CLOSE WINDOW

D4358
བོད་ཡིག

@##/ /rgya gar skad du/ Ar+ya san+d+hi nir mo tsa naM sU tra s+ya byA khyA na ma/ bod skad du/ 'phags pa dgongs pa nges par 'grel pa'i mdo'i rnam par bshad pa/ dkon mchog gsum la phyag 'tshal lo//'phags pa dgongs pa nges par 'grel pa'i mdo 'di ni mdor bsdu na don rnam pa lngas bstan te/ bsdus pa'i don dang / dgos pa dang / tshig gi don dang / mtshams sbyar ba dang / brgal ba'i don to/ /de la re zhig bsdus pa'i don ni rnam pa gnyis te/ gleng gzhi'i khyad par rnam par gzhag pa dang / mdo sde'i lus rnam par gzhag pa'o/ /de la gleng gzhi'i khyad par rnam par gzhag pa yang rnam pa gnyis te/thun mong gi gleng gzhi'i khyad par rnam par gzhag pa dang / thun mong ma yin pa'i gleng gzhi'i khyad par rnam par gzhag pa'o/ / de la thun mong gi gleng gzhi'i khyad par rnam par gzhag pa ni gang gi dus na/ gang gis bshad pa'i mdo sde thams cad kyi thun mong gi gleng gzhi'i khyad par rnam par gzhag pa'o/ /de yang phun sum tshogs pa rnam pa gnyis kyis bstan te/dus phun sum tshogs pa dang / ston pa phun sum tshogs pa'o/ /de la gang gi dus na bshad ce na/ dus phun sum tshogs pa nas te / de ni mdo las/'di skad bdag gis thos pa dus gcig na zhes gsungs pas bstan te/ de'i phun sum tshogs pa ni de bzhin gshegs pa 'jig rten du byung zhing mdo sde dkon mchog 'di lta bu dag mngon sum du thos pa'i skabs yod pa'o//gang gis bshad ce na ston pa phun sum tshogs pa ste/ de yang mdo las/ bcom ldan 'das zhes gsungs pas bstan te/ de'i phun sum tshogs pa ni legs pa drug dang ldan pa dang /bdud bzhi bcom pa la sogs pa bcom ldan 'das nyid kyi rgyud la mnga' ba'i yon tan dang ldan pa'o/ /de gnyis ni mdo sde thams cad la spyir 'dra bar bstan pa yin pas thun mong gi gleng gzhi'i khyad par rnam par gzhag pa zhes bya'o//de la thun mong ma yin pa'i gleng gzhi'i khyad par rnam par gzhag pa ni gang na ci 'dra ba zhig ji lta bu dag dang bzhugs pa'i rim gyis mdo sde'i gleng gzhi'i khyad par rnam par gzhag pa'o/ /de ni phun sum tshogs pa rnam pa gsum gyis bstan te/bcom ldan 'das kyi gnas phun sum tshogs pa dang / yon tan phun sum tshogs pa dang / 'khor phun sum tshogs pa'o/ /de la gang la bzhugs she na/ gnas phun sum tshogs pa ste/ de ni mdo las gzhal med khang chen po zhes gsungs pas bstan to//de'i phun sum tshogs pa ni mdo las/ rin po che sna bdun mchog tu 'bar ba bkod pa 'jig rten gyi khams dpag tu med pa rgyas par 'gengs pa'i 'od zer rgya chen po rab tu 'byung ba zhes bya ba nas rin po che'i pad+ma'i rgyal po chen po yon tan mtha' yas pas brgyan pa'i bkod pa la brten nas bzhugs te zhes gsungs pa'i bar gyi yon tan dang ldan pa'o//ci 'dra ba cig bzhugs she na/ yon tan phun sum tshogs pas te/ de ni mdo las bcom ldan 'das zhes gsungs pas bstan to/ /de'i phun sum tshogs pa ni mdo las/ legs par thugs su chud pa'i blo dang ldan pa zhes bya ba nas/nam mkha'i khams kyi mthas gtugs pa de zhes gsungs pa'i bar gyi yon tan dang ldan pa'o/ /de ji lta bu dag dang bzhugs she na/ 'khor phun sum tshogs pa dag dang ste/ de la 'khor phun sum tshogs pa ni rnam pa gnyis te/nyan thos kyi 'khor phun sum tshogs pa dang / byang chub sems dpa'i 'khor phun sum tshogs pa'o/ /de la nyan thos kyi 'khor phun sum tshogs pa ni mdo las/ nyan thos kyi dge 'dun tshad med pa thams cad kyang cang shes pa zhes gsungs pas bstan to/ /de'i phun sum tshogs pa ni mdo las/sangs rgyas kyi sras zhes bya ba nas/ de bzhin gshegs pa'i bka' la shin tu zhugs pa sha stag ces gsungs pa'i bar gyi yon tan dang ldan pa'o/ /byang chub sems dpa'i 'khor phun sum tshogs pa ni mdo las/ sangs rgyas kyi zhing tha dad pa nas 'dus pa'i byang chub sems dpa' dpag tu med pa thams cad kyang gnas chen po la yang dag par zhugs pa zhes bya bas bstan to//de'i phun sum tshogs pa ni mdo las/ theg pa chen po'i chos kyi nges par 'byung ba zhes bya ba nas sems can thams cad kyi gnod pa thams cad rab tu zhi bar byed pa'i sa mngon du gyur pa sha stag ces gsungs pa'i bar gyi yon tan dang ldan pa'o//de ni mdo sde thams cad la spyir 'dra bar bstan pa ma yin gyi/ 'phags pa dgongs pa nges par 'grel pa'i mdo 'di la sogs pa kha cig gi gleng gzhi'i khyad par can yin pas na/thun mong ma yin pa'i gleng gzhi'i khyad par rnam par gzhag pa zhes bya ba ste/ de ni re zhig gleng gzhi'i khyad par rnam par gzhag pas bsdus pa'i don bstan pa yin no/ /de la mdo sde'i lus rnam par gzhag pa ni/ 'phags pa dgongs pa nges par 'grel pa'i mdo 'di'i mdo sde'i lus rnam par gzhag pa mtha' dag gi bden pa gnyis po don dam pa'i bden pa dang kun rdzob kyi bden pa'i mtshan nyid yongs su shes par bya ba bstan pa'o//de la don dam pa'i bden pa ni mtshan nyid lnga dang ldan par shes par bya ste / brjod du med pa'i mtshan nyid dang /gnyis su med pa'i mtshan nyid dang / rtog ge'i spyod yul las yang dag par 'das pa'i mtshan nyid dang / tha dad pa dang tha dad pa ma yin pa nyid las yang dag par 'das pa'i mtshan nyid dang / thams cad du ro gcig pa'i mtshan nyid do/ /kun rdzob kyi bden pa ni mtshan nyid drug dang ldan par shes par bya ste/sems kyi mtshan nyid dang / chos rnams kyi mtshan nyid dang / chos rnams kyi ngo bo nyid med pa'i mtshan nyid dang / chos gdags pa rnam par gzhag pa las brtsams nas rnal 'byor gyis yongs su bsdus pa'i zhi gnas dang lhag mthong gi lam gyis rab tu dbye ba dang theg pa rnam par gzhag pa las brtsams nas theg pa ji lta ba bzhin du rnam par dbye ba bstan pa dang /theg pa gdags pa rnam par gzhag pa kho na las brtsams nas de bzhin gshegs pa'i bya ba sgrub pa'i rab tu dbye bas bstan pa ste/ mtshan nyid bcu gcig po de dag ni mdo las/de nas byang chub sems dpa' tshul bzhin kun 'dris kyis brjod du med pa dang / gnyis su med pa'i mtshan nyid don dam pa las brtsams te/ byang chub sems dpa' don zab dgongs pa nges par 'grel pa la dri ba dris pa zhes gsungs pa la sogs pa mdo sde'i lus rnam par gzhag pa'i le'u bcu 'byung ba las don dam pa'i mtshan nyid dang po gnyis ni le'u dang po sbyar ro//mtshan nyid lhag ma dgu ni le'u lhag ma dgu dang go rims bzhin du 'og nas rgya cher ston te/ de ni mdo sde'i lus rnam par gzhag pas bsdus pa'i don bstan pa yin no//de la dgos pa ni 'phags pa dgongs pa nges par 'grel pa'i mdo bstan pa 'dis de bzhin gshegs pa'i dgongs pa nges par dgrol ba dang bden pa gnyis kyi mtshan nyid la mkhas par bya ba dang / tshogs gnyis rdzogs par bya ba dang / bdag med pa gnyis chud par bya ba dang /sgrib pa gnyis spong ba dang / 'bras bu phun sum tshogs pa gnyis thob par 'gyur ba ste/ des ni dgongs pa'i ngo bo nyid dang / rgyu dang 'bras bu phun sum tshogs pa bstan to/ /de la tshig gi don ni 'di skad bdag gis thos pa dus gcig na zhes bya ba la sogs pa mdo sde'i lus mtha' dag gi ming dang tshig dang yi ge'i tshogs rnams kyi tshig gi don so sor ston pa'o//de la mtshams sbyar ba ni tshig gi don de dag gi snga ma dang sbyor ba dang / tshig phyi ma dang sbyor ba'i go rims snga phyi mi 'gal bar mtshams sbyor ba'o/ /brgal ba'i lan ni rigs pa dang mi 'gal bar bstan pa'i phyir gzhan gyis dris pa'i lan gdab pa dang /nyid kyi dogs pa bsu zhing gtan tshigs kyis dgrol ba la sogs pas the tshom gyi rnam pa thams cad gcod pa ste/ de ltar na dgos pa dang / tshig gi don dang / mtshams sbyar ba dang / brgal ba'i lan de dag ni mdo sde'i mgo 'jug gi lus mtha' dag dang spyir mthun mthun du sbyar te bstan pa yin gyi gnas skabs so sor dbye ba ni med do//de la dang por bsdus pa'i don ma bstan na mdo sde'i don bde blag tu khong du chud par mi 'gyur bas de'i phyir de rnam par bsal ba'i phyir dang por bsdus pa'i don bstan to//de'i 'og tu dgos pa ma bstan na nyan pa po rtog pa sngon du gtong ba dag nan tan gyis nyan pa po la sogs par khas mi len pas de'i phyir de rnam par bsal ba'i phyir de'i 'og tu dgos pa bstan to/ /de'i 'og tu tshig don ma bstan na nyan pa po shes rab rtul po de dag la rmongs par 'gyur bas de'i phyir de rnam par bsal ba'i phyir de'i 'og tu tshig gi don bstan to//de'i 'og tu mtshams sbyar ba ma bstan na smyon tshig ltar snga phyi 'brel ba med par 'gyur bas de'i phyir de rnam par bsal ba'i phyir de'i 'og tu mtshams sbyar ba bstan to//de'i 'og tu brgal ba'i lan ma brjod na rigs pas ma grol bas thams cad the tshom za bar 'gyur bas de'i phyir de rnam par bsal ba'i phyir de'i 'og tu brgal ba'i lan brjod de/ de ltar rnam pa lnga po de dag ni nges pa kho nar brjod par bya ba'i rtsis mgo yin no//de la mdo sde 'di'i ming 'phags pa dgongs pa nges par 'grel pa zhes bya ba ni don bzhin mdo sde'i ming du btags pa yin te/ de yang gsung rab tu gtogs pa'i mdo sde thams cad kyi ming mdor bsdu na gnas skabs rnam pa bzhi las btags pa yin te/ yul dang / gang zag dang / dpe dang / don gyi gnas skabs las so/ / de la yul gyi gnas skabs las btags pa ni yul gang du bshad pa'i gnas skabs las mdo sde'i ming du btags pa ste/ dper na lang ka'i grong rdal dang / ga ya mgo'i rir bshad pas 'phags pa lang kar gshegs pa dang /ga ya mgo'i ri zhes mdo sde'i ming du btags pa la sogs pa lta bu'o/ /gang zag gi gnas skabs las btags pa ni gang zag gang gis zhus pa dang bstan pa'i gnas skabs las mdo sde'i ming du btags pa ste/ dper na byang chub sems dpa' gtsug na rin po ches zhus pa dang /dri ma med par grags pas bstan pas 'phags pa gtsug na rin po ches zhus pa dang / dri ma med par grags pas bstan pa zhes mdo sde'i ming du btags pa la sogs pa lta bu'o/ /dpe'i gnas skabs las btags pa ni dpe gang gis don mtshon pa'i gnas skabs las mdo sde'i ming du btags pa ste/dper na sA lu'i ljang pa dang / rdo rje rnon po'i dpes mtshon te bshad pas 'phags pa sA lu'i ljang pa dang / rdo rje gcod pa zhes mdo sde'i ming du btags pa la sogs pa lta bu'o/ /don gyi gnas skabs las btags pa ni don gang gis bstan pa'i gnas skabs las mdo sde'i ming du btags pa ste/dper na shes rab kyi pha rol tu phyin pa dang / sangs rgyas kyis bstan pas 'phags pa shes rab kyi pha rol tu phyin pa dang / sangs rgyas kyi sa zhes mdo sde'i ming du btags pa lta bu'o/ / 'phags pa dgongs pa nges par 'grel pa'i mdo 'di yang don gyi gnas skabs las btags pa yin te/ 'dis de bzhin gshegs pa'i dgongs pa dang ldem por dgongs pa zab mo'i don nges par gtan la 'bebs shing nyon mongs pa dang shes bya'i sgrib pa'i mdud pa ma lus pa gcod pas 'phags pa dgongs pa nges par 'grel pa zhes mdo sde'i ming du btags pa yin te/dper na rten cing 'brel par 'byung ba dang / rin po che phrogs pa zhes bya ba la sogs pa'i mdo dang 'dra bar blta bar bya'o/ /de la 'phags pa zhes bya ba ni sdig pa mi dge ba'i chos thams cad las ring du gyur pa zhes bya ba'i don to//dgongs pa zhes bya ba ni de bzhin gshegs pa'i dgongs pa dang ldem por dgongs pa zab mo dag go/ /yang tshig gi don rnam pa gcig tu na nyon mongs pa dang / shes bya'i sgrib pa'i mdud pa la yang bya'o/ /nges par 'grel pa zhes bya ba ni nges par gtan la 'bebs pa ste/de bzhin gshegs pa'i dgongs pa dang ldem por dgongs pa zab mo'i don nges par gtan la 'bebs pa zhes bya ba'i tha tshig go/ /yang tshig gi don rnams gcig tu na ma lus par gcod pa'i don te/ nyon mongs pa dang shes bya'i sgrib pa'i mdud pa ma lus par gcod pa zhes bya ba'i tha tshig go//de la tshig gi don spyir bsdu na de bzhin gshegs pa'i dgongs pa zab mo nges par bkrol bas nyon mongs pa dang shes bya'i sgrib pa'i mdud pa ma lus par gcod pas na/ de ni dgongs pa nges par 'grel pa yang yin la/ mdud pa ma lus par gcod pa yang yin no zhes bya bar sbyar ro/ /theg pa chen po'i mdo zhes bya ba'i mdo sde gzhan dag las grags pa dang 'dra bar sbyar te/ theg pa zhes bya ba ni 'di las 'gro bar byed pas theg pa'am bgrod par bya ba yin pas theg pa ste/ lam dang 'bras bur 'brel pa'i theg pa zhes bya bar sbyar ro//chen po zhes bya ba ni nyan thos la sogs pa'i theg pa las chen po rnam pa bdun po chos chen po dang / sems bskyed pa chen po dang / mos pa chen po dang / lhag pa'i bsam pa chen po dang / tshogs pa chen po dang / dus chen po dang / yang dag par 'grub pa chen pos khyad par du 'phags pas na byang chub sems dpa' rnams kyi theg pa ni theg pa chen po zhes bya'o/ /chen po bdun po de dag las dang po drug ni tha ma'i rgyur gyur pa yin la/ tha ma ni dang po drug gi 'bras bur gyur par rig par bya'o/ / mdo sde zhes bya ba ni don mdo tsam du ston par byed pas mdo'o/ /yang gcig tu na skud pa'i gzungs kyi me tog phreng mang po'i rgyun 'dzin pa bzhin du don mdo tsam du ston pa'i mdo sde 'dis chos mngon pa'i don glag glag po mang po dag 'dzin pas na mdo zhes bya'o/ /de ltar na mdo sde'i ming bstan pa'i skabs 'di nyid kyis brjod par bya ba dang /dgos pa'i yang dgos pa dang / 'brel pa'i 'brel pa bstan pa yin te/ byang chub sems dpa'i sde snod du gtogs pa theg pa chen po'i mdo/ 'phags pa dgongs pa nges par 'grel pa zhes bya ba'i tshig gi don ji skad bstan pa de nyid brjod par bya ba yin pas brjod par bya ba'i don med pa'i mdo stong pa se'u bcu zhes bya ba la sogs pa lta bu yang ma yin la/de bzhin gshegs pa'i dgongs pa zab mo nges par bkrol bas nyon mongs pa dang shes bya'i sgrib pa'i mdud pa ma lus par gcod pa de nyid dgos pa'i yang dgos pa yin pas dgos pa'i 'bras bu med pa'i tshig kyal pa bya rog gi so brtag pa lta bu yang ma yin/'gro bar byed pa'i theg pa'i thabs dang bgrod par bya ba'i theg pa'i thabs las byung bar 'brel pa de nyid 'brel pa yin pas brjod par bya ba dang / dgos par 'brel pa med pa klu 'jog po'i gtsug gi nor bu lta bu yang ma yin te/de ltar na mdo 'di ni brjod par bya ba'i don kyang yod la/ dgos pa'i 'bras bu yang yod/ thob pa'i bya ba thabs kyi 'brel pa yang yod pa yin pas/ rnal 'byor dam pas bdag la phan par 'dod pa/ 'gro ba mtha' dag gi don gtso bor byed pa/bla na med pa'i byang chub kyi 'bras bu mchog 'dod pa rnams kyis 'di la dad pa mchog gi gnas yin par mos pa bskyed cing mi g.yel bar nan tan gyi snying por bsgrub par bya'o/ /de ltar mi slu ba'i gtam glengs nas/ da ni gleng gzhi'i khyad par gzhag pa'i tshig gi don la sogs pa bshad par bya ste/de la gleng gzhi ni gang du don 'brel par byed cing sbyor bar byed pa'am/ yang na phan tshun nges par sbyin pa 'byung bar 'gyur ba ni gleng gzhi zhes bya'o/ /de yang gang gi dus na gang gis bshad pas thun mong gi gleng gzhi'i khyad par rnam par gzhag pa dang /gang na ci 'dra ba zhig ji lta bu dag dang bzhugs pa'i rim gyis thun mong ma yin pa'i gleng gzhi'i khyad par rnam par gzhag pa gang yin pa'o/ /de la dang por gang gi dus na gang gis bshad pas thun mong gi gleng gzhi'i khyad par rnam par gzhag par bshad par bya ste/de yang phun sum tshogs pa rnam pa gnyis kyis bstan te/ dus phun sum tshogs pa dang / ston pa phun sum tshogs pa'o/ /de la gang gi dus na bshad ce na dus phun sum tshogs pa na ste / de'i phyir de bstan pa'i dbang du mdzad nas/ 'di skad bdag gis thos pa'i dus gcig na zhes bya ba gsungs so// de la 'di skad ces bya ba'i tshig gi phrad 'di dpe dang / lung 'bogs pa dang / dris pa gtan la rnam par 'bebs pa dang / khas len pa dang / tshig gi lan dag la 'byung bar 'gyur te/ de la dpe la ni phyug pa la rnam thos kyi bu lta bu zhes byas na rnam thos kyi bu dang 'dra bar shes pa lta bu'o//lung 'bogs pa la ni/ 'di skad lhogs shig ces bya ba lta bu'o/ /dris pa rnam par gtan la 'bebs pa la ni bdag gis 'di skad thos te de bzhin du bshad do zhes bya ba lta bu'o/ /khas len pa la ni de bzhin bya'o zhes bya ba lta bu'o/ / tshig gi lan la ni de de lta'o zhes bya ba lta bu ste/ de ltar rnam pa mang du yang 'dren mod kyi skabs 'dir ni 'di skad ces bya ba'i tshig gi phrad 'di khas len pa la bya bar shes par bya ste/ de yang yang dag par sdud par byed pa'i byang chub sems dpa' rnams kyis byang chub sems dpa' la khyod kyis ji skad thos pa de bzhin bshad par gsol zhes gsol ba btab pa dang /des bdag gis ji skad thos pa de bzhin bshad par bya'o zhes khas blangs pa'o/ /yang na ji skad smras pa de kho na bzhin du bdag gis 'di skad thos te de bzhin bstan par bya'o//gzhan du ma yin no zhes nges par bya ba ste/ des ni yan lag gzhan gyis sgro 'dogs pa dang skur pa 'debs pa'i mtha' bsal bar dgongs pa yin no/ /bdag gis zhes bya ba ni bdag nyid kyis bcom ldan 'das las mngon sum du ste/ gzhan las gcig nas gcig tu brgyud pa ma yin pa'o//thos pa zhes bya ba ni nyan nus pa'i rna ba'i dbang pos zin pa ste/ 'dis kyang yan lag gzhan gyi sgro 'dogs pa dang skur pa 'debs pa'i nges pa sel te/ byis pa gang dag nyan mi nus pa de dag ni yan lag la sgro 'dogs pa'am / skur pa 'debs par byed kyi 'di ni de lta ma yin pa'i phyir ro//dus gcig na zhes bya ba ni dus gcig gi tshe ste/ de yang nyan pa'i tshe bar chad med pa'i rgyun la dus gcig ces bya'i/ gzhan du na yi ge dang / rtsa ba dang / tshig gzung ba'i dus tha dad pa'i phyir cig car byar mi rung ngo / /yang na gzungs thob pas yi ge 'bru gcig la chos thams cad kyi rnam grangs yang dag par 'dzin pa'i phyir dus gcig kho na yang yin no//yang gcig tu na rna ba'i dbang po rnam par dag pa thob pas yi ge 'bru gcig yongs su rtogs pas gzhan la yang thogs pa med pa'i phyir yang dus gcig kho na yin no//yang rnam grangs gzhan du na dus zhes bya ba'i tshogs pa la bya ste/ dus gcig na bcom ldan 'das 'khor dang bcas pa tshogs so zhes tshig 'og ma dang sbyar ro/ /de ni dus phun sum tshogs pa yin te / de'i phun sum tshogs pa ni de bzhin gshegs pa 'jig rten du byung zhing /mdo sde dkon mchog 'di lta bu dag mngon sum du thos pa'i skabs yod pa'o/ /gal te de ltar na yang rdzogs ldan gyi dus la sogs pa ni skye dgu'i tshe lo dpag tu med cing longs spyod kyi 'byor pa phun sum tshogs pa yang yin pas dus phun sum tshogs pa zhes gdags su rung gi /'di'i tshe ni rtsod pa'i dus la bab ste/ snyigs ma lnga bdo ba yin na ji ltar dus phun sum tshogs pa gdags su rung zhe na/ rdzogs ldan gyi dus la sogs pa'i tshe na skye dgu'i tshe lo dpag tu med cing longs spyod kyi 'byor ba phun sum tshogs pa yin yang skye dgu gcig tu bag med par spyod cing /dkon mchog gsum gyi mtshan yang mi grag pa yin pas dus phun sum tshogs pa zhes mi gdags la/ dus mtha'i tshe na ni nad la sogs pa'i bar gyi bskal pas g.yen spyo zhing dge ba'i ming yang mi grag pas de ni dus kyi tha chad yin gyi/'di'i tshe na rtsod pa'i dus la bab tu zin kyang de bzhin gshegs pa 'jig rten du byung zhing mdo sde dkon mchog 'di lta bu dag mngon sum du thos pa'i skabs yod pa dang / mngon par rtogs pa mang ba dang / gang gis dkon mchog gsum gyi mtshan thos pa tsam dang / se gol gtogs pa'i yud tsam zhig dge ba'i sems bskyed pa de dag thams cad kyang dus gzhan na bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro zhes de bzhin gshegs pas lung ston pa'i gnas skabs yin pas gcig tu snyigs ma lnga bdo ba yang ma yin pas de'i phyir dus phun sum tshogs pa zhes gdags su rung ngo //gang gis bshad ce na/ ston pa phun sum tshogs pa ste/ de'i phyir de bstan pa'i dbang du mdzad nas/ bcom ldan 'das zhes bya ba gsungs so/ /de la bcom ldan 'das zhes bya ba ni legs pa rnam pa drug po rang dbang dang /rab tu sbyangs pa dang / gzugs bzang ba dang / grags pa dang / dpal dang / che ba nyid sogs pa la bya ste/ sgra nges par sbyor ba las ji skad du/ rang dbang dang ni rab sbyangs dang / /gzugs bzang ba dang grags pa dang / /dpal dang che ba nyid sogs pa//drug po rnams la legs bshad ni/ /zhes 'byung ba lta bu'o/ /de dag thams cad de bzhin gshegs pa la rnam pa thams cad du bral ba med de mnga' bas na de'i phyir de bzhin gshegs pa la bcom ldan 'das zhes bya'o/ /de la rang dbang ji lta bu na nyon mongs pas gzhan gyi dbang du 'gyur ba med pa'i phyir ro//rab tu sbyangs pa ni ye shes kyi me'i gdung bas nyon mongs pa'i bud shing rab tu bsregs pa'i phyir ro/ /gzugs bzang ba ni skyes bu chen po'i mtshan mchog sum cu rtsa gnyis la sogs pa mnga' ba'i phyir ro//grags pa ni yon tan gyi khyad par thams cad phun sum tshogs pa'i phyir ro/ /dpal ni 'gro ba thams cad kyis bsten par bya ba yin pa'i phyir ro/ /che ba nyid ni sems can thams cad la rnam pa thams cad du phan pa dang bde ba mdzad pa rgyun mi 'chad par sbyor ba'i phyir ro//tshogs pa zhes bya ba ni ldan pa'i don to/ / rang dbang la sogs pa drug car dang sbyar ro/ /yang tshig gi don rnam pa gcig tu na/ bdud bzhi bcom pas na bcom ldan 'das zhes bya ste/ bdud bzhi ni phung po'i bdud dang / 'chi bdag gi bdud dang / nyon mongs pa'i bdud dang /lha'i bu'i bdud do/ /bcom ldan 'das ni zag pa bzhi po lta ba'i zag pa dang / sred pa'i zag pa dang / ma rig pa'i zag pa dang / 'dod pa'i zag pa zad pas de dag go rims bzhin du bcom par rig par bya'o/ /de ni ston pa phun sum tshogs pa yin te/ de'i phun sum tshogs pa ni legs pa drug dang ldan pa dang bdud bzhi bcom pa la sogs pa bcom ldan 'das nyid kyi rgyud la mnga' ba'i yon tan dang ldan pa'o/ /de ltar dus phun sum tshogs pa dang / ston pa phun sum tshogs pa de gnyis ni mdo sde thams cad spyir 'dra bar bstan pa yin pas na thun mong gi gleng gzhi'i khyad par rnam par gzhag pa zhes bya'o//thun mong gi gleng gzhi'i khyad par rnam par gzhag pa'i tshig gi don la sogs pa bshad zin to// //de ltar thun mong gi gleng gzhi'i khyad par rnam par gzhag pa bstan nas/ da ni thun mong ma yin pa'i gleng gzhi'i khyad par rnam par gzhag pa'i tshig gi don la sogs pa bshad par bya ste/de yang gang na ci 'dra ba zhig ji lta bu dag dang bzhugs pa'i rim gyis mdo 'di'i gleng gzhi'i khyad par rnam par gzhag pa'o/ /de ni phun sum tshogs pa rnam pa gsum gyis bstan de / bcom ldan 'das kyi gnas phun sum tshogs pa dang /yon tan phun sum tshogs pa dang / 'khor phun sum tshogs pa dang / de la gang na bzhugs she na/ gnas phun sum tshogs pa na ste/ de'i phyir de bstan pa'i dbang du mdzad nas gzhal med khang chen po zhes bya ba gsungs so/ /de la bcom ldan 'das kyi gnas phun sum tshogs pa ni sangs rgyas kyi zhing yongs su dag pa ste/gzhal med khang chen po bya ba'i sgra nyid kyis bstan to/ /de ni dang po kho nas bstan dgos te/ 'jig rten pa thams cad las 'das pa thams cad mkhyen pa'i gnas yin no zhes yang dag par bstan pa'i phyir ro//de bstan pa yang gdul bya rnams de la mos pa bskyed pa dang / sangs rgyas kyi zhing yongs su dag par skye bar smon lam 'debs pa dang / rgya chen po la mos pa'i byang chub sems dpa' rnams dga' ba yang dag par bskyed pa dang / lhag pa'i bsam pa la mos pa rnams kyi lhag pa'i bsam pa'i khams bstan par bya ba dang /gang du bzhugs te chos dkon mchog 'di bshad pa'i gnas de yang dag par bstan pa'i phyir te/ gzhan du na gang du bzhugs te bshad pa mi shes pas kun la the tshom du 'gyur ro/ /de'i phun sum tshogs pa ni rnam pa bco brgyad du rig par bya ste/kha dog phun sum tshogs pa dang / dbyibs phun sum tshogs pa dang / tshad phun sum tshogs pa dang / yul phun sum tshogs pa dang / rgyu phun sum tshogs pa dang / rang bzhin phun sum tshogs pa dang / bdag po phun sum tshogs pa dang / zham 'bring ba phun sum tshogs pa dang /phyogs phun sum tshogs pa dang / longs spyod phun sum tshogs pa dang / bya ba sgrub pa phun sum tshogs pa dang / 'tshe ba med pa phun sum tshogs pa dang / phyir rgol ba med pa phun sum tshogs pa dang / gnas phun sum tshogs pa dang / bdag po'i gnas kyi bye brag phun sum tshogs pa dang /bzhon pa phun sum tshogs pa dang / sgo phun sum tshogs pa dang / rten phun sum tshogs pa'o/ /phun sum tshogs pa rnam pa bco brgyad po de dag ni mdo las/ rin po che sna bdun mchog tu 'bar ba bkod pa/ 'jig rten gyi khams dpag tu med pa rgyas par 'gengs pa'i 'od zer chen po rab tu byung ba zhes bya ba nas/rin po che'i pad+ma'i rgyal po yon tan mtha' yas pas brgyan pa'i bkod pa la brten pa na bzhugs te zhes gsungs pa'i bar gyi tshig bcu dgu las kha dog phun sum tshogs pa ni mdo'i tshig dang po gnyis dang sbyar ro//dbyibs phun sum tshogs pa la sogs pa lhag ma rnams ni mdo'i tshig lhag ma rnams dang go rims bzhin du sbyar ro/ /de la dang po kha dog phun sum tshogs pa bstan pa'i dbang du mdzad nas/ rin po che sna bdun mchog tu 'bar ba bkod pa 'jig rten gyi khams dpag tu med pa rgyas par 'gengs pa'i 'od zer chen po rab tu 'byung ba zhes bya ba gsungs so//de la rin po che sna bdun zhes bya ba ni gser dang / dngul dang / bai DUR+Ya dang / spug dang / rdo'i snying po dang / mu tig dmar po dang / ke ke ru'o/ /mchog tu 'bar ba zhes bya ba ni rin po che sna bdun po de dag nyid kha dog mchog tu 'bar ba'o//yang na gzhal med khang chen po'i khyad par de nyid rin po che sna bdun po de dag gi kha dog mchog tu 'bar ba la yang bya'o/ /bkod pa zhes bya ba ni rgyan gyi khyad par gzhan te/ gzhal med khang chen po de nyid rgyan gyi khyad par gzhan dang yang ldan no zhes bya bar sbyar ro//'jig rten gyi khams dpag tu med pa rgyas par 'gengs pa'i 'od zer zhes bya ba ni de ltar mchog tu 'bar ba de las 'od zer gang dag byung bas phyogs bcu'i 'jig rten gyi khams dpag tu med pa dag snang bas khyab par byed pa'o/ /chen po zhes bya ba ni de ltar 'jig rten gyi khams dpag tu med pa rgyas par 'gengs pa'i 'od zer de dag che ba yin te/de ltar na 'od zer de dag ni 'jig rten gyi khams dpag tu med par rgyas par 'gengs pa yang yin la/ 'od zer chen po yang yin no zhes bya bar sbyar ro/ /rab tu 'byung ba zhes bya ba ni gzhal med khang chen po de nyid las 'od zer chen po de dag rab tu 'byung ngo zhes bya ba'i tha tshig ste/tshig de nyid kyis ni kha dog phun sum tshogs pa bstan to/ /de ltar kha dog phun sum tshogs pa bstan nas/ de'i dbyibs ci 'dra zhe na/ de'i phyir dbyibs phun sum tshogs pa bstan pa'i dbang du mdzad nas/gnas tha dad pa shin tu rnam par phye ba mtha' yas par rnam par gnas pa zhes gsungs te/ de'i dbyibs ni gnas tha dad pa shin tu rnam par phye ba/ mtha' yas par rnam par gnas pa yin no zhes bya bar sbyar ro / /de la gnas tha dad pa zhes bya ba ni gcig tu zad pa ma yin gyi gnas kyi bye brag tha dad pa rnam pa sna tshogs mang du yod pa'i don to//shin tu rnam par phye ba zhes bya ba ni blo sngon du btang nas cha rnam par bzhag pas brgyan pa'o/ /ji ltar sems yongs su dag pa'i rang bzhin gyi sangs rgyas kyi zhing blo sngon du btang nas cha rnam par gzhag pa srid par 'gyur zhe na/de ni phyi rol gyi bsgrub pas yongs su grub pa ma yin gyi/ bcom ldan 'das sngon byang chub sems dpar gyur pa na mngon par 'du byed pa dang bcas pas 'jug pa'i shes rab kyi rnam pa la dpyod pa'i tshe smon lam gyi dbang gis de de ltar mngon par 'dus byas pa'i dbang gis na de ltar spros pa med pa lhun gyis grub pa'i gnas skabs na yang cha rnam par gzhag pa'i rnam par rig pa 'byung ba'i phyir rnam par rig pa ni sangs rgyas dang byang chub sems dpa' rnams la yang snang ste 'gal ba med do//mtha' yas par zhes bya ba ni grangs mtha' yas pa dang /yul mtha' yas pa'o/ /rnam par gnas pa zhes bya ba ni khyad par du 'phags par gnas pa'am/ rnam pa sna tshogs su gnas pa'am/ 'byam klas par gnas pa'i don te de ni dbyibs phun sum tshogs pa yin no/ /de ltar dbyibs phun sum tshogs pa bstan nas/de'i tshad ji tsam zhe na/ de'i phyir tshad phun sum tshogs pa bstan pa'i dbang du mdzad nas/ rgya yongs su ma chad pa zhes bya ba gsungs te/ de'i tshad ni rgya 'di tsam zhes tshad gzung du med pa'i phyir ro/ /de la rgya zhes bya ba ni tha gru'i khyon no/ /yongs su ma chad pa zhes bya ba ni de'i rgya 'di tsam zhes tshad gzung du med pa'o//yang na rgya che zhes bya ba ni tha gru'i khyon ma yin gyi/ shar phyogs la sogs pa'i phyogs cha ste/ phyogs cha tha dad pa'i cha yongs su bcad mi nus pa'i rgya yongs su ma chad pa zhes bya ste/ de ni tshad phun sum tshogs pa yin no/ / de ltar tshad phun sum tshogs pa bstan nas yongs su ma chad pa de khams gsum par gtogs pa zhig yin nam zhe na/ ma yin te/ de'i phyir yul phun sum tshogs pa bstan pa'i dbang du mdzad nas/ khams gsum pa las yang dag par 'das pa'i spyod yul zhes bya ba gsungs te/gnas phun sum tshogs pa de nyid khams gsum pa las yang dag par 'das pa'i spyod yul can yin pa'i phyir ro/ /de la spyod yul zhes bya ba ni gnas sam yul la bya ste/ dngos su na gzhal med khang chen po de nyid yin par blta'o/ /de bas na spyod yul de nyid khams gsum pa las yang dag par 'das pa yin te/de ni spyod yul yang yin la khams gsum pa las yang dag par 'das pa yang yin no zhes bya bar sbyar ro/ /de ci'i phyir zhe na/ khams gsum pa ni rang gi sa pa'i sred pa dag gis bdag gir byas pa yin pas dmigs pa dang mtshungs par ldan pa'i sgo nas brtas par 'gyur ba dang de'i rnam par smin pa yin gyi/spyod yul de ni khams gsum pa'i sred pa dag gis bdag gir byas pa ma yin pas dmigs pa dang mtshungs par ldan pa'i sgo nas brtas par 'gyur ba yang ma yin la/ rnam par smin pa'i sa las yang dag par 'das pa'i phyir de ni rnam par smin pa yang ma yin te/mya ngan las 'das pa dang 'dra bas na de'i phyir khams gsum pa las yang dag par 'das pa zhes bya ste de ni yul phun sum tshogs pa yin no/ /de ltar yul phun sum tshogs pa bstan nas/ gal te khams gsum pa'i sred pa dag gis bdag gir ma byas pa dang rnam par smin pa'i sa las 'das pa'i phyir de'i rnam par smin pa yang ma yin te/ mya ngan las 'das pa dang 'dra ba yin na/ de lta na de mya ngan las 'das pa dang 'dra bar rgyu med pa'i skyon du 'gyur ro/ /ci ste rgyu can zhig yin na ni khams gsum pa'i spyod yul du 'gyur bas de'i rgyu khams gsum pa las gzhan pa 'ga' zhig brjod dgos so zhe na/de'i phyir rgyu phun sum tshogs pa bstan pa'i dbang du mdzad nas/ 'jig rten las 'das pa de'i bla ma'i dge ba'i rtsa ba las byung ba zhes gsungs so/ / de la 'jig rten las 'das pa zhes bya ba ni rnam par mi rtog pa'i ye shes so/ /de'i bla ma'i dge ba'i rtsa ba zhes bya ba ni rnam par mi rtog pa'i ye shes de'i rjes las thob pa dag pa 'jig rten pa'i ye shes de nyid dge ba'i rtsa ba yin no/ /las byung ba zhes bya ba ni dag pa 'jig rten pa'i ye shes kyi dge ba'i rtsa ba de la gnas phun sum tshogs par snang ba'i rnam par rig pa de byung ba ste/dag pa 'jig rten pa'i ye shes de nyid gnas phun sum tshogs pa'i rnam par rig par snang ba'i don to/ /de bas na de ni rgyu med pa yang ma yin la dbang po la sogs pa rgyu mi mthun pa las byung ba yang ma yin no//gal te de lta na yang rnam par mi rtog pa'i rjes las thob pa dag pa 'jig rten pa'i chos de khams gsum pa las yang dag par 'das pa'i rnam par smin pa'i rgyur ji ltar 'gyur zhe na/ de ni rnam par smin pa'i rgyu zhes mi bya'i de las gzhan gang 'byung ba la ltos nas rgyu zhes brjod pa tsam du zad de/dper na sdug bsngal la chos shes pa'i bzod pa nas lam la rjes su shes pa'i bar gyi tshogs bcu drug po dag las 'jig rten pa'i chos kyi mchog 'byung ba dang 'dra'o/ /yang rnam grangs gzhan du na tshig gi don de 'di ltar yang bshad de/ 'jig rten las 'das pa zhes bya ba ni 'phags pa nyan thos dang rang sangs rgyas kyi lam mo//de'i bla ma'i dge ba'i rtsa ba zhes bya ba ni de bzhin gshegs pa'i dge ba'i rtsa ba zag pa med pa nyid do/ /las byung ba zhes bya ba ni de bzhin gshegs pa'i dge ba'i rtsa ba de'i dbang gis rnam par rig pa de lta bu snang ba la bya ste/ de ni rgyu phun sum tshogs pa yin no/ /de ltar rgyu phun sum tshogs pa bstan nas de'i rang bzhin ci 'dra zhe na/ de'i phyir rang bzhin phun sum tshogs pa'i dbang du mdzad nas shin tu rnam par dag cing dbang sgyur ba'i rnam par rig pa'i mtshan nyid ces bya ba gsungs te/ de'i rang bzhin ni shin tu rnam par dag cing dbang sgyur ba'i rnam par rig pa'i mtshan nyid yin no zhes bya bar sbyar ro//de la shin tu rnam par dag cing zhes bya ba ni gnas phun sum tshogs par snang ba'i rnam par rig pa de nyid bskal pa grangs med pa gsum gyi bar du shin tu sbyang ba byas te/ yang dag pa ma yin pa'i kun du rtog pa bsal zhing gzung ba dang 'dzin pa rnam par spangs pa'i ngo bo nyid yin pa'i phyir shin tu rnam par dag pa yin no//dbang sgyur ba zhes bya ba ni zad par gyi skye mched la sogs pa grub pa'i rnal 'byor pa dngos po rnams la 'dod dgur dbang sgyur ba dang 'dra bar shin tu rnam par dag pa'i rnam par rig pa des rnam par rig pa tsam gyi spyod yul rnam par rig pa'i ngo bo nyid de la dgyes dgur dbang sgyur zhing mnga' mdzad pa'i don to//rnam par rig pa'i mtshan nyid ces bya ba ni gnas kyi rnam pa lta bur snang ba de nyid kyi sems kyi rnam par rig pa tsam gyi mtshan nyid yin te/rnam par rig pa las gzhan pa'i phyi rol na rin po che la sogs pa'i dngos po gzhan med pa'i tha tshig go/ /so so'i skye bo rnams kyi spyod yul du snang ba lus longs spyod dang / gnas kyi rnam par snang ba dag kyang rang rang gi rnam par rig pa'i mtshan nyid yin mod kyi de ni yang dag pa ma yin pa'i kun du rtog pas bskyed pa gzung ba dang 'dzin pa'i rnam par snang ba yin pas shin tu rnam par dag cing dbang sgyur ba ma yin gyi/'di ni de las bzlog pa yin pas sangs rgyas kyi zhing yongs su dag pa zhes bya'o/ /shin tu rnam par dag cing dbang sgyur ba'i rnam par rig pa'i mtshan nyid 'di ni rgyu phun sum tshogs pa ltar bstan pa de'i 'bras bu phun sum tshogs pa zhes kyang bya ste/de la ci'i phyir 'bras bu zhes bya zhe na/ rnam par rig pa las tha mi dad kyang yul gyi rnam pa lta bur snang bas 'bras bu zhes bya ste/ dper na zad par sngon po la sogs par snyoms par zhugs pa rnams kyis de'i rnam pa'i rnam par rig pa la snang ba bzhin te/de ni rang bzhin phun sum tshogs pa yin no/ /de ltar rang bzhin phun sum tshogs pa bstan nas/ gnas ni bdag pos yongs su zin pa yin pa'i phyir de'i bdag po gang zhe na/ de'i phyir bdag po phun sum tshogs pa bstan pa'i dbang du mdzad nas/de bzhin gshegs pa'i gnas zhes bya ba gsungs te/ de ni bdag po'i khyad par sangs rgyas bcom ldan 'das kyi gnas yin gyi gzhan gyi ma yin no/ /yang na des de byin gyis brlabs te zin pa dang / yongs su bzung ba yin gyi gzhan gyi ma yin no zhes bya bar sbyar ro// de ni bdag po phun sum tshogs pa yin no/ /de ltar bdag po phun sum tshogs pa bstan nas/ bdag pos ni zham 'bring ba yongs su zin pa'i phyir bdag po phun sum tshogs pa la zham 'bring ba yang dgos pas de'i phyir zham 'bring ba phun sum tshogs pa bstan pa'i dbang du mdzad nas/byang chub sems dpa' dpag tu med pa'i dge 'dun dang ldan pa zhes bya ba gsungs te/ de ltar bdag po phun sum tshogs pa dang ldan pa'i gnas de ni zham 'bring ba phun sum tshogs pa dang ldan pa yang yin no zhes bya bar sbyar ro/ /zham 'bring ba zhes bya ba ni gang gi rjes su gang 'gro ba de ni de'i zham 'bring ba zhes bya ste/byang chub sems dpa' grangs las 'das pa dag de na yod pa'i don to/ /'o na zham 'bring ba nyan thos la sogs pa dag ma smos par ci'i phyir byang chub sems dpa'i dge 'dun nyi tshe smos she na/ byang chub sems dpa' rnams kyis bdud bzhi la sogs pa dgra'i rnam pa thams cad phyir bzlog nus pas de dag ni de'i zham 'bring ba yin gyi nyan thos la sogs pas ni de lta ma yin pa'i phyir te/de ni zham 'bring ba phun sum tshogs pa yin no/ /de ltar zham 'bring ba phun sum tshogs pa bstan nas/ zham 'bring ba phun sum tshogs pa dang ldan pa la phyogs phun sum tshogs pa yang dgos pas/de'i phyir phyogs phun sum tshogs pa bstan pa'i dbang du mdzad nas/ lha dang / klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po dang / mi dang mi ma yin pa mtha' yas pa rnam par rgyu ba zhes bya ba gsungs te/lha la sogs pa nyid de na phyogs yin te gzhan ni ma yin no zhes bya ba'i don to/ /gnas de ni khams gsum pa las yang dag par 'das pa'i spyod yul yin no zhes sngar bstan pa la lha la sogs pa de dag ni khams gsum par gtogs pa yin na/der ji ltar lha la sogs pa phyogs su 'gyur ro zhe na/ lha la sogs pa 'di dag kyang gnas phun sum tshogs pa'i khyad par de lta bur snang ba'i rnam par rig pa mthong bar nus pa sha stag yin pas 'gal ba med do/ /yang na lha la sogs pa de lta bu bstan pas 'dul ba'i sems can yongs su smin par bya ba'i phyir de dag lta bur sprul pa ste/dper na rgyal po ka pi na gdul ba'i phyir bcom ldan 'das kyis 'khor los sgyur ba'i rgyal po'i 'khor bstan pa bzhin no/ /yang na byang chub sems dpa' rnams kyis de bzhin gshegs pa la mchod pa bya ba'i don du rang rang gi lus lha la sogs pa'i cha byad sna tshogs dang ldan par sprul pa yin pas nyes pa med de/de ni phyogs phun sum tshogs pa yin no/ /de ltar phyogs phun sum tshogs pa bstan nas phyogs phun sum tshogs pa dang ldan pa de dag longs spyod ji lta bur bstan te gnas she na/de'i phyir longs spyod phun sum tshogs pa bstan pa'i dbang du mdzad nas/ chos kyi ro'i dga' ba dang bde ba chen po'i longs spyod kyis bstan te de na gnas so zhes bya bar sbyar ro/ /ston pa zhes bya ba ni/ zas de gnas pa'i rgyu yin pa'i phyir ro/ /chos kyi ro'i dga' ba dang bde ba chen po des kyang de dag gnas par 'gyur ba'i phyir de ni de dag gi ston pa yin no//'o na gnas de ni khams gsum las yang dag par 'das pa'i spyod yul yin no zhes sngar bstan/ de na zas yod par ji ltar 'gyur/ gal te zag pa med pa'i chos de dag gi zas yin no zhe na/de yang mi rung ngo / / zas ni srid pa gso bar byed pa yin gyi de ni srid pa gcod par byed pa yin pas de dag zas kyis gnas zhes byar mi rung ngo zhe na/ de ni dper na gzugs la sogs pa'i khams su 'phags pa dag zag pa med pa'i ting nge 'dzin la snyoms par zhugs pa na des de dag gi lus gnas par gyur pa dang 'dra bar zag pa med pa'i chos ni de dag gi zas dang 'dra bar ston pa yin pas 'gal ba med do//gal te 'phags pa dag gzugs la sogs pa'i gnas su zag pa med pa'i ting nge 'dzin la snyoms par zhugs pa ni zag pa med pa'i ting nge 'dzin des gnas pa ma yin gyi sngon 'das pa'i dus su zas gang yang rung ba ston pa'i zas da ltar gnas pa yin pas dpe de mi rung ngo zhe na/de dag 'das pa'i zas dang ldan zhes byar mi rung ste/ 'das pa ni med pa yin pa'i phyir ro/ /de dang 'dra bar 'dir yang gal te de dag de na zag pa med pa'i chos kyi ro'i dga' ba dang bde ba chen pos bstan pa ma yin gyi 'das pa'i dus kyi zas gzhan gyis bstan te gnas par gyur na med pas bstan te gnas pa'i skyon du 'gyur bas/de'i phyir de dag ni 'das pa'i zas kyis bstan te gnas pa ma yin gyi chos kyi ro'i dga' ba dang bde ba chen pos bstan pa yin te/de ni longs spyod phun sum tshogs pa yin no/ /de ltar longs spyod phun sum tshogs pa bstan nas/ longs spyod phun sum tshogs pa dang ldan pa de'i phrin las ci mdzad ce na/ de'i phyir bya ba sgrub pa phun sum tshogs pa bstan pa'i dbang du mdzad nas/ sems can gyi don thams cad yang dag par thob par byed par nye bar gnas pa zhes bya ba gsungs te/sems can thams cad kyi don bya ba thams cad yang dag par thob par byed pas de'i nye bar gnas pa zhes bya bar sbyar ro/ /don thams cad ces bya ba ni phan pa dang bde ba'i don to/ /tshe 'di la phan pa dang tshe phyi ma la bde ba'o//yang na 'jig rten pa'i don ni phan pa'o/ /'jig rten las 'das pa'i don ni bde ba'o/ /'o na gnas de ni mi g.yo ba'i mtshan nyid de mngon par 'du byed pa med pa yin na / ji ltar na sems can gyi don thams cad yang dag par thob par byed ce na/ de ni dper na 'phags pa rnams zhi ba'i ting nge 'dzin la snyoms par zhugs kyang sngon gyi mngon par 'du byed pa'i dbang gis sems can gyi don mdzad pa rgyun mi 'chad pa dang 'dra bar blta bar bya ste/de ni bya ba sgrub pa phun sum tshogs pa yin no/ /de ltar bya ba sgrub pa phun sum tshogs pa bstan nas/bya ba sgrub pa phun sum tshogs pa de la 'tshe ba med pa yang dgos pas de'i phyir 'tshe ba med pa phun sum tshogs pa bstan pa'i dbang du mdzad nas/ nyon mongs pa'i dri ma'i gnod pa thams cad dang bral ba zhes bya ba gsungs te/ de ni rang gi nang gi rgyud las byung ba'i gnod pa med par ston to//de la nyon mongs pa zhes bya ba ni 'dod chags la sogs pa'o/ /dri ma zhes bya ba ni nyon mongs pa de dag nyid dri ma'o/ /gnod pa zhes bya ba ni nyon mongs pa'i dri ma las byung ba'i gnod pa ste sdug bsngal sna tshogs so/ /nyon mongs pa'i dri ma de dag ni gnod pa'i rgyu yin te/de dag med pas de las byung ba'i gnod pa yang med do/ /'o na de ji ltar 'tshe ba med pa phun sum tshogs pa yin zhe na/ nyon mongs pa'i dri mas byas pa'i gnod pa med pa gang yin pa de nyid 'tshe ba med pa yang yin te/ dper na bdag pos phan ma btags kyang ma gtses pa'i phyir bdag gi rje bo dpon gyis ma gtses so zhes zer ba lta bu ste/de ni 'tshe ba med pa phun sum tshogs pa yin no/ /de ltar 'tshe ba med pa phun sum tshogs pa bstan nas/ nang gi gnod pa med pas 'tshe ba med pa phun sum tshogs pa la phyi rol gyi gnod pa'i rgyu yang med pas de'i phyir phyir rgol ba med pa phun sum tshogs pa'i dbang du mdzad nas bdud thams cad yongs su spangs pa zhes gsungs te/des ni phyi rol gyi gnod pa med par ston to/ /de la bdud thams cad ces bya ba ni phung po dang / nyon mongs pa dang / 'chi bdag dang / lha'i bu'i bdud rnams so/ /yongs su spangs pa zhes bya ba ni de dag gis de yongs su spangs te/ de dag gis der mi brdzi ba'am des de dag yongs su spangs te/ de na de dag med pa'o/ /bdud de dag ni phyir rgol ba yin te de dag las rgyal nas ni de'i phyir rgol ba med pa phun sum tshogs pa yin no//de ltar phyir rgol ba med pa phun sum tshogs pa bstan nas/ phyir rgol ba med pa de'i phun sum tshogs pa de'i gnas kyi khyad par ci 'dra zhe na/ de'i phyir gnas phun sum tshogs pa bstan pa'i dbang du mdzad nas thams cad kyi bkod pa las lhag pa de bzhin gshegs pa'i bkod pa'i gnas zhes bya ba gsungs te/de ni byang chub sems dpa' thams cad dam gzhan dag gi bkod pa las lhag pa ste/ de bzhin gshegs pa'i bkod pa dang ldan pa'i gnas yin no zhes bya bar sbyar ro/ /de bzhin gshegs pa'i gnas nyid de ltar snang ngo zhes bya ba'i tha tshig ste/thams cad kyi gnas las khyad par du 'phags pas na de ni gnas phun sum tshogs pa yin no/ /de ltar gnas phun sum tshogs pa bstan nas/ der 'gro ba'i lam ci 'dra ba zhe na/ de'i phyir bdag po'i gnas kyi bye brag phun sum tshogs pa bstan pa'i dbang du mdzad nas/dran pa dang / blo gros dang / rtogs pa chen pos nges par 'byung ba zhes bya ba gsungs te/ de la dran pa zhes bya ba ni thos pa las byung ba'i shes rab ste/ thos na don phyin ci ma log par mngon par rdzogs pa'i phyir ro/ /blo gros zhes bya ba ni bsams pa las byung ba'i shes rab ste/thos pa'i don rig pas nges par rtogs par byed pa la nges pa'i blo gros skye ba'i phyir ro/ /rtogs pa zhes bya ba ni bsgoms pa las byung ba'i shes rab ste/ bsgoms pa'i stobs kyis de kho na rtogs pa'i phyir ro/ /chen po zhes bya ba ni dran pa la sogs pa gsum char dang sbyar te/ de yang theg pa chen po'i chos la dmigs pa las byung ba'i phyir dang theg pa chen po'i 'bras bu yin pa'i phyir dang /theg pa chen pos bsdus pa yin pa'i phyir chen po zhes bya'o/ /nges par 'byung ba zhes bya ba ni 'dis nges par 'byung ba ste lam mo/ /de yang byang chub sems dpa' de dag dran pa la sogs pa'i lam 'dis gnas des nges par 'byung bas dran pa la sogs pas nges par 'byung bar sbyar te/de ni bdag po'i gnas kyi bye brag phun sum tshogs pa yin no/ /de ltar bdag po'i gnas kyi bye brag phun sum tshogs pa bstan nas gang la zhon nas der 'jug pa'i bzhon pa yang dgos pas de'i phyir bzhon pa phun sum tshogs pa bstan pa'i dbang du mdzad nas/zhi gnas dang lhag mthong chen po bzhon pa yin pa zhes bya ba gsungs te/ de la zhi gnas zhes bya ba ni sems rtse gcig pa'i ting nge 'dzin to/ /lhag mthong zhes bya ba ni khyad par du mthong ba ste shes rab bo/ /chen po zhes bya ba ni snga ma bzhin no/ /de gnyis mnyam par 'jug pa ni bzhon pa yin te/de gnyis kyi sa lam de nas gnas der 'gro ba'i phyir te/ de ni bzhon pa phun sum tshogs pa yin no/ /de ltar bzhon pa phun sum tshogs pa bstan nas/ bzhon pa phun sum tshogs pa dang ldan pa de sgo gang nas der 'jug par 'gyur ba'i sgo yang dgos pas de'i phyir sgo phun sum tshogs pa bstan pa'i dbang du mdzad nas/rnam par thar pa'i sgo chen po stong pa nyid dang mtshan ma med pa dang smon pa med pa nas 'jug pa zhes bya ba gsungs te/ de la rnam par thar pa zhes bya ba ni rnam par grol ba ste mya ngan las 'das pa'o/ /sgo zhes bya ba ni sgo mo ste/ mya ngan las 'das pa thob pa'i thabs so/ /chen po zhes bya ba ni snga ma bzhin no/ /de yang dngos su na stong pa nyid la sogs pa nyid rnam par thar pa'i sgo chen po yin te/ sgo de nas der 'jug par sbyar ro/ /de la stong pa nyid ces bya ba ni chos bdag med pa ste/ kun brtags pa'i ngo bo nyid kyi chos med pa'o//de la dmigs pa'i ting nge 'dzin ni rnam par thar pa'i sgo chen po stong pa nyid ces bya'o/ /mtshan ma med pa zhes bya ba la mtshan ma ni gzugs dang / sgra dang / dri dang / ro dang / reg bya rnams dang skyes pa dang / bud med dang / skye ba dang / rga ba dang / na ba dang / 'chi ba la sogs pa ste/ de dag gang la med pa de ni mtshan ma med pa'o/ /de yang gang zhe na mya ngan las 'das pa ste/ de ni mtshan ma thams cad bsal ba'i ngo bo nyid yin pa'i phyir ro/ /de la dmigs pa'i ting nge 'dzin ni rnam par thar pa'i sgo chen po mtshan ma med pa zhes bya'o//smon pa med pa zhes bya ba la smon pa ni smon lam ste 'dod pa'o/ /de gang la med pa ni smon pa med pa ste/ de yang gang zhe na khams gsum pa sdug bsngal bar mthong na de la smon par bya ba med do snyam nas der smon lam mi 'debs pa ni smon pa med pa'o/ /de la dmigs pa'i ting nge 'dzin ni rnam par thar pa'i sgo chen po smon pa med pa zhes bya'o//nas 'jug pas zhes bya ba ni stong pa nyid la sogs pa rnam par thar pa'i sgo chen po de dag nas der 'jug par 'gyur ro zhes bya bar sbyar te/ de ni sgo phun sum tshogs pa yin no/ /de ltar sgo phun sum tshogs pa bstan nas/ sgo phun sum tshogs pa dang ldan pa de gzhal med khang gzhan dag bzhin du gang la brten pa'i rten kyang dgos pa de'i phyir rten phun sum tshogs pa bstan pa'i dbang du mdzad nas/rin po che'i pad+ma'i rgyal po chen po yon tan mtha' yas pas brgyan pa'i bkod pa la brten pa zhes bya ba gsungs te/ dper na chu'i dkyil 'khor la sogs pa sa'i dkyil 'khor la sogs pa la brten pa dang / 'jig rten pa'i gzhal med khang dag pa dang nam mkha' la brten pa bzhin du gzhal med khang 'di yang rin po che'i pad+ma'i rgyal po chen po yon tan mtha' yas pas brgyan pa'i bkod pa la brten te zhes bya bar sbyar ro//de la rin po che'i pad+ma zhes bya ba ni pad+ma de nyid rin po che yang yin la pad+ma yang yin te/ rin po che'i rang bzhin gyi pad+ma zhes bya ba'i tha tshig go/ /rgyal po chen po zhes bya ba ni de nyid rin po che'i rgyal po chen po yang yin la pad+ma'i rgyal po chen po yang yin pa'o/ / yang na rin po che'i pad+ma ni byang chub sems dpa' rnams kyi byin gyi rlabs las byung ba 'khor gyi pad+ma dag yin no/ /rgyal po chen po zhes bya ba ni byang chub sems dpa' la sogs pa de dag gi bla ma ste/ chos kyi rgyal po chen po sangs rgyas bcom ldan 'das kyi dge ba'i rtsa ba las byung ba'i pad+ma chen po nyid yin par sbyar ro//yon tan mtha' yas pas brgyan pa zhes bya ba ni sangs rgyas kyi stobs dang mi 'jigs pa la sogs pa che ba'i yon tan las rgyan sna tshogs su grub pa'i rgyan sna tshogs kyis brgyan pa'o/ /bkod pa zhes bya ba ni rgyan de'i khyad par ro/ /la brten pa zhes bya ba ni rgyan de'i khyad par gyi bkod pa chen po de la gzhal med khang de brten ces bya ba'i tha tshig ste/de ni rten phun sum tshogs pa yin no/ /na bzhugs te zhes bya ba ni rgyan gyi bkod pa chen po la brten pa'i gzhal med khang chen po de na bcom ldan 'das bzhugs zhes bya bar sbyar ro/ /bzhugs zhes bya ba ni spyod lam dang /lha dang tshangs pa dang / 'phags pa'i bzhugs pa bla na med pa dag gis bzhugs pa'o/ / gnas phun sum tshogs pa'i tshig gi don la sogs pa bshad zin to// //ci 'dra ba cig bzhugs she na/ /yon tan phun sum tshogs pa ste/ de'i phyir de'i dbang du mdzad nas bcom ldan 'das zhes bya ba gsungs so//de la bcom ldan 'das kyi yon tan phun sum tshogs pa bstan pa ni de las gzhan pa'i ston pa rnams las khyad par du bya ba dang / gzhan dag kyang dang ba rab tu bskyed pa'i phyir ro/ /de'i phun sum tshogs pa ni yon tan gyi khyad par rnam pa nyi shu rtsa gcig tu rig par bya ste/mngon par byang chub pa'i yon tan gyi khyad par dang / sgrib pa mi mnga' ba'i yon tan gyi khyad par dang / 'dul ba'i thabs kyi yon tan gyi khyad par dang / 'dul ba la so sor rtog pa'i yon tan gyi khyad par dang / sangs rgyas thams cad dang phrin las kyi mdzad pa mthun pa'i yon tan gyi khyad par dang /mi mthun pa'i phyogs spang ba'i yon tan gyi khyad par dang / mu stegs can zil gyis gnon pa'i yon tan gyi khyad par dang / bdud zil gyis gnon pa'i yon tan gyi khyad par dang / chos bstan pa rnam par 'jog pa'i yon tan gyi khyad par dang /dus gsum lung ston pa yon tan gyi khyad par dang / dga' ldan gyi pho brang nas 'bab pa la sogs pa kun du ston pa'i yon tan gyi khyad par dang / the tshom gyi rnam pa thams cad gcod pa'i yon tan gyi khyad par dang / theg pa thams cad kyis 'dul ba de dag la snang ba'i sku kun du ston pa'i yon tan gyi khyad par dang /shin tu rnam par mkhyen nas ci rigs par gdams ngag stsol ba'i yon tan gyi khyad par dang / kun nas nyon mongs pa med pa'i sku yongs su 'dzin pa'i yon tan gyi khyad par dang / sangs rgyas kyi gdung mi 'chad par sbyor ba'i yon tan gyi khyad par dang /sangs rgyas kyi rang bzhin gyi sku la bzhugs pa'i yon tan gyi khyad par dang / sangs rgyas kyi longs spyod rdzogs pa'i sku la bzhugs pa'i yon tan gyi khyad par dang / mtshan nyid kyi yon tan gyi khyad par dang / 'bras bu thob pa'i yon tan gyi khyad par dang /yon tan mi zad pa'i yon tan gyi khyad par ro/ /phun sum tshogs pa nyi shu gcig po de dag ni mdo las/ legs par thugs su chud pa'i blo dang ldan pa zhes bya ba nas/ nam mkha'i khams kyi mthas gtugs pa de zhes gsungs pa'i tshig nyi shu rtsa gcig dang go rims bzhin du sbyar ro//de la dang por mngon par rdzogs par byang chub pa'i yon tan gyi khyad par bstan pa'i dbang du mdzad nas/ legs par thugs su chud pa'i blo dang ldan pa zhes bya ba gsungs te/ 'dus byas dang 'dus ma byas kyi chos ji snyed yod pa nyid dang / ji lta ba bzhin du yod pa nyid thugs su chud pa'i blo dang ldan no zhes bya bar sbyar ro//de la legs par bya ba'i tshig gi don ni rtogs par bya ba legs par rtogs pa dang / yongs su rdzogs par rtogs pa dang / ma lus par rtogs pa'i don to/ /thugs su chud pa'i blo dang ldan pa zhes bya ba ni ji snyed pa nyid dang ji lta ba bzhin du yod pa nyid rtogs par thugs su chud pa'i mkhyen pa mnga' ba ste/de ni mngon par rdzogs pa'i byang chub pa'i yon tan gyi khyad par yin no/ /de'i 'og tu sgrib pa mi mnga' ba'i yon tan gyi khyad par bstan pa'i dbang du mdzad nas/ kun du spyod pa gnyis mi mnga' ba zhes bya ba gsungs te/byis pa dang nyan thos kyi spyod pa nyon mongs pa dang shes bya'i sgrib pa gnyis mi mnga' ba zhes bya bar sbyar ro/ /de la byis pa'i kun du spyod pa ni 'khor ba'i kun nas nyon mongs pa ste/ de'i bdag nyid gnas pa'i phyir ro/ /nyan thos kyi kun du spyod pa ni mya ngan las 'das pa la gcig tu nges pa ste/gzhan gyi don bya ba la rgyab kyis phyogs pa'i phyir ro/ /de ltar na byis pa'i kun du spyod pa ni nyon mongs pa'i sgrib pa'i rang bzhin yin la/ nyan thos kyi kun du spyod pa ni shes bya'i sgrib pa'i rang bzhin yin pas de gnyis ni sgrib pa med pa'i yon tan dang ldan pa'i khyad par dang ldan pa ma yin gyi /bcom ldan 'das ni mi gnas pa'i mya ngan las 'das pa la bzhugs pa yin pas de la kun du spyod pa de gnyis mi mnga' ste/ de ni sgrib pa mi mnga' ba'i yon tan gyi khyad par yin no/ /de'i 'og tu 'dul ba'i thabs kyi yon tan gyi khyad par bstan pa'i dbang du mdzad nas/mtshan nyid med pa'i chos la mchog tu gzhol bar mdzad pa zhes bya ba gsungs te/ de la mtshan nyid med pa'i chos zhes bya ba ni mya ngan las 'das pa'o/ /mchog tu gzhol bar mdzad pa zhes bya ba ni skal ba ji lta ba bzhin du theg pa gsum gyis sems can rnams der 'dul ba'i thabs yongs su mkhyen nas de bzhin du ston cing de dag der gzhol ba dang /'bab pa dang / bab par mdzad pa ste/ de ni 'dul ba'i thabs kyi yon tan gyi khyad par yin no/ /de'i 'og tu 'dul ba las so sor rtog pa'i yon tan gyi khyad par bstan pa'i dbang du mdzad nas/ sangs rgyas kyi gnas pas gnas pa zhes bya ba gsungs te/ de la sangs rgyas kyi gnas pa zhes bya ba ni skabs 'dir thugs rje chen pos nyin mtshan du lan drug tu 'jig rten la gzigs pa dang sbyar ro/ /gnas pa zhes bya ba ni de lta bu'i gnas pas rtag tu gnas pa ste/ de ni 'dul ba la so sor rtog pa'i yon tan gyi khyad par yin no//de'i 'og tu sangs rgyas thams cad dang / phrin las kyi mdzad pa mthun pa'i yon tan gyi khyad par bstan pa'i dbang du mdzad nas/ sangs rgyas thams cad dang mnyam pa nyid brnyes pa zhes bya ba gsungs te/ de la sangs rgyas thams cad dang mnyam pa nyid ces bya ba ni sangs rgyas thams cad dang phrin las mthun par mdzad pa'o//brnyes pa zhes bya ba ni de dag dang phrin las mnyam pa nyid brnyes pa ste/ de ni sangs rgyas thams cad dang phrin las kyi mdzad pa mthun pa'i yon tan gyi khyad par yin no/ /de'i 'og tu mi mthun pa'i phyogs spangs pa'i yon tan gyi khyad par bstan pa'i dbang du mdzad nas/sgrib pa med pa'i rtogs pa thugs su chud pa zhes bya ba gsungs te/ de la sgrib pa med pa'i rtogs pa zhes bya ba ni nyon mongs pa dang / shes bya'i sgrib pa ma lus pa dang bral ba'i ye shes so/ /thugs su chud pa zhes bya ba ni sgrib pa ma lus pa spangs pa dang /sgrib pa med pa'i ye shes mngon sum du mdzad pa ste/ de ni mi mthun pa'i phyogs spangs pa'i yon tan gyi khyad par yin no/ /de'i 'og tu mu stegs can zil gyis gnon pa'i yon tan gyi khyad par bstan pa'i dbang du mdzad nas/ phyir mi zlogs pa'i chos dang ldan pa zhes bya ba gsungs te/de la phyir mi zlogs pa'i chos zhes bya ba ni mu stegs can dag gis phyir zlog mi nus pa'i chos dang de dag zil gyis mnan nas yang dag pa'i lam ston par mdzad pa'i chos so/ /ldan pa zhes bya ba ni de lta bu'i chos kyi khyad par brnyes pa ste/ de ni mu stegs can zil gyis gnon pa'i yon tan gyi khyad par yin no//de'i 'og tu bdud zil gyis gnon pa'i yon tan gyi khyad par bstan pa'i dbang du mdzad nas spyod yul gyis mi 'phrogs pa zhes bya ba gsungs te/ de la spyod yul zhes bya ba ni gzugs la sogs pa yul rnams te/ de dag ni sems 'khrul par byed pa'i rgyu yin pa dang /dge ba'i srog gi bar chad byed pa yin pa'i phyir bdud ces bya'o/ /mi 'phrogs pa