Wylie

e-texts based on the ACIP/ALL Input

རྒྱ་གར་སྐད་དུ། ཨཱརྱ་སུ་སྠི་ཏ་མ་ཏི་དེ་བ་པུཏྟྲ་པ་རི་པྲྀ་ཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ལྷའི་བུ་བློ་གྲོས་རབ་གནས་ཀྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ། དགེ་སློང་དྲུག་ཁྲི་ཉིས་སྟོང་གི་དགེ་སློང་གི་དགེ་འདུན་ཆེན་པོ་མངོན་པར་ཤེས་པ་མངོན་པར་ཤེས་པ་དགྲ་བཅོམ་པ་ཤ་སྟག་དང་། འཇམ་དཔལ་དང་། སེང་གེའི་ཏོག་ལ་སོགས་པ་བྱང་ཆུབ་སེམས་དཔའ་བཞི་ཁྲི་ཉིས་སྟོང་ལ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། སྤྱན་རས་གཟིགས་དབང་ཕྱུག་དང་། མཐུ་ཆེན་ཐོབ་དང་། སྤོབས་པ་བརྩེགས་དང་། གཟུངས་ཀྱི་དབང་ཕྱུག་རྒྱལ་པོ་དང་། ལྷུན་པོ་བརྩེགས་དང་། ལྷུན་པོའི་རྒྱལ་མཚན་དང་། རབ་ཏུ་མི་སྒུལ་དང་། དོན་རབ་སེམས་དང་། ལེགས་པར་བསམ་པ་སེམས་དང་། སེམས་དཔའ་བ་དང་། སེམས་ཀྱི་བློ་གྲོས་དང་། སེམས་བཟང་པོ་དང་། ནོར་བུ་བརྩེགས་དང་། རི་འཇོམས་རྒྱལ་པོ་དང་། ལག་ན་རིན་པོ་ཆེ་དང་། སེམས་དཔའ་རིན་པོ་ཆེ་དང་། ལག་ན་རིན་ཆེན་ཕྱག་རྒྱ་དང་། རྟག་ཏུ་ལག་བཏེག་དང་། རྟག་ཏུ་ལག་བརྐྱང་དང་། རྟག་ཏུ་བརྩོན་དང་། སེམས་ཅན་སྒྲོལ་དང་། བརྩོན་འགྲུས་མོས་པ་དང་། ཇི་སྐད་སྨྲས་པ་དེ་བཞིན་བྱེད་པ་ལ་གནས་པ་དང་། སྨོན་ལམ་འཕགས་པ་དང་། ལག་ན་སྒྲོན་མ་དང་། སེམས་མཉམ་པ་དང་། ངན་སོང་སྤོང་དང་། མྱ་ངན་གྱི་མུན་པ་ཐམས་ཅད་འཇོམས་པ་དང་|་བརྩོན་པ་མི་གཏོང་དང་། ཉི་མའི་སྙིང་པོ་དང་། རྡོ་རྗེས་རྣམ་པར་གནོན་དང་། མཐའ་ཡས་རྣམ་པར་གནོན་དང་། དཔག་མེད་རྣམ་པར་གནོན་དང་། མི་གཡོ་གནས་ཀྱིས་རྣམ་པར་གནོན་དང་། ནམ་མཁའ་མཛོད་དང་། བློ་གྲོས་དམ་པ་དང་། ཁྱད་པར་བློ་གྲོས་དང་། བློ་གྲོས་འཕེལ་དང་། འགྲོ་གྲུབ་དང་། ས་འཛིན་དང་། ཟླ་འོད་དང་། ཟླ་བའི་ཏོག་དང་|་འོད་ཀྱི་ཏོག་དང་། འོད་དཔལ་དང་། སྣང་བ་ཐོབ་པས་རྣམ་པར་གནོན་དང་། སེང་གེ་ལྟར་རྣམ་པར་གནོན་པས་མངོན་པར་བསྒྲགས་པའི་སྒྲ་དང་། སྤོབས་པ་ཐོགས་མེད་དང་། སྤོབས་པ་བཞད་པ་དང་། སྤོབས་པ་དཔའ་བ་དང་། རྣམ་པར་གནོན་པ་དང་། ཉི་ཟླའི་འོད་ཟེར་མོག་མོག་པོར་བྱེད་པའི་འོད་དང་། དམིགས་མེད་དང་། བློ་གྲོས་དཔེ་མེད་དང་། རྟག་ཏུ་བཞད་དགེས་དབང་པོ་དང་། ནོར་བུ་དང་། སྒྲིབ་པ་ཐམས་ཅད་རྣམ་པར་སེལ་བ་དང་། བུད་མེད་རྣམ་བསྒྱུར་གོ་ཆ་དང་། རབ་ཏུ་སྣང་བ་དང་། རྣམ་པར་སྣང་བྱེད་དང་། མེས་བྱིན་དང་། ཚོགས་ཅན་རབ་མཆོག་རྒྱལ་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྒྲ་སྐད་ཟབ་མོ་དང་། དེ་དག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་བཞི་ཁྲི་ཉིས་སྟོང་དང་ཐབས་གཅིག་ཏུ་བཞུགས་སོ། །རྒྱལ་པོ་ཆེན་པོ་བཞི་དང་། ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་དང་། དེ་དག་དང་གཞན་ཡང་ལྷའི་བུ་དྲུག་ཁྲི་ཙམ་དང་ཡང་ཐབས་གཅིག་གོ། ལྷའི་བུ་བློ་གྲོས་རབ་གནས་དང་། ལྷའི་བུ་མཚམས་བཟང་དང་། ལྷའི་བུ་དབང་ཕྱུག་ཆེན་པོ་དང་། ལྷའི་བུ་བློ་གྲོས་བཟང་པོ་དང་། དེ་དག་ལ་སོགས་པ་ཐམས་ཅད་ཀྱང་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་ལྷའི་བུ་བདུན་ཁྲི་སུམ་སྟོང་དང་ཡང་ཐབས་གཅིག་གོ་། ལྷ་མ་ཡིན་གྱི་དབང་པོ་སྒྲ་གཅན་དང་། ལྷ་མ་ཡིན་གྱི་དབང་པོ་ལྷུན་པོ་དང་། དེ་དག་ལ་སོགས་པ་ཐམས་ཅད་ཀྱང་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་ལྷ་མ་ཡིན་གྱི་དབང་པོ་ཉི་ཁྲི་དང་ཡང་ཐབས་གཅིག་གོ་། ཀླུའི་རྒྱལ་པོ་མ་དྲོས་པ་དང་། ཀླུའི་རྒྱལ་པོ་ཟླ་བ་དང་། ཀླུའི་རྒྱལ་པོ་འཇོག་པོ་དང་། དེ་དག་ལ་སོགས་པ་ཐམས་ཅད་ཀྱང་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་ཀླུའི་རྒྱལ་པོ་དྲུག་ཁྲི་དང་ཡང་ཐབས་གཅིག་གོ་། དེ་དག་དང་། གཞན་ཡང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་འབུམ་ཕྲག་དུ་མ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དག་དང་ཐབས་གཅིག་སྟེ། དེ་ནས་བཅོམ་ལྡན་འདས་འཁོར་འབུམ་ཕྲག་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ཏེ་ཆོས་སྟོན་ཏོ། །དེའི་ཚེ་ན་འཇམ་དཔལ་གཞོན་ནུར་གྱུར་པ་རང་གི་གནས་ཁང་ན་འདུག་པ། གཅིག་པུ་དབེན་པར་གྱུར་ཅིང་། ནང་དུ་ཡང་དག་འཇོག་ལ་ཞུགས་པ། ཉོན་མོངས་པ་མེད་པ། སེམས་མེད་ཅིང་སེམས་དང་བྲལ་བ་ཞེས་བྱ་བའི་ཏིང་འཛིན་ལ་སྙོམས་པར་ཞུགས་སོ། །དེ་ནས་འཇམ་དཔལ་གཞོན་ནུར་གྱུར་པ་དྲན་ཞིང་ཤེས་བཞིན་དུ་ཏིང་ངེ་འཛིན་དེ་ལས་ལངས་སོ། །འཇམ་དཔལ་གཞོན་ནུར་གྱུར་པ་ལངས་མ་ཐག་ཏུ་ཕྱོགས་བཅུའི་སངས་རྒྱས་ཀྱི་ཞིང་དཔག་ཏུ་མེད་པ་དག་རྣམ་པ་དྲུག་ཏུ་རབ་ཏུ་གཡོས་སོ། །དེ་ནས་འཇམ་དཔལ་གཞོན་ནུར་གྱུར་པ་ཏིང་ངེ་འཛིན་དེ་ལས་ལངས་ནས་འདུ་ཤེས་ཀྱི་རྣམ་པར་རྟོག་པ་ཡིད་ལ་བྱེད་པ་འདི་ལྟ་བུ་འདི་སྐྱེས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་བ་ནི་བརྒྱ་ལ་བརྒྱ་ལམ་ན་སྟེ། འདི་ལྟ་སྟེ། དཔེར་ན|་ཨུ་དུམ་ཝ་རའི་མེ་ཏོག་བརྒྱ་ལ་བརྒྱ་ལམ་ན་འཇིག་རྟེན་དུ་འབྱུང་བ་དེ་བཞིན་དུ་གང་དག་སྐྱེ་བའི་སྡུག་བསྔལ་ཟད་པར་བྱ་བའི་ཕྱིར་ཞི་བ་གསལ་བ། བརྟག་ཏུ་མེད་པ། རྟོག་གེ་དང་བྲལ་བ། ཟབ་པ་ཤེས་པར་དཀའ་བའི་ཆོས་སྟོན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱང་བརྒྱ་ལ་བརྒྱ་ལམ་ན་འཇིག་རྟེན་དུ་འབྱུང་ངོ་། །སངས་རྒྱས་འབྱུང་བ་མེད་པ་ན་ནི་ཆོས་མཉན་པ་ཡང་མེད་དོ། །ཆོས་མཉན་པ་མེད་ན་ནི་སེམས་ཅན་རྣམས་ཀྱི་སྡུག་བསྔལ་ཟད་པ་ཡང་མེད་པས་བདག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སྤྱན་སྔར་སོང་སྟེ། ཞུ་བ་ཞུས་པ་ཇི་ལྟ་བུས་སེམས་ཅན་རྣམས་ཀྱི་དགེ་བའི་རྩ་བ་ཡོངས་སུ་བསྒྲུབ་པར་འགྱུར་བ་དང་། བྱང་ཆུབ་སེམས་དཔའི་ཐེག་པ་པའི་གང་ཟག་རྣམས་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་དག་ལ་ནེམ་ནུར་མེད་ཅིང་ཐེ་ཚོམ་མེད་པར་འགྱུར་བ་དང་། སངས་རྒྱས་ཀྱི་བྱང་ཆུབ་ཡོངས་སུ་རྫོགས་པར་འགྱུར་བ་དང་། འཇིག་རྟེན་གྱི་ཁམས་མི་མཇེད་འདིའི་སེམས་ཅན་འདི་དག་ནི་འདོད་ཆགས་ཆེ་བ། ཞེ་སྡང་ཆེ་བ། གཏི་མུག་ཆེ་བ། དཀར་པོའི་ཆོས་དང་བྲལ་བ། མི་དགེ་བའི་ཆོས་དང་ལྡན་པ། གླེན་པ། བླུན་པ|་མི་གུས་པ། སངས་རྒྱས་དང་བྲལ་བ། ཆོས་དང་བྲལ་བ། དགེ་འདུན་དང་བྲལ་བ་ཤ་སྟག་ཡིན་པས། ཅི་ནས་ཀྱང་སེམས་ཅན་འདི་དག་གིས་ཆོས་ཐོས་ནས་ཤེས་རབ་ཀྱི་མིག་རྣམ་པར་དག་པར་འགྱུར་བ་དེ་ལྟ་བུའི་ཞུ་བ་ཞུའོ་སྙམ་མོ། །དེ་ནས་ཡང་འཇམ་དཔལ་གཞོན་ནུར་གྱུར་པ་འདི་སྙམ་དུ་སེམས་ཏེ། བདག་གི་ཕྱོགས་བཅུའི་བྱང་ཆུབ་སེམས་དཔའ་གང་དག་དེ་བཞིན་གཤེགས་པ་ལ་ཆོས་ཉན་པར་འགྱུར་བ་དང་། གང་དག་ཟབ་མོའི་བཟོད་པ་འདི་ལ་ལུས་ཀྱིས་མངོན་དུ་བྱེད་པར་འགྱུར་བ་འབུམ་ཕྲག་མང་པོ་དག་ཀྱང་བསྡུ་བར་བྱའོ་སྙམ་མོ། །དེ་ནས་དེའི་ཚེ་འཇམ་དཔལ་གཞོན་ནུར་གྱུར་པ་ཀུན་དུ་སྣང་བ་དྲི་མ་མེད་པ་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་བཞུགས་སོ། །འཇམ་དཔལ་གཞོན་ནུར་གྱུར་པ་ཀུན་དུ་སྣང་བ་དྲི་མ་མེད་པ་བཀོད་པའི་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ། དེ་ནས་དེའི་མོད་ལ་ཤར་ཕྱོགས་དང་། ཕྱོགས་བཅུའི་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དག་མཉེན་པ། འཇམ་པ། རྣམ་པར་དག་པ། འོད་གསལ་བ། དྲི་མ་མེད་པ། ཡོངས་སུ་དག་པའི་འོད་ཆེན་པོའི་སྣང་བ་ཆེན་པོས་ཁྱབ་པར་གྱུར་ཏོ། །འོད་དེ་དང་སྣང་བ་དེས། ཕྱོགས་བཅུའི་འཇིག་རྟེན་ན། འཇིག་རྟེན་གྱི་བར་གྱི་མུན་པ་མུན་ནག་དང་། རིའི་རྩེ་མོ་དང་། ཤིང་ལྗོན་པ་དང་། རི་དང་། ཁོར་ཡུག་དང་། བཏང་བཟུང་དང་། བཏང་བཟུང་ཆེན་པོ་དང་། གངས་དང་། རི་རབ་དང་། ལྷུན་པོ་ཆེན་པོ་གང་དག་ཡོད་པ་དེ་དག་ཐམས་ཅད་སྣང་བ་ཆེན་པོས་གསལ་བར་གྱུར་ཏོ། །དེ་ནས་ཕྱོགས་བཅུའི་འཇིག་རྟེན་ན་སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་གང་དག་བཞུགས་ཏེ། འཚོ་ཞིང་གཞེས་པ་དེ་དག་ལ་རང་རང་གི་བསྙེན་བཀུར་བདག་གིས་ཞུས་པ། བཅོམ་ལྡན་འདས། སྔོན་མ་ཐོས། མ་མཐོང་བའི་འོད་འདི་ལྟ་བུ་ཡིད་དུ་མཆི་བ། འདི་ལྟར་འོད་གསལ་བའི་སྣང་བ་ཆེན་པོ་འདི་ལྟ་བུ་འཇིག་རྟེན་དུ་འབྱུང་བ་འདི། བཅོམ་ལྡན་འདས། རྒྱུ་ནི་གང་ལགས། རྐྱེན་ནི་གང་ལགས། བཅོམ་ལྡན་འདས། འོད་འདིས་བདག་ཅག་སེམས་དང་བ་དང་། ལུས་སིམ་པ་ཆེན་པོ་དང་ལྡན་ཞིང་། སེམས་ཅན་རྣམས་ཀྱི་འདོད་ཆགས་དང་། ཞེ་སྡང་དང་། གཏི་མུག་དག་ཀྱང་ཀུན་དུ་མི་འབྱུང་ལགས་ན། བཅོམ་ལྡན་འདས། གང་གིས་འོད་འདི་ལྟ་བུ་བཀྱེ་བ་འདི་སུའི་མཐུ་ལགས། འདི་སུའི་བྱིན་གྱིས་རླབས་ལགས། དེ་སྐད་ཅེས་གསོལ་པ་དང་། སངས་རྒྱས་བཅོམ་ལྡན་འདས་དེ་དག་བསྙེན་བཀུར་བ་དེ་དག་ལ་ཅང་མི་གསུང་བར་གྱུར་ཏོ། །སངས་རྒྱས་ཀྱི་མཐུས་ཕྱོགས་བཅུའི་འཇིག་རྟེན་ན་ལྷའི་སྒྲ་དང་། ཀླུའི་སྒྲ་དང་། གནོད་སྦྱིན་གྱི་སྒྲ་དང་། ལྷ་མ་ཡིན་གྱི་སྒྲ་དང་། ནམ་མཁའ་ལྡིང་གི་སྒྲ་དང་། དྲི་ཟའི་སྒྲ་དང་། མིའམ་ཅིའི་སྒྲ་དང་། ལྟོ་འཕྱེ་ཆེན་པོའི་སྒྲ་དང་། མིའི་སྒྲ་དང་། མི་མ་ཡིན་པའི་སྒྲ་དང་། བྱའི་སྒྲ་དང་|་རི་དྭགས་ཀྱི་སྒྲ་གང་དག་ཡོད་པ་དེ་དག་ཐམས་ཅད་ཀྱང་མི་གྲག་པར་གྱུར་ཏོ། །རླུང་གི་སྒྲ་དང་། ཆུའི་ཕུང་པོའི་སྒྲ་དང་། རྒྱ་མཚོ་ཆེན་པོའི་ཤུགས་ཀྱི་སྒྲ་དང་། རོལ་མོའི་སྒྲ་དང་། ཀླུའི་དབྱངས་ཀྱི་སྒྲ་གང་དག་ཡོད་པ་དེ་དག་ཐམས་ཅད་ཀྱང་མི་གྲག་པར་གྱུར་ཏེ། འགའ་ཡང་སྒྲ་མི་འབྱིན་ཅིང་ཐམས་ཅད་ཞི་བ་དང་། རབ་ཏུ་ཞི་བར་གྱུར་ཏོ|་|ཡང་སངས་རྒྱས་བཅོམ་ལྡན་འདས་དེ་དག་ལ་བསྙེན་བཀུར་བ་དེ་དག་གིས་ལན་གཉིས་ལན་གསུམ་དུ་འདི་སྐད་ཅེས་གསོལ་ཏོ། །སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། ལྷ་དང་མི་རྣམས་ཀྱི་སྐྱེ་བོ་ཕལ་པོ་ཆེའི་དོན་དང་། སྨན་པ་དང་བདེ་བའི་སླད་དུ་བཅོམ་ལྡན་འདས་ཀྱིས་གང་གིས་འོད་འདི་ལྟ་བུ་བཀྱེ་ཞིང་། དེས་སངས་རྒྱས་ཀྱི་ཞིང་ཐམས་ཅད་སྣང་བར་གྱུར་པ་འདི་སུའི་མཐུ་ལགས་པ་བཤད་དུ་གསོལ། དེ་ནས་ཕྱོགས་བཅུའི་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དག་གི་སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱིས་གསུང་གི་སྒྲ་དབྱངས་གཅིག་ཏུ་བསྡུས་ནས། གསུང་གི་འཕྲིན་ལས་བརྗོད་དེ། དེ་བཞིན་གཤེགས་པ་གཅིག་ཅི་ལྟ་བ་བཞིན་དུ་གཞན་ཡང་དེ་བཞིན་དུ་གསུང་ཞིང་། དེ་དག་གིས་གསུང་གི་འཕྲིན་ལས་སྒྲ་དབྱངས་གཅིག་ཏུ་བསྡུས་པ་དེ་ལྟ་བུ་དེས་བསྙེན་བཀུར་བ་དེ་དག་ལ་བཀའ་སྩལ་ཏོ། །སངས་རྒྱས་བཅོམ་ལྡན་འདས་དེ་དག་གི་གསུང་བརྗོད་པ་དེས། སངས་རྒྱས་ཀྱི་ཞིང་ཐམས་ཅད་ཀུན་དུ་གང་བར་གྱུར་ཏེ། ལྷ་དང་མིར་བཅས་པའི་སིལ་སྙན་འབུམ་ཕྲག་མང་པོ་དག་ཀྱང་སྒྲ་མངོན་པར་འབྱིན་ཅིང་། རོལ་མོའི་སྒྲ་དག་ཀྱང་མ་དཀྲོལ་བར་སྒྲ་གྲག་པར་གྱུར་ཏོ། །རོལ་མོའི་སྒྲ་དེ་དག་ལས་མི་རྟག་པ་དང་། སྡུག་བསྔལ་བ་དང་། བདག་མེད་པ་དང་ལྡན་པའི་སྒྲ་འབྱུང་ཞིང་། སྟོང་པ་ཉིད་ཀྱི་སྒྲ་དང་། མཚན་མ་མེད་པའི་སྒྲ་དང་། སྨོན་པ་མེད་པའི་སྒྲ་དང་། འདོད་ཆགས་དང་བྲལ་བའི་སྒྲ་དང་། རྣམ་པར་གྲོལ་བའི་སྒྲ་དང་། ཆོས་ཀྱི་དབྱིངས་ཀྱི་སྒྲ་དང་། དེ་བཞིན་ཉིད་ཀྱི་སྒྲ་དང་། ཡང་དག་པའི་མཐའི་སྒྲ་དང་། སྦྱིན་པའི་སྒྲ་དང་། ཚུལ་ཁྲིམས་ཀྱི་སྒྲ་དང་། བཟོད་པའི་སྒྲ་དང་། བརྩོན་འགྲུས་ཀྱི་སྒྲ་དང་། བསམ་གཏན་གྱི་སྒྲ་དང་། ཤེས་རབ་ཀྱི་སྒྲ་དང་། ངེས་པའི་སྒྲ་དང་། ཕན་པའི་དངོས་པོའི་སྒྲ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཀྱི་སྒྲ་དག་དང་། དེ་ལྟ་བུ་དང་མཐུན་པའི་ཆོས་ཀྱི་སྒོ་འབུམ་ཕྲག་དུ་མ་དག་གི་སྒྲ་བྱུང་བར་གྱུར་ཏོ། །སྒྲ་བྱུང་བ་དེ་དག་གིས་སེམས་ཅན་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་པ། གྲངས་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་། ཉན་ཐོས་ཉིད་དང་། རང་སངས་རྒྱས་ཉིད་དང་། བརྒྱ་བྱིན་ཉིད་དང་། ཚངས་པ་ཉིད་དང་། འཁོར་ལོས་བསྒྱུར་བའི་རྒྱལ་སྲིད་ཡོངས་སུ་འགྲུབ་པ་ལས་ཕྱིར་མི་ལྡོག་པར་གྱུར་ཏོ། །དེ་ནས་སངས་རྒྱས་བཅོམ་ལྡན་འདས་དེ་དག་གིས་བསྙེན་བཀུར་བ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག། འདི་ལྟ་བུའི་གཏམ་དྲིས་པས་ཁྱེད་ལ་ཅི་ཞིག་བྱའི་ཐོང་ཞིག། འོད་འདི་ནི་ཇི་ཙམ་དུ་བསམ་གྱིས་མི་ཁྱབ་པའི་དགེ་བའི་རྩ་བ་དང་། ཇི་ཙམ་དུ་བསམ་གྱིས་མི་ཁྱབ་པའི་སྦྱིན་པའི་ཚོགས་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་ཚོགས་ཀྱིས་ཡོངས་སུ་སྦྱང་བ་བྱས་པ་ཡིན་ཏེ། འདི་ནི་ཉན་ཐོས་དང་། རང་སངས་རྒྱས་ཐམས་ཅད་ཀྱིས་མ་ཡིན་ནོ། །གལ་ཏེ་དེ་བཞིན་གཤེགས་པས་འོད་འདིའི་བསྔགས་པ་བརྗོད་པར་གྱུར་ན། ལྷ་དང་བཅས་པའི་འཇིག་རྟེན་ཐམས་ཅད་འདི་ལ་རྨོངས་པར་འགྱུར་རོ|་|འོད་འདི་ནི་བྱམས་པ་དང་། སྙིང་རྗེ་དང་། དགའ་བ་དང་། གཏང་སྙོམས་ཐམས་ཅད་ཀྱིས་ཡོངས་སུ་བསྒོས་པས་ཡོངས་སུ་ཚིམ་པར་བྱེད་པ་སྟེ། འོད་འདིའི་བསྔགས་པ་བརྗོད་པར་གྱུར་ན། བསྐལ་པའམ། བསྐལ་པ་ལས་ལྷག་པར་ཡང་བསྔགས་པ་བརྗོད་པའི་མཐར་ཕྱིན་པར་སླ་བ་མ་ཡིན་ནོ། །རིགས་ཀྱི་བུ་དག། དེ་ལྟ་མོད་ཀྱི། འོན་ཀྱང་ལེགས་པར་ཉོན་ལ་རབ་ཏུ་ཡིད་ལ་གཟུང་ཞིག་དང་། ཁྱེད་ལ་བཤད་པར་བྱའོ། །སངས་རྒྱས་བཅོམ་ལྡན་འདས་དེ་དག་ལ་བསྙེན་བཀུར་བ་དེ་དག་གིས་ལན་གཉིས་ལན་གསུམ་དུ་འདི་སྐད་ཅེས་གསོལ་ཏོ། །སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་ཡོངས་སུ་འགྲུབ་པར་བགྱི་བའི་སླད་དུ། བཅོམ་ལྡན་འདས་ཀྱིས་བཤད་དུ་གསོལ། དེ་སྐད་ཅེས་གསོལ་པ་དང་། སངས་རྒྱས་བཅོམ་ལྡན་འདས་དེ་དག་གིས་རང་རང་གི་བསྙེན་བཀུར་བ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་། འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་བཞུགས་ཏེ། འཚོ་ཞིང་གཞེས་པ་དེ་སྙིགས་མ་ལྔ་དང་ལྡན་པའི་འཇིག་རྟེན་གནས་པར་འདོད་ཆགས་དང་། ཞེ་སྡང་དང་། གཏི་མུག་གིས་གཟིར་བའི་སེམས་ཅན་མི་གུས་པ། དབང་པོ་རྟུལ་བ། ངོ་ཚ་ཤེས་པ་དང་། ཁྲེལ་ཡོད་པ་དང་བྲལ་བ། ཉོན་མོངས་པ་ཅན་གྱི་ལས་ལ་སྤྱོད་པ་དེ་ལྟ་བུའི་སེམས་ཅན་རྣམས་ཀྱི་སངས་རྒྱས་ཀྱི་ཞིང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ་ཆོས་སྟོན་ཏོ། །རིགས་ཀྱི་བུ་དག། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མི་མཇེད་དེ་ན། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ཞེས་བྱ་བ་མཐུ་ཆེ་བ། ཤེས་རབ་ཆེ་བ། བརྩོན་འགྲུས་ཆེ་བ། བྱང་ཆུབ་སེམས་དཔའ་རྣམས་ཡང་དག་པར་སྟོན་པར་བྱེད་པ། བྱང་ཆུབ་སེམས་དཔའ་རྣམས་ཡང་དག་པར་འཛིན་དུ་བཅུག་པ། བྱང་ཆུབ་སེམས་དཔའ་རྣམས་ཡང་དག་པར་གཟེངས་བསྟོད་པ། བྱང་ཆུབ་སེམས་དཔའ་རྣམས་ཡང་དག་པར་རབ་ཏུ་དགའ་བར་བྱེད་པ། བྱང་ཆུབ་སེམས་དཔའ་རྣམས་ཀྱི་ཕའི་གོ་འབྱེད་པ། བྱང་ཆུབ་སེམས་དཔའ་རྣམས་ཀྱི་མའི་གོ་འབྱེད་པ། ཆོས་ཐམས་ཅད་ཀྱི་གཞི་རབ་ཏུ་འབྱེད་པའི་ཤེས་པ་ལ་མཁས་པ། ཆགས་པ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ཐོབ་པ། ཐོགས་པ་མེད་པའི་སྤོབས་པ་དང་ལྡན་པ། གཟུངས་ཐོབ་པ། བྱང་ཆུབ་སེམས་དཔའི་ཡོན་ཏན་བསམ་གྱིས་མི་ཁྱབ་པ་དང་ལྡན་པ་ཞིག་འདུག་པ་དེ། འདི་ལྟ་སྟེ། སེམས་ཅན་རྣམས་ཀྱི་དགེ་བའི་རྩ་བ་ཡོངས་སུ་འགྲུབ་པར་བྱ་བ་དང་། བྱང་ཆུབ་སེམས་དཔའི་ཐེག་པ་པའི་གང་ཟག་རྣམས་ཀྱི་ཆོས་བསམ་གྱིས་མི་ཁྱབ་པ་ཡོངས་སུ་རྫོགས་པར་བྱ་བའི་ཕྱིར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་ཆོས་ཀྱི་ཞུ་བ་ཞུ་བར་འགྱུར་ཏེ། རིགས་ཀྱི་བུ་དག། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་དེས། བྱང་ཆུབ་སེམས་དཔའ་གང་དག་ཆོས་བསྟན་པ་དེ་ཉན་ཅིང་འདུ་བར་འགྱུར་བའི་བྱང་ཆུབ་སེམས་དཔའ་དཔག་ཏུ་མེད་པ་དག་ཕྱོགས་བཅུ་ནས་བསྡུ་བའི་ཕྱིར། འོད་འདི་བཀྱེ་སྟེ། རིགས་ཀྱི་བུ་དག། སྣང་བ་ཆེན་པོ་འཇིག་རྟེན་དུ་བྱུང་བ་འདིའི་རྒྱུ་ནི་དེ་ཡིན། རྐྱེན་ནི་དེ་ཡིན་ནོ། །དེ་སྐད་ཅེས་བཀའ་སྩལ་པ་དང་། སངས་རྒྱས་བཅོམ་ལྡན་འདས་དེ་དག་ལ་བསྙེན་བཀུར་བ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་དེ་ཏིང་ངེ་འཛིན་གང་ལ་གནས་ནས་འོད་འདི་ལྟ་བུ་འགྱེད་ལགས། བཀའ་སྩལ་པ། ཏིང་ངེ་འཛིན་ཀུན་དུ་སྣང་བ་དྲི་མེད་བཀོད་པ་སྟེ། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་དེ་ཏིང་ངེ་འཛིན་དེ་ལ་གནས་ནས་འོད་འདི་ལྟ་བུ་འགྱེད་དོ། །གསོལ་པ། བཅོམ་ལྡན་འདས། སངས་རྒྱས་བཅོམ་ལྡན་འདས་རྣམས་ནི་འདི་ལྟར་གསལ་བ། འདི་ལྟར་རྣམ་པར་དག་པ། འདི་ལྟར་ལུས་དང་སེམས་དགའ་བ་དང་། མཆོག་ཏུ་དགའ་བར་བགྱིད་པའི་འོད་འདི་ལྟ་བུ་འགྱེད་པར་མི་མཛད་ལགས་སོ། །བཀའ་སྩལ་པ། རིགས་ཀྱི་བུ་དག། བྱང་ཆུབ་སེམས་དཔའ་བསྡུ་བ་དང་། བྱང་ཆུབ་སེམས་དཔའ་བསྐུལ་བའི་ཆོས་ཀྱི་རྣམ་གྲངས་རྟག་ཏུ་རྒྱུན་མི་འཆད་པའི་ཕྱིར་རོ། །དེ་ནས་ཕྱོགས་བཅུའི་སངས་རྒྱས་ཀྱི་ཞིང་དཔག་ཏུ་མེད་གྲངས་མེད་བསམ་གྱིས་མི་ཁྱབ་པ་གངྒཱའི་ཀླུང་གི་བྱེ་མ་སྙེད་དག་ན། སངས་རྒྱས་ཀྱི་ཞིང་རེ་རེ་ནས་ཀྱང་བྱང་ཆུབ་སེམས་དཔའ་དཀྲིགས་ཕྲག་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་བསམ་གྱིས་མི་ཁྱབ་པ་དག་། སངས་རྒྱས་བཅོམ་ལྡན་འདས་དེ་དག་ག་ལ་བ་དེར་སོང་སྟེ། ལྷགས་ནས་སངས་རྒྱས་བཅོམ་ལྡན་འདས་དེ་དག་གི་ཞབས་ལ་མགོ་བོས་ཕྱག་འཚལ་ཏེ། སངས་རྒྱས་བཅོམ་ལྡན་འདས་དེ་དག་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། སྔོན་མ་མཐོང་། མ་ཐོས་པ་ཡོན་ཏན་དུ་མ་དང་ལྡན་པའི་འོད་འདི་ལྟ་བུ་དང་། སྣང་བ་འདི་ལྟ་བུ་དང་། འབར་བ་འདི་དག་ག་ལས་མཆིས། སུའི་འོད་ལགས། དེ་སྐད་ཅེས་གསོལ་པ་དང་། སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག། འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་ཏོ། །དེ་ན་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ཞེས་བྱ་བ་ཞིག་འདུག་པ་དེས་འདི་ལྟ་སྟེ། ཕྱོགས་བཅུའི་བྱང་ཆུབ་སེམས་དཔའ་རྣམས་བསྡུ་བའི་ཕྱིར་འོད་འབར་བ་འདི་ལྟ་བུ་འདི་བཀྱེའོ། །དེ་སྐད་ཅེས་བཀའ་སྩལ་པ་དང་། སངས་རྒྱས་བཅོམ་ལྡན་འདས་དེ་དག་ལ་བྱང་ཆུབ་སེམས་དཔའ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བ་དང་། ཞུ་བ་དང་ཞུ་བླག་བགྱི་བ་དང་། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་དེ་དང་། དེ་ལས་གཞན་པའི་བྱང་ཆུབ་སེམས་དཔའ་དག་ཀྱང་བལྟ་བའི་སླད་དུ་འཇིག་རྟེན་གྱི་ཁམས་མི་མཇེད་དེར་མཆིའོ། །བཀའ་སྩལ་པ། རིགས་ཀྱི་བུ་དག། དེའི་དུས་ལ་བབ་པར་ཤེས་ན་དེངས་ཤིག། དེ་ནས་དེའི་མོད་ལ་ཕྱོགས་བཅུའི་བྱང་ཆུབ་སེམས་དཔའ་དཀྲིགས་ཕྲག་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་བསམ་གྱིས་མི་ཁྱབ་པ་དག་སྐད་ཅིག་ཐང་ཅིག་ཡུད་ཙམ་དེ་ཉིད་ལ། འདི་ལྟ་སྟེ། དཔེར་ན། མི་སྟོབས་པོ་ཆེའི་ལག་པ་བསྐུམ་པ་ལས་བརྐྱང་བའམ། བརྐྱང་པ་ལས་བསྐུམ་པ་ཙམ་ལ་རང་རང་གི་སངས་རྒྱས་ཀྱི་ཞིང་དག་ནས་མི་སྣང་བར་གྱུར་ནས་འཇིག་རྟེན་གྱི་ཁམས་མི་མཇེད་འདིར་ལྷགས་པར་གྱུར་ཏོ། །དེ་ནས་བྱང་ཆུབ་སེམས་དཔའ་ལ་ལ་དག་ནི་མེ་ཏོག་གི་ཆར་དག་མངོན་པར་རབ་ཏུ་འབེབས་ཤིང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ག་ལ་བ་དེར་ལྷགས་སོ|་|ལ་ལ་དག་ནི་ཕྱེ་མ་དང་། བྱུག་པ་དང་། མེ་ཏོག་ཕྲེང་དང་། སྤོས་ཀྱི་ཆར་དག་དང་། མེ་ཏོག་ཨུཏྤ་ལ་དང་། པདྨ་དང་། ཀུ་མུ་ཏ་དང་། པདྨ་དཀར་པོ་དང་། ཙམ་པ་ཀ་དང་། ཨ་ཏི་མུག་ཏ་ཀ་དང་། སྐྱ་སྣར་དང་། དྷ་ནུ་སྐ་རི་དང་། སྣ་མའི་མེ་ཏོག་དང་། བཱ་ར་ཤི་ཀ་དང་། བཱ་ར་ཤི་ཀ་ཆེན་པོ་དང་། མནད་ར་བ་དང་། མནད་ར་བ་ཆེན་པོ་དང་། པ་རུ་ཤ་ཀ་དང་། པ་རུ་ཤ་ཀ་ཆེན་པོ་དང་། ཟླ་མདོག་དང་། ཟླ་མདོག་ཆེན་པོ་དང་། ཟླ་མདོག་རབ་མཛེས་ལ་སོགས་པ་མེ་ཏོག་གི་རིགས་རྣམ་པ་སྣ་ཚོགས་ཀྱི་ཆར་དག་དང་། སྤོས་ཀྱི་ཆར་དག་དང་། ཕྲེང་བའི་ཆར་དག་དང་། ཕྱེ་མའི་ཆར་དག་མངོན་པར་རབ་ཏུ་འབེབས་ཤིང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ག་ལ་བ་དེར་ལྷགས་སོ། །བྱང་ཆུབ་སེམས་དཔའ་ལ་ལ་དག་ནི་སིལ་སྙན་འབུམ་ཕྲག་དུ་མ་དག་རབ་ཏུ་གསིལ་ཞིང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ག་ལ་བ་དེར་ལྷགས་སོ། །བྱང་ཆུབ་སེམས་དཔའ་ལ་ལ་དག་ནི་དེ་བཞིན་གཤེགས་པ་ལ་བསྟོད་པའི་སྒྲ་དབྱངས་རེ་རེས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམས་སུ་སྒྲ་སྐད་ཀྱིས་གོ་བར་འབྱེད་ཅིང་ལྷགས་ཏེ། དེ་ལྟ་བུའི་བཀོད་པ་རྣམ་པ་སྣ་ཚོགས་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ག་ལ་བ་དེར་ལྷགས་སོ། །བྱང་ཆུབ་སེམས་དཔའ་དེ་དག་འཇིག་རྟེན་གྱི་ཁམས་མི་མཇེད་འདིར་ལྷགས་མ་ཐག་ཏུ་དེ་ནས་དེའི་མོད་ལ་འདི་ལྟ་སྟེ། བྱང་ཆུབ་སེམས་དཔའ་དེ་དག་གིས་མཐུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་གྱི་སེམས་ཅན་གང་ཇི་སྙེད་ཡོད་པ་དེ་དག་ཐམས་ཅད་ཉེ་བར་ཞི་བར་གྱུར་ཏོ། །སེམས་ཅན་གང་ལ་ཡང་འདོད་ཆགས་ཀྱིས་གནོད་པ་མེད། ཞེ་སྡང་གིས་མ་ཡིན། གཏི་མུག་གིས་མ་ཡིན། ང་རྒྱལ་གྱིས་མ་ཡིན། ཕྲག་དོག་གིས་མ་ཡིན། སེར་སྣས་མ་ཡིན། འཆབ་པས་མ་ཡིན། ཁྲོ་བས་མ་ཡིན། ཡོངས་སུ་གདུངས་པས་མ་ཡིན་ཏེ། སེམས་ཅན་ཐམས་ཅད་བྱམས་པའི་སེམས་དང་། མཆོག་ཏུ་དགའ་བའི་སེམས་དང་ལྡན་པར་གྱུར་ཏོ། །དེ་ནས་བྱང་ཆུབ་སེམས་དཔའ་དཀྲིགས་ཕྲག་བྱེ་བ་ཁྲག་ཁྲིག་འབུམ་པ་ཧྲག་དཔག་ཏུ་མེད་གྲངས་མེད་བསམ་གྱིས་མི་ཁྱབ་པ་དེ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་སྟེང་གི་བར་སྣང་ལ་ལུས་མི་སྣང་བར་བྱས་ཏེ། ལུས་ཐམས་ཅད་རྣམ་པར་འཇིག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རང་རང་གི་སྨོན་ལམ་ལས་བྱུང་བའི་པདྨ་ཁ་དོག་སྣ་ཚོགས་འདབ་མ་འབུམ་ཕྲག་དུ་མ་དང་ལྡན་པའི་པདྨའི་སྙིང་པོ་དག་ལ་སྐྱིལ་མོ་ཀྲུང་བཅས་ཏེ་འདུག་པར་གྱུར་ཏོ། །དེ་ནས་གནས་བརྟན་འོད་སྲུང་ཆེན་པོས་ཆོས་ཀྱི་ཆོ་འཕྲུལ་ཆེན་པོ་ངོ་མཚར་རྨད་དུ་བྱུང་བ་དེ་དང་། མེ་ཏོག་གི་ཆར་དང་། སྤོས་ཀྱི་ཆར་དང་། ཕྱེ་མའི་ཆར་དེ་དག་དང་། སིལ་སྙན་འབུམ་ཕྲག་མང་པོ་སྒྲ་འབྱིན་པ་དེ་དག་དང་། སྣང་བ་ཆེན་པོ་དེ་ཡང་མཐོང་། གླིང་ཆེན་པོ་བཞི་པའི་འཇིག་རྟེན་གྱི་ཁམས་འདི་མེ་ཏོག་དག་གིས་པུས་མོ་ནུབ་ཙམ་དུ་ཁེབས་པར་གྱུར་པ་ཡང་མཐོང་། འཁོར་ཕལ་པོ་ཆེ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དེ་དག་ཐམས་ཅད་ཀྱི་ལུས་གསེར་གྱི་ཁ་དོག་ལྟ་བུར་སྣང་བ་དག་ཀྱང་མཐོང་ངོ་། །དེ་ནས་གནས་བརྟན་འོད་སྲུང་ཆེན་པོ་སྟན་ལས་ལངས་ཏེ། ཆོས་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །རབ་དགའ་བདེ་བ་སྩོལ་བ་ཤིན་ཏུ་དྲི་མ་མེད་པའི་ཞལ། །མི་ཡི་དམ་པ་སྟོབས་བཅུ་ཡོན་ཏན་བརྒྱ་དག་ངེས་བསགས་པ། །བསམ་ཡས་གཞལ་དུ་མ་མཆིས་ཡིད་གཉིས་མུན་པ་སེལ་བ་པོ། །ས་བླ་ལྷ་ཡུལ་རྣམ་པར་རྒྱུ་བ་ཁྱོད་དང་མཚུངས་མ་མཆིས། །བསྐལ་པ་ཁྲག་ཁྲིག་བརྒྱར་སྦྱིན་དང་དུལ་བ་ལེགས་པར་སྤྱད། །བདེ་གཤེགས་ཁྱོད་ཀྱི་ཚུལ་ཁྲིམས་མཚུངས་པ་མ་མཆིས་གནས་མ་མཆིས། །བཟོད་སྟོབས་ཤིན་ཏུ་སྟོབས་དང་ལྡན་པ་སྟོབས་བཅུའི་སྟོབས་ལྡན་པ། །ཡོན་ཏན་མངའ་བ་འཛུམ་མཛད་བདག་གི་ཐེ་ཚོམ་བསལ་དུ་གསོལ། །སེམས་ཅན་སྡུག་བསྔལ་གཟིགས་ནས་བསྐལ་པ་བརྒྱ་དག་རྣམ་སྤྱད་ཀྱང་། །སྐྱོ་ཞིང་སྤོང་བ་མི་མངའ་དགྱེས་པ་གཞལ་དུ་མ་མཆིས་བརྙེས། །སྲས་དང་སྲས་མོ་བཙུན་མོ་རྒྱལ་སྲིད་སྤྱན་དང་སྣ་ཚོགས་བཏང་། །སྦྱིན་དགྱེས་ཐམས་ཅད་གཏོང་བ་བདག་གི་ཐེ་ཚོམ་བསལ་དུ་གསོལ།། ཁྱོད་ཀྱིས་སྔོན་ཆད་ཆིབས་དང་གླང་པོ་ཤིང་རྟ་དཔུང་ཆུང་སྩལ། །གཏོང་ལ་དགྱེས་པས་དབུ་དང་ན་བཟའ་ཁྲག་ཁྲིག་བརྒྱ་ཡང་བཏང་། །ཐུབ་པས་ཞལ་ཟས་གཙང་ནན་དེ་བཞིན་ཕོ་བྲང་དཀོར་ཡང་སྩལ། །སྦྱིན་དང་གཏོང་ལ་རྟག་ཏུ་དགྱེས་པ་བདེ་གཤེགས་ཁྱེད་ལ་ཞུ། །སྟོང་པའི་ཆོས་རྣམས་ངེས་པར་བསྟེན་ཞིང་ཐུགས་ལ་ལེགས་དགོངས་པས། །རྡུལ་བྲལ་སྐུ་ལུས་གཏུབས་ཀྱང་སྡུག་བསྔལ་འཁྲུགས་པ་མི་མངའ་ཞིང་། །གསུངས་ཞེས་ཞུས་ན་བཟོད་པ་གསུང་བའི་སྟོབས་ལ་བརྩོན་པ་ཡི། །ཡོན་ཏན་མངའ་བ་རྡུལ་དང་བྲལ་བ་ཁྱོད་ལ་ཞུ་བར་འཚལ། ། འདོད་ཆགས་ཞེ་སྡང་དག་གིས་རབ་དཀྲུགས་རྨོངས་ཤིང་ཀུན་དཀྲིས་ལ། །བདག་ཏུ་འདུ་ཤེས་བརྩོན་པའི་སེམས་ཅན་སྡུག་བསྔལ་གཟིགས་ནས་ནི། །ཐུགས་རྗེ་བསྐྱེད་ནས་བསྐལ་པ་བརྒྱ་དག་སྲིད་པ་འདིར་སྤྱད་པ། །དཔའ་བོ་ལམ་རབ་སྟོན་པར་མཛད་པ་བདག་གི་སྐྱབས་གྱུར་ཅིག། བདེ་གཤེགས་ལེགས་པ་མཛད་པ་ཁྱོད་ནི་འགྲོ་ལ་ཐོགས་མི་མངའ། །སྤྱད་པ་ལེགས་པར་སྤྱད་པས་རྫུ་འཕྲུལ་ཞབས་དང་ཡེ་ཤེས་བརྙེས། །བདག་དང་སེམས་ཅན་རྣམ་པར་བཤིག་ཅིང་སྟོང་པའི་ཆོས་ལ་བརྩོན། །ཤིན་ཏུ་དྲི་མ་མ་མཆིས་བསམ་བསྒོམ་བདག་གི་ཐེ་ཚོམ་ཁུམ། །ཁྱོད་ཀྱིས་སྔོན་ནི་སྦྱིན་དང་ཚུལ་ཁྲིམས་བཟོད་པ་བརྩོན་འགྲུས་དང་། །བསམ་གཏན་ཤེས་རབ་སྙིང་རྗེ་བྱམས་པ་མཚུངས་པ་མ་མཆིས་བསྟེན། །ཁྱོད་ཀྱིས་ཡོན་ཏན་བསམ་གྱིས་མི་ཁྱབ་ཆུ་འཛིན་རྒྱ་མཚོ་བཞིན། །འབྱུང་གནས་བཟང་པོ་ཤིན་ཏུ་གནས་པ་བདག་གི་སྐྱབས་གྱུར་ཅིག་།རྡུལ་བྲལ་ཁྱོད་ཀྱི་སྐུ་ལུས་དུམ་བུ་དུམ་བུར་བཅད་ཅིང་ནི|་|སྲང་ལ་བཅལ་བ་མཛད་ཅིང་དམ་དུམ་ལྷག་གྲོལ་མ་ལུས་པར། །སྐུ་ཀུན་རིལ་གྱིས་བཏང་སྟེ་ཕུག་རོན་ཕྲུག་གུ་གཅིག་མ་བཏང་། །རྡུལ་བྲལ་འོད་མཛད་ཐུགས་རྗེ་མངའ་བ་ཐེ་ཚོམ་གཅད་དུ་གསོལ། །ལྷ་ཚོགས་གནས་པའི་རི་བོ་གཡོས་ཤིང་དགུང་ནི་རྡིབ་གྱུར་ལ། །ལྷ་མ་ཡིན་གྱི་ཚོགས་ཀྱི་གནས་མལ་རྒྱ་མཚོ་བས་གྱུར་ཅིག་།མཁའ་ལ་གནས་ཤིང་རྒྱུ་བའི་དགུང་ཟླ་དོག་སར་ལྷུང་གྱུར་ཀྱང་། །རྒྱལ་བ་གྲགས་པ་མཛད་པ་ཁྱོད་ནི་ལོག་པའི་ཚིག་མི་གསུང་། །དེ་ནས་གནས་བརྟན་འོད་སྲུང་ཆེན་པོས་བཅོམ་ལྡན་འདས་ལ་ཚིགས་སུ་བཅད་པ་དེ་དག་གིས་མངོན་པར་བསྟོད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། སྣང་བ་ཆེན་པོ་འཇིག་རྟེན་དུ་བྱུང་ཞིང་ངོ་མཚར་རྨད་དུ་བྱུང་བའི་མཚན་མ་རྒྱ་ཆེན་པོ་འདི་ལྟ་བུ་གདའ་བ་འདིའི་རྒྱུ་ནི་གང་ལགས། རྐྱེན་ནི་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་། འདི་ལྟ་བུའི་གཏམ་དྲིས་པས་ཁྱོད་ལ་ཅི་ཞིག་བྱའི་ཐོང་ཞིག་། འདི་ནི་ཉན་ཐོས་དང་རང་སངས་རྒྱས་ཐམས་ཅད་ཀྱི་ས་མ་ཡིན་ནོ། །གལ་ཏེ་དེ་བཞིན་གཤེགས་པས་གནས་འདི་བསྟན་པར་གྱུར་ན་ལྷ་དང་བཅས་པའི་འཇིག་རྟེན་འདི་ལ་རྨོངས་ཤིང་བསླད་པར་འགྱུར་རོ། །གསོལ་པ། བཅོམ་ལྡན་འདས། དེ་བཞིན་གཤེགས་པས་སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བའི་སླད་དུ་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་། དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་གཟུང་ཞིག་དང་། བཤད་པར་བྱའོ། ། གནས་བརྟན་འོད་སྲུང་ཆེན་པོས་བཅོམ་ལྡན་འདས་ལ་ལེགས་སོ་ཞེས་བཅོམ་ལྡན་འདས་ཀྱིས་ལྟར་མཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །འོད་སྲུང་། འདི་ན་འཇམ་དཔལ་གཞོན་ནུར་གྱུར་པ་ཀུན་དུ་སྣང་པ་དྲི་མེད་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེའི་མཐུས་ཕྱོགས་བཅུའི་སངས་རྒྱས་ཀྱི་ཞིང་གངྒཱའི་ཀླུང་བྱེ་བའི་བྱེ་མ་སྙེད་དག་འོད་ཀྱིས་སྣང་བར་བྱས་ནས། འོད་དེས་ཕྱོགས་བཅུའི་བྱང་ཆུབ་སེམས་དཔའ་དཀྲིགས་ཕྲག་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད། བསམ་གྱིས་མི་ཁྱབ་པ་ཡང་དག་པར་བསྐུལ་ཏེ། འཇིག་རྟེན་གྱི་ཁམས་མི་མཇེད་འདིར་ལྷགས་ནས། དེ་དག་གིས་ད་གཟོད་ངའི་རྐང་པ་ལ་མགོ་བོས་ཕྱག་བྱས་ཏེ། ང་ལ་ལན་གསུམ་བསྐོར་བ་བྱས་ནས། སྟེང་གི་བར་སྣང་ལ་ཏ་ལ་སྲིད་ཙམ་ན་པདྨ་དགལ་འཁོད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་དེ་དག་གི་མཐུས|་མེ་ཏོག་གི་ཆར་འདི་ལྟ་བུ་འདི་དག་རབ་ཏུ་བབ་ཅིང་སྤོས་ཀྱི་ཆར་དག་དང་། ཕྱེ་མའི་ཆར་འདི་དག་ཀྱང་རབ་ཏུ་བབ་ལ། སིལ་སྙན་འབུམ་ཕྲག་མང་པོ་དག་ཀྱང་མ་དཀྲོལ་བར་སྒྲ་འབྱིན་ལགས་སམ|་བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་། དེ་དེ་བཞིན་ཏེ། བྱང་ཆུབ་སེམས་དཔའ་དེ་དག་གི་མཐུས་མེ་ཏོག་གི་ཆར་འདི་ལྟ་བུ་འདི་དག་རབ་ཏུ་བབ་ཅིང་སྤོས་ཀྱི་ཆར་དག་དང་|་ཕྱེ་མའི་ཆར་འདི་དག་ཀྱང་རབ་ཏུ་བབ་ལ། སིལ་སྙན་འབུམ་ཕྲག་མང་པོ་དག་ཀྱང་མ་དཀྲོལ་བར་སྒྲ་འབྱིན་ནོ། །གསོལ་པ། བཅོམ་ལྡན་འདས། འདི་ན་བྱང་ཆུབ་སེམས་དཔའ་འགའ་ཡང་མི་གདའོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་། དེ་དག་ནི་ཉན་ཐོས་རྣམས་དང་། རང་སངས་རྒྱས་དག་གིས་བལྟ་བར་མི་ནུས་སོ། །དེ་ཅིའི་ཕྱིར་ཞེ་ན། འོད་སྲུང་། འདི་ལྟར་ཉན་ཐོས་དང་། རང་སངས་རྒྱས་རྣམས་ནི་བྱང་ཆུབ་སེམས་དཔའ་རྣམས་སྙིང་རྗེ་ཆེན་པོ་གང་དང་། བྱམས་པ་ཆེན་པོ་གང་དང་། ཕན་པར་འདོད་པ་གང་དང་། སྤྱོད་པ་གང་ལ་གནས་པ་དང་། བྱང་ཆུབ་སེམས་དཔའ་རྣམས་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་གང་ལ་གནས་པ་དེ་ལ་མི་གནས་ཤིང་བྱང་ཆུབ་སེམས་དཔའ་གང་ལ་སྤྱོད་པའི་ལྷག་པའི་བསམ་པ་དེ་ལ་ཡང་མི་སྤྱོད་པའི་ཕྱིར་རོ། །འོད་སྲུང་། བྱང་ཆུབ་སེམས་དཔའ་དེ་དག་ནི་ལུས་ཐམས་ཅད་རྣམ་པར་འཇིག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་པས་དེ་དག་ནི་ཉན་ཐོས་རྣམས་དང་། རང་སངས་རྒྱས་དག་གིས་བལྟ་བར་མི་ནུས་ཏེ། དེ་བཞིན་གཤེགས་པ་རྣམས་ཀྱིས་གཟིགས་པ་ཁོ་ནར་ཟད་དོ|་|འོད་སྲུང་། རིགས་ཀྱི་བུ་དེ་དག་ནི་འདི་ལྟར་ས་ལ་གནས་པའི་བྱང་ཆུབ་སེམས་དཔའ་རྣམས་དང་། ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་རྣམས་ཀྱིས་ཀྱང་རེ་ཞིག་མི་མཐོང་ན། ཉན་ཐོས་དང་། རང་སངས་རྒྱས་རྣམས་ཀྱིས་མཐོང་བར་འགྱུར་བ་ལྟ་ཅི་སྨོས་ཏེ། དེ་ནི་གནས་མེད་དོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་ཆོས་དུ་དག་དང་། སྤྱོད་པ་ཅི་འདྲ་བ་དང་། དགེ་བའི་རྩ་བ་ཇི་ལྟ་བུ་དག་དང་ལྡན་ན་བྱང་ཆུབ་སེམས་དཔའི་ཏིང་ངེ་འཛིན་ལུས་ཐམས་ཅད་རྣམ་པར་འཇིག་པ་ཐོབ་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་། བྱང་ཆུབ་སེམས་དཔའ་ཆོས་བཅུ་དང་ལྡན་ན། བྱང་ཆུབ་སེམས་དཔའི་ཏིང་ངེ་འཛིན་ལུས་ཐམས་ཅད་རྣམ་པར་འཇིག་པ་ཐོབ་པར་འགྱུར་ཏེ། བཅུ་གང་ཞེ་ན། ལྷག་པའི་བསམ་པ་ལ་ཡང་དག་པར་འཇུག་པ་དང་། སེམས་ཅན་ཐམས་ཅད་ཡོངས་སུ་མི་གཏོང་བ་དང་། སྙིང་རྗེ་ཆེན་པོ་ཡོངས་སུ་རྫོགས་པར་བྱེད་པ་དང་། མཚན་མ་ཐམས་ཅད་རྣམ་པར་འཇིག་པ་དང་། སངས་རྒྱས་ཀྱི་ཆོས་ཐམས་ཅད་ལ་ལྷག་པར་དམིགས་ཤིང་དེ་ལ་རློམ་སེམས་མེད་པ་དང་། ཉན་ཐོས་དང་རང་སངས་རྒྱས་ཀྱི་ས་ལ་ལྷག་པར་དམིགས་པ་མེད་ཅིང་དེ་ལས་ཡེ་ཤེས་ཡོངས་སུ་ཚོལ་བ་དང་། ལུས་དང་སྲོག་ཀྱང་ཡོངས་སུ་གཏོང་ན་དངོས་པོ་གཞན་དག་ལྟ་ཅི་སྨོས་ཏེ། བདོག་པ་ཐམས་ཅད་ཡོངས་སུ་གཏོང་བ་དང་། ཚོགས་དཔག་ཏུ་མེད་པ་ཡོངས་སུ་འཛིན་ཅིང་། ཚོགས་དེས་རློམ་སེམས་མེད་པ་དང་། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དཔག་ཏུ་མེད་པ་ཡོངས་སུ་རྫོགས་པར་བྱེད་ཅིང་ཕ་རོལ་ཏུ་ཕྱིན་པ་དེ་དག་ལ་རྟོག་པ་མེད་པ་དང་། བདག་གིས་སེམས་ཅན་ཐམས་ཅད་སངས་རྒྱས་ཀྱིས་ཆོས་རྣམས་ལ་བཀོད་ནས། ཕྱིས་བྱང་ཆུབ་ཀྱི་ཤིང་དྲུང་དུ་འགྲོ་བར་བྱའོ་སྙམ་ཡང་སེམས་ཅན་རྣམས་དང་བྱང་ཆུབ་མི་དམིགས་པ་སྟེ། འོད་སྲུང་། བྱང་ཆུབ་སེམས་དཔའ་ཆོས་བཅུ་པོ་དེ་དག་དང་ལྡན་ན། བྱང་ཆུབ་སེམས་དཔའི་ཏིང་ངེ་འཛིན་ལུས་ཐམས་ཅད་རྣམ་པར་འཇིག་པ་ཐོབ་པར་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་གནས་བརྟན་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་ཙམ་དུ་བཅོམ་ལྡན་འདས་དེ་བཞིན་གཤེགས་པ་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་པས་ནམ་ཡང་སེམས་འགའ་ཡང་མ་བསྐྱེད་པའི་ལེགས་པར་གསུངས་པ་གསུང་བ་ནི། བཅོམ་ལྡན་འདས། ངོ་མཚར་ལགས་ཏེ། བདག་གིས་སེམས་ཅན་ཐམས་ཅད་དགྲ་བཅོམ་པ་ཉིད་ཀྱི་ཆོས་རྣམས་ལ་ཡང་དགོད་པར་བགྱི་ན། སངས་རྒྱས་ཀྱི་ཆོས་རྣམས་ལ་ལྟ་སྨོས་ཀྱང་ཅི་འཚལ་ལགས། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་། དེ་ལྟ་བས་ན་ཉན་ཐོས་དང་། རང་སངས་རྒྱས་རྣམས་ཀྱི་ནི་ལུས་ཐམས་ཅད་རྣམ་པར་འཇིག་པའི་ཏིང་ངེ་འཛིན་ལ་སྙོམས་པར་འཇུག་པར་མི་ནུས་ཏེ|་ཏིང་ངེ་འཛིན་དེའི་མིང་ཡང་མི་ཤེས་ན་སྙོམས་པར་འཇུག་པར་འགྱུར་བ་ལྟ་ཅི་སྨོས་ཏེ་དེ་ནི་གནས་མེད་དོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་གནས་བརྟན་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་བྱང་ཆུབ་སེམས་དཔའ་དེ་དག་བལྟ་བར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས། སྐྱེས་བུ་དམ་པ་དེ་ལྟ་བུ་དེ་དག་མཐོང་བར་དཀའ་བའི་སླད་དུའོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་། འཇམ་དཔལ་གཞོན་ནུར་གྱུར་པ་འོངས་ཀྱི་བར་དུ་ཁྱོད་རེ་ཞིག་སྡོད་ཅིག་དང་། དེ་ནས་བྱང་ཆུབ་སེམས་དཔའ་དེ་དག་ཏིང་ངེ་འཛིན་དེ་ལས་ལྡང་ཞིང་དེའི་འོག་ཏུ་མཐོང་བར་འགྱུར་རོ། །འོད་སྲུང་། དེ་ལྟ་མོད་ཀྱི་ཁྱོད་ཉིད་ཏིང་ངེ་འཛིན་རྣམས་ཀྱི་གནས་ཐོབ་པ་ཡིན་གྱི། བྱང་ཆུབ་སེམས་དཔའ་དེ་དག་སྤྱོད་ལམ་ཇི་ལྟ་བུས་གནས་པར་རྟོགས་ཤིག་།དེ་ནས་གནས་བརྟན་འོད་སྲུང་ཆེན་པོས་བཅོམ་ལྡན་འདས་ཀྱི་ལྟར་མཉན་ནས། བྱང་ཆུབ་སེམས་དཔའ་དེ་དག་སྤྱོད་ལམ་ཇི་ལྟ་བུས་གནས་པ་བལྟ་བའི་ཕྱིར་དེའི་ཚེ་སངས་རྒྱས་ཀྱི་མཐུ་དང་། རང་གི་སྟོབས་བསྐྱེད་པས་ཏིང་ངེ་འཛིན་ཉི་ཁྲི་ལ་སྙོམས་པར་ཞུགས་ཤིང་རྣམ་པར་ལངས་ཀྱང་དེ་དག་མ་མཐོང་སྟེ། བྱང་ཆུབ་སེམས་དཔའ་དེ་དག་གི་འོང་བ་དང་འགྲོ་བ་ཡང་མ་ཤེས། དེ་དག་གི་གནས་དང་རབ་ཏུ་གནས་པ་ཡང་མ་ཤེས། ཅི་བྱེད་པ་དང་། ཅི་སྟོན་པ་དག་ཀྱང་ཐམས་ཅད་ཀྱིས་ཐམས་ཅད་དུ་མ་ཤེས། མ་མཐོང་ངོ་། །དེ་ནས་བཅོམ་ལྡན་འདས་ལ་གནས་བརྟན་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟར་བདག་ཏིང་ངེ་འཛིན་ཉི་ཁྲི་ལ་སྙོམས་པར་ཞུགས་ཀྱང་བྱང་ཆུབ་སེམས་དཔའ་དེ་དག་མ་མཐོང་བ་ནི། བཅོམ་ལྡན་འདས། ངོ་མཚར་ལགས་སོ། །བདེ་བར་གཤེགས་པ། ཤིན་ཏུ་ངོ་མཚར་ལགས་སོ། །བཅོམ་ལྡན་འདས། བྱང་ཆུབ་སེམས་དཔའ་དེ་དག་ད་དུང་ཐམས་ཅད་མཁྱེན་པ་ཉིད་མ་ཐོབ་པར་དེ་ལྟར་ཞི་བའི་ཏིང་ངེ་འཛིན་བསྒྲུབས་པས་ཀྱང་དེ་ལྟ་ལགས་ན། བྱང་ཆུབ་སེམས་དཔའ་གང་དག་ཐམས་ཅད་མཁྱེན་པའི་ཡེ་ཤེས་ཐོབ་པ་དག་ལྟ་སྨོས་ཀྱང་ཅི་འཚལ་ཏེ། བཅོམ་ལྡན་འདས། རིགས་ཀྱི་བུ་དང་། རིགས་ཀྱི་བུ་མོ་སུ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་མི་བགྱིད། བཅོམ་ལྡན་འདས། གལ་ཏེ་བྱང་ཆུབ་སེམས་དཔའ་ལུས་ཐམས་ཅད་རྣམ་པར་འཇིག་པའི་ཏིང་ངེ་འཛིན་འདི་ཉིད་ཀྱི་སླད་དུ་གོ་ཆ་འཚལ་བར་བགྱིད་པ་དེ་ནི|་གོ་ཆ་ལེགས་པར་འཚལ་བ་ལགས་པས་ཏིང་ངེ་འཛིན་འདི་ནི་སླད་ཀྱིས་ཀྱང་ཡོངས་སུ་གཏང་བར་མི་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་། དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། འདི་ནི་ཉན་ཐོས་དང་རང་སངས་རྒྱས་ཐམས་ཅད་ཀྱི་ས་ཡང་མ་ཡིན་ན། སེམས་ཅན་གཞན་དག་གི་ལྟ་སྨོས་ཀྱང་ཅི་དགོས། དེ་ནས་གནས་བརྟན་ཤཱ་རིའི་བུ་འདི་སྙམ་དུ་སེམས་ཏེ། བདག་ནི་དེ་བཞིན་གཤེགས་པས་ཤེས་རབ་ཅན་རྣམས་ཀྱི་མཆོག་ཏུ་བསྟན་པ་ཡིན་གྱི། བྱང་ཆུབ་སེམས་དཔའ་དེ་དག་སྤྱོད་ལམ་ཅི་ལྟ་བུས་གནས་པ་བདག་གིས་བརྟག་པར་བྱའོ་སྙམ་མོ། །དེ་ནས་གནས་བརྟན་ཤཱ་རིའི་བུ་བྱང་ཆུབ་སེམས་དཔའ་དེ་དག་བལྟ་བའི་ཕྱིར། ཏིང་ངེ་འཛིན་སུམ་ཁྲི་ལ་སྙོམས་པར་ཞུགས་ཤིང་། རྣམ་པར་ལངས་ཀྱང་དེ་དག་གི་མཚན་མ་ཡང་ཤེས་པར་མ་ནུས་སོ། །དེ་ནས་གནས་བརྟན་རབ་འབྱོར་འདི་སྙམ་དུ་སེམས་ཏེ། བདག་གིས་བྱང་ཆུབ་སེམས་དཔའ་འདི་དག་བལྟ་བར་བྱའོ་སྙམ་མོ། །དེ་ནས་གནས་བརྟན་རབ་འབྱོར་བྱང་ཆུབ་སེམས་དཔའ་དེ་དག་བལྟ་བའི་ཕྱིར་སངས་རྒྱས་ཀྱི་མཐུ་དང་། རང་གི་སྟོབས་བསྐྱེད་པས། ཏིང་ངེ་འཛིན་བཞི་ཁྲི་ལ་སྙོམས་པར་ཞུགས་ཤིང་རྣམ་པར་ལངས་ཀྱང་དེ་དག་གི་འོང་བ་དང་། འགྲོ་བ་ཡང་མ་ཤེས། འགྲེང་བ་ཡང་མ་མཐོང་། འཆག་པ་ཡང་མ་མཐོང་། འདུག་པ་ཡང་མ་མཐོང་། ཉལ་བ་ཡང་མ་མཐོང་སྟེ། དེ་དག་བལྟ་བར་མ་ནུས་སོ། །དེ་ནས་གནས་བརྟན་རབ་འབྱོར་གྱིས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ནི་དེ་བཞིན་གཤེགས་པས་ཉོན་མོངས་པ་མ་མཆིས་པར་གནས་པ་རྣམས་ཀྱིས་མཆོག་ཏུ་བསྟན་ཏེ། བདག་ཞི་བའི་ཏིང་ངེ་འཛིན་རྣམས་ཐོབ་པ་ལགས་པས། བཅོམ་ལྡན་འདས། བདག་གལ་ཏེ་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདི་རྔ་བོ་ཆེའི་སྦུབས་གཅིག་ཏུ་གྱུར་ཅིང་། གླིང་ཆེན་པོ་བཞི་པའི་འཇིག་རྟེན་གྱི་ཁམས་གཅིག་ཤོས་ཀྱང་རྔ་བོ་ཆེའི་སྦུབས་གཅིག་ཏུ་གྱུར་ལ། དེར་མི་ལ་ལ་ཞིག་སྐྱེས་ནས་དེར་རི་རབ་ཙམ་གྱི་རྔ་ཤིང་ཐོགས་ཏེ། བདག་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ་མདུན་དུ་མཆིས་ནས། སུག་ལས་གཞན་མི་བགྱིད་པར་བསྐལ་པའི་བར་དུ་རྒྱུན་མི་འཆད་པར་རྔ་བོ་ཆེ་དེ་གཉིས་བརྡུངས་པར་གྱུར་ཀྱང་། བཅོམ་ལྡན་འདས། བདག་ཉོན་མོངས་པ་མ་མཆིས་པར་གནས་པའི་སླད་དུ་དེ་ལྟར་བསྒྲུབས་ཏེ་ཞི་བའི་ཏིང་ངེ་འཛིན་རྣམས་ཐོབ་པ་ལ་རེ་ཞིག་བསྐལ་པ་འདས་པར་གནས་པའི་རྔ་བོ་ཆེ་དེ་གཉིས་ཀྱི་སྒྲ་དེ་དག་བདག་གི་རྣ་བའི་རྣམ་པར་རིག་པ་ཙམ་དུ་ཡང་གྲགས་པར་མི་འགྱུར་ན། དེས་ཏིང་ངེ་འཛིན་དེ་ལས་བསླངས་པ་ལྟ་སྨོས་ཀྱང་ཅི་འཚལ་ཏེ། དེ་ནི་གནས་མ་མཆིས་ལགས་ན། བཅོམ་ལྡན་འདས་ཉོན་མོངས་པ་མ་མཆིས་པར་གནས་པ་དེ་ལྟ་བུ་དང་ལྡན་ཞིང་ཡེ་ཤེས་དེ་ལྟ་བུ་དང་ལྡན་པས། བྱང་ཆུབ་སེམས་དཔའ་དེ་དག་བལྟ་བའི་སླད་དུ་ཏིང་ངེ་འཛིན་བཞི་ཁྲི་ལ་སྙོམས་པར་ཞུགས་ཤིང་རྣམ་པར་ལངས་ཀྱང་དེ་དག་མ་མཐོང་སྟེ། དེ་དག་གི་གནས་ཀྱང་མི་འཚལ་ལགས་སོ། །བཅོམ་ལྡན་འདས། གལ་ཏེ་བྱང་ཆུབ་སེམས་དཔའ་རྣམས་ཀྱི་ཡེ་ཤེས་དེ་ལྟ་བུ་ཡོངས་སུ་ཚོལ་བ་ན། སེམས་ཅན་རེ་རེའི་སླད་དུ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་སེམས་ཅན་དམྱལ་བ་ཆེན་པོར་བསྲེག་པར་གྱུར་ཀྱང་སྤྲོ་བར་བགྱི་ཞིང་། བཅོམ་ལྡན་འདས་།བྱང་ཆུབ་སེམས་དཔའ་རྣམས་ཀྱི་ཡེ་ཤེས་བསམ་གྱིས་མི་ཁྱབ་པ་དེ་ལྟ་བུ་ཡོངས་སུ་གཏང་བར་མི་བགྱིའོ། །བཅོམ་ལྡན་འདས། གལ་ཏེ་བདག་ལེན་པ་མ་མཆིས་པར་ཟག་པ་རྣམས་ལས་སེམས་རྣམ་པར་གྲོལ་བར་མ་གྱུར་ན་ནི། བདག་སླད་མའི་མཐའི་མུར་ཐུག་པར་འཁོར་བར་སྤྱོད་ཅིང་། དེ་ལྟ་བུའི་ཐེག་པ་ཆེན་པོ་ཡང་ཡོངས་སུ་སྤོང་བར་མི་བགྱིད་དོ། །དེ་ནས་བཅོམ་ལྡན་འདས་ཀྱིས་གནས་བརྟན་རབ་འབྱོར་ལ་ལེགས་སོ་ཞེས་བྱ་བ་བྱིན་ཏེ། རབ་འབྱོར་ཁྱོད་ཀྱིས་ལྷག་པའི་བསམ་པ་དེ་ལྟ་བུས་ཚིག་དེ་སྐད་སྨྲས་པ་ལེགས་སོ། །ལེགས་སོ|་|རབ་འབྱོར། ཁྱོད་གལ་ཏེ་ཕུང་པོ་འདི་དག་ཉིད་ཀྱིས་ཡོངས་སུ་མྱ་ངན་ལས་འདའ་བར་མ་གྱུར་དུ་ཟིན་ན། ཁྱོད་དགེ་བའི་རྩ་བ་འདིས། འཁོར་ལོས་བསྒྱུར་བའི་རྒྱལ་སྲིད་གངྒཱའི་ཀླུང་གི་བྱེ་མ་སྙེད་བྱེད་དུ་འཇུག་ཅིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཡང་འགྱུར་རོ། །རབ་འབྱོར། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་པ་དེ་དག་མང་བ་ཡིན་ནམ། གསོལ་པ། བཅོམ་ལྡན་འདས། མང་ལགས་སོ། །བདེ་བར་གཤེགས་པ། མང་ལགས་སོ། །བཀའ་སྩལ་པ། རབ་འབྱོར། ནན་གྱིས་དཔེར་བྱས་ཏེ། གལ་ཏེ་སེམས་ཅན་དེ་དག་ཐམས་ཅད་དགེ་སློང་རབ་འབྱོར་དང་། ཤཱ་རིའི་བུ་དང་། འོད་སྲུང་ཆེན་པོ་ཅི་འདྲ་བ་དེ་ལྟ་བུའི་ཤེས་པ་དང་ལྡན་པར་གྱུར་ལ|་རབ་འབྱོར། ཉན་ཐོས་ཆེན་པོ་དེ་ལྟ་བུ་དེ་དག་གིས་བྱང་ཆུབ་སེམས་དཔའ་དེ་དག་བལྟ་བའི་ཕྱིར། བསྐལ་པ་བྱེ་བ་ཁྲག་ཁྲིག་འབུམ་ཕྲག་དུ་མར་བརྟགས་ཀྱང་མཐོང་བར་མི་ནུས་སོ། །དེ་ཅིའི་ཕྱིར་ཞེ་ན། རབ་འབྱོར། ཉན་ཐོས་དང་། རང་སངས་རྒྱས་རྣམས་ནི་བྱང་ཆུབ་སེམས་དཔའ་རྣམས་ཆོས་གང་དག་ལ་སྤྱོད་པ་དེ་དག་ལ་མི་སྤྱོད་པའི་ཕྱིར་ཏེ། རབ་འབྱོར། དེ་ནི་ཉན་ཐོས་དང་། རང་སངས་རྒྱས་ཐམས་ཅད་ཀྱི་གནས་མ་ཡིན་ནོ། །བསྟན་པ་འདི་བཤད་པ་ན། ལྷ་དང་མིའི་སྐྱེ་དགུ་རྣམས་ལས་སྲོག་ཆགས་བརྒྱད་ཁྲི་བཞི་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །དེ་ནས་འཇམ་དཔལ་གཞོན་ནུར་གྱུར་པ་གནས་འདི་ཉིད་ན་འདུག་པ་འདི་སྙམ་དུ་སེམས་ཏེ། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་མང་པོ་འདི་དག་འདུས་ཀྱི། བདག་གིས་ལྷ་འབུམ་ཕྲག་མང་པོ་དག་ཀྱང་བསྡུ་བར་བྱའོ་སྙམ་མོ། །དེ་ནས་འཇམ་དཔལ་གཞོན་ནུར་གྱུར་པས་དེའི་ཚེ། ཇི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་བྱས་ན་འདི་ལྟ་བུར་འགྱུར་བའི་རྫུ་འཕྲུལ་མངོན་པར་འདུ་བྱ་བ་འདུས་བྱས་པས། པདྨ་ཤིང་རྟའི་འཕང་ལོ་ཙམ། འདབ་མ་ནི་གསེར། སྡོང་བུ་ནི་དངུལ། སྙིང་པོ་ནི་རིན་པོ་ཆེ་དཔལ་གྱི་སྙིང་པོ། ཟེ་བ་ནི་བེ་ཌཱུཪྻ་ལས་བྱས་པ་བྱེ་བ་ཁྲག་ཁྲིག་འབུམ་ཕྲག་བརྒྱད་ཅུ་རྩ་བཞི་མངོན་པར་སྤྲུལ་ཅིང་། པདྨ་དེ་དག་ལ་བྱང་ཆུབ་སེམས་དཔའི་ལུས་གསེར་གྱི་ཁ་དོག་ལྟ་བུ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ། དཔལ་དང་ལྡན་པ། ཁ་དོག་དང་ལྡན་པ། གཟི་བརྗིད་དང་ལྡན་པ། འོད་གསལ་བ་དག་པ་པདྨའི་སྙིང་པོ་དག་གི་དབུས་ན་སྐྱིལ་མོ་ཀྲུང་གིས་འདུག་པའི་ལུས་གཟུགས་དག་ཀྱང་མངོན་པར་སྤྲུལ་ཏོ། །དེ་ནས་པདྨ་དེ་དག་རྒྱལ་ཆེན་བཞིའི་ལྷའི་རིས་ནས་བཟུང་སྟེ། སུམ་ཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། ཚངས་འཁོར་དང་། ཚངས་པའི་མདུན་ན་འདོན་དང་། ཚངས་ཆེན་དང་། འོད་ཆུང་དང་། ཚད་མེད་འོད་དང་། འོད་གསལ་དང་། དགེ་ཆུང་དང་། ཚད་མེད་དགེ་དང་། དགེ་རྒྱས་དང་། སྤྲིན་མེད་དང་། བསོད་ནམས་སྐྱེས་དང་|་འབྲས་བུ་ཆེ་དང་། མི་ཆེ་བ་དང་། མི་གདུང་བ་དང་། གྱ་ནོམ་སྣང་བ་དང་། ཤིན་ཏུ་མཐོང་བ་དང་། འོག་མིན་གྱི་ལྷའི་རིས་ཀྱི་བར་དང་། དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་རྒྱལ་ཆེན་བཞིའི་ལྷའི་རིས་ཐེར་འབུམ་ནས། འོག་མིན་གྱི་ལྷའི་རིས་ཀྱི་བར་འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷ་རྣམས་ཀྱི་གནས་ཇི་སྙེད་པ་ཐམས་ཅད་དུ་འདོང་ཞིང་སྒྲ་སྒྲོགས་པར་བྱེད། དབྱངས་རྗོད་པར་བྱེད། ཡང་དག་པར་སྐུལ་བར་བྱེད་དེ། བྱང་ཆུབ་སེམས་དཔའི་ལུས་གཟུགས་དེ་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་རྣམ་པར་རྒྱུ་བའི་ཚེ། ཚིགས་སུ་བཅད་པ་འདི་དག་སྨྲས་སོ། །སངས་རྒྱས་ཉི་མའི་རྩ་ལག་རྣམས། །འཇིག་རྟེན་དུ་ནི་ལན་འགའ་འབྱུང་། །ུ་དུམ་ཝ་རའི་མེ་ཏོག་ལྟར། །སངས་རྒྱས་དེ་བཞིན་ཤིན་ཏུ་དཀོན། །ཤཱཀྱ་སེང་གེ་མི་ཡི་མཆོག་།དེ་ནི་འཇིག་རྟེན་འདིར་བྱུང་སྟེ། །སྡུག་བསྔལ་ཐམས་ཅད་ཟད་བྱེད་པའི། །ཆོས་ནི་ཡང་དག་དེ་སྟན་མཛད། །ལྷ་ཡི་འདོད་པ་ཡི་དགའ་ལ། །ཇི་སྙེད་ཡུན་རིང་སྤྱད་བྱས་ན། །གང་དུ་ཚོར་བ་མྱོང་གྱུར་པའི། །ངན་སོང་རྣམས་སུ་འགྲོ་བར་འགྱུར། །ཇི་སྲིད་འདོད་པ་རྣམས་བསྟེན་པ། །སྲེད་པ་ཕྱིར་ཞིང་རབ་ཏུ་འཕེལ། །ཁམས་གསུམ་འཁོར་བའི་སྲོག་ཆགས་ལ། །བདེ་བ་ཡོད་པ་མ་ཡིན་ནོ། །སངས་རྒྱས་འབྱུང་བ་རབ་དཀོན་དང་། །ཁོམ་པ་དམ་པ་རྙེད་ནས་ནི། །གང་དག་བདག་མེད་མི་རྟོགས་པ། །དེ་དག་སྡུག་བསྔལ་ཟད་མི་འགྱུར། །སངས་རྒྱས་བལྟ་པའི་ཕྱིར་དེང་ལ། །ཆོས་ཀྱི་དམ་པ་མཉན་པར་གྱིས། །འཇིག་རྟེན་འདྲེན་པ་འདས་འོག་ཏུ། །ཕྱིས་དུས་འགྱོད་པར་མ་བྱེད་ཅིག|་མི་རྣམས་གང་དག་རྟག་མྱོས་ཤིང་། །འཇིགས་ཆེན་བདུད་ཀྱི་ཞགས་པ་ཡི། །བག་མེད་སྤྱོད་པར་བྱེད་རྣམས་ལ། །ཐར་པ་ཡོད་པར་ག་ལ་འགྱུར། །ད་ནི་འདི་སྐད་སྨྲ་བར་བྱ། །བསོད་ནམས་བྱས་པའི་སེམས་ཅན་གང་། །སུམ་ཅུ་རྩ་གཉིས་མཚན་མངའ་བའི། །རྫོགས་སངས་རྒྱས་དང་མྱུར་ཕྲད་བྱོས། །གང་དག་བྱམས་པ་བསམ་ཡས་པའི། །འཇིག་རྟེན་མགོན་རྣམས་མ་གཏོགས་པར། །སེམས་ཅན་རྣམས་ཀྱི་སྐྱབས་གཞན་མེད། །དཔུང་གཉེན་གཞན་ཡང་ཡོད་མ་ཡིན། །སྐྱོབ་པ་ཤཱཀྱ་སེང་གེ་ཡིས། །ཚད་མེད་བསམ་གྱིས་མི་ཁྱབ་པའི། །བསྐལ་པ་བྱེ་བར་སྤྱད་མཛད་ནས། །ཡེ་ཤེས་དམ་པ་བརྙེས་ནས་ནི། །གང་ལ་སེམས་ཅན་མི་དམིགས་ཤིང་། །སྲོག་དང་གང་ཟག་ཡོད་མིན་པའི། །ཆོས་མཆོག་ཞི་བ་ཟབ་མོ་དང་། །མཐོང་བར་དཀའ་བ་རབ་ཏུ་སྟོན། །རྟག་པ་དང་ནི་དེ་བཞིན་དུ། །ཆད་པའང་རབ་ཏུ་སྤངས་གྱུར་ཅིང་། །མཚན་མ་ཐམས་ཅད་སྤངས་པའི་ཆོས། །སྲོག་ཆགས་རྣམས་ལ་སྟོན་པར་མཛད། །གང་ལ་འཇིག་རྟེན་མི་གནས་པའི། །སྟོང་ཉིད་མཚན་མ་མེད་པ་དང་། །སྨོན་པ་བྱེད་པ་མ་ཡིན་པའི། །ཡང་དག་མཐའ་ནི་རབ་ཏུ་སྟོན། །རྟགས་མེད་མཚན་མ་ཡོད་མིན་ཞིང་། །སྐྱེ་མེད་འབྱུང་བ་མེད་པ་དང་། །འོང་བ་མེད་ཅིང་འགྲོ་མེད་པའི། །ཆོས་ནི་མཁས་པ་སྟོན་པར་མཛད། །ཟག་མེད་འབྱུང་བ་ཡོད་མིན་ཞིང་། །རང་བཞིན་གྱིས་ནི་དངོས་མེད་དང་|་|བལྟར་མེད་མཚན་མ་ཡོད་མིན་པ། །སྟོན་དང་རློམ་པའི་སེམས་མི་མངའ། །སེམས་ཅན་གང་ཡང་སྐྱེ་མེད་ཅིང་། །འགའ་ཡང་འཆི་བ་ཡོད་མ་ཡིན། །མྱ་ངན་འདས་པའང་གང་ཡང་མེད། །སེམས་ཅན་འབྱུང་བའང་ཡོད་མ་ཡིན། །སྐད་ཀྱིས་ཆོས་རྣམས་བསྟན་བྱས་ཀྱང་། །སྐད་ལ་བརྟེན་པ་ཡོད་མིན་ཞིང་། །ཡི་གེ་རྣམས་དང་བྲལ་བའི་ཆོས། །མི་ཡི་འདྲེན་པ་སྟོན་པར་མཛད། །གང་ལ་རླུང་ནི་མི་གནས་ཤིང་། །ཆུ་དང་མེ་ཡང་མི་དམིགས་ལ། །སར་ཡང་རྟོག་པ་མེད་པའི་ཆོས། །སྤྱན་དང་ལྡན་པ་སྟོན་པར་མཛད། །གཟུགས་དང་ཚོར་བ་འདུ་ཤེས་དང་། །འདུ་བྱེད་རྣམས་དང་རྣམ་ཤེས་ནི། །སྟོང་ཞིང་ཕུང་པོ་ལྔ་པོ་དག་།དངོས་པོ་མེད་པ་སྟོན་པར་མཛད། །མིག་དང་རྣ་བ་སྣ་དང་ནི། །ལྕེ་དང་ལུས་དང་དེ་བཞིན་ཡིད|་|རང་བཞིན་སྟོང་པར་སྟོན་མཛད་ཀྱང་། །སྟོང་པ་དེ་ཡང་དམིགས་སུ་མེད། །གཟུགས་དང་སྒྲ་དང་དྲི་རྣམས་དང་། །རོ་དང་རེག་བྱ་ཡིད་འོང་བ། །དེ་དག་རྣམ་པར་རྟོག་པས་བསྐྱེད། །རྟོག་པའང་རང་བཞིན་སྟོང་པ་ཡིན། །དེ་ལྟར་སངས་རྒྱས་སྐྱོབ་པ་ནི། །སྲོག་ཆགས་རྣམས་ལ་ཆོས་སྟོན་གྱི། །གང་དག་སྡུག་བསྔལ་ཐར་འདོད་པ། །དེ་དག་རྣམས་འདྲེན་དྲུང་དུ་ཤོག་།དེ་ནས་བྱང་ཆུབ་སེམས་དཔའི་སྤྲུལ་པ་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་ཚིགས་སུ་བཅད་པ་དེ་དག་གིས་ཆོས་བསྟན་པས། འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷའི་བུ་རྣམས་ལས་ལྷ་བྱེ་བ་ཕྲག་དགུ་བཅུ་རྩ་དྲུག་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་། ལྷའི་བུ་ཁྲི་ཉིས་སྟོང་གིས་ནི་འདོད་ཆགས་དང་བྲལ་བ་རྗེས་སུ་ཐོབ་བོ། །ལྷའི་བུ་ས་ཡ་ཕྲག་གསུམ་དང་ཉིས་འབུམ་ནི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་ལྷའི་བུ་ཁྲིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེའི་ཚེ་བྱང་ཆུབ་སེམས་དཔའི་ལུས་གཟུགས་དེ་དག་གིས། ལྷའི་བུ་གང་དག་ཡང་དག་པར་བསྐུལ་བ་དེ་དག་ལས། ལྷའི་བུ་འབུམ་ཕྲག་དཔག་ཏུ་མེད་གྲངས་མེད་པ་དག་སྐད་ཅིག་ཐང་ཅིག་ཡུད་ཙམ་ཅིག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ག་ལ་བ་དེར་དོང་སྟེ། ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། ཕྱོགས་གཅིག་ཏུ་འཁོད་དེ། ལྷའི་མེ་ཏོག་ཨུཏྤ་ལ་དང་། ཀུ་མུ་ཏ་དང་། པདྨ་དཀར་པོ་དང་། མནད་ར་བ་དང་། མནད་ར་བ་ཆེན་པོ་དང་། ཕྱེ་མ་དང་། སྤོས་དང་། བྱུག་པ་དག་གིས་དེ་བཞིན་གཤེགས་པ་ལ་མངོན་པར་གཏོར་ཏོ། །སྟེང་གི་བར་སྣང་ལ་ཡང་ལྷའི་གླུ་དབྱངས་མང་པོ་དག་རབ་ཏུ་ལེན་པར་གྱུར་ཏོ། །དེའི་ཚེ་ན་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདིར་གང་དུ་ལྷའི་བུ་གཟི་བརྗིད་ཆེ་བ|་གཟི་བརྗིད་ཆེ་བ་དག་གིས་ཁྱབ་པར་མ་གྱུར་པའི་ས་ཕྱོགས་ཐ་ན་འཁར་བ་གཟུགས་པའི་གཏོད་ཙམ་ཡང་མེད་པ་དེ་སྙེད་ཀྱི་ལྷའི་བུ་དག་འདུས་པར་གྱུར་ཅིང་། གླིང་ཆེན་པོ་བཞི་བའི་འཇིག་རྟེན་གྱི་ཁམས་འདི་ཡང་མེ་ཏོག་དག་གིས་པུས་མོ་ནུབ་ཙམ་དུ་ཁེབས་པར་གྱུར་ཏོ། །དེ་ནས་ལྷའི་བུ་བློ་གྲོས་རབ་གནས་དང་། ལྷའི་བུ་མཚམས་བཟང་དང་། ལྷའི་བུ་དྲི་མེད་དང་། ལྷའི་བུ་ངོ་ཚ་ཤེས་པའི་ནོར་ཅན་ཞེས་བྱ་བ་ལྷ་བྱེ་བ་ཕྲག་དགུ་བཅུ་རྩ་དྲུག་པོ་ཐམས་ཅད་ཀྱང་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་ཤ་སྟག་གིས་ཡོངས་སུ་བསྐོར་ཅིང་མདུན་དུ་བདར་ནས། འཇམ་དཔལ་གཞོན་ནུར་གྱུར་པའི་གནས་ག་ལ་བ་དེར་དོང་སྟེ་ལྷགས་ནས། འཇམ་དཔལ་གཞོན་ནུར་གྱུར་པའི་གནས་ཀྱི་ཕྱི་རོལ་ནས་ལན་བདུན་བསྐོར་བ་བྱས་ཏེ། མེ་ཏོག་མནད་ར་བའི་ཆར་དག་མངོན་པར་རབ་ཏུ་ཕབ་བོ། མེ་ཏོག་མནད་ར་བའི་ཆར་དེ་དག་གིས། འཇམ་དཔལ་གཞོན་ནུར་གྱུར་པའི་གནས་སུ་མེ་ཏོག་གི་ཕུང་པོ་འཕང་དུ་དཔག་ཚད་བཅུ་པ་ཀུན་ནས་གནས་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་བྱིན་གྱིས་བརླབས་སོ། །ཅི་ལྟ་བུ་བྱིན་གྱིས་བརླབས་ན། འདི་ལྟ་བུར་འགྱུར་བའི་བྱིན་གྱི་རླབས་ཀྱིས་བྱིན་གྱིས་བརླབས་པས། སྟོང་གསུམ་གྱིས་སྟོང་ཆེན་པོའི་འཇིག་རྟེན་གྱི་ཁམས་འདིའི་སྟེང་གི་བར་སྣང་ལ་མེ་ཏོག་གི་དྲ་བ་ཀུན་ནས་བཀྲམ་པར་གྱུར་ཏོ། །མེ་ཏོག་གི་འོད་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཀུན་ཏུ་ཁྱབ་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པ་རང་གི་གནས་ནས་བྱུང་སྟེ་སྨོན་ལམ་ལས་བྱུང་བའི་སྟན་ལ་འདུག་གོ་|དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པའི་རྐང་པ་གཉིས་ལ་གཏུགས་སོ། །ལྷའི་བུ་དེ་དག་ཐམས་ཅད་ཀྱིས་ཀྱང་འཇམ་དཔལ་གཞོན་ནུར་གྱུར་པའི་རྐང་པ་གཉིས་ལ་གཏུགས་སོ། ། །།བམ་པོ་གཉིས་པ། དེ་ནས་འཇམ་དཔལ་གཞོན་ནུར་གྱུར་པ་འདི་སྙམ་དུ་སེམས་ཏེ། བཅོམ་ལྡན་འདས་ཀྱི་སྤྱན་སྔར་བདག་སུ་དང་ལྷན་ཅིག་ཏུ་དྲི་བ་བསྟན་པ་བཤད་པར་བྱ། བསམ་གྱིས་མི་ཁྱབ་པའི་གཞི་རྣམས་དང་། ཤེས་པར་དཀའ་བའི་གཞི་རྣམས་དང་། གནས་པ་མེད་པའི་གཞི་རྣམས་དང་། སྤྲོས་པ་མེད་པའི་གཞི་རྣམས་དང་། སྤྲོས་པ་དང་བྲལ་བའི་གཞི་རྣམས་དང་། བརྗོད་དུ་མེད་པའི་གཞི་རྣམས་དང་། བརྟན་དུ་མེད་པའི་གཞི་རྣམས་དང་། ཟབ་མོའི་གཞི་རྣམས་དང་། བདེན་པའི་གཞི་རྣམས་དང་། ཆགས་པ་མེད་པའི་གཞི་རྣམས་དང་། མི་ཕྱེད་པའི་གཞི་རྣམས་དང་། སྟོང་པ་ཉིད་ཀྱི་གཞི་རྣམས་དང་། མཚན་མ་མེད་པའི་གཞི་རྣམས་དང་། སྨོན་པ་མེད་པའི་གཞི་རྣམས་དང་། དེ་བཞིན་ཉིད་བསྟན་པའི་གཞི་རྣམས་དང་། ཡང་དག་པའི་མཐའི་གཞི་རྣམས་དང་། ཆོས་ཀྱི་དབྱིངས་ཀྱི་གཞི་རྣམས་དང་། མཚུངས་པ་མེད་པའི་གཞི་རྣམས་དང་། བླང་བ་མེད་པའི་གཞི་རྣམས་དང་། དོར་བ་མེད་པའི་གཞི་རྣམས་དང་། སངས་རྒྱས་ཀྱི་གཞི་རྣམས་དང་། ཆོས་ཀྱི་གཞི་རྣམས་དང་། དགེ་འདུན་གྱི་གཞི་རྣམས་དང་། ཡེ་ཤེས་ཡོངས་སུ་རྫོགས་པ་འཐོབ་པའི་གཞི་རྣམས་དང་། ཁམས་གསུམ་པ་མཉམ་པ་ཉིད་ཀྱི་གཞི་རྣམས་དང་། ཆོས་ཐམས་ཅད་མི་དམིགས་པའི་གཞི་རྣམས་དང་། ཆོས་ཐམས་ཅད་སྐྱེ་བ་མེད་པར་བསྟན་པའི་གཞི་རྣམས་དང་། སེང་གེའི་གཞི་རྣམས་དང་། དཔའ་བོའི་གཞི་རྣམས་དང་། གཞི་མེད་པའི་གཞི་དེ་དག་བསྟན་པ་ན་སྣོད་དུ་གྱུར་པ་ནི་སུ་ཡོད་སྙམ་མོ། །དེ་ནས་ཡང་འཇམ་དཔལ་གཞོན་ནུར་གྱུར་པ་འདི་སྙམ་དུ་སེམས་ཏེ། ལྷའི་བུ་བློ་གྲོས་རབ་གནས་འདི་ནི་སྔོན་གྱི་རྒྱལ་བ་ལ་བྱ་བ་ལྷག་པར་བྱས་པ། ཟབ་མོ་ལ་བཟོད་པ་ཐོགས་པ་མེད་པའི་སྤོབས་པ་དང་ལྡན་པ་ཡིན་གྱི། བཅོམ་ལྡན་འདས་ཀྱི་སྤྱན་སྔར་བདག་འདི་དང་ལྷན་ཅིག་ཏུ་དྲི་བ་བསྟན་པ་བཤད་པར་བྱའོ་སྙམ་མོ། །དེ་ནས་འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་འདི་སྐད་ཅེས་སྨྲས་སོ། །ལྷའི་བུ། ཁྱོད་ནི་ཟབ་མོ་ལ་བཟོད་པ་ཐོགས་པ་མེད་པའི་སྤོབས་པ་དང་ལྡན་པ་ཡིན་ན། བཅོམ་ལྡན་འདས་ཀྱི་སྤྱན་སྔར་ཁོ་བོ་དང་ལྷན་ཅིག་ཏུ་དྲི་བ་བསྟན་པ་བཤད་པར་ནུས་སམ། དེ་སྐད་ཅེས་སྨྲས་པ་དང་། ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། གལ་ཏེ་ཁྱོད་གསུང་བར་མི་མཛད། བརྗོད་པར་མི་མཛད། འདོན་པར་ཡང་མི་མཛད། ཡི་གེ་ཡང་མི་བརྗོད། སྒྲ་ཡང་མི་གསན་པ་ལྟ་ན། བདག་གིས་དེ་བཞིན་བསྟན་པར་བགྱིའོ། །འཇམ་དཔལ་གྱིས་སྨྲས་པ། ལྷའི་བུ། གལ་ཏེ་ཁྱོད་ཉན་པར་མི་བྱེད། འཛིན་པར་མི་བྱེད། འཆང་བར་མི་བྱེད། ཀུན་ཆུབ་པར་མི་བྱེད། སེམས་པར་མི་བྱེད། རིག་པར་མི་བྱེད། རྣམ་པར་རིག་པར་མི་བྱེད། ལེན་པར་མི་བྱེད། གཏོང་བར་མི་བྱེད་ཅིང་། ཐོས་ནས་ཀྱང་གཞན་དག་ལ་སྟོན་པར་མི་བྱེད་པ་ལྟ་ན། ཁོ་བོས་ཀྱང་དེ་བཞིན་དུ་བསྟན་པར་བྱའོ། །དེ་ཅིའི་ཕྱིར་ཞེ་ན། ལྷའི་བུ། སངས་རྒྱས་ཀྱི་བྱང་ཆུབ་ནི་ཡི་གེ་མེད་པ། སེམས་མེད་པ། སེམས་དང་བྲལ་བ་སྟེ། གང་གིས་མིང་བརྗོད་ཅིང་། མིང་དེ་ཡང་གཡོ་བ་མེད་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ། ལྷའི་བུ་འདི་དག་ནི། ཁྱོད་ལས་ཆོས་བསྟན་པ་ཉན་པར་འཚལ་གྱི། ས་ཕྱོགས་འདི་ཉིད་དུ་ཁྱོད་ཀྱིས་ལྷའི་བུ་འདི་དག་ལ་ཆོས་ཀྱི་བཀའ་མཆིད་གསུངས་ཤིག། འཇམ་དཔལ་གྱིས་སྨྲས་པ། ལྷའི་བུ། ཁོ་བོ་ནི་ཉན་པར་འདོད་པ་རྣམས་ལ་ཆོས་སྟོན་པར་མི་བྱེད་དེ། འཛིན་པར་འདོད་པ་རྣམས་ལ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། ལྷའི་བུ། བདག་ཏུ་འཛིན་ན་ཉན་འདོད་པར་འགྱུར་ལ། སེམས་ཅན་དུ་འཛིན་པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་ན་ཉན་འདོད་པར་འགྱུར་བའི་ཕྱིར་རོ། ། ལྷའི་བུ། གང་ལ་ངར་འཛིན་པ་དང་། ང་ཡིར་འཛིན་པ་ཡོད་པ་དེ་ནི་འདི་སྙམ་དུ་འདི་ནི་སྟོན་པར་བྱེད་པའོ། །བདག་ནི་ཉན་པའོ། །འདི་ནི་བཤད་པར་བྱའོ་སྙམ་དུ་སེམས་པས། དེ་ནི་ཆགས་པ་གསུམ་གྱིས་ཆགས་པ་ཡིན་ཏེ། གསུམ་གང་ཞེ་ན། བདག་ཏུ་དམིགས་པ་དང་། སེམས་ཅན་དུ་དམིགས་པ་དང་། ཆོས་སུ་དམིགས་པའོ། །ལྷའི་བུ། གང་ལ་ངར་འཛིན་པ་དང་། ང་ཡིར་འཛིན་པ་མེད་པ་དེ་ནི་འཁོར་གསུམ་ཡོངས་སུ་དག་པས་ཆོས་སྟོན་པར་བྱེད་དེ། རྣམ་པར་རྟོག་པར་མི་བྱེད། སེམས་པར་མི་བྱེད། རློམ་སེམས་སུ་མི་བྱེད་དོ། །དེ་ལ་འཁོར་གསུམ་ཡོངས་སུ་དག་པ་གང་ཞེ་ན། བདག་ཏུ་དམིགས་པ་མེད་ཅིང་རྣམ་པར་རྟོག་པར་མི་བྱེད། རློམ་སེམས་སུ་མི་བྱེད། སེམས་པར་མི་བྱེད་པ་དེ་དང་། ཆོས་སྨྲ་བར་དམིགས་པ་མེད་ཅིང་རྣམ་པར་རྟོག་པར་མི་བྱེད། རློམ་སེམས་སུ་མི་བྱེད། སེམས་པར་མི་བྱེད་པ་དང་། ཆོས་སུ་དམིགས་པ་མེད་ཅིང་རྣམ་པར་རྟོག་པར་མི་བྱེད། རློམ་སེམས་སུ་མི་བྱེད། སེམས་པར་མི་བྱེད་པ་སྟེ། ལྷའི་བུ། གང་དག་དེ་ལྟར་ཉན་པ་དེ་དག་ནི་མཉམ་པར་ཉན་པ་ཡིན་ཏེ། མི་མཉམ་པ་མ་ཡིན་ནོ། །ལྷའི་བུ་བློ་གྲོས་རབ་གནས་ཀྱིས་སྨྲས་པ། འཇམ་དཔལ། ཅི་ནས་ཀྱང་མི་ལྡོག་པ་ཉིད་ཀྱི་སླད་དུ་བསྟན་པ་བཤད་པ་ལེགས་སོ། ། ལེགས་སོ། །འཇམ་དཔལ་གྱིས་སྨྲས་པ། ལྷའི་བུ། ཅི་རུང་རྣམ་པར་མ་རྟོག་ཅིག། བྱང་ཆུབ་སེམས་དཔའ་གང་ལྡོག་པ་དེ་ནི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། བྱང་ཆུབ་ཀྱང་དམིགས་སུ་མེད་དོ། །ལྷའི་བུས་སྨྲས་པ། འཇམ་དཔལ། གང་ལས་ལྡོག། འཇམ་དཔལ་གྱིས་སྨྲས་པ། ལྷའི་བུ། འདོད་ཆགས་ལས་གྲོལ་གོ། ཞེ་སྡང་ལས་ལྡོག་གོ། གཏི་མུག་ལས་ལྡོག་གོ། སྲེད་པ་ལས་ལྡོག་གོ། མ་རིག་པ་ལས་ལྡོག་གོ། འཁོར་བར་སྐྱེ་བའི་ཡན་ལག་བཅུ་གཉིས་ཀྱི་བར་ལས་ལྡོག་གོ། རྒྱུ་ལས་ལྡོག་ལོ། ལྟ་བ་ལས་ལྡོག་གོ། མིང་ལས་ལྡོག་གོ་།གཟུགས་ལས་ལྡོག་གོ་།འདོད་པའི་ཁམས་ལས་ལྡོག་གོ། གཟུགས་ཀྱི་ཁམས་ལས་ལྡོག་གོ། གཟུགས་མེད་པའི་ཁམས་ལས་ལྡོག་གོ་།ཉན་ཐོས་ཀྱི་སྤྱོད་པ་ལས་ལྡོག་གོ་། རང་སངས་རྒྱས་ཀྱི་སྤྱོད་པ་ལས་ལྡོག་གོ། །རྟོག་པ་ལས་ལྡོག་གོ། འཛིན་པ་ལས་ལྡོག་གོ་།མཚན་མ་ལས་ལྡོག་གོ་།དངོས་པོར་འཛིན་པ་ལས་ལྡོག་གོ་།ཆད་པར་ལྟ་བ་ལས་ལྡོག་གོ་། རྟག་པར་ལྟ་བ་ལས་ལྡོག་གོ། བླང་བ་ལས་ལྡོག་གོ་།དོར་བ་ལས་ལྡོག་གོ་།བདག་ཏུ་འདུ་ཤེས་པ་ལས་ལྡོག་གོ། སེམས་ཅན་དུ་འདུ་ཤེས་པ་ལས་ལྡོག་གོ་། སྲོག་ཏུ་འདུ་ཤེས་པ་ལས་ལྡོག་གོ་།གང་ཟག་ཏུ་འདུ་ཤེས་པ་ལས་ལྡོག་གོ། ཡིད་ལ་བྱེད་པ་དག་ལས་ལྡོག་གོ། ཆགས་པ་དག་ལས་ལྡོག་གོ། ཕྱིན་ཅི་ལོག་དག་ལས་ལྡོག་གོ། འཇིགས་ཚོགས་ལས་ལྡོག་གོ་།འཇིག་ཚོགས་ལ་ལྟ་བ་ལས་ལྡོག་གོ། འཇིག་ཚོགས་ཀྱི་རྩ་བ་ལས་བྱུང་བའི་ལྟ་བའི་རྣམ་པ་དྲུག་ཅུ་རྩ་གཉིས་ལས་ལྡོག་གོ་།སྒྲིབ་པ་དག་ལས་ལྡོག་གོ་། ཕུང་པོ་ལྔར་འཛིན་པ་ལས་ལྡོག་གོ། ཕྱི་དང་ནང་གི་སྐྱེ་མཆེད་ཐམས་ཅད་ལས་ལྡོག་གོ་།ཁམས་རྣམས་ལས་ལྡོག་གོ་།སངས་རྒྱས་སུ་འདུ་ཤེས་པ་ལས་ལྡོག་གོ་།ཆོས་སུ་འདུ་ཤེས་པ་ལས་ལྡོག་གོ་། དགེ་འདུན་དུ་འདུ་ཤེས་པ་ལས་ལྡོག་གོ་།བདག་སངས་རྒྱས་སུ་འགྱུར་རོ། །བདག་ཆོས་སྟོན་པར་འགྱུར་རོ། །བདག་སེམས་ཅན་གྲོལ་བར་བྱེད་པར་འགྱུར་རོ། ། བདག་བདུད་འདུལ་བར་འགྱུར་རོ། །བདག་ཡེ་ཤེས་ཐོབ་པར་འགྱུར་རོ་སྙམ་པའི་འདུ་ཤེས་དེ་དག་ལས་ལྡོག་གོ་།དེ་བཞིན་གཤེགས་པའི་སྟོབས་བཅུ་ལ་རྟོག་པར་མི་བྱེད་དོ། །སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་རྟོག་པར་མི་བྱེད་དོ། །དབང་པོ་རྣམས་དང་། སྟོབས་རྣམས་དང་། མི་འཇིགས་པ་རྣམས་ལ་རྟོག་པར་མི་བྱེད་དོ། །མཚན་མ་རྣམས་ལ་རྟོག་པར་མི་བྱེད་དོ། །སངས་རྒྱས་ཀྱི་ཞིང་བཀོད་པ་རྣམས་ལ་རྟོག་པར་མི་བྱེད་དོ། །ཉན་ཐོས་ཀྱི་དགེ་འདུན་ཕུན་སུམ་ཚོགས་པ་ལ་རྟོག་པར་མི་བྱེད་ཅིང་རྟོག་པ་ཐམས་ཅད་ལས་ལྡོག་སྟེ། ལྷའི་བུ། དེ་ལྟར་བྱང་ཆུབ་སེམས་དཔའ་གང་དེ་ལས་ལྡོག་པ་དེ་ནི་མི་ལྡོག་པ་ཡིན་ནོ། །ལྷའི་བུས་སྨྲས་པ། འཇམ་དཔལ། གང་ལས་མི་ལྡོག་གོ། འཇམ་དཔལ་གྱིས་སྨྲས་པ། ལྷའི་བུ། སངས་རྒྱས་ཀྱི་ཡེ་ཤེས་ལས་མི་ལྡོག་གོ། སྟོང་པ་ཉིད་ལས་མི་ལྡོག་གོ། མཚན་མ་མེད་པ་ལས་མི་ལྡོག་གོ། སྨོན་པ་མེད་པ་ལས་མི་ལྡོག་གོ་།དེ་བཞིན་ཉིད་ལས་མི་ལྡོག་གོ་།ཆོས་ཀྱི་དབྱིངས་ལས་མི་ལྡོག་གོ|་ཡང་དག་པའི་མཐའ་ལས་མི་ལྡོག་གོ། མཉམ་པ་ཉིད་ལས་མི་ལྡོག་གོ་།ལྷའི་བུས་སྨྲས་པ། འཇམ་དཔལ། དེ་སྐད་ཅེས་བྱང་ཆུབ་སེམས་དཔའ་གང་རྟོག་པ་དང་། རྣམ་པར་རྟོག་པ་དང་|་ཡོངས་སུ་རྟོག་པའི་ཆོས་དེ་དག་ལས་ལྡོག་པ་དེས་ན་ལྡོག་པ་ཞེས་བྱའོ་ཞེས་གསུངས་པ་དེ། ཅི་གང་དག་ལས་ལྡོག་པའི་ཆོས་དེ་དག་མཆིས་པ་ཞིག་གམ། འོན་ཏེ་མ་མཆིས་པ་ཞིག་གམ། འོན་ཏེ་མཆིས་པ་དང་མ་མཆིས་པ་ཞིག་གམ། འོན་ཏེ་མཆིས་པ་ཡང་མ་ལགས། མ་མཆིས་པ་ཡང་མ་ལགས་པ་ཞིག་ལགས། འཇམ་དཔལ་གྱིས་སྨྲས་པ། ལྷའི་བུ། གང་དག་ལས་ལྡོག་པའི་ཆོས་དེ་དག་ནི་ཡོད་པ་ཡང་མ་ཡིན། མེད་པ་ཡང་མ་ཡིན། ཡོད་པ་དང་མེད་པ་ཡང་མ་ཡིན། ཡོད་པ་ཡང་མ་ཡིན་མེད་པ་ཡང་མ་ཡིན་པ་ཡང་མ་ཡིན་ནོ། །ལྷའི་བུས་སྨྲས་པ། འཇམ་དཔལ། འོ་ན་གང་ལས་ལྡོག། འཇམ་དཔལ་གྱིས་སྨྲས་པ། ལྷའི་བུ། ཡང་དག་པ་མ་ཡིན་པར་འཛིན་པ་དང་། ལེགས་པ་མ་ཡིན་པར་འཛིན་པ་དང་། ལོག་པར་འཛིན་པ་གང་ཡིན་པ་དེ་འཛིན་པར་མི་བྱེད། ཡོངས་སུ་གཏོང་བར་མི་བྱེད། མཚན་མར་མི་བྱེད་པ་དེའི་ཕྱིར་ལྡོག་པ་ཞེས་བྱས་ཏེ། དེ་ནི་ཡོད་པར་ཡང་བསྟན་པར་མི་བྱ། མེད་པར་ཡང་བསྟན་པར་མི་བྱའོ། །དེ་ཅིའི་ཕྱིར་ཞེ་ན། གལ་ཏེ་ཡོད་པ་དང་མེད་པ་ལས་ལྡོག་པར་གྱུར་ན། དེ་ནི་སྐྱོན་དུ་གྱུར་པའི་ཕྱིར་རོ། །དེ་ཅིའི་ཕྱིར་ཞེ་ན། གལ་ཏེ་ཡོད་པ་ལས་ལྡོག་པར་གྱུར་ན་རྟག་པར་འགྱུར་ལ། མེད་པ་ལས་ལྡོག་པར་གྱུར་ན་ཆད་པར་འགྱུར་བའི་ཕྱིར་རོ། །དེ་བཞིན་གཤེགས་པ་ནི་རྟག་པ་དང་ཆད་པའི་ཕྱིར་ཆོས་སྟོན་པར་མི་མཛད་དེ། སངས་རྒྱས་བཅོམ་ལྡན་འདས་རྣམས་ཀྱི་ཆོས་བསྟན་པ་ནི་རྟག་པའི་ཕྱིར་ཡང་མ་ཡིན། ཆད་པའི་ཕྱིར་ཡང་མ་ཡིན་ནོ། །ལྷའི་བུ། དེ་བཞིན་ཉིད་གང་ཡིན་པ་དེ་ནི་སྔོན་མ་བྱུང་བར་གྱུར་པའོ། །ཞེས་འདུ་ཤེས་ཀྱིས་ཡོད་པ་མ་ཡིན་པར་ཡོངས་སུ་ཤེས་པར་ཟད་ཀྱི། དེ་ལ་ནི་ཆད་པ་ཡང་མེད། རྟག་པ་ཡང་མེད་དེ། ལྷའི་བུ། དེ་ལྟར་ན་བྱང་ཆུབ་སེམས་དཔའ་ལྡོག་པ་ཡིན་ནོ། །བསྟན་པ་འདི་བཤད་པ་ན་ལྷའི་བུ་ཁྲིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། དེ་བཞིན་གཤེགས་པ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བ་དང་། ཞུ་བ་དང་ཞུ་བླག་བགྱི་བའི་སླད་དུ་དེ་བཞིན་གཤེགས་པའི་སྤྱན་སྔར་བཞུད་ཀྱི་གཤེགས་སོ|་|འཇམ་དཔལ་གྱིས་སྨྲས་པ། ལྷའི་བུ་རྣམ་པར་རྟོག་པ་ལ་མ་སྤྱོད་ཅིག། དེ་བཞིན་གཤེགས་པ་དེ་ནི་ཁོ་བོས་བླངས་ཟིན་ཏོ། །ལྷའི་བུས་སྨྲས་པ། འཇམ་དཔལ། དེ་བཞིན་གཤེགས་པ་དེ་གང་ན་བཞུགས། འཇམ་དཔལ་གྱིས་སྨྲས་པ། ལྷའི་བུ། དེ་ནི་ཁོ་བོའི་མདུན་ན་བཞུགས་སོ། །ལྷའི་བུས་སྨྲས་པ། འཇམ་དཔལ། དེ་མི་གདའོ། །འཇམ་དཔལ་གྱིས་སྨྲས་པ། ལྷའི་བུ|་གལ་ཏེ་ཁྱོད་ཀྱིས་ཐམས་ཅད་མཐོང་ན། དེས་དེ་བཞིན་གཤེགས་པ་མཐོང་བར་མི་འགྱུར་རོ། །ལྷའི་བུས་སྨྲས་པ། འཇམ་དཔལ། ཅི་སླད་དུ་དེ་སྐད་ཅེས་དེ་བཞིན་གཤེགས་པ་དེ་ནི་ཁོ་བོས་བླངས་ཟིན་ཏེ། དེ་ནི་ཁོ་བོའི་མདུན་ན་བཞུགས་སོ་ཞེས་གསུང་། འཇམ་དཔལ་གྱིས་སྨྲས་པ། ལྷའི་བུ། འདི་ཇི་སྙམ་དུ་སེམས། ཁོ་བོའི་མདུན་ཞེས་བྱ་བ་ཅི་ཞིག་ཡིན་སྙམ། ལྷའི་བུས་སྨྲས་པ། འཇམ་དཔལ། ནམ་མཁའི་ཁམས་ལགས་སོ། །འཇམ་དཔལ་གྱིས་སྨྲས་པ། ལྷའི་བུ། དེ་བཞིན་གཤེགས་པ་དེ་ཡང་འདི་ལྟ་སྟེ། ནམ་མཁའི་ཁམས་ཡིན་ནོ།། དེ་ཅིའི་ཕྱིར་ཞེ་ན། ཆོས་ཐམས་ཅད་ནམ་མཁའ་དང་མཉམ་པའི་ཕྱིར་ནམ་མཁའ་ཇི་ལྟ་བུ་ཡིན་པ། དེ་བཞིན་གཤེགས་པ་ཡང་དེ་ལྟ་བུ་ཡིན་པས། ནམ་མཁའ་དང་དེ་བཞིན་གཤེགས་པ་དེ་ནི་གཉིས་སུ་མེད་དེ་གཉིས་སུ་བྱར་མེད་པའི་ཕྱིར་རོ། །ལྷའི་བུ། དེ་ལྟ་བས་ན་ཁྱོད་དེ་བཞིན་གཤེགས་པ་བལྟ་བར་འདོད་ན། མཐའ་འདི་ཁོང་དུ་ཆུད་པར་བྱ་ཞིང་ཅུང་ཟད་ཀྱང་རྣམ་པར་བརྟག་པར་མི་བྱའོ། །དེ་ནས་འཇམ་དཔལ་གཞོན་ནུར་གྱུར་པས། དེའི་ཚེ་ཁང་པ་བརྩེགས་པ་གྲུ་བཞི་ལྷམ་པ། ཀ་པ་བཞི་པ་ཆ་མཉམ་པ། ཤིན་ཏུ་འབྱེས་པ། མཛེས་པ། བལྟ་ན་སྡུག་པ་སུམ་ཁྲི་ཉིས་སྟོང་མངོན་པར་སྤྲུལ་ཏོ། །ཁང་པ་བརྩེགས་པ་དེ་དག་ཏུ་རིན་པོ་ཆེའི་ཁྲི་སྟན་ལྷའི་དཔག་བསམ་ཤིང་ལས་བྱུང་བའི་གོས་ཀྱིས་བཤམས་པ་དག་ཀྱང་སྤྲུལ་ཅིང་། ཁྲི་སྟན་རེ་རེ་ལ་ཡང་བྱང་ཆུབ་སེམས་དཔའི་ལུས་གཟུགས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་དག་སྤྲུལ་ཏོ། །དེ་ནས་འཇམ་དཔལ་གཞོན་ནུར་གྱུར་པས|་ཅི་ལྟ་བུའི་བྱིན་གྱི་རླབས་ནས། འདི་ལྟ་བུར་འགྱུར་བའི་བྱིན་གྱིས་བརླབས་པས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ནི་རྣམ་པར་སྤྱོད་པའི་པདྨ་གང་དག་ཡིན་པ་དེ་དག་དང་། ཁང་པ་བརྩེགས་པ་དེ་དག་དེ་བཞིན་གཤེགས་པ་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལ་ལན་གསུམ་བསྐོར་བ་བྱས་ཏེ། སྟེང་གི་བར་སྣང་ལ་བཅོམ་ལྡན་འདས་ཀྱི་འཁོར་གྱི་དཀྱིལ་འཁོར་ལ་སྣང་བར་བྱེད་ཅིང་། ཕྱོགས་བཞི་ཀུན་ནས་འཁོར་བར་འཁོད་དོ། །དེ་ནས་པདྨ་དེ་དག་ལ་འཁོད་པའི་བྱང་ཆུབ་སེམས་དཔའ་སྤྲུལ་པ་གང་དག་ཡིན་པ་དེ་དག་དང་། ཁང་པ་བརྩེགས་པ་དག་ན་འཁོད་པའི་བྱང་ཆུབ་སེམས་དཔའ་གང་དག་ཡིན་པ་དེ་དག་ཐམས་ཅད་ཀྱིས་བཅོམ་ལྡན་འདས་ལ་སྒྲ་དབྱངས་མཐུན་པར་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །གངྒཱའི་བྱེ་སྙེད་བསམ་གྱིས་མི་ཁྱབ་པའི། །སངས་རྒྱས་བྱེ་བ་ཕྲག་མང་ཁྱོད་ཀྱིས་མཆོད། །བྱང་ཆུབ་མཆོག་གི་སྤྱོད་པ་བཙལ་མཛད་པས། །དེ་སླད་མི་མཆོག་ཁྱོད་ནི་མཛེས་པ་ལགས། །ཐུབ་པ་མཚན་གྱིས་ཡོངས་སུ་སྤྲས་གྱུར་པ། །སྐུ་མཆོག་སྲིད་པ་གསུམ་ན་ལྷང་ངེ་སྟེ། །འདྲེན་པ་གང་ལ་མིང་དང་སྲོག་དང་ནི། །གང་ཟག་མ་མཆིས་ཆོས་ནི་འགྲོ་ལ་སྟོན། །རྣམ་པར་འདྲེན་པས་སྦྱིན་དང་ཚུལ་ཁྲིམས་སྤྱད། །བཟོད་དང་བརྩོན་འགྲུས་དེ་བཞིན་བསམ་གཏན་བསྟེན། །ཁྱོད་ཀྱིས་ཤེས་རབ་སྲིད་གསུམ་ཐོགས་མི་མངའ། །ཡེ་ཤེས་མཐར་བྱོན་ཁྱོད་ལ་ཕྱག་འཚལ་ལོ། །གང་ཞིག་ཆོས་རྗེ་ལྷ་དང་མིས་མཆོད་པའི། །འཇིག་རྟེན་འདྲེན་པ་ལ་ནི་འདུན་འགྱུར་ཞིང་། །སྟོང་པ་ཉིད་ལ་མོས་པར་བགྱིད་པ་ཡི|་|མི་དེ་འཇིག་རྟེན་དག་གི་འདྲེན་པར་འགྱུར། །གང་དག་སྔོན་བྱུང་དེ་བཞིན་གཤེགས་པ་དང་། །གང་དག་ཕྱོགས་རྣམས་བཞུགས་པའི་འདྲེན་པ་དག་།དེ་དག་གིས་ནི་མཚན་མེད་སྟོང་པའི་ཆོས། །རང་བཞིན་མཚན་ཉིད་མ་མཆིས་རྟག་ཏུ་བསྒོམས། །འདི་ལ་རང་བཞིན་སེམས་ཅན་གང་ཡང་ནི། །སྐྱེ་དང་འཆི་བ་དམིགས་སུ་མ་མཆིས་ཤིང་། །འོང་བ་མ་མཆིས་འགྲོ་བ་མ་མཆིས་ཏེ། །ཆོས་རྣམས་ཐམས་ཅད་ནམ་མཁའ་ཇི་བཞིན་ནོ། །ཅི་ལྟར་མི་ཡིས་སྒྱུ་མ་བསྟན་གྱུར་པ། །སྣང་ཡང་དེ་བཞིན་ཉིད་དུ་མ་མཆིས་ལྟར། །དེ་བཞིན་ཆོས་རྣམས་སྒྱུ་མ་འདྲ་བ་དང་། །རྨི་ལམ་ལྟ་བུར་བདེ་བར་གཤེགས་པས་བསྟན། །གང་ཟག་ལ་ལས་གངྒཱའི་བྱེ་སྙེད་ཀྱི། །འཇིག་རྟེན་ཁམས་རྣམས་འདིར་ནི་སྦྱིན་བྱས་དང་། ། འདུས་བྱས་སྟོང་པར་བཟོད་པ་གང་ལགས་པ། །བཟོད་པ་དེ་ནི་སྦྱིན་ལས་ཁྱད་པར་འཕགས། །བྱང་ཆུབ་འདོད་པའི་བྱང་ཆུབ་སེམས་དཔའ་ཡིས། །བསྐལ་པ་བྱེ་བ་གངྒཱའི་བྱེ་སྙེད་དུ། ། མེ་ཏོག་སྤོས་དང་དེ་བཞིན་ཟས་སྐོམ་དག། ཕུལ་ནས་མི་མཆོག་སངས་རྒྱས་མཆོད་པ་བས། །གང་གིས་གང་ལ་མིང་དང་སྲོག་དང་ནི། །གང་ཟག་མ་མཆིས་དེ་འདྲའི་ཆོས་འདི་དག་། ཐོས་ནས་དེ་ལ་འོད་གསལ་བཟོད་ཐོབ་པ། །དེ་ཡིས་མི་རྣམས་དམ་པ་མཆོད་པ་ལགས། །གང་ལ་མིང་དང་གང་ཟག་འདུ་ཤེས་མཆིས། །བསྐལ་པ་བྱེ་བ་མང་པོར་ཟས་སྐོམ་དང་། ། ཤིང་རྟ་དཔུང་ཆུང་ཁྲི་སྟན་སྦྱིན་བགྱིད་ཀྱང་། །དེས་ནི་འགྲོ་བ་གྲོལ་བར་མི་ཐོབ་བོ། །མི་མཆོག་གང་དག་མྱ་ངན་འདས་པ་དང་། །དེ་དག་གིས་ཀྱང་སེམས་ཅན་མ་བཀྲོལ་བ། །མཁས་རྣམས་རང་བཞིན་འོད་གསལ་སྟོང་པ་ཡི། །ཆོས་རྣམས་དེ་ལྟར་མཁྱེན་པས་རྣམ་པར་གྲོལ། །སངས་རྒྱས་འབྱུང་དང་ཡུལ་དུ་གནས་པ་དང་། །དེ་བཞིན་བསྟན་ལ་དད་པ་ཐོབ་པ་དཀའ།། མི་ཡི་སྲིད་པའང་རྙེད་པར་དཀའ་བས་ན། །རྒྱལ་བ་རྣམས་ཀྱི་བསྟན་ལ་ལེགས་བརྩོན་གྱིས། །མི་ཁོམ་བརྒྱད་པོ་ཐམས་ཅད་རྣམ་སྤངས་ཤིང་། །ཁོམ་པ་ཕུན་སུམ་རྙེད་དཀའ་ཐོབ་འགྱུར་ལ། །བདེ་གཤེགས་བསྟན་ལ་དད་པ་རྙེད་གྱུར་པའི། །མཁས་པ་རྣམས་ཀྱིས་རིག་པའི་རྣལ་འབྱོར་སྤྱོད། །སྒྲ་ལ་འཆེལ་ཞིང་འདུག་པར་མ་བྱེད་པར། །ཆོས་ཐོས་གྱུར་ནས་རྟག་ཏུ་ནན་ཏན་གྱིས། །ཁྱེད་ཀྱིས་རྟག་ཏུ་དགོན་པའི་གནས་བརྟེན་ལ། །དེས་ནི་མི་རྣམས་དམ་པར་འགྱུར་བར་བྱོས། །ཆོས་སྨྲའི་དགེ་བཤེས་གང་ཡིན་བསྟེན་གྱིས་ལ། །སྡིག་པའི་གྲོགས་ལ་ལན་འགའང་མ་བསྟེན་ཅིག་།སེམས་ཅན་ཀུན་ལ་སེམས་ནི་མཉམ་གྱིས་ལ། །སེམས་ཅན་དེ་ལ་ནམ་ཡང་མ་རློམས་ཤིག་།ཚུལ་ཁྲིམས་ལྡན་དང་མང་དུ་ཐོས་གྱིས་ལ། །རྟག་ཏུ་ཕྱག་དར་ཁྲོད་དང་བསོད་སྙོམས་སྤྱོད། །གཡེལ་བ་མེད་པར་ཤིང་དྲུང་བསྟེན་གྱིས་ལ། །བསྐུས་ཏེ་བོར་བ་མཆོག་ལ་མ་སྨོད་ཅིག་།འདུས་བྱས་འདི་དག་ཐམས་ཅད་འདུས་བྱས་མིན། །མཚན་ཉིད་གཅིག་ཅིང་སྨིག་རྒྱུ་འདྲ་བ་ཡི། །དམ་པའི་དོན་གྱི་མུ་གཅིག་ཤེས་གྱིས་ལ། །མྱུར་དུ་གཞལ་ཡས་བྱང་ཆུབ་རེག་པར་གྱིས། །ཕུང་པོ་ལྔ་རྣམས་སྒྱུ་མ་བཞིན་དུ་ལྟོས། །ནང་གི་སྐྱེ་མཆེད་དྲུག་དང་ཕྱི་ཡི་དྲུག་།དེ་དག་གྲོང་སྟོང་འདྲ་བར་གསུངས་པས་ན། །དེ་ལ་ནམ་ཡང་བསྟེན་པར་མ་བྱེད་ཅིག་།འདོད་ཆགས་ཞེ་སྡང་རང་བཞིན་སྟོང་པ་ཉིད། །གཏི་མུག་ང་རྒྱལ་ཡོངས་སུ་རྟོག་པས་བསྐྱེད། །རྟོག་པ་དེ་ཡང་མ་བྱུང་འབྱུང་མེད་པར། །དེ་ལྟར་ཤེས་ན་འདྲེན་པ་རྣམས་སུ་འགྱུར། །དེ་ནས་སྤྲུལ་པ་དེ་དག་གིས་ཚིགས་སུ་བཅད་པ་དེ་དག་སྨྲས་པ་ན། འཁོར་དེ་ལས་སྲོག་ཆགས་ཉི་ཁྲི་ཉིས་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །དགེ་སློང་ལྔ་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དགེ་སློང་སུམ་བརྒྱ་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་། དགེ་སློང་མ་སུམ་སྟོང་ཡང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། དགེ་བསྙེན་བདུན་སྟོང་དང་། དགེ་བསྙེན་མ་སྟོང་དང་། ལྷའི་བུ་ཉི་ཁྲི་བདུན་སྟོང་ཡང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་། བྱང་ཆུབ་སེམས་དཔའ་སུམ་བརྒྱས་ནི་མི་སྐྱེ་བའི་ཆོས་ལ་བཟོད་པ་ཐོབ་བོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་རབ་ཏུ་གཡོས་ཏེ། གཡོས། རབ་ཏུ་གཡོས། ཀུན་ཏུ་རབ་ཏུ་གཡོས། འགུལ། རབ་ཏུ་འགུལ། ཀུན་ཏུ་རབ་ཏུ་འགུལ། ལྡེག། རབ་ཏུ་ལྡེག་།ཀུན་ཏུ་རབ་ཏུ་ལྡེག་གོ་།དེ་ནས་བཅོམ་ལྡན་འདས་ལ་གནས་བརྟན་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་རབ་ཏུ་གཡོས་པ་དང་། བྱང་ཆུབ་སེམས་དཔའི་ལུས་གཟུགས་པད་མ་དག་དང་། ཁང་པ་བརྩེགས་པ་འདི་དག་ན་མཆིས་པ་འདི་རྣམས་ཆོས་ཟབ་མོ་འདི་ལྟ་བུ་སྟོན་པར་བགྱིད་པ་དང་། འཁོར་འདི་ཡང་སྣང་བ་ཆེན་པོས་ཁྱབ་པར་གྱུར་པ་དང་། ལྷའི་བུ་བྱེ་བ་ཕྲག་འདི་སྙེད་འདུས་པ་དང་། བྱང་ཆུབ་སེམས་དཔའ་བྱེ་བ་ཕྲག་མང་པོ་འདུས་པ་འདི་དག་སུའི་མཐུ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་གནས་བརྟན་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། འདི་ནི་འཇམ་དཔལ་གཞོན་ནུར་གྱུར་པའི་མཐུ་ཡིན་ཏེ། དེས་བཀོད་པ་འདི་ལྟ་བུ་འདི་དག་ཀུན་དུ་སྣང་ངོ་། །དེ་ཅིའི་ཕྱིར་ཞེ་ན། ཤཱ་རིའི་བུ། འདི་ལྟར་དེང་དེ་བཞིན་གཤེགས་པ་ལ་འཇམ་དཔལ་གཞོན་ནུར་གྱུར་པ་ལྷའི་བུ་བློ་གྲོས་རབ་གནས་དང་ལྷན་ཅིག་ཏུ་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཡོངས་སུ་བསྒྲུབ་པའི་ཕྱིར། བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇིག་པར་བྱེད་པ་ཞེས་བྱ་བའི་ཆོས་ཀྱི་རྣམ་གྲངས་ཞུ་ཞིང་ཞུ་བླག་བྱེད་པར་འགྱུར་པའི་ཕྱིར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། འཇམ་དཔལ་གཞོན་ནུར་གྱུར་པ་དེ་འཁོར་འདུས་པ་འདི་ན་མི་གདའོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ཁྱོད་རེ་ཞིག་སྡོད་ཅིག་དང་། འཇམ་དཔལ་གཞོན་ནུར་གྱུར་པ་དེ། དེའུ་རེ་བདུད་ཀྱི་དཀྱིལ་འཁོར་ཐམས་ཅད་དང་། བདུད་ཀྱི་གནས་ཐམས་ཅད་དང་། བདུད་ཐམས་ཅད་ཟིལ་གྱིས་གནོན་ཅིང་། བཀོད་པ་ཆེན་པོས་དེ་བཞིན་གཤེགས་པ་ག་ལ་བ་དེར་འོང་བར་འགྱུར་རོ། །དེ་ནས་འཇམ་དཔལ་གཞོན་ནུར་གྱུར་པ་བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇིག་པར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ།། འཇམ་དཔལ་གཞོན་ནུར་གྱུར་པ་བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇིག་པར་བྱེད་པའི་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ། དེ་ནས་དེའི་མོད་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་བདུད་ཀྱི་གནས་བྱེ་བ་བརྒྱ་ཕྲག་ཇི་སྙེད་པ་དེ་དག་ཐམས་ཅད་མོག་མོག་པོར་གྱུར་ཏོ། །བདུད་སྡིག་ཅན་དེ་དག་ཀྱང་རང་རང་གི་ལུས་རྒས་ཤིང་གཏུགས་ལ་འཁོགས་པར་གྱུར་ནས། ལག་པ་འཁར་བ་ལ་བརྟེན་ཅིང་འགྲོ་བར་གྱུར་ཏོ། །དེ་དག་གིས་ལྷའི་བུ་མོ་རྣམས་ཀྱང་རྒས་ཤིང་གཏུགས་ལ་འཁོགས་པར་གྱུར་པ་དང་། རང་རང་གི་གཞལ་མེད་ཁང་དག་ཀྱང་རྙིངས་ཤིང་རབ་ཏུ་འཇིག་ལ། མུན་པ་མུན་ནག་ཏུ་གྱུར་པ་མཐོང་ངོ་། །དེ་ནས་བདུད་སྡིག་ཅན་དེ་དག་སྐྲག་ཅིང་དངངས་ལ་ཡི་ཆད་ཅིང་སྒྱིད་ལུག་སྟེ། སྤུའི་ཁུང་བུ་ཟིང་ཞེས་བྱེད་པར་གྱུར་ནས་འདི་སྙམ་དུ་རྣམ་པར་རྟོག་སྟེ། གང་གིས་བདག་ཅག་བདུད་ཀྱི་གནས་རྣམས་འདི་ལྟ་བུའི་གནས་སྐབས་སུ་གྱུར་པ་འདིའི་རྒྱུ་ནི་གང་ཡིན། རྐྱེན་ནི་གང་ཡིན། བདག་ཅག་འདི་ནས་འཆི་འཕོ་ཞིང་མེད་པའམ། གཅིག་ཏུ་མི་འགྱུར་གྲང་སྙམ་མོ། །བདུད་དེ་དག་གིས་རྣམ་པར་རྟོག་པ་དེ་ལྟ་བུ་དེ་སྐྱེས་མ་ཐག་ཏུ། དེ་ནས་འཇམ་དཔལ་གཞོན་ནུར་གྱུར་པས་ལྷའི་བུ་སྤྲུལ་པ་ཐེར་འབུམ་སྤྲུལ་ཏེ། བདུད་དེ་དག་གི་མདུན་དུ་བཀོད་དོ། །དེ་ནས་ལྷའི་བུ་སྤྲུལ་པ་དེ་དག་གིས་བདུད་སྡིག་ཅན་དེ་དག་ལ་འདི་སྐད་ཅེས་སྨྲས་སོ། །གྲོགས་པོ་དག། འདི་ནི་བྱང་ཆུབ་སེམས་དཔའ་ཕྱིར་མི་ལྡོག་པ་འཇམ་དཔལ་གཞོན་ནུར་གྱུར་པ་ཞེས་བྱ་བ་དེ་ད་ལྟར་བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇིག་པར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་པ་དེའི་མཐུ་ཡིན་ཏེ། ཁྱེད་ལ་འཚེ་བ་གང་ཡང་འབྱུང་བར་མི་འགྱུར་གྱི། མ་སྐྲག་ཅིག་།ལྷའི་བུ། སྤྲུལ་པ་དེ་དག་གིས་ཚིག་དེ་སྐད་ཅེས་སྨྲས་མ་ཐག་ཏུ་དེ་ནས་བདུད་སྡིག་ཅན་དེ་དག་གིས་སྒྲ་དེ་ཡང་ཐོས། འཇམ་དཔལ་གཞོན་ནུར་གྱུར་པའི་མིང་ཡང་ཐོས་ནས་ཡང་རྒྱ་ཆེར་དངངས་ཤིང་སྐྲག་སྟེ། བདུད་ཀྱི་གནས་དེ་དག་ཐམས་ཅད་ཀྱང་རབ་ཏུ་གཡོས་སོ། །དེ་ནས་བདུད་སྡིག་ཅན་དེ་དག་གིས་ལྷའི་བུ་སྤྲུལ་པ་དེ་དག་ལ་འདི་སྐད་ཅེས་སྨྲས་སོ། །གྲོགས་པོ་དག་།ཡོངས་སུ་སྐྱོབས་ཤིག་།དེ་ནས་ལྷའི་བུ་སྤྲུལ་པ་དེ་དག་གིས་བདུད་སྡིག་ཅན་དེ་དག་ལ་འདི་སྐད་ཅེས་སྨྲས་སོ། །གྲོགས་པོ་དག་།ཡོངས་སུ་མ་འཇིགས་ཤིག་།ཁྱེད་ཅག་དེང་ལ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ག་ལ་བ་དེར་སོང་ཞིག་དང་། དེ་བཞིན་གཤེགས་པ་ཐུགས་རྗེ་དང་ལྡན་པ་དེ་ནི་སེམས་ཅན་འཇིགས་པར་གྱུར་པ་རྣམས་ལ་མི་འཇིགས་པ་སྩོལ་བར་མཛད་དོ། །དེ་ནས་ལྷའི་བུ་སྤྲུལ་པ་དེ་དག་གིས་ཚིག་དེ་སྐད་ཅེས་སྨྲས་ནས་དེ་ཉིད་དུ་མི་སྣང་བར་གྱུར་ཏོ། །དེ་ནས་བདུད་སྡིག་ཅ་ཨན་འཁོར་བདུད་སྡིག་ཅན་འབུམ་ཕྲག་ཐེར་འབུམ་དུ་མ་དང་བཅས་པ་དེ་དག་ཐམས་ཅད་རྒས་ཤིང་གཏུགས་ལ་འཁོགས་ཤིང་ལག་པ་འཁར་བ་ལ་བརྟེན་བཞིན་དུ་འདོང་ཞིང་སྐད་ཅིག་ཐང་ཅིག་ཡུད་ཙམ་ཅིག་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ག་ལ་བ་དེར་སོང་སྟེ་ལྷགས་ནས། བཅོམ་ལྡན་འདས་ལ་ཐམས་ཅད་ཀྱིས་སྒྲ་སྐད་མཐུན་པར་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་མི་སྡུག་པའི་རྣམ་པ་འདི་དག་ལས་ཡོངས་སུ་བསྐྱབ་ཏུ་གསོལ། བདེ་བར་གཤེགས་པ་བདག་ཅག་བསྐྱབ་ཏུ་གསོལ། བཅོམ་ལྡན་འདས། སངས་རྒྱས་བྱེ་བ་ཕྲག་འབུམ་གྱི་མཚན་ཡོངས་སུ་བསྒྲགས་པ་ནི་མི་མངོན་ལགས་ཀྱི། འཇམ་དཔལ་གཞོན་ནུར་གྱུར་པ་གཅིག་པུའི་མིང་ནི་དེ་ལྟ་མ་ལགས་སོ། །དེ་ཅིའི་སླད་དུ་ཞེ་ན། འཇམ་དཔལ་གཞོན་ནུར་གྱུར་པའི་མིང་ཐོས་ན་བདག་ཅག་འཇིགས་ཤིང་དངངས་ལ་སྐྲག་པར་གྱུར་ཏེ། འཆི་འཕོ་བ་སྙམ་དུ་འཆལ་ཅིང་མ་མཆིས་པར་འགྱུར་བ་སྙམ་དུ་འཚལ་བའི་སླད་དུའོ། །དེ་ནས་བཅོམ་ལྡན་འདས་ཀྱིས་བདུད་སྡིག་ཅན་དེ་དག་ལ་འདི་སྐད་ཅེས་བཀའ་སྩལ་ཏོ། །བདུད་སྡིག་ཅན་དག་། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། ཇི་ལྟར་འཇམ་དཔལ་གཞོན་ནུར་གྱུར་པས་ཡོངས་སུ་སྨིན་པ་དང་། རྣམ་པར་དབྱེ་བ་མེད་པར་སེམས་ཅན་རྣམས་ཀྱི་དོན་བྱས་པ་དང་། བྱེད་པར་འགྱུར་བ་དེ་ལྟར་སངས་རྒྱས་བྱེ་བ་ཕྲག་འབུམ་གྱིས་ཀྱང་སེམས་ཅན་རྣམས་ཀྱི་དོན་མ་མཛད། མི་མཛད་པས། དེའི་ཕྱིར་ཇི་ལྟར་འཇམ་དཔལ་གཞོན་ནུར་གྱུར་པ་གཅིག་པུའི་མིང་ཡོངས་སུ་བསྒྲགས་པ་དེ་ལྟར། སངས་རྒྱས་བྱེ་བ་ཕྲག་འབུམ་གྱི་མཚན་ཡོངས་སུ་བསྒྲགས་པས་ནི་ཁྱེད་ཅག་སྡུག་བསྔལ་ཞིང་རྣམ་པར་འཇིགས་པར་མི་འགྱུར་རོ། །དེ་ནས་བཅོམ་ལྡན་འདས་ལ་བདུད་སྡིག་ཅན་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་འདི་ལྟ་བུའི་ལུས་འཁོགས་པ་འདིས་ཉམ་ཐག་ཅིང་ངོ་ཚ་ལགས་པས། བཅོམ་ལྡན་འདས། སྔོན་བདག་ཅག་གི་ཁ་དོག་རྒྱས་པར་གྱུར་པ་གང་ལགས་པ་དེ་ལྟ་བུ་འཚལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁྱེད་ཅག་འཇམ་དཔལ་གཞོན་ནུར་གྱུར་པ་མ་འོངས་ཀྱི་བར་དུ་རེ་ཞིག་འདི་ཉིད་དུ་སྡོད་ཅིག་དང་། དེས་ཁྱེད་ཅག་མི་སྡུག་པའི་རྣམ་པ་འདི་ལས་ཡོངས་སུ་ཐར་པར་བྱེད་པར་འགྱུར་རོ། །དེ་ནས་འཇམ་དཔལ་གཞོན་ནུར་གྱུར་པ་ཏིང་ངེ་འཛིན་དེ་ལས་ལངས་ཏེ་སྟན་ལས་ལངས་ནས། བྱང་ཆུབ་སེམས་དཔའ་འབུམ་ཕྲག་དུ་མས་ཀྱང་ཡོངས་སུ་བསྐོར་ཅིང་མདུན་དུ་བདར། ལྷའི་བུ་འབུམ་ཕྲག་དུ་མ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་འབུམ་ཕྲག་དུ་མ་སིལ་སྙན་འབུམ་ཕྲག་མང་པོ་དག་རབ་ཏུ་གསིལ་ཞིང་། མེ་ཏོག་ཨུཏྤ་ལ་དང་། པདྨ་དང་། ཀུ་མུ་ཏ་དང་། པདྨ་དཀར་པོའི་ཆར་དག་རབ་ཏུ་འབེབས་པ་ཤ་སྟག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བཀོད་པ་ཆེན་པོ་དང་། རྣམ་པར་རྩེ་བ་ཆེན་པོས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ་། དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇིག་པར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་འཇུག་གམ། འཇམ་དཔལ་གྱིས་གསོལ་པ། བཅོམ་ལྡན་འདས། སྙོམས་པར་འཇུག་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ཀྱིས་ཏིང་ངེ་འཛིན་བསྒྲུབས་པ་དེ་དེ་བཞིན་གཤེགས་པ་གང་ལས་ཐོས། ཁྱོད་ཀྱིས་ཏིང་ངེ་འཛིན་དེ་བསྒྲུབས་ནས་ནི་ཇི་སྲིད་ཅིག་ལོན། འཇམ་དཔལ་གྱིས་གསོལ་པ། བཅོམ་ལྡན་འདས། གང་གི་ཚེ་བདག་གིས་ཏིང་ངེ་འཛིན་བསྒྲུབས་པ་དེ་ཐོས་ཤིང་། བདག་གིས་ཏིང་ངེ་འཛིན་དེ་བསྒྲུབས་པ་དེའི་ཚེ་ན། བཅོམ་ལྡན་འདས་ཀྱིས་བྱང་ཆུབ་ཏུ་ཐུགས་བསྐྱེད་པར་ཡང་མ་གྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ཀྱིས་གང་ལ་ཏིང་ངེ་འཛིན་བསྒྲུབས་པ་དེ་ཐོས་པའི་དེ་བཞིན་གཤེགས་པ་དེའི་མཚན་ཅི། འཇམ་དཔལ་གྱིས་གསོལ་པ། བཅོམ་ལྡན་འདས། སྔོན་བྱུང་བ་འདས་པའི་དུས་བསྐལ་པ་བསམ་གྱིས་མི་ཁྱབ་པའི་ཡང་ཆེས་བསམ་གྱིས་མི་ཁྱབ་པ། གྲངས་མ་མཆིས་པའི་ཡང་ཆེས་གྲངས་མ་མཆིས་པ་འདས་པ་དེའི་ཚེ། དེའི་དུས་ན། དེ་བཞིན་གཤེགས་པ་མེ་ཏོག་མནད་ར་བའི་དྲི་ཞེས་བགྱི་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་བྱུང་སྟེ། དེ་ཏིང་ངེ་འཛིན་བསྒྲུབས་པ་དེ་གསུང་བར་གྱུར་ནས། དེ་བཞིན་གཤེགས་པ་དེ་ལས་བདག་གིས་བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇིག་པར་བགྱིད་པའི་ཏིང་ངེ་འཛིན་བསྒྲུབ་པ་དེ་ཐོས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ|་འཇམ་དཔལ། བསྒྲུབས་པ་དེ་དག་གང་ཡིན། འཇམ་དཔལ་གྱིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་རྣམ་པ་ཉི་ཤུ་དང་ལྡན་ན་བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇིག་པར་བགྱིད་པའི་ཏིང་ངེ་འཛིན་དེ་ཐོབ་སྟེ། ཉི་ཤུ་གང་ཞེན། བཅོམ་ལྡན་འདས། འདི་ལ་བྱང་ཆུབ་སེམས་དཔའ་འདོད་ཆགས་རྣམ་པར་འཇིག་ཅིང་འདོད་ཆགས་ཀྱི་སེམས་རྣམ་པར་འཇིག་པར་བགྱིད་པ་དང་། ཞེ་སྡང་རྣམ་པར་འཇིག་ཅིང་ཞེ་སྡང་གི་སེམས་རྣམ་པར་འཇིག་པར་བགྱིད་པ་དང་། གཏི་མུག་རྣམ་པར་འཇིག་ཅིང་གཏི་མུག་གི་སེམས་རྣམ་པར་འཇིག་པར་བགྱིད་པ་དང་། ཕྲག་དོག་རྣམ་པར་འཇིག་ཅིང་ཕྲག་དོག་གི་སེམས་རྣམ་པར་འཇིག་པར་བགྱིད་པ་དང་། ང་རྒྱལ་རྣམ་པར་འཇིག་ཅིང་ང་རྒྱལ་གྱི་སེམས་རྣམ་པར་འཇིག་པར་བགྱིད་པ་དང་། འཆབ་པ་རྣམ་པར་འཇིག་ཅིང་འཆབ་པའི་སེམས་རྣམ་པར་འཇིག་པར་བགྱིད་པ་དང་། ཁྲོ་བ་རྣམ་པར་འཇིག་ཅིང་ཁྲོ་བའི་སེམས་རྣམ་པར་འཇིག་པར་བགྱིད་པ་དང་། ཡོངས་སུ་གདུང་བ་རྣམ་པར་འཇིག་ཅིང་ཡོངས་སུ་གདུང་བའི་སེམས་རྣམ་པར་འཇིག་པར་བགྱིད་པ་དང་། འདུ་ཤེས་རྣམ་པར་འཇིག་ཅིང་འདུ་ཤེས་ཀྱི་སེམས་རྣམ་པར་འཇིག་པར་བགྱིད་པ་དང་། ལྟ་བ་རྣམ་པར་འཇིག་ཅིང་ལྟ་བའི་སེམས་རྣམ་པར་འཇིག་པར་བགྱིད་པ་དང་། རྟོག་པ་རྣམ་པར་འཇིག་ཅིང་རྟོག་པའི་སེམས་རྣམ་པར་འཇིག་པར་བགྱིད་པ་དང་། ལེན་པ་རྣམ་པར་འཇིག་ཅིང་ལེན་པའི་སེམས་རྣམ་པར་འཇིག་པར་བགྱིད་པ་དང་། འཛིན་པ་རྣམ་པར་འཇིག་ཅིང་འཛིན་པའི་སེམས་རྣམ་པར་འཇིག་པར་བགྱིད་པ་དང་། མཚན་མ་རྣམ་པར་འཇིག་ཅིང་མཚན་མའི་སེམས་རྣམ་པར་འཇིག་པར་བགྱིད་པ་དང་། སྲིད་པ་རྣམ་པར་འཇིག་ཅིང་སྲིད་པའི་སེམས་རྣམ་པར་འཇིག་པར་བགྱིད་པ་དང་། རྟག་པ་རྣམ་པར་འཇིག་ཅིང་རྟག་པའི་སེམས་རྣམ་པར་འཇིག་པར་བགྱིད་པ་དང་། ཆད་པ་རྣམ་པར་འཇིག་ཅིང་ཆད་པའི་སེམས་རྣམ་པར་འཇིག་པར་བགྱིད་པ་དང་། ཕུང་པོ་རྣམ་པར་འཇིག་ཅིང་ཕུང་པོའི་སེམས་རྣམ་པར་འཇིག་པར་བགྱིད་པ་དང་། ཁམས་རྣམ་པར་འཇིག་ཅིང་ཁམས་ཀྱི་སེམས་རྣམ་པར་འཇིག་པར་བགྱིད་པ་དང་། སྐྱེ་མཆེད་རྣམ་པར་འཇིག་ཅིང་སྐྱེ་མཆེད་ཀྱི་སེམས་རྣམ་པར་འཇིག་པར་བགྱིད་པ་དང་། ཁམས་གསུམ་པ་རྣམ་པར་འཇིག་ཅིང་ཁམས་གསུམ་པ་ལ་དམིགས་པའི་སེམས་རྣམ་པར་འཇིག་པར་བགྱིད་པ་སྟེ། བཅོམ་ལྡན་འདས། བྱང་ཆུབ་སེམས་དཔའ་རྣམ་པ་ཉི་ཤུ་པོ་དེ་དག་དང་ལྡན་ན་ཏིང་ངེ་འཛིན་དེ་ཐོབ་བོ། །བཅོམ་ལྡན་འདས། གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་ཏིང་ངེ་འཛིན་དེ་ཐོབ་སྟེ། བཞི་གང་ཞེ་ན། ལྷག་པའི་བསམ་པ་ལ་ཡང་དག་པར་འཇུག་པ་དང་། གཡོ་མ་མཆིས་པ་དང་། ཟབ་པ་དང་། བདོག་པ་ཐམས་ཅད་ཡོངས་སུ་གཏོང་བ་སྟེ། བཅོམ་ལྡན་འདས། བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་ཏིང་ངེ་འཛིན་དེ་འཐོབ་བོ། །བཅོམ་ལྡན་འདས། གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་ཏིང་ངེ་འཛིན་དེ་ཐོབ་སྟེ། བཞི་གང་ཞེ་ན། སླུ་བ་མ་མཆིས་པ་དང་། བདེན་པའི་ཚིག་གིས་དམ་འཆའ་བ་དང་། འདུ་ཤེས་ཀྱི་དབང་གི་སྤྱོད་ཡུལ་མ་ལགས་པ་དང་། ཆོས་ཐམས་ཅད་མི་འཛིན་པ་སྟེ། བཅོམ་ལྡན་འདས། བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་ཏིང་ངེ་འཛིན་དེ་འཐོབ་བོ། །བཅོམ་ལྡན་འདས། གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་ཏིང་ངེ་འཛིན་དེ་འཐོབ་སྟེ། བཞི་གང་ཞེ་ན། དགེ་བའི་བཤེས་གཉེན་ལ་བསྟེན་པ་དང་། སྡིག་པའི་གྲོགས་པོ་སྤོང་བ་དང་། སྦྱངས་པ་དང་། ཚུལ་ཁྲིམས་དང་། ཡོ་བྱད་བསྙུངས་པ་དང་ལྡན་པ་དང་། འདུ་འཛི་མ་མཆིས་པར་སྤྱོད་པ་སྟེ། བཅོམ་ལྡན་འདས། བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་ཏིང་ངེ་འཛིན་དེ་འཐོབ་བོ། །བཅོམ་ལྡན་འདས། གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་ཏིང་ངེ་འཛིན་དེ་འཐོབ་སྟེ། བཞི་གང་ཞེ་ན། ཚུལ་ཁྲིམས་མ་ཉམས་པ་དང་། ཚུལ་ཁྲིམས་མ་རལ་པ་དང་། ཚུལ་ཁྲིམས་མི་བརྟེན་པ་དང་། ཚུལ་ཁྲིམས་ནག་ནོག་མ་མཆིས་པ་སྟེ|་བཅོམ་ལྡན་འདས། བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་ཏིང་ངེ་འཛིན་དེ་འཐོབ་བོ། །བཅོམ་ལྡན་འདས། གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་ཏིང་ངེ་འཛིན་དེ་འཐོབ་སྟེ། བཞི་གང་ཞེ་ན། ཉན་ཐོས་ཀྱི་སེམས་ཡོངས་སུ་སྤོང་བ་དང་། རང་སངས་རྒྱས་ཀྱི་སེམས་ལ་ལྷག་པར་མི་དམིགས་པ་དང་། བཟོད་པ་ལ་གནས་པ་དང་། སེམས་ཅན་ལ་རློམ་སེམས་མ་མཆིས་པ་སྟེ། བཅོམ་ལྡན་འདས། བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་ཏིང་ངེ་འཛིན་དེ་འཐོབ་བོ། །བཅོམ་ལྡན་འདས། གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན་ཏིང་ངེ་འཛིན་དེ་འཐོབ་སྟེ། བཞི་གང་ཞེ་ན། སྟོང་པ་ཉིད་ཀྱི་ཆོས་བསྒོམ་ཞིང་གང་ཟག་ལ་རློམ་སེམས་མ་མཆིས་པ་དང་། མཚན་མ་མ་མཆིས་པ་བསྒོམ་ཞིང་མཚན་མ་ཡོངས་སུ་སྤོང་པ་དང་། སྨོན་པ་མ་མཆིས་པ་བསྒོམ་ཞིང་སྨོན་པའི་སེམས་ཡོངས་སུ་སྤོང་བ་དང་། ཆོག་འཚལ་ཅིང་དངོས་པོ་ཐམས་ཅད་ཡོངས་སུ་གཏོང་བ་དང་བཞི་སྟེ། བཅོམ་ལྡན་འདས། བྱང་ཆུབ་སེམས་དཔའ་རྣམ་པ་དེ་དག་དང་། ཆོས་དེ་དག་དང་ལྡན་ན། བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇིག་པར་བགྱིད་པའི་ཏིང་ངེ་འཛིན་དེ་འཐོབ་བོ། །བཅོམ་ལྡན་འདས། དེ་ལྟར་དེ་བཞིན་གཤེགས་པ་མེ་ཏོག་མནད་རའི་དྲིས་ཏིང་ངེ་འཛིན་བསྒྲུབ་པ་དེ་རབ་ཏུ་བསྟན་ཏེ། བཅོམ་ལྡན་འདས། བདག་གིས་དེ་བཞིན་གཤེགས་པ་དེ་ལས་ཏིང་ངེ་འཛིན་བསྒྲུབ་པ་དེ་ཐོས་ཤིང་། བཅོམ་ལྡན་འདས། དེ་བཞིན་གཤེགས་པ་མེ་ཏོག་མནད་རའི་དྲི་དེའི་འོག་ཏུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནོར་བུ་དང་། རིན་པོ་ཆེ་དང་། གློག་དང་། ཉི་ཟླ་ཐམས་ཅད་ཟིལ་གྱིས་གནོན་པའི་འོད་ཅེས་བགྱི་བ་བྱུང་བར་གྱུར་ཏེ། བཅོམ་ལྡན་འདས། བདག་གིས་དེ་བཞིན་གཤེགས་པ་དེའི་སྤྱན་སྔར་ཏིང་ངེ་འཛིན་དེ་བསྒྲུབས་སོ། །བསྟན་པ་འདི་བཤད་པ་ན་འཁོར་དེ་ལས་བྱང་ཆུབ་སེམས་དཔའ་ཁྲི་ནི་ཏིང་ངེ་འཛིན་དེ་བསྒྲུབས་སོ། །དེ་ནས་བཅོམ་ལྡན་འདས་ལ་གནས་བརྟན་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། འཇམ་དཔལ་གཞོན་ནུར་གྱུར་པས་ཅི་ཙམ་དུ་ཏིང་ངེ་འཛིན་དེ་ལེགས་པར་བསྒྲུབས་ཤིང་ཏིང་ངེ་འཛིན་དེ་ལེགས་པར་བསྒྲུབས་པས་བདུད་སྡིག་ཅན་འདི་དག་མི་སྡུག་པའི་རྣམ་པ་འདི་ལྟ་བུར་བགྱིད་པ་དེ་ནི་ངོ་མཚར་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ|་|ཤཱ་རིའི་བུ། འདི་ཇི་སྙམ་དུ་སེམས། སྟོང་གསུམ་གྱིས་སྟོང་ཆེན་པོའི་འཇིག་རྟེན་གྱིས་ཁམས་འདི་འབའ་ཞིག་གིས་བདུད་སྡིག་ཅན་འདི་དག་འདི་ལྟར་མི་སྡུག་པའི་རྣམ་པར་བྱས་སོ་སྙམ་ན|་ཤཱ་རིའི་བུ། ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཤཱ་རིའི་བུ། འདི་ལྟ་སྟེ། འཇམ་དཔལ་གཞོན་ནུར་གྱུར་པའི་བྱིན་གྱིས་བརླབས་ཀྱིས། ཕྱོགས་བཅུ་ཀུན་གྱིས་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དག་ན་བདུད་སྡིག་ཅན་གང་དག་འཁོད་པ་དེ་དག་ཐམས་ཅད་ཀྱང་འདི་ལྟ་བུའི་གནས་སྐབས་སུ་གྱུར་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཁྱོད་ཀྱིས་བྱིན་གྱིས་བརླབས་འདི་ཐོང་ལ། ཅི་ནས་ཀྱང་བདུད་སྡིག་ཅན་འདི་དག་སྔོན་གྱི་ཁ་དོག་རྒྱས་པ་དང་ལྡན་པར་འགྱུར་བར་གྱིས་ཤིག་། དེ་ནས་འཇམ་དཔལ་གཞོན་ནུར་གྱུར་པས་བྱིན་གྱིས་བརླབས་དེ་བཏང་ངོ་། །བྱིན་གྱིས་བརླབས་དེ་བཏང་མ་ཐག་ཏུ་དེ་ནས་བདུད་སྡིག་ཅན་དེ་དག་སྔོན་གྱི་ཁ་དོག་རྒྱས་པ་དང་ལྡན་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་བདུད་སྡིག་ཅན་དེ་དག་དང་། བདུད་ཀྱི་འཁོར་དེ་དག་ལ་སྨྲས་པ། སྡིག་ཅན་དག་།གང་ལ་མིག་དང་། གང་ལ་མིག་གི་འདུ་ཤེས་དང་|་གང་ལ་མིག་ཏུ་ལྷག་པར་འཛིན་པ་དང་། གང་ལ་མིག་གི་མཚན་མ་དང་། གང་ལ་མིག་ཏུ་ལྷག་པར་དམིགས་པ་དང་། གང་ལ་མིག་ཏུ་མངོན་པར་ཆགས་པ་དང་། གང་ལ་མིག་གི་རློམ་སེམས་དང་། གང་ལ་མིག་བདག་གིར་འཛིན་པ་དང་། གང་ལ་མིག་གི་རྟེན་དང་། གང་ལ་མིག་ལ་མངོན་པར་ཞེན་པ་དང་། གང་ལ་མིག་གི་སྤྲོས་པ་དང་། གང་ལ་མིག་ང་ཡི་བ་ཉིད་དང་|་གང་ལ་མིག་ཀུན་དུ་བསྲུང་བ་དང་། གང་ལ་མིག་བསྒོམ་པ་དང་། གང་ལ་མིག་སྐྲང་བ་དང་། གང་ལ་མིག་དོར་བ་དང་། གང་ལ་མིག་ཏུ་རྟོག་པ་དང་། གང་ལ་མིག་ཏུ་སེམས་པ་དང་། གང་ལ་མིག་ཡོངས་སུ་འགྲུབ་པ་དང་། གང་ལ་མིག་འགོག་པ་དང་། གང་ལ་མིག་སྐྱེ་བ་དང་། གང་ལ་མིག་ཏུ་འཛིན་པ་དང་། གང་ལ་མིག་འོང་བ་ཡོད་པ་དེ་ལ་ནི་ཁྱེད་བདུད་ཀྱི་ལས་བར་ཆད་བྱེད་པའི་ཡུལ་ཡོད་དོ། །སྡིག་ཅན་དག། དེ་བཞིན་དུ་གང་ལ་རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་དང་|་གང་ལ་ཆོས་ཀྱི་འདུ་ཤེས་དང་། གང་ལ་ཆོས་སུ་ལྷག་པར་འཛིན་པ་དང་། གང་ལ་ཆོས་ཀྱི་མཚན་མ་དང་། གང་ལ་ཆོས་སུ་ལྷག་པར་དམིགས་པ་དང་། གང་ལ་ཆོས་སུ་མངོན་པར་ཆགས་པ་དང་། གང་ལ་ཆོས་ཀྱི་རློམ་སེམས་དང་། གང་ལ་ཆོས་བདག་གིར་འཛིན་པ་དང་། གང་ལ་ཆོས་ཀྱི་རྟེན་དང་། གང་ལ་ཆོས་ལ་མངོན་པར་ཞེན་པ་དང་། གང་ལ་ཆོས་ཀྱི་སྤྲོས་པ་དང་། གང་ལ་ཆོས་ང་ཡི་བ་ཉིད་དང་། གང་ལ་ཆོས་ཀུན་དུ་བསྲུང་བ་དང་། གང་ལ་ཆོས་བསྒོམ་པ་དང་། གང་ལ་ཆོས་བླང་བ་དང་། གང་ལ་ཆོས་དོར་བ་དང་། གང་ལ་ཆོས་སུ་རྟོག་པ་དང་། གང་ལ་ཆོས་སུ་སེམས་པ་དང་། གང་ལ་ཆོས་ཡོངས་སུ་འགྲུབ་པ་དང་། གང་ལ་ཆོས་འགོག་པ་དང་། གང་ལ་ཆོས་སྐྱེ་བ་དང་། གང་ལ་ཆོས་སུ་འཛིན་པ་དང་། གང་ལ་ཆོས་འོང་བ་ཡོད་པ་དེ་ལ་ནི་ཁྱེད་བདུད་ཀྱི་ལས་བར་ཆད་བྱེད་པའི་ཡུལ་ཡོད་དོ། །སྡིག་ཅན་དག། གང་ལ་མིག་མེད་པ་དང་། གང་ལ་མིག་གི་འདུ་ཤེས་མེད་པ་དང་། གང་ལ་མིག་ཏུ་ལྷག་པར་འཛིན་པ་མེད་པ་དང་། གང་ལ་མིག་གི་མཚན་མ་མེད་པ་དང་། གང་ལ་མིག་ཏུ་ལྷག་པར་དམིགས་པ་མེད་པ་དང་། གང་ལ་མིག་ཏུ་མངོན་པར་ཆགས་པ་མེད་པ་དང་|་གང་ལ་མིག་གི་རློམ་སེམས་མེད་པ་དང་། གང་ལ་མིག་བདག་གིར་འཛིན་པ་མེད་པ་དང་། གང་ལ་མིག་གི་རྟེན་མེད་པ་དང་། གང་ལ་མིག་ལ་མངོན་པར་ཞེན་པ་མེད་པ་དང་། གང་ལ་མིག་གི་སྤྲོས་པ་མེད་པ་དང་། གང་ལ་མིག་ང་ཡི་བ་ཉིད་མེད་པ་དང་། གང་ལ་མིག་ཀུན་དུ་བསྲུང་བ་མེད་པ་དང་། གང་ལ་མིག་བསྒོམ་པ་མེད་པ་དང་། གང་ལ་མིག་བླང་བ་མེད་པ་དང་། གང་ལ་མིག་དོར་བ་མེད་པ་དང་། གང་ལ་མིག་ཏུ་རྟོག་པ་མེད་པ་དང་། གང་ལ་མིག་ཏུ་སེམས་པ་མེད་པ་དང་། གང་ལ་མིག་ཡོངས་སུ་འགྲུབ་པ་མེད་པ་དང་། གང་ལ་མིག་འགོག་པ་མེད་པ་དང་། གང་ལ་མིག་སྐྱེ་བ་མེད་པ་དང་། གང་ལ་མིག་ཏུ་འཛིན་པ་མེད་པ་དང་། གང་ལ་མིག་འོང་བ་མེད་པ་དེ་ལ་ནི་ཁྱེད་ཀྱི་གནས་མེད་དོ། །ཡུལ་མེད་དོ། །བདག་པོ་མེད་དོ། །སྟོབས་མེད་དོ། །དབང་ཕྱུག་མེད་དོ། །མཐུས་བཟུང་བ་མེད་དོ། །སྡིག་ཅན་དག་།དེ་བཞིན་དུ་གང་ལ་རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་མེད་པ་དང་། གང་ལ་ཆོས་ཀྱི་འདུ་ཤེས་མེད་པ་དང་། གང་ལ་ཆོས་སུ་ལྷག་པར་འཛིན་པ་མེད་པ་དང་། གང་ལ་ཆོས་ཀྱི་མཚན་མ་མེད་པ་དང་། གང་ལ་ཆོས་སུ་ལྷག་པར་དམིགས་པ་མེད་པ་དང་། གང་ལ་ཆོས་སུ་མངོན་པར་ཆགས་པ་མེད་པ་དང་། གང་ལ་ཆོས་ཀྱི་རློམ་སེམས་མེད་པ་དང་། གང་ལ་ཆོས་སུ་བདག་གིར་འཛིན་པ་མེད་པ་དང་། གང་ལ་ཆོས་ཀྱི་རྟེན་མེད་པ་དང་། གང་ལ་ཆོས་ལ་མངོན་པར་ཞེན་པ་མེད་པ་དང་། གང་ལ་ཆོས་ཀྱི་སྤྲོས་པ་མེད་པ་དང་། གང་ལ་ཆོས་ང་ཡི་བ་ཉིད་མེད་པ་དང་། གང་ལ་ཆོས་ཀུན་དུ་བསྲུང་བ་མེད་པ་དང་། གང་ལ་ཆོས་བསྒོམ་པ་མེད་པ་དང་། གང་ལ་ཆོས་བླང་བ་མེད་པ་དང་། གང་ལ་ཆོས་དོར་བ་མེད་པ་དང་། གང་ལ་ཆོས་སུ་རྟོག་པ་མེད་པ་དང་། གང་ལ་ཆོས་སུ་སེམས་པ་མེད་པ་དང་། གང་ལ་ཆོས་སུ་ཡོངས་སུ་འགྲུབ་པ་མེད་པ་དང་། གང་ལ་ཆོས་འགོག་པ་མེད་པ་དང་། གང་ལ་ཆོས་སྐྱེ་བ་མེད་པ་དང་། གང་ལ་ཆོས་སུ་འཛིན་པ་མེད་པ་དང་། གང་ལ་ཆོས་འོང་བ་མེད་པ་དེ་ལ་ནི་ཁྱེད་ཀྱི་གནས་མེད་དོ། །ཡུལ་མེད་དོ། །བདག་པོ་མེད་དོ། །སྟོབས་མེད་དོ། །དབང་ཕྱུག་མེད་དོ། །མཐུས་གཟུང་བ་མེད་དོ། །དེ་ནས་འཇམ་དཔལ་གཞོན་ནུར་གྱུར་པས་དེ་ལྟ་དེ་ལྟར་ཆོས་བསྟན་པ་དེས། བདུད་ཀྱི་འཁོར་དེ་ལས་བདུད་ཁྲི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བདུད་ཀྱི་དཀྱིལ་འཁོར་དེ་ལས་བདུད་བརྒྱད་ཁྲི་བཞི་སྟོང་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་། དེ་ནས་བཅོམ་ལྡན་འདས་ལ་གནས་བརྟན་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། འཇམ་དཔལ་གཞོན་ནུར་གྱུར་པ་འདི་མཆིས་ལགས་ཀྱི། བཅོམ་ལྡན་འདས། བདག་ཅག་གིས་བྱང་ཆུབ་སེམས་དཔའ་དེ་དག་བལྟ་བར་བགྱིའོ། ། དེ་ཅིའི་སླད་དུ་ཞེ་ན། བཅོམ་ལྡན་འདས། སྐྱེས་བུ་དམ་པ་དེ་ལྟ་བུ་དེ་དག་མཐོང་བར་དཀའ་བའི་སླད་དུའོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ། འཁོར་འདི་ཕྱོགས་བཅུ་ནས་འདུས་པའི་བྱང་ཆུབ་སེམས་དཔའ་དེ་དག་བལྟ་བར་འདོད་ཀྱི་ཁྱོད་ཀྱིས་སྟོན་ཅིག། དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ཆོས་དང་། ཆོས་འཕགས་དང་། ཆོས་ཀྱི་བློ་གྲོས་དང་། ཉི་མ་དང་། བདུད་ཀྱི་མཚོན་ཆ་དང་། འཇམ་དབྱངས་དང་། སྡིག་པ་ཞི་བ་དང་། ཞི་བ་སྲུང་དང་། རྣམ་རྒྱལ་སྲུང་དང་། ཆོས་རྒྱལ་རྣམ་བསྒྲགས་དང་། དེ་དག་དང་། བྱང་ཆུབ་སེམས་དཔའ་གཞན་དག་ལ་སྨྲས་པ། རིགས་ཀྱི་བུ་དག། ཁྱེད་ཅག་གི་རང་རང་གི་སངས་རྒྱས་ཀྱི་ཞིང་དག་ན་བྱང་ཆུབ་སེམས་དཔའ་དེ་དག་གི་ལུས་ཅི་འདྲ་བ་དེ་ལྟ་བུར་ཁྱེད་ཅག་རང་རང་གི་ལུས་སྟོན་ཅིག་། འཇམ་དཔལ་གཞོན་ནུར་གྱུར་པས་ཚིག་དེ་སྐད་ཅེས་སྨྲས་མ་ཐག་ཏུ་དེ་ནས་དེའི་མོད་ལ་བྱང་ཆུབ་སེམས་དཔའ་དེ་དག་ཏིང་ངེ་འཛིན་དེ་ལས་ལངས་ཏེ། ལངས་ནས་ཀྱང་རང་རང་གི་ལུས་དག་བསྟན་ཏོ། །དེ་ན་བྱང་ཆུབ་སེམས་དཔའ་ཁ་ཅིག་གི་ལུས་ནི་རི་རབ་ཙམ་མོ། །ཁ་ཅིག་གི་ལུས་ནི་དཔག་ཚད་བརྒྱད་ཁྲི་ཙམ་མོ། །ཁ་ཅིག་གི་ནི་དཔག་ཚད་བདུན་ཁྲི་དང་། དྲུག་ཁྲི་དང་། ལྔ་ཁྲི་དང་། བཞི་ཁྲི་དང་། སུམ་ཁྲི་དང་། ཉིས་ཁྲི་དང་། ཁྲི་ཙམ་མོ། །ཁ་ཅིག་གི་ལུས་ནི་དཔག་ཚད་ལྔ་སྟོང་ཙམ་དང་། བཞི་སྟོང་དང་། སུམ་སྟོང་དང་|་ཉིས་སྟོང་དང་། སྟོང་ཙམ་མོ། །ཁ་ཅིག་གི་ལུས་ནི་དཔག་ཚད་ལྔ་བརྒྱ་དང་། བཞི་བརྒྱ་དང་། སུམ་བརྒྱ་དང་། ཉིས་བརྒྱ་དང་། བརྒྱ་ཙམ་མོ། །ཁ་ཅིག་གི་ལུས་ནི་དཔག་ཚད་ལྔ་བཅུ་དང་། བཞི་བཅུ་དང་། སུམ་ཅུ་དང་། ཉི་ཤུ་དང་། བཅུ་ཙམ་མོ། །ཁ་ཅིག་གི་ལུས་ནི་དཔག་ཚད་ལྔ་དང་། བཞི་དང་། གསུམ་དང་། གཉིས་དང་། གཅིག་ཙམ་མོ|་|བྱང་ཆུབ་སེམས་དཔའ་ཁ་ཅིག་གི་ལུས་ནི་འཇིག་རྟེན་གྱི་ཁམས་མི་མཇེད་འདིའི་སེམས་ཅན་རྣམས་ཀྱི་ལུས་ཇི་ཙམ་པར་ཁྲུ་ཕྱེད་དང་བཞི་ཙམ་པ་སྟེ། དེ་དག་གི་ལུས་དེ་ལྟ་བུ་དག་ཀུན་དུ་སྣང་ངོ་། །དེའི་ཚེ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་གང་དུ་བྱང་ཆུབ་སེམས་དཔའ་གཟི་བརྗིད་ཆེ་བ་གཟི་བརྗིད་ཆེ་བ་ཤ་སྟག་གིས་ཁྱབ་པར་མ་གྱུར་པའི་ས་ཕྱོགས་ནི་ཐ་ན་འཁར་བ་གཟུགས་པའི་གཏོས་ཙམ་ཡང་མེད་དེ། བྱང་ཆུབ་སེམས་དཔའ་དེ་དག་གི་འོད་ཀྱིས་ཀྱང་ཕྱོགས་བཅུའི་སངས་རྒྱས་ཀྱི་ཞིང་བྱེ་བ་ཕྲག་འབུམ་དག་སྣང་བར་གྱུར་ཏོ|་|དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ། བཅོམ་ལྡན་འདས་ཀྱིས་བདག་ལ་སྐབས་དབྱེ་བར་གནང་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུ་ལགས་སོ། །དེ་སྐད་ཅེས་གསོལ་པ་དང་|་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་ཅི་དང་ཅི་འདོད་པ་དེ་བཞིན་གཤེགས་པ་ལ་ཞུས་ཤིག་དང་། ངས་ཞུས་པ་དེ་དང་དེ་ཉིད་ཀྱི་ལན་གདབ་པས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང་། འཇམ་དཔལ་གཞོན་ནུར་གྱུར་པ་དང་། ཐམས་ཅད་དང་ལྡན་པའི་འཁོར་དེས་བཅོམ་ལྡན་འདས་ཀྱི་ལྟར་མཉན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་བྱང་ཆུབ་སེམས་དཔའ་ཞེས་བགྱི་ན། བཅོམ་ལྡན་འདས་ཅིའི་སླད་དུ་བྱང་ཆུབ་སེམས་དཔའ་ཞེས་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། ཆོས་ཐམས་ཅད་རྟོག་པའི་ཕྱིར་བྱང་ཆུབ་སེམས་དཔའ་ཞེས་བྱའོ། །འཇམ་དཔལ། གང་དག་རྟོགས་པའི་ཕྱིར་བྱང་ཆུབ་སེམས་དཔའ་བྱང་ཆུབ་སེམས་དཔའ་ཞེས་བྱ་བའི་ཆོས་ཐམས་ཅད་པོ་དེ་དག་གང་ཞེ་ན། འཇམ་དཔལ། འདི་ལ་བྱང་ཆུབ་སེམས་དཔས་མིག་རྟོགས་པར་བྱེད་དོ། །རྣ་བ་རྟོགས་པར་བྱེད་དོ། །སྣ་རྟོགས་པར་བྱེད་དོ། །ལྕེ་རྟོགས་པར་བྱེད་དོ། །ལུས་རྟོགས་པར་བྱེད་དོ། །ཡིད་རྟོགས་པར་བྱེད་དོ། །འཇམ་དཔལ། ཇི་ལྟར་བྱང་ཆུབ་སེམས་དཔས་མིག་རྟོགས་པར་བྱེད། ཇི་ལྟར་རྣ་བ་དང་། སྣ་དང་། ལྕེ་དང་། ལུས་དང་། ཡིད་རྟོགས་པར་བྱེད་ཅེ་ན། འཇམ་དཔལ། འདི་ལ་བྱང་ཆུབ་སེམས་དཔས་མིག་རང་བཞིན་གྱིས་སྟོང་ཞེས་བྱ་བར་རྟོགས་པར་བྱེད་ཀྱང་རྟོགས་སོ་སྙམ་དུ་རྣམ་པར་མི་རྟོག་གོ་།རྣ་བ་དང་། སྣ་དང་། ལྕེ་དང་། ལུས་དང་། ཡིད་རང་བཞིན་གྱིས་སྟོང་ཞེས་བྱ་བར་རྟོགས་པར་བྱེད་ཀྱང་རྟོགས་སོ་སྙམ་དུ་རྣམ་པར་མི་རྟོག་གོ་།གཟུགས་རྣམས་དང་། སྒྲ་རྣམས་དང་། དྲི་རྣམས་དང་|་རོ་རྣམས་དང་། རེག་བྱ་རྣམས་དང་། ཆོས་རྣམས་རང་བཞིན་གྱིས་སྟོང་ཞེས་བྱ་བར་རྟོགས་པར་བྱེད་ཀྱང་རྟོགས་སོ་སྙམ་དུ་རྣམ་པར་མི་རྟོག་གོ་།འཇམ་དཔལ། གཞན་ཡང་བྱང་ཆུབ་སེམས་དཔའ་ཉེ་བར་ལེན་པའི་ཕུང་པོ་ལྔ་པོ་དག་རྟོགས་པར་བྱེད་དོ། །ཇི་ལྟར་རྟོགས་པར་བྱེད་ཅེ་ན། སྟོང་པ་ཉིད་དག་ཏུ་རྟོགས་པར་བྱེད་དོ། །མཚན་མ་མེད་པ་དག་ཏུ་རྟོགས་པར་བྱེད་དོ། །སྨོན་པ་མེད་པ་དག་ཏུ་རྟོགས་པར་བྱེད་དོ། །འདོད་ཆགས་དང་བྲལ་བ་དག་ཏུ་རྟོགས་པར་བྱེད་དོ། །ཞི་བ་དག་ཏུ་རྟོགས་པར་བྱེད་དོ། །དབེན་པ་དག་ཏུ་རྟོགས་པར་བྱེད་དོ། ། དངོས་པོ་མེད་པ་དག་ཏུ་རྟོགས་པར་བྱེད་དོ། །གཡོ་བ་མེད་པ་དག་ཏུ་རྟོགས་པར་བྱེད་དོ། །སྐྱེ་བ་མེད་པ་དག་ཏུ་རྟོགས་པར་བྱེད་དོ། །འོང་བ་མེད་པ་དག་ཏུ་རྟོགས་པར་བྱེད་དོ། །འགྲོ་བ་མེད་པ་དག་ཏུ་རྟོགས་པར་བྱེད་དོ། །ངོ་བོ་ཉིད་མེད་པ་དག་ཏུ་རྟོགས་པར་བྱེད་དོ། །བདག་པོ་མེད་པ་དག་ཏུ་རྟོགས་པར་བྱེད་དོ། །རྣམ་པར་རིག་པ་མེད་པ་དག་ཏུ་རྟོགས་པར་བྱེད་དོ། །ཤེས་པ་མེད་པ་དག་ཏུ་རྟོགས་པར་བྱེད་དོ། །མཐོང་བ་མེད་པ་དག་ཏུ་རྟོགས་པར་བྱེད་དོ། །མ་སྐྱེས་པ་དག་ཏུ་རྟོགས་པར་བྱེད་དོ། །སྤྲོས་པ་མེད་པ་དག་ཏུ་རྟོགས་པར་བྱེད་དོ། །བདག་གི་མེད་པ་དག་ཏུ་རྟོགས་པར་བྱེད་དོ། །རྟོག་པས་ཀུན་ནས་བསླང་བ་དག་ཏུ་རྟོགས་པར་བྱེད་དོ། །རྣམ་པར་རྟོག་པས་ཀུན་ནས་ཀུན་ནས་བསླང་བ་དག་ཏུ་རྟོགས་པར་བྱེད་དོ། །རྟེན་ཅིང་འབྲེལ་པར་འབྱུང་བ་དག་ཏུ་རྟོགས་པར་བྱེད་དོ། །སྒྱུ་མ་ལྟ་བུ་དག་ཏུ་རྟོགས་པར་བྱེད་དོ། །རྨི་ལམ་ལྟ་བུ་དག་ཏུ་རྟོགས་པར་བྱེད་དོ། །མིག་ཡོར་ལྟ་བུ་དག་ཏུ་རྟོགས་པར་བྱེད་དོ། །བྲག་ཅ་ལྟ་བུ་དག་ཏུ་རྟོགས་པར་བྱེད་དོ། །ཆུ་ཤིང་གི་སྙིང་པོ་ལྟ་བུ་དག་ཏུ་རྟོགས་པར་བྱེད་དོ། །རིང་དུ་མི་གནས་པ་དག་དང་། སྙིང་པོ་མེད་པ་དག་དང་། གསོག་དག་དང་། གསོབ་དག་ཏུ་རྟོགས་པར་བྱེད་དོ། །འཇམ་དཔལ། གཞན་ཡང་བྱང་ཆུབ་སེམས་དཔའ་འདོད་ཆགས་རྟོགས་པར་བྱེད་དོ། །ཞེ་སྡང་རྟོགས་པར་བྱེད་དོ། །གཏི་མུག་རྟོགས་པར་བྱེད་དོ། །ཅི་ལྟར་རྟོགས་པར་བྱེད་ཅེ་ན། འདོད་ཆགས་དང་། ཞེ་སྡང་དང་། གཏི་མུག་དག་ནི་ཡོངས་སུ་རྟོགས་པས་ཀུན་ནས་བསླང་བ་ཡིན་པར་རྟོགས་པར་བྱེད་དེ། ཡོངས་སུ་རྟོག་པ་དེ་དག་ཀྱང་སྟོང་པ་དག་དང་། མེད་པ་དག་དང་། དངོས་པོ་མེད་པ་དག་དང་། སྤྲོས་པ་མེད་པ་དག་དང་། རྣམ་པར་རིག་པ་མེད་པ་དག་ཏུ་རྟོགས་པར་བྱེད་དོ། །འཇམ་དཔལ། གཞན་ཡང་བྱང་ཆུབ་སེམས་དཔའ་འདོད་པའི་ཁམས་རྟོགས་པར་བྱེད་དོ། །གཟུགས་ཀྱི་ཁམས་དང་། གཟུགས་མེད་པའི་ཁམས་རྟོགས་པར་བྱེད་དོ། །ཇི་ལྟར་རྟོགས་པར་བྱེད་ཅེ་ན། བདག་མེད་པ་དང་། སྟོང་པ་དང་། དབེན་པའི་རྣམ་པར་རྟོགས་པར་བྱེད་དོ། །འཇམ་དཔལ། གཞན་ཡང་བྱང་ཆུབ་སེམས་དཔའ་སེམས་ཅན་གྱི་སྤྱོད་པ་རྟོགས་པར་བྱེད་དོ། །ཇི་ལྟར་རྟོགས་པར་བྱེད་ཅེ་ན། སེམས་ཅན་འདི་དག་ནི་འདོད་ཆགས་སྤྱད་པའོ། །འདི་དག་ནི་ཞེ་སྡང་སྤྱད་པའོ། །འདི་དག་ནི་གཏི་མུག་སྤྱད་པའོ། །འདི་དག་ནི་ཆ་མཉམ་པ་སྤྱད་པའོ་ཞེས་བྱ་བར་རྟོགས་ནས། སྤྱོད་པ་ལ་མཁས་པར་རྟོགས་པར་བྱེད་དེ། གང་གི་ཤེས་པའི་རྣམ་པར་རིག་པ་བསྟན་པ་གང་ཡིན་པ་དེ་ཡང་རྟོགས་པར་བྱེད་ཅིང་། རྟོགས་ནས་ཀྱང་ཇི་ལྟ་ཇི་ལྟར་དེ་དག་རྣམ་པར་གྲོལ་བ་དེ་ལྟ་དེ་ལྟར་ཆོས་སྟོན་ཏོ། །འཇམ་དཔལ། གཞན་ཡང་བྱང་ཆུབ་སེམས་དཔའ་སེམས་ཅན་ཐམས་ཅད་རྟོགས་པར་བྱེད་དོ། །ཇི་ལྟར་རྟོགས་པར་བྱེད་ཅེ་ན། སེམས་ཅན་ཐམས་ཅད་ནི་མིང་ཙམ་སྟེ། མིང་དེ་ཡང་གཡོ་བ་མེད་པ་དང་། སེམས་ཅན་འདི་དག་ཐམས་ཅད་ནི་སེམས་ཅན་གཅིག་པ་སྟེ། སེམས་ཅན་དེ་ཡང་སེམས་ཅན་མེད་པ་དང་། དེ་ལྟར་ཡང་རྣམ་པར་མི་རྟོག་པ་སྟེ། དེའི་ཕྱིར་བྱང་ཆུབ་སེམས་དཔའ་ཞེས་བྱའོ། །གང་གི་ཚེ་བྱང་ཆུབ་སེམས་དཔས་ཆོས་ཐམས་ཅད་རྟོགས་པར་བྱེད་པ་དེའི་ཚེ་བྱང་ཆུབ་རྟོགས་པར་བྱེད་པ་ཡིན་ནོ། །དེ་ལ་འདི་སྐད་ཅེས་བྱ་སྟེ། མིག་དང་རྣ་བ་དེ་དག་ནི། །རང་བཞིན་སྟོང་པར་རྟོགས་བྱེད་ཀྱང་། །རྟོགས་སྙམ་རྟོག་པར་མི་བྱེད་པ། །བྱང་ཆུབ་སེམས་དཔའ་ཞེས་ཀྱང་བྱ། །སྣ་དང་ལྕེ་ཡང་རང་བཞིན་གྱིས།། དངོས་པོ་མེད་པར་རྟོགས་བྱེད་ཀྱང་། །རྟོགས་སྙམ་རྟོག་པར་མི་བྱེད་པ། །བྱང་ཆུབ་སེམས་དཔའ་ཞེས་ཀྱང་བྱ། །ཤེས་རབ་ཅན་གྱིས་ལུས་དང་ནི། །ཡིད་ནི་སྟོང་པར་རྟོགས་བྱེད་ཅིང་། །རྟོགས་ནས་ཡང་དག་སྟོན་བྱེད་པ། །བྱང་ཆུབ་སེམས་དཔའ་ཞེས་ཀྱང་བྱ། །གཟུགས་དང་སྒྲ་དང་དྲི་དག་དང་། །རོ་དང་རེག་བྱ་ཡིད་འོང་རྣམས། །ཐམས་ཅད་སྟོང་པར་རྟོགས་བྱེད་པ། །བྱང་ཆུབ་སེམས་དཔའ་ཞེས་ཀྱང་བྱ། །གཟུགས་དང་ཚོར་བ་རྟོགས་བྱེད་ཅིང་། །འདུ་ཤེས་ཀྱང་ནི་དེ་བཞིན་ཏེ། །འདུ་བྱེད་རྣམས་དང་རྣམ་ཤེས་ནི། །སྒྱུ་མ་ལྟ་བུར་རྟོགས་པར་བྱེད། །ལྔ་ཕུང་རྨི་ལམ་ལྟ་བུ་དང་། ། མཚན་ཉིད་མེད་པར་མཚན་གཅིག་པར། །རྟོགས་ཀྱང་རྟོགས་སྙམ་མི་རྟོག་པ། །བྱང་ཆུབ་སེམས་དཔའ་ཞེས་ཀྱང་བྱ། །ནང་ནི་འབྱུང་བ་མ་ཡིན་ཏེ། །སྤྲོས་པ་མེད་ཅིང་འདུས་མ་བྱས། །དེ་དག་མིང་གིས་བསྟན་པ་སྟེ། །མིང་དེ་དངོས་པོ་ཡོད་མ་ཡིན། །འདོད་ཆགས་ཞེ་སྡང་ཀུན་རྟོག་གིས། །ཀུན་ནས་བསླང་བར་རྟོགས་པར་བྱེད། །རྟོག་པ་དེ་ཡང་བྱུང་མིན་ཏེ། །གཏན་དུ་དངོས་པོ་མེད་པ་ཡིན|་|གཏི་མུག་རྣམ་པར་རྟོག་ལས་བྱུང་། །རྣམ་པར་རྟོག་པ་རྒྱུ་ལས་སྐྱེ། །རྒྱུ་ཡང་ལྟ་བས་བསྐྱེད་པ་སྟེ། །ལྟ་བ་དེ་ཡང་དམིགས་སུ་མེད། །ཁམས་གསུམ་ཐམས་ཅད་སྟོང་པ་སྟེ། །དེ་ནི་མེད་པར་རྟོགས་པར་བྱེད། །འདི་ན་འཕོ་བ་འགའ་ཡང་མེད། །བྱང་ཆུབ་སེམས་དཔའ་ཞེས་ཀྱང་བྱ། །འདོད་ཁམས་གྲུབ་པ་མ་ཡིན་ཏེ། །རྣམ་པར་རྟོག་པས་ཀུན་ནས་བསླངས། །གཟུགས་དང་གཟུགས་མེད་དེ་བཞིན་ཏེ། །དེ་དག་ཐམས་ཅད་ཡོད་མ་ཡིན། །འདོད་ཆགས་སྤྱོད་དང་ཞེ་སྡང་སྤྱོད། །དེ་བཞིན་གཏི་མུག་སྤྱོད་པ་དང་། །སེམས་ཅན་སྤྱོད་པ་གང་ཡིན་པ། །ཐམས་ཅད་མཁས་པས་རྟོགས་པར་བྱེད། །སེམས་ཅན་ཐམས་ཅད་སེམས་ཅན་གཅིག་།སེམས་ཅན་དེ་ཡང་ཡོད་མིན་པར། །ཤེས་རབ་ཅན་གྱིས་དེ་རྟོགས་ཀྱང་།། སེམས་ཅན་དེ་ལ་རློམ་སེམས་མེད། །ཆོས་རྣམས་ཀུན་གྱི་འབྱུང་བ་ནི། །ཕྱིན་ཅི་ལོག་ལས་སྐྱེ་བ་སྟེ། །གང་དག་ཕྱིན་ཅི་ལོག་རྟོག་པ། །དེ་ནི་ལོག་པའི་མཚན་ཉིད་དོ། །ཤེས་པ་ཀུན་ལ་མཁས་པ་ནི། །གང་གི་སྒྲ་ལའང་ཆགས་པ་མེད། །ཆགས་པ་མེད་པར་རྟོགས་གྱུར་པ། །བྱང་ཆུབ་སེམས་དཔའ་ཞེས་ཀྱང་བྱ། །རང་གི་ཤ་རྣམས་གཏོང་བྱེད་ཀྱང་། །དེ་ལ་གནས་པ་ཡོད་མིན་ཞིང་། །ཇི་བཞིན་རྗེས་སུ་རྟོགས་གྱུར་པ། །བྱང་ཆུབ་སེམས་དཔའ་ཞེས་ཀྱང་བྱ། །ཚུལ་ཁྲིམས་ཕ་རོལ་ཕྱིན་གྱུར་ཀྱང་། །ཚུལ་ཁྲིམས་ལ་ནི་རློམ་སེམས་མེད། ། སངས་རྒྱས་ཚུལ་དོན་གང་ཡིན་པ། །སྐྱེ་མེད་འབྱུང་བ་མེད་པ་ཡིན། །བྱམས་པས་སེམས་ཅན་ཁྱབ་བྱེད་ཀྱང་། །སེམས་ཅན་དམིགས་སུ་ཡོད་མ་ཡིན། །སེམས་ཅན་དོན་ནི་རྗེས་རྟོགས་པ། །དེ་ནི་མིང་གིས་བསྟན་པ་ཡིན། །འདུས་བྱས་ཀུན་ལ་རྣམ་སེམས་པའི། །བརྩོན་འགྲུས་རྩོམ་ལ་གནས་གྱུར་ཅིང་། །འཇིག་རྟེན་སྟོང་པར་རིག་ནས་ནི། །བྱང་ཆུབ་དམ་པ་རྟོགས་པར་བྱེད། །དེ་ནི་བསམ་གཏན་སྒོམ་བྱེད་ཀྱང་། །དེ་ལ་བརྟེན་པ་ཡོད་མིན་ཞིང་། །གནས་མེད་དམིགས་པ་ཡོད་མིན་པ། །དེ་ལྟར་མཁས་པ་སྒོམ་པར་བྱེད། །བག་ཆགས་ལྟ་བའི་ཉོན་མོངས་རྣམས། །ཤེས་རབ་མཚོན་གྱིས་གཅོད་བྱེད་ཀྱང་། །ཆོས་ཀྱི་དབྱིངས་ལ་དབྱེ་བ་དང་། །བཅད་པའི་རློམ་སེམས་ཡོད་མ་ཡིན།། །།བམ་པོ་གསུམ་པ། དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དང་པོ་བསྐྱེད་པ་དང་ལྡན་པ། སེམས་དང་པོ་བསྐྱེད་པ་དང་ལྡན་པ་ཞེས་བགྱི་ན། བཅོམ་ལྡན་འདས། ཇི་ཙམ་གྱིས་ན་བྱང་ཆུབ་སེམས་དཔའ་སེམས་དང་པོ་བསྐྱེད་པ་དང་ལྡན་པ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ|་འཇམ་དཔལ། བྱང་ཆུབ་སེམས་དཔའ་གང་གིས་ཁམས་གསུམ་པ་ཐམས་ཅད་ལས་འདུ་ཤེས་དང་། ཡིད་ལ་བྱེད་པ་བསྐྱེད་པ་དེ་ནི། སེམས་དང་པོ་བསྐྱེད་པ་དང་ལྡན་པ་ཞེས་བྱའོ|་|འཇམ་དཔལ་གྱིས་གསོལ་པ། བཅོམ་ལྡན་འདས་ཀྱིས་བཀའ་སྩལ་པའི་དོན་བདག་གིས་འཚལ་བ་ལྟར་ན། བྱང་ཆུབ་སེམས་དཔའ་གང་གིས་འདོད་ཆགས་བསྐྱེད་པ་དང་། ཞེ་སྡང་བསྐྱེད་པ་དང་། གཏི་མུག་བསྐྱེད་པ་དེ་ནི་སེམས་དང་པོ་བསྐྱེད་པ་དང་ལྡན་པ་ཞེས་བགྱིའོ། །དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། གལ་ཏེ་འདོད་ཆགས་དང་། ཞེ་སྡང་དང་། གཏི་མུག་དག་བསྐྱེད་པ། བྱང་ཆུབ་སེམས་དཔའི་སེམས་དང་པོ་བསྐྱེད་པ་ལགས་ན། དེ་ལྟར་ན་བྱིས་པ་སོ་སོའི་སྐྱེ་བོ་རྣམས་ཀྱང་སེམས་དང་པོ་བསྐྱེད་པ་དང་ལྡན་པ་ལགས་པར་འགྱུར་རོ། །དེ་ཅིའི་སླད་དུ་ཞེ་ན། འཇམ་དཔལ། འདི་ལྟར་དེ་དག་ནི་འདོད་ཆགས་དང་ཞེ་སྡང་དང་གཏི་མུག་དག་བསྐྱེད་པར་བགྱིད་པའི་སླད་དུའོ། །འཇམ་དཔལ་གྱིས་སྨྲས་པ། ལྷའི་བུ། བྱིས་པ་སོ་སོའི་སྐྱེ་བོ་རྣམས་ཀྱི་ནི་འདོད་ཆགས་དང་། ཞེ་སྡང་དང་། གཏི་མུག་དག་བསྐྱེད་པར་མི་ནུས་སོ། ། དེ་ཅིའི་ཕྱིར་ཞེ་ན། ལྷའི་བུ། འདོད་ཆགས་དང་། ཞེ་སྡང་དང་། གཏི་མུག་དག་ནི་སངས་རྒྱས་རྣམས་དང་། རང་སངས་རྒྱས་རྣམས་དང་། ཉན་ཐོས་རྣམས་དང་། བྱང་ཆུབ་སེམས་དཔའ་ཕྱིར་མི་ལྡོག་པ་རྣམས་ཀྱིས་བསྐྱེད་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ། འཁོར་འདིས་ཁྱོད་ཀྱིས་ལྡེམ་པོའི་ངག་མི་རྟོགས་ཤིང་མ་འཚལ་ན། ཐེ་ཚོམ་འཚལ་བར་འགྱུར་གྱི། རྣམ་པར་ཕྱེ་སྟེ་བསྟན་དུ་གསོལ། འཇམ་དཔལ་གྱིས་སྨྲས་པ། ལྷའི་བུ། འདི་ཇི་སྙམ་དུ་སེམས། འདབ་ཆགས་བྱ་སྟེང་གི་བར་སྣང་ལ་རྒྱུ་བ་དེ་འཕུར་ཏེ་སོང་ངམ། འོན་ཏེ་འདུག་སྙམ། ལྷའི་བུས་སྨྲས་པ། འཇམ་དཔལ། འཕུར་ཏེ་མཆིས་སོ། །འཇམ་དཔལ་གྱིས་སྨྲས་པ། ལྷའི་བུ། ཁོ་བོ་ནི་དེ་ལས་བསམས་ནས་འདི་སྐད་ཅེས། གང་དག་འདོད་ཆགས་དང་། ཞེ་སྡང་དང་། གཏི་མུག་དག་སྐྱེད་པར་བྱེད་པ་དེ་དག་ནི་སངས་རྒྱས་རྣམས་དང་། རང་སངས་རྒྱས་རྣམས་དང་། ཉན་ཐོས་རྣམས་དང་། བྱང་ཆུབ་སེམས་དཔའི་ཕྱིར་མི་ལྡོག་པ་ཞེས་བྱའོ་ཞེས་སྟོན་ཏེ། ལྷའི་བུ། གང་ལ་རྟེན་མེད་པ་དེ་ནི་སྐྱེ་བ་ཡིན་ནོ། །གང་ལ་ལྷག་པར་ཆགས་པ་མེད་པ་དེ་ནི་སྐྱེ་བ་ཡིན་ནོ། །གང་ལ་མངོན་པར་ཞེན་པ་མེད་པ་དེ་ནི་སྐྱེ་བ་ཡིན་ནོ། །ལྷའི་བུ། གང་ལ་རྟེན་མེད་པ་དང་། ལྷག་པར་ཆགས་པ་མེད་པ་དང་། མངོན་པར་ཞེན་པ་མེད་པ་དེ་ནི་སྐྱེ་བ་ཡིན་ཏེ། སྐྱེ་བ་ཞེས་བྱ་བ་དེ་ནི་གཞི་མེད་པ་ཡིན་ནོ། །སྐྱེ་བ་ཞེས་བྱ་བ་དེ་ནི་བརྟག་ཏུ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་འབྱུང་བ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་ངོ་བོ་ཉིད་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་དངོས་པོ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་འོང་བ་མེད་པའི་གཞི་ཡིན་ནོ|་|སྐྱེ་བ་ཞེས་བྱ་བ་དེ་ནི་འགྲོ་བ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་སྐྱེ་བ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་དམིགས་པ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་རྣམ་པར་རིག་པ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་རྡུལ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་རློམ་སེམས་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་སྤྱོད་པ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་བརྗོད་དུ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་མི་ཕྱེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་ཡི་གེ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་གཟུང་བ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་གནས་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་བླང་བ་མེད་པའི་གཞི་ཡིན་ནོ|་|གཞི་ལས་འདས་པ་ཞེས་བྱ་བ་དེ་ནི་དོར་བ་མེད་པའི་གཞི་ཡིན་ནོ། །སྐྱེ་བ་ཞེས་བྱ་བ་དེ་ནི་ཕྱིར་མི་ལྡོག་པའི་གཞི་ཡིན་ཏེ། ལྷའི་བུ། ཆོས་དེ་ལ་རློམ་སེམས་སུ་མི་བྱེད། མངོན་པར་ཞེན་པར་མི་བྱེད། སེམས་པར་མི་བྱེད། ཤེས་པར་མི་བྱེད། ལྟ་བར་མི་བྱེད། ཉན་པར་མི་བྱེད། རྣམ་པར་ཤེས་པར་མི་བྱེད། ལེན་པར་མི་བྱེད། གཏོང་བར་མི་བྱེད། སྐྱེད་པར་མི་བྱེད། འགོག་པར་མི་བྱེད་པ་གང་ཡིན་པ་དེ་ནི་བྱང་ཆུབ་སེམས་དཔའི་སེམས་དང་པོ་བསྐྱེད་པ་ཡིན་ནོ། །ལྷའི་བུ། དེ་ལྟ་བས་ན་བྱང་ཆུབ་སེམས་དཔས་ཚུལ་དེ་དང་། ཆོས་ཀྱི་དབྱིངས་དེ་དང་། མཉམ་པ་ཉིད་དེ་དང་། མཐའ་དེ་དང་། ཐབས་ལ་མཁས་པ་དེས་འདོད་ཆགས་བསྐྱེད་པར་བྱའོ། །ཞེ་སྡང་དང་། གཏི་མུག་བསྐྱེད་པར་བྱའོ། །མིག་གི་རྟེན་བསྐྱེད་པར་བྱའོ། །ཡིད་ཀྱི་རྟེན་གྱི་བར་དུ་བསྐྱེད་པར་བྱའོ། །གཟུགས་ལ་ལྷག་པར་ཆགས་པར་བསྐྱེད་པར་བྱའོ། །རྣམ་པར་ཤེས་པ་ལ་ལྷག་པར་ཆགས་པའི་བར་དུ་བསྐྱེད་པར་བྱའོ།། མིང་བསྐྱེད་པར་བྱའོ། །གཟུགས་བསྐྱེད་པར་བྱའོ། །རྒྱུ་བསྐྱེད་པར་བྱའོ། །ལྟ་བའི་རྣམ་པ་ཐམས་ཅད་བསྐྱེད་པར་བྱའོ། །མ་རིག་པ་བསྐྱེད་པར་བྱའོ། །སྲིད་པའི་སྲེད་པ་བསྐྱེད་པར་བྱའོ། ། རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་ལ་འཇུག་པའི་བར་དུ་བསྐྱེད་པར་བྱའོ། །འདོད་པའི་ཡོན་ཏན་ལྔ་བསྐྱེད་པར་བྱའོ། །ཁམས་གསུམ་པ་ལ་མངོན་པར་ཞེན་པ་བསྐྱེད་པར་བྱའོ། །ངར་འཛིན་པ་དང་། ང་ཡིར་འཛིན་པ་བསྐྱེད་པར་བྱའོ། །འཇིག་ཚོགས་བསྐྱེད་པར་བྱའོ། །འཇིག་ཚོགས་ལ་ལྟ་བ་བསྐྱེད་པར་བྱའོ། །ལྟ་བའི་རྣམ་པ་དྲུག་ཅུ་རྩ་གཉིས་བསྐྱེད་པར་བྱའོ། །སངས་རྒྱས་སུ་འདུ་ཤེས་པ་དང་། ཆོས་སུ་འདུ་ཤེས་པ་དང་། དགེ་འདུན་དུ་འདུ་ཤེས་པ་བསྐྱེད་པར་བྱའོ། །བདག་ཏུ་འདུ་ཤེས་པ་དང་། གཞན་དུ་འདུ་ཤེས་པ་བསྐྱེད་པར་བྱའོ། །སར་འདུ་ཤེས་པ་བསྐྱེད་པར་བྱའོ། །ཆུར་འདུ་ཤེས་པ་དང་། མེར་འདུ་ཤེས་པ་དང་། རླུང་དུ་འདུ་ཤེས་པ་དང་། ནམ་མཁར་འདུ་ཤེས་པ་དང་། རྣམ་པར་ཤེས་པར་འདུ་ཤེས་པ་བསྐྱེད་པར་བྱའོ། །ཕྱིན་ཅི་ལོག་བཞི་བསྐྱེད་པར་བྱའོ། །སྒྲིབ་པ་ལྔ་དང་། རྣམ་པར་ཤེས་པ་གནས་པ་གཞི་དང་། ལོག་པ་ཉིད་བརྒྱད་དང་། མི་དགེ་བ་བཅུའི་ལས་ཀྱི་ལམ་རྣམས་བསྐྱེད་པར་བྱའོ། །ལྷའི་བུ། མདོར་ན་བྱང་ཆུབ་སེམས་དཔའ་རྟོག་པ་ཐམས་ཅད་དང་། ཡོངས་སུ་རྟོག་པ་ཐམས་ཅད་དང་། རྣམ་པར་རྟོག་པ་ཐམས་ཅད་དང་། མཚན་མ་ཐམས་ཅད་དང་། སྤྲོས་པ་ཐམས་ཅད་དང་། འདོད་པ་ཐམས་ཅད་དང་། འཛིན་པ་ཐམས་ཅད་དང་། མངོན་པར་ཞེན་པ་ཐམས་ཅད་དང་། འདུ་ཤེས་ཐམས་ཅད་དང་། རློམ་སེམས་ཐམས་ཅད་དང་། ཆགས་པ་ཐམས་ཅད་བསྐྱེད་པར་བྱ་སྟེ། ལྷའི་བུ། རྣམ་གྲངས་དེས་ན་ཁྱོད་ཀྱིས་འདི་ལྟར་ཆོས་དེ་ལ་མངོན་པར་ཞེན་པ་མེད་པ་དང་། ལྷག་པར་ཆགས་པ་མེད་པ་གང་ཡིན་པ་དེ་ནི་སྐྱེ་བ་ཞེས་བྱ་བ་ཡིན་པར་རིག་པར་བྱའོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་བ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ། གང་གི་ཕྱིར་ཁྱོད་ཀྱིས་འདི་ལྟ་སྟེ། སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་ལ་བསྙེན་བཀུར་བྱས་པའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་དང་པོ་བསྐྱེད་པ་འདི་བསྟན་པ་ལེགས་སོ། །ལེགས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་ལྟར་འཇམ་དཔལ་གཞོན་ནུར་གྱུར་པས། བྱང་ཆུབ་སེམས་དཔའི་སེམས་དང་པོ་སྐྱེ་བ་འདི་བསྟན་པའི་སེམས་སྐྱེ་བ་འདི་ནི་མི་སྐྱེ་བའི་ཆོས་ལ་བཟོད་པ་ཐོབ་པ་དང་མཚུངས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། ཤཱ་རིའི་བུ། གང་གི་ཚེ་དེ་བཞིན་གཤེགས་པ་མར་མེ་མཛད་ཀྱིས་ང་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་བསྐལ་པ་གྲངས་མེད་པ་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ། །ཞེས་ལུང་བསྟན་པ་དེའི་ཚེ་ན། ཤཱ་རིའི་བུ། ང་སེམས་བསྐྱེད་པ་འདི་དང་བྲལ་བར་མ་གྱུར་ཏེ། ཤཱ་རིའི་བུ། དེ་ན་ངས་མི་སྐྱེ་བའི་ཆོས་ལ་བཟོད་པ་ཐོབ་པ་གང་ཡིན་པ་དང་། བྱང་ཆུབ་སེམས་དཔའི་སེམས་དང་པོ་བསྐྱེད་པ་དེ་ནི་འཇམ་དཔལ་གཞོན་ནུར་གྱུར་པས་ཇི་སྐད་བསྟན་པ་འདི་ཡིན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས་ཀྱིས་བཀའ་སྩལ་པའི་དོན་བདག་གིས་འཚལ་ལྟར་ན། བྱང་ཆུབ་སེམས་དཔའི་སེམས་སྐྱེ་བ་ཐམས་ཅད་ནི་སེམས་དང་པོ་སྐྱེ་བ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། འདི་ལྟར་སེམས་སྐྱེ་བ་ཐམས་ཅད་ནི་སྐྱེ་བ་མ་མཆིས་པ་ལགས་ལ། སྐྱེ་བ་མ་མཆིས་པ་གང་ལགས་པ་དེ་ནི་བྱང་ཆུབ་སེམས་དཔའི་སེམས་དང་པོ་སྐྱེ་བ་ལགས་པའི་སླད་དུའོ། །བསྟན་པ་འདི་བཤད་པ་ན་བྱང་ཆུབ་སེམས་དཔའ་ཉི་ཁྲི་སུམ་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་བོ། །དགེ་སློང་ལྔ་བརྒྱ་ནི་ལེན་པ་མེད་པའི་ཟག་པ་རྣམས་ལས་སེམས་རྣམ་པར་གྲོལ་ལོ། །ལྷའི་བུ། དུང་ཕྱུར་ཕྲག་དྲུག་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་། དེ་ནས་བཅོམ་ལྡན་འདས་ལ་གནས་བརྟན་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་ལྟར་འཇམ་དཔལ་གཞོན་ནུར་གྱུར་པས་ཆོས་བསྟན་པས་སེམས་ཅན་འདི་སྙེད་ཀྱི་དོན་བགྱིས་པ་ནི་འཇམ་དཔལ་གཞོན་ནུར་གྱུར་པ་དཀའ་བ་བགྱིད་པ་ལགས་སོ། །འཇམ་དཔལ་གྱིས་སྨྲས་པ|་བཙུན་པ་འོད་སྲུང་ཆེན་པོ། ཁོ་བོ་ནི་དཀའ་བ་བྱེད་པ་མ་ཡིན་ནོ། །དེ་ཅིའི་ཕྱིར་ཞེ་ན། བཙུན་པ་འོད་སྲུང་ཆེན་པོ། ཆོས་ཐམས་ཅད་བྱེད་པ་མེད་པ། མ་བྱས་པ། བྱ་བ་མེད་པ་ཡིན་པས|་ཁོ་བོ་ཆོས་འགའ་ཡང་མི་བྱེད། འཇིག་པར་མི་བྱེད་པའི་ཕྱིར་རོ། །ཁོ་བོ་ནི་སེམས་ཅན་འགའ་ཡང་གྲོལ་བར་མི་བྱེད། འཆིང་བར་མི་བྱེད་དོ། །དེ་ཅིའི་ཕྱིར་ཞེ་ན། སེམས་ཅན་མེད་པའི་ཕྱིར་རོ། །བཙུན་པ་འོད་སྲུང་ཆེན་པོ། གཞན་ཡང་དེ་སྐད་ཅེས་དཀའ་བ་བྱེད་པ་ཡིན་ནོ་ཞེས་ཟེར་བ་ནི། བཙུན་པ་འོད་སྲུང་ཆེན་པོ། ཁོ་བོ་ནི་དཀའ་བ་བྱེད་པ་མ་ཡིན་ཏེ། དེ་བཞིན་གཤེགས་པ་ཡང་མ་ཡིན། དགྲ་བཅོམ་པ་རྣམས་ཀྱང་མ་ཡིན། རང་སངས་རྒྱས་རྣམས་ཀྱང་མ་ཡིན་ནོ། །བཙུན་པ་འོད་སྲུང་ཆེན་པོ། གང་དག་བྱིས་པ་སོ་སོའི་སྐྱེ་བོ་རྣམས་དཀའ་བ་བྱེད་པ་ཡིན་ནོ་ཞེས་ཡང་དག་པར་སྨྲ་བ་བརྗོད་པར་གྱུར་ན། དེ་དག་ནི་ཡང་དག་པར་སྨྲ་བ་བརྗོད་པ་ཡིན་ནོ། །དེ་ཅིའི་ཕྱིར་ཞེ་ན། བཙུན་པ་འོད་སྲུང་ཆེན་པོ། འདི་ལྟར་སངས་རྒྱས་ཐམས་ཅད་ཀྱིས་མ་བརྙེས། མི་རྙེད། རྙེད་པར་མི་འགྱུར་བ་གང་ཡིན་པ་དང་། ཉན་ཐོས་ཐམས་ཅད་དང་། རང་སངས་རྒྱས་ཐམས་ཅད་ཀྱིས་མ་བརྙེས། མི་རྙེད། རྙེད་པར་མི་འགྱུར་བ་གང་ཡིན་པ་དེ་བྱིས་པ་སོ་སོའི་སྐྱེ་བོ་རྣམས་ཀྱིས་རྙེད་པའི་ཕྱིར་རོ། །འོད་སྲུང་ཆེན་པོས་སྨྲས་པ། འཇམ་དཔལ། སངས་རྒྱས་ཐམས་ཅད་ཀྱིས་ཅི་ཞིག་མ་བརྙེས། འཇམ་དཔལ་གྱིས་སྨྲས་པ། བཙུན་པ་འོད་སྲུང་ཆེན་པོ། བདག་མ་བརྙེས་སོ། །སེམས་ཅན་མ་བརྙེས་སོ། །སྲོག་མ་བརྙེས་སོ། །གང་ཟག་མ་བརྙེས་སོ། །རྟག་པ་མ་བརྙེས་སོ། །ཆད་པ་མ་བརྙེས་སོ།། ཕུང་པོ་རྣམས་མ་བརྙེས་སོ། །ཁམས་རྣམས་མ་བརྙེས་སོ། །སྐྱེ་མཆེད་རྣམས་མ་བརྙེས་སོ། །མིང་མ་བརྙེས་སོ། །གཟུགས་མ་བརྙེས་སོ། །འདོད་པའི་ཁམས་མ་བརྙེས་སོ། །གཟུགས་ཀྱི་ཁམས་མ་བརྙེས་སོ། །གཟུགས་མེད་པའི་ཁམས་མ་བརྙེས་སོ། །རྟོག་པ་དང་ཡོངས་སུ་རྟོག་པ་དང་། རྣམ་པར་རྟོག་པ་དང་། རྒྱུ་དང་སྐྱེ་བ་རྣམས་མ་བརྙེས་སོ། །ཕྱིན་ཅི་ལོག་རྣམས་མ་བརྙེས་སོ།། འདོད་ཆགས་དང་། ཞེ་སྡང་དང་། གཏི་མུག་དག་མ་བརྙེས་སོ། །འཇིག་རྟེན་འདི་དང་། འཇིག་རྟེན་ཕ་རོལ་མ་བརྙེས་སོ། །ངར་འཛིན་པ་དང་། ང་ཡིར་འཛིན་པ་དག་མ་བརྙེས་ཏེ། བཙུན་པ་འོད་སྲུང་ཆེན་པོ། མདོར་ན་ཆོས་ཐམས་ཅད་མ་བརྙེས། མ་བཤིག། མ་བཀྲོལ། མ་བཟུང་། མ་བཏང་། མ་སྦྱར། མ་ཕྱེའོ། །བཙུན་པ་འོད་སྲུང་ཆེན་པོ། རྣམ་གྲངས་དེས་ན་ཁྱོད་ཀྱིས་འདི་ལྟར་སངས་རྒྱས་ཐམས་ཅད་ཀྱིས་མ་བརྙེས་པ་གང་ཡིན་པ་དེ་ནི་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་རྣམས་ཀྱིས་རྙེད་པར་རིག་པར་བྱ་སྟེ། དེའི་ཕྱིར་དེ་དག་ནི་དཀའ་བ་བྱེད་པ་ཡིན་ནོ། །སངས་རྒྱས་རྣམས་ཀྱིས་མ་མཛད་པ་གང་ཡིན་པ་དང་། ཉན་ཐོས་རྣམས་དང་། རང་སངས་རྒྱས་རྣམས་ཀྱིས་མ་བྱས་པ་གང་ཡིན་པ་དེ་ཡང་བྱིས་པ་སོ་སོའི་སྐྱེ་བོ་རྣམས་བྱེད་དོ། །འོད་སྲུང་ཆེན་པོས་སྨྲས་པ། འཇམ་དཔལ། ཅི་ཞིག་བྱེད། འཇམ་དཔལ་གྱིས་སྨྲས་པ། བཙུན་པ་འོད་སྲུང་ཆེན་པོ། རྟག་པ་བྱེད་དོ། །ཆད་པ་བྱེད་དོ། །ཀུན་དུ་སྦྱོར་བ་བྱེད་དོ། །མངོན་པར་གནས་པ་བྱེད་དོ། །རློམ་སེམས་བྱེད་དོ། །སེམས་པ་བྱེད་དོ། །སྐྱེ་བ་བྱེད་དོ། །འཇིག་པ་བྱེད་དོ། །ལེན་པ་བྱེད་དོ། །འདོར་བ་བྱེད་དོ། །འཕྲོ་བ་བྱེད་དོ། །རྟོག་པ་བྱེད་དོ། །རྗེས་སུ་ཆགས་པ་བྱེད་དོ། །ཁོང་ཁྲོ་བ་བྱེད་དོ། །ཁེངས་པ་བྱེད་དོ། །འདུད་པ་བྱེད་དེ། བཙུན་པ་འོད་སྲུང་ཆེན་པོ། སངས་རྒྱས་བཅོམ་ལྡན་འདས་རྣམས་ཀྱིས་མ་མཛད། མི་མཛད། མཛད་པར་མི་འགྱུར་བའི་ཆོས་གང་དག་ཡིན་པ་དེ་དག་བྱིས་པ་སོ་སོའི་སྐྱེ་བོ་རྣམས་བྱེད་པས་ན། དེའི་ཕྱིར་དེ་དག་ནི་དཀའ་བ་བྱེད་པ་ཡིན་ནོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། མི་སྐྱེ་བའི་བཟོད་པ་མི་སྐྱེ་བའི་བཟོད་པ་ཞེས་བགྱི་ན། བཅོམ་ལྡན་འདས། བྱང་ཆུབ་སེམས་དཔའི་མི་སྐྱེ་བའི་ཆོས་ལ་བཟོད་པ་ཞེས་བགྱི་བ་དེ་ནི་གང་ལགས། མི་སྐྱེ་བའི་ཆོས་ལ་བཟོད་པ་ཐོབ་པའི་བྱང་ཆུབ་སེམས་དཔའ་ནི་ཅི་ཞིག་འཐོབ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། འཐོབ་པ་ཅི་ཡང་མེད་པའི་ཕྱིར་མི་སྐྱེ་བའི་ཆོས་ལ་བཟོད་པ་ཐོབ་པ་ཞེས་བྱའོ། །དེ་ཅིའི་ཕྱིར་ཞེ་ན། བཟོད་པ་དེ་ནི་ཐོབ་པ་མེད་པ་སྟེ། ཐོབ་པ་མེད་པ། ཐོབ་པ་དང་བྲལ་བ། མ་ཐོབ་པ། མ་བཤིག་པ་ཡིན་པའི་ཕྱིར་རོ། །འཇམ་དཔལ། མི་སྐྱེ་བའི་ཆོས་ལ་བཟོད་པ་ཞེས་བྱ་བ་དེ་ནི་ཆོས་ཐམས་ཅད་སྐྱེ་བ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་འོང་བ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་འགྲོ་བ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་མཉམ་པ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་བདག་པོ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་བླང་བ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་དོར་བ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་དངོས་པོ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་ངོ་བོ་ཉིད་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་འདྲ་བ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་རྡུལ་མེད་ཅིང་ནམ་མཁའ་དང་མཚུངས་པ་ཞེས་བྱ་བ་བཟོད་པ་དང་། ཆོས་ཐམས་ཅད་དབྱེར་མེད་ཅིང་གཅད་དུ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་ཀུན་ནས་ཉོན་མོངས་པ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་རྣམ་པར་བྱང་བ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་སྟོང་པ་དང་། མཚན་མ་མེད་པ་དང་། སྨོན་པ་མེད་པ་ཞེས་བྱ་བ་བཟོད་པ་དང་། ཆོས་ཐམས་ཅད་འདོད་ཆགས་དང་བྲལ་བ་དང་། ཞེ་སྡང་དང་བྲལ་བ་དང་། གཏི་མུག་དང་བྲལ་བ་ཞེས་བྱ་བ་བཟོད་པ་དང་། ཆོས་ཐམས་ཅད་དེ་བཞིན་ཉིད་དང་། ཆོས་ཀྱི་དབྱིངས་དང་། ཡང་དག་པའི་མཐའ་ལ་གནས་བ་ཞེས་བྱ་བ་བཟོད་པ་དང་། ཆོས་ཐམས་ཅད་མ་བརྟགས་པ་དང་། རྣམ་པར་མ་བརྟགས་པ་དང་། མ་རློམ་པ་དང་། མ་སྤྲོས་པ་དང་། མ་བསམས་པ་དང་། མ་བྱས་པ་དང་། སྟོབས་མེད་པ་དང་། ཉམ་ཆུང་བ་དང་། གསོག་དང་། གསོབ་དང་|་སྒྱུ་མ་ལྟ་བུ་དང་། རྨི་ལམ་ལྟ་བུ་དང་། བྲག་ཅ་ལྟ་བུ་དང་། མིག་ཡོར་ལྟ་བུ་དང་། སྨིག་རྒྱུ་ལྟ་བུ་དང་། ཆུ་ཤིང་གི་སྙིང་པོ་ལྟ་བུ་དང་། ཆུ་བུར་ལྟ་བུ་དང་། དབུ་བ་རྡོས་པ་ལྟ་བུ་ཞེས་བྱ་བ་བཟོད་ཅིང་། དེ་དག་ནི་ཆོས་རྣམས་ཀྱང་མ་ཡིན། ཆོས་མ་ཡིན་པ་རྣམས་ཀྱང་མ་ཡིན། མིང་གིས་བརྗོད་པ་ཁོ་ན་ཡིན་ཞིང་། མིང་དེ་ཡང་གཡོ་བ་མེད་པ། རང་བཞིན་གྱིས་དབེན་པ་ཡིན་ནོ། །ཞེས་བྱ་བ་དེ་ལྟར་བཟོད་པར་བྱེད། མོས་པར་བྱེད། ཡིད་ཆེས་པར་བྱེད། འཇུག་པར་བྱེད། རྟོགས་པར་བྱེད་ཅིང་། ནེམ་ནུར་མི་བྱེད། ཐེ་ཚོམ་མི་ཟ་ལ། མི་སྐྲག་མི་དངངས་དངང་བར་མི་འགྱུར་བར་ལུས་ཀྱིས་རེག་པར་བྱས་ནས་བསྒྲུབས་ཏེ་གནས་ཤིང་། ལུས་ཀྱང་མི་དམིགས། གནས་པ་ཡང་མི་དམིགས་པ་དེ་ནི། འཇམ་དཔལ། འདི་ལྟ་སྟེ། མཚན་མ་ཐམས་ཅད་རབ་ཏུ་མི་རྒྱུ་བའི་ཕྱིར། བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་ཞེས་བྱའོ། །འཇམ་དཔལ་གྱིས་གསོལ་པ། བཅོམ་ལྡན་འདས། བཟོད་པ་བཟོད་པ་ཞེས་བགྱི་བ་ནི|་ཆོས་གང་ཆོས་གང་གིས་ཀྱང་སྨྲས་པར་བགྱིར་མ་མཆིས་པ་དེ་ནི་བཟོད་པ་ཞེས་བགྱིའོ། །དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས། སོ|་|འཇམ་དཔལ། ཆོས་གང་ཞིག་ཆོས་གང་གིས་སྨྲས་པར་བགྱིད། འཇམ་དཔལ་གྱིས་སྨྲས་པ། ལྷའི་བུ། མིག་ནི་གཟུགས་ཡིད་དུ་འོང་བ་དང་། ཡིད་དུ་མི་འོང་བ་དག་གིས་སྨྲས་བར་བྱེད་དོ། ། རྣ་བ་ནི་སྒྲ་དག་གིས་སོ། །སྣ་ནི་དྲི་དག་གིས་སོ། །ལྕེ་ནི་རོ་དག་གིས་སོ། །ལུས་ནི་རེག་བྱ་དག་གིས་སོ། །ལྷའི་བུ། ཡིད་ནི་ཆོས་ཡིད་དུ་འོང་བ་དང་། ཡིད་དུ་མི་འོང་བ་དག་གིས་སྨྲས་པར་བྱེད་དོ། ། ལྷའི་བུ། བྱང་ཆུབ་སེམས་དཔའ་ནི་མིག་གིས་གཟུགས་མཐོང་ཡང་མཚན་མར་འཛིན་པར་མི་བྱེད། མངོན་རྟགས་སུ་འཛིན་པར་མི་བྱེད། རྟོག་པར་མི་བྱེད། རྣམ་པར་རྟོག་པར་མི་བྱེད། རྗེས་སུ་ཆགས་པར་མི་བྱེད། ཁོང་ཁྲོ་བར་མི་བྱེད་དེ། གཟུགས་རང་བཞིན་གྱིས་སྟོང་པར་ཤེས་པར་བྱེད་ཅིང་། རློམ་སེམས་སུ་མི་བྱེད། སྨྲས་པར་མི་བྱེད་དོ། །དེ་བཞིན་དུ་རྣ་བས་སྒྲ་ཐོས་པ་དང་|་སྣས་དྲི་མནམ་པ་དང་། ལྕེས་རོ་མྱོང་བ་དང་། ལུས་ཀྱིས་རེག་བྱ་རེག་པ་དང་། ཡིད་ཀྱིས་ཆོས་ཤེས་ཀྱང་མཚན་མར་འཛིན་པར་མི་བྱེད། མངོན་རྟགས་སུ་འཛིན་པར་མི་བྱེད། རྟོག་པར་མི་བྱེད། རྣམ་པར་རྟོག་པར་མི་བྱེད། རྗེས་སུ་ཆགས་པར་མི་བྱེད། ཁོང་ཁྲོ་བར་མི་བྱེད་དེ། ཆོས་རང་བཞིན་གྱིས་སྟོང་པར་ཤེས་པར་བྱེད་ཅིང་། རློམ་སེམས་སུ་མི་བྱེད། སྨྲས་པར་མི་བྱེད་དོ། །ལྷའི་བུ། དེ་ལྟར་སྐྱེ་མཆེད་དྲུག་པོ་དག་ལ་ཆགས་པར་མི་བྱེད། སྨྲས་བར་མི་བྱེད་དེ། སྨྲས་པར་མི་བྱེད་པ་གང་ཡིན་པ་དེ་ནི་བཟོད་པ་ཞེས་བྱའོ། ། ལྷའི་བུ། བཟོད་པ་དེ་ལྟ་བུ་ཐོབ་པའི་བྱང་ཆུབ་སེམས་དཔའ་ནི་ཆོས་རྣམས་ལ་སྐྱེ་བའམ། མི་སྐྱེ་བར་མི་རྟོག་གོ་།ཆོས་རྣམས་ལ་ཟག་པ་དང་བཅས་པའམ། ཟག་པ་མེད་པའམ། ཁ་ན་མ་ཐོ་བ་དང་བཅས་པའམ། ཁ་ན་མ་ཐོ་བ་མེད་པའམ། འདུས་བྱས་སམ། འདུས་མ་བྱས་སུ་མི་རྟོག་སྟེ། གང་གི་ཚེ་མི་རྟོག་པ་དེའི་ཚེ། མི་སྐྱེ་བའི་ཆོས་ལ་བཟོད་པ་ཞེས་བྱའོ། །བསྟན་པ་འདི་བཤད་པ་ན། སྲོག་ཆགས་དྲུག་ཁྲི་ཉིས་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་སེམས་དཔའ་ཁྲི་ཉིས་སྟོང་གིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། ས་ནས་སར་འཕར་བ་ཞེས་བགྱི་ན། ཇི་ལྟར་བྱང་ཆུབ་སེམས་དཔའ་ས་ནས་སར་འཕར་བར་བགྱིད། འཇམ་དཔལ་གྱིས་སྨྲས་པ། ལྷའི་བུ། ས་ནས་སར་འཕར་བར་བྱེད་པ་གང་ཡིན་པ་དེ་ལ་དྲིས་ཤིག། ལྷའི་བུས་སྨྲས་པ། འཇམ་དཔལ། བྱང་ཆུབ་སེམས་དཔའ་ས་ནས་སར་འཕར་ཞིང་། ས་བཅུ་པའི་བར་དུ་གནོན་པར་མི་བགྱིད་དམ། འཇམ་དཔལ་གྱིས་སྨྲས་པ། ལྷའི་བུ་ཁྱོད་བཅོམ་ལྡན་འདས་ཀྱིས་ཆོས་ཐམས་ཅད་སྒྱུ་མ་ལྟ་བུའོ་ཞེས་གསུངས་པ་ལ་མ་མོས་སམ། ལྷའི་བུས་སྨྲས་པ། འཇམ་དཔལ། མོས་སོ། །འཇམ་དཔལ་གྱིས་སྨྲས་པ། ལྷའི་བུ། ཅི་སྒྱུ་མ་དང་སྤྲུལ་པས་ནས་སར་འཕར་ཞིང་། ས་བཅུ་པའི་བར་དུ་གནོན་ཏམ། ལྷའི་བུས་སྨྲས་པ། འཇམ་དཔལ། དེ་ནི་མ་ལགས་སོ། །འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་སྒྱུ་མ་དང་སྦྲུལ་པ་ས་ནས་སར་འཕར་བར་གྱུར་པ་དེའི་ཚེ། ཁོ་བོ་ཡང་ས་ནས་སར་འཕར་བར་འགྱུར་རོ། །དེ་ཅིའི་ཕྱིར་ཞེ་ན། བཅོམ་ལྡན་འདས་ཀྱིས་ཆོས་ཐམས་ཅད་སྒྱུ་མ་ལྟ་བུ་ཞེས་གསུངས་པའི་ཕྱིར་རོ། །ལྷའི་བུ། དེ་ལྟ་མོད་ཀྱི་ས་ནས་སར་འཕར་བ་བསྟན་པ་ནི་འཕར་བ་མེད་པར་བསྟན་པར་བྱའི། འཕར་བར་ནི་མ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཐམས་ཅད་འཕར་བ་མེད་པས། ཆོས་རྣམས་ནི་ཆོས་རྣམས་སུ་མི་འཕར་བའི་ཕྱིར་ཏེ། གཟུགས་ནི་ཚོར་བར་མི་འཕོ། ཚོར་བ་ཡང་གཟུགས་སུ་མི་འཕོ། གཟུགས་ནི་འདུ་ཤེས་སུ་མི་འཕོ། འདུ་ཤེས་ཀྱང་གཟུགས་སུ་མི་འཕོ། གཟུགས་ནི་འདུ་བྱེད་རྣམས་སུ་མི་འཕོ། འདུ་བྱེད་རྣམས་ཀྱང་གཟུགས་སུ་མི་འཕོ། གཟུགས་ནི་རྣམ་པར་ཤེས་པར་མི་འཕོ། རྣམ་པར་ཤེས་པ་ཡང་གཟུགས་སུ་མི་འཕོ། ཚོར་བ་ནི་འདུ་ཤེས་སུ་མི་འཕོ། འདུ་ཤེས་ཀྱང་ཚོར་བར་མི་འཕོ། ཚོར་བ་ནི་འདུ་བྱེད་རྣམས་སུ་མི་འཕོ། འདུ་བྱེད་རྣམས་ཀྱང་ཚོར་བར་མི་འཕོ། ཚོར་བ་ནི་རྣམ་པར་ཤེས་པར་མི་འཕོ། རྣམ་པར་ཤེས་པ་ཡང་ཚོར་བར་མི་འཕོ། འདུ་ཤེས་ནི་འདུ་བྱེད་རྣམས་སུ་མི་འཕོ། འདུ་བྱེད་རྣམས་ཀྱང་འདུ་ཤེས་སུ་མི་འཕོ། འདུ་ཤེས་ནི་རྣམ་པར་ཤེས་པར་མི་འཕོ། རྣམ་པར་ཤེས་པ་ཡང་འདུ་ཤེས་སུ་མི་འཕོ། འདུ་བྱེད་རྣམས་ནི་རྣམ་པར་ཤེས་པར་མི་འཕོ། རྣམ་པར་ཤེས་པ་ཡང་འདུ་བྱེད་རྣམས་སུ་མི་འཕོ། མིག་ནི་རྣ་བར་མི་འཕོ། རྣ་བ་ཡང་མིག་ཏུ་མི་འཕོ། མིག་ནི་སྣར་མི་འཕོ། སྣ་ཡང་མིག་ཏུ་མི་འཕོ། མིག་ནི་ལྕེར་མི་འཕོ། ལྕེ་ཡང་མིག་ཏུ་མི་འཕོ། མིག་ནི་ལུས་སུ་མི་འཕོ། ལུས་ཀྱང་མིག་ཏུ་མི་འཕོ། མིག་ནི་ཡིད་དུ་མི་འཕོ། ཡིད་ཀྱང་མིག་ཏུ་མི་འཕོ། རྣ་བ་ནི་སྣར་མི་འཕོ། སྣ་ཡང་རྣ་བར་མི་འཕོ། རྣ་བ་ནི་ལྕེར་མི་འཕོ|་ལྕེ་ཡང་རྣ་བར་མི་འཕོ། རྣ་བ་ནི་ལུས་སུ་མི་འཕོ། ལུས་ཀྱང་རྣ་བར་མི་འཕོ། རྣ་བ་ནི་ཡིད་དུ་མི་འཕོ། ཡིད་ཀྱང་རྣ་བར་མི་འཕོ། སྣ་ནི་ལྕེར་མི་འཕོ། ལྕེ་ཡང་སྣར་མི་འཕོ། སྣ་ནི་ལུས་སུ་མི་འཕོ། ལུས་ཀྱང་སྣར་མི་འཕོ། སྣ་ནི་ཡིད་དུ་མི་འཕོ། ཡིད་ཀྱང་སྣར་མི་འཕོ། ལྕེ་ནི་ལུས་སུ་མི་འཕོ། ལུས་ཀྱང་ལྕེར་མི་འཕོ། ལྕེ་ནི་ཡིད་དུ་མི་འཕོ། ཡིད་ཀྱང་ལྕེར་མི་འཕོ། ལུས་ནི་ཡིད་དུ་མི་འཕོ། ཡིད་ཀྱང་ལུས་སུ་མི་འཕོ་ཞིང་། ཆོས་དེ་དག་གི་སྤྱོད་ཡུལ་ཐ་དད་པ། ཡུལ་ཐ་དད་པ། བླུན་པ། བེམ་པོ་སེམས་པ་མེད་པ། གཡོ་བ་མེད་པ། བྱེད་པ་མེད་པ། རྩཝ་དང་། རྩིག་པ་ལྟ་བུར་སྣང་བ། སྒྱུ་མ་ལྟ་བུར་རྣམ་པར་རིག་པ་མེད་པ། མཚན་ཉིད་མེད་པར་མཚན་ཉིད་གཅིག་པ་སྟེ། དེ་དག་ནི་འཕོ་བར་མི་བྱེད། འོང་བར་མི་བྱེད། འགྲོ་བར་མི་བྱེད་པའི་ཕྱིར་རོ། །ལྷའི་བུ། བྱང་ཆུབ་སེམས་དཔའ་གང་དེ་ལྟར་ཤེས་པར་བྱེད་པ་དེ་ནི་ཆོས་གང་ལ་ཡང་འཕོ་བར་མི་བྱེད་ཅིང་། སར་ཡང་རྣམ་པར་རྟོག་པར་མི་བྱེད། སར་འཕར་བར་ཡང་མི་མཐོང་། ས་ཡོངས་སུ་སྤོང་བར་ཡང་མི་བྱེད་དེ། འཕོ་བ་མེད་པ་དང་། འཇིག་པ་མེད་པའི་ཕྱིར། བྱང་ཆུབ་ལས་ལྡོག་པར་ཡང་མི་འགྱུར་རོ། །དེ་ཅིའི་ཕྱིར་ཞེ་ན། ཆོས་ཐམས་ཅད་གཟོད་མ་ནས་རྣམ་པར་དག་པའི་ཕྱིར། ཕུང་པོ་དང་། ཁམས་དང་། སྐྱེ་མཆེད་ཀྱི་ངོ་བོ་ཉིད་གང་ཡིན་པ་དེ་ནི་འཕོ་བ་མེད་ཅིང་འཇིག་པ་མེད་པའི་ཕྱིར་ཏེ། ལྷའི་བུ། དེ་ནི་བྱང་ཆུབ་སེམས་དཔའ་རྣམས་ཀྱི་ས་ནས་སར་འཕར་བ་ཡིན་ནོ། །ལྷའི་བུ། འདི་ལྟ་སྟེ། དཔེར་ན། སྒྱུ་མ་མཁན་ཞིག་གིས་ས་བཅུའི་ཁང་པ་བརྩེགས་པ་ཞིག་མངོན་པར་སྤྲུལ་ནས། དེར་སྒྱུ་མའི་མི་ཞིག་ཞུགས་པར་གྱུར་ན། ལྷའི་བུ། འདི་ཇི་སྙམ་དུ་སེམས། དེར་ཞུགས་པ་འགའ་ཡང་ཡོད་སྙམ་མམ། ལྷའི་བུས་སྨྲས་པ། འཇམ་དཔལ། དེ་ནི་མ་མཆིས་སོ། །འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་སེམས་དཔའི་ས་བཅུར་འཕར་བ་ཡང་དེ་བཞིན་དུ་བལྟ་བར་བྱའོ། །དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། ལ་ལ་ཞིག་རབ་ཏུ་འབྱུང་བའི་སླད་དུ་ཁྱོད་ཀྱི་ཐད་དུ་མཆིས་ན་། རབ་ཏུ་འབྱུང་བ་དེ་ལ་ཁྱོད་ཇི་སྐད་གསུང་ཞིང་། དེ་རབ་ཏུ་ནི་ཇི་ལྟར་འབྱིན། དེ་བསྙེན་པར་རྫོགས་པར་ནི་ཇི་ལྟར་མཛད། ཚུལ་ཁྲིམས་ཀྱི་ཕུང་པོ་ལ་ནི་ཇི་ལྟར་སྦྱོར། བསླབ་པའི་ལུང་ནི་ཇི་སྐད་འབོགས་པར་མཛད། འཇམ་དཔལ་གྱིས་སྨྲས་པ། ལྷའི་བུ། ལ་ལ་ཞིག་རབ་ཏུ་འབྱུང་བའི་ཕྱིར། ཁོ་བོའི་ཐད་དུ་འོངས་ན|་དེ་ལ་ཁོ་བོ་འདི་སྐད་ཅེས་རིགས་ཀྱི་བུ་གལ་ཏེ་ཁྱོད་རབ་ཏུ་འབྱུང་བའི་སེམས་བསྐྱེད་པར་མི་བྱེད་པ་དེ་ལྟ་ན། ཁོ་བོས་ཁྱོད་རབ་ཏུ་དབྱུང་ངོ་ཞེས་སྨྲའོ། །དེ་ཅིའི་ཕྱིར་ཞེ་ན། ལྷའི་བུ། གང་རབ་ཏུ་འབྱུང་བ་དེ་ནི་འདོད་པའི་ཁམས་སུ་གནས་པའམ། གཟུགས་ཀྱི་ཁམས་སུ་གནས་པའམ། གཟུགས་མེད་པའི་ཁམས་སུ་གནས་པའམ། འདོད་པའི་ཡོན་ཏན་ལྔ་ལ་གནས་པ་ཡིན་ལ|་གནས་དགུ་ལ་སྤྱོད་པའི་རིགས་ཀྱི་བུ་ནི་ཆོས་མངོན་སུམ་དུ་བྱེད་པའི་ཕྱིར་ཏེ། ལྷའི་བུ། དགུ་གང་ཞེ་ན། གང་ཅི་ལ་ཡང་མི་གནས་པ་དེ་ནི་སེམས་ཉེ་བར་དམིགས་པར་མི་བྱེད་པ་དང་། སེམས་ཉེ་བར་དམིགས་པར་མི་བྱེད་པ་དེ་ནི་རབ་ཏུ་འབྱུང་བར་མི་འདོད་པ་དང་། གང་རབ་ཏུ་འབྱུང་བར་མི་འདོད་པ་དེ་ནི་རབ་ཏུ་འབྱུང་བའི་སེམས་བསྐྱེད་པར་མི་བྱེད་པ་དང་། གང་རབ་ཏུ་འབྱུང་བའི་སེམས་བསྐྱེད་པར་མི་བྱེད་པ་དེ་ནི་མི་སྐྱེ་བ་དང་། གང་མི་སྐྱེ་བ་དེ་ནི་སྡུག་བསྔལ་ཟད་པ་དང་། གང་སྡུག་བསྔལ་ཟད་པ་དེ་ནི་གཏན་ཟད་པ་དང་། གང་གཏན་ཟད་པ་དེ་ནི་མི་ཟད་པ་དང་། གང་མི་ཟད་པ་དེ་ནི་ཟད་པར་མི་འགྱུར་བ་དང་། གང་ཟད་པར་མི་འགྱུར་བ་དེ་ནི་ནམ་མཁའ་ཡིན་པ་སྟེ། ལྷའི་བུ། ཁོ་བོ་ནི་རིགས་ཀྱི་བུ་དེ་ལ་དེ་སྐད་སྨྲའོ། །ལྷའི་བུ། གཞན་ཡང་ལ་ལ་ཞིག་རབ་ཏུ་འབྱུང་བའི་ཕྱིར་ཁོ་བོའི་ཐད་དུ་འོངས་ན། དེ་ལ་ཁོ་བོ་འདི་སྐད་ཅེས་རིགས་ཀྱི་བུ་ཁྱོད་རབ་ཏུ་འབྱུང་བའི་སེམས་མ་བསྐྱེད་ཅིག། དེ་ཅིའི་ཕྱིར་ཞེ་ན། འདི་ལྟར་སེམས་དེ་ནི་སྐྱེ་བ་མེད་པའི་ཕྱིར་ཏེ། དེ་རྣམ་པར་མ་དཀྲུགས་ཤིག། རིགས་ཀྱི་བུ། གལ་ཏེ་ཁྱོད་སྐྲ་འབྲེག་པ་མི་བྱེད་པ་དེ་ལྟ་ན་ཁྱོད་ལེགས་པར་རབ་ཏུ་བྱུང་བ་ཡིན་ནོ་ཞེས་སྨྲའོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ། དེ་བཞིན་གཤེགས་པ་ནི་གཅད་དུ་མེད་པ་དང་། དབྱེར་མེད་པའི་ཕྱིར་ཆོས་སྟོན་པར་མཛད་དོ། །ལྷའི་བུས་སྨྲས་པ། འཇམ་དཔལ། ཅི་ཞིག་གཅོད་པར་མི་བགྱིད་ཅིང་། ཅི་ཞིག་འབྱེད་པར་མི་བགྱིད། འཇམ་དཔལ་གྱིས་སྨྲས་པ། ལྷའི་བུ། གཟུགས་ནི་གཅོད་པར་མི་བྱེད་ཅིང་འབྱེད་པར་མི་བྱེད་དོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནི་གཅོད་པར་མི་བྱེད་ཅིང་འབྱེད་པར་མི་བྱེད་དོ། །ལྷའི་བུ། གང་འདི་སྙམ་དུ་བདག་གིས་སྐྲ་བྲེག་གོ་སྙམ་དུ་སེམས་པ་དེ་ནི། ངར་འཛིན་པ་དང་ང་ཡིར་འཛིན་པ་ལ་གནས་པ་ཡིན་པས། ངར་འཛིན་པ་དང་། ང་ཡིར་འཛིན་པ་ལ་སྤྱོད་པ་དག་གིས་ནི་མཉམ་པ་ཉིད་མི་མཐོང་ཞིང་། བདག་ཏུ་དམིགས་པ་ཡོད་ན་སྐྲར་དམིགས་པར་འགྱུར་ལ། སྐྲར་དམིགས་པ་ཡོད་ན་སེམས་ཅན་དུ་དམིགས་པར་འགྱུར་ཞིང་། སེམས་ཅན་དུ་དམིགས་པ་ཡོད་ན་འབྲེག་པའི་འདུ་ཤེས་འབྱུང་བར་འགྱུར་རོ། །ལྷའི་བུ། གང་ལ་བདག་ཏུ་དམིགས་པ་མེད་པ་དེ་ལ་གཞན་དུ་དམིགས་པ་མེད་དོ། །གང་ལ་གཞན་དུ་དམིགས་པ་མེད་པ་དེ་ལ་ངར་འཛིན་པ་མེད་དོ། །གང་ལ་ངར་འཛིན་པ་མེད་པ་དེས་ང་ཡིར་འཛིན་པ་སྤངས་སོ། །གང་གིས་ང་ཡིར་འཛིན་པ་སྤངས་པ་དེ་རྣམ་པར་མི་རྟོག་གོ། གང་རྣམ་པར་མི་རྟོག་པ་དེ་མི་འགྱུར་རོ། །གང་མི་འགྱུར་བ་དེ་ནི་སྤྲོས་པ་མེད་དོ།། སྤྲོས་པ་མེད་པ་དེ་མི་ལེན། མི་འདོར། མི་བྱེད། འཇིག་པར་མི་བྱེད། མི་གཅོད། མི་འབྱེད། མི་སྦྱོར། མི་འབྲལ། མི་ནུར། མི་སྤོང་ཞིང་། འབྲི་བར་མི་བྱེད། གང་བར་མི་བྱེད། སྡུད་པར་མི་བྱེད། འཕྲོ་བར་མི་བྱེད། རློམ་སེམས་སུ་མི་བྱེད། སྨྲ་བར་མི་བྱེད། རྗོད་པར་མི་བྱེད། རབ་ཏུ་རྗོད་པར་མི་བྱེད་དེ། དེ་ནི་ཡང་དག་པ་ལ་གནས་པ་ཡིན་ནོ། །ལྷའི་བུས་སྨྲས་པ|་འཇམ་དཔལ། ཡང་དག་པ་ཞེས་བགྱི་བ་ཅི་ལགས། འཇམ་དཔལ་གྱིས་སྨྲས་པ། ལྷའི་བུ། གང་ཡང་དག་པ་ཞེས་བྱ་བ་ནི་ནམ་མཁའ་སྟེ། ནམ་མཁའ་ནི་འགྲིབ་པའམ་། འཕེལ་བའམ། འབྱུང་བའམ། འཇིག་པར་མི་འགྱུར་བས། དེའི་ཕྱིར་ནམ་མཁའ་དེ་ནི་ཡང་དག་པའོ། །ཡང་དག་པ་ནི་སྟོང་པ་ཉིད་དོ། །ཡང་དག་པ་ནི་དེ་བཞིན་ཉིད་དོ། །ཡང་དག་པ་ནི་ཆོས་ཀྱི་དབྱིངས་སོ། །ཡང་དག་པ་ནི་ཡང་དག་པའི་མཐའོ། །ཡང་དག་པ་གང་ཡིན་པ་དེ་ནི། མ་བྱུང་བའོ། །དེ་ཅིའི་ཕྱིར་ཞེ་ན། དེ་ནི་མ་བྱུང་ཞིང་འབྱུང་བར་མི་འགྱུར་བས། དེའི་ཕྱིར་དེ་ནི་མ་བྱུང་བ་ཡིན་ནོ། །ལྷའི་བུ། གཞན་ཡང་ལ་ལ་ཞིག་རབ་ཏུ་འབྱུང་བའི་ཕྱིར་ཁོ་བོའི་ཐད་དུ་འོངས་ན། དེ་ལ་ཁོ་བོས་འདི་སྐད་ཅེས་རིགས་ཀྱི་བུ་གལ་ཏེ་ཁྱོད་ངུར་སྨྲིག་འཛིན་པར་མི་བྱེད་ཅིང་གྱོན་པར་མི་བྱེད་པ་དེ་ལྟ་ན་ཁྱོད་རབ་ཏུ་དབྱུང་ངོ་ཞེས་སྨྲའོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ། དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ|་དེ་བཞིན་གཤེགས་པ་ནི་འཛིན་པ་མེད་པའི་ཕྱིར་ཆོས་སྟོན་པར་མཛད་ཀྱི། འཛིན་པའི་ཕྱིར་ནི་མ་ཡིན་ནོ། །ལྷའི་བུས་སྨྲས་པ། འཇམ་དཔལ། ཅི་ཞིག་མི་འཛིན། འཇམ་དཔལ་གྱིས་སྨྲས་པ|་ལྷའི་བུ། གཟུགས་རྟག་ཅེས་བྱ་བའམ་མི་རྟག་ཅེས་བྱ་བར་མི་འཛིན་ཏོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་རྟག་ཅེས་བྱ་བའམ་མི་རྟག་ཅེས་བྱ་བར་མི་འཛིན་ཏོ། །མིག་མི་འཛིན་ཏོ། །གཟུགས་མི་འཛིན་ཏོ། །རྣ་བ་མི་འཛིན་ཏོ། །སྒྲ་མི་འཛིན་ཏོ། །སྣ་མི་འཛིན་ཏོ། །དྲི་མི་འཛིན་ཏོ། །ལྕེ་མི་འཛིན་ཏོ། །རོ་མི་འཛིན་ཏོ། །ལུས་མི་འཛིན་ཏོ། །རེག་བྱ་མི་འཛིན་ཏོ། །ཡིད་མི་འཛིན་ཏོ། །ཆོས་མི་འཛིན་ཏོ། །འདོད་ཆགས་མི་འཛིན་ཏོ། །ཞེ་སྡང་མི་འཛིན་ཏོ། །གཏི་མུག་མི་འཛིན་ཏོ། །ཕྱིན་ཅི་ལོག་མི་འཛིན་ཏེ། ལྷའི་བུ། མདོར་ན་ཆོས་ཐམས་ཅད་མི་འཛིན། མི་གཏོང་། མི་སྤོང་། མི་འདོར་རོ། །ལྷའི་བུ། གང་ངུར་སྨྲིག་དག་ལ་འཛིན་པའི་འདུ་ཤེས་དང་ལྡན་པ་དེ་ནི་ལྟ་བའི་རྣམ་པ་ཅན་ཡིན་པར་ཁོ་བོ་སྨྲ་སྟེ། ལྷའི་བུ། ངུར་སྨྲིག་འཛིན་པས་ནི་རྣམ་པར་དག་པའམ། རྣམ་པར་གྲོལ་བར་མི་འགྱུར་རོ། །དེ་ཅིའི་ཕྱིར་ཞེ་ན། ལྷའི་བུ། སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་ནི་སྙིགས་མ་མེད་པ་ཡིན་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ། སྙིགས་མ་ཞེས་བགྱི་པ་ཅི་ལགས། འཇམ་དཔལ་གྱིས་སྨྲས་པ། ལྷའི་བུ། འདོད་ཆགས་ནི་སྙིགས་མའོ། །ཞེ་སྡང་ནི་སྙིགས་མའོ། །གཏི་མུག་ནི་སྙིགས་མའོ། །རྒྱུ་ནི་སྙིགས་མའོ། །ལྟ་བ་ནི་སྙིགས་མའོ། །མིང་ནི་སྙིགས་མའོ། །གཟུགས་ནི་སྙིགས་མའོ། །འདུ་ཤེས་ནི་སྙིགས་མའོ། །ལྷག་པར་འཛིན་པ་ནི་སྙིགས་མའོ། ། མཚན་མ་ནི་སྙིགས་མའོ། །སྤྲོས་པ་ནི་སྙིགས་མའོ། །ལྷའི་བུ། གང་མི་དགེ་བའི་ཆོས་དེ་དག་ཡིད་ལ་མི་བྱེད་པ་དེ་ནི་སྙིགས་མ་མེད་པའོ། །གང་སྙིགས་མ་མེད་པ་དེ་ནི་ཅི་ཡང་མེད་པའོ། ། གང་ཅི་ཡང་མེད་པ་དེ་ནི་ཉོན་མོངས་པ་མེད་པའོ། །གང་ཉོན་མོངས་པ་མེད་པ་དེ་ནི་ནམ་མཁའ་ཡིན་ནོ། །ལྷའི་བུས་སྨྲས་པ། འཇམ་དཔལ། ལྷག་པར་བྱ་བ་མེད་པ། ལྷག་པར་བྱ་བ་མེད་པ་ཞེས་བགྱི་ན། འཇམ་དཔལ། ལྷག་པར་བྱ་བ་མེད་པ་ཞེས་བགྱི་བ་ཅི་ལགས། འཇམ་དཔལ་གྱིས་སྨྲས་པ། ལྷའི་བུ། ལྷག་པར་བྱ་བ་མེད་པ། ལྷག་པར་བྱ་བ་མེད་པ་ཞེས་བྱ་བ་ནི། ཆོས་འགའ་ཡང་ལྷག་པར་མི་བྱ་བ་དེ་ནི་ལྷག་པར་བྱ་བ་མེད་པ་ཞེས་བྱ་སྟེ། ལྷའི་བུ། གང་དག་ལྷག་པར་བྱེད་པ་དེ་དག་ལ་དེ་བཞིན་གཤེགས་པ་ལྷག་པར་བྱ་བ་མེད་པ་ཞེས་གསུངས་ཏེ|་དེ་ནི་ལྷག་པར་བྱ་བ་མེད་པ་ཞེས་བྱའོ། །ལྷའི་བུས་སྨྲས་པ། འཇམ་དཔལ། ཅི་ཞིག་ལྷག་པར་བགྱིད། འཇམ་དཔལ་གྱིས་སྨྲས་པ། ལྷའི་བུ། མཉམ་པ་ཉིད་ལས་འདའ་བར་བྱེད་ཅིང་། མཉམ་པ་ཉིད་ལས་འདས་ནས། ཆོས་གང་མ་རྙེད། མི་རྙེད། རྙེད་པར་མི་འགྱུར་ཞིང་། མ་བྱུང་། མི་འབྱུང་། འབྱུང་བར་མི་འགྱུར་བའི་ཆོས་དེ་ལ་ལོག་པར་གནས་ཤིང་ལྷག་པར་བྱེད་དེ། འདི་ལྟ་སྟེ། བདག་ཅེས་བྱ་བར་རྟོག་ཅིང་ལྷག་པར་བྱེད་པ་དང་། སེམས་ཅན་དང་། སྲོག་དང་། གང་ཟག་དང་། ཤེད་ལས་སྐྱེས་དང་། ཤེད་བུ་དང་། རྟག་པ་དང་། ཆད་པ་ཞེས་བྱ་བར་རྟོག་ཅིང་ལྷག་པར་བྱེད་པ་དང་། ཕུང་པོ་རྣམས་དང་། ཁམས་རྣམས་དང་། སྐྱེ་མཆེད་རྣམས་ཞེས་བྱ་བར་རྟོག་ཅིང་ལྷག་པར་བྱེད་པ་དང་། སངས་རྒྱས་དང་། ཆོས་དང་། དགེ་འདུན་ཞེས་བྱ་བར་རྟོག་ཅིང་ལྷག་པར་བྱེད་པ་དང་། འདི་ནི་ཚུལ་ཁྲིམས་དང་ལྡན་པའོ། །འདི་ནི་ཚུལ་ཁྲིམས་འཆལ་པའོ་ཞེས་བྱ་བར་རྟོག་ཅིང་ལྷག་པར་བྱེད་པ་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་འཐོབ་པ་དང་། འབྲས་བུ་དང་། མངོན་སུམ་དུ་བྱ་བ་ཞེས་བྱ་བར་རྟོག་ཅིང་ལྷག་པར་བྱེད་པ་དང་། རྒྱུན་དུ་ཞུགས་པའི་འབྲས་བུ་དང་། ལན་གཅིག་ཕྱིར་འོང་བའི་འབྲས་བུ་དང་། དགྲ་བཅོམ་པ་ཉིད་དང་། རང་སངས་རྒྱས་ཉིད་དང་། སངས་རྒྱས་ཉིད་ཅེས་བྱ་བར་རྟོག་ཅིང་ལྷག་པར་བྱེད་པ་དང་། འདི་ནི་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། རིག་པ་དང་། རྣམ་པར་གྲོལ་བ་དང་། འདོད་ཆགས་དང་བྲལ་བའོ། །ཞེས་བྱ་བར་རྟོག་ཅིང་ལྷག་པར་བྱེད་དེ། ལྷའི་བུ། བྱིས་པ་སོ་སོའི་སྐྱེ་བོ་ཐོས་བ་དང་མི་ལྡན་པ་རྣམས་ནི་ལྷག་པར་བྱ་བ་དེ་ལྟ་བུ་དེ་དག་ལ་རྟོག་ཅིང་ལྷག་པར་བྱེད་དོ། །མི་གཏི་མུག་ཅན་དེ་དག་རྟོག་པར་བྱ་བའི་ཆོས་ལ་སྒྲོ་འདོགས་ཤིང་ཡོངས་སུ་རྟོག་པར་བྱེད་དེ། དེ་དག་གི་སྒྲོ་འདོགས་པ་ལ་འདུན་པ་བཟློག་པའི་ཕྱིར། དེ་བཞིན་གཤེགས་པ་ལ་ལྷག་པར་བྱ་བ་མེད་པ་སྟོན་པར་མཛད་དོ། །དེ་ནས་ལྷའི་བུ་བློ་གྲོས་རབ་གནས་ཀྱིས། འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ། ལེགས་སོ། །ལེགས་སོ། །འཇམ་དཔལ་ཁྱོད་ཀྱིས་ལྷག་པར་བྱ་བ་མེད་པར་བསྟན་པ་འདི་བཤད་པ་ལེགས་སོ། །ལེགས་སོ། །བཅོམ་ལྡན་འདས་ཀྱིས་ཀྱང་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ། ལེགས་སོ། །ལེགས་སོ། །གལ་ཏེ་བསྟན་པར་བྱ་ན་དེ་སྐད་བསྟན་པར་བྱའོ། །གཞན་ཡང་འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་འདི་སྐད་ཅེས་སྨྲས་སོ། །ལྷའི་བུ། གང་ལ་ལ་ཞིག་རབ་ཏུ་འབྱུང་བའི་ཕྱིར་ཁོ་བོའི་ཐད་དུ་འོངས་ན། དེ་ལ་ཁོ་བོས་འདི་སྐད་ཅེས་རིགས་ཀྱི་བུ་གལ་ཏེ་ཁྱོད་རྫོགས་པར་བསྙེན་པར་མི་བྱེད་པ་དེ་ལྟ་ན། ཁྱོད་རབ་ཏུ་བྱུང་བ་ཡིན་ནོ། །ཞེས་སྨྲའོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། བཅོམ་ལྡན་འདས་ཀྱིས་རྫོགས་པར་བསྙེན་པ་ནི་འདི་གཉིས་ཡིན་པར་གསུངས་ཏེ། གཉིས་གང་ཞེ་ན། མཉམ་པར་རྫོགས་པར་བསྙེན་པ་དང་། མི་མཉམ་པར་རྫོགས་པར་བསྙེན་པའོ། །དེ་ལ་མི་མཉམ་པར་རྫོགས་པར་བསྙེན་པ་གང་ཞེ་ན། གང་མི་མཉམ་པར་ལྟུང་བའོ། །དེ་ལ་མི་མཉམ་པ་གང་ཞེ་ན། བདག་ཏུ་འཛིན་པ་དང་། སེམས་ཅན་དུ་འཛིན་པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་པ་དང་། རྟག་པ་དང་། ཆད་པ་དང་། ང་རྒྱལ་དང་། ལོག་པར་ལྟ་བ་དང་། ཆགས་པ་དང་། ཞེ་སྡང་དང་། གཏི་མུག་ཏུ་ལྟུང་བ་དང་། འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་སུ་ལྟུང་བ་དང་། ལྷག་པར་འཛིན་པ་དང་། རློམ་སེམས་དང་། ཉེ་བར་ལེན་པར་ལྟུང་བ་སྟེ། ལྷའི་བུ། མདོར་ན་མི་དགེ་བའི་ཆོས་ཐམས་ཅད་དུ་ལྟུང་བ་དང་། སྡིག་པའི་གྲོགས་པོ་རྣམས་ཀྱི་ལོག་ཏུ་ལྟུང་བ་དང་། ངེས་པར་འབྱུང་བ་མི་ཤེས་ཤིང་ཡོངས་སུ་འཛིན་པ་ཐམས་ཅད་ཡོངས་སུ་འཛིན་པར་བྱེད་པ་གང་ཡིན་པ་དེ་ནི། ལྷའི་བུ། མི་མཉམ་པར་རྫོགས་པར་བསྙེན་པ་ཡིན་ནོ|་།དེ་ལ་མཉམ་པར་རྫོགས་པར་བསྙེན་པ་གང་ཞེ་ན། གང་མཉམ་པ་ཉིད་དུ་འབབ་པའོ། །དེ་ལ་མཉམ་པ་ཉིད་གང་ཞེ་ན། སྟོང་པ་ཉིད་མཉམ་པ་ཉིད་དང་། མཚན་མ་མེད་པ་མཉམ་པ་ཉིད་དང་། སྨོན་པ་མེད་པ་མཉམ་པ་ཉིད་དེ། ལྷའི་བུ། རྣམ་པར་ཐར་པའི་སྒོ་གསུམ་པོ་དེ་དག་མངོན་སུམ་དུ་བྱ་བ་ཡང་དག་པ་ཇི་ལྟ་བ་བཞིན་བསྒྲུབ་ཅིང་རྟོག་པ་མེད་པ་དང་། རྣམ་པར་རྟོག་པ་མེད་པ་དང་། ཀུན་དུ་རྟོག་པ་མེད་པ་དང་། ཕྱིར་མི་ལྡོག་པ་གང་ཡིན་པ་དེ་ནི། ལྷའི་བུ། མཉམ་པར་རྫོགས་པར་བསྙན་པ་ཡིན་ནོ། །ལྷའི་བུ། གཞན་ཡང་འདོད་ཆགས་སེལ་བར་བྱེད་པ་དང་། ཞེ་སྡང་སེལ་བར་བྱེད་པ་དང་། གཏི་མུག་སེལ་བར་བྱེད་པ་དང་། སྲེད་པ་དང་། མ་རིག་པ་དང་། འཇིག་ཚོགས་དང་། འཇིག་ཚོགས་ཀྱི་རྩ་བ་ལས་བྱུང་བ་ལྟ་བའི་རྣམ་པ་དྲུག་ཅུ་རྩ་གཉིས་སེལ་བར་བྱེད་པ་དང་། ཕྱིན་ཅི་ལོག་རྣམས་སེལ་བར་བྱེད་པ་དང་། ཉེས་པར་སྤྱོད་པ་གསུམ་དང་། ལོག་པ་ཉིད་བརྒྱད་དང་། ཀུན་ནས་མནར་སེམས་ཀྱི་དངོས་པོ་དགུ་དང་། མི་དགེ་བ་བཅུའི་ལས་ཀྱི་ལམ་སེལ་བར་བྱེད་པ་གང་ཡིན་པ་དེ་ནི་ཡང་དག་པར་རྫོགས་པར་བསྙེན་པ་ཞེས་བྱའོ། །ལྷའི་བུ། འདི་ལྟ་སྟེ། དཔེར་ན། ས་གཞི་ལ་བརྟེན་ནས་ས་བོན་ཐམས་ཅད་སྐྱེ་ཤིང་། རྩཝ་དང་། ཤིང་གེལ་པ་དང་། སྨན་དང་། ནགས་ཚལ་རྣམས་ཀྱང་སྐྱེ་བ་དེ་དག་འཕེལ་བ་ན་རྫོགས་པ་ཞེས་བྱའོ། །ལྷའི་བུ། དེ་བཞིན་དུ་གང་དག་བསྟན་པ་འདི་རྫོགས་པར་བྱེད་པ་དེ་དག་ཀྱང་རྫོགས་པར་བསྙེན་པ་ཞེས་བྱའོ། །ལྷའི་བུ། འདི་ལྟ་སྟེ། དཔེར་ན། ས་ཆེན་པོ་ནི་ས་བོན་ཐམས་ཅད་ཀྱི་རྟེན་ཏེ། ཚུལ་ཁྲིམས་ཕུན་སུམ་ཚོགས་པ་ཡང་དེ་བཞིན་དུ་བལྟ་བར་བྱའོ། །དེ་ཅིའི་ཕྱིར་ཞེ་ན། ཚུལ་ཁྲིམས་ལ་བརྟེན་ནས་ཆོས་མངོན་པར་རྟོགས་པར་འགྱུར་བའི་ཕྱིར་རོ། །ཇི་ལྟར་ས་བོན་རྣམས་དང་། ཇི་ལྟར་སྨན་རྣམས་རྣམ་པར་འཕེལ་བ་ལ་རྫོགས་པ་ཞེས་བྱ་བ་དེ་བཞིན་དུ་ཚུལ་ཁྲིམས་དང་དད་པ་ལ་བརྟེན་པའི་བྱང་ཆུབ་ཀྱི་ཕྱོགས་དང་མཐུན་པའི་ཆོས་ཐམས་ཅད་སྐྱེ་ཞིང་རྫོགས་པར་འགྱུར་ཏེ། ལྷའི་བུ། རྣམ་པར་ཐར་པའི་སྒོ་གསུམ་པོ་དེ་དག་རྟོགས་ཤིང་སྤྲོས་པ་ཐམས་ཅད་ཡང་དག་པར་ཆད་པ་གང་ཡིན་པ་དེ་ནི་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་ཀྱི་ཉན་ཐོས་ཐམས་ཅད་ཀྱི་རྫོགས་པར་བསྙེན་པ་ཡིན་ནོ། །ལྷའི་བུ། གང་དེ་ལྟར་རྫོགས་པར་བསྙེན་པར་བྱེད་པ་ནི་ཡང་དག་པར་རྫོགས་པར་བསྙེན་པར་བྱེད་པ་ཡིན་གྱི་མི་མཉམ་པར་མ་ཡིན་ནོ། །ལྷའི་བུ། གཞན་ཡང་དེ་ལྟར་རབ་ཏུ་བྱུང་ཞིང་དེ་ལྟར་རྫོགས་པར་བསྙེན་པ་དེ་ལ་ཁོ་བོས་འདི་སྐད་ཅེས|་རིགས་ཀྱི་བུ། གལ་ཏེ་ཁྱོད་བསླབ་པ་ལེན་པར་མི་བྱེད་པ་དེ་ལྟར་ན། ཁྱོད་བསླབ་པ་འདོད་པ་ཡིན་ནོ། །ཞེས་རྗེས་སུ་བསྟན་པ་སྦྱིན་པར་བྱའོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ། ཆོས་ཐམས་ཅད་ནི་མ་བླངས་པ་ཡིན་པས། ལྷའི་བུ། གང་ཚུལ་ཁྲིམས་ལེན་པ་དེ་ནི་ཁམས་གསུམ་ལེན་པ་ཡིན་ནོ|་|ལྷའི་བུ། འདི་ཇི་སྙམ་དུ་སེམས། བསླབ་པ་དེ་གང་ཡིན་སྙམ། ལྷའི་བུས་སྨྲས་པ། འཇམ་དཔལ། སོ་སོར་ཐར་པའི་སྡོམ་པ་གང་ལགས་པའོ། །འཇམ་དཔལ་གྱིས་སྨྲས་པ། ལྷའི་བུ། སོ་སོར་ཐར་པའི་སྡོམ་པ་ཡང་གང་ཡིན། ལྷའི་བུས་སྨྲས་པ། འཇམ་དཔལ། སྡོམ་པ་ཞེས་བགྱི་བ་ནི་ལུས་སྡོམ་པ་དང་། ངག་སྡོམ་པ་དང་། ཡིད་སྡོམ་པ་སྟེ|་དེ་ནི་སོ་སོར་ཐར་པའི་སྡོམ་པ་ཞེས་བགྱིའོ། །འཇམ་དཔལ་གྱིས་སྨྲས་པ། ལྷའི་བུ། འདི་ཇི་སྙམ་དུ་སེམས། ལུས་དང་། ངག་དང་། ཡིད་ཀྱིས་མ་བྱས། མི་བྱེད། བྱེད་པར་མི་འགྱུར་བའི་ལས་གང་ཡིན་པ་དེ་ལ་སྔོན་པོའམ། སེར་པོའམ། དམར་པོའམ། དཀར་པོའམ། བཙོད་ཀའམ། ཤེལ་གྱི་ཁ་དོག་ལྟ་བུའོ་ཞེས་གདགས་པར་ནུས་སྙམ་མམ། ལྷའི་བུས་སྨྲས་པ། འཇམ་དཔལ། དེ་ནི་མ་ལགས་སོ། །འཇམ་དཔལ་གྱིས་སྨྲས་པ། ལྷའི་བུ། འོ་ན་ཇི་སྐད་བརྗོད་པར་བྱ། ལྷའི་བུས་སྨྲས་པ། འཇམ་དཔལ། མངོན་པར་འདུ་བགྱི་བ་མ་མཆིས་པ་ཞེས་བརྗོད་པར་བགྱི་སྟེ། དེ་ནི་ལུས་ཀྱི་ལས་སམ། ངག་གི་ལས་སམ། ཡིད་ཀྱི་ལས་ཞེས་གདགས་པར་རྔོ་མི་ཐོག་གོ། འཇམ་དཔལ་གྱིས་སྨྲས་པ། ལྷའི་བུ། འདི་ཇི་སྙམ་དུ་སེམས། གང་མངོན་པར་འདུ་བྱ་བ་མེད་པ་དེ་བླང་བར་ནུས་སྙམ་མམ། ལྷའི་བུས་སྨྲས་པ། འཇམ་དཔལ། དེ་ནི་མ་ལགས་སོ། །འཇམ་དཔལ་གྱིས་སྨྲས་པ། ལྷའི་བུ། དེའི་ཕྱིར་ཁོ་བོ་ནི་དེ་ལས་བསམས་ནས། དེ་སྐད་ཅེས་གང་བསླབ་པ་ལེན་པར་མི་བྱེད་པ་དེ་བསླབ་པ་འདོད་པ་ཡིན་ནོ་ཞེས་སྟོན་ཏོ། །ལྷའི་བུ། ལྷག་པའི་ཚུལ་ཁྲིམས་ཀྱི་བསླབ་པ་དང་། ལྷག་པའི་སེམས་ཀྱི་བསླབ་པ་དང་། ལྷག་པའི་ཤེས་རབ་ཀྱི་བསླབ་པ་ཞེས་བྱ་བ་གང་ཡིན་པ་དེ་ཡང་མཐའ་དེ་ཉིད་ཀྱིས་རྟོགས་པར་བྱ་སྟེ། ཚུལ་ཁྲིམས་མི་དམིགས་པས་ལྷག་པའི་ཚུལ་ཁྲིམས་ཀྱི་བསླབ་པ་ཞེས་བྱའོ། །སེམས་མི་དམིགས་པས་ལྷག་པའི་སེམས་ཀྱི་བསླབ་པ་ཞེས་བྱའོ། །ཤེས་རབ་མི་དམིགས་པས་ལྷག་པའི་ཤེས་རབ་ཀྱི་བསླབ་པ་ཞེས་བྱའོ། །སེམས་རྟོག་པ་མེད་པ་དང་། རློམ་སེམས་མེད་པ་དང་། རྣམ་པར་རྟོག་པ་མེད་པ་དང་། སྐྱེ་བ་མེད་པས་ལྷག་པའི་སེམས་ཀྱི་བསླབ་པ་ཞེས་བྱའོ། །ཚུལ་ཁྲིམས་རྟོག་པ་མེད་པ་དང་། རློམ་སེམས་མེད་པ་དང་། རྣམ་པར་རྟོག་པ་མེད་པ་དང་། སྐྱེ་བ་མེད་པས་ལྷག་པའི་ཚུལ་ཁྲིམས་ཀྱི་བསླབ་པ་ཞེས་བྱའོ། །ཤེས་རབ་རྟོག་པ་མེད་པ་དང་། རློམ་སེམས་མེད་པ་དང་། རྣམ་པར་རྟོག་པ་མེད་པ་དང་། སྐྱེ་བ་མེད་པས་ལྷག་པའི་ཤེས་རབ་ཀྱི་བསླབ་པ་ཞེས་བྱའོ། །ལྷའི་བུ། གང་གིས་སེམས་མ་རྙེད་པ་དེ་ཚུལ་ཁྲིམས་སུ་རློམ་སེམས་མི་བྱེད་དོ། །གང་ཚུལ་ཁྲིམས་སུ་རློམ་སེམས་མི་བྱེད་པ་དེས་ཏིང་ངེ་འཛིན་མི་དམིགས་སོ། །གང་གིས་ཏིང་ངེ་འཛིན་མི་དམིགས་པ་དེས་ཤེས་རབ་མི་དམིགས་སོ། །གང་གིས་ཤེས་རབ་མི་དམིགས་པ་དེ་ལ་ཐེ་ཚོམ་ཐམས་ཅད་མི་འབྱུང་ངོ་། །གང་ལ་ཐེ་ཚོམ་ཐམས་ཅད་མི་འབྱུང་བ་དེ་བསླབ་པ་མི་ལེན་ཏོ། །གང་བསླབ་པ་མི་ལེན་པ་དེ་བསླབ་པ་འདོད་པ་ཞེས་བྱའོ། །གང་བསླབ་པ་འདོད་པ་དེ་ཕྱིར་མི་འོང་བའོ། །གང་ཕྱིར་མི་འོང་བ་དེ་རྣམ་པར་དག་པའོ། །གང་རྣམ་པར་དག་པ་དེ་བྲལ་བའོ། །གང་བྲལ་བ་དེ་ཟག་པ་མེད་པའོ|་|གང་ཟག་པ་མེད་པ་དེ་ཡང་དག་པར་ཞུགས་པའོ། །གང་ཡང་དག་པར་ཞུགས་པ་དེ་ལ་བཅོས་པ་མེད་དོ། །གང་ལ་བཅོས་པ་མེད་པ་དེ་ནམ་མཁའོ། །དེ་ཅིའི་ཕྱིར་ཞེ་ན། ནམ་མཁའ་ནི་བཅོས་པ་མེད་པའི་ཕྱིར་རོ། །ལྷའི་བུ། གང་དེ་ལྟར་སློབ་པ་དེ་ནི་སློབ་པར་མི་བྱེད་དོ། །གང་སློབ་པར་མི་བྱེད་པ་དེ་ནི་སློབ་པར་བྱེད་དོ། །གང་ལ་སློབ་ཅེ་ན། ཅི་ལ་ཡང་མི་སློབ་སྟེ། གང་གི་ཚེ་ཅི་ལ་ཡང་མི་སློབ་པ་དེ་ནི་ཡང་དག་པའི་བསླབ་པ་ལ་གནས་པ་ཞེས་བྱའོ། །གཞན་ཡང་འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་འདི་སྐད་ཅེས་སྨྲས་སོ། །ལྷའི་བུ། དེ་ལྟར་རབ་ཏུ་བྱུང་ཞིང་དེ་ལྟར་རྫོགས་པར་བསྙེན་པ་དེ་ལ་ཁོ་བོ་འདི་སྐད་ཅེས། རིགས་ཀྱི་བུ། གལ་ཏེ་ཁྱོད་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱི་དད་པས་བྱིན་པ་ཡོངས་སུ་ལོངས་སྤྱོད་པར་བྱེད་ཅིང་། ཡོངས་སུ་སྦྱོང་བར་མི་བྱེད་པ་དེ་ལྟ་ན། ཁྱོད་ཚུལ་ཁྲིམས་ཡོངས་སུ་དག་པ་ཡིན་ནོ་ཞེས་སྨྲའོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ། གང་ལེན་པར་བྱེད་པ་དང་། བདེ་བར་བྱེད་པ་དེ་ནི་སྦྱོང་བར་བྱེད་དོ། །གང་དམིགས་པར་བྱེད་པ་དེ་ནི་སྦྱོར་བར་བྱེད་དོ། །གང་རློམ་སེམས་སུ་བྱེད་པ་དེ་ནི་སྦྱོང་བར་བྱེད་དོ། །གང་རྟོག་པར་བྱེད་པ་དེ་ནི་སྦྱོང་བར་བྱེད་དོ། །ལྷའི་བུ། གང་ལེན་པར་མི་བྱེད་པ་དང་། བདེ་བར་མི་བྱེད་པ་དང་། དམིགས་པར་མི་བྱེད་པ་དང་། རློམ་སེམས་སུ་མི་བྱེད་པ་དང་། རྟོག་པར་མི་བྱེད་པ་དེ་ནི་ཅི་ཡང་སྦྱོང་བར་མི་བྱེད་དོ། །དེ་ཅིའི་ཕྱིར་ཞེ་ན། དེ་ནི་གཏན་དག་པ་ཡིན་པའི་ཕྱིར་རོ། །ལྷའི་བུ། དེ་ལྟ་བས་ན་སོ་སོའི་སྐྱེ་བོ་རྣམས་ནི་དད་པས་བྱིན་པ་སྦྱོང་བར་བྱེད་ཀྱི། དགྲ་བཅོམ་པ་དག་ནི་མ་ཡིན་ནོ། །དེ་ཅིའི་ཕྱིར་ཞེ་ན། སོ་སོའི་སྐྱེ་བོ་རྣམས་ནི་ལེན་པར་བྱེད། བདེ་བར་བྱེད། དམིགས་པར་བྱེད། རློམ་སེམས་སུ་བྱེད། རྟོག་པར་བྱེད་ཅིང་། བདག་ནི་ལེན་པ་ཡིན་ནོ་སྙམ་དུ་རྟོག་པར་བྱེད། འདི་ནི་སྦྱིན་པར་བྱེད་པ་ཡིན་ནོ་སྙམ་དུ་རྟོག་པར་བྱེད་པས་དེ་དག་ནི་སྦྱོང་བར་བྱེད་པ་ཡིན་པའི་ཕྱིར་ཏེ། དེ་ཇི་ལྟར་སྦྱོང་བར་བྱེད་ཅེ་ན། སྲིད་པའི་འགྲོ་བར་སྐྱེ་བ་འགྲུབ་པར་བྱེད་ཅིང་དེར་སྦྱོང་བར་བྱེད་དོ། །ལྷའི་བུ། དགྲ་བཅོམ་པ་དག་ནི་སྲིད་པ་གཞན་དུ་རྟོགས་པའི་ལུས་གཞན་འགའ་ཡང་འགྲུབ་པར་མི་བྱེད་པས། དེ་དག་ནི་ཅི་ལ་ཡང་སྦྱོང་བར་མི་བྱེད་དོ། །དེ་དག་བསོད་སྙོམས་དེ་ལེན་པ་ན་ཡང་འཁོར་གསུམ་ཡོངས་སུ་དག་པས་ལེན་ཏོ། །ལྷའི་བུ། འཁོར་གསུམ་ཡོངས་སུ་དག་པ་དེ་ཡང་གང་ཞེ་ན|་ལེན་པར་བྱེད་པའི་བདག་གང་ཡིན་པ་ཡང་མི་དམིགས། སྦྱིན་པར་བྱེད་པའི་སྦྱིན་པ་པོ་གང་ཡིན་པ་ཡང་མི་དམིགས། བླང་བར་བྱ་བའི་བསོད་སྙོམས་གང་ཡིན་པ་ཡང་མི་དམིགས་པ་སྟེ|་ལྷའི་བུ། དེ་ནི་འཁོར་གསུམ་ཡོངས་སུ་དག་པ་ཞེས་བྱའོ། །ལྷའི་བུ། གང་དེ་ལྟར་དག་པ་དེ་ནི་ཡང་སྦྱོར་བར་མི་བྱེད་པས་ན། ཁོ་བོ་ནི་དེ་ལས་བསམས་ནས་འདི་སྐད་ཅེས་གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱིས་དད་པས་བྱིན་པ་ཡོངས་སུ་ལོངས་སྤྱོད་པར་བྱེད་ཅིང་། ཡོངས་སུ་སྦྱོང་པར་མི་བྱེད་པ་དེ་ནི་འཇིག་རྟེན་ན་སྦྱིན་གནས་ཀྱི་འོས་ཡིན་ཏེ། དེ་ནི་ལེགས་པར་རབ་ཏུ་བྱུང་བ་ཡིན་ནོ་ཞེས་སྟོན་ཏོ། །གཞན་ཡང་འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་འདི་སྐད་ཅེས་སྨྲས་སོ། །ལྷའི་བུ། དེ་ལྟར་རབ་ཏུ་བྱུང་ཞིང་དེ་ལྟར་རྫོགས་པར་བསྙེན་པ་དེ་ལ། ཁོ་བོ་འདི་སྐད་ཅེས། རིགས་ཀྱི་བུ། གལ་ཏེ་ཁྱོད་དགོན་པར་མི་གནས་ཤིང་། གྲོང་དུ་མ་ཡིན། ཐག་ཉེ་བར་མ་ཡིན། ཐག་རིང་བར་མ་ཡིན། ལམ་གོལ་བར་མ་ཡིན། གཅིག་པུར་མ་ཡིན། སྐྱེ་བོ་མང་པོའི་དབུས་སུ་མ་ཡིན། འདུ་འཛིའི་ནང་དུ་མ་ཡིན། དབེན་པར་མ་ཡིན་ལ། བསོད་སྙོམས་སྤྱོད་པར་ཡང་མི་བྱེད། མགྲོན་དུ་ཡང་མི་འགྲོ། ཕྱག་དར་ཁྲོད་པར་ཡང་མི་བྱེད། སྨད་པའི་ལྷུང་བཟེད་དང་། ཆོས་གོས་ཀྱང་མི་འཆང་། བླ་གབ་མེད་པར་ཡང་མི་བྱེད། འདོད་པ་ཆུང་བར་ཡང་མི་བྱེད། འདོད་པ་ཆེ་བར་ཡང་མི་བྱེད། ཆོག་ཤེས་པར་ཡང་མི་བྱེད། ཆོག་མི་ཤེས་པར་ཡང་མི་བྱེད། རབ་ཏུ་དབེན་པར་ཡང་མི་བྱེད། རབ་ཏུ་མི་དབེན་པར་ཡང་མི་བྱེད། ཤིང་དྲང་བར་ཡང་མི་བྱེད། གནས་ཁང་དུ་ཡང་མི་གནས། སྨན་བཀུས་ཏེ་བོར་བ་ཡང་མི་བསྟེན། མར་སར་དང་། སྦྲང་རྩི་ཡང་མི་བསྟེན་ཅིང་། རིགས་ཀྱི་བུ། གལ་ཏེ་ཁྱོད་སྦྱངས་པའི་ཡོན་ཏན་གྱི་ཆོས་དེ་ལྟ་བུ་ཐམས་ཅད་ཡང་དག་པར་བླངས་ཏེ་འཇུག་པར་མི་བྱེད་པ་དེ་ལྟ་ན་ཁྱོད་སྦྱངས་པ་དང་ལྡན་པ་ཡིན་ནོ་ཞེས་སྨྲའོ|་|དེ་ཅིའི་ཕྱིར་ཞེ་ན། ལྷའི་བུ། གང་འདི་སྙམ་དུ་བདག་ནི་ཕྱག་དར་ཁྲོད་པའོ། །བསོད་སྙོམས་པའོ། །ཤིང་དྲུང་པའོ། །བདག་ནི་སྨན་བཀུས་ཏེ་བོར་བས་ཆོག་ཤེས་པའོ། །བདག་ནི་འདོད་པ་ཆུང་བའོ། །བདག་ནི་ཆོག་ཤེས་པའོ། །བདག་ནི་དགོན་པ་པའོ། །བདག་ནི་བླ་གབ་མེད་པའོ། །བདག་ནི་སྦྱངས་པ་དང་ལྡན་པའོ་སྙམ་དུ་སེམས་པ་དེ་དག་ནི་མངོན་པའི་ང་རྒྱལ་ཅན་གྱི་རྣམ་པར་གཡོ་བ་ཡིན་པའི་ཕྱིར་རོ། །ལྷའི་བུ། ཡང་དག་པར་ཞུགས་པ་ལ་ནི་ལྷག་པར་གཡོ་བ་དང་བྲལ་བར་གཡོ་བ་དེ་དག་མི་འབྱུང་ངོ་། །དེ་ཅིའི་ཕྱིར་ཞེ་ན། འདི་ལྟར་དེ་ལ་རྣམ་པར་རྟོག་པ་མེད་པས་བདག་ཉིད་ཀྱང་མི་དམིགས་ན། སྦྱངས་པའི་ཡོན་ཏན་རྣམས་སུ་དམིགས་པ་ལྟ་ཅི་སྨོས་ཏེ། དེ་ནི་གནས་མེད་པའི་ཕྱིར་རོ། །ལྷའི་བུ། དེ་ལྟ་བས་ན་གང་སྦྱངས་པའི་ཡོན་ཏན་དེ་དག་ཡང་དག་པར་བླངས་ཏེ་འཇུག་ཅིང་རློམ་སེམས་སུ་མི་བྱེད། རྣམ་པར་རྟོག་པར་མི་བྱེད་པ་དེ་ནི་སྦྱངས་པ་དང་ལྡན་པ་ཡིན་ནོ་ཞེས་ཁོ་བོ་སྨྲའོ། །དེ་ཅིའི་ཕྱིར་ཞེ་ན། ལྷའི་བུ། དགེ་སློང་གང་འདོད་ཆགས་སྦྱོང་བ་དང་། ཞེ་སྡང་སྦྱོང་བ་དང་། གཏི་མུག་སྦྱོང་བ་དང་། ཁམས་གསུམ་སྦྱོང་བ་དང་། ཕུང་པོ་རྣམས་སྦྱོང་བ་དང་། ཁམས་རྣམས་སྦྱོང་བ་དང་། ནང་གི་སྐྱེ་མཆེད་དྲུག་དང་། ཕྱིའི་སྐྱེ་མཆེད་དྲུག་པོ་དེ་དག་སྦྱོང་བར་བྱེད་ཅིང་ཅི་ནས་ཀྱང་མི་ལེན། མི་འདོར། མི་སྒོམ། མི་སེལ། རྣམ་པར་མི་སེལ་བ་དེ་ལྟར་སྦྱོང་བར་བྱེད་པ་དེ་ནི་སྦྱངས་པ་དང་ལྡན་པ་ཡིན་ནོ་ཞེས་ཁོ་བོ་སྨྲ་བའི་ཕྱིར་རོ། །ལྷའི་བུ། གཞན་ཡང་དེ་ལྟར་རབ་ཏུ་བྱུང་ཞིང་དེ་ལྟར་རྫོགས་པར་བསྙེན་པ་དེ་ལ་ཁོ་བོ་འདི་སྐད་ཅེས། རིགས་ཀྱི་བུ། གལ་ཏེ་ཁྱོད་བདེན་པ་བཞི་རྟོགས་པར་མི་བྱེད། དྲན་པ་ཉེ་བར་གཞག་པ་བཞི་ཡང་མི་བསྒོམ། ཡང་དག་པར་སྤོང་བ་བཞི་ཡང་མ་ཡིན། རྫུ་འཕྲུལ་གྱི་རྐང་པ་བཞི་ཡང་མ་ཡིན། དབང་པོ་ལྔ་ཡང་མ་ཡིན། སྟོབས་ལྔ་ཡང་མ་ཡིན། བྱང་ཆུབ་ཀྱི་ཡན་ལག་བདུན་ཡང་མ་ཡིན། འཕགས་པའི་ལམ་ཡན་ལག་བརྒྱད་པ་ཡང་མི་སྒོམ་ཞིང་། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཡང་མི་སྒོམ། མངོན་སུམ་དུ་མི་བྱེད། རྣམ་པར་ཐར་པའི་སྒོ་གསུམ་ཡང་མི་སྒོམ། མངོན་སུམ་དུ་མི་བྱེད་པ་དེ་ལྟ་ན། ཁྱོད་བྱང་ཆུབ་ཀྱི་ཕྱོགས་ཀྱི་ཆོས་རྣམས་བསྒོམ་པ་ཡིན་ནོ་ཞེས་སྨྲའོ། །དེ་ཅིའི་ཕྱིར་ཞེ་ན། ལྷའི་བུ། དེ་ནི་མི་སྐྱེ་བའི་མཚན་ཉིད་རྟོགས་པ་ཞེས་བྱ་སྟེ། དེ་ནི་བསྒོམ་པར་བྱར་མེད་ཅིང་མངོན་སུམ་དུ་བྱར་མེད་པའི་ཕྱིར་རོ། །དེ་ཅིའི་ཕྱིར་ཞེ་ན། མི་སྐྱེ་བ་ནི་མངོན་སུམ་དུ་བྱར་མི་ནུས་པའི་ཕྱིར་རོ། །ལྷའི་བུ། དྲན་པ་ཉེ་བར་གཞག་པ་རྣམས་ཞེས་བྱ་བ་ནི་ཆོས་ཐམས་ཅད་དྲན་པ་མེད་ཅིང་ཡིད་ལ་བྱ་བ་མེད་པས་དེའི་ཕྱིར་དྲན་པ་ཉེ་བར་གཞག་པ་རྣམས་ཞེས་བྱའོ། །ལྷའི་བུ། དགེ་སློང་གང་འདོད་པའི་ཁམས་ལ་ཡང་མི་གནས། གཟུགས་ཀྱི་ཁམས་ལ་ཡང་མི་གནས། གཟུགས་མེད་པའི་ཁམས་ལ་ཡང་མི་གནས་པ་དེ་ནི་གནས་མེད་པ་ལ་གནས་བའི་དགེ་སློང་དྲན་པ་ཉེ་བར་གཞག་པ་རྣམས་བསྒོམ་པ་ཞེས་བྱའོ། །ཇི་ལྟར་བསྒོམ་ཞེ་ན། ཅི་ནས་སྒོམ་པར་མི་བྱེད། འཇིག་པར་མི་བྱེད་པ་དེ་ལྟར་སྒོམ་པར་བྱེད་པས། དེའི་ཕྱིར་སྒོམ་པར་བྱེད་པ་ཞེས་བྱ་སྟེ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་ཐམས་ཅད་ལ་ཡང་དེ་བཞིན་དུ་སྦྱར་རོ། །ལྷའི་བུ། གང་གི་ཚེ་དགེ་སློང་རྣལ་འབྱོར་པ་རྣལ་འབྱོར་སྤྱོད་པས་ཆོས་ཐམས་ཅད་མི་དམིགས་པ་དེའི་ཚེ་ན་རློམ་སེམས་སུ་མི་བྱེད་དོ། །གང་གི་ཚེ་རློམ་སེམས་སུ་མི་བྱེད་པ་དེའི་ཚེ་སྒོམ་པར་མི་བྱེད་དོ། །གང་གི་ཚེ་སྒོམ་པར་མི་བྱེད་པ་དེའི་ཚེ་མངོན་སུམ་དུ་མི་བྱེད་དོ། །དེ་ཅིའི་ཕྱིར་ཞེ་ན། ལྷའི་བུ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཞེས་བྱ་བ་གང་ཡིན་པ་དེ་ནི་མིང་ཙམ་སྟེ། མིང་དེ་ཡང་གཡོ་བ་མེད་པ། རྐྱེན་ལས་སྐྱེས་པ། མཚན་ཉིད་མེད་པར་མཚན་ཉིད་གཅིག་པ། བརྗོད་ཀྱང་རུང་། མ་བརྗོད་ཀྱང་རུང་། མིང་གིས་ཡོངས་སུ་ཤེས་པ་གང་ཡིན་པ་དེ་དམིགས་སུ་མེད་པའི་ཕྱིར་ཏེ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཡོངས་སུ་ཤེས་པ་གང་ཡིན་པ་དེ་ནི་བདེན་པ་པ་མཐོང་བ་ཡིན་ནོ། །ལྷའི་བུས་སྨྲས་པ། འཇམ་དཔལ། རྣལ་འབྱོར་པ་རྣལ་འབྱོར་སྤྱོད་པ་ཞེས་བགྱི་ན། ཇི་ལྟར་ན་དགེ་སློང་རྣལ་འབྱོར་སྤྱོད་པ་ལགས། འཇམ་དཔལ་གྱིས་སྨྲས་པ། ལྷའི་བུ། གང་གི་ཚེ་རྣལ་འབྱོར་སྤྱོད་པ་འདི་ལྟ་སྟེ། ཆོས་ཐམས་ཅད་སྐྱེ་བ་མེད་པའི་ཚུལ་གྱིས་ཚུལ་གཅིག་ཏུ་སྦྱོར་བར་བྱེད་ན། དེའི་ཕྱིར་རྣལ་འབྱོར་སྤྱོད་པ་ཞེས་བྱའོ། །གང་གི་ཚེ་ཅི་ལ་ཡང་མི་སྤྱོད་ན། དེའི་ཕྱིར་རྣལ་འབྱོར་སྤྱོད་པ་ཞེས་བྱའོ། །ཅི་ལ་མི་སྤྱོད་ཅེ་ན། འདི་ལྟ་སྟེ། ཆོས་ཐམས་ཅད་ཡོད་པ་མ་ཡིན་པའི་ཕྱིར་འཇིག་རྟེན་འདི་ལ་མི་སྤྱོད། འཇིག་རྟེན་ཕ་རོལ་ལ་མི་སྤྱོད། ཁམས་གསུམ་ལ་མི་སྤྱོད་དེ། དེའི་ཕྱིར་རྣལ་འབྱོར་སྤྱོད་པ་ཞེས་བྱའོ། །ལྷའི་བུ། གང་གི་ཚེ་རྣལ་འབྱོར་སྤྱོད་པ་ཆོས་འགའ་ཡང་སྦྱོར་བར་མི་བྱེད། འབྱེད་པར་མི་བྱེད་ན་དེའི་ཕྱིར་རྣལ་འབྱོར་སྤྱོད་པ་ཞེས་བྱའོ། །དེ་ནས་འཁོར་དེ་ལས་དགེ་སློང་སྟོང་ཕྲག་མང་པོ་དག་འདི་སྙམ་དུ། བཅོམ་ལྡན་འདས་དེ་བཞིན་གཤེགས་པས་རྣམ་པར་ཐར་པའི་སྒོ་གསུམ་རྟོགས་པས་མྱ་ངན་ལས་འདའ་བ་དང་། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་མངོན་སུམ་དུ་བྱས་པས་མྱ་ངན་ལས་འདའ་བར་འགྱུར་རོ་ཞེས་གསུངས་པ་དེ་འཇམ་དཔལ་གཞོན་ནུར་གྱུར་པ་འདིས་བཀག་པར་གྱུར་ན། འཇམ་དཔལ་གཞོན་ནུར་གྱུར་པས་བསྟན་པ་འདི་ཇི་ལྟར་རུང་སྟེ། ཆོས་བསྟན་པ་འདི་འགལ་བའམ། གཅིག་ཏུ་མ་གྱུར་གྲང་། སྙམ་དུ་ཐེ་ཚོམ་གྱི་སེམས་སྐྱེས་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་བས་དགེ་སློང་དེ་དག་གི་སེམས་ཀྱི་ཡོངས་སུ་རྟོགས་པ་སེམས་ཀྱིས་ཤེས་ནས། གནས་བརྟན་ཤཱ་རིའི་བུ་ལ་སྨྲས་པ། བཙུན་པ་ཤཱ་རིའི་བུ་ཁྱོད་ནི་དེ་བཞིན་གཤེགས་པས་ཡིད་ཆེས་པ། དད་པ་དང་ལྡན་པ། ཤེས་རབ་ཆེན་པོ་རྣམས་ཀྱི་མཆོག་ཏུ་བསྟན་པ་ཡིན་ན། བཙུན་པ་ཤཱ་རིའི་བུ། གང་གི་ཚེ་ཁྱོད་ཀྱིས་འདོད་ཆགས་དང་བྲལ་བའི་ཆོས་རྣམས་མངོན་སུམ་དུ་བྱས་པའི་ཚེ། བཙུན་པས་བདེན་པ་བཞི་པོ་དག་དམིགས་པའམ། མངོན་སུམ་དུ་བྱས་པའམ། བསྒོམ་པའམ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་། རྣམ་པར་ཐར་པའི་སྒོ་གསུམ་པོ་དག་དམིགས་པའམ། མངོན་སུམ་དུ་བྱས་པའམ། བསྒོམ་པ་ཅི་ཡང་ཡོད་དམ། ཤཱ་རིའི་བུས་སྨྲས་པ། འཇམ་དཔལ། དེ་ནི་མེད་དེ། གང་མངོན་སུམ་དུ་བྱ་བའམ། བསྒོམ་པར་བྱ་བའམ། རྟོགས་པར་བྱ་བའི་ཆོས་དེ་ནི་འགའ་ཡང་དམིགས་སུ་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་བླང་དུ་མེད་པ། མ་སྐྱེས་པ། རྣམ་བར་རིག་པ་མེད་པ། སྟོང་པ་ཡིན་པས། སྟོང་པས་སྟོང་པ་ཉིད་མངོན་སུམ་དུ་མི་བྱེད་པའི་ཕྱིར་རོ|་|བསྟན་པ་འདི་བཤད་པ་ན་དགེ་སློང་སུམ་སྟོང་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། ། །།བམ་པོ་བཞི་པ་སྟེ་ཐ་མའོ། །དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ། དེ་ནི་འདི་ལྟ་སྟེ། བྱེ་བས་གོ་བ་ཟབ་མོ་ལ་བཟོད་པ། སྟོང་པ་ཉིད་ལ་གནས་པས་བསྟན་པ་ལགས་ཏེ། ལེགས་སོ། །ལེགས་སོ། །འཇམ་དཔལ་གྱིས་སྨྲས་པ། ལྷའི་བུ། ཁོ་བོ་ནི་ཕྱ་བས་གོ་བ་མ་ཡིན་གྱི། བྱིས་པ་སོ་སོའི་སྐྱེ་བོ་ཐམས་ཅད་ནི་ཕྱེ་བས་གོ་བ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་དེ་དག་ནི་འབྱེད་པར་བྱེད་པ་ཡིན་པའི་ཕྱིར་རོ། །ཅི་ཞིག་འབྱེད་པར་བྱེད་ཅེ་ན། སེམས་ཅན་དམྱལ་བར་འབྱེད་པར་བྱེད་དོ། །དུད་འགྲོའི་སྐྱེ་གནས་འབྱེད་པར་བྱེད་དོ། །གཤིན་རྗེའི་འཇིག་རྟེན་འབྱེད་པར་བྱད་དོ། །ཁམས་གསུམ་འབྱེད་པར་བྱེད་དོ། དེ་ལྟར་འབྱེད་པ་རྣམས་དང་། ཀུན་དུ་འབྱེད་པ་རྣམས་ཀྱི་འཁོར་བའི་སྔོན་གྱི་མཐའ་མི་མངོན་ནོ|་|ལྷའི་བུ། བྱིས་པ་རྣམས་ནི་འདོད་ཆགས་ཀུན་དུ་འབྱེད་པར་བྱེད་དོ། །ཞེ་སྡང་ཀུན་དུ་འབྱེད་པར་བྱེད་དོ། །གཏི་མུག་ཀུན་དུ་འབྱེད་པར་བྱེད་དོ། །ལྟ་བ་ཀུན་དུ་འབྱེད་པར་བྱེད་དོ། །མིང་དང་གཟུགས་ཀུན་དུ་འབྱེད་པར་བྱེད་དོ། །ལྷའི་བུ། སངས་རྒྱས་རྣམས་ནི་ཕྱེ་བས་གོ་བ་མ་ཡིན་ནོ། །ཉན་ཐོས་རྣམས་ཀྱང་མ་ཡིན། རང་སངས་རྒྱས་རྣམས་ཀྱང་མ་ཡིན། བྱང་ཆུབ་སེམས་དཔའ་བཟོད་པ་ཐོབ་པ་རྣམས་ཀྱང་མ་ཡིན་གྱི། ལྷའི་བུ། བྱིས་པ་རྣམས་ནི་ཕྱེ་བས་གོ་བ་མ་ཡིན་ནོ། །ལྷའི་བུས་སྨྲས་པ། འཇམ་དཔལ། འོ་ན་ཅི་ཁྱོད་རྣམ་པར་སྤྲོས་ན་གོ་བ་ལགས་སམ། འཇམ་དཔལ་གྱིས་སྨྲས་པ། ལྷའི་བུ། དེ་ནི་མ་ཡིན་ནོ། །ལྷའི་བུས་སྨྲས་པ། འཇམ་དཔལ། འོ་ན་བཀྲི་དགོས་པ་ལགས་སམ། འཇམ་དཔལ་གྱིས་སྨྲས་པ། ལྷའི་བུ། དེ་ནི་མ་ཡིན་ནོ། །ལྷའི་བུས་སྨྲས་པ། འཇམ་དཔལ། འོ་ན་ཚིག་ལྷུར་ལེན་པ་ལགས་སམ། འཇམ་དཔལ་གྱིས་སྨྲས་པ། ལྷའི་བུ། དེ་དེ་བཞིན་ཏེ། ཁོ་བོ་ནི་ཚིག་ལྷུར་ལེན་པ་ཡིན་ནོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ། གང་བྱང་ཆུབ་སེམས་དཔའ་ནི་ཡི་གེ་གཅིག་དང་། ཚིག་གཅིག་ལས་ཀྱང་མི་གཡོ་ལ། ཡི་གེ་དེ་ཉིད་དང་། ཚིག་དེ་ཉིད་ཀྱི་དོན་དང་། ཚུལ་དང་། སྒོ་དང་། ལམ་ཡང་ཡང་དག་པར་ཇི་ལྟ་བ་བཞིན་རབ་ཏུ་ཤེས་པར་བྱེད་དོ། འདི་ནི་སྟོང་པའོ་ཞེས་བྱ་བར་ཤེས་པར་བྱེད་དོ། །འདི་ནི་དབེན་པའོ་ཞེས་བྱ་བར་ཤེས་པར་བྱེད་དོ|་|འདི་ནི་དངོས་པོ་མེད་པའོ་ཞེས་བྱ་བར་ཤེས་པར་བྱེད་དོ། །འདི་ནི་སྐྱེ་བ་མེད་པའོ་ཞེས་བྱ་བར་ཤེས་པར་བྱེད་ཅིང་། ཅི་ནས་ཀྱང་རྣམ་པར་ཤེས་པར་མི་བྱེད། རིག་པར་མི་བྱེད། ཚོར་བར་མི་བྱེད་པ་དེ་ལྟར་ཤེས་པར་བྱེད་པས། དེའི་ཕྱིར་ཚིག་ལྷུར་ལེན་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ། དེ་ནི་འདི་ལྟ་སྟེ། གཟུངས་ཐོབ་པས་བསྟན་པ་ཡིན་ཏེ། ལེགས་སོ། །ལེགས་སོ། །འཇམ་དཔལ་གྱིས་གསོལ་པ། བཅོམ་ལྡན་འདས། བདག་ནི་གཟུངས་ཐོབ་པ་མ་ལགས་སོ། །དེ་ཅིའི་སླད་དུ་ཞེ་ན|་བཅོམ་ལྡན་འདས། བྱིས་པ་རྣམས་ནི་གཟུངས་ཐོབ་པ་ལགས་ཀྱི། སངས་རྒྱས་རྣམས་དང་། བྱང་ཆུབ་སེམས་དཔའ་རྣམས་ནི་གཟུངས་ཐོབ་པ་མ་ལགས་པའི་སླད་དུའོ། །དེ་ཅིའི་སླད་དུ་ཞེ་ན། བཅོམ་ལྡན་འདས། བྱིས་པ་རྣམས་ནི་འཛིན་པར་བགྱིད་པའི་སླད་དུ་སྟེ། ཅི་ཞིག་འཛིན་པར་བགྱིད་ཅེ་ན། བདག་ཏུ་འཛིན་པར་བགྱིད་དོ། །སེམས་ཅན་དུ་འཛིན་པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་པར་བགྱིད་དོ། །ཆད་པར་འཛིན་པ་དང་། རྟག་པར་འཛིན་པ་དང་། འདོད་ཆགས་དང་། ཞེ་སྡང་དང་། གཏི་མུག་འཛིན་པར་བགྱིད་དོ། །མ་རིག་པ་དང་། སྲིད་པའི་སྲེད་པ་དང་། ཕུང་པོ་ལྔ་དང་། འཇིག་ཚོགས་དང་། ཁམས་བཅོ་བརྒྱད་དང་། ནང་གི་སྐྱེ་མཆེད་དྲུག་དང་། ཕྱིའི་སྐྱེ་མཆེད་དྲུག་འཛིན་པར་བགྱིད་དོ།། རྟོག་པ་དང་། རྣམ་པར་རྟོག་པ་དང་། ཡོངས་སུ་རྟོག་པ་དང་། ལྟ་བའི་རྣམ་པ་དག་འཛིན་པར་བགྱིད་དེ། བཅོམ་ལྡན་འདས། དེ་ལྟར་ལགས་པས་བྱིས་པ་རྣམས་ནི་གཟུངས་ཐོབ་པ་ལགས་སོ|་|རྟོག་གེ་བ་རྣམས་ནི་རྟོག་པ་དང་། རྣམ་པར་རྟོག་པ་དང་། ཡོངས་སུ་རྟོག་པ་དང་། ལྟ་བའི་རྣམ་པ་དག་འཛིན་པར་བགྱིད་པས་བཅོམ་ལྡན་འདས་དེའི་སླད་དུ་བྱིས་པ་རྣམས་ནི་གཟུངས་ཐོབ་པ་ལགས་སོ། །དེ་ཅིའི་སླད་དུ་ཞེ་ན། བྱིས་པ་རྣམས་ཆོས་གང་དག་འཛིན་པར་བགྱིད་པ་དེ་དག་ནི་སངས་རྒྱས་རྣམས་འཛིན་པར་མི་མཛད། ཉན་ཐོས་རྣམས་ཀྱང་མི་བགྱིད། རང་སངས་རྒྱས་རྣམས་ཀྱང་མི་བགྱིད་དེ། བྱང་ཆུབ་སེམས་དཔའ་རྣམས་ཀྱང་མི་བགྱིད་པས་དེའི་སླད་དུ་བྱིས་པ་རྣམས་ནི་གཟུངས་ཐོབ་པ་ལགས་སོ། །དེ་ཅིའི་སླད་དུ་ཞེ་ན། འདི་ལྟར་བྱིས་པ་རྣམས་ནི་ལེགས་པར་འཛིན་པ་མ་ལགས་པ་འཛིན་པར་བགྱིད་ཀྱི། སངས་རྒྱས་རྣམས་ནི་མི་མཛད། ཉན་ཐོས་རྣམས་ཀྱང་མི་བགྱིད། རང་སངས་རྒྱས་རྣམས་ཀྱང་མི་བགྱིད། བྱང་ཆུབ་སེམས་དཔའ་རྣམས་ཀྱང་མི་བགྱིད་པའི་སླད་དུའོ། །དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། གལ་ཏེ་ཁྱོད་གཟུངས་ཐོབ་པ་མ་ལགས་ན། འོ་ན་ཅི་ཁྱོད་རྟོགས་པ་བུལ་བ་ལགས་སམ། འཇམ་དཔལ་གྱིས་སྨྲས་པ། ལྷའི་བུ། དེ་དེ་བཞིན་ཏེ། ཁོ་བོ་ནི་རྟོགས་པ་བུལ་བ་ཡིན་ནོ། །དེ་ཅིའི་ཕྱིར་ཞེ་ན། ལྷའི་བུ། ཁོ་བོ་ནི་རྟོགས་པ་གང་། སངས་རྒྱས་རྣམས་དང་། ཉན་ཐོས་རྣམས་དང་། རང་སངས་རྒྱས་རྣམས་དང་། བྱང་ཆུབ་སེམས་དཔའ་རྣམས་ཀྱིས་ཀྱང་མི་མཁྱེན་པ་དེ་ཙམ་དུ་བུལ་བའི་རྟོགས་པ་དང་ལྡན་པའི་ཕྱིར་རོ། །ལྷའི་བུ། བྱིས་པ་སོ་སོའི་སྐྱེ་བོ་གང་དག་ཡིན་པ་དེ་དག་ནི་རྟོགས་པ་བུལ་བ་མ་ཡིན་ནོ། །དེ་ཅིའི་ཕྱིར་ཞེ་ན། བྱིས་པ་སོ་སོའི་སྐྱེ་བོ་རྣམས་ནི་མངོན་པར་ཆགས་པའི་རྟོགས་པ་ཅན་ཡིན་ལ། མཁས་པ་རྣམས་ནི་རྟོགས་པ་བུལ་བ་དང་ལྡན་པའི་ཕྱིར་རོ། །རྒྱུན་དུ་ཞུགས་པ་རྣམས་ཀྱང་རེ་ཞིག་མངོན་པར་ཆགས་པའི་རྟོགས་པ་ཅན་དུ་སྟོན་ན། བྱིས་པ་སོ་སོའི་སྐྱེ་བོ་གཞན་དག་ལྟ་སྨོས་ཀྱང་ཅི་དགོས་ཏེ། ལྷའི་བུ། དེ་ལྟ་བས་ན་ཁོ་བོ་ནི་རྟོགས་པ་བུལ་བ་ཡིན་གྱི། གཟུངས་ཐོབ་པ་མ་ཡིན་ནོ། །དེ་ཅིའི་ཕྱིར་ཞེ་ན། ཁོ་བོས་ནི་གང་གཟུང་བར་བྱ་བ་ཅུང་ཟད་ཀྱང་མ་རྙེད་བའི་ཕྱིར་རོ། །བསྟན་པ་འདི་བཤད་པ་ན་འཁོར་དེ་ལས་དགེ་སློང་ལྔ་བརྒྱ་ཙམ་ཆོས་ཀྱི་རྣམ་གྲངས་འདི་མ་རྟོགས་ཏེ་སྤངས་ཤིང་འགལ་བར་བྱས་ནས། རང་རང་གི་ལུས་དེ་དག་ཉིད་ཀྱིས་སེམས་ཅན་དམྱལ་བ་ཆེན་པོ་རྣམས་སུ་ལྷུང་བར་གྱུར་ཏོ། །དེ་ནས་ཚེ་དང་ལྡན་པ་ཤཱ་རིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། དགེ་སློང་ལྔ་བརྒྱ་ཙམ་པོ་འདི་དག་ཆོས་ཀྱི་རྣམ་གྲངས་འདི་མ་རྟོགས་ཏེ། སྤངས་ཤིང་འགལ་བར་བྱས་ནས་རང་རང་གི་ལུས་འདི་དག་ཉིད་ཀྱིས་སེམས་ཅན་དམྱལ་བ་ཆེན་པོ་རྣམས་སུ་ལྷུང་བར་འགྱུར་གྱི། དེ་ལྟ་བུའི་གནས་ཟབ་མོ་དག་མ་སྟོན་པར་སོ་སོར་རྟོགས་ཏེ་སྟོན་ཅིག། འཇམ་དཔལ་གྱིས་སྨྲས་པ། བཙུན་པ་ཤཱ་རིའི་བུ། ཁྱོད་མ་རྟོག་ཅིག། གང་སེམས་ཅན་དམྱལ་བར་འགྲོ་བའི་ཆོས་དེ་ལྟ་བུ་འགའ་ཡང་དམིགས་སུ་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་སྐྱེ་བ་མེད་པའི་ཕྱིར་རོ། །བཙུན་པ་ཤཱ་རིའི་བུ། གཞན་ཡང་དེ་སྐད་ཅེས་སོ་སོར་རྟོག་སྟེ་སྟོན་ཅིག་ཅེས་ཟེར་བ་ནི། བཙུན་པ་ཤཱ་རིའི་བུ། རིགས་ཀྱི་བུའམ་རིགས་ཀྱི་བུ་མོ་བདག་ཏུ་ལྟ་བ་ལ་བརྟེན་པའམ། སེམས་ཅན་དུ་ལྟ་བ་ལ་བརྟེན་པ་འམ། སྲོག་ཏུ་ལྟ་བ་ལ་བརྟེན་པའམ། གང་ཟག་ཏུ་ལྟ་བ་ལ་བརྟེན་པ་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་སློང་གི་དགེ་འདུན་དང་བཅས་པ་གངྒཱའི་ཀླུང་གི་བྱེ་མ་སྙེད་ཅིག་ལ་ཇི་སྲིད་འཚོའི་བར་དུ་བདེ་བའི་ཡོ་བྱད་ཐམས་ཅད་ཀྱིས་བསྙེན་བཀུར་བྱས་ལ། གང་གིས་ཆོས་ཟབ་མོ་ཤེས་པར་དཀའ་བ་འཇིག་རྟེན་ཐམས་ཅད་དང་མི་མཐུན་པ་འདི་ལྟ་བུ་འདི་ཐོས་ཤིང་། ཆོས་སྟོང་པ་དང་། མཚན་མ་མེད་པ་དང་། སྨོན་པ་མེད་པ་དང་། ཞི་བ་དང་། དབེན་པ་དང་། སྐྱེ་བོ་མེད་པ་དང་། སེམས་ཅན་མེད་པ་དང་། སྲོག་མེད་པ་དང་|་གང་ཟག་མེད་པ་དང་། མི་རྟག་པ་དང་། སྡུག་བསྔལ་བ་དང་། བདག་མེད་པ་འདི་ལྟ་བུ་འདི་ཐོས་ནས་སྤངས་ཏེ་སེམས་ཅན་དམྱལ་བ་རྣམས་སུ་ལྷུང་བར་གྱུར་པ་ནི། བཙུན་པ་ཤཱ་རིའི་བུ|་རིགས་ཀྱི་བུའམ་རིགས་ཀྱི་བུ་མོ་ཆོས་ཟབ་མོ་འདི་ཐོས་ནས་སྤངས་ཏེ། སེམས་ཅན་དམྱལ་བ་རྣམས་སུ་ལྷུང་བ་དེ་ཆེས་མྱུར་བར་དེ་དག་ནས་ལྡང་ཞིང་རྣམ་པར་ཐར་པར་འགྱུར་གྱི། རིགས་ཀྱི་བུའམ་རིགས་ཀྱི་བུ་མོ་བདག་ཏུ་བལྟ་བ་ལ་བརྟེན་པ། ཆོས་འདི་མ་ཐོས་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་སྙེད་ལ་བསྙེན་བཀུར་བྱས་པ་དེ་ནི་དེ་ལྟ་མ་ཡིན་ནོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ། ལེགས་སོ། །ལེགས་སོ། །ཇི་སྐད་སྨྲས་པ་དེ་བཞིན་ཏེ། ཐོས་པ་འདི་ནི་སངས་རྒྱས་འབྱུང་པ་དང་འདྲའོ། །ཐོས་པ་འདི་ནི་རྒྱུན་དུ་ཞུགས་པའི་འབྲས་བུ་དང་འདྲའོ། །ཐོས་པ་འདི་ནི་ལན་གཅིག་ཕྱིར་འོང་བའི་འབྲས་བུ་དང་འདྲའོ། །ཐོས་པ་འདི་ནི་ཕྱིར་མི་འོང་བའི་འབྲས་བུ་དང་འདྲའོ། །ཐོས་པ་འདི་ནི་དགྲ་བཅོམ་པ་དང་འདྲའོ། །དེ་ཅིའི་ཕྱིར་ཞེ་ན། བདག་ཏུ་ལྟ་བ་ལ་བརྟེན་པ་དང་། དམིགས་པ་ཅན་ལ་ནི་ཐོབ་པའམ། མངོན་པར་རྟོགས་པ་མེད་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། དགེ་སློང་དེ་དག་ནི་སེམས་ཅན་དམྱལ་བ་དེ་དག་ནས་ཆེས་མྱུར་བར་ལྡང་ཞིང་ཡོངས་སུ་མྱ་ངན་ལས་འདའ་བར་འགྱུར་གྱི། འདི་ན་མི་གཏི་མུག་ཅན་དམིགས་པའི་ལྟ་བ་དང་ལྡན་པ་ཐེ་ཚོམ་དུ་གྱུར་པ་གང་དག་དེ་བཞིན་གཤེགས་པ་ལ་མཆོད་པ་བྱེད་པ་དེ་དག་ནི་དེ་ལྟ་མ་ཡིན་ནོ། །ཤཱ་རིའི་བུ། དེ་ལྟ་མོད་ཀྱི་དེ་ནི་དེ་དག་གི་ཡོངས་སུ་མྱ་ངན་ལས་འདའ་བའི་རྒྱུར་འགྱུར་བ་ཡིན་ཏེ། མྱུར་དུ་རྣམ་པར་ཐར་པར་ནི་མི་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཆོས་ཟབ་མོ་དག་མ་ཐོས་པའི་ཕྱིར་རོ། །ཤཱ་རིའི་བུ། གཞན་ཡང་རིགས་ཀྱི་བུའམ་རིགས་ཀྱི་བུ་མོ་གང་དག་རྣ་བླགས་ཏེ། ཆོས་ཟབ་མོ་འདི་མཉན་ནས་མ་རྟོགས་ཤིང་སྤངས་ཏེ། སེམས་ཅན་དམྱལ་བར་འགྲོ་བ་དེ་དག་ནི་ཆེས་མྱུར་བར་རྣམ་པར་ཐར་པར་འགྱུར་གྱི། དམིགས་པ་ཅན་ཐེ་ཚོམ་དུ་གྱུར་པ་གཞན་དག་ནི་དེ་ལྟ་མ་ཡིན་ནོ། །དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་བདག་དང་ཚངས་པ་མཚུངས་པར་སྤྱོད་བཞེད་དམ། འཇམ་དཔལ་གྱིས་སྨྲས་པ། ལྷའི་བུ། གལ་ཏེ་ཁྱོད་ཚངས་པར་སྤྱོད་པ་མི་ལེན་ཅིང་ཚངས་པར་སྤྱད་པ་སྤྱོད་པར་མི་བྱེད་པ་དེ་ལྟ་ན། ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ། གང་ལེན་པར་བྱེད་པར་དེ་ནི་སྤྱོད་པར་བྱེད་ཀྱི། གང་ལེན་པར་མི་བྱེད་པ་དེ་ནི་ཅི་ལ་ཡང་སྤྱོད་པར་མི་བྱེད་དོ། །ལྷའི་བུ། གང་ཚངས་པར་སྤྱད་པ་དམིགས་པར་བྱེད་པ་དེ་ནི་སྤྱོད་པར་བྱེད་ཀྱི། གང་དམིགས་པར་མི་བྱེད་པ་དེ་ནི་ཅི་ཡང་སྤྱོད་པར་མི་བྱེད་དོ། །ལྷའི་བུས་སྨྲས་པ། འཇམ་དཔལ། འོ་ན་ཅི་ཁྱོད་ཚངས་པར་མི་སྤྱོད་ལགས་སམ། འཇམ་དཔལ་གྱིས་སྨྲས་པ། ལྷའི་བུ། དེ་དེ་བཞིན་ཏེ། ཁོ་བོ་ནི་ཚངས་པར་མི་སྤྱོད་དོ། །དེ་ཅིའི་ཕྱིར་ཞེ་ན། ཁོ་བོ་ནི་ཚངས་པ་ཡང་མ་ཡིན་ལ། སྤྱོད་པ་ཡང་མ་ཡིན་པས་དེའི་ཕྱིར་ཁོ་བོ་ཚངས་པར་མི་སྤྱོད་དོ། །ལྷའི་བུས་སྨྲས་པ། འཇམ་དཔལ། དེ་ནི་འདི་ལྟ་སྟེ། ཐོགས་པ་མེད་པའི་སྤོབས་པ་དང་ལྡན་པས་བསྟན་པ་ལགས་ཏེ། ལེགས་སོ། །ལེགས་སོ། །འཇམ་དཔལ་གྱིས་སྨྲས་པ། ལྷའི་བུ། གལ་ཏེ་ཁོ་བོ་ཐོགས་པ་མེད་པའི་སྤོབས་པ་དང་ལྡན་པ་ཡིན་པར་གྱུར་ན་ནི་དེ་ལྟར་ན་ཐོགས་པར་ཡང་འགྱུར་རོ། །དེ་ཅིའི་ཕྱིར་ཞེ་ན|་ཅི་ཙམ་དུ་བདག་གི་ཡོད་པ་དང་། ཇི་ཙམ་དུ་བདག་གི་མངོན་པར་ཞེན་པ་ཡོད་པ་དེ་ཙམ་དུ་ཐོགས་པར་འགྱུར་བའི་ཕྱིར་རོ། །འཇམ་དཔལ་གཞོན་ནུར་གྱུར་པས། ལྷའི་བུ་བློ་གྲོས་རབ་གནས་ལ་གཞན་ཡང་འདི་སྐད་ཅེས་སྨྲས་སོ། །ལྷའི་བུ། གལ་ཏེ་ཁྱོད་སེམས་ཅན་ཐམས་ཅད་སྲོག་དང་བྲལ་བར་བྱེད་ཅིང་མཚོན་ཆ་ཡང་ཐོགས་པར་མི་བྱེད|་རལ་གྲི་མ་ཡིན། བོང་བ་ཡང་མ་ཡིན། དབྱུག་པ་ཡང་ཐོགས་པར་མི་བྱེད་པ་དེ་ལྟར་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ། །ལྷའི་བུས་སྨྲས་པ། འཇམ་དཔལ་ཁྱེད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ། སེམས་ཅན་སེམས་ཅན་ཞེས་བྱ་བ་ཅི་ཞིག་ཡིན་པར་ཤེས། ལྷའི་བུས་སྨྲས་པ། འཇམ་དཔལ། སེམས་ཅན་སེམས་ཅན་ཞེས་བགྱི་བ་ནི། འདི་ལྟ་སྟེ། མིང་ཙམ་དང་། འཛིན་པའི་འདུ་ཤེས་ཙམ་ལགས་སོ། །འཇམ་དཔལ་གྱིས་སྨྲས་པ། ལྷའི་བུ། དེ་ལྟ་བས་ན་བདག་ཏུ་འཛིན་པའི་འདུ་ཤེས་གསད་པར་བྱའོ། །སེམས་ཅན་དུ་འཛིན་པའི་འདུ་ཤེས་གསད་པར་བྱའོ། །སྲོག་ཏུ་འཛིན་པའི་འདུ་ཤེས་གསད་པར་བྱའོ། །གང་ཟག་ཏུ་འཛིན་པའི་འདུ་ཤེས་གསད་པར་བྱའོ། །མིང་དུ་འཛིན་པའི་འདུ་ཤེས་གསད་པར་བྱའོ། །ལྷའི་བུས་སྨྲས་པ། འཇམ་དཔལ། ཅིས་དགུམ་པར་བགྱི། འཇམ་དཔལ་གྱིས་སྨྲས་པ། ལྷའི་བུ། ཤེས་རབ་ཀྱི་མཚོན་གྱིས་གསད་པར་བྱ་སྟེ|་ཤེས་རབ་ཀྱི་མཚོན་དེས་ཀྱང་། ཅི་ནས་ཀྱང་འཛིན་པ་མེད་པ་དང་། གཅོད་པ་མེད་པ་དེ་ལྟར་གཟུང་བར་བྱ་ཞིང་། དེ་ལྟར་གསད་པར་བྱའོ། །ལྷའི་བུ། རྣམ་གྲངས་དེས་ན་ཁྱོད་ཀྱིས་འདི་ལྟར་གང་གིས་བདག་གི་འདུ་ཤེས་དང་། སེམས་ཅན་གྱི་འདུ་ཤེས་གསད་པ་དེས། སེམས་ཅན་ཐམས་ཅད་གསད་པ་ཡིན་པར་རིག་པར་བྱའོ། །འཇམ་དཔལ། གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་གཞན་ཡང་འདི་སྐད་ཅེས་སྨྲས་སོ། །ལྷའི་བུ། གལ་ཏེ་ཁྱོད་མི་དགེ་བ་བཅུའི་ལས་ཀྱི་ལམ་རྣམས་ཡང་དག་པར་བླངས་ཏེ་འཇུག་ཅིང་། ནག་པོའི་ཕྱོགས་ཐམས་ཅད་ཀྱི་མཉམ་པ་ཉིད་ཀྱིས་དཀར་པོའི་ཕྱོགས་ཐམས་ཅད་ཡང་དག་པར་བླངས་ཏེ་འཇུག་པར་བྱེད་པ་དེ་ལྟ་ན། ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ། ནག་པོའི་ཕྱོགས་ཀྱི་མཉམ་པ་ཉིད་གང་ཡིན་པ་དེས་དེ་མཉམ་པར་ཉིད་ཡིན་པས། མཉམ་པ་ཉིད་དུ་འཇུག་པར་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་དོ། །ལྷའི་བུ། འདི་ཇི་སྙམ་དུ་སེམས། ནག་པོའི་ཕྱོགས་ཀྱི་མཉམ་པ་ཉིད་གང་ཡིན་སྙམ། ལྷའི་བུས་སྨྲས་པ། འཇམ་དཔལ་བྱ་བ་མ་མཆིས་པ་དང་། ལྷག་པར་བྱ་བ་མི་བགྱིད་པ་ལགས་སོ། །འཇམ་དཔལ་གྱིས་སྨྲས་པ། ལྷའི་བུ། དཀར་པོའི་ཕྱོགས་ཞེས་བྱ་བ་གང་ཡིན་སྙམ། ལྷའི་བུས་སྨྲས་པ། འཇམ་དཔལ། ཆོས་ཀྱི་དབྱིངས་དང་། དེ་བཞིན་ཉིད་དང་། ཡང་དག་པའི་མཐའ་དང་། རྣམ་པར་ཐར་པའི་སྒོ་གསུམ་སྟེ། དེ་ནི་དཀར་པོའི་ཕྱོགས་ལགས་སོ། །འཇམ་དཔལ་གྱིས་སྨྲས་པ། ལྷའི་བུ། ཆོས་ཀྱི་དབྱིངས་ཀྱིས་སྒྲིབ་པར་ནུས་སམ། ལྷའི་བུས་སྨྲས་པ། འཇམ་དཔལ། དེ་ནི་མ་ལགས་སོ། །འཇམ་དཔལ་གྱིས་སྨྲས་པ། ལྷའི་བུ། དེའི་ཕྱིར་ཁོ་བོ་ནི་དེ་ལས་བསམས་ནས། དེ་སྐད་ཅེས་གལ་ཏེ་ཁྱོད་ནག་པོའི་ཕྱོགས་ཐམས་ཅད་ཀྱི་མཉམ་པ་ཉིད་ཀྱིས་དཀར་པོའི་ཕྱོགས་ཐམས་ཅད་ཡང་དག་པར་བླངས་ཏེ་འཇུག་པར་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ་ཞེས་སྟོན་ཏོ། །འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་གཞན་ཡང་འདི་སྐད་ཅེས་སྨྲས་སོ། །ལྷའི་བུ། གལ་ཏེ་ཁྱོད་གསད་པ་དང་པོ་ཕྱིར་ཕྱུང་བ་དེའི་མགོ་ལ་མཚོན་གྱིས་འདེབས་པར་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ནས་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ། གསད་པ་གསད་པ་ཞེས་བྱ་བ་དེ་གང་ཞེ་ན། ལྷའི་བུ། འདོད་ཆགས་ནི་གསད་པ་ཞེས་བྱའོ། །ཞེ་སྡང་དང་། གཏི་མུག་ནི་གསད་པ་ཞེས་བྱའོ། །ང་རྒྱལ་དང་། ཁྲོ་བ་དང་། འཆབ་པ་དང་། ཕྲག་དོག་དང་། སྒྱུ་དང་། གཡོ་དང་། སེར་སྣ་དང་། ལྷག་པར་འཛིན་པ་དང་། མཚན་མ་དང་། ཉེ་བར་ལེན་པ་དང་། འདུ་ཤེས་དང་། ཚོར་བ་ནི་གསད་པ་ཞེས་བྱ་སྟེ། ལྷའི་བུ། དེ་དག་ནི་གསད་པ་ལེན་པར་གསུངས་སོ། །ལྷའི་བུ། རྣལ་འབྱོར་པ་རྣལ་འབྱོར་སྤྱོད་པ་གང་འདོད་ཆགས་ཀྱི་སེམས་སྐྱེས་པ་སེལ་བར་བྱེད་དེ། ཞི་བར་བྱེད། རབ་ཏུ་ཞི་བར་བྱེད་པ་དེ་ལ་ནི་སྟོང་པར་སྣང་བས་མི་སྡུག་པ་ལ་འཇུག་པར་མི་བྱེད་པར་སེམས་འདི་ག་ལ་སྐྱེས། གང་དུ་འགག། ཡུལ་གང་ལ་ཆགས་པར་འགྱུར། གང་གིས་ཆགས་པར་འགྱུར་ཞེས་འདོད་ཆགས་ཀྱི་སེམས་དེ་ཉིད་ཀྱི་འབྱུང་བ་དང་། འཇིག་པ་ལ་སོ་སོར་རྟོག་པར་བྱེད་དེ། དེ་དེ་ལྟར་སོ་སོར་རྟོག་པར་བྱེད་པ་ན། འདོད་ཆགས་ཀྱང་མི་དམིགས། གང་ལ་ཆགས་པར་འགྱུར་བ་དང་། གང་གིས་ཆགས་པར་འགྱུར་བ་དེ་ཡང་མི་དམིགས་སོ། །གང་གི་ཚེ་མི་དམིགས་པ་དེའི་ཚེ་མི་ལེན་ཏོ། །གང་གི་ཚེ་མི་ལེན་པ་དེའི་ཚེ་མི་འདོར་རོ|་|གང་གི་ཚེ་མི་འདོར་བ་དེའི་ཚེ་མི་འཛིན་མི་སྤོང་སྟེ། དེ་ནི་མྱ་ངན་ལས་འདས་པ་ཞེས་བྱའོ། །ཞེ་སྡང་དང་། གཏི་མུག་དང་། ང་རྒྱལ་དང་། ཁྲོ་བ་དང་། འཆབ་པ་དང་། ཕྲག་དོག་དང་། སྒྱུ་དང་|་གཡོ་དང་། སེར་སྣ་དང་། ལྷག་པར་འཛིན་པ་དང་། མཚན་མ་དང་། ཉེ་བར་ལེན་པ་དང་། འདུ་ཤེས་དང་། ཚོར་བའི་སེམས་ལ་ཡང་དེ་བཞིན་དུ་སྦྱར་ཏེ། ལྷའི་བུ། གང་གསད་པ་དེ་ལྟ་བུ་སྐྱེས་མ་ཐག་ཏུ་གསོད་པར་བྱེད་པ་དེ་ནི་གསད་པ་དང་པོ་ཕྱིར་ཕྱུང་བ་དེའི་མགོ་ལ་མཚོན་གྱིས་འདེབས་པ་ཞེས་བྱ་སྟེ། དེའི་ཕྱིར་ཁོ་བོ་ནི་དེ་ལས་བསམས་ནས་དེ་སྐད་ཅེས་སྟོན་ཏོ། །འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་གཞན་ཡང་འདི་སྐད་ཅེས་སྨྲས་སོ། །ལྷའི་བུ། གལ་ཏེ་ཁྱོད་སངས་རྒྱས་མཉེས་པར་མི་བྱེད། ཆོས་མཉེས་པར་མི་བྱེད། དགེ་འདུན་མཉེས་པར་མི་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ། །ལྷའི་བུས་སྨྲས་པ། འཇམ་དཔལ་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ། སངས་རྒྱས་སངས་རྒྱས་ཞེས་བྱ་བ་ཅི་ཞིག་ཡིན་པར་ཤེས། ལྷའི་བུས་སྨྲས་པ། འཇམ་དཔལ། དེ་བཞིན་ཉིད་དང་། ཆོས་ཀྱི་དབྱིངས་ལགས་སོ། ། འཇམ་དཔལ་གྱིས་སྨྲས་པ། ལྷའི་བུ། འདི་ཇི་སྙམ་དུ་སེམས། དེ་བཞིན་ཉིད་དང་། ཆོས་ཀྱི་དབྱིངས་མཉེས་པར་བྱར་ནུས་སྙམ་མམ། ལྷའི་བུས་སྨྲས་པ། འཇམ་དཔལ། དེ་ནི་མ་ལགས་སོ|་|འཇམ་དཔལ་གྱིས་སྨྲས་པ། ལྷའི་བུ། ཁོ་བོ་ནི་དེ་ལས་བསམས་ནས་དེ་སྐད་ཅེས་གལ་ཏེ་ཁྱོད་སངས་རྒྱས་མཉེས་པར་མི་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ་ཞེས་སྟོན་ཏོ། །ལྷའི་བུ། ཆོས་ཆོས་ཞེས་བྱ་བ་ཅི་ཞིག་ཡིན་པར་ཤེས། ལྷའི་བུས་སྨྲས་པ། འཇམ་དཔལ། ཆོས་ཞེས་བྱ་བ་ནི་འདོད་ཆགས་དང་བྲལ་བ་ཉིད་དང་། ཆོས་ཉིད་ལགས་སོ། །འཇམ་དཔལ་གྱིས་སྨྲས་པ། ལྷའི་བུ། འདི་ཇི་སྙམ་དུ་སེམས། འདོད་ཆགས་དང་བྲལ་བ་ཉིད་དང་། ཆོས་ཉིད་མཉེས་པར་བྱར་ནུས་སྙམ་མམ། ལྷའི་བུས་སྨྲས་པ། འཇམ་དཔལ། དེ་ནི་མ་ལགས་སོ། །འཇམ་དཔལ་གྱིས་སྨྲས་པ། ལྷའི་བུ། ཁོ་བོ་ནི་དེ་ལས་བསམས་ནས་དེ་སྐད་ཅེས། གལ་ཏེ་ཁྱོད་ཆོས་མཉེས་པར་མི་བྱེད་བ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ་ཞེས་སྟོན་ཏོ། །ལྷའི་བུ། དགེ་འདུན་དགེ་འདུན་ཞེས་བྱ་བ་ཅི་ཞིག་ཡིན་པར་ཤེས། ལྷའི་བུས་སྨྲས་པ། འཇམ་དཔལ། འཕགས་པ་ཉན་ཐོས་རྣམས་ནི་འདུས་མ་བགྱིས་ཀྱིས་རབ་ཏུ་ཕྱེ་བ་ལགས་པས་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི་འདུས་མ་བགྱིས་ལགས་སོ། །འཇམ་དཔལ་གྱིས་སྨྲས་པ། ལྷའི་བུ། འདི་ཇི་སྙམ་དུ་སེམས། འདུས་མ་བྱས་མཉེས་པར་བྱ་ནུས་སྙམ་མམ། ལྷའི་བུས་སྨྲས་པ། འཇམ་དཔལ། དེ་ནི་མ་ལགས་སོ། །འཇམ་དཔལ་གྱིས་སྨྲས་པ། ལྷའི་བུ། ཁོ་བོ་ནི་དེ་ལས་བསམས་ནས་དེ་སྐད་ཅེས། གལ་ཏེ་ཁྱོད་དགེ་འདུན་མཉེས་པར་མི་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ་ཞེས་སྟོན་ཏོ། །ལྷའི་བུ། གཞན་ཡང་གང་སངས་རྒྱས་སུ་དམིགས་པ་དེ་ནི་སངས་རྒྱས་མཉེས་པར་བྱེད་དོ། ། གང་ཆོས་སུ་དམིགས་པ་དེ་ནི་ཆོས་མཉེས་པར་བྱེད་དོ། །གང་དགེ་འདུན་དུ་དམིགས་པ་དེ་ནི་དགེ་འདུན་མཉེས་པར་བྱེད་དོ། །ལྷའི་བུ། གང་སངས་རྒྱས་སུ་མི་དམིགས་པ་དང་། ཆོས་སུ་མི་དམིགས་པ་དང་། དགེ་འདུན་དུ་མི་དམིགས་པ་དེས་ནི་སངས་རྒྱས་མཉེས་པར་མ་བྱས། དེས་ནི་ཆོས་མཉེས་པར་མ་བྱས། དེས་ནི་དགེ་འདུན་མཉེས་པར་མ་བྱས་པ་ཁོ་ན་ཡིན་ནོ། །དེ་ཅིའི་ཕྱིར་ཞེ་ན། དེས་དེ་དག་མ་དམིགས་པས་ན། དེས་མཉེས་པར་མ་བྱས་པའི་ཕྱིར་རོ། །ལྷའི་བུ། གཞན་ཡང་གང་དག་སངས་རྒྱས་ལ་ཆགས་པ་དང་། ཆོས་ལ་ཆགས་པ་དང་། དགེ་འདུན་ལ་ཆགས་པ་དེ་དག་གིས་སངས་རྒྱས་མཉེས་པར་བྱས། ཆོས་མཉེས་པར་བྱས། དགེ་འདུན་མཉེས་པར་བྱས་པ་ཡིན་ནོ། །གང་དག་གིས་སངས་རྒྱས་མ་དམིགས་པ་དེ་དག་ནི་སངས་རྒྱས་ལ་ཆགས་པ་མེད་པ་དེ་དག་གིས་སངས་རྒྱས་མཉེས་པར་མ་བྱས་པ་ཡིན་ནོ། །གང་དག་གིས་ཆོས་མ་དམིགས་པ་དེ་དག་ནི་ཆོས་ལ་ཆགས་པ་མེད་པས་དེ་དག་གིས་ཆོས་མཉེས་པར་མ་བྱས་པ་ཡིན་ནོ། །གང་གིས་དགེ་འདུན་མ་དམིགས་པ་དེ་དག་ནི་དགེ་འདུན་ལ་ཆགས་པ་མེད་པས་དེ་དག་གིས་དགེ་འདུན་མཉེས་པར་མ་བྱས་པ་ཡིན་ནོ། །ལྷའི་བུ། མཉེས་པར་མ་བྱས་པ་མཉེས་པར་མ་བྱས་པ་ཞེས་བྱ་བ་དེ་ནི་འདོད་ཆགས་དང་བྲལ་བའི་གནས་ཡིན་ནོ། །དེ་ནི་ཀུན་དུ་སྦྱོར་བ་དང་བྲལ་བའི་གནས་ཡིན་ནོ། །དེ་ནི་རྣམ་པར་བཤིགས་པའི་གནས་ཡིན་ནོ། །དེ་ནི་སེམས་དང་བྲལ་བའི་གནས་ཡིན་ནོ། །དེ་ནི་མ་བྱུང་བའི་གནས་ཡིན་ནོ། །དེ་ནི་རྣམ་པར་ངེས་པའི་གནས་ཡིན་ནོ། །དེ་ནི་ཡིད་བྱུང་བར་མ་བྱས་པའི་གནས་ཡིན་པས་དེའི་ཕྱིར་མཉེས་པར་མ་བྱས་པ་ཞེས་བྱ་སྟེ། ལྷའི་བུ། དེའི་ཕྱིར་ཁོ་བོ་ནི་དེ་ལས་བསམས་ནས་དེ་སྐད་ཅེས། གལ་ཏེ་ཁྱོད་སངས་རྒྱས་དང་། ཆོས་དང་། དགེ་འདུན་མཉེས་པར་མི་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ་ཞེས་སྟོན་ཏོ། །དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། འདི་ལྟར་ཇི་ཙམ་དུ་ཟབ་མོའི་གནས་དག་སྟོན་པར་མཛད་པ་ནི་ངོ་མཚར་ཏེ། བདག་ཅག་གིས་ཁྱོད་ལ་བགྱིས་པ་གཟོ་བར་བགྱིའོ། །འཇམ་དཔལ་གྱིས་སྨྲས་པ། ལྷའི་བུ། ཁྱོད་བྱས་པ་གཟོ་བར་མ་བྱེད་ཅིག། ལྷའི་བུས་སྨྲས་པ། འཇམ་དཔལ། འོ་ན་ཅི་བགྱིས་པ་མི་གཟོ་བར་བགྱིའམ། འཇམ་དཔལ་གྱིས་སྨྲས་པ། ལྷའི་བུ། དེ་དེ་བཞིན་ཏེ། ལྷའི་བུ། ཁྱོད་བྱས་པ་མི་གཟོ་བར་བྱོས་ལ། བྱས་པ་གཟོ་བར་མ་བྱེད་ཅིག། ལྷའི་བུས་སྨྲས་པ། འཇམ་དཔལ། ཅི་ཁྱོད་བགྱིས་པ་མི་གཟོ་ལགས་སམ། འཇམ་དཔལ་གྱིས་སྨྲས་པ། ལྷའི་བུ། དེ་དེ་བཞིན་ཏེ། ཁོ་བོ་ནི་བྱས་པ་མི་གཟོ་བ་ཡིན་གྱི། བྱས་པ་གཟོ་བ་མ་ཡིན་ནོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ། བྱིས་པ་རྣམས་ནི་རྣམ་པ་གཞན་དང་གཞན་དག་བྱེད་པས་ན། བྱིས་པ་རྣམས་ནི་གཞན་དང་གཞན་དག་གིས་བྱེད་པ་པོ་སྟེ། གང་གི་ཕྱིར་ལྟ་བའི་རྣམ་པ་གཞན་དང་གཞན་དག་བྱེད་པ་དེའི་ཕྱིར་དེ་དག་ནི་བྱས་པ་གཟོ་བ་ཞེས་བྱའོ། །ལྷའི་བུ། ཡང་དག་པར་ཞུགས་པའི་རིགས་ཀྱི་བུ་དག་ནི་བྱ་བའམ་མི་བྱ་བ་གང་ཡང་མི་བྱེད་དེ། གང་གི་ཚེ་མི་བྱེད་པ་དེའི་ཕྱིར་དེ་དག་ནི་བྱས་པ་མི་གཟོ་བ་ཞེས་བྱའོ། |ཇི་སྐད་དུ། སངས་རྒྱས་བཅོམ་ལྡན་འདས་རྣམས་ཀྱིས་འདི་ལྟ་སྟེ། ཆོས་ཐམས་ཅད་ནི་བྱ་བ་མེད་པ། བྱེད་པ་མེད་པ། ལྷག་པར་བྱེད་པ་མེད་པ་སྟེ། མཉམ་པ་ཉིད་ལས་ཀྱང་མི་འདའ་ལ། གཞན་ལེན་པར་ཡང་མི་བྱེད། བྱ་བ་གཞན་ཡང་མི་བྱེད་པས་མཉམ་པ་ཉིད་ཡིན་ནོ་ཞེས་གསུངས་པས་ན། དེའི་ཕྱིར་བྱས་པ་མི་གཟོ་བ་ཞེས་བྱའོ།། ལྷའི་བུས་སྨྲས་པ། འཇམ་དཔལ་ཁྱོད་བཟོད་པའམ། འོན་ཏེ་ཆོས་ཉིད་དམ། གང་ལ་གནས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ། བཟོད་པ་ལ་ཡང་མ་ཡིན། ཆོས་ཉིད་ལ་ཡང་མ་ཡིན་ནོ། །ལྷའི་བུས་སྨྲས་པ། འཇམ་དཔལ། འོ་ན་ཁྱོད་གང་ལས་གནས་ཏེ་དེ་སྐད་སྟོན། འཇམ་དཔལ་གྱིས་སྨྲས་པ། ལྷའི་བུ། སྒྱུ་མའི་སྐྱེས་བུའི་ལུས་གང་ལ་གནས་པ་ལའོ|་|ལྷའི་བུས་སྨྲས་པ། འཇམ་དཔལ། སྒྱུ་མའི་སྐྱེས་བུའི་ལུས་གང་ལ་གནས། འཇམ་དཔལ་གྱིས་སྨྲས་པ། ལྷའི་བུ། སྒྱུ་མའི་སྐྱེས་བུའི་ལུས་ནི་དེ་བཞིན་ཉིད་གང་ལ་གནས་པ་དེ་ལ་གནས་སོ། །ལྷའི་བུ། གཞན་ཡང་དེ་སྐད་ཅེས་ཁྱོད་བཟོད་པའམ། འོན་ཏེ་ཆོས་ཉིད་དམ། གང་ལ་གནས་ཏེ་དེ་སྐད་སྟོན་ཅེས་ཟེར་བ་ནི། ལྷའི་བུ། བཟོད་པ་ཞེས་བྱ་བ་ནི་མིང་ཙམ་སྟེ། མིང་ལ་ནི་གནས་པར་མི་ནུས་སོ། །ཆོས་ཉིད་ཀྱང་འགྱུར་བ་མེད་ཅིང་རྟོག་པ་མེད་པ་སྟེ། དེ་ལ་ཡང་གནས་མེད་དོ། །ལྷའི་བུ། དེ་བཞིན་གཤེགས་པ་ནི་སེམས་ཅན་ཐམས་ཅད་གང་ལ་གནས་ཏེ་སྟོན་པར་བྱེད་པ་དེ་བཞིན་ཉིད་ལ་བཞུགས་ཏེ་སྟོན་པར་མཛད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི་དེ་བཞིན་ཉིད་ལ་བཞུགས་ཏེ་སྟོན་ལ། སེམས་ཅན་ཐམས་ཅད་ཀྱང་དེ་བཞིན་ཉིད་ལས་མི་གཡོ་སྟེ། སེམས་ཅན་ཐམས་ཅད་ཀྱི་དེ་བཞིན་ཉིད་གང་ཡིན་པ་དང་། དེ་བཞིན་གཤེགས་པའི་དེ་བཞིན་ཉིད་གང་ཡིན་པའི་དེ་བཞིན་ཉིད་དེ་ནི་གཉིས་སུ་མེད་པའི་ཕྱིར་རོ། །དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། དགེ་སྦྱོང་དང་། བྲམ་ཟེ་ཞེས་བགྱི་ན། ཇི་ཙམ་གྱིས་ན་དགེ་སྦྱོང་དང་། བྲམ་ཟེ་ཞེས་བགྱི། འཇམ་དཔལ་གྱིས་སྨྲས་པ། ལྷའི་བུ། གང་དགེ་སྦྱོང་ཡང་མ་ཡིན། བྲམ་ཟེ་ཡང་མ་ཡིན་པ་དེ་ནི་དགེ་སྦྱོང་དང་། བྲམ་ཟེ་ཞེས་བྱའོ། །དེ་ཅིའི་ཕྱིར་ཞེ་ན|་ལྷའི་བུ། གང་འདོད་པའི་ཁམས་ལ་ཡང་མི་ཆགས། གཟུགས་དང་། གཟུགས་མེད་པའི་ཁམས་ལ་ཡང་མི་ཆགས་པ་དེ་ནི་དགེ་སྦྱོང་ཡིན་ནོ་ཞེས་ཁོ་བོ་སྨྲ་ཞིང་། ལྷའི་བུ། གང་མིག་ལས་མི་འཛག། རྣ་བ་ལས་མི་འཛག། སྣ་ལས་མི་འཛག། ལྕེ་ལས་མི་འཛག། ལུས་ལས་མི་འཛག། ཡིད་ལས་མི་འཛག་པ་དེ་ནི་དགེ་སྦྱོང་ཡིན་ནོ་ཞེས་ཁོ་བོ་སྨྲ་ལ། ལྷའི་བུ། གང་ལ་གནས་པ་མེད་ཅིང་གནས་པར་གདགས་པ་མེད་པ་དང་། ཀུན་དུ་གནས་པ་མེད་ཅིང་ཀུན་དུ་གནས་པར་གདགས་པ་མེད་པ་དེ་ནི་དགེ་སྦྱོང་ཡིན་ནོ་ཞེས་ཁོ་བོ་སྨྲ་བའི་ཕྱིར་དང་། ལྷའི་བུ། གང་ལས་ཀྱང་མ་འོངས་གང་དུ་ཡང་མི་འགྲོ་ལ། རྨ་མེད་ཅིང་རྨ་དང་བྲལ་བ་དེ་ནི་བྲམ་ཟེ་ཡིན་ནོ་ཞེས་ཁོ་བོ་སྨྲ་བའི་ཕྱིར་རོ། །གང་དག་དགེ་སྦྱོང་ཡང་མ་ཡིན། བྲམ་ཟེ་ཡང་མ་ཡིན་པ་དེ་ནི་དགེ་སྦྱོང་དང་། བྲམ་ཟེ་ཞེས་བྱའོ་ཞེས་བྱ་བའི་ཚིག་དེ་བསྟན་པ་དེ་ནི་དེ་ཡིན་ནོ། །དེ་ནས་འཁོར་དེ་ཉིད་དུ་བྱང་ཆུབ་སེམས་དཔའ་བསམ་གཏན་བཞི་སྒོམ་པ། མངོན་པར་ཤེས་པ་ལྔ་ཐོབ་པ་ལྔ་ཞིག་འདུས་པར་གྱུར་པ་དེ་དག་ད་དུང་བཟོད་པ་ཐོབ་པ་མ་ཡིན་པས་གནས་ཤིང་སྙོམས་པར་འཇུག་པར་བྱེད། གནས་ཤིང་རྣམ་པར་ལྡང་བར་བྱེད་དེ། བྱང་ཆུབ་སེམས་དཔའ་དེ་དག་གིས་སྔོན་ཕ་བསད་པ་དང་། མ་བསད་པ་དང་། དགྲ་བཅོམ་པ་བསད་པའི་སྔོན་གྱི་གནས་རྗེས་སུ་དྲན་ཅིང་། དེ་དག་ལ་ལས་ཀྱི་རྣམ་པར་སྨིན་པ་དེའི་ལས་ཀྱི་ལྷག་མ་ཡོད་པས|་དེ་དག་སེམས་ཡོངས་སུ་གདུང་བ་དེས་ཆོས་ཟབ་མོ་དག་ལ་མི་བཟོད་ཅིང་། བདག་ཉིད་ལ་བརྟེན་ཏེ་རྣམ་པར་རྟོག་པ་ཁོ་ནར་བྱེད་དེ། དེ་དག་གི་འདི་ལྟ་སྟེ། ཆོས་ལ་བཟོད་པ་མ་ཐོབ་པས་ཀུན་ནས་ལྡང་བ་དེ་རྣམ་པར་གནོན་པར་མི་ནུས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ལྔ་པོ་དེ་དག་གདུལ་བའི་དབང་གི་ཕྱིར་འཇམ་དཔལ་གཞོན་ནུར་གྱུར་པའི་སེམས་བསྡུ་བར་མཛད་དོ། །དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་ལག་པ་གཡས་པས་རལ་གྲི་བླངས་ཏེ་ལེགས་པར་བརྡར་ནས། བཅོམ་ལྡན་འདས་ག་ལ་བ་དེ་ལོགས་སུ་བརྒྱུགས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏེ། །འཇམ་དཔལ། ང་ནི་བསད་ཟིན་ཅིང་ལེགས་པར་བསད་ཟིན་གྱི། ཐོང་ཞིག། དེ་ཅིའི་ཕྱིར་ཞེ་ན། འཇམ་དཔལ། སྐྱེས་བུ་གང་དག་གིས་གང་གི་ཚེ་གསོད་དོ་སྙམ་པའི་སེམས་སྐྱེད་པར་བྱེད་པའི་སེམས་སྐྱེས་པ་དེའི་ཚེ་དེ་དག་གིས་ཡུན་རིང་པོ་ནས་བསད་པའི་ཕྱིར་རོ། །དེ་ནས་བྱང་ཆུབ་སེམས་དཔའ་ལྔ་དག་འདི་སྙམ་དུ་སེམས་ཏེ། ཆོས་ཐམས་ཅད་ནི་སྒྱུ་མ་ལྟ་བུ་སྟེ། འདི་ལ་བདག་གམ། སེམས་ཅན་ནམ། སྲོག་གམ། གང་ཟག་གམ། ཤེད་ལས་སྐྱེས་སམ། ཤེད་བུ་ནི་འགའ་ཡང་མེད་དོ། །འདི་ལ་ཕ་ཡང་མེད། མ་ཡང་མེད། སངས་རྒྱས་ཀྱང་མེད། ཆོས་ཀྱང་མེད། དགེ་འདུན་ཡང་མེད། འདི་ལ་གང་མཚམས་མེད་པར་བྱེད་པར་འགྱུར་བ་ཡང་འགའ་ཡང་མེད་དོ། །དེ་ཅིའི་ཕྱིར་ཞེ་ན། འཇམ་དཔལ་གཞོན་ནུར་གྱུར་པ་འདི་ནི་མཁས་པ། མཛངས་པ། ཡིད་གཞུངས་པ་སངས་རྒྱས་ཐམས་ཅད་ཀྱིས་བསྟོད་པ། བསྔགས་པ་ཟབ་མོ་ལ་བཟོད་པ། སངས་རྒྱས་བྱེ་བ་ཁྲག་ཁྲིག་འབུམ་ཕྲག་མང་པོ་ལ་བསྙེན་བཀུར་བྱས་པ། སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། ཆོས་ཐམས་ཅད་རབ་ཏུ་འབྱེད་པའི་ཤེས་པ་ལ་མཁས་པ། ཅི་ལྟ་བ་བཞིན་དུ་ཆོས་སྟོན་པ། ཡང་དག་པར་སྨྲ་བ། དེ་བཞིན་གཤེགས་པ་ལ་གུས་པ་དང་བཅས་པ་ཡིན་ན། དེ་མཚོན་རྣོན་པོ་ཐོགས་ཏེ་དེ་བཞིན་གཤེགས་པ་ག་ལ་བ་དེར་རྒྱུག་ཅིང་། དེ་བཞིན་གཤེགས་པ་ཡང་དེ་སྐད་ཅེས། འཇམ་དཔལ། ང་ནི་བསད་ཟིན་ཅིང་། ལེགས་པར་བསད་ཟིན་གྱི་ཐོང་ཞིག་ཅེས་གསུངས་པའི་ཕྱིར་ཏེ། གལ་ཏེ་འདི་ལ་སངས་རྒྱས་ཞེས་བྱ་བ་དང་། ཆོས་ཞེས་བྱ་བ་དང་། དགེ་འདུན་ཞེས་བྱ་བ་དང་། ཕ་ཞེས་བྱ་བ་དང་། མ་ཞེས་བྱ་བ་དང་། དགྲ་བཅོམ་པ་ཞེས་བྱ་བའི་ཆོས་ཐེར་ཟུག་ཏུ་གནས་པ་འགའ་ཞིག་ཡོངས་སུ་འགྲུབ་པར་འགྱུར་ན་ནི་མཚམས་མེད་པར་འཛིན་པ་དེ་ལ་ངེས་པར་འབྱུང་བ་ཡང་ཡོད་པར་མི་འགྱུར་བ་ཞིག་ན། གང་གི་ཕྱིར་ཆོས་དེ་དག་ནི་མེད་ལ། ལོག་པ། ཡང་དག་པ་མ་ཡིན་པར་བཟུང་བ། སྟོང་པ། སྒྱུ་མ་ལྟ་བུ་ཡིན་པ་དེའི་ཕྱིར། འདི་ལ་གང་བྱེད་པར་འགྱུར་བའམ། གང་ལ་བྱེད་པར་འགྱུར་བའི་བྱེད་པ་འགའ་ཡང་མེད་དོ་སྙམ་མོ། །བྱང་ཆུབ་སེམས་དཔའ་ལྔ་པོ་དེ་དག་གིས་དེ་ལྟར་ཤེས་པས། མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ནས། དེ་དག་དགའ་བ་དང་མཆོག་ཏུ་དགའ་བ་དེ་ཉིད་ཀྱིས་ཏ་ལ་བདུན་སྲིད་ཙམ་དུ་ནམ་མཁའ་ལ་མངོན་པར་འཕགས་ཏེ། མངོན་པར་འཕགས་ནས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཆོས་ཀུན་སྒྱུ་མ་ལྟ་བུ་སྟེ། །ཡོངས་སུ་རྟོག་པ་ཀུན་ནས་བསྐྱེད། །འདི་ལ་གྲུབ་བ་མ་མཆིས་ཏེ། །ཆོས་འདི་ཐམས་ཅད་སྟོང་པ་ལགས། །བདག་ཏུ་འདུ་ཤེས་རྨོངས་པ་རྣམས། །ལོག་པར་ཡོངས་སུ་རྟོག་པར་བགྱི། །སྔོན་གྱི་མཐར་ནི་མི་བཟད་པའི། །སུག་ལས་བགྱིས་བ་དེ་ཡང་དྲན། །ཚེ་རབས་སྔ་མ་རྣམས་སུ་ནི། །ཕ་མ་སྦྱིན་གནས་བཀུམ་གྱུར་ཅིང་། །དགེ་སློང་དགྲ་བཅོམ་བཀུམ་པ་ཡི། །སུག་ལས་ཤིན་ཏུ་མི་བཟད་བགྱིས། །སུག་ལས་དེ་ཡི་རྣམ་སྨིན་གྱིས། །སྡུག་བསྔལ་ཚོར་བ་མྱོང་གྱུར་ཞིང་། །འགྱོད་པ་སྐྱེས་པར་གྱུར་པ་ནི། །ཆོས་ཐོས་པས་ན་རྣམ་དག་གྱུར། །གྲགས་ཆེན་ཟུག་རྔུ་འབྱིན་པ་ཡིས། །བདག་ཅག་འགྱོད་པ་བསལ་མཛད་པས། །གང་ལ་ཉོན་མོངས་མ་མཆིས་པའི། །ཆོས་དབྱིངས་རྗེས་སུ་རྟོགས་པར་གྱུར། །སངས་རྒྱས་ཐབས་ལ་མཁས་པ་སྟེ། །ཐུབ་པ་ཐབས་ཀྱི་མཁྱེན་པ་མངའ། །ཐབས་དེས་སེམས་ཅན་ཐམས་ཅད་ཀྱི། ། འགྱོད་པ་དག་ནི་རྣམ་པར་བསལ། །ཆོས་རྣམས་རང་བཞིན་སྟོང་པས་ན། །འདི་ལ་སངས་རྒྱས་ཆོས་དང་ཡང་། །དགེ་འདུན་མི་དམིགས་འདི་ལ་ནི། །ཕ་མ་མ་མཆིས་དགྲ་བཅོམ་མིན།། འདི་ལ་འགུམ་པ་མ་མཆིས་ཏེ། །འགུམ་པ་འགའ་ཡང་མཆིས་མ་ལགས། །མཉམ་ཉིད་ཅི་བཞིན་འབྱུང་བ་སྟེ། །དེ་ནི་ཆོས་རྣམས་མཚན་ཉིད་ལགས། །འཇམ་དབྱངས་ཤེས་རབ་ཆེན་པོ་པ། །ཆོས་རྣམས་ཕ་རོལ་ཕྱིན་པ་ཡིས། །མཚོན་ཆ་རྣོན་པོ་ཐོགས་ནས་ནི། །སངས་རྒྱས་ག་ལ་བཞུགས་པར་བརྒྱུགས། །སངས་རྒྱས་ཅི་བཞིན་མཚོན་དེ་བཞིན། །དེ་དག་གཉིས་ཀ་མཚན་ཉིད་གཅིག་། མི་སྐྱེ་འབྱུང་བ་མ་མཆིས་ཏེ། །འདི་ལ་འགུམ་པ་འགའ་མ་མཆིས། །མཚོན་ཐོགས་པའི་ཆོས་ཀྱི་རྣམ་གྲངས་འདི་བཤད་པ་ན། ཕྱོགས་བཅུའི་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དག་རྣམ་པ་དྲུག་ཏུ་རབ་གཡོས་ཤིང་། ས་ཆེན་པོ་གཡོས་པ་ཡང་འཇིག་རྟེན་དུ་བྱུང་བར་གྱུར་ཏོ། །དེ་ནས་ཕྱོགས་བཅུའི་འཇིག་རྟེན་གྱི་ཁམས་ཀྱི་སངས་རྒྱས་ཀྱི་ཞིང་དེ་དག་ན། སངས་རྒྱས་བཅོམ་ལྡན་འདས་གང་དག་བཞུགས་ཏེ་འཚོ་ཞིང་གཞེས་པ་དེ་དག་ལ་རང་རང་གི་བསྙེན་བཀུར་བ་དག་གིས་ཞུས་པ། བཅོམ་ལྡན་འདས་གང་གིས་དོག་ས་ཆེན་པོ་གཡོས་པ་འདི་ལྟ་བུ་འཇིག་རྟེན་དུ་བྱུང་བ་འདི་སུའི་མཐུ་ལགས། སངས་རྒྱས་བཅོམ་ལྡན་འདས་དེ་དག་གིས་བཀའ་སྩལ་པ། རིགས་ཀྱི་བུ་དག། འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་ཆོས་སྟོན་ཏོ། །འཇིག་རྟེན་གྱི་ཁམས་མི་མཇེད་དེ་ན་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཞིག་འདུག་པ་དེས། འདི་ལྟ་སྟེ། བྱང་ཆུབ་སེམས་དཔའ་གཞན་དག་འདུལ་བའི་དབང་གིས་ཕྱིར་ཤེས་རབ་ཀྱི་རལ་གྲིའི་མཚོན་རྣོན་པོ་ཐོགས་ཏེ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེ་ག་ལ་བ་དེ་ལོགས་སུ་བརྒྱུགས་སོ། །དེ་ནས་སངས་རྒྱས་བཅོམ་ལྡན་འདས་དེ་དག་གི་ཤེས་རབ་ཀྱི་མཚོན་ལས་བརྩམས་ཏེ། ཅི་ནས་ཀྱང་སེམས་ཅན་དཔག་ཏུ་མེད་པ་དག་མིག་རྣམ་པར་དག་པ་དང་|་སེམས་རྣམ་པར་གྲོལ་བ་དང་། བཟོད་པ་སྐྱེས་པ་དང་། བྱང་ཆུབ་ལ་ཞུགས་པར་གྱུར་པ་དེ་ལྟ་དེ་ལྟར་ཆོས་བསྟན་ཏོ། །དེ་ནས་བཅོམ་ལྡན་འདས་ཀྱིས་ཅི་ནས་ཀྱང་འཁོར་དེ་ན་སེམས་ཅན་ལས་དང་པོ་པ་དགེ་བའི་རྩ་བ་ཆུང་བ། རྣམ་པར་རྟོག་པ་མང་བ་གང་དག་འཁོད་པ་དེ་དག་གིས་མཚོན་དེ་མི་མཐོང་ཞིང་། ཆོས་བསྟན་པ་དེ་ཡང་མི་ཐོས་པ་དེ་ལྟར་བྱིན་གྱི་རླབས་ཀྱིས་བྱིན་གྱིས་བརླབས་སོ། །དེ་ནས་གནས་བརྟན་ཤཱ་རིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱིས་སྟོན་པ་བགྲོངས་པའི་ཕྱིར་བརྟུལ་པའི་ལས་མི་བཟད་པ་མངོན་པར་འདུས་བྱས་པ་དེ་ཁྱོད་ལ་གང་དུ་རྣམ་པར་སྨིན་པར་འགྱུར། འཇམ་དཔལ་གྱིས་སྨྲས་པ། བཙུན་པ་ཤཱ་རིའི་བུ། དེ་དེ་བཞིན་ཏེ། ཇི་སྐད་སྨྲས་པ་དེ་བཞིན་ཏེ། ཁོ་བོས་ལས་མི་བཟད་པ་དེ་ལྟ་བུ་ནི་བྱས་ན། དེ་གང་དུ་རྣམ་པར་སྨིན་པར་འགྱུར་པའི་གནས་ནི་མི་ཤེས་སོ། །བཙུན་པ་ཤཱ་རིའི་བུ། དེ་ལྟར་མོད་ཀྱི། སྒྱུ་མའི་སྐྱེས་བུ་ལས་གང་དུ་རྣམ་པར་སྨིན་པར་འགྱུར་བ་དེར་ཁོ་བོའི་ཡང་རྣམ་པར་སྨིན་པར་འགྱུར་རོ། །དེ་ཅིའི་ཕྱིར་ཞེ་ན། བཙུན་པ་ཤཱ་རིའི་བུ། སྒྱུ་མའི་སྐྱེས་བུ་ཡང་མི་རྟོག་རྣམ་པར་མི་རྟོག་ལ། ཆོས་ཐམས་ཅད་ཀྱང་མི་རྟོག་རྣམ་པར་མི་རྟོག་པའི་ཕྱིར་རོ། །བཙུན་པ་ཤཱ་རིའི་བུ། འདི་ལྟར་དེ་བཙུན་པ་ཉིད་ལ་དྲིའི། ཁྱོད་ཅི་ལྟར་བཟོད་པ་དེ་ལྟར་སྟོན་ཅིག། བཙུན་པ། མཚོན་དམིགས་སུ་ཡོད་དམ། ཤཱ་རིའི་བུས་སྨྲས་པ། འཇམ་དཔལ། དེ་ནི་མ་ཡིན་ནོ། །འཇམ་དཔལ་གྱིས་སྨྲས་པ། བཙུན་པ། ལས་དམིགས་སུ་ཡོད་དམ། ཤཱ་རིའི་བུས་སྨྲས་པ། འཇམ་དཔལ། དེ་ནི་མ་ཡིན་ནོ། ། འཇམ་དཔལ་གྱིས་སྨྲས་པ། བཙུན་པ། རྣམ་པར་སྨིན་པ་དམིགས་སུ་ཡོད་དམ། ཤཱ་རིའི་བུས་སྨྲས་པ། འཇམ་དཔལ། དེ་ནི་མ་ཡིན་ནོ། །འཇམ་དཔལ་གྱིས་སྨྲས་པ། བཙུན་པ་ཤཱ་རིའི་བུ། མཚོན་ཡང་མེད། ལས་ཀྱང་མེད། རྣམ་པར་སྨིན་པ་ཡང་མེད་ན། འོ་ན་ལས་དེ་གང་དུ་རྣམ་པར་སྨིན་པར་འགྱུར། ཤཱ་རིའི་བུས་སྨྲས་པ། འཇམ་དཔལ་ཁྱོད་ཀྱི་བསམས་པ་དེས་བསྟན་པ་ལྟར་ན། ལས་དེ་ནི་གང་དུ་ཡང་རྣམ་པར་སྨིན་པར་མི་འགྱུར་རོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ལས་མེད་པ། རྣམ་པར་སྨིན་པ་མེད་པའི་ཕྱིར་རོ། །དེ་ནས་བཅོམ་ལྡན་འདས་ལ་གང་དག་ཕྱོགས་བཅུའི་འཇིག་རྟེན་གྱི་ཁམས་ནས་འདུས་པའི་བྱང་ཆུབ་སེམས་དཔའ་དེ་དག་གིས་གསོལ་བ། བཅོམ་ལྡན་འདས། འཇམ་དཔལ་གཞོན་ནུར་གྱུར་པ་འདི་ཅི་ནས་ཀྱང་བདག་ཅག་གི་སངས་རྒྱས་ཀྱི་ཞིང་དག་ཏུ་མཆི་ཞིང་། སངས་རྒྱས་ཀྱི་ཞིང་དེ་དག་ཏུ་ཆོས་སྟོན་པར་འགྱུར་པ་དེ་ལྟར་ཐུགས་བརྩེ་བས་སྤྲོ་བར་མཛད་དུ་གསོལ། དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་།ཁྱེད་ཅག་ཇེ་རང་རང་གི་སངས་རྒྱས་ཀྱི་ཞིང་རྣམས་སུ་ལྟོས་ཤིག། དེ་ནས་བྱང་ཆུབ་སེམས་དཔའ་དེ་དག་གིས་ཕྱོགས་བཅུ་ཀུན་གྱི་རང་རང་གི་སངས་རྒྱས་ཀྱི་ཞིང་རྣམས་སུ་བལྟས་སོ། བལྟས་པ་ན་ཕྱོགས་བཅུ་ཀུན་གྱི་རང་རང་གི་སངས་རྒྱས་ཀྱི་ཞིང་དེ་དག་ནས་འཇམ་དཔལ་གཞོན་ནུར་གྱུར་པའི་སྒྲ་སྙན་པ་ཡང་ཐོས། འཇམ་དཔལ་གཞོན་ནུར་གྱུར་པ་སངས་རྒྱས་བཅོམ་ལྡན་འདས་དེ་དག་གི་སྤྱན་སྔ་ན་འདུག་ཅིང་། ལྷའི་བུ་བློ་གྲོས་རབ་གནས་ཆོས་ཀྱི་རྣམ་གྲངས་འདི་ཉིད་འདྲི་བ་ལ་ཆོས་སྟོན་པ་དང་། དེ་དག་ཏུ་བྱང་ཆུབ་སེམས་དཔའ་འདུས་པ་དེ་སྙེད་དང་། ལྷའི་བུ་འདུས་པ་དེ་སྙེད་ཀྱང་མཐོང་ངོ་། །མཐོང་ནས་ཀྱང་འདི་སྙམ་དུ་འཇམ་དཔལ་གཞོན་ནུར་གྱུར་པ་འདི་དེ་ལྟར་སངས་རྒྱས་ཀྱི་ཞིང་འདི་ནས་ཀྱང་མི་གཡོ་ལ། ཐམས་ཅད་དུ་ཡང་དེ་བཞིན་ཉེ་བར་སྟོན་པ་ནི་ངོ་མཚར་ཏོ། །ངོ་མཚར་ཏོ་སྙམ་དུ་ངོ་མཚར་དང་ལྡན་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག། འདི་ལྟ་སྟེ། དཔེར་ན། སྒྱུ་མ་མཁན་ནི་སྒྱུ་མ་ཤིན་ཏུ་བསླབས་པའི་ཕྱིར་སྟན་ལས་ཀྱང་མི་གཡོ་ལ་གཟུགས་རྣམ་པ་སྣ་ཚོགས་དག་ཀྱང་སྟོན་པར་བྱེད་དོ། །དེ་བཞིན་དུ་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ལེགས་པར་བསླབས་པ་ཡང་སྒྱུ་མ་ལྟ་བུའི་ཆོས་རྣམས་ལ་སངས་རྒྱས་ཀྱི་ཞིང་ཇི་སྙེད་དུ་དེ་བཞིན་ཉེ་བར་སྟོན་པར་འདོད་པ་དེ་སྙེད་དུ་སྤྲུལ་པ་དག་སྤྲུལ་པར་བྱེད་དོ། །དེ་ཅིའི་ཕྱིར་ཞེ་ན། འདི་ལྟ་སྟེ། ཆོས་འདི་སྒྱུ་མ་ལྟ་བུར་རིག་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ། ཆོས་ཀྱི་རྣམ་གྲངས་འདི་ཐོས་པ་དེ་ནི་སངས་རྒྱས་འབྱུང་བ་དང་འདྲའོ། ། ཆོས་ཀྱི་རྣམ་གྲངས་འདི་ཐོས་པ་དེ་ནི་རྒྱུན་དུ་ཞུགས་པའི་འབྲས་བུ་དང་འདྲའོ། །ཆོས་ཀྱི་རྣམ་གྲངས་འདི་ཐོས་པ་དེ་ནི་ལན་གཅིག་ཕྱིར་འོང་བའི་འབྲས་བུ་དང་འདྲའོ། །ཆོས་ཀྱི་རྣམ་གྲངས་འདི་ཐོས་པ་དེ་ནི་ཕྱིར་མི་འོང་བའི་འབྲས་བུ་དང་འདྲའོ། །ཆོས་ཀྱི་རྣམ་གྲངས་འདི་ཐོས་པ་དེ་ནི་དགྲ་བཅོམ་པ་ཉིད་དང་འདྲ་སྟེ། འཇམ་དཔལ། ཆོས་ཀྱི་རྣམ་གྲངས་འདི་ལ་མོས་ཤིང་ཡིད་ཆེས་པ་དང་། བྱང་ཆུབ་ཀྱི་སྙིང་པོ་ལ་འདུག་པ་གང་ཡིན་པ་དེ་ནི་འདྲ་བ་ཡིན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས། དེ་དེ་བཞིན་ལགས་ཏེ། དེ་ནི་སྟོང་པ་ཉིད་ཇི་ལྟ་བ་དེ་ལྟར་འདྲ་བ་ལགས་སོ། །དེ་ནི་མཚན་མ་མ་མཆིས་པ་ཅི་ལྟ་བ་དེ་ལྟར་འདྲ་བ་ལགས་སོ། །དེ་ནི་སྨོན་པ་མ་མཆིས་པ་ཅི་ལྟ་བ་དེ་ལྟར་འདྲ་བ་ལགས་སོ། །དེ་ནི་དེ་བཞིན་ཉིད་ཇི་ལྟ་བ་དེ་ལྟར་འདྲ་བ་ལགས་སོ། །དེ་ནི་ཆོས་ཀྱི་དབྱིངས་ཅི་ལྟ་བ་དེ་ལྟར་འདྲ་བ་ལགས་སོ། །དེ་ནི་ཡང་དག་པའི་མཐའ་ཇི་ལྟ་བ་དེ་ལྟར་འདྲ་བ་ལགས་སོ། །དེ་ནི་མཉམ་པ་ཉིད་ཅི་ལྟ་བ་དེ་ལྟར་འདྲ་བ་ལགས་སོ|་|དེ་ནི་རྣམ་པར་གྲོལ་བ་ཅི་ལྟ་བ་དེ་ལྟར་འདྲ་བ་ལགས་སོ། །དེ་ནི་དབེན་པ་ཅི་ལྟ་བ་དེ་ལྟར་འདྲ་བ་ལགས་སོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཀྱི་རྣམ་གྲངས་འདི་ཅི་ནས་ཀྱང་མ་འོངས་པའི་དུས་ལྔ་བརྒྱ་ཐ་མར་གྱུར་པ་ན་སྤྱོད་པར་འགྱུར་ཞིང་། རིགས་ཀྱི་བུ་དང་རིགས་ཀྱི་བུ་མོ་དག་གི་རྣ་ལམ་དུ་གྲགས་པར་འགྱུར་བ་དེ་ལྟར་དེ་བཞིན་གཤེགས་པས་བྱིན་གྱིས་བརླབ་ཏུ་གསོལ། དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ལྷ་དང་མི་རྣམས་ཀྱི་རོལ་མོའི་སྒྲ་གང་ཇི་སྙེད་པ་དེ་ཐམས་ཅད་མ་དཀྲོལ་བར་སྒྲ་གྲག་ཅིང་། ཤིང་ལྗོན་པ་ཐམས་ཅད་ལས་ཀྱང་མེ་ཏོག་སྣ་ཚོགས་དག་རབ་ཏུ་རྒྱས་ལ་ལྷགས་པར་གྱུར་ཏོ། །རྫིང་བུ་དག་ནས་ཀྱང་པདྨ་མང་པོ་རབ་ཏུ་འཐོན་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་རབ་ཏུ་གཡོས་ཤིང་སྣང་བ་ཆེན་པོས་ཁྱབ་པར་གྱུར་ནས་ཉི་མ་དང་ཟླ་བ་འདི་དག་ཀྱང་མི་སྣང་བར་གྱུར་ཏོ། །ལྷ་བྱེ་བ་འབུམ་ཕྲག་མང་པོ་དག་ཀྱང་དགའ་ཞིང་མགུ་ལ་ཡི་རངས་ཏེ། སྟེང་གི་བར་སྣང་ལ་འཁོད་ནས་མེ་ཏོག་གི་ཆར་དག་མངོན་པར་རབ་ཏུ་འབེབས་ཤིང་། ཕྱེ་མ་དང་། སྤོས་དང་། མེ་ཏོག་ཕྲེང་དང་། བྱུག་པའི་ཆར་དག་ཀྱང་མངོན་པར་རབ་ཏུ་འབེབས་སོ། །སིལ་སྙན་དག་ཀྱང་རབ་ཏུ་གསལ་ཞིང་ལྷའི་གླུ་དབྱངས་མང་པོ་དག་ཀྱང་བསྒྲགས་ནས་ཐམས་ཅད་ཀྱི་ཐལ་མོ་སྦྱར་བ་བཏུད་དེ། ཁ་མཐུན་པར་ཚིག་འདི་སྐད་ཅེས། ཨ་ལ་ལ་འཇམ་དཔལ་གཞོན་ནུར་གྱུར་པས་བསྟན་པའི་ཆོས། ཨ་ལ་ལ་ཆོས། ཨ་ལ་ལ་ཆོས། འཇིག་རྟེན་དུ་ཆོས་ཀྱི་འཁོར་ལོ་གཉིས་པ་བསྐོར་བ་ཡང་མཐོང་ངོ་། །སེམས་ཅན་གང་དག་གིས་ཆོས་ཀྱི་རྣམ་གྲངས་འདི་ཐོས་པ་དང་། ཐོས་ནས་ཀྱང་མོས་པར་འགྱུར་བ་དེ་དག་ནི། དགེ་བའི་རྩ་བ་ངན་ངོན་དང་ལྡན་པ་མ་ཡིན་ནོ། །གང་དག་གིས་ཆོས་ཀྱི་རྣམ་གྲངས་འདི་ཐོས་ནས་སྐྲག་པར་མི་འགྱུར་བ་དེ་དག་ནི། སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ་ཟབ་མོ་ལ་བཟོད་པ་ཡིན་ནོ་ཞེས་ཀྱང་སྨྲས་སོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཀྱི་རྣམ་གྲངས་འདི་བྱིན་གྱིས་བརླབ་པའི་ཕྱིར་སྔ་ལྟས་འདི་དག་བྱུང་བ་ལགས་ན། འདི་ནི་མ་འོངས་པའི་དུས་ན་སྤྱོད་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། དེ་དེ་བཞིན་ཏེ། ཆོས་ཀྱི་རྣམ་གྲངས་འདི་བྱིན་གྱིས་བརླབ་པའི་ཕྱིར་སྔ་ལྟས་བྱུང་བ་འདི་དག་ཡིན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས། ཆོས་ཀྱི་རྣམ་གྲངས་འདི་ཡུན་རིང་དུ་གནས་པར་བགྱི་བའི་སླད་དུ་བཅོམ་ལྡན་འདས་ཀྱིས་བདེན་པའི་བྱིན་གྱིས་བརླབ་པ་མཛད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། བདེན་པ་དང་བདེན་པའི་ཚིག་གང་གིས་རྣམ་པར་ཐར་པའི་སྒོ་གསུམ་ལ་བརྟེན་ནས་རྣམ་པར་གྲོལ་བའི་བདེན་པ་དང་། བདེན་པའི་ཚིག་དེས་ཆོས་ཀྱི་རྣམ་གྲངས་འདི་མ་འོངས་པའི་དུས་ལྔ་བརྒྱ་ཐ་མ་ན་སྤྱོད་པར་གྱུར་ཅིག་།འཇམ་དཔལ་གྱིས་གསོལ་པ། བཅོམ་ལྡན་འདས། བདེན་པ་དང་བདེན་པའི་ཚིག་གང་གིས་བདག་མ་མཆིས་པ་དང་། སེམས་ཅན་མ་མཆིས་པ་དང་། སྲོག་མ་མཆིས་པ་དང་། གང་ཟག་མ་མཆིས་པ་དང་། ཤེད་ལས་སྐྱེས་མ་མཆིས་པ་དང་། ཤེད་བུ་མ་མཆིས་པ་དང་། ཀུན་ནས་ཉོན་མོངས་པ་མ་མཆིས་པ་དང་། རྣམ་པར་བྱང་བ་མ་མཆིས་པའི་བདེན་པ་དང་། བདེན་པའི་ཚིག་དེས་ཆོས་ཀྱི་རྣམ་གྲངས་འདི་མ་འོངས་པའི་དུས་ལྔ་བརྒྱ་ཐ་མ་ན་སྤྱོད་པར་གྱུར་ཅིག། བཅོམ་ལྡན་འདས། བདེན་པ་དང་བདེན་པའི་ཚིག་གང་གིས་འདོད་ཆགས་མ་མཆིས་པ་དང་། ཞེ་སྡང་མ་མཆིས་པ་དང་། གཏི་མུག་མ་མཆིས་པ་དང་། མིང་མ་མཆིས་པ་དང་། གཟུགས་མ་མཆིས་པ་དང་། རྒྱུ་མ་མཆིས་པ་དང་། ལྟ་བ་མ་མཆིས་པ་དང་། སྲིད་པ་མ་མཆིས་པ་དང་། སྲིད་པ་ཡོངས་སུ་འཚལ་བ་མ་མཆིས་པ་དང་། ལུས་མ་མཆིས་པ་དང་|་ལུས་སུ་གདགས་པ་མ་མཆིས་པ་དང་། སེམས་མ་མཆིས་པ་དང་། སེམས་སུ་གདགས་པ་མ་མཆིས་པ་དང་། དྲན་པ་མ་མཆིས་པ་དང་། དྲན་པར་བགྱིད་པ་དག་མ་མཆིས་པ་དང་། དྲན་པ་ཉེ་བར་བཞག་པ་དག་མ་མཆིས་པ་དང་། གཞག་པ་མ་མཆིས་པ་དང་། ཉེ་བར་གཞག་པ་མ་མཆིས་པ་དང་། གཟུགས་མ་མཆིས་པ་དང་། ཚོར་བ་མ་མཆིས་པ་དང་། འདུ་ཤེས་མ་མཆིས་པ་དང་། འདུ་བྱེད་རྣམས་མ་མཆིས་པ་དང་། རྣམ་པར་ཤེས་པ་མ་མཆིས་པ་དང་། མིག་མ་མཆིས་པ་དང་། གཟུགས་མ་མཆིས་པ་དང་། རྣ་བ་མ་མཆིས་པ་དང་། སྒྲ་མ་མཆིས་པ་དང་། སྣ་མ་མཆིས་པ་དང་། དྲི་མ་མཆིས་པ་དང་། ལྕེ་མ་མཆིས་པ་དང་། རོ་མ་མཆིས་པ་དང་། ལུས་མ་མཆིས་པ་དང་། རེག་བྱ་མ་མཆིས་པ་དང་། ཡིད་མ་མཆིས་པ་དང་། ཆོས་མ་མཆིས་པ་དང་། འདོད་པའི་ཁམས་མ་མཆིས་པ་དང་། གཟུགས་ཀྱི་ཁམས་མ་མཆིས་པ་དང་། གཟུགས་མ་མཆིས་པའི་ཁམས་མ་མཆིས་པ་དང་། འདི་ལ་རྟག་པ་མ་མཆིས་པ་དང་། ཆད་པ་མ་མཆིས་པའི་བདེན་པ་དང་། བདེན་པའི་ཚིག་དེས་ཆོས་ཀྱི་རྣམ་གྲངས་འདི་མ་འོངས་པའི་དུས་ལྔ་བརྒྱ་ཐ་མ་ན་སྤྱོད་པར་གྱུར་ཅིག། བཅོམ་ལྡན་འདས། བདེན་པ་དང་བདེན་པའི་ཚིག་གང་གིས་རྒྱུན་དུ་ཞུགས་པ་མ་མཆིས་པ་དང་། རྒྱུན་དུ་ཞུགས་པའི་འབྲས་བུ་མ་མཆིས་པ་དང་། ལན་གཅིག་ཕྱིར་འོང་བ་མ་མཆིས་པ་དང་། ལན་གཅིག་ཕྱིར་འོང་བའི་འབྲས་བུ་མ་མཆིས་པ་དང་། ཕྱིར་མི་འོང་བ་མ་མཆིས་པ་དང་། ཕྱིར་མི་འོང་བའི་འབྲས་བུ་མ་མཆིས་པ་དང་། དགྲ་བཅོམ་པ་མ་མཆིས་པ་དང་། དགྲ་བཅོམ་པའི་ཆོས་རྣམས་མ་མཆིས་པ་དང་། རང་སངས་རྒྱས་མ་མཆིས་པ་དང་། རང་སངས་རྒྱས་ཀྱི་ཆོས་རྣམས་མ་མཆིས་པ་དང་། དེ་བཞིན་གཤེགས་པ་མ་མཆིས་པ་དང་། དེ་བཞིན་གཤེགས་པའི་ཆོས་རྣམས་མ་མཆིས་པ་དང་། སྟོབས་རྣམས་མ་མཆིས་པ་དང་། མི་འཇིགས་པ་རྣམས་མ་མཆིས་པ་དང་། ཡེ་ཤེས་མ་མཆིས་པ་དང་། རྣམ་པར་ཤེས་པ་མ་མཆིས་པ་དང་། སྟོང་པ་ཉིད་མ་མཆིས་པ་དང་། མཚན་མ་མ་མཆིས་པ་མ་མཆིས་པ་དང་། སྨོན་པ་མ་མཆིས་པ་མ་མཆིས་པ་དང་། འདོད་ཆགས་དང་བྲལ་བ་ཉིད་མ་མཆིས་པ་དང་། རང་བཞིན་མ་མཆིས་པ་དང་། འཐོབ་པ་མ་མཆིས་པ་དང་། མངོན་སུམ་དུ་བགྱི་བ་མ་མཆིས་པ་དང་། མངོན་པར་རྟོགས་པ་མ་མཆིས་པ་དང་། རིགས་པ་མ་མཆིས་པ་དང་། རྣམ་པར་གྲོལ་བ་མ་མཆིས་པ་དང་། འགྲམ་མ་མཆིས་པ་དང་། ཕ་རོལ་མ་མཆིས་པ་དང་། ཚུ་རོལ་མ་མཆིས་པ་དང་། ཐར་པ་མ་མཆིས་པ་དང་། མིང་མ་མཆིས་པ་དང་། མིང་དུ་གདགས་པ་མ་མཆིས་པའི་བདེན་པ་དང་བདེན་པའི་ཚིག་དེས་ཆོས་ཀྱི་རྣམ་གྲངས་འདི་མ་འོངས་པའི་དུས་ལྔ་བརྒྱ་ཐ་མ་ན་སྤྱོད་པར་གྱུར་ཅིག་།བཅོམ་ལྡན་འདས། བདེན་པ་དང་བདེན་པའི་ཚིག་གང་གིས་ཆོས་བསྟན་པ་འདིས་འགའ་ཡང་མ་སྦྱར། མི་གྲོལ། མི་སྦྱོར། མི་གྲོལ་བའི་བདེན་པ་དང་བདེན་པའི་ཚིགས་དེས་ཆོས་ཀྱི་རྣམ་གྲངས་འདི་མ་འོངས་པའི་དུས་ལྔ་བརྒྱ་ཐ་མ་ན་སྤྱོད་པར་གྱུར་ཅིག་|བཅོམ་ལྡན་འདས། བདེན་པ་དང་བདེན་པའི་ཚིག་གང་གིས་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་སེམས་ཅན་འགའ་ཡང་མ་བཀྲོལ། ཡོངས་སུ་མྱ་ངན་ལས་མ་བཟླས། དེ་དག་གིས་སེམས་ཅན་འགའ་ཡང་མ་བརྙེས། མ་བཤིག། ཆོས་འགའ་ཡང་མ་བསྐྱེད། མ་བགག། རྣམ་པར་མ་བཤིག་།མ་བསྐྱོད་པ་དང་། མ་འོངས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་སེམས་ཅན་འགའ་ཡང་གྲོལ་བར་མི་འགྱུར། ཡོངས་སུ་མྱ་ངན་ལས་ཟློ་བར་མི་འགྱུར། དེ་དག་གིས་སེམས་ཅན་འགའ་ཡང་བརྙེས་པར་མི་འགྱུར། འཇིག་པར་མི་འགྱུར། ཆོས་འགའ་བསྐྱེད་པར་མི་འགྱུར། འགོག་པར་མི་འགྱུར། རྣམ་པར་འཇིག་པར་མི་འགྱུར། བསྐྱོད་པར་མི་འགྱུར་པ་དང་། ད་ལྟར་བྱུང་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་སེམས་ཅན་འགའ་ཡང་མི་འགྲོལ། ཡོངས་སུ་མྱ་ངན་ལས་མི་བཟློ། དེ་དག་སེམས་ཅན་འགའ་ཡང་མི་བརྙེས། མི་འཇིག། ཆོས་འགའ་ཡང་མི་བསྐྱེད། མི་འགོག་།རྣམ་པར་མི་འཇིག་།མི་བསྐྱོད་པའི་བདེན་པ་དང་བདེན་པའི་ཚིག་དེས་ཆོས་ཀྱི་རྣམ་གྲངས་འདི་མ་འོངས་པའི་དུས་ལྔ་བརྒྱ་ཐ་མ་ན་སྤྱོད་པར་གྱུར་ཅིག་། བཅོམ་ལྡན་འདས། བདེན་པ་དང་བདེན་པའི་ཚིག་གང་གིས་ཆོས་བསྟན་པ་འདི་ལ་ཅུང་ཟད་ཀྱང་མ་སྨྲས། མ་བརྗོད། མ་བཤད། མ་བསྟན། མ་བརྟགས། མ་བསྒྲགས། མ་བསྙད། མ་སྨོས། མ་བཟླས་ཤིང་། ཆོས་བསྟན་པ་འདི་ལ་ཡི་གེ་གཅིག་ཀྱང་མ་བརྗོད་ལ། ཆོས་བསྟན་པ་འདི་གང་གིས་ཀྱང་མ་མཉན། འགའ་ཡང་ཉན་པར་མི་འགྱུར། འགའ་ཡང་རྣམ་པར་གྲོལ་བར་མི་འགྱུར་བའི་བདེན་པ་དང་བདེན་པའི་ཚིག་དེས་ཆོས་ཀྱི་རྣམ་གྲངས་འདི་མ་འོངས་པའི་དུས་ལྔ་བརྒྱ་ཐ་མ་ན་འཛམ་བུའི་གླིང་ན་སྤྱོད་པར་གྱུར་ཅིག། བཅོམ་ལྡན་འདས། བདེན་པ་དང་བདེན་པའི་ཚིག་གང་གིས་འདི་ལ་ཚུལ་ཁྲིམས་མ་མཆིས་པ་དང་། ཚུལ་ཁྲིམས་ཀྱི་འབྲས་བུ་མ་མཆིས་པ་དང་། ཏིང་ངེ་འཛིན་མ་མཆིས་པ་དང་། ཏིང་ངེ་འཛིན་གྱི་གནས་མ་མཆིས་པ་དང་། ཤེས་རབ་མ་མཆིས་པ་དང་། ཤེས་རབ་ཀྱི་དབང་པོ་མ་མཆིས་པ་དང་། རྣམ་པར་གྲོལ་བ་མ་མཆིས་པ་དང་། རྣམ་པར་གྲོལ་བའི་ཡེ་ཤེས་མ་མཆིས་པའི་བདེན་པ་དང་། བདེན་པའི་ཚིག་དེས་ཆོས་ཀྱི་རྣམ་གྲངས་འདི་མ་འོངས་པའི་དུས་ལྔ་བརྒྱ་ཐ་མ་ན་འཛམ་བུའི་གླིང་ན་སྤྱོད་པར་གྱུར་ཅིག། བཅོམ་ལྡན་འདས། བདེན་པ་དང་བདེན་པའི་ཚིག་གང་གིས་བྱང་ཆུབ་སེམས་དཔའ་སྦྱིན་པ་སྩོལ་བར་མི་བགྱིད། ཚུལ་ཁྲིམས་བསྲུང་བར་མི་བགྱིད། བཟོད་བ་སྒྲུབ་པར་མི་བགྱིད། བརྩོན་འགྲུས་རྩོམ་པར་མི་བགྱིད། བསམ་གཏན་རྣམས་སྒོམ་པར་མི་བགྱིད། ཤེས་རབ་སྤྱོད་པར་མི་བགྱིད། བྱང་ཆུབ་དོན་དུ་གཉེར་བར་མི་བགྱིད། ཡང་དག་པ་ལ་འཇུག་པར་མི་བགྱིད། བྱང་ཆུབ་ཐོབ་པར་མི་བགྱིད། སྟོབས་རྣམས་ཐོབ་པར་མི་བགྱིད། མི་འཇིགས་པ་རྣམས་ཐོབ་པར་མི་བགྱིད། དབང་པོ་རྣམས་ཐོབ་པར་མི་བགྱིད། སོ་སོ་ཡང་དག་པར་རིག་པ་རྣམས་ཐོབ་པར་མི་བགྱིད། ཆོས་ཀྱི་འཁོར་ལོ་སྐོར་བར་མི་བགྱིད། སེམས་ཅན་གྲོལ་བར་མི་བགྱིད། སྨྲ་བར་མི་བགྱིད་པའི་བདེན་པ་དང་། བདེན་པའི་ཚིག་དེས་ཆོས་ཀྱི་རྣམ་གྲངས་འདི་མ་འོངས་པའི་དུས་ལྔ་བརྒྱ་ཐ་མ་ན་འཛམ་བུའི་གླིང་དུ་སྤྱོད་པར་གྱུར་ཅིག་། དེ་ནས་དེའི་ཚེ་སྟོང་གསུམ་གྱིས་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་བར་ཏུ་གཡོས་པར་གྱུར་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས། འཇིག་རྟེན་དུ་དོག་ས་ཆེར་གཡོས་པར་གྱུར་པ་འདིའི་རྒྱུ་ནི་གང་ལགས་།རྐྱེན་ནི་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་བྱམས་པ་ལ་འདི་སྐད་ཅེས་བཀའ་སྩལ་ཏོ། །བྱམས་པ། དམན་པ་ལ་མོས་པའི་སེམས་ཅན་འདི་དག་འཛིན་པར་མི་འགྱུར་ན་མ་ལེགས་ཀྱི་ཐོང་ཞིག། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་བྱམས་པས་འདི་སྐད་ཅེས་གསོལ་ཏོ། ། བཅོམ་ལྡན་འདས། སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། ལྷ་དང་མི་རྣམས་ཀྱི་དོན་གྱི་སླད་དུ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། བྱམས་པ། ཆོས་ཀྱི་རྣམ་གྲངས་འདི་ནི་ས་ཕྱོགས་འདི་ཉིད་དུ་སངས་རྒྱས་བྱེ་བ་ཁྲག་ཁྲིག་འབུམ་ཕྲག་བདུན་ཅུ་རྩ་བཞིས་བསྟན་ཏེ། ཐམས་ཅད་དུ་ཡང་འཇམ་དཔལ་གཞོན་ནུར་གྱུར་པ་དང་། ལྷའི་བུ་བློ་གྲོས་རབ་གནས་ཀྱིས་ཞུས་སོ། །བྱམས་པས་གསོལ་པ། བཅོམ་ལྡན་འདས། འཇམ་དཔལ་གཞོན་ནུར་གྱུར་པ་དང་། ལྷའི་བུ་བློ་གྲོས་རབ་གནས་ཀྱིས་རྣམ་གྲངས་འདི་ཐོས་ནས་ཇི་སྲིད་ཅིག་ལགས། བཅོམ་ལྡན་འདས་ཀྱིས་བཀའ་སྩལ་པ། བྱམས་པ། རིགས་ཀྱི་བུ་འདི་དག་གིས་བསྐལ་པ་གྲངས་མེད་པ་ཕྲག་འབུམ་འདས་པ་ནས། དེ་བཞིན་གཤེགས་པ་ཀུན་ནས་མེ་ཏོག་མངོན་པར་འཕགས་པ་སེངྒེའི་རྩལ་གྱི་ཡོན་ཏན་ཕུང་པོ་ཞེས་བྱ་བ་ལས་ཆོས་ཀྱི་རྣམ་གྲངས་འདི་ཐོས་སོ། །ཆོས་ཀྱི་རྣམ་གྲངས་འདི་བཤད་པ་ན། སེམས་ཅན་གངྒཱའི་ཀླུང་གི་བྱེ་མ་སྙེད་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །དེའི་ཉིས་བསྒྱུར་སྙེད་ཀྱིས་ནི་ཕྱིར་མི་ལྡོག་པའི་བཟོད་པ་ཐོབ་བོ། །དེའི་ཉིས་བསྒྱུར་སྙེད་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་དགེ་སློང་དེ་དག་དང་། འཇམ་དཔལ་གཞོན་ནུར་གྱུར་པ་དང་། ལྷའི་བུ་བློ་གྲོས་རབ་གནས་དང་། ཇི་ལྟར་འདུས་པའི་བྱང་ཆུབ་སེམས་དཔའ་དེ་དག་དང་། ལྷའི་བུ་དེ་དག་དང་། ཚེ་དང་ལྡན་པ་ཤཱ་རིའི་བུ་དང་། གནས་བརྟན་འོད་སྲུང་ཆེན་པོ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། ལྷའི་བུ་བློ་གྲོས་རབ་གནས་ཀྱི་ཞུས་པ་ཞེས་བྱ་བའི་ལེའུ་སྟེ། འདུས་པ་སུམ་ཅུ་རྩ་དྲུག་པ་རྫོགས་སོ||་||རྒྱ་གར་གྱི་མཁན་པོ་སུ་རེནྡྲ་བོ་དྷི་དང་། པྲ་ཛྙཱ་ཝརྨ་དང་། ཞུ་ཆེན་གྱི་ལོ་ཙྪ་བ་ཞང་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།

CLOSE WINDOW