བོད་ཡིག |
204b1 //'phags pa dkon mchog brtsegs pa chen po'i chos kyi rnam grangs le'u stong phrag brgya pa las le'u nyi shu dgu pa ste bad sa'i rgyal po 'char byed kyis zhus pa/ bam po gcig pa/
204b2 rgya gar skad du/ Ar+ya u da ya na bad sa rA dza pa ri pr-its+tshA nA ma pa ri brta/ bod skad du/ 'phags pa bad sa'i rgyal po 'char byed kyis zhus pa zhes bya ba'i le'u/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus
204b3 gcig na/bcom ldan 'das kau sham+bI na/ dbyangs can gyi kun dga' ra ba na dge slong lnga brgya tsam gyi dge slong gi dge 'dun chen po dang / byang chub sems dpa' sems dpa' chen po rab tu mang po dang thabs cig tu bzhugs te/ de'i tshe na ma du'i bu mo btsun mo dpe
204b4 med phrag dog dang /ser snas zin pas btsun mo sngo sangs can la lhag par dmigs nas bad sa'i rgyal po 'char byed la lha mkhyen par mdzad du gsol/ btsun mo sngo sangs can la sogs pa bud med lnga brgya ni dge sbyong gau ta ma dang lhan cig tu rab tu skyon chags par bgyid
204b5 de/de'i slad du bdag gis lha la gsol ba lags kyis ji ltar mkhyen pa de bzhin du mdzad du gsol zhes gyi tshig gis dbyen byas par gyur to/ /de nas bad sa'i rgyal po 'char byed ma du'i bu mo btsun mo dpe med kyis dbyen byas pas bcom ldan 'das dang / nyan
204b6 thos kyi dge 'dun rnams la tha ba dang /'khrug pa dang / khro ba skyes par gyur to/ /de yi ma rangs shing khro ba dang / rngam pas zil gyis non pas btsun mo sngo sangs can gsad pa'i phyir gzhu bdungs nas mda' ste'u ka nya rnga ma blangs te 'phangs so/ /de nas de'i mod la
204b7 btsun mo sngo sangs can gyis bcom ldan 'das de bzhin gshegs pa dgra bcom pa yang dag par rdzogs pa'i sangs rgyas la phyag 'tshal lo zhes bcom ldan 'das la phyag byas shing bcom ldan 'das kyi bsngags pa brjod nas byams pa'i ting nge 'dzin la snyoms par zhugs so/de nas 'di ltar sangs rgyas kyi mthus mda' ste'u ka nya rnga ma de de nas phyir log ste/
205a1 bad sa'i rgyal po 'char byed de nyid kyi mgo'i drang thad kyi steng gi bar snang la 'bar/ rab tu 'bar/ kun tu rab tu mched de 'bar zhing me lce gcig tu gyur te phar 'gro tshur
205a2 'gro zhing 'dug 'dug nas/bad sa'i rgyal po 'char byed ga la ba der song nas bad sa'i rgyal po 'char byed kyi g.yon rol logs su 'dug par gyur te/ de lus la ni ma phog go /lan gnyis lan gsum du de ltar gyur pa dang / de nas btsun mo sngo sangs can gyis bad sa'i
205a3 rgyal po 'char byed la 'di skad ces smras so//rgyal po chen po de lta lags pas gal te khyod de bzhin gshegs pa la phyag 'tshal na khyod la yang bde legs su 'gyur lags so/ /de nas bad sa'i rgyal po 'char byed 'jigs shing dngangs la sgyid lug cing spu zing zhes byed par gyur te
205a4 sa la 'gyel nas btsun mo sngo sangs can la tshigs su bcad de smras pa/khyod ni lha mo 'am dri za mo/ /sha za mo 'am srin mo'am/ /ngas ni ji ltar gzung bar bya/ /nga yis dris pa de smros shig /gang la mtshon gyis mi gnod pa'i/ /bud med 'ga' yang yod min te/ /ngas
205a5 ni 'di la gang du yang //thos sam mthong ngam shes pa'ang med/ /nga ni stobs ldan brtson 'grus can/ /'phong gi shes pa legs bslabs pas/ /nga yi mda' ni gdon mi za/ /nam yang mi phog yod min te/ /spre'u 'am yang na bya dang ni/ /mi'am yang na 'bem kyang rung / /
205a6 gang la nga yis mda' 'phangs pa/ /nam yang mi phog yod min na/ /de ring mda' 'di 'phangs pa ni/ /bzlog pa'i tshul du phyir 'ongs te/ /lus la gnod pa med par ni/ /nga yi mdun du 'dug par 'gyur/ /gzhan gyi tshig ni mnyan nas kyang / /nga ni khyod la gsod 'dod pa/ /
205a7 nga ni khyod la skyabs su 'gro/ /sdug bsngal gyur pa nga la skyobs/ /phyin cad 'di 'dra mi byed kyis/ /sdug bsngal ba la deng bzod kyis/ /khyod sngon dga' ba dran byos la/ /dang bar gyis shig khro thul cig /de nas btsun mo sngo sangs can gyis bad sa'i rgyal po 'char byed
205b1 la tshigs su bcad de smras pa//bdag ni lha min dri za min/ /sha za mo min srin mo min/ /bdag ni btsun mo sngo sangs can/ /'jig rten mgon po'i nyan thos ma/ /lha khyod la ni snying brtse bas/ /bdag gi sems ni mnyam bzhag gis/ /khyab bdag 'jig rten
205b2 mgon po la//thugs ni rab tu dang bar mdzod/ /bskal pa bye ba stong rnams su/ /gang gis byams pa legs bsgoms te/ /byams la gnas pa'i skyes bu dang / /bud med dag ni mi sod gsungs/ /gang zhig lo tog smin pa la/ /ser ltar yang dag ji bzhin
205b3 mkhyen//bud med rnams kyis gnod med pa/ /de yi bstan la bdag dga' lags/ /'jig rten mgon po thams cad kyis/ /bud med rnams ni smad par gsungs/ /bud med rnams la mi lta ba/ /'jig rten mgon po rnams kyis bsngags/ /sangs rgyas
205b4 rnams dang rang sangs rgyas//byang chub sems dpa' nyan thos rnams/ /bud med bsten par mi mdzad de/ /de ni byis pa'i spyod yul lags/ /bud med rnams la bsten pa ni/ /kun nas bdud kyi zhags par gsungs/ /sdig pa rnams la chags pa ni/ /kun
205b5 'joms dkrugs pa'i shul dang 'dra//mi mkhas bud med chags pa dang / /sdig pa'i las ni bgyis pa dang / /ye shes spong bar 'tshal ba yis/ /sems can rnams ni ngan 'gror khrid/ /mkhas pa thar bar 'tshal ba yis/ /bud med bsten par mi bgyi ste/ /
205b6 zhugs gtams ngu ba ma mchis pa'i/ /dong du mchongs pa mi dngo lags/ /yid 'ong bka' mchid bgyis pa dang / /bltas pas kyang ni 'ching bgyid cing / /mi bzad dmyal bar ltung bas na/ /khyod ni bud med tshig ma gsan/ /bdag ni khro ba ma mchis te/ /
205b7 bdag gi yid ni rab tu dang / /khyab bdag 'jig rten mgon po la/ /thugs ni rab tu dang bar mdzod/ /rgyal po chen po bzhud mdzod de/ /khyod kyis rkang gnyis mchog gzigs la/ /de yis chos ni gang bstan pa/ /g.yel ma mchis par khyod kyis gson/ /de nas
206a1 bad sa'i rgyal po 'char byed btsun mo sngo sangs can gyis bskul bas rgyal po'i mthu chen po dang /rgyal po'i 'byor pa chen po dang / skye bo'i tshogs phal po ches yongs su bskor cing mdun du bdar nas brtad cing myur ba myur bas bcom ldan 'das kyi spyan
206a2 sngar song ba dang /de nas bcom ldan 'das mdzes pa/ dang bar 'gyur ba/ dbang po zhi ba/ thugs zhi ba/ dul ba dang / zhi gnas kyi mchog dam pa'i pha rol tu byon pa/ bsam gtan dam pa rnams kyi pha rol du gshegs pa/ gser gyi mchod sdong ltar mngon par
206a3 'phags pa/dpal gyis mdzes shing / lham me lhan ne lhang nge ste/ skyes bu chen po'i mtshan sum cu rtsa gnyis kyis sku legs par brgyan pa/ dge slong dang / dge slong ma dang / dge bsnyen dang / dge bsnyen ma dang / byang chub sems dpa'i dge 'dun gyis
206a4 yongs su bskor ba/lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po dang / mi dang / mi ma yin pa rnams kyis mdun gyis bltas pa mthong bar gyur to/ /mthong nas kyang bcom ldan 'das
206a5 ga la ba der song ste phyin nas bcom ldan 'das kyi zhabs gnyis la gtugs te/bcom ldan 'das la 'di skad ces gsol to/ /bcom ldan 'das bdag gis sngon ma mthong ba'i rmad du byung ba zhig mthong ba bcom ldan 'das la gsol bar 'tshal na/ bcom ldan 'das kyis bdag
206a6 la skabs dbye bar ci gnang /de skad ces gsol pa dang / bcom ldan 'das kyis bad sa'i rgyal po 'char byed la 'di skad ces bka' stsal to/ /rgyal po chen po khyod kyis ji ltar bzod pa de ltar smros shig /zlos shig /de nas bcom ldan 'das la bad sa'i rgyal po 'char byed
206a7 kyis 'di skad ces gsol to//bcom ldan 'das bdag 'dod pa'i rgyu dang / 'dod pa'i gzhi dang / 'dod pa la lhag par zhen pas deng ma du'i bu mo dpe med kyi tshig gis khros shing rngam pas zil gyis non nas bcom ldan 'das nyan thos kyi dge 'dun dang bcas pa la tha ba dang zhe sdang gi
206b1 sems kyang bskyed/bcom ldan 'das bdag gis mchis brang sngo sangs can dgum pa'i slad du mda' ste'u ka nya rnga ma zhig 'phangs na/ de bar snang la 'bar/ rab tu 'bar/ kun tu rab tu mched de 'bar zhing me lce gcig tu gyur nas bzlog pa'i tshul du slar log ste bdag gi
206b2 g.yon rol logs su mchis par gyur cing lus la ni ma phog nas/bcom ldan 'das bdag gis mchis brang sngo sangs can gyi sug pa rkang pa gnyis la gtugs te/ mchis brang sngo sangs can la 'di skad du khyod lha mo zhig gam/ 'on te klu mo'am/ dri za mo'am/ sha
206b3 za mo'am/srin mo'am/ su zhig lags zhes bgyis pa dang / de bdag la 'di skad du rgyal po chen po bdag ni lha mo yang ma lags/ klu mo yang ma lags/ dri za mo yang ma lags/ sha za mo yang ma lags/ srin mo yang ma lags kyi/ bdag ni bcom ldan 'das de
206b4 bzhin gshegs pa dgra bcom pa yang dag par rdzogs pa'i sangs rgyas de'i nyan thos ma lags te/khyod nyid la snying brtse ba'i slad du sems mnyam par bzhag pa lags so zhes mchi nas/ de nas mchis brang sngo sangs can gyis bcom ldan 'das kyi bsngags pa rnam grangs
206b5 du mas brjod pa dang /bcom ldan 'das de la bdag 'di snyam du bcom ldan 'das de bzhin gshegs pa dgra bcom pa yang dag par rdzogs pa'i sangs rgyas de'i nyan thos ma 'di yang de lta bu'i snying rje'i bsam pa dang / de lta bu'i byams pa thob pa dang / de ltar rdzu 'phrul
206b6 che ba dang /de ltar mthu che ba dang / de ltar dbang che bar grags pa lags na/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas lta smos kyang ci 'tshal snyam du sems par gyur lags te/ bcom ldan 'das bdag 'di ltar byis
206b7 pa lta bu dang /'di ltar rmongs pa dang / 'di ltar mi gsal ba dang / 'di ltar mi mkhas pas de bzhin gshegs pa nyan thos kyi dge 'dun dang bcas pa la bdag gis tha ba dang zhe sdang gi sems bskyed pa de bcom ldan 'das la bzod par gsol zhing nyan thos kyi dge 'dun gyi
207a1 mdun du yang nongs pa 'chags shing mchis na/thugs brtse ba'i slad du bdag gis nongs pa nongs par bshags pa de bcom ldan 'das kyis legs par rjes su gzung bar gsol/ deng slan chad kyang sdom par 'tshal lags so/ /bcom ldan
207a2 'das kyis rgyal po chen po khyod longs la rang gi stan gang yin pa la 'dug shig ces bad sa'i rgyal po 'char byed kyis nyes pa bshags pa rjes su gzung bar gnang ngo //de nas bad sa'i rgyal po 'char byed kyis bcom ldan 'das kyi zhabs gnyis la mgo bos phyag 'tshal
207a3 te phyogs gcig tu 'dug go /phyogs gcig tu 'dug nas kyang bcom ldan 'das la bad sa'i rgyal po 'char byed kyis 'di skad ces gsol to/ /bcom ldan 'das bdag ni gtum zhing gzu lums che la drag shul can lags pas bdag gis bud med kyi tshig gis sdig pa'i
207a4 sug las mngon par 'dus bgyis pa des bcom ldan 'das bdag sems can dmyal bar mchi bar bdag gis yang dag par 'tshal na/bcom ldan 'das bdag la thugs brtse ba'i slad du ci nas kyang bdag slan chad bud med kyi dbang du mchis nas sdig pa'i sug
207a5 las mngon par 'du bgyid par mi 'gyur zhing /sems can dmyal bar mi ltung ba dang / bdag dang sems can thams cad la yun ring po'i don dang / sman pa dang / bde bar 'gyur ba'i slad du bcom ldan 'das kyis bud med kyi skyon de dag legs par yang dag par rab tu