zhes bya ba ni bcom ldan 'das kyis zil gyis gnon pa'i skye mched rnams shin tu yongs su rdzogs par bsgoms pas yul shin tu yid du 'ong bas kyang bar chad byed par mi nus te/ yul de dag zil gyis gnon cing rjes su chags pa dang khong khro bar mi 'gyur bas spyod yul gyis mi 'phrogs pa zhes bya ste/de ni bdud zil gyis gnon pa'i yon tan gyi khyad par yin no/ /de'i 'og tu chos bstan pa rnam par 'jog pa'i yon tan gyi khyad par bstan pa'i dbang du mdzad nas/ bsam gyis mi khyab pa rnam par 'jog pa zhes bya ba gsungs te/de la bsam gyis mi khyab pa zhes bya ba ni sangs rgyas bcom ldan 'das dang / byang chub sems dpa' chen po rnams ma gtogs par rtog ge'i spyod yul las shin tu 'das pa'o/ /rnam par 'jog pa zhes bya ba ni gdags pa rnam par gzhag pa rnam pa bzhi rnam par 'jog par mdzad pa ste/chos gdags pa rnam par gzhag pa dang / theg pa gdags pa rnam par gzhag pa dang / bden pa gdags pa rnam par gzhag pa dang / rigs pa gdags pa rnam par gzhag pa bsam gyis mi khyab pa dag rnam par 'jog par mdzad pa ste/ de ni chos bstan pa rnam par 'jog pa'i yon tan gyi khyad par yin no//de'i 'og tu dus gsum lung ston pa'i yon tan gyi khyad par bstan pa'i dbang du mdzad nas/ dus gsum la mnyam pa nyid tshar phyin pa zhes bya ba gsungs te/ de la dus gsum zhes bya ba ni 'das pa dang / ma 'ongs pa dang / da ltar byung ba'i dus rnams so/ /mnyam pa nyid tshar phyin pa zhes bya ba ni da ltar byung ba'i dus la ji lta ba bzhin du 'das pa dang ma 'ongs pa'i dus la'ang de bzhin du khyad par lung ston pa ste/ de ni dus gsum lung ston pa'i yon tan gyi khyad par yin no/ /de'i 'og tu dga' ldan gyi pho brang nas 'bab pa la sogs pa kun du ston pa'i yon tan gyi khyad par bstan pa'i dbang du mdzad nas/'jig rten gyi khams thams cad du zhugs pa'i sku dang ldan pa'i yon tan gyi khyad par bstan pa'i dbang du mdzad nas/ de bzhin gshegs pa ma 'dres pa'i rnam par thar par mdzad pa'i ye shes kyi mthar phyin pa zhes bya ba gsungs te/de la de bzhin gshegs pa ma 'dres pa zhes bya ba ni de bzhin gshegs pa rnams kyi longs spyod rdzogs pa'i sku tha dad pa la bya ste/ de dag ni sangs rgyas kyi zhing yongs su dag pa na 'khor sna tshogs kyi dkyil na byang chub sems dpa' rnams chos kyi longs spyod rdzogs par myong bar mdzad cing rgyud tha dad par bzhugs pas na ma 'dres pa zhes bya'o//rnam par thar par mdzad pa zhes bya ba ni longs spyod rdzogs pa'i sku des sems can rnams rnam par thar par mdzad pa'o/ /ye shes mthar phyin pa zhes bya ba ni bcom ldan 'das nyid longs spyod rdzogs pa'i skus sems can rnams rnam par thar par mdzad pa'i ye shes gang yin pa de'i mthar byon cing de lta bu'i sku la rtag tu bzhugs so zhes bya ba'i tha tshig ste/de ni sangs rgyas kyi longs spyod rdzogs pa'i sku la bzhugs pa'i yon tan gyi khyad par yin no/ /de'i 'og tu mtshan nyid kyi yon tan gyi khyad par bstan pa'i dbang du mdzad nas/mtha' dang dbus med pa'i sangs rgyas kyis mnyam pa nyid thugs su chud pa zhes gsungs te/ de la mtha' dang dbus med pa'i sangs rgyas zhes bya ba ni de bzhin gshegs pa ste/ 'dus byas dang 'dus ma byas kyi mtha' yongs su spangs pa'i mtshan nyid kyis ni mtha' med pa yin la/yul yongs su ma chad pa'i mtshan nyid kyis ni dbus med pa yin no/ /yang na sngon dang phyi ma'i mtha' spangs pa'i mtshan nyid kyis ni mtha' med pa yin la/ da ltar mi gnas pa'i mtshan nyid kyis ni dbus med pa yin no/ /mnyam pa nyid ces bya ba ni mtha' dang dbus med pa'i sangs rgyas de'i sa ste/'dus byas dang 'dus ma byas mnyam pa nyid do/ /thugs su chud pa zhes bya ba ni sa mnyam pa nyid gang yin pa de thugs su chud pa ste/ de yang 'dus byas dang 'dus ma byas mnyam pa nyid du yongs su mkhyen pa dang / de la byis pa dang nyan thos kyi kun du spyod pa'i sgrib pa gnyis mi mnga' ba'i phyir te/de ni de bzhin gshegs pa'i mtshan nyid kyi yon tan gyi khyad par yin no/ /de'i 'og tu 'bras bu thob pa'i yon tan gyi khyad par bstan pa'i dbang du mdzad nas/ chos kyi dbyings kyis klas pa zhes bya ba gsungs te/ de la chos kyi dbyings zhes bya ba ni chos kyi dbyings rnam par dag pa'o//klas pa zhes bya ba ni gting slebs pa'am mthar thug pa'am rtogs pa zhes bya ba'i tha tshig go/ /de rtogs pa yang lam bsgoms pas mthar thug pa'i 'bras bu thob pa nyid yin pa'i phyir de'i 'bras bu thob pa'i yon tan gyi khyad par yin no/ /de'i 'og tu yon tan mi zad pa'i yon tan gyi khyad par bstan pa'i dbang du mdzad nas/nam mkha'i khams kyi mthas gtugs pa de zhes bya ba gsungs te/ dper na nam mkha' ni 'jig pa dang chags pa'i dus dag na yang zad mi shes pas mi zad pa dang dngos po dang dngos po ma yin pa mtha' dag la khyab pas thams cad du song ba dang /'khor ba'i mtha'i bar du mu thug pa med par rgya che ba de bzhin du/ de bzhin gshegs pa'i yon tan thams cad 'byung ba dang / 'jig pa'i dus dag na yang zad mi shes pas mi zad pa dang / 'jig rten pa dang 'jig rten las 'das pa'i yon tan mtha' dag la khyab pas thams cad du song ba dang /'khor ba'i mtha'i bar du mu thug pa med par sems can gyi don mdzad pas rgya che ba yang yin te/ de'i phyir rnam par mkhyen nas ci rigs par gdams ngag stsol ba'i yon tan gyi khyad par yin no/ /de'i 'og tu kun nas nyon mongs pa med pa'i sku yongs su 'dzin pa'i yon tan gyi khyad par bstan pa'i dbang du mdzad nas rnam par ma brtags pa'i sku mnga' ba zhes bya ba gsungs te/de la rnam par ma brtags pa'i sku zhes bya ba la so so'i skye bo'i lus ni rnam par rtog pa las byung ba yin te/ de yang spros pa las ni rnam par rtog pa skye la/ rnam par rtog pa las ni las dang nyon mongs pa 'byung /las dang nyon mongs pa las ni sdug bsngal gyi lus bskyed/ lus de ni kun nas nyon mongs pa can gyi lus yin gyi de bzhin gshegs pa ni spros pa thams cad dang bral ba'i phyir rnam par rtog pa mi mnga' ba yin pas/ las dang nyon mongs pas bskyed pa'i lus can ma yin te/rnam par ma brtags pa'i sku bsam gyis mi khyab pa mnga' ba yin pas na de ni kun nas nyon mongs pa med pa'i sku yongs su 'dzin pa'i yon tan gyi khyad par yin no/ /de'i 'og tu sangs rgyas kyi gdung mi 'chad par sbyor ba'i yon tan gyi khyad par bstan pa'i dbang du mdzad nas/ byang chub sems dpa' thams cad kyi ye shes yang dag par blangs pa zhes bya ba gsungs te/de la byang chub sems dpa' thams cad zhes bya ba ni byang chub sems dpa' rnams sangs rgyas kyi gdung mi 'chad par sbyor ba yin gyi nyan thos la sogs pa gzhan ni ma yin pa'i phyir ro/ /ye shes yang dag par blangs pa zhes bya ba ni sangs rgyas kyi ye shes byang chub sems dpa' rnams kyis bdag gi ye shes su yang dag par blangs pa ste/de yang de bzhin gshegs pas byang chub sems dpa' rnams la phan gdags pa'i dam pas phan btags pa dang / yongs su gtad pa'i dam pas yongs su gtad de/byang chub sems dpa' yongs su smin pa rnams ni rnam par grol bar mdzad de/ phan gdags pa'i dam pas phan btags la yongs su ma smin pa rnams ni phan gdags pa rnams la nga yongs su mya ngan las 'das pa'i phyir na khyed kyis 'di dag yongs su smin par gyis shig ces yongs su gtad pa'i dam pas yongs su gtad pa'i sgo nas de dag kyang sems bskyed pa dang /gsum la skyabs su 'gro ba dang / chos kyi rjes su mthun pa'i chos bsgrub pa dang / mngon par rtogs pa dang / lung ston pa dang / dbang bskur ba la sogs pa'i rim gyis thams cad mkhyen pa'i ye shes yang dag par 'thob cing /sangs rgyas kyi gdung mi 'chad par 'gyur te/ de yang bcom ldan 'das nyid kyis de ltar sbyor bar mdzad pas na de ni sangs rgyas kyi gdung mi 'chad par sbyor ba'i yon tan gyi khyad par yin no/ /de'i 'og tu sangs rgyas kyi rang bzhin gyi sku la bzhugs pa'i yon tan gyi khyad par bstan pa'i dbang du mdzad nas/sangs rgyas kyi gnas pa gnyis su med pa dam pa'i pha rol du byon pa zhes bya ba gsungs te/ de la sangs rgyas kyi gnas pa gnyis su med pa zhes bya ba ni sangs rgyas kyi rang bzhin gyi sku de / chos kyi sku'o/ /de tha dad pa med pa'i mtshan nyid kyis gnyis su med pa yin te/kun du spyod pa gnyis ma lus par spangs pa'i phyir ro/ /dam pa'i pha rol du byon pa zhes bya ba ni de la dmigs pa'i ting nge 'dzin gyis de la gzhol zhing de la rtag tu gnas pa'i don te/ de ni sangs rgyas kyi rang bzhin gyi sku la bzhugs pa'i yon tan gyi khyad par yin no/ /de'i 'og tu sangs rgyas kyi longs spyod rdzogs pa'i sku la bzhugs pa zhes bya ba gsungs te/de la 'jig rten gyi khams thams cad ces bya ba ni stong gsum gyi stong chen po'i 'jig rten gyi khams kyi gling bzhi pa bye ba phrag brgyas bsdus pa gcig gi 'dzam bu'i gling thams cad la bya'o/ /yang gcig tu na de ni mtshon pa tsam du zad kyi sangs rgyas kyi yul dang spyod yul ni 'jig rten gyi khams dang gdul ba'i khams mtha' yas pa thams cad yin pas phyogs bcu'i 'jig rten gyi khams mtha' yas mu med pa thams cad la yang bya'o//zhugs pa'i sku dang ldan pa zhes bya ba ni/ 'jig rten gyi khams de dag gi gling bzhi pa'i 'jig rten gyi khams thams cad du sprul pa'i skus dang po dga' ldan gyi gnas nas 'bab pa nas/tha ma yongs su mya ngan las 'das pa chen po ston pa'i bar gyi sangs rgyas kyi mdzad pa bcu gnyis la sogs pa cig car ston pa ste/ de ni dga' ldan gyi pho brang nas 'bab pa la sogs pa kun du ston pa'i yon tan gyi khyad par yin no//de'i 'og tu the tshom gyi rnam pa thams cad gcod pa'i yon tan gyi khyad par bstan pa'i dbang du mdzad nas/ chos thams cad la the tshom med pa'i mkhyen pa mnga' ba zhes bya ba gsungs te/ de la chos thams cad ces bya ba ni shes bya'i rnam pa'i chos ji snyed yod pa nyid dang ji lta ba bzhin du yod pa nyid thams cad do//the tshom med pa'i mkhyen pa mnga' ba zhes bya ba ni chos thams cad la the tshom za ba ma lus par bsal ba'i ye shes brnyes pa'i phyir te/ de ni the tshom gyi rnam pa thams cad gcod pa'i yon tan gyi khyad par yin no/ /de'i 'og tu theg pa thams cad kyis 'dul ba de dag la snang ba'i sku kun du ston pa'i yon tan gyi khyad par bstan pa'i dbang du mdzad nas/spyod pa thams cad dang ldan pa'i blo mnga' ba zhes bya ba gsungs te/ de la spyod pa thams cad ces bya ba ni gdul ba rnams kyi spyod pa ste 'dod chags spyad pa dang / zhe sdang spyad pa dang /gti mug spyad pa dang / nga rgyal spyad pa dang / rnam par rtog pa'i spyad pa la sogs pa'i spyod pa thams cad do/ /ldan pa'i blo mnga' ba zhes bya ba ni gdul ba de dag gi 'dod chags spyad pa la sogs pa'i spyod pa thams cad mkhyen nas de dag la mi sdug pa'am/ byams pa'am/ rkyen 'di pa nyid kyi rten cing 'brel par 'byung ba'am/khams rab tu dbye ba'am/ dbugs rngub pa dang / dbugs 'byung ba dran pa la sogs pa theg pa gang gis gdul bar 'gyur ba'i sku dang thabs kun du ston par mdzad pa'i mkhyen pa mnga' ba ste/ de ni theg pa thams cad kyis 'dul ba de dag la snang ba'i sku kun du ston pa'i yon tan gyi khyad par yin no//de'i 'og tu shin tu rnam par mkhyen nas ci rigs par gdams ngag stsol ba'i yon tan gyi khyad par ston pa'i dbang du mdzad nas/ chos shes pa la nem nur mi mnga' ba zhes bya ba gsungs te/ de la chos shes pa zhes bya ba ni bcom ldan 'das nyid kyis rtogs par thugs su chud pa'i mkhyen pa la bya'o//nem nur mi mnga' ba zhes bya ba ni the tshom mi mnga' zhing nges par gyur pa ste/ de yang chos rnams la nem nur can dag la ni gzhan la ci rigs par gdams ngag sbyin pa'i mthu med kyi gang gis chos gang rtogs pa'i shes pa de dag nyid la the tshom med cing shin tu nges par gyur na des gzhan dag la yang phyin ci ma log par gdams ngag sbyin nus pas na 'dir yang bcom ldan 'das ni bdag nyid chos mkhyen pa la the tshom mi mnga' zhing shin tu nges pa yin pas gzhan la yang ci rigs par phyin ci ma log pa'i gdams ngag stsol bar mdzad de/de ni shin tu mdo kha cig las ni phyi ma'i mtha'i mur thug pa zhes kyang 'byung ste/ de ni yon tan mi zad pa'i yon tan gyi khyad par yin no/ /de zhes bya ba ni de ltar yon tan gyi khyad par nyi shu rtsa gcig dang ldan pa'i bcom ldan 'das de ste/ de 'khor phun sum tshogs pa 'og nas 'byung ba dag dang thabs cig tu bzhugs so zhes bya bar tshig 'og ma dang sbyar ro//yang rnam grangs gzhan du na bcom ldan 'das kyi yon tan gyi khyad par nyi shu rtsa gcig po de dag ni bstan pa dang bshad pa'i tshig yin te/ legs par thugs su chud pa'i blo dang ldan pa zhes bya ba ni bstan pa'i tshig yin no//kun du spyod pa gnyis mi mnga' ba zhes bya ba la sogs pa lhag ma rnams ni bshad pa'i tshig yin te/ de ltar na chos nyid legs par bshad pa yin no/ /de yang ji lta bu zhe na/ legs par thugs su chud pa'i blo dang ldan pa zhes bya ba ni yon tan gyi khyad par rnam pa nyi shus na legs par thugs su chud pa'i blo dang ldan pa zhes bya ste/shes bya la gcig tu sgrib pa med pa'i ye shes 'jug pa'i yon tan dang / mchog tu rnam par dag pa rtogs pa'i yon tan dang / sangs rgyas kyi mdzad pa rgyun mi gcod par gnas pa'i yon tan dang / chos kyi sku la sku dang / dgongs pa dang /phrin las tha dad pa mi mnga' ba'i yon tan dang / sgrib pa thams cad kyi gnyen po bsgoms pa'i yon tan dang / mu stegs can thams cad kyis mi thub pa'i yon tan dang / 'jig rten du skyes kyang 'jig rten gyi chos kyis mi 'phrogs pa'i yon tan dang / chos rnam par 'jog pa'i yon tan dang / lung ston pa'i yon tan dang / 'jig rten gyi khams thams cad du longs spyod rdzogs pa dang sprul pa'i sku kun du ston pa'i yon tan dang / the tshom gcod pa'i yon tan dang / spyad pa sna tshogs kyis 'dzud pa'i yon tan dang / phyis chos 'byung ba mkhyen pa'i yon tan dang / mos pa ji lta ba bzhin kun du ston pa'i yon tan dang /lus tshad med pas sems can 'dul bar sbyor ba'i yon tan dang / chos kyi sku mnyam pa la pha rol tu phyin pa grub pa'i yon tan dang / mos pa ji lta ba bzhin du sangs rgyas kyi zhing ma 'dres pa kun du ston pa'i yon tan dang / sangs rgyas kyi sku gsum gyi yul yongs su ma chad pa'i yon tan dang /'khor ba'i mtha'i bar du sems can thams cad la phan pa dang bde ba'i mdzad par nye bar gnas pa'i yon tan dang / mi zad pa'i yon tan gyis so/ /yon tan rnam pa nyi shu po de dag ni mdo las/ kun du spyod pa gnyis mi mnga' ba zhes bya ba nas nam mkha'i khams kyi mthas gtugs pa de zhes bya ba'i bar gyi tshig nyi shu dang go rims bzhin du sbyar ro//de la dang por shes bya la gcig tu sgrib pa med pa'i ye shes 'jug pa'i yon tan gyis legs par thugs su chud pa'i blo dang ldan par bstan pa'i dbang du mdzad nas/ kun du spyod pa gnyis mi mnga' ba zhes bya ba gsungs te/ji ltar nyan thos rnams kyi shes pa/ yul dang dus kyis bskal pa'i dus rnams las kha cig la theg pa dang sangs rgyas kyi chos rab tu dbye ba mtha' yas pa dag la shes pa mi 'jug pa ltar de bzhin gshegs pa rnams kyi mkhyen pa ni de lta ma yin te/ yul dang dus thams cad du dngos po rnam pa tha dad pa la chags pa med pa dang /thogs pa med pa'i mkhyen pa 'jug pas dngos po'i rang gi ngo bo yongs su shes pa dang / yongs su mi shes pa'i kun du spyod pa gnyis mi mnga' ba'i phyir shes bya la gcig tu sgrib pa med pa'i ye shes 'jug pa'i yon tan dang ldan pa yin te/ des na legs par thugs su chud pa'i blo dang ldan pa yin no//de'i 'og tu mchog tu rnam par dag pa rtogs par mdzad pa'i yon tan gyis legs par thugs su chud pa'i blo dang ldan par bstan pa'i dbang du mdzad nas/ mtshan nyid med pa'i chos la mchog tu gzhol bar mdzad pa zhes bya ba gsungs te/mtshan nyid med pa'i chos zhes bya ba ni dngos po dang dngos po med pa'i mtshan nyid kyi dri ma ma lus par bsal ba'i de bzhin nyid dam pa chos bdag med pa ste/ rnam par rtog pa thams cad dang bral ba'i ngo bo nyid yin no/ /mchog tu gzhol bar mdzad pa zhes bya ba ni de'i ngo bo nyid rang bzhin gyis rtogs par thugs su chud nas gzhan dag la yang go bar mdzad pa ste/da ltar mtshan nyid med pa'i chos la mchog tu gzhol bar mdzad pa'i phyir mchog tu rnam par dag pa rtogs par mdzad pa'i yon tan dang ldan pa yin te/ des kyang legs par thugs su chud pa'i blo dang ldan pa yin no//de'i 'og tu sangs rgyas kyi mdzad pa rgyun mi gcod par gnas pa'i yon tan gyis legs par thugs su chud pa'i blo dang ldan par bstan pa'i dbang du mdzad nas/ sangs rgyas kyi gnas pas gnas pa zhes bya ba gsungs te/ lhun gyis grub par sems can gyi don mdzad pa rgyun mi gcod pas 'phags pa dang /lha dang tshangs pa'i gnas pa bla na med pas rtag tu gnas pa'i phyir sangs rgyas kyi mdzad pa rgyun mi gcod par gnas pa'i yon tan dang ldan pa yin te/ des kyang legs par thugs su chud pa'i blo dang ldan pa yin no/ /de'i 'og tu chos kyi sku la sku dang dgongs pa dang phrin las tha dad pa mi mnga' ba'i yon tan gyis legs par thugs su chud pa'i blo dang ldan par bstan pa'i dbang du mdzad nas/sangs rgyas thams cad dang mnyam pa nyid brnyes pa zhes bya ba gsungs te/ sangs rgyas thams cad kyi chos kyi sku la sku dang / dgongs pa dang phrin las tha dad pa mi mnga' bas sangs rgyas thams cad dang mnyam pa nyid brnyes par sbyar ro//de yang sangs rgyas thams cad kyi de bzhin nyid rnam par dag pa'i ye shes kyi sku tha mi dad pa dang / sems can thams cad la phan pa dang / bde bar dgongs pa tha mi dad pa dang / longs spyod rdzogs pa dang sprul pa'i skus gzhan gyi don mdzad pa'i phyir phrin las tha mi dad pa'i phyir chos kyi sku la sku dang dgongs pa dang phrin las tha dad pa mi mnga' ba'i yon tan dang ldan pa yin te/des kyang legs par thugs su chud pa'i blo dang ldan pa yin no/ /de'i 'og tu sgrib pa thams cad kyi gnyen po bsgoms pa'i yon tan gyis legs par thugs su chud pa'i blo dang ldan par bstan pa'i dbang du mdzad nas/sgrib pa med pa'i rtogs pa thugs su chud pa zhes bya ba gsungs te/ nyon mongs pa dang shes bya'i sgrib pa thams cad kyi gnyen po 'phags pa'i lam goms par mdzad pas sgrib pa thams cad dang bral ba'i rtogs pa thugs su chud do zhes bya bar sbyar ro/ / de la sgrib pa med pa'i rtogs pa zhes bya ba ni sgrib pa las dben pa'i gnas sam rten par byed pa de mya ngan las 'das pa'o/ /thugs su chud pa zhes bya ba ni thob pa'i don yod pa'i phyir sgrib pa thams cad kyi gnyen po bsgoms pa'i yon tan dang ldan pa yin te/ des kyang legs par thugs su chud pa'i blo dang ldan pa yin no//de'i 'og tu mu stegs can thams cad kyis mi thub pa'i yon tan gyis legs par thugs su chud pa'i blo dang ldan par bstan pa'i dbang du mdzad nas/ phyir mi ldog pa'i chos dang ldan pa zhes bya ba gsungs te/ bshad pa dang thugs su chud pa'i chos rnams dang ldan pas gzhan mu stegs can dag gis phyir mi ldog pa'i phyir mu stegs can thams cad kyis mi thub pa'i yon tan dang ldan pa yin te/des kyang legs par thugs su chud pa'i blo dang ldan pa yin no/ /de'i 'og tu 'jig rten du skyes kyang 'jig rten gyi chos kyis mi 'phrogs pa'i yon tan gyis legs par thugs su chud pa'i blo dang ldan par bstan pa'i dbang du mdzad nas/spyod yul gyis mi 'phrogs pa zhes bya ba gsungs te/ de bzhin gshegs pa ni 'jig rten du byung yang 'jig rten pa'i spyod yul gyi chos brgyad po rnyed pa dang / ma rnyed pa dang / bstod pa dang / smad pa dang / grags pa dang / ma grags pa dang / bde ba dang / sdug bsngal ba dag gis 'phrogs par mi 'gyur ba'i phyir 'jig rten du skyes kyang 'jig rten gyi chos kyis mi 'phrogs pa'i yon tan dang ldan pa yin te/des kyang legs par thugs su chud pa'i blo dang ldan pa yin no/ /de'i 'og tu chos rnam par 'jog pa'i yon tan gyis legs par thugs su chud pa'i blo dang ldan par bstan pa'i dbang du mdzad nas/bsam gyis mi khyab pa rnam par 'jog pa zhes bya ba gsungs te/ gsung rab tu gtogs pa yan lag bcu gnyis po rtog ge'i spyod yul las shin tu 'das pa byis pa ma yin pa'i blos brtag par bya ba'i chos kyi rang dang spyi'i mtshan nyid bstan pa dang rnam par 'jog par mdzad pa'i phyir chos rnam par 'jog pa'i yon tan dang ldan pa yin te/des kyang legs par thugs su chud pa'i blo dang ldan pa yin no/ /de'i 'og tu lung ston pa'i yon tan gyis legs par thugs su chud pa'i blo dang ldan par bstan pa'i dbang du mdzad nas dus gsum du mnyam pa nyid tshar phyin pa zhes bya ba gsungs te/dus gsum du gtogs pa'i dngos po rnams kyi byung ba dang 'byung bas 'byung bar 'gyur ba'i skye ba gcig nas gcig tu brgyud pa lung ston par mdzad pa'i phyir lung ston pa'i yon tan dang ldan pa yin te/des kyang legs par thugs su chud pa'i blo dang ldan pa yin no/ /de'i 'og tu 'jig rten gyi khams thams cad du longs spyod rdzogs pa dang / sprul pa'i sku kun du ston pa'i yon tan gyis legs par thugs su chud pa'i blo dang ldan par bstan pa'i dbang du mdzad nas / 'jig rten gyi khams thams cad du bzhugs pa'i sku dang ldan pa zhes bya ba gsungs te/ 'jig rten gyi khams thams cad du gzugs kyi sku rnam pa gnyis kyis 'dul ba ji lta ba bzhin du sku mdog bai DUr+ya lta bu la sogs pa kun du ston par mdzad pa'i phyir 'jig rten gyi khams thams cad du longs spyod rdzogs pa dang /sprul pa'i sku ston pa'i yon tan dang ldan pa yin te/ des kyang legs par thugs su chud pa'i blo dang ldan pa yin no/ /de'i 'og tu the tshom gcod pa'i yon tan gyis legs par thugs su chud pa'i blo dang ldan par bstan pa'i dbang du mdzad nas/ chos thams cad la the tshom med pa'i mkhyen pa mnga' ba zhes bya ba gsungs te/mkhyen pa de ni bdag la nges pa bzhin du gzhan la yang nges pa bskyed pa'i rgyur 'gyur ba yin pa'i phyir the tshom gcod pa'i yon tan dang ldan pa yin te/ des kyang legs par thugs su chud pa'i blo dang ldan pa yin no/ / de'i 'og tu spyod pa sna tshogs kyis 'dzud pa'i yon tan gyis legs par thugs su chud pa'i blo dang ldan par bstan pa'i dbang du mdzad nas/ spyod pa thams cad dang ldan pa'i blo mnga' ba zhes bya ba gsungs te/ gdul ba ji lta ba bzhin du lus 'dra ba kun du ston pas theg pa la 'dzud par mdzad pa'i phyir spyod pa sna tshogs kyis 'dzud pa'i yon tan dang ldan pa yin te/des kyang legs par thugs su chud pa'i blo dang ldan pa yin no/ /de'i 'og tu phyis chos 'byung ba mkhyen pa'i yon tan gyis legs par thugs su chud pa'i blo dang ldan par bstan pa'i dbang du mdzad nas/ chos shes pa la nem nur mi mnga' ba zhes bya ba gsungs te/nyan thos la sogs pa'i yul las shin tu 'das pa/ dge ba'i rtsa ba'i sa bon phra mo rdo ba'i phag na gser phye yod pa lta bu rnams kyang phyin ci ma log par mkhyen pa'i phyir phyis chos 'byung ba mkhyen pa'i yon tan dang ldan pa yin te/ des kyang legs par thugs su chud pa'i blo dang ldan pa yin no//de'i 'og tu mos pa ji lta ba bzhin kun du ston pa'i yon tan gyis legs par thugs su chud pa'i blo dang ldan par bstan pa'i dbang du mdzad nas/ rnam par ma brtags pa'i sku mnga' ba zhes gsungs te/ rnam par mi rtog kyang yid bzhin gyi nor bu ltar de bzhin gshegs pa'i byin gyi rlabs dang /rang gi mos pa'i dbang gis de bzhin gshegs pa gser gyi kha dog la sogs pa'i gzugs su mthong yang / de bzhin gshegs pa ni mi rtog rnam par mi rtog go zhes bya ba la sogs pa mdo sde nas ji skad gsungs pa lta bu yin pa'i phyir mos pa ji lta ba bzhin du kun du ston pa'i yon tan dang ldan pa yin te/des kyang legs par thugs su chud pa'i blo dang ldan pa yin no/ /de'i 'og tu lus tshad med pas sems can 'dul bar sbyor ba'i yon tan gyis legs par thugs su chud pa'i blo dang ldan par bstan pa'i dbang du mdzad nas/byang chub sems dpa' thams cad kyis ye shes yang dag par blangs pa zhes bya ba gsungs te/ byang chub sems dpa' lus tshad med pa dag gis sems can gdul ba'i phyir sbyor ba gang yin pa de ni de bzhin gshegs pa'i byin gyi rlabs kyis dam pa'i chos nyan pa dang / sems pa dang sgom pa'i rim gyis ye shes thob pa khyad par can gyi byang chub sems dpa' rnams la phan bdags pa dang /yongs su gtad pa dag gis rgyun mi 'chad par gcig nas gcig tu brgyud de 'byung ba'i phyir lus tshad med pas sems can gdul bar sbyor ba'i yon tan dang ldan pa yin te/des kyang legs par thugs su chud pa'i blo dang ldan pa yin no/ /de'i 'og tu chos kyi sku mnyam pa la pha rol tu phyin pa grub pa'i yon tan gyis legs par thugs su chud pa'i blo dang ldan par bstan pa'i dbang du mdzad nas/ sangs rgyas kyi gnas pa gnyis su med pa dam pa'i pha rol du byon pa zhes bya ba gsungs te/sangs rgyas kyis chos kyi sku/ nyis su med pa la sbyin pa la sogs pa pha rol tu phyin pa thams cad mtshungs par yongs su grub pa'i phyir chos kyi sku mnyam pa la pha rol tu phyin pa grub pa'i yon tan dang ldan pa yin te/ des kyang legs par thugs su chud pa'i blo dang ldan pa yin no//de'i 'og tu mos pa ji lta ba bzhin du sangs rgyas kyi zhing ma 'dres pa kun du ston pa'i yon tan gyis legs par thugs su chud pa'i blo dang ldan par bstan pa'i dbang du mdzad nas/ de bzhin gshegs pa'i ma 'dres pa'i rnam par thar pa mdzad pa'i ye shes kyi mthar phyin pa zhes bya ba gsungs te/sems can gyi mos pa dang 'tsham par sangs rgyas kyi zhing gser la sogs pa'i rang bzhin las grub pa ma 'dres pa tha dad pa kun du ston pa'i phyir mos pa ji lta ba bzhin du sangs rgyas kyi zhing ma 'dres pa kun du ston pa'i yon tan dang ldan pa yin te/ des kyang legs par thugs su chud pa'i blo dang ldan pa yin no/ /de'i 'og tu sangs rgyas kyi sku gsum gyi yul yongs su ma chad pa'i yon tan gyis legs par thugs su chud pa'i blo dang ldan par bstan pa'i dbang du mdzad nas/ mtha' dang dbus med pa'i sangs rgyas kyi sa mnyam pa nyid du thugs su chud pa zhes bya ba gsungs te/mtha' dang dbus med pa zhes bya ba ni sangs rgyas nyid kyi khyad par te/ sku gsum gyi bdag nyid kyi sangs rgyas thog ma dang / tha ma dang / bar dang / nyal ba rnams so/ /de dag gis ni sangs rgyas kyi zhing ste sangs rgyas kyi zhing thams cad du sku gsum gyi yul du tha dad pa med pa'i dngos pos mnyam pa nyid du bzhugs pa'i phyir sangs rgyas kyi sku gsum gyi yul yongs su ma chad pa'i yon tan dang ldan pa yin te/des kyang legs par thugs su chud pa'i blo dang ldan pa yin no/ /de'i 'og tu 'khor ba'i mtha'i bar du sems can thams cad la phan pa dang bde ba mdzad par nye bar gnas pa'i yon tan gyis legs par thugs su chud pa'i blo dang ldan par bstan pa'i dbang du mdzad nas/chos kyi dbyings kyis klas pa zhes bya ba gsungs te/ chos kyi dbyings shin tu rnam par dag pa 'khor ba ji srid par gnas pa dang / de'i rgyu mthun pa mdo'i sde la sogs pa'i chos rnams 'dul ba'i dus ji lta ba bzhin du bcom ldan 'das bzhugs pa'i tshe dang /yongs su mya ngan las 'das pa'i dus na yang gnas pa'i phyir 'khor ba'i bar du sems can thams cad la phan pa dang bde ba mdzad pa'i nye bar gnas pa'i yon tan dang ldan pa yin te/des kyang legs par thugs su chud pa'i blo dang ldan pa yin no/ /de'i 'og tu mi zad pa'i yon tan gyis legs par thugs su chud pa'i blo dang ldan par bstan pa'i dbang du mdzad nas/ nam mkha'i khams kyi mthas gtugs pa de zhes bya ba gsungs te/ nam mkha' dang 'dra ba'i chos kyi dbyings la rnam par bkod pa'i yon tan rnams kyi mtha' med pas na 'khor ba ji srid pa'i bar du chos kyi dbyings kyis 'gro ba mtha' dag gi don mdzad pa'i rgyun mi 'chad par sbyor bas yon tan mi zad pa'i phyir mi zad pa'i yon tan dang ldan pa yin te/des kyang legs par thugs su chud pa'i blo dang ldan pa yin no zhes bya bar sbyar ro//yang rnam grangs gzhan du na bcom ldan 'das kyi yon tan gyi khyad par rnam pa nyi shu rtsa gcig po de dag gis ni bcom ldan 'das kyi ye shes dang spangs pa bla na med pa gnyis kyis rang gi don phun sum tshogs pa dang / bdag dang gzhan gyi sbyor ba gnyis kyis gzhan gyi don phun sum tshogs pa ste/yan lag bzhis phun sum tshogs pa gnyis bstan to/ /de la yan lag dang po ni ye shes bla na med pa ste mdo las/ legs par thugs su chud pa'i blo dang ldan pa zhes gsungs pas bstan te/ blos thugs su chud par bya ba ji snyed pa yod pa de snyed du thugs su chud pa'i phyir ro//de yang rnam pa bzhi ste/ legs par thugs su chud pa'i blo nyid dang / don zab mo thugs su chud pa'i blo nyid dang / legs par thugs su chud pa'i blo nyid dri ma med pa dang / legs par thugs su chud pa'i blo nyid bla na med pa'o//de la legs par thugs su chud pa'i blo nyid ni/ kun du spyod pa gnyis mi mnga' ba zhes gsungs pas bstan te/ nang dang phyi'i skye mched kyi mtshan ma kun du mi spyod pa'i phyir ro/ /don zab mo thugs su chud pa'i blo nyid ni/ mtshan nyid med pa'i chos la mchog tu gzhol bar mdzad pa zhes gsungs pas bstan te/chos bdag med pa la mchog tu gzhol ba'i phyir ro/ /legs par thugs su chud pa'i blo nyid dri ma med pa ni/ sangs rgyas kyi gnas pas gnas pa zhes bya bas bstan te/ byang chub sems dpa'i gnas pa las yang dag par 'das pa'i phyir ro/ / legs par thugs su chud pa'i blo nyid bla na med pa ni/ sangs rgyas thams cad dang mnyam pa nyid brnyes pa zhes bya bas bstan te/ sangs rgyas thams cad dang khyad par med pa'i phyir te/ de ni ye shes bla na med pas rang gi don phun sum tshogs pa bstan pa yin no/ /yan lag gnyis pa spangs pa bla na med pa ste/mdo las sgrib pa med pa'i rtogs pa thugs su chud pa zhes gsungs pas bstan te/ rtogs par bya ba ji snyed yod pa rtogs pa'i phyir ro/ /de yang rnam pa gsum ste/ nyon mongs pa'i sgrib pa mi mnga' bas rtogs pa dang / de dag la rnam par smin pa'i sgrib pa mi mnga' bas rtogs pa dang / shes bya'i sgrib pa mi mnga' bas rtogs pa'o/ /de la nyon mongs pa'i sgrib pa mi mnga' bas rtogs pa ni/ phyir mi ldog pa'i chos dang ldan pa spyod yul gyis mi 'phrogs pa zhes gsungs pa'i tshig gnyis kyis bstan te/ ma 'ongs pa'i dus su yang spangs pa de yongs su nyams pa dang / da ltar nyon mongs pa mi 'byung ba'i phyir te go rims bzhin no//de dag la rnam par smin pa'i sgrib pa mi mnga' bas rtogs pa ni/ bsam gyis mi khyab pa rnam par 'jog pa zhes gsungs pas bstan te/ sku bsam gyis mi khyab pa rnam par 'jog pa'i phyir ro/ /shes bya'i sgrib pa mi mnga' bas rtogs pa'i dus gsum la mnyam pa nyid tshar phyin pa zhes gsungs pas bstan te/dus gsum la chags pa med cing thogs pa med par ye shes mnyam pa nyid tshar phyin pa'i phyir te/ de ni spangs pa bla na med pas rang gi don phun sum tshogs pa bstan pa yin no/ /yan lag gsum pa ni bdag gis sbyor ba ste mdo las 'jig rten gyi khams thams cad du zhugs pa'i sku dang ldan pa zhes gsungs pas bstan te/sems can dpag tu med pa'i don mdzad pa'i phyir ro/ /zhugs pa'i sku de ni rnam pa bzhi ste/ dgos pa dang / thabs dang / kun nas nyon mongs pa med pa dang / ngo bo nyid kyis bstan to/ /de la dgos pa ni chos thams cad la the tshom med pa'i mkhyen pa mnga' bas zhes gsungs pas bstan te/the tshom thams cad bcad pa'o/ /thabs ni/ spyod pa thams cad dang ldan pa'i blo mnga' ba zhes gsungs pas bstan te/ dga' ldan gyi gnas su skye ba la sogs pa kun du ston pa'i phyir ro/ /kun nas nyon mongs pa med pa ni chos shes pa la nem nur mi mnga' ba zhes gsungs pas bstan te/'jig rten gyi chos rnams thog ma nyid du so sor rig pa'i phyir kun nas nyon mongs pa med pa nyid yin no/ /ngo bo nyid ni rnam par ma brtags pa'i sku mnga' ba zhes gsungs pas bstan te/ nyon mongs pa'i rnam par rtog pa thams cad las ma byung ba'i phyir te/de ni de'i bdag gi sbyor bas gzhan gyi don phun sum tshogs pa bstan pa yin no/ /yan lag bzhi pa ni gzhan gyi sbyor ba ste/ mdo las/ byang chub sems dpa' thams cad kyi ye shes yang dag par blangs pa zhes gsungs pas bstan te byang chub sems dpas ye shes rnams rang gi ye shes su yang dag par blangs pa'i phyir ro//ye shes yang dag par blangs pa de ni rnam pa gsum ste/ khas len pa dang / 'grub pa dang / rtogs pa bstan pa'o/ /de la khas len pa ni/ sangs rgyas kyi gnas pa gnyis su med pa dam pa'i pha rol tu byon pa zhes gsungs pas bstan te/byang chub sems dpa' sangs rgyas su 'gyur ba'i chos kyi sku dang gcig pa nyid du khas len pa'i phyir ro/ /'grub pa ni de bzhin gshegs pa ma 'dres pa'i rnam par thar pa mdzad pa'i ye shes kyi mthar byon pa zhes gsungs pas bstan te/ de bzhin gshegs pa'i ye shes dang spangs pa tha dad pa med pa 'grub pa'i phyir ro//rtogs pa mtha' dang dbus med pa'i sangs rgyas kyi mnyam pa nyid thugs su chud pa zhes gsungs pas bstan te/ de gnyi ga'i gnas de bzhin nyid chos kyi dbyings rtogs pa'i phyir ro/ /chos kyi dbyings rtogs pa de yang chos kyi dbyings kyis klas pa zhes gsungs pas nyan thos rnams las khyad du 'phags pa bstan te/nyan thos ni yongs su mya ngan las 'da'i/ chos kyi dbyings kyis klas pa de ni nam mkha'i khams kyi mthas gtugs pa yin te/ dper na nam mkha' ni 'jig pa'i dus sam chags pa'i dus na yang zad pa med pa de bzhin du sangs rgyas bcom ldan 'das rnams kyang mngon par rdzogs par byang chub pa'i dus sam/yongs su mya ngan las 'das pa'i dus na yang / 'khor ba dang mya ngan las 'das pa la mi gnas pa'i phyir nyan thos rnams las khyad par du 'phags pa yin te de ni de'i gzhan gyi sbyor bas gzhan gyi don phun sum tshogs pa bstan pa yin no//dngos po bsdu ba'i sgo nas yang rnam grangs gzhan te/ de bzhin gshegs pa'i phun sum tshogs pa ni 'dir rnam pa nyi shu rtsa gcig tu bstan te/ thugs phun sum tshogs pa dang / gsung phun sum tshogs pa dang /sku phun sum tshogs pa mya ngan las 'das pa mtshan nyid med pa dang / bzhugs pa phun sum tshogs pa stong pa nyid dang / so sor rtog pas bzhugs pa dang / yon tan yongs su 'dzin pa phun sum tshogs pa dang / dris pa lung ston pa phun sum tshogs pa dang / rab tu rgol ba zil gyis gnon pa phun sum tshogs pa dang /zhing yongs su dag pa phun sum tshogs pa dang / gnas phun sum tshogs pa dang / spyod lam phun sum tshogs pa dang / sprul pa phun sum tshogs pa dang / bstan pa phun sum tshogs pa dang / sems can gyi spyod pa rjes su 'jug pa phun sum tshogs pa dang /thams cad du 'gro ba'i lam gyi gdams ngag phun sum tshogs pa dang / phan pa gnod pa la kun nas nyon mongs pa med pa phun sum tshogs pa dang / gzhi phun sum tshogs pa dang / mi mthun pa med pa phun sum tshogs pa dang / cho 'phrul gyi rnam par rol pa phun sum tshogs pa dang /yon tan mi zad pa phun sum tshogs pa dang / bdag gi dngos po phun sum tshogs pa dang / mya ngan las 'das pa phun sum tshogs pa'o/ /phun sum tshogs pa rnam pa nyi shu rtsa gcig po de dag kyang mdo las/ legs par thugs su chud pa'i blo dang ldan pa zhes bya ba nas/ nam mkha'i khams kyi mthas gtugs pa zhes bya ba gsungs pa'i bar gyi tshig nyi shu rtsa gcig dang go rims bzhin du sbyar te/tshig gi don la sogs pa ni rnam grangs dag gis lugs bzhin du ci rigs par sbyar ro/ /yon tan phun sum tshogs pa'i tshig gi don la sogs pa bshad zin to// // ji lta bu dag dang bzhugs she na/ 'khor phun sum tshogs pa dag ste/ de la 'khor phun sum tshogs pa ni rnam pa gnyis te/ nyan thos kyi 'khor phun sum tshogs pa dang / byang chub sems dpa'i 'khor phun sum tshogs pa'o/ /de la dang por nyan thos kyi 'khor phun sum tshogs pa bstan pa'i dbang du mdzad nas/nyan thos kyi dge 'dun tshad med pa thams cad kyang cang shes pa zhes bya ba la sogs pa gsungs so/ /de la ci'i phyir nyan thos kyi 'khor thog mar smos she na/ de ni theg pa chen po la the tshom za ba rnams kyi the tshom bsal ba dang / byang chub sems dpa' ma nges pa'i rigs can rnams kyi rkyen nye bar bsgrub pa dang /nyan thos rnam par dag pa rnams kyi nga rgyal spang ba dang / 'khor dang rgyu ba rnams kyi 'khor de dag gdul ba dang / byang chub sems dpa' rnams nyan thos dag la gus pa bskyed par bya ba'i phyir te/ byang chub sems dpas kyang nyan thos rnams la mi gus par mi bya'o zhes gsungs pas na de'i phyir gzhan dag de la gus pa bskyed pa'i phyir de dag gi yon tan thog mar brjod pa'o//'o na gnas de ni shin tu rnam par dag cing dbang sgyur ba'i rnam par rig pa'i mtshan nyid yin no zhes gsungs na/ de ni nyan thos rnams ji srid par gyur te 'gal lo/ /ji ltar 'gal zhe na/ byang chub sems dpa' rnams dang lta ba mthun pa'i rkyen du 'gyur ro zhe na/gal te nyan thos rnams kyis kyang byang chub sems dpa' dag bzhin du gnas te mthong ngo zhes smra na ni 'gal bar yang 'gyur grang na/ de dag de na gnas su zin kyang de mthong bar 'gyur ba'i 'du byed dang bral ba'i phyir dmus long dang 'dra bar 'byor pa de lta bu de mi mthong bas 'gal ba med do//dper na gser la sogs pa la sol ba la sogs par mthong ba dang 'dra ste/ rang gi 'du byed kyi dbang gis gzhan du mthong ba'i phyir ro/ /yang na cung zad cig mthong na yang sangs rgyas kyi byin gyi rlabs kyis mthong bar zad kyi rang gi 'du byed kyi dbang gis mthong ba ma yin pas 'gal ba med do//yang na de dag ni byang chub sems dpa' chen po sha stag ste/ nyan thos kyi cha byad dang ming gis 'dul ba'i dbang gi phyir de na gnas pa yin pas 'gal ba med do/ /de la nyan thos kyi dge 'dun zhes bya ba la/nyan thos zhes bya ba'i tshig gi don ni nyan cing sgrogs pas na nyan thos zhes bya'o/ /dge 'dun zhes bya ba'i tshig gi don ni mang po 'dus pa ste/ de yang tshul khrims mthun pa dang / lta ba mthun pa dang / 'tsho ba mthun pa dang / spyod pa mthun pa'i phyir bdud la sogs pas mi phyed pas na dge 'dun zhes bya'o//tshad med pa zhes bya ba ni grangs tshad med pa dang / yon tan tshad med pa'o/ /de la grangs tshad med pa ni bgrang ba las yang dag par 'das pa'i phyir ro/ /yon tan tshad med pa ji lta bu zhe na/ de'i phyir thams cad kyang cang shes pa zhes bya ba la sogs pa gsungs te/ de la cang shes pa zhes bya ba ni bslab pa rnams dang 'gal bar mi byed pa ste/ dmu rgod ma yin pa'i phyir rta cang shes lta bu'o/ /yang rnam pa gcig tu na cang shes pa zhes bya ba ni mi 'jigs pa ste/ 'jigs pa med pa'i phyir mdo las cang shes pa rnam pa lngar gsungs te/ lce 'bab pa la sogs pa bag tsha ba 'byung bar dogs pa med pas khyu mchog cang shes dang /'thab mo'i 'jigs pa med pas glang po che dang / rta cang shes dang / gzhan gyis gnod par byed pa'i 'jigs pa med pas seng ge cang shes dang / 'chi ba'i 'jigs pa med pas dgra bcom pa cang shes so/ /mdor na bag tsha ba ni rnam pa bzhi ste/sdug bsngal gyi bag tsha ba dang / 'jigs pa'i bag tsha ba dang / 'jig rten gyi chos kyi bag tsha ba dang / mi shes pas bag tsha ba'o/ /dgra bcom pa la ni bag tsha ba de dag med pas bde ba thob pa dang / mi skrag pa thob pa dang / mi 'jigs pa thob pa dang / dbyugs dbyung ba thob pa zhes bya ste go rims bzhin no//de la mya ngan dang / smre sngags 'don pa dang / sdug bsngal ba dang / yid mi bde ba rnams mya ngan med pa'i phyir sdug bsngal gyi bag tsha ba med do/ /bdag gis smad pa dang / gzhan gyis smad pa dang / ngan 'gro dang / 'tsho ba med pa dang / chad pas bcad pa dang / tshigs su bcad pa med pa dang / 'tshe bas 'jigs pa rnams med pas 'jigs pa'i bag tsha ba med do/ /rnyed pa dang / ma rnyed pa dang / grags pa dang / ma grags pa dang / bstod pa dang / smad pa dang / bde ba dang / sdug bsngal gyis gos pa med pas 'jig rten gyi chos kyi bag tsha ba med do/ /mi shes pa dang /the tshom gyi shes pa dang / log par shes pa'i bar du gcod pa rnams med pas/ mi shes pa'i bag tsha ba med pa/ de ltar bag tsha ba med pa'i phyir cang shes pa zhes bya'o/ /cang shes pa de'i phun sum tshogs pa ni rnam pa bcu gsum du rig par bya ste/ gnyis su med pa phun sum tshogs pa dang /shin tu dul ba phun sum tshogs pa dang / bsngags pa phun sum tshogs pa dang / dkyel phun sum tshogs pa dang / rgyu phun sum tshogs pa dang / mthun pa'i lam du 'gro ba phun sum tshogs pa dang / myur ba nyid phun sum tshogs pa dang / ring du 'gro ba phun sum tshogs pa dang / 'gro ba mang po phun sum tshogs pa dang / yongs su spyod pa phun sum tshogs pa dang / tshogs pa dang nye bar zhi ba phun sum tshogs pa dang / 'grogs na bde ba phun sum tshogs pa dang / dbang du gyur pa phun sum tshogs pa'o/ /phun sum tshogs pa bcu gsum po de dag kyang mdo las sangs rgyas kyi sras zhes bya ba nas de bzhin gshegs pa'i bka' la shin tu zhugs pa sha stag ces gsungs pa'i bar gyi tshig nyi shu rtsa bdun las/gcig dang / gnyis dang / gcig dang / gcig dang / gsum dang / gsum dang / bcu dang / gcig dang / gcig dang / gcig dang / gcig dang / gcig dang go rims bzhin du sbyar ro//de la dang por gnyis su med pa phun sum tshogs pa bstan pa'i dbang du mdzad nas/ sangs rgyas kyi sras zhes bya ba gsungs te/ sangs rgyas kyi sras zhes bya ba ni de bzhin gshegs pa'i lung gi stobs kyis 'phags pa'i lam las skyes pa'i phyir yin gyi sangs rgyas kyi gdung yang dag par 'dzin pa ni ma yin te/nyan thos rnams ni bcom ldan 'das kyi sras zhal las skyes pa chos las skyes pa yin no zhes gsungs pa'i phyir ro/ /de ltar sangs rgyas kyi gdung yang dag par 'dzin pa ma yin du zin kyang zhal nas skyes pa'i sgo nas byang chub sems dpa' rnams dang khyad par med par sangs rgyas kyi sras su 'dra bas na de'i phyir gnyis su med pa phun sum tshogs pa zhes bya'o//de'i 'og tu shin tu dul ba phun sum tshogs pa bstan pa'i dbang du mdzad nas/ sems shin tu rnam par grol ba/ shes rab shin tu rnam par grol ba zhes bya ba gsungs te/ de la sems shin tu rnam par grol ba zhes bya ba ni khams gsum pa'i sred pa'i phyogs kyi kun nas nyon mongs pa'i chos thams cad las rnam par grol ba'o//shes rab shin tu rnam par grol ba zhes bya ba ni/ khams gsum pa'i ma rig pa'i phyogs kyi kun nas nyon mongs pa'i chos thams cad las rnam par grol ba ste/'di ltar 'dod chags dang rnam par bral ba'i phyir sems rnam par grol bas sems rnam par grol ba zhes bya'o/ /ma rig pa dang rnam par bral ba'i phyir shes rab rnam par grol bas shes rab shin tu rnam par grol ba zhes bya'o/ /de la sred pa'i phyogs kyi nyon mongs pa dang / nye ba'i nyon mongs pa spangs pas /ting nge 'dzin dang snyoms par 'jug pa thob pa ni sems rnam par grol ba zhes bya'o/ /nyon mongs pa thams cad spangs pas thob par bya ba dgra bcom pa'i lam gyi shes pa ni shes rab rnam par grol ba zhes bya'o/ /de la sems rnam par grol ba thob pas ni snyoms par 'jug pa'i sgrib pa las rnam par grol lo//shes rab rnam par grol ba thob pas ni nyon mongs pa'i sgrib pa las rnam par grol lo/ /gnyis ka'i cha las rnam par grol ba dag ni sems shin tu rnam par grol ba dang / shes rab shin tu rnam par grol ba zhes bya'o/ /de ltar khams gsum pa'i sred pa'i phyogs dang / ma rig pa'i phyogs kyi kun nas nyon mongs pa shin tu ma dul ba'i mtshan nyid dag las sems dang shes rab shin tu rnam par grol bas na de'i phyir shin tu dul ba phun sum tshogs pa zhes bya'o/ /de'i 'og tu bsngags pa phun sum tshogs pa bstan pa'i dbang du mdzad nas/ tshul khrims shin tu rnam par dag pa zhes bya ba gsungs te/tshul khrims shin tu rnam par dag pa zhes bya ba ni yan lag drug dang ldan pa'i tshul khrims dang ldan pa ste/ yan lag drug ni tshul khrims dang ldan par gnas pa dang / so sor thar pa'i sdom pas bsdams pa dang / cho ga phun sum tshogs pa dang / spyod yul phun sum tshogs pa dang /kha na ma tho ba phra rab tsam dag la yang 'jigs par lta ba dang / bslab pa'i gzhi rnams yang dag par blangs te slob par byed pa yin no/ /de la ji ltar na tshul khrims dang ldan par gnas pa yin zhe na/ bslab pa'i gzhi ji ltar yang dag par blangs pa dag la lus kyi las kyi mtha' ma log pa dang /ngag gi las kyi mtha' ma log par gyur cing ma nyams par byed pa dang / skyon med par byed pa yin no/ /ji ltar na so sor thar pa'i sdom pas bsdams pa yin zhe na/ sde tshan bdun po dag gi tshul khrims ni so sor thar pa'i sdom pa zhes bya ste/ skabs 'dir ni dge slong gi sdom pa las brten nas/so sor thar pa'i sdom pas bsdams pa zhes bya'o/ /ji ltar na cho ga phun sum tshogs pa yin zhe na/ spyod lam mam/ 'phral gyi bya ba 'am/ dge ba'i phyogs kyi sbyor ba la brten nas 'jig rten dang rjes su mthun zhing 'jig rten dang mi 'gal ba dang / 'dul ba dang / rjes su mthun zhing / 'dul ba dang mi 'gal ba'i cho ga dang ldan pa yin no/ /ji ltar na spyod yul phun sum tshogs pa yin zhe na/ dge slong gi spyod yul ma yin pa de bzhin gshegs pas smad pa lnga'o/ /shan pa'i gnas dang / smad 'tshong ma'i gnas dang / chang 'tshong gi gnas dang / rgyal po'i pho brang dang /gdol pa'i khyim rnams spangs nas spyod yul kha na ma tho ba med pa gzhan dag tu spyod par byed cing der yang dus su spyod par byed pa yin no/ /ji ltar kha na ma tho ba phra rab tsam dag la yang 'jigs par lta ba yin zhe na/ bslab pa'i gzhi phra ba gang dag la ltung ba 'byung ba dang / ltung ba 'byung ba de la ches chung ngus ltung bar 'gyur ba'i bslab pa'i gzhi phran tshegs phra mo de dag la yang bdag ltung ba byung bar gyur na gzhi des bdag la ma legs par 'gyur ro snyam nas/des 'jigs par lta zhing srog gi phyir yang bslab pa'i gzhi phran tshegs phra mo de dag la bsams bzhin du ltung ba 'byin par mi byed pa yin no//ji ltar na bslab pa'i gzhi rnams yang dag par blangs te slob par byed pa yin zhe na/ sngon so sor thar pa'i sdom pa yang dag par len pa'i tshe/ gsol ba dang bzhi'i las kyis bsnyen par rdzogs par byed pa na bslab pa'i gzhi che long rnams kyi rang bzhin thos shing de las gzhan pa bslab pa'i lhag ma so sor thar pa'i mdo las gsungs pa nyis brgya lnga bcu po las 'phral du ma thos pa dag kyang zla ba phyed phyed bzhin so sor thar pa'i mdo 'don pa'i tshe'am/gnas skabs gzhan dag tu mkhan po'am/ slob dpon nam/ tshangs pa mtshungs par spyod pa gtam 'dres pa'am/phebs par smra ba'am/ smos 'drin nam / 'grogs bshes dag las thos nas thams cad la bslab par bya'o zhes dam bca' bas yang dag par blangs te/ de phyin chad bslab pa'i gzhi de dag la lhag chad med par slob cing / don dang tshig 'bru phyin ci ma log par yongs su 'dzin par byed pa yin te/de ltar yan lag drug dang ldan pa'i tshul khrims dang ldan pa ni tshul khrims shin tu rnam par dag pa zhes bya'o/ /yang na zag pa med pa'i tshul khrims thob pa'i phyir te/ de yang mthong ba'i lam la tshul khrims mngon par rtogs nas bzung ste/ mi slob pa'i lam thob pa'i bar gyi gnas skabs na 'phags pa dgyes pa'i tshul khrims dang ldan pa la sogs pa nyid yin no//de ltar yan lag drug dang ldan pa dang / zag pa med pa'i tshul khrims shin tu rnam par dag pa ni yon tan thams cad kyi gzhir gyur pa yin pas na de'i phyir bsngags pa phun sum tshogs pa zhes bya'o/ / de'i 'og tu dkyel phun sum tshogs pa bstan pa'i dbang du mdzad nas/ chos 'dod pa rnams dang bde bar phrad pa zhes bya ba gsungs te/ chos 'dod pa rnams dang bde bar phrad pa zhes bya ba ni 'khor chos 'dod pa rnams bdag gi drung du nye bar 'ongs nas bdag nyid tshe 'di la bde bar gnas pa'i longs spyod las yongs su nyams pa la tshegs mi lta zhing 'dzum pa sngar gtong ba dang /tshur shog 'ongs pa legs so zhes bya ba la sogs pas gsong por smra zhing de dag bdag nyid dang bde bar spyod par byed pa'o/ /yang na bdag nyid chos 'dod pas dge ba'i bshes gnyen dang phrad pa na kun shes pa'i sems nye bar 'jog pa klan ka tshol ba'i bsam pa med pa dang /spyod lam ngan pa yongs su spangs pas bdag nyid dge ba'i bshes gnyen dang bde bar phrad par byed pa'o/ /de ltar 'khor chos 'dod pa rnams bdag nyid dang bde bar spros pa 'am/ bdag nyid chos 'dod pas dge ba'i bshes gnyen dang phrad par byed pa ni yon tan gyi dkyel che ba yin pas na de'i phyir dkyel phun sum tshogs pa zhes bya'o//de'i 'og tu rgyu phun sum tshogs pa bstan pa'i dbang du mdzad nas/ mang du thos pa/ thos pa 'dzin pa/ thos pa bsags pa zhes bya ba gsungs te/ de la mang du thos pa zhes bya ba ni sde snod gsum las brtsams pa ste gzhung du ma dag mgo mjug chub par nyan cing gzung ba'i phyir ro//thos pa 'dzin pa zhes bya bas ni de dag gi don 'dzin pa ste/ thos pa'i don kun 'dzin pa'i phyir ro/ /thos pa bsags pa zhes bya ba ni de gnyi ga'i don ston par byed pa'i phyir ro/ /de ltar sde snod gsum las brtsams te/mang du thos pa dang / thos pa 'dzin pa dang / thos pa bsags pa'i blo rgya che ba yin pas na de'i phyir rgyu phun sum tshogs pa zhes bya'o/ /de'i 'og tu mthun pa'i lam du 'gro ba phun sum tshogs pa bstan pa'i dbang du mdzad nas/ legs par bsam pa sems pa/ legs par smra ba brjod pa/legs par bya ba'i las byed pa zhes gsungs te/ byis pa rnams ni yid kyi nyes par spyod pa gsum dang / ngag gi nyes par spyod pa bzhi dang / lus kyi nyes par dgag pa gsum spyod pas/ nyes par bsam pa sems pa/ nyes par smra ba brjod pa/ nyes par byed pa'i las byed pa yin pa'i phyir ngan 'gro dang 'khor ba'i rgyud du 'gro ba yin gyi/'phags pa rnams ni de las bzlog pa yin pa'i phyir mngon par mtho ba dang / nges par legs pa'i lam dang mthun par gshegs pas na de'i phyir mthun lam du 'gro ba phun sum tshogs pa zhes bya'o/ /de'i 'og tu myur ba nyid phun sum tshogs pa bstan pa'i dbang du mdzad nas/shes rab myur ba/ shes rab mgyogs pa/ shes rab rno ba/ nges par 'byung ba'i shes rab can/ nges par rtogs pa'i shes rab can/ shes rab che ba/ shes rab yangs pa/ shes rab zab pa/ shes rab mnyam pa med pa/ shes rab rin po che dang ldan pa zhes bya ba gsungs te/de la shes rab myur ba zhes bya ba ni de bzhin gshegs pas gsungs pa'i chos 'dul ba'i don la myur du 'jug pa'i phyir ro/ /shes rab mgyogs pa zhes bya ba ni de dag nyid kyi don mang po la 'jug pa'i phyir te/ mang po la 'gro ba ni mgyogs pa zhes bya'o//shes rab rno ba zhes bya ba ni don cha phra ba la 'jug pa'i phyir ro/ /nges par 'byung ba'i shes rab can zhes bya ba ni 'khor ba las nges par 'byung ba'i shes rab zag pa med pa thob pa'i phyir ro/ /nges par rtogs pa'i shes rab can zhes bya ba ni mya ngan las 'das pa'i dgos pa dang ldan pa'i phyir te/nges par rtogs pa ni gtan la bab par rtogs pa de mya ngan las 'das pa yin no/ /de'i dgos pa dang ldan pa'i shes rab ni nges par rtogs pa'i shes rab ste/ de gang la yod pa'i gang zag ni nges par rtogs pa'i shes rab can zhes bya'o/ /shes rab che ba zhes bya ba ni dris pa lan gdab pa la mtha' thug pa med pa'i phyir ro//shes rab yangs pa zhes bya ba ni mngon par shes pa rgya chen po yongs su rdzogs pa'i phyir ro/ /shes rab zab pa zhes bya ba ni gzhan dag gis gting dpag dka' ba'i phyir ro/ /shes rab mnyam pa med pa zhes bya ba ni nyan thos dbang po rtul po dag las khyad par du 'phags pa'i phyir ro//shes rab rin po che dang ldan pa zhes bya ba ni don gyi mchog thob par byed pas rin po che dang 'dra ba'i phyir ro/ /de ltar shes rab myur ba la sogs pa 'phags pa nyan thos kyi shes rab rnam pa bcu po de dag dang ldan pa ni mngon par shes pa myur ba yin pas na de'i phyir myur ba nyid phun sum tshogs pa zhes bya'o//de'i 'og tu ring du 'gro ba phun sum tshogs pa bstan pa'i dbang du mdzad nas/ rig pa gsum dang ldan pa zhes bya ba gsungs te/ rig pa gsum dang ldan pa ni mi slob pa'i rig pa gsum thob pa'i phyir te/ mi slob pa'i rig pa gsum ni sngon gyi gnas rjes su dran pa'i shes pa mngon du bya ba'i mngon par shes pa'i rig pa dang /'chi 'pho ba dang skye ba shes pa mngon du bya ba'i mngon par shes pa'i rig pa dang / zag pa zad pa shes pa mngon du bya ba'i mngon par shes pa'i rig pa'o/ /de ltar mi slob pa'i rig pa gsum gyis sngon dang phyi ma'i mtha' dang zag pa dang bcas pa dang zag pa med pa'i chos thams cad kyi gting slebs par 'gyur bas na de'i phyir ring du 'gro ba phun sum tshogs pa zhes bya'o//de'i 'og tu 'gro ba bzang po phun sum tshogs pa bstan pa'i dbang du mdzad nas/ tshe 'di la bde bar gnas pa'i mchog thob pa zhes bya ba gsungs te/tshe 'di la bde bar gnas pa ni bsam gtan gyi dngos gzhi yongs su dag pa la gnas pa'o/ /de dag gi mchog thob pa ni yongs su mi nyams pa'i bsam gtan dang 'gog pa'i snyoms par 'jug pa thob pa'o/ /de ltar bsam gtan gyi dngos gzhi dang 'gog pa'i snyoms par 'jug pa thob pa ni tshe 'di la bde bar gnas pa'i bgrod pa yin pas na de'i phyir 'gro ba bzang po phun sum tshogs pa zhes bya'o//de'i 'og tu yongs su spyod pa phun sum tshogs pa bstan pa'i dbang du mdzad nas/ yon yongs su sbyong ba chen po bya ba gsungs te/ gang zag tshul khrims 'chal pa yon tan dang mi ldan pas dad pas sbyin pa yongs su longs spyad pa ni bu lon du gyur pa yin la/gang zag tshul khrims dang ldan pa yon tan gyis yongs su longs spyod pa ni spyod du dbang ba yin na yang 'bras bu myur du skyed pa ma yin gyi/ 'jig rten gsum gyi 'dod chags dang bral ba dgra bcom pa ri rab dang 'dra ba 'di dag la ni lha dang bcas pa'i 'jig rten kun gyi bde ba'i yo byad thams cad kyis bsnyen bkur byas na yang /zhing gshin pa dang 'dra bar 'bras bu bzang por myur du 'grub pa'i phyir yon yongs su spyod pa chen po yin no/ /de ltar bdag nyid la bu lon du mi 'gyur la sbyin bdag la yang 'bras bu myur zhing bzang ba'i phyir/zhing gshin pa lta bu yin pas na de'i phyir yongs su spyod pa phun sum tshogs pa zhes bya'o/ /de'i 'og tu nye bar zhi ba phun sum tshogs pa bstan pa'i dbang du mdzad nas/ spyod lam rab tu zhi ba phun sum tshogs pa zhes bya ba gsungs te/ 'gro ba dang / sdod pa dang / 'dug pa dang / nyal ba la sogs pa spyod lam thams cad du shes bzhin du spyod pa gang yin pa de ni spyod lam rab tu zhi ba dang ldan pa yin no/ /de ltar spyod lam thams cad du shes bzhin du spyod pa ni tshul zhi ba dang ldan pa yin pas na de'i phyir nye bar zhi ba phun sum tshogs pa zhes bya'o//de'i 'og tu 'grogs na bde ba phun sum tshogs pa zhes bya ba bstan pa'i dbang du mdzad nas/ bzod pa dang des pa chen po dang ldan pa zhes bya ba gsungs te/ sdug bsngal ji snyed snyam pa'i bzod pa chen po dang / bka' blo bde ba'i des pa chen po dang ldan pa ni bzod pa dang des pa chen po dang ldan pa yin no//de ltar bzod pa dang des pa chen po dang ldan pa ni bsten par bya ba'i 'os yin pas na/ de'i phyir 'grogs na bde ba phun sum tshogs pa zhes bya'o/ /de'i 'og tu dbang du gyur pa phun sum tshogs pa bstan pa'i dbang du mdzad nas/ de bzhin gshegs pa'i bka' la shin tu zhugs pa zhes bya ba gsungs te/bslab pa dag la yongs su rdzogs par byed pa'i phyir de bzhin gshegs pa'i bka' mi 'gal bar spyod pas na bka' la shin tu zhugs pa yin no/ /de ltar de bzhin gshegs pa'i bka' la shin tu zhugs pa ni nyon mongs pa gzhan gyi dbang du mi 'gyur ba'i phyir bslab pa dag la bag yangs su spyod pa yin pas na/de'i phyir dbang du gyur pa phun sum tshogs pa zhes bya'o/ /sha stag dang zhes bya ba ni nyan thos kyi 'khor phun sum tshogs pa yon tan tshad med pa de lta bu dang ldan pa grangs tshad med pa sha stag dang / byang chub sems dpa'i 'khor phun sum tshogs pa dang yang thabs cig go zhes tshig 'og ma dang sbyar ro//nyan thos kyi 'khor phun sum tshogs pa'i tshig gi don la sogs pa bshad zin to// //de ltar nyan thos kyi 'khor phun sum tshogs pa bstan nas/ de'i 'og tu byang chub sems dpa'i 'khor phun sum tshogs pa bstan pa'i dbang du mdzad nas /sangs rgyas kyi zhing tha dad pa nas 