན་གཤེགས་པ་རིན་པོ་ཆེའི་སྙིང་པོ་ལས་ཏིང་ངེ་འཛིན་གྱི་སྒོ་བསྟན་པའི་སྤྱོད་པ་འཇིགས་པ་མེད་པའི་ཆོས་ཀྱི་རྣམ་གྲངས་དེའང་ཉོན་ཅིག་།རིགས་ཀྱི་བུ། དེ་ནས་བྱང་ཆུབ་སེམས་དཔའ་རང་གིས་རྣམ་པར་འབྱེད་པས་ཡུལ་ཡང་དག་པར་འཁྲུགས་པ་དང ། གཟུངས་ཀྱིས་ཡང་དག་པར་རབ་ཏུ་དགའ་བ་རྣམ་པར་འཁྲུགས་པ་ཞེས་བྱ་བ་དེ་གཉིས་ཀྱིས་དེ་བཞིན་གཤེགས་པ་རྣམ་པར་སྣང་མཛད་མེ་ཏོག་རབ་རྒྱས་དེ་ལས་མེ་ཏོག་ཟླ་བ་མདོག་མཛེས་དྲི་མ་མེད་པ་དག་བླངས་ནས་བྱང་ཆུབ་སེམས་དཔའ་བྱེ་བ་ཕྲག་མང་པོ་དང་ལྷན་ཅིག་ཏུ་སངས་རྒྱས་ཀྱི་ཞིང་གི་མེ་ཏོག་ཀུན་ཏུ་རྒྱས་པ་ནས་འཕགས་ཏེ་སྐད་ཅིག་གཅིག་གིས་སངས་རྒྱས་ཀྱི་ཞིང་འདིའི་ཛམྦུའི་ཚལ་གྱི་སྐྱེད་མོས་ཚལ་དུ་ལྷགས་ཏེ་ཕྱིན་པ་དང ། དེ་བཞིན་གཤེགས་པ་རིན་པོ་ཆེའི་སྙིང་པོ་ག་ལ་བ་དེར་དོང་ངོ ། །ཡང་དེའི་ཚེ་ན་ཐམས་ཅད་དང་ལྡན་པའི་
397a
༄#། །སངས་རྒྱས་ཀྱི་ཞིང་ཡང་དག་རྟོག་ཐེག་པ་ཆེན་པོ་པའི་བྱང་ཆུབ་སེམས་དཔའ་རྣམས་དང ། རང་སངས་རྒྱས་ཀྱི་ཐེག་པ་པ་དང ། ཉན་ཐོས་ཀྱི་ཐེག་པ་པའི་རིགས་ཀྱི་བུ་དག་དང ། ལྷ་རྣམས་དང ། ལྟོ་འཕྱེ་ཆེན་པོའི་བར་དག་གིས་འདི་ལྟར་ཡོངས་སུ་གང་བར་གྱུར་ཏེ། འདི་ལྟ་སྟེ། དཔེར་ན། བུ་རམ་ཤིང་གི་ཚལ་ལམ། འདམ་བུའི་ཚལ་ལམ། ཏིལ་གྱི་ཞིང་ངམ། འབྲས་ཀྱི་ཞིང་རྒྱས་པས་ཀུན་ཏུ་ཁྱབ་པར་གྱུར་པ་དེ་བཞིན་དུ། དེའི་ཚེ་ན་སངས་རྒྱས་ཀྱི་ཞིང་ཡང་དག་རྟོག་ཀྱང་ཐེག་པ་ཆེན་པོའི་རིགས་ཀྱི་བུ་རྣམས་དང ། ལྟོ་འཕྱེ་ཆེན་པོའི་བར་དག་གིས་ཡོངས་སུ་གང་ཞིང་ཁྱབ་པར་གྱུར་ཏོ། །བྱང་ཆུབ་སེམས་དཔའ་དེ་དག་གིས་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་མགོ་བོས་ཕྱག་བཙལ་ཏེ། ཏིང་ངེ་འཛིན་གྱི་སྟོབས་དང ། བྱང་ཆུབ་སེམས་དཔའི་རྣམ་པར་འཕྲུལ་པ་རྣམ་པ་སྣ་ཚོགས་དག་གིས་མཆོད་པ་བྱས་ནས། དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔ་ན་བྲམ་ཟེ་ལ་ཐམས་ཅད་དང་ལྡན་པའི་འཁོར་རྣམས་ཐལ་མོ་སྦྱར་ཏེ་བསྔགས་པ་བརྗོད་ཅིང་འཁོད་པ་མཐོང་བ་དང ། བྱང་ཆུབ་སེམས་དཔའ་དེ་དག་འདི་སྙམ་དུ་སེམས་ཏེ། དེ་བཞིན་གཤེགས་པ་རྣམ་པར་སྣང་མཛད་མེ་ཏོག་རབ་རྒྱས་ཀྱིས་གང་ལ་མེ་ཏོག་ཟླ་བ་མདོག་མཛེས་དྲི་མ་མེད་པ་འདི་དག་
397b
བསྐུར་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེ་ནི་འདི་ཡིན་པ་ལྟ་སྙམ་ནས། བྱང་ཆུབ་སེམས་དཔའ་དེ་དག་བཅོམ་ལྡན་འདས་ཀྱི་དྲུང་ནས་ཕྱིར་ཕྱོགས་ཏེ། བྲམ་ཟེ་དེ་ལ་མེ་ཏོག་ཟླ་བ་མདོག་མཛེས་དྲི་མ་མེད་པ་དེ་དག་ཕུལ་ནས་སྨྲས་པ། སྐྱེས་བུ་དམ་པ། དེ་བཞིན་གཤེགས་པ་རྣམ་པར་སྣང་མཛད་མེ་ཏོག་རབ་རྒྱས་ཀྱིས་ཁྱོད་ལ་མེ་ཏོག་ཟླ་བ་མདོག་མཛེས་དྲི་མ་མེད་པ་འདི་བསྐུར་ཞིང ། སྐྱེས་བུ་དམ་པ་ཁྱོད་ལེགས་སོ་ཞེས་བྱ་བའང་བྱིན་ཏེ། ཡན་ལག་གསུམ་གྱིས་ལེགས་སོ་ཞེས་བྱ་བ་བརྗོད་པའི་བར་དུའང་ཇི་ལྟར་སྔར་སྨོས་པ་བཞིན་ནོ། །མེ་ཏོག་གང་ཡིན་པ་དེ་དག་སངས་རྒྱས་ཀྱི་ཞིང་སྟོང་པ་དག་ཏུ་ཆར་བཞིན་དུ་རབ་ཏུ་འབབ་པ་སངས་རྒྱས་ཀྱི་ཞིང་དེ་དག་ཏུ་དགེ་བའི་སྒྲ་རྣམ་པ་སྣ་ཚོགས་དག་གིས་ཀྱང་ཀུན་གྱིས་གང་བར་གྱུར་ཏེ། འདི་ལྟ་སྟེ། སངས་རྒྱས་ཀྱི་སྒྲ་དང ། ཆོས་ཀྱི་སྒྲ་དང ། དགེ་འདུན་གྱི་སྒྲ་དང ། སྣང་བའི་སྒྲ་དང ། ཕ་རོལ་ཏུ་ཕྱིན་པའི་སྒྲ་དང ། སྟོབས་ཀྱི་སྒྲ་དང ། མི་འཇིགས་པའི་སྒྲ་དང ། མངོན་པར་ཤེས་པའི་སྒྲ་དང ། མངོན་པར་འདུ་བྱ་བ་མེད་པའི་སྒྲ་དང ། སྐྱེ་བ་མེད་པའི་སྒྲ་དང ། འགག་པ་མེད་པའི་སྒྲ་དང ། ཞི་བའི་སྒྲ་དང ། ཉེ་བར་ཞི་བའི་སྒྲ་དང ། རབ་ཏུ་ཞི་བའི་སྒྲ་དང ། བྱམས་པ་ཆེན་པོའི་སྒྲ་དང ། སྙིང་རྗེ་ཆེན་པོའི་སྒྲ་དང ། མི་སྐྱེ་བའི་ཆོས་ཀྱི་སྒྲ་དང ། དབང་
398a
༄#། །བསྐུར་བའི་ས་ཐོབ་པའི་སྒྲ་དང ། ཐེག་པ་ཆེན་པོའི་གཏམ་འབའ་ཞིག་གི་སྒྲ་སྟེ། མེ་ཏོག་གི་ཆར་ཆེན་པོ་དེ་དག་གིས་དགེ་བའི་སྒྲ་དེ་ལྟ་བུས་སངས་རྒྱས་ཀྱི་ཞིང་དེ་དག་བཀང་སྟེ་གནས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྫུ་འཕྲུལ་ཆེ་བ། མཐུ་ཆེ་བ། ཆོས་ཟབ་མོ་ལ་དབང་ཐོབ་པ། གང་དག་འདུལ་བའི་སེམས་ཅན་ཡོངས་སུ་སྨིན་པར་བྱ་བའི་ཕྱིར་སྨོན་ལམ་གྱི་དབང་གིས་སངས་རྒྱས་ཀྱི་ཞིང་སྟོང་པ་དེ་དག་ཏུ་ལྷགས་པ་དེ་དག་གིས་སྒྲ་དེ་ཐོས་ནས་སངས་རྒྱས་ཀྱི་མཐུ་དང ། སྨོན་ལམ་གྱི་དབང་དང ། ཏིང་ངེ་འཛིན་གྱི་སྟོབས་ཀྱི་དེ་དག་དེ་ནས་རྫུ་འཕྲུལ་གྱིས་འདི་ལྟར་མགྱོགས་པར་དོང་སྟེ། འདི་ལྟ་སྟེ། དཔེར་ན། སྐྱེས་བུ་སྟོབས་དང་ལྡན་པ་ལག་པ་བརྐྱང་བ་དེ་བཞིན་དུ་བྱང་ཆུབ་སེམས་དཔའ་དེ་དག་ཀྱང་སངས་རྒྱས་ཀྱི་ཞིང་སྟོང་པ་དེ་དག་ནས་དོང་སྟེ། སངས་རྒྱས་ཀྱི་ཞིང་ཡང་དག་རྟོགས་འདིར་ལྷགས་ནས། བྱང་ཆུབ་སེམས་དཔའ་དེ་དག་གིས་བྱང་ཆུབ་སེམས་དཔའ་རྣམ་པར་འཕྲུལ་པ་རྣམ་པ་སྣ་ཚོགས་དག་གིས་དེ་བཞིན་གཤེགས་པ་རིན་པོ་ཆེའི་སྙིང་པོ་ལ་མཆོད་པ་བྱས་ཤིང་ཐམས་ཅད་དང་ལྡན་པའི་འཁོར་དེ་ལའང་མཆོད་པ་བྱས་ནས་ཆོས་ཉན་པའི་ཕྱིར་གནས་ཇི་ལྟ་བུ་ཐོབ་པར་འཁོད་དོ། །
398b
རིགས་ཀྱི་བུ། མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་དེས་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོ་དེ་ལ་མེ་ཏོག་ཟླ་བ་མདོག་མཛེས་དྲི་མ་མེད་པ་དེ་དག་གིས་མཆོད་པ་བྱས་ཏེ་གསོལ་པ། བཙུན་པ་བཅོམ་ལྡན་འདས། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་དུ་གསོལ། རིགས་ཀྱི་བུ། དེ་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་ཏིང་ངེ་འཛིན་གློག་གི་སྒྲོན་མ་ཞེས་བྱ་བ་ལ་སྙོམས་པར་ཞུགས་ཏེ། ཏིང་ངེ་འཛིན་དེས་ཐམས་ཅད་དང་ལྡན་པའི་སངས་རྒྱས་ཀྱི་ཞིང་ཡང་དག་རྟོག་རིན་པོ་ཆེ་སྣ་བདུན་གྱི་རང་བཞིན་དུ་གནས་པར་གྱུར་ནས་རི་དང ། ཤིང་ལྗོན་པ་རྣམས་དང ། རྩཝ་དང ། ཤིང་དང ། ས་གཞི་ཐམས་ཅད་ཀྱང་རིན་པོ་ཆེ་སྣ་བདུན་གྱི་རང་བཞིན་དུ་ཀུན་ཏུ་སྣང་ངོ་།། སེམས་ཅན་གང་དག་ཆོས་མཉན་པའི་ཕྱིར་དེ་ན་འཁོད་པ་དེ་དག་ཀྱང་དགེ་བའི་ཕྱོགས་ཇི་ལྟ་བུ་ཡིད་ལ་བྱེད་པ་དེ་ལྟ་བུའི་ལུས་སུ་ཁ་ཅིག་ནི་སེར་པོ། ཁ་ཅིག་ནི་དཀར་པོ། ཁ་ཅིག་ནི་བཙོད་ཁ། ཁ་ཅིག་ནི་དམར་པོ། ཁ་ཅིག་ནི་ནག་པོ། ཁ་ཅིག་ནི་སྐྱ་བོར་གནས་ཏེ། ཁ་ཅིག་གི་ལུས་ནི་རླུང་ལྟ་བུར་ཀུན་ཏུ་སྣང ། ཁ་ཅིག་ནི་མེ་ལྟ་བུར། ཁ་ཅིག་ནི་ནམ་མཁའ་ལྟ་བུར། ཁ་ཅིག་ནི་སྨིག་རྒྱུ་ལྟ་བུར། ཁ་ཅིག་ནི་ཆུ་ལྟ་བུར། ཁ་ཅིག་ནི་རི་ལྟ་བུར། ཁ་ཅིག་ནི་ཚངས་པ་ལྟ་བུར། ཁ་ཅིག་ནི་བརྒྱ་བྱིན་ལྟ་བུར། ཁ་ཅིག་ནི་མེ་ཏོག་ལྟ་བུར། ཁ་ཅིག་
399a
༄#། །ནི་ནམ་མཁའ་ལྡིང་ལྟ་བུར། ཁ་ཅིག་ནི་སེངྒེ་ལྟ་བུར། ཁ་ཅིག་ནི་ཉི་མ་ལྟ་བུར། ཁ་ཅིག་ནི་ཟླ་བ་ལྟ་བུར། ཁ་ཅིག་ནི་སྐར་མ་ལྟ་བུར། ཁ་ཅིག་ནི་བྱ་རྒོད་ལྟ་བུ་དང ། ཁ་ཅིག་ནི་ཝ་ལྟ་བུ་དག་ཏུ་ཀུན་ཏུ་སྣང་སྟེ། ཆོས་མཉན་པའི་ཕྱིར་དེ་ན་འཁོད་པའི་སེམས་ཅན་དེ་དག་དགེ་བའི་ཕྱོགས་ཇི་ལྟ་བུ་ཡིད་ལ་བྱེད་པ་དེ་ལྟ་བུའི་ལུས་སུ་ཀུན་ཏུ་སྣང་ངོ ། །རིགས་ཀྱི་བུ། དེ་ན་སེམས་ཅན་གང་དག་གིས་རང་རང་གི་ལུས་ཇི་ལྟ་བུར་མཐོང་བ་དེ་ལྟ་བུར་སེམས་ཅན་དེ་དག་གིས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྐུའང་མཐོང་ངོ ། །རིགས་ཀྱི་བུ། མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་དེས་ཀྱང་མདུན་ན་དེ་བཞིན་གཤེགས་པ་རིན་པོ་ཆེའི་སྙིང་པོ་རིན་པོ་ཆེའི་སྣ་བདུན་གྱི་པདྨ་འདབ་མ་སྟོང་དང་ལྡན་པའི་ཟེ་བ་ལ་བཞུགས་བར་མཐོང་ངོ ། །རིགས་ཀྱི་བུ། དེ་ན་སེམས་ཅན་གང་དག་ས་དང་ནམ་མཁའ་ལ་འདུག་པ་དང ། འགྲེང་བའི་སེམས་ཅན་རེ་རེས་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོའི་སྐུའང་དེ་ལྟར་མཐོང་སྟེ། བདག་ནི་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔ་ན་འདུག་སྟེ། ཐུགས་ཐམས་ཅད་ཀྱིས་དགོངས་ཤིང་བདག་གཅིག་བུ་ལས་བརྩམས་ཏེ་ཆོས་སྟོན་ཏོ་སྙམ་མོ། །རིགས་ཀྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
399b
པའི་སངས་རྒྱས་རིན་པོ་ཆེའི་སྙིང་པོས་བྲམ་ཟེ་རྒྱ་མཚོའི་རྡུལ་དེ་ལ་ལེགས་སོ་ཞེས་བྱ་བ་བྱིན་ཏེ། བྲམ་ཟེ་ཆེན་པོ་སྙིང་རྗེ་ཆེན་པོ་དང་ལྡན་པ་ཁྱོད་སེམས་ཅན་བགྲང་བ་ལས་ཡང་དག་པར་འདས་པ་རྣམས་ལ་ཕན་པ་བྱེད་པ་དང ། འཇིག་རྟེན་ལ་སྣང་བ་བྱེད་པར་གྱུར་པ་ནི་སྙིང་རྗེ་དང་ལྡན་པ་ཡིན་ཏེ། ལེགས་སོ། །ལེགས་སོ། །བྲམ་ཟེ། འདི་ལྟ་སྟེ། དཔེར་ན། མེ་ཏོག་གི་ཤིང་ཕུན་སུམ་ཚོགས་པ་ཞིག་ཁ་དོག་སྣ་ཚོགས་དང ། དྲི་སྣ་ཚོགས་དང ། རེག་པ་སྣ་ཚོགས་དང ། འདབ་མ་སྣ་ཚོགས་དང ། སྡོང་བུ་སྣ་ཚོགས་དང ། རྩ་བ་སྣ་ཚོགས་དང ། སྨན་གྱི་ཡོ་བྱད་ཀྱི་གནས་སྣ་ཚོགས་ཡོད་དོ། །དེ་ལ་མེ་ཏོག་ཁ་ཅིག་གི་ཁ་དོག་དང་དྲིས་ནི་དཔག་ཚད་བརྒྱར། ཁ་ཅིག་གིས་ནི་དཔག་ཚད་ཉིས་བརྒྱར། ཁ་ཅིག་གིས་ནི་དཔག་ཚད་སུམ་བརྒྱར་ལྷང་ངེ་ལྷན་ནེར་བྱེད་ཅིང་དེ་བཞིན་དུ་སྦྱར་ཏེ། དེ་ན་མེ་ཏོག་ཁ་ཅིག་གི་ཁ་དོག་དང་དྲིས་ནི་གླིང་བཞི་པའི་འཇིག་རྟེན་གྱི་ཁམས་ཐམས་ཅད་དུ་ལྷང་ངེ་ལྷན་ནེར་བྱེད་ལ། དེ་ན་སེམས་ཅན་གང་དག་མིག་མེད་པ་དེ་དག་གིས་མེ་ཏོག་དེའི་དྲི་བསྣམས་ན་ནི་མིག་དག་ཐོབ་པར་འགྱུར། འོན་པ་རྣམས་ཀྱིས་ནི་རྣ་བ་དག་ཐོབ་པར་འགྱུར་ཡན་ལག་ཐམས་ཅད་ཀྱི་བར་དག་ཉམས་པ་རྣམས་ཀྱིས་ནི་ཡན་ལག་ཐམས་ཅད་འཐོབ་པར་འགྱུར་བ་དང ། དེ་ན་སེམས་ཅན་གང་དག་ནད་བཞི་བརྒྱ་རྩ་བཞི་པོ་དག་གིས་
400a
༄#། །གཅེས་པར་གྱུར་པ་དེ་དག་གིས་དྲི་བསྣམས་ན་ནི་ནད་ཐམས་ཅད་ལས་ཡོངས་སུ་ཐར་བར་འགྱུར་བ་དང ། དེ་ན་སེམས་ཅན་གང་དག་མྱོས་པ་དང ། བརྒྱལ་བ་དང ། སྨྱོས་པ་དང ། རེངས་པ་དང ། སེམས་རྨུགས་པ་དང ། སེམས་རྣམ་པར་གཡེངས་པ་དང ། དྲན་པ་རབ་ཏུ་ཉམས་པ་རྣམས་ཀྱིས་མེ་ཏོག་དེ་དག་གི་དྲི་བསྣམས་ན་ནི་དྲན་པ་ཐམས་ཅད་ཐོབ་པར་འགྱུར་བ་ཞིག་ཡོད་ལ། མེ་ཏོག་གི་ཤིང་དེའི་ནང་ནས་པདྨ་དཀར་པོ་མཁྲང་བ། སྲ་བ། རྡོ་རྗེ་ལས་གྲུབ་པ། འཇམ་པ། སྡོང་བུ་ནི་བཻ་ཌཱུརྱ། འདབ་མ་ནི་གསེར། ཟེའུ་འབྲུ་ནི་རྡོའི་སྙིང་པོ། ཟེ་བ་མུ་ཏིག་དམར་པོ། འཕང་དུ་དཔག་ཚད་བརྒྱད་ཁྲི་བཞིན་སྟོང ། རྒྱར་ནི་དཔག་ཚད་འབུམ་ཡོད་པ་གཅིག་ཅིག་སྐྱེས་པར་གྱུར་ལ། པདྨ་དཀར་པོ་དེའི་ཁ་དོག་དང་དྲིས་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་ཏུ་ཁྱབ་ཅིང་ལྷང་ངེ་ལྷན་ནེར་འགྱུར་ལ། བྲམ་ཟེ། ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་གང་དག་ལུས་མི་མཐུན་པ་དང ། ནད་ཀྱིས་ཉེན་པ་དང ། ཡན་ལག་མཐུན་པ་དང ། ནད་ཀྱིས་ཉེན་པ་དང ། ཡན་ལག་ཉམས་པ་དང ། མྱོས་པ་དང ། བརྒྱལ་བ་དང ། མྱོས་པ་དང ། གཉིད་ལོག་པ་དང ། དྲན་པ་
400b
རབ་ཏུ་ཉམས་པ་དང ། སེམས་རྣམ་པར་གཡེངས་པའི་སེམས་ཅན་དེ་དག་གིས་པདྨ་དཀར་པོ་དེའི་འོད་མཐོང་ཞིང་དྲི་བསྣམས་ན་ནད་ཐམས་ཅད་རབ་ཏུ་ཞི་བར་འགྱུར་ཞིང་དྲན་པའང་ཐོབ་པར་འགྱུར་བ་དང ། སངས་རྒྱས་ཀྱི་ཞིང་དེ་དག་ན་སེམས་ཅན་གང་དག་ཤི་ནས་ཡུན་རིང་པོ་མ་ལོན་ཞིང་ལུས་མ་ཞིག་པ་དེ་དག་གི་རོ་ལ་པདྨ་དཀར་པོ་དེའི་འོད་ཟེར་དག་གིས་ཕོག་གམ། དྲིས་རེག་ན་རོ་དེ་དག་ཀྱང་སྲོག་གི་དབང་པོ་འཐོབ་པར་འགྱུར་ཞིང ། ཡང་ཕྱིས་ལངས་ཏེ་མཛའ་བཤེས་དང ། སྣག་གི་གཉེན་མཚམས་དག་མཐོང་ནས་དེ་དག་ཐམས་ཅད་སྐྱེད་མོས་ཚལ་དུ་ཞུགས་ཏེ། འདོད་པའི་ཡོན་ཏན་ལྔ་པོ་དག་འབྱོར་ཅིང་ལྡན་པར་འགྱུར་ལ་གནས་པར་འགྱུར་བ་དང ། གང་དག་ཡང་དེ་ནས་ཤི་འཕོས་པར་འགྱུར་པ་དེ་དག་ཀྱང་ཚངས་པའི་གནས་དག་པར་སྐྱེ་བར་འགྱུར་ལ། དེ་དག་དེར་ཚེ་དཔག་ཏུ་མེད་པར་འགྱུར་ཞིང་ཡུན་རིང་པོར་གནས་པར་འགྱུར་བ་དང ། དེ་ནས་ཤི་འཕོས་ནས་ཀྱང་གཞན་དུ་སྐྱེ་བར་མི་འགྱུར་བ་ཞིག་ཡོད་ན། བྲམ་ཟེ། མེ་ཏོག་གི་ཤིང་དེ་ཇི་ལྟ་བར་ཐེག་པ་ཆེན་པོའི་འདུས་པ་འདིའང་དེ་བཞིན་དུ་བལྟ་བར་བྱའོ། །ཇི་ལྟར་ཉི་མ་འཆར་བ་ཉེ་བར་གནས་པའི་དུས་ན་མེ་ཏོག་དེ་དག་ཁ་བྱེ་ཞིང་རབ་ཏུ་རྒྱས་བར་གྱུར་ནས་ལྷང་ངེ་ལྷན་ནེ།
401a
༄#། །ཤིང་ཁ་ཅིག་གི་འཕང་དུ་ནི་དཔག་ཚད་བརྒྱ། ཁ་ཅིག་གི་འཕང་དུ་ནི་དཔག་ཚད་སྟོང་གི་བར་དུ་གྱུར་ནས་སེམས་ཅན་མང་པོ་དེ་དག་གི་ནད་སྣ་ཚོགས་རབ་ཏུ་ཞི་བར་བྱེད་པ་དེ་ལྟར་ནི་འཇིག་རྟེན་དུ་སངས་རྒྱས་ཉི་མ་དེ་བཞིན་གཤེགས་པ་སྐྱེས་བུ་དམ་པ་བྱུང་བ་ཡིན་ནོ། །ཇི་ལྟར་ཉི་མ་ཤར་བའི་འོད་ཟེར་དག་གིས་མེ་ཏོག་དེ་དག་ཁ་ཕྱེ་ཞིང་ལམ་མེ་ལྷང་ངེ་ལྷན་ནེར་གྱུར་ནས། ནད་སྣ་ཚོགས་ཀྱིས་ཉེན་པའི་སེམས་ཅན་རྣམས་ཀྱི་ནད་ཉེ་བར་ཞི་བར་འགྱུར་བ་དེ་ལྟར་ནི་སྐྱེས་བུ་དམ་པ་ང་འཇིག་རྟེན་དུ་བྱུང་སྟེ། ཐུགས་རྗེའི་འོད་ཟེར་དག་གིས་སེམས་ཅན་རྣམས་ལ་ཁྱབ་པར་མཛད་ཅིང་ཁ་ཕྱེ་ནས་ཡང་དང་ཡང་དུ་སེམས་ཅན་རྣམས་ཀྱི་བསོད་ནམས་བྱ་བའི་དངོས་པོ་གསུམ་པོ་དག་ལ་མངོན་པར་སྦྱོར་བར་མཛད་པ་དང ། ཁྱོད་ཀྱིས་ཀྱང་སེམས་ཅན་ཚད་མེད་གྲངས་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་ནས་ང་ལ་ཕུལ་བ་དེ་དག་ཐམས་ཅད་ཀྱིས་ངའི་དྲུང་དུ་སངས་རྒྱས་ཀྱི་ཞིང་དག་ཡོངས་སུ་བཟུང་སྟེ། ཁ་ཅིག་གིས་ནི་སངས་རྒྱས་ཀྱི་ཞིང་ཡོངས་སུ་དག་པ་དག་ཡོངས་སུ་བཟུང ། ཁ་ཅིག་གིས་ནི་ཡོངས་སུ་མ་དག་པ་དག་ཡོངས་སུ་བཟུང་ཞིང ། རང་རང་གི་སྨོན་ལམ་ཇི་ལྟར་བཏབ་པ་དེ་ལྟར་ངས་
401b
ཀྱང་ལུང་བསྟན་པ་ཡིན་ནོ། །སྐྱེས་བུ་དམ་པ་གང་དག་གིས་ངའི་ཐད་ནས་སངས་རྒྱས་ཀྱི་ཞིང་ཡོངས་སུ་དག་པ་དག་ཡོངས་སུ་བཟུང་བ་དེ་དག་གིས་ནི་འདུལ་བའི་སེམས་ཅན་བསམ་པ་དག་པ། གདུལ་སླ་བ། དགེ་བའི་རྩ་བ་བསྐྱེད་པ་དག་ཡོངས་སུ་བཟུང་བས་ན་དེའི་ཕྱིར་དེ་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་མི་བྱ་སྟེ།་དེ་དག་ནི་སྐྱེས་བུ་དམ་པ་ཆེན་པོའི་བྱ་བ་བྱེད་པ་མ་ཡིན་ནོ། །དེ་དག་ནི་སྙིང་རྗེ་ཆེན་པོས་སེམས་དང་སེམས་ལས་བྱུང་བ་དག་ལ་འཇུག་པ་མ་ཡིན་ནོ། །བྱང་ཆུབ་སེམས་དཔའ་དེ་དག་ནི་སེམས་ཅན་ཐམས་ཅད་ལ་སྙིང་བརྩེ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་འཚོལ་བ་མ་ཡིན་ཏེ། གང་དག་སངས་རྒྱས་ཀྱི་ཞིང་ཡོངས་སུ་དག་པ་དེ་དག་ཡོངས་སུ་འཛིན་པའི་བྱང་ཆུབ་སེམས་དཔའ་དེ་དག་གིས་ནི་སྙིང་བརྩེ་བ་སྤངས་པ་ཡིན་ནོ། །གང་དག་ཉན་ཐོས་དང ། རང་སངས་རྒྱས་ཀྱི་ཐེག་པ་དག་ཡོངས་སུ་སྤངས་པའི་སངས་རྒྱས་ཀྱི་ཞིང་འདོད་པའི་བྱང་ཆུབ་སེམས་དཔའ་དག་ནི་ཡེ་ཤེས་དང ། བསམ་པ་ལ་མཁས་པར་གྱུར་པ་མ་ཡིན་ནོ། །གང་དག་ཇི་ལྟར་བདག་ཉན་ཐོས་དང ། རང་སངས་རྒྱས་སྤངས་པ། དགེ་བའི་རྩ་བ་དང་འགྲོགས་པར་གྱུར་པ། བུད་མེད་རྣམ་པར་སྤངས་པ། སེམས་ཅན་དམྱལ་བ་དང ། དུད་འགྲོའི་
402a
༄#། །སྐྱེ་གནས་དང ། གཤིན་རྗེའི་འཇིག་རྟེན་རྣམ་པར་སྤངས་པའི་སངས་རྒྱས་ཀྱི་ཞིང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་།ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་རྣམས་ལ་ཉན་ཐོས་དང་རང་སངས་རྒྱས་ཀྱིས་ཡོངས་སུ་སྤངས་པ་ཐེག་པ་ཆེན་པོའི་གཏམ་འབའ་ཞིག་གིས་ཆོས་སྟོན་པར་གྱུར་ཅིག་།བདག་གིས་བྱང་ཆུབ་ཐོབ་ནས་ཀྱང་ཚེ་རིང་པོར་གྱུར་ཏེ། ཡུན་རིང་དུ་གནས་ཤིང་བསྐལ་པ་མང་པོར་བསམ་པ་དག་པ་དང ། གདུལ་སླ་བ་དང ། དགེ་བའི་རྩ་བ་དང་འགྲོགས་པར་གྱུར་པ་རྣམས་ལ་ཆོས་སྟོན་པར་གྱུར་ཅིག་།ཅེས་སྨོན་ལམ་དེ་ལྟ་བུ་འདེབས་པའི་བྱང་ཆུབ་སེམས་དཔའ་དེ་དག་ནི་དེས་ན་ཡེ་ཤེས་དང ། བསམ་པ་ལ་མཁས་པར་གྱུར་པའང་མ་ཡིན་ལ། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་ཀྱང་མི་བྱའོ། །རིགས་ཀྱི་བུ། དེ་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་དེས་ཕྱག་བརྐྱང་སྟེ། སོར་མོ་ལྔ་ལས་འོད་ཟེར་ཁ་དོག་སྣ་ཚོགས་ཁ་དོག་དུ་མ། ཁ་དོག་འབུམ་ཕྲག་དུ་མ་དང་ལྡན་པ་དག་རབ་ཏུ་བཀྱེའོ། །འོད་ཟེར་དེ་དག་ཚད་མེད་གྲངས་མེད་དཔག་ཏུ་མེད་པའི་ཕྱོགས་སུ་དོང་སྟེ། སངས་རྒྱས་ཀྱི་
402b
ཞིང་རྣམས་སྣང་བར་བྱས་ནས། དེ་ནས་འཇིག་རྟེན་གྱི་ཁམས་མཐེ་བོ་ཅན་ཞེས་བྱ་བ་ཡོད་དེ། འཇིག་རྟེན་གྱི་ཁམས་མཐེ་བོ་ཅན་དེ་ན་མི་རྣམས་ནི་ཚེ་ལོ་བཅུ་པ་མདོག་ངན་པ། མི་སྡུག་པ། མི་དགེ་བའི་རྩ་བ་དང་ལྡན་པ་སྟེ། ཁྲུན་ནི་མཐེ་བོའི་ཚད་ཙམ་མོ། །དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐར་མ་ལ་དགའ་བ་ཞེས་བྱ་བ་བཞུགས་ཏེ། དེ་བཞིན་གཤེགས་པ་དེའི་སྐུའི་ཁྲུན་ཡང་རྩོད་པའི་དུས་ཀྱི་ཚད་ཀྱི་མི་རྣམས་ཀྱི་ཁྲུ་གང་དང ། མཐེ་བོ་ཅན་གྱི་མི་རྣམས་ཀྱི་ཁྲུ་གསུམ་དང ། སོར་བདུན་གྱི་ཚད་ཙམ་སྟེ། དེ་བཞིན་གཤེགས་པ་དེའང་བཞུགས་ཏེ་འཚོ་ཞིང་གཞེས་ལ་འཁོར་བཞི་པོ་རྣམས་ལ་ཐེག་པ་གསུམ་པོ་དག་གིས་ཆོས་སྟོན་ཏོ། །རིགས་ཀྱི་བུ། དེ་ནས་ཐམས་ཅད་དང་ལྡན་པའི་འཁོར་དེས་སངས་རྒྱས་ཀྱི་ཞིང་དེ་དང ། མི་དེ་དག་དང ། དེ་བཞིན་གཤེགས་པ་དེ་མཐོང་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོས་བཀའ་སྩལ་པ། དེ་བཞིན་གཤེགས་པ་སྐར་མ་ལ་དགའ་བ་དེས་ནི་བསྐལ་པ་དཔག་ཏུ་མེད་གྲངས་མེད་པ་འདས་པ་ན་དེ་བཞིན་གཤེགས་པ་རིན་པོ་ཆེའི་གདུགས་མངོན་པར་འཕགས་པར་སྣང་བའི་སྤྱན་སྔར་དང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་
403a
༄#། །དེ།་སྲོག་ཆགས་བྱེ་བ་ཁྲག་ཁྲིག་ཕྲག་མང་པོ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །སེམས་ཅན་དེ་དག་གིས་ཀྱང་དེ་བཞིན་གཤེགས་པ་རིན་པོ་ཆེའི་གདུགས་མངོན་པར་འཕགས་པར་སྣང་བའི་སྤྱན་སྔར་བསམ་པ་ཇི་ལྟ་བ་བཞིན་དུ་སྨོན་ལམ་བཏབ་སྟེ། ཁ་ཅིག་གིས་ནི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་དག་པ་དག་ཡོངས་སུ་བཟུང་ངོ ། །ཁ་ཅིག་གིས་ནི་ཡོངས་སུ་མ་དག་པ་སྙིགས་མ་ལྔ་དང་ལྡན་པ་དག་ཡོངས་སུ་བཟུང་ངོ ། །དེ་ན་སེམས་ཅན་ཆེན་པོ་དེས་ངའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཞག་སྟེ་རབ་ཏུ་གནས་པར་བྱས་ནས། དེར་ངས་དེ་བཞིན་གཤེགས་པ་རིན་པོ་ཆེའི་གདུགས་མངོན་པར་འཕགས་པར་སྣང་བའི་སྤྱན་སྔར་སྙིགས་མ་ལྔ་དང་ལྡན་པའི་སངས་རྒྱས་ཀྱི་ཞིང་གི་ཡོན་ཏན་བཀོད་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་བརྒྱ་བར་སྨོན་ལམ་བཏབ་བོ། །དེ་བཞིན་གཤེགས་པ་དེས་ཀྱང་ང་ལ་ལེགས་སོ་ཞེས་བྱ་བ་བྱིན་ནས། ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ན་གང་གིས་བྱང་ཆུབ་ཡང་དག་པར་འཛིན་དུ་བཅུག་
403b
པའི་དགེ་བའི་བཤེས་གཉེན་སྐྱེས་བུ་དམ་པ་དེས་སྙིགས་མ་ལྔ་ཤིན་ཏུ་བདོ་ཞིང་ཉོན་མོངས་པ་དང་རྩོད་པའི་དུས་ལ་བབ་པའི་ཚེ་ཤིན་ཏུ་ཉོན་མོངས་པའི་སངས་རྒྱས་ཀྱི་ཞིང་ཡོངས་སུ་བཟུང་ཞིང་འདུལ་བའི་སེམས་ཅན་མཚམས་མེད་པ་བྱེད་པ་དང ། མི་དགེ་བའི་རྩ་བ་དང་ལྡན་པ་དང ། སེམས་ཀྱི་རྒྱུད་ཚིག་པ་དང ། འཁོར་བའི་འབྲོག་དགོན་པ་ཉམ་ང་བར་ཞུགས་པ་དག་སྨོན་ལམ་གྱིས་ཡོངས་སུ་བཟུང་ནས་སྐྱེས་བུ་དམ་པ་དེ་ལ་ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མེད་གྲངས་མེད་པ་གཞན་དང་གཞན་དག་ན་བཞུགས་ཏེ། འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་ལེགས་སོ་ཞེས་ཕོ་ཉན་བཏང་སྟེ། སྙིང་རྗེ་ཆེན་པོ་རྣམ་པར་སྣང་བྱེད་ཞི་བ་ཞེས་བྱ་བར་མིང་བཏགས་སོ། །ངའི་དགེ་བའི་བཤེས་གཉེན་ཕན་པར་མཛད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་རྣམ་པར་སྣང་བྱེད་ཞི་བ་དེ་ད་ལྟར་འཇིག་རྟེན་གྱི་ཁམས་མཐེ་བོ་ཅན་དུ་མཐེ་བོའི་ཚད་ཙམ་གྱི་མི་རྣམས་ཀྱི་ནང་དུ་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་ཏེ། དེ་བཞིན་གཤེགས་པ་ཁྲུ་གང་ཙམ་པོ་དེས་མཐེ་བོའི་ཚད་ཙམ་གྱི་མི་དེ་དག་ཉིད་ཀྱི་ཁྲུ་གསུམ་གྱི་ཚད་ཙམ་གྱིས་སྐྱེ་དགུ་ཚེ་ལོ་བཅུ་པ་རྣམས་ལ་ཆོས་དང་ལྡན་པའི་ཆོས་ཀྱི་འཁོར་ལོ་བསྐོར་ཏེ། དེས་དང་པོ་བླ་ན་མེད་
404a
༄#། །པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་པའི་སངས་རྒྱས་བཅོམ་ལྡན་འདས་གང་དག་ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་པ་དག་ན་བཞུགས་ཏེ་འཚོ་ཞིང་གཞེས་པ་དེ་དག་གིས་ཀྱང་བྱང་ཆུབ་ཐོབ་པ་དེ་ལ་མཆོད་པ་བྱ་བའི་ཕྱིར་ཕོ་ཉ་དག་བཏང་ངོ ། །དེས་དང་པོ་གང་དག་སྦྱིན་པའི་ཕ་རོལ་ཏུ་ཕྱིན་པ་ནས། ཤེས་རབ་ཀྱི་ཕ་རོལ་ཏུ་ཕྱིན་པའི་བར་དག་ཡང་དག་པར་འཛིན་དུ་བཅུག་ཅིང་བཅུད་དེ་རབ་ཏུ་བཀོད་པའི་སངས་རྒྱས་བཅོམ་ལྡན་འདས་སྔོན་གྱི་བྱས་པ་གཟོ་ཞིང་རྗེས་སུ་དགོངས་པ་དེ་དག་གིས་ཀྱང་དེ་བཞིན་གཤེགས་པ་དེ་ལ་མེ་ཏོག་དག་བསྐུར་རོ། །བྲམ་ཟེ། སངས་རྒྱས་བཅོམ་ལྡན་འདས་དེ་དག་ཇི་ལྟར་སངས་རྒྱས་ཀྱི་ཞིང་རབ་ཏུ་དང་བ་དག་ན་སེམས་ཅན་ཚེ་རིང་བ། བསམ་པ་ཡོངས་སུ་དག་པ། བདེ་བར་གནས་པ་རྣམས་ལ་སངས་རྒྱས་ཀྱི་མཛད་པ་མཛད་པ་རྣམས་དང ། དེ་བཞིན་གཤེགས་པ་སྐར་མ་ལ་དགའ་བ་དེ་དེ་ལྟར་སངས་རྒྱས་ཀྱི་ཞིང་རབ་ཏུ་ངན་པ་སྙིགས་མ་ལྔ་དང་ལྡན་པ་དེ་ལྟ་བུར་སངས་རྒྱས་ཉིད་ཐོབ་ནས་སེམས་ཅན་མཚམས་མེད་པ་བྱེད་པ་དང ། མི་དགེ་བའི་རྩ་བ་དང་ལྡན་པར་གྱུར་པའི་བར་དག་ལ་ཚེ་ཐུང་ངུས་སངས་རྒྱས་ཀྱི་མཛད་པ་
404b
མང་པོ་ལྷག་པར་མཛད་ཅིང ། ཉན་ཐོས་དང ། རང་སངས་རྒྱས་རྣམས་ཀྱང་མ་སྤངས་པར་ཆོས་སྟོན་པ་ལ་ལྟོས། སྐྱེས་བུ་དམ་པ་ཁྱོད་ཀྱིས་ཀྱང་དེ་ལྟར་སངས་རྒྱས་ཀྱི་ཞིང་ཤིན་ཏུ་ངན་ཅིང་སྙིགས་མ་ལྔ་དང་ལྡན་པར་མཚམས་མེད་པ་བྱེད་པ་དང ། མི་དགེ་བའི་རྩ་བ་དང་ལྡན་པའི་བར་གྱི་འདུལ་བའི་སེམས་ཅན་རྣམས་ཡོངས་སུ་བཟུང་ཞིང་སྨོན་ལམ་ཁྱད་པར་ཅན་བཏབ་པས་ན། བྱང་ཆུབ་སེམས་དཔའི་འཁོར་འདི་དག་ཐམས་ཅད་ཟིལ་གྱིས་མནན་ཏོ། །བྱང་ཆུབ་སེམས་དཔའ་གང་དག་གིས་སེམས་ཅན་དམྱལ་བ་དང ། དུད་འགྲོའི་སྐྱེ་གནས་ཡོངས་སུ་སྤངས་པ་དང ། ཉན་ཐོས་དང ། རང་སངས་རྒྱས་ཡོངས་སུ་སྤངས་པའི་སངས་རྒྱས་ཀྱི་ཞིང་ཡོངས་སུ་དག་པ་རྣམས་ཡོངས་སུ་བཟུང་ཞིང་འདུལ་བའི་སེམས་ཅན་བསམ་པ་དག་པ་ཤིན་ཏུ་དུལ་བ། དགེ་བའི་རྩ་བ་བསྐྱེད་པ་དག་ཡོངས་སུ་བཟུང་བའི་སེམས་ཅན་དེ་དག་ནི་མེ་ཏོག་ལྟ་བུ་ཞེས་བྱ་སྟེ། གང་དག་ཤིན་ཏུ་དུལ་བ་དགེ་བའི་རྩ་བ་བསྐྱེད་པ་རྣམས་ཀྱི་ནང་དུ་སངས་རྒྱས་ཀྱི་མཛད་པ་བྱེད་པར་འགྱུར་བ་དེ་དག་ནི་པདྨ་དཀར་པོ་ལྟ་བུའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་མ་ཡིན་ནོ། །བྲམ་ཟེ། བྱང་ཆུབ་སེམས་དཔའ་རྣམས་ཀྱི་ལེ་ལོའི་དངོས་པོ་ནི་བཞི་སྟེ། བཞི་གང་ཞེ་ན། སངས་རྒྱས་ཀྱི་ཞིང་ཡོངས་སུ་དག་
405a
༄#། །པར་སྨོན་པ་དང ། སེམས་ཅན་བསམ་པ་ཡོངས་སུ་དག་པ་རྣམས་ལ་སངས་རྒྱས་ཀྱི་མཛད་པ་བྱེད་པར་སྨོན་པ་དང ། བྱང་ཆུབ་ཐོབ་ནས་ཉན་ཐོས་དང་རང་སངས་རྒྱས་ཀྱི་ཐེག་པའི་གཏམ་མི་སྟོན་པར་སྨོན་པ་དང ། བྱང་ཆུབ་ཐོབ་ནས་ཚེ་རིང་བར་སྨོན་པ་སྟེ། བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལེ་ལོའི་དངོས་པོ་ཡིན་ཏེ། དེས་ནི་བྱང་ཆུབ་སེམས་དཔའ་མེ་ཏོག་ལྟ་བུ་རྣམས་ཞེས་བྱའི། པདྨ་དཀར་པོ་ལྟ་བུའང་མ་ཡིན་ལ་སེམས་དཔའ་ཆེན་པོ་ཞེས་ཀྱང་མི་བྱ་སྟེ། བྲམ་ཟེ། འདི་ལྟ་སྟེ། དཔེར་ན། བྱང་ཆུབ་སེམས་དཔའི་འཁོར་འདི་མ་གཏོགས་པར་ཁྱབ་འཇུག་རླུང་གིས། གང་གི་ཕྱིར་སངས་རྒྱས་ཀྱི་ཞིང་ཡོངས་སུ་མ་དག་པ་ཡོངས་སུ་བཟུང་ཞིང་འདུལ་བའི་སེམས་ཅན་ཉོན་མོངས་པས་དཀྲུགས་པ་རྣམས་དང ། བསྐལ་པ་བཟང་པོའི་རིགས་ཀྱི་བུ་ཁ་ཅིག་ཀྱང་ཡོངས་སུ་བཟུང་བ་ལྟ་བུའོ། །བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་བརྩམས་པའི་དངོས་པོ་ནི་བཞི་པོ་འདི་དག་ཡིན་ཏེ། བཞི་གང་ཞེ་ན། སངས་རྒྱས་ཀྱི་ཞིང་ཡོངས་སུ་མ་དག་པར་སྨོན་པ་དང ། སེམས་ཅན་བསམ་པ་ཡོངས་སུ་མ་དག་པ་རྣམས་ལ་སངས་རྒྱས་ཀྱི་མཛད་པ་བྱེད་པར་སྨོན་པ་དང ། བྱང་ཆུབ་ཐོབ་ནས་
405b
ཉན་ཐོས་དང་རང་སངས་རྒྱས་ཀྱི་ཐེག་པའི་གཏམ་སྟོན་པར་སྨོན་པ་དང ། བྱང་ཆུབ་ཐོབ་ནས་ཚེ་ཧ་ཅང་ཡང་མི་རིང ། ཧ་ཅང་ཡང་མི་ཐུང་བ་ཞིག་བར་མར་སྒྲུབ་པར་སྨོན་པ་སྟེ། བཞི་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བརྩོན་འགྲུས་བརྩམས་པའི་དངོས་པོ་ཡིན་ཏེ། དེས་ན་བྱང་ཆུབ་སེམས་དཔའ་སེམས་དཔའ་ཆེན་པོ་པདྨ་དཀར་པོ་ལྟ་བུ་རྣམས་ཞེས་བྱའི། མེ་ཏོག་ལྟ་བུ་རྣམས་ཞེས་མི་བྱ་སྟེ། བྱང་ཆུབ་སེམས་དཔའ་དེ་དག་ནི་སེམས་དཔའ་ཆེན་པོ་རྣམས་ཞེས་ཀྱང་བྱའོ། །བྲམ་ཟེ། འདི་ལྟ་སྟེ། དཔེར་ན། ཁྱོད་ནི་ད་ལྟར་སྨོན་ལམ་གྱི་དབང་གིས་དེ་བཞིན་གཤེགས་པའི་སྤྱན་སྔར་བྱང་ཆུབ་སེམས་དཔའ་དཔག་ཏུ་མེད་གྲངས་མེད་པ་རྣམས་ཀྱི་ནང་དུ་དགེ་བ་ལུང་བསྟན་པའི་ཞིང་དུ་སྙིང་རྗེ་པདྨ་དཀར་པོ་ལྟ་བུར་སྐྱེས་པ་ཡིན་ནོ། །གང་གི་ཚེ་ཁྱོད་ཀྱིས་སྙིང་རྗེ་ཆེན་པོ་བརྗོད་པས་མཚམས་མེད་པ་བྱེད་པ་དང ། མི་དགེ་བའི་རྩ་བ་དང་ལྡན་པར་གྱུར་པའི་བར་གྱི་འདུལ་བ་རྣམས་ཡོངས་སུ་བཟུང་ཞིང་སྙིགས་མ་ལྔ་བདོ་བའི་སངས་རྒྱས་ཀྱི་ཞིང་ཡོངས་སུ་བཟུང་བའི་ཚེ། ཕྱོགས་བཅུའི་སངས་རྒྱས་བཅོམ་ལྡན་འདས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་གིས་ཀྱང་སྐྱེས་བུ་དམ་པ་ཁྱོད་ལ་ལེགས་སོ་ཞེས་བྱ་བ་བྱིན་ཏེ། ཕོ་ཉ་དག་
406a
༄#། །ཀྱང་བཏང་ནས་ཁྱོད་ཀྱི་མིང་སྙིང་རྗེ་ཆེན་པོ་དང་ལྡན་པ་ཞེས་བྱ་བར་བཏགས་སོ། །འཁོར་འདི་དག་ཐམས་ཅད་ཀྱང་ཁྱོད་ལ་མཆོད་པའི་ལས་བྱ་བའི་ཕྱིར་བརྩོན་པར་གྱུར་ཏོ། །སྙིང་རྗེ་ཆེན་པོ་དང་ལྡན་པ་ཁྱོད་ནི་མ་འོངས་པའི་དུས་ན་བསྐལ་པ་གྲངས་མེད་པ་གངྒཱའི་ཀླུང་གི་བྱེ་མ་སྙེད་ཅིག་འདས་ནས་ལྷག་མ་བསྐལ་པ་གྲངས་མེད་པ་གངྒཱའི་ཀླུང་གི་བྱེ་མ་སྙེད་གཉིས་པ་ལ་བབ་པ་ན་བསྐལ་པ་བཟང་པོ་ལ་འཇིག་རྟེན་གྱི་ཁམས་མི་མཇེད་དེར་སྐྱེ་དགུའི་ཚེ་ལོ་བརྒྱ་ཉི་ཤུ་ཐུབ་ཅིང་རྒ་བ་དང ། འཆི་བ་མང་བའི་སངས་རྒྱས་ཀྱི་ཞིང་ན་འཇིག་རྟེན་ལྡོངས་པ། འདྲེན་པ་མེད་པ། མི་དགེ་བའི་རྩ་བ་དང་ལྡན་པར་གྱུར་ཅིང ། སེམས་ཅན་ལམ་ངན་པས་བཅོམ་པ། ཉམ་ང་བ་ཆེན་པོ་ཐོབ་པ། མཚམས་མེད་པ་བྱེད་པ། འཕགས་པ་ལ་སྐུར་པ་འདེབས་པ། དམ་པའི་ཆོས་སྤོང་བ། ལྟུང་བའི་རྩ་བ་འབྱུང་བ་ནས་ཇི་སྐད་སྔར་སྨོས་པའི་བར་དག་ལྟ་བུས་གང་བའི་འཇིག་རྟེན་དུ་དེ་བཞིན་གཤེགས་པ་རིག་པ་དང་ཞབས་སུ་ལྡན་པ་ནས་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་ཏེ།་འགྲོ་བའི་འཁོར་ལོ་ནི་བཟློག་།ཆོས་ཀྱི་འཁོར་ལོ་ནི་བསྐོར། དབང་སྒྱུར་བའི་བདུད་དང ། ཉོན་མོངས་པའི་བདུད་ནི་བཅིལ་ཏེ། ཕྱོགས་བཅུའི་སངས་རྒྱས་ཀྱི་ཞིང་
