rKTs


H114

(e-text produced by ACIP)

see text in transliteration
86a
།།རྒྱ་གར་སྐད་དུ། ཨཱརྱ་མཧཱ་ཀ་རུ་ཎཱ་པུཎྜ་རཱི་ཀ་ནཱ་མ་མཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་སྙིང་རྗེ་ཆེན་པོའི་པདྨ་དཀར་པོ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཀུ་ཤའི་གྲོང་ཁྱེར་ན་གྱད་རྣམས་ཉེ་བར་གནས་པ་ཤིང་སཱ་ལའི་ཚལ་ན་བཞུགས་སོ། །དེ་ནས་བཅོམ་ལྡན་འདས་ཡོངས་སུ་མྱ་ངན་ལས་འདའ་བའི་དུས་ཀྱི་ཚེ་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། །དེ་བཞིན་གཤེགས་པ་དོ་ནུབ་ཀྱི་ནམ་གྱི་ཐུན་ཐ་མ་ལ་ཡོངས་སུ་མྱ་ངན་ལས་འདས་ནས། ཁྱོད་ཀྱིས་ཤིང་སཱ་ལ་ཟུང་གི་བར་དུ་དེ་བཞིན་གཤེགས་པ་སེང་གེ་ལྟར་གློ་གཡས་པས་མནལ་བའི་གཟིམས་མལ་ཆོས་ཤིག་།ཀུན་དགའ་བོ། འདུས་བྱས་སུ་བརྟགས་པ་ཐམས་ཅད་ལེགས་པར་བཅོམ་པའི་ཤིན་ཏུ་ཡོངས་སུ་མྱ་ངན་ལས་འདའ་བས་ང་ཡོངས་
86b
སུ་མྱ་ངན་ལས་འདའོ། །ཀུན་དགའ་བོ། ངས་སངས་རྒྱས་ཀྱི་བྱ་བ་ནི་བྱས། ངས་གནས་མེད་པའི་ཆོས་ཞི་བ། རབ་ཏུ་ཞི་བ། མཆོག་གྱ་ནོམ་པ་ཟབ་པ། མཐོང་བར་དཀའ་བ། ཁོང་དུ་ཆུད་པར་དཀའ་བ། རྟག་མི་ནུས་པ། མ་བརྟགས་པ། རྟོག་གེའི་སྤྱོད་ཡུལ་མ་ཡིན་པ། མཁས་པ་དང་མཛངས་པས་རིག་པ། ཕུལ་དུ་ཕྱིན་པར་འཕགས་པའི་བདུད་རྩི་ནི་བསྟན། ཀུན་དགའ་བོ། ངས་ཆོས་ཀྱི་འཁོར་ལོ་བླ་ན་མེད་པ་དགེ་སྦྱོང་ངམ་བྲམ་ཟེའམ་བདུད་དམ་ལྷའམ་ཚངས་པའམ། གཞན་གང་གིས་ཀྱང་ཆོས་དང་མཐུན་པར་འཇིག་རྟེན་དུ་མ་བསྐོར་བ་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་བ་ནི་བསྐོར། ངས་ཆོས་ཀྱི་རྔ་བོ་ཆེ་ནི་བརྡུངས། ངས་ཆོས་ཀྱི་དུང་ཆེན་པོ་ནི་བུས། ངས་ཆོས་ཀྱི་རྒྱལ་མཚན་ཆེན་པོ་ནི་བསྒྲེངས། ངས་ཆོས་ཀྱི་མར་མེ་ཆེན་པོ་ནི་བུས། ངས་མུན་པ་ཆེན་པོ་ནི་བསལ། ངས་སྟོང་གསུམ་ནི་སྣང་བར་བྱས། ངས་གྲུ་ཆེན་པོ་ནི་བཅས། ངས་སྟེགས་ཆེན་པོ་ནི་བཙུགས། ངས་ཟམ་པ་ཆེན་པོ་ནི་བཏགས། ངས་ཕ་རོལ་ཏུ་འདོང་བ་མང་པོ་ནི་བཏོན། ངས་ཐར་པའི་ལམ་ནི་ཡང་དག་པར་བསྟན། ངས་ཆོས་ཀྱི་ཆར་ཆེན་པོ་ནི་ཕབ། ངས་ལྷ་དང་མི་རྣམས་ནི་ཚིམ་པར་བྱས། ངས་གདུལ་བ་རྣམས་ནི་བཏུལ། ངས་ཕས་ཀྱི་རྒོལ་བ་ཐམས་ཅད་ནི་སྐྲག་པར་བྱས།
87a
༄#། །ངས་མུ་སྟེགས་ཀྱི་གནས་ཐམས་ཅད་ནི་ཚར་བཅད། ངས་བདུད་ཀྱི་སྟོབས་ནི་བཅོམ། ངས་བདུད་ཀྱི་གནས་ནི་གཡོ་བར་བྱས། ངས་སེང་གེའི་སྒྲ་ནི་བསྒྲགས། ངས་སངས་རྒྱས་ཀྱི་བྱ་བ་ནི་བྱས། ངས་སྐྱེས་བུ་དམ་པའི་ལས་ནི་མཐར་ཕྱུང ། ངས་སྔོན་གྱི་ཡི་དམ་ནི་ཡོངས་སུ་རྫོགས་པར་བྱས། ངས་ཆོས་ཀྱི་ཚུལ་ནི་བྱིན་གྱིས་བརླབས། ངས་ཉན་ཐོས་ཆེན་པོ་རྣམས་ལས་བྱེད་དུ་ནི་བཙུད། མ་འོངས་པའི་སངས་རྒྱས་ཀྱི་ཚུལ་རྒྱུན་མི་འཆད་པར་བྱ་བའི་ཕྱིར་ངས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལུང་ནི་བསྟན་ཟིན་ཏེ། ཀུན་དགའ་བོ། མྱ་ངན་ལས་འདའ་བ་མ་གཏོགས་པར་ཕྱིས་བྱ་བ་ང་ལ་མེད་དོ། །དེ་ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་གསུང་རྣམ་པ་དེ་ལྟ་བུ་དེ་ཐོས་ནས་སྡུག་བསྔལ་ཞིང་ཡིད་མི་བདེ་སྟེ་མི་དགའ་ཞིང་མྱ་ངན་ཆེན་པོའི་ཟུག་རྔུས་ཟུག་པར་གྱུར་ནས་རབ་ཏུ་ངུས་ཏེ་མཆི་མ་ཟག་བཞིན་དུ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། རབ་ཏུ་མྱུར་བར་མྱ་ངན་ལས་འདའ་ཞིང་བདེ་བར་གཤེགས་པ་རབ་ཏུ་མྱུར་བར་མྱ་ངན་ལས་འདའ་སྟེ། འཇིག་རྟེན་གྱི་མིག་རབ་ཏུ་མྱུར་བར་མི་སྣང་བར་འགྱུར། རབ་ཏུ་མྱུར་བར་འཇིག་རྟེན་མགོན་མ་མཆིས་པ་དང་སྐྱབས་མ་མཆིས་པ་དང ། ཡོངས་སུ་འདྲེན་པ་མ་མཆིས་པར་
87b
འགྱུར་རོ། །དེ་ནས་ཡང་བཅོམ་ལྡན་འདས་ཀྱི་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། ཆོག་གི། མྱ་ངན་མ་བྱེད་ཅིག་།སྨྲེ་སྔགས་མ་འདོན་ཅིག་།གང་གནས་པ་དང ། བྱུང་བ་དང ། འདུས་བྱས་པ་དང ། བསགས་པ་ནི་རབ་ཏུ་འཇིག་པའི་ཆོས་ཅན་ཡིན་པས་མི་འཇིག་པར་ག་ལ་འགྱུར་ཏེ་དེ་ནི་གནས་མེད་དོ། །ཀུན་དགའ་བོ། ངས་ཐོག་མ་ཉིད་དུ་ཁྱེད་ལ་དགའ་བ་དང ། སྡུག་པ་དང ། ཡིད་དུ་འོང་བ་རྣམས་དང་ཐ་དད་དུ་འགྱུར་ཞིང་འགྱེས་པར་འགྱུར། བྲལ་བར་འགྱུར། བྱེ་བར་འགྱུར་རོ་ཞེས་མ་བསྟན་ཏམ། ཀུན་དགའ་བོ་ཁྱོད་ཀྱིས་ང་ལ་བྱམས་པའི་ལུས་ཀྱི་ལས་ཕན་པ་དང ། བདེ་བ་དང ། གཉིས་སུ་མེད་པ་དང ། ཚད་མེད་པ་དང ། མི་མཐུན་པ་མེད་པས་བསྙེན་བཀུར་བྱས་སོ། །ཀུན་དགའ་པོ།་གང་ལྷ་དང་མི་དང་ལྷ་མ་ཡིན་གྱི་འཁོར་དུ་བཅས་པ་དང ། ཉན་ཐོས་དང་རང་སངས་རྒྱས་སུ་བཅས་པ་ལ་བསྐལ་པའམ་བསྐལ་པ་ལས་ལྷག་པར་བསྙེན་བཀུར་བྱས་པ་པས་གང་དེ་བཞིན་གཤེགས་པ་ལ་ཡུད་ཙམ་ཞིག་བསྙེན་བཀུར་བྱས་པ་དེ་དེ་བས་འབྲས་བུ་ཤིན་ཏུ་ཆེའི། ཀུན་དགའ་བོ་ཁྱོད་མྱ་ངན་མ་བྱེད་ཅིག་།སྨྲེ་སྔགས་མ་འདོན་ཅིག། ཀུན་དགའ་བོ་ཁྱོད་ཀྱིས་དེ་བཞིན་གཤེགས་པ་ལ་བསྙེན་བཀུར་བྱས་པ་ནི་དོན་ཆེ་བ་དང ། འབྲས་བུ་ཆེ་བ་དང ། ཕན་ཡོན་ཆེ་བ་དང ། རྒྱ་ཆེ་བ་དང ། བདུད་རྩི་དང་འདྲ་བ་དང །
88a
༄#། །བདུད་རྩིལ་འབབ་པ་དང ། བདུད་རྩིའི་མཐར་འགྱུར་བ་ནས་མྱ་ངན་ལས་འདའ་བའི་བར་དུ་འགྱུར་རོ། །དེ་ནས་ཚེ་དང་ལྡན་པ་ཀུན་དགའ་བོས་མཆི་མ་ཕྱིས་ནས་སྨྲེ་སྔགས་འདོན་ཅིང་ཤིང་སཱ་ལ་ཟུང་གི་བར་དུ་དེ་བཞིན་གཤེགས་པ་སེང་གེ་ལྟར་གློ་གཡས་པས་མནལ་བའི་གཟིམས་མལ་བཅས་སོ། །དེ་ནས་བཅོམ་ལྡན་འདས་ཤིང་སཱ་ལ་ཟུང་ག་ལ་བ་དེར་གཤེགས་ནས་ཤིང་སཱ་ལ་ཟུང་གི་བར་དུ་སེང་གེ་ལྟར་གློ་གཡས་པས་མནལ་ལོ། །གང་གི་ཚེ་དེ་བཞིན་གཤེགས་པ་ཤིང་སཱ་ལ་ཟུང་གི་བར་དུ་སེང་གེ་ལྟར་གློ་གཡས་པས་མནལ་བར་གྱུར་པ་དེའི་ཚེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཤིང་དང ། རྩཝ་དང ། ཤིང་གེལ་བ་དང ། སྨན་དང ། ནགས་ཚལ་ཐ་ན་སོར་བཞི་ཙམ་པོ་ཡན་ཆད་ཇི་སྙེད་ཡོད་པ་དེ་དག་ཐམས་ཅད་གང་དུ་དེ་བཞིན་གཤེགས་པ་མྱ་ངན་ལས་འདའ་བ་དེ་ལོགས་སུ་གཞོལ་འདུད། རབ་ཏུ་འདུད་ཅིང་མངོན་པར་འདུད་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཀླུང་ངམ། འབབ་ཆུའམ། ཆུ་མིག་གམ། མཚོའམ། ལྟེང་ཀའམ། ཁྲོན་པའམ། རྫིང་ངམ། པདྨ་དཀར་པོ་འབབ་པ་ཇི་སྙེད་ཡོད་པ་དེ་དག་ཐམས་ཅད་སངས་རྒྱས་ཀྱི་མཐུས་བྱིན་གྱིས་བརླབས་པས་མི་འབབ་པར་གྱུར་ཏོ། །སྟོང་གསུམ་གྱི་སྟོང་
88b
ཆེན་པོའི་འཇིག་རྟེན་གྱི་ཁམས་ན་བྱ་མང་པོ་དང ། རི་དྭགས་མང་པོ་སྣ་ཚོགས་ཇི་སྙེད་ཡོད་པ་དེ་དག་ཐམས་ཅད་ཀྱང་སངས་རྒྱས་ཀྱི་མཐུས་སྒྲ་མི་འབྱིན་པར་འཁོད་ཅིང་མི་ཟ་མི་རྒྱུ་བར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཉི་མ་དང་ཟླ་བའི་འོད་དམ། སྐར་མའི་གཟུགས་སམ། ནོར་བུའམ་མེའམ་སྲིན་བུ་མེ་ཁྱེར་གྱི་འོད་ཇི་སྙེད་ཡོད་པ་དེ་དག་ཐམས་ཅད་སངས་རྒྱས་ཀྱི་མཐུས་མི་མངོན་མི་སྣང་སྟེ། ལྷམ་མེར་མ་ཡིན། ལྷན་མེར་མ་ཡིན། ལྷང་ངེར་མ་ཡིན་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་དམྱལ་བ་ཆེན་པོའི་མེ་ཇི་སྙེད་ཡོད་པ་དེ་དག་ཐམས་ཅད་ཀྱང་སངས་རྒྱས་ཀྱི་མཐུས་ཞི་བར་གྱུར། མི་འབར་བར་གྱུར། མི་ཚ་བར་གྱུར། མི་ཚིག་པར་གྱུར།་ཡོངས་སུ་མི་གདུང་བར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་གང་སེམས་ཅན་དམྱལ་བ་ཆེན་པོའི་མེ་དེ་དག་ཐམས་ཅད་ཀྱང་ཉེ་བར་ཞི་ཞིང་བསིལ་བར་གྱུར་ཏོ། །དེ་ནས་སེམས་ཅན་དམྱལ་བའི་སེམས་ཅན་དེ་དག་ཐམས་ཅད་སྐད་ཅིག་དེ་དང་ཡུད་ཙམ་དེའི་ཚེ་སངས་རྒྱས་ཀྱི་མཐུས་བདེ་བ་ཐོབ་པར་གྱུར་ཏོ། །དུད་འགྲོའི་སྐྱེ་གནས་པའི་སེམས་ཅན་ཐམས་ཅད་ཀྱང་བྱམས་པའི་སེམས་དང་ཕན་པའི་སེམས་དང་ལྡན་པར་གྱུར་ཏེ། གཅིག་ལ་གཅིག་གནོད་སེམས་མེད། རྣམ་པར་འཚེ་
89a
༄#། །བ་མེད། རྣམ་པར་མཐོ་འཚམ་པ་མེད་ཅིང་གནོད་པ་བྱེད་པ་མེད་པར་གྱུར་ཏོ། །གཤིན་རྗེའི་འཇིག་རྟེན་པའི་སེམས་ཅན་ཐམས་ཅད་ཀྱང་བཀྲེས་པ་དང ། སྐོམ་པ་མེད་པར་གྱུར་ཏོ། །སེམས་ཅན་ཐམས་ཅད་ཀྱང་སྐད་ཅིག་དེ་དང་ཡུད་ཙམ་དེའི་ཚེ་སངས་རྒྱས་ཀྱི་མཐུས་བདེ་བ་དང ། ལུས་དང་སེམས་ཚིམ་པ་དང ། སྡུག་བསྔལ་རྒྱུན་ཆད་པ་དང ། བདེ་བ་དང་ཡིད་བདེ་བ་མཆོག་དང་ལྡན་པར་གྱུར་ཏོ། །དེ་བཞིན་གཤེགས་པ་སེང་གེ་ལྟར་གློ་གཡས་པས་མནལ་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་རིའི་རྒྱལ་པོ་རི་རབ་དང ། ཁོར་ཡུག་དང ། ཁོར་ཡུག་ཆེན་པོ་དང ། བཏང་ཟུང་དང ། བཏང་ཟུང་ཆེན་པོ་དང ། སྤོས་ཀྱི་ངད་ལྡང་དང ། གངས་རི་ཇི་སྙེད་ཡོད་པ་དང ། གཞན་ཡང་རི་ནག་པོ་རྣམས་དང ། ཐམས་ཅད་དང་ལྡན་པའི་ས་ཆེན་པོ་དང ། རྒྱ་མཚོ་ཆེན་པོ་ཁོར་ཡུག་གི་འོབས་ཀྱི་མཐས་གཏུགས་པ་རྣམ་པ་དྲུག་ཏུ་གཡོས་ཏེ། འགུལ། རབ་ཏུ་འགུལ། འཁྲུགས། རབ་ཏུ་འཁྲུགས། ལྡེག། རབ་ཏུ་ལྡེག་པར་གྱུར་ཏོ། །ཐམས་ཅད་དང་ལྡན་པའི་རླུང་གི་དཀྱིལ་འཁོར་ཡང་དེའི་ཚེ་མི་ལྡང་བར་གྱུར་ཏོ། དེའི་ཚེ་སྐད་ཅིག་དེ་དང་ཡུད་ཙམ་དེ་ན་སེམས་ཅན་ཐམས་ཅད་ཀྱང་ལས་བྱེད་པ་རྣམས་བཏང་བར་གྱུར་ཏེ་གཉིད་མེད། ཆོད་པ་མེད། སྒྲིབ་
89b
པ་མེད། ཚོམ་པ་མེད་ཅིང་མི་འཛེར་བར་གྱུར་ཏེ། སྒྲ་ཆུང ། ཅ་ཅོ་ཆུང་ཞིང་ཡིད་མི་གཡེང་བར་གྱུར་ཏོ། །བཅོམ་ལྡན་འདས་སེང་གེ་ལྟར་གློ་གཡས་པས་མནལ་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་ཇི་སྙེད་འཁོད་པ་དེ་དག་ཐམས་ཅད་ཀྱིས་རང་རང་གི་གནས་རྣམས་མོག་མོག་པོར་གྱུར་ཏེ་འོད་མེད་གཟི་བརྗིད་མེད་པར་གྱུར་པར་ཤེས་སོ། །དེ་བཞིན་གཤེགས་པ་སེང་གེ་ལྟར་གློ་གཡས་པས་མནལ་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ལྷ་དང ། ཀླུ་དང་གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་ཇི་སྙེད་འཁོད་པ་དེ་དག་ཐམས་ཅད་རང་རང་གི་སྟན་དང་སྐྱེད་མོས་ཚལ་དང་གཞལ་མེད་ཁང་རྣམས་ལ་མི་དགའ་བར་གྱུར་ཏོ། །སངས་རྒྱས་ཀྱི་མཐུས་དེ་དག་ཐམས་ཅད་འཁོར་དང་བཅས་པར་སྐྱོ་ཞིང་ཡིད་བྱུང་བར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ཚངས་པ་དང ། ཚངས་པ་ཆེན་པོ་གང་དག་ཟིལ་གྱིས་གནོན་ཅིང་ཟིལ་གྱིས་
90a
༄#། །མི་ནོན་པ་བརྒྱ་ཕྲག་བཅུ་ལ་དབང་སྒྱུར་བ་འདི་སྙམ་དུ་སེམས་ཤིང་བདག་ཅག་གིས་སེམས་ཅན་འདི་དག་བྱས། བདག་ཅག་གིས་སེམས་ཅན་འདི་དག་སྤྲུལ། བདག་ཅག་གིས་འཇིག་རྟེན་བྱས། བདག་ཅག་གིས་འཇིག་རྟེན་སྤྲུལ་ལོ་སྙམ་དུ་དེ་ལྟར་ཤེས་པའི་ཚངས་པ་དང ། ཚངས་པ་ཆེན་པོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་འཁོད་པ་དེ་དག་ཀྱང་རང་རང་གི་སྟན་ལ་མངོན་པར་མི་དགའ་བར་གྱུར་ཏོ། །རང་རང་གི་གནས་ཐམས་ཅད་དང་ལྡན་པའང་སངས་རྒྱས་ཀྱི་མཐུས་མོག་མོག་པོར་གྱུར་པ་ཤེས་སོ། །དེ་བཞིན་དུ་ཚངས་པ་གཞན་ཐམས་ཅད་ཀྱང་སངས་རྒྱས་ཀྱི་མཐུས་རང་རང་གི་གནས་རྣམས་མོག་མོག་པོར་གྱུར་པར་ཤེས་ཏེ། རང་རང་གི་གནས་རྣམས་ལ་མི་དགའ་བར་གྱུར་ཏོ། །འཇིག་རྟེན་སྐྱོང་བ་དང ། དབང་ཕྱུག་ཆེན་པོ་དང ། གནས་གཙང་མ་པ་རྣམས་ཀྱང་རང་རང་གི་གནས་རྣམས་ལ་མི་དགའ་བར་གྱུར་ཏོ། །དེ་ནས་སྟོང་གསུམ་གྱི་སྟོང་ཆེན་པོའི་ཚངས་པ་ཆེན་པོ་དེ་འདི་སྙམ་དུ་གང་གིས་བདག་རང་གི་གནས་ལ་མི་དགའ་བར་གྱུར་པ་དེ་སུའི་སྔ་ལྟས་ཡིན་སྙམ་དུ་སེམས་སོ། །དེ་ནས་སྟོང་གསུམ་གྱི་སྟོང་ཆེན་པོའི་ཚངས་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དང་ལྡན་པ་ལ་བལྟས་སོ།།
90b
དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ལ་བལྟས་ནས་འདི་སྙམ་དུ་གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་བྱེད་པ་པོ་དབང་ཕྱུག་བདག་པོ་དབང་སྒྱུར་བ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དོ་མོད་མྱ་ངན་ལས་འདའ་བར་འགྱུར་ཏེ། གང་གིས་བདག་རང་གི་སྟན་ལ་འདུག་པར་མི་དགའ་བ་དང ། གང་གིས་ཆོ་འཕྲུལ་བསམ་གྱིས་མི་ཁྱབ་པ་རྨད་དུ་བྱུང་བ་འདི་ལྟ་བུ་དག་སྣང་བར་གྱུར་པ་འདི་ནི་དེ་ཡོངས་སུ་མྱ་ངན་ལས་འདའ་བའི་སྔ་ལྟས་ཡིན། འདི་ནི་དེའི་མཐུ་ཡིན་ནོ་སྙམ་དུ་སེམས་ཏེ། དེ་མི་དགའ་ཞིང་ཡིད་དུང་ཞེས་བྱེད་དེ། སྤུ་ཟིང་ཞེས་བྱེད་པར་གྱུར་ནས་ཚངས་པའི་འཁོར་མང་པོས་ཡོངས་སུ་བསྐོར་ཅིང་མདུན་དུ་བདར་ཏེ་མྱུར་བ་མྱུར་བར་རིངས་པར་བཅོམ་ལྡན་འདས་ག་ལ་བ་དེར་སོང་ངོ ། །དེའི་ཚེ་སྟོང་གསུམ་གྱི་སྟོང་ཆེན་པོ་ན་ཚངས་པ་ལྷག་མ་ལུས་པར་གྱུར་པ་དང ། མ་འདུས་པ་དང ། ཚངས་པ་དེ་ལས་གཞན་པ་ཇི་སྙེད་ཡོད་པ་དེ་དག་འཕགས་པའི་ཆོས་ལ་མངོན་པར་དུལ་བར་གྱུར། འཕགས་པའི་ཆོས་ལ་གནས་པར་གྱུར་ཏོ། །དེ་ནས་སྟོང་གསུམ་གྱི་སྟོང་ཆེན་པོའི་ཚངས་པ་དེ་བཅོམ་ལྡན་འདས་ག་ལ་བ་དེར་སོང་སྟེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་
91a
༄#། །ཏོ། །བཅོམ་ལྡན་འདས། ཇི་ལྟར་གནས་པར་བགྱི་བ་དང ། ཇི་ལྟར་བསྒྲུབ་པར་བགྱི་བ་བདག་ལ་བཀའ་སྩལ་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚངས་པ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །ཚངས་པ་ཁྱོད་ང་ནི་ཚངས་པ་ཚངས་པ་ཆེན་པོ་ཟིལ་གྱིས་གནོན་ཅིང་ཟིལ་གྱིས་མི་ནོན་པ་ཀུན་ཤེས་པ་དང་ལྡན་པ་བརྒྱ་ཕྲག་བཅུ་ལ་དབང་སྒྱུར་བ་ཡིན་ཏེ། བདག་གིས་སེམས་ཅན་རྣམས་བྱས། བདག་གིས་སེམས་ཅན་རྣམས་སྤྲུལ། བདག་གིས་འཇིག་རྟེན་བྱས། བདག་གིས་འཇིག་རྟེན་སྤྲུལ་ཏོ་ཞེས་དེ་སྙམ་དུ་སེམས་ཤིང་དེ་སྐད་ཟེར་ཞེན། བདེན་ནམ། གསོལ་པ། བཅོམ་ལྡན་འདས། མད་དོ། །བདེ་བར་གཤེགས་པ། མད་དོ། །བཀའ་སྩལ་པ། ཚངས་པ་ཁྱོད་སུས་བྱས། །སུས་སྤྲུལ། དེ་ནས་ཚངས་པ་ཆེན་པོ་ཅང་མི་སྨྲ་བར་གྱུར་ཏོ། །ཚངས་པ་ཆེན་པོ་དེ་ཅང་མི་སྨྲ་བར་གྱུར་པ་དང་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཚངས་པ། གང་གི་ཚེ་བསྐལ་པས་བསྲེགས་པ་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་འབར་རབ་ཏུ་འབར། ཀུན་ཏུ་འབར། ཀུན་ཏུ་རབ་ཏུ་མཆེད་ཅིང་འབར་ཏེ། མེ་ལྕེ་གཅིག་ཏུ་གྱུར་པར་འགྱུར་བའི་དུས་དེ་དང་ཚེ་དེ་འབྱུང་བ་དེ་ཚངས་པ་ཁྱོད་ཉིད་ཀྱིས་
91b
བྱས་སམ། ཁྱོད་ཀྱིས་སྤྲུལ་ཏམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ། གང་ས་ཆེན་པོ་འདི་ནི་ཆུའི་ཕུང་པོ་ལ་བརྟེན། ཆུའང་རླུང་ལ་བརྟེན། རླུང་ཡང་ནམ་མཁའ་ལ་བརྟེན་ཏེ་འཕང་དུ་དཔག་ཚད་དྲུག་ཁྲི་བརྒྱད་སྟོང་ཡོད་ཅིང་མི་འཇིག་པ་དེ་ལ་ཇི་སྙམ་དུ་སེམས། འདི་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་ཏམ། གསོལ་པ།་བཅོམ་ལྡན་འདས། མ་ལགས་སོ། །བདེ་བར་གཤེགས་པ། མ་ལགས་སོ། །བཀའ་སྩལ་པ། ཚངས་པ། གང་ཉི་མ་དང་ཟླ་བའི་གཞལ་མེད་ཁང་ན་ལྷའི་བུ་དག་ལམ་མེ་མ་ཡིན། ལྷན་ནེ་མ་ཡིན་ཞིང་གཞལ་མེད་ཁང་རྣམས་སྟོང་པར་འཁོད་པའི་དུས་དེ་དང་ཚེ་དེ་འབྱུང་བ་དེ་ལ་ཇི་སྙམ་དུ་སེམས། ཚངས་པ་དེ་དག་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། གང་སོས་ཀ་དང ། དབྱར་དང ། སྟོན་དང ། དགུན་དང ། དགུན་སྨད་དང ། དཔྱིད་ཀྱི་དུས་ཚིགས་དེ་དག་ལ་ཁྱོད་ཇི་སྙམ་དུ་སེམས། དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ་གང་ཆུའམ། མེ་ལོང་གི་དཀྱིལ་འཁོར་རམ། འབྲུ་མར་དང །
92a
༄#། །མར་གྱི་སྣོད་དམ། ནོར་བུ་དང ། ཤེལ་རྣམས་ཀྱི་ནང་ངམ། དེ་ལས་གཞན་པའི་སྣོད་དག་པ་རྣམས་ལ་གཟུགས་བརྙན་རྣམས་པ་སྣ་ཚོགས་སྣང་བ་འདི་ལྟ་སྟེ་ཤིང་ལྗོན་པ་དང ། ནགས་ཚལ་དང ། ཀུན་དགའ་ར་བ་དང ། སྐྱེད་མོས་ཚལ་དང ། གཞལ་མེད་ཁང་སྣང་བའམ། གྲོང་དང་གྲོང་ཁྱེར་དང ། གྲོང་བརྡལ་སྣང་བའམ། གླང་པོ་ཆེ་དང ། རྟ་དང ། རྔ་མོ་དང ། བ་ལང་དང ། བོང་བུ་དང ། ལུག་དང ། རི་དྭགས་དང ། བྱ་རྣམས་སྣང་བའམ། ཟླ་བ་དང་ཉི་མ་དང་སྐར་མའི་ཚོགས་རྣམས་སྣང་བའམ། ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་དང་དེ་བཞིན་གཤེགས་པའི་སྐུ་སྣང་བའམ། ས་དང་རི་དང་ཀླུང་སྣང་བའམ། བརྒྱ་བྱིན་དང་ཚངས་པ་དང་འཇིག་རྟེན་སྐྱོང་བ་དང ། དེ་ལས་གཞན་པའི་སེམས་ཅན་མི་དང་མི་མ་ཡིན་པ་སྣང་བ་དེ་དག་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་བ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ། གཡང་ས་དང ། རི་དང ། རིའི་འབབ་ཆུ་དང ། རྫིང་རྣམས་ན་དུང་དང ། རྔ་བོ་ཆེ་དང ། རྫ་རྔ་དང ། གླུ་གར་དང ། རི་དྭགས་དང ། བྱ་དང ། མི་དང ། མི་མ་ཡིན་པ་རྣམས་ཀྱི་སྒྲའི་བྲག་ཅ་དང ། གང་དེ་དང་མཐུན་པའི་སྒྲ་བརྙན་
92b
འབྱུང་བ་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ། གང་སེམས་ཅན་རྣམས་ཀྱི་རྨི་ལམ་ན་གཟུགས་སྣ་ཚོགས་མཐོང་བ་དང ། སྒྲ་སྣ་ཚོགས་ཐོས་པ་དང ། དྲི་སྣ་ཚོགས་སྣོམ་པ་དང ། རོ་སྣ་ཚོགས་མྱོང་བ་དང ། རེག་བྱ་སྣ་ཚོགས་རེག་པ་དང ། ཆོས་སྣ་ཚོགས་ཤེས་པ་དང ། དགའ་བ་དང་རྩེ་བ་སྣ་ཚོགས་མྱོང་བ་དང ། མཆི་མ་བྱུང་བ་དང ། ངུ་བ་དང ། འཇིགས་པ་དང ། སྐྲག་པ་དང ། སྡུག་བསྔལ་བ་མཐོང་བའམ། མྱོང་བའམ་ཤེས་པ་དེ་དག་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ། གང་སེམས་ཅན་རྣམས་ཀྱི་འཇིགས་པ་དང་མི་དགའ་བ་དང ། མྱ་ངན་དང་སྨྲེ་སྔགས་འདོན་པ་དང ། གྲང་བ་དང་ཚ་བ་དང ། བཀྲེས་པ་དང་སྐོམ་པ་དེ་དག་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ། གང་རིགས་བཞིའི་འཇིག་རྟེན་གྱི་མཛེས་པའམ་མི་སྡུག་པའམ། ལོངས་སྤྱོད་ཆེ་བའམ་ལོངས་སྤྱོད་ཆུང་བའམ། དབུལ་བའམ་བསོད་
93a
༄#། །ནམས་ཆེ་བའམ། ཚུལ་ཁྲིམས་བཟང་བའམ་ཚུལ་ཁྲིམས་འཆལ་པའམ། ཤེས་རབ་བཟང་བའམ་ཤེས་རབ་འཆལ་བ་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ། གང་སེམས་ཅན་རྣམས་ཀྱིས་འཇིགས་པའམ། སྐྲག་པའམ། གནོད་པའམ། རྣམ་པར་འཚེ་བའམ། རྣམ་པར་མཐོ་འཚམས་པ་འདི་སྟེ། མཚོན་ཆ་དང ། མེ་དང ། ཆུ་དང ། རླུང་དམར་དང ། དུག་དང ། གཅན་གཟན་ཁྲོ་བོ་དང ། དགྲ་དང ། མི་དང ། མི་མ་ཡིན་པའི་འཇིགས་པའམ། གཞན་གནོད་པ་བྱེད་པའི་འཇིགས་པ་སྣ་ཚོགས་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ། སེམས་ཅན་རྣམས་ཀྱི་ནད་རྣམ་པ་སྣ་ཚོགས་དང ། རླུང་དང ། མཁྲིས་པ་དང ། བད་ཀན་དང ། འདུས་པ་དང ། དུས་དང ། ཁམས་མི་མཐུན་པ་ལས་གྱུར་པའམ། གཞན་གྱིས་གནོད་པར་བྱས་པ་དང ། སྔོན་གྱི་ལས་ཀྱི་སྒྲིབ་པ་ལས་གྱུར་པ་འདི་ལྟ་སྟེ། མིག་དང ། རྣ་བ་དང ། སྣ་དང ། ལྕེ་དང ། ལུས་ན་བ་དང ། སེམས་ཅན་རྣམས་ཀྱི་ཡིད་ལ་གདུང་བའི་སྡུག་བསྔལ་
93b
སྣ་ཚོགས་དེ་དག་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ། གང་མུ་གེ་དང ། ཆུ་དང ། འབྲོག་དང ། སྤྲུལ་དང ། ཆོམ་རྐུན་དང ། དགོན་པ་དང ། མཚོན་ཆ་དང ། ནད་དང ། བར་གྱི་བསྐལ་པ་དེ་དག་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ། གང་སེམས་ཅན་རྣམས་ཀྱི་འབྲལ་བའི་སྡུག་བསྔལ་རྣམ་པ་སྣ་ཚོགས་ཕ་མ་དང ། སྤུན་དང ། སྲིང་མོ་དང ། གྲོགས་དང ། ཉེ་དུ་དང ། སྣག་གི་གཉེན་མཚམས་དང ། བུ་ཕོ་དང ། ཆུང་མ་དང ། བུ་མོ་དག་དང་བྲལ་བའི་སྡུག་བསྔལ་དེ་དག་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་བ། བཅོམ་ལྡན་འདས། མ་ལགས་སོ། །བཀའ་སྩལ་པ།་གང་སེམས་ཅན་རྣམས་ཀྱི་སྡུག་བསྔལ་སྣ་ཚོགས་ཡང་བའི་ལས་ལ་སྦྱོར་བ། སྐྲ་དང ། ཕབས་དང ། རྒྱ་སྐྱེགས་དང ། འཁོར་ལོ་འཚོང་བའམ། རྒྱ་མཚོ་ཆེན་པོར་འགྲོ་བ་དང ། འབྲོག་དགོན་པར་འཇུག་པའམ། ཕྱོགས་སྣ་ཚོགས་སུ་སྐྱེས་འདེགས་པའམ། ཞིང་གི་ལས་རྒྱ་ཆེར་བྱེད་པའམ། དེ་ལས་གཞན་པའི་བྱ་བ་སྣ་ཚོགས་དེ་དག་
94a
༄#། །ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ། གང་སེམས་ཅན་རྣམས་ཀྱི་དགེ་བ་དང་མི་དགེ་བའི་ལས་རྣམ་པ་སྣ་ཚོགས་ཡང་དག་པར་ལེན་པ། སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དང ། ལྷ་དང་མིའི་རྒྱུ་ལས་བྱུང་བ་རྣམས་དང ། གང་སེམས་ཅན་རྣམས་ཀྱི་ལུས་དང་ངག་དང་ཡིད་ཀྱིས་ཉེས་པར་སྤྱད་པ་དང ། ལེགས་པར་སྤྱད་པ་རྣམས་སམ། གང་འཇིག་རྟེན་ན་མི་དགེ་བ་བཅུའི་ལས་ཀྱི་ལམ་སེམས་ཅན་རྣམས་ལ་མི་ཕན་པ་དང ། སྡུག་བསྔལ་བ་དང ། གནོད་པ་དང ། ངན་སོང་ངན་འགྲོ་ལོག་པར་ལྟུང་བར་འགྱུར་བ་འདི་ལྟ་སྟེ། སྲོག་གཅོད་པ་དང ། མ་བྱིན་པར་ལེན་པ་དང ། འདོད་པ་ལ་ལོག་པར་ག་ཡེམ་པ་དང ། བརྫུན་དུ་སྨྲ་བ་དང ། ཕྲ་མ་དང ། ངག་རྩུབ་པོ་དང ། ཚིག་ཀྱལ་པ་དང ། བརྣབ་སེམས་དང ། གནོད་སེམས་དང ། ལོག་པར་ལྟ་བ་དེ་རྣམས་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ། གང་སེམས་ཅན་རྣམས་
94b
ཀྱི་གནོད་བྱེད་ཀྱི་སྡུག་བསྔལ་འདི་ལྟ་སྟེ། མགོ་བཅད་པ་དང ། ལག་པ་དང ། རྐང་པ་དང ། རྣ་བ་དང ། སྣ་བཅད་པའམ། ཡན་ལག་དང་ཉིང་ལག་ཐམས་ཅད་བཅད་པའམ། །མེར་བསྲེགས་པ་དང ། འབྲུ་མར་གྱིས་གཏོར་བ་དང ། སྲོག་དང་དབྲལ་བ་དང ། རལ་གྲི་དང ། མདུང་ཐུང་དང ། མཚོན་རྩེ་གཉིས་པས་གདབ་པ་དང ། བསད་པ་དང ། བཅིང་བ་དང ། གོ་ར་ར་གཞུག་པ་དང ། འཐབ་པ་དང ། རྩོད་པ་དང ། འགྱེད་པ་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ་གང་སེམས་ཅན་རྣམས་འདོད་པའི་རྒྱུ་དང་འདོད་པའི་གཞིས་མ་ལ་ལོག་པར་སྤྱོད་པ་དང ། སྲིང་མོ་ལ་ལོག་པར་སྤྱོད་པ་དང ། ཚུལ་ཁྲིམས་དང་ལྡན་པ་ལ་ལོག་པར་སྤྱོད་པ་དང ། སྡིག་པའི་ལས་ཐམས་ཅད་ལ་ལྷག་པར་སྤྱོད་པ་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ། གང་སེམས་ཅན་རྣམས་ཀྱི་གནོད་པར་བྱེད་པ་སྣ་ཚོགས་བྱད་དང ། རོ་ལངས་དང ། རིག་སྔགས་དང ། སྔགས་དང ། སྨན་དང ། འབྱུང་པོ་དང ། གནོན་འབེབས་པ་དང ། གང་དེ་ལས་གཞན་པ་དུག་
95a
༄#། །སྦྱོར་བ་དང ། གང་སེམས་ཅན་རྣམས་ལ་གནོད་པར་འགྱུར་བ་དང ། སྲོག་དང་བྲལ་བར་འགྱུར་བ་དང ། སྲོག་འཆད་པར་འགྱུར་བ་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། གང་རིགས་བཞིའི་འཇིག་རྟེན་གྱི་ཁམས་ཐམས་ཅད་དུ་སྤང་དུ་མི་རུང་བའི་འཇིག་རྟེན་གྱི་ཆོས་འདི་ལྟ་སྟེ། སྐྱེ་བ་དང ། རྒ་བ་དང ། ན་བ་དང ། འཆི་བ་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་དང ། མི་རྟག་པའི་ཆོས་ཉིད་དང ། ཟད་པའི་ཆོས་ཉིད་དང ། འགྱུར་བའི་ཆོས་ཉིད་དང ། མཛའ་བ་དང་དགའ་བ་ཐམས་ཅད་དང་ཐ་དད་དུ་འགྱུར་བ་དང ། མེད་པར་འགྱུར་བ་དང ། བྲལ་བར་འགྱུར་བ་དང ། བྱེ་བར་འགྱུར་བ་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ། གང་སེམས་ཅན་རྣམས་ཀྱི་འདོད་ཆགས་དང ། ཞེ་སྡང་དང ། གཏི་མུག་དང ། སྒྲིབ་པ་དང ། ཆོད་པ་དང ། བག་ལ་ཉལ་དང ། ཀུན་ནས་དཀྲིས་པ་དང ། ཀུན་ཏུ་སྦྱོར་
95b
པ་རྣམས་དང ། དེ་ལས་གཞན་པ་ཉེ་བའི་ཉོན་མོངས་པ་རྣམ་པ་སྣ་ཚོགས་འཇུག་པ་གང་གིས་སེམས་ཅན་རྣམས་ཆགས་པར་འགྱུར་བ་དང ། སྡང་བར་འགྱུར་བ་དང ། རྨོངས་པར་འགྱུར་བ་དང ། ལས་མངོན་པར་འདུ་བྱ་བ་རྣམ་པ་སྣ་ཚོགས་མངོན་པར་འདུ་བྱེད་པ་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ། གང་འདི་སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་ངན་འགྲོ་རྣམ་པ་གསུམ་པོ་གང་ན་སེམས་ཅན་རྣམས་གནོད་བྱེད་རྣམ་པ་སྣ་ཚོགས་ཀྱིས་སྡུག་བསྔལ་སྣ་ཚོགས་མྱོང་བར་འགྱུར་བ་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ། གང་འདི་འབྱུང་པོའི་ཚོགས་དང ། ས་བོན་གྱི་ཚོགས་དང ། རྩཝ་དང ། ཤིང་གེལ་བ་དང ། སྨན་དང ། ནགས་ཚལ་ཆུ་ན་གནས་པ་དང ། ཐང་ལ་གནས་པའམ། མེ་ཏོག་དང་\?\་ཤིང་དང ། འབྲས་བུའི་ཤིང་དང ། སྤོས་ཤིང་རྣམ་པ་སྣ་ཚོགས་སམ། མངར་བ་དང ། ཁ་བ་དང ། ལན་ཚཝ་དང ། སྐྱུར་བ་དང ། ཚཝ་བ་དང ། བསྐ་བའི་རོའི་ཁྱད་པར་རྣམ་པ་
96a
༄#། །སྣ་ཚོགས་ཡིད་དུ་འོང་བ་དང་ཡིད་དུ་མི་འོང་བའི་མངོན་པར་གྲུབ་པ་གང་སེམས་ཅན་རྣམས་ལ་ཕན་པ་དང་གནོད་པར་འགྱུར་བ་དེ་ལ་ཇི་སྙམ་དུ་སེམས། ཚངས་པ། དེ་དག་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བཀའ་སྩལ་པ། ཚངས་པ།་གང་འགྲོ་བ་ལྔ་པོ་དག་ན་ཡོངས་སུ་འཁོར་བ་སྐྱེ་བ་དང ། འཆི་འཕོ་བ་དང ། འཐོན་པ་དང ། འབྱུང་བ་དང ། འཇིག་པ་འདི་དག་དང ། །ཚངས་པ། གང་སེམས་ཅན་མ་རིག་པའི་སྒྲིབ་པ་དང ། །སྲེད་པའི་ཀུན་ཏུ་སྦྱོར་བ་དང་ལྡན་པ་ཀུན་ཏུ་རྒྱུག་ཅིང་འཁོར་བ་དེ་དག་གི་སྔོན་གྱི་མཐའ་མི་མངོན་པ་དང ། ཚངས་པ། མ་འོངས་པའི་འཁོར་བའི་ལམ་རྒྱུན་མ་ཆད་པ་གང་ན་ལྷ་དང་བཅས་པ་དང་ཚངས་པ་དང་བཅས་པའི་འཇིག་རྟེན་འདི་དང ། དགེ་སྦྱོང་དང་བྲམ་ཟེ་དང་བཅས་པའི་སྐྱེ་དགུ་ཐགས་འཁྲུགས་པ་ལྟ་བུ། དྲུ་གུ་འཛིངས་པ་ལྟ་བུ་འོང་བ་དང ། འགྲོ་བར་གྱུར་པ་འཇིག་རྟེན་འདི་ནས་འཇིག་རྟེན་ཕ་རོལ་དང ། འཇིག་རྟེན་ཕ་རོལ་ནས་འཇིག་རྟེན་འདིར་ཀུན་ཏུ་རྒྱུག་ཅིང་འཁོར་བ། འཁོར་བ་ལས་འབྱུང་བ་མི་ཤེས་པ་དེ་དག་ལ་ཇི་སྙམ་དུ་སེམས། །ཚངས་པ། དེ་དག་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང ། །ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ།
96b
བཅོམ་ལྡན་འདས། མ་ལགས་སོ། །བདེ་བར་གཤེགས་པ། །མ་ལགས་སོ། །བཀའ་སྩལ་པ། འོ་ན་ཚངས་པ་ཁྱོད་ཅིའི་ཕྱིར་འདི་ལྟར་ངས་སེམས་ཅན་འདི་དག་བྱས། ངས་སྤྲུལ། ངས་བྱིན་གྱིས་བརླབས། ངས་འཇིག་རྟེན་བྱས། །ངས་སྤྲུལ། ངས་བྱིན་གྱིས་བརླབས་སྙམ་དུ་སེམས། གསོལ་པ། བཅོམ་ལྡན་འདས། བདག་ནི་མ་འཚལ་བ། རྟག་ཏུ་ལྟ་བར་གྱུར་པ་མ་སྤངས་པས་ཕྱིན་ཅི་ལོག་ཏུ་གྱུར་པ་ལགས་ཏེ། བཅོམ་ལྡན་འདས། བདག་ནི་དེ་བཞིན་གཤེགས་པས་གསུངས་པའི་ཆོས་འདུལ་བ་ལ་རྟག་ཏུ་མ་ཐོས་པས་སེམས་ཅན་རྣམས་བདག་གིས་བགྱིས། བདག་གིས་སྤྲུལ། འཇིག་རྟེན་བདག་གིས་བགྱིས། འཇིག་རྟེན་བདག་གིས་སྤྲུལ་ཞེས་བགྱི་བ་སྡིག་པ་ཅན་གྱི་ལྟ་བར་གྱུར་པ་འདི་ལྟ་བུར་གྱུར་ཏོ། །བཅོམ་ལྡན་འདས། དེ་བཞིན་གཤེགས་པ་ལ་དོན་འདི་ཉིད་བདག་ཞུའོ། །བཅོམ་ལྡན་འདས། འཇིག་རྟེན་འདི་སུས་བགྱིས། འཇིག་རྟེན་འདི་སུས་སྤྲུལ། སེམས་ཅན་རྣམས་སུས་བགྱིས། །སུས་སྤྲུལ། བཅོམ་ལྡན་འདས། འདི་སུའི་མཐུ་ལགས། སུས་བྱིན་གྱི་བརླབས། དེ་སྐད་ཅེས་གསོལ་བ་དང ། བཅོམ་ལྡན་འདས་ཀྱིས། ཚངས་པ་དེ་ལ་འདི་སྐད་ཅེས་བཀའ་སྩལ་ཏོ། །ཚངས་པ། འཇིག་རྟེན་ནི་ལས་ཀྱིས་བྱས། ལས་ཀྱིས་སྤྲུལ་ལོ། །སེམས་ཅན་རྣམས་ནི་ལས་ཀྱིས་བྱས། ལས་ཀྱི་རྒྱུ་ལས་བྱུང ། ལས་ཀྱིས་རབ་
97a
༄#། །ཏུ་ཕྱེ་བའོ། །དེ་ཅིའི་ཕྱིར་ཞེ་ན། ཚངས་པ་མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་།སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་འབྱུང་སྟེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་འབྱུང་བར་འགྱུར་ཞིང ། ཚངས་པ། མ་རིག་པ་འགགས་པས་འདུ་བྱེད་འགག་པ་ནས་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་འགག་པའི་བར་དུ་འགྱུར་ཏེ། ཚངས་པ། ལས་དང་ཆོས་ཀྱི་ཀུན་ཏུ་སྦྱོར་བ་རྣམས་ཡོད་ན་སེམས་ཅན་རྣམས་འབྱུང་བར་སྣང་བ་དང ། ལས་དང་ཆོས་ཀྱི་ཀུན་ཏུ་སྦྱོར་བ་དང་བྲལ་བས་འབྱུང་བ་མེད་པར་སྣང་བ་མ་གཏོགས་པར་འདི་ལ་བྱེད་པ་པོའམ། བྱེད་དུ་འཇུག་པའམ། ཉེ་བར་འཇོག་པ་པོ་གང་ཡང་མེད་དོ། །ཚངས་པ། དེ་ལྟར་འཇིག་རྟེན་འདི་ལས་ཟད་པ་དང ། ཉོན་མོངས་པ་ཟད་པ་དང ། སྡུག་བསྔལ་ཟད་པ་དང ། སྡུག་བསྔལ་ཉེ་བར་ཞི་བས་ཞི་བ་དང ། ངེས་
97b
པར་བྱུང་བ་དང ། རྣམ་པར་ཞི་བ་དང ། ཡོངས་སུ་མྱ་ངན་ལས་འདས་པ་ཞེས་བྱའོ། །ཚངས་པ། དེ་ལ་ལས་གང་ཡིན་པ་དེ་ཟད་པ་དང ། ཉོན་མོངས་པ་གང་ཡིན་པ་དེ་དང་བྲལ་བ་དང ། སྡུག་བསྔལ་གང་ཡིན་པ་དེ་རྣམ་པར་ཞི་བ་དང ། ནུབ་པ་མ་གཏོགས་པར་ཡོངས་སུ་མྱ་ངན་ལས་འདས་པ་ཞེས་བྱ་བ་ཅི་ཞིག་ཡོད་དེ། སངས་རྒྱས་རྣམས་ཀྱི་མཐུ་དང ། སངས་རྒྱས་རྣམས་ཀྱི་བྱིན་གྱི་རླབས་ཀྱིས་ཆོས་ཉིད་དེ་ལྟ་བུ་དག་འབྱུང་ངོ ། །དེ་ཅིའི་ཕྱིར་ཞེ་ན། ཚངས་པ། སངས་རྒྱས་བཅོམ་ལྡན་འདས་རྣམས་འབྱུང་བ་མེད་ན་ཆོས་དེ་ལྟ་བུ་རབ་ཏུ་སྟོན་པ་མི་འབྱུང་གི། ཚངས་པ། གང་གི་ཚེ་སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་བྱུང་བ་དེའི་ཚེ་ཞི་བར་བྱ་བའི་ཕྱིར་ཁོང་དུ་ཆུད་པར་དཀའ་བ། ཟབ་པ་ཟབ་པར་སྣང་བ།་ཆོས་རྣམ་པ་དེ་ལྟ་བུ་དག་ཡང་དག་པར་སྟོན་པར་འགྱུར་ཏེ། དེ་ཐོས་པས་སེམས་ཅན་སྐྱེ་བའི་ཆོས་ཅན་རྣམས་ནི་སྐྱེ་བ་ལས་ཡོངས་སུ་གྲོལ་བར་འགྱུར། སེམས་ཅན་རྒ་ཤི་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པའི་ཆོས་ཅན་རྣམས་ནི་འཁྲུག་པའི་བར་དག་ལས་ཡོངས་སུ་གྲོལ་བར་འགྱུར་རོ། །ཚངས་པ། དེ་ལྟ་བས་ན་འདི་ལྟ་སྟེ། འདུ་བྱེད་ཐམས་ཅད་ནི་མིག་ཡོར་ལྟ་བུ་མི་རྟག་པ་གཡོ་བ་མི་བརྟན་པ། ཐེར་ཟུག་མ་ཡིན་པ། ཟད་པ་དང་འགྱུར་བའི་
98a
༄#། །ཆོས་ཅན་ནོ་ཞེས་ཚངས་པ་སངས་རྒྱས་རྣམས་ཀྱིས་དེ་བསྟན་ཅིང་ཡང་དག་པར་བཤད་དེ་རྣམ་པར་ཕྱེ་ཞིང་གསལ་བར་མཛད་དེ། འདི་ནི་སངས་རྒྱས་རྣམས་ཀྱི་བྱིན་གྱི་རླབས་སོ། །སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་པ་རྣམས་ཀྱི་དམ་པའི་ཆོས་ནུབ་པ་ནའང་འདི་ལྟ་སྟེ། འདུ་བྱེད་ཐམས་ཅད་མིག་ཡོར་ལྟ་བུའོ་ཞེས་བྱ་བ་དེ་ཉིད་བྱིན་གྱིས་རླབས་ཡིན་ནོ། །གལ་ཏེ་དེ་བཞིན་གཤེགས་པ་རྣམས་ཀྱིས་འདུ་བྱེད་ཐམས་ཅད་མིག་ཡོར་ལྟ་བུར་མ་གཟིགས་སུ་ཟིན་མ་དེ་བཞིན་གཤེགས་པ་རྣམས་སྐད་ཅིག་ཐང་ཅིག་ཡུད་ཙམ་ཡང་འདུ་བྱེད་ཐམས་ཅད་རྨི་ལམ་དང་མིག་ཡོར་དང་བྲག་ཅ་ལྟ་བུར་མི་སྟོན་པ་ཞིག་ན་ཚངས་པ་གང་གི་ཕྱིར་དེ་བཞིན་གཤེགས་པ་རྣམས་འདུ་བྱེད་ཐམས་ཅད་རྨི་ལམ་དང ། མིག་ཡོར་དང ། བྲག་ཅ་ལྟ་བུ་དང ། མི་རྟག་པ་དང ། གཡོ་བ་དང ། འགྱུར་བའི་ཆོས་ཅན་དུ་མཁྱེན་པ་དེའི་ཕྱིར། དེ་བཞིན་གཤེགས་པ་རྣམས་འདུ་བྱེད་ཐམས་ཅད་རྨི་ལམ་དང ། མིག་ཡོར་དང ། བྲག་ཅ་ལྟ་བུར་སྟོན་ནོ། །དེ་ལ་མཁས་པ་དེའི་མཚན་མ་མཐོང་བ་དག་ཡོད་དེ།་དེའི་མཚན་མ་མཐོང་ནས་རྒྱུ་དེ་དང་རྐྱེན་དེ་དང་དམིགས་པའི་མཚན་མ་དེས་འདུ་བྱེད་ཐམས་ཅད་མི་རྟག་པར་ཁོང་དུ་ཆུད་ཅིང་གཡོ་བ་དང་འགྱུར་བའི་ཆོས་
98b
ཅན་ནོ་ཞེས་རྣམ་པར་འབྱེད་དོ། །འདུ་བྱེད་ཐམས་ཅད་ནི་འཇིག་ཅིང་འགྱུར་རོ། །དུས་དང ། ཚིགས་དང ། དུས་ཚིགས་ཀྱིས་ཀྱང་འཇིག་གོ། སྐད་ཅིག་དང ། ཐང་ཅིག་དང ། ཕྱེད་ཙམ་དང ། ཡུད་ཙམ་དང ། ཞག་དང ། ཉི་མ་དང ། ཟླ་བ་དང ། ཟླ་བ་ཕྱེད་དང ། ལོ་དང ། ལོ་བརྒྱ་དང ། བསྐལ་པ་དང ། བསྐལ་པ་བརྒྱ་དག་ཀྱང་འཇིག་པར་འགྱུར་རོ། །མེའི་ཕུང་པོ་ཆེན་པོའང་འབར་ནས་ཤི་བར་འགྱུར་རོ། །ཆུའི་ཕུང་པོ་ཆེན་པོའང་བབ་ནས་མི་འབབ་བོ། །རླུང་གི་ཕུང་པོ་ཆེན་པོའང་ལངས་ནས་མི་ལྡང་ངོ ། །སའི་ཕུང་པོ་ཆེན་པོའང་བྱུང་ནས་མེད་པར་འགྱུར་རོ། །རིའི་ཕུང་པོ་ཆེན་པོ་ཁོར་ཡུག་དང ། ཁོར་ཡུག་ཆེན་པོ་དང ། ལྷུན་པོ་དང ། ལྷུན་པོ་ཆེན་པོ་དང ། དེ་ལས་གཞན་པ་རི་ནག་པོ་དག་ཀྱང་བྱུང་ནས་ཡེ་མེད་པར་འགྱུར་རོ། །ཉི་མ་དང་ཟླ་བ་དང་སྐར་མའི་ཚོགས་ཀྱི་འཁོར་དང་བཅས་པ་འདི་དག་ཀྱང་བྱུང་ནས་ལྷམ་མེར་མ་ཡིན། །ལྷན་ནེར་མ་ཡིན། །ལྷང་ངེར་མ་ཡིན་ཞིང་སར་ལྟུང་ངོ ། །ལྷ་ཡུལ་པའི་ལྷའི་གཞལ་མེད་ཁང་བཟང་པོ་དག་ཀྱང་འཇིག་པར་འགྱུར་རོ། །གྲོང་དང ། གྲོང་ཁྱེར་དང ། གྲོང་རྡལ་འདི་དག་དང ། ཤིང་ལྗོན་པ་དང ། ནགས་ཚལ་དང ། སྐྱེད་མོས་ཚལ་དང ། ཀུན་དགའ་ཉམས་དགའ་བ་འདི་དག་ཀྱང་བྱུང་ནས་འགག་པར་འགྱུར་རོ། །ལྷ་དང་མི་འདི་རྣམས་ཀྱང་སྐྱེ་བ་དང ། རྒ་བ་དང ། འཕོ་བ་དང་
99a
༄#། །འབྱུང་བར་འགྱུར་རོ། །སྐྱེས་བུ་མཛངས་ཤིང་མཁས་པ་འདི་དག་ཀྱང་མཚན་མ་དེ་མཐོང་ནས། ཀྱེ་མའོ་འདུ་བྱེད་འདི་ཐམས་ཅད་མི་རྟག་པའོ། ། འཇིག་གོ། འདུ་བྱེད་འདི་ཐམས་ཅད་མེད་པར་འགྲོའོ། །འགྱུར་རོ། །འདུ་བྱེད་འདི་ཐམས་ཅད་ཟད་པར་འགྱུར་རོ་སྙམ་ནས་སྐྱོ་བར་འགྱུར་རོ། །སྐྱེས་བུ་མཛངས་ཤིང་མཁས་པ་འདི་དག་རྒྱུ་དེ་དང་རྐྱེན་དེས་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ ། །དེ་དག་དད་པས་ཁྱིམ་ནས་ཁྱིམ་མེད་པར་ཡང་དག་པར་རབ་ཏུ་བྱུང་ནས་ཀྱང་འདུ་བྱེད་ཐམས་ཅད་མིག་ཡོར་ལྟ་བུ་དང ། རྨི་ལམ་ལྟ་བུ་དང ། བྲག་ཅ་ལྟ་བུར་རིག་སྟེ། མཚན་མ་དེ་དང་དམིགས་པ་དེ་དང་རྐྱེན་དེས་བྱང་ཆུབ་འཐོབ་པར་འགྱུར་རོ། །ཆུའི་ནང་དུ་ཟླ་བའི་དཀྱིལ་འཁོར་དང ། ཉི་མའི་དཀྱིལ་འཁོར་སྣང་བ་དང ། སྐར་མའི་གཟུགས་སྣང་བ་དེ་དག་མཐོང་ནས། དེ་བཞིན་གཤེགས་པས་གདམས་པའམ། དེ་ལས་གཞན་པའི་དགེ་བའི་བཤེས་གཉེན་གྱིས་གདམས་པའམ། བདག་གི་བློས་བརྟགས་པས་འདུ་བྱེད་ཐམས་ཅད་རྨི་ལམ་དང ། མིག་ཡོར་དང ། བྲག་ཅ་ལྟ་བུར་རྟོགས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། རྒྱུན་དུ་ཞུགས་པའི་འབྲས་བུ་དང ། ལན་གཅིག་ཕྱིར་འོང་བའི་འབྲས་བུ་དང ། ཕྱིར་མི་འོང་བའི་འབྲས་བུ་ཐོབ་པ་དང །
99b
དགྲ་བཅོམ་པ་ཉིད་མངོན་སུམ་དུ་བྱེད་པ་དང ། གང་ཟག་བྱང་ཆུབ་སེམས་དཔའི་ཐེག་པ་པ་བཟོད་པ་དང་པོ་ཐོབ་པ་དང ། བཟོད་པ་གཉིས་པ་དང ། གསུམ་པ་ཐོབ་པ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་པར་འགྱུར་བའི་སྐྱེས་བུ་མཁས་པ་དག་ཡོད་དོ། །སངས་རྒྱས་བཅོམ་ལྡན་འདས་མྱ་ངན་ལས་འདས་པ་རྣམས་ཀྱི་ཆོས་བསྟན་པ་འདི་ཉིད་འཇིག་རྟེན་དུ་འབྱུང་སྟེ། དེ་ཐོས་པས་སེམས་ཅན་རྣམས་ཉན་ཐོས་ཀྱི་ཐེག་པ་དང ། རང་སངས་རྒྱས་ཀྱི་ཐེག་པ་དང ། ཐེག་པ་ཆེན་པོ་བླ་ན་མེད་པ་རྣམ་པ་ཐམས་ཅད་མཆོག་དང་ལྡན་པ་དང ། ཐེག་པ་གསུམ་པོ་དག་གིས་ངེས་པར་འབྱུང་བར་འགྱུར་རོ། །ཚངས་པ། འདི་ལྟར་འདིའང་སངས་རྒྱས་རྣམས་ཀྱི་སྦྱིན་གྱི་རླབས་སུ་རིག་པར་བྱ་སྟེ། ཚངས་པ། གང་གིས་སྐྱེས་བུ་མཁས་པ་དག་གིས་འདུ་བྱེད་འདི་དག་ནི་སྡུག་བསྔལ་པ། གཡོ་བ། མི་བརྟན་པ། ཟད་པ་དང་འགྱུར་བའི་ཆོས་ཅན་ཏེ། རྨི་ལམ་དང ། མིག་ཡོར་བ་དང ། བྲག་ཅ་ལྟ་བུའོ་ཞེས་བྱ་བའི་མཚན་མ་དེ་མཐོང་ནས་མང་དག་པར་སྐྱོ་བར་འགྱུར་བ་འདི་ནི་སངས་རྒྱས་རྣམས་ཀྱི་ཡུལ་དང་སངས་རྒྱས་ཀྱི་བྱིན་གྱི་རླབས་སོ། །སྔོན་སྤྱད་ཅིང་སྔོན་གྱི་རྒྱུ་ལས་བྱུང་བའི་སེམས་ཅན་སྔོན་ཡོངས་སུ་སྨིན་པར་བྱ་བ་དག་གིས། ཆོས་ཀྱི་སྒྲ་འདི་ལྟ་བུ་འདི་ཐོས་ནས་འདུ་བྱེད་འདི་དག་
100a
༄#། །ཐམས་ཅད་ནི་མི་རྟག་པ། འདུ་བྱེད་རྣམས་ནི་འཇིག་པ་སྟེ། འདུ་བྱེད་ཐམས་ཅད་ནི་རྨི་ལམ་དང་བྲག་ཅ་ལྟ་བུའོ་ཞེས་དེ་བཞིན་གཤེགས་པ་ལ་མོས་པར་འགྱུར། མངོན་པར་དད་པར་འགྱུར་རོ། །སེམས་ཅན་གང་དག་གིས་སངས་རྒྱས་བཅོམ་ལྡན་འདས་རྣམས་ཀྱི་དྲུང་དུ་ཚངས་པར་སྤྱོད་པ་སྤྱད་པར་གྱུར་པའམ། ཁྱིམ་པར་གྱུར་པས་བསླབ་པའི་གཞི་རྣམས་ཡོངས་སུ་བཟུང་བར་གྱུར་པ་དེ་དག་ཀྱང་རྒྱུ་དེ་དང་རྐྱེན་དེས་འདི་ལྟར་འདུ་བྱེད་རྣམས་མི་རྟག་པ་དང ། འདུ་བྱེད་རྣམས་སྡུག་བསྔལ་པ་དང ། འདུ་བྱེད་རྣམས་འཇིག་པ་དང ། འདུ་བྱེད་རྣམས་རྨི་ལམ་དང ། མིག་ཡོར་དང་བྲག་ཅ་ལྟ་བུའོ་ཞེས་འདུ་བྱེད་རྣམས་དེ་ལྟ་བུའི་ཚུལ་དུ་རྟོགས་པར་འགྱུར་ཏེ། རྒྱུ་དེ་དང་རྐྱེན་དེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་མ་བྱུང་ཡང་སངས་རྒྱས་ཀྱི་བྱིན་གྱིས་རླབས་ཉིད་དང ། སངས་རྒྱས་ལ་དགེ་བའི་རྩ་བ་བསྐྱེད་པའི་རྐྱེན་གྱིས་བྱང་ཆུབ་འཐོབ་པར་འགྱུར་རོ། །ཚངས་པ། རྣམ་གྲངས་དེས་ཀྱང་འདི་ལྟར་འདི་ནི་སངས་རྒྱས་ཀྱི་བྱིན་གྱི་རླབས་དང ། འདི་ནི་སངས་རྒྱས་ཀྱི་ཡུལ་ཡིན་པར་རིག་པར་བྱའོ། །ཚངས་པ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའང་སངས་རྒྱས་ཀྱི་
100b
སངས་རྒྱས་ཀྱི་ཞིང་ཡིན་ཏེ། ཚངས་པ། འདི་ནི་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པར་སངས་རྒྱས་བཅོམ་ལྡན་འདས་ཚད་མེད་གྲངས་མེད་པ་རྣམས་ཀྱི་དྲུང་དུ་དགེ་བའི་རྩ་བ་ཚད་མེད་གྲངས་མེད་པ་བསྐྱེད་དེ། ཚུལ་ཁྲིམས་དང ། དཀའ་ཐུབ་དང ། ཚངས་པར་སྤྱོད་པ་དང ། དེ་ལས་གཞན་པའི་དཀའ་བ་སྤྱད་པ་བྱེ་བ་ཁྲག་ཁྲིག་བརྒྱ་སྟོང་དག་གིས་ཇི་ལྟར་དགེ་བའི་རྩ་བ་ཐམས་ཅད་འཕེལ་བར་འགྱུར་བ་དང ། ཇི་ལྟར་ཡོངས་སུ་དག་པར་འགྱུར་བ་དང ། དུས་དང་ཚོད་དང་སྣོད་ཇི་ལྟ་བ་བཞིན་དུ་འདུལ་བ་ཉེ་བར་བཟུང་སྟེ། སངས་རྒྱས་ཀྱི་ཞིང་ཡོངས་སུ་བཟུང་ངོ ། །ཡོངས་སུ་སྦྱངས་སོ། །ངས་སྦྱིན་པ་དང ། སྙན་པར་སྨྲ་བ་དང ། དོན་སྤྱད་པ་དང ། དོན་མཐུན་པ་བསྡུ་བའི་དངོས་པོ་བཞི་པོ་དག་གིས་སེམས་ཅན་རྣམས་ཡང་དག་པར་བསྡུས་ཏེ། དེ་དག་ངའི་སྨོན་ལམ་ཉིད་ཀྱིས་སངས་རྒྱས་ཀྱི་ཞིང་འདིར་སྐྱེས་ནས་ངས་ཆོས་བསྟན་པའང་ཤེས་སོ། །ངའི་ཆོས་བསྟན་པས་འདུལ་བར་ཡང་འགྱུར་ཏེ། བརྒྱ་བྱིན་རྣམས་ཀྱི་མ་ཡིན། ཚངས་པ་རྣམས་ཀྱི་མ་ཡིན། འཇིག་རྟེན་སྐྱོང་བ་རྣམས་ཀྱི་མ་ཡིན་ནོ། ། ཚངས་པ། རྣམ་གྲངས་འདིས་ཀྱང་དེ་འདི་ལྟར་སངས་རྒྱས་ཀྱི་ཞིང་འདི་སངས་རྒྱས་བཅོམ་ལྡན་འདས་རྣམས་ཀྱི་ཡིན་གྱི། བརྒྱ་བྱིན་རྣམས་ཀྱི་མ་ཡིན། ཚངས་པ་རྣམས་ཀྱི་མ་
101a
༄#། །ཡིན། འཇིག་རྟེན་སྐྱོང་བ་རྣམས་ཀྱི་མ་ཡིན། གཞན་མུ་སྟེགས་ཅན་དང ། སྤྱོད་པ་ཅན་དང ། ཀུན་ཏུ་རྒྱུ་རྣམས་ཀྱི་མ་ཡིན་པར་རིག་པར་བྱའོ། །དེ་ནས་མི་མཇེད་ཀྱི་བདག་པོ་ཚངས་པ་འབུམ་ཕྲག་བཅུའི་བདག་པོ་ཚངས་པ་དེ་དང ། དེ་ལས་གཞན་པའི་ཚངས་པ་རྣམས་སྐྱོ་ཞིང་ཡིད་བྱུང་བར་གྱུར་ཏེ། ཚིག་འདི་སྐད་ཅེས་ཇི་ཙམ་དུ་སངས་རྒྱས་བཅོམ་ལྡན་འདས་རྣམས་ཆོས་རྒྱ་ཆེན་པོ་དང་ལྡན་པ་ངོ་མཚར་ཏོ། །ཇི་ཙམ་དུ་སངས་རྒྱས་བཅོམ་ལྡན་འདས་རྣམས་རྨད་དུ་བྱུང་བའི་ཆོས་དང་ལྡན་པ་ངོ་མཚར་ཏོ་ཞེས་སྨྲས་སོ། །དེ་ནས་སྟོང་གསུམ་གྱི་སྟོང་ཆེན་པོའི་ཚངས་པ་དེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་རྨད་དུ་འཛིན་པར་གྱུར་ཏེ། ཇི་ཙམ་དུ་སངས་རྒྱས་བཅོམ་ལྡན་འདས་རྣམས་ཀྱི་ཡུལ་བསམ་གྱིས་མི་ཁྱབ་ཅིང་མཐའ་ཡས་པ་ངོ་མཚར་ཏོ་སྙམ་མོ། །དེ་ནས་སྟོང་གསུམ་གྱི་སྟོང་ཆེན་པོའི་ཚངས་པ་ཆེན་པོ་དེ། བཅོམ་ལྡན་འདས་ཀྱི་སློབ་མར་ཁས་བླངས་ནས་བཅོམ་ལྡན་འདས་ལ་སྐྱབས་སུ་སོང་སྟེ། བཅོམ་ལྡན་འདས་ནི་བདག་གི་སྟོན་པ། བདེ་བར་གཤེགས་པ་ནི་བདག་གི་སྟོན་པ་ལགས་ན། བཅོམ་ལྡན་འདས། ཇི་ལྟར་གནས་པར་བགྱི་བ་དང ། ཇི་ལྟར་བསྒྲུབ་པར་བགྱི་བ་བདག་
101b
ལ་བཀའ་སྩལ་དུ་གསོལ་ཞེས་བཅོམ་ལྡན་འདས་ལ་བཀའ་ལུང་ཡང་ནོད་པར་གྱུར་ཏོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚངས་པ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །ཚངས་པ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ནི་ངའི་སངས་རྒྱས་ཀྱི་ཞིང་ཡིན་ཏེ། ཚངས་པ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཁྱོད་ལ་གཏད་ཀྱི། ཁྱོད་ཅི་ནས་ཀྱང་ངའི་རྗེས་སུ་འཇུག་པར་གྱིས་ལ་དགེ་བའི་ལམ་འདི་དང ། དགེ་བའི་ཚུལ་འདི་དང ། བླ་ན་མེད་པའི་སངས་རྒྱས་ཀྱི་ཚུལ་དང ། ཆོས་ཀྱི་ཚུལ་དང ། དགེ་འདུན་གྱི་ཚུལ་འདི་རྒྱུན་མི་འཆད་པར་གྱིས་ཤིག། ང་ནི་འདིའི་སྐྱེས་བུ་ཐ་མའོ། །ཚངས་པ། ངའི་བུའི་ཐུ་བོ་གཞོན་ནུ་ཐུགས་ལས་སྐྱེས་པ། ཞལ་ནས་སྐྱེས་པ། ཆོས་ལས་བྱུང་བ། ཆོས་ཀྱིས་སྤྲུལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་སྙིང་རྗེ་ཆེན་པོ་དང་ལྡན་པ། སྐྱེ་བོ་མང་པོའི་དོན་འདོད་པ། ཕན་པ་འདོད་པ། བདེ་བ་འདོད་པ། གྲུབ་པ་དང་བདེ་བ་འདོད་པ་འོང་བར་འགྱུར་ཏེ། དེའང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཇི་ལྟར་ངས་གནས་པ་བཞིན་དུ་ཆོས་ཀྱིས་གནས་པར་འགྱུར་གྱི། ཇི་ལྟར་ང་ལ་རྗེས་སུ་མཐུན་པར་བྱེད་པ་དེ་བཞིན་དུ་དེ་ལ་རྗེས་སུ་མཐུན་པར་གྱིས་ཤིག་།ཅི་ནས་ཀྱང་ཁྱོད་ཀྱིས་དགེ་བའི་ལམ་འདི་དང ། དགེ་བའི་
102a
༄#། །ཚུལ་འདི་དང ། སངས་རྒྱས་ཀྱི་ཚུལ་དང ། ཆོས་ཀྱི་ཚུལ་དང ། དགེ་འདུན་གྱི་ཚུལ་འདི་རྒྱུན་མི་འཆད་པར་གྱིས་ཤིག། དེ་ཅིའི་ཕྱིར་ཞེ་ན། ཚངས་པ། ཇི་ཙམ་དུ་དགེ་བའི་ཚུལ་འདི་ལྟ་བུའི་རྒྱུན་མི་འཆད་པ་དེ་ཙམ་དུ་སངས་རྒྱས་ཀྱི་ཚུལ་དང ། ཆོས་ཀྱི་ཚུལ་དང ། དགེ་འདུན་གྱི་ཚུལ་རྒྱུན་ཆད་པར་མི་འགྱུར། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་དང ། ལྷ་དང་མིའི་ཚུལ་དང ། ཐར་བའི་ཚུལ་ནས་མྱ་ངན་ལས་འདའ་བའི་ཚུལ་གྱི་བར་དུ་རྒྱུན་ཆད་པར་མི་འགྱུར་རོ། །ཚངས་པ། དེ་ལྟ་བས་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སངས་རྒྱས་ཀྱི་སངས་རྒྱས་ཀྱི་ཞིང་འདི་ཁྱོད་ལ་གཏད་དོ། །ཚངས་པ། ཁྱོད་ལ་བཀའ་སྩལ་པ་ནི་འདི་ཡིན། རྗེས་སུ་བསྟན་པ་ནི་འདི་ཡིན་གྱི། ཁྱོད་ཀྱིས་འདི་བཞིན་དུ་གྱིས་ཤིག། ང་ནི་འདིའི་སྐྱེས་བུ་ཐ་མའོ། །དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཚངས་པ་དང ། ཚངས་པ་ཆེན་པོ་ཇི་སྙེད་འཁོད་པ་དེ་དག་ཐམས་ཅད་འཕགས་པའི་ཆོས་ལ་མངོན་པར་དུལ་བར་གྱུར་ཏེ། ཚངས་པ་ཆེན་པོ་དེ་གཅིག་པུ་ནི་མ་གཏོགས་སོ། ། ཚངས་པ་ཆེན་པོ་སྟོང་གི་ཚངས་པ་དེའང་བཅོམ་ལྡན་འདས་ཀྱིས་འཕགས་པའི་ཆོས་ལ་རབ་ཏུ་བཏུལ་ཞིང་བཞག་པར་གྱུར་ཏོ། །ཚངས་པའི་ལེའུ་སྟེ་དང་པོ་རྫོགས་
102b
སོ།། །།བམ་པོ་གཉིས་པ། དེའི་ཚེ་བདུད་ཀྱི་བུ་དེད་དཔོན་ཞེས་བྱ་བ། བཅོམ་ལྡན་འདས་ལ་དད་ཅིང་དང་བ་ཆེན་པོ་ཐོབ་པར་གྱུར་པ་དེས་བཅོམ་ལྡན་འདས་ཡོངས་སུ་མྱ་ངན་ལས་འདའ་བའི་སྒྲ་ཐོས་ནས་སྡུག་བསྔལ་ཞིང་ཡིད་མི་བདེ་སྟེ་མི་དགའ་ཞིང་སྡུག་བསྔལ་བ་དང་ཡིད་མི་བདེ་བ་ཆེན་པོ་དང་ལྡན་པར་གྱུར། སྐྱོ་ཞིང་ཡིད་བྱུང་ལ་སྤུ་ཟིང་ཞེས་བྱེད་པར་གྱུར་ནས་མྱུར་བ་མྱུར་བར་རིངས་པའི་ཚུལ་དུ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། ཕྱོགས་གཅིག་ཏུ་འདུག་ནས་བདུད་ཀྱི་བུ་དེད་དཔོན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གསོལ་པ་འཚལ་ན་སྨན་པར་བགྱི་བའི་སླད་དུ་ཡོངས་སུ་མྱ་ངན་ལས་མི་འདའ་བར་གསོལ། བཅོམ་ལྡན་འདས། ལྷ་དང་བཅས་པའི་འཇིག་རྟེན་ལ་ཐུགས་བརྩེ་བ་ཉེ་བར་བཟུང་སྟེ། སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། ལྷ་དང་མི་རྣམས་ཀྱི་དོན་དང ། སྨན་པ་དང་བདེ་བའི་སླད་དུ་བཞུགས་སུ་གསོལ། བཅོམ་ལྡན་འདས། འཇིག་རྟེན་ཧ་ཅང་མྱུར་དུ་ལོང་པ་དང ། མིག་མ་མཆིས་པ་དང ། སྟོན་པ་མ་མཆིས་པ་དང ། འདྲེན་པ་མ་མཆིས་པ་དང ། དཔུང་གཉེན་མ་མཆིས་པ་དང ། སྐྱབས་
103a
༄#། །མ་མཆིས་པ་དང ། རྟེན་མ་མཆིས་པར་མི་འགྱུར་བར་མཛད་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བདུད་ཀྱི་བུ་དེད་དཔོན་ལ་འདི་སྐད་ཅེས་བཀའ་སྩལ་ཏོ། །དེད་དཔོན་ཁྱོད་ཀྱི་ཕ་བདུད་སྡིག་ཅན་གྱིས་ང་ལ་བཅོམ་ལྡན་འདས་ཡོངས་སུ་མྱ་ངན་ལས་འདར་གསོལ། བདེ་བར་གཤེགས་པ་ཡོངས་སུ་མྱ་ངན་ལས་འདར་གསོལ། བཅོམ་ལྡན་འདས་ཁྱོད་དེང་ཡོངས་སུ་མྱ་ངན་ལས་འདའ་བའི་དུས་ལ་བབ་བོ་ཞེས་གསོལ་བ་བཏབ་ནས་ཁྱོད་ཀྱི་ཕ་བདུད་སྡིག་ཅན་ལ་ངས་མྱ་ངན་ལས་འདའོ་ཞེས་སྨྲས་ཏེ། དེད་དཔོན། བདུད་སྡིག་ཅན་ལ་ངས་ཡོངས་སུ་མྱ་ངན་འདའ་བར་བྱ་བའི་སྐབས་ཕྱེའོ། །དེད་དཔོན། སྡིག་ཅན་དེ་ལ་ངས་ཁས་བླངས་པ་དེ་བྱ་བའི་དུས་ལའང་བབ་བོ། །དེ་སྐད་ཅེས་བཀའ་སྩལ་པ་དང ། བདུད་ཀྱི་བུ་དེད་དཔོན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདུད་སྡིག་ཅན་དེ་ནི་བདག་གི་ཕ་མ་ལགས་ཀྱི། བཅོམ་ལྡན་འདས། དེ་ནི་བདག་གི་དགྲ་ལགས། གཤེད་པོ་སླར་རྒོལ་པ་ལགས་ཤིང ། བཅོམ་ལྡན་འདས། བདག་དང་མི་མཛའ་བ་ལགས་ཏེ། གནོད་པར་འཚལ་པ། མི་སྨན་པར་འཚལ་བ་ལགས་སོ། །བཅོམ་ལྡན་འདས། སྡིག་ཅན་དེ་ནི་བདག་ལ་གྲུབ་པ་དང་བདེ་བ་མ་ལགས་པར་
103b
འཚལ་བ་ལགས་སོ། །བཅོམ་ལྡན་འདས། གང་ཤེས་རབ་ཀྱི་སྒྲོན་མ་འདི་ལྟ་བུ་དང ། ཤེས་རབ་ཀྱི་སྣང་བ་ཆེན་པོ་དང ། ཡེ་ཤེས་སྣང་བའི་སྒྲོན་མ་ཆེན་པོ་འདི་ལྟ་བུ་ཡོངས་སུ་མྱ་ངན་ལས་འདའ་བར་འཚལ་བའི་སྡིག་ཅན་དེ་ནི། སྡིག་པའི་བསམ་པ་ཅན། སྡིག་པའི་སྦྱོར་པ་ཅན་ཏེ། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་སུམ་འབྱིན་པའི་དགྲ་ལགས་སོ། །བཅོམ་ལྡན་འདས། ལྷ་དང་བཅས་པའི་འཇིག་རྟེན་ན་སེམས་ཅན་སྡིག་པ་ཆེན་པོ་འཇིག་རྟེན་དུ་བྱུང་ངོ་ཞེས་གང་ཡང་དག་པར་སྨྲ་བས་སྨྲ་བ་དེ་ནི། བཅོམ་ལྡན་འདས། བདུད་ལགས་སོ་ཞེས་ཡང་དག་པར་སྨྲ་བས་སྨྲ་བར་བགྱིའོ། །བཅོམ་ལྡན་འདས། གང་བདག་ལ་མི་ཕན་པར་ཞུགས་པ་དང ། གཞན་ལ་མི་ཕན་པར་ཞུགས་པ་དང ། སྐྱེ་བོ་མང་པོ་ལ་མི་ཕན་པར་ཞུགས་པ་ཞེས་གང་ཡང་དག་པར་སྨྲ་བས་སྨྲ་བ་དེ་ནི། བཅོམ་ལྡན་འདས། བདུད་ལགས་སོ་ཞེས་ཡང་དག་པར་སྨྲ་བས་སྨྲ་བར་བགྱིའོ། །ལྷ་དང་བཅས། བདུད་དང་བཅས། ཚངས་པ་དང་བཅས་པའི་འཇིག་རྟེན་དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་ལ་གནོད་པ་དང ། མི་ཕན་པ་དང ། སྡུག་བསྔལ་བ་དང ། གྲུབ་པ་དང་བདེ་བ་མ་ལགས་པ་དང ། ལོག་པར་ལྟུང་བའི་ཕྱིར་ཞུགས་པ་ཞེས་བགྱི་བ་ནི། བཅོམ་ལྡན་འདས། བདུད་ལགས་སོ་ཞེས་ཡང་དག་པར་སྨྲ་བས་སྨྲ་བར་བགྱིའོ། །ཆོས་
104a
༄#། །དང་ལྡན་པའི་དམ་བཅས་པ་དང ། ཆོས་དང་མི་ལྡན་པའི་དམ་བཅས་པ་བཅོམ་ལྡན་འདས་ལས་བདག་གིས་མངོན་སུམ་དུ་ཐོས་ཤིང་མངོན་སུམ་དུ་བཟུང་སྟེ། བཅོམ་ལྡན་འདས། གང་བདུད་སྡིག་ཅན་གྱིས་དམ་བཅས་པ་དེ་ནི་ཆོས་དང་མི་ལྡན་པའི་དམ་བཅས་པ་ལགས་སོ། །བཅོམ་ལྡན་འདས་ཁྱོད་ནི་དམ་བཅས་པ་འདི་ལ་བརྟེན་ཞིང་སྙིང་པོར་འདུ་ཤེས་པ་ལགས་ན། བཅོམ་ལྡན་འདས། སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། ལྷ་དང་མི་རྣམས་ལ་ཕན་པ་དང་བདེ་བའི་སླད་དུ་བསྐལ་བར་བཞུགས་སུ་གསོལ། བཅོམ་ལྡན་འདས། ཡུན་རིང་དུ་བཞུགས་ན་དེ་ནི་སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། ལྷ་དང་མི་རྣམས་ལ་བདེ་བར་འགྱུར་ཏེ། དེའི་སླད་དུ་བཅོམ་ལྡན་འདས་ལྷ་དང་བཅས་པའི་འཇིག་རྟེན་ལ་ཐུགས་བརྩེ་བ་ཉེ་བར་བཟུང་སྟེ་མྱུར་དུ་ཡོངས་སུ་མྱ་ངན་ལས་མི་འདར་གསོལ། དེ་སྐད་ཅེས་གསོལ་བ་དང ། བཅོམ་ལྡན་འདས་ཀྱིས་བདུད་ཀྱི་བུ་དེད་དཔོན་ལ་འདི་སྐད་ཅེས་བཀའ་སྩལ་ཏོ། །དེད་དཔོན། ལེགས་སོ། །ལེགས་སོ། །དེད་དཔོན་ཁྱོད་སྐྱེ་བོ་མང་པོའི་དོན་འདོད་པ་དང ། སྐྱེ་བོ་མང་པོ་ལ་ཕན་པ་དང ། བདེ་བ་དང་གྲུབ་པ་དང་བདེ་བར་འདོད་པས་དེ་ལྟར་བྱའོ། །དེད་དཔོན།
104b
གང་དག་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ལ་བསྙེན་བཀུར་བྱེད་ཅིང་ཕན་པ་དང་བདེ་བས་ཁྱབ་པར་བྱེད་པ་དང ། རྒྱལ་རིགས་སྤྱི་བོ་ནས་དབང་བསྐུར་བའི་ཡུལ་འཁོར་དང ། གྲོང་རྡལ་དང ། ལྗོངས་རྣམས་དང ། གཞོན་ནུ་རྣམས་དང ། བློན་པོ་རྣམས་ལ་རྟག་ཏུ་རྒྱུན་མི་འཆད་པར་བསྙེན་བཀུར་དང་རིམ་གྲོ་བྱེད་པ་ལ་ཞུགས་པར་འགྱུར་བ་དེ་དག་ནི་དེད་དཔོན་རྒྱལ་རིགས་སྤྱི་བོ་ནས་དབང་བསྐུར་བ་ལས་ནོར་མང་པོ་དང་ལོངས་སྤྱོད་ཆེན་པོ་འཐོབ་ཅིང་རྒྱལ་པོ་རྒྱལ་རིགས་དེ་ལན་དུ་ཕན་ཆེན་པོ་འདོགས་ཏེ། བུ་དང་ཆུང་མར་བཅས། གྲོགས་པོ་དང་ཉེ་དུ་དང་སྣག་གི་གཉེན་མཚམས་སུ་བཅས་པ་ལ་ཕན་པས་ཁྱབ་པར་བྱེད་དོ། །དེད་དཔོན། དེ་བཞིན་དུ་གང་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་རྒྱལ་པོ་བླ་ན་མེད་པ་ལ་སེམས་དང་བའི་དགེ་བའི་རྩ་བ་འདི་ལྟ་བུ་འདི་འབུལ་ན། དེད་དཔོན། དེ་བཞིན་གཤེགས་པ་ལ་སེམས་དང་བས་བསྙེན་བཀུར་དང་རིམ་གྲོ་བྱ་བའི་ཕྱིར་ཁྱོད་ལ་དབུགས་དབྱུང་བ་སྦྱིན་ནོ། །ཁྱོད་ལ་དགེ་བའི་རྩ་བརྒྱ་ཆེན་པོའི་ལོངས་སྤྱོད་ཆེན་པོ་སྦྱིན་ནོ། །དེད་དཔོན་ཁྱོད་དེ་བཞིན་གཤེགས་པ་ལ་སེམས་དད་པའི་དགེ་བའི་རྩ་བ་བསྐྱེད་ན་དབུགས་དབྱུང་ངོ ། །དེད་དཔོན་ཁྱོད་དགེ་བའི་རྩ་བ་འདི་དང ། དད་པ་དང ། དང་བ་འདིས་ང་མྱ་ངན་
105a
༄#། །ལས་འདས་ནས་མ་འོངས་པའི་དུས་ན་རང་སངས་རྒྱས་སྙིང་རྗེ་ཅན་ཞེས་བྱ་བར་འགྱུར་བའི་དུས་དེ་ལྟ་བུ་དང ། ཚེ་དེ་ལྟ་བུ་ཡོད་ཀྱི། ཤེས་པར་གྱིས་ཤིག། དེད་དཔོན། ང་འདས་ནས་དམ་པའི་ཆོས་ཐམས་ཅད་ཀྱི་ཐམས་ཅད་དུ་ནུབ་པ་ན་བདུད་སྡིག་ཅན་རབ་ཏུ་མགུ་བར་འགྱུར་བ་དང་དགའ་བ་དང་རངས་པར་འགྱུར་བའི་དུས་དེ་ལྟ་བུ་དང ། ཚེ་དེ་ལྟ་བུ་ཡོད་པར་འགྱུར་རོ། །དེ་ཤིན་ཏུ་དགའ་ཞིང་མགུ་པ་ལས་བདུད་ཀྱི་གནས་ནས་འཆི་འཕོ་བར་འགྱུར་རོ། །དེ་བདུད་ཀྱི་གནས་ནས་ཤི་འཕོས་མ་ཐག་ཏུ་མནར་མེད་པའི་སེམས་ཅན་དམྱལ་བ་ཆེན་པོར་ལུས་འཐོབ་པར་འགྱུར་ཏེ། དེར་ཡང་དེ་མནར་མེད་པའི་སྡུག་བསྔལ་རྣམ་པ་སྣ་ཚོགས་མྱོང་པར་འགྱུར་རོ། ། དེ་ཅིའི་ཕྱིར་ཞེ་ན། དེད་དཔོན་འདི་ལྟར་དེ་ནི་ཤེས་རབ་ཀྱི་སྒྲོན་མ་ཆེན་པོ་ཤེས་རབ་ཀྱི་སྣང་བ་ཆེན་པོ་འདི་ལྟ་བུ་མེད་པར་འགྱུར་པ་ལ་དགའ་བའི་ཕྱིར་རོ། །དེད་དཔོན། གང་བདག་གསོད་པ་དང ། བདག་ལ་གནོད་པ་དང ། བདག་མི་སྒྲུབ་པར་ཞུགས་པ་ཞེས་ཡང་དག་པར་སྨྲ་བས་སྨྲ་བ་དེ་ནི་བདུད་ཡིན་ནོ་ཞེས་ཡང་དག་པར་སྨྲ་བས་སྨྲ་བར་བྱའོ། །དེད་དཔོན། དེ་ཅིའི་ཕྱིར་ཞེ་ན། འདི་ལྟར་ང་ཡོངས་སུ་མྱ་ངན་ལས་འདས་པའི་དམ་པའི་ཆོས་ཇི་སྲིད་དུ་གནས་པ་དེ་སྲིད་དུ་བདུད་སྡིག་ཅན་བདུད་ཀྱིས་གནས་ན་
105b
འདུག་གོ། དེད་དཔོན། ངའི་དམ་པའི་ཆོས་ནུབ་མ་ཐག་ཏུ་དེ་ནས་བདུད་སྡིག་ཅན་རངས་པ་ཆེན་པོ་སྐྱེ་བར་འགྱུར་ཞིང ། ཚིམ་པ་ཆེན་པོ་དང ། དགའ་ཆེན་པོ་དང ། མཆོག་ཏུ་དགའ་བ་ཆེན་པོ་དང ། མགུ་པ་ཆེན་པོ་དང ། ཡིད་བདེ་བ་ཆེན་པོ་སྐྱེ་བར་འགྱུར་ཏེ། དེ་སྐད་ཅིག་དེ་ཉིད་དང ། ཐང་ཅིག་དེ་ཉིད་དང ། ཡུད་ཙམ་དེ་ཉིད་ལ་བདུད་ཀྱི་གནས་ནས་ཤི་འཕོས་ཏེ།་སེམས་ཅན་དམྱལ་བ་ཆེན་པོ་མཚམས་མེད་པར་ལྟུང་བར་འགྱུར་རོ། །དེད་དཔོན། འདི་ལྟ་སྟེ། དཔེར་ན། མི་ལ་ལ་ཞིག་ཤིང་སཱ་ལ་ལྗོན་པ་མེ་ཏོག་དང་འབྲས་བུ་མང་པོ་དང་ལྡན་པ་ཆེན་པོ་ལ་འཛེགས་ནས། དེས་ཤིང་སཱ་ལ་ལྗོན་པ་དེ་ལས་མེ་ཏོག་དང་འབྲས་བུ་ཡིད་དུ་འོང་བ་དག་སྤྱད་དེ། ཡལ་ག་གང་ལ་གནས་པའི་ཡལ་ག་དེ་ཉིད་བཅག་ན། དེད་དཔོན། དེ་ཇི་སྙམ་དུ་སེམས། མི་དེ་ཡལ་ག་ཆག་པ་དེ་ལ་གནས་སུ་རུང་ངམ། གང་ཡལ་ག་གང་ལ་འཛགས་ཏེ་བདེ་བར་འདུག་པའི་ཡལ་ག་དེ་ཉིད་གཅོད་པའི་མི་དེའང་ཅི་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བདེ་བར་གཤེགས་པ། མ་ལགས་སོ། །བཀའ་སྩལ་པ། དེད་དཔོན། བདུད་སྡིག་ཅན་གང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདའ་བར་འདོད་ཅིང་དེ་བཞིན་གཤེགས་པས་
106a
༄#། །གསུངས་པའི་ཆོས་འདུལ་བ་ནུབ་པར་དགའ་བའང་དེ་ལྟར་སྣང་བར་ངས་བསམས་སོ། །དེ་ཅིའི་ཕྱིར་ཞེ་ན། འདི་ལྟར་ངའི་དམ་པའི་ཆོས་ཇི་སྲིད་དུ་གནས་པ་དེ་སྲིད་དུ་དེ་བདུད་ཀྱི་གནས་ན་འདུག་གོ། །ངའི་ཆོས་ནུབ་པར་གྱུར་ན། བདུད་སྡིག་ཅན་དེ་དགའ་བ་བསྐྱེད་དེ་མགུ་རངས་ཤིང་ཡིད་བདེ་བ་བསྐྱེད་དེ། །དེ་དེ་མ་ཐག་ཏུ་བདུད་ཀྱི་གནས་ནས་ཤི་འཕོས་ནས་སེམས་ཅན་དམྱལ་བ་ཆེན་པོ་མནར་མེད་པར་རབ་ཏུ་ལྟུང་བར་འགྱུར་ཏེ། །དེད་དཔོན། །འདི་ལྟ་སྟེ། །དཔེར་ན། མི་དེ་ཤིང་སཱ་ལ་ལྗོན་པ་དེ་ལ་བདག་ལ་གནོད་པ་དང་གཞན་ལ་གནོད་པར་བྱེད་པ་ལྟར་བདུད་སྡིག་ཅན་ཡང་དེ་ལྟ་བུ་ཡིན་པར་མཐོང་ངོ ། །དེད་དཔོན། བདུད་སྡིག་ཅན་ནི་བདག་ལ་གནོད་པའི་ཕྱིར་ཞུགས་པ་ཡིན་ནོ། །དེད་དཔོན། བདུད་སྡིག་ཅན་ནི་གཞན་ལ་གནོད་པའི་ཕྱིར་ཞུགས་པ་སྟེ། དེད་དཔོན། བདུད་སྡིག་ཅན་དེ་དེའི་ཚེ་དེའི་དུས་ན་སེམས་ཅན་དམྱལ་བ་ཆེན་པོ་མནར་མེད་པར་ལྷུང་ནས། །སྡུག་བསྔལ་གྱི་ཚོར་བ་མི་བཟད་པ་ཚ་བ་སྲོག་འཕྲོག་པ་མྱོང་ནས་འཆི་སྟེ་འཆི་ཀར་ཚོར་བ་མྱོང་ནས་ང་རྗེས་སུ་དྲན་པར་འགྱུར་ཏེ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེན་པ་གསུང་བ། གཞན་དུ་མི་གསུང་བ། ལོག་པར་མི་གསུང་བ་དེས་ལུས་བསྡམས་
106b
པ་ལེགས། །ངག་བསྡམས་པ་ལེགས། ཡིད་བསྡམས་པ་ལེགས་ཏེ། ལུས་ཀྱིས་ལེགས་པར་སྤྱད་པ་དང ། ངག་གིས་ལེགས་པར་སྤྱད་པ་དང ། ཡིད་ཀྱིས་ལེགས་པར་སྤྱད་པའི་རྣམ་པར་སྨིན་པ་ནི་སྡུག་པ་དང ། འདོད་པ་དང ། དགའ་བ་དང ། ཡིད་དུ་འོང་བ་མངོན་པར་འགྲུབ་བོ། །ལུས་ཀྱིས་ཉེས་པར་སྤྱད་པ་དང ། ངག་གིས་ཉེས་པར་སྤྱད་པ་དང ། ཡིད་ཀྱིས་ཉེས་པར་སྤྱད་པའི་རྣམ་པར་སྨིན་པ་ནི་མི་སྡུག་པ་དང ། མི་འདོད་པ་དང ། མི་དགའ་བ་དང ། ཡིད་དུ་མི་འོང་བ་མངོན་པར་འགྲུབ་བོ་ཞེས་གསུངས་པ་དེ་ལེགས་པར་གསུངས་པའོ། །བདག་ནི་སྔོན་ལུས་ཀྱིས་ཉེས་པར་སྤྱད་པ་དང་ལྡན་པར་འགྱུར། །ངག་གིས་ཉེས་པར་སྤྱད་པ་དང ། ཡིད་ཀྱིས་ཉེས་པར་སྤྱད་པ་དང་ལྡན་པར་གྱུར་ཏེ། བདག་ལས་དེའི་རྣམ་པར་སྨིན་པས་ད་ལྟར་སེམས་ཅན་དམྱལ་པ་ཆེན་པོ་འདིར་སྐྱེས་ནས་འདི་ལྟ་བུའི་སྡུག་བསྔལ་མི་བཟད་པ་དྲག་པ། ཚ་བ་ཡིད་དུ་མི་འོང་བ། འཆི་བའི་མཐར་འགྱུར་བ་སྲོག་འཕྲོག་པའི་ཚོར་བ་མྱོང་བར་གྱུར་ཏོ་སྙམ་མོ། །དེ་དེའི་ཚེ་ངས་ལེགས་པར་སྨྲས་པ་ཐོས་ནས་སེམས་དང་བར་འགྱུར་ཏེ། དེ་སེམས་དང་བར་གྱུར་ནས་སེམས་ཅན་དམྱལ་བ་ཆེན་པོ་ནས་ཤི་འཕོས་ཏེ་སུམ་ཅུ་རྩ་གསུམ་གྱི་ལྷ་རྣམས་དང་སྐལ་པ་མཉམ་པར་སྐྱེ་བར་འགྱུར་རོ། །དེ་ཅིའི་ཕྱིར་ཞེ་ན། དད་དཔོན། དེ་ནི་འདི་ལྟ་བུ་ཡིན་ཏེ། གང་དགྲ་དེ་བཞིན་གཤེགས་
107a
༄#། །པ་ལ་ཉེས་པའི་བར་དུ་གཅོད་པས་ཀུན་ཏུ་སྤྱོད་པ་དེ་དག་ནི་དེ་བཞིན་གཤེགས་པ་ལ་ཉེས་པའི་བར་དུ་གཅོད་པས་ཀུན་ཏུ་སྤྱད་པས་ལུས་ཞིག་ནས་སེམས་ཅན་དམྱལ་བ་ཆེན་པོར་སྐྱེ་བར་འགྱུར་རོ། །དེད་དཔོན། །གང་དག་དེ་བཞིན་གཤེགས་པ་ལ་བྱམས་པས་ཀུན་ཏུ་སྤྱོད་ཀྱི། ཉེས་པར་མ་ཡིན་པ་དེ་དག་ནི་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷའི་ནང་དུ་སྐྱེ་བར་འགྱུར་ཏེ། དེ་དག་དགེ་བའི་རྩ་བ་དེས་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉམས་སུ་བླངས་ནས་དེ་ཉིད་དུ་དགེ་བའི་རྩ་བ་བསྐྱེད་དེ། རིམ་གྱིས་ཉེ་བར་ལེན་པ་མེད་པར་ཡོངས་སུ་མྱ་ངན་ལས་འདའོ། །དེ་བས་ན་དེད་དཔོན་ཁྱོད་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་སེམས་དད་པར་བྱས་པས། དེད་དཔོན་ཁྱོད་དགེ་བའི་རྩ་བ་དེ་དང ། རྒྱུ་དེ་དང ། རྐྱེན་དེས་གང་གི་ཚེ་བྱམས་པ་འཇིག་རྟེན་དུ་འབྱུང་བ་དེའི་ཚེ་དེད་དཔོན་ཁྱོད་དེའི་ཚེ་དེའི་དུས་ན་དེ་བཞིན་གཤེགས་པ་བྱམས་པའི་གསུང་རབ་དེ་ལ་རབ་ཏུ་འབྱུང་ངོ ། །རབ་ཏུ་བྱུང་ནས་ཀྱང་སེམས་ཅན་གཉིད་ཀྱིས་ལོག་པ་དང ། མྱོས་པ་དང་རབ་ཏུ་མྱོས་པ་རྣམས་ལ་ཀྱེ་སེམས་ཅན་ཁྱེད་ལོངས་ལ་སྦྱོར་བར་གྱིས། འབད་པར་གྱིས། རྩོལ་བར་གྱིས་ཤིག་།དེ་བཞིན་གཤེགས་པ་
107b
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་འབྱུང་བ་རྙེད་པར་དཀའ་སྟེ། འདི་ལྟ་སྟེ། དཔེར་ན། ཤིང་ཨུ་དུམ་ཝ་རའི་མེ་ཏོག་བརྒྱ་ལ་བརྒྱ་ལམ་ན་འབྱུང་བར་འགྱུར་པ་དེ་བཞིན་དུ་དེ་གཤེགས་པ་རྣམས་ཀྱང་བརྒྱ་ལ་བརྒྱ་ལམ་ན་འཇིག་རྟེན་དུ་འབྱུང་བར་འགྱུར་རོ། །གནས་མེད་པ། ཞི་བར་འགྱུར་བ། ཡོངས་སུ་མྱ་ངན་ལས་འདའ་བར་འགྱུར་བ། ཡང་དག་པར་རྫོགས་པའི་སངས་རྒྱས་ཀྱིས་བསྟན་པའི་ཆོས་སྟོན་པའང་བརྒྱ་ལ་བརྒྱ་ལམ་ནའོ། །མིའི་ལུས་འཐོབ་ཅིང་འཕགས་པའི་གནས་ན་ཚུལ་བཞིན་དུ་གནས་པའང་བརྒྱ་ལ་བརྒྱ་ལམ་ན་སྣང་ངོ ། །མི་ཁོམ་པ་བརྒྱད་སྤངས་ནས་དེ་ལྟ་བུའི་དལ་བ་ཕུན་སུམ་ཚོགས་པ་རྙེད་པའང་བརྒྱ་ལ་བརྒྱ་ལམ་ན་སྟེ། བག་ཡོད་པས་ལེགས་པར་བརྩོན་པར་གྱིས་ཤིག། ཕྱིས་འགྱོད་པར་མ་གྱུར་ཅིག་ཅེས་སྐུལ་བར་འགྱུར་རོ། །དེད་དཔོན་ཁྱོད་དེ་ལྟར་དེ་བཞིན་གཤེགས་པ་བྱམས་པའི་གསུང་རབ་དང ། དེ་བཞིན་གཤེགས་པ་བྱམས་པ་ཆོས་ཀྱི་རྒྱལ་པོའི་སངས་རྒྱས་ཀྱི་ཞིང་དུ་དེའི་གསུང་གི་ཚིག་རྗེས་སུ་འཛིན་ཅིང་རྗེས་སུ་སྐྱོང་བར་འགྱུར་རོ། །བྱམས་པའི་སེམས་ཁོན་མེད་པ་དང ། འགྲན་ཟླ་མེད་པ་དང ། ཁ་ན་མ་ཐོ་བ་མེད་པ་དང ། ཕན་པ་དང་བདེ་བས་ཁྱབ་པར་བྱེད་པར་འགྱུར་རོ། །དེད་དཔོན་ཁྱོད་དགེ་བའི་རྩ་བ་དེས་བདུད་སྡིག་ཅན་འདས་པའི་འོག་ཏུ་བདུད་ཀྱི་གནས་ན་
108a
༄#། །དབང་ཕྱུག་ཆེན་པོའི་བདག་པོ་བདུད་བྱེད་པར་འགྱུར་རོ། །དེད་དཔོན། སེམས་ཅན་གང་དག་དེ་བཞིན་གཤེགས་པ་ལ་ཐ་ན་སེམས་བསྐྱེད་པ་གཅིག་ཙམ་གྱི་དགེ་བའི་རྩ་བ་བསྐྱེད་པར་འགྱུར་བ་དེ་དག་ཐམས་ཅད་ནི་དེད་དཔོན་དགེ་བའི་རྩ་བ་དེས་མི་འཆི་བར་ཉེ་བར་འགྲོ། མི་འཆི་བ་ལ་གཞོལ། མི་འཆི་བའི་མཐར་འགྱུར་རོ། །དེད་དཔོན་ཁྱོད་ནི་དགེ་བའི་རྩ་བ་དེས་ལྷ་དང་མིའི་ཕུན་སུམ་ཚོགས་བ་རྒྱ་ཆེན་པོ་མྱོང་ནས་བསྐལ་པ་བརྒྱད་ཅུའི་སྲིད་པ་ཐ་མ་ལ་ལུས་ཐ་མ་འཐོབ་པ་ན། རང་སངས་རྒྱས་སྙིང་རྗེ་ཅན་ཞེས་བྱ་བར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེད་དཔོན་ཁྱོད་ཀྱིས་ང་ཡོངས་སུ་མྱ་ངན་ལས་འདས་པའི་སྒྲ་ཐོས་ནས་ང་ལ་སེམས་དང་བ་ཆེན་པོ་བསྐྱེད་དེ། སེམས་ཅན་རྣམས་ལའང་སྙིང་རྗེའི་སེམས་བསྐྱེད་ནས་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར། ང་ལ་བཅོམ་ལྡན་འདས་ཡོངས་སུ་མྱ་ངན་ལས་མི་འདའ་བར་བཞུགས་སུ་གསོལ་ཞེས་གསོལ་བ་འདེབས་པ་དང ། དེ་བཞིན་གཤེགས་པ་བྱམས་པའི་བསྟན་པ་ལའང་སེམས་ཅན་དེ་དག་ལ་སྙིང་རྗེ་བསྐྱེད་ནས་གཉིད་ཀྱིས་ལོག་པ་དང ། མྱོས་པ་དང ། རབ་ཏུ་མྱོས་པའི་སྐྱེ་བོ་རྣམས་ལ་བསྒོ་ཞིང་བསྐུལ་མ་འདེབས། དགེ་བའི་ཆོས་ཚད་མེད་པ་ལའང་བསྐུལ་པར་འགྱུར་ཏེ། དེད་དཔོན་ཁྱོད་རང་སངས་
108b
རྒྱས་སུ་འགྱུར་པའི་རྒྱུ་འདི་ཡིན། རྐྱེན་འདི་ཡིན་ནོ། །དེད་དཔོན། དགེ་བའི་རྩ་བའི་ལོངས་སྤྱོད་ཆེན་པོ་འདི་ལྟ་བུ་སྦྱིན་གྱི། དེད་དཔོན་དགའ་ཞིང་མགུ་བ་དང ། རངས་ཤིང་ཡིད་དགའ་བར་གྱིས་ཤིག་།དེད་དཔོན་ཁྱོད་དེ་བཞིན་གཤེགས་པ་ལ་གསོལ་བ་འདེབས་པ་དང ། དེ་བཞིན་གཤེགས་པ་ལ་སེམས་དང་བའི་ཕྱིར་དེ་བཞིན་གཤེགས་བས་ཆོས་ཀྱི་དགའ་བ་དང་ཆོས་ཀྱི་ལོངས་སྤྱོད་འདི་བྱིན་པ་ཡིན་ནོ། །དེ་སྐད་ཅེས་བཀའ་སྩལ་བ་དང ། བཅོམ་ལྡན་འདས་ལ་བདུད་ཀྱི་བུ་དེད་དཔོན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་དེ་སྐད་དུ་གསོལ་ཀྱང་དེ་སྟེ་བཞུགས་སུ་མི་གནང་ན། བཅོམ་ལྡན་འདས། བདག་དེང་སླན་ཆད་འདི་ཡིད་མ་འཆའ་ཞིང་སྨོན་ལམ་འདེབས་ཏེ། བཅོམ་ལྡན་འདས། ཡོངས་སུ་མྱ་ངན་ལས་འདས་ནས་དམ་པའི་ཆོས་ཇི་སྲིད་དུ་གནས་པ་དེ་སྲིད་དུ། བཅོམ་ལྡན་འདས། བདག་གཟུགས་དང ། སྒྲ་དང ། དྲི་དང ། རོ་དང ། རེག་པ་རྣམས་ལ་སྙེན་པར་མི་བགྱིད་དོ། །འདོད་པའི་ཡོན་ཏན་ལྔ་ལའང་ཆགས་པ་དང་རྩེ་བ་དང་ཡོངས་སུ་སྤྱོད་པར་མི་བགྱིད་དོ། །གོས་གཞན་ཡང་མི་འཚལ་མེ་ཏོག་དང ། སྤོས་དང ། ཕྲེང་བར་དང ། བྱུག་པའང་མི་སྙེན་ནོ། །བཅོམ་ལྡན་འདས་ཀྱི་དམ་པའི་ཆོས་ཇི་སྲིད་དུ་ནུབ་པར་མ་གྱུར་གྱི་བར་དུ་དེ་ལས་གཞན་པའི་ལྷའི་ལོངས་སྤྱོད་དང་ཡོངས་སུ་སྤྱད་པ་དག་ཀྱང་མི་སྤྱོད་
109a
༄#། །དོ། །དེ་ཅིའི་སླད་དུ་ཞེ་ན། བཅོམ་ལྡན་འདས། འདི་ལྟར་བདག་སང་ནང་བར་འདི་ལྟ་བུའི་སྐྱེས་བུ་རིན་པོ་ཆེ་དང་འབྲལ་བར་འགྱུར་ཞིང་ལྷན་ཅིག་མི་གནས་པ་དང ། དབྱེ་བ་དང་འགྱེས་པ་དང་ཤིན་ཏུ་མི་སྣང་བར་འགྱུར་ན། བཅོམ་ལྡན་འདས། བདག་དགའ་བ་དང་རྩེ་བས་ཅི་ཞིག་བགྱི། བདེ་བས་ཅི་ཞིག་བགྱི། ཡིད་བདེ་བས་ཅི་ཞིག་བགྱི། ཤེས་རབ་ཀྱི་སྒྲོན་མ་ཆེན་པོ་འདི་ལྟ་བུ་དང ། ཤེས་རབ་ཀྱི་མར་མེ་ཆེན་པོ་འདི་ལྟ་བུ་དང ། ཡེ་ཤེས་ཀྱི་སྣང་བ་ཆེན་པོ་ཡོངས་སུ་མྱ་ངན་ལས་འདས་ནས། བཅོམ་ལྡན་འདས། བདག་མགུ་བའམ། ཡིད་བདེ་བའམ། དགའ་བའམ། རངས་པའམ། རབ་ཏུ་དགའ་བ་མྱོང་བར་ག་ལ་འགྱུར། ཡེ་ཤེས་ཆེན་པོའི་ཉི་མ་འོད་ཟེར་བརྒྱ་སྟོང་དུ་མས་བསྐོར་བ་མ་རིག་པའི་མུན་པ་སེལ་བ་འདི་ལྟ་བུ་དང ། འོད་སྣང་བར་མཛད་པ་འདི་ལྟ་བུ་ནུབ་པར་གྱུར་ན། བཅོམ་ལྡན་འདས། བདག་དགའ་བའམ་བདེ་པ་ག་ལས་མཆི། བདག་སེམས་ཅན་རིན་པོ་ཆེ་འདི་ལྟ་བུ་དང་བྲལ་ན། དགའ་བ་དང་རྩེ་བ་ག་ལས་མཆི། སེམས་ཅན་སྣང་བ། སེམས་ཅན་རྟོགས་པ། སེམས་ཅན་མ་སྨད་པ།་སེམས་ཅན་ཁ་ན་མ་ཐོ་བ་མེད་པ། སེམས་ཅན་མ་རྨོངས་པ། སེམས་ཅན་མཆོག་།སེམས་ཅན་བླ་ན་མེད་པ། སེམས་ཅན་གོང་ན་མེད་པ། སེམས་ཅན་མཚུངས་པ་མེད་པ། སེམས་
109b
ཅན་མཉམ་པ་མེད་པ། སེམས་ཅན་མི་མཉམ་པ་དང་མཉམ་པ། སེམས་ཅན་ཐམས་ཅད་ཐར་བར་མཛད་པའི་སེམས་ཅན། སེམས་ཅན་རབ། སེམས་ཅན་མཆོད་པ། སེམས་ཅན་ཁ་ལོ་སྒྱུར་བ། སེམས་ཅན་འདུལ་བ། སེམས་ཅན་ཕན་པར་དགྱེས་པ། ཡང་དག་པར་གསུང་བ། དུས་སུ་གསུང་བ། ཚིགས་སུ་གསུང་བ། ཕྱིན་ཅི་མ་ལོག་པར་གསུང་པ། ཇི་སྐད་གསུང་བ་དེ་བཞིན་མཛད་པ། ཐུགས་རྗེ་ཆེན་པོ་དང་ལྡན་པ། བྱམས་པ་ཆེན་པོ་ལ་གནས་པ། སེམས་ཅན་ཐམས་ཅད་ལ་ཁོང་ཁྲོ་བ་མི་མངའ་བ། སེམས་ཅན་ཐམས་ཅད་ལ་སེམས་མཉམ་པ་རབ་ཏུ་མ་སྤྲོས་པ། ང་རྒྱལ་མི་མངའ་བ། ལེན་པ་མི་མངའ་བ། གཞི་མི་མངའ་བ། གནས་མི་མངའ་བ། མི་སྐྱོ་བ་དྲི་མ་མི་མངའ་བ། སྐྱོབ་བ་འདྲེན་པ་རྣམ་པར་འདྲེན་པ། ཡོངས་སུ་འདྲེན་པ། ཡོངས་སུ་ཐར་བར་མཛད་པ། ཡོངས་སུ་སྐྱོང་བ། དྲན་པར་མཛད་པ། རྟོགས་པར་མཛད་པ། སྐུལ་མ་འདེབས་པ། མྱ་ངན་སྤང་བ། ཟུག་རྡུ་འབྱིན་པ། སྨན་པའི་རྒྱལ་པོ་སེམས་ཀྱི་གསོ་བ་མཛད་པ། སྨན་ཆེན་པོ་སྦྱིན་པ། ཤིན་ཏུ་སྡུག་བསྔལ་བ་ལས་ཡོངས་སུ་ཐར་བར་མཛད་པ། སྟོན་པ་པོ། དེད་དཔོན་ཁྲིད་པ། འབབ་སྟེགས་མཛད་པ། གདོས་པ་འཛིན་པ། སྒྲོན་མ་འཛིན་པ། སྣང་བ་མཛད་པ། འོད་མཛད་པ། གསལ་བར་མཛད་པ། མིག་སྦྱིན་པ། ལམ་སྟོན་པ། ཡུལ་བདེ་བར་ཕྱིན་
110a
༄#། །པར་མཛད་པ། དྲི་མ་དང་ཐ་བ་དང་མདུད་པ་ཐམས་ཅད་སྤངས་པ། སྲེད་པ་མི་མངའ་བ། བག་ལ་ཉལ་མི་མངའ་བ། མདུད་པ་དང་ཀུན་ཏུ་སྦྱོར་བ་ཐམས་ཅད་རབ་ཏུ་བཤིག་པ། འདོད་ཆགས་དང་བྲལ་བ། ཞེ་སྡང་དང་བྲལ་བ། གཏི་མུག་དང་བྲལ་བ། ཉོན་མོངས་པ་དང་བྲལ་བ། ཀུན་ཏུ་སྦྱོར་བ་དང་བྲལ་བ། ང་རྒྱལ་དང་དྲེགས་པ་དང་རྩོད་པ་དང་བྲལ་བ། དེ་ལྟ་བུའི་སྐྱེས་བུ་ཆེན་པོ། སྐྱེས་བུ་དམ་པ། སྐྱེས་བུ་མཆོག། སྐྱེས་བུ་དཔའ་བོ། སྐྱེས་བུ་རྟུལ་ཕོད་པ། སྐྱེས་བུ་པདྨ། སྐྱེས་བུ་པདྨ་དཀར་པོ། སྐྱེས་བུ་གླང་པོ། སྐྱེས་བུ་སེང་གེ། སྐྱེས་བུ་གཙོ་བོ། སྐྱེས་བུ་བརྟན་པ། སྐྱེས་བུ་མཆོག། སྐྱེས་བུ་ཅང་ཤེས་པ། བླ་ན་མེད་པ། ཡིད་ཡོངས་སུ་མི་སྐྱོ་བ། བསམ་གཏན་ཆེན་པོ་ལ་བསམ་གཏན་པ། བསམ་གཏན་ཐམས་ཅད་ལ་བསམ་གཏན་པ། བསམ་གཏན་དང་སྙོམས་པར་འཇུག་པ་ཐམས་ཅད་སྤྱོད་ཡུལ་བ། ཤེས་རབ་ཆགས་པ་མེད་པ། ཤེས་རབ་སྒྲིབ་པ་མེད་པ། ཤེས་རབ་ཀྱི་སྤྱོད་ཡུལ་མཉམ་པ་མེད་པ། རྒྱལ་མཚན་བསྙལ་བ། འདམ་ལས་རྒལ་བ། ཐང་ལ་གནས་པ། ཕ་རོལ་ཏུ་ཕྱིན་པ།་མི་འཇིགས་པའི་གནས་སུ་ཕྱིན་པ། སེམས་ཅན་ཐམས་ཅད་ལ་མི་འཇིགས་པ་སྦྱིན་པ། འཇིག་རྟེན་ཐམས་ཅད་དབུགས་འབྱིན་པ་འདིར་དོ་མོད་ཀྱི་ཐུན་ཐ་མ་ལ་
110b
འབྲལ་ཞིང་འབྱེ་བར་འགྱུར་ཏེ། བདག་གིས་བཅོམ་ལྡན་འདས་སེང་གེའི་སྒྲ་སྒྲོགས་པ་ཕྱིན་ཆད་མི་མཐོང་ཞིང་དེ་བཞིན་གཤེགས་པའི་སེང་གེའི་སྒྲ་ཐོས་པར་མི་འགྱུར་ན། བཅོམ་ལྡན་འདས། བདག་དགའ་བའམ་ཡིད་བདེ་བ་ག་ལས་མཆི། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ནི། བཅོམ་ལྡན་འདས། འདི་ལྟ་སྟེ། དཔེར་ན། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་འཆི་བའི་དུས་བགྱིས་པ་ན་སེམས་ཅན་བྱས་པ་གཟོ་ཞིང་བྱས་པ་རིག་པ། བྱས་པ་རྗེས་སུ་སྐྱོང་བ། སྡུག་བསྔལ་གྱིས་གདུངས་པ་ཁ་ཅིག་མཆིས་པ་དེ་དག་དེ་ན་དགུང་གཅིག་གམ། གཉིས་སམ། གསུམ་མམ། བཞིའམ། ལྔའམ། དྲུག་གམ། བདུན་ནམ། ཟླ་བ་ཕྱད་དམ། ཟླ་བ་གཅིག་ཏུ་མྱ་ངན་བགྱིད་དེ་མཆི་མ་འབྱུང་ཞིང་གནས་པ་དེ་བཞིན་དུ། བདག་ཀྱང་བཅོམ་ལྡན་འདས་ཡོངས་སུ་མྱ་ངན་ལས་འདས་པ་ན་དམ་པའི་ཆོས་འདི་ཇི་སྲིད་དུ་གནས་པ་དེ་སྲིད་དུ་བདག་གཟུགས་དང ། སྒྲ་དང ། དྲི་དང ། རོ་དང ། རེག་བྱ་མི་སྙན་ཏོ། །འདོད་པའི་ཡོན་ཏན་ལྔ་ལའང་ཆགས་པར་མི་བགྱིས། མི་རྩེ། ཡོངས་སུ་མི་སྤྱོད་དོ། །གོས་གཞན་ཡང་མི་འཚལ་ཞིང་མེ་ཏོག་དང་ཕྲེང་བ་དང་སྤོས་དང་བྱུག་པའང་མི་སྙེན་ཡོངས་སུ་མི་སྤྱོད་དོ། །བཅོམ་ལྡན་འདས། དམ་པའི་ཆོས་ནུབ་པར་མ་གྱུར་གྱི་བར་དུ་དེ་ལས་གཞན་པའི་ལོངས་སྤྱོད་རྣམས་ཀྱང་མི་
111a
༄#། །སྙེན་ཏོ། །དེད་དཔོན་གྱི་ལེའུ་སྟེ་གཉིས་པ་རྫོགས་སོ།། །།དེ་ནས་ལྷའི་དབང་པོ་བརྒྱ་བྱིན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ལྷའི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ཇི་ལྟར་བསྒྲུབ་པར་བརྒྱ་བ་བཀའ་སྩལ་དུ་གསོལ། །བཅོམ་ལྡན་འདས། །གང་ལྷ་མ་ཡིན་གྱི་དབང་པོ་བཞི་གོ་ཆ་བགོས་ནས་སུམ་ཅུ་རྩ་གསུམ་གྱི་ལྷ་རྣམས་ལ་གཡུལ་བཤམས་ཏེ་རྒོལ་བའི་དུས་དེ་ལྟ་བུ་དང་ཚེ་དེ་ལྟ་བུ་མཆིས་སོ། །གང་གི་ཚེ་ལྷ་དང་ལྷ་མ་ཡིན་གཡུལ་ཤོམ་ཞིང་ལྷ་མ་ཡིན་གྱི་དབང་པོ་བཞི་ཚོགས་པར་གྱུར་པ་དེའི་ཚེ་འཕགས་པ་མཽངྒལ་གྱི་བུའང་མཆིས་ཏེ། འཕགས་པ་མཽངྒལ་གྱི་བུ་མཆིས་ནས་ལྷ་མ་ཡིན་གྱི་དབང་པོ་དེ་བཞི་ཆོས་དང་མཐུན་པས་ཚར་གཅོད་དོ། །དེ་ལྟར་བགྱིས་པས་ལྷ་དང་ལྷ་མ་ཡིན་རྣམས་འཐབ་པ་མ་མཆིས། འགྱེད་པ་མ་མཆིས། །མཚང་འདྲུ་བ་མ་མཆིས། རྩོད་པ་མ་མཆིས་ཤིང་བདེ་བར་འགྱུར་ན། བཅོམ་ལྡན་འདས། །མཽངྒལ་གྱི་བུའང་ཡོངས་སུ་མྱ་ངན་ལས་འདས། བཅོམ་ལྡན་འདས་ཀྱང་ད་ཡོངས་སུ་མྱ་
111b
ངན་ལས་འདའ་བར་འགྱུར་ཏེ། དེ་ལྟ་བས་ན་བདག་ཅག་འཐབ་པ་དང་འགྱེད་པ་ཆེན་པོར་འགྱུར་ན། བཅོམ་ལྡན་འདས། ལྷ་དང་ལྷ་མ་ཡིན་དང ། ལྷ་མ་ཡིན་གྱི་དབང་པོ་བཞི་གཡུལ་ཤོམ་པ་དེའི་ཚེ་ཇི་ལྟར་བསྒྲུབ་པར་བགྱི་བ་བདག་ལ་བཀའ་སྩལ་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ། འདི་ལྟ་སྟེ། ཚུལ་ཁྲིམས་རྣམ་པར་དག་པའི་ཕྱིར་ཚུལ་ཁྲིམས་དང་ལྡན་པ་ཚངས་པར་སྤྱོད་པའི་སེམས་ལ་སྨོན་པ་འགྲུབ་སྟེ་ཚངས་པར་མི་སྤྱོད་པའི་མ་ཡིན་ནོ། །འདོད་ཆགས་དང་བྲལ་བའི་འགྲུབ་ཀྱི་འདོད་ཆགས་དང་མ་བྲལ་བའི་མ་ཡིན་ནོ། །ཞེ་སྡང་དང་བྲལ་བའི་འགྲུབ་ཀྱི་ཞེ་སྡང་དང་མ་བྲལ་བའི་མ་ཡིན་ནོ། །གཏི་མུག་དང་བྲལ་བའི་འགྲུབ་ཀྱི་གཏི་མུག་དང་མ་བྲལ་བའི་མ་ཡིན་ནོ། །ཤེས་རབ་དང་ལྡན་པའི་གྲུབ་ཀྱི་ཤེས་རབ་འཆལ་བའི་མི་འགྲུབ་བོ། །ཀཽ་ཤི་ཀ། ཇི་སྲིད་དུ་དམ་པའི་ཆོས་འདི་ནུབ་པར་མ་གྱུར་པ་དེ་སྲིད་དུ། ཀཽ་ཤི་ཀ། ལྷ་དང་ལྷ་མ་ཡིན་གཡུལ་ཤོམ་པར་འགྱུར་པ་ངའི་མིང་སྨོས་པ་ཙམ་གྱིས་ལྷ་རྣམས་རྒྱལ་པར་འགྱུར་ཞིང་ལྷ་མ་ཡིན་ཕམ་པར་འགྱུར་བར་ངས་དེང་ནས་བྱིན་གྱིས་བརླབས་ཀྱིས། ཀཽ་ཤི་ཀ། མི་དགར་མ་བྱེད། །མྱ་ངན་མ་བྱེད། སྨྲེ་སྔགས་མ་འདོན་ཅིག། དེ་ནས་ལྷ་མ་ཡིན་གྱི་དབང་པོ་བཞི་བཅོམ་ལྡན་
112a
༄#། །འདས་ཀྱིས་བྱིན་གྱིས་བརླབས་པའི་སྒྲ་འདི་ལྟ་བུ་ཐོས་ནས་སྐྱོ་ཞིང་མི་དགའ་སྟེ། སྤུ་ཟིང་ཞེས་བྱེད་པར་གྱུར་ནས་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། །བཅོམ་ལྡན་འདས་ཀྱི་ཞབས་ལ་མགོ་པོས་ཕྱག་འཚལ་ཏེ། ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ལྷ་མ་ཡིན་གྱི་དབང་པོ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། །ཅིའི་སླད་དུ་འདི་ལྟ་བུར་བྱིན་གྱིས་རློབ་པ་མཛད། དེ་སྐད་ཅེས་གསོལ་བ་དང ། བཅོམ་ལྡན་འདས་ཀྱིས་ལྷ་མ་ཡིན་གྱི་དབང་པོ་བཞི་པོ་དེ་དག་ལ་འདི་སྐད་ཅེས་བཀའ་སྩལ་ཏོ། །ལྷ་མ་ཡིན་གྱི་དབང་པོ་ཁྱེད་ཅག་མྱ་ངན་མ་བྱེད། སྨྲེ་སྔགས་མ་འདོན། ཡོངས་སུ་ཡི་འཆད་པ་མ་སྐྱེད་ཅིག། དེ་ཅིའི་ཕྱིར་ཞེ་ན། ཁྱེད་རྣམས་ཀྱང་ལྷ་རྣམས་ཀྱི་དབང་པོར་འགྱུར་བའི་དུས་དེ་ལྟ་བུ་དང ། ཚེ་དེ་ལྟ་བུ་ཡོད་དེ། སུམ་ཅུ་རྩ་གསུམ་གྱི་རིས་ཀྱི་ལྷ་རྣམས་པས་ཆེས་ཕྱུག་པ་དང ། འཐབ་པ་མེད་པ་དང ། རྩོད་པ་མེད་པ་དང ། འགྱེད་པ་མེད་པ་དང ། འགལ་བ་མེད་ཅིང་རྒྱལ་བ་ཐོབ་པར་འགྱུར་རོ། །དེ་ཅིའི་ཕྱིར་ཞེ་ན། ཁྱེད་འཐབ་པ་མེད་པ་དང ། འཚང་འདྲུ་བ་མེད་པ་དང ། འགྱེད་པ་མེད་པ་དང ། རྩོད་པ་མེད་པ་དང ། འགལ་བ་མེད་པར་ལྷུར་ལོང་ལ། བྱམས་པའི་སེམས་དང ། ཕན་པའི་སེམས་
112b
ཀྱི་དངོས་པོ་ཕུན་སུམ་ཚོགས་པར་གནས་པར་གྱིས་ཤིག། གྲོགས་པོ་དག། སྲོག་ནི་རྒྱུན་མི་རིང ། དབང་ཕྱུག་ལ་དབང་བྱེད་པ་ནི་མི་རྟག་གོ། །གྲོགས་པོ་དག། ཕུན་སུམ་ཚོགས་པ་ཐམས་ཅད་ནི་མཐར་འཇིག་གོ། གྲོགས་པོ་དག། དེ་བཞིན་གཤེགས་པའང་མི་རྟག་པ་ཉིད་ཀྱིས་མཐར་ཐུག་པ་དང ། ཡོངས་སུ་ཟད་པ་དང ། ཡོངས་སུ་དེངས་པར་བྱེད་པ་ལ་ལྟོས། ང་ནི་སེམས་ཅན་ཐམས་ཅད་ལ་ཁོན་མེད་པ་དང ། འཐབ་པ་མེད་པ་དང ། རྩོད་པ་མེད་པ་དང ། འགལ་བ་མེད་པར་བྱེད་པ་ལ་གནས་པ་དང ། སེམས་ཅན་ཐམས་ཅད་འདུམ་ཞིང་མཐུན་པར་བྱེད་པ་ལ་ཞུགས་པ་ཡིན་ཡང ། དེ་ལྟར་ན་ཁྱོད་དགེ་བའི་རྩ་བ་ཆུང་དུ་དང་ལྡན་པ་ཕན་ཚུན་འཐབ་པ་དང་རྩོད་པ་ལ་མངོན་པར་དགའ་བ་རྣམས་ལ་ལྟ་སྨོས་ཀྱང་ཅི་དགོས། གྲོགས་པོ་དག། གང་གཞན་ལ་རྣམ་པར་མཐོ་འཚམས་པ་དང་རྣམ་པར་འཚེ་བ་ལ་ཞུགས་པར་གྱུར་པ་དེ་ནི་ཡུན་རིང་དུ་རྣམ་པར་མཐོ་འཚམས་པ་དང་རྣམ་པར་འཚེ་བ་ཐོབ་པར་འགྱུར་རོ། །གྲོགས་པོ་དག། སྲོག་གཅོད་པའི་སྐྱེས་བུ་གང་ཟག་ནི་ཚེ་ཐུང་བར་འགྱུར་རོ། །གྲོགས་པོ་དག་།འཐབ་པ་དང་རྩོད་པ་ལ་དགའ་བའི་སྐྱེས་བུ་གང་ཟག་ནི་རྟག་ཏུ་སྐྲག་པས་འཚོ་བར་འགྱུར་ཞིང ། དབང་ཆེ་བར་གྲགས་པ་དང་གཡོག་འཁོར་མང་པོར་མི་འགྱུར་རོ། །གྲོགས་བོ་དག་།དགེ་བ་དང་སྡིག་པའི་ལས་རྣམས་ཆུད་ཟ་བ་
113a
༄#། །མེད་དོ། །དེ་བས་ན། གྲོགས་པོ་དག་།ཁྱེད་ཕན་ཚུན་བྱམས་པའི་སེམས་དང ། བྱམས་པའི་ལུས་ཀྱི་ལས་དང ། བྱམས་པའི་དག་གི་ལས་དང ། བྱམས་པའི་ཡིད་ཀྱི་ལས་ཀུན་ཏུ་སྤྱོད་ཅིག་།འཐབ་པ་མེད་པ་དང ། འཚང་འདྲུ་བ་མེད་པ་དང ། རྩོད་པ་མེད་པ་ལྷུར་ལོང་ལ་གནས་པར་གྱིས་ཤིག་དང ། དེ་ཡུན་རིང་པོར་དོན་དུ་འགྱུར་བ་དང ། ཕན་པ་དང ། བདེ་བ་དང ། འགྱོད་པ་མེད་པར་འགྱུར་རོ། །དེ་སྐད་ཅེས་བཀའ་སྩལ་བ་དང ། བཅོམ་ལྡན་འདས་ལ་ལྷ་མ་ཡིན་གྱི་དབང་པོ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་དེ་ལྟ་ལགས་སོ། །བདེ་བར་གཤེགས་པ། དེ་དེ་ལྟ་ལགས་ཏེ། བཅོམ་ལྡན་འདས་ཀྱིས་ཇི་སྐད་དུ་བཀའ་སྩལ་པ་དེ་བཞིན་དུ་བགྱིའོ། ། དེ་བཞིན་དུ་བསྒྲུབ་པར་བགྱིའོ། །དེ་བཞིན་དུ་གནས་པར་བགྱིའོ། །བཅོམ་ལྡན་འདས། བདག་ཅག་ཀྱང་དེང་སླན་ཆད་གཡུལ་ཤོམ་པ་མི་བགྱིད་དོ། །ཕན་ཚུལ་བྱམས་པས་ཀུན་ཏུ་སྤྱད་པར་བགྱིའོ། །དེ་ནས་ལྷའི་དབང་པོ་བརྒྱ་བྱིན་བཅོམ་ལྡན་འདས་ཡོངས་སུ་མྱ་ངན་འདའ་བ་ལ་མྱ་ངན་བྱེད་དེ། གདོང་ལ་མཆི་མ་ཟག་པར་དུ་ཞིང་སྡུག་བསྔལ། ཡིད་མི་བདེ་ཞིང་མྱ་ངན་གྱི་ཟུག་རྡུ་ཆེན་པོ་དང་ལྡན་པར་གྱུར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་དེང་སླན་ཆད་
113b
བཅོམ་ལྡན་འདས་ཡོངས་སུ་མྱ་ངན་ལས་འདས་པའི་དམ་པའི་ཆོས་ཇི་སྲིད་དུ་གནས་པ་དེ་སྲིད་དུ་གཟུགས་ལ་མི་སྙམ་པ་ནས། རེག་བྱ་ལ་མི་རེག་པ་དང ། སླས་ཀྱི་ནང་དུ་མི་འཇུག་པ་དང་གོས་གཞན་མི་འཚལ་བར་བགྱིས་ཏེ། བཅོམ་ལྡན་འདས། འདི་ལྟ་སྟེ། དཔེར་ན། སེམས་ཅན་གང་དག་བྱས་པ་གཟོ་ཞིང་།བྱས་པ་རིག་པ། བྱས་པ་རྗེས་སུ་སྐྱོང་བ་དེ་དག་རྗེ་བོ་གུམ་པར་གྱུར་ན། དེའི་སླད་དུ་སྡུག་བསྔལ་ཞིང་མཆི་མ་འབྱུང་བ་དེ་བཞིན་དུ་བདག་ཀྱང་བཅོམ་ལྡན་འདས་ཡོངས་སུ་མྱ་ངན་ལས་འདས་ན་བཅོམ་ལྡན་འདས་ཀྱི་དམ་པའི་ཆོས་ཇི་སྲིད་དུ་གནས་པ་དེ་སྲིད་དུ་མཆི་མ་དབྱུང་བར་བགྱི། འདོད་པའི་ཡོན་ཏན་ལྔ་ལ་མི་སྙེན། སླས་ཀྱི་ནང་དུ་མི་འཇུག་།དེ་ལས་གཞན་པའི་གོས་འཆང་བར་མི་བགྱིད་དོ། །བཅོམ་ལྡན་འདས། འདི་ལྟར་བདག་འཇིག་རྟེན་ཐམས་ཅད་ལས་འདས་པའི་སྟོན་པ་འདི་ལྟ་བུ་དང་སང་ནང་བར་འབྲལ་ཞིང་མི་མཐོང་བ་དང་མི་འགྲོགས་པར་འགྱུར་པ་ལགས་པ་ལྟ། ལྷའི་དབང་པོ་བརྒྱ་བྱིན་གྱིས་དེ་སྐད་གསོལ་ནས་མཆི་མ་ཟག་པ་བཞིན་དུ་མགོ་སྨད་དེ་འདུག་གོ། བརྒྱ་བྱིན་གྱི་ལེའུ་སྟེ་གསུམ་པ་རྫོགས་སོ།། །།དེ་ནས་གནས་བརྟན་སྒྲ་ཅན་ཟིན་འདི་སྙམ་དུ་བཅོམ་ལྡན་འདས་ཡོངས་སུ་མྱ་ངན་ལས་འདའ་བ་ལ་བདག་མངོན་སུམ་དུ་ལྟ་བར་མི་སྤྲོའོ། །བཅོམ་ལྡན་འདས། ཡོངས་སུ་མྱ་ངན་ལས་འདའ་བ་
114a
༄#། །མངོན་སུམ་དུ་མཐོང་ན་བདག་རངས་པར་ག་ལ་འགྱུར་ཏེ། མགུ་བག་ལ་ཡོད། ཡིད་བདེ་བ་ག་ལ་ཡོད། དགའ་བ་ག་ལ་ཡོད། ཡི་རང་པ་ག་ལ་ཡོད་ཀྱི་བདག་ངེས་པར་འདི་ནས་འཇིག་རྟེན་གྱི་ཁམས་བཅུ་འདས་པ་ན། འཇིག་རྟེན་གྱི་ཁམས་འོད་ཟེར་ཅན་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྙེན་པར་དཀའ་བཞེས་བྱ་བའི་དྲུང་དུ་འགྲོའོ་སྙམ་དུ་སེམས་སོ། །དེ་ནས་ཚེ་དང་ལྡན་པ་སྒྲ་ཅན་ཟིན་ཀུ་ཤའི་གྲོང་ཁྱེར་གྱད་རྣམས་ཉེ་བར་གནས་པ་ཤིང་སཱ་ལའི་ཚལ་ནས་མི་སྣང་བར་གྱུར་ཏེ། བྱང་ཤར་གྱི་ཕྱོགས་ག་ལ་བ་དང ། དེ་བཞིན་གཤེགས་པ་བསྙེན་པར་དཀའ་བ་ག་ལ་བ་དེར་སོང་ནས་ཕྱིན་པ་དང ། དེ་བཞིན་གཤེགས་པ་དགྲ་བཅོམ་པ་ཡག་དག་པར་རྫོགས་པའི་སངས་རྒྱས་བསྙེན་པར་དཀའ་བའི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འདུག་ནས་སྡུག་བསྔལ་ཞིང་ཡིད་མི་བདེ་བ་ཚེ་དང་ལྡན་པ་སྒྲ་གཅོན་ཟིན་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྙེན་པར་དཀའ་བས་འདི་སྐད་ཅེས་བཀའ་སྩལ་ཏོ། །སྒྲ་གཅན་ཟིན་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།དེ་ཅིའི་ཕྱིར་ཞེ་ན། སྒྲ་གཅན་ཟིན། སྡུག་བ་དང་ཡིད་དུ་འོང་བ་ཐམས་ཅད་
114b
དང་ཐ་དད་དུ་འགྱུར་ཞིང་འགྱེས་པ་དང་འབྱེ་བ་དང་འབྲལ་བར་འགྱུར་རོ། །སྒྲ་གཅན་ཟིན། སངས་རྒྱས་བཅོམ་ལྡན་འདས་རྣམས་སངས་རྒྱས་ཀྱི་མཛད་པ་མཛད་ནས་ཡོངས་སུ་མྱ་ངན་ལས་འདའ་བ་འདི་ནི་ཆོས་ཉིད་ཡིན་ནོ། །སྒྲ་གཅན་ཟིན། བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གྱད་རྣམས་ཉེ་བར་གནས་པའི། ། ཤིང་སཱ་ལའི་ཚལ་ན་ཤིང་སཱ་ལ་ཟུང་གི་བར་དུ་སེང་གེ་ལྟར་གློ་གཡས་བས་མནལ་ཏེ་དོ་མེད་ཀྱི་ཐུན་ཐ་མ་ལ་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་མྱ་ངན་ལས་འདའ་བར་འགྱུར་གྱི། སྒྲ་གཅན་ཟིན་ཁྱོད་དེར་སོང་སྟེ། ཁྱོད་ངེས་པར་དེར་འདུག་དགོས་ཀྱི། སྒྲ་གཅན་ཟིན་ཁྱོད་སོང་ཞིག་བཅོམ་ལྡན་འདས། ཡོངས་སུ་མྱ་ངན་ལས་འདས་པའི་འོག་ཏུ་འགྱོད་པར་གྱུར་ཏ་རེ། དེ་སྐད་ཅེས་བཀའ་སྩལ་བ་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྙེན་པར་དཀའ་བ་ལ་ཚེ་དང་ལྡན་པ་སྒྲ་བཅན་ཟིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དོ་མོད་ཀྱི་ཐུན་ཐ་མ་ལ་ཡོངས་སུ་མྱ་ངན་ལས་འདའོ་ཞེས་བགྱི་བའི་སྒྲ་དེའང་ཐོས་པར་མི་བཟོད་ན། བཅོམ་ལྡན་འདས། དེ་ཡོངས་སུ་མྱ་ངན་ལས་འདའ་བ་མངོན་སུམ་དུ་མཐོང་བ་ལྟ་སྨོས་ཀྱང་ཅི་
115a
༄#། །འཚལ། བཅོམ་ལྡན་འདས་དེ་བས་ན་བདག་དེར་མཆི་བར་མི་སྤྲོའོ། །དེ་ནས་ཚེ་དང་ལྡན་པ་སྒྲ་གཅན་ཟིན་བཅོམ་ལྡན་འདས་དེ་བཞིན་གཤེགས་པ་བསྙེན་པར་དཀའ་བ་དེའི་བཀའ་མ་མཉན་པར་སངས་རྒྱས་ཀྱི་ཞིང་དེ་ནས་མི་སྣང་བར་གྱུར་ཏོ། །སྟེང་གི་ཕྱོགས་ཀྱི་འཇིག་རྟེན་གྱི་ཁམས་རིམ་གྱིས་བཅུ་པ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེད་དཔོན་ཞེས་བྱ་བ་བཞུགས་ཏེ་འཚོ་ཞིང་གཞེས་སོ། །དེ་ནས་ཚེ་དང་ལྡན་པ་སྒྲ་གཅན་ཟིན་དེ་བཞིན་གཤེགས་པ་དེད་དཔོན་ག་ལ་པ་དེར་སོང་སྟེ་ཕྱིན་པ་དང་དེ་བཞིན་གཤེགས་པ་དེད་དཔོན་གྱི་ཞབས་ལ་ཕྱག་འཚལ་ནས་གདོང་མཆི་མ་ཅན་དུ་དུས་ཏེ། སྨྲེ་སྔགས་འདོན་ཞིང་ཕྱོགས་གཅིག་ཏུ་འདུག་གོ། ཕྱོགས་གཅིག་ཏུ་འདུག་པ་དང ། ཚེ་དང་ལྡན་པ་སྒྲ་གཅན་ཟིན་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེད་དཔོན་གྱིས་འདི་སྐད་ཅེས་བཀའ་སྩལ་ཏོ། །སྒྲ་གཅན་ཟིན། ཐོང ། མི་དགར་མ་བྱེད། མྱ་ངན་མ་བྱེད། སྨྲེ་སྔགས་མ་འདོན་ཅིག། སྒྲ་གཅན་ཟིན། སྐྱེ་བའི་ཆོས་ཅན་མི་སྐྱེ་བ་དང ། རྒ་བའི་ཆོས་ཅན་མི་རྒ་བ་དང ། ན་བའི་ཆོས་ཅན་མི་ན་བ་དང ། འཆི་པའི་ཆོས་ཅན་མི་འཆི་བ་དང ། ཟད་པའི་ཆོས་ཅན་མི་ཟད་པར་འགྱུར་པ་དེ་ལྟ་བུ་ག་ལ་ཡོད། སྒྲ་
115b
གཅན་ཟིན། དེ་ལྟར་བུའི་གནས་དཀོན་ནོ། །སྒྲ་གཅན་ཟིན། སྔོན་གྱི་སངས་རྒྱས་དང་སངས་རྒྱས་ཀྱི་ཉན་ཐོས་ཐམས་ཅད་ཀྱང་ཞི་ཞིང་བྲལ་ཏེ་ཡོངས་སུ་མྱ་ངན་ལས་འདས་སོ། །མ་འོངས་པའི་སངས་རྒྱས་བཅོམ་ལྡན་འདས་དང་ཉན་ཐོས་དང་རང་སངས་རྒྱས་ཐམས་ཅད་ཀྱང་ཡོངས་སུ་མྱ་ངན་ལས་འདའ་བར་འགྱུར་རོ། །གང་དག་ད་ལྟར་བཞུགས་པའི་དེ་བཞིན་གཤེགས་པ་དང་ཉན་ཐོས་དང་རང་སངས་རྒྱས་དེ་དག་ཐམས་ཅད་ཀྱང་ཡོངས་སུ་མྱ་ངན་ལས་འདའོ། །སྒྲ་གཅན་ཟིན། བསྐལ་པའམ་བསྐལ་པ་བརྒྱར་གནས་པའང་ངེས་པར་ཡོངས་སུ་མྱ་ངན་ལས་འདའ་དགོས་སོ། །སྒྲ་གཅན་ཟིན། སངས་རྒྱས་བཅོམ་ལྡན་འདས་རྣམས་ལ་ཤིན་ཏུ་རྣམ་པར་ཞི་པ་མ་གཏོགས་པར་ཆོས་ཉིད་གཞན་མེད། གནས་མེད་དོ། །སྒྲ་གཅན་ཟིན། ཤིན་ཏུ་རྣམ་པར་ཞི་བ་ཞེས་བྱ་བ་ནི་ཤིན་ཏུ་ཞི་བ། ཤིན་ཏུ་བསིལ་བར་གྱུར་པ། ཤིན་ཏུ་མཐར་ཐུག་པ། ཤིན་ཏུ་བདེ་བ། ཤིན་ཏུ་གྲུབ་པ་དང་བདེ་བ་སྟེ། འདི་ལྟ་སྟེ། གཞི་མེད་པ་མྱ་ངན་ལས་འདས་པའི་དབྱིངས་སོ། །སྒྲ་གཅན་ཟིན། སྐྱེ་བ་སྡུག་བསྔལ། རྒ་པ་སྡུག་བསྔལ། ན་བ་སྡུག་བསྔལ། འཆི་བ་སྡུག་བསྔལ། ཡང་དང་ཡང་མཛའ་བ་དང་བྲལ་བ་སྡུག་བསྔལ། མི་མཛའ་བ་དང ། འགྲོགས་པ་སྡུག་བསྔལ། ཕུང་པོའི་ཁུར་ཐོགས་པ་སྡུག་བསྔལ་ལོ། །སྒྲ་གཅན་ཟིན། གང་གདག་ཉོངས་སུ་མྱ་ངན་ལས་འདས་པ་དེ་དག་
116a
༄#། །ནི་བདེ་བ་ཡིན་གྱི། སྒྲ་གཅན་ཟིན་ཁྱོད་ཀྱང་ཡོངས་སུ་མྱ་ངན་ལས་འདའ་བར་གྱིས་ཤིག། བཅོམ་ལྡན་འདས། དེ་བཞིན་གཤེགས་པ་ཤཱཀྱ་ཐུབ་པ་དེའང་ཡོངས་སུ་མྱ་ངན་ལས་འདའ་བར་འགྱུར་ཏེ། གང་ན་སྐྱེ་བ་མེད། །རྒ་བ་མེད། ན་བ་མེད། འཆི་བ་མེད། མཛའ་བ་དང་བྲལ་བ་མེད། མི་མཛའ་བ་དང་ཕྲད་བ་མེད། སྡུག་བསྔལ་བ་དང་ཡིད་མི་བདེ་བ་མེད་པ་དེར་ཁྱོད་གཉིས་ཀ་འདོད་བར་གྱུར་གྱི། །སྒྲ་གཅན་ཟིན། །ཁྱོད་མི་དགར་མ་བྱེད། མྱ་ངན་མ་བྱེད། སྨྲེ་སྔགས་མ་འདོན་ཅིག་།སྒྲ་གཅན་ཟིན། ཆོས་ཉིད་རྗེས་སུ་དྲན་པར་གྱིས་ཤིག། ཡང་དག་པ་མ་ཡིན་པ་ཕྱིན་ཅི་ལོག་ཏུ་འཛིན་པ་མ་གཏོགས་པར་འདི་ལ་སྐྱེ་བ་གང་ཡིན། །འདི་ལ་རྒ་བ་གང་ཡིན། །འདི་ལ་འཆི་བ་གང་ཡིན། འཕོ་བ་གང་ཡིན། །འབྱུང་བ་གང་ཡིན། །སྒྲ་གཅན་ཟིན། བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ། འཕགས་པའི་ཆོས་རྣམས་མ་མཐོང་བ། འཕགས་པའི་ཆོས་རྣམས་མ་བསླབས་པ། འཕགས་པའི་ཆོས་རྣམས་ལ་མི་མཁས་པ། འཕགས་པའི་ཆོས་རྣམས་ལ་མི་གནས་པ། འཕགས་པའི་ཆོས་རྣམས་ཀྱིས་མ་དུལ་བ། འཕགས་པའི་ཆོས་རྣམས་མ་ཤེས་པའི་ཕྱིར་འདུ་ཤེས་ཕྱིན་ཅི་ལོག་དང ། ལྟ་བ་ཕྱིན་ཅི་ལོག་ཏུ་ཕྱིན་ཅི་ལོག་པས་སྐྱེ་བ་དང ། རྒ་བ་དང ། ན་བ་དང ། འཆི་བ་དང །
116b
འཕོ་བ་དང ། འབྱུང་བ་དང ། ཀུན་ཏུ་རྒྱུག་པ་དང ། འཁོར་བ་དང ། རྣམ་པར་བརྐམ་པ་དང ། རྒུད་པ་དང ། མི་དགའ་བ་དང ། མྱ་ངན་དང ། སྨྲེ་སྔགས་འདོན་པ་དང ། བྲང་རྡུང་བར་འགྱུར་རོ། །སྒྲ་གཅན་ཟིན། འཕགས་པའི་ཆོས་འདུལ་བ་འདི་ལ་ནི་འདུ་བྱེད་ཐམས་ཅད་རྣམ་པར་ཞི་བས་ཕྱིས་གོང་དུ་བྱ་བ་ཅིའང་མེད་དོ། །སྒྲ་གཅན་ཟིན། །སྟོན་པའི་ཉན་ཐོས་བཅོམ་ལྡན་འདས་ཀྱི་སྲས་ཀྱིས་གང་བྱ་བ་དེ་ཁྱོད་ཀྱིས་བྱས་ཟིན་ཏོ། །སྒྲ་གཅན་ཟིན། །སྟོན་པ་བཅོམ་ལྡན་འདས་ཀྱིས་ཀྱང་ཉན་ཐོས་རྣམས་ཀྱི་བྱ་བ་གང་ཡིན་པ་དེ་མཛད་ཟིན་ཏེ། ད་གོང་དུ་མཛད་པ་མེད་ཀྱི། སྒྲ་གཅན་ཟིན་ཁྱོད་ད་མྱ་ངན་མ་བྱེད། མི་དགར་མ་བྱེད། །སྨྲེ་སྔགས་མ་འདོན་པར་སྒྲ་གཅན་ཟིན་ཁྱོད་བཅོམ་ལྡན་འདས་ཤཱཀྱ་ཐུབ་པ། ཤཱཀྱའི་རྒྱལ་པོ་ཆེན་པོ་དེ་ལ་ཐ་མར་བལྟ་བ་དང་ཕྱག་བྱ་བ་དང་བསྙེན་བཀུར་བྱ་བའི་ཕྱིར་སོང་ཞིག་།ཕྱིས་འགྱོད་པར་གྱུར་ཏ་རེ། སྒྲ་གཅན་ཟིན། དེ་བཞིན་གཤེགས་པ་ཤཱཀྱ་ཐུབ་པ་དེ་དེ་ལྟར་གྱད་རྣམས་ཉེ་བར་གནས་པ་ཤིང་སཱ་ལའི་ཚལ་ན་སེང་གེ་ལྟར་གློ་གཡས་པས་མནལ་བ་མཛད་དེ་ཁྱོད་ཀྱང་གཟིགས་པར་བཞེད་ཀྱི། སྒྲ་གཅན་ཟིན་ཁྱོད་ངེས་པར་དེ་ན་འདུག་དགོས་སོ། །དེ་སྐད་ཅེས་བཀའ་སྩལ་བ་དང ། བཅོམ་ལྡན་འདས་དེ་བཞིན་གཤེགས་པ་དེད་དཔོན་ལ་ཚེ་དང་ལྡན་བ་སྒྲ་གཅན་ཟིན་གྱིས་འདི་སྐད་ཅེས་གསོལ་ཏོ། །གང་བཅོམ་ལྡན་
117a
༄#། །འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱ་ཀྱ་ཐུབ་པ་ཡོངས་སུ་མྱ་ངན་ལས་འདའོ་ཞེས་བགྱི་བའི་སྒྲ་དེ་ལྟ་བུའང་བདག་ཐོས་པར་མི་སྤྲོ་ན། བཅོམ་ལྡན་འདས་དེ་ཡོངས་སུ་མྱ་ངན་ལས་འདའ་བ་མཐོང་བ་ལྟ་སྨོས་ཀྱང་ཅི་འཚལ། །བཅོམ་ལྡན་འདས། གང་བཅོམ་ལྡན་འདས་ཤཱཀྱ་ཐུབ་པ་ཤཱཀྱའི་རྒྱལ་པོ་དེ་ཡོངས་སུ་མྱ་ངན་ལས་འདའོ་ཞེས་བགྱི་བའི་སྒྲ་དེ་ལྟ་བུ་དེ་ཐོས་པས་བདག་ལུས་དུབ་པར་གྱུར་ཏོ། བཅོམ་ལྡན་འདས། སེམས་ཅན་རིན་པོ་ཆེ་འཇིག་རྟེན་ཐམས་ཅད་ལ་ཕན་པར་བཞེད་པ། འཇིག་རྟེན་ཐམས་ཅད་ལ་ཕན་པ་དང་ཐུགས་བརྩེ་བ། འཇིག་རྟེན་ཐམས་ཅད་ཀྱི་སྒྲོན་མ། འཇིག་རྟེན་ཐམས་ཅད་དང་མི་མཚུངས་པ།་འཇིག་རྟེན་ཐམས་ཅད་ཀྱི་འོད་མཛད་པ། འཇིག་རྟེན་ཐམས་ཅད་ཀྱི་མིག། ཤེས་རབ་ཀྱི་སྒྲོན་མ་ཆེན་པོས་སྣང་བར་མཛད་པ། དེ་ལྟ་བུ་དང་བདག་སང་ནང་བར་འབྲལ་ཞིང་འབྱེ་བ་དང་མི་འགྲོགས་པར་གྱུར་པ་ཇི་ལྟར་བགྱི། དེ་སྐད་ཅེས་གསོལ་བ་དང ། བཅོམ་ལྡན་འདས་དེ་བཞིན་གཤེགས་པ་དེད་དཔོན་གྱིས་ཚེ་དང་ལྡན་པ་སྒྲ་གཅན་ཟིན་ལ་འདི་སྐད་ཅེས་བཀའ་སྩལ་ཏོ། །སྒྲ་གཅན་ཟིན། ཐོང ། སྨྲེ་སྔགས་མ་འདོན། སྒྲ་གཅན་ཟིན། བཅོམ་ལྡན་འདས་དེས་འདུ་བྱེད་ཐམས་ཅད་མི་རྟག་པ། འདུ་བྱེད་ཐམས་
117b
ཅད་སྡུག་བསྔལ་བ། ཆོས་ཐམས་ཅད་བདག་མེད་པ། མྱ་ངན་ལས་འདས་པ་ཞི་བའོ་ཞེས་ཐོག་མ་ཉིད་དུ་ཆོས་མ་བསྟན་ཏམ། །སྒྲ་གཅན་ཟིན། བཅོམ་ལྡན་འདས་དེས། འདུ་བྱེད་ཐམས་ཅད་མི་རྟག་སྟེ། སྐྱེ་ཞིང་འཇིག་པའི་ཆོས་ཅན་ཡིན། སྐྱེས་ནས་འགག་པར་འགྱུར་བ་སྟེ། དེ་དག་རྣམ་པར་ཞི་བ་བདེ། །ཞེས་བྱ་བ་དེ་སྐད་ཀྱང་གསུངས་སོ། །གསོལ་པ། །བཅོམ་ལྡན་འདས། དེ་ལྟ་ལགས་སོ། །བདེ་བར་གཤེགས་པ། དེ་ལྟ་ལགས་སོ། །བཅོམ་ལྡན་འདས་ཀྱིས་བཀའ་སྩལ་བ། བཅོམ་ལྡན་འདས་དེས་སྡུག་པ་དང་ཡིད་དུ་འོང་བ་ཐམས་ཅད་དང་ཐ་དད་དུ་འགྱུར་ཞིང ། འགྱེས་པ་དང་འབྲལ་བ་དང ། འབྱེད་པར་འགྱུར་བ་དང ། ཇི་སྲིད་ཡུན་རིང་དུ་གནས་ཀྱང་ངེས་པར་ཉམས་པར་འགྱུར་རོ་ཞེས་ཐོག་མ་ཉིད་ཏུ་མ་བསྟན་ཏམ། གསོལ་པ། བཅོམ་ལྡན་འདས། དེ་ལྟ་ལགས་སོ། དེ་བར་གཤེགས་པ། དེ་ལྟ་ལགས་སོ། །བཀའ་སྩལ་བ། སྒྲ་གཅན་ཟིན། །གང་སྐྱེས་ཤིང་བྱུང་བ། འདུས་བྱས་པ། བསམས་པ། ཀུན་ཏུ་རྟོག་པ་ལས་བྱུང་བ། རྟེན་ཅིང་འབྲེལ་པར་བྱུང་བ་དེ་དག་འཇིག་པར་མི་འགྱུར་བ་དེ་ག་ལ་ཡོད་དེ། དེའི་གནས་མེད་དོ། །དེ་ནས་ཚེ་དང་ལྡན་པ་སྒྲ་གཅན་ཟིན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡབ་ཤཱཀྱ་ཐུབ་པ་དེ་རྗེས་སུ་དྲན་ནས་ཆོས་ཀྱི་ཤུགས་ཀྱིས་མཆི་མ་བྱུང་བར་
118a
༄#། །གྱུར་ཏོ། །བདག་སང་ནང་བར་བཅོམ་ལྡན་འདས་དགེ་སློང་གི་དགེ་འདུན་གྱིས་མདུན་དུ་བདར་ཅིང་ཆོས་སྟོང་པ་མི་མཐོང་ངོ ། རིའི་རྒྱལ་པོ་རི་རབ་རྒྱ་མཚོའི་ནང་ནས་མངོན་པར་བྱུང་ཞིང་ལྷག་གེར་སྣང་བ་ལྟ་བུ། །ཟླ་བ་ཉ་བ་སྐར་མས་ཡོངས་སུ་བསྐོར་བ་ལྟར་མཚོན་བརྒྱས་བརྒྱན་པ། ཉི་མ་འོད་སྟོང་དང་ལྡན་པ་ནམ་མཁའ་ལ་ཐལ་ལེར་སྣང་བ་ལྟ་བུ། རྒྱ་མཚོ་ལྟར་ཟབ་ཅིང་ཚད་མེད་ལ་རིན་པོ་ཆེ་དུ་མའི་ཚོགས་ཡོད་པ། འཁོར་ལོས་བསྒྱུར་བའི་རྒྱལ་པོ་ལྟར་འཁོར་དུ་མས་ཡོངས་སུ་བསྐོར་བ། གངས་རིའི་རྒྱལ་པོ་ལྟར་དབང་པོ་དང ། སྟོབས་དང ། བྱང་ཆུབ་ཀྱི་ཡན་ལག་གི་མེ་ཏོག་ཀུན་ཏུ་རྒྱས་པ། རི་ཁོར་ཡུག་ཆེན་པོ་ལྟར་ཕས་ཀྱི་རྒོལ་བ་ཐམས་ཅད་ཀྱིས་རབ་ཏུ་མི་གཡོས་པ། པདྨ་ལྟར་མཚོའི་ནང་ན་འདུག་ཀྱང་འཇིག་རྟེན་གྱི་ཆོས་ཐམས་ཅད་ཀྱིས་མ་གོས་པ། ཚངས་པའི་འཁོར་གྱི་ནང་ན་ཚངས་པ་ལྟ་བུ། བརྒྱ་བྱིན་མིག་སྟོང་དང་ལྡན་པ་ལྟར་སེང་གེའི་གདན་ལ་བཞུགས་པ། སེང་གེ་ལྟར་འཇིགས་ཤིང་སྐྲག་པ་མེད་པར་སེང་གེའི་སྒྲ་ཡང་དག་པར་སྒྲོགས་པ་ཕྱིན་ཆད་བདག་གིས་མི་མཐོང་ངོ་ཞེས་ཚེ་དང་ལྡན་པ་སྒྲ་གཅན་ཟིན་གྱིས་དེ་སྐད་སྨྲས་ནས་དུ་ཞིང་སེམས་ཁང་དུ་ཆུད་དེ་ཅང་མི་སྨྲ་བར་འདུག་གོ། །དེ་ནས་དེ་བཞིན་གཤེགས་པ་དེད་དཔོན་གྱིས་ཚེ་དང་ལྡན་པ་སྒྲ་གཅན་
118b
ཟིན་ལ་འདི་སྐད་ཅེས་བཀའ་སྩལ་ཏོ། །སྒྲ་གཅན་ཟིན་ཁྱོད་བཅོམ་ལྡན་འདས་དེའི་དྲུང་དུ་སོང་ཞིག། །བཅོམ་ལྡན་འདས་དེ་ཁྱོད་གཟིགས་པར་བཞེད་ཀྱི། སྒྲ་གཅན་ཟིན་ཁྱོད་ངའི་ངག་མ་གཅོག་པར་སོང་ཞིག། བཅོམ་ལྡན་འདས་དེའི་སྐུའོ་བརྒྱལ་བར་མ་བྱེད། སྒྲ་གཅན་ཟིན་ཁྱོད་ངེས་པར་དེ་ན་འདུག་དགོས་སོ། །དེ་ཅིའི་ཕྱིར་ཞེ་ན། སྒྲ་གཅན་ཟིན། སངས་རྒྱས་བཅོམ་ལྡན་འདས་རྣམས་ཆོས་ཉིད་ཀྱིས་དེ་བཞིན་གཤེགས་པ་བྱམས་པས་ཁྱབ་པར་མཛད་པ་དང ། གང་དགོངས་པར་མཛད་པ་དང ། གང་ཞིག་བཞེད་ན་དེ་དག་ངེས་པར་ཡོངས་སུ་མྱ་ངན་ལས་མི་འདའ་སྟེ། དེའི་ཚེ་དེ་དག་ངེས་པར་བཞུགས་པར་འགྱུར་རོ། །སྒྲ་གཅན་ཟིན། །དེ་བཞིན་གཤེགས་པ་དེ་ཁྱོད་གཟིགས་པར་བཞེད་ཀྱི། སོང་ལ་ཁྱོད་ངེས་པར་དེ་ན་གནས་པར་གྱིས་ཤིག་།དེ་ནས་ཚེ་དང་ལྡན་པ་སྒྲ་གཅན་ཟིན་གྱིས་བཅོམ་ལྡན་འདས་དེ་བཞིན་གཤེགས་པ་དེད་དཔོན་གྱི་ཞབས་ལ་མགོ་བོས་ཕྲག་བཙལ་ནས། འདི་ལྟ་སྟེ། དཔེར་ན། སྐྱེས་བུ་སྟོབས་དང་ལྡན་པའི་ལག་པ་བསྐུམ་པ་ལས་བརྐྱང་བའམ། བརྐྱང་བ་ལས་བསྐུམ་པ་དེ་བཞིན་དུ་ཚེ་དང་ལྡན་པ་སྒྲ་གཅན་ཟིན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེད་དཔོན་གྱི་སངས་རྒྱས་ཀྱི་ཞིང་ནས་མི་སྣང་བར་གྱུར་ཏེ།
119a
༄#། །ཀུ་ཤའི་གྲོང་ཁྱེར་གྱད་རྣམས་ཉེ་བར་གནས་པའི་ཤིང་སཱ་ལའི་ཚལ་ཤིང་སཱ་ལ་ཟུང་གི་བར་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་ལན་གསུམ་བསྐོར་བ་བྱས་ཏེ་ངུ་ཞིང་སྨྲེ་སྔགས་འདོན། །མཆི་མ་བྱུང་བཞིན་དུ་ཐལ་མོ་སྦྱར་ཏེ་ཕྱོགས་གཅིག་ཏུ་འདུག་གོ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་སྒྲ་གཅན་ཟིན་ལ་འདི་སྐད་ཅེས་བཀའ་སྩལ་ཏོ། སྒྲ་གཅན་ཟིན། ཚུར་ཤོག། སྒྲ་གཅན་ཟིན་ཁྱོད་མི་དགར་མ་བྱེད། མ་ངུ ། སྨྲེ་སྔགས་མ་འདོན། ཡི་མ་འཆད་ཅིག་།སྒྲ་གཅན་ཟིན་ཁྱོད་ཀྱིས་ང་ལ་ཕའི་བྱ་བ་བྱས། ངས་ཀྱང་བུ་ཁྱོད་ལ་བུའི་བྱ་བ་བྱས་སོ། །སྒྲ་གཅན་ཟིན། །དེ་ལྟར་ངས་པའི་བྱ་བ་བྱས། ཁྱོད་ཀྱིས་ཀྱང་བུའི་བྱ་བ་བྱས་ཏེ། བདག་ཅག་གཉིས་ཀས་ཀྱང་བྱ་བ་བྱས་ཤིང་བྱེད་པ་བྱས་ཟིན་གྱི། སྒྲ་གཅན་ཟིན་ཁྱོད་མྱ་ངན་མ་བྱེད། སྨྲེ་སྔགས་མ་འདོན། ཡི་མ་འཆད་ཅིག ། སྒྲ་གཅན་ཟིན། བདག་ཅག་གཉིས་སེམས་ཅན་ཐམས་ཅད་འཇིགས་པ་མེད་པར་བྱ་བའི་ཕྱིར་ཞུགས་པ་དང་ཁོ་ན་མེད་པ་དང ། འགྲན་ཟླ་མེད་པ་དང ། རྣམ་པར་མཐོ་འཚམས་པ་མེད་པ་དང ། རྣམ་པར་འཚེ་བ་མེད་པར་ཞུགས་པ་ལ་ལྟོས། དའང་ང་ནི་ཡོངས་སུ་མྱ་ངན་ལས་འདའ་བར་བྱ་བའི་ཕྱིར་གནས་ཏེ་ཕྱིན་ཆད་སུའི་ཕར་
119b
ཡང་མ་འགྱུར་རོ། །སྒྲ་གཅན་ཟིན་ཁྱོད་ཀྱང་ཡོངས་སུ་མྱ་ངན་ལས་འདས་ན་ཕྱིན་ཆད་སུའི་བུར་ཡང་མི་འགྱུར་རོ། །སྒྲ་གཅན་ཟིན། བདག་ཅག་གཉིས་སེམས་ཅན་ཐམས་ཅད་ལ་རྣམ་པར་འཚེ་བ་མེད་པ་དང་མི་མཐུན་པ་མེད་པར་གནས་པ་ལ་ལྟོས། དེ་ནས་ཚེ་དང་ལྡན་པ་སྒྲ་གཅན་ཟིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཡོངས་སུ་མྱ་ངན་ལས་མི་འདར་གསོལ། བདེ་བར་གཤེགས་པ། །ཡོངས་སུ་མྱ་ངན་ལས་མི་འདར་གསོལ། །བཅོམ་ལྡན་འདས་སྐྱེ་བོ་མང་པོ་ལ་སྨན་པ་དང་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། ལྷ་དང་མི་རྣམས་ཀྱི་དོན་དང ། ཕན་པ་དང་བདེ་བའི་སླད་དུ་བསྐལ་བར་བཞུགས་སུ་གསོ། །དེ་སྐད་ཅེས་གསོལ་བ་དང ། བཅོམ་ལྡན་འདས་ཀྱིས་ཚེ་དང་ལྡན་པ་སྒྲ་གཅན་ཟིན་ལ་འདི་སྐད་ཅེས་བཀའ་སྩལ་ཏོ། །སྒྲ་གཅན་ཟིན། ཆོས་གང་དག་དང་ལྡན་ན་འཇིག་རྟེན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་གྲངས་སུ་འགྲོ་བའི་ཆོས་དེ་དག་སྒྲ་གཅན་ཟིན་ཟད་པའམ་རྙིངས་པའམ། སྐྱེ་བའམ། འགྲོ་བའམ། འོང་བའམ། འབྱུང་བའམ། འགག་པའམ། སྲིད་པའམ། འཇིག་པའམ། གནས་པའམ། འདུག་པའམ། ཉལ་བའམ། ལྡན་པའམ། མི་ལྡན་པར་མི་འགྱུར་རོ། །དེ་ཅིའི་ཕྱིར་ཞེ་ན། སྒྲ་གཅན་ཟིན། །ཆོས་དེ་ནི་གནས་པ་སྟེ། ཤིན་ཏུ་མི་འབྱུང་
120a
༄#། །བ། ཤིན་ཏུ་མི་སྐྱེ་བ། ཤིན་ཏུ་མི་འགག་པ། ཤིན་ཏུ་སྟོང་པ། ཤིན་ཏུ་སྐྱེ་བ་མེད་པ། ཤིན་ཏུ་ངོ་བོ་ཉིད་མེད་པ། ཉེ་བར་ཞི་བ། གྲངས་མེད་པ། གཞི་མེད་པ། བརྗོད་དུ་མེད་པ། ངག་གི་ལམ་མ་ཡིན་པའོ། །སྒྲ་གཅན་ཟིན་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ། །འདི་ལྟར་སྟེ། ཤིན་ཏུ་གནས་པ་ཉིད་དང ། ཉེ་བར་ཞི་བ་ཉིད་དང ། ཤིན་ཏུ་དཔེན་པ་ཉིད་དང ། ཤིན་ཏུ་འདོད་ཆགས་དང་བྲལ་བ་ཉིད་དང ། ཤིན་ཏུ་འགགས་པ་ཉིད་དང ། ཤིན་ཏུ་མ་འདྲེས་པ་ཉིད་དང ། ཤིན་ཏུ་མ་བྱས་པ་ཉིད་དང ། ཤིན་ཏུ་མི་ཟད་པ་ཉིད་དེ། སྒྲ་གཅན་ཟིན། ངས་འདི་ལ་དགོངས་ནས་འདི་སྐད་དུ་དེ་བཞིན་གཤེགས་པ་རྣམས་བྱུང་ཡང་རུང ། དེ་བཞིན་གཤེགས་པ་རྣམས་མ་བྱུང་ཡང་རུང་སྟེ། ཆོས་རྣམས་ཀྱི་ཆོས་གནས་པ་ཉིད་དང ། ཆོས་ཉིད་དང ། ཆོས་ངེས་པ་ཉིད་དང ། ཆོས་འདོད་ཆགས་དང་བྲལ་བ་ཉིད་དང ། ཆོས་ཀྱི་ངོ་བོ་ཉིད་ནི་གནས་པ་ཉིད་དོ་ཞེས་བཤད་དོ། །སྒྲ་གཅན་ཟིན། དེ་བཞིན་གཤེགས་པ་ནི་ཚུལ་ཁྲིམས་ཀྱི་ཕུང་པོ་བསྣམས་ཏེ་ཡོངས་སུ་མྱ་ངན་ལས་མི་འདའ། ཏིང་ངེ་འཛིན་གྱི་ཕུང་པོ་མ་ཡིན། ཤེས་རབ་ཀྱི་ཕུང་པོ་མ་ཡིན། རྣམ་པར་གྲོལ་བའི་ཕུང་པོ་མ་ཡིན། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་བསྣམས་ཏེ་ཡོངས་སུ་མྱ་ངན་ལས་མི་འདའི། སྒྲ་གཅན་
120b
ཟིན་ཁྱོད་མི་དགར་མ་བྱེད་ཅིག་།སྨྲེ་སྔགས་མ་འདོན། ཡི་འཆད་པ་མ་སྐྱེད་ཅིག་།སྒྲ་གཅན་ཟིན། འདུ་བྱེད་ཐམས་ཅད་ནི་མི་རྟག་པ། མི་བརྟན་པ། གཟུགས་འཕྱིན་པ་མེད་པ། ཐེར་ཟུག་མ་ཡིན་པ། ཟད་ཅིང་འགྱུར་བའི་ཆོས་ཅན་ཡིན་ཏེ། སྒྲ་གཅན་ཟིན། དེ་བས་ན་འདུ་བྱེད་ཐམས་ཅད་ལ་ཡིད་བྱུང་བར་བྱ་བའི་རིགས། མཆགས་པར་བྱ་བའི་རིགས། རྣམ་པར་གྲོལ་བར་བྱ་བའི་རིགས་ཏེ། སྒྲ་གཅན་ཟིན། །འདི་ནི་ཁྱོད་ལ་རྗེས་སུ་བསྟན་པའོ། །སྒྲ་གཅན་ཟིན་ལ་བདེན་པ་མཐོང་བའི་ལེའི་འདི་བཅོམ་ལྡན་འདས་ཀྱིས་བཀའ་སྩལ་པ་ཀུན་ཏུ་ཤེས་ནས་དགེ་སློང་གནས་བརྟན་དྲུག་ཅུ་ཙམ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །ལྷ་དང་མི་ཚད་མེད་པ་དག་ཆོས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །བྱང་ཆུབ་སེམས་དཔའ་དྲུག་ཁྲི་བརྒྱད་སྟོང་གིས་ནི་མི་སྐྱེ་བའི་ཆོས་ལ་བཟོད་པ་ཐོབ་སྟེ། ཐམས་ཅད་ཀྱང ། ཀྱེ་མའོ་སངས་རྒྱས་ཀྱ་མའོ་སངས་རྒྱས། ཀྱེ་མའོ་སངས་རྒྱས་ཀྱི་ཆོས་བསམ་གྱིས་མི་ཁྱབ་བོ་ཞེས་ཆེད་དུ་བརྗོད་པ་ཆེད་དུ་བརྗོད་ཅིང ། དེ་དག་གིས་བཅོམ་ལྡན་འདས་ལ་མེ་ཏོག་ཨུཏྤལ་དང ། པདྨ་དང ། ཀུ་མུ་ད་དང ། པདྨ་དཀར་པོ་རྣམས་ཀྱིས་གཏོར། མངོན་པར་གཏོར་ནས་ཚིག་འདི་སྐད་ཅེས་བདག་ཅག་ཀྱང་མ་འོངས་པའི་དུས་ན་སྟོན་པ་འདི་ལྟ་བུ་འཇིག་རྟེན་དུ་
121a
༄#། །འབྱུང་བར་གྱུར་ཅིག། འདི་ལྟར་ཆོས་སྟོན་པར་གྱུར་ཅིག། བླ་ན་མེད་པ་འཇིག་རྟེན་ཐམས་ཅད་དང་མི་འདྲ་བའི་ཡོངས་སུ་མྱ་ངན་ལས་འདའ་བ། སངས་རྒྱས་ཀྱི་ཡོངས་སུ་མྱ་ངན་ལས་འདའ་བ་ཆེན་པོ་འདི་ལྟ་བུས་ཡོངས་སུ་མྱ་ངན་ལས་འདའ་བར་གྱུར་ཅིག་ཅེས་སྨྲས་སོ། །དེ་སྐད་ཅེས་སྨྲས་ནས་བྱང་ཆུབ་སེམས་དཔའ་དེ་དག་ཅང་མི་སྨྲ་བར་གྱུར་ཏོ། །སྒྲ་གཅན་ཟིན་གྱི་ལེའུ་སྟེ་བཞི་པ་རྫོགས་སོ།། །།བམ་པོ་གསུམ་པ། དེའི་ཚེ་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་ཕང་ན་གཟིམས་ཁྲི་ལ་བསྙེས་ནས་དུས་ཏེ་མཆི་མ་བྱུང ། སྨྲེ་སྔགས་འདོན་ཅིང་འདུག་གོ། དེ་ནས་ཚེ་དང་ལྡན་པ་ཀུན་དགའ་བོ་མཆི་མ་ཟག་པར་དུ་ཞིང་ཤིང་ལྗོན་པ་ཆེན་པོ་བཅད་དེ་བསྒྱེལ་བ་བཞིན་དུ་ས་ལ་འགྱེལ་ཏེ། བཅོམ་ལྡན་འདས། ཡོངས་སུ་མྱ་ངན་ལས་འདའ་བ་ཧ་ཅང་མྱུར་ཆེས་སོ། །བདེ་བར་གཤེགས་པ། ཡོངས་སུ་མྱ་ངན་ལས་འདའ་བ་ཧ་ཅང་མྱུར་ཆེས་སོ། །ཐུགས་རྗེ་ཅན། མི་བཞུགས་པར་འགྱུར་བ་ཧ་ཅང་མྱུར་ཆེས་སོ། །སེམས་ཅན་རིན་པོ་ཆེ། མི་བཞུགས་པར་འགྱུར་བ་ཧ་ཅང་མྱུར་ཆེས་སོ། །མར་མེ་ཆེན་པོ། འཇིག་རྟེན་ན་མི་སྣང་བར་འགྱུར་བ་ཧ་ཅང་མྱུར་ཆེས་སོ། །སྒྲོན་མ་ཆེན་པོ། འཇིག་རྟེན་ན་མི་སྣང་བར་འགྱུར་བ་ཧ་ཅང་མྱུར་ཆེས་སོ། །
121b
འཇིག་རྟེན་གྱི་མཆོག་།འཇིག་རྟེན་ན་འགག་པར་འགྱུར་བ་ཧ་ཅང་མྱུར་ཆེས་སོ། །སེམས་ཅན་རིན་པོ་ཆེ། སེམས་ཅན་པདྨ་དཀར་པོ། འཇིག་རྟེན་ན་མི་སྣང་བར་འགྱུར་བ་ཧ་ཅང་མྱུར་ཆེས་སོ། །སེམས་ཅན་ཅང་ཤེས་པ། སེམས་ཅན་དུལ་བ། སེམས་ཅན་མ་དུལ་བ་འདུལ་བ། འཇིག་རྟེན་ན་མེད་པར་འགྱུར་བ་ཧ་ཅང་མྱུར་ཆེས་སོ། །དེད་དཔོན་སྟོན་པ་པོ། བདེ་བའི་ལམ་སྟོན་པ། འཇིག་རྟེན་ན་མི་སྣང་བར་འགྱུར་བ་ཧ་ཅང་མྱུར་ཆེས་སོ། །མིག་ཆེན་པོ། ཤེས་རབ་ཀྱི་སྣང་བ་སྟོན་པ། འཇིག་རྟེན་ན་མི་སྣང་བར་འགྱུར་བ་ཧ་ཅང་མྱུར་ཆེས་སོ། །སེམས་ཅན་རྣམས་ཀྱི་ཕ་མ། འཇིག་རྟེན་ན་མི་སྣང་བར་འགྱུར་བ་ཧ་ཅང་མྱུར་ཆེས་སོ། །འཇིག་རྟེན་ན་ལོང་བར་འགྱུར་བ་ཧ་ཅང་མྱུར་ཆེས་སོ། །བཅོམ་ལྡན་འདས། འཇིག་རྟེན་མགོན་མ་མཆིས་པ་དང ། ཡོངས་སུ་འདྲེན་པ་མ་མཆིས་པར་འགྱུར་བ་ཧ་ཅང་མྱུར་ཆེས་སོ། །སང་ནང་པར་ནས་མིང་མཚན་ཙམ་ཞིག་ལུས་ཏེ་སེམས་ཅན་རིན་པོ་ཆེ་མི་མཐོང་བར་འགྱུར་བ་ལྟ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཐོང ། མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། སྡུག་པ་དང ། ཡིད་དུ་འོང་བ་ཐམས་ཅད་དང་ཐ་དད་པར་འགྱུར་ཞིང་འགྱུར་བ་དང ། འབྱེ་བར་འགྱུར་བ་དང ། འབྲལ་བར་འགྱུར་བར་ངས་ཐོག་མ་ནས་མ་བཤད་དམ། ཀུན་དགའ་
122a
༄#། །བོ།་གང་སྐྱེས་པ་བྱུང་བ། འདུས་བྱས་པ། བསམས་པ། རྟེན་ཅིང་འབྲེལ་པར་འབྱུང་བ། འཇིག་པའི་ཆོས་ཅན་དེ་མི་འཇིག་པར་ག་ལ་འགྱུར་ཏེ། དེ་ནི་གནས་མེད་དོ། །དེ་ལྟ་བུར་གྱུར་པ་དག་གནས་ཤིང་མི་སྣང་བར་མི་འགྱུར་པ་དེའི་གནས་མེད་དོ། །ཀུན་དགའ་བོ། ཇི་ལྟར་རིང་དུ་གནས་ཀྱང་ངེས་པར་ཡོངས་སུ་མྱ་ངན་ལས་འདའ་བའི་ཆོས་ཅན་དུ་འགྱུར་རོ། །དེ་བས་ན་ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།དེ་ནས་ཚེ་དང་ལྡན་པ་ཀུན་དགའ་བོ་མིག་མི་འཛུམས་པར་བཅོམ་ལྡན་འདས་ཀྱི་ཞལ་དུ་བལྟས་ནས་ཤིང་ལྗོན་པ་བཅད་དེ་བསྒྱེལ་བ་བཞིན་དུ་ཡང་ས་ལ་འགྱེལ་ཏོ། །བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་ལན་གཉིས་སུ་བཀའ་སྩལ་པ། ཀུན་དགའ་བོ་ཐོང ། མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། དོན་འདི་མྱ་ངན་བྱས་པ་དང ། སྨྲེ་སྔགས་འདོན་པས་རྙེད་པར་སླ་བ་མ་ཡིན་ནོ།། སྡུག་པ་དང ། ཡིད་དུ་འོང་བ་ཐམས་ཅད་དང་ཐ་དད་དུ་འགྱུར་ཞིང་འགྱེས་པར་འགྱུར་བར་ངས་ཐོག་མ་ནས་བཤད་དོ། །འདུ་བྱེད་རྣམས་ཇི་སྲིད་རིང་དུ་གནས་ཀྱང་ངེས་པར་རྣམ་པར་འགྱུར་བའི་ཆོས་ཅན་ཡིན་ནོ། །ཀུན་དགའ་བོ་ཁྱོད་ཀྱིས་དེ་བཞིན་གཤེགས་པ་ལ་བྱམས་པའི་ལུས་ཀྱི་ལས་ཕན་པ་དང ། བདེ་བ་དང ། གཉིས་སུ་མེད་པ་དང །
122b
ཚད་མེད་པ་དང ། ཁོན་མེད་པ་དང ། འགྲན་ཟླ་མེད་པ་དང ། བྱམས་པའི་ངག་གི་ལས་དང ། བྱམས་པའི་ཡིད་ཀྱི་ལས་བདེ་བ་ནས་འགྲན་ཟླ་མེད་པའི་བར་གྱིས་བསྙེན་བཀུར་བྱས་སོ། ། དེ་ནས་ཚེ་དང་ལྡན་པ་ཀུན་དགའ་བོ་ས་ལས་ལངས་ནས་མཆི་མ་ཕྱིས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་སེམས་ཅན་རིན་པོ་ཆེ་དེ་ལྟ་བུ་དང་ཐ་དད་དུ་འགྱུར། བདག་ཐུགས་རྗེ་ཆེན་པོ་འཇིག་རྟེན་ཐམས་ཅད་ལས་འཕགས་པ། འཇིག་རྟེན་ཐམས་ཅད་ལ་ཕན་པར་བཞེད་པ། འཇིག་རྟེན་ཐམས་ཅད་ལ་ཐུགས་བརྩེ་བ་ཅན། འཇིག་རྟེན་ཐམས་ཅད་ལ་གཅེས་པ། འཇིག་རྟེན་ཐམས་ཅད་ཀྱི་སྟོན་པ། འཇིག་རྟེན་ཐམས་ཅད་ཀྱི་ཡོངས་སུ་འདྲེན་པ། འཇིག་རྟེན་ཐམས་ཅད་ལ་ཕན་པ་དང་བདེ་བ་སྦྱིན་པ། སེམས་ཅན་ཆེན་པོ་དེ་ལྟ་བུ་དང་སང་ནང་པར་འབྲལ་ཞིང་ཐ་དད་དུ་འགྱུར་ན་ཅིའི་སླད་དུ་བདག་མྱ་ངན་མི་བགྱིད། སྨྲེ་སྔགས་མི་འདོན། དེ་ནས་ཚེ་དང་ལྡན་པ་ཀུན་དགའ་བོ་མཆི་མ་མང་དུ་ཕྱུང་ནས་མཆི་མ་ཕྱིས་ཏེ་ཡང་ཚིག་འདི་སྐད་སྨྲས་སོ། །ཀྱེ་མའོ་གང་དུ་མར་མེ་ཆེན་པོ། སྒྲོན་མ་ཆེན་པོ། སྣང་བ་ཆེན་པོ་འདི་ལྟ་བུ་འཇིག་རྟེན་ན་མི་སྣང་བར་འགྱུར། ཡེ་ཤེས་ཀྱི་ཉི་མ་ཆེན་པོ་འོད་ཟེར་བྱེ་བ་ཁྲག་ཁྲིག་བརྒྱ་སྟོང་དུ་མས་བསྐོར་བ། ཀུན་ཏུ་འོད་ཀུན་ཏུ་སྣང་བ་ཀུན་ཏུ་ལམ་མེ་བ། ཀུན་ཏུ་འོད་ཟེར་ཀུན་ཏུ་རྟོག་ཀུན་ཏུ་
123a
༄#། །གཟིགས་པ། ཀུན་ཏུ་མཁྱེན་པ་ཀུན་ཏུ་ཤེས་རབ་ཀུན་ཏུ་དྲན་པ་ཀུན་ཏུ་སྤྱོད་ཡུལ་ཀུན་ཏུ་འོད་ཀྱི་སེམས་ཅན་ཤེས་རབ་ཀྱི་སྣང་བ་འདི་ལྟ་བུ་འཇིག་རྟེན་དུ་ནུབ་བར་འགྱུར་པའི་འདུ་བྱེད་རྣམས་ནི་གཡོན་ཅན་ནོ། །བརྙས་ཐབས་ཅན་ནོ། །ཀྱེ་མའོ་འཇིག་རྟེན་ན་འོད་བྱེད་པ་མི་སྣང་བར་འགྱུར་བ་ཧ་ཅང་མྱུར་ཆེས་སོ། །ལྷ་དང་བཅས་པའི་འཇིག་རྟེན་གྱི་མགོན་པོ་མི་སྣང་བར་འགྱུར་བ་ཧ་ཅང་མྱུར་ཆེས་སོ། །ཀྱེ་མའོ་བཅོམ་ལྡན་འདས་ཆོ་འཕྲུལ་དང་བཅས་པ་འཇིག་རྟེན་ན་མི་སྣང་བར་འགྱུར་བ་ཧ་ཅང་ཡང་མྱུར་ཆེས་ན། བཅོམ་ལྡན་འདས། ཅིའི་སླད་དུ་བདག་མྱ་ངན་མི་བགྱིད། བཅོམ་ལྡན་འདས། ཅིའི་སླད་དུ་བདག་སྨྲེ་སྔགས་མི་འདོན། བཅོམ་ལྡན་འདས། བདག་སྙིང་རྣམ་པ་བརྒྱར་མ་གས་པ་ངོ་མཚར་ཆེའོ། །བཅོམ་ལྡན་འདས་ཀྱི་སྤྱན་སྔར་མ་གུམ་པ་ངོ་མཚར་ཆེའོ། །བཅོམ་ལྡན་འདས། བདག་དེ་ལ་འདི་སྙམ་དུ་བཅོམ་ལྡན་འདས་ཀྱི་བྱིན་གྱི་རླབས་ཀྱིས་བདག་མ་གུམ་མོ་སྙམ་བགྱིད་དོ། །དེ་ཅིའི་སླད་དུ། བཅོམ་ལྡན་འདས་ལས་བདག་གིས་གང་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་མངོན་དུ་མ་ནོས། མངོན་དུ་ཀུན་ཏུ་ཆུད་པར་བགྱིས། མངོན་དུ་ཀུན་བཟུང་བ་དེ་དག་ད་དུང་སྐྱེ་བོ་མང་པོ་ལ་ཕན་པར་མ་གྱུར། ཕྱོགས་མང་པོར་རྒྱས་པར་མ་གྱུར་པས། བཅོམ་
123b
ལྡན་འདས། བདག་འདི་སྙམ་དུ་བདག་མ་གུམ་པ་དེ་ནི་བཅོམ་ལྡན་འདས་ཀྱི་མཐུ་ལགས་པ་སྙམ་བགྱིད་དེ། བཅོམ་ལྡན་འདས། བདག་ཅིའི་སླད་དུ་མྱ་ངན་མི་བགྱིད། བཅོམ་ལྡན་འདས། བདག་ཅིའི་སླད་དུ་སྨྲེ་སྔགས་མི་འདོན། བཅོམ་ལྡན་འདས། བདག་གྲོང་ཁྱེར་སེར་སྐྱའི་གནས་སུ་བཅོམ་ལྡན་འདས་བལྟམས་པའི་སར་མཆིས་ནས་ཤཱཀྱ་རྣམས་ཚོགས་པ་ལ་ཤཱཀྱ་ཐུབ་པ་ཤཱཀྱའི་རྒྱལ་པོ་ཤིན་ཏུ་མི་འབྱུང་བར་བཞུགས་སོ་ཞེས་བགྱིའམ་ཇི་སྐད་བགྱི། རྒྱལ་པོའི་ཁབ་ཀྱི་གྲོང་ཁྱེར་དུ་མཆིས་ནས་ལུས་འཕགས་མོའི་བུ་རྒྱལ་པོ་མ་སྐྱེས་དགྲ་ལ་ཡང་དག་པར་རྫོགས་པའི་སངས་རྒྱས་ཉི་མ་ཆེན་པོ་ནུབ་སྟེ་མཚམས་མེད་པའི་ལས་ཀྱི་ཟུག་རྔུ་འབྱིན་པ་སྨན་པའི་རྒྱལ་པོ་ཆེན་པོ་དེ་གཤེགས་ལགས་སོ་ཞེས་བགྱིའམ་ཇི་སྐད་བགྱི། གྲོང་ཁྱེར་ཆེན་པོ་མཉན་ཡོད་དུ་མཆིས་ནས་ཐུགས་རྗེ་ཆེན་པོ་བརྙེས་པ། ཕན་པ་བཞེད་པ། འཇིག་རྟེན་ལ་ཐུགས་བརྩེ་བ་ཅན་དེ་མི་སྣང་བར་གྱུར་ཏོ་ཞེས་བགྱིའམ་ཇི་སྐད་བགྱི། མགོན་མེད་ཟས་སྦྱིན་ལ་དེ་བཞིན་གཤེགས་པ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བར་ཇི་ག་བཞུགས་པར་འགྱུར་རམ་ཞེས་བགྱིའམ་ཇི་སྐད་བགྱི། ཡངས་པའི་གྲོང་ཁྱེར་ཆེན་པོར་མཆིས་ནས་ལི་ཙ་བིའི་ཚོགས་རྣམས་ཀྱི་མདུན་དུ་དེད་དཔོན་ཕན་པར་བཞེད་པ་དེ་ནུབ་པར་གྱུར་ཏོ་ཞེས་བགྱིའམ་
124a
༄#། །ཇི་སྐད་བགྱི། ཕྱོགས་དང་ཕྱོགས་མཚམས་རྣམས་ནས་རིགས་ཀྱི་བུ་དང་རིགས་ཀྱི་བུ་མོ་གང་དག་ཞུ་བ་ཡོངས་སུ་ཞུ་བའི་སླད་དུ་མཆི་བ་དེ་རྣམས་ལ་མཁྱེན་པ་ཆེན་པོ་དང་ལྡན་པ་འཇིག་རྟེན་ཐམས་ཅད་ཀྱི་ཁམས་མཁྱེན་པ། མཁས་པ་ཐེ་ཚོམ་ཞུས་པ་ཐམས་ཅད་སེལ་བདེ་ནུབ་པར་གྱུར་ཏོ་ཞེས་བགྱིའམ་ཇི་སྐད་བགྱི། ཕྱོགས་དང་ཕྱོགས་མཚམས་རྣམས་ནས་དབྱར་གྱི་གནས་སུ་གནས་གནས་པའི་དགེ་སློང་བཅོམ་ལྡན་འདས་ལ་བལྟ་བ་དང ། ཕྱག་འཚལ་བ་དང ། བསྙེན་བཀུར་བགྱི་བ་དང ། ཞུ་བ་དང་བརྟག་པའི་སླད་དུ་མཆི་བ་དེ་རྣམས་ལ་ཆོས་དང་ལྡན་པའི་གཏམ་གསུང་ཞིང་མིའི་ཆོས་བླ་མ་རྟོགས་པ་བཅོམ་ལྡན་འདས་མི་བཞུགས་ན་བདག་གིས་མི་མཐོང་ངོ ། ། མི་ཐོས་སོ། །ཆོ་འཕྲུལ་དང་བཅས་པའི་ཚངས་པར་སྤྱོད་པ་དེ་ལྟ་བུ་འཇིག་རྟེན་ན་མི་སྣང་བར་འགྱུར་ན། བཅོམ་ལྡན་འདས། བདག་ཅིའི་སླད་དུ་མྱ་ངན་མི་བགྱིད། ཅིའི་སླད་དུ་བདག་སྨྲེ་སྔགས་མི་འདོན། དེ་སྐད་ཅེས་གསོལ་བ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཐོང ། །མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། ངའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པར་གྱུར་པ་ལྷ་དང་མི་རྣམས་ལ་རྒྱ་ཆེ་ཞིང་ཡངས་པ་དང ། ལྷ་དང་
124b
བཅས་པའི་འཇིག་རྟེན་གྱིས་མནོས་པ་ཡུན་རིང་དུ་གནས་པར་འགྱུར་རོ། །ཀུན་དགའ་བོ། ང་ཡོངས་སུ་མྱ་ངན་ལས་འདས་ནས་དགེ་སློང་འོད་སྲུང་དང་ཀུན་དགའ་བོ་ཁྱེད་གཉིས་ལོ་བཞི་བཅུ་ལྷག་ཙམ་དུ་ཆོ་འཕྲུལ་དང་བཅས་པའི་ཚངས་པར་སྤྱོད་པ་ལྷ་དང་མིས་སོ་སོར་མནོས་པ་དེ་སྤྱོད་པར་འགྱུར་གྱི། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག། ངའི་དམ་པའི་ཆོས་སྐྱེ་བོ་མང་པོ་ལ་ཕན་པར་གྱུར་པ་ལྷ་དང་མི་རྣམས་ལ་རྒྱ་ཆེ་ཞིང་ཡངས་པར་གྱུར་པ་ཡུན་རིང་དུ་གནས་པར་འགྱུར་རོ། །ཀུན་དགའ་བོ། ང་འདས་ནས་དགེ་སློང་འོད་སྲུང་དང་ཁྱེད་གཉིས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་དག་པར་བསྒྲུབས་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་དང ། ངའི་དགེ་བའི་ཆོས་དཀོན་མཆོག་འདི་རྣམ་པར་འཕེལ་ཞིང་ཡོངས་སུ་མི་ཉམས་པར་བྱ་བའི་ཕྱིར་ཞུགས་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ། དགེ་སློང་འོང་སྲུང་ནི་འདོད་པ་ཆུང་བ། ཆོག་ཤེས་པ། རབ་ཏུ་དབེན་པ། བརྩོན་འགྲུས་བརྩམས་པ། དྲན་པ་ཉེ་བར་བཞག་པ། སྤྲོས་པ་མེད་པ་ལ་དགའ་བ། མཉམ་པར་བཞག་པ། ཤེས་རབ་རྣོ་བའོ། །ཀུན་དགའ་བོ། དགེ་སློང་འོད་སྲུང་ནི་སྐྱེ་བོ་མང་པོ་ལ་ཡང་དག་པར་སྟོན་པ། ཡང་དག་པར་འཛིན་དུ་འཇུག་པ། ཡང་དག་པར་གཟེངས་བསྟོད་པ། ཡང་དག་པར་རབ་ཏུ་དགའ་བར་བྱེད་པ།
125a
༄#། །ཚངས་པ་མཚུངས་པར་སྤྱོད་པ་ཐམས་ཅད་ལ་ཆོས་འཆད་པས་ངལ་བ་མེད་པའོ། །ཀུན་དགའ་བོ། དགེ་སློང་འོད་སྲུང་ནི་འཁོར་བཞི་པོ་དག་གི་ཕ་མ་ལྟ་བུའོ། །ཀུན་དགའ་བོ། དགེ་སློང་འོད་སྲུང་ནི་འཇིག་རྟེན་ལ་ཡུན་རིང་དུ་ལྟ་ཞིང་སྙིང་བརྩེ་བ་ཅན་ནོ། །ཀུན་དགའ་བོ། །དགེ་སློང་འོད་སྲུང་ནི་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་སྙིང་བརྩེ་བ་དང ། ལྷ་དང་མི་རྣམས་ཀྱི་དོན་དང ། ཕན་པ་དང་བདེ་བའི་ཕྱིར་ཞུགས་པ་ཡིན་ནོ། །གསོལ་པ། བཅོམ་ལྡན་འདས། དགེ་སློང་འོད་སྲུང་སྐྱེ་བོ་མང་པོ་ཇི་སྙེད་ཅིག་གི་དོན་ལ་དགའ་བ་དང ། ལྷ་དང་མི་རྣམས་ལ་ཕན་པ་དང་བདེ་བར་དགའ་བ་ལ་ཞུགས་པ་ལགས། བཀའ་སྩལ་པ། ཀུན་དགའ་བོ། །དགེ་སློང་འོད་སྲུང་གང་གི་ཚེ་ཡོངས་སུ་མྱ་ངན་ལས་འདའ་བ་དེའི་ཚེ་འདི་ལྟར་བྱིན་གྱིས་རློབ་པར་འགྱུར་ཏེ། བདག་ཡོངས་སུ་མྱ་ངན་ལས་འདས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པ་འཇིག་རྟེན་དུ་མ་བྱུང་གི་བར་དུ་བདག་གི་ལུས་གཞན་དུ་མ་གྱུར་ཅིག་།གོས་དང ། སྤུ་དང ། སྐྲ་དང ། པགས་པ་དང ། མདོག་དང ། དབང་པོ་རྣམས་གཞན་དུ་མ་གྱུར་ཅིག་།བདག་གི་ལུས་སམ་ཡན་ལག་ཐམས་ཅད་ཀྱང་གཞན་དུ་མ་གྱུར་ཅིག་།གང་གི་ཚེ་དེ་བཞིན་གཤེགས་པ་བྱམས་
125b
པ་འཇིག་རྟེན་དུ་བྱུང་བར་གྱུར་པ་དེའི་ཚེ་དེ་བཞིན་གཤེགས་པ་དེ་འདུས་པ་དང་པོ་དང ། དེ་བཞིན་དུ་འདུས་པ་གཉིས་པ་དང ། དེ་བཞིན་དུ་འདུས་པ་ཆེན་པོ་གསུམ་པ་དང་བཅས་པས་བདག་གི་ལུས་མ་ཞིག་པར་གཟིགས་པར་གྱུར་ཅིག་།བདག་གིས་ཆོས་བཤད་པ་ལ་ཉེ་བར་བརྟེན་པ་དང ། བདག་གི་བྱིན་གྱི་རླབས་དང ། བདག་ལ་དམིགས་པས་སྲོག་ཆགས་བརྒྱ་ཕྲག་མང་པོ་དང ། སྲོག་ཆགས་སྟོང་ཕྲག་མང་པོ་དང ། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་རྣམས་དུལ་བར་གྱུར་ཅིག་།གང་གི་ཚེ་དེ་བཞིན་གཤེགས་པ་བྱམས་པ་དང ། ཉན་ཐོས་འདུས་པ་གསུམ་པོ་དབང་པོ་མ་ཡེངས་པ་གོས་ཇི་ལྟ་བ་བཞིན་དུ་བགོས་པ་དེ་རྣམས་ཀྱིས་བདག་གི་ལུས་མ་ཞིག་པར་གཟིགས་པར་གྱུར་པ་དེའི་ཚེ་བདག་གི་ལུས་ནམ་མཁའ་ལ་མངོན་པར་འཕགས་ནས་ལུས་ཀྱི་མེའི་ཁམས་ཀྱིས་ལུས་ཚིག་པར་གྱུར་ཅིག་།ཚིག་པ་དེའི་སོལ་བའང་མི་སྣང་བར་གྱུར་ཅིག་སྙམ་མོ། །ཀུན་དགའ་བོ། གང་དེ་ལྟར་བྱིན་གྱིས་རློབ་པར་འགྱུར་བའི་དགེ་སློང་འོད་སྲུང་དེ་སེམས་ཅན་ཡོངས་སུ་སྨིན་པར་བྱ་བའི་ཕྱིར་དེ་ལྟར་སྐྱེ་བོ་མང་པོ་ལ་ཕན་པ་དང ། དེ་ལྟར་སྐྱེ་བོ་མང་པོ་ལ་བདེ་བའི་ཕྱིར་ཞུགས་པ་ཡིན་ནོ། །ཀུན་དགའ་བོ། དགེ་སློང་འོད་སྲུང་ཡོངས་སུ་མྱ་ངན་ལས་འདས་ནས་ཀྱང་བྲག་གི་རི་བཞི་ལྷན་ཅིག་ཏུ་ཚོགས་ནས་འོད་སྲུང་གི་ལུས་བསྐོར་ཏེ་གཅིག་
126a
༄#། །ཏུ་འབྱོར་བར་གནས་པར་འགྱུར་རོ། །ཀུན་དགའ་བོ། བྲག་གི་རི་དེ་བཞིའི་ནང་ན་དགེ་སློང་འོད་སྲུང་གི་ལུས་གཅིག་ཏུ་མཁྲེགས་ཤིང་མ་ཞིག་པར་གནས་པར་འགྱུར་རོ། །དེ་བཞིན་གཤེགས་པ་བྱམས་པ་ཇི་སྲིད་དུ་འཇིག་རྟེན་དུ་མ་བྱུང་བ་དེ་སྲིད་དུ་དགེ་སློང་འོད་སྲུང་གི་ལུས་གོས་དང་བཅས་པར་མ་ཞིག་པར་གནས་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ། །འདི་ལྟ་སྟེ། ཚུལ་ཁྲིམས་དག་པའི་ཕྱིར་ཚུལ་ཁྲིམས་དང་ལྡན་པ་ཚངས་པར་སྤྱོད་པའི་སེམས་ལ་སྨོན་པ་འགྲུབ་སྟེ། ཚངས་པར་མི་སྤྱོད་པའི་མ་ཡིན་ནོ། །ཤེས་རབ་དང་ལྡན་པའི་འགྲུབ་ཀྱི་ཤེས་རབ་འཆལ་བའི་མ་ཡིན་ནོ། །འདོད་ཆགས་དང་བྲལ་བའི་འགྲུབ་ཀྱི་འདོད་ཆགས་དང་མ་བྲལ་བའི་མ་ཡིན་ནོ། །ཀུན་དགའ་བོ། དེ་བས་ན་དགེ་སློང་འོད་སྲུང་སྔོན་གྱི་བྱིན་གྱི་རླབས་ཀྱིས་ཡོངས་སུ་མྱ་ངན་ལས་འདས་ནས་དེ་བཞིན་གཤེགས་པ་བྱམས་པ་འཇིག་རྟེན་དུ་མ་བྱུང་གི་བར་དུ་ལུས་གཞན་དུ་མི་འགྱུར། སྐྲ་དང ། སྤུ་དང ། ཤ་དང ། ཁྲག་དང ། པགས་པ་དང ། དེ་ལས་གཞན་པའི་ཡན་ལག་དང་ཉིད་ལག་རྣམས་དང ། དབང་པོ་རྣམས་དང ། གོས་རྣམས་གཞན་དུ་མི་འགྱུར་ཞིང་ལུས་ཀྱི་དྲི་ང་བ་མེད་པར་འགྱུར་རོ། །ཀུན་དགའ་བོ། དེ་ནས་དེ་བཞིན་གཤེགས་པ་བྱམས་པ་འཇིག་རྟེན་དུ་བྱུང་ནས་
126b
འདུས་པ་དང་པོའི་དགེ་སློང་བྱེ་བ་ཕྲག་དགུ་བཅུ་རྩ་དྲུག་དང་ཐབས་གཅིག་ཏུ་འོད་སྲུང་གི་ལུས་ག་ལ་འདུག་བ་དེར་གཤེགས་པར་འགྱུར་རོ། །ཀུན་དགའ་བོ། །དེ་ནས་དེ་བཞིན་གཤེགས་པ་བྱམས་པས་དགེ་སློང་འོད་སྲུང་གི་ལུས་དགེ་སློང་བྱེ་བ་ཕྲག་དགུ་བཅུ་རྩ་དྲུག་པོ་དེ་དག་ལ་བསྟན་ནས་འདི་སྐད་ཀྱང་བཀའ་སྩལ་ཏོ། །དགེ་སློང་དག་།འདི་ནི་བཅོམ་ལྡན་འདས་ཤཱཀྱ་ཐུབ་པའི་ཉན་ཐོས་ཆེན་པོ་དགེ་སློང་འོད་སྲུང་ཞེས་བྱ་བ་ཡིན་ཏེ། འདི་ནི་སྦྱངས་པའི་ཡོན་ཏན་ལ་གནས་པ་རྣམས་དང ། འདོད་པ་ཆུང་བ་རྣམས་དང ། ཆོག་ཤེས་པ་རྣམས་དང ། རབ་ཏུ་དབེན་པ་རྣམས་དང ། བརྩོན་འགྲུས་བརྩམས་པ་རྣམས་དང ། དྲན་པ་ཉེ་བར་བཞག་པ་རྣམས་དང ། མཉམ་པར་བཞག་པ་རྣམས་དང ། ཤེས་རབ་དང་ལྡན་པ་རྣམས་ཀྱི་མཆོག་ཡིན་ཏེ། སྤྲོས་པ་མེད་པ་ལ་མོས་ཤིང་སྤྲོས་པ་མེད་པ་ལ་དགའ་བ། སྐྱེ་བོ་མང་པོ་ལ་ཡང་དག་པར་སྟོན་པ། ཡང་དག་པར་འཛིན་དུ་འཇུག་པ། ཡང་དག་པར་གཟེངས་བསྟོད་པ། ཡང་དག་པར་རབ་ཏུ་དགའ་བར་བྱེད་པ། ཚངས་པ་མཚུངས་པར་སྤྱོད་པ་ལ་ཆོས་འཆད་པས་ངལ་བ་མེད་པའོ། །དགེ་སློང་དག་།དགེ་སློང་འོད་སྲུང་ནི་འཁོར་བཞིའི་ཕ་མ་ལྟ་བུར་གྱུར་པའོ། །རིང་དུ་རྗེས་སུ་ལྟ་བ། ཤིན་ཏུ་རྗེས་སུ་ལྟ་བ། སྐྱེ་བོ་མང་པོ་ལ་རྗེས་སུ་ལྟ་བའོ། །དགེ་སློང་དག་།དགེ་སློང་འོད་སྲུང་འདི་སྐྱེ་བོ་མང་པོ་
127a
༄#། །ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་སྙིང་བརྩེ་བའི་ཕྱིར་ཞུགས་པ་དང ། ལྷ་དང་མི་རྣམས་ཀྱི་དོན་དང ། ཕན་པ་དང་བདེ་བའི་ཕྱིར་ཞུགས་པ་ལ་ལྟོས། ལན་གཉིས་སུའང་དེ་བཞིན་གཤེགས་པ་བྱམས་པ་ཉན་ཐོས་བྱེ་བ་དགུ་བཅུ་རྩ་བཞི་དང་ཐབས་གཅིག་ས་ཕྱོགས་དེར་གཤེགས་པར་འགྱུར་རོ། ། ཀུན་དགའ་བོ། ལན་གསུམ་དུའང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པ་ཉན་ཐོས་བྱེ་བ་དགུ་བཅུ་རྩ་གཉིས་དང་ཐབས་གཅིག་ཏུ་དགེ་སློང་འོད་སྲུང་གི་ལུས་ག་ལ་འདུག་པའི་ས་ཕྱོགས་དེར་གཤེགས་ཤིང ། ཀུན་དགའ་བོ། དེ་བཞིན་གཤེགས་པ་བྱམས་པ་དེའང་དགེ་སློང་བྱེ་བ་དགུ་བཅུ་རྩ་གཉིས་པོ་རྣམས་ལ་དགེ་སློང་འོད་སྲུང་གི་ལུས་སྟོན་པར་འགྱུར་རོ། །དགེ་སློང་དག་།དགེ་སློང་འོད་སྲུང་ཞེས་བྱ་བ་འདི་ནི་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའི་ཉན་ཐོས་ཆེན་པོ་སྦྱངས་པའི་ཡོན་ཏན་འཛིན་པ་རྣམས་ཀྱི་མཆོག་།འདོད་པ་ཆུང་བ་དང ། ཆོག་ཤེས་པ་ནས་སྐྱེ་བོ་མང་པོ་དང་ལྷ་དང་མི་རྣམས་ལ་ཕན་པ་དང་བདེ་བའི་ཕྱིར་ཞུགས་པའི་བར་ལ་ལྟོས། ཀུན་དགའ་བོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པས་དེའི་ཚེ་ཕྱག་
127b
གཡས་པ་གསེར་གྱི་ཁ་དོག་ཅན་བརྐྱང་ནས་དགེ་སློང་འོད་སྲུང་ཆེན་པོའི་མགོ་ལ་ཉུག་པར་འགྱུར་རོ། །བྱུགས་ནས་ཀྱང་དགེ་སློང་གི་དགེ་འདུན་ལ་གཟིགས་པར་འགྱུར་རོ། །གཟིགས་ནས་འདི་སྐད་བཀའ་སྩལ་ཏོ། །དགེ་སློང་དག་།དགེ་སློང་འོད་སྲུང་དེས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ཡོངས་སུ་མྱ་ངན་ལས་འདས་པ་དེའི་དམ་པའི་ཆོས་ཇི་ལྟར་ཡོངས་སུ་བཟུང་བ་དེ་ལྟ་བུ་ད་ལྟ་ངའི་དགེ་སློང་གི་དགེ་འདུན་མང་པོ་འདིའི་ནང་ན་ང་ཡོངས་སུ་མྱ་ངན་ལས་འདས་ན་གང་དམ་པའི་ཆོས་འཆད་པའི་དགེ་སློང་གཅིག་ཀྱང་མེད་དོ་ཞེས་བཀའ་སྩོལ་བར་འགྱུར་རོ། །ཀུན་དགའ་བོ། དེ་ནས་དགེ་སློང་འོད་སྲུང་འདུས་པ་ཆེན་པོ་གསུམ་པ་དེ་ཉིད་དུ་སྔོན་གྱི་བྱིན་གྱི་རླབས་ཀྱིས་སྟེང་གི་ནམ་མཁའི་བར་སྣང་ལ་མངོན་པར་འཕགས་ནས་ཆོ་འཕྲུལ་རྣམ་པ་སྣ་ཚོགས་བསྟན་ཏེ། རང་གི་མེའི་ཁམས་ཀྱིས་རང་གི་ལུས་སྲེག་པར་འགྱུར་ཏེ། བསྲེགས་པ་དེའི་སོལ་བའང་མི་སྣང ། ཐལ་བའང་མི་སྣང་བར་འགྱུར་རོ། །ཀུན་དགའ་བོ། །དེ་ནས་དེ་བཞིན་གཤེགས་པ་བྱམས་པ་དེའི་ཚེ་དགེ་སློང་འོད་སྲུང་ལས་བརྩམས་ནས་ཅི་ནས་ཀྱང་སྲོག་ཆགས་བརྒྱ་ཕྲག་མང་པོ་དང ། སྲོག་ཆགས་སྟོང་ཕྲག་མང་པོ་དང ། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་དང ། ལྷ་དང་མིར་བཅས་པའི་སྐྱེ་དགུ་དུལ་བར་འགྱུར་བ་དེ་ལྟ་
128a
༄#། །དེ་ལྟར་དགེ་སློང་བྱེ་བ་དགུ་བཅུ་རྩ་དྲུག་པོ་དེ་དག་ལ་ཆོས་སྟོན་པར་འགྱུར་རོ། །ཀུན་དགའ་བོ། དགེ་སློང་འོད་སྲུང་ཇི་ལྟར་སྐྱེ་བོ་མང་པོ་ལ་ཕན་པའི་ཕྱིར་ཞུགས་པ་ལ་ལྟོས། །ཀུན་དགའ་བོ་ཁྱོད་ཀྱང་སྐྱེ་བོ་མང་པོ་ལ་ཕན་པ་དང་བདེ་བའི་ཕྱིར་ཞུགས་སོ། །འཇུག་པར་ཡང་འགྱུར་རོ། །ཀུན་དགའ་བོ། །དེ་ལྟར་ན་དགེ་སློང་འོད་སྲུང་དང ། ཁྱོད་གཉིས་ལོ་བཞི་བཅུ་ལྷག་ཙམ་དུ་ངའི་དམ་པའི་ཆོས་འདི་འཛིན་པར་འགྱུར། ཆོ་འཕྲུལ་དང་བཅས་པའི་ཚངས་པར་སྤྱོད་པ་ལྷ་དང་མི་རྣམས་ལ་རྒྱ་ཆེ་ཞིང་ཡངས་པར་གྱུར་པ་སྤྱོད་པར་འགྱུར་རོ། །འོད་སྲུང་གི་ལེའུ་སྟེ་ལྔ་པ་རྫོགས་སོ།། །།དེ་ནས་ཡང་བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་མྱ་ངན་མ་བྱེད་ཅིག་ཅེས་བྱ་བ་ནས། རྒྱས་པར་ཀུན་དགའ་བོ་ཁྱོད་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པར་གྱུར་པ། ལྷ་དང་མི་རྣམས་ལ་རྒྱ་ཆེ་ཞིང་ཡངས་པ་དང ། ཡང་དག་པར་མནོས་པ་སྤྱོད་པར་འགྱུར་རོ་ཞེས་བྱ་བའི་བར་དུའོ། །ཀུན་དགའ་བོ། །ང་འདས་ཤིང་ང་ཡོངས་སུ་མྱ་ངན་ལས་འདས་ནས་གྲོང་ཁྱེར་བཅོམ་བརླག་ན་རི་སྤོ་དང་ངོས་ཆེ་བ་ཞེས་བྱ་བ་ཡོད་པར་འགྱུར་རོ། །དེ་ན་དགེ་འདུན་གྱི་ཀུན་དགའ་ར་བ་འདམ་བུ་ཅན་ཞེས་བྱ་བ་ཞིག་ཡོད་པར་འགྱུར་ཏེ། དེ་ན་ཡུལ་སླན་པ་ཞེས་
128b
བའི་དགེ་སློང་རྫུ་འཕྲུལ་ཆེ་བ། མཐུ་ཆེ་བ། གསལ་བ། དུལ་བ། འཇིགས་པ་མེད་པ། མང་དུ་ཐོས་པ། མདོ་འཛིན་པ། འདུལ་བ་འཛིན་པ། མ་མོ་འཛིན་པ། ཡང་དག་པར་སྟོན་པ། ཡང་དག་པར་འཛིན་དུ་འཇུག་པ། ཡང་དག་པར་གཟེངས་བསྟོད་པ། ཡང་དག་པར་རབ་ཏུ་དགའ་བར་བྱེད་པ། ཚངས་པ་མཚུངས་པར་སྤྱོད་པ་རྣམས་ལ་ཆོས་འཆད་པས་ངལ་བ་མེད་པ་ཞིག་འབྱུང་བར་འགྱུར་ཏེ། དེའང་ཚངས་པར་སྤྱོད་པ་འདི་ཆོ་འཕྲུལ་དང་བཅས་པ་དང ། ལྷ་དང་མི་རྣམས་ལ་རྒྱ་ཆེ་ཞིང་ཡངས་པར་བྱེད་པར་འགྱུར་གྱི། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། ང་འདས་ནས་རི་སྤོ་དང་ངོས་ཆེ་བ་དེ་ཉིད་ན་དགེ་འདུན་གྱི་ཀུན་དགའ་ར་བ་འདམ་བུ་ཅན་ཞེས་བྱ་བ་དེ་ཉིད་ན་དགེ་སློང་དགའ་བ་ཅན་ཞེས་བྱ་བ་རྫུ་འཕྲུལ་ཆེ་བ། མཐུ་ཆེ་བ་ནས་ཚངས་པ་མཚུངས་པར་སྤྱོད་པ་རྣམས་ལ་ཆོས་འཆད་པས་ངལ་བ་མེད་ཅེས་བྱ་བའི་བར་དང་ལྡན་པ་ཞིག་འབྱུང་བར་འགྱུར་ཏེ། དེའང་ངའི་བསྟན་པ་འདི་ཡངས་ཤིང་རྒྱས་པ་དང་ལྷ་དང་མིས་ཡང་དག་པར་མནོས་པར་བྱེད་པར་འགྱུར་གྱི། ཀུན་དགའ་བོ་ཁྱོད་མྱ་ངན་མ་བྱེད་སྨྲེ་སྔགས་མ་འདོན་ཅིག་།ཀུན་དགའ་བོ། །ང་འདས་ནས་རི་སྤོ་དང་ངོས་ཆེ་བ་དེ་ཉིད་ན་རི་ཨུ་ཤི་ར་ཞེས་བྱ་བ་ཡོད་པར་འགྱུར་རོ། །དེར་དགེ་སློང་བཞི་ཁྲི་བཞི་སྟོང་འདུས་པར་
129a
༄#། །འགྱུར་ཏེ། ཐམས་ཅད་ཀྱང་རྫུ་འཕྲུལ་ཆེ་བ། མཐུ་ཆེ་བ། དབང་ཆེ་བར་གྲགས་པ། གསལ་བ། དུལ་བ། འཇིགས་པ་མེད་པ། མང་དུ་ཐོས་པ། མདོ་འཛིན་པ། འདུལ་བ་འཛིན་པ། མ་མོ་འཛིན་པ། སྐྱེ་བོ་མང་པོ་ལ་ཡང་དག་པར་སྟོན་པ། ཡང་དག་པར་འཛིན་དུ་འཇུག་པ། ཡང་དག་པར་གཟེངས་བསྟོད་པ། ཡང་དག་པར་རབ་ཏུ་དགའ་བར་བྱེད་པ་ཤ་སྟག་སྟེ། དེ་དག་ཀྱང་ཚངས་པར་སྤྱོད་པ་ཆོ་འཕྲུལ་དང་བཅས་པ་འདི་རྒྱས་པར་བྱེད་དེ། ལྷ་དང་མི་རྣམས་ལ་རྒྱ་ཆེ་ཞིང་ཡང་པར་བྱེད་པར་འགྱུར་རོ། །ཀུན་དགའ་བོ། ངའི་ཚངས་པར་སྤྱོད་པ་རྒྱས་པར་འགྱུར་གྱི། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། ང་འདས་ནས་རི་སྤོ་དང་ངོས་ཆེ་བ་དེ་ཉིད་ན་དགེ་སློང་ཉེ་སྦས་ཞེས་བྱ་བ་འབྱུང་བར་འགྱུར་ཏེ། རྫུ་འཕྲུལ་ཆེ་བ། མཐུ་ཆེ་བ་ནས་དེའང་ཚངས་པར་སྤྱོད་པ་ཆོ་འཕྲུལ་དང་བཅས་པ་འདི་ཡངས་ཤིང་རྒྱས་པ་དང ། ལྷ་དང་མི་རྣམས་ཀྱིས་ཡང་དག་པར་མནོས་པར་བྱེད་པར་འགྱུར་བའི་བར་དུའོ། །དེར་ཡང་ངའི་དགྲ་བཅོམ་པ་མང་པོ་འདུས་པར་འགྱུར་ཏེ། དགེ་སློང་གསོ་སྦྱོང་གི་ལས་གཅིག་པ། ང་རྒྱལ་མེད་པ། ཀུན་ཤེས་པ། བརྡ་སྤྲོད་པ། བརྒྱད་ཁྲི་བརྒྱད་སྟོང་འབྱུང་བར་འགྱུར་རོ། །དེ་དག་ཀྱང་ངའི་ཚངས་
129b
པར་སྤྱོད་པ་རྫུ་འཕྲུལ་དང་བཅས་པའི་སྤྱོད་པར་འགྱུར་ཏེ། ལྷ་དང་མི་རྣམས་ལ་ཡངས་ཤིང་རྒྱ་ཆེ་བར་བྱེད་པར་འགྱུར་གྱི། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། དགེ་སློང་ཉེ་སྦས་ངའི་ཚངས་པར་སྤྱོད་པའང་ཡངས་ཤིང་རྒྱ་ཆེ་བར་སྤྱོད་ཅིང་ལྷ་དང་མི་རྣམས་ལ་ཡང་དག་པར་སྟོན་པར་འགྱུར་རོ། །ཀུན་དགའ་བོ། ང་འདས་ནས་གྲོང་ཁྱེར་སྐྱ་སྣར་གྱི་བུ་ཞེས་བྱ་བ་ན་དགེ་འདུན་གྱི་ཀུན་དགའ་ར་བ་ལམ་ཞེས་བྱ་བ་ཡོད་པར་འགྱུར་ཏེ། དེར་དགེ་སློང་རྟ་སྦས་ཞེས་བྱ་བ་འབྱུང་སྟེ། རིག་པ་གསུམ་དང་ལྡན་པ།་མངོན་པར་ཤེས་པ་དྲུག་དང་ལྡན་པ། རྣམ་པར་ཐར་པ་བརྒྱད་ལ་བསམ་གཏན་པ། གཉིས་ཀའི་ཆ་ལས་རྣམ་པར་གྲོལ་བ། རྫུ་འཕྲུལ་ཆེ་བ། མཐུ་ཆེ་བ་ནས་དེའང་ཚངས་པར་སྤྱོད་པ་འདི་ཡངས་ཤིང་རྒྱས་པར་བྱེད་པར་འགྱུར་ཞེས་བྱ་བའི་བར་དུ་རྒྱ་ཆེར་ཐམས་ཅད་དུ་སྦྱར་རོ། །ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། ང་འདས་ནས་དེ་ཉིད་དུ་བྱ་གག་གི་ཀུན་དགའ་ར་བར་དགེ་སློང་བླ་མ་ཞེས་བྱ་བ་འབྱུང་སྟེ། རྫུ་འཕྲུལ་ཆེ་བ། མཐུ་ཆེ་བ་ཞེས་བྱ་བ་ནས། དེའང་བསྟན་པ་འདི་ཆོ་འཕྲུལ་དང་བཅས་པར་བྱེད་ཅིང་ལྷ་དང་མི་རྣམས་ལ་སོ་སོར་ཡངས་ཤིང་རྒྱས་པར་བྱེད་པར་འགྱུར་གྱི། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་
130a
༄#། །མ་འདོན་ཅིག་།དེ་ཅིའི་ཕྱིར་ཞེ་ན། ཀུན་དགའ་བོ། ངའི་ཚངས་པར་སྤྱོད་པ་རྒྱས་པ་དང ། ལྷ་དང་མི་རྣམས་ལ་ཡངས་ཤིང་རྒྱ་ཆེ་བར་འགྱུར་བའི་ཕྱིར་རོ། །ཀུན་དགའ་བོ། ང་ཡོངས་སུ་མྱ་ངན་ལས་འདས་པའི་འོག་ཏུ་ཡུལ་ཡན་ལག་ཅེས་བྱ་བ་དེ་ན་ཉན་ཐོས་རྣམས་ལ་ལོ་ལྔའི་དུས་སྟོན་བྱེད་པར་འགྱུར་རོ། །དེར་དགྲ་བཅོམ་པ་ཁྲི་སུམ་སྟོང་འདུས་པར་འགྱུར་ཏེ། ཐམས་ཅད་ཀྱང་རྫུ་འཕྲུལ་ཆེ་བ། མཐུ་ཆེ་བ་དབང་ཆེ་བར་གྲགས་པ་ནས་རྒྱ་ཆེར་ཚངས་པ་མཚུངས་པར་སྤྱོད་པ་རྣམས་ལ་ཆོས་འཆད་པས་ངལ་བ་མེད་པ་ཤ་སྟག་གི་བར་དུའོ། །དེ་ན་དགེ་འདུན་གྱི་གནས་བརྟན་དད་ལྡན་དྲུག་པ་ཞེས་བྱ་བ་ཞིག་ཡོད་པར་འགྱུར་ཏེ། རྫུ་འཕྲུལ་ཆེ་བ་མཐུ་ཆེ་བ། དབང་ཆེ་བར་གྲགས་པ་ནས་རྒྱ་ཆེར་ཚངས་པ་མཚུངས་པར་སྤྱོད་པ་རྣམས་ལ་ཆོས་འཆད་པས་ངལ་བ་མེད་པའི་བར་དུ་སྟེ། དེའང་ངའི་ཚངས་པར་སྤྱོད་པ་ཆོ་འཕྲུལ་དང་བཅས་པ་ལྷ་དང་མི་རྣམས་ལ་རྒྱས་པར་བྱེད་པར་འགྱུར་གྱི། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། ང་འདས་ནས་གྲོང་ཁྱེར་གསེར་གྱི་བྲེ་ཞེས་བྱ་བ་ན་བྲམ་ཟེའི་རིགས་ལས་རབ་ཏུ་བྱུང་བར་དགེ་སློང་མཁས་པ་ཞེས་བྱ་བ་དང ། ཡང་དག་པར་རྒྱལ་བ་ཅན་ཞེས་བྱ་བ་གཉིས་སུ་འབྱུང་སྟེ། རྫུ་འཕྲུལ་ཆེ་བ་མཐུ་ཆེ་
130b
བ།་དབང་ཆེ་བར་གྲགས་པ་ནས་དེ་གཉིས་ཀྱང་ཚངས་པར་སྤྱོད་པ་ཆོ་འཕྲུལ་དང་བཅས་པ་འདི་རྒྱས་པའི་བར་དུ་བྱེད་པར་འགྱུར་གྱི། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། ང་འདས་ནས་གྲོང་ཁྱེར་གནས་བཅས་ཞེས་བྱ་བ་ན་དགེ་སློང་བརྩོན་འགྲུས་ཆེ་ཞེས་བྱ་བ་འབྱུང་སྟེ། རྫུ་འཕྲུལ་ཆེ་བ་མཐུ་ཆེ་བ་དེའང་ཚངས་པར་སྤྱོད་པ་འདི་ལྷ་དང་མི་རྣམས་ལ་ཆོ་འཕྲུལ་དང་བཅས་པར་བྱེད་པར་འགྱུར་གྱི། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། ང་འདས་ནས་མ་འོངས་པའི་དུས་ན་དགེ་སློང་ཉི་མའི་གུང་ཞེས་བྱ་བ་འབྱུང་སྟེ། ཀུན་དགའ་བོ། དགེ་སློང་ཉི་མའི་གུང་དེའང་ངའི་ཆོས་འདུལ་བ་འདི་རྒྱས་པར་བྱེད་ཅིང་ལྷ་དང་མི་རྣམས་ལ་ཆོ་འཕྲུལ་དང་བཅས་པ་དང་ཡངས་ཤིང་རྒྱ་ཆེ་བར་བྱེད་པར་འགྱུར་གྱི། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། ང་འདས་ནས་བྱང་ཕྱོགས་ཀྱི་རྒྱུད་ན་ཡུལ་སྤོས་འཛིན་ཞེས་བྱ་བ་ན་དགེ་སློང་འོད་སྲུང་ཞེས་གྦྱ་བ་འབྱུང་སྟེ། རྫུ་འཕྲུལ་ཆེ་བ་མཐུ་ཆེ་བ། དབང་ཆེ་བར་གྲགས་པ། གསལ་བ་འཇིགས་པ་མེད་པ། མང་དུ་ཐོས་པ། འདུལ་བ་འཛིན་པ། མདོ་འཛིན་པ། མ་མོ་འཛིན་པ། ཡང་དག་པར་སྟོན་པ། ཡང་དག་པར་འཛིན་དུ་འཇུག་པ། ཡང་དག་པར་གཟེངས་བསྟོན་པ། ཡང་དག་པ་
131a
༄#། །རབ་ཏུ་དགའ་བར་བྱེད་པ་ནས་དེའང་ངའི་བསྟན་པ་རྒྱས་པར་བྱེད་པའི་བར་དུ་འགྱུར་གྱི། །ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག ། ཀུན་དགའ་བོ། །ང་འདས་ནས་བྱང་ཕྱོགས་ཀྱི་རྒྱུད་ན་གྲོང་ཁྱེར་རྡོ་འཇོག་ཅེས་བྱ་བ་ཕྱོགས་དང་ཕྱོགས་མཚམས་སུ་སྒྲ་གྲག་པ་ཡོད་པར་འགྱུར་ཏེ། དེ་ན་ཁྱིམ་བདག་རལ་པ་ཅན་ཞེས་བྱ་བ་ཕྱུག་པ། ནོར་ཆེ་བ། ལོངས་སྤྱོད་ཆེ་བ། བསོད་ནམས་དང་ལྡན་པ། ཤེས་རབ་དང་ལྡན་པ། གཟུགས་བཟང་བ། མཛེས་པ། བལྟ་ན་སྡུག་པ།་ཁ་དོག་བཟང་པོ་རྒྱས་པ་མཆོག་དང་ལྡན་པ། དད་པ་ཅན། དང་བ་ཅན་ཞིག་འབྱུང་སྟེ། དེ་ངའི་ལུས་དང་ཉན་ཐོས་རྣམས་ལ་བསྟི་སྟང་དུ་བྱེད་པ་དང ། བླ་མར་བྱེད་པ་དང ། རིམ་གྲོར་བྱེད་པ་དང ། མཆོད་པ་དང་བརྗེད་པ་ལ་སྤྲོ་བར་འགྱུར་ཏེ། རིམ་གྱིས་བྱང་ཆུབ་ཀྱི་ཚོགས་ཡོངས་སུ་རྫོགས་པར་བྱ་བ་ནས་མ་འོངས་པའི་དུས་ན་བསྐལ་བ་སྟོང་རྫོགས་པ་དང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། བསྐལ་པ་བཟང་བྱེད་ཅེས་བྱ་བ་ལ་བཀོད་པ་ཆེན་པོས་ལེགས་པར་བརྒྱན་པའི་འཇིག་རྟེན་གྱི་ཁམས་སུ་ཀུན་ཏུ་སྣང་བ་ཞེས་བྱ་བའི་དེ་བཞིན་གཤེགས་པར་འགྱུར་རོ། །ཀུན་དགའ་བོ། །ཁྱིམ་བདག་རལ་པ་ཅན་
131b
དེའང་ངའི་བསྟན་པ་འདི་ལྷ་དང་མི་རྣམས་ལ་རྒྱས་པར་བྱེད་པར་འགྱུར་གྱི། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། །ང་འདས་ནས་བྱང་ཕྱོགས་ཀྱི་རྒྱུད་ན་རྒྱལ་པོའི་ཕོ་བྲང་འབྱོར་པ་རྒྱས་པ། བདེ་བ་ལོ་ལེགས་པ། སྐྱེ་བོ་མང་པོ་དང་མིས་གང་བ་རྒྱས་ལྡན་ཞེས་བྱ་བ་ཡོད་པར་འགྱུར་ཏེ། དེ་ན་བྲམ་ཟེ་དང་ཁྱིམ་བདག་རྣམས་ངའི་བསྟན་པ་འདི་ལ་དད་ཅིང་སེམས་དང་བར་འགྱུར་རོ། །ཀུན་དགའ་བོ། །དེ་དག་ཀྱང་ང་མྱ་ངན་ལས་འདས་པའི་ལུས་དང་ཉན་ཐོས་རྣམས་ལ་བསྟི་སྟང་དུ་བྱ་བ་དང ། བླ་མར་བྱ་བ་དང ། རིམ་གྲོར་བྱ་བ་དང ། མཆོད་པ་དང་བརྗེད་པ་དང ། རི་མོར་བྱ་བ་ལ་སྤྲོ་བར་འགྱུར་རོ། །དེར་ཡང་ངའི་ཉན་ཐོས་རྫུ་འཕྲུལ་ཆེ་བ་མཐུ་ཆེ་བ། དབང་ཆེ་བར་གྲགས་པ་བརྒྱ་ཕྲག་མང་པོ་འདུས་པར་འགྱུར་ཏེ་རྒྱ་ཆེར་སྦྱར་རོ། །ཀུན་དགའ་བོ། དེ་ན་འཁོད་པའི་ཁྱིམ་པ་རྣམས་ཀྱང་ཕལ་ཆེན་གསལ་བ། དུལ་བ། འཇིགས་པ་མེད་པ། མང་དུ་ཐོས་པ། ཐོས་པ་གསོག་པ།་མཁས་པ་ཤེས་རབ་ཆེ་བ་ཤ་སྟག་གོ་།ཀུན་དགའ་བོ། རྒྱལ་པོའི་ཕོ་བྲང་རྒྱས་ལྡན་དེ་ན་ཁྱིམ་པ་གང་དག་འཆི་བའི་དུས་བྱེད་པ་དེ་དག་འཆི་བའི་དུས་བྱས་མ་ཐག་ཏུ་ཕལ་ཆེར་དགའ་ལྡན་གྱི་ལྷའི་རིས་སུ་སྐྱེ་བར་བར་འགྱུར་རོ། །རབ་ཏུ་བྱུང་བ་གང་དག་འཆི་བའི་དུས་བྱེད་པ་དེ་དག་ནི་ཕལ་ཆེར་ལོག་པར་ལྟུང་བར་འགྱུར་རོ། །དེ་ཅིའི་ཕྱིར་ཞེ་ན།
132a
༄#། །འདི་ལྟར་དེ་དག་ཡོ་བྱད་བསྙུངས་པ་ལ་མི་གནས་ཤིང་སྡོམ་པ་ལ་མི་གནས་པའི་ཕྱིར་རོ། །ཀུན་དགའ་བོ། །རྒྱལ་པོའི་ཕོ་བྲང་རྒྱས་ལྡན་ན་དམ་པའི་ཆོས་གནས་བཞིན་དུ་བྲམ་ཟེ་དང་ཁྱིམ་བདག་གང་དག་འདི་ལྟར་བཅོམ་ལྡན་འདས་ཤཱཀྱ་ཐུབ་པའི་དམ་པའི་ཆོས་ནུབ་བོ་སྙམ་དུ་སེམས་སོ། །དེ་ཅིའི་ཕྱིར་ཞེ་ན། ཀུན་དགའ་བོ། །འདི་ལྟར་དེའི་ཚེ་ན་དགེ་སློང་ཕལ་ཆེར་ལྷོད་པ་དང ། ཡོ་བྱད་མང་བ་དང ། སྤོང་བ་ལས་ཉམས་པ་དང ། ལྡོག་པ་ལ་ཐོག་མར་འགྲོ་བ་དང ། རབ་ཏུ་དབེན་བ་ལ་བརྩོན་པ་བོར་བ་དང ། འཁོར་བཞི་པོ་དག་དང་འདྲེ་བ་དང ། ཚུལ་ཉམས་པ་དང ། ཚུལ་ཁྲིམས་འཆལ་པར་འགྱུར་ཏེ། དེ་དག་བྲམ་ཟེ་དང་ཁྱིམ་པ་རྣམས་དང་ལྷན་ཅིག་ཏུ་ཚུལ་ཉམས་ཤིང་ཚིགས་ལས་འདས་པ་དང ། གཅིག་ལ་གཅིག་མི་གུས་པར་མེ་ཏོག་དང ། འབྲས་བུ་དང ། བཟའ་བ་དང ། བཅའ་བ་དག་སྦྱིན་པ་དང།་རབ་ཏུ་སྦྱིན་པར་བྱེད་པ་ལ་མངོན་པར་དགའ་ཞིང་མ་བསྡམས་པར་འགྱུར་རོ། །དེ་དག་ཀྱང་བུ་དང་ཆུང་མ་སྤྱོད་པར་བྱེད་དེ། དེ་དག་གིས་དེ་མཐོང་ཞིང་ཐོས་ནས་བཅོམ་ལྡན་འདས་ཀྱི་དམ་པའི་ཆོས་ནུབ་པར་མི་འགྱུར་གྲང་སྙམ་ནས་རབ་ཏུ་འཇིགས་པ་དང ། སྐྲག་པ་དང ། མི་དགའ་བར་འགྱུར་རོ། །དེའི་ཚེའང་
132b
རྒྱལ་པོའི་ཕོ་བྲང་རྒྱས་ལྡན་དེ་ན་དགེ་བསྙེན་ཆོས་འཕེལ་ཞེས་བྱ་བ་རྫུ་འཕྲུལ་ཆེ་བ་མཐུ་ཆེ་བ། དབང་ཆེ་བར་གྲགས་པ། གསལ་བ། འཇིགས་པ་མེད་པ། མང་དུ་ཐོས་པ། ཐོས་པ། ངེས་པར་བྱེད་པ་ལ་མཁས་པ་ཞིག་འབྱུང་སྟེ། དེར་བྲམ་ཟེ་དང་ཁྱིམ་བདག་དེ་རྣམས་དགའ་བར་བྱ་བའི་ཕྱིར་རྫུ་འཕྲུལ་གྱིས་ནམ་མཁའ་ལ་མངོན་པར་འཕགས་ནས་བྲམ་ཟེ་དང་ཁྱིམ་བདག་རྣམས་ལ་ཡང་དག་པར་སྟོན། ཡང་དག་པར་འཛིན་དུ་འཇུག་།ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱེད་ཅིང་ཚིག་འདི་སྐད་ཀྱང་སྨྲ་བར་འགྱུར་ཏེ། བྲམ་ཟེ་དང་ཁྱིམ་བདག་རྣམས་མ་འཇིགས་ཤིག་།དོགས་པ་མ་སྐྱེད་ཅིག་།ཐེ་ཚོམ་མ་སྐྱེད་ཅིག་།ཡིད་གཉིས་མ་ཟ་ཞིག་།བཅོམ་ལྡན་འདས་ཤཱཀྱ་ཐུབ་པ་དེའི་དམ་པའི་ཆོས་ད་དུང་གནས་ཤིང་མ་ནུབ་ཀྱི། ཁྱེད་མ་ཐོབ་པ་ཐོབ་པར་བྱ་བ་དང ། མ་རྟོགས་པ་རྟོགས་པར་བྱ་བ་དང ། མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར་སྦྱོར་བ་གྱིས་ཤིག། རྩོལ་བ་གྱིས་ཤིག་།འབད་པ་གྱིས་ཤིག། ད་དུང་འཕགས་པའི་ཆོས་ཐོབ་པར་བྱ་སླའོ། །དེ་ནས་བྲམ་ཟེ་དང་ཁྱིམ་བདག་དེ་རྣམས་ཚིམ་ཞིང་མགུ་སྟེ་ཡི་རང་ཞིང་རབ་ཏུ་དགའ་ལ་དགའ་བ་དང་ཡིད་བདེ་བ་སྐྱེས་ནས་སྦྱིན་བ་དག་སྦྱིན། བསོད་ནམས་དག་བྱེད་ཅིང་ངའི་རིང་བསྲེལ་ལ་རིམ་གྲོར་བྱ་བ་ནས་བརྗེད་པ་དང་མངོན་པར་མཆོད་པར་བྱ་བའི་ཕྱིར་
133a