'dus pa'i byang chub sems dpa' dpag tu med pa thams cad kyang gnas chen po la yang dag par zhugs pa zhes bya ba la sogs pa gsungs so/ /de la byang chub sems dpa'i yon tan bstan pa'i dgos pa ni de dag la kha cig brnyas pa bzlog pa'i phyir te/nyan thos yun ring du tshangs par spyad pa rnams kyis byang chub sems dpa' dag la gdung bar bya'o zhes gsungs pa'i phyir dang / kha cig byang chub sems dpa' dag kyang yon tan de lta bu dang ldan pa yin na/ de bzhin gshegs pa lta smos kyang ci dgos snyam du dad pa bskyod pa'i phyir ro//de la byang chub sems dpa'i phun sum tshogs pa ni chen po rnam pa gsum gyis byang chub sems dpa' rnams kyi chen po brjod de/ grangs chen po dang / yon tan chen po dang / las chen pos so/ /de la grangs chen po ni/ sangs rgyas kyi zhing tha dad pa nas 'dus pa'i byang chub sems dpa' dpag tu med pa zhes gsungs pas bstan to//de la sangs rgyas kyi zhing tha dad pa nas 'dus pa zhes bya ba gsungs pa ni don du mi gnyer bas chos nyan du mi 'gro ba dang / le los chos nyan du mi 'gro ba dang / nga rgyal gyi dbang gis chos nyan du mi 'gro ba de dag gi gnyen por bstan pa'i phyir te/de la don du mi gnyer bas chos nyan du mi 'gro ba dag gi gnyen por ni de dag kyang bdag nyid chos mnyan pa don du gnyer bas sangs rgyas kyi zhing tha dad pa gzhan dang gzhan nas 'ongs pa yin gyi / gzhan gyi dring 'jog pas ni ma yin pas gzhan dag gis kyang ci'i phyir chos mnyan pa don du gnyer bar mi bya zhes bstan par bya ba'i phyir ro//le los chos nyan du mi 'gro ba dag gi gnyen por ni de dag kyang sangs rgyas kyi zhing tha dad pa thag ring po dag nas brtson 'grus kyi stobs bskyed pa chen pos chos mnyan pa'i phyir 'dir 'ongs pa yin na/ gzhan dag le los nyan du mi 'gro ba de dag ni rigs pa ma yin no zhes bstan par bya ba'i phyir ro//nga rgyal gyi dbang gis chos nyan du mi 'gro ba dag gi gnyen por ni 'byor pa chen po dang ldan pa de dag kyang sangs rgyas kyi zhing tha dad pa gzhan dag nas chos mnyan pa'i phyir 'ongs na gzhan dag ci'i phyir 'dod par mi bya snyam du sems par bya ba'i phyir ro//byang chub sems dpa' zhes bya ba'i tshig gi don ni bla na med pa'i byang chub dang sems can thams cad la dmigs te sems bskyed pa'o/ /yang gcig tu na byang chub ces bya ba ni rtogs pa dang ldan pa yin la/ sems dpa' zhes bya ba ni snying stobs dang ldan pa la bya'o//dpag tu med pa zhes bya ba ni bgrang ba las yang dag par 'das pa ste/ de nyid kyi grangs chen po bstan pa yin no/ /yon tan chen po ni chen po rnam pa dgus rig par bya ste/ brtson 'grus chen po dang / rgyu chen po dang / dmigs pa chen po dang / dus chen po dang / 'dod pa med pa chen po dang / yid la byed pa chen po dang / rtogs pa chen po dang / yongs su dag pa chen po dang / rtogs pa chen pos so/ /de la brtson 'grus chen po ni thams cad kyang gnas chen po la yang dag par zhugs pa zhes gsungs pas bstan te/ sems can thams cad yongs su bskyab pa'i phyir gnas thams cad chen po la yang dag par zhugs pa yin no zhes bya bar sbyar ro//de la gnas chen po zhes bya ba ni chen po rnams kyi gnas gang yin pa ste/ de yang byang chub sems dpa' chen po rnams kyi gnas de theg pa chen po yin no/ /de'i don gyi phyir yang dag par zhugs pa rnams ni brtson 'grus dang ldan pas na des ni brtson 'grus chen po bstan pa yin no//rgyu chen po ni theg pa chen po'i chos kyis nges par 'byung ba zhes gsungs pas bstan te/ theg pa chen po dang pha rol tu phyin pas bsdus pa lam gyi rang bzhin gyi chos la sogs pas thos pa dang / bsams pa dang / bsgoms pa la sogs pa'i rim gyis nges par 'byung ba yin no zhes bya bar sbyar ro/ /theg pa chen po'i chos dang pha rol tu phyin pa ni lam gyi rang bzhin yin la/ lam ni nges par 'byung ba'i rgyu yin pas na des ni rgyu chen po bstan pa yin no/ /dmigs pa chen po ni sems can thams cad la sems mnyam pa zhes gsungs pas bstan te/sems can thams cad la bdag dang gzhan du mnyam pa'i sems thob pas byams pa chen po la sogs pas mnyam pa nyid du sbyor ba'i phyir te/ sems can thams cad ni byang chub sems dpa'i dmigs pa'i yul yin la/ de dag la tshad med pa'i sems kyis mnyam pa nyid du dmigs par byed pas na des ni dmigs pa chen po bstan pa yin no//dus chen po ni/ bskal pa dang bskal pa ma yin pa'i yongs su rtog pa thams cad dang bral ba zhes bya bas bstan te/ bla na med pa'i byang chub dang sems can thams cad kyi don bsgrub pa'i phyir phyi ma'i mtha'i mur thug pa'i dus thams cad la skad cig gcig dang 'dra bar 'jug go zhes bya bar sbyar te/'di ni bskal pa yin te/ bskal pa gcig gi yud tsam zhig tu spyad par bya'o zhes snyam pa'am 'di ni bskal pa ma yin te/ bskal pa bas thung ba'am/ bskal pa las lhag pa yin pas de dag gi yud tsam zhig tu spyad par bya'o snyam du dus las yongs su rtog pa thams cad dang bral ba'i phyir grub pa'i mthar thug pa'i bar du bdag nyid kyi sangs rgyas kyi chos yongs su smin par byed pa dang /dus kyi mthar thug pa'i bar du phyi rol gyi sems can yongs su smin par byed pas na des ni dus chen po bstan pa yin no//yang rnam grangs gzhan du tshig gi don ni rtog pa dang rnam par rtog pa dang / yongs su rtog pa thams cad dang bral ba zhes bya bar yang 'dren te/ de'i tshig gi don du na rtog pa zhes bya ba ni ngo bo nyid du rtog pa ste/ 'di ni gzugs so/ /'di ni tshor ba'o/ /'di ni 'dod chags so//'di ni dad pa'o zhes bya ba la sogs pa lta bur ngo bo nyid du rtog pa'o/ /rnam par rtog pa zhes bya ba ni bye brag tu rnam par rtog pa ste/ gzugs 'di ni zag pa dang bcas pa'o/ / 'di ni zag pa med pa'o/ /tshor ba 'di ni sred pas brlan pa'o/ /'di ni sred pas ma brlan pa'o/ / 'dod chags 'di ni mthong bas spang bar bya'o/ /'di ni bsgom pas spang bar bya'o/ /dad pa 'di ni las dang 'bras bu la yid ches pa'o/ /'di ni dkon mchog dang bden pa la sems dad pa'o zhes bya ba la sogs pa lta bur bye brag tu rnam par rtog pa'o/ /yongs su rtog pa zhes bya ba ni ngo bo nyid dang bye brag tu yongs su rtog pa ste/'di ni gzugs te/ gzugs 'di ni zag pa dang bcas pa'o/ /'di ni zag pa med pa'o/ /'di ni tshor ba ste/ tshor ba 'di ni sred pas brlan pa'o / /'di ni sred pas ma brlan pa'o/ /'di ni 'dod chags te/ 'dod chags 'di ni mthong bas spang bar bya'o/ /'di ni bsgom pas spang bar bya'o//'di ni dad pa ste/ dad pa 'di ni las dang 'bras bu la yid ches pa'o/ /'di ni dkon mchog bden pa la sems dang ba'o zhes bya ba la sogs pa lta bur ngo bo nyid dang bye brag tu yongs su rtog pa'o/ /de dag thams cad bral ba ni spyod pa bzhi yongs su rdzogs pa'i phyir te/ rnam par mi rtog pa'i pha rol tu phyin pa'i spyod pa yongs su rdzogs pa dang / nyon mongs pa med pa'i byang chub kyi phyogs kyi spyod pa yongs su rdzogs pa dang / 'dzin pa med par sems can yongs su smin par byed pa'i spyod pa yongs su rdzogs pa dang / chags pa med par sangs rgyas kyi chos yongs su smin par byed pa'i spyod pa yongs su rdzogs pa'i phyir ro//de la thabs mkhas pas ni pha rol tu phyin pa'i spyod pa 'grub bo/ /yongs su 'dris pa'i shes pas ni byang chub kyi phyogs kyi spyod pa 'grub bo/ /snying rjes ni sems can yongs su smin par byed pa'i spyod pa 'grub bo//shes rab kyis ni sangs rgyas kyi chos yongs su smin par byed pa'i spyod pa 'grub ste/ de ltar na byang chub sems dpa' ni thabs la mkhas pa dang / yongs su 'dris pa'i shes pa dang / snying rje dang / shes rab dang ldan pas rtog pa thams cad dang bral ba zhes bya ba'i nyan thos ltar 'gog pa'i stobs kyis bkag pa ni ma yin no//tshig gi don de dag gis skabs gzhan du ni yon tan gzhan yang ston to/ /skabs 'dir ni de dag gis kyang dus chen po nyid bstan pa yin te/ de yang ji lta bu zhe na/ de ltar thabs la mkhas pa la sogs pas spyod pa bzhi yongs su rdzogs pa'i byang chub sems dpa' rtog pa dang /rnam par rtog pa dang / yongs su rtog pa thams cad dang bral ba ni 'khor ba yang mi spong / mya ngan las 'das pa yang mi len par phyi ma'i mtha'i mur thug pa'i bar du bdag dang gzhan gyi don phun sum tshogs pa sgrub par byed pas na des kyang dus chen po bstan pa yin no/ /'dod pa med pa chen po ni bdud phyir rgol ba thams cad nges par bcom pa zhes gsungs pas bstan te/'dod pa med pa ni yongs su 'dzin pa thams cad yongs su spangs pa yin pas de nyid kyis bdud phyir rgol ba thams cad nges par bcom pa yin te / ji skad du blo gros rgya mtsho gang gi tshe byang chub sems dpa' yongs su 'dzin pa thams cad mi 'dod par 'gyur ba de'i tshe bdud phyir rgol ba thams cad nges par bcom pa yin no zhes gsungs pa'i phyir ro//de ltar yongs su 'dzin pa thams cad spangs te/ bdud phyir rgol ba nges par bcom pa nyid 'dod pa med pa yin pas na des ni 'dod pa med pa chen po bstan pa yin no//yid la byed pa chen po ni/ nyan thos dang rang sangs rgyas kyi yid la byed pa thams cad las ring du gyur pa zhes gsungs pas bstan te/ byang chub sems dpa' rnams ni dang po sems bskyed pa nas theg pa dman pa'i yid la byed pa thag ring du spangs pa yin pa'i phyir te/ 'di ltar theg pa dman pa'i yid la byed pa thag ring du spangs pa nyid theg pa chen po'i bsam pa yid la byed pa yin pas na des ni yid la byed pa chen po bstan pa yin no//rtogs pa chen po ni/ chos kyi ro'i dga' ba dang / bde ba chen pos bstan pa zhes gsungs pas bstan te/ byang chub sems dpa' rnams ni theg pa chen po'i chos kyi ro'i dga' ba dang bde ba chen pos bstan pa yin pa'i phyir te/de ltar theg pa chen po'i chos kyi ro'i dga' ba dang bde ba chen pos bstan pa nyid byang chub sems dpa'i gnas pa dang / sangs rgyas kyi gnas pa la gnas par 'gyur ba'i rgyu yin pas na des ni rtogs pa chen po bstan pa yin no//yongs su dag pa chen po ni/ 'jigs pa chen po lnga las shin tu 'das pa zhes gsungs pas bstan te/ las rnam pa gsum dang lhag pa'i bsam pa yongs su dag pas 'jigs pa thams cad las shin tu 'das pa ste/ ngan 'gros 'jigs pa la sogs pa'i rgyu tshul khrims 'chal ba la sogs pa'i dri ma yongs su dag pa'i phyir ro//'jigs pa lnga ni 'tsho ba med pas 'jigs pa dang / mi bsngags pas 'jigs pa dang / 'chi bas 'jigs pa dang / ngan 'gros 'jigs pa dang / 'khor gyi nang du bag tsha bas 'jigs pa ste/ de dag ni lhag pa'i bsam pa dag pa'i sa thob nas med par 'gyur ro//de ltar 'jigs pa lnga las shin tu 'das pa ni las rnam pa gsum yongs su dag pa dang lhag pa'i bsam pa yongs su dag pa yin pas na des ni yongs su dag pa chen po bstan pa yin no/ /rtogs pa chen po ni/ phyir mi ldog pa'i sa bgrod pa gcig par gyur pa zhes gsungs pas bstan te/thams cad mkhyen pa nyid du lung bstan pa'i sa thob pas bgrod pa gcig par gyur pa zhes bya bar sbyar te/ byang chub sems dpa'i sa bdun po dag la ni mngon par 'du byed pas 'jug pa'i phyir bgrod pa gcig par gyur pa ma yin no/ /phyir mi ldog pa'i sa ni sa brgyad pa'o//bgrod pa ni lam ste sa brgyad pa de thob pa de ma yin pa'i byang chub sems dpa' sa brgyad pa thob pa gzhan dag dang bgrod pa gcig par gyur pa yin te/ sa brgyad pa bgrod pa gcig par gyur pa gang dag yin pa de dag la de skad ces bya'o zhes bya bar sbyar ro//de ltar phyir mi ldog pa'i sa thob cing de thob pa'i byang chub sems dpa' gzhan dag dang bgrod pa gcig par gyur pa nyid mi skye ba'i chos la bzod pa thob pa yin pas na/ des ni rtogs pa chen po bstan pa yin no/ /de la las chen po ni/ sems can thams cad kyi gnod pa thams cad rab tu zhi bar byed pa'i sa mngon du gyur pa sha stag ces gsungs pas bstan te/sems can thams cad kyi nang gi mtshan ma la sogs pa'i gnod pa gang dag yin pa de dag sa gang gis rab tu zhi bar byed pa'i sa de mngon du gyur pa gang dag yin pa de dag la 'di skad ces bya ste/sa de yang gang zhe na/ byams pa chen po dang / snying rje chen po ste/ de gnyis kyis blo myur du byung ba la sogs pa'i gnod pa thams cad rab tu zhi bar byed pa dang / dbul ba la sogs pa'i sdug bsngal thams cad rab tu zhi bar byed pa'i phyir ro/ /de ltar byams pa chen po dang snying rje chen po de gnyis kyis sems can bde ba la bkod pa dang /sdug bsngal las bskyab pa la sogs pa'i don bya ba phal cher byed la de'i sa mngon du gyur pas na des ni las chen po bstan pa yin te/ de ni re zhig rnam grangs gzhan yin no/ /yang rnam grangs gzhan du na byang chub sems dpa'i 'khor phun sum tshogs pa ni mdo las/sangs rgyas kyi zhing tha dad pa nas 'dus pa'i byang chub sems dpa' dpag tu med pa thams cad kyang gnas chen po la yang dag par bzhugs pa zhes bstan to/ /gnas chen po la yang dag par bzhugs pa zhes bya ba 'di skabs 'dir ni gnas chen po la yang dag par zhugs pa zhes mi bya'i/'jug pa chen po la yang dag par zhugs pa zhes bya bar bshad de/ 'jug pa chen po zhes bya ba ni theg pa chen po'i lam gyi rang bzhin la bya'o/ /de la 'jug pa chen po la yang dag par zhugs pa de ni lam gyi skyon rnam pa dgu yongs su spong bar yang dag par zhugs pas 'jug pa chen po la yang dag par zhugs pa zhes bya ste/de nyid de'i phun sum tshogs pa yang yin no/ /de la lam gyi skyon rnam pa dgu gang zhe na/ 'di skad du/ rdzogs pa'i byang chub mi mthun lam/ /rdul bcas pa dang tsher mar bcas/ /chud za 'jigs dang bde med dang / /'jigs bcas ris min phyogs min 'gro//zhes gsungs te/ byang chub sems dpa' rnams kyi lam gyi skyon rnam pa dgu ni rdzogs pa'i byang chub dang mi mthun pa'i lam dang / rdul dang bcas pa'i lam dang / tsher ma dang bcas pa'i lam dang / chud za ba'i lam dang / 'jigs pa'i lam dang / bde ba med pa'i lam dang /'jigs pa dang bcas pa'i lam dang / ris ma yin pa'i lam dang / phyogs ma yin pa'i lam du 'gro ba'o/ /las kyi skyon rnam pa dgu po de dag yongs su spang bar yang dag par zhugs pas ni mdo las/ theg pa chen po'i chos kyi nges par 'byung ba zhes bya ba nas sems can thams cad kyi gnod pa thams cad rab tu zhi bar byed pa'i sa mngon du gyur pa sha stag ces gsungs pa'i bar gyi tshig dgu dang go rims bzhin du sbyar ro//de la rdzogs pa'i byang chub dang mi mthun pa'i lam du 'gro ba yongs su spong bar yang dag par zhugs pa ni theg pa chen po'i chos kyi nges par 'byung ba zhes gsungs pas bstan te/de la rdzogs pa'i byang chub dang mi mthun pa'i lam du 'gro ba zhes bya ba la sogs pa'i byang chub ces bya ba ni bla na med pa yang dag par rdzogs pa'i byang chub bo/ /de dang mi mthun pa'i lam ni theg pa chen po sa dang pha rol tu phyin pas bsdus pa lam gyi rang bzhin gyi chos rnams kyi mthun pa'i phyogs kyi chos gang dag yin pa de sa dang po'i mi mthun pa'i phyogs so so'i skye bo nyid ces bya ba nas/sa bcu pa'i mi mthun pa'i phyogs chos la dbang ma thob pa zhes bya ba'i bar dang / sbyin pa'i pha rol tu phyin pa'i mi mthun pa'i phyogs ser sna zhes bya ba nas ye shes kyi pha rol tu phyin pa'i mi mthun pa'i phyogs shes bya mi shes pa zhes bya ba'i bar gyi chos rnams so//lam der 'gro ba la mi mthun pa'i phyogs kyi chos de dag la spyod pa yin te/ de ni rdzogs pa'i byang chub dang mi mthun pa'i lam du 'gro ba yin pas 'jug pa chen po la yang dag par zhugs pa ma yin pa'i phyir byang chub sems dpa' rnams kyi lam gyi skyon yin no//de yongs su spong bar yang dag par zhugs pa ni theg pa chen po sa dang pha rol tu phyin pas bsdus pa lam gyi rang bzhin gyi chos kyi nges par 'byung ba ste/ de'i phyir 'jug pa chen po la yang dag par zhugs pa yin no zhes bya bar sbyar ro//rdul dang bcas pa'i lam du 'gro ba yongs su spong bar yang dag par zhugs pa ni/ sems can thams cad la sems pa zhes gsungs pas bstan te/ de la rdul dang bcas pa'i lam du 'gro ba zhes bya ba la/ rdul dang bcas pa'i lam zhes bya ba ni nyon mongs pa dang bcas pa'i sems te/zhe sdang dang / rnam par 'tshe ba dang / mi dga' ba dang / 'dod pa dang / the tshom dang / mtshan ma dang bcas pa'i sems gang yin pa'o/ /lam der 'gro ba ni nyon mongs pa'i rdul dang bcas pa'i sems de dag la 'jug pa ste/ de ni nyon mongs pa'i rdul dang bcas pa'i lam du 'gro ba yin pas 'jug pa chen po la yang dag par zhugs pa ma yin pa'i phyir byang chub sems dpa' rnams kyi lam gyi skyon yin no//de yongs su spong bar yang dag par zhugs pa ni sems can thams cad las 'byung bar 'os pa'i khams drug po gnod sems las 'byin pa byams pa dang /rnam par 'tshe ba las 'byin pa snying rje dang / mi dga' ba las 'byin pa dga' ba dang / 'dod pa las 'byin pa btang snyoms dang / the tshom las 'byin pa nga'o snyam pa'i nga rgyal yang dag par 'joms pa dang / mtshan ma las 'byin pa mtshan ma med pa dag gis sems mnyam par sbyor ba ste/de'i phyir yang 'jug pa chen po la yang dag par zhugs pa yin no/ /tsher ma dang bcas pa'i lam du 'gro ba yongs su spong bar yang dag par zhugs pa ni/ bskal pa dang bskal pa ma yin par yongs su rtog pa thams cad bral ba zhes gsungs pas bstan te/ de la tsher ma dang bcas pa'i lam du 'gro ba zhes bya ba la/tsher ma dang bcas pa'i lam zhes bya ba ni rtog pa dang bcas pa'i sems te/ bskal pa dang bskal pa ma yin par yongs su rtog pa dang / ngo bo nyid dang bye brag tu yongs su rtog pa'i sems gang yin pa'o/ /lam der 'gro ba ni rtog pa'i tsher ma dang bcas pa'i sems de dag la gnas pa ste/de ni rtog pa'i tsher ma dang bcas pa'i lam du 'gro ba yin pas 'jug pa chen po la yang dag par zhugs pa ma yin pa'i phyir byang chub sems dpa' rnams kyi lam gyi skyon yin no/ /de yongs su spong bar yang dag par zhugs pa ni bskal pa dang bskal pa ma yin par yongs su rtog pa dang /ngo bo nyid bye brag tu yongs su rtog pa thams cad dang bral bas bdud kyi tsher ma dkrugs pa ste/ de'i phyir yang 'jug pa chen po la yang dag par zhugs pa yin no/ /chud za ba'i lam du 'gro ba yongs su spong bar yang dag par zhugs pa ni/ bdud phyir rgol ba thams cad nges par bcom pa zhes gsungs pas bstan te/de la chud mi za ba'i lam du 'gro ba zhes bya ba la/ chud za ba'i lam zhes bya ba ni rab tu nyams par 'gyur ba'i sems te/ lus kyi yo byad dang yongs su gzung ba'i dngos po la sogs pa dag la yongs su 'dzin pa'i sems gang yin pa'o//lam der 'gro ba ni yongs su 'dzin pa'i chud za ba dang bcas pa'i sems de dag dang ma bral ba de ni rab tu nyams par chud za ba'i lam du 'gro ba yin pas 'jug pa chen po la yang dag par zhugs pa ma yin pa'i phyir byang chub sems dpa' rnams kyi lam gyi skyon yin no/ / de yongs su spong bar yang dag par zhugs pa ni/ yongs su 'dzin pa thams cad spangs pas bdud phyir rgol ba la nges par bcom pa ste/ de'i phyir yang 'jug pa chen po la yang dag par zhugs pa yin no/ /'jigs pa'i lam du 'gro ba yongs su spong bar yang dag par zhugs pa ni nyan thos dang rang sangs rgyas kyi yid la byed pa thams cad las ring du gyur pa zhes gsungs pas bstan te/de la 'jigs pa'i lam du 'gro ba zhes bya ba la 'jigs pa'i lam zhes bya ba ni theg pa chen po bsam pa ma thob par yongs su nyams pa'i sems te/ nyan thos dang / rang sangs rgyas kyi yid la byed pa'i sems gang yin pa'o//lam der 'gro ba ni dang po nyid nas nyan thos dang rang sangs rgyas kyi rigs gnas shing de dag gi theg par sems bskyed pa ste/ de ni theg pa dman pa'i yid la byed pas 'jigs pa'i lam du 'gro ba yin pas 'jug pa chen po la yang dag par zhugs pa ma yin pa'i phyir byang chub sems dpa' rnams kyi lam gyi skyon yin no//de yongs su spong bar yang dag par yongs su zhugs pa ni/ dang po nyid nas bla na med pa'i byang chub kyi rigs dang / sems bskyed pa dang mngon par rtogs pa la sogs pa dang ldan pas nyan thos dang / rang sangs rgyas kyi yid la byed pa thams cad las ring du gyur pa ste/de'i phyir yang 'jug pa chen po la yang dag par zhugs pa yin no/ /bde ba med pa'i lam du 'gro ba yongs su spong bar yang dag par zhugs pa ni/ chos kyi ro'i dga' ba dang bde ba chen pos bstan pa zhes gsungs pas bstan te/de la bde ba med pa'i lam du 'gro ba zhes bya ba la/ bde ba med pa'i lam zhes bya ba ni theg pa chen po'i chos kyi ro'i dga' ba dang bde ba nyams su ma myong ba'i sems te/ mngon par rtogs pa'i lam ma thob pa'i sems gang yin pa'o/ /lam der 'gro ba ni mngon par rtogs pa thob pa'i lam nges par 'byed pa'i cha dang mthun pa dag las gzhan pa 'jig rten pa'i lam la spyod pa ste/de ni mngon par rtogs par bde ba med pa'i lam du 'gro ba yin pas 'jug pa chen po la yang dag par zhugs pa ma yin pa'i phyir byang chub sems dpa' rnams kyi lam gyi skyon yin no//de yongs su spong bar yang dag par zhugs pa ni mngon par rtogs pa'i lam la mngon par rtogs pa rnam pa drug po bsam pa mngon par rtogs pa dang / dad pa mngon par rtogs pa dang / tshul khrims mngon par rtogs pa dang / mngon par rtogs pa'i shes pa bden pa mngon par rtogs pa dang /mngon par rtogs pa'i mtha' las byung ba'i shes pa bden par rtogs pa dang / mthar thug pa'i mngon par rtogs pa dang / bdag mngon par rtogs pa yan chad theg pa chen po'i chos kyi ro'i dga' ba dang bde ba chen pos bstan pa ste/ de'i phyir yang 'jug pa chen po la yang dag par zhugs pa yin no//'jigs pa dang bcas pa'i lam du 'gro ba yongs su spong ba yang dag par zhugs pa ni 'jigs pa lnga las shin tu 'das pa zhes gsungs pas bstan te/ de la 'jigs pa dang bcas pa'i lam du 'gro ba zhes bya ba la/ 'jigs pa dang bcas pa'i lam zhes bya ba ni/ 'jigs pa lnga las ma 'das pa'i sems te/ so so'i skye bo'i 'jig rten pa'i sems gang yin pa'o/ /lam der 'gro ba ni 'jigs pa lnga po dag gi rgyu ser sna dang / rim gro la chags pa dang / bdag tu lta ba dang / nyes par spyod pa dang / bsam pa dman pa dag la spyod pa ste/ de ni 'jigs pa dang ma bral bas 'jigs pa dang bcas pa'i lam du 'gro ba yin pas 'jug pa chen po la yang dag par zhugs pa ma yin pa'i phyir byang chub sems dpa' rnams kyi lam gyi skyon yin no//de yongs su spong bar yang dag par zhugs pa ni las rnam pa gsum dang / lhag pa'i bsam pa yongs su dag pa'i gnas skabs ni 'jigs pa lnga'i rgyu yang dag par rjes su mthong bas 'jigs pa lnga las shin tu 'das pa ste/de'i phyir yang 'jug pa chen po la yang dag par zhugs pa yin no/ /rigs pa ma yin pa'i lam du 'gro ba yongs su spong bar yang dag par zhugs pa ni/ phyir mi ldog pa'i sa bgrod pa gcig par gyur pa zhes gsungs pas bstan te/de la rigs ma yin pa'i lam du 'gro ba zhes bya ba la/ rigs ma yin pa'i lam zhes bya ba ni mtshan ma med pa la gnas pa mngon par 'du byed pa med cing lhun gyis grub pa'i lam dang rigs mi mthun pa'i sems te/ byang chub sems dpa'i sa bdun po mngon par 'du byed pa dang bcas pas 'jug pa dag gi sems gang yin pa'o//lam der 'gro ba ni mngon par 'du byed pa dang bcas pas 'jug pa'i lam la spyod pa ste/ de ni mtshan ma med pa lhun gyis grub pa'i rigs ma yin pa'i lam du 'gro ba yin pas snang ba med pa'i sa lhun gyis grub pa nyid la ltos na 'jigs pa chen po la yang dag par zhugs pa ma yin pa'i phyir/de yang sa gong ma la ltos nas byang chub sems dpa' rnams kyi lam gyi skyon yin no/ /de yongs su spong bar yang dag par zhugs pa ni phyir mi ldog pa'i sa thob cing bgrod pa gcig par gyur pa ste/ de'i phyir yang 'jug pa chen po la yang dag par zhugs pa yin no//phyogs ma yin pa'i lam du 'gro ba yongs su spong bar yang dag par zhugs pa ni/ sems can thams cad kyi gnod pa thams cad rab tu zhi bar byed pa'i sa mngon du gyur pa sha stag ces gsungs pas bstan te/ de la phyogs ma yin pa'i lam du 'gro ba zhes bya ba la phyogs ma yin pa'i lam zhes bya ba ni 'khor ba dang mya ngan las 'das pa la mi gnas pa'i lam gyi phyogs ma yin pa'i sems te/sems can gyi don yal bar 'dor zhing mya ngan las 'das pa la mngon du phyogs pa'i sems gang yin pa'o/ /lam du 'gro ba ni zhi bar bgrod pa gcig pa nyid la zhugs pa ste/de ni byang chub sems dpa'i chos nyid dang mi gnas pa'i mya ngan las 'das pa'i phyogs ma yin pa'i lam du 'gro ba yin pas 'jug pa chen po la yang dag par zhugs pa ma yin pa'i phyir byang chub sems dpa' rnams kyi lam gyi skyon yin no//de yongs su spong bar yang dag par zhugs pa ni byams pa chen po dang / snying rje chen pos sems can thams cad kyi phyi nang gi gnod pa thams cad rab tu zhi bar byed pa'i sa mngon du gyur pa ste/ de'i phyir yang 'jug pa chen po la yang dag par zhugs pa yin no zhes bya bar sbyar ro//thabs cig go zhes bya ba ni gnas phun sum tshogs pa de na yon tan phun sum tshogs pa ste/ 'khor phun sum tshogs pa de dag dang thabs cig tu bzhugs so zhes bya ba'i tha tshig go/ /byang chub sems dpa'i 'khor phun sum tshogs pa'i tshig gi don la sogs pa bshad zin to// // thun mong ma yin pa'i gleng gzhi'i khyad par rnam par gzhag pa'i tshig gi don la sogs pa bshad zin te/ gleng gzhi'i khyad par rnam par gzhag pas bsdus pa'i don bstan pa bshad zin to// //de ltar gleng gzhi'i khyad par rnam par gzhag pas bsdus pa'i don bstan nas/ da ni mdo sde'i lus rnam par gzhag pas bsdus pa'i don bstan pa'i tshig gi don la sogs pa bshad par bya ste/de la mdo sde'i lus rnam par gzhag pa ni 'phags pa dgongs pa nges par 'grel pa'i mdo 'di'i mdo sde'i lus rnam par gzhag pa mtha' dag gis bden pa gnyis po don dam pa'i bden pa dang / kun rdzob kyi bden pa'i mtshan nyid yongs su shes par bya ba bstan pa'o//de la don dam pa'i bden pa ni mtshan nyid lnga dang ldan par shes par bya ste/ brjod du med pa'i mtshan nyid dang / gnyis su med pa'i mtshan nyid dang / rtog ge'i spyod yul las yang dag par 'das pa'i mtshan nyid dang / tha dad pa dang / tha dad pa nyid las yang dag par 'das pa'i mtshan nyid dang /thams cad du ro gcig pa'i mtshan nyid do/ /kun rdzob kyi bden pa'i mtshan nyid drug dang ldan par shes par bya ste/ sems kyi mtshan nyid dang / chos rnams kyi mtshan nyid dang / chos rnams kyi ngo bo nyid med pa'i mtshan nyid dang / chos gdags pa rnam par gzhag pa las brtsams nas/rnal 'byor gyis yongs su bsdus pa'i zhi gnas dang lhag mthong gi rab tu dbye ba dang / theg pa rnam par gzhag pa las brtsams nas theg pa ji lta ba bzhin du rnam par dbye ba bstan pa dang / theg pa gdags pa rnam par gzhag pa kho na las brtsams nas de bzhin gshegs pa'i bya ba sgrub pa'i rab tu dbye ba bstan pa ste /mtshan nyid bcu gcig po de dag ni mdo las/ de nas byang chub sems dpa' tshul bzhin kun 'dris kyis brjod du med pa dang / gnyis su med pa'i mtshan nyid don dam pa las brtsams te/ byang chub sems dpa' don zab dgongs pa nges par 'grel pa la dri ba dris pa zhes gsungs pa la sogs pa mdo sde'i lus rnam par gzhag pa la sogs pa'i le'u bcu 'byung ba las/don dam pa'i mtshan nyid dang po gnyis ni le'u dang po dang sbyar ro/ /mtshan nyid lhag ma dgu ni le'u lhag ma dgu dang go rims bzhin du 'og nas rgya cher ston te/de ni mdo sde'i lus rnam par gzhag pas bsdus pa'i don bstan pa yin no/ /don dam pa'i mtshan nyid rnam pa lnga bstan pa ni shes rab kyi pha rol tu phyin pa'i le'u las bsam gyis mi khyab pa dang / mtshungs pa med pa dang / dpag tu med pa dang / grangs med pa dang / mi mnyam pa dang mnyam pa'i don rnam pa lnga gsungs pa dang /go rims bzhin du sbyar bar rig par bya'o/ /de la dang por brjod du med pa'i mtshan nyid dang / gnyis su med pa'i mtshan nyid kyis tshig gi don la sogs pa de bshad par bya ste/ de yang lung rtog pa sgro btags pa med pa dang / skur pa med pa la rmongs pa'i gnyen por bstan pa yin no//de'i phyir de rmongs pa'i dbang du mdzad nas/ de nas byang chub sems dpa' tshul bzhin kun 'dris brjod du med pa dang / gnyis su med pa'i mtshan nyid don dam pa las brtsams te/ byang chub sems dpa'i don zab dgongs pa nges par 'grel ba dri ba dris pa zhes bya ba la sogs pa 'phags pa don zab dgongs pa nges par 'grel gyi le'u dang po 'di gsungs so//de la le'u dang po 'di'i bsdus pa'i don ni mdor bsdu na rnam pa gnyis te/ brjod du med pa'i mtshan nyid dang / gnyis su med pa'i mtshan nyid bstan pa yin no/ /de yang rnam par dbye na rnam pa bzhi ste/mtshan nyid gnyis kyis lus rnam par gzhag pa dang / de gnyis kyi dbang du mdzad nas ngo bo nyid gsum rnam par gzhag pa dang / de rnam par gtan la dbab pa'i dpe'i dngos po rnam par gzhag pa dang / de dag gi dngos po bsdu na rnam par gzhag pa'o/ /de la mtshan nyid gnyis kyis lus rnam par gzhag pa ni/rgyal ba'i sras chos thams cad gnyis su med pa/ chos thams cad gnyis su med pa zhes bya ba nas/ 'dus ma byas kyang ma yin/ 'dus byas kyang ma yin no zhes gsungs pa'i bar gyis bstan to/ /de nyid kyi dbang du mdzad nas ngo bo nyid gsum rnam par gzhag pa ni/kye rgyal ba'i sras ji ltar na 'dus byas ni/ 'dus byas kyang ma yin/ 'dus ma byas kyang ma yin la zhes bya ba nas/ brjod du med pa'i chos nyid de nyid mngon par rdzogs par rtogs par bya ba'i phyir 'dus byas zhes ming du btags so zhes gsungs pa'i bar gyis bstan to//de rnam par gtan la dbab pa'i dngos po rnam par gzhag pa ni/ kye rgyal ba'i sras ji ltar na 'phags pa rnams kyi dngos po de zhes bya ba nas/ brjod du med pa'i chos nyid de nyid mngon par rdzogs par rtogs par bya ba'i phyir 'dus byas dang 'dus ma byas zhes ming du btags pa yin no zhes gsungs pa'i bar gyis bstan to//de dag gi dngos po bsdu na rnam par gzhag pa ni/ de nas byang chub sems dpa' don zab dgongs pa nges par 'grel gyis de'i tshe tshigs su bcad pa 'di dag smras so zhes bya ba la sogs pa tshigs su bcad pa gnyis kyis don mdzad pa brjod du med pa'i mtshan nyid dang /gnyis su med pa'i mtshan nyid dang ldan pa'i tshig gi don de dag gi dngos po bsdu ba bstan pa dang sbyar ro/ /de la dang por mtshan nyid gnyis kyis lus rnam par gzhag pa'i tshig gi don la sogs pa bshad par bya ste/ mtshan nyid gnyis kyis lus rnam par gzhag pa zhes bya ba ni don dam pa brjod du med pa'i mtshan nyid dang /gnyis su med pa'i mtshan nyid dang ldan pa'i mtshan nyid gnyis gnas skabs gcig tu bsdus te rnam par gzhag pa bstan pa gang yin pa'o/ /de yang gnyis su med pa'i mtshan nyid grub par bstan pa nyid kyis brjod du med pa'i mtshan nyid kyang zhar la grub par bstan par rig par bya'o//de ci'i phyir zhe na/ byis pa'i blo can dag ni gnyis la brten nas brjod pa la mngon par zhen par byed kyi/ mkhas pa rnams kyis ni gnyis su med pa'i mtshan nyid khong du chud pas brjod pa la mngon par zhen par mi byed pa'i phyir ro/ /de'i phyir de bstan pa'i dbang du mdzad nas/'dir 'phags pa tshul bzhin yid la kun 'dris kyis/ 'phags pa don zab dgongs pa nges par 'grel la/ rgyal ba'i sras chos thams cad gnyis su med pa chos thams cad gnyis su med pa zhes bya na zhes bya ba la sogs pas dris te/ de bzhin gshegs pas mdo sde de dang de dag tu chos thams cad gnyis su med pa'i grub pa bstan pa de 'dir 'phags pa tshul bzhin kun 'dris rang gi blo la gzhag ste/gnyis su med pa'i mtshan nyid dri ba'i gleng bslang ba'i phyir chos thams cad gnyis su med pa chos thams cad gnyis su med pa zhes bya na zhes lan gnyis su bzlas te dris so/ / de la de bzhin gshegs pas mdo sde de dang de dag tu chos thams cad gnyis su med par grub pa bstan pa de yang rigs pa gang gis grub ce na/ de'i phyir/ ming gi snga rol blo med phyir/ /mang ba'i phyir dang ma nges phyir/ /chos rnams dngos po gang brjod pa/ /de ni gnyis su med par grub/ /ces bya ba bstan te/byis pa'i blo can dag gis chos rnams kyi dngos po gang dag brjod pa de dag ni ming gi snga rol blo med pa'i phyir dang / ming mang ba'i phyir dang / ming ma nges pa'i phyir ming gis dngos po'i ngo bo nyid kyi thog tu mi phebs pas na 'dus byas dang 'dus ma byas zhes bya ba la sogs pa lta bur gnyis su med par grub pa yin te/de ltar gnyis su med par grub pa'i phyir brjod du med pa yin no zhes bya bar sbyar ro/ /de la ji ltar na ming gi snga rol na blo med pa'i phyir gnyis su med par grub pa yin zhe na/ chos rnams la 'du byas she'am/ 'dus ma byas zhes ming du btags pa'i snga rol te/ ming du btags pa'i tshe na 'di ni 'dus byas so//'di ni 'dus ma byas so zhes bya ba la sogs pa lta bu'i blo mi 'byung ba'i phyir/ de'i gnas skabs na chos rnams kyi dngos po'i ngo bo nyid ni 'dus byas she'am/ 'dus ma byas zhes bya ba la sogs pa lta bu gang gi ngo bo nyid kyang ma yin pas na gnyis su med pa grub pa yin te/de ltar gnyis su med pa'i phyir 'dus byas dang 'dus ma byas zhes bya ba la sogs pa lta bur brjod du med pa yin no/ /ji ltar na ming mang ba'i phyir gnyis su med par 'grub pa yin zhe na/ chos rnams kyi dngos po'i ngo bo nyid gcig la yang tha snyad kyis ming mang po du mar btags pa yod de/dper na rgyal po'i dngos po gcig la yang rgyal po dang / sa bdag dang / mi'i bdag po dang / sa skyong dang / dbang phyug dam pa'i mnga' bdag ces bya ba la sogs pa ming mang por brjod pa lta bu ste/ de la gal te rgyal po de'i dngos po'i ngo bo nyid gang yin pa de ming gi ngo bo nyid yin par gyur na/ming la rnam pa mang po tha dad pa du ma yod pa de bzhin du/ rgyal po de'i dngos po'i ngo bo nyid kyang du mar gyur pa'i rigs na de lta ma yin la/ chos thams cad kyang de dang 'dra bas de'i phyir ming ni mang la dngos po'i ngo bo nyid ni gcig tu zad pas/ dngos po'i ngo bo nyid ni ming gis ji skad brjod pa de lta bu'i ngo bo nyid ma yin pas na gnyis su med par 'grub pa yin te/de ltar gnyis su med pa'i phyir brjod du med pa yin no/ /ji ltar na ming ma nges pa'i phyir gnyis su med par 'grub pa yin zhe na/ dngos po rnams kyi ming ni ma nges pa yin te/ dper na gang zag gcig la yang sngar lha sbyin zhes bya bar ming btags pa las bar du mes byin zhes bya bar ming spos pa dang /de nyid dus gzhan na sangs rgyas byin zhes bya bar ming spos nas/ yang dus gzhan na yon tan bshes gnyen zhes bya bar ming spos pa lta bu ste/ de la gal te gang zag de'i dngos po'i ngo bo nyid gang yin pa de ming gi ngo bo nyid yin par gyur na ming ma nges te/gzhan dang gzhan du 'gyur ba de bzhin du/ gang zag de'i dngos po'i ngo bo nyid kyang gzhan dang gzhan du 'gyur ba'i rigs na/ de lta ma yin la chos thams cad dang de 'dra bas de'i phyir ming ni ma nges la dngos po'i ngo bo nyid ni ming bzhin ma nges pa ma yin pas dngos po'i ngo bo nyid de ni ming gis ji skad brjod pa de lta bu'i ngo bo nyid ma yin pas na gnyis su med par grub pa yin te/de ltar gnyis su med pa'i phyir brjod du med pa yin no zhes bya ba yang snga ma bzhin du sbyar ro/ /chos thams cad ni gang ji ltar na gnyis su med pa yin zhes bya bas na ji snyed yod pa nyid dang / ji lta ba bzhin du yod pa nyid kyi dri ba rnam pa gnyis dris pa yin te/'og nas lan rnam pa gnyis 'byung bas go rims bzhin du ston to/ /rigs kyi bu chos thams cad chos thams cad ces bya ba ni gnyis ji tsam pa ste/ 'dus byas dang 'dus ma byas so zhes bya bas ni sngar chos thams cad ni gang zhes dris pa'i lan btab pa yin no//de la gnyis ji tsam pa ste zhes bya bas ni gnyis su thams cad 'dus par ston to/ /de yang gang zhe na/ 'dus byas dang 'dus ma byas so zhes bya bas bstan te/ des ni ji snyed yod pa nyid bstan pa yin no/ /de la 'dus byas ni 'dus byas kyang ma yin/ 'dus ma byas kyang ma yin no//'dus ma byas kyang 'dus ma byas kyang ma yin/ 'dus byas kyang ma yin zhes bya bas ni/ sngar ji ltar gnyis su med pa yin zhes dris pa'i lan btab pa yin te/ chos thams cad ces bya ba ni 'dus byas dang 'dus ma byas gnyis kyi khongs su gtogs pa yin la/ de gnyis ni 'dogs pa'i tshig gis glo bur gyi ming du btags pa yin te/dngos po'i ngo bo nyid ma yin pas byis pa'i blo can dag gis chos rnams kyi dngos po gang dag brjod pa de dag ni ming gi snga rol na blo med pa'i phyir dang / ming ma yin pa'i phyir dang / ming ma nges pa'i phyir ming gis dngos po'i ngo bo nyid kyi thog tu mi phebs pas na 'dus byas dang 'dus ma byas zhes bya ba la sogs pa lta bur gnyis su med par grub pa yin no zhes sngar bstan pa yin te/des ni ji lta ba bzhin du yod pa nyid bstan pa yin no/ /de ltar gnyis su med par grub pa bstan pa nyid kyis brjod du med pa yang zhar la grub par bstan pas na de ni mtshan nyid gnyis kyis lus rnam par gzhag pa bstan pa yin no//de'i 'og tu de nyid kyi dbang du mdzad nas ngo bo nyid gsum rnam par gzhag pa'i tshig gi don la sogs pa bshad par bya ste/ de nyid kyi dbang du mdzad nas ngo bo nyid gsum rnam par bshad pa zhes bya ba ni de gnyis su med pa'i mtshan nyid grub par bstan pa nyid brjod du med pa'i mtshan nyid kyang zhar la grub par bstan pa'i mtshan nyid gnyis kyis lus rnam par gzhag pa de nyid kyi dbang du mdzad nas 'dir kun brtags pa dang /gzhan gyi dbang dang / yongs su grub pa'i ngo bo nyid gsum rnam par gzhag pa'i sgo nas chos thams cad gnyis su med pas brjod du med par bstan pa gang yin pa'o//de'i phyir de bstan pa gleng bslang ba'i dbang du mdzad nas 'dir 'phags pa tshul bzhin kun 'dris/ 'phags pa don zab dgongs pa nges par 'grel la kye rgyal ba'i sras ji ltar na 'dus byas ni 'dus byas kyang ma yin 'dus ma byas kyang ma yin la/'dus ma byas ni 'dus ma byas kyang ma yin 'dus byas kyang ma yin zhes bya ba dris te/ sngar chos thams cad ni 'dus byas dang 'dus ma byas kyi khongs su gtogs pa yin la/ de gnyis ni 'dogs pa'i tshig gis glo bur gyi ming du btags pa yin te/ dngos po'i ngo bo nyid ma yin pas byis pa'i blo can dag gis chos rnams kyi dngos po gang dag brjod pa de dag ni ming gi snga rol na blo med pa'i phyir dang /blo mang ba'i phyir dang / blo ma nges pa'i phyir ming gi dngos po'i ngo bo nyid kyi thog tu mi phebs pas na 'dus byas dang 'dus ma byas zhes bya ba la sogs pa lta bur gnyis su med par grub pa yin no zhes bstan pa de nyid gtan la dbab pa'i phyir de skad ces dris so//de nas 'phags pa don zab dgongs pa nges par 'grel gyis kyang / de nyid kyi dbang du mdzad nas ngo bo nyid gsum rnam par gzhag pa'i sgo nas chos thams cad gnyis su med pas brjod du med par bstan te/ de la rigs kyi bu 'dus byas zhes bya ba de ni ston pas btags pa'i tshig yin te zhes bya bas ni kun brtags pa'i ngo bo nyid rnam par gzhag pa bstan to//brjod pa ni dngos po med pa can yang ma yin te zhes bya bas ni gzhan gyi dbang gi ngo bo nyid rnam par gzhag pa bstan to/ /brjod du med par mngon par rdzogs pa gang yin pa ste/ zhes bya bas ni yongs su grub pa'i ngo bo nyid rnam par gzhag pa de rnam pa gsum gyis ni mtshan nyid gnyis kyi dbang du mdzad pa las brjod du med pa'i mtshan nyid gtso bor bstan par shes par bya'o/ /de yang ji lta bu zhe na/ ston pas btags pa'i ngo bo nyid yin pas de ni mtshan nyid kyi ngo bo nyid med pa'i phyir gtan med pa yin no//kun du rtog pa sna tshogs las byung ba'i tha snyad du brjod pa kun brtags pa'i ngo bo nyid yongs su ma grub kyang brjod par bya ba'i dngos po gzhan gyi ngo bo nyid skye ba ngo bo nyid med pa nyid kyis ngo bo nyid med pa dang / don dam pa ngo bo nyid med pa nyid kyis ngo bo nyid med pa'i rten cing 'brel par 'byung ba ni yod do//gzhan gyi dbang gi ngo bo nyid kyi dngos po de 'phags pa rnams kyis don dam pa'i shes pa dang mthong bas brjod du med par mngon par rdzogs par sangs rgyas pa ni yongs su grub pa'i ngo bo nyid don dam par ngo bo nyid med pa nyid kyis ngo bo nyid med pa yin te/ de ni chos rnams kyi de bzhin nyid don dam pa chos bdag med pa gnyis su med pa'i mtshan nyid yin pas brjod du med pa'i mtshan nyid kyang yin te/de nyid don dam pa brjod du med pa'i mtshan nyid dang gnyis su med pa'i mtshan nyid dang ldan pa yin no zhes bya bar sbyar ro/ /de ltar spyi'i don bstan nas/ da ni de dag gi tshig gi don bshad par bya ste/de la ston pas btags pa'i tshig yin te zhes bya ba ni ston pas sems can rnams la tha snyad gdags pa dang go bar bya ba'i phyir bka' stsal pa'i tshig yin no/ /btags pa'i tshig de ni dang po'i ngo bo nyid ma yin gyi 'dogs pa'i tshig gis glo bur du sgro btags pa yin pas dngos su yod pa ma yin pa'i phyir kun brtags pa'i ngo bo nyid yin te/de ni mtshan nyid ngo bo nyid med pa nyid ngo bo nyid med pa yin pa'i phyir gtan med par rig par bya'o/ /ston pas btags pa'i tshig gang yin pa de ni zhes bya ba ni ston pas mdo sde de dang de dag tu 'dus byas zhes ming du btags pa la glengs te/'di bshad pas ston pa gtso cher smos par zad kyi 'dir ston pa 'ba' zhig gzung ba ma yin gyi / ji tsam du tha snyad gdags pa dang go bar bya ba'i phyir de las gzhan pa dag gis smras pa'i tshig kyang de bzhin du gzung bar bya'o/ /kun du rtog pa las byung ba zhes bya ba ni rtog pas ngag kun nas slong zhing ngag gi tha snyad du rjod par byed pa'i phyir te/de yang shes bya la brjod par bya ba'i rnam pa dang / sgra la brjod par bya ba'i rnam pa gzhan nas de go bar byed pa'i tshig brjod pa'i phyir yin gyi/ brjod par bya ba dang / rjod pa'i rnam pa dag dngos po la gnas pa ni ma yin no/ /tha snyad du brjod pa yin la zhes bya ba'i tha snyad gdags pa'i phyir brjod pa ste/tha snyad ni rang gi bsam pa go bar byed pa yin no/ /kun du rtog pa sna tshogs kyi tha snyad du brjod pa zhes bya ba ni/ kun du rtog pa sna tshogs las byung ba'i tha snyad du brjod pa'o/ /gtan yongs su ma grub pa'i phyir zhes bya ba ni brjod pas yongs su ma grub pa'i phyir dang /ngo bo nyid yongs su ma grub pa'i phyir te/ de'i phyir des ni 'dus byas kyi sgras bskyed pa'i 'dus byas kyi rnam pa yongs su ma grub pa'i phyir 'dus byas zhes bya ba'i 'dogs pa'i tshig gang yin pa de ni 'dus byas kyi dngos po'i ngo bo nyid ma yin pas na 'dus byas ma yin no zhes bya bar sbyar ro//'o na de de ltar 'dus byas ma yin na 'dus byas ma yin par 'gyur ro zhe na/ ma yin te de'i phyir rigs kyi bu 'dus ma byas zhes bya ba de yang tha snyad kyi khongs su gtogs pa yin la zhes bya ba gsungs te/ 'dus ma byas zhes bya ba'i rnam pa yang brjod pas bskyed pa'i rnam pa yin pa'i phyir gtan yongs su ma grub pas de ni 'dus ma byas kyang ma yin no//de ltar na de de gnyis ka ma yin pa'i phyogs gzhan zhig yin par 'gyur ro zhe na ma yin te/ de'i phyir 'dus byas dang 'dus ma byas su ma gtogs pa gang ci brjod kyang zhes bya ba gsungs te/ de gnyis kyi sgra la ma gtogs pa'i ming ci brjod kyang zhes bya ba'i tha tshig go//de yang de dang 'dra ba nyid du 'gyur zhes bya ba ni tha snyad kyi khongs su gtogs pa nyid du 'gyur ba'o/ /de yang de dang 'dra ba nyid du 'gyur ro zhes lan gnyis su bzlas pa ni thams cad kyang de dang 'dra ba'i zhes brnan pa'i phyir ro/ /de ltar na brjod pa'i sgra ni kun brtags pa'i ngo bo nyid yin pas de ni mtshan nyid ngo bo nyid med pa nyid kyis ngo bo nyid med pa yin pa'i phyir gtan med pas na 'dus byas zhes/ston pas btags pa'i tshig de ni 'dus byas kyang ma yin 'dus ma byas kyang ma yin te/ de gnyis las ma gtogs pa gzhan yang ma yin no/ / brjod pa'i sgra dang brjod par bya ba'i rnam pa gnyis kas stong pa gang yin pa de lta bu ni ci yang med de/ brjod pa'i sgra kun du brtags pa'i ngo bo nyid gtan yongs su ma grub kyang brjod par bya ba'i dngos po gzhan gyi dbang gi ngo bo nyid ni med pa ma yin pas de'i phyir de bstan pa'i dbang du mdzad nas brjod pa ni dngos po med pa can ma yin te zhes bya ba gsungs te/brjod pa zhes bya ba ni ston pas btags pa'i tshig ces sngar bstan pa ste kun brtags pa'i ngo bo nyid yin no/ /dngos po zhes bya ba ni brjod par bya ba'i dngos po ste/ gzhan gyi dbang gi ngo bo nyid yin no/ /med pa can yang ma yin te zhes bya ba ni brjod pa'i sgra kun brtags pa'i ngo bo nyid gtan yongs su ma grub kyang /brjod par bya ba'i dngos po gzhan gyi dbang gi ngo bo nyid med pa ma yin no zhes bya ba'i tha tshig ste/ de ltar na kun brtags pa'i ngo bo nyid kyis gzung ba dang 'dzin pa dang bral ba gzhan gyi dbang gi ngo bo nyid skye ba ngo bo nyid med pa nyid kyis ngo bo nyid med pa dang /don dam pa'i ngo bo nyid med pa nyid kyis ngo bo nyid med pa'i rten cing 'brel par 'byung ba ni yod par rig par bya'o/ /dngos po de yang gang zhe na zhes bya ba ni brjod pa'i sgra kun brtags pa'i ngo bo nyid gtan yongs su ma grub kyang brjod par bya ba'i dngos po gzhan gyi dbang gi ngo bo nyid med pa ma yin no zhes bstan pa'i gzhan gyi dbang gi ngo bo nyid kyi dngos po de gang zhe na zhes bya ba'i tha tshig ste/dngos po de nyid ni gzhan gyi dbang gi ngo bo nyid yin la/ de 'phags pa rnams kyis don dam pa'i shes pa dang / mthong bas mngon par rdzogs par sangs rgyas pa ni yongs su grub pa'i ngo bo nyid yin par sbyar ro//'phags pa rnams kyis zhes bya ba ni sangs rgyas kyi nyan thos rnams kyis so/ /'phags pa'i zhes bya ba ni 'phags pa'i don dam pa'i shes pa dang mthong ba zhes bya bar sbyar ro/ /shes pa zhes bya ba ni 'dres pa'i chos la dmigs pa'i zhi gnas dang lhag mthong gi shes rab gang yin pa ste/de ni rnam pa sna tshogs ma yin pa'i phyir ro/ /mthong ba zhes bya ba ni ma 'dres pa'i chos la dmigs pa'i zhi gnas dang lhag mthong gi shes rab gang yin pa ste/ de ni rnam pa sna tshogs yin pa'i phyir ro/ /brjod du med pa mngon par rdzogs par sangs rgyas pa gang yin pa ste zhes bya ba ni don dam pa'i shes pa dang /mthong bas rtogs par thugs su chud pa gang yin pa'o/ /de ni yongs su grub pa'i ngo bo nyid med pa nyid kyis ngo bo nyid med pa yin te/ chos rnams kyi de bzhin nyid don dam pa chos bdag med pa gnyis su med pa'i mtshan nyid yin pas brjod du med pa'i mtshan nyid kyang yin te/de nyid don dam pa brjod du med pa'i mtshan nyid dang gnyis su med pa'i mtshan nyid dang ldan pa yin no zhes bya bar sbyar ro/ /'o na de bzhin gshegs pas 'dus byas de ci'i phyir gdags pa mdzad ce na/ de'i phyir brjod du med pa'i chos nyid de nyid mngon par rdzogs par rtogs par bya ba'i phyir 'dus byas zhes ming du btags so zhes bya ba gsungs te/kun rdzob kyi tha snyad du 'dogs pa tshig gis de skad ma brjod na chos nyid de rtogs par khong du chud par bya ba'i thabs gzhan med pa'i phyir/ de bzhin gshegs pas thabs la 'jug pa chud mi za ba la mkhas pa'i dbang du mdzad nas de skad gdags pa mdzad do//rigs kyi bu 'dus ma byas zhes bya ba de yang ston pas btags pa'i tshig yin te zhes bya ba la sogs pa 'dus ma byas kyi tshar la yang snga ma'i tshul bzhin du sbyar zhing bshad par bya ste/ de ni de nyid kyi dbang du mdzad nas ngo bo nyid gsum rnam par gzhag pa yin no// 'og tu rnam par gtan la dbab pa'i dpe'i dngos po rnam par gzhag pa'i tshig gi don la sogs pa bshad par bya ste/ de rnam par gtan la dbab pa'i dngos po rnam par gzhag pa zhes bya ba ni don dam pa brjod du med pa'i mtshan nyid dang / gnyis su med pa'i mtshan nyid dang ldan pa bstan pa de rnam par gtan la dbab pa'i phyir byis pa kun brtags pa'i ngo bo nyid la mngon par zhen pas gzhan gyi dbang gi ngo bo nyid mi rtog pas yongs su grub pa'i ngo bo nyid mi mthong ba'i dpe dang /mkhas pa kun brtags pa'i ngo bo nyid la mngon par zhen pa med pas gzhan gyi dbang gi ngo bo nyid rtogs pas yongs su grub pa'i ngo bo nyid mthong zhing /gzhan gyis yongs su grub pa'i ngo bo nyid rtogs par bya ba'i phyir rjes su tha snyad 'dogs par byed pa'i dpe'i dngos po rnam par gzhag pa rnam pa gnyis kyis don de rgya cher ston pa gang yin pa'o/ /de'i phyir de bstan pa gleng bslang ba'i dbang du mdzad nas/'dir 'phags pa tshul bzhin kun 'dris/ 'phags pa don zab dgongs pa nges par 'grel la/ rgyal ba'i sras ji ltar na 'phags pa rnams kyi dngos po de 'phags pa'i shes pa dang / 'phags pa'i mthong bas brjod du med par mngon par rdzogs par sangs rgyas shing / brjod du med pa'i chos nyid de nyid mngon par rdzogs par rtogs par bya ba'i phyir 'dus byas dang 'dus ma byas zhes ming du btags pa yin zhes bya ba dris te/de la dngos po de zhes bya ba ni kun brtags pa'i tha snyad dang bral ba brjod par bya ba'i dngos po ste/ gzhan gyi dbang gi ngo bo nyid kyi dngos po'o/ /'phags pa'i shes pa dang 'phags pa'i mthong bas brjod du med par mngon par rdzogs par sangs rgyas shing zhes bya ba ni 'phags pa rnams kyi dngos po de ji lta bu 'phags pa'i rgyud la mnga' ba'i don dam pa'i shes pa dang /mngon par rtogs par thugs su chud ces 'dri ba ste/ ji ltar yongs su grub pa'i ngo bo nyid mthong bar gyur zhes bya ba'i tha tshig go//brjod du med pa'i chos nyid de nyid mngon par rdzogs par rtogs par bya ba'i phyir 'dus byas dang 'dus ma byas zhes ming du btags pa yin zhes bya ba ni de ltar 'phags pa don dam pa'i shes pa dang / mthong bas yongs su grub pa'i ngo bo nyid gzigs pa rnams yongs su grub pa'i ngo bo nyid de nyid gzhan gyis rtogs par bya ba'i thabs su kun rdzob kyi shes pa dang mthong bas 'dus byas dang 'dus ma byas zhes ming du 'dogs par mdzad pa ste/ji ltar 'dogs par mdzad ces 'dri ba ste/ ji ltar kun rdzob kyi shes pa dang mthong bas rjes su tha snyad 'dogs par mdzad ces bya ba'i tha tshig go//de nas 'phags pa don zab dgongs pa nges par 'grel gyis kyang don de nyid nges par gtan la dbab pa'i phyir/ rigs kyi bu 'di lta ste dper na sgyu ma mkhan nam sgyu ma mkhan gyi slob ma mkhas pa zhig lam po che'i bzhi mdor 'dug ste zhes bya ba la sogs pas dpe'i dngos po rnam par gzhag pa bstan to//de la dpe'i dngos po rnam par gzhag pa ni rnam pa gnyis te/ kun nas nyon mongs pa'i phyogs dang mthun pa'i dpe'i dngos po rnam par gzhag pa dang / rnam par byang ba'i phyogs dang mthun pa'i dpe'i dngos po rnam par gzhag pa'o/ /dpes mtshon pa'i don kyang rnam pa gnyis te/byis pa kun brtags pa'i ngo bo nyid la rnam par zhen pas gzhan gyi dbang gi ngo bo nyid skye ba ngo bo nyid med pa nyid kyis ngo bo nyid med pa dang / don dam pa ngo bo nyid med pa nyid kyis ngo bo nyid med pa mi rtogs pas yongs su grub pa'i ngo bo nyid don dam pa ngo bo nyid med pa nyid kyis ngo bo nyid med pa mi mthong ba dang /mkhas pa kun brtags pa'i ngo bo nyid la mngon par zhen pa med pas gzhan gyi dbang gi ngo bo nyid skye ba ngo bo nyid med pa nyid kyis ngo bo nyid med pa dang / don dam pa'i ngo bo nyid med pa nyid kyis ngo bo nyid med pa rtogs pas yongs su grub pa'i ngo bo nyid don dam pa'i ngo bo nyid med pa nyid kyis ngo bo nyid med pa mthong zhing /gzhan gyis yongs su grub pa'i ngo bo nyid don dam pa ngo bo nyid med pa nyid kyis ngo bo nyid med pa de nyid rtogs par bya ba'i phyir rjes su tha snyad 'dogs par byed pa'o/ /de la dpe'i dngos po rnam par gzhag pa rnam pa gnyis ni mdo las/de la sems can gang dag byis pa'i rang bzhin can zhes bya ba la sogs pa dang / de la sems can gang dag byis pa'i rang bzhin ma yin pa zhes bya ba la sogs pa gsungs pa dag go rims bzhin du sbyar ro/ /dpes mtshon pa'i don rnam pa gnyis ni mdo las/ de bzhin du sems can gang dag byis pa'i rang bzhin can so so'i skye bor gyur pa zhes bya ba la sogs pa dang /de la sems can gang dag byis pa'i rang bzhin can ma yin pas bden pa mthong ba zhes bya ba la sogs pa gsungs pa dang go rims bzhin du sbyar ro/ /skabs 'dir ni dpes mtshon pa'i don tha ma nyid gzung bar bya ste/kun brtags pa'i ngo bo nyid dang bral ba gzhan gyi dbang gi ngo bo nyid kyi dngos po de shes pa dang / mthong bas rtogs pa nyid yongs su grub pa'i ngo bo nyid mngon par rdzogs par rtogs pa yin pas de ni 'phags pa rnams kyi dngos po de 'phags pa'i shes pa dang 'phags pa'i mthong bas brjod du med par mngon par rdzogs par sangs rgyas pa zhes bya ste/de nyid chos rnams kyi de bzhin nyid don dam pa chos bdag med pa gnyis su med pa'i mtshan nyid yin pas brjod du med pa'i mtshan nyid kyang yin no zhes bya bar sbyar ro/ /de ltar spyi'i don bstan nas/ de nas de dag gi tshig gi don bshad par bya ste/de la sems can gang dag byis pa'i rang bzhin can/ rmongs pa'i rang bzhin can/ shes rab 'chal ba'i rang bzhin can zhes bya ba ni lung dang rjes su dpag pa dang mngon sum gyi tshad ma'i rjes su 'brang ba'i blo med pa ste/ go rims bzhin du sbyar ro/ /snang ba gang yin pa 'di ni yod do snyam du sems shing zhes bya ba ni de mi slu bar byed pa'i rgyu ma yin pa mi shes shing /glang po che la sogs pa dngos nyid yin par 'dzin pa'o/ /nan gyis zhes bya ba ni rang gi blos bye brag pa med par gzu lums su zhes bya ba'i tha tshig go/ /mchog tu gzung zhing zhes bya ba ni rab kyis lta ba mchog tu gzung nas gnas pa'o//mngon par zhen nas zhes bya ba ni gzhan dag gis de las bzlog pa na de 'dzin cing mi 'dor ba'o/ /'di ni bden gyi zhes bya ba ni mngon par zhen pa'i dbang gis de la chags nas de nyid bden par 'dzin pa'o/ /gzhan ni brdzun pa'o zhes bya ba ni 'di las bden pa lhag pa logs shig na med do zhes zer ba ni de ni de dag gi phyir nye bar brtag par bya dgos pa yin no zhes bya ba ni de'i tshe na log par rtog pa'i phyir ro//de la sems can gang dag byis pa'i rang bzhin can ma yin pa/ rmongs pa'i rang bzhin can ma yin pa/ shes rab dang ldan pa'i rang bzhin can zhes bya ba ni snga ma las bzlog pa yin no//snang ba gang yin pa 'di ni med do zhes bya ba yang snga ma las bzlog pa yin no/ /rnam grangs kyi 'du shes zhes bya ba ni de dag gi dngos po gcig la yang ming gi rnam grangs tha dad pa du mar 'dogs pa'i 'du shes 'byung ba'o/ /sgyu ma byas pa 'di ni yod ces bya ba ni glang po che la sogs pa'i mtshan ma sems las byung ba snang ba tsam gyi mtshan ma ste/des ni sgyu ma la yang glang po che la sogs pa log par mi 'dzin pa bstan to/ /mi slu bar byed pa 'di ni yod do zhes bya bas ni sgyu ma'i sgyu rtsal la sogs pa de dag la yang phyi rol gyi dngos po log par mi 'dzin pa bstan to/ /rjes su tha snyad mi 'dogs kyi zhes bya bas ni dpes mtshon pa'i don gyi 'jug nas 'phags pa'i shes pa dang /'phags pa'i bden pas brjod du med par mngon par rdzogs par sangs rgyas shing zhes 'byung ba'i don de mtshon par byed do/ /'di ltar don rnam par rig par bya ba'i phyir rjes su tha snyad 'dogs par byed de zhes bya bas ni dpes mtshon pa'i don gyi 'jug nas brjod du med pa'i chos nyid de nyid mngon par rdzogs par rtogs par bya ba'i phyir 'dus byas dang 'dus ma byas zhes ming du btags pa yin no zhes 'byung ba'i don de mtshon par byed de/'di ltar don rnam par rig par bya ba'i phyir zhes bya ba ni don gang yin pa nyid la ming de skad btags pa'i don de rnam par rig par bya ba'i phyir ming de skad ces rjes su tha snyad 'dogs par byed do zhes bya bar sbyar ro//de ni de dag gis phyis nye bar brtag par bya mi dgos pa yin no zhes bya ba ni de'i tshe na gtan la bab par rtogs par bya ba'i phyir ro/ /de dag ni dpe'i dngos po rnam par gzhag pa rnam pa gnyis kyis tshig gi don bshad pa yin no//da ni dpes mtshon pa'i don rnam pa gnyis kyis tshig gi don bshad par bya ste/ de la de bzhin du sems can gang dag byis pa'i rang bzhin can so so'i skye bor gyur pa shes rab 'phags pa 'jig rten las 'das pa ma thob pa ste/go rims bzhin du sbyar ro/ /'dus byas dang 'dus ma byas de mthong ngam/ thos na zhes bya ba ni 'dus byas kyi mtshan ma dang 'dus ma byas kyi mtshan ma rnam par rig pa tsam de mthong ngam thos nas zhes bya bar sbyar ro/ /snang ba gang yin pa de ni yod do snyam du sems shing zhes bya bas ni kun brtags pa'i ngo bo nyid la mngon par zhen pa bstan to//de dag ji ltar mthong ba dang ji ltar thos pa bzhin du zhes bya ba la sogs pas ni gzhan gyi dbang gi ngo bo nyid la log par mngon par zhen pa bstan to/ /de ni de dag gi phyis nye bar brtag par bya dgos pa yin no zhes bya bas ni yongs su grub pa'i ngo bo nyid ma mthong ba bstan to//de la sems can gang dag byis pa'i rang bzhin can ma yin pa bden pa mthong ba shes rab 'phags pa 'jig rten las 'das pa thob pa chos thams cad kyi brjod du med pa'i chos nyid mngon par shes pa zhes bya ba ni snga ma las bzlog pa yin no/ / 'dus byas dang 'dus ma byas snang ba gang yin pa 'di ni med kyi zhes bya ba ni phyi rol na rdzas su grub pa'i yul du gyur pa med pa'o/ /'dir gang la brjod pa 'jug par 'gyur ba de nyid kyi dbang du byas pa'i phyir 'dus byas dang 'dus ma byas zhes bya ba la sogs pa btags pa'i yod pa gang yin pa de dag med par bstan to//rdzas su yod pa de bzhin nyid ces bya ba la sogs pa lta bu yin yang rnam par rig pa tsam du yod par 'dod na gnod pa med de/ de'i phyir gang la 'dus byas dang 'dus ma byas kyi 'du shes dang / 'dus byas dang 'dus ma byas kyi rnam grangs kyi 'du shes 'byung ba zhes bya ba gsungs te/de bzhin nyid la ni 'du shes 'byung bar 'gyur ba med de/ 'byung na yang de'i mtshan ma la 'byung bas de yang rnam par rig pa tsam nyid yin te/ de'i phyir rnam par rtog pa las byung ba zhes bya ba gsungs so/ /'du byed kyi mtshan ma zhes bya ba ni dngos po la gzugs dang / sgra dang / dri dang / ro dang / reg bya dang / skyes pa dang / bud med dang / skye ba dang / rga ba dang / na ba dang / 'chi ba zhes bya ba la sogs pa lta bu lhag par sgro btags pa gang yin pa ste/ de nyid rnam par rig pa tsam gyi mtshan ma yin no/ /de bzhin nyid kyi mtshan ma gang yin pa de yang 'du shes kyi mtshan ma kho na ste/'dus byas pa'i phyir ro/ /sgyu ma lta bu 'di ni yod ces bya ba ni phyi rol gyi dngos por yod pa ma yin gyi rnam par rig pa tsam nyid yin no zhes bya ba'i tha tshig go/ /blo rnam par rmongs par byed pa 'di ni yod do zhes bya ba ni yang dag pa ma yin pa'i kun du rtog pa'i ngo bo nyid yin pa'i phyir te/de dag gis ni kun brtags pa'i ngo bo nyid la mngon par zhen pa med par bstan to/ / de dag ji ltar mthong ba dang ji ltar thos pa bzhin du zhes bya ba la sogs pas ni gzhan gyi dbang gi ngo bo nyid la log par mngon par zhen pa med par bstan to/ /'di ltar don rnam par rig par bya ba'i phyir rjes su tha snyad 'dogs par byed de zhes bya ba ni kun rdzob kyi shes pa dang mthong ba ste/'og nas brjod du med pa'i chos nyid de nyid mngon par rdzogs par rtogs par bya ba'i phyir 'dus byas dang 'dus ma byas zhes ming du btags pa yin no zhes 'byung ba dang sbyar ro/ /de ni de dag gis phyis nye bar brtag par bya mi dgos pa yin no zhes bya bas ni yongs su grub pa'i ngo bo nyid grub par bstan to//rigs kyi bu de ltar na zhes bya ba la sogs pas ni don gyi mjug bsdu ba bstan te/ de ltar kun brtags pa'i ngo bo nyid dang bral ba gzhan gyi dbang gi ngo bo nyid kyis dngos po de shes pa dang mthong bas rtogs pa ni yongs su grub pa'i ngo bo nyid mthong ba yin pas de ni chos rnams kyi de bzhin nyid don dam pa chos bdag med pa nyid gnyis su med pa'i mtshan nyid yin pas brjod du med pa'i mtshan nyid kyang yin te/de ni rnam par gtan la dbab pa'i dpe'i dngos po rnam par gzhag pa yin no/ / de'i 'og tu de dag gi dngos po bsdu ba'i rnam par gzhag pa'i tshig gi don la sogs pa bshad par bya ste/ de dag gi dngos po bsdu ba rnam par gzhag pa zhes bya ba ni don dam pa brjod du med pa'i mtshan nyid dang gnyis su med pa'i mtshan nyid dang ldan pa sngar bstan pa'i tshig gi don de dag gi dngos po tshigs su bcad pas mdor bsdu ba'i mtshan nyid rnam par gzhag pa gang yin pa'o//de'i phyir de bstan pa'i dbang du mdzad nas/ de nas byang chub sems dpa' don zab dgongs pa nges par 'grel gyis de'i tshe tshigs su bcad pa 'di dag smras so zhes bya ba la sogs pas tshigs su bcad pa gnyis gsungs te/tshigs su bcad pa gnyis las tshigs su bcad pa dang po'i rtsa ba gong ma gnyis kyis ni rnam par byang ba'i phyogs bstan to/ /rtsa ba 'og ma gnyis kyis ni kun nas nyon mongs pa'i phyogs bstan to/ /tshigs su bcad pa gnyis pas ni kun nas nyon mongs pa'i phyogs la gnas pa rnams kyi nyes dmigs bstan to//de la tshigs su bcad pa dang po'i rtsa ba gong ma gnyis ni/ zab mo'i byis pa'i spyod yul ma yin pa/ /brjod med gnyis med rgyal bas bstan mdzad kyang / /zhes gsungs pa yin te/ de ni don dam pa'i zab mo'i spyod yul ma yin pa brjod du med pa'i mtshan nyid dang /gnyis su med pa'i mtshan nyid dang ldan pa/ rgyal ba stobs bcu dang ldan pa/ thugs rje dam pa mnga' bas bstan pa'i sgo nas mtshan nyid gnyis kyi dngos po bsdu ba bstan te/ de gnyis kyi rnam par byang ba'i phyogs kyang bstan pa yin no/ /rtsa ba gong ma gnyis ni/byis pa gti mug rmongs pa 'di dag ni/ /smra ba'i spros la dga' zhing gnyis la gnas/ /zhes gsungs pa yin te/ des ni byis pa gti mug gis rmongs pa 'di dag ni don dam pas brjod du med pa'i mtshan nyid dang ldan pa mi shes pas smra ba'i spros pa la dga' ba dang / gnyis su med pa'i mtshan nyid dang ldan pa mi shes pas gnyis la gnas pa'i sgo nas mtshan nyid gnyis kyis mi mthun pa'i phyogs kyi dngos po bsdu ba bstan te/de nyid kyi kun nas nyon mongs pa'i phyogs kyang bstan pa yin no/ /tshigs su bcad pa gnyis po ni/ ma rtogs pa'am log par rtogs pa dag /lug dang ba lang dag tu yang skye zhing / /de dag shes pa'i smra ba der bor nas/ /shin tu yun ring 'khor ba 'dir 'khor 'gyur / /zhes gsungs pa ste/ des ni byis pa gti mug gis rmongs pa'i don dam pa brjod du med pa dang / gnyis su med pa'i mtshan nyid dang ldan pa ma rtogs pa dang / log par rtogs pa de dag ni lug dang ba lang la sogs pa ngan song gsum po dag tu yang dang yang du skye zhing chos thams cad rnam par shes pa tsam du smra ba de bor nas yun ring por 'khor ba 'dir 'khor bar 'gyur ro zhes bstan te/ de nyid kyis kun nas nyon mongs pa'i phyogs la gnas pa rnams kyi nyes dmigs bstan pa yin no//le'u dang po'i tshig gi don la sogs pa bshad zin to// //de ltar brjod du med pa'i mtshan nyid gnyis su med pa'i mtshan nyid kyis don dam pa'i bden pa'i mtshan nyid yongs su shes par bya ba bstan nas/ de ni rtog ge'i spyod yul las yang dag par 'das pa'i mtshan nyid kyis don dam pa'i bden pa'i mtshan nyid yongs su shes par bya ba bstan pa'i tshig gi don la sogs pa bshad par bya ste/de'i phyir de bstan pa'i dbang du mdzad nas/ de nas bcom ldan 'das la byang chub sems dpa' chos 'phags kyis 'di skad ces gsol to zhes bya ba la sogs pa 'phags pa chos 'phags kyi le'u gnyis pa 'di gsungs so//de la le'u gnyis pa 'di'i bsdus pa'i don ni mdor bsdu na rtog ge'i spyod yul las yang dag par 'das pa'i mtshan nyid bstan pa yin no/ /de yang rnam par dbye ba rnam pa bzhi ste rtog ge pa'i mtshan nyid mngon par bsgrub pa'i tshul rnam par gzhag pa dang /don dam pa'i mtshan nyid mngon par bsgrub pa'i tshul rnam par gzhag pa dang / dpe'i mtshan nyid mngon par bsgrub pa'i tshul rnam par gzhag pa dang / de dag gi dngos po bsdu ba'i mtshan nyid mngon par bsgrub pa'i tshul rnam par gzhag pa'o/ /de la rtog ge pa'i mtshan nyid mngon par bsgrub pa'i tshul rnam par gzhag pa ni/bcom ldan 'das sngon gyi gdugs rnams kyi shin tu snga ba zhig na zhes bya ba nas/ ngo mtshar rmad du byung ba legs so snyam bgyid lags so zhes gsungs pa'i bar gyis bstan to/ /don dam pa'i mtshan nyid mngon par bsgrub pa'i tshul rnam par gzhag pa ni 'di skad ces gsol ba dang /bcom ldan 'das kyis byang chub sems dpa' chos 'phags la 'di skad ces bka' stsal to zhes bya ba nas/ chos 'phags de'i phyir rnam grangs des kyang khyod kyis rtog ge'i spyod yul thams cad las yang dag par 'das pa'i mtshan nyid gang yin pa ni don dam pa yin par rig par bya'o zhes gsungs pa'i tshar tha ma'i bar gyis bstan to//dpe'i mtshan nyid mngon par bsgrub pa'i tshul rnam par gzhag pa ni/ chos 'phags 'di lta ste dper na zhes bya ba nas/ chos 'phags de bzhin du rtog ge pa thams cad kyis kyang don dam pa rtog ge thams cad las yang dag par 'das pa'i mtshan nyid la brtag pa'am/rjes su dpag pa'am mos par mi nus so zhes gsungs pa'i bar gyis bstan to/ /de dag gi dngos po bsdu ba'i mtshan nyid mngon par bsgrub pa'i tshul rnam par gzhag pa ni de nas bcom ldan 'das kyis de'i tshe tshigs su bcad pa 'di bka' stsal to zhes bya ba la sogs pa tshigs su bcad pa gcig gis don dam pa rtog ge'i spyod yul las yang dag par 'das pa'i mtshan nyid dang ldan pa'i tshig gi don de dag gi dngos po bsdu ba bstan pa dang sbyar ro//de la dang po rtog ge pa'i mtshan nyid mngon par bsgrub pa'i tshul rnam par gzhag pa'i tshig gi don la sogs pa bshad par bya ste/rtog ge pa'i mtshan nyid mngon par bsgrub pa'i tshul rnam par gzhag pa zhes bya ba ni dge sbyong dang bram ze rtog ge pa dang ldan pa rtog ger gtogs pa'i sa rang gi spobs pa las byung ba/so so'i skye bo sa spyod pa'i rjes su spyod pa la gnas pa/ thams cad mkhyen pa ma yin par thams cad mkhyen pa mngon pa'i nga rgyal can bdag dang / sems can dang / srog dang / gang zag la sogs par mthong ba'i chos rnams kyi don dam pa yin par lta zhing don dam pa rtog ge'i yul las yang dag par 'das pa'i mtshan nyid dang ldan pa khong du ma chud pa de dag gi mtshan nyid ci 'dra ba mngon par bsgrub pa'i tshul rnam par gzhag pa gang yin pa'o//de'i phyir de bstan pa'i dbang du mdzad nas/ 'dir 'phags pa chos 'phags kyis bcom ldan 'das la bcom ldan 'das sngon gyi gdugs rnams kyi shin tu snga ba zhig na zhes bya ba la sogs pa gsol te/rgyas par mdo nyid las 'byung ba bzhin du rig par bya'o/ /da ni de dag gi tshig gi don bshad par bya ste/ de la sngon gyi gdugs rnams zhes bya ba ni gang dag la bcom ldan 'das mngon par rdzogs par sangs rgyas pa'i dus dag ste/de yang dang por byang chub la gzhol ba nas tha ma mngon par rdzogs par byang chub pa'i bar gyi dus rnams la phyir bsnyags pa'i phyir gdugs rnams zhes mang po'i tshig tu byas so/ /shin tu snga ba zhig na zhes bya ba ni gang dag la bcom ldan 'das pas sngar sangs rgyas gzhan dag mngon par rdzogs par sangs rgyas pa'i dus na'o//'di na zhes bya ba ni bcom ldan 'das kyis gnas phun sum tshogs pa sngar bstan pa de nas sam/ 'jig rten gyi khams mi mjed 'di nas so/ /de na zhes bya ba ni/ 'jig rten gyi khams grags pa can de na'o/ / mu stegs pa rang rang gi ston pa la sogs pa zhes bya ba ni rtog ge pa grub pa'i mtha' dang gzhung lugs tha dad pa rang rang gi mkhan po dang dge 'dun gyi tshogs dang bcas pa dag go/ /chos rnams kyi don dam pa'i mtshan nyid bsam pa las brtsams nas zhes bya ba ni dngos po rnams kyi de kho na nyid gtan la dbab par 'dod nas zhes bya ba'i tha tshig go//mchis shing zhes bya ba ni gang dag dngos po de ji lta ba bzhin gtan la dbab pa'i phyir sngar der 'khod pa dag go/ /'dus nas zhes bya bas ni gang dag gis snga ma de dag mthong nas de'i 'og tu der lhags pa rnams so/ /sems par bgyid ces bya ba ni bstan pa'i tha tshig go//'jal bar bgyid de nye bar rtog par bgyid ces bya ba ni bshad pa'i tshig ste/ de yang rang gi gzhung lugs kyi sgro 'dogs pa dang / skur pa dang bral bas sems par byed pa ni 'jal bar bgyid ces bya bas bstan to/ /rigs pa la brten nas sems par byed pa ni nye bar rtog par bgyid ces bya bas bstan te/de ltar na de gnyis kyis ni ji ltar sems par byed pa dang / gang gis sems par byed pa bstan pa yin te go rims bzhin du sbyar ro/ /yongs su tshol bar bgyid kyang zhes bya ba ni de ltar bstan pa dang bshad pa'i tshig de dag gnyis kyis gtan la 'bebs par byed kyang zhes bya bar sbyar ro//ma rtogs nas ni zhes bya ba ni gtan la ma phebs nas zhes bya ba'i tha tshig go/ /blo gros tha dad pa zhes bya ba ni blo gros so sor gyur pa'o/ /yid gnyis can zhes bya ba ni gang dag som nyi za ba dag go/ /blo gros ngan pa zhes bya ba ni/ de dag las gang dag log par nges pa de dag go//rtsod pa zhes bya ba ni sems kyis so/ /'gyed par gyur pa zhes bya ba ni tshig gis so/ /gcig la gcig kha stobs kyis gnod pa bgyis zhes bya ba ni bstan pa'i tshig go/ /zher 'debs par bgyis/ gab gab kyis mnan pa bgyis/ tshar bcad par bgyis te zhes bya ba dag ni bshad pa'i tshig ste/de yang mi rigs par smras na ngag rtsub po 'byin pas gnod par byas pa ni/ zher 'debs par bgyis zhes bya bas bstan to/ /rigs par smras na spong ba la sogs pas gnod par byas pa ni/ gab gab kyis mnan pa bgyis zhes bya bas bstan to//de gnyis ka'i dus na gnyis kas gnod pa byas pa ni/ tshar bcad par bgyis te zhes bya bas bstan to/ /so sor mchis pa dag cig mthong nas zhes bya bas ni phyogs so sor dong ba ste/ de ltar tshig gi don de dag gis ni rtog ge pa'i mtshan nyid mngon par bsgrub pa'i tshul rnam par gzhag pa bstan pa yin no//bcom ldan 'das bdag 'di snyam bgyid do zhes bya ba la sogs pas ni de ltar rtog ge pa'i mtshan nyid mngon par bsgrub pa'i tshul rnam par gzhag pa de la ltos na/ kye ma de bzhin gshegs pa rnams 'jig rten du 'byung bas shin tu bde ba che ba dang /de dag byung bas don dam pa rtog ge thams cad las yang dag par 'das pa'i mtshan nyid 'di lta bu bstan pa shin tu phan 'dogs pa che ba dang / de rtogs pa dang mngon sum du bgyi ba'i thabs dang gnas skabs mchis pas shin tu dal 'byor che ba dang / de rtogs pa dang mngon sum du bgyi ba'i rnal 'byor pa de dag mchis pas shin tu mngon par rtogs pa che ba'i slad du ngo mtshar rmad du byung ba lags so snyam bgyid lags so zhes bya bar sbyar ro//de la rtogs pa zhes bya ba ni mthong ba'i lam gyis so/ /mngon sum du bgyi ba zhes bya ba ni bsgom pa'i lam gyis so/ /de dag ni rtog ge pa'i mtshan nyid la ltos na/de bzhin gshegs pa 'jig rten du byung ba la sogs pa shin tu bde ba dang phan 'dogs pa dang / dal 'byor dang mngon par rtogs pa che ba'i phyir ngo mtshar rmad du byung ba yin no zhes zhar la bstod pa dang / tshig 'og ma'i mgo 'dren pa tsam du zad kyi dngos su rtog ge pa'i mtshan nyid bstan pa'i gnas skabs yin pas na de ni rtog ge pa'i mtshan nyid mngon par bsgrub pa'i tshul gyis rnam par gzhag pa yin no//de'i 'og tu don dam pa'i mtshan nyid mngon par bsgrub pa'i tshul rnam par gzhag pa'i tshig gi don la sogs pa bshad par bya ste/ don dam pa'i mtshan nyid mngon par bsgrub pa'i tshul rnam par gzhag pa zhes bya ba ni don dam pa rtog ge thams cad las yang dag par 'das pa'i mtshan nyid dang ldan pa de bzhin gshegs pa nyid kyi so so rang gis rig pa'i tshul du mngon par rdzogs par sangs rgyas pa dang /tha snyad rnam par gzhag pa'i sgo nas gzhan la bsnyad pa la sogs pa'i mtshan nyid ci 'dra ba mngon par bsgrub pa'i tshul rnam par gzhag pa gang yin pa'o//de'i phyir de bstan pa'i dbang du mdzad nas/ de skad ces gsol pa dang / bcom ldan 'das kyis byang chub sems dpa' chos 'phags la 'di skad ces bka' stsal to zhes bya ba la sogs pa gsungs so//de la chos 'phags de de bzhin no/ /de de bzhin te zhes bya bas ni sngar rtog ge'i mtshan nyid mngon par bsgrub pa'i tshul rnam par gzhag pa la ltos na/ de bzhin gshegs pa rnams 'jig rten du 'byung ba dang / don dam par rtog ge thams cad las yang dag par 'das pa'i mtshan nyid 'di lta bu ston pa dang /de rtogs pa dang mngon sum du bya ba'i thabs dang gnas skabs yod pa dang / de rtogs pa dang mngon sum du byed pa'i rnal 'byor pa dag yod pa ni/ shin tu bde ba che ba dang / shin tu phan 'dogs pa che ba dang shin tu dal 'byor che ba dang /shin tu mngon par rtogs pa che ba'i phyir ngo mtshar rmad du byung ba lags so snyam bgyid lags so zhes gsol pa de nyid nges pa yin par mnan pa'i sgo nas don dam pa'i mtshan nyid mngon par grub pa'i tshul rnam par gzhag pa ston to/ /ngas ni don dam par rtog ge thams cad las yang dag par 'das pa'i mtshan nyid mngon par rdzogs par sangs rgyas te zhes bya bas ni don dam pa'i mtshan nyid mngon par bsgrub pa'i tshul rnam par gzhag pa nyid dmigs kyis bstan pa yang yin la/de bzhin gshegs pa rnams 'jig rten du 'byung ba yod pas shin tu bde ba che ba yang bstan par rig par bya'o//mngon par rdzogs par sangs rgyas nas yang zhes bya ba la sogs pas tha snyad rnam par gzhag pa'i sgo nas gzhan la bsnyad pa la sogs pa'i mtshan nyid ci 'dra ba nyid dmigs kyis bstan pa yang yin la/ don dam par rtog ge thams cad las yang dag par 'das pa'i mtshan nyid 'di lta bu ston pa yod pa la sogs pa shin tu phan 'dogs pa che ba la sogs pa yang bstan par rig par bya'o//bsnyad cing zhes bya ba ni bsnyad pa'i tshig go/ /gsal bar byas/ rnam par phye ste zhes bya ba gnyis ni bshad pa'i tshig gis gsal bar byas pa dang /rnam par phye ba gnyis kyis na bsnyad pa yin no/ /de la gsal bar byas zhes bya ba ni chos gdags pa rnam par gzhag pas legs par gdags pa byas pa'i phyir ro/ /rnam par phye zhes bya ba ni chos de dag gi don rab tu bstan pa'i phyir te/de ltar na tshig dang po ni bar ma gnyis kyis bshad la/ bar ma gnyis ni go rims bzhin du tha ma gnyis kyis bshad par blta bar bya'o/ /de ci'i phyir zhe na zhes bya ba la sogs pa gtan tshigs rnam pa lngas ni don dam pa'i mtshan nyid gong nas gong du mngon par bsgrub pa'i tshul rnam par gzhag pa rnam pa lnga ston te/de yang rtog ge la brten nas don dam pa rnam par dpyod pa gzhan mu stegs can rnams la gang gis don dam pa khong du chud par mi 'gyur ba'i nyes pa lnga yod pa'i gnyen por go rims bzhin du sbyar ro/ /nyes pa lnga ni kun du tshol ba'i nyes pa dang / mngon pa'i nga rgyal gyi nyes pa dang /mngon par zhen pa'i nyes pa dang / 'dogs pa'i nyes pa dang / rtsod pa'i nyes pa ste/ de dag kyang gzhan gyis bstan pa tsam gyis don dam pa khong du chud par re ba dang zhi gnas tsam thob na mtshan mar 'dzin pa tsam gyis don dam pa rtogs so snyam pa'i mngon pa'i nga rgyal dang /rnam par 'jig pa'i dbang gis ji ltar brjod pa bzhin du mngon par zhen pa dang mthong ba la sogs pa'i tha snyad la brten nas srog la sogs pa yod par rnam par 'jog pa 'dogs pa dang / phan tshun mi mthun par 'dogs pa bdag dang gzhan gyi phyogs la rjes su chags pa dang khong khro bar gyur pa rtsod par 'gyur ba dang /go rims bzhin du sbyar ro/ /rtog ge la brten pa'i nyes pa de lngas khong du chud par mi 'gyur ba nyid don dam pa rtog ge'i spyod yul las yang dag par 'das pa'i mtshan nyid dang ldan pa yin par rig par bya'o/ /de la don dam pa ni 'phags pa rnams kyi so so rang gis rig pa yin par ngas bshad la/so so'i skye bo rnams kyis phan tshun rig par bya ba ni rtog ge'i spyod yul yin pa'i phyir de zhes bya ba ni gzhan gyis bstan pa tsam gyis don dam pa khong du chud par re ba'i kun du tshol ba'i nyes pas don dam pa khong du chud par mi 'gyur ba bstan te/ gzhan gyis bstan pa tsam gyis zhes bya ba ni rtog ge las byung ba'i don gcig la gcig ston par byed pa ste/ des don dam pa khong du chud par mi 'gyur bas de nyid kun du tshol ba'i nyes pa yin no/ /de la don dam pa zhes bya bas ni sngar dngos po de 'phags pa'i shes pa dang mthong bas brjod du med par mngon par rdzogs par sangs rgyas shing zhes smos pa ste/gzhan gyi dbang gi ngo bo nyid kyi dngos po mngon par rdzogs par rtogs par 'gyur ba med par yongs su grub pa dang / phyin ci ma log par yongs su grub pa'i ngo bo nyid yin par bzhed do/ /'phags pa rnams kyi so so rang gis rig pa zhes bya ba ni de bzhin nyid kyi rnam pa yang dag pa'i ye shes kyi ngo bo nyid las tha mi dad pa de nyid yang dag pa'i ye shes kyi rang rig pa zhes bya ba'i tha tshig go//so so'i skye bo rnams kyis phan tshun rig par bya ba zhes bya ba ni rtog ge las byung ba'i don gcig la gcig ston par byed pa'o/ /rtog ge'i spyod yul yin pa'i phyir te zhes bya ba ni kun du tshol ba'i nyes pa dang ldan pa yin pa'i phyir ro//chos 'phags de'i phyir rnam grangs des zhes bya ba la sogs pas ni/ don dam pa'i mtshan nyid gong nas gong du mngon par bsgrubs pa'i tshul rnam par gzhag pa ston to / /de ltar kun du tshol ba'i nyes pas khong du chud par mi 'gyur ba nyid dam pa'i rtog ge'i spyod yul las yang dag par 'das pa'i mtshan nyid dang ldan pa yin par rig par bya ste/lhag ma rnams la yang de bzhin du ci rigs par sbyar ro/ /chos 'phags gzhan yang don dam pa ni mtshan ma med pa'i spyod yul yin par ngas bshad la/rtog ge'i mtshan ma'i spyod yul yin te zhes bya bas ni zhi gnas tsam thob nas mtshan mar 'dzin pa tsam gyis don dam pa rtogs so snyam pa'i mngon pa'i nga rgyal gyi nyes pas don dam pa khong du chud par mi 'gyur bar bstan te/ zhi gnas tsam thob nas mtshan mar 'dzin pa tsam gyis zhes bya ba ni 'jig rten pa'i lam gyi sems rtse gcig tu gyur pa tsam thob pa nas de nyid don dam pa yin par mtshan mar 'dzin pa ste/des kyang don dam pa khong du chud par mi 'gyur bas de nyid mngon pa'i nga rgyal gyi nyes pa yin no/ /de la mtshan ma med pa'i spyod yul zhes bya ba ni mtshan ma med pa'i ting nge 'dzin gyi spyod yul yin pa'o//mtshan ma med pa'i spyod yul yin te zhes bya ba ni de la mtshan ma med pa'i spyod yul can yin pa ste/ de ni byis pa'i shes pa'i yul can yin pa'i phyir ro/ /chos 'phags gzhan yang don dam pa ni brjod du med pa yin par ngas bshad la/rtog ge ni brjod pa'i yul yin te zhes bya bas ni rnam par 'jog pa'i dbang gis ji ltar brjod pa bzhin du mngon par zhen pa'i nyes pas don dam pa khong du chud par mi 'gyur bar bstan te/ rnam par 'jog pa'i dbang gis zhes bya ba ni ming dang / tshig dang / yi ge'i tshogs kyi sgo nas brjod pa rnam par 'jog pa ste/brjod pa la mngon par zhen pa des kyang don dam pa khong du chud par mi 'gyur bas de nyid mngon par zhen pa'i nyes pa yin no/ /de la brjod du med pa zhes bya ba ni brjod pas thog tu mi phebs pa'i phyir ro/ /brjod pa'i spyod yul yin te zhes bya ba ni brjod pa'i sgo nas don rtogs par 'gyur ba'i phyir ro//chos 'phags gzhan yang don dam pa ni tha snyad thams cad yang dag par chad pa yin par ngas bshad la/ rtog ge ni tha snyad kyi spyod yul de zhes bya bas ni mthong ba la sogs pa'i tha snyad la brten nas srog la sogs pa yod par rnam par 'jog pa 'dogs pa'i nyes pas don dam pa khong du chud par mi 'gyur ba bstan te/mthong ba la sogs pa'i tha snyad la brten nas zhes bya ba ni mthong ba dang / thos pa dang / bye brag phyed pa dang / rnam par shes pa'i tha snyad la brten nas za ba po dang / byed pa por 'dzin pa'i sgo nas bdag dang / sems can dang / srog dang / gang zag la sogs pa yod par 'dogs pa ste/ bdag tu 'dogs pa des kyang don dam pa khong du chud par mi 'gyur bas de nyid 'dogs pa'i nyes pa yin no/ /de la tha snyad thams cad yang dag par chad pa zhes bya ba ni brjod pa'i tha snyad lta ga la yod kyi/ brjod pa las gzhan pa mig brda la sogs pa'i tha snyad gang dag yin pa de dag kyang de la med pa'o//tha snyad kyi spyod yul yin te zhes bya ba ni brjod pa la sogs pa'i tha snyad kyis gdags pa'i yul yin pa'i phyir ro/ /chos 'phags gzhan yang don dam pa ni rtsod pa thams cad yang dag par chad pa yin pas ngas bshad pa/rtog ge ni rtsod pa'i spyod yul te zhes bya bas ni phan tshun mi mthun par 'dogs pa'i bdag dang gzhan gyi phyogs la rjes su chags pa dang / khong khro bar gyur pa'i rtsod pa'i nyes pas don dam pa khong du chud par mi 'gyur ba bstan te/ phan tshun mi mthun par 'dogs pa zhes bya ba ni dngos po la mngon par zhen pa'i dbang gis grub pa'i mtha' dang gzhung lugs mi mthun par 'dogs shing gzhi des bdag gi phyogs la rjes su chags pa dang /gzhan gyi phyogs la khong khro bar gyur pas rtsod pa ste/ dngos po la mngon par zhen pas phyogs la chags shing rtsod par gyur pa des kyang don dam pa khong du chud par mi 'gyur bas de nyid rtsod pa'i nyes pa yin no//de la rtsod pa thams cad yang dag par chad pa zhes bya ba ni ma rtogs pa'am log par rtogs pa mi mthun pa la ni rtsod pa 'byung bar 'gyur gyi/ 'di ni de las bzlog pa yin pa'i phyir rtsod pa thams cad yang dag par chad pa yin no//rtsod pa'i spyod yul yin te zhes bya ba ni yul gang la rtsod pa 'byung bar 'gyur ba'i yul der rtogs pa ste/ de'i yul yin pa'i phyir ro/ /chos 'phags de'i phyir rnam grangs des kyang khyod kyis 'di ltar rtog ge thams cad las yang dag par 'das pa'i mtshan nyid gang yin pa de ni don dam pa yin par rig par bya'o zhes bya bas ni don dam pa'i mtshan nyid gong nas gong du mngon par bsgrub pa'i tshul rnam par gzhag pa lnga pa ston te/de ltar rtsod pa'i nyes pas khong du chud par mi 'gyur ba nyid don dam pa rtog ge'i spyod yul las yang dag par 'das pa'i mtshan nyid dang ldan pa yin par rig par bya ste/de ni don dam pa'i mtshan nyid mngon par bsgrub pa'i tshul rnam par gzhag pa yin no/ /de'i 'og tu dpe'i mtshan nyid mngon par bsgrub pa'i tshul rnam par gzhag pa'i tshig don la sogs pa bshad par bya ste/ dpe'i mtshan nyid mngon par bsgrub pa'i rnam par gzhag pa zhes bya ba ni don dam pa'i mtshan nyid gong nas gong du mngon par bsgrub pa'i tshul rnam pa lnga sngar bstan pa de dag rtog ge pa nyes pa lnga dang ldan pa de dag gis khong du chud par mi 'gyur ba'i dpe mtshan nyid rnam pa lnga mngon par bsgrub pa'i tshul rnam par gzhag pa gang yin pa'o//de'i phyir de bstan pa'i dbang du mdzad nas/ chos 'phags 'di lta ste/ dper na zhes bya ba la sogs pa gsungs so/ /de la dpe lnga ni mos pa rnam pa lnga po yod pas sel bar mos pa dang / 'dod pa la mos pa dang / rnam par rtog pa la mos pa dang /tha snyad la mos pa dang / bdag gir 'dzin pa la mos pa rnam pa lngas brtsams nas rnam par gzhag ste/ don dam pa'i mtshan nyid gong nas gong du mngon par bsgrub pa'i tshul rnam par gzhag pa'i rnam pa lngas bstan pa dang go rims bzhin du sbyar ro/ /de la skyes bu gang zag ji srid 'tsho'i bar du zhes bya ba la sogs pas ni yod pa sel ba'i mos pa'i dpe ston te/yod pa sel bar mos pa zhes bya ba ni mthu chen pos mthu chung ngu yod bzhin du zil gyis mnan par mos pa ste/ dper na yun ring po nas kha ba dang tsha ba'i ro la brten brten pas/ sbrang rtsi la sogs pa'i ro yod bzhin du mi rtogs pa'i ro chen po la mos pa lta bu'o//de ltar ro chen po la brten brten pas ro chung ngu mi rtogs pa bzhin du rtog ge pa kun du tshol ba'i nyes pa dang ldan pas kyang don dam pa 'phags pa rnams kyis so so rang rig pa la brtag pa la sogs par mi nus so zhes sbyar ro//sbrang rtsi'i ro 'am sha ka ra'i ro zhes bya ba'i ro ni so so rang rig pa yin pa'i phyir ro/ /brtag pa'am/ rjes su dpag pa 'am/ mos par mi nus so zhes bya ba ni rtog ge dang rjes su dpag pa'i stobs dang / mos pa'i stobs kyis te go rims bzhin no/ /yun ring po nas 'dod pa'i 'dod chags la mos pa zhes bya ba la sogs pas ni 'dod pa la mos pa'i dpe ston te/'dod pa la mos pa zhes bya ba ni yun ring po nas 'dod pa'i yon tan lnga la mos pa nyon mongs pa'i 'dod pa dang / dngos po'i 'dod pa'i yongs su gdung ba dag gis yongs su gdung ba ste/ des nang gi rab tu dben pa'i bde ba la rtog pa la sogs par mi nus pa bzhin du rtog ge pa mngon pa'i nga rgyal gyi nyes pa dang ldan pas kyang don dam pa mtshan ma med pa'i spyod yul la 'jug pa la sogs par mi nus so zhes bya bar sbyar ro//nang gi rab tu dben pa'i bde ba zhes bya ba ni bsam gtan gyi dngos gzhi thob pa'i bde ba'o//gzugs dang / sgra dang / dri dang / ro dang / reg bya'i mtshan ma thams cad dang bral ba zhes bya ba de ni 'dod pa'i yon tan lnga po dag gis bskyed pa ma yin pa'i phyir ro/ /yun ring po nas kun du smra ba la mos pa zhes bya ba la sogs pas ni rnam par rtog pa la mos pa'i dpe ston te/rnam par rtog pa la mos pa zhes bya ba ni ngo bo nyid dang bye brag tu rnam par rtog pas ngag kun nas bslang ba'i brjod pa la mngon par zhen pa ste/ des nang gi mi smra ba 'phags pa'i bde ba la brtag pa la sogs par mi nus pa bzhin du/ rtog ge mngon par zhen pa'i nyes pa dang ldan pas kyang don dam pa brjod du med pa la brtag pa la sogs par mi nus so zhes bya bar sbyar ro//nang gi mi smra ba 'phags pa'i bde ba zhes bya ba ni zag pa med pa'i dbyings la mnyam par gzhag pa'o/ /yun ring po nas mthong ba dang / thos pa dang / bye brag phyed pa dang rnam par shes pa'i tha snyad la mos pa zhes bya ba la sogs pas ni tha snyad la mos pa'i dpe ston te/tha snyad la mos pa zhes bya ba ni yun ring po nas mthong ba la sogs pa'i tha snyad la mos pa ste/ des tha snyad thams cad yang dag par chad pa 'jig tshogs 'gog pa'i mya ngan las 'das pa la brtag pa la sogs par mi nus pa bzhin du rtog ge pa 'dogs pa'i nyes pa dang ldan pas kyang don dam pa tha snyad thams cad yang dag par chad pa la brtag pa la sogs par mi nus so zhes bya bar sbyar ro//'jig tshogs 'gog pa'i mya ngan las 'das pa zhes bya ba ni phung po lhag ma med pa'i mya ngan las 'das pa'i dbyings so//yun ring po nas bdag gir yongs su 'dzin pa nyid kyis rtsod pa la brtson pa zhes bya ba la sogs pas bdag gir 'dzin pa la mos pa'i dpes ston te/ bdag gir 'dzin pa la mos pa zhes bya ba ni yun ring po nas bdag gir 'dzin pas bdag gi phyogs la rjes su chags pa dang /gzhan gyi phyogs la khong khro bas rtsod par 'gyur ba ste/ des byang gi sgra mi snyan pa dag gi bdag gir 'dzin pa med pas rtsod pa med pa la brtag pa la sogs par mi nus pa bzhin du rtog ge pa rtsod pa'i nyes pa dang ldan pas kyang don dam pa rtsod pa med pa thams cad yang dag par chad pa la brtag pa la sogs par mi nus so zhes bya bar sbyar ro//byang gi sgra mi snyan pa dag gi bdag gir yongs su 'dzin pa med pa nyid dang rtsod pa med pa nyid ces bya ba ni de na bdag gir 'dzin pa med pas rtsod pa med de/ rtsod pa'i gzhi med pa'i phyir ro/ /chos 'phags de bzhin du rtog ge pa thams cad kyis kyang don dam pa rtog ge thams cad las yang dag par 'das pa'i mtshan nyid la brtag pa'am/rjes su dpag pa'am/ mos par mi nus so zhes bya bas ni de ltar gang zag yod pa sel bar mos pa dang / 'dod pa la mos pa dang / rnam par rtog pa la mos pa dang /tha snyad la mos pa dang / bdag gir 'dzin pa la mos pa dag gis rang rig pa'i ro dang / nang gi rab tu dben pa'i bde ba dang / nang gi mi smra ba 'phags pa'i bde ba dang / tha snyad thams cad yang dag par chad pa 'jig tshogs 'gog pa'i mya ngan las 'das pa dang / byang gi sgra mi snyan pa dag gi bdag gir yongs su 'dzin pa med pa nyid dang / rtsod pa med pa la brtag pa la sogs par mi nus pa bzhin du rtog ge pa kun du tshol ba'i nyes pa dang / mngon pa'i nga rgyal gyi nyes pa dang / 'dogs pa'i nyes pa dang / rtsod pa'i nyes pa dang ldan pa dag gis kyang don dam pa so so rang rig pa dang /mtshan ma med pa'i spyod yul dang / brjod du med pa dang / tha snyad thams cad yang dag par chad pa dang / rtsod pa thams cad yang dag par chad pa las brtag pa la sogs par mi nus so zhes dpes mtshon pa'i don gyi mjug bsdu ba bstan pa ste/ de ni dpe'i mtshan nyid mngon par bsgrub pa'i tshul du rnam par gzhag pa yin no/ /de'i 'og tu de dag gi dngos po bsdu ba'i mtshan nyid mngon par bsgrub pa'i tshul rnam par gzhag pa'i tshig gi don la sogs pa bshad par bya ste/ de dag gi dngos po bsdu ba'i mtshan nyid mngon par bsgrub pa'i tshul rnam par gzhag pa zhes bya ba ni don dam pa rtog ge pa'i spyod yul las yang dag par 'das pa'i mtshan nyid dang ldan pa sngar bstan pa'i tshig gi don de dag gi dngos po tshigs su bcad pas mdor bsdu ba'i mtshan nyid mngon par bsgrub pa'i tshul rnam par gzhag pa gang yin pa'o//de'i phyir de bstan pa'i dbang du mdzad nas/de nas bcom ldan 'das kyis de'i tshe tshigs su bcad pa 'di dag bka' stsal to zhes bya ba la sogs pa'i tshigs su bcad pa gcig gsungs te/ de la so so rang rig mtshan med spyod yul te/ /brjod du med cing tha snyad yongs bcad pa/ /rtsod dang bral ba don dam chos nyid de//de ni rtog ge kun las 'das mtshan nyid/ /ces gsungs pa'i don lnga dang sngar don dam pa'i mtshan nyid gong nas gong du mngon par bsgrub pa'i tshul rnam pa lnga bstan par go rims bzhin du sbyar te/ don dam pa rtog ge'i spyod yul las yang dag par 'das pa'i mtshan nyid dang ldan par bstan par rig par bya'o//le'u gnyis pa'i tshig gi don la sogs pa bshad zin to// // de ltar rtog ge'i spyod yul las yang dag par 'das pa'i mtshan nyid kyi don dam pa'i bden pa'i mtshan nyid yongs su shes par bya ba bstan nas/ da ni tha dad pa dang / tha dad pa ma yin pa nyid las yang dag par 'das pa'i mtshan nyid kyis don dam pa'i bden pa'i mtshan nyid yongs su shes par bya ba bstan pa'i tshig gi don la sogs pa bshad par bya ste/de'i phyir de bstan pa'i dbang du mdzad nas/ de nas bcom ldan 'das la byang chub sems dpa' blo gros shin tu rnam dag gis 'di skad ces gsol to zhes bya ba la sogs pa 'phags pa blo gros shin tu rnam dag gi le'u gsum pa 'di gsungs so//de la le'u gsum pa 'di'i bsdus pa'i don ni mdor bsdu na tha dad pa dang tha dad pa ma yin pa nyid las yang dag par 'das pa'i mtshan nyid bstan pa yin no/ /de yang rnam par dbye na rnam pa bzhi ste/don dam pa'i mtshan nyid rnam par gzhag pa dang / de la shin tu rmongs pa'i mtshan nyid rnam par gzhag pa dang / de dag gi dpe'i mtshan nyid rnam par gzhag pa dang / de dag gi dngos po bsdu ba'i mtshan nyid rnam par gzhag pa'o/ /de la don dam pa'i mtshan nyid rnam par gzhag pa ni/bcom ldan 'das bcom ldan 'das kyis gang gi slad du 'di skad ces bya ba nas ji tsam du bcom ldan 'das kyis legs par gsungs pa de ni ngo mtshar lags so zhes gsungs pa'i bar gyis bstan to/ /de la shin tu rmongs pa'i mtshan nyid rnam par gzhag pa ni/bcom ldan 'das 'di ni bdag gis sa phyogs zhig na zhes bya ba nas tshul bzhin du zhugs pa ma yin par rig par bya'o zhes gsungs pa'i tshar tha ma'i bar gyis bstan to/ /de dag gi dpe'i mtshan nyid rnam par gzhag pa ni/ blo gros shin tu rnam dag 'di lta ste dper na zhes bya ba nas mngon par rdzogs par sangs rgyas nas kyang bsnyad pa'i gsal bar byas/rnam par phye/ gdags pa byas/ rab tu bstan to zhes gsungs pa'i bar gyis bstan to/ /de dag gi dngos po bsdu ba'i mtshan nyid rnam par gzhag pa ni de nas bcom ldan 'das kyis de'i tshe tshigs su bcad pa 'di dag bka' stsal to zhes bya ba la sogs pa'i tshigs su bcad pa gnyis kyis don dam pa tha dad pa dang tha dad pa ma yin pa nyid las yang dag par 'das pa'i mtshan nyid dang ldan pa'i tshig gi don de dag gi dngos po bsdu ba bstan pa dang sbyar ro//de la dang por don dam pa'i mtshan nyid rnam par gzhag pa'i tshig gi don la sogs pa bshad par bya ste/don dam pa'i mtshan nyid rnam par gzhag pa zhes bya ba ni skabs 'dir don dam pa tha dad pa dang / tha dad pa ma yin pa nyid las yang dag par 'das pa'i mtshan nyid dang / phra ba/ zab pa/ rtogs par dka' ba'i rang bzhin bcom ldan 'das kyis mdo sde de dang de dag tu bka' stsal pa nyid 'dir mdor smos pa gang yin pa'o//de'i phyir de bstan pa'i dbang du mdzad nas/ 'dir 'phags pa blo gros shin tu rnam dag gis bcom ldan 'das la/ bcom ldan 'das bcom ldan 'das kyis gang gi slad du 'di skad ces bya ba la sogs pa gsol to//de la gang gi slad du zhes bya ba ni don dam pa'i mtshan nyid bstan pa'i phyir zhes bya bar sbyar ro/ /phra ba/ zab pa/ rtogs par dka' ba zhes bya ba ni gong nas gong du bye brag tu bstan pa yin no/ /ngo mtshar lags so zhes bya ba ni rgya che ba dang / zab pa'i sgo nas bstod pa'i tshig ste/de ni dam pa'i mtshan nyid rnam par gzhag pa yin no/ /de'i 'og tu de la shin tu rmongs pa'i mtshan nyid rnam par gzhag pa'i don la sogs pa bshad par bya ste/ de la shin tu rmongs pa'i mtshan nyid rnam par gzhag pa zhes bya ba ni de ltar don dam pa tha dad pa dang / tha dad pa ma yin pa nyid las yang dag par 'das pa'i mtshan nyid dang ldan pa de ni nges pa'i don du rnam par gzhag pa ste/ sar chud pa'i byang chub sems dpa' rnams kyi spyod yul yin pas de la dang po'i don rnam par gzhag pa la mngon par zhen pa mos pas spyod pa'i sa la gnas pa'i byang chub sems dpa' rnams shin tu rmongs par gyur pa'i mtshan nyid rnam par gzhag pa gang yin pa'o//de'i phyir de bstan pa'i dbang du mdzad nas/ bcom ldan 'das 'di na bdag gis sa phyogs shig na zhes bya ba la sogs pa gsungs so/ /de yang mos pas spyod pa'i sa la gnas pa'i byang chub sems dpa' shin tu rmongs pa gnyis kyis shin tu rmongs nas don dam pa la tshul bzhin ma yin pas sems te/gdags pa la shin tu rmongs pa dang / rigs pa la shin tu rmongs pas so/ /de la gdags pa la shin tu rmongs pas don dam pa la tshul bzhin ma yin pa pas sems pa ni/de la byang chub sems dpa' kha cig 'di skad ces bya ba nas don dam pa mngon sum du byed pa ma yin pa'i phyir ro zhes gsungs pa'i bar gyis bstan to/ /rigs pa la shin tu rmongs pas don dam pa la tshul bzhin ma yin pas sems pa ni/ de ci'i phyir zhe na/ blo gros shin tu rnam dag ces bya ba nas tshul bzhin du bzhugs pa ma yin par rig par bya'o zhes gsungs pa'i tshar tha ma'i bar gyis bstan to//de la gdags pa la shin tu rmongs pa zhes bya ba ni nges pa'i don gyi mdo sde las phyi rol du gyur pa'i phyir te/ de dag bcom ldan 'das kyis drang ba'i don gyi mdo sde gdags pa mdzad pa'i rjes su 'brang ba yin pas nges pa'i don gyi mdo sde gdags pa mdzad pa la shin tu rmongs shing nga las phyi rol du gyur pa'i don dam pa la tshul bzhin du ma yin par sems par byed do zhes bya bar sbyar ro//de yang ji lta bu zhe na/ de'i phyir 'du byed kyi mtshan nyid dang /don dam pa'i mtshan nyid tha dad pa ma lags so zhes mchi zhes bya ba dang / tha dad pa lags so zhes mchi zhes bya ba la sogs pa gsungs te/ 'du byed kyi mtshan nyid ces bya ba ni phung po la sogs pa gzhan gyi dbang gi ngo bo nyid kyi skye ba dang / gnas pa dang / 'jig pa'o/ / don dam pa'i mtshan nyid ces bya ba ni chos rnams kyi chos bdag med pa yongs su grub pa'i ngo bo nyid do/ /de gnyis ni nges pa'i don gyi mdo sde las 'du byed rnams kyi bdag med pa tsam dang / ngo bo med pa tsam nyid don dam pa'i mtshan nyid yin pas tha dad pa dang / tha dad pa ma yin pa nyid las yang dag par 'das pa'i mtshan nyid yin par gsungs na /de dag ni nges pa'i don gyi mdo sde las phyi rol du gyur pa'i phyir drang ba'i don gyi mdo sde las kha cig tu 'du byed ni gzhan gyi dbang gi ngo bo nyid yin la/ don dam pa ni yongs su grub pa'i ngo bo nyid yin pas/ ngo bo nyid rnam par gzhag pa'i sgo nas tha dad pa skad kyang bka' stsal/kha cig tu gzhan gyi dbang gi ngo bo nyid yongs su dag pa ni yongs su grub pa'i ngo bo nyid yin pas rang bzhin gcig pa'i sgo nas tha dad pa ma yin pa skad kyang bka' stsal pa'i mdo de nyid kyi rjes su 'brang ba sgra ji bzhin du 'dzin pas kha cig ni tha dad pa ma yin zhes zer te/de gnyis ka yang gdags pa la gcig tu rmongs pa don dam pa la tshul bzhin ma yin pas sems pa yin no zhes bya ba'i tha tshig go/ /the tshom du gyur pa'i blo gros can yid gnyis su gyur pa zhes bya ba dag kyang de nyid kyi khongs su gtogs pa yin no/ /gang ni med par mchi ba lags gang ni sho be mchi ba lags zhes bya ba ni 'dir nges pa'i don gyi mdo sde bsam pa'i skabs su gnyis ka yang brdzun pa yin par bya'o//gang ni tshul bzhin du zhugs pa lags/ gang ni tshul bzhin ma lags par zhugs pa lags zhes bya ba yang gnyi ga nges pa'i don la tshul bzhin ma yin par zhugs pa yin par sbyar ro//bdag 'di snyam bgyid de zhes bya ba la sogs pas ni de dag nges pa'i don gyi mdo sde las phyi rol du gyur pa dngos su ston to/ /byis pa rmongs pa mi gsal ba/ mi mkhas pa zhes bya ba dag ni rnam grangs so/ /rtogs pa dang mngon sum du byed pa zhes bya ba ni sngar bshad pa bzhin te de dag ni gdags pa las shin tu rmongs pa'i tshig gi don bshad pa yin no//de la rigs pa la shin tu rmongs pa la zhes bya ba ni gtan tshigs dang dpe'i yan lag mngon par mi shes pa'i phyir te/ gtan tshigs kyi yan lag rjes su dpag par bya ba la yod pa dang / mthun pa'i phyogs la yod pa dang /mi mthun pa'i phyogs las ldog pa dang / dpe'i yan lag chos mthun pa'i dpe dang / chos mi mthun pa'i dpe dag mi shes pas na gal te tha dad pa ma yin par gyur na ni skyon 'dir 'gyur ro/ /gal te tha dad pa yin par gyur na ni skyon 'dir 'gyur ro zhes bya ba'i rigs pa la shin tu rmongs pas don dam pa la tshul bzhin ma yin pas sems pa yin no zhes bya bar sbyar ro//de yang ji lta bu zhe na/ de'i phyir de ci'i phyir zhe na/ blo gros shin tu rnam dag ces bya ba la sogs pas tha dad pa dang / tha dad pa ma yin pa nyid las yang dag par 'das pa'i gtan tshigs ston te/ bsgrim mi dgos par shes pa dang /bsgrims kyang mi shes pa ni gtan tshigs nyes par thal bar 'gyur ba med pas gtan tshigs yin no/ /de yang ji lta bu zhe na/ sar chud pa'i byang chub sems dpa' don dam pa'i mtshan nyid la mkhas pa rnams kyis ni sngon goms pa'i dbang gis bsgrim mi dgos pa don 'di shes pas de dag la yang gtan tshigs 'di nyes par thal bar 'gyur ba med pas gtan tshigs yongs su dag pa yin la/mos pas spyod pa'i sa la gnas pa don dam pa'i mtshan nyid la mi mkhas pa rnams kyis ni sngon ma goms pa'i phyir bsgrims kyang don 'di mi shes te mi shes pa ni de dag nyid kyi nyes pa yin gyi/gtan tshigs kyi nyes pa ma yin pas de dag la yang / yang gtan tshigs kyi nyes par thal bar 'gyur ba med pas gtan tshigs yongs su dag pa yin no zhes bya ba'i tha tshig go/ /de ltar gtan tshigs yongs su dag pa 'dis brtags na tha dad pa yin par gyur na yang skyon du 'gyur la/tha dad pa ma yin par gyur na yang skyon du 'gyur bar snang ba lags na/ mos pas spyod pa'i sa la gnas pa de dag gis tha dad pa dang / tha dad pa ma yin pa'i skyon ma rtogs na mtha' gnyis su so sor smra ba ni rigs pa la shin tu rmongs pas don dam pa la tshul bzhin ma yin pa'i sems pa yin no zhes bya bar sbyar ro//de la gal te 'du byed kyi mtshan nyid dang / don dam pa'i mtshan nyid tha dad pa ma yin par gyur na ni zhes bya ba la sogs pa'i tshar gyis ni tha dad pa ma yin par gyur na bden pa mthong ba rnams 'du byed kyi mtshan ma dang ma bral bar gyur pa la sogs pa smras par thal bar 'gyur ba ston to//da ni tshig gi don bshad par bya ste/ de la byis pa so so'i skye bo thams cad bden pa mthong ba yin par yang 'gyur zhes bya ba ni de dag gis mtshan ma dang bral bar rtogs pa'i phyir ro/ /so so'i skye bo kho nar 'gyur bzhin du zhes bya ba ni bden pa rtogs par bya ba'i phyir sbyor ba ma brtsams pa kho nar ro//grub pa dang bde ba zhes bya ba lam ma thob pa thob pa ni grub pa'o/ /thob pa chud mi za ba ni bde ba'o/ /'du byed kyi mtshan ma dang ma bral bar 'gyur zhes bya ba ni gzhan mthong bas gzhan dang bral bar mi 'gyur ba'i phyir ro/ /mtshan ma'i 'ching ba las rnam par ma grol bar yang 'gyur zhes bya ba ni 'du byed kyi mtshan ma dang ma bral ba'i phyir gzugs la sogs pa'i mtshan ma las rnam par mi grol ba'i phyir ro//gnas ngan len gyi 'ching ba las kyang rnam par ma grol bar 'gyur zhes bya ba ni mtshan ma ma spangs pas de yang ma spangs par rjes su dpag pa'i phyir yin gyi/ 'di ni spong ba ni de la spong ba la rag las pa ma yin te/ de las bzlog pa yin pa'i phyir ro/ /gang dag ces bya ba ni mos pas spyod pa'i sa la rigs pa la shin tu rmongs pa snga ma dag go/ /'du byed kyi mtshan nyid kun nas nyon mongs pa'i mtshan nyid du rtogs pa zhes bya ba ni yang dag pa ma yin pa'i phyir/ kun du rtog pa'i mtshan nyid dang ldan pa zhes bya ba'i tha tshig go/ /spyi'i mtshan nyid du gyur pa ma yin par 'gyur ro zhes bya ba ni tha dad pa yin na/ dpe gzugs dri la sogs pa gzhan gyi spyi'i mtshan nyid yin par grags pa med pa lta bur 'gyur ba'o/ /bye brag med par zhes bya ba ni de bzhin nyid kyi 'du byed thams cad la spyir khyab pa'o//gong du don dam pa yongs su tshol bar yang mi 'gyur ro zhes bya ba ni mtshan ma rtogs nas de'i gong du de bzhin nyid yongs su tshol bar mi 'gyur ro/ /'du byed rnams kyi bdag med pa tsam dang / ngo bo nyid med pa tsam nyid don dam pa'i mtshan nyid yin par yang mi 'gyur ro zhes bya ba ni de'i mtshan nyid tha dad pa brgyud na zhes bya bar dgongs so//kun nas nyon mongs pa'i mtshan nyid dang rnam par byang ba'i mtshan nyid kyang dus gcig tu mtshan nyid tha dad du grub par 'gyur ro zhes bya bas ni gang la mtshan ma las de bzhin nyid tha mi dad pa de la ni dus gcig tu 'grub par brtag mi nus so//yang na mtshan ma rnam par gzhig pa de bzhin nyid yin na yang mtshan ma'i dus na ni de bzhin nyid med la de bzhin nyid kyi dus na yang mtshan ma med pa kho na yin pas dus gcig tu 'grub tu mi rung ba de dus gcig tu 'grub pa'i skyon du 'gyur ro/ /tshul bzhin du zhugs pa ma yin par rig par bya'o zhes bya ba ni gdags pa la shin tu rmongs pa dang /rigs pa la shin tu rmongs pas nges pa'i don la tshul bzhin du zhugs pa ma yin no zhes bya bar sbyar te/ de ni de la shin tu rmongs pa'i mtshan nyid rnam par gzhag pa yin no/ /de'i 'og tu de dag gi dpe'i mtshan nyid rnam par gzhag pa'i tshig gi don la sogs pa bshad par bya ste/de dag gi dpe'i mtshan nyid rnam par gzhag pa zhes bya ba ni don dam pa tha dad pa dang / tha dad pa ma yin pa nyid las yang dag par 'das pa'i mtshan nyid dang ldan pa sngar bstan pa'i gtan tshigs de dag gi dpe'i mtshan nyid rnam par gzhag pa gang yin pa'o//de'i phyir de bstan pa'i dbang du mdzad nas/ blo gros shin tu rnam par dag pa 'di lta ste/ dper na zhes bya ba la sogs pa gsungs so/ /de la dpe'i mtshan nyid rnam par gzhag pa ni gdul ba'i bsam pa dang / mos pa tha dad pa'i dbang du mdzad nas 'jig rten la grags pa'i gzugs dang sgra dang / dri dang / ro dang / reg bya dang / chos rnams kyi mtshan gzhi dang mtshan nyid tha dad pa dang / tha dad pa ma yin pa nyid las yang dag par 'das pa'i mtshan nyid dang ldan pa rnams rmongs so/ /de la dung dang gser ni gzugs so/ /pi wang gi sgra ni sgra'o/ /a ka ru nag po'i dri ni dri'o/ / na le sham gyi tsha ba dang a ru ra'i mngar ba ni ro'o/ /shing bal gyi 'dab ma'i 'jam pa ni reg bya'o/ /mar la sogs pa lhag ma rnams ni chos te/ chos de dag kyang / gzugs dang / sems dang sems las byung ba dang / kun nas nyon mongs pa dang rnam par byang ba'i chos rnams dang ci rigs par sbyar ro//de dag gi tshig gi don ni dung gi 'byung ba dang 'byung ba las gyur pa 'dus pa'i mtshan nyid yin pa'i phyir dkar po nyid dang tha dad pa yang ma yin tha mi dad pa yang ma yin te/ de'i phyir dung gi rdzas ni 'byung ba las gyur pa kha dog tsam du zad pa yang ma yin no/ / lhag ma rnams la yang de bzhin du ci rigs par sbyar ro/ /blo gros shin tu rnam dag de bzhin du zhes bya ba la sogs pa dpes mtshon pa'i don ni gtan tshigs sngar bstan pa bzhin du sbyar ro/ /blo gros shin tu rnam dag ngas ni don dam par zhes bya ba la sogs pas ni don dam pa'i mtshan nyid rnam par gzhag pa sngar bstan pa de nyid kyi mjug bsdu ba bstan to//phra ba/ mchog tu phra ba/ zab pa/ mchog tu zab pa/ rtogs par dka' ba/ mchog tu rtogs par dka' ba zhes bya ba la/ phra ba dang / zab pa dang / rtogs par dka' ba zhes bya ba'i tshig gsum ni phra ba nyid bye brag tu bya ba'i phyir zab pa zhes bya ba gsungs la/zab pa nyid bye brag tu bya ba'i phyir rtogs par dka' ba zhes gsungs te/ de dag ni nyan thos la sogs pa dang thun mong yin par shes par bya'o/ /mchog tu phra ba dang / mchog tu zab pa dang / mchog tu rtogs par dka' ba zhes bya ba'i tshig gsum yang snga ma bzhin du gcig las gcig tu bye brag tu bya ba yin te/de dag ni nyan thos la sogs pa dang / thun mong ma yin par shes par bya'o/ /bsnyad cing zhes bya ba la sogs pa'i tshig gi don ni sngar bshad pa bzhin du sbyar ro/ /de dag ni dpes mtshon pa'i don gyi mjug bsdu ba'i phyir zhar la bzlas pa tsam du zad kyi/gtso cher dper bstan pa'i gnas skabs yin pas na de ni de dag gi dpe'i mtshan nyid rnam par gzhag pa yin no/ /de'i 'og tu de dag gi dngos po bsdu ba'i mtshan nyid rnam par gzhag pa'i tshig gi don la sogs pa bshad par bya ste/ de dag gi dngos po bsdu ba'i mtshan nyid rnam par gzhag pa zhes bya ba ni don dam pa tha dad pa dang /tha dad pa ma yin pa nyid las yang dag par 'das pa'i mtshan nyid dang ldan pa sngar bstan pa tshig gi don de dag gi dngos po tshigs su bcad pas mdor bsdus pa'i mtshan nyid rnam par gzhag pa gang yin pa'o/ /de'i phyir de bstan pa'i dbang du mdzad nas/de nas bcom ldan 'das kyis de'i tshe tshigs su bcad pa 'di dag bka' stsal to zhes bya ba la sogs pa tshigs su bcad pa gnyis gsungs te/ de la/ 'du byed khams dang don dam mtshan nyid ni/ /gcig dang tha dad bral ba'i mtshan nyid de/ / zhes bya ba'i tshigs su bcad pa dang po'i rtsa ba gong ma gnyis kyis ni don dam pa'i tha dad pa dang / tha dad pa ma yin pa nyid las yang dag par 'das pa'i mtshan nyid dang ldan pa'i mtshan nyid rnam par gzhag pa sngar bstan pa'i dngos po bsdu ba bstan te/ des rnam par byang ba'i phyogs thams cad kyi dngos po bsdu ba yang bstan pa yin no//gcig dang tha dad nyid du gang rtog pa/ /de dag tshul bzhin ma yin zhugs pa yin/ /zhes bya ba rtsa ba 'og ma 'di gnyis kyis ni shin tu rmongs pa gnyis kyis shin tu rmongs nas don dam pa la tshul bzhin ma yin pas sems pa'i shin tu rmongs pa'i mtshan nyid rnam par gzhag pa'i dngos po bsdu ba bstan te/des kun nas nyon mongs pa'i phyogs thams cad kyi dngos po bsdu ba yang bstan pa yin no/ /skye bo'i sa la lhag mthong dang / /zhi gnas goms par byas pas ni/ /zhes bya ba'i tshigs su bcad pa gnyis pa'i rtsa ba gong ma 'di gnyis kyis ni de ltar bsdu/nyon mongs pa'i phyogs la gnas pa de dag gi gnyen po bsgom pa'i dngos po bsdu ba bstan pa'o/ /gnas ngan len gyi 'ching ba dang / /mtshan ma'i 'ching ba las grol 'gyur/ /zhes bya ba'i rtsa ba 'og ma 'di gnyis kyis ni de ltar gnyen po bsgom pa de'i phan yon gyi dngos po bsdu ba bstan te/de ni de dag gi dngos po bsdu ba'i mtshan nyid rnam par gzhag pa yin no/ /le'u gsum pa'i tshig gi don la sogs pa bshad zin to// //de ltar tha dad pa dang tha dad pa ma yin pa nyid las yang dag par 'das pa'i mtshan nyid kyis don dam pa'i mtshan nyid yongs su shes par bya ba bstan nas/da ni thams cad du ro gcig pa'i mtshan nyid kyis don dam pa'i bden pa'i mtshan nyid yongs su shes par bya ba bstan pa'i tshig gi don la sogs pa bshad par bya ste/ de'i phyir de bstan pa'i dbang du mdzad nas/ de nas bcom ldan 'das kyis tshe dang ldan pa rab 'byor la bka' stsal pa zhes bya ba la sogs pa 'phags pa rab 'byor gyi le'u bzhi pa 'di gsungs so//de la le'u bzhi pa 'di'i bsdus pa'i don ni mdor bsdu na thams cad du ro gcig pa'i mtshan nyid bstan pa yin no/ /de yang rnam par dbye na rnam pa bzhi ste/ mngon pa'i nga rgyal gyi mtshan nyid rnam par gzhag pa dang /mngon pa'i nga rgyal gyi gnyen po'i mtshan nyid rnam par gzhag pa dang / de dag gi dpe'i mtshan nyid rnam par gzhag pa dang / de dag gi dngos po bsdus pa'i mtshan nyid rnam par gzhag pa'o/ /de la mngon pa'i nga rgyal gyi mtshan nyid rnam par gzhag pa ni/rab 'byor khyod kyis sems can gyi khams na gang dag mngon pa'i nga rgyal can zhes bya ba nas/ 'di nas slad rol pa'i mu stegs can rnams kyis smos kyang ci 'tshal zhes gsungs pa'i bar gyis bstan to/ /mngon pa'i nga rgyal gyi gnyen po'i mtshan nyid rnam par gzhag pa ni/ bcom ldan 'das kyis bka' stsal pa/rab 'byor de de bzhin no/ /de de bzhin te zhes bya ba nas rab 'byor rnam grangs des kyang khyod kyis 'di ltar thams cad du ro gcig pa'i mtshan nyid gang yin pa ni don dam pa yin par rig par bya'o zhes gsungs pa'i tshar thar ma'i bar gyis bstan to/ /de dag gi dpe'i mtshan nyid rnam par gzhag pa ni/rab 'byor 'di lta ste dper na nam mkha' ni zhes bya ba nas thams cad du ro gcig pa'i mtshan nyid yin par blta bar bya'o zhes gsungs pa'i bar gyis bstan to/ /de dag gi dngos po bsdu ba'i mtshan nyid rnam par gzhag pa ni/ de nas bcom ldan 'das kyis de'i tshe tshigs su bcad pa 'di bka' stsal to zhes bya ba la sogs pa'i tshigs su bcad pa gcig gis don dam pa thams cad ro gcig pa'i mtshan nyid dang ldan pa'i tshig gi don de dag gi dngos po bsdu ba bstan pa dang sbyar ro//de la dang por mngon pa'i nga rgyal gyi mtshan nyid rnam par gzhag pa tshig gi don la sogs pa bshad par bya ste/mngon pa'i nga rgyal gyi mtshan nyid rnam par gzhag pa zhes bya ba ni gang zag kha cig chos rnams kyi de bzhin nyid don dam pa chos bdag med pa thams cad du ro gcig pa'i mtshan nyid dang ldan pa khong du ma chud par phung po la sogs pa dngos po re re'i mtshan nyid tha dad pa rtogs pa tsam gyi sgo nas/don dam pa rtogs so snyam du sems shing rang gi shes pa gzhan la brda sprod par byed pa gang yin pa'o/ /de'i phyir de bstan pa'i dbang du mdzad nas/ rab 'byor khyod kyis sems can gyi khams na gang dag mngon pa'i nga rgyal can mngon pa'i nga rgyal gyis mngon du zin cing shes pa brda sprod par byed pa'i sems can ni ji tsam zhig yod par shes zhes bya ba la sogs pa gsungs so//de la 'dir mngon pa'i nga rgyal gyi mtshan nyid rnam par gzhag pa ni rnam pa gsum ste gzung ba'i mngon pa'i nga rgyal dang /'dzin pa'i mngon pa'i nga rgyal dang / mtshan nyid rab tu dbye ba'i mngon pa'i nga rgyal lo/ /de la gzung ba'i mngon pa'i nga rgyal ni phung po la sogs pa gzung ba'i chos rnams sna tshogs dmigs pa'i mngon par rtogs pa ston pas/ don dam pa rtogs so snyam du sems shing rang gi shes pa gzhan la brda sprod par byed pa'o//'dzin pa'i mngon pa'i nga rgyal ni phung po la sogs pa chos gcig gi de bzhin nyid don dam pa chos bdag med par rab tu rtogs nas yang de las gzhan pa'i chos so so la de bzhin nyid don dam pa chos bdag med pa yongs su tshol bar byed pa'o/ / mtshan nyid rab tu dbye ba'i mngon pa'i nga rgyal ni phung po la sogs pa chos rnams phan tshun mtshan nyid tha dad pa yin pa de bzhin du chos de dag gi de bzhin nyid don dam pa chos bdag med pa yang mtshan nyid tha dad pa yin par sems pa ste/ de dag gi 'og nas chos rnam pa sna tshogs dmigs pa'i mngon par rtogs pa ston pas shes pa brda sprod par bgyid de zhes 'byung ba la sogs pa'i skabs dang ci rigs par sbyar ro//de ltar spyi'i don bstan nas/ da ni tshig gi don bshad par bya ba ste/ de la sems can gyi khams na zhes bya ba ni sems can gyi khams dpag tu med pa ste/ de yang sems can gyi rigs drug cu rtsa bzhi po 'di lta ste/sems can dmyal ba pa dang / dud 'gro rnams dang / yi dgas rnams dang / lha rnams dang / mi rnams dang / rgyal rigs rnams dang / bram ze rnams dang / rje'u rigs rnams dang / dmangs rigs rnams dang / skyes pa rnams dang /bud med rnams dang / ma ning rnams dang / ngan pa rnams dang / 'bring rnams dang / bzang po rnams dang / khyim pa rnams dang / rab tu byung ba rnams dang / dka' thub drag po can rnams dang / dka' thub drag po can ma yin pa rnams dang / sdom pa can rnams dang / sdom pa can ma yin pa rnams dang /sdom pa can yang ma yin sdom pa can ma yin pa yang ma yin pa rnams dang / 'dod chags dang bral ba rnams dang / 'dod chags dang bral ba ma yin pa rnams dang / log pa nyid du nges pa'i tshogs rnams dang / yang dag pa nyid du nges pa'i tshogs rnams dang / ma nges pa nyid du nges pa'i tshogs rnams dang / dge slong rnams dang / dge slong ma rnams dang / dge tshul rnams dang / dge tshul ma rnams dang / dge bsnyen rnams dang / dge bsnyen ma rnams dang / spangs pa rnams dang / kha thon pa rnams dang / zhal ta byed pa rnams dang / gnas brtan rnams dang /bar ma rnams dang / gsar bu rnams dang / slob dpon rnams dang / mkhan po rnams dang / lhan cig gnas pa rnams dang / nye gnas rnams dang / glo bur du lhags pa rnams dang / dge 'dun gyi las byed pa rnams dang / rnyed pa 'dod pa rnams dang / bkur sti 'dod pa rnams dang /yo byad bsnyungs pa rnams dang / mang du thos pa rnams dang / mkhas shing bsod nams dang ldan pa rnams dang / chos kyi rjes su mthun pa'i chos la zhugs pa rnams dang / mdo sde 'dzin pa rnams dang / 'dul ba 'dzin pa rnams dang / ma mo 'dzin pa rnams dang /so so'i skye bo rnams dang / bden pa mthong ba rnams dang / slob pa rnams dang / mi slob pa rnams dang / nyan thos rnams dang / rang sangs rgyas rnams dang / byang chub sems dpa' rnams dang / de bzhin gshegs pa rnams dang / 'khor los sgyur ba rnams so/ /sems can gyi rigs drug cu rtsa bzhi po de dag ni sems can gyi rigs bye brag kun nas nyon mongs pa dang /rnam par byang ba dag tu rung ba rnams dang / de dag nyid la 'jug pa rnams dang / rnam par byang ba kho na la 'jug pa'i bye brag rnam pa gsum las brtsams te gzhag par bya'o/ /de la dang po'i 'gro ba dang /rigs rnam par gzhag pa dang / sems can du rnam par brtags pa dang / las kyi bye brag las rnam par gzhag pa ste/ tshig lnga dang / bzhi dang / gsum dang / gsum ste bco lngas bstan to/ /gnyis pa ni kun nas nyon mongs pa dang rnam par byang ba de dag nyid kyi gzhi dang / bya ba yang dag par blangs pa/ 'bras bu dang / bsdu ba bstan pa'i bye brag las rnam par gzhag pa ste/ tshig gnyis dang / gnyis dang / gsum dang / gnyis dang / gsum dang / bcu gnyis kyis bstan to/ /gsum pa ni sdom pa'i bye brag las rnam par gzhag ste/ sdom pa rnam pa brgyad kyi phyir ni tshig bdun gyis bstan to//lhag ma rnams kyis ni sdom pa can mchog gi rab tu dbye ba ston to/ /de yang bye brag rnam pa lnga'i phyir te/ dge ba'i phyogs kyi bye brag dang / 'dug par bya ba'i yul gyi bye brag dang / bstan pa la gnod pa dang / phan pa'i bye brag dang / lung dang rtogs pa'i bye brag dang / mi'i lus thob nas 'jig rten dang / 'jig rten las 'das pa'i phun sum tshogs pa mchog brnyes pa'i bye brag las rnam par gzhag ste/ tshig gsum dang / dgu dang / drug dang / bcu dang / gnyis te sum cus bstan to/ /mngon pa'i nga rgyal can zhes bya ba ni sngar bstan pa'i mngon pa'i nga rgyal can rnam pa gsum dang ldan pa ste/spyir na don dam pa thams cad du ro gcig pa'i mtshan nyid dang ldan pa ma rtogs par rtogs so snyam du khas 'che ba'o/ /mngon pa'i nga rgyal gyis mngon du zin cing zhes bya ba ni gcig tu de'i dbang du song ba'o/ /shes pa brda sprod par zhes bya ba ni rang gis rtogs pa'i shes pa gzhan la go bar byed pa'o//mngon pa'i nga rgyal med pa zhes bya ba ni snga ma las bzlog pa'o/ /nyung shas shig shes par 'tshal lags kyi zhes bya ba ni sems can gyi rigs drug cu rtsa bzhi las de bzhin gshegs pa dang / byang chub sems dpa' la sogs pa nyi tsher zad do zhes bya bar bsams pa'o//tshad ma mchis grangs ma mchis brjod du ma mchis pa ji snyed cig mchis par 'tshal lags te zhes bya bar ni sems can gyi rigs de dag las gzhan thams cad de lta bu yin no zhes bya bar bsams pa ste/ de ni re zhig de dag mang ba spyir bstan pa yin no//bcom ldan 'das bdag dus gcig cig na zhes bya ba la sogs pas ni de ltar mang ba de yang kha cig rang gi mngon sum du gyur pa'i sgo nas gzhan la yang rjes su dpag pa ston to/ /chos rnam pa sna tshogs dmigs pa'i mngon par rtogs pa'i ston pas zhes bya ba ni chos mtshan ma tha dad pa dmigs pa'i mngon par rtogs pa ston pas zhes bya ba'i chos mtshan ma tha dad pa dmigs pas mngon par rtogs pa ston par byed pa'am/yang na dmigs pa de nyid mngon par rtogs pa yin no zhes ston par byed do/ /phung po dmigs pa zhes bya ba ni bstan pa'i tshig yin no//de dag ji ltar dmigs par byed pa de ni tshig 'og ma rnams kyis ston pas/ 'og ma rnams ni bshad pa'i tha tshig go/ /phung po'i mtshan ma dmigs pa zhes bya ba ni rang gi mtshan ma yongs su brtags pa'i sgo nas so/ /phung po'i skye ba dmigs pa dang / phung po'i 'jig pa dmigs pa zhes bya ba gnyis ni spyi'i mtshan nyid dang yongs su brtags pa'i sgo nas te / de gnyis ni phung po rnams kyi kun 'byung ba dang sdug bsngal gyi bden pa'i rnam pa ston to/ /phung po'i 'gog pa dmigs pa zhes bya ba ni 'gog pa'i bden pa'i rnam pa ston to/ /phung po'i 'gog pa mngon du bgyi ba dmigs pa zhes bya bas ni lam gyi bden pa'i rnam pa ston to//de ltar phung po'i rang dang spyi'i mtshan nyid dang / kun 'byung ba la sogs pa'i rnam pa gzung ba'i chos sna tshogs dmigs pa'i mngon par rtogs pa ston pas don dam pa rtogs so snyam du sems shing rang gi shes pas gzhan la brda sprod par byed pa ni gzung ba'i mngon pa'i nga rgyal yin no//phung po rnams las phung po gcig gi don dam pa chos bdag med pa rab tu rtogs nas yang de las gzhan pa'i phung po so so la de bzhin nyid don dam pa chos bdag med pa yongs su tshol bar byed pa ni 'dzin pa'i mngon pa'i nga rgyal gyi yin no//phung po rnams phan tshun mtshan nyid tha dad pa yin pa de bzhin du de dag gi de bzhin nyid don dam pa chos bdag med pa yang mtshan nyid tha dad pa yin par sems pa ni mtshan nyid dbye ba'i mngon pa'i nga rgyal yin te/ skye mched la sogs pa lhag ma rnams la yang sbyar ro//bden pa yongs su shes pa dang / spang ba dang / mngon du bgyi ba dang / sgom pa dmigs pa zhes bya ba bzhis ni bden pa rnams kyi ngo bo nyid dang / bsgom pa'i rnam pa bstan to/ /khams sna tshogs pa nyid dmigs pa zhes bya ba ni rigs la gnas pa sna tshogs la nyan thos dang rang sangs rgyas dang de bzhin gshegs pa'i rigs rnams dang /'dod chags la sogs pa rab tu dbye ba'i tshul gyis sems can gyi spyod pa brgyad khri'i bar rnams kyi khams sna tshogs zhes bya ste/ de dag la snga ma bzhin du dmigs pa'o/ /khams du ma dmigs zhes bya ba ni khams sna tshogs de dag la yang khams rab tu dbye bar mdor bsdu na rnam pa bzhi ste/rang bzhin du gnas pa'i khams dang / sngon goms pa las byung ba'i khams dang / rnam par dag par byar rung ba'i khams dang / rnam par dag pa byar mi rung ba'i khams yod pa lta bu dang / gzhan yang khams de dag re re la yang rab tu dbye ba mtha' yas pa ni khams gsum pa du ma zhes bya ste/de la dmigs pa yang snga ma bzhin du sbyar ro/ /dran pa nye bar gzhag pa'i mi mthun pa'i phyogs dang gnyen po dmigs pa zhes bya ba ni lus la gtsang ba dang dngos por lta ba la sogs pa mi mthun pa'i phyogs de dag gi gnyen por lus la mi gtsang ba dang /rang bzhin med par lta ba la sogs pa dran pa nye bar gzhag pa dag bstan pa la dmigs pa'o/ /dran pa nye bar gzhag pa mthong ba zhes bya ba la bsgom pa ni rnam pa gnyis te/ 'thob pa bsgom pa dang / brten pa bsgom pa'o/ /de la 'thob pa bsgom pa ni ma skyes pa skye ba'o//brten pa bsgom pa ni skyes pa gnas pa la sogs pa'o/ /yang dag pa'i spong ba la sogs pa lhag ma rnams la yang de bzhin du ci rigs par sbyar ro/ /mthong nas kyang bdag 'di snyam bgyid de zhes bya ba la sogs pas ni don dam pa thams cad du ro gcig pa'i mtshan nyid dang ldan pa ma rtogs par rtogs so snyam du sems shing rang gi shes pa gzhan la brda sprod par byed pa de dag ni mngon pa'i nga rgyal rnam pa gsum dang ldan pa sha stag yin no zhes bya bar dmigs kyis bstan to//bcom ldan 'das bcom ldan 'das kyis gang gi slad du 'di skad ces bya ba la sogs pas ni don dam pa thams cad du ro gcig pa'i mtshan nyid dang ldan pa yang dmigs kyis ston la mngon pa'i nga rgyal can mngon pa'i nga rgyal gyis mngon du zin kyang /shes pa brda sprod par byed pa'i sems can kha cig rang gi mngon sum du gyur pa'i sgo nas gzhan yang mang bar rjes su dpag pa'i mjug bsdu ba yang ston te/de ni mngon pa'i nga rgyal gyi mtshan nyid rnam par gzhag pa yin no/ /de'i 'og tu mngon pa'i nga rgyal gyi gnyen po'i mtshan nyid rnam par gzhag pa'i tshig gi don la sogs pa bshad par bya ste/ mngon pa'i nga rgyal gyi gnyen po'i mtshan nyid rnam par gzhag pa zhes bya ba ni mngon pa'i nga rgyal rnam pa gsum gyi gnyen por don dam pa thams cad du ro gcig pa'i mtshan nyid dang ldan pa bstan pa gang yin pa'o//de'i phyir de bstan pa'i dbang du mdzad nas/ bcom ldan 'das kyis bka' stsal pa/ rab 'byor de de bzhin no//de de bzhin te zhes bya ba la sogs pa gsungs te/ de la don dam pa thams cad du ro gcig pa'i mtshan nyid dang ldan pa zhes bya ba ni yongs su grub pa'i de bzhin nyid don dam pa chos bdag med pa ni gzung ba'i dngos po dang / 'dzin pa'i dngos po dang / mtshan nyid rab tu dbye ba'i dngos po thams cad la bye brag med par thams cad du ro gcig par bstan pa gang yin pa'o//de'i phyir de nyid dmigs kyis bstan pa'i dbang du mdzad nas/ ngas ni don dam pa thams cad du ro gcig pa'i mtshan nyid phra ba/ mchog tu phra ba/ zab pa/ mchog tu zab pa/ rtogs par dka' ba/ mchog tu rtogs par dka' ba/mngon par rdzogs par sangs rgyas te zhes bya ba la sogs pa gsungs te/ skabs de dag gi tshig gi don ni sngar bshad pa bzhin du sbyar ro/ /de ltar don dam pa thams cad du ro gcig pa'i mtshan nyid dang ldan pa bstan pa 'di yang mngon pa'i nga rgyal rnam pa gsum gyi gnyen por bstan pa yin te/mngon pa'i nga rgyal rnam pa gsum ni gzung ba'i mngon pa'i nga rgyal dang / 'dzin pa'i mngon pa'i nga rgyal dang / mtshan nyid rab tu dbye ba'i mngon pa'i nga rgyal lo/ /de la gzung ba'i mngon pa'i nga rgyal gyi gnyen por bstan pa ni/ de ci'i phyir zhe na rab 'byor phung po rnams la rnam par dag pa'i dmigs pa gang yin pa de ni ngas don dam pa yin par yongs su bstan cing zhes bya ba la sogs pa dang sbyar ro//'dzin pa'i mngon pa'i nga rgyal gyi gnyen por bstan pa ni/ rab 'byor gzhan yang dge slong rnal 'byor spyod pa ni zhes bya ba la sogs pa dang sbyar ro/ / mtshan nyid rab tu dbye ba'i mngon pa'i nga rgyal gyi gnyen por bstan pa ni/ rab 'byor gzhan yang ji ltar phung po dang zhes bya ba la sogs pa dang sbyar ro/ /da ni de dag gis tshig gi don bshad par bya ste/ de la gzung ba'i mngon pa'i nga rgyal zhes bya ba ni phung po la sogs pa gzung ba'i chos rnam pa sna tshogs dmigs pa'i mngon par rtogs pa ston pas don dam pa rtogs so snyam du sems shing rang gi shes pa gzhan la brda sprod par byed pa ste/de'i gnyen por phung po rnams la rnam par dag pa'i dmigs pa gang yin pa de ni ngas don dam pa yin par yongs su bstan cing zhes bya ba la sogs pa gsungs te phung po rnams la rnam par dag pa'i dmigs pa zhes bya ba ni phung po lnga po dag la de bzhin nyid don dam pa chos bdag med pa thams cad du ro gcig pa'i mtshan nyid dang ldan pa yang dag pa'i shes pas mthong ba ste/de nyid don dam pa thams cad du ro gcig pa'i mtshan nyid med par yongs su bstan to//de yang ji lta bu zhe na/ phung po rnams ni gzhan gyi dbang gi ngo bo nyid kyi dngos po yin te/ de yang rnam par rig pa'i mtshan nyid las logs shig na phyi rol gyi dngos por grub pa ma yin mod kyi/ rnam par rig pa'i ngo bo nyid yul gyi dngos po lta bur snang ba'i sgo nas gzung ba'i chos zhes bya bar tha snyad du brjod de/gzhan gyi dbang gi ngo bo nyid 'phags pa rnams kyis 'phags pa'i shes pa dang mthong bas brjod du med par mthong bar rdzogs par sangs rgyas pa nyid yongs su grub pa'i de bzhin nyid don dam pa chos bdag med pa thams cad du ro gcig pa'i mtshan nyid dang ldan pa yin pas /de ni gzung ba'i mngon pa'i nga rgyal gyi gnyen po don dam pa thams cad du ro gcig pa'i mtshan nyid dang ldan pa yin te/ skye mched la sogs pa lhag ma rnams la yang de bzhin du sbyar ro/ /de ltar phung po rnams la de bzhin nyid don dam pa chos bdag med pa mthong ba de thams cad du ro gcig pa'i mtshan nyid dang ldan pa yin par ci mngon snyam pa la de'i phyir phung po rnams la rnam par dag pa'i dmigs pa de yang thams cad du ro gcig pa ste/mtshan nyid tha dad pa ma yin no zhes bya ba gsungs te/ kun brtags pa'i ngo bo nyid med pa'i de bzhin nyid la bye brag med pa'i phyir ro//phung po rnams la ji lta ba bzhin du skye mched la sogs pa lhag ma rnams la yang de bzhin du sbyar te/ de ni gzung ba'i mngon pa'i nga rgyal gyi gnyen po don dam pa thams cad du ro gcig pa'i mtshan nyid dang ldan pa'i tshig gi don bshad pa yin no//de la 'dzin pa'i mngon pa'i nga rgyal zhes bya ba ni phung po la sogs pa chos gcig gi de bzhin nyid don dam pa chos bdag med par rab tu rtogs nas yang de las gzhan pa'i so so la de bzhin nyid don dam pa chos bdag med pa yongs su tshol bar byed pa ste/ de'i gnyen por rab 'byor gzhan yang dge slong rnal 'byor spyod pa ni zhes bya ba la sogs pa gsungs te/dge slong rnal 'byor spyod pa zhes bya ba la/ rnal 'byor spyod pa ni rnam pa gsum ste/ las dang po pa dang / yongs su sbyang ba byas pa dang / yid la byed pa las 'das pa'o/ /de la las dang po pa ni rnam pa gnyis te/yid la byed pa'i las dang po pa dang / nyon mongs pa rnam par sbyong ba'i las dang po pa'o/ /de la yid la byed pa'i las dang po pa ni/ rnal 'byor pa'i yid la byed pa'i dngos po gzhi bdun po mtshan nyid so sor rig pa dang / mos pa las byung ba'i rab tu dben pa las byung ba dang /dga' ba sdud pa dang / spyod pa'i yid la byed pa dang / sbyor ba'i mthar thug pa dang / sbyor ba'i mthar thug pa'i 'bras bu'i yid la byed pa dag las/ da dung mtshan nyid so so rig pa'i yid la byed pa yang ma thob cing sems rtse gcig pa nyid la ma reg pa gang yin pa'o//nyon mongs pa rnam par sbyong ba'i las dang po pa ni mtshan nyid so sor rig pa'i yid la byed pa thob cing nyon mongs pa rnams las sems rnam par sbyong bar 'dod pa dang / nyon mongs pa rnam par sbyong ba'i dmigs pa mngon du ma gyur pa gang yin pa'o/ /de la yongs su sbyong ba byas pa ni mtshan nyid so sor rig pa'i yid la byed pa ma gtogs pa/mos pa las byung ba'i yid la byed pa yan chad nas sbyor ba mthar thug pa'i yid la byed pa'i bar gyi yid la byed pa lnga po dag la yongs su sbyang ba byas pa gang yin pa'o/ /de la yid la byed pa las 'das pa ni sbyor ba mthar thug pa'i 'bras bu yid la byed pa thob pa gang yin pa ste/de ni sbyor ba'i sgom pa yid la byed pa las shin tu 'das pa dang / bsgoms pa'i 'bras bu la gnas pa yin pas na de'i phyir yid la byed pa las 'das pa zhes bya'o/ /gzhan yang dge ba'i chos la 'dun pa nas gzung ste/ rab tu brtson par byed pa na/ ji srid du nges par 'byed pa'i cha dang mthun pa'i dge ba'i rtsa ba dag skyed par mi byed pa de srid du ni las dang po pa yin no/ /gang gi tshe nges par 'byed pa'i cha dang mthun pa'i dge ba'i rtsa ba bzhi po de dag skyed par byed de/ /de'i tshe na ni yongs su sbyang ba byas pa yin no/ /gang gi tshe yang dag pa nyid skyon med pa la 'jug cing bden pa rnams mngon par rtogs par byed pa la ston pa'i bstan pa la gzhan gyi dring mi 'jog pa de'i tshe na yid la byed pa las 'das pa yin te/gzhan gyi dring 'jog cing yid la byed pa las shin tu 'das shing / gzhan gyi dring mi 'jog pa la gnas pa yin pas na de'i phyir yid la byed pa las 'das pa zhes bya ste/skabs 'dir ni yid la byed pa las 'das pa'i rnal 'byor pa nyid gzung bar bya'o/ /phung po gcig gi de bzhin nyid don dam pa chos bdag med pa rab tu rtogs nas zhes bya ba ni gzugs la sogs pa phung po lnga po dag las phung po gcig gi de bzhin nyid yang dag pa'i shes pa'i ngo bo nyid las tha mi dad pa de nyid yang dag pa'i shes pas so sor rig pa'i tshul du rtogs par khong du chud nas zhes bya ba'i tha tshig go//yang de las gzhan pa'i phung po rnams la sogs pa so so la de bzhin nyid don dam pa chos bdag med pa yongs su tshol bar byed kyi zhes bya ba ni gal te chos sna tshogs pa'i phyir chos nyid kyang so so'i gzhi la mtshan nyid tha dad par gyur na ni rnal 'byor pas chos gcig gi de bzhin nyid rtogs nas gzhi gzhan rtogs par bya ba'i phyir rtsom par byed pa'i rigs na rtsom par yang mi byed de/chos gcig gi de bzhin nyid rtogs pa'i dus nyid na chos gzhan gyi de bzhin nyid kyang rtogs pa'i phyir ro//de bzhin nyid kyi rjes su 'brang ba gnyis med pa'i shes pa la brten pa de nyid kyis zhes bya ba la sogs pas ni ji ltar rtogs pa'i rnam pa de nyid du phyi mar goms par byed par zad kyi sngon ma byung ba gzod rtogs par byed pa ni ma yin no zhes bya bar ston to//de la de bzhin nyid kyi rjes su 'brang ba zhes bya ba ni yang dag pa'i shes pa de nyid de bzhin nyid kyi khongs su gtogs pa zhes bya ba'i tha tshig go/ /gnyis med pa'i shes pa zhes bya ba ni de bzhin nyid kyi rjes su 'brang ba yang dag pa'i shes pa de nyid la gzung ba dang 'dzin pa'i dngos po gnyis med pa zhes bya ba'i don to//brten pa de nyid kyis zhes bya ba ni gnyis med pa'i shes pa de nyid kyi dbang du byas nas zhes bya ba'i tha tshig go/ /don dam pa thams cad du ro gcig pa'i mtshan nyid ces bya ba'i tshig gi don ni sngar bshad pa bzhin te/ de yang 'gyur ba med par yongs su grub pa dang /phyin ci ma log par yongs su grub pa zhes bya ba'i tha snyad kyi don gsal bar bya ba'i phyir yang dag pa'i shes pa dang / de bzhin nyid ces brjod par zad kyi/ dngos su yul dang yul can gyi dngos po ltar gnyis su gnas pa ma yin te/ de bzhin nyid so sor rang rig pa'i rnam pa mngon par rtogs pa de nyid don dam pa thams cad du ro gcig pa'i mtshan nyid dang ldan pa zhes bya'o//nges par 'dzin pa dang mngon par rtogs pa zhes bya ba ni rnam grangs te/ de yang dngos po gcig gi de bzhin nyid yang dag pa'i shes pas mngon par rtogs pa'i dus na dngos po gzhan thams cad kyi de bzhin nyid kyang mngon par rtogs pa kho na yin pas/dngos po re re la mngon par rtogs pa re re yongs su ma tshol ba'i don te/ de ni 'dzin pa'i mngon pa'i nga rgyal gyi gnyen po don dam pa thams cad ro gcig pa'i mtshan nyid dang ldan pa'i tshig gi don bshad pa yin no//de la mtshan nyid rab tu dbye ba'i mngon pa'i nga rgyal zhes bya ba ni phung po la sogs pa chos rnams phan tshun mtshan nyid tha dad pa yin pa de bzhin du/ de dag gi de bzhin nyid don dam pa chos bdag med pa yang mtshan nyid tha dad pa yin par sems pa ste/ de'i gnyen por rab 'byor gzhan yang ji ltar phung po dang zhes bya ba la sogs pa gsungs te/ji ltar phung po la sogs pa gzhan gyi dbang gi ngo bo nyid kyi dngos po 'di dag kun rdzob kyi bden pa rnam par gzhag pa'i gnas skabs nas rang gi mtshan nyid tha dad pa yin pa ltar de dag gi yongs su grub pa'i de bzhin nyid don dam pa chos bdag med pa ni don dam pa'i bden pa rnam par ma bzhag pa'i gnas skabs ni spyi'i mtshan nyid tha mi dad par ston to//de yang gal te tha dad pa'i skyon du 'gyur ba'i tshar gcig dang skyon las bzlog pa tshar gcig gis tha mi dad par ston te don de nyid la 'byung ba bzhin du sbyar ro/ / des na de bzhin nyid don dam pa chos bdag med pa yang rgyu dang bcas pa yin zhing rgyu las byung ba yin par 'gyur ro zhes bya ba ni mtshan nyid tha dad pa'i dngos po rnams ni rgyu las rkyen gyi rjes su bsgrubs pa yin pa'i phyir mtshan nyid mi 'dra bar snang bas na 'di yang gal te mtshan nyid tha dad pa yin na gdon mi za bar rgyu dang bcas pa yin pa'i skyon du 'gyur ro zhes bya ba'i tha tshig go//rgyu las byung ba yin na ni 'dus byas yin par 'gyur ro zhes bya ba ni 'dus byas ni rgyu'i lus dang 'bras bu'i mtshan nyid du gnas pa yin pa'i phyir ro/ /'dus byas nyid yin na ni don dam pa yin par mi 'gyur ro zhes bya ba ni ji tsam du brdzun pa yin la/ji tsam du 'dus ma byas pa de tsam du brdzun pa ma yin no zhes gsungs pa'i phyir ro/ /don dam pa ma yin na ni don dam pa gzhan zhig yongs su btsal dgos par 'gyur ro zhes bya ba ni dngos po rnams kyi de bzhin nyid don dam pa zhes bya ba med pa'i skyon du 'gyur ro zhes bya ba'i tha tshig go//rab 'byor gang gi phyir zhes bya ba la sogs pa skyon las bzlog pa'i tshig gi don rnams ni snga ma las bzlog pa las rig par bya'o/ /chos gnas par bya ba'i phyir zhes bya ba ni chos nyid dbyings ni 'dzin pa'i don yin pas chos rnams chos nyid kyis 'dzin pa'i phyir chos bya ba'i tha tshig go//chos rnams kyi zhes bya ba ni gzhan gyi dbang gi ngo bo nyid kyi dngos po ste/ chos can rnams kyi'o/ /chos nyid dbyings de ni zhes bya ba ni yongs su grub pa'i ngo bo nyid kyi chos kyi dbyings te chos nyid do/ /rnam par gnas pa kho na yin pa'i phyir zhes bya ba ni sngar de bzhin gshegs pa rnams byung yang rung ma byung yang rung ste/rtag pa rtag pa'i dus na ther zug ther zug gi dus su zhes smos pa dang sbyar te/ 'dus byas kyi dngos po las khyad par du 'phags pa de'i phyir don dam pa ni med pa ma yin no zhes bya ba'i tha tshig go //rab 'byor rnam grangs des kyang khyod kyis 'di ltar thams cad du ro gcig pa'i mtshan nyid gang yin pa 'di ni don dam pa yin par rig par bya'o zhes bya ba'i mtshan nyid rab tu dbye ba'i mngon pa'i nga rgyal gyi gnyen po don dam pa thams cad du ro gcig pa'i mtshan nyid dang ldan pa'i tshig gi don bshad pa'i mjug bsdu ba yin te/de ni mngon pa'i nga rgyal gyi gnyen po'i mtshan nyid rnam par gzhag pa yin no/ /de'i 'og tu de dag gi dpe'i mtshan nyid rnam par gzhag pa'i tshig gi don la sogs pa bshad par bya ste/ de dag gi dpe'i mtshan nyid rnam par gzhag pa zhes bya ba ni don dam pa thams cad du ro gcig pa'i mtshan nyid dang ldan pa sngar bstan pa'i tshig gi don de dag gi dpe'i mtshan nyid rnam par gzhag pa gang yin pa'o//de'i phyir de bstan pa'i dbang du mdzad nas/ rab 'byor 'di lta ste/ dper na nam mkha' ni zhes bya ba la sogs pa gsungs so/ /de la nam mkha'i dpes ni ci ston zhe na/'di ltar nam mkha' ni/ gzugs kyi ngo bo nyid med pa'i mtshan nyid yin pas de dag gi ngo bo nyid med pa nyid ni/ de dag tha dad pas tha dad du dbyer med do/ /don dam pa yang de dang 'dra'o zhes ston to/ /mtshan ma med pa zhes bya ba ni gzugs la sogs pa'i mtshan mas dben pa'i phyir ro//rnam par rtog pa med pa zhes bya ba la rnam par rtog pa ni tha dad pa ste/ de med pas rnam par rtog pa med pa yin no/ /'gyur ba med pa ste zhes bya ba ni rtag pa'i mtshan nyid yin pa'i phyir ro/ /thams cad du ro gcig pa'i mtshan nyid yin no zhes bya ba ni nam mkha' ni dngos po rnams kyi spyi'i mtshan nyid yin no zhes bya ba'i tha tshig go//rab 'byor de bzhin du don dam pa yang mtshan nyid tha dad pa'i chos rnams la thams cad du ro gcig pa'i mtshan nyid yin par blta bar bya'o zhes bya ba tshig gi don sngar bshad pa bzhin te/ de ni de dag gi dpe'i mtshan nyid rnam par gzhag pa yin no//de'i 'og tu de dag gi dngos po bsdu ba'i mtshan nyid rnam par gzhag pa'i tshig gi don la sogs pa bshad par bya ste/ de dag gi dngos po bsdu ba'i mtshan nyid rnam par gzhag pa zhes bya ba ni don dam pa thams cad du ro gcig pa'i mtshan nyid dang ldan pa sngar bstan pa'i tshig gi don de dag gi dngos po'i tshigs su bcad pas mdor bsdu ba'i mtshan nyid rnam par gzhag pa gang yin pa'o//de'i phyir de bstan pa'i dbang du mdzad nas/ de nas bcom ldan 'das kyis de'i tshe tshigs su bcad pa 'di bka' stsal to zhes bya ba la sogs pa'i tshigs su bcad pa gcig gsungs te/de la/ don dam de ni tha dad ma yin te/ /kun du ro gcig mtshan nyid sangs rgyas gsungs/ /zhes bya ba rtsa ba gong ma gnyis kyis ni mngon pa'i nga rgyal rnam pa gsum gyi gnyen po don dam pa thams cad du ro gcig pa'i mtshan nyid dang ldan pa rnam par gzhag pa'i dngos po bsdu ba bstan te/de rnam par byang ba'i phyogs thams cad kyi dngos po bsdu ba yang bstan pa yin no/ /de la gang dag tha dad kun rtog pa/ /de dag nga rgyal gnas pa rmongs pa yin/ /zhes bya ba rtsa ba 'og ma 'di gnyis kyis ni mngon pa'i nga rgyal rnam pa gsum gyi mtshan nyid rnam par gzhag pa'i dngos po bsdu ba bstan te/des kun nas nyon mongs pa'i phyogs thams cad kyi dngos po bsdu ba yang bstan pa yin te/ de ni de dag gi dngos po bsdu ba'i mtshan nyid rnam par gzhag pa yin no/ /le'u bzhi pa'i tshig gi don la sogs pa bshad zin to/ / don dam pa'i bden pa'i mtshan nyid yongs su shes par bya bas mdo sde'i lus rnam par gzhag pa bstan pa'i tshig gi don la sogs pa bshad zin to// //de ltar don dam pa'i mtshan nyid yongs su shes par bya bas mdo sde'i lus rnam par gzhag pa bstan nas da ni kun rdzob kyi bden pa'i mtshan nyid yongs su shes par bya bas mdo sde'i lus rnam par gzhag pa bstan pa'i tshig gi don la sogs pa bshad par bya'o//de la kun rdzob kyi bden pa ni mtshan nyid drug dang ldan par shes par bya ste/ sems kyi mtshan nyid dang / chos rnams kyi mtshan nyid dang / chos rnams kyi ngo bo nyid med pa'i mtshan nyid dang / chos gdags pa rnam par gzhag pa las brtsams nas rnal 'byor gyis yongs su bsdus pa'i zhi gnas dang / lhag mthong gi lam gyi rab tu dbye ba dang / theg pa rnam par gzhag pa las brtsams nas/ theg pa ji lta ba bzhin du rnam par dbye ba bstan pa dang /theg pa gdags pa rnam par gzhag pa kho na las brtsams nas de bzhin gshegs pa'i bya ba sgrub pa'i rab tu dbye ba bstan to/ /de dag go rims rnam par gzhag pa ni de ltar don dam pa'i bden pa'i mtshan nyid dang ldan pa'i mdo brjod par bya ba'i don dang / dgos pa'i 'bras bu dang / thob par bya ba'i thabs dang ldan pa 'di la rnal 'byor dam pa/ bdag la phan par 'dod pa dang / 'gro ba mtha' dag gi gtso bor byed pa bla na med pa'i byang chub kyi 'bras bu 'dod pa rnams kyi dad pa mchog gi gnas yin par mos pa bskyed cing mi g.yel bar nan tan snying po bsgrub par bya ba na/dang po kho nar sems kyi gsang ba la shin tu rmongs pa'i gnyen por sems dang yid la rnam par shes pa'i gsang ba la mkhas par bya dgos pas 'dir dang por sems kyi mtshan nyid bstan to/ /de'i 'og tu chos rnams kyi mtshan nyid la shin tu rmongs pa'i gnyen por kun brtags pa dang gzhan gyi dbang dang yongs su grub pa'i mtshan nyid la mkhas par bya dgos pas 'dir de'i 'og tu chos rnams kyi mtshan nyid bstan to//de'i 'og tu chos rnams kyi ngo bo nyid med pa la shin tu rmongs pa'i mtshan nyid dang / skye ba dang / don dam pa ngo bo nyid med pa la mkhas par bya dgos pas 'dir de'i 'og tu chos rnams kyi ngo bo nyid med pa'i mtshan nyid bstan to//de'i 'og tu ngo bo nyid med pa'i don de la rnal 'byor du bya ba'i thabs de la shin tu rmongs pa'i gnyen por dang po sems bskyed pa dang / chos gdags pa rnam par gzhag pa'i gnas dang / rten gyi rgyu la brten te zhi gnas dang / lhag mthong la mkhas par bya dgos pas 'dir de'i 'og tu chos gdags pa rnam par gzhag pa las brtsams nas rnal 'byor gyis yongs su bsdus pa'i zhi gnas dang / lhag mthong gi lam gyi rab tu dbye ba bstan to/ /de'i 'og tu zhi gnas dang lhag mthong gi theg pa de nyid kyi spyod pa dang /rtog pa la shin tu rmongs pa'i gnyen por sa dang pha rol tu phyin pa nges pa'i don la mkhas par bya dgos pas 'dir de'i 'og tu theg pa rnam par gzhag pa las brtsams nas theg pa ji lta ba bzhin du rnam par dbye ba bstan to/ /de'i 'og tu sa dang pha rol tu phyin pa'i theg pa'i 'bras bu la shin tu nyon mongs pa'i gnyen por de bzhin gshegs pa'i sku dang gsung dang thugs kyi mtshan nyid la mkhas par bya dgos pas 'dir de'i 'og tu theg pa gdags pa rnam par gzhag pa kho na las brtsams nas de bzhin gshegs pa'i bya ba sgrub pa'i rab tu dbye ba bstan te/bde bar gshegs pa'i bstan pa bde bar bgrod par bya ba'i chos 'di la yongs su shes par bya ba ni de tsam du zad de/ des theg pa chen po mtha' dag bsdus par rig par bya'o/ /de la dang por sems kyi mtshan nyid kyi kun rdzob kyi bden pa yongs su shes par bya ba'i tshig gi don la sogs pa bshad par bya ste/de'i phyir de bstan pa'i dbang du mdzad nas/ de nas bcom ldan 'das la byang chub sems dpa' blo gros yangs pas zhu ba zhus pa zhes bya ba la sogs pa 'phags pa blo gros yangs pa'i le'u lnga pa 'di gsungs so/ /de la le'u lnga pa 'di'i bsdus pa'i don ni mdor bsdu na sems kyi mtshan nyid bstan pa yin no//de la rnam par dbye na rnam pa gnyis te/ yongs su zhus pa dang / rgya che bar bstan to/ /de la yongs su zhus pa ni/ bcom ldan 'das byang chub sems dpa' sems dang yid dang rnam par shes pa'i gsang ba la mkhas pa zhes bya ba nas/ji tsam gyis 'dogs lags zhes gsungs pa'i bar gyis bstan to/ rgya cher bstan pa ni de skad ces gsol pa dang / bcom ldan 'das kyis byang chub sems dpa' blo gros yangs pa la 'di skad ces bka' stsal to zhes bya ba la sogs pa le'u 'di nyid kyi gzhung lhag ma thams cad kyis bstan to//de la dang por yongs su zhus pa'i tshig gi don la sogs pa bshad par bya ste/ yongs su zhus pa zhes bya ba ni sems kyi gsang ba la shin tu rmongs pa'i gnyen por sems dang yid dang rnam par shes pa'i gsang ba la mkhas pa gleng bslang ba'i phyir dang por bcom ldan 'das la 'phags pa blo gros yangs pas zhu ba zhus pa gang yin pa'o//de'i phyir de bstan pa'i dbang du mdzad nas/ bcom ldan 'das byang chub sems dpa' sems dang yid dang rnam par shes pa'i gsang ba la mkhas pa zhes bya ba la sogs pa gsungs so//de la sems zhes bya ba ni kun gzhi'i rnam par shes pa'o/ /yid ces bya ba ni nyon mongs pa can gyi yid dang / 'gags ma thag pa dang gnas su gyur pa'i rnam par shes pa la bya'o/ /rnam par shes pa zhes bya ba ni 'jug pa'i rnam par shes pa'i tshogs drug go/ /gsang ba zhes bya ba ni de dag gi ngo bo dang /gnas dang / dmigs pa dang / grogs dang / las dang / de'i yod pa nyid dang / rab tu dbye ba ni 'di las phyi rol pa dag dang / chos 'di dag las kyang kha cig mi shes pa dag de la rang bzhin gyis lkog tu gyur pa'o/ /mkhas pa zhes bya ba ni chos kyi lugs shes pa/so sor rtog pa'i ye shes kyis de'i spyod yul gyi gsang ba la mkhas pa yin no/ /lan gnyis su bzlas pa ni grags pa'i don bstan pa'i phyir ro zhes bgyi na zhes bya ba ni mdo sde de dang de dag las de skad ces gsungs na zhes bya ba'i tha tshig go/ /de ltar byang chub sems dpa' sems dang yid dang rnam par shes pa'i gsang ba la mkhas pa zhes bya ba ni de dag gi ngo bo nyid dang /gnas dang / dmigs pa dang / grogs dang / las kyi mtshan nyid la mkhas pa dang / kun gzhi'i rnam par shes pa'i yod pa nyid dang / rab tu dbye ba la mkhas pa yin no zhes bstan pa de la/de dag gi ngo bo nyid gang zhe na/ sems dang / yid dang / rnam par shes pa gang yin pa ste/ de la sems zhes bya ba ni sa bon thams cad dang ldan pa gnas kyi dngos por gyur pa/ gnas kyi dngos por gnas pa/ len par byed pa/ rnam par smin pas bsdus pa kun gzhi'i rnam par shes pa gang yin pa'o//yid ces bya ba ni nyon mongs pa can gyi yid ma rig pa dang / bdag tu lta ba dang / nga'o snyam pa'i nga rgyal dang / sred pa'i mtshan nyid kyi nyon mongs pa rnam pa bzhi dang rtag tu ldan pa gang yin pa dang / rnam par shes pa rnams 'gags ma thag pa gang yin pa'o/ /yang na yid ces bya ba ni gnas su gyur pa'i rnam par shes pa la bya ste/gnas kyang rnam pa bzhi ste/ sa bon gyi gnas ni kun gzhi'i rnam par shes pa'o/ /'byung ba'i sgo 'byed pa'i gnas ni rnam par shes pa rnams 'gags ma thag pa'o/ /'ching ba'i gnas ni nyon mongs can gyi yid de / de ma 'gags na rnam par rig pa'i 'ching ba ni grol ba'i phyir ro//kun nas nyon mongs pa dang / rnam par byang ba'i gnas ni yid kyi rnam par shes pa ste/ 'dod chags la sogs pa dang / dad pa la sogs pa'i gnas yin pa'i phyir te/ de ltar na yid ces bya ba'i sgras rnam par shes pa thams cad bsdus pa yang bstan to//rnam par shes pa zhes bya ba ni dbang po la brten nas dmigs pa rnam par rig par byed pas nye bar gnas pa 'jug pa'i rnam par shes pa'i tshogs drug po dag go/ /de dag gi gnas gang zhe na/ kun gzhi'i rnam par shes pa dang / nyon mongs pa can gyi yid dang /yid kyi rnam par shes pa'i gnas ni gnyis te/ sa bon gyi gnas ni kun gzhi'i rnam par shes pa nyid do/ /de ma thag pa'i gnas ni yid do/ /yid kyi rnam par shes pa'i gnas ni nyon mongs pa can gyi yid kyang yin te/ 'di ltar de ma 'gags na rnam par rig pa'i 'ching ba mi 'grol la/'gags na de 'grol ba'i phyir ro/ /sgo lnga'i rnam par shes pa'i gnas ni gsum ste/ dbang po ni lhan cig byung ba'i gnas so/ /yid ni de ma thag pa'i gnas so/ /sa bon thams cad pa lus len par byed pa rnam par smin par bsdus pa kun gzhi'i rnam par shes pa ni sa bon gyi gnas so//de dag gi dmigs pa gang zhe na/ kun gzhi'i rnam par shes pa'i dmigs pa ni rnam pa gnyis te/ nang gi len pa dang / phyi rol snod yongs su ma chad pa'o/ /nyon mongs pa can gyi yid kyi dmigs pa ni kun gzhi la bdag go snyam du dmigs pa'o/ /yid kyi rnam par shes pa'i dmigs pa ni chos thams cad de/de yang rang bzhin gyi yul dang / rang dang / spyi'i mtshan nyid dang / dus gsum dang skad cig gi rgyun gyis bsdus pa dag go/ /sgo lnga'i rnam par shes pa'i dmigs pa ni thams cad kyang da ltar byung ba'i dus dang / skad cig gcig gis bsdus pa rang gi mtshan nyid sha stag ste/ de la mig gi rnam par shes pa'i dmigs pa ni gzugs bstan du yod la thogs pa dang bcas pa'o/ /rna ba dang / sna dang / lce dang / lus kyi rnam par shes pa'i dmigs pa ni sgra dang / dri dang / ro dang / reg bya bstan du med la thogs pa dang bcas pa dag go//de dag gi grogs gang zhe na/ sems las byung ba'i chos de dag dang / lhan cig 'byung zhing mtshungs par ldan pa rnams so/ /de dag gi las gang zhe na/ mdor bsdu na rnam pa bzhi ste/ snod rnam par rig pa dang / gnas rnam par rig pa dang / bdag go snyam du rnam par rig pa dang /yul rnam par rig pa'o/ /de la dang po gnyis ni kun gzhi'i rnam par shes pa'i las yin te/ de ni rtag tu dmigs pa rnam pa gnyis pa'i phyi rol gyi snod rnam pa yongs su ma chad pa dang / nang gi len pa rnam par rig par byed pa yin pa'i phyir ro/ /gsum pa ni nyon mongs pa can gyi yid kyi las yin te/de ni 'ching bar byed pa yin pa'i phyir ro/ /tha ma ni 'jug pa'i rnam par shes pa drug gi las yin te/ de dag ni dmigs pa rnam par rig par byed pas nye bar gnas pa yin pa'i phyir ro/ /'jug pa'i rnam par shes pa rnams kyi las kyang rab tu dbye na yid kyi rnam par shes pa'i las ni rang dang gzhan gyi yul gyi dmigs pa rnam par rig par byed pa dang /rang dang spyi'i mtshan nyid rnam par rig par byed pa dang / dus gsum rnam par rig par byed pa dang / skad cig gi rgyun rnam par rig par byed pa dang / dge ba dang mi dge ba'i chos rnams dang las rnam par 'jug cing rjes su 'jug par byed pa dang /de las gzhan pa'i rnam par shes pa'i tshogs rnams kyi sdug pa dang mi sdug pa'i 'bras bu yang yongs su 'dzin te/ de'i rgyu las byung ba rgyu mthun pa kun nas slong ba'i phyir ro/ /de dag ni rnam par shes pa'i tshogs gzhan dag dang thun mong dang thun mong ma yin pa'i las yin no//yang de las gzhan pa'i rnam par shes pa'i tshogs rnams las thams cad kyi thams cad du khyad par du gyur pa'i las ni rnam pa bcu bzhi ste/ dmigs pa la rnam par rtog pa dang / dmigs pa la nye bar sems pa dang / ra ro bar byed pa dang / smyo bar byed pa dang / gnyid log par byed pa dang / sad par byed pa dang / brgyal bar byed pa dang / brgyal ba las sangs par byed pa dang / lus dang ngag gi las 'jug par byed pa dang / 'dod chags las bral ba las yongs su nyams par byed pa dang / dge ba'i rtsa ba rnams rgyun mi 'chad par byed pa dang / dge ba'i rtsa ba rnams mtshams sbyor bar byed pa dang / 'chi 'pho dang skye bar byed pa'o/ /sgo lnga'i rnam par shes pa rnams kyi las ni mdor bsdu na rnam pa drug tu blta bar bya ste/ rang gi yul rnam par rig par byed pa dang / rang gi mtshan nyid rnam par rig par byed pa dang /da ltar gyi dus rnam par rig par byed pa dang / skad cig gcig gi rnam par rig par byed pa dang / rnam pa gnyis kyis yid kyi rnam par shes pa'i rjes su 'jug ste/ dge ba'i dang nyon mongs pa can gyi rjes su 'jug pa dang / las kun nas slong ba'i rjes su 'jug pa dang /sdug pa dang mi sdug pa'i 'bras bu yongs su 'dzin par byed pa'o/ /de la kun gzhi'i rnam par shes pa'i yod pa nyid dang / rab tu dbye ba ji ltar rig par bya zhe na/ kun gzhi'i rnam par shes pa yod pa nyid ni rnam pa brgyad kyis khong du chud par byas la/ de'i rab tu dbye ba ni 'jug pa dang /ldog pa rnam par gzhag pas rig par bya'o/ /de la kun gzhi'i rnam par shes pa'i yod pa nyid rnam pa brgyad kyis khong du chud par bya ba gang zhe na/ 'di lta ste kun gzhi'i rnam par shes pa med na lus len pa mi srid pa dang / dang po 'jug pa mi srid pa dang / gsal bar 'jug pa mi srid pa dang /sa bon nyid mi srid pa dang / las mi srid pa dang / lus kyi tshor ba mi srid pa dang / sems med pa'i snyoms par 'jug pa mi srid pa dang / rnam par shes pa'i 'chi 'pho mi srid pas so/ /de la ji ltar na kun gzhi'i rnam par shes pa med na lus len pa mi srid par 'gyur zhe na/rgyu rnam pa lnga ste/ 'di lta ste kun gzhi'i rnam par shes pa ni/ sngon las mngon par 'du byas pa'i rgyu las byung ba yin pas des lus len par byed kyi 'jug pa'i rnam par shes pa rnams ni da ltar gyi rkyen las byung ba yin pas de dag ni lus len par byed pa ma yin te/de ni rgyu dang po yin no/ /gzhan yang kun gzhi'i rnam par shes pa ni lung du ma bstan pa yin pas des lus len par byed pa yin gyi 'jug pa'i rnam par shes pa rnams ni dge ba dang mi dge bar snang bas de dag ni lus len par byed pa ma yin te/ de ni rgyu gnyis pa yin no//gzhan yang kun gzhi'i rnam par shes pa ni lung du ma bstan pa rnam par smin pas bsdus pa'i rigs yin pas des lus len par byed pa yin gyi/ 'jug pa'i rnam par shes pa rnams la ni lung du ma bstan pa rnam par smin pas bsdus pa'i rigs gang yin pa de ni dmigs pas/de dag ni lus len par byed pa ma yin te/ de ni rgyu gsum pa yin no/ /gzhan yang kun gzhi'i rnam par shes pa ni lus thams cad la khyab par gnas pas/ des lus len par byed pa yin gyi/ 'jug pa'i rnam par shes pa rnams ni gnas nges pa las so sor 'byung ste/de la rnam par shes pa gnas gang dang gang nas 'byung ba de nyid des zin par 'gyur gyi/ gnas gang nas rnam par shes pa ma byung ba'i gnas de ma zin pas/ de dag ni lus len par byed pa ma yin te/ de ni rgyu bzhi pa yin no/ /gzhan yang kun gzhi'i rnam par shes pa ni dang po'i len pa'i skad cig ma'i rgyun gyis lus cig car len pa yin gyi/'jug pa'i rnam par shes pa rnams ni lan 'ga' 'byung zhing lan 'ga' mi 'byung bas gal te kun gzhi rnam par shes pa med na yang dang yang du lus len pa'i skyon du 'gyur te/ de ni rgyu lnga pa yin no/ /de ltar na da ltar gyi rkyen las byung ba dang /dge ba dang mi dge ba yin pa dang / rnam par smin pa'i rigs ma yin pa dang / gnas nges pa dang / yang dang yang lus len pa'i skyon du 'gyur bas kyang gal te kun gzhi'i rnam par shes pa med na lus len pa mi srid pas skyon du 'gyur bas/ de'i phyir kun gzhi'i rnam par shes pa yod par khong du chud par bya'o//ji ltar kun gzhi'i rnam par shes pa med na dang por 'jug par mi srid par 'gyur zhe na/ kun gzhi'i rnam par shes pa yod na 'jug pa'i rnam par shes pa rnams dang / lhan cig gi dngos pos 'jug cing rnam par shes pa gnyis sam gsum mam/brgyad car lhan cig 'byung bar 'gyur ba de mi 'dod pas kun gzhi yang med la/ 'jug pa'i rnam par shes pa drug kyang lhan cig mi 'byung zhing gang yang rung ba snga phyir rim gyis 'byung ngo zhes zer ba de mi rung ste/ gang gi tshe rnam par shes pa drug car gyi rkyen dus gcig kho nar nye bar gnas par gyur pa'i tshe/dang po gcig 'byung zhing gzhan yang rim gyis 'byung zhes byar rkyen tshogs par 'dra bas mi rung ste/ rnam par shes pa rnams lhan cig 'byung bas na de'i phyir yang kun gzhi'i rnam par shes pa yod par khong du chud par bya'o/ /ji ltar na kun gzhi'i rnam par shes pa med na gsal bar 'jug pa mi srid par 'gyur zhe na/kun gzhi med na rnam par shes pa lhan cig gi dngos pos 'jug pa yang med pas yid kyi rnam par shes pa da ltar gyi yul la gsal bar 'jug ces bya'o/ /mig la sogs pa da ltar gyi yul la gsal bar 'jug pa dang /dus gcig tu 'gyur bas mi rung ba'i rigs nas yid kyi rnam par shes pa da ltar gyi yul la gsal bar 'jug pas lhan cig gi dngos pos 'jug pa yod pas na de'i phyir yang kun gzhi'i rnam par shes pa yod par khong du chud par bya'o/ /ji ltar na kun gzhi'i rnam par shes pa med na sa bon nyid mi srid par 'gyur zhe na/kun gzhi'i rnam par shes pa med na 'jug pa'i rnam par shes pa rnams kyi dge ba'i mjug thogs su dge ba dang mi dge ba 'byung ba la sogs pa ni gcig gi sa bon gcig yin par mi rung ba dang / sems kyi rgyun yun ring por rgyun chad pa yang 'byung ba'i rgyu med pas de dag mi 'byung ba'i rigs na 'byung ste/de'i phyir yang de dag gi sa bon kun gzhi'i rnam par shes pa yod par khong du chud par bya'o/ /ji ltar na kun gzhi'i rnam par shes pa med na las mi srid par 'gyur zhe na/ las ni mdor bsdu na rnam pa bzhi ste/snod rnam par rig pa dang / gnas rnam par rig pa dang / bdag go snyam du rnam par rig pa dang / yul rnam par rig pa'o/ /rnam par rig pa de dag kyang skad cig skad cig la cig car 'byung bar snang ste/ kun gzhi'i rnam par shes pa med na rnam par shes pa rnams lhan cig gi dngos pos 'byung ba med pas/rnam par shes pa gcig gi skad cig la ni las shin tu tha dad pa de lta bu de dag mi rung bas mi 'byung ba'i rigs na/ 'byung bas rnam par shes pa lhan cig gi dngos pos 'jug pa yod pas na/ de'i phyir yang kun gzhi'i rnam par shes pa yod par khong du chud par bya'o/ji ltar na kun gzhi'i rnam par shes pa med na lus kyi tshor ba mi srid par 'gyur zhe na/ kun gzhi'i rnam par shes pa med na tshul bzhin nam/ tshul bzhin ma yin pa sems par byed pa dang / rjes su rtog par byed pa'am sems mnyam par bzhag pa'am/sems mnyam par ma bzhag pa gang yang rung ba cig gcig gi lus la tshor ba rnam pa du ma rnam pa mang po sna tshogs gang dag 'byung ba de dag mi 'byung ba'i rigs na 'byung ste/ de'i phyir yang kun gzhi'i rnam par shes pa yod par khong du chud par bya'o//ji ltar na kun gzhi'i rnam par shes pa med na sems med pa'i snyoms par 'jug pa mi srid par 'gyur zhe na/ kun gzhi'i rnam par shes pa med pa na 'du shes med pa la snyoms par zhugs pa'am/ 'gog pa la snyoms par zhugs pa'i lus rnam par shes pa dang bral bas shi ba kho nar 'gyur ba zhig na/bcom ldan 'das kyis de'i lus ni rnam par shes pa dang bral ba ma yin no zhes gsungs pas na/ de'i phyir yang kun gzhi'i rnam par shes pa yod par khong du chud par bya'o/ /ji ltar na kun gzhi'i rnam par shes pa med na rnam par shes pa'i 'chi 'pho mi srid par 'gyur zhe na/kun gzhi'i rnam par shes pa med na/ yid kyi rnam par shes pa ni ma shi ba'i bar du rtag par 'byung ba kho nar 'dod pas/ 'chi ka'i rnam par shes pas lus ro stod dam ro smad du drod yal bar byed cing spang bar mi 'gyur ba zhig na/ de ltar snang bas lus len par byed pa kun gzhi'i rnam par shes pa kho na dang bral bas drod yal ba dang tshor ba med par snang bar zad kyi yid kyi rnam par shes pa dang bral bas ni ma yin te/de'i phyir yang kun gzhi'i rnam par shes pa yod par khong du chud par bya'o/ /de la de'i 'jug pa dang ldog pa rnam par gzhag pa gang zhe na/mdor bsdu na kun gzhi'i rnam par shes pa'i 'jug pa ni rnam pa bzhis rnam par gzhag la/ ldog pa ni rnam pa gcig gis rnam par gzhag par rig par bya ste/ 'di lta ste/ dmigs pas 'jug pa rnam par gzhag pa dang / mtshungs par ldan pas 'jug pa rnam par gzhag pa dang /gcig gi rkyen nyid gcig yin pas 'jug pa rnam par gzhag pa dang / lhan cig gi dngos pos 'jug pa rnam par gzhag pa ste/ rnam pa bzhi po de dag gis ni 'jug pa rnam par gzhag pa'o/ /kun nas nyon mongs pa ldog pa rnam par gzhag par rig par bya'o//de la dmigs pas 'jug pa rnam par gzhag pa gang zhe na/ mdor bsdu na kun gzhi'i rnam par shes pa ni dmigs pa rnam pa gnyis kyis 'jug ste/ nang gi len pa rnam par rig pa dang / phyi rol gyi snod rnam pa yongs su ma chad pa rnam par rig pa'o/ /de la nang gi len pa ni rnam pa gnyis te/kun brtags pa'i ngo bo nyid la mngon par zhen pa'i bag chags dang / rten dang bcas pa'i dbang po gzugs can no/ /de yang gzugs can gyi khams na'o/ /gzugs can ma yin pa'i khams na ni bag chags len pa kho nar zad do/ /de la phyi rol gyi snod rnam pa yongs su ma chad par rnam par rig pa ni/kun gzhi'i rnam par shes pa nang gi len pa'i dmigs pa gang yin pa de nyid la brten nas/ rtag tu rgyun mi 'chad par 'jig rten dang / snod kyi rgyun bye brag tu mi 'byed par rnam par rig pa ste/ 'di lta ste dper na mar me 'bar ba ni snying po dang /snum gyi rgyus ni nang 'jug par 'gyur la/ phyi rol du ni 'od 'byung bar byed pa de bzhin du/ nang gi len pa'i dmigs pa dang / phyi rol gyi dmigs pa 'di la yang kun gzhi'i rnam par shes pa'i tshul de dang 'dra bar blta bar bya'o/ /dmigs pa de ni 'jig rten gyi mkhas pa rnams kyis kyang yongs su dpyad pa dka' ba'i phyir phra ba yin no//dmigs pa de ni rtag tu yod pa yin te/ lan 'ga' gzhan du 'gyur la/ lan 'ga' gzhan du 'gyur ba ma yin zhing / dang po'i len pa'i skad cig la brten nas ji srid 'tsho'i bar du rnam par rig pa ro gcig pas 'jug par 'gyur ro//kun gzhi'i rnam par shes pa de ni dmigs pa la skad cig pa yin par blta bar bya ste/ skad cig pa'i rgyud kyi rgyun gyis 'jug pa yin gyi/ gcig pa nyid ni ma yin no/ /kun gzhi'i rnam par shes pa de ni 'dod pa'i khams na ni rgyu chung ngu'i dmigs pa can du brjod par bya'o//gzugs kyi khams na ni rgyu chen por gyur pa'i dmigs pa can yin no/ /gzugs med pa'i khams nam mkha' mtha' yas skye mched dang / rnam shes mtha' yas skye mched ni rgyu tshad med pa'i dmigs pa can yin no/ /ci yang med pa'i skye mched na ni rgyu phra ba'i dmigs pa can yin no// 'du shes med 'du shes med min skye mched na ni rgyu shin tu phra ba'i dmigs pa can du blta bar bya ste/ de ltar na dmigs pa rnam pa gnyis rnam par rig pa dang / phra ba rnam par rig pa dang / 'dra ba rnam par rig pa dang / skad cig ma rnam par rig pa dang / rgyu chung ngu'i dmigs pa'i rnam par rig pa dang / rgyu chen por gyur pa'i dmigs pa'i rnam par rig pa dang / rgyu tshad med pa'i dmigs pa'i rnam par rig pa dang / rgyu phra ba'i dmigs pa'i rnam par rig pa dang / rgyu shin tu phra ba'i dmigs pa'i rnam par rig pas kyang kun gzhi'i rnam par shes pa dmigs pas 'jug pa rnam par gzhag par rig par bya'o//de la mtshungs par ldan pas 'jug pa rnam par gzhag pa gang zhe na/ de la kun gzhi'i rnam par shes pa mtshungs par ldan pa na sems dang mtshungs par ldan pa kun du 'gro ba lnga po yid la byed pa dang /reg pa dang / tshor ba dang / 'du shes dang / sems pa rnams dang mtshungs par ldan no/ /chos de dag kyang rnam par smin par bsdus pa dang / 'jig rten gyi mkhas pa rnams kyis kyang rtogs par dka' ba'i phyir phra ba dang / gtan du dmigs pa gcig la mtshungs par 'jug pa yin no//sems las byung ba de dag las kun gzhi'i rnam par shes pa dang mtshungs par ldan pa'i tshor ba gang yin pa de ni/ gcig tu sdug bsngal ba yang ma yin bde ba yang ma yin pa dang / lung du ma bstan pa yin no/ /de nyid kyi de las gzhan pa'i sems las byung ba'i chos rnams kyang rnam par bshad pa yin te/de ltar na sems las 'byung ba kun du 'gro ba lnga dang mtshungs par ldan pa dang / rnam par smin par rigs 'dra ba dang mtshungs par ldan pa dang / 'jug pa phra ba dang / mtshungs par ldan pa dang / dmigs pa gcig la mtshungs par 'jug pa dang / mtshungs par ldan pa dang sdug bsngal ba yang ma yin bde ba yang ma yin pa dang / mtshungs par ldan pa dang / lung du ma bstan pa dang mtshungs par ldan pas kyang kun gzhi'i rnam par shes pa mtshungs par ldan pas 'jug pa rnam par gzhag par rig par bya'o//de la gcig gi rkyen nyid gcig yin pas/ 'jug pa rnam par gzhag pa gang zhe na/ 'di la kun gzhi'i rnam par shes pa ni rnam pa gnyis kyis 'jug pa'i rnam par shes pa'i rkyen gyi bya ba byed de/ sa bon gyi dngos po dang rten byed pas so/ / de la sa bon gyi dngos po ni 'jug pa'i rnam par shes pa dge ba dang / mi dge ba dang / lung du ma bstan par 'byung bar 'gyur ba gang ci yang rung ste/ de dag thams cad ni kun gzhi'i rnam par shes pa'i sa bon dang ldan pa yin no/ /de la rten byed pa ni kun gzhi'i rnam par shes pas zin pa'i dbang po gzugs can rnams la brten nas rnam par shes pa'i tshogs lnga po dag 'byung bar 'gyur gyi/ma zin pa dag las ni ma yin no/ /ji ltar rnam par shes pa'i tshogs lnga po dag gi gnas mig la sogs pa dang 'dra ba yid dang / yid kyi rnam par shes pa'i gnas kun gzhi'i rnam par shes pa yod na/yid dang yid kyi rnam par shes pa yang 'byung bar 'gyur gyi med na ni ma yin no/ /de la 'jug pa'i rnam par shes pa yang gnyis kyi kun gzhi'i rnam par shes pa'i rkyen gyi bya ba byed de/ tshe 'di la sa bon yongs su brtas par byed pa dang / phyi ma la de mngon par grub pa'i sa bon yongs su 'dzin pa skyed par byed pas so//de la tshe 'di la sa bon yongs su brtas par byed pa ni/ ji lta ji ltar kun gzhi'i rnam par shes pa la brten pa 'jug pa'i rnam par shes pa dge ba dang mi dge ba dang / lung du ma bstan pa 'byung bar 'gyur ba de lta de ltar rang gi rten la brten dang de dang lhan cig skye ba dang /'gags pas bag chags bsgo bar byed do/ /rgyu de dang rkyen des ni 'jug pa'i rnam par shes pa rnams kyang phyir zhing phyir zhing dge ba la sogs pa'i dngos por shin tu brtas pa dang / shin tu sbyangs pa dang / shin tu 'od gsal ba dag tu 'byung bar 'gyur ro/ /phyi ma la de mngon par grub pa'i sa bon yongs su 'dzin pa skyed par byed pa ni 'jug pa'i rnam par shes pa de nyid kyi yul gyi bag chags kyis phyi ma la kun gzhi'i rnam par shes pa de nyid kyi rnam par smin pa yongs su 'dzin pa skyed par byed pa ste de ltar na sa bon gyi dngos po dang /rten byed pa dang / sa bon yongs su brtas par byed pa dang / sa bon yongs su 'dzin pas kyang kun gzhi'i rnam par shes pa dang / 'jug pa'i rnam par shes pa gcig gi rkyen nyid gcig pas 'jug pa rnam par gzhag par bya'o/ /de la lhan cig gi dngos pos 'jug pa rnam par gzhag pa gang zhe na/kun gzhi'i rnam par shes pa res 'ga' ni 'jug pa'i rnam par shes pa gcig kho na dang lhan cig 'jug ste/ 'di lta ste/ nyon mongs pa can gyi yid dang po'o/ /res 'ga' ni nyon mongs pa can gyi yid dang / yid kyi rnam par shes pa gnyis dang gsum lhan cig 'jug go//res 'ga' ni rnam par shes pa'i tshogs lnga po dag las gang yang rung ba cig dang gsum dang ngo / /res 'ga' ni rnam par shes pa'i tshogs lnga po dag las gnyis lhan cig 'byung ba dang bzhi dang ngo / /res 'ga' ni rnam par shes pa'i tshogs lnga po lnga char lhan cig 'byung ba dang /bdun char gyi bar dag dang lhan cig 'byung zhing 'jug go/ /kun gzhi'i rnam par shes pa de res 'ga' ni bde ba dang / sdug bsngal ba dang / sdug bsngal ba yang ma yin bde ba yang ma yin pa'i tshor ba glo bur ba rnams dang yang 'dres mar 'jug ste/ 'jug pa'i rnam par shes pa la brten nas tshor ba gang dag 'byung ba dag kyang de las 'byung ba brten nas 'byung ba'i phyir ro/ /de la mi rnams dang 'dod pa na spyod pa'i lha rnams dang / dud 'gro dang / yi dgas kha cig gi nang na ni lhan cig skyes pa'i tshor ba sdug bsngal ba yang ma yin pa bde ba yang ma yin pa de dang /'jug pa'i rnam par shes pa'i tshogs kyi tshor ba bde ba'am/ sdug bsngal ba'am/ sdug bsngal ba yang ma yin bde ba yang ma yin pa de dag gi rgyun 'dren par lhan cig 'byung zhing 'jug go/ /sems can dmyal ba dag na ni lhan cig skyes pa'i tshor ba de 'jug pa'i rnam par shes pa'i tshogs kyi tshor ba sdug bsngal ba yang ma yin bde ba yang ma yin pa zil gyis mnan te/sdug bsngal gyi rgyun 'ba' zhig ma 'dres pa dang lhan cig 'byung zhing 'jug ste/ de yang zil gyis mnan pa'i phyir rtogs par dka' ba yin par blta'o/ /sems can dmyal ba dag ni sdug bsngal ba dang /ji lta ba de bzhin du bsam gtan gsum po dag gi sa pa'i lha rnams la ni bde ba dang ngo / /bsam gtan bzhi pa yan chad srid pa'i rtse mo'i bar dag la ni sdug bsngal yang ma yin bde ba yang ma yin pa dang ngo / /kun gzhi'i rnam par shes pa res 'ga' ni 'jug pa'i rnam par shes pa rtogs pa'i sems las byung ba'i chos glo bur ba dge ba dang mi dge ba dang /lung du ma bstan pa rnams dang yang lhan cig 'byung zhing 'jug go/ /de ltar 'jug pa'i rnam par shes pa rnams dang / glo bur gyi tshor ba rnams dang / glo bur gyi chos dge ba dang / mi dge ba dang / lung du ma bstan pa rnams dang / lhan cig 'byung zhing 'jug kyang / de ni de dag dang mtshungs par ldan pa ni mi brjod do/ /de ci'i phyir zhe na/ dmigs pa mi mtshungs pa la 'jug pa'i phyir te/ 'di lta ste/ dper na mig gi rnam par shes pa ni mig dang lhan cig byung yang de ni de dang mtshungs par ldan pa ma yin pa bzhin no//de ltar na 'jug pa'i rnam par shes pa dang / lhan cig gi dngos po dang / tshor ba dang lhan cig gi dngos po dang / dge ba la sogs pa dang lhan cig gi dngos pos kyang kun gzhi'i rnam par shes pa lhan cig gi dngos po 'jug pa rnam par gzhag par rig par bya'o//de la kun nas nyon mongs pa ldog pa rnam par gzhag pa gang zhe na/ kun gzhi'i rnam par shes pa rnams mdor bsdu na/ kun nas nyon mongs pa thams cad kyi rtsa ba yin te/ 'di ltar 'di ni sems can gyi 'jig rten 'grub par byed pa dang /snod kyi 'jig rten 'grub par byed pa dang / da ltar gyi sdug bsngal gyi bden pa'i ngo bo nyid yin pa dang / ma 'ongs pa'i sdug bsngal gyi bden pa 'grub par byed pa dang / da ltar gyi kun 'byung gi bden pa 'grub par byed pa yin pa'i phyir ro/ /de ltar kun nas nyon mongs pa'i rtsa ba kun gzhi'i rnam par shes pa de ni dge ba'i chos bsgoms pas ldog par rig par bya'o//dge ba'i chos bsgoms pa de yang mthong ba'i lam la 'jug pa dang / bsgom pa'i lam gyi sbyor ba rtogs pa dang / de'i khyad par gyi lam goms par bya ba dang / de'i mthar thug pa'i lam yid la byed pa'i gnas skabs rnams su shes par bya ste/rgyu des gnas 'gyur bar byed do/ /gnas su gyur ma thag tu kun gzhi'i rnam par shes pa spang bar brjod par bya ste/ de spangs pa'i phyir kun nas nyon mongs pa thams cad kyang spang bar brjod par bya'o/ /kun gzhi'i rnam par shes pa de'i gnas ni gnyen por bsgyur bar rig par bya ste/kun gzhi'i rnam par shes pa ni mi rtag pa dang / len pa dang bcas pa yin la/ gnas gyur