CLOSE WINDOW

D4419a
བོད་ཡིག

@#// saMg+haHshu b+hAmitahetu nod+hAdAshayasarbapUr+NaMkalpadrumo/ /dz+nyAnash+tsakAruNapal+lahitaso+okhyabe+epAkyam+many+dzarI/ dge tshogs dpag tu med pa'i rgyus bskyed bsams kun rdzogs pa'i dpag bsam shing / /mkhyen dang brtse ba'i yal 'dab rab rgyas phan bde'i snye ma g.yur du za/ / dge tshogs dpag tu med pa'i rgyus bskyed bsams kun rdzogs pa'i dpag bsam shing / /mkhyen dang brtse ba'i yal 'dab rab rgyas phan bde'i snye ma g.yur du za/ / sarngas+yalokarathAd+hamuk+tAnAMparipAraNon+naMsaMbud+b+hatA/ /man+dArabar+ShapraweshayAd+yAtraMkusumAHshub+haMshreyAm+mad+galaM/ / 'jig rten kun kyi pos ba'i shing rta phyur bur 'gengs pa'i rdzogs sangs rgyas/ /deng 'dir dge legs shis pa'i me tog man+dA ra ba char du bsnyil// ming tshig yi ge tshogs pa'i rjod byed lung gi khrung khrung sgra snyan 'byen/ /brjod par bya ba don bzang gser gyi bye ma 'dren cing khams gsum gyi/ /'gro ba'i nyon mongs dri ma sbyong byed bsil ba dam pa'i zla gzugs kyang / / gsal bar snang ba'i chos kyi rgyun gsum byang chub lang tsho brtas pa'i bcud/ /thub pa'i mgrin las bab pa'i bdud rtsis rtogs pa'i lus stobs mchog tu rgyas/ /bslab gsum gser gyi dra bas gdong mdzes chos kun rnam 'byed mche ba rno//mtha' med 'gro ba srid las gdon pa'i g.yar dam khur ni khyer ba po/ /rig dang zhabs ldan 'phags pa'i dge 'dun sa srung phreng ba byang chub grogs/ /sna tshogs las kyi lag pas ma bdar mkhyen pa'i dkyil 'khor rnam par gsal//gzhan gyi 'bangs su bskos pa min par thugs rje'i gzigs pa 'gro la 'jug /bcu drug lang tsho dar la bab kyang rgyal ba ma lus skyed pa'i yab/ /'jam pa'i dbyangs nyid skye bar dge ba'i bshes su gsol ba'i thal mo sbyar//bai DUr+ya yi rgyud mangs snyan par 'khrol ba'i sgra dang bsres pa'i gsung / /yan lag drug cu rdzogs pa'i gdangs las shes bya thams cad snyan pa'i glur/ /'dren pa de yis skye 'phags snying gi brtan pa 'phrog pa'i mtsho byung ma//mgrin pa pad+ma'i rdzing du 'jug phyir snyan pa'i tshig gi mchod sprin spro/ /ring nas thub pa'i bstan la phan pa'i smon lam pho nyas bos pa'i mgron//mi bdag chen po rigs mchog sA la'i rkang 'thung phreng bar bcas pa yis/ /snying stobs bla nas bla mar 'phags pas bde gshegs bka' yi dgongs 'grel che/ /gangs can brda ru 'gyur ro 'tshal rnams mi zad ma mo nyid du bskrun//e ma snying stobs ldan pa'i snying stobs mchog gi rtsom pa 'di 'dra sngon/ /mig gi dbang pos longs su ma spyad de bzhin rna lung yangs po na/ /lhung ba med pa de ni ci zhes phyogs kyi dga' ma khengs ldan dag /phan tshun 'dri dang lan ldon mchid kyi rnga ni lhang lhang brdung ba bzhin/ /tshul 'di bsgrub la zhing dang dmigs pa sbyor ba rnam par dag pa las/ /byung ba'i rnam dkar dge ba gang de gal te gzugs su 'gyur srid na//lam gsum khongs su mi chud dogs pas 'jig rten kun gyi byed pa pos/ /mi mjed ces su grags pa'i snod 'di ched du yangs par sprul lam snyam//de lta na yang