CLOSE WINDOW

H343
བོད་ཡིག

/ //rgya gar skad du/ karma bi b+hang+ga/ bod skad du/ las rnam par 'byed pa/ bam po dang po/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan du yod pa na rgyal bu rgyal byed kyi tshal mgon med zas sbyin gyi kun dga' ra ba na bzhugs te/ de nas bcom ldan 'das snga dro chos gos dang / sham thabs mnabs/ lhung bzed bsnams te/ mnyan du yod par bsod snyoms kyi phyir gshegs nas/ mthar chags su mnyan du yod par bsod snyoms bzhes te/ to'u te ya'i bu bram ze'i khye'u ne tso'i khyim ga la ba der gshegs so/ /de'i tshe to'u te ya'i bu bram ze'i khye'u ne tso'i khyim de ni/ khri ras ko ni ka bting ba'i steng na khyi dung zhes bya ba 'dug ste/ khar gzhong rdo ba khar blangs pa la 'bras chan dang / sha bsres pa'i khrud ma 'thung ba las/ khyi dung gis bcom ldan 'das sgo drung na bzhugs pa mthong ste/ mthong nas kyang 'a 'u zhes zugs so/ /de nas bcom ldan 'das kyis khyi dung la 'di skad ces bka' stsal te/ khyi dung khyod kye zhes bya ba las 'a 'u zhes zugs par gyur na/ des kyang ma dul lam/ de skad ces bka' stsal pa dang / khyi dung khros 'khrugs tshig pa zos te/ yid ma rangs nas ras ko ni ka bting ba'i khri las babs te/ khri'i 'og na gtor khung gi shing gi wA la 'dug go /de'i tshe to'u te ya'i bu bram ze'i khye'u ne tso bya ba zhig gi phyir phyi rol du byung ba las/ de nas to'u te ya'i bu bram ze'i khye'u ne tso slar log pa dang / to'u te ya'i bu bram ze'i khye'u ne tsos khyi dung khri'i 'og na gtor khung gi wA la 'dug pa mthong ngo / /mthong nas kyang nang mi la smras pa/ khyod kyi khyi dung 'di la ci zhig smras/ jo bo/ bdag cag gang gis kyang khyi dung la ci yang ma smras so/ /de lta lags mod kyi dge sbyong go'u ta ma byon par gyur te/ khyi dung gis dge sbyong go'u ta ma sgo drung na bzhugs pa mthong ngo / /mthong nas kyang 'a 'u zhes zugs pa dang / dge sbyong go'u ta mas de la 'di skad ces bka' stsal te/ khyi dung khyod kye zhes bya ba las 'a 'u zhes zugs par gyur na/ des kyang ma dul lam/ de skad ces bka' stsal pa dang / khyi dung khros 'khrugs tshig pa zos te yi ma rangs nas/ ras ko ni ka bting ba'i khri las babs te/ khri'i 'og na gtor khung gi shing gi wA la 'dug go /de nas bram ze'i khye'u ne tso khros 'khrugs tshig pa zos te yi ma rangs nas mnyan du yod pa nas byung ste/ rgyal bu rgyal byed kyi tshal mgon med zas sbyin gyi kun dga' ra ba ga la ba der song ngo / /de'i tshe bcom ldan 'das dge slong brgya phrag du ma'i 'khor gyi mdun na chos ston cing bzhugs te/ bcom ldan 'das kyis to'u te ya'i bu bram ze'i khye'u ne tso rgyang ring po nas 'ong ba gzigs so/ /gzigs nas kyang dge slong rnams la bka' stsal pa/ dge slong dag/ khyed kyis to'u te ya'i bu bram ze'i khye'u ne tso rgyad ring po nas 'ong ba mthong ngam/ btsun pa/ de lta lags so/ /gal te to'u te ya'i bu bram ze'i khye'u ne tso 'di'i tshe 'chi ba'i dus byas par gyur na ni/ lus dang bral nas shi ba'i 'og tu/ dper na/ mda' ste'u ka 'phangs pa de bzhin du ngan song ngan 'gro rnam par ltung ba/ sems can dmyal ba rnams su skye bar 'gyur te/ 'di ltar 'di nga la sems rab tu khros pa'i phyir ro/ /sems rab tu khros pa'i rgyus/ de ltar 'di na sems can kha cig lus dang bral nas shi ba'i 'og tu ngan song ngan 'gro rnam par ltung ba sems can dmyal ba rnams su skye bar 'gyur ro/ /de nas dge slong zhig gis de'i tshe tshigs su bcad de smras pa/ 'di na gang zag kha cig ni/ /rab tu sems khros gyur gzigs nas/ /ston pas dge slong tshogs rnams la/ /don de nyid ni lung bstan to/ /kye ma gson pa'i mi 'di ni/ /da ni 'chi ba'i dus byed na/ /de yi sems ni khros pa'i phyir/ /sems can dmyal ba rnams su skye/ /de bzhin gshegs la sems khros pa/ /de yi rgyus ni sems can rnams/ /dper na mda' ni 'phangs pa bzhin/ /de ltar ngan 'gror 'gro bar 'gyur/ /de nas to'u te ya'i bu bram ze'i khye'u ne tso bcom ldan 'das ga la ba deng song ste phyin pa dang / bcom ldan 'das dang lhan cig tu mngon du kun dga' bar bya ba dang / yang dag par chags par bya ba'i gtam rnam pa mang po byas nas phyogs gcig tu 'dug go /to'u te ya'i bu bram ze'i khye'u ne tso phyogs gcig tu 'dug nas/ bcom ldan 'das la 'di skad ces gsol to/ /go'u ta ma khyod bdag gi khyim du byon tam/ bram ze'i khye'u/ phyin to/ /go'u ta ma khyod kyis bdag gi khyi dung la ci zhig ma gsungs sam/ bram ze'i khye'u/ nga 'dir snga dro chos gos dang sham thabs bgos/ lhung bzed thogs nas mnyan du yod par bsod snyoms kyi phyir zhugs te/ mthar gyis mnyan du yod par bsod snyoms blangs nas khyod kyi khyim ga la ba der song ste phyin nas/ sgo drung na 'dug pa dang / de'i tshe khyi dung ras ko ni ka bting ba'i khri'i steng na 'dug cing / khar gzhong rdo ba'i khar blangs pa la/ 'bras chan dang / sha bsres pa'i khrud ma 'thung ba las/ khyi dung gis nga sgo drung na 'dug pa mthong ste mthong nas kyang zugs pa dang / ngas de la smras pa/ khyi dung khyod kye zhes bya ba las 'a 'u zhes zugs par gyur na/ des kyang ma dul lam zhes de skad ces smras pa dang / khyi dung khros 'khrugs tshig pa zos te yi ma rangs nas/ ras ko ni ka bting ba'i khri las babs te/ khri'i 'og na gtor khung gi shing gi w+wa la 'dug go /go'u ta ma/ khyod kyis khyi dung tshe snga ma la bdag gi cir mchi mkhyen tam/ bram ze'i khye'u/ kha rog 'dug la nga la don 'di ma 'dri zhig /khyod kun tu gnod sems su 'gyur ba dang / mi bzod pa dang / sems yid mi bde bar 'gyur du 'ong ngo / /lan gnyis lan gsum du to'u te ya'i bu bram ze'i khye'u ne tsos bcom ldan 'das la 'di skad ces gsol to/ /go'u ta ma khyod kyis khyi dung tshe snga ma la bdag cag gi cir mchi mkhyen tam/ bcom ldan 'das kyis kyang lan gnyis lan gsum du to'u te ye'i bu bram ze'i khye'u ne tso la 'di skad ces bka' stsal to/ /bram ze'i khye'u/ kha rog 'dug la nga la don 'di ma 'dri zhig /khyod kun tu gnod sems su 'gyur ba dang / mi bzod pa dang / sems yid mi bde bar 'gyur du 'ong ngo / /bram ze'i khye'u khyod lan gsum gyi bar du don 'di nges par ma thob pas 'dri na/ de'i phyir bram ze'i khye'u legs par rab tu nyon la yid la zungs shig dang bshad do/ /bram ze'i khye'u/ khyod kyi pha to'u te ya gang yin pa de lus dang bral nas/ dman pa khyi'i gnas su skyes so/ /kye go'u ta ma/ bdag gi pha te'u te ya ni mchod sbyin bgyis pa/ sbyin sreg bgyis pa/ mchod sdong bsgreng ba lags na/ de ci'i slad du 'di ltar 'gyur/ de ni lus dang bral nas tshangs pa'i 'jig rten bzang por skye bar 'gyur ro/ /bram ze'i khye'u khyod kyi pha to'u te ya ni/ nga rgyal las nga rgyal nyid kyis dman pa khyi'i gnas su skyes so/ /bram ze'i khye'u/ gal te ngas smras pa la yid mi ches na/ bram ze'i khye'u/ khyod de'i phyir rang gi khyim du song la phyin pa dang / khyi dung la/ 'di skad du gal te khyi dung khyod tshe snga ma la nga'i pha to'u te yar gyur pa lta na/ ras ko ni ka bting ba'i khri la 'dug cig ces smros shig /khri la 'dug pa dang tshig 'di skad du gal te khyi dung khyod tshe snga ma la nga'i pha to'u te yar gyur pa lta na/ khar gzhong rdo ba'i khar blangs pa la 'bras chan dang sha bsres pa'i khrud ma 'thungs shig ces smros shig / 'thung na de la tshig 'di skad du gal te khyi dung khyod tshe snga ma la nga'i pha to'u te yar gyur pa lta na/ khyod 'chi ba'i dus kyi tshe bdag dbang ba gang yod pa nga la ma bstan pa de ston cig ces smros shig dang ston par 'gyur ro/ /de nas to'u te ya'i bu bram ze'i khye'u ne tsos bcom ldan 'das kyis gsungs pa bzung ste/ kun chub par byas nas rang gi khyim ga la ba der song ste phyin pa dang / khyi dung la 'di skad ces smras so/ /gal te khyi dung khyod tshe snga ma la nga'i pha to'u te yar gyur pa lta na/ ras ko ni ka bting ba'i khri la 'dug cig khri la 'dug nas de la 'di skad ces smras so/ /gal te khyi dung khyod tshe snga ma la nga'i pha to'u te yar gyur pa lta na/ khar gzhong rdo'i khar blangs pa la 'bras chan dang sha bsres pa'i khrud ma 'thungs shig/ 'thungs nas de la 'di skad ces smras so/ /gal te khyi dung khyod tshe snga ma la nga'i pha to'u te yar gyur pa lta na/ khyod 'chi ba'i dus kyi tshe bdag dbang ba gang yod pa nga la ma bstan pa de ston cig /de nas khyi dung ras ko ni ka bting ba'i khri las babs te/ gnas khyim rnying pa zhig yod pa ga la ba der song ste phyin pa dang / khri'i rkang pa bzhi'i gnas su rkang lag gi sder mos 'bru'o/ /dbus su ni snas snom mo/ /to'u te ya'i bu bram ze'i khye'u ne tsos/ de nas gser dngul brdungs pa dang / sil ma lcags zangs bzhi dang / dbus nas gser gyi 'khar ba dang / ril ba rnyed do/ /de nas to'u te ya'i bu bram ze'i khye'u ne tsos gser de sbas nas dga' mgu zhing rab tu dga' ste rangs nas dga' ba dang / yid bde ba skyes te/ mnyan du yod pa nas byung nas/ bcom ldan 'das ga la ba der song ngo / /de'i tshe bcom ldan 'das dge slong gi 'khor brgya phrag du ma'i mdun na chos ston cing bzhugs te/ bcom ldan 'das kyis to'u