406b
མཐའ་ཡས་མུ་མེད་པ་དག་ཏུ་སྒྲས་ཁྱབ་པར་བྱས་ནས། ཁྱོད་ཀྱི་ཉན་ཐོས་འདུས་པ་ཆེན་པོ་དག་འབྱུང་བར་འགྱུར་བ་འདི་ལྟ་སྟེ། དགེ་སློང་སྟོང་ཉིས་བརྒྱ་ལྔ་བཅུ་དང་ལྷན་ཅིག་སྨོན་ལམ་ཇི་ལྟར་བཏབ་པ་དེ་བཞིན་དུ། ལོ་བཞི་བཅུ་རྩ་ལྔར་རིམ་གྱིས་སངས་རྒྱས་ཀྱི་མཛད་པ་དེ་ལྟ་བུ་མཐའ་དག་ཡོངས་སུ་རྫོགས་པར་བྱེད་པར་འགྱུར་རོ། །དེའི་ཚེ་ཇི་ལྟར་རྒྱལ་པོ་ཆེན་པོ་བདུད་རྩི་དག་པ་འདི་འོད་དཔག་མེད་ཅེས་བྱ་བར་འགྱུར་ཞིང་བསྐལ་པ་ཚད་མེད་པ་དག་གིས་སངས་རྒྱས་ཀྱི་མཛད་པ་མཐའ་དག་བྱེད་པར་འགྱུར་བ་དེ་བཞིན་དུ་སྙིང་རྗེ་ཆེན་པོ་དང་ལྡན་པ་ཁྱོད་ཀྱང་བསྐལ་པ་ཆེན་པོ་བཟང་པོ་ལ་འཇིག་རྟེན་གྱི་ཁམས་མི་མཇེད་དེར་སྐྱེ་དགུ་ཚེ་ལོ་བརྒྱ་ཉི་ཤུ་ཐུབ་པ་ན་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བར་འགྱུར་ཏེ། ལོ་བཞི་བཅུ་རྩ་ལྔས་སངས་རྒྱས་ཀྱི་མཛད་པ་དེ་ལྟ་བུ་མང་པོ་དག་བྱེད་པར་འགྱུར་རོ། །སྐྱེས་བུ་དམ་པ་ཁྱོད་བླ་ན་མེད་པའི་ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ལོ་སྟོང་ལྷག་པར་གནས་པར་གྱུར་ཏོ། །སྐྱེས་བུ་དམ་པ་ཁྱོད་ཀྱི་དམ་པའི་ཆོས་ནུབ་ནས་ཀྱང་ལུས་ལས་སྐྱེས་པའི་སྐུ་གདུང་རྣམས་ཀྱང་རང་གིས་སྨོན་ལམ་ཇི་ལྟར་བཏབ་པ་དེ་ལྟར་སངས་རྒྱས་ཀྱི་མཇེད་པ་མང་པོ་མཐའ་དག་བྱེད་པར་འགྱུར་ཏེ། སྔར་ཇི་སྐད་སྨོས་པ་དེ་བཞིན་དུ་
407a
༄#། །ཡུན་རིང་པོར་སེམས་ཅན་རྣམས་འདུལ་བར་འགྱུར་རོ། །རིགས་ཀྱི་བུ། དེའི་ཚེ་ན་གནས་གྲོང་ཞེས་བྱ་བ་ན་བྲམ་ཟེ་ཞིག་ཡོད་པ་དེས་འདི་སྐད་ཅེས་སྨྲས་སོ། །སྐྱེས་བུ་དམ་པ་ཁྱོད་བསྐལ་པ་གྲངས་མེད་པ་དེ་དང་དེ་དག་ཏུ་བྱང་ཆུབ་ཀྱི་སྤྱད་པ་སྤྱོད་པ་ན། བདག་ཀྱང་རྟག་ཏུ་བསྙེན་བཀུར་བར་འགྱུར་ཞིང ། བྱམས་པ་དང་མཐུན་པའི་ཡོ་བྱད་སྦྱོར་བ་དང ། གྲོགས་བྱེད་པར་གྱུར་ནས་ཁྱོད་ལ་བསྙེན་བཀུར་བྱེད་པར་གྱུར་ཅིག་།ཁྱོད་སྲིད་པ་ཐ་མར་གྱུར་པ་ན་བདག་ཁྱོད་ཀྱི་ཕར་གྱུར་ཅིག་།སྐྱེས་བུ་དམ་པ། བདག་ཁྱོད་ཀྱིས་བྱང་ཆུབ་ཐོབ་པར་སྦྱིན་བདག་གི་མཆོག་ཏུ་འགྱུར་ཞིང་ཁྱོད་ཀྱིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་གྱུར་ཅིག་།གཞན་ཡང་དེ་ན་རྒྱ་མཚོའི་ལྷ་མོ་ཤིན་ཏུ་དུལ་བའི་བློ་ཞེས་བྱ་བ་དེས་ཀྱང་སྨྲས་པ། བསྐལ་པ་གྲངས་མེད་པ་དེ་དང་དེ་དག་ཅེས་བྱ་བ་ནས་ཁྱོད་སྲིད་པ་ཐ་མ་པའི་བར་དུ་གྱུར་པ་ན་བདག་ཁྱོད་སྐྱེད་པའི་མར་གྱུར་ཅིག་།སྙིང་རྗེ་ཆེན་པོ་དང་ལྡན་པ་ཁྱོད་ཀྱིས་བྱང་ཆུབ་ཐོབ་ནས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་གྱུར་ཅིག་།རྒྱུ་སྐར་གྱི་ལྷ་མོ་ཆུ་ལྷ་སྤྱོད་ཅེས་བྱ་བ་\?\་ཀྱང་སྨྲས་པ། དེ་དང་དེ་དག་ཅེས་བྱ་བ་ནས་ཁྱོད་སྲིད་པ་ཐ་མ་
407b
པའི་བར་དུ་གྱུར་པ་ན་བདག་ཁྱོད་ལ་བསྣུན་པའི་མ་མ་བྱེད་པའི་མར་གྱུར་ཅིག་།ཁྱོད་ཀྱིས་བྱང་ཆུབ་ཐོབ་ནས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་གྱུར་ཅིག་།བརྒྱ་བྱིན་མུ་ཁྱུད་ཅན་ཞེས་བྱ་བ་དང ། གཞན་ཡང་བརྒྱ་བྱིན་ཕ་རོལ་སེམས་ཞེས་བྱ་བ་དེ་གཉིས་ཀྱིས་ཀྱང་སྨྲས་པ། ཀྱེ་སྙིང་རྗེ་ཆེན་པོ་དང་ལྡན་པ་བདག་ཅག་ཀྱང་དེ་དག་ཅེས་བྱ་བ་ནས། ཁྱོད་ཀྱིས་བྱང་ཆུབ་ཐོབ་པ་ཞེས་བྱ་བའི་བར་དུ་སྟེ། བདག་ཅག་ཤེས་རབ་དང་ལྡན་པ་དང ། རྫུ་འཕྲུལ་དང་ལྡན་པའི་ཉན་ཐོས་ཟུང་དུ་གྱུར་ཅིག་།གཞན་ཡང་བརྒྱ་བྱིན་སྤྱད་སྤྱོད་ལྟ་མཛེས་ཚོགས་ཞེས་བྱ་བ་དེས་འདི་སྐད་ཅེས་སྨྲས་སོ། །སྙིང་རྗེ་ཆེན་པོ་དང་ལྡན་པ་བདག་ཀྱང་ཁྱོད་དེ་དང་དེ་དག་ཅེས་བྱ་བ་ནས་སྲིད་པ་ཐ་མའི་བར་དུ་གྱུར་པའི་བུར་གྱུར་ཅིག་།གཞན་ཡང་རི་རྩེའི་ལྷ་མོ་དེས་པ་ཀིངྴུ་ཀ་ཞེས་བྱ་བ་དེས་ཀྱང་སྨྲས་པ། སྙིང་རྗེ་ཆེན་པོ་དང་ལྡན་པ་བདག་ཀྱང་ཚེ་རབས་དེ་དང་དེ་དག་ཏུ་ཁྱོད་ཀྱི་བཙུན་མོར་གྱུར་ཅིག། ཁྱོད་ཀྱིས་བྱང་ཆུབ་ཐོབ་ནས་བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་གྱུར་ཅིག་།ལྷ་མ་ཡིན་གྱི་དབང་པོ་མཛེས་སྤྱོད་ཅེས་བྱ་བ་དེས་ཀྱང་སྨྲས་པ། སྙིང་རྗེ་ཆེན་པོ་དང་ལྡན་པ་ཁྱོད་བསྐལ་པ་གྲངས་མེད་པ་དེ་དང་དེ་དག་ཏུ་བྱང་ཆུབ་ཀྱི་སྤྱད་པ་སྤྱོད་པ་ན་བདག་ཀྱང་སྐྱེས་བུ་དམ་པ་ཁྱོད་
408a
༄#། །ལ་བྱམས་པ་དང་མཐུན་པའི་ཡོ་བྱད་ཀྱིས་གྲོགས་བྱེད་པའི་བྲན་ཉིད་དུ་གྱུར་ཏེ། ཁྱོད་ལ་བསྙེན་བཀུར་བྱེད་པར་གྱུར་ཅིག་།ཁྱོད་སྲིད་པ་ཐ་མ་བར་གྱུར་པ་ལ་ཡང་བདག་བསྙེན་བཀུར་བྱེད་པར་གྱུར་ཅིག་།སྐྱེས་བུ་དམ་པ་ཁྱོད་ཀྱིས་བྱང་ཆུབ་ཐོབ་ནས་ཀྱང་ཆོས་དང་ལྡན་པའི་ཆོས་ཀྱི་འཁོར་ལོ་བསྐོར་བའི་ཕྱིར་གསོལ་བ་འདེབས་པར་གྱུར་ཅིག་།ཁྱོད་ཀྱིས་ཆོས་བསྟན་པ་བདག་གིས་དང་པོར་འབྲས་བུ་དང་བཅས་པར་བྱེད་པར་གྱུར་ཅིག་།ཆོས་ཀྱི་བཅུད་ཀྱང་འཐུང་བར་གྱུར་ཅིག ། འཆི་བ་མེད་པའང་རྟོགས་པར་གྱུར་ཅིག་།ཉོན་མོངས་པ་ཐམས་ཅད་སྤངས་པའི་ཕྱིར་དགྲ་བཅོམ་པ་ཉིད་ཀྱི་བར་ཡང་ཐོབ་པར་གྱུར་ཅིག་།དེ་བཞིན་དུ་སྦྱར་ཏེ། དེ་ན་ལྷ་དང ། ཀླུ་དང ། ལྷ་མ་ཡིན་གངྒཱའི་ཀླུང་གི་བྱེ་མ་སྙེད་དག་གིས་ཀྱང་སྙིང་རྗེ་ཆེན་པོ་དང་ལྡན་པ་དེའི་སྤྱོད་པའི་རྗེས་སུ་འཇུག་པའི་ཕྱིར་སྨོན་ལམ་བཏབ་སྟེ་འདུལ་བ་དག་ཀྱང་ཉེ་བར་བཀོད་དོ། །དེ་ན་འཚོ་བ་པ་མི་འགྱུར་འཇིགས་བྱེད་ཅེས་བྱ་བ་གཅིག་ཅིག་འདུག་པ་དེས་སྨྲས་པ། ཀྱེ་བྲམ་ཟེ་ཆེན་པོ། བདག་ཀྱང་ཁྱོད་ལ་ཡོ་བྱད་མང་པོ་དག་གིས་གྲོགས་བྱེད་པར་གྱུར་ཅིག་།བདག་བསྐལ་པ་དཔག་ཏུ་མེད་པ་དག་ཏུ་ཁྱོད་ལ་འབྲས་བུ་དང་བཅས་པར་སྤྱོད་ཅིང་ཉེ་བར་འཚོ་བའི་ཉེ་དུར་གྱུར་ཅིག། རྟག་ཏུ་དངོས་པོ་བསླང་བའི་དོན་
408b
དུ་ཁྱོད་ཀྱི་དྲུང་དུ་ཉེ་བར་འགྲོ་བར་གྱུར་ཅིག་།མལ་ཆ་དང ། སྟན་དང ། བགོ་བ་དང ། གླང་པོ་ཆེ་དང ། རྟ་དང ། ཤིང་རྟ་དང ། གྲོང་དང ། གྲོང་ཁྱེར་དང ། གྲོང་རྡལ་དང ། ཁྱིམ་དང ། བུ་དང ། བུ་མོ་དང ། ཤ་དང ། ཁྲག་དང ། པགས་པ་དང ། རུས་པ་དང ། ལག་པ་དང ། རྐང་པ་དང ། ལྕེ་དང ། རྣ་བ་དང ། སྣ་དང ། མིག་དང ། མགོ་དག་སློང་བར་གྱུར་ཅིག ། བྲམ་ཟེ་ཆེན་པོ། བདག་དེ་ལྟར་ཁྱོད་ཀྱི་སྦྱིན་པའི་ཕ་རོལ་ཏུ་ཕྱིན་པའི་གྲོགས་སུ་གྱུར་ཅིག་།ཤེས་རབ་ཀྱི་ཕ་རོལ་ཏུ་ཕྱིན་པའི་བར་གྱི་གྲོགས་སུའང་གྱུར་ཅིག་།བྲམ་ཟེ་ཆེན་པོ། བདག་དེ་ལྟར་ཁྱོད་བྱང་ཆུབ་ཀྱི་སྤྱད་པ་སྤྱོད་པའི་ཕ་རོལ་ཏུ་ཕྱིན་པ་དྲུག་གི་གྲོགས་སུ་གྱུར་ཅིག་།ནམ་ཁྱོད་ཀྱིས་བྱང་ཆུབ་ཐོབ་པ་ན་བདག་ཀྱང་ཁྱོད་ཀྱི་ཉན་ཐོས་ཀྱི་གནས་ཐོབ་པར་གྱུར་ཅིག་།ཆོས་ཀྱི་ཕུང་པོ་བརྒྱད་ཁྲི་འཛིན་པར་གྱུར་ཅིག་།རྗེས་སུ་ཆོས་སྟོན་པར་གྱུར་ཅིག་།ཁྱོད་ཀྱིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་གྱུར་ཅིག་།རིགས་ཀྱི་བུ། བྲམ་ཟེ་སྙིང་རྗེ་ཆེན་པོ་དང་ལྡན་པས་དེ་ཐོས་པ་དང ། དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་ལྔས་ཕྱག་བྱས་ནས་འཚོ་བ་པ་མི་འགྱུར་འཇིགས་བྱེད་ལ་བོས་ཏེ་སྨྲས་པ། སྐྱེས་བུ་དམ་པ་ཁྱོད་ངའི་བླ་ན་མེད་པའི་སྤྱོད་པའི་གྲོགས་སུ་འགྱུར་པ་ནི་ལེགས་སོ། །ལེགས་སོ། །
409a
༄#། །ཁྱོད་ཚེ་རབས་ཁྲག་ཁྲིག་འབུམ་ཕྲག་ཚད་མེད་གྲངས་མེད་པའི་བར་དུ་ང་ལ་དངོས་པོ་སློང་བའི་ཕྱིར་ནམ་འོངས་པ་དེའི་ཚེ་ངས་ཀྱང་སེམས་རབ་ཏུ་དང་བས་སྦྱིན་པར་བྱ་སྟེ། ཁྱོད་ལའང་བསོད་ནམས་མ་ཡིན་པའི་ཆ་དང་མཐུན་པར་མ་གྱུར་ཅིག་།རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་ཡང་གསོལ་པ། བཙུན་པ་བཅོམ་ལྡན་འདས། བདག་བསྐལ་པ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མ་མཆིས་གྲངས་མ་མཆིས་པ་དེ་དང་དེ་དག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སླད་དུ་སྤྱད་པ་སྤྱོད་པའི་ཚེ། གལ་ཏེ་བདག་གི་མདུན་དུ་སློང་མོ་པ་གང་དག་མཆིས་ནས་ཟས་སློང་བར་བགྱིད་ཅིང་ཚིག་འཇམ་པོའམ། ཚིག་རྩུབ་པོའམ། བརྙས་པའི་ཚིག་གམ། ཚིག་གསལ་བས་སློང་བར་གྱུར་ན། བཙུན་པ་བཅོམ་ལྡན་འདས། གལ་ཏེ་བདག་གིས་སློང་མོ་པ་ལ་སེམས་ཀྱི་སྐད་ཅིག་གཅིག་ཙམ་ཞིག་ཁྲོ་བ་བསྐྱེད་པར་གྱུར་ཏམ། མ་དད་པའི་སེམས་བསྐྱེད་པར་གྱུར་ཏམ། སྦྱིན་པའི་རྣམ་པར་སྨིན་པའི་འབྲས་བུ་འཚལ་བས་སྦྱིན་པ་རྩོལ་པར་གྱུར་ན། ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མ་མཆིས་གྲངས་
409b
མ་མཆིས་པ་གཞན་དག་ན་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་རྣམས་བདག་གིས་བསླུས་པར་གྱུར་ཅིག་།བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མ་གྱུར་ཅིག་།བཙུན་པ་བཅོམ་ལྡན་འདས། གལ་ཏེ་བདག་གིས་སློང་མོ་པ་ལ་སེམས་མ་དད་པས་སྦྱིན་པ་སྩོལ་ཏམ། སྦྱིན་པ་དེའང་ལེན་པ་པོ་ལ་མ་དད་པས་བྱིན་པར་འགྱུར་ཞིང་ཆུད་ཟ་བར་འགྱུར་རམ། གལ་ཏེ་ཐ་ན་སྐྲའི་རྩེ་མོའི་ཆ་ཤས་ཀྱི་ཚད་ཙམ་ཞིག་དགེ་བའི་ཆོས་རྣམས་ལ་བར་ཆད་བགྱིད་པར་གྱུར་ན་བདག་གིས་སངས་རྒྱས་བཅོམ་ལྡན་འདས་རྣམས་བསླུས་པར་གྱུར་ཅིག་།གལ་ཏེ་སྐྲའི་རྩེ་མོའི་ཆ་ཤས་ཀྱི་ཚད་ཙམ་ཞིག་ལེན་པ་པོའི་དགེ་བའི་ཆོས་རྣམས་ལ་བར་ཆད་བགྱིད་པར་གྱུར་ན་བདག་ཀྱང་མནར་མེད་པར་མཆི་བར་གྱུར་ཅིག་།ཟས་ལ་ཇི་ལྟ་བ་དེ་བཞིན་དུ་སློང་མོ་པ་གང་དག་བདག་ལ་གོས་དང ། མགོའི་བར་དག་སློང་བར་འགྱུར་ཞིང་ཚིག་འཇམ་པོའམ། ཚིག་རྩུབ་པོའམ། བརྙས་ཚིག་གམ། ཚིག་གསལ་བས་མ་གོའི་བར་དག་སློང་བར་བགྱིད་ན། བཙུན་པ་བཅོམ་ལྡན་འདས། གལ་ཏེ་བདག་གིས་སློང་མོ་པ་ལ་སེམས་ཀྱི་སྐད་ཅིག་གཅིག་ཙམ་ཞིག་ཁྲོ་བའི་སེམས་བསྐྱེད་པར་གྱུར་ཏམ། མ་དད་པའི་སེམས་
410a
༄#། །བསྐྱེད་པར་གྱུར་ཏམ། སྦྱིན་པའི་རྣམ་པར་སྨིན་པའི་འབྲས་བུ་འཚལ་བས་མགོ་བོའི་བར་དག་ཡོངས་སུ་གཏོང་བར་གྱུར་ན། བདག་གིས་སངས་རྒྱས་བཅོམ་ལྡན་འདས་རྣམས་བསླུས་པར་འགྱུར་བ་ནས། བདག་མནར་མེད་པར་མཆི་བའི་བར་དུ་གྱུར་ཅིག་།སྦྱིན་པ་ལ་ཇི་ལྟ་བ་དེ་བཞིན་དུ་ཚུལ་ཁྲིམས་ནས་ཤེས་རབ་ཀྱི་བར་དག་ཡོངས་སུ་གཏོང་བ་ལའང་བརྗོད་པར་བགྱིའོ། །རིགས་ཀྱི་བུ། དེ་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་ལ་ལེགས་སོ་ཞེས་བྱ་བ་བྱིན་ཏེ། སྐྱེས་བུ་དམ་པ་ཁྱོད་ཀྱིས་སྙིང་རྗེ་ཆེན་པོ་ལ་གནས་པའི་སེམས་ཀྱིས་སྨོན་ལམ་དེ་ལྟ་བུ་བཏབ་པ་ནི། སྐྱེས་བུ་དམ་པ། ལེགས་སོ། །ལེགས་སོ། །རིགས་ཀྱི་བུ། ཐམས་ཅད་དང་ལྡན་པའི་འཁོར་དེ་དང ། ལྷ་དང ། དྲི་ཟ་དང ། མི་དང ། ལྷ་མ་ཡིན་དང་བཅས་པའི་འཇིག་རྟེན་གྱིས་ཀྱང་ཐལ་མོ་སྦྱར་ཏེ་འཁོར་ནས་དེ་ལ་ལེགས་སོ་ཞེས་བྱ་བ་ཡིན་ཏེ། སྐྱེས་བུ་དམ་པ་ཁྱོད་ཀྱིས་སྙིང་རྗེ་ཆེན་པོ་ལ་གནས་པའི་ཡིད་ཀྱིས་སྨོན་ལམ་དེ་ལྟ་བུ་བཏབ་པ་ནི། སྐྱེས་བུ་དམ་པ། ལེགས་སོ། །ལེགས་སོ། །ཁྱོད་ནི་སྙིང་པོར་འགྱུར་བ་དང་མཐུན་པའི་ཆོས་དྲུག་གིས་
410b
སེམས་ཅན་རྣམས་ཡང་དག་པར་ཚིམ་པར་བྱེད་པར་འགྱུར་རོ། །རིགས་ཀྱི་བུ། ཇི་ལྟར་སྦྱིན་པ་ལེན་པའི་བྱང་ཆུབ་སེམས་དཔའ་འཚོ་བ་པ་མི་འགྱུར་འཇིགས་བྱེད་དེས་སྨོན་ལམ་བཏབ་པ་དེ་བཞིན་དུ། སྲོག་ཆགས་བརྒྱད་ཁྲི་བཞི་སྟོང་གིས་ཀྱང་སྨོན་ལམ་བཏབ་བོ། །རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེས་ཇི་ལྟར་འཚོ་བ་པ་མི་འགྱུར་འཇིགས་བྱེད་ཀྱིས་སྨོན་ལམ་བཏབ་པ་དེ་བཞིན་དུ། སྲོག་ཆགས་བརྒྱད་ཁྲི་བཞི་སྟོང་གིས་ཀྱང་སྨོན་ལམ་དེ་ལྟ་བུ་དག་བཏབ་པ་ཐོས་པ་དང ། དེ་ནས་སྙིང་རྗེ་ཆེན་པོ་དང་ལྡན་པ་དེ་མཆོག་ཏུ་དགའ་བ་དང ། ཡིད་བདེ་བ་སྐྱེས་ནས་ཐལ་མོ་སྦྱར་ཏེ་འདུག་ནས། ཐམས་ཅད་དང་ལྡན་པའི་འཁོར་ལ་བལྟས་ཏེ་མཆོག་ཏུ་དགའ་བའི་ཡིད་ཀྱིས་སྨྲས་པ། ཨ་ལ་ལ་བདག་ཆོས་ཀྱི་མུ་གེ་དང ། ཟད་པའི་དུས་དང ། ཉོན་མོངས་པ་ཆེན་པོས་དཀྲུགས་ཤིང་རྩོད་པའི་དུས་ན་སྙིགས་མ་ལྔ་དང་ལྡན་པའི་འཇིག་རྟེན་གྱི་མགོན་མེད་པའི་དེད་དཔོན་དང ། སྣང་བ་བྱེད་པ་དང ། སྒྲོན་མ་བྱེད་པ་དང ། བྱིས་པ་སྐྱབས་མེད་པ་དང ། ལྡོངས་པ་རྣམས་ཀྱི་ལམ་སྟོན་པར་འགྱུར་བ་དང ། འདི་ལྟར་བདག་གིས་སེམས་དང་པོ་བསྐྱེད་པས་ཚེ་རབས་གཞན་དག་ཏུ་གང་དག་བདག་གི་མགོ་ལེན་པར་འགྱུར་བ་དང ། མིག་དང ། རྣ་བ་དང ། སྣ་
411a
༄#། །དང ། ལྕེ་དང ། ལག་པ་དང ། རྐང་པ་དང ། པགས་པ་དང ། རུས་པ་དང ། ཁྲག་དང ། ཁ་ཟས་ཀྱི་བར་དག་ལེན་པར་འགྱུར་ཞིང ། བླ་ན་མེད་པའི་བྱང་ཆུབ་ཀྱིས་སྤྱོད་པའི་གྲོགས་བྱེད་པ་དེ་ལྟ་བུ་དག་རྙེད་པ་ནི་ངོ་མཚར་ཏོ། །རིགས་ཀྱི་བུ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་འདུག་སྟེ་གསོལ་པ། བཙུན་པ་བཅོམ་ལྡན་འདས། ཚེ་རབས་གཞན་གྱི་བསྐལ་པ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མ་མཆིས་གྲངས་མ་མཆིས་པ་དེ་དང་དེ་དག་ནས་བྱང་ཆུབ་ཀྱི་མཐར་ཐུག་པའི་བར་དུ་བདག་གི་དྲུང་དུ་སློང་མོ་པ་གང་དག་ཉེ་བར་མཆིས་པར་འགྱུར་ཞིང་ཡུན་རིང་པོ་དེ་སྲིད་ཀྱི་བར་དུ་ཟས་སམ། སྐོམ་དག་བླངས་པར་གྱུར་པ་དང ། བདག་གིས་སུག་པ་ནས་ཐ་ན་སྐྲའི་རྩེ་མོའི་ཆ་ཤས་ཀྱི་ཚད་ཙམ་གྱི་སྦྱིན་པ་བླངས་པར་གྱུར་པའི་སེམས་ཅན་དེ་དག། བཙུན་པ་བཅོམ་ལྡན་འདས། བདག་མངོན་པར་རྫོགས་པར་སངས་རྒྱས་ནས། གལ་ཏེ་འཁོར་བ་ལས་ཡོངས་སུ་ཐར་བར་མི་བགྱིད་དམ། ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པའམ། ཐེག་པ་ཆེན་པོས་ལུང་སྟོན་པར་མི་བགྱིད་ན། བདག་གིས་གང་དག་ད་ལྟར་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་ཏེ། འཚོ་ཞིང་
411b
བཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་འགྱུར་བ་ནས། བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་བའི་བར་དུ་གྱུར་ཅིག་།རིགས་ཀྱི་བུ། གཞན་ཡང་དེ་བཞིན་གཤེགས་པ་རིན་པོ་ཆེའི་སྙིང་པོས་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་ལ་ལེགས་སོ་ཞེས་བྱ་བ་བྱིན་ཏེ། སྐྱེས་བུ་དམ་པ་ཁྱོད་ཀྱིས་ཇི་ལྟར་སྔོན་དེ་བཞིན་གཤེགས་པ་ལྷུན་པོ་རྩེ་འཛིན་གྱིས་དེ་བཞིན་གཤེགས་པ་འཇིག་རྟེན་དབང་ཕྱུག་འོད་ཟེར་གྱི་སྤྱན་སྔར་དང་པོ་བྱང་ཆུབ་ཏུ་སེམས་བསྐྱེད་ནས་བྱང་ཆུབ་སེམས་དཔའི་སྤྱོད་པའི་སྨོན་ལམ་འདི་ལྟ་བུ་བཏབ་སྟེ། སྐྱེས་བུ་དམ་པ་དེས་སྨོན་ལམ་ཇི་ལྟར་བཏབ་པ་དེ་བཞིན་དུ་བསྐལ་པ་ཆེན་པོ་གངྒའི་ཀླུང་གི་བྱེ་མ་སྙེད་ལས་ཤིན་ཏུ་ལྷག་པ་དེ་སྙེད་དུ་བྱང་ཆུབ་སེམས་དཔའི་སྤྱོད་པ་སྤྱད་ནས། འདི་ནས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་ཕྲག་འབུམ་འདས་པ་ན་འཇིག་རྟེན་གྱི་ཁམས་འོད་ཟེར་སོ་སོར་རྟོག་པ་ཞེས་བྱ་བར་སྐྱེ་དགུའི་ཚེ་ལོ་བརྒྱ་ཐུབ་པའི་ནང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་མེ་ཏོག་རྡུལ་བྲལ་བྱང་ཆུབ་དབང་ཕྱུག་ཡང་
412a
༄#། །དག་མཐོ་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་དུ་གྱུར་ཅིང ། ལོ་བཞི་བཅུ་རྩ་ལྔར་སངས་རྒྱས་ཀྱི་མཛད་པ་མཛད་ནས་ཕུང་པོ་ལྷ་མ་མེད་པའི་མྱ་ངན་འདས་པའི་དབྱིངས་སུ་ཞུགས་སོ། །སྙིང་རྗེ་ཆེན་པོ་དང་ལྡན་པ། དེ་བཞིན་གཤེགས་པ་ཡེ་ཤེས་ཡེ་ཏོག་རྟུལ་ཕལ་བྱང་ཆུབ་དབང་ཕྱུར་ཡང་དག་མཐོ་ཡོངས་སུ་མྱ་ངན་ལས་འདས་ནས་དེའི་དམ་པའི་ཆོས་ཀྱི་ཚུལ་ནི་ལོ་སྟོང་དུ་གནས་པར་གྱུར་ཏོ། །དམ་པའི་ཆོས་ནུབ་ནས་དམ་པའི་ཆོས་ཀྱི་གཟུགས་བརྙན་ཡང་ལོ་སྟོང་དུ་གནས་པར་གྱུར་ཏོ། །སྙིང་རྗེ་ཆེན་པོ་དང་ལྡན་པ། དེ་བཞིན་གཤེགས་པ་ཡེ་ཤེས་མེ་ཏོག་རྡུལ་བྲལ་བྱང་ཆུབ་དབང་ཕྱུག་ཡང་དག་མཐོ་ཡོངས་སུ་མྱ་ངན་ལས་འདས་པའི་དམ་པའི་ཆོས་ཀྱི་ཚུལ་དང ། དམ་པའི་ཆོས་ཀྱི་གཟུགས་བརྙན་གནས་པ་ན་དགེ་སློང་དང ། དགེ་སློང་མ་གང་དག་ཚུལ་ཁྲིམས་འཆལ་བ། སྡིག་པའི་ཆོས་དང་ལྡན་པ། མི་མཐུན་པར་སྤྱོད་པ། མཆོད་རྟེན་གྱི་ནོར་འཕྲོག་པ། ངོ་ཚ་མེད་པ་རྣམས་དང ། ཆོས་ཀྱི་མཆོད་པ་གཅོད་པར་བྱེད་པ། ངོ་ཚ་མེད་པ་དང་འདྲེས་པ་རྣམས་དང ། ཕྱོགས་བཞིའི་དགེ་འདུན་དང ། མངོན་དུ་གྱུར་པའི་དགེ་འདུན་རྣམས་ཀྱི་གོས་དང ། ཟས་དང ། མལ་ཆ་དང ། སྟན་དང ། ནད་ཀྱི་གསོས་སྨན་དང ། ཡོ་བྱད་གཅོད་
412b
ཅིང་གང་ཟག་གིར་ཡོངས་སུ་བཟུང་སྟེ། བདག་སྤྱོད་པར་བྱེད་པའམ། ཁྱིམ་པ་ལ་སྦྱིན་པར་བྱེད་པ་ཐམས་ཅད་ཀྱང ། སྙིང་རྗེ་ཆེན་པོ་དང་ལྡན་པ། དེ་བཞིན་གཤེགས་པ་ཡེ་ཤེས་མེ་ཏོག་རྡུལ་བྲལ་བྱང་ཆུབ་དབང་ཕྱུག་ཡང་དག་མཐོ་དེས་ཐེག་པ་གསུམ་པོ་དག་གིས་རིམ་གྱིས་ལུང་བསྟན་ཏོ། །སྙིང་རྗེ་ཆེན་པོ་དང་ལྡན་པ། གང་སུ་དག་བཅོམ་ལྡན་འདས་དེའི་བསྟན་པ་ལ་ངུར་སྨྲིག་དམར་པོ་བགོས་པ་ཐམས་ཅད་ཀྱང་ཐེག་པ་གསུམ་པོ་དག་གིས་ཕྱིར་མི་ལྡོག་པར་ལུང་བསྟན་ཏོ། །དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་སུ་དག་སྔ་མ་ཁོ་ན་བཞིན་དུ་ལྟུང་པའི་རྩ་བ་བྱུང་བར་གྱུར་པ་དེ་དག་ཀྱང་སྟོན་པར་འདུ་ཤེས་པའི་དགེ་བའི་རྩ་བའི་རྣམ་པར་སྨིན་པ་ཡོད་པས་དེ་བཞིན་གཤེགས་པ་དེས་ཐེག་པ་གསུམ་པོ་དག་གིས་ཕྱིར་མི་ལྡོག་པར་ལུང་བསྟན་པ་དེ་བཞིན་དུ་སྐྱེས་བུ་དམ་པ་ཁྱོད་ཀྱིས་ཀྱང་བྱང་ཆུབ་ཀྱི་སྤྱོད་པའི་སྨོན་ལམ་བཏབ་པ་ལེགས་སོ། །ལེགས་སོ། །རིགས་ཀྱི་བུ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་གསོལ་པ། བཙུན་པ་བཅོམ་ལྡན་འདས། བདག་གི་སྨོན་ལམ་ནི་འདི་ལྟ་བུ་ལགས་ཏེ། ཇི་སྲིད་དུ་བདག་བླ་ན་མེད་པ་ཡང་དག་
413a
༄#། །པར་རྫོགས་པའི་བྱང་ཆུབ་ཀྱི་སྤྱད་པ་སྤྱོད་པ་ནས། བྱང་ཆུབ་ཀྱི་མཐར་ཐུག་པའི་སྤྱད་པ་སྤྱོད་པའི་བར་དུ་བདག་གིས་སེམས་ཅན་གང་དག་སྦྱིན་པའི་ཕ་རོལ་ཏུ་ཕྱིན་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པའི་བར་ལ་སྦྱོར་བར་འགྱུར་བ་དང ། ཡང་དག་པར་འཛིན་དུ་སྩོལ་བར་འགྱུར་བ་དང ། རབ་ཏུ་འགོད་པར་འགྱུར་བའམ། ཐ་ན་དགེ་བའི་རྩ་བ་སྐྲའི་རྩེ་མོའི་ཆ་ཤས་ཀྱི་ཚད་ཙམ་ལ་སྦྱོར་བར་འགྱུར་བའི་སེམས་ཅན་དེ་དག་ལས་སེམས་ཅན་འགའ་ཙམ་ཞིག་ཞིག་བདག་གིས་ཐེག་པ་གསུམ་པོ་དག་གིས་ཕྱིར་མི་ལྡོག་པའི་ས་ལ་བཀོད་པར་མ་གྱུར་ན། བདག་གིས་ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མ་མཆིས་གྲངས་མ་མཆིས་པ་དག་ན་བཞུགས་ཏེ།་འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་རྣམས་བསླུས་པར་གྱུར་ཅིག་།བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མ་གྱུར་ཅིག་།བཙུན་པ་བཅོམ་ལྡན་འདས། བདག་གིས་བླ་ན་མེད་པའི་ཡེ་ཤེས་ཐོབ་ནས་ཀྱང་སེམས་ཅན་གང་དག་བདག་གིས་བསྟན་པ་ལ་ཆོས་གོས་ངུར་སྨྲིག་བགོས་པར་གྱུར་པ་ལས་ལྟུང་བའི་རྩ་བ་བྱུང་བར་གྱུར་པའམ། ཉོན་མོངས་པ་ཅན་གྱི་ལྟ་བ་ལ་ཞུགས་པར་གྱུར་པའམ། དཀོན་
413b
མཆོག་གསུམ་ལ་འཁྲུལ་པར་གྱུར་ཅིང ། ནོངས་པ་དང་བཅས་པར་གྱུར་པའི་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་གང་དག་སྐད་ཅིག་གཅིག་ཙམ་བདག་ལ་སྟོན་པའི་འདུ་ཤེས་སམ། གུས་པའི་སེམས་བསྐྱེད་པར་གྱུར་པའི་སེམས་ཅན་དེ་དག་ལས། བཙུན་པ་བཅོམ་ལྡན་འདས། གལ་ཏེ་བདག་གིས་ཐ་ན་སེམས་ཅན་འགའ་ཙམ་ཞིག་སྤངས་ཤིང་ཐེག་པ་གསུམ་པོ་དག་གིས་ཕྱིར་མི་ལྡོག་པར་ལུང་བསྟན་པར་མ་གྱུར་ན་བདག་གིས་སངས་རྒྱས་བཅོམ་ལྡན་འདས་རྣམས་བསླུས་པར་འགྱུར་པ་ནས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་བའི་བར་དུ་གྱུར་ཅིག་།བརྩུན་པ་བཅོམ་ལྡན་འདས། བདག་བྱང་ཆུབ་ཐོབ་པའི་ཆོས་གོས་ངུར་སྨྲིག་དམར་པོ་ལྷ་དང་མི་རྣམས་ཀྱིས་གུས་པར་བགྱིས་པ་དང ། བླ་མར་བགྱིས་པ་དག། རི་མོར་བགྱིས་པ་དང ། མཆོས་པར་བགྱིས་པར་འགྱུར་བ་མཐོང་མ་ཐག་ཏུ་ངུར་སྨྲིག་མགུལ་ན་ཐོགས་པར་འགྱུར་བའི་སེམས་ཅན་རྣམས་ཀྱང་ཐེག་པ་གསུམ་པོ་དག་གིས་ཕྱིར་མི་ལྡོག་པར་གྱུར་ཅིག་།སེམས་ཅན་གང་དག་བཟའ་བ་དང ། བཏུང་བ་དང་བྲལ་ཞིང་བཀྲེས་པ་དང ། སྐོམ་པས་གནོད་པར་གྱུར་པ་རྣམས་དང ། ཐ་ན་གནོད་སྦྱིན་དབུལ་པོ་རྣམས་དང ། གཤིན་རྗེའི་འཇིག་རྟེན་པའི་སེམས་
414a
༄#། །ཅན་གང་དག་ཐ་ན་ཆོས་གོས་ངུར་སྨྲིག་སོར་བཞི་ཙམ་འཚལ་བར་འགྱུར་བ་དེ་དག་ཐམས་ཅད་ཀྱང་བཟའ་བ་དང ། བཏུང་བ་ཕུན་སུམ་ཚོགས་པར་འགྱུར་ཞིང་བསམ་པ་ཡོངས་སུ་རྫོགས་པར་གྱུར་ཅིག་།ལྷའམ། གནོད་སྦྱིན་ནམ། སྲིན་པོའམ། ཀླུའམ། ལྷ་མ་ཡིན་ནམ། ནམ་མཁའ་ལྡིང་ངམ། མིའམ་ཅིའམ། ལྟོ་འཕྱེ་ཆེན་པོའམ། གྲུལ་བུམ་མམ། ཤ་ཟའམ། མིའམ། སེམས་ཅན་གང་དག་ཕན་ཚུན་ཞེ་འགྲས་ཤིང་འཁོན་གཅུགས་མང་པོར་གྱུར་པ་རྣམས་དང ། ཕན་ཚུན་འགྱེད་ཅིང་གཡུལ་ངོར་ཞུགས་ཏེ། གཡུལ་སྤྲོད་པར་གྱུར་པ་རྣམས་ཀྱིས་ཀྱང་བདག་གི་ཆོས་གོས་ངུར་སྨྲིག་རྗེས་སུ་དྲན་པར་གྱུར་ན། སེམས་ཅན་དེ་དག་སྙིང་རྗེའི་སེམས་དང ། འཇམ་པའི་སེམས་དང ། ཁོན་མེད་པའི་སེམས་དང ། ལས་སུ་རུང་བའི་སེམས་སུ་གྱུར་ཅིག་།སེམས་ཅན་གང་དག་གཡུལ་ངོའམ་འགྱོད་པའམ། འཐབ་པའམ། རྩོད་པའི་ནད་དུ་བསྲུང་བ་དང ། མཆོད་པར་བགྱི་བ་དང ། གུས་པར་བགྱི་བའི་སླད་དུ་ངུར་སྨྲིག་གི་དུམ་བུ་འཆང་བར་འགྱུར་བའི་སེམས་ཅན་དེ་དག་ཀྱང་རྟག་ཏུ་རྒྱལ་བར་འགྱུར་བ་དང ། འཁྲུལ་པ་མ་མཆིས་པ་དང ། རྣམ་པར་འཚེ་བ་མ་མཆིས་པར་གྱུར་ཅིག་།གཡུལ་ངོ་དང ། དགྱེས་པ་དང ། འཐབ་མོ་
414b
དང ། རྩོད་པ་དེ་དག་ལས་ཀྱང་ལེགས་པར་ཡོངས་སུ་ཐར་བར་གྱུར་ཅིག་།བཙུན་པ་བཅོམ་ལྡན་འདས། གལ་ཏེ་བདག་གི་ཆོས་གོས་ངུར་སྨྲིག་དམར་པོ་འཕགས་པའི་ཡོན་ཏན་ལྔ་པོ་དེ་དག་དང་ལྡན་པར་མ་གྱུར་ན། བདག་གིས་ཕྱོགས་བཅུའི་སངས་རྒྱས་བཅོམ་ལྡན་འདས་རྣམས་བསླུས་པར་འགྱུར་བ་ནས། བདག་གིས་སངས་རྒྱས་ཀྱི་མཛད་པ་མཐའ་དག་ཡོངས་སུ་རྫོགས་པར་བགྱིད་པར་རྡོ་མི་ཐོགས་པ་དང ། བདག་གིས་ཆོས་རྣམས་བསྐྱུད་པར་འགྱུར་བ་དང ། བདག་གིས་གཞན་མུ་སྟེགས་ཅན་རྣམས་ཚར་གཅོད་པར་རྡོ་མི་ཐོགས་པའི་བར་དུ་གྱུར་ཅིག་།བཙུན་པ་བཅོམ་ལྡན་འདས། གང་དག་བདག་མངོན་པར་རྫོགས་པར་སངས་རྒྱས་ནས་ཡོངས་སུ་མྱ་ངན་ལས་འདས་ཀྱི་བར་དུ་དེ་བཞིན་གཤེགས་པ་ཤཱཀྱ་ཐུབ་པ་ལ་ཕྱག་འཚལ་ལོ་ཞེས་ཚིག་ཏུ་བརྗོད་ཅིང་ཕྱག་འཚལ་བར་འགྱུར་བ་དེ་དག་ཐམས་ཅད་ཀྱང་ལས་ཀྱི་སྒྲིབ་པ་བས་པར་འགྱུར་ཞིང ། མཐར་ཡང་སངས་རྒྱས་ཀྱི་ཞིད་ཡོངས་སུ་མྱ་ངན་ལས་འདའ་པ་བླ་ན་མེད་པས་ཡོངས་སུ་མྱ་ངན་ལས་འདས་པར་འགྱུར་ལགས་སོ། །རིགས་ཀྱི་བུ། དེ་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་དེས་ཕྱག་གཡས་པ་བརྐྱང་སྟེ། ཕྱག་གི་མཐིལ་གྱིས་ཀྱང་ཆུབ་སེམས་དཔའ་སྙིང་རྗེ་ཆེན་པོ་དང་ལྡན་པའི་མགོ་ལ་བྱུགས་ནས་བཀའ་སྩལ་པ། སྐྱེས་བུ་དག་པ་
415a
༄#། །ཁྱོད་ཀྱི་སྨོན་ལམ་ནི་དགེ་བ། བཟང་བ། རབ་ཏུ་གཏན་ལ་བབ་པ་ཡིན་ཏེ། ལེགས་སོ། །ལེགས་སོ། །སྐྱེས་བུ་དམ་པ་ཁྱེད་ནི་དེ་བཞིན་དུ་འཕགས་པའི་ཡོན་ཏན་ལྔ་དང་ལྡན་བའི་ངུར་སྨིག་དམར་པོས་སེམས་ཅན་རྣམས་ཉེ་བར་འཚོ་བར་བྱེད་པར་འགྱུར་རོ། །ཀྱི་རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེ་དེ་བཞིན་གཤེགས་པས་བསོད་ནམས་ཀྱི་ཕྱག་སོར་རིང་པོས་ཡོངས་སུ་བཀབ་ཅིང་ཕྱག་གཡས་པ་འཇམ་ཞིང་གཞོན་པའི་མཐིལ་གྱིས་བྱུགས་པ་དང ། ལུང་བསྟན་ཅིང་ལེགས་སོ་ཞེས་བྱ་བ་བྱིན་པ་ནས་མཆོག་ཏུ་དགའ་ཞིང་རབ་ཏུ་དད་པ་སྐྱེས་ནས་ཚེ་ལོ་ཉི་ཤུ་ལོན་པ་ལྟ་བུའི་ཚད་ཙམ་དུ་གཞོན་ནུར་རེད་དོ། །རིགས་ཀྱི་བུ། གཞན་ཡང་ཐམས་ཅད་དང་ལྡན་པའི་འཁོར་དེ་དང ། ལྷ་དང ། དྲི་ཟ་དང ། མི་དང ། ལྷ་མ་ཡིན་དུ་བཅས་པ་རྣམས་དང ། སྙིང་རྗེ་ཆེན་པོ་དང་ལྡན་པ་ལ་མཆོད་པའི་ལས་བྱ་བའི་ཕྱིར་བརྩོན་པར་གྱུར་ཅིང ། མེ་ཏོག་དང་རོལ་མོའི་སྒྲ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་ལ་མཆོད་པ་བྱས་ཏེ། བསྔགས་པ་དང ། ཚིགས་སུ་བཅད་པ་སྣ་ཚོགས་ཀྱིས་བསྟོད་ནས་ཐལ་མོ་སྦྱར་ཏེ་འཁོད་དོ། །ཐེག་པ་ཆེན་པོའི་མདོ་སྙིང་རྗེ་པདྨ་དཀར་པོ་ལས། ལུང་བསྟན་པའི་ལེའུ་ཞེས་བྱ་
415b
སྟེ་བཞི་པའོ།། །།བམ་པོ་བཅུ་གསུམ་པ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེས་ཡང་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་ལ་ཡན་ལག་སྔས་ཕྱག་བྱས་ཏེ། དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་འདུག་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་ལ་གུས་པ་དད་བཅས་པས་ཡོངས་སུ་ཞུགས་པ། བཙུན་པ་ཅོམ་ལྡན་འདས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམས་ཀྱི་ལམ་ཏིང་ངེ་འཛིན་གྱི་སྒོ་བསྟན་པ་དང ། ཚོགས་རྣམ་པར་དག་པའི་སྒོའི་ཆོས་ཀྱི་རྣམ་གྲངས་བསྟན་ལགས་ན། བཙུན་པ་བཅོམ་ལྡན་འདས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམས་ཀྱི་ལམ་ཏིང་ངེ་འཛིན་གྱི་སྒོ་བསྟན་པ་དང ། ཚོགས་རྣམ་པར་དག་པའི་སྒོའི་ཆོས་ཀྱི་རྣམ་གྲངས་བསྟན་པ། བཙུན་པ་བཅོམ་ལྡན་འདས། ཇི་ཙམ་གྱིས་ན་ཏིང་ངེ་འཛིན་གྱི་སྒོ་བསྟན་པ་དང ། ཚོགས་རྣམ་པར་དག་པའི་སྒོའི་ཆོས་ཀྱི་རྣམ་གྲངས་ཡོངས་སུ་རྫོགས་པར་འགྱུར་ལགས་།བཙུན་པ་བཅོམ་ལྡན་འདས། རིགས་ཀྱི་བུའམ། རིགས་ཀྱི་བུ་མོ་ཚོགས་ཇི་ལྟ་བུ་དང་ལྡན་ན་བསྟན་པར་གནས་པ་ལགས། ཏིང་ངེ་འཛིན་གྱི་སྒོ་བསྟན་པ་ཇི་ལྟ་བུས་ནི་བརྒྱན་པ་ལགས། རིགས་ཀྱི་བུ། དེ་ནས་དེ་བཞིན་གཤེགས་པ་དགྲ་
416a
༄#། །བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོས་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེ་ལ་འདི་སྐད་ཅེས་བཀའ་སྩལ་ཏོ། །སྙིང་རྗེ་ཆེན་པོ་དང་ལྡན་པ་ཁྱོད་ཀྱི་ཞུ་བ་བཟང་པོ་སྤོབས་པ་དགེ་སྟེ། སྙིང་རྗེ་ཆེན་པོ་དང་ལྡན་པ་ཁྱོད་དེ་ལྟར་དེ་བཞིན་གཤེགས་པ་ལ་དོན་དེ་ལྟ་བུ་ཡོངས་སུ་ཞུ་བར་སེམས་པ་ནི་སྙིང་རྗེ་ཆེན་པོ་དང་ལྡན་པ་ཁྱོད་སེམས་ཅན་དཔག་ཏུ་མེད་གྲངས་མེད་པ་རྣམས་ལ་ཕན་པ་བྱེད་པ་དང ། གཅེས་སྤྲས་བྱེད་པ་རྒྱ་ཆེན་པོ་སྐྱེས་པ་ཡིན་ཏེ། ལེགས་སོ། །ལེགས་སོ། །སྙིང་རྗེ་ཆེན་པོ་དང་ལྡན་པ། དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་གཟུང་ཞིག་དང་ངས་ཁྱོད་ལ་བཤད་པར་བྱའོ། །སྙིང་རྗེ་ཆེན་པོ་དང་ལྡན་པ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་དཔའ་པར་འགྲོ་བ་ཞེས་བྱ་བ་ཡོད་དོ། །བྱང་ཆུབ་སེམས་དཔའི་ཏིང་ངེ་འཛིན་དེ་ལ་གནས་པ་ནི་ཏིང་ངེ་འཛིན་ཐམས་ཅད་ལ་རྗེས་སུ་ཞུགས་པ་ཡིན་ནོ། །རིན་ཆེན་ཕྱག་རྒྱ་ཞེས་བྱ་བའི་ཏིང་ངེ་འཛིན་ཡོད་དེ། དེས་ནི་ཏིང་ངེ་འཛིན་ཐམས་ཅད་ཕྱག་རྒྱས་འདེབས་པར་བྱེད་དོ། །སེང་གེ་རྣམ་པར་རྩེ་བ་ཞེས་བྱ་བའི་ཏིང་ངེ་འཛིན་ཡོད་དེ། དེ་ལ་གནས་ནས་ཏིང་ངེ་འཛིན་ཐམས་ཅད་ཀྱིས་རྣམ་པར་རྩེ་བར་བྱེད་དོ། །ཟླ་བ་