pa ni rtag pa dang / len pa med pa yin no/ /kun gzhi'i rnam par shes pa ni gnas ngan len dang ldan pa yin la/ gnas gyur pa ni gnas ngan len thams cad dang gtan bral ba yin no//kun gzhi'i rnam par shes pa ni nyon mongs pa rnams kyi 'jug pa'i rgyu yin zhing / lam gyi 'jug pa'i rgyu ma yin la/ gnas gyur pa ni nyon mongs pa rnams kyi 'jug pa'i rgyu ma yin zhing lam gyi 'jug pa'i rgyu yin no/ /kun gzhi'i rnam par shes pa ni dge ba dang lung du bstan pa'i chos rnams la dbang mi byed la/gnas gyur pa ni dge ba dang lung du bstan pa'i chos rnams la dbang byed pa yin no/ /kun gzhi'i rnam par shes pa de'i spangs pa'i mtshan nyid ni de spangs ma thag tu len pa rnam pa gnyis spong ba dang / sprul pa lta bu'i lus kun du gnas pa ste/ phyi ma la sdug bsngal yang 'byung ba'i rgyu spangs pa'i phyir phyi ma la yang 'byung bar byed pa'i len pa spong ba dang / tshe 'di la kun nas nyon mongs pa'i rgyu thams cad spangs pa'i phyir tshe 'di'i kun nas nyon mongs pa'i gnas ngan len thams cad spong ba dang / gnas ngan len thams cad dang bral zhing srog gi rkyen du gyur pa tsam kun du gnas pa yin no/ /de yod na lus kyi mtha' pa dang / srog gi mtha' pa'i tshor ba myong bar byed do/ / de'i phyir mdo las kyang / 'di'i tshor ba thams cad de tsam gyis na yongs su gtugs par 'gyur ro zhes rgya cher ji skad gsungs pa lta bu'o//de ltar na kun nas nyon mongs pa'i rtsa ba rnam par gzhag pa dang / 'jug pa dang / rtogs pa dang / goms pa dang / yid la byed pa rnam par gzhag pa dang / gnas gyur pa rnam par gzhag pas kyang kun gzhi'i rnam par shes pa'i kun nas nyon mongs pa ldog pa rnam par gzhag par rig par bya'o//de ltar na 'di ni sems dang yid dang rnam par shes pa rnam par gzhag pa'i tshul yang dag pa yin te/ de ltar khams gsum pa'i sems dang / yid dang rnam par shes pa thams cad ji skad bstan pa'i tshul 'dis kun nas nyon mongs pa'i tshul dang rnam par byang ba'i tshul thams cad khong du chud par bya'o//sems dang / yid dang / rnam par shes pa'i tshul gzhan dag yongs su bstan pa gang yin pa de ni gdul ba'i rim pa nyid kyi phyir te/ 'di lta ste/ gdul ba byis pa'i shes rab can dag gi dbang du mdzad nas thabs bla bas 'jug par bya ba'i phyir bstan pa yin no//de ltar sems dang yid dang rnam par shes pa de dag gi ngo bo nyid dang / gnas dang / dmigs pa dang / grogs dang / las dang / kun gzhi'i rnam par shes pa yod pa nyid dang / rab tu dbye ba ni 'di las phyi rol pa dag dang /chos 'di pa dag las kyang kha cig gis mi shes pas de dag la rang bzhin gyis lkog tu gyur pas na gsang ba zhes bya'o/ /mkhas pa zhes bgyi na zhes bya ba ni chos kyi lugs shes pa/ so sor rtog pa'i ye shes kyis de'i spyod yul gyi gsang ba la mkhas pa yin no/ / sems dang yid dang rnam par shes pa'i gsang ba la mkhas pa zhes bya ba la lan gnyis su bzlas pa ni grags pa'i don bstan pa'i phyir ro zhes bgyi zhes bya ba ni mdo sde de dang de dag las ji skad ces gsungs na zhes bya ba'i tha tshig go/ /ji tsam gyis ni byang chub sems dpa' sems dang yid dang rnam par shes pa'i gsang ba la mkhas pa lags zhes bya ba ni chos kyi lugs shes pa ji tsam gyi sgo nas mkhas na mkhas pa lags zhes zhus pa yin te/chos kyi lugs shes pa zhes bya ba ni rten cing 'brel par 'byung ba'i chos gnas pa nyid shes pa so sor rtog pa'i ye shes so//de'i sgo nas mkhas na mkhas pa'i chos kyi lugs shes pa'i spyod yul gyi gsang ba sems dang yid dang rnam par shes pa'i ngo bo nyid dang / gnas dang / dmigs pa dang / grogs dang / las dang / kun gzhi'i rnam par shes pa'i yod pa nyid dang / 'jug pa rnam par gzhag pa la mkhas pa de tsam gyis mkhas pa yin no//de bzhin gshegs pa byang chub sems dpa' sems dang yid dang rnam par shes pa'i gsang ba la mkhas par 'dogs na yang ji tsam gyis 'dogs lags zhes bya bas ni rnam par mi rtog pa'i ye shes ji tsam gyi sgo nas mkhas na mkhas par 'dogs pa lags zhes zhus pa yin te/rnam par mi rtog pa'i ye shes zhes bya ba ni gnas gyur pas bsdus pa yang dag par shes pa 'jig rten las 'das pa'o/ /de'i sgo nas mkhas na mkhas par 'dogs pa ni rnam par mi rtog pa'i ye shes kyi spyod yul gyi gsang ba kun gzhi'i rnam par shes pa'i ldog pa rnam par gzhag pa la mkhas na de tsam gyis mkhas par 'dogs pa yin no//yongs su zhus pa'i tshig gi don la sogs pa bshad zin to// //de'i 'og tu rgya cher bstan pa'i tshig gi don la sogs pa bshad par bya ste/ de ni de ltar yongs su zhus nas/bcom ldan 'das kyis sems dang yid dang rnam par shes pa'i gsang ba la mkhas pa rgya cher bstan pa gang yin pa'o/ /de'i phyir blo gros yangs pa khyod de ltar zhes bya ba la sogs pa gsungs so/ /de la rgya cher bstan pa 'dis ni sems kyi gsang ba la shin tu rmongs pa gsum gyi gnyen por rgya cher bstan te/shin tu rmongs pa rnam pa gsum ni ngo bo nyid la shin tu rmongs pa dang / rab tu dbye ba la shin tu rmongs pa dang / brgal ba'i lan la shin tu rmongs pa'o/ /de la ngo bo nyid la shin tu rmongs pa'i gnyen por bstan pa ni/ blo gros yangs pa 'gro ba drug gi 'khor ba 'di na zhes bya ba nas/gzugs can ma yin pa'i khams ni len pa gnyis su med do zhes bya ba'i bar gyis bstan to/ /rab tu dbye ba la shin tu rmongs pa'i gnyen por bstan pa ni/ blo gros yangs pa rnam par shes pa de ni len pa'i rnam par shes pa zhes kyang bya ste zhes bya ba nas/de tsam gyis 'dogs so zhes bya ba'i bar gyis bstan to/ /brgal ba'i lan la shin tu rmongs pa'i gnyen por bstan pa ni/ de nas bcom ldan 'das kyis de'i tshe tshigs su bcad pa 'di dag bka' stsal to zhes bya ba la sogs pa tshigs su bcad pa gcig gis bstan to//de la dang por ngo bo nyid la shin tu rmongs pa'i gnyen po'i tshig gi don la sogs pa bshad par bya ste/ ngo bo nyid ces bya ba ni sems dang yid dang rnam par shes pa gang yin pa'o/ /de la shin tu rmongs pa ni de dag gi mtshan nyid mi shes pa ste/ de'i gnyen por kun gzhi'i rnam par shes pa nang gi len par rnam pa gnyis kyis skye gnas su nying mtshams sbyor zhing 'khor bar 'jug pa rnam par gzhag pa bstan pa ni ngo bo nyid la shin tu rmongs pa'i gnyen po zhes bya'o//de'i phyir blo gros yangs pa 'gro ba drug gi 'khor ba 'di na zhes bya ba la sogs pa gsungs so/ /de la lus mngon par grub cing zhes bya ba ni 'byung bar 'gyur ba zhes bya bas bshad de/dang po skye gnas su phung po'i nying mtshams sbyor ba'i gnas skabs dang sbyar ro/ /len pa rnam pa gnyis po zhes bya ba ni kun gzhi'i rnam par shes pa 'khor bar 'jug cing nying mtshams sbyor ba'i rgyu gnyis te/ nang gi len pa rnam pa gnyis po rten dang bcas pa'i dbang po gzugs can len pa dang /kun brtags pa'i ngo bo nyid la mngon par zhen pa'i bag chags len pa zhes bya ba dang sbyar ro/ /rten dang bcas pa'i dbang po gzugs can len pa zhes bya ba la rten ces bya ba ni dbang po gzugs can gyi rten de zin pa'i phung po gzugs can du bgrang ba gang yin pa'o//dbang po gzugs can zhes bya ba ni dbang po gzugs can lnga ste/ skabs 'dir sa bon gyi sgo nas ni lnga char yod do/ /mngon par grub pa'i sgo nas ni lus kyi dbang po 'ba' zhig gzung ngo / /de yang mngal nas skyes pa'i skye gnas kyi skabs su ni gnas gsum po ma nyams bde zhing zla mtshan dang ldan pa dang /pha ma chags par gyur cing phrad pa dang / dri za nye bar gnas pa dang mngon du gyur la/ bar du gcod pa rnam pa gsum po skye gnas kyi nyes pa las gyur pa dang / sa bon gyi nyes pa las gyur pa dang /las kyi nyes pa las gyur pa rnams med cing pha ma gnyis 'dod chags spyod pa dar la bab pa mjug thogs kho nar khu ba skye bar 'byung bar 'gyur ro/ /de'i rjes kho na la pha las khu ba thigs pa gcig dang / ma las khrag thigs pa gcig gdon mi za bar 'byung bar 'gyur te/ gnyi ga'i khu ba dang khrag gi thigs pa de gnyis ma'i skye gnas su 'dres par gyur nas/ dper na 'o ma bskol ba grangs pa'i spris ma bzhin du chags shing 'dug pa de ni rten dang bcas pa'i dbang po gzugs can zhes bya ste/ der sa bon thams cad pa rnam par smin par bsdus pa lus len par byed pa kun gzhi'i rnam par shes pa 'jug par 'gyur ro//de ltar na gzugs de sngar chags la/ kun gzhi'i rnam par shes pa ni phyis 'jug pa 'dra bas der kun gzhi'i rnam par shes pa ma zhugs pa'i gnas skabs na gzugs de la dbang po gzugs can zhes ci'i phyir bya zhe na/ de gnyis ni snga phyi med de/khu ba dang khrag 'dus nas spris ma lta bur gyur pa'i skad cig de nyid la phyin ci log tu dmigs pa bar ma do'i srid pa'i gzugs de 'gag la/ de 'gag pa dang dus gcig kho nar rnam par shes pa sa bon thams cad pa de der 'jug cing khu ba dang khrag 'dus pa de yang kun gzhi'i rnam par shes pa zin pas de'i tshe na rten dang bcas pa'i lus kyi dbang po gzugs can zhes bya ste/khu ba dang khrag 'dus pa de dang / kun gzhi'i rnam par shes pa 'pho zhing 'jug pa de ni skad cig gcig gi gnas skabs kho nar lhan cig 'byung bas de ni kun gzhi'i rnam par shes pa 'khor bar 'jug cing nying mtshams sbyor ba'i lhan cig 'byung ba'i rgyu yin no//de'i gnas skabs su kun gzhi'i rnam par shes pa gnas par gyur pa ni nying mtshams sbyor ba zhes bya ste/ de ni mer mer po'i dus yin no/ /mngal nas skye ba'i skye gnas su nying mtshams sbyor ba'i tshul ni de yin no//rdzus te skye ba ni las kyi skye gnas can yin pas de la ni 'di med do/ /sgo nga las skye ba dang / drod gsher las skye ba'i skye gnas gnyis su nying mtshams sbyor ba la yang sgo nga'i sbubs chags pa dang / drod gsher dus la bab pas dbang po gzugs can gyi rten zin pa'i phung po sems can du bgrang ba'i gnas skabs su gyur pa gang du kun gzhi'i rnam par shes pa 'jug par gyur pa de nyid rten dang bcas pa'i dbang po gzugs can len pa yin pa zhes bya bar sbyar ro//mtshan ma dang ming dang rnam par rtog pa la tha snyad 'dogs pa'i spros pa'i bag chags len pa zhes bya ba ni kun brtags pa'i ngo bo nyid la mngon par zhen pa'i bag chags te/'khrul pa'i rgyu dang ldan pa'i rnam par rtog pas 'du byed kyi mtshan ma la ming dang tha snyad 'dogs pa'i spros pa ni kun brtags pa'i ngo bo nyid de/ de la mngon par zhen pa'i bag chags kyi phyi mar nying mtshams sbyor bar byed pas de ni kun gzhi'i rnam par shes pa 'khor bar 'jug cing nying mtshams sbyor ba'i ltos pa'i rgyu yin no//sa bon thams cad pa'i sems zhes bya ba ni kun gzhi'i rnam par shes pa ste/ thams cad kyi sa bon de la yod pa'i phyir ro/ /rnam par smin cing zhes bya ba ni de khu ba dang khrag 'dus pa'i nang du nying mtshams sbyor ba'i dus na sngon gyi las kyi 'bras bur 'grub pa'o//'jug la zhes bya ba ni dus de na pha ma'i khu ba dang / khrag 'dus pa'i gzugs kyi rnam pa gang yin pa de dang / kun gzhi'i rnam par shes pa skye gnas kyi sgo nas mngal du 'pho zhing grub pa dang bde ba gcig par 'gyur ba'o//rgyas shing zhes bya bas ni de phyin chad rgyun gyis 'jug pa'i phyir ro/ /'phel ba zhes bya ba ni 'jug pa'i rnam par shes pa 'byung ba'i dus na'o/ /yangs par 'gyur ro zhes bya ba ni 'jug pa'i rnam par shes pa de dag gis bag chags bsgos pa'i phyir ro/ / yang na gcig nas gcig tu brgyud de 'byung ba'i phyir ro/ /gzugs can gyi khams na ni len pa gnyi ga yod la zhes bya ba ni 'dod pa'i khams gang na mngal dang / sgo nga dang / drod gsher las skye ba de ni rgyu sngar smos pa gnyis ka yod pa'o/ /gzugs can ma yin pa'i khams na ni len pa gnyis su med do zhes bya ba ni len pa gcig yod pa ste/de na gzugs med pa'i phyir rten dang bcas pa'i dbang po gzugs can ni med kyi/ bag chags 'ba' zhig la ltos nas skye'o/ /gzugs kyi khams ni gzugs can yin yang de na rdzus te skye bas/ de na yang dbang po gzugs can med do//sngar kun gzhi'i rnam par shes pa'i dmigs pa rnam pa gnyis po nang gi len pa rnam par rig pa dang / phyi rol gyi snod rnam pa yongs su ma chad pa rnam par rig pa zhes bstan pa la nang gi len pa rnam par rig pa rnam pa gnyis te/ rten dang bcas pa'i dbang po gzugs can dang /kun brtags pa'i ngo bo nyid la mngon par zhen pa'i bag chags te/ de gnyis ni kun gzhi'i rnam par shes pa nying mtshams sbyor ba'i rgyu yang yin dmigs pa yang yin te/ de ni skabs 'dir rten dang bcas pa'i dbang po gzugs can len pa dang / mtshan ma dang / ming dang / rnam par rtog pa la tha snyad 'dogs pa'i spros pa'i bag chags len pa zhes bya ba len pa rnam pa gnyis bstan pa dang sbyar ro/ /phyi rol gyi snod kyi rnam pa yongs su ma chad pa rnam par rig pa ni kun gzhi'i rnam par shes pa nang gi len pa rnam par rig pa'i dmigs pa gang yin pa de nyid la brten nas rtag tu rgyun mi 'chad par 'jig rten dang snod kyi rgyun bye brag tu mi 'byed par rnam par rig pa ste/de ni kun gzhi'i rnam par shes pa nying mtshams sbyor bas/ rnam par smin pa'i bdag nyid du gyur pa'i dmigs pa yin par rig par bya ste/ dmigs pa des phyi mar nying mtshams sbyor ba'i bag chags len pa yang sogs par byed do//de ltar na nang gi len pa rnam pa gnyis la brten nas/ kun gzhi'i rnam par shes pa 'khor bar 'jug cing nying mtshams sbyor ba'i tshul bstan pa 'di ni ngo bo nyid la shin tu rmongs pa'i gnyen por sems kyi gsang ba la mkhas pa zhes bya ste/sngar kun gzhi'i rnam par shes pa'i ngo bo nyid dang de'i yod pa nyid dang dmigs pa'i 'jug pa rnam par gzhag pa bstan pa skabs 'dir bstan par sbyar ro/ /ngo bo nyid la shin tu rmongs pa'i gnyen po bstan pa'i tshig gi don la sogs pa bshad zin to// // de'i 'og tu rab tu dbye ba la shin tu rmongs pa'i gnyen po bstan pa'i tshig gi don la sogs pa bshad par bya ste/ de ni kun gzhi'i rnam par shes pa rab tu dbye ba rnam pa lnga la shin tu rmongs pa'i gnyen po rnam pa lnga bstan pa gang yin pa'o/ /rab tu dbye ba rnam pa lnga la shin tu rmongs pa ni mtshan nyid rab tu dbye ba la shin tu rmongs pa dang /las kyi rab tu dbye ba la shin tu rmongs pa dang / 'jug pa'i rab tu dbye ba la shin tu rmongs pa dang / kun rdzob kyi rab tu dbye ba la shin tu rmongs pa dang / don dam pa'i rab tu dbye ba la shin tu rmongs pa'o/ /de la mtshan nyid rab tu dbye ba la shin tu rmongs pa'i gnyen por bstan pa ni/blo gros yangs pa rnam par shes pa de ni len pa'i rnam par shes pa zhes kyang bya ste zhes bya ba dang / kun gzhi'i rnam par shes pa zhes kyang bya ste zhes bya ba dang / sems zhes kyang bya ste zhes bya ba'i tshig de gsum gyis bstan to/ /las kyi rab tu dbye ba la shin tu rmongs pa'i gnyen por bstan pa ni/'di lta ste lus 'di gzung zhing blangs pa'i phyir ro zhes bya ba dang / 'di lta ste lus 'di grub pa dang / bde ba gcig pa'i don gyis kun sbyor ba dang / rab tu sbyor bar byed pa'i phyir ro zhes bya ba dang / 'di lta ste de ni gzugs dang / sgra dang / dri dang / ro dang / reg bya dang / chos rnams kyis kun du bsags pa dang / nye bar bsags pa'i phyir ro zhes bya ba'i tshig de gsum gyis bstan to/ /'jug pa'i rab du dbye ba la shin tu rmongs pa'i gnyen por bstan pa ni/ blo gros yangs pa len pa'i rnam par shes pa de la brten cing gnas nas zhes bya ba nas/gal te rnam par shes pa'i tshogs lnga char gyi bar dag lhan cig 'byung ba'i rkyen nye bar gnas par gyur na yang rnam par shes pa'i tshogs lnga char lhan cig 'byung ngo zhes bya ba'i bar gyis bstan to/ /kun rdzob kyi rab tu dbye ba la shin tu rmongs pa'i gnyen por bstan pa ni/ blo gros yangs pa de ltar byang chub sems dpa' chos kyi lugs shes pa la brten cing zhes bya ba nas/de tsam gyis thams cad kyi thams cad du mi 'dogs so zhes gsungs pa'i bar gyis bstan to/ /don dam pa'i rab tu dbye ba la shin tu rmongs pa'i gnyen por bstan pa ni/ blo gros yangs pa gang gi phyir byang chub sems dpa' nang gi len pa mi mthong zhes bya ba nas/ de tsam gyis 'dogs so zhes bya ba'i bar gyis bstan to/ / de la dang por mtshan nyid rab tu dbye ba la shin tu rmongs pa'i gnyen por bstan pa'i tshig gi don la sogs pa bshad par bya ste/ de ni kun gzhi'i rnam par shes pa de la len pa'i rnam par shes pa zhes kyang bya/kun gzhi'i rnam par shes pa zhes kyang bya/ sems zhes kyang bya'o zhes rnam grangs gsum gsungs pa de dag gi kun gzhi'i rnam par shes pa'i mtshan nyid rab tu dbye ba mi shes pa de'i gnyen por de gsum gyi mtshan nyid rab tu dbye ba la mkhas pa gang yin pa'o//de'i phyir blo gros yangs pa rnam par shes pa de ni len pa'i rnam par shes pa zhes kyang bya ste zhes bya ba dang / kun gzhi'i rnam par shes pa zhes kyang bya ste zhes bya ba dang / sems zhes kyang bya ste zhes bya ba gsungs te/ sngar kun gzhi'i rnam par shes pa'i ngo bo nyid bstan pa'i skabs su sa bon thams cad dang ldan pa gnas kyi dngos por gyur pa gnas kyi dngos por gnas pa la len par byed pa zhes bya ba'i tshig bzhi smos pa yang skabs 'di nyid kyis ston te/de dag gi don ni las kyi rab tu dbye ba la shin tu rmongs pa'i gnyen po bstan pa'i skabs su 'og nas 'chad do//de'i 'og tu las kyi rab tu dbye ba la shin tu rmongs pa'i gnyen po bstan pa'i tshig gi don la sogs pa bshad par bya ste/ de'i mtshan nyid sngar bstan pa de'i gtan tshigs mi shes pa'i gnyen por las 'di dang 'di lta bu byed pa'i phyir len pa'i rnam par shes pa dang / kun gzhi'i rnam par shes pa dang /sems zhes bya'o zhes snga ma'i gtan tshigs su kun gzhi'i rnam par shes pa las kyi rab tu dbye ba bstan pa gang yin pa'o/ /de la re zhig ci'i phyir len pa'i rnam par shes pa zhes bya zhe na/ de'i phyir 'di ltar 'dis lus 'di gzung zhing blangs pa'i phyir ro zhes bya ba gsungs te/de la bzung zhes bya ba ni rnam par shes pa des gzugs dang / tshor ba dang / 'du shes dang / 'du byed kyi phung po nye bar len cing mdung khyim gyi tshul du gcig la gcig brten cing gnas kyi dngos por gnas pa'o/ /blangs pa zhes bya ba ni des zin na gzugs kyi lus 'di sems can gyi dngos po bgrang ba nyid du 'gyur bar bdag gir byas pa ste/de gnyis kyis ni gnas kyi dngos por gnas par len par byed pa zhes sngar smos pa'i tshig de gnyis go rims bzhin du bstan te/ de'i phyir len pa'i rnam par shes pa zhes bya'o zhes bya bar sbyar ro/ /ci'i phyir kun gzhi'i rnam par shes pa zhes bya zhe na/de'i phyir 'di ltar de lus 'di la grub pa dang bde ba gcig pa'i don gyis kun du sbyor ba dang / rab tu sbyor bar byed pa'i phyir ro zhes bya ba gsungs te/ lus 'di la grub pa dang bde ba gcig pa'i don gyis shes par bya ba ni sems kyi dbang gis kyang lus 'di rul ba la sogs par mi 'gyur la/lus kyi 'byung ba dang / 'byung ba las gyur pa'i phan pa dang / gnod pa la sogs pa'i dbang gis kyang sems dang sems las byung ba dag bde ba dang sdug bsngal la sogs par 'gyur bar 'brel pa'i don gyis shes par bya ba'i tha tshig go/ /kun du sbyor ba zhes bya bas ni sngar kun gzhi'i rnam par shes pa'i ngo bo nyid bstan pa'i skabs su sa bon thams cad dang ldan pa gnas kyi dngos por gyur pa zhes smos pas bstan to//rab tu sbyor ba zhes bya bas ni sngar kun gzhi'i rnam par shes pa'i ngo bo nyid bstan pa'i skabs su gnas kyi dngos por gnas pa len par byed pa zhes smos pas bstan te/tshig de bzhi yang ji ltar na sa bon thams cad dang ldan pa yin zhe na/ gnas kyi dngos por gyur pa'i phyir ro/ /ji ltar na gnas kyi dngos por gnas pa yin zhe na/ len par byed pa yin pa'i phyir ro zhes tshig snga ma phyi mas bshad de/ rnam par smin pas bsdus pa kun gzhi'i rnam par shes pa'i ngo bo nyid yin par sbyar ro//yang don gzhan du na phung po lngas bsdus pa'i chos rnams kyi bag chags kyi rten yin pa'i phyir ni sa bon thams cad dang ldan pa gnas kyi dngos por gyur pa zhes gsungs te/ sngar gcig gi rkyen nyid gcig yin pas 'jug pa'i rnam par gzhag pa bstan pa'i skabs su kun gzhi'i rnam par shes pa ni rnam pa gnyis kyis 'jug pa'i rnam par shes pa'i rkyen gyi bya ba byed de/sa bon gyi dngos po dang / rten byed pas zhes smos pa dang sbyar ro/ /des zin pa mig la sogs pa'i gnas kyi dngos po nyid len pa'i phyir ni gnas kyi dngos por gnas pa len par byed pa zhes bya ba gsungs te/rnam par shes pa dang ming dang gzugs dag mdung khyim gyi tshul du gcig la gcig brten cing gnas kyi dngos por gnas pa'i phyir dang / des zin na gzugs kyang sems can gyi dngos por bgrang ba nyid du 'gyur ba'i phyir ro//yang don gzhan du na tshig bzhi po de dag gis ni mthong ba dang / gnas dang / 'phel ba dang / chud mi za ba'i bye brag gis rgyu rnam pa bzhi bstan te/ go rims bzhin no/ /yang don gzhan du na tshig bzhi po de dag gis ni kun gzhi'i don rnam pa bzhi bstan te/ 'byung ba dang ldan pa'i 'du byed rnams de la 'bras bu'i dngos por sbyor bar byed pa dang /de dag la de'i rgyu'i dngos por sbyor bar byed pa'i phyir kun gzhi zhes bya ba dang / sems can rnams de la bdag tu sbyor bar byed pa'i phyir kun gzhi zhes bya ba dang / de dang po kho nar mer mer por zhugs pa na grub pa dang bde ba gcig pa'i phyir kun gzhi zhes bya ba dang /des lus zin pa'i phyir len par byed pa'i don ni kun gzhi zhes bya ba ste/ go rims bzhin du sbyar ro/ /de ltar na tshig bzhi po de dag gis ni kun gzhi'i don gsal ba kho nar bstan pa yin te/ de'i phyir kun gzhi'i rnam par shes pa zhes bya'o zhes bya bar sbyar ro//ci'i phyir sems zhes bya zhe na/ de'i phyir 'di ltar de ni gzugs dang / sgra dang / dri dang / ro dang / reg bya dang / chos rnams kyis kun du bsags pa dang nye bar bsags pa yin pa'i phyir ro zhes bya ba gsungs te/ kun du bsags pa dang nye bar bsags pa zhes bya bas ni sngar gcig gi rkyen nyid gcig yin pas 'jug pa rnam par gzhag pa'i bstan pa'i skabs su 'jug pa'i rnam par shes pa yang rnam pa gnyis kyis kun gzhi'i rnam par shes pa'i rkyen gyi bya ba byed de/tshe 'di la sa bon yongs su brtas par byed pa dang / phyi ma la de mngon par 'grub pa'i sa bon yongs su 'dzin par byed pas so zhes smos pas bstan to// 'jug pa'i rnam par shes pa de dag nyid kyi sa bon gyis kun du bsags pa dang / de dag dmigs pa gzugs la sogs pa'i bag chags kyi nye bar bsags pa yin pas na sems zhes bya'o zhes bya bar sbyar ro/ /de ltar na lus 'di 'dzin cing len par byed pa dang /lus 'di la grub pa dang / bde ba gcig pa'i don gyis kun du sbyor ba dang / rab tu sbyor bar byed pa dang / gzugs la sogs pa'i sa bon kun du bsags pa dang / nye bar bsags pa'i bag chags sogs par byed pa nyid de'i las yin te/ sngar kun gzhi'i rnam par shes pa'i las ni snod rnam par rig pa dang / gnas rnam par rig par byed pa'o zhes smos pa yang skabs 'di nyid kyis bstan te/ de ni las kyi rab tu dbye ba la shin tu rmongs pa'i gnyen po bstan pa yin no/ /de'i 'og tu 'jug pa'i rab tu dbye ba la shin tu rmongs pa'i gnyen po bstan pa'i tshig gi don la sogs pa bshad par bya ste/de ni de ltar kun gzhi'i rnam par shes pa de nang gi len pa rnam pa gnyis la brten te skye gnas su nying mtshams sbyor bas/ de phyin chad phyi rol gyi snod rnam pa yongs su ma chad pa rnam par rig pas 'jug pa na len pa'i rnam par shes pa de nyid la brten nas 'jug pa'i rnam par shes pa'i tshogs drug po dag ji ltar 'byung zhing /yul rnams la reg pa'i rim gyis 'khor bar 'jug cing mi shes pa'i gnyen por de dag gi tshul rgya cher bstan pa gang yin pa'o/ /de'i phyir blo gros yangs pa len pa'i rnam par shes pa de la brten cing gnas nas rnam par shes pa'i tshogs drug po 'di lta ste/mig gi rnam par shes pa dang / rna ba dang / sna dang / lce dang / lus dang / yid kyi rnam par shes pa dag 'byung ngo zhes bya ba la sogs pa gsungs so/ / 'dis ni 'jug pa'i rnam par shes pa de dag gi ngo bo nyid dang / gnas dang / dmigs pa dang / grogs dang / las dang / yod pa nyid dang / rab tu dbye ba dag gis ci rigs par ston to/ /de la rnam par shes pa dang bcas pa'i mig ces bya bas ni de dag dang mtshungs pa'i mig la sogs pa ma gtogs par mtshungs pa'i mig bstan te/ des ni mig gi rnam par shes pa'i lhan cig 'byung ba'i gnas bstan to//gzugs rnams zhes bya bas ni gzugs bstan du med la/ thogs pa dang bcas pa la sogs pa ma gtogs par gzugs bstan du yod la/ thogs pa dang bcas pa bstan te/ des ni mig gi rnam par shes pa'i dmigs pa bstan to//mig gi rnam par shes pa 'byung ste zhes bya bas ni mig la brten nas gzugs so sor rig pa'i rnam par shes pa bstan te/ des ni mig gi rnam par shes pa'i ngo bo bstan to/ /mig gi rnam par shes pa de dang lhan cig rjes su 'jug pa dus mtshungs pa dang / spyod yul mtshungs pa dang / rnam par rtog pa yid kyi rnam par shes pa yang 'byung ngo zhes bya ba la/ lhan cig rjes su 'jug pa zhes bya ba ni mig gi rnam par shes pa dang lhan cig 'byung ba ste/ des ni mig gi rnam par shes pa dang / rnam par rtog pa'i yid kyi rnam par shes pa lhan cig gi dngos pos 'jug pa rnam par gzhag pa bstan to//dus mtshungs pa zhes bya bas ni skad cig kho na la snga phyi med par 'byung ba ste/ des ni mig gi rnam par shes pa dang / rnam par rtog pa'i yid kyi rnam par shes pa gcig gi rkyen nyid gcig yin pas 'jug pa rnam par gzhag pa bstan to//spyod yul mtshungs pa zhes bya bas ni dmigs pa'i rnam pa gcig kho na la bar du ma chod par 'byung ba ste/ des ni mig gi rnam par shes pa dang / rnam par rtog pa'i yid kyi rnam par shes pa dmigs pas 'jug pa rnam par shes pa bstan to/ /grogs dang mtshungs par ldan par 'jug pa rnam par gzhag pa yang ci rigs par rig par bya ste/de yang mig gi rnam par shes pa de dang lhan cig 'byung zhing mtshungs par ldan pa sems las byung ba'i chos kun du 'gro ba lnga po yid la byed pa dang / reg pa dang / tshor ba dang / 'du shes dang / sems pa dag go/ /kun du 'gro ba lnga po de dag ni gang gi tshe mig gi rnam par shes pa skye ba de'i tshe na/gdon mi za bar 'byung ba yin pas na grogs kyang yin la mtshungs par ldan pas 'jug pa yang yin te/ ji ltar gdon mi za bar 'byung zhe na/ bcom ldan 'das kyis mig kyang yongs su ma nyams la/ gzugs kyang snang bar 'gyur du zin kyang de dang 'byung ba yid la byed pa nye bar gnas par ma gyur na/de dang 'byung ba'i mig gi rnam par shes pa 'byung bar mi 'gyur gyi/ 'di ltar mig kyang yongs su ma nyams la gzugs kyang snang bar gyur cing de dang 'byung ba yid la byed pa yang nye bar gnas par gyur na de'i phyir de dang 'byung gi mig gi rnam par shes pa 'byung bar 'gyur ro//mig dang gzugs la brten nas mig gi rnam par shes pa 'byung ste/ gsum 'dus pa'i reg pa'o/ /reg pa dang lhan cig skyes pa ni tshor ba dang / 'du shes dang / sems pa'o zhes gsungs pas/ de'i phyir de dag mig gi rnam par shes pa skye ba'i tshe na gdon mi za bar 'byung ba yin no/ /'o na ci'i phyir lnga kho nar nges she na/ de dag las gang yang rung ba zhig med na yul gyi longs spyod kyi bya ba yongs su rdzogs par mi 'gyur ba'i phyir ni nyung ba ma yin la/ 'dun pa dang mos pa la sogs pas gzhan dag gi yul so sor nges pa yin pas kun du 'gro ba ma yin pa'i phyir ni mang ba ma yin te/bcom ldan 'das kyis kyang yid la byed pa dang sems pa med na ma bsgrubs shing mngon par 'dus ma byas par rnam par shes pa mi 'byung la/ 'du shes dang tshor ba med na yul la mtshan mar 'dzin pa dang /myong ba med par 'gyur bas rnam par shes pa 'byung ba ni don med par 'gyur ro/ /reg pa med na tshor ba dang / 'du shes dang / sems pa dag kyang rten med pas mi 'byung ba'i phyir lnga las nyung ba yang ma yin la/ 'dun pa ni 'dod pa'i dngos po kho na las byung gi gzhan yang ma yin la/mos pa yang nges pa'i dngos po kho na las byung zhing gzhan la ma yin te/ de dag la sogs pa gzhan yang 'khrul pa yod pas ma nges pa'i phyir lnga las mang ba yang ma yin te/ de'i phyir kun du 'gro ba ni lnga kho nar zad do zhes gsungs so/ /kun du 'gro ba lnga po de dag ni rnam par shes pa'i tshogs thams cad dang /dge ba dang / mi dge ba dang / lung du ma bstan pa'i chos thams cad dang lhan cig 'byung ba yin pas mig gi rnam par shes pa'i skabs 'dir yang gnas dang / dmigs pa dang / gnas pa dang / rdzas dang / dus mtshungs pas 'jug par rig par bya'o//de lta mod kyi sgo lnga'i rnam par shes pa dang mtshungs par ldan pa rnams ni yid kyi rnam par shes pa'i dbang gis dge ba'am/ mi dge ba'i rgyud du 'byung bar zad kyi/ ngo bo nyid ni lung du ma bstan pa yin te/ sgo lnga'i rnam par shes pa dag rtog pa byed pa'i phyir ngo bo nyid kyi lung du ma bstan pa yin pas/de dag dang mtshungs par ldan pa'i chos rnams kyang lung du ma bstan pa yin pa'i phyir ro/ /sems las byung ba'i chos gzhan gang dag mig gi rnam par shes pa dang lhan cig 'byung zhing mtshungs par ldan pa de dag ni dmigs pa gcig la rnam pa du ma re re 'byung ba zhes bya ste/de yang ji lta bu zhe na/ 'dun pa la sogs pa yul so sor nges pa lnga dang / dad pa la sogs pa dge ba bcu gcig dang 'dod chags la sogs pa nyon mongs pa drug dang / khro ba la sogs pa nye ba'i nyon mongs pa mang po dag ni rnam pa du ma yod pa bzhin du de dag gi dmigs pa yang du ma yod pa ma yin te/yul drug po gang yang rung ba cig gi spyi la dmigs pas na dmigs pa can gcig pa zhes gsungs so/ /da ltar dmigs pa'i dngos po gcig yin pas dmigs par mtshungs kyang dmigs pa'i dngos po gcig la yang rnam pa du ma yod de/dmigs pa'i rnam pa tha dad pas de 'dzin pa'i sems las byung ba yang rnam pa tha dad pa'i phyir rnam pa du ma zhes gsungs so/ /dmigs pa'i rnam pa gcig la sems las byung ba yang sde tshan gcig las rdzas gcig kho nar 'byung gi /gnyis pa mi 'byung bas re re 'byung zhes gsungs te/de dag gi tshul ni zhib tu 'og nas bstan to/ /rnam par rtog pa'i yid kyi rnam par shes pa yang 'byung ngo zhes bya ba ni mig gi rnam par shes pa dang lhan cig gi dngos po 'jug pa rnam par rtog pa yid kyi rnam par shes pa'i ngo bo nyid bstan te/ yid kyi rnam par shes pa ni rnam pa gsum ste/nye bar gnas pa las byung ba dang / tshor ba dang nges pa'o/ /de la nye bar gnas pa las byung ba ni skad cig ma dang po la/ dmigs pa nye bar gnas pa la brten nas/ sgo lnga'i rnam par shes pa dang lhan cig 'byung ba rang gi mtshan nyid la dmigs pa yin no//tshor ba ni skad cig ma gnyis pa la snga ma'i rjes su spyod pa spyi'i mtshan nyid la dmigs pa yin no/ /nges pa ni skad cig ma gsum pa la yul nges par gcod pa la spyi'i mtshan nyid la dmigs pa yin no/ /skabs 'dir ni nye bar gnas pa las byung ba yin par rig par bya'o/ / de dag gi tshul bzhin du bshad na/ de la nye bar gnas pa las byung ba zhes bya ba ni 'byung ba'i rkyen nye bar gnas pa las byung ba rnam par rtog pa'i yid kyi rnam par shes pa ste/ de ni rang gi mtshan nyid 'ba' zhig la dmigs pa yin gyi/ spyi'i mtshan nyid la dmigs pa ni ma yin no//rang gi mtshan nyid la dmigs pa la yang rkyen ji lta ba bzhin du lan 'ga' ni rang gi yul gyi rang gi mtshan nyid 'ba' zhig la gnas so/ /lan 'ga' ni rang dang gzhan gnyis ka'i yul gyi rang gi mtshan nyid la dus gcig kho na dmigs par byed do/ /de la re zhig rang gi yul gyi rang gi mtshan nyid la dmigs pa ni gzugs med pa'i khams sam/gzugs can gyi khams na yang / sgo lnga'i rnam par shes pa gzhan gyi yul nye bar gnas par ma gyur pa'i gnas skabs na rang gi yul chos kyi khams bdun po dag las gang nye bar gnas par gyur pa de'i rang gi mtshan nyid yul dang /dus dang / rang bzhin gyis ma bskal bas bsdus pa gang yin pa de dang / skad cig gcig la dus gcig kho nar 'byung zhing yul de la bye brag tu gcod pa ni mi byed par de'i don tsam la dmigs par byed pa ste/ de ni yul gyi gzugs brnyan gyi ngo bo nyid yin no/ /rang dang gzhan gnyis ka'i yul gyi rang gi mtshan nyid la dus gcig kho nar dmigs pa ni rang gi yul dang sgo lnga'i rnam par shes pa rnams kyi yul rkyen ji lta ba bzhin du/yul gcig gam gnyis sam/ lnga char gyi bar dag las gang yang rung ba gcig gam gnyis sam/ lnga char gyi bar dag nye bar gnas par gyur ma thag tu rang gi yul nye bar gnas pa de nyid kyi rang gi mtshan nyid la yang dmigs bzhin du sgo lnga'i yul de dag la yang /sgo lnga'i dbang po gang gi yul gyi yul nye bar gnas par gyur pa'i dbang po gang yang rung ba gcig gam/ lnga char gyi bar dang de dang 'byung ba sgo lnga'i rnam par shes pa yang gang gi yul nye bar gnas par gyur pa'i rnam par shes pa gang yang rung ba gcig gam lnga char gyi bar gyi yul dang /dbang po dang rnam par shes pa de dag dang / skad cig dang po la dus gcig kho nar lhan cig 'byung zhing / yul de la bye brag tu gcod par ni mi byed par de'i rang gi mtshan nyid kyi don tsam la dmigs par byed pa ste/de yang yul gyi gzugs brnyan gyi ngo bo nyid yin no/ /nye bar gnas pa las byung ba'i yid kyi rnam par shes pa de dang lhan cig tu 'byung ba'i sgo lnga'i rnam par shes pa de dag kyang nye bar gnas pa las byung ba zhes bya ste/de dag kyang dbang po dang yul de dang 'byung ba yid la byed pa la sogs pa 'byung ba'i rkyen nye bar gnas pa las byung ba yin pa'i phyir ro/ /de dag kyang spyi'i mtshan nyid la dmigs pa ma yin te/ rang rang gi yul gyi rang gi mtshan nyid la bye brag tu gcod par mi byed par don tsam la dmigs par byed pa yul gyi gzugs brnyan gyi ngo bo nyid yin te/de la bye brag tu na de dag gi ngo bo nyid kyis rnam par mi rtog pa nyid yin no/ /de la tshol ba zhes bya ba ni de ltar skad cig dang po la nye bar gnas pa las byung ba'i yid kyi rnam par shes pa rang gi yul gyi rang gi mtshan nyid la dmigs te skyes kyang rung sgo lnga'i rnam par shes pa'i yul la dmigs te/sgo lnga'i rnam par shes pa dang lhan cig skyes kyang rung ste/ der skyes pa'i mjug thogs kho nar skad cig gnyis pa la 'byung zhing / sngar nye bar gnas pa las byung ba'i yid kyi rnam par shes pas rang gi yul gyi rang gi mtshan nyid la dmigs pa'i yul de 'das pa de yang rung /sgo lnga'i rnam par shes pa gzhan gyi yul la dmigs pa'i yul 'das pa de yang rung ste/ des yul gyi rang gi mtshan nyid kyi don tsam so sor rig pa'i yul 'das pa de nyid kyi spyi'i mtshan nyid gang yin pa de mngon par gsal bar bya ba'i tshul gyis yongs su tshol bar byed pa gang yin pa ste/de ni don la rnam par rtog pa dang bcas pa yul gyi gzugs brnyan gyi mtshan ma la rjes su dpyod pa dang mthun pa yin no/ /de la gang gi tshe sngar nye bar gnas pa las byung ba'i yid kyi rnam par shes pa des sgo lnga'i rnam par shes pa gzhan gyi yul nye bar ma gyur pa'i gnas skabs na rang gi yul chos kyi khams bdun po dag las gang nye bar gnas par gyur pa de'i rang gi mtshan nyid so sor rig pa'i yul 'das pa de nyid kyi spyi'i mtshan nyid gang yin pa de nyid kyi tshe mngon par gsal bar bya ba'i tshul gyis yongs su tshol bar byed pa de'i tshe na ni rang gi yul gyi spyi'i mtshan nyid 'ba' zhig la dmigs pa yin no//gang gi tshe sngar nye bar gnas pa las byung ba'i yid kyi rnam par shes pa des rang dang gzhan gyi yul rkyen ji lta ba bzhin du/ dus gcig tu nye bar gnas par gyur pa de gnyis ka'i rang gi mtshan nyid so sor rig pa'i yul 'das pa de gnyis ka'i spyi'i mtshan nyid gang dag yin pa de dag mngon par gsal bar bya ba'i tshul gyis yongs su tshol bar byed pa de'i tshe na ni rang dang gzhan gnyis ka'i spyi'i mtshan nyid la dus gcig kho nar dmigs pa zhes bya'o//de la nges pa zhes bya ba ni de ltar skad cig gnyis pa la tshol ba'i yid kyi rnam par shes pa skyes pa'i mjug thogs kho nar skad cig ma gsum pa las 'byung zhing sngar tshol ba'i yid kyi rnam par shes pas rang gi yul gyi spyi'i mtshan nyid kyang rung /rang dang gzhan gnyis ka'i yul gyi spyi'i mtshan nyid kyang rung ste/ spyi'i mtshan nyid mngon par gsal bar byas pa'i yul 'das pa de nyid la de ni sngon po'o/ /de ni ser po'o zhes bya ba la sogs pa lta bu'i 'du shes dang 'brel ba'i dran pa can gyi yid kyi rnam par shes pas yul bye brag tu gcod pa gang yin pa de/ de ni don la rnam par rtog pa dang / don de'i ming la dmigs par byed pa yang yin no//de rang gi yul gyi spyi'i mtshan nyid 'ba' zhig la dmigs pa dang / rang dang gzhan gnyis ka'i yul gyi spyi'i mtshan nyid la dus gcig kho nar dmigs pa'i bye brag kyang snga ma bzhin du ci rigs par sbyar ro/ /de ltar na gnas skabs thams cad du yang nye bar gnas pa las byung ba'i yid kyi rnam par shes pa dang sgo lnga'i rnam par shes pa ni rang gi mtshan nyid la dmigs pa yin la/tshol ba pa dang nges pa'i yid kyi rnam par shes pa gnyis ni spyi'i mtshan nyid la dmigs pa yin par rig par bya'o/ /de ltar sems gsum po de dag ni sems med pa'i gnas skabs drug po gnyid log pa sems med pa'i gnas skabs dang /brgyal ba sems med pa'i gnas skabs dang / 'du shes med pa'i snyoms par 'jug pa dang / 'du shes med pa dang / 'gog pa'i snyoms par 'jug pa dang / phung po lhag ma med pa'i mya ngan las 'das pa'i dbyings ma gtogs pa de las bzlog pa'i gnas skabs drug po dag na yid kyi rnam par shes pa rang dang gzhan gyi yul la skye ba'i gnas skabs thams cad du yang rim pa de ltar 'byung bar rig par bya'o//de la sngar yid kyi rnam par shes pa'i lam ni rang dang gzhan gyi yul gyi dmigs pa rnam par rig par byed pa dang /rang dang spyi'i mtshan nyid rnam par rig par byed pa dang / dus gsum rnam par rig par byed pa dang / skad cig gi rgyun rnam par rig pa zhes smos pa la yid kyi rnam par shes pa'i rang gi yul ni chos kyi khams bdun no/ /gzhan gyi yul ni sgo lnga'i rnam par shes pa'i yul gzugs la sogs pa lnga'o/de gnyi ga yang rang dang spyi'i mtshan nyid dang / dus gsum dang / skad cig gi rgyu thams cad kyis bsdus pa yin te/ de la rang gi mtshan nyid ni da ltar byung ba'i dus dang skad cig gcig gis bsdus pa dag go/ / spyi'i mtshan nyid ni 'das pa dang ma 'ongs pa'i dus dang / skad cig snga phyi'i rgyun gyis bsdus pa dag yin te/ rang dang gzhan gyi yul gyi rang gi mtshan nyid da ltar byung ba'i dus dang skad cig gcig gis bsdus pa yul dang ngo bo nyid kyis ma bskal pa de dag ni nye bar gnas pa las byung ba'i yid kyi rnam par shes pa dang /sgo lnga'i rnam par shes pa'i dmigs pa yin no/ /de dag gi spyi'i mtshan nyid 'das pa dang / ma 'ongs pa'i dus dang / skad cig snga phyi'i rgyun gyis bsdus pa yul dang ngo bo nyid kyis bskal pa dag ni 'tsho ba dang nges pa'i yid kyi rnam par shes pa'i dmigs pa yin no//de la ci'i phyir nye bar gnas pa las byung ba'i yid kyi rnam par shes pa'i rang gi mtshan nyid la 'jug ce na/ rang gi mtshan nyid ni mngon sum gyi yul yin la/ de la dmigs pa nye bar gnas pa las 'byung ba'i sems de yang rtog pa med pa dang ma nor ba yin pa'i phyir ro/ / ci'i phyir tshol ba pa dang / nges pa gnyis spyi'i mtshan nyid la 'jug ce na/ spyi'i mtshan nyid ni rjes su dpag pa'i yul yin la/ de la dmigs pa'i tshol ba pa dang / nges pa'i sems de gnyis kyang rtog pa dang bcas pa dang / rjes su dpog par byed pa yin pa'i phyir ro/ /sngar sgo lnga'i rnam par shes pa las ni rang gi yul rnam par rig par byed pa dang /da ltar gyi dus rnam par rig par byed pa dang / skad cig gcig rnam par rig par byed pa zhes smos pa ni thams cad kyang rang gi mtshan nyid kyis bsdus pa kho na yin pas na mngon sum gyi yul yin la/ sgo lnga'i rnam par shes pa thams cad kyang nye bar gnas pa las byung ba kho na yin pas/mngon sum gyi yul la 'jug pa'i phyir de dag ni nye bar gnas pa las byung ba yid kyi rnam par shes pa dang dmigs pa mtshungs shing cha mthun pa yin pas na nye bar gnas pa las byung ba'i yid kyi rnam par shes pa de ni sgo lnga'i rnam par shes pa gcig gi rkyen nye bar gyur na yang gcig dang lhan cig 'byung la/lnga char gyi rkyen nye bar gyur na yang lnga char dang dus gcig kho nar lhan cig 'byung ste/ de'i phyir lung las/ yid kyi rnam par shes pa gcig gis ni cig car du yul gcig gam/ gnyis sam/rab tu mang po dang / rang gi yul dang gzhan gyi yul la yang rnam par rtog par byed pas na/ de'i phyir yid kyi rnam par shes pa de'i 'jug pa ni bsam gyis mi khyab pa zhes bya'o zhes gsungs pa yang nye bar gnas pa las byung ba'i yid kyi rnam par shes pa 'di nyid las dgongs pa yin gyi tshol ba pa dang /nges pa gnyis ni ma yin te/ de gnyis ni rang gi mtshan nyid la 'jug mi srid pa dang / spyi'i mtshan nyid la yang gnas skabs tha dad par 'byung ba'i phyir ro/ /de ltar nye bar gnas pa las byung ba'i yid kyi rnam par shes pas dus gcig tu rang dang gzhan gyi yul gyi mtshan nyid kyis bsdus pa tha dad pa 'dzin pa 'di la ni 'gal ba yang med la/rnam par shes pa'i rdzas gcig kho nar zad pa rigs mthun pa'i sems gnyis sam/ gsum mam/ mang po lhan cig byung ba yang ma yin te/ 'di lta ste/ dper na mig gi rnam par shes pas dngos po gcig la rnam pa'i rkyen ji lta ba bzhin du/res 'ga' ni gzugs kyi rnam par rigs gcig par sna tshogs ma yin pa gcig tu 'dzin par byed la/ res 'ga' ni rnam pa sna tshogs du ma cig car 'dzin par byed pa la/ 'gal ba med cing rnam par shes pa'i rdzas gcig kho nar zad pas rigs mthun pa'i sems gnyis lhan cig 'byung ba yang ma yin pa bzhin no//de la dang po nye bar gnas pa las byung ba'i sems skyes pa'i gnas skabs na ni grogs dang de dang lhan cig 'byung zhing mtshungs par ldan pa sems las byung ba'i chos kun du 'gro ba lnga po dag kho nar zad de/'dun pa la sogs pa gzhan ni mi 'byung ngo / /de ci'i phyir zhe na/ de'i tshe na yul la bye brag tu gcod par mi byed pas de dag gi dmigs pa med pa'i phyir ro/ /de'i tshe na nye bar gnas pa las byung ba'i yid kyi rnam par shes pa de yul bye brag tu gcod par mi byed na ci'i phyir rnam par rtog pa zhes bya zhe na/de ni de'i tshe rtog pa shas chung bas dmigs pa'i yul gang gis rnam par shes pa de la yul gyi rnam pa bskyed pa'i rnam pa de nyid kyi rang gi mtshan nyid du rnam par shes pa de skye zhing yul bye brag tu gcod par mi byed pa'i phyir ni mngon sum gyi yul 'dzin pa yin la/mig gi rnam par shes pa dag la sogs pa ltar rang bzhin gyis rnam par mi rtog pa yang ma yin la/ de ma thag tu tshol ba pa dang / nges pa'i yid kyi rnam par shes pa'i rgyun rnam par rtog pa rags pa dang ldan pa dag kyang bskyed cing de dag gis yul gyi spyi'i mtshan nyid la rtog pa'i rang bzhin yin pa'i phyir ni rnam par rtog pa zhes bya'o//tshol ba pa'i sems skyes pa'i gnas skabs na ni grogs kun du 'gro ba lnga po de dag nyid dang 'dun pa yang 'byung bar 'gyur te/ 'dun pa ni 'dod pa'i dngos po kho na las 'byung la/ tshol ba la yang nye bar gnas pa las byung ba'i rnam par shes pas dmigs pa'i rang gi mtshan nyid so sor rig pa'i yul 'das pa de nyid la/spyi'i mtshan nyid mngon par gsal bar bya ba'i tshul gyis yongs su tshol bar byed pa yin pas de nyid 'dun pa'i dmigs pa yin pa'i phyir ro/ /de'i skabs na mos pa la sogs pa sems las byung ba'i chos lhag ma gzhan ni mi 'byung ste/de'i tshe na yul ma nges pas de dag gi dmigs pa med pa'i phyir ro/ /nges pa'i sems skyes pa'i gnas skabs na ni grogs kun du 'gro ba lnga po de dag nyid dang / sems las byung ba'i chos dmigs pa gcig la rnam pa du ma re re 'byung ba de dag kyang rang rang gi dmigs pa dang rnam pa'i rkyen ji lta ba bzhin 'byung ngo //nges pa'i sems de tshun chad ni yul bye brag tu bcad zin pa'i phyir rang gi 'dod chags la sogs pa'am/ dad pa la sogs pa dang ldan pas kun nas nyon mongs pa'am/ rnam par byang bar 'gyur zhing de ma thag tu sgo lnga'i rnam par shes pa dge ba'am mi dge ba dag 'phen par byed pas de'i rgyu las byung ba rgyu mthun pa sgo lnga'i rnam par shes pa dag kyang dge ba'am mi dge ba'i rgyu 'byung bar 'gyur te/rang gi rtog pa'i dbang gis ni ma yin no/ /de ltar skad cig dang po la nye bar gnas pa las byung ba'i yid kyi rnam par shes pa rang gi yul gyi mtshan nyid la dmigs te 'byung ba dang /sgo lnga'i rnam par shes pa gzhan gyi yul gyi rang gi mtshan nyid la dmigs te/ sgo lnga'i rnam par shes pa rnams dang dus gcig tu byung ba'i gnas skabs na grogs de dag dang lhan cig 'byung zhing mtshungs par ldan pa sems las byung ba kun du 'gro ba lnga po dag kho nar zad de/'dun pa la sogs pa gzhan dag mi 'byung na sgo lnga'i rnam par shes pa yang sems las 'byung ba'i chos dge ba dang / mi dge ba dang lung du ma bstan pa dmigs pa gcig la rnam pa du ma re re 'byung ba dang lhan cig 'byung zhing mtshungs par ldan no zhes bya ba de sgo lnga'i rnam par shes pa ni skad cig de nyid la byung ma thag tu gtan 'gag cing dus phyi mar sdod pa med pas ji ltar rung zhe na/de ni sngar de dag gi las bshad pa'i skabs su yid kyi rnam par shes pa ni dge ba dang mi dge ba'i chos rnams 'jug cing rjes su 'jug par byed do zhes bya ba dang /sgo lnga'i rnam par shes pa yang / yid kyi rnam par shes pa'i dge ba dang nyon mongs pa can gyi rjes su 'jug par byed do zhes bstan pas rig par bya ste/ de yang ji lta bu zhe na/ sngar skad cig gsum pa la nges pa'i sems skyes pa'i gnas skabs na grogs sems las byung ba'i chos kun du 'gro ba lnga dang ldan zhing dge ba dang /nyon mongs pa dang / lung du ma bstan pa dmigs pa gcig la rnam pa du ma re re 'byung ba rnams las kyang dge ba'am/ yang na nyon mongs pa'am/ yang na lung du ma bstan pa gang yang rung ba cig gi yul nye bar gnas pa nges par gyur pa na/skad cig de nyid la yid kyi rnam par shes pa nges pa de nyid ji srid du gzhan du ma yengs kyi bar du dmigs pa mtshungs pa de nyid la sems las byung ba dge ba'am/ nyon mongs pa'am/ lung du ma bstan pa gang yang rung ba pa mang po pa de dag dang gnas dang /dmigs pa dang / rnam pa dang / rdzas dang / dus mtshungs pas mtshungs par ldan zhing 'byung ste/ de'i tshe na nges pa'i yid kyi rnam par shes pa de dag nyid sems las byung ba gang yang mtshungs par ldan pa de nyid kyi dbang gis yang na ni dge bar 'gyur/ yang na ni nyon mongs par 'gyur/ yang na ni lung du ma bstan par 'gyur zhing / nges pa'i sems dge ba'am/ nyon mongs pa can nam/ lung du ma bstan pa gang yin pa de yid la byed pa la sogs pa kun du 'gro ba lnga po dang / sa mang po pa dge ba'am/ nyon mongs pa can nam/ lung du ma bstan pa gang dag dang mtshungs par ldan pa de dag gi dbang gis de'i mjug thogs su 'byung ba'i skad cig phyi ma la nye bar gnas pa las byung ba'i sgo lnga'i rnam par shes pa 'phen par byed de/des 'phangs nas skad cig phyi ma de la nye bar gnas pa las byung ba'i sgo lnga'i rnam par shes pa sngar bstan pa'i tshul bzhin du rang gi yul la dbang po dang /de dang lhan cig byung ba nye bar gnas pa las byung ba'i yid kyi rnam par shes pa dang dus gcig tu skyes pa de/ de nyid 'phen cing kun nas slong ba'i nges pa'i yid kyi rnam par shes pa dge ba dang ldan pas kun nas bslang ba yin na ni dge ba dang ldan pa zhes bya'o/ / nyon mongs pa dang ldan pas kun nas bslang ba yin na ni nyon mongs pa dang ldan pa zhes bya/lung du ma bstan pa dang ldan pas kun nas bslang ba yin na ni lung du ma bstan pa dang ldan pa zhes bya ste/ de ltar na sgo lnga'i rnam par shes pa de nyid ni chos las byung ba'i sems dge ba dang mi dge ba dag gi rdzas dngos dang ldan pa ma yin gyi/'phen pa dang nges pa'i yid kyi rnam par shes pa dge ba'am/ nyon mongs pa'am/ lung du ma bstan pa gang dang ldan pas 'phangs pa de'i dbang kho nas dge ba'am/ nyon mongs pa'am/ lung du ma bstan pa'i rgyud du 'byung ba'i phyir de ni gzhan gyi dbang kho nas 'jug pa zhes bya'o//sgo lnga'i rnam par shes pa yang de dag dang lhan cig 'byung zhing mtshungs par ldan no zhes bya ba'i sgra ni 'phen pa nges pa'i yid kyi rnam par shes pa chos de dag dang mtshungs par ldan pa des sgo lnga'i rnam par shes pa bskyed pa'i phyir rgyu la 'bras bu btags te brgyud pa'i sgo nas de skad gdags par zad kyi dngos su lhan cig 'byung zhing mtshungs par ldan pa ni ma yin no//de lta bas na sgo lnga'i rnam par shes pa nye bar gnas pa las 'byung ba skyes pa'i skad cig de nyid kyi gnas skabs na sems las byung ba kun du 'gro ba lnga po ma gtogs pa gzhan gang yang med pas de'i phyir lung las kyang /sgo lnga'i rnam par shes pa'i ngo bo nyid ni lung du ma bstan pa yin no zhes gsungs par rig par bya'o/ /sgo lnga'i rnam par shes pa dang lhan cig 'byung ba nye bar gnas pa las byung ba'i yid kyi rnam par shes pa de yang / bdag nyid gang gis 'phangs pa'i nges pa'i yid kyi rnam par shes pa dge ba la sogs pa gang dang mtshungs par ldan pas 'phangs shing bskyed pa de dang rgyu mthun par dge ba'am/mi dge ba'am/ lung du ma bstan pa'i rgyud du 'byung bar zad kyi/ dge ba la sogs pa'i chos de dag dngos po dang mtshungs par ldan pa ni ma yin te/dge ba la sogs pa de dag sa bon gyi gnas dang de ma thag pa'i gnas ma gtogs par lhan cig 'byung ba'i gnas dang / dmigs pa dang / rnam pa dang / rdzas dang / dus rnams las gang yang mi mtshungs pa'i phyir ro/ /de lta bas na gzhung gzhan dag las kyang yid kyi rnam par shes pa rtsol ba med cing rnam par g.yengs pa dang /ma 'dres pa la dmigs pa la ni 'dun pa la sogs 'jug pa med de yid kyi rnam par shes pa de ni nye bar gnas pa las byung ba zhes brjod par bya'o zhes ji skad bshad pa lta bu'o/ /de ltar 'phen pas nges pa'i yid kyi rnam par shes pa'i dge ba dang /mi dge ba la sogs pa'i dbang gis de'i mjug thogs su skad cig phyi ma la byung ba nye bar gnas pa las byung ba'i yid kyi rnam par shes pa dang / sgo lnga'i rnam par shes pa dag rgyus kun nas bslang ba dang / de'i skad cig mas kun nas bslang bas dge ba'am/mi dge ba la sogs pa'i rgyud du rgyun mi 'chad par 'byung ba de ni yid kyi rnam par shes pas dge ba dang / mi dge ba'i chos rnams 'jug cing rjes su 'jug par byed pa zhes bya'o/ /nye bar gnas pa las byung ba'i sgo lnga'i rnam par shes pa de dag nyid rtog pa med pa yin yang des dmigs pa'i yul yid bde ba'am/yid mi bde ba'i gnas dang mthun pa gang nye bar gnas par gyur pa de'i rang gi mtshan nyid kyi don tsam so sor rig pa la brten nas/ de'i rjes la tshol ba pa'i yid kyi rnam par shes pas yul 'das pa de'i spyi'i mtshan nyid mngon par gsal bar byas pa la nges pa'i yid kyi rnam par shes pas bye brag tu gcod pa na/sngar nye bar gnas pa las byung ba'i rnam par shes pas yul yid bde ba'i gnas dang mthun pa'i rang gi mtshan nyid so sor rig pa'i spyi'i mtshan nyid la bye brag tu bcad na ni nges pa'i yid kyi rnam par shes pa de dge bar 'gyur la/de las bzlog pa ni nyon mongs pa can du 'gyur ba de ni sgo lnga'i rnam par shes pa yid kyi rnam par shes pa'i dge ba dang / nyon mongs pa can gyi rjes su 'jug pa zhes bya ste/ de ltar na yid kyi rnam par shes pa ni rang dang gzhan gyi dbang gnyis kas 'jug la/ sgo lnga'i rnam par shes pa ni gzhan gyi dbang kho nas so//sngar de dag gi las bshad pa'i skabs su yid kyi rnam par shes pa ni lam rnams 'jug cing rjes su 'jug par byed do zhes bya ba dang / de las gzhan pa'i rnam par shes pa'i tshogs rnams kyi sdug pa dang mi sdug pa'i 'bras bu yang yongs su 'dzin te/de'i rgyu las byung ba rgyu mthun pa kun nas slong ba'i phyir ro zhes bya ba dang / sgo lnga'i rnam par shes pa yang yid kyi rnam par shes pa la kun nas slong ba'i rjes su 'jug pa dang / sdug pa dang mi sdug pa'i 'bras bu yongs su 'dzin par byed do zhes bstan pa dag kyang dge ba dang /nyon mongs pa can gyi tshul bstan pa de nyid ji lta ba bzhin du sbyar ro/ /de dag ni spyir rnam par shes pa skye ba'i tshul bstan pa yin gyi/ skabs 'dir mdo las rnam par rtog pa'i yid kyi rnam par shes pa yang 'byung ngo zhes gsungs pa ni nye bar gnas pa las byung ba'i yid kyi rnam par shes pa nyi tsher gzung bar bya'o//'dir rnam par shes pa 'jug pa'i rab tu dbye ba bstan pa ni mdor na lhan cig byung ba'i mig gi dbang po dang / dmigs pa gzugs dang / de dang byung ba mig gi rnam par shes pa dang / de dang lhan cig byung ba nye bar gnas pa las byung ba'i yid kyi rnam par shes pa rnams ni skad cig kho na la snga phyi med par dus gcig tu 'byung bar bzhed do//de ci'i phyir zhe na/ mig gi dbang po ni mig gi rnam par shes pa lhan cig 'byung ba'i gnas yin la/ gzugs ni mig gi rnam par shes pa gzugs gang gi rnam pa skyes pa de nyid kyi rang gi mtshan nyid yin pa dang /de dang lhan cig 'byung ba nye bar gnas pa las byung ba'i yid kyi rnam par shes pa ni mig gi rnam par shes pa de dang lhan cig 'jug pa dus mtshungs pa/ spyod yul mtshungs pa/ rnam par rtog pa'i yid kyi rnam pa yang 'byung ngo zhes gsungs pa nyid yin pas de dag ni dus tha dad pa ma yin pa'i phyir ro//de la la la dag 'di snyam du bcom ldan 'das kyis mig dang gzugs rnams la brten nas mig gi rnam par shes pa 'byung ngo zhes gsungs pa na/ brten nas zhes bya ba'i sgra skad cig dang po la mig dang gzugs phrad pa la brten nas skad cig gnyis pa la mig gi rnam par shes pa 'byung la/skad cig gsum pa la des drangs pa'i yid kyi rnam par shes pa 'byung bas de dag ni dus tha dad do snyam na/ de ni de lta ma yin te/ brten nas zhes bya ba'i sgra ni rten cing 'brel par 'byung ba rgyu la brten te/ 'bras bu 'byung ba'i tshul bstan par zad kyi/ dus snga phyi yod pa ni ma yin te/ dper na mdung khyim dang 'dra'o/ /de yang cis mngon zhe na/ bcom ldan 'das kyis rten cing 'brel par 'byung ba'i don ni rnam pa bcu gnyis su gsungs te/ 'di lta ste 'di yod pas 'di 'byung la/ 'di skyed pa'i phyir 'di skye ba zhes gsungs pa yin te/ de la 'di yod pas 'di 'byung la zhes bya bas ni sems dang sems las byung ba dang / dbang po dang / yul dang rnam par shes pa la sogs pa dus gcig tu 'byung ba'i rten cing 'brel par 'byung ba rgyu dang 'bras bu mgo mnyam pa rnams kyi dbang du mdzad de gsungs pa yin pas/'dir mig dang gzugs rnams la brten nas zhes bya ba yang de gnyis ni rgyu yin la/ rnam par shes pa ni 'bras bu yin pas rgyu la brten te 'bras bu 'byung ngo zhes rgyu dang 'bras bu'i tshul bstan pa yin gyi dngos su na de dag ni dus gcig pa yin te/'di ltar mig ni mig gi rnam par shes pa'i lhan cig 'byung ba'i gnas yin la/ gzugs ni mig gi rnam par shes pa'i gzugs gang gi rnam par skyes pa de nyid kyi mtshan nyid yin pas de dag ni snga phyi med de/ dper na sems dang sems las byung ba'i chos rnams rgyu dang 'bras bu yin yang dus mtshungs pa dang 'dra'o//de la 'di skyes pa'i phyir 'di skye ba zhes bya ba ni sa bon dang myu gu la sogs pa dus snga phyir byung ba'i rten cing 'brel par 'byung ba'i rgyu ni snga la/ 'bras bu ni 'phyi ba rnams kyi dbang du mdzad de gsungs pa yin pas de dag la ni snga phyi yod pas rtag tu rung gi /mig dang / gzugs dang / mig gi rnam par shes pa la ni snga phyi med de/ dus gcig pa yin par rig par bya'o/ /mig gi rnam par shes pas drangs nas skad cig gsum pa la mig gi rnam par shes pa 'byung ngo zhes bya ba de yang nye bar gnas pa las 'byung ba'i yid kyi rnam par shes par byar ni mi rung ste/de ni mdo 'di nyid las kyang / mig gi rnam pa de dang lhan cig rjes su 'jug pa dus mtshungs pa/ spyod yul mtshungs pa/ rnam par rtog pa'i yid kyi rnam par shes pa yang 'byung ngo zhes gsungs pa yin no//dus dang dmigs pa tha dad ces byar yang mi rung la/ gzhung gzhan dag las kyang yid kyi rnam par shes pa ni rang dang gzhan gyi yul la 'jug go zhes 'byung bas/ mig gi yul la yang 'jug par ni nges