207a6 bshad cing bud med kyi spyod pa rnams dang /bud med kyi mtshan ma rnams dang / bud med kyi sgyu rnams dang / bud med kyi g.yo rnams dang / bud med kyi gya gyu rnams dang / bud med kyi mi brtan pa rnams dang / bud med kyi 'gyur ldog rnams dang / bud med kyi sten
207a7 pa rnams dang /bud med kyi tshig rnams dang / bud med kyi 'khrul pa rnams yang dag par rab tu bshad du gsol/ de skad ces gsol pa dang / bcom ldan 'das kyis bad sa'i rgyal po 'char byed la 'di skad ces bka' stsal to/ /rgyal po chen po gnas de lta bu
207b1 yongs su zhus pas khyod la ci zhig bya/bcom ldan 'das la bad sa'i rgyal po 'char byed kyis yang 'di skad ces gsol to/ /bcom ldan 'das ci nas bdag bud med kyi dbang du mchis par gyur na bud med ni ma rungs ma/ 'khon can/ gtum mo drag shul
207b2 can lags te/bcom ldan 'das bud med de ni bdag sems can dmyal bar mchi bar bgyid 'tshal ba lags pas bcom ldan 'das las bdag don de nyid nyan par 'tshal lags so/ /de skad ces gsol pa dang / bcom ldan 'das kyis bad sa'i rgyal po 'char
207b3 byed la 'di skad ces bka' stsal to//rgyal po chen po khyod kyis je rang gi skyon rnams yongs su rtogs shig dang / de nas phyis bud med kyi skyon rnams yongs su rtogs par 'gyur ro/ /de skad ces bka' stsal pa dang / bcom ldan 'das la bad sa'i rgyal po 'char
207b4 byed kyis 'di skad ces gsol to//bcom ldan 'das legs so legs so/ /skyes pa skyon ji lta bu dag dang ldan na skyes pa bud med kyi dbang du mchi bar 'gyur ba'i skyes pa'i skyon rnams bcom ldan 'das kyis bdag la yang dag par rab tu bshad du gsol/
207b5 de skad ces gsol pa dang / bcom ldan 'das kyis bad sa'i rgyal po 'char byed la 'di skad ces bka' stsal to/ /rgyal po chen po de'i phyir khyod legs par nyon la rab tu yid la zung shig dang ngas khyod la bshad par bya'o/ /bad sa'i rgyal po 'char byed kyis bcom
207b6 ldan 'das de bzhin no zhes gsol te/bcom ldan 'das kyi ltar nyan pa dang / bcom ldan 'das kyis de la 'di skad ces bka' stsal to/ /rgyal po chen po skyes pa skyon gang dag dang ldan na skyes pa bud med kyi dbang du 'gro bar 'gyur ba'i skyes pa'i skyes bu'i skyon ni bzhi
207b7 po 'di dag yin no//bzhi po gang zhe na/ 'di lta ste/ rgyal po chen po 'di la skyes pa 'dod pa rnams la chags par gyur cing / de 'dod pa rnams la bag med par gyur nas phyir zhing bud med la lta 'dod de/ tshul khrims dang ldan pa/ yon tan dang ldan pa/ shes
208a1 rab dang ldan pa'i dge sbyong dang bram ze dag la lta bar mi 'dod cing /des tshul khrims dang ldan pa/ yon tan dang ldan pa/ shes rab dang ldan pa'i dge sbyong dang bram ze dag mthong na snyen par mi byed/ sten par mi byed/ bsnyen bkur mi byed pas
208a2 de tshul khrims dang ldan pa/yon tan dang ldan pa/ shes rab dang ldan pa'i dge sbyong dang bram ze dag gis yongs su spangs pas dad pa las yongs su nyams/ tshul khrims las yongs su nyams/ gtong ba las yongs su nyams/ shes rab las yongs su nyams
208a3 shing dad pa dang bral ba/tshul khrims 'chal ba/ thos pa nyung ba/ ser sna can du gyur pa/ kyi yon tan gyi chos la kun tu spyod pa/ shes rab 'chal ba/ rma la chags pa/ btsog pa'i spyod yul can/ bshul bar mnam pa la mngon par dga'
208a4 ba/mi gtsang ba la dga' ba/ bud med la dad che ba/ zhi ba yongs su mi tshol ba chags pa'i spyod yul can/ 'gro bar bya ba ma yin par song ba/ smad par 'os pa/ mi gtsang ba'i srin bu dang 'dra ba/ snyigs ma len pa/ 'dod pa la brkam pa/ khrel
208a5 dang ngo tsha bor ba/lha dang mi'i chos las nyams pa/ ngan par smad pa'i 'tsho bas 'tsho ba/ mkhas pas smad pa/ byis pa'i skye bo la sten pa/ sdig pa'i bsam pa dang ldan pa/ sdig pa'i grogs po la sten pa/ sdig pa la kun tu 'jug pa/ sdig pa la gzhol
208a6 ba/bud med kyi thul 'og tu chud pa/ bud med kyis 'khol ba/ bud med kyi dbang du song ba/ bud med la gzhol ba/ bud med dang gnas pa/ rma'i sgo'i spyod yul can/ rma'i sgo la rten pa/ rma'i sgo la gnas pa/ kha chu dang / snabs dang / mchil ma
208a7 dang /ngar snabs dang / rnag dang / she'u rul dang / glad rgyas dang / mi gtsang ba'i spyod yul can/ lug dang / ba lang dang / bya gag dang / khyi dang / phag pa dang / wa dang / bong bu'i chos spyod pa/ gnod pas 'tsho ba/ pha ma la phangs par mi
208b1 'dzin pa/dge sbyong dang / bram ze dang / sbyin gnas la phangs par mi 'dzin pa/ sangs rgyas dang / chos dang / dge 'dun la dad pa yongs su nyams pa/ mya ngan las 'da' ba la yongs su nyams pa/ sems can dmyal ba dang / dud 'gro'i skye gnas dang /
208b2 gshin rje'i 'jig rten la zhugs shing gzhol ba/ seng ge dang / nam mkha' lding gi lus la yang dag par zhugs pa/ lcags kyi shing shal ma li mthon po dang / me ma mur la gzhol ba/ sems can dmyal ba yang sos dang / thig nag dang / bsdus 'jom dang /
208b3 ngu 'bod dang / ngu 'bod chen po dang / tsha ba dang / rab tu tsha ba dang / mnar med pa'i sems can dmyal ba chen por zhugs pa ni bud med kyi skyon 'di lta bu 'di dag thos kyang bud med la chags shing bud med dang sten pas bgad pa dang / ngus pa dang / ca co 'don 'dod
208b4 pa dang /bro brdungs pa dang / glu blangs pa dang / rol mo byas pa dag rjes su dran par byed cing skyo ba mi skyed yid byung bar mi byed de/ rgyal po chen po byis pa'i chos la kun tu spyod cing kun tu spyod pa de dag dang ldan pa'i skyes pa ni ngan song rnams su skye bar 'gyur te/