byang chub mchog gi sa bon bsgyur min de srid du/ /gnas skabs mtho ris 'bras bu zhig gam sdig pas kyang ni mthar gtugs byed/ /des na 'khor gsum dmigs pa'i dug med rab tu zhi ba'i dbyings nyid du//rmi lam sgyu ma'i rtse 'jo la rol mnyam par 'jog pa'i bsngo ba bgyi/ 7/nam mkha'i mthas gtugs phyogs dang phyogs bral dang / /steng 'og dag na rgya mtsho'i rdul snyed kyi/ /zhing khams rnams su byon dang 'byon 'gyur dang //da ltar 'tsho zhing gzhes pa'i chos rnga che/10 /de dag re re la yang gdung 'tshob kyi/ /rgyal ba'i sras dang slob ma bye ba phrag /bgrang las 'das pa'i 'khor gyis bskor ba dag /smon lam don yod byed pa'i dpang por blta/11 /gsang gsum mi zad rgyan gyi 'khor lo'i mdzod/ /brnyes pa gang gi yon tan phyogs re'i 'phrin/ /yid kyi ngos su gsal bar bris nas ni/ /grangs med lus rab btud pa'i phyag bgyi'o/ 12/ blo yi bang mdzod phye ba las blangs pa'i/ /nye bar spyod pa rnams dang rin chen bdun/ /'dod yon ma tshang med pa'i stong gzugs sprin/ /mchod 'os kun gyi spyan lam 'byung gyur cig /13 /chags sdang rmongs pa'i dgra yis rab bdas pas//bslab gsum bcas pa'i dbang gi rgyal po dag /nyes lhung 'dam gyi nang du bskyur ba'i dri/ /gnyen po stobs bzhis bshags pa'i chab kyis 'khrud/ 14/ 'phags bzhi so skyes bsags pa dge ba'i mtsho/ /phan dang bde ba'i rlabs phreng g.yo ba der/ /phrag dog rdul gyi 'tshub ma mi 'thor bar /yi rang 'dzum pa'i zla 'od dkar pos bran/15 /'gro 'dul kha lo sgyur ba khyed rnams la//skyo zhing dub pa'i nongs pa mi mnga' yang / /'jig rten mthun par btang snyoms mi bzhugs par/ /zab dang rgya che'i chos 'khor bskor bar bskul/16 /sna tshogs spros pa'i gzha' ris mya ngan las//brgal ba'i dgon par gzhol bar mi mdzad par/ /sngon gyi smon lam la dgongs bskal pa ni/ /grangs med srid du bzhugs par gsol ba 'debs/ 17/ de ltar bgyis pa'i legs byas de yis bdag /sems can mos pa'i mkha' la bgrod mkhas pa'i/ /kun mkhyen chos kyi nyi ma mngon gyur nas/ /'jig rten dge ba'i snang bas 'gengs par shog /18/ de 'dra'i byang chub 'dod pa'i ko ki las/ /gzhi lam 'bras bu'i dge legs yid gcugs grogs/ /'gugs pa'i ched du snyan pa'i ming bzung nas/ /bsngo smon tshig gi rgyang glus 'bod la dgongs/17 /de bzhin gshegs pa rnams dang byang chub sems/ /rkyen gcig rtogs dang nyan thos so skye yis//dus gsum rjes su 'brel par sgo gsum gyis/ /legs par spyad pa'i dge tshogs gang yin dang / 20/chos tshul 'di yi ched du gtong ba'i phyag /'dod ldan yongs kyi dpag bsam brkyang ba las/ /mkho dgu ma tshang med pa'i mchod sbyin dang / / sgo gsum thang rer 'bad pa'i dge bar bcas/ 21/deng 'dir gcig tu bsdams pa'i gangs kyi ri/ /'khor gsum dmigs pa med pa'i 'od po ches/ /zhi bsil dam pa'i rgyun du bsgyur ba'i klung //byang chub mchog gi rgya mtshor ro gcig shog /22/de yi rten 'brel snang ba ma 'gags gdangs//ngo mtshar sgyu ma'i mchod sprin bdag cag gi /smon lam 'grub pa'i bden dpang mchod pa'i 'os/ /bzhugs so 'tshal gyi spyan lam 'byung gyur cig /23/gang zhig thos na sdug bsngal rgyur bcas las/ /skyob cing mchog gi go 'phang sbyin pa'i chos/ /phan bde'i gzi byin 'jig rten gsum gyi blar//rab tu 'bar zhing yun du brtan gyur cig /29/yongs rdzogs bstan pa'i dgongs don ma nor gtam/ /tsho ba'i blo dang ngag gi bang mdzod de/ /'jam dpal gzhon nus byin pa sa skya pa'i/ /bstan pa thub pas bsngags pa rgyal gyur cig /25 / thams cad mkhyen pa'i gsung gi tasru ras/ /bstan la mkhas pa'i bya ba bgyis mtha' ru/ /'tshang rgya 'gyur ba'i lung bstan kun dga' bzang / /de yi lugs mchog kun du dar gyur cig /26/dpal ldan rgyal ba'i phrin las rgya mtsho las/ /rnam par 'phrul pa'i smra mchog nyin mo'i mgon//yongs rdzogs chos kyi rgyal srid skyong ba'i slad/ /zhabs pad rdo rje'i khri la brtan gyur cig /17 /so so thar pa 'dul ba'i gzhung bzhin bca'/ /byang sems bslab pa mdo sde'i lugs su bshad/ /gsang sngags rgyud sde zab mo'i don bzhin gdams/ /'chad mkhas mang pos bstan pa skyong gyur cig /sgra tshad rig pa'i mda' gzhu'i 'khrul 'khor gyis/ /smra ngan bden pa bral ba'i phyogs kun las/ /rnam rgyal grags pa'i sI ta 'phrog byed pa'i/ /rtsod mkhas mang po'i log rtogs chom gyur cig /27 /sde snod gsum gyis brjod par bya ba'i don//bcad lhug spel ma'i rjod byed me na kas/ /sgra don rgyan gyi gling bu 'bum bsgyur ba'i/ /rtsom mkhas mang po'i bstan pa gsal gyur cig /30 /bstan pa'i rtsa lag dge 'dun 'dus pa'i sdes/ /bshad dang sgrub pas sa steng yom yom du/ /bgyid pa de la skrag nas me tog gzhu//stong pa'i brdzu la zhugs snyam byed gyur cig /31 /thub chen rang gi lung rtogs dam pa'i chos/ /dar zhing rgyas pa'i gnas su rab bsngags pa/ /bod chen sde bzhi dge bcu'i 'byor pa can/ /sa phyogs 'dis mtshon yangs pa'i rgyal khams su/ /bstan la dga' ba'i lha rnams nam mkha' la//dus su lhags nas sprin gyi 'thor yab bzung / /swa ste dbyangs su len cing chu gtsang gi/ /an+d+ha rnyil gyi sil ma 'bebs gyur cig /33 /de tshe gser ldan dga' ma rang gi lus/ /sngo bsangs mdzes pa'i me tog rgyan dang bcas/ /rtsa ldum lo 'dab myu gu 'bras bu'i tshogs//smin pa'i dga' ston ci yang ngom gyur cig /yangs pa'i 'jig rten khams kyi lus can rnams/ /kun 'byung las kyi sprul pa sgyu ma'i lus/ /nyams dang dus min 'jig byed nad kyi rigs/ /mun nang sgron me bteg bzhin yal gyur cig /35 /zag bcas sdug bsngal nyid du bstan pa'i 'phrin//lo zla zhag dus rung ba min pa'i skeg /sri dang gzhan gyi byad kha sbod gtod dag /'bras bu 'byin pa'i nus pa bral gyur cig /34 /las dang smon lam log pa'i chu klung gis/ /dbang med bdas te legs pa'i gegs byed cing / /nyes par sbyor ba'i gdon bgegs 'byung po rnams//byams pa chen pos 'khyud bzhin gnas gyur cig /37 /khros pas gtsubs pa'i mig bsgyur smin ma 'khyog /khrag gis bsgos pa'i mtshon char 'bebs pa yis/ /phan tshun gcod dang 'bigs pa'i mi srun tshogs/ /sems rgyud snying rje bas kyang mnyen gyur cig /38 /bkres pa'i nyen pas lus