te ya'i bu bram ze'i khye'u ne tso rgyang ring po nas 'ong ba gzigs so/ /gzigs nas kyang dge slong rnams la bka' stsal pa/ dge slong dag khyed kyis to'u te ya'i bu bram ze'i khye'u ne tso rgyang ring po nas 'ong ba mthong ngam/ btsun pa/ de lta lags so/ /gal te to'u te ya'i bu bram ze'i khye'u ne tso 'di'i tshe 'chi ba'i dus byas par gyur na ni/ dper na/ mda' ste'u ka 'phangs pa de bzhin du bde 'gro mtho ris kyi 'jig rten du lha rnams kyi nang du skye bar 'gyur te/ 'di ltar des nga la sems dad par byas pa'i phyir ro/ /dge slong dag /sems dad pa'i rgyus de ltar 'di na sems can kha cig lus dang bral nas bde 'gro mtho ris kyi 'jig rten du lha rnams kyi nang du skye bar 'gyur ro/ /de nas dge slong zhig gis de'i tshe tshigs su bcad de smras pa/ 'di na gang zag kha cig ni/ /rab tu sems dad gyur gzigs nas/ /ston pas dge slong tshogs rnams la/ /don de nyid ni lung bstan to/ /kye ma gson pa'i mi 'di ni/ /da ni 'chi ba'i dus byed na/ /de yi sems ni dad pa'i phyir/ /lha rnams nang du skye bar 'gyur/ /de bzhin gshegs la sems dad pa/ /de yi rgyus ni sems can rnams/ /dper na mda' ni 'phangs pa bzhin/ /de ltar bzang 'gror 'gro bar 'gyur/ /de nas to'u te ya'i bu bram ze'i khye'u ne tso bcom ldan 'das ga la ba der song ste phyin pa dang / bcom ldan 'das dang lhan cig tu mdun du kun dga' bar bya ba dang / yang dag par chags par bya ba'i gtam rnam pa mang po byas nas phyogs gcig tu 'dug go /to'u te ya'i bu bram ze'i khye'u ne tso phyogs gcig tu 'dug pa dang / bcom ldan 'das kyis 'di skad ces bka' stsal to/ / bram ze'i khye'u ci/ ngas ji ltar khyi dung lung bstan pa de de bzhin du gyur tam/ kye go'u ta ma/ mad de/ ji ltar go'u ta ma khyod kyis khyi dung lung bstan pa de de bzhin no| |gal te zhus nas zhu ba lung bstan pa'i slad du skabs dbye bar gnang na/ go'u ta ma khyod la bdag zhu ba gzhan 'ga' zhig kyang zhu'o/ /bram ze'i khye'u ci dang ci 'dod pa dris shig /kye go'u ta ma/ rgyu gang dang / rkyen gang gis 'dir sems can kha cig tshe thung ba dang / tshe ring ba dang / nad mang ba dang / nad nyung ba dang / mdog sdug pa dang / mdog mi sdug pa dang / dbang chung bar grags pa dang / dbang che bar grags pa dang / rigs btsun pa dang / rigs dma' ba dang / tshig gzung bar 'os pa dang / tshig gzung bar mi 'os pa dang / longs spyod che ba dang / longs spyod chung ba dang / shes rab 'chal ba dang / shes rab chen por gyur pa/ kye go'u ta ma/ las gang gi rnam par smin pas/ sems can 'di dag las sna tshogs su gda'/ bram ze'i khye'u/ de'i phyir legs par rab tu nyon la yid la zungs shig dang bshad do/ /bram ze'i khye'u/ sems can rnams ni las bdag gir 'gyur ba/ las kyi bgo skal la spyod pa/ las kyi skye gnas can/ las la ston pa ste/ bram ze'i khye'u/ sems can rnams ni las kyis 'di lta ste/ dman pa dang / mchog dang / 'bring dang / mchog dang / mthon po dang / dma' ba dang / ngan pa dang / bzang po rnams su rnam par phye'o/ /go'u ta ma/ khyod kyis mdor bshad de rnam par ma phyed pa 'di bdag gis don rgya cher ma 'tshal to/ /bram ze'i khye'u/ de'i phyir legs par rab tu nyon la yid la zungs shig dang bshad do/ /sems can rnams kyi las sna tshogs dang / nyon mongs pa sna tshogs dang / lta ba sna tshogs dang / spyod pa sna tshogs rig nas/ las nag po dang / dkar po rnams kyi 'bras bu rnam par smin pa brjod par bya ste/ bram ze'i khye'u/ las nag pos ni ngan song sems can dmyal ba dang / dud 'gro dang / yi dwags rnams kyi nang du skye'o/ /las dkar pos ni lha dang / mi rnams kyi nang du skye'o/ /bram ze'i khye'u/ tshe thung bar 'gyur ba'i las kyang yod/ tshe ring bar 'gyur ba'i las kyang yod/ nad mang bar 'gyur ba'i las kyang yod/ nad nyung bar 'gyur ba'i las kyang yod/ mdog mi sdug par 'gyur ba'i las kyang yod/ mdzes par 'gyur ba'i las kyang yod/ dbang chung bar grags par 'gyur ba'i las kyang yod/ dbang che bar grags par 'gyur ba'i las kyang yod/ rigs btsun par 'gyur ba'i las kyang yod/ rigs dma' bar 'gyur ba'i las kyang yod/ longs spyod chen por 'gyur ba'i las kyang yod/ longs spyod chung bar 'gyur ba'i las kyang yod/ shes rab 'chal bar 'gyur ba'i las kyang yod/ shes rab chen por 'gyur ba'i las kyang yod/ sems can dmyal bar skye bar 'gyur ba'i las kyang yod/ dud 'gror skye bar 'gyur ba'i las kyang yod/ yi dwags su skye bar 'gyur ba'i las kyang yod/ /mi'i 'jig rten du skye bar 'gyur ba'i las kyang yod/ 'dod pa na spyod pa'i lhar skye bar 'gyur ba'i las kyang yod/ gzugs na spyod pa'i lhar skye bar 'gyur ba'i las kyang yod/ gzugs med pa na spyod pa'i lhar skye bar 'gyur ba'i las kyang yod/ nges par skye bar 'gyur ba'i las kyang yod/ skye bar 'gyur bar ma nges pa'i las kyang yod/ yul gzhan du rnam par smin par 'gyur ba'i las kyang yod/ byas la bsags pa ma yin pa'i las kyang yod/ bsags ba ma byas pa'i las kyang yod/ byas la bsags pa'i las kyang yod/ ma byas la ma bsags pa'i las kyang yod/ las gang dang ldan na/ gang zag sems can dmyal ba rnams su skyes te/ sems can dmyal ba pa'i tshe yongs su rdzogs par zad par byas nas/ 'chi 'pho ba'i las kyang yod/ las gang dang ldan na| gang zag sems can dmyal ba rnams su skyes te/ sems can dmyal ba ba'i tshe phyed zad par byas nas 'chi 'pho ba'i las kyang yod/ las gang dang ldan na/ gang zag sems can dmyal ba rnams su skyes ma thag tu 'chi 'pho ba'i las kyang yod/ las gang dang ldan na/ gang zag sngar bde bar gyur la/ phyis sdug bsngal bar 'gyur ba'i las kyang yod/ las gang dang ldan na/ gang zag sngar sdug bsngal bar gyur la/ phyis bde bar 'gyur ba'i las kyang yod/ las gang dang ldan na/ gang zag sngar yang bde bar gyur la/ phyis kyang bde bar 'gyur ba'i las kyang yod/ las gang dang ldan na/ gang zag sngar yang sdug bsngal bar gyur la/ phyis kyang sdug bsngal bar 'gyur ba'i las kyang yod/ las gang nang ldan na/ gang zag phyug por gyur la/ gtong ba dang ldan pa'i las kyang yod/ las gang dang ldan na/ gang zag phyug por gyur la/ ser sna can du 'gyur ba'i las kyang yod/ /las gang dang ldan na/ gang zag dbul por gyur la/ gtong ba dang ldan pa'i las kyang yod/ las gang dang ldan na/ gang zag dbul por gyur la/ ser sna can du 'gyur ba'i las kyang yod/ gang zag gang gi tshe zad par gyur la/ las ma zad pa'i gang zag kyang yod/ gang zag gang gi las zad par gyur la/ tshe ma zad pa'i gang zag kyang yod/ gang zag gang gi tshe yang zad par gyur la/ las kyang zad pa'i gang zag kyang yod/ gang zag gang gi tshe yang ma zad cing / las kyang ma zad la/ de'i nyon mongs pa rnams zad pa'i gang zag kyang yod/ lus bde bar gyur la/ sems mi bde ba'i gang zag kyang yod/ sems bde bar gyur la/ lus mi bde ba'i gang zag kyang yod/ lus bde bar gyur la/ sems kyang bde ba'i gang zag kyang yod/ lus kyang mi bde bar gyur la/ sems kyang mi bde ba'i gang zag kyang yod/ las gang dang ldan na/ gang zag ngan song rnams su skyes la/ gzugs bzang pa dang / blta na sdug pa dang / mdzes pa dang / mdog snum pa dang / pags pa snum pa dang / mig tu sdug par 'gyur ba'i las kyang yod/ las gang dang ldan na/ gang zag ngan song rnams su skyes la/ mdog mi sdug pa dang / lus rtsub ba dang / blta na mi sdug pa dang / lta ba dang mi mthun par 'gyur ba'i las kyang yod/ las gang dang ldan na/ gang zag ngan song rnams su skyes la/ dri mi zhim pa dang / dbang po mi gsal ba dang / dbang po mi rno bar 'gyur ba'i las kyang yod/ bram ze'i khye'u/ mi dge ba'i las kyi lam bcu po dag yang dag par blangs pa'i rgyus/ phyi rol gyi dngos po bcu rgud par snang / dge ba bcu'i las kyi lam rnams yang dag par blangs pa'i rgyus/ phyi rol gyi dngos po bcu phun sum tshogs par snang ste/ 'di ni mdor bstan pa'o/ /de la tshe thung bar 'gyur ba'i las gang zhe na/ tshe thung bar 'gyur ba'i chos bcu ste/ bcu gang zhe na/ srog gcod pa dang / srog gcod pa yang dag par 'dzin du 'jug pa dang / srog gcod pa'i bsngags pa smra ba dang / srog gcod pa la rjes su yi rang ba dang / mngal nas zag par byed pa dang / mngal nas zags par bya bar yang dag par 'dzin du 'jug pa dang / mi mdza' ba shi na yid dga' ba dang / mi 'dza' ba shi bar dga' ba dang / gang du srog chags mang po gsod pa'i lta rten 'dzugs pa dang / g.yul 'gyed pa la lta ba ni bcu pa'o/ /chos bcu po de dag ni tshe thung bar 'gyur ba ste/ las 'di ni tshe thung bar 'gyur ba'o/ /de la tshe ring bar 'gyur ba'i las gang zhe na/ tshe ring bar 'gyur ba'i chos bcu ste/ bcu gang zhe na/ srog gcod pa spong ba dang / srog gcod pa spong ba yang dag par 'dzin du 'jug pa dang / /srog gcod pa spong ba'i bsngags pa smra ba dang / srog gcod pa spong ba la rjes su yi rang ba dang / bsad par chad pa'i gang zag rnams rab tu thar bar byed pa dang / dud 'gro'i skye gnas su gyur pa'i srog chags bsad par chad pa rnams rab tu thar bar byed pa dang / 'jigs skrag pa rnams la mi 'jigs pa sbyin pa dang / mgon med pa