དེར་དྲང་སྲོང་རྣམས་ཀྱིས་དཀའ་ཐུབ་སྤྱད་ན་རང་གི་ལུས་ཉིད་ཀྱིས་མཐོ་རིས་སུ་འདོང་བ་ཡིན་ནོ།། ཀྱེ་བྲམ་ཟེའི་ཁྱེའུ་དེ་ནི་མཇལ་གྱིས་གཞན་འདི་འདྲིའོ།། ཡུལ་དབུས་ན་མཁས་པར་བགྲང་བ་དག་ཡོད་དམ། ཤེས་ལྡན་དག་ཁོ་བོས་དང་པོ་ཉིད་ནས་ཤེས་ལྡན་དག་ཡུལ་དབུས་ནི་དབུས་པའི་སྐྱེ་བོས་གང་བ། མཐའ་འཁོབ་པའི་སྐྱེ་བོས་སྤངས་པ། སྐྱེ་བོ་མཁས་པས་བསྟེན་པའོ་ཞེས་མ་སྨྲས་སམ། བྲམ་ཟེའི་ཁྱེའུ་ཁྱོད་ཀྱིས་དེ་སྐད་སྨྲས་སོ།། བྲམ་ཟེའི་ཁྱེའུ་ཡུལ་དབུས་ན་འདི་ལྟ་སྟེ་དཔེར་ན་བདག་ཅག་གི་མཁན་པོ་དང་འདྲ་བ་སྨྲ་བའི་ཁྱུ་མཆོག་དེ་ལྟ་བུ་དག་ཡོད་དམ། ཤེས་ལྡན་དག་ཡུལ་དབུས་ན་བདག་ཅག་གི་མཁན་པོས་གང་དག་གི་གདོང་དུ་ལྟ་བར་ཡང་མི་ནུས་པ། སྙན་པར་སྨྲ་བ། སྨྲ་བའི་ཁྱུ་མཆོག་དེ་ལྟ་བུ་དག་ཡོད་དོ།། བྲམ་ཟེའི་ཁྱེའུ་དེས་དེ་དག་ལ་དེ་ལྟ་དེ་ལྟར་ཡུལ་དབུས་ཀྱི་བསྔགས་པ་བརྗོད་པ་དང་། འདི་ལྟར་དེ་དག་ཐམས་ཅད་ཡུལ་དབུས་སུ་འདོང་འདོད་པར་གྱུར་ཏོ།། དེ་ནས་བྲམ་ཟེའི་ཁྱེའུ་དེ་དག་ཡམ་སྲེག་ཤིང་དག་བཙལ་ཏེ། ཡམ་སྲེག་ཤིང་གི་ཁུར་ཐོགས་ནས་བྲམ་ཟེའི་ཁྱིམ་ག་ལ་བ་དེར་དོང་སྟེ་ཕྱིན་ནས་ཡམ་སྲེག་ཤིང་གི་ཁུར་དག་མཐའ་གཅིག་ཏུ་བཞག་སྟེ། བྲམ་ཟེ་དེ་ག་ལ་བ་དེར་དོང་ནས་ཕྱིན་པ་དང་། བྲམ་ཟེ་དེ་ལ་འདི་སྐད་ཅེས་སྨྲས་སོ།། མཁན་པོ་མཁྱེན་པར་མཛོད་ཅིག། བྲམ་ཟེའི་ཁྱེའུ་འདིས་ཅི་ནས་ཀྱང་བདག་ཅག་ཐམས་ཅད་ཡུལ་དབུས་སུ་མཆི་འཚལ་བར་གྱུར་པ་དེ་ལྟར་ཡུལ་དབུས་ཀྱི་བསྔགས་པ་བརྗོད་དོ། ། བྲམ་ཟེ་དེས་སྨྲས་པ། བུ་དག་ཇི་སྙེད་ཐོས་པ་དེ་སྙེད་བགྲོད་པར་བྱ་བ་ཡིན་ནམ། འདི་ལྟར་ཡུལ་དག་ནི་ཐོས་ན་དགའ་བར་འགྱུར་བ་ཡིན་པས་མཉན་པར་བྱའི་བགྲོད་པར་ནི་མི་བྱའོ།། མཁན་པོ་བྲམ་ཟེའི་ཁྱེའུ་འདིའི་མཆིད་ནས་ཡུལ་དབུས་ན་བདག་ཅག་གི་མཁན་པོས་གང་དག་གི་གདོང་དུ་ལྟ་བར་ཡང་མི་ནུས་པ། སྙན་པར་སྨྲ་བ། སྨྲ་བའི་ཁྱུ་མཆོག་དེ་ལྟ་བུ་དག་མཆིས་སོ་ཞེས་མཆིའོ།། བུ་དག་ཅི་ཁོ་བོ་ན་རེ་སའི་སྟེང་ན་ཁོ་བོ་གཅིག་པུ་ཁོ་ན་སྨྲ་བ་ཡིན་གྱི། སྨྲ་བ་གཞན་འགའ་ཡང་མེད་དོ་ཞེས་ཟེར་རམ། ས་ནི་རིན་པོ་ཆེ་མང་པོ་འཛིན་པ་ཡིན་པས་ས་གཞི་ནི་མཛེས་པ་མཛེས་པ་དག་གིས་གང་བ་ཡིན་ནོ། ། མཁན་པོ་རེ་ཞིག་ཡུལ་དེ་ཡང་མཐོང་བར་འགྱུར་ཞིང་ཆུ་ངོགས་སུ་ཉེ་རེག་ཀྱང་བགྱི། སྨྲ་བའི་ཁྱུ་མཆོག་དེ་དག་ལ་ཡང་བསྙེན་བཀུར་བགྱི། རྒོལ་བ་དག་ཀྱང་ཚར་གཅད་པར་བགྱི། རང་གི་གྲགས་པ་ཡང་བསྒྲག་པར་བགྱི། རྙེད་པ་ཡང་བསྒྲུབ་པར་བགྱིས། བདག་ཅག་ཡུལ་དབུས་སུ་མཆིའོ།། བྲམ་ཟེ་དེ་སློབ་མ་ལ་རྗེས་སུ་ཆགས་པ་དང་བཅས་པ་དང་། འཁོར་ཉུང་བ་ཡིན་པས་དེས་བྲམ་ཟེའི་ཁྱེའུ་དེ་དག་ལ་འདི་སྐད་ཅེས་སྨྲས་སོ།། བུ་དག་གལ་ཏེ་དེ་ལྟ་ན་གཡང་གཞི་དག་དང་། ཤིང་ཤུན་དག་དང་། དབྱུ་གུ་དག་དང་། བླུགས་གཟར་དག་དང་། དགང་གཟར་དག་དང་། རིལ་བ་དག་ལོང་ཤིག་དང་ཡུལ་དབུས་སུ་འདོང་ངོ་།། དེ་དག་གིས་དེ་དག་བླངས་ནས་བྲམ་ཟེ་དེ་བྲམ་ཟེའི་ཁྱེའུ་དེ་དག་དང་ལྷན་ཅིག་ཡུལ་དབུས་སུ་འཕགས་པ་དང་། དེས་རྒོལ་བ་ཁ་ཅིག་ནི་ཚར་བཅད་དེ་རྒོལ་བའི་ཤིང་རྟ་ལ་སྦྱོར་བར་བྱེད། ཁ་ཅིག་ནི་མགོར་ཐལ་བའི་བུམ་པ་དག་གིས་བསྣུན། ཁ་ཅིག་ནི་འཕོང་གི་དཔོང་སར་ཁྭ་བཞིན་དུ་ཐག་རིང་པོ་ནས་ཡོངས་སུ་སྤོང་བར་བྱེད། ཁ་ཅིག་ནི་གདུགས་དང་། རྒྱལ་མཚན་དང་། བ་དན་དག་གིས་བསུ་བར་བྱེད། ཁ་ཅིག་ནི་སློབ་མ་ཉིད་དུ་ཁས་ལེན་པར་བྱེད་ཅིང་དེ་མཐར་གྱིས་གྲོང་དང་། གྲོང་ཁྱེར་དང་། གྲོང་རྡལ་དང་། དབྱེ་ཚོངས་དང་། ཚོང་རྡལ་དག་ཏུ་རྒོལ་བ་འདུལ་ཞིང་རྒྱལ་པོའི་ཁབ་ཏུ་ཕྱིན་ཏོ།། བྲམ་ཟེ་དེས་བསམས་པ། བདག་གིས་ཅིའི་ཕྱིར་རྩ་བ་སྤངས་ཏེ་ཡལ་ག་དང་། འདབ་མ་དང་། ལོ་མ་ལ་ཉུག་པར་བྱ། རྒོལ་བ་གང་དག་དང་། མཁས་པར་བགྲང་བ་གང་ཇི་སྙེད་པ་དེ་དག་ཐམས་ཅད་ཀྱང་རྒྱལ་པོ་དང་ཉེ་བ་ཡིན་གྱིས། བདག་ཀྱང་རྒྱལ་པོའི་གན་དུ་འགྲོའོ་སྙམ་ནས་བྲམ་ཟེ་དེ་རྒྱལ་པོ་གཟུགས་ཅན་སྙིང་པོ་ག་ལ་བ་དེར་སོང་སྟེ་ཕྱིན་ནས་རྒྱལ་པོ་གཟུགས་ཅན་སྙིང་པོ་ལ་རྒྱལ་བ་དང་ཚེ་སྤེལ་བ་བྱས་ཏེ་ཕྱོགས་གཅིག་ཏུ་འདུག་གོ། ། ཕྱོགས་གཅིག་ཏུ་འདུག་ནས་རྒྱལ་པོ་གཟུགས་ཅན་སྙིང་པོ་ལ་འདི་སྐད་ཅེས་སྨྲས་སོ།། ལྷ་བདག་ལ་བླ་མ་ལས་ཡི་གེ་ཉུང་ཤས་ཤིག་བླངས་པ་མཆིས་ཏེ། དེའི་སླད་དུ་ལྷའི་སྤྱན་སྔར་རྒོལ་བ་དག་དང་ལྷན་ཅིག་བཀའ་མཆིད་རྣམ་པར་གཏན་ལ་དབབ་པར་འཚལ་ལོ།། རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་ངའི་ཡུལ་ན་བྲམ་ཟེ་འདི་དང་ལྷན་ཅིག་གཏམ་རྣམ་པར་གཏན་ལ་འབེབས་པར་བྱེད་པའི་རྒོལ་བ་འགའ་ཡོད་དམ། བློན་པོ་རྣམས་ཀྱིས་སྨྲས་པ། ལྷ་གྲོང་ན་ལ་ད་ན་བྲམ་ཟེ་གནས་ལེན་གྱི་བུ་ཞེས་བགྱི་བ་རིག་བྱེད་དང་རིག་བྱེད་ཀྱི་ཡན་ལག་གི་ཕ་རོལ་ཏུ་མཆིས་པ་ཞུགས་ལྟ་བུའི་ཤེས་པས་རང་གི་སྨྲ་བ་གསལ་བར་བགྱིད། གཞན་གྱི་སྨྲ་བ་ཚར་གཅོད་པར་རྔོ་ཐོག་པ་ཞིག་མཆིས་ཏེ། དེས་བསྟན་བཅོས་གནས་ལེན་གྱི་བུ་ཞེས་བགྱི་བ་ཉེ་བར་སྦྱར་ཏོ།། མཁན་པོ་གནས་ལེན་གྱི་བུ་དེ་བོས་ཤིག། ལྷ་བོད་པར་བགྱིའོ་ཞེས་དེ་དག་གིས་དེ་བོས་ནས་དེ་རྒྱལ་པོ་གཟུགས་ཅན་སྙིང་པོ་ག་ལ་བ་དེར་སོང་སྟེ་ཕྱིན་ནས་རྒྱལ་པོ་གཟུགས་ཅན་སྙིང་པོ་ལ་རྒྱལ་བ་དང་ཚེ་སྤེལ་བ་བྱས་ཏེ་ཕྱོགས་གཅིག་ཏུ་འདུག་པ་དང་། བློན་པོ་རྣམས་ཀྱིས་སྨྲས་པ། ལྷ་མཁན་པོ་དེ་འདི་ལགས་སོ།། རྒྱལ་པོས་འོངས་པ་ལེགས་སོ་ཞེས་བྱ་བའི་ཚིག་གིས་ཀུན་དུ་སྤྱད་དེ་སྨྲས་པ། མཁན་པོ་ཁྱོད་ཁོ་བོའི་མདུན་དུ་བྲམ་ཟེ་འདི་དང་ལྷན་ཅིག་གཏམ་རྣམ་པར་གཏན་ལ་དབབ་པར་བྱེད་ནུས་སམ། གནས་ལེན་གྱི་བུས་སྨྲས་པ། བདག་གིས་རྔོ་ཐོག་པས། རྒྱལ་པོ་དགྱེས་པར་བགྱིའོ།། རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་རྒོལ་བའི་དཀྱིལ་འཁོར་ཤོམས་ཤིག། ཕྱོགས་དང་གཞན་གྱི་ཕྱོགས་དག་རྣམ་པར་ཞོག་ཤིག།

der drang srong rnams kyis dka' thub spyad na rang gi lus nyid kyis mtho ris su 'dong ba yin no// kye bram ze'i khye'u de ni mjal gyis gzhan 'di 'dri'o// yul dbus na mkhas par bgrang ba dag yod dam/ shes ldan dag kho bos dang po nyid nas shes ldan dag yul dbus ni dbus pa'i skye bos gang ba/ mtha' 'khob pa'i skye bos spangs pa/ skye bo mkhas pas bsten pa'o zhes ma smras sam/ bram ze'i khye'u khyod kyis de skad smras so// bram ze'i khye'u yul dbus na 'di lta ste dper na bdag cag gi mkhan po dang 'dra ba smra ba'i khyu mchog de lta bu dag yod dam/ shes ldan dag yul dbus na bdag cag gi mkhan pos gang dag gi gdong du lta bar yang mi nus pa/ snyan par smra ba/ smra ba'i khyu mchog de lta bu dag yod do// bram ze'i khye'u des de dag la de lta de ltar yul dbus kyi bsngags pa brjod pa dang / 'di ltar de dag thams cad yul dbus su 'dong 'dod par gyur to// de nas bram ze'i khye'u de dag yam sreg shing dag btsal te/ yam sreg shing gi khur thogs nas bram ze'i khyim ga la ba der dong ste phyin nas yam sreg shing gi khur dag mtha' gcig tu bzhag ste/ bram ze de ga la ba der dong nas phyin pa dang / bram ze de la 'di skad ces smras so// mkhan po mkhyen par mdzod cig/ bram ze'i khye'u 'dis ci nas kyang bdag cag thams cad yul dbus su mchi 'tshal bar gyur pa de ltar yul dbus kyi bsngags pa brjod do/ / bram ze