stobs ches dman zhing / /bza' btung ming nas 'dzer ba'i skad kyis smon/ /rdul gyis g.yogs pa'i skra spu gzings byed pa'i/ /bkres phongs bskal pa ming yang mi gnas shog /37 /phan tshun brku dang 'phrog sogs lus med ni//lag pa'i brdzu la zhugs 'dra'i log 'tsho dag /yongs su spangs nas rang rang longs spyod kyis/ /chog shes mi zad gter la spyod gyur cig /40 /mdza' bar gyur pa'i 'gro ba phan tshun dag /mthong na byams pa chen pos dzrel ba'i 'dzum/ /so phreng dkar ba'i 'od zer sngon 'gro mas//mdun nas bsu ba byed bzhin gnas gyur cig /41 /'chi ba med pa'i tshe dang bsod nams stobs/ /chos mthun 'byor pa rnams ni gang+gA'i rgyun/ /dkar phyogs zla ba nyin mor byed pa'i 'od/ /dbyar gyi chu gter rnams su 'gran par shog /42 /rgyal ba gnyis pa'i chos kyi rgyal srid la//mgrin pa'i bkra shis chos dung 'khyel pa las/ /'chad rtsod rtsom pa'i sgra dbyangs ldir de yi/ /bzhed pa'i don kun lhun gyis grub gyur cig 43 /bstan pa dam pa'i lha gnas snying gi stobs/ /rmad byung phrag par 'degs pa'i sa 'dzin des/ /tshe rabs du ma'i ring nas smon pa'i gnas//thams cad mkhyen pa'i sa la reg gyur cig 44 /las dbang gser gyi 'khor lo sngon 'gro mas/ /yangs pa'i chab srid ri gling rgya mtshor bcas/ /rang dbang byed pa'i pho nya dang po'i 'phrin/ /bla ma che zhes phyogs kyi bu mos smra/ 45 /kun dga'i dpal ster lung dang rtogs pa'i bstan//bla na 'degs pa'i phrin las rgya mtsho'i gos/ /yongs su khyab pa'i sde bzhi ldan pa gang / /'gro ba'i bsod nams khri 'phang brtan gyur cig 46 /gang gi bgrod byed zung gi chu las skyes/ /rab dmar dbang gi rdul phreng sgyugs pa de/ /khengs ldan phyogs kyi sa 'dzin bye ba'i gtsug /kun las rnam par rgyal bar brtan gyur cig 47 /'phel zhing rgyas par gyur cig 'chi med tshe/ /rgud pa med pa'i chab srid mnga' thang dpal/ /rnam par gnon du med pa'i 'khor dang stobs/ /nub pa med par grags pa'i yi ge rnams/ 48 /rigs dang stobs dang dpung tshogs 'byor pa yis//khengs pas dregs pa rnams kyang rang dbang du/ /rtse gcig 'dun pa'i dmar mdangs mkhur tshos pa/ /'phos pa'i mdzes pa ci yang 'byung gyur cig /49 /chos dang srid kyi phrin las nam mkha'i mtha'/ /rtogs phyir ring du so snyam bgyid pa der//gegs byed mi dang mi min gnod pa rnams/ /nam yang 'jug pa'i go skabs ma gyur cig / 50 /tshul gnas thos bsam bsgom pa'i 'khor lo yis/ /lung dang rtogs pa'i rgyal srid chen po la/ /dbang mdzad chos kyi rgyal po mngon gyur nas/ /sa gsum bstan pa'i rgyal rnga brdung bar shog 51 /de lta'i byang chub sgrub pa la sdang ba'i/ /sdig pas snying nas bzung 'dra'i gdug can rnams/ /skad cig gson du rung na srung ma'i tshogs/ /dkar phyogs dga' ba'i ru mtshon ci ste sgreng / 52/lugs brgya dpyod pa'i blo gros ba ku la/ /'jam dpal byin rlabs sgeg mo'i 'gram chang gis//phye ba gang de'i sku tshe las dbang dang / /yon tan rgya mtsho'i dpal la spyod gyur cig/ /lus can yongs kyi bsod nams khang pa ru/ /bde skyid mgron du