༄#། །སྤྲོ་བ་སྐྱེ་བར་འགྱུར་ཞིང་ཐོས་པ་དང ། ཚུལ་ཁྲིམས་དང ། སྤོང་བ་ལའང་བརྩོན་པར་འགྱུར་རོ། །དེ་ལྟར་ཁྱིམ་བདག་ཆོས་འཕེལ་གྱིས་བྲམ་ཟེ་དང་ཁྱིམ་བདག་རྣམས་དགའ་བར་བྱས་པས་ཕལ་ཆེར་མཐོ་རིས་དང་ཐར་པར་འགྲོ་བར་འགྱུར་རོ། །ཀུན་དགའ་བོ། །ཁྱིམ་བདག་ཆོས་འཕེལ་དེའང་ངའི་བསྟན་པ་འདི་རྒྱ་ཆེར་རྒྱས་པར་བྱེད་པར་འགྱུར་རོ། །ཀུན་དགའ་བོ། དེ་ལྟར་ང་འདས་ནས་ངའི་བསྟན་པ་འདི་ལ་སེམས་དང་ཞིང་མངོན་པར་དགའ་བ། སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། དགེ་བའི་རྩ་བ་བསྐྱེད་པ། ལྷག་པའི་བསམ་པ་ཕུན་སུམ་ཚོགས་པ། སངས་རྒྱས་མང་པོ་ལ་བསྙེན་བཀུར་བྱས་པའི་ཁྱིམ་བདག་ཀྱང་མང་དུ་འབྱུང་བར་འགྱུར་རོ། །དེ་དག་ཀྱང་ངའི་ལུས་དང་ཉན་ཐོས་རྣམས་ལ་རིམ་གྲོར་བྱ་བ་དང་།བླ་མར་བྱ་བ་དང ། བསྟི་སྟང་དུ་བྱ་བ་དང ། མཆོད་པར་བྱ་བ་དང ། བརྗེད་པར་བྱ་བ་དང ། མངོན་པར་མཆོད་པར་བྱ་བའི་ཕྱིར་སྤྲོ་བར་འགྱུར་ཏེ། ཀུན་དགའ་བོ། དེ་དག་ཀྱང་ངའི་བསྟན་པ་འདི་རྒྱས་པར་བྱེད་ཅིང་ལྷ་དང་མི་རྣམས་ཀྱིས་མནོས་པར་བྱེད་པར་འགྱུར་རོ། །ཀུན་དགའ་བོ། ང་འདས་ནས་མ་འོངས་པའི་དུས་ན་བྱང་ཕྱོགས་ཀྱི་རྒྱུད་དུ་དགེ་སློང་འཚོ་བྱེད་ཅེས་བྱ་བ་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། སངས་རྒྱས་བརྒྱ་སྟོང་མང་པོ་ལ་བསྙེན་བསྐུར་བྱས་
133b
པ།་དགེ་བའི་རྩ་བ་བསྐྱེད་པ། ལྷག་པའི་བསམ་པ་བསྐྱེད་པ། ཐེག་པ་ཆེན་པོ་ལ་ཡང་དག་པར་ཞུགས་པ། སྐྱེ་བོ་མང་པོ་ལ་ཕན་པ་དང་བདེ་བའི་ཕྱིར་ཞུགས་པ། མང་དུ་ཐོས་པ། བྱང་ཆུབ་སེམས་དཔའི་སྡེ་སྣོད་འཛིན་པ། ཐེག་པ་ཆེན་པོའི་བསྔགས་པ་བརྗོད་པ། ཐེག་པ་ཆེན་པོ་ཡང་དག་པར་རབ་ཏུ་སྟོན་པ་ཞིག་འབྱུང་བར་འགྱུར་ཏེ། དེ་ངའི་སྐུ་གདུང་གི་མཆོད་རྟེན་ཞིག་ཅིང་རལ་བ་མཐོང་ནས་གསེར་གྱིས་བརྒྱན་པར་བྱེད་ཅིང་གདུགས་དང ། རྒྱལ་མཚན་དང ། བ་དན་དང ། དར་དང ། དྲིལ་བུ་གཡེར་ཁའི་དྲ་བ་གཡོག་པ་དང ། དེ་བཞིན་གཤེགས་པའི་སྐུ་གཟུགས་དང ། མཆོད་རྟེན་གྱི་ཁང་པ་དང ། མཆོད་རྟེན་རྣམས་སེང་གེའི་རྒྱལ་མཚན་གྱིས་བརྒྱན་ཏེ། ལྷ་དང་མི་རྣམས་དགའ་བ་སྐྱེ་ཞིང་དེ་ཡོངས་སུ་བསྐྱང་པ་དང ། ངའི་བསྟན་པ་ཡོངས་སུང་སྐྱང་བ་དང ། སེམས་མ་དད་པ་རྣམས་དད་པར་བྱ་བ་དང ། དད་པ་རྣམས་ཕྱིར་ཞིང་འཕེལ་བ་དང ། སྐྱེ་བོ་མང་པོའི་དགེ་བའི་རྩ་བའི་ཚོགས་བསགས་པའི་ཕྱིར་ལོ་ལྔ་པ་བྱེད་དུ་འཇུག་པར་འགྱུར་རོ། །ཀུན་དགའ་བོ། དེའི་ཚེ་ན་དགེ་སློང་མི་བརྩོན་པ། ལྷོད་པ། ཡོ་བྱད་མང་བ། སྤོང་བ་ལས་ཉམས་པ། ཚུལ་ཉམས་པ། ཚུལ་ཁྲིམས་འཆལ་པ། སྡིག་པའི་ཆོས་ཀུན་ཏུ་སྤྱོད་པ། འདུ་འཛི་ལ་དགའ་བ། རབ་ཏུ་དབེན་པ་ལ་མི་ལྟ་བ། བརྩོན་པ་བོར་བ། གནས་གཅིག་ན་འཁོད་པ། ཡོངས་སུ་འཛིན་པ་ལ་
134a
༄#། །བརྩོན་པ། ཁྱིམ་པ་དང་རབ་ཏུ་བྱུང་བ་རྣམས་དང་འདྲེས་པ། དཀོན་མཆོག་གསུམ་དང་མ་འདྲེས་པ། མ་གུས་པ་དགེ་སྦྱོང་ལྟར་བཅོས་པ་དག་ནི་མང་དུ་འབྱུང་བར་འགྱུར་རོ། །དེ་ན་དགེ་སློང་བརྩོན་འགྲུས་བརྩམས་པ། རབ་ཏུ་དབེན་པ། དྲན་པ་ཉེ་བར་གཞག་པ། མཉམ་པར་གཞག་པ། ཤེས་རབ་དང་ལྡན་པ། སེམས་རྩེ་གཅིག་པ་དགེ་བའི་ཆོས་ཅན། འདོད་པ་ཆུང་བ། ཆོག་ཤེས་པ། བསོད་སྙོམས་ལ་རྒྱུ་བ། འཕགས་པའི་རིགས་ལ་གནས་པ། མང་དུ་ཐོས་པ། ཐོས་པ་བསགས་པ་དག་ནི་ཉུང་དུ་འབྱུང་བར་འགྱུར་ཏེ། དེ་ལ་དགེ་སློང་འཚོ་བྱེད་ཁོང་ཁྲོ་བའི་སེམས་མེད་པ་དང ། དབང་པོ་མ་ཉམས་པ་དང ། དད་པ་དང་དང་བ་མཆོག་དང་ལྡན་པས་གོས་ངུར་སྨྲིག་བགོས་ཤིང་ཚུལ་ཁྲིམས་དང་ལྡན་པའི་འདུ་ཤེས་ཅན་ཐམས་ཅད་ལ་སྦྱིན་གནས་སུ་འདུ་ཤེས་བསྐྱེད་ནས་སྦྱིན་པ་སྦྱིན། དགེ་བའི་རྩ་བསྐྱེད་པར་བྱེད་དེ། དེ་བྱང་ཆུབ་སེམས་དཔའ་བྱེད་པའི་དགེ་བའི་རྩ་བ་རྒྱ་ཆེན་པོ་རྣམ་པ་སྣ་ཚོགས་བསགས་ནས་འཆི་བའི་དུས་བྱས་དུས་བྱས་མ་ཐག་ཏུ་ནུབ་ཕྱོགས་སུ་སངས་རྒྱས་ཀྱི་ཞིང་བྱེ་བ་བརྒྱ་སྟོང་འདས་པ་ན་དེ་བཞིན་གཤེགས་པ་འོད་དཔག་མེད་ཀྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ། འཇིག་རྟེན་གྱི་
134b
ཁམས་ཡོན་ཏན་ཐམས་ཅད་ཀྱིས་བརྒྱན་པ་ཞེས་བྱ་བར་དེ་བཞིན་གཤེགས་པ་འོད་དྲི་མ་མེད་པ་ཞེས་བྱ་བར་འགྱུར་རོ། །ཀུན་དགའ་བོ། དགེ་སློང་འཚོ་བྱེད་དེའང་ངའི་བསྟན་པ་འདི་ཡངས་ཤིང་རྒྱས་པར་བྱེད་པར་འགྱུར་གྱི། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། ངའི་ཚངས་པར་སྤྱོད་པ་རྒྱས་པ་དང་ལྷ་དང་མི་རྣམས་ཀྱིས་མནོས་པར་འགྱུར་རོ། །ཀུན་དགའ་བོ། །ང་འདས་ནས་མ་འོངས་པའི་དུས་ན་མཐའ་འཁོབ་ཀྱི་ཡུལ་ནགས་ཀྱི་ས་ན་རྒྱལ་པོའི་ཕོ་བྲང་ཞི་བ་ཞེས་བྱ་བ་ཞིག་ཡོད་པར་འགྱུར་ཏེ། དེ་ན་རྒྱལ་པོ་མེས་སྦྱིན་ཞེས་བྱ་བ་དད་པ་དང་ལྡན་པ་དང་བ་ཞིག་འབྱུང་སྟེ། དེ་ངའི་སྐུ་གདུང་དང་ཉན་ཐོས་རྣམས་ལ་བསྟི་སྟང་དུ་བྱ་བ་དང ། བླ་མར་བྱ་བ་ནས་བརྗོད་པར་བྱ་བའི་བར་ལ་སྤྲོ་བར་འགྱུར་རོ། །ཀུན་དགའ་བོ། རྒྱལ་པོ་མེས་སྦྱིན་དེའང་རྒྱལ་པོའི་ཕོ་བྲང་ཞི་བ་དེར་ངའི་ཉན་ཐོས་རྣམས་བསྡུས་ནས་དང་བར་བྱེད་པར་འགྱུར་རོ། །དེར་དགྲ་བཅོམ་པ་སུམ་སྟོང་ལྷག་ཙམ་འདུས་པར་འགྱུར་ཏེ། ཐམས་ཅད་ཀྱང་རྫུ་འཕྲུལ་ཆེ་བ་མཐུ་ཆེ་བ། དབང་ཆེ་བར་གྲགས་པ་ནས་ཚངས་པ་མཚུངས་པར་སྤྱོད་པ་རྣམས་ལ་ཆོས་འཆད་པས་ངལ་བ་མེད་པ་ཤ་སྟག་གོ། །ཀུན་དགའ་བོ། དེ་དག་ཀྱང་ངའི་བསྟན་པ་རྒྱས་པར་བྱེད་དེ། ལྷ་དང་མི་རྣམས་ལ་ཡང་
135a
༄#། །ཤིང་རྒྱ་ཆེ་བར་བྱེད་པར་འགྱུར་གྱི། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། ང་འདས་ནས་བྱང་ཕྱོགས་ཀྱི་རྒྱུད་ན་གྲོང་ཁྱེར་ཤིང་ཀུན་སྐྱེ་བ་ཞེས་བྱ་བ་ཞིག་ཡོད་པར་འགྱུར་ཏེ། དེར་ངའི་མཆེ་བ་ལ་མེ་ཏོག་དང ། ཕྲེང་བ་དང ། སྤོས་དང ། བྱུང་པ་དང ། སིལ་སྙན་དང ། གདུགས་དང།་རྒྱལ་མཚན་དང ། བ་དན་དང ། རྣམ་པར་རྒྱལ་བའི་བ་དན་ལ་སོགས་པ་དང ། གོས་དང ། དངུལ་དང ། གསེར་དང ། རིན་པོ་ཆེ་རྣམས་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་པར་འགྱུར་རོ། །ཀུན་དགའ་བོ། ངའི་མཆོད་རྟེན་ཡང་གསེར་གྱིས་བརྒྱན་པར་འགྱུར་རོ། །ཀུན་དགའ་བོ། །ས་ཕྱོགས་དེར་རབ་ཏུ་བྱུང་བའི་སྐྱེ་བོ་མང་པོ་འབྱུང་བར་འགྱུར་རོ། །སྐྱེ་བོ་མང་པོ་ཚུལ་ཁྲིམས་དང་ལྡན་པ་དང ། དགེ་བའི་ཆོས་དང་ལྡན་པ་རྣམས་དང ། དགེ་སློང་གི་ཚོགས་བརྒྱ་སྟོང་དུ་མ་འབྱུང་བར་འགྱུར་རོ། །ཀུན་དགའ་བོ། དེ་ན་ཁྱིམ་པ་ཚུལ་ཁྲིམས་དང་ལྡན་པ། མང་དུ་ཐོས་པ། མཁས་པ་ཡིད་གཞུངས་པ། ངའི་བསྟན་པ་འདི་ལ་དད་པ་དང་དང་བ་དག་ཀྱང་མང་དུ་འབྱུང་སྟེ། དེ་དག་ངའི་སྐུ་གདུང་དང་ཉན་ཐོས་རྣམས་ལ་བསྟི་སྟང་དུ་བྱ་བ་དང ། བླ་མར་བྱ་བ་དང ། རིམ་གྲོར་བྱ་བ་དང ། མཆོད་པར་བྱ་
135b
བ་དང ། བརྗེད་པར་བྱ་བ་དང ། མངོན་པར་མཆོད་པར་བྱ་བའི་ཕྱིར་སྤྲོ་བར་འགྱུར་རོ། །དེ་དག་ངའི་དཀོན་མཆོག་གསུམ་ཡོངས་སུ་བཟུང་སྟེ། དགེ་བའི་རྩ་བ་དེས་ལྷ་དང་མིའི་ཕུན་སུམ་ཚོགས་པ་མྱོང་ནས་ཁ་ཅིག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ། ཁ་ཅིག་ནི་རང་སངས་རྒྱས་ཀྱི་ཐེག་པས་ཡོངས་སུ་མྱ་ངན་ལས་འདས། །ཁ་ཅིག་ནི་ཉན་ཐོས་ཀྱི་ཐེག་པས་ཡོངས་སུ་མྱ་ངན་ལས་འདའ་བར་འགྱུར་ཏེ། ཀུན་དགའ་བོ། དེ་ལྟར་ན་དེ་དག་གི་བསྟི་སྟང་མཐུ་ཆེ་བར་འགྱུར་རོ། །ཀུན་དགའ་བོ།་དེ་དག་ཀྱང་ངའི་བསྟན་པ་འདི་རྒྱ་ཆེ་ཞིང་རྒྱས་པར་བྱེད་པར་འགྱུར་བ་དང ། ལྷ་དང་མི་རྣམས་ལ་ཡང་ཤིང་ཤིན་ཏུ་རྒྱས་པར་འགྱུར་བ་དང ། བཀྲོལ་ཞིང་ཡང་དག་པར་བསྟན་པར་བྱེད་པར་འགྱུར་གྱི། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། ངའི་ཚངས་པར་སྤྱོད་པ་རྒྱས་པ་དང་ལྷ་དང་མི་རྣམས་ཀྱིས་ཡང་དག་པར་མནོས་པར་འགྱུར་རོ། །ཀུན་དགའ་བོ། ཛམྦུའི་གླིང་ཐམས་ཅད་སྐུ་གདུང་གི་མཆོད་རྟེན་དང ། དེ་བཞིན་གཤེགས་པའི་སྐུ་གཟུགས་རྣམས་ཀྱིས་ཀྱང་ཀུན་ཏུ་རྒྱས་པར་འགྱུར་ན། ཀུན་དགའ་བོ་ལྷ་དང ། ཀླུ་དང ། གནོད་སྦྱིན་དང་།དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་གི་གནས་རྣམས་ན་མི་སྣང་བར་གྱུར་བ་རྣམས་
136a
༄#། །ཀྱིས་གང་བར་འགྱུར་བ་ལྟ་སྨོས་ཀྱང་ཅི་དགོས་ཀྱི། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། དེ་ལྟར་ན་ངའི་ཆོས་འདུལ་བ་རྒྱས་པར་འགྱུར་ཞིང་ལྷ་དང་མི་རྣམས་ལ་ཡངས་ཤིང་རྒྱ་ཆེ་བར་འགྱུར་རོ། །དམ་པའི་ཆོས་འཛིན་པའི་ལེའུ་སྟེ་དྲུག་པ་རྫོགས་སོ།། །།ཡང་དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། །ང་ཡོངས་སུ་མྱ་ངན་ལས་འདས་ནས་རིགས་ཀྱི་བུའམ་རིགས་ཀྱི་བུ་མོ་རབ་ཏུ་བྱུང་བའམ། ཁྱིམ་ན་གནས་པ་གང་དག་ཁ་ཅིག་ཐ་ན་རིང་བསྲེལ་ཡུངས་འབྲུ་ཙམ་ལ་བསྟི་སྟང་བྱེད། །བླ་མར་བྱེད། རིམ་གྲོར་བྱེད། མཆོད་པར་བྱེད་ན། ཀུན་དགའ་བོ། དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་ཡོངས་སུ་མྱ་ངན་ལས་འདས་པ་ཡིན་ཏེ། ཐ་མ་ཡོངས་སུ་མྱ་ངན་ལས་འདའ་བར་ང་སྨྲའོ། །ཀུན་དགའ་བོ། ང་ཡོངས་སུ་མྱ་ངན་ལས་འདས་ནས་རིགས་ཀྱི་བུའམ་རིགས་ཀྱི་བུ་མོ་གང་དག་ཁ་ཅིག་ཐ་ན་ངའི་ཕྱིར་བྱས་པའི་མཆོད་རྟེན་མཐོང་ནས་སེམས་དང་པ་བསྐྱེད་ན། ཀུན་དགའ་བོ། འདི་ལ་སེམས་དང་བའི་དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུའང་མྱ་ངན་ལས་འདས་པ་ཡིན་ཏེ། ཐ་མ་ཡོངས་སུ་མྱ་ངན་ལས་འདའ་བར་
136b
འགྱུར་བར་ངེས་པར་ཤེས་པར་གྱིས་ཤིག་།ཀུན་དགའ་བོ། གང་ང་འདུག་པ་ལ་མངོན་སུམ་དུ་བསྟི་སྟང་བྱེད་པ་དང ། བླ་མར་བྱེད་པ་ནས་མཆོད་པར་བྱེད་པའི་བར་ལྟ་ཞོག། གང་ང་ཡོངས་སུ་མྱ་ངན་ལས་འདས་ནས་རིང་བསྲེལ་ཡུངས་འབྲུ་ཙམ་ལ་བསྟི་སྟང་བྱེད་པ་ལྟའང་ཞོག་།ངའི་ཕྱིར་མཆོད་རྟེན་བྱས་པ་ལ་གང་བསྟི་སྟང་བྱེད་པ་ལྟའང་ཞོག་སྟེ།་ཀུན་དགའ་བོ། གང་དག་ཁ་ཅིག་སངས་རྒྱས་ལ་དམིགས་ནས་ཐ་ན་མེ་ཏོག་གཅིག་ནམ་མཁའ་ལ་འཐོར་ན། ཀུན་དགའ་བོ། དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བར་ང་སྨྲའོ། །ཀུན་དགའ་བོ། སངས་རྒྱས་བཅོམ་ལྡན་འདས་རྣམས་ལ་མཆོད་པ་བྱས་པ་རྫུ་འཕྲུལ་ཇི་ཙམ་དུ་ཆེ་བ་ལ་ལྟོས། གང་ན་སངས་རྒྱས་ལ་དམིགས་པའི་སེམས་ཀྱིས་མེ་ཏོག་གཅིག་ནམ་མཁའ་ལ་བོར་བས་ཀྱང་མྱ་ངན་ལས་འདས་པར་ཕྱིན་པར་བྱེད་ན། ཀུན་དགའ་བོ། གང་དག་དེ་བཞིན་གཤེགས་པ་ལ་མངོན་སུམ་དུ་བསྟི་སྟང་བྱེད་པའམ། ཡོངས་སུ་མྱ་ངན་ལས་འདས་ནས་སྐུ་གདུང་ལ་སྐུ་གདུང་གི་མཆོད་པ་བྱེད་པ་ལྟ་ཅི་སྨོས། ཀུན་དགའ་བོ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡུལ་བསམ་གྱིས་མི་ཁྱབ་བོ། །ཀུན་དགའ་བོ། དེ་བཞིན་གཤེགས་པ་
137a
༄#། །བསམ་གྱིས་མི་ཁྱབ་པ་ལ་བསྟི་སྟང་བྱས་ན་རྣམ་པར་སྨིན་པའང་བསམ་གྱིས་མི་ཁྱབ་པར་ཤེས་པར་བྱའོ། །ཀུན་དགའ་བོ། སངས་རྒྱས་ལ་དམིགས་པའི་སེམས་ཀྱིས་ནམ་མཁའ་ལ་མེ་ཏོག་གཅིག་བོར་བའི་རྣམ་པར་སྨིན་པ་གལ་ཏེ་ངས་སངས་རྒྱས་ཀྱི་ཡེ་ཤེས་ཀྱིས་བསྟན་ན། ཀུན་དགའ་བོ་ཁྱོད་ཉིད་ཀྱང་ངོ་མཚར་དང་རྨད་དུ་བྱུང་བར་འཛིན་པ་དང ། དགའ་བ་དང ། མགུ་བ་དང ། རབ་ཏུ་དགའ་བར་གྱུར་ན་མ་འོངས་པའི་དུས་ན་ངའི་བུ་གང་དག་རབ་ཏུ་དད་པ། རབ་ཏུ་གུས་པ། རབ་ཏུ་དང་པ་རྣམས་དང ། གང་དག་སངས་རྒྱས་ཀྱི་ཡོན་ཏན་ལ་རྟོག་ཅིང་སངས་རྒྱས་ཀྱི་ཡེ་ཤེས་དོན་དུ་གཉེར་བར་འགྱུར་བ་དེ་དག་ལྟ་ཅི་སྨོས། དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སངས་རྒྱས་ལ་དམིགས་ནས་ནམ་མཁའ་ལ་མེ་ཏོག་གཅིག་བོར་བའི་རྣམ་པར་སྨིན་པ་བཤད་པའི་དུས་ལ་བབ་སྟེ། བཅོམ་ལྡན་འདས། དུས་འདི་ལགས་སོ། །བདེ་བར་གཤེགས་པ། སྐབས་འདི་ལགས་སོ། །གང་བཅོམ་ལྡན་འདས་ལས་ཐོས་ནས་དགེ་སློང་རྣམས་ཡང་དག་པ་ཉིད་དུ་འཛིན་པར་འགྱུར་བ་དེ་ནི་སྐྱེ་བ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་
137b
བ་དང ། འཇིག་རྟེན་ལ་སྙིང་བརྩེ་བ་དང ། ལྷ་དང་མི་རྣམས་ལ་དོན་དང་ཕན་པ་དང་བདེ་བར་འགྱུར་རོ། །ད་ལྟར་དང་མ་འོངས་པའི་དུས་ཀྱི་སེམས་ཅན་རྣམས་དེ་བཞིན་གཤེགས་པ་ལས་ཐོས་ནས་ཡང་དང་ཡང་དུ་དགེ་བའི་རྩ་བ་བསྐྱེད་པར་འགྱུར། སེམས་དང་བར་འགྱུར། ཡིད་བདེ་བའང་ཐོབ་པར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ། ཤཱཀྱའི་རྒྱལ་པོ་ཐུགས་རྗེ་ཆེན་པོ་དང་ལྡན་པ། འཇིག་རྟེན་ཐམས་ཅད་ལ་ཕན་ཞིང་ཐུགས་བརྩེ་བ་ཅན་གྱིས་བདག་ཅག་དབུགས་ཕྱུང་ངོ་ཞེས་དེ་དག་རྒྱ་ཆེར་སྤྲོ་བར་འགྱུར་ཏེ། སངས་རྒྱས་ཡིད་ལ་བགྱིད་ཅིང་སངས་རྒྱས་ལ་དམིགས་པའི་དྲན་པ་སྐྱེད་པར་འགྱུར་རོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་གཟུང་ཞིག་དང་བཤད་དོ། །བཙུན་པ། དེ་བཞིན་ནོ་ཞེས་གསོལ་ནས། ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། །གང་དག་ཁ་ཅིག་སངས་རྒྱས་ལ་དམིགས་ནས་ཐ་ན་སངས་རྒྱས་ལ་དམིགས་པའི་སེམས་ཀྱིས་མེ་ཏོག་གཅིག་ནམ་མཁའ་
138a
༄#། །ལ་འདོར་ན། དེའི་རྣམ་པར་སྨིན་པ་གང་ཡིན་པ་དེ་ནི། ཀུན་དགའ་བོ། གལ་ཏེ་སེམས་ཅན་འགའ་ཞིག་བསྐལ་བ་གཅིག་ཏུ་འཁོར་བ་འདི་ཇི་སྲིད་པར་ཀུན་ཏུ་རྒྱུག་ཅིང་འཁོར་ཡང་འཁོར་བའི་སྔོན་གྱི་མཐའ་མི་ཤེས་པ་བཞིན་དུ་བསོད་ནམས་མངོན་པར་འདུ་བྱ་བའི་དགེ་བའི་རྩ་བ་མངོན་པར་འདུས་བྱས་པ་དེའི་མཐའ་དེ་ནི་བརྒྱ་བྱིན་ཉིད་རྣམས་ཀྱིས་རྙེད་པར་སླ་བ་མ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ། འདི་ལྟར་སངས་རྒྱས་ལ་ཕུལ་བའི་ཡོན་ནི་འཁོར་བ་ན་སྤྱོད་པའི་བདེ་བ་ཐམས་ཅད་ཀྱིས་མཐར་གཏུགས་པར་སླ་བ་མ་ཡིན་ཏེ། གཞན་དུ་ན་དགེ་བའི་རྩ་བ་དེའི་འབྲས་བུ་མྱ་ངན་ལས་འདས་པ་ཉིད་འབྲས་བུ་ཡིན་པས་ཐ་མ་མྱ་ངན་ལས་འདའ་བར་ང་སྨྲའོ། །ཀུན་དགའ་བོ། གང་དག་ཁ་ཅིག་མངོན་དུ་བསྟི་སྟང་བྱེད་པ་ལྟའང་ཞོག་།གང་ངའི་སྐུ་གདུང་དང་རིང་བསྲེལ་ཡུངས་འབྲུ་ཙམ་ལ་སྐུ་གདུང་གི་མཆོད་པ་བྱེད་པ་ལྟའང་ཞོག་།གང་ངའི་ཕྱིར་མཆོད་རྟེན་བྱས་པ་རྣམས་ལ་བསྟི་སྟང་བྱེད་པ་ལྟའང་ཞོག་།གང་སངས་རྒྱས་ལ་དམིགས་ནས་ཐ་ན་མེ་ཏོག་གཅིག་ནམ་མཁའ་ལ་འདོར་བ་ལྟའང་ཞོག་སྟེ། ཀུན་དགའ་བོ། གལ་ཏེ་སེམས་ཅན་མྱ་ངན་ལས་འདའ་བའི་སྐལ་བ་མེད་པ་ཞིག་གིས་སངས་རྒྱས་ལ་དམིགས་
138b
ནས།་ཐ་ན་མེ་ཏོག་གཅིག་ནམ་མཁའ་ལ་འདོར་ནའང ། ཀུན་དགའ་བོ། དགེ་བའི་རྩ་བ་དེའི་འབྲས་བུ་དེའང་མྱ་ངན་ལས་འདས་པ་ཡིན་ཏེ། མྱ་ངན་ལས་འདས་པས་ཀླས་པ་དང།་མྱ་ངན་ལས་འདས་པའི་མཐས་གཏུགས་པར་ང་སྨྲའོ། །དགེ་བའི་རྩ་བ་དེ་དག་གི་མཐའ་ནི་མྱ་ངན་ལས་འདས་པ་ཡིན་ཏེ། མྱ་ངན་ལས་འདས་པ་ནི་གཙོ་བོ་ཡིན། མྱ་ངན་ལས་འདས་པ་ནི་ཁྱད་པར་ཅན་ཡིན། མྱ་ངན་ལས་འདས་པ་ནི་མཆོག་ཡིན། མྱ་ངན་ལས་འདས་པ་ནི་གྱ་ནོམ་པ་ཡིན་ནོ། །སྦྱིན་པ་དེ་མཐར་ཕྱིན་པ་ལ་ཕུལ་བ་ནི་མྱ་ངན་ལས་འདས་པ་རྣམ་པར་དག་པར་ང་སྨྲའོ། །ཀུན་དགའ་བོ། རྒྱུ་དེས་དེ་བཞིན་གཤེགས་པ་སྦྱིན་གནས་རྣམས་ཀྱི་མཆོག་དང ། སྦྱིན་གནས་རྣམས་ཀྱི་རྒྱལ་པོ་ཡིན་ནོ། ། དེ་ཅིའི་ཕྱིར་ཞེ་ན། སྦྱིན་པ་གང་དེ་བཞིན་གཤེགས་པ་ལ་ཕུལ་བ་དེའི་འབྲས་བུ་མྱ་ངན་ལས་འདས་པ་འཐོབ་པར་འགྱུར་ཏེ། དེའི་ཕྱིར་དེ་བཞིན་གཤེགས་པ་སྦྱིན་གནས་རྣམས་ཀྱི་མཆོག་ཅེས་བྱའོ། །ཀུན་དགའ་བོ། ལམ་དེ་ནི་མཐུན་པའོ། །ཀུན་དགའ་བོ། འདི་ལྟར་རྣམ་གྲངས་འདིས་ན་དེ་བཞིན་གཤེགས་པ་ནི་ངེས་པར་ལེན་པ་རྣམས་ཀྱི་མཆོག་ཡིན་པར་བསྟན་ཏོ། །དེ་བཞིན་གཤེགས་པ་ལ་ཡོན་ཕུལ་བ་ཐམས་ཅད་ཀྱི་མཐའ་ནི་འབྲས་བུ་མྱ་ངན་ལས་འདས་པ་ཡིན་ཏེ། མྱ་ངན་ལས་
139a
༄#། །འདས་པས་ཀླས་པ་དང ། མྱ་ངན་ལས་འདས་པའི་མཐས་གཏུགས་པར་འགྱུར་རོ། །ཀུན་དགའ་བོ། སྦྱིན་པ་དེ་ལྟ་བུའང་ལྟ་ཞོག་།དེ་ཅིའི་ཕྱིར་ཞེ་ན། ཀུན་དགའ་བོ། གང་སངས་རྒྱས་ལ་དམིགས་ནས་ཐ་ན་སེམས་གཅིག་བསྐྱེད་དེ་དང་བ་བསྐྱེད་ན། ཀུན་དགའ་བོ། དེ་ཐམས་ཅད་ཀྱི་འབྲས་བུའང་མྱ་ངན་ལས་འདས་པ་ཡིན་ཏེ།་ཐ་མ་མྱ་ངན་ལས་འདའ་བར་ང་སྨྲའོ། །ཀུན་དགའ་བོ། མིར་འགྱུར་པའི་སྦྱིན་པ་བྱས་པ་དེ་ལྟ་བུའང་ལྟ་ཞོག་ལ། ཀུན་དགའ་བོ། གང་ཐ་ན་དུད་འགྲོའི་སྐྱེ་གནས་སུ་སོང་བའི་སེམས་ཅན་རྣམས་ཀྱང་སངས་རྒྱས་ལ་དམིགས་པའི་དྲན་པ་རྙེད་པ་དེ་དག་ཐམས་ཅད་ཀྱི་འབྲས་བུའང་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བར་ང་སྨྲའོ། །ཀུན་དགའ་བོ། འདི་ལྟར་དུད་འགྲོའི་སྐྱེ་གནས་སུ་སོང་བའི་སེམས་ཅན་རྣམས་ཀྱང་ཐ་མ་མྱ་ངན་ལས་འདའ་བའི་བར་དུ་འགྱུར་ཏེ། འདི་ལྟར་རྫུ་འཕྲུལ་ཆེ་བས་སངས་རྒྱས་བཅོམ་ལྡན་འདས་རྣམས་ལ་ཡོན་ཕུལ་བ་ཇི་ཙམ་དུ་རྫུ་འཕྲུལ་ཆེ་བ་དང ། སངས་རྒྱས་རྣམས་ལ་སེམས་དང་བ་ཇི་ཙམ་དུ་རྫུ་འཕྲུལ་ཆེ་བ་ལ་ལྟོས། ཀུན་དགའ་བོ་ཁྱོད་མྱ་ངན་མ་བྱེད། སྨྲ་སྔགས་མ་འདོན་ཞིག་དང ། ཀུན་དགའ་བོ་ཁྱོད་ཀྱི་རྫུ་འཕྲུལ་ཆེ་བ་དང ། འབྲས་བུ་ཆེ་བ་དང ། ཕན་ཡོན་ཆེ་བ་དང །
139b
རབ་ཏུ་རྒྱ་ཆེ་བ་དང ། འོད་ཆེ་བ་དང ། བདུད་རྩི་ལྟ་བུ་དང ། མི་འཆི་བས་ཀླས་པ་དང ། མི་འཆི་བའི་མཐས་གཏུགས་པར་འགྱུར་རོ། །ཀུན་དགའ་བོ་ཁྱོད་ཀྱིས་དེ་བཞིན་གཤེགས་པ་ལ་བྱམས་པའི་ལུས་ཀྱི་ལས་དང ། བྱམས་པའི་ངག་གི་ལས་དང ། བྱམས་པའི་ཡིད་ཀྱི་ལས་ཕན་པ་དང ། བདེ་བ་དང ། གཉིས་སུ་མེད་པ་དང ། ཚད་མེད་པ་དང ། ཁོ་ན་མེད་པ་དང ། གནོད་སེམས་མེད་པས་བསྙེན་བཀུར་བྱས་ཏེ། ཀུན་དགའ་བོ། གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྒྱུན་དུ་ཞུགས་པས་ཡོངས་སུ་གང་བར་གྱུར་ཅིང ། ལན་གཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་རྣམས་ཀྱིས་ཡོངས་སུ་གང་བར་གྱུར་པ་འདི་ལྟ་སྟེ། དཔེར་ན། བུ་རམ་ཤིང་སྟུག་པོའམ། འབྲས་ཞིང་སྟུག་པོའམ། འདམ་བུ་མདའ་རྒྱུ་སྟུག་པོའམ། འོད་མ་སྟུག་པོའམ། འདམ་བུ་སྟུག་པོའམ། ཏིལ་ཞིང་སྟུག་པོའམ། རྩཝ་ཀུ་ཤ་སྟུག་པོ་ལྟ་བུར་གྱུར་པ་དེ་དག་ཐམས་ཅད་ལ་རིགས་ཀྱི་བུའམ། རིགས་ཀྱི་བུ་མོ་ལ་ལ་ཞིག་བསྐལ་པའམ་བསྐལ་པ་ལས་ལྷག་པར་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་ཅིང་བདེ་བའི་ཡོ་བྱད་ཡིད་དུ་འོང་བ་ཐམས་ཅད་དང ། བདེ་བར་སྦྱར་བའི་སྤྱད་པ་ཐམས་ཅད་ཀྱིས་བསྙེན་བཀུར་བྱེད་ན། ཀུན་དགའ་བོ། །དེ་ཇི་སྙམ་
140a
༄#། །དུ་སེམས། རིགས་ཀྱི་བུའམ་རིགས་ཀྱི་བུ་མོ་དེ་གཞི་དེ་ལས་བསོད་ནམས་མང་དུ་སྐྱེད་དམ། གསོལ་བ། བཅོམ་ལྡན་འདས། མང་ལགས་སོ། །བདེ་བར་གཤེགས་པ། མང་ལགས་སོ། །བཀའ་སྩལ་པ། ཀུན་དགའ་བོ། བསོད་ནམས་ཀྱི་ཕུང་པོ་གང་ཡིན་པ་དེ་ནི་གང་དེ་བཞིན་གཤེགས་པ་ལ་ཐ་ན་ཐལ་མོ་སྦྱར་བ་ལན་གཅིག་བྱས་ཏེ་དེ་བཞིན་གཤེགས་པ་ལ་ཕྱག་འཚལ་ལོ་ཞེས་ཚིག་ལན་གཅིག་སྨྲས་ན། ཀུན་དགའ་བོ། ཐལ་མོ་སྦྱར་བ་གཅིག་གིས་བསྟི་སྟང་བྱས་པ་དེ་ལ་དགེ་བའི་རྩ་བ་སྔ་མ་དེས་བརྒྱའི་ཆར་ཡང་མི་ཆོག་།སྟོང་གི་ཆ་དང ། བརྒྱ་སྟོང་གི་ཆ་དང ། གྲངས་དང ། བགྲང་བ་དང ། ཆར་ཡང་མི་ཆོག་གོ། ཀུན་དགའ་བོ། དེ་ཅིའི་ཕྱིར་ཞེ་ན། དེ་ལྟར་དེ་བཞིན་གཤེགས་པ་ནི་སྦྱིན་གནས་རྣམས་ཀྱི་བླ་ན་མེད་པ་སྟེ། དེ་བཞིན་གཤེགས་པ་ལ་ཡོན་ཕུལ་བ་དེ་ལྟར་རྫུ་འཕྲུལ་ཆེའོ། །ཀུན་དགའ་བོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དགྲ་བཅོམ་པས་ཡོངས་སུ་གང་བ་ལ་བསྙེན་བཀུར་བྱེད་པ་ལྟའང་ཞོག་ལ། ཀུན་དགའ་བོ། གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རང་སངས་རྒྱས་ཀྱིས་ཡོངས་སུ་གང་བར་གྱུར་པ་འདི་ལྟ་སྟེ། བུ་རམ་ཤིང་སྟུག་པོའམ། འདམ་བུ་སྟུག་པོ་ནས་རྩཝ་ཀུ་ཤ་སྟུག་པོའི་བར་
140b
ལྟ་བུར་གྱུར་པ་དེ་དག་ལ་འགའ་ཞིག་ཇི་སྲིད་འཚོའི་བར་དུ་བདེ་བའི་ཡོ་བྱད་ཐམས་ཅད་དང ། བདེ་བ་ལ་རེག་པར་གནས་པར་འགྱུར་བ་ཐམས་ཅད་ཀྱིས་བསྟི་སྟང་བྱེད། བླ་མར་བྱེད། རི་མོར་བྱེད། མཆོད་པར་བྱེད་ཅིང་རང་སངས་རྒྱས་དེ་དག་ཡོངས་སུ་མ་ངན་ལས་འདས་པ་རྣམས་ཀྱི་མཆོད་རྟེན་རིན་པོ་ཆེ་སྣ་བདུན་ལས་བྱས་ཏེ། དེ་དག་ལའང་ཇི་སྲིད་འཚོའི་བར་དུ་མེ་ཏོག་དང ། བདུག་པ་དང ། སྤོས་དང ། ཕྲེང་བ་དང ། བྱུག་པ་དང ། ཕྱེ་མ་དང ། གོས་དང ། གདུགས་དང ། རྒྱལ་མཚན་དང ། བ་དན་ཐམས་ཅད་ཀྱིས་བསྟི་སྟང་བྱེད། བླ་མར་བྱེད་པ་ནས་མཆོད་པར་བྱེད་པའི་བར་དུ་བྱེད་ན། ཀུན་དགའ་བོ། དེ་ཇི་སྙམ་དུ་སེམས། དེ་གཞི་དེ་ལས་བསོད་ནམས་མང་དུ་སྐྱེད་དམ། གསོལ་པ། བཅོམ་ལྡན་འདས། མང་ལགས་སོ། །བདེ་བར་གཤེགས་པ། མང་ལགས་སོ། །བཀའ་སྩལ་པ། ཀུན་དགའ་བོ། གང་བསོད་ནམས་ཀྱི་ཕུང་པོ་འདི་ནི་གང་དེ་བཞིན་གཤེགས་པ་ལ་ཐ་ན་སེམས་བསྐྱེད་པ་གཅིག་གིས་སེམས་རབ་ཏུ་དང་བས་རྗེས་སུ་དྲན་པ་དང ། སངས་རྒྱས་ཀྱི་ཡོན་ཏན་རྣམས་ལ་དད་པ་དང ། རྟོག་པ་དང ། མོས་པ་དང ། དེ་བཞིན་གཤེགས་པ་རྣམས་ཀྱི་ཡེ་ཤེས་ནི་བསམ་གྱིས་མི་ཁྱབ་བོ་ཞེས་ཚིག་ཏུ་སྨྲ་བ་ནི། ཀུན་དགའ་བོ། སེམས་དང་བའི་དགེ་བའི་རྩ་བ་འདི་ལ་རང་སངས་རྒྱས་ལ་བསྐྱེད་པའི་
141a
༄#། །བསོད་ནམས་ཀྱི་ཕུང་པོ་སྔ་མས་ཐ་ན་ཆ་ནས་རྒྱུའི་བར་དུའང་ཉེ་བར་མི་འགྲོའོ། །དེ་ཅིའི་ཕྱིར་ཞེ་ན། ཀུན་དགའ་བོ། །སངས་རྒྱས་བཅོམ་ལྡན་འདས་རྣམས་ཀྱི་བྱམས་པ་དཔག་ཏུ་མེད། སྙིང་རྗེ་ཆེན་པོ་དཔག་ཏུ་མེད། ཚུལ་ཁྲིམས་དཔག་ཏུ་མེད། ཏིང་ངེ་འཛིན་དཔག་ཏུ་མེད། ཤེས་རབ་དཔག་ཏུ་མེད། རྣམ་པར་གྲོལ་བ་དཔག་ཏུ་མེད། རྣམ་པར་གྲོལ་བའི་ཡེ་ཤེས་མཐོང་བ་དཔག་ཏུ་མེད། ཡང་དག་པར་འགྲུབ་པ་དཔག་ཏུ་མེད། རྟོགས་པ་དཔག་ཏུ་མེད་དེ། ཀུན་དགའ་བོ། །སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་བསམ་གྱིས་མི་ཁྱབ། སངས་རྒྱས་ཀྱི་ཡུལ་བསམ་གྱིས་མི་ཁྱབ་པ་དེ་ལ་རྣམ་པར་སྨིན་པའང་བསམ་གྱིས་མི་ཁྱབ་པར་ཤེས་པར་བྱོས་ལ། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ་ཁྱོད་རྫུ་འཕྲུལ་ཆེན་པོ་དང ། རྒྱ་ཆེན་པོར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་ཁྱོད་ཀྱིས་ལོ་ཉི་ཤུ་ལྷག་གི་བར་དུ་དེ་བཞིན་གཤེགས་པ་ལ་བྱམས་པའི་ལུས་ཀྱི་ལས་དང ། བྱམས་པའི་ངག་གི་ལས་དང ། བྱམས་པའི་ཡིད་ཀྱི་ལས་ཀྱིས་བསྙེན་བཀུར་བྱས་ཤིང་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་བཟུང་སྟེ། མང་དུ་ཐོས་པ་རྣམས་ཀྱི་མཆོག་།སྣ་ཚོགས་སྨྲ་བ་རྣམས་ཀྱི་མཆོག། །གསལ་བ། དུལ་
141b
བ། འཇིགས་པ་མེད་པ། མང་དུ་ཐོས་པ། མདོ་འཛིན་པ། འདུལ་བ་འཛིན་པ། མ་མོ་འཛིན་པ། འཁོར་བཞི་རྣམས་ལ་ཆོས་འཆད་པས་ངལ་བ་མེད་པ་ཡིན་ནོ། །ཀུན་དགའ་བོ།་ང་འདས་ནས་ཁྱོད་དང་གནས་བརྟན་འོད་སྲུང་ཆེན་པོ་གཉིས་སྟོན་པའི་མཛད་པ་བྱེད་པར་འགྱུར་གྱི། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ་ཁྱོད་རྫུ་འཕྲུལ་ཆེ་བར་འགྱུར། ཕན་ཡོན་ཆེ་བ་དང་གཟི་ཆེ་བ་དང ། ཀུན་དགའ་བོ་ཁྱོད་རྒྱ་ཆེ་བར་འགྱུར་རོ། །སྐུ་གདུང་མེད་པར་མི་འགྱུར་བའི་ལེའུ་སྟེ་བདུན་པ་རྫོགས་སོ།། །།བམ་པོ་བཞི་པ། དེ་ནས་ཡང་བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། སེམས་ཅན་གང་དག་ཁ་ཅིག་སངས་རྒྱས་བཅོམ་ལྡན་འདས་རྣམས་ཀྱི་གསུང་ཐོས་སམ། མཚན་གྱི་སྒྲ་ཐོས་ན། ཀུན་དགའ་བོ། དེའང་དེ་དག་ལ་ཡོངས་སུ་མྱ་ངན་ལས་འདས་ཀྱི་བར་དུ་དོན་མེད་པར་མི་འགྱུར་བར་ང་སྨྲའོ། །ཀུན་དགའ་བོ། གང་སངས་རྒྱས་རྣམས་ལ་ཕྱག་འཚལ་ལོ་ཞེས་བྱ་བའི་ཚིག་དེའི་དོན་ཀྱང་གང་ཡིན། དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས། བཅོམ་ལྡན་འདས་ནི་ཆོས་ཐམས་ཅད་ཀྱི་རྩ་བ་ལགས། བཅོམ་ལྡན་འདས་ནི་འདྲེན་
142a
༄#། །པ་ལགས། བཅོམ་ལྡན་འདས་ནི་སྟོན་པ་ལགས་ན། བཅོམ་ལྡན་འདས་དགེ་སློང་རྣམས་ལ་དོན་དེ་ལེགས་པར་བཤད་དུ་གསོལ། བཅོམ་ལྡན་འདས་ལས་མངོན་སུམ་དུ་ཐོས་ནས་དོན་དེ་བཞིན་དུ་འཛིན་པར་འགྱུར་རོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་གཟུང་ཞིག་དང་ངས་བཤད་དོ། །བཅོམ་ལྡན་འདས། དེ་བཞིན་ནོ་ཞེས་གསོལ་ནས། ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། འདི་ལ་སངས་རྒྱས་ལ་ཕྱག་འཚལ་ལོ་ཞེས་བྱ་བ་ཚིག་དེའི་དོན་ནི་འདི་ཡིན་ཏེ། འདི་ལྟ་སྟེ། སངས་རྒྱས་བཅོམ་ལྡན་འདས་རྣམས་ཀྱི་མཚན་གྱི་སྒྲ་དོན་མེད་པར་མི་འགྱུར་བ་ཡིན་ནོ། །ཀུན་དགའ་བོ།་དེ་ལྟར་ན་སངས་རྒྱས་ལ་ཕྱག་འཚལ་ལོ་ཞེས་བྱ་བ་འདི་ནི་དོན་མེད་པར་མི་འགྱུར་བར་བཤད་དོ། །ཀུན་དགའ་བོ། དེ་བས་ན་དོན་འདི་རྒྱ་ཆེར་ཤེས་པར་བྱ་བ་དང ། ཡོངས་སུ་རྫོགས་པར་བྱ་བ་དང ། སངས་རྒྱས་བཅོམ་ལྡན་འདས་རྣམས་ཀྱི་མཚན་ཐོས་ན་དད་པའི་རིགས་ཀྱི་བུ་དང་རིགས་ཀྱི་བུ་མོ་དག་བསྟན་པ་འདི་ལ་རྒྱ་ཆེར་སེམས་
142b
དང་བར་འགྱུར་བར་བྱ་བའི་ཕྱིར་ཁྱོད་ལ་དཔེ་བསྟན་ཏོ། །ཀུན་དགའ་བོ། སྔོན་བྱུང་བ་འདས་པའི་དུས་ན་ཚོང་པའི་ཚོགས་མང་པོ་རྒྱ་མཚོ་ཆེན་པོར་ཞུགས་པར་གྱུར་ཏེ། དེ་དག་རྒྱ་མཚོའི་དབུས་སུ་ཕྱིན་པ་དང་གྲུ་བོ་ཆེ་ཆུ་སྲིན་གྱིས་ཟིན་པར་གྱུར་ཏོ། །ཀུན་དགའ་བོ། དེ་ནས་ཚོང་པའི་ཚོགས་ཆེན་པོ་འཇིགས་ཤིང་དངངས་སྐྲག་སྟེ་སྤུ་ཟིང་ཞེས་བྱེད་པར་གྱུར་ཅིང་འཆི་བའི་འཇིགས་པས་སྐྲག་སྟེ། མགོན་མེད། སྐྱབས་མེད། དཔུང་གཉེན་མེད་པར་གྱུར་ནས་དེ་དག་སོ་སོ་ན་དུ་ཞིང་ཆོ་ངེ་འདོན་སྨྲེ་སྔགས་འདོན་ཏེ་རྣམ་པར་སྨྲེ་བ་སྣ་ཚོགས་ཀྱིས་རྣམ་པར་སྨྲེ་སྟེ། ཀྱེ་མའོ། །ཛམྦུ་གླིང་དེ་ཉམས་རེ་དགའ། །ཀྱེ་མའོ། །འཚོ་བའི་འཇིག་རྟེན་དེ་རེ་བཟང ། ཀྱེ་མའོ། །མིར་འགྱུར་བ་འདི་རྙེད་པར་རེ་དཀའ། ཀྱེ་མའོ། །ཕ་མ་དག་དང་འབྲལ་པར་འགྱུར་རོ། །ཀྱེ་མའོ། །བུ་དང་ཆུང་མ་དང ། ཀྱེ་མའོ། །མཛའ་བཤེས་དང་ཆུང་མའི་ཚོགས་རྣམས་ཕྱིན་ཆད་མི་མཐོང་ངོ་ཞེས་དུ་ཞིང་སྨྲེ་སྔགས་འདོན། སྡུག་བསྔལ་དང་ཡིད་མི་བདེ་བ་མྱོང་སྟེ། འཚོ་བར་འདོད་པས་ལྷ་སྣ་ཚོགས་རྣམས་ལ་ཕྱག་འཚལ་ལོ། །ཀུན་དགའ་བོ། དེ་ནས་ཚོང་པའི་ཚོགས་དེ་ན་དེད་དཔོན་མཁས་པ་གསལ་བ་ཡིད་གཞུངས་པ། སངས་རྒྱས་དང ། ཆོས་དང ། དགེ་འདུན་ལ་མངོན་པར་དད་པ། ལྷར་གཞན་མི་འཛིན་ཅིང་སངས་རྒྱས་བཅོམ་ལྡན་
143a
༄#། །འདས་ལ་དད་པ་ཞིག་ཡོད་པར་གྱུར་ཏེ། དེས་ཚོང་པ་དེ་དག་ཐམས་ཅད་ལ་འདི་སྐད་ཅེས་སྨྲས་སོ། །ཀྱེ་ཚོང་པ་དག་།འཇིགས་ཤིང་སྐྲག་པ་ཆེན་པོ་འདི་ལས་ཕྱིན་ཅིང་ཐར་བར་འདོད་དམ། མ་ཐར་ནའང་བདེ་འགྲོ་མཐོ་རིགས་སུ་སྐྱེ་བར་འདོད་ན་ཚུར་ཤོག་།ཐམས་ཅད་ཚོགས་ཤིང་མཐུན་པས་ང་ཇི་སྐད་དུ་སྨྲ་བ་དེ་བཞིན་དུ་ཁྱེད་ཀྱང་སོ་སོར་སྨྲོས་ཤིག་དང ། དེ་དག་གིས་སྨྲས་པ། དེད་དཔོན་ཁྱོད་སྨྲོས་ཤིག་།བདག་ཅག་ཀྱང་ཁྱོད་སྨྲ་བ་བཞིན་དུ་ཟློས་སོ། །ཀུན་དགའ་བོ། དེ་ནས་དེད་དཔོན་དེ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་གྲུ་བོ་ཆེ་ལ་བཙུགས་ཏེ་སངས་རྒྱས་ལ་དམིགས་པའི་སེམས་ཀྱིས་སྒྲ་ཆེན་པོ་ཕྱུང་སྟེ། སངས་རྒྱས་རྣམས་ལ་ཕྱག་འཚལ་ལོ། །མི་འཇིགས་པ་སྦྱིན་པ། ཐུགས་རྗེ་ཆེན་པོ་དང་ལྡན་པ། སེམས་ཅན་ཐམས་ཅད་ལ་ཐུགས་བརྩེ་བ་ཅན་སངས་རྒྱས་རྣམས་ལ་ཕྱག་འཚལ་ལོ་ཞེས་སངས་རྒྱས་ལ་ཕྱག་འཚལ་ཏོ། །ཚོང་པའི་ཚོགས་དེ་དག་ཀྱང་དེ་ཉིད་དུ་ཐལ་མོ་སྦྱར་ནས་མགྲིན་གཅིག་ཏུ་ཚིག་སྨྲས་པ། སངས་རྒྱས་རྣམས་ལ་ཕྱག་འཚལ་ལོ། །སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ། སེམས་ཅན་ཐམས་ཅད་ལ་ཐུགས་བརྩེ་བ་ཅན་ལ་ཕྱག་འཚལ་ལོ་ཞེས་བྱས་སོ། །
143b
ཀུན་དགའ་བོ། དེ་ནས་ཆུ་སྲིན་དེས་སངས་རྒྱས་ཀྱི་སྒྲ་དེ་ཐོས་སོ། །དེས་སངས་རྒྱས་ལ་ཕྱག་འཚལ་ལོ་ཞེས་བྱ་བ་དེ་ཐོས་ནས་དགའ་བ་ཆེན་པོ་དང་རྣམ་པར་འཚེ་བ་མེད་པའི་སེམས་ཐོབ་པར་གྱུར་ཏེ་དེས་ཁ་སླར་བཙུམས་སོ། །ཀུན་དགའ་བོ། །དེ་ནས་དེད་དཔོན་དེ་གྲུ་དེ་དང་བཅས་པར་བདེ་བར་ཐར་ཏེ། གྲུ་བོ་ཆེ་དེ་དག་བདེ་ཞིང་དོན་གྲུབ་ནས་སླར་ཛམྦུའི་གླིང་དུ་འཁོར་ཏོ། །ཆུ་སྲིན་དེའང་སངས་རྒྱས་ཀྱི་སྒྲ་དེ་ཐོས་པས་བདེ་བ་མྱོང་ཞིང་ཕྱིན་ཆད་སྲོག་ཆགས་གཞན་མི་ཟ་སྟེ། དེ་ལྟོགས་ནས་དེ་ཉིད་དུ་འཆི་བའི་དུས་བྱས་སོ། །དེ་འཆི་བའི་དུས་བྱས་མ་ཐག་ཏུ་དུད་འགྲོའི་སྐྱེ་གནས་ལས་འཕོས་ནས་མི་དང་སྐལ་པ་མཉམ་པར་སྐྱེས་པར་གྱུར་ཏོ། །དེ་དེ་བཞིན་གཤེགས་པས་གསུངས་པའི་ཆོས་འདུལ་བ་ལ་དད་པར་གྱུར་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ ། །རབ་ཏུ་བྱུང་ནས་ཀྱང་དགེ་བའི་བཤེས་གཉེན་ལ་བསྙེན་ཅིང་བསྟེན་ལ་བསྙེན་བཀུར་བྱས་པས་དགྲ་བཅོམ་པ་ཐོབ་སྟེ། མངོན་པར་ཤེས་པ་དྲུག་མངོན་སུམ་དུ་བྱས་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་མྱ་ངན་ལས་འདས་སོ། །ཀུན་དགའ་བོ།་ཆུ་སྲིན་དུད་འགྲོའི་སྐྱེ་གནས་སུ་གྱུར་པ་དེས་སངས་རྒྱས་ཀྱི་སྒྲ་ཐོས་པ་དེ་མིར་འགྱུར་བའི་རྒྱུར་གྱུར་པ་དང ། རབ་ཏུ་བྱུང་བའི་རྒྱུར་གྱུར་པ་དང ། དགྲ་བཅོམ་པ་ཐོང་
144a
༄#། །པའི་རྒྱུར་གྱུར་པ་དང ། ཡོངས་སུ་མྱ་ངན་ལས་འདས་པའི་རྒྱུར་གྱུར་པ་ལ་ལྟོས། ཀུན་དགའ་བོ། སངས་རྒྱས་བཅོམ་ལྡན་འདས་རྣམས་ཀྱི་སྒྲ་ཐོས་པ་དེ་ཇི་ཙམ་དུ་རྫུ་འཕྲུལ་ཆེ་བ་དང ། མཚན་བརྗོད་པ་ཇི་ཙམ་དུ་རྫུ་འཕྲུལ་ཆེ་བ་དང ། སེམས་དང་བ་ཇི་ཙམ་དུ་རྫུ་འཕྲུལ་ཆེ་བ་ལ་ལྟོས། གང་ན་མི་དགེ་བར་གཏོགས་པ་དུད་འགྲོའི་སྐྱེ་གནས་སུ་གྱུར་པའི་ཆུ་སྲིན་གྱིས་སངས་རྒྱས་ཀྱི་སྒྲ་ཐོས་པ་དེའང་དོན་མེད་པར་མ་གྱུར་ན་མིར་གྱུར་པ་ལྟ་ཅི་སྨྲོས། །ཀུན་དགའ་བོ་ཁྱོད་ཀྱིས་རྣམ་གྲངས་འདིས་ཀྱང་འདི་ལྟར་རིག་པར་བྱ་སྟེ། འདི་ལྟར་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་སྒྲ་ཐོས་པའང་དོན་མེད་པར་མི་འགྱུར་ན། སངས་རྒྱས་ལ་བསྐྱེད་པའི་དགེ་བའི་རྩ་བ་དེ་ལས་གཞན་ལྟ་ཅི་སྨོས། །ཀུན་དགའ་བོ། ཉི་ཚེ་བ་བྱེད་པ་ནི་ཚེ་བ་འགྲུབ། ཡོངས་སུ་རྫོགས་པ་བྱེད་པ་ནི་ཡོངས་སུ་རྫོགས་པ་འགྲུབ་བོ་།ངས་དེ་སྐད་སྨྲས་པ་དེའང་ངས་ཅི་ལ་བརྟེན་ཏེ་སྨྲས་ཤེ་ན། ཉི་ཚེ་བ་བྱེད་པ་ཞེས་བྱ་བ་ནི་གང་དད་པ་ལས་བྱུང་བ་དགེ་བའི་རྩ་བ་ཚུ་རོལ་པའི་དུས་ཅན་ཉན་ཐོས་ཀྱི་ས་བོན་སྐྱེད་པ་སྟེ་ཉན་ཐོས་སུ་འགྱུར་རོ། །དེ་དགེ་བའི་རྩ་བ་དེས་ཉན་ཐོས་ཀྱིས་ཡོངས་སུ་རྫོགས་པར་བྱེད་དོ། །རང་གི་ཕྱིར་བྱེད་པ་ནི་རང་གི་དགེ་བའི་རྩ་
144b
བ་བསྐྱེད་ནས་རང་སངས་རྒྱས་ཀྱིས་ཡོངས་སུ་རྫོགས་པར་བྱེད་དོ། ཀུན་དགའ་བོ། ངས་འདི་ལ་བརྟེན་ནས་འདི་ཉི་ཚེ་བ་བྱེད་པའོ་ཞེས་སྨྲས་སོ། །ཀུན་དགའ་བོ། ཡོངས་སུ་རྫོགས་པ་བྱེད་པ་ནི། ཀུན་དགའ་བོ། གང་ཐོག་མ་དང་ཐ་མ་མེད་པའི་དུས་ཅན་དགེ་བའི་རྩ་བ་སངས་རྒྱས་ལ་བསྐྱེད་པ། སངས་རྒྱས་ཀྱི་ས་བོན་བསྐྱེད་པ་སྟེ། དེ་དུས་རིང་མོ་ཞིག་འདས་ནས་བརྒྱ་ལ་བརྒྱ་ལམ་ན་རྒྱུ་དེ་དང ། རྐྱེན་དེ་དང ། དགེ་བའི་རྩ་བ་དེས་སངས་རྒྱས་བཅོམ་ལྡན་འདས་རྣམས་མཉེས་པར་བྱེད་དོ། །མཉེས་པར་བྱས་ནས་ཀྱང་ཡོངས་སུ་རྫོགས་པར་བྱ་བའི་ཕྱིར་དེ་ལ་དགེ་བའི་རྩ་བ་བསྐྱེད་དོ། །བསྐྱེད་ནས་ཀྱང་བྱང་ཆུབ་ཀྱི་ཚོགས་རྣམས་མངོན་པར་འདུས་བྱས་ནས་ཡན་ལག་རྣམས་ཡོངས་སུ་རྫོགས་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་འཇིག་རྟེན་ན་སྒྲ་རྣམ་པར་གྲགས་པའི་སངས་རྒྱས་སུ་འགྱུར་ཏེ། ཀུན་དགའ་བོ། འདི་ནི་ཡོངས་སུ་རྫོགས་པར་བྱེད་པ་ཞེས་བྱའོ། །དེ་ལྟར་ངས་གང་སྨྲས་པ་དེ་ནི་འདི་ལ་བརྟེན་ཏེ་སྨྲས་སོ། །ཀུན་དགའ་བོ། རྣམ་གྲངས་འདིས་ཀྱང་ཁྱོད་ཀྱིས་འདི་ལྟར་གང་ཉི་ཚེ་བ་བྱེད་པས་ནི་ཉི་ཚེ་བ། ཡོངས་སུ་རྫོགས་པ་བྱེད་པས་ནི་ཡོངས་སུ་རྫོགས་པ་འགྲུབ་པར་རིགས་པར་བྱའོ། །ཀུན་དགའ་བོ། ངས་སྤྱོད་པ་གཞན་ཡང་ཐ་ན་རྩ་བ་བཞི་པ་ཙམ་ཡང་བཤད་དོ། །དེ་ལྟར་
145a
༄#། །ངས་གང་སྨྲས་པ་དེ་ངས་ཅི་ལ་བརྟེན་ཏེ་སྨྲས་ཤེ་ན། ཀུན་དགའ་བོ། ངས་སེམས་ཅན་རིད་ཅིང་ཉམ་ཆུང་བ་རྣམས་ལ་བརྟེན་ནས་བཤད་དེ། ཀུན་དགའ་བོ།་ང་ནི་སེམས་ཅན་ཆུད་ཟོས་པ་རྣམས་ཀྱི་སྐྱབས་སོ། །ང་ནི་རབ་ཏུ་ཆུད་ཟོས་པ་རྣམས་ཀྱི་མགོན་ནོ། །ང་ནི་དཔུང་གཉེན་ནོ། །ང་ནི་བརྟེན་མེད་པ་དང་མགོན་མེད་པ་རྣམས་ཀྱི་རྟེན་དང་མགོན་ཡིན་ནོ། །ཀུན་དགའ་བོ། ང་ནི་སེམས་ཅན་སྒྲོན་མ་མེད་པ་དང ། ལོང་བ་དང ། མིག་མེད་པ་རྣམས་ཀྱི་སྒྲོན་མ་དང ། མིག་དང ། སྣང་བ་དང ། འོད་བྱེད་པའོ། ། ཀུན་དགའ་བོ། །ཕས་ཀྱི་རྒོལ་བ་ཐམས་ཅད་ནི་སྐྱབས་མེད་པ། ལོང་བ། མིག་མེད་པ། ཡོངས་སུ་འདྲེན་པ་མེད་པའོ། །ཀུན་དགའ་བོ། ང་ནི་ལྷ་དང་བཅས་པའི་འཇིག་རྟེན་གྱི་སྟོན་པའོ། །འཆོས་པའོ། །སེམས་ཅན་ཐམས་ཅད་ལ་སྙིང་བརྩེ་བ་ཅན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ། །ཕྱི་མའི་དུས་ཟད་པའི་དུས། དམ་པའི་ཆོས་འཇིག་པར་འགྱུར་བའི་དུས་ན་གང་དག་ངའི་བསྟན་པ་འདི་ལ་རབ་ཏུ་འབྱུང་བར་འགྱུར་བ་དག་རབ་ཏུ་བྱུང་ནས་བུའི་ལག་ནས་བཟུང་སྟེ། བུ་དང་ལྷན་ཅིག་ཏུ་ཆང་སྐྱོགས་གང་གི་ཕྱིར་ཆང་པའི་ཁྱིམ་ནས་ཆང་པའི་ཁྱིམ་དུ་འཁྱམ་པ། ངའི་དམ་པའི་ཆོས་འདིའི་རྗེས་སུ་སློབ་པ་དེ་དག་ཐམས་ཅད་ཀྱང ། ཀུན་དགའ་བོ། བསྐལ་པ་བཟང་པོ་འདི་ལ་ཡོངས་
145b
སུ་མྱ་ངན་ལས་འདའ་བར་འགྱུར་རོ། །ཀུན་དགའ་བོ། ཅིའི་ཕྱིར་བསྐལ་པ་འདི་བསྐལ་པ་བཟང་པོ་ཞེས་བྱ་ཞེ་ན། ཀུན་དགའ་བོ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་འཇིག་པར་གྱུར་པའི་ཚེ་ས་ཆེན་པོ་རྒྱ་མཚོ་གཅིག་ཏུ་གྱུར་པ་ན་གནས་གཙང་མའི་རིས་ཀྱི་ལྷའི་བུ་རྣམས་ལྷའི་མིག་གིས་ཆུས་འཇིག་པ་ཐམས་ཅད་ལ་རྣམ་པར་བལྟའོ། །དེ་དག་གིས་བལྟས་ན་ཛམྦུའི་གླིང་དུ་པདྨ་ཆེན་པོ་གསེར་གྱི་ཁ་དོག་ལྟ་བུ། གསེར་གྱི་འོད་བྱུང་བ། འདབ་མ་སྟོང་ཡོད་པ། བསུང་ཞིམ་པ། ཡིད་དུ་འོང་བ་སྟོང་ཐམ་པ་མཐོང་ངོ ། །དེ་དག་གིས་དེ་མཐོང་ནས་འདི་སྙམ་དུ་སེམས་ཏེ། པདྨ་འདི་དག་ཇི་སྙེད་བྱུང་བ་དེ་སྙེད་ཀྱི་སངས་རྒྱས་བཅོམ་ལྡན་འདས་རྣམས་བསྐལ་པ་འདི་ལ་འབྱུང་བར་འགྱུར་རོ་སྙམ་ནས་དེ་དག་ཚིམ་ཞིང་མགུ་ལ་ཡི་རང་ཞིང་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་གང་དུ་སངས་རྒྱས་སྟོང་འབྱུང་བ། ཀྱེ་མའོ། །བསྐལ་པ་འདི་བཟང་པོར་འགྱུར་རོ། །ཀྱེ་མའོ། བསྐལ་པ་འདི་རབ་ཏུ་བཟང་པོར་འགྱུར་རོ་ཞེས་ཆེད་དུ་བརྗོད་པ་ཆེད་དུ་བརྗོད་དེ། ཀུན་དགའ་བོ། དེའི་ཕྱིར་བསྐལ་པ་འདི་བཟང་པོ་ཞེས་བྱའོ། །ཀུན་དགའ་བོ། འདི་ལྟར་བསྐལ་པ་བཟང་པོ་འདི་ལ་བསྐལ་པ་བཟང་པོ་ཞེས་མིང་བཏགས་པའི་བསྐལ་པ་བཟང་པོའི་རྒྱུ་འདི་ཡིན་རྐྱེན་འདི་ཡིན་ནོ། །ཀུན་དགའ་བོ། བསྐལ་པ་བཟང་པོ་འདི་ཡང་
146a
༄#། །འདས་ནས་སངས་རྒྱས་དགུ་བརྒྱ་དགུ་བཅུ་རྩ་དྲུག་འབྱུང་སྟེ། བསྐལ་པ་འདི་ལ་འཁོར་བ་འཇིག་ཚུན་ཆད་ད་ལྟའི་ང་དང་བཞིའོ། །ཀུན་དགའ་བོ། །ངའི་འོག་ཏུ་བྱམས་པ་འབྱུང་སྟེ། དེ་བཞིན་གཤེགས་པ་མོས་པ་ཞེས་བྱ་བ་སྟོང་གི་ཐ་མར་འབྱུང་ངོ ། །ཀུན་དགའ་བོ། རྣམ་གྲངས་འདིས་ཀྱང་ཁྱོད་ཀྱིས་འདི་ལྟར་རིག་པར་བྱ་སྟེ། འདི་ལྟར་བསྐལ་པ་བཟང་པོ་འདི་ལ་ང་འདས་ནས་སངས་རྒྱས་དགུ་བརྒྱ་དགུ་བཅུ་རྩ་དྲུག་འབྱུང་བའི་ཚེ། ཀུན་དགའ་བོ། ངའི་བསྟན་པ་འདི་ལ་གང་དག་དགེ་སྦྱོང་གི་རིགས་ཅན་དགེ་སྦྱོང་ཤིན་ཏེ་མ། དགེ་སྦྱོང་དུ་ཁས་འཆེ་བ། དགེ་སྦྱོང་ལྟར་བཅོས་པ། ངུར་སྨྲིག་གྱོན་པ་འབྱུང་བ་དེ་དག་ཐམས་ཅད་ཀྱང་བསྐལ་པ་བཟང་པོ་འདི་ལ་གང་བྱམས་པ་ནས་མོས་པ་ལ་ཐུག་གི་བར་དུ་ཕྱིས་འབྱུང་བའི་སངས་རྒྱས་བཅོམ་ལྡན་འདས་དེ་དག་གི་འོག་ཏུ་མཐར་གྱིས་མྱ་ངན་ལས་འདའ་བར་འགྱུར་རོ། །དེ་དག་ཐམས་ཅད་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་སྟེ། དགེ་སློང་གཅིག་ཀྱང་ལྷག་མ་མ་ལུས་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ། འདི་ལྟར་དེ་བཞིན་གཤེགས་པ་ཆོས་ཀྱི་དབྱིངས་རྟོགས་ཤིང་རྗེས་སུ་རྟོགས་པ་ལ་འདི་ལྟ་བུ་དག་ཐ་ན་སེམས་དང་བ་གཅིག་བསྐྱེད་པ་དང ། དཀར་
146b
པོ་དང་ནག་པོའི་ཆོས་རྣམས་ཆུད་ཟ་བར་མི་འགྱུར་པའི་ཕྱིར་རོ། །ཀུན་དགའ་བོ། གང་དག་ཁ་ཅིག་སེམས་དང་བས་སངས་རྒྱས་རྣམས་ལ་ཕྱག་འཚལ་ལོ་ཞེས་བྱ་བའི་ཚིག་བརྗོད་ན། ཀུན་དགའ་བོ། དགེ་བའི་རྩ་བ་དེའང་མྱ་ངན་ལས་འདའ་བ་ལ་གཞོལ་བར་ང་སྨྲ་སྟེ། མྱ་ངན་ལས་འདའ་བའི་མཐར་འགྱུར་བ་དང ། མྱ་ངན་ལས་འདའ་བའི་མུར་ཐུག་པར་འགྱུར་བར་ང་སྨྲ་ན། གང་དེ་བཞིན་གཤེགས་པ་བཞུགས་པ་ལ་བསྟི་སྟང་བྱེད་པ་དང ། བླ་མར་བྱེད་པ་དང ། རིམ་གྲོར་བྱེད་པ་དང ། མཆོད་པར་བྱེད་པ་དང ། ཡོངས་སུ་མྱ་ངན་ལས་འདས་པའི་སྐུ་གདུང་ལ་སྐུ་གདུང་གི་མཆོད་པ་བྱེད་པ་ལྟ་ཅི་སྨོས། ཀུན་དགའ་བོ། དགེ་སློང་གི་རིགས་ངུར་སྨྲིག་བགོས་པ་དེ་དག་ནི་ཐ་ན་ལན་འགའ་ཞིག་སངས་རྒྱས་རྣམས་ལ་ཕྱག་འཚལ་ལོ་ཞེས་ངེས་པར་ཚིག་ཏུ་བརྗོད་པར་ཡང་འགྱུར་ན་སེམས་དང་བ་བསྐྱེད་པར་འགྱུར་བ་དང ། དགེ་བའི་རྩ་བ་གཞན་དག་བསྐྱེད་པར་འགྱུར་བ་ལྟ་ཅི་སྨོས། །ཀུན་དགའ་བོ། ངས་འདི་ལ་དགོངས་ནས་ཀྱང་ངས་དེ་སྐད་བཤད་དོ། །དེ་ནས་བཅོམ་ལྡན་འདས་ཀྱིས་ཚིག་དེ་དག་ཚིགས་སུ་བཅད་དེ་བཀའ་སྩལ་པ། དེ་ལྟར་སངས་རྒྱས་བསམ་མི་ཁྱབ། །སངས་རྒྱས་ཆོས་ཀྱང་བསམ་མི་ཁྱབ། །བསམ་མི་ཁྱབ་ལ་དད་བྱས་ན། །དེ་ཡི་རྣམ་སྨིན་བསམ་མི་ཁྱབ། །མཐུ་ཆེན་ལྡན་པ་སྣང་བ་མཛད་པ་པོ། །འདས་པའི་སངས་རྒྱས་རྣམས་ལ་མཆོད་བྱས་
147a
༄#། །ནས། །སྙིང་རྗེས་འཇིག་རྟེན་ཀུན་ཏུ་མཚུངས་མེད་ཅིང ། །གྲངས་མེད་བྱང་ཆུབ་འདི་འཚང་རྒྱ་བྱ་ཞེས། །དེ་ཚེ་སྦྱིན་ལ་མངོན་པར་བརྩོན་པར་གྱུར། །དད་པའི་དབང་པོ་སྒོམ་དང་བརྩོན་འགྲུས་ལྡན། །བརྩོན་འགྲུས་སྟོབས་ལྡན་མཐུན་པ་རབ་བསྐྱེད་ནས། །སྦྱིན་པ་བྱིན་ནས་སྐྱེ་དགུ་སྙིང་བརྩེ་བྱས། །ཇི་ལྟར་ཕ་དང་མ་དང་སྲིང་མོ་དང ། །སྤུན་དང་གྲོགས་ལ་བྱམས་པར་འགྱུར་བ་བཞིན། །མཛའ་དང་མི་མཛའ་དག་ལ་ཁོང་ཁྲོ་སྤངས། །བྱང་ཆུབ་མཚུངས་མེད་གྲངས་མེད་ངས་ཐོབ་བོ། །བྱང་ཆུབ་ཞི་བ་མྱ་ངན་མེད་འཚོལ་ཕྱིར། །བསྐལ་པ་བྱེ་བར་ང་ཡིས་སྦྱིན་པ་བྱིན། །ཕན་པར་འདོད་པས་སྙིང་རྗེ་རབ་བསྐྱེད་ནས། །མགོ་དང་མིག་དང་ཤ་དང་ཁྲག་རྣམས་དང ། །རྒྱལ་སྲིད་སྟོང་ཕྲག་རྣམ་པ་མང་པོ་བཏང ། །སྡུག་པའི་བུ་དང་ཆུང་མ་བུ་མོ་དང ། །དེ་བཞིན་རྟ་དང་བཞོན་པ་དུ་མ་དག། བྱང་ཆུབ་འདི་ཡི་ཆེད་དུ་ངས་སྔོན་བཏང ། །བསྐལ་པ་སྟོང་དད་བྱེ་བ་མང་པོར་ཡང ། །བྱང་ཆུབ་དམ་པ་འདི་ནི་འདོད་པའི་ཕྱིར། །ཀུན་ཏུ་རྒྱུག་པའི་ཚེ་ནི་ཡང་དང་ཡང ། །དད་པ་མང་པོས་ངས་ནི་སྦྱིན་པ་བྱིན། །བྱང་ཆུབ་མཆོག་འདི་ཡོངས་སུ་འཚོལ་བའི་ཚེ། །ཚ་དང་གྲང་དང་བཀྲེས་དང་སྐོམ་པ་ཡི། །སྡུག་བསྔལ་མི་ཟད་མང་པོ་བཟོད་བྱས་ནས། །བརྩོན་འགྲུས་བརྩམས་ཏེ་བདག་ནི་འཆི་དུས་
147b
བྱས། །བྱང་ཆུབ་ཞི་བ་མྱ་ངན་མེད་འཚོའི་ཚེ། །འཇིག་རྟེན་འདི་དག་ཀུན་ལ་ཕན་པའི་ཕྱིར། །གང་དག་ངས་སྤྱད་པ་ཡི་མཚན་ཉིད་རྣམས། །ལོ་བརྒྱའམ་ཡང་ན་བསྐལ་པར་བརྗོད་པར་བྱ། །ང་ནི་འཁོར་ཚེ་སངས་རྒྱས་བརྒྱ་དག་དང ། །སངས་རྒྱས་སྟོང་དང་བྱེ་མང་མཉེས་པར་བྱས། །སངས་རྒྱས་མཐུ་ཆེན་དེ་དག་ཐམས་ཅད་ལ། །གསེར་གྱི་མེ་ཏོག་རྣམས་ཀྱིས་རྟག་ཏུ་བཀུར། །ཟས་དང་སྐོམ་དང་དེ་བཞིན་གོས་རྣམས་དང ། །སྤོས་དང་ཕྲེང་བ་དག་དང་བྱུག་པ་དང ། །བ་དན་རྒྱལ་མཚན་གདུགས་རྣམས་བྱེ་བ་ཡིས། །སངས་རྒྱས་བྱེ་བ་མང་པོ་ངས་མཆོད་དོ། །སྲོག་ཆགས་མང་པོ་སྲོག་ཆགས་བྱེ་བ་མང ། །ཕ་མཐའ་མེད་པའི་འཁོར་བ་འདིར་འཁོར་རྣམས། །ངས་ནི་རྟག་ཏུ་དབུགས་བྱུང་བྱས་ཤིང་སོང ། །སྦྱིན་པ་རྒྱ་ཆེན་བཟང་པོ་དག་ཀྱང་བྱིན། །ཚུལ་ཁྲིམས་བཟོད་པ་དེ་བཞིན་བརྩོན་འགྲུས་དང ། །ཏིང་ངེ་འཛིན་དང་ཤེས་རབ་དེ་བཞིན་ཐབས། །ཡང་དག་སྤོང་དང་དྲན་པ་ཉེར་གཞག་དང ། །དེ་བཞིན་རྫུ་འཕྲུལ་རྐང་བཞི་རབ་ཏུ་བསྒོམས། །བྱང་ཆུབ་དམ་པ་འདི་ནི་འདོད་པའི་ཕྱིར། །དབང་པོ་ལྔ་དང་སྟོབས་ལྔ་ལེགས་པར་བསྒོམས། །བྱང་ཆུབ་ཡན་ལག་བདུན་དང་འཕགས་པའི་ལམ། །བྱང་ཆུབ་ཕྱོགས་རྣམས་ཐམས་ཅད་ངས་བསྒོམས་སོ། །གང་བྱས་ན་ནི་འཇིག་པར་མི་འགྱུར་བ། །འཕགས་པའི་ཡེ་ཤེས་ཀྱིས་ནི་དགོངས་པར་གྱིས། །
148a
༄#། །རྟག་ཏུ་དང་བས་རབ་ཏུ་སྤྱད་བྱས་ན། །སྐྲ་རྩེ་ཙམ་དང་འབྲལ་བར་མི་འགྱུར་རོ། །ཕྱག་འཚལ་བའི་ལེའུ་སྟེ་བརྒྱད་བ་རྫོགས་སོ།། །།དེ་ནས་ཡང་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། སངས་རྒྱས་བཅོམ་ལྡན་འདས་རྣམས་ལ་དགེ་བའི་སེམས་གཅིག་བསྐྱེད་པའང་ཆུད་མི་ཟ་ན། དགེ་བའི་རྩ་བ་དེ་ལས་གཞན་རྣམས་ལྟ་ཅི་སྨོས། ཀུན་དགའ་བོ། །དེའི་ཕྱིར་དོན་འདི་རྒྱ་ཆེར་ཤེས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱ་སྟེ། འདི་ལ་སྐྱེས་བུ་མཁས་པ་ཁ་ཅིག་ནི་འདི་ལྟར་དེ་བཞིན་གཤེགས་པ་ལ་དང་བའི་སེམས་གཅིག་བསྐྱེད་པའང་ཆུད་མི་ཟ་བ་དཔེས་ཤེས་པར་འགྱུར་རོ། །ཀུན་དགའ་བོ། འདི་ལྟ་སྟེ། དཔེར་ན། མི་ལ་ལ་ཞིག་གིས་སྐྲའི་རྩེ་མོ་བརྒྱར་གཤགས་པས་ཆུའི་ཐིགས་པ་གཅིག་བླངས་ཏེ་ངའི་ཐད་དུ་འོངས་ནས་འདི་སྐད་ཅེས། ཀྱེ་གོའུ་ཏམ། ཆུའི་ཐིགས་པ་འདི་ཁྱོད་ཀྱི་ལག་ཏུ་གཞག་གི། བསྐལ་པ་འདས་ན་ཁྱོད་ཀྱིས་འདི་མཉམ་ཞིང་ལྷག་ཆད་མེད་པར་སླར་བདག་ལ་བྱིན་ཅིག། ཆུའི་ཐིགས་པ་འདི་ཁྱོད་ཀྱི་རླུང་དང་ཉི་མས་མ་བསྐམས་པར་གྱིས་ཤིག། རི་དྭགས་དང་བྱའི་ཚོགས་རྣམས་ལ་མ་བླུད་ཅིག། ཆུ་གཞན་དང་འདྲེས་པར་ཡང་མ་བྱ་ཞིག། ཆུ་འདི་ཁྱོད་ཀྱིས་སྣོད་དུ་བླུགས་ཏེ་བཅད་
148b
པར་བྱ་བའི་ས་ལ་མི་གཞག་གོ་ཞེས་ཟེར་ལ། དེ་དེ་བཞིན་གཤེགས་པས་བླངས་ནས་གངྒཱའི་ཀླུང་ཆེན་པོར་གནག་ན་ཀློང་གིས་དཀྲུགས་པར་མི་འགྱུར་བའི་ས་ཕྱོགས་དེར་བཞག་ནས་ཆུའི་ཐིགས་པ་དེ་གངྒཱའི་ཀླུང་ཆེན་པོའི་ནང་ན་ཀློང་གིས་མ་དཀྲུགས་ཤིང ། རི་དྭགས་དང་བྱའི་ཚོགས་ཀྱིས་མ་འཐུངས་པར་ཆུའི་ཐིགས་པ་དེ་ཆུའི་ཀླུང་ཆེན་པོ་དང་ལྷན་ཅིག་ཏུ་འབབ་ཅིང་རིམ་གྱིས་རྒྱ་མཚོ་ཆེན་པོར་སོང་ལ། དེ་ནས་ཆུའི་ཐིགས་པ་དེ་རྣམ་པར་འཐོར། རླུང་གི་ཕུང་པོས་ཀྱང་བསྐལ་པའི་མཐའི་བར་དུ་ཟད་པར་མ་གྱུར་ལ་ཡོངས་སུ་བརྟག་པ་བཟུང་སྟེ། མི་དེའང་བསྐལ་པར་གནས་ཤིང་ཡོངས་སུ་བརྟག་པ་བཟུང་སྟེ། ངའང་བསྐལ་པར་གནས་ལ། དེ་ནི་མི་དེ་བསྐལ་པ་འདས་པ་དང ། སླར་ངའི་གན་དུ་འོངས་ནས་འདི་སྐད་ཅེས། ཀྱེ་གོའུ་ཏམ། ཆུའི་ཐིགས་པ་དེ་བདག་ལ་དགོས་པ་ཞིག་ཡོད་ཀྱི། ཆུའི་ཐིགས་པ་དེ་སླར་བྱིན་ཅིག་ཅེས་ཟེར་ན། ཀུན་དགའ་བོ། བསྐལ་པར་ལོན་ཡང་ཆུའི་ཐིགས་པ་དེ་རྒྱ་མཚོ་ཆེན་པོའི་ཕྱོགས་འདི་ལྟ་བུ་ཞིག་ན་ཡོད་དོ་ཞེས་དེ་བཞིན་གཤེགས་པས་མཁྱེན་པའི་ཡེ་ཤེས་དེ་དེ་བཞིན་གཤེགས་པ་ལ་མངའོ། །ཀུན་དགའ་བོ། དེ་བཞིན་གཤེགས་པ་ལ་ནི་ཡེ་ཤེས་གང་དང་ལྡན་ན་དེ་བཞིན་གཤེགས་པས་རྒྱ་མཚོ་ཆེན་པོ་ནས་ཆུའི་ཐིགས་པ་དེ་སྐྲའི་རྩེ་མོ་ཚལ་པ་བརྒྱར་གཤེགས་པ་དེ་ཉིད་ཀྱིས་བླངས་ནས་ཆུ་གཞན་དང་མ་འདྲེས། རླན་པ་གཞན་གྱི་རྗེས་སུ་