des smras pa/ bu dag ji snyed thos pa de snyed bgrod par bya ba yin nam/ 'di ltar yul dag ni thos na dga' bar 'gyur ba yin pas mnyan par bya'i bgrod par ni mi bya'o// mkhan po bram ze'i khye'u 'di'i mchid nas yul dbus na bdag cag gi mkhan pos gang dag gi gdong du lta bar yang mi nus pa/ snyan par smra ba/ smra ba'i khyu mchog de lta bu dag mchis so zhes mchi'o// bu dag ci kho bo na re sa'i steng na kho bo gcig pu kho na smra ba yin gyi/ smra ba gzhan 'ga' yang med do zhes zer ram/ sa ni rin po che mang po 'dzin pa yin pas sa gzhi ni mdzes pa mdzes pa dag gis gang ba yin no/ / mkhan po re zhig yul de yang mthong bar 'gyur zhing chu ngogs su nye reg kyang bgyi/ smra ba'i khyu mchog de dag la yang bsnyen bkur bgyi/ rgol ba dag kyang tshar gcad par bgyi/ rang gi grags pa yang bsgrag par bgyi/ rnyed pa yang bsgrub par bgyis/ bdag cag yul dbus su mchi'o// bram ze de slob ma la rjes su chags pa dang bcas pa dang / 'khor nyung ba yin pas des bram ze'i khye'u de dag la 'di skad ces smras so// bu dag gal te de lta na g.yang gzhi dag dang / shing shun dag dang / dbyu gu dag dang / blugs gzar dag dang / dgang gzar dag dang / ril ba dag long shig dang yul dbus su 'dong ngo // de dag gis de dag blangs nas bram ze de bram ze'i khye'u de dag dang lhan cig yul dbus su 'phags pa dang / des rgol ba kha cig ni tshar bcad de rgol ba'i shing rta la sbyor bar byed/ kha cig ni mgor thal ba'i bum pa dag gis bsnun/ kha cig ni 'phong gi dpong sar khwa bzhin du thag ring po nas yongs su spong bar byed/ kha cig ni gdugs dang / rgyal mtshan dang / ba dan dag gis bsu bar byed/ kha cig ni slob ma nyid du khas len par byed cing de mthar gyis grong dang / grong khyer dang / grong rdal dang / dbye tshongs dang / tshong rdal dag tu rgol ba 'dul zhing rgyal po'i khab tu phyin to// bram ze des bsams pa/ bdag gis ci'i phyir rtsa