khugs pa'i 'chi med mgon/ /bstan srid lha yi gzhal med yangs po na/ /mkhyen pa'i mig stong 'dzum par ma gyur cig /59 /sa spyod mchog gi bsod nams g.yab mo yis/ /bos bzhin byon pa'i chos blon chen po rnams/ /dge ba bcu dang mthun pa'i bka' khrims kyis/ /khams gsum 'gro ba bde la dgod gyur cig /55/chos sbyin 'di yi las byed mgo 'dren du/ /'os pa'i yi ge dam pa gang gi gtsug /bab pa de yang skye nas skye ba ru/ /rgyal ba'i gsung rab kun la dbang 'byor shog /56 /rtags gsum sngon rjes 'jug dang bya byed las/ /dus gsum rnam dbye 'byed pa'i blo gros kyis/ /brda dag byed pa rnams ni byang chub bar/ /mchog gi bstan la bya ba byed gyur cig /57 /bzo gnas sbyangs pa'i mthar son sku gzugs dang / /yi ge'i rig byed 'dri 'don rko ba sogs/ /sgo gsum las kyi 'brel thogs thams cad kyang / /tshogs gnyis rdzogs pa'i 'bras bu mngon gyur cig /bdag kyang byang chub bar gyi skye ba'i phreng / /rnam gsum tshul khrims dag cing lung rigs dang //gdams pa mi zad rin chen mdzod bzung nas/ /bstan dang 'gro ba'i don chen byed gyur cig /57 /yongs rdzogs bstan pa'i glegs bam phreng ba dag /gang du bzhugs dang gang gis spyan 'dren mdzad/ /nyan dang klog dang mchod sbyin byed pa der/ /thog mtha' bar du dge ba'i bden pas skyong //mdor na spyi dang bye brag 'gro ba yi/ /mtshan nas smos dgu thams cad mthong ba'i chos/ /phyi mar bcas la mi bslu nges pa'i skyabs/ /dkon mchog gsum dang bral bar ma gyur cig /61 /mngon par mtho dang nges legs bsgrub pa'i rten/ / dal brgyad 'byor pa bcu dang mi 'bral zhing / /gang de 'jig pa'i chos su shes nas ni/ /dge ba'i snyeng po can du byed gyur cig62 /srid par 'ching ba'i 'khyud po khyod nyid ces/ /bdag don zhen la rnam pa brgyas smad cing / /gzhan don byang chub mchog tu smon pa dang / /'jug pa'i bsam pa rnam par dag gyur cig /63 /nyam thag dbul ba'i tshor ba dbugs 'byin slad/ /gtong phod phyag gi dpag bsam brkyang ba las/ /lan dang rnam smin re ba'i 'dogs thag gis/ /bcing ba med pa'i sbyin pa mthar phyin shog /69 /srid pa'i 'dun pas dben pa gzhan don du/ / byang chub 'dod pa'i mkhur tshos 'dzum bsu ba'i/ /bag yod sdom pa'i kA shi mdzes dga' mar/ /rnam gsum tshul khrims rgyan gyis bklub par shog /thos bsam bsgom pa'i dka' thub gdung ba dang / /gshe dang brdeg sogs gzhan gyis gtses pa rnams/ /chu la bris pa'i ri mo ji bzhin du//ma rmas bzod pa'i g.yar dam brtan par shog /66/bsreg za rab tu 'bar ba bud shing gis/ /tshim pa med ltar rgyal sras spyod pa'i khur/ /ji tsam lci la phyir zhing spro ba yis/ /de la 'jug pa'i brtson 'grus rtsom par shog /67 /'gro la snying rje shin tu mnyen ldan gyis//lan brgyar dkris nas bdag gi bde dge dang / /gzhan gyi sdug bsngal mnyam dang brje sems kyis/ /rang nyid gces pa'i mgo bo gnon par shog /68 /mtshan rtog tsher ma med pa'i zhi gnas dang / /gnas lugs brjod bral rtogs pa'i lhag mthong dag /ya bral med pa'i rtse gcig rnal 'byor gyis//bdag tu 'dzin pa