rnams la snying rje ba'i sems dang ldan pa dang / nad pa rnams la byams pa nye bar sgrub pa dang / len pa rnams la zas sbyin pa'o/ /chos bcu po de dag ni tshe ring bar 'gyur ba ste/ las 'di ni tshe ring bar 'gyur ba'o/ /de la nad mang bar 'gyur ba'i las gang zhe na/ nad mang bar 'gyur ba'i chos bcu ste/ bcu gang zhe na/ khu tshur dang / thal mo la sogs pas brdeg pa dang / khu tshur dang / thal mo la sogs pas brdeg pa yang dag par 'dzin du 'jug pa dang / khu tshur dang / thal mo la sogs pas brdeg pa'i bsngags pa smra ba dang / khu chur dang / thal mo la sogs pas brdeg pa la rjes su yi rang ba dang / pha ma na bar sgrub pa dang / 'phags pa rnams na bar sgrub pa dang / mi mdza' ba rnams nad kyis btab na yid dga' ba dang / mi mdza' ba rnams nad sos na yid mi dga' ba dang / sman ma yin pa sbyin pa dang / zas ma zhu bar za ba ni bcu pa'o/ /chos bcu po de dag ni nad mang bar 'gyur ba ste/ las 'di ni nad mang bar 'gyur ba'o/ /de la nad nyung bar 'gyur ba'i las gang zhe na/ nad nyung bar 'gyur ba'i chos bcu ste/ bcu gang zhe na/ khu tshur dang / thal mo la sogs pas brdeg pa sbong ba dang / khu tshur dang / thal mo la sogs pas brdeg pa spong ba yang dag par 'dzin du 'jug pa dang / khu tshur dang / thal mo la sogs pas brdeg pa spong ba'i bsngags pa smra ba dang / khu tshur dang thal mo la sogs pas brdeg pa spong ba la rjes su yi rang ba dang / pha ma nad kyis btab na rim gro byed pa dang / 'phags pa rnams nad kyis btab na rim gro byed pa dang / mi mdza' ba nad kyis btab na yid mi dga' ba dang / mi mdza' ba nad sos na yid dga' ba dang / nad pa la sman sbyin pa dang / kha zas zhu bar gyur nas za ba ni bcu pa'o/ /chos bcu po de dag ni nad nyung bar 'gyur ba ste/ las 'di ni nad nyung bar 'gyur ba'o/ /de la mdog mi sdug par 'gyur ba'i las gang zhe na/ mdog mi sdug par 'gyur ba'i chos bcu ste/ bcu gang zhe na/ khro ba dang / 'chab pa dang / khon du 'dzin pa dang / 'tshig pa dang / pha ma'i bsngags pa ma yin pa smra ba dang / 'phags pa rnams kyi bsngags pa ma yin pa smra ba dang / 'phags pa'i yongs su spyad pa ma rung bar byed pa dang / de bzhin gshegs pa'i mchod rten gyi mar me'i 'od kyi bar du gcod pa dang / gang zag mdog mi sdug pa rnams la dbang za ba dang / gtsang sbra med par spyod pa ni bcu pa'o/ /chos bcu po de dag ni mdog mi sdug par 'gyur ba ste/ las 'di ni mdog mi sdug par 'gyur ba'o/ /de la mdzes par 'gyur ba'i las gang zhe na/ mdzes par 'gyur ba'i chos bcu ste/ bcu gang zhe na/ mi khro ba dang / gos sbyin pa dang / de bzhin gshegs pa'i mchod rten la rdo thal gyis nyug pa dang / gtsug lag khang phyag dar byed pa dang / de bzhin gshegs pa'i mchod rten gyi khang pa phyag pa dang / de bzhin gshegs pa'i sku gzugs 'phyi ba dang / pha ma'i bsngags pa smra ba dang / 'phags pa rnams kyi bsngags ba smra ba dang / gang zag mdog mi sdug rnams la mi brnyas pa dang / gtsang sbra spyod pa ni bcu pa'o/ /chos bcu po de dag ni mdzes par 'gyur ba'o/ /de la dbang chung bar grags par 'gyur ba'i las gang zhe na/ dbang chung bar grags par 'gyur ba'i chos bcu ste/ bcu gang zhe na/ pha rol gyi rnyed pa la phrag dog byed pa dang / pha rol gyi rnyed pa la yid mi dga' ba dang / pha rol gyis ma rnyed pa la yid dga' ba dang / pha rol gyi grags pa dang / bsngags pa dang / brjod pa dang / sgra dang tshigs su bcad pa la yid mi dga' ba dang / pha rol gyi grags pa dang / bsngags pa dang / brjod pa dang / sgra dang tshigs su bcad pa ma yin pa la yid dga' ba dang / pha ma la brnyas pa dang / 'phags pa rnams la brnyas pa dang / dge ba'i rtsa ba chung ngu yang dag par 'dzin du 'jug pa dang / dge ba'i rtsa ba chen po'i rgyun gcod pa dang / gang zag dbang chung bar grags pa rnams la dbang za ba'o/ /chos bcu po de dag ni dbang chung bar grags par 'gyur ba ste/ las 'di ni dbang chung bar grags par 'gyur ba'o/ /de la dbang che bar grags par 'gyur ba'i las gang zhe na/ dbang che che bar grags par 'gyur ba'i chos bcu ste/ bcu gang zhe na/ pha rol gyi rnyed pa la phrag dog med pa dang / pha rol gyi rnyed pa la yid dga' ba dang / pha rol gyis ma rnyed pa la yid mi dga' ba dang / pha rol gyi grags pa dang / bsngags pa dang / brjod pa dang / sgra dang / tshigs su bcad pa ma yin pa la yid mi dga' ba dang / pha rol gyi grags pa dang / bsngags pa dang / brjod pa dang / sgra dang / tshigs su bcad pa la yid dga' ba dang / byang chub tu sems bskyed pa dang / gdugs sbyin pa dang / de bzhin gshegs pa'i mchod rten gyi khang pa byed pa dang / dge ba'i rtsa ba chung du rgyun mi gcod pa dang / dge ba'i rtsa ba chen po yang dag par 'dzin du 'jug pa'o/ /chos bcu po de dag ni dbang che bar grags par 'gyur ba ste/ las 'di ni dbang che bar grags par 'gyur ba'o/ /de la rigs dma' bar 'gyur ba'i las gang zhe na/ rigs dma' bar 'gyur ba'i chos bcu ste/ bcu gang zhe na/ khengs pa dang / nga'o snyam pa'i nga rgyal dang / mar mi shes pa dang / phar mi shes pa dang / dge sbyong du mi shes pa dang / bram zer mi shes pa dang / khyim gyi gtso bo la rim gro mi byed pa dang / pha ma la mi ldang ba dang / 'phags pa rnams la mi ldang ba dang / rigs dma' bar skyes pa'i gang zag rnams la dbang za ba'o/ /chos bcu po de dag ni rigs dma' bar 'gyur ba ste/ las 'di ni rigs dma' bar 'gyur ba'o/ /de la rigs btsun par 'gyur ba'i las gang zhe na/ rigs btsun par 'gyur ba'i chos bcu ste/ bcu gang zhe na/ ma khengs pa dang / nga'o snyam pa'i nga rgyal med pa dang / mar shes pa dang / phar shes pa dang / dge sbyong du shes pa dang / bram zer shes pa dang / khyim gyi gtso bo la rim gro byed pa dang / pha ma la ldang ba dang / 'phags pa rnams la ldang ba dang / rigs dma' bar skyes pa'i gang zag rnams la dbang mi za ba'o/ /chos bcu po de dag ni rigs btsun par 'gyur ba'o/ /de la longs spyod chung bar 'gyur ba'i las gang zhe na/ longs spyod chung bar 'gyur ba'i chos bcu ste/ bcu gang zhe na/ ma byin par len pa dang / ma byin par len pa yang dag par 'dzin du 'jug pa dang / ma byin par len pa'i bsngags pa smre ba dang / ma byin par len pa la rjes su yi rang ba dang / pha ma'i 'tsho ba rgyun gcod pa dang / 'phags pa rnams kyi 'tsho ba rgyun gcod pa dang / pha rol gyi rnyed pa la yid mi dga' ba dang / pha rol gyis ma rnyed pa la yid dga' ba dang / pha rol gyis rnyed pa'i bar chad byed pa dang / mu ge byung na dga' ba ni bcu pa'o/ /chos bcu po de dag ni longs spyod chung bar 'gyur ba ste/ las 'di ni longs spyod chung bar 'gyur ba'o/ /de la longs spyod chen por 'gyur ba'i las gang zhe na/ longs spyod chen por 'gyur ba'i chos bcu ste/ bcu gang zhe ma byin par len pa spong ba dang / ma byin par len pa spong bar yang dag par 'dzin du 'jug pa dang / ma byin par len pa spong ba'i bsngags pa smra ba dang / ma byin par len pa spong ba la rjes su yi rang ba dang / pha ma la 'tsho ba sbyin pa dang / 'phags pa rnams la 'tsho ba sbyin pa dang / pha rol gyis ma rnyed pa la yid mi dga' ba dang / pha rol gyis rnyed pa la yid dga' ba dang / pha rol gyis rnyed pa'i bar chad mi byed pa dang / lo legs na mngon par dga' ba ni bcu pa'o/ /chos bcu po de dag ni longs spyod chen por 'gyur ba ste/ las 'di ni longs spyod chen por 'gyur ba'o/ /de la shes rab 'chal bar 'gyur ba'i las gang zhe na/ shes rab 'chal bar 'gyur ba'i chos bcu ste/ bcu gang zhe na/ 'di la gang zag dge sbyong dang / bram ze mkhas pa dang / mkhas pa'i grangs su gtogs pa gang yin pa de dag gi gan du 'gro yang yongs su mi 'dri/ yongs su 'dri bar mi byed/ mi bsnyen/ mi bsten/ bsnyen bkur mi byed pa dang / 'chal ba'i shes rab can la bsnyen cing bsten te/ bsnyen bkur byed pa dang / mkhas pa rnams kyi mi 'jigs pa gcod pa dang / legs par bshad pa rnams yongs su spong ba dang / nyes par bshad pa rnams kun tu 'dzin pa dang / dam pa'i chos ma yin pa yongs su ston pa dang / dam pa'i chos yongs su spong ba dang / chos smra ba rnams la legs so zhes bya ba mi sbyin pa dang / log par lta ba bsngags par byed pa dang / yang dag par lta ba la smad pa'o/ /chos bcu po de dag ni shes rab 'chal bar 'gyur ba ste/ las 'di ni shes rab 'chal par 'gyur ba'o/ /de la shes rab chen por 'gyur ba'i las gang zhe na/ shes rab chen por 'gyur ba'i chos bcu ste/ bcu gang zhe na/ 'di la gang zag dge sbyong dang / bram ze mkhas pa mkhas pa'i grangs su gtogs pa gang yin pa de dag gi gan du 'gro ste yongs su 'dri zhing yongs su 'dri bar byed la/ bsnyen cing bsten te bsnyen bkur byed pa dang / shes rab 'chal pa can rnams la mi bsnyen mi bsten/ bsnyen bkur mi byed pa dang / mkhas pa rnams la mi 'jigs pa nye bar sgrub pa dang / legs par bshad pa rnams yongs su mi spong ba dang / nyes par bshad pa rnams yongs su spong ba dang / dam pa'i chos yongs su mi spong ba dang / dam pa'i chos ma yin pa yongs su spong ba dang / chos smra ba'i gang zag rnams la legs