416b
བཟང་པོ་ཞེས་བྱ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་སྣང་བར་བྱེད་དོ། །ཟླ་བའི་རྒྱལ་མཚན་ཏོ་གཅེས་བྱ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་རྒྱལ་མཚན་འཛིན་པར་བྱེད་དོ། །ཆོས་ཐམས་ཅད་ལས་མངོན་པར་འཕགས་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཁོང་དུ་ཆུད་པར་བྱེད་དོ། །ཕྱག་རྒྱ་རྣམ་པར་ལྟ་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་སྤྱི་གཙུག་རྣམ་པར་ལྟ་བར་བྱེད་དོ། །ཆོས་ཀྱི་དབྱིངས་སུ་རྣམ་པར་སོང་བའི་ཏིང་ངེ་འཛིན་གྱིས་ནི་བྱང་ཆུབ་སེམས་དཔའ་ཆོས་ཀྱི་དབྱིངས་ཐམས་ཅད་རྣམ་པར་ངེས་པར་འགྲོ་བར་བྱེད་དོ། །ངེས་པའི་རྒྱལ་མཚན་ཏོག་གི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱིས་རྒྱལ་མཚན་འཛིན་པར་བྱེད་དོ། །རྡོ་རྗེའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་མི་ཕྱེད་པར་བྱེད་དོ། །ཆོས་ལ་འཇུག་པའི་ཕྱག་རྒྱའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་ཕྱག་རྒྱས་འདེབས་པར་བྱེད་དོ། །ཏིང་ངེ་འཛིན་གྱི་རྒྱལ་པོ་ཤིན་ཏུ་བརྟན་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་རྒྱལ་པོ་ཉིད་དུ་རབ་ཏུ་གནས་པར་བྱེད་དོ། །འོད་ཟེར་འགྱེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་འོད་ཟེར་འགྱེད་པར་བྱེད་དོ། །སྟོབས་ཀྱི་བརྩོན་འགྲུས་ཀྱི་ཏིང་ངེ་འཛིན་གྱིས་ནི་ཏིང་ངེ་འཛིན་
417a
༄#། །ཐམས་ཅད་ལ་སྟོབས་དང་བརྩོན་འགྲུས་སུ་བྱེད་དོ། །ཡང་དག་པར་འཕགས་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལས་གྱེན་དུ་འཕགས་པར་བྱེད་དོ། །ངེས་པའི་ཚིག་སྟོན་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་ཚིག་ལ་འཇུག་པར་བྱེད་དོ། །ཚིག་བླ་དྭགས་ལ་འཇུག་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་མིང་གི་རྗེས་སུ་འཇུག་པར་བྱེད་དོ། །ཕྱོགས་ལ་རྣམ་པར་ལྟ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་རྣམ་པར་ལྟ་བར་བྱེད་དོ། །ཆོས་ཐམས་ཅད་རབ་ཏུ་འབྱེད་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ཀྱི་རབ་ཏུ་དབྱེ་བ་རྗེས་སུ་རྟོགས་པར་བྱེད་དོ། །ཕྱག་རྒྱ་ཡོངས་སུ་འཛིན་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་ཕྱག་རྒྱ་འཛིན་པར་བྱེད་དོ། །ཆོས་ཐམས་ཅད་ལ་དབེན་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལས་དབེན་པའི་ཆོས་ཉིད་ལ་རྗེས་སུ་འཇུག་པར་བྱེད་དོ། །བརྗེད་པ་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་མི་བརྗོད་པར་བྱེད་དོ། །ཆོས་ཐམས་ཅད་ལས་མི་གཡོ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་མི་གཡོ་བ་ཉིད་དུ་གནས་པར་བྱེད་དོ། །ཆོས་ཐམས་ཅད་ཡང་དག་པར་འདུ་བ་རྒྱ་མཚོའི་ཕྱག་རྒྱའི་ཏིང་ངེ་འཛིན་གྱིས་ནི་ཏིང་ངེ་འཛིན་
417b
ཐམས་ཅད་སྡུད་ཅིང་ཡང་དག་པར་འདུ་བར་བྱེད་དོ། །ཆོས་ཐམས་ཅད་ལ་རློམ་སེམས་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅན་ལ་འབྱུང་བ་དང ། འཇུག་པའི་རློམ་སེམས་མེད་པར་བྱེད་དོ། །ནམ་མཁའ་མཁའ་ཁྱབ་པར་བྱེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་ནམ་མཁའ་ལྟར་ཁའ་ཁྱབ་པར་བྱེད་དོ། །ཆོས་ཐམས་ཅད་རྒྱུན་མི་གཅོད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་རྒྱུན་མི་འཆད་པར་བྱེད་དོ། །རྡོ་རྗེའི་དཀྱིལ་འཁོར་གྱི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་དཀྱིལ་འཁོར་འཛིན་པར་བྱེད་དོ། །ཆོས་ཐམས་ཅད་རོ་གཅིག་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་བཅུད་འཛིན་པར་བྱེད་དོ། །རིན་ཆེན་རྒྱལ་བའི་ཏིང་ངེ་འཛིན་གྱིས་ནི་ཡོ་བྱད་ཀྱི་ཉོན་མོངས་པ་ཐམས་ཅད་སྤོང་བར་བྱེད་དོ། །ཆོས་ཐམས་ཅད་སྐྱེ་བ་མེད་པའི་ཏིང་ངེ་འཛིན་གྱིས་ནི་ཆོས་ཐམས་ཅད་སྐྱེ་བ་མེད་པ་དང ། འགག་པ་མེད་པར་སྟོན་པར་བྱེད་དོ། །རྣམ་པར་སྣང་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལམ་མེ་ལྷན་ནེ་ལྷང་ངེར་བྱེད་དོ། །ཆོས་ཐམས་ཅད་འགག་པ་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་རྣམ་པར་འབྱེད་པར་བྱེད་དོ། །ཚོལ་བ་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་ཏིང་ངེ་འཛིན་གྱི་ཆོས་རྣམས་ནམ་ཡང་འཚོལ་བར་མི་བྱེད་
418a
༄#། །དོ། །གནས་ལ་བརྟེན་པ་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་གནས་པའི་ཆོས་ནམ་ཡང་དག་པར་རྗེས་སུ་མི་མཐོང་བར་བྱེད་དོ། །ནམ་མཁའ་ལྟ་བུའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ནམ་མཁའ་ངོ་བོ་ཉིད་ལྟ་བུར་སྙིང་པོ་མེ་དཔ་ཉིད་དུ་ཡང་དག་པར་རྗེས་སུ་མཐོང་བར་བྱེད་དོ། །སེམས་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་སེམས་དང་སེམས་ལས་བྱུང་བའི་ཆོས་རྣམས་སྤོང་བྱེད་དོ། །གཟུགས་མུ་མེད་པའི་ཏིང་ངེ་འཛིན་གྱིས་ནི་གཟུགས་ཀུན་ཏུ་སྣང་བར་བྱེད་དོ། །དྲི་མ་མེད་པའི་སྒྲོན་མའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་སྒྲོན་བཞིན་དུ་བྱེད་དོ། །ཆོས་ཐམས་ཅད་མུ་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་ཡེ་ཤེས་མུ་མེད་པར་སྟོན་པར་བྱེད་དོ། །གློག་ལྟ་བུའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་ཤེས་པ་མུ་མེད་པ་སྟོན་པར་བྱེད་དོ། །འོད་ཐམས་ཅད་བྱེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་འོད་བྱེད་པའི་སྒོ་ཉེ་བར་སྟོན་པར་བྱེད་དོ། །ཁམས་ཀྱི་མཐའི་ཏིང་ངེ་འཛིན་གྱིས་ནི་ཏིང་ངེ་འཛིན་མཐའ་མེད་པ་ཐམས་ཅད་རྣམ་པར་ཤེས་པར་བྱ་བའི་ཕྱིར་ཉེ་བར་སྟོན་པར་བྱེད་དོ། །ཏིང་ངེ་འཛིན་དག་པ་དམ་པའི་ཏིང་
418b
ངེ་འཛིན་གྱིས་ནི་ཏིང་ངེ་འཛིན་གྱི་ཆོས་རྣམས་ལས་སྟོང་པ་ཉིད་རྗེས་སུ་ཐོབ་པར་བྱེད་དོ། །ལྷུན་པོ་ལྟར་བཀྲ་བའི་ཏིང་ངེ་འཛིན་གྱིས་ནི་ཆོས་ཐམས་ཅད་གསོག་ཉིད་དུ་ཀུན་ཏུ་སྟོན་པར་བྱེད་དོ། །འོད་དྲི་མ་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་དྲི་མ་སེལ་བར་བྱེད་དོ། །ཆོས་ཐམས་ཅད་ཀྱི་བརྡའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་མ་འདྲེས་པ་ཉིད་དུ་ཡང་དག་པར་སྟན་པར་བྱེད་དོ། །དགའ་བ་བྱེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་དགའ་བ་རབ་ཏུ་ཐོབ་པར་བྱེད་དོ། །ཆོས་ཐམས་ཅད་ཀྱི་ངོ་བོ་ཉིད་ལ་རྣམ་པར་རྩེ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་ངོ་བོ་ཉིད་མི་དམིགས་པ་སྟོན་པར་བྱེད་དོ། །གློག་འགྱུ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་མི་ཟད་པ་ཉིད་སྟོན་པར་བྱེད་དོ། །ཆོས་ཐམས་ཅད་ལ་རྣམ་པར་གཡེང་བ་མེད་ཅིང་རྡུལ་དང་བྲལ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་ཤེས་པ་རྡུལ་དང་བྲལ་བ་ཉེ་བར་སྟོན་པར་བྱེད་དོ། །མི་ཟད་པ་དང་ལྡན་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་ཟད་པ་མེད་པ་དང ། ཟད་པ་མེད་པ་མ་ཡིན་པ་ཡང་དག་པར་སྟོན་པར་བྱེད་དོ། །ཆོས་ཐམས་ཅད་བསམ་གྱིས་མི་ཁྱབ་ཅིང་རྣམ་པར་དག་པའི་ཏིང་ངེ་འཛིན་གྱིས་ནི་ཆོས་ཐམས་ཅད་མིག་ཡོར་ལྟ་བུར་སྟོན་
419a
༄#། །པར་བྱེད་དོ། །གཟི་བརྗིད་ཡོད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་ཡེ་ཤེས་འབར་བར་བྱེད་དོ། །ཟད་པ་དང་བྲལ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཟད་པ་མེད་པ་དང ། །ཉམས་པ་མེད་པར་སྟོན་པར་བྱེད་དོ། །མི་གཡོ་བའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་གཡོ་བར་མི་བྱེད། འགུལ་བར་མི་བྱེད། འཕྲོ་བར་མི་བྱེད་དོ། །རྣམ་པར་འཕེལ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་དང་སྙོམས་པར་འཇུག་པ་ཐམས་ཅད་ལ་ཤེས་བྱ་རྣམ་པར་འཕེལ་བར་ཡང་དག་པར་རྗེས་སུ་མཐོང་བར་བྱེད་དོ། །ཉི་མའི་སྒྲོན་མའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་འོད་ཟེར་གྱི་སྒོ་དག་འགྱེད་པར་བྱེད་དོ། །ཟླ་བ་བྲི་མ་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་སྣང་བར་བྱེད་དོ། །སྣང་བ་དག་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་སོ་སོ་ཡང་དག་པར་རིག་པ་བཞི་རབ་ཏུ་ཐོབ་པར་བྱེད་དོ། །བྱ་བ་དང་མི་བྱ་བའི་ཏིང་ངེ་འཛིན་གྱིས་ནི་བྱ་བ་དང་མི་བྱ་བའི་བྱ་བ་བྱེད་ཅིང་ཡེ་ཤེས་རྟོགས་ཀྱང་ཡང་དག་པར་རྗེས་སུ་མཐོང་བར་བྱེད་དོ། །རྡོ་རྗེ་ལྟ་བུའི་ཏིང་ངེ་འཛིན་གྱིས་ནི་ཆོས་ཐམས་ཅད་ངེས་པར་འབྱེད་པར་བྱེད་ཅིང་གང་ལ་འབྱེད་པའང་ཡང་དག་པར་རྗེས་སུ་མི་མཐོང་བར་བྱེད་དོ། །སེམས་
419b
གནས་པའི་ཏིང་ངེ་འཛིན་གྱིས་ནི་སེམས་གཡོ་བར་མི་བྱེད། འགུལ་བར་མི་བྱེད། སྣང་བར་མི་བྱེད་ཅིང་གནོད་པར་འགྱུར་བའང་མེད་ལ། དེ་འདི་སྙམ་དུ་འདི་ནི་སེམས་ཡིན་ནོ་སྙམ་དུའང་མི་སེམས་པར་བྱེད་དོ། །ཀུན་ཏུ་སྣང་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་སྣང་བ་ཡང་དག་པར་རྗེས་སུ་མཐོང་བར་བྱེད་དོ། །རབ་ཏུ་གནས་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་རབ་ཏུ་གནས་པ་ཉིད་ཀྱིས་རབ་ཏུ་གནས་པར་བྱེད་དོ། །རིན་ཆེན་བརྩེགས་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་རིན་པོ་ཆེ་བརྩེགས་པ་ལྟ་བུར་ཀུན་ཏུ་སྣང་བར་བྱེད་དོ། །ཆོས་དམ་པའི་ཕྱག་རྒྱའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་ཕྱག་རྒྱ་འདེབས་པར་བྱེད་ཅིང་ཆོས་ཐམས་ཅད་མཉམ་པ་ཉིད་ཀྱི་ཕྱིར་མཉམ་པ་ཉིད་མ་གཏོགས་པའི་ཆོས་འགའ་ཡང་ཡང་དག་པར་རྗེས་སུ་མི་མཐོང་བར་བྱེད་དོ། །དགའ་བ་སྤོང་བའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་དགའ་བ་སྤོང་བར་བྱེད་དོ། །ཆོས་ཀྱི་སྒྲོན་མའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་ཡི་གེ་མི་མཉམ་པའི་རབ་ཏུ་འཐོབ་པར་བྱེད་དོ། །ཡི་གེ་དང་བྲལ་བའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་ཡི་གེ་གཅིག་ཀྱང་མི་དམིགས་པར་བྱེད་དོ། །དམིགས་པ་གཅོད་པའི་ཏིང་ངེ་འཛིན་གྱིས་
420a
༄#། །ནི་ཆོས་ཐམས་ཅད་ལ་དམིགས་པ་རྣམ་པར་གཅོད་པར་བྱེད་དོ། །འགྱུར་བ་མེད་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་འགྱུར་བ་མི་དམིགས་པར་བྱེད་དོ། །རང་བཞིན་རྣམ་པར་དག་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་ཕན་འདོགས་པ་མི་དམིགས་པར་བྱེད་དོ། །གནས་མེད་པར་རྒྱུ་བའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་གནས་མི་དམིགས་པར་བྱེད་དོ། །རབ་རིབ་དང་བྲལ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ཀྱི་སྤྱོད་པ་ཡང་དག་པར་རྗེས་སུ་མི་མཐོང་ཞིང་མུན་པའི་ཡུལ་ལས་ཡང་དག་པར་འདའ་བར་བྱེད་དོ། །ཡོན་ཏན་ཐམས་ཅད་ཀྱི་ཚོགས་སུ་གྱུར་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་བསགས་པ་སྤོང་བར་བྱེད་དོ། །སེམས་མེད་པར་གནས་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་སེམས་ཞེས་བྱ་བ་མི་དམིགས་པར་བྱེད་དོ། །བྱང་ཆུབ་ཀྱི་ཡན་ལག་ཡོད་པའི་ཏིང་ངེ་འཛིན་གྱིས་ནི་ཆོས་ཐམས་ཅད་རྟོགས་པར་བྱེད་དོ། །དྲན་པ་རྣམ་པར་འཕྲོ་བའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་སྤོབས་པ་གྲངས་མེད་པ་ཐོབ་པར་བྱེད་དོ། །དེ་ཕྱེད་པའི་ཤེས་པ་རྣམ་པར་དག་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་མི་མཉམ་པ་དང་
420b
མཉམ་པའི་ཉིད་རབ་ཏུ་ཐོབ་པར་བྱེད་དོ། །ཡེ་ཤེས་ཏོག་གི་ཏིང་ངེ་འཛིན་གྱིས་ནི་ཁམས་གསུམ་ཐམས་ཅད་ལས་ཡང་དག་པར་འདའ་བར་བྱེད་དོ། །ཤེས་པ་ཉེ་བར་གཅོད་པའི་ཏིང་ངེ་འཛིན་གྱིས་ནི་ཆོས་ཐམས་ཅད་རྣམ་པར་གཅོད་པ་ཡང་དག་པར་རྗེས་སུ་མཐོང་བར་བྱེད་དོ། །ཡེ་ཤེས་རྣམ་པར་འཕྲོ་བའི་ཏིང་ངེ་འཛིན་གྱིས་ནི་ཆོས་ཐམས་ཅད་ཀྱི་རྣམ་པར་འཕྲོ་བ་ཉིད་རྗེས་སུ་ཐོབ་པར་བྱེད་དོ། །གནས་མེད་པའི་ཏིང་ངེ་འཛིན་གྱིས་ནི་ཆོས་ཐམས་ཅད་གནས་སུ་གྱུར་པ་མེད་པ་ཉིད་དུ་ཡང་དག་པར་རྗེས་སུ་མཐོང་བར་བྱེད་དོ། །བཀོད་པ་གཅིག་པའི་ཏིང་ངེ་འཛིན་གྱིས་ནི་ཆོས་འགའ་ཡང་གཉིས་སུ་ཡང་དག་པར་རྗེས་སུ་མི་མཐོང་བར་བྱེད་དོ། །རྣམ་པར་སྒྲུབ་པ་དང་ལྡན་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ཀྱི་རྣམ་པར་བསྒྲུབ་པར་ཡང་དག་པར་རྗེས་སུ་མཐོང་བར་བྱེད་དོ། །སྲིད་པའི་གཞི་ཐམས་ཅད་རྣམ་པར་སེལ་བ་ཐམས་ཅད་དུ་གཏོགས་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་ངེས་པར་འབྱེད་པའི་ཡེ་ཤེས་འཇུག་ཅིང་གང་ལ་འཇུག་པ་འགའ་ཡང་མི་རྙེད་པར་བྱེད་དོ། །བརྡ་དང་སྒྲ་ལ་འཇུག་པའི་ཏིང་ངེ་འཛིན་གྱིས་ནི་སྒྲ་དང་བརྡ་ཐམས་ཅད་ཀྱི་རྗེས་སུ་འཇུག་པར་བྱེད་དོ། །སྒྲ་དབྱངས་ཀྱི་ཡི་གེ་དང་བྲལ་བའི་ཏིང་ངེ་འཛིན་གྱིས་ནི་ཆོས་ཐམས་ཅད་ཡི་
421a
༄#། །གེ་དང་བྲལ་བར་ཡང་དག་པར་རྗེས་སུ་མཐོང་བར་བྱེད་དོ། །ཡེ་ཤེས་ཀྱི་སྒྲོན་མ་དང་ལྡན་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་གཟི་བརྗིད་ཀྱིས་ལམ་མེ་ལྷན་ནེ་ལྷང་ངེར་བྱེད་དོ། །ཡེ་ཤེས་མཆོག་གི་མཚན་ཉིད་རྣམ་པར་བསྒྱིངས་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་ཡོངས་སུ་དག་པའི་མཚན་ཉིད་སྟོན་པར་བྱེད་དོ། །མངོན་པར་ཤེས་པ་མེད་པའི་མཚན་ཉིད་དང་ལྡན་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་མངོན་པར་རིག་པ་མེད་པར་ཡང་དག་པར་རྗེས་སུ་མཐོང་བར་བྱེད་དོ། །རྣམ་པ་ཐམས་ཅད་ཀྱི་མཆོག་དང་ལྡན་པའི་ཏིང་ངེ་འཛིན་གྱིས་ནི་ཆོས་དང་ཏིང་ངེ་འཛིན་ཐམས་ཅད་ལ་རྣམ་པ་ཐམས་ཅད་ཀྱིས་མཆོག་དང་ལྡན་པར་བྱེད་དོ། ། སྡུག་བསྔལ་ཐམས་ཅད་ཤིན་ཏུ་སྤོང་བའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་གནས་པ་མེད་པ་ཡང་དག་པར་རྗེས་སུ་མཐོང་བར་བྱེད་དོ། །བྱེད་རྒྱུ་མི་ཟད་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་ཟད་པར་ཡང་དག་པར་རྗེས་སུ་མི་མཐོང་བར་བྱེད་དོ། །གཟུངས་ཀྱི་གཞིའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་དང ། ཆོས་ཐམས་ཅད་འཛིན་ཅིང་ཡང་དག་པ་ཉིད་དང ། ལོག་པ་ཉིད་ཡང་དག་པར་རྗེས་སུ་མི་མཐོང་བར་བྱེད་དོ། །འགག་པ་དང་འགལ་བ་རབ་ཏུ་ཞི་བའི་ཏིང་ངེ་འཛིན་གྱིས་ནི་ཆོས་
421b
ཐམས་ཅད་དང་མཐུན་པ་དང་འགལ་བ་ཡང་དག་པར་རྗེས་སུ་མི་མཐོང་བར་བྱེད་དོ། །འོད་དྲི་མ་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་འདུས་བྱས་ཀྱི་དྲི་མ་དང་བྲལ་བ་ཡང་དག་པར་རྗེས་སུ་མི་མཐོང་བར་བྱེད་དོ། །སྙིང་པོ་དང་ལྡན་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་སྙིང་པོ་མེད་པ་མི་དམིགས་པར་བྱེད་དོ། །ཟླ་བ་ཉ་བ་དྲི་མ་མེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་ཡོན་ཏན་ཡོངས་སུ་རྫོགས་པར་བྱེད་དོ། །བཀོད་པ་ཆེན་པོའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་བཀོད་པ་ཆེན་པོ་དང་ལྡན་པར་བྱེད་དོ། །སྣང་བ་ཐམས་ཅད་རབ་ཏུ་འབྱེད་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་ཡེ་ཤེས་ཀྱིས་སྣང་བར་བྱེད་དོ། །མཉམ་པ་ཉིད་རྣམ་པར་སྣང་བར་བྱེད་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་རྩེ་གཅིག་པ་ཉིད་རབ་ཏུ་ཐོབ་པར་བྱེད་དོ། །ཉོན་མོངས་པ་མེད་བ་དང ། ཉོན་མོངས་པ་དང་བཅས་པ་ཐམས་ཅད་ཡང་དག་པར་འདུ་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་ཉོན་མོངས་པ་མེད་པར་བྱེད་དོ། །རླུང་གི་གནས་ཀྱི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་གནས་པར་མི་བྱེད་དོ། །དེ་བཞིན་ཉིད་ལ་གནས་ཤིང་སེམས་མེད་པའི་ཏིང་ངེ་འཛིན་གྱིས་ནི་ཆོས་ཐམས་ཅད་ཀྱི་དེ་བཞིན་ཉིད་ལས་ཕྱིར་མི་ལྡོག་པར་
422a
༄#། །བྱེད་དོ། །ལུས་ཀྱི་སྐྱོན་ཡང་དག་པར་སེལ་བའི་ཏིང་ངེ་འཛིན་གྱིས་ནི་ཆོས་ཐམས་ཅད་ལ་འཇིག་ཚོགས་མི་དམིགས་པར་བྱེད་དོ། །ངག་གི་སྐྱོན་རྣམ་པར་འཇིག་པས་ནམ་མཁའ་ལྟར་གྱུར་པའི་ཏིང་ངེ་འཛིན་གྱིས་ནི་བྱང་ཆུབ་སེམས་དཔའ་ཆོས་ཐམས་ཅད་ལ་ངག་གི་ལས་མི་དམིགས་པར་བྱེད་དོ། །ནམ་མཁའ་ལྟར་ཆགས་པ་མེད་ལ་རྣམ་པར་གྲོལ་ཞིང་གོས་པ་མེད་པའི་ཏིང་ངེ་འཛིན་ལ་གནས་པའི་བྱང་ཆུབ་སེམས་དཔའ་ནི་ཆོས་ཐམས་ཅད་ལ་ནམ་མཁའ་ལྟར་ཆགས་པ་མེད་པ་ཉིད་རྗེས་སུ་ཐོབ་པར་འགྱུར་ཏེ། དེ་ནི་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་གྱི་སྒོ་བསྟན་པ་ཡིན་ནོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཚོགས་རྣམ་པར་དག་པའི་སྒོ་སྡུད་པའི་ཆོས་ཀྱི་རྣམ་གྲངས་གང་ཞེ་ན། བྱང་ཆུབ་སེམས་དཔའ་རྣམས་ཀྱི་སྦྱིན་པའི་ཚོགས་ནི་སེམས་ཅན་ཐམས་ཅད་ཡོངས་སུ་སྨིན་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཀྱི་ཚོགས་ནི་སྨོན་ལམ་ཡོངས་སུ་རྫོགས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བཟོད་པའི་ཚོགས་ནི་མཚན་དང་དཔེ་བྱད་བཟང་པོ་ཡོངས་སུ་རྫོགས་
422b
པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཀྱི་ཚོགས་ནི་དགོས་པ་ཐམས་ཅད་ཡོངས་སུ་རྫོགས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བསམ་གཏན་གྱི་ཚོགས་ནི་ཅང་ཤེས་ཀྱི་སེམས་སུ་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཤེས་རབ་ཀྱི་ཚོགས་ནི་ཉོན་མོངས་པ་ཐམས་ཅད་ཡོངས་སུ་ཤེས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཐོས་པའི་ཚོགས་ནི་སྤོབས་པ་ཐོགས་པ་མེད་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བསོད་ནམས་ཀྱི་ཚོགས་ནི་སེམས་ཅན་ཐམས་ཅད་ཉེ་བར་འཚོ་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་ཚོགས་ནི་ཤེས་པ་ཐོགས་བ་མེད་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཞི་གནས་ཀྱི་ཚོགས་ནི་སེམས་ལས་སུ་རུང་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ལྷག་མཐོང་གི་ཚོགས་ནི་ཐེ་ཚོམ་དང་བྲལ་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བྱམས་པའི་ཚོགས་ནི་ཞེ་འགྲས་པའི་སེམས་མེད་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་སྙིང་རྗེའི་ཚོགས་ནི་སེམས་ཅན་ཡོངས་སུ་སྨིན་པར་བྱ་བ་ལ་སྐྱོ་བ་མེད་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་
423a
༄#། །དགའ་བའི་ཚོགས་ནི་ཆོས་ཀྱི་ཀུན་དགའ་ལ་དགའ་ཞིང་དགའ་བར་བྱེད་བར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བཏང་སྙོམས་ཀྱི་ཚོགས་ནི་རྗེས་སུ་ཆགས་པ་དང ། ཁྲོང་ཁྲོ་བ་སྤོང་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཆོས་ཉན་པའི་ཚོགས་ནི་སྒྲིབ་པ་སྤོང་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་མངོན་པར་འབྱུང་བའི་ཚོགས་ནི་ཡོངས་སུ་འཛིན་པ་ཐམས་ཅད་སྤོང་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་དགོན་པར་གནས་པའི་ཚོགས་ནི་དགེ་བའི་རྩ་བའི་ལས་བྱས་པ་ཆུད་མི་ཟ་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་དྲན་པའི་ཚོགས་ནི་གཟུངས་ཐོབ་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བློ་གྲོས་ཀྱི་ཚོགས་ནི་བློ་རབ་ཏུ་འབྱེད་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་རྟོགས་པའི་ཚོགས་ནི་དོན་གྱི་རྣམ་པ་རྗེས་སུ་རྟོགས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་དྲན་པ་ཉེ་བར་བཞག་པའི་ཚོགས་ནི། ལུས་དང ། ཚོར་བ་དང ། སེམས་དང ། ཆོས་རྗེས་སུ་རྟོགས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཡང་དག་པར་སྤོང་བའི་ཚོགས་ནི་མི་དགེ་བའི་ཆོས་ཐམས་ཅད་སྤྱོང་\?\་བ་དང །
423b
དག་བའི་ཆོས་ཐམས་ཅད་སྒོམ་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་རྫུ་འཕྲུལ་གྱི་རྐང་པའི་ཚོགས་ནི་ལུས་དང་སེམས་ཡང་བ་ཉིད་དུ་བྱེད་པར་འགྱུར་རོ། ། བྱང་ཆུབ་སེམས་དཔའ་རྣམས་ཀྱི་དབང་པོའི་ཚོགས་ནི་སེམས་ཅན་ཐམས་ཅད་ཀྱི་དབང་པོ་ཡོངས་སུ་རྫོགས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་སྟོབས་ཀྱི་ཚོགས་ནི་ཉོན་མོངས་པ་ཐམས་ཅད་འཇོམས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་ཡན་ལག་གི་ཚོགས་ནི་ཆོས་ཀྱི་ངོ་བོ་ཉིད་རྗེས་སུ་རྟོགས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ལམ་གྱི་ཚོགས་ནི་ལམ་ངན་པ་ཐམས་ཅད་ལས་ཡང་དག་བར་འདའ་བར་བྱེད་པར་འགྱུར་རོ། ། བྱང་ཆུབ་སེམས་དཔའ་རྣམས་ཀྱི་བདེན་པའི་ཚོགས་ནི་མི་དགེ་བའི་ཆོས་རྣམས་སྤོང་ཞིང་མཐོ་རིས་སུ་སྐྱེ་བ་ཐོབ་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་སོ་སོ་ཡང་དག་པར་རིག་པའི་ཚོགས་ནི་སེམས་ཅན་ཐམས་ཅད་ཀྱི་ཐེ་ཚོམ་གཅོད་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་སྟོན་པའི་ཚོགས་ནི་ཤེས་པ་གཞན་ལ་རག་མ་ལས་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་དགེ་བའི་བཤེས་གཉེན་གྱི་ཚོགས་ནི་ཡོན་ཏན་ཐམས་ཅད་ཀྱི་སྒོ་ཡིན་པར་
424a
༄#། །བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བསམ་པའི་ཚོགས་ནི་འཇིག་རྟེན་ཐམས་ཅད་ལ་མི་སླུ་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་སྦྱོར་བའི་ཚོགས་ནི་ཚོགས་ཐམས་ཅད་མཐར་ཕྱིན་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པའི་ཚོགས་ནི་ཁྱད་པར་དུ་འགྲོ་བར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ནང་དུ་ཡང་དག་འཇོག་པའི་ཚོགས་ནི་ཇི་ལྟར་ཐོས་པའི་ཆོས་སྒྲུབ་པར་བྱེད་པར་འགྱུར་རོ།། བྱང་ཆུབ་སེམས་དཔའ་རྣམས་ཀྱི་བསྡུ་བའི་དངོས་པོའི་ཚོགས་ནི་སེམས་ཅན་ཐམས་ཅད་ཡོངས་སུ་སྨིན་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་དམ་པའི་ཆོས་ཡོངས་སུ་འཛིན་པའི་ཚོགས་ནི་དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཡོངས་སུ་བསྔོ་བའི་ཆོ་ག་ཤེས་པ་ལ་མཁས་པའི་ཚོགས་ནི་སངས་རྒྱས་ཀྱི་ཞིང་ཡོངས་སུ་དག་པར་བྱེད་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པའི་ཚོགས་ནི་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་བྱེད་པར་འགྱུར་ཏེ། རིགས་ཀྱི་བུ། དེ་ནི་བྱང་ཆུབ་སེམས་དཔའ་རྣམས་ཀྱི་ཚོགས་རྣམ་པར་དག་པའི་
424b
སྒོ་ཡང་དག་པར་སྡུད་པའི་ཆོས་ཀྱི་རྣམ་གྲངས་ཡིན་ནོ། །རིགས་ཀྱི་བུ། གཞན་ཡང་དག་དེ་བཞིན་གཤེགས་པ་རིན་པོ་ཆེའི་སྙིང་པོས་བྱང་ཆུབ་སེམས་དཔའི་འཁོར་ཆེན་པོ་ལ་རྣམ་པར་གཟིགས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་ལ་བོས་ཏེ་བཀའ་སྩལ་པ། སྙིང་རྗེ་ཆེན་པོ་དང་ལྡན་པ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་མི་འཇིགས་པའི་རྒྱན་ཇི་ལྟ་བུས་བརྒྱན་ན་བཟོད་པ་ཡོངས་སུ་རྫོགས་པར་འགྱུར་ཞེ་ན། དོན་དམ་པ་མཐོང་བའི་བྱང་ཆུབ་སེམས་དཔའ་སེམས་དཔའ་ཆེན་པོའི་འབད་པ་དོན་ཡོད་པ་ཡོངས་སུ་འཛིན་པའི་སེམས་དང ། ཁམས་གསུམ་པ་ཐམས་ཅད་དང ། སེམས་ཅན་ཐམས་ཅད་ལ་ཡོངས་སུ་འཛིན་པ་མེད་པའི་སེམས་གང་ཡིན་པ་དེ་ནི་དགེ་སྦྱོང་གི་ཆོས་མི་འཇིགས་པ་ཆེན་པོ་ཞེས་བྱ་སྟེ། སྙིང་རྗེ་ཆེན་པོ་དང་ལྡན་པ་གང་གི་སེམས་ཆོས་ཐམས་ཅད་ལ་ནམ་མཁའ་དང་ལག་པར་མཉམ་པ་དེ་ནི་བྱང་ཆུབ་སེམས་དཔའི་མི་འཇིགས་པའི་རྒྱན་ཡིན་ནོ། །ཇི་ལྟར་ན་བཟོད་པ་ཡོངས་སུ་རྫོགས་པར་འགྱུར་ཞེ་ན། འདི་ལྟ་སྟེ། བྱམས་པ་དང ། བདག་མེད་པ་དང ། སྙིང་རྗེ་དང ། སེམས་ཅན་མེད་པ་ཉིད་དང ། དགའ་བ་དང ། ཡིད་བྱུང་པ་དང ། བཏང་སྙོམས་དང ། གང་ཟག་མེད་པ་ཉིད་དང ། སྦྱིན་པ་དང ། དུལ་བའི་སེམས་ཉིད་དང །
425a
༄#། །ཚུལ་ཁྲིམས་དང ། ཞི་བའི་སེམས་ཉིད་དང ། བཟོད་པ་དང ། བཟོད་པའི་སེམས་ཉིད་དང ། བརྩོན་འགྲུས་དང ། དབེན་པའི་སེམས་ཉིད་དང ། བསམ་གཏན་དང ། ངེས་པར་སེམས་དཔའི་སེམས་ཉིད་དང ། ཤེས་རབ་དང ། རྒྱ་ཆེ་བའི་སེམས་ཉིད་དང ། དྲན་པ་ཉེ་བར་བཞག་པ་དང ། དྲན་པ་མེད་པ་དང ། ཡིད་ལ་བྱེད་པ་མེད་པའི་སེམས་དང ། ཡང་དག་པའི་སྤོང་བ་དང ། སྐྱེ་བ་མེད་པ་དང ། འགག་པ་མེད་པའི་སེམས་ཉིད་དང ། རྫུ་འཕྲུལ་གྱི་རྐང་པ་དང ། ཆོས་ཐམས་ཅད་འགྲོ་བ་མེད་པའི་སེམས་ཉིད་དང ། དད་པ་དང ། ཐོགས་པ་མེད་པའི་སེམས་ཉིད་དང ། དྲན་པ་དང ། རང་བྱུང་གི་སེམས་ཉིད་དང ། ཏིང་ངེ་འཛིན་དང ། སྙོམས་པར་འཇུག་པར་བྱེད་པའི་སེམས་ཉིད་དང ། ཤེས་རབ་ཀྱི་དབང་པོ་དང ། དབང་པོ་མེད་པའི་སེམས་ཉིད་དང ། སྟོབས་དང ། མི་རྫི་བའི་སེམས་ཉིད་དང ། བྱང་ཆུབ་ཀྱི་ཡན་ལག་དང ། བློ་རབ་ཏུ་འབྱེད་པའི་སེམས་ཉིད་དང ། ལམ་དང ། སྒོམ་པའི་སེམས་ཉིད་དང ། ཞི་གནས་དང ། ཉེ་བར་ཞི་བའི་སེམས་ཉིད་དང ། ལྷག་མཐོང་དང ། རྨོངས་པ་མེད་པའི་སེམས་ཉིད་དང ། འཕགས་པའི་བདེན་པ་བསྒོམ་པ་དང ། ཤིན་ཏུ་ཡོངས་སུ་ཤེས་པ་བསྒོམ་པའི་སེམས་ཉིད་དང ། སངས་རྒྱས་ཡིད་ལ་བྱེད་པ་
425b
དང ། མུན་པ་མེད་པའི་སེམས་ཉིད་དང ། ཆོས་ཡིད་ལ་བྱེད་པ་དང ། ཆོས་ཀྱི་དབྱིངས་མཉམ་པའི་སེམས་ཉིད་དང ། དགེ་འདུན་ཡིད་ལ་བྱེད་པ་དང ། གནས་པ་མེད་པའི་སེམས་ཉིད་དང ། སེམས་ཅན་ཡོངས་སུ་སྨིན་པར་བྱ་བ་དང ། གདོད་མ་ནས་རྣམ་པར་དག་པའི་སེམས་ཉིད་དང ། དམ་པའི་ཆོས་ཡོངས་སུ་འཛིན་པ་དང ། ཆོས་ཀྱི་དབྱིངས་དབྱེར་མེད་པའི་སེམས་ཉིད་དང ། ཞིང་ཡོངས་སུ་དག་པར་བྱེད་པ་དང ། ནམ་མཁའ་དང་མཉམ་པའི་སེམས་ཉིད་དང ། མཚན་ཡོངས་སུ་རྫོགས་པར་བྱེད་པ་དང ། མཚན་མ་མེད་པའི་སེམས་ཉི་དང ། བཟོད་པ་ཐོབ་པ་དང ། དམིགས་པ་མེད་པའི་སེམས་ཉིད་དང ། ཕྱིར་མི་ལྡོག་པའི་ས་དང ། འཇུག་པ་དང་ལྡོག་པའི་སེམས་ཉིད་དང ། བྱང་ཆུབ་ཀྱི་སྙིང་པོའི་རྒྱན་དང ། ཁམས་གསུམ་གྱི་སྙིང་པོ་ལེན་པའི་སེམས་ཉིད་དང ། སེམས་ཅན་ཐམས་ཅད་ལ་བདུད་ཚར་བཅད་པའི་སེམས་དང ། སེམས་ཅན་ཐམས་ཅད་ལ་ཕན་གདགས་པའི་སེམས་ཉིད་དང ། བྱང་ཆུབ་དང ། ཆོས་ཐམས་ཅད་མཉམ་པ་ཉིད་དུ་རྟོགས་པའི་སེམས་ཉིད་དང ། ཆོས་ཀྱི་འཁོར་ལོ་བསྐོར་བ་དང ། ཆོས་ཐམས་ཅད་བསྐོར་བ་མེད་པའི་སེམས་ཉིད་དང ། ཡོངས་སུ་མྱ་ངན་ལས་འདས་པ་ཆེན་པོ་ཀུན་ཏུ་སྟོན་པ་དང ། འཁོར་བའི་རང་བཞིན་གྱི་སེམས་ཉིད་ཀྱི་ཆོས་དེ་ལ་གང་
426a
༄#། །རྗེས་སུ་རྟོགས་པར་འགྱུར་བའམ། རབ་ཏུ་རྟོགས་པར་བྱ་བ་ཕྲ་རབ་ཙམ་ཡང་མི་དམིགས་ཤིང ། རྣམ་པར་སྨིན་པ་མེད་པའི་ཆོས་ལ་མོས་པར་བྱེད་པའོ། །ཆོས་ཀྱི་རྣམ་གྲངས་འདི་བཤད་པ་ན་གང་དག་ཕྱོགས་བཅུ་ནས་སྔོན་གྱི་ཚུལ་གྱི་ཏིང་ངེ་འཛིན་གྱི་སྒོ་བསྟན་པ་དང ། ཚོགས་རྣམ་པར་དག་པའི་སྒོའི་ཆོས་ཀྱི་རྣམ་གྲངས་ཉན་པའི་ཕྱིར་དེ་བཞིན་གཤེགས་པ་ཤཱཀྱ་ཐུབ་པའི་སྤྱན་སྔར་བྱ་རྒོད་ཀྱི་ཕུང་པོའི་རི་ལ་ལྷགས་པའི་བྱང་ཆུབ་སེམས་དཔའ་ས་ཡ་ཕྲག་དྲུག་དང་བཞི་འབུམ་པོ་དེ་དག་གིས་མི་སྐྱེ་བའི་ཆོས་ལ་བཟོད་པ་ཐོབ་ནས་དེ་བཞིན་གཤེགས་པ་ཤཱཀྱ་ཐུབ་པས་བཀའ་སྩལ་པ། རིགས་ཀྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོས་ཆོས་ཀྱི་རྣམ་གྲངས་འདི་བཤད་པ་ན་བྱང་ཆུབ་སེམས་དཔའ་སེམས་དཔའ་ཆེན་པོ་གངྒཱའི་ཀླུང་བཞི་བཅུ་རྩ་བརྒྱད་ཀྱི་བྱེ་མ་སྙེད་ཀྱིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་གླིང་བཞི་པའི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་སྙེད་ཀྱིས་ནི་ཕྱིར་མི་ལྡོག་པའི་ས་ཐོབ་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་གངྒཱའི་ཀླུང་གི་བྱེ་མ་སྙེད་ཀྱིས་ནི་ཏིང་ངེ་འཛིན་གྱི་
426b
སྒོ་བསྟན་པ་དང ། ཚོགས་རྣམ་པར་དག་པའི་སྒོའི་ཆོས་ཀྱི་རྣམ་གྲངས་འདི་མཐའ་དག་ཡོངས་སུ་རྫོགས་ཤིང་རྣམ་པར་དག་པའི་ཡེ་ཤེས་ཁོང་དུ་ཆུད་པར་གྱུར་ཏོ། །རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེའང་མཆོག་ཏུ་དགའ་བ་དང་རབ་ཏུ་དང་བ་དེས་གཞོན་ནུ་ལོ་ཉི་ཤུ་ལོན་པ་ལྟ་བུར་རེད་ནས་དེ་བཞིན་གཤེགས་པ་རིན་པོ་ཆེའི་སྙིང་པོའི་ཞབས་འབྲིང་དུ་འབྲང་བར་གྱུར་ཏོ། །རིགས་ཀྱི་བུ། རྒྱལ་པོ་བདུད་རྩི་དག་པ་དེའང་བུ་སྟོང་དང ། ཁམས་ཀྱི་རྒྱལ་པོ་བརྒྱད་ཁྲི་དང ། གཞན་ཡང་སྲོག་ཆགས་བྱེ་བ་ཕྲག་དགུ་བཅུ་རྩ་གཉིས་དང་ལྷན་ཅིག་འགྲོགས་ཏེ། མངོན་པར་བྱུང་ཞིང་རབ་ཏུ་བྱུང་ནས་ཚུལ་ཁྲིམས་དང ། ཐོས་པ་དང ། ཏིང་ངེ་འཛིན་དང ། དེས་པ་དག་གིས་མངོན་པར་བརྩོན་པར་བྱས་པར་གྱུར་ཏོ། །རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དེས་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོའི་ཐད་ནས་མཐར་གྱིས་ཉན་ཐོས་ཀྱི་ཐེག་པའི་གཏམ་གྱི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་བཀླགས་ཤིང་ཀུན་ཆུབ་པར་བྱས་སོ། །རང་སངས་རྒྱས་ཀྱི་ཐེག་པའི་གཏམ་གྱི་ཆོས་ཀྱི་ཕུང་པོ་དགུ་ཁྲི་ལུང་མནོས་ཤིང་བཀླགས་ཏེ་ཀུན་ཆུབ་པའི་བར་དུ་བྱས་སོ། །དེ་བཞིན་དུ་བླ་ན་མེད་པའི་ཐེག་པ་ཆེན་
427a
༄#། །པོའི་གཏམ་ལའང་ལུས་དྲན་པ་ཉེ་བར་བཞག་པའི་གཏམ་འབུམ་ལུང་མནོས་ཤིང་བཀླགས་ཏེ་ཀུན་ཆུབ་པར་བྱས་སོ། །ཚོར་བ་དྲན་པ་ཉེ་བར་བཞག་པའི་གཏམ་འབུམ་དང ། སེམས་དྲན་པ་ཉེ་བར་བཞག་པའི་གཏམ་འབུམ་དང ། ཆོས་དྲན་པ་ཉེ་བར་བཞག་པའི་གཏམ་འབུམ་ཡང་ལུང་མནོས་ཏེ་བཀླགས་ཤིང་ཀུན་ཆུབ་པར་བྱས་སོ། །ཁམས་ཀྱི་ཚོགས་ཀྱི་གཏམ་འབུམ་དང ། སྐྱེ་མཆེད་ཀྱི་ཚོགས་ཀྱི་གཏམ་འབུམ་དང ། འདོད་ཆགས་ཀྱི་ཀུན་ཏུ་སྦྱོར་བ་སྤོང་བའི་ཚོགས་ཀྱི་གཏམ་འབུམ་དང ། ཞེ་སྡང་གི་ཀུན་ཏུ་སྦྱོར་བ་སྤོང་བའི་ཚོགས་ཀྱི་གཏམ་འབུམ་དང ། གཏི་མུག་གི་ཀུན་ཏུ་སྦྱོར་བ་སྤོང་བའི་རྟེན་ཅིང་འབྲེལ་བར་འབྱུང་བའི་ཚོགས་ཀྱི་གཏམ་འབུམ་དང ། ཏིང་ངེ་འཛིན་དང ། རྣམ་པར་ཐར་པའི་ཚོགས་ཀྱི་གཏམ་འབུམ་དང ། སྟོབས་དང ། མི་འཇིགས་པ་དང ། སངས་རྒྱས་ཀྱི་ཆོས་མ་འདྲེས་པའི་ཚོགས་ཀྱི་གཏམ་འབུམ་ཡང་ལུང་མནོས་ཤིང་བཀྲགས་ཏེ་ཀུན་ཆུབ་པར་བྱས་སོ། །དེ་བཞིན་གཤེགས་པ་རིན་པོ་ཆེའི་སྙིང་པོའི་ཐད་ནས་ཆོས་ཀྱི་ཕུང་པོ་འབུམ་ཕྲག་བཅུའི་བར་དག་ཀྱང་བཟུང་ཞིང་བཀླགས་ཏེ་ཀུན་ཆུབ་པར་བྱས་སོ། །རིགས་ཀྱི་བུ། ཇི་ཙམ་གྱི་དུས་གཞན་ཞིག་ན། དེ་བཞིན་གཤེགས་པ་དགྲ་
427b
བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་དང ། བྱང་ཆུབ་སེམས་དཔའ་སྙིང་རྗེ་ཆེན་པོ་དང་ལྡན་པ་དེས་རོལ་མོའི་སྒྲ་དང ། མེ་ཏོག་དང ། ཕྱེ་མ་དང ། མེ་ཏོག་ཕྲེང་དང ། སྤོས་དང ། བྱུག་པ་དང ། གདུགས་དང ། རྒྱལ་མཚན་དང ། བ་དན་དང ། རིན་པོ་ཆེ་རྣམ་པ་སྣ་ཚོགས་དཔག་ཏུ་མེད། གྲངས་མེད་པ་དག་གིས་མཆོད་པ་བྱས་ཤིང་སྤོས་ཆུ་སྣ་ཚོགས་ཀྱི་ས་བཀྲུས་ནས། སྐུ་གདུང་གཞག་པའི་མཆོད་རྟེན་རིན་པོ་ཆེ་སྣ་བདུན་ལས་བྱས་པ་འཕང་དུ་དཔག་ཚད་ལྔ་བརྒྱ། རྒྱར་ནི་དཔག་ཚད་ཕྱེད་ཡོད་པའང་བརྩིགས། དེ་ནས་ཞག་བདུན་གྱི་བར་དུ་རོལ་མོའི་སྒྲ་དང ། མེ་ཏོག་དང ། མེ་ཏོག་ཕྲེང་དང ། སྤོས་དང ། བྱུག་པ་དང ། གདུགས་དང ། རྒྱལ་མཚན་དང ། བདན་དང ། རིན་པོ་ཆེ་དཔག་ཏུ་མེད་གྲངས་མེད་པ་དག་གི་མཆོད་པ་བྱས་ནས་དེར་ཡང་སེམས་ཅན་དཔག་ཏུ་མེད། གྲངས་མེད་པ་དག་ཐེག་པ་གསུམ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །དེ་ཞག་བདུན་པོ་དེ་དག་འདས་ནས་སྲོག་ཆགས་བརྒྱད་ཁྲི་བཞི་སྟོང་དང་ལྷན་ཅིག་ཏུ་མངོན་པར་བྱུང་སྟེ། སྐྲ་དང་ཁ་སྤུ་བྲེགས་ནས་གོས་ངུར་སྨྲིག་དག་བགོས་
428a
༄#། །ཏེ།་ཡང་དག་པར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་ཡོངས་སུ་མྱ་ངན་ལས་འདས་པའི་བསྟན་པ་འབར་བར་བྱས་ཏེ། ལོ་ཁྲིའི་བར་དུ་དམ་པའི་ཆོས་འཛིན་པར་གྱུར་ནས། དེར་ཡང་སེམས་ཅན་དཔག་ཏུ་མེད་གྲངས་མེད་པ་དག་ཐེག་པ་གསུམ་པོ་དག་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །གསུམ་ལ་སྐྱབས་སུ་འགྲོ་བ་ལའང་རབ་ཏུ་བཀོད་དོ། །དགེ་བསྙེན་གྱི་སྡོམ་པ་དང ། དགེ་ཚུལ་གྱི་སྡོམ་པ་དང ། བསྙེན་པར་རྫོགས་པ་དགེ་སློང་གི་དངོས་པོ་ཚངས་པར་སྤྱོད་པའི་སྡོམ་པ་ལའང་བཙུད་དེ་རབ་ཏུ་བཀོད་དོ། །དེས་ཡང་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་མང་པོ་དག་མངོན་པར་ཤེས་པ་དང ། རྫུ་འཕྲུལ་ལ་མཁས་པ་ལ་ངེས་པར་སྦྱར་ཅིང་ངེས་པ་དང ། ཚངས་པར་སྤྱོད་པའི་གནས་ལའང་ངེས་པར་སྦྱར། ཕུང་པོ་རྣམས་དགྲ་ལྟ་བུར་གྱུར་པར་ཡོངས་སུ་ཤེས་པ་ལའང་ངེས་པར་སྦྱར། སྐྱེ་མཆེད་རྣམས་གྲོང་སྟོང་པ་ལྟ་བུར་ཡོངས་སུ་ཤེས་པ་ལའང་ངེས་པར་སྦྱར། ཆོས་ཐམས་ཅད་རྟེན་ཅིང་འབྲེལ་བར་འབྱུང་བའོ་ཞེས་འདུས་བྱས་ཤེས་པ་མཐོང་བ་ཡོངས་སུ་ཤེས་པ་ལའང་ངེས་པར་སྦྱར། ཆོས་ཐམས་ཅད་མིག་ཡོར་ལྟ་བུ་དང ། མིག་སྒྱུ་ལྟ་བུ་དང ། ཆུ་ཟླ་ལྟ་བུར་ཡང་བསྟན།
428b
སྐྱེ་བ་མེད་པ་དང ། འགག་པ་མེད་པ་དང ། མཚམས་སྦྱོར་བ་མེད་པའི་འགོག་པ་དང ། ཞི་བ་དང ། རབ་ཏུ་ཞི་བ་དང ། ཉེ་བར་ཞི་བ་དང ། མཆོག་དང ། གྱ་ནོམ་པའི་འགོག་བ་མྱ་ངན་ལས་འདས་པ་ཡོངས་སུ་ཤེས་པའང་བསྟན་ཏེ། འཕགས་པའི་ལམ་ཡན་ལག་བརྒྱད་པ་ལ་རབ་ཏུ་བཀོད་ནས་འཆི་བའི་དུས་བྱས་པར་གྱུར་ཏོ། །སེམས་ཅན་དེ་དག་གིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་དགེ་སྦྱོང་ཆེན་པོ་དེའི་རུས་པ་ལ་སྔ་མ་བཞིན་དུ་མཆོད་པ་བྱས་ཏེ། ཇི་ལྟར་འཁོར་ལོས་བསྒྱུར་བའི་རྒྱལ་པོའི་རུས་པ་དག་ལ་རུས་པའི་མཆོད་པ་བྱེད་པ་དེ་བཞིན་དུ། དེའི་ཚེ་ན་སེམས་ཅན་དེ་དག་གིས་ཀྱང་སྙིང་རྗེ་ཆེན་པོ་དང་ལྡན་པའི་དགེ་སྦྱོང་ཆེན་པོ་དེའི་རུས་པ་དག་ལ་མཆོད་པ་བྱས་སོ། །གང་གི་ཉིན་མོ་སྙིང་རྗེ་ཆེན་པོ་དང་ལྡན་པའི་དགེ་སྦྱོང་ཆེན་པོ་འཆི་བའི་དུས་བྱས་པར་གྱུར་པ་དེའི་ཉིན་མོ་དེ་བཞིན་གཤེགས་པ་རིན་པོ་ཆེའི་སྙིང་པོའི་དམ་པའི་ཆོས་ཀྱང་ནུབ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་ནི་སྨོན་ལམ་གྱི་དབང་གིས་འཇིག་རྟེན་གྱི་ཁམས་གཞན་དག་ཏུ་སྐྱེ་བ་ཡོངས་སུ་བཟུང་སྟེ། ཁ་ཅིག་ནི་སྨོན་ལམ་གྱི་དབང་གིས་དགའ་ལྡན་གྱི་གནས་སུ་སྐྱེས་སོ། །ཁ་ཅིག་ནི་མི་རྣམས་ཀྱི་ནང་དུ། ཁ་ཅིག་ནི་ཀླུ་རྣམས་ཀྱི་ནང་དུ། ཁ་ཅིག་ནི་ལྷ་མ་ཡིན་
429a
༄#། །རྣམས་ཀྱི་ནང་དུ། ཁ་ཅིག་ནི་སྨོན་ལམ་གྱི་དབང་གིས་དུད་འགྲོའི་སྐྱེ་གནས་སྣ་ཚོགས་དག་ཏུ་སྐྱེས་སོ། །རིགས་ཀྱི་བུ། སྙིང་རྗེ་ཆེན་པོ་དང་ལྡན་པའི་དགེ་སྦྱོང་ཆེན་པོ་འཆི་བའི་དུས་བྱས་ནས་ཀྱང་སྨོན་ལམ་གྱི་དབང་གིས་སངས་རྒྱས་ཀྱི་ཞིང་འདི་ནས་ལྷོ་ཕྱོགས་ལོགས་སུ་སངས་རྒྱས་ཀྱི་ཞིང་ཁྲི་འདས་པ་དེ་ན་འཇིག་རྟེན་གྱི་ཁམས་ཡང་དག་འདྲེན་ཅེས་བྱ་བ་ཡོད་དེ། དེ་ན་མི་རྣམས་ནི་ཚེ་ལོ་བརྒྱད་ཅུ་ཐུབ་ལ། མི་དགེ་བའི་རྩ་བ་དང་ལྡན་པ་གཏུམ་པ། ལག་པ་ཁྲག་གིས་གོས་པ། སྡིག་པ་ལ་ཞེན་པ། སེམས་ཅན་ཐམས་ཅད་ལ་བརྩེ་བ་མེད་པར་ཞུགས་པ། མར་མི་འཛིན་པ། ཕར་མི་འཛིན་པ། འཇིག་རྟེན་ཕ་རོལ་ལ་འཇིགས་པར་མི་ལྟ་བ་ཤ་སྟག་སྟེ། སྙིང་རྗེ་ཆེན་པོ་དང་ལྡན་པའི་དགེ་སྦྱོང་ཆེན་པོ་དེ་སྨོན་ལམ་གྱི་དབང་གིས་སངས་རྒྱས་ཀྱི་ཞིང་ཡང་དག་འདྲེན་དེར་གདོལ་པའི་རིགས་སུ་སྐྱེས་པར་གྱུར་ཏེ། དེའང་ལུས་ཤིན་ཏུ་རིང་བར་གྱུར་ཅིང་ཤིན་ཏུ་སྟོབས་དང་ལྡན་པ། ཤིན་ཏུ་ཤུགས་དང་ལྡན་པ། ཤིན་ཏུ་དྲན་པ་དང ། ལྡན་པ། ཤིན་ཏུ་སྤོབས་པ་དང་ལྡན་པ། ཤིན་ཏུ་མགྱོགས་པ་དང་ལྡན་པར་གྱུར་ནས། དེས་སྟོབས་ཀྱི་ཤུགས་བརྟན་པས་སེམས་ཅན་དག་བཟུང་སྟེ་སྨྲས་པ། ཀྱེ་སེམས་ཅན་དག་།ཁྱེད་ཅག་གལ་ཏེ་སྲོག་གཅོད་པ་སྤོང་བ་དང ། མ་བྱིན་པར་ལེན་པ་
429b
སྤོང་བ་དང ། འདོད་པས་ལོག་པར་གཡེམ་པ་དང ། ལོག་པར་ལྟ་བའི་བར་དག་སྤོང་བར་བྱེད་ན་ངས་ཁྱེད་ཅག་གི་སྲོག་སྤྱིན་པར་བྱ་ཞིང ། འཚོ་བའི་ཡོ་བྱད་དག་ཀྱང་སྦྱིན་པར་བྱའོ། །ཀྱེ།་གལ་ཏེ་མི་སྤོང་ན་ངས་སྲོག་དང་ཕྲལ་ཏེ་འགྲོའོ། །དེ་ནས་སེམས་ཅན་དེ་དག་གིས་ཐལ་མོ་སྦྱར་ཏེ་སྨྲས་པ། མགོན་པོ་ཁྱོད་ཀྱི་ཚིག་གིས་བདག་ཅག་ད་དེང་སླན་ཆད་ནས་ཇི་སྲིད་འཚོ་བའི་བར་དུ་སྲོག་གཅོད་པ་དང ། མ་བྱིན་པར་ལེན་པ་ནས་ལོག་པར་ལྟ་བའི་བར་དག་སྤོང་བར་བགྱིད་དོ། །གདོལ་བ་སྟོབས་ཅན་དེ་སོང་ནས་རྒྱལ་པོ་དང ། རྒྱལ་པོས་བཀྲབས་པ་དག་ལ་བསྒོ་བ། །ཁོ་བོའི་ཚོ་བའི་ཡོ་བྱད་དུ་ཟས་དང ། སྐོམ་དང ། བཟའ་བ་དང ། བཅའ་བ་དང ། བཏུང་བ་དང ། གོས་དང ། མལ་ཆ་དང ། སྤོས་དང ། འགྲོན་བུ་དང ། གསེར་དང ། ནོར་བུ་དང ། མུ་ཏིག་དང ། བཻ་\?\་རྱ་དང ། དུང་དང ། མན་ཤེལ་དང ། བྱུ་རུ་དང ། དངུལ་དང ། ས་ལེ་སྦྲམ་དག་དགོས་ཀྱི། འཚོ་བའི་ཡོ་བྱད་མང་པོ་དག་ཁོ་བོ་ལ་ཕུལ་ཅིག་།གདོལ་བ་སྟོབས་ཅན་དེས་ཇི་སྲིད་འཚོ་བའི་བར་དུ་སེམས་ཅན་རྣམས་དགེ་བ་བཅུའི་ལས་ཀྱི་ལམ་ལ་རབ་ཏུ་བཀོད་པ་དང ། དེ་ནས་མི་དེ་དག་ཀྱང་ཚེ་ལོ་ལྔ་བརྒྱ་ཐུབ་པར་གྱུར་ཏོ། །དེ་ན་རྒྱལ་པོ་གང་ཡིན་པ་དེ་འཆི་བའི་དུས་བྱས་པར་གྱུར་པ་དང ། དེ་ནས་རྒྱལ་པོའི་བློན་པོ་དེ་དག་གིས་གདོལ་བ་སྟོབས་
430a
༄#། །ཅན་དེ་རྒྱལ་པོའི་དབང་བསྐུར་བས་དབང་བསྐུར་ཏེ་རྒྱལ་པོར་བཅུག་ནས་རྒྱལ་པོ་བསོད་ནམས་སྟོབས་ཞེས་བྱ་བར་གྱུར་ཏོ། །རིགས་ཀྱི་བུ། དེ་ནས་རྒྱལ་པོ་བསོད་ནམས་སྟོབས་ཀྱིས་རིང་པོ་མ་ལོན་པར་ཡུལ་དེར་རྗེས་སུ་བསྟན་ཏེ། བརྩོན་འགྲུས་བརྟན་ཞིང་རྟུལ་བས་ཡུལ་གཉིས་པར་ཡང་རྗེས་སུ་བསྟན་ནས་རྒྱལ་པོ་བསོད་ནམས་སྟོབས་རིང་པོ་མ་ལོན་པར་ཛམྦུའི་གླིང་ཐམས་ཅད་དུ་སྟོབས་ཀྱི་འཁོར་ལོས་བསྒྱུར་བའི་རྒྱལ་པོའི་བར་དུ་གྱུར་ཏོ། །གང་གི་ཚེ་རྒྱལ་པོ་བསོད་ནམས་སྟོབས་ཀྱིས་ཛམྦུའི་གླིང་ཐམས་ཅད་ཀྱི་རྒྱལ་སྲིད་བཟུང་ནས། དེའི་འོག་ཏུ་སེམས་ཅན་རྣམས་སྲོག་གཅོད་པ་སྤོང་བ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །དེ་བཞིན་དུ་མ་བྱིན་པར་ལེན་པ་དང ། ལོག་པར་ལྟ་བའི་བར་དག་སྤོང་བ་ཡང་དག་པར་འཛིན་དུ་བཅུག་ཅིང་བཙུད་དེ་ཡང་དག་པའི་ལྟ་བའི་བར་དག་ལ་རབ་ཏུ་བཀོད་དོ། །སེམས་ཅན་རྣམས་བསམ་པ་ཇི་ལྟ་བ་བཞིན་དུ་ཐེག་པ་གསུམ་པོ་དག་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །དེ་ནས་རྒྱལ་པོ་བསོད་ནམས་སྟོབས་ཀྱིས་ཛམྦུའི་གླིང་གི་སེམས་ཅན་ཐམས་ཅད་དགེ་བ་བཅུའི་ལས་ཀྱི་ལམ་དག་ལ་རབ་ཏུ་བཀོད་ཅིང་ཐེག་པ་གསུམ་པོ་དག་ལ་ངེས་
430b
པར་སྦྱར་ནས་ཛམྦུའི་གླིང་ཐམས་ཅད་དུ་སྒྲ་དབྱངས་རྗེས་སུ་བསྒྲགས་པ། སློང་མོ་པ་གང་སུ་དག་ཟས་འདོད་པ་དང ། རིན་པོ་ཆེའི་བར་དག་འདོད་པ་དེ་དག་ཐམས་ཅད་ཚུར་ཤོག་ཅིག་དང ། ངས་ཐམས་ཅད་ལ་སྦྱིན་པ་སྦྱིན་པར་བྱའོ་ཞེས་བསྒྲགས་སོ། །དེ་ནས་དུས་གཞན་ཞིག་གི་ཚེ་ན་ཛམྦུའི་གླིང་གི་སེམས་ཅན་ཐམས་ཅད་ལྷགས་ནས་རྒྱལ་པོ་བསོད་ནམས་སྟོབས་ལ་སློང་མོ་བྱེད་པར་གྱུར་པ་དང ། རྒྱལ་པོ་བསོད་ནམས་སྟོབས་ཀྱིས་ཀྱང་དེ་དག་ལས་བརྩམས་ཏེ་སྦྱིན་པ་རྣམ་པ་སྣ་ཚོགས་དག་བྱིན་ནོ། ། དེ་ནས་འཚོ་བ་པ་རྡུལ་དབྱངས་ཞེས་བྱ་བ་ཞིག་རྒྱལ་པོ་བསོད་ནམས་སྟོབས་ཀྱི་དྲུང་དུ་སོང་སྟེ་སྨྲས་པ། རྒྱལ་པོ་ཆེན་པོ། གལ་ཏེ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བཞེད་ཅིང་སྦྱིན་པ་ཆེན་པོ་རྣམ་པ་སྣ་ཚོགས་ཡོངས་སུ་གཏོང་བ་དག་ཡོངས་སུ་གཏོང་བར་མཛད་ལ། རྒྱལ་པོ་ཆེན་པོ། གལ་ཏེ་ཁྱོད་ཀྱིས་བདག་གི་བསམ་པ་ཡོངས་སུ་རྫོགས་པར་མཛད་པར་འགྱུར་ན་ནི། རྒྱལ་པོ་ཆེན་པོ་ཁྱོད་རྒྱལ་བ་འཇིག་རྟེན་གྱི་སྒྲོན་མར་འགྱུར་ལགས་སོ། །རྒྱལ་པོས་སྨྲས་པ། ཁྱོད་ཅི་ཞིག་འདོད། འཚོ་བ་པ་རྡུལ་དབྱངས་ཀྱིས་སྨྲས་པ། རྒྱལ་པོ་ཆེན་པོ། བདག་ནི་ལྷ་མ་ཡིན་གྱི་གཡུལ་ཆེན་པོར་རབ་ཏུ་འཇོམས་པའི་རིག་སྔགས་འཆང་ཉིད་འཚལ་ན། ཆོ་ག་ཞི་བ་མོ་བསྒྲུབ་
431a
༄#། །པའི་སླད་དུ་མི་གསོན་པོའི་པགས་པའང་འཚལ། མིག་ཀྱང་འཚལ་ཏེ། དེའི་སླད་དུ་བདག་ཁྱོད་ཀྱི་སྤྱན་སྔར་མཆིས་ནས་གསོལ་བ་བགྱིད་ལགས་སོ། །རིགས་ཀྱི་བུ། དེ་ནས་རྒྱལ་པོ་བསོད་ནམས་སྟོབས་འདི་སྙམ་དུ་སེམས་ཏེ། བདག་གིས་སྟོབས་ཀྱི་འཁོར་ལོས་བསྒྱུར་བ་ཉིད་ཐོབ་ནས་སེམས་ཅན་བགྲང་བ་ལས་འདས་པ་དག་ཅིག་དགེ་བ་བཅུའི་ལས་ཀྱི་ལམ་ལ་རབ་ཏུ་བཀོད་ཅིང ། ཐེག་པ་གསུམ་པོ་དག་ལའང་ངེས་པར་སྦྱར་ཏེ། བདག་གིས་སྦྱིན་པའང་དཔག་ཏུ་མེད་པ་ཞིག་བྱིན་ན། དེ་ནི་སྙིང་པོ་མེད་པའི་ལུས་ལས་སྙིང་པོ་ལེན་པར་བྱེད་པ་ཞིག་སྟེ། བདག་གི་དགེ་བའི་བཤེས་གཉེན་ཡིན་ནོ་སྙམ་ནས་རྒྱལ་པོས་སྨྲས་པ། ངས་ཁྱོད་ལ་ཤའི་མིག་ཐ་མལ་པ་འདི་སྦྱིན་པར་བྱའི། དགའ་བར་གྱིས་ཤིག་།དེས་ནི་བདག་གིས་བླ་ན་མེད་པའི་ཆོས་ཀྱི་སྤྱན་ཐོབ་པར་གྱུར་ཅིག་།ངས་ཁྱོད་ལ་རབ་ཏུ་དང་བའི་སེམས་ཀྱིས་རང་གི་པགས་པ་འདིའང་སྦྱིན་པར་བྱའི། དེས་ནི་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་གྱུར་ཅིག་།རིགས་ཀྱི་བུ། དེ་ནས་རྒྱལ་པོ་བསོད་ནམས་སྟོབས་ཀྱིས་ལག་པ་གཡས་པས་རང་གི་མིག་གཉིས་ཕྱུང་སྟེ་འཚོ་བ་པ་ལ་བྱིན་ནས་གདོང་ཁྲག་གིས་ཡོག་བཞིན་
431b
དུ་སྨྲས་པ། འདི་ན་གང་དག་འདིར་ལྷགས་པ་དང ། ནམ་མཁའ་ལ་རྒྱུ་བ་དང ། ས་ལ་གནས་པའི་ལྷ་རྣམས་དང ། གནོད་སྦྱིན་མཐུ་ཆེན་པོ་རྣམས་དང ། མིའམ་ཅི་གང་ཡིན་པ་རྣམས་དང ། ལྷ་མ་ཡིན་གང་ཡིན་པ་རྣམས་དང ། འབྱུང་པོ་གང་ཡིན་པ་རྣམས་དང ། མི་གང་ཡིན་པ་རྣམས་བདག་ལ་ཉོན་ཅིག་།བདག་གིས་སྦྱིན་པ་བྱང་ཆུབ་ཏུ་བསྔོས་པའི་དགེ་བས་ཞི་བའི་གོ་འཕང་ཐོབ་པར་གྱུར་ནས། བདག་གིས་སེམས་ཅན་རྣམས་འཁོར་བའི་རྒྱ་མཚོ་མི་ཟད་པ་ལས་སྒྲོལ་ཞིང་བླ་ན་མེད་པའི་ཞི་བ་མྱ་ངན་ལས་འདས་པ་ལ་འགོད་པར་གྱུར་ཅིག་།ཡང་སྨྲས་པ། གལ་ཏེ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་བ་ལྟ་ན། ཇི་སྲིད་དུ་འཚོ་བ་པ་འདིའི་རིག་སྔགས་དེ་གྲུབ་པར་མ་གྱུར་པ་དེ་སྲིད་ཀྱི་བར་དུ་བདག་གི་སྲོག་གི་དབང་པོ་འགག་པར་མ་གྱུར་ཅིག་།བདག་གི་དྲན་པའང་ཉམས་པར་མ་གྱུར་ཅིག་།བདག་འགྱོད་པར་ཡང་མ་གྱུར་ཅིག ། རིགས་ཀྱི་བུ། རྒྱལ་པོས་པགས་པའང་ཁྱེར་ཅིག་ཅེས་སྨྲས་པ། འཚོ་བ་པ་རྡུལ་དབྱངས་དེས་མཚོན་རྣོན་པོ་བླངས་ཏེ། རྒྱལ་པོ་གསོན་པོའི་ལུས་ལས་པགས་པ་བཤུས་ནས་པགས་པ་ཁྱེར་ཏེ་རིག་སྔགས་བསྒྲུབས་སོ། །དེ་ལྟར་ཞག་བདུན་གྱི་བར་དུ་རྒྱལ་པོ་བསོད་ནམས་སྟོབས་ཀྱི་སྲོག་གི་དབང་པོའང་མ་འགགས། དྲན་པའང་མ་ཉམས། སྡུག་
432a
༄#། །བསྔལ་གྱི་ཚོར་བ་དེའང་མི་མྱོང་ལ། དེ་ལ་སྐད་ཅིག་ཙམ་ཡང་འགྱོད་པ་སྐྱེས་པར་མ་གྱུར་ཏོ། །རིགས་ཀྱི་བུ། འདི་ཇི་སྙམ་དུ་སེམས། དེའི་ཚེ་དེའི་དུས་ན་སྙིང་རྗེ་ཆེན་པོ་དང་ལྡན་པ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན་གཞན་དུ་མི་བལྟ་སྟེ། ང་དེའི་ཚེ་དེའི་དུས་ན་དེ་བཞིན་གཤེགས་པ་རིན་པོ་ཆེའི་སྙིང་པོའི་ཡབ་སྙིང་རྗེ་ཆེན་པོ་དང་ལྡན་པ་ཞེས་བྱ་བ་དེར་གྱུར་ཏོ། །ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་པའི་དང་པོ་ནི་དེ་ཡིན་ནོ། ། ངས་དང་པོ་སེམས་བསྐྱེད་པས་སེམས་ཅན་བགྲང་བ་ལས་འདས་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་སྟེ། ངའི་དཔའ་བའི་དངོས་པོ་དང ། དཔའ་བོའི་བྱ་བ་དང་པོ་ནི་དེ་ཡིན་ནོ། །ང་སྨོན་ལམ་གྱི་དབང་གིས་དེ་ནས་ཤི་འཕོས་ནས་སངས་རྒྱས་ཀྱི་ཞིང་ཡང་དག་འདྲེན་དུ་གདོལ་པའི་རིགས་སུ་སྐྱེས་པ་དེའི་ཚེ་ན། ངས་གདོལ་བའི་རིགས་སུ་གནས་ནས་སེམས་ཅན་རྣམས་དགེ་བ་ལ་སྦྱར་ཅིང་རང་གི་སྟོབས་དང་རྟུལ་བས་སྟོབས་ཀྱི་འཁོར་ལོས་བསྒྱུར་བ་ཉིད་ཐོབ་པའི་བར་དང ། ཛམྦུའི་གླིང་ཐམས་ཅད་དུ་འཐབ་པ་དང་རྩོད་པའི་རྙོག་པ་རྣམས་རབ་ཏུ་ཞི་བར་བྱས་ཤིང ། ཚེའང་བསྲིངས་ཏེ་ངས་དང་པོ་ལུས་ཡོངས་སུ་བཏང་བ་དེ་ནི་ངའི་
432b
དཔའ་བའི་དངོས་པོ་དང ། དཔའ་བོའི་བྱ་བ་གཉིས་པ་ཡིན་ནོ། །གང་གི་ཚེ་ངས་རང་གི་མིག་དག་ཡོངས་སུ་བཏང་ཞིང་རང་གི་པགས་པའང་ཡོངས་སུ་བཏང་སྟེ། དེ་ནས་ཤི་འཕོས་ནའང་སྨོན་ལམ་གྱི་དབང་གིས་སངས་རྒྱས་ཀྱི་ཞིང་ཡང་དག་འདྲེན་དེ་ཉིད་ཀྱི་གླིང་གཉིས་པར་གདོལ་པའི་རིགས་སུ་སྐྱེས་ནས་སྔ་མ་བཞིན་དུ་སྦྱར་ཏེ། དེར་ཡང་ངས་བརྩོན་འགྲུས་བརྟན་ཞིང་རྟུལ་བ་དེ་ལྟ་བུས་སེམས་ཅན་རྣམས་དགེ་བའི་ལས་དག་ལ་ངེས་པར་སྦྱར་ནས་སྟོབས་ཀྱི་འཁོར་ལོས་བསྒྱུར་བའི་བར་ཡང་ཐོབ་སྟེ། དེར་ཡང་འཐབ་པ་དང ། རྩོད་པའི་རྙོག་པ་དང ། འཁོན་པ་དང ། འགྱོད་པ་དག་རབ་ཏུ་ཞི་བར་བྱས་ཏེ་ཚེའང་བསྲིངས་སོ། །དེར་ཡང་རང་གི་ལུས་ལས་ལྕེ་དང ། རྣ་བ་དག་ཡོངས་སུ་བཏང་བ་ན་སངས་རྒྱས་ཀྱི་ཞིང་ཡང་དག་འདྲེན་གྱི་སྟོང་ཆེན་པོ་དེ་ཀུན་གྱི་གླིང་ཐམས་ཅད་ཀྱི་བར་དུའང་སྐྱེས་བུའི་རྩལ་དེ་ལྟ་བུ་དག་བྱས་སོ། །སྨོན་ལམ་དང་བརྩོན་འགྲུས་བརྟན་ཞིང་རྟུལ་པ་རྗེས་སུ་འབྲེལ་པ་དང ། སྨོན་ལམ་གྱི་དབང་གིས་སྙིགས་མ་ལྔ་དང་ལྡན་པའི་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དག་ཏུའང་སེམས་ཅན་རྣམས་དགེ་བའི་རྩ་བ་དེ་དག་ལ་ངེས་པར་སྦྱར་ཅིང་ཐེག་པ་གསུམ་པོ་དག་ཡང་དག་པར་འཛིན་དུ་བཅུག་སྟེ། འཐབ་པ་དང་རྩོད་པའི་རྙོག་པ་དང ། ཉོན་མོངས་པ་དང ། འཁོན་པ་དང ། འགྱེད་པ་
433a
༄#། །རྣམས་རབ་ཏུ་ཞི་བར་བྱས་ཤིང་སྐྱེས་བུ་ཆེན་པོའི་རྩལ་དེ་ལྟ་བུ་དག་བྱས་སོ། །རིགས་ཀྱི་བུ། སངས་རྒྱས་བཅོམ་ལྡན་འདས་གཞན་དག་གི་སངས་རྒྱས་ཀྱི་ཞིང་ཡོངས་སུ་དག་པ་ནི་འདིའི་ཕྱིར་ཏེ། གང་གི་ཚེ་སངས་རྒྱས་བཅོམ་ལྡན་འདས་དེ་དག་སྔོན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སྤྱད་པ་སྤྱོད་པ་ན་གཞན་གྱི་ལྟུང་བ་གླེང་བར་མི་བྱེད་ཅིང་གཞན་ལ་འཇིགས་པ་སྟོན་པར་མི་བྱེད་ལ། སེམས་ཅན་རྣམས་ཉན་ཐོས་དང ། རང་སངས་རྒྱས་ཀྱི་ཐེག་པ་ཡང་དག་པར་འཛིན་དུ་མ་བཅུག་པས་ན། དེའི་ཕྱིར་སངས་རྒྱས་བཅོམ་ལྡན་འདས་དགོངས་པ་ཡོངས་སུ་རྫོགས་པ་དེ་དག་གི་སངས་རྒྱས་ཀྱི་ཞིང་ཡོངས་སུ་དག་པར་གྱུར་ཏེ། སངས་རྒྱས་ཀྱི་ཞིང་དེ་ན་ལྟུང་བའི་མིང་ཡང་མེད་ལ། བསླབ་པ་གཟུང་བའང་མེད། ཚིག་རྩུབ་པོའང་མི་གྲག་།མི་དགེ་བའི་སྒྲའང་མི་གྲག་སྟེ། གཞན་དུ་ན་སངས་རྒྱས་ཀྱི་ཞིང་དེ་ཆོས་ཀྱི་སྒྲ་དང ། ཡིད་དུ་མི་འོང་བ་མེད་པའི་སྒྲས་ཁྱབ་པ་ཡིན་ནོ། །དེ་ན་སེམས་ཅན་རྣམས་ཀྱང་ཇི་ལྟར་འདོད་པ་བཞིན་དུ་བྱེད་པ་ཡིན་ཏེ། དེ་ན་ཉན་ཐོས་དང་རང་སངས་རྒྱས་ཀྱི་ཐེག་པའི་མིང་དུ་གདགས་པ་ཙམ་ཡང་མི་སྲིད་དོ། །ངས་ནི་གང་གི་ཚེ་བསྐལ་པ་ཆེན་པོ་གངྒཱའི་ཀླུང་གི་བྱེ་མ་
433b
སྙེད་དུ་སྙིགས་མ་ལྔ་དང་ལྡན་པའི་སངས་རྒྱས་ཀྱི་ཞིང་སྟོང་པ་གངྒཱའི་ཀླུང་གི་བྱེ་མ་སྙེད་དག་ཏུ་ཚིག་རྩུབ་པོ་དང་འཇིགས་སུ་རུང་བས་སེམས་ཅན་རྣམས་སྲོག་གཅོད་པ་སྤོང་བ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་པ་ནས། ཐེག་པ་གསུམ་པོ་དག་ཀྱང་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་པའི་བར་དུ་བྱས་པས་ན། དེའི་ལས་ཀྱི་འཕྲོས་ད་ལྟར་ང་ཉོན་མོངས་པ་དང་ལྡན་ཞིང་མི་དགེ་བའི་སྒྲས་ཀུན་ཏུ་ཁྱབ་ལ། མི་དགེ་བའི་རྩ་བ་དང་ལྡན་པའི་སེམས་ཅན་རྣམས་ཀྱིས་ཡོངས་སུ་གང་བའི་སངས་རྒྱས་ཀྱི་ཞིང་འདི་ལྟ་བུ་ན་ཐེག་པ་གསུམ་གྱིས་ཆོས་སྟོན་ཏེ། ངས་ནི་སྔོན་ཇི་ལྟར་སྨོན་ལམ་བཏང་བ་དེ་ལྟ་བུའི་སངས་རྒྱས་ཀྱི་ཞིང་ཡོངས་སུ་བཟུང་ཞིང ། ངས་འདུལ་བའི་སེམས་ཅན་ཇི་ལྟ་བུ་དག་ཡོངས་སུ་བཟུང་བ་དེ་ལྟ་བུ་ཁོ་ནའི་སྟོབས་དང ། བརྩོན་འགྲུས་དང ། འབད་པས་བྱང་ཆུབ་ཀྱི་སྤྱོད་པ་སྤྱད་དེ། སྨོན་ལམ་ཇི་ལྟ་བུ་བཏབ་ཅིང ། ས་བོན་ཅི་འདྲ་བ་བཏབ་པ་དེ་འདྲ་བའི་སངས་རྒྱས་ཀྱི་ཞིང་ཐོབ་བོ།། །།བམ་པོ་བཅུ་བཞི་པ། རིགས་ཀྱི་བུ། ཇི་ལྟར་ངས་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྦྱིན་པ་ཡོངས་སུ་གཏོང་བ་ཡོངས་སུ་བཏང་བ་ལྟར། སྔོན་གྱི་བྱང་ཆུབ་སེམས་དཔའ་གང་གིས་ཀྱང་དེ་ལྟ་བུའི་སྦྱིན་པ་ཡོངས་སུ་གཏོང་བ་ཡོངས་
434a
༄#། །སུ་མ་བཏང་ལ། ཇི་ལྟར་ངས་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྦྱིན་པ་ཡོངས་སུ་གཏོང་བ་ཡོངས་སུ་བཏང་བ་ལྟར་ཕྱིས་འབྱུང་བར་འགྱུར་བའི་བྱང་ཆུབ་སེམས་དཔའ་གང་ཡང་བྱང་ཆུབ་སེམས་དཔའི་སྤྱད་པ་སྤྱོད་པ་ན་དེ་ལྟ་བུའི་སྦྱིན་པ་ཡོངས་སུ་གཏོང་བ་ཡོངས་སུ་གཏོང་བར་མི་འགྱུར་བའི་སྦྱིན་པའི་ཕ་རོལ་ཏུ་ཕྱིན་པ་མདོར་བསྡུས་ཏེ་ཁྱོད་ལ་བཤད་པར་བྱའོ། །སྐྱེས་བུ་དམ་པ་བརྒྱད་ནི་མ་གཏོགས་ཏེ། སྐྱེས་བུ་དམ་པ་སས་བྱིན་ཞེས་བྱ་བར་གྱུར་པ་ནི་ལྷོ་ཕྱོགས་ལོགས་སུ་འཇིག་རྟེན་གྱི་ཁམས་ཀུན་དབྱངས་ཞེས་བྱ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་བཞིན་གཤེགས་པ་འདྲེས་སྤོང་འོད་ཟེར་ཞེས་བྱ་བར་གྱུར་ནས་སྐྱེ་དགུ་ཚེ་ལོ་བརྒྱ་བ་རྣམས་ལ་ཆོས་སྟོན་ཅིང་ཞག་བདུན་ན་ཡོངས་སུ་མྱ་ངན་ལས་འདའ་བར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་བརྩོན་འགྲུས་ཡང་དག་སྐུལ་ཞེས་བྱ་བ་དེ་ནི་ཤར་ཕྱོགས་ལོགས་སུ་འཇིག་རྟེན་གྱི་ཁམས་མི་ཕམ་ཅན་ཞེས་བྱ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། སྐྱེ་དགུའི་ཚེ་ལོ་བརྒྱ་པ་རྣམས་ལ་བསྐལ་པ་གངྒཱའི་གི་བྱེ་མ་སྙེད་ལས་ལྷག་པ་སྙེད་དུ་སངས་
434b
རྒྱས་ཀྱི་མཛད་པ་མཛད་ནས་དེའི་ཚེ་དེ་བཞིན་གཤེགས་པ་དེ་བླ་ན་མེད་པའི་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདས་ཏེ། ད་དུང་དུའང་ཐུགས་རྗེ་ཆེན་པོ་དང་ལྡན་པ་དེའི་སྐུ་གདུང་རྣམས་སྙིགས་མ་ལྔ་དང་ལྡན་པའི་སངས་རྒྱས་ཀྱི་ཞིང་སྟོང་པ་དག་ན་སངས་རྒྱས་ཀྱི་མཛད་པ་མཛད་དོ། །དེ་བཞིན་དུ་བྱང་ཆུབ་སེམས་དཔའ་སྙིང་པོ་མེ་ཏོག་རྒྱས་ཞེས་བྱ་བ་ནི་བརྩོན་འགྲུས་དང ། ཡི་དམ་བརྟན་པ་དང ། ཡོངས་སུ་གཏོང་བའི་སྟོབས་ཀྱི་ཤུགས་ཀྱིས་བྱང་ཆུབ་སེམས་དཔའི་སྤྱད་པ་སྤྱོད་དེ། དེ་བསྐལ་པ་ཆེན་པོ་གངྒཱའི་ཀླུང་བཅུའི་བྱེ་མ་སྙེད་འདས་པའི་འོག་ཏུ་འདི་ནས་བྱང་ཕྱོགས་ལོགས་སུ་སྙིགས་མ་ལྔ་དང་ལྡན་པའི་སངས་རྒྱས་ཀྱི་ཞིང་རྒྱུར་བཅས་ཡང་དག་འདྲེན་ཅེས་བྱ་བ་ཞིག་འབྱུང་བར་འགྱུར་བ་དེར་སྐྱེས་བུ་དམ་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱུར་བཅས་ནག་པོ་རྣམ་པར་འཇོམས་པའི་རྒྱལ་པོ་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་རོ། །བྱང་ཆུབ་སེམས་དཔའ་ཤེས་རབ་འོད་ཟེར་ཀུན་ནས་འཁྲུགས་འཛིན་ཅེས་བྱ་བའི་སྐྱེས་བུ་དམ་པ་དེ་ནི་བསྐལ་པ་ཆེན་པོ་གཅིག་འདས་ནས་ནུབ་ཕྱོགས་
435a
༄#། །ལོགས་སུ་སྙིགས་མ་ལྔ་དང་ལྡན་པའི་འཇིག་རྟེན་གྱི་ཁམས་འཇིགས་ལྡན་ཞེས་བྱ་བ་ཞིག་འབྱུང་བར་འགྱུར་བ་དེར་སྐྱེ་དགུའི་ཚེ་ལོ་བརྒྱ་པའི་ནང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་མའི་སྙིང་པོའི་འོད་ཟེར་དྲི་མ་མེད་པའི་དབང་པོ་ཞེས་བྱ་བ་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་རོ། །ལེགས་དགའ་འདིའང་བསྐལ་པ་བགྲང་བ་ལས་ཡང་དག་པར་འདས་པ་སྙེད་རྫོགས་པའི་འོག་ཏུ། སྟེང་གི་ཕྱོགས་ལོགས་སུ་བསྐལ་པ་ཆེན་པོ་རྩོད་རྙོག་མི་བཟད་ཡང་དག་འཁྲུག་ཅེས་བྱ་བ་ལ་སྙིགས་མ་ལྔ་དང་ལྡན་པའི་འཇིག་རྟེན་གྱི་ཁམས་འགྱུར་བྱེད་ཀྱི་མི་གཙང་བསགས་ཞེས་བྱ་བ་ཞིག་འབྱུང་བར་འགྱུར་ཏེ། ལེགས་དགའ་འདི་སྔོན་གྱི་སྨོན་ལམ་གྱི་དབང་གིས་སངས་རྒྱས་ཀྱི་ཞིང་འགྱུར་བྱེད་མི་གཙང་བསགས་ཞེས་བྱ་བ་དེར་སྐྱེ་དགུའི་ཚེ་ལོ་ལྔ་བཅུ་པ་རྣམས་ཀྱི་ནང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་བསམ་ཡས་རྣམ་པར་སྣང་མཛད་ཅེས་བྱ་བ་སངས་རྒྱས་
435b
བཅོམ་ལྡན་འདས་ཀྱི་བར་དུ་འགྱུར་ཞིང ། དེ་སྔོན་གྱི་སྨོན་ལམ་གྱི་དབང་གིས་ལོ་བཅུས་སངས་རྒྱས་ཀྱི་མཛད་པ་མཐའ་དག་མཛད་ནས་ཡོངས་སུ་མྱ་ངན་ལས་འདའ་བར་འགྱུར་ཏེ། དེ་ཉིད་ཀྱི་ཉིན་མོ་དེ་བཞིན་གཤེགས་པ་དེའི་དམ་པའི་ཆོས་ཀྱང་ནུབ་པར་འགྱུར་ཞིང་ལོ་བཅུའི་བར་དུ་སངས་རྒྱས་ཀྱི་ཞིང་དེ་སྟོངས་པར་འགྱུར་རོ། །དེའི་འོག་ཏུ་བྱང་ཆུབ་སེམས་དཔའ་རབ་ཏུ་ལག་བརྐྱང་འདི་སྔོན་གྱི་སྨོན་ལམ་གྱི་དབང་གིས་སངས་རྒྱས་ཀྱི་ཞིང་འགྱུར་བྱེད་མི་གཙང་བསགས་དེར་སྐྱེ་དགུའི་ཚེ་ལོ་སུམ་ཅུ་པ་རྣམས་ཀྱི་ནང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྣམ་པར་སྣང་མཛད་ཅེས་བྱ་བ་སངས་རྒྱས་བཅོམ་ལྡན་འདས་ཀྱི་བར་དུ་འགྱུར་ཞིང ། དེའང་སྔོན་གྱི་སྨོན་ལམ་གྱི་དབང་གིས་ལོ་བཅུས་སངས་རྒྱས་ཀྱི་མཛད་པ་མཐའ་དག་མཛད་ནས། ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་འགྱུར་ཏེ། དེའི་དམ་པའི་ཆོས་ནི་ལོ་བདུན་དུ་གནས་པར་འགྱུར་རོ། །དེ་ནས་སྐྱེས་བུ་དམ་པ་དེ་གཉིས་ཀྱིས་སྔར་ལུང་བསྟན་པ་ཐོབ་ཅིང་བླ་ན་མེད་པ་ཡང་དག་པར་རྫོགས་
436a
༄#། །པའི་བྱང་ཆུབ་ཀྱི་རོ་མྱང་བ་ཐོབ་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། དགའ་བ་དང ། ཡིད་བདེ་བ་དང ། མཆོག་ཏུ་དགའ་བས་ཏ་ལ་བདུན་སྲིད་ཙམ་དུ་སྟེང་གི་བར་སྣང་ལ་མངོན་པར་འཕགས་ཤིང་ཐལ་མོ་སྦྱར་ཏེ་འཁོད་ནས། བཅོམ་ལྡན་འདས་ལ་དབྱངས་གཅིག་གིས་ཚིགས་སུ་བཅད་དེ་གསོལ་པ། སངས་རྒྱས་ཉི་མ་བཞིན་དུ་ལྷང་དེ་ཞིང ། །འཇིག་རྟེན་འདི་ན་མངོན་འཕགས་ལྷུན་པོ་འདྲ། །རྣམ་འདྲེན་རྡུལ་བྲལ་རྣམ་དག་སྤྱན་མངའ་བ། སྣང་གྱུར་བ་དེ་གཤེགས་ཁྱོད་ལ་ཕྱག་འཚལ་ལོ། །ཁྱོད་ནི་བྱང་ཆུབ་དམ་པ་འཚོལ་བ་ན། །བསྐལ་པ་མང་པོར་ཁྱོད་ཀྱིས་བརྩོན་འགྲུས་བསྒོམས། །ཁྱོད་ཀྱི་སྔོན་གྱི་རྒྱལ་མང་གང་མཆོད་པ། །འདས་པའི་འདྲེན་པ་དེ་ཡིས་ལུང་མ་བསྟན། །འདོད་ཆགས་སྤངས་པ་ཡོངས་གྲོལ་ཐུགས་མངའ་བ། ཁྱོད་འདིར་འཇིག་རྟེན་ཀུན་ཏུ་མཛད་པ་མཛད། །ལམ་སྟོར་རྣམས་ལ་ཆོས་ཀྱང་སྟོན་མཛད་ཅིང ། །སེམས་ཅན་རྣམས་ཀྱང་སྲིད་པའི་མཚོ་ལས་བསྒྲལ། །རང་བྱུང་བསྟན་ལ་བདག་ཅག་རབ་བྱུང་ཞིང ། །དབང་པོ་མཉམ་གཞག་རྒྱལ་བས་བསྟན་པ་ཡི། །སོ་སོར་ཐར་པའི་བསླབ་པ་དེ་བསླབས་ནས། །བདག་ཅག་རྟག་ཏུ་ཁྱོད་དང་ཉེར་གྱུར་ཅིག་།སྲོག་ལ་བརྟེན་པ་མ་མཆིས་ཆོས་འཚལ་
436b
ཞིང ། །སྟོན་པར་འདུ་ཤེས་ཆོས་རྣམས་མཉན་བགྱིས་ནས། །རྒྱལ་བས་མངོན་པར་ལུང་བསྟན་དོན་དེ་ཡི། །རོ་མྱང་དབང་བསྐུར་ས་ཡང་ཐོབ་གྱུར་ཅིག་།བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། སྐྱེས་བུ་དམ་པ་ལེགས་དགའ་དང ། རབ་ཏུ་ལག་བརྐྱང་ཞེས་བྱ་བ་དེ་གཉིས་དང ། སས་བྱིན་དང ། བརྩོན་འགྲུས་ཡང་དག་སྐུལ་དང ། སྙིང་པོ་མེ་ཏོག་རྒྱས་དང ། ཤེས་རབ་འོད་ཟེར་ཀུན་འཁྲུགས་འཛིན་ཅེས་བྱ་བ་བཞི་དང ། སྐྱེས་བུ་དམ་པ་དྲུག་པོ་དེ་དག་གིས་བྱང་ཆུབ་ཏུ་སེམས་བསྐྱེད་པ་ལས་ངས་དང་པོ་བྱང་ཆུབ་ཡང་དག་པར་འཛིན་དུ་བཅུག་པ་དེ་དག་ཉོན་ཅིག་།རིགས་ཀྱི་བུ། སྔོན་བྱུང་བ་འདས་པའི་དུས་ནས་བསྐལ་པ་གྲངས་མེད་དཔག་ཏུ་མེད་པ་འདས་པར་གྱུར་པ་དེའི་ཚེ་དེའི་དུས་ན་སངས་རྒྱས་ཀྱི་ཞིང་འདི་རྡུལ་མེད་ལྷུན་པོ་སྤོས་ཞེས་བྱ་བར་གྱུར་ཏེ། རིགས་ཀྱི་བུ། དེའི་ཚེ་བསྐལ་པ་ཆེན་པོ་བྱུང་བ་ན་སྐྱེ་དགུའི་ཚེ་ལོ་བརྒྱ་ཐུབ་ཅིང་དེ་བཞིན་གཤེགས་པ་སྤོས་ཀྱི་པདྨའི་བསྟན་པ་དམ་པའི་ཆོས་ཀྱི་གཟུགས་བརྙན་དུ་གྱུར་པ་དེའི་ཚེ་དེའི་དུས་ན་ང་ཛམྦུའི་གླིང་ལས་རྣམ་པར་རྒྱལ་བའི་སྟོབས་ཀྱི་འཁོར་ལོས་བསྒྱུར་བ་ནོར་ངན་ཅེས་བྱ་བར་གྱུར་ཅིང་བུའང་སྟོང་ཡོད་པར་གྱུར་ནས། ངས་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་
437a
༄#། །གོ་།དེ་དག་ཀྱང་དུས་གཞན་ཞིག་ན་མངོན་པར་བྱུང་སྟེ། དེ་བཞིན་གཤེགས་པ་སྤོས་ཀྱི་པདྨའི་བསྟན་པ་ལ་རབ་ཏུ་བྱུང་ནས་དེ་དག་གིས་དེ་བཞིན་གཤེགས་པ་སྟོབས་ཀྱི་པདྨའི་བསྟན་པ་རྒྱ་ཆེར་འབར་བ་བྱས་སོ། །གང་དག་རབ་ཏུ་མ་བྱུང་ཞིང་བྱང་ཆུབ་ཏུ་སེམས་བསྐྱེད་པར་མི་འདོད་པ་བུ་དྲུག་ཅིག་མ་གཏོགས་ཏེ།་ངས་དེ་དག་ལ་ཡང་དང་ཡང་དུ་བསྒོ་བ། ཁྱེད་ཅག་བསམ་པ་ཇི་ལྟ་བུ་ཞིག་གིས་ན་ཁྱེད་རབ་ཏུ་མི་འབྱུང་ཞིང་བྱང་ཆུབ་ཏུ་སེམས་བསྐྱེད་པར་མི་བྱེད། །དེ་དག་གིས་སྨྲས་པ། བདག་ཅག་ནི་རབ་ཏུ་མི་འབྱུང་ལགས་སོ། །དེ་ཅིའི་སླད་དུ་ཞེ་ན། གང་ཟག་པའི་དུས་ཀྱི་མཐར་དམ་པའི་ཆོས་གཟུགས་བརྙན་དུ་གྱུར་པ་ན་རབ་ཏུ་བྱུང་བ་དེས་ནི་ཚུལ་ཁྲིམས་ཀྱི་ཕུང་པོ་མཐའ་དག་ཀུན་ཏུ་འཛིན་པར་ཡང་རྡོ་མི་ཐོགས་ལ། དེ་ནོར་བདུན་དང་ཡང་བྲལ་བར་འགྱུར་ཞིང་འཁོར་བའི་འདམ་དུ་བྱིང་ནས། དེས་སླར་རེས་འགའ་ཞིག་ལྷ་དང་མིའི་དཔལ་ཐོབ་པར་བས་ཀྱི། རྟག་ཏུ་ངན་སོང་གསུམ་པོ་དག་ཏུ་ཡོངས་སུ་འཁམས་པར་འགྱུར་ཞིང ། སངས་རྒྱས་ཀྱི་བསླབ་པ་ཡང་དག་པར་འཛིན་པར་མི་འགྱུར་ཏེ། དེའི་སླད་དུ་བདག་ཅག་རབ་ཏུ་མི་འབྱུང་ལེགས་སོ། །དེས་\?\་ཡང་དེ་དག་ལ་དྲིས་པ། ཁྱེད་ཅག་ཅིའི་ཕྱིར་བྱང་ཆུབ་ཏུ་སེམས་བསྐྱེད་པར་
437b
མ་བྱེད། །དེ་དག་གིས་སྨྲས་པ། གལ་ཏེ་བདག་ཅག་ལ་ཛམྦུའི་གླིང་ཐམས་ཅད་སྩལ་ན། དེ་ལྟ་ན་བདག་ཅག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །རིགས་ཀྱི་བུ། ངས་དེ་ཐོས་ནས་མཆོག་ཏུ་དགའ་བའི་ཡིད་ཀྱིས་འདི་སྙམ་དུ་བསམས་ཏེ། ངས་ཛམྦུའི་གླིང་གི་མི་ཐམས་ཅད་གསུམ་ལ་སྐྱབས་སུ་འགྲོ་བ་ལ་རབ་ཏུ་བཀོད་ཅིང་འཕགས་པའི་གསོ་སྦྱོང་ཡན་ལག་བརྒྱད་དང་ལྡན་པ་ལ་གནས་པ་ཡང་ཡང་དག་པར་འཛིན་དུ་བཅུག་སྟེ། ཐེག་པ་གསུམ་པོ་དག་ཀྱང་ཡང་དག་པར་འཛིན་དུ་བཅུག་ཟིན་གྱི། གང་བདག་གིས་ཛམྦུའི་གླིང་འདི་ཆ་དྲུག་ཏུ་བགོས་ཏེ་བུ་དྲུག་པོ་དག་ལ་བྱིན་ལ། བྱིན་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་གཞུག་ཅིང་བདག་ཀྱང་མངོན་པར་བྱུང་སྟེ། རབ་ཏུ་བྱུང་བར་བྱ་གོར་མ་ཆག་སྙམ་ནས་ངས་དེ་བཞིན་དུ་ཛམྦུའི་གླིང་ཐམས་ཅད་ཆ་དྲུག་ཏུ་བགོས་ཏེ། བུ་དྲུག་པོ་དག་ལ་བྱིན་ནས་བདག་ཀྱང་མངོན་པར་བྱུང་སྟེ། རབ་ཏུ་བྱུང་བ་དང ། ཛམྦུའི་གླིང་གི་རྒྱལ་པོ་དེ་དག་ཀྱང་ཕན་ཚུན་མི་མཐུན་ཞིང་འཐབ་པ་དང ། མཚང་འདྲུ་བ་དང ། འགྱེད་པ་དང ། ནད་དང ། ཕ་རོལ་གྱི་འཁོར་གྱིས་འཁྲུག་པ་དང ། རྩོད་བ་དག་བྱུང་ངོ ། །དེའི་ཕྱིར་ཛམྦུའི་གླིང་ཐམས་ཅད་དུ་མུ་གེ་བྱུང་སྟེ། ལོ་ཏོག་རྣམས་ཀྱང་མི་སྐྱེ།
438a
༄#། །ཆར་པའང་མི་འབབ། ཤིང་ལྗོན་པ་དག་ལས་ཀྱང་ལོ་མ་དང ། མེ་ཏོག་དང ། འབྲས་བུ་དག་མི་སྐྱེ། སྨན་དང ། རྩཝ་དག་ཀྱང་མི་སྐྱེ་བས་རི་དྭགས་དང་བྱ་རྣམས་ཀྱང་བཀྲེས་པ་དང ། སྐོམ་པས་ལུས་རབ་ཏུ་འབར་ཞིང་ཉམ་ཐག་པར་གྱུར་ཏོ། །དེའི་ཚེ་ན་ང་འདི་སྙམ་དུ་སེམས་ཏེ། ངས་ད་ལྟར་གྱི་ལུས་འདི་ཡོངས་སུ་བཏང་སྟེ། རང་གི་ཤ་དང་ཁྲག་གིས་སེམས་ཅན་རྣམས་ཚིམ་པར་བྱའོ་སྙམ་ནས། དེ་ནས་ངས་གནས་ཡོངས་སུ་སྤངས་ཏེ། ཡུལ་གྱི་དབུས་སུ་སོང་ནས་རི་ཆུ་སྐྱོང་ཞེས་བྱ་བ་ལ་འཛེགས་ཏེ་སྨོན་ལམ་བཏབ་པ། འདི་ལྟར་རང་གི་ལུས་སྲོག་གཏོང་བ་ནི། །སྙིང་རྗེའི་ཕྱིར་ཏེ་མཐོ་རིས་ཕྱིར་མ་ཡིན། །རི་འདིའི་འཕང་ཙམ་དག་ཏུ་གྱུར་ནས་ནི། །ལྷར་བཅས་འཇིག་རྟེན་དོན་དུ་འགྱུར་བར་ཤོག། །འདི་ལྟར་གཟུགས་མཛེས་ཕུན་སུམ་གཏོང་བ་ནི། བདུད་ཕྱི་མ་ཡིན་བརྒྱ་བྱིན་ཚངས་ཕྱིར་མིན། ། བདག་གི་ཤ་ཁྲག་མང་པོར་གྱུར་ནས་ནི། །ལྷར་བཅས་འཇིག་རྟེན་དོན་དུ་བྱེད་གྱུར་ཅིག་།གང་དག་རི་དང་བྲག་ལ་གནས་པ་ཡི། །ལྷ་ཀླུ་གནོད་སྦྱིན་ལྷ་མིན་མི་རྣམས་ཉོན། །སེམས་ཅན་ཕྱིར་ནི་བདག་གིས་བརྩེ་བསྐྱེད་དེ། རང་གི་ཤ་ཁྲག་དག་གིས་ཚིམ་པར་བྱ། གང་གི་ཚེ་ངས་སྨོན་ལམ་དེ་ལྟ་བུ་བཏབ་པ་ན། འཇིག་རྟེན་གསུམ་
438b
འཁྲུགས་ཤིང་སའང་གཡོས། ལྷུན་པོའང་འགུལ་།ལྷའི་ཚོགས་རྣམས་ཀྱང་དུའོ། །དེ་ནས་ངས་རང་གི་ལུས་རི་ཆུ་སྐྱོང་གི་ཁ་ནས་བོར་བ་དང ། སྨོན་ལམ་གྱི་དབང་གིས་ངའི་ལུས་རིའི་\?\་ཚད་ཙམ་དུ་གྱུར་ཅིང ། མགོ་འབུམ་ཕྲག་དུ་མ་ཡོད་པར་གྱུར་ལ། ཁྱོན་དུ་ནི་དཔག་ཚད་བརྒྱ། འབང་དུའང་དཔག་ཚད་བརྒྱར་གྱུར་ནས། མི་དང ། རི་དྭགས་དང ། བྱའི་བར་དག་གིས་ཀྱང་ཤ་དང་ཁྲག་བཟའ་བར་བརྩམས་སོ། །རིགས་ཀྱི་བུ། ངའི་ལུས་ལ་སེམས་ཅན་དེ་དག་གིས་ཟོས་པ་ན་ཉིན་གཅིག་བཞིན་དུ་ཕྱིར་སྐྱེ་ཞིང་ཁྱོན་དུའང་དཔག་ཚད་འབུམ། འཕང་དུའང་དཔག་ཚད་འབུམ་ཡོད་པར་འགྱུར་ལ། ཐམས་ཅད་ནས་མིའི་མགོ་བོ་སྐྲ་དང ། རྣ་བ་དང ། མིག་དང་བཅས་པ། མཆུ་དང་སོ་དང་བཅས་པ། ལྕེ་དང་བཅས་པའི་ཁ་འབུམ་ཕྲག་དུ་མ་དག་བྱུང་བར་གྱུར་ནས། ཁ་འབུམ་ཕྲག་དུ་མ་བོ་དེ་དག་ནས་མིའི་སྐད་ཀྱིས་སྒྲ་སྒྲོགས་པ། ཀྱེ་སེམས་ཅན་དག་།ཅི་འདོད་པ་ལོང་ཞིག་།ཀྱེ་ཤ་ཟོ་ཞིག་།ཁྲག་འཐུང་ཞིག་།མིག་དག་ཁྱེར་ཅིག་།རྣ་བ་དང ། སྣ་དང ། སྐྲ་དང ། མཆུ་དང ། སོ་དང ། ལྕེ་དག་ཁྱེར་ཅིག་།གང་འདོད་པ་དང ། གང་གིས་འདོད་པ་དང ། ཇི་སྙེད་འདོད་པས་ལུས་ཚིམ་པར་གྱུར་ཅིག་།བསམ་པ་ཡོངས་སུ་རྫོགས་པར་གྱུར་པ་རྣམས་ནི་ཉན་ཐོས་ཀྱི་ཐེག་པ་པའམ། རང་སངས་རྒྱས་ཀྱི་ཐེག་པའམ་
439a
༄#། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིག་།ཁྱེད་ཀྱི་ལོངས་སྤྱོད་དང ། ཡོངས་སུ་སྤྱོད་པ་འདི་ནི་ཟད་པར་ཡང་མི་འགྱུར་ལ། ཁྱེད་ལ་དད་པས་བྱིན་པར་ཡང་མི་འགྱུར་གྱི། ཁྱེད་ཅག་མྱུར་བ་ཉིད་དུ་སྲོག་ཟད་པར་ཡང་མ་གྱུར་ཅེས་སྒྲ་སྒྲོགས་པར་བྱེད་དོ། །དེ་ན་སེམས་ཅན་མཁས་པ་གང་ཡིན་པ་དེ་དག་ལས་ཁ་ཅིག་ནི་ཉན་ཐོས་ཀྱི་ཐེག་པར་སེམས་སྐྱེད་པར་བྱེད། ཁ་ཅིག་ནི་རང་སངས་རྒྱས་ཀྱི་ཐེག་པར་སེམས་སྐྱེད་པར་བྱེད། ཁ་ཅིག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བྱེད་དོ། །ཁ་ཅིག་ནི་ལྷ་དང་མིར་སྐྱེ་བར་སེམས་སྐྱེད་པར་བྱེད་ཅིང ། ཤ་ནི་ཟ། ཁྲག་ནི་འཐུང་ངོ ། །ཁ་ཅིག་གིས་ནི་མིག་དག་ཁྱེར། ཁ་ཅིག་གིས་ནི་རྣ་བ་དག་།ཁ་ཅིག་གིས་ནི་སྣ་དག་།ཁ་ཅིག་གིས་ནི་མཆུ་དག་།ཁ་ཅིག་གིས་ནི་སོ་དག་བླངས་ནས་ཁྱེར་ཏེ་དོང་ཡང་སྨོན་ལམ་གྱི་དབང་གིས་ཤ་བྲི་བར་ཡང་མ་གྱུར། ཡོངས་སུ་ཟད་པར་ཡང་མ་གྱུར་ལ། ཡང་དང་ཡང་ཕྱིར་སྐྱེས་པར་གྱུར་ཏོ། །ལོ་ཁྲིའི་བར་དུ་ཛམྦུའི་གླིང་གི་མི་ཐམས་ཅད་དང ། གནོད་སྦྱིན་དང ། རི་དྭགས་དང ། བྱ་རྣམས་ཀྱང་ངའི་ལུས་ཀྱིས་ཚོམ་པར་བྱས་ཏེ། ངས་ལོ་ཁྲི་བོ་དེའི་བར་དུ་གངྒཱའི་ཀླུང་གི་བྱེ་མ་སྙེད་ཀྱི་མིག་དག་ཡོངས་སུ་བཏང་ངོ ། །ངས་རྒྱ་མཚོ་བཞིའི་ཆུ་
439b
སྙེད་ཀྱི་ཁྲག་དག་ཡོངས་སུ་བཏང་ངོ ། །ངས་རི་རབ་སྟོང་སྙེད་ཙམ་གྱི་ཤ་དག་ཡོངས་སུ་བཏང་ངོ ། །ངས་རི་ཁོར་ཡུག་ཙམ་གྱི་ལྕེ་དག་ཡོངས་སུ་བཏང་ངོ ། །ངས་ལྷུན་པོ་དང་གཉའ་ཤིང་འཛིན་ཙམ་གྱི་རྣ་བ་དག་ཡོངས་སུ་བཏང་ངོ ། །ངས་རི་རབ་ཙམ་གྱི་སྣ་རྒྱ་ཆེན་པོ་དག་ཡོངས་སུ་བཏང་ངོ ། །ངས་བྱ་རྒོད་ཀྱི་ཕུང་པོའི་རི་འདི་ཙམ་གྱི་སོ་དག་ཡོངས་སུ་བཏང་ངོ ། །ངས་དེར་སངས་རྒྱས་ཀྱི་ཞིང་མི་མཇེད་མཐའ་དག་གི་ས་གཞི་ཙམ་གྱི་རང་གི་པགས་པའང་ཡོངས་སུ་བཏང་ངོ ། །རིགས་ཀྱི་བུ། དེ་ལྟར་ལོ་ཁྲིའི་བར་དུ་སྲོག་གཅིག་གིས་རང་གི་ལུས་ཡོངས་སུ་བཏང་བ་ཚད་མེད་གྲངས་མེད་དཔག་ཏུ་མེད་པ་དག་ཡོངས་སུ་བཏང་ཞིང ། དེ་ལྟར་སེམས་ཅན་ཚད་མེད་གྲངས་མེད་དཔག་ཏུ་མེད་པ་དག་ཚིམ་པར་བྱས་ཀྱང་ངའི་སེམས་སྐད་ཅིག་གཅིག་ཙམ་ཡང་འགྱོད་པར་མ་གྱུར་པ་ལ་ལྟོས། །དེར་ངས་སྨོན་ལམ་འདི་ལྟ་བུའང་བཏབ་སྟེ། གལ་ཏེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་བ་ལྟ་ན། བདག་གི་བསམ་པ་འདིའང་ཡོངས་སུ་རྫོགས་པར་གྱུར་ཅིག་།ཇི་ལྟར་བདག་གིས་གླིང་གཅིག་ཏུ་རང་གི་ལུས་ཀྱིས་སེམས་ཅན་ཐམས་ཅད་ཚིམ་པར་བྱས་པ་དེ་བཞིན་དུ་སངས་རྒྱས་ཀྱི་ཞིང་རྡུལ་མེད་ལྷུན་པོ་སྤོས་འདིའི་གླིང་ཐམས་ཅད་དུའང་ལོ་སྟོང་ཕྲག་
440a
༄#། །གངྒཱའི་ཀླུང་གི་བྱེ་མ་སྙེད་དུ་དེ་ལྟ་བུའི་ལུས་འབྱུང་བར་གྱུར་ཅིག་།གླིང་གཅིག་ཏུ་ལོ་ཁྲིའི་བར་དུ་ཇི་ལྟར་བ་དེ་བཞིན་དུ་གླིང་ཐམས་ཅད་དུའང་རང་གི་ཤ་དང ། ཁྲག་དང ། པགས་པ་དང ། མིག་དང ། རྣ་བ་དང ། སྣ་དང ། མཆུ་དང ། ལྕེ་དང ། སྐྲ་དག་གིས་སེམས་ཅན་ཐམས་ཅད་ཚིམ་པར་བྱས་ཤིང་ཐེག་པ་གསུམ་པོ་དག་ཡང་དག་པར་འཛིན་དུ་བཅུག་པར་གྱུར་ཅིག་།མི་རྣམས་དང ། གནོད་སྦྱིན་དང ། སྲིན་པོ་རྣམས་དང ། དུད་འགྲོའི་སྐྱེ་གནས་ཐམས་ཅད་དང ། གང་དག་ཤ་ཟ་ཞིང་ཁྲག་འཐུང་བ་སོ་སོའི་གནོད་སྦྱིན་རྣམས་དང ། ཐ་ན་གཤིན་རྗེའི་འཇིག་རྟེན་གྱི་བར་དེ་དག་ཀྱང་བདག་གིས་ཚིམ་པར་བྱེད་པར་གྱུར་ཅིག་།ཇི་ལྟར་བདག་གིས་སངས་རྒྱས་ཀྱི་ཞིང་གཅིག་ཏུ་རང་གི་ལུས་ཀྱིས་སེམས་ཅན་ཐམས་ཅད་ཚིམ་པར་བྱེད་པར་འགྱུར་བ་དེ་བཞིན་དུ། ཕྱོགས་བཅུ་ཀུན་གྱི་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དག་ཏུའང་རང་གི་ཤ་དང ། ཁྲག་དང ། པགས་པ་དང ། མིག་དང ། ལྕེའི་བར་དག་དང ། དེ་ལྟ་བུའི་ལུས་ཀྱིས་བསྐལ་པ་ཆེན་པོ་གངྒཱའི་ཀླུང་གི་བྱེ་མ་སྙེད་དུ་སངས་རྒྱས་ཀྱི་ཞིང་དེ་དང་དེ་དག་ཏུ་དེ་ལྟ་བུའི་ལུས་ཐོབ་ནས་རང་གི་ལུས་དང་སྲོག་གིས་སེམས་ཅན་རྣམས་ཚིམ་པར་བྱེད་པར་གྱུར་ཅིག་།གལ་ཏེ་བདག་སེམས་ཅན་རྣམས་
440b
ཚིམ་པར་བྱ་བའི་ཕྱིར་རང་གི་ལུས་དེ་ལྟ་བུ་དག་ཡོངས་སུ་གཏོང་བར་མི་བྱེད་དམ། ཇི་ལྟར་བདག་རེ་ཞིང་སེམས་པའི་སྨོན་ལམ་དེ་ལྟ་བུ་ཡོངས་སུ་རྫོགས་པར་མ་གྱུར་ན་བདག་གིས་གང་དག་ཕྱོགས་བཅུའི་སངས་རྒྱས་ཀྱི་ཞིང་གཞན་དང་གཞན་དག་ན་ཆོས་ཀྱི་འཁོར་ལོ་བསྐོར་ནས་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་བསླུས་པར་གྱུར་ཅིག་།བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མ་གྱུར་ཅིག་།བདག་འཁོར་བ་ན་འཁོར་བའི་ཚེ་སངས་རྒྱས་ཀྱི་སྒྲ་ཐོས་པར་མ་གྱུར་ཅིག་།ཆོས་ཀྱི་སྒྲའང་མི་ཐོས། །དགེ་འདུན་གྱི་སྒྲའང་མི་ཐོས། ཕ་རོལ་ཏུ་ཕྱིན་པའི་སྒྲའང་མི་ཐོས། བདུད་ཀྱི་དཔུང་ཕམ་པའི་སྒྲའང་མི་ཐོས། མི་འཇིགས་པའི་སྒྲའང་མི་ཐོས་པ་ནས། འཁོར་བ་ན་དགེ་བའི་སྒྲའི་བར་ཡང་ཐོས་པར་མི་འགྱུར་ཞིང ། རྟག་ཏུ་མནར་མེད་པའི་སེམས་ཅན་དམྱལ་བ་ཆེན་པོ་ན་གནས་པར་གྱུར་ཅིག་ཅེས་སྨོན་ལམ་དེ་ལྟ་བུའང་བཏབ་བོ། །ཇི་ལྟར་སངས་རྒྱས་ཀྱི་ཞིང་འདིའི་གླིང་ཐམས་ཅད་ཀྱི་གླིང་ར་རེར་ཡང་དེ་ལྟ་བུའི་ལུས་དག་ཡོངས་སུ་བཏང་ཞིང ། རང་གི་ཤ་དང་ཁྲག་གིས་སེམས་ཅན་རྣམས་ཚིམ་པར་བྱས་པ་དེ་བཞིན་དུ་ཕྱོགས་བཅུ་གཞན་གྱི་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དག་ཏུའང་
441a
༄#། །དེ་ལྟ་བུའི་ལུས་དག་ཡོངས་སུ་བཏང་སྟེ། རང་གི་ཤ་དང་ཁྲག་གིས་སེམས་ཅན་རྣམས་ཚིམ་པར་བྱས་སོ། །རིགས་ཀྱི་བུ། དེའི་ཚེ་ངས་རྒྱུན་མི་ཆད་པར་མིག་དག་ཡོངས་སུ་བཏང་བ་གང་ཡིན་པ་དེ་དག་གི་ཕུང་པོའང་ཛམྦུའི་གླིང་འདི་ནས་སུམ་ཅུ་རྩ་གསུམ་གྱི་ལྷའི་མཐར་ཐུག་པའི་ཚད་ཙམ་དུ་གྱུར་ཏེ། དེ་བཞིན་གཤེགས་པའི་ལུས་ཡོངས་སུ་གཏོང་བའི་སྦྱིན་པའི་ཕ་རོལ་ཏུ་ཕྱིན་པ་ལ་ལྟོས། རིགས་ཀྱི་བུ། དེ་ནི་དེ་བཞིན་གཤེགས་པའི་ལུས་ཡོངས་སུ་གཏོང་བའི་སྦྱིན་པའི་ཕ་རོལ་ཏུ་ཕྱིན་པ་མདོར་བསྡུས་པ་ཡིན་ནོ། །རིགས་ཀྱི་བུ། གཞན་ཡང་དེའི་འོག་ཏུ་བསྐལ་པ་ཚད་མེད་པ་འདས་པ་ན་སངས་རྒྱས་ཀྱི་ཞིང་འདི་ཟླ་བ་རྣམ་པར་སྣང་བ་ཞེས་བྱ་བར་གྱུར་ཏེ། དེའང་སྙིགས་མ་ལྔ་དང་ལྡན་པར་གྱུར་ཏོ། །ངའང་ཛམྦུའི་གླིང་དེར་སྟོབས་ཀྱི་འཁོར་ལོས་བསྒྱུར་བའི་རྒྱལ་པོ་སྒྲོན་མ་སྣང་བ་ཞེས་བྱ་བར་གྱུར་ནས་ངས་ཇི་སྐད་སྔར་སྨོས་པ་བཞིན་དུ་ཛམྦུའི་གླིང་གི་སེམས་ཅན་ཐམས་ཅད་དགེ་བ་དག་ལ་ངེས་པར་སྦྱར་ཏོ། །ཕྱིས་ང་རང་གིས་བལྟ་བའི་ཕྱིར་སྐྱེད་མོས་ཚལ་གྱི་སར་བྱུང་བ་དང ། དེ་ན་ངས་བཅིང་བ་དམ་པོས་ཕྱིང་ཀ་ལོག་ཏུ་བཅིངས་པའི་མི་ཞིག་མཐོང་ངོ ། །མཐོང་ནས་ཀྱང་ངས་བློན་པོ་རྣམས་ལ་མི་འདིས་ཅི་ཞིག་བྱས་ཞེས་དྲིས་པ་དང ། བློན་པོ་རྣམས་ཀྱིས་ང་ལ་སྨྲས་པ།
441b
ལྷ།་མི་འདི་ནི་ལྷ་ལ་ནོངས་པ་བགྱིས་པ་ལགས་ཏེ། དགུང་ལོ་གཅིག་ལ་མི་འདིའི་འབྲུ་དང ། ལོ་ཏོག་ཅི་འཁྲུང་བ་དེ་ལས་དྲུག་ཆ་གཅིག་ལྷའི་ཞལ་སྔར་འབུལ་བ་ལགས་ན།་ཇི་ལྟར་ལྷའི་གྲོང་དང ། གྲོང་ཁྱེར་དང ། ལྗོངས་ཀྱི་མི་དང ། རི་བྲག་དག་ན་གནས་པའི་འབངས་ལས་ཀྱི་མཐས་འཚོ་བ་གཞན་དག་ཏུ་འདུ་བའི་སྒོ་འབུལ་བར་བགྱིད་པ་དེ་ལྟར་མི་འདི་འབུལ་བར་མི་བགྱིད་ལགས་སོ། །དེ་དག་ལ་ངས་འདི་སྐད་ཅེས་སྨྲས་སོ། །མི་འདི་ཐོང་ལ་སུ་ལའང་མཐུས་ནོར་དང་འབྲུ་དག་མ་སྡུད་ཅིག་།དེ་དག་གིས་སྨྲས་པ། ལྷ། འགའ་ཡང་སེམས་ཤིན་ཏུ་དད་པས་འབུལ་བར་མི་བགྱིད་དོ། །གདུགས་གཅིག་བཞིན་དུ་ལྷའི་ཞལ་ཟས་དང ། སྐྱེམས་དང ། ལོངས་སྤྱོད་དང ། ཡོངས་སུ་སྤྱད་པ་གང་ལགས་པ་དང ། ལྷའི་བཙུན་མོའི་འཁོར་དང ། ལྷ་མོ་དང ། ལྷའི་སྲས་རྣམས་དང ། སྲས་མོ་རྣམས་ཀྱི་ལོངས་སྤྱོད་དང ། ཡོངས་སུ་སྤྱད་པ་གང་ལགས་པ་དེ་དག་ཐམས་ཅད་ཀྱང་གཞན་དག་ལས་འདུ་བ་ལགས་ན། འགའ་ཡང་སེམས་རབ་ཏུ་དང་བས་འབུལ་བར་མི་བགྱིད་ལགས་སོ། །དེ་ནས་ང་ཤིན་ཏུ་ཡིད་མི་བདེ་སྟེ་བསམས་པ། ངས་ཛམྦུའི་གླིང་ཐམས་ཅད་ཀྱི་རྒྱལ་སྲིད་ཀྱི་དབང་ཕྱུག་འདི་སུ་ལ་སྦྱིན་པར་བྱ་སྙམ་ནས། ང་ལ་བུ་ལྔ་བརྒྱ་ཡོད་པར་གྱུར་པ་དེ་དག་ཀྱང་བྱང་ཆུབ་
442a
༄#། །ཡང་དག་པར་འཛིན་དུ་བཅུག་ཅིང ། ཛམྦུའི་གླིང་འདིའང་ཆ་ལྔ་བརྒྱར་བགོས་ཏེ་བུ་རྣམས་ལ་བྱིན་ནས། ངའང་དཀའ་ཐུབ་ཀྱི་ནགས་ཚལ་དུ་སོང་སྟེ། དྲང་སྲོང་གི་རབ་ཏུ་འབྱུང་བས་ཚངས་པར་སྤྱད་པ་སྤྱོད་ཅིང་ལྷོ་ཕྱོགས་ཀྱི་རྒྱ་མཚོ་ཆེན་པོ་དང་ཧ་ཅང་ཡང་མི་རིང་བའི་ནགས་ཁྲོད་ཅིག་ན་ནགས་ཀྱི་རྩ་བ་དང་འབྲས་བུ་ཟ་ཞིང ། ཤིང་ཨུ་དུམྦ་རའི་དྲུང་ན་བསམ་གཏན་སྒོམ་ཞིང་འདུག་འདུག་ནས་མཐར་གྱིས་མངོན་པར་ཤེས་པ་ལྔ་ཐོབ་པར་གྱུར་ཏོ། །ཡང་དེའི་ཚེ་ན་ཛམྦུའི་གླིང་གི་ཚོང་པ་ལྔ་བརྒྱ་ཞིག་རྒྱ་མཚོ་ཆེན་པོར་ཞུགས་པ་དང ། དེ་དག་གིས་ཀྱང་དེ་ནས་རིན་པོ་ཆེའི་ཕུང་པོ་མང་དུ་རྙེད་དོ། །དེ་ན་དེད་དཔོན་ཟླ་བ་ཞེས་བྱ་བ་སྐྱེས་བུ་སྐལ་པ་དང་ལྡན་ཞིང་མཛངས་པ་ཞིག་ཡོད་པ་དེས་ཀྱང་ཡིད་བཞིན་གྱི་ནོར་བུ་རྙེད་ནས། དེ་དག་རིན་པོ་ཆེའི་གླིང་དེ་ནས་ནོར་བུ་རིན་པོ་ཆེའི་ཕུང་པོ་རྒྱ་ཆེན་པོ་དང ། ཡིད་བཞིན་གྱི་ནོར་བུ་དེ་ཁྱེར་ཏེ་ཕྱིར་འཕགས་པ་དང ། དེ་ནས་རྒྱ་མཚོའང་འཁྲུགས། ཀླུ་རྣམས་ཀྱང་ཁྲོས། གང་དག་དེ་ན་གནས་པའི་ལྷ་རྣམས་ཀྱང་ངུའོ། །དེ་ན་དྲང་སྲོང་དབུགས་འབྱིན་ཅེས་བྱ་བ་བྱང་ཆུབ་སེམས་དཔའ་ཞིག་ཀྱང་སྔོན་གྱི་སྨོན་ལམ་གྱིས་དེར་སྐྱེས་ནས་སེམས་ཅན་ཆེན་པོ་དེས་འདྲོན་པ་དེ་དག་བདེ་ཞིང་བཀྲ་ཤིས་པར་རྒྱ་མཚོ་ལས་བསྒྲལ་
442b
ཏོ། །སྲིན་པོ་གདུག་པ་ཕྱིར་རྒོལ་ཞིང་གླགས་བལྟ་ལ། སྐབས་ཚོལ་བ་ཞིག་ཀྱང་འདྲོན་པ་དེ་དག་གི་ཕྱིར་བཞིན་རྗེས་སུ་འབྲང་བར་གྱུར་ནས། དེ་ནས་ཞག་བདུན་གྱི་བར་དུ་རླུང་དམར་དྲག་པོ་དང ། ཆར་པ་ཆེན་པོ་བབས་ནས། དེས་ཚོང་པ་དེ་དག་ལམ་རབ་ཏུ་སྟོར་ཏེ་ཤིན་ཏུ་སྐྲག་ནས་སྒྲ་ཆེན་པོས་ངུ་ཞིང་ཆོ་ངེས་འདེབས་ལ་སྨྲེ་སྔགས་འདོན་ཅིང་ལྷ་དང།་གུ་ལང་དང ། ཆུ་ལྷ་དང ། ལུས་ངན་ལ་གསོལ་བ་འདེབས་པ་ནས། ཕ་དང ། མ་དང ། སྡུག་པའི་བུ་རྣམས་ཞེས་བྱ་བའི་བར་དུ་ངུ་འབོད་པར་བྱེད་པ་ངའི་ལྷའི་རྣ་བས་ཐོས་ནས། ང་ལམ་ཇི་སྲིད་པ་དེར་སོང་སྟེ། ཚོང་པ་དག་ལ་མ་འཇིགས་ཤིག་།མ་འཇིགས་ཤིག་དང ། ངས་ཁྱེད་ཅག་ལ་ལམ་བསྟན་པར་བྱ་ཞིང ། ཛམྦུའི་གླིང་དུ་བདེ་ཞིང་བཀྲ་ཤིས་པར་ཕྱིན་པའི་བར་དུ་བྱའོ་ཞེས་ཚོང་པ་རྣམས་དབུགས་ཕྱུང་ནས། དེའི་ཚེ་ངས་རས་ཏིལ་མར་གྱིས་བསྐུས་ཏེ་རང་གི་ལག་པ་དཀྲིས་ནས་མེ་འབར་བར་བྱས་ཏེ་བདེན་པའི་ཚིག་བརྗོད་པ། གལ་ཏེ་བདག་གིས་སེམས་ཅན་རྣམས་ཀྱི་དོན་དང་ཕན་པའི་ཕྱིར་ལོ་ཉི་ཤུ་རྩ་དྲུག་ཏུ་ཚངས་པའི་གནས་པ་བཞི་པོ་དག་གིས་ནགས་ཁྲོད་དུ་གནས་ཏེ། ནགས་ཀྱི་རྩ་བ་དང ། འབྲས་བུ་ཟ་ཞིང ། ཀླུ་དང ། གནོད་སྦྱིན་པ་བརྒྱད་ཁྲི་བཞི་སྟོང་གིས་སེམས་ཀྱི་རྒྱུད་ཡོངས་སུ་སྨིན་པར་བྱས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་
443a
༄#། །ལས་ཕྱིར་མི་ལྡོག་པ་ལ་བཀོད་པ་ལྟ་ན། བདེན་པ་དང་བདེན་པའི་ཚིག་དེ་དང ། དགེ་བའི་རྩ་བ་ཡོངས་སུ་སྨིན་པ་དེས་བདག་གི་ལག་པ་འབར་བར་འགྱུར་ཞིང་ཚོང་བ་རྣམས་ཀྱིས་ལམ་རྙེད་པར་གྱུར་ཏེ། ཛམྦུའི་གླིང་དུ་བདེ་ཞིང་བཀྲ་ཤིས་པར་ཕྱིན་པར་གྱུར་ཅིག་ཅེས་བདེན་པའི་ཚིག་བརྗོད་པ་དང ། ཉིན་མཚན་བདུན་གྱི་བར་དུ་ངའི་ལག་པ་དེ་འབར་བར་གྱུར་ནས་ཚོང་པ་དེ་དག་ཛམྦུའི་གླིང་དུ་བཀོད་དོ། །དེར་ངས་སྨོན་ལམ་བཏབ་པ། གལ་ཏེ་གང་གི་ཚེ་ཛམྦུའི་གླིང་ན་རིན་པོ་ཆེ་མེད་པར་གྱུར་པ་དེའི་ཚེ་ན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་ལྟ་ན་བདག་གི་བསམ་པ་འདི་ཡང་ཡོངས་སུ་རྫོགས་པར་གྱུར་ཅིག་།བདག་ཛམྦུའི་གླིང་དུ་དེད་དཔོན་དུ་གྱུར་ལ་ལན་བདུན་གྱི་བར་དུ་ཡིད་བཞིན་གྱི་ནོར་བུ་བླངས་ཏེ། སངས་རྒྱས་ཀྱི་ཞིང་འདིའི་གླིང་ཐམས་ཅད་ཀྱི་བར་དུ་རིན་པོ་ཆེ་སྣ་ཚོགས་ཀྱི་ཆར་མངོན་པར་རབ་ཏུ་འབེབས་པར་གྱུར་ཅིག་།དེ་བཞིན་དུ་ཕྱོགས་བཅུའི་སངས་རྒྱས་ཀྱི་ཞིང་སྟོང་པ་སྙིགས་མ་ལྔ་དང་ལྡན་པ་གངྒཱའི་ཀླུང་གི་བྱེ་མ་སྙེད་དག་ཏུའང་ཇི་ལྟར་སྔར་སྨོས་པ་བཞིན་དུ་རིན་པོ་ཆེ་སྣ་ཚོགས་ཀྱི་ཆར་དག་མངོན་པར་རབ་ཏུ་འབེབས་པར་གྱུར་ཅིག་ཅེས་སྨོན་ལམ་བཏབ་པ་དང ། དེ་བཞིན་དུ་ངའི་
443b
བསམ་པ་ཡོངས་སུ་རྫོགས་པར་གྱུར་ཏེ། བསྐལ་པ་ཆེན་པོ་གངྒཱའི་ཀླུང་གི་བྱེ་མ་སྙེད་འདས་ཀྱི་བར་དུ་ང་དེད་དཔོན་དུ་གྱུར་ནས། སངས་རྒྱས་ཀྱི་ཞིང་སྟོང་པ་སྙིགས་མ་ལྔ་དང་ལྡན་པའི་གངྒཱའི་ཀླུང་གི་བྱེ་མ་སྙེད་དག་ཏུ་རིན་པོ་ཆེའི་ཆར་དག་རབ་ཏུ་ཕབ་སྟེ། གླིང་རེ་རེར་ཡང་ལན་བདུན་བདུན་དུ་རིན་པོ་ཆེ་སྣ་ཚོགས་ཀྱི་ཆར་དག་མངོན་པར་རབ་ཏུ་ཕབ་བོ། །དེ་ལྟར་སེམས་ཅན་དཔག་ཏུ་མེད་པ་གྲངས་མེད་པ་དག་རིན་པོ་ཆེ་དག་གིས་བསམ་པ་ཡོངས་སུ་རྫོགས་པར་བྱས་ཤིང་ཐེག་པ་གསུམ་པོ་དག་ལའང་ངེས་པར་སྦྱར་ཏོ། །རིགས་ཀྱི་བུ། དེ་བཞིན་གཤེགས་པའི་རིན་པོ་ཆེ་ཡོངས་སུ་གཏོང་བའི་དགེ་བའི་རྩ་བ་རྣམ་པར་སྨིན་པའི་མཚན་ཉིད་ལ་ལྟོས། རིགས་ཀྱི་བུ། གཞན་ཡང་བསྐལ་པ་དཔག་ཏུ་མེད་པ་འདས་པའི་འོག་ཏུ་བསྐལ་པ་མགུ་བྱེད་ཅེས་བྱ་བ་བྱུང་བ་ན་སངས་རྒྱས་ཀྱི་ཞིང་འདི་རབ་རིབ་ཅན་ཞེས་བྱ་བར་གྱུར་ཏེ། སྙིགས་མ་ལྔ་དང་ལྡན་ཞིང་སྐྱེ་དགུ་ཚེ་ལོ་ལྔ་སྟོང་པར་གྱུར་པ་ན་ང་སྨོན་ལམ་གྱི་དབང་གིས་ཛམྦུའི་གླིང་འདིར་རིག་བྱེད་འདོན་པའི་བྲམ་ཟེ་ཉི་ཁྲི་སྤོས་ཞེས་བྱ་བར་གྱུར་ཏེ། དེའི་ཚེ་ན་སེམས་ཅན་རྣམས་ཕལ་ཆེར་རྟག་པར་ལྟ་ཞིང་འཁོན་པ་དང ། ཕ་རོལ་གནོན་པ་དང་བཅས་ལ། འཐབ་པ་ལ་གནས་པ་དང་བཅས་པར་གྱུར་ཏེ། ངས་སེམས་ཅན་དེ་དག་ཕ་རོལ་གནོན་པའི་སྟོབས་ཆེན་པོའི་
444a
༄#། །ཤུགས་ཀྱིས་ཕུང་པོ་དགྲ་ལྟ་བུར་གྱུར་པའི་རབ་ཏུ་སྦྱོར་བས་ཆོས་བསྟན་ཏོ། །སྐྱེ་མཆེད་གྲོང་སྟོང་པ་ལྟ་བུར་སོ་སོར་བརྟགས་པ་དང ། རྐྱེན་གྱིས་རྗེས་སུ་འབྲེལ་པ་སྐྱེ་བ་དང་འཇིག་པ་དང་བཅས་པ་དང ། དབུགས་ཕྱི་ནང་དུ་རྒྱུ་བ་རྗེས་སུ་དྲན་པའི་ཡིད་ལ་བྱེད་པའང་བསྟན་ཏེ། དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་དགེ་བའི་རྩ་བ་ཡོངས་སུ་བསྔོ་བ་ལ་མངོན་པར་སྦྱར་ནས་ང་ཉིད་ཀྱང་མངོན་པར་ཤེས་པ་ལྔ་དང་ལྡན་པར་གྱུར་ཏེ། དེའི་ཚེ་ན་སེམས་ཅན་དཔག་ཏུ་མེད་གྲངས་མེད་པ་དག་ཀྱང་ང་ཡིས་གདམས་ཤིང་རྗེས་སུ་བསྟན་པ་ལ་མངོན་པར་ཤེས་པ་ལྔ་དང་ལྡན་པར་གྱུར་ཏོ། །དེ་བཞིན་དུ་སེམས་ཅན་དཔག་ཏུ་མེད་གྲངས་མེད་པ་དག་ཀྱང་འཐབ་མོ་དང ། རྩོད་པ་དང ། ཁོན་དུ་འཛིན་པ་དག་སྤངས་ཏེ། ནགས་ཁྲོད་ན་གནས་ཤིང་ནགས་ཁྲོད་ན་རྩ་བ་དང་འབྲས་བུ་ཟ་ལ་བསམ་གཏན་སྒོམ་ཞིང་ཚངས་པའི་གནས་པ་བཞི་པོ་དག་གིས་ཉིན་མཚན་འདའ་བར་བྱེད་དོ། །དེ་ནས་གང་གི་ཚེ་བསྐལ་པ་དེ་ཟད་དུ་ཉེ་བ་ན་སྦྱིན་གནས་དེ་དག་གིས་ཛམྦུའི་གླིང་མཐའ་དག་ཁྱབ་པར་གྱུར་ཏོ། །འཐབ་མོ་དང ། འཐབ་པ་དང ། གཡུལ་དང ། འཁོན་པ་དང ། འགྱེད་པ་དང ། རྩོད་པ་དེ་དག་ཀྱང་རབ་ཏུ་ཞི་
444b
བར་གྱུར། དུས་མ་ཡིན་པའི་རླུང་དང ། ཆར་པ་དག་ཀྱང་རབ་ཏུ་ཞི། ས་ལ་བརྟེན་པའི་ལོ་ཏོག་རྣམས་ཀྱང་ལེགས་པར་སྨིན་ཅིང་དམངས་དང་ལྡན་པར་གྱུར་ན་དུས་ཀྱི་ཉེས་པས་ནད་སྣ་ཚོགས་ཀྱིས་ཉེན་པ་འབའ་ཞིག་ཏུ་གྱུར་ནས་དེའི་ཚེ་ང་འདི་སྙམ་དུ་སེམས་ཏེ། འདི་ལྟར་བདག་གིས་སེམས་ཅན་རྣམས་ཀྱི་ནད་ཞི་བར་བྱེད་མ་ནུས་སོ་སྙམ་ནས། དེའི་ཚེ་ངས་འདི་སྙམ་དུ་བསམས་ཏེ། གང་དག་བདག་གིས་བརྒྱ་བྱིན་དང ། ཚངས་པ་ཆེན་པོ་དང ། འཇིག་རྟེན་སྐྱོང་དང ། གཞན་ཡང་ལྷའི་དྲང་སྲོང་རྣམས་དང ། ཀླུའི་དྲང་སྲོང་རྣམས་དང ། བརྒྱ་བྱིན་གྱི་དྲང་སྲོང་རྣམས་དང ། མིའི་དྲང་སྲོང་རྣམས་ཀྱང་བསགས་ལ། སེམས་ཅན་རྣམས་ཀྱི་དོན་གྱི་ཕྱིར་སྨན་སྦྱར་པའི་བསྟན་བཅོས་དག་བསྟན་པར་བྱའོ་སྙམ་ནས་དེའི་ཚེ་ང་རྫུ་འཕྲུལ་གྱིས་སོང་སྟེ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་དང ། ལྷའི་དྲང་སྲོང་རྣམས་དང ། ཀླུའི་དྲང་སྲོང་རྣམས་དང ། བརྒྱ་བྱིན་གྱི་དྲང་སྲོང་རྣམས་དང ། མིའི་དྲང་སྲོང་རྣམས་ལ་བསྒོ་ནས་རི་ལན་ཚཝའི་བདག་པོ་གཅིག་པ་ཞེས་བྱ་བ་ལན་ཚཝ་སྤྱོད་པའི་རྩེ་མོར་ངེས་པའི་གནས་ཞེས་བྱ་བ་དེར་བསྡུས་ནས་འབྱུང་པོ་ཡང་དག་པར་ཟློག་པ་སོ་སོ་འབྲང་ཞིང་བསྲུང་ལ། རླུང་དང ། མཁྲིས་པ་དང ། བད་ཀན་རབ་ཏུ་ཞི་བར་བྱེད་པའི་བསྟན་
445a