drung nas 'byin par shog /sna tshogs thabs la mkhas pa'i dpung tshogs kyis/ /chos kun bdag med rnam par 'byed pa'i mtshon/ /gdengs pa tsam gyis nyon mongs dgra bo che/ /gzhom pa'i shes rab pha rol phyin par shog /70 /phongs phongs dbugs rab 'byen pa lag pa'i mthil/ /dmar dmar brtse ba'i tshon kyis byugs 'dra las/ /lhug lhug stsal ba'i zang zing sbyin pa yis/ /mang mang skye bo 'khor du sdud par shog /71 /de mthong dga' ba'i 'dzum dkar yid 'ong mas/ /bltas te chos dang thar pa'i phan yon dag /mchid du snyan par smra bas thams cad kyang / /dge ba'i phyogs su spro ba bskyed par shog /72 /zhum la gzengs bstod rgod la skyo ba bskyed/ /rmugs pa ngo mtshar gtam gyis brid byas nas/ /don spyod pa yis rang rang mos pa dang / /'tsham pa'i chos la legs par sbyar bar shog73 /lam la zhugs pa'i gang zag dge ba'i blo/ /brtan ldan bya ba'i ched du rang nyid kyang / sbyin sogs brtson pa'i don mthun bya ba yis/ /sems can yongs su smin par byed par shog /74 /bskal pa grangs med gsum gyi tshogs zung gi/ /rgya mtsho bsrubs pa'i snying po sa lam dang //'bras bu'i yon tan cha rdzogs rgyu skar bdag /mda' lnga'i mun pa kun las rgyal bar shog /75 /sgrib gnyis zad pa'i 'khor tshogs grangs med dbus/ /sku gnyis zung 'jug longs spyod rdzogs pa'i dpal/ /bden gnyis zung 'jug 'doms pa'i chos rnga che/ / don gnyis mtha' ru phyin pa mngon gyur cig /76 /zla ba gcig las ji snyed chu yi snod/ /de snyed gzugs su 'gog med ston bzhin du/ /gang de nyid las mchog gi sprul pa'i sku/ /'bad med 'jig rten kun du snang byed shog /77/gsang gsum yon tan mi zad yid bzhin gyi/ / nor bu bum pa bzang dang dpag bsam ltar/ /mchog dman bar ma'i gdul bya ji snyed kyi/ /re ba'i shing rta kun nas 'gengs par shog /78 /'jig rten gsum na mi bslu nges pa'i skyabs/ /dkon mchog gsum 'dra mi srid gtam gyi rnga/ /bden mtha' gsal bas lhang lhang brdung de yis//bdag gi smon lam snying pos lci gyur cig /76/bdag cag mos pa'i khang bzangs yangs par dad pa'i spos chus kun nas bran pa'i gnas 'di ru/ /dkar phyogs lha rnams rin chen gdugs dang rgyal mtshan thogs nas me tog sil mas mchod pa'i dbus/ /rgyal ba sras dang bcas pa mgrin bsgrigs swa ste dza ya snyan pa'i gling bu 'bum bsgyur nas//bstan pa dri med yun du gnas shing 'jig rten bde ba'i shis pa kun gyis skyong gyur cig /80/dga' ldan lha yi gzhal med nas 'phos 'dzam bu'i gling 'di dam pa'i snying pos phyi ba'i be+ed/ /lhums su zhugs dang pad+ma ltar 'khrungs gzhon nu rol rtsed mdzad dang btsun mo'i 'khor gyis bskor//nges par 'byung dang dka' ba rab spyad byang chub mchog brnyes bdud las rnam rgyal chos rab ston/ /sa gsum chos kyi snang bas khyab pa'i bkra shis dam pas 'di na shis pa'i 'bab stegs mdzod/ 81/ phyogs bcu rab 'byam mu dang mtha' yis thug pa med pa'i zhing na rab gshegs stobs bcu pa'i/ /mchu sgros mtsho skyes dmar po'i 'dab ma 'dzum las 'phos pa'i tshangs dbyangs rkang drug glu dang bcas/ /'gro khams mos par mi 'tsham med pa'i zab dang rgya che legs gsungs rtsi'i dga' ston gyis//rnam grol srog gi ka ba tshugs pa'i bkra shis dam pas skye dgu thams cad bde gyur cig 82/de skad bdag gis smras pa'i 'bras bu mi bslu nges par gsung gi rdo rje grub pa min/ /'chi med drang srong bden tshig grub pa'i ngag gi mtshon cha stor ba rnyed pa nyid kyang min//'on te sngon gyi 'jam dpal la sogs rgyal sras spyod pa'i smon lam rgya mtsho'i rjes zhugs nas/ /dge rtsa byang chub chen por smin byas ji ltar smon pa nam yang don med ma gyur cig 83/de ltar thams cad mkhyen pa chen po nyi ma'i gnyen gyi bka' lung spyi dang bye brag gi dgongs don ma lus pa rnam par 'grel pa'i bstan bcos 'gyur ro 'tshal gyi chos sbyin rgyun mi 'chad pa'i ngo mtshar 'phrul gye phyi mo rdzogs ldan bskal pa'i bsod nams kyi sprin phung rgyas par dkrigs pa zhes bya ba'i glegs bam gyi phreng ba brgya phrag gnyis la bkra shis pa'i rtags kyis nye bar lhag pa 'di ni/bcom ldan 'das thub pa'i dbang po'i mgur gyi bum pa bzang po las/ lung bstan gyi bdud rtsi nod pa'i rgyal tshab kyi skyes bu chen po/ mkhyen rab rgyal ba nyid las dmigs su med pa'i bdag nyid chen po dpal rdo rje 'chang kun dga' bzang po zhes phyogs thams cad du yongs su grags pa de nyid kyi zhabs stegs mi 'jigs gdong lnga'i dbang po rnam par bsgyings pa'i khri 'phang mthon po ga la ba der/'khor los mtshan pa'i zhabs zung nye bar bkod nas/ rnam par dkar ba'i phrin las kyi 'khor los 'chi med lam gyi mu mtha' gzhal ba snyam byed pa gang gi mtshan nas smos na mkhan chen 'jam pa'i dbyangs bkra shis lhun grub grags pa'i rgyal mtshan dpal bzang po pa'i zhal snga nas kyis/yongs rdzogs bstan pa'i dgongs 'grel chen po 'di dag par du brko ba cig byung na/ rgyal ba'i bstan pa rin po che 'jig rten gyi khams su yun ring por gnas pa'i rgyur 'gyur ba sogs phan yon dpag tu med pas sngon drangs pa'i bka' byed phebs par brten/kun mkhyen bu ram shing pa'i ring lugs dri ma med pa yongs su dar ba'i yul gru chen po nyid du ches cher bsngags pa rnams kyi nang gses bod chen por grags pa'i sa'i steng gi dkyil 'khor phal che ba dag /chos tshul dge ba bcu dang mthun pa'i phrin las dang stobs kyi 'khor los mnga' sgyur zhing khyad par gnam gyis bskos pa shar phyogs gong ma chen po'i las lung gis bod chen ljongs kyi skye 'gro spyi'i rje bor mnga' gsol ba'i sde dge sa spyod chen po bstan pa tshe ring zhes grags pa'i rnga gsang phyogs kyi kho ra khor yug dag tu khyab pa de nyid kyis/ya rabs dam pa'i spyod tshul bsngags par 'os pa rnams kyi nang nas kyang bla ma'i bka' tshul bzhin du bsgrub pa de ni ches mchog tu gyur pa'i lung rigs kyi nor bu dam par thugs la bcang nas/mkhan chen dam pa'i bka' stsal ji ltar phebs pa de ltar bsgrub par zhal gyis 'ches te/ dmar ser zhes pa me sbrul gyi lo'i zla tshes dge ba nas las kyi dbu tshugs par mdzad/ de nas brtsams te snying stobs rmad du byung ba'i