བོད་ཡིག |
355a2 / //rgya gar skad du/ AR+Ya u da ya na bad sa rA dza ba ri pr-i ts+tshA nA ma pa ri brta/ bod skad du/ 'phags pa bad sa'i rgyal po 'char byed kyis zhus pa zhes bya ba'i
355a3 le'u/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa'i dus gcig na/ bcom ldan 'das ko'u sham+b+hi na dbyangs can gyi
355a4 kun dga' ra ba na/ dge slong lnga brgya tsam gyi dge slong gi dge 'dun chen po dang / byang chub sems dpa' sems dpa' chen po rab tu mang po dang thabs gcig tu bzhugs te/
355a5 de'i tshe na ma du'i bu mo dpe med phrag dog dang / ser snas zin pas/ btsun mo sngo sangs can la lhag par dmigs nas/ bad sa'i rgyal po 'char byed la/ lha/ mkhyen par mdzad
355a6 du gsol/ btsun mo sngo sangs can la sogs pa bud med lnga brgya ni/ dge slong go'u ta ma dang lhan cig tu rab tu skyon chags par bgyid de/ de'i slad du bdag gis lha la
355a7 gsol ba lags kyi/ ji ltar mkhyen pa de bzhin du mdzad du gsol/ zhes rdzun gyis tshig gis dbyen byas par gyur to/ /de nas bad sa'i rgyal po 'char byed/ ma du'i bu mo
355b1 dpe med kyis dbyen byas pas/ bcom ldan 'das dang / nyan thos kyi dge 'dun rnams la tha ba dang / 'khrug pa dang / khro ba skyes par gyur to/ /de yi ma rangs shing / khro ba dang rngam
355b2 pas zil gyis non pas/ btsun mo sngo sangs can gsad pa'i phyir gzhu bdungs nas/ mda' ste'u ka nya rnga ma blangs te 'phangs so/ /de nas de'i mod la btsun mo sngo sangs can gyis/
355b3 bcom ldan 'das de bzhin gshegs pa dgra bcom pa yang dag par rdzogs pa'i sangs rgyas la phyag 'tshal lo/ /zhes bcom ldan 'das la phyag byas shing / bcom ldan
355b4 'das kyi bsngags pa brjod nas/ byams pa'i ting nge 'dzin la snyoms par zhugs so/ /de nas 'di ltar sangs rgyas kyi mthus/ mda' ste'u ka nya rnga ma de de nas phyir log ste/ bad
355b5 sa'i rgyal po 'char byed de nyid kyi mgo bo'i drang thad kyi steng gi bar snang la 'bar/ rab tu 'bar/ kun du rab tu mched de/ 'bar zhing me lce gcig tu gyur te/ phar 'gro/ tshur
355b6 'gro zhing 'dug 'dug nas/ bad sa'i rgyal po 'char byed da la ba der song nas/ bad sa'i rgyal po 'char byed kyi g.yon rol logs su 'dug par gyur te/ de'i lus la ni
355b7 ma phog go /lan gnyis lan gsum du de ltar gyur pa dang / de nas btsun mo sngo sangs can gyis/ bad sa'i rgyal po 'char byed la 'di skad ces smras so/ /rgyal po chen po/
356a1 de lta lags pas/ gal te khyod de bzhin gshegs pa la phyag 'tshal na/ khyod la yang bde legs su 'gyur lags so/ /de nas bad sa'i rgyal po
356a2 'char byed 'jigs shing dngangs la/ sgyid lug cing spu zing zhes byed par gyur te/ sa la 'gyel nas btsun mo sngo sangs can la tshigs su bcad de smras pa/ khyod ni lha mo'am
356a3 dri za mo/ /sha za mo'am srin mo'am/ /ngas ni ji ltar gzung bar bya/ /nga yis dris pa de smros shig/ gang la mtshon gyis mi gnod pa'i/ /bud med 'ga' yang yod min te/ /
356a4 ngas ni 'di la gang du yang / /thos sam mthong ngam shes pa'ang med/ /nga ni stobs ldan brtson 'grus can/ /'phongs gi shes pa legs bslabs pas/ /nga yi mda' 'di
356a5 gdon mi za/ /nam yang mi phog yong min te/ /spre'u'am yang na bya dang ni/ /mi'am yang na 'ben yang rung / /gang la nga yis mda' 'phangs pa/ /nam yang mi phog yod
356a6 min na/ /de ring mda' 'di 'phangs pa ni/ /bzlog pa'i tshul du phyir 'ongs te/ /lus la gnod pa med pa ni/ /nga yi mdun du 'dug par gyur/ /gzhan gyi tshig ni mnyan nas
356a7 kyang / /nga ni khyod la gsod 'dod na/ /nga ni khyod la skyabs su 'gro/ /sdug bsngal gyur pa nga la skyobs/ /phyin chad 'di 'dra mi byed kyi/ /sdug bsngal ba la deng bzod kyi/ /khyod
356b1 sngon dga' ba dran byos la/ /dang bar gyis shing khro thul cig/ de nas btsun mo sngo sangs can gyis/ /bad sa'i rgyal po 'char byed la tshigs su bcad de smras pa/ bdag ni lha min
356b2 dri za min/ /sha za mo min srin mo min/ /bdag ni btsun mo sngo sangs can/ /'jig rten mgon bo'i nyan thos ma/ /lha khyod la ni snying brtse bas/ /bdag gis sems ni mnyam gzhag
356b3 gis/ /khyab bdag 'jig rten mgon po la/ /thugs ni rab tu dang bar mdzod/ /bskal pa bye ba stong rnams su/ /gang gis byas pa'i legs bsgoms te/ /byams la gnas pa'i
356b4 skyes bu dang / /bud med ngag ni mi gsod gsungs/ /gang zhig lo tog smin pa la/ /ser ltar yang dag ji bzhin mkhyen/ /bud med rnams kyis gnod med pa/ /de yi bstan la
356b5 bdag dga' lags/ /'jig rten mgon po thams cad kyis/ /bud med rnams ni smad par gsungs/ /bud med rnams la mi lta ba/ /'jig rten mgon po rnams kyis bsngags/ /sangs
356b6 rgyas rnams dang rang sangs rgyas/ /byang chub sems dpa' nyan thos rnams/ /bud med bsten par mi mdzad de/ /de ni byis pa'i spyod yul lags/ /bud med rnams la brten pa ni/ /kun
356b7 nas bdud kyi zhags par gsung / /sdig pa rnams la chags pa ni/ /kun 'joms dkrugs pa'i shul dang 'dra/ /mi mkhas bud med chags pa dang / /sdig pa'i las ni bgyid
357a1 pa dang / /ye shes spong bar 'tshal ba yi/ /sems can rnams ni ngan 'gror khrid/ /mkhas pa thar par 'tshal ba yis/ /bud med bsten par mi bgyi ste/ /
357a2 zhugs gtams du ba ma mchis pa'i/ /dong du mchong bar mi dong lags/ /yid 'ong bka' mchid bgyis pa dang / /bltas pas kyang ni 'ching bgyid cing / /mi bzad dmyal bar
357a3 ltung bas na/ /khyod ni bud med tshig ma gsan/ /bdag ni khro ba ma mchis te/ /bdag gi yid ni rab tu dang / /khyab bdag 'jig rten mgon po la/ /thugs ni rab tu dang bar