208b5 rgyal po chen po bud med kyi dbang du song nas 'dod pa la rten cing / ngan 'gror 'gro bar 'jug pa de ni skyes pa'i skyes bu'i skyon dang po yin no/ /de nas de'i tshe bcom ldan 'das kyis tshigs su bcad pa 'di dag bka' stsal to/ /'dod pa dri nga mi gtsang smad par 'os pa
208b6 dang //mi mthun 'jigs byed mi rtag las byung sdug bsngal byed/ /don med phung bar byed cing dman pa yin pas na/ /mkhas pa su zhig 'dod pa'i skom la sten par byed/ /btsog pas gang ba'i chab khung dri nga lta bu dang / /mnam par gyur cing rul pa'i khyim
208b7 rnams ji bzhin dang //shi ba dur khrod sa na shin tu smad pa ltar/ /de bzhin 'dod pa rnams kyang mchog tu smad pa yin/ /sbrang bu rma zhig mthong nas rgyug pa ci 'dra dang / /phag ni ngan skyugs mthong nas rgyug pa ci 'dra dang / /khyi ni sha yi don du shen sar 'gro ba ltar/ /de
209a1 bzhin mi mkhas bud med dag la dga' bar byed//grags pa med cing mi snyan yon tan 'bri ba dang / /de las tshul khrims dam pa nyams par 'gyur ba dang / /mtho ris nyams shing dmyal ba dag tu ltung bas na/ /mkhas pa su zhig 'dod pa'i skom la rten par
209a2 byed//ji ltar ha la ha la'i dug ni zos pa na/ /lus dag rmya zhing rmongs pa skye ba 'gyur ba ltar/ /de bzhin 'di na byis pa rnams ni 'dod pa'i rgyus/ /rang gi lus kyi dbyibs ni dug tu mi rig go /ji ltar sgyu ma shin tu bslab pa'i mi zhig gis/ /rnam par 'phrul pas sems can
209a3 brgya dag dga' byed ltar//de bzhin byis pa bdag la bde bar 'dod pa rnams/ /'dod la dga' ba'i rgyu las ngan 'gror rab tu ltung / /zas skom ston mo bzang po tha dad pa dag dang / /glu bro sil snyan bzang po tha dad pa dag gis/ /khang pa mchog nas byung ba'i chung ma len pa
209a4 ni//gnod pa rnyed pa yin zhing sdug bsngal sogs pa yin/ /'dod pa'i dga' la brkam pa dag ni gnod yin te/ /mi gtsang mtshon 'dra rmongs gyur dag la bsngags pa rjod/ /'dod pa dman pa dag la bsngags shing bsten pas ni/ /dman pa de dag ngan 'gror rab tu ltung
209a5 bar 'gyur//gnod pa 'dod pa dag gis yul rnams rab bsngags shing / /'dod pa gnod pa yid la dga' ba'i byis pa rnams/ /de dag don med 'tsho ba rnam par spangs nas ni/ /mi bzad g.yang sa chen por rab tu ltung bar 'gyur/ /nga rgyal rmongs pas bcom pa'i skyes bu
209a6 'di dag ni//rgya mtsho'i pha rol ma mthong ba yi bya bzhin du/ /lcags kyi me lce lnga po dag la chags gyur na/ /byis pa rnams ni rab tu 'bar zhing 'khyam par 'gyur/ /'di ni byis pa myos shing shin tu rmongs pa rnams/ /shel du mi mthong snod mchog yin par sems pa
209a7 ltar//lam la rnam par rmongs rnams 'dod pa'i ched kyi phyir/ /rtag tu 'dir gnas 'di ni gya nom yin zhes 'dzer/ /gang phyir rnam pa sna tshogs las dag mi shes pas/ /'gro ba thams cad rab nyams gus pa yod min pas/ /pha dang ma dang bu dang bu mo dag la ni/ /don
209b1 gyis mchod pa mi byed gnod pa thob pa yin//de dag rtag tu bud med 'dris pa rjod byed cing / /de 'dra'i las kyi tshul la rab tu 'jug par byed/ /de dag gti mug dra ba sdig pa rab sogs shing / /ngan song 'gro bar 'gyur ba'i lam yang sogs par byed/ /mi rnams de dag der
209b2 chags bde bar 'du shes shing //pha dang ma yang yongs su rab tu spong bar byed/ /de dag mchod 'os rnams la mchod pa mi byed cing / /smad par 'os pa'i 'dod pa dag la sten par byed/ /phan tshun gdungs par 'gyur ba la ni gzhol byed cing / /rnam rtog mu yis nges bcom
209b3 mi rnams nyon mongs pa//bkur sti yongs su tshol la dga' zhing ma 'phags rnams/ /chos ma yin par 'jig rten rab tu 'dzud par byed/ /gzhi de las ni mtshon cha dag dang lcags rnams dang / /de bzhin bcing ba dang ni 'thab cing rtsod pa dang / /nges par 'chi ba'i sdug
209b4 bsngal rab tu myong bar 'gyur//shi 'phos nas ni mnar med 'jigs su rung bar 'gro/ /tshe 'di nyid la de bzhin sdug bsngal 'byung 'gyur zhing / /nor nyams snying du sdug pa rab tu 'jig 'gyur la/ /mtho ris nyams shing dmyal bar rab tu ltung bas na/ /mkhas pa su zhig 'dod
209b5 pa'i 'du shes skyed par byed//lcags las grub pa'i nags tshal sngon po'i khrod dag tu/ /mkhas pas bdag nyid rab tu bor ba de bla zhing / /mdzangs pa spu gri'i so yis bcad pa byas bla la/ /ral gri dag gi khrod du mal yang bcas sla zhing / /rab tu me 'bar thu lum bzung
209b6 ba de sla la//de bzhin lcags kyi thu lum 'bar ba za sla zhing / /me dong 'jigs su rung ba rnams la reg sla yi/ /lag pa gnyis kyis nam yang bud med reg mi bya/ /mis ni ji lta ji ltar 'dod pa rnam sten pa/ /de lta de ltar bde ba thams cad rab spong zhing / /'di ltar 'dod
209b7 rnams gcig tu sdug bsngal mi gtsang bas//'dod pa sdug bsngal mi gtsang ba dag rnam par spongs/ /'dod pa sdug bsngal kun gyi gzhi bor gyur pa dang / /gang phyir nor ni chud zad 'gyur bar byed pa dang / /yid 'ong skye bo rnams kyi nyams pa'i rtsa ba bas/ /bud med nges par sten
210a1 pa gnod pa thob pa yin//skyes bu gang gis de 'dra'i chos tshul rig nas ni/ /bud med rnams la rab tu bag med mi 'gyur ba/ /des ni rtag tu mtho ris lam yang rnam sbyangs shing / /des ni byang chub dam pa rnyed par dka' ma yin/ /rgyal po chen po gzhan yang
210a2 mi'i pha ma dag ni dka' ba byed pa dag yin te/zla ba dgu 'am zla ba bcur mngal na bzung ste shin tu sdug bsngal bar gsos shing / gcin dang phyi sa yang 'phyi bar byed/ pang du blangs nas nu zho ldud par byed/ phung po rnams skyed par byed/ khams rnams gso bar byed/ 'jig
