| Wylie | e-texts produced with ocr Programm |
རྒྱ་གར་སྐད་དུ། ཤྲཱི་ཏད་ཏཱ་པྲ་དཱི་པ་ནཱ་མ་མ་ཧཱ་ཡོ་གི་ནཱི་ཏནྟྲ་རཱ་ཛ། བོད་སྐད་དུ། དཔལ་དེ་ཁོ་ན་ཉིད་ཀྱི་སྒྲོན་མ་ཞེས་བྱ་བ་རྣལ་འབྱོར་ཆེན་མོའི་རྒྱུད་ཀྱི་རྒྱལ་པོ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེ་དཔའ་བོ་ཆེན་པོ་དང་དཔའ་མོའི་དབང་ཕྱུག་མས་ཡང་དག་པར་བསྐོར་ནས་ཤེས་རབ་ཀྱི་བྷ་ག་ལ་བཞུགས་སོ། ། དེར་བཅོམ་ལྡན་འདས་མ་རྡོ་རྗེ་དབྱིངས་ཀྱི་དབང་ཕྱུག་མས་ལེགས་དགྱེས་ཆེན་པོའི་རོལ་པས་སྒེག་པས་ཉེ་བར་ལོངས་སྤྱོད་པ་དང་། མ་མཆུའི་བདུད་རྩེརྩིའི་བཏུང་བས་བཅོམ་ལྡན་འདས་མཉེས་པར་བྱས་ཏེ། ཁ་སྦྱོར་གྱི་ཐབས་ཀྱི་སྦྱོར་བ་ལས་ལངས་ནས་རི་རབ་ཀྱི་ཉི་རྡུལ་གྱི་གྲངས་ཀྱི་རྣལ་འབྱོར་མ་དང་ལྷན་ཅིག་པས་ལན་གསུམ་དུ་བསྐོར་བ་བྱས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་འདི་སྐད་ཅེས་གསོལ་ཏོ། ། བཅོམ་ལྡན་ཡེ་ཤེས་ཟླ་བར་གྲགས།། ལྟེ་བའི་ཀུ་མུད་ཁ་འབྱེད་པ།། གང་ཞིག་བདག་གིས་ཞུ་བ་ཀུན།། མངའ་བདག་ཆེན་པོས་བདག་ལ་གསུངས། ། དཔལ་ལྡན་བླ་ན་མེད་པའི་རྒྱུད།། རྣལ་འབྱོར་མ་ཞེས་རབ་གྲགས་པ།། ཨེ་ཝཾ་མ་ཡཱ་ལ་སོགས་སྒྲའི།། དོན་ནི་ཇི་ལྟ་བུར་ནི་བརྗོད།། བཅོམ་ལྡན་འདས་ཀྱིས་བཀའ་སྩལ་པ། ཉོན་ཅིག་ལྷ་མོ་སྤྱན་བཟང་རིང་།། ཁྱོད་ཀྱིས་ང་ལ་གང་ཞུས་པ།། ཨེ་ཝཾ་མ་ཡཱ་སོགས་སྒྲ་ཡིས།། ཁམས་གསུམ་འགྲོ་དང་མི་འགྲོ་བཅས།། ཤེས་རབ་ཐབས་ཀྱི་རང་བཞིན་གྱིས།། ཐམས་ཅད་རྒྱས་བཏབ་གཞན་གྱིས་མིན། ། དེ་ཁོ་ན་ཉིད་སྒྲོན་མར་གྲགས།། དྲི་མེད་རྫོགས་པའི་འབྲས་བུའི་གཟུགས།། ཨེ་ཝཾ་མ་ཡཱ་དེ་ཉིད་གསུམ།། ཐོག་མར་བདག་བཅས་པ་དང་ནི།། རང་བཞིན་བཞི་ཡི་བྱེ་བྲག་ཏུ། ། དོན་དམ་པར་ནི་ཤེས་པར་བྱ།། ཐོས་པའི་དོན་ནི་ཟླ་བ་བདེ།། དེ་ནི་ནམ་མཁའ་བཞིན་དུ་མཆོག། གཅིག་ཅེས་བྱ་བ་གཞན་མཆོག་རབ།། སྲིད་དང་མྱ་ངན་འདས་པ་སྤངས།། དུས་ནི་ཕྱག་རྒྱ་ཆེན་པོ་སྟེ། ། བསྐྱེད་པ་དང་ནི་རྫོགས་དང་བྲལ།། བཅོམ་ལྡན་འདས་ནི་མཐའ་ཞེས་བྱ།། རང་དགའ་ཉམས་སུ་མྱོང་བའི་དངོས།། ཐམས་ཅད་ཡེ་ཤེས་གསུམ་སྟོང་ཉིད།། དེ་ཉིད་དེ་ཉིད་ཀྱིས་ནི་སྤངས།། དེ་བཞིན་། གཤེགས་པ་རྣམ་འབྱེད་གྲགས།། དང་པོའི་གནས་ནི་རབ་གྲུབ་བྱེད།། སྐུ་ནི་དགའ་བའི་གཟུགས་སུ་གྲགས།། དབང་པོ་གཉིས་བྱུང་དང་བྲལ་བ།། གསུང་ནི་མངོན་པར་དགའ་ཞེས་བྱ།། དམ་ཚིག་ལས་བྱུང་གིས་ནི་སྤངས། ། ཐུགས་ནི་དགའ་བྲལ་དགའ་ཞེས་བྱ།། ཡེ་ཤེས་ལས་བྱུང་བ་དེ་དང་བྲལ།། རྡོ་རྗེ་ལྷན་སྐྱེས་ཞེས་སུ་བསྟན།། རང་བཞིན་གྱིས་ནི་སྤངས་པའོ།། ལྷ་མོ་དཔལ་ཆེན་ཉི་མ་སྐྱེས།། ཞུ་བ་དགའ་བྲལ་དང་བྲལ་ལོ། ། དཔའ་མོའི་དབང་ཕྱུག་མ་བདེ་རྟེན།། དང་པོའི་བདུད་རྩི་ལས་སྐྱེས་སོ།། ཡན་ལག་ཀུན་གྱིས་ཡང་དག་བསྐོར།། ཁྱབ་པ་སྲོག་གི་པདྨ་བཞིན།། ཤེས་རབ་ཚངས་པའི་སྒོ་ལྔའི་ཁྱིམ། ། ཚངས་པའི་ཡེ་ཤེས་འཛིན་ཕྱིར་རོ།། བྷ་ག་དངོས་པོ་འཇིག་པ་ཡིས།། ཡང་ན་ལོངས་སྤྱོད་མྱོང་བས་སོ།། བཞུགས་པ་རང་གི་ངོ་བོ་ལ།། གནས་པ་ཡང་ན་གཤེགས་པའོ།། དེ་ལྟ་བུ་ནི་དོན་དམ་པར་འདི་སྐད་བདག་ལ་སོགས་པར་བཤད། ། ཐམས་ཅད་རྣལ་འབྱོར་རྒྱུད་དུ་སྨྲས།། དེ་བཞིན་རྣལ་འབྱོར་བླ་མར་ཡང་།། ངེས་དང་དྲང་དོན་བྱེ་བྲག་ཏུ།། ཨེ་ཝཾ་མ་ཡཱ་ལ་སོགས་གནས།། རྒྱུད་ཤེས་པ་ཡི་དོན་ཕྱིར་ཏེ།། གཉིས་སུ་དབྱེ་བའི་རྒྱུད་རབ་བསྟན། ། འབྲས་བུ་ཡེ་ཤེས་ཆེན་པོའི་རོ།། རང་གིས་ཉམས་མྱོང་ངོ་བོ་ཉིད།། རང་རིག་རང་གིས་མི་རྙེད་པས།། རྟོག་པ་ཐམས་ཅད་རྣམ་པར་སྤངས།། ལྷ་མེས་གསོལ་པ། བཅོམ་ལྡན་ཡེ་ཤེས་རྒྱལ་པོ་ཉིད། ། ལོག་པའི་ཡེ་ཤེས་མུན་འཇོམས་པ།། དེ་ཉིད་ཉི་ཤུ་གཉིས་བདག་ཉིད།། གང་ཞིག་ཡེ་ཤེས་ཐིག་ལེར་གསུངས།། དེ་ལ་ཡང་ནི་ངེས་པའི་དོན།། མཆོག་གི་དབང་ཕྱུག་བདག་ལ་གསུངས།། བཅོམ་ལྡན་འདས་ཀྱིས་བཀའ་སྩལ་པ། ། གང་ཞིག་དེ་ཉིད་ངེས་དོན་དུ།། ཞལ་བཟང་དེ་ནི་གསང་བའོ།། ཁྱོད་ཀྱིས་ངོར་བྱས་བདག་གིས་བཤད།། དེ་ལྟ་མིན་ན་སྦས་པའོ།། ཨེ་ཝཾ་རྣམ་པའི་དབུས་སུ་ནི།། གང་ཞིག་དྲུག་ཅུ་རྩ་བཞིའི་འདབ་མའི་དབྱིབས་ཀྱི་རྩའི་འཁོར་ལོ་དེ་ནི་རྣམ་པ་དང་བཅས་པའི་རྣམ་པར་ཤེས་པའོ། ། དེའི་ནང་དུ་གང་དུ་རྩ་སུམ་ཅུ་རྩ་གཉིས་ཀྱི་བདག་ཉིད་ཨུཏྤ་ལའི་རྣམ་པའི་འཁོར་ལོ་དེ་ནི་མཐའ་སྟེ། དེ་ལ་གང་ཞིག་ཟུར་བརྒྱད་པའི་རྣམ་པའི་ལྟེ་བ་དེ་ནི་སྣང་བའོ། ། གང་ཞིག་ལྟེ་བའི་དབུས་ཡངས་པ་དེ་ནི་ནམ་མཁའ་འོ།། དེར་ནི་ལྔ་གཉིས་ནས་བཟུང་སྟེ། བཅོ་ལྔའི་བར་གྱི་ས་འམ། དབང་ཕྱུག་གི་མངའ་བདག་བཞུགས་སོ། དེར་གང་ཞིག་དེ་ཁོ་ན་ཉིད་གསུམ་གྱི་བདག་ཉིད་དེ་ནི་ལན་གསུམ་འབབ་པའི་ཕུང་པོའི་རྣམ་པར་ཤེས་པ་སེམས་དང་སེམས་ལས་བྱུང་བ་དང་། མ་རིག་པའི་གཟུགས་ཀྱིས་གསུམ་དུ་དབྱེ་བ་ཟུར་དང་པོ་ལ་ཐུན་ཚོད་གཅིག་གི་བར་དུ་འབར་བའོ། ། གང་ཞིག་སྲོག་གི་དབྱིག་པ་དེ་ནི་ལུ་གུ་རྒྱུད་ཀྱི་རྣམ་པའི་མདུད་པ་སུམ་ཅུ་རྩ་གཉིས་སུ་སྒོམ་པ་དང་། ཕྲ་མོའི་ཐིག་ལེ་རོ་གཅིག་པའི་གཟུགས་ཀྱིས་དབྱིན་པའི་བདུད་རྩི་ཟུར་གཉིས་པ་ལ་ཐུན་ཚོད་གཉིས་ཀྱི་བར་དུ་ཞུ་བའོ། ། དྲུག་པོ་དེ་ནི་བསྐྱེད་པ་དང་རྫོགས་པའི་གྲགས་པ་དགའ་བ་དྲུག་ཟུར་གསུམ་པ་ལ་ཐུན་ཚོད་གསུམ་གྱི་བར་དུ་འཛག་པའོ།། གང་ཞིག་ཐིག་ལེ་ཤར་བ་དང་། ནུབ་པ་དེ་ནི་ཐིམ་པ་དང་ལོངས་སྤྱོད་དུ་གྲགས་པའི་སྲོག་དེ་ནི་ཟུར་བཞི་པ་ལ་ཐུན་ཚོད་བཞིའི་བར་དུ་འབར་བའོ།། གང་ཞིག་འཕོ་བའི་སྦྱོར་བ་དེ་ནི་སྟེང་དང་འོག་གི་འདབ་མ་ཡོད་པར་བྱང་ཆུབ་ཀྱི་སེམས་འདུས་པའི་དབང་ནི་ཟུར་ལྔ་པ་ལ་ཐུན་ཚོད་ལྔའི་བར་དུ་ཞུ་བའོ། ། གང་ཞིག་རྩའི་འཁོར་ལོ་འབྱུང་བ་དེ་ནི་ཡན་ལག་ཐམས་ཅད་ལ་བདུད་རྩི་རྒྱས་པ་ཟུར་དྲུག་པ་ལ་ཐུན་ཚོད་དྲུག་གི་བར་དུ་འཛག་པའོ།། གང་ཞིག་དབང་གི་རིམ་པ་དེ་ནི་གཅིག་ཉིད་སྲོག་གི་ཁ་རུ་སྲོག་ལ་འབབ་པ་དང་། འཕུར་བ་དང་། ཁྱབ་པ་དེའང་ཟུར་བདུན་པ་ལ་ཐུན་ཚོད་བདུན་པའི་བར་དུ་འབར་བའོ།། གང་ཞིག་སྲུང་བའི་འཁོར་ལོ་དེ་ནི་མཐེའུ་ཆུང་གི་མདུད་པའི་ནང་དུ་བདུད་རྩི་ལ་བསྐོར་བ་ཟུར་བརྒྱད་པ་ལ་ཐུན་ཚོད་བརྒྱད་ཀྱི་བར་དུ་ཞུ་བའོ། ། དེ་དག་ནི་གཡོན་དུ་བསྐོར་བའི་སྲོག་གི་རླུང་ལ་ཞོན་པ་ཉི་མ་སྐྱེ་བ་ལ་མཚན་མོ་དང་། ཉིན་མོའི་བར་དུ་སུམ་ཅུ་རྩ་གཉིས་ཀྱི་ཆ་རྒྱས་པར་འགྱུར་རོ། ། སུམ་ཅུ་རྩ་གཉིས་ཀྱི་ནང་ན་བཅུ་དྲུག་བྲལ་བའི་མཚན་ཉིད་མི་གསལ་བ་དང་། དགའ་བའི་མཚན་ཉིད་བཅུ་དྲུག་གསལ་བ་དེའི་དོན་གྱི་ཕྱིར་དགའ་བྲལ་གྱི་དགའ་བའི་མཚན་ཉིད་ཨ་ལིའི་རང་གི་ངོ་བོ་། ཟླ་བའོ།། ཕྱི་དང་ཕྱི་མའི་དོན་རྣམས་ཀྱིས་ནི་ནང་དང་ནང་གི་དོན་གནས་པས་ཤེས་པར་བྱའོ།། དེའང་ཕྱིའི་ཆོས་ཀྱི་གྲངས་ཀྱིས་སོ།། ནང་སྲོག་གི་རླུང་གི་གྲངས་ཀྱིས་སོ།། ལྷ་མོས་གསོལ་པ། སུམ་ཅུ་རྩ་གཉིས་ཀྱི་ཆུ་སྐྱེས་ཀྱི་ཨུཏྤ་ལའི་རྣམ་པ་ལ་བདེ་བ་ཆེན་པོའི་ཀུན་ཏུ་སྤྱོད་པ་ངེས་པའི་དོན་གྱིས་གནས་པ་དེ་མཆོག་གི་དབང་ཕྱུག་གི་བཀའ་དྲིན་བསྒྲུབ་ཏུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཉོན་ཅིག་ལྔ་མོ་སྐལ་ལྡན་མོ། ། གསང་བ་ཆེན་པོ་ཡེ་ཤེས་མཆོག། གང་ཞིག་ཤེས་པ་ཙམ་གྱིས་ནི།། ཐམས་ཅད་ས་ཡི་དབང་ཕྱུག་འགྱུར།། གང་ཞིག་སྙིང་པོའི་སྔགས་ནི་ཉིད།། དེ་ནི་བདག་ཉིད་བཅུ་དྲུག་བདེ།། ཀུན་རྫོབ་རི་བོང་ཅན་གྱི་འོད། ། དོན་དམ་པར་ནི་ནམ་མཁའ་བཞིན།། གང་ཞིག་སྐུ་བརྒྱད་མཆོག་སྦྱིན་ནི།། དེ་ནི་མཚན་མོ་བརྒྱད་མཆོག་གོ། ལྷ་མོ་ཡང་ན་ཡེ་ཤེས་བརྒྱད།། མཚན་མོ་ཉིན་མོ་གཉིས་ལས་འབྱུང་།། གང་ཞིག་ཐིམ་དང་ལོངས་སྤྱོད་དབང་། ། དེ་ནི་ངེས་པར་བསྐྱེད་རིམ་མོ།། ལྷ་མོ་བསྐྱེད་རིམ་གསལ་བ་སྟེ།། རིམ་ལས་བྱུང་བའི་བདེ་བ་ཆེ།། སྐལ་ལྡན་མོ་གང་ཡེ་ཤེས་སྐུ།། ད་ནི་རིམ་སོགས་ཡན་ལག་སྤངས།། ཡན་ལག་བཞིར་དབྱེ་དྲུག་དབྱེ་འམ། ། བསྐྱེད་དང་རྫོགས་པའི་རིམ་པའོ།། ལྷ་མོ་གང་ཞིག་གསང་བའི་སྒྲ།། དེ་ནི་ཡེ་ཤེས་གསུམ་དང་བྲལ།། ཡང་ན་གཞན་མིན་བདག་ཉིད་གསུམ།། མཚམས་ཀྱི་ཡེ་ཤེས་ཡོད་པའི་ཕྱིར། ། ལྷ་མོ་གང་ཞིག་དམ་ཚིག་ནི།། སྲུང་བ་ལ་སོགས་ངེས་པར་རོ།། དེ་ནི་བདེ་བ་དབུས་གནས་སུ།། གཟུང་བྱ་ཡང་ན་གང་ནང་དུ།། གང་ཞིག་སྦྱིན་སྲེག་དོན་དམ་པར།། དེ་ནི་ཧ་ཞེས་གློ་བུར་ཏེ།། ཆར་ཡང་དབུས་ཡོད་ཐིག་ལེ་ནི། ། གང་དུ་སྐད་ཅིག་གིས་ཐིམ་མོ།། གང་ཞིག་སྲུབ་དང་བསྲུབ་ཐབས་ནི།། དེ་ནི་ཐོག་མའི་དགའ་བ་སྤངས།། ལྷ་མོ་དེ་བཞིན་ཐ་མའང་མིན།། ཐོག་མ་ཐ་མ་གཉིས་དང་བྲལ། ། སྐལ་ལྡན་མོ་གང་སྔགས་ཀྱི་བཟླས།། དེ་ནི་སྲིད་པ་འདས་པའི་ཡིད།། མྱ་ངན་འདས་པའི་གནས་ཀྱང་མིན།། གཉིས་ཀྱི་ངོ་བོ་གཉིས་དང་བྲལ།། གང་ཞིག་གནས་ནི་བརྒྱད་དུ་བསྟན།། དེ་ནི་ཉི་སྐྱེས་མ་རྒྱས་པ། ། གནས་ཀྱི་དབང་གིས་ཤར་བ་ལ།། ཉེ་བས་མྱུར་དུ་རྒྱས་པའོ།། གང་ཞིག་དགའ་བ་ལ་སོགས་རིམ།། དེ་ནི་རིམ་པ་གཉིས་སུ་དབྱེ།། རྣམ་བཅས་ལས་ནི་དང་པོ་པ།། རྣམ་བྲལ་བཅུ་ཡི་དབང་ཕྱུག་གོ། གང་ཞིག་དུར་ཁྲོད་རྣམ་རྟོག་བྲལ། ། དབུགས་དབྱུང་ལ་སོགས་རྣམ་པར་སྤངས།། བྱང་ཆུབ་ཀྱི་ནི་སེམས་རོ་ལ།། རྣམ་པར་ཞུ་བ་དམ་ཚིག་ཕྱིར།། ལྷ་མོ་གང་ཞིག་ཆུ་ཡི་ངོགས།། དེ་ནི་རྟོག་མེད་མ་ཡི་མཐར།། ཡང་ནི་དེ་རུ་སྲོག་གི་རྩ། ། བདེ་བའི་ཆུ་བོ་འབབ་པའི་ཕྱིར།། གང་ཞིག་སྣང་བ་སོགས་ཡེ་ཤེས།། དེ་ནི་དགའ་བ་དང་ལྡན་ཡིད།། ས་དང་ཆུ་དང་འོད་ཀྱི་གཟུགས།། དེ་བཞིན་རླུང་གི་ངོ་བོ་དང་།། གང་ཞིག་དངོས་པོ་རྟེན་ལ་སོགས། ། དེ་ནི་བདེ་བའི་དངོས་པོར་རིག། རང་གི་རྣམ་པའི་བྱེ་བྲག་གམ།། རྣམ་པར་དཔྱོད་པས་ངེས་པར་སྤྱོད།། ལྷ་མོ་གང་ཞིག་དུར་ཁྲོད་བརྒྱད།། དེ་ནི་བདེ་བ་ལ་ཐིམ་ཞེས།། རྣམ་པར་རྟོག་པ་འཛིན་པའི་སྐུ།། དེ་ལ་ཐིམ་ཞིང་ཐིམ་པའོ།། གང་ཞིག་ཤིང་ལ་སོགས་པའི་དོན།། དེ་ནི་དང་པོའི་བདུད་རྩི་རྒྱུ།། རྩ་དེ་རྟེན་པའི་གཟུགས་སུ་གྲགས།། ཐམས་ཅད་རྣམ་པའི་བདེ་སྦྱིན་མ།། གང་རླུང་དེ་ཉིད་སྙིང་པོའི་དོན།། དེ་ནི་རིན་ཆེན་གདུ་བུའི་བདེ། ། འཛུམ་པ་ཡིས་ནི་ཡང་དག་པར།། པདྨའི་ཞལ་དེ་མྱོང་བའོ།། ལྷ་མོ་གང་ཞིག་འཛུམ་ལ་སོགས།། དེ་ནི་གྱེན་དུ་གཟུང་བའི་རླུང་།། ཡང་ནི་རྩ་ཡི་ཀུན་སྤྱོད་ལས།། འགྲོ་བའི་བདུད་རྩི་འཛིན་པའོ། ། གང་ཞིག་ཉེར་འགྲོའི་བསམ་གཏན་སྦྱོར།། དེ་ནི་ཟླ་བ་གྱེན་དུ་བྱེད།། ཡང་ན་ཚངས་བཞི་རྣམ་དབྱེ་བྱས།། རྣམ་པར་ཤེས་པ་ལེགས་གཤེགས་གསོལ།། གང་ཉིད་ཡེ་ཤེས་ཐིག་ལེ་ནི།། དེ་ན་དྲུག་ཕྱེད་གསུམ་དང་བྲལ། ། བཅུ་དང་ལྔ་ཡི་ས་རྣམས་ནི།། དབང་ཕྱུག་འཕོ་མེད་སྐྱེ་མེད་དོ།། གང་ཞིག་བདག་གི་རང་ངོ་མཆོག། དེ་ནི་ངེས་པར་བཞི་པའི་འབྲས།། ཡང་ན་ཏོར་ཡ་ཉམས་སུ་མྱོང་།། འབྲས་བུའི། སྒྲས་ནི་བརྗོད་པའོ།། གང་ཞིག་ས་ཡི་དབང་བྱེད་པ།། དེ་ནི་དེ་ཉིད་དྲུག་རང་བཞིན།། དེ་ཉིད་དྲུག་ལས་དེ་ཉིད་གསུམ།། དེ་ཉིད་གསུམ་ལས་རང་བཞིན་གཅིག། གང་ཞིག་དེ་བཞིན་གཤེགས་པའི་སྐུ།། དེ་ནི་མྱ་ངན་འདས་མཚན་ཉིད། ། ཡང་ན་དགའ་བ་དང་ནི་བྲལ།། དགའ་བྲལ་དགའ་མིན་རང་ངོ་བོ།། ལྷ་མོ་གང་ཞིག་རྒྱུད་བསྟན་པ།། དེ་ནི་བདེ་བ་ཤིན་ཏུ་འཕེལ།། བདེ་དང་བྲལ་བའི་བདེ་བ་ནི།། ཡང་ན་དེ་ཉིད་རྙེད་པའོ། ། གང་ཞིག་ཕྱག་རྒྱ་ཆེ་རང་བཞིན།། དེ་ནི་ཐིམ་སོགས་ཡིད་ལས་འདས།། རང་གིས་ཉམས་མྱོང་རང་ངོ་བོ།། བསམ་གཏན་འཛིན་པ་སྤངས་པའོ།། གང་ཞིག་གསང་བ་དོན་དམ་པར།། དེ་ནི་དགའ། བ་དགའ་དང་བྲལ།། ཡང་ནི་ནང་གི་རེག་བྱ་སྟེ།། རེག་བྱ་དང་བྲལ་རྟོག་པ་མེད།། གང་ཞིག་བསྐུལ་བའི་མཆོད་པའི་དོན།། དེ་ནི་དྲི་མེད་བདེ་བ་འབྱུང་།། འདས་པ་ལས་ནི་ཡང་སྐྱེ་བ།། སྐྱེ་བ་དེ་ལ་འཕེལ་བའོ།། ལྷ་མོ་ཤེས་རབ་ཡེ་ཤེས་གང་།། དེ་ནི་ཁ་ལ་སྙིང་ཁར་བདེ།། ཁ་ནི་རྟག་ཏུ་ཤེས་རབ་ཡིན།། སྙིང་ཁ་ཡེ་ཤེས་བརྗོད་པའོ།། གང་ཞིག་གསང་བའི་དཀྱིལ་འཁོར་འཁོར།། དེ་ནི་ཁུ་བ་འཕོ་མེད་དགེ། ཡང་ན་བདེ་ཆེན་རང་ངོ་བོ།། བདེ་བའི་རྣམ་པར་རྟོག་དང་བྲལ།། ལྷ་མོ་ཚིགས་རྒྱས་གང་ཞིག་ནི།། བྱ་གདོང་མ་དེ་ཁོང་དུ་ཆུད།། ཡང་ན་ཚིགས་ནི་ཞུ་མེད་ཁུ།། དགའ་མོ་རྒྱས་པ་མཆོག་ཡིན་ནོ།། འབྱུང་བ་སྲུང་དོན་གཏོར་མ་གང་།། དེ་ནི་སྲོག་ཆགས་བསད་པའོ།། བཅད་པ་དེ་ནི་མཆོག་གི་གནས།། འགྲོ་བ་འགོག་པར་བྱེད་པའོ།། དེ་དག་ནི་མཆོག་གི་གསང་བ་ཆེན་པོའོ་གསང་ཆེན་བཅོམ་ལྡན་འདས་མ་བཞི་བཅུའི་བདག་ཉིད་ཀྱི་དེ་ཁོ་ན་ཉིད་བདེ་བ་ཆེན་པོའི་རྒྱལ་པོའི་བདུད་རྩིའི་གཏེར་ལ་ངེས་པའི་དོན་ཏོ། ། ལྷ་མོས་གསོལ་པ། བཞི་བཅུའི་བདག་ཉིད་དེ་ཉིད་ནི།། ཤིན་ཏུ་རེག་མེད་གཟུང་བར་དཀའ། ། ས་ཡི་དབང་ཕྱུག་དུ་ཙམ་ཞིག། མཆོག་གི་དབང་ཕྱུག་གིས་མཁྱེན་ལགས།། བཅོམ་ལྡན་འདས་ཀྱིས་བཀའ་སྩལ་པ།། སྣ་ཚོགས་རྙེད་པ་སུམ་ཅུ་དྲུག། བཅུ་གཅིག་ས་ཡི་བདག་པོའོ།། དགའ་བ་རྙེད་པ་སུམ་ཅུ་བདུན། ། བཅུ་གཉིས་ས་ཡི་བདག་པོར་བརྗོད།། མཆོག་དགའ་རྙེད་པ་སུམ་ཅུ་བརྒྱད།། དེ་ནི་བཅུ་གསུམ་པ་ཡིས།། སུམ་ཅུ་དགུ་ལྷག་མཐར་ཐུག་པ།། ས་ནི་བཅུ་བཞི་རྙེད་པའོ།། བཞིབཅུ་དེ་ནི་ལྷན་སྐྱེས་སོ། ། བཅོ་ལྔ་རྙེད་པའི་མངའ་བདག་གོ། གང་ཞིག་བཅུ་དྲུག་པ་ཡིས།། བརྗོད་དུ་མེད་པ་ནམ་མཁའ་བཞིན།། དེ་ལ་དབང་ཕྱུག་མཆོག་གི་མཁའ།། ཐམས་ཅད་མཁྱེན་པ་རྙེད་དཀའ་བ།། ཟད་མེད་འཕོ་མེད་ཞི་བ་སྟེ།། སྐྱེ་མེད་རྨད་བྱུང་བས་རྨད་བྱུང་།། ཀྱེ་བཅོམ་ལྡན་འདས་སུམ་ཅུ་རྩ་གཉིས་ཀྱི་བདག་ཉིད་བདེ་བ་ཆེན་པོའི་བདུད་རྩིའི་རྒྱལ་པོའི་བདུད་རྩིའི་གཏེར་དེ་ཁོ་ན་ཉིད་དེ་ལ་ཀུན་ཏུ་སྤྱོད་པའི་དུས་ནི་གང་ལགས། འདུས་པ་ནི་ཅི་ཞིག་ལགས། ཉམས་སུ་མྱོང་བ་ནི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། སུམ་ཅུ་རྩ་གཉིས་ཀྱི་བདག་ཉིད་ལ་སུམ་ཅུ་རྩ་གཉིས་ཀྱི་ཆུ་ཚོད་ཀྱི་བར་དུ་སྲོག་དང་རྩོལ་བའི་རླུང་གཉིས་ཤར་བ་ནི་ཀུན་ཏུ་སྤྱོད་པའོ། ། རྩོལ་བའི་རླུང་འབྱུང་བའི་དུས་སུ་གང་ཞིག་ཡན་ལག་ཐམས་ཅད་ལ་ཁྱབ་པའི་སྲོག་དེ་ནི་གཡོན་བསྐོར་དུ་འབྱུང་བ་ཡིས། ཨུཏྤ་ལའི་རྣམ་པ་འཛུམ་ཞིང་ནང་གི་ལྟེ་བའི་སྙིང་པོ་རྩ་བའི་སྡོང་བུས་འཇུག་པའོ། ། འཇུག་པ་ཙམ་གྱིས་ཟུར་བརྒྱད་པའི་ནང་ན་ཡོད་པའི་བདེ་བ་ཆེན་པོའི་སྲོག་གི་རྒྱལ་པོ་ལ་གང་ཞིག་རོ་གཅིག་པའི་མཚན་ཉིད་དེ་ནི་འདུས་པའོ།། དེའི་དུས་སུ་གང་ཞིག་བདག་དང་གཞན་གྱི་བྱེ་བྲག་མེད་པ་གཉིས་སུ་མེད་པའི་སྤྲོས་པ་དང་བྲལ་བའི་ཡེ་ཤེས་ཀྱིས་ཐམས་ཅད་གཟིགས་པ་དེ་ནི་ཉམས་སུ་མྱོང་བའོ། ། ལྷ་མོས་གསོལ་པ། གང་ཞིག་ཉམས་མྱོང་ལས་རྙེད་དེ།། མངའ་བདག་དེ་ནི་ཇི་ལྟར་ལགས།། ཉམས་སུ་མྱོང་བས་གང་རྙེད་པ།། དེ་ཉིད་མདོར་བསྡུས་བཀའ་སྩོལ་ཅིག། བཅོམ་ལྡན་འདས་ཀྱིས་བཀའ་སྩལ་པ།། དྲིས་པ་དེ་ནི་རྨད་བྱུང་མཆོག། ཉོན་ཅིག་ལྷ་མོ་སྤྱན་བཟང་རིང་། ། ཉམས་སུ་མྱོང་བས་གང་རྙེད་པ།། དགའ་བའི་དབང་མོ་དེ་བརྗོད་མེད།། བླ་མའི་ཞལ་ནས་ཉམས་སུ་མྱོང་།། དབང་བསྐུར་ལས་ནི་རྙེད་པའོ།། ལྷ་མོས་གསོལ་པ། དབང་བསྐུར་བ་ནི་དུ་མ་ཞིག། རྒྱུད་རྒྱུང་ནང་དུ་རབ་ཏུ་གསལ།། འདི་རུ་བྱེ་བྲག་ཅི་འདྲ་བ།། སུ་ལ་སྦྱིན་པར་བགྱི་བ་ལགས།། བཅོམ་ལྡན་འདས་ཀྱིས་བཀའ་སྩལ་པ།། དགའ་བའི་འབྲས་བུ་བྱེ་བྲག་ཏུ།། དབང་ནི་རེ་ཞིག་བཞི་རུང་དབྱེ། ། དང་པོ་དགའ་བ་དང་ལྡན་པ།། ལས་དང་པོ་ལ་སྦྱིན་པར་བྱ།། གཉིས་པ་མཆོག་དགའ་དང་ལྡན་པ།། སྣང་བ་གསུམ་ནི་ཐོབ་པ་ལ།། དགའ་བ་གསུམ་པ་དང་ལྡན་པ།། ཆོས་ཀྱི་སྤྲིན་རྙེད་ངེས་པས་སོ། ། ཀུན་ཏུ་འོད་ས་ཞེས་བྱ་བ།། རྙེད་པ་བཞི་ལ་སྦྱིན་པར་བྱ།། ལྷ་མོས་གསོལ་པ། ཀྱེ་བཅོམ་ལྡན་འདས་སྣང་བ་ལ་སོགས་པ་དང་། ཆོས་ཀྱི་སྤྲིན་དང་། ཀུན་ཏུ་འོད་རྙེད་པ་ལ་དེ་ལྟ་བུའི་དབང་གི་རིམ་པ་ལགས་ན། ས་ལ་སོགས་པ་མ་རྙེད་པ་ལ་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། ས་ལ་སོགས་པ་མ་རྙེད་པ་རྣམས་ལ་ཐོག་མར་རང་གི་ངོ་བོས་སོ།། ས་ལ་སོགས་པ་རྙེད་པ་རྣམས་ལ་མཐར་ཐུག་པའི་རང་གི་ངོ་བོས་སོ། ། གང་གི་ཕྱིར་ཞེ་ན། དེ་རྣམས་ལ་བརྩོན་འགྲུས་ཀྱི་སྟོབས་ཀྱིས་ཤིན་ཏུ་བསོད་ནམས་ཀྱི་བྱིན་གྱིས་བརླབས་ཀྱིས་བྱ་བ་ལ་སོགས་པ་དང་བྲལ་བའི་ཡེ་ཤེས་ཆེན་པོ་མཐོང་བ་ཙམ་གྱིས་ཐོབ་བོ། ། ཇི་ལྟར་པདྨ་ཡོངས་སུ་སྨིན་པ་ཉི་མའི་འོད་ཀྱིས་རེག་པ་ཙམ་གྱིས་རྒྱས་སོ།། མ་སྨིན་པ་དེ་བཞིན་དུ་མ་ཡིན་ནོ།། ལྷ་མོས་གསོལ་པ། མ་སྨིན་པ་རྣམས་ལ་ཡོངས་སུ་སྨིན་པའི་དུས་གང་ལགས། བཅོམ་ལྡན་འདས་ཀྱིས་བཀའ་སྩལ་པ། སྦྱིན་སོགས་བསོད་ནམས་བསགས་པ་ཡིས།། མཆོག་གི་བླ་མས་གཏན་ལ་ཕབ།། སྐལ་ལྡན་མོ་དེ་སྨིན་པའི་དུས།། དེ་ལས་བླ་མེད་བྱང་ཆུབ་ནི། ། བླ་མེད་གནས་ནི་ཐོབ་པ་གང་།། ཕྱི་ནས་ཅི་ཡང་བསླབ་མི་དགོས།། བླ་མེད་ཡེ་ཤེས་ཆེན་པོའི་གནས།། འབད་མི་མལྔར་རིམ་པར་ཙམ་གྱིས། སྣ་ཚོགས་གཟུགས་ནི་མཐོང་བར་འགྱུར། ། དེ་བཞིན་བླ་མེད་འོད་ཀྱིས་ནི།། ཡེ་ཤེས་ཆེན་པོ་མཐོང་བར་འགྱུར།། ཡེ་ཤེས་ཆེན་པོ་སྐུ་དང་བྲལ།། གཉིས་སུ་མེད་པ་རམ་མཁའ་བཞིན།། ལུས་དང་ངག་དང་ཡིད་གཟུགས་མིན། ། སྒྲ་ལ་སོགས་པ་རྣམ་པར་སྤངས།། དཔེ་མེད་ནམ་མཁའ་དང་བྲལ་བ།། སྲིད་དང་མྱ་ངན་འདས་པ་སྤངས།། སྦོམ་དང་ཕྲ་ལ་སོགས་ལས་འདས།། ཆར་ཡང་ཐིག་ལེ་དང་བྲལ་བ། ཚུལ་དང་ཚུལ་ཙམ་མ་ཡིན་ཏེ། ། མཆོག་དང་གཞན་མཆོག་གནས་ལས་གྲོལ།། སྐྱེ་བ་མེད་དང་འཆི་མེད་པ།། རྨང་བྱུང་ཆེན་འདུ་ཤེས་སོ།། ལྷ་མོས་གསོལ་པ། ཀྱེ་བཅོམ་ལྡན་འདས་ཡེ་ཤེས་ཆེན་པོའི་དབང་ཕྱུག་བླ་ན་མེད་པའི་ཡང་དག་པའི་བྱང་ཆུབ་རྙེད་པ་ལ་ཡེ་ཤེས་ཆེན་པོ་བརྗོད་དུ་མེད་པའི་གནས་གའན་རྙེད་པ་ཡོད་དམ་ཅི། བཅོམ་ལྡན་འདས་ཀྱིས་བཀའ་སྩལ་པ། གྲངས་མེད་པའི་སངས་རྒྱས་རྣམས་ཀྱི་ཡུམ་ཁྱོད་ཅི་ལ་དེ་ལྟ་བུར་འདྲི། བརྗོད་དུ་མེད་པའི་ཡེ་ཤེས་ཆེན་པོ་ཁྱོད་ཀྱིས་ཅི་ཕྱིར་མི་ཤེས། དེ་ལྟར་ཡིན་ན་བདག་གི་རང་གི་ངོ་བོ་ཡང་དག་པར་ཁྱོད་ཀྱིས་མི་ཤེས་སོ།། ལྷ་མོས་གསོལ་པ། ཁྱོད་ཀྱི་ངོ་བོ་བདག་གིས་ཤེས།། འོན་ཀྱང་བདག་གིས་གཞན་ཞིག་ཞུས།། སེམས་ཅན་བྱང་ཆུབ་ལས་གཞན་ཅི།། མཆོག་གི་དབང་ཕྱུག་རྙེད་པ་འམ།། བཅོམ་ལྡན་འདས་ཀྱིས་བཀའ་སྩལ་པ། ། བྱང་ཆུབ་རྙེད་ལས་གཞན་ཅི་ཞིག། ཞལ་བཟང་མོ་དེ་རྙེད་ཡོད་དམ།། འོན་ཀྱང་དེ་ལ་མཐོང་བ་ཡོད།། ཚོལ་ལ་བདུད་རྩི་ཇི་བཞིན་ནོ།། ལྷ་མོས་གསོལ་པ། བཅོམ་ལྡན་དཔའ་བོའི་དཔའ་དབང་ཕྱུག། རང་བཞིན་ཡེ་ཤེས་སྦྱིན་པ་པོ།། བདག་གིས་གཞན་ཞིག་ཞུ་བ་བགྱིད།། དེ་ལ་བཀའ་དྲིན་བདག་ལ་སྩོལ།། དབང་གི་རིམ་པའི་ཡེ་ཤེས་གང་།། བཞི་པ་དེ་ལྟར་དེ་བཞིན་ནོ། ། དེ་ལ་རེ་ཞིག་ཇི་བཞིན་དོན།། རྡོ་རྗེ་འཛིན་པ་བདག་ལ་གསུངས།། བཅོམ་ལྡན་འདས་ཀྱིས་བཀའ་སྩལ་པ། བཞི་པ་དེ་ཉིད་ངོ་བོར་གྲགས།། དེ་ལྟར་ཡེ་ཤེས་འདུ་ཤེས་སོ།། དེ་བཞིན་ཡེ་ཤེས་ལས་བྱུང་ཞེས། ། ཡེ་ཤེས་ལས་བྱུང་ལྟེ་བར་བདེ།། ལྷ་མོ་ཡེ་ཤེས་ལ་ལ་ཡོད།། ཡེ་ཤེས་ལས་བྱུང་སྐེ་རུ་སྟེ།། སྐེ་རུ་ལོངས་སྤྱོད་ངོ་བོར་གྲགས།། སྙིང་ལ་རུ་ནི་དབང་ཞེས་བྱ།། ཐིམ་པ་ཁ་རུ་ཤེས་བྱ་སྟེ།། བསྐྱེད་པའི་རིམ་པ་ཡི་ནི་ཕྱོགས།། ཡང་ན་དེ་བཞིན་གྱི་ནི་སྒྲ།། ཇི་བཞིན་ཤེས་རབ་ལ་སྔར་ཐལ།། དེ་ལྟར་ཡེ་ཤེས་ལྟ་བ་ཡིས།། བཀུག་ནས་རང་གི་ཁ་ལ་བཀོད།། རང་གི་སྙིང་ཁའི་པད་གནས་སུ།། བྱས་ནས་ཉིད་ཀྱིས་ཉམས་སུ་མྱོང་།། དེ་ཡི་སྐད་ཅིག་ཡེ་ཤེས་བདེ།། སྤྲོས་པ་དང་བྲལ་རྟོག་མེད་པ།། སེམས་ཀྱིས་ཐམས་ཅད་མཐོང་ནས་སུ།། ནམ་མཁའ་བཞིན་དུ་བསམ་པར་བྱ།། དེ་ཡང་བསམ་པ་བོར་ནས་སུ། ། ཕྱི་ནས་བསམ་པ་ཅི་ཡང་མེད།། ཉིད་ནི་བདེ་ཆེན་ཡེ་ཤེས་ཏེ།། ནམ་མཁའ་ཟླ་བ་བཞིན་དུ་མཐོང་།། ལྷ་མོ་དེ་ནི་རྫོགས་པའི་རིམ།། དོན་དམ་པར་ནི་ཤེས་པར་བྱ།། ལྷ་མོས་གསོལ་པ།། བཅོམ་ལྡན་ཡེ་ཤེས་རིན་ཆེན་ཉིད།། འདོད་པ་ཐམས་ཅད་རབ་འགྲུབ་པ།། སྣང་བ་བཞི་ལ་གོ་རིམ་གནས།། མངའ་བདག་ཆེན་པོས་བཀའ་སྩོལ་ཅིག། བཅོམ་ལྡན་འདས་ཀྱིས་བཀའ་སྩལ་སྣང་བ་བཞིན་ལ་གོ་རིམ་གནས། ། སེམས་དང་སེམས་བྱུང་འདུ་ཤེས་སོ།། དེ་དག་ལས་ནི་མ་རིག་འབྱུང་།། མཚམས་ཀྱི་འདུ་ཤེས་མཚན་ཉིད་ཅན།། ཉིན་མོའི་རང་བཞིན་སེམས་ལས་འབྱུང་།། སེམས་ནི་མཚན་མོའི་ངོ་བོ་ཉིད། ། ཡང་དག་འོད་ནི་གསུམ་དང་བྲལ།། ལྷན་སྐྱེས་ཡེ་ཤེས་མཚན་ཉིད་དོ།། གང་ཚེ་ཚངས་པའི་ཚིགས་སུ་སེམས།། ལྷ་མོ་དེ་ཚེ་ཉིན་མོར་འགྱུར།། གང་ཚེ་དེ་ལས་སྲོག་འཕོ་བ་དེ་ཚེ་མཚན་མོ་འོག་ན་གནས། ། སྟེང་ཡང་མ་ཡིན་འོག་མ་མིན།། དེ་ཚེ་མཚམས་ཤེས་དྲན་པར་བྱ།། དེ་ཡང་མེ་ཡི་རང་བཞིན་གྲགས།། ཉི་མ་ལ་ནི་སྲོག་འཛིན་མ།། གང་གིས་ཉི་མ་ཡོད་པ་ནི།། སྣང་བ་ལས་ནི་ཤར་དུས་འགྱུར། ། སྣང་བ་ཟླ་བ་ཞེས་པར་བསྟན།། ཡོངས་སུ་ཞུ་བའི་བདུད་རྩི་གཡོ།། ལྷ་མོ་ཆེན་མོ་གཡོ་བའི་ཕྱིར།། དགའ་བྲལ་དགའ་བར་རབ་ཏུ་གྲགས།། གང་དུ་ཆད་པ་ལས་ནི་ཐིམ།། མཆོག་གི་དགའ་བ་ཤར་བའི་དུས།། དེ་ནི་སྣང་བ་དང་པོའི་དགའ།། དེ་ལས་མཆོག་ནི་གསལ་བར་འགྱུར།། གསང་ཕྱིར་སྣང་བ་མཆེད་པར་གྲགས།། ཞུ་མེད་གཡོ་མེད་སྐ་བའོ།། སྐ་བ་ལས་ནི་ཕྲ་མོའི་དངོས། ། བདེ་སྦྱིན་ཡང་ན་ཀུན་སྤྱོད་དོ།། ཀུན་སྤྱོད་ལས་ནི་ཐོབ་པ་ཡིན།། ཞལ་བཟང་མོ་ནི་སྣང་བས་སོ།། དེ་ནི་མཚམས་ཞེས་གྲགས་པ་སྟེ།། དབུས་ཀྱི་གནས་སུ་ཡོད་པའི་ཕྱིར།། དབུས་ཀྱི་གནས་ན་ཡོད་པ་ན། ། དེ་ཕྱིར་ཀུན་ཏུ་སྤྱོད་བྱེད་པའོ།། དབུས་ནི་དངོས་པོ་ཐམས་ཅད་ལ།། འདུས་པར་བྱེད་པ་དྲན་པའོ།། ཡང་ན་གང་དུ་མཚན་མོ་ནི།། མ་བྱུང་ཉི་མ་ནུབ་པའོ།། དེ་ནི་དབུས་རྒྱ་མཚམས་ཞེས་གྲགས། ། རང་བཞིན་དགའ་བ་སྦྱིན་བྱེད་མ།། དེ་ཉིད་སྣང་བ་ཐོབ་པ་ཡིན།། ཐམས་ཅད་སྐྱེ་བའི་རྒྱུ་ཡིན་ནོ།། གང་དུ་དབུས་མཚམས་སྐད་ཅིག་གིས།། བདེ་བའི་ཚོར་བ་མ་ཤེས་ན།། སྐལ་ལྡན་ལྷ་མོ་དེ་རུ་ནི། ། དགའ་བྲལ་གསལ་བར་འགྱུར་བའོ།། དེ་ཡི་ཉམས་སུ་མྱོང་ཤེས་པ།། སྐྱོན་ནི་ཅུང་ཟད་མི་བྱེད་དོ།། མི་ཤེས་པས་ནི་སྐལ་ལྡན་མོ།། རྩ་བ་དང་བཅས་མེད་པར་བྱེད།། རྩ་བ་སྣང་བ་ཞེས་བྱར་དྲན། ། ཁུ་བའི་གཟུགས་ནི་ཟླ་བའོ།། བདེ་བ་ཆེན་པོའི་བདུད་རྩིའི་གཏེར།། བསྲུབས་ལས་སྐྱེ་བ་ཡིན་པའི་ཕྱིར།། ལྷ་མོ་མེ་ཏོག་སྣང་བ་མཆེད།། དམར་བའི་ཕྱིར་ནི་ཉི་མར་བརྗོད།། བདེ་ཆེན་རྣམ་པར་སྨིན་པའི་ཕྱིར། ། དམར་བའི་གཟུགས་ནི་སྔར་འགྱུར་རོ།། འབྲས་བུ་ཐོབ་པའི་གྲགས་པ་སྟེ།། མཚན་དང་དཔེ་བྱད་དང་ལྡན་ནོ།། དངོས་དང་དངོས་མིན་བྲལ་བའི་ཕྱིར།། ཞལ་བཟང་མཚམས་ཀྱི་ཡེ་ཤེས་སོ། ། ཉིན་མོ་སྣང་བ་མཆེད་འཁོར་གྲགས།། མཚན་མོ་སྣང་བ་མྱ་ངན་འདས།། སྲིད་དང་མྱ་ངན་འདས་བྲལ་བ།། མཚམས་ནི་སྣང་བ་ཐོབ་པའོ།། དེ་ལྟ་བུ་ཡི་གསང་ཆེན་མཆོག། གང་དུ་ཡང་ནི་གསལ་མ་བྱས། ། སྐལ་ལྡན་ཁྱོད་ཀྱི་ངོར་བྱས་པས།། ཡེ་ཤེས་རིན་ཆེན་གསལ་བྱས་སོ།། ལྷ་མོས་གསོལ་པ། འབྲས་བུ་དེ་ཉིད་རིན་ཆེན་གང་།། མངའ་བདག་དེ་ནི་ཇི་ལྟར་རྙེད།། བཅོམ་ལྡན་འདས་ཀྱིས་བཀའ་སྩལ་པ། ། འབྲས་བུ་དེ་ནི་རིན་ཆེན་གང་།། དེ་ནི་གཉིས་སུ་དབྱེ་བར་གནས།། མཆོག་གི་དགའ་བའི་ངོ་བོ་གཅིག། མཆོག་གི་དགའ་བ་དང་བྲལ་བ།། མཆོག་དགའ་ངོ་བོར་གྲགས་པ་ནི།། ཉམ། སུ་མྱོང་བས་རྙེད་པ་ཡིན།། མཆོག་གི་དགའ་བ་དང་བྲལ་བ།། རང་ལས་རབ་ཏུ་གསལ་བར་འགྱུར།། སྐལ་ལྡན་མོ་གང་ཉམས་སུ་མྱོང་།། དེ་ནི་རྫོགས་པའི་རང་བཞིན་ནོ།། ཉམས་སུ་མྱོང་མིར་རྫོགས་པ་ནི། ། གང་དུ་སུས་ཀྱང་མི་ཤེས་སོ།། ཇི་ལྟར་བུ་མོ་ལང་ཚོ་བ་བ།། སྐྱེས་བུ་མེད་ན་ནམ་ཡང་མིན།། ལེགས་དགྱེས་ཀྱི་ནི་བདེ་མྱོང་བ།། ལེགས་སྐྱེས་དབང་མོ་མི་ཤེས་སོ།། གང་ཞིག་བསམ་པ་ལ། གས་ཀྱིས། ། དེ་ནི་བསྐྱེད་པའི་མཚན་ཉིད་དོ།། བསྐྱེད་པ་དང་ནི་རྫོགས་བྲལ་བ།། དེ་ནི་འབྲས་མཆོག་རང་བཞིན་ནོ།། དེ་རུ་གང་ཞིག་སྒོམ་པ་ནི།། ཕྲ་མོའི་ཕྲ་མོ་ཡང་དག་མཆོག། གང་གིས་བླ་ན་མེད་པ་དང་། འགྲོ་བའི་མ་དེ་ཡོད་པ་མིན། ། བླ་ན་མེད་པའི་ཡེ་ཤེས་ཆེ།། བཞི་དང་བྲལ་བ་རྟག་ཏུ་ཤར།། རྟག་ཏུ་ཤར་བ་ལས་གཞན་ཅི།། གང་དུ་ཡང་ན་བསྒོམ་ཡོད་ད།། གལ་ཏེ་གང་གིས་བསྒོམ་པ་དེ། ཁྱད་པ་ཡོངས་མི་སྐྱེ། ། མི་སྐྱེའི་ཕྱིར་ན་བསམ་གཏན་ངལ།། གལ་ཏེ་ཁྱད་པར་འོང་འགྱུར་ན།། དེ་ནི་དེ་ཉིད་རང་བཞིན་མིན།། དེ་ཉིད་མིན་པར་ཐེ་ཚོམ་མེད།། དེ་ཉིད་མི་བསྒོམ་དེ་ཉིད་ནི།། སུ་ཞིག་དེ་ལ་རྙེད་པར་འདིང།། དེ་ནི་མཁའ་ལ་རི་མོ་ནི།། མཆོག་གི་དབང་མོ་འདྲི་བའོ།། ལྷ་མོས་གསོལ་པ། གསང་བ་ཆེན་པོའི་རྒྱུད་འདི་ནི།། ཤེས་པ་དང་ནི་བཤད་པ་སུ།། བཅོམ་ལྡན་འདས་ཀྱིས་བཀའ་སྩལ་པ། བྱང་ཕྱོགས་སུ་དཔལ་རྡོ་རྗེའི་གནས་སུ་ཨུ་རྒྱན་དུ་རྒྱལ་པོ་ཨིནྡྲ་བྷཱུ་ཏི་ཞེས་བྱ་བས་ཤེས་པ་དང་། བཤད་པ་དང་། སེམས་ཅན་ལ་གསལ་བར་བྱེད་དོ།། ལྷ་མོས་གསོལ་པ། ཀྱེ་བཅོམ་ལྡན་འདས་རྒྱལ་པོ་ཆེན་པོ་ཨིནྡྲ་བྷཱུ་ཏི་ཞེས་བྱ་བ་དེ་ས་དུའི་དབང་ཕྱུག་ལགས་བཀའ་སྩོལ་ཅིག། བཅོམ་ལྡན་འདས་ཀྱིས་བཀའ་སྩལ་པ། དཔལ་ཡེ་ཤེས་ཐིག་ལེའི་རྒྱུད་ཀྱི་རྒྱལ་པོ་ལས་གང་ཞིག་ངས་བསྟན་པའི་ཕྱག་ནརྡོ་རྗེའི་རྒྱལ་པོ་དེ་ཉིད་ཨིནྡྲ་བྷཱུ་ཏི་སྤྲུལ་པའི་སྐུས་ས་བཅུའི་དབང་ཕྱུག་ཡེ་ཤེས་ཀྱི་སྐུ་ས་བཅུ་བཞིའི་དབང་ཕྱུག་གོ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། རི་རབ་ཀྱི་ཉི་རྡུལ་གྱི་གྲངས་བཅོམ་ལྡན་འདས་མ་དང་ལྷན་ཅིག་ཏུ་སྟན་ལས་ལངས་ཏེ། ལན་གསུམ་དུ་བསྐོར་བ་བྱས་ནས།། ཞབས་ལ་མགོ་བོས་ཕྱག་འཚལ་ཏེ། རང་རང་གི་རྫུ་འཕྲུལ་གྱིས་སྣ་ཚོགས་པའི་མཆོད་པས་མཆོད་སྦྱིན་བྱས་ནས་བསྟོད་པ། དེ་ཁོ་ན་ཉིད་བདུད་རྩི་རྒྱ་མཚོའི་སྙིང་པོ་རབ་མཆོག་རྒྱལ་གྱུར་ཅིག། ཡེ་ཤེས་ནམ་མཁའ་སྐྱེ་མེད་གཟུགས་མེད་བརྗོད་མེད་སྐུ་རབ་རྒྱལ་གྱུར་ཅིག། དངོས་དང་དངོས་མིན་རོ་གཅིག་ངོ་བོའི་རྨད་བྱུང་དེ་ཉིད་རབ་གཏེར་རྒྱལ་གྱུར་ཅིག། སྟོང་ཉིད་སྟོང་པ་ཉིད་མིན་མཆོག་དང་གཞན་མཆོག་འོད་ཀྱིས་གྲུབ་པ་རྒྱལ་གྱུར་ཅིག། དེ་ལྟ་བུའི་བསྟོད་པའི་རྒྱལ་པོས་བསྟོད་ནས།། འཁོར་ཐམས་ཅད་བཅོམ་ལྡན་འདས་དང་བཅས་པར་མི་སྣང་བར་གྱུར་ཏོ། ། དཔལ་རྣལ་འབྱོར་མ་ཆེན་པོའི་རྒྱུད་ཀྱི་རྒྱལ་པོའི་རྒྱལ་པོ་མཆོག་ཆེན་པོ་རྨད་དུ་བྱུང་ཞིང་། རྨད་དུ་བྱུང་བ་དེ་ཁོ་ན་ཉིད་ཀྱི་སྒྲོན་མ་ཞེས་བྱ་བ་རྫོགས་སོ།
CLOSE WINDOW