357a4 mdzod/ /rgyal po chen po bzhud mdzod de/ /khyod kyis rkang gnyis mchog gzigs la/ /de yis chos ni gang bstan pa/ /g.yel ma mchis par khyod kyis gson/ /de nas
357a5 bad sa'i rgyal po 'char byed btsun mo sngo sangs can gyis bskul bas/ rgyal po'i mthu chen po dang / rgyal po'i 'byor pa chen po dang / skye bo'i tshogs phal po ches yongs
357a6 su bskor cing mdun du bdar nas brtad cing myur ba myur bar bcom ldan 'das kyi spyan sngar song ba dang / des bcom ldan 'das mdzes pa/ dang par gyur pa/ dbang po zhib/
357a7 thugs zhi ba/ dul ba dang / zhi gnas kyi mchog dam pa'i pha rol tu byon pa/ bsam gtan dam pa rnams kyi pha rol tu gshegs pa/ gser gyi mchod sdong ltar mngon
357b1 par 'phags pa/ dpal gyis mdzes shing lham me/ lhan ne/ lhang nge ste/ skyes bu chen po'i mtshan sum cu rtsa gnyis kyis sku legs par brgyan pa /dge slong dang / dge slong ma dang /
357b2 dge bsnyen dang / dge bsnyen ma dang / byang chub sems dpa'i dge 'dun gyis yongs su bskor ba/ lha dang / klu dang / gnod sbyin dang /dri za dang / lha ma yin dang / nam mkha'
357b3 lding dang / mi'am ci dang / lto 'phye chen po dang / mi dang mi ma yin pa rnams kyis mdun gyis bltas pa mthong bar gyur to/ /mthong nas kyang bcom ldan 'das ga la ba der song
357b4 ste phyin nas/ bcom ldan 'das kyi zhabs gnyis la gtugs te/ bcom ldan 'das la 'di skad ces gsol to/ /bcom ldan 'das/ bdag gis sngon ma mthong ba'i rmad du
357b5 byung ba zhig mthong ba/ bcom ldan 'das la gsol bar 'tshal na/ bcom ldan 'das kyis bdag la skabs dbye bar ci gnang / de skad ces gsol pa dang / bcom ldan
357b6 'das kyis bad sa'i rgyal po 'char byed la 'di skad ces bka' stsal to/ /rgyal po chen po khyod kyis ji ltar bzod pa de ltar smros shig/ zlos shig/ de nas bcom ldan
357b7 'das la bad sa'i rgyal po 'char byed kyis 'di skad ces gsol to/ /bcom ldan 'das/ bdag 'dod pa'i rgyu dang / 'dod pa'i gzhi dang / 'dod pa la lhag par zhen
358a1 pas/ deng ma du'i bu mo dpe med kyis tshig gis khros shing rngam pas zil gyis non nas/ bcom ldan 'das nyan thos kyi dge 'dun dang bcas pa la tha ba
358a2 dang / zhe sdang gi sems kyang bskyed/ bcom ldan 'das/ bdag gis mchis 'brang sdo sangs can dgum pa'i slad du/ mda' ste'u ka nya rnga ma zhig 'phangs na/ de bar snang la
358a3 'bar/ rab tu 'bar/ kun tu rab tu mched de 'bar zhing me lce gcig tu gyur nas/ bzlog pa'i tshul du slar log ste/ bdag gi g.yon rol logs su mchis par gyur cing /
358a4 lus la ni ma phog nas/ bcom ldan 'das/ bdag gis mchis 'brang sngo sangs can gyi sug ba rkang pa gnyis la gtugs te/ mchis 'brang sngo sangs can la 'di skad du/
358a5 khyod lha mo zhig gam/ 'on te klu mo'am/ dri za mo'am/ sha za mo'am/ srin mo'am/ su zhig lags zhes bgyis pa dang / de bdag la 'di skad du/ rgyal po chen po/ bdag
358a6 ni lha mo yang ma lags/ klu mo yang ma lags/ dri za mo yang ma lags/ sha za mo yang ma lags/ srin mo yang ma lags kyi/ bdag ni bcom ldan 'das de bzhin
358a7 gshegs pa dgra bcom pa yang dag par rdzogs pa'i sangs rgyas de'i nyan thos ma lags te/ khyod nyid la snying brtse ba'i slad du/ sems mnyam par bzhag pa lags so
358b1 zhes mchi nas/ de nas mchis 'brang sngo sangs can gyis bcom ldan 'das kyi bsngags pa rnam grangs du mas brjod pa dang / bcom ldan 'das/ de la bdag 'di snyam du bcom ldan
358b2 'das de bzhin gshegs pa dgra bcom pa yang dag par rdzogs pa'i sangs rgyas de'i nyan thos ma 'di yang de lta bu'i snying rje'i bsam pa dang / de lta bu'i byams pa thob pa dang / de
358b3 ltar rdzu 'phrul che ba dang / de ltar mthu che ba dang / de ltar dbang che bar grags pa lags na/ bcom ldan 'das de bzhin gshegs pa dgra bcom pa yang dag par rdzogs pa'i
358b4 sangs rgyas lta smos kyang ci 'tshal snyam du sems par gyur lags te/ bcom ldan 'das/ bdag 'di ltar byis pa lta bu dang / 'di ltar rmongs pa dang / 'di ltar mi gsal ba dang /
358b5 'di ltar mi mkhas pas/ de bzhin gshegs pa nyan thos kyi dge 'dun dang bcas pa la bdag gis tha ba dang / zhe sdang gi sems bskyed pa de/ bcom ldan 'das la bzod par
358b6 gsol zhing / nyan thos kyi dge 'dun gyi mdun du yang nongs par 'chags shing mchis na/ thugs brtse ba'i slad du bdag gis nongs pa nongs par gshags pa de/ bcom ldan
358b7 'das kyis legs par rjes su gzung bar gsol/ deng slan chad kyang sdom par 'tshal lags so/ /bcom ldan 'das kyis/ rgyal po chen po khyod longs la rang gi stan gang
359a1 yin pa la 'dug cig/ ces bad sa'i rgyal po 'char byed kyis nyes pa bshags pa rjes su gzung bar gnang ngo / /de nas bad sa'i rgyal po 'char byed
359a2 kyis| bcom ldan 'das kyi zhabs gnyis la mgo bos phyag 'tshal te/ phyogs gcig tu 'dug go/ phyogs gcig tu 'dug nas kyang / bcom ldan 'das la bad sa'i rgyal
359a3 po 'char byed kyis 'di skad ces gsol to/ /bcom ldan 'das/ bdag ni gtum zhing gzu lums che la/ drag shul can lags pas/ bdag gis bud med kyi tshig gis
359a4 sdig pa'i sug las mngon par 'du bgyis pa des/ bcom ldan 'das/ bdag sems can dmyal bar mchi bar bdag gis yang dag par 'tshal na/ bcom ldan 'das/
359a5 bdag la thugs brtse ba'i slad du/ ci nas kyang bdag slan chad bud med kyi dbang du mchis nas/ sdig pa'i sug las mngon par 'du bgyid par mi 'gyur zhing / sems can
359a6 dmyal bar mi ltung ba dang / bdag dang sems can thams cad la yun ring po'i don dang / sman pa dang / bde bar 'gyur ba'i slad du bcom ldan 'das kyis bud med kyi skyon