na/ de la mig gi rnam par shes pa ni skad cig gcig rnam par rig pa yin pas rang gi yul skad cig gcig la nye bar gyur pa de nyid kyi rnam pa so sor rig nas yul dang bcas te 'gags pas skad cig phyi ma la yid kyi rnam par shes pa 'byung tsam na snga ma'i mig dang /mig gi rnam par shes pa dang / mig gi yul de nyid la 'gags zin pas/ mig gi yul zhes bya ba'i rang gi mtshan nyid ci yang med pa'i phyir yid kyi rnam par shes pa skad cig phyi ma la byung ba de mig gi yul la dmigs zhes byar mi rung ngo //mig gi yul la ni mi 'jug gi /mig gi yul 'gags pa'i spyi'i mtshan nyid la rjes su 'jug pa la bya'o zhe na/ de ni tshol ba'am/nges pa'i yid kyi rnam par shes pa gzhan gyi yul gyi spyi'i mtshan nyid la dmigs pa nyid yin pas brtsad du med de/ /de lta na lhan cig 'byung ba'i gnas mig gi dbang po dang / dmigs pa gzugs dang / de dang 'byung ba mig gi rnam par shes pa dang / de dang lhan cig 'byung ba nye bar gnas pa las byung ba'i yid kyi rnam par shes pa dang /grogs de dang lhan cig 'byung zhing mtshungs par ldan pa sems las byung ba kun du 'gro ba lnga la sogs pas mang po dag ni skad cig kho na la dus gcig tu 'byung bar rig par bya'o/ /tshul de ltar bstan pa ni theg pa chen po'i nges pa'i don rnam par gtan la dbab pa'i skabs 'dir sems kyi 'jug pa'i tshul yang dag par bstan pa yin no//drang ba'i don gyi mdo kha cig dang nyan thos sde pa gzhan gyi lung dag las tshul gzhan du bstan pa ni gdul ba byis pa'i shes rab can dag gi dbang du mdzad pa yin pas de dag gi rjes su 'jug par mi bya'o//chos 'di pa dang gzhan dag gi gang zag dag gi gzhung lugs kha cig las gzhan du bshad pa ni rtog ge skam po tsam du zad pas de dag dang lung 'di ni brdzun par yang mi bya'o/ /blo gros yangs pa de la rnam par shes pa dang bcas pa'i rna ba dang / sna dang / lce dang / lus dang / reg bya rnams la brten nas lus kyi rnam par shes pa 'byung ste zhes bya bas ni rna ba'i rnam par shes pa la sogs pa lhag ma bzhi'i lhan cig 'byung ba'i gnas dang / dmigs pa dang ngo bo nyid bstan te snga ma bzhin du rig par sbyar ro/ /lus kyi rnam par shes pa de dang lhan cig rjes su 'jug pa dus mtshungs pa/spyod yul mtshungs pa/ rnam par rtog pa'i yid kyi rnam par shes pa yang 'byung ngo zhes bya bas ni rna ba'i rnam par shes pa la sogs pa lhag ma bzhi dang rnam par rtog pa'i yid kyi rnam par shes pa lhan cig gi dngos pos 'jug pa rnam par gzhag pa dang /gcig gi rkyen nyid gcig yin pas 'jug pa rnam par gzhag pa dang / dmigs pas 'jug pa rnam par gzhag pa dang / grogs dang mtshungs par ldan pas 'jug pa rnam par gzhag pa dang / de dag dang lhan cig gi ngo bos 'jug pa rnam par rtog pa'i yid kyi rnam par shes pa'i ngo bo nyid bstan te /de dag kyang skad cig gcig kho na la snga phyi med par 'byung bar rig par bya ste/ snga ma bzhin du ci rigs par sbyar ro/ /gal te mig gi rnam par shes pa gcig lan cig byung na ni mig gi rnam par shes pa dang spyod yul mtshungs pa rnam par rtog pa'i yid kyi rnam par shes pa yang gcig kho na lan cig 'byung ngo //gal te rnam par shes pa'i tshogs gnyis sam/ gsum mam/ bzhi lan cig gam lnga char lan cig byung na yang der rnam par shes pa'i tshogs lnga po dag dang spyod yul mtshungs pa rnam par rtog pa'i yid kyi rnam par shes pa yang gcig kho na lan cig 'byung ngo zhes bya ba'i tshar gyis ni nye bar gnas pa las byung ba'i yid kyi rnam par shes pa rang dang gzhan gyi yul gyi rang gi mtshan nyid la dmigs pa de sgo lnga'i rnam par shes pa rnams kyi rkyen ji lta ba bzhin du gcig gam/gnyis sam/ lnga char gyi bar dang lhan cig 'byung ba nyid kyi tshul ston te/de yang ji lta bu zhe na/ sgo lnga'i rnam par shes pa rnams ni phyi rol gyi yul gyi rkyen la rag las pa yin pas 'byung ba'i rim pa dang dus nges pa med de gang gi rkyen nye bar gnas par gyur pa nyid 'byung zhing gzhan ni mi 'byung ngo / /rkyen rnams la yang nges pa med de/lan 'ga' ni gcig gi rkyen nye bar gnas so/ /lan 'ga' ni gnyis dang gsum dang bzhi'am/ lnga char gyi rkyen dus gcig tu nye bar gnas par 'gyur ro/ /de ltar gcig gi rkyen nye bar gnas par gyur na yang gang gi rkyen nye bar gnas pa de nyid kyi rnam par shes pa gcig kho na rang gi rkyen la brten te 'byung ngo //rkyen gnyis dang gsum dang bzhi'am lnga char dus gcig tu nye bar gnas par gyur na yang / sgo lnga'i rnam par shes pa lnga char dus gcig kho nar rang rang gi rkyen la brten te 'byung ngo / /sgo lnga'i rnam par shes pa de dag ni rang rang gi yul gyi rang gi mtshan nyid la dmigs pa ste/mig gi rnam par shes pa yang yul gyi rnam pa'i rkyen ji lta ba bzhin du/ gzugs kyi dngos po gcig la yang res 'ga' ni gzugs kyi rnam par rig pa gcig pa sna tshogs ma yin pa 'dzin par byed la/ res 'ga' ni rnam pa sna tshogs du ma cig car 'dzin par byed de/de ltar rnam pa sna tshogs du ma cig car 'dzin kyang shes pa'i ngo bo nyid gcig tu zad pas rigs mthun pa'i sems gnyis cig car 'byung ba yang ma yin no/ /rna ba'i rnam par shes pa la sogs pa lhag ma rnams kyang de bzhin te/ de ni sgo lnga'i rnam par shes pa skye ba'i tshul bstan pa yin no//de lta bas na nye bar gnas pa las 'byung ba'i yid kyi rnam par shes pa de yang sgo lnga'i rnam par shes pa de dag gi rkyen ji lta ba bzhin du lan 'ga' ni sgo lnga'i rnam par shes pa gcig dang gnyis dus gcig tu rkyen de nyid la brten te 'byung ngo / /lan 'ga' ni sgo lnga'i rnam par shes pa gnyis dang gsum dang bzhi'am lnga char gyi bar dang drug dus gcig tu rang rang gi rkyen de dag la brten te 'byung ngo //de de ltar dus gcig tu sgo lnga'i rnam par shes pa lnga char gyi bar dang lhan cig 'byung yang / skyes bu skar khung tha dad pa nas 'jug pa dag bzhin du rdzas tha dad pa yang ma yin te shes pa'i ngo bo nyid gcig tu zad par rigs mthun pa'i sems gnyis cig car 'byung ba yang ma yin no//shes pa'i ngo bo nyid gcig tu zad kyang rang dang gzhan gyi yul rang gi mtshan nyid kyis bsdus pa tha dad pa la yang dus gcig tu dmigs so/ / de ltar dus gcig tu dmigs kyang de'i gnas skabs na grogs kun du 'gro ba lnga dang mtshungs par ldan par zad kyi yul bye brag tu mi gcod pas sems las byung ba dge ba dang / nyon mongs pa rang gi sa pa dag med pa'i phyir dge ba dang mi dge ba'i sems mi mthun pa gnyis dus gcig tu 'byung ba yang med do//de ni lhan cig 'byung ba'i gnas dbang po gzugs can nges pa med la dmigs pa rang gi mtshan nyid yin par 'dra bas rang dang gzhan gyi gnas dmigs pa thams cad du 'gro ba yin gyi/ sgo lnga'i rnam par shes pa dag ni gnas pa dang dmigs pa so sor nges pa'i phyir thams cad du 'gro ba ma yin no//de la mdor bsdu na yid kyi rnam par shes pa'i dmigs pa ni rang dang gzhan gyi yul dang / rang dang spyi'i mtshan nyid yin la/ sgo lnga'i rnam par shes pa'i dmigs pa ni rang gi yul dang rang gi mtshan nyid kho na yin no//bye brag tu dbye na nye bar gnas pa las byung ba'i yid kyi rnam par shes pa'i dmigs pa thams cad ni rang dang gzhan gyi yul yin mod kyi/ rang dang gzhan gyi yul thams cad ni nye bar gnas pa las byung ba'i yid kyi rnam par shes pa dang dmigs pa ma yin te rang dang gzhan gyi yul gyi spyi'i mtshan nyid do//tshol ba pa dang nyes pa'i yid kyi rnam par shes pa'i dmigs pa thams cad dang rang dang gzhan gyi yul yin mod kyi/ rang dang gzhan gyi yul thams cad ni de gnyis kyi dmigs pa ma yin te/ rang dang gzhan gyi yul gyi mtshan nyid do/ /de bzhin du sgo lnga'i rnam par shes pa thams cad kyi dmigs pa ni rang gi mtshan nyid yin mod kyi/rang gi mtshan nyid thams cad ni sgo lnga'i rnam par shes pa'i dmigs pa ma yin te/ chos kyi khams kyi rang gi mtshan nyid do/ /de ltar rnam par shes pa rnams kyi 'jug pa'i rab tu dbye ba bstan pa 'di la yang sa bon gyi gnas kun gzhi'i rnam par shes pa dang de ma thag pa'i gnas rnam par shes pa rnams 'gags ma thag pa ni 'jug pa'i rnam par shes pa thams cad kyi gnas thun mong yin no//de ma thag pa'i gnas de ni kun gzhi'i rnam par shes pa rnam par gzhag pa'i skabs su ni/drug po 'gags ma thag pa yi / /rnam shes gang yin de yi de'i / /zhes gsungs pas 'jug pa'i rnam par shes pa'i tshogs drug po nyi tshe la gzhag go/ /kun gzhi'i rnam par shes pa gzhag pa'i skabs su ni 'byung ba'i go 'byed pa'i gnas skabs su ni/ rnam par shes pa rnams 'gags ma thag pa'o zhes gsungs pas rnam par shes pa brgyad car la gzhag go//gnas de ni nges pa med de/ de la re zhig skye bo rnams kyi sems yod pa'i gnas skabs na kun gzhi dang nyon mongs pa can gyi yid dang / yid kyi rnam par shes pa ni rgyun rtag tu 'jug pas rang gi snga ma 'gags ma thag pa rang gi rgyun phyi ma la skye ba'i de ma thag pa'i gnas yin no//sgo lnga'i rnam par shes pa rnams kyang thams cad dus gcig tu skye ba'i gnas skabs na ni rang ka 'gags ma thag par rang rang gi de ma thag pa'i gnas yin no/ /lnga char dus gcig tu 'gag pa ni mjug thogs su bzhi ni mi skye gang yang rung ba gcig skye na ni lnga char ni 'gags ma thag pa ni gang yang rung ba gcig skye ba de ma thag pa'i gnas yin no//bzhi ni ma skyes la gang yang rung ba gcig skyes pa de 'gags ma thag tu lnga char dus gcig tu skyes na yang gcig po'i 'gags ma thag pa de lnga char skye ba'i de ma thag pa'i gnas yin no//gnyid log pa dang brgyal ba sems med pa'i gnas skabs ni sgo lnga'i rnam par shes pa re zhig 'gags te/ rgyun chad pa phyis skye ba ni kun gzhi dang / nyon mongs pa can dang / yid kyi rnam par shes pa rgyun ma chad pa rnams kyi de ma thag pa'i gnas las skyes so//de bzhin du 'du shes med pa'i snyoms par 'jug pa dang 'du shes med pa pa sems med pa'i gnas skabs na 'jug pa'i rnam par shes pa drug po re zhig 'gags te/ rgyun chad pa phyis skye ba ni kun gzhi dang nyon mongs pa can gyi rgyun ma chad pa'i de ma thag pa'i gnas las skyes so//de bzhin du 'gog pa'i snyoms par zhugs pa sems med pa'i gnas skabs na nyon mongs pa can gyi yid la sogs pa bdun po re zhig 'gags te/ rgyun chad pa phyis skye ba ni kun gzhi'i rnam par shes pa rgyun ma chad pa'i de ma thag pa'i gnas skabs las skye'o//phung po lhag ma med pa'i mya ngan las 'das pa sems med pa'i gnas skabs na ni kun gzhi spangs pas rnam par shes pa thams cad kyi de ma thag pa'i gnas med de gnas gyur pa'i ngo bo nyid ni rgyun chad pa med par rig par bya'o/ /de la gang kun gzhi'i rnam par shes pa dang ldan pa de 'jug pa'i rnam par shes pa dang yang ldan la/gang 'jug pa'i rnam par shes pa dang ldan pa de yang kun gzhi'i rnam par shes pa dang ldan pa yin nam zhe na/ mu bzhi ste/ kun gzhi'i rnam par shes pa dang ldan la/ 'jug pa'i rnam par shes pa dang mi ldan pa ni gnyid log pa'i sems med pa dang /brgyal ba sems med pa dang / 'du shes med pa'i snyoms par 'jug pa dang / 'gog pa'i snyoms par zhugs pa la snyoms par zhugs pa dang / 'du shes med pa'i sems can rnams kyi nang du skyes pa de ci rigs par sbyar ro/ /'jug pa'i rnam par shes pa dang ldan la/kun gzhi'i rnam par shes pa dang mi ldan pa ni sems yod pa'i gnas skabs na dgra bcom pa dang / rang sangs rgyas dang / phyir mi ldog pa'i byang chub sems dpa' dang / de bzhin gshegs pa'o/ /gnyis ka dang ldan pa ni sems yod pa'i gnas skabs na de dag las gzhan pa rnams so//gnyis ka dang mi ldan pa ni dgra bcom pa dang / rang sangs rgyas dang / phyir mi ldog pa'i byang chub sems dpa' dang / de bzhin gshegs pa 'gog pa la snyoms par zhugs pa dang / phung po lhag ma med pa'i mya ngan las 'das pa'i dbyings na'o/ / rnam par shes pa lhan cig 'byung ba'i tshul bshad pa'i skabs 'di la nyan thos kyi sde pa kha cig sems rigs mi mthun pa gnyis kyang lhan cig 'byung ba med par 'dod pa de dag ni byis pa'i shes rab can dad pa'i rjes su 'brang ba yin pas de dag gi rjes su 'jug par mi bya'o/ /de bas na rnam par shes pa rigs mthun pa ni gnyis cig car mi 'byung gi rigs mi mthun pa ni rkyen ji lta ba bzhin du gcig nas gnyis rab tu mang po yang lhan cig 'byung ste/rnal 'byor pa dag gi sems ni sgo lnga'i rnam par shes pa gcig gis kyang gzhan thams cad kyi bya ba byed nus pas rnam par shes pa'i 'jug pa ni bsam gyis mi khyab par rig par bya'o//blo gros yangs pa 'di lta ste dper na zhes bya ba la sogs pa'i dpe rnam pa gnyis kyis ni sa bon gyi gnas kun gzhi'i rnam par shes pa la brten nas 'jug pa'i rnam par shes pa rnams rkyen ji lta ba bzhin du 'byung ba'i don sngar bstan pa de nyid kyi dpe ston to//de yang chu'i klung chen po 'bab pa zhes bya ba dang / me long gi dkyil 'khor yongs su dag pa'i zhes bya ba'i gnas lta bu ni kun gzhi'i rnam par shes pa'o/ /rlabs dang gzugs brnyan gyi gnas lta bu ni 'jug pa'i rnam par shes pa rnams so//'byung ba'i rkyen ces bya ba ni rlung dang gzugs kyi dngos po la sogs pa dag ste/ rkyen de dag gi gnas lta bu ni de ma thag pa'i gnas 'gags ma thag pa dang / lhan cig pa'i gnas dbang po gzugs can dang / dmigs pa yul dang de dang 'byung ba yid la byed pa la sogs pa rnams yin par blta'o//'o na dpe'i dngos po gcig bstan pas chog na rnam pa gnyis smras pa la dgos pa lhag pa ci yod ce na/ don gyi gnas mtshon pa la ni dpe gcig dang chog mod kyi/ rten cing 'brel par 'byung ba'i tshul gzhan dag log par mngon par zhen pa rnam pa gnyis yod de/rgyu'i rgyun snga ma zad nas 'bras bu phyi ma rgyu med pa las 'byung ba lta bu dang rgyu nyid 'bras bu'i gnas su 'pho bar blta ba bsal ba'i phyir dpe rnam pa gnyis su gsungs te go rims bzhin du sbyar ro/ /de la chu'i klung de rang gi rgyun gyis rgyun chad par yang mi 'gyur la/ yongs su zad par mi 'gyur ro zhes bya ba ni rgyu'i rgyun snga ma zad nas 'bras bu phyi ma rgyu med pa las 'byung bar lta ba sel to//de ltar lta ba su zhe na/ 'di ltar 'di ni dge sbyong bram ze rtag pa rtag pa'i dus dang / ther zug ther zug gi dus su rgyu med par smra ba dag las kha cig ste/ de dag kyang ci'i phyir de ltar lta zhing rnam par 'jog pa la yongs su ston par byed ce na/'di ltar lung dang rigs pas byed de/ lung gang zhe na rgyu med pa kho na'o zhes de dang ldan pa gcig nas gcig tu brgyud pa dang / sde snod byin pa'i tshul gyis de dag la 'ongs pa yin no/ /rigs pa gang zhe na/ 'di ltar dge slong dang bram ze rtog ge pa spyod pa can rtog ger gtogs pa'i rang gi spobs pa las byung ba'i so so'i skye bo sa dpyod pa'i rjes su dpyod pa la gnas pa de dag bsam gtan la brten pa dang /rtog ge la brten pa'i tshul gyis rnam pa gnyis su smra ste/ de la bsam gtan la brten pa ni dge sbyong dang bram ze sngon gyi mthar rtog pa kha cig 'jig rten pa'i bsam gtan chung ngu dang 'bring dang chen po la brten nas sngon gyi gnas rjes su dran pa'i shes pas sems can dang /'jig rten gyi sngon gyi mtha' la rtog pa na tshe rabs gcig gam gnyis sam mang po zhig gam bar gyi bskal pa gcig gam gnyis sam mang po zhig gam /bskal pa chen po gcig tshun chad rjes su dran pa na de dag gi sngon rol gyi rgyu'i rgyun 'brel ba rjes su ma mthong bas 'di snyam du sems te/ sems can dang 'jig rten 'di dag dang por grub pa'i rgyu'i snga ma ni rgyun chad de med pa yin pas des ni ma bskyed kyi 'bras bu phyi ma 'di dag ni rgyu med pa las byung ba yin no snyam du sems pa ste/de dag la yang lta bar gyur pa 'di 'byung ngo / /rtog ge brten pa ni mdor bsdu na de dag gis nang dang phyi rol gyi dngos po 'di dag sus kyang bsam pa sngon du ma btang bar rnam pa sna tshogs su snang ba dang /res 'ga' rgyu rnams 'bras bu med par snang ba dang / res 'ga' glo bur du rlung ldang la res 'ga' mi ldang ba dang / res 'ga' glo bur du chu klung 'bab la res 'ga' mi 'bab pa dang / res 'ga' glo bur du shing ljon pa dag las me tog dang 'bras bu 'byung la/ res 'ga' mi 'byung ba la sogs pa mthong ba na de dag gi sngon rol gyi rgyu'i rgyun 'brel pa rjes su ma mthong bas 'di snyam du sems te/ phyi nang gi dngos po 'di dang po grub pa'i rgyu'i rgyun snga ma'i rgyun chad de med pa yin pas des ni ma bskyed kyi/ 'bras bu phyi ma 'di dag ni rgyu med pa las 'byung ba yin no snyam du sems pa ste/de dag la yang lta bar gyur pa 'di 'byung ngo / /de'i phyir de dag rten cing 'brel par 'byung ba la tshul bzhin ma yin par rtog cing rigs pas bskyed pa ma yin pa'i smras pa mang du brjod pas de bsal ba'i phyir bcom ldan 'das kyis dpe bstan pa'i skabs 'dir de skad ces gsungs so//'dir rigs pa brjod pa ni rtog ge pa bsam gtan pa'i tshul gyis smra ba de dag ni 'di skad ces brjod par bya ste/ ci sngon gyi gnas rjes su dran pa de dngos po med pa zhig rjes su dran nam 'on te sems can dang 'jig rten rjes su dran par 'dod/ gal te dngos po med pa rjes su dran zhes byar ni dngos po med na sngon gyi gnas rjes su dran zhes byar yang mi rung ngo //gal te sems can dang 'jig rten rjes su dran na ni des na 'bras bu 'di dag rgyu med pa las byung zhes byar yang mi rung ngo / /rtog ge pa rtog ge pa la brten pa'i tshul gyis smra ba de dag la ni 'di skad ces brjod par bya ste/ci'i phyir nang gi dngos po rnam pa sna tshogs su 'jug pa dang / glo bur du 'jug par snang ba de rgyu med pa'am/ 'on te rgyu yod par 'dod/ gal te rgyu med ces byar ni rgyu med na rnam pa sna tshogs su 'jug pa dang / glo bur du 'jug par snang zhes byar mi rung ngo //gal te rgyu yod na ni des na 'bras bu 'di dag rgyu med pa las byung zhes byar mi rung ngo / /de ltar na dngos po med pa rjes su dran pa dang / sems can dang 'jig rten rjes su dran pa dang rgyu med par 'jug pa dang rgyu yod par 'jug pas kyang mi rung ste/ de bas na smra ba de ni rigs pas bskyed pa ma yin no//de'i phyir chos thams cad ni rgyu dang rkyen la brten te 'byung ba yin la/ rgyu'i rgyun snga ma zad nas 'bras bu phyi ma rgyu med pa las byung ba ma yin par rig par bya'o/ /me long gi dkyil 'khor dang gzugs brnyan gyi dngos por yongs su gyur pa yang ma yin la yongs su spro bar yang mi mngon pa zhes bya ba ni rgyu nyid 'bras bu'i gnas su 'pho bar lta ba sel to//de ltar lta ba su zhe na/ 'di ltar 'di ni dge sbyong dang bram ze kha cig dang / chos 'di la kha cig 'das pa dang / ma 'ongs pa rjes su yod par smra ba dag ste/ de dag kyang ci'i phyir de ltar lta zhing rnam par 'jog pa la yongs su ston par byed ce na 'di ltar lung dang rigs pas byed de/de la rtog ge dag gi lung ni snga ma bzhin du blta bar bya'o/ /chos 'di pa dag gi lung gi mdo sde la tshul bzhin ma yin par rtog pa ste/ bcom ldan 'das kyis skye mched bcu gnyis po thams cad mtshan nyid kyis yod do zhes gsungs pa dang /'das pa'i las yod do zhes gsungs pa dang / 'das pa dang / ma 'ongs pa dang / da ltar byung ba'i 'du byed dang / khams yod do zhes gsungs pa la tshul bzhin ma yin par rtog pa'o/ /rigs pa gang zhe na rtog ge pa can rtog ger gtogs pa'i sa rang gi spobs pa las byung ba'i so so'i skye bos dpyod pa'i rjes su dpyod pa la gnas pa de dag dang /chos 'di la de bzhin gshegs pa'i gsung rab thog ma dang bar dang tha mar dge ba/ gser bzang po lta bur bsreg pa dang bcad pa dang bdar ba dang 'dra ba'i mngon sum dang rjes su dpag pa dang /lung gi tshig rnams kyis shin tu rnam par dag pa la mig bkab ste lag nom byed pa dang 'dra ba de dag gi lugs mthun te/ de dag 'di snyam du sems te chos gang rang gi mtshan nyid gang gis rnam par gnas pa de ni des yongs su grub pa yin te/gal te ma 'ongs pa de med du zin na ni des ni de'i tshe rang gi mtshan nyid ma zin par 'gyur ro/ /gal te 'das pa med du zin na ni des na de'i tshe rang gi mtshan nyid dang bral bar 'gyur ro/ /de ltar gyur na rang gi mtshan nyid yongs su ma grub pa'i skyon du 'gyur bas/ de'i phyir rang gi mtshan nyid ni yongs su ma grub ces byar mi rung ngo snyam nas des na de dag 'das pa yang yod/ma 'ongs pa yang yod de/ 'das pa thams cad ni da ltar byung ba'i rgyu yin pas rgyu de nyid dang da ltar byung ba'i 'bras bu'i gnas su 'pho la/ da ltar byung ba thams cad ni ma 'ongs pa'i rgyu yin pas rgyu de nyid ma 'ongs pa'i 'bras bu'i gnas su 'pho bar 'gyur ro zhes de ltar lta zhing de skad ces smra'o//de'i phyir de dag rten cing 'brel par 'byung ba la tshul bzhin ma yin par rtog cing rigs pas bskyed pa ma yin pa'i smra ba mang du brjod pas de bsal ba'i phyir bcom ldan 'das kyis dpe bstan pa'i phyir skabs 'dir de skad ces gsungs so//'dir rigs pa brjod pa re zhig rtog ge pa dang chos 'di pa de dag gnyis ka la spyir 'di skad ces brjod par bya ste/ ci 'das pa dang ma 'ongs pa dang da ltar byung ba'i mtshan nyid dang / mtshan nyid gcig par 'dod dam/ 'on te mtshan nyid tha dad par 'dod/gal te mtshan nyid gcig par 'dod na ni des mtshan nyid dus gsum du gzhag par mi rung ngo / /gal te mtshan nyid tha dad na ni des 'das pa dang ma 'ongs pa rang gi mtshan nyid des yongs su grub ces byar mi rung ngo / /de dag la 'di skad ces kyang brjod par bya ste/ci dus su rtogs pa'i chos rtag pa'i mtshan nyid du 'dod dam/ 'on te mi rtag pa'i mtshan nyid du 'dod/ gal te rtag pa'i mtshan nyid yin na ni des dus gsum du rtogs zhes byar mi rung ngo / /gal te mi rtag pa'i mtshan nyid yin na ni des na dus gsum du de kho na bzhin du yod do zhes byar mi rung ngo //de dag la 'di skad ces kyang brjod par bya ste/ gal te ma 'ongs pa'i chos 'du byed kyi mtshan nyid kyis yod pa kho na las da ltar gyi dus su 'byung bar 'gyur na de 'pho zhing 'byung ste/ ma 'ongs pa'i dus kyi yul nas da ltar gyi dus kyi yul du 'pho zhing 'byung bar 'gyur ram 'chi 'pho zhing 'byung ste ma 'ongs pa'i dus nas shi 'phos nas da ltar gyi dus su 'byung bar 'gyur ram/brten nas 'byung ste ma 'ongs pa de kho na bzhin du mi 'gyur bar 'dug la/ de la brten te gzhan kho na zhig da ltar gyi dus su 'byung bar 'gyur ram/ las dang bcas par 'byung ste/ma 'ongs pa'i dus na las mi byed par 'gyur ba las da ltar gyi dus su las byed pa zhig 'byung bar 'gyur ram/ mtshan nyid rdzogs par 'byung ste/ ma 'ongs pa'i dus mtshan nyid ma rdzogs par gyur pa las da ltar gyi dus su mtshan nyid rdzogs pa zhig 'byung bar 'gyur ram/mtshan nyid 'dra bar 'byung ste/ ma 'ongs pa'i dus na/ ma 'ongs pa'i dngos po dang / 'bras bu'i dngos po de gnyis mtshan nyid mi 'dra bar gyur pa las da ltar gyi dus da ltar gyi dngos po dang 'bras bu'i dngos po de gnyis kyi mtshan nyid 'dra ba zhig 'byung bar 'gyur grang na/ de yod cing 'byung bar ni rnam pa drug po de dag thams cad kyis mi rung ngo //ci'i phyir zhe na/ gal te 'byung bar gyur na des ma 'ongs pa yul na mi gnas phyogs na mi gnas pa yul na gnas mi srid pa de yul na gnas par 'gyur ba dang / ma 'ongs pa nyid nyams pas da ltar dang yang bye brag med de ther zug par 'gyur bas de ni mi rung ngo //gal te 'chi 'pho zhing 'byung bar 'gyur na/ yang des na ma 'ongs pa de shi 'phos te zhig par gyur pas ma 'ongs pa dngos 'dir ma skyes par 'gyur ba dang / ma 'ongs pa ni sngon ma byung ba dang ma skyes pa yin pas ma byung ba dang ma skyes pa la skye ba dang 'chi 'pho mi srid pa de 'dir skyes pa dang /ma 'ongs pa'i dus su shi 'phos par 'gyur bas de yang mi rung ngo / /gal te brten nas 'byung bar 'gyur na yang des na ma 'ongs pa de de kho na bzhin du mi 'gyur bar 'dug pas ther zug par 'gyur ba dang / de la brten pa de yang sngon ma byung ba yin pas ma byung ba la skye ba mi srid pas de 'dir skyes par 'gyur ba dang /de la brten te gzhan kho na zhig 'dir skyes pas ma 'ongs pa dang / dngos 'dir ma skyes pa'i phyir de yang mi rung ngo / /gal te las dang bcas par 'byung bar 'gyur na yang des ma 'ongs pa'i dus na las mi byed par 'gyur ba las da ltar gyi dus su las byed par gyur pas las de yang sngon ma byung ba yin pas ma byung ba la skye ba mi srid pa de da ltar skyes par gyur pa dang /las shig 'dir skyes pas ma 'ongs pa dngos 'dir ma skyes pa dang / ci las de yang ma 'ongs pa'i chos de dang mtshan nyid gcig gam/'on te mtshan nyid tha dad par 'dod gal te mtshan nyid gcig na ni de ma 'ongs pa'i dus na las mi byed par gyur pa las da ltar gyi dus su las byed pa zhig 'byung bar 'gyur ro zhes byar yang mi rung ngo / /gal te mtshan nyid tha dad na ni des na las de la ma 'ongs pa'i mtshan nyid med pa'i phyir ma 'ongs pa 'dir ma byung bas de yang mi rung ngo //gal te mtshan nyid rdzogs par 'byung bar 'gyur na yang des ma 'ongs pa'i dus na mtshan nyid ma rdzogs par gyur pa las da ltar gyi dus su mtshan nyid rdzogs par 'byung ba'i mtshan nyid de yang ci ma 'ongs pa'i chos de dang mtshan nyid gcig gam/'on te mtshan nyid tha dad par 'dod/ gal te mtshan nyid gcig na ni des ma 'ongs pa de nyid da ltar byung ba yin pas ma 'ongs pa dang da ltar byung ba gnyis rang bzhin 'dres par gyur pas mi rung ngo / /gal te mtshan nyid tha dad na des na ma 'ongs pa'i dus na mtshan nyid ma rdzogs pa de da ltar gyi dus su mtshan nyid rdzogs par 'gyur zhes byar yang mi rung bas de yang mi rung ngo //gal te mtshan nyid 'dra bar 'byung bar 'gyur na yang des na ma 'ongs pa'i dus na/ ma 'ongs pa'i dngos po dang / 'bras bu'i dngos po de gnyis kyi mtshan nyid mi 'dra bar gyur pa las da ltar gyi dus su da ltar gyi dngos po dang 'bras bu'i dngos po de gnyis kyi mtshan nyid 'dra bar 'byung bar 'gyur ba'i mtshan nyid de yang ci ma 'ongs pa'i chos de dang mtshan nyid gcig gam/'on te mtshan nyid tha dad par 'dod/ gal te mtshan nyid gcig na ni des na ma 'ongs pa de nyid da ltar byung ba yin pas ma 'ongs pa dang da ltar byung ba gnyis rang bzhin 'dres pa'i skyon snga ma lta bur gyur pas mi rung ngo //gal te mtshan nyid tha dad na ni des na ma 'ongs pa'i dus na mtshan nyid mi 'dra ba de da ltar gyi dus su mtshan nyid ci 'dra bar 'gyur zhes bya ba yang snga ma bzhin du mi rung bas de yang mi rung ste/de ltar na ma 'ongs pa'i chos 'du byed kyi mtshan nyid kyis yod pa kho na las da ltar gyi dus su 'byung ba ni rnam pa gang gis kyang mi rung bar khong du chud par mi bya'o/ /ma 'ongs pa dang da ltar ji lta ba bzhin du da ltar ba dang 'das pa la yang gtan tshigs 'di dag nyid dang /lan gyi lam 'di dag nyid kyis ci rigs par skyon dang ldan par blta bar bya ste/ de ltar na rang gi mtshan nyid dang / spyi'i mtshan nyid dang 'pho zhing 'byung ba dang brten nas 'byung ba dang / las dang bcas par 'byung ba dang / mtshan nyid rdzogs par 'byung ba dang /mtshan nyid 'dra bar 'byung bas kyang 'das pa dang ma 'ongs pa rdzas su yod par mi rung bas 'das pa'i rgyu nyid da ltar gyi 'bras bu'i gnas su 'pho ba dang / da ltar gyi rgyu nyid ma 'ongs pa'i 'bras bu'i gnas su 'pho bar 'gyur ro zhes smra ba de rigs pas bskyed pa ma yin no//de ltar 'thad pas bsgrubs kyang chos 'di pa dag 'di skad ces gal te 'das pa dang / ma 'ongs pa med du zin na dmigs pa med pa la ji ltar blo 'jug par 'gyur/ gal te 'jug na yang bcom ldan 'das kyis skye mched bcu gnyis po thams cad mtshan nyid kyis yod do zhes gsungs pa dang /'das pa'i las yod do zhes gsungs pa dang / da ltar byung ba'i 'du shes dang khams yod do zhes gsungs pa'i lung dang ji ltar 'gal bar mi 'gyur zhe na/ de la 'di skad ces brjod par bya ste/ ci 'jig rten na med pa la 'dzin pa'i blo mi 'jug gam 'on te 'jug par 'dod/gal te mi 'jug ces byar ni des na bdag med par 'dzin pa dang / ri bong gi rwa dang mo gsham gyi bu la sogs pa med par 'dzin pa'i blo gang yin pa de yang med pa kho na'o zhes bya bar 'gyur la/ bcom ldan 'das kyis nyan thos g.yo med pa ni ngas gdams ngag byin te/yang dag par bsgrub pa na yod pa la yod par shes med pa la yang med par shes so zhes gsungs pa'i lung dang yang 'gal bas mi rung ngo / /gal te 'jug na ni des dmigs pa med pa la ji ltar blo 'jug par 'gyur zhes byar mi rung ngo / /bcom ldan 'das kyis skye mched bcu gnyis po thams cad mtshan nyid kyis yod do zhes gsungs pa gang yin pa de yang yod pa la yod pa'i mtshan nyid yod pa dang /med pa la med pa'i mtshan nyid yod pa las dgongs nas gsungs pa yin te/ 'di ltar yod pa'i mtshan nyid kyi chos rnams dang yod pa'i mtshan nyid 'dzin pa med pa'i mtshan nyid kyi chos rnams kyang med pa'i mtshan nyid 'dzin pa'i phyir chos rnams zhes bya'o//de ltar ma yin du zin kyang rnal 'byor pas yod pa mi shes pa dang / med pa mi shes pas shes bya'i chos la rgyun chags su rtogs par mi 'gyur bas mi rung ngo / /bcom ldan 'das kyis 'das pa'i las yod do zhes gsungs pa yang 'das pa'i tshe rabs rnams su las dge ba dang mi dge ba bskyed cing 'gags pa de'i sa bon gyi phyi ma la 'bras bu 'dod pa dang /mngon par 'grub par 'gyur ba'i bag chags las dgongs nas gsungs pa yin te/ de yang mi mthun par rgyur smra ba dang rgyu med par smra ba dag gi lugs dgag pa'i don gyi dbang gnyis gzigs pas yongs su bstan to//bcom ldan 'das kyis 'das pa dang / ma 'ongs pa dang / da ltar byung ba'i 'du byed yod do zhes gsungs pa dang / da ltar byung ba'i 'du byed rang gi mtshan nyid kyis rab tu phye ba nyid las dgongs pa yin te/da ltar byung ba'i 'du byed ni 'das pa'i 'bras bu'i dngos po yin pas 'bras bu'i mtshan nyid las dgongs nas de'i rgyu 'das pa yod do zhes gsungs so/ /ma 'ongs pa'i rgyu'i dngos po yin pas rgyu'i mtshan nyid las dgongs nas de'i 'bras bu ma 'ongs pa yod do zhes gsungs so//da ltar rang gi mtshan nyid 'dzin pa las dgongs nas/ da ltar byung ba yod do zhes gsungs te/ de ltar 'du byed kyi mtshan nyid gsum po rgyu'i mtshan nyid dang / 'bras bu'i mtshan nyid do/ /rang gi mtshan nyid las dgongs pa yin no/ /de la 'das pa'i 'du byed gang zhe na/rang gi bdag nyid kyi dngos po las zhigs shing rab tu nyams par 'gyur ba'i mtshan nyid gang yin pa'o/ /da ltar byung ba'i 'du byed gang zhe na/ rang gi mtshan nyid kyi dngos po las ma zhigs shing ma nyams par skye ba tsam gyis dus la gnas pa'i mtshan nyid gang yin pa'o//ma 'ongs pa'i 'du byed gang zhe na/ rgyu ni yod cing med pa ma yin la/ rang gi mtshan nyid ma byung zhing bdag nyid ma thob pa gang yin pa'o/ /de lta bas na bcom ldan 'das kyis 'das pa dang / ma 'ongs pa'i dngos po ni med la/ da ltar byung ba'i dngos po ni yod ces gsungs te/de yang 'das pa dang ma 'ongs pa rdzas su yod par mngon par zhen pa spang bar bya ba dang / da ltar byung ba yang med do snyam du mngon par zhen pa spang bar bya ba'i don gyi dbang de gnyis gzigs pas yongs su bstan to/ /bcom ldan 'das kyis 'das pa dang / ma 'ongs pa dang / da ltar byung ba'i khams yod do zhes gsungs pa yang sa bon gyi rgyu 'bras bu bskyed zin pa'i 'das pa yin la/sa bon gyi rgyun 'byung ba 'bras bu ma bskyed pa ni khams ma 'ongs pa yin no/ /da ltar gyi sa bon gyi rgyun 'bras bu skyed par byed pa nyid ni khams da ltar byung ba yin te/ de la dgongs pa ni de yin pas 'das pa dang ma 'ongs pa rdzas su yong ba ma yin te/de'i phyir bcom ldan 'das kyi dgongs pa ma rtogs par gya tshom du smra ba ni bdag phung bar byed la/ gzhan yang the tshom gyi dpyang thag la 'dogs par byed pa yin pas sgrib pa'i rgyu byed cing / bstan pa'i tsher ma bskyed pa'i lta ba ngan pa de shin tu thag bsring bar bya ba'i rigs so zhes brjod par bya'o//de bas na mu stegs byed glang po'i rigs can tshul bzhin ma yin pa'i dregs pas smyos pa/ 'khor ba dang ngan 'gro'i g.yang sa dang gcong rong gis mi 'dzem pa de dag ni 'jig rten yongs la bslu zhing bstan pa'i dgrar gyur pa yin pas de bzhin gshegs pa'i seng ge'i sgra'i shugs kyis spa bkong ste/rigs pa'i lcags kyus rtag tu sna nas gzung zhing gdul bar bya'o/ /bde bar gshegs pa'i dgongs pa ma rtogs bzhin du rang gi rtog pa'i dra bas glags shing rang gi yul gyi gzeb la thogs nas/rta long ba bong ba'i phyi bzhin 'brang ba dang 'dra bar chos 'di par khas 'che zhing / gzhan mu stegs can dag gi gzhung lugs kyi rjes su 'brang ba de dag ni dam pa'i chos ltar bcos pa ston pa yin pas snying brtse ba'i sems nye bar gzhag ste/lung gi srab kyis rtag tu kha nas gzung zhing bkri bar bya'o/ /de'i phyir chos thams cad ni rgyu dang rkyen la brten te byung ba yin la/ rgyu nyid 'bras bu'i gnas su 'pho ba ma yin par rig par bya'o/ /rnam par shes pa'i tshogs lnga char lan cig 'byung ngo zhes bya ba'i mthar thug pa'i bar gyi dpes mtshon pa'i don ni sngar bstan pa'i lugs bzhin du sbyar bar bya ste/de ni 'jug pa'i rab tu dbye ba la shin tu rmongs pa'i gnyen po bstan pa yin no/ /de'i 'og tu kun rdzob kyi rab tu dbye ba la shin tu rmongs pa'i gnyen po bstan pa'i tshig gi don la sogs pa bshad par bya ste/kun rdzob kyi rab tu dbye ba la shin tu rmongs pa'i gnyen po zhes bya ba ni de yan chad du sems dang yid dang rnam par shes pa de dag gi ngo bo nyid dang / gnas dang / dmigs pa dang / grogs dang / las dang / de'i yod pa nyid dang / dmigs pas 'jug pa dang / mtshungs par ldan pas 'jug pa dang /gcig gi rkyen nyid gcig yin pas 'jug pa dang / lhan cig gi dngos po 'jug pa dag gis 'jug pa rnam par gzhag pa bstan pa gang yin pa de dag ni kun nas nyon mongs pa'i phyogs kyi rab tu dbye ba yin pas kun rdzob kyi rab tu dbye ba zhes bya'o/ /mi shes pa'i gnyen por rten cing 'brel par 'byung ba'i chos kyi lugs shes pa bstan pa ni de la shin tu rmongs pa'i gnyen po bstan pa zhes bya ste/de'i phyir de bstan pa'i dbang du mdzad nas/ blo gros yangs pa de ltar byang chub sems dpa'i chos kyi lugs shes pa la bstan cing chos kyi lugs shes pa la gnas nas zhes bya ba la sogs pa gsungs so//de la chos kyi lugs shes pa zhes bya ba la/ chos kyi lugs shes pa ni rten cing 'brel par 'byung ba'i chos gnas pa nyid yin te/ de yang don dam par ma skyes pa yin mod kyi/ kun rdzob tu sgyu ma dang / gzugs brnyan lta bur rgyu dang rkyen sna tshogs so sor nges pa la ltos pa tha snyad gdags par yod pa nyid yin pas na/mdo gzhan las kyang ci'i phyir rten cing 'brel par 'byung ba zhes bya zhe na/ rgyu dang bcas rkyen dang bcas pa la bya'i rgyu med rkyen med pa la ma yin te/ de'i phyir rten cing 'brel par 'byung ba zhes bya'o zhes gsungs so//de'i phyir kun rdzob tu chos gnas pa nyid ces bya zhe na/ de'i phyir mdo gzhan las kyang de la bcom ldan 'das kyis de bzhin gshegs pa rnams byung yang rung ma byung yang rung ste/ rkyen 'di pa nyid kyi 'bras bu chos rnams kyi chos nyid gnas pa gang yin pas chos gnas pa nyid dang /chos nges par 'gyur ba nyid dang / rten cing 'brel par 'byung ba mthun pa nyid dang / de bzhin nyid dang / ma nor ba de bzhin nyid dang / gzhan ma yin pa de bzhin nyid dang / yang dag pa nyid dang / bden pa kho na dang / ma nor ba nyid dang / phyin ci ma log pa nyid kyi bar du gnas pa gang yin pa de ni rten cing 'brel par 'byung ba'i mtshan nyid mdor bstan pa yin no zhes gsungs so zhes 'byung ba'i phyir te/de bas na kun rdzob tu rten cing 'brel par 'byung ba'i chos gnas pa nyid gang yin pa de ni chos kyi lugs zhes bya'o/ /shes pa zhes bya ba ni de ltar rten cing 'brel par 'byung ba'i chos gnas pa nyid gang yin pa de la gzhan mu stegs can dag gi rgyu med pa dang mi mthun pa'i rgyu las byung ba'i mtshan nyid du brtags pa de lta bu ma yin par kun rdzob tu rten cing 'brel par 'byung ba rnam par gzhag pa'i mtshan nyid lnga po rgyu dang bcas pa las 'byung ba'i mtshan nyid dang /mi rtag pa'i du ma'i rgyu las byung ba'i mtshan nyid dang / nus pa'i rkyen las byung ba'i mtshan nyid dang / byed pa med pa'i rkyen las byung ba'i mtshan nyid kyi tshul ji lta ba bzhin du rab tu shes pa so sor rtog pa'i ye shes gang yin pa'o/ /brten cing gnas zhes bya ba ni de ltar chos kyi lugs shes pa so sor rtog pa'i ye shes de la brten cing gnas nas so//de ltar chos kyi lugs shes pa la brten cing gnas nas sems dang yid dang rnam par shes pa'i gsang ba la mkhas pa ni de dag gi ngo bo nyid dang / gnas dang dmigs pa dang / grogs dang / las dang / de'i yod pa nyid la mkhas pa dang / dmigs pa la 'jug pa dang / mtshungs par ldan pas 'jug pa dang / gcig gi rkyen nyid gcig yin pas 'jug pa dang / lhan cig gi dngos pos 'jug pa dag gis 'jug pa rnam par gzhag pa la mkhas pa yin pas na de nyid kun rdzob kyi rab tu dbye ba la shin tu rmongs pa'i gnyen po la mkhas pa yin no zhes bya bar sbyar ro//des ni sngar 'phags pa blo gros yangs pas ji tsam gyis na byang chub sems dpa' sems dang yid dang rnam par shes pa'i gsang ba la mkhas pa lags zhes zhus pa'i lan btab pa yin te/de dag ni chos kyi lugs shes pa'i spyod yul gyi gsang ba la mkhas pa bstan pa yin no/ /yin yang de bzhin gshegs pa ni byang chub sems dpa' sems dang yid dang rnam par shes pa'i gsang ba la mkhas par 'dogs na de tsam gyis thams cad kyi thams cad du mi 'dogs so zhes bya ba ni de ltar chos kyi lugs shes pa'i spyod yul gyi gsang ba la mkhas pa yang 'jug pa rnam par gzhag pa la mkhas pa yin mod kyi/ldog pa rnam par gzhag pa la mkhas pa ma yin pas de tsam la mkhas par mi 'dogs kyi ldog pa rnam par gzhag pa la mkhas pa la ni mkhas par 'dogs so zhes 'og nas 'byung ba'i mig 'dren pa yin te/de la kun rdzob kyi rab tu dbye ba la shin tu rmongs pa'i gnyen por bstan pa'i tshig gi don la sogs pa bshad par bya ste/ don dam pa'i rab tu dbye ba la shin tu rmongs pa'i gnyen po zhes bya ba ni kun nas nyon mongs pa ldog pa rnam par gzhag pas kun gzhi'i rnam par shes pa gnas gyur pas bsdus pa yongs su grub pa'i ngo bo nyid gang yin pa ni don dam pa'i rab tu dbye ba zhes bya'o//de mi shes pa'i gnyen por rnam par mi rtog pa'i ye shes kyi stobs dang ldan pas sems dang yid dang rnam par shes pa mi dmigs pa'i tshul gyis rnam par mi rtog pa'i ye shes kyi spyod yul gyi gsang ba bstan pa gang yin pa ni de la shin tu rmongs pa'i gnyen po bstan pa zhes bya ste/de'i phyir de bstan pa'i dbang du mdzad nas/ blo gros yangs pa gang gi phyir byang chub sems dpa' nang gi so so len pa mi mthong zhes bya ba la sogs pa gsungs so//de la kun nas nyon mongs pa ldog pa rnam par gzhag pa gang zhe na/ kun gzhi'i rnam par shes pa ni kun nas nyon mongs pa thams cad kyi rtsa ba yin pas dge ba'i chos bsgom pas rnam par ldog par rig par bya ste/ ji ltar kun nas nyon mongs pa thams cad kyi rtsa ba yin zhe na/de ni sems can gyi 'jig rten grub par byed pa dang / snod kyi 'jig rten grub par byed pa dang / da ltar gyi sdug bsngal gyi bden pa'i ngo bo nyid gang yin pa dang / ma 'ongs pa'i sdug bsngal gyi bden pa grub par byed pa dang / da ltar gyi kun 'byung ba'i bden pa grub par byed pa yin pa'i phyir kun nas nyon mongs pa thams cad kyi rtsa ba yin no//de ltar kun nas nyon mongs pa'i rtsa ba kun gzhi'i rnam par shes pa de ni dge ba'i chos bsgom pas ldog par rig par bya ste/ dge ba'i chos bsgom pa de yang 'jug pa dang / rtogs pa dang / goms pa dang / yid la byed pa'i gnas rnams su shes par bya'o //de la 'jug pa zhes bya ba ni kun gzhi'i rnam par shes pa rtogs par bya ba'i phyir dang po so so'i skye bo'i sa nas bden pa mngon par rtogs pa la 'jug pa ste/ de yang bden pa mthong ba bden pa rnams la mig ma thob pas ni kun gzhi'i rnam par shes pa'i sa bon thams cad pas rtogs par mi nus pas de'i phyir so so'i skye bo sems gnas par bya ba'i phyir 'jug pa'i rnam par shes pa la dmigs pa'i yid la byed pas brtson par byed pa na dang po kho nar rnam par gzhag pa dang /rnam par gzhag pa'i bden pa mngon par rtogs pa la 'jug par bya ba'i phyir mthong ba'i lam gyis bsdus pa'i dge ba'i chos bsgom pa ni 'jug pa'i bsgom pa yin no//rtogs pa zhes bya ba ni kun gzhi'i rnam par shes pa'i tshul rtogs par byed pa ste/ de yang de ltar bden pa mngon par rtogs shing nyan thos kyi yang dag pa nyid skyon med pa la zhugs sam/byang chub sems dpa'i yang dag pa nyid skyon med pa la zhugs so/ /chos thams cad kyi chos kyi dbyings rtogs par byed pa na/ kun gzhi'i rnam par shes pa sa bon thams cad pas rtogs par bya ba'i phyir bsgom pa'i lam gyi sbyor bas bsdus pa'i dge ba'i chos bsgom pa ni rtogs pa bsgom pa yin no//goms pa zhes bya ba ni rtogs pa nyid kun du bsten cing lan mang du byed/ goms par byed pa ste/ de yang de ltar kun gzhi'i rnam par shes pa'i tshul rtogs pa'i 'og tu kun gzhi'i rnam par shes pa de ni 'du byed kyi rnam pa spros par bsdus pa thams cad kyi khams dang ldan pa yin pa'i phyir de la spros pa thams cad gcig tu sdud pa dang /gcig tu spung ba dang / gcig tu sogs par byed cing de kun du bsten pa dang / lan mang du bya ba dang / goms par bya ba'i phyir bsgom pa'i lam gyi khyad par gyis bsdus pa'i dge ba'i chos bsgom pa ni goms par bsgom pa yin no//yid la byed pa zhes bya ba ni khyad par gyi lam ma thob pa mthar thug par bya ba'i phyir de bzhin nyid yid la byed pa ste/ de yang de ltar kun gzhi'i rnam par shes pa la spros pa thams cad gcig tu bsogs nas de bzhin nyid la dmigs pa'i shes pas kun du bsten cing bsgom pa'i lam gyi mthar thug pas bsdus pa'i dge ba'i chos bsgom pa ni yid la byed pa bsgom pa yin te/rgyu des gnas par byed do/ /gnas gyur ma thag tu kun gzhi'i rnam par shes pa spang bar brjod par bya ste/ de spangs pa'i phyir kun nas nyon mongs pa thams cad kyang spang bar brjod par bya'o//kun gzhi'i rnam par shes pa de'i gnas ni gnyen pos bsgyur bar rig par bya ste/ kun gzhi'i rnam par shes pa ni mi rtag pa dang / len pa dang bcas pa yin la/ gnas gyur pa ni rtag pa dang / len pa med pa yin no/ /kun gzhi'i rnam par shes pa ni gnas ngan len dang ldan pa yin la/gnas gyur pa ni gnas ngan len pa thams cad dang gtan bral ba yin no/ /kun gzhi'i rnam par shes pa ni nyon mongs pa rnams kyi 'jug pa'i rgyu yin zhing lam gyi 'jug pa'i rgyu ma yin la/ gnas gyur pa ni nyon mongs pa rnams kyi 'jug pa'i rgyu ma yin zhing lam gyi 'jug pa'i rgyu yin no//kun gzhi'i rnam par shes pa ni dge ba dang / lung du ma bstan pa'i chos rnams la dbang mi byed la/ gnas gyur pa ni dge ba dang / lung du ma bstan pa'i chos rnams la dbang byed pa yin no/ /kun gzhi'i rnam par shes pa de'i spangs pa'i mtshan nyid ni de spangs ma thag tu len pa rnam pa gnyis spong ba dang /sprul pa lta bu'i lus kun du gnas pa ste/ phyi ma la sdug bsngal 'byung bar byed pa'i rgyu spangs pa'i phyi ma la yang 'byung bar byed pa'i len pa spong ba dang / tshe 'di la kun nas nyon mongs pa'i rgyu thams cad spangs pa'i phyir tshe 'di'i kun nas nyon mongs pa'i gnas ngan len pa thams cad spong ba dang /gnas ngan len pa thams cad dang bral zhing srog gi rkyen du gyur pa tsam kun du gnas pa yin no/ /de yod na lus kyi mtha' pa dang / srog gi mtha' pa'i tshor ba myong bar byed de / de'i phyir mdo las kyang 'di na de'i tshor ba thams cad de tsam gyis na yongs su gtugs par 'gyur ro zhes ji skad gsungs pa lta bu'o//de ltar kun nas nyon mongs pa'i rtsa bar rnam par gzhag pa dang / 'jug pa dang / rtogs pa dang / goms pa dang / yid la byed pa rnam par gzhag pa dang / gnas gyur pa rnam par gzhag pas kun gzhi'i rnam par shes pa'i kun nas nyon mongs pa ldog pa rnam par gzhag pa bstan pa de ni kun gzhi'i rnam par shes pa gnas gyur pas bsdus pa yongs su grub pa'i ngo bo nyid yin te/de nyid 'dir don dam pa'i rab tu dbye ba yin par rig par bya'o/ /de mi shes pa'i gnyen por 'dir rnam par mi rtog pa'i ye shes kyi stobs dang ldan pas sems dang /yid dang / rnam par shes pa mi dmigs pa'i tshul gyis rnam par mi rtog pa'i ye shes kyi spyod yul gyi gsang ba bstan pa gang yin pa ni de la shin tu rmongs pa'i gnyen po bstan pa yin par rig par bya ste/ de yang ji lta bu zhe na/ sngar ji tsam du rjes su tha snyad gdags pa'i phyir sems dang /yid dang / rnam par shes pa zhes pa dang / ngo bo nyid dang bye brag rnam par gzhag pa gang yin pa de ni kun brtags pa'i ngo bo nyid yin pas de ni mtshan nyid ngo bo nyid med pa nyid kyis ngo bo nyid med pa yin pas nam mkha'i me tog dang 'dra bar gtan med pa yin no//kun brtags pa'i tha snyad dgal ba'i sems dang yid dang rnam par shes pa rten cing 'brel par 'byung ba gang yin pa de ni gzhan gyi dbang gi ngo bo nyid yin pas de ni skye ba ngo bo nyid med pa nyid kyis ngo bo nyid med pa'i rang bzhin sgyu ma byas pa dang 'dra bar yod pa yin yang de rnam par dag pa'i dmigs pa ma yin pa'i phyir don dam pa'i ngo bo nyid med pa yin pas na don dam pa'i rab tu dbye ba ma yin no//sems dang yid dang rnam par shes pa rten cing 'brel par 'byung ba gzhan gyi dbang gi ngo bo nyid de'i de bzhin nyid gang yin pa de ni yongs su grub pa'i ngo bo nyid yin te/de ni don dam pa'i ngo bo nyid med pa nyid kyis ngo bo nyid med pa'i rang bzhin nam mkha' dang 'dra ba rnam par rtog pa'i dmigs pa chos bdag med pa yin pas de nyid rnam par mi rtog pa'i ye shes kyi spyod yul gyi gsang ba zhes bya ste/ de'i phyir byang chub sems dpa' gang rnam par mi rtog pa'i ye shes kyi stobs dang ldan pas sems dang yid dang rnam par shes pa mi dmigs pa'i tshul gyis rnam par mi rtog pa'i ye shes kyi spyod yul gyi gsang ba de lta bu la mkhas pa ni don dam pa'i rab tu dbye ba la mkhas pa yin pas na/de bzhin gshegs pa byang chub sems dpa' sems dang yid dang rnam par shes pa'i gsang ba la mkhas par 'dogs na yang de tsam gyis 'dogs so zhes bya bar sbyar ro//de ltar spyi'i don bstan nas da ni de dag gi tshig gi don bshad par bya ste/ de la nang gi zhes bya ba ni phyi rol gyi dngos po las bzlog pa ste/ des ni rnam par shes pas zin pa'i rgyud du gtogs pa thams cad bsdu bar bstan to//so so rang gi zhes bya ba ni gang zag gzhan gyi rgyud las bzlog pa ste/ des ni lung gi rjes su 'brang ba ma yin gyi/ bdag nyid kyi rtogs pa tshad mar bya ba bstan to/ /len pa mi mthong zhes bya ba ni don gang gis len pa'i rnam par shes pa zhes bya bar gdags pa mi mthong ba ste/sngar las kyi rab tu dbye ba bstan pa'i skabs su 'di ltar des lus 'di gzung zhing blangs pa'i phyir ro zhes smos pa dang sbyar ro/ /de yang gang gi tshe yang dag pa'i shes pas de bzhin nyid mthong ba'i tshe na mi mthong ste/ de nyid phyin ci ma log par yongs su grub pa dang /'gyur ba med par yongs su grub pa'i ngo bo nyid don dam pa yin pa'i phyir ro zhes bya bar sbyar ro/ /mi mthong zhes bya ba'i tshig gi don ni lhag ma thams cad la yang de bzhin du blta bar bya'o/ /len pa'i rnam par shes pa yang zhes bya ba ni sngar mtshan nyid rab tu dbye ba bstan pa'i skabs su de ni len pa'i rnam par shes pa zhes kyang bya ste zhes smos pa dang sbyar ro//de yang yang dag pa ji lta ba bzhin du yin pa dang zhes bya ba ni chos rnams kyi yongs su grub pa'i ngo bo nyid don dam pa'i chos bdag med pa ji lta ba bzhin du phyin ci ma log par mthong ba la bya'i/dmus mong gis gzugs mi mthong ba lta bu ni ma yin te/ lhag ma rnams la yang de bzhin du sbyar ro/ /kun gzhi yang zhes bya ba ni don gang gis kun gzhi'i rnam par shes pa zhes bya ba gdags pa ste/ sngar las kyi 'bras bu dbye ba bstan pa'i skabs su 'di ltar de lus 'di la grub pa dang bde ba gcig pa'i don gyi kun du sbyor ba dang /rab tu sbyor bar byed pa'i phyir ro zhes smos pa dang sbyar ro/ /kun gzhi'i rnam par shes pa yang zhes bya ba ni sngar mtshan nyid rab tu dbye ba bstan pa'i skabs su kun gzhi'i rnam par shes pa zhes kyang bya ste zhes smos pa dang sbyar ro/ /bsags pa yang zhes bya ba ni don gang gis sems zhes bya bar gdags pa ste/sngar las kyi rab tu dbye ba bstan pa'i skabs su 'di ltar de ni gzugs dang / sgra dang / dri dang / ro dang / reg bya dang / chos rnams kyis kun du bsags pa dang / nye bar bsags pa yin pa'i phyir ro zhes smos pa dang sbyar ro/ /sems kyang zhes bya ba ni sngar mtshan nyid rab tu dbye ba bstan pa'i skabs su sems zhes kyang bya ste zhes smos pa dang sbyar ro//dmigs kyang zhes bya ba la sogs pas ni rnam par shes pa rnams kyi gnas dang dmigs pa dang ngo bo nyid bstan te/ sngar 'jug pa'i rab tu dbye ba bstan pa'i skabs su gnas dang /dmigs pa dang / ngo bo nyid dang / grogs dang / las dang / 'jug pa'i mtshan nyid bstan pa thams cad dang ci rigs par sbyar ro/ /de ni byang chub sems dpa' don dam pa la mkhas pa zhes bya ste zhes bya ba ni rnam par mi rtog pa'i ye shes kyi spyod yul gyi gsang ba la mkhas pa de ni don dam pa'i rab tu dbye ba la mkhas pa yin no zhes don gyi mjug bsdu ba yin no//de tsam gyis 'dogs so zhes bya bas ni sngar 'phags pa blo gros yangs pas de bzhin gshegs pa byang chub sems dpa' sems dang / yid dang rnam par shes pa'i gsang ba la mkhas par 'dogs na yang ji tsam gyis 'dogs lags zhes zhus pa'i lan btab pa yin no//de dag ni rnam par mi rtog pa'i ye shes kyi spyod yul gyi gsang ba la mkhas pa bstan pa yin te/ de ni don dam pa'i rab tu dbye ba la shin tu rmongs pa'i gnyen po bstan pa yin no/ /de ltar mtshan nyid rab tu dbye ba la shin tu rmongs pa dang /'jug pa'i rab tu dbye ba la shin tu rmongs pa dang / kun rdzob kyi rab tu dbye ba la shin tu rmongs pa dang / don dam pa'i rab tu dbye ba la shin tu rmongs pa'i gnyen po rnam pa lnga bstan pa de dag ni rab tu dbye ba la shin tu rmongs pa'i gnyen po yin no/ / rab tu dbye ba la shin tu rmongs pa'i gnyen po bstan pa'i tshig gi don la sogs pa bshad zin to// //de'i 'og tu brgal ba'i lan la shin tu rmongs pa'i gnyen po bstan pa'i tshig gi don la sogs pa bshad par bya ste/ brgal ba'i lan la shin tu rmongs pa'i gnyen po zhes bya ba ni sems dang yid dang rnam par shes pa'i gsang ba'i tshul bstan pa 'di la sems dang yid dang rnam par shes pa gsum char yang kun rdzob tu chos kyi lugs shes pa so sor rtog pa'i ye shes kyi spyod yul du'ang gsang ba yin par 'dra la/don dam par gnas gyur pa'i shes pa rnam par mi rtog pa'i ye shes kyi spyod yul du yang gsang ba yin par 'dra ba las bcom ldan 'das kyis theg pa gdags pa rnam par gzhag pa bstan pa'i skabs su 'jug pa'i rnam par shes pa rnams ni yod pa nyid dang rab tu dbye ba'i sgo nas theg pa thams cad du yang bstan la/kun gzhi'i rnam par shes pa yod pa nyid dang rab tu dbye ba ni theg pa gzhan gyi gnas skabs su ma bstan pa de ci'i phyir ma bstan pa dang /ji ltar na de'i yod pa nyid dang / rab tu dbye bar rig par bya zhes/ zhib mo mkhas pa mdzangs pa/ rtogs pa'i shes rab dang ldan pa dag tshul bzhin du zhugs pa'i bsam pa dang / rigs pas bskyed pa'i smra bas rgol ba de dag la lan gdab pa mi shes pas rmongs pa'i gnyen por/ de ni bcom ldan 'das kyis gsang ste bstan cing rnam par gzhag pa yin pas na de'i phyir ma bstan to zhes bya ba dang / theg pa chen po gdags pa rnam par gzhag pa'i gnas skabs su de'i yod pa nyid rab tu dbye ba yang bstan to zhes dmigs kyis bsal zhing bstan pa ni brgal ba'i lan la shin tu rmongs pa'i gnyen po bstan pa zhes bya ste/de'i phyir de bstan pa'i dbang du mdzad nas/ de nas bcom ldan 'das kyis de'i tshe tshigs su bcad pa 'di dag bka' stsal to zhes bya ba la sogs pa gsungs so//de la de ni bcom ldan 'das kyis gsang ste bstan cing rnam par gzhag pa yin pas na de'i phyir ma bstan to zhes bstan pa'i phyir/ len pa'i rnam par shes pa zab cing phra/ /sa bon thams cad chu bo'i klung ltar 'bab/ /bdag tu rtog par gyur na mi rung zhes/ /byis pa rnams la ngas ni de ma bstan//zhes gsungs te/ de ni sa bon thams cad pa yin pa'i phyir gsang ba rnam par gnas pa ste/ de dag gi nang nas de ni bstan pa'i 'os ma yin pa'i phyir dang / 'jug pa'i rnam par shes pa rnams kyi sa bon gyi mtshan nyid du gnas pa'i phyir dang / rang gi mtshan nyid kyis mi gnas pa'i phyir shes par dka' bas na de'i phyir gsang ste bstan cing rnam par gzhag go zhes bya bar sbyar ro//de la lan pa'i rnam par shes pa zhes bya ba ni kun gzhi'i rnam par shes pa ste/ sngar 'di ltar des lus 'di gzung zhing blangs pa'i phyir ro zhes bstan pas bshad do/ /zab cing phra zhes bya ba ni zab pa nyid bye brag tu bya ba'i phyir phra ba zhes bya bas bstan to//yang na de ngo bo nyid kyis cha phra ba'i phyir zab pa zhes bya'o/ /gzhan gyis rtogs par dka' ba'i phyir phra ba zhes bya'o/ /sa bon thams cad ces bya ba ni sa bon thams cad dang ldan pa/ gnas kyi dngos por gyur pa/ gnas kyi dngos por gnas pa/ len par byed pa'i tshig bzhi rnam par gzhag pa sngar bstan pas bshad do/ /chu bo'i klung ltar 'bab ces kun gzhi'i rnam par shes pa nyid 'jug pa'i rnam par shes pa chu rlabs lta bu rnams kyi gnas kyi dngos pos chu bo'i klung ltar rtag tu 'jug pa ste/ ji skad du kun gzhi'i rnam par shes pa'i rgya mtsho la 'jug pa'i rnam par shes pa yul gyi rlung gis bskyod de/de dag gis sems 'byung bar gzigs nas ched du brjod pa ched du brjod pa mdzad do zhes gsungs pa lta bu'o/ /bdag tu rtog par gyur na mi rung zhes / /zhes bya ba ni sa bon thams cad pa de la ste/sngar gnas pa'i dngos por gyur pa de la sems can rnams bdag tu sbyor bar byed pa'i phyir kun gzhi zhes bya'o zhes bstan pa na/ de la bdag tu rtog par gyur na gzhan mu stegs can nyid du gyur pas mi rung ngo zhes bya bar dgongs pa yin no/ /byis pa rnams la ngas ni de ma bstan zhes bya ba ni gang bdag tu rtog par gyur na de dag ni byis pa dang 'dra ba yin pas byis pa rnams zhes bya ste/de dag la ngas kun gzhi'i rnam par shes pa de'i yod pa nyid dang / rab tu dbye ba de ma bstan pas na de'i phyir de ni gsang ste bstan cing rnam par gzhag pa yin no zhes bya ba'i tha tshig go/ / de'i yod pa nyid dang rab tu dbye ba ni sngar bstan pa bzhin du rig par bya ste/ de ni brgal ba'i lan la shin tu rmongs pa'i gnyen po bstan pa yin no/ / le'u lnga pa'i tshig gi don la sogs pa bshad zin to// //de ltar sems kyi mtshan nyid kyis kun rdzob kyi bden pa'i mtshan nyid yongs su shes par bya ba bstan nas/da ni chos rnams kyi mtshan nyid kyis kun rdzob kyi bden pa'i mtshan nyid yongs su shes par bya ba bstan pa'i tshig gi don la sogs pa bshad par bya ste/ de'i phyir de bstan pa'i dbang du mdzad nas/ de nas bcom ldan 'das la byang chub sems dpa' yon tan 'byung gnas kyis zhu ba zhus pa zhes bya ba la sogs pa 'phags pa yon tan 'byung gnas kyi le'u drug pa 'di gsungs so// de la le'u drug pa 'di bsdus pa'i don ni mdor bsdu na chos rnams kyi mtshan nyid bstan pa yin no/ /de yang rnam par dbye na rnam pa gnyis te/ yongs su zhus pa dang / rgya cher bstan pa'o//de la yongs su zhus pa ni/ bcom ldan 'das byang chub sems dpa' chos rnams kyi mtshan nyid la mkhas pa zhes bya ba nas/ ji tsam gyis 'dogs lags zhes gsungs pa'i bar gyis bstan to/ /de skad ces gsol ba dang / bcom ldan 'das kyis byang chub sems dpa' yon tan 'byung gnas la 'di skad ces bka' stsal to zhes bya ba la sogs pa le'u 'di nyid kyi gzhung lhag ma thams cad kyis bstan to//de la dang por yongs su zhus pa'i tshig gi don la sogs pa bshad par bya ste/ yongs su zhus pa zhes bya ba'i chos rnams kyi mtshan nyid la shin tu rmongs pa'i gnyen por mtshan nyid la mkhas pa bstan pa gleng bslang ba'i phyir 'dir dang por/bcom ldan 'das la 