| Wylie | e-texts produced with ocr Programm |
བཅོམ་ལྡན་འདས་མཉན་ཡོད་ན་རྒྱལ་བྱེད་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ།། དེ་ནས་ལྷ་དུ་མ་རྣམས་མཚན་མོ་ཁ་དོག་སྣ་ཚོགས་པ་དང་ལྡན་པའི་འོ་ད་རྣམས་ཀྱིས་དུས་གཅིག་ལ་རྒྱལ་བྱེད་ཚལ་འོད་ཀྱིས་སྣང་བར་བྱས་ནས། བཅོམ་ལྡན་འདས་གང་དུ་བཞུགས་པ་དེར་ལྷགས་ཏེ་ལྷགས་ནས། བཅོམ་ལྡན་འདས་ལ་ཕྱག་བྱས་ནས་ཕྱོགས་གཅིག་ཏུ་འཁོད་དོ། ། ཕྱོགས་གཅིག་ཏུ་འཁོད་ནས། ལྷ་དེ་རྣམས་ཀྱིས་བཅོམ་ལྡན་འདས་ལ་ཚིགས་སུ་བཅད་པ་མང་དུ་ཞུས་སོ།། ལྷ་དང་མི་རྣམས་མང་པོ་ཡིས།། བཀྲ་ཤིས་པ་ནི་བསམ་གྱུར་པ། ། བཀྲ་ཤིས་པ་ལ་ཐེ་ཚོམ་སྐྱེས།། བཀྲ་ཤིས་མཆོག་ནི་གསུང་དུ་གསོལ།། ལྷའི་ཡང་ལྷ་ཡིས་བཀའ་སྩལ་པ།། སྡིག་པ་ཐམས་ཅད་རྣམ་པར་འཇོམས།། འཇིག་རྟེན་ཀུན་ལ་ཕན་པའི་དོན། ། བཀྲ་ཤིས་དེ་རྣམས་ཁྱེད་ལ་བཤད།། བྱིས་པ་རྣམས་ལ་བསྙེན་མི་བྱ།། མཁས་པ་རྣམས་ལ་བསྙེན་པར་བྱ།། མཆོད་ལ་མཆོད་པའི་ལན་བྱ་བ།། འདི་ནི་མཆོག་གི་བཀྲ་ཤིས་སོ། ། སྔར་བྱས་པ་ཡི་བསོད་ནམས་ཀྱིས།། འཐུན་པའི་ཡུལ་དུ་གནས་པ་དང་།། བདག་ཉིད་མཆོག་གི་སྨོན་ལམ་བྱ།། འདི་ནི་མཆོག་གི་བཀྲ་ཤིས་སོ།། བདེན་དང་ལག་པའི་བཟོ་དང་ནི། ། འདུལ་བའི་སྦྱོར་བས་ལེགས་པར་བསླབ།། གང་གིས་འདི་ནི་ལེགས་པར་བསླབ།། གང་གིས་ལེགས་པར་བཤད་པའི་ཚིག། འདི་ནི་མཆོག་གི་བཀྲ་ཤིས་སོ།། པ་དང་མ་ལ་བསྙེན་བཀུན་བྱ། བུ་དང་ཆུང་མ་རྗེས་སུ་གཟུང་།། མི་མཐུན་པ་ཡི་ལས་མི་བྱ།། འདི་ནི་མཆོག་གི་བཀྲ་ཤིས་སོ།། སྦྱིན་པ་ཆོས་ཀྱི་སྤྱོད་པ་དང་།། གཉེན་འདུན་རྣམས་ནི་རྗེས་སུ་གཟུང་།། ཁ་ན་མ་ཐོའི་ལས་མི་བྱ། འདི་ནི་མཆོག་གི་བཀྲ་ཤིས་སོ།། སྡིག་ལ་དགའ་བ་སྤང་བར་བྱ།། ཆང་གི་བཏུང་བ་རྣམ་པར་སྤང་།། གང་ཞིག་ཆོས་ལ་བག་ཡོད་པ།། འདི་ནི་མཆོག་གི་བ། ཤིས་སོ།། གློ་བུར་བླ་མ་གུས་པར་བྱ།། བྱས་པ་ཤེས་ཤིང་གུས་པར་བྱ།། དུས་སུ་ཆོས་ནི་མཉན་པར་བྱ།། འདི་ནི་མཆོག་གི་བཀྲ་ཤིས་སོ།། ཚིག་ངན་པ་ནི་བཟོད་པར་བྱ།། དགེ་སྦྱོང་རྣམས་ནི་མཐོང་བར་བྱ། ། དུས་སུ་ཆོས་ཀྱི་འབེལ་གཏམ་བྱ།། འདི་ནི་མཆོག་གི་བཀྲ་ཤིས་སོ།། དཀའ་ཐུབ་དང་ནི་ཚངས་སྤྱོད་བྱ།། འཕགས་པའི་བདེན་པ་མཐོང་བར་བྱ།། མྱ་ངན་འདས་པ་མངོན་སུམ་བྱ། ། འདི་ནི་མཆོག་གི་བཀྲ་ཤིས་སོ།། འཇིག་རྟེན་ཆོས་ལ་དྲིས་པ་ན།། གང་ཞིག་སེམས་ནི་གཡོ་མི་བྱ།། མྱ་ངན་མི་དགའ་མེད་བཟོད་བྱ།། འདི་ནི་མཆོག་གི་བཀྲ་ཤིས་སོ།། དེ་ལྟར་བཤད་པར་བྱས་པ་རྣམས། ། ཐམས་ཅད་དུ་ནི་རྒྱལ་བ་དང་།། ཐམས་ཅད་དུ་ནི་ཞི་བར་འགྲོ།། དེ་རྣམས་དེ་ལ་མཆོག་བཀྲ་ཤིས།། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ལྷ་དེ་རྣམས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། བཀྲ་ཤིས་ཆེན་པོའི་མདོ་རྫོགས་སོ།། པཎྜི་ཏ་ཆེན་པོ་ཨཱ་ནནྡ་ཤྲིའི་ཞལ་སྔ་ནས། མང་དུ་ཐོས་པའི་ལོ་ཙཱ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས་སྐད་གཉིས་སྨྲ་བ་རྣམས་ཀྱི་གདན་ས་གཙུག་ལག་ཁང་ཆེན་པོ་དཔལ་ཐར་པ་གླིང་དུ་བསྒྱུར་ཅིང་ནུས་ཏེ་གཏན་ལ་ཕབ་པའོ། ། སའི་སྟེང་དུ་ཉི་མ་དང་ཟླ་བ་ལྟར་གྱུར་ཅིག།
CLOSE WINDOW