༄#། །བཅོས་དག་རབ་ཏུ་བསྟན་ཏོ། །དེ་བཞིན་དུ་སྦྱར་ཏེ་སེམས་ཅན་དཔག་ཏུ་མེད་གྲངས་མེད་པ་དག་གི་ནད་རྣམས་ཀྱང་རབ་ཏུ་ཞི་བར་བྱས་སོ། ། དེར་ངས་ཇི་ལྟར་སྨོན་ལམ་ཆེན་པོ་བཏབ་པ་བཞིན་དུ་ཉི་མ་གཅིག་ལའང་སེམས་ཅན་དཔག་ཏུ་མེད་གྲངས་མེད་པ་རྣམས་ཀྱིས་ཤེས་རབ་སྣང་བར་བྱས་ཤིང་ཐེག་པ་གསུམ་པོ་དག་ལ་ངེས་པར་སྦྱར་ནས་ངན་སོང་གི་ལམ་རྣམས་ནི་བཅད། མཐོ་རིས་ཀྱི་ལམ་དག་ལ་ནི་རབ་ཏུ་བཀོད་དེ། ནད་སྣ་ཚོགས་རབ་ཏུ་ཞི་བར་བྱས་ཤིང་ཡོངས་སུ་ཐར་བར་བྱས་པ་དང ། དེ་བཞིན་དུ་སེམས་ཅན་དཔག་ཏུ་མེད་པ་དག་ལ་ཡེ་ཤེས་ཀྱི་སྣང་བ་བྱིན་ཏེ། བདེ་བ་ལ་བཀོད་པའི་དགེ་བའི་རྩ་བ་རྣམ་པར་སྨིན་པ་དེས་ན། རིགས་ཀྱི་བུ།་ངའི་སྨོན་ལམ་གྱི་རེ་བ་དེ་ཡོངས་སུ་རྫོགས་སོ། །གང་གི་ཚེ་ངས་ཉི་མ་གཅིག་ལ་སེམས་ཅན་དཔག་ཏུ་མེད་གྲངས་མེད་པ་དག་གི་ངན་སོང་གི་ལམ་རྣམས་བཀག་ཅིང ། མཐོ་རིས་ཀྱི་ལམ་ལ་རབ་ཏུ་བཀོད་ད། ངས་ནད་པ་རྣམས་ཀྱི་ཡོ་བྱད་ཀྱི་དོན་དང ། སེམས་ཅན་རྣམས་ཀྱི་དོན་གྱི་ཕྱིར་ལྷའི་དྲང་སྲོང་རྣམས་དང ། གནོད་སྦྱིན་གྱི་ཚོགས་རྣམས་ལྷའི་འཇིག་རྟེན་ལན་ཚཝ་སྤྱོད་པའི་རྩེ་མོར་བསྡུས་ནས་སེམས་ཅན་རྣམས་ཀྱི་ནད་མེད་པ་ལ་མཁས་པ་རབ་ཏུ་བཤད་དོ། །དེ་བཞིན་དུ་སངས་རྒྱས་ཀྱི་ཞིང་
445b
རབ་རིབ་ཅན་གྱི་གླིང་ཐམས་ཅད་དུའང་སྐྱེས་བུའི་རྩལ་དེ་ལྟ་བུ་དག་བྱས་ཏེ། སེམས་ཅན་རྣམས་ཀྱང་མཐོ་རིས་ཀྱི་ལམ་ལ་རབ་ཏུ་བཀོད་དོ། །ལྷ་དང ། ཀླུ་དང ། གནོད་སྦྱིན་དང ། མིའི་དྲང་སྲོང་རྣམས་ཀྱང་བསགས་ཏེ། དེ་དག་གིས་ཀྱང་སེམས་ཅན་རྣམས་ཀྱི་དོན་གྱི་ཕྱིར་རིག་པའི་གནས་སྣ་ཚོགས་དག་རབ་ཏུ་བཤད་དོ། །སངས་རྒྱས་ཀྱི་ཞིང་རབ་རིབ་ཅན་འདིར་ཇི་ལྟ་བ་དེ་བཞིན་དུ་ཕྱོགས་བཅུའི་སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པའི་གངྒཱའི་ཀླུང་གི་བྱེ་མ་སྙེད་དག་ཏུའང་སྐྱེས་བུའི་རྩལ་དེ་ལྟ་བུ་དག་བྱས་ཏེ། སེམས་ཅན་རྣམས་ཀྱང་ཐེག་པ་གསུམ་པོ་དག་ལ་ངེས་པར་སྦྱར་ཅིང་མཐོ་རིས་ཀྱི་ལམ་ལ་རབ་ཏུ་བཀོད་དེ། རིག་པའི་གནས་སྣ་ཚོགས་དག་རབ་ཏུ་བཤད་ནས་ནད་ཐམས་ཅད་ལས་ཡོངས་སུ་ཐར་བར་བྱས་ནས། རིགས་ཀྱི་བུ། ངའི་བླ་ན་མེད་པའི་རེ་བ་འདི་ལྟ་བུ་ཡོངས་སུ་རྫོགས་སོ། །ཡང་སངས་རྒྱས་ཀྱི་ཞིང་རབ་རིབ་ཅན་གྱི་གླིང་ཐམས་ཅད་དུ་ཇི་ལྟར་སྔར་སྨོན་ལམ་བཏབ་པ་བཞིན་དུ་བླ་ན་མེད་པའི་ཡེ་ཤེས་ཀྱིས་སྐྱེས་བུའི་རྩལ་དེ་ལྟ་བུ་དག་བྱས་པ་དེ་བཞིན་དུ། ཕྱོགས་བཅུའི་སངས་རྒྱས་ཀྱི་ཞིང་སྟོང་པ་སྙིགས་མ་ལྔ་དང་ལྡན་པ་གངྒཱའི་ཀླུང་གི་བྱེ་མ་སྙེད་དག་གི་སངས་རྒྱས་ཀྱི་ཞིང་རེ་རེའི་གླིང་ཐམས་ཅད་དུའང་ངས་ཇི་ལྟར་སྔོན་སྨོན་ལམ་བཏབ་པ་བཞིན་དུ་སྐྱེས་བུའི་རྩལ་དེ་ལྟ་བུ་དག་
446a
༄#། །ཀྱང་བྱས་ཏེ། རིགས་ཀྱི་བུ། དེ་བཞིན་གཤེགས་པ་བྱང་ཆུབ་སེམས་དཔའི་སྤྱད་པ་སྤྱོད་པའི་ཤེས་རབ་ཀྱི་ཁྱད་པར་དང ། དེ་བཞིན་གཤེགས་པའི་ལེགས་པར་སྤྱད་པ་གསུམ་གྱི་དགེ་བའི་རྩ་བའི་ས་བོན་དེ་ལ་ལྟོས། དེ་བཞིན་དུ་བསྐལ་པ་གྲངས་མེད་པ་ལས་ཤིན་ཏུ་ལྷག་པ་སྙེད་འདས་པ་ན་དུས་ངན་པའི་ཚེ་བསྐལ་པ་ཆེན་པོ་ལེགས་བཅས་ཞེས་བྱ་བ་བྱུང་བ་ན་སངས་རྒྱས་ཀྱི་ཞིང་འདི་རྣམ་རྒྱལ་སྒྲ་དབྱངས་ཞེས་བྱ་བར་གྱུར་ཏེ། དེའང་སྙིགས་མ་ལྔ་དང་ལྡན་པར་གྱུར་ནས་ཤར་ཕྱོགས་ལོགས་སུ་གླིང་བཞི་པ་ལྔ་བཅུ་འདས་པ་ན་ཛམྦུའི་གླིང་དགའ་བ་ཞེས་བྱ་བ་ཞིག་བྱུང་བར་གྱུར་ཏེ། དེར་ཡང་ང་སེམས་ཅན་རྣམས་ཡོངས་སུ་སྨིན་པར་བྱ་བའི་ཕྱིར་སྐྱེས་ནས་གླིང་བཞིའི་དབང་ཕྱུག་འཁོར་ལོས་བསྒྱུར་བའི་རྒྱལ་པོ་ནམ་མཁའ་ཞེས་བྱ་བར་གྱུར་ཏོ། །དེར་ཡང་ངས་སེམས་ཅན་རྣམས་དགེ་བ་བཅུའི་ལས་ཀྱི་ལམ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །ཐེག་པ་གསུམ་པོ་དག་ཀྱང་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །ཐམས་ཅད་སྦྱིན་ཞིང་ཀུན་ལ་སྦྱིན་པར་ཡང་གྱུར་ཏོ། །དེ་ངའི་གན་དུ་སློང་མོ་པ་དག་འོངས་ནས་འདི་ལྟ་སྟེ། དབྱིག་དང ། གསེར་དང །
446b
ནད་རྙིལ་དང ། རིན་པོ་ཆེ་མཐོན་ཀ་ཆེན་པོ་དང ། སྐར་མདོག་དང ། ཆུ་འདང་གི་བར་གྱི་རིན་པོ་ཆེ་སྣ་ཚོགས་སློང་བར་བྱེད་པའི་སློང་མོ་པ་རྣམས་ཀྱིས་ཀྱང་རིན་པོ་ཆེ་མང་པོ་དེ་སྙེད་ཐོབ་པར་གྱུར་ཏོ། །དེའི་ཚེ་ན་ངས་བློན་པོ་རྣམས་ལ་དྲིས་པ། རིན་པོ་ཆེ་འདི་དག་ག་ལས་བྱུང ། དེ་དག་གིས་སྨྲས་པ། ཀླུའི་རྒྱལ་པོ་རྣམས་ཀྱིས་གཏེར་དག་བསྟན་ཏེ། འཇིག་རྟེན་དུ་གཏེར་དག་བྱུང་བས་རིན་པོ་ཆེ་རྣམས་ཀྱང་བྱུང་བར་གྱུར་ཏེ། ལྷའི་ཞལ་སྔར་སློང་མོ་པ་ཇི་ཙམ་མཆིས་པ་དེ་ཙམ་ཉི་ཚེ་ལས་མ་བསྟན་ལགས་སོ།། དེའི་ཚེ་ངས་སྨོན་ལམ་བཏབ་པ། གལ་ཏེ་བདག་སྙིགས་མ་ལྔ་དང་ལྡན་ཞིང་ཉོན་མོངས་པ་དང ། འཐབ་པ་དང ། རྩོད་པ་བདོ་བར་གྱུར་པའི་འཇིག་རྟེན་དུ་སྐྱེ་དགུ་ཚེ་ལོ་བརྒྱ་པ་རྣམས་ཀྱི་ནང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་ལྟ་ན་དེའི་ཕྱིར་བདག་གི་རེ་བ་འདིའང་ཡོངས་སུ་རྫོགས་པར་གྱུར་ཅིག་།བདག་སངས་རྒྱས་ཀྱི་ཞིང་འདིར་གཏེར་སྟོན་པར་བྱེད་པའི་ཀླུའི་རྒྱལ་པོར་འགྱུར་ཞིང ། སངས་རྒྱས་ཀྱི་ཞིང་རྣམ་རྒྱལ་སྒྲ་དབྱངས་འདིའི་གླིང་ཐམས་ཅད་ཀྱི་གླིང་རེ་རེར་ཡང་སྐྱེ་བ་ལན་བདུན་བདུན་ལེན་པར་གྱུར་ལ། སྐྱེ་བ་རེ་རེར་ཞིང་ཡང་རིན་པོ་ཆེ་སྣ་ཚོགས་ཀྱིས་ཡོངས་སུ་གང་བའི་གཏེར་བྱེ་བ་ཁྲག་ཁྲིག་ཕྲག་འབུམ་དག་
447a
༄#། །སྟོན་ཅིང་གཏོང་བར་གྱུར་ཅིག་།འདི་ལྟ་སྟེ། དབྱིག་དང ། གསེར་དང ། ནད་རྙིལ་དང ། རིན་པོ་ཆེ་མཐོན་ཀ་ཆེན་པོ་དང ། སྐར་མདོག་དང ། ཆུ་འདང་གི་བར་དག་གི་གཏེར་རེ་རེ་ཞིང་ཡང་རྒྱར་དཔག་ཚད་སྟོང་ཡོད་ལ། རིན་པོ་ཆེ་མང་པོས་ཡོངས་སུ་གང་བ་དག་བྱུང་སྟེ། སེམས་ཅན་རྣམས་ལ་སྟོན་ཅིང་གཏོང་བར་གྱུར་ཅིག་།ཇི་ལྟར་སངས་རྒྱས་ཀྱི་ཞིང་འདིར་དཔའ་བོའི་མཐུ་དེ་ལྟ་བུ་དག་བྱེད་པར་འགྱུར་པ་དེ་བཞིན་དུ་ཕྱོགས་བཅུའི་སངས་རྒྱས་ཀྱི་ཞིང་སྙིགས་མ་ལྔ་དང་ལྡན་པའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་གི་སངས་རྒྱས་ཀྱི་ཞིང་རེ་རེའི་གླིང་ཐམས་ཅད་དུའང་སྔར་ཇི་སྐད་སྨོས་པའི་བར་དག་ལྟ་བུར་སྐྱེ་བ་ལན་བདུན་བདུན་འཛིན་པར་གྱུར་ཅིག་ཅེས་སྨོན་ལམ་བཏབ་བོ། །རིགས་ཀྱི་བུ། གང་གི་ཚེ་ངས་སྨོན་ལམ་དེ་ལྟ་བུ་བཏབ་པ་དེའི་ཚེ་ནམ་མཁའི་དཀྱིལ་ནས་ལྷ་བྱེ་བ་ཁྲག་ཁྲིག་ཕྲག་འབུམ་གྱིས་བར་སྣང་ལས་མེ་ཏོག་གི་ཆར་རབ་ཏུ་ཕབ་ཅིང་ང་ལ་ལེགས་སོ་ཞེས་བྱ་བ་བྱིན་ཏེ། ཐམས་ཅད་སྦྱིན་པ་ལེགས་སོ། །ལེགས་སོ། །ཇི་ལྟར་ཁྱོད་ཀྱིས་སྨོན་ལམ་བཏབ་པ་དེ་བཞིན་དུ་ཁྱོད་ཀྱི་རེ་བ་དེའང་འགྲུབ་པར་འགྱུར་རོ། །ལྷ་རྣམས་ཀྱིས་ནམ་མཁའི་དཀྱིལ་ནས་རྒྱལ་པོ་ནམ་མཁའི་
447b
མིང་ཐམས་ཅད་སྦྱིན་པ་ཞེས་བྱ་བར་བཏགས་པ་སྐྱེ་བོ་ཕལ་པོ་ཆེ་རྣམས་ཀྱིས་ཐོས་སོ། །ཐོས་ནས་ཀྱང་དེ་དག་འདི་སྙམ་དུ་སེམས་ཏེ། བདག་ཅག་གིས་འདི་ལ་གང་ཡོངས་སུ་གཏང་བར་དཀའ་བའི་སྦྱིན་པ་དག་བསླང་བར་བྱ་སྟེ། གལ་ཏེ་ཡོངས་སུ་གཏོང་བར་བྱེད་ན་ནི་དེའི་ཚེ་འདིའི་མིང་ཐམས་ཅད་སྦྱིན་པ་ཞེས་བྱ་བར་འགྱུར་རོ། །ཇི་སྟེ་ཡོངས་སུ་གཏོང་བར་མི་བྱེད་ན་ནི་འདིའི་མིང་ཐམས་ཅད་སྦྱིན་པ་ཞེས་བྱ་བར་ཡང་མི་འགྱུར་རོ་སྙམ་ནས། དེ་ནས་སེམས་ཅན་དེ་དག་གིས་རྒྱལ་པོ་ནམ་མཁའ་ལ་སླས་རྣམས་ཀྱང་བསླངས། བཙུན་མོ་རྣམས་དང ། བཙུན་མོ་དམ་པ་དང ། བུ་དང ། བུ་མོ་དག་ཀྱང་བསླང་བར་བརྩམས་པ་དང ། དེའི་ཚེ་རྒྱལ་པོ་ནམ་མཁའ་སེམས་རབ་ཏུ་དང་བས་བྱིན་ནོ། །དེ་དག་ཡང་འདི་སྙམ་དུ་སེམས་ཏེ། བཙུན་མོ་ཡོངས་སུ་གཏོང་བ་གང་ཡིན་པ་དེ་ནི་འདི་ལ་དཀའ་བ་མ་ཡིན་གྱི། བདག་ཅག་གིས་རྒྱལ་པོ་ནམ་མཁའ་ལ་ཡན་ལག་དང ། ཉིང་ལག་གང་ཡིན་པ་དག་བསླང་བར་བྱ་སྟེ། གལ་ཏེ་སྟེར་ན་ནི་ཐམས་ཅད་སྦྱིན་པ་ཞེས་བྱ་བར་འགྱུར་རོ། །ཇི་སྟེ་མི་སྟེར་ན་ནི་ཐམས་ཅད་སྦྱིན་པ་ཞེས་བྱ་བར་ཡང་མི་འགྱུར་རོ་སྙམ་པ་དང ། དེ་ནས་བྲམ་ཟེ་སྐར་མ་ལ་དགའ་བ་ཞེས་བྱ་བ་དེ་རྒྱལ་པོ་ནམ་མཁའི་མདུན་དུ་འདུག་སྟེ་སྨྲས་པ། ཐམས་ཅད་
448a
༄#། །སྦྱིན་པ། རྒྱལ་སྲིད་བདག་ལ་སྩོལ་ཅིག་།རྒྱལ་པོ་ནམ་མཁའ་དེ་ཐོས་པ་དང་ཡིད་མཆོག་ཏུ་དགའ་སྟེ། བདག་ཉིད་ཀྱིས་བྲམ་ཟེ་ཁྲུས་བྱས་ནས་རྒྱལ་ཐབས་ཀྱི་ཐོད་བཅིངས་ཏེ། རྒྱལ་པོའི་དབང་བསྐུར་བས་དབང་བསྐུར་ནས། རྒྱལ་སྲིད་ལ་རབ་ཏུ་བཞག་སྟེ་ཛམྦུའི་གླིང་ཐམས་ཅད་ཕུལ་ནས་སྨོན་ལམ་བཏབ་པ།་བདག་གིས་ཛམྦུའི་གླིང་ཐམས་ཅད་ཡོངས་སུ་བཏང་བས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག ། གལ་ཏེ་བདག་གི་རེ་བ་དེ་ཡོངས་སུ་རྫོགས་པར་འགྱུར་བ་ལྟ་ན། གང་བདག་གིས་ད་ལྟར་ཛམྦུའི་གླིང་ཐམས་ཅད་ཀྱི་རྒྱལ་པོར་བཅུག་པ་འདི་ཛམྦུའི་གླིང་ཐམས་ཅད་དུ་ཚིག་གིས་དབང་སྒྱུར་ཞིང་ཚེ་རིང་བ་དང ། འཁོར་ལོས་བསྒྱུར་བའི་རྒྱལ་སྲིད་ལ་ཡུན་རིང་དུ་གནས་པར་གྱུར་ཅིག་།གང་གི་ཚེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དེའི་ཚེ་རྒྱལ་ཚབ་ཉིད་དུ་གྱུར་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་ཡང་གྱུར་ཅིག་ཅེས་སྨོན་ལམ་བཏབ་བོ། །བྲམ་ཟེ་འདོད་པ་ཞེས་བྱ་བ་དེས་ཀྱང་ངའི་རྐང་པ་གཉིས་བསླངས་པ་དང ། ང་ཉིད་ཀྱིས་སེམས་རབ་ཏུ་དང་བས་མཚོན་ཆ་རྣོན་པོ་བླངས་
448b
ནས། རང་གི་རྐང་པ་གཉིས་བཅད་དེ་བྱིན་ནས་བདག་གིས་བླ་ན་མེད་པ་ཡང་དག་པའི་ཚུལ་ཁྲིམས་ཀྱི་རྐང་པ་ཐོབ་པར་གྱུར་ཅིག་ཅེས་སྨོན་ལམ་བཏབ་བོ། །དེ་ན་བྲམ་ཟེ་ལྟ་བ་བསྲུང་ཞེས་བྱ་བ་དེས་ཀྱང་ངའི་མིག་གཉིས་བསླངས་པ་དང ། ངས་མིག་གཉིས་ཕྱུང་སྟེ་དེ་ལ་བྱིན་ནས་སྔ་མ་བཞིན་དུ་སྦྱར་ཏེ། བླ་ན་མེད་པའི་སྤྱན་ལྔ་ཐོབ་པར་བྱ་བའི་ཕྱིར་སྨོན་ལམ་བཏབ་བོ། །ཡང་རིང་པོ་མ་ལོན་པར་བྲམ་ཟེ་སྒྲ་བཟང་ཞེས་བྱ་བ་དེས་ཀྱང་ངའི་རྣ་བ་གཉིས་བསླངས་པ་དང ། ང་ཉིད་ཀྱིས་རང་གི་རྣ་བ་གཉིས་བཅད་དེ།་དེ་ལ་བྱིན་ནས་བླ་ན་མེད་པའི་སྙན་ཐོབ་པར་བྱ་བའི་ཕྱིར་སྨོན་ལམ་བཏབ་བོ། །འཚོ་བ་པ་ཡང་དག་འཚོ་ཞེས་བྱ་བ་དེས་ཀྱང་ངའི་སྐྱེས་བུའི་དབང་པོ་ཕོ་མཚན་བསླངས་པ་དང ། ང་ཉིད་ཀྱིས་བཅད་དེ། བྱིན་ནས་འདོམས་ཀྱི་སྦ་བའི་མཚན་བླ་ན་མེད་པ་ཐོབ་པར་བྱ་བའི་ཕྱིར་སྨོན་ལམ་བཏབ་བོ། །གཞན་དག་གིས་ཀྱང་ངའི་ཤ་དང་ཁྲག་དང་བསླངས་པ་དང ། ང་ཉིད་ཀྱིས་བྱིན་ནས་གསེར་གྱི་མདོག་ལྟ་བུའི་མཚན་ཐོབ་པར་བྱ་བའི་ཕྱིར་སྨོན་ལམ་བཏབ་བོ། །གཞན་ཡང་ཀུན་ཏུ་རྒྱུའོ་མ་འཛག་ཅེས་བྱ་བ་དེས་ངའི་ལག་པ་གཉིས་བསླངས་པ་དང ། ང་ཉིད་ཀྱིས་ལག་པ་གཡས་པས་ལག་པ་གཡོན་པ་བཅད་ནས་གཡས་པའང་གཅོད་དུ་བཅུག་སྟེ་བྱིན་ནས་དད་པའི་ཕྱག་བླ་ན་
449a
༄#། །མེད་པ་ཐོབ་པར་བྱ་བའི་ཕྱིར་སྨོན་ལམ་བཏབ་བོ། །གང་གི་ཚེ་ངས་ཡན་ལག་དང་ཉིང་ལག་དག་བཅད་པ་དེའི་ཚེ་ལུས་ཁྲག་གིས་ཡོག་བཞིན་དུ་སྨོན་ལམ་བཏབ་པ། གལ་ཏེ་ཡོངས་སུ་གཏོང་བ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བདག་གི་རེ་བ་ཡོངས་སུ་རྫོགས་པར་འགྱུར་བ་ལྟ་ན་བདག་གི་ལུས་ཀྱི་ལེན་པ་ཞིག་ཀྱང་གདོན་མི་ཟ་བར་རྙེད་པར་གྱུར་ཅིག་།དེ་ན་སེམས་ཅན་རྣམས་དང ། ཁམས་ཀྱི་རྒྱལ་པོ་རྣམས་དང ། བློན་པོ་དེ་དག་ཀྱང་སྙིང་རྗེ་མེད་ལ། འཕགས་པ་མ་ཡིན་ཞིང ། བྱས་པ་མི་གཟོ་བས་སྨྲས་པ། འདི་ནི་བློ་འཆལ་ཅིང་ཤེས་པ་ཆུང་སྟེ། ཡན་ལག་ཐམས་ཅད་གཏུབས་ཤིང་རྒྱལ་སྲིད་ཀྱི་དབང་ཕྱུག་ཐམས་ཅད་ཉམས་པ་ཡིན་པས་ན་ད་ཤ་སྣ་གུ་འདི་ཅི་དགོས་ཞེས་ཟེར་ཏེ། དེ་དག་གིས་ང་ཁྱེར་ནས་གྲོང་ཁྱེར་གྱི་ཕྱི་རོལ་དུར་ཁྲོད་ཀྱི་སར་བོར་ཏེ་དོང་ངོ ། །དེར་ཤ་སྦྲང་དང ། སྦྲང་བུ་མ་ཆུ་རིང་དག་ལྷགས་ནས་ཁྲག་འཇིབ་པར་བྱེད་དོ། །ཁྱི་དང ། ཝ་དང ། བྱ་རྒོད་དག་ཀྱང་ལྷགས་ཏེ་ཤ་འཐོག་པར་བྱེད་དོ། །དེ་ནས་ངས་སེམས་རབ་ཏུ་དང་བས་སྨོན་ལམ་བཏབ་པ། གང་གི་ཚེ་བདག་གིས་རྒྱལ་སྲིད་ཀྱི་དབང་ཕྱུག་ཐམས་ཅད་ཡོངས་སུ་བཏང་བ་དང ། ལུས་དང་ཡན་ལག་དང་ཉིང་ལག་ཐམས་ཅད་ཡོངས་སུ་བཏང་བ་ན་སྐད་
449b
ཅིག་གཅིག་ཙམ་ཡང་བདག་གིས་སེམས་འགྱོད་པར་མ་གྱུར་ཅིང་ཁྲོ་བ་མ་སྐྱེས་པ་ལྟ་ན། དེའི་ཕྱིར་བདག་གི་རེ་བ་འདི་ཡོངས་སུ་རྫོགས་པར་གྱུར་ཅིག་།བདག་གི་ལུས་འདི་ཤའི་རིར་ཀུན་ཏུ་གནས་པར་གྱུར་ལ་སེམས་ཅན་གང་སུ་དག་ཤ་ཟ་བ་དང ། ཁྲག་འཐུང་བ་དེ་དག་བདག་གི་ཤ་ཟ་བར་གྱུར་ཅིག་།ཁྲག་འཐུང་བར་གྱུར་ཅིག་།ཇི་སྲིད་དུ་སེམས་ཅན་རྣམས་ཤ་ཟ་བར་འགྱུར་བ་དང ། ཁྲག་འཐུང་བར་འགྱུར་བ་དེ་སྲིད་དུ་བདག་གི་སྨོན་ལམ་གྱི་དབང་གིས་ལུས་མཐར་གྱིས་སྐྱེ་བར་འགྱུར་ཞིང ། ལུས་ཀྱི་འཕང་དུ་ནི་དཔག་ཚད་འབུམ་ཡོད་པར་གྱུར་ལ། ཁྱོན་དུ་ནི་དཔག་ཚད་ལྔ་སྟོང་ཡོད་པར་གྱུར་ཅིག་ཅེས་སྨོན་ལམ་བཏབ་སྟེ། དེར་ངས་ལོ་སྟོང་གི་བར་དུ་རང་གི་ཤ་དང་ཁྲག་གིས་སེམས་ཅན་རྣམས་ཚིམ་པར་བྱས་སོ། །དེར་ངས་ལྕེ་ཇི་སྙེད་ཡོངས་སུ་བཏང་སྟེ། གཅན་གཟན་དང་བྱ་དག་གིས་ཡོངས་སུ་ཟོས་ནས། ཡང་སྨོན་ལམ་གྱི་དབང་གིས། གཞན་དང་གཞན་དག་ཕྱིར་སྐྱེས་པར་གྱུར་པ་གང་ཡིན་པ་དེ་དག་གི་ཕུང་པོའང་བྱ་རྒོད་ཀྱི་ཕུང་པོའི་རི་འདིའི་ཚད་ཙམ་དུ་གྱུར་ཏེ། ལྗགས་ཤིན་ཏུ་རིང་པའི་མཚན་བླ་ན་མེད་པ་ཐོབ་པར་བྱ་བའི་ཕྱིར་ངས་སྨོན་ལམ་ཡང་རྟག་ཏུ་བཏབ་བོ། །དེ་ནས་ང་ཤི་འཕོས་ནས་སྨོན་ལམ་གྱི་དབང་གིས་ཛམྦུའི་གླིང་ཤིང་པ་ཏ་སྐྱེ་བར་ཀླུ་རྣམས་ཀྱི་ནང་དུ་སྐྱེས་ཏེ། ཀླུའི་རྒྱལ་པོ་གཏེར་སྟོན་ཅེས་བྱ་
450a
༄#། །བར་གྱུར་ཏོ། །གང་གི་ནུབ་མོ་ཀླུ་རྣམས་ཀྱི་ནང་དུ་སྐྱེས་པ་དེ་ཉིད་ཀྱི་ནུབ་མོ་ངས་དེར་གཏེར་བྱེ་བ་ཁྲག་ཁྲིག་ཕག་འབུམ་ཀུན་ཏུ་བསྟན་ནས་ང་ཉིད་ཀྱིས་སྒྲ་བསྒྲགས་པ། ཀྱེ་སེམས་ཅན་དག་།ཕྱོགས་འདི་ནི་འདི་ལྟ་སྟེ། དབྱིག་དང ། གསེར་དང ། ཆུ་འདང་གི་བར་གྱི་རིན་པོ་ཆེ་སྣ་ཚོགས་ཀྱིས་ཡོངས་སུ་གང་བའི་གཏེར་དག་ཡོད་ཀྱི། ཀྱེ་སེམས་ཅན་དག་།ཁྱེད་ཀྱིས་ལོང་ཞིག་།བླངས་ནས་ཀྱང་དགེ་བ་བཅུའི་ལས་ཀྱི་ལམ་ཡང་དག་པར་གཟུང་ཞིག་།བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་སེམས་སྐྱེད་ཅིག་།ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པའམ། སངས་རྒྱས་ཀྱི་ཐེག་པར་ཡང་སེམས་སྐྱེད་ཅིག ། དེ་ང་ལས་རིན་པོ་ཆེ་ཇི་ཙམ་དགོས་པ་དག་ལོང་ཞིག་ཅེས་ཀྱང་བསྒོ་སྟེ། ཛམྦུའི་གླིང་ཤིང་པ་ཏ་སྐྱེ་བ་དེར་སྔོན་གྱི་སྨོན་ལམ་གྱི་དབང་གིས་ཀླུའི་སྐྱེ་བ་ལན་བདུན་བརྗེས་པ་ན། ལོ་བྱེ་བ་ཁྲག་ཁྲིག་འབུམ་ཕྲག་བདུན་ཅུ་རྩ་བདུན་གྱི་བར་དུ་གཏེར་དཔག་ཏུ་མེད་གྲངས་མེད་པ་དག་བསྟན་ཅིང་རབ་ཏུ་བྱིན་ནོ། །དེ་བཞིན་དུ་དེར་སེམས་ཅན་དཔག་ཏུ་མེད་གྲངས་མེད་པ་དག་ཀྱང་ཐེག་པ་གསུམ་པོ་དག་ལ་བཙུད་ཅིང་དགེ་བ་བཅུའི་ལས་ཀྱི་ལམ་དག་ལ་རབ་ཏུ་བཀོད་དེ། རིན་པོ་ཆེ་རྣམ་པ་སྣ་ཚོགས་དག་
450b
གིས་ཚིམ་པར་བྱས་ནས། བླ་ན་མེད་པའི་མཚན་སུམ་ཅུ་རྩ་གཉིས་ཐོབ་པར་བྱ་བའི་ཕྱིར་སྨོན་ལམ་ཡང་བཏབ་བོ། །དེ་བཞིན་དུ་གླིང་གཉིས་པར་ཡང་ཀླུའི་སྐྱེ་བ་ལན་བདུན་བརྗེས་ཏེ་སྐྱེས་བུའི་རྩལ་དེ་ལྟ་བུ་དག་བྱས་སོ། །དེ་བཞིན་དུ་གླིང་གསུམ་པ་ནས་འཇིག་རྟེན་གྱི་ཁམས་རྣམ་རྒྱལ་སྒྲ་དབྱངས་ཐམས་ཅད་ཀྱི་གླིང་ཀུན་གྱི་བར་དུའང་སྐྱེས་བུའི་རྩལ་དེ་ལྟ་བུ་དག་བྱས་སོ། །དེ་བཞིན་དུ་ཕྱོགས་བཅུའི་སངས་རྒྱས་ཀྱི་ཞིང་སྟོང་པ་སྙིགས་མ་ལྔ་དང་ལྡན་པ་གངྒཱའི་ཀླུང་གི་བྱེ་མ་སྙེད་དག་གི་གླིང་རེ་རེར་ཡང་སྔར་ཇི་སྐད་སྨོས་པའི་བར་བཞིན་དུ་ངས་ཀླུའི་སྐྱེ་བ་དེ་ལྟ་བུ་ལན་བདུན་བདུན་བླངས་ཤིང ། ལོ་བྱེ་བ་ཁྲག་ཁྲིག་འབུམ་ཕྲག་བདུན་ཅུ་རྩ་བདུན་བདུན་དུ་སེམས་ཅན་རྣམས་ལ་གཏེར་དཔག་ཏུ་མེད་གྲངས་མེད་པ་དེ་ལྟ་བུ་དག་བསྟན་ཅིང་རབ་ཏུ་བྱིན་ནོ། །རིགས་ཀྱི་བུ། ཇི་ལྟར་དེ་བཞིན་གཤེགས་པ་སྟོབས་དང་བརྩོན་འགྲུས་ཤིན་ཏུ་དྲག་པོས་མཚན་སུམ་ཅུ་རྩ་གཉིས་ཡོངས་སུ་ཚོལ་བ་ན་བྱང་ཆུབ་ཀྱི་སྤྱད་པ་སྤྱོད་པ་ལྟར། སྔར་ཇི་སྐད་སྨོས་པའི་སྐྱེས་བུ་དམ་པ་བརྒྱད་པོ་དེ་དག་མ་གཏོགས་པར་སྔོན་བྱང་ཆུབ་སེམས་དཔའ་གང་གིས་ཀྱང་སྟོབས་དང་བརྩོན་འགྲུས་ཤིན་ཏུ་དྲག་པོ་དེ་ལྟ་བུས་བྱང་ཆུབ་ཀྱི་སྤྱད་པ་མ་སྤྱད་ཅིང ། ད་ལྟར་ཡང་སུའང་མི་སྤྱོད་ལ། ཕྱིས་འབྱུང་བར་
451a
༄#། །འགྱུར་བའི་བྱང་ཆུབ་སེམས་དཔའ་འགའ་ཡང་སྟོབས་དང་བརྩོན་འགྲུས་ཀྱི་ཤུགས་དེ་ལྟ་བུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སྤྱད་པ་སྤྱོད་པར་མི་འགྱུར་བས་དེ་བཞིན་གཤེགས་པའི་བྱང་ཆུབ་ཀྱི་སྤྱོད་པ་ལ་ལྟོས། དེའི་ཚེ་བསྐལ་པ་གྲངས་མེད་པ་འདས་ནས་དུས་ངན་པའི་ཚེ་བསྐལ་པ་ཆེན་པོ་ཨུཏྤ་ལ་ཞེས་བྱ་བ་བྱུང་བ་ན་སངས་རྒྱས་ཀྱི་ཞིང་འདི་བྱུ་རུ་འབྱུང་བ་ཞེས་བྱ་བ་སྟོང་ཞིང་སྙིགས་མ་ལྔ་དང་ལྡན་པར་གྱུར་པའི་ཚེ། གླིང་བཞི་པ་དེར་ང་བརྒྱ་བྱིན་ལེགས་པར་རྣམ་པར་བྱེད་ཅེས་བྱ་བར་གྱུར་ནས་ངས་ཛམྦུའི་གླིང་དེ་ན་སེམས་ཅན་རྣམས་མི་དགེ་བ་ལ་དད་ཅིང་སྤྱོད་པར་མཐོང་ངོ ། །མཐོང་ནས་ཀྱང་ངས་བདག་ཉིད་གནོད་སྦྱིན་གྱི་གཟུགས་ཤིན་ཏུ་འཇིགས་འཇིགས་ལྟ་ཞིག་ཏུ་མངོན་པར་སྤྲུལ་ཏེ། ཛམྦུའི་གླིང་དུ་བབས་ནས་མི་རྣམས་ཀྱི་མདུན་དུ་འདུག་གོ། །དེ་དག་གིས་ང་མཐོང་ནས་སྐྲག་སྟེ་ང་ལ་དྲིས་པ། ཁྱོད་ལ་ཅི་དགོས། བདག་ཅག་གིས་ཁྱོད་ལ་དབུལ་བར་བགྱིའོ། །ངས་སྨྲས་པ། ཁོ་བོ་ལ་ཁ་བས་དག་དགོས་སོ། །དེ་དག་གིས་སྨྲས་པ། ཁྱོད་ཀྱི་ཁ་ཟས་ཇི་ལྟ་བུ་ལགས། ངས་སྨྲས་པ། ཁོ་བོ་ནི་མི་དག་བསད་ཅིང་ཟ་སྟེ། མི་གང་དག་ཇི་སྲིད་འཚོའི་བར་དུ་སྲོག་གཅོད་པ་སྤོང་བར་བྱེད་པ་དང ། ལོག་པར་ལྟ་བའི་བར་དག་
451b
སྤོང་བར་བྱེད་པ་དེ་དག་ལ་ནི་ང་མི་ཟའོ། །གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱེད་པ་དང ། རང་སངས་རྒྱས་ཀྱི་ཐེག་པ་དང ། ཉན་ཐོས་ཀྱི་ཐེག་པར་སེམས་བསྐྱེད་པར་བྱེད་པ་དེ་དག་ལའང་ང་མི་ཟའོ་ཞེས་སྨྲས་ཏེ། དེ་ན་ང་སེམས་ཅན་དག་སྤྲུལ་ཞིང་ཟ་བ་དེ་མཐོང་བ་ན། སེམས་ཅན་དེ་དག་འཇིགས་པས་ཇི་སྲིད་འཚོ་བའི་བར་དུ་སྲོག་གཅོད་པ་སྤངས་སོ། །མ་བྱིན་པར་ལེན་པ་དང ། ལོག་པར་ལྟ་བའི་བར་དག་ཀྱང་སྤངས་སོ། །ཁ་ཅིག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཁ་ཅིག་གིས་ནི་རང་སངས་རྒྱས་ཀྱི་ཐེག་པར། ཁ་ཅིག་གིས་ནི་ཉན་ཐོས་ཀྱི་ཐེག་པར་སེམས་བསྐྱེད་དེ། གླིང་བཞི་པའི་སེམས་ཅན་ཐམས་ཅད་དགེ་བ་བཅུའི་ལས་ཀྱི་ལམ་དང ། ཐེག་པ་གསུམ་པོ་དག་ལ་རབ་ཏུ་བཀོད་ནས་དེར་ངས་སྨོན་ལམ་བཏབ་པ། གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བདག་གི་རེ་བ་ཡོངས་སུ་རྫོགས་པར་འགྱུར་བ་ལྟ་ན། དེའི་ཕྱིར་བདག་གིས་སྨོན་ལམ་འདིའང་ཡོངས་སུ་རྫོགས་པར་གྱུར་ཅིག་།ཇི་ལྟར་བདག་གིས་གླིང་བཞི་པའི་སེམས་ཅན་རྣམས་དགེ་བའི་ལམ་རྣམས་ལ་ངེས་པར་སྦྱར་བ་དེ་བཞིན་དུ་སངས་རྒྱས་ཀྱི་ཞིང་འདི་ཐམས་ཅད་ཀྱི་གླིང་བཞི་པ་ཀུན་གྱི་སེམས་ཅན་ཐམས་ཅད་ཀྱིས་ཀྱང་དེ་ལྟ་
452a
༄#། །བུའི་འཇིགས་པས་བདག་མཐོང་བར་འགྱུར་བ་དང ། བདག་གིས་ཀྱང་སེམས་ཅན་དེ་དག་དགེ་བ་བཅུའི་ལས་ཀྱི་ལམ་ལ་རབ་ཏུ་འགོད་ཅིང ། ཐེག་པ་གསུམ་པོ་དག་ལའང་ངེས་པར་སྦྱོར་བར་གྱུར་ཅིག། དེ་བཞིན་དུ་ཕྱོགས་བཅུ་ཀུན་གྱི་སངས་རྒྱས་ཀྱི་ཞིང་སྟོང་པ་སྙིགས་མ་ལྔ་དང་ལྡན་པ་དག་གི་སེམས་ཅན་ཐམས་ཅད་ཀྱང་དགེ་བ་བཅུའི་ལས་ཀྱི་ལམ་ལ་རབ་ཏུ་འགོད་ཅིང ། ཐེག་པ་གསུམ་པོ་དག་ལའང་ངེས་པར་སྦྱོར་བར་གྱུར་ཅིག་ཅེས་སྨོན་ལམ་བཏབ་བོ། །རིགས་ཀྱི་བུ། ངའི་རེ་བ་དང་སྨོན་ལམ་དེ་བཞིན་དུ་ཡོངས་སུ་རྫོགས་ཏེ། འཇིག་རྟེན་གྱི་ཁམས་བྱུ་རུ་འབྱུང་བ་ཐམས་ཅད་ཀྱི་སེམས་ཅན་རྣམས་གནོད་སྦྱིན་གྱི་གཟུགས་ཀྱིས་དགེ་བའི་ཆོས་རྣམས་ལ་ངེས་པར་བཏུལ་ཏོ། །དེ་བཞིན་དུ་ཕྱོགས་བཅུའི་སངས་རྒྱས་ཀྱི་ཞིང་སྟོང་པ་སྙིགས་མ་ལྔ་དང་ལྡན་པ་གངྒཱའི་ཀླུང་གི་བྱེ་མ་སྙེད་དག་ཏུའང་ངས་གནོད་སྦྱིན་གྱི་གཟུགས་ཀྱིས་མི་རྣམས་དགེ་བའི་ལམ་གྱི་སྤྱོད་པ་དག་ལ་རབ་ཏུ་བཀོད་དོ། །དེ་ལྟར་ངས་སེམས་ཅན་མང་པོ་དག་བསྡིགས་ཤིང་དགེ་བའི་སྤྱོད་པ་ལ་རབ་ཏུ་བཀོད་པའི་ལས་ཀྱི་འཕྲོ་དེས་ན། དེ་བར་ང་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་ནས་བྱང་ཆུབ་ཀྱི་སྙིང་པོར་བྱང་ཆུབ་ཀྱི་ཤིང་དྲུང་
452b
དུ་རྡོ་རྗེའི་གདན་ལ་འདུག་པ་ན་བདུད་སྡིག་ཅན་དམག་གི་ཚོགས་ཆེན་པོ་དང་བཅས་ཏེ། ང་བྱང་ཆུབ་ལས་རྣམ་པར་བཟློག་པར་བྱ་བའི་ཕྱིར་ཉེ་བར་འོངས་པ་ཡིན་ནོ། །རིགས་ཀྱི་བུ།་ངས་བྱང་ཆུབ་ཀྱི་སྤྱད་པ་སྤྱོད་པ་ན་སྦྱིན་པའི་ཕ་རོལ་ཏུ་ཕྱིན་པ་ཐོབ་པ་མདོར་བསྡུས་པ་ནི་དེ་ཡིན་ཏེ། དེའི་ཚེ་ངས་བཟོད་པ་ཟབ་མོ་དང ། གཟུངས་ཟབ་མོ་དང ། ཏིང་ངེ་འཛིན་ཟབ་མོ་དང ། འཇིག་རྟེན་པའི་མངོན་པར་ཤེས་པ་ལྔའང་ཐོབ་སྟེ། སྐྱེས་བུའི་རྩལ་ཆེན་པོ་དེ་ལྟ་བུ་དག་བྱས་སོ། །དེ་བཞིན་དུ་སེམས་ཅན་དཔག་ཏུ་མེད་གྲངས་མེད་པ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །དེ་བཞིན་དུ་སེམས་ཅན་དཔག་ཏུ་མེད་གྲངས་མེད་པ་དག་རང་སངས་རྒྱས་ཀྱི་ཐེག་པའང་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །དེ་བཞིན་དུ་སེམས་ཅན་དཔག་ཏུ་མེད་གྲངས་མེད་པ་དག་ཉན་ཐོས་ཀྱི་ཐེག་པའང་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །ངས་ཇི་སྲིད་དུ་བྱང་ཆུབ་ཀྱི་སྤྱད་པ་སྤྱོད་པ་ན་སངས་རྒྱས་བཅོམ་ལྡན་འདས་སངས་རྒྱས་ཀྱི་ཞིང་རྡུལ་ཕྲ་རབ་ཀྱི་རྡུལ་སྙེད་དག་ལ་བསྙེན་བཀུར་བྱས་ཏེ། ངས་སངས་རྒྱས་རེ་རེའི་དྲུང་ནས་རྒྱ་མཚོའི་ཆུའི་ཐིགས་པ་སྙེད་ཀྱི་ཡོན་ཏན་དག་ཡོངས་སུ་བཟུང་བ་མ་གཏོགས་པར་ངས་
453a
༄#། །རང་སངས་རྒྱས་བགྲང་བ་ལས་ཡང་དག་པར་འདས་པ་དག་ལའང་མཆོད་པ་བྱས་སོ། །དེ་བཞིན་གཤེགས་པའི་ཉན་ཐོས་བགྲང་བ་ལས་ཡང་དག་པར་འདས་པ་དག་ལའང་མཆོད་པ་བྱས་སོ། །དེ་བཞིན་དུ་ཕ་དང ། མ་དང ། མངོན་པར་ཤེས་པ་ལྔ་དང་ལྡན་པའི་དྲང་སྲོང་རྣམས་ལའང་མཆོད་པ་བྱས་སོ། །ངས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྙིང་བརྩེ་བས་རང་གི་ཤ་དང་ཁྲག་གིས་སེམས་ཅན་རྣམས་ཚིམ་བར་བྱས་ཏེ། ད་ལྟར་ཡང་རང་གི་ཆོས་རྣམས་ཀྱིས་ཚིམ་པར་བྱས་པ་ཡིན་ནོ། །ཐེག་པ་ཆེན་པོའི་མདོ་སྙིང་རྗེ་པདྨ་དཀར་པོ་ལས། སྦྱིན་པའི་ལེའུ་ཞེས་བྱ་བ་སྟེ་ལྔ་པའོ།། །།རིགས་ཀྱི་བུ། ཇི་ལྟར་ངས་སངས་རྒྱས་ཀྱི་སྤྱན་གྱིས་ཕྱོགས་བཅུ་ན་སངས་རྒྱས་བཅོམ་ལྡན་འདས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་ཡོངས་སུ་མྱ་ངན་ལས་འདས་པ་དག་གཟིགས་པ་དེ་དག་ཀྱང་ངས་དང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །དེ་ལྟར་ངས་དང་པོ་སྦྱིན་པའི་ཕ་རོལ་ཏུ་ཕྱིན་པའང་ཡང་དག་པར་འཛིན་དུ་བཅུག་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དག་ཀྱང་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །དེ་བཞིན་
453b
དུད་ལྟར་ཤར་ཕྱོགས་ལོགས་ན་སངས་རྒྱས་བཅོམ་ལྡན་འདས་དཔག་ཏུ་མེད་གྲངས་མེད་པ་དག་ཆོས་དང་ལྡན་པའི་ཆོས་ཀྱི་འཁོར་ལོ་བསྐོར་ནས་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པ་དག་གཟིགས་པ་གང་ཡིན་པ་དེ་དག་ཀྱང ། ངས་དང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །ཕ་རོལ་ཏུ་ཕྱིན་པ་དྲུག་པོ་དག་གི་བར་ལའང་དེ་བཞིན་དུ་བརྗོད་པར་བྱའོ། །དེ་བཞིན་དུ་ལྷོ་དང ། ནུབ་དང ། བྱང་དང ། འོག་དང ། སྟེང་གི་ཕྱོགས་རྣམས་སུའང་བརྗོད་པར་བྱའོ། །རིགས་ཀྱི་བུ། ངས་སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་ས་ཡ་ཕྲག་དགུ་དང་ཆིག་འབུམ་འདས་པ་ན་འཇིག་རྟེན་གྱི་ཁམས་མེ་ཏོག་ཀུན་ཏུ་རྒྱས་པ་ཞེས་བྱ་བ་ན་དེ་བཞིན་གཤེགས་པ་དྲི་མེད་གཟི་བརྗིད་ཡོན་ཏན་རྒྱལ་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པ་གཟིགས་ཏེ།་བཅོམ་ལྡན་འདས་དེའང་ངས་དང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། ཡང་དག་པར་འཛིན་དུ་བཅུག་ཅིང་བཞག་སྟེ་རབ་ཏུ་གནས་པར་བྱས་སོ། །ངས་དང་པོ་སྦྱིན་པའི་ཕ་རོལ་ཏུ་ཕྱིན་པ་དང ། ཤེས་རབ་ཀྱི་ཕ་རོལ་ཏུ་ཕྱིན་བའི་བར་དག་ཀྱང་ཡང་དག་པར་འཛིན་དུ་བཅུག་ཅིང་བཞག་སྟེ་རབ་ཏུ་གནས་པར་
454a
༄#། །བྱས་སོ། །དེ་བཞིན་དུ་སྦྱར་ཏེ་ཤར་ཕྱོགས་ལོགས་ན་སངས་རྒྱས་ཀྱི་ཞིང་མངོན་པར་དགའ་བ་ཞེས་བྱ་བ་ན་དེ་བཞིན་གཤེགས་པ་མི་འཁྲུགས་པ་ཞེས་བྱ་བ་དང ། སངས་རྒྱས་ཀྱི་ཞིང་ཛམྦུའི་ཆུ་ཀླུང་ཞེས་བྱ་བ་ན། དེ་བཞིན་གཤེགས་པ་ཉི་མའི་སྙིང་པོ་ཞེས་བྱ་བ་དང ། སངས་རྒྱས་ཀྱི་ཞིང་དགའ་བའི་དབང་ཕྱུག་ཅེས་བྱ་བ་ན་དེ་བཞིན་གཤེགས་པ་དགའ་བའི་དབང་ཕྱུག་སྒྲ་དབྱང་འོད་ཟེར་ཞེས་བྱ་བ་དང ། སངས་རྒྱས་ཀྱི་ཞིང་ཉི་མ་གནས་པ་ཞེས་བྱ་བ་ན་དེ་བཞིན་གཤེགས་པ་ཡེ་ཤེས་ཉི་མ་ཞེས་བྱ་བ་དང ། སངས་རྒྱས་ཀྱི་ཞིང་རྒྱལ་བའི་གནས་རབ་ཅེས་བྱ་བ་ན་དེ་བཞིན་གཤེགས་པ་འབྲུག་སྒྲ་བསྒྲགས་པ་ཞེས་བྱ་བ་དང ། སངས་རྒྱས་ཀྱི་ཞིང་ཡང་དག་འཚོ་ཞེས་བྱ་བ་ན་དེ་བཞིན་གཤེགས་པ་རྡོ་རྗེ་གྲགས་པ་ཞེས་བྱ་བ་དང ། སངས་རྒྱས་ཀྱི་ཞིང་ཤིན་ཏུ་རྡུལ་མེད་ཅེས་བྱ་བ་ན་དེ་བཞིན་གཤེགས་པ་སྟག་གི་འོད་ཟེར་ཅེས་བྱ་བ་དང ། སངས་རྒྱས་ཀྱི་ཞིང་དགའ་མེད་ཅེས་བྱ་བ་ན་དེ་བཞིན་གཤེགས་པ་ཉི་གདུགས་སྙིང་པོ་ཞེས་བྱ་བ་དང ། སངས་རྒྱས་ཀྱི་ཞིང་འཁོན་སྦྱོང་འོད་ཅེས་བྱ་བ་ན་དེ་བཞིན་གཤེགས་པ་གྲགས་པའི་དབང་ཕྱུག་རྒྱལ་པོ་ཞེས་བྱ་བ་དང ། སངས་རྒྱས་ཀྱི་ཞིང་ལྷུན་པོ་འོད་ཅེས་བྱ་བ་ན་དེ་བཞིན་གཤེགས་པ་བསམ་ཡས་རྒྱལ་པོ་ཞེས་བྱ་བ་དང ། སངས་རྒྱས་
454b
ཀྱི་ཞིང་ནམ་མཁའ་ཞེས་བྱ་བ་ན་དེ་བཞིན་གཤེགས་པ་སྣང་དཔལ་སྙིང་པོ་ཞེས་བྱ་བ་དང ། སངས་རྒྱས་ཀྱི་ཞིང་མེ་ཏོག་འོད་ཅེས་བྱ་བ་ན་དེ་བཞིན་གཤེགས་པ་འོད་གསལ་ཏོག་ཅེས་བྱ་བ་དང ། སངས་རྒྱས་ཀྱི་ཞིང་བདེ་མཆོག་ཅེས་བྱ་བ་ན་དེ་བཞིན་གཤེགས་པ་ལྷུན་དབྱངས་ལྷུན་པོ་ཡང་དག་སྟོན་ཅེས་བྱ་བ་དང ། སངས་རྒྱས་ཀྱི་ཞིང་ས་ཅན་ཞེས་བྱ་བ་ན་དེ་བཞིན་གཤེགས་པ་ཡེ་ཤེས་གཟུགས་ཞེས་བྱ་བ་དང ། སངས་རྒྱས་ཀྱི་ཞིང་མེ་ཏོག་སྣ་ཚོགས་ཞེས་བྱ་བ་ན་དེ་བཞིན་གཤེགས་པ་དྲི་མེད་སྤྱན་ཞེས་བྱ་བ་དང ། རིགས་ཀྱི་བུ། དེ་དག་ལ་སོགས་པ་ཤར་ཕྱོགས་ལོགས་ན་སངས་རྒྱས་བཅོམ་ལྡན་འདས་དཔག་ཏུ་མེད་གྲངས་མེད་པ་དག་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པ་དག་ཀྱང་ངས་སངས་རྒྱས་ཀྱི་སྤྱན་གྱིས་གཟིགས་ཏེ། དེ་དག་སྔོན་བྱང་ཆུབ་ཏུ་སེམས་མ་བསྐྱེད་པ་ལས་ངས་དང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་གོ། །སྦྱིན་པའི་ཕ་རོལ་ཏུ་ཕྱིན་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པའི་བར་དག་ཀྱང་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་ནས། ངས་དང་པོ་སངས་རྒྱས་བཅོམ་ལྡན་འདས་བཞུགས་ཏེ་འཚོ་ཞིང་གཞེས་བདག་གི་ཐད་དུ་ཕུལ་ནས། དེར་དེ་དག་ཐམས་ཅད་ཀྱིས་དང་པོ་བླ་ན་མེད་པ་ཡང་
455a
