Wylie

e-texts based on the ACIP/ALL Input

།འཕགས་པ་ལས་ཀྱི་སྒྲིབ་པ་ཐམས་ཅད་རྣམ་པར་སྦྱོང་བ་ཞེས་བྱ་བའི་གཟུངས་རྫོགས་སོ།། །།རྒྱ་གར་སྐད་དུ། ཨཱཪྱ་བིདྱཱ་ཨུཏྟ་མ་མཧཱ་ཏནྟྲ|་བོད་སྐད་དུ། འཕགས་པ་རིག་པ་མཆོག་གི་རྒྱུད་ཆེན་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན|་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་ཨ་རྡོ་རྗེ་རིག་པ་བྱེ་བ་ཕྲག་དུ་མས་བསྐོར་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བར་སྣང་ལས་བབས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འདུག་གོ་། དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ཀྱང་རིག་པ་བྱེ་བ་དུ་མས་ཡ་ཨོངས་སུ་བསྐོར་ནས་འཁོར་དེ་ཉིད་དུ་འདུས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འདུག་གོ་། དེ་ནས་འབྱུང་པོའི་བདག་པོ་དབང་ལྡན་འབྱུང་པོ་བྱེ་བ་ཕྲག་དུ་མས་བསྐོར་ནས་འཁོར་དེ་ཉིད་དུ་འདུས་པར་གྱུར་ཏེ་བཅོམ་ལྡན་འདས་ཀྱི་ཞབས་དང་། ཕྱག་ན་རྡོ་རྗེ་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ་། དེ་ནས་གདོལ་པའི་རྒྱལ་པོ་ཕུར་བུ་གསུམ་པ་ཡང་འཁོར་དེ་ཉིད་དུ་འདུས་པར་གྱུར་ཏོ། །རྒྱལ་པོ་ཆེན་པོ་བ་ཞི་ཡང་གཡོག་འཁོར་བྱེ་བ་ཕྲག་དུ་མས་ཀུན་ནས་བསྐོར་ཏེ་འཁོར་དེ་ཉིད་དུ་འདུས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ་། དེ་ནས་བྱང་ཆུབ་སེམས་དཔའ་ལག་ན་རྡོ་རྗེས་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། སེམས་ཅན་ཐམས་ཅད་ཀྱི་དོན་གྱི་སླང་དུ་བདག་གསང་སྔགས་ཀྱི་ཚིག་འཆད་པར་གནང་བ་མཛད་དུ་གསོལ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ|་ཁྱོད་ནི། ཤིན་ཏུ་མ་རུངས་པ། ལག་ན་རྡོ་རྗེ། ཁྱོད་ནི། ཤིན་ཏུ་བརྩམ་པ་མེད་པ། ཤིན་ཏུ་གཏུམ་པ་ཡིན་ན། ཇི་ལྟར་སེམས་ཅན་རྣམས་ཀྱི་དོན་གྱི་ཕྱིར་གསང་སྔགས་འཆང་། ལག་ན་རྡོ་རྗེ། ཁྱོད་ནི། དམ་ཚིག་ཤེས་པ་ཡིན་ལ། སེམས་ཅན་གང་དག་དམ་ཚིག་མི་ཤེས་པར་བརྗོད་པ་རྣམས་ནི། རྡོ་རྗེས་མཐར་བྱེད་པ་ཡིན་ན། ཁྱོད་ཇི་ལྟར་གསང་སྔགས་འཆང་། གསོལ་པ། བཅོམ་ལྡན་འདས། དེ་དེ་ལྟ་ལགས་མོད་ཀྱི། བཅོམ་ལྡན་འདས། གང་དག་རིག་པ་མཆོག་འདིའི་དོན་འདོན་པ་དང་། འཆང་བ་དང་། མཆོད་པ་བགྱིས་པ་དེ་དག་ནི། བདག་གི་དམ་ཚིག་འཚལ་བ་ལགས། བདག་གི་དཀྱིལ་འཁོར་དུ་ཞུགས་པ་ལགས་པས། བཅོམ་ལྡན་འདས་ཀྱིས་གནང་བར་མཛད་དུ་གསོལ། དེ་ནས་བཅོམ་ལྡན་འདས་ལ་གནོད་སྦྱིན་གྱི་བདག་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གི་ཡི་གེ་བཞི་པ་ཞེས་བགྱི་བ་འདི་ནི། རིག་པའི་ཚོགས་ཐམས་ཅད་ཀྱི་སྙིང་པོར་གྱུར་པ། ལས་མང་པོ་རབ་ཏུ་སྒྲུབ་པ། སྟོབས་དང་ཕ་རོལ་གནོན་པ་དཔག་ཏུ་མ་མཆིས་པ། བསྟན་པ་ཐོགས་པ་མ་མཆིས་པ་སྟེ། བཅོམ་ལྡན་འདས་རིག་པའི་རྒྱལ་པོ་བཤད་པར་བགྱིའོ། །ཀྱེ་ཀྱེ་ལྷ་ཡུལ་དང་། ས་དང་། ཆུ་ལ་གནས་པའི་འབྱུང་པོའི་ཚོགས་རྣམས། ཁྱེད་ཡིད་རྩེ་གཅིག་ཏུ་གྱིས་ལ་ཉོན་ཅིག་།རྡོ་རྗེས་མགོ་བཀས་པར་གྱུར་ཏ་རེ། དེ་ནས་ལག་ན་རྡོ་རྗེས་རང་གི་རིག་པའི་ཚོགས་ལ་བལྟས་ནས་གསང་སྔགས་སྨྲས་པ། ན་མོ་རཏྣ་ཏྲ་ཡ་སྱ། ན་མཤྩཎྜ་བཛྲ་པཱ་ཎི་སྱ། མ་ཧཱ་ཡཀྵ་སེ་ནཱ་པ་ཏི་སྱ། མ་ཧཱ་ཤཱཀྱ་སཾ་བུདྡྷཱ་ཡ། བིརླི། ཀིརླི། མིརླི། ཧིརླི། བིདྱུ་ཏ་ཏ་མ་ཡརྩི་ནི་མི་ལི་སྭཱཧཱ། དེ་ནས་ཐམས་ཅད་དང་ལྡན་པའི་འཁོར་དེ་འདར་ཡེད་ཡེད་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་ལ་བསྐྱབ་ཏུ་གསོལ། བདེ་བར་གཤེགས་པ། བདག་ཅག་ལ་བསྐྱབ་ཏུ་གསོལ། དེ་ནས་གནོད་སྦྱིན་གྱི་དབང་པོ་ལག་ན་རྡོ་རྗེས་ཐམས་ཅད་དང་ལྡན་པའི་འཁོར་ལ་གྲོགས་པོ་དག་མ་འཇིགས་ཤིག་། མ་འཇིགས་ཤིག་།རིག་པའི་རྒྱལ་པོ་དྲན་པར་གྱིས་ཤིག་ཅེས་དབུགས་ཕྱུང་ངོ་། །དེ་ནས་ཐམས་ཅད་དང་ལྡན་པའི་འཁོར་དེ་ངོ་མཚར་དུ་གྱུར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་ལག་ན་རྡོ་རྗེ་འདི་ལྟ་བུའི་གསང་སྔགས་ཀྱི་ཚིག་དག་འཆད་པ་ནི། ངོ་མཚར་ཏོ། །བཅོམ་ལྡན་འདས། བདག་ཅག་ནི། རིག་པའི་རྒྱལ་པོ་གང་ན་གནས་པ་དེར་མཆོད་པར་འཚལ་ལོ། ། སུ་ཀློག་པ་དང་། མཆོད་པར་བགྱིད་པ་དང་། སྒྲུབ་པའི་རིག་སྔགས་འཆང་དེའི་བརྩོན་པ་བསྐྱེད་པར་བགྱིའོ། །བཀའ་སྩལ་པ། རིགས་ཀྱི་བུ་དག་།དེ་དེ་བཞིན་ཏེ། དེ་དེ་བཞིན་ནོ། །དེ་ནས་རིག་པའི་རྒྱལ་པོའི་ལས་ནི། འདི་ལགས་ཏེ། སྲད་བུའམ། ཐལ་བའམ། ཆུ་ལ་ལན་གཅིག་བརྗོད་པས་སྲུང་བར་འགྱུར་རོ། །རིག་སྔགས་བཅད་ན། མཚོན་རྣོན་པོ་ལ་ལན་གཉིས་བརྗོད་དེ་རྩཝ་ཀུ་ཤ་བཅད་དོ། །ཡང་ན་ས་དྲའོ། །དེ་ལྟར་ན་རིག་སྔགས་ཐམས་ཅད་བཅད་པར་འགྱུར་རོ། །ལན་གསུམ་བརྗོད་ན། རིགས་སྔགས་ཚང་བར་འགྱུར་ཏེ། མར་གྱི་ངོ་ཞག་བརྒྱད་ལ་འཕགས་པ་ལག་ན་རྡོ་རྗེའི་མདུན་དུ་མཆོད་པ་བགྱིས་ལ་རིག་སྔགས་གང་ཡི་གེ་མ་ཚང་པའམ། དྲན་པ་ཉམས་པ་དེ་ལན་བརྒྱ་རྩ་བརྒྱད་བརྗོད་དེ་རིག་པའི་མཆོག་གི་སྙིང་པོ་དང་ལྷན་ཅིག་ཏུ་ལན་གསུམ་བརྗོད་ན། རྨི་ལམ་དུ་སྟོན་ཏོ། །ཅི་སྟེ་ལས་བཅང་པར་གྱུར་ན། རྩཝ་ཀུ་ཤས་བྱབ་པར་བྱ་སྟེ|་རྫོགས་པར་འགྱུར་རོ། །ལག་ན་རྡོ་རྗེའི་མདུན་དུ་ལན་བཞི་བརྗོད་ན། དགེ་བ་དང་མི་དགེ་བ་སྟོན་པར་འགྱུར་རོ། །ཅི་འདོད་པ་ཡིད་བཞིན་དུ་སྦྱོར་བ་བགྱིས་ན། ལས་རྣམས་སུ་འགྱུར་རོ། །གདོན་ཚར་བཅད་ན། ཐལ་བའམ། ཆུའམ། དུར་ཁྲོད་ཀྱི་སོལ་བས་བསྣུན་ནོ། །ཡང་ན་གཟུགས་བགྱིས་ཏེ་ལྕུག་མས་བཞུས་ན། གཏོང་བར་འགྱུར་རོ། །ཡང་ན་ས་ལ་གཟུགས་བགྱིས་ཏེ་དུར་ཁྲོད་ཀྱི་སོལ་བས་ལག་མཐིལ་ལ་རྡོ་རྗེ་བྲིས་ཏེ་ལག་པས་བཀབ་ན། གཏོང་བར་འགྱུར་རོ། །སྐུད་པ་ལ་མདུད་པ་བོར་བ་རྣམས་ཀྱིས་རིག་སྔགས་བཅིང་ངོ་། །མཁའ་འགྲོ་མ་རྣམས་བཅད་པར་བགྱི་ན། ཡུངས་ཀར་དག་ལ་ལན་བདུན་བདུན་བསྔགས་ཏེ་བསྣུན་ན་མཁའ་འགྲོ་མ་ཐམས་ཅད་མ་རུངས་པར་འགྱུར་རོ། །དབབ་པར་བགྱི་ན། རྣ་བར་བཟླས་བརྗོད་བགྱིའོ། །ཡང་ན་ཙནྡན་དམར་པོས་དཀྱིལ་འཁོར་བྱུགས་ལ་རྡོ་རྗེ་རྩེ་ལྔ་པ་བྲིས་ཏེ་གུ་གུལ་གྱིས་བདུག་པ་དང་། མེ་ཏོག་རྣམས་ཀྱིས་དབབ་བོ། །ཕྱག་རྒྱ་གཞིག་ན། ཆུའམ། ཐལ་ལྕག་གམ། སོ་ཕག་གི་དུམ་བུ་རྣམས་ཀྱིས་སོ། །དུག་ལས་གསོ་ན། ཆུའམ། རྨ་བྱའི་མདོངས་སམ། ཆུ་དྲིའམ། མེ་ལོང་གིས་སོ། །མར་གྱི་ངོ་ཞག་བཅུ་བཞི་ནས་ལག་ན་རྡོ་རྗེའི་མདུན་དུ་ཞག་གསུམ་སྨྱུང་བར་བྱས་ལ་བརྒྱད་སྟོང་བཟླས་བརྗོད་བགྱིའོ། །དེ་ནས་བཅོམ་ལྡན་འདས་ལག་ན་རྡོ་རྗེས་དམ་པ་སྩོལ་བར་འགྱུར་ཏེ། དེའི་འོག་ཏུ་དུག་གསོ་བ་ལ་སོགས་པ་དང་། ལས་གཞན་རྣམས་ཀྱང་བགྱིའོ། །གལ་ཏེ་མཁའ་འགྲོ་མ་རྣམས་ཤིན་ཏུ་བཅད་པར་འཚལ་ན། དེ་ནས་ལག་ན་རྡོ་རྗེའི་མདུན་དུ་འབྲས་ཀྱི་ཟེགས་མས་ལན་བརྒྱ་སྟོང་སྦྱིན་སྲེག་བགྱིས་ན། ལག་ན་རྡོ་རྗེས་ཇི་སྐད་བཤད་པ་བཞིན་དུ་ཚེ་ཇི་ཙམ་ཐུབ་པར་རིག་སྔགས་ཐམས་ཅད་མ་རུངས་པར་འགྱུར་རོ། །སེང་ལྡེང་གི་རྡོ་རྗེ་བགྱིས་ཏེ་རིག་སྔགས་འཆང་གི་མིང་ནས་བརྗོད་ལ་ས་ལ་ལན་གཅིག་བཙུགས་ན་བཤིག་པར་འགྱུར་ཏེ། དེ་ཕྱིན་ཆད་རིག་སྔགས་འཆང་དེའི་གསང་སྔགས་རྣམས་མི་འཇུག་གོ་།རིག་སྔགས་གཅད་པར་བགྱི་འཚལ་ན། རིག་སྔགས་འཆང་གི་གཟུགས་བགྱིས་པ་བཅད་ན། བཅད་པ་བགྱིས་པར་འགྱུར་རོ། །རིག་སྔགས་བཤིག་པར་བགྱིད་འཚལ་བས་རིག་སྔགས་དེ་རིག་པ་མཆོག་གི་སྙིང་པོ་དང་ལྷན་ཅིག་བརྗོད་ན། རིག་སྔགས་ཐམས་ཅད་བཤིག་པར་འགྱུར་ཏེ། ལས་མི་བགྱིད་དོ། །རིག་པ་འགུགས་པར་འཚལ་བས་མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ལ་ལག་ན་རྡོ་རྗེའི་མདུན་དུ་མཆོད་པར་བགྱིས་ཏེ་རིག་པ་མཆོག་གི་སྙིང་པོ་དང་ལྷན་ཅིག་ལན་བརྒྱ་སྟོང་བཟླས་བརྗོད་བགྱིས་ན། རིག་པ་འགུགས་ཏེ། ཕྱིས་རིག་པ་སྒྲུབ་བོ། །རིག་པ་ཉམས་པར་བགྱིས་ན། བཟླས་བརྗོད་བྱས་པས་ཆོ་ག་སྟེ། ཆེ་གེ་མོའི་རིག་པ་ལ་གནོད་པ་མཛོད་ཅིག་ཅེས་བགྱིས་ན། རིག་པ་དེ་ལས་མི་བགྱིད་དོ། །རིག་པ་ཚར་གཅད་པར་བགྱི་ན། ཐལ་བ་ལ་གཟུགས་བགྱི་སྟེ། རིག་པ་མཆོག་གི་སྙིང་པོ་དང་ལྷན་ཅིག་བརྗོད་ལ་རྐང་པ་གཡོན་པས་ཀྱང་ཕྱིས་ན། རིག་པ་སྨད་པ་དང་། ཉམས་པར་འགྱུར་ཏེ། ལས་མི་བགྱིད་དོ། །གལ་ཏེ་རིག་སྔགས་འཆང་གཞིག་པར་འཚལ་ན། ལག་ན་རྡོ་རྗེའི་མདུན་དུ་རིག་སྔགས་འཆང་གི་མིང་ནས་བརྗོད་དེ་མར་མེའི་སྙིང་པོ་མེ་ལྕེ་དང་བཅས་པ་བདུན་སྦྱིན་སྲེག་བགྱིས་ན། རིག་སྔགས་འཆང་བ་བཤིག་པར་འགྱུར་ཏེ། བསོད་ནམས་ཀྱང་འཇིག་གོ་།སྲོག་ཀྱང་འཇིག་གོ་།རིག་སྔགས་འཆང་དེའི་ཚེ་ཇི་ཙམ་པར་གསང་སྔགས་རྣམས་མི་འགྲུབ་བོ། །སླར་གསོ་བར་བགྱི་ན། མ་ལ་ཏའི་མེ་ཏོག་མར་ལ་སྨྱུགས་པའི་སྦྱིན་སྲེག་བགྱི་བ་ལན་ཉི་ཤུ་རྩ་གཅིག་ལག་ན་རྡོ་རྗེའི་མདུན་དུ་སྦྱིན་སྲེག་བགྱི་ན་རིག་པ་འགྲུབ་བོ། །ལས་འདི་དག་ནི། མ་བསྒྲུབས་ཀྱང་བགྱིད་དོ། །ཅི་སྟེ་བགྱིད་འཚལ་ན། རི་ལ་འཛེགས་ཏེ་ཁ་ཟས་འོ་སྐྱོ་འཐུང་ཞིང་ལན་འབུམ་བཟླས་བརྗོད་བགྱིས་ན་རིག་པའི་རྒྱལ་པོའི་མཆོག་རང་གི་གཟུགས་སུ་མཐོང་བར་འགྱུར་ཏེ། དེ་ལ་བུ་ཅི་བྱ་ཞེས་གསུང་བར་འགྱུར་རོ། །དེ་ནས་བཅོམ་ལྡན་འདས། ལས་ཐམས་ཅད་མཛད་དུ་གསོལ་ཞེས་བརྗོད་པར་བགྱིའོ། །དེ་བཞིན་དུ་གྱུར་ཅིག་ཅེས་བརྗོད་ནས་མི་སྣང་བར་འགྱུར་རོ། །དེ་ནས་ཡིད་ཀྱིས་བཟླས་བརྗོད་བགྱིས་ན། རིག་སྔགས་འཆང་ཡང་འགུག་གོ། གྲོག་མཁར་གྱི་ས་ལས་སྦྲུལ་བགྱིས་ཏེ་སྔགས་ཀྱིས་བཏབ་ན། ཀླུ་ཐམས་ཅད་འཆིའོ། །དབང་དུ་ཡང་འགྱུར་རོ|་|གསག་མ་ལ་ལན་བདུན་བསྔགས་ཏེ་མཚོར་བོར་ན། མཚོ་སྐམ་པར་འགྱུར་རོ། །འབབ་ཆུ་ཆེན་པོར་བོར་ན། འབབ་ཆུ་ཆེན་པོ་སྐམ་པར་འགྱུར་རོ། །གང་དུ་བོར་བ་དེ་སྐམ་པར་འགྱུར་རོ། །བདག་གི་རིག་པའི་རྒྱལ་པོ་འདི་ནི། རིག་པའི་རྒྱལ་པོ་ཐམས་ཅད་དང་། རིག་པ་ཐམས་ཅད་ཀྱི་མཆོག་ཏུ་བརྗོད་པའོ། །གལ་ཏེ་རིག་པ་གཞན་དག་གི་ལས་མི་འཚལ་ན་ཡང་སྦྱོར་བ་འདིས་རིག་པ་ཐམས་ཅད་སྦྱོར་བར་བགྱིའོ། །ལས་ཐམས་ཅད་བགྱིད་དོ། །ལས་བགྱིད་ན། རིག་པའི་རྒྱལ་པོ་ལྷན་ཅིག་ལན་གསུམ་བརྗོད་ལ་འགའ་ཞིག་མ་མཆིས་ན། དེའི་མགོ་དུམ་བུ་ཞིམ་ཐིག་ལེའི་སྙི་མ་བཞིན་དུ་འགས་པར་འགྱུར་རོ། །གང་གི་ཚེ་གསང་བ་པ་རྣམས་ཀྱི་གསང་སྔགས་གྲུབ་པ་དེའི་ཚེ་ལས་ཐམས་ཅད་དུ་རིག་པའི་མཆོག་བཟླས་བརྗོད་བགྱིའོ། །མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་མཆོད་པ་བགྱིས་ལ་བ་སྨད་སྤུ་མཐུན་གྱི་མར་གསར་བླངས་ཏེ་མར་གསར་དེས་སེང་ལྡེང་གི་མེར་ལན་བརྒྱད་སྟོང་སྦྱིན་སྲེག་བགྱིས་ན། རིག་པའི་མཆོག་རིག་པ་སྒྲུབ་པ་རྣམས་ལ་དམ་པ་སྩོལ་བར་འགྱུར་རོ། །གང་གི་ཚེ་ཕ་རོལ་འབྲོས་པར་བགྱིད་འཚལ་ན། ཕུབ་མ་ལས་ལན་བརྒྱ་སྟོང་སྦྱིན་སྲེག་བྱའོ། །སོ་ཕག་གིས་ཀྱང་འཕངས་ན། འབྲོས་པར་འགྱུར་རོ། ། མར་གྱི་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་ཨརྒའི་ཞུགས་བུས་ལ་རྩཝ་དུར་བའི་ལོ་མ་ལན་བརྒྱད་སྟོང་སྦྱིན་སྲེག་བགྱིས་ན། ཏི་ན་ར་གཅིག་རྙེད་པར་འགྱུར་རོ། །མར་གྱི་ངོ་ཞག་བཅུ་བཞི་ནས་ཞག་གསུམ་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་མེ་ཏོག་ཀུ་མུ་ད་དང་། ཞོ་དང་། སྦྲང་རྩི་དང་། མར་ལ་སྨྱུགས་པ་ཁྲི་མེའི་ནང་དུ་སྦྱིན་སྲེག་བགྱིས་ན། དཔལ་ཆེ་བར་འགྱུར་རོ། །རྒྱ་མཚོའི་དབུ་བ་དང་། རྒྱ་སྤོས་དང་། ལྡོང་རོས་རྣམས་ཆ་བསྙམས་ཏེ་རྨ་བྱའི་མཁྲིས་པ་དང་། རིལ་བུ་སྲན་མ་ཙམ་དུ་བགྱིས་ཏེ་ལག་ན་རྡོ་རྗེའི་མདུན་དུ་རིག་པའི་མཆོག་ལན་བརྒྱད་སྟོང་བཟླས་བརྗོད་བགྱིས་ལ་སྦྲུལ་གྱིས་ཟིན་པ་ལ་ཆུ་ལ་བཏང་ན། འཇོག་པོས་ཟིན་པ་ཡང་འཚོའོ།། སྲིན་བུས་ཟིན་པ་དང་། བས་བལྡགས་དང་། འབྲས་ཕྲེང་བར་གྱུར་པ་ལ་ཆབ་བསྐོལ་བ་ལས་གཏང་ངོ་། །སྦྲུམ་མ་བུ་མ་ཕྱིན་པ་ལ་ནི། མར་ལས་བཏང་ན་བདེ་བར་བཙའ་བར་འགྱུར་རོ། །བྱིས་པ་གདོན་གྱིས་ཟིན་ན། བདུག་པས་བདུགས་པས་གཏོང་བར་འགྱུར་རོ། །བུད་མེད་ཀྱི་ནད་ལ་ནི། དར་བ་ལས་གཏང་ངོ་། །ཕུག་ཏུ་འཇུག་ན|་ལུས་ལ་བསྐུའོ། །སྒྲུབ་པ་ན་བདག་ལ་བདུགས་ན། ལོག་འདྲེན་ཐམས་ཅད་ལས་ཐར་པར་འགྱུར་རོ། །ལག་ན་རྡོ་རྗེའི་མདུན་དུ་སྲད་བུ་ལ་རིག་པའི་མཆོག་བརྒྱད་སྟོང་བཟླས་བརྗོད་བགྱིས་ཏེ་ལག་པ་ལ་བཏགས་ནས་གཡུལ་ངོར་ཞུགས་ན། ཕ་རོལ་གྱིས་མི་ཚུགས་པར་འགྱུར་རོ། །སྦྱིན་སྲེག་བགྱིས་པའི་ཐལ་བའམ། ཐལ་བ་གཙང་མས་ཁམ་ཕོར་བཀང་ལ་རིག་པ་མཆོག་བཟླས་བརྗོད་བགྱིད་ན། རྐུན་པོ་གང་ན་འདུག་པ་དེར་མཆིའོ། །གང་གིས་རིག་པའི་རྒྱལ་པོ་འདི་ཡིད་ཀྱིས་བཟླས་བརྗོད་བགྱིས་པ་དེ་ལ་དབང་ཕྱུག་ཆེན་པོ་དང་། དབང་ཕྱུག་ཆེན་པོའི་ཚོགས་དང་། བགེགས་དང་། ལོག་འདྲེན་དང་། མཁའ་འགྲོ་མ་དང་། སྲིན་པོ་དང་། ཤ་ཟ་དང་། གནོད་སྦྱིན་དང་། འབྱུང་པོ་དང་། གྲུལ་བུམ་དང་། སྲུལ་པོ་དང་། མདངས་འཕྲོག་པ་དང་། གདོན་རྒྱན་མ་དང་། མ་མོ་དང་། ལག་ན་རྡོ་རྗེའི་ཕྱག་བརྙན་དང་། གང་གིས་ཀྱང་གླགས་མི་རྙེད་ཀྱི། ལག་ན་རྡོ་རྗེའི་དེའི་མགོ་འགེམས་སོ། །བཅོམ་ལྡན་འདས་ཀྱི་སྤྱན་སྔའམ། ཕྱོགས་གཙང་མར་མཆོད་པ་བགྱིས་ཏེ་རྩཝ་ཀུ་ཤའི་མདུང་རྩེ་གསུམ་པ་ཐོགས་ལ་ཡུངས་ཀར་ཞོ་དང་། སྦྲང་རྩི་དང་། མར་བསྲེགས་པ་སྦྱིན་བླུགས་ལན་ཉི་ཤུ་རྩ་གཅིག་སྦྱིན་སྲེག་བགྱི་ཞིང་ཉིན་བདུན་དུས་གསུམ་དུ་གཅེར་བུས་སྐྲ་བཤིག་ལ་བགྱིས་ན། ནོར་སྩོལ་བར་བགྱིད་དོ། ། མར་གྱི་ངོ་ཞག་དྲུག་ནས་བརྩམས་ཏེ་མཚོ་འགྲམ་དུ་མཆིས་ལ་མར་གྱི་ངོ་ཞག་བརྒྱད་པའི་བར་དུ་ཡུངས་ཀར་དག་ལས་སྦྱིན་སྲེག་ལན་བརྒྱ་སྟོང་བགྱིས་ན། ནོར་དང་། གོས་རྣམས་སྩོལ་བར་འགྱུར་རོ། །འཕགས་པ་རིག་པའི་རྒྱལ་པོའི་མཆོག་སྒྲུབ་པ་ནི། རི་མོ་མཁན་གསོ་སྦྱོང་བཟུང་བས་མ་གོང་པའི་རས་ལ་སྤྱིན་དང་མ་འདྲེས་པའི་ཚོན་རྩི་རྣམས་ཀྱིས་སངས་རྒྱས་ཀྱི་སྐུ་གཟུགས་བྲི་བར་བགྱིའོ། །གཡས་ཕྱོགས་སུ་ལག་ན་རྡོ་རྗེ་སྟན་ནང་ཚངས་ཅན་གྱི་སྟེང་ན་མཆིས་པར་བྲིའོ། །ལག་ན་རྡོ་རྗེའི་འོག་ཏུ་རིག་པའི་མཆོག་བྲིའོ|་|བཅོམ་ལྡན་འདས་ནི། གསེར་གྱི་ཁ་དོག་ལྟ་བུའོ། །ལག་ན་རྡོ་རྗེ་ནི། སྔོ་བསངས་ཏེ། རྒྱན་ཐམས་ཅད་ཀྱིས་བརྒྱན་པའོ། །རིག་པའི་རྒྱལ་པོ་ཡང་སྔོ་བསངས་ཏེ། རྒྱན་ཐམས་ཅད་ཀྱིས་བརྒྱན་ལ་སྟན་གོར་བུའི་སྟེང་ན་མཆིས་པར་བྲིའོ། །མར་གྱི་ངོ་ཞག་བཅུ་བཞི་ལ་ཉིན་ཞག་གཅིག་སྨྱུང་བ་བགྱིས་ཏེ་ཅི་ནུས་སུ་མཆོད་པར་བགྱིས་ལ་རྒྱལ་པའི་བློ་གྲོས་ཀྱིས་རིག་པའི་རྒྱལ་པོ་དགུག་པར་བགྱིའོ། །རྡོ་རྗེའི་ཁས་ཉེ་རེག་བགྱིའོ། །རྡོ་རྗེའི་ལྟེ་བས་སྤོས་དབུལ་བར་བགྱིའོ། །མེ་ཁ་ལས་མེ་ཏོག་དབུལ་བར་བགྱིའོ། །གདོང་དཀར་གྱིས་བསྲུང་བར་བགྱིའོ། །རྡོ་རྗེ་སོར་མོས་ཁྲུས་བགྱིའོ། །ནག་མོས་ཁུ་བ་བཅིང་བར་བགྱིའོ། །གྱེན་དུ་ལྟ་བའི་གདོང་གིས་ཕྱོགས་བཅིང་བར་བགྱིའོ། །རྡོ་རྗེའི་སེངྒེའི་ཁྲིས་འདུག་པར་བགྱིའོ། །རྡོ་རྗེ་ལྡན་མས་བགེགས་གཞོམ་པར་བགྱིའོ། །ཤུགས་ལྡན་མས་སླར་གཤེགས་སུ་གསོལ་ལོ། །ཕྱིས་རིག་པ་མཆོག་གི་རི་མོའི་གཟུགས་ཀྱི་མདུན་དུ་གུ་གུལ་གྱི་རིལ་བུ་བརྒྱད་སྟོང་སྦྱིན་སྲེག་བགྱིས་ན། དངོས་གྲུབ་ཀྱི་མཚན་མར་བཅོམ་ལྡན་འདས་ཀྱི་གཟུགས་འགུལ་བར་འགྱུར་རོ། །ཞག་བདུན་ན་ཏི་ན་ར་བརྒྱ་རྙེད་པར་འགྱུར་རོ། །ཡང་ན་ལོངས་སྤྱོད་སྩོལ་བར་འགྱུར་རོ། །མར་གྱི་ངོ་ཞག་བརྒྱད་ན་ལག་ན་རྡོ་རྗེའི་མདུན་དུ་དུ་རུ་ཀའི་འབྲས་བུ་ལས་ལན་བརྒྱད་བརྒྱ་སྦྱིན་སྲེག་བགྱིད་ན། གང་འདོད་པ་དེ་སྨྱོ་བར་འགྱུར་རོ། །ལག་ན་རྡོ་རྗེའི་མདུན་དུ་མར་དང་གུ་གུལ་གྱི་རིལ་བུ་བརྒྱད་བརྒྱའི་སྦྱིན་སྲེག་བགྱིས་ན། སོས་པར་འགྱུར་རོ། ། མར་གྱི་ངོ་ཞིག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་ཤིང་ཨ་ཤྭཏྠའི་ལོ་འདབ་ཀྱི་སྟེང་དུ་ལྡོང་རོས་བཞག་ལ་ཇི་སྲིད་ཀྱིས་རྣམ་གསུམ་གྲུབ་པ་དེ་སྲིད་དུ་བཟླས་བརྗོད་བགྱིའོ|་|དྲོ་བར་གྱུར་ན། རྐང་པས་མཆིའོ། །དུ་བ་འཐུལ་ན། མི་སྣང་བ་དང་། ལོ་བདུན་སྟོང་དུ་འཚོའོ། །འབར་ན། བསྐལ་བར་གནས་པར་འགྱུར་རོ། །རླུང་བཞིན་དུ་ལག་ན་རྡོ་རྗེའི་གནས་སུ་མཆི་ཞིང་ཁ་ཟས་ཅི་འདོད་པ་ཟའོ། ། ཐ་རཱ་ཛཱ་དྷཱ་མ་ཤི་ཀ་དྷུ་ཀཱ་མ་ཀྲྀ་ཏ་ཨཥྚ་མྱ་ཨ་ཧོ་རཱ་ཏྲི་ཤི་ཏེ་ན་བཛྲ་པཱ་ཎི་སྱ་ཨ་གྲ་ཏ་ཨརྐ་ཀྵྛེ་ཨགྣི་པྲ་ཛྭཱ་ལེ། རུ་དྷི་ར་ཨ་ག་ཏ་ཎ་ཏི་ལཱ་ནཱ་ཨཥྚ་ས་ཧ་སྲཾ་ཧུ་ཛུ་ཡ་ད་རཱ་ཛ་བ་ཤོ་བ་ཏི་བཛྲ་ཀཱ་མོ་པ་སཾ་ཧ་ཏི། ཅི་སྟེ་དགྲ་གསོད་པར་འདོད་ན། ལག་ན་རྡོ་རྗེའི་མདུན་དུ་སེང་ལྡེང་གི་ཞུགས་བུས་ལ་ཡུངས་ཀར་དང་སྐེ་ཚེའི་འབྲུ་ལས་ལན་བརྒྱད་སྟོང་སྦྱིན་སྲེག་བགྱིས་ན་དགྲ་མཆིའོ། །གནོད་པར་སེམས་པར་བགྱིས་ན། ལག་ན་རྡོ་རྗེའི་མདུན་དུ་ཡི་དྭགས་ཀྱི་ཤིང་གི་ཞུགས་བུས་ལ་ཏིལ་ནག་པོ་ལ་ལན་བརྒྱ་སྟོང་སྦྱིན་སྲེག་བགྱིས་ན་གནོད་པར་སེམས་པར་བགྱིས་པར་འགྱུར་རོ། །མར་གྱི་ངོ་ཞག་བཅུ་བཞི་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་རྐང་པ་གཡས་པའི་མཐེ་བོང་ལས་བཟུང་ལ་དེའི་མིང་ནས་ཕྱུང་སྟེ་བཟླས་བརྗོད་བགྱིས་ན་འཕྲལ་དུ་དགྲར་མི་འགྱུར་རོ། །མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་རིག་པ་མ་ཆོག་གི་སྔགས་ཀྱིས་བཏབ་པའི་ཆང་གིས་རྡོ་རྗེ་བཀྲུས་ལ་རིག་སྔགས་ཀྱང་ལན་བརྒྱད་བརྒྱ་བཟླས་བརྗོད་བགྱིས་ན་གང་གི་མིང་ནས་ཕྱུང་སྟེ་བཟླས་བརྗོད་བགྱིས་པ་དེ་གདོན་གྱིས་ཟིན་པར་འགྱུར་རོ། །རྡོ་རྗེ་འོ་མས་བཀྲུས་ལ་རིག་སྔགས་ལན་བརྒྱད་སྟོང་བཟླས་པ་བགྱིས་ན་སོས་པར་འགྱུར་རོ། །ཡུལ་འཁོར་གཞིག་པར་འདོད་པས་སེང་ལྡེང་གི་རྡོ་རྗེ་བགྱིས་ལ་ཡར་གྱི་ངོ་ཚེས་བཅུ་གཉིས་ལ་ལག་ན་རྡོ་རྗེའི་མདུན་དུ་ལན་བརྒྱ་སྟོང་བཟླས་བརྗོད་བགྱིས་ཏེ་ཤུལ་གྱི་བཞི་མདོར་བཙུགས་ན། ཡུལ་འཁོར་འཇིག་པར་འགྱུར་རོ། །ཕྱུང་ན། སྔ་མ་ཁོ་ན་བཞིན་རྟག་པར་འགྱུར་རོ། །མར་ངོའི་ཞག་དགུ་ལ་ལག་ན་རྡོ་རྗེའི་མདུན་དུ་རིག་པ་མཆོག་གིས་སྐེ་ཚེའི་འབྲུ་ལ་ལན་བརྒྱད་སྟོང་བཟླས་བརྗོད་བགྱིས་ན་ཕུང་བར་འགྱུར་རོ། །ལག་ན་རྡོ་རྗེའི་མདུན་དུ་མར་དང་བསྲེས་པའི་སྐེ་ཚེའི་འབྲུ་ལ་ལན་བརྒྱད་སྟོང་སྦྱིན་སྲེག་བགྱིས་ན་བརྟས་པར་འགྱུར་རོ། ། མར་གྱི་ངོ་ཞག་བརྒྱད་ལ་བ་སྨད་སྤུ་མཐུན་གྱི་འོ་མ་བླངས་ཏེ་རིག་པ་མཆོག་གི་བཟླས་བརྗོད་བྱས་ཤིང་བསྲུངས་ལ། དེ་ལས་མར་གསར་བླངས་ཏེ་ཐོད་པའི་ནང་དུ་བཞག་ལ་ཐོད་པ་དེ་བླངས་ཏེ་མར་གྱི་ངོ་ཞག་བཅུ་བཞི་ལ་ཉིན་ཞག་གཅིག་སྨྱུང་བ་བགྱིས་ལ་མངོན་མཚན་གཅིག་ཡོད་པར་སོང་སྟེ་འབྱུང་པོ་ཐམས་ཅད་པའི་གཏོར་མ་བགྱིས་ལ། ཐོད་པ་དེ་ཐོགས་ཏེ་ལུས་ཀྱི་ལྷོ་ཕྱོགས་སུ་འདུག་ལ་ཇི་ཙམ་ན་འབར་བ་དེ་སྲིད་དུ་བཟླས་བརྗོད་བགྱིའོ། །དེ་ནས་དེ་འཐུངས་ན། ཅི་འདོད་པའི་གཟུགས་སུ་འགྱུར་རོ། །ནམ་མཁའ་ལ་འགྲོ་བར་འགྱུར་རོ། །མི་སྣང་བར་འགྱུར་རོ། །གཟུགས་སྣ་ཚོགས་སྟོན་པར་འགྱུར་རོ། །ལོ་ལྔ་བརྒྱ་འཚོ་བར་འགྱུར་རོ། །བདག་རིག་པའི་རྒྱལ་པོའི་མཆོག་འདི་ནི། རིག་པ་ཐམས་ཅད་ཀྱི་གཙོ་བོའོ། །བདག་སྲུང་ན། གོས་ཀྱི་མཐའ་མར་མདུད་པ་དོར་རོ། །གཞན་སྲུང་ན། སྤྱི་གཙུག་ཏུ་སྐྲ་མདུད་དོར་རོ། །ཆུ་སྲིན་ཀུམྦྷི་རའི་ཁ་བཅིངས་ན། ཕྱོགས་བཞིར་ཆུ་གཏོར་རོ། །སྟག་ལ་ནི། ཡིད་ཀྱིས་དཀྱིལ་འཁོར་བགྱིས་ན་བཅིངས་པར་འགྱུར་རོ། །མཚམས་བཅད་ན། ཡུངས་ཀར་གྱིས་སོ། །ཞིང་སྲུང་ན། ཕུར་བུ་དག་གིས་སོ། ། སྨན་སྲུང་ན། ཡིད་ཀྱིས་རིག་པའི་མཆོག་སྦྱར་བར་བགྱིའོ། །གཞན་ཡང་སྒྲུབ་པ་ན་མ་གོད་པའི་རས་ལ་སྤྱིན་དང་མ་འདྲེས་པའི་ཚོན་རྩི་རྣམས་ཀྱིས་རིག་པའི་རྒྱལ་པོའི་མཆོག་བྲི་བར་བགྱི་སྟེ། མདོག་སྔོ་བསངས། ཤམ་ཐབས་སེར་པོ། །ལག་པ་གཡོན་ན་ཞགས་པ། གཡས་པས་དམ་པ་སྦྱིན་པ་བྲི་བར་བྱའོ། །འོག་ཏུ་སྒྲུབ་པ་པོ་ལག་ན་པོག་ཕོར་ཐོགས་པ་བྲིའོ། །ཞག་བདུན་ཟས་སུ་འོ་སྐྱོ་བཏུང་ངོ་། །ཐ་མར་ཞག་གསུམ་སྨྱུང་བ་བགྱིས་ཏེ་མར་གྱི་ངོ་ཞག་བཅུ་བཞི་ལ་ཅི་ནུས་ཀྱིས་མཆོད་པ་བགྱིས་ལ་སྐྲ་ཚོགས་ལས་ཞགས་པ་བགྱིས་ཏེ་ལག་པ་གཡས་པར་ཐོགས་ཏེ་ཇི་སྲིད་དུ་རང་གི་གཟུགས་ཀྱིས་མཆི་བ་དེ་སྲིད་དུ་བཟླས་བརྗོད་བགྱིའོ། །རྡོ་རྗེ་བཞད་མས་སྨྲར་གཞུག་སྟེ། དེ་བུ་ཅི་བྱ་ཞེས་སྨྲ་བར་འགྱུར་རོ། །དེས་ཚངས་པའམ། ཁྱབ་འཇུག་གམ། དབང་ཕྱུག་ཆེན་པོའམ། ཆེ་གེ་མོ་ཞེས་བྱ་བ་ཞགས་པས་བཟུང་ལ་ཁྲིད་དེ་སྦྱོན་ཅིག་ཅེས་བརྗོད་དོ། །ཡང་ན་རྒྱལ་པོའམ། གནོད་སྦྱིན་ནམ། སྲིན་པོའམ། ཤ་ཟའམ། གང་དགུག་པར་འདོད་ན། དེ་དགུག་པ་སྟེ། དེ་དག་ཐམས་ཅད་ཕྱག་བརླན་དུ་འགྱུར་རོ། །གང་བསམ་པ་དེ་འཚལ་ཏེ་མཆིའོ། །གང་ན་མ་གོད་པའི་རས་ལ་རི་མོ་མཁན་གསོ་སྦྱོང་བཟུང་བས་སྦྱིན་དང་མ་འདྲེས་པའི་ཚོན་རྩི་རྣམས་ཀྱིས་རིག་པའི་རྒྱལ་པོའི་མཆོག་དྲི་བར་བྱ་སྟེ། མདོག་སྔོ་བསངས། རྒྱན་ཐམས་ཅད་ཀྱིས་བརྒྱན་པ། སྟོད་གཡོགས་དར་དཀར། སྨད་གཡོགས་རས། ལག་པ་བཞི་པ། ལག་པ་གཡོན་པ་གཅིག་ན་རྡོ་རྗེ། གཅིག་ན་ལྕགས་ཀྱུ། གཡས་པ་གཅིག་དམ་པ་སྦྱིན་པ། གཅིག་བེ་ཅོན་ཐོགས་པར་བྲི་བར་བགྱིའོ། །འོག་ཏུ་སྒྲུབ་པ་པོ་ལག་ན་པོག་ཕོར་ཐོགས་པར་བགྱིའོ་།གཡས་ཕྱོགས་སུ་རྡོ་རྗེ་ཁུ་ཚུར་མདོག་གསེར་ལྟ་བུ། རྒྱན་ཐམས་ཅད་ཀྱིས་བརྒྱན་པ། ལག་པ་གཉི་ག་ན་རྡོ་རྗེ་ཐོགས་པ་བྲིའོ། །གཡོན་ལོགས་སུ་རྡོ་རྗེ་བློ་གྲོས་བྲི་བར་བགྱི་སྟེ། དེ་ཡང་མདོག་གསེར་ལྟ་བུ། རྒྱན་ཐམས་ཅད་ཀྱིས་བརྒྱན་པར་བགྱིའོ། །དེ་ནས་རྡོ་རྗེ་སྒྲུབ་པ་ནི། ཟླ་བ་གཅིག་སློང་མོའི་ཟས་ཟོས་ལ་ཐ་མར་ལུས་སྦྱང་བར་བགྱི་སྟེ། ཆོ་འཕྲུལ་ག་ཡི་ཟླ་བ་ཉ་ལ་ཞག་གསུམ་སྨྱུང་བ་བགྱིས་ལ་ལྕགས་སྣ་གསུམ་ལ་བགྱིས་པའི་རྡོ་རྗེ་རི་མོའི་སྐུ་གཟུགས་ཀྱི་མདུན་དུ་ཤིང་ཨ་ཤྭཏྠའི་ལོ་མ་བདུན་གྱི་སྟེང་དུ་བཞག་ལ་བསྒྲུབ་སྟེ|་ཇི་སྲིད་ཀྱིས་འབར་བ་དེ་སྲིད་དུ་བཟླས་བརྗོད་བགྱིའོ། །འབར་ནས་བླང་བར་བགྱི་སྟེ། བླངས་མ་ཐག་ཏུ་ལག་ན་རྡོ་རྗེ་འདྲ་བར་འགྱུར་རོ། །ཉི་མ་ཤར་བའི་ཁ་དོག་འདྲ་བར་འགྱུར|་རིག་སྔགས་འཆང་གི་འཁོར་ལོས་བསྒྱུར་བར་འགྱུར་རོ། །དེ་ནས་ལྕགས་ཀྱུ་བསྒྲུབས་ན། སྔར་སྤྱད་པར་བགྱི་སྟེ། རྩཝ་ཀུ་ཤ་རྩ་བ་མེད་པ་ལས་ལྕགས་ཀྱུ་བགྱིས་ལ་མ་ཨར་གྱི་ངོ་ཞག་བཅུ་བཞི་ལ་ཞག་གསུམ་སྨྱུང་བ་བགྱིས་ཏེ་རི་མོའི་སྐུ་གཟུགས་ཀྱི་མདུན་དུ་མཆོད་པ་རྒྱ་ཆེར་བགྱིས་ལ་མེ་ཏོག་གི་སྟེང་དུ་བཞག་སྟེ་དེའི་སྟེང་དུ་ལག་པ་བཞག་ལ་ཇི་སྲིད་ཀྱིས་འབར་བ་དེ་སྲིད་དུ་བཟླས་བརྗོད་བགྱིའོ། །འབར་ནས་བླང་བར་བགྱི་སྟེ། བླངས་མ་ཐག་ཏུ་ས་སེར་ག་མཐོང་ཞིང་ཚངས་པའི་གནས་སུ་མཆི་བར་འགྱུར་རོ། །ལག་ན་ལྕགས་ཀྱུ་ཐོགས་ན། སུམ་ཅུ་རྩ་གསུམ་པས་ཀྱང་ཟིལ་གྱིས་མནན་པར་མི་ནུས་སོ། །བེ་ཅོན་སྒྲུབ་པ་བཤད་པར་བགྱི་སྟེ། ལྕགས་སྣ་གསུམ་ལས་བེ་བཅོན་སོར་བཅུ་དྲུག་པ། དབྱིབས་ཐོ་བ་འདྲ་བ་ཟུར་དྲུག་པར་བགྱིའོ། །སྔར་སྤྱད་པ་བགྱིས་ལ་མར་གྱི་ངོ་ཞག་བཅུ་བཞི་ལ་ཞག་གསུམ་སྨྱུང་བ་བགྱིས་ཏེ་རི་མོའི་སྐུ་གཟུགས་ཀྱི་མདུན་དུ་མཆོད་པ་རྒྱ་ཆེར་བགྱིས་ལ་རས་དཀར་པོའི་སྟེང་དུ་བཞག་སྟེ་ཇི་སྲིད་འབར་བ་དེ་སྲིད་དུ་བཟླས་བརྗོད་བགྱིའོ། །དེ་ནས་བླངས་མ་ཐག་ཏུ་ལག་ན་རྡོ་རྗེ་འདྲ་བར་འགྱུར་ཏེ། ལག་ན་རྡོ་རྗེ་དང་སྟོབས་མཉམ་སྟེ། ལག་ན་རྡོ་རྗེའི་གནས་སུ་མཆི་བར་འགྱུར་རོ། །དངོས་གྲུབ་རྣམ་པ་གསུམ་ལ་བསྐལ་པར་གནས་པར་འགྱུར་རོ། །སྒྲུབ་པ་ཐམས་ཅད་དུ་ཕོ་ཉ་མོ་རྣམས་ཀྱིས་ལས་ཐམས་ཅད་བགྱིས་ཏེ་རིག་པ་སྣ་ཚོགས་སྦྱར་བར་བགྱིའོ། །དེ་ལྟར་གང་གིས་རིག་པའི་རྒྱལ་པོ་འདོན་པ་དང་། མཆོད་པ་དེ་དེ་བཞིན་གཤེགས་པ་ཐམས་ཅད་མཆོད་པ་ལགས་སོ། །མཉེས་པར་བགྱིས་པ་ལགས་སོ། །ཐོད་པ་བླངས་ཏེ་ཁྲག་གིས་བཀང་སྟེ་མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་ཁང་སྟོང་ངམ། ཀུན་དགའི་ར་བར་ཇི་སྲིད་ཀྱིས་བུད་མེད་འབྱུང་བ་དེ་སྲིད་དུ་བཟླས་བརྗོད་བགྱིའོ། །དེ་ལ་ཆེ་གེ་མོ་ཞེས་བྱ་བ་ལ་གནོད་པ་གྱིས་ཤིག་པར་བརྗོད་ན། གནས་པར་བགྱིད་དོ|་|གནོད་པ་བགྱིད་དུ་འཇུག་གོ་། རིངས་པར་བགྱིད་དོ། །རིག་པའི་རྒྱལ་པོ་འདི་འགུགས་པ་འདིས་བཀུག་ནས་ཕྱིས་རྒྱལ་བའི་བློ་གྲོས་ཀྱིས་དགུག་པར་བགྱིའོ། །ན་མོ་རཏྣ་ཏྲ་ཡ་སྱ། ན་མཤྩཎྜ་བཛྲ་པཱ་ཎི་སྱ། མ་ཧཱ་ཡཀྵ་སེ་ནཱ་པ་ཏི་སྱ། ཏུ་རུ་ཏུ་རུ། ཙུ་རུ་ཙུ་རུ། ཀི་རི་ཀི་རི། རཻ་ཏྲ་པྲ་ཙཎྜ་ཡ་ཊ་ཡ། ཨཱ་གཙྪ་ཨཱ་གཙྪ། མ་མ་ཨརྟྟ་མ། པ་རི་པཱུ་ར་ཡ|་ཨསྐྲྀ་ཏ་བིདྱཱ་དྷ་རོཏྟ་མ་ཨ་ཧཾ། སྟྭཾ་ཨཱ་ཀཪྵ་ཡ་མི། མ་མ་སརྦ་ཨརྠ་མ་ནོར་ཐ་པ་རི་པཱུ་ར་ཀོ་བྷ་བ། མ་མ་ཨརྠ་སིདྡྷིཉྩད་ད་མ་ཙི་རཾ་ཀུ་རུ་སྭཱཧཱ། ཅི་སྟེ་ཚེས་བརྒྱད་ལ་སྒྲུབ་པར་འཚལ་ན། ཚེས་བདུན་གྱི་ཕྱེམ་རེད་གུ་གུལ་གྱིས་བདུགས་ལ་གསང་སྔགས་ལན་བརྒྱ་རྩ་བརྒྱད་བརྗོད་དོ། །སྒྲུབ་པ་ནི། རྒྱལ་བའི་བློ་གྲོས་ཀྱིས་དགུག་གོ། སྒྲུབ་པ་ཐམས་ཅད་དང་། ལས་ཐམས་ཅད་དུ་ཡང་དགུག་པ་འདིས་དགུག་གེ་།ན་མོ་རཏྣ་ཏྲ་ཡ་སྱ། ན་མཤྩཎྜ་བཛྲ་པཱ་ཎི་སྱ། མ་ཧཱ་ཡཀྵ་སེ་ནཱ་པ་ཏི་སྱ། ཛ་ཡ་མ་ཏི། ཛི་ན་ཏི་ཛི་ན་དྷ་རི་ཎི། ཨཱ་བེ་ཤ་ཡ། ད་ཤ་མ་ཏ་ཤཱཾ་བ། དེ་བ་ནཱ་ག་ཡཀྵ་གནྡྷརྦྷེ་ཀཱ་ནུ་ཙརྨ་རུ་ཤི་ལ་ཧུ་ལ་ཧུ། གྲྀཧྞ་ཕཱུ་མི་པ་ཏ་ཡེ། ཤཱི་གྷྲཾ་བཛྲ་པཱ་ཎི་སྟྭཾ། ཨཱཛྙཱ་པ་ཡ་ཏི་སྭཱཧཱ། རྒྱལ་བའི་བློ་གྲོས་འདིས་དགུག་པར་བགྱིའོ། ། དེ་ནས་རྡོ་རྗེ་ལྕགས་སྒྲོག་གིས་བཅིང་བར་བགྱིའོ། །ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཀུ་རུ་ཀུ་རུ། ཙ་ཏ་ཙ་ཏ། མ་ལ་མ་ལ། ས་ར་ས་ར། ཏིཥྛ་ཏིཥྛ|་མ་ཧཱ་བ་ལ། ས་མ་ཡ་མ་ནུ་སྨ་ར་སིདྷ། ན་མཤྩཎྜ་བཛྲ་པཱ་ཎི། ཨཱཛྙཱ་ཕ་ཡ་ཏི་སྭཱཧཱ། རྡོ་རྗེ་ལྕགས་སྒྲོག་འདིས་གུ་གུལ་གྱི་རིལ་བུ་གསུམ་ཡུངས་ཀར་གྱི་འབྲུ་མར་དུ་སྨྱུགས་ལ་སྦྱིན་སྲེག་བགྱིས་ན། བཅིངས་པར་འགྱུར་རོ། །རིག་པ་གང་སྒྲུབ་པ་དང་། ཕོ་ཉ་མོ་ཡང་རུང་སྟེ། དེ་འདི་ཉིད་ཀྱིས་བཅིང་བར་བགྱིའོ། །རྡོ་རྗེ་སེར་མོས་བཅིང་བ་ལས་དགྲོལ་པར་བགྱིའོ། །ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཧུ་ལུ་ཧུ་ལུ། གཙྪ་གཙྪ། མ་ཧཱ་པ་ལ། སྭ་བྷཱ་བ་ན་མ་པུ་ན་ན་མ་གན་མ་ཡ་ཀུ་རུ་ཀུ་རུ། གཙྪ་གཙྪ་སྭཱཧཱ། ཆབ་ཁྱོར་བ་གསུམ་གཏོར། མེ་ཏོག་ཀྱང་དབུལ་ལོ། །དེ་ནས་ཤུགས་ལྡན་གྱིས་སླར་གཤེགས་སུ་གསོལ་ལོ། །ན་མོ་བཛྲ་པཱ་ཎ་ཡེ། ཕཊ་ཕཊ|་གཙྪ་གཙྪ། བྷ་ག་བ་ཏེ། མ་ཧཱ་ཡཀྵཱ་དྷི་པ་ཏེ་ཙི་རི་ལི་ཙི་རི་ལི། ཧི་རི་ལི། ཙི་ནི་ལི། ཧི་རི་ལེ་ཨ་བི་ག་ནཾ་ཀུ་རུ་སྭཱཧཱ། ཤུགས་ལྡན་གྱིས་སླར་གཤེགས་སུ་གསོལ་བའི་སྔགས་ཏེ|་ཨ་ཀ་རུའི་བདུག་པ་ལ་ལན་བདུན་བཟླས་བརྗོད་བགྱིས་པས་སོ། །ན་མོ་བཛྲ་པཱ་ཎི་སྱ། ན་མསྟེ་བྷ་ག་བ་ཏི། བཛྲ་མུ་ཁི་གཽ་རི་བཀྟྲེ། ག་ར་ཏེ་ག་ར་ཏེ། ཀི་ནི་ཏི་ཀི་ནི་ཏི་སྭཱཧཱ། ཉེ་རེག་བྱ་བའི་གསང་སྔགས་སོ། །ན་མོ་བཛྲ་པཱ་ཎི་སྱ། ཛྭ་ལ་བཛྲ་ཎི་བི་ཧུ་རུ་ཧུ་རུ། ལ་ཧུ་ལ་ཧུ། ཕྲ་ཏི་གྲྀཧྣ་སྟྭཾ། ཨི་མཾ་གནྡྷ་ཀཱི་ལི་ཀཱི་ལ་ཡ་སྭཱཧཱ། སྤོས་ཀྱི་གསང་སྔགས་སོ། ། ན་མོ་བཛྲ་པཱ་ཎི་སྱ། ད་ཧ་ད་ཧ། པ་ཙ་པ་ཙ། བནྡྷ་བནྡྷ། ཤི་ཁི་སྭཱཧཱ། མེ་ཏོག་གི་གསང་སྔགས་སོ། །ན་མོ་བཛྲ་པཱ་ཎི་སྱ། ཨ་ཏི་ནི། ཙི་ལི་ནི། ཁ་ལ་ཀརྨ་ཎི། ད་ར་ཙི་ལི་ནི། ཙི་ལི་ནི་སྭཱཧཱ|་བདུག་པའི་གསང་སྔགས་སོ། །ན་མོ་བཛྲ་པཱ་ཎི་སྱ། ན་མ་སྟེ། བྷ་ག་པ་ཏི་ཤ་ཏ་མུ་ཁི། མ་ཧཱ་གཽ་རི་ཙ་ཚུ་ལེ། ཙུ་ཙུ་ལེ། ཙི་ཙི་རཀྵ་རཀྵ་སྭཱཧཱ། སྲད་བུས་བསྲུང་བར་བགྱིའོ། ན་མོ་བཛྲ་པཱ་ཎི་སྱ། ཀ་ཏ་ཀ་ཏ། མ་ཏ་མ་ཏ། ར་ར་ར་ར། བཛྲ་བིཾ་ག་ལ། མ་ཏ་ད་ར་ད་ར་ནི། ཀི་རི་ཎི་ཀི་རི་ཎི། ཀི་རི་ཎི་ཀི་རི་ཎི་སྭཱཧཱ། ཁྲུས་བགྱི་བའི་གསང་སྔགས་སོ། །ན་མོ་བཛྲ་པཱ་ཎི་སྱ|་ན་མསྟེ། བྷ་ག་བ་ཏི། ད་ཤ་བ་ཏི་ཤ་བ་ཏི། ས་ཧ་སྲ་པ་ཏི་ཨཱ་གཙྪ། ཤཱི་གྷྲཾ་ཀི་རི་ཀི་རི། ཤུ་ཀྲ་བཾ་དྷ་བཾ་དྷ་སྭཱཧཱ། སྲད་བུ་ལ་ལན་བདུན་བཟླས་བརྗོད་བགྱིས་ཏེ་ཁུ་བ་བཅིང་ངོ་།། ན་མོ་བཛྲ་པ་ཎི་སྱ། ཨུཏྟ་མ་རཀྵ། ཨ་དྷོ་རཀྵ། ཙ་ཏུར་དི་ཤཾ་རཀྵ། མ་ཐ་མ་ཐ། ཏྲཱ་ས་ཡ་ཏྲཱ་ས་ཡ། སྟམྦྷ་ཡ་སྟམྦྷ་ཡ། ཨུད་དྷྲྀ་ཏ་བཛྲ་ཨཱཛྙཱ་པ་ཡ་ཏི་སྭཱཧཱ། ཡུངས་ཀར་ལ་ལན་ཉི་ཤུ་རྩ་གཅིག་བཟླས་བརྗོད་བགྱིས་ཏེ་ཕྱོགས་བཅིང་ངོ་། །ན་མོ་བཛྲ་པཱ་ཎི་སྱ། ཏདྱ་ཐཱ། བཛྲེ་བཛྲེ་ཎི། བཛྲ་སིཾ་ཧ་ནི། བཛྲ་པཱ་ཎི། པྲི་ཡེ་བཛྲ་བར་དེ་བི་ཀྲྀ་ཏ་དཾཥྚ་ཀ་རཱ་ལ་བ་ནེ། ལཾ་པོ་དྷ་ར་བི་ཀྲི་ཏ་གཽ་ར་རཱུ་པ་ད་ར་ཤ་ན་མརྫ་ར་བཀྟྲེ། མཛྫ་མཱཾ་ས་སྲི་ཡེ། ཨེ་ཧི་ཨེ་ཧི་བྷ་བ་ཏི་བྷྱོ་གུ་རུ་པྲ་ཛྭ་ལི་ཏ། གྲ་ཀེ་ཤི་ཨི་དཾ་མ་ནུ་ཤ་ཤ་རཱི་ར་མ་ནུ་པྲ་བི་ཤ། ཀ་ཏ་ཀ་ཏ། པུ་ར་པུ་ར། དྷུ་ན་དྷུ་ན|་པ་ཏ་པ་ཏ། བལྒུ་བལྒུ། ཧ་ས་ཧ་ས། ཨཱ་བི་ཤེ་ཨཱ་བི་ཤེ། སྤ་ཏ་སྤ་ཏ། ཀིཾ་ཙི་ར་ཡ་སི། བྷ་ག་བ་ཏི། བ་ཧུ་རཱུ་པེ། ཨད་བྷི་ཀ་སྲི་ག་ལ་ཧེ་རུ་ཀ་ར་བིད་ཏྲེ། ཨཊྚ་ཊྚ་ཧ་སེ། ཨི་མ་སེ་ཏུ་སྟ|་གྲ་ཧ་སྱ་ཧྲྀ་ད་ཡཾ། བྷིནྡ་བྷིནྡ། ཙ་ལ་ཙ་ལ། གུ་མུ་གུ་མུ། ཀུ་རུ་ཀུ་རུ། ཨཱ་བི་ཤ་ཨཱ་བི་ཤ། བཛྲ་པཱ་ཎི། ཨཱཛྙཱ་པ་ཡ་ཏི་སྭཱཧཱ། ལས་ཐམས་ཅད་དུ་རྩཝ་ཀུ་ཤ་སྦམས་པ་ལ་སྔགས་ཀྱིས་བཏབ་སྟེ་བདུག་པར་བགྱིའོ། །ན་མོ་བཛྲ་པཱ་ཎི་སྱ། ལ་ལ་ཧ་སེ་ཧ་ས། བཛྲེ་ཎེ་ཀུ་རུ་ཀུ་རུ། ཀམྤ་ཀམྤ། ཙ་ལ་ཙ་ལ། ཛལྤ་ཛལྤ་སྭཱཧཱ། གཤེགས་ནས་གསུང་དུ་གཞུག་གོ་། ན་མོ་བཛྲ་པཱ་ཎི་སྱ། དྷུ་དྷུ་མ་ས་ལ་མ་ས་ལ། དྷུ་རུ་མེ་ཨ་མ་ལེ། བཛྲ་པཱ་ཎི་ཡཀྵཱ་དྷི་པ་ཏི་མ་ཙ་མེ་ཀ་ཤྩིད་བིགྷྣཾ་ཀུ་རུ་སྭཱཧཱ། ཡུངས་ཀར་རམ། ཐལ་བས་བགེགས་རབ་ཏུ་ཞི་བར་བྱའོ། །ཅི་སྟེ་རིག་སྔགས་འཆང་གྲུབ་པ་རྣམས་ཀྱི་རིག་པ་བཅད་པར་འཚལ་ན། མར་གྱི་ངོ་ཚེས་བཅོ་ལྔ་ལ་ལག་ན་རྡོ་རྗེའི་མདུན་དུ་བ་ཀུ་ལའི་མེ་ཏོག་དག་ལས་ལན་བརྒྱད་སྟོང་སྦྱིན་སྲེག་བགྱིས་ན། རིག་སྔགས་འཆང་ཐམས་ཅད་ཀྱི་རིག་སྔགས་བཅད་པར་འགྱུར་རོ། །མ་གོད་པའི་རས་ལ་སྤྱིན་དང་མ་འདྲེས་པའི་ཚོན་རྩི་རྣམས་ཀྱིས་རིག་པའི་མཆོག་བྲི་བར་བགྱི་སྟེ། མདོག་སྔོ་བསངས། རྒྱན་ཐམས་ཅད་ཀྱིས་བརྒྱན་པའོ། །སྦྱིན་སྲེག་བགྱི་བ་བཟའ་ཞིང་བྲི་བར་བགྱིའོ། །མར་གྱི་ངོ་ཞག་བ་ཅུ་བཞི་ལ་ཞག་གཅིག་སྨྱུང་བ་བགྱིས་ཏེ་རི་མོའི་སྐུ་གཟུགས་ཀྱི་མདུན་དུ་ཅི་ནུས་སུ་མཆོད་པ་བགྱིས་ལ་བྱང་ཆུབ་ཀྱི་ཤིང་གིས་ཞུགས་བུས་ཏེ་ཏ་མ་ལའི་མེ་ཏོག་མར་ལ་སྨྱུགས་པ་བརྒྱད་སྟོང་སྦྱིན་སྲེག་བགྱིས་ན། རི་མོའི་སྐུ་གཟུགས་འགུལ་ལོ། །མེ་ཏོག་གི་ཕྲེང་བ་ཡང་འགུལ་ལོ། །དེ་ནས་མཚན་མོའི་ལྷ་མོ་མེ་ཏོག་ཅེས་བགྱི་བ་གྲུབ་པར་འགྱུར་ཏེ། ལྷ་མོ་མེ་ཏོག་གི་ལས་རྣམས་སུ་འགྱུར་རོ། །རིག་སྔགས་འཆང་གི་རིག་པའི་སྒྲུབ་པ་ལ་བགེགས་སུ་མི་འགྱུར་རོ། །ལོག་འདྲེན་གྱིས་མི་ཚུགས་སོ། །དངོས་གྲུབ་འདིས་མཚན་མོའི་ལྷ་མོ་བཞི་དངོས་གྲུབ་ཏུ་འགྱུར་ཏེ། སྲོད་ནི། ལྷ་མོ་མེ་ཏོག་གིའོ། །མཇིང་ནི། ལྷ་མོ་ཕྲེང་བའི་འོ། །ནམ་གུང་ནི། ལྷ་མོ་ཀུ་མུ་དའིའོ། །ཐོ་རངས་ནི། ལྷ་མོ་མཛེས་མའིའོ|་|རིག་སྔགས་འཆང་ནི། རིག་པ་སྒྲུབ་ན་སྲོད་ལ་ལོག་འདྲེན་གནས་སུ་འོང་སྟེ། དེ་ནས་མཚན་མོའི་ལྷ་མོ་མེ་ཏོག་གིས་ལོག་འདྲེན་མཐོང་ནས་བཅོམ་ལྡན་འདས་ལག་ན་རྡོ་རྗེ་ཡིད་ལ་བགྱིད་དོ། །ལག་ན་རྡོ་རྗེ་ཡིད་ལ་བགྱིས་པས་ལོག་འདྲེན་རྣམས་སྐྲག་ཅིང་ཉམས་ཏེ་ཉམ་ཐག་ནས་འབྲོས་པར་འགྱུར་རོ། །ལག་ན་རྡོ་རྗེ་རིག་སྔགས་འཆང་དེའི་མདུན་དུ་འདུག་ཅིང་དངོས་གྲུབ་ཀྱང་མྱུར་དུ་སྩོལ་བར་བགྱིད་དོ། །མཇིང་ལ་གལ་ཏེ་བགེགས་བྱུང་ན། མཚན་མོའི་ལྷ་མོ་ཕྲེང་བ་དེས་ལྷ་ཆེན་པོ་ལ་བཅོམ་ལྡན་འདས་ལག་ན་རྡོ་རྗེ་ཁྱོད་ལ་འབོད་དོ་ཞེས་སྒྲོག་གོ་། དེས་དེ་ཐོས་ནས་སྙིང་འདར་ཞིང་མྱུར་བ་མྱུང་བར་མདུན་དུ་འདུག་སྟེ། དེས་ན་རིག་སྔགས་འཆང་དེ་ལ་བགེགས་སུ་མི་འགྱུར་རོ|་|དངོས་གྲུབ་ཀྱང་མྱུར་དུ་འགྲུབ་བོ། །ནམ་གུང་ལ་གལ་ཏེ་བགེགས་བྱུང་ན། མཚན་མོའི་ལྷ་མོ་ཀུ་མུ་ད་དེ་ཡང་རྒྱལ་པོ་ཆེན་པོ་བཞི་ལ་ཀྱེ་ཀྱེ་བཙུན་པ་ཀུན་དག་།ལག་ན་རྡོ་རྗེ་ཁྱོད་ལ་འབོད་དོ་ཞེས་སྒྲོག་གོ་། དེ་དག་གིས་ཚིག་དེ་ཐོས་ནས་སྙིང་འདར་ཞིང་མྱུར་བ་མྱུར་བར་མདུན་དུ་འདུག་སྟེ། དེ་ནས་དེ་ལ་བགེགས་སུ་མི་འགྱུར་རོ|་|ཐོ་རངས་ལ་གལ་ཏེ་བགེགས་བྱུང་ན། མཚན་མོའི་ལྷ་མོ་མཛེས་མ་ཡང་ལོག་འདྲེན་རྣམས་ལ་ཀྱེ་ཀྱེ་ལོག་འདྲེན་སྡང་བ་རྣམས། དྲག་པོ་ལག་ན་རྡོ་རྗེས་བཀའ་སྩལ་ཏོ་ཞེས་བསྒོ་བར་བགྱིའོ། །དེ་དག་གིས་དེའི་ཚིག་ཐོས་ནས་ཕྱོགས་བཅུར་འབྲོས་སོ། །དེས་ན་དེ་ལ་བགེགས་སུ་མི་འགྱུར་ཏེ། བདེ་བར་ལས་རྣམས་འགྲུབ་པར་བྱེད་དོ། །མར་གྱི་ངོ་ཞག་བརྒྱད་དམ། བཅུ་བཞི་ལ་བུད་མེད་བུ་བྱུང་བའི་ཁྱེའུ་ལྟེ་བ་སོར་གཉིས་ཙམ་བཅད་ལ་གསེར་གྱི་གྱིམ་བག་གིས་དཀྲིས་ཏེ་མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་ལན་བརྒྱད་སྟོང་བཟླས་བརྗོད་བགྱིས་ན་མི་སྣང་བར་འགྱུར་རོ། །ཚེ་ཡང་ཉིས་འགྱུར་དུ་འགྱུར་རོ། །ཞག་བདུན་དུ་ཕྱེ་ཐུག་བཏུང་ངོ་། །ཕྱིས་མར་གྱི་ངོ་ཞག་བཅུ་བཞི་ནས་ཞག་གསུམ་སྨྱུང་བ་བགྱིས་ཏེ། ཞི་བའི་མཚན་ཡོད་པར་སོང་ལ་མཚན་གྱི་སྟེང་གི་ལྷོ་ཕྱོགས་ལོགས་སུ་ལག་པ་གཡས་པ་བཞག་སྟེ་སྐྲ་ལས་བགྱིས་པའི་སྐུད་པས་བཅིང་ངོ་། །བཅིངས་ནས་ཇི་སྲིད་ཀྱིས་བཅད་དོ་ཞེས་སྐྲ་འབྱུང་བ་དེ་སྲིད་དུ་བཟླས་བརྗོད་བགྱིའོ། །སྒྲ་ལན་གསུམ་དུ་བྱུང་ན་དངོས་གྲུབ་ཏུ་འགྱུར་རོ། །ཁུ་ཚུར་བཅངས་ཏེ་བསྒྲུབ་པར་བགྱིའོ། །ཁུ་ཚུར་བཅངས་ནས། མི་སྣང་བར་འགྱུར་རོ། །སྐྲ་ལྕང་ལོ་འཁྱིལ་བར་འགྱུར་རོ། །ལོ་བཅུ་དྲུག་ལོན་པ་ཙམ་དུ་འགྱུར་རོ། །ལོ་བདུན་བརྒྱར་འཚོ་བར་འགྱུར་རོ། །དབང་ཕྱུག་ཆེན་པོའི་ཚོགས་རྣམས་ཀྱང་ཕྱག་བརྙན་དུ་འགྱུར་རོ། །ཅི་སྟེ་དགྲ་གསད་པར་འཚལ་ན། མར་གྱི་ངོ་ཞག་བཅུ་བཞི་ལ་ཉིན་གཅིག་སྨྱུང་བ་བགྱིས་ཏེ་སྤྲ་ཚིལ་ལས་གཟུགས་བགྱིས་ལ་སེང་ལྡེང་གི་ཕུར་བུ་ལྔས་གནད་དུ་བཙུགས་ཏེ། དུར་ཁྲོད་དུ་མཆིས་ལ་དོང་བརྐོས་ཏེ་དོང་དེར་བཅུག་ལ་སྟེང་དུ་ཞུགས་བུས་ལ་དུག་དང་། ཁྲག་དང་། ཡུངས་ཀར་བསྲེས་ལ་ལན་བརྒྱ་སྟོང་སྦྱིན་སྲེག་བགྱིས་ན། དུ་ཞིང་ཚིག་སྟེ་འཕྲལ་དུ་འགུམ་མོ། །མར་གྱི་ངོ་ཞག་བཅུ་བ་ཞི་ལ་བ་སེར་མོའི་ལྕི་བ་ས་ལ་མ་ལྷུང་བ་བླངས་ཏེ་ས་ཕྱོགས་གཙང་མར་གཟུགས་བགྱིས་ལ་ཅི་ནུས་ཀྱིས་མཆོད་དེ་ཞག་གཅིག་སྨྱུང་བ་བགྱིས་ལ་ཤིང་བིལ་བའི་ལོ་མ་བསྲེགས་ཤིང་ཞོ་དང་། སྦྲང་རྩི་དང་། མར་ལ་སྨྱུགས་ཏེ་བརྒྱད་སྟོང་སྦྱིན་སྲེག་བགྱིས་ན། དཔྲལ་བ་ལས་འོད་ཟེར་འབྱུང་ངོ་། །དེ་ནས་དངོས་གྲུབ་ཏུ་འགྱུར་ཏེ། གསེར་དཔག་ཏུ་མེད་པ་སྩོལ་བར་འགྱུར་རོ། །ཡང་ན་ཉིན་གཅིག་བཞིན་དུ་ཏི་ན་ར་སྩོལ་བར་འགྱུར་རོ། །གསེག་མ་ལ་ལན་བརྒྱད་སྟོང་བཟླས་ཏེ་དུར་ཁྲོད་དུ་པོར་ན། ཡི་དྭགས་ཐམས་ཅད་གླུ་ལེན་ཅིང་གར་བྱེད་པར་འགྱུར་རོ། །མར་གྱི་ངོ་ཞག་བཅུ་བཞི་ནས་ལག་ན་རྡོ་རྗེའི་རྐང་བའི་དྲུང་དུ་ཞག་གསུམ་སྨྱུང་བ་བགྱིས་ལ་ཤིང་ཀཱ་ར་བཱི་རའི་མེ་ཏོག་ལས་ལན་བརྒྱད་སྟོང་སྦྱིན་སྲེག་བགྱིའོ། །དེ་ནས་ཀཱ་ར་བཱི་རའི་མེ་ཏོག་དག་ལས་མེ་ཏོག་ཅིག་བླངས་ཏེ་ཀླུའི་གནས་སུ་སོང་ལ་བཟླས་བརྗོད་བགྱིས་ན། ཀླུ་དང་ཀླུ་མོ་རྣམས་དབང་དུ་འགྱུར་ཏེ་ཅི་འཚལ་བ་རྣམས་རྙེད་དོ། །ལག་བུ་མིག་དང་། གསེར་དང་། མཆོད་ཕྱིར་ཐོགས་ཀྱང་ཀཱ་ར་བཱི་རའི་མེ་ཏོག་དང་འདྲའོ། །གང་ན་གནོད་སྦྱིན་མོ་འདུག་པ་དེར་བཟླས་བརྗོད་བགྱིས་ན|་གནོད་སྦྱིན་མོ་མཆི་སྟེ་ཆུང་མར་འགྱུར་རོ། །ཡང་ན་ནོར་སྩོལ་བར་འགྱུར་རོ། །གལ་ཏེ་མི་མཆི་ན། ཞག་གཅིག་སྨྱུང་བ་བགྱིས་ཏེ་ཤིང་མ་ད་ནའི་ཚེར་མ་དང་། དུག་དང་། ཁྲག་བསྲེས་པ་ལན་བརྒྱ་སྟོང་སེང་ལྡེང་གི་ཞུགས་ལ་སྦྱིན་སྲེག་བགྱིས་ན། དེ་ཚིག་ཅིང་མི་སྡུག་པར་འགྱུར་ལ་མཆིའོ། །གལ་ཏེ་ཀླུ་མོ་མི་མཆི་ན། དེ་ལ་ཡང་དེ་ཉིད་ཀྱིས་སྦྱིན་སྲེག་བགྱིའོ། །ཡར་གྱི་ངོ་ཚེས་བཅོ་ལྔ་ལ་ཞག་གསུམ་སྨྱུང་བ་བགྱིས་ཏེ་རྒྱ་མཚོར་འབབ་པའི་ཆུ་བོར་ཞུགས་ལ་ཀླུ་ཤིང་གི་མེ་ཏོག་བརྒྱད་སྟོང་བྱི་དོར་བགྱིས་ན། དུས་མ་ཡིན་པར་ཆར་འབབ་བོ། །ཞག་བདུན་འོ་སྐྱོ་འཐུངས་ལ་མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་མཆོད་པ་བགྱིས་ལ་ས་ལས་བགྱིས་པའི་རྡོ་རྗེ་བཞག་སྟེ། དེའི་རྐེད་པར་ཤིང་ཨ་ཤྭཏྠའི་ལོ་མ་བདུན་བཞག་ལ་དེའི་སྟེང་དུ་ལྡོང་རོས་བཞག་སྟེ་ཇི་སྲིད་ཀྱིས་དངོས་གྲུབ་གསུམ་དུ་གྱུར་པ་དེ་སྲིད་དུ་བཟླས་བརྗོད་བགྱིའོ། །འབར་བར་གྱུར་ན། ལོ་བདུན་སྟོང་དུ་འཚོའོ། །ལུས་མཛེས་པར་བགྱིས་ལ་མར་གྱི་ངོ་ཞག་བཅུ་བཞི་ལ་ཉིན་གཅིག་སྨྱུང་བ་བགྱིས་ཏེ་ལམ་གྱི་སུམ་མདོར་མཆོད་པ་རྒྱ་ཆེར་བགྱིས་ལ་དེར་འདུག་སྟེ་ལྡོང་རོས་སྲན་མ་ཙམ་ཞིག་ཁར་བཅུག་ལ་ཇི་སྲིད་དུ་ཁའི་ནང་དུ་གས་པར་གྱུར་པ་དེ་སྲིད་དུ་བཟླས་བརྗོད་བགྱིའོ། །དེ་ནས་དངོས་གྲུབ་ཏུ་འགྱུར་ཏེ། ཐིག་ལེ་བགྱིས་ན་མི་སྣང་བར་འགྱུར་རོ། །ལོ་ལྔ་བརྒྱ་ཐུབ་པར་འགྱུར་རོ། །ཅི་འདོད་པའི་གཟུགས་ཅན་དུ་འགྱུར་རོ། །ཉི་མའི་གུང་ཚིགས་ལ་བགྱིའོ། །ཚེས་གྲངས་དང་སྐར་མ་གང་མ་མི་འཚལ། སྨྱུང་བ་བགྱི་མི་འཚལ་བར་སྐྱེས་པའི་རོ་མ་རྨས་མ་ཉམས་པ་བླངས་ཏེ་རྡོ་རྗེ་སེན་མོའི་སྔགས་བཟླས་བརྗོད་བགྱིས་ལ་བཀྲུའོ། །རྡོ་རྗེ་ལྟེ་བས་སྤོས་སྩལ་བར་བགྱིའོ། །རྡོ་རྗེ་མེ་ཁ་ལས་མེ་ཏོག་སྩལ་བར་བགྱིའོ། །དེ་ནས་དེའི་སྙིང་གར་འདུག་སྟེ་མི་དོ་ཙམ་གྱན་དུ་མ་འཕགས་ཀྱི་བར་དུ་རིག་པ་མཆོག་གི་སྙིང་པོ་དང་ལྷན་ཅིག་བཟླས་བརྗོད་བགྱིའོ། །གྱེན་དུ་འཕགས་མ་ཐག་ཏུ་སླར་འོག་ཏུ་ལྟུང་ངོ་། །ལྷུང་ནས་བུད་མེད་བཅུ་ཉེ་བར་གནས་པར་འགྱུར་ཏེ། དེ་དག་གཡོག་འཁོར་རྣམས་ལ་སྩལ་བར་བགྱིའོ། །དེ་དག་ཀྱང་སྟོབས་མཉམ་པར་འགྱུར་རོ། །ཅི་སྟེ་མ་སྩལ་ན། བདག་བུད་མེད་བཅུས་བསྐོར་ཏེ་མི་ལ་ཞོན་ཏེ་གར་དགའ་བ་དེར་མཆིའོ། །ཡང་ཡིད་ཀྱིས་བསམ་པ་དེ་བཞོན་པ་ལས་འབྱུང་ངོ་། །ལོ་བརྒྱད་ཁྲིར་འཚོ་བར་འགྱུར་རོ། །རིག་སྔགས་འཆང་དུ་ཡང་འགྱུར་རོ། །མར་གྱི་ངོ་ཞག་བརྒྱད་དམ་བཅུ་བཞི་ལ་སྐྱེས་པ་ཤི་བའི་རོ་བཞག་པའི་ཕྱོགས་ཀྱི་གཡས་རོལ་གྱི་ཟུར་ཤིང་ཁྱེར་སོང་ལ། ཕྱི་མ་མར་གྱི་ངོ་ཞག་བརྒྱད་ལ་དེ་མདུང་རྩེ་གསུམ་པར་བགྱིས་ལ་སློང་མོ་བའི་ཟས་བཟའ་ཞིང་རིག་སྔགས་འཆང་བཟླས་བརྗོད་བགྱིའོ། །ཕྱི་མ་མར་གྱི་ངོ་ཞག་བརྒྱད་ནས་ཞག་གསུམ་སྨྱུང་བ་བགྱིས་ཏེ་དུར་ཁྲོད་དུ་སོང་ལ་མདུང་རྩེ་གསུམ་པ་ལ་མཆོད་པ་རྒྱ་ཆེར་བགྱིས་ཏེ། མདུང་རྩེ་གསུམ་པ་ལག་པ་གཡས་པར་ཐོགས་ལ། རིག་པའི་མཆོག་ལན་བརྒྱད་སྟོང་བཟླས་བརྗོད་བགྱིས་ན། མདུང་རྩེ་གསུམ་པ་ལས་འོད་ཟེར་འབྱུང་སྟེ། དེ་ནས་དངོས་གྲུབ་དུ་འགྱུར་རོ། །མཚན་མོ་བཙུགས་ན། རྒྱན་ཐམས་ཅད་ཀྱིས་བརྒྱན་པའི་བུད་མེད་དག་འབྱུང་ངོ་། །སྐྱེས་པ་ཅི་ལ་མ་རེག་པར་ཆས་པ་དག་ཀྱང་ཉེ་བར་གནས་སོ། །གང་བསམ་པ་ཐམས་ཅད་རྙེད་དོ། །ཕྱུང་ན། ཐམས་ཅད་མེད་པར་འགྱུར་རོ། །འབྱུང་པོ་རྣམས་ཕྱག་བརྙན་དུ་འགྱུར་རོ། །ཆོ་ག་གང་ལ་བླངས་པའི་ཆོ་ག་དེ་ཉིད་ལ་བསྒྲུབ་པར་བགྱིའོ། །མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་ཅི་ནུས་ཀྱིས་མཆོད་པ་བགྱིས་ལ་དེའི་མདུན་དུ་འབྲས་ཆན་གྱིས་ལོ་མ་བཀང་སྟེ་བཞག་ལ་འབྲས་ཆན་མི་སྣང་བར་མ་གྱུར་གྱི་བར་དུ་བཟླས་བརྗོད་བགྱིའོ། །དེ་ནས་དངོས་གྲུབ་ཏུ་འགྱུར་ཏེ། ཕྱིས་འབྲས་ཆན་ལ་འཕོ་བར་བགྱིད་དོ། །རྫས་ཀྱང་འཕོ་བར་འགྱུར་རོ། །འབྲུའི་རྣམ་པ་གཞན་དག་ཀྱང་འཕོ་བར་འགྱུར་རོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བགྱིས་ཏེ་སེང་ལྡེང་ལ་བགྱིས་པའི་རྡོ་རྗེ་ལ་ཤིང་ཀུན་གྱིས་བདུགས་ལ་རིག་པ་མཆོག་གི་སྙིང་པོ་དང་ལྷན་ཅིག་བཟླས་བརྗོད་བགྱིས་ན། གང་གི་མིང་ནས་ཕྱུང་སྟེ་བཟླས་བརྗོད་བགྱིས་པ་དེ་བརྗེད་བྱེད་ཀྱིས་ཟིན་པར་འགྱུར་རོ། །ལྕེ་པོག་གིས་བདུགས་ལ་ལན་བརྒྱ་སྟོང་བཟླས་བརྗོད་བགྱིས་ན། གཏོང་བར་འགྱུར་རོ། །མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ལ་ཨེ་རཎྜའི་ཤིང་གི་ཞུགས་བུས་ལ་བ་ལང་གི་པགས་པ་ལ་སྲེག་བླུགས་ལན་བརྒྱད་སྟོང་མིང་ནས་བརྗོད་དེ་སྦྱིན་སྲེག་བགྱིས་ན་བ་ལང་རྣམས་འཆིའོ། །སྐྱེས་པའི་རོ་མ་སྨད་མ་ཉམས་པ་བླངས་ཏེ་ཆུ་འགྲམ་གྱི་ཕྱོགས་གཅིག་གམ། སྐམ་ས་གཙང་མར་ཕོ་ཉ་མོ་རྣམས་ཀྱིས་ལས་ཐམས་ཅད་བགྱིའོ། །དེ་ནས་རིག་སྔགས་འཆང་ཉི་མའི་གུང་ཚིགས་ལ་མི་རོའི་མགོ་ཤར་ཕྱོགས་སུ་བསྟན་ཏེ་ཕྱོགས་བཞིར་བསྙེན་བཀུར་བགྱིད་པ་བཞི་གཞག་པར་བགྱིའོ། །དེ་ནས་རིག་སྔགས་འཆང་དེའི་སྙིང་གར་ལྡོང་རོས་བཅུག་སྟེ་དངོས་གྲུབ་རྣམ་གསུམ་མ་ཐོབ་ཀྱི་བར་དུ་བཟླས་བརྗོད་བྱའོ། །འབར་བར་གྱུར་ན། ལོ་སྟོང་ཐུབ་བོ། །རྐང་པ་ལ་བསྐུས་ན། ལོ་ལྔ་བརྒྱ་ཐུབ་སྟེ། འདི་ནི། དངོས་གྲུབ་བོ། །མང་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་པ་ལ་ཤའི་ཤིང་གིས་ཞུགས་བུས་ལ་ཤིང་བིལ་བའི་ཡམ་སྲེག་ཤིང་ཞོ་དང་། སྦྲང་རྩི་དང་། མར་ལ་སྨྱུགས་པ་བརྒྱད་སྟོང་སྦྱིན་སྲེག་བགྱི་ཞིང་མིང་ནས་བརྗོད་ན། ཕྱུགས་ཆུང་རྙེད་དོ། །གལ་ཏེ་མ་རྙེད་ན། ཕྱུགས་ཆུང་དེ་འཆིའོ། །དགྲ་གང་ལ་ནད་ཀྱིས་བཏབ་པར་བགྱིད་འཚལ་ན|་རུ་རྟ་བཏགས་ལ་བདག་གི་ལུས་ལ་དྲིལ་བའི་དྲི་མ་བསགས་ཏེ་མར་གྱི་ངོ་ཞག་བརྒྱད་ལ་ལག་ན་རྡོ་རྗེའི་མདུན་དུ་དུ་རུ་ཀའི་ཤིང་གི་ཞུགས་བུས་ལ། དྲི་མ་དེས་ལན་བརྒྱད་སྟོང་སྦྱིན་སྲེག་བགྱི་ཞིང་མིང་ནས་བརྗོད་ན། དེ་མཛེ་ནད་ཀྱིས་འདེབས་སོ། །ལག་ན་རྡོ་རྗེའི་མདུན་དུ་ལྕེ་བོག་གི་བདུག་པས་བདུགས་ལ་རིག་སྔགས་ཀྱང་ལན་བརྒྱད་སྟོང་བཟླས་བརྗོད་བགྱིས་ན། གསོ་བ་བགྱིས་པར་འགྱུར་རོ། |ཡར་གྱི་ངོ་ཞག་གཅིག་རྒྱ་མཚོར་འབབ་པའི་ཆུ་ཀླུང་དུ་ཞུགས་ལ་ཟས་སུ་ཆུ་སྐྱོ་འཐུང་ཞིང་ཟླ་བ་ཉའི་བར་དུ་བཟླས་བརྗོད་བགྱིས་ན་ཡུལ་གྲུ་འཐོབ་བོ། །བྲམ་ཟེ་དབང་དུ་བགྱི་ན། ཡར་གྱི་ངོ་ཚེས་དྲུག་ནས་བརྒྱད་ཀྱི་བར་དུ་དུས་གསུམ་དུ་ལག་ན་རྡོ་རྗེའི་མདུན་དུ་སྣ་མའི་མེ་ཏོག་ལ་ལན་བརྒྱ་སྟོང་བཟླས་བརྗོད་བགྱིས་ལ་ཐ་མར་ཞག་གཅིག་སྨྱུང་བ་བགྱིས་ན་སྐྱེས་པའམ། བུད་མེད་ཀྱང་རུང་སྟེ་དབང་དུ་འགྱུར་རོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་བིལ་བའི་ཤིང་གི་ཞུགས་བུས་ལ་ཡུངས་ཀར་གྱི་འབྲུ་མར་དང་བསྲེས་པའི་ཏིལ་ལས་ལན་བརྒྱད་སྟོང་སྦྱིན་སྲེག་བགྱི་ཞིང་མིང་ནས་བརྗོད་ན་དབང་དུ་འགྱུར་རོ། །བུད་མེད་ཡུགས་ས་མོ་དབང་དུ་བགྱི་ན། ཉིན་ཞག་གཅིག་སྨྱུང་བ་བགྱིས་ལ་ལག་ན་རྡོ་རྗེའི་མདུན་དུ་ཨརྒའི་ཤིང་གི་ཞུགས་བུས་ཏེ་ཨརྒའི་མེ་ཏོག་མར་ལ་སྨྱུགས་པ་ལན་བརྒྱ་སྟོང་སྦྱིན་སྲེག་བགྱི་ཞིང་མིང་ནས་བརྗོད་ན་དབང་དུ་འགྱུར་རོ། །དུས་གསུམ་དུ་ཁྲུས་བགྱི་ཞིང་ལག་ན་རྡོ་རྗེའི་མདུན་དུ་ཤིང་མ་ད་ནའི་ཚེར་མ་ལས་ལན་བརྒྱ་སྟོང་སྦྱིན་སྲེག་བགྱིས་ན|་ཞག་གསུམ་གྱིས་དབང་དུ་འགྱུར་རོ། །མི་ངས་འབྱུང་བར་འཚལ་ན། མར་གྱི་ངོ་ཞག་བརྒྱད་ལ་དུར་ཁྲོད་དུ་སོང་ལ་དུར་ཁྲོད་ཀྱི་ཤིང་གི་ཞུགས་པུས་ལ་དུག་རློན་པས་ལན་བརྒྱད་སྟོང་སྦྱིན་སྲེག་བགྱིས་ན་མི་ངས་འབྱུང་ངོ་། །ཞི་བར་བགྱི་ན། མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་ཤིང་ཐ་མལ་པའི་ཞུགས་བུས་ཨུཏྤ་ལ་དང་། ཞོ་དང་། སྦྲང་རྩི་དང་། མར་ལ་སྨྱུགས་པ་བརྒྱད་སྟོང་སྦྱིན་སྲེག་བགྱིས་ན་ཞི་བར་འགྱུར་རོ། །གཞན་བསྐྲད་པར་འཚལ་ན། བྱ་ཁྭའི་གཤོག་པ་ཡུངས་ཀར་གྱི་འབྲུ་མར་ལ་སྨྱུགས་པ་བརྒྱད་སྟོང་ཞག་བདུན་དུས་གསུམ་དུ་སྦྱིན་སྲེག་བགྱིའོ། །འདི་ནི། བསྐྲད་པའི་མཆོག་གོ། དབྱེ་བ་བགྱི་ན། ཞག་བདུན་དུས་གསུམ་དུ་བ་ལང་གི་ལྕི་བ་ལས་བརྒྱད་སྟོང་སྦྱིན་སྲེག་བགྱིས་ན་དབྱེ་བ་བགྱིས་པར་འགྱུར་རོ། །ལས་གཅིག་གིས་ཆོ་ག་རྒྱས་པར་སྒྲུབ་པར་འཚལ་བས་མཱ་མ་ཀཱི་ཐོགས་ལ་པདྨའི་རྫིང་དུ་སོང་སྟེ་མཱ་མ་ཀཱི་ལ་རེག་པར་པདྨ་འབུམ་ཕུལ་ན་རིག་པའི་རྒྱལ་པོ་མཆོག་རང་གི་གཟུགས་སྟོན་ཏེ་དེ་ལ་བུ་ཅི་བྱ་ཞེས་སྨྲའོ། །དེས་བཅོམ་ལྡན་འདས། ཆོ་ག་རྒྱས་པའི་དངོས་གྲུབ་སྩལ་དུ་གསོལ། ཞེས་བརྗོད་པ་དང་། དེ་བཞིན་བྱའོ་ཞེས་བརྗོད་ནས་མི་སྣང་བར་འགྱུར་རོ། །དེ་ཆོ་ག་རྒྱས་པ་ལས་འབྱུང་བའི་ལས་ཐམས་ཅད་དངོས་གྲུབ་ཏུ་འགྱུར་རོ|་|གལ་ཏེ་དེས་ལས་གྲུབ་པར་མ་གྱུར་ན། དེའི་འོག་ཏུ་ལས་འདི་བསྒྲུབས་ན་དངོས་གྲུབ་ཀྱི་མཆོག་ཏུ་འགྱུར་རོ། །ཡར་གྱི་ངོ་ཉ་ནས་བཟུང་སྟེ་ཕྱི་མའི་ཉའི་བར་དུ་མི་སྨྲ་པའི་བརྟུལ་ཞུགས་ཀྱིས་ཟས་སུ་འོ་སྐྱོ་འཐུང་ཞིང་དེ་བཞིན་གཤེགས་པའི་མདུན་དུ་འབུམ་བཟླས་བརྗོད་བགྱིས་ན་། དེ་བཞིན་གཤེགས་པའི་གཟུགས་འགུལ་བར་འགྱུར་ཏེ། དེ་ནས་ཆོ་ག་རྒྱས་པ་དང་། དངོས་གྲུབ་ཏུ་འགྱུར་རོ། །རས་སྔོན་པོ་ལ་ལན་བརྒྱ་རྩ་བརྒྱད་བཟླས་བརྗོད་བགྱིས་ཏེ་འོག་སྒོར་བཅིངས་ལ་ལན་ཉི་ཤུ་རྩ་གཅིག་སྦྱིན་སྲེག་བགྱིས་པའི་ཐལ་བས་མགོ་བོར་སྲུང་བར་བགྱིས་ན། གྱད་ཕར་ནོན་ཅིང་གྱད་ཀྱིས་ཚུར་མི་ནོན་ནོ། །ཡིད་གཞུངས་པར་བགྱི་ན། བྲ་མའི་ཁུ་བ་མར་དང་ཆ་བསྙམས་ལ་མར་གྱི་ངོ་ཞག་བཅུ་བཞི་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའོ་མདུན་དུ་ལན་བརྒྱད་སྟོང་བཟླས་བརྗོད་བགྱིས་པ་འཐུངས་ན། ཐོས་པ་འཛིན་པར་འགྱུར་རོ། །ཡར་གྱི་ངོ་ཚེས་ཞག་གཅིག་ནས་བརྩམས་ཏེ་ལག་ན་རྡོ་རྗེའི་མདུན་དུ་མར་དང་འོ་མ་བསྲེས་པ་ལས་ལན་བརྒྱ་རྩ་བརྒྱད་བཟླས་བརྗོད་བགྱིས་པ་འཐུངས་ཤིང་ཞག་བདུན་བགྱིས་ན། ཐོས་པ་འཛིན་པར་འགྱུར་རོ། །ཡར་གྱི་ངོ་ཉ་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་ཨང་གོ་ཏའི་མེ་ཏོག་བརྒྱད་སྟོང་སྦྱིན་སྲེག་བགྱིས་ན། ཉི་མ་གསུམ་པ་ལ་ཐོས་པ་འཛིན་པར་འགྱུར་རོ། །ཞག་བདུན་ན་ལག་ན་རྡོ་རྗེའི་ཁ་ནས་འོད་ཟེར་འབྱུང་སྟེ། རིག་སྔགས་འཆང་ལ་བསྐོར་བ་བྱས་ནས་གྱེན་དུ་འགྲོ་བར་འགྱུར་རོ། །རིག་སྔགས་འཆང་ཇི་ལྟར་འདོད་པའི་གཟུགས་ཅན་དུ་འགྱུར་རོ། །ལོ་སུམ་སྟོང་ཐུབ་པར་འགྱུར་རོ། །མར་གྱི་ངོ་ཞག་བཅུ་ལ་ལག་ན་རྡོ་རྗེའི་མདུན་དུ་སྣ་མའི་མེ་ཏོག་བརྒྱད་སྟོང་ཕུལ་ན། གནས་སྟོན་པར་འགྱུར་རོ། །ཆོ་ག་རྒྱས་པ་སྒྲུབ་པ་པོས་ཉ་དང་། ཤ་དང་། ཏིལ་དང་། སྲན་ཆན་གྱི་བག་དང་། ལྷ་བཤོས་དང་། ཁ་འདའ་དང་། ལ་ཕུག་དང་། ཤིང་ཐོག་རྣམས་བཟའ་བར་མི་བགྱིའོ། །གལ་ཏེ་འདི་དག་ཀྱང་ཟོས་ལ་ལས་ཀྱང་བསྒྲུབས་ན། ལག་ན་རྡོ་རྗེའི་དེ་ཉིད་མཐར་བྱེད་ཅིང་ལས་ཀྱང་དངོས་གྲུབ་ཏུ་མི་འགྱུར་རོ། །སེངྒེ་སྒྲུབ་ན། མར་གྱི་ངོ་ཞག་བརྒྱད་ལ་གྲོག་མཁར་རྩེ་མོ་ཡོད་པའི་མདུན་ནས་ས་བླངས་ཏེ་བའི་རྣམ་ལྔ་དང་བསྲེས་ལ་སེངྒེའི་གཟུགས་བགྱིས་ཏེ་གསོ་སྦྱོང་བཟུང་ལ། ཟླ་བ་གཅིག་ཟས་སུ་འོ་སྐྱོ་འཐུང་ཞིང་ཐ་མར་ཞག་གསུམ་སྨྱུང་བ་བགྱིས་ཏེ་མར་གྱི་ངོ་ཞག་བརྒྱད་ལ་བསྒྲུབ་བོ། །སྔར་པོ་ཉ་མོ་རྣམས་ཀྱིས་ལས་རྣམས་བགྱིའོ། །བསྙེན་བསྐུར་བགྱིས་པ་རྣམས་ཀྱང་བསྲུང་བར་བགྱིའོ། །དེ་ནས་ལག་ན་རྡོ་རྗེའི་མདུན་དུ་བཟླས་བརྗོད་བགྱིས་ཏེ་སེངྒེའི་སྒྲ་འབྱིན་གྱི་བར་དུ་བགྱིའོ། །སེངྒེའི་སྒྲ་ཐོས་ནས་ལྷ་མ་ཡིན་གྱི་བུ་མོ་རྣམས་འབྱུང་ངོ་། །དེ་དག་ལ་འདོད་པ་བསྐྱེད་པར་མི་བགྱིའོ། །གལ་ཏེ་འདོད་པ་བསྐྱེད་ན། སེངྒེ་ནི། མ་མཆིས་སོ། །ལྷ་མ་ཡིན་གྱི་བུ་རྣམས་ནི། མཆིས་ཏེ། ལྷ་མ་ཡིན་རྣམས་ཀྱང་ཡོངས་སུ་སྤྱད་པར་འགྱུར་རོ། །གལ་ཏེ་དེ་དག་ལ་འདོད་པ་མ་བསྐྱེད་ན། སེངྒེར་འགྱུར་ཏེ། སེངྒེ་ལ་ཞོན་ནས་རིག་སྔགས་འཆང་གི་བུ་མོ་བརྒྱད་ཅུ་འབྱུང་ངོ་། །རིག་སྔགས་འཆང་བཞི་སྟོང་ཡང་གཡོག་འཁོར་དུ་འགྱུར་རོ། །གང་དུ་འདོད་པ་དེར་མཆིའོ། །རིག་སྔགས་འཆང་གི་འཁོར་ལོས་བསྒྱུར་བར་འགྱུར་རོ། །འཁོར་ལོ་ལ་སོགས་པའི་སྤྱོད་ཡུལ་དུ་མི་འགྱུར་རོ། །གང་གི་ཚེ་རྡོ་རྗེ་དང་། འཁོར་ལོ་དང་། མདུང་རྩེ་གསུམ་པ་དང་། བེ་ཅོན་དང་། ཞགས་པ་དང་། མདུང་ཐུང་དང་། དབྱུག་ཏོ་རྣམས་མཆི་བ་དེའི་ཆེ་སེངྒེས་སེངྒའི་སྒྲ་འབྱིན་ཏེ་སེངྒེའི་སྒྲས་མཚོན་པ་ཐམས་ཅད་དཔག་ཚད་བརྒྱད་ཁྲིར་མཆིའོ། །རིག་སྔགས་འཆང་གི་རྒྱལ་པོ་གང་དག་སེངྒེའི་སྒྲ་ཐོས་པ་དེ་དག་ཐམས་ཅད་ས་ལ་ལྷུང་ངོ་། །མཚོན་ཆད་དག་ཐམས་ཅད་ཀྱང་དབང་དུ་འགྱུར་རོ། །བསྐལ་པར་གནས་པའི་རིག་སྔགས་འཆང་གི་རྒྱལ་པོར་འགྱུར་རོ། །མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱང་བ་བགྱིས་ཏེ་བའི་ལྕི་བ་ས་ལ་མ་ལྷུང་བ་བླངས་ཏེ་སྐམ་ས་གཙང་མའི་ཕྱོགས་སུ་གནོད་སྦྱིན་གྱི་གཟུགས་བགྱིས་ཏེ། དེ་ལ་མེ་ཏོག་དམར་པོ་དང་། གཏོར་མ་དམར་པོ་སྦྱིན་ནོ། །ཕོ་ཉ་མོ་རྣམས་ཀྱིས་ལས་ཐམས་ཅད་བགྱིའོ|་|ཕྱོགས་གཅིག་ཏུ་གནོད་སྦྱིན་ཐམས་ཅད་ལ་མེ་ཁ་ལས་མེ་ཏོག་དཀར་པོ་རྣམས་སྩོལ་ཏོ། །གཟུགས་དེའི་མདུན་དུ་ཨརྒའི་ཤིང་གི་ཞུགས་བུས་ལ་ཤིང་བིལ་བའི་ཡམ་སྲེག་ཤིང་ཞོ་དང་། སྦྲང་རྩི་དང་། མར་ལ་སྨྱུགས་པ་བརྒྱད་སྟོང་སྦྱིན་སྲག་བགྱིའོ། །དེ་ནས་གཟུགས་འགུལ་ཞིང་དངོས་གྲུབ་ཏུ་འགྱུར་ཏེ། ཉིན་རེ་ཏི་ན་ར་རེ་རེ་དབུལ་ལོ|་|དཔོན་གཡོག་བདུན་གྱི་ཟས་དབུལ་ལོ། །ལས་འདི་བསམ་པར་བགྱིས་ཏེ་གཙང་མར་བགྱིས་ལ་ལན་གཅིག་བཟླས་བརྗོད་བགྱིས་ཏེ་བ་ནག་མོ་མ་སྨད་སྤུ་མཐུན་གྱི་འོ་མ་བླངས་ལ་བྲམ་ཟེའི་བུ་མོས་བསྲུབས་པའི་མར་བླངས་ཏེ་མར་གྱི་ངོ་ཞག་བཅུ་བཞི་ལ་ཞག་གསུམ་དུ་སྨྱུང་བ་བགྱིས་ཏེ་མཚན་གཅིག་ཡོད་པའམ། ལག་ན་རྡོ་རྗེའི་ཁྱིམ་དུ་སོང་ལ་ཤིང་ཨ་ཤྭཏྠའི་ལོ་མ་བདུན་བླངས་ཏེ་དེ་དག་གི་སྟེང་དུ་གནོད་སྦྱིན་གྱི་གཟུགས་མཐེ་བོང་གི་ཆ་ཙམ་ཞིག་བགྱི་སྟེ། དེ་ནས་འགུལ་གྱི་བར་དུ་བཟླས་བརྗོད་བགྱིའོ|་|དེ་ནས་སོ་ལ་མ་རེག་པར་མེད་དོ། །དེ་ནས་དངོས་གྲུབ་ཏུ་འགྱུར་ཏེ། དེ་ཉིན་རེ་ཏི་ན་ར་རེ་རེ་དབུལ་ལོ། །དཔོན་གཡོག་བཅུ་གཉིས་ཀྱི་ཟས་དབུལ་ལོ། །འདི་ནི། དངོས་གྲུབ་བོ། ། རིག་སྔགས་གང་གཞག་ལ་བྱིན་པའི་རིག་སྔགས་དེ་ཕྱི་དྲོ་བཟླས་བརྗོད་བགྱིས་ལ། ཕྱི་དེ་ཉིན་རིག་པ་མཆོག་གི་སྙིང་པོ་དང་ལྷན་ཅིག་བཟླས་བརྗོད་བགྱིས་ན། དེ་ལ་ཚིགས་སུ་བཅད་པར་འགྱུར་གྱི། གསང་སྔགས་སུ་མི་འགྱུར་རོ། །དེ་ནས་འབྱུང་པོའི་བདག་པོ་དབང་ལྡན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། རིག་པའི་རྒྱལ་པོ་ཡི་གེ་བཞི་པ་ནི། བསྐལ་པ་བཞིར་གནས་པ་ལགས་སོ། །བཅོམ་ལྡན་འདས། རིག་པའི་རྒྱལ་པོ་རྫུ་འཕྲུལ་ཆེ་བ། དབང་ཆེ་བ་དང་། མ་རུངས་པ། གཏུམ་པ། དྲག་པོ་ལགས་སོ། །བཅོམ་ལྡན་འདས། མིང་བརྗོད་པས་བདག་ལ་གནོད་པ་ལགས་སོ། །ད་ནས་བཅོམ་ལྡན་འདས་ཀྱིས་འབྱུང་པོའི་བདག་པོ་དབང་ལྡན་ལ་འདི་སྐད་ཅེས་བཀའ་སྩལ་ཏོ། །འབྱུང་པོའི་བདག་པོ། དེ་དེ་བཞིན་ཏེ། ཇི་སྐད་སྨྲས་པ་དེ་བཞིན་ནོ། །འབྱུང་པོ་བདག་པོ། རིག་པའི་རྒྱལ་པོ་ཆེན་པོ་རིག་པ་མཆོག་འདི་ནི། རྫུ་འཕྲུལ་ཆེ་བའོ། ། འབྱུང་པོའི་བདག་པོ། རིག་པའི་རྒྱལ་པོ་ཆེན་པོ་འདི་ནི། འགྲོ་ལྡིང་བའི་གཟུགས་ཅན་འགྲོ་ལྡིང་གི་སྐད་དུ་བརྗོད་པའོ། །འབྱུང་པོའི་བདག་པོ། རིག་པའི་རྒྱལ་པོ་ཆེན་པོའི་མཆོག་འདི་ནི|་ཕྱག་འཚལ་བ་དང་བཅས་པར་ཡི་གེ་སུམ་ཅུ་རྩ་གཉིས་པའོ། །ཡི་གེ་བཞི་པ་འདི་ཡང་མི་མཉམ་པ་དང་མཉམ་པ། མཚུངས་པ་མེད་པ་སྟེ། བསྐལ་པ་བཞིར་གནས་པ་ཡིན་ནོ|་|བཅོམ་ལྡན་འདས་དེ་བཞིན་གཤེགས་པ་མར་མེ་མཛད་ནས་བཟུང་སྟེ་བཤད་པའོ། །འབྱུང་པོའི་བདག་པོ། འདི་ཐོས་ན་སེམས་ཅན་གང་དག་མཚམས་མེད་པ་ལྔ་བྱེད་པ་དེ་དག་ཀྱང་སེམས་ཅན་དམྱལ་བ་ཆེན་པོ་མནར་མེད་པར་སྐྱེ་བ་དེ་ནི། གནས་མ་ཡིན་ཞིང་གོ་སྐབས་མེད་དེ། རིག་པའི་རྒྱལ་པོ་ཆེན་པོ་རིག་པ་མཆོག་གི་མཐུ་ནི། འདི་ཡིན་ནོ། །འདི་ལྟ་སྟེ|་དཔེར་ན། ནོར་བུ་རིན་པོ་ཆེ་ཆེན་པོའི་རྒྱལ་པོ་གཙུག་ཏོར་ལྡན་ཞེས་བྱ་བ་མཐོང་བ་ཙམ་གྱིས་ནད་ཐམས་ཅད་མེད་པར་འགྱུར་ཞིང་གདོན་ཐམས་ཅད་ཀྱང་འབྲོས་པར་འགྱུར་རོ། ། འབྱུང་པོའི་བདག་པོ། དེ་བཞིན་དུ་རིག་པའི་རྒྱལ་པོ་ཆེན་པོ་བཞི་དག་གང་གིས་བཟླས་བརྗོད་བྱས་པ་དེ་མཚོན་གྱིས་འཆི་བའི་དུས་བྱེད་པར་མི་འགྱུར་ཏེ། དུག་གིས་མ་ཡིན། ཆུས་མ་ཡིན། མེས་མ་ཡིན་ཞིང་། དེ་ཡང་བར་མདོར་འཆི་བར་མི་འགྱུར་རོ། །ངན་འགྲོ་ལོག་པར་ལྟུང་བར་མི་འགྱུར་རོ། །ངེས་པར་རྡོ་རྗེའི་རིགས་སུ་སྐྱེ་བར་འགྱུར་ར་ཨོ|་|དེ་ནས་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་སྤྱན་སྔར་འདུག་ནས་མགོ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ|་|བཅོམ་ལྡན་འདས། ཅིའི་སྐད་དུ་རིག་པའི་རྒྱལ་པོ་ལག་ན་རྡོ་རྗེ་འདི་སྐད་དུ་རིག་པའི་རྒྱལ་པོ་མི་མཉམ་པ་དང་མཉམ་པ། མཚུངས་པ་མེད་པ་འདི་བདག་གིས་བཅོམ་ལྡན་འདས་དེ་བཞིན་གཤེགས་པ་མར་མེ་མཛད་ནས་བཟུང་སྟེ་བཤད་དོ་ཞེས་གསུང་། བཅོམ་ལྡན་འདས། བདག་གི་མངོན་པར་ཤེས་པའི་སྟོབས་ཀྱིས་མཱ་མ་ཀཱི་དེ་ལྟར་རྫུ་འཕྲུལ་ཆེ་བ་ཡང་རྗེས་སུ་དྲན་ཏེ། རྡོ་རྗེ་འཆང་ཆེན་པོ་འདི་ཉིད་ཀྱིས་དེ་བཞིན་གཤེགས་པ་འཁོར་བ་འཇིག་གི་གསུང་རབ་ལ་ལྷ་རྣམས་ལ་མཱ་མ་ཀཱི་བསྟན་ཏེ། འཁོར་འ་དུས་པ་དེར་མཚམས་མེད་པ་བགྱིས་པའི་སེམས་ཅན་གཅིག་ཅིག་ཧ་ཅང་ཡང་མི་རིང་བ་ཞིག་ན་མཆིས་པ་དེ་འོད་ཟེར་གྱི་སྣང་བ་དེ་མཐོང་ནས་ཡིད་དགའ་བར་གྱུར་ཏེ་རྣམ་པར་བལྟས་ནས་རིག་སྔགས་འཆང་རྣམས་ཀྱི་རྒྱལ་བོ་རྡོ་རྗེ་ཕྲེང་བ་ཞེས་བགྱི་བར་འགྱུར་ཏོ། །ཤཱ་རིའི་བུས་རིག་སྔགས་འཆང་དེ་ལ་བསམས་སོ། །དེ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། དེ་དང་ཤཱ་རིའི་བུ་ཡང་བཅོམ་ལྡན་འདས་ཀྱི་སྤྱན་སྔར་འདུག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དེའི་སླད་དུ་མཱ་མ་ཀཱི་དེ་ལྟར་རྫུ་འཕྲུལ་ཆེའོ་ཞེས་བདག་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། དོན་དེ་རྡོ་རྗེ་འཆང་ཆེན་པོ་ལ་དྲིས་ཤིག་།དེ་ནས་ཤཱ་རིའི་བུས་རྡོ་རྗེ་འཆང་ཆེན་པོ་ལ་འདི་སྐད་ཅེས་སྨྲས་སོ། །རིག་པའི་རྒྱལ་པོ་མཆོག། ཁྱོད་ཅིའི་ཕྱིར་བཅོམ་ལྡན་འདས་དེ་བཞིན་གཤེགས་པ་མར་མེ་མཛད་ནས་བཟུང་སྟེ་བདག་གིས་རིག་པའི་རྒྱལ་པོ་ཆེན་པོ་འདི་བཤད་ཅེས་དེ་སྐད་སྨྲ། རྡོ་རྗེ་འཆང་ཆེན་པོས་འདི་སྐད་ཅེས་སྨྲས་སོ། །ཤཱ་རིའི་བུ། དེ་ཇི་སྙམ་དུ་སེམས། ཅི་དེ་བཞིན་གཤེགས་པ་གཙོ་བོ་ཡིན་ནམ། ཤེས་རབ་ཀྱི་ཕ་རོལ་ཏུ་ཕྱིན་པ་གཙོ་བོ་ཡིན། ཤེས་རབ་ཀྱི་ཕ་རོལ་ཏུ་ཕྱིན་པ་གཙོ་བོ་ཡིན་ནམ། དེ་བཞིན་གཤེགས་པ་གཙོ་བོ་ཡིན་ཞེ་ན། ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལས་བྱུང་ལ། དེ་བཞིན་གཤེགས་པ་ཐམས་ཅད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་བཤད་དོ། ཤཱ་རིའི་བུ། དེ་བཞིན་དུ་བདག་གིས་ཀྱང་རིག་པའི་རྒྱལ་པོ་ཆེན་པོ་མཆོག་གི་སྙིང་པོ་ལ་བྱས་ལ། བཅོམ་ལྡན་འདས་དེ་བཞིན་གཤེགས་པ་ཡེ་ཤེས་སྒྲོན་མ་ཆེན་པོའི་འོད་ཟེར་གྱི་རྒྱལ་པོ་དེའི་མཐུས་མཱ་མ་ཀཱི་ཕྱག་རྒྱ་ཆེན་པོའི་རྒྱལ་མོ་ཆེན་མོ་དེ་ཐོབ་བོ། །དེ་ནས་ཤཱ་རིའི་བུ་ཅང་མི་སྨྲ་བར་གྱུར་རོ། །དེའི་ཚེ་བཅོམ་ལྡན་འདས་ཀྱིས་འབྱུང་པོའི་བདག་པོ་དབང་ལྡན་ལ་བཀའ་སྩལ་པ། འབྱུང་པོའི་བདག་པོ། གང་གིས་དེ་བཞིན་གཤེགས་པ་འབུམ་ཕྲག་གངྒཱའི་ཀླུང་དགུ་བཅུ་རྩ་གཉིས་ཀྱི་བྱེ་མ་སྙེད་ལ་ཕྱག་བྱས་པ་བྱས། གང་གིས་རིག་པའི་རྒྱལ་པོ་ཆེན་པོའི་མཆོག་ལག་ན་རྡོ་རྗེ་ལ་ཡིད་ཀྱིས་ཕྱག་བྱས་པ་དེ་ནི། དེ་ཉིད་ལས་བསོད་ནམས་མང་དུ་བསྐྱེད་དོ། །དེ་ནས་བྱང་ཆུབ་སེམས་དཔའ་རྟོགས་པ་དྲི་མ་མེད་པས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་ལག་ན་རྡོ་རྗེ་འདིས་ཇི་སྲིད་ཅིག་ནས་རིག་པའི་རྒྱལ་པོ་ཆེན་པོ་དང་། རིག་སྔགས་འཆང་གི་བདག་པོར་བསྐོས་པ་ཐོབ་སྟེ|་འདི་ཏིང་ངེ་འཛིན་གང་གིས་གནས། འདིའི་སྔོན་གྱི་དགེ་བའི་བཤེས་གཉེན་ནི། སུ་ལགས། འདི་གནས་པ་གང་གིས་གནས། དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྟོགས་པ་དྲི་མ་མེད་པ་ལ་འདི་སྐད་ཅེས་བཀའ་སྩལ་ཏོ། །རྟོགས་པ་དྲི་མ་མེད་པ། སྔོན་བྱུང་བ་འདས་པའི་དུས་ན་བསྐལ་པ་གངྒཱའི་ཀླུང་དགུ་བཅུའི་བྱེ་མ་སྙེད་འདས་པ་ན་གདུལ་དཀའ་ཞེས་བྱ་བའི་བསྐལ་པ་ཆེན་པོ་བྱུང་སྟེ། བསྐལ་བ་ཆེན་པོ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་སྒྲོན་མ་ཆེན་མོའི་འོད་ཟེར་ཞེས་བྱ་བ་འཇིག་རྟེན་དུ་བྱུང་ངོ་། །རིགས་ཀྱི་བུ། འཇིག་རྟེན་གྱི་ཁམས་མི་མཇེད་འདི་ནི། དེའི་ཚེ་དེའི་དུས་ན་རྡོ་རྗེ་ལྡན་ཞེས་བྱ་བའི་འཇིག་རྟེན་གྱི་ཁམས་སུ་གྱུར་ཏོ། །བཅོམ་ལྡན་འདས་དེ་བཞིན་གཤེགས་པ་ཡེ་ཤེས་སྒྲོན་མ་ཆེན་པོའི་འོད་ཟེར་དེ་ནི། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་ལ་མུན་པ་མུན་ནག་རྣམ་པར་སེལ་བ་རྣམ་པར་སྣང་བྱེད་ཅེས་བྱ་བའི་ཆོས་ཀྱི་རྣམ་གྲངས་དེ་བཞིན་གཤེགས་པའི་གསང་བ་འཆད་དོ། །རྡོ་རྗེ་འཆང་གི་རིགས་འཇིག་རྟེན་གྱི་ཁམས་རབ་འབྱམས་དཔག་ཏུ་མེད་པ་ནས་འདུས་པ་འཇིག་རྟེན་གྱི་ཁམས་མཐའ་ཡས་མུ་མེད་པའི་རྔུལ་ཕྲ་རབ་སྙེད་ལ་ཏིང་ངེ་འཛིན་དང་། གཟུངས་ཀྱི་སྔགས་པ་དཔག་ཏུ་མེད་པ་བསྟན་པའི་ཕྱིར་འཛུམ་པ་མཛད་དོ། །དེ་ནས་རྡོ་རྗེ་འཆང་ཆེན་པོའི་ཁྱུ་མཆོག་ཏུ་གྱུར་པ་འཇིག་རྟེན་མཐའ་ཡས་པའི་དབང་ཕྱུག་གི་རྒྱལ་པོ་ཞེས་བྱ་བ་འ་ཁོར་འདུས་པ་དེ་ཉིད་དུ་འདུས་པར་གྱུར་བ་དེ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ངས་ལ་བཙུགས་ཏེ་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་ཡང་ལངས་ཏེ། རྟོགས་ཡངས་པ་ཆེན་པོ་རབ་འབྱམས་ཀྱི་འོག་གི་ཕྱོགས་ནས་ཕྱག་རྒྱ་ཆེན་པོ་བསྒྱུར་བས་རྡོ་རྗེ་བླངས་ཏེ་ཕྱོགས་བ་ཅུའི་འཇིག་རྟེན་གྱི་ཁམས་རབ་འབྱམས་མཐའ་ཡས་རྒྱ་མཚོ་རྣམ་པ་བཅུ་ཡང་དག་པར་བསྐུལ་ནས་དེ་དག་གིས་རྒྱལ་པོ་བསྒྱིངས་པར་བསྒྱུར་བས་རྒྱ་མཚོ་ཆེན་པོ་བསྡུ་བའི་ཏ་ཤུལ་གྱི་ང་རྒྱལ་ཆེན་པོ་ངེས་རྡོ་རྗེ་གསོར་ནས་དུས་ཀྱི་ཐ་མ་འཇིག་པའི་མེ་ལྟ་བུའི་མིག་གི་འཛུམ་པའི་འོད་ཟེར་འབར་བའི་དཀྱིལ་འཁོར་གྱི་འོག་གི་ཕྱོགས་ཀྱི་ཕྱག་རྒྱ་བསྒྱུར་བས་རྡོ་རྗེ་དེ་དེ་བཞིན་གཤེགས་པའི་ཞབས་ཀྱི་དྲུང་དུ་བཞག་སྟེ་ཞབས་གཉིས་ལ་ཕྱག་འཚལ་ནས་དེ་བཞིན་གཤེགས་པ་དེ་ལ་འཛུམ་པ་མཛད་པའི་རྒྱུ་དེ་ཞུས་པ། དེ་ཅིའི་སླད་དུ་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཆེན་པོའི་འཁོར་འདུས་པ་ལ་འཛུམ་པ་བསྟན། བཅོམ་ལྡན་འདས་ཀྱི་ཞལ་གྱི་སྒོ་དང་། སྨིན་མཚམས་ཀྱི་མཛོད་སྤུ་ནས་སྔོན་མ་བྱུང་བའི་འོད་ཟེར་ཁ་དོག་སྣ་ཚོགས་བྱུང་། བཅོམ་ལྡན་འདས། དེའི་སླད་དུ་འཁོར་འདིས་བསྐུལ་ནས་བདག་བཅོམ་ལྡན་འདས་ལ་ཞུ་ཞིང་མཆིས་ན། ཐུགས་རྗེ་ཆེན་པོ་དང་ལྡན་པ་བཅོམ་ལྡན་འདས་ཀྱིས་བདག་དང་བྱང་ཆུབ་སེམས་དཔའི་ཚོགས་འདི་ལ་ཐུགས་བརྩེ་པའི་སླད་དུ་བཀའ་སྩལ་དུ་གསོལ། རྡོ་རྗེ་བསྒྱིངས་པ་ཆེན་པོ་འཇིག་རྟེན་མཐའ་ཡས་པའི་དབང་ཕྱུག་གི་རྒྱལ་པོ་ལག་ན་རྡོ་རྗེས་དེ་སྐད་ཞུས་པ་དང་། དེ་ནས་དེའི་ཚེ་བཅོམ་ལྡན་འདས་ཀྱིས་མཚན་དཔལ་བེའུ་ཆེན་པོ་ལས་མཐོན་ཁ་ཆེན་པོ་དང་། བཻཌཱུཪྱ་ལྟ་བུ་འོད་ཟེར་ནོར་བུ་རིན་པོ་ཆེ་ཆེན་པོ་སྐར་མདོག་ལྟ་བུའི་འོད་དང་ལྡན་པ་འོད་ཟེར་ཆེན་པོའི་དཀྱིལ་འཁོར་ཕྱོགས་བཅུའི་འཇིག་རྟེན་གྱི་ཁམས་རབ་འ་བྱམས་མཐའ་ཡས་པར་ཆེར་སྣང་བའི་འོད་ཟེར་གྱི་མེ་ལྕེ་བྱུང་ནས་དྲི་མ་མེད་པའི་འོད་ཟེར་རྣམ་པར་འཕྲོ་བའི་དཀྱིལ་འཁོར་ལས་ལག་པ་གཡོན་པས་རྡོ་རྗེ་བླངས་པ་ལས་གསང་བའི་བདག་པོ་ལག་ན་རྡོ་རྗེ་རིག་པའི་རྒྱལ་པོ་ཆེན་པོ་བྱུང་ངོ་། །ལྕགས་ཀྱུའི་མཚན་ལས་ནི། ལྕགས་ཀྱུ། ཉས་ནི། འདོང་བའི་རྡོ་རྗེ་མ། བཀྲ་ཤིས་ལས་ནི། ལུ་གུ་རྒྱུད། གཡུང་དྲུང་འཁྱིལ་པ་མཆོག་ཏུ་མཛེས་ཤིང་མེ་འབར་བ་ལྟ་བུ་ལས་ནི། མེ་ཁ་ལ། བྱ་མ་བུམ་ལས་ནི། སེར་མོ། །གདུགས་ལས་ནི། རྒྱལ་མཚན་དྲག་པོ། །རྡོ་རྗེ་ལས་ནི། དགའ་བ་སྟེ། རྒྱལ་མོ་ཆེན་མོ་ཕོ་ཉ་མོ་དང་འཁྲོ་དུ་བཅས་པ་བདུན་པོ་དེ་དག་བྱུང་ངོ་། །དེ་དག་གི་མདུན་དུ་མ་རུངས་པ་ཁྲོ་བོའི་གཟུགས་སྟོབས་པོ་ཆེན་དང་། ཁྲོ་བོ་ཀི་ལི་ཀི་ལི་དུས་ཀྱི་མའི་རིན་པོ་ཆེ་ལྟ་བུ་རྡོ་རྗེ་ཁུ་ཚུར་ལས་བྱུང་ངོ་། །ལག་ངར་ལས་ནི། ཁུ་ཚུར་རོ། །ཕྲག་པ་འབར་ཞིང་མཛེས་པ་ལས་ནི། རྡོ་རྗེ་གནམ་ལྕགས་ཏེ། དེ་ལྟར་འཁོར་དང་བཅས་པའི་ཕོ་ཉ་མོ་བཅུའོ|་|དེ་བཞིན་དུ་དྲུག་ཅུ་ཕྲག་བཞིར་བསྒྲེའོ། །རྟོགས་པ་དྲི་མ་མེད་པ། འདི་ལྟར་ལག་ན་རྡོ་རྗེ་གཡོག་འཁོར་དང་བཅས་ཤིང་ཕོ་ཉ་མོ་དང་། འཁོར་ད་ཨང་བཅས་པ་བྱུང་ནས་དམ་ཚིག་ཆེན་པོ་དང་ལྡན་པའི་དཀྱིལ་འཁོར་དུ་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་སྒྲོན་མ་མཆེན་པོའི་འོད་ཟེར་ལས་དེས་དེ་བཞིན་གཤེགས་པའི་བྱིན་གྱི་རླབས་ཀྱིས་གསོལ་བ་བཏབ་པ་དང་། དེ་བཞིན་གཤེགས་པ་དེའི་མ་མེད་བཞེས་བྱ་བའི་ཏིང་ངེ་འཛིན་ལ་མཉམ་པར་བཞག་སྟེ་ཐོག་མར་དེ་བཞིན་གཤེགས་པས་སྐུ་དང་། གསུང་དང་། ཐུགས་ཀྱི་གསང་བ་བཅུ་དང་། གསང་བ་མཐའ་ཡས་དཀྲིགས་ཕྲག་བྱེ་བ་དང་ལྡན་བའི་མདོ་སྡེའི་དབང་པོའི་རྒྱལ་པོ་དེ་གདུལ་དཀའ་བ་རྣམས་འདུལ་བ་དང་། ཐམས་ཅད་མཁྱེན་པའི་ཡེ་ཤེས་བསྟན་པའི་ཕྱིར་དེ་བཞིན་གཤེགས་པའི་འཁོར་དམ་ཚིག་ཅན་འདུས་པའི་དཀྱིལ་འཁྲོ་དུ་བཤད་དོ། །རྟོགས་པ་དྲི་མ་མེད་པ། དེ་ཚུན་ཆད་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་སྒྲོན་མ་ཆེན་པོའི་འོད་ཟེར་དེ་ལ་སོགས་པ་སངས་རྒྱས་བྱེ་བ་ཕྲག་དགུ་བཅུ་རྩ་དགུའི་གམ་དུ་བདུད་ཕམ་པར་མཛད་ནས་བསྟན་པ་ཀུན་ཏུ་བཟུང་བར་གྱུར་ཏོ། །རྟོགས་པ་དྲི་མ་མེད་པ། དེ་ལ་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་སྒྲོན་མ་ཆེན་པོ་འོད་ཟེར་དེའི་འ་ཨོག་ཏུ་བསྐལ་པ་དགུ་བཅུ་རྩ་དྲུག་པ་ལ་འཇིག་རྟེན་གྱི་ཁམས་མི་མཇེད་འདིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་གཟིགས་པ་ཞེས་བྱ་བ་འཇིག་རྟེན་དུ་བྱུང་སྟེ། བཅོམ་ལྡན་འདས་དེའི་གསུང་རབ་ལ་བདུད་ཅང་མི་སྨྲ་བ་ཞེས་བྱ་བ་དེ་བྱུང་ངོ་། །རྟོགས་པ་དྲི་མ་མེད་བ། ལག་ན་རྡོ་རྗེ་དེས་ཀྱང་བདུད་ཕམ་པར་བྱས་ནས་དོན་གཟིགས་པ་ཞེས་བྱ་བའི་དེ་བཞིན་གཤེགས་པ་བརྒྱད་ཅུ་དང་། སངས་རྒྱས་བྱེ་བ་ཕྲག་དགུ་བཅུ་རྩ་གཅིག་ལས་བདུད་ཕམ་པར་བྱས་ཏེ་བསྟན་པ་སྲུང་བར་བྱས་སོ། །དེ་ཚུན་ཆང་བསྐལ་བ་ད་གུ་བཅུ་རྩ་དྲུག་ལྷག་བ་ཞིག་འདས་ནས་སངས་རྒྱས་གསེར་དུ་སྣང་བས་རྣམ་པར་རོལ་བ་ཞེས་བྱ་བ་བསྐལ་བ་བྱེ་བ་ཕྲག་དྲུག་ཅུ་རྩ་བརྒྱད་ལས་བདུད་ཕམ་པར་བྱས་ཏེ་བསྟན་པ་ཀུན་ཏུ་བསྲུངས་པར་གྱུར་ཏོ། །དེའི་འོག་ཏུ་དེར་སྟོང་སྙེད་འདས་ནས་ལག་ན་རྡོ་རྗེ་འདི་དེ་བཞིན་གཤེགས་པ་དེ་དག་གི་གསང་བ་འཛིན་པ་དང་། བསྟན་པ་སྲུང་བར་གྱུར་ཏོ། །དེ་བཞིན་དུ་སྦྱར་ཏེ་ཐ་མར་དེ་བཞིན་གཤེགས་པ་གཙུག་ཏོར་ཅན་དང་། རྣམ་པར་གཟིགས་དང་། ཐམས་ཅད་སྐྱོབ་དང་། གསེར་ཐུབ་དང་། དེ་བཞིན་དུ་ལོག་པར་དང་སེལ་དང་། མི་འཁྲུགས་པ་དང་། འོད་སྲུང་ལ་སོགས་པ་དང་། ངའི་བསྟན་པ་ལ་ཡང་མ་དུལ་བ་དང་། དེ་བཞིན་དུ་གསང་བ་འཛིན་ཅིང་བསྐལ་པ་བཟང་པོ་ལ་འཇིག་རྟེན་གྱི་ཁམས་མི་མཇེད་འདི་ཉིད་དུ་སངས་རྒྱས་ཀྱི་མཛད་པ་བྱེད་དེ། བསྐལ་པ་བཟང་པོའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཇི་སྙེད་པ་ཐམས་ཅད་ལ་དེ་བཞིན་དུ་མཐར་གྱིས་ཐབས་འདིས་བསྟན་པ་ལ་བྱ་བ་བྱས་ནས་མངོན་པར་རྫོགས་པར་སངས་རྒྱས་ཏེ། རྡོ་རྗེའི་རྩལ་གྱིས་འགྲོ་བ་ཞེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཨ་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་བཀའ་སྩལ་ཏོ|་|དེ་ནས་བཅོམ་ལྡན་འདས་ལ་འབྱུང་པོའི་བདག་པོ་དབང་ལྡན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ཀྱང་རིག་པ་མཆོག་གི་ལས་སྩལ་བར་བགྱིའོ། །མ་གོད་པའི་རས་ལ་རི་མོ་མཁན་གསོ་སྦྱོང་བཟུང་བས་སངས་རྒྱས་ཀྱི་སྐུ་གཟུགས་གསེར་གྱི་ཁ་དོག་ལྟར་འབྲིར་སྩལ་ཏོ། །དེ་བཞིན་གཤེགས་པའི་གཡས་རོལ་དུ་ལག་ན་རྡོ་རྗེ་མདོག་སྔོ་བསངས། རྒྱན་ཐམས་ཅད་ཀྱིས་བརྒྱན་པའོ། །ལག་ན་རྡོ་རྗེའི་གཡས་རོལ་དུ་ནི། ཕོ་ཉ་མོ་བཅུ་གཉིས་ཏེ། རྒྱལ་བའི་བློ་གྲོས་མ་དང་། མེ་ཁ་ལ་ནི|་སྔོ་བསངས་སོ། །རྡོ་རྗེའི་གདོང་དང་། རྡོ་རྗེ་ལྟེ་བ་དང་། གདོང་དཀར་མོ་དང་། རྡོ་རྗེ་སེར་མོ་དང་། ནག་མོ་དང་། གྱེན་དུ་ལྟ་བའི་གདོང་ནི། གསེར་མདོག་གོ། རྡོ་རྗེ་སེངྒེའི་ཁྲི་དང་། རྡོ་རྗེ་ལྡན་མ་དང་། ཤུགས་ལྡན་མ་དང་། རྡོ་རྗེ་བཞད་མ་ནི། དམར་མོར་བྲི་བར་བགྱི་སྟེ། ཕོ་ཉ་མོ་ཐམས་ཅད་ཀྱང་རྒྱན་ཐམས་ཅད་ཀྱིས་བརྒྱན་པར་བགྱིའོ། །བཅོམ་ལྡན་འདས་ཀྱི་གཡོན་རོལ་ཏུ་དབང་ཕྱུག་ཆེན་པོ་མདོག་དཀར་པོ་རལ་པ་ཅན་མཚན་མ་བསྒྲེང་བ། དཀའ་ཐུབ་ཟློག་པ་དང་ལྷན་ཅིག་བྲི་བར་བྱའོ། །འབྱུང་པོ་མདོག་དམར་པོ་མི་སྡུག་པ་བཞི་ཡང་བྲི་བར་བྱའོ། །ཕྱིས་རིག་སྔགས་འཆང་གིས་དུས་གསུམ་དུ་ཁྲུས་བགྱི་ཞིང་ཟླ་བ་གཅིག་གི་བར་དུ་བརྒྱད་བརྒྱ་བརྒྱད་བརྒྱ་བཟླས་བརྗོད་བགྱི་ཞིང་ཟས་སུ་ཆུ་སྐྱོ་བཏུང་བར་བགྱིའོ། །ཐ་མར་ལུས་སྦྱང་བ་བགྱི་སྟེ། དེའི་འོག་ཏུ་ཞག་གསུམ་སྨྱུང་བ་བགྱིས་ལ། གནས་བཞིར་བསྙེན་བཀུར་བགྱིད་པ་བཞི་གཞག་གོ། །ཕོ་ཉ་མོ་རྣམས་ཀྱིས་ལས་ཐམས་ཅད་བགྱིའོ། །རི་མོའི་སྐུ་གཟུགས་ཀྱི་སྤྱན་སྔར་རྩཝ་ཀུ་ཤ་སྤམ་ས་པའི་སྟེང་དུ་འདུག་སྟེ། མཆོད་པ་རྒྱ་ཆེར་བགྱིས་ལ་གཏོར་མ་ཡང་ཤིན་ཏུ་རྒྱ་ཆེར་བགྱིའོ། །ལྕེ་པོག་གི་བདུག་པས་བདུག་གོ་། རི་མོའི་སྐུ་གཟུགས་ཀྱི་སྤྱན་སྔར་ཨརྒའི་ཤིང་གི་ཞུགས་བུས་ལ། མེ་ཏོག་དཀར་པོ་ཞོ་དང་། སྦྲང་རྩི་དང་། མར་ལ་སྨྱུགས་པས་མེ་སྟག་དག་བྱུང་གི་བར་དུ་སྦྱིན་སྲེག་བགྱིའོ། །དེའི་འོག་ཏུ་ཨུཏྤ་ལ་སྔོན་པོ་ལྟ་གྦུའི་རལ་གྲི་བྱུང་གི་བར་དུ་ལྕགས་ཕྱེས་སྦྱིན་སྲེག་བགྱིའོ། །དེ་བླངས་མ་ཐག་ཏུ་སྐྲ་ལྕང་ལོ་འཁྱིལ་བར་འགྱུར། ལོ་བཅུ་དྲུག་པ་ལྟ་བུར་འགྱུར། ཉི་མ་འཆར་བའི་འོད་ལྟར་འགྱུར། དཔོན་གཡོག་དྲུག་ནམ་མཁའ་ལ་མཆི་བར་འགྱུར་རོ། །ལོ་ཁྲི་ཉིས་སྟོང་ཐུབ་པར་འགྱུར། དེ་བཞིན་དུ་གྲོགས་རྣམས་ཀྱང་དཔག་ཚད་སྟོང་དུ་གྱེན་དུ་འཕགས་པར་འགྱུར་རོ། །དེ་བཞིན་དུ་འོག་མ་དབང་ཕྱུག་ཆེན་པོའི་རལ་གྲི་བསྒྲུབ་པར་བགྱིའོ། །གཞན་ཡང་རལ་གྲི་སྒྲུབ་པ་ནི། ཟླ་བ་གཅིག་སློང་མོའི་ཟས་ཟ་ཞིང་། ཕྱིས་མར་གྱི་ངོ་ཞག་བཅུ་བཞི་ལ་རི་མོའི་གཟུགས་ཀྱི་མདུན་དུ་ཕོ་ཉ་མོ་རྣམས་ཀྱིས་ལས་ཐམས་ཅད་བགྱིའོ། །ཞག་གསུམ་སྨྱུང་བ་བགྱིས་ཏེ་རལ་