@རྒྱ་གར་སྐད་དུ། ཨཱརྱ་ཨ་པ་ལོ་ཀི་ནི་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་སྤྱན་རས་གཟིགས་ཞེས་བྱ་བ་ཐེག་པ་ཆེན་པོའི་མདོ། ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན། བྱ་རྒོང་སུ་བོའི་རི་ལ། དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དང་ཐབས་ཅིག་ཏུ་བཞུགས་སོ།། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བློ་གྲོས་རྣམ་པར་དག་པ་ལ་བཀའ་སྩལ་པ། བློ་གྲོས་རྣམ་པར་དག་པ། ཚུལ་ཁྲིམས་ཡོངས་སུ་དག་པས། དེ་བཞིན་གཤེགས་པ་ཡོངས་སུ་དག་གོ།། བློ་གྲོས་རྣམ་པར་དག་པ། ཏིང་ངེ་འཛིན་ཡོངས་སུ་དག་པ་དང་། བཟོད་པ་ཡོངས་སུ་དག་པ་དང་། ཕན་པའི་དངོས་པོ་ཡོངས་སུ་དག་པས། དེ་བཞིན་གཤེགས་པ་ཡོངས་སུ་དག་གོ།། བློ་གྲོས་རྣམ་པར་དག་པ། བྱམས་པ་ཡོངས་སུ་དག་པས། དེ་བཞིན་གཤེགས་པ་ཡོངས་སུ་དག་གོ། ། བློ་གྲོས་རྣམ་པར་དག་པ། སྙིང་རྗེ་ཡོངས་སུ་དག་པས། དེ་བཞིན་གཤེགས་པ་ཡོངས་སུ་དག་གོ།། བློ་གྲོས་རྣམ་པར་དག་པ། དགའ་བ་ཡོངས་སུ་དག་པ་དང་། བཅ་སྙོམས་ཡོངས་སུ་དག་པས། དེ་བཞིན་གཤེགས་པ་ཡོངས་སུ་དག་གོ།། བློ་གྲོས་རྣམ་པར་དག་པ། རྣམ་པར་གྲོལ་བ་ཡོངས་སུ་དག་པ་དང་། རྣམ་པར་གྲོལ་བའི་ཡེ་ཤེས་ཡོངས་སུ་དག་པས། དེ་བཞིན་གཤེས་པ་ཡོངས་སུ་དག་གོ། ། བློ་གྲོས་རྣམ་པར་དག་པ། སྟོབས་ཡོངས་སུ་དག་པས། དེ་བཞིན་གཤེགས་པ་ཡོངས་སུ་དག་གོ།། བློ་གྲོས་རྣམ་པར་དག་པ། མི་འཇིག་པ་ཡོངས་སུ་དག་པ་དང་། སངས་རྒྱས་ཀྱི་ཆོས་ཡོངས་སུ་དག་པ་དང་། རྣམ་པ་ཐམས་ཅད་མཁྱེན་པའི་ཡེ་ཤེས་ཡོངས་སུ་དག་པས། དེ་བཞིན་གཤེགས་པ་ཡོངས་སུ་དག་གོ།། བློ་གྲོས་རྣམ་པར་དག་པ། དེ་ལྟར་དེ་བཞིན་གཤེགས་པ་ཡོངས་སུ་དག་པ་ལ་སུ་ཞིག་མེ་ཏོག་དང་། འཕྲེང་བ་དང་། སྤོས་དང་། གདུགས་དང་། རྒྱལ་མཚན་དང་། བ་དན་དང་། རོལ་མོའི་སྒྲ་དང་། བྱུག་པ་རྣམས་ཀྱིས་བསྟི་སྟང་དུ་བྱེད་པ་དེའི་བསོད་ནམས་ཀྱི་ཕུང་པོའི་མཐའ་རྟོགས་པར་མི་ནུས་ཏེ། དེའི་མཐའ་ནི་ཐེག་པ་གསུམ་ལ། ཐེག་པ་གང་ཡང་རུང་བས་མྱ་ངན་ལས་འདས་པའི་མཐར་ཐུག་པ་མ་གཏོགས་པར་བསོད་ནམས་ཀྱི་ཕུང་པོ་དེ་ཕྱི་མའི་མཐའ་ཡང་ཟད་པར་མི་ནུས་སོ།། དེ་ཅིའི་ཕྱིར་ཞེ་ན། བློ་གྲོས་རྣམ་པར་དག་པ་ཇི་ལྟར་དེ་བཞིན་གཤེགས་པ་སངས་རྒྱས་ཀྱི་ཆོས་ཐམས་ཅད་ཀྱིས་ཚད་མེད་པ་དེ་བཞིན་དུ་དེ་བཞིན་གཤེགས་པ་ལ་ཡོན་ཕུལ་བ་ཡང་ཚད་མེད་དོ།། མཐའ་ཡས་སོ། ། བསམ་གྱིས་མི་ཁྱབ་བོ།། མཚུངས་པ་མེད་དོ།། དཔག་ཏུ་མེད་དོ།། གྲངས་མེད་དོ།། དཔག་གིས་མི་ལང་ངོ་།། བརྗོད་དུ་མེད་དོ།། བློ་གྲོས་རྣམ་པར་དག་པ་སུ་ཞིག། དེ་བཞིན་གཤེགས་པ་དེ་ལྟར་བཞུགས་ཏེ། མཚོ་ཞིང་གཞེས་པ་ལ་བསྟི་སྟང་བྱེད་པ་དང་། བླ་མར་བྱེད་པ་དང་། རི་མོར་བྱེད་པ་དང་། མཆོད་པ་དང་། རྗེད་པ་དང་། ཕྱི་མའི་ཚེ་ཕྱི་མའི་དུས་ལྔ་བརྒྱ་ཐ་མ་ལ་སུ་ཞིག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་རིང་བསྲེལ་ཡུངས་འབྲུ་ཙམ་ལ་བསྟི་སྟང་བྱེད་པ་དང་། བླ་མར་བྱེད་པ་དང་། རི་མོར་བྱེད་པ་དང་། མཆོད་པ་དང་། རྗེད་པ་དང་། ཡང་དག་པར་སེམས་ཉེ་བར་གཞན་@སྟེ། བྱང་ཆུབ་ཏུ་གཞོལ་བའི་སེམས་བསྐྱེད་པས་ཕྱག་འཚལ་བ་དང་། ཕྱག་བྱེད་པ་དང་། བསྟི་སྟང་བྱེད་པ་དང་། བླ་མར་བྱེད་པ་དང་། རི་མོར་བྱེད་པ་དང་། མཆོད་པ་དང་། རྗེདཔ་དང་། གསོལ་བ་དང་། བསྔགས་པ་དང་། སྐོར་བ་བྱེད་པ་དེས་ཕན་ཡོན་ལྔ་ཡོངས་སུ་བཟུང་བར་འགྱུར་ཏེ། ལྔ་གང་ཞེ་ན། དྲན་པ་དང་ལྡན་པར་འགྱུར་བ་དང་། རྟོགས་པ་དང་ལྡན་པར་འགྱུར་བ་དང་། ངོ་ཚ་ཤེས་ཤིང་ཁྲེལ་ཡོད་པ་དང་ལྡན་པར་འགྱུར་བ་དང་། མྱུར་དུ་སངས་རྒྱས་བཅོམ་ལྡན་འདས་མཐོང་བར་འགྱུར་བ་དང་། མཐོང་ནས་ཀྱང་དད་པ་སྐྱེད་པར་འགྱུར་བ་སྟེ། ཕན་ཡོན་ལྔ་པོ་དེ་དག་ཡོངས་སུ་བཟུང་བར་འགྱུར། རོ།། དེ་ཆོས་བཞི་དང་ལྡན་པ་འགྱུར་ཏེ། བཞི་གང་ཞེ་ན། དེ་བཞིན་གཤེགས་པའི་བསྟན་པ་འཛིན་པ་དང་། དེ་ཡང་ཇི་སྐད་བསྟན་པ་བཞིན་དུ་བསྒྲུབ་པ་དང་། བསྒྲུབས་ནས་ཀྱང་སངས་རྒྱས་བཅོམ་ལྡན་འདས་རྣམས་དང་ཉེ་བར་འགྱུར་བ་དང་། མྱུར་དུ་སངས་རྒྱས་ཀྱི་ཞིང་ཡོངས་སུ་དག་པར་སྐྱེ་བར་འགྱུར་བ་སྟེ། ཆོས་བཞི་པོ་དེ་དག་གོ།། བློ་གྲོས་རྣམ་པར་དག་པ་བྱང་ཆུབ་སེམས་དཔའ་ཆོས་བཞི་དང་ལྡན་ན་བདུད་དམ། བདུད་ཀྱི་རིས་ཀྱི་ལྷའི་བུ་རྣམས་ཀྱིས་མི་བརྫི་བར་འགྱུར་ཏེ། བཞི་གང་ཞེ་ན། རིགས་མཐོ་ཞིང་རིགས་ཆེ་བ་དང་། བཙས་མ་ཐག་ཏུ་སངས་རྒྱས་བཅོམ་ལྡན་འདས་རྣམས་ཡིད་ལ་བྱེད་པ་དང་། ཕྱི་མའི་དུས་ན་དམ་པའི་ཆོས་འཛིན་པ་དང་། རྟག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བྱིན་གྱིས་བརླབས་པར་འགྱུར་བ་སྟེ། བློ་གྲོས་རྣམ་པར་དག་པ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན། བདུད་དམ་བདུད་ཀྱི་རིས་ཀྱི་ལྷའི་བུ་རྣམས་ཀྱིས་མི་བརྫི་བར་འགྱུར་རོ།། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། ། སྲོག་ཆགས་ཀུན་ལ་ཕན་པའི་ཕྱིར།། བྱང་ཆུབ་ཏུ་ནི་སེམས་བསྐྱེད་ནས།། འཇིག་རྟེན་མགོན་གྱི་མཆོད་རྟེན་ལ།། སུ་ཞིག་བསྐོར་བ་བྱེད་པ་ནི།། ཚེ་རབས་དག་ནི་ཐམས་ཅད་དུ།། བྱང་ཆུབ་སྤྱད་པ་སྤྱོད་པའི་ཚེ། ། དྲན་དང་ལྡན་ཞིང་བློ་གྲོས་ལྡན།། བསོད་ནམས་ལྡན་ཞིང་འཇིགས་མེད་འགྱུར།། མཆོད་རྟེན་བསྐོར་བ་བྱས་ན་ནི། ཚེ་རབས་དག་ནི་ཐམས་ཅད་དུ། ལྷ་དང་ཀླུ་དང་གནོད་སྦྱིན་དང་། སྲིན་པོ་རྣམས་ཀྱིས་མཆོད་པར་འགྱུར།། ངས་ནི་གང་དག་བསྟན་པ་ཡིན།། མི་ཁོམ་བརྒྱད་པོ་དེ་དག་སྤོང་།། སངས་རྒྱས་འབྱུང་བ་རབ་མཛེས་པ།། མཉེས་པར་བྱེད་འདི་དལ་བ་གཅིག། མདོག་ལྡན་གཟུགས་ནི་ཕུན་སུམ་ཚོགས། ། མཚན་གྱིས་ལེགས་པར་བརྒྱན་པ་དང་།། མཐུ་དང་སྟོབས་དང་ལྡན་པར་འགྱུར།། ལེ་ལོ་ཙན་དུ་དེ་མ་འགྱུར།། དེ་ནི་ཕྱུག་ཅིང་ནོར་ཆེར་འགྱུར།། བསོད་ནམས་ལྡན་ཞིང་བརྫི་བ་མེད།། འཇིག་རྟེན་སྒྲོན་མ་མཉེས་བྱས་ནས། ། ཡང་དང་ཡང་དུ་བསྟི་སྟང་བྱེད།། བདག་མེད་སྟོང་པའི་ཆོས་ཐོས་ན།། དེ་ནི་ཆོས་ལ་རྨོངས་མི་འགྱུར།། མྱུར་དུ་དང་པ་ཐོབ་བམྱུར་ཞིང་།། ཆོས་དོན་ཇི་བཞིན་མཁས་པར་འགྱུར།། ཚོང་དཔོན་ཁྱིམ་དང་རྒྱས་པ་དང་།། ཕྱུག་པོ་རྣམས་སུ་སྐྱེ་བར་གྱུར།། དཔའ་ཞིང་སྦྱིན་པའི་བདག་པོར་འགྱུར།། གཏོང་བ་བཏང་ཞིང་སེར་སྣ་མེད།། འཛམ་བུའི་གླིང་ན་གང་ཡང་རུང་།། ཁྱད་པར་ཅན་གྱི་རིགས་མཛེས་པ། ། དེར་ནི་བརྟན་པ་དེ་སྐྱེ་སྟེ།། དམའ་བ་དག་ནི་རྣམ་པར་སྤངས།། མཆོད་རྟེན་བསྐོར་བ་བྱས་ན་ནི།། སྐྱེ་བ་ཐམས་ཅད་ཀུན་ཏུ་ཡང་།། དབང་ཆེར་གྲངས་པའི་ཁྱིམ་བདག་དང་།། དཔལ་དང་གཟི་བརྗིད་གཟི་ལྡན་འགྱུར།། བྲམ་ཟེ་སཱ་ལ་ཆེ་བདྲ་དང་།། ཚུལ་ཁྲིམས་ལྡན་ཞིང་མང་ཐོས་དང་།། རྒྱལ་རིགས་སཱ་ལ་ཆེན་འདྲ་དང་།། ཕྱུག་ཅིང་ནོར་ཆེན་ལྡན་པར་འགྱུར།། རིས་བསྐོར་རྒྱ་མཚོ་ཚུན་ཆད་ཀྱི། ། ས་ཀུན་ལ་ནི་གང་སྨོན་པ།། གླིང་བཞི་དག་གི་དབང་ཕྱུག་བླ།། རྒྱལ་པོ་ཆོས་དང་ལྡན་པར་འགྱུར།། འཁོར་ལོས་སྒྱུར་བ་རྫུ་འཕྲུལ་ཆེ།། རིན་ཆེན་བདུན་དང་ལྡན་པར་འགྱུར།། རྒྱལ་སྲིད་གནས་ནས་སངས་རྒྱས་ལ། ། ཡང་དང་ཡང་དུ་བསྟི་སྟང་བྱེད།། འདི་ནས་ཤི་འཕོས་མཐོ་རིས་སུ།། སོང་ནས་སངས་རྒྱས་བསྟན་ལ་དང་།། ལྷུན་པོའི་ཟོམ་གྱི་དབང་ཕྱུག་པོ།། ལྷ་ཡི་དབང་པོ་བརྒྱ་བྱིན་འགྱུར།། ལྷ་དབང་ཤིན་ཏུ་འཐབ་བྲལ་དང་། ། དེ་བཞིན་དུ་ནི་དགའ་ལྡན་དང་།། ལྷ་དབང་ཤིན་ཏུ་འཕྲུལ་པ་དང་།། དབང་སྒྱུར་འཇིགས་པ་མེད་པར་འགྱུར།། མཆོད་རྟེན་བསྐོར་བ་བྱས་ན་ནི།། དེ་ནི་ཚངས་པའི་འཇིག་རྟེན་དུ།། ཚངས་པའི་དབང་ཕྱུག་མཁས་འགྱུར་ཞིང་། ། ལྷ་རྣམས་བྱེ་བས་མཆོད་པར་འགྱུར།། འཇིག་རྟེན་མགོན་གྱི་མཆོད་རྟེན་ལ།། མི་གང་བསྐོར་བ་བྱེད་པ་ཡི།། བསྔགས་པ་བསྐལ་པ་བྱེ་བར་ཡང་།། བརྗོད་པས་ཟད་པར་བྱ་མི་ནུས། སུ་ཞིག་བྱང་ཆུབ་སེམས་བསྐྱེད་ནས།། སྟོན་པའི་མཆོད་རྟེན་ཕྱག་འཚལ་བ།། དེ་ནི་བསྐལ་པ་བྱེ་བར་ཡང་།། ནམས་ཀྱང་ལོང་ཞིང་འཐེང་མི་འགྱུར།། འཇིག་རྟེན་མགོན་གྱི་མཆོད་རྟེན་ལ།། མངོན་དུ་བསྐོར་བ་བྱེང་པ་ནི། ། བུང་བ་སྔོན་པོ་མཛེས་འདྲ་ཡི།། རྣམ་པར་དག་པའི་མིག་ཐོབ་འགྱུར།། མཆོད་རྟེན་བསྐོར་བ་བྱས་ན་ནི།། དེ་ནི་ངེས་པར་རྟག་ཏུ་ཡང་།། མཐུན་པའི་དོན་ཀུན་ཐོས་འགྱུར་ཞིང་།། དོན་མིན་རྣམས་ནི་སྤངས་པར་འགྱུར། ། མཆོད་རྟེན་བསྐོར་བ་བྱས་ན་ནི།། མཐུ་དང་སྟོབས་དང་ལྡན་པར་འགྱུར།། དེ་ནི་ལེ་ལོ་མེད་འགྱུར་ཞིང་།། རྟག་ཏུ་བག་ཡོད་ལྡན་པར་འགྱུར།། མཆོད་རྟེན་བསྐོར་བ་བྱས་ན་ནི།། བརྩོན་འགྲུས་བརྟན་ནིང་མཐུ་བརྟན་ལ། ། བརྟན་ཞིང་རྣམ་པར་གནོན་བརྟན་དང་།། དེ་ནི་མྱུར་དུ་མཁས་པར་འགྱུར།། མེ་དང་དུག་དང་མཚོན་གྱིས་དེ།། ནམས་ཀྱང་འཆི་དུས་བྱེད་མི་འགྱུར།། མཁས་པ་ཚེ་ནི་རྫོགས་རྫོགས་སུ།། ཟད་པར་བྱས་ནས་འཆི་དུས་བྱེད། ། མཆོད་རྟེན་བསྐོར་བ་བྱས་ན་ནི།། ཕོ་བྲང་འཁོར་དང་ཡུལ་འཁོར་དང་།། གྲོང་བརྡལ་རྣམས་སུ་ལོངས་སྤྱོད་དང་།། གཟུགས་ཀྱི་ཁྱད་པར་འཕགས་པར་འགྱུར།། བྱང་ཆུབ་སྤྱད་པ་སྤྱོད་པའི་ཚེ། ། དེ་ནི་འདོད་པ་མི་བསྟེན་ཅིང་།། ལུས་ཀྱང་གཙང་ལ་གོས་གཙང་ཞིང་།། གཙང་མའི་ཆོས་ལ་གནས་པར་འགྱུར།། བློ་གྲོས་རྣམ་པར་དག་པ།། བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་གང་གིས་དེ་བཞིན་གཤེགས་པའི་མཆོད་རྟེན་མཐོང་ནས་དད་པ་བསྐྱེད་དེ། ། པུས་མོ་གཉིས་ཀའི་ལྷ་ང་ས་ལ་བཙུགས་ནས་ཕྱག་འཚལ་ཞིང་ཕྱག་བྱེད་དེ། དེ་བཞིན་གཤེགས་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་སྐུ་ལེགས་པར་བརྒྱན་པ་དེ། ཅི་འདྲ་བར་བདག་གི་ལུས་ཀྱང་དེ་དང་འདྲ་བར་གྱུར་ཅིག་ཅེས་དེ་ལ་མོས་པ་བསྐྱེད་ན། བློ་གྲོས་རྣམ་པར་དག་པ། བསོད་ནམས་ཀྱི་ཕུང་པོ་དེའི་མཐའ་བརྗོད་པར་མི་ནུས་ཏེ། བླ་ན་མེད་པར་ཡང་དག་པར་རྫོགས་པའི་བྱང་ཆུབ་ལ་གནས་པའི་ཕྱིར་རོ།། བསོད་ནམས་ཀྱི་ཕུང་པོ་དེ་ནི་རྒྱལ་པོ་ཉིད་དམ། བརྒྱ་བྱིན་ཉིད་དམ། ཚངས་པ་ཉིད་དམ། རང་སངས་རྒྱས་ཉིད་དམ། ཡང་དག་པར་རྫོགས་པའི་སངས་རྒྱས་ཀྱི་ཐེག་པ་བླ་ན་མེད་པས་ཀྱང་ཟད་པར་བྱ་བར་མི་ནུས་སོ།། དེ་ཅིའི་ཕྱིར་ཞེ་ན། བློ་གྲོས་རྣམ་པར་དག་པ། རིགས་ཀྱི་བུ་ངེས་བསོད་ནམས་ཀྱི་ཕུང་པོ་བསམ་གྱིས་མི་ཁྱབ་པ་ཡོངས་སུ་བཟུང་བའི་ཕྱིར་རོ། ། བློ་གྲོས་རྣམ་པར་དག་པ་འདི་ལྟ་སྟེ་དཔེར་ན། དེ་བཞིན་གཤེགས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ། གྲོང་ཁྱེར་རམ། གཙུག་ལག་ཁང་ངམ། གྲོང་དུ་འཇུག་ཀྱང་རུང་། འཆག་ཀྱང་རུང་། འགྲེང་ཡང་རུང་། འདུག་ཀྱང་རུང་། ཆོས་སྟོན་ཀྱང་རུང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། སེམས་ཅན་ལྷ་འམ། ཀླུ་འམ། གནོད་སྦྱིན་ནམ། དྲི་ཟ་འམ། ལྷ་མ་ཡིན་ནམ། ནམ་མཁའ་ལྡིང་ངམ། མི་འམ་ཅི་བམ། ལྟོ་འཕྱེད་ཆེན་པོ་འམ། མི་འམ། མི་མ་ཡིན་པ་སེམས་ཅན་གྱི་གྲངས་སུ་མ་གཏོགས་པ་ཤིང་ངམ། རི་འམ། ཁུང་བུ་འམ། བུ་ག་འམ། བྱ་སྐྱིབས་ཀྱང་རུང་སྟེ། དེ་བཞིན་གཤེགས་པ་ག་ལ་བ་དེ་ལོགས་སུ་འདུད་པ་དང་། རབ་ཏུ་འདུད་པ་དང་། ཀུན་ཏུ་འདུད་མི་བྱེད་པ་དེ་གང་ཡང་མེད་དེ། ཇིལྟར་དེ་བཞིན་གཤེགས་པ་དགེ་བའི་རྩ་བ་ཐམས་ཅད་དང་ལྡན་པ་ལ་བྱེད་པ་དེ་བཞིན་དུ། རིགས་ཀྱི་བུ་དེ་དག་གྲོང་ངམ། གྲོང་ཁྱེར་རམ། གྲོང་བརྡལ་ལམ། ཡུལ་འཁོར་རམ། ཕོ་བྲང་འཁོར་ན་རྒྱུ་བ་ལ། སེམས་ཅན་རྣམས་འདུད། རབ་ཏུ་འདུད། ཀུན་ཏུ་འདུད་པར་འགྱུར་རོ།། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ།། འཇིག་རྟེན་སངས་རྒྱས་ཇི་ལྟར་འགྱུར་ཞེས་མོས་བསྐྱེད་དེ། ། སངས་རྒྱས་མཆོད་རྟེན་ལ་ནི་པུས་མོ་གཉིས་འཛུགས་དང་། སུ་ཞིག་བྱང་ཆུབ་གཞོལ་ནས་ཕྱོགས་རྣམས་ཀུན་འགྲོ་བ།། དེ་འགྲོ་ཚེ་ན་འཇིག་རྟེན་གསུམ་པོ་བདུད་པ་བྱེད།། མི་རྣམས་གཙོ་བོ་རང་འབྱུང་གང་དུ་འགྲོ་བྱེད་པ། ། དེ་ལོགས་སུ་ནི་རྩཝ་དང་ཤིང་དང་སྡོང་ལྕུག་དང་། སྨན་དང་ཤིང་ལོ་རྣམས་དང་འབྲས་བུ་འདབ་མ་དང་། ཡིད་འོང་དྲི་ལྡན་མེ་ཏོག་རྣམས་ནི་བདུད་པར་འགྱུར།། བཅོམ་ལྡན་འདས་མཆོད་རྟེན་རྣམས་ལ་པུས་མོ་བཙུགས་པ་ནི། ། དེ་ལ་མི་ཡི་དབང་པོ་ཀུན་ཀྱང་འདུད་པར་འགྱུར།། གནོད་སྦྱིན་དབང་དང་ཀླུ་དང་ལྷ་ཡི་རྒྱལ་པོ་དང་།། ཚངས་པའི་དབང་པོ་ཐམས་ཅད་རྐང་པར་གཏུགས་པར་བྱེད། ། བཅོམ་ལྡན་མཆོད་རྟེན་རྣམས་ལ་པུས་བཙུགས་ཕྱག་བྱས་ན།། དཔའ་ཞིང་སྟོབས་དང་ལྡན་པའི་འཁོར་ལོས་སྒྱུར་བར་འགྱུར།། གསེར་གྱི་མདོག་ལྡན་མཚན་རྣམས་ཀྱིས་ནི་གོ་ཆར་འགྱུར། ། མཐུ་ཆེན་བླ་མར་བྱ་ཞིང་ཐུབ་པར་དཀའ་བར་འགྱུར།། དེ་ཡི་ཡུལ་ན་སེམས་ཅན་གང་དག་གནས་གྱུར་པ།། དེ་དག་ཐམས་ཅད་བྱམས་པའི་སེམས་དང་དགའ་བར་འགྱུར།། དེ་ལ་སེམས་ཅན་གང་ཡང་སྡིག་པ་མི་སྐྱེད་དེ། སྐྱེ་བོ་ཚོགས་ཆེན་དགའ་ཞིང་ཡིད་དུ་འོང་བར་འགྱུར།། བཅོམ་ལྡན་མཆོད་རྟེན་དག་ལ་པུས་བཙུགས་ཕྱག་འཚལ་བ།། དེ་ལ་སེམས་ཅན་ཀུན་གྱི་རྒྱལ་པོ་རབ་འདུད། ། ལྷ་དང་ཀླུ་དང་མི་དང་ལྟོ་འཕྱེ་ཆེན་པོ་འདུད།། བསྐལ་པ་མཐའ་ཡས་རྣམས་སུ་དབུགས་ཕྱིན་ཐོབ་པར་འགྱུར།། བཅོམ་ལྡན་མཆོད་རྟེན་དག་ལ་པུས་བཙུགས་ཕྱག་འཚལ་བ། གང་ཚེ་རྒྱལ་བ་དམ་པ་བྱུང་བར་གྱུར་པའི་ཚེ།། དེ་བཞིན་གཤེགས་པ་རྣམས་དང་ཉེ་བར་འགྱུར་བ་ཐོབ།། འདྲེན་པ་གཞལ་ཡས་རྣམས་ལ་མཆོད་པ་བྱེད་པར་འགྱུར།། འཇིག་རྟེན་སངས་རྒྱ་གྱུར་ཅེས་མོས་པ་བསྐྱེད་ནས་ནི། ། བཅོམ་ལྡན་མཆོད་རྟེན་རྣམས་ལ་པུས་བཙུགས་ཕྱག་འཚལ་བ།། བསྐལ་པ་བྱེ་བ་ཁྲག་ཁྲིག་བརྒྱ་གྲངས་ཟད་འགྱུར་ན།། དེ་ནི་རིང་པོར་མི་ཐོགས་བྱང་ཆུབ་མཚུངས་མེད་ཐོབ།། གང་ཞིག་སངས་རྒྱས་བྱེ་བ་ཁྲག་ཁྲིག་རྒྱ་སྟོང་ལ།། བསྐལ་པ་བྱེ་བ་གཞལ་ཡས་བསྟི་སྟང་བྱེད་པ་བས།། གང་ཞིག་ཕྱི་དུས་མི་བཟང་བསྐལ་པ་འདི་ལ་ནི།། མཆོད་རྟེན་ཕྱག་འཚལ་དེ་ཡི་བསོད་ནམས་ཆེས་མང་ངོ་། ། སངས་རྒྱས་དམ་པ་སྦྱིན་གནས་མཚུངས་པ་མེད་གྱུར་པ།། སྤྱོད་པ་དམ་པ་སྤྱད་ནས་ཁྱད་པར་བརྙེས་གྱུར་པ།། མི་ཡི་ཁྱུ་མཆོག་དེ་ལ་འདིར་ནི་མཆོད་བྱས་ན།། རྣམ་པར་སྨིན་པ་དམ་པ་མཚུངས་མེད་རང་བཞིན་འགྱུར། ། བྱང་ཆུབ་ཏུ་ནི་སེམས་བསྔོ་སྟེ། མེ་ཏོག་འཕྲེང་བ་བྱས་ནས་སུ།། མཆོད་རྟེན་དག་ལ་སུ་འབུལ་བ།། དེ་ནི་ནམས་ཀྱང་ཕོངས་མི་འགྱུར།། མི་ཡི་ནང་ནས་ཤི་འཕོས་ནས།། སུམ་ཅུ་རྩ་གསུམ་འགྲོ་བར་འགྱུར། ། དེར་ནི་རིན་ཆེན་སྣ་ཚོགས་ཀྱི།། གཞལ་མེད་ཁང་པ་ཐོབ་པར་འགྱུར།། མཆོད་རྟེན་འཕྲེང་བ་འདིར་ཕུལ་ན།། ཁང་བཟངས་དག་དང་ཁང་བརྩེགས་པ།། ལྷ་ཡི་བུ་མོས་བསྟེན་པ་རྣམས། ། སུམ་ཅུ་གསུམ་དུ་སྤྱོད་པར་འགྱུར།། ཡན་ལག་བརྒྱད་ལྡན་ཆུས་གང་ཞིང་།། གསེར་གྱི་བྱེ་མ་བདལ་གྱུར་པ།། བཻ་ཌཱུཪྻ་དང་ཤེལ་དག་གི། ལྷ་ཡི་རྫིང་བུ་ཐོབ་པར་འགྱུར།། དེར་ནི་ལྷ་ཡི་དགའ་སྤྱད་ནས། ། མཁས་པ་ཚེ་ཚད་རྫོགས་པར་འགྱུར།། ལྷ་ཡི་འཇིག་རྟེན་ཤི་འཕོས་ནས།། མི་ནང་ལོངས་སྤྱོད་ལྡན་པར་འགྱུར།། དགེ་བའི་རྩ་བ་དེ་ཉིད་ཀྱིས།། མཁས་པ་བག་ཡོད་གྱུར་ནས་ནི། ། དེ་བཞིན་གཤེགས་པ་མཉེས་བྱས་ཏེ།། རྐང་གཉིས་མཆོག་ལ་མཆོད་པ་བྱེད།། མཆོད་རྟེན་འཕྲེང་བ་འབུལ་བྱེད་པ།། དེ་ནི་འདོད་ཆགས་མི་འཕྲོགས་ཞིང་།། ཞེ་སྡང་གིས་ཀྱང་འཕྲོགས་མི་འགྱུར།། དེནི་ནམས་ཀྱང་རྨོངས་མི་འགྱུར།། རྐང་གཉིས་མཆོག་ལ་མཆོད་བྱས་ན།། དེ་ནི་ཚེ་རབས་ཐམས་ཅད་དུ།། ཆགས་པ་མེད་ཅིང་ཞེ་སྡང་མེད།། བཀྲམ་པ་མེད་ཅིང་དབང་པོ་བསྡམས།། མཆོད་རྟེན་འཕྲེང་བ་འབུལ་བྱེད་པ། ། ཚེ་རབས་བྱེ་བ་སྟོང་རྣམས་དང་།། ཁྲག་ཁྲིག་དག་ནི་བརྒྱ་བགྲངས་པ།། ཀུན་ཏུ་བཀུར་སྟིར་བྱས་པར་འགྱུར།། མཆོད་རྟེན་འཕྲེང་