ba spangs te yal ga dang / 'dab ma dang / lo ma la nyug par bya/ rgol ba gang dag dang / mkhas par bgrang ba gang ji snyed pa de dag thams cad kyang rgyal po dang nye ba yin gyis/ bdag kyang rgyal po'i gan du 'gro'o snyam nas bram ze de rgyal po gzugs can snying po ga la ba der song ste phyin nas rgyal po gzugs can snying po la rgyal ba dang tshe spel ba byas te phyogs gcig tu 'dug go/ / phyogs gcig tu 'dug nas rgyal po gzugs can snying po la 'di skad ces smras so// lha bdag la bla ma las yi ge nyung shas shig blangs pa mchis te/ de'i slad du lha'i spyan sngar rgol ba dag dang lhan cig bka' mchid rnam par gtan la dbab par 'tshal lo// rgyal pos blon po rnams la smras pa/ shes ldan dag nga'i yul na bram ze 'di dang lhan cig gtam rnam par gtan la 'bebs par byed pa'i rgol ba 'ga' yod dam/ blon po rnams kyis smras pa/ lha grong na la da na bram ze gnas len gyi bu zhes bgyi ba rig byed dang rig byed kyi yan lag gi pha rol tu mchis pa zhugs lta bu'i shes pas rang gi smra ba gsal bar bgyid/ gzhan gyi smra ba tshar gcod par rngo thog pa zhig mchis te/ des bstan bcos gnas len gyi bu zhes bgyi ba nye bar sbyar to// mkhan po gnas len gyi bu de bos shig/ lha bod par bgyi'o zhes de dag gis de bos nas de rgyal po gzugs can snying po ga la ba der song ste phyin nas rgyal po gzugs can snying po la rgyal ba dang tshe spel ba byas te phyogs gcig tu 'dug pa dang / blon po rnams kyis smras pa/ lha mkhan po de 'di lags so// rgyal pos 'ongs pa legs so zhes bya ba'i tshig gis kun du spyad de smras pa/ mkhan po khyod kho bo'i mdun du bram ze 'di dang lhan cig gtam rnam par gtan la dbab par byed nus sam/ gnas len gyi bus smras pa/ bdag gis rngo thog pas/ rgyal po dgyes par bgyi'o// rgyal pos blon po rnams la bsgo ba/ shes ldan dag rgol ba'i dkyil 'khor shoms shig/ phyogs dang gzhan gyi phyogs dag rnam par zhog shig/