359a7 de dag legs par yang dag par rab tu bshad cing / bud med kyi skyon rnams dang / bud med kyi mtshan ma rnams dang / bud med kyi sgyu rnams dang / bud med kyi g.yo rnams
359b1 dang / bud med kyi gya gyu rnams dang / bud med kyi mi brtan pa rnams dang / bud med gyi 'gyur ldog rnams dang / bud med kyi bsten pa rnams dang / bud med kyi tshig rnams dang / bud
359b2 med kyi 'khrul pa rnams yang dag par rab tu bshad du gsol/ de skad ces gsol pa dang / bcom ldan 'das kyis bad sa'i rgyal po 'char byed la 'di skad ces bka' stsal to/ /
359b3 rgyal po chen po/ gnas de lta bu yongs su zhus pas khyod la ci zhig bya/ bcom ldan 'das la bad sa'i rgyal po 'char byed kyis yang 'di skad ces gsol to/ /bcom ldan 'das/
359b4 ci nas bdag bud med kyi dbang du mchis par gyur na/ bud med ni ma rungs ma/ 'khon can gtum mo/ drag shul can lags te/ bcom ldan 'das/ bud med de ni/ bdag sems
359b5 can dmyal bar mchis par bgyid 'tshal ba lags pas/ bcom ldan 'das las bdag don de nyid nyan par 'tshal lags so/ /de skad ces gsol pa dang / bcom ldan
359b6 'das kyis bad sa'i rgyal po 'char byed la 'di skad ces bka' stsal to/ /rgyal po chen po khyod kyis je rang gi skyon rnams yongs su rtogs shig dang / de nas phyis bud med kyi
359b7 skyon rnams yongs su rtogs par 'gyur ro/ /de skad ces bka' stsal pa dang / bcom ldan 'das la bad sa'i rgyal po 'char byed kyis 'di skad ces gsol to/ /bcom ldan 'das
360a1 legs so/ /legs so/ /skyes pa skyon ji lta bu dag dang ldan na/ skyes pa bud med kyi dbang du mchis par 'gyur ba'i skyes pa'i skyon rnams/ bcom ldan 'das
360a2 kyis bdag la yang dag par rab tu bshad du gsol/ de skad ces gsol pa dang / bcom ldan 'das kyis bad sa'i rgyal po 'char byed la 'di skad ces bka' stsal to/ /rgyal
360a3 po chen po/ de'i phyir khyod legs par nyon la/ rab tu yid la gzung zhig dang / ngas khyod la bshad par bya'o/ /bad sa'i rgyal po 'char byed kyis/ bcom ldan 'das/ de bzhin
360a4 no zhes gsol te/ bcom ldan 'das kyi ltar nyan pa dang / bcom ldan 'das kyis de la 'di skad ces bka' stsal to/ /rgyal po chen po/ skyes pa skyon gang dag dang ldan na/ skyes
360a5 pa bud med kyi dbang du 'gro bar 'gyur ba'i skyes pa'i skyes bu'i skyon ni bzhi po 'di dag yin no/ /bzhi gang zhe na/ 'di lta ste/ rgyal po chen po 'di la skyes pa 'dod pa rnams la
360a6 chags par gyur cing / de 'dod pa rnams la bag med par gyur nas/ phyir zhing bud med la blta 'dod de/ tshul khrims dang ldan pa/ yon tan dang ldan pa/ shes rab dang
360a7 ldan pa'i dge sbyong dang / bram ze dag la blta bar mi 'dod cing / de tshul khrims dang ldan pa/ yon tan dang ldan pa/ shes rab dang ldan pa'i dge sbyong dang / bram ze dag mthong
360b1 na| bsnyen par mi byed/ bsten par mi byed/ bsnyen bkur mi byed pas/ de tshul khrims dang ldan pa/ yon tan dang ldan pa/ shes rab dang ldan pa'i dge sbyong dang / bram ze dag gis yongs
360b2 su spangs pas/ dad pa las yongs su nyams/ tshul khrims las yongs su nyams/ gtong ba las yongs su nyams/ shes rab las yongs su nyams shing / dad pa dang bral ba/
360b3 tshul khrims 'chal ba/ thos pa nyung ba/ ser sna can du gyur ba/ yi dwags kyi yon tan gyi chos la kun tu spyod pa/ shes rab 'chal ba/ rma la chags pa/ btsog pa'i spyod yul
360b4 can/ bshul bar mnam pa la mngon par dga' ba/ mi gtsang ba la dga' ba/ bud med la dad che ba/ zhi ba yongs su mi tshol ba/ chags pa'i spyod yul can/ 'gro bar bya ba
360b5 ma yin par song ba/ smad par 'os pa/ mi gtsang ba'i srin bu dang 'dra ba/ snyigs ma len pa/ 'dod pa la brkam pa/ khrel dang ngo tsha bor ba/ lha dang mi'i chos las nyams pa/
360b6 ngan par smad pa'i 'tsho bas 'tsho ba/ mkhas pas smad pa/ byis pa'i skye bo la brten pa/ sdig pa'i bsam pa dang ldan pa/ sdig pa'i grogs po la brten pa/ sdig pa la kun tu
360b7 'jug pa/ sdig pa la gzhol ba/ bud med kyi thul 'og tu chud pa/ bud med kyis 'khol ba/ bud med kyi dbang du song ba/ bud med la gzhol ba/ bud med dang gnas pa/
361a1 rma'i sgo'i spyod yul can/ rma'i sgo la rten pa/ rma'i sgo la gnas pa kha chu dang / snabs dang / mchil ma dang / ngar snabs dang / rnag dang / she'u rul dang /
361a2 klad rgyas dang / mi gtsang ba'i spyod yul can/ lug dang / ba glang dang / bya gag dang / khyi dang / phag dang / wa dang / bong bu'i chos spyod pa/ gnod pas 'tsho ba/ pha ma
361a3 la phangs par mi 'dzin pa/ dge sbyong dang / bram ze dang / sbyin gnas la phangs par mi 'dzin pa/ sangs rgyas dang / chos dang / dge 'dun la dad pa yongs su nyams pa/ mya ngan las
361a4 'da' ba las yongs su nyams pa/ sems can dmyal ba dang / dud 'gro'i skye gnas dang / gshin rje'i 'jig rten la zhugs shing gzhol ba/ seng ge dang / nam mkha' lding gi
361a5 lus la yang dag par zhugs pa/ lcags kyi shing shal ma li mthon po dang / me ma mur la gzhol ba/ sems can dmyal ba yang sos dang / thig nag dang / bsdus 'joms
361a6 dang / ngu 'bod dang / ngu 'bod chen po dang / tsha ba dang / rab tu tsha ba dang / mnar med pa'i sems can dmyal ba chen por zhugs pa ni bud med kyi skyon 'di lta bu 'di dag thos
361a7 nas kyang / bud med la chags shing bud med dang bsten pas/ bgad pa dang / ngu ba dang / ca co 'don pa dang / bro brdungs pa dang / glu blangs pa dang / rol mo byas pa dag rjes su
361b1 dran par byed cing / skyo pa mi bskyed/ yid byung bar mi byed de/ rgyal po chen po/ byis pa'i chos la kun tu spyod cing / kun tu spyod pa de dag dang ldan pa'i skyes pa ni ngan song rnams su skye bar