khur gyis bya ba 'di nyid kyi thog mtha' bar gsum du 'grub par byed pa'i bdag po'i rkyen ni gang de'i rigs sras dri ma med pa bod chen ljongs kyi skye 'gro spyi'i bsod nams dang dbang thang gi rin chen phung po gcig tu srungs pa'i khri 'phang mthon po la/lha dang mi'i mchod pa'i bye brag bsam gyis mi khyab pa dang bcas pas phyogs thams cad las rnam par rgyal bar mnga' gsol ba'i tshe na chos dang srid kyi phrin las 'khor lo rtsibs stong dang ldan pa phyogs kyi mthar bgrod pa can sde dge bla ma kun dga' phrin las rgya mtsho'i sde zhes yongs su grags pa 'di nyid kyi las dbang dang bsod nams gzhal du med pa'i gser ldan dga' ma'i lto ba yangs par/sngon chad gang gis bskrun par ma nus pa'i legs byas kyi rgya mtsho chen po 'di nyid kyi khur yongs su 'dzin pa la spro ba mchog gi rtse mor 'dzeg par gyur te/ bzhed pa tshul bzhin du sgrub pa'i phrin las kyi kha lo sgyur zhing /las byed rnams kyi mgo 'dzin par/ phyag mdzod 'gu ru bkra shis dang / gnyer pa a zlos dang / dge slong tshul khrims rab brtan/par dpon gzungs skyabs rnams dang / zhus dag pa bdag dang / de'i grogs ldan pa rmugs sangs sbyin pa rgya mtsho/spo lu'i drung yig blo gros rgyal mtshanaske/ lcags ra'i dge bshes bstan 'dzin lhun grub/ 'dzom thog pa o rgyan bkra shis rnams dang bcas te/ phyi mo khungs thub rgyas bsdus cha gsum tsam dang zhib par gtugs nas zhu dag nan cher bgyis nas stod smad phyogs kyi smyug 'dzin pa brgyad cu kha yar dang /par mkhan brgya phrag lnga tsam bsags nas/ rnga chen zhes pa chu pho khye'i gnam lo gsar du shar ba'i zla tshes dge bar/mkhas shing grub pa'i skyes chen bgrang ba las 'das pa byon pa dang 'byon pa dang 'byon 'gyur ba'i gdan sa chen po dpal sde dge lhun grub steng gi rgyal khab chen por legs par grub par bgyis pa phyogs thams cad du dar zhing rgyas par gyur cig /ces pa thams cad mkhyen pa chen po nyi ma'i gnyen gyi bka' spyi dang bye brag gi dgongs pa ma lus pa rnam par 'grel pa'i bstan bcos 'gyur ro 'tshal gyi chos sbyin rgyun mi 'chad pa'i phyi mo rdzogs ldan bskal pa'i bsod nams kyi sprin phung rgyas par dkrigs pa 'di dag yongs su rdzogs par grub pa'i bsngo ba smon lam gyi tshigs su bcad pa gzhi lam 'bras bu'i dge legs yid gcugs mdza' bo 'gugs pa'i rgyang glu zhes bya ba par byang mdor bsdus tsam dang bcas pa 'di ni/zhu dag pa ban+de tshul khrims rin chen nam/'byung du rung ba'i yon tan la smon pa'i tha snyad du ngag gi dbang po 'jigs bral phyogs las rnam par rgyal ba'i lha dbyangs can snyems pa'i lang tsho'i sde zhes btags pa'i snyom las pa des/nam mkha' lding gi 'phur lding la bung ba gzhon nus 'gran pa bzhin du smras pa dge legs 'phel bar gyur cig/ //yang smras pa/ lhung lhung snyan pa'i sgrar bcas 'bab pa'i klung //drang srong khros pa'i dmod pas ma bcings na/ /skal ldan shing rta'i re ba rdzogs byed pa'i/ /lam gsum dri ma sbyong byed de rmad byung / /zhes so/ /sarba mang+ga lo// //