210a3 rten ston par byed/'dzam bu'i gling sna tshogs ston par byed/ don du 'dod/ phan par 'dod/ grub pa dang bde bar 'dod/ 'jig rten la yang phan par 'dod pa ste/ sbyin pa'i gnas yin la/ bu la phan pa dang bde bar 'dod pas de dag gis rang gi nor gyi tshogs kyis
210a4 gzhan gyi khyim nas gzhan gyi bu mo blangs pa dang /de de la chags shing myos la 'chums shing brgyal ba dang / lhag par zhen pa dang / lhag par zhen cing 'dug par gyur nas/ gzhan gyi khyim nas blangs pa'i bud med de la chags shing myos pas sbyin pa'i gnas pha ma rgas
210a5 'khogs pa/gtugs la lus nyam chung zhing mig mi mthong ba dag la brnyas shing longs spyod med pa dang / nor med par byas nas rang gi khyim nas phyung ste skrod par byed do/ /rgyal po chen po 'di ltar pha ma dga' ba byed byed pa sbyin pa'i gnas la rtag tu rgyun mi 'chad par yang dag pa'i
210a6 bde bas bsti stang du bya/bla mar bya/ brjed par bya/ mchod par bya ba'i rigs na/ des de'i tshe pha ma dag rang gi khyim nas phyung ste bskrad nas gzhan gyi khyim nas blangs pa'i bud med la bza' ba dang / btung ba dang / gos rnams kyis bsnyen bkur byed cing bsti stang du byed/
210a7 gces su byed/ rim gro byed la mchod pa byed cing yang dag pa'i bde bas bsnyen bkur byed kyi pha ma la ni mi byed pa'i mi snying brtse ba med pa dang / mi lta ba dang / ngan pa'i sems dang ldan pa la ltos/ rgyal po chen po des bde 'gror 'gro ba'i chos gang yin pa de ni spangs la/
210b1 ngan 'gror 'gro ba'i chos gang yin pa de ni yang dag par blangs te 'dug pa'i mi de la yang ltos/ rgyal po chen po bud med kyi dbang du song nas 'dod pa rnams la sten cing pha ma la brnyas pa dang / ngan 'gror 'gro bar 'jug pa de ni skyes pa'i skyes bu'i skyon gnyis pa yin no/ /de
210b2 nas de'i tshe bcom ldan 'das kyis tshigs su bcad pa 'di dag bka' stsal to//gang dag pha ma rgas pa gso bar byed pa ni/ /de dag rtag tu bde zhing yid kyang bde 'gyur la/ /'di la lha dang bcas pa dang ni dbang po dang / /de bzhin 'di la tshangs par bcas pa'i rigs su
210b3 'gyur//gang dag pha ma rgas pa gso bar byed pa ni/ /de dag song na phyir 'ong ba yang 'grub 'gyur zhing / /rgya mtsho chen po nas kyang bde zhing legs 'ong ste/ /de ltar byed pa dag ni rab mchog rnyed pa yin/ /gang dag pha ma rgas pa gso bar byed pa yi/ /tshong pa de dag yon
210b4 tan kun gyi gtsor 'gyur zhing //de bzhin zhing las 'bras bu phun sum tshogs 'byung ste/ /bsod nams bgrang ba'i don du brjod par mi nus so/ /gang dag pha ma rgas pa gso bar byed pa ni/ /de dag khur rnams khyer ba'i rnga mo rnams dang yang / /yang na glang dang bong bu
210b5 dag tu'ang mi 'gyur te//mi rnams de dag spu gri'i so la rdzi mi 'gyur/ /gang dag pha ma rgas pa gso bar byed pa ni/ /de dag chu bo rab med dang ni me mur dang / /spu gri'i so dang ldan pa la yang mi rgal te/ /de dag zangs khu bskol ba 'thungs par yong mi 'gyur/ /gang
210b6 dag pha ma rgas pa gso bar byed pa ni//de dag nor dang 'bru ni mi nyung ba dag dang / /chung ma dang ni bu dang bu mo dag dang yang / /bai dUr+ya dang rin chen sa le sbram yang rnyed/ /gang dag pha ma rgas pa gso bar byed pa ni/ /de dag rab 'phrul lha'i pho brang dag dang ni/ /rtsub
210b7 'gyur dang ni 'dres pa'i tshal yang mthong 'gyur te//lha rnams du mas rtag tu mdun du bdar bar 'gyur/ /mi yi gtso bor gyur cing lha yi lhar gyur pa/ /thub pa chen po 'di 'dra'i gsung ni thos gyur na/ /rgas shing dbang po shin tu nyam chung gyur pa yi/ /pha ma sbyin
211a1 gnas dam pa su zhig gso mi byed//rgyal po chen po gzhan yang skyes bu dam pa ma yin pa ni skyes bu dam pa ma yin pa'i las byed cing log par lta ba la mngon par zhen pa yin te/ de ni dge ba dang mi dge ba gang yin zhes bdag gi don mi shes shing mi brtan
211a2 pa yin pas skye bo mang po rnams mi dga' zhing byis pa'i skye bos bsngags pa la mngon par dga' ba dang /'dod chags dang zhe sdang dag gis rmongs par gyur pa dang / skyes bu mdzangs pa dag gis smad pa dang / khro bas zil gyis non cing sdig pa'i las byed pa dang / sangs
211a3 rgyas dang /byang chub sems dpa' rnams kyis yongs su spangs pa dang / longs spyod kyi rgyags pas myos pa dang / ser sna can du gyur pa dang / gzhan la gnod par mngon par dga' zhing chos sgom par mi dga' ba yin te/ rgyal po chen po skyes bu dam pa ma yin pa skyes bu
211a4 dam pa ma yin pa'i las la mngon par dga' zhing skyes bu dam pa'i las la mi dga' ba de la ltos/rgyal po chen po 'dod pa rnams la sten cing ngan 'gror 'gro bar 'jug pa de ni skyes pa'i skyes bu'i skyon gsum pa yin no/ /de nas de'i tshe bcom ldan 'das kyis tshigs su bcad pa 'di
211a5 dag bka' stsal to//'dod pa rnams kyi gzhis ni skyes bu rnam nyams shing / /gzhi de las ni sdig pa dag kyang rab tu byed/ /log par lta bas rmongs nas 'dir ni 'khyam 'gyur zhing / /de ni rnam par 'khrul pas ngan 'gror 'gro bar 'gyur/ /log dang ldan pas yon tan
211a6 kun gyis rnam spangs shing //de ni rtog pa med cing blo yang nor pa yin/ /gang dag chu klung dag tu ud pal rtswa tshol ltar/ /log par lta bas yongs su 'khor bar byed pa yin/ /bde ba'i don du bdag nyid yongs su skyong byed cing / /chos ma yin la chags pa'i
211a7 mi rnams mang po dag /de bzhin bde ba'i rgyu phyir 'dod pa rnams tshol ba/ /de dag gti mug rmongs pas sems can dmyal bar 'gro/ /gang dag 'dod pa rnams kyi don du rtag tu ni/ /de bzhin sems la gcags pa'i skyes bu tha ma dang / /'dod pa'i bdag nyid can dang skye
211b1 bo sdig can dang //'du shes log pa dag la bde ba ga la yod/ /mi rnams de dag byas pa mi gzo sdig bcas shing / /dad pa rnam nyams tshul 'chos gus pa med pa dang / /'phags pa'i tshogs kyis rtag tu rnam par spangs pas na/ /dmyal ba bzod brlag shin tu
211b2 'jigs su rung bar ltung //gzugs dang sgra dang ro la chags pa'i mi rnams ni/ /byang chub sems dpa' rnams dang mkhas pa mi mchod cing / /log par lta bas chos kyang nyan par mi byed la/ /lan 'ga' 'ang dge 'dun legs par mchod par mi byed pas/ /'phags pa
211b3 rnams kyis rnam spangs ngan song ltung bas na//de phyir mi'i srid pa 'di ni rnyed pa la/ /sbyin dul yang dag sdom la nges par sten cig dang / /de las byang chub dam pa mchog kyang thob par 'gyur/ /rgyal po chen po gzhan yang skyes pa ni bzo'i gnas sna tshogs dang / las
211b4 kyi gnas sna tshogs 'di dag gis 'tsho bar byed de/rgyal po chen po 'di ltar yi ge'am/ /rtsis sam/ grangs sam/ lag rtsis sam/ mtshon cha'am/ rgyal po la zho shas 'tsho ba'am/ zhing las sam/ tshong byed pa'am/ ba lang 'tsho ba'am/ de lta bu'i bzo'i
211b5 gnas sna tshogs dang /las kyi gnas sna tshogs dag gis 'tsho bar byed cing 'di lta ste/ nor gyi phyir lam ma yin par yang 'gro bar byed/ lam ngan par yang 'gro bar byed/ gcong rong dang chu klung can gyi lam du yang 'gro bar byed/ mtshon cha'i lam du yang 'gro bar byed/
211b6 rgya mtshor 'jug par yang 'jug par byed/ grang ba'i dus na yang lhags pas gnod par byed/ dro ba'i dus na yang tsha bas gnod par byed cing bkres pa dang / skom pa dag gis gnod bzhin du 'gro ba la yang spro bar byed de/ longs spyod yongs su tshol ba na de lta bu'i sdug bsngal
211b7 dag gis longs spyod yongs su btsal nas kyang rang gi 'tsho ba dag gi phyir nye bar sgrub par byed pas dge sbyong dang bram ze dag dang /bkren pa dang / sdug phongs pa dang / slong mo ba dag la sbyin pa sbyin par mi bzod cing bud med rnams kyis dbang du byas pa dang / bud med rnams
212a1 kyis thul 'og tu chud pa dang /bud med rnams kyis bskol ba dang / bud med rnams la byams pa de nyid kyis bud med de dag nyid gso ba'i phyir sbyin pa sbyin pa dang / tshul khrims yang dag par len par mi nus shing de de la chags la bud med rnams kyis spyos
212a2 pa bzod par byed cing bud med kyis bsdigs pa dang /bltas pa dang / brgyab pa dag kyang bzod par byed de/ de skyes par gyur kyang bud med kyis bsdigs pa dang du len cing / mi dga' ba med par de'i ngor lta bar byed pa ni 'dod pa'i gzhis bud med kyi dbang du song ba yin te/
212a3 rgyal po chen po bud med la sten cing ngan 'gror 'gro bar 'jug pa de ni skyes pa bud med la brkam zhing ngan skyugs kyi sgo la gdu ba dang / mi gtsang ba la dga' ba dang / shes bzhin med par spyod pa'i skyes bu'i skyon bzhi pa yin te/ rgyal po chen po skyon de dag dang ldan pa'i skyes pa
212a4 ni 'dod pa rnams kyi dbang du 'gro ba yin no//de nas de'i tshe bcom ldan 'das kyis tshigs su bcad pa 'di dag bka' stsal to/ /'dod pa rnams ni tshol ba dang / /rab tu myos pa ga la bde/ /'dod pa dman pa rnams sten pa/ /de ni gang gis bde bar 'gyur/ /skyes
212a5 bu dam pa ma yin pa'i//las rnams byed cing mi sdom la/ /'dod pa'i 'dod chags tshol byed pa/ /de dag rab nyams chud kyang za/ /mi rnams gang dag mi mkhas pa/ /rnga mo bong bu'i chos spyod cing / /bud med mthong na rab snyegs pa/ /ngan skyugs gnas la phag
212a6 rnams bzhin//gang la byis pa gus bcas pa'i/ /'dod rnams dri nga mi gtsang yang / /'dod pa'i skyon rnams mi mthong ba/ /sa yi steng na dmus long bzhin/ /gzugs kyi 'ching bas bcings pa rnams/ /'dod pa'i 'du shes rab tu 'jug /byis pa 'dod rnams
212a7 sten pa dag /khyi dang wa rnams ji bzhin no/ /sgra dri ro dang reg rnams kyis/ /gang la so so'i skye bo rnams/ /byis pa 'khor ba yongs 'khor ba/ /spre'u rnams phur la btags pa bzhin/ /byis pa ma rig khebs pa rnams/ /mun pa'i phung pos bsgribs gyur cing /
212b1 bud med rnams la chags pa ni/ /mi gtsang gnas la khwa bzhin no/ /gang gis ngan 'gror rab 'jug pa/ /de ni bdud kyi spyod yul yin/ /ro myang 'du shes chags gyur pa/ /ngan skyugs gnas la srin bu bzhin/ /gsang ba'i gshed ma rnams kyis ni/ /ji ltar mi
212b2 zhig bor ba ltar//shes na thar pa thob 'gyur zhing / /bud med dbang du 'gro mi 'gyur/ /'dod pa bud med lta byed pa'i/ /kun tu sbyor las 'jigs pa skye/ /byis pa mtshan mar 'dzin pa rnams/ /'dod pa'i sred pa rab tu 'phel/ /sos ka'i dus na mi zhig ni/ /
212b3 dgon pa chen por song gyur nas/ /byis pas lan tshwa'i chu 'thungs na/ /skom pa phyir zhing rab skyed ltar/ /de bzhin bden pa ma mthong ba'i/ /byis pa rmongs pas 'tsho ba rnams/ /'di na phyir zhing bud med la/ /'dod pa'i sred pa brtan par 'gyur/ /ji ltar mi lus
212b4 mdze can la//srog chags rnams ni za ba ltar/ /'dod brkam so so'i skye bo rnams/ /de bzhin bud med rnams kyis zos/ /mi gtsang bum pa khra bo zhig /kha dog ldan par snang mod kyi/ /nang na ha la ha la'i dug /drag po chen po yod pa ltar/ /de
212b5 bzhin bud med brgyan pa dag /gang dang gang na snang ba yang / /gcin dang phyi sas gang ba yi/ /rkyal ba rlung gis gang ba bzhin/ /'bru mar gyis ni bdar ba'i mtshon/ /gos kyis dkris pa ji bzhin du/ /de bzhin bud med brgyan pa yang / /ral gri rling ba