361b2 'gyur te/ rgyal po chen po/ bud med kyi dbang du song nas 'dod pa la sten cing / ngan 'gror 'gro bar 'jug pa de ni/ skyes pa'i skyes bu'i skyon dang po yin no/ /de nas de'i tshe bcom ldan
361b3 'das kyis tshigs su bcad pa 'di dag bka' stsal to/ /'dod pa dri nga mi gtsang smad par 'os pa dang / /mi mthun 'jigs byed mi rtag las byung sdug bsngal byed/ /don med phung bar
361b4 byed cing dman pa yin pas na/ /mkhas pa su zhig 'dod pa'i skom la rten par byed/ /btsog pas gang ba'i chab khung dri nga lta bu dang / /mnam par gyur cing rul ba'i khyim rnams ji
361b5 bzhin dang / /shi ba dur khrod sa na shin tu smad pa ltar/ /de bzhin 'dod pa rnams kyang mchog tu smad pa yin/ /sbrang bu rma zhig mthong nas rgyug pa ci 'dra dang / /phag ni ngan skyugs
361b6 mthong nas rgyug pa ci 'dra dang / /khyi ni sha yi don du shen sar 'gro ba ltar/ /de bzhin mi mkhas bud med dag la dga' bar byed/ /grags pa med cing mi snyan yon tan 'dri ba
361b7 dang / /de las tshul khrims mtho la nyams par gyur pa dang / /mtho ris nyams shing dmyal ba dag tu ltung bas na/ /mkhas pa su zhig 'dod pa'i skom la rten par byed/ /ji ltar
362a1 ha la ha la'i dug ni zos pa na/ /lus ngag rmya zhing rmongs pa skye bar 'gyur ba ltar/ /de bzhin 'di na byis pa rnams ni 'dod pa'i rgyus/ /rang gi lus kyi
362a2 dbyibs ni dug tu mi rig go /ji ltar sgyu ma shin tu bslabs pa'i mi zhig gis/ /rnam par 'phrul bas sems can brgya dag dga' byed ltar/ /de bzhin byis pa bdag la bde bar
362a3 'dod pa rnams/ /'dod pa dga' ba'i rgyu las ngan 'gror rab tu ltung / /zas skom ston mo bzang po tha dad pa dag dang / /glu bro sil snyan bzang po tha dad pa dag gis/ /khang pa
362a4 mchog nas byung ba'i chung ma len pa ni/ /gnod pa rnyed pa yin zhing sdug bsngal gsog pa yin/ /'dod pa'i dga' la brkam pa dag ni gnod yin te/ /mi gtsang mchog 'dra
362a5 rmongs gyur dag la bsngags pa brjod/ /'dod pa dman pa dag la bsngags shing bsten nas ni/ /dman pa de dag ngan 'gror rab tu ltung bar 'gyur/ /gnod pa 'dod pa
362a6 dag gis yul rnams rab bsngags shing / /'dod pa gnod pa yin la dga' ba'i byis pa rnams/ /de dag don med 'tsho ba rnam par spangs nas ni/ /mi bzad g.yang sa chen por
362a7 rab tu ltung bar 'gyur/ /nga rgyal rmongs pas bcom pa'i skye dgu 'di dag ni/ /rgya mtsho'i pha rol ma mthong ba yi bya bzhin du/ /lcags kyi me lce lnga po dag la chags gyur na/ /byis
362b1 pa rnams ni rab tu 'bar zhing 'khyam par 'gyur/ /'di na byis pa myos shing shin tu rmongs pa rnams/ /shin tu mi mthong snod mchog yin par sems pa ltar/ /lam la rnam par rmongs
362b2 rnams 'dod pa'i ched kyi phyir/ /rtag tu 'dir gnas 'di ni gya nom yin zhes 'dzer/ /gang phyir rnam pa sna tshogs las dag mi shes pas/ /'gro ba thams cad rab nyams gud pa
362b3 yod min pas/ /pha dang ma dang bu dang bu mo dag la ni/ /don gyis mchod pa mi byed gnod pa thob pa yin/ /de dag rtag tu bud med 'dris pa rjod byed cing / /de 'dra'i las kyi tshul la rab
362b4 tu 'jug par byed/ /de dag gti mug dra ba sdig pa rab gsog cing / /ngan song 'gro bar 'gyur ba'i lam yang gsog par byed/ /mi rnams de dag der chags bde bar 'du shes
362b5 shing / /pha dang ma yang yongs su rab tu spong bar byed/ /de dag mchod 'os rnams la mchod par mi byed cing / /smad par 'os pa'i 'dod pa dag ni tshol bar byed/ /phan tshun gdung bar
362b6 'gyur ba la ni gzhol byed cing / /rnam rtog mu yis nges bcom mi rnams nyon mongs pa/ /bkur sti yongs su tshol la dga' zhing ma 'phags rnams/ /chos ma yin par 'jig rten
362b7 rab tu 'dzud par byed/ /gzhi de las ni mtshon cha dag dang lcags rnams dang / /de bzhin 'ching ba dang ni 'thab cing rtsod pa dang / /nges par 'chi ba'i sdug bsngal rab tu myong ba
363a1 'gyur/ /shi 'phos nas ni mnar med 'jigs su rung bar 'gro/ /tshe 'di nyid la de bzhin sdug bsngal 'byung 'gyur zhing / /nor nyams snying du sdug pa rab tu
363a2 'jig 'gyur la/ /mtho ris nyams zhing dmyal bar rab tu ltung bas na/ /mkhas pa su zhig 'dod pa'i 'du shes skyed par byed/ /lcags las grub pa'i nags tshal sngon po'i
363a3 khrod dag tu/ /mkhas pas bdag nyid khrod du bor ba de blang zhing / /mdzangs pa spu gri'i so yis bcad pa byas sla la/ /ral gri dag gi khrod du mal yang bcas sla zhing / /rab tu
363a4 me 'bar thu lum bzung ba de sla la/ /de bzhin lcags kyi thu lum 'bar ba za sla zhing / /me dong 'jigs su rung ba rnams la reg sla yi/ /lag pa gnyis ni nam yang bud med
363a5 reg mi bya/ /mis ni ji lta ji ltar 'dod pa rnams bsten pa/ /de lta de ltar bde ba thams cad rab spong zhing / /'di ltar 'dod rnams gcig tu sdug bsngal mi gtsang bas/ /
363a6 'dod pa sdug bsngal mi gtsang ba dag rnam par spongs/ /'dod pa sdug bsngal kun gyi gzhi bor gyur pa dang / /gang phyir nor ni chud zar 'gyur bar byed pa dang / /yid 'ong
363a7 skye bo rnams kyi nyams pa'i rtsa ba bas/ /bud med nges par bsten pa gnod pa thob pa yin/ /skyes pa gang gis de 'dra'i chos tshul rig nas ni/ /bud med rnams la rab tu bag med mi
363b1 'gyur ba/ /des ni rtag tu mtho ris lam yang rnam sbyangs shing / /des ni byang chub dam pa rnyed par dka' ma yin/ /rgyal po chen po/ gzhan yang mi'i pha ma dag ni dka' ba byed pa dag
363b2 yin te/ zla ba dgu'am/ zla ba bcur mngal na bzung ste/ shin tu sdug bsngal bar g.yo zhing / gcin dang / phyis yang 'phyi bar byed/ pang du blangs nas nu zho ldud par byed/ phung po