149a
༄#། །མ་སོང ། མ་འབགས་མ་འདྲེས་ལ་མཉམ་ཞིང་ལྷག་ཆད་མེད་པར་སླར་མི་དེ་ལ་སྦྱིན་པའི་ཡེ་ཤེས་མངའོ། །ཀུན་དགའ་བོ། དེ་བཞིན་གཤེགས་པའི་ཡེ་ཤེས་ནི་དེ་ལྟར་ཡོངས་སུ་དག་གོ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་དེ་ལྟར་རྫུ་འཕྲུལ་ཆེ་ཞིང་དེ་ལྟར་མཐུ་ཆེ་ལ་དེ་ལྟར་དབང་ཆེ་བར་གྲགས་པ་སྟེ། དེ་ལྟར་ཡེ་ཤེས་དཔག་ཏུ་མེད་པ་དང་ལྡན་ཞིང་དེ་ལྟར་སྒྲིབ་པ་མེད་པའི་ཡེ་ཤེས་གཟིགས་པ་དང་ལྡན་ནོ། །ཀུན་དགའ་བོ། གང་དག་ལ་ཆུའི་ཐིགས་པ་དེ་ལྟར་ཆུང་ངུ་བཞག་ཀྱང་ཡུན་རིང་པོ་ཇི་སྲིད་དུའང་ཆུད་ཟ་བར་མི་འགྱུར་བ་དེ་བཞིན་གཤེགས་པ་དེ་ལྟ་བུ་དག་ནི་དམ་པ་དག་གོ། མཆོག་དང་གོ། བཞག་པ་འཛིན་པ་དག་གོ། །ཀུན་དགའ་བོ། དོན་ཤེས་པར་བྱ་བའི་ཕྱིར་དཔེ་འདི་བསྟན་པ་འདི་ལ་དོན་བརྗོད་པར་བྱ་བ་གང་ཞེ་ན། ཀུན་དགའ་བོ། སྐྲའི་རྩེ་མོ་ཕྲ་བ་ཞེས་བྱ་བ་དེ་ནི་སེམས་ཀྱི་ཚིག་བླ་དྭགས་སོ། །ཀུན་དགའ་བོ། །གངྒཱའི་ཀླུང་ཆེན་པོ་ཞེས་བྱ་བ་དེ་ནི་འཁོར་བའི་རྒྱུན་གྱི་ཚིག་བླ་དྭགས་སོ། །ཀུན་དགའ་བོ། ཐིགས་པ་གཅིག་ཅེས་བྱ་བ་ནི་སེམས་གཅིག་བསྐྱེད་པའི་དགེ་བའི་རྩ་བའི་ཚིག་བླ་དྭགས་སོ། །ཀུན་དགའ་བོ། །རྒྱ་མཚོ་ཆེན་པོ་ཞེས་བྱ་བ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
149b
པའི་སངས་རྒྱས་ཀྱི་ཚིག་བླ་དྭགས་སོ། །ཀུན་དགའ་བོ། མི་ཞེས་བྱ་བ་དེ་ནི་བྲམ་ཟེ་དང་ཁྱིམ་བདག་དད་པ་རྣམས་ཀྱི་ཚིག་བླ་དྭགས་སོ། །བསྐལ་པར་གནས་ཞེས་བྱ་བ་དེ་ནི་དེ་བཞིན་གཤེགས་པ་ལ་དགེ་བའི་རྩ་བ་བསྐྱེད་པ་ཆུད་མི་ཟ་བའི་ཚིག་བླ་དྭགས་སོ། །ཀུན་དགའ་བོ། ཇི་ལྟར་མི་ཆེ་གེ་མོ་ཞིག་ཆུའི་ཐིགས་པ་གཅིག་ཡུན་རིང་པོ་ཇི་སྲིད་དུའང་ཆུད་མི་ཟ་བ་ལྟར། ཀུན་དགའ་བོ། དེ་བཞིན་དུ་དེ་བཞིན་གཤེགས་པ་ལ་སེམས་གཅིག་བསྐྱེད་པའང་ཆུད་མི་ཟ་ན་དགེ་བའི་རྩ་བ་དེ་ལས་གཞན་པ་ཤིན་ཏུ་ཁྱད་པར་ཅན་རྣམས་ལྟ་ཅི་སྨོས་ཏེ། ཀུན་དགའ་བོ། དེ་དག་ཐམས་ཅད་ཀྱི་འབྲས་བུ་ནི་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བའི་བར་དུ་འགྱུར་བར་ང་སྨྲའོ། །ཀུན་དགའ་བོ། །གཞན་ཡང་དེ་བཞིན་གཤེགས་པ་ལ་སེམས་ཅན་གང་དག་སེམས་དང་བ་གཅིག་བསྐྱེད་ནས་དེ་ལས་གཞན་པའི་ཉེས་པར་བྱས་པའམ། ཉེས་པར་སྤྱད་པའམ། མི་དགེ་བའི་སྒྲིབ་པར་འགྱུར་བའི་སེམས་བསྐྱེད་པ། སྔོན་ཉེས་པར་བྱས་པ་བདག་གིས་བསགས་ཤིང་བདག་གིས་བྱས་པ་གཞན་གྱིས་སེམས་ཅན་དམྱལ་བའམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་དུ་སོང་ཡང་གང་གི་ཚེ་སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་དག་འཇིག་རྟེན་དུ་བྱུང་བ་ན། དེ་དག་གི་
150a
༄#། །སངས་རྒྱས་ཀྱི་ཡེ་ཤེས་ཐོགས་པ་མེད་ཅིང་སྒྲིབ་པ་མེད་པས་སེམས་ཅན་འདི་དག་སྔོན་དགེ་བའི་རྩ་བ་བྱས་པ་ལས་ཉེས་པར་སྤྱད་པའི་ལས་འགའ་ཞིག་གིས་ལོག་པར་ལྟུང་བར་གྱུར་པར་མཁྱེན་ཏེ། སངས་རྒྱས་བཅོམ་ལྡན་འདས་རྣམས་ཀྱིས་དེ་དག་སྔོན་བྱས་པའི་དགེ་བའི་རྩ་བ་དང་ལྡན་པར་མཁྱེན་ནས་དགེ་བའི་སེམས་དེ་དང ། དགེ་བའི་རྩ་བའི་བྱིན་གྱི་རླབས་དེ་དང ། སྔོན་གྱི་རྒྱུ་དེས་ལོག་པར་ལྟུང་བ་དེ་ལས་འདོན་ནོ། །བཏོན་ནས་མྱ་ངན་ལས་ཟློའོ། །ཞི་བ་བདེ་བའི་ཐང་བསིལ་བ་འཇིགས་པ་མེད་པ་ཕ་རོལ་གྱི་འགྲམ་དུ་འགོད་དོ། །བཀོད་ནས་ཀྱང་སངས་རྒྱས་བཅོམ་ལྡན་འདས་དེ་དག། རིགས་ཀྱི་བུ་དག་ཁྱོད་སྔོན་དགེ་བའི་རྩ་བ་འདི་ལྟ་བུ་ཞིག། དུས་དེ་ལྟ་བུ་ཞིག་ཏུ། ཚེ་རབས་དེ་ལྟ་བུ་ཞིག་གི་ཚེ། སངས་རྒྱས་བཅོམ་ལྡན་འདས་དེ་དག་ལ་བསྐྱེད་ཅིང་བཞག་པ་དྲན་པར་གྱིས་ཤིག་ཅེས་དྲན་པར་མཛད་ཅིང་བསྐུལ་བ་དང ། དེ་དག་གིས་སངས་རྒྱས་ཀྱི་མཐུས་དྲན་ནས་འདི་སྐད་ཅེས། བཅོམ་ལྡན་འདས། དེ་ལྟར་ལགས་སོ། །བདེ་བར་གཤེགས་པ། དེ་ལྟ་ལགས་སོ་ཞེས་ཟེར་རོ། །དེ་དག་ལ་སངས་རྒྱས་བཅོམ་ལྡན་འདས་དེ་དག་གིས་བཀའ་སྩལ་པ། རིགས་ཀྱི་བུ་དག། དགེ་བའི་རྩ་བ་འདི་དག་ནི་སྔོན་གྱི་སངས་རྒྱས་ལ་བསྐྱེད་པ་དེ་དག་ཡིན་ཏེ། མ་ཟད་
150b
ཅིང་ཆུད་མ་ཟོས་སོ། །འདི་ལྟ་སྟེ། སྡུག་བསྔལ་ཐམས་ཅད་ཞི་བ་མྱ་ངན་ལས་འདས་པ་འདིའང་དེའི་གཞིས་རྙེད་དོ། །རིགས་ཀྱི་བུ་དག། ཁྱེད་ཕ་མེས་ཀྱི་སྤྱོད་ཡུལ་དང ། འཕགས་པའི་སྤྱོད་ཡུལ་དུ་ཕྱིན་ཏོ། །ཁྱོད་ནི་ཡུན་རིང་པོར་སྤྱོད་ཡུལ་མ་ཡིན་པ་ལ་སྤྱོད་སྤྱོད་དོ། །ཐོག་མ་དང་ཐ་མ་མེད་པའི་འཁོར་བར་འཁོར་བར་གྱུར་ཏོ། །རིགས་ཀྱི་བུ་དག། ད་ལྟ་བུ་དག་ལ་དགེ་བའི་རྩ་བ་བཞག་པ་ནི་བཞག་པ་ཆུད་མི་ཟའོ། །ཀུན་དགའ་བོ། འདི་ལྟ་སྟེ། དཔེར་ན། རྒྱལ་པོའི་བུའམ་ཚོང་དཔོན་གྱི་བུ་ཞིག་ཉེས་པ་འགའ་ཞིག་གིས་བཙོན་རར་བཅུག་ལ་དེ་སྔོན་གྱི་ཉེས་པ་གླེངས་ཤིང་སྤྱོས་ནས་དེ་སླར་མྱུར་དུ་ཕྱུང་བ་དེ་བཞིན་དུ། ཀུན་དགའ་བོ། གང་དག་སྔོན་གྱི་སངས་རྒྱས་རྣམས་ལ་དགེ་བའི་རྩ་བ་བསྐྱེད་པ་དེ་དག་ཉེས་པར་བྱས་པ་འགའ་མ། དེ་ལས་གཞན་པའི་ཉེས་པས་སེམས་ཅན་དམྱལ་བའམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་དུ་སོང་ཡང ། གང་གི་ཚེ་སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་དག་འཇིག་རྟེན་དུ་བྱུང་བ་ན་སེམས་ཅན་གང་དག་ཁ་ཅིག་གིས་དགེ་བའི་སེམས་གཅིག་བསྐྱེད་པར་གྱུར་པ་དེ་དག་དགེ་བའི་རྩ་བ་དེ་དང ། སེམས་དེ་དང ། དགེ་བའི་རྩ་བའི་བྱིན་གྱི་རླབས་དེ་དང ། རྒྱུ་དེས་སངས་རྒྱས་བཅོམ་ལྡན་འདས་དེ་དག་གིས་སེམས་ཅན་དེ་དག་སྐྱོན་གྱི་དགེ་བའི་རྩ་
151a
༄#། །བ་དང་ལྡན་པར་མཁྱེན་ནས་ལོག་པར་ལྟུང་བ་དེ་ལས་བཏོན་ཏེ་མྱ་ངན་ལས་འདས་པའི་ཐང་བསིལ་པ་འཇིགས་པ་མེད་པ་ལ་འགོད་དོ། །བཀོད་ནས་ཀྱང ། རིགས་ཀྱི་བུ་དག་།ཁྱེད་དགེ་བའི་རྩ་བ་དེ་ལྟ་བུ་དེ་དྲན་པར་གྱིས་ཤིག་ཅེས་བསྐུལ་བ་དང ། དེ་དག་གིས་གསོལ་པ། བཅོམ་ལྡན་འདས། དེ་ལྟ་ལགས་སོ། །བདེ་བར་གཤེགས་པ། དེ་ལྟ་ལགས་ཏེ་སངས་རྒྱས་ཀྱི་མཐུ་དང ། སངས་རྒྱས་ཀྱི་བྱིན་གྱི་རླབས་ཀྱིས་དྲན་ལགས་སོ་ཞེས་ཟེར་རོ། །དགེ་བའི་རྩ་བའི་ལེའུ་སྟེ་དགུ་པ་རྫོགས་སོ།། །། དེ་ནས་ཡང་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། རྣམ་གྲངས་འདིས་ཀྱང་ཁྱོད་ཀྱིས་འདི་ལྟར་རིག་པར་བྱ་སྟེ། ང་ལྟ་བུ་དག་ལ་དགེ་བའི་རྩ་བ་ཇི་ཙམ་དུ་ཆུང་བ་བྱས་པའང་ཆུད་མི་ཟ་ཞིང་སེམས་གཅིག་བསྐྱེད་པའི་དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བར་ང་སྨྲའོ། །ཀུན་དགའ་བོ། དེ་བས་ན་དོན་དེ་ཉིད་རྒྱ་ཆེར་རབ་ཏུ་བརྗོད་པ་དང ། ཅི་ནས་ཀྱང་འདི་ལ་རིགས་ཀྱི་བུའམ་རིགས་ཀྱི་བུ་མོ་དད་པ་མཁས་པ་ཁ་ཅིག་རྒྱ་ཆེར་མངོན་པར་དད་པ་དང ། ཀུན་ཏུ་རྟོག་པ་དང ། ནན་ཏན་སྐྱེད་པ་དང ། མངོན་པར་དད་ནས་རྒྱ་ཆེར་དགའ་བ་དང ། མཆོག་ཏུ་དགའ་པ་ཆེན་པོ་བསྐྱེད་
151b
པར་འགྱུར་བར་བྱ་བའི་ཕྱིར་ཁྱོད་ལ་དཔེ་བསྟན་ནོ། །ཀུན་དགའ་བོ། འདི་ལྟ་སྟེ། དཔེར་ན། ཉ་བ་མཆིལ་པ་ཐོགས་པས་ཉ་གཤོར་བའི་ཕྱིར་མཆིལ་པ་གཟན་མ་དང་བཅས་པ་མཚོ་ཆུ་ཆེན་པོར་བཅུག་ལ་དེར་བཅུག་པ་དེ་ཉས་མིང་པར་གྱུར་ན་མཆིལ་པ་མིད་པའི་ཉ་དེ་མཚོ་ཆུའི་ནང་ན་འཕྱོའང་སྐམ་ལ་འདུག་པ་ཉིད་དུ་ཤེས་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་ཉ་དེ་ཉ་པས་མཆིལ་པའི་སྲད་བུ་སྲ་བས་ཟིན་པའི་ཕྱིར་རོ། །ཅི་སྟེ་ཉ་དེ་མཆིལ་པ་དང་བཅས་པར་ཆུའི་ནང་དུ་སོང་པར་གྱུར་ལ། སྲད་བུའང་མཆིལ་པ་དང་འབྲེལ་པར་གྱུར་ན་ཆུའི་ནང་ན་འདུག་པའང་ཡིན་ལ། སྐམ་ལ་འདུག་པའང་ཡིན་ཏེ། ཡུ་བ་སྐམ་ལ་འདུག་ཅིང་ལེགས་པར་ཟིན་ན་ཉ་བ་དེ་འོངས་ནས་སྲད་བུ་དེས་ཉ་ཟིན་པར་ཤེས་ཏེ་དེས་སྲད་བུ་དེས་དྲངས་ནས་ཇི་ལྟར་འདོད་པར་སྐམ་ལ་ཕྱུང་སྟེ་དགའ་མགུར་བྱ་བ་བྱེད་པའི་དུས་དེ་ཡོད་དོ། །ཀུན་དགའ་བོ། དེ་བཞིན་དུ་སེམས་ཅན་གང་དག་སངས་རྒྱས་བཅོམ་ལྡན་འདས་ལ་སེམས་དང་བར་བྱེད། དགེ་བའི་རྩ་བསྐྱེད་པར་བྱེད། ཡོན་འབུལ་ཞིང་ཐ་ན་སེམས་དང་བ་གཅིག་ཙམ་ཡང་བསྐྱེད་ན། ཉེས་པར་བྱས་པའི་ལས་སྒྲིབ་པར་འགྱུར་བ་གཞན་གྱིས་བསྒྲིབས་པས་སེམས་ཅན་དམྱལ་བའམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་ནམ། དེ་ལས་གཞན་པའི་མི་ཁོམ་པ་ལོག་པར་ལྟུང་བར་སོང་ཡང །
152a
༄#། །གང་གི་ཚེ་སངས་རྒྱས་བཅོམ་ལྡན་འདས་འཇིག་རྟེན་དུ་ཕྱུང་བ་ན་དེ་དག་སངས་རྒྱས་ཀྱི་ཡེ་ཤེས་ཀྱི་སེམས་ཅན་འདི་དག་ནི་བྱང་ཆུབ་སེམས་དཔའི་ཐེག་པ་པའོ། །སེམས་ཅན་འདི་དག་ནི་རང་སངས་རྒྱས་ཀྱི་ཐེག་པ་པའོ། །སེམས་ཅན་འདི་དག་ནི་ཉན་ཐོས་ཀྱི་ཐེག་པ་པའོ། །སེམས་ཅན་འདི་དག་ནི་དགེ་བའི་རྩ་བ་བྱས་པའོ། །སེམས་ཅན་འདི་དག་ནི་དགེ་བའི་རྩ་བ་ཆད་པའོ། །སེམས་ཅན་འདི་དག་ནི་ཉམས་པའི་ཆ་དང་མཐུན་པའོ། །སེམས་ཅན་འདི་དག་ནི་ཁྱད་པར་དུ་འགྱུར་པའི་ཆ་དང་མཐུན་པའོ། ། འདི་དག་ནི་དགེ་བའི་ཆོས་རྟོགས་པས་ས་བོན་བཏབ་པ་དག་གོ། འདི་ལྟ་སྟེ། འདི་ནི་སངས་རྒྱས་ལ་ཡོན་འབུལ་བ་ཐ་ན་དད་པ་དང་ལྡན་པའི་སེམས་གཅིག་བསྐྱེད་པའི་དགེ་བའི་ཆོས་རྣམ་པར་དག་པས་ས་བོན་བཏབ་པའོ་ཞེས་མཁྱེན་ཏོ། །ཡོན་གང་གི་རྣམ་པར་སྨིན་པས་གང་དག་གིས་སངས་རྒྱས་བཅོམ་ལྡན་འདས་རྣམས་ལ་དད་པའི་སེམས་བསྐྱེད་པ་གཅིག་ཙམ་ཡང་བསྐྱེད་པར་འགྱུར་བ་དེ་དག་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཡེ་ཤེས་ཀྱིས་སེམས་བསྐྱེད་པའི་ཁྱད་པར་དེ་དག་གིས་ལོག་པར་ལྟུང་པ་དེ་ལས་འདོན་ནོ། །བཏོན་ནས་ཀྱང་མྱ་ངན་ལས་འདས་པའི་ཐང་བདེ་བ་ལ་འགོད་དོ། །བཀོད་ནས་ཀྱང་རིགས་ཀྱི་བུ་ཁྱེད་དགེ་བའི་རྩ་བ་
152b
པ་འདི་དག་དེ་བཞིན་གཤེགས་པ་འདི་ཞེས་བྱ་བ་ལ་བསྐྱེད་པ་དྲན་པར་གྱིས་ཤིག་ཅེས་སྐུལ་ཏོ། །གསོལ་པ། བཅོམ་ལྡན་འདས། དེ་ལྟ་ལགས་སོ། །བདེ་བར་གཤེགས་པ། དེ་ལྟ་ལགས་སོ། །བཀའ་སྩལ་པ། དེ་བས་ན། རིགས་ཀྱི་བུ་དག། དེ་བཞིན་གཤེགས་པ་ལ་ཡོན་ཕུལ་བའི་དགེ་པའི་རྩ་བ་འདི་དག་ནི་འབྲས་བུ་ཆེན་པོ་དང་རྙེད་པ་ཆེན་པོ་དང་ལྡན་པ་དག་སྟེ། རིགས་ཀྱི་བུ་དག། ང་ལྟ་བུ་དག་ལ་བཞག་པ་བསོད་ནམས་ཀྱི་ཞིང་ཆེན་པོ་ལ་བཏབ་པ་དེ་དག་ནི་ཐ་ན་ཡུན་རིང་པོ་ཇི་སྲིད་བསྐལ་བ་བྱེ་བ་ཁྲག་ཁྲིག་བརྒྱ་སྟོང་དུའང་ཆུད་ཟ་བར་མི་འགྱུར་རོ། །དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་ནི་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བར་འགྱུར་རོ། །ཀུན་དགའ་བོ། དོན་ཤེས་པར་བྱ་བའི་ཕྱིར་ངས་དཔེ་འདི་བྱས་པ་འདི་ལ་དོན་དུ་བལྟ་བ་གང་ཞེ་ན། ཀུན་དགའ་བོ། ཉ་ཞེས་བྱ་བ་དེ་ནི་སོ་སོའི་སྐྱེ་བོའི་ཚིག་བླ་དྭགས་སོ། །ཀུན་དགའ་བོ། །མཚོ་ཆུ་ཞེས་བྱ་བ་དེ་ནི་འཁོར་བའི་རྒྱ་མཚོའི་ཚིག་བླ་དྭགས་སོ། །ཀུན་དགའ་བོ། མཆིལ་པ་ཞེས་བྱ་བ་དེ་ནི་དེ་བཞིན་གཤེགས་པ་ལ་དགེ་བའི་རྩ་བ་བསྐྱེད་པའི་ཚིག་བླ་དྭགས་སོ། །ཀུན་དགའ་བོ།་སྲད་བུ་ཞེས་བྱ་བ་དེ་ནི་བསྡུ་བའི་དངོས་པོ་བཞིའི་ཚིག་བླ་དྭགས་སོ། །ཀུན་དགའ་བོ། ཉ་བ་ཞེས་བྱ་བ་དེ་ནི་དེ་བཞིན་གཤེགས་པའི་ཚིག་བླ་དྭགས་སོ། །ཀུན་དགའ་བོ།
153a
༄#། །ཉ་གསོན་པོ་ཞེས་བྱ་བ་དེ་ནི་སེམས་ཅན་རྣམས་མྱ་ངན་ལས་འདའ་བའི་འབྲས་བུ་ལ་འགོད་པའི་ཚིག་བླ་དྭགས་སོ། །ཀུན་དགའ་བོ། རྣམ་གྲངས་འདིས་ཀྱང་ཁྱོད་ཀྱིས་འདི་ལྟར་རིག་པར་བྱ་སྟེ། གང་སངས་རྒྱས་ལ་ཡོན་ཕུལ་ནི་ཇི་སྲིད་མྱ་ངན་ལས་འདའ་བར་འགྱུར་བ་མ་གཏོགས་པར་ཇི་སྲིད་ཡུན་རིང་བར་ཡང་འཇིག་པ་མེད། ཡོངས་སུ་ཟད་པ་མེད། མཐར་ཐུག་པ་མེད་དོ། །ཀུན་དགའ་བོ། དེའི་ཕྱིར་སངས་རྒྱས་ལ་ཕུལ་བའི་ཡོན་ཇི་ལྟར་མྱ་ངན་ལས་འདའ་བས་ཀླས་ཤིང་མྱ་ངན་ལས་འདས་པའི་མཐས་གཏུགས་པར་འགྱུར་བའི་དབེ་གཞན་དག་ཀྱང་ཁྱོད་ལ་བསྟན་པར་བྱའོ། །ཀུན་དགའ་བོ། སེམས་ཅན་སྲེད་པ་ལ་སྤྱོད་པ། ཚོར་བ་ལ་ཆགས་པ་མྱོང་བ་འདོད་པས་འཁོར་བ་ལ་མངོན་པར་བསྟོད་པ། འཁོར་བ་ལ་དགའ་བ། འཁོར་བ་འདོད་པས་སངས་རྒྱས་བཅོམ་ལྡན་འདས་ལ་ཡོན་འབུལ་ཞིང་མཐོ་རིས་འདོད་པ་དང ། མིར་འགྱུར་བ་འདོད་པའི་ཕྱིར་དགེ་བའི་རྩ་བ་ཡོངས་སུ་བསྔོ་བ་དག་ཀྱང་ཡོད། སངས་རྒྱས་བཅོམ་ལྡན་འདས་ལ་ཡོན་ཕུལ་ནས་དགེ་བའི་རྩ་བ་འདིས་བདག་ཅག་ནམ་ཡང་ཡོངས་སུ་མྱ་ངན་ལས་འདའ་བར་མ་གྱུར་ཅིག་ཅེས་ཡོངས་སུ་བསྔོ་བའི་སེམས་ཅན་དག་ཀྱང་ཡོད་མོད་ཀྱི། ཀུན་དགའ་བ། དག་པའི་རྩ་བ་དེས་
153b
སེམས་ཅན་དེ་དག་ཡོངས་སུ་མྱ་ངན་ལས་འདའ་བར་མི་འགྱུར་བའི་གནས་མེད་སྐབས་མེད་དོ། །དེ་ཅིའི་ཕྱིར་ཞེ་ན། ཀུན་དགའ་པོ། འདི་ལྟར་སངས་རྒྱས་བཅོམ་ལྡན་འདས་རྣམས་ནི་བླ་ན་མེད་པའི་བསོད་ནམས་ཀྱི་ཞིང་ཐ་བ་དང་ཚེར་མ་མེད་པ། འདོད་ཆགས་དང ། ཞེ་སྡང་གི་དྲི་མ་མེད་པ་ཡོངས་སུ་དག་པ་སྟེ། དེ་ལ་དགེ་བའི་རྩ་བའི་ས་བོན་ཇི་ཙམ་དུ་ཆུང་བ་དང ། དགེ་བའི་རྩ་བའི་ས་བོན་ཇི་ཙམ་དུ་རྒྱས་པ་དང ། ཇི་ཙམ་དུ་ཕྲ་བའང་རུང ། ཇི་ཙམ་དུ་བྱང་ཆུབ་ཀྱི་ས་བོན་དུ་འགྱུར་བའམ། ཉན་ཐོས་ཀྱི་ས་བོན་དུ་འགྱུར་བའམ། རངས་སངས་རྒྱས་ཀྱི་ས་བོན་དུ་འགྱུར་བའི་དགེ་བའི་རྩ་བ་དེ་དག་ཐམས་ཅད་སླུ་བར་མི་བྱེད་དེ། ཡོངས་སུ་མ་བཏང་ན་ལོངས་སྤྱོད་འཕེལ་བ་ཕུན་སུམ་ཚོགས་པར་འགྱུར་ཞིང་སེམས་དང་བས་མཐོ་རིས་སུ་འགྱུར་བའི་ལམ་ཡོངས་སུ་དག་པ་དང ། མྱ་ངན་ལས་འདའ་བའི་མཐར་ཐུག་པར་འགྱུར་རོ། །ཀུན་དགའ་བོ། །འདི་ལྟ་སྟེ། དཔེར་ན། ཁྱིམ་བདག་ཞིང་པའི་ཞིང་ངོ་མེད་པ། སྡོང་དུམ་དང་ཚེར་མ་མེད་པ། གྱོ་མོ་དང་གསེག་མ་མེད་པ། ས་སྣག་ཆེ་བ་ཞིག་ཡོད་པར་གྱུར་ཏེ། ལེགས་པར་རྨོས་ཤིང་ལག་བྱད་ཀྱི་ས་ཕྱིན་པར་བྱས་ལ། དེའི་ས་བོན་ཡང་སར་པ་གྲུང་པོ་ཆེས་ལེགས་པར་བྱས་པ། རླུང་དང་ཉི་མས་མ་སྣད་པ། མ་ཆག་མ་གྲུགས་ཤིང་མ་རུལ་ཏེ་
154a
༄#། །ཆུང་མ་ཟོས་པར་གྱུར་ལ། ས་པོན་དེ་དག་དུས་དང་ཚིགས་སུ་ཞིང་ལ་བཏབ་སྟེ་དུས་དུས་སུ་ཆུས་བཅུས། དུས་སུ་བསྐམས། ཐམས་ཅད་ལས་ལེགས་པར་བསྲུངས་ནས། ཀུན་དགའ་བོ། དེ་ནས་ཁྱིམ་པ་ཞིང་པ་དེ་དུས་གཞན་ཞིག་ན་ཞིང་གི་དྲུང་དུ་སོང་སྟེ་ཞིང་གི་མུར་འདུག་ནས། ཀྱེ་ས་བོན་ཁྱེད་ས་བོན་དུ་མ་གྱུར་ཅིག། ཀྱེ་ས་བོན་ཁྱེད་མ་སྐྱེ་ཞིག་།མ་འཕེལ་ཞིག། ང་ལ་འབྲས་བུ་མི་དགོས། རྙེད་པ་མི་དགོས་སོ་ཞེས་དེ་སྐད་ཟེར་ན། ཀུན་དགའ་བོ། དེ་ཇི་སྙམ་དུ་སེམས། ཁྱིམ་བདག་ཞིང་པ་དེའི་ཚིག་གིས་ས་བོན་དེ་དག་ས་བོན་མ་ཡིན་པར་འགྱུར་རམ། གསོལ་པ། བཅོམ་ལྡན་འདས། མ་ལགས་སོ། །བདེ་བར་གཤེགས་པ། མ་ལགས་སོ། །བཀའ་སྩལ་པ།་འབྲས་བུ་དེ་འབྲས་བུ་མ་ཡིན་པར་འགྱུར་རམ། རྙེད་པ་མངོན་པར་མི་འགྲུབ་བམ། གསོལ་པ། བཅོམ་ལྡན་འདས། མ་ལགས་སོ། །བདེ་བར་གཤེགས་པ། མ་ལགས་སོ། །བཀའ་སྩལ་པ། ཀུན་དགའ་བོ། དེ་བཞིན་དུ་སྲིད་པ་ལ་བསྟོད་ཅིང་སྲིད་པ་ལ་དགའ་བས་སངས་རྒྱས་ལ་ཡོན་ཕུལ་ནས་དགེ་བའི་རྩ་བ་འདིས་བདག་ཅག་ནམ་ཡང་ཡོངས་སུ་མྱ་ངན་ལས་འདའ་བར་མ་གྱུར་ཅིག་ཅེས་དེ་སྐད་ཟེར་ཡང་དེས་ཡོངས་སུ་མྱ་ངན་ལས་འདའ་བར་མི་འགྱུར་བའི་གནས་མེད་གོ་སྐབས་མེད་ཀྱི། ཀུན་
154b
དགའ་བོ། སངས་རྒྱས་ལ་བསྐྱེད་པའི་དགེ་བའི་རྩ་བ་དེ་དག་མི་འདོད་ཀྱང་འབྲས་བུ་མྱ་ངན་ལས་འདས་པ་ཡིན་ཏེ། ཐམ་མྱ་ངན་ལས་འདས་པ་རེ་བར་དུ་འགྱུར་པར་ང་སྨྲའོ། །དེ་ལྟར་ཇི་ཙམ་དུ་སངས་རྒྱས་བཅོམ་ལྡན་འདས་ལ་སེམས་གཅིག་བསྐྱེད་པའི་དགེ་བའི་རྩ་བ་བསྐྱེད་པ་དེ་དག་ཐམས་ཅད་ཀྱི་འབྲས་བུའམ་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བའི་བར་དུ་འགྱུར་བར་ད་སྨྲའོ། །ཀུན་དགའ་བོ། མ་འོངས་པའི་དུས་ན་རྒྱལ་པོ་རྐུ་འཕྲོག་བྱེད་པ་དང་ཀླ་ཀློ་དག་འབྱུང་བར་འགྱུར་ཏེ། ཀུན་དགའ་བོ། །དེར་རྒྱལ་པོ་རྐུ་འཕྲོག་བྱེད་པ་དང ། ཀླ་ཀློ་གང་དག་གིས་དེ་བཞིན་གཤེགས་པའི་མཆོད་རྟེན་དང ། དེ་བཞིན་གཤེགས་པའི་སྐུ་གཟུགས་མཐོང་ནས་སེམས་དང་བར་གྱུར་པ་དེ་དག། ཀུན་དགའ་བོ། སངས་རྒྱས་ཀྱི་ཆོས་ཐམས་ཅད་ཀྱང་མི་ཤེས་ཤིང་སངས་རྒྱས་ཀྱི་ཡོན་ཏན་ཐམས་ཅད་ཀྱང་མི་ཤེས་སུ་ཟིན་ཀྱང ། ཀུན་དགའ་བོ། ངས་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་འགྲོ་བ་དེ་དང་དེ་དག་དང ། སྐྱེ་བ་དེ་དང་དེ་དག་ཏུ་བསྡུ་བའི་དངོས་པོ་བཞིས་བསྡུ་པ་བྱས་སོ། །བཞི་གང་ཞེ་ན། སྦྱིན་པ་དང ། སྙན་པར་སྨྲ་བ་དང ། དོན་སྤྱད་ལ་དང ། དོན་མཐུན་པའོ། །ཀུན་དགའ་པོ། དེ་དག་ངའི་མཆོད་རྟེན་མཐོང་ནས་ངེས་པར་སེམས་དང་བར་འགྱུར་རོ། །ཀུན་དགའ་བོ། དེ་དག་གི་ ་བའི་རྩ་བའི་འབྲས་བུ་དེའང་
155a
༄#། །མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་པའི་བར་དུ་འགྱུར་བར་ང་སྨྲའོ། །གང་མཐའ་འཁོབ་ཀྱི་རྒྱལ་པོ་རྐུ་གསོད་བྱེད་པ་དང ། ཀླ་ཀློ་དེ་དག་གི་རྐུ་ལག་དང ། བློན་པོ་དང ། གཞོན་ནུ་དང ། རྩིས་མཁན་དང ། སྣ་ཆེན་པོ་ལ་གཏོགས་པ་དང ། འཁོར་དང ། མཛའ་བ་བཤེས་དང ། ཉེ་དུ་དང ། གྲོགས་དང ། སྣག་གི་གཉེན་མཚམས་སུ་གྱུར་པ་གང་ཡིན་པ་དེ་དག་གིས་ང་མྱ་ངན་ལས་འདས་པའི་མཆོད་རྟེན་མཐོང་ནས་ཚོགས་ཆུང་དུས་སེམས་དང་བར་གྱུར་ན། ཀུན་དགའ་བོ། དེ་དག་ཐམས་ཅད་ཀྱང་སངས་རྒྱས་ཀྱི་ཆོས་རྣམས་སམ། སངས་རྒྱས་ཀྱི་ཡོན་ཏན་རྣམས་ཀྱིས་དགེ་བའི་རྩ་བ་བསྐྱེད་པར་འགྱུར་ཏེ། ཀུན་དགའ་བོ། དེ་དག་ཀྱང་ངས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བསྡུ་བའི་དངོས་པོ་བཞིས་ཡང་དག་པར་བསྡུས་སོ། །ཀུན་དགའ་བོ། དེ་དག་གི་དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུའང་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བར་ང་སྨྲའོ། །ཀུན་དགའ་བོ། ངས་ཡུན་རིང་པོ་ནས་སྐྱེ་དགུ་འདི་དག་བསྡུ་བའི་དངོས་པ་བཞིས་བསྡུས་པ་དང ། ཡུན་རིང་པོ་ནས་སྣགས་རྒྱས་བཅོམ་ལྡན་འདས་རྣམས་ཀྱི་བསྟན་པ་དང་ལྡན་པར་བྱས་པ་ལ་ལྟོས། ཀུན་དགའ་བོ། དེ་བཞིན་གཤེགས་པ་ལམ་དུ་ཞུགས་ཏེ་
155b
བཞུད་པ་ན་ས་དམའ་བ་ནི་མཐོན་པོར་འགྱུར། ས་མཐོན་པོ་ནི་དམའ་བར་འགྱུར། ས་ཕྱོགས་མི་མཉམ་པ་ནི་མཉམ་པར་འགྱུར། རབ་ཏུ་དམའ་བ་ནི་རབ་ཏུ་མཐོན་པོར་འགྱུར་བ་དང ། དེ་བཞིན་གཤེགས་པ་བཞུད་པའི་འོག་ཏུ་སྔ་མཁོ་བཞིན་དུ་གནས་པར་འགྱུར་པ་དང ། ཤིང་ཐམས་ཅད་འདུད་པ་དང ། ཤིང་གི་ལྷ་ཐམས་ཅད་ཕྱག་འཚལ་པ་དང ། དེ་བཞིན་གཤེགས་པ་བཞུད་པའི་འོག་ཏུ་སླར་སྔ་མཁོ་བཞིན་དུ་གནས་པར་འགྱུར་པ་དང ། ངམ་གྲོག་དང ། གཡངས་ས་དང ། ཤོང་ཁུང་དང ། རྩཝ་དང ། སྡོང་དུམ་དང ། ཚེར་མ་དང ། གྱོ་མོ་དང ། གསེག་མ་དང ། ཐིབས་པོ་དང ། གཡང་ས་མི་བདེ་བ་དེ་དག་ཐམས་ཅད་ཀྱང་འདུད་པ་དང ། མཉམ་པ་དང ། གཙང་བ་དང ། ཤིན་ཏུ་སྦྱངས་པ་དང ། མི་གཙང་པ་མེད་པ་དང ། མེ་ཏོག་བསུང་ཞིམ་ཞིང་ཡིད་དུ་འོང་པ་བཀྲམ་པར་འགྱུར་རོ། །ཀུན་དགའ་བོ། དེ་བཞིན་གཤེགས་པས་འདི་ལྟར་སྔོན་དགེ་བ་རྣམས་ལེགས་པར་བྱས་པའི་ཕྱིར་ལམ་དུ་བཞུད་པ་ན་གཙང་མར་བཞུད་དོ། །ཀུན་དགའ་བོ། དེ་བཞིན་གཤེགས་པ་ལམ་དུ་ཞུགས་པ་ན་སེམས་ཅན་གང་མི་འདུད་པ་དེ་ལྟ་བུ་དེ་མོད་པ་མ་ཡིན་པ་དང ། གང་སེམས་མེད་པའི་དངོས་པོ་རི་དང ། ངམ་གྲོག་དང ། གཡང་ས་དང ། ཤིང་དང ། རྩཝ་དང ། ཤིང་གེལ་པ་དང ། སྨན་དང ། ནགས་ཚལ་སའི་སྟེང་ན་
156a
༄#། །ཡོད་པ་དག་དེ་བཞིན་གཤེགས་པ་ལ་མ་དུ་བཞུད་པ་ག་ལ་བ་ལོགས་སུ་མི་འདུད་པ་དེ་དག་མོང་བ་མ་ཡིན་པ་ལ་ལྟོས། དེ་ཅིའི་ཕྱིར་ཞེ་ན། ཀུན་དགའ་བོ། འདི་ལྟར་ང་སྔོན་བྱང་ཆུབ་སེམས་དཔའི་སྤྱོད་པ་སྤྱོད་པ་ཉིད་ན་བླ་མ་ལ་བཏུད། རབ་ཏུ་བཏུད། ཕྱག་འཚལ་ཅིང་གནས། ཕ་མ་ལ་རབ་ཏུ་གུས་པར་བཏུད་ཅིང་གནས། རྒན་པ་དང་བར་མ་དང་གཞོན་པ་དང ། མཛའ་བཤེས་དང་ཉེ་དུ་དང ། སྣག་གི་གཉེན་མཚམས་དང ། སངས་རྒྱས་དང་བྱང་ཆུབ་སེམས་དཔའ་དང ། དགེ་བའི་བཤེས་གཉེན་དང ། ཉན་ཐོས་དང་རང་སངས་རྒྱས་དང ། མངོན་པར་ཤེས་པ་ལྔ་དང་ལྡན་པ་དང ། དེ་བཞིན་དུ་དེ་ལས་གཞན་པ་དགེ་སྦྱོང་དང ། བྲམ་ཟེ་རྣམས་ལ་བཏུད། ངས་སངས་རྒྱས་དང་བྱང་ཆུབ་སེམས་དཔའ་དང ། དགེ་བའི་བཤེས་གཉེན་དང ། ཉན་ཐོས་དང ། རང་སངས་རྒྱས་དང ། ཕྱི་རོལ་པའི་དྲང་སྲོང་དང ། དགེ་སྦྱོང་དང ། བྲམ་ཟེ་དང ། ཕ་མ་དང ། མཛའ་བཤེས་དང ། ཉེ་དུ་དང་སྣག་གི་གཉེན་མཚམས་དེ་དག་ཐམས་ཅད་དང ། དེ་ལས་གཞན་པ་རྒན་པ་དང ། བར་མ་དང ། གཞོན་པ་དང ། གྲོགས་པོ་རྣམས་ལ་ཡིད་རབ་ཏུ་དམའ་བར་བྱས་ཏེ་ལུས་ཀྱིས་ཕྱག་བྱས་ཤིང་དག་གིས་དེ་དག་ལ་བླ་མར་བྱ་བའི་སྒོ་དེ་ནས་མངོན་པར་བཏུད་དོ། །ཀུན་
156b
དགའ་བོ། ངའི་ལས་དགེ་བའི་རྣམ་པར་སྨིན་པ་དེས་དེ་བཞིན་གཤེགས་པ་བྱང་ཆུབ་བརྙེས་ནས་དེ་བཞིན་གཤེགས་པ་ལམ་དུ་བཞུད་པའི་ཚེ་དངོས་པོ་གང་སེམས་ཡོད་པའམ་སེམས་མེད་པའང་རུང་མ་གུས་པ་དང ། མི་འདུད་པ་དང ། རབ་ཏུ་མི་འདུད་པ་དེ་དག་མོད་པ་མ་ཡིན་ནོ། །ཀུན་དགའ་བོ། ངས་བླ་མ་ལྟ་བུ་དང ། དེ་བཞིན་གཤེགས་པ་དང ། སེམས་ཅན་རྣམས་ལ་སྦྱིན་པ་གཙང་བ་དང ། བཟའ་བ་དང ། ཡིད་དུ་འོང་བ་མང་པོ་རང་གིས་ལག་དར་ནས་སྦྱིན་པ་བྱིན་ཏེ། ཀུན་དགའ་བོ། ལས་དེའི་རྣམ་པར་སྨིན་པ་དེས་དེ་བཞིན་གཤེགས་པ་ལམ་དུ་བཞུད་པ་ན་བཟང་ཞིང་གཙང་ལ་ཤིན་ཏུ་སྦྱངས་ཏེ། ཤིང་དང ། བོང་བ་དང ། འདམ་རྫབ་རྣམས་བསལ་བར་གྱུར་ཏོ། །ཀུན་དགའ་བོ། ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བ་ན་སེམས་ཅན་ཐམས་ཅད་ལ་ཕན་པ་དང ། སེམས་ཅན་ཐམས་ཅད་ལ་བདེ་བ་དང ། འཇིག་རྟེན་ལ་སྙིང་བརྩེ་བ་དང ། ལྷ་དང་མི་རྣམས་ཀྱི་དོན་དང ། ཕན་པ་དང་བདེ་བའི་ཕྱིར་ངས་རྟག་ཏུ་སངས་རྒྱས་དང་བྱང་ཆུབ་སེམས་དཔའ་དང ། དགེ་བའི་བཤེས་གཉེན་དང ། ཉན་ཐོས་དང ། རང་སངས་རྒྱས་དང ། ཕྱི་རོལ་བའི་དྲང་སྲོང་མང་པོ་རྣམས་ལམ་དུ་ཞུགས་པ་ན་ལམ་ཕྱག་དར་བྱས་སོ། །གནས་དང ། འཆགས་དང ། འདུག་གནས་རྣམས་ཕྱག་དར་བྱས་སོ། །ངས་དེ་
157a
༄#། །བཞིན་གཤེགས་པའི་མཆོད་རྟེན་དག་བྱམས་པའི་སེམས་དང ། སྙོམས་པའི་སེམས་དང ། མི་མཉམ་པ་མེད་པའི་སེམས། གྱ་གྱུ་མེད་བའི་སེམས་དང ། ཕན་པའི་སེམས་ཀྱིས་ཕྱག་དར་བྱས་སོ། །གཙང་མར་བྱས་སོ། །ཀུན་དགའ་བོ། དགེ་བའི་རྩ་བ་དེས་དེ་བཞིན་གཤེགས་པ་ས་ཕྱོགས་གང་དང་གང་ན་བཞེངས་སམ། བཞུགས་སམ། འཆག་གམ། མནལ་བ་མཛད་དམ། ལམ་དུ་ཞུགས་ཀྱང་རུང ། ཚེགས་ཆུང་དུས་ས་ཕྱོགས་དེ་དག་གཙང་ཞིང་དག་ལ་མཉམ་སྟེ་ལག་མཐིལ་ལྟ་བུར་གྱུར་ཏོ། །ཀུན་དགའ་བོ། གང་དེ་བཞིན་གཤེགས་པའི་སྐུའི་འཕྲིན་ལས་ཀྱི་ཁྱད་པར་གང་ཡིན་པ་དེ་དག་གི་མཐའ་ནི་རྟོགས་པར་སླ་བ་མ་ཡིན་ནོ། །ཀུན་དགའ་བོ། དེ་བས་ན་དོན་དེ་རྒྱ་ཆེར་ཡོངས་སུ་རྫོགས་པར་བྱ་བ་དང ། འདི་ལ་རིགས་ཀྱི་བུའམ་རིགས་ཀྱི་བུ་མོ་དད་པ་ཅན་ཁ་ཅིག་ཅི་ནས་ཀྱང་དེ་བཞིན་གཤེགས་པ་ལ་དགའ་བ་དང ། སེམས་དང་བ་དང་གུས་པ་དང ། རི་མོར་བྱེད་པར་ཆེན་པོ་རྒྱས་པར་བསྐྱེད་པའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ། །རིའི་རྒྱལ་པོ་རི་རབ་དཔག་ཚད་བརྒྱད་ཁྲི་བཞི་སྟོང་ནི་རྒྱ་མཚོ་ཆེན་པོའི་ནང་ནས་བྱུང ། དཔག་ཚད་བརྒྱད་ཁྲི་བཞི་སྟོང་ནི་ཆུའི་ནང་དུ་ནུབ་པའི་རིའི་རྒྱལ་པོ་ཆེན་པོ་དེ་སྲ་བ་རྡོ་རྗེ་ལྟར་
157b
གྱུར་དུ་ཟིན་ཀྱང ། ཀུན་དགའ་བོ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་དབུ་སྐྲ་སྣད་བར་བྱ་བར་ཡང་སླ་བ་མ་ཡིན་ན། གཅིག་ཙམ་བསྒྱུར་ཞིང་འགྱུར་བར་དབྱུང་བ་ལྟ་ཅི་སྨོས་ཏེ་དེ་ནི་གནས་མེད་དོ། །ཀུན་དགའ་བོ། རིའི་རྒྱལ་པོ་རི་རབ་ལྟ་ཞོག་ལ། ཀུན་དགའ་བོ། གང་རིའི་རྒྱལ་པོ་ཁོར་ཡུག་དང ། ཁོར་ཡུག་ཆེན་པོ་འཕང་དུ་དཔག་ཚད་དྲུག་ཁྲི་བརྒྱད་སྟོང་ཡོད་པ་རིའི་རྒྱལ་པོ་ཁོར་ཡུག་དང ། ཁོར་ཡུག་ཆེན་པོ་རྡོ་རྗེ་ལྟ་བུ་གང་ཡིན་པ་དེ་དག་གིས་ཀྱང ། ཀུན་དགའ་བོ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་དབུ་སྐྲ་འདུད་པའམ། ཡོངས་སུ་འདུད་པའམ། དབྱུང་བར་ཡང་སླ་བ་མ་ཡིན་ན་མེད་པར་བྱ་བ་ལྟ་ཅི་སྨོས་ཏེ། དེ་ནི་གནས་མེད་དོ། །དེ་ཅིའི་ཕྱིར་ཞེ་ན། ཀུན་དགའ་བོ། འདི་ལྟར་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། གང་ངས་སྔོན་ཕྱེ་བའི་སེམས་ཅན་གང་ཡང་རྙེད་པར་སླ་བ་མ་ཡིན་ཏེ། ཀུན་དགའ་བོ། ངས་ནི་སེམས་ཅན་འཐབས་ཤིང་བྱེ་བ་རྣམས་འདུམ་ཞིང་མཐུན་པ་ལ་བཀོད་ནས་བརྟན་པ་དང ། མི་ཕྱེད་པ་དང ། གཅིག་ལ་གཅིག་བྱམས་པའི་སེམས་དང ། ཕན་པའི་སེམས་དང་ལྡན་པར་བྱས་སོ། །ཀུན་དགའ་བོ། རྣམ་གྲངས་དེ་དང ། དགེ་བའི་རྩ་བ་དེས་དེ་བཞིན་གཤེགས་པའི་སྐུ་མི་ཕྱེད་པ་དང ། ཀུན་དགའ་བོ། དེ་བཞིན་གཤེགས་པའི་ཞབས་འབྲིང་འཁོར་མི་ཕྱེད་པར་གྱུར་ཏོ། །ཀུན་
158a
༄#། །དགའ་བོ། དེ་བཞིན་གཤེགས་པའི་ཞབས་འབྲིང་འཁོར་ཀྱང་གང་ཞེ་ན། ཀུན་དགའ་བོ། དེ་བཞིན་གཤེགས་པའི་ཞབས་འབྲིང་འཁོར་ནི་ཆོས་ཡིན་ཏེ། འདི་ལྟ་སྟེ། དྲན་པ་ཉེ་བར་བཞག་པ་བཞི་དང ། ཡང་དག་པར་སྤོང་བ་བཞི་དང ། རྫུ་འཕྲུལ་གྱི་རྐང་པ་བཞི་དང ། དབང་པོ་ལྔ་དང ། སྟོབས་ལྔ་དང ། བྱང་ཆུབ་ཀྱི་ཡན་ལག་བདུན་དང ། འཕགས་པའི་ལམ་ཡན་ལག་བརྒྱད་པ་སྟེ། ཀུན་དགའ་བོ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་འདི་དག་ནི་དེ་བཞིན་གཤེགས་པའི་ཞབས་འབྲིང་འཁོར་ཆེན་པོ་ཡིན་ནོ། །གང་དེ་བཞིན་གཤེགས་པས་ཉན་ཐོས་གང་དག་དེ་དག་བཀོད་པ་དེ་དག་ཀྱང་ལྷ་དང་བཅས་པའི་འཇིག་རྟེན་གྱིས་དབྱེ་མི་ནུས་སོ། །དེ་ཅིའི་ཕྱིར་ཞེ་ན། ཀུན་དགའ་བོ། འདི་ལྟར་ཆོས་འདི་ལྟ་བུ་འདིའི་ཆོས་ཉིད་འདི་ཡིན་ཏེ། གང་ལྷ་དང་བཅས་ཚངས་པ་དང་བཅས་པའི་འཇིག་རྟེན་དང ། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་འཁོར་དང་བཅས་པ་ལྷ་དང་མི་དང་ལྷ་མ་ཡིན་དུ་བཅས་པ་དང ། རི་རབ་དང ། ཁོར་ཡུག་དང ། ཁོར་ཡུག་ཆེན་པོ་དང་བཅས་པའི་ས་ཆེན་པོ་དེ་དག་གིས་ཐན་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་དབུ་འདུད་པར་ཡང་སླ་བ་མ་ཡིན་ན་དབྱེ་བ་ལྟ་ཅི་སྨོས་ཏེ། དེ་ནི་གནས་མེད་དོ། །དེ་ཅིའི་ཕྱིར་ཞེ་
158b
ན། ཀུན་དགའ་བོ། འདི་ལྟར་དེ་བཞིན་གཤེགས་པའི་སྐུ་མི་ཕྱེད་པ་དང ། སྐུ་གདུང་རྣམས་མི་ཕྱེད་པ་ཡིན་པའི་ཕྱིར་རོ། །ཀུན་དགའ་བོ། སེམས་ཅན་རྣམས་ལ་སྙིང་བརྩེ་བ་དང་བསྟན་པ་རྒྱས་པར་བྱ་བའི་ཕྱིར་སྔོན་གྱི་སྨོན་ལམ་གྱིས་དེ་བཞིན་གཤེགས་པས་སྐུ་གདུང་རྣམས་ཡུངས་འབྲུ་ཙམ་དུ་བྱིན་གྱིས་བརླབས་སོ། །ཀུན་དགའ་བོ། དེ་བཞིན་གཤེགས་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཡོངས་སུ་མྱ་ངན་ལས་འདས་པའི་སྐུ་གདུང་རྣམས་རྒྱས་པར་གྱུར་ཅིག་ཅེས་ངེས་པར་དེ་ལྟར་སེམས་བསྐྱེད་དེ། ཀུན་དགའ་བོ། སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་པའི་སྐུ་གདུང་རྣམས་རྒྱས་པར་འགྱུར་བ་འདིའང་སྔོན་གྱི་སྨོན་ལམ་གྱི་དབང་གིས་གྱུར་ཏོ། །ཡོངས་སུ་མྱ་ངན་ལས་འདའ་བའི་དུས་ཀྱི་ཚེའང་གདུལ་བའི་སེམས་ཅན་དེ་དག་གིས་བཅོམ་ལྡན་འདས་མཐོང་བར་འགྱུར་ཏེ། དེ་དག་གི་དོན་དང་སེམས་ཅན་ལ་སྙིང་བརྩེ་བའི་ཕྱིར་སྐུ་གདུང་ཕྱེ་བ་དང ། སྐུ་གདུང་ཡུངས་འབྲུ་ཙམ་དག་ཏུ་བྱིན་གྱིས་བརླབས་སོ། །ཀུན་དགའ་བོ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདའ་བའི་དུས་ཀྱི་ཚེ། འཇིག་རྟེན་ལ་སྙིང་བརྩེ་བའི་ཕྱིར་ཇི་ལྟར་སྐུ་གདུང་ཡུངས་འབྲུ་ཙམ་
159a
༄#། །དག་ཏུ་བྱིན་གྱིས་རློབ་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་འཇུག་གོ། །ཀུན་དགའ་བོ། ངའི་སྐུའི་ཚིགས་ཐམས་ཅད་ཕྱེ་ཞིང་སྐུ་གདུང་ཡུངས་འབྲུ་ཙམ་དག་ཏུ་བྱིན་གྱིས་རློབ་པ་ན་སྡུག་བསྔལ་དུ་ཚོར་བ་འབྱུང་མོད་ཀྱི། ཀུན་དགའ་བོ། འོན་ཀྱང་སེམས་ཅན་དེ་དག་རྗེས་སུ་བཟུང་བ་དང ། སྙིང་བརྩེ་བའི་ཕྱིར་དེ་བཞིན་གཤེགས་པ་སྡུག་བསྔལ་དུ་ཚོར་བ་བཟོད་པར་ནུས་ཏེ། ཡུལ་གྱི་མི་ཕྱི་མ་རྣམས་བདེ་བ་དང་དགེ་བའི་ལམ་གྱིས་རྗེས་སུ་གཟུང་བར་འགྱུར་རོ། །ཀུན་དགའ་བོ། གང་རིང་བསྲེལ་ཡུངས་འབྲུ་ཙམ་དག་ལ་མེ་ཏོག་དང ། བདུག་པ་དང ། ཕྲེང་བ་དང ། བྱུག་པ་དང ། ཕྱེ་མ་དང ། ན་བཟའ་དང ། གདུགས་པ་དང ། རྒྱལ་མཚན་དང ། བ་དན་དང་གར་དང་སིལ་སྙན་ལེན་པ་དང ། ཕེང་རྡོབ་པ་དང ། བསྟོད་པ་རྣམས་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད། བརྗེད་པར་བྱེད། གསོལ་བར་བྱེད་ན། ཀུན་དགའ་བོ། དགེ་བའི་རྩ་བ་དེ་ཐམས་ཅད་ཀྱི་འབྲས་བུ་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བའི་བར་དུ་འགྱུར་བར་ང་སྨྲའོ། །ཀུན་དགའ་བོ།་ང་ཡོངས་སུ་མྱ་ངན་ལས་འདས་ནས་ལོ་བརྒྱ་ལོན་པ་ན་གྲོང་ཁྱེར་སྐྱ་སྣར་གྱི་བུ་ཞེས་བྱ་བར་རྒྱལ་པོ་མྱ་ངན་མེད་པ་ཞེས་བྱ་བ་མོའུ་རྱའི་རིགས་ཀྱི་སྐྱེས་པ་ཆོས་ཅན་
159b
ཆོས་ཀྱི་རྒྱལ་པོ་ཞིག་འབྱུང་བར་འགྱུར་ཏེ། དེའང་ངའི་བསྟན་པ་ལ་དད་པར་འགྱུར་རོ། །དད་པར་གྱུར་ནས་ཀྱང་ངའི་སྐུ་གདུང་རྒྱས་པར་བྱེད་དོ། །དེ་དུས་གཅིག་ཏུ་ཉིན་གཅིག་ལ་ངའི་སྐུ་གདུང་གི་མཆོད་རྟེན་བརྒྱད་ཁྲི་བཞི་སྟོང་བྱེད་པར་འགྱུར་གྱི། ཀུན་དགའ་བོ་ཁྱོད་མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། ངའི་སྐུ་གདུང་རྒྱས་པ་དང ། ལྷ་དང་མི་རྣམས་ལ་ཡངས་ཤིང་རྒྱ་ཆེ་བར་འགྱུར་རོ། །ཀུན་དགའ་བོ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ད་ལྟར་བཞུགས་པ་ལ་གང་བསྟི་སྟང་བྱེད་པ་ལྟ་ཞོག། ཡོངས་སུ་མྱ་ངན་ལས་འདས་པའི་སྐུ་གདུང་ལ་གང་སྐུ་གདུང་གི་མཆོད་པ་བྱེད་པ་ལྟའང་ཞོག་ལ། ཀུན་དགའ་བོ། གང་དང་ཁ་ཅིག་ཐ་ན་རྨི་ལམ་ན་དེ་བཞིན་གཤེགས་པའི་མཆོད་རྟེན་མཐོང་ནས་སེམས་དང་བར་བྱེད་ན། ཀུན་དགའ་བོ། དགེ་བའི་རྩ་བ་དེའི་འབྲས་བུའང་མྱ་ངན་ལས་འདས་ཕ་ཡིན་ཏེ། མྱ་ངན་ལས་འདས་པས་ཀླས་ཤིང་མྱ་ངན་ལས་འདས་པའི་མཐས་གཏུགས་པར་འགྱུར་བར་ང་སྨྲའོ། །ཀུན་དགའ་བོ། མ་འོངས་པའི་དུས་ན་སངས་རྒྱས་བཅོམ་ལྡན་འདས་གང་དག་འབྱུང་བ་དེ་དག་ལས་གང་ངའི་ཡོན་ཏན་མི་སྒྲོགས་པའི་དེ་བཞིན་གཤེགས་པ་འཇིག་རྟེན་དུ་འབྱུང་བ་དེ་གང་ཡང་མེད་དོ། །འདི་ལྟ་སྟེ། དཔེར་ན། ང་ད་ལྟར་འདས་པའི་སངས་རྒྱས་
160a
༄#། །བཅོམ་ལྡན་འདས་རྣམས་ཀྱི་ཡོན་ཏན་སྒྲོགས་པ་དེ་བཞིན་དུ་མ་བྱོན་པའི་སངས་རྒྱས་བཅོམ་ལྡན་འདས་དེ་དག་ཀྱང་ངའི་ཡོན་ཏན་ཡོངས་སུ་སྒྲོགས་པར་འགྱུར་རོ། །ཀུན་དགའ་བོ། གང་ལ་ལ་ངའི་ཆོས་བསྟན་པ་ལས་བརྩམས་ཏེ་ཆོས་རྣམས་ལ་ཆོས་ཀྱི་མིག་རྡུལ་དང་བྲལ་ཞིང་དྲི་མ་མེད་པ་རྣམ་པར་དག་པའི་སེམས་ཅན་དེ་དག་ཐམས་ཅད་ནི། ཀུན་དགའ་བོ། ང་སྔོན་བྱང་ཆུབ་སེམས་དཔར་གྱུར་པ་ན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་ཡོངས་སུ་སྨིན་པར་བྱས་པ་དག་གོ། །ཀུན་དགའ་བོ། དགེ་འདུན་ལ་ཕུལ་བའི་ཡོན་ནི་བར་དུ་ཡོངས་སུ་ཟད་པ་དང་མཐར་འགྱུར་བ་ཡོད། ཡོན་གང་དག་ཕྱོགས་བཞིའི་དགེ་འདུན་ལ་ཕུལ་བའི་ཡོན་དེ་དག་ཀྱང་བར་དུ་ཡོངས་སུ་ཟད་པ་དང་མཐར་འགྱུར་བ་ཡོད། ཀུན་དགའ་བོ། ཡོན་གང་དག་རང་སངས་རྒྱས་ལ་ཕུལ་བའི་ཡོན་དེ་དག་ཀྱང་བར་དུ་ཡོངས་སུ་ཟད་པ་དང་མཐར་འགྱུར་བ་ཡོད་ཀྱི། ཀུན་དགའ་བོ། དེ་བཞིན་གཤེགས་པ་ལ་ཡོན་གང་དག་ཕུལ་བ་དེ་དག་ནི་བར་དུ་ཡོངས་སུ་ཟད་པ་དང་མཐར་འགྱུར་བ་མེད་དོ། །ཀུན་དགའ་བོ།་ཡོན་དེ་དག་ཐམས་ཅད་ཀྱི་འབྲས་བུ་ནི་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བར་ང་སྨྲའོ། །ཀུན་དགའ་བོ། དེ་བཞིན་གཤེགས་པ་བཞུགས་པ་དེ་
160b
ལ་མངོན་སུམ་དུ་བསྟི་སྟང་བྱེད་པ་ལྟའང་ཞོག་།ཡོངས་སུ་མྱ་ངན་ལས་འདས་པའི་སྐུ་གདུང་ལ་སྐུ་གདུང་གི་མཆོད་པ་བྱེད་པ་ལྟའང་ཞོག་སྟེ། ཀུན་དགའ་བོ། སངས་རྒྱས་ལ་དམིགས་པའི་སེམས་ཀྱི་མེ་ཏོག་གཅིག་ནམ་མཁའ་ལ་འདོར་ན་དེའི་དགེ་བའི་རྩ་བ་ནི་ངས་དེ་བཞིན་གཤེགས་པའི་སངས་རྒྱས་ཀྱི་ཡེ་ཤེས་ཀྱིས་ཀྱང་ཚད་གཟུང་བའམ་བསྟན་པར་སླ་བ་མ་ཡིན་ནོ། །ཀུན་དགའ་བོ། གལ་ཏེ་དེས་སངས་རྒྱས་ལ་དམིགས་པའི་སེམས་ཀྱིས་ནམ་མཁའ་ལ་མེ་ཏོག་གཅིག་པོར་བའི་དགེ་བའི་རྩ་བ་བྱས་པ་དེ་ཡོངས་སུ་བརྟག་པ་བཟུང་སྟེ།་གལ་ཏེ་འཁོར་བ་ན་ཇི་སྲིད་དུ་སྔོན་གྱི་མཐའ་མི་མངོན་པའི་བསྐལ་པ་དེ་སྲིད་དུ་ཀུན་ཏུ་རྒྱུག་ཅིང་འཁོར་ཡང་དེ་བཞིན་གཤེགས་པ་ལ་མེ་ཏོག་གཅིག་ཕུལ་བ་དེའི་རྣམ་པར་སྨིན་པ་ནི་ཚངས་པ་ཉིད་དམ། བརྒྱ་བྱིན་ཉིད་དམ། འཁོར་ལོས་བསྒྱུར་བའི་རྒྱལ་སྲིད་ཀྱི་མཐར་ཕྱིན་པར་སླ་བ་མ་ཡིན་གྱི། ཀུན་དགའ་བོ། གཞན་དུ་ན་དགེ་བའི་རྩ་བ་དེའི་འབྲས་བུ་ནི་མྱ་ངན་ལས་འདས་པའི་ཡིན་ཏེ། མྱ་ངན་ལས་འདའ་བ་ལ་གཞོལ་ཞིང་ཐ་མ་མྱ་ངན་ལས་འདའ་བར་ང་སྨྲའོ། །དེ་ཅིའི་ཕྱིར་ཞེ་ན། ཀུན་དགའ་བོ། སངས་རྒྱས་བཅོམ་ལྡན་འདས་ལ་མེ་ཏོག་གཅིག་ཕུལ་བའི་རྣམ་པར་སྨིན་པ་གང་མྱ་ངན་ལས་འདའ་བའི་མཐར་ཐུག་པར་འགྱུར་བ་མ་གཏོགས་པར་མཐང་རྟོགས་པར་སླ་བ་མ་ཡིན་ཏེ། དེ་ལྟར་
161a
༄#། །རྫུ་འཕྲུལ་ཆེ། དེ་ལྟར་ཕན་ཡོན་ཆེ། དེ་ལྟར་གཟི་བརྗིད་ཆེ། དེ་ལྟར་རྒྱ་ཆེའོ། །ཀུན་དགའ་བོ། གང་དེ་ལྟ་བུའི་རྣམ་པར་སྨིན་པར་འགྱུར་པ་དེ་བཞིན་གཤེགས་པ་ལ་ཡོན་ཕུལ་བ་དེ་ལྟར་དཔག་ཏུ་མེད་དོ། །དེ་བཞིན་གཤེགས་པ་ལ་ཐ་ན་སེམས་དང་བ་གཅིག་བསྐྱེད་པའང་ཤིན་ཏུ་མཐར་ཐུག་པ་དང ། ཤིན་ཏུ་གྲུབ་པ་དང ། བདེ་བ་དང ། ཤིན་ཏུ་མུར་ཐུག་པ་དང ། ཤིན་ཏུ་ཚངས་པར་སྤྱོད་པར་ང་སྨྲའོ། །ཀུན་དགའ་བོ། དེ་བས་ན་རིགས་ཀྱི་བུའམ་རིགས་ཀྱི་བུ་མོ་འཁོར་ལོས་བསྒྱུར་བའི་རྒྱལ་སྲིད་འདོད་པས་དེ་ལྟར་སངས་རྒྱས་བཅོམ་ལྡན་འདས་ལ་བསྟི་སྟང་བྱ། བླ་མར་བྱ། རིམ་གྲོར་བྱ། མཆོད་པར་བྱའོ། །རིགས་ཀྱི་བུའམ། རིགས་ཀྱི་བུ་མོ་བརྒྱ་བྱིན་ཐོབ་པར་འདོད་པ་དང།་ཚངས་པ་དང ། རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་བདག་པོ་བྱེད་པར་འདོད་པ་དང ། སུམ་ཅུ་རྩ་གསུམ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་ཀྱི་ལྷ་རྣམས་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མིའམ་མི་མ་ཡིན་པའམ། འཇིག་རྟེན་ཐམས་ཅད་ཀྱི་འཇིག་རྟེན་གྱི་བདག་པོ་ཐོབ་པར་འདོད་པས་སངས་རྒྱས་བཅོམ་ལྡན་འདས་ལ་བསྟི་སྟང་བྱ། བླ་མར་
161b
བྱ། རིམ་གྲོར་བྱ། མཆོད་པར་བྱའོ། །རིགས་ཀྱི་བུའམ། རིགས་ཀྱི་བུ་མོ་ཉན་ཐོས་ཀྱི་ས་ཐོབ་པར་འདོད་པའམ། རང་སངས་རྒྱས་ཀྱི་ས་ཐོབ་པར་འདོད་པའམ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འདོད་པས་སངས་རྒྱས་བཅོམ་ལྡན་འདས་ལ་བསྟི་སྟང་བྱ། བླ་མར་བྱ། རིམ་གྲོག་བྱ། མཆོད་པར་བྱའོ། །ཀུན་དགའ་བོ། ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་གཉེར་བ་ན། སངས་རྒྱས་མང་པོ། སངས་རྒྱས་བརྒྱ་ཕྲག་མང་པོ། སངས་རྒྱས་སྟོང་ཕྲག་མང་པོ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་རྣམས་ལ་འདི་ལྟ་སྟེ། ན་བཟའ་དང ། བཤོས་དང ། གཟིམས་ཆ་དང ། སྙུན་གསོས་ཀྱི་སྨན་དང ། ཡོ་བྱད་རྣམས་དང ། གདན་དང ། འཆག་ས་དང ། གཙུག་ལག་ཁང་དང ། མེ་ཏོག་དང ། སྤོས་དང ། ཕྲེང་བ་དང ། བྱུག་པ་དང ། ཕྱེ་མ་དང ། ན་བཟའ་དང ། གདུགས་དང ། རྒྱལ་མཚན་དང ། བ་དན་རྣམས་ཀྱིས་བསྟི་སྟང་བྱས། བླ་མར་བྱས། རིམ་གྲོར་བྱས། མཆོད་པར་བྱས་སོ། །སངས་རྒྱས་བཅོམ་ལྡན་འདས་དེ་དག་ཡོངས་སུ་མྱ་ངན་ལས་འདས་ནས་ཀྱང་མཆོད་རྟེན་བྱས་ནས་མེ་ཏོག་དང ། བདུག་པ་དང ། སྤོས་དང ། ཕྲེང་བ་དང ། བྱུག་པ་བརྒྱ་སྟོང་དང ། གླུ་དང ། གར་དང ། སིལ་སྙན་དང ། ཕེག་རྡོབ་པ་བརྒྱ་སྟོང་རྣམས་ཀྱིས་བསྟི་སྟང་བྱས། བླ་མར་བྱས། རིམ་
162a
༄#། །གྲོར་བྱས་ཏེ། མཆོད་ཅིང་བརྗེད་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཉིད་ལ་བརྟེན་ནས་སེམས་ཅན་ཐམས་ཅད་ལ་སྙིང་བརྩེ་བ་དང ། ལྷ་དང་མི་རྣམས་ཀྱི་དོན་དང ། ཕན་པ་དང་བདེ་བ་དང ། མ་བརྒལ་བ་རྣམས་བསྒྲལ་བ་དང ། མ་གྲོལ་བ་རྣམས་དགྲོལ་བ་དང ། དབུགས་མ་ཕྱིན་པ་རྣམས་དབུགས་དབྱུང་བ་དང ། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདའ་བའི་ཕྱིར་བྱས་སོ། །ཀུན་དགའ་བོ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ལ་ངས་མེ་ཏོག་ཨུཏྤ་ལ་ལྔ་གཏོར་ཏེ། དེ་ནས་ངས་མི་སྐྱེ་བའི་ཆོས་ལ་བཟོད་པ་ཐོབ་བོ། །ཀུན་དགའ་བོ། ངས་དགེ་བའི་རྩ་བ་ཐོབ་པ་དེ་ལས་དགེ་བའི་རྣམ་པར་སྨིན་པའི་ཕྱོགས་ཙམ་ཞིག་མྱོང་ངོ ། །གང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ལ་མེ་ཏོག་ཨུཏྤལ་དེ་ལྔ་གཏོར་བའི་དགེ་བའི་རྩ་བའི་རྣམ་པར་སྨིན་པ་དེ་ལས་ཕྱོགས་ཙམ་ཞིག་ཉན་པར་འདོད་དམ། གསོལ་བ།་བཅོམ་ལྡན་འདས། འཚལ་ལོ། །བདེ་བར་གཤེགས་པ། འཚལ་ལོ། །བཅོམ་ལྡན་འདས་ཀྱིས་གང་མར་མེ་མཛད་ལ་དགེ་བའི་རྩ་བ་བསྐྲུན་བའི་ཕྱོགས་
162b
ཙམ་ཞིག་བཤད་ཅིང་བསྟན་པའི་དུས་ལགས་ཏེ། བཅོམ་ལྡན་འདས། དུས་ལ་བབ་བོ། །བདེ་བར་གཤེགས་པ། དུས་ལ་བབ་བོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཕྱག་གཡས་པ་གསེར་གྱི་ཁ་དོག་ཅན་བརྐྱང་བ་དང ། ཕྱག་གི་མཐེའུ་ཆུང་ལས་ལྷའི་མེ་ཏོག་ཨུཏྤ་ལའི་བསུང་བྱུང་བར་གྱུར་ཏོ། །དེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་ན་ཟླ་བ་དང་ཉི་མ་བྱེ་བ་ཕྲག་བརྒྱ་རྒྱུ་བའི་སངས་རྒྱས་ཀྱི་ཞིང་དེ་དག་ཐམས་ཅད་ལྷའི་མེ་ཏོག་ཨུཏྤ་ལའི་བསུང་གིས་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་འདི་ལྟ་བུ་ངོ་མཚར་རྨད་དུ་བྱུང་བའི་ཆོས་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ལ་བསྟན་ཅིང ། སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོའི་རྣམ་པར་སྨིན་པ་ཕྱོགས་ཙམ་ཞིག་བསྟན་ཏེ། སངས་རྒྱས་ལ་དགེ་བའི་རྩ་བ་བསྐྱེད་པ་ཆུད་མི་ཟ་བའང་བསྟན་ནས། དེའི་ཚེ་ཚིགས་སུ་བཅད་པ་འདི་དག་གསུངས་སོ། །དེ་ལྟར་སངས་རྒྱས་བསམ་མི་ཁྱབ། །སངས་རྒྱས་ཆོས་ཀྱང་བསམ་མི་ཁྱབ། །བསམ་མི་ཁྱབ་ལ་དད་བྱས་ན། །དེ་ཡི་རྣམ་སྨིན་བསམ་མི་ཁྱབ། །འདུ་ཤེས་ཡོད་དང་མེད་པ་ཡི། །སེམས་ཅན་ཐམས་ཅད་ཇི་སྙེད་པ། །བསྐལ་པ་བྱེ་བ་བརྒྱ་མང་དུ། །ཀུན་གྱིས་མཆོད་པ་བྱས་པ་དང ། །རང་སངས་རྒྱས་པ་གང་དག་དང ། །ཟག་པ་མེད་པའི་དགྲ་བཅོམ་པ། །བསྐལ་པ་བྱེ་བ་བསམ་
163a
༄#། །ཡས་པར། །དེ་དག་ཐམས་ཅད་མཆོད་པ་བས། །རྫོགས་པའི་སངས་རྒྱས་བཞུགས་པའམ། །ཡོངས་སུ་མྱ་ངན་འདས་པ་ལ། །གང་གིས་ཐལ་སྦྱར་གཅིག་བྱས་པ། །བསོད་ནམས་འདི་ནི་ཁྱད་པར་འཕགས། །སངས་རྒྱས་ཚུལ་ཁྲིམས་མ་ཞིག་ཅིང ། །ཏིང་ངེ་འཛིན་ལ་དབང་དུ་གྱུར། །ཆོས་རྣམས་ཀུན་ལ་ཐེ་ཚོམ་མེད། །སངས་རྒྱས་སྤྱན་གྱིས་མཁྱེན་པ་ཡིན། །གང་ཞིག་བདེ་གཤེགས་དེ་ལ་ཡུད་ཙམ་མ་མ། །ཉིན་དང་མཚན་མོ་བྱམས་པ་བསྒོམ་བྱེད་ན། །གང་ཞིག་བསོད་ནམས་དེ་དང་མཉམ་འགྱུར་པ། །ཁམས་གསུམ་དག་ན་དེ་འདྲའི་མཆོད་པ་མེད། །བསྐལ་པ་གྲངས་མེད་འདས་པའི་འདུས་དག་ན། །ལྷ་བས་ལྷག་པའི་ལྷར་འགྱུར་འོད་མཛད་པ། །འཇིག་རྟེན་སློབ་དཔོན་གྱུར་པའི་སངས་རྒྱས་ལ། །ལས་དགེ་མི་ཉུང་བ་དག་ངས་བྱས་བ། །བསྐལ་པ་གྲངས་མེད་ཀུན་ཏུ་རྒྱུག་པ་ན། །བསོད་ནམས་དེ་ནི་ཟད་པར་མ་གྱུར་གྱི། །དེ་ཉིད་ང་ཡི་རྒྱུར་ནི་གྱུར་པ་སྟེ། །དེ་ཡིས་བྱང་ཆུབ་དམ་པ་ངས་ཐོབ་བོ། །འཇིག་རྟེན་ཀུན་ལ་སྙིང་ནི་བརྩེ་བའི་ཕྱིར། །སངས་རྒྱས་བརྒྱ་དང་སངས་རྒྱས་བྱེ་བ་སྟོང ། །གང་ལ་ཚེ་རབས་སྔ་མར་མཆོད་བྱས་པ། །མི་མཆོག་དེ་དག་ང་ནི་མཁྱེན་གྱུར་པས། །སངས་རྒྱས་དེ་དག་སྨོད་པར་ཡོང་མི་མཛད། །འདི་ལྟར་ང་ཡིས་བཟོད་པ་མ་ཐོབ་པས། །དགེ་བ་སྤྱོད་
163b
ཀྱང་མ་འོངས་དུས་དག་ན། །འདི་ལྟར་འགྱུར་ཞེས་ལུང་བསྟན་མ་མཛད་དོ། །གང་ཚེ་མར་མེ་མཛད་འདྲེན་ངས་མཐོང་བ། །དེ་ན་ང་ཡིས་ཨུཏྤ་ལ་ལྔ་གཏོར་ཅིང ། །རྣམ་པར་འདྲེན་ལ་རལ་པ་བཏིང་བ་དང ། །མི་སྐྱེའི་བཟོད་པ་ཐོབ་པར་གྱུར་པ་ན། །མར་མེ་མཛད་པ་བར་སྣང་གནས་པ་ཡིས། །བསྐལ་པ་གྲངས་མེད་འདས་ན་ཤཱཀྱའི་རྗེ། །ཤཱཀ་རིགས་རང་བྱུང་རྒྱལ་བར་འགྱུར་རོ་ཞེས། །དེ་ནས་འདྲེན་པས་ང་ནི་ལུང་བསྟན་ནོ། །ང་ནི་བྱང་ཆུབ་དམ་པ་འདོད་པ་ན། །དེ་ནས་དུས་རིང་ཀུན་ཏུ་རྒྱུག་པའི་ཚེ། །ངས་ནི་དགེ་བ་དུ་མ་བྱས་པ་དང ། །སེམས་ཅན་དོན་ཕྱིར་སྡུག་བསྔལ་མྱོང་གྱུར་པ། །བསོད་ནམས་དེ་ཡི་ཚད་ནི་ཅུང་ཟད་ཀྱང ། །འཇིག་རྟེན་རྣམ་འདྲེན་རྣམས་ཀྱིས་མ་བསྟན་ཏོ། །སྐྱེ་དགུ་མགོན་མེད་སྡུག་བསྔལ་གྱུར་མཐོང་ནས། །སྡན་ཆད་ངས་ནི་བྱིན་པ་གང་ཡིན་པ། །སྤྱད་པ་སྤྱོད་ཚེ་བདེ་གཤེགས་འོད་མཛད་པ། །སངས་རྒྱས་དཔའ་བོ་གང་དག་ངས་མཆོད་ཅིང ། །ང་ཡི་སྔོན་མཐའི་སྤྱོད་པ་གཟིགས་གྱུར་པ། །ཉིན་དང་མཚན་དུ་དེ་དག་མཚན་བརྗོད་དོ། །གཉིས་གསུམ་ལྔའམ་བཅུའམ་ཉི་ཤུའམ། །སུམ་ཅུའམ་དེ་ལས་བཏུས་ནས་མཚན་བརྗོད་དོ།། འཇིག་རྟེན་དོན་ཕྱིར་སྤྱད་པ་སྤྱོད་པ་ན། །སངས་རྒྱས་གཙོ་བོ་ངས་སྔོན་གང་མཆོད་པ། །ཇི་ལྟར་ང་ཡིས་སྡུག་བསྔལ་ཆེན་པོ་མང ། །དུ་མ་འཁོར་བར་བླངས་ནས་མ་བཏང་
164a