so zhes bya ba sbyin pa dang / log par lta ba la smod pa dang / yang dag par lta ba la bsngags par byed pa'o/ /chos bcu po de dag ni shes rab chen por 'gyur ba ste/ las 'di ni shes rab chen por 'gyur ba'o/ /de la sems can dmyal bar skye bar 'gyur ba'i las gang zhe na/ sems can dmyal bar skye bar 'gyur ba'i chos bcu ste/ bcu gang zhe na/ lus kyi nyes par spyod pa che ba dang / ngag gi nyes par spyod pa che ba dang / yid kyi nyes par spyod pa che ba dang / chad par lta ba dang / rtag par lta ba dang / med par lta ba dang / byed pa med par lta ba dang / byas pa mi gzo ba dang / mtshams med pa'i las la bskul ma 'debs pa dang / log par lta ba yang dag par 'dzin du 'jug pa ni bcu pa'o/ /chos bcu po de dag ni sems can dmyal bar skye bar 'gyur ba ste/ las 'di ni sems can dmyal bar skye bar 'gyur ba'o/ /de la dud 'gror skye bar 'gyur ba'i las gang zhe na/ dud 'gror skye bar 'gyur ba'i chos bcu ste/ bcu gang zhe na/ lus kyi nyes par spyod pa 'bring dang / ngag gi nyes par spyod pa 'bring dang / yid kyi nyes par spyod pa 'bring dang / 'dod chags kyis kun nas bslang ba'i las sna tshogs dang / zhe sdang gis kun nas bslang ba'i las sna tshogs dang / gti mug gis kun nas bslang ba'i las sna tshogs dang / rung ba ma yin pa'i sbyin pa dang / dman pa'i ming gis gshe ba dang / smon lam gyis 'gyur ba/ 'di lta ste/ seng ge'i skyes pa'i rabs lta bu dang / ngag gi nyes par spyod pas 'gyur ba bram ze dbyar byed spre'ur skyes pa lta bu'o/ /chos bcu po de dag ni dud 'gror skye bar 'gyur ba ste/ las 'di ni dud 'gror skye bar 'gyur ba'o/ /de la yi dwags su skye bar 'gyur ba gang zhe na/ yi dwags su skye bar 'gyur ba'i chos bcu ste/ bcu gang zhe na/ lus kyi nyes par spyod pa chung ba dang / ngag gi nyes par spyod pa chung ba dang / yid kyi nyes par spyod pa chung ba dang / chags pa dang / yang bas chags pa dang / log par 'tsho ba dang / ser sna byed pa dang / sbyin pa 'gog pa dang / bkres shing skom bzhin du 'chi ba'i dus byed pa dang / dngos po la chags bzhin du 'chi ba'i dus byed pa'o/ / chos bcu po de dag ni yi dwags su skye bar 'gyur ba ste/ las 'di ni yi dwags su skye bar 'gyur ba'o/ /de la mir skye bar 'gyur ba'i las gang zhe na/ mir skye bar 'gyur ba'i chos bcu ste/ bcu gang zhe na/ srog gcod pa dang / ma byin par len pa dang / 'dod pa la log par g.yem pa dang / brdzun du smra ba dang / phra ma dang / ngag rtsub po dang / tshig kyal pa dang / brnab sems dang / gnod sems dang / log par lta ba mi dge ba'i las kyi lam bcu po 'di dag spong ba'o/ /chos bcu po de dag ni mir skye bar 'gyur ba ste| las 'di ni mir skye bar 'gyur ba'o/ /de la 'dod pa na spyod pa'i lhar skye bar 'gyur ba'i las bcu gang zhe na/ dge ba bcu'i las kyi lam rnams legs par sbyangs pa la mnyam par bzhag pa ste/ las 'di ni 'dod pa na spyod pa'i lhar skye bar 'gyur ba'o/ /de la gzugs na spyod pa'i lhar skye bar 'gyur ba'i las gang zhe na/ ting nge 'dzin gyis legs par mnyam par bzhag pa/ zag pa dang bcas pa'i dge ba bcu'i las kyi lam rnams te/ las 'di ni gzugs na spyod pa'i lhar skye bar 'gyur ba'o/ /gzugs med pa na spyod pa'i lhar skye bar 'gyur ba'i las gang zhe na/ gzugs med pa'i snyoms par 'jug pa bzhi ste/ bzhi gang zhe na/ gzugs kyi 'du shes rnams las rnam pa thams cad du yang dag par 'das te/ thogs pa'i 'du shes rnams nub nas/ sna tshogs kyi 'du shes rnams yid la mi byed pas/ nam mkha' mtha' yas so zhes nam mkha' mtha' yas skye mched nye bar bsgrubs te gnas pa dang / nam mkha' mtha' yas skye mched las rnam pa thams cad du yang dag par 'das nas/ rnam par shes pa mtha' yas so zhes rnam shes mtha' yas skye mched nye bar bsgrubs te gnas pa dang / rnam shes mtha' yas skye mched las rnam pa thams cad du yang dag par 'das nas ci yang med do zhes ci yang med pa'i skye mched nye bar bsgrubs te gnas pa dang / ci yang med pa'i skye mched las rnam pa thams cad du yang dag par 'das nas/ 'du shes med 'du med min skye mched nye bar bsgrubs nas gnas pa ste/ las 'di ni gzugs med pa na spyod pa'i lhar skyes bar 'gyur ba'o/ /de la nges par skye bar 'gyur ba'i las gang zhe na/ dge ba'i las gang byas nas/ 'dis bdag 'di lta bu zhig tu skye bar gyur cig/ ces yongs su bsngo ba dang / mtshams med pa lnga rnams te/ 'di ni nges par skye bar 'gyur ba'o/ /de la skye bar 'gyur bar ma nges pa'i las gang zhe na/ dge ba'i las gang byas nas/ cir yang yongs su mi bsngo ba ste/ las 'di ni skye bar 'gyur bar ma nges pa'o/ /de la yul gzhan du rnam par smin par 'gyur ba'i las gang zhe na/ 'dir dge ba dang mi dge ba'i las gang byas pa/ yul gzhan du song nas rnam par smin par 'gyur ba ste/ dper na/ tshong pa mdza' bo'i bu mo lta bu ste/ las 'di ni gzhan du rnam par smin par 'gyur ba'o/ /de la byas la bsags pa ma yin pa'i las gang zhe na/ las gang byas nas ngo tsha ba dang / 'dzem pa dang / 'gyod pa dang / smod pa dang / 'chags pa dang / mthol ba dang / 'dor ba dang / spong ba dang / ma 'ongs pa na sdom par byed pa ste/ las 'di ni byas la bsags pa ma yin pa'o/ /de la bsags la ma byas pa'i las gang zhe na/ las gang lus kyis yongs su rdzogs par bya ba de/ sems kyis yongs su rdzogs par byas shing / tshig tu yang las 'di bya'o zhes smras la de ma byas pa ste/ las 'di ni bsags la ma byas pa'o/ /de la byas la bsags pa'i las gang zhe na/ las gang byas nas ngo mi tsha ba dang / mi 'dzem pa dang / mi 'gyod pa dang / mi smod pa dang / mi 'chags pa dang / mi mthol ba dang / mi 'dor ba dang / mi spong ba dang / ma 'ongs pa na sdom par mi byed pa ste/ las 'di ni byas la bsags pa'o/ /de la ma byas la ma bsags pa'i las gang zhe na/ las gang ched du ma bsams par byas pa ste/ las 'di ni ma byas la ma bsags pa'o/ /de la las gang dang ldan na/ gang zag sems can dmyal ba rnams su skyes te/ sems can dmyal ba'i tshe yongs su rdzogs pas zad par byas nas/ 'chi 'pho ba'i las gang zhe na| 'di la gang zag 'ga' zhig gis sems can dmyal bar 'gyur ba'i las byas zhing bsags par gyur la/ de las des ngo mi tsha ba dang / mi 'dzem pa dang / mi 'gyod pa dang / mi smod pa dang / mi 'chags pa dang / mi mthol ba dang / mi 'dor ba dang / mi spong ba dang / mi gshung ba dang / smod par mi byed pa dang / yang gnod par bya'o zhes sha gnyer ba tshol ba ste/ dper na/ lhas byin lta bu'o/ /'di ni las gang dang ldan na/ gang zag sems can dmyal ba rnams su skyes te/ sems can dmyal ba pa'i tshe yongs su rdzogs par zad par byas nas 'chi 'pho ba'i las so/ /de la las gang dang ldan na/ /gang zag sems can dmyal ba rnams su skyes te| sems can dmyal ba'i tshe phyed zad par byas nas/ 'chi 'pho ba'i las gang zhe na/ 'di la gang zag 'ga' zhig gis sems can dmyal bar 'gyur ba'i las byas nas| ngo tsha ba dang / 'dzem pa dang / 'gyod pa dang / smod pa dang / 'chags pa dang / mthol ba dang / 'dor ba dang / spong ba dang / ma 'ongs pa na sdom par byed pa ste/ 'di ni las gang dang ldan na/ gang zag sems can dmyal ba rnams su skyes te/ sems can dmyal ba pa'i tshe phyed zad par byas nas 'chi 'pho ba'i las so/ /de la las gang dang ldan na/ gang zag sems can dmyal ba rnams su skyes ma thag tu 'chi 'pho ba'i las gang zhe na/ 'di la gang zag 'ga' zhig gis sems can dmyal bar 'gyur ba'i las byas shing bsags par gyur la/ de las de byas pas/ ngo tsha ba dang / 'dzem pa dang / 'gyod pa dang / smod pa dang / 'chags pa dang / mthol ba dang / 'dor ba dang / spong ba dang / de shin tu yid la bcags pa yin yang yid la bcags pa des/ las de sel bar mi nus pa ste/ dper na/ rgyal po ma skyes dgras pha bsad pa lta bu'o/ /de skad du shin tu mi bzad las rnams byas pa ni/ /bdag la smod dang rab tu bshags pa dang / /sdom par byed pas de dag bsrab 'gyur gyi/ /shin tu rtsa nas phyin ces mi smra'o/ /zhes gsungs so/ /'di ni las gang dang ldan na/ /gang zag sems can dmyal ba rnams su skyes ma thag tu 'chi 'pho ba'i las so/ /de la las gang dang ldan na/ gang zag sngar bde bar gyur la/ phyis sdug bsngal bar 'gyur ba'i las gang zhe na/ 'di la gang zag 'ga' zhig sbyin pa sbyin pa na/ yid rab tu dga' zhing dga' ba dang / yid bde ba skyes la byin nas ni 'gyod pa yin te/ gang zag de gang gi tshe mi rnams kyi nang du skye ba na phyug pa dang / nor che ba dang / longs spyod che ba dang / nor dang yo byad mang ba dang / bdag dbang ba mang ba dang / mdza' bshes dang / blon po dang / nye du dang / snag gi gnyen mtshams mang ba dang / mdzod dang / bang ba yongs su gang ba'i khyim rnams su skye bar 'gyur te/ khyim de lta bu dag tu skyes nas/ shin tu skyid la bzhon pa la zhon zhing bde bar spyod la/ de'i longs spyod de dag phyis yongs su nyams zhing yongs su zad par 'gyur te/ de'i gzhis sdug bsngal bar 'gyur ba ste/ 'di ni las gang dang ldan na/ gang zag sngar bde bar 'gyur la/ phyis sdug bsngal bar 'gyur ba'i las so// //las rnam par 'byed pa zhes bya ba/ bam po gnyis pa/ de la las gang dang ldan na/ gang zag sngar sdug bsngal bar gyur la phyis bde bar 'gyur ba'i las gang zhe na/ 'di la gang zag 'ga' zhig sbyin pa sbyin pa na/ sdug bsngal bar 'jug cing / sdug bsngal bar sbyin pa byin nas ni mi 'gyod par gyur cing / dga' ba dang / yid bde ba skyes pa yin te/ gang zag de gang gi tshe mi rnams kyi nang du skye ba na/ dbul po bza' ba dang / btung pa dang / kha zas nyung ba sdug bsngal bas 'tsho ba'i khyim rnams su skye bar 'gyur ba ste/ der sdug bsngal bar bza' ba dang / bgo ba rnyed la des che 'gras su gyur pa dang / longs spyod de dag 'phel zhing rgyas par 'gyur ba ste/ 'di ni las gang dang ldan na/ gang zag sngar sdug bsngal bar gyur la/ phyis bde bar 'gyur ba'i las so/ /de la las gang dang ldan na/ gang zag sngar yang bde bar gyur la/ phyis kyang bde bar 'gyur ba'i las gang zhe na/ 'di la gang zag 'ga' zhig sbyin pa sbyin pa na/ yid dga' bzhin du byin te dga' ba dang / yid bde ba skyes nas/ byin nas kyang mi 'gyod pa yin te/ gang zag de gang gi tshe mi rnams kyi nang du skye ba na/ phyug pa dang / nor che ba dang / longs spyod che ba dang / nor dang / yo byad mang ba dang / bdag dbang ba mang ba dang / mdza' bshes dang / blon po dang / nye du dang / snag gi gnyen mtshams mang ba dang / mdzod dang / bang ba yongs su gang ba'i khyim rnams su skye bar 'gyur te/ khyim de lta bu dag tu skyes nas shin tu skyid la bzhon pa la zhon zhing bde bar spyod la/ de'i longs spyod de dag phyis kyang 'phel ba ste/ 'di ni las gang dang ldan na/ gang zag sngar yang bde bar 'gyur la| phyis kyang bde bar 'gyur ba'i las so/ /de la las gang dang ldan na/ gang zag sngar yang sdug bsngal bar gyur la/ phyis kyang sdug bsngal bar 'gyur ba'i las gang zhe na/ 'di la gang zag 'ga' zhig dge ba'i bshes gnyen dang bral bar gyur te/ de sus kyang sbyin pa yang dag par 'dzin du ma bcug pa yin/ des kyang sbyin ba ci yang ma byin pa yin/ des sdig pa'i las ci yang ma byas shing ma bsags pa yin te/ gang zag de gang gi tshe mi rnams kyi nang du skye ba na/ dbul po bza' ba dang / btung ba dang / kha zas nyung ba/ sdug bsngal bas 'tsho ba'i khyim rnams su skye bar 'gyur te/ de der skyes nas sdug bsngal bar bza' ba dang / bgo ba rnyed par mi 'gyur la| de'i longs spyod de dag phyis kyang mi 'phel ba ste/ 'di ni las gang dang ldan na/ gang zag sngar yang sdug bsngal bar gyur la/ phyis kyang sdug bsngal bar 'gyur ba'i las so/ /de la las gang dang ldan na/ gang zag phyug por gyur la gtong ba dang ldan pa'i las gang zhe na/ 'di la gang zag zhig gis snod bzang por gyur pa rnams la sbyin pa dpag tu med pa byin pa yin/ des gtong ba goms par byas pa yin te/ des bsod nams dag bsgoms pas phyug por 'gyur/ gtong ba bsgoms pas gtong ba dang ldan par 'gyur te/ 'di ni las gang dang ldan na/ gang zag phyug por gyur la gtong ba dang ldan pa'i las so/ /de la las gang dang ldan na/ gang zag phyug por gyur la ser sna can du 'gyur ba'i las gang zhe na/ 'di la gang zag 'ga' zhig gis snod du gyur pa rnams la sbyin pa cung zad tsam byin pa yin gyi/ de gtong ba la cher goms par ma byas pa yin te/ gang zag de gang gi tshe mi'i nang du skye ba na/ phyug pa dang / nor che ba dang / longs spyod che ba dang / nor dang / yo byad mang ba dang / bdag dbang ba mang ba'i khyim rnams su skye bar 'gyur te/ snod bzang po rnams la phul ba ni/ skyid pa 'gyur/ gtong ba la goms par ma byas pas ni ser sna can du 'gyur te/ 'di ni las gang dang ldan na/ gang zag phyug por gyur la ser sna can du 'gyur ba'i las so/ /de la las gang dang ldan na/ gang zag dbul por gyur la gtong ba dang ldan par 'gyur ba'i las gang zhe na/ 'di la gang zag 'ga' zhig gis snod du gyur pa ma yin pa rnams la sbyin pa mang du byin pa yin te| de 'khor ba na 'khor ba'i tshe/ bsod nams de dag yongs su nyams shing / yongs su zad par 'gyur/ gtong ba'i rgyu yang phyi phyir zhing bsgoms pa yin te/ de bsod nams yongs su zad pa'i phyir dbul por 'gyur/ sngon goms par byas pas gtong ba dang ldan par 'gyur te/ 'di ni las gang dang ldan na/ gang zag dbul por gyur la gtong ba dang ldan pa'i las so/ /de la las gang dang ldan na/ gang zag dbul por gyur la ser sna can du 'gyur ba'i las gang zhe na/ 'di la gang zag 'ga' zhig dge ba'i bshes gnyen dang bral bar gyur te/ de sus kyang sbyin pa yang dag par 'dzin du ma bcug pa yin/ des kyang sbyin pa ci yang ma btang ba yin/ sdig pa'i las kyang ma byas shing ma bsags pa yin te/ gang zag de gang gi tshe mi rnams kyi nang du skye ba na/ dbul po bza' ba dang / btung ba dang / kha zas nyung ba/ sdug bsngal ba/ sdug bsngal bas 'tsho ba'i khyim rnams su skye bar 'gyur te/ de de na sdug bsngal bar bza' ba dang / bgo ba rnyed par 'gyur ro/ /gtong ba ma bsgoms pas dbul zhing ser sna can du 'gyur te/ 'di ni las gang dang ldan na/ gang zag dbul por gyur la ser sna can du 'gyur ba'i las so/ /de la las gang dang ldan na/ gang zag lus bde bar gyur la sems kyis ma yin pa'i las gang zhe na/ bsod nams byas pa'i so so'i skye bo ste/ dper na/ 'khor los sgyur ba'i rgyal po lta bu ste/ gang zag 'di ni lus bde bar gyur la sems kyis ma yin pa'o/ /de la las gang dang ldan na/ gang zag sems bde bar gyur la lus kyis ma yin pa'i las gang zhe na| bsod nams ma byas pa'i dgra bcom pa ste/ dper na/ gnas brtan le kun tsi ka lta bu ste/ gang zag 'di ni sems bde bar gyur la lus kyis ma yin pa'o// de la lus kyang bde la sems kyang bde ba'i gang zag gang zhe na/ bsod nams byas pa'i dgra bcom pa ste/ dper na/ gnas brtan she ba la lta bu ste/ gang zag 'di ni lus kyang bde la sems kyang bde ba'o/ /de la lus kyang mi bde la/ sems kyang mi bde ba'i gang zag gang zhe na/ 'di lta ste/ bsod nams ma byas pa'i so so'i skye bo ste/ gang zag 'di ni lus kyang mi bde la/ sems kyang mi bde ba'o/ /de la gang zag gang gi tshe zad par gyur la/ las ma zad pa gang zhe na/ gang zag gang sems can dmyal ba nas shi 'phos la sems can dmyal bar skye ba dang / dud 'gro nas shi 'phos la dud 'gror skye ba dang / yi dwags las shi 'phos la yi dwags su skye ba dang / lha las shi 'phos la lhar skye ba dang / mi las shi 'phos la mir skye ba ste/ gang zag 'di tshe zad par gyur la/ las ma zad pa'o/ /de la gang zag gi las zad par gyur la tshe ma zad pa'i gang zag gang zhe na/ gang zag gang sngar bde bar gyur la/ phyis sdug bsngal bar gyur pa dang / sngar sdug bsngal bar gyur la/ phyis bde bar gyur pa ste/ gang zag de ni las zad par gyur la tshe ma zad pa'o/ /de la gang zag gang gi las kyang zad la/ tshe yang zad pa'i gang zag gang zhe na/ gang zag gang sems can dmyal ba nas shi 'phos te/ dud 'gror skye ba dang / dud 'gro nas shi 'phos te/ yi dwags su skye ba dang / yi dwags las shi 'phos te/ lha ma yin gyi nang du skye ba dang / lha ma yin la shi 'phos te/ mi'i nang du skye ba dang / mi las shi 'phos te/ lha'i nang du skye ba ste/ gang zag de ni tshe yang zad la las kyang zad pa'o/ /de la gang zag gang tshe yang ma zad cing las kyang ma zad la/ de'i nyon mongs pa rnams zad pa'i gang zag gang zhe na/ rgyun du zhugs pa dang / lan gcig phyir 'ong ba dang / phyir mi 'ong ba dang / dgra bcom pa ste/ gang zag de ni tshe yang ma zad cing / las kyang ma zad la/ de'i nyon mongs pa rnams zad pa yin no| |de la las gang dang ldan na/ gang zag ngan song rnams su skyes la/ gzugs bzang ba dang / mdzes pa dang / blta na sdug pa dang / mdog snum pa dang / pags pa snam pa dang / mig tu sdug par 'gyur ba'i las gang zhe na/ 'dod chags kyis kun nas bslang ba'i ngang tshul ngan pa ste/ 'di ni las gang dang ldan na/ gang zag ngan song rnams su skyes la/ gzugs bzang ba dang / blta na sdug pa dang / mdzes pa dang / mdog snum pa dang / pags pa snum par 'gyur ba'i las so/ /de la las gang dang ldan na/ gang zag ngan song rnams su skyes la/ mdog mi sdug pa dang / lus rtsub pa dang / blta ba dang mi mthun par 'gyur ba'i las gang zhe na/ zhe sdang gis kun nas bslang ba'i ngang tshul ngan pa ste/ 'di ni las gang dang ldan na/ gang zag ngan song rnams su skyes la/ mdog mi sdug pa dang / lus rtsub pa dang / blta na mi sdug pa dang / blta ba dang mi mthun par 'gyur ba'i las so/ /de la las gang dang ldan na/ gang zag ngan song rnams su skyes la/ dri mi zhim pa dang / dbang po mi gsal ba dang / dbang po mi rno bar 'gyur ba'i las gang zhe na/ gti mug gis kun nas bslang ba'i ngang tshul ngan pa ste/ 'di ni las gang dang ldan na/ gang zag ngan song rnams su skyes la/ dri mi zhim pa dang / dbang po mi gsal ba dang / dbang po mi rno bar 'gyur ba'i las so/ /de la mi dge ba bcu'i las kyi lam 'di dag yang dag par blangs pa'i rgyus/ phyi rol gyi dngos po bcu rgud par snang ba gang zhe na/ srog gcod pa'i rnam par smin pas ni sa'i mthu yongs su nyams par 'gyur ro| |ma byin par len pa'i rnam par smin