བ་འབུལ་བྱེད་པ།། དེ་ནི་འཁོར་ལོས་སྒྱུར་བར་འགྱུར།། བརྒྱ་བྱིན་ལྷ་ཡི་དབང་ཕྱུག་འགྱུར།། ཚངས་པའི་འཇིག་རྟེན་ཚངས་པར་འགྱུར།། འཇིག་རྟེན་མགོན་པོ་སྐྱོབ་པ་ལ།། དར་གྱི་དབུལ་བ་ཕུལ་བྱས་ན།། ལྷ་ཡི་དག་དང་མི་རྣམས་ཀྱི།། དོན་རྣམས་ཐམས་ཅད་གྲུབ་པར་འགྱུར། ། དམའ་པའི་རིགས་ནི་རྣམ་སྤངས་ཏེ།། དེར་ནི་དེ་སྐྱེད་འགྱུར་མ་ཡིན།། ཕྱུག་ཅིང་ནོར་ཆེན་ལྡན་པ་དང་།། འཇིག་རྟེན་དབང་ཕྱུག་དེ་འགྱུར་རོ།། དེ་བཞིན་གཤེགས་ལ་མཆོད་བྱས་ན།། གཟུགས་དང་དོན་དང་ལོངས་སྤྱོད་དང་། ། ཁ་དོག་དང་ནི་འབྱོར་པ་དང་།། ཀུན་ཏུ་གྲགས་དང་ལྡན་པར་འགྱུར།། དེ་ནི་ཚེ་རབས་དྲན་འགྱུར་ཞིང་།། འདོད་ཆགས་ཀྱིས་ཀྱང་འཕྲོགས་མི་འགྱུར།། འདོད་པ་རྣམས་ཀྱི་སྐྱོན་ཤེས་ཤིང་།། ཚངས་པར་སྤྱད་པ་སྤྱོད་པར་འགྱུར།། དེ་བཞིན་གཤེགས་པ་མཆོད་བྱས་ན།། གཟུགས་རྣམས་དང་ནི་སྒྲ་དག་དང་།། རོ་རྣམས་ཀྱིས་ཀྱང་མི་ཚུགས་ཤིང་།། སྡིག་པའི་ལས་ནི་བྱེད་མི་འགྱུར། ། རྣམ་པར་འདྲེན་པ་མཆོད་བྱེད་ན།། དེ་ནི་སྤོས་དང་མེ་ཏོག་གིས།། ནམས་ཀྱང་འཕོངས་པར་མི་འགྱུར་ཞིང་།། དྲན་ལྡན་ཤེས་རབ་ལྡན་པར་འགྱུར།། དེ་བཞིན་གཤེགས་ལ་སུ་མཆོད་པ། ། དེ་ཡི་ནོར་གྱི་ཕུང་པོ་ལ།། རྒྱལ་པོ་དང་ནི་ཆོམ་རྐུན་དང་།། མེ་དང་ཆུས་ཀྱང་རེག་མི་འགྱུར།། འཇིག་རྟེན་མགོན་པོའི་མཆོད་རྟེན་ལ།། དར་གྱི་དབུལ་བ་སུ་འབུལ་བ།། དེ་ནི་སྐམ་དང་མྱ་ངན་དང་། ། ནང་བུ་ཅན་དུ་གཞར་མི་འགྱུར།། འཇིག་རྟེན་སྒྲོན་མ་མཆོད་བྱེད་པ།། ཚེ་རབས་དག་ནི་ཐམས་ཅད་དུ།། མྱ་ངན་མེད་ཅིང་གནོད་མེད་དང་།། འཁོར་ལོས་སྒྱུར་བ་འབྱོར་ཆེན་འགྱུར།། འདྲེན་ལ་མཆོད་པ་བྱས་ན་ནི། ། རྐང་པ་ལག་པ་མཉེན་འགྱུར་ཞིང་།། ཡན་ལག་རྣམ་པར་དག་འགྱུར་ལ།། གཟུགས་དང་ཁ་དོག་ལྡན་པར་འགྱུར།། སྡིག་པའི་ལས་ནི་རྣམ་སྤངས་ཏེ།། བྱང་ཆུབ་སྤྱད་པ་སྤྱོད་པར་བྱེད། ། གང་དག་འཇིག་རྟེན་རབ་དཀོན་པ།། རྐང་གཉིས་མཆོག་རྣམས་མཐོང་བར་འགྱུར།། བསྐལ་པ་བྱེ་བ་སྟོང་རྣམས་དང་།། ཁྲག་ཁྲིག་དག་ནི་བརྒྱ་བགྲངས་པར།། མཆོད་ཅིང་བདེ་ལ་ཤེས་རབ་ལྡན། ། བྱང་ཆུབ་དམ་པ་འཚང་ཡང་རྒྱ།། འཇིག་རྟེན་མགོན་པོ་སྐྱོབ་པ་ལ།། འཕྲེང་བའི་ཁང་པ་བྱས་ན་ནི།། དེ་ནི་གཡོག་འཁོར་མི་ཕྱེད་ཅིང་།། རྒྱལ་པོ་འབྱོར་པ་ཆེན་པོར་འགྱུར།། འཕགས་པ་རྣམས་ཀྱིས་གང་སྤངས་པ། ། སྡིག་པའི་ལས་ནི་སྤོང་བར་བྱེད།། རྫོགས་སངས་རྒྱས་ཀྱིས་བཤད་པ་ཡི།། དགེ་བའི་ལས་ལ་བསྟེན་པར་བྱེད།། ལྷ་འམ་འོན་ཏེ་ཀླུ་རྣམས་སམ།། འཇིག་རྟེན་དག་ན་གང་མཁས་པ། ། དེ་དག་དགའ་ཞིང་མགུ་བ་དང་།། བསྟི་སྟང་བྱས་ཤིང་བསྔགས་པར་འགྱུར།། བརྟེན་པ་དེ་ནི་གར་སྐྱེས་པར།། བསོད་ནམས་གཟི་བརྗིད་ཤིན་ཏུ་བརྗིད།། ཡུལ་འཁོར་དག་དང་གྲོང་ཁྱེར་དག། རིགས་དེར་བསྟི་སྟང་བྱེད་པར་འགྱུར་རོ།། སངས་རྒྱས་གཞན་གྱིས་མི་ཐུབ་པ།། རྐང་གཉིས་མཆོག་ལ་སུ་མཆོད་པ།། དེ་དག་མཐུ་སྟོབས་ཆེ་བ་དང་།། གཡོག་འཁོར་ཆེན་པོས་མཛེས་པར་འགྱུར། ། བྱང་ཆུབ་ཏུ་ནི་སེམས་བསྔོས་ཏེ།། བཕྲེང་བའི་གཙུག་ལག་ཁང་བྱས་ན།། སངས་རྒྱས་རྣམས་ཀྱིས་གང་བསྔགས་པའི།། འབྱོར་པ་དག་ནི་དེ་ཐོབ་བོ།། དེ་ནི་འཐེང་དང་ཞར་བ་དང་། སྨསྤང་དང་མ་རུངས་མི་འགྱུར་གནས།། གང་དང་གང་དུ་སྐྱེས་པར་ཡང་།། མཚན་རྣམས་ཀྱིས་ནི་བརྒྱན་པར་འགྱུར།། སེམས་ཅན་དབུལ་པོ་རྣམས་མཐོང་ན།། དེ་ནི་ནོར་གྱིས་སྡུད་པར་བྱེད།། དེ་ནི་ནོར་དང་ལྡན་འགྱུར་ཞིང་། ། དེ་ནི་བྱང་ཆུབ་སྡུད་པ་སྤྱོད།། བློ་གྲོས་ཆེན་པོས་ས་འདི་ཀུན།། ཡོངས་སུ་བཏང་བ་བྱས་ནས་ཀྱང་།། དམན་པའི་སེམས་སུ་མི་འགྱུར་ཞིང་།། དེ་ནི་རྣམས་ཀྱང་འཕོངས་མི་འགྱུར། ། གང་དག་བྱང་ཆུབ་མངོན་ཞུགས་པ།། དེ་དག་བུ་དང་བུ་མོ་དང་།། ཆུང་མ་དགེ་ཞིང་བཟང་མོ་དག། གཏང་ནས་མྱ་ངན་བྱེད་མི་འགྱུར།། དེ་ནི་སྔོན་དུ་འགྲོ་འགྱུར་ཞིང་བཀྲི་བ་མེད་ལ་མཐོང་ན་དགའ། ། ཕྲག་དོག་དང་ནི་ང་རྒྱལ་གྱིས།། ནམས་ཀྱང་དེ་ལ་གནོད་མི་འགྱུར།། གང་དག་བྱང་ཆུབ་རབ་ཞུགས་པ།། དེ་དག་ཕྲག་དོག་མེད་ཅིང་དེས།། བཟོད་པའི་ཕ་རོལ་ཕྱིན་པར་འགྱུར། ། ཕན་པ་འདོད་ཅིང་ཡོན་ཏན་ལྡན།། གང་དག་བྱང་ཆུབ་མངོན་ཞུགས་པ།། འཇིག་རྟེན་ཀུན་ན་དེ་རིན་ཆེན།། དེ་དག་འབྱུང་བ་ཤིན་ཏུ་དཀོན།། སྨད་པ་མེད་པའི་སྦྱིན་གནས་འགྱུར།། ས་འདི་དག་ནི་རིམ་གྱིས་སུ།། བགྲང་བར་བྱ་ཞིང་དཔག་པར་ནུས།། དེ་དག་རྣམས་ཀྱི་ཡོན་ཏན་མཐའ།། ཚིག་གིས་བསྟན་པར་མི་ནུས་སོ།། སེམས་ཅན་དག་ནི་ཐམས་ཅད་ཀྱི།། དུས་གསུམ་སེམས་ནི་ཤེས་པར་ནུས། ། དེ་དག་རྣམས་ཀྱི་ཡོན་ཏན་མཐའ།། ཚིག་གིས་བསྟན་པར་མི་ནུས་སོ།། རྒྱ་མཚོ་ཆེན་པོ་བཞི་པོ་དག། སྐྲ་ནི་བྱེ་བ་སྟོང་གཤེགས་པའི།། སྒྲ་ཡིས་ཟད་པར་བྱ་བར་ནུས།། དེ་དག་ཡོན་ཏན་ཟད་མི་ནུས། ། ས་རྣམས་ཐམས་ཅད་བྱེར་རླགས་པ།། རབ་ཏུ་ཕྲ་རྡུལ་ཤེས་པར་ནུས།། སངས་རྒྱས་སྲས་པོ་དེ་དག་གི། ཡོན་ཏན་མཐའ་ནི་བརྗོད་མི་ནུས།། ཆུ་ཀླུང་ཐམས་ཅད་རབ་འབབ་པ། རྒྱུན་ལས་བཟློག་སྟེ་འགྲོ་ཡང་སྲིད།། སངས་རྒྱས་སྲས་པོ་དེ་དག་གི། ཡོན་ཏན་མཐའ་བརྗོད་དེ་ལྟ་མིན།། སེམས་ཅན་དག་ནི་ཐམས་ཅད་ཀྱི།། སྔོན་གྱི་ལུས་རྣམས་ཇི་སྙེད་པ།། བགྲང་བར་བྱ་ཞིང་དཔག་པར་ནུས། ། དེ་དག་ཡོན་ཏན་ཟད་མི་འགྱུར།། སྔོན་གྱི་ལུས་རྣམས་ཐམས་ཅད་ལ།། སྤུ་འཕྲེང་ཇི་སྙེད་ཡོད་པ་རྣམས།། བགྲང་བར་བྱ་ཞིང་དཔག་པར་ནུས།། དེ་དག་ཡོན་ཏན་ཟད་མི་འགྱུར།། འགྲོ་བ་ལྔ་པོར་འཁོར་བ་ཡི།། སེམས་ཅན་ཀུན་གྱི་སྤུ་རྣམས་ནི།། བགྲང་བར་བྱ་ཞིང་དཔག་པར་ནུས།། དེ་དག་ཡོན་ཏན་ཟད་མི་འགྱུར།། ས་འདི་ཇི་སྙེད་ཐམས་ཅད་པ།། ཆུ་ཡི་ཕུང་པོར་གནས་གྱུར་ཀྱང་། དེ་ནི་བགྲངས་ཞིང་དཔག་པར་ནུས།། དེ་དག་ཡོན་ཏན་བརྗོད་མི་ནུས།། མར་མེ་མཛད་ནས་བཟུང་ནས་ནི།། མ་འོངས་བསྐལ་པ་ཇི་སྙེད་པ།། དེ་ཡི་བར་དུ་ཤིང་ལྗོན་རྣམས།། ཇི་སྙེད་མ་འོངས་འབྱུང་འགྱུར་བ།། དེ་དག་འབྲས་བུ་མེ་ཏོག་རྣམས།། དེ་དག་ཟད་པར་ཤེས་པར་ནུས།། བསྐལ་པ་བྱེ་བ་སྟོང་རྣམས་དང་།། ཁྲག་ཁྲིག་དག་ནི་བརྒྱ་བགྲངས་པར།། བརྩོན་པ་ཞིག་གིས་དེ་དག་གི། བསྔགས་འབྲེང་ཡིད་དུ་འོང་བརྗོད་ཀྱང་། ། སངས་རྒྱས་སྲས་པོ་དེ་དག་གི། ཡོན་ཏན་མཐའ་ནི་བརྗོད་མི་ནུས།། སངས་རྒྱས་སྲས་པོ་དེ་དག་ལ།། མི་གང་མི་དགའ་བྱེད་པ་དེ།། ལྷ་དང་མི་ནི་སྤངས་ནས་སུ།། དེ་དག་དམྱལ་བ་སྤྱོད་ཡུལ་འགྱུར།། བྱང་ཆུབ་སེམས་དཔའ་རྣམས་ལ་ནི།། མི་གང་ལ་ལ་གནོད་བྱེད་པ།། མིག་མེད་པ་འམ་ལོང་བ་དང་།། སྡུག་བསྔལ་དཔུང་གཉེན་མེད་པར་འགྱུར།། ཤི་འཕོས་ནས་ནི་མནར་མེད་འགྲོ།། དེ་ནི་འབར་ཞིང་འཇིགས་སྐྲག་འགྱུར། ། ལུས་ནི་ཆེན་པོར་གྱུར་ནས་ཀྱང་།། སྡུག་བསྔལ་ཚོར་བ་མྱོང་བར་འགྱུར།། ཚེ་རབས་དེ་དང་དེ་དག་ཏུ།། དེ་ལུས་དཔག་ཚད་ཙམ་འགྱུར་ཏེ།། དེ་དག་ཕྲུམ་ལྟར་ཟླུམ་གྱུར་ལ།། ཀུན་ནས་ཡོངས་སུ་@བཟའ་བར་འགྱུར། ། དེ་ཚེ་ལུས་ལ་མགོ་བོ་ནི།། ལྔ་སྟོང་ཡོད་པར་འགྱུར་འགྱུར་ཞིང་།། མགོ་བོ་དེ་དག་རེ་རེ་ལས་འང་།། ལྡེ་ནི་ལྔ་རྒྱུ་ཐམ་པ་ཡོད།། གཅིག་ལའང་ཐོང་ཤོལ་བརྒྱ་དག་གིས།། ལྕེ་ནི་རབ་ཏུ་རྨོ་བར་འགྱུར།། སྡིག་པའི་ལས་ནི་རྣམ་སྨིན་གྱིས།། མི་བཟད་ཆེན་པོར་གཤེགས་པར་འགྱུར།། མནར་མེད་དེ་ནས་ཤི་འཕོས་ནས།། དེ་ནི་ཚ་དང་རབ་ཚ་བར།། བློ་གྲོས་ངན་པ་ཚོར་བ་མྱོང་།། དེ་སྔོན་ཉེས་བྱས་འབྲས་བུ་ཡིན། ། བྱང་ཆུབ་སེམས་དཔའ་རྣམས་ལ་ནི།། མ་བསྡམས་གང་ཞིག་གནོད་བྱེད་པ།། དེ་ལ་དུད་འགྲོའི་སྐྱེ་གནས་དང་།། དམྱལ་བའི་སན་དཀོན་མ་ཡིན།། ཚེ་རབས་བྱེ་བ་སྟོང་རྣམས་དང་། ། ཁྲག་ཁྲིག་དག་ནི་བརྒྱ་བགྲངས་པར།། སྡུག་བསྔལ་ཚེར་བ་མྱོང་འགྱུར་ཞིང་།། དེས་ནི་བཟང་པོ་རྣམས་མི་མཐོང་།། སངས་རྒྱས་སྲས་པོ་སྐྱོ་བ་རྣམས་ལ།། གནོད་པ་དག་ནི་བྱས་འགྱུར་ན།། ཨ་ལ་གརྟན་འཇིགས་པ་ཡི། ། ཤིན་ཏུ་གདུག་པའི་སྦྲུལ་དུ་སྐྱེ།། དེ་ནི་བཀྲེས་དང་སྐོམ་པས་ཉེན།། སྡིག་པའི་ལས་རྣམས་བྱེད་པ་འགྱུར།། དེ་ནི་ཟས་ཀྱང་མི་རྙེད་དེ།། ནམས་ཀྱང་འབྲངས་པར་ཟ་མི་མྱོང་།། ཤི་འཕོས་གཤིན་རྗེའི་འཇིག་རྟེན་དུ། ། དེ་ནི་རྟག་པར་གཏུན་དུ་རྡུང་།། དགེ་སློང་དག་ལ་གནོད་བྱས་པས།། ནམས་ཀྱང་སྐབས་ནི་རྙེད་མི་འགྱུར།། དེ་ནས་ཤི་འཕོས་དུས་བྱས་ཏེ།། མི་ཡི་ལུས་ནི་ཐོབ་གྱུར་ན།། ངན་དེ་ནི་དམུས་ལོང་འགྱུར།། གནོད་སེམས་ལྡན་ཞིང་སྡོམ་པ་མེད།། དེ་ནི་ཉེས་པར་སྤྲས་བྱས་ཏེ།། འཕགས་པ་རྣམས་ལ་སྐུར་བཏབ་པས།། མི་ཡི་ནང་ནས་ཤིང་ཕོས་ནས།། ངན་སོང་དག་ཏུ་མྱུར་འགྲོ། ། བྱང་ཆུབ་སེམས་དཔའ་རྣམས་ལ་ནི།། མ་བསྡམས་གང་ཞིག་གནོད་བྱེད་པ།། བསྐལ་པ་བྱེ་བ་སྟོང་དག་ཏུ།། ནམས་ཀྱང་སངས་རྒྱས་མཐོང་མི་འགྱུར།། རྫོགས་སངས་རྒྱས་ཀྱི་སྲས་རྣམས་ལ།། གང་ཞིག་ཆོས་བཞིན་བསྲུང་བྱེད་པ།། དེས་ནི་ངན་འགྲོ་ཀུན་སྤངས་ཏེ།། མྱུར་དུ་བཟང་འགྲོར་འགྲོ་བར་འགྱུར།། ཕྱུག་ཅིང་ནོར་ཆེན་ལྡན་པ་དང་།། སྟོབས་དང་ལྡན་ཞིང་འཇིགས་པ་མེད།། དྲན་དང་ལྡན་ཞིང་ཤེས་རབ་ལྡན། ། བདེ་ཞིང་ངོ་ཚ་ཁྲེལ་ལྟས་ལྡན།། གང་དུ་འཇིགས་རྟེན་རྣམས་ཀྱི་སྒྲོན།། ཡོངས་སུ་མྱ་ངན་འདས་གྱུར་པ།། སངས་རྒྱས་མཆོད་རྟེན་མཐོང་ནས་ནི།། ཡང་དང་ཡང་དུ་བསྟི་སྟང་བྱེད།། རྫོགས་སངས་རྒྱས་ཀྱིས་གསུངས་པ་ཡི།། འདི་འདྲའི་ཆོས་འདི་ཐོས་གྱུར་ནས།། སངས་རྒྱས་སྲས་པོ་རྣམས་ལ་ནི།། སུ་ཞིག་ཕྱི་ཕྱིར་དད་མི་བྱེད།། གང་གིས་སངས་རྒྱས་སྟོང་རྣམས་དང་།། བརྒྱ་དང་བྱེ། བ་བགྲངས་དག་ལ།། བསྐལ་པ་གངྒཱའི་བྱེ་མ་སྙེད།། དེ་སྙེད་བསྐལ་པར་བཀུར་བ་བས།། འཇིག་རྟེན་མགོན་གྱིས་གསུངས་པ་ཡི།། དམ་ཆོས་འཇིག་ཚེ་གང་ཞིག་གིས།། ཉིན་དང་མཚན་དུ་འཛིན་བྱེད་པ།། དེ་ནི་བསོད་ནམས་ཁྱད་པར་འཕགས།། ཆོས་འཇིག་དུས་ན་ཆོས་འཛིན་པ།། སྔོན་གྱི་སངས་རྒྱས་ཐམས་ཅད་དང་།། སངས་རྒྱས་ཡེ་ཤེས་རབ་གནས་པ།། ང་ལ་དེས་ནི་མཆོད་པ་བྱས།། དམ་པའི་ཆོས་ནི་འཇིག་པའི་ཚེ། ། སྟོན་པའི་བསྟན་པ་བསྲུང་བྱེད་པ།། བསྐལ་པ་བྱེ་བ་སྟོང་རྣམས་སུ།། དེ་ནི་ནམས་ཀྱང་ཆུད་མི་འགྱུར།། ལུས་ཀྱིས་བདེ་བ་མྱོང་འགྱུར་ཞིང་།། དེ་ནི་ནད་ཀྱིས་བཏབ་མི་འགྱུར།། དེ་ནི་ཡིད་དུ་མི་འོང་བས། ནམས་ཀྱང་འཕྲོགས་པར་མི་འགྱུར་རོ།། སྟོན་པའི་བསྟན་པ་བསྲུང་བྱས་ན།། བཟོད་པ་ཕུན་སུམ་ཚོགས་པ་དང་།། དེས་དང་གསལ་དང་གཉེན་པ་དང་།། སེམས་ཅན་རྣམ་ལ་བྱམས་སེམས་འགྱུར། ། འཇིག་ཚེ་རྒྱལ་བ་མཆོག་གི་ཆོས་བཟུང་བས།། བདེ་དང་དགའ་ཐོབ་མཛོད་ནི་མང་པོར་འགྱུར།། སྔོན་གྱི་རིམ་གྲོ་བྱ་བ་ཐོབ་འགྱུར་ཞིང་།། མི་ཁོམ་བརྒྱད་པོ་མ་ལུས་ཟད་པར་སྤོང་། འཇིག་ཚེ་རྒྱལ་བ་མཆོག་གི་ཆོས་བཟུངས་པས།། དཔེར་ན་ནམ་མཁའ་སྐར་མས་ཡོངས་གང་ལྟར།། རྟག་ཏུ་མཚན་གྱིས་གོ་ཆར་བྱས་པ་དང་།། རབ་ཏུ་ཚིག་སྙན་ཡིད་འོངས་དབྱངས་ལྡན་འགྱུར།། འཇིག་ཚེ་རྒྱལ་བ་མཆོག་གི་ཆོས་བཟུངས་པས། ། གང་ན་ཡིད་བདེ་མེད་ཅིང་རབ་སྡུག་པ།། རིགས་དམན་དེ་ནི་དེ་ཡིས་སྤངས་པར་འགྱུར།། ཕྱུག་ཅིང་ཤིན་ཏུ་བདེ་ལ་ལོངས་སྤྱོད་ལྡན།། འཇིག་ཚེ་རྒྱལ་བ་མཆོག་གི་ཆོས་བཟུང་བས།། ། མཐུ་དང་སྟོབས་དང་ལྡན་ཞིང་བརྩོན་འགྲུས་ལྡན།། མི་དམན་ས་རྣམས་ཀུན་ཏུ་རྣམ་པར་རྒྱུ།། སངས་རྒྱས་རྒྱ་སྟོང་དག་ལ་བསྙེན་བཀུར་བྱེད།། འཇིག་ཚེ་རྒྱལ་བ་མཆོག་གི་ཆོས་བཟུང་བས།། མཆོག་ཏུ་རབ་མཛེས་གཟུངས་ལྡན་ཤེས་རབ་ལྡན། ། མི་ཡི་འཇིག་རྟེན་མཆོག་ཏུ་བསྙེན་བཀུར་འགྱུར།། རྒྱལ་པོ་མཁས་པ་མཛངས་པ་རྣམས་ཀྱིས་བསྔགས།། འཇིག་ཚེ་རྒྱལ་བ་མཆོག་གི་ཆོས་བཟུང་བས།། མཆོག་ཏུ་གཟུངས་མཛེས་བལྟ་ན་སྡུག་པ་དང་།། སྐྱེད་པ་བུད་མེད་ལྷ་རྣམས་དགའ་བ་དང་།། བདེ་ཞིང་མཁས་ལ་བསྔགས་ཤིང་ཤེས་རབ་ལྡན།། སྟོན་པ་སྟོབས་བཅུ་མངའ་བ་ལྷ་ཡི་ཝས།། གང་གི་མདུན་དུ་མདོ་འདི་རབ་བཤད་པ། ། མི་དེའི་ལག་ཏུ་མདོ་སྡེ་འདི་འདྲ་འདི།། ཕྱི་མའི་དུས་ཀྱི་ཚེ་ན་ཐོབ་པར་འགྱུར།། གང་ཞིག་སྟོན་པ་མི་མཆོག་གཟུགས་བྱེད་པ།། རས་འདྲི་རྩིགས་ངོས་འདྲི་འམ་གསེར་ལས་བྱས། ། དེ་ཡི་ཆོས་ཀྱི་ཁྱད་པར་གང་ཡིན་པ།། དེ་དག་མ་ལུས་རབ་ཏུ་བསྟན་གྱིས་ཉོན།། དེ་ནི་བསྟ་མིན་ལོང་བར་གཞན་མིན་འགྱུར།། སྒུར་པོར་མི་འགྱུར་ཡན་ལག་མི་ལྷུག་མིན།། དེ་ནི་གཟུགས་དང་། ལྡན་ཞིང་ཁ་དོག་ལྡན།། སུམ་ཅུ་རྩ་གཉིས་མཚན་གྱིས་གོ་ཆར་འགྱུར།། ལུས་ནི་རྣམ་པར་དག་ཅིང་ཁྱད་པར་ཐོབ།། སྟོབས་པ་ཐོབ་ཅིང་སྒྲ་སྙན་ཡིད་དུ་འོང་།། ཤེས་བཞིན་ལྡན་ཞིང་འཇིག་རྟེན་ཀུན་གྱི་གཙོ།། ། དེ་མཐོང་སེམས་ཅན་བདེ་ཞིང་དགའ་བར་འགྱུར།། སྡིག་བྱེད་མི་འགྱུར་ཞེ་སྡང་མེད་སེམས་ལྡན།། གཡོ་མེད་མི་རྐུ་རྒྱལ་པོ་འཁྲུག་མི་བྱེད།། མཐུ་དང་ལྡན་ཞིང་དབང་ཆེར་གྲགས་པར་འགྱུར།། བྱམས། ལ་གནས་ཤིང་མི་དམན་སེམས་དང་ལྡན།། འདྲེན་པའི་སྐུ་གཟུགས་སྐུ་རབ་མཛེས་བྱས་ན།། དེ་ནི་མཆོག་འགྱུར་སྐྱེ་བོ་མང་མཆོད་འོས།། བློ་ལྡན་ཕྱུག་ཅིང་ཆེ་ཉིད་རྒྱ་ཆེར་ལྡན།། དབང་ལྡན་འཁོར་ལོས་སྒྱུར་བའི་རྒྱལ་པོར་འགྱུར། ། འདྲེན་པའི་སྐུ་གཟུགས་རབ་ཏུ་མཛེས་བྱས་ན།། ལྷ་ཡི་དབང་པོ་དབང་ཕྱུག་དབང་ཐོབ་པ།། ལྷུན་པོའི་ཟོམ་ན་དབང་ཐོབ་བརྒྱ་བྱིན་འགྱུར།། བདག་པོ་ལྷུན་པོའི་ཟོམ་ན་རྒྱལ་སྲིད་སྟོན། ། དེ་ནི་དྲན་དང་བློ་གྲོས་མི་ལྡན་མིན།། དེ་ནི་རྟོགས་མོས་ཤེས་རབ་ཚར་བར་འགྱུར།། འཇིག་རྟེན་ཀུན་ན་དབུགས་ཕྱིན་ཐོབ་འགྱུར་ཏེ།། འདི་ནི་ཡེ་ཤེས་ལྡན་ཞིང་དམྱལ་བ་སྤངས།། སེམས་ཅན་སཱིང་པོ་མཚུངས་མེད་མཆོད་བྱས་ནས། ། དུད་འགྲོའི་སྐྱེས་གནས་གཤིན་རྗེའི་ཡུལ་མི་འགྲོ།། ངན་འགྲོ་གསུམ་པོ་དེས་ནི་རྣམས་སྤངས་ཏེ།། བདག་དེར་ཕྱིས་མི་སྐྱེ་བར་ཤེས་པར་འགྱུར། འདྲེན་པའི་སྐུ་གཟུགས་རབ་ཏུ་མཛེས་བྱས་ནས།། དབང་ལྡན་དབང་ཕྱུག་ཉིད་ཀྱི་ལྷར་འགྱུར་ཏེ།། མི་དམན་དགའ་བའི་སེམས་ཀྱིས་སངས་རྒྱས་མཆོད།། རྒྱལ་བ་མཆོག་གི་བསྟན་ལ་དད་པར་འགྱུར།། ཚངས་པའི་འཇིག་རྟེན་དབང་ཐོབ་ཚངས་པར་འགྱུར། ། ཡིད་བོར་ཤིན་ཏུ་མཛེས་པའི་སྤོས་དང་ཅན།། འཛམ་བུའི་གླིང་གསེར་འོད་བྱེད་དགའ་འགྱུར་བའི།། གཞལ་མེད་ཁང་མཆོག་བལྟ་སྡུག་ཐོབ་པར་འགྱུར།། དེ་ནི་དེད་དཔོན་སྟོབས་བཅུ་ལྡན་པ་པོ། ། སེམས་ཅན་སྙིང་པོ་མཚུངས་འདྲ་མེད་པ་ཐོབ།། ཁ་དོག་མཐའ་ཡས་འཇིག་རྟེན་ཀུན་ན་གསལ།། གསེར་སྟེང་རིན་ཆེན་བཻ་ཌཱུཪྻ་དང་མཚུངས།། སུ་ཞིག་དགའ་བའི་ཡིད་ཀྱིས་མེ་ཏོག་བླངས། ། དང་སྐྱེས་འཇིག་རྟེན་མགོན་ལ་ཆར་དུ་གཏོར།། དེ་ནི་མི་ཡི་འཇིག་རྟེན་བསོད་ནམས་ལྡན།། རྒྱལ་སྲིད་གནས་ནས་རྒྱལ་བ་མཆོག་བསྐུར་འགྱུར།། མྱ་ངན་སྐམ་ཤིང་ཐ་བ་དྲིར་ལྡན་ལུས། ། ཡན་ལག་ལེགས་གནས་མཚུངས་མེད་ཐོབ་པར་འགྱུར།། སྐྱེ་བོ་མང་པོས་བལྟ་བའི་བོས་ཡིན་ཏེ།། དམྱལ་བ་དགྲ་རྩ་འདོད་པ་སྤོང་བར་འགྱུར།། སྤྱད་པ་རྣམ་པར་སྤྱོད་ཚེ་འདོད་པ་ལ།། ངན་སྐྱུགས་ཁུང་ལྟར་སྨད་པར་ཤེས་པར་འགྱུར། ། ཚུངས་སྤྱོད་དགེ་བ་ཁྱད་པར་འཕགས་ལ་སྤྱོད།། དགའ་བའི་སེམས་ཀྱིས་རྟག་ཏུ་སྤྱོད་པར་འགྱུར།། བསྐལ་པ་མཐའ་ཡས་མང་དུ་དེ་ཁ་ནས།། རབ་མཛེས་ཨུཏྤལ་བསུང་ནི་འབྱུང་བར་འགྱུར། ། དེ་ཡི་ལུས་ནི་གསེར་གྱི་མདོག་འདྲ་ཞིང་།། ཙན་དན་ལྟ་བུར་དྲི་ཞིམ་དང་ཀྱང་འབྱུང་།། སྤྱད་པ་རྣམ་པར་སྤྱོད་ཚེ་བྲོ་བ་དང་།། ཐ་བ་དྷི་སྐྱོན་གཏི་མུག་གནོད་མི་བྱེད།། དམན་པ་མེད་པའི་སེམས་ཀྱིས་དབུགས་ཕྱིན་རྙེད། ། བག་ཡོད་ལྷ་ཡི་ནང་ན་རྒྱལ་པོ་ཐོབ།། གང་ཚེ་རྒྱལ་བ་མྱ་ངན་འདས་པ་ན།། དེ་ནི་གུས་པས་དེ་དག་ཆོས་ཀྱང་འཛིན།། མི་དམན་དགའ་བའི་སེམས་ཀྱིས་སྦྱིན་པ་སྦྱིན། ། བཅོམ་ལྡན་མྱ་ངན་འདས་པའི་རིང་བསྲེལ་མཆོད།། རྒྱལ་བ་མཆོག་གི་བསྟན་པ་འཇིག་དུས་ཚེ།། རབ་ཏུ་དགའ་བས་སྟོན་པའི་ཆོས་ཚུལ་འཛིན།། དེས་ནི་ཆོས