༄#། །ལྟར། །སངས་རྒྱས་གང་དག་དཀའ་བ་འདི་འདྲ་སྤྱད། །དེ་འདྲའི་སངས་རྒྱས་གཞན་ནི་བྱུང་མ་གྱུར། །ལེགས་པར་གསུངས་པ་མང་པོ་འཚོལ་བའི་ཚེ།། མགོ་བོ་བརྒྱ་དང་མགོ་བོ་བྱེ་བ་སྟོང ། །འཁོར་བའི་ཚེ་ནི་སྔོན་ཆད་ངས་བཏང་ཞིང ། །ཡུལ་འཁོར་རྒྱལ་སྲིད་སྤངས་ནས་རབ་ཏུ་བྱུང ། །ཆོས་མཆོག་འདི་ནི་ཡོངས་སུ་འཚོལ་བའི་ཚེ། །སྦྱིན་དང་ཚུལ་ཁྲིམས་དང་ནི་དུལ་བས་འཕགས། །བརྩོན་འགྲུས་ཀྱིས་ནི་བྱང་ཆུབ་དམ་པ་རྟོགས། །བསྐལ་པ་དཔག་མེད་ང་ནི་དེ་ལྟར་གྱུར། །སངས་རྒྱས་མཐུ་ཆེན་བསམ་གྱིས་མི་ཁྱབ་པ། །ཡོན་ཏན་ཀུན་དང་ལྡན་ཞིང་མངོན་པར་འཕགས། །ཆོས་མཆོག་བསམ་གྱིས་མི་ཁྱབ་ལེགས་པར་བཤད། །བསམ་གྱིས་མི་ཁྱབ་ལམ་ཡང་བརྗོད་པ་མཛད། །ཡོན་གྱི་བསོད་ནམས་ཀྱི་ལེའུ་སྟེ་བཅུ་པ་རྫོགས་སོ།། །།བམ་པོ་ལྔ་པ། །དེ་ནས་ཡང་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀྱི་ཚུ་རོལ་ན་དེ་བཞིན་གཤེགས་པ་པདྨའི་བླ་མ་ཞེས་བྱ་བ་ངས་མཉེས་པར་བྱས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཉིད་འདོད་པའི་ཕྱིར། བཅོམ་ལྡན་འདས་
164b
དེ་ལ་ངས་གསེར་གྱི་མེ་ཏོག་གཏོར་ཏོ། །དེའི་ཚུ་རོལ་ན་དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པ་ཞེས་བྱ་བ་མཉེས་པར་བྱས་ཏེ། རྣམ་པ་ཐམས་ཅད་མཁྱེན་པ་ཉིད་འདོད་པའི་ཕྱིར་བཅོམ་ལྡན་འདས་དེ་ལའང་ངས་དངུལ་གྱི་མེ་ཏོག་གཏོར་ཏོ། །དེའི་ཚུ་རོལ་ན་དེ་བཞིན་གཤེགས་པ་ཤིན་ཏུ་འཐོར་བཞུད་ཅེས་བྱ་བ་མཉེས་པར་བྱས་ཏེ། གྲངས་མེད་པ་འདི་ཉིད་ཀྱི་དོན་དུ་བཅོམ་ལྡན་འདས་དེ་ལའང་ངས་གསེར་སྙིམ་པ་གང་གཏོར་ཏོ། །ཤིན་ཏུ་འཐོར་བཞུད་དེའི་ཚུ་རོལ་ན་དེ་བཞིན་གཤེགས་པ་གྲགས་པ་བླ་མ་ཞེས་བྱ་བ་མཉེས་པར་བྱས་ཏེ། ངེས་པར་རྟོགས་པའི་ཡེ་ཤེས་འདི་ཉིད་ཀྱི་དོན་དུ་དེ་བཞིན་གཤེགས་པ་དེ་ལ་ངས་རིན་པོ་ཆེ་སྙིམ་པ་གང་གཏོར་ཏོ། །དེ་བཞིན་གཤེགས་པ་གྲགས་པ་བླ་མའི་ཚུ་རོལ་ན་ང་དང་མིང་མཐུན་པ་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་བྱུང་སྟེ། འཕགས་པའི་ལམ་འདི་ཉིད་ཀྱི་ཕྱིར་དེ་ལའང་ངས་མེ་ཏོག་སིལ་མས་གཏོར་ཏོ། དེ་བཞིན་གཤེགས་པར་ཤཱཀྱ་ཐུབ་པའི་ཚུ་རོལ་ན་དེ་བཞིན་གཤེགས་པ་སྐར་རྒྱལ་ཞེས་བྱ་བ་མཉེས་པར་བྱས་ཏེ། ངེས་པར་རྟོགས་པའི་ཡེ་ཤེས་འདི་ཉིད་ཀྱི་དོན་དུ་བཅོམ་ལྡན་འདས་དེ་ལའང་ངས་ཙནྡན་དམར་པོའི་ཕྱེ་མས་གཏོར་ཏོ། །དེ་བཞིན་གཤེགས་པ་སྐར་རྒྱལ་གྱི་ཚུ་རོལ་ན་དེ་བཞིན་གཤེགས་པ་རྒྱས་པ་ཞེས་བྱ་བ་མཉེས་པར་བྱས་ཏེ། བཅོམ་
165a
༄#། །ལྡན་འདས་དེ་ལའང་ངས་མིག་མི་འཛུམ་ཞིང་སེམས་མངོན་པར་དང་བས་ཉིན་ཞག་བདུན་དུ་ཚིགས་སུ་བཅད་པ་གཅིག་གིས་མངོན་པར་བསྟོད་དོ། །དེ་བཞིན་གཤེགས་པ་རྒྱས་པའི་ཚུ་རོལ་ན་དེ་བཞིན་གཤེགས་པ་རྣམ་པར་གཟིགས་ཞེས་བྱ་བ་མཉེས་པར་བྱས་ཏེ། བཅོམ་ལྡན་འདས་དེ་ལའང་ངས་མོན་སྲན་སྡེའུ་སྙིམ་པ་གང་གཏོར་ཏོ། །རྣམ་པར་གཟིགས་ཀྱི་ཚུ་རོལ་ན་དེ་བཞིན་གཤེགས་པ་གཙུག་ཏོར་ཅན་ཞེས་བྱ་བ་མཉེས་པར་བྱས་ཏེ། བཅོམ་ལྡན་འདས་དེ་ལའང་ངས་ན་བཟའ་རིན་པོ་ཆེ་གསོལ་ཏོ། །གཙུག་ཏོར་ཅན་གྱི་འོག་ཏུ་དེ་བཞིན་གཤེགས་པ་ཐམས་ཅད་སྐྱོབ་ཅེས་བྱ་བ་མཉེས་པར་བྱས་ཏེ། བཅོམ་ལྡན་འདས་དེ་ལའང་ངས་བཤོས་བཟང་པོ་གསོལ་ཏོ། །ཀུན་དགའ་བོ། །བསྐལ་པ་བཟང་པོ་འདི་ལ་དེ་བཞིན་གཤེགས་པ་འཁོར་བ་འཇིག་བྱུང་སྟེ། ཡེ་ཤེས་རང་བྱུང་འདི་ཉིད་ཀྱི་དོན་དུ་དེའི་ཞབས་འབྲིང་ན་ངས་ཚངས་པར་སྤྱོད་པ་སྤྱད་དོ། །འཁོར་བ་འཇིག་གི་འོག་ཏུ་དེ་བཞིན་གཤེགས་པ་གསེར་ཐུབ་ཅེས་བྱ་བ་བྱུང་སྟེ། དེའི་ཞབས་འབྲིང་ནའང་ངས་ཚངས་པར་སྤྱོད་པ་སྤྱད་དོ། །གསེར་ཐུབ་ཀྱི་ཚུ་རོལ་ན་དེ་བཞིན་གཤེགས་པ་འོད་སྲུང་ཞེས་བྱ་བ་བྱུང་སྟེ། འོད་སྲུང་གི་ཞབས་འབྲིང་ནའང་ངས་ཚངས་པར་སྤྱོད་པ་སྤྱད་དེ། ཐམས་ཅད་ལའང་
165b
བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཉིད་འདོད་པའི་ཕྱིར་བྱས་སོ། །དེ་ལྟར་ང་བརྒལ་ནས་མ་བརྒལ་བ་རྣམས་སྒྲོལ་ཞིང་གྲོལ་ནས་མ་གྲོལ་བ་རྣམས་འགྲོལ་བ་ནས། ཡོངས་སུ་མྱ་ངན་ལས་འདས་ནས་ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདའ་བར་བྱེད་དོ། །ཀུན་དགའ་བོ། འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཉིད་འདོད་པའི་ཕྱིར་འདི་ལྟར་སངས་རྒྱས་བཅོམ་ལྡན་འདས་འདི་དག་དང ། དཔག་ཏུ་མེད་གྲངས་མེད་པ་གཞན་རྣམས་ལའང་བསྟི་སྟང་བྱས། བླ་མར་བྱས། རིམ་གྲོར་བྱས། མཆོད་པར་བྱས་ཏེ། སངས་རྒྱས་མང་པོ་ཇི་སྙེད་ལ་བསྙེན་བཀུར་བྱས་པ་དང ། དེ་བཞིན་གཤེགས་པ་ཡོན་ཏན་མང་པོ་ཇི་སྙེད་དང་ལྡན་པ་ལ་ལྟོས། །ཀུན་དགའ་བོ། །རྣམ་གྲངས་འདིས་ཀྱང་ཁྱོད་ཀྱིས་འདི་ལྟར་རིག་པར་བྱ་སྟེ། དེ་བཞིན་གཤེགས་པ་ལ་དགེ་བའི་རྩ་བ་གང་ཇི་ཙམ་དུ་ཆུང་བ་བསྐྱེད་པའང་དེ་ལྟར་རྫུ་འཕྲུལ་ཆེ་བ་དང ། དེ་ལྟར་ཕན་ཡོན་ཆེ་བ་དང ། དེ་ལྟར་གཟི་ཆེ་བ་དང ། དེ་ལྟར་རྒྱ་ཆེ་བར་འགྱུར་རོ། །ཀུན་དགའ་བོ། དེ་བཞིན་གཤེགས་པ་བསམ་གྱིས་མི་ཁྱབ་པ་རྣམས་ལ་ངས་དགེ་བའི་རྩ་བ་བསྐྱེད་དེ། དེའི་རྣམ་པར་སྨིན་པའང་བསམ་གྱིས་མི་ཁྱབ་པར་ཤེས་པར་བྱའོ། ས།ཀུན་དགའ་བོ། དེ་ལྟར་དེ་བཞིན་
166a
༄#། །གཤེགས་པ་རྣམས་ལ་མཉམ་པ་མེད་པ་དང ། མི་མཐུན་པ་མེད་པ་དང ། མཐའ་ཡས་པའི་ཡོན་ཕུལ་བས་རྣམ་པར་སྨིན་པའང་མཐའ་ཡས་པར་ཤེས་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ང་སྔོན་བྱང་ཆུབ་སྤྱད་པ་སྤྱོད་པ་ན། །མར་མེ་མཛད་པ་རྐང་གཉིས་མཆོག་མཉེས་བྱས། །དེ་ལ་ང་ཡིས་ཨུཏྤ་ལ་ལྔ་གཏོར་ཏེ། །དེ་ནས་འདྲེན་པས་ང་ལ་ལུང་བསྟན་ཏོ། །དེ་ཡི་འོག་ཏུ་རྒྱལ་བ་པདྨའི་བླ། །བྱུང་སྟེ་དེའང་ང་ཡིས་མཉེས་པར་བྱས། །བྱང་ཆུབ་དམ་པ་འདི་ནི་འདོད་པས་ན། །གསེར་གྱི་མེ་ཏོག་རྣམས་ཀྱིས་རྒྱལ་དེ་མཆོད། །དེ་ཡི་འོག་ཏུ་འདྲེན་པ་བྱུང་བ་ནི། །ཐམས་ཅད་ཟིལ་གནོན་ཡོན་ཏན་ཀུན་དང་ལྡན། །ཤིན་ཏུ་འཐོར་བཞུད་གྲགས་པའི་བླ་མ་དང ། །ཤཱཀྱ་ཁྱུ་མཆོག་སྐར་རྒྱལ་དེ་བཞིན་རྒྱས། །སངས་རྒྱས་རྣམ་གཟིགས་གཙུག་ཏོར་ཐམས་ཅད་སྐྱོབ། །འཁོར་བ་འཇིག་དང་འདྲེན་པ་གསེར་ཐུབ་དང ། །བྱང་ཆུབ་དམ་པ་ཡོངས་སུ་འཚོལ་བ་ན། །སངས་རྒྱས་འོད་སྲུང་དེ་བཞིན་ངས་མཆོད་དོ། །བྱང་ཆུབ་མཆོག་འདི་ཡོངས་སུ་འཚོལ་བ་ན། །སེམས་ཅན་དོན་ཕྱིར་སྙིང་རྗེ་བསྐྱེད་ནས་སུ། །སྤྱོད་མཆོག་སྤྱད་ཚེ་གང་དག་ངས་མཆོད་པ། །འདས་པའི་འདྲེན་པ་གཞན་དང་དེ་དག་གོ་།སངས་རྒྱས་
166b
བྱེ་བ་ཕྲག་སྟོང་དེ་དག་མཆོད། །ཚོགས་རྣམས་ཐམས་ཅད་ཡོངས་སུ་རྫོགས་བྱས་ནས། །མྱ་ངན་མེད་ཞི་བྱང་ཆུབ་ངས་ཐོབ་སྟེ། །དཔུང་བཅས་བཞོན་པར་བཅས་པའི་བདུད་བཏུལ་ནས། །ཆོས་ཀྱི་འཁོར་ལོ་ང་ཡིས་རབ་ཏུ་བསྐོར། །སྲོག་ཆགས་ཕན་ཕྱིར་ཆོས་རྣམས་རབ་ཏུ་བཤད། །ལྷ་དང་ཀླུ་དང་མི་དང་མིའམ་ཅི། །སངས་རྒྱས་བྱང་ཆུབ་མཆོག་ལ་ངས་བཀོད་དེ། །བདེ་ཞིང་ཞི་བའི་ལམ་དག་ངས་བསྟན་ཏོ། །མ་བྱོན་སངས་རྒྱས་དེ་བཞིན་ཉན་ཐོས་གང ། །སྡུག་བསྔལ་ཀུན་ལས་གང་ཞིག་ཐར་འདོད་པ། །མཁས་པ་དེ་དག་ང་ཡི་ཡོན་ཏན་སློབས། །དགེ་བའི་རྩ་བ་བསྐྱེད་པའི་ལེའུ་སྟེ་བཅུ་གཅིག་པ་རྫོགས་སོ།། །།དེ་ནས་ཡང་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། ང་བྱང་ཆུབ་ཐོབ་པའི་ཡོན་ཏན་གྱི་ཕན་ཡོན་ལྟ་ཞོག་ལ། ཀུན་དགའ་བོ། ང་བྱང་ཆུབ་སེམས་དཔའི་སྤྱད་པ་སྤྱོད་པ་ན་གང་ཡོན་ཏན་གྱི་ཆོས་རྣམས་བྱུང་བ་དེ་དག་ཀྱང་རང་སངས་རྒྱས་རྣམས་ལའང་མེད་ན་ཉན་ཐོས་རྣམས་སམ། དེ་ལས་གཞན་པའི་སེམས་ཅན་རྣམས་ལ་ལྟ་ཅི་སྨོས། །ཀུན་དགའ་བོ། ང་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཇི་ཙམ་དུ་དཀའ་བ་སྤྱོད་པ་དེ་དག་ཐམས་ཅད་ཁྱེད་ཀྱི་དོན་དུ་སྤྱད་དོ། །ངས་རྒྱལ་སྲིད་དང་སྡུག་པ་དག་ཀྱང་ཡོངས་སུ་བཏང་
167a
༄#། །ཞིང་བུ་ཕོ་དང ། བུ་མོ་དང ། ཆུང་མ་དང ། སླས་དང ། བདག་གི་སྲོག་དང ། ཤ་དང ། ཁྲག་དང ། རུས་པ་དང ། རྐང་དང ། རྣ་བ་དང ། སྣ་དང ། ལག་པ་དང ། རྐང་པ་དང ། མགོ་དག་ཀྱང་ངས་ཡོངས་སུ་བཏང་བ་དང ། སྡུག་བསྔལ་མི་བཟད་པ་རྩུབ་ཅིང་དྲག་པའི་ཚོར་བ་རྣམ་པ་དུ་མ་མྱོང་བ་དེ་དག་ཐམས་ཅད་ཀྱང་ཁྱེད་ཀྱི་ཕྱིར་རོ། །ཀུན་དགའ་བོ། ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བ་ན་གང་བྱ་དཀའ་བ་དང ། ཡོངས་སུ་བཏང་བ་བྱས་པ་དང ། སེམས་ཅན་རྣམས་ཀྱི་དོན་དུ་ངས་སྡུག་བསྔལ་གང་དག་མྱོང་བ་དེ་ཐམས་ཅད། ཀུན་དགའ་བོ། གལ་ཏེ་བརྗོད་ན་བདེན་པར་ཡིད་ཆེས་པར་མི་འགྱུར་ན་ཚིག་ཏུ་སྨྲ་བ་ལྟ་ཅི་སྨོས། ཀུན་དགའ་བོ།་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཁྱེད་ཀྱི་དོན་དུ་སྡུག་བསྔལ་མི་བཟད་པ་རྩུབ་ཅིང་དྲག་པའི་ཚོར་བ་འདི་ལྟ་བུ་དག་མྱོང་ངོ་ཞེས་དེ་སྐད་བཤད་ན་དེ་བཞིན་གཤེགས་པ་དེས་བདག་ཅག་གི་ཕྱིར་རབ་ཏུ་དཀའ་བ་སྤྱད་དོ་ཞེས་གལ་ཏེ་བྱིས་པ་སོ་སོའི་སྐྱེ་བོ་དག་ཚིག་བཞི་པ་གཅིག་གི་སྙིང་རྗེ་སྐྱེད་ན། ཀུན་དགའ་བོ། སེམས་བསྐྱེད་པ་དེའི་འབྲས་བུའང་མྱ་ངན་
167b
ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བའི་བར་དུ་འགྱུར་བ་ང་སྨྲ་ན། ཀུན་དགའ་བོ། ང་ལ་དགེ་བའི་རྩ་བ་བསྐྱེད་པ་ལྟ་ཅི་སྨོས། ཀུན་དགའ་བོ། འདི་ལྟ་སྐྱེས་བུ་བླུན་པོ་མ་དད་པ། རྒྱུད་ཉམས་པ། མུན་མཐའ་ཡས་པས་ཁེབས་པ་ཁ་ཅིག་ནི་ངའི་བྱང་ཆུབ་སེམས་དཔའི་སྤྱོད་པ་བཤད་ན་ཚིག་བཞི་པ་གཅིག་གི་སྙིང་རྗེའམ། ཕན་པའི་དངོས་པོའམ་སེམས་དང་བའང་མི་སྐྱེད་དོ། །\?\་བླ་ན་མེད་པའི་མྱ་ངན་ལས་འདའ་བ་སྒྲུབ་པའི་ཕྱིར་ཁྱད་པར་དུ་འཕགས་པར་འགྱུར་བ་དང ། བྱང་ཆུབ་སེམས་དཔའི་སྤྱད་པ་སྤྱོད་པ་ན་སྙིང་རྗེ་ཆེན་པོ་རྙེད་པས་གང་དག་ཐོ་\?\་པར་གྱུར་པ་ཡོན་ཏན་གྱི་ཆོས་དེ་དག་རང་སངས་རྒྱས་རྣམས་ལའང་མེད་ན་ཉན་ཐོས་རྣམས་ལ་ལྟ་ག་ལ་ཡོད། སོ་སོའི་སྐྱེ་བོ་རྣམས་ལ་ལྟ་ག་ལ་ཡོད། ཀུན་དགའ་བོ། ང་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྙིང་རྗེ་ཆེན་པོ་རྙེད་པས་གང་དག་ཐོབ་པའི་ཆོས་དེ་དག། ཀུན་དགའ་བོ། གལ་ཏེ་རང་སངས་རྒྱས་རྣམས་ལ་ཡོད་པར་གྱུར་ན་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བ་ཞིག་ན། གང་གི་ཕྱིར་ཆོས་དེ་དག་བྱམས་པ་ཆེན་པོ་དང ། སྙིང་རྗེ་ཆེན་པོས་ཟིན་པས་དེའི་ཕྱིར་རང་སངས་རྒྱས་རྣམས་ལ་མེད་དོ། །དེའི་ཕྱིར་དེ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་
168a
༄#། །རྫོགས་པའི་སངས་རྒྱས་སྟོབས་བཅུ་དང་ལྡན་པ། མི་འཇིགས་པ་བཞི་ཐོབ་པ། བྱམས་པ་ཆེན་པོ་དང ། སྙིང་རྗེ་ཆེན་པོ་དང་ལྡན་པར་མི་འགྱུར་རོ། །ཀུན་དགའ་བོ། ངས་མངོན་པར་དྲན་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བ་ཅི་བྱ་བ་འཚོལ་ཞིང་འཁོར་བས་ཡིད་རྟག་ཏུ་སྐྲག་ལ། སེམས་ཅན་རྣམས་ལ་སྙིང་རྗེ་ཆེན་པོས་ཡོངས་སུ་བསྒོས་པའི་ཡིད་དུ་གྱུར་པ་ན་རྨི་ལམ་འདི་ལྟ་བུ་རྨིས་པ་དྲན་ཏེ། རིའི་རྒྱལ་པོ་རི་རབ་ཀྱི་སྟེང་ཆེ་ཞིང་ཡངས་པ་ཞིག་ན་བདག་འདུག་སྟེ། དེ་ན་སེམས་ཅན་གང་དག་འཇིག་རྟེན་གྱི་བར་ན་བཀོད་པ། སེམས་ཅན་དམྱལ་བ་ཆེན་པོར་སྐྱེས་པ་དེ་དག་སེམས་ཅན་དམྱལ་བའི་སྲུང་མ་རྣམས་ཀྱིས་ཚར་ཆོད་ཅིང་ལུས་འབར་བ་དང ། ཀུན་ཏུ་འབར་བ་དང ། མེར་གྱུར་པ་དང ། ཤིན་ཏུ་སྡུག་བསྔལ་མི་བཟད་པ་རྩུབ་ཅིང་དྲག་པ་སྲོག་འཕྲོག་པའི་ཚོར་བ་མྱོང་བར་གྱུར་ནས་ང་ག་ལ་བ་དེར་ལྷགས་སོ། །ལྷགས་ནས་ང་ལ་ཐལ་མོ་སྦྱར་ཏེ་ཕྱག་འཚལ་ནས་འདི་སྐད་ཅེས་གྲོགས་པོ་ཁྱེད་ནི་བདེ་བའི་ཚོར་བ་མྱོང ། བདག་ཅག་ནི་སྡུག་བསྔལ་ཞིང་སེམས་ཅན་དམྱལ་བའི་ཚོར་བ་མི་བཟད་པའི་ནང་ན་མཆིས་ཏེ། ཤིན་ཏུ་སྡུག་བསྔལ་མི་བཟད་པ་རྩུབ་ཅིང་དྲག་པ་སྲོག་འཕྲོག་པའི་ཚོར་བ་མྱོང་ཞིང ། མགོན་མ་མཆིས། སྐྱབས་མ་མཆིས། དཔུང་གཉེན་
168b
མ་མཆིས་སོ། །སྐྱེས་བུ་དམ་པ་ཁྱོད་བཞེད་ན་ནི་བདག་ཅག་སྡུག་བསྔལ་འདི་ལྟ་བུ་འདི་ལས་ཁྱོད་ཀྱིས་ཡོངས་སུ་ཐར་བར་མཛད་སྤྱོད་དོ་ཞེས་ཟེར་རོ། །ཀུན་དགའ་བོ། ང་རྨི་ལམ་དེ་ཉིད་ན་དུ་ཞིང་མིག་གཉིས་ནས་འདི་ལྟ་སྟེ། དཔེར་ན། གངྒཱའི་ཀླུང་ཆེན་པོ་ལྟ་བུའི་མཆི་མ་བྱུང་སྟེ། ངས་སེམས་ཅན་དམྱལ་བའི་སེམས་ཅན་དེ་དག་ལ་དེ་ལྟ་བུའི་སྙིང་རྗེ་ཆེན་པོ་སྐྱེས་ནས་སེམས་ཅན་དམྱལ་བའི་སེམས་ཅན་དེ་དག་ལ། གྲོགས་པོ་དག་།དེ་ལྟར་མ་འཇིགས་ཤིག་།ངས་ཁྱེད་སྡུག་བསྔལ་ཆེན་པོ་འདི་ལྟ་བུ་འདི་ལས་ཡོངས་སུ་ཐར་བར་བྱའོ་ཞེས་དབུགས་ཕྱུང་ངོ ། །ཀུན་དགའ་བོ། ངས་རྨི་ལམ་ཉིད་ན་སེམས་ཅན་དམྱལ་བ་པའི་སེམས་ཅན་དེ་དག་གཅིག་ཏུ་གསོག་ནས་ལག་པ་གཡས་པས་མགོ་ལ་བྱུགས་སོ། །ཀུན་དགའ་བོ། སེམས་ཅན་དམྱལ་བ་པའི་སེམས་ཅན་དེ་དག་གི་སྤྱི་བོར་ལག་པ་གཡས་པ་བཞག་མ་ཐག་པ་དང ། སེམས་ཅན་ཁྱེད་ངས་ཐར་བར་བྱའི། མ་འཇིགས་ཤིག་ཅེས་ངས་དེ་སྐད་སྨྲས་མ་ཐག་ཏུ་སེམས་ཅན་དམྱལ་བ་པའི་མེ་དེ་ཞི་བར་གྱུར་ཏོ། །སེམས་ཅན་དམྱལ་བ་པའི་སེམས་ཅན་དེ་དག་ཀྱང་སྐད་ཅིག་དེ་ཉིད་དང ། ཡུད་ཙམ་དེ་ཉིད་ལ་བདེ་བའི་ཚོར་བ་མྱོང་བར་གྱུར་ཏོ། །ཀུན་དགའ་བོ། ང་གཉིད་ཀྱིས་ལོག་པ་དེ་ཉིད་ལས་སད་མ་ཐག་ཏུ་མཆི་མ་དེ་གོས་ལས་བཙིར་ནས་བསགས་སོ། །ཀུན་དགའ་བོ། ང་བྱང་ཆུབ་སེམས་དཔའི་སྤྱད་པ་
169a
༄#། །སྤྱོད་པ་ནའང་སྙིང་རྗེ་ཆེན་པོའི་ཆོས་དེ་ལྟ་བུ་དང་ལྡན་ན། ད་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན་ལྟ་ཅི་སྨོས། ཀུན་དགའ་བོ། རྣམ་གྲངས་འདིས་ཁྱོད་ཀྱིས་འདི་ལྟར་རིག་པར་བྱ་སྟེ། ང་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཆོས་གང་དག་བྱུང་བ་དེ་དག་རང་སངས་རྒྱས་རྣམས་ལའང་མེད་ན། ཉན་ཐོས་རྣམས་དང་བྱིས་པ་སོ་སོའི་སྐྱེ་བོ་རྣམས་ལ་ལྟ་ག་ལ་ཡོད། ཀུན་དགའ་བོ། དེ་བཞིན་གཤེགས་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སེམས་ཅན་རྣམས་ལ་སྙིང་རྗེ་ཆེན་པོ་ཇི་ཙམ་ཞིག་དང་ལྡན་པ་ཚིག་ཏུ་བརྗོད་པས་ཀྱང་མཐར་ཕྱིན་པར་སླ་བ་མ་ཡིན་པ་དེ་ལྟ་བུའི་སེམས་ཅན་རྣམས་ལ་ཕན་པའི་དངོས་པོའི་སེམས་དང་ལྡན་པར་གྱུར་པ་ལ་ལྟོས། ཀུན་དགའ་བོ། སྔོན་བྱུང་བ་འདས་པའི་དུས་ན་ཚོང་པ་མང་པོ་རིན་པོ་ཆེའི་ཕྱིར་རྒྱ་མཚོ་ཆེན་པོར་ཞུགས་པ་དང ། དེ་དག་གི་གྲུ་ཆེན་པོ་ནོར་གྱིས་གང་བ་རྒྱ་མཚོ་ཆེན་པོ་དེ་ཉིད་དུ་ཞིག་པར་གྱུར་ཏོ། །དེ་ནས་ཚོང་པ་དེ་དག་གྲུ་ཞིག་པས་འཇིགས། སྐྲག་།མི་དགའ་བར་གྱུར་ནས་སྲོག་གི་ཕྱིར་ཁ་ཅིག་ནི་སྤང་ལེབ་ལ་བརྟེན་ཏེ་རྒལ། ཁ་ཅིག་ནི་ལག་པས་རྐྱལ། ཁ་ཅིག་ནི་འཆི་བའི་དུས་བྱས་སོ། །དེའི་ཚེའང་ཚོང་པ་མང་པོ་དེའི་ནང་ན་གང་དེད་དཔོན་དུ་གྱུར་
169b
པ་དེ་རྒྱ་མཚོ་ཆེན་པོ་ལ་རྐྱལ་པས་རྐྱལ་ལོ། །དེའི་ཚེའང་ཚོང་པ་ལྔ་ཞིག་རྒྱ་མཚོ་ཆེན་པོས་ཁྱེར་བ་དེ་དག་དེད་དཔོན་དེ་ལ། ཀྱེ་དེད་དཔོན་མི་འཇིགས་པ་སྩོལ་ཅིག་ཅེས་འབོད་དོ། ། ཀུན་དགའ་བོ། དེ་སྐད་ཅེས་སྨྲས་པ་དང ། དེད་དཔོན་དེས་ཚོང་པ་དེ་དག་ལ་འདི་སྐད་ཅེས་སྨྲས་སོ། །ཀྱེ་སྐྱེས་བུ་ཁྱེད་མ་འཇིགས་ཤིག་།ངས་ཁྱེད་རྒྱ་མཚོ་ཆེན་པོ་འདི་ལས་བདེ་བར་གདོན་ནོ། །ཀུན་དགའ་བོ། དེའི་ཚེ་དེད་དཔོན་དེའི་ལུས་ལ་མཚོན་རྣོན་པོ་ཞིག་ཀྱང་འཆང་སྟེ། དེ་འདི་སྙམ་དུ་རྒྱ་མཚོ་ཆེན་པོ་འདི་མི་རོ་དང་ལྷན་ཅིག་མི་གནས་པས་ངེས་པར་བདག་གིས་བདག་གི་ལུས་སྲོག་དང་ཕྲལ་ཏེ་ཚོང་པ་འདི་དག་རྒྱ་མཚོ་ཆེན་པོ་འདི་ལས་གདོན་ནོ་སྙམ་དུ་བསམས་ནས། དེས་ཚོང་པ་དེ་དག་བདག་གི་ལུས་ལ་ཤིན་ཏུ་ལེགས་པར་ཁ་ཅིག་ནི་རྒྱབ་ཏུ་ཞོན། ཁ་ཅིག་ནི་ཕྲག་པ་ལ་ཞོན། ཁ་ཅིག་ནི་བརླ་ལ་བཅར་ཏེ། རྩོལ་བ་ཆེན་པོ་བསྐྱེད་ནས་ལུས་དང་སེམས་ལ་སོ་སོར་བརྟག་པའི་མཐུ་བསྐྱེད་དེ། ཚོང་པ་དེ་དག་ལ་མི་འཇིགས་པ་བྱིན་ནས་སྙིང་རྗེ་ཆེན་པོས་ཡོངས་སུ་བསྒོས་པའི་སེམས་ཀྱིས་མཚོན་རྣོན་པོས་བདག་གི་སྲོག་བཅད་པ་དང ། དེ་མྱུར་བ་ཉིད་དུ་འཆི་བའི་དུས་བྱས་སོ། །དེ་ནས་དེ་མ་ཐག་ཏུ་རོ་དེ་རྒྱ་མཚོ་ཆེན་པོའི་ནང་ནས་སྐམ་ལ་བྱུང་ངོ ། །དེ་ནས་ཚོང་པ་ལྔ་པོ་དེ་དག་བདེ་ཞིང་དོན་གྲུབ་ནས་རྒྱ་མཚོ་ཆེན་པོ་ལས་བརྒལ་ཏེ་སླར་ཛམྦུ་གླིང་དུ་
170a
༄#། །བདེ་བར་ལྷགས་པར་གྱུར་ཏོ། །ཀུན་དགའ་བོ། དེའི་ཚེ་དེའི་དུས་ན་དེད་དཔོན་དེ་གཞན་ཞིག་ཡིན་པ་སྙམ་དུ་ཁྱོད་ཐེ་ཚོམ་མམ་ཡིད་གཉིས་ཟ་ན། ཀུན་དགའ་བོ་ཁྱེད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཀུན་དགའ་བོ། ང་ཉིད་དེའི་ཚེ་དེའི་དུས་ན་དེད་དཔོན་དུ་གྱུར་ཏོ། །ཀུན་དགའ་བོ། དགེ་སློང་ལྔ་སྡེ་ནི་དེའི་ཚེ་དེའི་དུས་ན་ཚོང་པ་ལྔ་པོར་གྱུར་ཏེ། ཀུན་དགའ་བོ། དེའི་ཚེའང་དགེ་སློང་ལྔ་པོ་རྒྱ་མཚོ་ཆེན་པོ་ལས་བསྒྲལ་ཏོ། །དའང་ངས་འཁོར་བའི་རྒྱ་མཚོ་ཆེན་པོ་ལས་བསྒྲལ་ཏེ་མྱ་ངན་ལས་འདས་པ་འཇིགས་པ་མེད་ཅིང་ཞི་བ་ལ་བཀོད་དོ། །ཀུན་དགའ་བོ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དཀའ་བ་ཇི་སྙེད་བྱེད་པ་དང ། ཡོན་ཏན་ཚད་མེད་པ་ཇི་སྙེད་དང་ལྡན་པ་ལ་ལྟོས། ཀུན་དགའ་བོ། རྣམ་གྲངས་འདིས་ཀྱང་ཁྱོད་ཀྱིས་འདི་ལྟར་རིག་པར་བྱ་སྟེ། བྱང་ཆུབ་སེམས་དཔའ་རྣམས་ཅི་འདྲ་བའི་ཡོན་ཏན་འདི་ལྟ་བུ་དག་རང་སངས་རྒྱས་རྣམས་ལ་མེད་དོ། །ཀུན་དགའ་བོ། གལ་ཏེ་རང་སངས་རྒྱས་རྣམས་ལ་ངའི་ཆོས་རྣམས་ཡོད་དུ་ཟིན་ན་དེ་དག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་བ་ཞིག་ན་གང་གི་ཕྱིར་དེ་དག་ལ་ཆོས་འདི་དག་མེད་པ་དེའི་ཕྱིར་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱའོ། །ཀུན་དགའ་བོ། དེ་ལྟར་བྱང་
170b
ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དཀའ་བ་བྱེད་ཅིང ། སྙིང་རྗེ་ཆེ་ལ་སེམས་ཅན་ཐམས་ཅད་ལ་སྙིང་བརྩེ་བའོ། །དེ་ལ་མི་བླུན་པོ་ཁ་ཅིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང ། བླ་ན་མེད་པའི་ཡོངས་སུ་མྱ་ངན་ལས་འདས་པའི་ས་བོན་མངོན་སུམ་དུ་བྱ་བའི་ཕྱིར་སེམས་དང་བ་འགའ་ཡང་ང་ལ་མི་སྐྱེད་དོ། །ཀུན་དགའ་བོ། ཉི་ཚེ་བ་བྱེད་པ་ནི་ཉི་ཆེ་བསྒྲུབ་ལ། ཡོངས་སུ་རྫོགས་པ་བྱེད་པ་ནི་ཡོངས་སུ་རྫོགས་པ་སྒྲུབ་པོ། །ཀུན་དགའ་བོ། ངའི་སྤྱོད་པ་གཞན་དག་ཀྱང་བསྟན་ཏེ། ཀུན་དགའ་བོ། ཐ་ན་སེམས་དང་བ་གཅིག་བསྐྱེད་པའི་དགེ་བའི་རྩ་བ་དང་ལྡན་པ་བསྐྱེད་པའང་དོན་མེད་པར་མི་འགྱུར་ན་གོང་མ་དག་ལྟ་ཅི་སྨོས། ཀུན་དགའ་བོ། གང་དེ་བཞིན་གཤེགས་པ་ལ་བཞག་པའི་དགེ་བའི་རྩ་བ་གང་ཡིན་པ་ཐ་ན་སངས་རྒྱས་ལ་དམིགས་པའི་སེམས་གཅིག་བསྐྱེད་ན། ཀུན་དགའ་བོ། དེ་དག་ཐམས་ཅད་ཀྱང་བདུད་རྩི་དང་མཚུངས་ཤིང་ཐ་མ་བདུད་རྩིར་འགྱུར་པར་ང་སྨྲའོ། །ཀུན་དགའ་བོ།་དེ་བཞིན་གཤེགས་པ་ནི་རྣམ་པ་ཐམས་ཅད་ཀྱིས་རྗེས་སུ་དྲན་པར་བྱ་སྟེ། ཀུན་དགའ་བོ། དྲན་པ་ལས་ཀྱང་དེ་བཞིན་གཤེགས་པ་དྲན་པར་བྱའོ། །ཀུན་དགའ་བོ། དགེ་བའི་རྩ་བ་ལས་ཀྱང་དེ་བཞིན་གཤེགས་པ་དྲན་པར་བྱའོ། །ཀུན་དགའ་བོ། རིགས་ལས་ཀྱང་དེ་བཞིན་གཤེགས་པ་དྲན་པར་བྱའོ། །ང་ནི་འདྲ་བའི་ཕྱིར་ཉི་མའི་རིགས་ཏེ། གང་བུ་
171a
༄#། །རམ་ཤིང་པའི་རིགས་སུ་སྐྱེས་པ་ནོར་མང་པོ་ཕུན་སུམ་ཚོགས་པའོ། །ཉི་མའི་རིགས་ཀྱིས་མུན་པ་མུན་ནག་དང་བྲལ་བ་སྣང་བ་བྱེད་པ་འོད་བྱེད་པའོ། །ཀུན་དགའ་བོ། ང་ནི་ཤཱཀྱ་ཡིན་ཏེ། དེ་ནི་རིགས་ཆེ་བའི་ཚིག་བླ་དྭགས་སོ། །ཀུན་དགའ་བོ། དེ་བཞིན་གཤེགས་པ་ནི་རུས་དང ། ཆོ་རིགས་དང ། རིགས་དང ། ནོར་དང ། གཟུགས་དང ། ཡུལ་དང ། མཚན་དང་དཔེ་བྱད་བཟང་པོ་དང ། སྟོབས་དང ། མི་འཇིགས་པ་དང ། སངས་རྒྱས་ཀྱི་ཆོས་མ་འདྲེས་པས་མངོན་པར་འཕགས་སོ། །ཀུན་དགའ་བོ། །དེ་བཞིན་གཤེགས་པ་ཡོན་ཏན་ཐམས་ཅད་ཀྱིས་མངོན་པར་འཕགས་ཤིང་རིགས་ཕུན་སུམ་ཚོགས་སོ། །ཀུན་དགའ་བོ། །རོ་མྱོང་བ་ལས་ཀྱང་དེ་བཞིན་གཤེགས་པ་རྗེས་སུ་དྲན་པར་བྱའོ། །ཀུན་དགའ་བོ། །དོན་ཡོད་པ་དང ། སྔོན་གྱི་སྦྱོར་བ་ཕུན་སུམ་ཚོགས་པ་དང ། སྨོན་ལམ་ཕུན་སུམ་ཚོགས་པ་དང ། ཚུལ་ཁྲིམས་དང ། ཏིང་ངེ་འཛིན་དང ། ཤེས་རབ་དང ། རྣམ་པར་གྲོལ་བ་དང་རྣམ་པར་གྲོལ་བའི་ཡེ་ཤེས་མཐོང་བ་དང ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་དང ། སྤྱོད་ལམ་དང ། སྤྱོད་པ་དང ། སྒྲུབ་པ་ལས་ཀྱང་དེ་བཞིན་གཤེགས་པ་རྗེས་སུ་དྲན་པར་བྱ་ན་སངས་རྒྱས་ཀྱི་ཡོན་ཏན་ཐམས་ཅད་ཀྱིས་ལྟ་ཅི་སྨོས། ཀུན་དགའ་བོ། རྣམ་པ་གང་དང་གང་དག་གིས་དེ་བཞིན་
171b
གཤེགས་པ་རྗེས་སུ་དྲན་པར་འགྱུར་བའི་རྣམ་པ་དེ་དང་དེ་དག་གིས། རྫུ་འཕྲུལ་ཆེ་\?\་ཕན་ཡོན་ཆེ་གཟི་ཆེ། རྒྱ་ཆེ། །བདུད་རྩི་དང་མཚུངས་ཏེ། བདུད་རྩི་ཀླས་ཤིང་བདུད་རྩིའི་མཐས་གཏུགས་པར་འགྱུར་རོ། །ཀུན་དགའ་བོ། ང་སྔོན་བྱང་ཆུབ་སེམས་དཔར་གྱུར་པའི་རྒྱུད་ལ་ཡོད་པའི་སྦྱིན་པའི་ཕ་རོལ་ཏུ་ཕྱིན་པའི་ས་གང་ཡིན་པ་དེའི་ཡོན་ཏན་རྣམས་ངས་སངས་རྒྱས་ཀྱི་ཡེ་ཤེས་ཀྱིས་ཀྱང་མཐའ་རྟོགས་པར་མི་ནུས་ན་གང་ངའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང ། བཟོད་པའི་ཕ་རོལ་ཏུ་ཕྱིན་པ་དང ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང ། བསམ་གཏན་གྱི་ཕ་རོལ་ཏུ་ཕྱིན་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པར་གྱུར་པ་ལྟ་ཅི་སྨོས། བྱང་ཆུབ་སེམས་དཔའི་ཡོན་ཏན་དེ་ལས་གཞན་པ་དག་ཡོད་པ་ལྟ་ཅི་སྨོས། ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་པ་ན། བྱང་ཆུབ་སེམས་དཔའི་ཡོན་ཏན་ཡོད་པ་དེ་དག་གི་མཐའ་ཡང་ངས་སངས་རྒྱས་ཀྱི་ཡེ་ཤེས་ཀྱིས་རྟོགས་པར་སླ་བ་མ་ཡིན་ན་ལུང་བསྟན་པ་ལྟ་ཅི་སྨོས། སངས་རྒྱས་ཀྱི་ཡོན་ཏན་ཐམས་ཅད་ལྟ་ཅི་སྨོས་ཏེ། དེ་དག་གི་མཐའ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུའང་རྟོགས་པར་སླ་བ་མ་ཡིན་ནོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཡོན་ཏན་དཔག་ཏུ་མེད་པའི་ཕྱིར་རོ། །ཀུན་དགའ་བོ། ངས་དོན་གྱི་
172a
༄#། །དབང་འདི་མཐོང་ནས་གང་དག་ཁ་ཅིག་ངའི་བྱང་ཆུབ་སེམས་དཔའི་སྤྱོད་པའི་ཡོན་ཏན་རྣམས་རྗེས་སུ་དྲན་ཞིང་སེམས་དང་པའང་སྐྱེད་ན། ཀུན་དགའ་བོ།་དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདས་པར་ང་དེ་སྐད་སྨྲའོ། །ཀུན་དགའ་བོ། དེ་བས་ན་མྱ་ངན་མ་བྱེད། སྨྲེ་སྔགས་མ་འདོན་ཞིག་།ཀུན་དགའ་བོ་ཁྱོད་ལྷ་དང་བཅས་པའི་འཇིག་རྟེན་གྱི་དོན་ཆེན་པོ་ངས་བྱས་ཟིན་ཏེ། ཕན་ཆེན་པོ་ནི་བཏགས། བླ་ན་མེད་པའི་གྲུབ་པ་དང་བདེ་བ་འདི་ལྟ་སྟེ། མྱ་ངན་ལས་འདའ་བ་ཐོབ་པར་བྱ་བའི་ལམ་ནི་བསྟན། བསྒྲུབ་པ་ནི་བཤད་ཟིན་གྱི། ང་ཁྱེད་བག་ཡོད་པ་ལ་བརྩོན་པར་གྱིས་ཤིག་།དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་དགེ་སློང་གི་དགེ་འདུན་ལ་བཀའ་སྩལ་པ། དགེ་སློང་དག་།དོ་མོད་ཀྱི་ནམ་གྱི་གུང་ཐུན་ལ་དེ་བཞིན་གཤེགས་པ་ཡོངས་སུ་མྱ་ངན་ལས་འདའི། དགེ་སློང་དག་ཚུར་ཤོག་།དེང་དུ་ངས་ཁྱེད་མཐོང་བའི་ཐ་མ་དང ། རྗེས་སུ་བསྟན་པའི་ཐ་མར་འགྱུར། དེང་དུ་ང་དང་ཁྱེད་མཐོང་བ་ཐ་མ་དང ། ཕྲད་པ་ཐ་མར་འགྱུར་ཏེ། དགེ་སློང་ཁྱོད་ཀྱིས་ཕྱིས་ང་མི་མཐོང་།ངས་ཀྱང་ཁྱེད་མི་མཐོང་ངོ ། །དེ་བས་ན། དགེ་སློང་དག་།མྱ་ངན་མ་བྱེད། སྨྲེ་སྔགས་མ་འདོན་ཞིང ། དགེ་སློང་དག་།སྡུག་པ་དང་ཡིད་དུ་འོང་བ་
172b
ཐམས་ཅད་དང་ཐ་དད་དུ་འགྱུར་ཞིང་འགྱེས་ཏེ། བྱེ་བར་འགྱུར། འབྲལ་བར་འགྱུར་རོ། །དགེ་སློང་དག་།གང་སྐྱེས་པ། བྱུང་བ། བརྟགས་པ། འདུས་བྱས་པ། མངོན་པར་བསམས་པ། རྟེན་ཅིང་འབྲེལ་པར་བྱུང་བ། རབ་ཏུ་འཇིག་པའི་ཆོས་ཅན་འདི་དག་འཇིག་པར་མི་འགྱུར་བའི་གནས་ག་ལ་ཡོད་དེ། དེ་ནི་གནས་མེད་དོ། །དགེ་སློང་དག་།ཇི་ལྟར་རིང་དུ་གནས་ཀྱང་ཚེ་ཕྱི་མར་ངེས་པར་འགྲོ་དགོས་སོ། །དགེ་སློང་དག། སྐྱེས་པ་ནི་མི་འཆི་བ་མེད་དོ། །འདུ་བྱེད་དུ་གྱུར་པ་རྣམས་ལ་ནི་རྟག་པའམ། བརྟན་པའམ། ཐེར་ཟུག་གམ། མི་འགྱུར་བའི་ཆོས་ཅན་མ་ཡིན་ནོ། །དགེ་སློང་དག་།སྐྱེས་པ་དང་འཆི་བ་ནི་སྡུག་བསྔལ་ལོ། །དགེ་སློང་དག་།གང་དག་ཡོངས་སུ་མྱ་ངན་ལས་འདས་པ་དེ་དག་ནི་བདེ་བའོ། །མ་ཐོབ་པ་ཐོབ་པར་བྱ་བ་དང ། མ་རྟོགས་པ་རྟོགས་པར་བྱ་བ་དང ། མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར་བརྩོན་པ་གྱིས་ཤིག་།འབད་པ་གྱིས་ཤིག་།བརྩལ་བ་གྱིས་ཤིག ། དགེ་སློང་དག་།སངས་རྒྱས་བཅོམ་ལྡན་འདས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང ། གང་དེ་ལས་གཞན་པའི་དགེ་བའི་བྱང་ཆུབ་ཀྱི་ཕྱོགས་ཀྱི་ཆོས་རྣམས་ནི་བག་ཡོད་པས་ཐོབ་ཀྱི། བག་ཡོད་པ་ལ་བརྩོན་པར་གྱིས་ཤིག་།དགེ་སློང་དག་།འདི་ནི་ཁྱེད་ལ་རྗེས་སུ་བསྟན་པའོ། །དེའི་ཚེ་འཁོར་དེ་ན་དགེ་སློང་དང ། དགེ་སློང་མ་དང ། དགེ་བསྙེན་
173a
༄#། །དང ། དགེ་བསྙེན་མ་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་ཇི་སྙེད་འདུས་པར་གྱུར་པ་དེ་དག་ཐམས་ཅད་ཀྱིས་བཅོམ་ལྡན་འདས་ལ་གདམས་པ་དང་རྗེས་སུ་བསྟན་པ་འདི་ལྟ་བུ་འདི་ཐོས་ནས་སྡུག་བསྔལ་ཞིང་ཡིད་མི་བདེ་སྟེ། སྡུག་བསྔལ་དང་ཡིད་མི་བདེ་བ་མཆོག་དང་ལྡན་པར་གྱུར། མྱ་ངན་གྱི་ཟུག་རྔུ་ཆེན་པོས་ཟུག་པར་གྱུར་ནས་ངུ་ཞིང་མཆི་མ་བྱུང་བར་གྱུར་ཏེ། བཅོམ་ལྡན་འདས། ཡོངས་སུ་མྱ་ངན་ལས་འདའ་བ་ཧ་ཅང་མྱུར་ཆེས་སོ། །བདེ་བར་གཤེགས་པ། ཡོངས་སུ་མྱ་ངན་ལས་འདའ་བ་ཧ་ཅང་མྱུར་ཆེས་སོ། །འཇིག་རྟེན་གྱི་མིག་མི་སྣང་བར་འགྱུར་བ་ཧ་ཅང་མྱུར་ཆེས་སོ། །འཇིག་རྟེན་གྱི་མིག་མེད་ཅིང་ལོང་བར་འགྱུར་པ་ཧ་ཅང་མྱུར་ཆེས་སོ། །སེམས་ཅན་རིན་པོ་ཆེ་འདི་ལྟ་བུ་དང་འབྲལ་བ་དང ། འབྱེ་པ་དང ། ཐ་དད་དུ་འགྱུར་བ་ཧ་ཅང་མྱུར་ཆེས་སོ་ཞེས་ཆོ་ངེ་ཆེན་པོ་བཏོན་ནོ། །དེ་ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ལ་མིག་མི་འཛུམ་པར་ལྟ་སྟེ། བལྟས་ཤིང་བརྟགས་ནས་བཅོམ་ལྡན་འདས་ལས་ཚིག་དེ་སྐད་ཐོས་པ་དང་ངུ་ཞིང་སྨྲེ་སྔགས་འདོན་ཏེ། ཇི་ལྟར་ལངས་པ་ཉིད་ལས་ཤིང་བཅད་པ་བསྒྱེལ་བ་བཞིན་དུ་ས་ལ་འགྱེལ་ཏོ། །དེ་ནས་བཅོམ་ལྡན་
173b
འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཐོང ། མྱ་ངན་མ་བྱེད། སྨྲེ་སྔགས་མ་འདོན་ཅིག་།ཀུན་དགའ་བོ། སྡུག་བ་དང་ཡིད་དུ་འོང་བ་ཐམས་ཅད་དང་ཐ་དད་དུ་འགྱུར་ཞིང་འགྱེས་ཏེ་འབྱེ་བ་དང་འབྲལ་བར་འགྱུར་རོ། །གང་བྱུང་བ་དང ། འདུས་བྱས་པ། །མངོན་བསམས་པ། རྟེན་ཅིང་འབྲེལ་བར་འབྱུང་བ་དེ་དག་མི་འཇིག་པ་དེ་ག་ལ་ཡོད་དེ། །དེ་ནི་གནས་མེད་དོ་ཞེས་ངས་ཐོག་མ་ནས་མ་བསྟན་ཏམ། དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །གང་སེམས་ཅན་རིན་པོ་ཆེ། སེམས་ཅན་ཁ་ལོ་སྒྱུར་བ། སེམས་ཅན་ཡོངས་སུ་འདྲེན་པ། སེམས་ཅན་ཐམས་ཅད་ལ་གཅེས་པ། སེམས་ཅན་ཐམས་ཅད་རྟོན་པ།་སྟོན་པ་དེ་ལྟ་བུ་དང་བདག་འགྱེས་ཤིང་འབྱེ་འབྲལ་ན། བཅོམ་ལྡན་འདས། ཅིའི་སླད་དུ་མྱ་ངན་མི་བགྱིད། བདེ་བར་གཤེགས་པ། བདག་ཅིའི་སླད་དུ་སྨྲེ་སྔགས་མི་འདོན། བཅོམ་ལྡན་འདས། འདི་ལྟར་འཇིག་རྟེན་གྱི་མགོན་པོ་ཐུགས་རྗེ་ཆེན་པོ་འཇིག་རྟེན་ཐམས་ཅད་ལ་ཕན་ཞིང་ཐུགས་བརྩེ་བ་མིག་རིང་པོ་ཆེ་སྣང་བ་མཛད་པ་དང་བདག་འབྲལ་བར་འགྱུར་ན་ཅིའི་སླད་དུ་བདག་མྱ་ངན་མི་བགྱིད། སྨྲེ་སྔགས་མི་འདོན། བཅོམ་ལྡན་འདས། བདག་གི་སྙིང་ཚལ་བ་བརྒྱར་མ་གས་པ་ངོ་མཚར་ཏོ། བཅོམ་
174a
༄#། །ལྡན་འདས། བདག་མཆིས་པ་འདི་ཉིད་དུ་འགུམ་པའི་དུས་མ་བགྱིས་པ་ངོ་མཚར་ཏོ། །བཅོམ་ལྡན་འདས། གང་བདག་མཆིས་པ་འདི་ཉིད་དུ་འདི་ལྟ་སྟེ། དཔེར་ན། ཕུབ་མ་སྤར་གང་བཞིན་དུ་རྣམ་པ་དུ་མར་མ་ཞིགས་པ་ངོ་མཚར་ཏོ། །བཅོམ་ལྡན་འདས། བདག་ནི་བཅོམ་ལྡན་འདས་ཀྱི་བྱིན་གྱིས་རླབས་ཀྱིས་འགུམ་པའི་དུས་མ་བགྱིས་སོ་སྙམ་གྱི་བགྱིད་དོ། །བཅོམ་ལྡན་འདས། འདི་ལྟར་སེམས་ཅན་རིན་པོ་ཆེ་འཇིག་རྟེན་ཡོངས་སུ་འདྲེན་པ། འཇིག་རྟེན་ལ་ཕན་ཞིང་ཐུགས་བརྩེ་བ་དེ་ལྟ་བུ་སང་སླན་ཆད་བཞུགས་པ་མི་མཐོང་ན་ཅིའི་སླད་དུ་མྱ་ངན་མི་བགྱིད། །སྨྲེ་སྔགས་མི་འདོན། །དེ་ནས་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ལ་ང་སྡུག་གམ། གསོལ་པ། བཅོམ་ལྡན་འདས་བདག་ལ་སྡུག་གོ། བདེ་བར་གཤེགས་པ་བདག་ལ་སྡུག་གོ ། བཀའ་སྩལ་པ། ཀུན་དགའ་བོ་ཁྱོད་ལ་ང་ཇི་ཙམ་དུ་སྡུག། གསོལ་པ། བཅོམ་ལྡན་འདས། ངག་གི་ལས་ཀྱིས་བསྟན་པར་སླ་བ་མ་ལགས་པ་དང ། བཅོམ་ལྡན་འདས། དཔེས་བསྟན་པར་ཡང་སླ་པ་མ་ལགས་པ་དེ་ཙམ་དུ་བཅོམ་ལྡན་འདས་བདག་ལ་སྡུག་གོ། བདེ་བར་གཤེགས་པ་བདག་ལ་སྡུག་གོ། བཅོམ་ལྡན་འདས།
174b
བདག་གི་ལུས་དང་སྲོག་བཅོམ་ལྡན་འདས་ཀྱི་དོན་དུ་ཡོངས་སུ་བཏང་ཡང་བདག་མི་དགའ་བར་མི་འགྱུར་བ་དེ་ལྟ་བུར་བཅོམ་ལྡན་འདས་བདག་ལ་སྡུག་གོ། བདེ་བར་གཤེགས་པ་བདག་ལ་སྡུག་གོ་།བཅོམ་ལྡན་འདས་བདག་ལ་དེ་ལྟར་སྡུག་པ་དང ། བདེ་བར་གཤེགས་པ་བདག་ལ་དེ་ལྟར་སྡུག་པར་བཅོམ་ལྡན་འདས་དེ་བཞིན་གཤེགས་པ་ཉིད་ཀྱིས་མཁྱེན་ནོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། གལ་ཏེ་ཁྱོད་ལ་ང་སྡུག་ན་ལག་པ་གཡས་པ་ང་ལ་བྱིན། དེ་ནས་ཚེ་དང་ལྡན་པ་ཀུན་དགའ་བོས་ལག་པ་གཡས་པ་ཕུལ་ལོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོའི་ལག་པ་ཉིད་ཀྱི་ཕྱག་གཡས་པ་གསེར་གྱི་ཁ་དོག་ཅན་རྒྱ་སྐྱེགས་ཀྱི་ཁུ་བ་རབ་ཏུ་བཟང་པོས་ཁ་བསྒྱུར་བ་ལྟ་བུར་འཇམ་ཞིང་རབ་ཏུ་གཞོན་པས་བཟུང་ནས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། གལ་ཏེ་ཁྱོད་ལ་ང་སྡུག་པའི་བྱ་བ་བྱོས། །དེ་ལ་ང་ལ་སྡུག་པར་འཛིན་པའི་བྱ་བ་གང་ཞེ་ན། ཀུན་དགའ་བོ། །བསྐལ་པ་གྲངས་མེད་པ་བྱེ་བར་བསྒྲུབས་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང ། བླ་ན་མེད་པའི་ཆོས་དཀོན་མཆོག་གི་མཛོད་འདི་ཁྱོད་ལ་བཅོལ་ཅིང་གཏད་ཀྱི། ཅི་ནས་ཀྱང་ང་དང་མཐུན་
175a
༄#། །པར་གྱིས་ཤིག་།མཐུན་པར་བྱས་ནས་ཀྱང་ཡངས་ཤིང་རྒྱས་པར་གྱིས་ཤིག་།རྒྱུན་མ་ཆད་པར་གྱིས་ཤིག་།སྐྱེས་བུ་ཐ་མ་པར་མ་གྱུར་ཅིག་།ཀུན་དགའ་བོ།་དེ་བཞིན་གཤེགས་པས་གསུངས་པའི་ཆོས་འདུལ་བ་འདི་རྣམ་པར་འཕེལ་བ་དང ། ཡོངས་སུ་མི་ཉམས་པ་དང ། ཀུན་ཏུ་བསྲུང་ཞིང་སྦ་བ་དང ། ཆུད་མི་ཟོས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱ་སྟེ། འདི་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་རོ། །ཀུན་དགའ་བོ། འདི་ལྟ་སྟེ། དཔེར་ན། ཚོང་དཔོན་ནམ་ཁྱིམ་བདག་ཕྱུག་པོ་ནོར་ཆེ་བ། ལོངས་སྤྱོད་ཆེ་བ། བང་མཛོད་མང་བ། བདག་དབང་བ་མང་བ། རྫས་དང་ཡོ་བྱད་མང་བ། རིགས་ཕུན་སུམ་ཚོགས་པ། རུས་ཕུན་སུམ་ཚོགས་པ། རིགས་བཙུན་པའི་རིགས་ལས་བུ་གཅིག་པ་ཞིག་སྐྱེས་ཏེ། དེ་སྐྱེས་མ་ཐག་ཏུ་དབང་པོ་རྣམས་རྒྱས་པར་བྱ་བའི་ཕྱིར་ཡི་གེ་དང ། གྲངས་དང ། རྩིས་དང ། ལག་རྩིས་དང ། དེ་ལས་གཞན་པའི་བཟོ་དཀའ་བ་དང ། སྒྱུ་རྩལ་དཀའ་བ་དག་སློབ་བོ། །དེ་ལ་བསླབས་ནས་ཐ་མར་ཚོང་དཔོན་ན་མ་ཁྱིམ་བདག་དེ་འདི་སྐད་དུ་བུ་ཁྱོད་ལ་ངས་ཇི་ཙམ་དུ་བྱ་བ་དེ་དག་ངས་བྱས་ཟིན། ཡི་གེ་དང ། གྲངས་དང ། རྩིས་དང ། ལག་རྩིས་དང ། བཟོ་དཀའ་བ་དང ། སྒྱུ་རྩལ་དཀའ་བ་དག་ཀྱང་ལོབས་ཟིན་ཏེ། འདི་ནི་ངའི་དུས་ཐ་མ་ཡིན་པས་
175b
བདག་དབང་བ་ཐམས་ཅད་ངས་ཁྱོད་ལ་གཏད་ཀྱི། གནས་གསུམ་ལ་སློབ་ཅིང་ཚོང་དཔོན་གྱི་ཁྱིམ་འདི་ན་གནས་པར་བྱོས་ཤིག་།གསུམ་གང་ཞེ་ན། འདུན་པ་དང ། བརྩོན་འགྲུས་དང ། བག་ཡོད་པའོ་ཞེས་སྨྲས་ཏེ། དེ་ལྟར་ཚོང་དཔོན་ནམ་ཁྱིམ་བདག་དེས་བུ་གཅིག་པ་དེ་ལ་ཤིན་ཏུ་ལེགས་པར་གཏམས་ནས་འཆི་བའི་དུས་བྱས་ལ། དེའི་བུ་གཅིག་པ་དེ་བག་མེད་པར་སྤྱོད་པས་ལོངས་སྤྱོད་མ་རྙེད་པ་ནི་མི་རྙེད། ཕ་མེས་ཀྱི་ལོངས་སྤྱོད་རྙེད་པ་དག་ནི་ཡོངས་སུ་ཟད་ཅིང་མེད་པར་གྱུར་ན། ཀུན་དགའ་བོ། དེ་ཇི་སྙམ་དུ་སེམས། ཚོང་དཔོན་གྱི་བུའམ། ཁྱིམ་བདག་གི་བུ་དེས་ཕའི་ལུང་བཞིན་དུ་བྱས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བདེ་བར་གཤེགས་པ། མ་ལགས་སོ། །བཀའ་སྩལ་པ། ཀུན་དགའ་བོ། ཕ་དེས་བུ་དེ་ལ་བུའི་བྱ་བ་ཅུང་ཟད་བྱས་སམ། གསོལ་པ། བཅོམ་ལྡན་འདས། བགྱིས་སོ། །བདེ་བར་གཤེགས་པ། བགྱིས་སོ། །བཀའ་སྩལ་པ། ཀུན་དགའ་བོ། དེ་བཞིན་དུ་དེ་བཞིན་གཤེགས་པའང་འཇིག་རྟེན་ཐམས་ཅད་ཀྱི་ཡབ་སྟེ། ཁྱེད་ལ་བུ་གཅིག་པ་བཞིན་དུ་དབུགས་འབྱིན་ཏོ། ཀུན་དགའ་བོ། །འདི་ནི་ངའི་དུས་ཐ་མ་སྟེ། འདི་ནི་ངའི་རྗེས་སུ་བསྟན་པ་ཐ་མ་ཡིན་གྱི། ཅི་ནས་ཀྱང་བསྐལ་བ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་བསྒྲུབས་པ་ངའི་ཆོས་དཀོན་མཆོག་གི་མཛོད་དང ། ཆོས་དཀོན་མཆོག་གི་
176a
༄#། །སྣོད་དང ། ཆོས་ཀྱི་ནོར་བླ་ན་མེད་པ་འདི་གནས་གསུམ་གྱིས་བཞག་ནས་གནས་པར་གྱིས་ཤིག། གསུམ་གང་ཞེ་ན། འདུན་པ་དང ། བརྩོན་འགྲུས་དང ། བག་ཡོད་པའོ། །ཁྱེད་གནས་འདི་གསུམ་གྱིས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་བསྒྲུབས་པ་བླ་ན་མེད་པའི་ཆོས་དཀོན་མཆོག་གི་མཛོད་འདི་ལ་གནས་ན་དགེ་བའི་རྩ་བ་མ་ཐོབ་པ་རྣམས་ཐོབ་པར་འགྱུར་རོ། །དགེ་བའི་ཆོས་ཐོབ་པ་རྣམས་ཡོངས་སུ་མི་ཉམས་པར་འགྱུར་རོ། །གལ་ཏེ་ཁྱེད་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ལ་གནས་གསུམ་གྱིས་མི་གནས་ན་དགེ་བའི་ཆོས་མ་ཐོབ་པ་རྣམས་ཁྱེད་ཀྱིས་ཐོབ་པར་མི་འགྱུར་ལ་དགེ་བའི་ཆོས་ཐོབ་པ་རྣམས་ཀྱང་ཡོངས་སུ་ཉམས་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ། འདི་ལྟར་ང་འཇིག་རྟེན་གྱི་ཡབ། འཇིག་རྟེན་གྱི་མགོན་པོ། དོན་བཞེད་པ། ཕན་པར་བཞེད་པ། བདེ་བར་བཞེད་པ། གྲུབ་པ་དང་བདེ་བ་བཞེད་པ། ཕན་པ་བཞེད་པ། ཐུགས་བརྩེ་བ་ཅན། ཐུགས་རྗེ་དང་ལྡན་པས་གང་བྱ་བ་དེ་ནི་ངས་བྱས་ཟིན་གྱི། ད་ཁྱོད་ཀྱིས་བྱོས་ཤིག། ཀུན་དགའ་བོ། བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་
176b
བྱང་ཆུབ་འདི་ནི་གནས་གསུམ་གྱིས་མེད་པར་འགྱུར་རོ། །གསུམ་གང་ཞེ་ན། མ་དད་པ་དང ། མི་སྒྲུབ་པ་དང ། མི་སྟོན་པའོ། །ཀུན་དགའ་བོ། དེ་བས་ན་དམ་པའི་ཆོས་དཀོན་མཆོག་གི་མཛོད་འདི་བསྲུང་བའི་ཕྱིར་མངོན་པར་དད་པ་དང ། བསྒྲུབ་པ་དང ། བསྟན་པ་ལ་འདུན་པ་དང ། བརྩོན་འགྲུས་དང ། བག་ཡོད་པ་ལ་བརྩོན་པར་གྱིས་ཤིག་།དེ་ལྟར་བྱས་ན་ཆོས་ཀྱི་རྗེ་འཇིག་རྟེན་གྱི་ཡབ་ངའི་བྱ་བ་ཁྱེད་བུ་རྣམས་ཀྱིས་བྱས་པར་འགྱུར་རོ། །ཀུན་དགའ་བོ། དེ་བས་ན་བླ་ན་མེད་པའི་ཆོས་དཀོན་མཆོག་གི་མཛོད་འདི་རྒྱ་ཆེར་ཡོངས་སུ་གཏད་པའི་ཕྱིར་ཁྱོད་ལ་དཔེ་བསྟན་པར་བྱ་སྟེ། འདི་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་ཏེ། བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བདག་ཅག་གི་དོན་དུ་ཡོངས་སུ་མྱ་ངན་ལས་འདའ་བའི་ཚེ་ཕྱག་གཡས་པས་ཚེ་དང་ལྡན་པ་ཀུན་དགའ་བོའི་ལག་པ་ནས་བཟུང་སྟེ། བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཡོངས་སུ་གཏད་དོ་སྙམ་ནས་དེ་དག་རྒྱ་ཆེར་ཡོངས་སུ་དགའ་བ་དང་མགུ་བར་འགྱུར་རོ། །ཀུན་དགའ་བོ། འདི་ལྟ་སྟེ། དཔེར་ན། དེད་དཔོན་བྱེས་སུ་སོང་
177a
༄#། །བས་གང་བདག་གི་བྱ་བ་ཅུང་ཟད་ཅི་ཡོད་པ་དང ། འདྲོན་པ་ཐམས་ཅད་ཀྱི་གང་བྱ་བ་ཅུང་ཟད་ཅི་ཡོད་པ་དེ་དག་བྱས་ཟིན་པར་གྱུར་ན། ཀུན་དགའ་བོ།་དེ་ཇི་སྙམ་དུ་སེམས། དེད་དཔོན་དེ་བདག་གི་ཁྱིམ་དུ་འོང་ངམ། འོན་ཏེ་བྱེས་དེ་ཉིད་ན་འདུག་གམ། གསོལ་པ། བཅོམ་ལྡན་འདས། སླར་ཁྱིམ་དུ་མཆིའི། མི་མཆི་བ་མ་མཆིས་སོ། །ཀུན་དགའ་བོ། དེ་བཞིན་དུ་དེ་བཞིན་གཤེགས་པ་འཇིག་རྟེན་གྱི་ཡབ། འཇིག་རྟེན་གྱི་མགོན་པོ། འཇིག་རྟེན་གྱི་ཡོངས་སུ་འདྲེན་པ། དེད་དཔོན་ཆེན་པོས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སངས་རྒྱས་ཀྱི་ཡེ་ཤེས་ཀྱིས་གང་བྱ་བ་དེ་དག་ཐམས་ཅད་བྱས་ཟིན་ཏེ། དེ་ལ་སངས་རྒྱས་ཀྱི་བྱ་བ་གང་ཕྱིས་བྱ་དགོས་པ་ཅུང་ཟད་ཀྱང་མེད་དོ། །ད་ལྟ་སངས་རྒྱས་ཀྱིས་གདུལ་བའི་སེམས་ཅན་གང་མ་དལ་བའམ་མ་ཞི་བ་འགའ་ཡང་མེད་དོ། །ཀུན་དགའ་བོ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་གནས་གསུམ་ཡོངས་སུ་མ་རྫོགས། ཡོངས་སུ་མ་བརྙེས་པར་ཡོངས་སུ་མྱ་ངན་ལས་མི་འདའི། གང་གི་ཚེ་གནས་དེ་གསུམ་མཛད་ཅིང་ཡོངས་སུ་རྫོགས་ལ་ཡོངས་སུ་བརྙེས་པར་གྱུར་པ་དེའི་ཚེ་ན་གདོད་དེ་བཞིན་གཤེགས་
177b
པ་ཡོངས་སུ་མྱ་ངན་ལས་འདའོ། །གསུམ་གང་ཞེ་ན། བྱང་ཆུབ་སེམས་དཔའ་གང་དེ་བཞིན་གཤེགས་པའི་བསྟན་པ་ནུབ་པའི་འོག་ཏུ་བསྐལ་པའམ། བསྐལ་པ་བརྒྱའམ། བསྐལ་པ་སྟོང་ངམ། བསྐལ་པ་བརྒྱ་སྟོང་ངམ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ན་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཕྱིར་མི་ལྡོག་པའི་ཆོས་ལ་གནས་པར་མ་གྱུར་ལ། གལ་ཏེ་སངས་རྒྱས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱིར་མི་ལྡོག་པ་ཉིད་དུ་དབང་པོ་ཡོངས་སུ་མ་སྨིན་པ་གཟིགས་ནས། དེའི་ཚེ་གང་ཟག་དེ་ཡོངས་སུ་སྨིན་པར་བྱ་བའི་ཕྱིར་བྱང་ཆུབ་སེམས་དཔའ་ཕྱིར་མི་ལྡོག་པའི་ཆོས་ཉིད་མ་ཐོབ་ཀྱི་བར་དུ་རྫུ་འཕྲུལ་གྱི་སྐུ་བྱིན་གྱིས་རློབ་སྟེ། དེའི་ཚེ་ཕྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ནས་གདོད་དེ་བཞིན་གཤེགས་པ་རྣམས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའོ། ། དེ་བས་ན་ངས་ད་ནི་བྱང་ཆུབ་སེམས་དཔའ་བྱམས་པ་ལ་སོགས་པ་བྱེ་བ་ཁྲག་ཁྲིག་བརྒྱ་སྟོང་མང་པོ་དག་ཕྱིར་མི་ལྡོག་པའི་ཆོས་ཉིད་ལ་ལུང་བསྟན་ཅིང་བཀོད་དེ། ངའི་བྱ་བ་འདི་དག་སེམས་ཅན་རྣམས་ལ་ཐུགས་བརྩེ་བའི་ཕྱིར་བྱས་ཟིན་ནོ། །ཀུན་དགའ་བོ། གཞན་ཡང་སངས་རྒྱས་ཀྱིས་མངོན་དུ་འདུལ་བ་ཐམས་ཅད་དུལ་བར་མ་གྱུར་གྱི་བར་དུ་དེ་བཞིན་
178a
༄#། །གཤེགས་པ་ཡོངས་སུ་མྱ་ངན་ལས་མི་འདའོ། །གང་གི་ཚེ་སངས་རྒྱས་བཅོམ་ལྡན་འདས། བསྐལ་པ་སྟོང་ཕྲག་མང་པོ་ཞིག་ནས་སངས་རྒྱས་བཅོམ་ལྡན་འདས་གཞན་རྣམས་འབྱུང་བ་དང ། འཇིག་རྟེན་གྱི་ཁམས་དེའམ། གཞན་དག་ཏུ་འགྲོ་བ་ལྔའི་ནང་ན་གང་ཡང་རུང་བའི་འགྲོ་བར་སྐྱེས་བའི་གང་ཟག་ཀྱང་སངས་རྒྱས་ཀྱིས་འདུལ་བར་མཁྱེན་ལ། གང་ཟག་དེ་ལོ་གཅིག་གམ། ལོ་བརྒྱའམ། ལོ་སྟོང་ངམ། ལོ་བྱེ་བ་ཁྲག་ཁྲིག་བརྒྱ་སྟོང་ངམ། བསྐལ་པ་ལས་ལྷག་པ་ན་གང་ཟག་དེ་ངས་འདུལ་བར་འགྱུར་གྱི། ཉན་ཐོས་ཀྱིས་མ་ཡིན། རང་སངས་རྒྱས་ཀྱིས་མ་ཡིན་པར་མཁྱེན་པར་འགྱུར་བ་དེའི་ཚེ་སངས་རྒྱས་ཀྱི་ཡེ་ཤེས་ཀྱིས་མཁྱེན་ནས། གང་ཟག་དེ་ལ་ཐུགས་བརྩེ་བའི་ཕྱིར་གང་ཟག་དེ་ཡོངས་སུ་སྨིན་པར་གྱུར་གྱི་བར་དུ་རྫུ་འཕྲུལ་གྱི་སྐུ་བྱིན་གྱིས་བརླབས་ནས་དེའི་འོག་ཏུ་གདོད་འདུལ་ཏེ། ཀུན་དགའ་བོ། འདི་ནི་གང་བྱས་ནས་ཕྱིས་སངས་རྒྱས་བཅོམ་ལྡན་འདས་རྣམས་ཡོངས་སུ་མྱ་ངན་ལས་འདའ་བར་འགྱུར་པ་དེ་བཞིན་གཤེགས་པ་རྣམས་ཀྱི་མཛད་པ་གཉིས་པའོ། །ཀུན་དགའ་བོ། གཞན་ཡང་དེ་བཞིན་གཤེགས་པའི་མདོ་སྡེའམ། འདུལ་བའམ། མ་མོ་སངས་རྒྱས་ཀྱི་བསྟན་པའི་གསུང་རབ་ལས་དགོས་པ་འགའ་ཞིག་མངོན་སུམ་དུ་ཞུ་བའམ་བྱ་བ་
178b
ཡོད་ལ། དེའང་ཉན་ཐོས་སློབ་པའམ་མི་སློབ་པ་དག་གིས་ཀྱང་ཤེས་པའམ། ཡང་དག་པར་བསྡུ་བའམ། བསྟན་པར་མི་ནུས་ལ། གལ་ཏེ་སངས་རྒྱས་རྣམས་ཀྱི་དགེ་སློང་གི་དགེ་འདུན་དེ་ལས་དགེ་སློང་གཅིག་ཙམ་ཡང་དེ་བཞིན་གཤེགས་པ་ལ་གནོད་པར་འགྱུར་དུ་འོང་ངོ་ཞེས་དེ་བཞིན་གཤེགས་པ་ལ་གུས་པར་ཞུ་ནུས་པ་མེད་པར་གྱུར་པ་དེ་ན་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་སངས་རྒྱས་ཀྱི་ཡེ་ཤེས་ཀྱིས་དགེ་སློང་སྤྲུལ་པ་སྤྲུལ་པར་མཛད་དེ། སྤྲུལ་པ་དེ་དེ་བཞིན་གཤེགས་པ་ལ། བཅོམ་ལྡན་འདས། བགྱི་བ་འདི་ལྟ་བུ་ཞིག་འདི་ལྟར་བྱུང་ན་ཇི་ལྟར་བགྱི་ཞེས་ཡོངས་སུ་ཞུའོ། །དེ་བཞིན་གཤེགས་པས་སྤྲུལ་པ་དེ་ལ། དགེ་སློང་བྱ་བ་དེ་འདི་ལྟར་བྱོས་ཤིག་།འདི་བྱས་ནས་འདི་ལྟར་བྱོས་ཤིག་ཅེས་དེ་སྐད་ཅེས་བཀའ་སྩལ་ཏོ། །གང་ཡོངས་སུ་མ་རྫོགས་པར་དེ་བཞིན་གཤེགས་པ་ཡོངས་སུ་མྱ་ངན་ལས་མི་འདའ་བའི་གནས་གསུམ་པོ་དེ་དག་དེ་བཞིན་གཤེགས་པས་ངེས་པར་མཛད་དགོས་པ་དེ་དག་ཐམས་ཅད་ངས་བྱས་ཤིང་ཡོངས་སུ་རྫོགས་ཏེ། འདི་ལ་ངས་ཉན་ཐོས་རྣམས་ལ་བསླབ་པའི་འདུལ་བ་དང་སོ་སོར་ཐར་པ་ནི་བཅས། ངས་ལམ་ནི་བསྟན། དེ་བྱེད་པ་ཡང་དག་པར་སྡུག་བསྔལ་ཟད་པར་འགྱུར་པ་ངེས་པར་འབྱིན་
179a
༄#། །པའི་ལམ་ནི་བསྙད་ཟིན་ཏེ། ཕྱིས་བྱ་དགོས་པའི་ལྷག་མ་ཅིའང་མེད་དོ། །ཀུན་དགའ་བོ། དེ་ལྟར་བས་ན་ཁྱེད་ཀྱིས་མ་བཅས་པ་ནི་མི་བཅའ། བཅས་པ་ནི་མི་གཞིག་སྟེ། ཀུན་དགའ་བོ། བསླབ་པ་ཇི་ལྟར་བཅས་པ་བཞིན་དུ་སློབས་ཤིག། ཀུན་དགའ་བོ། འདི་ནི་ཁྱེད་ཀྱིས་བྱ་བ་ཡིན་གྱི། བག་ཡོད་པ་དང ། བག་ཡོད་པ་ལ་དགའ་བར་གྱིས་ཤིག་།འདི་ནི་ངའི་རྗེས་སུ་བསྟན་པ་ཡིན་གྱི། མྱ་ངན་མ་བྱེད། སྨྲེ་སྔགས་མ་འདོན་ཅིག། ཀུན་དགའ་བོ། དོ་མོད་ཀྱི་ཐུན་ཐ་མ་ལ་ང་ཡོངས་སུ་མྱ་ངན་ལས་འདའ་སྟེ། ཀུན་དགའ་བོ།་རང་གི་ཡུལ་དང ། རང་གི་སྤྱོད་ཡུལ་དུ་འགྲོའོ། །སླར་འཇིག་རྟེན་འདིར་མི་འོང་ངོ ། །འཇིག་རྟེན་ཕ་རོལ་ཏུའང་མི་འགྲོའོ། །ཕྱིན་ཆད་ཁྱེད་ཀྱིས་ང་མི་མཐོང ། ངས་ཀྱང་ཁྱེད་མི་མཐོང་ངོ ། །ཀུན་དགའ་བོ། ཕུང་པོའི་ལྷག་མ་མེད་པར་མྱ་ངན་ལས་འདའ་བའི་དབྱིངས་ཞི་བ། བསིལ་བ། རྡུལ་མེད་པ། རྡུལ་དང་བྲལ་བ། སྡུག་བསྔལ་ཐམས་ཅད་རྣམ་པར་ཞིབ། ཡིད་དུ་འོང་བའི་མྱ་ངན་ལས་འདས་པ། གང་ན་སྐྱེ་བའང་མེད། རྒ་བའང་མེད། འཆི་བའང་མེད། མྱ་ངན་ཡང་མེད། སྨྲེ་སྔགས་འདོན་པའང་མེད། སྡུག་བསྔལ་དང་ཡིད་མི་བདེ་བ་དང་འཁྲུག་པའང་མེད། གནོད་པའང་མེད། མི་མཛའ་བ་དང་ཕྲད་པའང་མེད། མཛའ་བ་དང་འབྲལ་བའང་མེད་ཅིང་གང་དུ་སངས་རྒྱས་དང་
179b
སངས་རྒྱས་ཀྱི་ཉན་ཐོས་ཀྱི་ཚོགས་གངྒའི་ཀླུང་གི་བྱེ་མ་སྙེད་བཞུད་ཟིན་པ་དང ། བཞུད་པ་དང ། བཞུད་པར་འགྱུར་བ་དེ་ལ་ང་དགའོ། །ཀུན་དགའ་བོ། སེམས་ཅན་རྣམས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་ལ་མི་དགའ་བ་དང ། དེ་དག་མྱ་ངན་ལས་འདས་པ་ཐོབ་པའི་ས་བོན་དུ་འགྱུར་བ་ཐར་པའི་རྗེས་སུ་མཐུན་པ་དང་ལྡན་པའི་སེམས་བསྐྱེད་པ་གཅིག་ཀྱང་མི་སྐྱེད་པ་ལ་ལྟོས། ཀུན་དགའ་བོ། བྱིས་པ་སོ་སོ་སྐྱེ་བོ་ལ་སྟོབས་ག་ལ་ཡོད། ཀུན་དགའ་བོ། བྱིས་པ་སོ་སོ་སྐྱེ་བོ་ཐམས་ཅད་ནི་སྟོབས་མེད་ཅིང་སྟོབས་ཆུང་བ་སྟེ། ཀུན་དགའ་བོ། བྱིས་པ་སོ་སོ་སྐྱེ་བོ་འདི་དག་ཐམས་ཅད་ནི་རྩཝ་དང་ཕུབ་མ་དང་སོག་མ་དང་མཚུངས་པར་སྣང་ངོ ། །ཀུན་དགའ་བོ། བྱིས་པ་སོ་སོ་སྐྱེ་བོ་དག་ནི་མྱ་ངན་ལས་འདས་པའི་ས་བོན་དུ་འགྱུར་བ་ཐར་པའི་རྗེས་སུ་མཐུན་པ་དང་ལྡན་པའི་སེམས་བསྐྱེད་པ་གཅིག་ཀྱང་མི་བསྐྱེད་པ་དག་སྟེ། དེ་དག་ལ་སྟོབས་ག་ལ་ཡོད། དབུགས་དབྱུང་བ་ལྟ་ག་ལ་ཡོད། ཀུན་དགའ་བོ། བྱིས་པ་སོ་སོ་སྐྱེ་བོ་རྣམས་ལ་ཚུལ་ཁྲིམས་ཀྱི་སྟོབས་མེད། ཏིང་ངེ་འཛིན་གྱི་སྟོབས་མེད། ཤེས་རབ་ཀྱི་སྟོབས་མེད་དོ། །ཀུན་དགའ་བོ། ང་ནི་སངས་རྒྱས་ཀྱི་སྟོབས་དཔག་ཏུ་མེད་པ་དང ། གྲངས་མེད་པ་དང ། བསམ་གྱིས་མི་ཁྱབ་པ་དང ། གཞལ་དུ་མེད་པ་དང ། ཚད་མེད་པ་དང་ལྡན་ཞིང་ཚུལ་ཁྲིམས་དང ། ཏིང་ངེ་འཛིན་དང ། ཤེས་རབ་དང ། རྣམ་
180a
༄#། །པར་གྲོལ་བ་དང ། རྣམ་པར་གྲོལ་བའི་ཡེ་ཤེས་མཐོང་བའི་སྟོབས་རྣམས་དང་ལྡན་ལ། ངོ་ཚ་ཤེས་པའི་སྟོབས་དང ། ཁྲེལ་ཡོད་པའི་སྟོབས་དང ། ཡང་དག་པར་འགྲུབ་པའི་སྟོབས་དང ། ཡེ་ཤེས་ཀྱི་སྟོབས་དང ། སྤོང་བའི་སྟོབས་དང ། བསོད་ནམས་ཀྱི་སྟོབས་དང ། ཤེས་རབ་ཀྱི་སྟོབས་དང ། དབང་པོའི་སྟོབས་དང ། བྱིན་གྱི་རླབས་ཀྱི་སྟོབས་དང ། སྟོབས་བཅུ་དང་ལྡན་པ་སྟེ། ཀུན་དགའ་བོ། འོན་ཀྱང་ང་མྱ་ངན་ལས་འདས་པའི་དབྱིངས་དེ་ལ་དགའོ། །དེ་ལ་བྱིས་པ་མུན་ནག་གི་སྒོར་གྱུར་པ། མི་ཤེས་པའི་ཆོས་དང་ལྡན་པ། འཁོར་བ་ན་རྒྱུ་བ། བཅིང་བས་བཅིངས་པ་ལ་དགའ་བ་དེ་དག་ནི་མྱ་ངན་ལས་འདས་པའི་ས་བོན་དུ་འགྱུར་བ་རྗེས་སུ་མཐུན་པའི་སེམས་གཅིག་ཀྱང་མི་སྐྱེད་དོ། །ཀུན་དགའ་བོ། ཕྱི་མའི་དུས་ཕྱི་མའི་ཚེ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ལྟ་བུ་བསྟོད་ཅིང་བཞག་སྟེ་བཤད་པ་དེ་དག་དེ་བཞིན་གཤེགས་པ་འདས་པའི་འོག་ཏུ་དེ་དག་དེ་བཞིན་གཤེགས་པས་གསུངས་པའི་མདོ་སྡེ་འདི་ལྟ་བུ་ཉན་ནོ། །ཐོས་ནས་གལ་ཏེ་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་འདི་མ་ཐོབ་ཀྱང་ངའི་ཆོས་རིན་པོ་ཆེའི་སྣོད་འདི་ལ་འཇུག་པར་འགྱུར་བ་དག་ཡོད་དེ། ཀུན་དགའ་བོ། དོན་འདི་ཉིད་རྒྱ་ཆེར་ཤེས་པར་བྱ་བའི་ཕྱིར་
180b
ཁྱོད་ལ་དཔེ་བསྟན་པར་བྱའོ། །ཀུན་དགའ་བོ། འདི་ལྟ་སྟེ། དཔེར་ན། འདྲོན་པ་མང་པོ་དག་འབྲོག་དགོན་པ་ཆེན་པོ་ལས་འདས་ཏེ་ཆོམ་རྐུན་གྱི་ལམ་འཇིགས་པ་དང་བཅས་པ་ལས་འདས་ནས།་འཇིགས་པ་མེད་པའི་གྲོང་ཁྱེར་དུ་ཕྱིན་པ་དེའི་ནང་ནས་མི་གཅིག་ཅིག་འདྲོན་པ་མང་པོ་དེ་དང་བྲལ་ཞིང་ཁྱམས་པར་གྱུར་ལ། དེ་འདྲོན་པ་མང་པོ་དེའི་རྗེས་བཞིན་དུ་འགྲོ་ཞིང་འདྲོན་པ་མང་པོ་ལམ་གང་ནས་དོང་བའི་རྗེས་བཞིན་དུ་སྡུག་བསྔལ་བ་དང ། ཉོན་མོངས་པ་དང ། ཚེགས་ཆེན་པོས་སོང་ནས་འདྲོན་པ་མང་པོ་དང་ཕྲད་པར་གྱུར་པ་དེ་བཞིན་དུ། ཀུན་དགའ་བོ། གང་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ད་ལྟར་མདོ་སྡེ་འདི་ལྟ་བུ་དག་བཤད་པ་དེ་ལ་མ་འོངས་པའི་དུས་ན་རིགས་ཀྱི་བུའམ་རིགས་ཀྱི་བུ་མོ་དག་མདོ་སྡེ་འདི་ལྟ་བུ་དག་ཐོས་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་འདི་སྒྲས་གོ་བར་འགྱུར་བ་དག་ཡོད་པས་ངས་དམ་པའི་ཆོས་ཀྱི་གྲོང་ཁྱེར་འདི་བཞག་གོ། དེ་དག་ལྷགས་ནས་ངའི་དམ་པའི་ཆོས་ཀྱི་གྲོང་ཁྱེར་འདིར་གནས་པར་བྱེད་ཅིང་ངའི་དམ་པའི་ཆོས་ཀྱི་མཛོད་འདི་སྲུང་བར་བྱེད། ཡང་དག་པར་སྟོན་པར་ཡང་བྱེད་དོ། །ཀུན་དགའ་བོ། གང་ཟག་གཅིག་གི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་གཏད་ནའང་ཁྱོད་ཀྱིས་
181a
༄#། །ལེགས་པར་གཟུང་དགོས་ན་སེམས་ཅན་བརྒྱ་སྟོང་དཔག་ཏུ་མེད་པ་རྣམས་ཀྱི་ཕྱིར་གཏད་པ་ལྟ་ཅི་སྨོས། ཀུན་དགའ་བོ། དེ་བས་ན་བསྐལ་པ་གྲངས་མེད་པ་བྱེ་བར་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་དང ། དམ་པའི་ཆོས་དཀོན་མཆོག་གི་མཛོད་འདི་ཁྱོད་ལ་གཏད་ཀྱི། ཅི་ནས་ཀྱང་འཁོར་བཞི་པོ་དད་པ་རྣམས་ལ་རྗེས་སུ་མཐུན་པར་བྱ་བ་དང ། འཇུག་པ་དང ། བཤད་པ་དང ། གདགས་པ་དང ། དགྲོལ་བ་དང ། རྣམ་པར་དབྱེ་བ་དང ། གསལ་བར་བྱོས་ཤིག། སྐྱེས་བུ་ཐ་མ་པར་མ་གྱུར་ཅིག་།ཀུན་དགའ་བོ། གང་མདོ་སྡེ་འདི་ལྟ་བུ་དག་མ་ཐོས་པས་ཡོངས་སུ་ཉམས་པར་འགྱུར་བའི་སེམས་ཅན་དག་ཡོད་དོ། །ཀུན་དགའ་བོ། དེ་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་ཏེ། དེའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ། འདི་ལྟ་སྟེ། དཔེར་ན། ཚོང་དཔོན་ནམ་ཁྱིམ་བདག་ཕྱུག་པ་ནོར་ཆེ་བ་ལོངས་སྤྱོད་ཆེ་བ། བདག་དབང་བ་མང་བ། རྫས་དང་ཡོ་བྱད་མང་བ། ནོར་དང་འབྲུ་མང་བ། བདག་དབང་བའི་སྐྱེ་བོ་མང་བ། མཛོད་དང་བང་བ་མང་བ་ཞིག་ཡོད་པ་དེའི་བུ་གཅིག་པ་ཞིག་བྱེས་སུ་སོང་བར་གྱུར་ལ། ཚོང་དཔོན་ནམ་ཁྱིམ་བདག་དེའང་ན་ཞིང་མི་བདེ་ལ་ཤིན་ཏུ་སྡུག་བསྔལ་བར་གྱུར་ཏེ་དེ་འཆི་བའི་དུས་ལ་བབ་པའི་
181b
ཚེ།་ཁྱིམ་བདག་གཞན་ཞིག་ལ་ནོར་བུ་དང ། མུ་ཏིག་དང ། བཻ་ཌཱུརྱ་དང ། དུང་དང ། མན་ཤེལ་དང ། བྱུ་རུ་དང ། གསེར་དང ། དངུལ་མང་པོ་དང ། རིན་པོ་ཆེ་མང་པོ་རྣམས་བཞག་སྟེ། ངས་རིན་པོ་ཆེ་དེ་དག་བཞག་ནས་ཚོང་དཔོན་ནམ་ཁྱིམ་བདག་དེ་ལ་འདི་སྐད་ཅེས་ཁྱེད་ཤེས་པར་གྱིས་ཤིག། ཁོ་བོའི་བུ་གཅིག་པ་དེ་ནི་བྱེས་སུ་སོང ། ཁོ་བོ་ནི་ད་ལྟ་ན་ཞིང་མི་བདེ་སྟེ། རིང་པོ་མི་ཐོགས་པར་ཁོ་བོ་འཆི་བའི་དུས་བྱེད་པར་འགྱུར་གྱི། རིན་པོ་ཆེ་དང་བང་མཛོད་མང་པོ་འདི་དག་བུ་གཅིག་པ་དེའི་ཕྱིར་ཁྱོད་ཀྱི་ལག་ཏུ་བཞག་གོ། ནམ་བདག་གི་བུ་གཅིག་པ་དེ་བྱེས་དེ་ནས་འོངས་ཏེ། དེ་བག་ཡོད་ལ་བག་ཡོད་པའི་ཆོས་ལ་གནས་པར་གྱུར་པ་དེ་ན་རིན་པོ་ཆེ་འདི་རྣམས་བྱིན་ཅིག་།བྱིན་ནས་ཀྱང་འདི་སྐད་དུ་གཞོན་ནུ་ཁྱོད་ཀྱི་ཕ་འཆི་ཀར་རིན་པོ་ཆེ་མང་པོ་འདི་དག་ཁྱོད་ཀྱི་ཕྱིར་ང་ལ་བཞག་སྟེ། ཁྱོད་ཀྱི་ཕའི་ནོར་གྱི་ཚོགས་འདི་བདག་གི་ལོངས་སྤྱོད་ཡིན་གྱི། ཁྱེར་ལ་བག་ཡོད་པར་བསྲུངས་ཏེ་ཅི་ནས་ཀྱང་ཆུད་མྯོས་པར་གྱིས་ཞེས་བསྒོ་ཞིག་ཅེས་སྨྲས་ལ། དེ་ནས་ཚོང་དཔོན་ནམ་ཁྱིམ་བདག་དེས་ཚོང་དཔོན་གཅིག་ཤོས་ལས་རིན་པོ་ཆེའི་མཛོད་མང་པོ་བཞག་པ་བླངས་ནས་ཚོང་དཔོན་གྱི་བུ་བྱེས་ནས་འོངས་པ་ལ་རིན་པོ་ཆེའི་མཛོད་བཞག་པ་དེ་མ་བྱིན་ན། ཀུན་དགའ་བོ། དེ་ཇི་སྙམ་དུ་སེམས། དེ་ལ་སུས་ཉེས་པར་འགྱུར། དེ་སྐད་ཅེས་བཀའ་
182a
༄#། །སྩལ་པ་དང ། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་ཚོང་དཔོན་དེའི་རིན་པོ་ཆེ་མང་པོ་བཞག་པ་བླངས་ནས་ཚོང་དཔོན་གྱི་བུ་དེ་ལ་མ་སྩལ་བས་བཞག་པ་འཆང་བའི་ཁྱིམ་བདག་དེས་ནོངས་པར་འགྱུར་རོ། །བཀའ་སྩལ་པ། ཀུན་དགའ་བོ། དོན་དེ་ཤེས་པར་བྱ་བའི་ཕྱིར་ངས་དཔེ་བསྟན་པ་དེ་ལ་དོན་དུ་ལྟ་བ་གང་ཞེ་ན། ཀུན་དགའ་བོ། ཁྱིམ་བདག་ཅེས་བྱ་བ་དེ་ནི་བཞིན་གཤེགས་པའི་ཚིག་བླ་དྭགས་སོ། །ཀུན་དགའ་བོ། འཆི་བའི་དུས་ཀྱི་ཚེ་ཞེས་བྱ་བའི་དེ་ནི་དེ་བཞིན་གཤེགས་པའི་ཡོངས་སུ་མྱ་ངན་ལས་འདས་པའི་དབྱིངས་ཀྱི་ཚིག་བླ་དྭགས་སོ། །ཀུན་དགའ་བོ། བུ་གཅིག་པ་ཞེས་བྱ་བ་དེ་ནི་མ་འོངས་པའི་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པ་རྣམས་ཀྱི་ཚིགས་བླ་དྭགས་སོ། །ཀུན་དགའ་བོ། བྱེས་སུ་སོང་བ་ཞེས་བྱ་བ་དེ་ནི་འགྲོ་བ་ལྔའི་འཁོར་བར་སྐྱེ་བའི་ཚིག་བླ་དྭགས་སོ། ། ཀུན་དགའ་བོ། རིན་པོ་ཆེའི་མཛོད་ཆེན་པོ་ཞེས་བྱ་བ་དེ་ནི་བསྐལ་པ་གྲངས་མེད་པ་བྱེ་བར་བསྒྲུབས་པ་ཆོས་དཀོན་མཆོག་འདིའི་ཚིག་བླ་དྭགས་སོ། །ཀུན་དགའ་བོ། བཞག་པ་འཆང་པ་ཞེས་བྱ་བ་དེ་ནི་ཁྱེད་ལྟ་བུ་དམ་པའི་ཆོས་ཀྱི་གྲོང་ཁྱེར་འདི་སྐྱོང་བ་ཉན་ཐོས་ཆེན་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཚིག་བླ་དྭགས་
182b
སོ། །ཀུན་དགའ་བོ། དེ་ལྟར་བསྐལ་པ་གྲངས་མེད་པ་བྱེ་བར་བསྒྲུབས་པའི་ཆོས་དཀོན་མཆོག་གི་མཛོད་ཆེན་པོ་འདི་མ་འོངས་པའི་རིགས་ཀྱི་བུའམ་རིགས་ཀྱི་བུ་མོ་རྣམས་ཀྱི་དོན་དུ་ཁྱོད་དང ། འོད་སྲུང་ཆེན་པོ་དང ། བྱང་ཆུབ་སེམས་དཔའ་བྱམས་པ་ལ་སོགས་པ་ལ་གཏད་ཀྱི། མ་འོངས་པ་ན་ངའི་བུ་དད་པ་དད་ལྡན་ཞིང་མངོན་པར་དད་པ་རྣམས་ལ་ཅི་ནས་ཀྱང་རྗེས་སུ་མཐུན་པ་དང་རྗེས་སུ་བསྟན་པས་དམ་པའི་ཆོས་དཀོན་མཆོག་གི་མཛོད་འདི་བྱིན་ཅིག། དེ་ཅིའི་ཕྱིར་ཞེ་ན། ཀུན་དགའ་བོ། ང་སྔོན་བྱང་ཆུབ་སེམས་དཔར་གྱུར་པ་ན་ཡོངས་སུ་སྨིན་པར་བྱས་པའི་སེམས་ཅན་དག་ཡོད་དེ། དེ་དག་ད་ལྟ་ཉེས་པར་བྱས་ཤིང་ཉེས་པར་སྤྱད་པས་སེམས་ཅན་དམྱལ་བའམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་དུ་དོང་ངོ ། །དེ་དག་དེ་བཞིན་གཤེགས་པ་འདས་པའི་འོག་ཏུ་དེ་ནས་ཤི་འཕོས་ནས་མིར་སྐྱེ་བར་འགྱུར་རོ། །དེ་དག་དབང་པོ་རྒྱས་ཤིང་ཡོངས་སུ་སྨིན་པའི་རྒྱུས་ངའི་བསྟན་པ་འདི་ལ་ཚོགས་ཆུང་དུས་དད་པར་འགྱུར་ཏེ། དེ་ལ་ཁ་ཅིག་ནི་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འགྱུར་རོ། །ཁ་ཅིག་ནི་ཁྱིམ་ན་གནས་པར་འགྱུར་རོ། །དེ་དག་ངའི་མདོ་སྡེ་འདི་ལྟ་བུ་ཐོས་ནས་ཁྱད་པར་དུ་འགྲོ་བར་འགྱུར་ཏེ། དེ་དག་ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པའམ། ཐེག་པ་ཆེན་པོས་ཡོངས་སུ་མྱ་ངན་ལས་འདའ་བར་འགྱུར་རོ། །
183a
༄#། །ཀུན་དགའ་བོ། བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་བསྒྲུབས་པ་དམ་པའི་ཆོས་དཀོན་མཆོག་གི་མཛོད་འདི་འདི་ལྟར་རིགས་ཀྱི་བུ་རྣམས་ཀྱིས་མཉན་པར་བྱ་བའི་ཕྱིར་དེ་དག་གི་དོན་དུ་ཁྱོད་ཀྱི་ལག་ཏུ་གཏད་པས་གཏད་དོ། །དེ་ཅིའི་ཕྱིར་ཞེ་ན། ཀུན་དགའ་བོ། འདི་ལྟར་སེམས་ཅན་དེ་དག་ནི་དགེ་བའི་ལམ་འདི་ལྟ་བུ་དག་མ་ཐོས་པ་ལས་ཡོངས་སུ་ཉམས་པར་འགྱུར་རོ། །ཀུན་དགའ་བོ། དེ་བས་ན་ཅི་ནས་ཀྱང་དེ་དག་འདི་ལྟ་བུ་ཐོས་པ་ལས་ཉམས་པར་མི་འགྱུར་བར་བྱ་བའི་ཕྱིར་མ་འོངས་པ་དེ་དག་ཁྱོད་ལ་གཏད་དོ། །ཀུན་དགའ་བོ། འདི་ལ་སྐྱེས་བུ་མཁས་པ་ཁ་ཅིག་ནི་དཔེས་སྨྲས་པའི་དོན་ཤེས་པར་འགྱུར་ཏེ། དེའི་ཕྱིར་དོན་འདི་རྒྱ་ཆེར་ཤེས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ། འདི་ལྟ་སྟེ། དཔེར་ན། འཁོར་ལོས་བསྒྱུར་བའི་རྒྱལ་ཕོས་དཀོར་བ་དང་མངན་རྣམས་ལ་མཛོད་དང་བང་བ་ཐམས་ཅད་གཏད་དེ། ཀྱེ་མི་ཁྱེད་དགེ་སྦྱོང་དང ། བྲམ་ཟེ་དང ། བཀྲེན་པ་དང ། འདྲོན་པ་དང ། སྡུག་ཕོངས་པ་སློང་བ་ཟས་འདོད་པ་རྣམས་ལ་ཟས་དང ། སྐོམ་འདོད་པ་རྣམས་ལ་སྐོམ་དང ། བཞོན་པ་དང ། གོས་དང ། མེ་ཏོག་དང ། སྤོས་དང ། ཕྲེང་བ་དང ། བྱུག་པ་དང ། མལ་ཆ་དང ། གནས་དང ། རྒྱབ་རྟེན་དང ། འཚོ་བའི་ཡོ་བྱད་གང་ཡང་རུང་བ་རྣམས་
183b
སྦྱིན་པ་བྱིན་ཅིག་ཅེས་དེས་དེ་སྐད་དུ་བསྒོ་ཞིང་གཏམས་པ་ལས། དེ་ལ་དཀོར་བ་དང་མངན་རྣམས་ལ་མཛོད་དང་བང་བ་དེ་ཕྱེའང་སྦྱིན་པ་དེ་སྦྱིན་པར་མི་བྱེད་ན། ཀུན་དགའ་བོ། དེ་ཇི་སྙམ་དུ་སེམས། །དེ་ལ་སུས་ཉེས་པར་འགྱུར། གསོལ་པ། བཙུན་པ་བཅོམ་ལྡན་འདས། དཀོར་བ་དང་མངན་དེ་དག་གིས་ནོངས་པར་འགྱུར་གྱི། འཁོར་ལོས་བསྒྱུར་བའི་རྒྱལ་པོས་ནི་མ་ནོངས་སོ། །བཀའ་སྩལ་པ། ཀུན་དགའ་བོ། དེ་བཞིན་དུ་ཆོས་ཀྱི་རྒྱལ་པོ་ངས་ཆོས་ཀྱི་བང་མཛོད་ཆེན་པོ་འདི་རབ་ཏུ་བསགས་ནས་བསྐལ་པ་གྲངས་མེད་པ་བྱེ་བར་བསྒྲུབས་པའི་ཆོས་དཀོན་མཆོག་གི་མཛོད་འདི་མངོན་པར་རྫོགས་པར་སངས་རྒྱས་ནས་ཡངས་ཤིང་རྒྱ་ཆེ་བར་བྱས་ཏེ། ལྷ་དང་མི་རྣམས་ལ་རྣམ་པར་ཕྱེ་ཞིང་རབ་ཏུ་བསྟན་ནོ། །གང་ངས་བསྟན་པའི་ཆོས་དེ་ཁྱོད་ལའང་རྣམ་པར་ཕྱེ་སྟེ་སྦྱིན་གྱི། བྱིས་པ་སོ་སོའི་སྐྱེ་བོ་དང ། དགེ་སྦྱོང་དང ། བྲམ་ཟེ་དང ། ཁྱིམ་བདག་དད་པ། དོན་འདོད་པ། ཆོས་འདོད་པ་རྣམས་ཉན་དུ་ཆུག་ཅིག། ཀུན་དགའ་བོ། གལ་ཏེ་ངའི་ཆོས་དཀོན་མཆོག་གི་མཛོད་འདི་རྣམ་པར་ཕྱེ་ཞིང་ཡང་དག་པར་རབ་ཏུ་བསྟན་ཏེ་ཁྱོད་ཀྱི་ལག་ཏུ་གཏད་པ་དེ་བྲམ་ཟེ་དང་ཁྱིམ་བདག་དད་པ་རྣམས་ལ་མ་བསྟན། བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་དོན་དུ་གཉེར་ཅིང་འདུན་པ་དང་དད་པ་དང་ལྡན་ཞིང་དད་པ་རྣམས་ལ་མི་སྟོན་ན། དེ་ལྟ་ན་ནི་ཀུན་
184a
༄#། །དགའ་བོ་ཁྱོད་ཀྱིས་དེ་བཞིན་གཤེགས་པ་ལ་ཉེས་པ་བྱས་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ། ང་ནི་རྒྱལ་པོ་སྟེ། བླ་ན་མེད་པའི་ཆོས་ཀྱི་རྒྱལ་པོ་ཆོས་ཀྱི་འཁོར་ལོས་བསྒྱུར་བ། ཆོས་དཀོན་མཆོག་གི་མཛོད་རྒྱ་ཆེན་པོ་མང་པོ་དང་ལྡན་པ། ཡོན་ཏན་གྱི་བང་མཛོད་མང་པོ་དང་ལྡན་པ། བྱང་ཆུབ་ཀྱི་ཕྱོགས་མང་པོའི་བདག་པོ།་བྱང་ཆུབ་ཀྱི་ཡན་ལག་རིན་པོ་ཆེ་སྣ་བདུན་དང་ལྡན་པ། སྟོབས་བཅུ་དང ། མི་འཇིགས་པ་བཞིའི་དབང་ཐོབ་པ། ཆོས་ཐམས་ཅད་ལ་དབང་སྒྱུར་བའོ། །འདི་ལྟ་སྟེ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་ཆོས་ཀྱི་བང་མཛོད་ཇི་སྲིད་འཛིན་གྱི་བར་དུ་བྲམ་ཟེ་དང་ཁྱིམ་བདག་དད་པ་རྣམས་དང ། བྱིས་པ་སོ་སོའི་སྐྱེ་བོ་དད་པས་དོན་དུ་གཉེར་བ་དང ། འདུན་པ་དང ། ཆོས་འདོད་པ་དང ། ཆོས་ཀྱི་སྣོད་དུ་གྱུར་པ་རྣམས་ལ་མ་རྟོག་པར་བྱིན་ཅིག་།སྐྱེས་བུ་ཐ་མ་པར་མ་གྱུར་ཅིག་།ཀུན་དགའ་བོ། ཁྱོད་གལ་ཏེ་བསྐལ་པ་གྲངས་མེད་པ་བྱེ་བར་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་དང ། བླ་ན་མེད་པའི་ཆོས་དཀོན་མཆོག་གི་མཛོད་འདི་འཁོར་བཞི་རྣམས་ལ་ཡང་དག་པར་རབ་ཏུ་སྟོན་ན། དེ་ལྟ་ན་ནི་ཀུན་དགའ་བོ་ཁྱོད་དེ་བཞིན་གཤེགས་པ་ལ་ཉེས་པ་བྱེད་པར་མི་འགྱུར་རོ། །ཅི་སྟེ་ཡང་དག་པར་རབ་ཏུ་མི་སྟོན་ན་ཉེས་པ་བྱེད་པར་འགྱུར་
184b
རོ། །ཀུན་དགའ་བོ། དགེ་སློང་དགྲ་བཅོམ་པ་ཟག་པ་ཟད་པ་གང་འདུས་མ་བྱས་ཀྱི་ཆོས་རྗེས་སུ་ཐོབ་ནས་གཞན་ལ་མི་འཆད། ཡང་དག་པར་རབ་ཏུ་མི་སྟོན་པ་དེས་སྟོན་པ་ལ་བསྙེན་བཀུར་བྱས་པར་མི་འགྱུར། དེས་ངའི་དམ་པའི་ཆོས་ཡོངས་སུ་བཟུང་བར་མི་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ། འདི་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་བས་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ། འདི་ལྟ་སྟེ། དཔེར་ན། ཚོང་དཔོན་ནམ་ཁྱིམ་བདག་ཕྱུག་པོ་ནོར་ཆེ་བ། ལོངས་སྤྱོད་ཆེ་བ། བང་མཛོད་མང་བ། ནོར་དང ། འབྲུ་དང ། རྫས་དང ། ཡོ་བྱད་མང་བ། ནོར་བུ་དང ། མུ་ཏིག་དང ། བཻ་ཌཱུརྱ་དང ། དུང་དང ། མན་ཤེལ་དང ། བྱུ་རུ་དང ། དངུལ་མང་པོ་ཡོད་པ་དེ་ལ་ཕྱིར་རྒོལ་བའམ། དགྲ་བོ་འགའ་ཞིག་བང་མཛོད་དེར་མེ་གཏོང་བ་དང ། གང་དེ་དང་མི་མཛའ་བ་ཕྱིར་རྒོལ་བ་དགྲ་བོར་གྱུར་པ། མི་ཕན་པར་འདོད་པ། །མི་བདེ་བར་འདོད་པ། གྲུབ་པ་དང ། བདེ་བ་མི་འདོད་པ་གཞན་དེ་དག་ཀྱང་བང་མཛོད་ཚིག་པའི་མེ་དེ་མཐོང་ནས་མེ་མི་གསོད་ཅིང་གཡེལ་བར་གནས་པ་དང ། གང་དེའི་མཛའ་བོ་ཕན་པར་འདོད་པ། བདེ་བར་འདོད་པ། གྲུབ་པ་དང་བདེ་བར་འདོད་པ་དེ་དག་གིས་ཀྱང་མེའི་ཕུང་པོ་ཆེན་པོ་དེས་ནོར་དང་འབྲུ་མང་པོ་དེ་དག་ཚིག་པ་མཐོང་ནས་གཡེལ་
185a
༄#། །བར་གནས་པ་དང ། ཚོང་དཔོན་ནམ། ཁྱིམ་བདག་དེའི་མཛའ་བཤེས་དང ། ཉེ་དུ་དང ། སྣག་གི་གཉེན་མཚམས་དོན་འདོད་པ་གྲུབ་པ་དང ། བདེ་བར་འདོད་པ་དེ་དག་མེ་དེ་མཐོང་ནས་མེ་དེ་མི་གསོད་དེ། གཡེལ་བར་གནས་ན་ཡང་དག་པར་ཞུགས་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བདེ་བར་གཤེགས་པ། མ་ལགས་སོ། །བཀའ་སྩལ་པ། ཀུན་དགའ་བོ། གང་དག་ཚོང་དཔོན་ནམ། ཁྱིམ་བདག་གི་དོན་འདོད་པ། ཕན་པ་འདོད་པ། བདེ་བར་འདོད་པ། གྲུབ་པ་དང་བདེ་བ་འདོད་པ་དེ་དག་ཀྱང་བང་མཛོད་ཚིག་པའི་མེ་དེ་མཐོང་ལ། བང་མཛོད་དེ་དག་གི་མེ་བསད་པ་ལ་གཡེལ་བར་གནས་ན་མེའི་ཕུང་པོ་དེས་རྒྱ་ཆེར་བང་མཛོད་ཐམས་ཅད་ཚིག་པར་འགྱུར་རམ། གསོལ་པ། བཅོམ་ལྡན་འདས། དེ་ལྟ་ལགས་སོ། །བདེ་བར་གཤེགས་པ། དེ་ལྟ་ལགས་སོ། བཀའ་སྩལ་པ། ཀུན་དགའ་བོ། དེ་བཞིན་དུ་ངས་བསྐལ་པ་གྲངས་མེད་པ་བྱེ་བར་དགེ་བའི་རྩ་བས་བསྒྲུབས་པའི་ཆོས་དཀོན་མཆོག་གི་བང་མཛོད་བླ་ན་མེད་པ་འདི་འཇིག་ཅིང་མི་སྣང་བར་གྱུར་པ་ན། དགེ་སློང་གང་མ་དད་པ། ཚུལ་ཁྲིམས་འཆལ་པ། སྡིག་པའི་ཆོས་ཀུན་ཏུ་སྤྱོད་པ། འཕྱར་བ་སྔོན་དུ་འགྲོ་བ། རབ་ཏུ་དབེན་པ་ལ་བརྩོན་པ་བོར་བ། སྙོམས་ལས་ཅན། ལེ་ལོ་ཅན། ཐོས་པ་
185b
ཉུང་བ་དག་འབྱུང་སྟེ། ཉན་པ་ལ་འདུན་པར་ཡང་མི་འགྱུར། ཆོས་དཀོན་མཆོག་འདི་ཡང་དག་པར་གཟུང་བའི་ཕྱིར། གཞན་དག་ཉན་དུ་འཇུག་པར་ལྟ་ག་ལ་འགྱུར་བ་དེ་ལྟ་བུ་དག་འབྱུང་ངོ ། །བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་རྣམས་ནི་།ཆོས་དཀོན་མཆོག་གི་བང་མཛོད་འདི་ལྟ་བུ་མེས་ཚིག་པ་མཐོང་ན་མེ་དེ་བསད་པ་ལ་གཡེལ་བར་གནས་ན། ཀུན་དགའ་བོ། དེ་ཇི་སྙམ་དུ་སེམས། ཆོས་དཀོན་མཆོག་འདི་ལྟ་བུ་ལས་ཡོངས་སུ་ཉམས་པར་མི་འགྱུར་རམ། དགེ་སློང་གང་དགྲ་བཅོམ་པ་ཟག་པ་ཟད་པ་དེ་དག་ཀྱང་འདུས་མ་བྱས་མངོན་སུམ་དུ་བྱས་ནས། ཆོས་བཤད་པ་དང ། རབ་ཏུ་བསྟན་པ་ཡ་ལ་བར་འདོར་བར་གནས་པ་དག་འབྱུང་སྟེ། དེ་དག་གིས་ཀྱང་སྟོན་པ་ལ་བསྙེན་བཀུར་བྱས་པར་མི་འགྱུར་ལ། ངའི་དམ་པའི་ཆོས་ཀྱང་ཡོངས་སུ་གཟུང་བར་མི་འགྱུར་ཏེ། ཆོས་དཀོན་མཆོག་གི་མཛོད་བླ་ན་མེད་པ་དེ་ལྟར་མ་བཤད་པ་དང ། ཀློག་ཏུ་མ་བཅུག་པས་ནུབ་པར་འགྱུར་རོ། །གསོལ་པ། བཅོམ་ལྡན་འདས། །དེ་ལྟ་ལགས་སོ། །བདེ་བར་གཤེགས་པ། དེ་ལྟ་ལགས་སོ། །ཀུན་དགའ་བོ། །ཅི་ནས་འདིར་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་ཞིང ། །དོན་འདི་རྒྱ་ཆེར་ཡོངས་སུ་རྫོགས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ། འདི་ལྟ་སྟེ། །
186a
༄#། །དཔེར་ན། མི་ལ་ལ་མཚན་མོ་མུན་པ་རབ་ཏུ་གནག་པ་ན་རྩཝའི་སྒྲོན་མ་ཐོགས་ནས་བདག་གི་ཁྱིམ་དུ་སོང་ཞིང ། དེ་ནའང་སྐྱེ་བོ་ཕལ་པོ་ཆེ་མུན་གནག་དེ་ལས་ཐར་པར་འདོད་པ་རྣམས་ཚོགས་པར་འགྱུར་ལ། མི་དེ་རྩཝའི་སྒྲོན་མ་དེས་མུན་པ་མུན་གནག་ལས་ཐར་ནས། བདག་གི་ཁྱིམ་དུ་ཞུགས་ཏེ། སྒྲོན་མ་དེ་བསད་ནས་སུ་ལའང་མི་སྟེར་ན།་ཀུན་དགའ་བོ། དེ་ཇི་སྙམ་དུ་སེམས། གང་སྒྲོན་མ་ཡོད་བཞིན་དུ་སྐྱེ་བོ་མང་པོ་མུན་ནག་དེ་ལས་ཐར་བར་འདོད་པ་དག་འཁོད་པ་གང་ལའང་རྩཝའི་སྒྲོན་མ་མི་སྟེར་ན། ཀུན་དགའ་བོ། སྐྱེས་བུ་དེ་དེ་ལྟར་བྱེད་ན་ལེགས་པར་བྱ་བ་བྱེད་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བདེ་བར་གཤེགས་པ། མ་ལགས་སོ། །བཀའ་སྩལ་པ།་ཀུན་དགའ་བོ། དེ་བཞིན་དུ་དགེ་སློང་དགྲ་བཅོམ་པ་ཟག་པ་ཟད་པ་གང་འདུས་མ་བྱས་ཀྱི་ཆོས་མངོན་སུམ་དུ་བྱས་ནས་བསྐལ་པ་གྲངས་མེད་པ་བྱེ་བར་བསྒྲུབས་པ་ཆོས་དཀོན་མཆོག་གི་མཛོད་འདི་མི་འཆད་\?\་རབ་ཏུ་མི་སྟོན་གཞན་དག་ལ་རྒྱས་པར་མི་བྱེད་ན། ཀུན་དགའ་བོ། ངས་སྟོན་པ་ལ་བསྙེན་བཀུར་བྱས་པ་མ་ཡིན་ལ། ངའི་དམ་པའི་ཆོས་ཡོངས་སུ་བཟུང་བ་མ་ཡིན་ནོ། །ཀུན་དགའ་བོ། དེ་བས་ན་བསྐལ་པ་གྲངས་མེད་པ་བྱེ་བར་བསྒྲུབས་པ་ཆོས་དཀོན་མཆོག་གི་མཛོད་འདི་ཁྱོད་ལ་གཏད་ཀྱི། ཅི་ནས་
186b
ཀྱང་རྒྱུན་མི་འཆད་པ་དང ། དགེ་བའི་ལམ་འདི་རྒྱུན་དུ་འབྱུང་བར་གཞན་དག་ལ་རྒྱ་ཆེར་རབ་ཏུ་སྟོན་ཅིག་།སྐྱེས་བུ་ཐ་མ་པར་མ་གྱུར་ཅིག། །།བམ་པོ་དྲུག་པ་སྟེ་ཐ་མ། ཀུན་དགའ་བོ། དགེ་སློང་ངམ། དགེ་སློང་མའམ། དགེ་བསྙེན་ནམ་།དགེ་བསྙེན་མ་གང་ལ་ལ་ཞིག་ཆོས་འདི་དག་ལ་བདག་ཀྱང་སྒྲུབ་ལ། གཞན་ལའང་འཆད་ཅིང་རབ་ཏུ་སྟོན་ན། ཀུན་དགའ་བོ། དེ་ལ་ངས་བསྐལ་པ་གྲངས་མེད་པ་བྱེ་བར་བསྒྲུབས་པའི་ཆོས་དཀོན་མཆོག་གི་མཛོད་འདི་ལས་ཆ་ཤས་སྦྱིན་ཞིང་སྐལ་པ་བཞག་གོ། ཀུན་དགའ་བོ། དེ་བས་ན་བསྐལ་པ་གྲངས་མེད་པ་བྱེ་བར་བསྒྲུབས་པའི་བྱང་ཆུབ་འདི་གང་མ་འོངས་པའི་སེམས་ཅན་དེ་རྣམས་ཀྱི་དོན་དུ་ཁྱོད་ལ་ལན་གཉིས་སུའང་གཏད་གྱི། སེམས་ཅན་དེ་དག་ཆོས་དཀོན་མཆོག་གི་མཛོད་དེ་ལྟ་བུ་མ་ཐོས་པས་ཡོངས་སུ་ཉམས་པར་གྱུར་ཏ་རེ། ཀུན་དགའ་བོ། ཆོས་དཀོན་མཆོག་གི་མཛོད་འདི་ལྟ་བུ་མ་ཐོས་པ་ལས་སེམས་ཅན་མང་པོ་དག་ཡོངས་སུ་ཉམས་པར་འགྱུར་རོ། །ཀུན་དགའ་བོ། ངས་དོན་འདིའི་དབང་ལ་བརྟེན་ནས་བསྐལ་པ་གྲངས་མེད་པ་བྱེ་བར་བསྒྲུབས་པའི་སངས་རྒྱས་ཀྱི་བྱང་ཆུབ་འདི་ཁྱོད་ལ་གཏད་ཀྱི། སེམས་ཅན་དེ་དག་ཆོས་དཀོན་མཆོག་གི་མཛོད་འདི་ལྟ་བུ་ལས་ཡོངས་སུ་མ་ཉམས་པར་གྱིས་ཤིག་།ཀུན་དགའ་བོ། འདི་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་
187a
༄#། །དོན་ཤེས་པར་འགྱུར་ཏེ། དེའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ། འདི་ལྟ་སྟེ། དཔེར་ན། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་པའི་བུ་གཅིག་པ་ཞིག་ཡོད་པ་བྱེས་སུ་སོང་སྟེ། དེ་བྱེས་སུ་སོང་བའི་འོག་ཏུ་རྒྱལ་པོ་རྒྱལ་རིགས་དེ་ན་བར་གྱུར་ལ་དེ་ན་བར་གྱུར་པ་དང ། རིན་པོ་ཆེའི་མཛོད་མང་པོ་རིན་པོ་ཆེ་ལ་མཁས་པ་གཏམས་པ་འཆར་བ་རྣམས་ཀྱི་ལག་ཏུ་གཏད་དེ། ཁྱིམ་བདག་རྣམས། ངའི་བུ་བྱེས་སུ་སོང་བ་ནམ་དེ་བྱེས་ནས་སླར་ལོག་པར་གྱུར་ལ་རྒྱལ་པོར་ཡང་བཅུག་པར་གྱུར་པ་དེ་ན་ཁྱེད་ཀྱིས་རིན་པོ་ཆེའི་མཛོད་མང་པོ་འདི་ཁྱོད་ཀྱི་ཕ་འཆི་བའི་དུས་བྱེད་པ་ན་བཞག་པ་ཡིན་ནོ་ཞེས་བྱོས་ལ། རིན་པོ་ཆེའི་མཛོད་མང་པོ་འདི་དེ་ལ་བྱིན་ཅིག་ཅེས་དེ་སྐད་ཀྱང་སྨྲས་ནས་དེ་ལྟར་རྒྱལ་པོ་དེས་ཤིན་ཏུ་ལེགས་པར་གཏམས་ཏེ་འཆི་བའི་དུས་བྱས་ལ། དེ་འཆི་བའི་དུས་བྱས་པའི་འོག་ཏུ་རྒྱལ་པོའི་བུ་དེ་བྱེས་ནས་སླར་ལོག་སྟེ་རྒྱལ་པོར་ཡང་གཅུག་ལ་གསེར་གྱིས་བསྒྱུར་བ་དང ། ཁྱིམ་བདག་དེ་དག་ལ་སོ་སོར་བཞག་པ་རྒྱལ་པོའི་བུ་རྒྱལ་སྲིད་ཀྱི་དབང་ཕྱུག་ཐོབ་པ་རྒྱལ་སྲིད་ལ་གནས་པ་དེ་ལ་རིན་པོ་ཆེའི་མཛོད་མ་བྱིན་ན། ཀུན་དགའ་བོ། དེ་ཇི་སྙམ་དུ་སེམས། གསེར་གྱིས་བསྒྱུར་བའམ། ཁྱིམ་བདག་དེ་དག་རྒྱལ་པོ་དེ་ལ་ཉེས་པར་བྱེད་པ་ཡིན་ནམ། གསོལ་པ།
187b
བཅོམ་ལྡན་འདས། དེ་ལྟ་ལགས་སོ། །བདེ་བར་གཤེགས་པ། དེ་ལྟ་ལགས་སོ། །བཀའ་སྩལ་པ། ཀུན་དགའ་བོ། དོན་ཤེས་པར་བྱ་བའི་ཕྱིར་ངས་ཁྱོད་ལ་དཔེ་བསྟན་པ་དེ་ལ་དོན་དུ་ལྟ་བ་གང་ཞེ་ན། ཀུན་དགའ་བོ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཞེས་བྱ་བ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་རྒྱལ་པོའི་ཆེན་པོའི་ཚིག་བླ་དྭགས་སོ། །ཀུན་དགའ་བོ། བུ་གཅིག་པ་ཞེས་བྱ་བ་ནི་མ་འོངས་པའི་རིགས་ཀྱི་བུ་དང ། རིགས་ཀྱི་བུ་མོ་དད་པ་རྣམས་ཀྱི་ཚིག་བླ་དྭགས་སོ། ། ཀུན་དགའ་བོ། བྱས་སུ་སོང་ཞེས་བྱ་བ་དེ་ནི་འགྲོ་བ་ལྔ་རྣམས་ཀྱི་ཚིག་བླ་དྭགས་སོ། །ཀུན་དགའ་བོ། ནད་པ་ཞེས་བྱ་བ་དེ་ནི་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བའི་ཚིག་བླ་དྭགས་སོ། །ཀུན་དགའ་བོ། རིན་པོ་ཆེའི་མཛོད་མང་པོ་ཞེས་བྱ་བ་དེ་ནི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་ཆོས་རྣམས་ཀྱི་ཚིག་བླ་དྭགས་སོ། །ཀུན་དགའ་བོ།་ཁྱིམ་བདག་ཅེས་བྱ་བ་དེ་ནི་དགྲ་བཅོམ་པ་རྣམས་ཀྱི་ཚིག་བླ་དྭགས་སོ། །ཀུན་དགའ་བོ། དཔེར་ན། རྒྱལ་པོ་དེ་འཆི་བའི་དུས་བྱེད་པ་ན་ནོར་འཇོག་པ་དེ་བཞིན་དུ། ཀུན་དགའ་བོ། ངའི་ཆོས་དཀོན་མཆོག་གི་མཛོད་བསྐལ་པ་གྲངས་མེད་པ་བྱེ་བར་བསྒྲུབས་པ་མ་འོངས་པའི་རིགས་ཀྱི་བུ་དང ། རིགས་ཀྱི་བུ་མོ་དེ་དག་གི་དོན་དུ་ཁྱོད་ལ་གཏད་དོ།།
188a
༄#། །དེ་ཅིའི་ཕྱིར་ཞེ་ན། ཀུན་དགའ་བོ། སེམས་ཅན་གང་དག་ངས་ཡོངས་སུ་སྨིན་པར་བྱས་པ་དེ་དག་མི་དགེ་བའི་ལས་ཀྱི་ལམ་འགའ་ཞིག་གིས་སེམས་ཅན་དམྱལ་བ་དང ། དུད་འགྲོ་དང ། གཤིན་རྗེའི་འཇིག་རྟེན་དུ་སྐྱེས་ཏེ། དེ་དག་ང་འདས་པའི་འོག་ཏུ་དེ་ནས་ཤི་འཕོས་ནས་མིར་འགྱུར་བ་ཐོབ་སྟེ། དབང་པོ་རྣམས་རྒྱས་པའི་རྒྱུ་དང་ཡོངས་སུ་སྨིན་པའི་རྒྱུས་ངའི་བསྟན་པ་འདི་ལ་དད་པར་འགྱུར་བ་དག་ཡོད་དེ། དེ་ལ་ཁ་ཅིག་ནི་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འགྱུར་རོ། །ཁ་ཅིག་ནི་ཁྱིམ་ན་གནས་པར་འགྱུར་རོ། །དེ་ལ་ཁ་ཅིག་ནི་རྒྱུན་དུ་ཞུགས་པའི་འབྲས་བུ་ཐོབ་པར་འགྱུར་རོ། །ཁ་ཅིག་ནི་ལན་གཅིག་ཕྱིར་འོང་བའི་འབྲས་བུ་དང ། ཁ་ཅིག་ནི་ཕྱིར་མི་འོང་བའི་འབྲས་བུ་དང ། ཁ་ཅིག་ནི་དགྲ་བཅོམ་པ་མངོན་སུམ་དུ་བྱེད་པར་འགྱུར་རོ། །ཁ་ཅིག་ནི་སློབ་པའི་ས་ནས་འཆི་བའི་དུས་བྱེད་པར་འགྱུར་རོ། །ཁ་ཅིག་ནི་སངས་རྒྱས་ཀྱི་སར་ལྷག་པའི་བསམ་པས་སེམས་བསྐྱེད་པར་འགྱུར་རོ། །ཁ་ཅིག་ནི་ལྷ་དང་མིར་སྐྱེ་བར་བྱ་བའི་ཕྱིར་དགེ་བའི་རྩ་བ་བསྐྱེད་པར་འགྱུར་ཏེ། དེ་ལྟར་རྙེད་པ་དེ་དང་དེ་དག་དང་ལྡན་པར་འགྱུར་རོ། །ཁ་ཅིག་ནི་སེམས་དང་བ་གཅིག་ཐོབ་པར་འགྱུར་ཏེ། འཇིག་རྟེན་གྱི་ཡབ་དེས་བདག་ཅག་ལ་ལེགས་པར་གཏད་དོ་སྙམ་ནས་དེ་དག་རྒྱ་ཆེར་རབ་ཏུ་དད་པར་
188b
འགྱུར་ཞིང་དང་བ་སྐྱེད་པར་བྱེད་དོ། །ཀུན་དགའ་བོ། འདི་ལྟར་དེ་དག་གིས་ཆོས་དཀོན་མཆོག་འདི་མཉན་པར་བྱ་བའི་ཕྱིར་ངས་ཆོས་དཀོན་མཆོག་གི་མཛོད་འདི་ཁྱོད་ལ་གཏད་དོ། །ཀུན་དགའ་བོ་ཁྱོད་ཀྱིས་གལ་ཏེ་ངའི་ཆོས་དཀོན་མཆོག་གི་མཛོད་འདི་རིགས་ཀྱི་བུ་དང ། རིགས་ཀྱི་བུ་མོ་དད་པ་དེ་དག་ཉན་དུ་མ་བཙུད་ན། དེ་ལྟ་ན་ནི་ཀུན་དགའ་བོ་ཁྱོད་དེ་བཞིན་གཤེགས་པ་ལ་ཉེས་པ་བྱེད་པ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ། འདི་ལྟར་རིགས་ཀྱི་བུ་དང་རིགས་ཀྱི་བུ་མོ་དེ་དག་ཆོས་དཀོན་མཆོག་འདི་ལྟ་བུ་ཐོས་ནས་ཁ་ཅིག་གིས་ནི་ཁྱད་པར་ཐོབ་པར་འགྱུར། ཁ་ཅིག་གིས་ནི་རབ་ཏུ་དགའ་ཞིང་མགུ་བར་འགྱུར། ཁ་ཅིག་ནི་ཆོས་ཀྱི་ཤུགས་ཀྱིས་མཆི་མ་འབྱུང་ཞིང་སྤུ་ཟིང་ཞེས་བྱེད་པར་འགྱུར་རོ། །ཀུན་དགའ་བོ། གང་དག་ཆོས་ཀྱི་རྣམ་གྲངས་འདི་ལྟ་བུ་ཐོས་ནས་ངའི་ཡོན་ཏན་རྗེས་སུ་དྲན་ཞིང་ཆོས་ཀྱི་ཤུགས་ཀྱིས་མཆི་མ་འབྱུང་ལ་སྤུ་ཟིང་ཞེས་བྱེད་པར་འགྱུར་ན། ཀུན་དགའ་བོ། དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་ནི་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བར་ང་སྨྲའོ། །ཀུན་དགའ་བོ། དགེ་སློང་གང་དག་ཆོས་ཀྱི་རྣམ་གྲངས་འདི་ལྟ་བུ་འཛིན་ལ་རིགས་ཀྱི་བུ་དང་རིགས་ཀྱི་བུ་མོ་དད་པ་ཆོས་འདོད་པ་རྣམས་འོངས་ཤིང་ལྷགས་པ་དག་ལ་ཆོས་མི་འཆད་ཅིང་རབ་ཏུ་མི་སྟོན་ན་དེ་དག་དེ་བཞིན་གཤེགས་པ་ལ་ཉེས་པ་
189a
༄#། །བྱེད་པ་ཡིན་ནོ། །ཀུན་དགའ་བོ། གང་དག་རིགས་ཀྱི་བུ་དང་རིགས་ཀྱི་བུ་མོ་ཆོས་དོན་དུ་གཉེར་ཅིང་ཉན་པར་འདོད་དེ། ཉན་པ་རྣམས་ཆོས་ཉན་པ་ལས་ཉམས་པར་བྱེད་ན། དེ་དག་དེ་ལྟར་སྣོད་དུ་གྱུར་པ་རྣམས་ལ་མི་འཆད་པས་བདག་གི་རྒྱུད་ལ་དགེ་བའི་རྩ་བ་ཉམས་པ་དང ། གཞན་གྱི་རྒྱུད་ལ་དགེ་བའི་རྩ་བ་ཡོངས་སུ་ཉམས་པར་བྱེད་པ་ལ་ཞུགས་པ་ཡིན་ནོ། །དེ་ཅིའི་ཕྱིར་ཞེ་ན། དེ་དག་ནི་གང་ལ་ཆོས་བཤད་པར་བྱ་བ་དང ། གང་ལ་མི་བཤད་པ་མི་ཤེས་སོ། །ཀུན་དགའ་བོ། དེ་བས་ན་དོན་དེ་རྒྱ་ཆེར་ཤེས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ། འདི་ལྟ་སྟེ། དཔེར་ན་།ཚོང་པ་བྱིས་པའི་རང་བཞིན་ཅན་ལ་ལ་ཞིག་རིན་པོ་ཆེ་མང་པོ་ཁྱེར་ཏེ་འོང་བ་དེ་བྱེས་ནས་འོངས་ཏེ། འབྲོག་དགོན་པ་ཆེན་པོ་ཆོམ་རྐུན་ཡོད་པ་དེར་ཟོང་དེ་དག་བཀྲམ་སྟེ་རྐུན་པོའི་ཚོགས་རྣམས་བོས་ནས། ཀྱེ་མི་དག་།ཟོང་འདི་དག་ཇི་ཙམ་དུ་བཟང ། ཇི་ཙམ་དུ་མཛེས་པ་ལྟོས་ཏེ། མི་ཁྱོད་ངའི་ཟོང་འདི་དག་ཉོས་ཤིག་ཅེས་ཟེར་ལ། ཀུན་དགའ་བོ། འབྲོག་དགོན་པ་དེར་ཆོམ་རྐུན་དེ་དག་གིས་ཚོང་པ་བྱིས་པའི་རང་བཞིན་ཅན་དེ་དབྱུག་པས་སྣད་པར་བརྡེགས་ནས་རིན་པོ་ཆེ་ཐམས་ཅད་ཕྲོགས་ན། ཀུན་དགའ་བོ། དེ་ཇི་སྙམ་དུ་སེམས། འབྲོག་དགོན་པ་དེར་ཟོང་བཀྲམ་ནས་ཆོམ་རྐུན་འབོད་
189b
པའི་ཚོང་པ་དེ་ཆོས་དང་རྗེས་སུ་མཐུན་པ་ཡིན་ནམ། དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས། ཚོང་པ་དེ་ཆོམ་རྐུན་མཆིས་པའི་འབྲོག་དགོན་པར་ཟོང་འགྲེམས་པའང་ཆོས་དང་མཐུན་པ་མ་ལགས་ན་ཟོང་རྣམས་བཀྲམ་ནས་ཆོམ་རྐུན་འབོད་པ་ལྟ་སྨོས་ཀྱང་ཅི་འཚལ། བཅོམ་ལྡན་འདས། འདི་ལྟར་བགྱིད་ན་ནི་ཆོས་དང་རྗེས་སུ་མཐུན་པ་ལགས་ཏེ། གལ་ཏེ་ཚོང་པ་དེ་ཟོང་དེ་དག་ལེགས་པར་སྦས་ནས་མདའ་གཞུ་ཐོགས་ཤིང་གོ་ཆ་བཟང་པོ་བགོས་ཏེ། འབྲོག་དགོན་པ་དེ་ནས་ལེགས་པར་འབྱུང་ན་དེ་ཆོས་དང་རྗེས་སུ་མཐུན་པ་ལགས་སོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། ཅི་སྟེ་ཚོང་པ་བྱིས་པའི་རང་བཞིན་ཅན་དེ་ནོར་གྱི་ཕུང་པོ་མང་པོ་དང་རིན་པོ་ཆེ་མང་པོ་ཁྱེར་ཏེ་བྱེས་ནས་ལར་ལོག་སྟེ། གྲོང་དང་གྲོང་ཁྱེར་དང ། གྲོང་འདབ་དང ། ཡུལ་འཁོར་དང ། ཕོ་བྲང་འཁོར་དུ་འོངས་ཏེ། ཟོང་དེ་བཀྲམ་ལ་དེར་ཟོང་བཀྲམ་པའི་རིན་པོ་ཆེ་རིན་ཐང་ཆེན་པོ་དེ་དག་ཉོ་བའི་སྐྱེས་བུ་མཁས་པ་ཤེས་རབ་དང་ལྡན་པ་ཟོང་འདོད་པ་རྣམས་ལྷགས་པ་དང ། དེ་ནས་ཚོང་པ་དེ་ཟོང་འདོད་པའི་སྐྱེས་བུ་ལྷགས་པ་དེ་དག་ལ་མདའ་གཞུ་ཐོགས་ཏེ་འཐབ་མོ་རྒོལ་
190a
༄#། །ན།་ཀུན་དགའ་བོ། དེ་ཇི་སྙམ་དུ་སེམས། སྐྱེས་བུ་དེ་དེ་ལྟར་བྱེད་ན་ཆོས་དང་རྗེས་སུ་མཐུན་པ་ཡིན་ནམ། གསོལ་པ། བཅོམ་ལྡན་འདས། མ་ལགས་སོ། །བདེ་བར་གཤེགས་པ། མ་ལགས་སོ། བཅོམ་ལྡན་འདས། ཚོང་པ་དེས་འདི་ལྟར་བགྱི་ཞིང་ཟོང་འཚལ་བའི་སྐྱེས་བུ་དེ་དག་ལ་སྐྱེས་བུ་ཁྱེད་ཚུར་ཤོག་།ཟོང་གི་བྱེ་བྲག་བཟང་པོ་མང་པོ་འདི་དག་ལ་ཇི་ཙམ་དུ་བཟང་བ་དང ། ཇི་ཙམ་དུ་མཛེས་པ་ལྟོས་ལ་ཉོས་ཤིག་དང ། རིན་ཆུང་ངུར་སྦྱིན་ནོ་ཞེས་དེ་སྐད་སྨྲ་ཞིང ། བཅོམ་ལྡན་འདས། ཚོང་པ་དེས་དེ་ལྟར་བགྱི་བའི་རིགས་ཏེ། དེ་ལྟར་བགྱིས་ན་དེ་ཆོས་དང་རྗེས་སུ་མཐུན་གྱི། ཚོང་དུས་སུ་ཟོང་བཀྲམ་ནས་གོ་བགོས་ཏེ་མཆིས་པ་ནི་མི་རིགས་སོ།། བཀའ་སྩལ་པ། ཀུན་དགའ་བོ། དེ་བཞིན་དུ་འདི་ལ་དགེ་སློང་ཁ་ཅིག་ཆོས་དཀོན་མཆོག་གི་མཛོད་མང་པོ་འདི་ལྟ་སྟེ། མདོའི་སྡེ་དང ། དབྱངས་ཀྱིས་བསྙད་པའི་སྡེ་དང ། ལུང་དུ་བསྟན་པའི་སྡེ་དང ། ཚིགས་སུ་བཅད་པའི་སྡེ་དང ། ཆེད་དུ་བརྗོད་པའི་སྡེ་དང ། གླེང་གཞིའི་སྡེ་དང ། རྟོགས་པ་བརྗོད་པའི་སྡེ་དང ། དེ་ལྟ་བུ་བྱུང་བའི་སྡེ་དང ། སྐྱེས་པ་རབས་ཀྱི་སྡེ་དང ། ཤིན་ཏུ་རྒྱས་པའི་སྡེ་དང ། རྨད་དུ་བྱུང་བའི་ཆོས་ཀྱི་སྡེ་དང ། གཏན་ལ་བབ་པར་བསྟན་པའི་སྡེ་རྣམས་ཀུན་ཆུབ་པར་བྱས་ནས་གང་
190b
ན་ཆོས་དཀོན་མཆོག་གི་མཛོད་འདིའི་སྣོད་དུ་གྱུར་ཅིང་ལེན་པར་བྱེད་པ་གང་དག་གིས་ཐོས་ནས་ཁྱད་པར་ཐོབ་པར་འགྱུར་ཞིང་དགའ་བ་དང ། མཆོག་ཏུ་དགའ་བ་ཆེན་པོ་རྙེད་པར་འགྱུར་བ་དང ། དེའི་དགེ་བའི་རྩ་བས་མྱ་ངན་ལས་འདའ་བར་འགྱུར་བ་ཡོད་པ་དེར་དེ་དག་མི་འཆད་ཀྱི། དེ་དག་གང་ན་ཆོས་དཀོན་མཆོག་འདིའི་སྣོད་དུ་མ་གྱུར་ཅིང་ཐོས་ནས་དང་བར་མི་འགྱུར། དད་པར་མི་འགྱུར། མོས་པར་མི་འགྱུར་གྱི། སྤོང་བར་འགྱུར་བ་དང ། དེའི་མི་དགེ་བའི་རྩ་བ་ངན་སོང་གསུམ་དུ་འགྱུར་བ་ཡོད་པ་དེར་འཆད་དེ། ཀུན་དགའ་བོ།་འདི་ལྟ་སྟེ། དཔེར་ན། ཚོང་པ་བྱིས་པའི་རང་བཞིན་ཅན་དེ་གང་དུ་ཟོང་དེ་དཀྲམ་པའི་རིགས་པ་དེར་མི་འགྲེམས་པར་གང་དུ་དགྲམ་པར་མི་བྱ་བ་དེར་འགྲེམས་ཏེ། གང་དག་ལ་སྦྱིན་པའི་རིགས་པ་དེ་དག་ལ་ནི་མི་སྟེར། གང་དག་ལ་སྦྱིན་པའི་མི་རིགས་པ་དེ་དག་ལ་སྟེར་བ་དེ་བཞིན་དུ། ཀུན་དགའ་བོ། གང་དག་རིགས་ཀྱི་བུ་དང་རིགས་ཀྱི་བུ་མོ་མངོན་པར་དད་པ། ཆོས་དང་ལྡན་པ། ཆོས་འདོད་པ། ཉན་འདོད་པ། སྒྲུབ་འདོད་པ། སྣོད་དུ་གྱུར་པ་ལྷགས་པ་རྣམས་ལ་ཆོས་མི་འཆད་པར་དེ་གང་ལ་བཤད་པའི་མི་རིགས་པ་དེ་དག་ལ་འཆད་ཅིང ། གང་ལ་བཤད་པའི་རིགས་པ་དེ་དག་ལ་མི་འཆད་པ་དག་ཀྱང་ངས་དེ་ལྟ་བུ་ཡིན་པར་མཐོང་ངོ ། །ཀུན་དགའ་བོ། དེ་ལྟ་བས་ན་
191a
༄#། །གང་དག་སྣོད་དུ་གྱུར་པ། དད་པ། ཉན་འདོད་པ། མྱ་ངན་ལས་འདའ་བ་དོན་དུ་གཉེར་བ་དེ་དག་ལ་ཆོས་བཤད་པར་བྱའོ། །གང་དག་སྣོད་དུ་མ་གྱུར་པ།་མ་དད་པ། གླགས་ཚོལ་བ། ཚུལ་ཁྲིམས་འཆལ་བ། སྡིག་པའི་ཆོས་ཅན། འཕྱས་ཚོལ་བའི་བསམ་པ་ཅན། ཆོས་སྤོང་བ། དམ་པའི་ཆོས་དང་འགལ་བར་གནས་པ་གཏམ་དུ་བྱེད་ཀྱི། རྗེས་སུ་མཐུན་པའི་ཆོས་མི་འཆད་པ་དེ་དག་ལ་མི་བཤད་དོ་ཞེས་དེ་ལྟར་བསླབ་པར་བྱའོ། །དེ་ཅིའི་ཕྱིར་ཞེ་ན། མི་བླུན་པོ་དེ་དག་གིས་ཐོས་ནས་རྒྱ་ཆེར་མ་རུང་བར་གྱུར་ཏ་རེ་ཞེས། ཀུན་དགའ་བོ་ཁྱོད་དེ་ལྟར་བསླབ་པར་བྱའོ། །ཀུན་དགའ་བོ་ཁྱོད་སྐྱོ་བར་མ་བྱེད་ཅིག་།ཀུན་དགའ་བོ། དགེ་སློང་དོན་དུ་གཉེར་བ་རྣམས་ལ་ཆོས་གུས་པར་འཆད་ཅིང ། དེའང་གུས་པར་ཉན་ན། ཀུན་དགའ་བོ། དེ་གཉིས་ཀའང་བསོད་ནམས་རྒྱ་ཆེར་བསྐྱེད་ཅིང ། བསོད་ནམས་ཚད་མེད། གྲངས་མེད་པར་བསྐྱེད་དོ། །ཀུན་དགའ་བོ། དེ་ཇི་སྙམ་དུ་སེམས། སའི་ཁམས་དང ། སེམས་ཅན་གྱི་ཁམས་གང་མང ། གསོལ་པ། བཅོམ་ལྡན་འདས། ཇི་ལྟར་བཅོམ་ལྡན་འདས་ཀྱིས་བཤད་པའི་དོན་བདག་གིས་འཚལ་བ་ལྟར་ན། བཅོམ་ལྡན་འདས། སེམས་ཅན་གྱི་ཁམས་ཆེས་མང་ངོ ། །བཅོམ་ལྡན་འདས་ཀྱིས་བཀའ་སྩལ་བ། ཀུན་དགའ་བོ་ཁྱོད་ཇི་སྐད་
191b
སྨྲ་བ་དེ་བཞིན་ཏེ། ཀུན་དགའ་བོ། སེམས་ཅན་གྱི་ཁམས་ཆེས་མང་གི་སའི་ཁམས་ནི་མ་ཡིན་ནོ། །ཀུན་དགའ་བོ། སེམས་ཅན་གྱི་ཁམས་ཆེས་མང་གི། ཆུའི་ཁམས་ནི་མ་ཡིན་ནོ། ། མེའི་ཁམས་ནི་མ་ཡིན་ནོ། །ཀུན་དགའ་བོ། ཡོངས་སུ་བརྟག་པ་བཟུང་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་དུ་མངོན་པས་མངོན་པ་ཀུན་ཏུ་སྣང་བར་གྱུར་པའམ། ཀུན་ཏུ་སྣང་བར་མ་གྱུར་པ་གང་དག་ཡོད་པ་དེ་དག་ཐམས་ཅད་སྐད་ཅིག་གཅིག་དང ། ཐང་ཅིག་གཅིག་དང ། ཡུད་ཙམ་གཅིག་ལ་མིའི་ལུས་ཐོབ་པར་གྱུར་ཏེ། དེ་དག་མིའི་ལུས་ཐོབ་ནས་སྐད་ཅིག་གཅིག་དང ། ཐང་ཅིག་གཅིག་དང ། ཡུད་ཙམ་གཅིག་ལ་རང་བྱང་ཆུབ་ཐོབ་པར་གྱུར་པ་དང ། ཀུན་དགའ་བོ། །ཡོངས་སུ་བརྟག་པ་བཟུང་སྟེ།་འཇིག་རྟེན་གྱི་ཁམས་མཐའ་ཡས་དཔག་ཏུ་མེད་པ་དག་ན་སའི་ཁམས་ཇི་སྙེད་ཡོད་པ་སའི་ཕུང་པོ་གང་གི་མཐའ་མི་མངོན་པའི་སའི་ཕུང་པོ་དེ་ལ་རྡུལ་ཕྲ་རབ་ཀྱི་རྡུལ་ཇི་སྙེད་ཡོད་པའི་སའི་རྡུལ་དེ་ཐམས་ཅད་སྙེད་ཀྱི་མིར་གྱུར་ལ། ཀུན་དགའ་བོ། མིར་གྱུར་པ་དེ་དག་ཀྱང་སྐད་ཅིག་ཐང་ཅིག་ཡུད་ཙམ་གཅིག་ལ་སྔ་ཕྱི་མེད་པར་རང་བྱང་ཆུབ་ཐོབ་པར་གྱུར་པ་དང ། ཀུན་དགའ་བོ། ཡོངས་སུ་བརྟག་པ་བཟུང་སྟེ། འཇིག་རྟེན་གྱི་ཁམས་མཐའ་ཡས་དཔག་ཏུ་མེད་པ་ན་གང་རིའི་རྒྱལ་པོ་རི་རབ་རྣམས་དང ། རིའི་རྒྱལ་
192a
༄#། །པོ་ཁོར་ཡུག་དང ། ཁོར་ཡུག་ཆེན་པོ་རྣམས་དང ། གངས་རི་དང ། སྤོས་ཀྱི་ངད་ལྡང་དང ། དེ་ལས་གཞན་པ་རི་ནག་པོ་རྣམས་དང ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་རྩཝ་དང ། ཤིང་དང ། ལོ་མ་དང ། ཤིང་ལྗོན་པ་དང ། ནགས་དང ། ཤིང་གེལ་པ་དང ། སྨན་དང་ནགས་ཚལ་ཇི་སྙེད་ཡོད་པ་དེ་དག་ལ་རྡུལ་ཕྲ་རབ་ཀྱི་རྡུལ་ཇི་སྙེད་ཡོད་པ། ཡོད་པའི་དངོས་པོའམ། བརྟགས་པར་བལྟ་བར་བྱ་བར་སྣང་བ་དེ་དག་ཐམས་ཅད་ཀྱང་མིར་གྱུར་ལ། ཀུན་དགའ་བོ། མིར་གྱུར་པ་དེ་དག་ཀྱང་སྐད་ཅིག་དང་ཐང་ཅིག་དང་ཡུད་ཙམ་གཅིག་ལ་སྔ་ཕྱི་མེད་པར་རང་བྱང་ཆུབ་ཐོབ་པར་གྱུར་ཏེ། ཀུན་དགའ་བོ། རང་སངས་རྒྱས་དེ་དག་ཀྱང་ཇི་སྲིད་དུ་འཁོར་བའི་སྔོན་གྱི་མཐའ་མི་མངོན་པ་དེ་སྲིད་དུ་ཡུན་རིང་དུ་གནས་པར་གྱུར་པ་དེ་དག་ལ་སེམས་ཅན་གྱི་ཁམས་དེར་མ་གཏོགས་པའི་ཁྱིམ་བདག་གཅིག་ཅིག་བྱུང་བ་དེའང་ཇི་སྲིད་འཁོར་བའི་སྔོན་གྱི་མཐའ་མི་མངོན་པ་དེ་སྲིད་དུ་གནས་པར་གྱུར་ཏེ། དེ་ནས་ཁྱིམ་བདག་དེ་ཚེའི་ཚད་དེ་ལྟ་བུས་རང་སངས་རྒྱས་རྣམས་ལ་ན་བཟའ་དང ། བཤོས་དང ། གཟིམས་ཆ་དང ། ན་བའི་གསོས་སྨན་དང ། བདེ་བར་སྦྱར་བ་ཐམས་ཅད་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་པ་དང ། ཡོངས་སུ་
192b
མྱ་ངན་ལས་འདས་པ་རྣམས་ཀྱི་མཆོད་རྟེན་ཡང་རིན་པོ་ཆེ་སྣ་བདུན་ལས་བྱས་ནས་ལྷ་དང་མིའི་གདུགས་དང ། རྒྱལ་མཚན་དང ། བ་དན་རྣམས་དང ། མེ་ཏོག་དང ། ཕྲེང་བ་དང ། སྤོས་དང ། བྱུག་པ་དང ། ཕྱེ་མ་དང ། ན་བཟའ་དང ། གླུ་གར་དང ། སིལ་སྙན་རྣམས་ཀྱིས་ལྷ་དང་མི་རྣམས་མཆོད་པ་བྱེད། བསྟི་སྟང་བྱེད། བླ་མར་བྱེད། རིམ་གྲོར་བྱེད། རྗེད་པར་བྱེད། གསོལ་བར་བྱེད་ན། ཀུན་དགའ་བོ། དེ་ཇི་སྙམ་དུ་སེམས། གཞི་དེ་ལས་ཁྱིམ་བདག་དེ་བསོད་ནམས་མང་དུ་སྐྱེད་དམ། དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བཤད་པའི་དོན་ཇི་ལྟར་བདག་གིས་འཚལ་བ་ལྟར་ན་ཅང་ཤེས་གཅིག་ལ་བསྟི་སྟང་བགྱིས་པའང་བསོད་ནམས་མང་དུ་སྐྱེད་དེ། གྲངས་མ་མཆིས། བསམ་གྱིས་མི་ཁྱབ། མཚུངས་པ་མ་མཆིས་ན། རང་སངས་རྒྱས་ཀྱི་ཚོགས་འདི་ལྟ་བུ་འདི་ལ་བསྟི་སྟང་བགྱིས་པ་ལྟ་སྨོས་ཀྱང་ཅི་འཚལ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ལ་བསྒོའོ། ། ཁྱོད་ཀྱིས་ཁོང་དུ་ཆུད་པར་བྱའོ། །རང་སངས་རྒྱས་ཚུལ་ཁྲིམས་དང་ལྡན། ཏིང་ངེ་འཛིན་དང ། ཤེས་རབ་དང ། རྣམ་པར་གྲོལ་བ་དང ། རྣམ་པར་གྲོལ་བའི་ཡེ་ཤེས་མཐོང་
193a
༄#། །བའི་ཕུང་པོ་དང་ལྡན་པ་དེ་དག་ཐམས་ཅད་ཁྱིམ་བདག་དེའི་སྦྱིན་པ་སྦྱོང་བར་བྱེད་པ་བས། ཀུན་དགའ་བོ། གང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཅིག་འཇིག་རྟེན་དུ་བྱུང་སྟེ། བྱུང་ནས་ཀྱང་ཁྱིམ་བདག་དེས་ཕུལ་བའི་ན་བཟའ་དང ། བཤོས་དང ། གཟིམས་ཆ་དང ། ན་བའི་གསོས་སྨན་དང ། ཡོ་བྱད་རྣམས་ཡོངས་སུ་སྤྱད་དེ། ཡོངས་སུ་སྤྱད་ནས་ཀྱང་ཁྱིམ་བདག་དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་མཐོང་བ་མ་གཏོགས་པར་ཆོས་ཀྱང་མི་འཆད་ཀྱང ། ཀུན་དགའ་བོ། དེ་བཞིན་གཤེགས་པ་དེ་རང་བཞིན་གྱི་སྤྱོད་ལམ་སྟོན་པ་ཙམ་གྱིས་སྦྱིན་པ་རབ་ཏུ་མང་པོ་དེ་སྦྱོང་བར་མཛད་ཀྱི། ཇི་ལྟར་དེ་བཞིན་གཤེགས་པ་རང་བཞིན་གྱི་སྤྱོད་ལམ་སྟོན་པ་དེས་སྦྱིན་པ་སྤྱོད་པར་མཛད་པ་དེ་ལྟར་རང་སངས་རྒྱས་ཚུལ་ཁྲིམས་ཀྱི་ཕུང་པོ་དང་ལྡན། ཏིང་ངེ་འཛིན་གྱི་ཕུང་པོ་དང།་ཤེས་རབ་ཀྱི་ཕུང་པོ་དང ། རྣམ་པར་གྲོལ་བའི་ཕུང་པོ་དང ། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང་ལྡན་པ་ཐམས་ཅད་ཀྱིས་བསྐལ་བ་བྱེ་བ་ཁྲག་ཁྲིག་བརྒྱ་སྟོང་དུའང་སྦྱིན་པ་སྦྱོང་བར་མི་བྱེད་དོ། །དེ་ཅིའི་ཕྱིར་ཞེ་ན། ཀུན་དགའ་བོ། དེ་བཞིན་གཤེགས་པའི་སྤྱོད་ལམ་ཡང་ཡོན་ཏན་ཚད་མེད། གྲངས་མེད།
193b
བསམ་གྱིས་མི་ཁྱབ་པ་གང་གི་མཐའ་རྟོགས་པར་སླ་བ་མ་ཡིན་པ་དེ་སྙེད་དང་ལྡན་ན་སངས་རྒྱས་ཀྱི་ཡོན་ཏན་གཞན་རྣམས་ལྟ་ཅི་སྨོས། ཀུན་དགའ་བོ། རང་སངས་རྒྱས་རྣམས་ལ་ཡོན་ཕུལ་བའང་ཡོད། ཡོན་དེ་ཚད་མེད། དཔག་ཏུ་མེད་པར་འགྱུར་བའང་ཡོད། ཀུན་དགའ་བོ། ཚད་མེད་དཔག་ཏུ་མེད་ཅིང་དཔག་ཡས་པའི་ཁྱད་པར་ཡང་ཡོད། ཐ་བར་དུ་བྱ་བའང་ཡོད་དོ། །ཀུན་དགའ་བོ། ཡོན་དེ་ཡོད་དེ། དེ་མེད་པ་མ་ཡིན་ནོ། །ཀུན་དགའ་བོ། །ང་ལྟ་བུ་ལ་གནས། ང་ལྟ་བུ་ལ་བརྟེན་ཏེ་ཡོན་ཕུལ་ན་ཡོན་དེའི་དཔེ་བྱ་བར་ཡང་སླ་བ་མ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ། ཡོན་དེ་ཚད་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། དཔག་ཏུ་མེད་ཅིང་ཟད་མི་ཤེས་པའི་ཕྱིར་རོ། །ཀུན་དགའ་བོ། འདི་ལྟ་སྟེ། དཔེར་ན། མི་འགའ་ཞིག་ཁེའི་ཕྱིར་སོང་ལ་དེ་ནས་ཁེ་རྙེད་དེ་སླར་འོངས་པ་དེ་བཞིན་དུ། ཀུན་དགའ་བོ། རང་སངས་རྒྱས་ལ་ཡོན་ཕུལ་བའང་ངས་དེ་དང་འདྲ་བར་མཐོང་ངོ ། །ང་ལྟ་བུ་ལ་གནས་ཏེ་ང་ལྟ་བུ་ལ་ཡོན་ཕུལ་བ་ལ་བརྩམས་ནས། ཀུན་དགའ་བོ། དོན་དེ་ཉིད་རྒྱ་ཆེར་ཤེས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱ་སྟེ། འདི་ལྟར་འདི་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་རོ། །ཀུན་དགའ་བོ། འདི་ལྟ་སྟེ། དཔེར་ན། མི་ལ་ལ་ཞིག་
194a
༄#། །རི་མོ་འདྲི་བ་ལས་དེས་རི་མོ་དེ་མ་ལེགས་པར་བྲིས་ལ་མ་ལེགས་པར་བྲིས་ནས་ཅུང་ཟད་ཅུང་ཟད་ཙམ་ཕྱིས་ཀྱང ། ཀུན་དགའ་བོ། རི་མོ་དེ་ལ་སྡུག་པ་ཡོད་མོད་ཀྱི། དེ་བས་གཞན་ཆེས་སྡུག་པ་དག་ཡོད་དོ། །ཀུན་དགའ་བོ། དེ་བཞིན་དུ་རང་སངས་རྒྱས་ཐམས་ཅད་པས་ང་ལྟ་བུ་དག་ལ་བརྩམས་པའི་ཡོན་རྒྱས་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ། ཡེ་ཤེས་གང་གིས་རང་སངས་རྒྱས་ཞེས་བྱ་བའི་གྲངས་སུ་འགྲོ་བའི་རང་སངས་རྒྱས་ཀྱི་ཡེ་ཤེས་ནི་འདི་ལས་བྱུང་ངོ ། །དེ་བཞིན་གཤེགས་པ་ནི་ཆོས་ཐམས་ཅད་མཁྱེན་པ་ལ་ཁྱད་པར་དུ་མཁས་པའོ། །ཀུན་དགའ་བོ། དེ་ཇི་སྙམ་དུ་སེམས། གང་དེ་བཞིན་གཤེགས་པ་ལ་ཇི་སྲིད་འཚོ་བའི་བར་དུ་ན་བཟའ་དང ། བཤོས་དང ། གཟིམས་ཆ་དང ། ན་བའི་གསོས་སྨན་དང ། ཡོ་བྱད་ཐམས་ཅད་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་ན་བསོད་ནམས་མང་དུ་སྐྱེད་དམ། གསོལ་པ། བཅོམ་ལྡན་འདས། དེ་དེ་ལྟ་ལགས་སོ། །བདེ་བར་གཤེགས་པ། དེ་དེ་ལྟ་ལགས་ཏེ། གང་དེ་བཞིན་གཤེགས་པ་ལ་ཇི་སྲིད་འཚོའི་བར་དུ་བསྟི་སྟང་བགྱིད་པ་དེ་བསོད་ནམས་མང་དུ་སྐྱེད་དོ། །བཅོམ་ལྡན་འདས། དེ་བཞིན་གཤེགས་པ་ལ་སེམས་དང་བས་སེམས་གཅིག་བསྐྱེད་པའང་གཞི་དེ་ལས་བསོད་ནམས་མང་