pas ni/ ser ba dang / byi ba dang / srin dang / mu ge la sogs pa 'byung bar 'gyur ro/ /'dod pa la log par g.yem pa'i rnam par smin pas ni/ ba tshwa dang / sa 'bab pa dang / rdul dang / rlung dang / char drag po 'byung bar 'gyur ro/ /brdzun du smra ba'i rnam par smin pas ni/ dri mi zhim par 'gyur ro// phra ma'i rnam par smin pas ni/ mtho dman dang / ngam grog dang / 'dam rdza ba dang / g.yang sa dang / ljag ljig dang / ngan skyugs kyi ljan ljin 'byung bar 'gyur ro/ /ngag rtsub pa'i rnam par smin pas ni/ 'bras bu ngan pa dang / reg tu mi bzod pa dang / gseg ma dang / gyo mo dang / tsher ma tshang tshing dag 'byung bar 'gyur ro/ /tshig kyal ba'i rnam par smin pas ni/ rtswa tshang tshing dang / nags thibs pa dang / 'khri shing tsher ma tshang tshing can dag 'byung bar 'gyur ro/ /brnab sems kyi rnam par smin pas ni/ lo tog la sogs pa 'bras bu nyung du 'byung bar 'gyur ro/ /gnod sems kyi rnam par smin pas ni/ 'bras bu dang / sa bon tsha ba dang / kha ba 'byung bar 'gyur ro/ /log par lta ba yang dag par blangs pa'i rgyus ni 'bras bu med pa dang / nyung ba'i sa bon 'byung bar 'gyur te/ mi dge ba bcu'i las kyi lam 'di dag yang dag par blangs pa'i rgyus/ phyi rol gyi dngos po bcu rgud par snang ngo / /dge ba bcu'i las kyi lam rnams yang dag par blangs pa'i rgyus/ phyi rol gyi dngos po bcu phun sum tshogs par snang ste/ bcu gang zhe na/ srog gcod pa spangs pa'i rnam par smin pas ni/ sa'i mthu med par mi 'gyur ro/ /ma byin par len pa spangs pa'i rnam par smin pas ni/ ser ba dang / byi ba dang / srin dang / mu ge la sogs pa 'byung bar mi 'gyur ro/ /'dod pa la log par g.yem pa spangs pa'i rnam par smin pas ni/ ba tshwa dang / sa 'bab pa dang / rdul dang / rlung dang / char drag po 'byung bar mi 'gyur ro/ /brdzun du smra ba rnam par spangs pa'i rnam par smin pas ni/ dri mi zhim pa 'byung bar mi 'gyur ro/ /phra ma spangs pa'i rnam par smin pas ni/ ngam grog dang / g.yang sa dang / 'dam rdzab dang / ngan skyugs kyi ljan ljin dang / dong rnams 'byung bar mi 'gyur ro/ /ngag rdzub po spangs pa'i rnam par smin pas ni/ gseg ma dang / gyo mo dang / gyo dum gyis reg pa 'byung bar mi 'gyur ro/ /tshig kyal pa spangs pa'i rnam par smin pas ni/ rtswa tshang tshing dang / nags thibs po dang / tsher ma tshang tshing rnams 'byung bar mi 'gyur ro/ /brnab sems spangs pa'i rnam par smin pas ni/ lo tog la sogs pa 'bras bu dang bcas pa 'byung bar 'gyur ro/ /gnod sems spangs pa'i rnam par smin pas ni/ lo legs pa dang / 'bras bu dang / sa bon mi kha ba dang / mi tsha ba rnams 'byung bar 'gyur ro/ /log par lta ba spangs pa'i rnam par smin pas ni/ 'bras bu med pa dang / chung ba ma yin pa'i sa bon rnams 'byung bar 'gyur te/ dge ba bcu'i las kyi lam bcu po 'di dag yang dag par blangs pa'i rgyus/ phyi rol gyi dngos po bcu po 'di dag phun sum tshogs par snang ngo / /bram ze'i khye'u srog gcod pa'i nyes dmigs bcu po 'di dag rig par bya ste/ bcu gang zhe na/ sha gnyer ba mang ba dang / mthong na yid du mi 'ong ba dang / sdig pa rnams sems pa dang / de la sems can rnams 'jigs par 'gyur ba dang / mi bde bzhin nyal zhing / mi bde bzhin sad pa dang / sdig pa can gyi rmi lam rmi ba dang / rmugs te 'chi ba'i dus byed par 'gyur ba dang / 'gyod par 'gyur ba dang / tshe thung bar 'gyur ba'i las byed cing gsog pa dang / lus dang bral nas shi ba'i 'og tu ngan song ngan 'gror rnam par ltung ba sems can dmyal ba rnams su skye bar 'gyur ro/ /ma byin par len pa la nyes dmigs bcur rig par bya ste/ bcu gang zhe na/ khon bcugs su 'gyur ba dang / dogs par 'gyur ba dang / dus ma yin par rgyu ba dang / dgongs kar rgyu ba dang / sdig pa'i grogs pos yongs su zin pa dang / dge ba'i bshes gnyen gyis rnam par spangs pa dang / ngang tshul ngan pa dang / rgyal po'i gnod pa dang / chad pa'i gnod pa 'byung ba dang / longs spyod kyis phongs par 'gyur ba'i las byed cing gsog pa dang / lus dang bral nas shi ba'i 'og tu ngan song ngan 'gro log par ltung ba sems can dmyal ba rnams su skye bar 'gyur ba'o/ /'dod pa la log par g.yem pa la nyes dmigs bcur rig par bya ste/ bcu gang zhe na/ gang dag gi chung ma la nyal po byed pa de dag de la glags tshol bar 'gyur ba dang / de'i chung ma dang rtsod par 'gyur ba dang / de'i mi dge ba'i chos 'phel bar 'gyur ba dang / de'i dge ba'i chos yongs su 'grib cing yongs su zad par 'gyur ba dang / bdag ma sbas shing ma bsrungs pa dang / de'i bu dang / chung ma dang / nor rnams ma sbas shing ma bsrungs pa dang / dogs par 'gyur ba dang / mdza' bshes dang / blon po dang / nye du dang / snag gi gnyen mtshams rnams yid mi rton pa dang / byi bo byed pa dang / bcas par 'gyur ba'i las byed cing gsog pa dang / lus dang bral nas shi ba'i 'og tu ngan song ngan 'gror rnam par ltung ba/ sems can dmyal ba rnams su skye bar 'gyur ba'o/ /brdzun du smra ba la nyes dmigs bcur rig par bya ste/ bcu gang zhe na/ de kha mnam par 'gyur ba dang / de'i lus las lha rnams mi 'phangs pa dang / mi ma yin pa rnams kyis de la glags rnyed par 'gyur ba dang / bden pa smras kyang de la su yang yid ches par mi 'gyur ba dang / rdzun smra bar 'gyur ba dang / yid ches par bya ba'i gnas rnams su mkhas pa rnams de la dri bar bya bar mi sems pa dang / de'i bden pa ma yin pa'i bsngags pa dang / brjod pa dang / sgra dang / tshigs su bcad pa ma yin pa 'byung ba dang / gzung ba'i tshig tu mi 'gyur ba dang / skur pa 'debs par 'gyur ba'i las byed cing gsog pa dang / lus dang bral nas shi ba'i 'og tu ngan song ngan 'gro log par ltung ba sems can dmyal ba rnams su skye ba'o/ /'bru dang / 'bras bu'i chang bag med pa'i gnas la nyes dmigs sum cu rtsa drug tu rig par bya ste/ sum cu rtsa drug gang zhe na/ tshe 'di la nor zad pa dang / nad kyi gzhir 'gyur ba dang / 'thab pa dang / mtshang 'dru ba dang / rtsod pa 'phel ba dang / gsang ba'i gnas ston pa dang / shes rab nyams par byed pa dang / ma thob pa'i longs spyod rnams mi thob pa dang / longs spyod thob pa rnams las yongs su nyams par 'gyur ba dang / gsang rdol bar 'gyur ba dang / las kyi mtha' rnams yongs su nyams pa dang / mya ngan gyi rtsa bar 'gyur ba dang / nyam chung bar 'gyur ba dang / mar mi shes par 'gyur ba dang / phar mi shes par 'gyur ba dang / dge sbyong du mi shes par 'gyur ba dang / bram zer mi shes par 'gyur pa dang / rigs kyi gtso bo la rim gro med par 'gyur ba dang / sangs rgyas la gus par mi 'gyur ba dang / chos la gus par mi 'gyur ba dang / dge 'dun la gus par mi 'gyur ba dang / sdig pa'i grogs pos yongs su zin par 'gyur ba dang / dge ba'i bshes gnyen gyis rnam par spangs pa dang / ngo tsha med par 'gyur ba dang / 'dzem pa med par 'gyur ba dang / dbang po'i sgo ma bsdams par 'gyur ba dang / bud med rnams la shin tu bag med par 'gyur ba dang / skye bo mang po'i yid du mi 'ong bar 'gyur ba dang / skye bo mang po mi mthun pa dang / nye du dang snag gi gnyen mtshams btsun pa rnams kyis smad par 'gyur ba dang / dam pa'i chos ma yin pa yongs su 'dzin pa dang / dam pa'i chos yongs su spangs pa dang / yid ches par bya ba'i gnas su mkhas pa rnams kyis de bzhag par mi bsam pa dang / bag med pas g.yel ba dang / de la mya ngan las 'das pa ring bar 'gyur ba dang / myos par 'gyur ba dang / myos par 'gyur ba'i las byed cing gsog pa dang / lus dang bral nas shi ba'i 'og tu ngan song ngan 'gro sems can dmyal ba rnams su skye ba'o/ /bram ze'i khye'u/ de bzhin gshegs pa'i mchod rten la thal mo sbyar ba'i phan yod ni/ bcu po 'di dag ste| bcu gang zhe na/ rgya chen po'i khyim du skye ba 'thob pa dang / rgya che ba'i gzugs dang / rgya che ba'i g.yog 'khor dang / rgya che ba'i mchod pa dang / bkur sti dang / rgya che ba'i nor dang / rgya che ba'i thos pa dang / rgya che ba'i dad pa dang / rgya che ba'i dran pa dang / rgya che ba'i shes rab dang / rgya che ba'i rtogs pa thob pa ste/ bcu po de dag ni/ de bzhin gshegs pa'i mchod rten la thal mo sbyar ba'i phan yon no/ /de bzhin gshegs pa'i mchod rten la phyag 'tshal ba'i phan yon bcu ste/ bcu gang zhe na/ gzugs bzang ste mdog gser gyi kha dog lta bur 'gyur ba dang / mdzes te mig tu sdug par 'gyur ba dang / skad snyan cing gzung ba'i tshigs tu 'gyur ba bag tsha ba med par 'khor gyi nang du 'gro ba dang / lha dang mi rnams dga' bar 'gyur ba dang / gzi brjid chen por 'gyur ba dang / gzi brjid chen po'i gang zag /'di lta ste/ sangs rgyas bcom ldan 'das rnams dang / byang chub sems dpa' rnams dang / sangs rgyas kyi nyan thos rnams dang 'grogs par 'gyur ba dang / longs spyod che bar 'gyur ba dang / mtho ris su skye bar 'gyur ba dang / myur du yongs su mya ngan las 'da' ba ste/ bcu po 'di dag ni/ de bzhin gshegs pa'i mchod rten la phyag 'tshal ba'i phan yon no/ /de bzhin gshegs pa'i mchod rten phyags pa'i phan yon bcu ste/ bcu gang zhe na/ gzugs bzang