363b3 rnams skyed par byed/ khams rnams gso bar byed/ 'jig rten ston par byed/ 'dzam bu'i gling sna tshogs ston par byed/ don du 'dod/ phan par 'dod/ grub pa dang / bde bar
363b4 'dod/ 'jig rten la yang phan par 'dod pa ste/ sbyin pa'i gnas yin la/ bu la phan pa dang / bde bar 'dod pas/ de dag gis rang gi nor gyi tshogs kyis gzhan gyi khyim nas
363b5 gzhan gyi bu mo blangs pa dang / de de la chags shing myos la 'chums shing brgyal ba dang / lhag par zhen pa dang / lhag par zhen cing 'dug par gyur nas/ gzhan gyi khyim nas
363b6 blangs pa'i bud med de la chags shing myos pas sbyin pa'i gnas pha ma dag rgas/ 'khogs/ gtugs la/ lus nyam chung zhing mig gis mi mthong ba dag brnyas shing longs
363b7 spyod med pa dang / nor med par byas nas/ rang gi khyim nas phyung ste/ skrod par byed do/ /rgyal po chen po/ 'di ltar pha ma dka' ba byed byed pa sbyin pa'i gnas la/ rtag tu rgyun mi
364a1 'chad par yang dag pa'i bde bas bsti stang du bya/ bla mar bya/ brjed par bya/ mchod par bya ba'i rigs na/ des de'i tshe pha ma dag rang gi khyim nas phyung /
364a2 bskrad nas gzhan gyi khyim nas blangs pa'i bud med la/ bza' ba dang / btung ba dang / gos rnams kyis bsnyen bkur byed cing bsti stang du byed/ gces su byed/ rim gro byed la
364a3 mchod pa byed cing / yang dag pa'i bde bas bsnyen bkur byed kyi/ pha ma la ni mi byed pa'i snying brtse ba med pa dang / mi lta ba dang / ngan pa'i sems dang ldan pa la ltos/ rgyal po
364a4 chen po/ des bde 'gror 'gro ba'i chos gang yin pa de ni spangs la/ ngan 'gror 'gro ba'i chos gang yin pa de ni yang dag par blangs te 'dug pa'i mi de la yang ltos/ rgyal po
364a5 chen po/ bud med kyi dbang du song nas/ 'dod pa rnams la sten cing / pha ma la brnyas pa dang / ngan 'gror 'gro bar 'jug pa de ni/ skyes pa'i skyes bu'i skyon gnyis pa yin
364a6 no| |de nas de'i tshe bcom ldan 'das kyis tshigs su bcad pa 'di dag bka' stsal to/ /gang dag pha ma rgas pa gso bar byed pa ni/ /de dag rtag tu bde zhing yid kyang bder
364a7 'gyur la/ /'di la lha dang bcas pa dang ni dbang po dang / /de bzhin 'di la tshangs par bcas pa'i rigs su 'gyur/ gang dag pha ma rgas pa gso bar byed pa ni/ /de dag
364b1 song nas phyir 'ong ba yang 'grub 'gyur zhes/ /rgya mtsho chen po nas kyang bde zhing legs 'ong ste/ /de ltar byed pa dag ni rab mchog rnyed pa yin/ /gang dag pa ma rgas pa gso bar
364b2 byed pa yi/ /tshong dpon de dag yon tan kun gyi gtsor 'gyur zhing / /de bzhin zhing las 'bras bu phun sum tshogs 'byung ste/ /bsod nams bgrang ba'i don du brjod par mi nus
364b3 so| |gang dag pha ma rgas pa gso bar byed pa ni/ /de dag khur rnams khyer ba'i rnga mo rnams dang yang / /yang na glang dang bong bu rtag tu mi 'gyur te/ /mi rnams de dag spu gri'i
364b4 so la rdzi mi 'gyur/ /gang dag pha ma rgas pa gso bar byed pa ni/ /de dag chu bo rab med dang ni me mur dang / /spu gri'i so dang ldan pa la yang mi rgal te/ /de dag zangs khu bskol
364b5 ba 'thung ba yong mi 'gyur/ /gang dag pha ma rgas pa gso bar byed pa ni/ /de dag nor dang 'bru ni mi nyung mang ba dang / /chung ma bu dang bu mo dam pa dag dang yang / /bai DUR+Ya dang
364b6 rin chen sa le sbram yang rnyed/ /gang dag pha ma rgas pa gso bar byed pa ni/ /de dag rab 'phrul lha yi pho brang dag dang ni/ /rtsub 'gyur dang ni 'dres pa'i tshal yang mthong
364b7 'gyur te/ /lha rnams du mas rtag tu mdun du bdar bar 'gyur/ /mi yi gtso bor gyur cing lha yi lhar gyur pa/ /thub pa chen po 'di 'dra'i gsung ni thos gyur na/ /rgas shing
365a1 dbang po shin tu nyam chung gyur pa yi/ /pha ma sbyin gnas dam pa su zhig gso mi byed/ /rgyal po chen po/ gzhan yang skyes bu dam pa ma yin na/ skyes bu
365a2 dam pa ma yin pa'i las byed cing / log par blta ba la mngon par zhen pa yin te/ de ni dge ba dang / mi dge ba gang yin zhes bdag gi don mi shes shing / mi brtan
365a3 pa yin pas skye bo mang po rnams mi dga' zhing / byis pa'i skye bos bsngags pa la mngon par dga' ba dang / 'dod chags dang zhe sdang gis rmongs par gyur pa dang /
365a4 skyes bu mdzangs pa dag gis smad pa dang / khro bas zil gyis non cing / sdig pa'i las byed pa dang / sangs rgyas dang / byang chub sems dpa' rnams kyis yongs su spangs
365a5 pa dang / longs spyod kyi rgyags pas myos pa dang / ser sna can du gyur pa dang / gzhan la gnod par mngon par dga' zhing / chos goms pas mi dga' ba yin te/ rgyal po chen
365a6 po| skyes bu dam pa ma yin pa/ skyes bu dam pa ma yin pa'i las la mngon par dga' zhing / skyes bu dam pa'i las la mi dga' ba de la ltos/ /rgyal po chen po/ 'dod
365a7 pa rnams la sten cing ngan 'gror 'gro bar 'jug pa de ni/ skyes pa'i skyes bu'i skyon gsum pa yin no/ /de nas de'i tshe bcom ldan 'das kyis tshigs su bcad pa 'di dag skyes
365b1 bka' stsal to/ /'dod pa rnams kyi gzhis ni skyes bu rnams nyams shing / /gzhi de las ni sdig pa dag kyang rab tu byed/ /log par lta bas rmongs nas 'dir ni 'khyam 'gyur zhing / /
365b2 de ni rnam par 'khrul pas ngan 'gror 'gro bar 'gyur/ /log dang ldan pas yon tan kun gyis rnam spangs shing / /de ni rtog pa med cing blo yang nor ba yin/ /gang dag chu klung dag
365b3 tu ut+pal rtswa tshol ltar/ /log par lta bas yongs su 'khor bar byed pa yin/ /bde ba'i don du bdag nyid yongs su skyong byed cing / /chos ma yin la chags pa'i mi rnams mang
365b4 po dag/ de bzhin bde ba'i rgyu phyir 'dod pa rnams tshol ba/ /de dag gti mug rmongs pas sems can dmyal bar 'gro/ gang dag 'dod pa rnams kyi don du rtag tu ni/ /de