་མཆོག་མཛེས་པ་དེ་སྤྱད་པས།། གནོད་པས་འཆི་བའི་དུས་བྱེད་གཞར་མི་འགྱུར།། གལ་ཏེ་སེམས་ཅན་ཐམས་ཅད་སངས་རྒྱས་ཤིང་།། ཉོན་མོངས་མེད་པ་གསེར་མདོག་སྟོབས་བཅུར་གྱུར།། དེ་དག་བསྐུལ་པ་བྱེ་བ་ཁྲག་ཁྲིག་བརྒྱ་སྟོང་དུ། ། རྒྱལ་བ་མཆོག་ལ་མཆོད་པའི་བསྔགས་བརྗོད་ནུས།། འཇིག་རྟེན་ཀུན་ཏུ་སྡིག་པའི་ལས་སྤངས་ཏེ།། དགའ་བའི་སེམས་ཀྱིས་མཆོག་གི་ལས་བྱས་ཤིང་།། རླབས་ཆེན་སྤྱོད་ཚེཆོ་དོན་ནི་ལེགས་བྱས་ནས། ། འཇིག་རྟེན་མཐུ་ཆེན་རྫོགས་པའི་སངས་རྒྱས་འགྱུར།། གང་གིས་སྤོས་ཆུ་ཡུངས་འབྲུ་ཙམ་བླངས་ཏེ།། བཅོམ་ལྡན་མཆོད་རྟེན་རྣམས་ལ་བདུག་བྱེད་པ། ཡི་ཕན་ཡོན་བརྗོད་ཀྱིས་སེམས་དང་ཞིང་།། རྡུལ་དང་དྲི་མ་སྤོངས་ལ་མཉན་པར་གྱིས།། དེ་ནི་བསོད་ནམས་ལྡན་ཞིང་ཕྱོགས་ཀུན་རྒྱུ།། ནད་མེད་གྱུར་ཅིང་བློ་བརྟན་བག་ཡོད་ལ།། སྤྱད་པ་རྣམ་པར་སྤྱོད་ཚེ་མྱ་ངན་འདུལ། ། སྐྱེ་བོ་མང་པོ་དགའ་ཞིང་ཡིད་དུ་འོང་།། རྒྱལ་པོ་ཐོབ་ནས་རྒྱལ་བ་མཆོག་བཀུར་འགྱུར།། མཐུ་ཆེན་རབ་མཁས་འཁོར་ལོས་སྒྱུར་འགྱུར་ཏེ། གསེར་གྱི་མདོག་ལྡན་མཚན་གྱི་གོ་ཆ་ཅན།། འཇིག་རྟེན་ཀུན་ན་ཡིད་འོང་དྲི་ལྡན་ཐོབ།། དེ་ལ་ཡིད་མི་བདེ་དང་སྡུག་བསྔལ་མེད།། སྤྱད་པ་སྤྱོད་ཚེ་ལོངས་སྤྱོད་ཉམས་མི་འགྱུར།། ཕྱུག་ཅིང་ནོར་ལྡན་མཛོད་ནི་རབ་ཏུ་མང་། ། མྱ་ངན་མེད་འགྱུར་འཇིག་རྟེན་ཀུན་ཏུ་རྒྱུ།། སྐྱེ་བོ་མང་པོ་ལྷགས་ཏེ་དེ་ལ་འདྲི།། རྒྱལ་བ་མཆོག་གི་བསྟན་པ་ཁྱད་འཕགས་ཆོས།། ཚིག་རབ་བརྗོད་ཅིང་ཐེ་ཙོམ་སེལ་བར་བྱེད། ། ཆོས་ཐོས་ཡིད་བདེ་སླར་ཡང་སླུ་བར་བྱེད།། སྡིག་པའི་ལས་མེད་བློ་རྒྱ་ཆེ་དང་ལྡན།། རྒྱལ་བས་གསུངས་པའི་ཆོས་མཆོག་ཁྱད་འཕགས་པ།། དགའ་བར་འགྱུར་ལ་རྟག་ཏུ་མཁས་བྱས་ཏེ། ། མིག་ཀྱང་སྦྱོར་ཞིང་མུན་པ་སེལ་བར་བྱེད།། འདོད་ཆགས་མི་ཆེན་ཞེ་སྡང་ཆེ་མ་ཡིན།། མི་ཡི་འཇིག་རྟེན་གཏི་མུག་ཆེ་མ་ཡིན།། དེ་ནི་ཚངས་སྤྱད་དག་པ་མཆོག་འདི་སྤྱོད།། མི་ཡི་དོན་ནི་དཔག་ཏུ་མེད་པ་བྱེད།། བཅོམ་ལྡན་མཆོད་རྟེན་རྣམས་ལ་སྤོས་བདུགས་ན།། དེ་ལ་གནོད་པར་སེམས་པ་སུ་ཡང་མེད།། དེ་ནི་ནམས་ཀྱང་ལོངས་སྤྱོད་ཉམས་མི་འགྱུར།། བལྟ་བར་བོས་ཤིང་ནོར་ཆེན་ལྡན་པར་འགྱུར། ། བསྐལ་པ་བྱེ་བ་ཁྲག་ཁྲིག་བརྒྱ་རྣམས་སུ།། སེམས་ནི་རྣམ་དག་སྡིག་པ་རྣམ་དག་ཅིང་།། ཞི་ཞིང་རབ་ཞི་ཞི་དུལ་ལྡན་གྱུར་ནས།། མི་དམན་སེམས་ཀྱིས་བྱང་ཆུབ་མཚུངས་མེད་ཐོབ། ། སེམས་ཅན་བྱེ་བ་ཁྲག་ཁྲིག་བརྒྱ་མཐའ་ཡས།། མྱ་ངན་མེད་བདེ་ཞི་བ་མཆོག་བཀོད་ཅིང་།། འཁོར་ལོ་མཚུངས་མེད་འཇིག་རྟེན་ཀུན་བསྐོར་ནས།། ཕྱི་ནས་ཉོན་མོངས་རྡུལ་མེད་མྱ་ངན་འདས། ། སུ་ཞིག་དགའ་མགུ་སེམས་ཀྱིས་གོས་ཀྱིས་ནི།། བཅོམ་ལྡན་མཆོད་རྟེན་རྣམས་ལ་མཆོད་བྱེད་པ།། དེ་ནི་གོས་མཛེས་བྱེ་བ་སྟོང་རྣམས་དང་།། ཁྲག་ཁྲིག་བརྒྱ་བགྲངས་མཐའ་ཡས། རྟག་ཏུ་རྙེད།། བཅོམ་ལྡན་མཆོད་རྟེན་གོས་ཀྱིས་དཀྲིས་བྱས་ན།། དེ་ནི་བཙས་མ་ཐེག་ཏུ་གོས་མཆོག་ཐོབ།། ལྕེ་ཡི་ཁྱང་འཕགས་དར་གོས་རབ་བཟང་རྙེད།། བཙས་མ་ཐག་ཏ་དེ་ལུས་ཤིན་ཏུ་བདེ། གང་ཞིག་གོས་ཀྱིས་བཅོམ་ལྡན་མཆོད་རྟེན་དང་།། འདྲེན་པ་མཚུངས་མེད་རྣམས་ལ་མཆོད་བྱེད་པ།། དེ་འདིར་མཚུངས་པ་མེད་པའི་ལུས་ཐོབ་སྟེ།། སུམ་ཅུ་རྩ་གཉིས་མཚན་གྱི་མེ་ཏོག་རྒྱས།། བཅོམ་ལྡན་མཆོད་རྟེན་གོས་ཀྱིས་དཀྲིས་བྱས་ན།། ལག་མཐིལ་ནས་ནི་མུ་ཏིག་ཕྲེང་མཛེས་པ།། སྣ་ཚོགས་དག་དང་སེང་གེའི་ཕྲེང་བ་དང་།། གསེར་སྐུད་རབ་མཛེས་བསྐལ་པ་མཐའ་ཡས་འབྱུང་།། བཅོམ།། ལྡན་མཆོད་རྟེན་གོས་ཀྱི་དཀྲིས་བྱས་ན།། ལྷ་འམ་གྲུ་འམ་མི་འམ་ལྟོ་འབྱེ་ཆེ།། སུ་ཡང་དེ་ལ་མ་དང་སྐྱེད་མི་བྱེད།། རྟག་ཏུ་ཚངས་པར་སྤྱོད་པ་མཆོག་འདི་སྤྲོ།། བཅོམ་ལྡན་མཆོད་རྟེན་གོས་ཀྱིས་དཀྲིས་བྱས་ན། ། སྟོང་གི་འཇིག་རྟེན་ཁམས་ཀུན་ཟིལ་གནོན་ཏེ།། འཛམ་གླིང་གསེར་གྱིས་གསེར་ནི་ཟིལ་མནན་བཞིན།། སྐྱེ་དགུའི་དོན་ནི་དཔག་ཏུ་མེད་པ་བྱེད།། གལ་ཏེ་རིན་ཆེན་རབ་མཆོག་སྣ་བདུན་གྱིས།། སྟོང་གི་ཞིང་ཀུན་རབ་ཏུ་བཀང་བ་ཡིན། ། དེ་འདྲའི་དཔལ་འདི་ཟད་པར་བྱ་ནུས་ཀྱི།། རྒྱལ་བའི་མཆོད་རྟེན་གོས་གཅིག་ཕུལ་བ་མིན།། ནོར་བུ་རིན་ཆེན་ཟླ་བའི་འོད་རྣམས་ཀྱིས།། བྱེ་བ་ཁྲག་ཁྲིག་བརྒྱ་སྟོང་ཞིང་བཀང་བ། ། དེ་འདྲའི་དཔལ་འདི་ཟད་པར་བྱ་ནུས་ཀྱི།། རྒྱལ་བའི་མཆོད་རྟེན་གོས་གཅིག་ཕུལ་བ་མིན།། འཇིག་རྟེན་སངས་རྒྱས་འགྱུར་ཞེས་མོས་བསྐྱེད་དེ།། བཅོམ་ལྡན་མཆོད་རྟེན་བ་དན་ཕུལ་བྱས་ན། ། དེ་ནི་སྐྱེ་བོ་མང་པོའི་མཆོད་པོས་འགྱུར།། བྱང་ཆུབ་མཆོད་སྤྱོད་དམ་པ་ཞི་བ་སྤྱོད།། བཅོམ་ལྡན་མཆོད་རྟེན་པ་ངན་ཕུལ་བྱས་ན།། དག་ཅིང་མཆོག་གི་ལུས་ནི་ཐོབ་འགྱུར་ཏེ།། དཔེར་ན་གསེར་ལྟར་ཤིན་ཏུ་དཀར་འགྱུར་ཞིང་།། ལྷ་ཡིས་བསྔགས་ལ་མཆོད་ཅིང་བླ་མར་བྱེད།། དེ་ཡི་ལུས་ནི་གསེར་གྱི་མདོག་འདྲར་འགྱུར།། རས་ཀྱི་གོས་དངལ་བ་བཟང་རབ་དང་།། དུ་གུ་ལ་དང་ཀ་ཤི་པ་རྣམས་དང་། ། ཤིན་ཏུ་མཛེས་པའི་གོས་ཀྱང་རྙེད་པར་འགྱུར།། འཛམ་བུའི་གླིང་ན་རིགས་མཆོག་དམ་པ་གང་།། ཕྱུག་ཅིང་ཆེ་ཉིད་བདག་དབང་ནོར་མང་བ།། དེ་དག་ཏུ་ནི་རྟག་ཏུ་དེ་སྐྱེ་སྟེ།། དམན་ཤིང་མཆོག་ཏུ་དབུལ་བ་རྣམ་པར་སྤངས། ། དེ་ལ་སེམས་ཅན་སུ་ཡང་ཕྲག་དོག་མེད།། སེམས་ཅན་གནོད་པར་སེམས་པ་གཞན་མི་འབྱུང་།། གཞན་གྱི་སྡིག་པའི་ལས་ལ་དེ་སྨོད་དེ།། རྟག་ཏུ་བག་ཡོད་ཚུལ་ཁྲིམས་རྣམ་ངག་འགྱུར། ། འཛིན་པ་མེད་ཅིང་སེར་སྣ་མེད་པར་འོང་།། གཏོང་བ་རབ་བཏང་མྱ་ངན་མེད་པ་ཐོབ།། དེ་ནི་སྲོག་ཕྱིར་གཞན་ལ་སྦྱིན་མི་བྱེད།། བོང་པ་མེད་བྱེད་རྟག་ཏུ་བག་ཡོང་འགྱུར། སངས་རྒྱས་སྟོབས་བཅུ་དེད་དཔོན་མཐོང་ནས་ནི།། དགའ་བའི་སེམས་ཀྱིས་གདུགས་དང་བ་ངན་དང་།། མར་མེ་རྣམས་ཀྱིས་བཅོམ་ལྡན་འདས་ལ་མཆོད།། བྱང་ཆུབ་སྤྱོད་མཆོག་འདི་ནི་རྟག་པར་སྤྱོད།། མི་ཡི་འཇིག་རྟེན་བླ་མར་བསྙེན་བཀུར་བྱེད།། ལྷ་ནང་ལྷ་ཡི་ངག་དང་མི་ཡི་གཙོ།། ཡིད་འོང་སྤོས་མཛེས་བལྟ་ན་སྡུག་པ་དང་།། ནོར་བུ་ཤེས་འདྲ་སྣ་ཚོགས་ལྡན་པ་ཐོབ།། རི་རབ་རྩེ་མོར་ལྷ་ནང་རབ་ཏུ་གསལ།། ལྷ་ཀུན་སློབ་མར་གྱུར་ནས་མངོན་དུ་འདུད།། ཆོས་ཀྱིས་དེ་དག་ཡིད་བདེ་སྐྱེད་པར་བྱེད།། དེ་ལ་དད་མཆོག་གཞའ་གསང་ཐོབ་པར་འགྱུར།། དེ་ནས་ཤི་འཕོས་མི་ཡི་འཇིག་རྟེན་དུ།། རྒྱལ་པོ་དམ་པ་སྟོབས་ལྡན་འཁོར་ལོས་སྒྱུར། ། དེ་ལ་སེམས་ཅན་སུ་ཡང་སྡིག་མི་སྐྱེ།། སྐྱེ་བོ་མང་པོ་དགའ་ཞིང་ཡིད་འོང་འགྱུར།། རྡུལ་བསལ་སེམས་ཅན་མཆོག་ལ་རྒྱལ་མཚན་ཕུལ།། རིང་པོར་མི་ཐོགས་ནོར་མང་རྙེད་པར་འགྱུར། ། ཤེས་རབ་མཐའ་ཡས་མཛོད་ནི་མང་ལྡན་འོང་།། སེམས་ཆུང་མི་འགྱུར་དམན་པའི་སེམས་མི་འགྱུར།། ལོངས་སྤྱོད་རྙེད་ནས་བགྱེད་ཅིང་བདག་ཀྱང་སྦྱོར།། དེ་ནི་འཇིགས་མེད་ཡིད་མི་བདེ་བ་མེད།། རྒྱལ་པོ་དགའ་ནས་གྲོང་དང་ཡུལ་འཁོར་བསྐྱེད།། དེ་ལ་སེམས་ཅན་སུ་ཡང་སྡིག་མི་སྐྱེ།། གཙོ་བོ་ཁྱད་པར་འཕགས་པ་མཛོད་མང་ཞིང་།། ཁྱིམ་བདག་རིན་ཆེན་སྣ་ཚོགས་ལུས་བརྒྱན་འགྱུར།། རྒྱལ་པོའི་བུའམ་དེ་བཞིན་བློན་པོ་འོང་། ། རྒྱལ་པོར་གྱུར་ན་སྟོབས་ལྡན་བརྫི་བ་མེད།། བརྙེས་པའི་རིགས་དམན་ཐམས་ཅད་ཡོངས་སུ་སྤོང་།། ལོངས་སྤྱོད་ཁྱད་འཕགས་རིགས་མཆོག་རྙེད་ནས་ནི།། རྟག་ཏུ་བག་ཡོད་སེམས་ནི་ཞུམ་མི་འགྱུར། ། འདོད་པ་རྣམས་ནི་ངན་སྐྱུགས་ཁུང་ལྟར་སྤོང་།། ཁྱད་འཕགས་གཟུགས་དང་མཚན་རྣམས་རབ་ཏུ་ཐོབ།། ཁྱད་འཕགས་རིགས་དང་དེ་བཞིན་དབང་ཕྱུག་ཉིད། ། དི་ཡི་གཡོག་འཁོར་རྟག་ཏུ་མི་ཕྱེད་འགྱུར།། སྐྱེ་བོ་མང་པོས་མདུན་དུ་བདར་བར་འོང་།། དེ་ནི་གཞན་ལ་གནོད་པའི་སེམས་མི་སྐྱེ།། སེམས་ནི་རབ་དང་རྟག་ཏུ་བག་ཡོད་ལྡན།། དེ་ལ་མེ་དང་དུག་དང་མཚོན་མི་ཚུགས། ། སྐྱེ་བོ་ཚོགས་ཚན་གྱིས་ནི་བལྟ་བར་འགྱུར།། རབ་ཏུ་དགའ་ཞིང་ཐུབ་པའི་ཆོས་ལ་སྤྱོད།། ཤེས་བཞིན་ལྡན་ནས་ཡིད་བདེ་སྐྱེད་པར་བྱེད།། འཛིན་པ་མེད་ཅིང་ཆགས་མེད་སེམས་དང་ལྡན། ། ཆགས་མེད་གྱུར་ནས་དེ་ལ་མི་མཐུན་མེད།། དེ་ཡི་ལུས་གཙང་ཀུན་ནས་ཉོན་མོངས་མེད།། རྣམ་དག་སེམས་ལྡན་དེ་ནི་བདེན་པར་སྨྲ།། འཇིག་པས་ཉེས་པ་རྣམས་ལ་ཡིད་བདེ་སྐྱེད། ། སེམས་ཅན་རྣམས་ཀྱི་སྐྱབས་དང་དཔུང་གཉེན་འགྱུར།། དེ་ནི་བདག་དོན་རྒྱ་ཆེན་བྱས་ནས་སུ།། གཞན་ཡང་སངས་རྒྱས་ཡེ་ཤེས་རྫོགས་ལ་འགོད།། ཤིང་དབང་ཤིང་མཆོག་དམ་པའི་དྲུང་སོང་ནས། ། མཚུངས་མེད་མཆོག་ཞིང་བྱང་ཆུབ་ཚང་ཡང་རྒྱ།། སངས་རྒྱས་མཆོད་རྟེན་མར་མེ་གཅིག་ཕུལ་ན།། འདི་ནས་བཟུང་སྟེ་སྲིད་པའི་རྩེ་མོའི་བར།། སངས་རྒྱས་ཞིང་ནི་འཛམ་གླིང་གསེར་གྱིས་གང་།། དེ་འདྲའི་དཔལ་དེ་ཟད་པར་བྱ་མི་ནུས།། བཅོམ་ལྡན་མཆོད་རྟེན་མར་མེ་ཕུལ་བྱས་ན།། དེ་ཡི་ལུས་ནི་མདོག་ངན་ཡོད་མི་འགྱུར།། གཟུགས་མཆོག་སྲ་ཞིང་ལག་པ་གཟུ་བ་འདྲ།། སྣང་བ་ཐོབ་ནས་འཇིག་རྟེན་ཀུན་ཏུ་རྒྱུ། ། གལ་ཏེ་རྒྱལ་བ་དམ་པར་བྱུང་གྱུར་ན།། དེ་བཞིན་གཤེགས་པ་རྣམས་དང་ཉེ་བར་འགྱུར།། ཉེ་དུར་འགྱུར་རམ་ཡང་ན་བུར་ཡང་འགྱུར།། དེ་ནི་ཡེ་ཤེས་ཕུང་པོ་མྱུར་དུ་ཐོབ།། གལ་ཏེ་ཁྲག་ཁྲིག་བརྒྱ་སྟོང་སངས་རྒྱས་ཞིང་། ། ཡུངས་བཅུ་དག་གིས་བྱུང་ངུར་གང་གྱུར་པ།། བཟང་བ་དང་ནི་གཞལ་ཞིང་བརྗོད་པར་ནུས།། བདེ་གཤེགས་མར་མེ་གཅིག་ཕུལ་དེ་ལྔ་མིན།། སངས་རྒྱས་དམ་པ་མཚུངས་མེད་བྱིན་པའི་གནས། ། སྤྱོད་པ་མཆོག་སྤྱད་ཁྱད་པར་བརྙེས་གྱུར་པ།། མི་མཆོག་དེ་ལ་མཆོད་པ་འདིར་བྱས་པ།། རྣམ་པར་སྨིན་པ་དམ་པ་གཞལ་ཡས་འགྱུར།། གལ་ཏེ་མི་མཇེད་འཇིག་རྟེན་ཁམས་འདི་ཀུན།། ནོར་བུ་རིན་ཆེན་བཻ་ཌཱུཪྻས་གང་བ།། ཟད་པར་བྱ་ནུས་སངས་རྒྱས་མཆོད་རྟེན་ལ།། མར་མེ་གཅིག་ཕུལ་དཔལ་དེ་ཟད་མི་འགྱུར།། ཀར་ཤ་པ་ཎ་ས་མི་མཇེད་འཇིག་རྟེན་ཁམས།། འོག་ནས་སྲིད་པའི་རྩེ་མོ་བར་གང་བ། ། ཟད་པར་བྱ་ནུས་སངས་རྒྱས་མཆོད་རྟེན་ལ།། མར་མེ་གཅིག་ཕུལ་དཔལ་དེ་ཟད་མི་འགྱུར།། སངས་རྒྱས་ཞིང་སྟོང་དེ་དག་ཙན་དན་གྱིས།། འོག་ནས་སྲིད་པའི་རྩེ་མོ་བར་གང་བ།། ཟད་པར་བྱ་ནུས་སངས་རྒྱས་མཆོད་རྟེན་ལ། ། མར་མེ་གཅིག་ཕུལ་དཔལ་དེ་ཟད་མི་འགྱུར།། ཚངས་པའི་འཇིག་རྟེན་ཡོད་པའི་ལྷ་རས་ཀྱི།། གོས་ཀྱིས་སངས་རྒྱས་ཞིང་སྟོང་གང་གྱུར་པ།། ཟད་པར་བྱ་ནུས་སངས་རྒྱས་མཆོད་རྟེན་ལ། ། མར་མེ་གཅིག་ཕུལ་དཔལ་དེ་ཟད་མི་འགྱུར།། ཀླུ་དང་ལྷ་མིན་མི་དང་ལྟོ་འཕྱེ་ཆེ།། ལྷ་ཡི་ལྷ་རྫས་ནོར་བུ་རིན་ཆེན་མང་།། ཟད་པར་བྱ་ནུས་སངས་རྒྱས་མཆོད་རྟེན་ལ།། མར་མེ་གཅིག་ཕུལ་དཔལ་དེ་ཟད་མི་འགྱུར། ། ལྷ་ཡི་འཇིག་རྟེན་ཡོད་པའི་ལྷ་ཡི་སྤོས།། དེ་དག་མི་མཇེད་འདི་ཀུན་གང་གྱུར་པ།། ཟད་པར་བྱ་ནུས་སངས་རྒྱས་མཆོད་རྟེན་ལ།། མར་མེ་གཅིག་ཕུལ་དཔལ་དེ་ཟད་མི་འགྱུར། ། ཕྱོགས་དང་ཕྱོགས་མཚམས་ཚད་ནི་ཤེས་པར་ནུས།། ནམ་མཁའི་ཁམས་འདིའི་ཚད་ཀྱང་ཤེས་པར་ནུས།། སངས་རྒྱས་མཆོད་རྟེན་མར་མེ་གཅིག་ཕུལ་བའི།། དེ་འདྲའི་དཔལ་དེ་ཟད་པར་བྱ་མི་ནུས། ། སངས་རྒྱས་དམ་པ་མི་མཆོག་བཞུད་པའི་ཚེ།། འདྲེན་པ་མཚུངས་པ་མེད་ལ་དང་བྱས་ཏེ།། སྟོན་པའི་སྐུ་ལ་ཉེ་ཟེར་མི་འབབ་པར།། མེ་ཏོག་མ་ལི་ཀ་བདུགས་བཅོམ་ལྡན་ཕུལ། ། དེས་ནི་ལས་མཛེས་དམ་པ་གུས་བྱས་པས།། ལྷ་དབང་བརྒྱ་བྱིན་དུ་ནི་ལན་འབུམ་གྱུར།། འཇིག་རྟེན་ཀུན་ཏུ་ཚངས་པའི་བདག་པོར་གྱུར།། རྒྱལ་བའི་མཆོད་རྟེན་ལ་ནི་འབུམ་ཕུལ་ནས།། འཁོར་ལོས་སྒྱུར་བའི་རྒྱལ་པོ་སྟོབས་ལྡན་གྱུར། ། སྟོང་ཕྲག་བཅུ་ལ་དབང་བ.རང་གྱུར་ཏེ།། ནོར་ཆེན་རབ་ཏུ་མཛོད་མང་ཚོང་དཔོན་གྱུར།། ཁྱིམ་བདག་བློ་ལྡན་བསོད་ནམས་ལྡན་པར་གྱུར།། བདེ་གཤེགས་མི་མཆོག་བྱེ་བ་ཉི་ཤུ་དག། ངས་ནི་མཉེས་བྱས་གཟིམས་ཆན་བཟའ་ཡིས།། མི་མཆོག་དག་ལ་བླ་མར་བསྟི་སྟང་བྱས།། དེ་དག་གཙུག་ལག་ཁང་ལ་སྤོས་ཀྱིས་བསྐུས།། ང་ཡི་ཁ་དོག་ངན་པ་ཀུན་མེད་གྱུར།། ངས་ནི་ཚེ་དང་གྲང་དང་ངལ་བ་སྤངས།། སངས་རྒྱས་སྤྱན་སྔར་དམན་མེད་སེམས་གྱུར་ཅིང་།། དེ་དག་མཆོད་པ་དམ་པ་མཆོག་གིས་མཆོད།། རྒྱན་གྱིས་བརྒྱན་པའི་གདུགས་མཛེས་བལྟ་སྡུག་པ།། སུ་ཞིག་བཅོམ་ལྡན་མཆོད་རྟེན་འབུལ་བྱེད་པ། ། དེ་འདིར་ལུས་ནི་མཚུངས་པ་མེད་འགྱུར་ཏེ།། སུམ་ཅུ་རྩ་གཉིས་མཚན་གྱིས་གོ་ཆར་འགྱུར།། གང་གིས་རྒྱལ་བའི་སྐུ་ནི་རབ་འབར་ཞིང་།། ཁྱད་པར་འཕགས་པའི་གཟུགས་དང་སེམས་འདྲ་དང་། ། འཛམ་གླིང་གསེར་ལྟར་རབ་མཛེས་ལྟ་ན་སྡུག། མཚན་གྱིས་མེ་ཏོག་རྒྱས་པས་མངོན་ཏུ་གང་།། མངོན་པར་ཤེས་པ་ཐོབ་ཅིང་དབང་ཆེར་གྲགས།། བྱང་ཆུབ་སྤྱོད་མཆོག་དམ་པ་ཞི་བ་སྤྱོད། ། དེ་ནི་ནམས་ཀྱང་ལོངས་སྤྱོད་འགྲིབ་མི་འགྱུར།། ལྷས་ཀྱང་བསྟི་སྟང་བྱ་ཞིང་མཆོད་པར་འོང་།། བརྟན་པ་འདོད་པའི་ལོངས་སྤྱོད་གཞར་མི་དཀའ།། ཚུལ་ཁྲིམས་རྣམ་དག་རབ་མཁས་ཚངས་པར་སྤྱོད། ། ཡི་དམ་བཅས་ནས་ནགས་དང་ནགས་འདབ་སོང་།། མངོན་ཤེས་ཐོབ་ཅིང་ཁྱད་པར་ཐོབ་པར་འགྱུར།། བཅོམ་ལྡན་མཆོད་རྟེན་རྣམས་ལ་གདུགས་འབུལ་བ།། ཇི། ལྟ་བུར་ཡང་བྱང་ཆུབ་སེམས་མི་འདོར།། བྱམས་ལ་གནས་ཤིང་མི་དམན་སེམས་སུ་འགྱུར།། དེ་ཡི་ཤེས་པ་རྣམས་ཀྱང་ཉམས་པ་མེད།། རོལ་མོའི་སྒྲ་ཡིས་མི་མཆོག་མཆོད་བྱས་ན།། མྱ་ངན་མེད་ཅིང་དབང་ལྡན་རྒྱལ་པོར་འོང་། ། མི་ཡི་འཇིག་རྟེན་ཡིད་འོང་སྒྲ་ལྡན་འགྱུར།། དེ་སྒྲ་ཡན་ལག་ཚང་ཞིང་དག་པར་འོང་།། བཅོམ་ལྡན་མཆོད་རྟེན་རོལ་མོའི་སྒྲ་བྱས་ན།། ཤེས་བཞིན་ལྡན་ཞིང་མིག་ནི་རྣམ་དག་འགྱུར། ། རྣ་བ་རྣམ་པར་དག་ཅིང་སེམས་ཀྱང་དགའ།། སྣ་ཡི་དབང་པོ་མཆོག་དང་ལྡན་པར་འགྱུར།། དེ་ཡི་ལྕེ་ནི་རབ་མཛེས་བལྟ་ན་སྡུག། ཐོབ་མར་རབ་མཉེན་མཛེས་ཤིང་སྒྲ་ཡིད་འོང་། ། དཔེར་ན་ལྷ་ཡིས་རིན་ཆེན་བྱུ་རུ་འདྲ།། སྒྲ་སྐད་ཡན་ལག་བྱེ་བ་དཔག་མེད་འབྱིན།། བཅོམ་ལྡན་མཆོད་རྟེན་རོལ་མོའི་སྒྲ་བྱས་ན།། ནམས་ཀྱང་སྦྲུལ་དུ་མི་འགྱུར་ལྕེ་མེད་མིན། ། གཞར་བ་སྒུར་པོ་ཡ་ཡོ་ཅན་མི་འགྱུར།། ལུས་ནི་ཁྱད་པར་འཕགས་ཤིང་ཤིན་ཏུ་མཛེས།། བཅོམ་ལྡན་མཆོད་རྟེན་རོལ་མོའི་སྒྲ་བྱས་ན།། ལྷ་འམ་ཀླུ་འམ་མི་འམ་ལྟོ་འཕྱེ་ཆེ།། སུ་ཡང་དེ་ལ་མ་དང་སྐྱེ་མི་འགྱུར།། དབུགས་ཕྱིན་ཐོབ་ནས་འཇིག་རྟེན་ཀུན་དུ་རྒྱུ།། བཅོམ་ལྡན་མཆོད་རྟེན་རོལ་མོའི་སྒྲ་བྱས་ན།། དེ་ནི་མ་ནིང་ཟ་མར་གཞར་མི་འགྱུར།། ནམས་ཀྱང་མཛེ་དང་ཤ་བཀྲ་མི་འབྱུང་ཞིང་། ། བསྔགས་པར་འོས་པའི་ལུས་ནི་ཐོབ་པར་འགྱུར།། བཅོམ་ལྡན་མཆོད་རྟེན་རོལ་མོའི་སྒྲ་བྱས་ན།། ལྕེ་རིང་འགྱུར་ཞིང་ལུས་ཀྱང་ཆེ་བར་འགྱུར།། གསེར་གྱི་གཟུགས་ལྟར་ཁ་དོག་འབར་བར་འོང་། ། ཏིང་འཛིན་བརྟན་ཞིང་ཤིན་ཏུ་རྟོགས་པར་འགྱུར།། བཅོམ་ལྡན་མཆོད་རྟེན་རོལ་མོའི་སྒྲ་བྱས་ན།། ལྷ་ནང་བདག་པོར་འགྱུར་ཞིང་དབང་ཕྱུག་འགྱུར།། མི་ཡི་འཇིག་རྟེན་སྐྱེས་ན་དགའ་བར་འོང་། ། བརྩོན་འགྲུས་ལྡན་ཞིང་བག་ཡོད་འབར་བར་འགྱུར།། བཅོམ་ལྡན་མཆོད་རྟེན་རོལ་མོའི་སྒྲ་བྱས་ན།། དེ་ལ་སུ་ཡང་ཡིད་མི་བདེ་མི་སྐྱེད།། དེ་ལ་སུ་ཡང་ཚིག་རྔུབ་སྨྲབ་མེད། ཕྲ་མ་ཐམས་ཅད་སྤངས་ཤིང་ཡང་དག་སྨྲ།། བསོད་ནམས་འདོད་པ་སུ་ཞིག་ཕྱགས་ཐོགས་ཏེ།། བཅོམ་ལྡན་མཆོད་རྟེན་གུས་པར་འཕྱག་བྱེད་པ།། དེ་ནི་སྤང་ཅིང་མི་གཙང་ལུས་མི་འགྱུར། སྤུ་ཁུང་ནས་ཙན་དན་དྲི་ངང་འབྱུང་།། བཅོམ་ལྡན་མྱ་ངན་འདས་པའི་མཆོད་རྟེན་ཕྱགས།། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ།། ཡན་ལག་མ་སྨད་ཁྱད་འཕགས་ལུས་ཐོབ་ཅིང་།། མཛེས་ལ་མཚན་གྱིས། གོ་ཆར་བྱས་པར་འགྱུར།། བཅོམ་ལྡན་མྱ་ངན་འདས་པའི་མཆོད་རྟེན་ཕྱགས།། ལྷ་ཡི་ཙན་དན་ཁྱད་འཕགས་རབ་མཛེས་པའི།། གཞལ་མེད་ཁང་མཆོག་ཡིད་འོང་དྲི་ལྡན་ཐོབ།། དེ་ནི་དེ་ལ་གཞར་ཡང་སྲེད་མི་སྐྱེད། ། བཅོམ་ལྡན་མྱ་ངན་འདས་པའི་མཆོད་རྟེན་ཕྱགས།། ཡིད་བོང་དྲི་ལྡན་མཆོག་ཏུ་བལྟ་སྡུག་པའི།། ལྷ་ཡི་བུ་མོ་བྱེ་བ་སྟོང་འཐོབ་ཅིང་།། དེ་ནི་དེ་ལ་ནམས་ཀྱང་ཆགས་མི་སྐྱེད།། བཅོམ།། ། ལྡན་མྱ་ངན་འདས་པའི་མཆོད་རྟེན་ཕྱགས།། བསྐྱེད་མོས་ཚལ་མཆོག་ཡོད་པའི་རྫིང་བུ་ནི།། ཡན་ལག་བརྒྱད་ལྡན་ཆུ་གཙང་མཛེས་གྱུར་པ།། མེ་ཏོག་ཨུཏྤ་ལས་ནི་རྒྱས་པ་ཐོབ།། བཅོམ་ལྡན་མྱ་ངན་འདས་པའི་མཆོད་རྟེན་ཕྱགས། ། དེ་ཡི་གཡོག་འཁོར་རྟག་ཏུ་མཐུན་འགྱུར་ཞིང་།། མི་དམན་སེམས་ཅན་ལྷ་ཡི་སྒྲ་ཡང་ཐོས།། ལྷ་མོ་རྣམས་ཀྱི་གླུ་དབྱངས་སྙན་སྒྲ་ཐོབ།། བཅོམ་ལྡན་མྱ་ངན་འདས་པའི་མཆོད་རྟེན་ཕྱགས། ། འཇིག་རྟེན་ཀུན་དུ་སྐྱེས་ཚེ་བདག་ཉིད་ཀྱིས།། འདི་ནས་ཤི་འཕོས་ངན་འགྲོར་མི་འགྲོ་ཞིང་།། མི་ཡི་འཇིག་རྟེན་སངས་རྒྱས་མཐོང་བར་ཤེས།། བཅོམ་ལྡན་མྱ་ངན་འདས་པའི་མཆོད་རྟེན་ཕྱགས།། དེ་ནི་ལྷ་ལ་སྙན་པའི་གཏམ་བྱས་ཏེ།། སངས་རྒྱས་ཡེ་ཤེས་རྫོགས་ལ་ལྷ་བཀོད་ནས།། ཤི་བའི་དུས་བྱས་འཛམ་བུའི་གླིང་དུ་སྐྱེ།། བཅོམ་ལྡན་མྱ་ངན་འདས་པའི་མཆོད་རྟེན་ཕྱགས།། བཙས་མ་ཐག་ཏུ་བསྐལ་པ་མཐའ་ཡས་དྲན། ། སྔོན་གྱི་སངས་རྒྱས་གཙོ་རྣམས་བཀུར་བ་དང་།། དེ་དག་མཚན་དང་ཡོན་ཏན་ཆོས་ཀྱང་དྲན།། འཇིག་རྟེན་སངས་རྒྱས་ཇི་ལྟར་འགྱུར་ཞེས་ཏེ།། མོས་པ་བསྐྱེད་ནས་མཆོད་རྟེན་རྩཝ་སྐྱེས་སེལ། ། དེ་ཡི་ཕན་ཡོན་དེ་དག་ངས་བཤད་ཀྱིས།། ཐ་བ་དྲི་སོལ་དང་བའི་སེམས་ཀྱིས་ཉོན།། མཐུ་ཆེན་སྐྱེས་བུ་དམ་པ་ཁྱད་འཕགས་པ།། རྒྱལ་བ་དམ་པ་མ་འོངས་དུས་ན་མཐོང་། ། དེ་དག་མཆོད་པ་དམ་པ་མཆོག་གིས་མཆོད།། དེ་ནི་གཞའ་གསང་དད་པ་དམ་པ་ཐོབ།། སངས་རྒྱས་སྟོབས་བཅུ་དེད་བློན་དེས་མཐོང་ནས།། འདྲེན་པ་མཚུངས་པ་མེད་པ་མཆོད་པ་བྱེད།། མཚན་གྱིས་གོ་ཆར་བྱས་པའི་སངས་རྒྱས་སུ།། འགྱུར་ཞེས་ཐུགས་དགྱེས་དེ་དག་ལུང་ཡང་སྟོན།། གྲོང་ཁྱེར་ཡངས་པ་ཉམས་དགའ་མཆོག་གནས་ཤིང་།། ང་ནི་ཆོས་སྟོན་གང་གིས་མཐོང་གྱུར་པ།། དག་ཕྱི་དུས་རབ་ཏུ་འཇིགས་པའི་ཚེ།། རྒྱལ་མཆོག་མྱ་ངན་འདས་པའི་ཆོས་འཛིན་འགྱུར།། མཆོད་རྟེན་རྩཝ་སྐྱེས་སེལ་བར་བྱེད་པ་ནི།། རྒྱལ་བ་དམ་པ་མི་ཐུལ་མཐོང་འདོད་པའི།། རྒྱུ་དང་ས་བོན་འགྱུར་བ་འདི་ཡིན་ནོ། ། འདོད་དང་དམྱལ་དང་དུད་འགྲོའི་སྐྱེ་གནས་སྤོང་།། བྱང་ཆུབ་སེམས་དཔའ་གང་གིས་མདོ་མཆོག་འདི།། ཕྱི་མ་རབ་འཇིག་དུས་ན་འཛིན་བྱེད་པ།། དེ་ནི་འཇིག་རྟེན་སངས་རྒྱས་ལྷ་ཡི་ལྷ།། བསོད་ནམས་ཁྱད་འཕགས་མཚུངས་མེད་ཞིང་དུ་འགྱུར།། འདི་བཤད་ཚེ་ན་གང་དག་འདིར་མཆོད་དང་།། ཚུལ་འདི་བཤད་པ་གང་དག་ཐོས་པ་དང་།། གང་དག་མདོ་མཆོག་འདི་ནི་འདིར་བཟུང་བ།། དེ་དག་ཕྱི་མའི་དུས་ན་འདིར་འདི་འཛིན། ། གང་དག་ཕྱིན་ཆད་མདོ་མཆོག་འདི་འཛིན་པ།། དེ་དག་རྟག་ཏུ་དང་མཐུན་པའི་སྲས།། སངས་རྒྱས་བྱེ་བས་དེ་དག་བསྔགས་བརྗོད་ཀྱང་།། དེ་དག་བསྔགས་པ་མཐར་ནི་ཕྱིན་མི་འགྱུར། ། གང་དག་ཕྱི་དུས་རྒྱལ་བའི་ཆོས་འཛིན་པ།། སངས་རྒྱས་བྱེ་བ་ཁྲག་ཁྲིག་བརྒྱ་མཐའ་ཡས།། བསྐལ་པ་བྱེ་བར་བཞུགས་ཏེ་དེ་དག་གིས།། བསྔགས་པ་བརྗོད་ཀྱང་མཐའ་མར་ཕྱིན་མི་ནུས།། དྲི་ཞིམ་ཡིད་འོང་སྤོས་ཀྱིས་ཆོ་ག་བཞིན།། སངས་རྒྱས་མཆོད་རྟེན་ལ་ནི་སུ་སྐུད་པ།། དེ་ནི་ཐོབ་རྙེད་འཇིག་རྟེན་ཀུན་ཏུ་རྒྱུ།། དེ་ནི་ས་འདིར་སྙིང་པོ་བླངས་པར་འགྱུར།། རྒྱལ་བའི་མཆོད་རྟེན་སྤོས་བྱུག་ཕུལ་བྱས་ན། ། བཅོམ་ལྡན་འདས་ཀྱི་བསྟན་པ་འཇིག་འགྱུར་ཚེ།། འཛམ་བུའི་གླིང་དུ་སྐྱེ་བར་མི་འགྱུར་ཞིང་།། དེ་ནི་དེ་ཚེ་མཐོ་རིས་བདག་པོར་འགྱུར།། རྒྱལ་བའི་མཆོད་རྟེན་སྤོས་བྱུག་ཕུལ་བྱས་ན།། དྲི་མི་ཞིམ་དང་མི་གཙང་སྨད་པ་རྣམས། ། རྟག་ཏུ་སྤོང་ཞིང་ཚུལ་ཁྲིམས་ཕུང་པོར་གནས།། དེ་ནི་རྟག་ཏུ་ཚངས་སྤྱོད་མཆོག་འདིར་སྤྱོད།། རྒྱལ་བའི་མཆོད་རྟེན་སྤོས་བྱུག་ཕུལ་བྱས་ན།། འདི་ནས་ཤི་འཕོས་མཐོ་རིས་ལྷ་དབང་འགྱུར། ། རིན་པོར་མི་ཐོགས་དོན་སྟོང་རྣམས་ལ་རྟོག། ལྷ་རྣམས་ལ་ནི་རྒྱུ་ཆེན་དོན་ཀྱང་བྱེད།། རྒྱལ་བའི་མཆོད་རྟེན་སྤོས་བྱུག་ཕུལ་བྱས་ན།། གང་གི་ཚེ་ན་མི་ཡི་འཇིག་རྟེན་ན།། ཞེ་སྡང་མེད་སེམས་འཇམ་ཞིང་མཉེན་འགྱུར་བ། ། དེ་ཚེ་དེན་འཛམ་བུའི་གླིང་དུ་གནས།། རྒྱལ་བའི་མཆོད་རྟེན་སྤོས་བྱུག་ཕུལ་བྱས་ན།། ཁྱད་འཕགས་ཚིག་ལྡན་སྒྲ་དབྱངས་ཡིད་འོང་འགྱུར།། སྐྱེ་བོ་མང་པོ་ཡིད་འོང་དགའ་ཞིང་བཀུར། ། དེ་ཡི་ཁ་བཞིན་རྟག་ཏུ་གསལ་བར་འགྱུར།། རྒྱལ་བའི་མཆོད་རྟེན་སྤོས་བྱུག་ཕུལ་བྱས་ན།། དེ་ནི་ངན་སོང་ས་རྣམས་མ་ལུས་སྤོང་།། དེ་བཞིན་གཤེགས་དང་ཉེ་བར་ཐོབ་པར་འགྱུར། ། དད་པ་ཐོབ་ཅིང་རྟག་ཏུ་བདེ་ལ་དགའ།། རྒྱལ་བའི་མཆོད་རྟེན་སྤོས་བྱུག་ཕུལ་བྱས་ན།། རྒྱལ་པོ་སྟོབས་ལྡན་འཁོར་ལོས་སྒྱུར་བར་འགྱུར།། བློན་པོ་ཚོང་དཔོན་ཁྱིམ་བདག་བསོད་ནམས་ལྡན། ། ཆོས་རྗེ་བོང་མཛད་སངས་རྒྱས་སུ་ཡང་འགྱུར།། དགབ་པའི་སེམས་ཀྱིས་མགུ་བའི་ཤུགས་བསྐྱེད་དེ།། བཅོམ་ལྡན་མཆོད་རྟེན་ནོར་བུའི་དྲ་བ་འབུལ།། དེ་ནི་རྒྱལ་པོ་མཚན་གྱི་གོ་ཆ་ཅན་མཐུ་ཆེ་བླ་མ་འཁོར་ལོས་སྒྱུར་བར་འགྱུར། ། བལྟ་བོས་མཚན་གྱི་གོ་ཆ་ལྡན་གྱུར་ནས།། གཞལ་མེད་ཁང་ཆེན་རབ་མཛེས་བལྟ་སྡུག་པ།། ཁ་དོག་སྣ་ཚོགས་དཔག་མེད་ལྡན་པ་དང་།། རིན་ཆེན་ཁང་བཟངས་ཆེ་བོས་དག་པ་ཐོབ། ། རྒྱལ་པོའི་ཕོ་བྲང་ཁྱད་པར་འཕགས་གྱུར་པ།། སྐྱེས་པ་བུད་མེད་དག་གིས་གང་བ་དང་།། མཉམ་ཞིང་ལེགས་བྱས་རབ་མཛེས་བལྟ་སྡུག་པ། དྲ་བས་སྣ་ཚོགས་བདེ་བྱེད་དེ་འཇུག་ཐོབ། རྒྱལ་མཚན་པ་དན་གསལ་བས་མཛེས་བྱས་ཤིང་།། གདུགས་བྲེས་ཤིན་ཏུ་མཛེས་ལ་བལྟ་སྡུག་དང་།། མུ་ཏིག་དྲ་བ་ཕྲེང་བ་དེ་འདྲ་བའི།། རྒྱལ་སྲིད་ཡོན་ཏན་ཁྱད་འཕགས་གཞན་ཡང་ཐོབ།། དེ་ཡི་ཡུལ་ན་གཞན་ནོར་བཇིག་བྱེད་པ། ། ཆོམ་རྒན་གཡོ་ལྡན་གཡོ་ཅན་གནས་མི་འགྱུར།། སེམས་ཅན་རྒྱ་ཆེན་བློ་མཆོག་ལྡན་པ་དང་།། ཕན་བྱེད་བྱམས་སེམས་ལྡན་པ་དེ་ན5།། ཤི་འཕོས་བག་ཡོད་དེ་ནི་ལྷར་། འགྲོ་སྟེ།། དཀར་ནག་གང་ཡིན་བདག་ཅག་ཇི་ལྟར་གནས།། འདི་ནས་ཤི་འཕོས་ཇི་ལྟར་མིང་སྐྱེ་ཞེས།། བློ་ལྡན་དེ་ནི་མཐོ་རིས་འདི་གནས་འགྱུར།། སངས་རྒྱས་སྦྱིན་གནས་མྱུར་དུ་མཐོང་འགྱུར་ཏེ། མཐོང་ནས་མཆོད་ཅིང་མཚུངས་མེད་བསྟི་སྟང་བྱེད།། སངས་རྒྱས་མཐོང་ནས་བྱང་ཆུབ་མོས་སྐྱེད་ཅིང་།། རྡུལ་བྲལ་རྣམས་ལ་ཕྱིར་ཞིང་བསྟི་སྟང་བྱེད།། ཡེ་ཤེས་མཐའ་ཡས་ལྡན་དང་མཐུ་ཆེན་འགྱུར།། ཁྱད་པར་ས་གནས་འཕགས་པའི་སེམས་ཅན་འགྱུར།། བཅོམ་ལྡན་འདས་ལ་དད་པའི་སེམས་བསྐྱེད་ནས།། འདི་འདྲའི་དཔལ་འདི་ཕྱིར་ཞིང་མྱོང་བར་འགྱུར།། ང་ཡི་བྱ་བ་འདི་ནི་བརྗོད་པར་བྱ།། ངས་བརྗོད་འདི་ལ་ཐེ་ཙོམ་མ་སྐྱེད་ཅིག། སངས་རྒྱས་དཀའ་སྤངས་མནར་མེད་འགྲོར་འགྱུར་ཞིང་།། ཕྱིན་ཆད་སྡུག་བསྔལ་ཉོན་མོངས་གྱུར་ཏ་རེ།། འཇིག་རྟེན་སྒྲོན་མ་མཚུངས་མེད་བསོད་ནམས་ཞིང་།། དེ་ཡི་མཆོད་རྟེན་བརྒྱ་སུ་སེལ་བ།། བག་ཡོད་གྱུར་ནས་དེ་ནི་བདུད་བརྒྱ་འདྲལ།། དུས་རྣམས་ཀུན་ཏུ་ངན་སོང་ས་ཡང་སྤོང་།། རྟག་ཏུ་སངས་རྒྱས་རྡུལ་བྲལ་བསྟི་སྟང་བྱེད།། རྟག་ཏུ་སྟོབས་ལྡན་ལོ་སྒྱུར་བར་འགྱུར། ། མི་ཡི་འཇིག་རྟེན་སྐྱེས་ན་བསོད་ནམས་ལྡན།། རྒྱལ་པོ་ཀུན་གྱིས་མཆོད་པའི་གནས་སུ་འགྱུར།། ལྷ་ནང་ལྷ་ཡི་དབང་པོ་མཆོད་གནས་འགྱུར།། དེར་ནི་མྱུར་དུ་ལྷ་ཡི་ཚེ་ཡང་ཐ་དཔལ་ལྡན་གསེར་གྱི་གཞལ་མེད་ཁང་པ་རྙེད། ། ལྷ་ཡི་བདེ་བ་མཚུངས་མེད་དབང་ཕྱུག་ཉིད།། གཟུགས་དང་སྒྲ་དང་དྲི་རབ་རོ་མཆོག་དང་།། རེག་བྱ་དཔལ་ལྡན་ལྷ་ཡི་འཇིག་རྟེན་ཐོབ།། མཐུ་ཆེན་ལྡན་དང་བལྟ་བའི་བོས་སུ་འགྱུར། ། ལྷ་མོ་རྣམས་ལ་འདོད་པའི་སྲེད་མི་སྐྱེད།། བཅོམ་ལྡན་མཆོད་རྟེན་བརྒྱ་བསལ་བྱས་ན།། འདི་ནས་ཤི་འཕོས་མི་ཡི་འཇིག་རྟེན་འགྲོ།། ཡན་ལག་ལེགས་གནས་ཁྱད་པར་འགྲོ་བར་འགྱུར། ། ནམ་ཡང་བསྟན་བཅོས་མི་ཉུང་མང་པོ་ཐོབ།། བཅོམ་ལྡན་མཆོད་རྟེན་བརྒྱ་བསལ་བྱས་ན།། དེ་ནི་མི་ཁོམ་བརྒྱད་པོ་ཀུན་སྤོང་ཞིང་།། དེ་ནི་ངལ་འགྱུར་དེ་བཞིན་ཁྱད་པར་འཕགས། ། དེ་ནི་སངས་རྒྱས་མཚུངས་མེད་མཆོད་པ་བྱེད།། བཅོམ་ལྡན་མཆོད་རྟེན་བརྒྱ་བསལ་བྱས་ན།། བག་ཡོད་བློ་གྲོས་བརྟན་ལ་དཔའ་བོར་འགྱུར།། འདོད་པའི་ཡོན་ཏན་དག་ལ་དགའ་མི་སྐྱེད།། མི་དམན་སེམས་ཀྱིས་མངོན་པར་འབྱུང་བར་འགྱུར།། བཅོམ་ལྡན་མཆོད་རྟེན་བརྒྱ་བསལ་བྱས་ན།། དེ་ནི་ནམས་ཀྱང་བྱང་ཆུབ་སེམས་མི་འདོར།། ཚུལ་ཁྲིམས་སྐྱོན་མེད་ཤིན་ཏུ་བསྡམས་པར་འགྱུར།། རྣམ་དག་འདོད་ཆགས་བྲལ་བའི་ཆོས་ཀྱང་ཐོབ། ། བཅོམ་ལྡན་མཆོད་རྟེན་བརྒྱ་བསལ་བྱས་ན།། དེ་ཡི་མདོག་ངན་དུས་རྣམས་ཀུན་ཏུ་སྤོང་།། འཆལ་པའི་ཤེས་རབ་མ་ལུས་རྣམ་པར་སྤོང་།། ཤེས་རབ་བརྒྱ་ཆེན་གྱུར་ནས་སྤྱོད་ལ་གནས། ། བཅོམ་ལྡན་མཆོད་རྟེན་བརྒྱ་བསལ་བྱས་ན།། ཁ་ཟས་གཙང་མ་དག་ཀྱང་རྙེད་འགྱུར་ལ།། ཁྱད་འཕགས་ཁ་ཏོན་ལྡན་ཞིང་བལྟ་སྡུག་ལ།། རེག་དང་ལྡན་ཞིང་རབ་མཛེས་གོས་རྣམས་ཐོབ། ། དད་པའི་ཤུགས་བསྐྱེད་བཅོམ་ལྡན་མཆོད་རྟེན་ལ།། མེ་ཏོག་སྐམ་པོ་ཉལ་ཉི་ལ་ཕྱགས་བྱས་ན།། འདོད་པ་སྨད་པ་སྡུག་བསྔལ་བྱེད་པ་སྤོང་།། སྟོབས་བཅུ་མངའ་བའི་དེད་དཔོན་མཉེས་པར་བྱེད། ། མཆོད་རྟེན་མེ་ཏོག་རྙིས་པ་སུ་འཕྱགས་པ།། དེ་ནི་མཛེས་ཤིང་རྣམ་དག་ལུས་སུ་འགྱུར།། སྐྱེ་བོ་མང་པོས་མཆོད་འོས་བལྟ་བོས་འགྱུར།། དེ་ལ་རྒྱལ་པོ་གནོད་པར་སེམས་མི་འགྱུར།། བཅོམ་ལྡན་མཆོད་རྟེན་དག་ལ་སྔ་རབས་མིས། ། མེ་ཏོག་ཕུལ་བ་སྐམ་པོ་ཕྱགས་བྱས་ན།། ངན་སོང་ས་ཡི་ལས་ངན་ཐམས་ཅད་གཅོད།། བྱང་ཆུབ་སེམས་དཔའ་ཚུལ་ཁྲིམས་ཕུང་པོར་གནས།། མཆོད་རྟེན་མེ་ཏོག་རྙིན་པ་སུ་འཕྱག་པ། ། བག་ཡོད་མྱ་ངན་རྣམས་དང་སྐྱོན་རྣམས་སྤོང་།། ནད་རྣམས་དུ་མ་མ་ལུས་རྣམ་པར་སྤོང་།། བསྐལ་པ་མཐའ་ཡས་རྣམས་སུ་དབུགས་བྱིན་ཐོབ།། མཆོད་རྟེན་མེ་ཏོག་རྙིས་པ་སུ་འཕྱག་པ། སྦྱིན་གནས་མཚུངས་མེད་སངས་རྒྱས་ཐོབ་པར་འོང་།། ཚུངས་མེད་ཐོབ་ཅིང་ལྷ་མིས་མཆོད་འོས་འགྱུར།། རྣམ་དག་ལུས་ལྡན་རྒྱན་གྱིས་བརྒྱན་པར་འགྱུར།། ལྷ་ཡི་མེ་ཏོག་རབ་མཛེས་མནྡ་ར།། མཚུངས་མེད། པ་ཏ་ལ་ཡང་སུ་འབུལ་དང་།། མཆོད་རྟེན་མེ་ཏོག་ཉལ་ཉིལ་སུ་འཕྱག་པ།། དེ་དག་རྣམ་སྨིན་འདྲ་སྟེ་མཆོག་ཏུ་གྱུར།། མཆོད་རྟེན་མེ་ཏོག་རྙིས་པ་སུ་འཕྱག་པ།། དེ་ལུས་དུག་གིས་མི་ཚུངས་མཚོན་མི་ཚུངས།། མེ་འབར་བོད་འཕྲོ་ཕུང་པོ་ཆེས་མི་ཚུགས།། ནོར་གྱི་ཕུང་པོ་རྐུན་པོས་བརྐུ་མི་འགྱུར།། མགུ་ཞིང་རབ་ཏུ་དགའ་བའི་ཤུགས་བསྐྱེད་དེ།། བཅོམ་ལྡན་མཆོད་རྟེན་མེ་ཏོག་སྐམ་ཕྱགས་ན།། དེ་ཡི་བསོད་ནམས་བཟུང་བར་གང་གྱུར་པ། ། གྲངས་སམ་ཆ་ཡང་བརྗོད་པར་སླ་མ་ཡིན།། མཆོད་རྟེན་མེ་ཏོག་རྙིས་པ་སུ་འཕྱག་པ།། སུམ་ཅུ་རྩ་གཉིས་མཚན་གྱིས་གོ་ཆར་འགྱུར།། མི་ཡི་འཇིག་རྟེན་ན་ནི་རྟག་ཏུ་དགའ། ། མཐུ་དང་ལྡན་ཞིང་ཡིད་འོང་སྒྲ་སྐད་འབྱུང་།། མཆོད་རྟེན་མེ་ཏོག་སྙིས་པ་སུ་འཕྱག་པ། ཆོས་མཆོག་རབ་མཛེས་ཡང་དག་སྤྱོད་བྱེད་ཅིང་།། དེ་ལུས་རྣམ་པར་དག་པ་ཆེན་བོར་འོང་། ། རིང་པོར་མི་ཐོགས་འཇིག་རྟེན་སངས་རྒྱས་འགྱུར།། འཇིག་རྟེན་སངས་རྒྱས་འགྱུར་བྱར་མོས་བསྐྱེད་དེ།། སྟོན་པའི་མཆོད་རྟེན་ཐལ་སྦྱར་ཕྱག་འཚལ་བ།། འཇིག་རྟེན་དག་ན་བླ་མར་བཀུར་བྱ། ། དེ་ནི་མཛེས་ཤིང་བལྟ་ན་སྡུག་པར་འགྱུར།། དེ་འདིར་རྒྱལ་སྲིད་ཐོབ་ནས་ལྷ་ཀླུ་མི།། ལྟོ་འཕྱེ་ཆེ་དང་འཇིག་རྟེན་ཐམས་ཅད་འདུད།། སྟེང་གི་འཇིག་རྟེན་ཁམས་ཀུན་རྒྱས་གྱུར། ཕྱག་ཉིད་དུ་དབང་ཐོབ་རྒྱལ་སྲིད་སྟོན། ། དེ་ཡི་ཡུལ་ན་སེམས་ཅན་གང་གནས་པ།། དེ་ཀུན་སངས་རྒྱས་ཡེ་ཤེས་རྫོགས་ལ་འགོད།། དེ་ནི་ངན་སོང་ས་ཡང་རྣམ་པར་སྤོངས།། དེ་དག་རྣམས་ཀྱི་དོན་མཆོག་དམ་པ་བྱེད།། བསོད་ནམས་བློ་གྲོས་དྲན་ལྡན་མཆོད་པོས་འགྱུར།། དབུགས་ཕྱིན་ཐོབ་ནས་འཇིག་རྟེན་ཀུན་ཏུ་རྒྱུ།། དེ་ཡི་གཡོ་འཁོར་ཡིད་འོང་སྒྲ་སྐད་ལྡན།། བསམ་པ་ཇི་བཞིན་དེ་དག་དགའ་བ་སྐྱེད།། སེམས་ཅན་རྣམས་ལ་མི་ལྷོད་ཞི་ཚིག་སྟོན། ། དེ་ལ་སུ་ཡང་དབང་ཕྱུག་མེད་མི་བྱེད།། སྐྱེ་བོ་ཚོགས་ཆེན་དག་གིས་བལྟ་འོས་འགྱུར།། དེ་ཡི་གཡོག་ཀྱང་སྒྲ་དབྱངས་ཡན་ལག་དག། སངས་རྒྱས་མཆོད་རྟེན་ཐལ་སྦྱར་ཕྱག་འཚལ་བ། ། སྦྱིན་དང་སྙན་པར་སྨྲ་དང་དོན་སྤྱོད་དང་།། དོན་མཐུན་པ་དང་སྐྱེ་བོ་མངལ་བྱེད།། སྤྱོད་ཤིང་བརྒྱད་ཀྱང་ཁྲོ་བའི་དངོས་མི་སྐྱེད།། སངས་རྒྱས་མཆོད་རྟེན་ཐལ་སྦྱར་ཕྱག་འཚལ་ལོ།། མཐོ་རིས་འཇིག་རྟེན་གནས་ཤིང་ལྷ་དབང་འགྱུར།། མིར་གྱུར་ན་ཡང་མི་ཡི་རྒྱལ་པོར་འོང་།། དེ་ནི་གཞར་ཡང་ཡོངས་སུ་ཉམས་མི་འགྱུར།། སངས་རྒྱས་མཆོད་རྟེན་ཐལ་སྦྱར་ཕྱག་འཚལ་བ།། དེ་ནི་གཞར་ཡང་ངན་སོང་ཕྱིས་མི་ལྷུང་། ། འཇིག་རྟེན་འདིར་དེ་རྟག་ཏུ་འདོད་པ་སྤོངས།། ནོར་ཅན་ནང་ན་ཕྱུག་ཅིང་མཛོད་མང་འགྱུར།། ཡོན་ཏན་ལྡན་ལ་ཚིག་གཅིག་སུ་སྨྲ་བ།། དེ་ནི་མི་རིགས་སྔགས་ལ་གཞར་མི་སྤྱོད། ། མི་ཡི་འཇིག་རྟེན་གནས་མིན་སྤྱོད་མི་འགྱུར།། དེ་ལ་སེམས་ཅན་མི་ངོམས་དགའ་བར་འགྱུར།། ཡིད་འོང་དབྱངས་ལྡན་ཕོ་བྲང་འཁོར་གཤེགས་ཤིང་།། འཇིག་རྟེན་མགོན་པོ་སྒོ་གཏན་བཞུགས། པའི་ཚེ།། སུ་ཞིག་ཤུགས་བསྐྱེད་མེ་ཏོག་བླངས་ཏེ་གཏོར།། དེ་ནི་བརྒྱན་ནས་རྒྱལ་བ་དམ་པ་མཐོང་།། རང་གི་ཁྱིམ་དུ་སྟོབས་བཅུ་བསྙེན་བཀུར་བྱེད།། དེ་ཡི་བཤོས་གསོལ་ཆོས་བཟང་སྟོན་པ་མཛད།། དད་པ་སྐྱེས་ནས་མི་མཆོག་བསྙེན་བཀུར་བྱེད།། གོས་ཀྱང་ཐོགས་ཏེ་རྣམ་པར་འདྲེན་ལ་འབུལ།། སངས་རྒྱས་བྱང་ཆུབ་མཚུངས་མེད་མཆོག་ཐོབ་ནས།། སྟོབས་བཅུ་ལྡན་ཞིང་གཡོ་བ་མེད་གྱུར་ལ།། བྱང་ཆུབ་སངས་རྒྱས་སྡུག་བསྔལ་སྐྱེ་བོ་འགྲོལ།། འཇིག་རྟེན་ཀུན་ཏུ་མཚུངས་མེད་སངས་རྒྱས་ཤོག། དེ་ཡི་སྨོན་ལམ་འདི་འདྲ་འདི་དང་ནི།། སངས་རྒྱས་ཡེ་ཤེས་དེ་སེམས་དགའ་མཁྱེན་ནས།། སྟོབས་བཅུ་འཛུམ་མཛད་འཇིག་རྟེན་ཐམས་ཅད་དུ། ། མཚུངས་མེད་སངས་རྒྱས་འགྱུར་ཞེས་ལུང་སྟོན་ཏོ།། སྐྱེས་བུ་དམ་པ་མཆོག་གི་གསུང་ཐོས་ནས།། བདེ་གཤེགས་མཆོག་གསུང་གཞན་དུ་མི་འགྱུར་ཏེ། བདག་ནི་རྒྱལ་བ་མཆོག་འགྱུར་དོགས་མེད་ཅེས།། དགའ་ཞིང་མགུནས་པར་སྣང་ཀུན་ཏུ་རྒྱུ།། འཇིག་རྟེན་ལྷ་ཡི་ལྷར་གྱུར་སངས་རྒྱས་སུ།། ཁྱད་འཕགས་མཚུངས་མེད་སྦྱིན་གནས་འགྱུར་བ་དང་། ། དེ་སེམས་སྤྱོད་དང་དགའ་བར་གནས་མཁྱེན་ནས།། དེ་ལ་སྟོབས་བཅུ་མངའ་བས་བཞེས་པར་གྱུར།། བདེ་གཤེགས་མཆོག་གིས་གོས་ནི་བཞེས་རིག་ནས།། དེ་ནི་ཤུགས་སྐྱེས་རབ་དགའ་སེམས་མགུ་སྟེ། ། མཚུངས་མེད་འཇིག་རྟེན་མགོན་ལ་བལྟས་ནས་ནི།། འཇིག་རྟེན་སངས་རྒྱས་བདག་འགྱུར་མོས་པ་སྐྱེད།། སྐྱེ་ཤི་ཕ་རོལ་སེམས་ཅན་བསྒྲལ་བར་བྱ།། གྲོལ་ནས་སྐྱེ་བོ་མང་པོ་འདུས་བྱས་དགྲོལ།། འཇིག་རྟེན་ཀུན་ན་ལོང་བའི་མིག་བདག་གྱུར།། སྣང་བ་ཐོབ་ནས་མུན་པ་རབ་རིབ་བསལ།། དེ་ལྟར་ཕན་ཡོན་དམ་པ་འདི་ཐོས་ནས།། མེ་ཏོག་ཕྲེང་བ་རྒྱལ་མཚན་གོས་མཆོག་དང་།། རོལ་མོ་སྒྲ་དང་གདུགས་དང་བྱུག་བདུག་གིས། ། མགོན་པོ་མཆོག་ལ་སངས་རྒྱས་འགྱུར་བས་གྱིས།། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས།། དགེ་སློང་དེ་དག་དང་། བློ་གྲོས་རྣམ་པར་དག་པ་ལ་སོགས་པ། བྱང་ཆུབ་སེམས་དཔའ་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡིད་རངས་ཏེ།། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། འཕགས་པ་སྤྱན་རས་གཟིགས་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ། ། ། རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤི་ལ་དང་། ཞུ་ཆེན་གྱི་ལོ་ཙ་བ་བནྡྷེ་ཡེ་ཤེས་སྡེས་བསྒྱུར་ཅིང་ཐ་སྐད་གསར་ཆད་ཀྱིས་ཀྱང་བཅོས་ནས་བསྟན་ལ་ཕབ་པ།

CLOSE WINDOW