གྲི་མ་ཆག་ཅིང་འཕན་མེད་པ་བླངས་ལ། རལ་གྲི་ལག་པ་གཡས་ན་ཐོགས་ཏེ་འབར་གྱི་བར་དུ་བཟླས་བརྗོད་བགྱིའོ། །དེ་བླངས་པ་ཙམ་གྱིས་ནམ་མཁའ་ལ་འཕག་གོ་། ལོ་བཅུ་དྲུག་ལོན་པ་ལྟ་བུར་འགྱུར་རོ། །རིག་སྔགས་འཆང་སྟོང་གི་བདག་པོར་འགྱུར་རོ། །ལོ་ཁྲི་ཉིས་སྟོང་ཐུབ་པར་འགྱུར་རོ། །གཞན་ཡང་འཁོར་ལོ་སྒྲུབ་པ་བཤད་པར་བགྱིའོ། །སློང་མོའི་ཟས་བཟའ་ཞིང་ཕྱིས་མར་གྱི་ངོ་ཞག་བཅུ་བཞི་ནས་ཞག་གསུམ་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་མཆོད་པ་རྒྱ་ཆེར་བགྱིས་ལ། གཏོར་མ་དང་ལྷ་བཤོས་ཀྱང་ཤིན་ཏུ་རྒྱ་ཆེར་སྦྱར་ཅིང་ཕོ་ཉ་མོ་རྣམས་ཀྱིས་ལས་ཐམས་ཅད་བགྱིའོ། །ལྕགས་སྣ་གསུམ་ལ་འཁོར་ལོ་རྩིབས་བཅུ་དྲུག་པ་བགྱིས་ལ། ཤིང་ཨ་ཤྭ་ཏྠའི་ལོ་མ་བདུན་གྱི་སྟེང་དུ་བཞག་ལ་འབར་གྱི་བར་དུ་བཟླས་བརྗོད་བགྱིའོ། །འབར་ནས་ས་གཡོ་བར་འགྱུར་རོ། །རིག་སྔགས་འཆང་ཐམས་ཅད་སྐྲག་པར་འགྱུར་རོ། ། དེས་བླངས་པ་ཙམ་གྱིས་སྐྲ་ལྕང་ལོ་འཁྱིལ་བར་འགྱུར་རོ། །ལོ་བཅུ་དྲུག་ལོན་པ་ལྟ་བུར་འགྱུར་རོ། །མདོག་ཉི་མ་ཤར་བ་བཞིན་དུ་འགྱུར་རོ། །རིག་སྔགས་འཆང་གི་འཁོར་ལོས་བསྒྱུར་བར་འགྱུར་རོ། །བུད་མེད་བརྒྱད་འབྱུང་བར་འགྱུར་རོ། །དཔོན་གཡོག་བཅུ་དྲུག་འགྲོ་བར་འགྱུར་རོ། །རིག་སྔགས་འཆང་གཞན་བརྒྱ་ཡང་འབྱུང་སྟེ། བསྙེན་བཀུར་བགྱིད་པར་འགྱུར་རོ། །གང་གི་གནས་ཆེ་གེ་མོ་ཞེས་བགྱི་བར་མཆི་བར་བསམ་པ་དེའི་ཚེ་འཁོར་ལོ་དཔག་ཚད་ཙམ་དུ་མེ་ལྕེ་འབར་བ་སྟོང་འབྱིན་ཅིང་འགྲོ་སྟེ། བསྡོ་བ་ཅི་ཡོད་པ་ཕུང་བར་འགྱུར་རོ། །ལོ་བརྒྱད་ཁྲི་ཐུབ་བོ། །གང་གི་ཚེ་འཆི་བ་དེའི་ཚེ་ལྷའི་ནང་དུ་སྐྱེའོ། །དེ་ནས་རིག་པའི་རྒྱལ་པོ་ལས་ཀྱི་དཀྱིལ་འཁོར་བཤད་པར་བགྱི་སྟེ། བརྟག་པ་བགྱིས་ལ་གནས་མ་ཉམས་པར་ཤེས་རབ་ཅན་གྱིས་དཀྱིལ་འཁོར་བྲིའོ། ཁྲུ་ནི་བཅུ་གཉིས་སྒོ་བཞི་པ། །དེ་བཞིན་དུ་ནི་ཁྲུ་བརྒྱད་ལ། །དེ་ལ་ཐོག་མར་བྲི་བ་ནི། །རིམ་པ་གཉིས་པ་དམར་པོ་སྟེ། །རིམ་པ་གསུམ་པ་ནག་པོའོ། །དཀྱིལ་འཁོར་དེ་ཡི་བྱང་ཕྱོགས་སུ། །སངས་རྒྱས་བཅོམ་ལྡན་བྲི་བར་བགྱི། །དེ་བཞིན་གཤེགས་དང་ཉེ་བར་ནི། །བཅོམ་ལྡན་ཕྱག་ན་རྡོ་རྗེ་སྟེ། །རྡོ་རྗེ་ཐོགས་ཤིང་རིམ་པས་བསྐོར། །སྒོ་རྣམས་ཀུན་ཏུ་བསྲུང་བར་བགྱི། །སྒོ་བཞིར་སྒོ་བ་རྣམས་བྲི་འོ། །ཤར་ཕྱོགས་སུ་ནི་དྲག་པོ་དང་། །གཞོན་ནུ་དང་ནི་མ་མོ་བྲི། །ལྷོ་ཕྱོགས་སུ་ནི་ཁྱབ་འཇུག་དང་། །ཉི་ཟླ་དང་ནི་ཚངས་པ་བྲི། །ནུབ་ཕྱོགས་སུ་ནི་གཤིན་རྗེ་དང་། །ཀ་ཏྱའི་བུ་མོ་གཏུམ་མོ་བྲི། །བྱང་ཕྱོགས་སུ་ནི་ལྷ་མོ་དཔལ། །དེ་བཞིན་ལྷ་མོ་དབྱངས་ཅན་བྲི། །ལྷ་རྣམས་འདི་དག་ཐམས་ཅད་ནི། །ཇི་སྐད་བཤད་པ་བཞིན་དུ་བྲི། །བྱ་མ་བུ་མ་མགུལ་ཆིངས་ཅན་གྱིས་བསྐོར་ཞིང་སྒོ་སྐོར་ཡང་གཞག་གོ་། དབུས་སུ་གཏུན་ཤིང་སྐྲའི་སྲད་བུ་དང་བཅས་པ་གཅིག་གཞག་གོ་།བྱ་མ་བུམ་གྱི་ལྷོ་ཕྱོགས་སུ་རྡོ་རྗེ་བྲིའོ། །ལྷ་རྣམས་ཀྱང་མཚོན་ཆ་དང་བཅས་པར་བགྱི་སྟེ། དྲག་པོའི་ནི། མདུང་རྩེ་གསུམ་པ་བྲིའོ། །གཞོན་ནུའི་ནི། མདུང་ཐུང་ངོ་། །མ་མོ་རྣམས་ཀྱི་ནི། མཆེ་བའོ། །ཁྱབ་འཇུག་གི་ནི། འཁོར་ལོའོ། །ཟླ་བ་དང་ཉི་མའི་ནི། གཞུའོ། །ཚངས་པའི་ནི། རིལ་བ་སྤྱི་བླུགས་སོ། །གཤིན་རྗེའི་ནི། བེ་ཅོན་ནོ། །གཞན་དག་མཚོན་ཆ་ཐ་མལ་པའོ། །ཞུགས་ན་རབ་ཏུ་བུས་ནས་སུ། །བརྒྱད་བརྒྱད་ཚང་བའི་ཡམ་སྲོག་ཤིང་། །ལྷ་བཤོས་དྲི་དང་བདུག་པ་དང་། །གཏོར་མ་བཙལ་ནས་ལྷ་སྤྱན་དང་། །སྦྱིན་སྲེག་འདི་ནི་སྦྲང་རྩི་དང་། །མར་དང་འབྲས་ཡོས་ལན་ཚྭ་དང་། །དེ་བཞིན་ཡུངས་ཀར་རྣམས་ཀྱིས་བགྱི། །ཡུངས་ཀར་གྱིས་ནི་སྲུང་བ་བགྱི། །གཙང་མའི་གོས་ནི་བགོ་བར་བགྱི། །མཆོད་པ་དག་ནི་སྔར་བགྱིས་ཏེ། །དེ་ཡི་འོག་ཏུ་ལས་བརྩམ་མོ། །འཇིག་རྟེན་ན་ནི་ཅི་ཡོད་པའི། །མནའ་ཚིག་རྣམས་ཀྱིས་མ་ནས་བསྒྲག་གོ། དམ་ཚིག་འདི་ལྟར་སུ་སྲུང་བ་དེ་ལ་ལོག་འདྲེན་ཐམས་ཅད་ཀྱིས་གླགས་མི་རྙེད་ཅིང་ལས་ཀྱང་དངོས་གྲུབ་ཏུ་འགྱུར་རོ། །དཀོན་མཆོག་གསུམ་ལ་དང་པས་དཀྱིལ་འཁོར་སྔར་མཐོང་ནས་དེའི་འོག་ཏུ་རིག་པ་མཆོག་བསྒྲུབ་པར་བགྱིའོ། །སུ་ཞིག་གཞན་དུ་བགྱིད་ན་དེའི་རྡོ་རྗེ་ཉིད་ཀྱིས་མཐར་བགྱིད་པར་འགྱུར་རོ། །དཀྱིལ་འཁོར་གྱི་ཆོ་ག་རྫོགས་སོ།། །།རིག་པ་མཆོག་སྒྲུབ་པ་འདི་ནི། འདི་ལགས་ཏེ། ཟླ་བ་གཅིག་ཟས་སུ་འོ་སྐྱོ་འཐུངས་ལ་ཕྱིས་མར་གྱི་ངོ་ཞག་བཅུ་བཞི་ནས་ཞག་གསུམ་སྨྱུང་བ་བགྱིས་ཏེ་གོས་གཙང་མ་དགོས་ལ། རིང་བསྲེལ་དང་བཅས་པའི་མཆོད་རྟེན་ནམ། སངས་རྒྱས་ཀྱི་སྐུ་གཟུགས་སམ། བྱང་ཆུབ་ཀྱི་ཤིང་ངམ། བཅོམ་ལྡན་འདས་ལག་ན་རྡོ་རྗེ་ཡང་ཅི་ནུས་སུ་མཆོད་དོ། །ཕོ་ཉ་རྣམས་ཀྱིས་དྲི་དང་། མེ་ཏོག་དང་། བདུག་པ་དང་། གཏོར་མ་སྦྱིན་ནོ|་|དེ་ནས་ལྕགས་ཀྱི་རལ་གྲི་བགྱིས་ཏེ་བུང་མེད་རྒྱན་ཐམས་ཅད་ཀྱིས་བརྒྱན་པ། བུད་མེད་བཅུས་བསྐོར་བ་ནམ་འོངས་ཀྱི་བར་དུ་བཟླས་བརྗོད་བགྱིའོ། །འོངས་ནས་གཡོག་འཁོར་འབུལ་ལོ། །རལ་གྲི་དེ་གཡོག་འཁོར་ལ་བཞག་ན། བུད་མེད་དེ་ཆུང་མར་འགྱུར་རོ། །གལ་ཏེ་འཚལ་ན། བུད་མེད་དེ་དག་ཀྱང་ཆུང་མར་འགྱུར་རོ།། གལ་ཏེ་མི་འཚལ་ན། གཡོག་འཁོར་རྣམས་ལ་སྩལ་ཏོ། །གཡོག་འཁོར་རྣམས་དང་ལྷན་ཅིག་ཏུ་ནམ་མཁའ་ལ་མཆིའོ། །འོག་ཏུ་ཡང་དཔག་ཚང་སྟོང་དུ་ཡང་མཆིའོ|་|སྟེང་དུ་ཡང་དེ་བཞིན་ནོ། །རལ་གྲི་དེ་ཐོགས་ན་འཁོར་ལོས་བསྒྱུར་བ་མ་གཏོགས་པར་རིག་སྔགས་འཆད་ཐམས་ཅད་ཀྱིས་མི་སོད་དོ། །ལོ་ཁྲི་ཐུབ་བོ། །སྒྲུབ་པ་གཞན་ཡང་ཡོད་དེ། ཚེས་གྲངས་དང་། སྐར་མ་གདམ་མི་དགོས། སྨྱུང་བ་བྱ་མི་དགོས་སོ། །བུད་མེད་དེ་ལེགས་པར་བསྐུ་ཞིང་མེ་ཏོག་གིས་ཀྱང་མཆོད་ལ་ཕོ་ཉ་མོ་རྣམས་ཀྱིས་ཀྱང་ལས་བྱའོ། །དེའི་འོག་ཏུ་བུད་མེད་དེ་ཁ་བུབ་ཏུ་བཞག་ལ་བུད་མེད་དེའི་རྒྱབ་ཏུ་ཞོན་ཏེ་བུད་མེད་དེ་འགུལ་ཞིང་སྒྲ་འབྱིན་ཡང་འཇིགས་པར་མི་བྱ་ཞིང་། གྱེན་དུ་འཕག་གི་བར་དུ་རིག་པའི་རྒྱལ་པོ་བཟླས་བརྗོད་བྱའོ། །ཡང་ས་ལ་ལྷུང་ངོ་། །ལྷུང་ནས་དེ་ལས་འབབ་པར་བྱའོ། །དེ་ནས་བུད་མེད་རྒྱན་ཐམས་ཅད་ཀྱིས་བརྒྱན་པ་རྣམས་མཐོང་ངོ་། །དེའི་ནང་ནས་བུད་མེད་ཅིག་ཁ་བུབ་ཏུ་འདུག་ཅིང་དབུགས་འབྱིན་པ་དེའི་རྒྱབ་ཏུ་ཞོན་ན། ནམ་མཁའ་ལ་འཕག་ཅིང་མདོག་ཉི་མ་ཤར་བ་ལྟ་བུར་འགྱུར་རོ|་|བུད་མེད་ཀྱི་གློ་ལ་རལ་གྲི་འཛམ་བུའི་ཆུ་བའི་གསེར་གྱིས་བརྒྱན་ཅིང་མུ་ཏིག་དང་། རིན་པོ་ཆེས་སྤྲས་པ་འཕྱང་ངོ་། །ལས་འདི་ནི། རྒྱལ་མཚན་དང་འགྲེའོ་ཞེས་སྨྲས་ནས་བྱའོ|་|ལེ་ལོ་ཅན་དང་། བྱས་པ་མི་གཟོ་བ་རྣམས་ཀྱིས་ལས་འདི་མི་བྱའོ། །གང་ནུས་པ་བརྟན་ཞིང་མཐུ་སྟོབས་དང་ལྡན་པ་རྩོལ་པར་ངེས་པར་བྱས་པས་ལས་འདི་བརྩམ་པར་སྟེ|་ལས་འདི་སྒྲུབ་པ་པོས་རྟག་ཏུ་གོ་ཆ་སྲ་བ་དང་། ཚངས་པར་སྤྱོད་པར་བྱ་ཞིང་ཉ་དང་ཤ་ཡོངས་སུ་སྤང་བར་བྱའོ། །རིག་སྔགས་འཆང་གིས་ལྡོང་རོས་སྒྲུབ་པའི་ཚེ་གལ་ཏེ་སྟེ་ན|་དེ་དགུག་པའི་ཕྱིར་འདི་བརྩམ་པར་བྱ་སྟེ། རིག་སྔགས་འཆང་གྲུབ་པའམ། ཀླུའམ། གནོད་སྦྱིན་ནམ། ཤ་ཟའམ། གྲུལ་བུམ་ཡང་རུང་སྟེ་དབབ་པ་བྱས་པ་དེ་ལ་གང་གིས་རྫས་ཁྱེར་བ་དེས་ང་ལ་སླར་བྱིན་ཅིག་དང་ཕུང་བར་མི་བྱའོ་ཞེས་བརྗོད་པར་བྱའོ། །མར་གྱི་ངོ་ཞག་བཅུ་བཞི་ལ་ཉིན་ཞག་གཅིག་སྨྱུང་བ་བགྱིས་ཏེ་ཟངས་པོ་ཆེ་བཙུགས་ལ་འབྲུ་མར་བླུགས་ཏེ་བསྐོལ་ལ་རིག་པའི་རྒྱལ་པོ་བཟླས་བརྗོད་བྱས་ན་རིག་སྔགས་འཆང་གྲུབ་པ་ཡང་རུང་། གང་ཡིན་པ་དེ་དེར་འོང་ཞིང་འོངས་ནས་ཀྱང་སླར་འབུལ་ལ་དེ་ལ་ཅི་ཡང་མི་བྱའོ། །གལ་ཏེ་མི་འོང་ན། ཕྱིས་སྙིང་པོས་ཡན་ལག་དང་། ཉིང་ལག་རྣམས་གཏུབས་ཏེ་གཞག་གོ། སྲུང་བ་བྱས་པའི་ཆོ་གས་བྱའོ། །གཞན་དུ་ན་མ་རུངས་པར་འགྱུར་རོ། །གལ་ཏེ་སྲུང་བ་མ་བྱས་ན། གྲུབ་པ་རྣམས་ཀྱིས་མ་རུངས་པར་བྱེད་དོ། །ཡན་ལག་དང་ཉིད་ལག་གཏུབས་པས་འོང་ཞིང་རྫས་ཀྱང་སྦྱིན་པར་བྱེད་དོ|་|འདི་སྐད་དུ་བཅོམ་ལྡན་འདས། ཡོངས་སུ་བསྐྱབ་ཏུ་གསོལ་ཞེས་སྨྲའོ། །དེ་སླར་གསོ་བའི་ཕྱིར་འབྲུ་མར་གྱི་ཟངས་པོ་ཆེ་ལས་འབྲུ་མར་བླངས་ཏེ་འཕགས་པ་ལག་ན་རྡོ་རྗེའི་མདུན་དུ་སྙིང་པོས་སྲེག་བླུགས་ལན་སྟོང་སྦྱིན་སྲེག་བྱས་ན། སོས་ཤིང་དབང་དུ་ཡང་འགྱུར་རོ། །དབྱིག་དུག་བསལ་བར་འདོད་ན། ལག་པ་དང་རྐང་པ་སྣོད་དུ་བཅུག་ལ་རླུང་གཡབ་ཀྱིས་གཡབས་ཏེ་གང་དུ་འདོད་པ་དེར་རིག་པའི་རྒྱལ་པོ་བཟླས་བརྗོད་བྱས་ན། དབྱིག་དུག་བྱུང་སྟེ་ནད་མེད་པར་འགྱུར་རོ། །མིག་སེར་གྱི་ནད་བསལ་བར་འདོད་ན། ཆུ་ལ་ལན་བདུན་བསྔགས་ལ་སྐོམ་དུ་བླུད་ན་འཚོའོ། །མིག་ནད་བསལ་བར་འདོད་ན། མེ་ཏོག་རྩ་བ་རིང་པོ་དག་ལ་ལན་བདུན་བཟླས་བརྗོད་བྱས་ཏེ་སྔགས་ཀྱིས་བཏབ་ལ་སྣོད་དུ་བཅུག་ན་འཚོའོ། །དེ་ནས་རིག་པའི་རྒྱལ་པོའི་མཆོག་ལག་ན་རྡོ་རྗེ་ལ་ལོག་འདྲེན་གྱིས་འདི་སྐད་ཅེས་སྨྲས་སོ། །བཅོམ་ལྡན་འདས། སེམས་ཅན་ཐམས་ཅད་ཀྱི་དོན་གྱི་སླད་དུ་རིག་པ་མཆོག་འདི་འཆད་དམ། བཅོམ་ལྡན་འདས། གང་གིས་བདག་ས་ལ་འཁྱམས་ཤིང་སེམས་ཅན་རྣམས་ལ་ཡང་གླགས་རྙེད་པར་འགྱུར་བར་བདག་ལ་མི་གཟིགས་སམ། དེ་ནས་གནོད་སྦྱིན་གྱི་དབང་པོ་ལག་ན་རྡོ་རྗེས་ལོག་འདྲེན་ལ་འདི་སྐད་ཅེས་སྨྲས་སོ། །ཁྱོད་ཉོན་ཅིག་།གང་དག་དམ་ཚིག་མི་ཤེས་པར་ངའི་རིག་པའི་ཆོ་ག་རྒྱས་པར་ཀློག་པ་དེ་དག་ཁྱེར་ཅིག་། གང་དག་གཅིག་གི་ལྷག་མ་གཅིག་ཟ་བ་དང་། ལྷ་ལ་ཕུལ་བའི་དྲི་དང་། བདུག་པ་དང་། མེ་ཏོག་ལ་སྤྱོད་པ་དེ་དག་ཁྱེར་ཅིག་། གང་དག་ངའི་དམ་ཚིག་ཤེས་པ་དང་། ཆོ་ག་རྒྱས་པ་ལས་འབྱུང་བ་བཞིན་དུ་སྤོང་བར་བྱེད་པ་དང་། གང་དག་རིག་པ་མཆོག་རྡོ་རྗེའི་རིག་སྔགས་དང་བཅས། གསང་ཆེན་དང་བཅས་པར་འཛིན་པ་དེ་དག་ལ་གླགས་མ་ཚོལ་ཅིག། ཆུད་མ་གསོན་ཅིག་།དེ་སྐད་ཐོས་པ་དང་། ལོག་འདྲེན་དེ་དག་ཅ་ཅོ་ནས་དགའ་ཞིང་མགུ་ལ་ཡིད་རངས་ཏེ་ལག་ན་རྡོ་རྗེའི་རྐང་པ་ལ་ཕྱག་བྱ་བའི་གསང་སྔགས་སྨྲས་པ། ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ན་པ་ཏ་ཡེ། ཏདྱ་ཐཱ། ཧུ་རུ་བཛྲ་པཱ་ཎི། ཧུ་རུ་བཛྲ་པཱ་ཎི། ཏྲོ་ཊ་ཐ་ཡ་བཛྲ་པཱ་ཎི། སྥོ་ཊ་ཡ་བཛྲ་པཱ་ཎི། ད་ཧ་པ་ཙ་མ་ཐ་བཛྲ་པཱ་ཎི་སྭཱཧཱ། རི་མོ་མཁན་གསོ་སྦྱོང་བཟུང་བསམ་གོད་པའི་རས་ལ་སྦྱིན་དང་མ་འདྲེས་པའི་ཚོན་གྱིས་འཕགས་པ་ལག་ན་རྡོ་རྗེ་བྲི་བར་བྱ་སྟེ། པྲི་ཡང་ཀུ་ལྟར་སྔོ་བསངས། རྒྱན་ཐམས་ཅད་ཀྱིས་བརྒྱན་པའོ། །དེའི་གཡོག་འཁོར་ལོག་འདྲེན་བཞི་བཅུ་བྲི་བར་བྱ་སྟེ། ཁ་དོག་སྣ་ཚོགས་པ་ལག་ན་རྡོ་རྗེའི་རྐང་པ་གཉིས་ལ་མགོ་བོས་ཕྱག་འཚལ་བ་བྲི་བར་བྱའོ། །སྣ་དཀར་ལ་གཅུ་བར་བྱའོ། །དེའི་འོག་ཏུ་རིག་སྔགས་འཆང་གིས་མར་གྱི་ངོ་ཞག་བཅུ་བཞི་ནས་བརྩམས་ཏེ་བའི་རྣམ་ལྔས་ལུས་སྦྱང་བ་བྱས་ལ་དུས་གསུམ་དུ་ཁྲུས་བྱ་ཞིང་རི་མོའི་སྐུ་གཟུགས་ཀྱི་མདུན་དུ་དུས་གསུམ་དུ་བརྒྱ་རྩ་བརྒྱད་སྦྱིན་སྲེག་བྱའོ། །ཟླ་བ་ཕྱི་མ་མར་གྱི་ངོ་ཞག་བཅུ་བཞི་ལ་ཉིན་ཞག་གཅིག་སྨྱུང་བ་བྱས་ཏེ་ལག་ན་རྡོ་རྗེ་ལ་མཆོད་པ་བྱས་ནས་དྲི་དང་། མེ་ཏོག་དང་། བདུག་པ་ཕུལ་ཏེ་ལོག་འདྲེན་རྣམས་ལ་ཡང་བག་བཙོས་པར་པ་ཏ་ཀ་དང་། མོ་ཏ་ཀ་ད་དང་། པུ་པ་ལི་ཀ་དང་། རྩ་བ་དང་ཤིང་ཏོག་གཞན་དག་ཀྱང་ཕུལ་ལ། ལག་ན་རྡོ་རྗེའི་མདུན་དུ་སྣ་མའི་མེ་ཏོག་ཞོ་དང་། སྦྲང་རྩི་དང་། མར་ལ་སྨྱུགས་པ་བརྒྱད་སྟོང་སྦྱིན་སྲེག་བྱའོ། །འོག་དང་རི་མོའི་སྐུ་གཟུགས་འགུལ་ཞིང་ཧ་ཧ་ཞེས་བྱ་བའི་སྒྲ་སྒྲོག་སྟེ། དེ་ལ་ཡང་འཇིགས་པར་མི་བྱའོ། །ཡང་ལན་བརྒྱ་སྟོང་སྦྱིན་སྲེག་བྱས་ན། དེ་ནས་མི་མི་སྡུག་པ་ཞིག་འོང་སྟེ། དེ་ལ་ཡང་འཇིགས་པར་མི་བྱའོ། །རྡོ་རྗེ་བཞད་མས་སྨྲར་བཅུག་ན། དེ་ཅི་ཞེས་སྨྲའོ། །དེས་ལག་ན་རྡོ་རྗེའི་མདུན་དུ་གང་སྨྲས་པ་དེ་དྲན་པར་བགྱིས་ལ་དེ་བཞིན་གྱིས་ཤིག་ཅེས་བརྗོད་པར་བྱའོ། །དེ་བཞིན་དུ་བྱའོ་ཞེས་སྨྲས་ནས་མི་སྣང་བར་འགྱུར་རོ། །དེའི་འོག་ཏུ་རིག་སྔགས་སྒྲུབ་པ་ལ་ལོག་འདྲེན་དེ་དག་དངོས་གྲུབ་སྦྱིན་པར་འགྱུར། ཉིན་གཅིག་བཞིན་ཀཪྴ་པ་ཎ་ཉི་ཤུ་སྦྱིན་པར་འགྱུར། དབང་དུ་ཡང་འགྱུར་རོ། །ཡིད་ལ་གང་ཅི་བསམ་པ་དེ་ཐམས་ཅད་བྱེད་པར་ཡང་འགྱུར་རོ། །བཅོམ་ལྡན་འདས། གཞན་ཡང་བརྗོད་པར་བགྱིའོ། །གང་དག་རིག་པ་མཆོག་གི་ཆོ་ག་རྒྱས་པར་སྒྲུབ་པར་བགྱི་བ་དང་། མཆོད་པར་བགྱིད་པ་དེ་དག་ལ་ཅི་ཡང་མི་བགྱིའོ། །འདོད་པ་ཐམས་ཅད་ཟ་ཞིང་སྒྲུབ་པ་དེ་ལ་དངོས་གྲུབ་སྩལ་ཏོ། །གང་དག་བདག་ཅག་གིས་གསང་སྔགས་འཆང་བ་དེ་དག་ལ་ལོག་འདྲེན་ནམ། ལོག་འདྲན་གྱི་བུའམ། ལོག་འདྲེན་གྱི་འཁོར་གང་ལ་ལ་ཞིག་གླགས་ལྟ་བའམ། གང་གླགས་རྣམ་པར་ཚོལ་བ་དེའི་མགོ་ཚལ་པ་བརྒྱར་འགས་སོ། །བཅོམ་ལྡན་འདས། བདག་ཅག་གིས་མི་སྙན་པ་བརྗོད་པར་བགྱིའོ། །སྒྲུབ་པའི་དུས་ན་གསང་སྔགས་འདི་ཉིད་ཀྱིས་མེ་ཏོག་ལ་ལན་བདུན་སྔགས་ཀྱིས་བཏབ་ལ་སྩལ་བར་བགྱིས་ན། ལོག་འདྲེན་ཐམས་ཅད་དངོས་གྲུབ་སྩོལ་ཏོ། །སྔགས་འདི་ཉིད་ཀྱིས་གཞན་ལ་བགེགས་བགྱིད་དོ། །སྐར་མ་གདམ་མི་འཚལ། སྨྱུང་བ་བགྱི་མི་འཚལ་ལོ། །ལག་ན་རྡོ་རྗེའི་མདུན་དུ་མོན་སྲན་གྲེའུ་ལས་བགྱིས་པའི་སྣུམ་ཁྲུ་ཕུ་པ་ལ་ཀ་བརྒྱད་སྟོང་སྦྱིན་སྲེག་བགྱིས་ལ་འདི་སྐད་དུ་ཆེ་གེ་མོ་ཞེས་བྱ་བའི་བགེགས་གྱིས་ཤིག་ཅེས་བརྗོད་ན། དེའི་ཚེ་ལོག་འདྲེན་དེ་དག་དགའ་ཞིང་མགུ་བར་གྱུར་པའི་ཡིད་ཀྱིས་བགེགས་བགྱིད་དོ། །བསམ་ན་ཞི་བར་འགྱུར་རོ། །ཅི་སྟེ་ལོག་འདྲེན་རྣམས་མཐོང་བར་འཚལ་ན། མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ། དུར་ཁྲོད་དུ་མཆིས་ལ་མགལ་བ་བླངས་ཏེ་དྲི་དང་། མེ་ཏོག་དང་། བདུགས་པས་བརྒྱན་པ་བགྱིས་ལ། རིག་པ་དཔག་ཏུ་མ་མཆིས་པར་བཟླས་བརྗོད་བགྱིས་ན། དགུང་ཕྱེད་ཀྱི་དུས་ན་ལོག་འདྲེན་རྣམས་མཆི་སྟེ། དེ་དག་ལ་རྡོ་རྗེ་ལྟེ་བས་དྲི་སྩལ་བར་བགྱིའོ། །མེ་ཁ་ལས་མེ་ཏོག་སྩལ་བར་བགྱིའོ|་|རྡོ་རྗེ་བཞད་མས་སྨྲར་སྩལ་ཏེ། །འདི་སྐད་སེམས་དང་བར་གྱིས་ཤིག་ཅེས་བརྗོད་ན། ལོག་འདྲེན་དེ་དག་རྩེ་ཞིང་དགོད་དོ། །དེ་ནས་རིག་སྔགས་འཆང་གིས་རིག་པ་མཆོག་དྲན་པར་བགྱིས་ན། དེ་དག་མི་འགུལ་ཏེ། འདི་སྐད་དུ་ཁྱེད་སེམས་དང་བར་གྱིས་ཤིག་ཅེས་བརྗོད་པར་བགྱིའོ། །དེ་བཞིན་དུ་བྱའོ་ཞེས་སྨྲས་ནས་མི་སྣང་བར་གྱུར་ཏོ|་|དེའི་འོག་ཏུ་རིག་པ་ལ་བགེགས་མི་བགྱིད་དོ། །སྔགས་འདི་ཉིད་ཀྱིས་སྐྱེས་པ་དང་། བུད་མེད་དབང་དུ་བགྱི་བར་འཚལ་ན། མར་གྱི་ངོ་ཞག་བརྒྱད་ལ་གྲོག་མཁར་ར་ཙའི་མདུན་གྱི་དོག་ས་བླངས་ལ་གཟུགས་བགྱིས་ཏེ་ལག་ན་རྡོ་རྗེའི་མདུན་དུ་ཐབ་ཁུང་བགྱིས་ལ་ཐབ་ཁུང་གི་ནང་དུ་དགོན་པའི་བ་ལང་གི་ལྕི་བས་ཞུགས་བུས་ཏེ་ཞུགས་ཀྱི་ནང་དུ་གཟུགས་སྩལ་ལ་དེའི་སྟེང་དུ་ལན་ཚྭའི་སྦྱིན་སྲེག་ལན་བརྒྱ་རྩ་བརྒྱད་བཟླས་བརྗོད་བགྱིས་ཏེ་དགུང་བདུན་དུ་དུས་གསུམ་ན་དབང་དུ་འགྱུར་རོ། །བགེགས་བརྒྱད་ཁྲི་གཙུག་ཕུད་འཕྱང་བ་ཞེས་བགྱི་བའི་བགེགས་དེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་བགེགས་བགྱིད་པ་ལགས་ཏེ། དེའི་བར་དུ་བསྒྲུབ་པར་བགྱིའོ། །སྒྲུབ་པ་ཨའི་དུས་ན་རིག་སྔགས་འཆང་གིས་གྲོག་མཁར་གྱི་དོགས་ལས་གཙུག་ཕུད་འཕྱང་གི་སྐུ་གཟུགས་བགྱིས་ལ་མར་གྱི་ངོ་ཞག་བརྒྱད་དམ་བཞི་ལ་ལག་ན་རྡོ་རྗེའི་མདུན་དུ་བཞག་སྟེ་ཞོ་དང་། འོ་མས་བཀྲུས་ལ། མེ་ཏོག་དང་། བདུག་པས་མཆོད་དེ་རིག་པ་བརྒྱད་སྟོང་བཟླས་བརྗོད་བགྱིས་ན་དེ་ནས་ཡིད་དགའ་ནས་འཇིག་རྟེན་གྱི་འཕྲུལ་པོ་ཆེས་དངོས་གྲུབ་སྩོལ་ཏོ། །དགོས་པ་ཞིག་གྲུབ་ན་ཡང་དེ་ལ་དངོས་གྲུབ་སྩོལ་ཏོ། །ལོག་འདྲེན་གྱི་སྒྲུབ་པ་རྫོགས་སོ།། །།རིག་སྔགས་འཆང་གི་ནོར་སྒྲུབ་པ་དང་། ལས་བྱང་བར་བགྱི་བར་འཚལ་ན། བ་ལང་གི་ལྷས་སུ་མཆིས་ལ་མར་གྱི་ངོ་ཞག་བརྒྱད་ནས་བརྩམས་ཏེ་ཟས་སུའོ་སྐྱོ་འཚལ་ཞིང་འབུམ་བཟླས་བརྗོད་བགྱིས་ན་རིག་པའི་རྒྱལ་པོ་ཚངས་པའི་གདུགས་ཀྱི་གུང་ལ་ཅེ་སྦྱང་མོ་སྒྲ་འབྱིན་ཏེ། སྒྲ་ལན་ལྔ་བརྒྱ་འབྱིན་ཏོ། །དེ་ནས་དངོས་གྲུབ་ཏུ་འགྱུར་ཏེ། ཏི་ན་ར་སྟོང་རྙེད་ཅིང་ལས་ཀྱང་བྱང་བར་འགྱུར་རོ། །ཅི་སྟེ་ལག་ན་རྡོ་རྗེ་བཅོམ་ལྡན་འདས་ལག་ན་རྡོ་རྗེ་མཐོང་བར་འཚལ་ན། པདྨའི་རྫིང་དུ་མཆིས་ལ་ཡར་གྱི་ངོ་ཞག་བདུན་ནས་བརྩམས་ཏེ་ཟས་སུ་འོ་སྐྱོ་འཐུང་ཞིང་ལན་སུམ་སྟོང་བཟླས་བརྗོད་བགྱིས་ན་ཉིད་ཀྱིས་ལག་ན་རྡོ་རྗེ་མཐོང་ངོ་། །མེ་ཁ་ལ་བཟླས་བརྗོད་བགྱིས་པས་མེ་ཏོག་དབུལ་ལོ། །རྡོ་རྗེ་བཞད་མས་སྨྲར་སྩལ་ཏེ། རིག་སྔགས་འཆང་གིས་འདི་སྐད་དུ་བཅོམ་ལྡན་འདས། བདག་ཡོངས་སུ་བསྐྱབ་ཏུ་གསོལ་ཞེས་བརྗོད་དོ། །དེ་འདི་སྐད་དུ་བུ་དེ་ཅི་བྱ་ཞེས་བརྗོད་པ་དང་། དེ་ནས་བཅོམ་ལྡན་འདས་ཡིད་ཀྱིས་གང་བསམ་པ་དེ་ཐོབ་པར་མཛད་དུ་གསོལ་ཞེས་བརྗོད་དོ། །དེ་བཞིན་དུ་གྱུར་ཅིག་ཅེས་བརྗོད་ནས་མི་སྣང་བར་འགྱུར་རོ། །དེའི་འོག་ཏུ་ཡིད་ལ་གང་བསམ་པ་དེ་ཐམས་ཅད་འགྲུབ་བོ། །བྱིས་པ་ལོག་འདྲེན་གྱིས་ཟིན་ན། ལག་ན་རྡོ་རྗེའི་མདུན་དུ་ལན་བརྒྱ་རྩ་བརྒྱད་བཟླས་བརྗོད་བགྱིས་པའི་སྤོས་ཆུས་བཀྲུས་ན་གཏོང་ངོ་། །གལ་ཏེ་ལོག་འདྲེན་གྱི་གནས་སྒྲུབ་པར་འཚལ་ན། རིག་སྔགས་འཆང་གིས་ཡར་གྱི་ངོའི་ཉ་ནས་བརྩམས་ཏེ་ཟས་སུ་འོ་སྐྱོ་འཐུང་ཞིང་རིག་པ་བཟླས་བརྗོད་བགྱིའོ། ། དེ་ནས་མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་མཚན་གཅིག་མཆིས་པར་མཆིས་ལ་ཅི་འབྱོར་པས་མཆོད་དེ། མེ་ཏོག་དཀར་པོ་སྟོང་གིས་མཚན་མ་བསྣུན་ན། མཚན་བརྒྱར་འགས་ཏེ། དེ་ནས་ལོག་འདྲེན་གྱི་ལས་དངོས་གྲུབ་ཏུ་འགྱུར་རེ། །ལོག་འདྲེན་རྣམས་ངག་ཉན་པར་ཡང་འགྱུར་རོ། །ལོག་འདྲེན་རྣམས་གསད་དོ་སྙམ་དུ་ཁྲོས་པའི་ཡིད་ཀྱིས་བཟླས་བརྗོད་བགྱིས་ན། ལོག་འདྲེན་རྣམས་འགུམ་མོ། །གང་དུ་བསྒོམས་པ་དེར་ཐམས་ཅད་བགྱིད་དོ། །ཡར་གྱི་ཚེས་བརྒྱད་ནས་བརྩམས་ལ་འཕགས་པ་ལག་ན་རྡོ་རྗེའི་མདུན་དུ་ནང་པར་རིག་པ་ལན་བརྒྱ་རྩ་བརྒྱད་བཟླས་བརྗོད་བགྱིའོ། །གདུགས་ཀྱི་གུང་ལ་ཡང་དེ་བཞིན་དུ་བགྱིའོ། །ཕྱེ་མ་རེད་ལན་བརྒྱ་རྩ་བརྒྱད་བཟླས་བརྗོད་བགྱིས་ཏེ། དེ་ལྟར་དགུང་བདུན་དུ་བགྱིས་ན་བདུན་པའི་གདུགས་ལ་ཏི་ན་ར་སྦྱིན་པར་བགྱིད་དོ། །ཅི་ནུས་ཀྱིས་མཆོད་པར་བགྱིའོ། །ཟས་སུའོ་སྐྱོ་འཐུང་བར་བགྱིའོ། །ཡར་གྱི་ངོའི་ཚེས་ལྔ་ནས་བརྩམས་ཏེ་རྒྱ་མཚོར་འབབ་པའི་ཆུ་ཀླུང་དུ་ཞུགས་ལ་སྔ་དྲོ་ནས་ཕྱི་དྲོའི་བར་དུ་བཟླས་བརྗོད་བགྱིས་ན་ཏི་ནར་གཅིག་རྙེད་དོ། །ཚེས་གྲངས་དང་སྐར་མ་གདམ་མི་འཚལ། སྨྱུང་བ་བགྱི་མི་འཚལ་བར་ཡུངས་ཀར་འཕྲུ་སྟོང་ལས་རྡོ་རྗེ་བགྱིས་ཏེ་ཁམ་ཕོར་དུ་སྩལ་ལ་ལོ་མས་ཁ་བཅད་དེ་རིག་པ་བརྒྱ་རྩ་བརྒྱད་བཟླས་བརྗོད་བགྱིའོ། །རས་ཟུང་གཅིག་སྩོལ་གྱི་བར་དུ་གཞག་གོ་།དེ་ནས་མཚའུར་དོར་རོ། །ཚེས་གྲངས་དང་སྐར་མ་གདམ་མི་འཚོལ། །སྨྱུང་བ་བགྱི་མི་འཚལ་བར་རྐེད་པ་ནུབ་ཙམ་གྱི་ཆབ་ཏུ་ཞུགས་ལ་ལན་བརྒྱད་སྟོང་བཟླས་བརྗོད་བགྱིས་ན་རས་ཟུང་གཅིག་སྩོལ་བར་བགྱིད་དོ། །མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ལ་ལག་ན་རྡོ་རྗེའི་མདུན་དུ་མཆོད་པ་བགྱིས་ལ། ཤིང་བིལ་བའི་ཞུགས་ཤིང་གི་ཞུགས་བུས་ཏེ་སྣ་མའི་མེ་ཏོག་ཞོ་དང་། སྦྲང་རྩི་དང་། མར་ལ་སྨྱུགས་པ་བརྒྱད་སྟོང་སྦྱིན་སྲེག་བགྱིས་ན། ཏི་ན་ར་སྩོལ་བར་བགྱིད་དོ། །ཡར་གྱི་ངོ་ཚེས་བཅུ་གསུམ་ལ་དེ་བཞིན་གཤེགས་པའི་སྤྱན་སྔར་མཆོད་པ་བགྱིས་ཏེ་ཉིན་ཞག་གཅིག་སྨྱུང་བ་བགྱིས་ལ་ལན་བརྒྱ་སྟོང་བཟླས་བརྗོད་བགྱིས་ན། རས་ཟུང་གཅིག་རྙེད་དོ། །དེ་ནས་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ལ་གསན་དུ་གསོལ། ཡོན་ཏན་བསམ་གྱིས་མི་ཁྱབ་པའི་ལས་བརྗོད་པར་བགྱིའོ། །དགུང་གསུམ་དུ་སྨྱུང་བ་བགྱིས་ལ་མར་གྱི་ངོ་ཞག་བཅུ་བཞི་ལ་ནྱ་གྲོ་དྷའི་ཤིང་གཅིག་པུ་མཆིས་པར་མཆིས་ལ། དྲི་དང་། མེ་ཏོག་དང་། བདུག་པས་བརྒྱན་པར་བགྱིའོ། །ཕོ་ཉ་མོ་རྣམས་ཀྱིས་ཐམས་ཅད་བགྱིའོ། །དེ་ནས་རིག་སྔགས་འཆང་གིས་རས་ཡུག་མ་གོད་པས་ཤིང་ནྱ་གྲོ་དྷ་དཀྲིས་ལ་རྩཝ་ཀུ་ཤ་སྤམས་པའི་སྟེང་དུ་མཆིས་ཤིང་། རིག་པའི་རྒྱལ་པོ་བརྒྱད་སྟོང་བཟླས་བརྗོད་བགྱིས་ན། དེ་ནས་ཤིང་ནྱ་གྲོ་དྷ་ལས་འོད་ཟེར་ཅིག་བྱུང་སྟེ། དེས་རིག་སྔགས་འཆང་ལ་བསྐོར་བ་བགྱིས་ནས་སྤྱི་བོར་ནུབ་བར་འགྱུར་རོ། །དེ་ནས་རིག་སྔགས་འཆང་གིས་རས་ལ་བཏགས་ཏེ་དེ་བཞིན་གཤེགས་པ་ཐམས་ཅད་དང་། ལག་ན་རྡོ་རྗེ་ལ་ཕྱག་བགྱིས་ལ་རས་དེ་དེ་བཞིན་གཤེགས་པ་ལ་ཕུལ་ན། ཡིད་ལ་བསམ་པ་ཙམ་གྱིས་སྐྱེ་བོ་བདུན་གྱིས་བསྐོར་ཏེ་ནམ་མཁའ་ལ་མཆི་ཅི་འཚལ་བ་གཟུགས་ཅན་དུ་འགྱུར་རོ། །དཔག་ཚད་སུམ་སྟོང་དུ་གྱེན་དུ་འཕག་གོ་།འོག་ཏུ་ཡང་དེ་བཞིན་ནོ། །བསམ་པ་ཙམ་གྱིས་ལྷའི་རིགས་ཐམས་ཅད་འགུགས་པར་འགྱུར་རོ|་|སེམས་ཅན་ཐམས་ཅད་ཀྱི་སེམས་དང་སྤྱོད་པ་ཡང་འཚལ་བར་འགྱུར་རོ། །ས་དང་པོ་ལ་གནས་པའི་བྱང་ཆུབ་སེམས་དཔའ་རྣམས་དང་ལྷན་ཅིག་གནས་པར་འགྱུར་རོ།། ཁྲི་བདུན་སྟོང་ཐུབ་པར་འགྱུར་རོ། །དེའི་བསམ་པ་དང་། དགོས་པ་ཐམས་ཅད་འབྱོར་པར་འགྱུར་རོ། །རིག་སྔགས་འཆང་གྲུབ་པ་དང་། ས་ལ་གནས་པ་རྣམས་ཀྱི་རྣམ་པའི་སྤྱོད་ཡུལ་དུ་མི་འགྱུར་རོ། །གང་གི་ཚེ་ནམ་མཁའ་ལ་གནས་པ་དེའི་ཚེ་རིག་སྔགས་འཆང་རྣམས་ཀྱི་སྤྱོད་ཡུལ་དུ་མི་འགྱུར་རོ། །དངོས་གྲུབ་འདིས་ལྷ་ཐམས་ཅད་དང་། རིག་སྔགས་འཆང་ཐམས་ཅད་མདུན་ན་གནས་པར་འགྱུར་རོ། །དེ་བཞིན་དུ་ལག་ན་རྡོ་རྗེའི་ཆོ་ག་རྒྱས་པ་ཐམས་ཅད་དངོས་གྲུབ་ཏུ་འགྱུར་རོ། །འདི་སྒྲུབ་པའི་རིག་སྔགས་འཆང་གི་མཚམས་མ་མཆིས་པ་ལྔ་འབྱང་བར་འགྱུར་རོ། །གང་གི་ཚེ་འགུམ་པ་དེའི་ཚེ་ལག་ན་རྡོ་རྗེའི་གནས་སུ་མཆིའོ། །ཡར་གྱི་ངོ་ཚེས་བརྒྱད་ནས་བརྩམས་ཏེ་ལུས་སྦྱང་བ་བགྱིས་པ་ལ་ཟས་སུའོ་སྐྱོ་འཐུང་ཞིང་རིག་པ་བཟླས་བརྗོད་བགྱིའོ། །མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་མཚན་གཅིག་མཆིས་པར་མཆིས་ལ་ཤམ་ཐབས་སེར་པོ་བགོ་ཞིང་བསྒྲུབ་པར་བགྱིའོ། །དེ་ནས་རིག་སྔགས་འཆང་གིས་གཏོར་མའི་ཆོ་ག་རྒྱ་ཆེར་བགྱིས་ལ་མཚན་གྱི་སྟེང་དུ་ཞབས་གཡོན་པ་བཞག་སྟེ་རིག་སྔགས་བརྒྱད་སྟོང་བཟླས་བརྗོད་བགྱིས་ན། དེ་ནས་མཚན་ལས་འོད་ཟེར་ཅིག་བྱུང་སྟེ། དེས་རིག་སྔགས་འཆང་ལ་བསྐོར་བ་བགྱིས་ནས་མགོ་བོར་ནུབ་པར་འགྱུར་ཏེ། དེས་སྐྲ་ལྕང་ལོ་འཁྱིལ་ཞིང་གདུགས་ཤར་བ་ལྟ་བུའི་མདོག་ཅན་གྱི་རིག་སྔགས་འཆང་དུ་འགྱུར་རོ། །ཡིད་ཀྱིས་གར་འཚལ་བ་དེར་མཆི་བར་འགྱུར་རོ།། ལོ་དགུ་སྟོང་ཐུབ་པར་འགྱུར་རོ། །བཅོམ་ལྡན་འདས། འདི་ཡང་སྟོབས་དང་ཕ་རོལ་གནོན་པ་དཔག་ཏུ་མ་མཆིས་ཤིང་འབྱུང་པོ་ཐམས་ཅད་དང་། གནོད་སྦྱིན་ཐམས་ཅད་དང་། ཀླུ་ཐམས་ཅད་དང་། ལོག་འདྲེན་ཐམས་ཅད་ཀྱིས་མི་ཚུགས་པ་ལགས་ཏེ། རིག་པའི་རིགས་རྒྱུད་ཐམས་ཅད་ཀྱི་སྙིང་པོ་མཆོག་གི་གསང་སྔགས་བཤད་པར་བགྱིའོ|་|ཊཀྐི་ཧཱུཾ་ཛ། འདི་དང་། ཕོ་ཉ་མོ་རྣམས་ཀྱི་ལས་ཀྱི་ཁྱད་པར་བརྗོད་པར་བགྱིའོ། །སྙིང་པོའི་ལས་རྣམས་ནི། རི་མོ་མཁན་གསོ་སྦྱོང་བཟུང་བས་མ་གོང་བའི་རས་ལ་སྦྱིན་དང་མ་འདྲེས་པའི་ཚོན་གྱིས་སངས་རྒྱས་ཀྱི་སྐུ་གཟུགས་བྲི་བར་བགྱིའོ། །དེའི་གཡོན་རོལ་ཏུ་ཀུན་དགའ་བོ་དང་། གཡས་རོལ་དུ་ལག་ན་རྡོ་རྗེ་ཡབ་ཐོགས་པ་བྲི་བར་བགྱིའོ། །བཅོམ་ལྡན་འདས་ནི། གསེར་གྱི་མདོག་ཅན་ནོ། །ཀུན་དགའ་བོ་ནི། སྔོ་བསངས་སོ། །ལག་ན་རྡོ་རྗེ་ཡར་སྔོ་བསངས་ཏེ། རྒྱན་ཐམས་ཅད་ཀྱིས་བརྒྱན་པའོ། །དེའི་འོག་ཏུ་སྒྲུབ་པ་པོ་ལག་ན་པོག་ཕོར་ཐོགས་པར་བྲིའོ། །དེ་ནས་ཡར་གྱི་ངོ་ནས་དགུང་གསུམ་སྨྱུང་བ་བགྱིས་ཏེ། རི་མོའི་སྐུ་གཟུགས་ཀྱི་མདུན་དུ་ལུང་ཐང་གི་ཤིང་གི་ཞུགས་བུས་ལ་སྣ་མའི་མེ་ཏོག་མར་ལ་སྨྱུགས་པ་ལན་བརྒྱད་སྟོང་སྦྱིན་སྲེག་བགྱིས་ན། དེ་བཞིན་གཤེགས་པའི་དཔྲལ་བ་ལས་འོད་ཟེར་བྱུང་སྟེ། དེ་ནས་དངོས་གྲུབ་ཏུ་འགྱུར་རོ། །དེས་ཡིད་ཀྱིས་གང་བསམ་པ་དེ་འབྱོར་བར་འགྱུར་རོ། །འཁོར་ལོས་བསྒྱུར་བ་ཉིད་དམ། རིག་སྔགས་འཆང་ཉིད་ནི། མ་གཏོགས་སོ། །གཏོར་མ་རྒྱ་ཆེར་སྩལ་བར་བགྱིའོ། །མ་བསྒྲུབས་པར་ལས་རྣམས་སུ་འགྱུར་བ་ལགས་ཏེ། ལན་བདུན་བཟླས་བརྗོད་བགྱིས་པའི་ཐལ་བའམ། སྲད་བུའམ། ཆུས་ནི། བཀྲུ་བར་བགྱིའོ། །གྲོགས་སྲུང་ན། སྤྱི་བོར་མདུད་པ་དོར་རོ། །ལན་གསུམ་བཟླས་བརྗོད་བགྱིས་པས་ཡུལ་འཁོར་བསྲུང་ངོ་། །གསེག་མ་ལ་ལན་བདུན་བཟླས་བརྗོད་བགྱིས་པ་ཆབ་ཏུ་སྩལ་བས་ཆུ་སྲིན་ཀུམ་བྷིར་དང་། ཆུ་སྲིན་བཅིང་ངོ་། །ཡལ་གས་ནི|་རིམས་ནད་གསོ་བར་བགྱིའོ། །ཆབ་བམ་རྩཝ་ཀུ་ཤས་ནི། དུག་ལས་གསོ་བར་བགྱིའོ། །བགེགས་དང་ལོག་འདྲེན་ཕུང་བར་བགྱི་བར་འཚལ་བས། སྒྲུབ་པའི་དུས་ན་ཨརྒའི་ཤིང་གི་ཞུགས་བུས་ལ་སྐེ་ཚེའི་འབྲུ་ལས་ལན་བརྒྱ་སྟོང་སྦྱིན་སྲེག་བགྱིས་ན། ལོག་འདྲེན་རྣམས་ཕུང་བར་འགྱུར་རོ། །ཕྱུགས་ཆུང་དབང་དུ་བགྱིས་པར་འཚལ་བས། མདའ་ཐོགས་ལ་ལག་ན་རྡོ་རྗེའི་མདུན་དུ་ལན་བརྒྱ་རྩ་བརྒྱད་བཟླས་བརྗོད་བགྱིས་ཏེ་ཕྱུགས་ཆུང་གི་ལག་ནས་བཟུང་ན། དབང་དུ་འགྱུར་རོ། །ཆང་མ་རུང་བར་བགྱི་བར་འཚལ་ན|་ལན་བདུན་བཟླས་བརྗོད་བགྱིས་པའི་གསེག་མ་ཁྱིམ་གྱི་སྒོར་དོར་རོ། །ཆབ་ལ་མི་འབྱིང་བར་བགྱིས་ན། ཤིང་ཤ་ལྱ་ཀའི་འབྲས་བུ་ལ་ལན་བདུན་བཟླས་བརྗོད་བགྱིས་ཏེ་སྩལ་ན་ཆབ་མི་འབྱིང་བ་བགྱིས་པར་འགྱུར་རོ། །མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ། ལག་ན་རྡོ་རྗེའི་མདུན་དུ་ཤིང་བིལ་བའི་བུད་ཤིང་གི་ཞུགས་བུས་ལ་སྲེག་བླུགས་རྒྱ་སྐྱེགས་ལ་ལན་སྟོང་བསྐྱར་ཞིང་སྦྱིན་སྲེག་བགྱིས་ན། ནད་རྐང་སྐེ་མས་གྱིས་འདེབས་པར་བགྱིད་དོ། །མར་དང་གུ་གུལ་གྱི་སྲེག་བླུགས་ལན་བརྒྱ་སྟོང་སྦྱིན་སྲེག་བགྱིས་ན། ཞི་བར་འགྱུར་རོ། །ཡར་གྱི་ངོ་ཉ་ནས་བརྩམས་ཏེ་གདུགས་ཀྱི་གུང་ལ་གོས་གསར་པ་བ་གོས་ལ་ཟངས་ཀྱི་སྣོད་དུ་ཞོ་དང་འབྲས་ཆན་སྩོལ་ཏེ་གདོང་གཏུགས་ལ་བསྟན་ཅིང་ཕྱུགས་ཆུང་གི་མིང་ནས་ཕྱུང་སྟེ་ལན་བརྒྱ་སྟོང་བཟླས་བརྗོད་བགྱིས་ན། ཕྱུགས་ཆུང་མཆིའོ། །གལ་ཏེ་མི་མཆིན། ཕྱུགས་ཆུང་དེ་འགུམ་མོ། །གདུག་བདུན་དུ་བགྱིའོ། །འབྲས་ཅན་གྱི་གདུགས་ལ་དབུལ་ལོ། །ཤིང་ཤ་མི་ཕུར་བུ་སོར་བརྒྱད་བ་བླངས་ཏེ་སྲད་བུས་དཀྲིས་ཏེ་ལག་ན་རྡོ་རྗེའི་མདུན་དུ་ལན་བརྒྱ་རྩ་བརྒྱད་བཟླས་བརྗོད་བགྱིས་ལ་གྲུ་མི་འགུལ་བར་བགྱིའོ་ཞེས་བགྱི་སྟེ། ཆབ་ཏུ་དོར་ན་གྲུ་མི་འགུལ་བ་བགྱིས་པར་འགྱུར་རོ། །མར་གྱི་ངོ་ཞག་བཞི་ལ་ཞག་གཅིག་སྨྱུང་བ་བགྱིས་ཏེ་མཚན་གཅིག་མཆིས་པར་མཆིས་ལ། འབྱུང་པོའི་གཏོར་མ་སྩལ་ཏེ་ལྷོ་ཕྱོགས་ཀྱི་ངོས་ལ་ཤུ་དག་བརྒྱ་སྟོང་སྦྱིན་སྲེག་བགྱིས་ན། ཏི་ན་ར་གསུམ་རྙེད་དོ། །ཤུ་དག་ལ་ལན་ཉི་ཤུ་རྩ་གཅིག་བཟླས་བརྗོད་བགྱིས་ཏེ་སོ་ཕྲག་ཏུ་སྩལ་ན། ཤགས་འགྱེད་པའི་ཚེ་གཞན་གྱིས་ལན་མི་ཐེབས་པར་སྨྲ་བར་འགྱུར་རོ། །ལག་ན་རྡོ་རྗེའི་མདུན་དུ་གིའུ་ཝང་ལ་ལན་བརྒྱ་སྟོང་བཟླས་བརྗོད་བགྱིས་ལ། དེས་ཐིག་ལེ་བགྱིས་ན་དཔལ་ཆེ་བར་འགྱུར་རོ། །རྒྱལ་པོའི་ཕོ་བྲང་འཁོར་དུ་ལན་ཐེབས་པར་སྨྲ་བར་འགྱུར་རོ། །བུད་མེད་དབང་དུ་བགྱིད་ན། ལག་ན་རྡོ་རྗེའི་མདུན་དུ་པ་ལ་ཤའི་ཤིང་གི་ཞུགས་བུས་ལ། སྔ་དྲོ་ལན་ཚྭ་ལ་ལན་སྟོང་རྩཝ་བརྒྱད་སྦྱིན་སྲེག་བགྱིས་ནས་མིང་ནས་བརྗོད་ན། ཉི་མ་བདུན་གྱིས་འགྲུབ་སྟེ|་ཟ་གཅིག་པར་བགྱིའོ། །ཡུགས་ས་མོ་དབང་དུ་བགྱིད་ན། མར་གྱི་ངོ་ཞག་དྲུག་ནས་བརྩམས་ཏེ་བཅུའི་བར་དུ་དུས་གསུམ་དུ་ལག་ན་རྡོ་རྗེའི་མདུན་དུ་ལུང་ཐང་གི་ཤིང་ལ་ཞུགས་བུས་ལ་མོན་སྲན་གྲེའུ་ལན་བརྒྱ་རྩ་བརྒྱད་སྦྱིན་སྲེག་བགྱིས་ན། དབང་དུ་འགྱུར་རོ། །བྲམ་ཟེའི་བུ་མོ་དབང་དུ་བགྱིད་པར་འཚལ་བས། མར་གྱི་ངོ་ཞག་བརྒྱད་ལ་ལག་ན་རྡོ་རྗེའི་མདུན་དུ་དུ་བ་མ་མཆིས་པའི་མེ་མདག་ལ་རྒྱ་སྐྱེགས་ཀྱིས་ལན་བརྒྱ་སྟོང་སྦྱིན་སྲེག་བགྱིས་ན། དབང་དུ་འགྱུར་རོ། །སྐྱེས་པ་དབང་དུ་བགྱི་ན། མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བགྱིས་ནས་ལག་ན་རྡོ་རྗེའི་མདུན་དུ་དོང་ཀའི་ཤིང་གི་ཞུགས་བུས་ལ་ཡུངས་ཀར་ལ་ལན་བརྒྱ་སྟོང་སྦྱིན་སྲེག་བགྱིས་ན། དབང་དུ་འགྱུར་རོ། ། ཊཀྐི་ཧཱུཾ་ཛཿརཱ་ཛཱ་ནཱ་མ་པ་ཤི་ཀ་ཏུ་ཀ་མེ་ན་ཤུཀླ་པཉྩ་མྱེ་མ་ཧོ་ར་ཏ་ཤཱི་ཏེ་བཛྲ་པཱ་ཎི་སྱ་ཨ་གྲ་ཏ་པྲི་ཡ་ཀུ་བ་ཏ་ཤེ་རཏྣི་མ་པྲ་ཛྭ་ལྱ་ཤྭེ་སར་ཤ་པཾ་ཨིནྡྲ་ཡ་བཾ་ཙེ་ཀི་ཀྲི་ཏྱ་བི་ཤྭ་རུ་དྷི་ར་ཨཀྟཱ་ནཱཾ་ཨཥྚ་ས་ཧ་སྲཾ་ཛཱུ་ཡ་ཤོ་བ་ཏི། མར་གྱི་ངོ་ཞག་བརྒྱད་དམ་བཅུ་བཞི་ནས་ཞག་གསུམ་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་མཆོད་པ་ཅི་ནུས་ཀྱིས་མཆོད་དེ། རིག་པ་མཆོག་གིས་དྲི་དང་། མེ་ཏོག་དང་། བདུག་པ་ཐམས་ཅད་ལ་ཕུལ་ལ། དེའི་འོག་ཏུ་རིག་སྔགས་འཆང་གིས་ཤིང་སཱ་ལ་སེར་པོ་ལས་སྒྲོམ་བུ་བགྱིས་ཏེ། སྒྲོམ་བུ་དེར་ལིག་བུ་མིག་སྩལ་ལ་དྲོ་བར་གྱུར་པ་དང་། དུ་བར་འཐུལ་བ་དང་། འབར་བའི་བར་དུ་བཟླས་བརྗོད་བགྱིའོ། །དྲོ་བར་གྱུར་ན། དབང་དུ་འགྱུར་རོ། །དུ་བ་འཐུལ་ན། མི་སྣང་བར་འགྱུར་རོ། །འབར་ན། ནམ་མཁའ་ལ་མཆི་བར་བགྱིའོ། །མདོག་གདུགས་ཤར་བ་འདྲ་བར་འགྱུར་རོ། །ལོ་བདུན་སྟོང་ཐུབ་པར་འགྱུར་རོ། །ལུས་ཞིག་ནས་ལག་ན་རྡོ་རྗེ་མཐོང་བར་འགྱུར་རོ། །མར་གྱི་བོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་དུར་ཁྲོད་དུ་མཆིས་ལ་སྐྱེས་པའི་རོ་མ་སྨས་པ་བླངས་ཏེ་རིག་པ་མཆོག་གིས་དྲི་དང་། མེ་ཏོག་དང་། བདུག་པས་བརྒྱན་པ་བགྱིས་ལ་མགོ་བོ་ཤར་ཕྱོགས་སུ་བསྟན་ཏེ། དེ་ནས་རིག་སྔགས་འཆང་གཅེར་བུར་བྱུང་ལ་སྐྲ་བཤིག་སྟེ། དེའི་སྙིང་གར་མཆིས་ལ་མི་རོའི་ཁར་མིའི་ཐོད་བ་ཡུངས་ཀར་གྱིས་གཏམས་པ་བཞག་ལ་ཡུངས་ཀར་རྣམས་མི་སྣང་གི་བར་དུ་བཟླས་བརྗོད་བགྱིའོ། །དེ་ནས་དངོས་གྲུབ་ཏུ་འགྱུར་རོ། །མི་ཐོད་བླངས་ལ་མཚེའུར་བོར་ན་དེ་ནས་ཡིད་ཀྱིས་བསམ་པ་ཙམ་གྱིས་ནམ་མཁའ་ལ་མཆི་བར་འགྱུར་ཏེ། ནམ་མཁའ་ལ་མཆིའོ། །མི་སྣང་བར་འགྱུར་རོ། །རྒྱལ་པོར་བགྱིད་དོ། །བདག་མི་སྡུག་པར་ཡང་སྟོན་ཏོ། ། སླར་ཡང་རྒྱན་ཐམས་ཅད་ཀྱིས་བརྒྱན་པ་དང་། མདོག་གདུགས་ཤར་བ་ལྟ་བུར་ཡང་སྟོན་ཏོ། །བདག་གིས་གང་བསམ་པ་དེ་དག་ཐམས་ཅད་འགྲུབ་བོ། ། ཚེ་ལོ་སྟོང་ཐུབ་པར་འགྱུར་རོ། །མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་རིག་པ་མཆོག་གིས་ལག་ན་རྡོ་རྗེ་ལ་དྲི་དང་། མེ་ཏོག་དང་། བདུག་པ་རྣམས་དབུལ་ལོ། །གྲོང་གི་ཕུག་རོན་གྱི་ཁར་ལྡོང་རོས་སྩལ་ལ་དྲོ་བར་གྱུར་པ་དང་། དུ་བ་འཐུལ་བ་དང་། འབར་གྱི་བར་དུ་བཟླས་བརྗོད་བགྱིའོ། །དྲོ་བར་གྱུར་པས་ཐིག་ལེ་བགྱིས་ན། ཆབ་ཀྱི་ནང་དུ་དགུང་ཟླ་གཅིག་མཆིས་ཤིང་ཆབ་ཀྱི་ནང་དུ་གཞག་གོ་།གང་མཐོང་བ་དེ་དབང་དུ་འགྱུར་རོ། །དུ་བ་འཐུལ་ན། མི་སྣང་བར་འགྱུར་ཏེ། མི་སྣང་བར་གྱུར་ན། གྲུབ་པ་རྣམས་ཀྱི་སྤྱོད་ཡུལ་དུ་མི་འགྱུར་རོ། །ལོ་སྟོང་ཐུབ་པར་འགྱུར་རོ། །འབར་ན། ནམ་མཁའ་ལ་མཆི་བར་འགྱུར་ཏེ། དཔག་ཚད་སྟོང་ཚུན་ཆད་མཐོང་ཞིང་སྒྲ་ཡང་ཐོས་སོ། །ལོ་ཁྲི་ཉིས་སྟོང་ཐུབ་པར་འགྱུར་རོ། །ལག་ན་རྡོ་རྗེ་གྲུབ་པར་འགྱུར་རོ། །ཆུ་ལ་ལན་བདུན་བཟླས་བརྗོད་བགྱིས་པས་གར་བགྱིད་དུ་སྩལ་ཏེ། ལན་གསུམ་བཟླས་བརྗོད་བགྱིས་པའི་དུ་བས་གསང་ཚིག་སྨྲར་སྩལ་ཏོ། །ཡིད་ཀྱིས་ལན་བདུན་བཟླས་བརྗོད་བགྱིས་པའི་མེ་ཏོག་གིས་སྨྲར་སྩལ་ཏོ། །ཡར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་པ་ལ་ཤའི་ཤིང་གི་ཞུགས་བུས་ལ་ཀུ་མུ་དའི་མེ་ཏོག་ཞོ་དང་། སྦྲང་རྩི་དང་། མར་ལ་སྨྱུགས་པ་བརྒྱད་སྟོང་སྦྱིན་སྲེག་བགྱིས་ན། ཡིད་ཀྱིས་བསམ་པ་དེ་དག་ཐམས་ཅད་འགྲུབ་སྟེ། རིག་སྔགས་འཆང་གི་རྒྱལ་པོ་ཉིད་ནི། མ་གཏོགས་སོ། །མར་ངོ་ཞག་བརྒྱད་ནས་བརྩམས་ཏེ་ཟས་སུ་འོ་སྐྱོ་འཚལ་ཞིང་ལག་ན་རྡོ་རྗེའི་མདུན་དུ་བིལ་བའི་ཤིང་གི་ཞུགས་བུས་ལ་བིལ་བའི་ཡམ་སྲེག་ཤིང་འབུམ་སྦྱིན་སྲེག་བགྱིས་ན། རྒྱལ་པོ་ཉིད་སྩོལ་ཏོ། །ཆོ་ག་འདི་ཉིད་ཀྱིས་རིག་སྔགས་འཆང་ཉིད་ཀྱང་སྩོལ་ཏོ། །མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་སེང་ལྡེང་གི་ཤིང་གི་ཞུགས་བུས་ལ་སྐེ་ཚེའི་མེ་ཏོག་ལ་ལན་བརྒྱ་སྟོང་སྦྱིན་སྲེག་བགྱིས་ན། ལས་གྲུབ་པའི་མཆོག་ཏུ་འགྱུར་རོ། །མར་གྱི་ངོ་ཞག་བཅུ་བཞི་ལ་ལག་ན་རྡོ་རྗེའི་མདུན་དུ་ཨརྒའི་ཤིང་གིས་ཞུགས་བུས་ལ་ཨརྒའི་མེ་ཏོག་ལས་ལན་འབུམ་སྦྱིན་སྲེག་བགྱིས་ན། ཏི་ན་ར་སྟོང་སྩོལ་ལོ། །བྱང་ཆུབ་ཀྱི་ཤིང་གི་འོག་ཏུ་ཟས་སུ་ཆུ་གྲོག་འཚལ་ཞིང་ལན་སུམ་འབུམ་བཟླས་བརྗོད་བགྱིས་ན། རིག་སྔགས་འཆང་བརྒྱས་བསྐོར་བའི་རིག་སྔགས་འཆང་དུ་འགྱུར་རོ། །འདོད་པ་ཐམས་ཅད་ལོངས་སྤྱོད་དུ་འགྱུར་རོ། །ལོ་དགུ་སྟོང་ཐུབ་པར་འགྱུར་རོ། །གང་རིག་པའི་རྒྱལ་པོ་སྒྲུབ་པར་འཚལ་བ་དེས་མར་གྱི་ངོ་ཞག་བརྒྱད་ནས་བཟུང་སྟེ་ཟས་སུ་འོ་སྐྱོ་འཚལ་ཞིང་རྒྱ་མཚོར་འབབ་པའི་ཆུ་ཀླུང་དུ་ཞུགས་ཏེ་ཀུ་མུ་དའི་མེ་ཏོག་རྒྱས་པ་འབུམ་དུ་ཕུལ་ན། དེ་ནས་རིག་སྔགས་འཆང་ལ་ཆུའི་ནང་དུ་ཀླུས་རིག་པར་བགྱིད་དེ། དེ་ལ་འཇིགས་པར་མི་བགྱིའོ། །དེ་ནས་བཅོམ་ལྡན་འདས་རིག་པའི་མཆོག་འགྲུབ་པར་འགྱུར་ཏེ། དེ་གྲུབ་པས་ཆོ་ག་རྒྱས་པ་ཐམས་ཅད་གྲུབ་པར་འགྱུར་རོ། །རིག་པའི་མཆོག་གི་སྙིང་པོའི་ཆོ་ག་རྒྱས་པ་རྫོགས་སོ།། །། དེ་ནས་བཅོམ་ལྡན་འདས་ལ་ཕྱག་ན་རྡོ་རྗེ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས། ཉེ་བའི་སྙིང་པོ་འདི་མཆོག་ཏུ་མི་བཟད་པ། ཆོ་ག་རྒྱས་པ་མང་པོ་རབ་ཏུ་སྒྲུབ་པ་བགྱིད་པ། ལྷ་དང་བཅས་པའི་འཇིག་རྟེན་གྱིས་འགལ་བར་བགྱི་བ་མ་ལགས་པ་འབྱུང་པོ་ཐམས་ཅད་དང་། ལྷ་ཐམས་ཅད་ཀྱིས་མི་ཚུགས་ཏེ། ཕྱིར་ཞིང་བཤད་པར་བགྱིའོ། །དེ་ནས་བཅོམ་ལྡན་འདས་ཀྱིས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ཤོད་ཅིག་།གནོད་སྦྱིན་གྱི་དབང་པོ། སེམས་ཅན་རྣམས་ཀྱི་དོན་གྱི་ཕྱིར་དེ་བཞིན་གཤེགས་པས་གནང་གི་།ཤོད་ཅིག་།དེ་ནས་ལག་ན་རྡོ་རྗེས་ཐམས་ཅད་དང་ལྡན་པའི་འཁོར་འདུས་པ་ལ་རྣམ་པར་བལྟས་ནས་ལྷ་དེ་དག་ལ་འདི་སྐད་ཅེས་སྨྲས་སོ། །ཀྱེ་ཀྱེ་ལྷའི་ཚོགས་རྣམས་ཉོན་ཅིག་།ཉེ་བའི་སྙིང་པོ་འདི་ནི། མཆོག་ཏུ་མི་བཟད་པ། དེ་བཞིན་གཤེགས་པས་ཀྱང་འགལ་བར་མཛེད་པ་མ་ཡིན་ཏེ། ཕྱི་ཕྱིར་བཤད་ཀྱི། ལྷའི་ཚོགས་རྣམས་དེ་ཉོན་ཅིག་།དེ་ནས་ལག་ན་རྡོ་རྗེས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་གསང་སྔགས་སྨྲས་པ། ན་མོ་རཏྣ་ཏྲ་ཡ་སྱ། ན་མ་ཤྩཎྜ་བཛྲ་པཱ་ཎི་སྱ། མཧཱ་ཡཀྵ་སེ་ནཱ་པ་ཏི་སྱ། ན་མཤྩཎྜ་པྲ་མརྡ་ནཱ་ཡ་སྭཱཧཱ། ཧི་རི་མི་རི་ཏི་རི་ནི་སྭཱཧཱ། དེ་ནས་གསང་སྔགས་སྨྲས་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམ་པ་དྲུག་ཏུ་གཡོས་སོ། །གཞལ་མེད་ཁང་ན་གནས་པའི་ལྷ་རྣམས་ཀ་ཡང་ཁ་བུབ་ཏུ་འགྱེལ་ནས་སྐྱབས་མེད་ཅིང་དཔུང་གཉེན་མེད་དེ་འདར་ཡེད་ཡེད་ནས་གསང་བའི་བདག་པོ་ཅི་ནས་བདག་ཅག་སྲོག་དང་བྲལ་བར་མི་འགྱུར་བར་བདག་ཅག་ལ་ཡོངས་སུ་བསྐྱབ་ཏུ་གསོལ་ཞེས་ལག་ན་རྡོ་རྗེ་ལ་སྐྱབས་སུ་དོང་ངོ་། །ལོག་འདྲེན་རྣམས་ཀྱང་འགུལ་མ་ནུས་ནས་ཡིད་ཀྱིས་ལག་ན་རྡོ་རྗེ་ལ་ཕྱག་འཚལ་ལོ། །དེ་ནས་བཅོམ་ལྡན་འདས་ལག་ན་རྡོ་རྗེས་ཅུང་ཟད་འཛུམ་པའི་བཞིན་གྱིས་ལྷ་དེ་དག་ལ་འདི་སྐད་ཅེས་སྨྲས་སོ། །གྲོགས་པོ་ཁྱེད་ལོངས་ཤིག་།ངའི་དམ་ཚིག་ལ་ཡང་དག་པར་གནས་པར་གྱིས་ཤིག་།དེ་ཐོས་ནས་ལྷ་རྣམས་རབ་ཏུ་དགའ་བའི་བཞིན་གྱིས་བཅོམ་ལྡན་འདས་ལག་ན་རྡོ་རྗེའི་རྐང་པ་གཉིས་ལ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལག་ན་རྡོ་རྗེ་འདི་ནི། མཆོག་ཏུ་མི་བཟད་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ལྷ་དག་།དེ་དེ་བཞིན་ནོ། །དེ་ནས་བཅོམ་ལྡན་འདས་ལ་ལག་ན་རྡོ་རྗེས་གསོལ་པ། བཅོམ་ལྡན་འདས། བདག་གི་རིག་པ་འདི་ནི། ལྷ་རྣམས་འཆི་འཕོ་བར་བགྱིད་པ། གནོད་སྦྱིན་རྣམས་ཕུང་བར་བགྱིད་པ། གནོད་སྦྱིན་རྣམས་ཕུང་བར་བགྱིད་པ|་དྲི་ཟ་རྣམས་ལྷུང་བར་བགྱིད་པ། ལོག་འདྲེན་རྣམས་ངེས་པར་བརླག་པར་བགྱིད་པ། རྡོ་རྗེའི་རིགས་ཐམས་ཅད་སྐྲག་པར་བགྱིད་པ། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་ལ་སོགས་པ་ལ་གནོད་པར་བགྱིད་པ་ལགས་སོ། །བཅོམ་ལྡན་འདས། བདག་གི་ཉེ་བའི་སྙིང་པོ་འདི་ནི། བདག་ལ་ཡང་ཕུར་བུས་འདེབས་པ་ལགས་ཏེ། བཅོམ་ལྡན་འདས། མགུ་བར་བགྱིད་པ། སྐམ་པར་བགྱིད་པ། ཆད་པས་གཅོད་པ་ལགས་སོ། །ལྷ་རྣམས་འཆི་འཕོ་བར་བགྱིད་པ་དང་། གནོད་པར་བགྱིད་པ་དང་། ཕུར་བུས་གདབ་པར་བགྱིད་པར་འ་ཚལ་བས་མར་གྱི་ངོ་ཞག་བཅུ་བཞི་ལ་ཞག་གསུམ་སྨྱུང་བ་བགྱིས་ཏེ་བའི་ལྕི་བ་ས་ལ་མ་ལྷུང་བ་ལས་བརྒྱ་བྱིན་གྱི་གཟུགས་བགྱིས་ལ་ལག་ན་རྡོ་རྗེའི་མདུན་དུ་བཞག་སྟེ་དེའི་སྟེང་དུ་ཤིང་ཀུན་གྱི་ཤིང་གི་ཞུགས་བུས་ལ་བྲི་ཡང་ཀུའི་ཡམ་སྲེག་ཤིང་ཡུངས་ཀར་གྱི་འབྲུ་མར་ལ་སྨྱུགས་པ་བརྒྱ་སྟོང་སྦྱིན་སྲེག་བགྱིའོ། །དེ་ནས་ལྷ་རྣམས་སོ་སོ་ནས་ཚིག་ཅིང་བརྒྱ་བྱིན་གྱི་གན་དུ་མཆིའོ། །བརྒྱ་བྱིན་ཡང་ལྷ་རྣམས་དབུགས་འབྱིན་ཏེ། གྲོགས་པོ་དག་མ་འཇིགས་ཤིག་ཅེས་ལྷ་རྣམས་དབུགས་ཕྱུང་ནས་རིག་སྔགས་འཆང་གི་གན་དུ་མཆི་སྟེ་ཕྱིན་པ་དང་། ཚིག་འདི་སྐད་དུ་ཀྱེ་མའོ་རིག་སྔགས་འཆང་ལ་དགེ་སྦྱོང་གི་ཚུལ་མེད་དོ། །ཞེས་སྨྲས་པ་དང་། རིག་སྔགས་འཆང་གིས་འདི་སྐད་དུ་བཅོམ་ལྡན་འདས་ལག་ན་རྡོ་རྗེས་གང་བཤད་པ་དེ་དྲན་པར་གྱིས་ཤིག་ཅེས་བརྗོད་པར་བགྱིའོ། །དེ་ཐོས་ནས་ཤིན་ཏུ་དགའ་བའི་བཞིན་གྱིས་རིག་སྔགས་འཆང་ལ་རིག་པ་སྩོལ་ལོ། །དེའི་འོག་ཏུ་རིག་སྔགས་འཆང་གི་རིག་པ་མཆོག་གིས་སླར་གཏང་བར་བགྱིའོ། །རིག་པ་དེས་རིག་སྔགས་འཆང་གི་འཁོར་ལོས་བསྒྱུར་བར་འགྱུར་ཏེ། རིག་སྔགས་འཆང་བདུན་སྟོང་གི་བདག་པོར་བསྐལ་བར་གནས་པར་འགྱུར་རོ། །ལྷ་རྣམས་ཀྱང་གཡོས་པར་བགྱིད་པར་འགྱུར་རོ། །གནོད་སྦྱིན་རྣམས་ཀྱང་ཕུང་བར་བགྱིད་པར་འཚལ་བས་གང་ནས་གནོད་སྦྱིན་ནམ། གནོད་སྦྱིན་མོ་ག་ནས་པ་དེར་མར་གྱི་ངོ་ཞག་བརྒྱད་ལ་མཆིས་ལ་ཉིན་ཞག་གཅིག་སྨྱུང་བ་བགྱིས་ཏེ་བྱང་ཆུབ་ཀྱི་ཤིང་གི་ཞུགས་བུས་ལ་ཨ་པ་མྲྒའི་ཡམ་སྲེག་ཤིང་ལས་ལན་བརྒྱ་སྟོང་སྦྱིན་སྲེག་བགྱིའོ|་|དེ་ནས་གནོད་སྦྱིན་དེ་དག་འབྲོས་པ་ཚུར་ཤོག་ཅེས་བརྗོད་ན་སླར་མཆིའོ། །མཆིས་ནས་ཀྱང་དེའི་བསྙེན་བཀུར་གྱིས་ཤིག་ཅེས་བརྗོད་དོ། །གདུགས་གཅིག་བཞིན་དུ་ཏི་ན་ར་བདུན་བདུན་སྩལ་ལོ། །གང་དུ་བསྐོས་པ་དེ་ཐམས་ཅད་བགྱིད་དོ། །དྲི་ཟ་རྣམས་ལྷུང་བར་བགྱིད་པར་འཚལ་བས་རྒྱ་མཚོར་འབབ་པའི་ཀླུང་གི་ངོས་སུ་ཡར་གྱི་ངོ་ཚེས་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་ཁམ་པོ་ཛའི་ཤིང་གི་ཞུགས་བུས་ལ་ཡུངས་ཀར་མར་དང་བསྲེས་པས་ལན་ཁྲིར་སྦྱིན་སྲེག་བགྱིའོ། །དེ་ནས་ཡི་དྭགས་ཀྱི་གཟུགས་ཅན་གྱི་མི་ཞིག་མཆིའོ། །མཆིས་ནས་ཀྱང་རྐང་པ་གཉིས་ལ་ཕྱག་བགྱིད་པ་དང་། བདེ་བར་གྱུར་ཅིག་ཅེས་བརྗོད་པར་བགྱིའོ། །དེ་ནས་མི་དེས་རྐང་པ་གཉིས་ལ་ལིག་བུ་མིག་བཞག་ནས་སླར་མཆིའོ། །ལིག་བུ་མིག་དེས་མིག་བསྐུས་ན། དྲི་ཟའི་གཟུགས་སུ་འགྱུར་རོ། །རྐང་གིས་འགྲོ་བར་འགྱུར་རོ། །ལོ་ལྔ་སྟོང་ཐུབ་བར་འགྱུར་རོ|་|དྲི་ཟ་རྣམས་ཀྱང་སྲུང་བ་དང་། སྐྱོབ་པ་དང་། སྦེད་པར་བགྱིད་དོ། །ལོག་འདྲེན་རྣམས་ཀྱང་བརླག་པར་བགྱིད་ན། སྨན་ཨ་ས་དེ་བ་དང་། ཤིང་བ་ལ་ཀར་བ་སའི་ཚིག་གུ་དང་། ནེའུ་ལེའི་སྤུ་དང་། སྦྲུལ་སྐོགས་བརྗེས་པ་དང་། རྫས་དེ་དག་གིས་གནོད་སྦྱིན་གྱི་གཟུགས་ལ་བདུག་པར་བགྱིའོ། །རིག་པ་ཡང་ལན་བརྒྱ་སྟོང་བཟླས་བརྗོད་བགྱིའོ། །དེ་ནས་རྨི་ལམ་དུ་ལོག་འདྲེན་རྣམས་བྲེད་ཅིང་ཅི་བྱ་གཏོལ་མེད་པར་མཐོང་ངོ་། །དེའི་ནང་ནས་མི་ཞིག་འདི་སྐད་ཅེས་ཀྱི་རིག་སྔགས་འཆང་། བདག་ཅག་ལ་གནོད་པ་མ་མཛད་པར་འདི་སྣོམས་ཤིག་ཅེས་སྨྲའོ། །དེ་ནས་ནང་བར་ཏི་ན་ར་ཅིག་སྩོལ་ལོ། །སྒྲུབ་པའི་དུས་ན་ཡང་བདུག་པ་འདི་ཉིད་ཀྱིས་བདག་ལ་བདུགས་ན། ལོག་འདྲེན་ཐམས་ཅད་ཉམས་པར་འགྱུར་རོ། །ལོག་འདྲེན་གྱི་ལས་བགྱི་ན་ཡང་མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ལ་བགྱིའོ། །རྡོ་རྗེའི་རིགས་སྐྲག་པར་བགྱི་ན། ལྕེ་འབབ་པས་བཅག་པའི་ཤིང་བླངས་ལ་མར་གྱི་ངོ་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་ལྕེ་འབབ་པས་བཅག་པའི་ཤིང་གི་ཞུགས་བུས་ལ་ཁམ་པོ་ཛའི་ཡམ་སྲེག་ཤིང་བརྒྱ་སྟོང་སྦྱིན་སྲེག་བགྱིས་ན། རྡོ་རྗེའི་རིགས་ཐམས་ཅད་སྐྲག་པར་འགྱུར་རོ། །རིའི་དངོས་གྲུབ་ཀྱང་སྩོལ་ལོ། ། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་ལ་སོགས་པ་ལ་གནོད་པ་བགྱིད་ན། མར་གྱི་ངོ་ཞག་བཅུ་བཞི་ལ་ཞག་གསུམ་སྨྱུང་བ་བགྱིས་ཏེ་མཚན་གཅིག་མཆིས་པར་མཆིས་ལ་ཅི་ནུས་ཀྱིས་མཆོད་དེ། མཚན་མ་ཁྲག་གིས་བསྐུས་ལ་ཁྲོས་པ་དང་བཅས་པས་ལག་པ་གཉིས་ཀས་འཁྱུད་དེ་རིག་པ་ལན་བརྒྱ་སྟོང་བཟླས་བརྗོད་བགྱིས་ན། དེ་ན་མཚན་མ་འགུལ་ལོ། །སྐྲག་པར་འགྱུར་ཞིང་རང་གི་ཆོ་ག་རྒྱས་པ་རྣམས་ཀྱི་དངོས་གྲུབ་སྩོལ་ཏོ། །དེ་ལྟར་ཆོ་ག་རྒྱས་པ་ཐམས་ཅད་འགྲུབ་པར་འགྱུར་ར་ཨོ|་|ལག་ན་རྡོ་རྗེ་ལ་ཕུར་བུས་གདབ་ན་མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་སེང་ལྡེང་གི་ཤིང་གི་ཞུགས་བུས་ལ་ཁམ་པོ་ཛའི་ཡམ་སྲེག་ཤིང་བརྒྱ་སྟོང་སྦྱིན་སྲེག་བགྱིས་ན། སྲེག་བླུགས་གསུམ་པའི་ཚེ་འདར་རོ། །བརྒྱས་ཚར་གཅོད་པར་འགྱུར་རོ། །སུམ་བརྒྱས་སྐམ་པར་འགྱུར་རོ། །བཞི་བརྒྱ་པའི་ཚེ་ལག་ན་རྡོ་རྗེ་ལ་ཕུར་བུས་བཏབ་པར་འགྱུར་རོ། །ལག་ན་རྡོ་རྗེ་ཕུར་བུས་བཏབ་པས་ལག་ན་རྡོ་རྗེའི་རིགས་ཐམས་ཅད་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་ལ་སོགས་པ་ཐམས་ཅད་ཀྱང་ཕུར་བུས་བཏབ་པར་འགྱུར་རོ། །བརྒྱ་སྟོང་ཚང་བའི་ཚེ་ལག་ན་རྡོ་རྗེའི་ཚིག་ནས་མཆི་སྟེ་རིག་སྔགས་འཆང་ཅི་འདོད་ཅི་སྦྱིན་ཅེས་བརྗོད་པ་དང་། བཅོམ་ལྡན་འདས། ཆོ་ག་རྒྱས་པ་དངོས་གྲུབ་བདག་ལ་སྩལ་དུ་གསོལ་ཞེས་བརྗོད་པར་བྱའོ། །དེ་ལྟར་གྱུར་ཅིག་ཅེས་བརྗོད་ནས་མི་སྣང་བར་གྱུར་ཏོ། །དེ་ནས་རིག་སྔགས་འཆང་གིས་མྱུར་བར་ལག་ན་རྡོ་རྗེའི་གཟུགས་འོ་མས་བཀྲུ་བར་བགྱིའོ། ། དེ་ནས་མཆིས་པའི་མར་དང་། གུ་གུལ་གྱིས་ལན་བརྒྱ་སྟོང་སྦྱིན་སྲེག་བགྱིའོ། །དེ་ནས་སོས་པར་འགྱུར་རོ། །ལྷ་ལ་ཡང་མཆོད་པ་རྒྱ་ཆེར་བགྱིས་ལ་ཤུགས་ལྡན་མས་སླར་གཤེགས་སུ་གསོལ་ལོ། །བཅོམ་ལྡན་འདས་རིག་པའི་རྒྱལ་པོ་སྒྲུབ་པའི་རིག་སྔགས་འཆང་ལ་གལ་ཏེ་དངོས་གྲུབ་ཏུ་མ་གྱུར་ན། རིག་སྔགས་འཆང་དེས་ལས་བདག་གིར་བྱ་བ་ཡིན་པར་དམིགས་པར་བགྱིའོ། །ལན་གཉིས་སུ་ཡང་བསྒྲུབ་པར་བགྱིའོ། །མ་གྲུབ་ན་ཡང་ལས་བདག་གིར་བྱ་བ་ཡིན་པར་དམིགས་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ཅིའི་ཕྱིར་དེ་སྐད་སྨྲ། གསོལ་པ། བཅོམ་ལྡན་འདས། ཕ་འགུམས་པ་དང་། མ་འགུམས་པ་དང་། ཚངས་པ་ལ་གནོད་པ་བགྱིས་པའི་སེམས་ཅན་དག་ཀྱང་མཆིས། མཚམས་མ་མཆིས་པ་ལྔ་དང་ལྡན་པའི་སེམས་ཅན་དག་ཀྱང་མཆིས་ཏེ། བཅོམ་ལྡན་འདས། དེའི་སླད་དུ་བདག་འདི་སྐད་ཅེས་བརྩོན་འགྲུས་བརྩམས་ལ་བསྒྲུབ་པར་བྱའོ་ཞེས་མཆིའོ། །ལན་བདུན་དུ་ཡང་སྒྲུབ་པ་ལ་འཇུག་པར་བགྱིའོ། །གལ་ཏེ་མ་གྲུབ་ན། ལས་འདི་བརྩམ་པར་བགྱི་ས་ཏེ|་མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བར་བགྱིས་ལ་དུར་ཁྲོད་ཀྱི་ཤིང་གི་ཞུགས་བུས་ཏེ་སེང་ལྡེང་གི་ཡམ་སྲེག་གི་ཤིང་ལ་བདག་གི་ཁྲག་བྱུགས་ལ་ལན་བརྒྱ་སྟོང་སྦྱིན་སྲེག་བགྱིའོ། །གལ་ཏེ་མ་མཆིས་ན་རང་གི་ཤས་ལན་བརྒྱ་སྟོང་སྦྱིན་སྲེག་བགྱིས་ན་མཆི་བར་བགྱི་སྟེ། བཅོམ་ལྡན་འདས་རིག་སྔགས་ཀྱི་དངོས་གྲུབ་ཀྱང་སྩལ་བར་བགྱིའོ། །ལས་འདི་ནི། མཆོག་ཏུ་མི་བཟད་པ་ལགས་ཏེ། རིག་སྔགས་འཆང་དེས་མི་བཟད་པའི་ལས་འདི་ཐོག་མར་མི་བགྱིའོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པ་རྣམས་ཀྱི་བྱང་ཆུབ་ནི། བཅོམ་ལྡན་འདས་ཀྱིས་ཀྱང་འགལ་བར་བགྱི་བ་མ་ལགས་པ་ལྟ་བུ་སྟེ། གལ་ཏེ་རིག་སྔགས་འཆང་གིས་ལས་ཐོག་མར་བརྩམ་སྟེ། བཅོམ་ལྡན་འདས། དེ་ནི། བདག་ལ་གནོད་པ་བགྱིད་དེ། དེ་ཁོ་ན་ཉིད་ཀྱང་མི་མཐོང་ལ་བདག་ལ་གནོད་པ་བགྱིད་དོ། །བཅོམ་ལྡན་འདས|་བདག་ལ་གནོད་པ་བགྱིད་ན། ལྷ་ཐམས་ཅད་ལ་གནོད་པ་བགྱིད་པར་འགྱུར་རོ། །གནོད་སྦྱིན་ཐམས་ཅད་ལ་ཡང་གནོད་པ་བགྱིས་པར་འགྱུར་ཏེ། དེ་དག་རིག་སྔགས་འཆང་དེ་ལ་གླགས་ཚོལ་ཞིང་མཆིས་པར་འགྱུར། གལ་ཏེ་མཚམས་མ་མཆིས་པ་ལྔ་དང་ལྡན་པའི་རིག་སྔགས་འཆང་ཞིག་རིག་པའི་རྒྱལ་པོ་བསྒྲུབས་ན། སྒྲུབ་པ་བདུན་པ་ལ་དངོས་གྲུབ་སྩལ་བར་བགྱིའོ། །གལ་ཏེ་མ་སྩལ་ན། དེ་བཞིན་གཤེགས་པ་ཐམས་ཅད་འཁུས་པར་འགྱུར་རོ། །བཅོམ་ལྡན་འདས། གཞན་ཡང་གང་གིས་རིག་སྔགས་འཆང་རྣམས་ཀྱི་དངོས་གྲུབ་ཏུ་འགྱུར་བའི་རྫས་རྣམས་མི་འཕྲོག་པར་བརྗོད་པར་བགྱིའོ། །བྱང་ཆུབ་སེམས་དཔའ་ཆེན་པོ་སྨྲོས་ཤིག་།བཅོམ་ལྡན་འདས། རིག་སྔགས་འཆང་གིས་ལིག་བུ་མིག་དང་ལྡོང་རོས་ལ་སོགས་པ་སྒྲུབ་ན། ཐོག་མར་འོ་མས་བཀྲུ་བར་བགྱི་སྟེ། བཀྲུས་པས་དངོས་གྲུབ་ཏུ་འགྱུར་རོ། །དངོས་གྲུབ་ཏུ་གྱུར་པའི་རྫས་རྣམས་ཀྱང་རིག་སྔགས་འཆང་གི་བླ་མ་དང་། བདག་དང་། གྲོགས་རྣམས་ལ་ཆ་གསུམ་དུ་བགོ་བར་བགྱིའོ། །རལ་གྲི་དང་། འཁོར་ལོ་དང་། མདུང་རྩེ་གསུམ་པ་ཞིག་གྲུབ་ལ། སྟོར་ན་ཡིད་ཀྱིས་འདི་སྙམ་དུ་སེམས་ཅན་གང་བསོད་ནམས་ཆུང་བ་དེའི་སྟོར་གྲང་སྙམ་དུ་བསམ་ལ་རིག་སྔགས་འཆང་དེས་སྦྱིན་སྲེག་བགྱིའོ། །ཡང་ན་ལག་པ་བཀན་ཏེ་མནན་ནོ། །གལ་ཏེ་ཤིན་ཏུ་གནོད་པ་བགྱིས་ན། རིག་སྔགས་འཆང་དེས་འདི་སྐད་དུ་རྫས་འདི་ནི། ལག་ན་རྡོ་རྗེའི་ཡིན་ནོ་ཞེས་བརྗོད་པར་བགྱིའོ། ། བཅོམ་ལྡན་འདས། བདག་གི་མིང་ཐོས་ནས་ཡིད་ཀྱིས་ཀྱང་འཁུ་བས་སེམས་པ་ནི། ལྷ་དང་བཅས་པ་དང་། བདུད་དང་བཅས་པ་དང་། ཚངས་པ་དང་བཅས་པ་དང་། དགེ་སྦྱོང་དང་བྲམ་ཟེའི་སྐྱེ་རྒུ་དང་བཅས་པའི་འཇིག་རྟེན་ན་མ་མཐོང་ངོ་། །དེ་ནས་ཐམས་ཅད་དང་བཅས་པའི་འཁོར་དེས་བྱང་ཆུབ་སེམས་དཔའ་ཆེན་པོ་ལེགས་སོ་ལེགས་སོ། ། སྟོབས་དང་ཕ་རོལ་གནོན་པ་དཔག་ཏུ་མེད་པ་ཁྱོད་སེངྒེའི་སྒྲ་འདི་ལྟ་བུ་འབྱིན་པ་ལེགས་སོ་ཞེས་ཏེ་ལེགས་སོ་ཞེས་བྱ་བ་བྱིན་ནོ། །བཅོམ་ལྡན་འདས། འདི་ནི། བདག་གི་ཉེ་བའི་སྙིང་པོ་ལགས་ཏེ། འདི་ལན་གཅིག་བརྗོད་པས་ཆོ་ག་ཆེན་པོ་རྒྱས་པ་བརྒྱད་བརྗོད་པར་འགྱུར་རོ། །ལག་ན་རྡོ་རྗེ། དེ་དེ་བཞིན་ཏེ། དེ་དེ་བཞིན་ནོ|་|བཅོམ་ལྡན་འདས། རིག་པའི་རྒྱལ་པོ་འདི་བདུན་སྒྲུབ་པ་དང་། གནོད་པ་བགྱིད་ན། ཡིད་ཀྱིས་བཟླས་བརྗོད་བགྱིའོ། །ཅི་སྟེ་རིག་སྔགས་འཆང་རིག་སྔགས་སྒྲུབ་པར་འཚལ་ན། རིག་སྔགས་འཆང་དེས་ཐོག་མར་རིག་སྔགས་དེ་ལན་བརྒྱ་རྩ་བརྒྱད་བརྗོད་པར་བགྱིའོ། །ཉེ་བའི་སྙིང་པོ་ཡང་ལན་བརྒྱ་རྩ་བརྒྱད་བཟླས་བརྗོད་བགྱིའོ། །དེ་ནས་རིག་སྔགས་འཆང་གིས་རིག་སྔགས་བསྒྲུབ་པར་བགྱིའོ། །གལ་ཏེ་རིག་སྔགས་མ་གྲུབ་ན། དེ་ཉིད་དུ་མཆིས་ལ་དུ་བ་མཆིས་པའི་མེ་མདག་ཏུ་སྐེ་ཚེ་ལས་ལན་བརྒྱ་སྟོང་སྦྱིན་སྲེག་བགྱིས་ན། རིག་པ་དེ་ཉམས་པར་གྱུར་ནས་དེའི་མདུན་དུ་མཆི་སྟེ་དངོས་གྲུབ་ཏུ་སྩོལ་ཏོ། །དེ་ཉིད་དུ་མཆིས་ལ་རིག་སྔགས་འཆང་གིས་ཡང་རིག་པ་བསྒྲུབ་ན། མྱུར་དུ་འགྲུབ་བོ། །གསང་སྔགས་ཐམས་ཅད་ཀྱི་ལས་ཀྱང་འདིས་འགྲུབ་པ་ལགས་སོ། །སྤོས་རྣམས་ཀྱི་ལག་ན་རྡོ་རྗེའི་ག་ཟུགས་བགྱིས་ལ་གདུགས་བདུན་དུས་གསུམ་དུ་ལན་བརྒྱ་རྩ་བརྒྱད་བཟླས་བརྗོད་བགྱིས་ལ་མར་གྱི་ངོ་ཞག་བཅུ་བཞི་པ་ལ་ཉིན་ཞག་གཅིག་སྨྱུང་བ་བགྱིས་ཏེ་དཔག་ཏུ་མ་མཆིས་པར་བཟླས་བརྗོད་བགྱིས་ན། གནོད་སྦྱིན་མོ་མཆི་བར་འགྱུར་ཏེ། རྡོ་རྗེ་བཞད་མས་སྨྲར་སྩལ་བར་བགྱིའོ། །གང་གི་ཚེ་ངས་ཆེ་གེ་མོ་ཞེས་བྱ་བ་ལ་རྒྱོབས་ཤིག་རྒྱོབས་ཤིག་། སྲེགས་ཤིག་སྲེགས་ཤིག་།ཟུངས་ཤིག་།མྱོས་པར་གྱིས་ཤིག་།མ་རུངས་པར་གྱིས་ཤིག་ཅེས་བསྒོ་བ་ཐམས་ཅད་ལ་གནོད་པ་གྱིས་ཤིག། བཅོམ་ལྡན་འདས་དྲན་པ་ཙམ་གྱིས་ཀྱང་ཐམས་ཅད་གྱིས་ཤིག་ཅེས་བསྒོ་བར་བགྱིའོ། །ཉེ་བའི་སྙིང་པོ་རྫོགས་སོ།། །།ནག་མོ་དྲག་མོའི་ལས་རྣམས་ལགས་ཏེ་གསང་སྔགས་ཐམས་ཅད་དུ་གསང་སྔགས་གང་ལས་མི་བགྱིད་པ་དེ་ནག་མོ་དྲག་མོ་འདིས་བཀུག་ན། དེ་ལས་བགྱིད་དོ། །བཀུག་ཀྱང་གལ་ཏེ་མ་གྲུབ་ན། ཕྱེམ་རེད་ལག་ན་རྡོ་རྗེའི་མདུན་དུ་རིག་སྔགས་དེ་ལན་བདུན་བརྗོད་ལ་དེའི་འོག་ཏུ་ནག་མོ་དྲག་མོའི་སྔགས་ལན་བརྒྱ་རྩ་བརྒྱད་བརྗོད་པར་བགྱིའོ། །དེ་ནས་སྔགས་དེ་རྨི་ལམ་དུ་སྟོན་པར་བགྱིད་དོ|་|ཡི་གེ་མ་ཚང་བ་དང་། ཕུར་བུ་བཏབ་པས་སྤྲ་བར་བགྱིད་དོ། །གལ་ཏེ་ཡི་གེ་མ་ཚང་བར་གྱུར་ན། རིག་པ་མཆོག་གིས་ཚང་བར་བགྱིད་དོ། །གལ་ཏེ་ཕུར་བུས་བཏབ་བར་གྱུར་ན། རིག་པ་མཆོག་ཉིད་ཀྱིས་ཕུར་བུས་འབྱུང་བར་བགྱིད་དོ། །ཕྱེམ་རེད་ལག་ན་རྡོ་རྗེའི་མདུན་དུ་མཆོད་པ་བགྱིས་ལ་སྔགས་དེ་རང་གི་ཁྲག་གིས་ཤིང་ཏ་ལའི་ལོ་མ་བྲིས་ཏེ་རྩཝ་ཀུ་ཤ་ལས་བགྱིས་པའི་རྡོ་རྗེ་ལ་བདུན་སྔགས་ལ་བསྣུན་ན། དེ་ནས་ཕུར་བུ་འབྱིན་པར་འགྱུར་རོ། །གདོན་དགུག་ན། མེ་ཏོག་གིས་བགྱིའོ|་|གདོན་རེངས་པར་བགྱིད་ན། ལན་གསུམ་བཟླས་བརྗོད་བགྱིས་པའི་ཆབ་ཀྱིས་བགྱིའོ། །གདོན་སྤོང་བར་བགྱི་ན། བདུག་པས་བགྱིའོ། །གདོན་དབབ་ན། རྣ་བར་བཟླས་བརྗོད་བགྱིས་པས་སོ། །གདོན་གཏོང་བར་འདོད་ན། ཤ་ཀ་རའི་ཆབ་ལ་ལན་བདུན་བཟླས་བརྗོད་བགྱིས་ན་གཏོང་ངོ་། །ཙནྡན་དམར་པོ་ལས་རྡོ་རྗེ་བགྱིས་ལ་མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་བ་ལང་གི་ཤས་བདུག་པར་བགྱིའོ། །རིག་པ་ཡང་ལན་བརྒྱ་སྟོང་བཟླས་བརྗོད་བགྱིས་ན། ཕ་རོལ་བརྗེད་བྱེད་ཀྱིས་ཟིན་པར་བགྱིད་དོ། །རྡོ་རྗེ་འོ་མས་བཀྲུས་ལ་རིག་པ་ཡང་ལན་བརྒྱ་སྟོང་བཟླས་བརྗོད་བགྱིས་ན། ཐར་པར་ཡང་བགྱིས་པར་འགྱུར་རོ། །རྡོ་རྗེ་དེ་ཉིད་ལ་ཤ་ཆེན་པོས་བདུགས་ལ་རིག་པ་ཡང་ལན་བརྒྱ་སྟོང་བཟླས་བརྗོད་བགྱིས་ན། འགུམ་པར་བགྱིད་དོ། །ཚེས་གྲངས་དང་སྐར་མ་གདམ་མི་འཚལ། སྨྱུང་བ་བགྱི་མི་འཚལ་ཏེ། འདི་ལ་རྒྱུ་ནི། ཁྲོ་བོ་ཉིད་དོ། །དགྲ་གསད་པར་འཚལ་བས་གོས་རློན་པ་བགོས་ལ་ཁ་གདུགས་བལྟས་ཏེ་དགྲའི་སྲོག་བསྐམས་ཀྱི་བར་དུ་གསང་སྔགས་བཟླས་བརྗོད་བགྱིའོ། །རྡོ་རྗེ་འོ་མས་བཀྲུས་ལ་རིག་པ་ཡང་ལན་བརྒྱ་སྟོང་བཟླས་བརྗོད་བགྱིས་ན། སྔ་མཁོ་བཞིན་འགྱུར་རོ། །གལ་ཏེ་ནག་མོ་དྲག་མོ་སྒྲུབ་པར་འཚལ་ན། ཐོག་མ་ཉིད་དུ་ཟས་སུ་འོ་སྐྱོ་འཚལ་ཞིང་ལན་འབུམ་བཟླས་བརྗོད་བགྱིའོ། །དེའི་འོག་ཏུ་རི་མོ་མཁན་གསོ་སྦྱོང་བཟུང་བས་མ་གོད་པའི་རས་ལ་སངས་རྒྱས་ཀྱི་སྐུ་གཟུགས་གསེར་མདོག་ལྟ་བུ་བྲི་བར་བགྱིའོ། །དེའི་གཡོན་རོལ་དུ་ནག་མོ་དྲག་མོ་བྲི་བར་བགྱིའོ། །མར་གྱི་ངོ་ཞག་བཅུ་བཞི་ལ་ཞག་གསུམ་སྨྱུང་བ་བགྱིས་ཏེ་མཆོད་པ་རྒྱ་ཆེར་བགྱིས་ལ་ནག་མོ་དྲག་མོ་མཆི་བར་འགྱུར་གྱི་བར་དུ་རིག་པ་བཟླས་བརྗོད་བགྱིའོ། །མཆིས་པ་དང་རིག་པ་མཆོག་གིས་མཆོད་ཡོན་དབུལ་ལོ། །དེ་ནས་དེ་རིག་སྔགས་འཛིན་ཅི་སྦྱིན་པར་བྱ་ཞེས་མཆི་བ་དང་། དེ་ནས་བཅོམ་ལྡན་འདས་མ། རྒྱལ་པོ་བགྱིད་དུ་སྩོལ་ཅིག་ཅེས་བརྗོད་ན། དེ་བཞིན་དུ་གྱུར་ཅིག་ཅེས་བརྗོད་ནས་མི་གདའ་བར་འགྱུར་རོ|་|ནག་མོ་དྲག་མོའི་ཆོ་ག་རྫོགས་སོ། ། །།རྒྱལ་བ་ལྡན་མའི་ལས་རྣམས་ལགས་ཏེ། ལྷ་ཐམས་ཅད་དགུག་ན་ལན་གསུམ་བཟླས་བརྗོད་བགྱིས་པའི་ཆབ་ཀྱིས་བགྱིའོ།། དུད་འགྲོའི་སྐྱེ་གནས་སུ་གཏོགས་པ་ཐམས་ཅད་དགུག་ན། ཡིད་ཀྱིས་བགྱིའོ། །བུད་མེད་དབང་དུ་བགྱིད་ན། ཡར་གྱི་ངོ་ཚེས་བརྒྱད་ནས་བརྩམས་ཏེ་ལག་ན་རྡོ་རྗེའི་མདུན་དུ་གདུགས་བདུན་དུས་གསུམ་དུ་དུ་བ་མ་མཆིས་པའི་མེ་མདག་ལ་ན་ལེ་ཤམ་གྱིས་ལན་བརྒྱ་རྩ་བརྒྱད་སྦྱིན་སྲེག་བགྱིས་ན་དབང་དུ་འགྱུར་རོ། །དབབ་པར་བགྱིད་ན། ཆབ་བམ། བྱེའུ་རུག་པའི་འོ་མས་བགྱིའོ། །གདོན་བཅིང་ངམ། བསྐྱོད་པར་བགྱི་ན། གུ་གུལ་གྱིས་བགྱིའོ། །དུར་ཁྲོད་ཀྱི་ཐལ་བ་ལ་གཟུགས་བགྱིས་ལ་ལན་གསུམ་བཟླས་བརྗོད་བྱས་པས་གདོན་གྱིས་གཏོང་བར་བགྱིད་དོ། །དུར་ཁྲོད་ཀྱི་སོལ་བ་ལས་གདོན་གྱི་གཟུགས་བགྱིས་ལ་མཚོན་རྣོན་པོས་བཅད་ན། བཅད་པར་འགྱུར་ཏེ། གཏོང་ངོ་། །དུག་ལས་གསོལ་ན། ཡལ་གས་བགྱིའོ། །མར་གྱི་ངོ་ཞག་བཅུ་བཞི་ལ་དུར་ཁྲོད་དུ་དུར་ཁྲོད་ཀྱི་ཐལ་བས་གཟུགས་བགྱིས་ལ་བཟླས་བརྗོད་ལན་བརྒྱ་སྟོང་བགྱིས་པའི་སེང་ལྡེང་གི་ཕུར་བུས་སྙིང་གར་བཙུགས་ན། གཟེར་ཐབས་དྲག་པོས་བཏབ་པར་འགྱུར་རོ། །ཕྱུང་ན། སོས་པར་འགྱུར་རོ། །ཡར་གྱི་ངོ་ཚེས་བདུན་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་བྱ་རོག་མ་ལངས་ཀྱི་བར་དུ་ལན་སྟོང་རྩ་བརྒྱད་བཟླས་བརྗོད་བགྱིས་ན། ཏི་ན་ར་གཅིག་སྩོལ་ཏོ། །སྒྲུབ་པ་བགྱི་ན། མ་གོད་པའི་རས་ལ་སྤྱིན་དང་མ་འདྲེས་པའི་ཚོན་གྱིས་སངས་རྒྱས་ཀྱི་སྐུ་གཟུགས་གསེར་གྱི་མདོག་ཅན་བྲི་བར་བགྱིའོ། །དེའི་གཡོན་རོལ་ཏུ་འཕགས་པ་སྤྱན་རས་གཟིགས་དབང་ཕྱུག་བྲི་བར་བགྱིའོ|་|དེའི་གཡས་རོལ་ཏུ་འཕགས་པ་ལག་ན་རྡོ་རྗེ་བྲི་བར་བགྱིའོ། །འཕགས་པ་སྤྱན་རས་གཟིགས་དབང་ཕྱུག་ནི། འདམ་བུ་མདའ་རྒྱུའི་ཁ་དོག་ལྟར་དཀར་བའོ། །ལག་ན་རྡོ་རྗེ་ནི། སྔོ་བསངས་ཏེ། རྒྱན་ཐམས་ཅད་ཀྱིས་བརྒྱན་པའོ། །ལག་ན་རྡོ་རྗེ་གཡས་རོལ་དུ་ནི། རྒྱལ་བ་ལྡན་མ་སྔོ་བསངས་ལ། དེ་ཡང་རྒྱན་ཐམས་ཅད་ཀྱིས་བརྒྱན་པའོ། །དེའི་འོག་རོལ་ཏུ་ནི། སྒྲུབ་པ་པོ་ལག་ན་པོག་ཕོར་ཐོགས་པར་བྲིའོ། །དེ་ནས་ཞག་གསུམ་སྨྱུང་བ་བགྱིས་ཏེ་མར་གྱི་ངོ་ཞག་བརྒྱད་ལ་རི་མོའི་སྐུ་གཟུགས་ལ་མཆོད་པ་རྒྱ་ཆེར་བགྱིས་ལ། གུ་གུལ་གྱི་བདུག་པ་བསྲེག་ཅིང་རི་མོའི་སྐུ་གཟུགས་ཀྱི་མདུན་དུ་ཞུགས་བུས་ལ་ཀཱ་ར་བཱི་རའི་མེ་ཏོག་ཞོ་དང་། སྦྲང་རྩི་དང་། མར་ལ་སྨྱུགས་པ་བརྒྱད་སྟོང་སྦྱིན་སྲེག་བགྱིའོ། །དེ་ནས་མེ་ཐབ་ནས་ཀཱ་ར་བཱི་རའི་མེ་ཏོག་པདྨའི་ཚད་ཙམ་དུ་འབྱུང་ངོ་། །ཀཱ་ར་བཱི་རའི་པདྨའི་དབུས་ནས་ཀཱ་ར་བཱི་ར་འདྲ་བའི་ལྡོང་རོས་འབྱུང་སྟེ། རིག་པའི་རྒྱལ་པོ་བཟླས་བརྗོད་བགྱིད་བཞིན་དུ་དེ་བླང་བར་བགྱིའོ། །བླངས་པ་ཙམ་གྱིས་གདུགས་ཤར་བའི་མདོག་ལྟ་བུ་དང་། སྐྲ་ལྕང་ལོ་འཁྱིལ་བ་དང་། ལོ་བཅུ་དྲུག་ལོན་པའི་ལུས་ལྟ་བུར་འགྱུར། ལོ་བརྒྱད་ཁྲི་ཐུབ་པར་འགྱུར། ནམ་མཁའ་ལ་མཆི་བ་དང་། མཉམ་པ་མ་མཆིས་པ་དང་། ཁ་ཟས་ཅི་འཚལ་བ་རྣམས་འཚལ་བར་འགྱུར་རོ། །རིག་སྔགས་འཆང་རྣམས་ཀྱི་སྤྱོད་ཡུལ་མ་ལགས་པར་འགྱུར་རོ། །བདག་འགུམ་པའི་དུས་འཚལ་བ་འགྱུར་རོ། །གལ་ཏེ་སླད་ཀྱིས་ཀྱང་བརྩོན་འགྲུས་བསྐྱེད་ན། ཚེ་དེའི་ཉིས་འགྱུར་ཐུབ་པར་འགྱུར་རོ། །ཡར་གྱི་ངོ་ཟླ་བ་ཉ་ལ་ཉིན་ཞག་གཅིག་སྨྱུང་བ་བགྱིས་ཏེ་མཆོད་པ་བགྱིས་ལ་མེ་ཏོག་དྲི་ཞིམ་པོ་ལས་བརྒྱ་སྟོང་ཕུལ་ན། ཀཪྴ་པ་ཎ་ལྔ་སྩོལ་ཏོ། །དགྲ་བསྐྲད་པར་འཚལ་ན། ཡར་གྱི་ངོ་ཚེས་གཅིག་ལ་དུར་ཁྲོད་ཀྱི་གནས་སུ་ཞུགས་བུས་ལ་དུར་ཁྲོད་ཀྱི་ཐལ་བས་སྦྱིན་སྲེག་བགྱིས་ན་བསྐྲད་པར་འགྱུར་རོ། །མར་གྱི་ངོ་ཞག་བཅུ་བཞི་ལ་ཉིན་ཞག་གཅིག་སྨྱུང་བར་བགྱིས་ཏེ་ལག་ན་རྡོ་རྗེའི་མདུན་དུ་པྲི་ཡང་ཀུའི་ཤིང་གི་ཞུགས་བུས་ལ་བེ་ཀངྐ་ཏའི་ཡམ་སྲེག་ཤིང་བརྒྱ་སྟོང་སྦྱིན་སྲེག་བགྱིས་ན། ནོར་སྩོལ་ཏོ། །དཔལ་ཆེ་བར་བགྱི་ན། ལག་ན་རྡོ་རྗེའི་མདུན་དུ་ཏིལ་གྱིས་ལན་བརྒྱ་སྟོང་བཟླས་བརྗོད་བགྱིའོ|་|དབྱེ་བར་བགྱི་ན། ཡར་གྱི་ངོ་ཚེས་ལྔ་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་མོན་སྲན་གྲེའུ་ལས་ལན་བརྒྱ་སྟོང་སྦྱིན་སྲེག་བགྱིས་ན་དབྱེ་བར་བགྱིས་པར་འགྱུར་རོ། །ཚེས་གྲངས་དང་སྐར་མ་གདམ་མི་འཚལ། སྨྱུང་བ་བགྱི་མི་འཚལ་ཏེ་ལག་ན་རྡོ་རྗེའི་མདུན་དུ་གདུགས་བདུན་དུས་གསུམ་དུ་བ་རུ་ར་བརྒྱ་རྩ་བརྒྱད་སྦྱིན་སྲེག་བགྱིས་ན། ཕྱུགས་ཆུང་རྙེད་དོ། །བུད་མེད་དབང་དུ་བགྱི་ན། གདུགས་བདུན་དུས་གསུམ་དུ་མོན་སྲན་གྲེའུ་ལས་སྦྱིན་སྲེག་བགྱིའོ། །སྐྱེས་པ་དབང་དུ་བགྱི་ན། མར་གྱི་ངོ་ཞག་བཅུ་བཞི་ལ་ལག་ན་རྡོ་རྗེའི་མདུན་དུ་ཉིན་ཞག་གཅིག་སྨྱུང་བ་བགྱིས་ལ་ཏིལ་ལས་ལན་བརྒྱ་སྟོང་བགྱིས་ན་སྐྱེས་པ་དབང་དུ་འགྱུར་རོ། །རཱ་ཛཱ་མ་ཏེ་བ་ཤཱི་ཀ་ར་མི་ཤུཀླ་པྲ་ཏི་པ་དྷ་མཾ་བྷེ་བཛྲ་པཱ་ཎེ་ར་གྷྲ་ཏ་ཨརྐྐ་ཨེསྟེ་རག་ནིམ་པ་ཛྭ་ལྱ་ཤྭེ་ཏ་ས་ར་ཤ་པ་ནཾ་ཨཥྚ་ས་ཧ་སྲཾ་ཛུ་ཧུ་ཡད་ཡ་བད་ཨསྟ་མི་ཏི་བ་ཤ་། རྒྱལ་བ་ལྡན་པའི་ཆོ་ག་རྫོགས་སོ།། །། རྡོ་རྗེ་ལྕགས་སྒྲོག་གི་ལས་རྣམས་ཏེ། རིག་སྔགས་བཅིང་ན། སྲད་བུ་ལ་ལན་ཉི་ཤུ་རྩ་གཅིག་བཟླས་བརྗོད་བགྱིས་ཏེ་མདུད་པ་དོར་རོ། །ཡུངས་ཀར་གྱིས་ནི། ཞུགས་ཀྱི་ར་བར་འགྱུར་རོ། །ཆབ་ཀྱིས་ནི|་ཡུལ་གྲུ་ཆེན་པོར་འགྱུར་རོ། །ཐལ་བས་ནི། རྡོ་རྗེ་ར་བར་འགྱུར་རོ། །བཅིང་བ་ཐམས་ཅད་རྡོ་རྗེ་ལྕགས་སྒྲོག་འདི་ཉིད་སྦྱར་བར་བགྱིའོ། །གང་དག་བདག་གི་རིག་པ་མཆོག་གི་ཆོ་ག་རྒྱས་པ་ལ་དམ་ཚིག་མཐོང་ནས་འཇིག་རྟེན་པ་དང་། འཇིག་རྟེན་ལས་འདས་པའི་རིག་སྔགས་སྒྲུབ་པ་དེ་དག་ལ་གང་དག་བགེགས་བགྱིད་དམ། རྫས་འཕྲོག་པ་དེ་དག་ནི། དམ་ཚིག་མ་འཆལ་ཞིང་རིགས་ལ་འཁུ་བ་ལགས་ཏེ། དེ་དག་མ་རུང་པར་བགྱི་བའི་སླད་དུ་ལས་འདི་བརྩམ་པར་བགྱིའོ། །ཙནྡན་དམར་པོ་ལས་ལག་ན་རྡོ་རྗེའི་གཟུགས་བགྱིས་ཏེ་མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་སེང་ལྡེང་གི་ཤིང་གི་ཞུགས་བུས་ལ། ཤ་ཆེན་པོ་སྲེག་བླུགས་ལན་བདུན་སྦྱིན་སྲེག་བགྱིས་ཏེ་དེའི་འོག་ཏུ་འདི་སྐད་ཅེས་ལྷའམ། གནོད་སྦྱིན་ནམ། གྲུབ་པའམ། རིག་སྔགས་འཆང་ངམ། ལོག་འདྲེན་ནམ། ལོག་འདྲེན་གཡོག་འཁོར་རམ། གྲུལ་བུམ་མམ། འབྱུང་པོའམ། ཤ་ཟའམ། གང་གིས་བདག་གི་རྫས་ཇི་ལྟར་ཁྱེར་བ་དེས་སླར་བྱིན་ཅིག་ཅེས་བརྗོད་པར་བགྱིའོ། །དེ་སྐད་ཐོས་ནས་གལ་ཏེ་དེས་སྩལ་ན་ནི། ཅང་མི་བགྱིའོ། །གལ་ཏེ་མ་སྩལ་ན་ཡང་འདི་སྐད་སྐྲག་པར་བགྱི་སྟེ། གང་གིས་བདག་གི་རྫས་ཁྱེར་བ་དེས་སླར་བྱིན་ཅིག་ཅེས་བགྱིའོ། །ཅི་སྟེ་མ་སྩལ་ན། ལག་ན་རྡོ་རྗེའི་རིགས་ལས་ཕྱི་རོལ་པ་ལག་ན་རྡོ་རྗེའི་རིགས་ལ་འཁུ་བ་ལགས་པས་བྱ་གག་གི་རྟུག་པ་བླངས་ལ་ཡང་ལན་གསུམ་བརྗོད་པར་བགྱིའོ། །དེ་ལྟར་བགྱིས་ཀྱང་མ་སྩལ་ན། བྱ་གག་གི་རྟུག་པ་ལག་ན་རྡོ་རྗེ་ལ་བདུག་ཅིང་རིག་སྔགས་ཀྱང་ལན་བརྒྱད་བརྒྱ་བཟླས་བརྗོད་བགྱིའོ|་|དེ་ནས་ལག་ན་རྡོ་རྗེའི་རིགས་ལ་འཁུ་བ་ངེས་ཀྱི་ཧུད་ཀྱི་ཧུད་ཅེས་མཆི་ལ་ཚིག་ཅིངས་ཕྱོགས་དེར་ལྟུང་ངོ་། །མིག་ཀྱང་འཇར་རོ། །འགུམ་པར་ཡང་འགྱུར་རོ། །དེའི་རིགས་རབས་ཆད་པར་འགྱུར་རོ། །ནོར་ནི། སླར་ཁུགས་པར་འགྱུར་རོ། །གསད་པར་ནི། མི་བགྱིའོ། །གདོན་གྱི་ལས་རྣམས་ཀྱང་བགྱི་སྟེ། ས་ཟིན་པའམ་མ་ཟིན་པ་ཡང་རུང་སྟེ་ཡིད་ཀྱིས་དབབ་པར་བགྱིའོ། ། བྱེའུ་རུག་པའི་ལོ་མའམ། སྲ་རྩི་པོག་གམ། ཆབ་ཀྱིས་དུག་ལས་གསོ་བར་བགྱིའོ། །བདག་གསོ་ཞིང་མཛེ་ནད་མ་མཆིས་པར་བགྱི་ན། དོག་ས་ལ་ལན་བརྒྱ་རྩ་བརྒྱད་བཟླས་བརྗོད་བགྱིས་ལ་བསྐུ་བར་བགྱིའོ། །ནད་ཀྲི་ཏ་སི་མ་མཆིས་པར་བགྱི་ན། སྲད་བུ་ལ་ལན་བརྒྱ་རྩ་བརྒྱད་བཟླས་བརྗོད་བགྱིད་ལ་གང་ན་ནད་ཀྲི་ཏ་སི་མཆིས་བདེར་བཅིང་བར་བགྱིའོ། །མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་བིལ་བའི་ཤིང་གི་ཞུགས་བུས་ལ་བིལ་བའི་ཡམ་སྲེག་ཤིང་ཁྲི་སྦྱིན་སྲེག་བགྱིས་ན། ལོངས་སྤྱོད་དག་སྩོལ་ལོ། །ཡར་གྱི་ངོ་ཉ་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་ཨ་བ་མརྒའི་ཡམ་སྲེག་ཤིང་ཁྲི་རིག་པ་མཆོག་དང་ལྷན་ཅིག་པས་སྦྱིན་སྲེག་བགྱིས་ན། རྡོ་རྗེ་ལྕགས་སྒྲོག་མཐོང་ཞིང་གང་བླངས་པ་དེ་སྩོལ་ལོ། །རྡོ་རྗེ་ལྕགས་སྒྲོག་གི་ཆོ་ག་རྫོགས་སོ།། །།རྡོ་རྗེ་སེར་མོའི་ལས་རྣམས་ལགས་ཏེ། གདོན་བབས་པ་གཏོང་བར་བགྱི་ན། ཆབ་གྱིས་བགྱིའོ། །འདར་བར་བགྱི་ན། མཛུབ་མོ་ལ་ལན་བདུན་བཟླས་བརྗོད་བགྱིས་ཏེ་བསྟན་ན་འདར་རོ། །གདོན་རྣམ་པར་གཞོམ་ན། ཡིད་ཀྱིས་ལན་བདུན་བཟླས་བརྗོད་བགྱིའོ། །ཆབ་ཀྱིས་ནི། རེངས་པར་བགྱིད་དོ། །རིག་པས་བཅིངས་པ་ལས་དགྲོལ་ན|་རྡོ་རྗེ་སོར་མོའི་སྔགས་ལན་བདུན་བརྗོད་དེ། སོང་ཞིག་སོང་ཞིག་ཅེས་བརྗོད་ན། གྲོལ་བར་འགྱུར་རོ། །བཅིང་བ་དགྲོལ་ན། ལན་འབུམ་བཟླས་བརྗོད་བགྱིས་པས་གྲོལ་ལོ། །རྐང་རྡུལ་ལ་ལན་བརྒྱ་རྩ་བརྒྱད་བཟླས་བརྗོད་བགྱིས་པས་ཐིག་ལེ་བགྱིས་ན། གང་བསམ་པ་དེ་རྙེད་དོ། །མར་གྱི་ངོ་ཞག་བཅུ་བཞི་ནས་ཞག་གཅིག་སྨྱུང་བ་བགྱིས་ཏེ་ནྱ་གྲོ་དྷ་གཅིག་པུ་མཆིས་པར་མཆིས་ལ་མཆོད་པ་རྒྱ་ཆེར་བགྱིས་ཏེ་ནྱ་གྲོ་དྷའི་དྲུང་དུ་མཆིས་ལ་ཤླེ་ཤྨེ་ཏ་ཀའི་ལོ་མ་དག་གི་སྟེང་དུ་རྩཝ་དུར་བའི་ལོ་མ་བཞག་སྟེ་འབར་གྱི་བར་དུ་བཟླས་བརྗོད་བགྱིའོ། །འབར་ནས་མགོ་བོར་བཞག་ན། དེ་མེ་ཏོག་གི་ཕྲེང་བར་འགྱུར་རོ། །དེས་མགོ་ལ་བཅིངས་ན། དཔག་ཚད་སྟོང་དུ་གྱེན་དུ་འཕག་གོ་།ལོ་ཁྲི་ཉིས་སྟོང་ཐུབ་བོ། །ཟླ་བ་སྤྱང་ཀིས་ཟིན་པའི་ཚེ་ཞག་གཅིག་སྨྱུང་བ་བགྱིས་ལ་ལག་ན་རྡོ་རྗེའི་མདུན་དུ་རས་དཀར་པོ་བཞག་ལ་འབར་གྱི་བར་དུ་བཟླས་བརྗོད་བགྱིས་ན། བླངས་པ་ཙམ་གྱིས་གདུགས་ཤར་བ་ལྟ་བུའི་མདོག་ཅན་དུ་འགྱུར་ཞིང་ལོ་ཉིས་སྟོང་ཐུབ་པར་འགྱུར་རོ། །རྡོ་རྗེ་སེར་མོའི་ཆོ་ག་རྫོགས་སོ།། །།ཤུགས་ལྡན་མའི་ལས་རྣམས་ལགས་ཏེ། གདོན་ཚར་གཅད་ན། དུར་ཁྲོད་ཀྱི་སོལ་བས་གཟུགས་བྲིས་ལ། ལན་གསུམ་བཟླས་བརྗོད་བགྱིས་པའི་ལྕུག་མས་བཞུས་ན་གདོན་གྱིས་གཏང་ངོ་། །སྐྲ་ལས་བགྱིས་པའི་སྲད་བུ་གཏུན་ཤིང་གིས་བརྡུངས་ན། གདོན་དུ་ཞིང་གཏོང་ངོ་། །གཟེགས་མ་ལས་སྦྱིན་སྲེག་བགྱིས་ན། གདོན་གྱི་ཡན་ལག་འཚིག་པར་འགྱུར་རོ། །བ་ལང་གི་ལྕི་བ་ལས་གཟུགས་བགྱིས་ལ་ལན་བདུན་བཟླས་བརྗོད་བགྱིས་པའི་ཐུར་མས་མིག་ཕྱུང་ན། ཞར་བར་འགྱུར་རོ། །ལན་བདུན་བཟླས་བརྗོད་བགྱིས་པའི་གསེག་མས་ཤིང་ལྗོན་པ་ལ་བསྣུན་ན། འཕོ་བར་འགྱུར་རོ། །དབབ་ན། མེ་ཏོག་གིས་བགྱིའོ། །དགྲོལ་ན། ཡིད་ཀྱིས་སོ། །འདི་དག་ལ་སོགས་པ་ནི། དོན་གྱི་ལས་རྣམས་ལགས་སོ། །སྲུང་བ་ནི། ལན་ཉི་ཤུ་རྩ་གཅིག་བཟླས་བརྗོད་བགྱིས་པའི་ཐལ་བས་བགྱིའོ། །ཡུལ་གྲུ་སྲུང་བ་ནི། ལན་བདུན་བཟླས་བརྗོད་བགྱིས་པའི་ཆབ་ཀྱིས་བགྱིའོ། །བསྐྲད་པ་ནི|་ཡུངས་ཀར་གྱིས་བགྱིའོ། །ནང་པར་ལངས་ཏེ་ཤུགས་ལྡན་མའི་སྔགས་ལན་བརྒྱ་རྩ་བརྒྱད་བརྗོད་ན། ནད་ཐམས་ཅད་ལས་ཐར་པར་འགྱུར་རོ། །བུད་མེད་དབང་དུ་བགྱི་ན། མར་གྱི་ངོ་ཞག་བརྒྱད་ནས་བརྩམས་ཏེ་དགུང་བདུན་དུས་གསུམ་དུ་ལུང་ཐང་གི་ཤིང་གི་ཞུགས་བུས་ལ། ཏིལ་གྱི་སྲེག་བླུགས་ལན་ཉི་ཤུ་རྩ་གཅིག་སྦྱིན་སྲེག་བགྱིས་ན། དབང་དུ་འགྱུར་རོ། །རཱ་ཛྙཱ་ན་བ་མ་ཤི་ཀ་ཏུ་ཀ་མ་ཀྲྀཥྞ་སྲ་ཨ་བྷ་མི་མ་ཨ་ཧོ་ར་ཏྲོ་ཤི་ཏེ་ན་བཛྲ་པཱ་ཎི་ར་གྷུ་ཏ་ཏི་ལ་ཀ་ཤྭེ་རཀ་ནིཾ་པྲ་ཛྭ་ལྱ་རུ་དྷི་ར་ཨཀྟ་ནཾ་རི་ཛ་ཀ་ནཾ་ཨཥྚ་ས་ཧ་སྲཾ་ཛུ་ཧཱུ་ཡ་བ་ཤོ་བྷ་བ་ཏི། རྒྱ་མཚོར་འབབ་པའི་ཆུ་ངོགས་ག་ཉི་གའི་ས་བླངས་ལ་ཟ་མ་ཏོག་བགྱིས་ཏེ་ཟ་མ་ཏོག་དེར་ལིག་བུ་མིག་སྩལ་ལ་ཟ་མ་ཏོག་ཀྱང་མི་ཐོད་ཁ་སྦྱར་གྱི་ནང་དུ་སྩལ་ཏེ་མར་གྱི་ངོ་ཞག་བརྒྱད་ནས་དགུང་གསུམ་སྨྱུང་བ་བགྱིས་ཏེ་མཚན་གཅིག་མཆིས་པར་མཆིས་ལ་ལྷོ་ཕྱོགས་སུ་མཆིས་ཏེ་མི་ཐོད་ཐོགས་ལ་འབར་གྱི་བར་བཟླས་བརྗོད་བགྱིའོ། །འབར་ནས་བླངས་ཏེ་རིག་པ་མཆོག་གིས་སྲུང་བ་བགྱིས་ཏེ་ལིག་བུ་མིག་གཅིག་ལ་བཏགས་ཏེ་ལིག་བུ་མིག་དེའོ་མ་དང་ལྷན་ཅིག་འཚལ་ན། འཚལ་བ་ཙམ་གྱིས་སྐྲ་ལྕང་ལོ་འཁྱིལ་བར་འགྱུར། མདོག་ཨུཏྤ་ལའི་ཁ་དོག་ལྟ་བུར་འགྱུར། མཚོན་གང་དག་འཕངས་པ་དེ་དག་ཕྱེ་མར་ལྷགས་པར་འགྱུར། ལོ་དྲུག་ཁྲི་ཐུབ་པར་འགྱུར། དབང་ཕྱུག་ཆེན་པོའི་ཚོགས་རྣམས་གྲོགས་སུ་འགྱུར་རོ། །མར་གྱི་ངོ་ཞག་བཅུ་བཞི་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་བྱང་ཆུབ་ཀྱི་ཤིང་གི་ཞུགས་བུས་ལ་མེ་ཏོག་ཨུཏྤ་ལ་ཞོ་དང་། སྤྲང་རྩི་དང་། མར་ལ་སྨྱུགས་པ་བརྒྱ་སྟོང་སྦྱིན་སྲེག་བགྱིས་ན་ཡུལ་རྙེད་དོ། །འབྱུང་པོ་ཐམས་ཅད་དབང་དུ་བགྱི་བར་འཚལ་བས་མར་གྱི་ངོ་ཞག་གསུམ་དུ་སྨྱུང་བ་བགྱིས་ཏེ་དུར་ཁྲོད་དུ་མཆིས་ལ་པྲི་ཡང་ཀུའི་ཤིང་གི་ཞུགས་བུས་ཏེ་མར་ལ་ལན་བརྒྱ་རྩ་བརྒྱད་སྦྱིན་སྲེག་བགྱིས་ན། འབྱུང་པོ་ཐམས་ཅད་མཆི་བར་འགྱུར་ཏེ། དེ་དག་ལ་ཕྱག་བརྙན་གྱིས་ཤིག་ཅེས་བརྗོད་ན། གང་དང་གང་དུ་བསྐོས་པ་དེ་དག་ཐམས་ཅད་བགྱིད་དོ། །ཡར་གྱི་ངོ་ཚེས་ལྔ་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་ཨ་ཏི་མུཀྟ་ཀའི་མེ་ཏོག་སྟོང་རྩ་བརྒྱད་ཕུལ་ན། ལོངས་སྤྱོད་རྣམས་སྩོལ་ཏེ། ཤུགས་ལྡན་མའི་ཆོ་ག་རྫོགས་སོ། ། །།རྡོ་རྗེ་གདོང་གི་ལས་རྣམས་ལགས་ཏེ། ལན་བརྒྱ་རྩ་བརྒྱད་བཟླས་བརྗོད་བགྱིས་པའི་བུམ་པས་གདུགས་བདུན་ཁྲུས་བགྱིས་ན། སྡིག་པ་ཐམས་ཅད་ལས་གྲེལ་བར་འགྱུར་རོ། །བྱིས་པ་གང་དག་གདོན་གྱིས་ཟིན་པ་དེ་ཁྲུས་བགྱིས་ན། གཏོང་བར་འགྱུར་རོ། །གདོན་གྱིས་ཟིན་པ་རྣམས་ལ་ལན་ཉི་ཤུ་རྩ་གཅིག་བཟླས་བརྗོད་བགྱིས་པའི་བདུག་པས་བདུགས་ན། གཏོང་བར་འགྱུར་རོ། །གང་དག་ནམ་གྲུ་དང་། སྲུལ་པོ་དང་། གདོན་བརྙན་མས་ཟིན་པ་དེ་དག་ཚོན་སྣ་ལྔའི་སྐུད་པ་ལ་མདུད་པ་བདུན་བོར་ཏེ་ལག་པ་ལ་བཅིངས་ན། གཏོང་ངོ་། ། དུག་ལས་གསོན། ཡལ་གས་བགྱིའོ། །སྲིན་བུ་ཏི་ཀས་ཟིན་པ་དང་། ནད་ཙི་ལུ་ཏ་དང་། རྐང་ཤུ་བྱུང་བ་ལས་ལ་ལན་ཉི་ཤུ་རྩ་གཅིག་བཟླས་བརྗོད་བགྱིས་ཏེ་བསྐུས་ན། ལན་གསུམ་གྱི་ཐ་མ་ལ་སོས་པར་འགྱུར་རོ། །ཕྱག་རྒྱ་གཞིག་ན། ཆབ་ཀྱིས་བགྱིའོ། །དབྱིག་དུག་བསལ་བར་བགྱི་ན། ཆབ་ཀྱིས་རྐང་ལག་བཀྲུས་ལ་སྣོད་དུ་སྩལ་ཏེ། དེ་ནས་རྩཝ་ཀུ་ཤས་བྱབས་ན་འབྱང་བར་འགྱུར་རོ། །གདོན་སྤོ་ན། ལན་བདུན་བཟླས་བརྗོད་བགྱིས་པའི་ཐལ་བས་བགྱིའོ། །ནད་ཙི་ལུ་མ་མཆིས་པར་བགྱི་ན། མཚོན་རྣོན་པོས་ས་ཤུར་གྱིས་དྲས་ལ་ཡང་རྐེད་དུ་བཅད་ན་ཙི་ལུ་མ་མཆིས་པར་འགྱུར་རོ། །ནད་བྲི་ཧ་མ་མཆིས་པར་བགྱི་བ་ཡང་དེ་བཞིན་ནོ། །འཛེར་པ་མ་མཆིས་པར་བགྱི་ན། ས་ལ་ལན་བདུན་བཟླས་བརྗོད་བགྱིས་པས་བགྱིའོ། །མར་གྱི་ངོ་ཞག་བཅུ་བཞི་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་མཆོད་པ་ཅི་ནུས་སུ་བགྱིས་ལ་གི་ཝང་རས་དཀར་པོའི་སྟེང་དུ་བཞག་སྟེ་འབར་གྱི་བར་དུ་བཟླས་བརྗོད་བགྱིའོ། །འབར་ནས་བླང་བར་བགྱིས་ཏེ། བླངས་ནས་ཐིག་ལེ་བགྱིས་ན། མི་གདའ་བར་འགྱུར། འབྱུང་པོ་ཐམས་ཅད་ཀྱིས་མི་ཚུགས་པར་འགྱུར་རོ། །ཟླ་བ་གཅིག་སློང་མོ་བའི་ཟས་འཚལ་ཞིང་ཐ་མར་ཞག་ག་སུམ་སྨྱུང་བ་བགྱིས་ལ་མར་གྱི་ངོ་ཞག་བཅུ་བཞི་ལ་ལག་ན་རྡོ་རྗེའི་མདུན་དུ་མཆོད་པ་རྒྱ་ཆེར་བགྱིས་ཏེ་ཤུ་དག་ཆང་པར་བཅངས་ལ་སྦྲུལ་དུ་གྱུར་གྱི་བར་བཟླས་བརྗོད་བགྱི་ཞིང་། དེས་མི་འཇིགས་པར་བགྱིའོ། །སླར་ཡང་ཤུ་དག་ཏུ་གྱུར་གྱི་བར་དུ་བཟླས་བརྗོད་བགྱིའོ། །དེ་ནས་དེ་བཟའ་བར་བགྱི་སྟེ། འཚལ་བ་ཙམ་གྱིས་གདུགས་ཤར་བ་ལྟ་བུའི་མདོག་ཅན་དུ་འགྱུར་ཞིང་ལོ་ལྔ་སྟོང་ཐུབ་པར་འགྱུར་རོ། །མར་གྱི་ངོ་ཞག་བརྒྱད་ལ་ལྷ་ཆེན་པོ་གནས་སུ་མཆིས་ལ་ཉིན་ཞག་གཅིག་སྨྱུང་བ་བགྱིས་ལ། ལྷ་ཆེན་པོ་གཞོགས་གཡས་པར་ལིག་བུ་མིག་ཨ་ཤྭཏྠའི་ལོ་མའི་སྟེང་དུ་བཞག་སྟེ་དུ་བ་འཐུལ་གྱི་བར་དུ་བཟླས་བརྗོད་བགྱིའོ། །དེ་ནས་ལིག་བུ་མིག་བླངས་ཏེ་ལྷའི་སྐལ་བ་བཞག་ལ་མིག་ལ་བསྐུས་ན། མི་གདའ་བར་འགྱུར་རོ། །ལོ་བདུན་སྟོང་ཐུབ་པར་འགྱུར་རོ། །རྒའི་མེ་ཏོག་དུར་ཁྲོད་ཀྱི་མེས་བསྲེགས་ནས་མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ནས་ལྷ་ཆེན་པོའི་གནས་སུ་མཆིས་ལ་ཤིང་ཨ་ཤྭཏྠའི་ལོ་མའི་སྟེང་དུ་བཞག་སྟེ་ལན་བརྒྱ་སྟོང་བཟླས་བརྗོད་བགྱིས་ལ་ཐིག་ལེ་བགྱིས་ན། མི་གདའ་བར་འགྱུར་རོ། །ལོ་ལྔ་སྟོང་ཐུབ་པར་འགྱུར་རོ། །ཟླ་བ་གཅིག་སྐྱོ་འཚལ་ཞིང་མར་གྱི་ངོ་ཞག་བཅུ་བཞི་ལ་མིའི་རུས་པ་ཟླ་གམ་ལྟ་བུར་བགྱིས་ལ་དེ་ནས་རིག་སྔགས་འཆང་གི་རིང་བསྲེལ་དང་བཅས་པའི་མཆོད་རྟེན་གྱི་དྲུང་དུ་ལག་ན་རྡོ་རྗེའི་གཟུགས་དང་། དབང་ཕྱུག་ཆེན་པོའི་གཟུགས་བཞག་ལ་རིག་སྔགས་འཆང་གིས་བཅོམ་ལྡན་འདས་དང་། ལག་ན་རྡོ་རྗེ་དང་། དབང་ཕྱུག་ཆེན་པོ་ལ་ར་གྱ་ཆེར་མཆོད་དེ་རིག་སྔགས་འཆང་གིས་ཡར་གྱི་ངོའི་ཚེས་བརྒྱད་ནས་ཉིན་ཞག་གཅིག་སྨྱུང་བ་བགྱིས་ལ་ཟླ་གམ་བླངས་ཏེ་རས་དཀར་པོའི་སྟེང་དུ་བཞག་ལ་འབར་གྱི་པར་དུ་བཟླས་བརྗོད་བགྱིའོ། །འབར་ནས་བླངས་ཏེ་མགོ་བོར་བཞག་ན། ཅི་འདོད་པའི་གཟུགས་ཅན་དུ་འགྱུར་རོ། །ལག་ན་རྡོ་རྗེ་དང་། དབང་ཕྱུག་ཆེན་པོའི་གཟུགས་སུ་ཡང་བསྒྱུར། ཡིད་ཀྱིས་གང་བསམ་པ་དེ་ཐམས་ཅད་ཀྱང་འགྲུབ་བོ། །ལོ་སྟོང་ཐུབ་པར་འགྱུར་རོ། །འཆི་བའི་དུས་ཀྱང་འཚལ་ལོ། །ཟས་སུ་འོ་སྐྱོ་འཚལ་ཞིང་ལག་ན་རྡོ་རྗེའི་མདུན་དུ་ཤླེ་ཤྨེ་ཏ་ཀའི་ཤིང་གི་ཞུགས་བུས་ལ|་ཨ་པ་མརྒའི་ཡམ་སྲེག་ཤིང་འབུམ་སྦྱིན་སྲེག་བགྱིས་ན། རྒྱལ་པོ་ཉིད་འཐོབ་བོ། །རྡོ་རྗེ་གདོང་གི་ཆོ་ག་རྫོགས་སོ།། །།རྡོ་རྗེ་ལྟེ་བའི་ལས་རྣམས་ལགས་ཏེ། རི་མོ་མཁན་གསོ་སྦྱོང་བཟུང་བས་མ་གོད་པའི་རས་ལ་སྤྱིན་དང་མ་འདྲེས་པའི་ཚོན་གྱིས་འཕགས་པ་ལག་ན་རྡོ་རྗེའི་མདོག་སྔོ་བསངས། རྒྱན་ཐམས་ཅད་ཀྱིས་བརྒྱན་པ། དར་རམ་རས་ཀྱི་ཤམ་ཐབས་ཅན་བྲི་བར་བྱའོ། །དེའི་གཡས་རོལ་ཏུ་རྡོ་རྗེའི་ལྟེ་བ་གསེར་གྱི་མདོག་ལྟ་བུ་བྲི་བར་བགྱིས་ཏེ། དེ་ཡང་རྒྱན་ཐམས་ཅད་ཀྱིས་བརྒྱན་པར་བགྱིའོ། །དེ་ནས་རིག་སྔགས་འཆང་ཟས་སུ་འོ་སྐྱོ་འཚལ་བར་བགྱིའོ|་|མར་གྱི་ངོ་ཞག་བཅུ་བཞི་ནས་ཞག་གསུམ་སྨྱུང་བ་བགྱིས་ཏེ་ཅི་ནུས་ཀྱིས་མཆོད་པ་བགྱིས་ལ་ཙནྡན་དམར་པོ་མཐོ་གང་ལ་རྡོ་རྗེ་བགྱིས་ཏེ། རྡོ་རྗེའི་རྐེད་པར་ལྡོང་རོས་བཞག་ལ་བྱང་ཆུབ་ཀྱི་ཤིང་གི་ལོ་མས་གཡོགས་ཏེ་དངོས་གྲུབ་རྣམ་གསུམ་བྱུང་གི་བར་དུ་བཟླས་བརྗོད་བགྱིའོ། །འབར་བར་གྱུར་ན། བསྐལ་པར་གནས་ཤིང་རིག་སྔགས་འཆང་ཐམས་ཅད་ཀྱིས་མི་ཚུགས་པར་འགྱུར་རོ། །དཔག་ཚད་སྟོང་གྱེན་དུ་འཕགས་ཤིང་དེའི་མོད་ལ་སླར་མཆིའོ། །གང་གི་ཚེ་འགུམ་པ་དེའི་ལག་ན་རྡོ་རྗེའི་རིགས་སུ་སྐྱེའོ། །ཅི་སྟེ་དུ་བ་འཐུལ་ན་ས་བླངས་ཏེ་ཐིག་ལེ་བགྱིས་ན། མི་གདའ་བར་འགྱུར། ལོ་བཅུ་དྲུག་ལོན་པ་ལྟ་བུའི་ལུས་སུ་འགྱུར། ལོ་བདུན་སྟོང་ཐུབ་པར་འགྱུར་རོ། །བྲོ་བར་གྱུར་ནས་བླངས་ལ་ཐིག་ལེར་བགྱིས་ན། གང་མཐོང་བ་དེ་དབང་དུ་འགྱུར་ཏེ། དུད་འགྲོའི། སྐྱེ་གནས་སུ་གཏོགས་པ་ཡང་དབང་དུ་འགྱུར་རོ། །ཟླ་བ་གཅིག་ཟས་སུ་ཆུ་གྲོག་འཚལ་ཞིང་མར་གྱི་ངོ་ཞག་བརྒྱད་ནས་ཞག་གསུམ་སྨྱུང་བ་བགྱིས་ཏེ་བ་ལང་གི་ལྷས་སམ། ཀུན་དགའི་ར་བའམ། ཡང་ན་གནས་གཙང་མར་མཆོད་པ་རྒྱ་ཆེར་བགྱིས་ལ། ལྡོང་རོས་ཏིལ་གྱི་ལོ་མ་བདུན་གྱི་སྟེང་དུ་བཞག་སྟེ་གདོལ་པའི་བུ་མོའི་མོ་མཚན་ནམ། འཇི་བ་ལས་བགྱིས་པའི་མོ་མཚན་གྱི་སྟེང་དུ་གཞག་པར་བགྱི་ཞིང་། གདོལ་པའི་བུ་མོ་རལ་གྲི་ཐོགས་པ་བཞི་ཕྱོགས་བཞིར་བཞག་པར་བགྱིས་ལ|་དེ་ནས་རིག་སྔགས་འཆང་གི་དངོས་གྲུབ་རྣམ་པ་གསུམ་བྱུང་གི་བར་དུ་བཟླས་བརྗོད་བགྱིའོ། །འབར་བར་གྱུར་ན། གདུགས་ཤར་བ་འདྲ་བའི་མདོག་ཏུ་འགྱུར། སྐྲ་ལྕང་ལོ་འཁྱིལ་བར་འགྱུར་རོ|་|ལོ་བཅུ་དྲུག་ལོན་པ་ལྟ་བུར་འགྱུར། འོག་ཏུ་དཔག་ཚད་སྟོང་དུ་མཆི་བར་འགྱུར། སྟེང་དུ་ཡང་དེ་བཞིན་མཆི་བར་འགྱུར། དཔག་ཚད་སྟོང་ཚུན་ཆད་ཀྱིས་ཐོས་ཤིང་མཐོང་བར་འགྱུར། ལོ་ཁྲི་ཉིས་སྟོང་འཚོ་བར་འགྱུར། ནམ་མཁའ་ལ་རླུང་གི་ཤུགས་ངང་མཚུངས་པར་འགྱུར། གྲུབ་པ་ཐམས་ཅད་ཀྱང་འདིས་དབང་དུ་འགྱུར། ཚེས་གྲངས་དང་སྐར་མ་འདམ་མི་འཚལ། སྨྱུང་བ་བགྱི་མ་ཨི་འཚལ་ཏེ་བུད་མེད་གྱི་རོ་བླངས་ལ་ལིག་བུ་མིག་དེའི་མོ་མཚན་གྱི་སྟེང་དུ་བཞག་སྟེ་མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ལ་ལག་ན་རྡོ་རྗེའི་མདུན་དུ་མཆོད་ལ་བགྱིས་ཏེ་ལན་བརྒྱ་སྟོང་བཟླས་བརྗོད་བགྱིས་ལ། ལིག་བུ་མིག་དེ་བླངས་ཏེ་མིག་ལ་བསྐུས་ན། མི་གདའ་བར་འགྱུར། ལོ་བདུན་སྟོང་ཐུབ་པར་འགྱུར་རོ། །མར་གྱི་ངོ་ཞག་བརྒྱད་ལ་ཟ་ཧག་གཅིག་སྨྱུང་བ་བགྱིས་ཏེ་གདོལ་བའི་ཁྱིམ་ནས་ཞུགས་བླངས་ལ་སེང་ལྡེང་གི་ཤིང་གི་ཞུགས་བུས་ཏེ་དུག་དང་ཁྲག་དང་བསྲེས་པའི་ཡུངས་ཀར་གྱིས་ལན་བརྒྱད་སྟོང་སྦྱིན་སྲེག་བགྱིས་ན། གང་གི་མིང་ནས་སྨོས་ཏེ་སྦྱིན་སྲེག་བགྱིས་པ་དེ་དབང་དུ་འགྱུར་རོ། །མར་གྱི་ངོ་ཞག་བཅུ་གཉིས་ལ་མི་རུས་ཀྱི་ཐུར་མས་བླངས་ཏེ་ལན་བརྒྱ་སྟོང་བཟླས་བརྗོད་བགྱིས་ལ་དགྲའི་ཁྱིམ་སྒོར་བཙུགས་ན། དགུང་གསུམ་གྱིས་འབྲོས་པར་འགྱུར་རོ། །རྡོ་རྗེ་ལྟེ་བའི་ཆོ་ག་རྫོགས་སོ།། །།མེ་ཁ་ལའི་ལས་རྣམས་ལགས་ཏེ། སྲུང་བ་བགྱི་ན། ལན་བདུན་བཟླས་བརྗོད་བགྱིས་པའི་སྲད་བུས་ལག་པ་ལ་བཅིང་བར་བགྱིའོ། །ཡུལ་གྲུ་སྲུང་ན། ལན་ཉི་ཤུ་རྩ་གཅིག་བཟླས་བརྗོད་བགྱིས་པའི་ཆབ་ཀྱིས་བགྱིའོ། །དབབ་ན། བྱེའུ་རུག་པའི་ལོ་མའམ་རྨ་བྱའི་མདོངས་ཀྱིས་བགྱིའོ། །གདོན་ལ་གནོད་པ་བགྱིད་ན། ཆབ་ཀྱིས་བགྱིའོ། །ཁྱིམ་མམ། ལྷ་ཁང་ངམ། ཀུན་དགའི་ར་བར་མཆིས་ལ་གང་དུ་བཟླས་བརྗོད་བགྱིས་པ་དེ་ནས་འབྱུང་པོ་གདོན་ཐམས་ཅད་འབྲོས་པར་འགྱུར་རོ། །གདོན་ཚར་བཅད་ན། ཁྲག་གིས་གཟུགས་བྲིས་ལ་རྐང་པས་མནན་ཏེ་ལན་བརྒྱ་རྩ་བརྒྱད་བཟླས་བརྗོད་བགྱིས་ན་གདོན་གྱི་རིགས་ཕུང་བར་འགྱུར་རོ། །རིག་པ་སྒྲུབ་ན། ཐོག་མ་ཉིད་ལས་འདི་བགྱིས་ཏེ་ལག་ན་རྡོ་རྗེའི་མདུན་དུ་ཤླེ་ཤྨེ་ཏ་ཀའི་ཤིང་གིས་ཞུགས་བུས་ལ་ཀུ་ར་བའི་མེ་ཏོག་བརྒྱ་སྟོང་སྦྱིན་སྲེག་བགྱིས་ན་ལྷ་དེས་རིག་པའི་ལྷ་བཟུང་ནས་ཁྲིད་དེ་མཆིའོ། །ཁྲིད་དེ་མཆིས་ནས་མྱུར་དུ་དངོས་གྲུབ་ཏུ་འགྱུར་རོ། །ཅི་སྟེ་ལོག་འདྲེན་རྣམས་ཀྱི་རིགས་སྒྲུབ་པར་འཚལ་ན་།ལོག་འདྲེན་རྣམས་ཀྱི་ལོག་འདྲེན་གྱི་རིགས་ནི། བཞི་མཆིས་ཏེ། སོ་གཅིག་པའི་རིགས་དང་། ཀམ་པོ་ཛའི་རིགས་དང་། རྣམ་པར་འཇོམས་པའི་རིགས་དང་། ཕུང་བྱེད་ཀྱི་རིགས་སོ། །སེ་གཅིག་པའི་རིགས་ལ་གཙུག་ཕུད་འཕྱང་ལ་སོགས་པ་ལོག་འདྲེན་བརྒྱད་ཁྲི་མཆིས་ཏེ་དེ་དག་ནི། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་བགེགས་བགྱིད་དོ། །ཀམ་པོ་ཛའི་རིགས་ལ་ནི། དབང་ཕྱུག་ཆེན་པོའི་གཡོག་འཁོར་བ་ལང་རྣ་བ་ལ་སོགས་པ་བགེགས་དྲུག་ཁྲི་མཆིས་ཏེ། དབང་ཕྱུག་ཆེན་པོའི་ཆོ་ག་རྒྱས་པ་ལ་བགེགས་བགྱིད་ཅིང་རིག་པ་ཡང་འཇོམས་པར་བགྱིད་དོ། །རྣམ་པར་འཇོམས་པའི་རིགས་ལ་ནི། འཇིག་རྟེན་སྐྱོང་བའི་གཡོག་འཁོར་མྱ་ངན་མེད་ལ་སོགས་པ་ལོག་འདྲེན་དྲུག་ཁྲི་མཆིས་ཏེ། དེ་དག་ཀྱང་དབང་ཕྱུག་ཆེན་པོ་དང་། ཕུར་བུ་གསུམ་པའི་ཆོ་ག་རྒྱས་པ་ལ་བགེགས་བགྱིད་དོ། །ཕུང་བྱེད་ཀྱི་རིགས་ལ་ནི། ལག་ན་རྡོ་རྗེའི་གཡོག་འཁོར་མུརྡ་ཏ་ཀ་ལ་སོགས་པའི་ལོག་འདྲེན་བྱེ་བ་ཕྲག་འབུམ་མཆིས་ཏེ|་དེ་དག་ནི། རིག་པའི་ཆོ་ག་རྒྱས་པ་ཐམས་ཅད་ལ་བགེགས་བགྱིད་ཅིང་། རིག་པ་ཡང་འཇོམས་པར་བགྱིད་དོ། །འདི་ནི། ལོག་འདྲེན་དེ་དག་གི་སྒྲུབ་པ་ལགས་ཏེ། སོ་གཅིག་པའི་རིགས་ཀྱི་སྒྲུབ་བ་ནི། མར་གྱི་ངོ་ཞག་བཅུ་བཞི་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་དུར་ཁྲོད་ཀྱི་ཤིང་གིས་ཞུགས་བུས་ལ་བ་ལང་གི་མཁྲིས་པས་སྦགས་པའི་ཡུངས་ཀར་ལ་ལན་བརྒྱ་སྟོང་སྦྱིན་སྲེག་བགྱིས་ན། ཀྱི་ཧུད་ཀྱི་ཧུད་ཅེས་མཆི་བའི་སྒྲ་གྲག་ཅིང་གྲུབ་པར་འགྱུར་ཏེ། གྲུབ་ནས་ཀྱང་སྒྲུབ་པ་ལ་བགེགས་མི་བགྱིད་དེ། བདེ་བར་སྒྲུབ་ཏུ་མཆིས་སོ། །ཀམ་པོ་ཛའི་རིགས་ཀྱི་སྒྲུབ་བ་ནི། མར་གྱི་ངོ་ཞག་ལྔ་ལ་ཉིན་ཞག་གཅིག་སྨྱུང་བ་བགྱིས་ཏེ་ལ་གན་རྡོ་རྗེ་དང་། དབང་ཕྱུག་ཆེན་པོ་ལ་མཆོད་པ་བགྱིས་ནས་ལག་ན་རྡོ་རྗེའི་མདུན་དུ་ཨརྒའི་ཤིང་གིས་ཞུགས་བུས་ལ་མོན་སྲན་གྲེའུ་དང་མར་བསྲེས་པ་ལ་ལན་བརྒྱ་སྟོང་སྦྱིན་སྲེག་བགྱིས་ན། ལག་ན་རྡོ་རྗེའི་གཟུགས་འགུལ་ཏེ། དེ་ནས་འགྲུབ་པར་འགྱུར་རོ། །གྲུབ་ནས་ཀྱང་དབང་ཕྱུག་ཆེན་པོའི་ཆོ་ག་རྒྱས་པར་བཀླགས་པ་ཙམ་གྱིས་རིག་པ་ཐམས་ཅད་འགྲུབ་བོ། །རྣམ་པར་འཇོམས་པའི་རིགས་ཀྱི་སྒྲུབ་པ་ནི། མར་གྱི་ངོ་ཞག་བཅུ་བཞི་ལ་ཉིན་ཞག་གཅིག་སྨྱུང་བ་བགྱིས་ཏེ་མཚན་གཅིག་མཆིས་པར་མཆིས་ལ་མཆོད་པ་རྒྱ་ཆེན་པོ་བགྱིས་ལ་ལོག་འདྲེན་རྣམས་ལ་ཡང་གཏོར་མ་བགྱིའོ། །དེའི་མདུན་དུ་བེ་ཀངྐ་ཏའི་ཞུགས་བུས་ལ་ཁྲག་དང་བསྲེས་པའི་ཡུངས་ཀར་གྱིས་ལན་བརྒྱ་སྟོང་སྦྱིན་སྲེག་བགྱིས་ན། དེའི་འོག་ཏུ་གྲིབ་མ་གདའ་ཞིང་འགྲུབ་པར་འགྱུར་རོ། །རྣམ་པར་འཇོམས་པའི་རིགས་གྲུབ་ན། ལོག་འདྲེན་རྣམས་དབང་དུ་འགྱུར་རོ། །གང་དང་གང་དུ་དགོས་པ་དེ་ཐམས་ཅད་བགྱིད་དོ། །ཕུང་བྱེད་ཀྱི་རིགས་ཀྱི་སྒྲུབ་པ་ཨ་ནི|་ཟླ་བ་ཕྱེད་ཟས་སུ་འོ་སྐྱོ་འཚལ་ཞིང་མར་གྱི་ངོ་ཞག་བཅུ་བཞི་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་མཆོད་བ་རྒྱ་ཆེར་བགྱིས་ལ་ཞུགས་མར་གཉིས་བུས་ཏེ། གཅིག་ནི། ལག་ན་རྡོ་རྗེ་ལ་དབུལ་ལོ། །གཅིག་ནི། མུརྡ་ཏ་ཀ་ལ་དབུལ་ལོ། །དེ་ནས་རིག་སྔགས་འཆང་གིས་སྲུང་བ་བགྱིས་ལ་ལག་ན་རྡོ་རྗེའི་མདུན་དུ་སེང་ལྡེང་གི་ཤིང་གིས་ཞུགས་བུས་ཏེ་ན་ལེ་ཤམ་དཀར་པོ་དག་གི་ཁྲག་བསྲེས་པས་ལན་བརྒྱ་སྟོང་སྦྱིན་སྲེག་བགྱིས་ན། ལག་ན་རྡོ་རྗེའི་རྐང་པ་གཡས་པའི་མཐེ་བོང་ལས་འོད་ཟ་འབྱུང་སྟེ། དེ་ནས་འགྲུབ་པར་འགྱུར་རོ། །ཕུང་བྱེད་ཀྱི་རིགས་སྒྲུབ་ན། རིག་པའི་ཆོ་ག་ཐམས་ཅད་བདེ་བར་སྒྲུབ་ཏུ་མཆིས་ཏེ། བགེགས་མ་མཆིས་པའོ། །ལོག་འདྲེན་དེ་དག་ཀྱང་ཕྱག་བརྙན་དུ་འགྱུར་རོ། །ལོག་འདྲེན་རྣམས་ཀྱང་རིག་སྔགས་འཆང་ལ་གསང་སྔགས་སྩོལ་ཏེ། དེས་ལོ་སྟོང་ཐུབ་པར་འགྱུར་རོ། །ཟས་སུ་འོ་ཐུག་འཚལ་ཞིང་ལག་ན་རྡོ་རྗེའི་མདུན་དུ་ལན་འབུམ་བཟླས་བརྗོད་བགྱིས་ན། མེ་ཁ་ལ་འགྲུབ་པར་འགྱུར་ཏེ། གདུགས་གཅིག་བཞིན་ཀཪྵ་པ་ཎ་བརྒྱ་སྟོང་སྩོལ་ཏོ། །རྟག་ཏུ་བཟླས་བརྗོད་བགྱིས་ན། དགྲ་ལས་རྒྱལ་ལོ|་|མར་གྱི་ངོ་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་པདྨ་བརྒྱ་སྟོང་ཕུལ་ན། རིག་པའི་རྒྱལ་པོ་དམ་པ་སྩོལ་བར་འགྱུར་རོ། །མེ་ཁ་ལའི་ཆོ་ག་རྫོགས་སོ།། །། གདོན་དཀར་མོའི་ལས་རྣམས་ལགས་ཏེ། རི་མོ་མཁན་གསོ་སྦྱོང་བཟུང་བས་མ་གོད་པའི་རས་ལ་སྦྱིན་དང་མ་འདྲེས་པའི་ཚོན་གྱིས་ལག་ན་རྡོ་རྗེ་མདོག་སྔོ་བསངས། རྒྱན་ཐམས་ཅད་ཀྱིས་བརྒྱན་པ། ཕོ་ཉ་མོ་བཅུ་གཉིས་ཀྱིས་བསྐོར་བ་བྲི་བར་བགྱི་སྟེ། ཁ་དོག་ཇི་ལྟ་བ་བཞིན་དུ་བྲི་བར་བགྱིའོ། །ཕོ་ཉ་མོ་ཐམས་ཅད་ཀྱང་རྒྱན་ཐམས་ཅད་ཀྱིས་བརྒྱན་པ་བྲི་བར་བགྱིའོ། །ཐ་མར་རིའི་རྩེ་མོ་རྣམས་བྲི་བར་བགྱིའོ། །དེ་ནས་རིག་སྔགས་འཆང་གིས་ཡར་གྱི་ངོ་ཚེས་གཅིག་ནས་བརྩམས་ཏེ་ཟས་སུ་ཆུ་སྒྲོག་འཆལ་ཞིང་མར་གྱི་ངོ་ཞག་བརྒྱད་ལ་ཐུག་གི་བར་དུ་བཟླས་བརྗོད་བགྱིའོ། །མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེ་ལ་མཆོད་པ་རྒྱ་ཆར་བགྱིས་ལ་འབྱུང་བོའི་གཏོར་མ་ཡང་བཟང་དུ་བགྱིའོ། །དེའི་འོག་ཏུ་རིག་སྔགས་འཆང་གིས་རི་མོའི་གཟུགས་ཀྱི་མདུན་དུ་བྱང་ཆུབ་ཀྱི་ཤིང་གིས་ཞུགས་བུས་ལ་པདྨ་ཞོ་དང་སྦྲང་རྩི་དང་མར་ལ་སྨྱུགས་པ་བརྒྱ་སྟོང་སྦྱིན་སྲེག་བགྱིའོ། །དེ་ནས་ཅ་ཙོའི་སྒྲ་ཆེན་པོ་གྲག་པར་འགྱུར་ཏེ། དེ་ལ་མི་འཇིགས་པར་བགྱིའོ། །དེ་ནས་གདོང་དཀར་མོ་གཟུགས་མི་སྡུག་པར་བསྒྱུར་ནས་མཆི་སྟེ། དེ་ལ་ཡང་མ་འཇིགས་པར་བགྱིའོ། །རྡོ་རྗེ་བཞད་མའི་བཟླས་བརྗོད་བགྱིས་ལ་དེ་ལ་འདི་སྐད་ཅེས་ལག་ན་རྡོ་རྗེའི་གནང་ཆེན་མ་བཅོམ་ལྡན་འདས་མ་ཁྱོད་ལེགས་པར་བྱོན་ཏམ་ཞེས་བརྗོད་པར་བགྱིའོ། །དེ་དེ་སྐད་ཐོས་ནས་དགའ་བར་འགྱུར་ཏེ། དེས་འདི་སྐད་དུ་ཆི་བྱ་བ་ཞེས་བརྗོད་པ་དང་། བཅོམ་ལྡན་འདས་མ་ལོ་ལྔ་སྟོང་ཐུབ་པར་འཚལ་ལོ་ཞེས་བརྗོད་པར་བགྱི་སྟེ། དེ་བཞིན་དུ་གྱུར་ཅིག་ཅེས་བརྗོད་ནས་དགའ་བའི་ཡིད་ཀྱིས་རལ་གྲི་སྩོལ་ཏེ། དེ་ནས་མི་གདའ་བར་འགྱུར་རོ། །རལ་གྲི་དེ་བླངས་ནས་སྐྲ་ལྕང་ལོར་འཁྱིལ་བར་འགྱུར། གདུགས་ཤར་བ་ལྟ་བུའི་མདོག་ཅན་དུ་འགྱུར། རིག་སྔགས་འཆང་ཐམས་ཅད་ཀྱི་སྙིང་དུ་སྡུག་པར་འགྱུར་རོ། །མ་བསྒྲུབས་པར་ལས་རྣམས་འགྲུབ་པར་འགྱུར་རོ། །དབབ་པར་བགྱི་ན། གདོན་གྱིས་ཟིན་པའི་རྐང་པ་ལ་རྐང་པས་མནན་ཏེ་དབབ་པར་བགྱིའོ། །འབྱུང་པོ་དང་། ཤ་ཟ་རྣམས་དབབ་ན། ལན་བདུན་བཟླས་བརྗོད་བགྱིས་པའི་ཡུངས་ཀར་གྱིས་བགྱིའོ། །དུག་ལས་གསོ་ན། ཡལ་གས་བགྱིའོ། །གདོན་བཟའ་བར་བགྱི་ན། ལན་གསུམ་བཟླས་བརྗོད་བགྱིས་པའི་མེ་ཏོག་དམར་པོས་བགྱིའོ་གདོན་འཁུངས་པར་བགྱི་ན། ཡིད་ཀྱིས་བཟླས་བརྗོད་བགྱིས་པས་བགྱིའོ། །དབྱེ་བར་བགྱི་ན། མར་གྱི་ངོ་ཞག་བརྒྱད་ནས་བརྩམས་ཏེ་ལག་ན་རྡོ་རྗེའི་མདུན་དུ་གདུགས་བདུན་དུས་གསུམ་དུ་བ་རུ་རའི་ཤིང་གིས་ཞུགས་བུས་ལ། སྦྲུལ་ཁོག་པ་བརྗེས་པའི་སྲེག་བླུགས་གསུམ་སྦྱིན་སྲེག་བགྱིའོ། །ལོང་བར་བགྱི་ན། དབང་ཕྱུག་ཆེན་པོའི་གནས་སུ་མཆིས་ལ་ནེའུ་ལེའུ་ལྕེས་ལན་བརྒྱད་བརྒྱ་སྦྱིན་སྲེག་བགྱི་ཞིང་མིང་ནས་ཕྱུང་ན། ལོང་བར་འགྱུར་རོ། །ལག་ན་རྡོ་རྗེའི་མདུན་དུ་ཤུ་དག་བརྒྱད་བརྒྱ་སྦྱིན་སྲེག་བགྱིས་ན། སྔ་མཁོ་བཞིན་དུ་འགྱུར་རོ། གདོང་དཀར་མོའི་ཆོ་ག་རྫོགས་སོ།། །།རྡོ་རྗེ་སེར་མོའི་ལས་རྣམས་ལགས་ཏེ། ཡར་གྱི་ངོ་ཚེས་བརྒྱད་ནས་བརྩམས་ཏེ་དུར་ཁྲོད་དུ་ཟླ་བ་དྲུག་བཟླས་བརྗོད་བགྱིས་ན། རྒྱལ་པོ་ཉིད་སྩོལ་ཏོ། །ཟླ་བ་གསུམ་བཟླས་བརྗོད་བགྱིས་ན། ཉི་ཚེ་བའི་ལོངས་སྤྱོད་རྣམས་སྩོལ་ཏོ། །ཟླ་བ་གཅིག་བཟླས་བརྗོད་བགྱིས་ན། དི་ན་ར་ཁྲི་ཉིས་སྟོང་སྩོལ་ཏོ། །ཟས་སུ་ནི། སློང་མོའི་ཟས་རྣམས་བཟའ་བར་བགྱིའོ། །དགྲ་བསྐྲད་པར་འཚལ་ན། བྱ་ནག་བཀྲའི་འདབ་མ་བླངས་ཏེ་ལག་ན་རྡོ་རྗེའི་མདུན་དུ་ལན་བརྒྱ་སྟོང་བཟླས་བརྗོད་བགྱིས་ལ་དགྲའི་ཁྱིམ་དུ་བཞག་ན་དགྲ་འཕྲལ་དུ་འབྲོས་སོ། །གཞན་ནད་ཀྱིས་འདེབས་པར་འཚལ་ན། མར་གྱི་ངོ་ཞག་བརྒྱད་ལ་ལག་ན་རྡོ་རྗེའི་མདུན་དུ་ཤིང་བཛྲའི་རྩ་བས་རྡོ་རྗེ་ལ་བདུག་པར་བགྱི་ཞིང་། རིག་པ་ཡང་ལན་བརྒྱ་སྟོང་བཟླས་བརྗོད་བགྱིས་ན། གང་ཡིད་ལ་བསམ་པ་དེ་ནད་ཀྱིས་ཐེབས་པར་འགྱུར་རོ།། ལག་ན་རྡོ་རྗེའི་མདུན་དུ་ལྕེ་པོག་གིས་བདུག་ཅིང་རིག་པ་ཡང་ལན་བརྒྱད་སྟོང་བཟླས་བརྗོད་བགྱིས་ན། གསོས་པ་བགྱིས་པར་འགྱུར་རོ། །འབྱུང་པོ་དང་ཤ་ཟ་རྣམས་རེངས་པར་བགྱི་ན། ཡིད་ཀྱིས་བགྱིའོ། །དབབ་པའི་མེ་ལོང་གིས་བགྱིས་ཏེ། མེའི་སྦྱིན་སྲེག་བགྱིས་པའི་ཐལ་བས་དག་པར་ཕྱིས་ལ་ཁྱེའུ་དག་ལ་བསྟན་ན། བདེན་པ་བརྗོད་དོ། །གདོན་བསྐྲད་ན། ཡུངས་ཀར་གཏུན་དུ་བརྡུངས་ན་དུ་ཞིང་གཏོང་བར་འགྱུར་རོ། །དུར་ཁྲོད་ཀྱི་སོལ་པས་ས་ལ་གཟུགས་བྲིས་ལ་དེའི་ལག་པའམ་མགུལ་བར་ལག་ན་རྡོ་རྗེ་བྲིས་ཏེ་མནན་ན་གཏོང་བར་འགྱུར་རོ། །མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བྱས་ཏེ་ལག་ན་རྡོ་རྗེའི་མདུན་དུ་ཡུངས་ཀར་ཟ་མ་ཏོག་ཏུ་སྩལ་ལ་བཟླས་བརྗོད་བགྱིས་ན། དེས་རེག་པ་ཙམ་གྱིས་གདོན་དུ་ཞིང་གཏོང་བར་འགྱུར་རོ། །དགྲ་བསད་པར་འཚལ་ན། དུར་ཁྲོད་ཀྱི་སོལ་བ་བླངས་ལ་གཟུགས་བྲིས་ཏེ་སྙིང་གར་མནན་ལ་བཟླས་བརྗོད་བགྱིས་ན་འཕྲལ་དུ་དགྲ་མ་ལགས་པར་འགྱུར་རོ། །ཚེས་གྲངས་དང་སྐར་མ་གདམ་མི་འཚལ། སྨྱུང་བ་བགྱི་མི་འཚལ་ཏེ། དགྲ་སྐམ་པར་བགྱི་ན། མར་གྱི་ངོ་ཞག་བརྒྱད་ལ་ཨ་ཤིང་མ་ད་ན་ལས་གཟུགས་བགྱིས་ལ་སེང་ལྡེང་གི་ཕུར་བུ་སྙིང་གར་བཙུགས་ཏེ་རིག་པ་གང་ལན་བརྒྱ་སྟོང་བཟླས་བརྗོད་བགྱིས་ན་ནད་དྲག་པོས་འདེབས་ཤིང་སྐམ་པར་ཡང་འགྱུར་རོ། །ཕྱུང་ན་སོས་པར་ཡང་འགྱུར་རོ། །རྡོ་རྗེ་སེར་མོའི་ཆོ་ག་རྫོགས་སོ།། །།ནག་སེར་གྱི་ལས་རྣམས་ལགས་ཏེ། ཡུལ་གྲུ་སྲུང་ན། ཆབ་ཀྱིས་བགྱིའོ།། མཚམས་བཅད་ན། ལན་ཉི་ཤུ་རྩ་གཅིག་བཟླས་བརྗོད་བགྱིས་པའི་ཕུར་བུས་བགྱིའོ། །སྨན་སྲུང་ན། ཡིད་ཀྱིས་བགྱིའོ། །རྐང་གཉིས་པ་དང་། རྐང་བཞི་པ་རྣམས་དགར་ན་ཐལ་མོས་བརྡབས་པས་བགྱིའོ། །རིག་སྔགས་བཅད་ན། མཚོན་རྣོན་པོས་ས་ལ་ཤུབ་རེར་དྲས་ན་རིག་སྔགས་བཅད་པར་འགྱུར་རོ། །གདོན་དབབ་ན། ཡིད་ཀྱིས་བགྱིའོ། །གདོན་སྤོ་ན། ལན་བདུན་བཟླས་བརྗོད་བགྱིས་པའི་མེ་ཏོག་གིས་བགྱིའོ། །ཡར་གྱི་ངོ་ཚེས་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་རྒྱ་མཚོར་འབབ་པའི་ཆུ་ཀླུང་དུ་ཞུགས་ལ་རིག་པ་ལན་བརྒྱ་སྟོང་བཟས་བརྗོད་བགྱིས་ན། འགྲུབ་པར་འགྱུར་རོ། །གྲུབ་ནས་ལས་སུ་གྱུར་ཏེ་གླང་པོ་ཆེ་རེངས་པར་བགྱི་བ་དང་། རྟ་རེངས་པར་བགྱི་ཕ་དང་། ཕ་རོལ་གྱི་དམག་ཚོགས་རེངས་པར་བགྱི་བ་དང་། གང་ཡིད་ལ་བསམ་པ་དེ་དག་ཐམས་ཅད་རེངས་པར་བགྱིད་དོ། །མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་ནག་མོའི་མདུན་དུ་ཨརྒའི་ཤིན་གིས་ཞུགས་བུས་ལ་འབྲས་སཱ་ལུ་མར་དང་བསྲེས་པས་ལན་བརྒྱ་སྟོང་སྦྱིན་སྲེག་བགྱིས་ན། ནག་མོ་མཆིས་པར་འགྱུར་ཏེ། དེ་ལ་ཕོ་ཉ་མོའི་གསང་སྔགས་ཀྱིས་མཆོད་ཡོན་ཕུལ་ན། དེ་ཁྱོད་ཉིད་ལ་དམ་པ་གང་སྦྱིན་པར་བྱ་ཞེས་སྨྲ་བར་འགྱུར་རོ། །དེ་ལ་འདི་སྐད་དུ་སའི་བདག་པོར་གྱུར་པ་སྩོལ་ཅིག་ཅེས་བརྗོད་པར་བགྱིའོ། །དེས་འདི་སྐད་དུ་ཡུལ་གཅིག་གི་རྒྱལ་པོར་གྱུར་ཅིག་ཅེས་བརྗོད་ན། དེ་བཞིན་དུ་གྱུར་ཅིག་ཅེས་བརྗོད་པར་བགྱི་སྟེ། སླར་གཏང་བའི་གསང་སྔགས་ཀྱིས་ཀྱང་སླར་གཏང་ཞིང་། མེ་ཏོག་དཀར་པོས་ཀྱང་སླར་བཏང་ན། དེ་ནས་མི་གདའ་བར་འགྱུར་རོ། །ལུང་ཐང་གི་ཤིང་དྲུང་ན་གཏུམ་མོ་ཁ་ཤར་ཕྱོགས་སུ་བསྟན་པ་མཆིས་པ་དེའི་མདུན་དུ་མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བགྱིས་ཏེ་དུ་བམ་མཆིས་པའི་མདག་མར་མེའི་སྙིང་པོ་བརྒྱ་སྟོང་བོར་ན། དི་ན་ར་སྟོང་སྩོལ་ཏོ། །ནག་སེར་གྱི་ཆོ་ག་རྫོགས་སོ། ། །།རྡོ་རྗེ་བསྟོད་དེ་འཛིན་པའི་ལས་རྣམས་ལགས་ཏེ། མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་མེ་ཏོག་དཀར་པོ་བརྒྱ་སྟོང་ཕུལ་ན|་མཚན་མས་བཏབ་བསྟོད་སྩོལ་ཏོ། །མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་རྐང་པ་གཡས་པའི་མཐེ་བོང་ནས་བཟུང་ལ་གཟུགས་འགུལ་གྱི་བར་དུ་བཟླས་བརྗོད་བགྱིས་ན། ཡིད་ཀྱིས་བསམ་པས་རེངས་པར་བགྱིད་དེ། དུད་འགྲོའི་སྐྱེ་གནས་སུ་མཆི་བའི་སེམས་ཅན་དེ་དག་ཐམས་ཅད་རེངས་པར་བགྱིད་དོ། ། ཡིད་ཀྱིས་གྲོལ་བར་འགྱུར་རོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་པ་བགྱིས་ཏེ་ལག་ན་རྡོ་རྗེའི་མདུན་དུ་ལག་ན་རྡོ་རྗེ་ལ་མཆོད་པ་བགྱིས་ལ་ཤིང་ཤླེ་ཤྨེ་ཏ་ཀའི་ཕུར་བུ་བ་ལངས་ཏེ་སྐུད་པ་དམར་པོས་དཀྲིས་ལ་དེ་ནས་རིག་སྔགས་འཆད་གིས་པ་ལ་ཤའི་ཤིང་གིས་ཞུགས་བུས་ཏེ་ཕུར་བུ་ལ་ལན་བརྒྱ་སྟོང་བཟླས་བརྗོད་བགྱིས་ལ་དེ་ནས་དུམ་བུ་གསུམ་དུ་བཅད་དེ། དུམ་བུ་རེ་རེ་ལ་ལན་ཉི་ཤུ་རྩ་རེ་རེ་བཟླས་བརྗོད་བགྱིས་ལ་ཞུགས་སུ་བོར་ན། ནང་པར་དི་ན་ར་སུམ་སྟོང་སྩོལ་ཏོ། །ཡར་གྱི་ངོ་ཚེས་བརྒྱད་ལ་ཞག་གཅིག་སྨྱུང་བ་བགྱིས་ཏེ་རྒྱ་མཚོར་འབབ་པའི་ཆུ་ཀླུང་དུ་ཞུགས་ལ་པདྨ་འབུམ་ཕུལ་ན་རྒྱལ་པོ་ཉིད་སྩོལ་ཏེ། །སྐྱེས་པ་དབང་དུ་བགྱི་ན། མར་གྱི་ངོ་ཞག་བརྒྱད་ལ་ཞག་གཅིག་ས་མྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་བྱང་ཆུབ་ཀྱི་ཤིང་གིས་ཞུགས་བུས་ལ་ཀུ་མུ་དའི་མེ་ཏོག་ཞོ་དང་སྦྲང་རྩི་དང་མར་ལ་སྨྱུགས་པ་བརྒྱ་སྟོང་སྦྱིན་སྲེག་བགྱིས་ན་སྐྱེས་པ་དབང་དུ་འགྱུར་རོ། །བུད་མེད་དབང་དུ་བགྱི་ན། མར་གྱི་ངོ་ཞག་བཅུ་གཉིས་ལ་ལག་ན་རྡོ་རྗེའི་མདུན་དུ་དྲི་མཆོག་གི་མེ་ཏོག་བརྒྱ་སྟོང་གིས་ལག་ན་རྡོ་རྗེ་ལ་བསྣུན་ན་བུད་མེད་དབང་དུ་འགྱུར་རོ། །རྡོ་རྗེ་བསྟོད་དེ་འཛིན་གྱི་ཆོ་ག་རྫོགས་སོ།། །།རྡོ་རྗེ་སེངྒེའི་ཁྲིའི་ལས་རྣམས་ལགས་ཏེ། དབབ་ན། གདོན་གྱིས་ཟིན་པའམ། མ་ཟིན་པ་ཡང་རུང་གུ་གུལ་གྱིས་དབབ་པོ། །གདོན་བཅིངས་ན། ཡིད་ཀྱིས་བགྱིའོ། །གདོན་སྐྲག་པར་བགྱི་ན། ལན་བདུན་བཟླས་བརྗོད་བགྱིས་པའི་ཐལ་མོས་བརྡབ་པར་བགྱིའོ། །གདོན་འབྲོས་པར་བགྱི་ན། སོལ་བས་གཟུགས་བྲིས་ལ་ལྕུག་མས་བསྣུན་ན་གཏོང་བར་འགྱུར་རོ། །གདོན་སྐམ་ན། གུ་གུལ་གྱི་བདུག་པས་བགྱིའོ། །གདོན་བཟའ་བར་བགྱི་ན། ལན་བདུན་བཟླས་བརྗོད་བགྱིས་པའི་ཤས་བགྱིའོ། །གདོན་གཅད་ན། མཚོན་རྣོན་པོས་རྩཝ་ཀུ་ཤ་བཅད་ན་གདོན་བཅད་པར་འགྱུར་རོ། །དུག་སྤོ་ན། ཆབ་བམ། ཡལ་གས་བགྱིའོ།། བྱིས་པ་གདོན་གྱིས་ཟིན་པ་རྣམས་ལ་ཡལ་གས་བྱ་བ་པར་བགྱིའོ། །ཆུར་མི་འབྱིང་པར་བགྱི་ན། ལན་བདུན་བཟླས་བརྗོད་བགྱིས་པའི་ཡུངས་ཀར་གྱིས་བགྱིའོ། །མཚོན་གྱིས་མི་ཚུགས་པར་བགྱི་ན། ཡིད་ཀྱིས་བགྱིའོ། །མར་གྱི་ངོ་ཞག་བཅུ་བཞི་ལ་ལག་ན་རྡོ་རྗེའི་མདུན་དུ་ཙནྡན་དམར་པོས་གདོང་དམར་ཕྲིས་ནས་དེ་ལ་གཏོར་མ་སྣ་ཚོགས་སྩལ་ཅིང་གྲོག་མཁར་གྱིས་ལ་མདུད་རྩེ་གསུམ་པ་བགྱིས་ཏེ་ལག་པ་གཡོན་ན་རྡོ་རྗེ་ཐོགས་པ་མདུང་རྩེ་གསུམ་པའི་སྟེང་དུ་མཆིས་ཏེ་ལན་བརྒྱ་སྟོང་བཟླས་བརྗོད་བགྱིས་ན། གཏེར་མཐོང་བར་འགྱུར་རོ། །ཡར་གྱི་ངོ་ཚེས་ལྔ་ནས་བརྩམས་ཏེ་རྒྱ་མཚོར་འབབ་པའི་ཆུ་ཀླུང་དུ་ཞུགས་ལ་ལན་འབུམ་བཟླས་བརྗོད་བགྱིས་ན། རིག་སྔགས་འཆང་གི་འཁོར་ལོས་བསྒྱུར་བར་འགྱུར། རིག་སྔགས་ལན་དུག་སྟོང་གི་གཡོག་འཁོར་དང་ལྡན་པར་འགྱུར་རོ། །བསྐལ་པར་གནས་པར་ཡང་འགྱུར་རོ། །ཟླ་བ་གཅིག་ཟས་སུ་འོ་སྐྱོ་འཚལ་ཞིང་མར་གྱི་ངོ་ཞག་བཅུ་བཞི་ལ་ཞག་གསུམ་ས་མྱུང་བ་བགྱིས་ཏེ་དབང་ཕྱུག་ཆེན་པོའི་གནས་སུ་མཆིས་ལ་གློ་གཡས་ལོགས་སུ་མཆོད་པ་བགྱིས་ཏེ་ཕག་རྒོད་ཀྱི་མཆེ་བ་ལ་གི་ཝང་གིས་བསྐུས་ལ་རས་དཀར་པོའི་སྟེང་དུ་བཞག་སྟེ་རིག་པ་བཟླས་བརྗོད་བགྱིས་ན། བགེགས་རྣམ་པ་སྣ་ཚོགས་འབྱུང་སྟེ། རིག་བའི་རྒྱལ་པོས་བསྣུན་པར་བགྱིའོ། །དེ་ནས་མཆེ་བ་དེ་འབར་བར་འགྱུར་ཏེ། འབར་ནས་བླང་བར་བགྱིའོ། །བླངས་མ་ཐག་ཏུ་མདུད་རྩེ་གསུམ་པར་འགྱུར་ཏེ། རིག་སྔགས་ཐམས་ཅད་ཀྱི་སྤྱོད་ཡུལ་དུ་མི་འགྱུར། དཔག་ཚད་གྱེན་དུ་འཕགས་པར་འགྱུར་རོ|་|ལོ་དགུ་སྟོང་ཐུབ་པར་འགྱུར་རོ། །རྡོ་རྗེ་སེངྒེའི་ཁྲིའི་ཆོ་ག་རྫོགས་སོ།། །།རྡོ་རྗེ་ལྡན་མའི་ལས་རྣམས་ལག་སྟེ། རི་མོ་མཁན་གསོ་སྦྱོང་བཟུང་བས་མ་གོད་པའི་རས་ལ་སྦྱིན་དང་མ་འདྲེས་པའི་ཚོན་གྱིས་འཕགས་པ་ཕྱག་ན་རྡོ་རྗེ་མདོག་སྡོ་བསངས། རྒྱན་ཐམས་ཅད་ཀྱིས་བརྒྱན་པ་བྲི་བར་བྱའོ། །དེའི་གཡས་རོལ་དུ་རྡོ་རྗེ་དང་ལག་བཟང་ཡང་བྲི་བར་བགྱི་སྟེ། གཉི་ག་ཡང་གསེར་གྱི་མདོག་ཅན། རྒྱན་ཐམས་ཅད་ཀྱིས་བརྒྱན་པར་བགྱིའོ། །གཡོན་རོལ་དུ་རྡོ་རྗེ་ལྡན་མ་རྒྱན་ཐམས་ཅད་ཀྱིས་བརྒྱན་པ་བྲིའོ། །ཐ་མར་རིའི་རྩེ་མོ་རྣམས་བྲི་བར་བགྱིའོ། །དེ་ནས་རིག་སྔགས་འཆང་གིས་ཚེས་གཅིག་ནས་བརྩམས་ཏེ་ཟས་སུ་འོ་སྐྱོ་འཚལ་ཞིང་ཟླ་བ་ཉའི་བར་དུ་བཟླས་བརྗོད་བགྱིའོ། །དེ་ནས་ཟ་ཧག་གསུམ་སྨྱུང་བར་གྱིས་ཏེ་བཅོམ་ལྡན་འདས་ལ་མཆོད་པ་རྒྱ་ཆེར་བགྱིས་ལ་བིལ་བའི་ཤིང་གིས་ཞུགས་བུས་ལ་བིལ་བའི་མེ་ཏོག་ཞོ་དང་སྦྲང་རྩི་དང་མར་ལ་སྨྱུགས་པ་བརྒྱ་སྟོང་སྦྱིན་སྲེག་བགྱིས་ན། དེ་ནས་རྡོ་རྗེ་རྗེའི་འགུལ་ནས་གྲུབ་པར་འགྱུར་ཏེ། ཉིན་གཅིག་བཞིན་དི་ན་ར་ལྔ་ལྔ་སྩོལ་ཏོ། །དེ་བཞིན་དུ་དགོད་པར་བགྱིའོ། །མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བགྱིས་ཏེ་རི་མོའི་གཟུགས་ཀྱི་མདུན་དུ་དུ་བ་མ་མཆིས་པའི་མདག་མེ་ལ་ཨ་ཀ་རུ་སྟོང་སྦྱིན་སྲེག་བགྱིས་ན། རི་མོའི་གཟུགས་ཀྱི་མེ་ཏོག་གི་ཕྲེང་བ་འགུལ་ནས་འགྲུབ་པར་འགྱུར་ཏེ། གྲུབ་ནས་ཡུལ་གྲུ་སྩོལ་ལོ། །བུད་མེད་དབང་དུ་བགྱི་ན། གདུགས་བདུན་དུས་གསུམ་དུ་ཀ་ར་བཱི་རའི་ཤིང་གིས་ཞུགས་བུས་ལ་མར་དང་བསྲེས་པའི་ཡུངས་གྱིས་སྦྱིན་སྲེག་ལན་བརྒྱ་སྟོང་བགྱིའོ། །ཡུགས་ས་མོ་དབང་དུ་བགྱི་ན། ས་ཕྱོགས་གཙང་མར་ལུང་ཐང་གི་ཤིང་གིས་ཞུགས་བུས་ལ་ཏིལ་ལ་ལན་བརྒྱ་སྟོང་སྦྱིན་སྲེག་བགྱིས་ན་ཡུགས་ས་མོ་དབང་དུ་འགྱུར་རོ། །སྐྱེས་པ་དབང་དུ་བགྱི་ན། མར་གྱི་ངོ་ཞག་བཅུ་བཞི་ལ་ཞུག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་ཨརྒའི་ཤིང་གིས་ཞུགས་བུས་ལ་སྐེ་ཚེའི་འབྲུ་ལ་ལན་བརྒྱད་སྟོང་སྦྱི་ན་སྲེག་བགྱིས་ན་དབང་དུ་འགྱུར་རོ། །རྡོ་རྗེ་ལྡན་མའི་ཆོ་ག་རྫོགས་སོ།། །།རྡོ་རྗེ་བཞད་མའི་ལས་རྣམས་ལགས་ཏེ། དབབ་ན། མེ་ཏོག་དཀར་པོ་དག་གིས་བགྱིའོ། །བཅིང་ན། ཡིད་ཀྱིས་བགྱིའོ། །སྨྲས་སྩལ་ན། ལན་བདུན་བཟླས་བརྗོད་བགྱིས་པའི་ཆབ་ཀྱིས་བགྱིའོ། །གང་བགྱིད་དུ་སྩལ་ན། གུ་གུལ་གྱིས་བདུག་པར་བགྱིའོ|་|ཟས་སྩལ་ན། ཀཱ་ར་བཱི་རའི་མེ་ཏོག་ལ་ལན་བདུན་བཟླས་བརྗོད་བགྱིས་པར་བགྱིའོ། །བརྗོད་དུ་སྩལ་ན། ལན་བདུན་བཟླས་བརྗོད་བགྱིས་པའི་ཡུངས་ཀར་གྱིས་བསྣུན་ན་འདས་པ་དང་། མ་འོངས་པ་བརྗོད་དོ། །གདོན་དགོད་དུ་སྩལ་ན། ལན་བདུན་བཟླས་བརྗོད་བགྱིས་པའི་མེ་ཏོག་གཏོར་རོ། བཅིང་ན། ཆབ་ཀྱིས་བགྱིའོ། །བརྡེག་ན། སེ་གོལ་གཏོགས་པར་བགྱིའོ། །ཚར་གཅད་ན། རྩཝ་ལ་ལན་བདུན་སྔགས་ཀྱིས་བཏབ་ལ་མགོ་ལ་བཞག་ན་མྱོས་པར་འགྱུར་ཏེ་གདོན་འབྲོས་སོ། །བཅད་ན|་བ་ལང་གི་ལྕི་བ་ལས་གཟུགས་བགྱིས་ལ་མཚོན་རྣོན་པོས་བཅད་ན་བཅད་པར་འགྱུར་རོ། །གདོན་བསྡིགས་པ་དང་རྒྱུག་ཏུ་གཞུག་ན། མཛུབ་མོས་བསྡིག་པར་བགྱིའོ།། གདོན་དཀྱིལ་འཁོར་དུ་གཞུག་ན། རྡོ་རྗེའི་ཕྱག་རྒྱས་བསྣུན་ན་དཀྱིལ་འཁོར་དུ་གཞུག་གོ། གདོན་འབྲོས་པར་བགྱི་ན། དོན་གྱི་མདུན་དུ་ལན་བརྒྱ་རྩ་བརྒྱད་སྦྱིན་སྲེག་བགྱིས་ན་གདོན་དུ་ཞིང་འབྲོས་སོ། །གདོན་སྤོ་ན། ཡིད་ཀྱིས་གར་འཚལ་བ་དེར་རྦད་དོ། །དུག་དབབ་ན། སྲ་རྩི་པོག་གིས་བདུག་པས་བགྱིའོ། །ཕུར་བུ་དབབ་ན། ལུང་ཏང་གི་ལོ་མའི་བདུག་པས་བགྱིའོ། །རིམས་དབབ་ན། ཀཱ་ར་བཱི་རའི་མེ་ཏོག་གི་བདུག་པས་བགྱིའོ། །རིམས་ཞག་བཞི་པ་དབབ་ན། མདས་བགྱིའོ། །སྲུང་བ་བགྱི་ན། ལན་བདུན་བཟླས་བརྗོད་བགྱིས་བའི་སྲད་བུས་བགྱིའོ། །ཆང་མ་རུང་བར་བགྱི་ན། གསེག་མ་ལ་ལན་བདུན་བཟླས་བརྗོད་བགྱིས་ལ་ཁང་སྟེང་དུ་བོར་ན་ཆང་མ་རུང་པར་བགྱིས་པར་འགྱུར་རོ། །གདོན་གྱིས་བཏབ་པར་བགྱི་ན། ཡིད་ཀྱིས་བགྱིའོ། །སྐྱེས་པ་དང་བུད་མེད་དབང་དུ་བགྱི་ན། མར་གྱི་ངོ་ཞག་བརྒྱད་ནས་བརྩམས་ཏེ་གདུགས་བདུན་དུས་གསུམ་དུ་ཕུབ་མ་ལས་ལན་བརྒྱ་སྟོང་སྦྱིན་སྲེག་བགྱིས་ན་དབང་དུ་འགྱུར་རོ། །དབྱེ་བར་བགྱི་ན། མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེ་མདུན་དུ་སྐྱེས་པའི་སྐྲ་ལས་ལན་བརྒྱ་སྟོང་སྦྱིན་སྲེག་བགྱིས་ན་དབྱེ་བ་བགྱིས་པར་འགྱུར་རོ། །རོ་ལངས་སྒྲུབ་པར་འཚལ་བས་ཚེས་གྲངས་དང་སྐ་ར་མ་གདམ་མི་འཚལ། སྨྱུང་བ་བགྱི་མི་འཚལ་བས་བུད་མེད་ཀྱི་རོ་ལངས་ལ་སྤོས་དང་བདུག་པས་མཆོད་དེ། མགོ་ཤར་ཕྱོགས་སུ་བསྟན་ལ། དེ་ནས་རིག་སྔགས་འཆང་གིས་རྡོ་རྗེ་བཞག་མ་བརྗོད་པར་གྱིས་ན། བུད་མེད་དེ་དགོད་ཅིང་ལྡང་བར་འགྱུར་ཏེ|་དེ་ལ་ཉལ་པོ་བགྱིའོ། །གལ་ཏེ་མ་ནུས་ན་རིག་སྔགས་འཆང་གིས་ལ་གོར་དུ་རིག་པ་མཆོག་དྲན་པར་བགྱི་ཞིང་སྙིང་པོ་གཉིས་ཀ་བཟླས་བརྗོད་བགྱིས་པའི་ཡུངས་ཀར་གྱིས་བསྣུན་པར་བགྱིའོ། །དེ་ནས་བུད་མེད་དེ་དགོད་ཅིང་མཆི་སྟེ། དེ་ལ་རྩེད་པར་བགྱིའོ། །དེ་ནས་བུད་མེད་དེ་སྦྲུམ་པར་གྱུར་ཏེ། དེ་ནས་རིག་སྔགས་འཆང་གིས་རྡོ་རྗེ་བཞད་མ་བཟླས་བརྗོད་བགྱིས་པའི་ཡུངས་ཀར་གྱིས་བསྣུན་པར་བགྱིའོ། དེ་ནས་དེ་མི་འགུལ་བར་འགྱུར་རོ། །ཡང་རིག་པ་མཆོག་གིས་ཡུངས་ཀར་གྱིས་བསྣུན་པར་བགྱིའོ། །དེ་ནས་ལྟོ་འགས་ཏེ་བཞད་མ་བཟླས་བརྗོད་བགྱིས་ལ་མངལ་བླངས་བར་བགྱིའོ། །མངལ་བླངས་ནས་ཀྱང་ཡུངས་ཀར་གྱིས་བསྣུན་ན། དུམ་བུ་བརྒྱར་འགྱུར་ཏེ། ཕྲུ་མ་ཨའི་ནང་དུ་སྩལ་ལ་མི་ཐོད་གསུམ་གྱི་སྟེང་དུ་མཆིས་ལ་ཡོངས་སུ་སྨིན་པར་འགྱུར་གྱི་བར་དུ་རྡོ་རྗེ་བཞད་མ་བཟླས་བརྗོད་བགྱིས་ལ་བླངས་ཏེ་གྲོགས་རྣམས་ལ་ཡང་སྩལ་ཅིང་འཚལ་ན་སྐྲ་ལྕང་ལོ་འཁྱིལ་པར་འགྱུར། གདུགས་ཤར་བ་ལྟ་བུའི་མདོག་ཏུ་འགྱུར། ལོ་བཅུ་དྲུག་ལོན་པ་ལྟ་བུར་འགྱུར། ནམ་མཁའ་ལ་མཆི་བར་འགྱུར། རིག་སྔགས་འཆང་ཐམས་ཅད་བྲན་དུ་འགྱུར། རྡོ་རྗེའི་འཁོར་ལོས་བསྒྱུར་བར་འགྱུར། དཔག་ཚད་སྟོང་གྱེན་དུ་འཕགས་པར་འགྱུར། དཔག་ཚད་སྟོང་ཚུན་ཆད་ཀྱིས་ཐོས་པར་འགྱུར། ལ་བརྒྱད་ཁྲི་ཐུབ་པར་འགྱུར། མཚོན་ཆས་ལུས་ལ་མི་ཚུགས་པར་འགྱུར། རྡོ་རྗེ་ཉིད་དུ་འགྱུར། བདག་མཆི་བར་འཚལ་བར་འགྱུར་རོ། །ལྷའི་སྒྲུབ་པ་ནི། ཟླ་བ་གཅིག་ཟས་སུ་ཆུ་གྲོག་འཚལ་ཞིང་དེའི་འོག་ཏུ་མར་གྱི་ངོ་ཞག་བརྒྱད་ནས་ཞག་གསུམ་སྨྱུང་བ་བགྱིས་ཏེ་ལག་ན་རྡོ་རྗེ་མཆད་ཅིང་ལྷ་ཐམས་ཅད་ཀྱང་མཆོད་པར་བགྱིའོ|་|དེ་ནས་རིག་སྔགས་འཆང་གིས་ལག་ན་རྡོ་རྗེའི་མདུན་དུ་ལྡོང་རོས་ཤིང་ཨ་ཤྭཐའི་ལོ་མ་བདུན་གྱི་སྟེང་དུ་བཞག་སྟེ་དངོས་གྲུབ་གསུམ་བྱུང་གི་བར་དུ་བཟླས་བརྗོད་བགྱིའོ། འབར་པར་གྱུར་ན། ནམ་མཁའ་ལ་མཆི་པར་འགྱུར་རོ། །དུ་བ་འཐུལ་ན། མི་གདའ་བར་འགྱུར། ལོ་ལྔ་སྟོང་ཐུབ་པའི་རིག་སྔགས་འཆང་ཉིད་དུ་འགྱུར། ལོ་ལྔ་སྟོང་ཐུབ་པའི་རྐང་གིས་འགྲོ་བར་འགྱུར་རོ། །ས་ཕྱོགས་གང་ན་གནོད་སྦྱིན་མོ་མཆིས་བ་དེར་མར་གྱི་ངོ་ཞག་བརྒྱད་ནས་ཞག་གསུམ་སྨྱུང་བ་བགྱིས་ཏེ་གནས་དབེན་པར་མཆིས་ལ་དུར་ཁྲོད་ཀྱི་ཤིང་གིས་ཞུགས་བུས་ལ་སེང་ལྡེང་གི་ཡུམ་སྲེག་ཞིང་ཁྲག་དང་དུག་ལ་སྨྱུགས་པ་ལན་བརྒྱ་སྟོང་སྦྱིན་སྲེག་བྱིས་ན། གནོད་སྦྱིན་མོ་དེ་མཆི་བར་འགྱུར་ཏེ། མཆིས་ནས་འདི་སྐད་དུ་ཅི་བྱ་ཞེས་མཆི་བ་དང་། དེས་འདི་སྐད་དུ་གང་བསམ་པ་དེ་གྱིས་ཤིག་ཅེས་བརྗོད་པར་བགྱིའོ། །གལ་ཏེ་བཏུབ་ན་འདི་སྐད་དུ་དཔག་ཚད་བརྒྱ་ནས་བུད་མེད་ངའི་གན་དུ་ཁྲིད་ཤོག་།གྲོགས་པོ་བརྒྱད་ཅུ་ལ་ཟན་བྱིན་ཅིག། ཉིན་གཅིག་བཞིན་རས་ཟུང་བརྒྱད་དང་། ཀཪྵ་པ་ཎ་བརྒྱད་བརྒྱད་ཕུལ་ཅིག་ཅེས་བརྗོད་དང་། དེ་ལྟར་བགྱིའོ་ཞེས་མཆིས་པར་འགྱུར་ཏེ། དེའི་འགོ་ཏུ་བུད་མེད་ཁྲིད་དེ་མཆིའོ། །ཡིད་ཀྱིས་བཟླས་བརྗོད་བགྱིའོ། །ཡིད་ཀྱིས་སླར་གཏང་བར་བགྱིའོ། །རྡོ་རྗེ་བཞད་མའི་ཆོ་ག་རྫོགས་སོ།། །།ཕོ་ཉ་མོ་ཐམས་ཅད་ཀྱི་ལས་ནི། འདི་ལགས་ཏེ། རིག་པ་མཆོག་གི་ཕོ་ཉ་མོ་ནི། ལས་ཐམས་ཅད་དུ་ཡང་སྦྱར་བར་བགྱིའོ། །ལས་ཐམས་ཅད་དུ་ཡང་རིག་པ་མཆོག་གི་སྙིང་པོ་དང་ལྷན་ཅིག་སྦྱར་བར་བགྱི་སྟེ། སྒྲུབ་པ་མ་ལགས་པའི་རིག་པ་ཡང་སྒྲུབ་པར་བགྱིད་དོ། །སྲིན་བུ་ཀ་ཏའི་དུག་གིས་གནོད་བར་གྱུར་པ་རྣམས་ལ་ནི། ཡི་གེ་བྲི་བའི་གཞི་དང་། སྣག་ཚ་དང་། སྨྱུག་གུ་ཡང་སྔགས་ལན་བདུན་བདུན་གྱིས་བསྔགས་ལ་གང་འདོད་པ་བྲིས་ཏེ་བསྐུར་ན་སོས་པར་འགྱུར་རོ། །དེ་ནས་ཡང་བཅོམ་ལྡན་འདས་ལ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས|་གཞན་ཡང་གང་གིས་རིག་པ་ཐམས་ཅད་དངོས་གྲུབ་ཏུ་འགྱུར་བ་སྩོལ་བའི་རིག་པའི་ལྷ་ཐམས་ཅད་ཀྱི་གསང་བ་བརྗོད་པར་བགྱིའོ། །གལ་ཏེ་རིག་སྔགས་འཆང་རིག་པ་སྒྲུབ་པར་འཚལ་ན། རིག་པའི་ལྷ་དེ་ལ་འདིས་མགུ་བར་བགྱིའོ། །མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བགྱིས་ཏེ་རྒྱ་མཚོར་འབབ་པའི་ཆུ་ཀླུང་གི་ངོགས་གཉི་གའི་ས་བླངས་ལ་ལྷའི་གཟུགས་བགྱིས་ཏེ་སྤྱིན་དང་མ་འདྲེས་པའི་ཚོན་གྱིས་ལྷའི་ཁ་དོག་ཅི་འདྲ་བ་དེ་འདྲ་བར་བྲི་བར་བགྱིའོ། །མར་སྦྲང་རྩིས་ལྟོ་དགང་བར་བགྱིའོ|་|མེ་ཏོག་པདྨའི་དབུས་སུ་ལྷ་དེ་གཞག་པར་བགྱིའོ། །པདྨའི་ཟེ་བ་ནི། ཨ་ག་རུ་དང་ཙནྡན་གྱིས་བསྐུ་བར་བགྱིའོ། །དུས་གསུམ་དུ་བདུག་པས་ཀྱང་བདུག་པར་བགྱི་སྟེ|་གུ་གུལ་དང་། དུ་རུ་ཀ་དང་། ག་པུར་དང་། ཤིང་ཤ་མིའི་མེ་ཏོག་དང་། དེ་རྣམས་བསྲེས་པའི་བདུག་པས་བདུག་པར་བགྱིའོ། །གདུགས་གསུམ་གྱི་བར་དུ་བགྱིའོ། །དེ་ནས་གཟུགས་དེ་འོ་མའི་ནང་དུ་སྩལ་ཏེ་ཞིག་པར་མ་གྱུར་གྱི་བར་དུ་བཞག་ལ་ཞིག་ནས་འོ་མ་རྒྱ་མཚོར་འབབ་པའི་ཆབ་ཀྱི་ནང་དུ་སྩོལ་ཏོ། །དེ་ནས་སྦྱོར་བ་འདིས་ལྷ་ངེ་མགུ་བར་འགྱུར་ཞིང་དགའ་བ་མཐོང་སྟེ་མྱུར་དུ་དངོས་གྲུབ་ཀྱང་སྩོལ་ཏེ། བཅོམ་ལྡན་འདས། འདི་ནི། རིག་པའི་རིགས་ཐམས་ཅད་ཀྱང་གསང་བ་ལགས་ཏེ། འདིས་ལྷ་ཐམས་ཅད་འགྲུབ་པར་འགྱུར་རོ། །བཅོམ་ལྡན་འདས། གསང་བ་འདི་ནི། བདག་གིས་སེམས་ཅན་ཐམས་ཅད་ཀྱི་དོན་གྱི་སླད་དུ་བརྗོད་དོ། །བཅོམ་ལྡན་འདས། རིག་པའི་རྒྱལ་བོ་བདག་གིས་བཤད་པ་འདི་ནི། རིག་སྔགས་ཐམས་ཅད་ཀྱི་རྒྱལ་པོ་སྟེ། རིག་པ་ཐམས་ཅད་སྒྲུབ་ཏུ་སྩལ་བ། མཚུངས་པ་མ་མཆིས་པ། མི་མཉམ་པ་དང་མཉམ་པ། ཟླ་མ་མཆིས་པ་ལགས་སོ། །འདི་ནི། བདག་གིས་སེམས་ཅན་ཐམས་ཅད་ཀྱི་དོན་གྱི་སླད་དུ་བཤད་དོ། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་འཁོར་འདུས་པ་ལ་བཀའ་སྩལ་པ|་གྲོགས་པོ་དག། བྱང་ཆུབ་སེམས་དཔའ་སེམས་དཔའ་ཆེན་པོ་སྟོབས་ཆེན་པོ་ལག་ན་རྡོ་རྗེ་མཐོང་ངམ། གསོལ་བ། བཅོམ་ལྡན་འདས། མཐོང་ལགས་སོ། །བདེ་བར་གཤེགས་པ|་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། གྲོགས་པོ་དག་།བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་གང་གིས་འདི་ལྟར་ཡིད་ཀྱིས་ཕྱག་འཚལ་ན་ཡང་དེས་དེ་བཞིན་གཤེགས་པ་སྟོང་ཕྲག་དགུ་ལ་ཕྱག་བྱས་པར་འགྱུར་རོ། །དེ་ནས་ཐམས་ཅད་དང་ལྡན་པའི་འཁོར་དེས་ལག་ན་རྡོ་རྗེའི་རྐང་པ་གཉིས་ལ་གཏུགས་ཏེ་ཕྱག་འཚལ་ནས་འདི་སྐད་ཅེས་བྱང་ཆུབ་སེམས་དཔའ་ཁྱོད་དེ་བཞིན་གཤེགས་པས་བསྟོད་ཅིང་བཀུར་ཏེ་བསྔགས་པ་ལེགས་སོ་ལེགས་སོ། །བརྩོན་འགྲུས་དང་བརྟུལ་བ་ཆེན་པོ་དང་ལྡན་པ་ལེགས་སོ་ཞེས་བྱ་བ་སྨྲས་སོ། །དེ་ནས་གཞོན་ནུ་རྡོ་རྗེ་སྡེས་བཅོམ་ལྡན་འདས་ཀྱི་ཞབས་དང་། ལག་ན་རྡ་རྗེ་ལ་ཕྱག་འཚལ་ཏེ་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །ཡབ། བདག་ཀྱང་རིག་པ་མཆོག་ལ་དགའ་བས་གང་གིས་རིག་པ་མཆོག་སྒྲུབ་པའི་རིག་སྔགས་འཆང་དེ་ལ་གནོད་སྦྱིན་ཐམས་ཅད་དང་། ལོག་འདྲེན་ཐམས་ཅད་དང་། རིག་སྔགས་འཆང་ཐམས་ཅད་དང་། གྲུབ་པ་ཐམས་ཅད་དང་། ཀླུ་ཐམས་ཅད་དང་། ཡི་དྭགས་ཐམས་ཅད་དང་། གྲུལ་བུམ་ཐམས་ཅད་བགེགས་བགྱིད་པར་མི་འགྱུར་བར་སེམས་ཅན་ཐམས་ཅད་ཀྱི་དོན་གྱི་སླད་དུ་གསང་སྔགས་སྩལ་བར་བགྱིའོ། །དེ་ནས་གནོད་སྦྱིན་གྱི་དབང་པོ་ལག་ན་རྡོ་རྗེས་གཞོན་ནུ་རྡོ་རྗེ་སྡེ་ལ་འདི་སྐད་ཅེས་སྨྲས་སོ། །བཞིན་བཟང་། ཁྱོད་སེམས་ཅན་ཐམས་ཅད་ལ་ཕན་བར་བརྩོན་པ་ལེགས་སོ། །བཞིན་བཟང་། ཁྱོད་རིག་པ་མཆོག་གི་དོན་གྱི་ཕྱིར་གསང་སྔགས་སྨྲོས་ཤིག། དེ་ནས་ཕས་གནང་བས་གཞོན་ནུ་རྡོ་རྗེ་སྡེ་དགའ་མགུ་ཡིད་རངས་ཏེ་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ནས་ལོག་འདྲེན་ངེས་པར་གཞིག་པའི་གསང་སྔགས་སྨྲས་པ། ན་མོ་བུདྡྷཱ་ཡ། ན་མོ་དྷརྨཱ་ཡ། ན་མོ་སཾ་གྷཱ་ཡ། ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་སེ་ནཱ་ཡ། ཀུ་མ་ར་རཱུ་པ་དྷཱ་ར་ཎི། ཨ་པྲ་ཏི་ཧ་ཏཱ་ཡ། མ་ཧཱ་བ་ལ་པ་རཱ་ཀྲ་མཱ་ཡ། ཙ་ལ་ཙ་ལ། ཀུ་ལ་ཀུ་ལ། མ་ཐ་མ་ཐ། ནཱ་ཤ་ཡ་སརྦ་བིགྷྣན། བི་ནཱ་ཡ་ཀཾ་བནྡྷ་བནྡྷ། སྥོ་ཊ་ཡ་སྥོ་ཊ་ཡ|་མ་ར་མ་ར། བིནྡ་བིནྡ། ཡེ་མ་མ་དུཥྚ། ཙྪིནྡ་སྟྭཾ་མྱ་ཀྲྀནྟ་ཛམྦྷ་མོ་ཧ་ཡ་ནི། སུམྦྷ་ཡ་སྟམྦྷ་ཡ་སྭཱཧཱ། སྒྲུབ་པའི་དུས་ན་གྲོགས་མཁར་བགྱིས་ལས་རྡོ་རྗེ་བགྱིས་ཏེ་སྲུང་བ་བགྱིའོ།། སྲུང་བའི་དུས་ན་ཏིལ་ནག་པོས་སྦྱིན་སྲེག་བརྒྱ་སྟོང་བགྱིས་ན། བགེགས་ཐམས་ཅད་བཅོམ་པར་འགྱུར་རོ། །སྒྲུབ་པའི་དུས་ན་ལན་བདུན་བཟླས་བརྗོད་བགྱིས་པའི་ཡུངས་ཀར་གྱིས་མཚམས་གཅད་དོ། །རྐང་རྗེས་ཀྱི་སའམ་ཐལ་བ་ལ་ལན་གསུམ་བཟླས་བརྗོད་བགྱིས་ཏེ་སྲུང་བ་བགྱིའོ། །སྒྲུབ་པའི་དུས་ན་འཇིམ་པ་ལས་རྡོ་རྗེའི་གཟུགས་བགྱིས་ཏེ་སྤོས་དང་། མེ་ཏོག་དང་། བདུག་པས་མཆོད་ལ་རིག་པ་ལན་བརྒྱ་སྟོང་བཟླས་བརྗོད་བགྱིས་ན། སྒྲུབ་པའི་ཚེ་བྱིན་གྱིས་རློབ་པར་བགྱིད་ཅིང་དངོས་གྲུབ་ཏུ་འགྱུར་རོ། ། ལྷ་རྣམས་དབབ་ན། གུ་གུལ་གྱི་བདུག་པས་བགྱིའོ། །ཀླུ་དཀྲུག་པར་བགྱི་ན། རྡོ་རྗེའི་ཕྱག་རྒྱ་བགྱིས་ལ་ལག་ན་རྡོ་རྗེའི་མདུན་དུ་བཟླས་བརྗོད་ལན་བརྒྱད་བརྒྱ་བགྱིས་ཏེ་གང་ན་ཀླུ་གནས་པའི་མཚོ་དེར་བོར་ན། ཀླུ་ཐམས་ཅད་སྐྲག་པར་འགྱུར་རོ། །དྲི་ཟ་རྣམས་གཡོས་པར་བགྱི་ན། མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེའི་མདུན་དུ་དུར་ཁྲོད་ཀྱི་སོལ་བས་དྲི་ཟའི་གཟུགས་བྲིས་ལ། དེའི་ལྟོ་བར་སྲིན་ལག་བཞག་སྟེ་རིག་པ་ལན་བརྒྱ་སྟོང་བརྗོད་ན། སྙིང་པོ་བརྗོད་པས་མཆི་བར་འགྱུར་རོ། །མཆིས་ནས་བར་སྣང་ལས་སྨན་འདོར་ཏེ། དེ་འཚལ་ན་ཐོས་པ་འཛིན་པར་འགྱུར། དྲི་ཟ་ཐམས་ཅད་ཀྱང་སྲུང་བར་འགྱུར་རོ། །གནོད་སྦྱིན་རྣམས་བརླག་པར་བགྱི་ན། ཕྱོགས་གང་ན་གནོད་སྦྱིན་ནམ་གནོད་སྦྱིན་མོ་གནས་བའི་ཕྱོགས་དེར་མཆིས་ལ་ལྕགས་ཕུར་སོར་བཞི་པ་བླངས་ཏེ་ལན་བརྒྱ་རྩ་བརྒྱད་བཟླས་བརྗོད་བགྱིས་ཏེ་བཙུགས་ན། གནོད་སྦྱིན་འབྲོས་པར་འགྱུར་རོ། །ཅི་སྟེ་སྒྲུབ་བར་འཚལ་ན། རི་མོ་མཁན་གསོ་སྦྱོང་བཟུང་བས་མ་གོད་པའི་རས་ལ་སངས་རྒྱས་ཀྱི་གཟུགས་གསེར་གྱི་མདོག་ཅན་བྲི་བར་བགྱིའོ། །དེའི་གཡོན་རོལ་དུ་ལག་ན་རྡོ་རྗེ་མདོག་སྔོ་བསངས། རྒྱན་ཐམས་ཅད་ཀྱིས་བརྒྱན་པ་བྲིའོ། །དེ་བཞིན་གཤེགས་པའི་གཡས་རོལ་དུ་རྡོ་རྗེ་སྡེ་གཞོན་ནུའི་གཟུགས་འཛིན་པ་གསེར་གྱི་མདོག་ཅན། ལག་པ་གཡོན་པ་ན་པདྨ། གཡས་པས་དམ་པ་སྦྱིན་པར་བྲིའོ། །དེའི་འོག་རོལ་དུ་སྒྲུབ་པ་པོ་ལག་ན་པོག་ཕོར་ཐོགས་བ་བྲིའོ། །དེ་ནས་རིག་སྔགས་འཆང་གིས་ཟླ་བ་ཕྱེད་ཟས་སུ་འོ་སྐྱོ་འཐུང་ཞིང་རིག་པ་བཟླས་བརྗོད་བགྱིའོ། །དེ་ནས་མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བགྱིས་ཏེ་རྒྱ་ཆེར་མཆོད་ལ་གཏོར་མ་ཡང་རྒྱ་ཆེར་བགྱིའོ། །དེ་ནས་རིག་སྔགས་འཆང་གིས་སྣ་མའི་མེ་ཏོག་བརྒྱ་སྟོང་གིས་དེ་བཞིན་གཤེགས་པ་ལ་ཕོག་པར་བགྱིའོ། །དངོས་གྲུབ་ཀྱི་མཚན་མར་ནི། མར་མེའི་མེ་ལྕེ་གྱེན་དུ་མཆི་ལ་སྤུ་ཟིང་ཞེས་བགྱིད་ན་དངོས་གྲུབ་ཏུ་འགྱུར་རོ། །ཡིད་ཀྱིས་གང་བསམ་པ་དེ་སྩོལ་ཏེ། རིག་སྔགས་འཆང་ཉིད་དང་། འདོད་པ་དང་ལྡན་པ་ནི། མ་གཏོགས་སོ། །ལས་ཐམས་ཅད་དུ་ཡང་སྦྱར་བར་བགྱི་སྟེ། ཡིད་ཀྱི་ལས་བགྱིའོ། །རྡོ་རྗེ་སྡེའི་ཆོ་ག་རྫོགས་སོ།། །།དེ་ནས་མུ་དྷ་ད་ཀས་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །ཡབ། བདག་ནི་ཁྱོད་ཀྱི་རིག་སྔགས་ཀྱི་ཆོ་ག་རྒྱས་པ་ཐམས་ཅད་ལ་བགེགས་བགྱིད་པ་ལགས་མོད་ཀྱི། གང་དག་རིག་པ་མཆོག་སྒྲུབ་པ་དེ་དག་ལ་བདག་སླར་བཅིང་བ་སྩལ་བར་བགྱིའོ། །བདག་བཅིངས་ན། རིག་སྔགས་འཆང་དེ་ལ་སུ་ཡང་བགེགས་བགྱིད་པར་མི་འགྱུར་རོ|་|བཞིན་བཟང་། དེ་དེ་བཞིན་ཏེ། བདག་ཅག་བཅིང་བ་སྨྲོས་ཤིག། སྨྲོས་ཤིག། དེ་ནས་མུ་དྷ་ད་ཀས་ལག་ན་རྡོ་རྗེའི་རྐང་པ་གཉིས་ལ་གཏུགས་ཏེ་བདག་བཅིང་བའི་གསང་སྔགས་སྨྲས་པ། ན་མོ་རཏྣ་ཏྲ་ཡ་སྱ། ན་མཤྩཎྜ་བཛྲ་པཱ་ཎི་སྱ། ཏདྱ་ཐཱ། རྫི་རྫི་རུ་རུ་ཁ་རི་བི་ཁ་རི། ཏིཥྛ་ཏིཥྛ། ཙ་ལ་ཡ་ཙ་ལ་ཡ། བཛྲ་པཱ་ཎི་སྱ། ཨ་ཀྲོ་དྷ་བྷ་ཤ་དྷཾ། སྨ་ར་སྨ་ར|་བནྡྷ་བནྡྷ་སྭཱཧཱ། ལག་ན་རྡོ་རྗེ་དང་|་མུ་དྷ་ད་ཀའི་མདུན་དུ་མེ་ཏོག་དམར་པོ་དང་བདུག་པས་མཆོད་ལ། དེ་ནས་སྒྲུབ་པའི་དུས་ན་སྲད་བུ་དཀར་པོ་ལ་མདུད་པ་གསུམ་དོར་རོ|་|སུ་ཞིག་རྟག་ཏུ་འཆང་བ་དེ་ལ་ཐམས་ཅད་དངོས་གྲུབ་ཏུ་འགྱུར་རོ། །སྒྲུབ་པ་ཐམས་ཅད་དང་། ལས་ཐམས་ཅད་དུ་ཡང་སྤྲ་ཚིལ་ལས་མུ་དྷ་ད་ཀའི་གཟུགས་བགྱིས་ཏེ་ལག་པ་གཡོན་ན་མདུང་རྩེ་གསུམ་པ་ཐོགས་པར་བགྱིའོ། །དེ་ནས་རིག་སྔགས་འཆང་གིས་ཙནྡན་དམར་པོའི་མདུང་རྩེ་གསུམ་པས་སྙིང་གར་བཙུགས་པ་དེའི་འོག་ཏུ་རྡེའུ་ནག་པོས་བཀང་སྟེ་དངོས་གྲུབ་སྩལ་གྱི་བར་དུ་གཞག་པར་བགྱིའོ། །དེ་ནས་རིག་སྔགས་འཆང་གིས་མདུང་རྩེ་གསུམ་པ་ཕྱུང་ལ་འོ་མས་བཀྲུས་ཏེ་རིག་པ་ཡང་ལན་བརྒྱ་རྩ་བརྒྱད་བཟླས་བརྗོད་བགྱིས་ལ་ཐམས་ཅད་བགྱིའོ། །གལ་ཏེ་ལས་དེ་ལྟར་མ་བགྱིས་ན། དངོས་གྲུབ་ཏུ་མི་འགྱུར་རོ། །མུ་དྷ་ད་ཀའི་སྒྲུབ་པ་ལགས་ཏེ། རི་མོ་མཁན་གསོ་སྦྱོང་བཟུང་བས་མ་གོད་པའི་རས་ལ་སངས་རྒྱས་ཀྱི་གཟུགས་གསེར་གྱི་ཁ་དོག་ཅན་བྲི་བར་བགྱིའོ། །དེ་བཞིན་གཤེགས་པའི་གཡོན་རོལ་དུ་ལག་ན་རྡོ་རྗེ་མདོག་སྔོ་བས་རྒྱན་ཐམས་ཅད་ཀྱིས་བརྒྱན་པ་བྲིའོ། །དེ་བཞིན་གཤེགས་པའི་གཡས་རོལ་དུ་ནི། འཕགས་པ་ཀུན་དགའ་བོ་གསེར་གྱི་མདོག་ཅན་ལག་ན་རྔ་ཡབ་ཐོགས་པ་བྲིའོ། །ལག་ན་རྡོ་རྗེའི་འོག་ལོགས་སུ་མུ་དྷ་ད་ཀ་མདོག་དམར་ལ་མིག་གསུམ་པ། འདོད་པའི་གཟུགས་འཛིན་པ། གད་མོ་རྟ་སྐད་འབྱིན་ཅིང་ལག་པ་གཡས་པ་ཁ་འགྲམ་དུ་བཞག་པ་བ་རིའོ|་|དེ་ནས་རིག་སྔགས་འཆང་གིས་མར་གྱི་ངོ་ཞག་བཅུ་བཞི་ལ་ཉིན་ཞག་གཅིག་སྨྱུང་བ་བགྱིས་ལ་རི་མོའི་གཟུགས་ལ་མཆོད་པ་རྒྱ་ཆེར་བགྱིས་ལ་དེའི་མདུན་དུ་ཨ་ཀཪྵའི་ཤིང་གིས་ཞུགས་བུས་ཏེ་ཡུངས་ཀར་དང་། ཏིལ་ནག་པོ་དང་། འབྲས་ཡོས་དང་། འདི་རྣམས་མར་དང་བསྲེས་པ་ལ་ལན་བརྒྱ་སྟོང་བགྱིས་ན། རི་མོའི་གཟུགས་ཀྱི་མེ་ཏོག་གི་ཕྲེང་བ་འགུལ་བར་འགྱུར་ཏེ། དངོས་གྲུབ་ཏུ་འགྱུར་རོ། །དངོས་གྲུབ་ཏུ་གྱུར་ན། རྡོ་རྗེའི་རིགས་ཐམས་ཅད་ཀྱི་དངོས་གྲུབ་ཏུ་འགྱུར་རོ། །ལས་གཞན་དག་ཀྱང་བགྱིས་ཏེ། སྦྲུལ་གྱིས་ཟིན་པ་དབབ་ན། སྲ་རྩི་པོག་གིས་བདུག་པས་བགྱིའོ། །གདོན་བསྐྲད་ན། རྐང་རྗེས་ཀྱིས་ལག་མཐིལ་དུ་མདུང་རྩེ་གསུམ་པ་བྲིས་ལ་བསྟན་ན་གདོན་དུ་ཞིང་འབྲོས་སོ། །སྐྱེས་པ་དང་བུད་མེད་དབང་དུ་བགྱི་ན། མུ་དྷ་ད་ཀ་ལ་ཕྱག་བགྱིས་ལ་གདུགས་གང་ཡང་རུང་སྟེ་ཤླེ་ཤྨེ་ཏ་ཀའི་ཤིང་གིས་ཞུགས་བུས་ལ་བ་རུ་རའི་མེ་ཏོག་བརྒྱ་སྟོང་སྦྱིན་སྲེག་བགྱིས་ན་དབང་དུ་འགྱུར་རོ། །མོ་མཚན་བཅིང་བར་འཚལ་ན། དུར་ཁྲོད་ཀྱི་ཐལ་བ་དུར་ཁྲོད་ཀྱི་རས་ཀྱིས་བཅིངས་ལ་རིག་པ་ཡང་ལན་བརྒྱ་རྩ་བརྒྱད་བཟླས་བརྗོད་བགྱིས་ན་མོ་མཚན་བཅིངས་པར་འགྱུར་རོ། །དགྲོལ་ན་དབྱེའོ། །བྱིས་པ་གདོན་སྐེམ་བྱེད་ཀྱིས་ཟིན་པ་རྣམས་ནི། ཆབ་ལ་ལན་བརྒྱ་རྩ་བརྒྱད་བཟླས་བརྗོད་བགྱིས་ཏེ་བཀྲུས་ན་སོས་པར་འགྱུར་རོ། །འབྱུང་པོ་དང་། འདྲེ་དང་། ཀླུ་རྣམས་བསྐྲད་ན། ཐལ་མོ་བརྡབས་པས་བགྱིའོ། །ཱཪྱ་མུ་དྷ་ད་ཀའི་ཆོ་ག་རྫོགས་ས་ཨོ||་||དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ཀྱང་ལག་ན་རྡོ་རྗེ་ལ་གསང་སྔགས་སྩལ་བར་བགྱིའོ། །ལག་ན་རྡོ་རྗེ། འདི་ནི། ཁྲོ་བོ་གོས་དཀར་མོའི་སྙིང་པོ་བཏོན་པ་ཙམ་གྱིས་འགྲུབ་པ་སྟེ། འདི་ཁོ་བོས་བརྗོད་པར་བགྱིའོ། །འདི་བཏོན་པ་ཙམ་གྱིས་སེམས་ཅན་ཐམས་ཅད་རེངས་པར་འགྱུར་རོ། །ན་མཿསརྦ་ཏ་ཐཱ་ག་ཏེ་བྷྱོ། བྷ་ག་བ་ཏེ། ཨོཾ་བྷ་ཡ་ནཱ་ཤ་ནེ་ཏྲཱ་ས་ནེ་ཏྲཱ་ས་ཡ། བྷྀ་ཀུ་ཊི་ཏ་ཏི་བེ་ཏ་ཏི་སྭཱཧཱ། རིག་པ་འདི་བཏོན་པ་ཙམ་གྱིས་བགེགས་ཐམས་ཅད་བཅོམ་པར་འགྱུར་རོ|་|བདག་སྲུང་ན། ཐལ་བ་ལ་ལན་བདུན་བཟླས་བརྗོད་བགྱིས་པས་བགྱིའོ། །གཞན་སྲུང་ན། སྤྱི་བོར་ལན་གསུམ་བཟླས་བརྗོད་བགྱིས་ཏེ་སྐྲ་མདུད་པར་བགྱིའོ། །སེམས་ཅན་ཐམས་ཅད་རེངས་པར་བགྱི་ན། ཡིད་ཀྱིས་བགྱིའོ། །དབང་དུ་བགྱི་ན། ཡར་གྱི་ངོ་ཟླ་བ་ཉ་ལ་ཞག་གཅིག་སྨྱུང་བ་བགྱིས་ལ་འཕགས་པ་སྤྱན་རས་གཟིགས་དབང་ཕྱུག་གི་མདུན་དུ་བྱང་ཆུབ་ཀྱི་ཤིང་གིས་ཞུགས་བུས་ལ་ཏིལ་གྱིས་ལན་བརྒྱ་སྟོང་སྦྱིན་སྲེག་བགྱིས་ན་དབང་དུ་འགྱུར་རོ། །མ་རུངས་པར་བགྱི་འཚལ་ན། མི་རུས་ཀྱི་ཕུར་བུ་བླངས་ལ་ལན་བརྒྱ་སྟོང་སྔགས་ཀྱིས་བཏབ་སྟེ་དགྲའི་ཁྱིམ་དུ་བཙུགས་ན་དགྲ་མ་རུངས་པར་འགྱུར་རོ། །དགྲ་འགུམ་ན། མར་གྱི་ངོ་ཞག་བརྒྱད་ལ་དུར་ཁྲོད་ཀྱི་ཐལ་བ་བླངས་ཏེ་དུར་ཁྲོད་ཀྱི་ཞུགས་སུ་ལན་བརྒྱ་སྟོང་སྦྱིན་སྲེག་བགྱིས་ན་འགུམ་མོ། །བསྐམ་ན། མར་གྱི་ངོ་ཞག་བཅུ་བཞི་ལ་ཆབ་ལྟེ་བ་ནུབ་ཙམ་དུ་ཞུགས་ལ་དགྲའི་སྲོག་བསྐམས་ཀྱི་བར་དུ་བཟླས་བརྗོད་བགྱིའོ། །མཚམས་བཅད་པར་འཆལ་ན། སེང་ལྡེང་གི་ཕུར་པ་སོར་བཞི་པ་བླངས་ཏེ་ཕུར་བུ་རེ་རེ་ལ་ཡང་ལན་བརྒྱ་རྩ་བརྒྱད་བཟླས་བརྗོད་བགྱིས་ལ་ཕྱོགས་བཞིར་བཙུགས་ན་མཚམས་བཅད་པར་འགྱུར་རོ། །ཡུལ་འཁོར་བཅིང་ན། ལན་ཉི་ཤུ་རྩ་གཅིག་བཟླས་བརྗོད་བགྱིས་པའི་ཆབ་ཀྱིས་བགྱིའོ། །སེམས་ཅན་རྣམས་བསྐྲད་ན། ལན་བདུན་བཟླས་བརྗོད་བགྱིས་པའི་ཡུངས་ཀར་གྱིས་བགྱིའོ། །ལིག་བུ་མིག་དང་ལྡོང་རོས་སྒྲུབ་ན། ཟླ་བ་གཅིག་ཟས་སུ་འོ་སྐྱོ་འཚལ་ཞིང་ཡར་གྱི་ངོ་ཚེས་བརྒྱད་ནས་ཞག་གསུམ་སྨྱུང་བ་བགྱིས་ཏེ་རིང་བསྲེལ་དང་བཅས་པའི་མཆོད་རྟེན་ནམ། སངས་རྒྱས་ཀྱི་སྐུ་གཟུགས་ཀྱི་སྤྱན་སྔར་ཤིང་ཨ་ཤྭཏྠའི་ལོ་མ་བདུན་གྱི་སྟེང་དུ་ལིག་བུ་མིག་དང་ལྡོང་རོས་བཞག་པ་དངོས་གྲུབ་གསུམ་བྱུང་གི་བར་དུ་བཟླས་བརྗོད་བགྱིའོ། །འབར་ན་ནི། ལོ་སྟོང་ཐུབ་པར་འགྱུར་རོ། །རིག་སྔགས་འཆང་སྐྲ་ལྕང་ལོ་འཁྱིལ་པ་ཅན་དུ་འགྱུར་རོ། །དུ་བ་འཐུལ་ན་ནི། མི་གདའ་བར་འགྱུར་རོ། །ལོ་དགུ་སྟོང་ཐུབ་པར་འགྱུར་རོ། །ཡུལ་འཁོར་མ་རུངས་པར་བགྱིད་པར་འཚལ་བས་མར་གྱི་ངོ་ཞག་བརྒྱད་ལ་དུར་ཁྲོད་ཀྱི་ཤིང་གིས་ཞུགས་བུས་ལ་ཡུངས་ཀར་དང་། དུག་དང་། ཁྲག་དང་བསྲེས་ལ་ལན་བརྒྱ་སྟོང་སྦྱིན་སྲེག་བགྱིས་ན་ཡུལ་འཁོར་མ་རུངས་པར་འགྱུར་རོ། །མར་གྱིས་ལན་བརྒྱ་སྟོང་སྦྱིན་སྲེག་བགྱིས་ན་ཞི་བར་འགྱུར་རོ། །དགྲ་འགུམ་ན། ཚེས་གྲངས་དང་སྐར་མ་གདམ་མི་འཚལ་ཏེ། ལུང་ཐང་གི་ཤིང་གིས་ཞུགས་བུས་ལ་ཤིང་ཨརྒའི་ལོ་མ་བརྒྱ་སྟོང་སྦྱིན་སྲེག་བགྱིས་ན་ཞག་གསུམ་ན་འགུམ་མོ། །ཤགས་འགྱེད་ན། རིག་པ་བཟླས་བརྗོད་བགྱིས་ལ་གདོང་ལ་བྱུགས་ན་རྒྱལ་བར་འགྱུར་རོ། །ཁྲོས་པའི་མདུན་དུ་བཟླས་བརྗོད་བགྱིས་ན་དགའ་བར་འགྱུར་རོ། །ཡུགས་ས་མོ་དབང་དུ་བགྱི་བར་འཚལ་བས་ཡར་གྱི་ངོ་ཞག་བརྒྱད་ལ་འཕགས་པ་སྤྱན་རས་གཟིགས་དབང་ཕྱུག་གི་མདུན་དུ་མེ་ཏོག་དཀར་པོ་བརྒྱ་སྟོང་སྦྱིན་སྲེག་བགྱིད་ན་དབང་དུ་འགྱུར་རོ། །དགྲ་ཚར་བཅད་ན། འཕགས་པ་སྤྱན་རས་གཟིགས་དབང་ཕྱུག་གི་མདུན་དུ་དུ་བ་མ་མཆིས་པའི་མེ་མདག་ལ་རྒྱ་སྐྱེགས་ཀྱིས་ལན་བརྒྱ་སྟོང་སྦྱིན་སྲེག་བགྱིའོ། །བཟླས་བརྗོད་བགྱིས་ན། གང་འདོད་པ་དེ་རྙེད་པར་འགྱུར་རོ། །མཁའ་འགྲོ་མ་ཐམས་ཅད་ཀྱི་དཀྱིལ་འཁོར་བཅིང་ན། ཡུངས་ཀར་ལ་ལན་བདུན་བཟླས་བརྗོད་བགྱིས་པས་བགྱིའོ། །ཆུ་སྲིན་ཀུ་མྦྷི་རའི་ཁ་བཅིང་ན། གསེག་མ་ལ་ལན་བདུན་བཟླས་བརྗོད་བགྱིས་ཏེ་ཆབ་ཏུ་བོར་ན་ཁ་བཅིང་བར་འགྱུར་རོ། །སེངྒེ་དང་། སྟག་དང་། མ་ཧེ་དང་། གླང་པོ་ཆེ་དང་། རྒྱལ་པོ་དང་། ཆོམ་རྐུན་གྱི་ནང་དུ་ཆུད་ན་བསམ་པར་བྱའོ|་|རི་མོ་མཁན་གསོ་སྦྱོང་བཟུང་བས་མ་གོད་པའི་རས་ལ་སངས་རྒྱས་ཀྱི་སྐུ་གཟུགས་བྲི་བར་བྱ་སྟེ། གཡོན་རོལ་དུ་ནི། ལག་ན་རྡོ་རྗེ། གཡས་རོལ་དུ་ནི། འཕགས་པ་སྤྱན་རས་གཟིགས་དབང་ཕྱུག་གོ། དེ་བཞིན་གཤེགས་པ་ནི། གསེར་གྱི་མདོག་ཅན་དུ་བྲིའོ། །ལག་ན་རྡོ་རྗེ་ནི། ལོ་བཅུ་དྲུག་ཙམ་ལོན་པའི་གཟུགས་འདྲ་ལ་ཁ་དོག་སྔོ་བསངས། རྒྱན་ཐམས་ཅད་ཀྱིས་བརྒྱན་པ་བྲིའོ། །འཕགས་པ་སྤྱན་རས་གཟིགས་ཀྱི་དབང་ཕྱུག་གི་གཡས་རོལ་དུ་ནི། ལྷ་མོ་བྲི། དེ་ཡང་འདམ་བུ་མདའ་རྒྱུ་ལྟར་དཀར་བའོ། །འཕགས་པ་སྤྱན་རས་གཟིགས་ཀྱང་དེ་དང་འདྲའོ། །ལྷ་མོ་ནི། པདྨའི་ཕྲེང་བས་བརྒྱན་པ་བྲིའོ། །དེའི་འོག་རོལ་དུ་སྒྲུབ་པ་པོ་པོག་ཕོར་ཐོགས་པ་བྲིའོ།། སྒྲུབ་པ་པོ་ཟླ་བ་གཅིག་གི་བར་དུ་ཟས་སུ་འོ་སྐྱོ་འཚལ་ཞིང་ཡར་གྱི་ངོ་ཚེས་བརྒྱད་ལ་མཆོད་པ་རྒྱ་ཆེན་པོ་བགྱིས་ཏེ་ལྷ་མོ་ལ་འོད་ཟེར་བྱུང་གི་བར་དུ་བཟླས་བརྗོད་བགྱིའོ། །འོད་ཟེར་དེ་དེ་བཞིན་གཤེགས་པའི་ཞབས་ཀྱི་མཐེ་བོང་ནུབ་པར་འགྱུར་རོ། །དེ་ནས་དངོས་གྲུབ་ཏུ་འགྱུར་ཏེ། རྒྱལ་པོ་ཉིད་སྩོལ་ཏོ། །ཡིད་ཀྱིས་གང་བསམ་པ་དེ་དག་ཐམས་ཅད་འབྱོར་ཏོ། །ཡར་གྱི་ངོ་ཟླ་བ་ཉ་ནས་ཞག་གསུམ་སྨྱུང་བ་བགྱིས་ཏེ་རྒྱ་མཚོར་འབབ་པའི་ཆུ་ཀླུང་དུ་ཞུགས་ལ་པདྨ་འབུམ་བོར་ན་ལྷ་མོ་ཉིད་མཐོང་ངོ་། །དམ་པ་གང་བླངས་པ་དེ་རྙེད་དེ། རྒྱལ་པོ་ཉིད་དམ། རིག་སྔགས་འཆང་ཉིད་དུ་འགྱུར་རོ། །ཐ་མར་ཞག་གསུམ་སྨྱུང་བ་བགྱིའོ། །འཕགས་པ་སྤྱན་རས་གཟིགས་ཀྱི་དབང་ཕྱུག་གི་ཆོ་ག་རྫོགས་སོ། ། །།དེ་ནས་བཅོམ་ལྡན་འདས་ཀྱིས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ། ངས་ཀྱང་གང་གིས་རྡོ་རྗེའི་རིགས་དང་། ཆོ་ག་རྒྱས་པ་ཆེན་པོ་གཞན་དག་ཀྱང་འགྲུབ་པར་འགྱུར་པའི་གསང་སྔགས་ཀྱི་ཆོ་ག་རྒྱས་པ་འདིར་སྦྱིན་པར་བགྱིའོ། །དེ་ལྟ་བས་ན། ཆོ་ག་རྒྱས་པ་ཐམས་ཅད་དུ་འདི་གཅིག་པུ་སྦར་བར་བགྱིའོ། །ལག་ན་རྡོ་རྗེ། འདི་དྲན་པ་ཙམ་གྱིས་རིག་པའི་ལྷ་ཐམས་ཅད་མངོན་དུ་འགྱུར་རོ། །ན་མ་སརྦ་ཏ་ཐཱ་ག་ཏེ་བྷྱོ་བྷ་ག་བདྷྱཿ། ཨོཾ་རུ་རུ་སྤུ་རུ་ཛྭ་ལ་ཏིཥྛ་སིདྡྷ་ལོ་ཙ་ནེ་སརྦ་ཨརྠ་སཱ་དྷ་ནི་སྭཱཧཱ། ལག་ན་རྡོ་རྗེ། སྤྱན་འདི་ནི། སེམས་ཅན་ཐམས་ཅད་ཀྱི་དོན་གྱི་ཕྱིར་དེ་བཞིན་གཤེགས་པ་བྱེ་བ་ཕྲག་བཅུས་དགོངས་ཏེ། ངས་ཀྱང་ད་ལྟར་སེམས་ཅན་རྣམས་ཀྱི་དོན་དང་། ཁྲོ་བོ་རྣམས་དགའ་བར་བྱ་བ་དང་། གདུལ་དཀའ་བ་རྣམས་འདུལ་བའི་ཕྱིར་བཤད་དོ། །རི་མོ་མཁན་གསོ་སྦྱོང་དང་ལྡན་པས་མ་གོད་པའི་རས་ལ་སྦྱིན་དང་མ་འདྲེས་པའི་ཚོན་གྱིས་སངས་རྒྱས་ཀྱི་སྐུ་གཟུགས་གསེར་གྱི་མདོག་ཅན་ཆོས་སྟོན་པ་བྲི་བར་བྱའོ། །དེའི་གཡས་རོལ་དུ་འཕགས་པ་ལག་ན་རྡོ་རྗེ་མདོག་སྔོ་བསངས། རྒྱན་ཐམས་ཅད་ཀྱིས་བརྒྱན་པ་ཆོས་ཉན་པ་བྲིའོ། །དེ་བཞིན་གཤེགས་པའི་གཡོན་རོལ་དུ་འཕགས་པ་སྤྱན་རས་གཟིགས་དབང་ཕྱུག་འདམ་བུ་མདའ་རྒྱུ་ལྟར་དཀར་བ། སྐྲའི་ཐོར་ཚུགས་དང་ཅོད་པན་ཅན། སྟག་ལྤགས་ཀྱི་ཤམ་ཐབས་གྱོན་པ། ལག་ན་རྔ་ཡང་ཐོགས་པ་བྲི་བར་བྱའོ། །དེ་ནས་ཟླ་བ་ཕྱེད་ཟས་སུ་འོ་སྐྱོ་འཐུང་ཞིང་རིག་པ་བཟླས་བརྗོད་བྱའོ། །དེས་མར་གྱི་ངོ་ཞག་བཅུ་བཞི་ལ་ཉིན་ཞག་གཅིག་སྨྱུང་བ་བགྱིས་ཏེ་རི་མོའི་གཟུགས་ལ་མཆོད་པ་རྒྱ་ཆེར་བྱས་ལ་རིག་པ་ལན་བརྒྱ་སྟོང་བཟླས་བརྗོད་བྱའོ། །དེ་བཞིན་གཤེགས་པའི་གློ་གཡས་ནས་འོད་ཟེར་བྱུང་སྟེ་ལག་ན་རྡོ་རྗེ་ལ་ནུབ་ན་འགྲུབ་པར་འགྱུར་རེ།། རྒྱལ་པོ་ཉིད་དམ། རིག་སྔགས་འཆང་ཉིད་དེ། དམ་པ་གཉིས་སྦྱིན་པར་བྱེད་དོ། །རྒྱལ་པོ་ཉིད་དུ་གྱུར་ན། རིག་སྔགས་འཆང་རྣམས་ཀྱི་འཁོར་ལོས་བསྒྱུར་བར་འགྱུར་རོ|་|རིག་སྔགས་འཆང་ཉིད་དུ་གྱུར་ན་ནི། རིག་སྔགས་འཆང་དྲུག་ཁྲིའི་བདག་པོ་ཉི་མ་ཤར་བ་ལྟ་བུའི་མདོག་ཅན་ལོ་བཅུ་དྲུག་ལོན་པ་ལྟ་བུའི་ལུས་སུ་འགྱུར་རོ། །ལོ་ཁྲི་བཞི་སྟོང་ཐུབ་པར་འགྱུར་རོ། །སེམས་ཅན་ཐམས་ཅད་ཀྱི་སྐད་ཤེས་པར་འགྱུར་རོ། །སློང་མོའི་ཟས་བཟའ་ཞིང་རིའི་རྩེ་མོར་རིང་བསྲེལ་དང་བཅས་པའི་མཆོད་རྟེན་གྱི་དྲུང་དུ་མེ་ཏོག་དཀར་པོ་ཞོ་དང་། སྦྲང་རྩི་དང་། མར་ལ་སྨྱུགས་པ་འབུམ་སྦྱིན་སྲེག་བྱ་ཞིང་ལན་འབུམ་བཟླས་བརྗོད་བྱས་ན། དེ་བཞིན་གཤེགས་པའི་གཟུགས་མངོན་སུམ་དུ་འགྱུར་ཏེ། མཐོང་ནས་གང་སྒྲུབ་པ་དེ་འགྲུབ་བོ། །སུ་ཞིག་རྟག་ཏུ་ལན་གསུམ་བརྗོད་ཅིང་ཕྱག་ཀྱང་འཚལ་ན། དེས་དེ་བཞིན་གཤེགས་པ་བྱེ་བ་ཕྲག་བཅུ་ལ་བསྟི་སྟང་བྱས་པ་དང་། བླ་མར་བྱས་པ་དང་། རིམ་གྲོ་བྱས་པ་དང་། མཆོད་པ་བྱས་པར་འགྱུར་རོ། །གང་གི་ཚེ་ཤི་བ་དེའི་ཚེ་བདེ་བ་ཅན་དུ་སྐྱེ་བར་འགྱུར་རོ། །མར་གྱི་ངོ་ཞག་བརྒྱད་ལ་ཉིན་ཞག་གཅིག་སྨྱུང་བ་བྱས་ཏེ་བཅོམ་ལྡན་འདས་ལ་མཆོད་པ་བྱས་ལ་ཙནྡན་དཀར་པོས་དཀྱིལ་འཁོར་བྱུགས་ཏེ་རིག་པ་ལན་བརྒྱ་སྟོང་བཟླས་བརྗོད་བྱས་ན་། དེ་ནས་དངོས་གྲུབ་ཏུ་འགྱུར་རོ། །དེའི་འོག་ཏུ་ལས་ཐམས་ཅད་ལ་སྦྱར་བར་བྱའོ། །མིག་ལ་ལན་བདུན་བསྔགས་ན། གང་མཐོང་བ་དེ་དབང་དུ་འགྱུར་རོ། །ལག་ན་རྡོ་རྗེའི་མདུན་དུ་ལྡོང་རོས་ལ་ལན་བརྒྱད་བརྒྱ་བཟླས་བརྗོད་བྱས་ནས་མིག་ལ་བསྐུས་ན། གང་མཐོང་བ་དེ་དབང་དུ་འགྱུར་རོ། །རྐང་རྗེས་ཀྱིས་བླངས་ལ་ལན་བདུན་སྔགས་ཀྱིས་བཏབ་སྟེ་བུད་མེད་གང་གི་མགོ་བོར་གཏོར་ན། དེ་དབང་དུ་འགྱུར་རོ། །བདག་གི་མཆིལ་མ་ལན་བདུན་བསྔགས་ཏེ་ཐིག་ལེ་བྱས་ན། གང་མཐོང་བ་དེ་དབང་དུ་འགྱུར་རོ། །གང་གི་མིང་ནས་བརྗོད་དེ་ཡུངས་ཀར་ལ་ལན་བརྒྱད་བརྒྱ་སྦྱིན་སྲེག་བྱས་ན། དེ་དབང་དུ་འགྱུར་རོ། །བུད་མེད་དབང་དུ་བྱ་ན། ཏིལ་ནག་པོ་ལས་ལན་བརྒྱད་བརྒྱ་སྦྱིན་སྲེག་བྱ་ཞིང་མིང་ནས་ཀྱང་བརྗོད་ན་དེ་དབང་དུ་འགྱུར་རོ། །ཀྲྀཥྞ་ཙ་ཏུ་ར་ད་ཤྱེ་ན་ཤྭེ་ཏ། ཕུཥྞ་ན་མ་ཨཥྚ་ས་ཧ་སྲ་ཎེ། བཛྲ་པཱ་ཎི་ར་ཧ་ན་ཏ་པ་སྱ། རཱ་ཛ་པ་ད་ནི་ཡ་ཤོ་བ་ཏི། ལྡོང་རོས་ཀྱིས་ལག་མཐིལ་དུ་གཟུགས་བྲིས་ལ་མིང་ནས་བརྗོད་ཅིང་ཉི་མ་ལ་བལྟས་ཏེ་ལན་བརྒྱད་བརྒྱ་བཟླས་བརྗོད་བྱས་ན། དབང་དུ་འགྱུར་རོ། །དུར་ཁྲོད་ཀྱི་སོལ་བ་བླངས་ཏེ་རྩིག་ངོས་ལ་གཟུགས་བྲིས་ལ་མོ་མཚན་གྱི་སྟེང་དུ་མཛུབ་མོ་བཞག་སྟེ་ལན་བརྒྱད་བརྒྱ་བཟླས་བརྗོད་བྱས་ན། དབང་དུ་འགྱུར་རོ། །སྤྲ་ཚིལ་ལ་གཟུགས་བྱས་ཏེ་ལྡན་པ་གཡས་པར་བཞག་ལ་ལན་བརྒྱད་བརྒྱ་བཟླས་བརྗོད་བྱས་ན། དབང་དུ་འགྱུར་རོ། །གི་ཝང་དང་། ཤུ་དག་དང་། དུང་གི་ལྟེ་བ་དང་། རྒྱ་སྤོས་རྣམས་བསྲེས་ཏེ་བཏགས་ལ་རིག་པ་ལན་བརྒྱ་སྟོང་བཟླས་བརྗོད་བྱས་ཏེ་ཟས་དང་། སྐོམ་དང་། བཟའ་བའི་ནང་དུ་བཏབ་ན། དབང་དུ་འགྱུར་རོ། །དུར་ཁྲོད་ཀྱི་ཐལ་བ་བླངས་ལ་ལག་ན་རྡོ་རྗེའི་མདུན་དུ་ལན་བརྒྱད་བརྒྱ་བཟླས་བརྗོད་བྱས་ཏེ་གང་ལ་གཏོར་བ་དེ་དབང་དུ་འགྱུར་རོ། །ལག་ན་རྡོ་རྗེའི་མདུན་དུ་མེ་ཏོག་དཀར་པོ་བརྒྱད་བརྒྱ་གཏོར་ན། དབང་དུ་འགྱུར་རོ། །དུར་ཁྲོད་ཀྱི་སོལ་བ་བླངས་ཏེ་རྩིག་ངོས་ལ་གཟུགས་བྲིས་ལ་ཤིང་ཀཱ་ར་བཱི་རའི་མེ་ཏོག་བརྒྱ་རྩ་བརྒྱད་མོ་མཚན་དུ་ཕོག་པར་བྱས་ན། དབང་དུ་འགྱུར་རོ། །བ་ལང་གི་ལྕི་བ་ས་ལ་མ་ལྷུང་བ་བླངས་ཏེ་ཞི་བའི་མཚན་གཅིག་བྱས་ལ་དེའི་མདུན་དུ་རྩཝ་ཀུ་ཤ་ལས་མདུང་རྩེ་གསུམ་བྱས་པས་ཉི་མ་གསུམ་དུ་ཡུངས་ཀར་དང་། ཞོ་དང་། སྦྲང་རྩི་བསྲེས་པའི་སྲེག་བླུགས་ལན་བདུན་བདུན་སྦྱིན་སྲེག་བྱས་ན། དབང་དུ་འགྱུར་རོ། །ལག་ན་རྡོ་རྗེའི་མདུན་དུ་ལྡུམ་བུ་བ་ཤ་ཀའི་ཡམ་སྲེག་ཤིང་བརྒྱད་བརྒྱ་སྦྱིན་སྲེག་བྱས་ན། དབང་དུ་འགྱུར་རོ། །གཞོན་ནུ་མ་དབང་དུ་བྱ་ན། ཨ་རང་ག་ནའི་མེ་ཏོག་བརྒྱ་སྟོང་གིས་ལག་ན་རྡོ་རྗེ་ལ་ཕོག་པར་བྱས་ན་གཞོན་ནུ་མ་དབང་དུ་འགྱུར་རོ། །ཡུགས་ས་མོ་དབང་དུ་བྱ་ན། ལག་ན་རྡོ་རྗེའི་མདུན་དུ་མོན་སྲན་གྲེའུ་སྦྱིན་སྲེག་བྱ་ཞིང་མིང་ནས་ཀྱང་བརྗོད་ན་དབང་དུ་འགྱུར་རོ། །ཐལ་བ་ལ་ལན་བདུན་སྔགས་ཀྱིས་བཏབ་སྟེ་བུད་མེད་ལ་གཏོར་ན། དབང་དུ་འགྱུར་རོ། །བུད་མེད་ཀྱི་མདུན་དུ་རིག་པ་ལན་བརྒྱད་བརྒྱ་བཟླས་བརྗོད་བྱས་ན། དབང་དུ་འགྱུར་རོ། །ཤིང་བུ་སོར་བཞི་པ་བླངས་ཏེ་གཡབ་ན་འོང་ཞིང་དབང་དུ་འགྱུར་རོ། །མེ་ཏོག་དཀར་པོ་བླངས་ཏེ་ལག་ན་རྡོ་རྗེའི་མདུན་དུ་ལན་བརྒྱ་སྟོང་བཟླས་བརྗོད་བྱས་ལ་བུད་མེད་མཐོང་བར་གཡབ་ན་འོང་ཞིང་དབང་དུ་འགྱུར་རོ། །གཞན་ཡང་ལས་བྱེད་འདོད་ན། བུ་མོ་གཙང་མས་བཀལ་བའི་སྐུད་པ་བརྐྱང་ནས་བླངས་ཏེ་ལག་ན་རྡོ་རྗེའི་མདུན་དུ་ཉིས་ཁུགས་དང་བཞི་ཁུགས་བྱས་པ་བཞག་ལ་བཟླས་བརྗོད་བྱས་ཏེ་གཅིག་ལ་གཅིག་འཁྲིལ་ན་དགོངས་པ་འགྲུབ་པར་འགྱུར་རོ། །གེའུ་ཝང་སྒྲུབ་པར་འདོད་པས་ཉི་མ་བདུན་དུ་ཟ་ཨས་སུ་འོ་སྐྱོ་འཐུང་ཞིང་ཡར་གྱི་ངོ་ཞག་བཅུ་བཞི་ལ་ཉིན་ཞག་གཅིག་སྨྱུང་བ་བྱས་ཏེ་ལག་ན་རྡོ་རྗེ་ལ་མཆོད་པ་རྒྱ་ཆེར་བྱས་ལ་གིའུ་ཝང་པདྨའི་སྟེང་དུ་བཞག་སྟེ་འབར་གྱི་བར་དུ་བཟླས་བརྗོད་བྱའོ། །འབར་ནས་བླང་བར་བྱའོ། །བླངས་པ་ཙམ་གྱིས་ཉི་མ་ཤར་བ་ལྟ་བུའི་མདོག་དང་ལྡན་པར་འགྱུར་རོ། །དགོས་པ་ཐམས་ཅད་ཡིད་ཀྱིས་བསམ་པ་ཙམ་གྱིས་འབྱུང་བར་འགྱུར། རིག་སྔགས་འཆང་ཐམས་ཅད་ཀྱིས་མི་སོད་པར་འགྱུར། ལོ་དགུ་སྟོང་ཐུབ་པར་འགྱུར་རོ། །ཟླ་བ་ཕྱེད་ཟས་སུ་འོ་སྐྱོ་འཐུང་ཞིང་། དེ་ནས་རིག་སྔགས་འཆང་གིས་གྲོག་མཁར་གྱིས་ལས་ནོར་རྒྱས་ཀྱི་གཟུགས་བྱས་ལ་དེའི་སྟེང་དུ་འདུག་སྟེ་ནམ་འགུལ་བར་གྱུར་གྱི་བར་དུ་རིག་སྔགས་ལན་འབུམ་བཟླས་བརྗོད་བྱས་ན་ལོངས་སྤྱོད་སྟེར་རོ། །འདས་པ་དང་། མ་འོངས་པ་དང་། ད་ལྟར་བྱུང་བ་རྣམས་སྟོན་པར་འགྱུར། ལོ་ལྔ་བརྒྱ་ཐུབ་པར་འགྱུར|་བདེ་བ་ཅན་དུ་སྐྱེ་བར་འགྱུར། ཟས་སུ་འོ་སྐྱོ་འཐུང་ཞིང་ལག་ན་རྡོ་རྗེའི་མདུན་དུ་ལན་འབུམ་བཟླས་བརྗོད་བྱས་ན། ལོངས་སྤྱོད་སྟེར་ཏེ། ཟླ་བ་གཅིག་གི་བར་དུ་སློང་མ་ཨོའི་ཟས་བཟའ་ཞིང་ཡར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བགྱིས་ཏེ་ལག་ན་རྡོ་རྗེ་ལ་མཆེད་པ་བྱས་ནས་བཅོམ་ལྡན་འདས་ལ་ཡང་ལྷག་པར་མཆོད་དེ་ལག་ན་རྡོ་རྗེའི་རྐང་པ་ནས་བཟུང་ལ་རིག་སྔགས་བཟླས་བརྗོད་བྱས་ཏེ་ལག་ན་རྡོ་རྗེའི་གཟུགས་འགུལ་བར་གྱུར་གྱི་བར་དུ་བཟླས་བརྗོད་བྱའོ། །འགུལ་བར་གྱུར་ན། གྲུབ་བ་ཐམས་ཅད་ཀྱིས་མཐོང་བར་འགྱུར་རོ། །ཡིད་ཀྱིས་བསམ་པས་ཁ་ཟས་འབྱུང་བར་འགྱུར། ལོ་ལྔ་སྟོང་ཐུབ་པར་འགྱུར་རོ། །དེ་ནས་གནོད་སྦྱིན་གྱི་དབང་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སངས་རྒྱས་བཅོམ་ལྡན་འདས་གང་དག་སེམས་ཅན་རྣམས་ཀྱི་དོན་གྱི་སླད་དུ་གསང་སྔགས་འདི་ལྟ་བུ་གསུངས་པ་ནི། ངོ་མཚར་ཏོ་ཞེས་གསོལ་ནས་འཁོར་ཐམས་ཅད་ངོ་མཚར་དུ་གྱུར་ཏོ། །སངས་རྒྱས་ཀྱི་སྤྱན་གྱི་ཆོ་ག་རྫོགས་སོ།། །།དེ་ནས་འབྱུང་པོའི་བདག་པོ་དབང་ལྡན་གྱིས་བླ་གོས་ཕྲག་པ་ཨ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གི་མིག་འདི་ནི། རིག་པ་ཐམས་ཅད་ཀྱི་གཙོ་མོ་ལགས་ཏེ། འདི་དྲན་པ་ཙམ་གྱིས་བདག་གིས་དངོས་གྲུབ་སྩལ་བར་བགྱིའོ། །བཅོམ་ལྡན་འདས། བདག་གིས་ཀྱང་སེམས་ཅན་རྣམས་ཀྱི་དོན་གྱི་སླད་དུ་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་མིང་དབུལ་བར་འཚལ་ལོ། །འབྱུང་པོའི་བདག་པོ། དེ་བཞིན་དུ་གྱིས་ཤིག་།དེ་ནས་འབྱུང་པོའི་བདག་པོ་དབང་ལྡན་གྱིས་ལག་ན་རྡོ་རྗེའི་ཞབས་གཉིས་ལ་བཏུགས་ནས་ལག་ན་རྡོ་རྗེ་ལ་འདི་སྐད་ཅེས་སྨྲས་སོ|་|གསང་བའི་བདག་པོ། ཁྱོད་ཀྱིས་རིག་སྔགས་ཆེན་པོའི་མིང་འདི་བཞེས་སུ་གསོལ། ན་མོ་རུ་ཏྲཱ་ཡ་ལེ་ལེ། ལི་ལི་ལི་ལི། ཀ་མུ་ཀཱ་ཡ་སྭཱཧཱ། ལིག་བུ་མིག་བུད་མེད་ཀྱི་ས་ཀྲས་བཅིངས་ལ་རྒྱ་མཚོ་འབབ་པའི་ཆུ་ཀླུང་གི་ངོས་གཉིས་ཀའི་འཇིམ་པ་བླངས་པའི་ནང་དུ་བཅུག་སྟེ་བསྲེགས་ལ་དབང་ཕྱུག་ཆེན་པོའི་གནས་སུ་སོང་ནས་མར་གྱི་ངོ་ཞག་བརྒྱད་དམ་བཅུ་བཞི་ལ་ཞག་གཅིག་སྨྱུང་བ་བྱས་ཏེ་ལིག་བུ་མིག་བླངས་ལ་ལན་བརྒྱ་སྟོང་བཟླས་བརྗོད་བྱས་ནས་སྦྱང་བར་བྱ་སྟེ། མིག་ལ་བསྐུས་ན་གང་ལ་བལྟས་པ་དེ་དབང་དུ་འགྱུར་རོ། །མར་གྱི་ངོ་ཞག་བརྒྱད་ལ་དུར་ཁྲོད་ཀྱི་སོལ་བ་བླངས་ཏེ་མིའི་ཐོད་པ་ལ་བརྡར་ནས་ལན་བརྒྱ་རྩ་བརྒྱད་བཟླས་བརྗོད་བྱས་པས་ཐིག་ལེ་བྱས་ན། གང་ལ་བལྟས་པ་དེ་དབང་དུ་འགྱུར་རོ། །སོལ་བ་ཡང་བསྒྲུབ་པར་བྱ་སྟེ། ཞག་བདུན་གྱི་བར་དུ་ཟས་སུ་ཆུ་དང་ཕྱེའི་འདག་གུ་ཟ་ཞིང་མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བགྱིས་ཏེ་དུར་ཁྲོད་དུ་སོང་ལ། དེ་ནས་ཐག་བུ་ལ་སྐྱང་ནུལ་བ་ཀོ་ཙམ་བྱས་ཏེ་མཆོད་པ་ཆེན་པོ་བྱས་ནས་དུར་ཁྲོད་ཀྱི་སོལ་བ་བླངས་ཏེ། དེ་ནས་རིག་སྔགས་འཆང་གིས་སོལ་བ་མིའི་ཐོད་པའི་ནང་དུ་བཞག་ལ་ལག་པས་མནན་ཏེ་དུད་པར་འཐུལ་བར་གྱུར་གྱི་བར་དུ་རིག་སྔགས་བཟླས་བརྗོད་བྱས་ནས་བླངས་ཏེ་ཐིག་ལེ་བྱས་ན། ལུས་མི་སྣང་བར་འགྱུར་ཞིང་། བསམ་པས་ཀྱང་ཁ་ཟས་འབྱུང་བར་བྱེད་དེ། ཚེ་ལོ་སྟོང་ཐུབ་པར་འགྱུར་ལ། དབང་ཕྱུག་ཆེན་པོའི་ལས་རྣམས་བཀླགས་པ་ཙམ་གྱིས་འགྲུབ་པར་འགྱུར་རོ། །ཚེས་གྲངས་དང་སྐར་མ་ཡང་གདམ་མི་འཚལ། སྨྱུང་བ་ཡང་བགྱི་མི་འཚལ་བར་བུད་མེད་ཤི་བའི་རོ་བླངས་ལ་དྲི་དང་། མེ་ཏོག་གིས་བརྒྱན་ཏེ། དེའི་མོ་མཚན་དུ་ཏིལ་གྱི་ལོ་མ་བཞག་ནས་དེའི་སྟེང་དུ་ལྡོང་རོས་སྲང་གཅིག་གམ། སྲང་ཕྱེད་བཞག་ལ་འབར་བར་གྱུར་གྱི་བར་དུ་རིག་སྔགས་བཟླས་བརྗོད་བྱས་ཏེ། འབར་བར་གྱུར་ན་དབང་ཕྱུག་ཆེན་པོའི་གཟུགས་དང་ལྡན་པར་འགྱུར་ཞིང་། རབ་ཏུ་འཇོམས་པའི་ཚོགས་ཀྱིས་བསྐོར་ལ་ལོ་དགུ་སྟོང་ཐུབ་ཅིང་དབང་ཕྱུག་ཆེན་པོའི་ཚོགས་རྣམས་དབང་དུ་འགྱུར་རོ།། དུར་ཁྲོད་ཀྱི་ཐལ་བ་བླངས་ཏེ་མིའི་ཐོད་པའི་སྣོད་དུ་བཞག་ལ། མཚན་གཅིག་འདུག་པའི་གནས་སུ་སོང་ནས་ཞག་གསུམ་སྨྱུད་བ་བྱས་ཏེ་མར་གྱི་ངོ་ཞག་བཅུ་བཞི་ལ་འབྱུང་པོའི་གཏོར་མ་ཡང་བྱས་ལ། དེ་ནས་ཐོད་པའི་སྣོད་ལག་ཏུ་བླངས་ཏེ་དངོས་གྲུབ་རྣམ་གསུམ་དུ་གྱུར་གྱི་བར་དུ་བཟླས་བརྗོད་བྱས་ན། དུད་པ་འཐུལ་བས་ནི|་ལུས་མི་སྣང་བར་འགྱུར་ཞིང་ཚེ་ལོ་བརྒྱ་སྟོང་ཐུབ་པར་འགྱུར་རོ། །འབར་བར་འགྱུར་ཏེ། ཐིག་ལེ་བྱས་པས་ནི། སྐྲ་ལྕང་ལོ་འཁྱིལ་བར་འགྱུར་ཞིང་ནམ་མཁའ་ལ་འགྲོ་བ་དང་། ཚེ་ལོ་ལྔ་སྟོང་ཐུབ་པར་འགྱུར་རོ། །གི་ཝང་སྒྲུབ་པར་འདོད་པས་ནི། མར་གྱི་ངོ་ཞག་གཅིག་སྨྱུང་བ་བྱས་ཏེ་ལག་ན་རྡོ་རྗེའི་མདུན་དུ་མཆོད་པ་བྱས་ལ་ལག་ན་རྡོ་རྗེའི་ལག་ཏུ་གིའུ་ཝང་བཞག་ནས་འབར་བར་གྱུར་གྱི་བར་དུ་བཟླས་བརྗོད་བྱས་ཏེ་འབར་བར་གྱུར་ན། བླངས་པ་ཙམ་གྱིས་སྟོབས་གླང་པོ་ཆེ་དང་མཉམ་ཞིང་ཕ་རོལ་གྱི་མཚོན་གྱིས་ཀྱང་མི་ཚུགས་ལ་ཚེ་ལོ་སུམ་སྟོང་ཐུབ་པར་འགྱུར་བ་དང་། གང་གཏམ་བྱས་པ་དེ་དབང་དུ་འགྱུར་ཞིང་། དབང་ཕྱུག་ཆེན་པོའི་གཡོག་རྣམས་ཀྱིས་ཉིན་གཅིག་བཞིན་ཏི་ན་ར་བཅུ་གཉིས་དང་། གོས་ཕྲུགས་བཅུ་གཉིས་སྦྱིན་པར་བགྱིད་ཅིང་། སྔོན་མ་བྱུང་བའི་བུད་མེད་ཀྱང་ཁྲིད་དེ་འོང་བར་འགྱུར་རོ། །དབང་ཕྱུག་ཆེན་པོའི་ཆོ་ག་རྫོགས་སོ། ། །།དེ་ནས་མ་ཏངྒི་རྒྱལ་པོ་ཕུར་བུ་གསུམ་པས་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །ལག་ན་རྡོ་རྗེ། བདག་གིས་ཀྱང་སེམས་ཅན་ཐམས་ཅད་ཀྱི་དོན་གྱི་ཕྱིར་མིག་དབུལ་བར་བགྱིས་ཏེ། འདི་དྲན་པ་ཙམ་གྱིས་བདག་གི་ཆོ་ག་རྒྱས་པ་ཐམས་ཅད་འགྲུབ་པར་འགྱུར་རོ། །དེ་ནས་མ་ཏང་གི་རྒྱལ་པོ་ཕུར་བུ་གསུམ་པས་བཅོམ་ལྡན་འདས་དང་། ལག་ན་རྡོ་རྗེའི་ཞབས་ལ་མགོ་བོས་ཕྱག་འཚལ་ནས་གསང་སྔགས་སྨྲས་པ། ན་མོ་བཛྲ་པཱ་ཎི་སྱ། མ་ཧཱ་ཡཀྵ་སེ་ནཱ་པ་ཏི་སྱ། ན་མཿན་མཿཏྲི་ཤ་ཀརྨ་ཏཾ་གརྫ་སྱ། ཨ་ཊ་བ་ཊ། ཨུ་བུ་རི་ཎི། གཽ་རི་གནྡྷ་རི། ཧ་ན་ད་ཧ། པ་ཙ་པ་ཙ། སནྟར་བ་ཡ། ཏུ་རུ་ཏུ་རུ། ཀམྤཱ་ཡ་སྭཱཧཱ། ཡར་གྱི་ངོ་ཚེས་བརྒྱད་ཀྱི་སྲོད་ལ་དཀྱིལ་འཁོར་སྐྱང་ནུལ་གྱིས་བྱུགས་ནས་ཕུར་བུ་གསུམ་པ་ལ་དྲི་དང་། མེ་ཏོག་དང་། བདུག་པ་ཕུལ་ཏེ་བཅོམ་ལྡན་འདས་དང་། ལག་ན་རྡོ་རྗེ་ལ་བདུག་པ་གསོལ་ནས་ཞག་གཅིག་སྨྱུང་བ་བྱས་ཏེ་རིག་སྔགས་ལན་བརྒྱ་སྟོང་བཟླས་བརྗོད་བྱས་ན། འགྲུབ་པར་འགྱུར་ཏེ། དེའི་འོག་ཏུ་ལས་བརྩམ་པར་བྱའོ། །བུད་མེད་དབང་དུ་བྱ་ན། ཚེས་གྲངས་དང་རྒྱུ་སྐར་ཡང་གདམ་མི་དགོས། སྨྱུང་བ་ཡང་བྱ་མི་དགོས་པར་ཀཱ་ར་བཱི་རའི་ཡམ་སྲེག་ཤིང་གིས་མིང་ནས་སྨོས་ཤིང་བརྒྱ་སྟོང་གིས་སྦྱིན་སྲེག་བྱས་ན། དབང་དུ་འགྱུར་རོ། །དཀྱིལ་འ་ཁོར་སྐྱང་ནུལ་གྱིས་བྱུགས་ལ་ལན་ཚྭ་ལས་གཟུགས་བྱས་ནས་མཚོན་རྣོན་པོས་རྐང་པ་ནས་བརྩམས་ཏེ་བཅད་ཅིང་དུད་པ་མེད་པའི་འདབ་མ་ལ་ལན་བརྒྱད་བརྒྱ་སྦྱིན་སྲེག་བྱས་ན་ཡང་དབང་དུ་འགྱུར་རོ། །ཡར་གྱི་ངོ་ཚེས་ལྔ་ལ་ཡང་མིའི་རུས་པའི་ཕུར་བུ་ས་ལ་བཏབ་སྟེ་དེའི་སྟེང་དུ་མར་མེ་སྦར་ལ་མར་མེ་དེའི་མེ་ལྕེ་འབར་བ་ལ་ནིམ་པའི་ལོ་མ་ཁབ་ཀྱིས་བཙུགས་ཏེ་མིང་ནས་སྨོས་ཤིང་བརྒྱད་བརྒྱ་སྦྱིན་སྲེག་བྱས་ན། དབང་དུ་འགྱུར་རོ། །ཡར་གྱི་ཚེས་བཅུ་གསུམ་ལ་རས་བལ་གྱི་འདབ་མ་རྒྱ་སྐྱེགས་ཀ་ཡིས་ཁ་དོག་བསྒྱུར་བ་སྲེད་མེད་ཀྱི་བུའི་ཆུང་མ་ལ་ཕུལ་བ་ལས་མར་མེའི་སྙིང་པོ་བྱས་ཏེ་མར་མེ་སྦར་ལ་ཀཱ་ར་བཱི་རའི་མེ་ཏོག་ཁབ་ཀྱིས་བཙུགས་ཏེ་བརྒྱ་སྟོང་སྦྱིན་སྲེག་བྱས་ན་ཡང་དབང་དུ་འགྱུར་རོ། །ཡར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ་ཨ་ཏི་མུཀྟ་ཀའི་མེ་ཏོག་བརྒྱ་སྟོང་གིས་དཀའ་ཟློག་མའི་མོ་མཚན་ལ་བསྣུན་ན་ཡང་གྲོང་དང་། ལོངས་སྤྱོད་ཀྱི་གཞི་སྦྱིན་པར་བྱེད་དོ། །མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ་ཨ་རང་ག་ནའི་མེ་ཏོག་གིས་དཀའ་ཟློག་མའི་རྐང་པ་ལ་བསྣུན་ན། བུ་མོ་ཐོབ་པར་འགྱུར་རོ། །བུད་མེད་དབང་དུ་བྱ་ན། ལག་ན་རྡོ་རྗེའི་མདུན་དུ་མེ་ཏོག་དཀར་པོ་བརྒྱད་བརྒྱ་ཕུལ་ན་དབང་དུ་འགྱུར་རོ། །ཡར་གྱི་ངོ་ཞག་ལྔ་ལ་ཞག་གཅིག་སྨྱུང་བ་བྱས་ཏེ་ཀམ་པོ་ཛ་འི་ཤིང་གིས་མེ་སྦར་ལ་ཀོ་ཤ་ཏ་ཀའི་མེ་ཏོག་བརྒྱ་སྟོང་གིས་མིང་ནས་སྨོས་ཤིང་སྦྱིན་སྲེག་བྱས་ན། མོ་མཚན་རུལ་བར་འགྱུར་རོ། །དཀའ་ཟློག་མའི་འོ་མས་བཀྲུས་ལ་རིག་སྔགས་ཀྱང་སྟོང་རྩ་བརྒྱད་བཟླས་བརྗོད་བྱས་ན། སོས་པར་འགྱུར་རོ། །ཕུར་བུ་གསུམ་པའི་ཆོ་ག་རྫོགས་སོ།། །།དེ་ནས་ནམ་མཁའ་ལ་རྒྱུ་བའི་མ་མོ་བདུན་གྱིས་ཅ་ཨ་ཅོ་དང་ག་ཞའི་སྒྲ་བཏོན་ནས་འཁོར་དེ་ཉིད་དུ་འདུས་པར་གྱུར་ཏེ་འཁོར་འདུས་པ་དེ་དག་ཐམས་ཅད་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གིས་ཀྱང་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་གསང་སྔགས་ཀྱི་ཤས་འབུལ་བར་འཚལ་ལོ། །དེ་ནས་བཅོམ་ལྡན་འདས་ཀྱིས་མ་མོ་དེ་དག་ལ་འདི་སྐད་ཅེས་བཀའ་སྩལ་ཏོ། །སྲིང་མོ་དག་།གང་ཁྱེད་སེམས་ཅན་ཐམས་ཅད་ལ་ཕན་པའི་ཕྱིར་ཞུགས་པ་ནི|་ལེགས་སོ་ལེགས་སོ། །དེ་ནས་མ་མོ་དེ་དག་གིས་ཚིག་མཐུན་པར་ལག་ན་རྡོ་རྗེ་ལ་གསང་སྔགས་ཕུལ་བ། ན་མོ་བུདྡྷཱ་ཡ། ན་མོ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཏདྱ་ཐཱ|་ཧུ་ལུ་ཧུ་ལུ། ལ་ཧུ་ལ་ཧུ། ཧ་ཧ། ཏིཥྛ་ཏིཥྛ། བྷྲ་མ་བྷྲ་མ། བནྡྷ་བནྡྷ། ཁ་ད་ཁ་ད། མ་ཙ་མེ་ཁ་ཤྩིད་བེགྷྣཾ་ཀ་རི་ཥྱ་ཏི། མོ་ཧ་ནི་མོ་ཧ་ནི། ན་ཡ་ཏི་ན་ཡ། མཱ་ལི་ནི་བི་ཤྭེ་ཤྭ་རེ། ཨ་མོ་གྷེ་ན་མཿསྭཱཧཱ། རིག་སྔགས་འདི་དྲན་པ་ཙམ་གྱིས་རིག་པ་མཆོག་སྒྲུབ་པའི་རིག་སྔགས་འཆང་དེ་ལ་བདག་ཅག་མ་མོ་བདུན་གྱིས་དཔག་ཚད་གཅིག་གི་བར་དུ་བསྲུང་བར་བགྱི། ཡང་དག་པར་སོ་སོར་བསྐྱབ་པར་བགྱིའོ། །རིག་སྔགས་ཀྱི་ལས་རྣམས་འབྱུང་སྟེ། རས་གསར་པ་ལ་སྦྱིན་དང་མ་འདྲེས་པའི་ཚོན་རྩིས་ལག་ན་རྡོ་རྗེ་མདོག་སྔོ་བསངས་ལ་ལོ་བཅུ་དྲུག་ལོན་པའི་ཤ་གཟུགས་ཅན་རྒྱན་ཐམས་ཅད་ཀྱིས་བརྒྱན་པ། མ་མོ་བདུན་གྱིས་བསྐོར་བ་བྲིའོ། །མ་མོ་བདུན་ནི། འཇིགས་པའི་ཚུལ་དུ་བསྒྲུབ་པར་བྱའོ། །དེ་ནས་ཞག་གསུམ་སྨྱུང་བ་བྱས་ཏེ་མར་གྱི་ངོ་ཞག་བཅུ་བཞི་ལ་ཅི་ནུས་ཀྱིས་མཆོད་པ་བྱས་ཏེ་ཆང་དང་། ཤའི་གཏོར་མ་ཡང་སྦྱིན་པར་བྱའོ། །དེ་ནས་རིག་ས་ངགས་འཆང་གིས་རི་མོའི་སྐུ་གཟུགས་ཀྱི་མདུན་དུ་སེང་ལྡེང་གི་ཤིང་གིས་མེ་སྦར་ལ་ཡུངས་ཀར་ཁྲག་གིས་བསྒོས་པས་ལན་བརྒྱ་སྟོང་སྦྱིན་སྲེག་བྱས་ཏེ་དེ་ནས་རི་མོའི་སྐུ་གཟུགས་འགུལ་བར་མཐོང་ན། རིག་སྔགས་འཆང་གི་རིག་པ་མཆོག་དྲན་པར་བྱའོ། །བུད་མེད་མཆེ་བ་གཙིགས་པ་ཡང་འོང་བར་འགྱུར་ཏེ། དེས་འཇིགས་པར་མི་བྱ་བར་སྲིང་མོ་ཁྱོད་འོངས་པ་ལེགས་སོ། །རྡོ་རྗེ་འཛིན་གྱིས་དམ་ཚིག་བྱིན་པ་གང་ཡིན་པ་དེ་དྲན་པར་གྱིས་ཤིག་ཅེས་སྨྲོས་ཤིག་།དེ་སྐད་ཐོས་ནས་ཅ་ཅོའི་སྒྲ་ཕྱུང་སྟེ་དེ་བཞིན་དུ་བྱའོ་ཞེས་ནས་མི་སྣང་བར་འགྱུར་རོ། །དེ་ནས་ཉིན་གཅིག་བཞིན་དུ་ཏི་ན་ར་རེ་སྦྱིན་བར་བྱེད་ཅིང་དོན་ཐམས་ཅད་སྒྲུབ་སྟེ། རིག་སྔགས་ཀྱི་དངོས་གྲུབ་ཀྱང་སྦྱིན་པར་བྱེད་དོ།། ལས་གཞན་དག་ཀྱང་འབྱུང་སྟེ། ལོག་འདྲེན་ཕུང་བར་བྱ་བ་ལ་ནི། སྐེ་ཚེ་དང་། ལན་ཚྭ་སྦྱིན་སྲེག་ལན་བརྒྱད་བརྒྱ་བྱའོ། །གདོན་གཞིག་པ་ནི། སྐྲ་གཏུབས་པའི་བདུག་པས་བདུགས་ན་གདོན་ཐམས་ཅད་འཇིགས་པར་འགྱུར་རོ། །གདོན་གཞོམ་པ་ནི། མཛུབ་མོས་བྱའོ། །ལོ་ཏོག་མ་རུངས་པར་བྱ་བ་ནི། མར་གྱི་ངོ་ཞག་བཅུ་བཞི་ལ་ནི་ཨ་འབྲའི་ཤིང་གི་ཕུར་བུ་སོར་བརྒྱད་པ་བླངས་ཏེ་ལག་ན་རྡོ་རྗེའི་མདུན་དུ་ལན་བརྒྱད་བརྒྱ་བཟླས་བརྗོད་བྱས་ནས་ཞིང་ལ་བཏབ་ན་ལོ་ཏོག་མེད་པར་འགྱུར་རོ། །ཆང་མ་རུང་བར་བྱ་ན། འོ་མའི་སྲེག་བླུགས་ལ་ལན་ཉི་ཤུ་རྩ་གཅིག་སྦྱིན་སྲེག་བྱས་ན་མ་རུང་བར་འགྱུར་རོ། །དགྲ་ལུས་མི་སྡུག་པར་བྱ་ན། ལམ་གྱི་སུམ་མདོར་སྐྱུ་རུ་རའི་ཤིང་གིས་མེ་སྦར་ཏེ་དགྲའི་མིང་ནས་སྨོས་ཤིང་དུག་གིས་ལན་བརྒྱ་སྟོང་སྦྱིན་སྲེག་བྱས་ན་དགྲའི་ལུས་ལ་མི་གཙང་བའི་དྲི་མནམ་པར་འགྱུར་རོ། །ཕྱིར་གསོ་བ་ནི། ལག་ན་རྡོ་རྗེ་ལ་མཆོད་པ་རྒྱས་པར་བྱས་ཏེ་མར་དང་། གུ་གུལ་གྱིས་ལན་སྟོང་རྩ་བརྒྱད་སྦྱིན་སྲེག་བྱས་ན་ཕྱིར་འཚོ་བར་འགྱུར་རོ། །དབྱེ་བར་བྱ་བ་ནི། མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ་ལག་ན་རྡོ་རྗེའི་མདུན་དུ་སྤེན་མའི་ཤིང་གིས་མེ་སྦར་ལ་ཕུབ་མས་ལན་བརྒྱ་སྟོང་སྦྱིན་སྲག་བྱས་ན་དབྱེ་བར་འགྱུར་རོ། །དགྲ་བསྐྲད་པར་འདོད་པས་ནི|་མར་གྱི་ངོ་ཞག་བརྒྱད་ལ་ནེའུ་ལེའི་རུས་པ་བླངས་ནས་དགྲའི་མིང་ནས་སྨོས་ཏེ་སྦྲུལ་གྱི་ཁུང་བུར་བཙུགས་ན་དེ་མ་ཐག་ཏུ་དགྲ་འབྲོས་པར་འགྱུར་རོ། །རིག་པ་མཆོག་སྒྲུབ་པའི་རིག་སྔགས་འཆང་གི་ཆོ་ག་རྒྱས་པ་ལས་འབྱུང་བའི་ལྷ་རྣམས་ལ་མཆོད་པ་བྱས་ལ་བཙུགས་ནས་བྱུང་ན་ཡང་རྟག་ཏུ་བཅིང་བར་བྱའོ། །དེ་བཅིངས་ན|་ཆོ་ག་རྒྱས་པར་འགྲུབ་པར་འགྱུར་ཏེ། རིག་སྔགས་ཀྱི་དངོས་གྲུབ་ལས་སུ་ཡང་གླགས་ཚོལ་བར་མི་འགྱུར་རོ། །གང་ལ་རིག་པ་མཆོག་གི་ཆོ་ག་རྒྱས་པ་ཐམས་ཅད་རྫོགས་པ་ཡོད་པ་དེ་ཐམས་ཅད་ལ་ནི། ལྷ་རྣམས་ཡིད་དགའ་བར་འགྱུར་ཏེ། རིག་སྔགས་ཀྱང་སྦྱིན་པར་བྱེད་དོ། །དེ་མ་ཡིན་ན། ལག་ན་རྡོ་རྗེའི་བྱ་བ་སྒྲུབ་པ་རྣམས་གླགས་ཚོལ་བའི་ཕྱིར་འཁོད་དོ། །ཆོ་ག་རྒྱས་པ་སྒྲུབ་པས་ཆོ་ག་རྒྱས་པ་ལས་བཤད་པ་བཞིན་དུ་འགལ་བ་རྣམས་བསྲུང་བར་བྱ་སྟེ། ཉ་དང་། ཤ་སྤང་བར་བྱའོ། །རྟག་ཏུ་སངས་རྒྱས་དང་། ཆོས་དང་། དགེ་འདུན་ལ་མངོན་པར་དགའ་བར་བྱའོ། །གང་དག་ངའི་རྡོ་རྗེའི་རིགས་ལ་མཆོད་པ་བྱེད་ཅིང་དང་བར་བྱེད་པ་དང་། རིག་པའི་མཆོག་འདོན་ཅིང་མཆོད་པ་དེ་དག་ནི། ངའི་དམ་ཚིག་ཤེས་པ་ཡིན་ནོ། །དེ་དག་ནི། ང་ལ་ཤས་ཆེར་དང་སྟེ། དེ་དག་ལ་ང་ཞི་བར་སེམས་སོ། །ལྷ་ཐམས་ཅད་ཀྱང་ཞི་བར་སེམས་པར་འགྱུར་རོ། །གང་དག་བྱང་ཆུབ་སེམས་དཔའ་རྣམས་ཀྱི་ཚུལ་ལས་ཕྱི་རོལ་དུ་གྱུར་ཅིང་འདོད་དོ་ཅོག་ཟ་བ་དང་། དགེ་སྦྱོང་དུ་མི་འཛིན་པ་དང་། བྲམ་ཟེར་མི་འཛིན་པར་ཆོ་ག་རྒྱས་པ་འདི་སྒྲུབ་པ་དེ་དག་ནི། ལག་ན་རྡོ་རྗེ་འཛིན་གྱིས་རྡོ་རྗེས་བཤིག་པར་འགྱུར་རོ། །ལྷ་ཐམས་ཅད་ཀྱང་མ་དད་པའི་སེམས་སུ་འགྱུར་རོ། །ལོག་འདྲེན་རྣམས་ཀྱང་གླགས་ལྟ་ཞིང་ཀླན་ཀ་ཚོལ་བའི་ཕྱིར་འཁོད་དེ། དེ་མ་ཐག་ཏུ་ནད་ཀྱིས་འདེབས་ཤིང་ལོག་འདྲེན་རྣམས་ཀྱིས་ནོན་པར་འགྱུར་རོ། །མ་མོ་རྣམས་ཀྱི་ཆོ་ག་རྫོགས་སོ།། །།དེ་ནས་རྡོ་རྗེ་ཁྲོ་བོ་བདུད་རྩི་ཐབ་སྦྱོར་གྱིས་འཁོར་འདུས་པ་ཐམས་ཅད་ལ་གླང་པོ་ཆེའི་ལྟ་སྟངས་ཀྱིས་བལྟས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས|་འདིའི་སེམས་ཅན་རྣམས་ནི། བསོད་ནམས་དམན་པ་དང་། ཚུལ་ལ་མི་གནས་པ་དང་། ཕ་ལ་མ་གུས་པ་དང་། མ་ལ་མ་གུས་པ་དང་། བསོད་ནམས་ཆུང་བ་དང་། དད་པ་མེད་པ་དང་། གླགས་ཚོལ་བ་དང་། འཆལ་བ་དང་། རྟག་ཏུ་ཟང་ཟིང་ལ་བརྐམ་པ་དང་། རྟག་ཏུ་ལོག་འདྲེན་དང་། མཆེ་བ་ཅན་དང་། ཤ་ཟ་རྣམས་ཀྱིས་ཟིན་པ་ལགས་ཏེ། བགེགས་དང་ལོག་འདྲེན་དེ་དག་གཞིག་པ་དང་། མཐར་གཏུགས་པའི་སླད་དུ་གསང་སྔགས་བཤད་པར་འཚལ་ལོ། །དེ་ནས་བཅོམ་ལྡན་འདས་ཀྱིས་རྡོ་རྗེ་ཁྲོ་བོ་ལ་བཀའ་སྩལ་ཏོ། །བདུད་རྩི་ཐབ་སྦྱོར། གང་ཁྱོད་སེམས་ཅན་ཐམས་ཅད་ལ་ཕན་པའི་ཕྱིར་ཞུགས་པ་ལེགས་སོ་ལེགས་སོ། །ཁྱོད་ལ་དེ་བཞིན་གཤེགས་པས་གནང་གི་། སེམས་ཅན་ཐམས་ཅད་ཀྱི་ཕྱིར་གསང་སྔགས་ཤོད་ཅིག་།དེ་ནས་རྡོ་རྗེ་ཁྲོ་བོ་བདུད་རྩི་ཐབ་སྦྱོར་གྱིས་བཅོམ་ལྡན་འདས་དང་། ལག་ན་རྡོ་རྗེའི་ཞབས་ལ་གཏུགས་ནས་གསང་སྔགས་བཤད་པ། ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷཱ་ཡ། པྲ་ཛྭ་ལི་ཏ་དཱི་པྟ་དཾཥྚོ་ཏ་ཀ་ཊ་བྷ་ཡ་བྷཻ་ར་བཱ་ཡ། ཨ་སི་མུ་ས་ལ། བཛྲ་བ་ར་ཤུ་པཱ་ཤ་ཧ་སྟཱ་ཡ། ཏདྱ་ཐཱ། ཨོཾ་ཧུ་ལུ་ཧུ་ལུ། ཨ་མྲྀ་ཏ་ཀུཎྜ་ལི། ཁ་ཁ་ཁ་ཁ། ཁཱ་ན་ཁཱ་ན་ཁཱ་ན་ཁཱ་ན། ཁཱ་ད་ཁཱ་ད་ཁཱ་ད་ཁཱ་ད། ཁཱ་ཧི་ཁཱ་ཧི་ཁཱ་ཧི་ཁཱ་ཧི། ཏིཥྛ་ཏིཥྛ་|ཧ་ན་ཧ་ན། ད་ཧ་ད་ཧ། པ་ཙ་པ་ཙ། གྲྀཧྞ་གྲྀཧྞ། བནྡྷ་བནྡྷ། གརྫ་གརྫ། ཏརྫ་ཏརྫ། བི་སྥོ་ཊ་ཡ་བི་སྥོ་ཊ་ཡ། བྷ་ག་བཱན། ཨ་མྲྀ་ཏ་ཀུཎྜ་ལི། མཱུརྟ་ན་ཏཱ་ཌ་ཡ་བཛྲེ་ཎ་སརྦ་བིགྷྣཱཾ་བི་ནཱ་ཡ་ཀཾ་ནི་བཱ་ར་ཡ་མ་ཧཱ་ག་ཎ་པ་ཏི། ཛཱི་བི་ཏཱནྟ་ཀ་རཱ་ཡ། ཧཱུཾ་ཧཱུཾ་ཕཊ་ཕཊ། ཨོཾ་ཀྲོ་དྷ་ག་ཎ་ཡེ་སྭཱཧཱ། བདུད་རྩི་ཐབ་སྦྱོར་གྱི་གསང་སྔགས་དང་པོའོ། །ན་མོ་རཏྣ་ཏྲ་ཡཱ་ཡ|་ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་མ་ཧཱ་བཛྲ་ཀྲོ་དྷ་ཡ། དཾཥྚོ་ཏ་ཀ་ཊ་བྷཻ་ར་བཱ་ཡ། ཨ་སི་མུ་ས་ལ་པ་ར་ཤུ་བཱ་ཤ་ན་ཧ་སྟཱ་ཡ། ཧེ་ཧེ། པ་ཏ་པ་ཏ། དྷ་བ་དྷ་བ|་ཁ་ཁ། ཁཱ་ཧི་ཁཱ་ཧི། ཨ་མྲྀ་ཏ་ཀུཎྜ་ལི། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། གརྫ་གརྫ། ག་ཎ་བ་ཏི། ཛཱི་བི་ཏ་ཨནྟ་ཀ་རཱ་ཡ་སྭཱཧཱ། གསང་སྔགས་གཉིས་པའོ། །ན་མཱ+ོ་རཏྣ་ཏྲ་ཡ་ཡ། ན་མ་ཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷཱ་ཡ། བི་མ་ལ་ཀ་ན་ཀ་ཛྭ་བུ་ཤ་ན་ཡ་ག་ག་ན། ཨ་མྲྀ་ཏ་སཾ་བྷ་བཱ་ཡ། གརྟ་མ་ལྱ་ཨ་ནུ་ལེ། པ་ན་པྲི་ཡཱ་ཡ། བཛྲ་པཱ་ཎི་པྲི་ཡཱ་ཡ། བཛྲ་པཱ་ཎི་ཏུ་ལྱ། བྷ་ག་ཡ་དེ་བ་ནཱ་ག་ཡཀྵ་རཱཀྵ་ས་པྲ་མརྡ་ནཱ་ཡ། ཏྲཻ་ལོཀྱ། གོ་ཙ་རཱ་ཡ། ཤ་ཏ་སྱ་ནྱ་བི་ཏྲ་ཀ་ར་ཡ་ཧྲྀ་ད་ནན། གརྦྷོ་ཏྟ་མཱ་ཡ་ཨ་མྲྀ་ཏ་ཀུཎྜ་ལི། ཨི་ཧྱེ་ཧི་དཾཥྚྲོ་ཏ་ཀ་ཊ་བྷཻ་ར་བ་གྷི་བི་ཏུད་ཛྭ་ལ་སྤུ་ལིཾ་ཀ་ཤ་ནི་དུ་ལེ་རུ་ཕོ་ཏི་ཏི་སཾ་བུདྡྷ། ཨོཾ་ཁ་ཁ་ཁ་ཁ། གྲྀཧྞ་གྲྀཧྞ། བནྡྷ་བནྡྷ། ཧ་ན་ཧ་ན། གརྫ་གརྫ། བི་སྥོ་ཊ་ཡ་བི་སྥོ་ཊ་ཡ། དྷ་ཀ་དྷ་ཀ། ཛྭ་ལ་ཛྭ་ལ། པྲ་ཛྭ་ལ་པྲ་ཛྭ་ལ། གྲ་ས་གྲ་ས། སརྦ་བིགྷྣཱཾ་བི་ནཱ་ཡ་ཀཱ་ནཱན་ཧྲྀ་ད་ཡཾ་སྤ་ཏ། གནྡྷ་རྦ་ཧྲྀ་ད་ཡཾ་སྤ་ཏ། རཱཀྵ་ས་ཧྲྀ་ད་ཡཾ་སྤ་ཏ། སརྦ་ཛྭ་ར་ཧྲྀ་ད་ཡཾ་སྤ་ཏ། སརྦ་ཙ་ཏུ་ཀ་ཧྲྀ་ད་ཡཾ་སྤ་ཏ། སརྦ་ནཱ་གཱ་ནཱཾ་ཧྲྀ་ད་ཡཾ་སྤ་ཏ། ཧཱུཾ་ཧཱུཾ་སྤ་ཏ། ད་ཧ་ད་ཧ། པ་ཙ་པ་ཙ། ཨཱ་བི་ཤ་ཨཱ་བི་ཤ། ཨི་དཾ་ཙ་མེ་ཀཱཪྱཾ་ཀུ་རུ་བཛྲ་དྷ་ར་ཨཱཛྙཱ་པ་ཡ་ཏི་སྭཱཧཱ། གསང་སྔགས་གསུམ་པའོ། ། ན་མོ་བཛྲ་ཀྲོ་དྷཱ་ཡ། དཾཥྚྲོཏ་ཀ་ཊ་བྷཻ་ར་བཱ་ཡ། ཏདྱ་ཐཱ། ཧུ་ལུ་ཧུ་ལུ། ཁ་ཁ་ཁ་ཁ། ཁཱ་ཧི་ཁཱ་ཧི། ཏིཥྛ་ཏིཥྛ། བནྡྷ་བནྡྷ་སྭཱཧཱ། ཁྲོ་བོ་བདུད་རྩི་ཐབ་སྦྱོར་གྱི་གསང་སྔགས་བཞི་པའོ། །དེ་ནས་འདི་དག་གི་སྙིང་པོ་དོན་ཡོད་པ་གང་འདོད་པ་དང་། བཟླས་བརྗོད་བྱས་ཤིང་བསྒྲུབས་ན། བདག་གི་གསང་སྔགས་ཐམས་ཅད་བཏོན་ཅིང་བཟླས་བརྗོད་བགྱིས་པ་དང་། བསྒྲུབས་པར་གྱུར་པ་དེ་བཤད་པར་འཚལ་ལོ། །དེ་ལ་འདི་ནི། བདག་གི་སྙིང་པོ་ལགས་སོ། །ོཾ་ཨ་མྲྀ་ཏེ་ཧཱུཾ་ཕཊ། བདུད་རྩི་ཐབ་སྦྱོར་གྱི་སྙིང་པོ་རྡོ་རྗེ་ཁྲོ་བོ་བདུད་རྩི་ཐབ་སྦྱོར་གྱིས་གསང་སྔགས་རྣམས་བཤད་མ་ཐག་ཏུ་ས་ཆེན་པོ་འདི་རྣམ་པ་དྲུག་ཏུ་གཡོས་སོ། །ལོ་ག་འདྲེན་རྣམས་ཀྱང་སྐྲག་སྟེ་སྐྱབས་མེད་ཅིང་རྟེན་མེད་པར་གྱུར་ནས་དེ་བཞིན་གཤེགས་པའི་ཐད་དུ་སོང་སྟེ། བཅོམ་ལྡན་འདས། བདག་ཅག་གི་སྐྱབས་མཛད་དུ་གསོལ། བདེ་བར་གཤེགས་པ|་བདག་ཅག་གི་སྐྱབས་མཛད་དུ་གསོལ་ཞེས་དེ་སྐད་དུ་སྨྲ་ཞིང་མགོ་བོ་ཐུར་དུ་གཏུགས་སོ། །ཀྱེ་ཀྱེ་ལོག་འདྲེན་མ་རུངས་པ་རྣམས་ལོངས་ལ་ངའི་ངག་ཉོན་ཅིག་། རྡོ་རྗེ་ཀུན་ཏུ་འབར་ཞིང་རབ་ཏུ་འབར་ལ། ཀུན་ཏུ་རབ་ཏུ་འབར་བས་ཁྱེད་ཀྱི་སྤྱི་བོ་གཤགས་ས་རེ། ངས་རལ་པ་སེར་པོ་ཅན་རྣམས་ཀྱི་གསང་སྔགས་ཀྱིས་ལྷའི་ལོ་སྟོང་གེ་བར་དུ་ལོག་འདྲེན་རྣམས་བཅོམ་པ་དང་། གཏུབས་པ་དང་། བརྡུངས་པ་དང་། གཟིར་བ་དང་། བསྐམས་པ་གང་ཡིན་པ་དེ་དྲན་པར་གྱིས་ཤིག་།ངའི་མཐུ་དང་། བརྩོན་འགྲུས་དང་། ཕ་རོལ་གནོན་པ་ཆེན་པོ་དྲན་པར་གྱིས་ཤིག་།གང་ངའི་གསང་སྔགས་འཛིན་ཅིང་འདོན་པ་དང་། སྒྲུབ་པ་དང་། དེས་སྲུང་བར་བྱེད་པ་དེ་ལ་གླགས་མ་ཚོལ་ཅིག་།ཏིལ་སྦྲུས་པའམ། ཟས་ངན་པ་ཟ་ཡང་རུང་། ཤ་ཟ་ཡང་རུང་། གྲོང་གི་ཆོམ་རྐུན་སྤྱོད་ཀྱང་རུང་སྟེ། རིག་པའི་མཆོག་ལ་སོགས་པ་རིག་པ་ཐམས་ཅད་སྒྲུབ་པ་ལ་གླགས་མ་ཚོལ་ཅིག་། ཟན་ཟ་བའི་ཚེ་ཡང་ཁམ་དང་པོ་ལ་སྔགས་ཀྱིས་བཏབ་སྟེ་དབུལ་བར་བྱའོ། །ཉི་མ་ཤར་བའི་ཚེ་ལན་བདུན་བརྗོད་ན། དེའི་ཕྱི་བཞིན་དུ་རྟག་ཏུ་འབྲང་ངོ་། །ལོག་འདྲེན་རྣམས་ཀྱང་གླགས་མི་ཚོལ་ལོ། །ཉ་དང་། ཤ་དང་། ཏིལ་དང་། སྲན་ཆན་དང་། པེན་ཚེ་ཡང་རུང་། སྣུམ་འཁུར་པརྤ་ཏ་དང་། ལ་ཕུག་ཀྱང་རུང་སྟེ་ཐམས་ཅད་ཟར་ཟིན་ཀྱང་རིག་སྔགས་འཛིན་ན། དེ་ལ་ཐམས་ཅད་འགྲུབ་པར་འགྱུར་རོ། །གང་ངའི་གསང་སྔགས་འཛིན་པ་ནི། བཟའ་བ་མ་ཡིན་པ་ཟ་ཞིང་བྱ་བ་མ་ཡིན་པ་བྱེད་དུ་ཟིན་ཀྱང་དེ་ལ་གང་གིས་ལོག་འདྲེན་རྣམས་གླགས་ཚོལ་བ་བརྟུན་ཏེ་འཁོད་པར་མི་འགྱུར་བའི་གསང་སྔགས་བདེ་བ་བསྟན་པར་བྱའོ། །རིག་སྔགས་འཆང་སྒྲུབ་པ་ན་གང་དུ་ལོག་འདྲེན་རྣམས་ཀྱིས་གླགས་རྙེད་པར་མི་འགྱུར་བའི་གནས་ཀྱང་བསྟན་པར་བྱ་སྟེ། ངེས་པར་བྱས་པ་ལ་ནི། གླགས་ཚོལ་བ་ལ་བརྟུན་པར་མི་འགྱུར་རོ། །ངེས་པར་གནས་པ་ལ་ཡང་གནས་ནས་གནས་སུ་འགྲོ་བ་ན་གོམ་པ་རེ་རེ་ལ་ལོག་འདྲེན་རྣམས་གླགས་ཚོལ་བའི་ཕྱིར་འཁོད་པ་ཡོད་དོ། །ལོག་འདྲེན་སའི་སྤྱི་ཕུད་ཅེས་བྱ་བ་གང་དག་ས་བརྟོལ་ནས་འབྱུང་བ་ཡང་ཡོད་དོ། །དེ་ལ་བགེགས་ཀྱི་མཚན་མ་ཡང་བཤད་པར་བྱ་སྟེ། དེ་དག་ནི། གོམ་པ་རེ་རེ་འཛིན་པར་བྱེད་དོ། །དེ་དག་གིས་ཟིན་ན། བགེགས་སུ་འགྱུར་ཏེ། ལེ་ལོ་སྐྱེ་བར་འགྱུར་ཞིང་བརྒྱལ་བ་དང་། སྐྱུག་པ་དང་། མགོ་འཁོར་བར་འགྱུར་རོ། །ལོག་འདྲེན་དེ་དག་ནི། བསོད་ནམས་ཀྱང་ཟད་པར་བྱེད་དེ། ལོག་འདྲེན་རྣམས་ཀྱིས་རེག་པ་ཙམ་གྱིས་ལ་ཧའི་ལོ་སྟོང་གི་བར་དུ་ཕ་རོལ་ཏུ་ཕྱིན་པ་དྲུག་བསགས་པའི་བསོད་ནམས་ཀྱི་ཕུང་པོ་ཡང་ཐལ་བར་རློག་པར་བྱེད་ཅིང་རིག་སྔགས་འཆང་རིག་སྔགས་སྒྲུབ་པའི་བསོད་ནམས་ཟད་པར་བྱེད་དོ། དེ་ནས་རིག་སྔགས་རྣམས་འགྲུབ་པར་མི་འགྱུར་རོ། །དེ་བས་ན། རིག་སྔགས་འཆང་གི་ལུས་ཀྱི་ལྕི་ཡང་ལས་ཤེས་པར་བྱ་སྟེ། མར་དང་སྲ་རྩི་པོག་གིས་བདག་ཉིད་བདུག་པར་བྱའོ། །དེ་ནས་ལོག་འདྲེན་དེ་དག་གིས་གཏོང་བར་འགྱུར་རོ། །གང་ངའི་གསང་སྔགས་འཛིན་པ་དེ་ལ་ནི་གླགས་ཚོལ་བར་བརྟུན་པར་མི་འགྱུར་ཏེ། དེ་བས་ན། རིག་སྔགས་འཆང་གིས་རིག་པའི་མཆོག་དྲན་པར་བྱས་ན་དེ་མཉེས་པར་གྱུར་པས་འཛུམ་པའི་བཞིན་གྱིས་དངོས་གྲུབ་མྱུར་དུ་འབྱིན་པར་བྱེད་དེ། ལོག་འདྲེན་རྣམས་ཀྱིས་མ་མཐོང་བ་འགྲུབ་པར་འགྱུར་རོ། །ལོག་འདྲེན་སའི་སྤྱི་ཕུད་ཅེས་བྱ་བ་རྣམས་ཀྱི་མཚན་ཉིད་རྫོགས་སོ།། །།ལོག་འདྲེན་ཆུ་ལྟར་གཡོ་བ་ཞེས་བྱ་བ་དེ་དག་ནི། ཆུ་ན་གནས་ཏེ། རིག་སྔགས་འཆང་ཁྲུས་བྱེད་པ་ན་འཛིན་པར་བྱེད་དོ། །དེ་དག་གི་མཚན་མ་འབྱུང་སྟེ་སེམས་འཁྲུག་པར་བྱེད་དེ། འདོད་པ་ལ་ལྷུར་སེམས་པ་དང་། བྲུ་བས་གཟིར་ཅིང་ཁ་ཟས་ལ་མངོན་པར་ཆགས་པ་དང་། འཇིགས་པའི་སེམས་སྐྱེ་བར་འགྱུར་རོ། །དེ་བས་ན། རིག་སྔགས་འཆང་གིས་བདུད་རྩི་ཐབ་སྦྱོར་དྲན་པར་བྱ་སྟེ། དྲན་པ་ཙམ་གྱིས་ལོག་འདྲེན་རྣམས་འཆི་བར་འགྱུར་རོ། །དེ་ནས་རིག་སྔགས་འཆང་གིས་སྙིང་རྗེའི་སེམས་བསྐྱེད་པར་བྱ་སྟེ། རིག་པ་མཆོག་དྲན་པར་བྱའོ། །དེ་དྲན་པ་ཙམ་གྱིས་འབྲས་བུ་ཆེ་བར་འགྱུར་ཏེ། རིག་སྔགས་ཀྱི་ལྷ་དེ་དག་གིས་ལོག་འདྲེན་རྣམས་མྱོས་པར་མཐོང་ནས་དགའ་བའི་སེམས་ཀྱིས་དངོས་གྲུབ་མྱུར་དུ་སྦྱིན་པར་བྱེད་དོ། །ལོག་འདྲེན་ཆུ་ལྟར་གཡོ་བ་ཞེས་བྱ་བ་རྣམས་ཀྱི་མཚན་ཉིད་རྫོགས་སོ། ། །།ལོག་འདྲེན་རིག་སྔགས་ཀྱི་ལྷའི་མངག་གཞུག་པ་ཞེས་བྱ་བ་རྣམས་ནི། མཐུ་ཆེ་བ་སྟེ། དེ་དག་ནི། རིག་སྔགས་འཆང་རིག་སྔགས་ལས་ལྡང་བ་ན་འཛིན་པར་བྱེད་དོ། །ཟིན་པར་གྱུར་ན་ལུས་ཀྱི་ཚུལ་ལས་རྟོགས་པར་བྱ་སྟེ། ལུས་ཚ་བར་འགྱུར། སྡང་བར་གྱུར། སྡིག་པའི་སེམས་འབྱུང་བར་འགྱུར་རོ། །དེ་ནས་རིག་སྔགས་འཆང་གིས་དེ་དག་ཕྱིར་གཞིལ་བར་བྱ་སྟེ། གཙུག་ཕུད་ལ་འཆང་ལ་བདུག་པ་ཐམས་ཅད་སྦྱིན་ཞིང་། རིག་སྔགས་ལན་བརྒྱ་སྟོང་བཟླས་བརྗོད་བྱས་ན། ཕྱིན་ཆད་ལོག་འདྲེན་དེ་དག་གླགས་ཚོལ་བ་ལ་བརྟུན་པར་མི་འགྱུར་ཏེ། དགའ་བར་གྱུར་ནས་དངོས་གྲུབ་ཀྱང་སྦྱིན་པར་བྱེད་དོ། །ལོག་འདྲེན་འདི་དག་ཀྱང་རིག་སྔགས་ཀྱི་ལྷ་ཐམས་ཅད་ཀྱི་ཕྱི་བཞིན་འབྲང་ཞིང་གནས་པ་ཡིན་ནོ། །རྟག་ཏུ་གླགས་ཚོལ་བ་ཡང་ཡིན་ཏེ། སུ་ཞིག་སྔགས་གྲུབ་པ། སུ་ཞིག་སྔགས་འདོན་པ། སུ་མཆོད་པ་བྱེད་པས་དེ་ལ་བགེགས་ཀྱང་བྱེད་ཅིང་འདུན་པ་ཟློག་པར་བྱེད། ལེ་ལོ་ཡང་འཇུག་པར་བྱེད་དོ། །དེ་བས་ན། རིག་སྔགས་འཆང་གིས་ཉི་མ་ལོགས་སུ་ཁ་བལྟས་ལ་རྟག་ཏུ་ཆུ་ཁྱོར་གང་གཏོར་ནས་ཁྲོ་བོའི་རིག་སྔགས་ཀྱང་ལན་བདུན་བརྗོད་པར་བྱ་སྟེ། འདི་སྐད་དུ་བདག་མིང་འདི་ཞེས་བྱ་བའི་རིག་སྔགས་ཆེ་གེ་མོ་ཞེས་བྱ་བ་སྒྲུབ་ཀྱི། ཁྱེད་ཡིད་དགའ་བར་གྱིས་ཤིག་ཅེས་ཀྱང་སྨྲོས་ཤིག་།དུས་ཐམས་ཅད་དུ་དེ་སྐད་སྨྲས་ནས་དེས་ལོག་འདྲེན་རྣམས་དགའ་ཞིང་མགུ་ལ་ཡིད་དགའ་པར་གྱུར་ཏེ། དངོས་གྲུབ་སྦྱིན་པར་བྱེད་ཅིང་སེམས་ཀྱང་དང་བར་འགྱུར་རོ། །གྲུབ་པའི་ཚེ་ཡང་ནང་པར་ཉི་མ་ལོགས་སུ་ཁ་བལྟས་ལ་ཐལ་མོ་སྦྱར་ནས་རིག་སྔགས་བརྗོད་དེ། འདི་སྐད་དུ་བདག་མིང་འདི་ཞེས་བགྱི་བའི་རིག་སྔགས་ཆ་གེ་མོ་ཞིག་སྒྲུབ་ཀྱི། ཁྱེད་ཡིད་དགའ་བར་གྱིས་ཤིག་ཅེས་ཀྱང་སྨྲོས་ཤིག་།དེ་ནས་གཙུག་ཕུད་འཕྱང་ལ་ལ་སོགས་པ་ལོག་འདྲེན་དེ་དག་དེ་ཉིད་དུ་འདུ་བར་འགྱུར་ཏེ། རིག་སྔགས་འཆང་གིས་ཁྲོ་བར་བྱས་ལ་ཁྱེད་མ་འགུལ་ཅིག་ཅེས་སྨྲོས་ཤིག་།དེ་ནས་ལོག་འདྲེན་དེ་དག་བཅིངས་ཤིང་གཟིར་བར་གྱུར་ཏེ་དངོས་གྲུབ་མྱུར་དུ་སྦྱིན་པར་བྱེད་དོ། །ལོག་འདྲེན་རྣམས་དགྲོལ་བ་ནི། ཡིད་ཀྱིས་བྱའོ། །ལོག་འདྲེན་ལྷའི་མངག་གཞུག་ཅེས་བྱ་བ་རྣམས་ཀྱི་མཚན་ཉིད་རྫོགས་སོ།། །། ལོག་འདྲེན་འཇིག་རྟེན་མེ་ཏོག་ཅེས་བྱ་བ་རྣམས་ནི། གང་གི་ཚེ་རིག་སྔགས་འཆང་རིག་སྔགས་སྒྲུབ་ཅིང་ལྷ་ལ་མེ་ཏོག་དབུལ་བ་ན་དེའི་ཚེ་ལོག་འདྲེན་དེ་དག་གིས་འཛིན་པར་བྱེད་དེ། ལོག་འདྲེན་དེ་དག་ཉིད་ཀྱང་མེ་ཏོག་གི་ཁོངས་སུ་འཇུག་ཅིང་གནས་སོ། །དེ་བས་ན་རིག་སྔགས་འཆང་གིས་ཐོག་མ་ཉིད་དུ་མེ་ཏོག་དེ་དག་རིག་སྔགས་འཆང་བཟླས་བརྗོད་བྱེད་བཞིན་དུ་བླང་བར་བྱའོ། །བླངས་ནས་གུ་གུལ་གྱི་བདུག་པས་བདུགས་ཏེ། དེ་ནས་ལྷ་ལ་ཕུལ་ན་ལྷ་རྣམས་ཡིད་དགའ་བར་འགྱུར་རོ། །བདུག་པས་མ་བདུགས་པར་ལྷ་དེ་དག་ལ་ལོག་འདྲེན་རྣམས་ཀྱིས་གནོད་པར་འགྱུར་ཏེ་འགྲུབ་པར་མི་འགྱུར་རོ། །ལོག་འདྲེན་འཇིག་རྟེན་མེ་ཏོག་ཅེས་བྱ་བ་རྣམས་ཀྱི་མཚན་ཉིད་རྫོགས་སོ||་||ལོག་འདྲེན་ཟས་སུ་དྲི་ཟ་བ་ཞེས་བྱ་བ་དེ་དག་ནི། རིག་སྔགས་འཆང་དྲི་ལ་རེག་པ་ན་འཛིན་པར་བྱེད་དེ། ཅི་སྟེ་རིག་སྔགས་འཆང་གིས་དྲི་དག་ལྷ་ལ་ཕུལ་ན། ལྷ་དེ་དག་སེམས་དང་བ་མེད་ཅིང་རྒྱབ་ཀྱིས་ཕྱོགས་པར་འགྱུར་ཏེ། ལོག་འདྲེན་དེ་རྣམས་མཐོང་བས་འཕང་བར་འགྱུར་ཞིང་། རིག་སྔགས་འཆང་ལ་འགྲུབ་པར་མི་འགྱུར་རོ|་|དེ་བས་ན། རིག་སྔགས་འཆང་གིས་ཐོག་མ་ཉིད་དུ་ཁྲོ་བོའི་བཟླས་བརྗོད་བྱེད་བཞིན་དུ་དྲི་བླང་བར་བྱའོ། །དེས་ན་ལོག་འདྲེན་དེ་དག་འབྱེར་ཏེ་རྨས་པར་ཡང་འགྱུར་རོ། ། དེ་ནས་ལྷ་དེ་དག་དྲིས་ཚིམ་པར་བྱས་པས་དགའ་བའི་སེམས་ཀྱིས་དངོས་གྲུབ་སྩོལ་ཏོ། །ལོག་འདྲེན་ཟས་སུ་དྲི་ཟ་བ་རྣམས་ཀྱི་མཚན་ཉིད་རྫོགས་སོ།། །། ལོག་འདྲེན་ནག་པོ་ཞེས་བྱ་བ་རྣམས་ནི། བདུག་པ་ཉིད་ལས་འབྱུང་སྟེ། གང་གི་ཚེ་རིག་སྔགས་འཆང་ལྷ་ལ་བདུག་པ་འབུལ་བ་ན་དེའི་ཚེ་འཛིན་པར་བྱེད་དོ། །ལོག་འདྲེན་གྱིས་ཟིན་པའི་མཚན་ཉིད་ནི། དྲན་པ་ཉམས་པ་དང་། རིག་སྔགས་གཏོང་བར་འགྱུར་ཏེ། བདུག་པ་མཐོང་བས་ལྷ་འཕང་བར་འགྱུར་ཞིང་དངོས་གྲུབ་འགྲུབ་པར་མི་འགྱུར་རོ|་|དེ་བས་ན། རིག་སྔགས་འཆང་གིས་ཐོག་མ་ཉིད་དུ་ལག་པ་གཡོན་པས་མར་བླངས་ལ་ཁམ་ཕོར་གྱི་ནང་ནས་བདུག་པ་ཕུལ་ན། དེ་ཕྱིན་ཆད་ལོག་འདྲེན་རྣམས་འབྱུང་བར་མི་འགྱུར་རོ། །བདུག་པ་དེས་ཀྱང་ལྷ་ཐམས་ཅད་ཚིམ་པར་བྱའོ། །ལྷ་དེས་ཀྱང་དངོས་གྲུབ་མྱུར་དུ་སྦྱིན་པར་བྱེད་དོ། །ནག་པོ་དང་། ཟས་སུ་དྲི་ཟ་བ་ནི། མཚན་ཉིད་གཅིག་གོ་།ནག་པོ་ཞེས་བྱ་བའི་མཚན་ཉིད་རྫོགས་སོ། ། །།ལོག་འདྲེན་གཙུག་ཕུད་གཅིག་པ་ཞེས་བྱ་བ་རྣམས་ནི། མཐུ་ཆེ་ཞིང་བརྩོན་འགྲུས་ཆེ་བ་སྟེ། ལོག་འདྲེན་དེས་ཀྱང་མར་མེའི་མེ་ལྕེ་ཉིད་ལས་འབྱུང་སྟེ། དེ་བས་ན་རིག་སྔགས་འཆང་གིས་ཐོག་མ་ཉིད་དུ་འདི་ལྟར་བྱ་སྟེ། རས་དཀར་པོ་ལས་སྙིང་པོ་བྱས་ཏེ་མར་མེ་གཉིས་སྦར་ནས་རིག་སྔགས་བཟླས་བརྗོད་བྱེད་བཞིན་དུ་ཁ་ཐུར་དུ་བསྟན་ཏེ་བཞག་ལ་རིག་སྔགས་ཀྱང་ལན་བརྒྱད་བརྒྱ་བརྗོད་ན་ལོག་འདྲེན་ཐམས་ཅད་ཁ་ཐུར་དུ་བལྟས་ཏེ་འཁོད་པར་འགྱུར་རོ། །རིགས་སྔགས་ཀྱང་བདེ་བླག་ཏུ་འགྲུབ་པར་འགྱུར་རོ། །སྒྲུབ་པ་ཐམས་ཅད་ལ་ཡང་ཐོག་མ་ཉིད་དུ་ལས་དེ་དག་བྱའོ། །ལོག་འདྲེན་གཙུག་ཕུད་གཅིག་པ་ཞེས་བྱ་བ་རྣམས་ཀྱི་མཆན་ཉིད་རྫོགས་སོ། ། །།བཅོམ་ལྡན་འདས། གང་སུ་ལོག་འདྲེན་རྣམས་འཛིན་པར་འགྱུར་བ་དང་། གང་དུ་རིག་སྔགས་འཆང་རྣམས་ཀྱི་དངོས་གྲུབ་འགྲུབ་པར་འགྱུར་བའི་ལོག་འདྲེན་རྣམས་ཀྱི་གནས་བདག་གིས་བཤད་ལགས་སོ། །བཅོམ་ལྡན་འདས། ལོག་འདྲེན་ཐམས་ཅད་ཀྱི་སྲོག་མཐར་ཐུག་པར་བགྱི་བའི་ལས་འདི་ཡང་བཤད་པར་འཚལ་ལོ། །བསྒྲུབས་པའི་རིག་སྔགས་འཆང་གིས་རྡོ་རྗེ་ཁྲོ་བོའི་དཀྱིལ་འཁོར་སྐྱང་ནུལ་གྱིས་བྱུགས་ལ་ཀཱ་ར་བཱི་རའི་ཤིང་གིས་མེ་སྦར་ལ། ཀཱ་ར་བཱི་རའི་མེ་ཏོག་དག་གི་ཁྲག་གི་ནང་དུ་སྨྱུགས་པའི་སྲེག་བླུགས་ཉི་ཤུ་རྩ་གཅིག་གིས་སྦྱིན་སྲེག་བྱ་སྟེ། ལས་དེ་བྱས་ནས་ལོག་འདྲེན་ཐམས་ཅད་བཅིང་ངོ་ཞེས་བརྗོད་ན། བཅིངས་པར་འགྱུར་རོ། །ལོག་འདྲེན་ཐམས་ཅད་ཀྱི་མཐར་ཐུག་པར་གྱིས་ཤིག་ཅེས་བརྗོད་ན། ལོག་འདྲེན་ཐམས་ཅད་འཆི་བར་འགྱུར་རོ། །བཅིངས་པ་ལས་བཀྲོལ་ན་ཡང་ཡིད་ཀྱིས་བྱའོ། །ལས་གཞན་དག་ཀྱང་འབྱུང་སྟེ། བསྲུང་བར་བྱ་ན། ལན་བདུན་བཟླས་བརྗོད་བྱས་པའི་ཆུས་མགོ་བོར་བླུགས་སོ། །མཚམས་བཅད་ན། ལན་ཉི་ཤུ་རྩ་གཅིག་བཟླས་བརྗོད་བྱས་པའི་སེང་ལྡེང་གི་ཕུར་བུས་བྱའོ། །གདོན་དབབ་ན། ཧ་ཧ་ཞེས་བྱ་བ་དང་། གུ་གུལ་གྱི་བདུག་པས་བྱའོ། །དུག་ལས་གསོ་བར་བྱ་ན། སེ་གོལ་ལམ་ཡལ་གས་བྱའོ། །གདོན་འབྲོས་པར་བྱ་ན། མེ་ཏོག་དཀར་པོ་ལ་ལན་བདུན་བཟླས་བརྗོད་བྱ་བའམ་གུ་གུལ་གྱིས་བདུག་པས་བྱའོ། །དགྲ་བསྐྲད་པར་འདོད་པས་ནི། མར་གྱི་ངོ་ཞག་བརྒྱད་ལ་ཞག་གཅིག་སྨྱུང་བ་བྱས་ཏེ། རྡོ་རྗེ་ཁྲོ་བོའི་དཀྱིལ་འཁོར་སྐྱང་ནུལ་གྱིས་བྱུགས་ནས་པྲི་ཡང་ཀུའི་ཤིང་གིས་མེ་སྦར་ཏེ་ཕུབ་མའི་སྦྱིན་སྲེག་ལན་བརྒྱ་སྟོང་བྱས་ན་ཞག་བདུན་གྱིས་འབྲོས་པར་འགྱུར་རོ། །དགྲ་གསད་པར་འདོད་ན། དུར་ཁྲོད་དུ་སོང་ལ་རྡོ་རྗེ་ཁྲོ་བོའི་དཀྱིལ་འཁོར་སྐྱང་ནུལ་གྱིས་བྱུགས་པའི་དབུས་སུ་ས་ལས་གཟུགས་བྱས་པ་དེའི་ཁར་དུར་ཁྲོད་ཀྱི་ཤིང་གིས་མེ་སྦར་ཏེ་ཡུངས་ཀར་གྱི་སྦྱིན་སྲེག་ལན་བརྒྱ་སྟོང་བྱས་ན། དེ་མ་ཐག་ཏུ་དགྲ་འཆི་བར་འགྱུར་རོ། །མར་གྱི་དོ་ཞག་བརྒྱད་ལ་ལག་ན་རྡོ་རྗེའི་མདུན་དུ་ཀཱ་ར་བཱི་རའི་མེ་ཏོག་དུས་གསུམ་དུ་བརྒྱ་རྩ་བརྒྱད་ཞག་བདུན་གྱི་བར་དུ་སྦྱིན་སྲེག་བྱས་ན། ཁྲག་འཛག་པར་འགྱུར་རོ། །འཕགས་པ་ལག་ན་རྡོ་རྗེའི་མདུན་དུ་མཆོད་པ་བྱས་ཏེ་ཀཱ་ར་བཱི་རའི་མེ་ཏོག་དཀར་པོ་སྟོང་རྩ་བརྒྱད་ཕུལ་ན། ཞི་བར་འགྱུར་རོ། །དེ་ནས་སྐྱེས་པ་དང་བུད་མེད་དབང་དུ་བྱ་བར་འདོད་ན། མ་ད་ན་ཨ་ལས་གཟུགས་བྱས་ཏེ་མ་ད་ནའི་ཚེར་མ་བདུན་གྱིས་གནད་རྣམས་སུ་བཏབ་ལ་ཚ་བ་གསུམ་གྱིས་སྙིང་གར་བཀང་ནས་ཟངས་ཀྱི་ཐུར་མས་ཀྱང་རྐང་པར་བཙུགས་ལ་སྤྱི་བ་ཨོར་ཕྱུང་སྟེ་ཞག་བདུན་གྱི་བར་དུ་དུས་གསུམ་དུ་བཟླས་བརྗོད་བྱེད་བཞིན་དུ་སེང་ལྡེང་གི་མེ་ལ་སྲེག་ཅིང་དུས་གཅིག་ཀྱང་ལན་བརྒྱ་རྩ་བརྒྱད་བཟླས་བརྗོད་བྱས་པའི་མཇུག་ཏུ་ཞག་གཅིག་སྨྱུང་བ་བྱས་ལ་མཆོད་པ་རྒྱ་ཆེར་བྱས་ཏེ་ལན་བརྒྱ་སྟོང་བཟླས་བརྗོད་བྱས་ན་སྐྱེས་པ་དང་། བུད་མེད་དབང་དུ་འགྱུར་རོ། །མར་གྱི་ངོ་ཞག་བཞི་ལ་ཞག་གཅིག་སྨྱུང་བ་བྱས་ཏེ་ལག་ན་རྡོ་རྗེའི་མདུན་དུ་བིལ་བའི་ཤིང་གི་མེ་སྦར་ལ། བེ་ཀངྐ་ཏའི་ཡམ་སྲེག་ཤིང་ཡུངས་མར་གྱི་ནང་དུ་སྨྱུགས་པ་བརྒྱ་སྟོང་གིས་སྦྱིན་སྲེག་བྱས་ན། ཏི་ན་ར་རེ་རེ་ཐོབ་པར་འགྱུར་རོ། །ཡུགས་ས་མོ་དབང་དུ་བྱ་བར་འདོད་ན། ཡར་གྱི་ངོ་ཞག་བརྒྱད་ནས་བརྩམས་ཏེ་ཞག་གསུམ་གྱི་བར་དུ་དུས་གསུམ་དུ་ཟར་མའི་མེ་ཏོག་བརྒྱ་རྩ་བརྒྱད་ཀྱིས་ལག་ན་རྡོ་རྗེ་ལ་བསྣུན་ན། དབང་དུ་འགྱུར་རོ། །བུ་མོ་དབང་དུ་བྱ་བར་འདོད་ན། ཞག་གསུམ་སྨྱུང་བ་བྱས་ཏེ་ཡར་གྱི་ངོ་ཚེས་བཅུ་གསུམ་ལ་འདོད་པའི་ལྷའི་གཟུགས་བྱས་ཏེ་འདིའི་ཁར་འབྲས་ཀྱི་སྦྱིན་སྲེག་ལན་བརྒྱ་སྟོང་བྱས་ན། བུ་མོ་དབང་དུ་འགྱུར་རོ། །དེ་ནས་མཛུབ་མོ་སྒྲུབ་པར་འདོད་ན། ཞག་གསུམ་སྨྱུང་བ་བྱས་ཏེ་མར་གྱི་ངོ་ཞག་བཅུ་བཞི་ལ་དུར་ཁྲོད་དུ་སོང་ནས་བ་ལང་གི་ལྕི་བ་ས་ལ་མ་ལྷུང་བས་དཀྱིལ་འཁོར་སྐྱང་ནུལ་གྱིས་བྱུགས་ཏེ། དཀྱིལ་འཁོར་གྱི་དབུས་སུ་མིའི་ཐོད་པ་མ་ཆག་མ་ཉམས་པ་བཞག་ལ་ཙནྡན་དམར་པོའི་དྲི་ཆུས་གཏོར་ནས་མེ་ཏོག་དམར་པོས་མཆོད་ལ། དེ་ནས་སྒྲུབ་པ་པོས་མཛུབ་མོས་གཡབ་ནས་གང་གི་ཚེ་ཐོད་པ་འགུལ་ན|་དེའི་ཚེ་འགྲུབ་པར་འགྱུར་ཏེ། གང་ལ་མཛུབ་མོས་བསྡིགས་པ་དེ་དབང་དུ་འགྱུར་རོ། །དེ་ནས་གཏེར་དབྱུང་བར་འདོད་ན། མེའི་སྦྱིན་སྲེག་གི་ཐབ་ཏུ་ལྕགས་བཞག་པ་བླངས་པ་ལས་རྡོ་རྗེ་བྱས་ལ། རྡོ་རྗེ་བལ་ནག་གི་སྐུད་པས་དཀྲིས་ཏེ་མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་ང་བྱས་ནས་ལག་ན་རྡོ་རྗེའི་མདུན་དུ་རྡོ་རྗེ་དེ་ལ་ལན་བརྒྱ་བཟླས་བརྗོད་བྱས་ན་དེའི་ཚེ་འགྲུབ་པར་འགྱུར་རོ། །བསྒྲུབས་ནས་ཀྱང་གཏེར་གང་ན་ཡོད་པ་དེར་བཞག་པ་རྡོ་རྗེའི་གཏེར་དེ་བླངས་ཏེ་འབྱུང་བར་འགྱུར་རོ། །དེ་ནས་ཁྲོ་བོའི་བཟླས་བརྗོད་བྱེད་བཞིན་དུ་བླང་བར་བྱའོ། །དེ་སྟེ་མེད་ན། རྡོ་རྗེ་ཉིད་འབྱུང་བར་འགྱུར་རོ། །དེ་ནས་གཤེད་བྱེད་བསླང་འདོད་ན། མར་གྱི་ངོ་ཞག་བཅུ་བཞི་ལ་ཞག་གཅིག་སྨྱུང་བ་བྱས་ཏེ་ལག་ན་རྡོ་རྗེའི་མདུན་དུ་དུར་ཁྲོད་ཀྱི་ཤིང་གིས་མེ་སྦར་ལ། བ་ལང་གི་ཤས་སྦྱིན་སྲེག་བྱས་པ་དང་། ཇི་ཙམ་ན་མེའི་ཐབ་ནས་གཤེད་བྱེད་འབྱུང་བར་འགྱུར་ཏེ། གང་ལ་ཡིད་ཀྱིས་བསམ་པ་དེ་བསྐྱབ་པར་འགྱུར་རོ། །མི་ནད་འབྱུང་བར་འདོད་ན། མར་གྱི་ངོ་ཞག་བཅུ་བཞི་ལ་དུར་ཁྲོད་དུ་སོང་སྟེ་དུར་ཁྲོད་ཀྱི་ཤིང་གིས་མེ་སྦར་ལ་སྒྲེན་མོར་བྱུང་ཞིང་སྐྲ་བཤིག་སྟེ་ཏིལ་དང་བསྲེས་པའི་ཡུངས་ཀར་གྱིས་བརྒྱད་བརྒྱ་སྦྱིན་སྲེག་བྱས་ན་མི་ནད་འབྱུང་བར་འགྱུར་རོ། །འཕགས་པ་ལག་ན་རྡོ་རྗེའི་མདུན་དུ་པདྨའི་སྦྱིན་སྲེག་ལན་སྟོང་རྩ་བརྒྱད་བྱས་ན། ཞི་བར་འགྱུར་རོ། །མི་མང་པོ་གཞིག་པར་འདོད་ན། ཚེས་གྲངས་དང་རྒྱུ་སྐར་ཡང་འདམ་མི་འཚལ། སྨྱུང་བ་ཡང་བྱ་མི་དགོས་པར་ཁྲོ་བོ་ཉིད་མཆོག་ཏུ་བརྟམ་པར་བྱ་སྟེ། དུར་ཁྲོད་དུ་སོང་ལ་དུར་ཁྲོད་ཀྱི་ཤིང་གིས་མེ་སྦར་སྒྲེན་མོར་བྱུང་ཞིང་སྐྲ་བཤིག་སྟེ། ནིམ་པའི་ལོ་མས་བསྲེགས་པའི་དུར་ཁྲོད་ཀྱི་ཐལ་པའི་སྦྱིན་སྲེག་ལན་བརྒྱ་སྟོང་བྱས་ན་མི་མང་པོ་འཇིག་པར་འགྱུར་རོ། ། ཞི་བར་འདོད་ན། སྣ་མའི་མེ་ཏོག་ཞོ་དང་། སྦྲང་རྩི་དང་། མར་གྱི་ནང་དུ་སྨྱུགས་པས་ལན་བརྒྱད་བརྒྱ་སྦྱིན་སྲེག་བྱས་ན་ཞི་བར་འགྱུར་རོ། །རྡོ་རྗེ་ཁྲོ་བོ་བདུད་རྩི་ཐབ་སྦྱོར་གྱི་ཆོ་ག་རྫོགས་སོ། ། །།དེ་ནས་མི་མཇེད་ཀྱི་བདག་པོ་ཚངས་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདུད་རྩི་ཐབ་སྦྱོར་གང་གིས་ལོག་འདྲེན་རྣམས་ཀྱི་གསང་བའི་གནས་འདི་དག་བཤད་པ་ནི། བརྩོན་འགྲུས་དང་། མཐུ་དང་། ཕ་རོལ་གནོན་པ་ཆེ་ལགས་སོ། །བདག་གིས་ཀྱང་དེ་བཞིན་གཤེགས་པ་ལ་རིག་སྔགས་རྣམས་ཀྱི་དངོས་གྲུབ་རྣམས་ཀྱི་སླད་དུ་གང་གིས་རིག་སྔགས་རྣམས་འགྲུབ་པ་དང་། གང་གིས་མི་འགྲུབ་པ་ཡོངས་སུ་ཞུ་བར་འཚལ་ལོ། །དེ་ནས་བཅོམ་ལྡན་འདས་ཀྱི་ཚངས་པ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །ཚངས་པ་ཆེན་པོ། གང་ཁྱོད་སེམས་ཅན་ཐམས་ཅད་ལ་ཕན་པའི་ཕྱིར་ཞུགས་ཏེ། དངོས་གྲུབ་འགྲུབ་པར་འགྱུར་བ་དང་། འགྲུབ་པར་མི་འགྱུར་བ་དེ་བཞིན་གཤེགས་པ་ལ་ཡོངས་སུ་ཞུ་བར་བྱེད་པ་ལེགས་སོ་ལེགས་སོ། །ཚངས་པ་ཆེན་པོ། ཁྱོད་ལ་རིག་སྔགས་རྣམས་ཀྱི་དངོས་གྲུབ་འགྲུབ་པར་འགྱུར་བ་དང་། འགྲུབ་པར་མི་འགྱུར་བའི་རྒྱུ་བཤད་པར་བྱ་སྟེ། འཇུག་པར་བྱ་བ་མ་ཡིན་པ་ལ་འཇུག་པ་གང་ཡིན་པ་དང་། ཚངས་པ་ཆེན་པོ་འཇོམས་པ་དང་། རིག་སྔགས་ལ་སྨོད་པ་གང་ཡིན་པ་དེ་ལ་ནི། རིག་སྔགས་འགྲུབ་པར་མི་འགྱུར་རོ། །མི་བཟད་པའི་ལས་བྱེད་པའམ། སྡིག་པའི་ངང་ཆུལ་ཅན་ནམ། རྫུན་ཟེར་བའམ། རིག་སྔགས་གཅོད་དམ། ཕུར་བུས་འདེབས་པ་གང་ཡིན་པ་དེ་ལ་ཡང་རིག་སྔགས་འགྲུབ་པར་མི་འགྱུར་རོ། །ཚངས་པ། བྱང་ཆུབ་ཀྱི་སེམས་ཡོངས་སུ་འཛིན་པས་ནི། ཡིད་ཀྱིས་ཀྱང་ལྷ་གཞན་ལ་ཕྱག་མི་བྱའོ། །གསོལ་པ|་བཅོམ་ལྡན་འདས། དེ་ནི། དེ་ལགས་སོ། །བཀའ་སྩལ་པ། རིགས་ཀྱི་བུའམ་རིགས་ཀྱི་བུ་མོ་གང་བྱང་ཆུབ་ཀྱི་སེམས་ཡོངས་སུ་འཛིན་པས་ལྷ་གཞན་ལ་ཕྱག་བྱས་ན། བྱང་ཆུབ་ཀྱི་སེམས་ཡོངས་སུ་འཛིན་པ་མེད་པའི་ཕྱིར་དེ་ལ་ལྷ་དེ་མ་དད་པའི་ཕྱིར་ཏེ། དེའི་ཕྱིར་དེས་ཀྱང་རིག་སྔགས་འགྲུབ་པར་མི་འགྱུར་རོ། །དུད་འགྲོར་སྐྱེས་པ་རྣམས་ལ་འཇུག་པར་བྱེད་པ་གང་ཡིན་པ་དང་། སྦྲུལ་འཛིན་པ་དང་། ཁས་རྩཝ་གཅོད་པར་བྱེད་པ་གང་ཡིན་པ་དེ་ལ་ཡང་རིག་སྔགས་འགྲུབ་པར་མི་འགྱུར་རོ། །པདྨ་དང་ཁྱུ་མཆོག་ལ་རྐང་པས་རེག་པར་བྱེད་པ་དེ་ལ་ཡང་རིག་སྔགས་འགྲུབ་པར་མི་འགྱུར་རོ། །ཚངས་པ|་གང་གིས་རིག་སྔགས་འགྲུབ་པར་མི་འགྱུར་བ་ངས་མདོར་བསྟན་པ་ཡིན་ནོ། །དེ་ནས་མི་མཛེད་ཀྱི་བདག་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། སངས་རྒྱས་བཅོམ་ལྡན་འདས་རྣམས་དེ་ལྟར་སེམས་ཅན་དག་བདེ་བླག་ཏུ་འགྲུབ་པར་བགྱི་བའི་གནས་རྣམས་སྟོན་པ་ཐུགས་རྗེ་ཆེ་བ་ལགས་སོ། །དེ་ནས་བཅོམ་ལྡན་འདས་ཀྱིས་ཚངས་པ་ལ་འདི་སྐད་ཅེས་བཀའ་སྩལ་ཏོ། །ཚངས་པ། གང་དག་ལ་རིག་སྔགས་ཀྱི་དངོས་གྲུབ་འགྲུབ་པར་འགྱུར་བའི་ཕྱོགས་འགའ་ཙམ་ཞིག་ཁྱོད་ལ་བསྟན་པར་བྱ་སྟེ། སངས་རྒྱས་དང་། ཆོས་དང་། དགེ་འདུན་ལ་དགའ་བ་གང་ཡིན་པ་དག་དང་། དགེ་བ་བཅུའི་ལས་ཀྱི་ལམ་དང་ལྡན་པ་གང་ཡིན་པ་དག་དང་། ཕ་ལ་གུས་པ་དང་། མ་ལ་གུས་པ་གང་ཡིན་པ་དང་། རིག་སྔགས་ལ་མཆོད་པ་བྱེད་ཅིང་རིག་སྔགས་ལ་བཀུར་སྟི་བྱེད་པ་གང་ཡིན་པ་དང་། གསང་སྔགས་འཛིན་པར་བྱེད་པ་གང་ཡིན་པ་དང་། འབྱུང་པོའི་ཟས་ངན་པ་དང་ཏིལ་སྦྲུས་པ་མི་ཟ་བ་དང་། སེམས་ཅན་ཐམས་ཅད་ལ་ལེགས་པར་ལྟ་བ་གང་ཡིན་པ་དེ་ལ་ནི། རིག་སྔགས་འགྲུབ་པར་འགྱུར་རོ། །དེ་ནས་མི་མཇེད་ཀྱི་བདག་པོ་ཚངས་པ་དགའ་ཞིང་མགུ་ལ་ཡིད་རངས་ཏེ་རབ་ཏུ་དགའ་ནས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ཀྱང་ལག་ན་རྡོ་རྗེའི་ཚེ་ག་རྒྱས་པ་ལ་གང་གིས་རིག་སྔགས་འཆང་རྣམས་སྲུང་བའི་གསང་སྔགས་དབུལ་བར་འཚལ་ལོ། ། བཀའ་སྩལ་པ། ཚངས་པ་ཆེན་པོ། གང་ཁྱོད་ཀྱིས་སེམས་ཅན་ཐམས་ཅད་ལ་ཕན་པའི་ཕྱིར་བསམ་པ་ཤོད་ཅིག་ཤོད་ཅིག་།ཁྱོད་ལ་དེ་བཞིན་གཤེགས་པས་གནང་ངོ་། །དེ་ནས་མི་མཇེད་ཀྱི་བདག་པོ་ཚངས་པས་ལག་ན་རྡོ་རྗེ་ལ་གསང་སྔགས་ཕུལ་བ། ན་མོ་རཏྣ་ཏྲ་ཡ་སྱ། ན་མ་ཤྩཎྜ་བཛྲ་པ་ཎི་སྱ། མཧཱ་ཡཀྵ་སེ་ནཱ་པ་ཏི་སྱ། ཏདྱ་ཐཱ། ན་མ་ཙཎྜ་བཀྵི་ཎི། ཨ་ཏི་ནི་ཙ་ཨ་སེ་བྷི་ཤ་ཡ། མི་མེད་ཙ་མྱེ་དན་ཙ། ཨ་ཧ་ར་སྭཱཧཱ། བཅོམ་ལྡན་འདས། རིག་སྔགས་འདི་དྲན་པ་ཙམ་གྱིས་ལོག་འདྲེན་རྣམས་ལས་ཐར་པར་འགྱུར་རོ། །འདི་དག་གི་ལས་རྣམས་འབྱུང་སྟེ། སྲུང་པ་ནི། ལན་བདུན་བཟླས་བརྗོད་བྱེད་པའི་སྐུད་པས་བྱའོ། །མཚམས་གཅད་པ་དང་། དུག་བཅིང་བ་ནི། ལན་བརྒྱ་རྩ་བརྒྱད་བཟླས་བརྗོད་བྱས་པའི་ཆུས་བྱའོ།། དུག་ལས་གསོ་བ་ནི། ཡལ་གས་བྱའོ། །རྒྱ་གཞོམ་པ་ནི། ཆུས་བྱའོ། །དབབ་པ་ནི། གུ་གུལ་གྱིས་བདུག་པའམ་ཆུས་བྱའོ། །གདོན་བཅིང་བ་དང་། གདོན་བསྐྱོད་པ་ནི། མཐེ་བོས་བྱའོ|་|གདོན་འཁོར་དུ་གཞུག་པ་ནི། མཛུབ་མོ་ལ་བཟླས་བརྗོད་བྱས་ཏེ་བསྡིག་པར་བྱའོ། །སྐྱེས་པ་དང་བུད་མེད་དབང་དུ་བྱ་ན། ཡར་གྱི་ངོ་ཚེས་གཅིག་ལ་བརྩམས་ཏེ་ཞག་བདུན་གྱི་བར་དུ་དུས་གསུམ་དུ་སྣ་མའི་མེ་ཏོག་སྟོང་རྩ་བརྒྱད་ཀྱིས་ལག་ན་རྡོ་རྗེ་ལ་བསྣུན་ན་དབང་དུ་འགྱུར་རོ། །བུམ་པ་ལ་ལན་བརྒྱད་བརྒྱར་བསྔགས་ཏེ་བདག་ཉིད་ཁྲུས་བྱས་ན། ལོག་འདྲེན་ཐམས་ཅད་ཀྱིས་གཏོང་བར་འགྱུར་རོ། །རིག་སྔགས་སྒྲུབ་པའི་ཚེ་བགེགས་ཞི་བར་བྱ་ན། ལན་བདུན་བཟླས་བརྗོད་བྱས་པའི་ཐལ་བ་གཙང་མས་བྱའོ། །གཞན་ལ་བགེགས་འབྱུང་བར་འདོད་ན། རིག་སྔགས་འཆང་གང་གིས་ནུབ་མོའི་རིག་སྔགས་སྒྲུབ་པ་དེ་ཉིད་ཀྱི་ནུབ་མོ་ལག་ན་རྡོ་རྗེའི་མདུན་དུ་བེ་ཀཾ་ཀ་ཏའི་ཡམ་སྲེག་ཤིང་བརྒྱད་བརྒྱས་སྦྱིན་སྲེག་བྱས་ན། ཕ་རོལ་ལ་བགེགས་འབྱུང་བར་འགྱུར་རོ། །འཕགས་པ་ལག་ན་རྡོ་རྗེའི་བདུན་དུ་རིག་སྔགས་ལན་བརྒྱད་བརྒྱ་བཟླས་བརྗོད་བྱས་ན། རྨི་ལམ་དུ་ཡང་དག་པ་ཇི་ལྟ་བ་བཞིན་དུ་སྟོན་པར་འགྱུར་རོ། །གཞིག་པར་འདོད་ན། ལག་ན་རྡོ་རྗེའི་མདུན་དུ་ཞག་བདུན་གྱི་བར་དུ་དུས་གསུམ་དུ་ལྷ་ལ་ཕུལ་བའི་མེ་ཏོག་བརྒྱ་རྩ་བརྒྱད་སྦྱིན་སྲེག་བྱའོ། །རིམས་ཀྱིས་འདེབས་པར་བྱ་ན། མར་གྱི་ངོ་ཞག་བརྒྱད་ན་ཞག་གཅིག་སྨྱུང་བ་བྱས་ཏེ་ལག་ན་རྡོ་རྗེའི་མདུན་དུ་ཨ་ཤྭཏྠའི་ཤིང་གིས་མེ་སྦར་ནས་ཡུངས་ཀར་ཁྲག་གིས་བསྒོས་པས་ལན་སྟོང་རྩ་བརྒྱད་སྦྱིན་སྲེག་བྱས་ན། དེ་མ་ཐག་ཏུ་རིམས་ཀྱིས་འདེབས་པར་འགྱུར་རོ། །དབྱེ་བར་བྱ་ན། ཞག་བདུན་གྱི་བར་དུ་དུས་གསུམ་དུ་ཕུབ་མའི་སྦྱིན་སྲེག་བརྒྱ་རྩ་བརྒྱད་བྱའོ། །གདོན་གཞིག་པར་འདོད་ན། ལག་ན་རྡོ་རྗེའི་མདུན་དུ་ཏིལ་དང་ཐལ་བའི་སྦྱིན་སྲེག་བརྒྱ་རྩ་བརྒྱད་བྱས་ན་གདོན་གྱི་རིགས་འཇིགས་པར་འགྱུར་རོ། །གདོན་མདོངས་པར་བྱ་ན། ཞིམ་ཐིག་ལེའི་ལོ་མའི་སྦྱིན་སྲེག་བརྒྱ་རྩ་བརྒྱད་བྱས་ན་མདོངས་པར་འགྱུར་རོ|་|ཡུངས་ཀར་ཁྱོར་གང་བཏགས་ཏེ་འཕགས་པ་ལག་ན་རྡོ་རྗེའི་མདུན་དུ་ལན་སྟོང་རྩ་བརྒྱད་བཟླས་བརྗོད་བྱས་ན། སླར་ཤགས་འགྱེད་པ་ལ་ལན་ཐེབས་པར་འགྱུར་རོ། ། ནོར་འདོད་ན། ཡར་གྱི་ངོ་ཟླ་བ་ཉ་ལ་ཞག་གཅིག་སྨྱུང་བ་བྱས་ཏེ་ལག་ན་རྡོ་རྗེའི་མདུན་དུ་ནིམ་པའི་ཤིང་གིས་མེ་སྦར་ནས་ཏིལ་གྱི་སྦྱིན་སྲེག་སྟོང་རྩ་བརྒྱད་བྱས་ན། ཏི་ན་ར་རེ་ཐོབ་པར་འགྱུར་རོ། །དེ་ནས་མཛུབ་མོ་སྒྲུབ་པར་འདོད་ན། མར་གྱི་ངོ་ཞག་གཅིག་སྨྱུང་བ་བྱས་ཏེ་ཁང་སྟོང་ངམ། དབེན་པའི་ཕྱོགས་སུ་བུད་མེད་ཀྱི་མོ་མཚན་དུ་མཛུབ་མོ་བཙུགས་ཏེ་རིག་སྔགས་སྟོང་རྩ་བརྒྱད་བཟླས་བརྗོད་བྱས་ན་འགྲུབ་པར་འགྱུར་ཏེ། དེ་ནས་གང་ལ་མཛུབ་མོས་བསྡིགས་པ་དེ་དབང་དུ་འགྱུར་རོ། །གོས་འདོད་ན་ཡང་ཡར་གྱི་ངོ་ཚེས་བརྒྱད་ལ་ཞག་གཅིག་སྨྱུང་བ་བྱས་ཏེ་ལྟེ་བ་ནུབ་ཙམ་དུ་ཆུའི་ནང་དུ་ཞུགས་ལ་ཀཱ་ར་བཱི་ར་ཀའི་མེ་ཏོག་བརྒྱད་བརྒྱ་ཕུལ་ན་གོས་ཕྲུགས་རེ་རེ་ཐོབ་པར་འགྱུར་རོ། ། ཀླུ་མཆོད་པས་ཚེས་ལྔ་ལ་ཞག་གཅིག་སྨྱུང་བ་བྱས་ཏེ་གྲོག་མཁར་གྱི་སྟེང་དུ་སོང་ལ་དེར་འདུག་ནས་རིག་སྔགས་སྟོང་རྩ་བརྒྱད་བཟླས་བརྗོད་བྱས་ཏེ། དེ་ནས་སྦྲུལ་མཐོང་བ་དེ་ལ་ཆེ་གེ་མོ་ཞིག་གི་ཐད་དུ་སོང་ལ་ཟོ་ཞིག་ཞེས་སྨྲོས་ཤིག་། ཕྱིར་གསོ་ན། ཡིད་ཀྱིས་བྱ་སྟེ། གཅིག་པུས་གསོ་ནུས་ཀྱི། གཞན་སུས་ཀྱང་གསོ་མི་ནུས་སོ|་|ཚངས་པའི་ཆོ་ག་རྫོགས་སོ། ། །།དེ་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གིས་ཀྱང་རིག་པའི་མཆོག་སྒྲུབ་པ་ལ་དངོས་གྲུབ་སྩལ་བར་འཚལ་ཏེ། བགེགས་གཞིལ་བའི་གསང་སྔགས་ཀྱང་བཤད་པར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག་།སེམས་ཅན་རྣམས་ཀྱི་དོན་ཀྱི་ཕྱིར་ཁྱེད་ཀྱིས་ཤོད་ཅིག་།དེ་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་དང་། ལག་ན་རྡོ་རྗེའི་ཞབས་གཉིས་ལ་ཕྱག་འཚལ་ནས་ཚིག་མཐུན་པར་གསང་སྔགས་བཤད་པ། ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་པཱ་ཎ་ཡེ། མཧཱ་ཡཀྵ་སེ་ནཱ་པ་ཏ་ཡེ། ཏདྱ་ཐཱ། ཨུ་གྲཱ་ཡ་སྭཱཧཱ། ཨ་ཏི་ཨུ་གྲཱ་ཡ་སྭཱཧཱ། ཨུ་གྲ་བི་ཡཱ་ཡ་སྭཱཧཱ། ཨ་ཏི་ཨུ་གྲ་བི་ཡཱ་ཡ་སྭཱཧཱ། ཨུ་གྲ་ཀྲོ་དྷ་ནཱ་ཡ་སྭཱཧཱ། ཨ་ཏི་ཨུ་གྲ་ཀྲོ་དྷ་ནཱ་ཡ་སྭཱཧཱ། ཙཎྜ་རོ་ཥ་ཎ་ཡ་སྭཱཧཱ། རོ་ཥ་པྲ་མ་ནཱ་ཡ་སྭཱཧཱ། པྲ་ཧ་ར་ཎ་བཛྲ་པྲ་ཧ་ར་ཎི་སྭཱཧཱ། ཨཊྚེ་མཊྚེ་མ་ཏི་ནི་ཧ་སེ་སྭཱཧཱ། བཅོམ་ལྡན་འདས། འདི་དྲན་པ་ཙམ་གྱིས་གདོན་ཐམས་ཅད་འབྱེར་བར་འགྱུར་རོ། །ཡི་དྭགས་ཐམས་ཅད་དང་། ཤ་ཟ་ཐམས་ཅད་དང་། གྲུལ་བུམ་ཐམས་ཅད་དང་། འབྱུང་པོ་ཐམས་ཅད་དང་། གནོད་སྦྱིན་ཐམས་ཅད་འབྱེར་བར་བྱེད་དེ། འགུམ་པར་ཡང་འགྱུར་རོ། ། དེ་ནས་རིག་སྔགས་འདིའི་ལས་རྣམས་འབྱུང་སྟེ། དབབ་པར་བྱ་ན་ནི། ཞིམ་ཐིག་ལེའི་ལོ་མས་བྱའོ། །གདོན་ཐམས་ཅད་མཉེ་བར་བྱ་ན། གོས་བསྲེག་པར་བྱའོ། །གདོན་གྱིས་ཟིན་པ་ལ་ནི། ལན་བདུན་བཟླས་བརྗོད་བྱས་པའི་གཏུན་ཤིང་གིས་བསྡིག་པར་བྱའོ། །གདོན་འབྲོས་པར་བྱ་ན། དུར་ཁྲོད་ཀྱི་སོལ་བ་ལ་གཟུགས་བྱས་ཏེ་མཚོན་རྣོན་པོས་བཅད་ན་གདོན་ཆོ་ངེས་འདེབས་ཤིང་འབྲོས་པར་འགྱུར་རོ། །གདོན་གྱི་མདུན་དུ་ལན་ཚྭ་དང་། སྐེ་ཚེས་སྦྱིན་སྲེག་ལན་བརྒྱད་བརྒྱ་བྱས་ན། གདོན་གྱི་ལུས་ཚ་བས་འདེབས་པར་འདེབས་པར་འགྱུར་རོ། །བ་ལང་གི་ལྕི་བ་ལས་གདོན་གྱི་གཟུགས་བྱས་ཏེ་ལྕགས་ཀྱི་ཐུར་མས་མིག་ཏུ་བཙུགས་ན། ལོང་བར་འགྱུར་རོ། །གདོན་གྱི་མདུན་དུ་ཕུབ་མའི་སྦྱིན་སྲེག་སྟོང་རྩ་བརྒྱད་བྱས་ན། གདོན་གྱི་རིགས་བརླག་པར་འགྱུར་རོ། །གདོན་གྱི་མདུན་དུ་ན་ལེ་ཤམ་གྱི་སྲེག་ལུགས་ཉི་ཤུ་རྩ་གཅིག་སྦྱིན་སྲེག་བྱས་ན། གདོན་ཁྲག་སྐྱུག་པར་འགྱུར་རོ། །བྱི་པ་གདོན་གྱིས་ཟིན་པ་ལ་ནི། བདུག་པས་གཏོང་བར་འགྱུར་རོ། །ཅི་སྟེ་མི་གཏོང་ན། སྐྲ་གཏུབས་པ་དང་། ལུག་རུ་དང་། སྒོག་སྐྱ་དང་། སྦྲུལ་གྱི་པགས་པ་བརྗེས་པ་རྣམས་ཀྱི་བདུག་པས་བདུགས་ན་དེ་མ་ཐག་ཏུ་གཏོང་བར་འགྱུར་རོ། །བྱིས་པ་གདོན་གྱིས་ཟིན་པ་རྣམས་ལ་བཟླས་བརྗོད་བྱས་པའི་ཚོན་སྣ་ལྔའི་སྐུད་པས་ཀྱང་གཏོང་བར་འགྱུར་རོ། །བདག་སྲུང་ན། ལན་གསུམ་བཟླས་བརྗོད་བྱས་པའི་ཐལ་བས་བྱའོ། །ཕ་རོལ་སྲུང་ན། ལན་བདུན་བཟླས་བརྗོད་བྱས་པའི་སྐུད་པས་བྱའོ།། མཚམས་བཅད་ན། ལན་གསུམ་བཟླས་བརྗོད་བྱས་པའི་གསེག་མས་བྱའོ། །སྦྲུལ་བསྐྲད་ན། ལན་གསུམ་བཟླས་བརྗོད་བྱས་པའི་ཆུ་དང་ཐལ་བས་བརྡབ་པར་བྱའོ།། མཆེ་བ་ཅན་ཐམས་ཅད་ཁ་བཅིང་བར་བྱ་བ་དང་། སྨད་བཅིང་བར་བྱ་བ་ནི། ཡིད་ཀྱིས་བྱའོ། །གཏེར་བཅིང་ན། ལན་ཉི་ཤུ་རྩ་གཅིག་བཟླས་བརྗོད་བྱས་པའི་སེང་ལྡེང་གི་ཕུར་བུ་ས་ལ་བཏབ་ན་གཏེར་བཅིངས་པར་འགྱུར་རོ། །ཆང་མ་རུང་བར་བྱ་ན། ཏིལ་གྱི་སྲེག་བླུགས་ལན་བདུན་སྦྱིན་སྲེག་བྱའོ། །ཉ་བསྐྲད་ན་ནི། ནིམ་པའི་ལོ་མ་ལ་ལན་བདུན་བསྔགས་ཏེ་མཚོའི་ནང་དུ་བོར་ན་ཉ་འབྲོས་པར་འགྱུར་རོ། །དུད་འགྲོར་སྐྱེས་པ་རྣམས་ལ་ནད་དག་ཞི་བར་འདོད་པར་བྱ་ན། ལག་ན་རྡོ་རྗེའི་གཟུགས་འོ་མས་བཀྲུས་ལ་བཟླས་བརྗོད་ཀྱང་སྟོང་རྩ་བརྒྱད་བྱས་ན་ཞི་བར་འགྱུར་རོ། །དུས་མ་ཡིན་པར་ཆར་འབབ་པར་འདོད་ན་ཡང་ཡར་གྱི་ངོ་ཚེས་ལྔ་ལ་ཞག་གཅིག་སྨྱུང་བ་བྱས་ཏེ་ལྟེ་བ་ནུབ་ཙམ་དུ་ཆུའི་ནང་དུ་ཞུགས་ནས་པདྨའི་སྦྱིན་སྲེག་ཁྲི་ཕུལ་ན། དུས་མ་ཡིན་པར་ཆར་པ་འབབ་པར་འགྱུར་རོ། །ཞི་བར་འདོད་ན། ཡར་གྱི་ངོ་ཚེས་བརྒྱད་ལ་ཞག་གཅིག་སྨྱུང་བ་བྱས་ལ་ལག་ན་རྡོ་རྗེའི་མདུན་དུ་བྱང་ཆུབ་ཀྱི་ཤིང་གི་བུད་ཤིང་གིས་མེ་སྦར་ནས་ཨུཏྤ་ལའི་སྦྱིན་སྲེག་སྟོང་རྩ་བརྒྱད་བྱས་ན་ཞི་བར་འགྱུར་རོ། །དུག་གཞོམ་པར་འདོད་ན། རྩཝ་ཀུ་ཤས་བྱའོ|་|དུག་བསལ་ན། ཁུ་ཚུར་གྱིས་བྱའོ། །གདོན་ཟར་གཞུག་ན། ལན་བདུན་བཟླས་བརྗོད་བྱས་པའི་ཨ་པ་ར་ཙི་ཏའི་མེ་ཏོག་གིས་བྱའོ། །གཡུལ་འགྱེད་ན། ཨ་པ་ར་ཙི་ཏའི་མེ་ཏོག་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ་མགོ་ལ་བཏགས་ན་གཞན་གྱིས་མི་ཐུབ་པར་འགྱུར་རོ། །གང་གི་ཚེ་རིག་སྔགས་འཆང་རིག་སྔགས་འགྲུབ་པར་འདོད་ན་ཨ|་ཞག་གསུམ་སྨྱུང་བ་བྱས་ལ་ནང་པར་བུམ་པ་གསར་པ་བཞི་བླངས་ཏེ་ཆུས་བཀང་ནས་རིག་སྔགས་འཆང་གི་ཕྱེམ་རེད་ན་ལེ་ཤམ་དཀར་པོ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ཏེ་བུམ་པ་དེ་དག་གི་ནང་དུ་བླུགས་ན་བུམ་པ་དེ་དག་འཕག་ཅིང་ལུད་པར་གྱུར་ན། རིག་སྔགས་འཆང་གིས་རིག་སྔགས་འགྲུབ་པར་ཤེས་པར་བྱའོ། ། དེ་སྟེ་མི་འགྲུབ་ན་ནི། འཕག་པར་མི་བྱའོ། །རིག་སྔགས་འཆང་རིག་སྔགས་སྒྲུབ་ལན་ཞག་གཅིག་སྨྱུང་བར་བྱས་ལ་ས་ལས་གཟུགས་བྱས་པ་བཀོད་དེ་མེའི་ཕྱོགས་སུ་ཁ་དོག་དམར་པོ་གཞག་པར་བྱའོ། །གཤིན་རྗེའི་ཕྱོགས་སུ་ནི། ཁ་དོག་སེར་པོའོ། །ཆུ་ལྷའི་ཕྱོགས་སུ་ནི། སྔོ་བསངས་སོ། །རླུང་གི་ཕྱོགས་སུ་ནི། ནག་པོ་སྟེ|་འདི་དག་སོ་སོའི་གནས་ཇི་ལྟ་བ་བཞིན་དུ་དགོད་པར་བྱའོ། །དེ་ནས་རིག་སྔགས་འཆང་རིག་སྔགས་སྒྲུབ་པ་ན་ཅི་སྟེ་བགེགས་ཀྱི་གཟུགས་དག་འབྱུང་བར་འགྱུར་ཏེ། དངོས་གྲུབ་ཕལ་སྒྲུབ་ན། གཤིན་རྗེའི་ཕྱོགས་ནས་ཡི་དྭགས་མོ་ནག་མོ་ཞེས་བྱ་བ་དེ་བགེགས་བྱེད་དེ། སྟག་གི་གཟུགས་སུ་སྟོན་པ་དང་། ཝའི་གཟུགས་སུ་འཚེ་བར་བྱེད་དོ|་|དེ་ལྟ་བུ་ལ་སོགས་པ་བགེགས་བྱེད་པ་དང་། རིག་སྔགས་འཆང་གིས་གཤིན་རྗེའི་ཕྱོགས་ལ་ལན་བདུན་བཟླས་བརྗོད་བྱས་པའི་ཡུངས་ཀར་གྱིས་བསྣུན་ན། བགེགས་རྣམས་མེད་པར་འགྱུར་རོ། །གཤིན་རྗེའི་རྒྱལ་པོའི་གཡོག་ཡི་དྭགས་ཀུ་མུ་ད་ཞེས་བྱ་བ་རྫུ་འཕྲུལ་ཆེ་བ་ཡི་དྭགས་སུམ་ཁྲིའི་བདག་པོ་ཞིག་ཡོད་དེ། ཀུ་མུ་ད་དེ་ཡང་རིག་སྔགས་འཆང་དེ་དངོས་གྲུབ་ཆེན་པོ་སྒྲུབ་པ་ན་བགེགས་བྱེད་དེ། ཀུ་མུ་དའི་བགེགས་འབྱུང་བ་ཡང་ལ་ལ་ནི། ཡི་དྭགས་ཀྱི་ཚུལ། ལ་ལ་ནི། སྲིན་པོའི་གཟུགས། ལ་ལ་ནི། ཁྱིའི་མགོ་ཅན། ལ་ལ་ནི། རྔ་མོའི་མགོ་ཅན། ལ་ལ་ནི། བོང་བུའི་མགོ་ཅན་གྱི་ཡི་དྭགས་ཏེ། དེ་དག་འོང་བའི་ཚེ་ཡང་ཧ་ཧ་ཞེས་བྱ་བའི་སྒྲ་འབྱིན་ཅིང་སྐར་མདའ་བརྒྱ་དག་ཁ་ནས་འབྱིན་པར་བྱེད་དོ། །དེ་ལ་རིག་སྔགས་འཆང་གིས་གཤིན་རྗེའི་ཕྱོགས་ཀྱི་གཟུགས་ལ་ལན་བདུན་བཟླས་བརྗོད་བྱས་པའི་ཐལ་བས་བསྣུན་ན། དེ་མ་ཐག་ཏུ་བགེགས་ཐམས་ཅད་མེད་པར་འགྱུར་རོ། །རྒྱལ་པོ་དེའི་ཕྱི་བཞིན་འབྲང་བ་སྒོ་དཔོན་མ་སྣ་ཆད་མ་ཞེས་བྱ་བ་རྫུ་འཕྲུལ་ཆེ་ཞིང་མཐུ་ཆེ་བ་ཞིག་ཡོད་དེ། སྣ་ཆད་མ་དེ་ནི། བགེགས་ཆེན་པོ་བྱེད་པ་ཡིན་ནོ། །དེ་ཡང་དེས་གསང་སྔགས་ཀྱིས་བཟློག་པར་མི་ནུས་ཏེ། དེ་འོངས་བ་དང་སྐར་མདའ་ལྟུང་བར་སྟོན་ཅིང་སྦྱུགས་པ་ཡང་ལེན་ཏེ། སྣ་ཆད་མ་དེས་དཀྱིལ་འཁོར་གྱི་མཚམས་སེང་ལྡེང་གི་ཕུར་བུས་བཏབ་པ་ནི། མོ་མཚན་གྱིས་འབྱིན་པར་བྱེད་དོ། །དཀྱིལ་འཁོར་གྱི་མཚམས་ཐལ་བས་བཅད་པ་ནི། བུས་པས་མེད་པར་བྱེད་དོ། །དཀྱིལ་འཁོར་གྱི་མཚམས་ཆུས་བཅད་པ་ནི། མཆིལ་མས་མེད་པར་བྱེད་དོ། །ཡིད་ཀྱིས་དཀྱིལ་འཁོར་གྱི་མཚམས་བཅད་པ་ནི། གཅིན་གྱིས་འབྲལ་བར་བྱེད་དོ།། དེ་ལྟ་བུའི་ཚུལ་དག་གིས་དཀྱིལ་འཁོར་འཇིག་པར་བྱེད་པ་དང་། དེ་ལ་རིག་སྔགས་འཆང་གིས་མྱུར་དུ་སྣ་ཆད་མའི་མིང་ནས་སྨོས་ཏེ་སྲིང་མོ་སྣ་ཆད་མ་ཁྱོད་འོངས་བ་ལེགས་སོ་ལེགས་སོ་ཞེས་བྱས་ནས་ལན་བདུན་བསྔགས་པའི་སེང་ལྡེང་གི་ཕུར་བུ་སོར་བཞི་པར་གཤིང་དེའི་ཕྱོགས་ཀྱི་སྙིང་གར་གདབ་བོ། །དེ་ནས་སྣ་ཆད་མ་དེས་དུ་འབོད་ཀྱི་སྒྲ་ཕྱུང་ནས་མེད་པར་འགྱུར་ཏེ། རིག་སྔགས་ཀྱང་འགྲུབ་པར་འགྱུར་རོ། །གཤིན་རྗེའི་ཕྱོགས་ཀྱི་ཆོ་ག་རྫོགས་སོ།། །།རིག་སྔགས་འཆང་རིག་སྔགས་སྒྲུབ་པ་ན་ཅི་སྟེ་མེའི་ཕྱོགས་ནས་བགེགས་ཀྱི་གཟུགས་དག་འབྱུང་སྟེ། དངོས་གྲུབ་ཕལ་སྒྲུབ་པ་ན་མེའི་ཕྱོགས་ཀྱི་རྒྱལ་པོའི་གཡོག་མོ་སྲིན་མོ་རྩེད་མོ་ཅན་ཞེས་བྱ་བ་ཡོད་དེ། དེ་ནི། བགེགས་བྱེད་པ་ཡིན་ནོ|་|སྲིན་མོ་རྩེད་མོ་ཅན་དེ་ཡང་བྱའི་གཟུགས་སུ་སྟོན་པར་བྱེད་ཅིང་ང་རོ་མི་སྙན་པ་ཡང་འབྱིན་པར་བྱེད་དོ། །དེ་ལ་རིག་སྔགས་འཆང་གིས་མེའི་ཕྱོགས་ཀྱི་གཟུགས་ལན་བདུན་སྔགས་ཀྱིས་བསྔགས་པའི་ཡུངས་ཀར་གྱིས་བསྣུན་ན། མེད་པར་འགྱུར་རོ། །དངོས་གྲུབ་ཆེན་པོ་སྒྲུབ་པ་ན་རྒྱལ་པོ་དེའི་གཡོག་སྲིན་མོ་མི་སྡུག་པ་ཞེས་བྱ་བ་རྫུ་འཕྲུལ་ཆེ་བ་སྲིན་པོ་སུམ་ཁྲིའི་བདག་པོ་ཞིག་ཡོད་དེ། མི་སྡུག་པ་དེ་ཡང་རིག་སྔགས་འཆང་ལ་བགེགས་བྱེད་པ་ཡིན་ཏེ། མི་སྡུག་པ་དེ་འོངས་པ་དང་། མི་སྡུག་པ་དེའི་རྣམ་པའི་སྲིན་པོ་དག་དང་། ལ་ལ་ཁྱི་མགོ་ཅན་དག་དང་། ལ་ལ་གླང་པོ་ཆེའི་མགོ་ཅན་དག་དང་། ལ་ལ་སེངྒེའི་མགོ་ཅན་ལྟ་བུའི་བགེགས་ཀྱི་རྣམ་པ་དག་ཏུ་སྣང་སྟེ། ལ་ལ་ནི|་བྲག་འཕེན་པར་བྱེད། ལ་ལ་ནི། འབྱུང་པོའི་འཁྲུལ་འཁོར་སྟོན་ཅིང་འཇིགས་པའི་སྒྲ་དག་ཀྱང་འབྱིན་ཏེ། སྐར་མདའ་བརྒྱ་དག་ཀྱང་ཁ་ནས་འབྱིན་པར་བྱེད་དོ། །དེ་ལ་རིག་སྔགས་འཆང་གིས་མེའི་ཕྱོགས་ཀྱི་གཟུགས་ལ་ལན་བདུན་བསྔགས་པའི་ཐལ་བས་བསྣུན་ན། བགེགས་རྣམས་མེད་པར་འགྱུར་རོ། །རྒྱལ་པོ་དེའི་གཡོག་སྲིན་པོ་སོ་དཀར་ཞེས་བྱ་བ་མཐུ་ཆེ་ཞིང་བརྩོན་འགྲུས་ཆེ་བ་ཞིག་ཡོད་དེ། སོ་དཀར་དེ་ཡང་རིག་སྔགས་འཆང་དེ་ལ་ནམ་གུང་གི་ཐུན་ལ་བགེགས་བྱེད་དོ། །དེ་ཡང་གསང་སྔགས་ཀྱིས་བཟློག་པར་མི་ནུས་ཏེ། དེ་འོངས་པ་དང་ངུ་འབོད་ཀྱི་སྒྲ་ཆེན་པོ་ནི། འབྱིན། རི་རྣམས་ནི། གཡོ། རི་དྭགས་རྣམས་ནི། གར་བྱེད། ཝ་རྣམས་ནི། རྩེ། གླང་པོ་ཆེ་རྣམས་ནི། སྐད་འབྱིན་ཏེ། དེས་རིག་སྔགས་འཆང་གི་མེའི་ཕྱོགས་ཀྱི་བགེགས་ཡིན་པར་ཤེས་པར་བྱའོ། །སོ་དཀར་དེ་ཡང་བུས་པའི་གཟུགས་ཀྱིས་སྒྲ་འབྱིན་ཞིང་འོང་ངོ་། །ཡང་ན་ལྷའི་གཟུགས་ཀྱིས་འོང་སྟེ། དེས་ཀྱང་བལྟས་པ་ཙམ་གྱིས་དཀྱིལ་འཁོར་ཐམས་ཅད་འཇིག་པར་བྱེད་དོ། །དེ་ལ་རིག་སྔགས་འཆང་གིས་མྱུར་དུ་ལན་བདུན་བསྔགས་པའི་སེང་ལྡེང་གི་ཕུར་བུ་སོར་བཞི་པས་མེའི་ཕྱོགས་ཀྱི་གཟུགས་ལ་བཏབ་སྟེ་འདི་སྐད་དུ་སོ་དཀར་བཅོམ་མོ་ཞེས་ཀྱང་སྨྲས་ན། ངུ་འབོད་ཀྱི་སྒྲ་ཆེན་པོ་ཕྱུང་ནས་མེད་པར་འགྱུར་ཏེ། གསང་སྔགས་ཀྱང་འགྲུབ་པར་འགྱུར་རོ། །མོའི་ཕྱོགས་གྱི་ཆོག་རྫོགས་སོ།། །།རིག་སྔགས་འཆང་རིག་སྔགས་སྒྲུབ་པ་ན་ཅི་སྟེ་རླུང་གི་ཕྱོགས་ནས་སྲོད་ལ་བགེགས་ཀྱི་གཟུགས་དག་འབྱུང་སྟེ། དངོས་གྲུབ་ཕལ་སྒྲུབ་པ་ན་རླུང་གི་ཕྱོགས་ཀྱི་རྒྱལ་པོའི་གཡོག་མོ་སོ་སྒོ་མ་ཞེས་བྱ་བ་ཞིག་ཡོད་པ་དེ་ཡང་བགགས་བྱེད་དེ། མར་མེ་གསོད་ཅིང་ལྷ་བཤོས་སྨེ་བས་འགགས་པར་བྱེད་དོ། །དེ་ཕྱིར་གཞིལ་བར་བྱ་བ་ནི། རླུང་གི་ཕྱོགས་ཀྱི་གཟུགས་ལ་ལན་བདུན་བསྔགས་པའི་ཡུངས་ཀར་གྱིས་བསྣུན་ན། བགེགས་རྣམས་མེད་པར་འགྱུར་རོ། །དངོས་གྲུབ་ཆེན་པོ་སྒྲུབ་པ་ན་རླུང་གི་ཕྱོགས་ཀྱི་རྒྱལ་པོའི་གཡོག་གནོད་སྦྱིན་རྫུ་འཕྲུལ་ཆེན་པོ་དྲུག་ཁྲིའི་བདག་པོ་ཞིག་ཡོད་དེ། །འཚུབ་མ་གཅིག་པ་ཞེས་བྱ་བ་དེ་ཡང་རིག་སྔགས་འཆང་དེ་ལ་འཇིང་གི་ཐུན་ལ་བགེགས་བྱེད་དོ། །འཚུབ་མ་གཅིག་པ་དེ་ཡང་འདོད་རྒུར་སྒྱུར་བའི་གཟུགས་ཅན་ཡིན་ཏེ། ཆེད་འགའ་ནི། ཝའི་གཟུགས། ཆེད་འགའ་ནི། སྟག་གི་གཟུགས། ཆེད་འགའ་ནི། ཁྱུ་མཆོག་གི་གཟུགས། གཟུགས་སྣ་ཚོགས་སུ་བདག་ཉིད་སྟོན་པར་བྱེད་ཅིང་། ཆེད་འགའ་ནི། ཧ་ཧ་ཞེས་བྱ་བའི་སྒྲ་འབྱིན་ཅིང་སྐར་མདའ་བརྒྱ་དག་ལྟུང་བར་བྱེད། གནམ་ཡང་གྲུམ་པར་བྱེད་དོ། །དེ་ལ་རིག་སྔགས་འཆང་གིས་རླུང་གི་ཕྱོགས་ཀྱི་གཟུགས་ལ་ལན་བདུན་བསྔགས་པའི་ཐལ་བས་བསྣུན་ན། བགེགས་རྣམས་མེད་པར་འགྱུར་རོ། །རྒྱལ་པོའི་སྒོ་དཔོན་མ་ལྕགས་ཀྱུ་དཀར་མོ་ཅན་ཞེས་བྱ་བ་མཐུ་ཆེ་ཞིང་རྫུ་འཕྲུལ་ཆེ་ལ་བགེགས་བྱེད་པ་ཆེན་མོ་ཞིག་ཡོད་དེ། དེ་ཡང་གསང་སྔགས་ཀྱིས་བཟློག་པར་མི་ནུས་ཏེ། དེ་ནི། ནམ་གུང་གི་ཐུན་ལ་འོང་ངོ་། །དེ་འོངས་པ་དང་དུས་མ་ཡིན་པའི་ཆར་འབབ་ཅིང་འབྲུག་ཀྱང་དི་རི་རི་སྒྲོག་། གནམ་ཡང་གྲུམ་པར་བྱེད་དེ། ལྕགས་ཀྱུ་དཀར་མོ་ཅན་དེ་ཡང་མདོག་དཀར་ཞིང་གཟུགས་ཀྱི་ལུས་བསྟན་པས་ཀྱང་དཀྱིལ་འཁོར་འཇིག་པར་བྱེད་དོ།། དེ་ལ་རིག་སྔགས་འཆང་གིས་མྱུར་དུ་ལན་བདུན་བསྔགས་ཏེ་སེང་ལྡེང་གི་ཕུར་བུ་སོར་བཞི་བས་རླུང་གི་ཕྱོགས་ཀྱི་གཟུགས་ལ་བཏབ་སྟེ་ལྕགས་ཀྱུ་དཀར་མོ་ཅན་བཅོམ་མོ་ཞེས་ཀྱང་སྨྲས་ན|་དུ་འབོད་ཀྱི་སྒྲ་ཆེན་པོ་ཕྱུང་ནས་མེད་པར་འགྱུར་ཏེ། གསང་སྔགས་ཀྱང་འགྲུབ་པར་འགྱུར་རོ། །རླུང་གི་ཕྱོགས་ཀྱི་ཆོ་ག་རྫོགས་སོ།། །།རིག་སྔགས་འཆང་རིག་སྔགས་སྒྲུབ་པ་ན་ཆུ་ལྷའི་ཕྱོགས་ནས་བགེགས་རྣམས་འབྱུང་སྟེ། དངོས་གྲུབ་ཕལ་སྒྲུབ་པ་ན་ཆུ་ལྷའི་རྒྱལ་པོའི་གཡོག་མོ་ཀླུ་མོ་རྒྱལ་བ་མོ་ཞེས་བྱ་བ་ཞིག་ཡོད་དེ། རྒྱལ་བ་མོ་དེ་ཡང་སྲོད་ལ་བགེགས་བྱེད་དོ། །ཐོག་ཏུ་འོངས་ལ་ཁོག་སྐམ་འདོར་བར་བྱེད་ཅིང་ཕ་གུ་འཕེན་པར་བྱེད་དོ། །དེ་ལ་རིག་སྔགས་འཆང་གིས་ཆུའི་ཕྱོགས་ཀྱི་གཟུགས་ལ་ལན་བདུན་བསྔགས་པའི་ཡུངས་ཀར་གྱིས་བསྣུན་ན། མེད་པར་འགྱུར་རོ། །རྒྱལ་པོ་དེའི་གཡོག་ཀླུ་མོ་སོ་བརྩེགས་ཞེས་བྱ་བ་མཐུ་ཆེ་ཞིང་རྫུ་འཕྲུལ་ཆེ་བ་ཀླུ་སུམ་ཁྲིའི་བདག་པོ་ཞིག་ཡོད་དེ། སོ་བརྩེགས་དེ་ཡང་རིག་སྔགས་འཆང་དེ་ལ་འཇིང་གི་ཐུན་ལ་བགེགས་བྱེད་སྣ་ཚོགས་རྣམ་པ་མང་པོ་བྱེད་དོ། །སོ་བརྩེགས་དེ་དུར་ཁྲོད་དུ་སྐྱེས་པ་ཐམས་ཅད་ཀྱི་ཆ་ལུགས་དག་ཏུ་སྣང་ཞིང་ཀུན་ཏུ་རྒྱུ་དང་གཅེར་བུ་ལྟ་བུའི་བགེགས་ཀྱི་ཆ་ལུགས་དག་ཏུ་སྣང་སྟེ། དེ་ཡང་དུ་འབོད་ཀྱི་སྒྲ་ཆེན་པོ་འབྱིན་ཅིང་སྐར་མདའ་དག་ཀྱང་འབྱིན་པར་བྱེད་དོ། །དེ་ལ་རིག་སྔགས་འཆང་གིས་ཆུ་ལྷའི་ཕྱོགས་ཀྱི་གཟུགས་ལ་ལན་བདུན་བསྔགས་པའི་ཡུངས་ཀར་གྱིས་བསྣུན་ན། མེད་པར་འགྱུར་རོ། །ཆུ་ལྷའི་ཕྱོགས་ཀྱི་རྒྱལ་པོ་རྒོ་དཔོན་མ་མིག་སེར་མ་ཞེས་བྱ་བ་མཐུ་ཆེ་ཞིང་རྫུ་འཕྲུལ་ཆེ་བ་གེགས་ཆེན་པོ་བྱེད་པ་ཞིག་ཡོད་དེ། དེ་ཡང་གསང་སྔགས་ཀྱིས་བཟློག་པར་མི་ནུས་ཏེ། རིག་སྔགས་འཆང་དེ་རིག་སྔགས་སྒྲུབ་པ་ན་ནམ་གུང་གི་ཐུན་ལ་བགེགས་བྱེད་དེ། དེས་ཀྱང་སྒྲ་ཕྱུང་བས་དཀྱིལ་འཁོར་ཐམས་ཅད་འཇིག་པར་བྱེད་ཅིང་མེའི་གཟུགས་ཀྱིས་བགེགས་བྱེད་ལ་སྐར་མདའ་སྟོང་དག་སྣང་བར་བྱེད་དོ། །དེ་ལ་རིག་སྔགས་འཆར་གིས་མྱུར་དུ་ལན་བདུན་བསྔགས་པའི་སེང་ལྡེང་གི་ཕུར་བུ་སོར་བཞི་པས་ཆུ་ལྷའི་ཕྱོགས་ཀྱི་གཟུགས་ལ་བཏབ་ཅིང་འདི་སྐད་དུ་མིག་སེར་མ་འདུག་ཅིག་འདུག་ཅིག་ཅེས་སྨྲས་ན། འདུག་ཅིག་འདུག་ཅིག་ཅེས་བྱ་བ་ཐོས་ནས་བདག་ནི། རྨ་ཕབ་བོ་སྙམ་སྟེ་དུ་འབོད་ཀྱི་སྒྲ་ཆེན་པོ་ཕྱུང་ནས་མེད་པར་འགྱུར་ཏེ། རིག་སྔགས་ཀྱི་དངོས་གྲུབ་ཀྱང་འགྲུབ་པར་འགྱུར་རོ། །ཆུ་ལྷའི་ཆོ་ག་རྫོགས་སོ།། །།དེ་བས་འཛམ་པའི་ལས་འདི་བཤད་དེ། རིག་སྔགས་འཆང་རིག་སྔགས་སྒྲུབ་པ་ན་ལན་བདུན་བསྔགས་པའི་སེང་ལྡེང་གི་ཕུར་བུ་སོར་བཞི་པ་ཚོན་སྣ་ལྔའི་སྐུད་པས་དཀྲིས་པ། བགེགས་ཐམས་ཅད་ཀྱི་གནས་སུ་རྐང་པ་གཡོན་པས་མནན་ན། བགེགས་ཐམས་ཅད་བཅོམ་པ་དང་། རེངས་པར་བྱས་པར་འགྱུར་རོ། །ཞག་གསུམ་སྨྱུང་བ་བ་ཡས་ཏེ་མར་གྱི་ངོ་ཞག་བརྒྱད་དམ་ཞག་བཅུ་བཞི་ལ་དབང་ཕྱུག་ཆེན་པོའི་གནས་སུ་སོང་སྟེ་འབྱུང་པོའི་གཏོར་མ་ཡང་བྱིན་ལ་རིག་སྔགས་ལན་བརྒྱད་བརྒྱ་བཟླས་བརྗོད་བྱས་ན|་བགེགས་ཀྱི་ལས་ཐམས་ཅད་འགྲུབ་པར་འགྱུར་ཏེ། བསམ་པས་བགེགས་ཐམས་ཅད་མེད་པར་འགྱུར་རོ། །འཇིག་རྟེན་སྐྱོང་བ་རྣམས་ཀྱི་ཆོ་ག་རྫོགས་སོ།། །།དེ་ནས་འཇིག་རྟེན་ཕན་འདོད་པ། །ཐུབ་པ་ཀུན་དང་ལྷ་ཆེན་གྱིས། །ལག་ན་རྡོ་རྗེའི་མདུན་དུ་བདར། །ལྷན་ཅིག་ཏུ་ནི་འདུས་པར་འགྱུར། །ཉི་མ་བཞིན་དུ་གཟི་འབར་ཞིང་། །དཀའ་ཐུབ་རྣལ་འབྱོར་ལྡན་པ་ཡི། །ཐུབ་པ་རབ་མཆོག་ལྡན་པ་ཀུན། །ཉིན་མོ་བྱ་བ་བྱས་ནས་འཁོད། །ཐུབ་པ་དག་ནི་ཐམས་ཅད་དང་། །བདེ་བྱེད་ལྷ་ཚོགས་ལྷ་རྣམས་ཀྱིས། །ལག་ན་རྡོ་རྗེ་སེམས་དཔའ་ཆེ། །འབྱུང་པོ་ཀུན་དབང་རྗེ་ལ་ཞུས། །འཇིག་རྟེན་དངོས་གྲུབ་བྱེད་པ་ཡི། །བགེགས་རྣམས་དག་ནི་ག་ལ་འབྱུང་། །དེ་དག་གི་ནི་ཆག་ཐོས་ནས། །ལག་ན་རྡོ་རྗེ་གྲགས་པ་ཆེ། །དགའ་པར་གྱུར་ནས་དྲིས་པ་དེ། །རྒྱས་པར་ཡང་ནི་རབ་བཤད་དེ། །བགེགས་རྣམས་ཇི་ལྟར་འབྱུང་འགྱུར་བ། །ཐུབ་པ་དག་ནི་ཀུན་གྱིས་ཉོན། །ལྷ་རྣམས་ལ་ཡང་ལྷ་མིན་རྣམས། །འཐབ་པའི་ཕྱིར་ནི་ལྡང་བ་ལྟར། །སེམས་ཅན་རྣམས་ལ་བགེགས་བྱའི་ཕྱིར། །དེ་བཞིན་གཤེགས་རྣམས་འབྱུང་བར་འགྱུར།། ཇི་ལྟར་ལྷ་ཡིས་ལྷ་མིན་རྣམས། །གཡུལ་དུ་ལན་བརྒྱར་བཅོམ་པ་དང་། །བརྒྱ་བྱིན་གྱིས་ནི་གཡུལ་བཅོམ་ལྟར། །དེ་བཞིན་གཤེགས་རྣམས་བཅོམ་པར་གྱུར། །དེ་ཚེ་ལྷ་ཀུན་དགར་གྱུར་ནས། །འཇིག་རྟེན་གྲགས་པ་དེ་དག་ནི། །ཐམས་ཅད་སྟོབས་དང་ལྡན་འགྱུར་ཞིང་། །དེ་དག་ང་རྒྱལ་དྲེགས་པས་རྒྱས། །འཇིག་རྟེན་དོན་དང་ལྷ་རྣམས་ཀྱིས། །བརྩོན་འགྲུས་དང་ནི་མཐུ་བསྐྱེད་ཕྱིར། །བདེ་ཞིང་རྒྱ་མཚོ་ཆེན་པོ་ནི། །གཤེད་བྱེད་དང་ནི་དབྱུང་བར་བརྩམས། །ཐུབ་པ་དེ་དག་རྨོངས་པ་སྟེ། །ཕན་པ་བྱས་ན་སྟོབས་ཀྱིས་རྒྱགས།། བརྒྱལ་འདིས་ནི་འཇིག་རྟེན་ན། །རིང་པོར་མི་ཐོགས་ཐེ་ཚོམ་མེད། །དེ་ནས་དྲང་སྲོང་ལྷར་བཅས་རྣམས། །ཅ་ཅོའི་སྒྲ་ནི་རབ་འདོན་ཅིང་། །རྩོམ་པ་ཆེན་པོ་སྐད་ཅིག་ཏུ། །འཇིག་རྟེན་དུ་ནི་གྲགས་པར་འགྱུར། །དེ་ནས་ལྷ་རྣམས་ཐུབ་པར་བཅས། །ཁྲོ་བོ་རུ་ནི་གྱུར་པ་ན། །ལྷར་བཅས་དྲང་སྲོང་དེ་དག་ལ། །ལྷ་ཆེན་གྱིས་ནི་ཚིག་སྨྲས་པ། །ཚངས་བཅས་ལྷ་རྣམས་ཁྱེད་ཀྱི་མཐུས། །རྩོམ་པ་དག་ནི་མ་བྱེད་ཅིག་།རྡོ་རྗེ་འཆང་བ་དཔལ་ལྡན་འདི། །གནོད་སྦྱིན་ཚོགས་ཀུན་བདག་པོ་སྟེ། །གནོད་སྦྱིན་བདེ་བདག་ཞི་བ་པོ། །སེམས་ཅན་ཀུན་ལ་ཕན་པར་དགའ། །མ་རུངས་འདི་དག་བརླག་བྱེད་པ། །བརྩམས་ཤིང་ཚར་གཅོད་ནུས་པ་ཡོད། །དེ་ནས་ལྷ་ཡི་མཆོག་རྣམས་ཀྱིས། །ལག་ན་རྡོ་རྗེ་དཔལ་ལྡན་མཆོག་།སྦྱོར་བ་ཤེས་ཤིང་སྦྱོར་གནས་ནས། །དཔུང་ཆེན་དག་ནི་རབ་སྤྲུལ་པ། །རྒྱལ་པོའི་བློ་གྲོས་རྡོ་རྗེའི་གདོང་། །རྡོ་རྗེའི་ལྟ་བ་གདོང་དཀར་མ། །རྡོ་རྗེ་མིག་སེར་འོག་པག་ཅན། །རྡོ་རྗེ་ནག་མོ་ཕོ་ཉ་ཆེ|་|དབང་ཕྱུག་ཆེན་མོ་གནམ་ངོ་མ། །དྲག་མོ་རྡོ་རྗེ་སེངྒེའི་ཁྲི། །ཤུགས་ལྡན་མ་དང་རྡོ་རྗེ་ཅན། །དེ་བཞིན་བཞད་མ་རྡོ་རྗེ་ཅན། །གཏུམ་མོ་རང་གི་ཐུགས་དང་ནི། །ཉེ་བའི་སྙིང་པོ་ལས་ཀུན་བྱེད། །འབྱུང་པོ་སྲིན་པོ་ཕོ་ཉ་མོ། །རྣམ་པ་སྣ་ཚོགས་མིང་གྲགས་པ། །མ་རུངས་གདོན་རྣམས་བཟློག་པ་དང་། །བགེགས་རྣམས་བརླག་ཕྱིར་སྤྲུལ་པར་གྱུར|་|དེ་ནས་བསྒྱུར་དེ་དགར་གྱུར་ནས། །དཔལ་གྱིས་སུ་ནི་འཁྱུད་པ་བཞིན། །ལག་ན་རྡོ་རྗེའི་ཕོ་ཉ་དེ། །ཀུན་ནས་བསྐོར་ཅིང་འཁོད་པར་གྱུར། །དེ་ནས་རབ་འབར་མི་བཟད་ཅིང་། །འབྱུང་པོ་ཐམས་ཅད་བརླག་བྱེད་ཅིང་། །ལག་ན་རྡོ་རྗེའི་རྡོ་རྗེ་དེ། །ཕྱོགས་བརྒྱད་དག་ཏུ་འཕྲོས་པར་འགྱུར། །དེ་ནས་སྟོབས་ཆེན་བརྩོན་ཆེན་མོ|་|ཕོ་ཉ་མོ་དག་སོང་བར་གྱུར། །དེ་ནས་སྐྲག་ནས་གདོན་དེ་དག་།ཐམས་ཅད་བརྡུངས་ཏེ་སེམས་སྟོར་ཅིང་། །རྡོ་རྗེ་ནག་མོས་འཇིགས་གཟིར་བས། །བསྐྱབས་ཀྱང་རྙེད་པར་མ་གྱུར་ཏེ། །རྡོ་རྗེ་སྒྲོག་གིས་ཕམ་བྱས་ཤིང་། །རྡོ་རྗེ་ཅན་གྱི་ཡུལ་དུ་བཅོམ། །དེ་ནས་དེ་དག་ཡིད་ཀྱིས་སུ། །དེ་བཞིན་གཤེགས་ལ་སྐྱབས་སུ་སོང་། །དཀོན་མཆོག་གསུམ་གྱིས་མཛེས་བྱས་ཤིང་། །ཐམས་ཅད་དགེ་ལ་ངེས་པར་གྱུར། །དེ་ནས་མེ་ནི་འདྲ་བ་དེ། །རྡོ་རྗེ་ལྟ་བུའི་མཚོན་ཐོགས་པ། །ཞི་ནས་རྡོ་རྗེ་ལ་སོགས་ཚོགས། ཡིད་མ་ཞི་ལ་ཡང་སྨྲས་པ། །ཀྱེ་ཀྱེ་ཚོགས་རྣམས་ཞི་བར་གྱིས། །སྐལ་བ་ཆེ་རྣམས་ལྡོག་པར་གྱིས། །གདོན་ཀུན་དགེ་ལ་ངེས་བྱས་ཤིང་། །ཞི་བར་གྱུར་གྱི་མ་གཞོམ་ཞིག། ལག་ན་རྡོ་རྗེ་ལྟས་བསྟན་པའི། །ཐད་དུ་ཡང་ནི་ཁྲིད་པར་གྱིས། །མི་བཟད་ཚོགས་ཀྱིས་དེ་ཉན་ནས། །གདོན་རྣམས་དེ་དག་ཐམས་ཅད་ནི། །རྣལ་འབྱོར་བསྟན་བཅོས་མཐུས་བཏུལ་ནས། །ལག་ན་རྡོ་རྗེའི་ཐད་དུ་ཁྲིད། །བཅོམ་ལྡན་རྡོ་རྗེ་ལྡན་པ་དེས། །མཐོང་ནས་ཅི་སྟེ་གསོན་འདོད་ན། །རིག་པའི་མཆོག་ལ་ཕྱག་བྱོས་ལ། །ཕྱག་རྒྱ་མཐོང་ནས་བསྟ་ན་ལ་མནོས|་|གནས་ནས་མི་རྣམས་ཐོང་ཞིག་ཅེས། །གདོན་རྣམས་ལ་ནི་བགད་དེ་སྨྲས། །དེ་སྐད་སྨྲས་ནས་གདོན་དེ་དག་།ཀུན་གྱིས་དེ་ཚེ་བསྟན་སྨྲས་པ། །ཁྱོད་ཀྱི་ལས་འདི་མཆོག་ཡིན་ཏེ|་|གཞན་གྱིས་མི་ཐུབ་དྲག་ཅིང་དགེ་། མངའ་བདག་ཁྱོད་ཀྱིས་བཀའ་སྩལ་པ། །དེ་བཞིན་དུ་ནི་བགྱི་བར་འཚལ། །སངས་རྒྱས་ལ་ནི་སྐྱབས་སུ་མཆི། །ཆོས་དང་དགེ་འདུན་དེ་བཞིན་ཏེ། །ཞི་ལ་མ་རུངས་འདུལ་བ་པོ། །ཁྱོད་ལ་རྟག་ཏུ་སྐྱབས་སུ་མཆི། །སེམས་ཅན་ཀུན་ལ་ཕན་པའི་ཕྱིར། །སྟོབས་ཆེན་དེ་ནི་སྐྱེས་པ་ལེགས། །བདག་ཅག་གི་ནི་འཚོ་པ་ཡི། །ཐབས་ཀྱི་ཕྱིར་ཡང་བཀའ་སྩོལ་ཅིག་། དེ་ནས་དཔལ་ལྡན་རྡོ་རྗེ་འཆང་། །བགད་ནས་ཚོགས་ལ་སྨྲས་པ་ནི། །ཁྱོད་ཀྱིས་བླང་བར་བྱ་བ་དང་། །མེ་བླང་བ་ཡང་བསྟན་པར་བྱ། །གང་དག་རྟག་ཏུ་རྫུན་སྨྲ་དང་། །དྲིན་དུ་མི་གཟོ་གཙང་སྦྲར་མེད། །བྱང་ཆུབ་སེམས་ནི་རབ་ཉམས་པ། །སྐྱེ་བོ་དེ་རྟག་རྟག་ཏུ་ལོང་། །ཉ་དང་ཤ་སོགས་ཟ་བ་དང་། །མི་བྱ་བདག་བྱེད་པ་གང་། །རྐང་པས་ཕྱག་རྒྱ་རྫི་བྱེད་པ|་|སྐྱེ་བོ་དེ་དག་བླང་བར་གྱིས། །ཅི་སྟེ་གསོན་པར་འདོད་ན་ནི། །གང་དག་བདེན་པའི་ཚིག་སྨྲ་དང་། །དྲིན་དུ་གཟོ་ཞིང་ངེས་པར་གནས། །སྲོག་གི་ཕྱིར་ཡང་བྱང་ཆུབ་སེམས། །གཏོང་བར་མི་བྱེད་རབ་བསྡམས་དང་། །རྟག་ཏུ་ངལ་དད་པ་དང་། །དེ་བཞིན་རིགས་མཆོག་རིགས་ལ་གནས། །གང་རྣམས་ཀྱི་ནི་ཁྱིམ་དག་ཏུ། །རིག་རྒྱལ་དམ་པ་རྟག་མཆོད་དང་། །ང་རིག་པ་ཡི་རྒྱལ་པོ་མཆོག་།སྒྲུབ་པ་དང་ནི་བཟླས་བརྗོད་བྱེད། །དེ་དག་ལ་ནི་ཞི་བར་གྱིས། །ཡི་གེ་བཞི་པ་ཞེས་བྱ་བའི། །རྡོ་རྗེ་དོན་ཡོད་ཆེན་པོ་དེས། །གདོན་གང་དེ་ལ་དང་མི་འཛིན། །དེ་ཡི་སྤྱི་བོ་འགེམས་པར་བྱེད། །རྟག་ཏུ་ང་དང་རིགས་མཆོག་ལ། །དེ་བཞིན་དད་པ་ལྷུར་བྱེད་དང་། །དམ་ཚིག་གཤེས་པ་གང་ཡིན་དེ། །ཁྱེད་ཀྱིས་རྟག་ཏུ་མཆོད་པ་གྱིས|་|ལག་ན་རྡོ་རྗེའི་ཚིག་འདི་དག་། ཐོས་ནས་ཀྱང་ནི་ལོག་འདྲེན་རྣམས། །དགའ་ཞིང་ཅ་ཅོའི་སྒྲ་འབྱིན་ནས། །སྐད་ཅིག་གིས་ནི་མི་སྣང་གྱུར། །རིག་པ་མཆོག་གི་རྒྱུད་ཕྱི་མ་ལས། ལོག་འདྲེན་འབྱུང་པོ་རྫོགས་སོ།། །།ལས་འདི་ནི། དམ་པར་འགྱུར་བ་དང་། དྲག་ཅིང་དོན་ཡོད་ལ་གཞན་གྱིས་མི་ཐུབ་ཅིང་དགེ་བ་ཡིན་ཏེ། དངོས་གྲུབ་སྒྲུབ་པའི་ཚེ་དུད་པ་མེད་པའི་མེ་མདག་ལ་རིག་སྔགས་ཀྱི་རྒྱལ་པོས་ཏིལ་ནག་པོའི་སྦྱིན་སྲེག་ལན་བརྒྱད་བརྒྱ་བྱས་ན། བགེགས་ཐམས་ཅད་འབྱུང་བར་མི་འགྱུར་རོ། །ལས་འདི་དག་ནི་མཆོག་ཡིན་ཏེ། །འཇིག་རྟེན་རྣམས་ཀྱི་དངོས་གྲུབ་ཕྱིར། །རིག་མཆོག་མགོ་བོར་བཞག་ན་ནི། །སྤྱན་རྣམས་དངོས་གྲུབ་སྟོན་པར་འགྱུར། །སངས་རྒྱས་ཡུལ་དང་ཆོས་སྤྱན་ལ། །གང་ཞིག་ཕྱག་འཚལ་ད་ལ་ནི།། བཅོམ་ལྡན་གསུངས་པའི་ལས་ལ་སོགས། །ལག་ན་རྡོ་རྗེས་བཤད་པ་ཡི། །ཆོ་ག་འདི་དང་རྡོ་རྗེའི་རིགས། །དེ་དག་ཐམས་ཅད་འགྲུབ་འགྱུར་ཏེ། །ཡུལ་ཡང་ཡིད་ལ་བཞག་ནས་ནི། །དངོས་གྲུབ་མཆོག་ནི་བསྒྲུབ་པར་བྱ། །ལས་འདི་དག་ཀྱང་བྱས་ནས་ནི། །དངོས་གྲུབ་མཆོག་འགྱུར་ཤེས་པར་བྱ། །གང་གིས་ཉིན་མོ་ཡང་རུང་སྟེ་ཞག་གཅིག་སྨྱུང་བ་བྱས་ཏེ་ལག་ན་རྡོ་རྗེའི་མདུན་དུ་དྲི་དང་། མེ་ཏོག་དང་། བདུག་པ་ཕུལ་ནས་བ་སེར་མོའི་ལྕི་བ་ས་ལ་མ་ལྷུང་བས་ལྷ་མོའི་གཟུགས་བྱས་ཏེ་ལག་པ་གཡས་པར་རྡོ་རྗེ་ཐོགས་པར་བྱ། དེའི་འོག་ལོགས་སུ་སྒྲུབ་པ་པོ་སྙིམ་པ་ཟེད་ཅིང་འདུག་པར་བྱའོ། །དེ་ནས་རིག་སྔགས་འཆང་གིས་ཡིད་ལ་བསམ་སྟེ་རིག་སྔགས་བརྗོད་ནས་ཅི་སྟེ་གཟུགས་འགུལ་བར་གྱུར་ན། དེ་མ་ཐག་ཏུ་ལས་འགྲུབ་ཅིང་། རིག་སྔགས་ཀྱང་བདེ་བླག་ཏུ་འགྲུབ་སྟེ། བགེགས་ཐམས་ཅད་ཀྱང་བསམ་པ་ཙམ་གྱིས་འཇིགས་པར་འགྱུར་རོ། །ཡང་ན་སྒྲུབ་པ་པོའི་ལག་ཏུ་རྡོ་རྗེ་བྱིན་ན། །སའི་བདག་པོར་འགྱུར་རོ། །ཡང་ན་བཅོམ་ལྡན་འདས་མ་ལས་འོད་ཟེར་འབྱུང་སྟེ། འོད་ཟེར་དེས་ཕོག་པར་གྱུར་ན་ནི། རིག་སྔགས་འཆང་དུ་འགྱུར་ཞིང་གླང་པོ་ཆེའི་སྟོབས་དང་ལྡན་ལ་སྐྲ་ལྕང་ལོ་འཁྱིལ་བ་དང་། ཉི་མ་ཤར་བའི་ཁ་དོག་ཅན་དུ་འགྱུར་ཞིང་ལག་ཏུ་རལ་གྲི་འོད་བར་འགྱུར་ཏེ། དེ་ཐོགས་ན་རིག་སྔགས་འཆང་ཐམས་ཅད་ཀྱིས་མི་སོད་ལ་སྒྱུ་འཕྲུལ་དག་ཀྱང་བྱེད་པར་འགྱུར་རོ། །གང་གི་ཚེ་གཉིད་ཀྱིས་ལོག་པ་དེ་ན་རལ་གྲི་དེ་དཔག་ཚད་གཅིག་ཙམ་ནས་མགལ་མེའི་འཁོར་ལོ་བཞིན་དུ་ཀུན་ནས་འཁོར་བར་བྱེད་ཅིང་སད་པ་ན་ཤུགས་སུ་འགྲོ་སྟེ། ཚེ་ལོ་ཁྲི་བཞི་སྟོང་ཐུབ་ཅིང་ནམ་འཆི་བ་དེའི་ཚེ་བདེ་བ་ཅན་དུ་སྐྱེ་བར་འགྱུར་རོ། །ལས་དེ་བྱས་ཏེ་དངོས་གྲུབ་ཀྱི་མཆོག་སྒྲུབ་ན། ཆོ་ག་རྒྱས་པའི་དངོས་གྲུབ་སྦྱིན་པར་བྱེད་དེ། མས་བུ་ལ་བྱ་བ་བཞིན་ནོ། །དངོས་གྲུབ་བསྒྲུབ་པའི་ཕྱིར་དབང་ཕྱུག་ཆེན་པོ་སྒྲུབ་པའི་མདོར་བསྟན་ཏེ། དེ་ལ་ནི། འདི་ནི། ཆོ་ག་རྒྱས་པའི་དངོས་གྲུབ་མཆོག་སྒྲུབ་པ་བསྟན་པ་སྟེ། ལག་ན་རྡོ་རྗེའི་མདུན་དུ་བྱང་ཆུབ་ཀྱི་ཤིང་གིས་མེ་སྦར་ལ་ཡུངས་མར་དང་སྦྱར་བས་ལན་བརྒྱ་སྟོང་སྦྱིན་སྲེག་བྱས་ན་ཁྲུ་དོའམ་ཁྲུ་གསུམ་ཙམ་དུ་དུད་པའི་ཁྲི་ཞིང་འབྱུང་སྟེ། དེ་ནས་རིག་སྔགས་འཆང་གིས་རིག་སྔགས་ཀྱི་རིགས་འགྲུབ་པ་དང་། ཆོ་ག་རྒྱས་པ་འགྲུབ་པར་ཤེས་པར་བྱ་སྟེ། དེ་ནས་ལས་བརྩམ་པར་བྱའོ། །ཡིད་ལ་བསམ་སྟེ་ཕུར་བུ་གསུམ་པས་བཤད་པའི་ཆོ་ག་རྒྱས་པ་དང་། ལག་ན་རྡོ་རྗེས་བཤད་པ་བསྒྲུབ་པར་བྱའོ། །རྣ་བར་གཤིབས་ཏེ་བཟླས་བརྗོད་བྱས་ན། དངོས་གྲུབ་ཀྱི་མཆོག་སྟོན་པར་འགྱུར་ཏེ། ནུབ་ཀར་ལག་ན་རྡོ་རྗེ་ལ་མཆོད་པ་བྱས་ལ་ལག་ན་རྡོ་རྗེའི་རྣ་བ་གཡས་པར་རིག་སྔགས་ལན་སྟོང་རྩ་བརྒྱད་བཟླས་བརྗོད་བྱས་ནས་ཅི་སྟེ་རྨི་ལམ་དུ་བྲམ་ཟེ་མཐོང་ན། ལས་འགྲུབ་པར་འགྱུར་རོ། །འབྲེག་མཁན་མཐོང་ན་ནི། འགྲུབ་པར་མི་འགྱུར་ཏེ། དེ་ལ་བལྟ་ཞིང་ལས་བསྒྲུབ་པར་བྱའོ|་|རི་མོའི་གཟུགས་གང་གིས་མཐོང་བ་དེས་ནི། རྡོ་རྗེའི་རིགས་མཐོང་བ་ཡིན་ནོ། །རྡོ་རྗེའི་རིགས་མཐོང་ན། ལས་འབྱང་བར་འགྱུར་རོ། །ལས་བྱང་ན། དངོས་གྲུབ་ཀྱི་མཆོག་ཐོབ་པར་འགྱུར་ཏེ། རས་མ་ཉམས་པ་ལ་རི་མོ་མཁན་གསོ་སྦྱོང་དང་ལྡན་པ་ཚོན་རྩི་སྤྱིན་མེད་པས་སངས་རྒྱས་ཀྱི་སྐུ་གཟུགས་གསེར་གྱི་ཁ་དོག་ཅན་ཆོས་སྟོན་པའི་ཚུལ་དུ་འབྲིར་གཞུག་གོ་།དེ་བཞིན་གཤེགས་པའི་གཡས་ལོགས་སུ་ལྷ་མོ་གསེར་གྱི་ཁ་དོག་ཅན་ཆོས་ཉན་པ་བྲིའོ། །དེའི་འོག་ལོགས་སུ་ལག་ན་རྡོ་རྗེ་མདོག་སྡོ་བསངས་ལ་རྒྱན་ཐམས་ཅད་ཀྱིས་བརྒྱན་པ་ཆོས་ཉན་པ་བྲི|་དེ་བཞིན་གཤེགས་པའི་གཡོན་ལོགས་སུ་དབང་ཕྱུག་ཆེན་པོ་འདམ་བུ་མངའ་རྒྱུའི་མདོག་ཅན། ཐོར་ཚུགས་དང་ཅོད་པན་ཐོགས་པ་བྲི། དེའི་གཡོན་ལོགས་སུ་ཕུར་བུ་གསུམ་པའི་མ་མ་ཏངྒི་ལུགས་ཅན་ཆོས་ཉན་པའི་ཚུལ། དེའི་འོག་ལོགས་སུ་དབང་ཕྱུག་ཆེན་པོ་འདམ་བུ་མདའ་རྒྱུའི་ཁ་དོག་ཅན། ཐོར་པོ་ཕུར་བུ་གསུམ་པ། མདོག་སྡོ་བསངས། རྒྱན་ཐམས་ཅད་ཀྱི་མིག་གསུམ་དང་ལྡན་པ་བྲིའོ། །དེའི་དྲུང་དུ་མ་ཏང་གི་རྒྱལ་པོ་ཕུར་བུ་གསུམ་པ། མདོག་སྡོ་བསངས། རྒྱན་ཐམས་ཅད་ཀྱི་བརྒྱན་པ་མ་ཏང་གི་ཆ་ལུགས་སུ་བྲིའོ། །དེའི་ལོགས་སུ་འཇིག་རྟེན་སྐྱོང་བ་བཞི་ཁ་དོག་ཐ་དད་པ་དང་། རྒྱན་སྣ་ཚོགས་ཀྱིས་བརྒྱན་པ་ཆོས་ཉན་པའི་ཚུལ་དུ་བྲི། ལག་ན་རྡོ་རྗེའི་ལོགས་སུ་རྡོ་རྗེ་སྡེ་དང་གཙུག་ནས་བྱུང་རྩེ་ཞིང་འདུག་པར་བྲི་སྟེ། རྡོ་རྗེ་སྡེ་ནི|་གསེར་གྱི་མདོག་ཅན་ལ་རྒྱན་ཐམས་ཅད་ཀྱིས་བརྒྱན་པ་བྱའོ། །གཙུག་ནས་བྱུང་གི་མདོག་དམར་ལ་མིག་གསུམ་ཡོད་པ། གླང་པོ་ཆེའི་པགས་པའི་སྨད་གཡོགས་ཅན། ཀླུའི་རྒྱལ་པོ་ནོར་རྒྱས་ཀྱི་སེ་རལ་ཀར་ཐོགས་ལ་རྒྱན་སྣ་ཚོགས་ཀྱིས་བརྒྱན་པ་བྱའོ། །ཁྱད་པར་དུ་རྡོ་རྗེ་སྡེའི་དྲུང་དུ་རྡོ་རྗེ་ཁྲོ་བོ་འབར་ལ་ལོག་འདྲེན་རྣམས་འཇོམས་ཤིང་འཐོར་བ་བྲི། རིག་པའི་མཆོག་འདོད་རྒུར་སྒྱུར་བའི་གཟུགས་ཅན་ལན་གཅིག་མཐོང་བ་ཙམ་གྱིས་ངོ་ཤེས་པ་ཙམ་དུ་གསོལ་བ་ལག་ན་རྡོ་རྗེའི་ཁ་ནས་བྱུང་བ་བྲིའོ|་|གཟུགས་དེ་མཐོང་ན། སྔོན་གྱི་སྡིག་པ་ཐམས་ཅད་ལས་གྲོལ་བར་འགྱུར་ཏེ། ལོག་འདྲེན་རྣམས་ཀྱིས་ཀྱང་མི་ཚུགས་སོ། །གང་རི་མོའི་གཟུགས་འདི་སྒྲུབ་པ་དེས་ནི། དངོས་གྲུབ་ཀྱི་མཆོག་ངེས་པར་འགྲུབ་པར་འགྱུར་རོ། །སྒྲུབ་པར་འདོད་པའི་རིག་སྔགས་འཆང་གིས་ཞག་གསུམ་སྨྱུང་བ་བྱས་ཏེ་ཟླ་བ་ཉ་ལ་རི་མོའི་གཟུགས་མཆོད་པ་རྒྱས་པར་བྱས་ན། གསང་སྔགས་སྔ་མ་དག་གིས་ལས་རྣམས་བྱའོ། །འོ་མས་བཀང་བའི་སྣོད་བཞི་དང་། ཞོས་བཀང་བ་བཞི་དང་། དེ་བཞིན་དུ་བཏུང་བ་དང་སྦྱར་ཐུག་གིས་བཀང་བ་བཞི་བཞི་དབུལ་ཞིང་འབྱུང་པོའི་གཏོར་མ་ཡང་སྦྱིན་ནོ། དེ་ནས་རིག་སྔགས་འཆང་གིས་དངོས་གྲུབ་ཀྱི་མཚན་མ་བྱུང་གི་བར་དུ་ནམ་ཕྱེད་ཀྱི་དུས་སུ་མེ་ཏོག་དྲི་ཞིམ་པོ་སྟོང་རྩ་བརྒྱད་བཟླས་བརྗོད་ལན་རེ་རེ་སྦྱར་ཞིང་བཅོམ་ལྡན་འདས་སངས་རྒྱས་ཀྱི་ཡུམ་ལ་བསྣུན་ན། རི་མོའི་གཟུགས་འགུལ་བ་དང་། མེ་ཏོག་གི་ཕྲེང་བ་གཡོ་བ་དང་། ལྷ་མོ་ལས་འོད་ཟེར་འབྱུང་བར་འགྱུར་ཏེ། རི་མོའི་གཟུགས་འདུལ་ན་ནི། དབབ་པའི་ལས་དང་། ཞི་བ་དང་། རྒྱས་པའི་ཆོ་ག་འགྲུབ་པར་འགྱུར་རོ། །མེ་ཏོག་ཕྲེང་བ་གཡོ་ན་ནི། དབབ་པའི་རིག་སྔགས་ཀྱི་ཆོ་ག་འགྲུབ་པར་འགྱུར་རོ། །འོད་ཟེར་བྱུང་ན་ནི། ཆོ་ག་རྒྱས་པའི་དངོས་གྲུབ་མཆོག་ཏུ་འགྱུར་ཏེ། སྒྲུབ་པར་གྱུར་ན་རྡོ་རྗེའི་རིགས་ཐམས་ཅད་འགྲུབ་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གིས་དཔལ་ཆེན་མོའི་རིག་སྔགས་ཀྱི་ཆོ་ག་རྒྱས་ལ་ལྷག་མ་དག་ཀྱང་འགྲུབ་པར་འགྱུར་རོ། །ཅི་སྟེ་དབང་ཕྱུག་ཆེན་པོའི་ཆོ་ག་རྒྱས་པ་སྒྲུབ་པར་འདོད་ན་རིག་སྔགས་འཆང་དེས་མེ་ཏོག་དམར་པོ་སྟོང་རྩ་བརྒྱད་བཟླས་བརྗོད་ལན་རེ་རེ་དང་སྦྱར་ཏེ་དབང་ཕྱུག་ཆེན་པོ་ལ་བསྣུན་ན། དེའི་ཡང་དངོས་གྲུབ་རྣམ་པ་གསུམ་དུ་འགྱུར་ཏེ། དབང་ཕྱུག་ཆེན་པོའི་ཆོ་ག་རྒྱས་པ་ཡང་འགྲུབ་པར་འགྱུར་རོ། །ཅི་སྟེ་ཕུར་བུ་གསུམ་པའི་ཆོ་ག་རྒྱས་པར་སྒྲུབ་པར་འདོད་ན་རིག་སྔགས་འཆང་དེས་མ་ཏོག་ནག་པོ་སྟོང་རྩ་བརྒྱད་བཟླས་བརྗོད་ལན་རེ་དང་སྦྱར་ཏེ་ཕུར་བུ་གསུམ་པའི་རི་མོ་ལ་བསྣུན་ན། དེ་ཡང་དངོས་གྲུབ་རྣམ་པ་གསུམ་དུ་འགྱུར་ཏེ། ཕུར་བུ་གསུམ་པས་བྱས་པའི་མ་ཏངྒི་ཆོ་ག་རྒྱས་པ་ཐམས་ཅད་ཀྱང་འགྲུབ་པར་འགྱུར་རོ། ། སེམས་ཅན་རྣམས་ལ་ཕན་པའི་ཕྱིར། །ཆོ་ག་འདི་ནི་བདག་གིས་བཤད། །ཁྱེད་རྣམས་ཡིད་ནི་དགའ་བཞིན་པས། །དངོས་གྲུབ་དམ་པ་སྦྱིན་པར་གྱིས|་|གང་སངས་རྒྱས་ཀྱི་ཡུམ་དྲན་པ་ཙམ་གྱིས་འོང་བར་མི་བྱེད་ན་དངོས་གྲུབ་ཀྱང་སྦྱིན་པར་མི་བྱེད་པ་ནི། དེ་བཞིན་གཤེགས་པ་ལ་སྙིང་རིངས་པ་ཡིན་ཏེ། ངས་ཀྱང་རྡོ་རྗེས་སྤྱི་བོ་བཀས་པར་བྱའོ། །གང་ཆོ་ག་རྒྱས་པ་འདི་འཆང་བ་དེ་ལ་གདོན་ཐམས་ཅད་དང་། ལོག་འདྲེན་ཐམས་ཅད་དང་། ཤ་ཟ་ཐམས་ཅད་ཀྱང་འབྱེར་ཞིང་སྐྲག་པར་འགྱུར་རོ། །གང་ཞིག་ཆོ་ག་འདིས་མཆོད་པ། །དེ་ལ་ལྷ་མཆོག་རྣམས་ཀྱིས་མཆོད། །གང་ཞིག་དངོས་གྲུབ་མཆོད་པ་ལ། །དེ་ཡིས་ཆོ་ག་ལྷ་མཆོད་བྱ། །གང་ཞིག་ཆོ་ག་འདི་མཆོད་དང་། །ཐམས་ཅད་རྫོགས་པར་མཆོད་བྱེད་པ། །དེ་ཡི་ལག་ན་རྡོ་རྗེ་ཡིས། །བཤད་པ་བཞིན་དུ་ངེས་པར་འགྲུབ། །གང་ཞིག་ཆོ་ག་འདི་འཆང་བ། །སངས་རྒྱས་ཀུན་གྱིས་བྱིན་གྱིས་བརླབས། །ལག་ན་རྡོ་རྗེ་དཔལ་ལྡན་པ། །དེ་ཡི་ལུས་ཀྱི་སྤྱི་བོར་གནས། །ཡི་གེ་བཞི་པ་ཞེས་བྱ་བ། །རིག་སྔགས་ཀྱི་རྒྱལ་པོའི་ཆོ་ག་རྟོགས་སོ།། །།

CLOSE WINDOW