༄#། །དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་བོ། །དེ་ནས་དེའི་ཚེ་འཇིག་རྟེན་གྱི་ཁམས་མེ་ཏོག་ཀུན་ཏུ་རྒྱས་པ་ན་དེ་བཞིན་གཤེགས་པ་དྲི་མེད་གཟི་བརྗིད་ཡོན་ཏན་རྒྱལ་པོ་བཞུགས་པ་དེའི་གདན་རབ་ཏུ་གཡོས་སོ། །དེ་བྱང་ཆུབ་སེམས་དཔའ་གང་དག་འཁོད་པ་དེ་དག་གིས་དེ་བཞིན་གཤེགས་པ་དྲི་མེད་གཟི་བརྗིད་ཡོན་ཏན་རྒྱལ་པོ་དེའི་གདན་རབ་ཏུ་གཡོས་པ་མཐོང་བ་དང ། དེ་བཞིན་གཤེགས་པ་དེ་ཉིད་ལ་ཞུས་པ། བཅོམ་ལྡན་འདས། སྔོན་མ་མཐོང་བ་བཅོམ་ལྡན་འདས་ཀྱི་གདན་རབ་ཏུ་གཡོས་པ་འདིའི་རྒྱུ་ནི་གང་ལགས། རྐྱེན་ནི་གང་ལགས། དེ་བཞིན་གཤེགས་པ་དེས་དེ་དག་ལ་བཀའ་སྩལ་པ། རིགས་ཀྱི་བུ་དག་།སངས་རྒྱས་ཀྱི་ཞིང་འདི་ནས་ནུབ་ཕྱོགས་ཀྱི་ཕྱོགས་ལོགས་སུ་སངས་རྒྱས་ཀྱི་ཞིང་ས་ཡ་ཕྲག་དགུ་དང་ཆིག་འབུམ་འདས་པ་ན། འཇིག་རྟེན་གྱི་ཁམས་མི་མཇེད་ཅེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་པ་དེ་ད་ལྟར་འཁོར་བཞི་པོ་རྣམས་ལ་སྔོན་གྱི་ཚུལ་ལས་བརྩམས་ཏེ་ཆོས་སྟོན་ཏོ། །དེ་བཞིན་གཤེགས་པ་དེ་བཞིན་གཤེགས་པ་དེ་སྔོན་བྱང་ཆུབ་སེམས་དཔའ་གྱུར་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སྤྱད་པ་སྤྱོད་པ་ན། དེས་ང་དང་པོ་
455b
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་སྟེ། གང་གིས་ང་དང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་དེ་བཞིན་གཤེགས་པ་དེས་ང་དང་པོ་སྦྱིན་པའི་ཕ་རོལ་ཏུ་ཕྱིན་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པའི་བར་དག་ཀྱང་ཡང་དག་པར་འཛིན་དུ་བཅུག་ཅིང་བཞག་སྟེ་རབ་ཏུ་གནས་པར་བྱས་སོ། །དེ་བཞིན་གཤེགས་པ་དེ་སྔོན་བྱང་ཆུབ་སེམས་དཔར་གྱུར་ཅིང་བྱང་ཆུབ་སེམས་དཔའི་སྤྱད་པ་ན་སྤྱོད་པ་ན་དེས་ང་དང་པོ་སངས་རྒྱས་བཅོམ་ལྡན་འདས་བཞུགས་ཏེ་འཚོ་ཞིང་གཞེས་པ་དག་གི་ཐད་དུ་ཕུལ་ནས། དེར་ངས་དང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་སྟེ། ངའི་དགེ་བའི་བཤེས་གཉེན་དེ་བཞིན་གཤེགས་པ་ཤཱཀྱ་ཐུབ་པ་དེ་འཇིག་རྟེན་གྱི་ཁམས་མི་མཇེད་ན་བཞུགས་ཏེ་འཚོ་ཞིང་གཞེས་སོ། །དེ་འཁོར་བཞི་པོ་རྣམས་ལ་སྔོན་གྱི་ཚུལ་དེ་ཉིད་ལས་བརྩམས་ཏེ་ཆོས་སྟོན་པས་ན། དེ་བཞིན་གཤེགས་པ་དེའི་བྱིན་གྱི་རླབས་དེས་ངའི་སྟན་རབ་ཏུ་གཡོས་སོ། །རིགས་ཀྱི་བུ་དག་།ཁྱེད་ཅག་ལས་ངའི་ཚིག་གིས་དེ་བཞིན་གཤེགས་པ་ཤཱཀྱ་ཐུབ་པ་ལ་སྙུན་མི་མངའ་མ། ཐུགས་བདེ་བའམ་ཞེས་ཡོངས་སུ་དྲི་བའི་ཕྱིར་སངས་རྒྱས་ཀྱི་ཞིང་མི་མཇེད་དུ་འགྲོ་བར་སྤྲོ་བ་སུ་ཡོད། དེ་ནས་དེ་བཞིན་གཤེགས་
456a
༄#། །པ་དྲི་མེད་གཟི་བརྗིད་ཡོན་ཏན་རྒྱལ་པོ་ལ་བྱང་ཆུབ་སེམས་དཔའ་དེ་དག་གིས་གསོལ་པ། བཙུན་པ་བཅོམ་ལྡན་འདས། བྱང་ཆུབ་སེམས་དཔའ་རྫུ་འཕྲུལ་དང་ལྡན་ཞིང་ཡོན་ཏན་ཐམས་ཅད་ཀྱི་ཕ་རོལ་ཏུ་སོན་པ་གང་དག་དེང་སྔ་དྲོའི་དུས་ཀྱི་ཚེ་སྣང་བ་ཆེན་པོ་མཐོང་ནས་རྣམ་པར་འཕྲུལ་པས་སངས་རྒྱས་ཀྱི་ཞིང་གཞན་དག་ནས་སངས་རྒྱས་ཀྱི་ཞིང་མེ་ཏོག་ཀུན་ཏུ་རྒྱས་པ་འདིར་ལྷགས་ཏེ། དེས་དོགས་འདི་ཡང་ཡུད་ཙམ་ཞིག་བསྐྱོད་ཅིང་མེ་ཏོག་གི་ཆར་ཡང་རབ་ཏུ་ཕབ་པ་དེ་དག་ལགས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་གསོལ་པ། བཙུན་པ་བཅོམ་ལྡན་འདས། བདག་ཅག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་ཕྱག་བགྱི་བ་དང ། བསྙེན་བཀུར་བགྱི་བ་དང ། ཐམས་ཅད་མཁྱེན་པ་ཉིད་ཀྱི་རྣམ་པ་ལ་འཇུག་པའི་གཟུངས་ཀྱི་སྒོའི་ཆོས་ཀྱི་རྣམ་གྲངས་དེའང་མཉན་པའི་སླང་དུ་སངས་རྒྱས་ཀྱི་ཞིང་མི་མཇེད་དེར་མཆིའོ་ཞེས་གསོལ་ནས། བྱང་ཆུབ་སེམས་དཔའ་འབུམ་ཕྲག་མང་པོ་དེ་དག་རང་རང་གི་རྫུ་འཕྲུལ་གྱི་མཐུས་སངས་རྒྱས་ཀྱི་ཞིང་དེ་ནས་འཕགས་པ་དང ། དེ་དག་གིས་གང་ལོགས་སུ་བགྲོད་བར་བྱ་བ་མ་རྩོལ་ནས།
456b
ཡང་དེ་དག་གིས་གསོལ་པ། བཙུན་པ་བཅོམ་ལྡན་འདས། བདག་ཅག་གིས་དེ་བཞིན་གཤེགས་པ་ཤཱཀྱ་ཐུབ་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མི་མཇེད་གང་ཕ་རོལ་ན་མཆིས་པའི་ཕྱོགས་དེའང་མ་འཚལ་ལགས་སོ། །དེ་ནས་དེ་བཞིན་གཤེགས་པ་དྲི་མེད་གཟི་བརྗིད་ཡོན་ཏན་རྒྱལ་པོ་དེས་ཕྱག་བརྐྱང་སྟེ། སོར་མོ་ལྔ་ལས་འོད་ཟེར་སྣ་ཚོགས་དག་རབ་ཏུ་བཀྱེའོ། །དེ་ནས་འོད་ཟེར་དེ་དག་གིས་སངས་རྒྱས་ཀྱི་ཞིང་ས་ཡ་ཕྲག་དགུ་དང་ཆིག་འབུམ་དག་སྣང་བར་བྱས་ཏེ། སངས་རྒྱས་ཀྱི་ཞིང་མི་མཇེད་འདིའི་བར་དུའང་སྣང་བར་བྱས་སོ། །དེས་བྱང་ཆུབ་སེམས་དཔའ་དེ་དག་གིས་ཐམས་ཅད་དང་ལྡན་པའི་སངས་རྒྱས་ཀྱི་ཞིང་མི་མཇེད་འདི་བྱང་ཆུབ་སེམས་དཔའ་དག་གིས་ཁྱབ་ཅིང་ནམ་མཁའི་ངོས་ཀྱང་ལྷ་དང ། ཀླུ་དང ། གནོད་སྦྱིན་དང ། ལྷ་མ་ཡིན་དག་གིས་ཁྱབ་པར་མཐོང་ངོ ། །མཐོང་ནས་ཀྱང་དེ་བཞིན་གཤེགས་པ་དྲི་མེད་གཟི་བརྗིད་ཡོན་ཏན་རྒྱལ་པོ་དེ་ལ་བྱང་ཆུབ་སེམས་དཔའ་དེ་དག་གིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ཅག་གིས་ཐམས་ཅད་དང་ལྡན་པའི་སངས་རྒྱས་ཀྱི་ཞིང་མི་མཇེད་དེ་བྱང་ཆུབ་སེམས་དཔའ་དག་གིས་ཁྱབ་སྟེ་དེ་ན་གང་དུ་བྱང་ཆུབ་སེམས་དཔའ་དག་གིས་ཁྱབ་པར་མ་གྱུར་པའི་གོ་སྐབས་ནི་ཐ་ན་འཁར་བ་གཟུགས་པའི་གཏོས་ཙམ་ཡང་མ་མཆིས་
457a
༄#། །པར་མཐོང་ལགས་སོ།། །།བམ་པོ་བཅོ་ལྔ་པ་སྟེ་ཐ་མ། དེ་བཞིན་གཤེགས་པ་ཤཱཀྱ་ཐུབ་པའང་བདག་ཅག་ལ་གཟིགས་ཤིང་ཆོས་སྟོན་པར་མཐོང་ལགས་སོ། །དེ་བཞིན་གཤེགས་པ་དྲི་མེད་གཟི་བརྗིད་ཡོན་ཏན་རྒྱལ་པོས་བྱང་ཆུབ་སེམས་དཔའ་དེ་དག་ལ་བཀའ་སྩལ་པ། རིགས་ཀྱི་བུ་དག་།དེ་བཞིན་གཤེགས་པ་ཤཱཀྱ་ཐུབ་པ་ནི་ཀུན་ཏུ་གཟིགས་པ་ཡིན་ཏེ། རིགས་ཀྱི་བུ་དག་།འཇིག་རྟེན་གྱི་ཁམས་མི་མཇེད་ན་སེམས་ཅན་གང་ས་ལ་གནས་པའམ། བར་སྣང་ལ་གནས་པ་དེ་དག་ལས་སེམས་ཅན་རེ་རེའང་འདི་སྙམ་དུ་སེམས་ཏེ། དེ་བཞིན་གཤེགས་པ་ཤཱཀྱ་ཐུབ་པ་ནི་ཐུགས་ཐམས་ཅད་ཀྱིས་བདག་ལ་གཟིགས་ཤིང ། བདག་གཅིག་པུ་ལས་བརྩམས་ཏེ་ཆོས་སྟོན་ཏོ་སྙམ་དུ་སེམས་སོ། །རིགས་ཀྱི་བུ་དག་།དེ་བཞིན་གཤེགས་པ་ཤཱཀྱ་ཐུབ་པ་ནི་ཁ་དོག་དང་དབྱིབས་གཅིག་གིས་ཀྱང་ཁ་དོག་དང་དབྱིབས་ཐམས་ཅད་དུ་ཆོས་སྟོན་པར་མཛད་དེ། རིགས་ཀྱི་བུ་དག་།སངས་རྒྱས་ཀྱི་ཞིང་དེ་ན་སེམས་ཅན་གང་དག་ཚངས་པ་ལ་དད་པ་དེ་དག་གིས་ནི་དེ་བཞིན་གཤེགས་པ་ཤཱཀྱ་ཐུབ་པ་ཚངས་པར་ཡང་དག་པར་རྗེས་སུ་མཐོང་ཞིང་ཚངས་པའི་བདག་པོ་ཆེན་པོའི་སྒྲ་སྐད་ཀྱིས་ཆོས་ཐོས་སོ། །གང་དག་བདུད་ལ་དད་པ་རྣམས་དང ། གང་
457b
དག་ཉི་མ་ལ་དད་པ་རྣམས་དང ། གང་དག་ཟླ་བ་ལ་དད་པ་རྣམས་དང ། གང་དག་རྣམ་ཐོས་ཀྱི་བུ་ལ་དད་པ་རྣམས་དང ། གང་དག་འཕགས་སྐྱེས་པོ་ལ་དད་པ་རྣམས་དང ། གང་དག་མིག་མི་བཟང་ལ་དད་པ་རྣམས་དང ། གང་དག་ཡུལ་འཁོར་སྲུང་ལ་དད་པ་རྣམས་དང ། གང་དག་དབང་ཕྱུག་ཆེན་པོ་ལ་དད་པའི་བར་གྱི་སེམས་ཅན་དེ་དག་གིས་ནི་དེ་བཞིན་གཤེགས་པ་ཤཱཀྱ་ཐུབ་པ་དབང་ཕྱུག་ཆེན་པོའི་བར་གྱི་གཟུགས་དང ། ཁ་དོག་དང ། དབྱིབས་སུ་མཐོང་ཞིང ། དབང་ཕྱུག་ཆེན་པོའི་ཚིག་དང་སྒྲ་སྐད་ཀྱིས་ཆོས་ཐོས་སོ། །དེ་ན་ཁ་དོག་དང ། དབྱིབས་དང ། དད་པ་དང ། གཟུགས་དང ། སྒྲ་སྐད་བརྒྱད་ཁྲི་བཞི་སྟོང་གི་བར་དང་ལྡན་པའི་སེམས་ཅན་དེ་དག་གིས་ཀྱང་དེ་བཞིན་གཤེགས་པ་ཤཱཀྱ་ཐུབ་པ་དེ་བཞིན་དུ་མཐོང་ཞིང་ཆོས་ཀྱང་ཐོས་སོ། །དེ་ནས་དེ་བཞིན་གཤེགས་པ་དྲི་མེད་གཟི་བརྗིད་ཡོན་ཏན་རྒྱལ་པོས་འཁོར་དེའི་བྱང་ཆུབ་སེམས་དཔའ་གསང་བ་བསྒྲགས་ཞེས་བྱ་བ་དང ། བྱང་ཆུབ་སེམས་དཔའ་གཅིག་ཤོས་སྣང་བའི་འོད་ཟེར་ཞེས་བྱ་བ་དང ། བྱང་ཆུབ་སེམས་དཔའ་དེ་དག་ལ་བཀའ་སྩལ་པ། རིགས་ཀྱི་བུ་དག་།ཁྱེད་འཇིག་རྟེན་གྱི་ཁམས་མི་མཇེད་དུ་དེང་ལ་ངའི་ཚིག་གིས་དེ་བཞིན་གཤེགས་པ་ཤཱཀྱ་ཐུབ་པ་ལ་སྙུན་མི་མངའམ། ཐུགས་བ་དེའམ། བདེ་བར་
458a
༄#། །རེག་པ་ལ་གནས་སམ་ཞེས་སྙུན་གསོལ་ཅིག་།བྱང་ཆུབ་སེམས་དཔའ་དེ་དག་གིས་གསོལ་པ། བཙུན་པ་བཅོམ་ལྡན་འདས། ཐམས་ཅད་དང་ལྡན་པའི་སངས་རྒྱས་ཀྱི་ཞིང་མི་མཇེད་ས་དང་ནམ་མཁར་བཅས་པ་ཐམས་ཅད་བྱང་ཆུབ་སེམས་དཔའ་དག་གིས་ཁྱབ་པར་ཡང་དག་པར་རྗེས་སུ་མཐོང་སྟེ། དེ་ན་ས་དང་ནམ་མཁའ་ལ་སེམས་ཅན་འགའ་ཙམ་གྱི་གོ་སྐབས་ཀྱང་མ་མཆིས་ན་བདག་ཅག་གང་དུ་གནས་པར་བགྱི་ལགས། དེ་བཞིན་གཤེགས་པ་དྲི་མེད་གཟི་བརྗིད་ཡོན་ཏན་རྒྱལ་པོ་དེས་བཀའ་སྩལ་པ། རིགས་ཀྱི་བུ་དག། སངས་རྒྱས་།དེ་ཅིའི་ཕྱིར་ཞེ་ན། དེ་བཞིན་གཤེགས་པ་།དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཤཱཀྱ་ཐུབ་པ་དེ་ནི་སངས་རྒྱས་ཀྱི་ཡོན་ཏན་བསམ་གྱིས་མི་ཁྱབ་པ་དག་གིས་གོ་སྐབས་ཡངས་པ་ཡིན་ཏེ། སྔོན་གྱི་སྨོན་ལམ་གྱིས་གསུམ་ལ་སྐྱབས་སུ་འགྲོ་བ་དང།་ཐེག་པ་གསུམ་གྱི་ཆོས་བསྟན་པ་ལས་བརྩམས་ཏེ་ཆོས་སྟོན་པར་མཛད་པ་དང ། བསླབ་པ་གསུམ་གྱི་སྡོམ་པ་སྟོན་པར་མཛད་པ་དང ། རྣམ་པར་ཐར་པའི་སྒོ་གསུམ་པོ་དག་སྟོན་པར་མཛད་པ་དང ། སེམས་ཅན་རྣམས་ངན་སོང་གསུམ་པོ་དག་ལས་འདྲེན་པར་མཛད་པ་དང ། ཞི་བའི་ལམ་གསུམ་པོ་དག་ལ་རབ་ཏུ་འགོད་
458b
པར་མཛད་པའི་ཕྱིར་དེ་བཞིན་གཤེགས་པ་དེའི་ཐུགས་རྗེ་དང་བསྟན་པ་ལ་འཇུག་པ་ནི་ཡངས་པ་ཡིན་ནོ། །རིགས་ཀྱི་བུ་དག་།དེ་བཞིན་གཤེགས་པ་ཤཱཀྱ་ཐུབ་པ་དེ་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པའི་དུས་ཤིག་ན་འདུལ་བའི་སེམས་ཅན་ལ་གཟིགས་ཤིང་རི་བྲག་མི་མཉམ་པའི་དབུས་ན་གནོད་སྦྱིན་དབང་པོ་མིག་ཅེས་བྱ་བའི་གནས་ཤིང་སཱ་ལའི་ཕུག་ན་རྣམ་པར་གྲོལ་བའི་དགའ་བ་དང ། བདེ་བ་ཉམས་སུ་མྱོང་ཞིང་སྐྱིལ་མོ་ཀྲུང་གཅིག་གིས་ཞག་བདུན་ལས་འདའ་བར་མཛད་ཅིང་བཞུགས་པ་ན་དེ་བཞིན་གཤེགས་པའི་སྐུས་སཱ་ལའི་ཕུག་ཐམས་ཅད་ཁྱབ་པར་གྱུར་ཏེ། དེ་ན་གང་དུ་དེ་བཞིན་གཤེགས་པའི་སྐུས་ཁྱབ་པར་མ་གྱུར་པའི་གོ་སྐབས་ནི་ཐ་ན་སོར་བཞི་ཙམ་གྱི་གཏོས་ཀྱང་མེད་དོ། །ཞག་བདུན་པོ་དེ་འདས་པ་དང ། ཕྱོགས་བཅུ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཁྲག་ཁྲིག་ཕྲག་བཅུ་གཉིས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་ཕྱག་བྱ་བ་དང ། བསྙེན་བཀུར་བྱ་བ་དང ། ཆོས་མཉན་པའི་ཕྱིར་འཇིག་རྟེན་གྱི་ཁམས་མི་མཇེད་ཀྱི་རི་གང་ཡིན་པ་དེ་ལོགས་སུ་མངོན་དུ་ཕྱོགས་ཏེ་འཁོད་པ་དང ། རིགས་ཀྱི་བུ་དག་།དེ་བཞིན་གཤེགས་པ་ཤཱཀྱ་ཐུབ་པ་དེས་འཁོར་དེར་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་པས་
459a
༄#། །གང་གི་ཚེ་བྱང་ཆུབ་སེམས་དཔའ་བྱེ་བ་ཁྲག་ཁྲིག་ཕྲག་བཅུ་གཉིས་པོ་དེ་དག་གིས་སཱ་ལའི་ཕུག་གོ་སྐབས་ཡངས་པར་མཐོང་ཞིང་དེར་ཞུགས་པར་གྱུར་པ་དེ་ལྟར་སཱ་ལའི་ཕུག་དེ་ཡངས་པ་དང ། དེ་ལྟར་རྒྱ་ཆེ་བར་གྱུར་ཏོ། །དེར་བྱང་ཆུབ་སེམས་དཔའ་རེ་རེས་ཀྱང་དེ་བཞིན་གཤེགས་པ་དེ་ལ་བྱང་ཆུབ་སེམས་དཔའི་རྣམ་པར་འཕྲུལ་པ་སྣ་ཚོགས་དག་གིས་མཆོད་པ་བྱས་ནས། དེར་བྱང་ཆུབ་སེམས་དཔའ་རེ་རེས་ཀྱང་རིན་པོ་ཆེ་སྣ་བདུན་གྱི་ཁྲི་སྟན་དག་མངོན་པར་སྤྲུལ་ནས་དེ་ལ་འཁོད་དེ་ཆོས་ཉན་པར་བྱེད་དོ། །རིགས་ཀྱི་བུ་དག་།བྱང་ཆུབ་སེམས་དཔའ་དེ་དག་གིས་ཀྱང་དེ་བཞིན་གཤེགས་པ་ཤཱཀྱ་ཐུབ་པ་ལས་ཆོས་མཉན་ཏེ། དེ་བཞིན་གཤེགས་པ་ཤཱཀྱ་ཐུབ་པའི་ཞབས་ལ་ལན་གསུམ་མགོ་བོས་ཕྱག་བྱས་ནས་རང་རང་གི་སངས་རྒྱས་ཀྱི་ཞིང་དག་ཏུ་དོང་ངོ ། །བྱང་ཆུབ་སེམས་དཔའ་དེ་དག་དེང་ནས་རིང་པོ་མ་ལོན་པར་སཱ་ལའི་ཕུག་དེའང་སྔོན་ཇི་ལྟ་བ་བཞིན་དུ་གྱུར་ཏེ། དེ་བཞིན་གཤེགས་པ་ཤཱཀྱ་ཐུབ་པ་དེ་ནི་དེ་ལྟར་གོ་སྐབས་ཡངས་པ་ཡིན་ནོ། །གླིང་བཞི་པ་དེ་ན་བརྒྱ་བྱིན་ཀཽ་ཤི་ཀ་ཞེས་བྱ་བ་ཚེ་ཡོངས་སུ་ཟད་དེ། དུད་འགྲོའི་སྐྱེ་གནས་སུ་སྐྱེ་བས་འཇིགས་ཞིང་སྐྲག་ནས་དེ་སུམ་ཅུ་རྩ་གསུམ་པའི་ལྷའི་བུ་
459b
བརྒྱད་ཁྲི་བཞི་སྟོང་དང་ལྷན་ཅིག་འགྲོགས་ཏེ་སཱ་ལའི་ཕུག་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། གནོད་སྦྱིན་དབང་པོ་མིག་གི་གནས་སཱ་ལའི་ཕུག་གི་ཁོ་ར་ཁོར་ཡུག་ཏུ་འཁོད་པ་དང ། བཅོམ་ལྡན་འདས་ཀྱི་མཐུས་དེ་འདི་སྙམ་དུ་སེམས་ཏེ། གང་བདག་གིས་དྲི་ཟའི་བུ་གཙུག་ཕུད་ལྔ་པ་ལ་གསོལ་བ་བཏབ་སྟེ། དྲི་ཟའི་བུ་གཙུག་ཕུད་ལྔ་པ་དེས་དབྱངས་སྙན་པས་བཅོམ་ལྡན་འདས་ལ་མངོན་སུམ་དུ་བསྟོད་ན་ནི་དེའི་ཚེ། བཅོམ་ལྡན་འདས་བསམ་གཏན་དང ། ཏིང་ངེ་འཛིན་དག་ལས་བཞེངས་པར་འགྱུར་རོ་སྙམ་ནས། དེ་ནས་བརྒྱ་བྱིན་ཀཽ་ཤི་ཀས་དྲི་ཟའི་བུ་གཙུག་ཕུད་ལྔ་པ་ལ་གསོལ་བ་བཏབ་པོ། །དེ་ནས་བཅོམ་ལྡན་འདས་ཀྱི་མཐུས་དྲི་ཟའི་བུ་གཙུག་ཕུད་ལྔ་པས་པི་ཝང་བླངས་ཏེ། གླུ་དང་རོལ་མོའི་སྒྲ་ཡིད་དུ་འོངས་བས་བཅོམ་ལྡན་འདས་ལ་བསྟོད་པ་ལྔ་བརྒྱས་བསྔགས་པ་བརྗོད་དོ། །རིགས་ཀྱི་བུ། གང་གི་ཚེ་དྲི་ཟའི་བུ་གཙུག་ཕུད་ལྔ་པས་བཅོམ་ལྡན་འདས་ལ་མངོན་པར་བསྟོད་པ་བརྩམས་པ་དང ། དེ་ནས་བཅོམ་ལྡན་འདས་ཤཱཀྱ་ཐུབ་པ་དེ་དབྱངས་སྙན་རྣམ་པར་སྣང་བྱེད་ཏོག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ཏིང་ངེ་འཛིན་དེས་འཇིག་རྟེན་གྱི་ཁམས་མི་མ་\?\་\?\་ན་གང་དག་རྫུ་འཕྲུལ་ཆེ་བའི་གནོད་སྦྱིན་རྣམས་དང ། སྲིན་པོ་རྣམས་དང ། ལྷ་མ་ཡིན་རྣམས་དང ། ནམ་མཁའ་
460a
༄#། །ལྡིང་རྣམས་དང ། མིའམ་ཅི་རྣམས་དང ། ལྟོ་འཕྱེ་ཆེན་པོ་རྣམས་དང ། དྲི་ཟ་རྣམས་དང ། འདོད་པ་ན་སྤྱོད་པའི་ལྷའི་བུ་ཐམས་ཅད་དང ། གཟུགས་ན་སྤྱོད་པའི་ལྷའི་བུ་ཐམས་ཅད་དེར་འདུས་པར་གྱུར་ནས། གང་དག་དབྱངས་ལ་དད་པ་དེ་དག་གིས་ནི་དབྱངས་ཐོས་ནས་རབ་ཏུ་དང་བར་གྱུར་ཏོ། །གང་དག་བསྔགས་པ་དང་སྙན་པ་ལ་དགའ་བ་དེ་དག་གིས་ནི་བཅོམ་ལྡན་འདས་ཀྱི་བསྔགས་པ་ཐོས་ནས་བཅོམ་ལྡན་འདས་དེ་ལ་ཤིན་ཏུ་དགའ་བ་དང ། རབ་ཏུ་དང་བ་དང ། བླ་མར་བྱ་བ་དང་རི་མོར་བྱ་བ་དང ། གུས་པ་སྐྱེས་ཏེ་རབ་ཏུ་དང་བར་གྱུར་ཏོ། །གང་དག་གླིང་བུའི་སྒྲ་ལ་དགའ་བ་དེ་དག་གིས་གླིང་བུའི་སྒྲ་ཐོས་ནས་རབ་ཏུ་དང་བར་གྱུར་ཏོ། །དེ་ནས་བཅོམ་ལྡན་འདས་ཤཱཀྱ་ཐུབ་པ་ཏིང་ངེ་འཛིན་དེ་ལས་བཞེངས་ཏེ་སཱ་ལའི་ཕུག་གི་སྒོར་གཟིགས་པ་དང ། བརྒྱ་བྱིན་ཉེ་བར་སོང་སྟེ། བཅོམ་ལྡན་འདས་ལ་ཞུས་པ། བཅོམ་ལྡན་འདས། བདག་གང་དུ་མཆིས་པར་བགྱི་བ་དང ། དེ་བཞིན་གཤེགས་པ་ཤཱཀྱ་ཐུབ་པ་དེས་བཀའ་སྩལ་པ། \?\་\?\་དག་ཇི་སྙེད་ལྷགས་པ་རྣམས་འཁོད་ཅིག ། དེ་ནས་སཱ་ལའི་ཕུག་དེར་ཇི་ལྟར་གནོད་སྦྱིན་གངྒཱའི་ཀླུང་བཅུ་གཉིས་ཀྱི་བྱེ་མ་སྙེད་དག་ཞུགས་ཏེ་འཁོད་པ་དེ་ལྟར་སཱ་ལའ་\?\དེ་རྒྱ་ཆེ་བ་འགྱུར་ནས་བཅོམ་ལྡན་འདས་
460b
\?\་\?\་པ་དེས་འཁོར་དེ་དག་ལ་འདི་ལྟར་ཆོས་བསྟན་ཏེ། ཇི་ལྟར་འཁོར་དེ་ན་གང་དག་ཉན་ཐོས་ཀྱི་ཐེག་པ་བདག་འཁོད་པ་དེ་དག་གིས་ནི་ཉན་ཐོས་ཀྱི་ཐེག་པའི་གཏམ་ཐོས་ཤིང་དེ་དག་ལས་དུང་ཕྱུར་ཕྲག་དགུ་དང ། བྱེ་བ་ཕྲག་དགུས་རྒྱུན་དུ་ཞུགས་པའི་འབྲས་བུ་ཐོབ་བོ། །འཁོར་དེ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཐེག་པ་པ་གང་ཡིན་པ་དེ་དག་གིས་ནི་ཐེག་པ་ཆེན་པོའི་གཏམ་འབའ་བཞིག་ཐོས་སོ། །དེ་ན་དྲི་ཟའི་བུ་གཙུག་ཕུད་ལྔ་པ་ལ་སོགས་པ་ཁྲག་ཁྲིག་ཕྲག་བཅོ་བརྒྱད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ལ་གནས་པར་གྱུར་ཏོ། །གང་དག་གིས་ཐེག་པ་གསུམ་པོ་དག་ཏུ་སེམས་མ་བསྐྱེད་པ་དེ་དག་ལས་ཁ་ཅིག་གིས་ནི་དེར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་དག་ལས་ཁ་ཅིག་གིས་ནི་རང་སངས་རྒྱས་ཀྱི་ཐེག་པར་སེམས་བསྐྱེད་དོ། །ཁ་ཅིག་གིས་ནི་ཉན་ཐོས་ཀྱི་ཐེག་པར་སེམས་བསྐྱེད་དོ། །དེར་བརྒྱ་བྱིན་ཀཽ་ཤི་ཀ་དེའང་འཇིགས་པ་ལས་ཡོངས་སུ་གྲོལ་ཞིང་ཚེ་ལོ་སྟོང་དུ་ནུར་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ལ་གནས་པར་གྱུར་ཏེ། རིགས་ཀྱི་བུ་དག་།དེ་བཞིན་གཤེགས་པ་ཤཱཀྱ་ཐུབ་པ་དེ་ནི་དེ་ལྟ་དེ་ལྟར་གོ་སྐབས་ཡངས་པ་ཡིན་ནོ། །དེ་བཞིན་
461a
༄#། །གཤེགས་པ་དེའི་དབྱངས་ཀྱི་དཀྱིལ་འཁོར་ཡང་འདི་ལྟར་རྒྱ་ཆེ་བ་ཡིན་ཏེ། དེ་བཞིན་གཤེགས་པ་དེའི་དབྱངས་ཀྱི་དཀྱིལ་འཁོར་གྱི་མཐའ་ནི་སུས་ཀྱང་ཚད་གཟུང་བའམ་བགྲང་བར་མི་ནུས་སོ། །དེ་བཞིན་གཤེགས་པ་དེའི་སེམས་ཅན་ཡོངས་སུ་སྨིན་པར་མཛད་པའི་ཐབས་ལ་མཁས་པའང་རྒྱ་ཆེ་བ་ཡིན་ཏེ། དེ་བཞིན་གཤེགས་པ་དེའི་ཐབས་ལ་མཁས་པའི་མཐའ་ནི་སུས་ཀྱང་ཚད་གཟུང་བར་མི་ནུས་སོ། །རིགས་ཀྱི་བུ་དག་།དེ་བཞིན་གཤེགས་པ་དེའི་སྐུའང་རྒྱ་ཆེ་བ་ཡིན་ཏེ། དེའི་སྤྱི་གཙུག་བལྟ་བའམ་སྐུའི་མཐའ་ནི་སུས་ཀྱང་ཚད་གཟུང་བར་མི་ནུས་སོ། །གལ་ཏེ་དེ་ལྟར་སངས་རྒྱས་ཀྱི་ཞིང་མི་མཇེད་དེ་ན་སེམས་ཅན་ཇི་སྙེད་འདུས་པར་གྱུར་པ་འདི་དག་ཐམས་ཅད་དེ་བཞིན་གཤེགས་པ་ཤཱཀྱ་ཐུབ་པའི་ཁོང་དུ་ཞུགས་པར་གྱུར་ཅིང་དེ་དག་ཐམས་ཅད་དེ་ན་རྒྱུ་བར་གྱུར་ཏམ། སེམས་ཅན་དེ་དག་དེ་བཞིན་གཤེགས་པ་དའི་སྤུའི་སྒོ་གཅིག་ཏུ་ཞུགས་ཤིང་འབྱུང་བར་གྱུར་ཀྱང་དེ་དག་གིས་ཆེར་ན་ལྷའི་མིག་གིས་ཀྱང་དེ་བཞིན་གཤེགས་པ་དེའི་སྤུའི་སྒོ་གཅིག་གི་མཐའ་ཡང་བྲི་བའམ་གང་བར་ཚད་གཟུང་བར་མི་ནུས་ཏེ། དེ་བཞིན་གཤེགས་པ་ཤཱཀྱ་ཐུབ་པ་དེའི་སྐུ་ནི་དེ་ལྟར་རྒྱ་ཆེ་བ་ཡིན་ནོ། །རིགས་ཀྱི་བུ་དག་།གཞན་ཡང་དེ་བཞིན་གཤེགས་པ་ཤཱཀྱ་ཐུབ་
461b
པ་ནི་སངས་རྒྱས་ཀྱི་ཞིང་རྒྱ་ཆེན་པོ་དང་ལྡན་པ་ཡིན་ཏེ། ཕྱོགས་བཅུའི་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་པོ་ཇི་སྙེད་པ་དག་འདི་ལྟ་སྟེ། དཔེར་ན། ད་ལྟར་ངའི་སངས་རྒྱས་ཀྱི་ཞིང་མི་མཇེད་བཞིན་དུ་སེམས་ཅན་རྣམས་ཀྱིས་ཡོངས་སུ་གང་བར་གྱུར་པའི་སེམས་ཅན་དེ་དག་ཐམས་ཅད་སངས་རྒྱས་ཀྱི་ཞིང་མི་མཇེད་དུ་ཞུགས་པར་གྱུར་ཀྱང་དེ་དག་ཐམས་ཅད་དེ་ན་རྒྱུ་བར་འགྱུར་རོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དེས་སྔོན་དང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ན་སྨོན་ལམ་དེ་ལྟ་བུ་བཏབ་པའི་ཕྱིར་རོ། །རིགས་ཀྱི་བུ་དག་།འཇིག་རྟེན་གྱི་ཁམས་གངྒཱའི་ཀླུང་གཅིག་གི་བྱེ་མ་སྙེད་དག་ལྟ་ཞོག་གི་།རིགས་ཀྱི་བུ་དག་།གལ་ཏེ་ཕྱོགས་བཅུའི་སངས་རྒྱས་ཀྱི་ཞིང་གངྒཱའི་ཀླུང་སྟོང་གི་བྱེ་མ་སྙེད་པོ་དེ་ལྟར་རྒྱ་ཆེ་བ་དག་འདི་ལྟ་སྟེ། དཔེར་ན། ད་ལྟར་སངས་རྒྱས་ཀྱི་ཞིང་མི་མཇེད་བཞིན་དུ་སེམས་ཅན་རྣམས་ཀྱི་ཡོངས་སུ་གང་བར་གྱུར་པའི་སེམས་ཅན་དེ་དག་ཐམས་ཅད་འཇིག་རྟེན་གྱི་ཁམས་མི་མཇེད་དུ་ཞུགས་པར་གྱུར་ཀྱང་དེ་དག་ཐམས་ཅད་དེ་ན་རྒྱུ་བར་འགྱུར་རོ། །རིགས་ཀྱི་བུ་དག་།དེ་བཞིན་གཤེགས་པ་དེས་སྔོན་དང་པོ་སེམས་བསྐྱེད་པ་ན་བླ་ན་མེད་པའི་ཡེ་ཤེས་ཐོབ་པར་བྱ་བའི་ཕྱིར་སྨོན་ལམ་དེ་ལྟ་བུ་བཏབ་པས་ན་དེ་བཞིན་གཤེགས་པ་ཤཱཀྱ་ཐུབ་པ་དེ་ནི་
462a
༄#། །སངས་རྒྱས་ཀྱི་ཞིང་རྒྱ་ཆེན་པོ་དེ་ལྟ་བུ་དང་ལྡན་པ་ཡིན་ཏེ། དེ་བཞིན་གཤེགས་པ་ཤཱཀྱ་ཐུབ་པ་དེ་ནི་ཇི་སྐད་སྨོས་པའི་ཆོས་བཞི་པོ་དེ་དག་གི་དེ་བཞིན་གཤེགས་པ་གཞན་དག་ལས་ཁྱད་པར་དུ་འཕགས་པ་ཡིན་ནོ། །རིགས་ཀྱི་བུ་དག་།ཁྱོད་ཀྱིས་མེ་ཏོག་ཟླ་བ་མདོག་མཛེས་དྲི་མ་མེད་པ་འདི་དག་ལོང་ལ་ནུབ་ཕྱོགས་ལོགས་སུ་རང་རང་གིས་ཇི་ལྟར་མཐོང་བའི་སངས་རྒྱས་ཀྱི་ཞིང་མི་མཇེད་དེར་དེངས་ཤིག་།ངའི་ཚིག་གིས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་སྙུན་མི་མངའམ་ཐུགས་བདེའམ་ཞེས་ཀྱང་སྙུན་གསོལ་ཅིག་།དེ་ནས་དེ་བཞིན་གཤེགས་པ་དྲི་མེད་གཟི་བརྗིད་ཡོན་ཏན་རྒྱལ་པོ་དེས་མེ་ཏོག་ཟླ་བ་མདོག་མཛེས་དྲི་མ་མེད་པ་དག་བླངས་ཏེ་བྱང་ཆུབ་སེམས་དཔའ་གསང་བསྒྲགས་དང ། བྱང་ཆུབ་སེམས་དཔའ་སྣང་བའི་འོད་ཟེར་ལ་བྱིན་ནས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་།ངའི་རྫུ་འཕྲུལ་གྱི་སྟོབས་བསྐྱེད་པས་ཁྱེད་ཅག་འཇིག་རྟེན་གྱི་ཁམས་མི་མཇེད་དུ་དེངས་ཤིག་།དེ་ན་སྲོག་ཆགས་ཉི་ཁྲིས་ཀྱང་གསོལ་པ། བཙུན་པ་བཅོམ་ལྡན་འདས། བདག་ཅག་ཀྱང་དེ་བཞིན་གཤེགས་པའི་མཐུས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་བལྟ་བ་དང ། ཕྱག་བགྱི་བ་དང ། བསྙེན་བཀུར་བགྱི་བའི་སླད་དུ་འཇིག་རྟེན་གྱི་ཁམས་མི་མཇེད་དུ་མཆི་ལགས་སོ། །དེ་བཞིན་
462b
གཤེགས་པ་དྲི་མེད་གཟི་བརྗིད་ཡོན་ཏན་རྒྱལ་པོས་བཀའ་སྩལ་པ། རིགས་ཀྱི་བུ་དག་།བསམ་པ་ཇི་ལྟ་བ་བཞིན་དུ་དེངས་ཤིག་།དེ་ནས་དེ་བཞིན་གཤེགས་པ་དྲི་མེད་གཟི་བརྗིད་ཡོན་ཏན་རྒྱལ་པོ་དེའི་རྫུ་འཕྲུལ་གྱི་སྟོབས་ཀྱིས་བྱང་ཆུབ་སེམས་དཔའ་གསང་བསྒྲགས་དང ། སྣང་བའི་འོད་ཟེར་དེ་གཉིས་བྱང་ཆུབ་སེམས་དཔའ་ཉི་ཁྲི་དང་ལྷན་ཅིག་འགྲོགས་ཏེ་འཇིག་རྟེན་གྱི་ཁམས་མེ་ཏོག་ཀུན་ཏུ་རྒྱས་པ་ནས་འཕགས་པ་དང ། སེམས་ཀྱི་སྐད་ཅིག་གཅིག་གིས་སངས་རྒྱས་ཀྱི་ཞིང་མི་མཇེད་འདིར་ཕྱིན་ཏེ་བྱ་རྒོད་ཀྱི་ཕུང་པོའི་རི་ལ་སོ་སོར་འཁོད་ནས། དེ་དག་གིས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ག་ལ་དེ་ལོགས་སུ་ཐལ་མོ་སྦྱར་བ་བཏུད་དེ་གསོལ་པ། བཙུན་པ་བཅོམ་ལྡན་འདས། འདི་ནས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་ས་ཡ་ཕྲག་དགུ་དང་ཆིག་འབུམ་འདས་པ་དེ་ན་འཇིག་རྟེན་གྱི་ཁམས་མེ་ཏོག་ཀུན་ཏུ་རྒྱས་པ་ཞེས་བགྱི་བ་མཆིས་ཏེ། དེ་ན་དེ་བཞིན་གཤེགས་པ་དྲི་མེད་གཟི་བརྗིད་ཡོན་ཏན་རྒྱལ་པོ་ཞེས་བགྱི་བ་བཞུགས་སོ། །དེ་བཞིན་གཤེགས་པ་དེ་བྱང་ཆུབ་སེམས་དཔའི་འཁོར་གྱི་ཚོགས་ལ་དེ་བཞིན་གཤེགས་པའི་ཡོན་ཏན་གྱི་བསྔགས་པ་སྒྲོགས་ཤིང་འདི་སྐད་དུ་སངས་རྒྱས་ཀྱི་ཞིང་མི་མཇེད་ན་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་
463a
༄#། །ཞིང་གཞེས་སོ། །དེ་བཞིན་གཤེགས་པ་དེ་སྔོན་བྱང་ཆུབ་སེམས་དཔར་གྱུར་ཅིང་བྱང་ཆུབ་སེམས་དཔའི་སྤྱད་པ་སྤྱོད་པ་ན། དེས་ང་ཐམས་ཅད་ཀྱི་དང་པོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཞག་སྟེ་རབ་ཏུ་གནས་པར་བྱས་སོ། །དེའི་ཚིག་གིས་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་བཞིན་གཤེགས་པ་དེས་ང་དང་པོ་སྦྱིན་པའི་ཕ་རོལ་ཏུ་ཕྱིན་པ་ལ་བཞག་པ་ནས། དེ་བཞིན་གཤེགས་པ་ཤཱཀྱ་ཐུབ་པ་དེ་ནི་ཆོས་བཞི་པོ་དེ་དག་གིས་ཁྱད་པར་དུ་འཕགས་པ་ཡིན་ནོ་ཞེས་ཇི་སྐད་སྔར་སྨོས་པའི་བར་དག་དེ་སྐད་དུ་གསུངས་ཏེ། འདི་ལྟར་དེ་བཞིན་གཤེགས་པ་དེས་མེ་ཏོག་ཟླ་བ་མདོག་མཛེས་དྲི་མ་མེད་པ་འདི་དག་ཀྱང་བསྐུར་ཞིང་བཅོམ་ལྡན་འདས་ལ་སྙུན་མི་མངཱམ། ཐུགས་བདེའམ་ཞེས་ཀྱང་སྙུན་གསོལ་ལགས་སོ། །དེ་བཞིན་དུ་སངས་རྒྱས་ཀྱི་ཞིང་མངོན་པར་དགའ་བ་ན་དེ་བཞིན་གཤེགས་པ་མི་འཁྲུགས་པའི་གདན་ཡང་གཡོས་ཤིང་བྱང་ཆུབ་སེམས་དཔའ་གང་དག་དེར་འདུས་པར་གྱུར་པ་དེ་དག་གིས་དེ་བཞིན་གཤེགས་པ་མི་འཁྲུགས་པའི་གདན་གཡོས་པར་མཐོང་སྟེ། ཡོངས་སུ་ཞུས་པ་ནས་དེ་བཞིན་དུ་སྦྱར་ཏེ། ཇི་སྐད་སྔར་སྨོས་པའི་བར་དེ་
463b
དག་ཐམས་ཅད་ཀྱང་བརྗོད་པར་བྱའོ། །དེའི་ཚེ་ན་ཤར་ཕྱོགས་ལོགས་ནས་དེ་བཞིན་གཤེགས་པའི་ཕོ་ཉ་བྱང་ཆུབ་སེམས་དཔའ་དཔག་ཏུ་མེད་གྲངས་མེད་པ་དག་དེ་བཞིན་གཤེགས་པ་ཤཱཀྱ་ཐུབ་པ་ལ་ཡོངས་སུ་ཞུ་བ་དང ། མཆོད་པ་བྱ་བ་དང ། ཕྱག་བྱ་བ་དང ། བསྙེན་བཀུར་བྱ་བ་དང ། ཆོས་མཉན་པའི་ཕྱིར་མེ་ཏོག་ཟླ་བ་མདོག་མཛེས་དྲི་མ་མེད་པ་དག་ཐོགས་ཏེ་སངས་རྒྱས་ཀྱི་ཞིང་མི་མཇེད་འདིར་ལྷགས་སོ། །བཅོམ་ལྡན་འདས་ཀྱིས་ཤར་ཕྱོགས་ཀྱི་སངས་རྒྱས་བཅོམ་ལྡན་འདས་རྣམས་ཀྱི་མཚན་དང ། སངས་རྒྱས་ཀྱི་ཞིང་ཡོངས་སུ་བསྒྲགས་པ་དག་མཐར་ཕྱིན་མ་ཐག་ཏུའང་བཅོམ་ལྡན་འདས་ཀྱིས་ལྷོ་ཕྱོགས་ལོགས་ཀྱི་ཡོངས་སུ་བསྒྲགས་པ་བརྩམས་ཏེ། རིགས་ཀྱི་བུ། ངས་སངས་རྒྱས་ཀྱི་ཞིང་འདི་ནས་ལྷོ་ཕྱོགས་ལོགས་སུ་སངས་རྒྱས་ཀྱི་ཞིང་གངྒཱའི་ཀླུང་གཅིག་གི་བྱེ་མ་སྙེད་འདས་པ་དེ་ན་འཇིག་རྟེན་གྱི་ཁམས་མྱ་ངན་ཐམས་ཅད་དང་བྲལ་བ་ཞེས་བྱ་བ་ཞིག་ཡོད་པ་དེ་ན་དེ་བཞིན་གཤེགས་པ་མྱ་ངན་མེད་པའི་དཔལ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པ་གཟིགས་ཏེ། བཅོམ་ལྡན་འདས་དེའང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ངས་ཐམས་ཅད་ཀྱི་དང་པོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་པ་ནས་ཇི་སྐད་སྔར་སྨོན་པའི་བར་
464a
༄#། །དག་བཞིན་ནོ། །དེ་བཞིན་དུ་སངས་རྒྱས་ཀྱི་ཞིང་ཛམྦུའི་འོད་ཅེས་བྱ་བ་ན་དེ་བཞིན་གཤེགས་པ་ཆོས་ཀྱི་དབང་ཕྱུག་རྣམ་སྒྲོགས་ཞེས་བྱ་བ་དང ། སངས་རྒྱས་ཀྱི་ཞིང་ལྷུན་པོ་རབ་གནས་ཞེས་བྱ་བ་ན་དེ་བཞིན་གཤེགས་པ་འགྲོ་བའི་དབང་ཕྱུག་སཱ་ལའི་དབང་པོ་ཞེས་བྱ་བ་དང ། སངས་རྒྱས་ཀྱི་ཞིང་ཡོན་ཏན་དབང་པོའི་བ་གམ་ཞེས་བྱ་བ་ན་དེ་བཞིན་གཤེགས་པ་སེངྒེ་བསྒྱིངས་པའི་རྒྱལ་པོ་ཞེས་བྱ་བ་དང ། སངས་རྒྱས་ཀྱི་ཞིང་ནོར་བུ་གཞིར་བཀོད་ཅེས་བྱ་བ་ན་དེ་བཞིན་གཤེགས་པ་སྲེད་མེད་ཀྱི་བུས་རྣམ་པར་རྒྱལ་བའི་སྙིང་པོ་ཞེས་བྱ་བ་དང ། སངས་རྒྱས་ཀྱི་ཞིང་འོད་འགྱེད་ཡང་དག་བསགས་ཞེས་བྱ་བ་ན་དེ་བཞིན་གཤེགས་པ་ཡོན་ཏན་བསྒྱིངས་པ་ཡང་དག་བསགས་ཞེས་བྱ་བ་དང ། སངས་རྒྱས་ཀྱི་ཞིང་ལྷའི་ཟླ་བ་ཞེས་བྱ་བ་ན་དེ་བཞིན་གཤེགས་པ་སྐར་མའི་སྙིང་པོ་ཞེས་བྱ་བ་དང ། སངས་རྒྱས་ཀྱི་ཞིང་ཙནྡན་གྱི་རྩ་བ་ཞེས་བྱ་བ་ན་དེ་བཞིན་གཤེགས་པ་རྒྱུ་སྐར་ཆོག་གྲགས་པ་ཞེས་བྱ་བ་དང ། སངས་རྒྱས་ཀྱི་ཞིང་དྲི་མཆོག་ཅེས་བྱ་བ་ན་དེ་བཞིན་གཤེགས་པ་བསོད་ནམས་སྟོབས་སཱ་ལའི་རྒྱལ་པོ་ཞེས་བྱ་བ་དང ། སངས་རྒྱས་ཀྱི་ཞིང་ཤིན་ཏུ་རྟོག་པ་ཞེས་བྱ་བ་ན་དེ་བཞིན་གཤེགས་པ་ཡིད་དུ་འོང་བའི་སྒྲ་དབྱངས་རྣམ་པར་བསྒྲགས་པ་ཞེས་བྱ་བ་དང ། སངས་རྒྱས་ཀྱི་ཞིང་རྩོད་མེད་ཅེས་བྱ་
464b
བྱ་བ་ན་དེ་བཞིན་གཤེགས་པ་སཱ་ལའི་ཐིག་པའི་རྒྱལ་པོ་ཞེས་བྱ་བ་དང ། སངས་རྒྱས་ཀྱི་ཞིང་ཟླ་བསྒྲགས་ཞེས་བྱ་བ་ན་དེ་བཞིན་གཤེགས་པ་གཟི་བརྗིད་དབང་ཕྱུག་འོད་ཅེས་བྱ་བ་དང ། སངས་རྒྱས་ཀྱི་ཞིང་མངོན་པར་སྒྲོགས་པ་ཞེས་བྱ་བ་ན་དེ་བཞིན་གཤེགས་པ་སྒྲ་དབྱངས་ཡིད་དུ་འོང་བ་ཞེས་བྱ་བ་དང ། སངས་རྒྱས་ཀྱི་ཞིང་རིན་ཆེན་ཁྱུ་མཆོག་ཅེས་བྱ་བ་ན་དེ་བཞིན་གཤེགས་པ་ཀླུ་དབང་རིན་ཆེན་ངོས་ཞེས་བྱ་བ་དང ། སངས་རྒྱས་ཀྱི་ཞིང་རིན་ཆེན་ལྗོན་ཤིང་འབྲས་བུ་དཔག་མེད་རིན་པོ་ཆེ་ཞེས་བྱ་བ་ན་དེ་བཞིན་གཤེགས་པ་ཆོས་སྤྲིན་སྒྲ་དབྱངས་དབང་ཕྱུག་ཟླ་བ་ཞེས་བྱ་བ་དང ། དེ་བཞིན་དུ་ལྷོ་ཕྱོགས་ལོགས་ཀྱི་སངས་རྒྱས་བཅོམ་ལྡན་འདས་དཔག་ཏུ་མེད་གྲངས་མེད་པ་དག་གི་གདན་དག་གཡོས་ཤིང ། སངས་རྒྱས་བཅོམ་ལྡན་འདས་དེ་དག་ཐམས་ཅད་དེ་བཞིན་གཤེགས་པ་ཤཱཀྱ་ཐུབ་པའི་བསྔགས་པ་དང ། སྙན་པ་དང ། གྲགས་པ་བརྗོད་པར་མཛད་པ་ད་དེའི་ཚེ་ན་ལྷོ་ཕྱོགས་ལོགས་ན་དེ་བཞིན་གཤེགས་པའི་ཕ་ཉ་བྱང་ཆུབ་སེམས་དཔའ་དཔག་ཏུ་མེད་གྲངས་མེད་པའི་དག་ཀྱང་དེ་བཞིན་གཤེགས་པ་ཤཱཀྱ་ཐུབ་པ་ལ་ཡོངས་སུ་ཞུ་དང ། ཆོས་མཉན་པའི་བར་གྱི་ཕྱིར་མེ་ཏོག་ཟླ་བ་མདོག་མཛེས་དྲི་མ་མེད་པ་དག་ཐོགས་ཏེ། སངས་རྒྱས་ཀྱི་ཞིང་མི་མཇེད་འདིར་ལྷགས་པའི་བར་དུ་ཇི་སྐད་སྔར་སྨོས་པ་བཞིན་