212b6 g.yogs pa bzhin//ji ltar me dong gang gyur la/ /du ba med cing 'bar ldan ltar/ /bud med de bzhin me 'dra zhing / /srin bu gtum po bzhin du g.yo/ /sreg pa'i bskal pa 'dir byung na/ /sa 'di kun tu 'bar gyur la/ /rtswa dang gel pa 'jig 'gyur zhing / /
212b7 chu klung dag kyang skams par 'gyur/ /'byung po chen po'i gnas gyur pa/ /rgya mtsho yang ni skam 'gyur zhing / /ri bo chen po rnams sreg la/ /de bzhin lhun po'ang 'jig par 'gyur/ /rgyal chen 'byung po 'dzin pa yi/ /sa 'di'ang rnam par 'jig 'gyur zhing / /
213a1 brag chen rnams ni 'jig 'gyur yang / /skyob par byed pa yod ma yin/ /ji ltar me yis rir bcas dang / /rgya mtshor bcas pa sreg pa ltar/ /de bzhin bud med me 'dra ste/ /gtum zhing skyes bu g.yo bar byed/ /snabs dang mchil ma kha chu
213a2 dang //klad rgyas rul pa'i klad pa dang / /lus las dri nga 'dzag de la/ /byis pa rnams ni sbrang rtsi bzhin/ /kha sgo rus pas gang ba dang / /sha dang lpags la sogs bsags shing / /de bzhin lus ni 'bras 'dra ste/ /dri nga smad par bya ba yin/ /mi gtsang sna
213a3 tshogs gang ba dang //'bras ni smin par gyur pa ltar/ /de ltar lus 'di mi gtsang ba/ /sna tshogs rnams kyi snod yin no/ /lto ni gnye ma mtsher pa dang / /glo bas gang zhing mkhal ma dang / /khrag dang mkhris pas gang gyur la/ /klad rgyas kyis ni klad pa gang / /
213a4 khong pa'i nang na srin bu'i rigs/ /brgyad khri po dag gnas gyur kyang / /gti mug dra bas bsgribs pa yi/ /byis pa rnams kyis mi mthong ngo / /rma sgo dgu nas rtag tu ni/ /mi gtsang rul ba zag gyur kyang / /smra ba dag dang lta ba la/ /byis pa rnams ni mtshan
213a5 mar 'dzin//gang zhig kun gyis smad pa'i yul/ /chags pa rnams kyis phyis mi shes/ /mi gtsang spyod yul byis pa rnams/ /snabs dang mchil ma za bar byed/ /smad par 'os la chags byed pa/ /sbrang bu rnams kyis rma mthong bzhin/ /mchan
213a6 khung dag nas rdul 'dzag cing //smad pa'i dri ni 'byung bar 'gyur/ /byis pa sdug bsngal chags byed pa/ /de dag bdag la gnod phyir g.yo/ /des ni myur du phongs gyur te/ /nya rnams chu nas bton pa bzhin/ /'jigs rung lag na mtshon thogs kyis/ /
213a7 ji ltar mi zhig gtses pa ltar/ /mtshon 'dra'i bud med sdig can gyis/ /'dod la chags rnams de bzhin no/ /rnam rgyal lag na mtshon thogs pas/ /ji ltar rgyal po gtses pa ltar/ /'dod chags me dang 'dra ba yis/ /'dod la chags rnams de bzhin
213b1 sreg /shen pa'i gnas la khyi rnams ltar/ /myang bar 'du shes byis pa rnams/ /ji ltar sgra yis skrag pa ltar/ /myur du sdug bsngal myong bar 'gyur/ /rang gi las kyi nyes pa yis/ /de la skyob pa med pa ltar/ /de bzhin bdag gi
213b2 nyes pa yis//sems can rnams ni ngan 'gror 'gro/ /de dag sangs rgyas chos spangs nas/ /bud med rnams kyi rnag la sten/ /sems ni ro la chags gyur pa/ /de yis ngan 'gror 'gro bar 'gyur/ /ji ltar spre'u zhig shing las ni/ /
213b3 shing gzhan du ni rgyu ba'i tshe/ /de ni gnas der gtses gyur na/ /de nyid du ni sdug bsngal 'gyur/ /de bzhin 'dod la brkam pa dang / /sdug bsngal 'dod chags sten pa dang / /gti mug rgya la thogs pa rnams/ /dus ni yang dang yang du
213b4 'da'//mi bkren rnams ni gsal shing la/ /rab tu btsugs nas 'phyang ba ltar/ /de bzhin 'dod la chags pa rnams/ /shal ma li ni mtho la 'phyang / /ji ltar mon sran sde'u dang gre'u/ /lcags zangs rnams su blugs byas nas/ /
213b5 mes ni rab tu bsregs pa na/ /dbu bar bcas shing khol ba ltar/ /de bzhin dge ba ma mthong zhing / /'dod la chags pa'i skye bo rnams/ /shi nas ngan song 'gro 'gyur zhing / /lcags zangs rnams su btso bar 'gyur/ /mi rnams gang dag
213b6 sdig byed pa'i//sems can sdig pa rnams kyi gnas/ /zangs ni bye ba drug cu dang / /gzhan yang bzhi po dag yin no/ /zangs ni so so re re la/ /tshad ni dmigs su yod min zhing / /me yi phung por ldan rnams su/ /bskal pa du mar
213b7 btso bar 'gyur//kha cig zangs rnams de dag tu/ /rang gi las kyis bskal brgya 'am/ /nyis brgya sum brgya tshang bar 'tshed/ /yang na bzhi brgyar btso bar 'gyur/ /phra skam rnon po rnams kyis ni/ /bzung zhing yang dang yang smyugs pas/ /
214a1 de dag sha ni yod min zhing / /dung ltar dkar ba rnams su 'gyur/ /lcags kyi gzhong par 'jug nas ni/ /rab tu tsha zhing 'dren pa med/ /shi zhing shi zhing skye 'gyur te/ /rang gi las kyis gnas par 'gyur/ /
214a2 gang tshe dmyal ba'i srungs rnams kyis/ /ngan pa'i mi rnams de dag ni/ /gtun la sogs pas brdungs pas ni/ /sha rkang rus pa phye mar 'gyur/ /de yis tshe na de dag la/ /shin tu grang ba'i rlung yang ldang / /des ni dmyal ba'i sems
214a3 can rnams//sdug bsngal gyur pa de las 'tsho/ /mi rnams gang dag sdig byed pa/ /gtun bu drag po rnams kyis 'joms/ /sta re rnams kyis gsheg pa dang / /de bzhin gsal shing 'dzugs par 'gyur/ /mi rnams gang
214a4 dag sdig byed pa'i//sems can rnams kyi lus la ni/ /lcags mdung rtse mo bzhi pa dang / /rtse gsum pa dang rtse lnga 'bab/ /mi rnams gang dag sdig byed pa/ /ral gri'i mchu can khwa rnams kyis/ /mgo dang btogs 'gyur zhing / /
214a5 wa dang spyang kis zos par 'gyur/ /mi rnams gang dag sdig byed pa/ /ngan skyugs rul pa dri nga zhing / /kun gyis smad par ltung 'gyur la/ /spu gri'i chu klung rnams su ltung / /mi rnams gang dag sdig byed pa/ /rab tu tsha bar sreg
214a6 'gyur zhing //ngu 'bod dang ni ngu 'bod che/ /thig nag tu yang sreg par 'gyur/ /mi rnams gang dag sdig byed pa/ /thig nag tu ni skyes nas kyang / /yang dang yang du me mur dang / /spu gri'i chu klung rnams su ltung / /gang tshe lcags