365b5 bzhin sems la gcags pa'i skyes bu tha ma dang / /'dod pa'i bdag nyid can dang skye bo sdig can dang / /'du shes log pa dag la bde ba ga la yod/ /mi rnams de dag
365b6 byas pa mi gzo sdig bcas shing / /dad pa rnam nyams tshul 'chos gus pa med pa dang / /'phags pa'i tshogs kyis rtag tu rnam par spangs pas na/ /dmyal ba bzod brlag
365b7 shin tu 'jigs su rung ba dang / /gzugs dang sgra dang ro la chags pa'i mi rnams ni/ /byang chub sems dpa' rnams dang mkhas pa mi mchod cing / /log par lta bas
366a1 chos kyang nyan par mi byed la/ /lan 'ga' 'ang dge 'dun legs par mchod par mi byed pas/ /'phags pa rnams kyis rnam spangs ngan song ltung
366a2 bas na/ /de phyir mi yi srid pa 'di ni rnyed pa la/ /sbyin dul yang dag sdom la nges par sten cig dang / /de las byang chub dam pa mchog kyang thob par 'gyur/ /rgyal po chen po/
366a3 gzhan yang skyes bu ni bzo'i gnas sna tshogs dang / las kyi mtha' sna tshogs dag gis 'tsho bar byed de/ rgyal po chen po/ 'di ltar yi ge'am/ rtsis sam/ grangs sam/
366a4 lag rtsis sam/ mtshon cha'am/ rgyal po la zho shas 'tsho ba'am/ zhing las sam/ tshong byed pa'am/ ba lang 'tsho ba'am/ de lta bu'i bzo'i gnas sna tshogs dang /
366a5 las kyi gnas sna tshogs dag gis 'tsho bar byed cing / 'di lta ste/ nor gyi phyir lam ma yin par yang 'gro bar byed/ lam ngan par yang 'gro bar byed/ gcong rong
366a6 dang chu klung can gyi lam du yang 'gro bar byed/ mtshon cha'i lam du yang 'gro bar byed/ rgya mtshor 'jug par yang 'jug par byed/ grang ba'i dus na yang lhags
366a7 pas gnod par byed/ dro ba'i dus na yang tsha bas gnod par byed cing / bkres pa dang skom pa dag gis gnod bzhin du 'gro ba la yang spro bar byed de/ longs spyod
366b1 yongs su tshol ba na/ de lta bu'i sdug bsngal dag gis longs spyod yongs su btsal nas kyang / rang gi 'tsho ba dag gi phyir nye bar sgrub par byed pas/ dge sbyong dang / bram
366b2 ze dag dang / bkren pa dang / sdug phongs pa dang / slong mo ba dag la sbyin pa sbyin par mi bzod cing / bud med rnams kyi dbang du byas pa dang / bud med rnams kyi
366b3 thul 'og tu chud pa dang / bud med rnams kyis bkol ba dang / bud med rnams la byams pa de nyid kyis bud med de dag nyid gso ba'i phyir sbyin pa byin pa dang / tshul khrims
366b4 yang dag par len par mi nus shing / de de la chags la bud med kyis spyos pa bzod par byed cing / bud med kyis bsdigs pa dang / bltas pa dang / brgyabs pa dag kyang
366b5 bzod par byed de/ de skyes par gyur kyang bud med kyis bsdigs pa dang du len cing / mi dgar med par de'i ngor lta bar byed pa ni/ 'dod pa'i gzhis bud med kyi dbang du song
366b6 ba yin te/ rgyal po chen po/ bud med la bsten cing / ngan 'gror 'gro bar 'jug pa de ni/ skyes pa bud med la bskam zhing ngan skyugs kyi sgo la 'du ba dang / mi gtsang ba la dga'
366b7 ba dang / shes bzhin med par spyod pa'i skyes bu'i skyon bzhi pa yin te/ rgyal po chen po/ skyon de dag dang ldan pa'i skyes pa ni 'dod pa rnams kyi dbang du 'gro ba yin no/ /de nas
367a1 de'i tshe bcom ldan 'das kyis tshigs su bcad pa 'di dag bka' stsal to/ /'dod pa rnams ni tshol ba na/ /rab tu myos pa ga la bde/ /'dod pa dman pa rnams
367a2 bsten pa/ /de ni gang gis bde bar 'gyur/ /skyes bu dam pa ma yin pa'i/ /las rnams byed cing mi sdom la/ /'dod pa'i 'dod chags tshol byed pa/ /de dag rab nyams chud kyang za/ /mi
367a3 rnams gang dag mi mkhas pa/ /rnga mo bong bu'i chos spyod cing / /bud med mthong na rab snyegs pa/ /ngan skyugs gnas la phag rnams bzhin/ /gang la byis pa gus bcas pa'i/ /'dod
367a4 rnams dring mi gtsang yang / /'dod pa'i skyon rnams mi mthong ba/ /sa yi steng na dmus long bzhin/ /gzugs kyi 'ching bas bcings pa rnams/ /'dod pa'i 'du shes rab tu 'jug/
367a5 byis pa 'dod rnams bsten pa dag/ khyi dang wa rnams ji bzhin no/ /sgra dri ro dang reg rnams kyis/ /gang la so so'i skye bo rnams/ /byis pa 'khor bar yongs 'khor bya/ /spre'u rnams
367a6 phur la btags pa bzhin/ /byis pa ma rig khebs pa rnams/ /mun pa'i phung pos bsgribs gyur cing / /bud med rnams la chags pa ni/ /mi gtsang gnas pa khwa bzhin no/ /
367a7 gang gis ngan 'gror rab 'jug pa/ /de ni bdud kyi spyod yul yin/ /ro myang 'du shes chags gyur pa/ /ngan skyugs gnas la srin bu bzhin/ /gsad pa'i gshed ma rnams
367b1 kyis ni/ /ji ltar mi zhig bor ba ltar/ /shes nas thar pa thob 'gyur zhing / /bud med dbang du 'gro mi 'gyur/ /'dod pa bud med lta byed pa'i/ /kun tu sbyor la 'jigs pa skye/ /byis pa mtshan
367b2 mar 'dzin pa rnams/ /'dod pa'i srid pa rab tu 'phel/ /so ga'i dus na mi zhig ni/ /dgon pa chen por song gyur nas/ /byis pas lan tshwa'i chu 'thungs na/ /skom pa phyir zhing rab spyod ltar/ /de
367b3 bzhin bden pa ma mthong ba'i/ /byis pa rmongs pas 'tsho ba rnams/ /'di na phyir zhing bud med la/ /'dod pa'i sred pa brtan par 'gyur/ /ji ltar mi lus mdze can la/ /srog chags rnams
367b4 ni za ba ltar/ /'dod brkam so so'i skye bo rnams/ /de bzhin bud med rnams kyis zos/ /mi gtsang bum pa khra bo zhig/ kha dog ldan par snang mos kyi/ /nang na ha la ha la'i dug/ drag po chen po yod
367b5 pa ltar/ /de bzhin bud med brgyan pa dag/ gang dang gang na snang ba yang / /gcin dang phyi sas gang ba yi/ /rkyal pa rlung gis bkang ba bzhin/ /'bru mar gyis ni bdar ba'i mtshon/ /gos kyis dkris
367b6 ba ji bzhin du/ /de bzhin bud med brgyan pa yang / /ral gri rling ba g.yogs pa bzhin/ /ji ltar me dong gang gyur la/ /du ba med cing 'bar ldan ltar/ /bud med de bzhin me 'dra zhing / /srin bu gtum po bzhin
367b7 du g.yo/ /sreg pa'i bskal pa 'dir byung na/ /sa ni kun tu 'bar gyur la/ /rtswa dang gel pa 'jig 'gyur zhing / /chu klung dag kyang bskam par 'gyur/ /'byung ba chen po'i gnas gyur pa/ /rgya mtsho yang ni bskam 'gyur
368a1 zhing / /ri bo chen po rnam bsreg la/ /de bzhin lhun po'ang 'jig par 'gyur/ /rgyal chen 'byung po 'dzin pa yin/ /sa 'di'ang rnam par 'jig 'gyur zhing //
368a2 brag chen rnams ni 'jig 'gyur la/ /skyob par byed pa yod ma yin/ /ji ltar me yis rir bcas dang / /rgya mtshor bcas pa bsreg pa ltar/ /de bzhin bud med me 'dra ste/ /gtum
368a3 zhing skyes bu g.yo bar byed/ /snabs dang mchil ma kha chu dang / /klad rgyas rus pa'i klad pa dang / /lus la dri nga 'dzag de la/ /byis pa rnams ni sbrang rtsi bzhin/ /kha sgo rus pas gang
368a4 ba dang / /sha dang pags la sogs bsags shing / /de bzhin lus ni 'bras 'dra ste/ /dri nga smad par bya ba yin/ /mi gtsang sna tshogs gang ba dang / /'bras ni smin par gyur
368a5 pa ltar/ /de ltar lus 'di mi gtsang ba/ /sna tshogs rnams kyi snod yin no/ /lto ni mnye ma mcher ba dang / /glo bas gang zhing mkhal ma dang / /khrag dang mkhris pas gang gyur la/ /klad
368a6 rgyas kyis ni klad pa gang / /khong pa'i nang na srin bu'i rigs/ /brgyad khri po dag gnas gyur kyang / /gti mug drwa bas bsgribs pa yi/ /byis pa rnams kyis mi mthong ngo / /rma sgo dgu
368a7 nas rtag tu ni/ /mi gtsang rul pa zag gyur kyang / /smra ba dag dang lta ba la/ /byis pa rnams ni mtshan mar 'dzin/ /gang zhig kun gyis smad pa'i yul/ /chags pa rnams kyis phyis
368b1 mi shes/ /mi gtsang spyod yul byis pa rnams/ /snabs dang mchil ma za bar byed/ /smad par 'os la chags byed pa/ /sbrang bu rnams kyis rma mthong bzhin/ /mchan khung dag nas rdul
368b2 'dzag cing / /smad pa'i dri ni 'byung bar 'gyur/ /byis pa sdug bsngal chags byed pa/ /de dag bdag la gnod phyir g.yo/ /des ni myur du phongs gyur te/ /nya rnams chu nas bton
368b3 pa bzhin/ /'jigs rung lag na mtshon thogs kyis/ /ji ltar mi zhig gtses pa ltar/ /mtshon 'dra'i bud med sdig can gyis/ /'dod la chags rnams de bzhin no/ /rnam rgyal lag
368b4 na mtshon thogs pas/ /ji ltar rgyal po gtses pa ltar/ /'dod chags me dang 'dra ba yis/ /'dod la chags rnams de bzhin bsreg/ shen pa'i gnas la khyi rnams ltar/ /myang bar
368b5 'du shes byis pa rnams/ /ji ltar dgra yis skrag pa ltar/ /myur du sdug bsngal myong bar 'gyur/ /rang gi las kyi nyes pa yis/ /de la skyob pa med pa ltar/ /de bzhin bdag gi
368b6 nyes pa yis/ /sems can rnams ni ngan 'gror 'gro/ de dag sangs rgyas chos spangs nas/ /bud med rnams kyi rnag la brten/ sems ni ro la chags gyur pa/ /de yis ngan 'gror
368b7 'gro bar 'gyur/ /ji ltar spre'u zhig shing las ni/ /shing gzhan du ni gyur pa'i tshe/ /de ni gnas der gtses gyur na/ /de nyid du ni sdug bsngal 'gyur/ /de bzhin 'dod la brkam
369a1 pa dang / /sdug bsngal 'dod chags bstan pa dang / /gti mug rgyal thogs pa rnams/ /dus ni yang dang yang du 'da'/ /mi bkren rnams ni gsal
369a2 shing la/ /rab tu btsugs nas 'phyang ba ltar/ /de bzhin 'dod la chags pa rnams/ /shal ma li yi mtho la 'phyang / /ji ltar mon sran sde'u dang gre'u/ /lcags zangs rnams su
369a3 blugs byas nas/ /mes ni rab tu bsregs pa na/ /lbu bar bcas shing khol ba ltar/ /de bzhin dge ba ma mthong zhing / /'dod la chags pa'i skye bo rnams/ /shi nas ngan song
369a4 'gro 'gyur zhing / /lcags zangs rnams su btso bar 'gyur/ /mi rnams gang dag sdig byed pa'i/ /sems can sdig pa rnams kyi gnas/ /zangs ni bye ba drug cu dang / /gzhan
369a5 yang bzhi po dag yin no/ /zangs ni so so re re la/ /tshad ni dmigs su yod min zhing / /me yi phung por ldan rnams su/ /bskal pa du mar btso bar 'gyur/ /kha cig zangs
369a6 rnams de dag tu/ /rang gi las kyi bskal brgya'am/ /nyis brgya sum brgya tshang bar 'tshod/ /yang na bzhi brgyar btso bar 'gyur/ /sra skam rnon po rnams kyis ni/ /bzung zhing
369a7 yang dang yang smyugs pas/ /de dag sha ni yod min zhing / /dung ltar dkar ba rnams su 'gyur/ /lcags kyi gzhong par 'dug nas ni/ /rab tu tsha zhing 'dren pa med/ /shi zhing shi
369b1 zhing skye 'gyur te/ /rang gi las kyis gnas par 'gyur/ /gang tshe dmyal ba'i srung rnams kyis/ /ngan pa'i mi rnams de dag ni/ /gtun la sogs pas brdungs pa na/ /sha rkang rus
369b2 pa phye mar 'gyur/ /de yi tshe na de dag la/ /shin tu grang ba'i rlung yang ldang / /des ni dmyal ba'i sems can rnams/ /sdug bsngal gyur pa de las 'tsho/ /mi rnams gang dag sdig
369b3 byed pa/ /gtun bu drag po rnams kyis 'joms/ /sta re rnams kyis gshegs pa dang / /de bzhin gsal shing 'dzugs par 'gyur/ /mi rnams gang dag sdig byed pa'i/ /sems
369b4 can rnams kyi lus la ni/ /lcags mdung rtse mo bzhi pa dang / /rtse gsum pa dang rtse lnga 'bab/ /mi rnams gang dag sdig byed pa/ /ral gri'i mchu can khwa rnams kyis/ /mgo yang
369b5 klad pa gtogs 'gyur zhing / /wa dang spyang kis zos par 'gyur/ /mi rnams gang dag sdig byed pa/ /ngan skyugs rul ba dri nga zhing / /kun gyis smad par ltung 'gyur la/ /spu
369b6 gri'i chu klung rnams su ltung / /mi rnams gang dag sdig byed pa/ /rab tu tsha bar bsreg 'gyur zhing / /ngu 'bod dang ni ngu 'bod che/ /thig nag tu yang bsreg par 'gyur/ /mi rnams