465a
༄#། །དུ་སྦྱར་རོ། །ཡང་བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ངས་སངས་རྒྱས་ཀྱི་ཞིང་འདི་ནས་ནུབ་ཕྱོགས་ལོགས་སུ་སངས་རྒྱས་ཀྱི་ཞིང་ཁྲག་ཁྲིག་འབུམ་ཕྲག་དགུ་བཅུ་རྩ་བདུན་འདས་པ་དེ་ན་སངས་རྒྱས་ཀྱི་ཞིང་བློ་གྲོས་ཉེ་བར་ཞི་བ་ཞེས་བྱ་བ་ཞིག་ཡོད་པ་དེ་ན་དེ་བཞིན་གཤེགས་པ་རིན་ཆེན་རི་བོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པར་གཟིགས་ཏེ། བཅོམ་ལྡན་འདས། དེའང་ང་སྔོན་བྱང་ཆུབ་སེམས་དཔར་གྱུར་ཅིང་སྤྱད་པ་སྤྱོད་པ་ན་ངས་ཐམས་ཅད་ཀྱི་དང་པོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་པ་ནས་ཇི་སྐད་སྔར་སྨོས་པའི་བར་དག་བཞིན་ནོ། །སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་སྦྱར་ཏེ། དེ་བཞིན་གཤེགས་པ་འོད་ཟེར་མཆོག་གི་མཛོད་ཅེས་བྱ་བ་དང ། དེ་བཞིན་གཤེགས་པ་དབྱངས་མཁྱེན་མཛོད་ཅེས་བྱ་བ་དང ། པ་བླ་གྲགས་པ་དང ། ཀུན་ཏུ་སྙིང་པོ་དང ། ཚངས་པའི་མེ་ཏོག་དང ། སྐུ་མཆོག་རྣམ་པར་གནོན་དང ། ཆོས་ཀྱི་ཤུགས་ཀྱི་སྒྲོན་མ་དང ། ལྷུན་པོ་ཕྲག་མེད་པ་སྒྲ་དབྱངས་རྣམ་པར་གྲགས་པའི་རྒྱལ་པོ་དང ། ཚངས་པའི་དབང་པོ་དབྱངས་དང ། དེ་བཞིན་དུ་ནུབ་ཕྱོགས་ལོགས་ཀྱི་སངས་རྒྱས་བཅོམ་ལྡན་འདས་དཔག་ཏུ་མེད་གྲངས་མེད་པ་གང་དག་གི་
465b
མཚན་དག་དེ་བཞིན་གཤེགས་པ་ཤཱཀྱ་ཐུབ་པས་ཡོངས་སུ་བསྒྲགས་པ་དེ་དག་གི་གདན་དག་གཡོས་ཤིང ། དེའི་ཚེ་ན་ནུབ་ཕྱོགས་ལོགས་ནས་སངས་རྒྱས་ཀྱི་ཕོ་ཉ་བྱང་ཆུབ་སེམས་དཔའ་དཔག་ཏུ་མེད་གྲངས་མེད་པ་དག་ཆོས་མཉན་པའི་བར་གྱི་ཕྱིར་མེ་ཏོག་ཟླ་བ་མདོག་མཛེས་དྲི་མ་མེད་པ་དག་ཐོགས་ཏེ། སངས་རྒྱས་ཀྱི་ཞིང་མི་མཇེད་འདིར་ལྷགས་ཤིང་འཁོད་པའི་བར་དུ་ཇི་སྐད་སྔར་སྨོས་པ་བཞིན་དུ་སྦྱར་རོ། །དེ་བཞིན་དུ་བྱང་ཕྱོགས་དང ། དེ་བཞིན་དུ་སྟེང་དང ། དེ་བཞིན་དུ་འོག་དང ། དེ་བཞིན་དུ་ཤར་ལྷོ་དང ། དེ་བཞིན་དུ་ལྷོ་ནུབ་དང ། དེ་བཞིན་དུ་ནུབ་བྱང་དང ། དེ་བཞིན་དུ་བྱང་ཤར་གྱི་ཕྱོགས་རྣམས་སུའང་སྔ་མ་བཞིན་དུ་སྦྱར་ཏེ་བརྗོད་པར་བྱའོ། །ཡང་བཅོམ་ལྡན་འདས་ཤཱཀྱ་ཐུབ་པས་བཀའ་སྩལ་པ། རིགས་ཀྱི་བུ། ངས་སངས་རྒྱས་ཀྱི་ཞིང་འདི་ནས་བྱང་ཤར་གྱི་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་བརྒྱད་འདས་པ་དེ་ན་སངས་རྒྱས་ཀྱི་ཞིང་རྣམ་པར་རྒྱལ་བ་ཞེས་བྱ་བ་ཞིག་ཡོད་པ་དེ་ན་དེ་བཞིན་གཤེགས་པ་གདུང་བྲལ་མངོན་པར་འཕགས་པ་རྣམ་ཐོས་ཀྱི་བུ་སཱ་ལའི་རྒྱལ་པོ་ཞེས་བྱ་བ་བཞུགས་ཏེ། དེ་བཞིན་གཤེགས་པ་དེའང་ང་སྔོན་བྱང་ཆུབ་སེམས་དཔར་གྱུར་ཅིང ། བྱང་ཆུབ་སེམས་དཔའི་སྤྱད་པ་སྤྱོད་པ་ན་ངས་ཐམས་ཅད་ཀྱི་དང་པོར་བླ་ན་མེད་པ་ཡང་དག་པར་རྫོགས་པའི་
466a
༄#། །བྱང་ཆུབ་དང ། ཕ་རོལ་ཏུ་ཕྱིན་པ་དྲུག་གི་བར་དག་ཡང་དག་པར་འཛིན་དུ་བཅུག་པ་ནས། ཐམས་ཅད་ཀྱི་དང་པོར་སངས་རྒྱས་བཅོམ་ལྡན་འདས་བཞུགས་ཏེ་འཚོ་ཞིང་གཞེས་པ་དག་གི་ཐད་དུ་ཕུལ་ནས་དེར་དང་པོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་བོ། །གང་གི་ཚེ་དེའི་མཚན་ཡོངས་སུ་བསྒྲགས་པ་དེའི་ཚེ་གདན་གཡོས་པ་ནས་ཁ་དོག་དང ། དབྱིབས་དང ། དད་པ་དང ། གཟུགས་དང ། སྒྲ་སྐད་བརྒྱད་ཁྲི་བཞི་སྟོང་གི་བར་དང་ལྡན་པའི་སེམས་ཅན་རྣམས་ཀྱིས་ཀྱང་དེ་བཞིན་གཤེགས་པ་ཤཱཀྱ་ཐུབ་པ་དེ་བཞིན་དུ་མཐོང་ཞིང་ཆོས་ཀྱང་ཐོས་སོ་ཞེས་བྱ་བའི་བར་དུ་ཇི་སྐད་སྔར་སྨོས་པ་བཞིན་དུ་སྦྱར་རོ། །འཁོར་དེ་ན་བྱང་ཆུབ་སེམས་དཔའ་གཉིས་ལ་གཅིག་འཁྲུགས་མེད་རྩེ་མོ་ཞེས་བྱ་བ་དང ། གཅིག་ཤོས་ནི་སངས་རྒྱས་ཡང་དག་འདོད་ཅེས་བྱ་བ་ཞིག་ཡོད་དེ། དེ་བཞིན་གཤེགས་པ་གདུང་བྲལ་མངོན་པར་འཕགས་པ་རྣམ་ཐོས་ཀྱི་བུ་སྔ་ལའི་རྒྱལ་པོ་དེས་བྱང་ཆུབ་སེམས་དཔའ་དེ་གཉིས་བོས་ཏེ་འདི་སྐད་ཅེས་བཀའ་སྩལ་ཏོ། རིགས་ཀྱི་བུ་དང ། ཁྱེད་ཅག་སངས་རྒྱས་ཀྱི་ཞིང་མི་མཇེད་དུ་དེ་ང་ལ་ངའི་ཚིག་གིས་དེ་བཞིན་གཤེགས་པ་ཤཱཀྱ་ཐུབ་པ་ལ་སྙུན་མི་མངའམ། ཐུགས་འདོད་བདེ་བ་འཇོག་པ་ལ་གནས་སམ་ཞེས་སྙུན་གསོལ་ཅིག་།དེ་གཉིས་ཀྱིས་
466b
གསོལ་བ། བཙུན་པ་བཅོམ་ལྡན་འདས། བདག་ཅག་གིས་ཐམས་ཅད་དང་ལྡན་པའི་སངས་རྒྱས་ཀྱི་ཞིང་མི་མཇེད་ཀྱི་ས་དང་ནམ་མཁའ་ཐམས་ཅད་ཡང་དག་པར་རྗེས་སུ་མཐོང་སྟེ། དེ་ན་ས་དང་ནམ་མཁའ་ལ་སེམས་ཅན་འགའ་ཙམ་གྱི་གོ་སྐབས་ཀྱང་མ་མཆིས་ན། བདག་ཅག་གང་དུ་གནས་པར་བགྱི་ལགས། དེ་བཞིན་གཤེགས་པ་དེས་བཀའ་སྩལ་པ། རིགས་ཀྱི་བུ་དག་།སངས་རྒྱས་ཀྱི་ཞིང་མི་མཇེད་ན་གོ་སྐབས་མེད་དོ་ཞེས་དེ་སྐད་མ་ཟེར་ཅིག་།དེ་ཅིའི་ཕྱིར་ཞེ་ན། རིགས་ཀྱི་བུ་དག་།དེ་བཞིན་གཤེགས་པ་ཤཱཀྱ་ཐུབ་པ་དེ་ནི་སངས་རྒྱས་ཀྱི་ཡོན་ཏན་བསམ་གྱིས་མི་ཁྱབ་པ་དག་གིས་གོ་སྐབས་ཡངས་པ་ཡིན་ཏེ། སྔོན་གྱི་སྨོན་ལམ་གྱིས་གསུམ་ལ་སྐྱབས་སུ་འགྲོ་བ་དང ། ཐེག་པ་གསུམ་གྱི་ཆོས་བསྟན་པ་ལས་བརྩམས་ཏེ་ཆོས་སྟོན་པར་མཛད་པ་དང ། བསླབ་པ་གསུམ་གྱི་སྡོམ་པ་སྟོན་པར་མཛད་པ་དང ། རྣམ་པར་ཐར་པའི་སྒོ་གསུམ་པོ་དག་སྟོན་པར་མཛད་པ་དང ། སེམས་ཅན་རྣམས་ངན་སོང་གསུམ་པོ་དག་ལས་འདྲེན་པར་མཛད་པ་དང ། ཞི་བའི་ལམ་གསུམ་པོ་དག་ལ་རབ་ཏུ་འགོད་པར་མཛད་པའི་ཕྱིར་དེ་བཞིན་གཤེགས་པ་དེའི་ཐུགས་རྗེ་དང་བསྟན་པ་ལ་འཇུག་པ་ནི་ཡངས་པ་ཡིན་ནོ། །རིགས་ཀྱི་བུ་དག་།དེ་བཞིན་གཤེགས་པ་ཤཱཀྱ་ཐུབ་པ་དེ་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པའི་དུས་ཤིག་ན། འདུལ་བའི་སེམས་
467a
༄#། །ཅན་ལ་གཟིགས་ཤིང་རི་བྲག་མི་མཉམ་པའི་དབུས་ན་གནོད་སྦྱིན་དབང་པོའི་མི་གཅེས་བྱ་བའི་གནས་ཤིང་སཱ་ལའི་ཕུག་ན་རྣམ་པར་གྲོལ་བའི་དགའ་བ་དང ། བདེ་བ་ཉམས་སུ་མྱོང་ཞིང་སྐྱིལ་མོ་ཀྲུང་གཅིག་གི་ཞག་བདུན་འདའ་བར་མཛད་ཅིང་བཞུགས་པ་ན་དེ་བཞིན་གཤེགས་པའི་སྐུས་སཱ་ལའི་ཕུག་ཐམས་ཅད་ཁྱབ་པར་གྱུར་ཏེ། དེ་ན་གང་དུ་དེ་བཞིན་གཤེགས་པའི་སྐུས་ཁྱབ་པར་མ་གྱུར་པའི་གོ་སྐབས་ནི་ཐ་ན་སོར་བཞི་ཙམ་གྱི་གཏོས་ཀྱང་མེད་དོ། །ཞག་བདུན་པོ་དེ་འདས་པ་དང ། ཕྱོགས་བཅུ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཁྲག་ཁྲིག་ཕྲག་བཅུ་གཉིས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་ཕྱག་བྱ་བ་དང ། བསྙེན་བཀུར་བྱ་བ་དང ། ཆོས་མཉན་པའི་ཕྱིར་འཇིག་རྟེན་གྱི་ཁམས་མི་མཇེད་ཀྱི་རི་དེ་གང་ཡིན་པ་དེ་ལོགས་སུ་མངོན་དུ་ཕྱོགས་ཏེ་འཁོད་པ་དང་ཞེས་བྱ་བ་ནས་དེ་བཞིན་གཤེགས་པ་ཤཱཀྱ་ཐུབ་པ་དེ་ནི་ཇི་སྐད་སྨྲོས་པའི་ཆོས་བཞི་པོ་དེ་དག་གིས་དེ་བཞིན་གཤེགས་པ་གཞན་དག་ལས་ཁྱད་པར་དུ་འཕགས་པ་ཡིན་ནོ་ཞེས་བྱ་བའི་བར་དུ་ཇི་སྐད་སྔར་སྨོས་པ་བཞིན་ཏེ། རིགས་ཀྱི་བུ་དག་།ཁྱེད་ཀྱིས་མེ་ཏོག་ཟླ་བ་མདོག་མཛེས་དྲི་མ་མེད་པ་འདི་དག་ལོང་ལ། ལྷོ་ནུབ་ཀྱི་ཕྱོགས་ལོགས་སུ་རང་རང་གིས་ཇི་ལྟར་མཐོང་བའི་སངས་
467b
རྒྱས་ཀྱི་ཞིང་མི་མཇེད་དེར་དེངས་ཤིག་།ངའི་ཚིག་གིས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་སྙུན་མི་མངའམ། ཐུགས་བདེའམ་ཞེས་ཀྱང་སྙུན་གསོལ་ཅིག་།དེ་ནས་དེ་བཞིན་གཤེགས་པ་གདུང་བྲལ་མངོན་པར་འཕགས་པ་རྣམ་ཐོས་ཀྱི་བུ་སཱ་ལའི་རྒྱལ་པོ་དེས་མེ་ཏོག་ཟླ་བ་མདོག་མཛེས་དྲི་མ་མེད་པ་དག་བླངས་ཏེ། བྱང་ཆུབ་སེམས་དཔའ་འཁྲུག་མེད་རྩེ་མོ་དང ། བྱང་ཆུབ་སེམས་དཔའ་སངས་རྒྱས་ཡང་དག་འདོད་ལ་བྱིན་ནས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་།ངའི་རྫུ་འཕྲུལ་གྱི་སྟོབས་བསྐྱེད་པས་ཁྱེད་ཅག་འཇིག་རྟེན་གྱི་ཁམས་མི་མཇེད་དུ་དེངས་ཤིག་།དེ་ན་སྲོག་ཆགས་ཉི་ཁྲིས་ཀྱང་གསོལ་པ། བཙུན་པ་བཅོམ་ལྡན་འདས། བདག་ཅག་ཀྱང་དེ་བཞིན་གཤེགས་པའི་མཐུས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་བལྟ་བ་དང ། ཕྱག་བགྱི་བ་དང ། བསྙེན་བཀུར་བགྱི་བའི་སླད་དུ་འཇིག་རྟེན་གྱི་ཁམས་མི་མཇེད་དུ་མཆིས་ལགས་སོ། །དེ་བཞིན་གཤེགས་པ་དེས་བཀའ་སྩལ་པ། རིགས་ཀྱི་བུ་དག་།བསམ་པ་ཇི་ལྟ་བ་བཞིན་དུ་དེངས་ཤིག་།དེ་ནས་དེ་བཞིན་གཤེགས་པ་དེའི་མཐུས་བྱང་ཆུབ་སེམས་དཔའ་དེ་གཉིས་བྱང་ཆུབ་སེམས་དཔའ་ཉི་ཁྲི་དང་ལྷན་ཅིག་འགྲོགས་ཏེ་སངས་རྒྱས་ཀྱི་ཞིང་རྣམ་པར་རྒྱལ་བ་དེ་ནས་འཕགས་པ་དང ། སེམས་ཀྱི་སྐད་ཅིག་གཅིག་གིས་སངས་རྒྱས་ཀྱི་
468a
༄#། །ཞིང་མི་མཇེད་འདིར་ཕྱིན་ཏེ་བྱ་རྒོད་ཕུང་པོའི་རི་ལ་སོ་སོར་འཁོད་དོ། །འཁོད་ནས་ཀྱང་དེ་དག་གིས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་གསོལ་པ། བཙུན་པ་བཅོམ་ལྡན་འདས། འདི་ནས་བྱང་ཤར་གྱི་ཕྱོགས་ལོགས་སུ་ཞེས་བྱ་བ་ནས་དེ་བཞིན་གཤེགས་པ་དེས་མེ་ཏོག་ཟླ་བ་མདོག་མཛེས་དྲི་མ་མེད་པ་འདི་དག་ཀྱང་བསྐུར་ཞིང ། བཅོམ་ལྡན་འདས་ལ་སྙུན་མི་མངའ་འམ། ཐུགས་བདེའམ་ཞེས་ཀྱང་སྙུན་གསོལ་ལགས་སོ་ཞེས་བྱ་བའི་བར་དུ་ཇི་སྐད་སྔར་སྨོས་པ་བཞིན་དུ་སྦྱར་རོ། །དེ་བཞིན་དུ་དེ་བཞིན་གཤེགས་པ་བདུད་ཀྱི་གནས་རྣམ་པར་འཇོམས་པའི་གདན་ཡང་གཡོས་ཏེ། བྱང་ཆུབ་སེམས་དཔའ་གང་དག་དེར་འདུས་པར་གྱུར་པ་དེ་དག་གིས་དེ་བཞིན་གཤེགས་པ་བདུད་ཀྱི་གནས་རྣམ་པར་འཇོམས་པའི་གདན་གཡོས་པ་མཐོང་སྟེ། དེ་བཞིན་གཤེགས་པ་དེ་ལ་ཡོངས་སུ་ཞུས་པ་ནས་ཇི་སྐད་སྔར་སྨོས་པའི་བར་དག་བཞིན་ནོ། །དེ་བཞིན་དུ་དེའི་ཚེ་ན་དེ་བཞིན་གཤེགས་པ་སཱ་ལའི་དབང་པོའི་རྒྱལ་པོ་དང ། རྣམ་པར་གནོན་པ་ཆེན་པོའི་འོད་ཟེར་དང ། པདྨ་དམ་པ་དང ། ཙནྡན་དང ། ལྷུན་པོའི་རྒྱལ་པོ་དང ། རྒྱ་མཚོ་དང ། སྐར་མའི་སྙིང་པོ་དང ། རྣམ་པར་གནོན་པའི་ཡེ་
468b
ཤེས་དང ། བྱང་ཤར་གྱི་ཕྱོགས་ཀྱི་དེ་བཞིན་གཤེགས་པ་དཔག་ཏུ་མེད་པའི་བར་དག་གིས་བྱང་ཆུབ་སེམས་དཔའ་དེ་དག་ཀྱང་དེ་བཞིན་གཤེགས་པ་ཤཱཀྱ་ཐུབ་པ་ལ་ཡོངས་སུ་ཞུ་བ་དང ། མཆོད་པ་བྱ་བ་དང ། ཕྱག་བྱ་བ་དང ། བསྙེན་བཀུར་བྱ་བ་དང ། ཆོས་མཉན་པའི་ཕྱིར་མེ་ཏོག་ཟླ་བ་མདོག་མཛེས་དྲི་མ་མེད་པ་དག་ཐོགས་ཏེ་སངས་རྒྱས་ཀྱི་ཞིང་མི་མཇེད་འདིར་ལྷག་པ་དང ། དེའི་མོད་ལ་དེ་བཞིན་གཤེགས་པ་ཤཱཀྱ་ཐུབ་པའི་རྫུ་འཕྲུལ་གྱི་མཐུས་སེམས་ཅན་གང་དག་སངས་རྒྱས་ཀྱི་ཞིང་མི་མཇེད་དུ་འདུས་པ་དེ་དག་ཐམས་ཅད་ཀྱི་སེམས་ཅན་རེ་རེའི་ལུས་ཀྱང་དཔག་ཚད་ཀྱི་ཚད་ཙམ་དུ་གྱུར་ནས་སངས་རྒྱས་ཀྱི་ཞིང་མི་མི་ཇེད་ཐམས་ཅད་དེ་ལྟ་བུའི་སེམས་ཅན་དག་གིས་ཀྱང་ཁྱབ་པར་གྱུར་ཏོ། ། སངས་རྒྱས་ཀྱི་ཞིང་འདིའི་ས་དང་ནམ་མཁའ་ཐམས་ཅད་སེམས་ཅན་དེ་དག་གིས་ཁྱབ་པར་གྱུར་ཏེ། གང་དུ་སེམས་ཅན་དག་གིས་ཁྱབ་པར་མ་གྱུར་པ་གོ་སྐབས་ནི་ཐ་ན་མིག་སྨན་གྱི་ཐུར་མ་གཟུགས་པའི་གཏོས་ཙམ་ཡང་མེད་དོ། །སེམས་ཅན་དེ་དག་ཐམས་ཅད་ཀྱིས་ཀྱང་དེ་བཞིན་གཤེགས་པ་ཤཱཀྱ་ཐུབ་པ་མཐོང་བ་མ་གཏོགས་པར་ནམ་མཁའ་སྟོང་པ་མཐོང་དུ་ཟད་ཀྱི་གཅིག་གིས་གཅིག་མ་མཐོང་ངོ ། །དེ་དག་གི་མིག་གི་ལམ་དུ་རི་རབ་དང ། ཁོར་ཡུག་དང ། ཁོར་ཡུག་ཆེན་པོ་དང ། རི་རྣམས་ཀྱང་སྣང་བར་མ་
469a
༄#། །གྱུར་ཏོ། །འཇིག་རྟེན་གྱི་བར་དག་ཀྱང་མི་སྣང ། ལྷའི་གཞལ་མེད་ཁང་རྣམས་ཀྱང་མི་སྣང་སྟེ། འོག་ཏུ་གསེར་གྱི་འཁོར་ལོ་ལ་ཐུག་པའི་བར་དང ། དེའི་སྟེང་གི་ས་གཞིའང་མིག་ལམ་དུ་སྣང་བར་མ་གྱུར་ཏོ། །དེ་ནས་བཅོམ་ལྡན་འདས་ཏིང་ངེ་འཛིན་ནམ་མཁའ་ཁྱབ་ཆོས་སེལ་ཤིན་ཏུ་སྦྱངས་པ་ཞེས་བྱ་བ་ལ་སྙོམས་པར་ཞུགས་པ་དང ། དེས་མེ་ཏོག་ཟླ་བ་མདོག་མཛེས་དྲི་མ་མེད་པ་དེ་དག་ཀྱང་བཅོམ་ལྡན་འདས་ཀྱི་སྤུའི་སྒོ་ཐམས་ཅད་དུ་ཞུགས་ཏེ། གང་དག་འཇིག་རྟེན་གྱི་ཁམས་མི་མཇེད་ཀྱི་ཁོངས་སུ་ཆུད་པར་གྱུར་པའི་སེམས་ཅན་དེ་དག་ཐམས་ཅད་ཀྱིས་ཀྱང་མཐོང་ངོ ། །སེམས་ཅན་དེ་དག་གི་སེམས་ལས་བྱུང་བ་དག་ཀྱང་གཟུགས་ལ་ཀུན་ཏུ་ལྟ་བའི་ཡིད་ལ་བྱེད་པ་དང་བྲལ་ཞིང་དེ་དག་བཅོམ་ལྡན་འདས་ཀྱི་སྤུའི་སྒོ་འདས་\?\ཞིག་ཏུ་ངེས་པར་རྟོགས་ཏེ། དེར་ཡང་འདི་ལྟ་སྟེ། དཔེར་ན། འཇིག་རྟེན་གྱི་ཁྱམས་བདེ་བ་ཅན་གྱི་སྐྱེད་མོས་ཚལ་ལྟ་བུར་རིན་པོ་ཆེའི་ཤིང་ལྗོན་པ་སྣ་ཚོགས་དང ། ལོ་མ་སྣ་ཚོགས་དང ། མེ་ཏོག་སྣ་ཚོགས་དང ། འབྲས་བུ་སྣ་ཚོགས་ཀྱིས་གང་བའི་སྐྱེད་མོས་ཚལ་དག་མཐོང་ངོ ། །ཤིང་ལྗོན་པ་བཅོས་བུ་སྣ་ཚོགས་དང ། གོས་སྣ་ཚོགས་དང ། གདུགས་དང ། རྒྱལ་མཚན་དང ། བ་དན་དང ། དཔུང་རྒྱན་དང ། མུ་ཏིག་གི་ཆུན་པོ་སྣ་ཚོགས་ཀྱིས་བརྒྱན་པ་དེ་
469b
དག་མཐོང་བ་དང ། སེམས་ཅན་དེ་དག་འདི་སྙམ་དུ་སེམས་ཏེ། བདག་ཅག་སྐྱེད་མོས་ཚལ་དེ་ལྟར་འདོང་ངོ་སྙམ་ནས། གང་དག་འཇིག་རྟེན་གྱི་ཁམས་མི་མཇེད་ཀྱི་ཁོངས་སུ་ཆུད་པར་གྱུར་པའི་སེམས་ཅན་དེ་དག་ཐམས་ཅད་ལས་སེམས་ཅན་དམྱལ་བ་པ་རྣམས་དང ། གཤིན་རྗེའི་འཇིག་རྟེན་པ་རྣམས་དང ། དུད་འགྲོའི་སྐྱེ་གནས་པ་རྣམས་དང ། གཟུགས་མེད་པ་ན་སྤྱོད་པ་རྣམས་མ་གཏོགས་པར་སེམས་ཅན་ལྷག་མ་ཐམས་ཅད་དེ་བཞིན་གཤེགས་པ་དེའི་སྤུའི་སྒོ་དག་ནས་དེ་བཞིན་གཤེགས་པའི་སྐུའི་ནང་དུ་ཞུགས་པར་གྱུར་ཏོ།། དེ་ནས་བཅོམ་ལྡན་འདས་ཀྱིས་རྫུ་འཕྲུལ་དེ་དག་སླར་བསྡུས་ཏེ་བཞེངས་པ་དང ། དེ་ནས་སེམས་ཅན་དེ་དག་གཅིག་གིས་གཅིག་མཐོང་ནས་སྨྲས་པ། དེ་བཞིན་གཤེགས་པ་ཤཱཀྱ་ཐུབ་པ་ག་ལ་བཞུགས། བྱང་ཆུབ་སེམས་དཔའ་བྱམས་པས་སྨྲས་པ། ཀྱེ་སེམས་ཅན་དག་།བདག་ཅག་ཐམས་ཅད་དེ་བཞིན་གཤེགས་པའི་སྐུའི་ཁོང་པར་ཞུགས་པར་ཤེས་བཞིན་གྱིས་སོམས་ཤིག་།དེ་ནས་སེམས་ཅན་དེ་དག་གིས་དེ་བཞིན་གཤེགས་པའི་སྐུ་ཕྱི་ནང་བཅས་པར་མཐོང་ཞིང་ཇི་ལྟར་བདག་ཅག་དེ་བཞིན་གཤེགས་པའི་སྐུའི་ཁོང་པར་ཞུགས་ཏེ་འདུག་པར་གྱུར་པ་རང་རང་གི་མངོན་སུམ་དུ་གྱུར་ནས་དེ་དག་འདི་སྙམ་དུ་སེམས་ཏེ། བདག་ཅག་གང་ནས་དེ་བཞིན་གཤེགས་པའི་སྐུའི་ཁོང་པར་ཞུགས་
470a
༄#། །ཤིང་སུས་འདིར་བཅུག་སྙམ་མོ། །དེ་ནས་བྱང་ཆུབ་སེམས་དཔའ་བྱམས་པས་ཐམས་ཅད་དང་ལྡན་པའི་འཁོར་རྣམས་ལ་སྒྲས་མངོན་པར་གོ་བར་བྱས་ཏེ་སྨྲས་པ། ཁྱེད་ཅག་ཉོན་ཅིག་།འདི་ནི་དེ་བཞིན་གཤེགས་པའི་རྫུ་འཕྲུལ་དང ། རྣམ་པར་འཕྲུལ་བའི་ཆོ་འཕྲུལ་ཡིན་ཏེ། གང་གི་ཕྱིར་བདག་ཅག་ལ་ཕན་པར་མཛད་པའི་སྟོན་པས་ཆོས་སྟོན་པར་མཛད་ཀྱི། དེའི་ཕྱིར་ཁྱེད་ཅག་སེམས་ཅན་ཐམས་ཅད་ཀྱིས་སོམས་ཤིག་།དེ་ནས་ཐམས་ཅད་དང་ལྡན་པའི་འཁོར་རྣམས་ཀྱིས་ཐལ་མོ་སྦྱར་བ་བཏང་བ་དང ། བཅོམ་ལྡན་འདས་ཀྱིས་བདེ་བ་སྤྱོད་པའི་ཆོས་ཐམས་ཅད་བསྟན་ཏོ། །དེ་ལ་བདེ་བ་སྤྱོད་པའི་ཆོས་ཐམས་ཅད་གང་ཞེ་ན། འདི་ལྟ་སྟེ། འཁོར་བའི་འདམ་ལས་བསྒྲལ་བ་དང ། འཕགས་པའི་ལམ་ཡན་ལག་བརྒྱད་པ་ལ་གཟུད་པ་དང ། ཐམས་ཅད་མཁྱེན་པ་ཉིད་ལ་གཟུད་པ་དང ། ཐམས་ཅད་མཁྱེན་པ་ཉིད་ཀྱི་རང་བྱུང་གི་ཡེ་ཤེས་ཡོངས་སུ་རྫོགས་པར་བྱའོ། །དེ་ལ་བསམ་གཏན་ལ་གཟུད་པའི་སེམས་བསྐྱེད་པ་ཡོངས་སུ་བསྔོ་བ་རྣམ་པ་བཅུ་སྟེ། འདི་ལྟ་སྟེ། ཕན་པའི་དངོས་པོ་ཡང་དག་པར་བསྐྱེད་པའི་ཕྱིར་སེམས་ཅན་ཐམས་ཅད་ལ་སྙིང་རྗེ་ཆེན་པོའི་སེམས་ཀྱིས་གནས་པ་དང ། སེམས་ཅན་མ་བརྒལ་བའི་བརྣམས་བསྒྲལ་བའི་ཕྱིར་གྲུ་ཆེན་
470b
པ་ཡང་དག་པར་བསྒྲུབ་པ་དང ། ཡོད་པ་མ་ཡིན་པའི་ཕྱིན་ཅི་ལོག་ལས་ཡོངས་སུ་ཐར་པར་བྱ་བའི་ཕྱིར་མ་གྲོལ་བ་དགྲལ་བའི་གོ་ཆ་དང ། ཆོས་ལ་བདག་མེད་པར་སོ་སོར་བརྟག་པའི་ཕྱིར་སེངྒེའི་སྒྲ་ཆེན་པོས་མི་སྒྲ་པའི་གོ་ཆ་དང ། ཆོས་ཐམས་ཅད་སྒྱུ་མ་དང ། རྨི་ལམ་དང ། མི་གཡོར་ལྟ་བུར་རྟོགས་པའི་ཕྱིར་འཇིག་རྟེན་གྱི་ཁམས་ཐམས་ཅད་དུ་འགྲོ་བའི་གོ་ཆ་དང ། ཚུལ་ཁྲིམས་ཀྱི་ཕུང་པོ་ཡོངས་སུ་དག་པ་ལ་གནས་པའི་ཕྱིར་འཇིག་རྟེན་གྱི་ཁམས་ཐམས་ཅད་སྣང་བས་བརྒྱན་པར་བྱེད་པའི་གོ་ཆ་དང ། ཕ་རོལ་ཏུ་ཕྱིན་པ་ཐམས་ཅད་ཡོངས་སུ་རྫོགས་པའི་ཕྱིར་དེ་བཞིན་གཤེགས་པའི་སྟོབས་བཅུ་ཡོངས་སུ་སྒྲུབ་པའི་གོ་ཆ་དང ། ཇི་སྐད་སྨྲས་པ་དེ་བཞིན་དུ་བྱེད་པའི་ཕྱིར་མི་འཇིགས་པ་བཞི་ཐོབ་པའི་གོ་ཆ་དང ། བྱང་ཆུབ་སེམས་དཔའ་རྣམས་ཀྱི་ཇི་ལྟར་ཐོས་པའི་ཆོས་བསྒྲུབ་པའི་ཕྱིར་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཀྱི་བར་དག་མ་ལུས་པར་ཐོབ་པའི་གོ་ཆ་དང ། སྤྲོས་པ་མེད་པ་སྟེ། དེ་དག་ནི་བདེ་བ་སྤྱོད་པའི་ཆོས་ཐམས་ཅད་ལ་གཟུད་པ་རྣམ་པ་བཅུའོ། །མཚན་ཉིད་མེད་པའི་སྒོ་ཡོངས་སུ་ཤེས་པ་རྟོགས་པའི་སྤྱོད་པ་དང ། ཆོས་ཐམས་ཅད་བདག་མེད་པར་ཡིད་ལ་བྱེད་པ་དང ། སེམས་སྐྱེས་བ་མེད་པ་དང ། འགག་པ་མེད་པར་རྟོགས་པ་གང་ཡིན་པ་ནི་ཕྱིར་མི་ལྡོག་པའི་ས་
471a
༄#། །ཡིན་ཏེ། དེ་ལ་ནི་འཇུག་པ་དང ། ལྡོག་པ་ཆད་ཅིང་རྟག་པ་མེད་པ་དང ། གདེག་པ་མེད་པ་དང ། གཞག་པ་མེད་པ་ཡིན་ནོ། །ཆོས་ཀྱི་རྣམ་གྲངས་འདི་བཤད་པ་ན་དེ་བཞིན་གཤེགས་པའི་སྐུའི་ཁོང་པར་ཞུགས་པའི་སེམས་ཅན་གངྒཱའི་ཀླུང་དུད་ཕྱུར་ཕྲག་བརྒྱད་ཀྱི་བྱེ་མ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེར་བྱང་ཆུབ་སེམས་དཔའ་སེམས་དཔའ་ཆེན་པོ་བགྲང་བ་ལས་ཡང་དག་པར་འདས་པ་སྙེད་པོ་དེ་དག་གིས་ནི་གཟུངས་དང་བཟོད་པ་རྣམ་པ་སྣ་ཚོགས་ཐོབ་པར་གྱུར་ནས། ཐམས་ཅད་དེ་བཞིན་གཤེགས་པའི་སྐུའི་སྤུའི་སྒོ་དག་ནས་ཕྱིར་ཐོན་པ་དང་ངོ་མཚར་དུ་གྱུར་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། དེ་བཞིན་གཤེགས་པའི་དབྱངས་ཀྱི་དཀྱིལ་འཁོར་དང ། སྐུའི་ཚད་བརྟག་པའི་ཕྱིར་ཕྱོགས་བཅུར་རང་རང་གི་སངས་རྒྱས་ཀྱི་ཞིང་དག་ཏུ་དོང་ངོ ། །དེ་ན་བྱང་ཆུབ་སེམས་དཔའ་གང་དག་ཤར་ཕྱོགས་ལོགས་སུ་དོང་བ་དང ། ཤར་ཕྱོགས་ལོགས་སུ་སངས་རྒྱས་ཀྱི་ཞིང་དཔག་ཏུ་མེད་གྲངས་མེད་པ་དག་འདས་ཀྱང་དེ་བཞིན་གཤེགས་པ་ཤཱཀྱ་ཐུབ་པའི་དབྱངས་ཀྱི་དཀྱིལ་འཁོར་ནི་ཉམས་པ་མེད་ཅིང་དེར་ཡང་ཚིག་དང ། དོན་དང ། ཡིག་འབྲུ་རྣམ་པ་སྣ་ཚོགས་ཀྱི་སྒྲ་དག་དེ་བཞིན་དུ་ཐོས་ཏེ།
471b
ཇི་ལྟར་དེ་བཞིན་གཤེགས་པ་ཤཱཀྱ་ཐུབ་པའི་སྤྱན་སྔ་ན་འདུག་པའི་ཆོས་ཐོས་པ་དེ་བཞིན་དུ་དེའི་ཆོས་ཐོས་སོ། །གཞན་ཡང་དེ་ན་དེ་བཞིན་གཤེགས་པ་ཤཱཀྱ་ཐུབ་པའི་སྐུའང་སྐྱེ་བའམ་བྲི་བར་མི་མངོན་ཞིང་དེ་བཞིན་གཤེགས་པ་ཤཱཀྱ་ཐུབ་པའི་སྐུ་བྱང་ཆུབ་སེམས་དཔའ་དང་ཉན་ཐོས་དག་གིས་ཁྱབ་པར་སྣང་སྟེ། དེ་བཞིན་གཤེགས་པ་ཤཱཀྱ་ཐུབ་པའི་སྤུའི་སྒོ་གཅིག་ནའང་བྱང་ཆུབ་སེམས་དཔའ་དང ། ཉན་ཐོས་དཔག་ཏུ་མེད་གྲངས་མེད་པ་དག་འཇུག་ཅིང་འབྱུང་བར་སྣང་ངོ ། །དེ་བཞིན་དུ་སྤུའི་སྒོ་གཉིས་པ་ནས་སྤུའི་སྒོ་ཐམས་ཅད་ཀྱི་བར་དག་ཏུའང་འཇུག་ཅིང་འབྱུང་བར་སྣང་སྟེ། ཕྱོགས་བཅུའི་བར་དུའང་དེ་བཞིན་དུ་བརྗོད་པར་བྱའོ། །ཐམས་ཅད་དང་ལྡན་པའི་འཁོར་ཇི་སྙེད་བཅོམ་ལྡན་འདས་ཀྱི་སྐུའི་ཁོང་པར་ཞུགས་པར་གྱུར་པ་དེ་དག་ཀྱང་བཅོམ་ལྡན་འདས་ཀྱི་སྐུའི་སྤུའི་སྒོ་དག་ནས་ཕྱིར་འཐོན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་དེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ལ་དོན་དང ། ཚིག་དང ། ཡི་གེ་དང ། འབྲུ་དང ། སྒྲ་དང ། བརྗོད་པ་སྣ་ཚོགས་དག་གིས་བསྟོད་ཅིང་བཅོམ་ལྡན་འདས་ཀྱི་སྤྱན་སྔ་ན་འཁོད་དོ། །དེ་ནས་དེའི་མོད་ལ་འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷའི་བུ་རྣམས་ཀྱིས་སྤོས་དང ། མེ་ཏོག་ཕྲེང་བ་དང ། བྱུག་པ་སྣ་ཚོགས་ཀྱི་ཆར་དག་རབ་ཏུ་ཕབ་སྟེ།
472a
༄#། །ལྷའི་སིལ་སྙན་དག་ཀྱང་རབ་ཏུ་གསིལ་ནས་ལྷའི་གདུགས་དང ། རྒྱལ་མཚན་དང ། བ་དན་དང ། ན་བཟའ་དང ། རས་བཅོས་བུ་དང ། རྒྱན་དག་གིས་བཅོམ་ལྡན་འདས་ལ་མཆོད་པ་བྱ་བའི་ཕྱིར་བརྩོན་པར་གྱུར་ཏོ། །དེ་ན་བྱང་ཆུབ་སེམས་དཔའ་འཇིགས་མེད་ཡང་དག་འདྲེན་ཅེས་བྱ་བ་དེས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། ལུང་བསྟན་པ་ཆེན་པོའི་མདོ་སྡེ་འདིའི་མིང་ཅི་ལགས། བཅོམ་ལྡན་འདས་ཀྱིས་བཀའ་སྩལ་བ། ཐམས་ཅད་མཁྱེན་པ་ཉིད་ཀྱི་རྣམ་པ་ལ་འཇུག་པའི་གཟུངས་ཀྱི་སྒོ་ཞེས་བྱ་བ་དང ། སངས་རྒྱས་མང་པོ་པ་ཞེས་བྱ་བ་དང ། མང་པོ་འདུས་པ་ཞེས་བྱ་བ་དང ། བྱང་ཆུབ་སེམས་དཔའ་ལུང་བསྟན་པ་ཞེས་བྱ་བ་དང ། མི་འཇིགས་པའི་ལམ་དུ་སྒྲོལ་བ་ཞེས་བྱ་བ་དང ། ཏིང་ངེ་འཛིན་གྱི་རྟོག་པ་ལ་འཇུག་པ་ཞེས་བྱ་བ་དང ། སངས་རྒྱས་ཀྱི་ཞིང་ཀུན་ཏུ་སྟོན་པ་ཞེས་བྱ་བ་དང ། རྒྱ་མཚོ་ལྟ་བུ་ཞེས་བྱ་བ་དང ། བགྲང་བ་ལས་ཡང་དག་པར་འདས་པ་ཞེས་བྱ་བ་དང ། སྙིང་རྗེ་པདྨ་དཀར་པོ་ཞེས་ཀྱང་བྱའོ། །ཡང་གསོལ་པ། བཙུན་པ་བཅོམ་ལྡན་འདས། རིགས་ཀྱི་བུའམ། རིགས་ཀྱི་བུ་མོ་གང་ཆོས་ཀྱི་རྣམ་གྲངས་འདི་ཉན་པ་དང ། འཛིན་པ་དང ། འཆང་བ་དང་
472b
ཀློག་པ་དང ། གཞན་དག་ལའང་ཐ་ན་ཚིགས་སུ་བཅད་པ་གཅིག་ཙམ་ཡང་རྒྱ་ཆེར་ཡང་དག་པར་སྟོན་པར་བགྱིད་པ་དེ་བསོད་ནམས་ཇི་སྙེད་ཅིག་བསྐྱེད་པར་འགྱུར་ལགས། བཀའ་སྩལ་པ། ངས་དེའི་བསོད་ནམས་སྔར་ཡང་སྨྲས་ཏེ། དེ་ཡང་མདོར་བསྡུས་ཏེ་བརྗོད་པར་བྱའོ། །གང་ལ་ལ་ཞིག་ཆོས་ཀྱི་རྣམ་གྲངས་འདི་ཉན་པ་དང ། འཛིན་པ་དང ། འཆང་བ་དང ། ཀློག་པ་དང ། གཞན་དག་ལའང་ཐ་ན་ཚིགས་སུ་བཅད་པ་གཅིག་ཙམ་རྒྱ་ཆེར་ཡང་དག་པར་སྟོན་པར་བྱེད་པ་དང ། གང་ཡང་མ་འོངས་པའི་དུས་ལྔ་བརྒྱ་པ་ཐ་མ་ན་ཐ་ན་བྲིས་ཏེ་འཆང་བར་བྱེད་ན་དེ་བསོད་ནམས་ཆེས་མང་དུ་བསྐྱེད་པར་འགྱུར་གྱི། བྱང་ཆུབ་སེམས་དཔའ་གང་དག་བསྐལ་པ་ཆེན་པོ་ཆེན་བཅུའི་བར་དུ་ཕ་རོལ་ཏུ་ཕྱིན་པ་དྲུག་ལ་སྤྱོད་པའི་བསོད་ནམས་ཀྱི་ཕུང་པོ་ནི་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། ལྷ་དང་བཅས་པ་དང ། བདུད་དང་བཅས་པ་དང ། ཚངས་པ་དང་བཅས་པ་དང ། དགེ་སྦྱོང་དང་བྲམ་ཟེའི་སྐྱེ་དགུ་དང་བཅས་པ་དང ། གནོད་སྦྱིན་དང ། ཀླུ་དང ། དྲི་ཟ་དང ། གྲུལ་བུམ་དང ། ཡི་དྭགས་དང ། ཤ་ཟ་དང ། མིའམ་ཅི་དང ། ལྷ་མ་ཡིན་རྣམས་དང་བཅས་པའི་འཇིག་རྟེན་གྱི་སྡང་བའི་སེམས་རབ་ཏུ་དང་བར་བྱ་བ་དང ། ནད་ཐམས་ཅད་རབ་ཏུ་ཞི་བར་བྱ་བ་དང ། འཐབ་མོ་དང ། འཐབ་པ་དང ། རྩོད་པ་དང ། འགྱེད་པ་ཐམས་ཅད་ཉེ་
473a
༄#། །བར་ཞི་བར་བྱ་བ་དང ། དུས་མ་ཡིན་པའི་རླུང་དང ། དུས་མ་ཡིན་པའི་ཆར་པ་དང ། འཆི་བ་དང ། ནད་ཐམས་ཅད་རབ་ཏུ་ཞི་བར་བྱ་བ་དང ། མུ་གེ་ཐམས་ཅད་རབ་ཏུ་ཞི་བར་བྱ་བ་དང ། བདེ་བར་བྱ་བ་དང ། ལོ་ལེགས་པར་བྱ་བ་དང ། ནད་མེད་པ་ཚོགས་པར་བྱ་བ་དང ། སྐྲག་པ་རྣམས་འཇིགས་པ་མེད་པ་ཅིང་བདེ་བར་བྱ་བ་དང ། ཉོན་མོངས་པ་ཉེ་བར་ཞི་བར་བྱ་བ་དང ། དགེ་བའི་རྩ་བ་རྣམ་པར་འཕེལ་བར་བྱ་བ་དང ། ངན་སོང་གསུམ་གྱི་སྡུག་བསྔལ་ལས་ཐར་པར་བྱ་བ་དང ། ཐེག་པ་གསུམ་པོ་དག་གི་ལམ་ཡང་དག་པར་བསྟན་པར་བྱ་བ་དང ། ཏིང་ངེ་འཛིན་དང ། གཟུངས་དང ། བཟོད་པ་ཐོབ་པར་བྱ་བ་དང ། སེམས་ཅན་ཐམས་ཅད་ཉེ་བར་འཚོ་བར་བྱ་བ་དང ། རྡོ་རྗེའི་གདན་ལ་འདུག་པར་བྱ་བ་དང ། བདུད་བཞི་གཞོམ་པར་བྱ་བ་དང ། བྱང་ཆུབ་ཀྱི་ཕྱོགས་མངོན་པར་རྫོགས་པར་འཚང་རྒྱ་བར་བྱ་བ་དང ། ཆོས་ཀྱི་འཁོར་ལོ་བསྐོར་བར་བྱ་བ་དང ། འཕགས་པའི་ནོར་བདུན་དང་བྲལ་བའི་སེམས་ཅན་རྣམས་བྱང་ཆུབ་ཀྱི་ཕྱོགས་དང་ལྡན་པར་བྱ་བ་དང ། འཁོར་མང་པོར་བྱ་བ་དང ། མི་འཇིགས་པའི་གྲོང་ཁྱེར་གྱི་གནས་སུ་འཇུག་པར་བྱ་བའི་ཕྱིར་ངས་ཆོས་ཀྱི་རྣམ་གྲངས་འདི་བཤད་པའི་ཕྱིར་རོ། །ངས་ཆོས་ཀྱི་རྣམ་གྲངས་འདི་སུའི་ལག་ཏུ་གཏད་པ་དང ། སུ་ཞིག་ལྔ་བརྒྱ་ཐ་མ་ལ་ངའི་
473b
ཆོས་ཀྱི་རྣམ་གྲངས་འདི་བསྲུང་བར་འགྱུར་ཞིང ། ཆོས་མ་ཡིན་པ་ལྷུར་ལེན་པའི་སེམས་ཅན་རྣམས་དང ། ཚུལ་ཁྲིམས་ཉམས་པའི་དགེ་སློང་རྣམས་ཀྱི་རྣ་ལམ་དུ་སྒྲོགས་པར་འགྱུར། ཆོས་མ་ཡིན་པ་ལ་ཆགས་པས་ཆགས་པར་གྱུར་པ་རྣམས་དང ། འདོད་པ་མི་བཟད་པས་ཟིལ་གྱིས་ནོན་པ་རྣམས་དང ། ཆོས་ལོག་པས་ཡོངས་སུ་དཀྲིས་པ་རྣམས་དང ། སེམས་ཅན་ཡོངས་སུ་མ་སྨིན་པ་རྣམས་ཀུན་ཏུ་སྐྱོ་བ་མེད་པར་འགྱུར་ཞིག་གུ་སྙམ་དུ་དགོངས་པ་དང ། ཐམས་ཅད་དང་ལྡན་པའི་འཁོར་དེས་བཅོམ་ལྡན་འདས་ཀྱི་ཐུགས་ཀྱི་ཡོངས་སུ་རྟོག་པ་སེམས་ཀྱིས་ཤེས་ནས་འཁོར་དེ་ན་གནོད་སྦྱིན་གྱི་དྲང་སྲོང་བསོད་ནམས་ལྷུན་པོ་ཞེས་བྱ་བ་ཞིག་ཀྱང་འདུག་གོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་གནོད་སྦྱིན་གྱི་དྲང་སྲོང་བསོད་ནམས་ལྷུན་པོ་དེ་ཁྲིད་ནས་བཅོམ་ལྡན་འདས་ཀྱི་ཐད་དུ་ཕུལ་བ་དང ། བཅོམ་ལྡན་འདས་ཀྱིས་བཀའ་སྩལ་བ། དྲང་སྲོང་ཆེན་པོ་ཁྱོད་ཀྱིས་ཆོས་ཀྱི་རྣམ་གྲངས་འདི་གཟུང་ལ། ལྔ་བརྒྱ་པ་ཐ་མ་ལ་ཕྱིར་མི་ལྡོག་པའི་བྱང་ཆུབ་སེམས་དཔའ་ཡུལ་གཞན་དུ་སོང་བའི་བར་དག་གི་རྣ་ལམ་དུ་སྒྲོགས་ཤིག་།དེ་དག་ཀྱང་ཕྱིར་མི་ལྡོག་པའི་སེམས་བསྐྱེད་དུ་ཆུག་ཅིག་།གསོལ་བ། བཙུན་པ་བཅོམ་ལྡན་འདས། དེ་བཞིན་དུ་བགྱི་སྟེ། བཙུན་པ་བཅོམ་ལྡན་འདས། བདག་སྨོན་ལམ་གྱིས་བསྐལ་བ་ཆེན་པོ་བརྒྱད་ཅུ་རྩ་
474a
༄#། །བཞི་འདས་པ་ནས་གནོད་སྦྱིན་གྱི་དྲང་སྲོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སྤྱད་པ་སྤྱོད་པ་ན། བདག་གིས་སེམས་ཅན་བགྲང་བ་ལས་ཡང་དག་པར་འདས་པ་དག་ཚངས་པའི་གནས་པ་བཞི་པོ་དག་ལ་རབ་ཏུ་བཀོད་ཅིང་ཕྱིར་མི་ལྡོག་པའི་ས་ལའང་རབ་ཏུ་བཀོད་ལགས་ཏེ། བདག་གིས་སེམས་ཅན་གང་དག་ལྔ་བརྒྱ་པ་ཐ་མ་ལ་ཆོས་ཀྱི་རྣམ་གྲངས་འདི་འཛིན་པར་བགྱིད་པ་དང ། གང་དག་འདི་ལས་ཚིག་བཞི་པའི་ཚིགས་སུ་བཅད་པ་ཙམ་གྱི་བར་དག་འཛིན་པར་བགྱིད་པ་དེ་དག་ཀྱང་བདག་ཉིད་ཀྱིས་ཡོངས་སུ་སྨིན་པར་བགྱི་ལགས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཐམས་ཅད་དང་ལྡན་པའི་འཁོར་དེ་དང ། ལྷ་དང་མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སྙིང་རྗེ་པདྨ་དཀར་པོ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། སུ་རེནྡྲ་བོ་དྷི་དང ། པྲཛྙཱ་བརྨ་དང ། ཞུ་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།