214a7 kyi zangs po cher//mi rnams de dag 'tshed pa na/ /khyi rnams kyis ni gtses gyur nas/ /de dag bde ba tshol bar byed/ /mi rnams gang dag sdig byed pa/ /dmyal ba drag po chen por ni/ /lhung nas dpung gnyen yod min zhing / /
214b1 lcags kyi thu lum za bar 'gyur/ /mi rnams sdig pa byed pa dag /lcags las grub pa'i brag chen dang / /mi sdug ri bo rnams kyis ni/ /de tshe kun nas lus 'joms byed/ /des ni rang gis las byas pa'i/ /'bras bu de 'dra thob gyur
214b2 cing //de yis tshor ba myong bas na/ /de la skyob pa 'ga' yang med/ /ji snyed rten pa thams cad ni/ /bdag gi mdun der 'ga' yang med/ /der ni mgon med bdag gcig pu/ /sdug bsngal tshor ba myong bar byed/ /gang dag bde
214b3 phyir don min par//sngan chad nyes par spyad byas kyang / /pha ma de dag de ring ni/ /rnam par grol ba'i mthu yang med/ /gang dag bde phyir don min pa/ /sngan chad nyes par spyad byas kyang / /bu dang bu mo chung ma rnams/ /de ring
214b4 bdag la 'grol mi nus//gang dag bde phyir don min par/ /sngan chad nyes par spyad byas kyang / /mdza' bshes nye du de dag kun/ /rnam par dgrol bar yong mi nus/ /gang dag bde phyir don min par/ /sngan chad nyes par spyad byas kyang / /
214b5 bdag gi rtsa lag de dag kun/ /de ring 'grol bar mi nus so/ /'dod pa dman pa rnams sten cing / /dman pa'i chos rnams bsten nas ni/ /nyes pa'i las rnams byed pa dag /de yis ngan 'gror 'gro bar 'gyur/ /shes rab 'chal
214b6 pa mnar med par//song nas sdug bsngal tshor ba myong / /sangs rgyas rnams kyis bud med dag /phyi sa'i dri ltar dman par bsgrags/ /de phyir dman pa rnams dang ni/ /dman pa'i bud med rnams sten pa/ /byis pa de ni phyi sa yi/ /
214b7 rkyal pa bzung nas gnas pa yin/ /ci 'dra'i las ni byed pa ltar/ /de 'dra'i 'bras bu thob 'gyur te/ /rgyal po yi ni chad pa dang / /sdug bsngal bcing ba'ang myong bar 'gyur/ /bud med gzhi las skyes pa yang / /gsang dang bcing ba myong
215a1 'gyur zhing //dmyal srungs rnams kyis sreg pa dang / /nges par 'ching ba'ang myong bar 'gyur/ /bud med rnams la brkam pa yi/ /blo ngan de dag bde mi 'gyur/ /gsal shing mthon po rnams su ni/ /
215a2 btsugs shing chur yang bcug par 'gyur/ /sa yi ser kar bcug nas ni/ /de bzhin ral gris gdab par 'gyur/ /de 'dra ba dag thos nas ni/ /de dag yi chad bde mi 'gyur/ /rmongs pa bud med lhan cig tu/ /yang dang yang du 'du
215a3 'dzi byed//sdug bsngal 'dod pa rnams sten cing / /smad pa rnams kyang smra bar byed/ /rmongs pa rnams kyis chos thos nas/ /dge bar gsungs zhes rjod byed kyang / /de sems bud med phyi bzhin song / /byi ba la ni byi la bzhin/ /
215a4 rgyal bas gsungs pa thos gyur nas/ /yud tsam zhig ni yid byung yang / /ha la ha la'i dug 'dra ba'i/ /'dod chags kyis ni de yang 'khrugs/ /ji ltar phag ni yud tsam zhig /dngangs shing skrag par byung gyur kyang / /des ni
215a5 phyi sa mthong na yang //chags pa skyed par byed pa ltar/ /de bzhin byis pa bde 'dod rnams/ /rgyal ba'i bstan pa spangs nas ni/ /'dod pa dman pa rnams bsten pas/ /des ni ngan 'gror 'gro bar 'gyur/ /'dod pa rnams la
215a6 chags myos nas//shin tu sdig pa'i las byas shing / /tshul khrims can dag bslus byas nas/ /phyis ni ngan 'gror 'gro bar 'gyur/ /shes rab can gyis dal rnyed cing / /de 'dra'i chos ni thos gyur nas/ /'dod kun spangs nas 'di la
215a7 ni//mkhas pa mngon par rab byung shig /rgyal po chen po skyes pa 'dod pa la sten pa rnams kyi skyon ni de dag yin te/ 'dod pa'i gzhi dang / 'dod pa'i rma dang / 'dod pa la lhag par zhen pa rnams ni sems can dmyal ba pa rnams kyi tshor ba
215b1 myong bar 'gyur ro//rgyal po chen po de lta bas na khyod kyis rtag par rgyun tu sangs rgyas rjes su dran pa bsgom par bya'o/ /khyod kyis lus su gtogs pa'i sems rjes su dran pa bsgom par bya'o/ /de ltar bcom ldan 'das kyis bad sa'i rgyal po 'char
215b2 byed la de lta de ltar chos bstan par mdzad de/chos bstan pa des bad sa'i rgyal po 'char byed de bzhin gshegs pa la dga' ba dang / rab tu dga' ba dang / mchog tu dga' ba thob par gyur to/ /de nas bcom ldan 'das la bad sa'i rgyal po 'char byed
215b3 kyis 'di skad ces gsol to//bcom ldan 'das ji tsam du bcom ldan 'das de bzhin gshegs pa dgra bcom pa yang dag par rdzogs pa'i sangs rgyas kyis skyes pa dang / bud med rnams kyi skyon bsam gyis mi khyab pa'i bar de dag bka' stsal cing legs par
215b4 gsungs pa ni ngo mtshar lags so//bcom ldan 'das bdag ni bcom ldan 'das dang / chos dang dge slong gi dge 'dun la skyabs su mchi ste/ mtshon cha spangs shing dbyug pa spangs la ngo tsha mchis shing srog chags 'byung po thams cad la snying brtse bar
215b5 zhugs pa lags kyis/bcom ldan 'das kyis bdag dge bsnyen du gzung du gsol/ bcom ldan 'das kyis de skad ces bka' stsal nas/ bad sa'i rgyal po 'char byed dang / dge slong de dag dang / byang chub sems dpa' de dag dang / lha dang mi dang
215b6 lha ma yin dang /dri zar bcas pa'i 'jig rten yi rangs te bcom ldan 'das kyis gsungs pa la mngon par bstod do// //'phags pa dkon mchog brtsegs pa chen po'i chos kyi rnam grangs le'u stong phrag brgya pa las bad sa'i rgyal po 'char byed
215b7 kyis zhus pa'i le'u zhes bya ste nyi shu rtsa dgu pa rdzogs so// //rgya gar gyi mkhan po dzi na mi tra dang / su ren dra bo d+hi dang / zhu chen gyi lo ts+tsha ba ban de ye shes sde la sogs pas bsgyur cing zhus te gtan la phab pa// //
CLOSE WINDOW