ba dang / blta na sdug par 'gyur ba dang / mdzes par 'gyur ba dang / skad snyan par 'gyur ba dang / de'i 'dod chags dang / zhe sdang dang / gti mug bsrab par 'gyur ba dang / lam du 'gro na rtsa ba dang / gseg ma dang / gyo mo rnams med par 'gyur ba dang / btsun pa'i rigs su skye bar 'gyur ba dang / longs spyod che bar 'gyur ba dang / mtho ris su skye bar 'gyur ba dang / myur du yongs su mya ngan las 'da' ba ste/ bcu po de dag ni/ de bzhin gshegs pa'i mchod rten phyags pa'i phan yon no/ /de bzhin gshegs pa'i mchod rten la gdugs phul ba'i phan yon bcu ste/ bcu gang zhe na| 'jig rten na gdugs lta bur 'gyur ba dang / lus la gdung ba med par 'gyur ba dang / sems la gdung ba med par 'gyur ba dang / 'jig rten gyi rten du 'gyur ba dang / bdag por 'gyur ba'i las byed cing gsog pa dang / 'khor los sgyur pa'i rgyal srid yang dang / yang 'thob pa dang / dbang che bar grags par 'gyur ba dang / longs spyod che bar 'gyur ba dang / mtho ris su skye bar 'gyur ba dang / myur du yongs su mya ngan las 'da' ba ste/ bcu po 'di dag ni de bzhin gshegs pa'i mchod rten la gdugs phul ba'i phan yon no/ /de bzhin gshegs pa'i mchod rten la dril bu phul ba'i phan yon bcu ste/ bcu gang zhe na/ gzugs bzang bar 'gyur ba dang / sgra snyan par 'gyur ba dang / yid du 'ong ba smra ba dang ldan par 'gyur ba dang / ka la ping+ka'i sgra lta bur smra ba dang ldan par 'gyur ba dang / gzung ba'i tshig tu 'gyur ba dang / rab tu dga' bar 'gyur ba dang / kun tu dga' ba'i rgya chen po'i sgra 'thob pa dang / longs spyod che bar 'gyur ba dang / mtho ris su skye bar 'gyur ba dang / myur du yongs su mya ngan las 'da' ba ste/ bcu po de dag ni de bzhin gshegs pa'i mchod rten la dril bu dbul pa'i phan yon no/ /de bzhin gshegs pa'i mchod rten la ba dan dbul ba'i phan yon bcu ste| bcu gang zhe na/ 'jig rten na rgyal mtshan lta bur 'gyur ba dang / mdza' bshes dang / blon po dang / nye du dang / snag gi gnyen mtshams rnams kyis bsti stang du byed/ bla mar byed/ ri mor byed/ mchod par byed pa dang / phyogs dang phyogs mtshams rnams su de'i grags pa dang / brjod pa dang / sgra dang tshigs su bcad pa mngon du 'byung ba dang / gzugs bzang zhing blta na sdug la mdzes par 'gyur ba dang / skye ba gzhan rnams su tshe ring zhing ring du gnas par 'gyur ba dang / dbang che bar grags par 'gyur ba dang / rigs btsun par skye bar 'gyur ba dang / longs spyod chen por 'gyur ba dang / mtho ris su skye bar 'gyur ba dang / myur du yongs su mya ngan las 'da' ba ste/ bcu po de dag ni de bzhin gshegs pa'i mchod rten la ba dan phul ba'i phan yon no/ /de bzhin gshegs pa'i mchod rten la gos phul ba'i phan yon bcu gnyis te/ bcu gnyis gang zhe na/ mdzes shing blta na sdug par 'gyur ba dang / pags pa 'jam pa dang / pags pa snum pa dang / pags pa srab pa dang / de'i lus la rdul dang / dri ma mi 'chags pa dang / de'i gos bzang por 'gyur ba dang / gding ba dang / bgo ba phra mo rnyed par 'gyur ba dang / ngo tsha shes pa dang / khrel yod pa phun sum tshogs par 'gyur ba dang / mthong na dga' bar 'gyur ba dang / longs spyod che bar 'gyur ba dang / mtho ris su skye bar 'gyur ba dang / myur du yongs su mya ngan las 'da' ba ste/ bcu gnyis po de dag ni de bzhin gshegs pa'i mchod rten la gos phul pa'i phan yon no/ /de bzhin gshegs pa'i mchod rten la me tog phul ba'i phan yon bcu ste/ bcu gang zhe na/ 'jig rten na me tog lta bur 'gyur ba dang / de'i sna'i dbang po nam yang nyams par mi 'gyur ba dang / lus kyi dri nga ba rnam par dag par 'gyur ba dang / dri zhim po 'byung bar 'gyur ba dang / phyogs dang phyogs mtshams rnams su de'i tshul khrims kyi dri'i ngad ldang bar 'gyur ba dang / 'jig rten gyis mngon du 'gro bar bya bar 'gyur ba dang / sdug pa'i chos rnams 'thob par 'gyur ba dang / longs spyod che bar 'gyur ba dang / mtho ris su skye bar 'gyur ba dang / myur du yongs su mya ngan las 'da' ba ste/ bcu po de dag ni de bzhin gshegs pa'i mchod rten la me tog phul pa'i phan yon no/ /de bzhin gshegs pa'i mchod rten la phreng ba phul ba'i phan yon bcu ste/ bcu gang zhe na/ 'jig rten na phreng ba lta bur 'gyur ba dang / lus kyi dri nga ba rnam par dag par 'gyur ba dang / phyogs dang phyogs mtshams rnams su tshul khrims kyi dri zhim po'i ngad ldang ba dang / rtag tu dri zhim por 'gyur ba dang brgyan par 'gyur ba dang / g.yog 'khor mi phyed par 'gyur ba dang / skyes pa dang / bud med rnams kyi yid du 'ong bar 'gyur ba dang / longs spyod che bar 'gyur ba dang / mtho ris su skye bar 'gyur ba dang / myur du yongs su mya ngan las 'da' ste/ bcu po de dag ni de bzhin gshegs pa'i mchod rten la phreng ba phul ba'i phan yon no/ /de bzhin gshegs pa'i mchod rten la mar me phul ba'i phan yon bcu ste/ bcu gang zhe na/ 'jig rten na mar me lta bur 'gyur ba dang / sha'i mig rnam par dag par 'gyur ba dang / lha'i mig 'thob par 'gyur ba dang / dge ba dang / mi dge ba'i chos rnams la shes rab 'byung bar 'gyur ba dang / ma rig pa dang / gti mug gi mun pa sel ba dang / shes rab kyi snang ba thob par 'gyur ba dang / de 'khor ba na 'khor ba'i tshe/ nam du yang mun pa na gnas par mi 'gyur ba dang / longs spyod che bar 'gyur ba dang / mtho ris su skye bar 'gyur ba dang / myur du yongs su mya ngan las 'da' ba ste/ bcu po de dag ni de bzhin gshegs pa'i mchod rten la mar me phul ba'i phan yon no/ /de bzhin gshegs pa'i mchod rten la spos phul ba'i phan yon bcu ste/ bcu gang zhe na/ 'jig rten na spos lta bur 'gyur ba dang / sna'i dbang po rnam par dag par 'gyur ba dang / lus kyi dri mi zhim pa rnam par dag par 'gyur ba dang / rtag tu dri zhim par 'gyur ba dang / gzugs bzang bar 'gyur ba dang / 'jig rten gyis mngon du 'gro bar 'gyur ba dang / sdug pa'i chos rnams 'thob par 'gyur ba dang / longs spyod che bar 'gyur ba dang / mtho ris su skye bar 'gyur ba dang / myur du yongs su mya ngan las 'da' ba ste/ bcu po de dag ni de bzhin gshegs pa'i mchod rten la spos phul ba'i phan yon no/ /de bzhin gshegs pa'i mchod rten la rol mo sil snyan phul ba'i phan yon bcu ste/ bcu gang zhe na/ gzugs bzang zhing blta na sdug par 'gyur ba dang / skad snyan par 'gyur ba dang / yid du 'ong bar smra ba dang ldan par 'gyur ba dang / grags pa dang ldan par 'gyur ba dang / gzung ba'i tshig tu 'gyur ba dang / rtag tu dga' bar 'gyur ba dang / kun dga' ba'i sgra rgya chen po 'thob par 'gyur ba dang / longs spyod che bar 'gyur ba dang / mtho ris su skye bar 'gyur ba dang / myur du yongs su mya ngan las 'da' ba ste/ bcu po de dag ni de bzhin gshegs pa'i mchod rten la rol mo sil snyan phul ba'i phan yon no| |de bzhin gshegs pa'i mchod rten byed pa'i phan yon bco brgyad de/ bco brgyad gang zhe na/ rgya chen po'i khyim du skye bar 'gyur ba thob pa dang / gzugs bzang bar 'gyur ba dang / mdzes shing mig tu sdug par 'gyur ba dang / dbang che bar grags par 'gyur ba dang / g.yog 'khor chen por 'gyur ba dang / g.yog 'khor mi phyed par 'gyur ba dang / longs spyod che bar 'gyur ba dang / mngon du 'gro bar bya bar 'gyur ba dang / rten du 'gyur ba dang / phyogs bcur brjod pa dang / sgra dang tshigs su bcad pa rgya chen po mngon du 'byung bar 'gyur ba dang / lha dang mis mchod par 'gyur ba dang / nor chen po mang po dang ldan par 'gyur ba dang / 'khor lo sgyur ba'i rgyal srid 'thob par 'gyur ba dang / tshe dang ldan par 'gyur ba dang / lus rdo rje'i tshogs ltar 'gyur ba dang / lus mtshan dang dpe byad kyis brgyan par 'gyur ba dang / mtho ris su skye bar 'gyur ba dang / myur du yongs su mya ngan las 'da' ba ste/ bco brgyad po de dag ni de bzhin gshegs pa'i mchod rten byed pa'i phan yon no/ /khri stan sbyin pa'i phan yon bcu ste/ bcu gang zhe na/ 'jig rten gyi bla ma'i gnas su 'gyur ba dang / bsngags par 'gyur ba dang / skye bo mang po la grags pa dang / brjod pa dang / sgra dang / tshigs su bcad pa mang po mngon du 'byung bar 'gyur ba dang / bde ba dang / yid bde ba mang bar 'gyur ba dang / bzhon pa dang / khri stan dang / rim gro byed pa dang mi ldan par mi 'gyur ba dang / 'jig rten gyis mngon du 'gro bar bya bar 'gyur ba dang / longs spyod che bar 'gyur ba dang / dbang che bar grags par 'gyur ba dang / mtho ris su skye bar 'gyur ba dang / myur du yongs su mya ngan las 'da' ba ste/ bcu po de dag ni khri stan sbyin pa'i phan yon no/ /lham sbyin pa'i phan yon bcu ste/ bcu gang zhe na/ de bzhon pa rnams kyis brel bar mi 'gyur ba dang / rkang pa legs par gnas par 'gyur ba dang / lam du 'gro na stobs dang ldan par 'gyur ba dang / de'i lus ngal bar mi 'gyur ba dang / de 'gro na tsher ma dang / gseg ma dang / gyo mo rnams kyis rkang pa rmas par mi 'gyur ba dang / rdzu 'phrul thob par 'gyur ba dang / de rim gro byed pa dang mi ldan par mi 'gyur ba dang / longs spyod che bar 'gyur ba dang / mtho ris su skye bar 'gyur ba dang / myur