369b7 gang dag sdig byed pa/ /thig nag tu ni skyes nas kyang / /yang dang yang du me mur dang / /spu gri chu klung rnams su ltung / /gang tshe lcags kyi zangs po cher/ /mi rnams gang dag
370a1 'tshod pa na/ /khyi rnams kyis ni gtses gyur nas/ /de dag bde ba tshol bar byed/ /mi rnams gang dag sdig byed pa/ /dmyal ba drag po chen por
370a2 ni| |lhung nas dpung gnyen yod min zhing / /lcags kyi thu lum za bar 'gyur/ /mi rnams sdig pa byed pa dag /lcags las grub pa'i brag chen dang / /mi sdug ri bo rnams
370a3 kyis ni/ /de tshe kun nas lus 'joms byed/ /nges ni rang gi las byas pas/ /'bras bu de 'dra thob gyur cing / /de yis tshor ba myong ba na/ /de la skyob pa 'ga' yang med/ /ji
370a4 snyed rten pa thams cad ni/ /bdag gi mdun der 'ga' yang med/ /der ni mgon med bdag gcig pu/ /sdug bsngal tshor ba myong bar byed/ /gang dag bde phyir don min par/
370a5 sngan chad nyes par spyad byas kyang / /pha ma de dag de ring ni/ /rnam par grol ba'i mthu yang med/ /gang dag bde phyir don min par/ /sngon chad nyes par spyad byas kyang / /bu dang
370a6 bu mo chung ma rnams/ /de ring bdag la 'grol mi nus/ /gang dag bde phyir ngon min par/ /sngan chad nyes par spyad byas kyang / /mdza' bshes nye du de dag kun/ /rnam par
370a7 'grel bar yong mi nus/ /gang dag bde phyir don min par/ /sngan chad nyes par spyad byas kyang / /bdag gi rtsa lag de dag kun/ /de ring 'grel bar mi nus so/ /'dod pa dman
370b1 pa rnams bsten cing / /dman pa'i chos rnams bsten nas ni/ /nyes pa'i las rnams byed pa dag /de yis ngan 'gror 'gro bar 'gyur/ /shes rab 'chal ba mnar med par/ /song
370b2 nas sdug bsngal tshor ba myong / /sangs rgyas rnams kyis bud med dag /phyi sa'i dri ltar mnam par bsgrags/ /de phyir dman pa rnams dang ni/ /dman pa'i bud med rnams
370b3 bstan pa/ /byis pa de ni phyis yi/ /rkyal ba bzung nas gnas pa yin/ /ci 'dra'i las ni byed pa ltar/ /de 'dra'i 'bras bu 'thob 'gyur te/ /rgyal po yi ni chad pa dang / /sdug
370b4 bsngal bcing ba'ang myong bar 'gyur/ /bud med gzhi las skyes pa yang / /bsad dang bcing ba myong 'gyur zhing / /dmyal srung rnams kyis bsregs pa dang / /nges par 'chi
370b5 ba'ang myong bar 'gyur/ /bud med rnams la brkam pa yi/ /blo ngan de dag bde mi 'gyur/ /gsal shing mthon po rnams su ni/ /btsugs shing chur yang bcug par 'gyur/ /sa
370b6 yi ser khar bcug nas ni/ /de bzhin ral gris gdab par 'gyur/ /de 'dra ba dag thos nas ni/ /de dag yi chad bde mi 'gyur/ /rmongs pa bud med lhan cig tu/ /yang dang yang du
370b7 'du 'dzi byed/ /sdug bsngal 'dod pa rnams bsten cing / /dman pa rnams kyang smra bar byed/ /rmongs pa rnams kyis chos thos nas/ /dge bar gsungs zhes rjod byed kyang / /de sems
371a1 bud med phyi bzhin song / /byi ba la ni byi la bzhin/ /rgyal bas gsungs pa thos gyur nas/ /yud tsam zhig ni yid byung yang / /ha la ha la'i dug 'dra
371a2 ba'i/ /'dod chags kyis ni de yang 'khrug /ji ltar phag ni yud tsam zhig /dngangs shing skrag pa byung gyur kyang / /des ni phyi sa mthong ba na/ /chags pa bskyed par byed pa
371a3 ltar/ /de bzhin byis pa bde 'dod rnams/ /rgyal ba'i bstan pa spangs nas ni/ /'dod pa dman pa rnams bsten pas/ /des ni ngan 'gror 'gro bar 'gyur/ /'dod pa rnams la
371a4 chags myos nas/ /shin tu sdig pa'i las byas shing / /tshul khrims can dag bslus byas nas/ /phyis ni ngan 'gror 'gro bar 'gyur/ /shes rab can gyis dal rnyed cing / /de 'dra'i
371a5 chos ni thos gyur nas/ /'dod kun spangs nas 'di la ni/ /mkhas pa mngon byung rab byung zhig /rgyal po chen po/ /skyes pa 'dod pa la rten pa rnams kyi skyon ni de dag yin te/
371a6 'dod pa'i gzhi dang / 'dod pa'i rgyu dang / 'dod pa la lhag par zhen pa rnams ni/ sems can dmyal ba pa rnams kyi tshor ba myong bar 'gyur ro/ /rgyal po chen po/ de lta bas na
371a7 khyod kyis rtag par rgyun du sangs rgyas rjes su dran pa bsgom par bya'o/ /khyod kyi lus su gtogs pa'i sems rjes su dran pa bsgom par bya'o/ /de ltar bcom ldan 'das kyis bad
371b1 sa'i rgyal po 'char byed la de lta de ltar chos bstan par mdzad de/ chos bstan pa des bad sa'i rgyal po 'char byed/ de bzhin gshegs pa la dga' ba dang / rab tu dga' ba
371b2 dang / mchog tu dga' ba thob par gyur to/ /de nas bcom ldan 'das la bad sa'i rgyal po 'char byed kyis 'di skad ces gsol to/ /bcom ldan 'das/ ji tsam du bcom ldan
371b3 'das de bzhin gshegs pa dgra bcom pa yang dag par rdzogs pa'i sangs rgyas kyis skyes pa dang / bud med rnams kyi skyon bsam gyis mi khyab pa'i bar de dag bka'
371b4 stsal cing / legs par gsungs pa ni ngo mtshar lags so/ /bcom ldan 'das/ bdag ni bcom ldan 'das dang / chos dang / dge slong gi dge 'dun la skyabs su mchi
371b5 ste| mtshon cha spangs shing / dbyug pa spangs la/ ngo tsha mchis shing / srog chags 'byung po thams cad la snying brtse bar zhugs pa lags kyi/ bcom ldan 'das kyis bdag
371b6 dge bsnyen du gzung du gsol/ /bcom ldan 'das kyis de skad ces bka' stsal nas/ bad sa'i rgyal po 'char byed dang / dge slong de dag dang / byang chub sems dpa' de dag
371b7 dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa dkon mchog
372a1 brtsegs pa chen po'i chos kyi rnam grangs le'u stong phrag brgya pa las/ pad sa'i rgyal po 'char byed kyis zhus pa'i le'u zhes bya ste/ 'dus
372a2 pa nyi shu rtsa dgu pa rdzogs so// //rgya gar gyi mkhan po dzi na mi tra dang / su ren+d+ra bo d+hi dang / zhu chen gyi lots+tsha ba ban de ye shes sde la sogs
pas bsgyur cing zhus te gtan la phab pa/
CLOSE WINDOW