194b
དུ་སྐྱེད་ད། དཔག་ཏུ་མ་མཆིས། བསམ་གྱིས་མི་ཁྱབ། གྲངས་མ་མཆིས་ན། གང་དེ་བཞིན་གཤེགས་པ་ལ་ཇི་སྲིད་འཚོའི་བར་དུ་བསྟི་སྟང་བགྱིད། བླ་མར་བགྱིད། རིམ་གྲོར་བགྱིད། མཆོད་པར་བགྱིད་པ་ལྟ་སྨོས་ཀྱང་ཅི་འཚལ། དེ་སྐད་ཅེས་གསོལ་བ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། །གང་དེ་བཞིན་གཤེགས་པ་གཅིག་ལ་ཇི་སྲིད་འཚོའི་བར་དུ་བདེ་བའི་ཡོ་བྱད་ཐམས་ཅད་ཀྱིས་བསྟི་སྟང་བྱེད་པ་ལྟ་ཞོག་ལ། གཉིས་སམ། གསུམ་མམ། བཞིའམ། ལྔའམ། བཅུའམ། ཉི་ཤུ་ཤུའམ། སུམ་ཅུའམ། བཞི་བཅུའམ། ལྔ་བཅུའམ། བརྒྱའམ། སྟོང་ངམ། བྱེ་བའམ། བྱེད་བ་བརྒྱའམ། བྱེ་བ་སྟོང་ངམ། བྱེ་བ་བརྒྱ་སྟོང་ངམ། བྱེ་བ་ཁྲག་ཁྲིག་བརྒྱ་སྟོང་ངམ། ཀུན་དགའ་བོ། ཛམ་བུའི་གླིང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཡོངས་སུ་གང་བར་གྱུར་པ་དང ། གླིང་བཞི་པོ་ཆེན་པོའི་འཇིག་རྟེན་གྱི་ཁམས་དང ། སྟོང་གཉིས་པའི་འཇིག་རྟེན་གྱི་ཁམས་དང ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་ན་ཟླ་བ་བྱེ་བ་བརྒྱ་རྣམས་དང ། ཉི་མ་བྱེ་པ་བརྒྱ་རྣམས་དང ། རི་རབ་བྱེ་བ་བརྒྱ་རྣམས་དང ། རི་ཁོར་ཡུག་བྱེ་བ་བརྒྱ་རྣམས་དང ། རྒྱ་མཚོ་ཆེན་པོ་བྱེ་བ་བརྒྱ་རྣམས་དང ། ཛམྦུའི་གླིང་བྱེ་བ་བརྒྱ་རྣམས་དང ། ཤར་གྱི་ལུས་འཕགས་
195a
༄#། །བྱེ་བ་བརྒྱ་རྣམས་དང ། བྱང་གི་སྒྲ་མི་སྙན་བྱེ་བ་བརྒྱ་རྣམས་དང ། ནུབ་ཀྱི་བ་གླང་སྤྱོད་བྱེ་བ་བརྒྱ་རྣམས་ཏེ། གླིང་བརྒྱད་ཁྲིས་བསྐོར་བ་རྣམས་དང ། གླིང་བཞི་པ་ཆེན་པོ་བྱེ་བ་བརྒྱ་རྣམས་དང ། རྒྱལ་ཆེན་བཞི་པ་བྱེ་བ་བརྒྱ་རྣམས་དང ། སུམ་ཅུ་རྩ་གསུམ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་བྱེ་བ་བརྒྱ་རྣམས་དང ། ཚངས་རིས་བྱེ་བ་བརྒྱ་རྣམས་ནས་འོག་མིན་བྱེ་བ་བརྒྱ་རྣམས་ཀྱི་བར་འདི་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཞེས་བྱ་སྟེ། དེ་ཐམས་ཅད་འདི་ལྟ་སྟེ། དཔེར་ན། བུ་རམ་ཤིང་སྟུག་པོའམ། འབྲས་ཀྱི་ཞིང་སྟུག་པོའམ། ཏིལ་གྱི་ཞིང་སྟུག་པོའམ། འདམ་བུ་མདའ་རྒྱུ་སྟུག་པོའམ། འོད་མ་སྟུག་པོའམ། འདམ་བུ་སྟུག་པོའམ། སེང་ལྡེང་སྟུག་པོའམ། རྩཝ་ཀུ་ཤ་སྟུག་པོ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀུན་ཏུ་གང་བར་གྱུར་ལ། ཐ་ན་ཡོངས་སུ་བརྟག་པ་བཟུང་སྟེ་སངས་རྒྱས་བཅོམ་ལྡན་འདས་དེ་དག་བསྐལ་བ་གངྒཱའི་ཀླུང་གི་བྱེ་མ་སྙེད་དུ་བཞུགས་པར་གྱུར་ལ། དེར་ཁྱིམ་བདག་གཅིག་ཅིག་བྱུང་སྟེ། ཁྱིམ་བདག་དེའང་དེ་སྲིད་དུ་གནས་པར་གྱུར་བ་དེས་སངས་རྒྱས་བཅོམ་ལྡན་འདས་དེ་དག་ལ་ཇི་སྲིད་འཚོའི་བར་དུ་ན་
195b
བཟའ་དང ། བཤོས་དང ། གཟིམས་ཆ་དང ། ན་བའི་གསོས་སྨན་དང ། ཡོ་བྱད་རྣམས་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་པ་དང ། སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་པ་རྣམས་ཀྱི་སྐུ་གདུང་ལའང་སྐུ་གདུང་གི་མཆོད་པ་རིན་པོ་ཆེ་སྣ་བདུན་གྱི་མཆོད་རྟེན་བྱས་ནས་ལྷའི་གདུགས་དང ། རྒྱལ་མཚན་དང ། བ་དན་ལ་སོགས་པ་དང ། སྤོས་དང་བྱུག་པ་ཐམས་ཅད་དང ། མེ་ཏོག་དང ། ཕྲེང་བ་དང ། ུཏྤལ་དང ། པདྨ་དང ། ཀུ་མུ་ད་དང ། པདྨ་དཀར་པོ་ཐམས་ཅད་དང ། གླུ་དབྱངས་ཐམས་ཅད་དང ། རོལ་མོའི་སྒྲ་ཐམས་ཅད་དང ། ལྷ་དང་མིའི་མཆོད་པ་བཟང་པོ་མེ་ཏོག་ནས་སིལ་སྙན་དང་ཕེག་རྡོབ་པའི་བར་ཐམས་ཅད་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་ན། ཀུན་དགའ་བོ། དེ་ཇི་སྙམ་དུ་སེམས། གཞི་དེ་ལས་ཁྱིམ་བདག་དེ་བསོད་ནམས་མང་དུ་སྐྱེད་དམ། གསོལ་པ།་བཅོམ་ལྡན་འདས། དེ་བཞིན་གཤེགས་པ་གཅིག་ལ་ཁྱིམ་བདག་དེས་བཤོས་གསོལ་ནའང་བསོད་ནམས་མང་དུ་སྐྱེད་དེ། དཔག་ཏུ་མ་མཆིས་གྲངས་མ་མཆིས་ན་དེ་བཞིན་གཤེགས་པའི་ཚོགས་དེ་སྙེད་ཅིག་བསྐལ་བ་དེ་སྙེད་དུ་བཞུགས་པ་ལ་བསྟི་སྟང་བགྱིད། བླ་མར་བགྱིད། རིམ་གྲོར་བགྱིད། མཆོད་པར་བགྱིད་པ་དང ། ཡོངས་སུ་
196a
༄#། །མྱ་ངན་ལས་འདས་པ་རྣམས་ཀྱི་མཆོད་རྟེན་ལ་དེ་ལྟ་བུའི་བསྟི་སྟང་བགྱིད་པ་ལྟ་སྨོས་ཀྱང་ཅི་འཚལ། བཅོམ་ལྡན་འདས། དེ་བཞིན་གཤེགས་པའི་ཚོགས་དེ་ལྟ་བུ་ལ་དེ་ལྟ་བུའི་བསྟི་སྟང་བགྱིས་པ་ཁྱིམ་བདག་དེ་བཞི་དེ་ལས་བསོད་ནམས་འདི་སྙེད་ཅིག་བསྐྱེད་དོ་ཞེས་བསོད་ནམས་ཀྱི་ཕུང་པོ་དེ་དཔེ་བསྟན་དུ་མི་ནུས་སོ། ། དེ་སྐད་ཅེས་གསོལ་བ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ལ་བསྒོའོ། །ཀུན་དགའ་བོ་ཁྱོད་ཀྱི་ཁོང་དུ་ཆུད་པར་བྱའོ། །ཁྱིམ་བདག་གང་གིས་དེ་བཞིན་གཤེགས་པ་དེ་སྙེད་ཅིག་བསྐལ་པ་དེ་སྙེད་དུ་བཞུགས་པ་ལ་བསྟི་སྟང་བྱས། བླ་མར་བྱས། རིམ་གྲོར་བྱས། མཆོད་པར་བྱས་པ་དང ། ཡོངས་སུ་མྱ་ངན་ལས་འདས་པ་རྣམས་ཀྱི་མཆོད་རྟེན་ལ་དེ་ལྟ་བུའི་བསྟི་སྟང་བྱས་པའི་བསོད་ནམས་བསྐྱེད་པ་བས། ཀུན་དགའ་བོ། རིགས་ཀྱི་བུའམ། རིགས་ཀྱི་བུ་མོ་དད་པ་རབ་ཏུ་མང་བ། ལྷག་པའི་བསམ་པས་ཞུགས་པ། སངས་རྒྱས་བཅོམ་ལྡན་འདས་ཀྱི་བྱང་ཆུབ་ལ་མི་རྟོག་པར་མངོན་པར་དད་ཅིང་ཡིད་ཆོས་ལ། མོས་པ་གང་གིས་ཆོས་ཐམས་ཅད་མི་རྟག་པའམ། སྡུག་བསྔལ་བའམ། སྟོང་པའམ། བདག་མེད་པའོ་ཞེས་ལེགས་པར་གསུངས་པའི་ཆོས་ལ་ཡང་དག་
196b
པར་ཞུགས་ཤིང་ཚིག་ཏུ་སྨྲ་ན། ཀུན་དགའ་བོ། འདི་ནི་དེ་བས་བསོད་ནམས་ཆེས་མང་དུ་བསྐྱེད་དོ། །ཀུན་དགའ་བོ། གང་བླ་ན་མེད་པའི་ཆོས་དཀོན་མཆོག་འདི་ལྟ་བུ་བསྟི་སྟང་དུ་བྱ་ཏེ་གཞན་ལ་འཆད་དམ། རབ་ཏུ་སྟོན་ན་བསོད་ནམས་ཇི་ཙམ་དུ་རྒྱ་ཆེར་སྐྱེད་པ་དང ། ཇི་ཙམ་དུ་ཚད་མེད་པ་དང ། ཇི་ཙམ་དུ་གྲངས་མེད་པ་དང ། ཇི་ཙམ་དུ་བསམ་གྱིས་མི་ཁྱབ་པ་དང ། ཇི་ཙམ་དུ་མཚུངས་པ་མེད་པ་དང ། ཇི་ཙམ་དུ་དཔག་ཏུ་མེད་པའི་བསོད་ནམས་བསྐྱེད་པ་ལ་ལྟོས། དེ་ཅིའི་ཕྱིར་ཞེ་ན། ཀུན་དགའ་བོ། །འདི་ལྟར་དེ་ལས་གཞན་པའི་སྦྱིན་པ་རྣམས་ནི་ཟག་པ་དང་བཅས་ཤིང་ཉོན་མོངས་པ་དང་བཅས་པ་སྟེ། འཁོར་བར་རྒྱུ་བ་ཡིན་ལ། ཀུན་དགའ་བོ། བསྐལ་པ་གྲངས་མེད་པ་བྱེ་བར་བསྒྲུབས་པའི་ཆོས་དཀོན་མཆོག་གི་མཛོད་ཟང་ཟིང་མེད་པ་བླ་ན་མེད་པ་འདི་ནི་འཁོར་བའི་རྒྱུན་གཅོད་པར་འགྱུར་བའི་ཕྱིར་རོ། །ཀུན་དགའ་བོ། ཆོས་དཀོན་མཆོག་བླ་ན་མེད་པ་འདི་ཐོས་ན་སེམས་ཅན་སྐྱེ་བའི་ཆོས་ཅན་རྣམས་སྐྱེ་བ་ལས་ཡོངས་སུ་ཐར་བར་འགྱུར། སེམས་ཅན་ན་བའི་ཆོས་ཅན་དང ། འཆི་བའི་ཆོས་ཅན་དང ། མྱ་ངན་དང ། སྨྲེ་སྔགས་འདོན་པ་དང།་སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པའི་ཆོས་ཅན་རྣམས་འཁྲུག་པའི་བར་ལས་ཡོངས་སུ་ཐར་བར་འགྱུར་རོ། །ཀུན་དགའ་བོ། །དོན་གྱི་གཞི་འདི་མཐོང་
197a
༄#། །ནས་གང་ཆོས་གུས་པར་འཆད་པ་དང ། གང་ཆོས་གུས་པར་ཉན་པ་གཉིས་ནི་བསོད་ནམས་མང་དུ་བསྐྱེད་དོ་ཞེས་ང་སྨྲའོ། །དེ་སྐད་ཅེས་བཀའ་སྩལ་ནས།་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། ལྷག་པའི་བསམ་པས་ཞུགས་ཤིང་ཡང་དག་པར་བསྒྲུབ་པར་འདོད་པས་སངས་རྒྱས་བཅོམ་ལྡན་འདས་ཀྱི་བསྟན་པ་ལ་མི་རྟོག་པར་མངོན་པར་དད་ཅིང་མོས་ནས་ཆོས་ལེགས་པར་གསུངས་པ་ཡིན་པ་དང ། དགེ་འདུན་ལེགས་པར་ཞུགས་པ་ཡིན་པ་དང ། འདུ་བྱེད་ཐམས་ཅད་མི་རྟག་པའམ། སྡུག་བསྔལ་བའམ། ཞི་བའམ། སྟོང་པའམ། བདག་མེད་པ་ཡིན་པར་ཡིད་པར་ཡིད་ཆེས་ན། ཀུན་དགའ་བོ། འདི་ནི་དེ་བས་ཆེས་བསོད་ནམས་མང་དུ་བསྐྱེད་དེ། ཚིག་ཙམ་མ་ཡིན་ནོ། །ཀུན་དགའ་བོ། གང་ལ་ལ་ཞིག་གིས་རུ་ཤིང་བཞིན་དུ་བྱས། ཡིད་ལ་བྱས། སེམས་ཐམས་ཅད་ཀྱིས་བསམས་ནས་རྣ་བླགས་ཏེ་ཆོས་ཉན་པ་དང ། མཉན་ནས་ཀྱང་ཐ་ནས་སེ་གོལ་གཏོགས་པ་ཙམ་ཡང་མི་རྟག་པའམ། སྡུག་བསྔལ་བའམ། སྟོང་པའམ། བདག་མེད་པར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ན། ཀུན་དགའ་བོ། དེ་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ནས་སེམས་ཅན་གྱི་ཁམས་ཡོད་པའི་སེམས་ཅན་ཇི་
197b
སྙེད་པ་ཐམས་ཅད་ནི་ཆེས་མང་གི། སའི་ཁམས་མ་ཡིན། ཆུའི་ཁམས་མ་ཡིན། མེའི་ཁམས་མ་ཡིན། རླུང་གི་ཁམས་མ་ཡིན་ནོ་ཞེས་དེ་སྐད་བྱ་བ་དེ་དག་ཐམས་ཅད་ཡོངས་སུ་བརྟག་པ་གཟུང་སྟེ། སྐད་ཅིག་དང ། ཐང་ཅིག་དང ། ཡུད་ཙམ་ཅིག་ལ་སྔ་ཕྱི་མེད་པར་མིར་གྱུར་ལ། སྐད་ཅིག་དང ། ཐང་ཅིག་དང ། ཡུད་ཙམ་ཅིག་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཁྱིམ་བདག་གཅིག་ཅིག་ཀྱང་བྱུང་ལ། སངས་རྒྱས་བཅོམ་ལྡན་འདས་དེ་དག་ཇི་ཙམ་དུ་འཁོར་བའི་སྔོན་གྱི་མཐའ་མི་མངོན་པ་དེ་སྲིད་དུ་ཡུན་རིང་དུ་བཞུགས་ཏེ། ཁྱིམ་བདག་དེའང་བསྐལ་པ་དེ་སྲིད་དུ་གནས་བར་གྱུར་ལ། དེས་སངས་རྒྱས་བཅོམ་ལྡན་འདས་དེ་སྙེད་ལ་ན་བཟའ་དང ། བཤོས་དང ། གཟིམས་ཆ་དང ། ན་བའི་གསོས་སྨན་དང ། ཡོ་བྱད་དང ། བདེ་བར་སྦྱར་བ་ཐམས་ཅད་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་པ་དང ། ཡོངས་སུ་མྱ་ངན་ལས་འདས་པ་རྣམས་ཀྱི་མཆོད་རྟེན་རིན་པོ་ཆེ་སྣ་བདུན་ལས་བྱས་ཏེ། ལྷའི་གདུགས་དང ། རྒྱལ་མཚན་དང ། བ་དན་རྣམས་དང ། མེ་ཏོག་དང ། ཕྲེང་བ་དང ། སྤོས་དང ། བྱུག་པ་ཐམས་ཅད་དང ། བདོག་པ་ཐམས་ཅད་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་ན། ཀུན་དགའ་བོ། དེ་ཇི་སྙམ་དུ་སེམས། ཁྱིམ་བདག་
198a
༄#། །དེ་གཞི་དེ་ལས་བསོད་ནམས་མང་དུ་སྐྱེད་དམ། གསོལ་བ། བཅོམ་ལྡན་འདས། ཁྱིམ་བདག་དེས་དེ་བཞིན་གཤེགས་པ་གཅིག་མཉེས་པར་བགྱིས། བསྟི་སྟང་བགྱིས། བླ་མར་བགྱིས། རིམ་གྲོར་བགྱིས། མཆོད་པར་བགྱིས་ནའང་གཞི་དེ་ལས་བསོད་ནམས་མང་དུ་སྐྱེད་དེ། བསོད་ནམས་ཚད་མ་མཆིས། གྲངས་མ་མཆིས། བསམ་གྱིས་མི་ཁྱབ། མཚུངས་པ་མ་མཆིས། དཔག་ཏུ་མ་མཆིས་པ་བསྐྱེད་པར་འགྱུར་ན། དེ་བཞིན་གཤེགས་པའི་ཚོགས་དེ་ལྟ་བུ་ལ་བསྐལ་པ་དེ་སྙེད་དུ་བསྟི་སྟང་བགྱིས། བླ་མར་བགྱིས། རིམ་གྲོར་བགྱིས། མཆོད་པར་བགྱིས་པ་ལྟ་སྨོས་ཀྱང་ཅི་འཚལ། དེ་སྐད་ཅེས་གསོལ་བ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། དེ་དེ་བཞིན་ནོ། །ཁྱོད་ཇི་སྐད་ཟེར་བ་བཞིན་ཏེ། དེ་བསོད་ནམས་ཚད་མེད་པ་སྐྱེད་དོ། །ཀུན་དགའ་བོ། དེ་བས་ན་ཁྱོད་ལ་བསྒོའོ། །ཁྱོད་ཀྱིས་ཁོང་དུ་ཆུད་པར་བྱའོ། །གང་ཁྱིམ་བདག་དེས་དེ་བཞིན་གཤེགས་པ་དེ་སྙེད་ཅིག་ལ་བདེ་བའི་ཡོ་བྱད་ཐམས་ཅད་ཀྱིས་བསྐལ་པ་དེ་སྙེད་དུ་བསྟི་སྟང་བྱས། བླ་མར་བྱས། རིམ་གྲོར་བྱས་བས་བསོད་ནམས་བསྐྱེད་པ་བས། གང་གིས་རུ་ཤིང་བཞིན་དུ་བྱས། ཡིད་ལ་བྱས། སེམས་ཐམས་ཅད་ཀྱིས་བསམས་ཏེ་རྣ་བླགས།
198b
སེམས་རྩེ་གཅིག་ཏུ་བྱས་ནས་ཆོས་ཉན་ཅིང་སེ་གོལ་གཏོགས་པ་ཙམ་ཡང་འདུ་བྱེད་ཐམས་ཅད་མི་རྟག་པའམ། སྡུག་བསྔལ་བའམ། ཞི་བའམ། སྟོང་པའམ། བདག་མེད་པའོ་ཞེས་ཡིད་ལ་བྱེད་ན་འདི་དེ་བས་བསོད་ནམས་ཆེས་མང་དུ་སྐྱེད་དེ། ཀུན་དགའ་བོ། གང་ཆོས་གུས་པར་འཆད་པ་དང ། གང་ཆོས་གུས་པར་ཉན་པ་ནི་བསོད་ནམས་ཆེས་མང་དུ་སྐྱེད་དོ། །ཀུན་དགའ་བོ། ངས་འདི་ལ་དགོངས་ནས་འདི་སྐད་དུ། རྣམ་པ་གཉིས་ཀྱི་དོན་གྱི་ཕྱིར། །སངས་རྒྱས་བཤད་པ་མཉན་པར་བྱ། །ཟག་པ་རྣམས་ཀྱང་ཟད་པར་འགྱུར།། བྱང་ཆུབ་ཉེ་བར་གྱུར་པར་འདོད། གང་ཞིག་ཆོས་རྣམས་འཆད་པ་དང ། །དྲང་སྲོང་རྒྱལ་མཚན་གང་འཛིན་པ། །གཉིས་ཀ་བསོད་ནམས་ལྡན་པར་འགྱུར། །ཆོས་ནི་དྲང་སྲོང་རྒྱལ་མཚན་ཡིན། །ཞེས་བཤད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། གང་ཆོས་གུས་པར་འཆད་པ་དང ། གང་ཆོས་གུས་པར་ཉན་པ་འདི་གཉིས་ནི་བདུད་དང་ལྷན་ཅིག་ཏུ་གཡུལ་འདྲེ་བའོ། །དེ་ཅིའི་ཕྱིར་ཞེ་ན། ཀུན་དགའ་བོ། འདི་ལྟ་སྟེ། དགེ་བའི་བཤེས་གཉེན་ཉིད་དང ། དགེ་བའི་གྲོགས་སུ་གྱུར་པ་ཉིད་དང ། དགེ་བའི་བཤེས་གཉེན་དང་ལྡན་པ་འདི་ནི་ཚངས་པར་སྤྱོད་པ་ཡོངས་སུ་རྫོགས་བར་བྱེད་པའོ། །དེ་ཅིའི་ཕྱིར་ཞེ་ན། ཀུན་དགའ་བོ།
199a
༄#། །དགེ་བའི་བཤེས་གཉེན་ལ་བརྟེན་ནས་སེམས་ཅན་སྐྱེ་བའི་ཆོས་ཅན་རྣམས་སྐྱེ་བ་ལས་ཡོངས་སུ་ཐར་བར་འགྱུར་བ་ནས་སེམས་ཅན་འཁྲུག་པའི་ཆོས་ཅན་རྣམས་འཁྲུག་པ་ལས་ཡོངས་སུ་ཐར་བར་འགྱུར་རོ། །ཀུན་དགའ་བོ། ངས་ཉན་ཐོས་རྣམས་ལ་ཡང་དག་པའི་ལྟ་བ་འབྱུང་བའི་རྒྱུ་གཉིས་དང ། རྐྱེན་གཉིས་ནི། འདི་ལྟ་སྟེ། གཞན་གྱི་སྒྲ་དང ། སོ་སོ་རང་གི་ཚུལ་བཞིན་ཡིད་ལ་བྱེད་པའོ་ཞེས་གསུངས་པའང་དེ་ཡིན་ཏེ། ཀུན་དགའ་བོ། དེ་དག་ལས་གཞན་གྱི་སྒྲ་ནི་སངས་རྒྱས་བཅོམ་ལྡན་འདས་རྣམས་ལས་བྱུང་བར་རིག་པར་བྱའོ། །གང་སོ་སོ་རང་གི་ཚུལ་བཞིན་ཡིད་ལ་བྱེད་པ་དེའང་སངས་རྒྱས་བཅོམ་ལྡན་འདས་ཉིད་ལས་བྱུང་བར་རིག་པར་བྱའོ། ། དེ་ཅིའི་ཕྱིར་ཞེ་ན། ཀུན་དགའ་བོ། འདི་ལྟར་བྱིས་པ་སོ་སོའི་སྐྱེ་བོ་རྣམས་ལ་སོ་སོ་རང་གི་ཚུལ་བཞིན་ཡིད་ལ་བྱེད་པ་མེད་པའི་ཕྱིར་རོ། །དེ་ཅིའི་ཕྱིར་ཞེ་ན། སངས་རྒྱས་རྣམས་མ་བྱུང་ན་བྱིས་པ་སོ་སོའི་སྐྱེ་བོ་རྣམས་ཅི་ཞིག་ཡིད་ལ་བྱ་བ་མི་ཤེས་ཀྱི། ཆོས་འདི་དག་ཡིད་ལ་བྱའོ་ཞེས་དེ་བཞིན་གཤེགས་པ་ཉིད་ཀྱིས་བསྟན་པའི་ཕྱིར་རོ། །ཀུན་དགའ་བོ། ངས་དོན་གྱི་གཞི་འདི་མཐོང་ནས་སོ་སོ་རང་གི་ཚུལ་བཞིན་ཡིད་ལ་བྱེད་པ་དེའང་སངས་རྒྱས་བཅོན་ལྡན་འདས་རྣམས་ལས་བྱུང་བར་རིག་པར་བྱའོ་ཞེས་དེ་
199b
སྐད་བཤད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སྐྱེས་བུ་དམ་པ་རྣམས་ནི་མཐོང་ན་ལེགས། །ཐེ་ཚོམ་རྣམས་ནི་གཅོད་ཅིང་སེལ་བར་བྱེད། །བྱིས་པ་རྣམས་ཀྱང་རབ་ཏུ་མཁས་པར་བྱེད། །དེ་བས་མཁས་པ་རྣམས་ནི་མཐོང་ན་ལེགས། །འཕགས་པ་རྣམས་ནི་མཐོང་ན་བདེ། །དམ་པ་རྣམས་དང་འགྲོགས་པའང་བདེ། བྱིས་པ་རྣམས་ནི་མ་མཐོང་ན། །དམ་པ་རྣམས་ལ་རྟག་ཏུ་བདེ། ཀུན་དགའ་བོ། འདི་ལྟ་སྟེ། དགེ་བའི་བཤེས་གཉེན་དང ། དགེ་བའི་གྲོགས་སུ་གྱུར་པ་དང ། དགེ་བའི་བཤེས་གཉེན་གྱ་གྱུ་མེད་པ་ཉིད་ནི་ཚངས་པར་སྤྱོད་པ་འདི་རྫོགས་པར་བྱེད་པའོ་ཞེས་བྱ་བའང་ངས་འདི་ལ་དགོངས་ཏེ་ཚིག་དེ་སྐད་སྨྲས་སོ། །དེ་ཅིའི་ཕྱིར་ཞེ་ན། ཀུན་དགའ་བོ་དགེ་བའི་བཤེས་གཉེན་ལ་བརྟེན་ནས་སེམས་དགེ་བར་འགྱུར་རོ། །སེམས་དགེ་བས་བསམ་པ་དགེ་བར་འགྱུར། སྦྱོར་བ་དགེ་བར་འགྱུར། དགེ་བའི་ཆོས་ལ་སེམས་དང་བར་འགྱུར། དགེ་བའི་ཆོས་ལ་ཉེ་བར་གནས་པར་འགྱུར། སངས་རྒྱས་བཅོམ་ལྡན་འདས་རྣམས་ལ་ཤེས་ནས་དད་བར་འགྱུར། ཆོས་ལ་ཤེས་ནས་དད་པར་འགྱུར། དགེ་འདུན་ལ་ཤེས་ནས་དད་པར་འགྱུར། འཕགས་པ་དགྱེས་པའི་ཚུལ་ཁྲིམས་རང་དབང་ཅན་མཁས་པས་བསྔགས་པ། མྱ་ངན་ལས་འདའ་བར་འགྱུར་བ་རྣམས་ཐོབ་པར་འགྱུར་རོ། །
200a
༄#། །ཀུན་དགའ་བོ། འདི་ལྟ་སྟེ། དཔེར་ན། ཆར་རབ་ཏུ་བབ་ན་ཤང་ཤོང་རྣམས་ཡོངས་སུ་གང་བར་བྱེད་དོ། །ཤང་ཤོང་རྣམས་ཡོངས་སུ་གང་ནས་ཆུ་དྲན་རྣམས་བྲུག་པར་བྱེད་དོ། །ཆུ་བྲན་རྣམས་བྲུག་ནས་ཀླུང་ཆེན་པོ་རྣམས་བྲུག་པར་བྱེད་དོ། །ཀླུང་ཆེན་པོ་བྲུག་པ་རྣམས་ཀྱིས་མཚོ་ཆེན་པོ་རྒྱ་མཚོ་ཡོངས་སུ་གང་བར་འགྱུར་རོ། །ཀུན་དགའ་བོ། དེ་བཞིན་དུ་དགེ་བའི་བཤེས་གཉེན་དང ། དགེ་བའི་གྲོགས་སུ་གྱུར་བ་དང ། དགེ་བ་དང་རབ་ཏུ་ལྡན་པ་དང ། དགེ་བ་གཙོ་བོར་གྱུར་པ་དང ། དགེ་བའི་སེམས་ཉིད་ལ་བརྟེན་ནས་དགེ་བའི་རྩ་བའི་སྟོབས་བསྐྱེད་པ་ཐོབ་པ་རྣམས་ནི་རྗེས་སུ་མཐུན་པའི་ཆོས་ཀྱི་བར་དུ་བསྒྲུབས་པས་རབ་ཏུ་མཐར་ཐུག་པ་དང ། རབ་ཏུ་དྲི་མ་མེད་པ་དང ། རབ་ཏུ་ཚངས་པར་སྤྱོད་པ་དང ། རབ་ཏུ་མཐར་ཕྱིན་པར་འགྱུར་རོ། །ཀུན་དགའ་བོ། ཕྱི་རོལ་གྱི་དངོས་པོར་གྱུར་པ་འདི་དག་ཀྱང་དུས་ལ་བབ་ན་སྐྱེ་བར་འགྱུར་བ་དང ། མེ་ཏོག་དང ། ཡལ་ག་དང ། འབྲས་བུ་འབྱིན་པ་ལ་ལྟོས། ཀུན་དགའ་བོ། འདི་ལྟར་ཕྱི་རོལ་གྱི་དངོས་པོ་འདི་དག་ཀྱང་སླུ་བར་མི་བྱེད་ན་ཁྱེད་ཀྱི་ལེགས་པར་སྤྱད་པ་མི་སླུ་བ་ལྟ་ཅི་སྨོས་ཏེ། དེ་ནི་གནས་མེད་དོ། །ཀུན་དགའ་བོ། ལེགས་པར་སྤྱད་པ་ནི་སུ་ལའང་མི་སླུའོ། །ལེགས་པར་སྤྱད་པ་སྤྱོད་ཅིག་།ཀུན་དགའ་བོ། ངའང་ལེགས་པར་སྤྱད་བས་
200b
མ་བསླུས་སོ། །ཀུན་དགའ་བོ། ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། ལེགས་པར་སྤྱད་པ་གང་ཡིན་པ་དེ་དག་སྤྱོད་དེ། ལེགས་པར་སྤྱད་པ་དེས་ང་མ་བསླུས་ས། ཀུན་དགའ་བོ། དེ་བཞིན་གཤེགས་པ་ལམ་གང་ནས་གཤེགས་པ་དེ་ན་གངས་མཐོན་དམན་དང ། ངམ་གྲོག་དང ། གཡང་ས་དང ། སྟོར་ཁུང་དང ། ཤོད་ཁུད་དང ། སྡོང་དུ་མ་དང ། ཚེར་མ་སྟུག་པོ་དེ་དག་ཐམས་ཅད་འདུད་ཅིང་མེད་པར་འགྱུར་པ་དང ། ས་དམའ་བ་མཐོང་པོར་འགྱུར་བ་དང ། མཐོན་པོ་དམའ་བར་འགྱུར་པ་དང ། ཤིང་རྣམས་རབ་ཏུ་འདུད་པ་དང ། ཤིང་གི་ལྷ་རྣམས་ཕྱག་འཚལ་བ་དང ། ཚོང་དུས་དང ། སྲང་དག་ན་སྐྱེ་བོ་གང་དག་འཁོད་པ་དེ་དག་དེ་བཞིན་གཤེགས་པ་བཞུད་པའི་རྗེས་སུ་འབྲང་སྟེ། དེ་བཞིན་གཤེགས་པ་འདས་ནས་དེ་དག་སླར་རང་གི་གནས་ན་འཁོད་པ་ལ་ལྟོས། ཀུན་དགའ་བོ། སྔོན་སངས་རྒྱས་བཅོམ་ལྡན་འདས་རྣམས་དང ། རང་སངས་རྒྱས་རྣམས་དང ། དགྲ་བཅོམ་པ་རྣམས་དང ། བྱང་ཆུབ་སེམས་དཔའ་རྣམས་དང ། དགེ་བའི་བཤེས་གཉེན་ཡིད་དུ་འོང་བ་རྣམས་དང ། དགེ་སྦྱོང་དང ། བྲམ་ཟེ་རྒན་པ་རྣམས་ལ་རྟག་ཏུ་གུས་པ་དང ། འདུད་པ་དང ། ཕྱག་འཚལ་བའི་ལེགས་པར་སྤྱད་བའི་རྒྱུ་མཐུན་པ་ལ་ལྟོས། ཀུན་དགའ་བོ། ཕྱི་རོལ་གྱི་དངོས་པོ་སེམས་མེད་པའང་དེ་
201a
༄#། །བཞིན་གཤེགས་པ་ལ་འདུད་ཅིང་ཕྱག་འཚལ་བ་དང ། མཐོ་བར་འགྱུར་བ་དང ། དངོས་པོ་གང་དག་དམའ་བར་འོས་པའམ། མཐོ་བར་འོས་པ་དེ་དག་དེ་བཞིན་གཤེགས་པ་མཐོང་མ་ཐག་ཏུ་དམའ་བ་དང་མཐོ་བར་འགྱུར་བ་ལེགས་པར་སྤྱད་པའི་ཁྱད་པར་ལ་ལྟོས། འདི་ལ་མི་བླུན་པོ་ཁ་ཅིག་ནི་ང་རྒྱལ་གྱི་ཟིལ་གྱིས་ནོན། །ང་རྒྱལ་གྱིས་བསླད། ང་རྒྱལ་གྱིས་སེམས་ཡོངས་སུ་གདུངས་ནས་སུ་ལའང་མི་འདུད་དོ། །ཀུན་དགའ་བོ། དེ་བཞིན་གཤེགས་པའི་ཕྱག་དྲ་བར་འབྲེལ་བ་དང ། ཞབས་དྲ་བར་འབྲེལ་བ་དེ་དག་ཐམས་ཅད་ཀྱང་ལེགས་པར་སྤྱད་པ་ལས་གྱུར་པ་ལ་ལྟོས། ཀུན་དགའ་བོ། གང་ངས་སྔོན་སྦྱིན་པ་དང ། ཚིག་སྙན་པ་དང ། དོན་སྤྱད་པ་དང ། དོན་མཐུན་པས་སེམས་ཅན་རྣམས་བསྡུས་པ་སྔོན་གྱི་ལེགས་པར་སྤྱད་པ་དེ་དག་ལ་ལྟོས། ཀུན་དགའ་བོ། ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་འདི་ནི་ངའི་མ་ཡིན། འདི་ནི་ངའི་ཕ་ཡིན། འདི་ནི་ཕུ་ནུ་བོ། འདི་ནི་སྲིང་མོ། འདི་ནི་ཉེ་དུ། འདི་ནི་མཛའ་བོ། འདི་ནི་མི་མཛའ་བ་ཡིན་ནོ་སྙམ་པ་དེ་ལྟ་བུར་མ་གྱུར་གྱི། ཀུན་དགའ་བོ། ང་ནི་སེམས་ཅན་ཐམས་ཅད་ལ་སེམས་རོ་གཅིག་པ་དང ། སེམས་མཉམ་ཞིང་སེམས་མི་མཉམ་པ་མེད་པ་དང ། བདག་གི་སེམས་སུ་གྱུར་ཏོ། །ཀུན་
201b
དགའ་བོ། ཡུན་རིང་པོ་འདི་ན་གང་ངས་སྦྱིན་པ་དང ། ཚིག་སྙན་པ་དང ། དོན་སྤྱད་པ་དང ། དོན་མཐུན་པས་མ་བཟུང་བའི་སེམས་ཅན་དེ་ནི་རྙེད་པར་སླ་བ་མ་ཡིན་ན་བྱིས་པ་སོ་སོའི་སྐྱེ་བོ་རྣམས་ནི་དེ་ལྟར་བཟུང་བར་མི་ཤེས་སོ། །ཇི་ལྟར་འཁོར་བའི་སྔོན་གྱི་མཐའ་མི་མངོན་པ་བཞིན་དུ་བྱིས་པ་སོ་སོའི་སྐྱེ་བོ་རྣམས་ཀྱིས་བདེ་བ་མྱོང་སྟེ། ཀུན་དགའ་བོ། བྱིས་པ་སོ་སོའི་སྐྱེ་བོ་ཐམས་ཅད་ཀྱིས་རང་གིས་བསོད་ནམས་མངོན་པར་འདུས་བྱས་པས་བདེ་བ་མྱོང་བར་གྱུར་པ་དེ་བས་ནི་གང་ངས་སེམས་ཅན་གཅིག་ལ་བདེ་བར་སྦྱར་ཞིང་བསྒྲུབས་པ་འདི་ཆེས་མང་སྟེ། ངས་སེམས་ཅན་རྣམས་ལ་བདེ་བར་སྦྱར་བ་བསྒྲུབས་པ་ཙམ་ནི་སེམས་ཅན་དེ་དག་གིས་རང་གིས་བསོད་ནམས་མངོན་པར་འདུས་བྱས་པས་བདེ་བ་མ་མྱོང་ངོ ། ། ཀུན་དགའ་བོ། །འོན་ཀྱང་བདེ་བར་སྦྱོར་བ་དེ་དག་ཐམས་ཅད་ནི་མི་རྟག་བ་སྟེ། འགྱུར་བའི་ཆོས་ཅན་ནོ། །གང་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བྱིས་པ་སོ་སོའི་སྐྱེ་བོ་རྣམས་ལ་བདེ་བར་སྦྱོར་བ་ཐམས་ཅད་ཉེ་བར་སྦྱར་བ་དེ་དག་ཐམས་ཅད་ནི་ལམ་འདི་ལ་དགོད་པའི་ཕྱིར་ཡོངས་སུ་སྨིན་པར་འགྱུར་བ་ཤ་སྟག་གོ། །དེ་ལྟར་བདེ་བ་གང་གིས་ངས་ཁྱེད་བདེ་བར་བྱས་པ་འདུས་མ་བྱས་པའི་བདེ་བ། འཕགས་པ་ཟག་པ་མེད་པའི་བདེ་བ། དེ་དག་ནི་ནམ་ཡང་ཕྱིས་ཡོངས་སུ་མི་འགྱུར་ཞིང་ཆུད་ཟ་བར་མི་འགྱུར་རོ། །
202a
༄#། །ཀུན་དགའ་བོ། དེ་བས་ན་འཕགས་པའི་ཡེ་ཤེས་ཀྱིས་བྱ་བ་བྱོས་ཤིག་།ཀུན་དགའ་བོ། ཡེ་ཤེས་ཀྱི་བྱ་བས་བྱ་བ་བྱོས་ཤིག་།ངས་ནི་བྱས་ཟིན་ཏོ། །ཀུན་དགའ་བོ། སྤྱོད་པ་གཞན་ཡང་ཐ་ན་སེམས་དད་པ་གཅིག་བསྐྱེད་པའི་དགེ་བའི་རྩ་བའི་རྣམ་པར་སྨིན་པ་ངས་བཤད་ཟིན་ཏོ། །ཀུན་དགའ་བོ། སེམས་ཅན་དགེ་བའི་རྩ་བ་བྱས་པ། དགེ་བའི་རྩ་བ་བསྐྱེད་པ། མྱ་ངན་ལས་འདས་པའི་ས་བོན་བསྐྱེད་པ་དག་ཀྱང་ཡོད་དོ། །ཀུན་དགའ་བོ། སེམས་ཅན་གང་དག་གིས་དེ་བཞིན་གཤེགས་པ་ཡང་དག་པར་རྗེས་སུ་དྲན་ནས་ང་འདི་ལྟ་བུར་ཟད་ཅིང་ཡོངས་སུ་ཉམས་པ་ཐོས་ན་དགའ་བ་ཙམ་མམ་དད་པ་ཙམ་གྱིས་མཆི་མ་འབྱུང་བ་དག་ཀྱང་ཡོད་དོ། །ཀུན་དགའ་བོ།་དེ་བཞིན་གཤེགས་པ་རྗེས་སུ་དྲན་ནས་ཤུགས་རིང་པོ་འབྱིན་པའི་སེམས་ཅན་དག་ཀྱང་ཡོད། སྤུ་ཟིང་ཞེས་བྱེད་པ་དག་ཀྱང་ཡོད་དེ། སེམས་ཅན་དེ་དག་ནི་སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དུ་མི་འགྲོ་ཞིང་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གཞོལ་བ་དག་གོ། ཀུན་དགའ་བོ། དེ་བཞིན་དུ་གང་ལ་ལ་ང་རྗེས་སུ་དྲན་ནས་ཆོས་ཀྱི་ཤུགས་ཀྱིས་མཆི་མ་འབྱུང་བའམ། སྤུ་ཟིང་ཞེས་བྱེད་པའམ། ཤུགས་རིང་དུ་འབྱིན་པར་འགྱུར་བའི་སེམས་
202b
ཅན་དེ་དག་ཐམས་ཅད་ནི། ཀུན་དགའ་བོ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་དུ་མི་འགྲོའོ། །ལོག་པར་ལྟུང་བ་ཐམས་ཅད་དུ་མི་འགྲོའོ། །ཀུན་དགའ་བོ། དེ་བས་ན་བག་ཡོད་པ་ལ་བརྩོན་པར་གྱིས་ཤིག་།ཀུན་དགའ་བོ། སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་ནི་བག་ཡོད་པས་ཐོབ་ཅིང་དེ་ལས་གཞན་པའི་དགེ་བ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱང་བག་ཡོད་པས་ཐོབ་བོ། །ཀུན་དགའ་བོ། གང་འདོམས་པ་པོས་བྱ་བ་དང ། གང་དོན་འདོད་པ་དང ། ཕན་པ་དང་བདེ་བ་འདོད་པ་དང ། ཕན་པར་དགའ་བ་དང་།སྙིང་རྗེ་ཅན་དང ། སྙིང་བརྩེ་བ་ཅན་གྱིས་སྙིང་བརྩེ་བའི་ཕྱིར་བྱ་བ་དེ་དག་ངས་བྱས་ཀྱི། ད་ནི་ཁྱེད་ཀྱིས་ཅི་ནས་ཀྱང་དགེ་བའི་ལམ་རྒྱུན་ཆད་པར་མི་འགྱུར་བ་དང ། དམ་པའི་ཆོས་ཀྱི་ཚུལ་ནུབ་པར་མི་འགྱུར་བར་གྱིས་ཤིག་།ཀུན་དགའ་བོ། ཅི་ནས་ཀྱང་དམ་པའི་ཆོས་ཀྱི་ཚུལ་འདི་ཡུན་རིང་དུ་གནས་པར་འགྱུར་བ་དང་།ལྷ་དང་མི་རྣམས་ལ་ཡངས་ཤིང་རྒྱ་ཆེར་འགྱུར་བར་གྱིས་ཤིག་།ཀུན་དགའ་བོ། ཆོས་དཀོན་མཆོག་གི་མཛོད་འདི་ཅི་ནས་ཀྱང་རབ་ཏུ་མི་འཇིགས་པར་བྱ་བའི་ཕྱིར་ངས་ཁྱོད་ལ་གཏད་དོ། །འདི་ནི་ངས་རྗེས་སུ་བསྟན་པའོ། །འདི་ནི་ངའི་རྗེས་སུ་བསྟན་པའོ། །དམ་པའི་ཆོས་ཡོངས་སུ་གཏད་པ་ཞེས་བྱ་བའི་ལེའུ་སྟེ་བཅུ་གཉིས་རྫོགས་སོ།། །།དེ་ནས་བཅོམ་
203a
༄#། །ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ཇི་ལྟར་བསྒྲུབ་པར་བགྱི། བཅོམ་ལྡན་འདས། བདག་གིས་ཇི་ལྟར་བསྒྲུབས་ན་དམ་པའི་ཆོས་ཀྱི་ཚུལ་འདི་ཡུན་རིང་དུ་གནས་པ་དང ། ལྷ་དང་མི་རྣམས་ལ་ཡངས་ཤིང་རྒྱ་ཆེ་བར་འགྱུར། བཅོམ་ལྡན་འདས། ཆོས་ཀྱི་ཚུལ་འདི་བདག་གིས་ཇི་ལྟར་ཡང་དག་པར་བསྡུ་བར་བགྱི། ཇི་ལྟར་རབ་ཏུ་བསྟན་པར་བགྱི། དེ་སྐད་ཅེས་གསོལ་བ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ང་ཡོངས་སུ་མྱ་ངན་ལས་འདས་པའི་འོག་ཏུ་དགེ་སློང་གནས་བརྟན་དག་འདུས་ནས་ཆོས་དང་འདུལ་བ་ཡང་དག་པར་སྡུད་པར་བྱེད་དེ། དེ་ལ། ཀུན་དགའ་བོ། གནས་བརྟན་འོད་སྲུང་ཆེན་པོ་ལ་སོགས་པ་དགེ་སློང་གནས་བརྟན་དག་ཁྱོད་ལ་འདི་སྐད་འདྲིའོ། །ཀུན་དགའ་བོ། དེ་བཞིན་གཤེགས་པས་བསྟན་པ་ཆེན་པོ་དག་གང་དུ་གསུངས། གླིང་གཞི་ཆེན་པོའི་རྣམ་གྲངས་དག་གང་དུ། མཉམ་པར་བཞག་པ་ཆེན་པོ་གང་དུ། ལྔ་པ་དང་གསུམ་པ་གང་དུ། ལྷས་ཞུས་པ་དག་གང་དུ། བརྒྱ་བྱིན་གྱིས་ཞུས་པ་དག་གང་དུ། ལྷ་ཡུལ་ནས་བབས་པ་གང་དུ། ཚངས་པའི་དྲི་བ་གང་དུ་གསུངས་ཞེས། ཀུན་དགའ་བོ། དགེ་སློང་དེ་དག་རྣམ་གྲངས་དེ་དག་
203b
གིས་ཁྱོད་ལ་དེ་སྐད་འདྲི་བར་འགྱུར་རོ། །ཀུན་དགའ་བོ། དེ་བཞིན་གཤེགས་པས་མདོའི་སྡེ་དག་གང་དུ་གསུངས། དབྱངས་ཀྱིས་བསྙད་པའི་སྡེ་དང ། ལུང་བསྟན་པའི་སྡེ་དང ། ཚིགས་སུ་བཅད་པའི་སྡེ་དང ། ཆེད་དུ་བརྗོད་པའི་སྡེ་དང ། གླེང་གཞིའི་སྡེ་དང ། རྟོགས་པ་བརྗོད་པའི་སྡེ་དང ། དེ་ལྟ་བུ་བྱུང་བའི་སྡེ་དང ། སྐྱེས་པ་རབས་ཀྱི་སྡེ་དང ། ཤིན་ཏུ་རྒྱས་པའི་སྡེ་དང ། རྨད་དུ་བྱུང་བའི་ཆོས་ཀྱི་སྡེ་དང་།གཏན་ལ་དབབ་པར་བསྟན་པའི་སྡེ་དག་གང་དུ་གསུངས། ཀུན་དགའ་བོ། དེ་བཞིན་གཤེགས་པས་ཉན་ཐོས་ཀྱི་སྡེ་སྣོད་གང་དུ་གསུངས། རང་སངས་རྒྱས་ཀྱི་སྡེ་སྣོད་གང་དུ་གསུངས། ཐེག་པ་ཆེན་པོ་བྱང་ཆུབ་སེམས་པའི་སྡེ་སྣོད་གང་དུ་གསུངས་ཞེས། ཀུན་དགའ་བོ། དེ་ན་དགེ་སློང་དེ་དག་གིས་ཁྱོད་ལ་དེ་སྐད་དྲིས་པ་དང་འདི་སྐད་ལུང་སྟོན་ཅིག་།འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དང་པོ་མངོན་པར་རྫོགས་པར་སངས་རྒྱས་ནས་ཡུལ་མ་ག་དྷ་ན་བྱང་ཆུབ་ཀྱི་སྙིང་པོ་ལ་བཞུགས། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་ག་ཡཱ་ལ་བཞུགས། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་མ་ག་དྷཱ་ན་ར་རྫིའི་ཤིང་ནྱ་གྲོ་དྷའི་དྲུང་ན་བཞུགས། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་ཝཱ་ར་ཎཱ་སི་ན་དྲང་སྲོང་
204a
༄#། །ལྷུང་བ་རི་དྭགས་ཀྱི་ནགས་ན་བཞུགས། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཕུང་པོའི་རི་དང་ལུས་འཕགས་རི་ཡངས་པའི་སྟེང་ན་དབང་པོའི་བྲག་ཕུག་ན་བཞུགས། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལནྟ་ཀ་གནས་པ་ན་བཞུགས། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དྲང་སྲོང་གི་རིའི་ངོས་སྲིན་བུའི་བྲག་ལ་བཞུགས། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་ཡངས་པ་ཅན་ན་ཤིང་ཨ་མྲས་སྐྱོང་མའི་ཚལ་དང ། སྤྲེའུ་རྫིང་གི་འགྲམ་ན་ཁང་པ་བརྩེགས་པའི་གནས་ན་བཞུགས། དེ་བཞིན་དུ་ཡུལ་ཙམྤ་ན་གགྲགྶ་བརྐོས་པའི་རྫིང་གི་འགྲམ་ན་བཞུགས། དེ་བཞིན་དུ་ག་ཡཱ་ན་ག་ཡཱ་མགོའི་རི་ལ་བཞུགས། དེ་བཞིན་དུ་ཡུལ་ཀོའུ་ཤམྦི་ན་སྒྲས་མངོན་གྱི་ཀུན་དགའ་ར་བ་ན་བཞུགས། ཡུལ་གནས་བཅས་ན་ནག་པོའི་ཀུན་དགའ་ར་བ་ན་བཞུགས། སྐྱ་སྣར་གྱི་བུ་ན་བུ་མང་པོ་པའི་མཆོད་རྟེན་གྱི་དྲུང་ན་བཞུགས། ཡུལ་
204b
བཅོམ་བརླག་ན་བྱ་གག་གི་ཀུན་དགའ་ར་བ་ན་བཞུགས། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཀུ་ཤའི་གྲོང་ཁྱེར་ན་གྱད་རྣམས་ཉེ་བར་གནས་པ་ཤིང་སཱ་ལའི་ཚལ་ན་བཞུགས་ཞེས། ཀུན་དགའ་བོ། རྣམ་གྲངས་དེ་དག་གིས་གང་དང་གང་དུ་དེ་བཞིན་གཤེགས་པས་ཆོས་བཤད་པ་དང ། འཁོར་གང་དང་གང་དང ། དུས་ཚིགས་གང་དང་གང་དུ་དང ། དོན་གང་ལ་བརྟེན་པ་དང ། གང་ཟག་གང་ལས་བརྩམས་པ་དང ། ཡེ་ཤེས་གང་དང་གང་བསྟན་པའི་ཕྱིར་རྣམ་གྲངས་གང་དང་གང་གིས་གསུངས་པ་དང ། དོན་དང ། ཚིག་དང ། ཡི་གེ་གང་དང་གང་དག་གིས་རྣམ་གྲངས་གང་དང་གང་གསུངས་པ་དེ་ལ་ཁྱོད་ཀྱིས་གླེང་གཞི་དང་བཅས་པ་དང ། རྒྱུ་དང་བཅས་པ་དང ། རྐྱེན་དང་བཅས་པ་དང ། དོན་བཟང་པོ་དང ། ཚིག་འབྲུ་བཟང་པོར་རྒྱས་པར་སྟོན་ཅིག་།མདོ་སྡེའི་མཇུག་ཏུའང་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཐམས་ཅད་དང་ལྡན་པའི་འཁོར་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ་ཞེས་བྲིས་ཤིག་།ཀུན་དགའ་བོ། ཆོས་ཀྱི་ཚུལ་འདི་དེ་ལྟར་ཡང་དག་པར་བསྡུ་པར་བྱའོ། །དེ་ལྟར་རྣམ་པར་དབྱེ་བར་བྱའོ། །དེ་ལྟར་རབ་ཏུ་བསྟན་པར་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས། འདི་སྐད་
205a
༄#། །བདག་གིས་ཐོས་པ་དུས་གཅིག་ཏུ། བཅོམ་ལྡན་འདས་ཞེས་བྱ་བའི་ཚིག་དེ་སྐད་ཅེས་གསུངས་མ་ཐག་ཏུ་དེ་ནས་དེའི་ཚེ་འཇིགས་ཤིང་སྤུ་ཟིང་ཞེས་བྱེད་པ་དང་བཅས་པའི་ས་གཡོས་པ་ཆེན་པོ་འཇིག་རྟེན་དུ་བྱུང་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའང་དེའི་ཚེ་རྣམ་པ་དྲུག་ཏུ་གཡོ། རབ་ཏུ་གཡོ། ཀུན་ཏུ་རབ་ཏུ་གཡོ། ལྡེག་།རབ་ཏུ་ལྡེག་།ཀུན་ཏུ་རབ་ཏུ་ལྡེག་།འགུལ། རབ་ཏུ་འགུལ། ཀུན་ཏུ་རབ་ཏུ་འགུལ། འུར་འུར། རབ་ཏུ་འུར་འུར། ཀུན་ཏུ་རབ་ཏུ་འུར་འུར། འཁྲུགས། རབ་ཏུ་འཁྲུགས། ཀུན་ཏུ་རབ་ཏུ་འཁྲུགས། ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ། ཤར་ཕྱོགས་དམའ་ན་ནུབ་ཕྱོགས་མཐོ། ནུབ་ཕྱོགས་དམའ་ན་ཤར་ཕྱོགས་མཐོ། ལྷོ་ཕྱོགས་དམའ་ན་བྱང་ཕྱོགས་མཐོ། བྱང་ཕྱོགས་དམའ་ན་ལྷོ་ཕྱོགས་མཐོ། མཐའ་དམའ་ན་དབུས་མཐོ། དབུས་དམའ་ན་མཐའ་མཐོ་བར་གྱུར་ཏོ། ། དེའི་ཚེ་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་རྣམས་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་རྣམས་དང ། མི་དང ། མི་མ་ཡིན་པ་དཔག་ཏུ་མེད་པ་དག་རབ་ཏུ་ངུ་སྟེ་མཆི་མ་བྱུང་ཞིང་ཚིག་འདི་སྐད་དུ། བཅོམ་ལྡན་འདས་ཡོངས་སུ་མྱ་ངན་ལས་
205b
འདའ་བ་ཧ་ཅང་མྱུར་ཆེས་སོ། །བདེ་བར་གཤེགས་པ་ཡོངས་སུ་མྱ་ངན་ལས་འདའ་བ་ཧ་ཅང་མྱུར་ཆེས་སོ། །འཇིག་རྟེན་གྱི་མིག་མི་སྣང་བར་འགྱུར་བ་ཧ་ཅང་མྱུར་ཆེས་སོ། ། འཇིག་རྟེན་གྱི་མིག་མ་མཆིས་ཤིང་ལོང་བར་འགྱུར་བ་ཧ་ཅང་མྱུར་ཆེས་སོ་ཞེས་ཟེར་རོ། །ཚེ་དང་ལྡན་པ་ཀུན་དགའ་བོའང་རབ་ཏུ་དུ་ཞིང་མཆི་མ་བྱུང་ནས། བཅོམ་ལྡན་འདས་ཡོངས་སུ་མྱ་ངན་ལས་འདའ་བ་ཧ་ཅང་མྱུར་ཆེས་སོ། །བདེ་བར་གཤེགས་པ་ཡོངས་སུ་མྱ་ངན་ལས་འདའ་བ་ཧ་ཅང་མྱུར་ཆེས་སོ། །འཇིག་རྟེན་གྱི་མིག་མི་སྣང་བར་འགྱུར་བ་ཧ་ཅང་མྱུར་ཆེས་སོ། །འཇིག་རྟེན་གྱི་མིག་མ་མཆིས་ཤིང་ལོང་བར་འགྱུར་བ་ཧ་ཅང་མྱུར་ཆེས་སོ། །འཇིག་རྟེན་ཡོངས་སུ་འདྲེན་པ་མ་མཆིས་པར་འགྱུར་བ་ཧ་ཅང་མྱུར་ཆེས་སོ། ། ཞེས་ཟེར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཐོང ། མྱ་ངན་མ་བྱེད། སྨྲེ་སྔགས་མ་འདོན། ཀུན་དགའ་བོ། གང་སྐྱེས་ཤིང་བྱུང་བ། བྱས་པ། འདུས་བྱས་པ། བསགས་པ། རྟེན་ཅིང་འབྲེལ་བར་འབྱུང་བ། རབ་ཏུ་འཇིག་པའི་ཆོས་ཅན་དེ་དག་རབ་ཏུ་མི་འཇིག་པར་ག་ལ་འགྱུར་ཏེ། དེ་ནི་གནས་མེད་དོ། །ཀུན་དགའ་བོ་ཁྱོད་ཀྱིས་ང་ལ་ཡུན་རིང་དུ་བྱམས་པའི་ལུས་ཀྱི་ལས་དང ། བྱམས་པའི་ངག་གི་ལུས་དང ། བྱམས་པའི་ཡིད་ཀྱི་ལས་ཕན་པ་དང ། བདེ་བ་
206a
༄#། །དང ། གཉིས་སུ་མེད་པ་དང ། ཁོན་མེད་པ་དང ། ཚད་མེད་པ་དང ། གནོད་པ་མེད་པས་བསྙེན་བཀུར་བྱས་སོ། །ཀུན་དགའ་བོ་ཁྱོད་མཐུ་ཆེ་བ་དང ། གཟི་ཆེ་བ་དང ། རྒྱ་ཆེ་བ་དང ། བདུད་རྩི་ལྟ་བུ་དང ། བདུད་རྩིས་ཀླས་པ་དང ། བདུད་རྩིས་མཐས་གཏུགས་པར་འགྱུར་རོ། །ཀུན་དགའ་བོ། དེ་བས་ན་ཚངས་པ་མཚུངས་པར་སྤྱོད་པ་རྣམས་ལ་བྱམས་པའི་ལུས་དང་ངག་དང་ཡིད་ཀྱི་ལས་ཀྱིས་གནས་པར་བྱའོ་ཞེས་ཀུན་དགའ་བོ་ཁྱོད་ཀྱིས་དེ་ལྟར་བསླབ་པར་བྱའོ། །དེ་ལས་གཞན་པའི་ཚངས་པར་སྤྱོད་པ་རྣམས་ལའང་ཁྱོད་ཀྱིས་དེ་ལྟར་བསྙེན་བཀུར་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ། ང་ཡོངས་སུ་མྱ་ངན་ལས་འདས་ནས་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མ་ལ་ཟད་པའི་དུས། འཇིག་པའི་དུས། དགེ་སློང་ཚུལ་ཁྲིམས་དང་ལྡན་པ་ཡོངས་སུ་ཟད་ཅིང་ཡོངས་སུ་ཉམས་པར་འགྱུར་བའི་དུས། ཚུལ་ཁྲིམས་དང་མི་ལྡན་པའི་ཕྱོགས་མངོན་པར་འཕེལ་བའི་དུས། དམ་པའི་ཆོས་ཡོངས་སུ་ཉམས་པར་འགྱུར་བའི་དུས། ཆོས་མ་ཡིན་པའི་ཕྱོགས་ཤས་ཆེ་བར་འགྱུར་བའི་དུས། དམ་པའི་ཆོས་སྤོང་བའི་དུས། རྒྱལ་པོ་འཁྲུག་པའི་དུས། སེམས་ཅན་རྣམ་པར་འཇིག་པའི་དུས། ཆོས་དང་འབྲལ་བའི་དུས། དགེ་སློང་དང་འབྲལ་བའི་དུས། འཁྲུག་
206b
པའི་དུས་དེ་ལྟ་བུར་གྱུར་པ་དེ་ན། ཀུན་དགའ་བོ། དགེ་སློང་ཕལ་ཆེར་ལུས་མ་བསྒོམས་པ་དང ། སེམས་དང་ཚུལ་ཁྲིམས་མ་བསྒོམས་པ་དང ། ཤེས་རབ་མ་བསྒོམས་པར་འགྱུར་ཏེ། དེ་ལུས་མ་བསྒོམས་པ་ནས་ཤེས་རབ་མ་བསྒོམས་པའི་བར་དུ་གྱུར་པས་གནས་དྲུག་ལ་ཆགས་པར་འགྱུར་ཏེ། དྲུག་གང་ཞེ་ན། འདི་ལྟ་སྟེ། ལྷུང་བཟེད་ལ་ཆགས་པ་དང ། ཆོས་གོས་ལ་ཆགས་པ་དང ། བསོད་སྙོམས་ལ་ཆགས་པ་དང ། མལ་སྟན་ལ་ཆགས་པ་དང ། ན་བའི་གསོས་སྨན་དང ། ཡོ་བྱད་ལ་ཆགས་པ་དང ། སྣོད་བཟང་པོ་ལ་ཆགས་པར་འགྱུར་རོ། །དེ་དག་ལྷུང་བཟེད་ཀྱི་ཕྱིར་འཐབ་མོར་གྱུར། ཤགས་སུ་གྱུར་ནས་གཅིག་ལ་གཅིག་ཁའི་མཚོན་མདུང་ཐུང་གིས་རྩོད་ཅིང་འགྱེད་པར་འགྱུར། གཅིག་ལ་གཅིག་མི་སྙན་བ་སྒྲོགས་པར་འགྱུར། གཅིག་ལ་གཅིག་ཞེ་སྡང་བར་འགྱུར་རོ། །དེ་བཞིན་དུ་ཆོས་གོས་དང ། བསོད་སྙོམས་དང ། ན་བའི་གསོས་སྨན་དང ། ཡོ་བྱད་ཀྱི་ཕྱིར་གཅིག་ལ་གཅིག་ཞེ་སྡང་བའི་བར་དུ་འགྱུར་རོ། །གཅིག་ལ་གཅིག་ཀུན་ནས་མནར་སེམས་དང་ལྡན་པ་དང ། ཐ་བའི་སེམས་དང་ལྡན་པ་དང ། མ་དད་པའི་སེམས་དང་ལྡན་པ་དང ། ཞེ་འགྲས་པ་དང ། རྣམ་པར་ཀུན་ནས་མནར་སེམས་དང ། མ་དད་པའི་སེམས་དང་ལྡན་པར་འགྱུར་རོ། །ཀུན་དགའ་བོ། དེ་ལྟ་བས་ན་སྣང་བའམ།
207a
༄#། །དཔེན་པའམ། ཕྲ་བའམ། རགས་པའམ། བསམ་པའམ། སྦྱོར་བ་ནའང་རུང ། ཚངས་པ་མཚུངས་པར་སྤྱོད་པ་རྣམས་ལ་བྱམས་པའི་ལུས་ཀྱི་ལས་ཀྱིས་གནས་པར་བྱའོ། །བྱམས་པའི་ངག་གི་ལས་དང ། བྱམས་པའི་ཡིད་ཀྱི་ལས་ཀྱིས་ཚངས་པ་མཚུངས་པར་སྤྱོད་པ་རྣམས་ལ་གནས་པར་བྱའོ་ཞེས་ཀུན་དགའ་བོ་ཁྱོད་ཀྱིས་དེ་ལྟར་བསླབ་པར་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ། འདི་ལྟར་འཁྲུག་པ་ཆེན་པོའི་དུས་དེ་ལྟ་བུར་གྱུར་ཅིང ། ཚེ་སྙིགས་མ་དང ། ལྟ་བ་སྙིགས་མ་དང ། ཉོན་མོངས་པ་སྙིགས་མ་དང ། དུས་སྙིགས་མ་དང ། སེམས་ཅན་སྙིགས་མ་དང ། ཞིང་སྙིགས་མར་གྱུར་པ་དེའི་ཚེ་ཁྱིམ་པ་རྣམས་ཀྱང་སྡུག་བསྔལ་བར་གྱུར་ཏེ། སྡུག་བསྔལ་དུ་ཉེ་བར་ལྟུང ། སྡུག་བསྔལ་གྱིས་གཙེས། མུ་གེས་གཙེས། ནད་ཀྱིས་གཙེས། འཆི་བས་གཙེས། ཆོམ་རྐུན་གྱིས་གཙེས། ཆར་མི་འབབ་པ་དང ། ཧ་ཅང་ཆར་ཆེས་པས་གཙེས། དུས་དང་བྱེ་བས་གཙེས་ཤིང་འཚེ་བ་རྣམ་པ་སྣ་ཚོགས་དེ་དག་དང་གཞན་དག་གིས་ཀྱང་གཙེས་པར་འགྱུར་ཏེ། ཀུན་དགའ་བོ། བྲམ་ཟེ་དང་ཁྱིམ་བདག་དེ་དག་དེ་ལྟར་སྡུག་བསྔལ་བར་གྱུར་ཅིང་སྡུག་བསྔལ་དང་ལྡན་པས་དད་པར་འགྱུར་རོ། །མངོན་པར་དད་ཅིང་རྣམ་པར་མི་རྟོག་པ་མེད་པས་སངས་
207b
རྒྱས་ལ་ཤེས་ནས་དད། ཆོས་དང་དགེ་འདུན་ལ་ཤེས་ནས་དད་པར་འགྱུར་རོ། །དེ་དག་སངས་རྒྱས་ལ་དམིགས་པའི་སེམས་དང ། ཆོས་ལ་དམིགས་པའི་སེམས་དང ། དགེ་འདུན་ལ་དམིགས་པའི་སེམས་ཀྱིས་ཁ་ཅིག་ནི་གང་ཟག་ལ་དགའ་བས་སྦྱིན་པ་དག་སྦྱིན་པར་འགྱུར་རོ། །བསོད་ནམས་དག་བྱེད་པར་འགྱུར་རོ། །གསོ་སྦྱོང་འཛིན་པར་འགྱུར་རོ། ། ཁ་ཅིག་ནི་བསླབ་པའི་གཞི་རྣམས་འཛིན་པར་འགྱུར། ལུང་ནོད་པར་འགྱུར། ཁ་ཏོན་བྱེད་པར་འགྱུར། ཆོས་ཀྱང་ཉན་པར་འགྱུར་རོ། །མཉན་ནས་ཀྱང་སྒྲུབ་པར་བྱེད་ཅིང་དགའ་བ་དང་དད་པ་དང་མཆོག་ཏུ་དགའ་བ་ཐོབ་པར་འགྱུར་ཏེ། དེ་དགེ་བའི་རྩ་བ་རྣམས་ཀྱང་སྐྱེད་པར་འགྱུར་རོ། །དེ་དག་དགེ་བའི་རྩ་བ་དང་ལྡན་པར་གྱུར་པས་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷའི་ནང་དུ་སྐྱེ་བར་འགྱུར་རོ། །ཀུན་དགའ་བོ། འདི་ལྟར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ཡང་ངན་སོང་དུ་འགྲོ་བར་འགྱུར་བ་དང ། ཁྱིམ་པ་ཁྱིམ་ན་གནས་པ་སྡུག་བསྔལ་བར་གྱུར་ཅིང་སྡུག་བསྔལ་གྱིས་ཉམ་ཐག་པ་རྣམས་སེམས་དད་པའི་དགེ་བའི་རྩ་བས་བདེ་འགྲོར་འགྲོ་བར་འགྱུར་པ་དུས་དེ་ཇི་ཙམ་དུ་ལོག་པར་གྱུར་པ་ལ་ལྟོས། ཀུན་དགའ་བོ། དེ་བས་ན་ལུས་དང ། ངག་དང ། ཡིད་སྡོམ་པས་བསྡམ་པར་བྱ་ཞིང་སེམས་དད་པ་དང ། དགའ་བའི་སྟོབས་སུ་འགྱུར་བ་དང ། དད་པ་དང ། དང་བ་དང ། ལྷག་
208a
༄#། །པའི་བསམ་པ་ཕུན་སུམ་ཚོགས་པ་དང ། ལུས་ཀྱི་ལས་ལེགས་པར་བརྟགས་པ་དང ། ངག་གི་ལས་ལེགས་པར་བརྟགས་པ་དང ། ཡིད་ཀྱི་ལས་ལེགས་པར་བརྟགས་པར་གྱིས་ཤིག། དེ་ཅིའི་ཕྱིར་ཞེ་ན། ཀུན་དགའ་བོ། རན་པར་མི་སྨྲ་བའི་གང་ཟག་གི་ཉེས་དམིགས་ལྔ་སྟེ། ལྔ་གང་ཞེ་ན། རྫུན་གྱི་ཚིག་སྨྲ་བ་དང ། ངག་རྩུབ་པོ་དང ། ཕྲ་མའི་ཚིག་སྨྲ་བ་དང ། ཚིག་ཀྱལ་པ་དང ། བརྣབ་སེམས་ཅན་དུ་འགྱུར་ཞིང་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བར་སྐྱེ་བར་འགྱུར་བའོ། །ཀུན་དགའ་བོ། རན་པར་སྨྲ་བའི་གང་ཟག་གི་ཕན་ཡོན་ལྔ་སྟེ། ལྔ་གང་ཞེ་ན། རྫུན་གྱི་ཚིག་མི་སྨྲ་བ་དང ། ངག་རྩུབ་པོ་མེད་པ་དང ། ཕྲ་མ་མེད་པ་དང ། ཚིག་ཀྱལ་བ་མེད་པ་དང ། བརྣབ་སེམས་མེད་པར་འགྱུར་ཞིང་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷའི་ནང་དུ་སྐྱེ་བར་འགྱུར་བ་སྟེ། ལྔ་པོ་འདི་དག་གོ། ཀུན་དགའ་བོ། གང་ཟག་འཐབ་མོ་བྱེད་པ་དང ། མཚང་འདྲུ་བ་དང ། རྩོད་པ་དང ། ཤགས་འགྱེད་པ་དང ། ཐ་བའི་སེམས་དང ། གནོད་སེམས་ཅན་དང ། སེམས་མ་དད་པ་ལ་ཉེས་དམིགས་འདི་ལྔ་འབྱུང་ངོ ། །ལྔ་གང་ཞེ་ན། འདི་ལ་གང་ཟག་འཐམ་མོ་བྱེད་པ་ནས་སེམས་མ་དད་པའི་བར་དུ་རྫུན་གྱི་ཚིག་སྨྲ་བ་དང ། ཕྲ་མ་
208b
བྱེད་པ་དང ། ཚུལ་ཁྲིམས་དང་ལྡན་པ་རྣམས་ལ་དང་བའི་སེམས་མི་སྐྱེད་པ་དང ། ཉིན་མཚན་དུ་སྡུག་བསྔལ་བ་དང་ཡིད་མི་བདེ་བ་མྱོང་བར་འགྱུར་ཞིང་ལུས་ཞིག་ནས་ཀྱང་སེམས་ཅན་དམྱལ་བར་སྐྱེ་བ་སྟེ། ལྔ་པོ་འདི་དག་གོ། ཀུན་དགའ་བོ། གང་ཟག་བྱམས་པས་གནས་པ་ལ་ཕན་ཡོན་བཅུ་གཅིག་ཡོད་དེ། བཅུ་གཅིག་གང་ཞེ་ན། ཀུན་དགའ་བོ། འདི་ལ་གང་ཟག་བྱམས་པས་གནས་པ་ནི་བདེ་བར་གཉིད་ལོག་པ་དང ། བདེ་བར་སད་པ་དང ། རྨི་ལམ་ངན་པ་མི་རྨི་བ་དང ། མི་དང་མི་མ་ཡིན་པ་རྣམས་དགའ་བར་འགྱུར་བ་དང ། ལྷ་རྣམས་བསྲུང་བར་འགྱུར་བ་དང ། དེ་ལ་དུག་གིས་མི་ཚུགས་པ་དང ། དེ་ལ་མེས་མི་ཚུགས་པ་དང ། དེ་ལ་མཚོན་གྱིས་མི་ཚུགས་པ་དང ། ཆུས་འཆི་བའི་དུས་མི་བྱེད་པ་དང ། གོས་དང ། ཟས་དང ། མལ་ཆ་དང ། ན་བའི་གསོས་སྨན་དང ། ཡོ་བྱད་རྣམས་རྙེད་པ་དང ། མིའི་ཆོས་བླ་མ་མ་རྟོགས་པས་ལུས་ཞིག་ནས་ཚངས་པའི་འཇིག་རྟེན་དུ་སྐྱེ་བར་འགྱུར་བ་སྟེ། ཀུན་དགའ་བོ། བྱམས་པས་གནས་པའི་གང་ཟག་གི་ཕན་ཡོན་བཅུ་གཅིག་པོ་འདི་དག་གོ། ཀུན་དགའ་བོ། དེ་བས་ན་ད་ལྟ་དང ། ང་འདས་པའི་འོག་ཏུ་བདག་གླིང་དུ་གྱུར་པ་དང ། བདག་སྐྱབས་སུ་གྱུར་པ་དང ། ཆོས་གླིང་དུ་གྱུར་པ་དང ། ཆོས་སྐྱབས་སུ་གྱུར་པ་དང ། གཞན་གླིང་མ་ཡིན་པ་དང ། གཞན་སྐྱབས་མ་ཡིན་པར་གནས་པར་གྱིས་ཤིག་།ཀུན་
209a
༄#། །དགའ་བོ། ཇི་ལྟར་ན་དགེ་སློང་བདག་གླིང་དུ་གྱུར་པ་ནས་གཞན་གླིང་མ་ཡིན་པ་དང ། གཞན་སྐྱབས་མ་ཡིན་པའི་བར་དུ་གནས་ཤེ་ན། ཀུན་དགའ་བོ།་འདི་ལ་དགེ་སློང་བརྟུན་པ་ཤེས་བཞིན་ཅན་དྲན་པ་དང་ལྡན་པས་འཇིག་རྟེན་གྱི་བརྣབ་སེམས་དང་ཡིད་མི་བདེ་བ་རྣམ་པར་བསལ་ནས། ནང་གི་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ། །བརྟུན་པ་ཤེས་བཞིན་ཅན་དྲན་པ་དང་ལྡན་པས་འཇིག་རྟེན་གྱི་བརྣབ་སེམས་དང་ཡིད་མི་བདེ་བ་རྣམ་པར་བསལ་ནས། ནང་གི་ཚོར་བ་རྣམས་དང ། སེམས་དང ། ཆོས་ཀྱི་རྗེས་སུ་ལྟ་ཞིང་གནས་སོ། །ཀུན་དགའ་བོ། དེ་ལྟར་ན་དགེ་སློང་བདག་གླིང་དང་བདག་སྐྱབས་ཡིན་པར་གནས་ཀྱི། གཞན་གླིང་དང་གཞན་སྐྱབས་མ་ཡིན་པར་གནས་པའོ། །ཀུན་དགའ་བོ། དེ་བས་ན་སྟོན་པས་ཉན་ཐོས་རྣམས་ལ་བྱ་བ་གང་ཡིན་པ་དེ་ངས་བྱས་ཟིན་གྱི་ད་ཁྱོད་ཀྱིས་གྱིས་ཤིག་།ཀུན་དགའ་བོ། དགོན་པ་དང ། ཤིང་དྲུང་དང ། ཁང་སྟོང་དང ། བླ་གབ་མེད་པ་འདི་དག་ཏུ་བསམ་གཏན་གྱིས་ཤིག་།ཀུན་དགའ་བོ། བག་མེད་པར་མ་བྱེད་ཅིག་།ཕྱིས་འགྱོད་པར་གྱུར་ཏ་རེ། འདི་ནི་ངས་རྗེས་སུ་བསྟན་པའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཀུན་ཤེས་ཟུག་རྔུ་འབྱིན་པ་ཡི། །ལམ་
209b
ནི་ང་ཡིས་ཡང་དག་བསྟན། །དེ་བཞིན་གཤེགས་རྣམས་སྟོན་པ་སྟེ། །དེ་ནི་ཁྱེད་ཀྱིས་བརྩམ་པར་བྱ། །ལྟ་བ་རྣམ་དག་འགྱུར་བ་ཡི། །ལམ་གཞན་མེད་དེ་མཆོག་འདི་ཡིན། །བསྒྲུབ་ན་བདུད་ཀྱིས་བཅིངས་པ་དག། །བཅད་ནས་རབ་ཏུ་ཐར་བར་འགྱུར། །སངས་རྒྱས་ཀྱིས་ནི་བཤད་པ་བཞིན། །གང་དག་གིས་ནི་འདི་རིག་པ། །སྟོན་པའི་བསྟན་པ་བྱེད་པ་དག། སྡུག་བསྔལ་ཐ་མར་འབྱིན་པར་འགྱུར། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང ། དགེ་སློང་དེ་དག་དང ། ཐམས་ཅད་དང་ལྡན་པའི་འཁོར་དེ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །སྙིང་རྗེ་ཆེན་པོའི་ཆོས་ཀྱི་རྣམ་གྲངས་ལས་བསྟན་པའི་ལེའུ་སྟེ། བཅུ་གསུམ་པ་རྫོགས་སོ།། །།སྙིང་རྗེ་ཆེན་པོའི་པདྨ་དཀར་པོ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། ཤཱི་ལེནྡྲ་བོ་དྷི་དང ། ཞུ་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།