du yongs su mya ngan las 'da' ba ste/ bcu po de dag ni lham sbyin pa'i phan yon no/ /snod sbyin pa'i phan yon bcu ste/ bcu gang zhe na/ 'jig rten gyi yon tan gyi snod lta bur 'gyur ba dang / mdog snum par 'gyur ba dang / sems kyi rgyud mnyen par 'gyur ba dang / skom par mi 'gyur ba dang / skom na'ang chu 'byung bar 'gyur ba dang / yi dwags su skye bar mi 'gyur ba dang / lha dang / mi rnams dga' bar 'gyur ba dang / longs spyod che bar 'gyur ba dang / mtho ris su skye bar 'gyur ba dang / myur du yongs su mya ngan las 'da' ba ste/ bcu po de dag ni snod sbyin pa'i phan yon no/ kha zas sbyin pa'i phan yon bcu ste/ bcu gang zhe na/ tshe ring bar 'gyur ba dang / kha dog dang ldan par 'gyur ba dang / stobs dang ldan par 'gyur ba dang / dran pa dang ldan zhing / spobs pa dang ldan par 'gyur ba dang / bag tsha ba med par 'khor gyi nang du 'gro ba dang / 'khor 'dun par 'gyur ba dang / lha dang / mi rnams 'dun zhing / dga' bar 'gyur ba dang / longs spyod che bar 'gyur ba dang / mtho ris su skye bar 'gyur ba dang / myur du yongs su mya ngan las 'da' ba ste/ bcu po de dag ni/ kha zas sbyin pa'i phan yon no/ /bzhon pa sbyin pa'i phan yon bcu ste/ bcu gang zhe na/ rkang pa shin tu gzhon par 'gyur ba dang / rkang pa shin tu gnas par 'gyur pa dang / rkang pas 'gro na lus ngal bar mi 'gyur ba dang / bde bar 'gyur ba dang / mi mdza' ba mang bar mi 'gyur ba dang / rdzu 'phrul gyi rkang pa rgya chen po 'thob par 'gyur pa dang / bzhon pa rnams kyis brel bar mi 'gyur ba dang / rim gro byed pa dang mi ldan par mi 'gyur ba dang / mtho ris su skye bar 'gyur ba dang / myur du yongs su mya ngan las 'da' ba ste/ bcu po de dag ni bzhon pa sbyin pa'i phan yon no/ /gnas sbyin pa'i phan yon rab tu mang po ste/ mang po gang zhe na/ de la 'jigs pa mi 'byung ngo / /gding ba dang / bgo ba shin tu 'jam po rnyed par 'gyur ro/ /lha dang mi rnams kyi 'dod pa'i phan yon lnga rnyed par 'gyur ro/ /gal te 'dod de ma la/ kye ma bdag rgyal rigs shing sA la chen po lta bu'i khyim du skye bar gyur cig ce'am/ bram ze shing sA la chen po lta bu'i khyim du skye bar gyur cig ce'am/ khyim bdag shing sA la chen po lta bu'i khyim du skye bar gyur cig ce'am/ de'i smon pa de 'grub par 'gyur ro/ /gal te 'dod de kye ma bdag grong gi gtso bor gyur cig ce'am/ grong khyer gyi gtso bor gyur cig ce'am/ grong rdal gyi gtso bor gyur cig ce'am/ ri brags kyi rgyal por gyur cig ce'am/ rgyal phran du gyur cig ce'am/ rgyal po btsan par gyur cig ce'am/ de'i smon pa de de bzhin du grub par 'gyur ro/ /gal te 'dod de gling gcig gi rgyal por gyur cig ce'am/ gling gnyis kyi rgyal por gyur cig ce'am/ gling gsum gyi rgyal por gyur cig ce'am/ 'khor lo sgyu ba'i rgyal por gyur cig ce na/ de'i smon pa de 'grub par 'gyur ro/ /gal te 'dod de rgyal chen bzhi'i ris kyi lha rnams dang skal ba mnyam par skye bar gyur cig ce na/ de'i smon pa de 'grub par 'gyur ro/ /sum cu rtsa gsum dang / 'thab bral dang / dga' ldan dang / 'phrul dga' dang / gzhan 'phrul dbang byed kyi lha rnams dang skal ba mnyam par skye bar gyur cig ce na/ de'i smon pa de 'grub par 'gyur ro/ /gal te 'dod de/ ma la/ kye ma bdag tshangs ris kyi lha rnams dang skal ba mnyam par gyur cig ce na/ de'i smon pa de 'grub par 'gyur ro/ /tshangs pa'i mdun na 'don pa dang / tshangs chen dang / 'od chung dang / tshad med 'od dang / 'od gsal dang / dge chung dang / tshad med dge dang / dge rgyas dang / sprin med dang / bsod nams 'phel ba dang / 'bras bu che ba dang / mi che ba dang / mi gdung ba dang / gya nom snang dang / legs par mthong dang / 'og min lha rnams dang skal pa mnyam par skye bar gyur cig ce na/ de'i smon pa de 'grub par 'gyur ro/ /gal te 'dod de nam mkha' mtha' yas skye mched kyi 'du shes su nye bar 'gro ba rnams dang / rnam shes mtha' yas skye mched kyi 'du shes su nye bar 'gro ba rnams dang / ci yang med pa'i skye mched kyi 'du shes su nye bar 'gro ba rnams dang / 'du shes med 'du shes med min skye mched kyi 'du shes su nye bar 'gro ba'i lha rnams dang skal ba mnyam par gyur cig ce na/ de'i smon pa de 'grub par 'gyur ro/ /gal te 'dod de rgyun du zhugs pa'i 'bras bu mngon du bya'o zhe na/ de'i smon pa de 'grub par 'gyur ro/ /gal te 'dod de lan gcig phyir 'ong ba'i 'bras bu dang / phyir mi 'ong ba'i 'bras bu dang / dgra bcom pa nyid kyi 'bras bu dang / rang byang chub mngon du bya'o zhe na/ de'i smon pa de 'grub par 'gyur ro/ /gal te 'dod de bla na med pa yang dag par rdzogs pa'i byang chub mngon par rdzogs par byang chub par gyur cig ce na/ de'i smon pa de 'grub par 'gyur te/ mang po de dag ni gnas sbyin pa'i phan yon no/ /skom sbyin pa'i phan yon bcu ste/ bcu gang zhe na/ dbang po thams cad yongs su tshang bar dpral ba dag cing / 'dzum pa'i bzhin du 'gyur ba dang / yon tan dang ldan par 'gyur ba dang / sems kyi rgyud mnyen par 'gyur ba dang / skom par mi 'gyur ba dang / skom na yang chu 'byung bar 'gyur ba dang / yi dwags su skye bar mi 'gyur ba dang / longs spyod che bar 'gyur ba dang / mtho ris su skye bar 'gyur ba dang / myur du yongs su mya ngan las 'da' ba ste/ bcu po de dag ni skom sbyin pa'i phan yon no/ /rab tu 'byung ba'i phan yon bcu ste/ bcu gang zhe na/ de'i bu dang / tshung ma dang / nor la sred par mi 'gyur ba dang / de 'dod pa yongs su 'dzin par mi 'gyur ba dang / dgon par gnas pa la dga' ba rnyed pa dang / sangs rgyas la gus par 'gyur ba dang / bdud kyi spyod yul rnam par spong ba dang / bde 'gro thob par byed pa'i chos rnams yongs su tshor ba dang / dan 'gro thob par byed pa'i chos rnams rnam par spong ba dang / lha dang mir smon par byed pa dang / rtag tu de bzhin gshegs pa'i gsung rab la rab tu 'byung ba rnyed pa dang / mtho ris su skye bar 'gyur ba dang / myur du yongs su mya ngan las 'da' ba ste/ bcu po de dag ni rab tu 'byung ba'i phan yon no/ /dgon pa la gnas pa'i phan yon bcu ste/ bcu gang zhe na/ 'du 'dzi rnam par spong ba dang / rab tu dben pa la sten pa dang / de'i sems bsam gtan la dmigs par 'gyur ba dang / sangs rgyas bcom ldan 'das rnams la smon pa dang / dga' ba dang / bde ba dang / yid bde ba lus la skyed pa dang / de la bar du gcod pa mi 'byung ba dang / ji ltar thos pa'i chos kyi don rgya cher shes par 'gyur ba dang / zhi gnas thob pa dang / lhag mthong thob pa ste/ bcu po de dag ni dgon pa la gnas pa'i phan yon no/ /bsod snyoms pa'i phan yon bcu ste| bcu gang zhe na/ de 'gro ba la goms par 'gyur ba dang / de spyod yul gom par 'gyur ba dang / de nga rgyal bcom par 'gyur ba dang / bdag rnyed pa la sbyor ba dang / gzhan dag kyang bsod nams la rab tu 'god pa dang / ston pa'i bstan pa yongs su ston pa dang / phyi ma'i skye bo la snang bar byas par 'gyur ba dang / tshangs pa mtshungs par spyod pa rnams la nyam nga ba med par 'gyur ba dang / dma' ba'i sems nye bar gzhag par 'gyur ba dang / bsod snyoms kyis yongs su dul ba'i dge slong phyogs la mun pa med par snang ba'o/ /'jigs pa med pa'i phan yon bcu ste/ bcu gang zhe na/ 'jigs pa med par grong du 'jug pa dang / 'jigs pa med par grong nas 'byung ba dang / 'jigs pa med par khyim rnams su 'gro ba dang / 'jigs pa med par 'khor la chos ston pa dang / 'jigs pa med par dge 'dun gyi nang du 'jug pa dang / 'jig pa med par slob dpon dang / mkhan po'i drung du 'gro ba dang / 'jigs pa med par byams pa'i sems kyis slob ma'i gan du 'gro ba dang / 'jigs pa med par gos dang / zas dang / mal cha dang / na ba'i gsos sman dang / yo byad rnams yongs su sbyor ba dang / 'jigs pa med par kha ton 'don pa dang / 'jigs pa med par 'chi ba'i dus byed pa'o/ /bram ze'i khye'u/ de ltar na sems can rnams ni las bdag gir 'gyur ba/ las kyi skye gnas can/ las kyi bsgo skal la spyod pa/ las la ston pa ste/ sems can rnams ni las kyis bcun pa dang / dma' pa dang / dman pa dang / bzang por rnam par phye'o zhes ngas gang smras pa de ni/ las 'di las bsams te smras so/ /chos kyi rnam grangs 'di bshad pa na/ to'u te ya'i bu bram ze'i khye'u ne tso/ bcom ldan 'das la sems mngon par dad do/ /de nas to'u te ya'i bu bram ze'i khye'u ne tsos/ bcom ldan 'das la 'di skad ces gsol to/ /go'u ta ma khyod mnyan du yod par dge bsnyen gyi khyim dag tu gshegs par dgongs pa na/ de ltar to'u te ya'i khyim du yang gshegs par dgongs su gsol/ des ni to'u te ya'i khyim du yun ring po'i don dang phan pa dang bde bar 'gyur ro/ /bcom ldan 'das kyis cang mi gsung bas to'u te ya'i bu bram ze'i khye'u ne tso la gnang ba mdzad do/ /de nas to'u te ya'i bu bram ze'i khye'u ne tsos/ bcom ldan 'das kyis cang mi gsung bas gnas bar rig nas bcom ldan 'das kyis gsungs pa la mngon par dga' ste rjes su yi rang nas bcom ldan kyis gnang bas song ngo / /las rnam par 'byed pa rdzogs so// //rgya gar gyi mkhan po dzi na mi tra dang | dA na shI la dang /

CLOSE WINDOW