'phags pa yon tan 'byung gnas kyis zhu ba zhus pa gang yin pa'o/ /de'i phyir de bstan pa'i dbang du mdzad nas/ bcom ldan 'das byang chub sems dpa' chos rnams kyi mtshan nyid la mkhas pa zhes bya ba la sogs pa gsungs so//de la chos rnams zhes bya ba ni mtshan nyid med pa'i chos dang / kun nas nyon mongs pa'i mtshan nyid kyi chos dang / rnam par byang ba'i mtshan nyid kyi chos thams cad do/ /mtshan nyid ces bya ba ni mtshan gzhi'i chos de dag gi don mtshon par byed pa ste/kun brtags pa dang / gzhan gyi dbang dang / yongs su grub pa'i mtshan nyid gsum po de dag yin no/ /mkhas pa zhes bya ba ni mtshan nyid gsum po de dag lung gi sgo nas sgro btags pa med pa dang / skur pa med par shes pa'o/ /lan gnyis su bzlas pa ni grags pa'i don bstan pa'i phyir ro zhes bgyi ba ni mdo sde de dang de dag las de skad ces gsungs na zhes bya ba'i tha tshig go//ji tsam gyis na byang chub sems dpa' chos rnams kyi mtshan nyid la mkhas pa lags zhes bya ba ni lung ji tsam gyi sgo nas mkhas na mkhas pa lags zhes zhus pa yin te/ lung zhes bya bas ni mnyan pa'i rnam pas yongs su shes pa'o//de'i sgo nas mkhas pa ni kun brtags pa la sgro 'dogs pa dang / gzhan gyi dbang dang / yongs su grub pa la skur pa 'debs pa yin no/ /ji tsam gyis 'dogs pa lags zhes bya ba ni rtogs pa ji tsam gyi sgo nas mkhas par 'dogs lags zhes zhus pa yin te/rtogs pa zhes bya ba ni bsgom pa'i rnam pa yongs su shes pa dang / de'i 'bras bu bya ba med pa'o/ /de'i sgo nas mkhas par 'dogs pa ni mtshan nyid med pa'i chos yang dag pa ji lta ba bzhin rab tu shes nas kun nas nyon mongs pa'i mtshan nyid kyi chos rab tu spangs nas/ rnam par byang ba'i mtshan nyid kyis chos thob par 'gyur ba de tsam gyis na mkhas par 'dogs pa yin no//yongs su zhus pa'i tshig gi don la sogs pa bshad zin to// //de'i 'og tu rgya cher bstan pa'i tshig gi don la sogs pa bshad par bya ste/ rgya cher bstan pa zhes bya ba ni de ltar yongs su zhus nas/bcom ldan 'das kyis chos rnams kyi mtshan nyid la mkhas pa rgya cher bstan pa gang yin pa'o/ /de'i phyir de bstan pa'i dbang du mdzad nas/ yon tan 'byung gnas khyod de ltar zhes bya ba la sogs pa gsungs so/ /de la rgya cher bstan pa 'dis ni chos rnams kyi mtshan nyid la mkhas pa bstan pa dang /bshad pa rnam pa gnyis bstan te/ de la bstan pa ni chos rnams kyi mtshan nyid lung dang rtogs pa'i sgo nas med pa'i mtshan nyid kyang med par shes par bya dgos pas/ mtshan nyid gsum mdor bstan pa gang yin pa ste/ de'i phyir de bstan pa'i dbang du mdzad nas/ yon tan 'byung gnas chos rnams kyi mtshan nyid gsum po 'di dag yin te/gsum gang zhe na/ kun brtags pa'i mtshan nyid dang / gzhan gyi dbang gi mtshan nyid dang / yongs su grub pa'i mtshan nyid do zhes bya ba gsungs te/ de la kun brtags pa'i mtshan nyid ces bya ba ni khams gsum pa'i sems dang sems las byung ba'i yang dag pa ma yin pa kun du rtog pa gzhan gyi dbang dang /yongs su grub pa'i ngo bo nyid dam/ bye brag tu kun brtags pa dang / ming dang brdar btags pa dang / tha snyad du brjod pa gang yin pa'o/ /de ni khams gsum pa'i sems dang sems las byung ba'i yang dag pa ma yin pa kun du rtog pas ngo bo nyid dam/bye brag tu kun brtags pa tsam du zad kyi gzung ba'i ngo bo nyid kyang ma yin/ 'dzin pa'i ngo bo nyid kyang ma yin pas na kun brtags pa'i mtshan nyid ces bya ste/ nam mkha'i me tog dang 'dra bar mtshan nyid ngo bo nyid med pa nyid kyis ngo bo nyid med pa kun rdzob dang don dam pa'i bden pa gnyi gar gtan med pa yin par rig par bya'o//gzhan gyi dbang gi mtshan nyid ces bya ba ni phyi nang gi dngos po'i ngo bo nyid rkyen gzhan gyi dbang gis rten cing 'brel par 'byung ba gang yin pa'o/ /de ni gzung ba dang 'dzin pa'i dngos po'i ngo bo nyid rgyu dang rkyen gzhan gyi dbang gis byung ba yin pas na gzhan gyi dbang gi mtshan nyid ces bya ste/sgyu ma byas pa dang 'dra bar skye ba ngo bo nyid med pa nyid dang / don dam pa'i ngo bo nyid med pa nyid kyis ngo bo nyid med pa kun rdzob kyi bden pa nyid du yod pa yin par rig par bya'o/ /yongs su grub pa'i mtshan nyid ces bya ba ni gnas gyur pa dang /dngos po'i de bzhin nyid kyis rab tu phye ba yang dag pa'i shes pa dang / de bzhin nyid gang yin pa'o/ /de ni gzhan gyi dbang gi mtshan nyid la kun brtags pa'i mtshan nyid du mngon par zhen pa med pa yang dag pa ma yin pa kun du rtog pa gnas gyur pa yang dag pa'i shes pa dang /de'i yul gzhan gyi dbang gi dngos po'i de bzhin nyid rnam par dag pa'i dmigs pa yongs su grub pa yin pas na yongs su grub pa'i mtshan nyid ces bya ste/ nam mkha' dang 'dra bar don dam pa ngo bo nyid med pa nyid kyis ngo bo nyid med la don dam pa'i bden pa nyid du yod pa yin par rig par bya'o//de ltar chos rnams kyi mtshan nyid gsum mdor bstan pa gang yin pa de ni bstan pa yin no/ /bstan pa'i tshig gi don la sogs pa bshad zin to// //de'i 'og tu bshad pa'i tshig gi don la sogs pa bshad par bya ste/ bshad pa zhes bya ba ni de ltar chos rnams kyi mtshan nyid gsum mdor bstan pa de nyid rgyas par bshad pa gang yin pa'o//bshad pa 'di yang rnam pa gnyis te/ dgos pa drug dang ldan pa'i chos kyi mtshan nyid bstan pa dang / de dag gi dngos po bsdu ba bstan pa'o/ /de la dgos pa drug dang ldan pa'i chos kyi mtshan nyid bstan pa ni gnyen po'i dgos pa dang /dpe'i dgos pa dang / mngon par bsgrub pa'i dgos pa dang / thabs kyi dgos pa dang / rtogs pa'i dgos pa dang / phan yon gyi dgos pa dang ldan pa'o/ /de la gnyen po'i dgos pa dang ldan pa ni yon tan 'byung gnas de la chos rnams kyi kun brtags pa'i mtshan nyid gang zhe na zhes bya ba nas/bla na med pa yang dag par rdzogs pa'i byang chub kyi bar du yang dag par bsgrub pa gang yin pa'o zhes gsungs pa'i bar gyis bstan to/ /dpe'i dgos pa dang ldan pa ni/ yon tan 'byung gnas 'di lta ste/ dper na zhes bya ba nas/ gser du log par 'dzin pas kyang sems can rnams rnam par rmongs par byed do zhes gsungs pa'i khyad par gyis bstan to//mngon par bsgrub pa'i dgos pa dang ldan pa ni yon tan 'byung gnas 'di lta ste/ dper na shel shin tu gsal ba tshon dang phrad pa de lta bu ni zhes bya ba nas/ yongs su grub pa'i mtshan nyid blta bar bya'o zhes gsungs pa'i bar gyis bstan to//thabs kyi dgos pa dang ldan pa ni yon tan 'byung gnas de la mtshan ma dang 'brel pa'i ming la brtan nas ni kun brtags pa'i mtshan nyid rab tu shes so zhes bya ba nas yongs su grub pa'i mtshan nyid rab tu shes so zhes gsungs pa'i bar gyis bstan to//rtogs pa'i dgos pa dang ldan pa ni yon tan 'byung gnas de la byang chub sems dpas chos rnams kyi gzhan gyi dbang gi mtshan nyid la kun brtags pa'i mtshan nyid yang dag pa ji lta ba bzhin du rab tu shes na zhes bya ba nas/ rnam par byang ba'i mtshan nyid kyi chos yang dag pa ji lta ba bzhin du rab tu shes so zhes gsungs pa'i bar gyis bstan to//phan yon gyi dgos pa dang ldan pa ni/ yon tan 'byung gnas de la byang chub sems dpas gzhan gyi dbang gi mtshan nyid la mtshan nyid med pa'i chos yang dag pa ji lta ba bzhin du rab tu shes na zhes bya ba nas/ rnam par byang ba'i mtshan nyid kyi chos thob par 'gyur te zhes gsungs pa'i bar gyis bstan to//de dag gi dngos po bsdu ba ni/ yon tan 'byung gnas gang gi phyir byang chub sems dpas de ltar chos rnams kyi kun brtags pa'i mtshan nyid yang dag pa ji lta ba bzhin du rab tu shes shing zhes bya ba nas/ tshigs su bcad pa rdzogs pa'i bar gyi gzhung lhag ma thams cad kyis bstan to//de la dang por gnyen po'i dgos pa dang ldan pa'i chos kyi mtshan nyid bstan pa'i tshig gi don la sogs pa bshad par bya ste/ gnyen po'i dgos pa dang ldan pa'i chos rnams kyi mtshan nyid bstan pa zhes bya ba ni shin tu rmongs pa rnam pa bzhi'i gnyen po'i dgos pa dang ldan pa'i chos kyi mtshan nyid gsum bstan pa gang yin pa'o//de la shin tu rmongs pa rnam pa bzhi ni med pa'i don la shin tu rmongs pa sgro 'dogs pa'i rgyu dang / yod pa'i don la shin tu rmongs pa skur pa 'debs pa'i rgyu dang / kun nas nyon mongs pa la shin tu rmongs pa de 'jig pa'i rgyu dang rnam par byang ba la shin tu rmongs pa de 'jig pa'i rgyu'o//de la dang por med pa'i don la shin tu rmongs pa'i sgro 'dogs pa'i rgyu'i gnyen po'i dgos pa dang ldan pa'i chos kyi mtshan nyid bstan pa'i tshig gi don la sogs pa bshad par bya ste/ de la med pa'i don ces bya ba ni kun brtags pa'i mtshan nyid de ni khams gsum pa'i sems dang sems las byung ba yang dag pa ma yin pa kun rtog pas gzhan gyi dbang dang yongs su grub pa'i dngos po la ngo bo nyid dam bye brag tu kun brtags pa dang ming dang brdar btags pa dang /tha snyad du brjod par zad kyi gzung ba dang 'dzin pa'i ngo bo nyid gang yang ma yin te/nam mkha'i me tog dang 'dra bar mtshan nyid ngo bo nyid med pa nyid kyis ngo bo nyid med pa kun rdzob dang / don dam pa'i bden pa gnyi gar gtan med pas na med pa'i don ces bya'o/ /de la shin tu rmongs pa zhes bya ba ni kun brtags pa'i mtshan nyid med pa'i don la yod par mngon par zhen pa yin no//sgro 'dogs pa'i rgyu zhes bya ba ni de ltar med pa'i don la shin tu rmongs pa de nyid sgro 'dogs pa'i rgyu yin te/ med pa'i don la med par mngon par zhen cing shin tu rmongs pa des med pa'i don de la yod par sgro 'dogs pa'i phyir ro/ /de'i gnyen po'i dgos pa dang ldan pa'i chos kyi mtshan nyid bstan pa zhes bya ba ni de ltar sgro 'dogs pa'i rgyu de rnam par sel ba'i gnyen po'i don dang ldan pa kun brtags pa'i chos kyi mtshan nyid nam mkha'i me tog dang 'dra ba bden pa gnyi gar gtan med par bstan pa gang yin pa de/de'i phyir de bstan pa'i dbang du mdzad nas/ yon tan 'byung gnas de la chos rnams kyi kun brtags pa'i mtshan nyid gang zhe na/ ji tsam du rjes su tha snyad gdags pa'i phyir chos rnams kyi ngo bo nyid dam bye brag tu ming dang brdar rnam par gzhag pa gang yin pa'o zhes bya ba gsungs so/ /de la ji tsam du rjes su tha snyad gdags pa'i phyir zhes bya ba ni sgro btags pa'i phyir zhes bya ba'i tha tshig go//chos rnams kyi zhes bya ba ni gzhan gyi dbang gi mtshan nyid kyi chos dang / yongs su grub pa'i mtshan nyid kyi chos rnams kyi'o/ /ngo bo nyid dam bye brag tu ming dang brdar rnam par gzhag pa zhes bya ba ni ngo bo nyid kyi mtshan nyid du ming dang brdar btags pa dang / bye brag gi mtshan nyid du ming dang brdar btags pa zhes bya ba'i tha tshig ste/ kun brtags pa dang / btags pa dang / brjod pa'i don to/ /de la ngo bo nyid ces bya ba ni 'di ni gzugs so/ /'di ni tshor ba'o/ /'di ni 'dod chags so/ /'di ni dad pa'o zhes bya ba la sogs pa lta bur ngo bo nyid du sgro btags pa gang yin pa'o//bye brag zhes bya ba ni gzugs 'di ni zag pa dang bcas pa'o/ /'di ni zag pa med pa'o/ /tshor ba 'di ni sred pas brlan pa'o/ /'di ni sred pas ma brlan pa'o/ /'dod chags 'di ni mthong bas spong bar bya ba'o / /'di ni bsgom pas spang bar bya ba'o //dad pa 'di ni las dang 'bras bu la yid ches pa'o/ /'di ni dkon mchog dang bden pa la sems dang ba'o zhes bya ba la sogs pa lta bur bye brag tu sgro btags pa gang yin pa'o/ /ming zhes bya ba ni tha snyad gzhan du mi 'khrul pa'i rgyu ste/ gzugs she'am/ tshor ba zhe'am / 'dod chags she 'am/ dad pa la sogs pa lta bur tshig gis gdags pa yin no/ /brda zhes bya ba ni tha snyad go bar byed pa'i rgyu ste/ 'dir 'dug shig pa'am/ phar song shig pa'am/ byos shig pa'am/ ma byed cig pa la sogs pa lta bu'i tha snyad tshig gam/ lag brda'am/ mig zur la sogs pas go bar byed pa yin no/ /rnam par gzhag pa zhes bya ba ni khams gsum pa'i sems dang sems las byung ba yang dag pa ma yin pa kun rtog pas gzhan gyi dbang dang / yongs su grub pa'i dngos po'i ngo bo nyid dang bye brag tu kun brtags pa dang / ming dang brdar btags pa dang /tha snyad du brjod pa rnam par gzhag pa ste/ de ni dngos po la glo bur ba yin no/ /de ltar na kun brtags pa'i mtshan nyid ni kun brtags pa tsam du zad kyi/ gzung ba dang 'dzin pa'i ngo bo nyid ma yin pas de ltar shes na med pa'i don la shin tu rmongs shing yod pa sgro 'dogs pa'i phyir de ni med pa'i don la shin tu rmongs pa sgro 'dogs pa'i rgyu'i gnyen por dgos pa dang ldan par kun brtags pa'i mtshan nyid bstan pa yin no//de'i 'og tu yod pa'i don la shin tu rmongs pa skur pa 'debs pa'i rgyu'i gnyen po'i dgos pa dang ldan pa'i chos kyi mtshan nyid bstan pa'i tshig gi don la sogs pa bshad par bya ste/de la yod pa'i don ces bya ba ni gzhan gyi dbang gi mtshan nyid de/ de ni phyi nang gi dngos po'i ngo bo nyid rkyen gzhan gyi dbang gis rten cing 'brel par 'byung ba ste/ sgyu ma byas pa dang 'dra bar skye ba ngo bo nyid med pa nyid kyis ngo bo nyid med pa kun rdzob kyi bden pa nyid du yod pa'i phyir yod pa'i don ces bya'o//de la shin tu rmongs pa zhes bya ba ni gzhan gyi dbang gi mtshan nyid yod pa'i don la med par mngon par zhen pa yin no/ /skur pa 'debs pa'i rgyu zhes bya ba ni de ltar yod pa'i don la shin tu rmongs pa de nyid skur pa 'debs pa'i rgyu yin te/ yod pa'i don la med par mngon par zhen cing shin tu rmongs pa des yod pa'i don la med par skur pa 'debs pa'i phyir ro//de'i gnyen por dgos pa dang ldan pa'i chos kyi mtshan nyid bstan pa zhes bya ba ni de ltar skur pa 'debs pa'i rgyu de rnam par sel ba'i gnyen po'i don dang ldan pa gzhan gyi dbang gi chos kyi mtshan nyid sgyu ma byas pa dang 'dra bar kun rdzob kyi bden pa nyid du yod par bstan pa gang yin pa ste/de'i phyir de bstan pa'i dbang du mdzad nas/ yon tan 'byung gnas chos rnams kyi gzhan gyi dbang gi mtshan nyid gang zhe na/ chos rnams kyi rten cing 'brel par 'byung ba nyid de/ 'di lta ste 'di yod pas 'di 'byung la/ 'di skyes pa'i phyir 'di skye ba zhes bya ba gsungs so/ /de la chos rnams kyi rten cing 'brel par 'byung ba nyid ces bya ba ni phyi nang gi dngos po'i ngo bo nyid rkyen gzhan gyi dbang gis rten cing 'brel par 'byung ba thams cad do/ /'di lta ste 'di yod pas 'di 'byung la zhes bya ba ni sems dang sems las byung ba dang /dbang po dang / yul dang / rnam par shes pa la sogs pa dus gcig tu 'byung ba'i rten cing 'brel par 'byung ba rgyu dang 'bras bu mgo mnyam pa rnams kyi dbang du mdzad de gsungs pa yin no/ /'di skyes pa'i phyir 'di skye ba zhes bya ba ni sa bon dang myu gu la sogs pa dus snga phyi 'byung ba'i rten cing 'brel par 'byung ba'i rgyu ni snga la 'bras bu ni 'phyi ba rnams kyi dbang du mdzad de gsungs pa yin no//de ltar na gzhan gyi dbang gi mtshan nyid ni phyi nang gi dngos po'i ngo bo nyid rkyen gzhan gyi dbang gis rten cing 'brel par 'byung ba yin pas de ltar shes na/yod pa'i don la ni shin tu rmongs shing skur pa mi 'debs pa'i phyir de ni yod pa'i don la shin tu rmongs pa skur pa 'debs pa'i rgyu'i gnyen po'i dgos pa dang ldan pa gzhan gyi dbang gi mtshan nyid bstan pa yin no/ /de'i 'og tu kun nas nyon mongs pa la shin tu rmongs pa de 'jig pa'i rgyu'i gnyen po'i dgos pa dang ldan pa'i chos kyi mtshan nyid bstan pa'i tshig gi don la sogs pa bshad par bya ste/de la kun nas nyon mongs pa zhes bya ba ni rten cing 'brel par 'byung ba'i bsdus pa'i nyon mongs pa dang / las dang skye ba'i kun nas nyon mongs pa dang ldan pa'i gzhan gyi dbang gi mtshan nyid do//de la shin tu rmongs pa zhes bya ba ni yod pa la med par mngon par zhen pa yin no/ /de la 'jig rten pa'i rgyu zhes bya ba la/ de zhes bya ba'i sgra ni kun nas nyon mongs pa nyid do/ /'jig pa zhes bya ba ni chud gson pa ste de la skur pa 'debs pa'o/ / rgyu zhes bya ba ni de ltar kun nas nyon mongs pa la shin tu rmongs pa nyid kun nas nyon mongs pa de 'jig pa'i rgyu yin te/ yod pa la med par mngon par zhen cing shin tu rmongs pa des yod pa'i don de chud gson par byed pa'i phyir ro/ /de'i gnyen po'i dgos pa dang ldan pa'i chos kyi mtshan nyid bstan pa'i zhes bya ba ni de ltar 'jig pa'i rgyu de rnam par sel ba'i don dang ldan pa/kun nas nyon mongs pa'i phyogs dang mthun pa'i gzhan gyi dbang gi chos kyi mtshan nyid sgyu ma byas pa 'dra bar kun rdzob kyi bden pa nyid du yod par bstan pa gang yin pa ste/ de'i phyir de bstan pa'i dbang du mdzad nas/'di lta ste ma rig pa'i rkyen gyis 'du byed rnams zhes bya ba nas/ de ltar na sdug bsngal gyi phung po chen po 'ba' zhig pa 'di 'byung bar 'gyur ro zhes bya ba'i bar gang yin pa'o zhes bya ba gsungs so/ /de dag gis ni rten cing 'brel par 'byung ba lugs su 'byung bas bsdus pa'i nyon mongs pa bstan te/de ltar na kun nas nyon mongs pa'i phyogs dang mthun pa'i gzhan gyi dbang gi mtshan nyid kyang / dngos po'i ngo bo nyid kyi gzhan gyi dbang gis rten cing 'brel par 'byung ba yin pas de ltar shes na kun nas nyon mongs pa la shin tu rmongs shing de 'jig par mi byed pa'i phyir de yang kun nas nyon mongs pa la shin tu rmongs pa ste/'jig pa'i rgyu'i gnyen po'i dgos pa dang ldan pa gzhan gyi dbang gi mtshan nyid bstan pa yin no/ /de'i 'og tu rnam par byang ba la shin tu rmongs pa de 'jig pa'i rgyu'i gnyen po'i dgos pa dang ldan pa'i chos kyi mtshan nyid bstan pa'i tshig gi don la sogs pa bshad par bya ste/de la rnam par byang ba zhes bya ba ni yongs su grub pa'i mtshan nyid de/ de ni gnas gyur pa dang dngos po'i de bzhin nyid kyis rab tu phye ba yang dag pa'i shes pa dang de bzhin nyid yin pas na rnam par byang ba zhes bya'o/ /de la shin tu rmongs pa zhes bya ba ni yod pa la med par mngon par zhen pa yin no//de la 'jig pa'i rgyu zhes bya ba la/ de zhes bya ba'i sgra ni rnam par byang ba nyid do/ /'jig pa zhes bya ba ni chud gson pa ste/ de la skur pa 'debs pa'o/ /rgyu zhes bya ba ni/ de ltar rnam par byang ba la shin tu rmongs pa nyid rnam par byang ba de 'jig pa'i rgyu yin te/yod pa la med par mngon par zhen cing shin tu rmongs pa des yod pa'i don de chud gson par byed pa'i phyir ro/ /de'i gnyen po'i dgos pa dang ldan pa'i chos kyi mtshan nyid bstan pa zhes bya ba ni de ltar de 'jig pa'i rgyu de rnam par sel ba'i gnyen po'i don dang ldan pa yongs su grub pa'i chos kyi mtshan nyid nam mkha' dang 'dra bar don dam pa'i bden pa yod par bstan pa gang yin pa de/de'i phyir de bstan pa'i dbang du mdzad nas/ yon tan 'byung gnas chos rnams kyi yongs su grub pa'i mtshan nyid gang zhe na/ chos rnams kyi de bzhin nyid gang yin pa ste/byang chub sems dpa' rnams kyi brtun pa'i rgyu dang legs par tshul bzhin yid la byed pa'i rgyus de rtogs shing de rtogs pa goms par byas pa yang dag par grub pas kyang bla na med pa yang dag par rdzogs pa'i byang chub kyi bar du yang dag par 'grub pa gang yin pa'o zhes gsungs so//de la chos rnams kyi de bzhin nyid gang yin pa ste zhes bya ba ni dngos po'i de bzhin nyid rnam par dag pa'i dmigs pa gang yin pa ste/ des ni de bzhin nyid yongs su grub pa bstan to/ /byang chub sems dpa' rnams kyi zhes bya ba la sogs pas ni yang dag pa'i shes pa yongs su grub pa bstan te/de brtul ba zhes bya ba ni rtag tu byed pa'i sbyor ba'o/ /legs par tshul bzhin yid la byas pa zhes bya ba ni gus par byed pa'i sbyor ba yin no/ /de rtogs shing zhes bya bas ni mthong ba'i lam gyis so/ /de rtogs pa goms par byas zhes bya ba ni bsgom pa'i lam gyis so//yang dag par grub pas kyang zhes bya ba ni de bzhin nyid la bzod pa dang / gnas gyur pa yang dag par bsgrub pas so/ /bla na med pa yang dag par rdzogs pa'i byang chub kyi bar du yang dag par 'grub pa gang yin pa'o zhes bya bas ni yang dag pa'i shes pas yongs su grub pa mthar phyin pa nyid kyi gnas skabs bstan to//de ltar na yongs su grub pa'i mtshan nyid ni gnas gyur pa dang dngos po'i de bzhin nyid kyis rab tu phye ba yang dag pa'i shes pa yongs su grub pa dang / de bzhin nyid yongs su grub pa nam mkha' dang 'dra bar don dam pa'i bden pa nyid du yod pa yin pas de ltar shes na rnam par byang ba la shin tu rmongs shing de 'jig par mi byed pa'i phyir de ni rnam par byang ba la shin tu rmongs pa de 'jig pa'i rgyu de gnyen po dgos pa dang ldan pa yongs su grub pa'i mtshan nyid bstan pa yin no//gnyen po'i dgos pa dang ldan pa'i chos kyi mtshan nyid bstan pa'i tshig gi don la sogs pa bshad zin to// //de'i 'og tu dpe'i dgos pa dang ldan pa'i chos kyi mtshan nyid bstan pa'i tshig gi don la sogs pa bshad par bya ste/ dpe'i dgos pa dang ldan pa'i chos kyi mtshan nyid bstan pa zhes bya ba ni dpe'i don rnam pa bzhi dang ldan pa'i chos kyi mtshan nyid gsum bstan pa gang yin pa'o//de la dpe'i dgos pa rnam pa bzhi ni don gyi dpe dang / phyi rol gyi dang / nang gi dpe dang / mnyam par ma bzhag pa'i sa pa'i dpe'o/ /de la dang por don gyi dpe'i dgos pa dang ldan pa'i chos kyi mtshan nyid bstan pa'i tshig gi don la sogs pa bshad par bya ste/de la don gyi dpe zhes bya ba ni nang gi mig la rab rib kyi skyon chags pa'i mig dngos don zhes bya ste/ de nyid don gyi dpe'o/ /dpe'i dgos pa dang ldan pa'i chos kyi mtshan nyid bstan pa zhes bya ba ni dpe de'i don dang ldan pa kun brtags pa'i chos kyi mtshan nyid bstan pa gang yin pa ste/de'i phyir de bstan pa'i dbang du mdzad nas/ yon tan 'byung gnas 'di lta ste dper na/ skyes bu gang zag rab rib can gyi mig la rab rib kyi skyon chags pa de lta bur ni kun du brtags pa'i mtshan nyid dang blta bar bya'o zhes bya ba gsungs so/ /'dir ni rgyus 'bras bu ston te/dper na mig la rab rib kyi skyon chags pa ni 'khrul pa'i rgyu yin la/ rgyu des 'khrul par 'gyur ba ni 'bras bu yin pa dang 'dra bar thog ma med pa'i dus nas dngos po la mngon par zhen pa'i bag chags sems 'khrul par byed pa'i rgyu kun gzhi'i rnam par shes pa la glo bur bar gnas pa de ni 'dir mig la rab rib kyi skyon chags pa dang 'dra bar bstan te/de ni sgro 'dogs pa'i rgyu yin no/ /rgyu des dngos po la ngo bo nyid dam bye brag tu ming dang brdar btags pa dngos po la glo bur bar gnas pa ni 'bras bu ste/ de gnyi ga kun brtags pa'i mtshan nyid yin par 'dra ba las 'bras bu de ni dngos su 'dir ma bstan pas rgyu'i sgo nas shes par bya ba'i phyir rgyus 'bras bu bstan to zhes bshad de/de ni don gyi dpe'i dgos pa dang ldan pa kun brtags pa'i mtshan nyid bstan pa yin no/ /de'i 'og tu phyi rol gyi dpe'i dgos pa dang ldan pa'i chos kyi mtshan nyid bstan pa'i tshig gi don la sogs pa bshad par bya ste/de la phyi rol gyi dpe zhes bya ba ni nang gi mig la rab rib kyi skyon chags pa'i rgyu de las 'bras bu phyi rol gyi mtshan ma snang ba nyid dpe'o/ /dpe de'i dgos pa dang ldan pa'i chos kyi mtshan nyid bstan pa zhes bya ba ni dpe de'i don dang ldan pa gzhan gyi dbang gi chos kyi mtshan nyid bstan pa gang yin pa ste/de'i phyir de bstan pa'i dbang du mdzad nas/ yon tan 'byung gnas 'di lta ste dper na/ de nyid la rab rib kyi mtshan ma skra shad 'dzings pa la sogs pa'i mtshan ma snang bar gyur pa de lta bur ni gzhan gyi dbang gi mtshan nyid blta bar bya'o zhes bya ba gsungs te/dper na mig 'khrul par byed pa'i rgyu rab rib gang gi mig la yod pa de la 'bras bu skra shad 'dzings pa la sogs pa'i mtshan ma dag snang ba dang 'dra bar dngos po la mngon par zhen pa'i bag chags sems 'khrul par byed pa'i rgyu kun brtags pa'i mtshan nyid gang gi rgyud la yod pa de la 'bras bu gzugs la sogs pa'i rnam pa 'khrul pa'i dngos po dag snang ba de ni gzhan gyi dbang gi mtshan nyid yin no//sngar kun brtags pa'i skabs su rgyus 'bras bu ston te zhes smos pa ni 'khrul pa'i rgyus ngo bo nyid dam bye brag tu ming dang brdar btags pa ste/gnyi ga kun brtags pa nyid do/ /'bras bu 'di ni 'khrul pa'i dngos por snang ba gzhan gyi dbang yin te/ de ni phyi rol gyi dpe'i dgos pa dang ldan pa gzhan gyi dbang gi mtshan nyid bstan pa yin no/ /de'i 'og tu nang gi dpe'i dgos pa dang ldan pa'i chos kyi mtshan nyid bstan pa'i tshig gi don la sogs pa bshad par bya ste/de la nang gi dpe zhes bya ba ni nang gi mig yongs su dag pa'i spyod yul ma nor ba nyid dpe'o/ /dpe de'i dgos pa dang ldan pa'i chos kyi mtshan nyid bstan pa zhes bya ba ni dpe de'i don dang ldan pa yongs su grub pa'i chos kyi mtshan nyid bstan pa gang yin pa ste/de'i phyir de bstan pa'i dbang du mdzad nas/ yon tan 'byung gnas 'di lta ste/ dper na skyes bu gang zag de nyid kyi mig yongs su dag cing mig la rab rib kyi skyon chags pa dang bral bar gyur pa na/ mig de nyid kyi rang bzhin gyi spyod yul ma nor ba'i spyod yul de lta bur ni yongs su grub pa'i mtshan nyid blta bar bya'o zhes bya ba gsungs te/dper na mig 'khrul pa'i rgyu rab rib kyi skyon dang bral ba'i mig ma 'khrul pa'i spyod yul ma nor ba dang 'dra bar sems 'khrul pa'i rgyu kun brtags pa'i mtshan nyid dang bral ba'i gnas gyur pa yang dag pa'i shes pa'i yul de bzhin nyid ni yongs su grub pa'i mtshan nyid yin te/de ni nang gi dpe'i dgos pa dang ldan pa yongs su grub pa'i mtshan nyid bstan pa yin no/ /de'i 'og tu mnyam par ma bzhag pa'i sa pa'i dpe'i dgos pa dang ldan pa'i chos kyi mtshan nyid bstan pa'i tshig gi don la sogs pa bshad par bya ste/de la mnyam par ma bzhag pa'i sa pa'i dpe zhes bya ba ni shel dang / tshon la sogs pa sems can du bgrang ba ma yin pa'i phyir phyi rol gyi dngos po nyid dpe'o/ /dpe de'i dgos pa dang ldan pa'i chos kyi mtshan nyid bstan pa zhes bya ba ni dpe de'i don dang ldan pa kun brtags pa dang /gzhan gyi dbang dang / yongs su grub pa'i chos kyi mtshan nyid gsum bstan pa gang yin pa de / de'i phyir de bstan pa'i dbang du mdzad nas/ yon tan 'byung gnas 'di lta ste/ dper na shel bzhin du gsal ba ni zhes bya ba nas/gser du log par 'dzin pas kyang sems can rnams rnam par rmongs par byed do zhes gsungs pa'i bar gyis bstan te/ dpe de dag gis mtshon pa'i don ni 'og nas mngon par bsgrub pa'i dgos pa dang ldan pa'i chos kyi mtshan nyid bstan pa nyid yin par sbyar ro/ / dpe de dag kyang rnam par rig pa tsam las ma gtogs pa phyi rol gyi dngos po gzhan med mod kyi 'jig rten la grags pa'i dbang du mdzad nas mnyam par ma bzhag pa'i sa pa'i dpe zhes gsungs te/ de ni mnyam par ma bzhag pa'i sa pa'i dpe'i dgos pa dang ldan pa'i chos kyi mtshan nyid bstan pa yin no//dpe'i dgos pa dang ldan pa'i chos kyi mtshan nyid bstan pa'i tshig gi don la sogs pa bshad zin to// //de'i 'og tu mngon par bsgrub pa'i dgos pa dang ldan pa'i chos kyi mtshan nyid bstan pa'i tshig gi don la sogs pa bshad par bya ste/ mngon par bsgrub pa'i dgos pa dang ldan pa'i chos kyi mtshan nyid bstan pa zhes bya ba ni rnam par thar pa'i sgo gsum po dag mngon par bsgrub pa'i don dang ldan pa'i chos kyi mtshan nyid gsum bstan pa gang yin pa'o//de la rnam par thar pa'i sgo gsum po dag mngon par bsgrub pa'i mtshan nyid gsum la brten nas rnam par gzhag ste/kun brtags pa'i mtshan nyid la brten nas ni rnam par thar pa'i sgo stong pa nyid mngon par bsgrub pa rnam par gzhag go/ /gzhan gyi dbang gi mtshan nyid la brten nas ni rnam par thar pa'i sgo smon pa med pa mngon par bsgrub pa rnam par gzhag go / /yongs su grub pa'i mtshan nyid la brten nas ni rnam par thar pa'i sgo mtshan ma med pa la mngon par bsgrub pa rnam par gzhag go//de la dang por rnam par thar pa'i sgo stong pa nyid mngon par bsgrub pa'i dgos pa dang ldan pa kun brtags pa'i mtshan nyid bstan pa'i tshig gi don la sogs pa bshad par bya ste/rnam par thar pa'i sgo stong pa nyid ni kun brtags pa'i chos bdag med par rab tu phye ba yin la/ kun brtags pa'i mtshan nyid kyang mtshan nyid ngo bo nyid med pas stong pa nyid yin pas na/ des ni rnam par thar pa'i sgo stong pa nyid mngon par bsgrub pa rnam par gzhag ste/de'i phyir de bstan pa'i dbang du mdzad nas/ yon tan 'byung gnas 'di lta ste/ dper na shel shin tu gsal ba tshon dang phrad pa de lta bur ni gzhan gyi dbang gi mtshan nyid la kun brtags pa'i mtshan nyid kyi tha snyad kyi bag chags blta bar bya'o/ /'di lta ste dper na shel shin tu gsal ba nor bu rin po che an da rnyil la sogs pa log par 'dzin pa de lta bu ni gzhan gyi dbang gi mtshan nyid la kun brtags pa'i mtshan nyid du 'dzin par blta bar bya'o zhes gsungs te/de la tshig dang pos ni thog ma med pa'i dus nas dngos po la mngon par zhen pa'i bag chags sems 'khrul par byed pa'i rgyu kun gzhi'i rnam par shes pa la glo bur bar gnas pa bstan to//tshig 'og mas ni gzhan gyi dbang gi mtshan ma la kun brtags pa'i ming du mngon par zhen par byed pa yang dag pa ma yin pa kun rtog pa bstan te/ rtog pa de dngos ni gzhan gyi dbang yin pas kun brtags pa'i skabs 'dir mi sbyar gyi /des gzung zhing mngon par zhen par bya ba dngos po la glo bur ba'i ming du btags pa gang yin pa de 'dir gzung ste/ de gnyis ni kun brtags pa'i mtshan nyid yin te/ de ni 'khrul pa'i rgyu dang 'khrul pa'i rang bzhin tsam du zad kyi phyi nang gi dngos po'i ngo bo nyid gang yang ma yin pa glo bur ba yin pas de ni rnam par thar pa'i sgo stong pa nyid mngon par bsgrub pa'i dgos pa dang ldan pa kun brtags pa'i mtshan nyid bstan pa yin no//de'i 'og tu rnam par thar pa'i sgo smon pa med pa mngon par bsgrub pa'i dgos pa dang ldan pa gzhan gyi dbang gi mtshan nyid bstan pa'i tshig gi don la sogs pa bshad par bya ste/rnam par thar pa'i sgo smon pa med pa ni khams gsum pa la mi smon pas rab tu phye ba yin la/ gzhan gyi dbang gi mtshan nyid kyang khams gsum pa'i sems dang sems las byung ba'i ngo bo nyid yin pas na des ni rnam par thar pa'i sgo smon pa med pa mngon par bsgrub pa rnam par gzhag ste/de'i phyir de bstan pa'i dbang du mdzad nas/ yon tan 'byung gnas 'di lta ste/ dper na shel shin tu gsal ba de nyid lta bur ni gzhan gyi dbang gi mtshan nyid blta bar bya'o zhes bya ba gsungs te/gzhan gyi dbang ni rnam par rtog pa'i spyod yul kun brtags pa'i mtshan nyid kyi gnas 'du byed mtshan ma khams gsum pa'i sems dang sems las byung ba sdug bsngal ba'i ngo bo nyid yin pas na de ni rnam par thar pa'i sgo smon pa med pa mngon par bsgrub pa'i dgos pa dang ldan pa gzhan gyi dbang gi mtshan nyid bstan pa yin no//de'i 'og tu rnam par thar pa'i sgo mtshan ma med pa mngon par bsgrub pa'i dgos pa dang ldan pa yongs su grub pa'i mtshan nyid bstan pa'i tshig gi don la sogs pa bshad par bya ste/ rnam par thar pa'i sgo mtshan ma med pa ni mya ngan las 'das pa mtshan ma thams cad bsal bas rab tu phye ba yin la/yongs su grub pa'i mtshan nyid kyang chos rnams kyi de bzhin nyid don dam pa mtshan ma thams cad bsal ba'i ngo bo nyid yin pas na des ni rnam par thar pa'i sgo mtshan ma med pa mngon par bsgrub pa rnam par gzhag pa ste/de'i phyir de bstan pa'i dbang du mdzad nas/ 'di lta ste/ dper na shel shin tu gsal ba de nyid nor bu rin po che an da rnyil la sogs pa'i mtshan nyid der rtag pa rtag pa'i dus dang / ther zug ther zug gi dus su yongs su ma grub cing ngo bo nyid med pa de lta bur ni gzhan gyi dbang gi mtshan nyid de kun brtags pa'i mtshan nyid der rtag pa rtag pa'i dus dang /ther zug ther zug gi dus su yongs su ma grub cing ngo bo nyid med pa nyid kyis yongs su grub pa'i mtshan nyid blta bar bya'o zhes bya ba gsungs te/ yongs su grub pa ni rnam par rtog pa'i spyod yul kun brtags pa'i mtshan nyid kyi 'du byed kyi mtshan ma de nyid der yongs su ma grub cing ngo bo nyid de kho nas ngo bo nyid med pa chos bdag med pa de bzhin nyid rnam par dag pa'i dmigs pa yin pas na de ni rnam par thar pa'i sgo mtshan ma med pa mngon par bsgrub pa'i dgos pa dang ldan pa yongs su grub pa'i mtshan nyid bstan pa yin no//mngon par bsgrub pa'i dgos pa dang ldan pa'i chos kyi mtshan nyid bstan pa'i tshig gi don la sogs pa bshad zin to// // de'i 'og tu thabs kyi dgos pa dang ldan pa'i chos kyi mtshan nyid bstan pa'i tshig gi don la sogs pa bshad par bya ste/thabs kyi dgos pa dang ldan pa'i chos kyi mtshan nyid bstan pa zhes bya ba ni dngos po lnga la brten nas rab tu shes par 'gyur ba'i thabs kyi don dang ldan pa'i chos kyi mtshan nyid gsum bstan pa gang yin pa'o/ /de la mtshan nyid gsum po dag ni dngos po lnga la brten nas rab tu shes par 'gyur te/mtshan ma dang ming la brten nas ni kun brtags pa'i mtshan nyid rab tu shes so/ /rnam par rtog pa la brten nas ni gzhan gyi dbang gi mtshan nyid rab tu shes so/ /yang dag pa'i shes pa dang de bzhin nyid la brten nas ni yongs su grub pa'i mtshan nyid rab tu shes so//de la dang por mtshan ma dang ming la brten nas rab tu shes par 'gyur ba'i thabs kyi dgos pa dang ldan pa kun brtags pa'i mtshan nyid bstan pa'i tshig gi don la sogs pa bshad par bya ste/ de'i phyir de bstan pa'i dbang du mdzad nas/ yon tan 'byung gnas de la mtshan ma dang 'brel pa'i ming la brten nas kun brtags pa'i mtshan nyid rab tu shes so zhes bya ba gsungs te/mtshan ma ni rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma ste/ gzhan gyi dbang gi mtshan nyid yin no/ /ming ni mtshan ma de la ji tsam du rjes su tha snyad gdags pa'i phyir ngo bo nyid dam bye brag tu ming dang brdar rnam par gzhag pa ste/kun brtags pa'i mtshan nyid yin no/ /de yang gnas med pa la ming dang gdags su mi rung bas mtshan ma'i gnas la ming du 'dogs par byed pa ni mtshan ma dang 'brel pa'i ming zhes bya ba ste/ji tsam du ming dang mtshan ma la ming du gdags pa de nyid kun brtags pa'i mtshan nyid yin pas de'i phyir ming la brten nas ni kun brtags pa'i mtshan nyid rab tu shes so zhes gsungs te/ de ni mtshan ma dang ming la brten nas rab tu shes par 'gyur ba'i thabs kyi dgos pa dang ldan pa kun brtags pa'i mtshan nyid bstan pa yin no//de'i 'og tu rnam par rtog pa la brten nas rab tu shes par 'gyur ba thabs kyi dgos pa dang ldan pa gzhan gyi dbang gi mtshan nyid bstan pa'i tshig gi don la sogs pa bshad par bya ste/ de'i phyir de bstan pa'i dbang du mdzad nas/gzhan gyi dbang gi mtshan nyid la kun brtags pa'i mtshan nyid du mngon par zhen pa la brten nas ni gzhan gyi dbang gi mtshan nyid rab tu shes so zhes bya ba gsungs te/ gzhan gyi dbang gi mtshan ma la kun brtags pa'i ming du rnam par rtog pas mngon par zhen pa ni yang dag pa ma yin pa kun rtog pa khams gsum pa'i sems dang sems las byung ba ste/ji srid du mtshan ma la ming du rnam par rtog pas mngon par zhen pa de srid du gzhan gyi dbang gi mtshan nyid yin pas na de'i phyir mngon par zhen pa la brten nas gzhan gyi dbang gi mtshan nyid rab tu shes so zhes gsungs te/de ni rnam par rtog pa la brten nas rab tu shes par 'gyur ba'i thabs kyi dgos pa dang ldan pa gzhan gyi dbang gi mtshan nyid bstan pa yin no/ /de'i 'og tu yang dag pa'i shes pa dang de bzhin nyid la brten nas rab tu shes par 'gyur ba'i thabs kyi dgos pa dang ldan pa'i yongs su grub pa'i mtshan nyid bstan pa'i tshig gi don la sogs pa bshad par bya ste/de'i phyir de bstan pa'i dbang du mdzad nas/ gzhan gyi dbang gi mtshan nyid la kun brtags pa'i mtshan nyid du mngon par zhen pa med pa la brten nas ni yongs su grub pa'i mtshan nyid rab tu shes so zhes bya ba gsungs te/gzhan gyi dbang gi mtshan ma la kun brtags pa'i ming du mngon par zhen pa med pa ni gnas gyur pas bsdus pa yang dag pa'i shes pa de bzhin nyid kyi spyod yul dang ldan pa ste/ gang gi tshe gzhan gyi dbang gi mtshan ma la kun brtags pa'i ming du yang dag par shes pas mngon par zhen pa med pa de'i tshe yongs su grub pa'i mtshan nyid yin pas/de'i phyir mngon par zhen pa med pa la brten nas yongs su grub pa'i mtshan nyid rab tu shes so zhes gsungs te/ de ni yang dag pa'i shes pa dang / de bzhin nyid la brten nas rab tu shes par 'gyur ba'i thabs kyi dgos pa dang ldan pa'i yongs su grub pa'i mtshan nyid bstan pa yin no//thabs kyi dgos pa dang ldan pa'i chos kyi mtshan nyid bstan pa'i tshig gi don la sogs pa bshad zin to// // de'i 'og tu rtogs pa'i dgos pa dang ldan pa'i chos kyi mtshan nyid bstan pa'i tshig gi don la sogs pa bshad par bya ste/rtogs pa'i dgos pa dang ldan pa'i chos kyi mtshan nyid bstan pa zhes bya ba ni mtshan nyid gsum rtogs pa la brten nas shes bya'i dngos po rnam pa thams cad rtogs par 'gyur zhing de rtogs pa'i 'bras bu phan yon gyi dgos pa thob cing mkhas par 'dogs par 'gyur ba'i don dang ldan pa'i chos kyi mtshan nyid gsum bstan pa gang yin pa'o//de la shes bya'i dngos po rnam pa thams cad kyi mtshan nyid med pa'i chos dang / kun nas nyon mongs pa'i mtshan nyid kyi chos dang / rnam par byang ba'i mtshan nyid kyi chos rnam pa thams cad do//de yang kun brtags pa'i mtshan nyid rtogs pa la brten nas ni mtshan nyid med pa'i chos rtogs par 'gyur ro/ /gzhan gyi dbang gi mtshan nyid rtogs pa la brten nas ni kun nas nyon mongs pa'i mtshan nyid kyi chos rtogs par 'gyur ro/ /yongs su grub pa'i mtshan nyid rtogs pa la brten nas ni rnam par byang ba'i mtshan nyid kyi chos rtogs par 'gyur ro//de la dang por mtshan nyid med pa'i chos rtogs par gyur pa'i dgos pa dang ldan pa kun brtags pa'i mtshan nyid bstan pa'i tshig gi don la sogs pa bshad par bya ste/ de'i phyir de bstan pa'i dbang du mdzad nas/yon tan 'byung gnas de la byang chub sems dpa' chos rnams kyi gzhan gyi dbang gi mtshan nyid la kun brtags pa'i mtshan nyid yang dag pa ji lta ba bzhin du rab tu shes na mtshan nyid med pa'i chos yang dag pa ji lta ba bzhin du rab tu shes so zhes bya ba gsungs te/chos rnams kyi gzhan gyi dbang gi mtshan nyid la zhes bya ba ni rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma'o/ /kun brtags pa'i mtshan nyid yang dag pa ji lta ba bzhin du rab tu shes na zhes bya ba ni ji tsam du rjes su tha snyad gdags pa'i phyir ngo bo nyid dam bye brag tu ming dang brda rnam par gzhag pa de glo bur bar shes na'o//mtshan nyid med pa'i chos yang dag pa ji lta ba bzhin du rab tu shes so zhes bya ba ni kun brtags pa'i mtshan nyid de nyid ngo bo nyid med pa nyid kyis ngo bo nyid med pa'i phyir nam mkha'i me tog dang 'dra bar bden pa gnyi gar gtan med par shes shing chos brtags pa'i phyir chos bdag med pa rtogs par 'gyur ba ste/de ni mtshan nyid med pa'i chos rtogs par 'gyur ba'i dgos pa dang ldan pa kun brtags pa'i mtshan nyid bstan pa yin no/ /de'i 'og tu kun nas nyon mongs pa'i mtshan nyid kyi chos rtogs par 'gyur ba'i dgos pa dang ldan pa gzhan gyi dbang gi mtshan nyid bstan pa'i tshig gi don la sogs pa bshad par bya ste/de'i phyir de bstan pa'i dbang du mdzad nas/ yon tan 'byung gnas de la byang chub sems dpas gzhan gyi dbang gi mtshan nyid yang dag pa ji lta ba bzhin du rab tu shes na kun nas nyon mongs pa'i mtshan nyid kyi chos yang dag pa ji lta ba bzhin du rab tu shes so zhes bya ba gsungs te/gzhan gyi dbang gi mtshan nyid yang dag pa ji lta ba bzhin du rab tu shes na zhes bya ba ni 'du byed kyi mtshan ma la kun brtags pa'i mtshan nyid du mngon par zhen pa yang dag pa ma yin pa kun rtog pa khams gsum pa'i sems dang sems las byung ba nyid du shes na'o//kun nas nyon mongs pa'i mtshan nyid kyi chos yang dag pa ji lta ba bzhin du rab tu shes so zhes bya ba ni gzhan gyi dbang gi mtshan nyid de nyid rten cing 'brel par 'byung ba lugs su 'byung bas bsdus pa'i nyon mongs pa dang /las dang skye ba'i kun nas nyon mongs pa'i mtshan nyid dang ldan pa skye ba ngo bo nyid med pa dang don dam pa'i ngo bo nyid med pa sgyu ma byas pa dang 'dra bar kun rdzob kyi bden pa nyid du yod par shes shing gzhan gyi dbang thams cad sdug bsngal bar rtogs par 'gyur ba ste/de ni kun nas nyon mongs pa'i mtshan nyid kyi chos rtogs par 'gyur ba'i dgos pa dang ldan pa gzhan gyi dbang gi mtshan nyid bstan pa yin no/ /de'i 'og tu rnam par byang ba'i mtshan nyid kyi chos rtogs par 'gyur ba'i dgos pa dang ldan pa yongs su grub pa'i mtshan nyid bstan pa'i tshig gi don la sogs pa bshad par bya ste/de'i phyir de bstan pa'i dbang du mdzad nas/ yon tan 'byung gnas de la byang chub sems dpas yongs su grub pa'i mtshan nyid yang dag pa ji lta ba bzhin du rab tu shes na rnam par byang ba'i mtshan nyid kyi chos yang dag pa ji lta ba bzhin du rab tu shes so zhes bya ba gsungs te/yongs su grub pa'i mtshan nyid yang dag pa ji lta ba bzhin du rab tu shes na zhes bya ba ni 'du byed kyi mtshan ma la kun brtags pa'i mtshan nyid du mngon par zhen pa med pa/ gnas gyur pas rab tu phye ba yang dag pa'i shes pa de bzhin nyid kyi spyod yul dang ldan par shes na'o//rnam par byang ba'i mtshan nyid kyis chos yang dag pa ji lta ba bzhin du rab tu shes so zhes bya ba ni yongs su grub pa'i mtshan nyid de nyid rten cing 'brel par 'byung ba lugs las bzlog pas bsdus pa'i shes rab la sogs pa'i byang chub kyi phyogs dang mthun pa'i chos thams cad dang /stobs bcu la sogs pa che ba'i yon tan thams cad kyi rgyur gyur pa don dam pa ngo bo nyid med pa nam mkha' dang 'dra bar don dam pa'i bden pa nyid du yod par shes shing rnam par grol ba thams cad bde bar rtogs par 'gyur ba ste/de ni rnam par byang ba'i mtshan nyid kyi chos rtogs par 'gyur ba'i dgos pa dang ldan par yongs su grub pa'i mtshan nyid bstan pa yin no/ /de ltar shes bya'i dngos po rnam pa thams cad rtogs pa'i 'bras bu phan yon gyi dgos pa thob pa de tsam gyis na mtshan nyid la mkhas par 'dogs na ni 'og nas ston to//rtogs pa'i dgos pa dang ldan pa'i chos kyi mtshan nyid bstan pa'i tshig gi don la sogs pa bshad zin to// //de'i 'og tu phan yon gyi dgos pa dang ldan pa'i chos kyi mtshan nyid bstan pa'i tshig gi don la sogs pa bshad par bya ste/ phan yon gyi dgos pa dang ldan pa'i chos kyi mtshan nyid bstan pa zhes bya ba ni de ltar shes bya'i dngos po rnam pa thams cad mngon par rdzogs par rtogs pa'i 'bras bu rnam pa thams cad mkhyen pa nyid thob cing mkhas par 'dogs par 'gyur ba'i phan yon gyi don dang ldan pa'i chos kyi mtshan nyid gsum bstan pa gang yin pa'o//de la rnam pa thams cad mkhyen pa nyid ni 'bras bu'i gnas te/ de yang spangs pa phun sum tshogs pa dang / ye shes phun sum tshogs pas rab tu phye ba yin no/ /de la kun brtags pa'i mtshan nyid med pa'i chos rtogs pa la brten nas gzhan gyi dbang gi kun nas nyon mongs pa'i mtshan nyid kyi chos spangs pa phun sum tshogs pas rab tu phye ba'i 'bras bu thob bo//gzhan gyi dbang gi kun nas nyon mongs pa'i mtshan nyid kyi chos spangs pa la brten nas yongs su grub pa'i rnam par byang ba'i mtshan nyid kyi chos 'thob pas ni ye shes phun sum tshogs pas rab tu phye ba'i 'bras bu thob bo//de la dang por spangs pa phun sum tshogs pas rab tu phye ba'i 'bras bu thob pa'i phan yon gyi dgos pa dang ldan pa kun brtags pa dang gzhan gyi dbang gi mtshan nyid bstan pa'i tshig gi don la sogs pa bshad par bya ste/de'i phyir de bstan pa'i dbang du mdzad nas/ yon tan 'byung gnas de la byang chub sems dpas gzhan gyi dbang gi mtshan nyid la mtshan nyid med pa'i chos yang dag pa ji lta ba bzhin du rab tu shes na kun nas nyon mongs pa'i mtshan nyid kyi chos rab tu spong ngo zhes bya ba gsungs te/gzhan gyi dbang gi mtshan nyid la mtshan nyid med pa'i chos yang dag pa ji lta ba bzhin du rab tu shes na zhes bya ba ni 'du byed kyi mtshan ma la kun brtags pa'i ming med par shes so/ /kun nas nyon mongs pa'i mtshan nyid kyi chos rab tu spong ngo zhes bya ba ni yang dag pa ma yin pa kun du rtog pa rab tu spong bar 'gyur ba ste/de ltar yang dag pa ma yin pa kun du rtog pa rab tu spangs pa nyid spangs pa phun sum tshogs pa yin pas de ni spangs pa phun sum tshogs pas rab tu phye ba'i 'bras bu thob pa'i phan yon gyi dgos pa dang ldan pa kun brtags pa dang gzhan gyi dbang gi mtshan nyid bstan pa yin no//de'i 'og tu ye shes phun sum tshogs pas rab tu phye ba'i 'bras bu 'thob pa'i phan yon gyi dgos pa dang ldan pa'i gzhan gyi dbang dang yongs su grub pa'i mtshan nyid bstan pa'i tshig gi don la sogs pa bshad par bya ste/ de'i phyir de bstan pa'i dbang du mdzad nas/kun nas nyon mongs pa'i mtshan nyid kyi chos rab tu spangs na rnam par byang ba'i mtshan nyid kyi chos thob par 'gyur te zhes bya ba gsungs te/ kun nas nyon mongs pa'i mtshan nyid kyi chos rab tu spangs na zhes bya ba ni yang dag pa ma yin pa kun du rtog pa gnas gyur na'o//rnam par byang ba'i mtshan nyid kyi chos thob par 'gyur te zhes bya ba ni gnas gyur pas bsdus pa yang dag pa'i shes pa thob pa ste/ de ltar yang dag pa'i shes pa thob pa nyid ye shes phun sum tshogs pa yin pas de ni ye shes phun sum tshogs pas rab tu phye ba'i 'bras bu thob pa'i phan yon gyi dgos pa dang ldan pa gzhan gyi dbang dang yongs su grub pa'i mtshan nyid bstan pa yin no//phan yon gyi dgos pa dang ldan pa'i chos kyi mtshan nyid bstan pa'i tshig gi don la sogs pa bshad zin to// // dgos pa drug dang ldan pa'i chos kyi mtshan nyid bstan pas rgya cher bstan pa bshad pa'i tshig gi don la sogs pa bshad zin to// // don de dag gis dngos po bsdus pa'i tshig gi don la sogs pa bshad par bya ste/ de dag gi dngos po bsdu ba zhes bya ba ni de yan chad du dgos pa drug dang ldan pa'i chos kyi mtshan nyid ji skad bstan pa de dag gi mjug bsdu zhing sgo de nas byang chub sems dpa' chos rnams kyi mtshan nyid la mkhas pa dang /mtshan nyid la mkhas par 'dogs pa bstan pa gang yin pa'o/ /de'i phyir de bstan pa'i dbang du mdzad nas/ yon tan 'byung gnas gang gi phyir byang chub sems dpas zhes bya ba la sogs pa gsungs so//de la de gang dag gi dngos po bsdu ba 'di ni don rnam pa gsum bstan te/ mnyan pa'i rnam pas yongs su shes pa dang / bsgom pa'i rnam pas yongs su shes pa dang / de'i 'bras bus bya ba med pa'o/ /de la dang por mnyan pa'i rnam pas yongs su shes pa ni da ltar chos rnams kyi kun brtags pa'i mtshan nyid dang /gzhan gyi dbang gi mtshan nyid dang / yongs su grub pa'i mtshan nyid yang dag pa ji lta ba bzhin du rab tu shes shing zhes bya bas bstan te/ des ni sngar gnyen po'i dgos pa dang / dpe'i dgos pa dang /thabs kyi dgos pa dang ldan pa'i chos kyi mtshan nyid gsum ji skad bstan pa de dag gi dngos po bsdu ba bstan te/ de dag ni lung gi sgo nas kyang shes par byar rung ba yin pas na mnyan pa'i rnam pas yongs su shes pa zhes bya'o/ /de'i 'og tu bsgom pa'i rnam pas yongs su shes pa ni/mtshan nyid med pa dang / kun nas nyon mongs pa'i mtshan nyid dang / rnam par byang ba'i mtshan nyid yang dag pa ji lta ba bzhin du rab tu shes la zhes bya bas bstan te/ des ni sngar rtogs pa'i dgos pa dang ldan pa'i chos kyi mtshan nyid gsum ji skad bstan pa de dag gi dngos po bsdu ba bstan te/de dag gi lam bsgom pas shes par bya ba yin pas na sgom pa'i rnam pa yongs su shes pa zhes bya'o/ /de'i 'og tu de'i 'bras bus bya ba med pa ni/ mtshan nyid med pa'i chos yang dag pa ji lta ba bzhin du rab tu shes nas/ kun nas nyon mongs pa'i mtshan nyid kyi chos rab tu spong zhing kun nas nyon mongs pa'i mtshan nyid kyi chos rab tu spangs na rnam par byang ba'i mtshan nyid kyi chos 'thob par gyur pa zhes bya ba bstan te/des ni sngar phan yon gyi dgos pa dang ldan pa'i chos kyi mtshan nyid gsum ji skad bstan pa de dag gi dngos po bsdu ba bstan te de dag ni sngar bsgom pa'i rnam par bya ba byas zin pa'i 'bras bu'i 'grel pa sbyar ba tsam du zad kyi/gzod bya ba bsgrub pa ma yin pas na de'i 'bras bu bya ba med pa zhes bya'o/ /de tsam gyis na byang chub sems dpa' chos rnams kyi mtshan nyid la mkhas pa yin la zhes bya ba ni mnyan pa'i rnam pas yongs su shes pa de tsam gyis na mkhas pa yin par bstan te/des ni sngar yongs su zhus pa'i skabs su 'phags pa yon tan 'byung gnas kyis ji tsam gyis na byang chub sems dpa' chos rnams kyi mtshan nyid la mkhas pa lags zhes zhus pa'i lan btab pa yin no//de bzhin gshegs pa byang chub sems dpa' chos rnams kyi mtshan nyid la mkhas par 'dogs na yang de tsam gyis 'dogs so zhes bya ba ni bsgom pa'i rnam pas yongs su shes pa dang / de'i 'bras bu bya ba med pa de tsam gyis na mkhas par 'dogs so zhes bstan te/ des ni sngar yongs su zhus pa'i skabs su 'phags pa yon tan 'byung gnas kyis de bzhin gshegs pa byang chub sems dpa' chos rnams kyi mtshan nyid la mkhas par 'dogs na yang ji tsam gyis 'dogs lags zhes zhus pa'i lan btab pa yin no/ /tshigs su bcad pa dang pos ni phan yon gyi dgos pa de nyid kyi dngos po bsdu ba bstan to//gnyis pas ni de ltar mi sgrub pa'i nyes dmigs bstan te/ de ni de dag gi dngos po bsdu bas rgya cher bstan pa bshad pa yin no/ / le'u drug pa'i tshig gi don la sogs pa bshad zin to// //de ltar chos rnams kyis mtshan nyid kyi kun rdzob kyi bden pa'i mtshan nyid yongs su shes par bya ba bstan nas/da ni chos rnams kyi ngo bo nyid med pa'i mtshan nyid kyis kun rdzob kyi bden pa'i mtshan nyid yongs su shes par bya ba bstan pa'i tshig gi don la sogs pa bshad par bya ste/ de'i phyir de bstan pa'i dbang du mdzad nas/de nas bcom ldan 'das la byang chub sems dpa' don dam yang dag 'phags kyis 'di skad ces gsol to zhes bya ba la sogs pa 'phags pa don dam yang dag 'phags kyi le'u bdun pa 'di gsungs so/ / de la le'u bdun pa 'di'i bsdus pa'i don ni mdor bsdu na chos rnams kyi ngo bo nyid med pa'i mtshan nyid bstan pa yin no//de yang rnam par dbye na rnam pa gnyis te/ yongs su zhus pa dang / rgya cher bstan pa'o/ /de la yongs su zhus pa ni bcom ldan 'das 'di na bdag gcig pu dben pa zhig na mchis pa'i tshe sems kyi yongs su rtog pa 'di lta bu skyes lags te zhes bya ba nas/bka' stsal pa'i don de nyid bcom ldan 'das la bdag yongs su zhu lags so zhes gsungs pa'i bar gyis bstan to/ /rgya cher bstan pa ni de skad ces gsol pa dang / bcom ldan 'das kyis byang chub sems dpa' don dam yang dag 'phags la 'di skad ces bka' stsal to zhes bya ba la sogs pa le'u 'di nyid kyi gzhung lhag ma thams cad kyis bstan to//de la dang por yongs su zhus pa'i tshig gi don la sogs pa bshad par bya ste/ yongs su zhus pa zhes bya ba ni chos rnams kyi ngo bo nyid med pa la shin tu rmongs pa'i gnyen por mtshan nyid dang /skye ba dang / don dam pa'i ngo bo nyid med pa la mkhas pa bstan pa gleng bslang ba'i phyir 'dir dang po bcom ldan 'das la 'phags pa don dam yang dag 'phags kyis zhu ba zhus pa gang yin pa'o/ /de la yongs su zhus pa'i skabs 'dir ni 'phags pa don dam yang dag 'phags kyis 'di snyam du/bcom ldan 'das de kho na nyid thugs su chud pa'i dpal gyi mgur nas so so yang dag par rig pa bzhi'i mkhyen pas chos rnams kyi rnam grangs dang / mtshan nyid dang / nges pa'i tshig dang / rab tu dbye ba yang bka' stsal la/ chos rnams kyi ngo bo nyid med pa la shin tu rmongs pa'i gnyen por chos thams cad ngo bo nyid med par yang bka' stsal pa 'di la/ngo bo nyid med pa rnam pa gsum bstan pa ma brjod na/ gzhan dag ngo bo nyid med pa nyid kyi ldem por dgongs pa bstan pa la don la log par rtogs pas chud za bar 'gyur ba'i gnyen po bstan par dgongs nas/'dir bcom ldan 'das kyis rnam grangs du mar phung po rnams rang gi mtshan nyid la sogs pa yang bka' stsal pa/ bcom ldan 'das kyis chos thams cad ngo bo nyid ma mchis pa la sogs pa yang bka' stsal lags na/ bcom ldan 'das kyis ci la dgongs nas chos thams cad ngo bo nyid ma mchis pa la sogs pa/bka' stsal pa'i don de nyid bcom ldan 'das la bdag yongs su zhu lags so zhes yongs su zhus par sbyar ro/ /skabs 'di dag gi tshig gi don gzhan ni sngar 'phags pa rab 'byor gyi le'ur bshad pa bzhin du rig par bya'o//yongs su zhus pa'i tshig gi don la sogs pa bshad zin to// //de'i 'og tu rgya cher bstan pa'i tshig gi don la sogs pa bshad par bya ste/ rgya cher bstan pa zhes bya ba ni de ltar yongs su zhus nas/ bcom ldan 'das kyis chos rnams kyi ngo bo nyid med pa nyid kyi don rgya cher bstan pa gang yin pa'o//de'i phyir de bstan pa'i dbang du mdzad nas/ don dam yang dag 'phags khyod kyi sems kyi yongs su rtogs pa dge ba tshul bzhin skyes pa legs so legs so zhes bya ba la sogs pa gsungs so/ /de la rgya cher bstan pa 'dis ni don rnam pa gsum ston te/ngo bo nyid med pa nyid kyi ldem por dgongs pa bstan pa dang / de la spyod pa'i gang zag gi bye brag bstan pa dang / mdo sde'i che ba nyid bstan pa'o/ /de la ngo bo nyid med pa nyid kyi ldem por dgongs pa bstan pa ni/ don dam yang dag 'phags de'i phyir nyon cig dang ngas ci la dgongs nas chos thams cad ngo bo nyid med pa la sogs zhes gsungs pa khyod la bshad par bya'o zhes bya ba nas rang bzhin gyis yongs su mya ngan las 'das pa'o zhes bstan to zhes gsungs pa'i tshar tha ma'i bar gyis bstan to//de la spyod pa'i gang zag gi bye brag bstan pa ni/don dam yang dag 'phags ngas ni sems can gyi khams na zhes bya ba nas/ don dam yang dag 'phags de bzhin te/ gzhan du ma yin gyis des ni de bzhin du zung shig ces gsungs pa'i bar gyis bstan to/ /mdo sde'i che ba nyid bstan pa ni/ de nas bcom ldan 'das la byang chub sems dpa' don dam yang dag 'phags kyis yang 'di skad ces gsol to zhes bya ba la sogs pa gzhung lhag ma thams cad kyis bstan to//de la dang por ngo bo nyid med pa nyid kyi ldem por dgongs pa bstan pa'i tshig gi don la sogs pa bshad par bya ste/ngo bo nyid med pa nyid kyi ldem por dgongs pa bstan pa'i zhes bya ba ni don la log par rtog pa rnam pa bzhi'i gnyen po ngo bo nyid med pa nyid gsum bstan pa 'di ma brjod na ngo bo nyid med pa nyid kyi ldem por dgongs pa bstan pa la don la log par rtog pa rnam pa bzhis chud za bar 'gyur ba de'i gnyen por ngo bo nyid med pa gsum bstan pa'o//de la don la log par rtog pa rnam pa bzhi ni gnas med par log par rtog pa dang / dgongs pa med par log par rtog pa dang / don med par log par rtog pa dang / ltos pa med par log par rtog pa'o/ /de la gnas med par log par rtog pas chud za bar 'gyur ba'i gnyen po ni/don dam yang dag 'phags ngas chos rnams kyi ngo bo nyid med pa nyid rnam pa gsum po 'di lta ste zhes bya ba la sogs pa bstan to/ /dgongs pa med par log par rtog pas chud za bar 'gyur ba'i gnyen po ni/ don dam yang dag 'phags de la chos rnams kyi mtshan nyid ngo bo nyid med pa nyid gang zhe na zhes bya ba la sogs pas bstan to//don med par log par rtog pas chud za bar 'gyur ba'i gnyen po ni/ don dam yang dag 'phags de la 'di lta ste/ dper na nam mkha'i me tog ji lta ba de lta bur ni zhes bya ba la sogs pas bstan to//ltos pa med par log par rtog pas chud za bar 'gyur ba'i gnyen po ni/ don dam yang dag 'phags de la mtshan nyid ngo bo nyid med pa nyid la dgongs nas zhes bya ba la sogs pas bstan to/ /de la dang por gnas med par log par rtog pas chud za bar 'gyur ba'i gnyen po'i tshig gi don la sogs pa bshad par bya ste/gnas med par log par rtog pas chud za bar 'gyur ba'i zhes bya ba ni ngo bo nyid gsum la ma brten pa'i phyir gnas med par log par rtog pa ste/ de ji lta bu zhe na/ bcom ldan 'das kyis chos thams cad ngo bo nyid med pa zhes bya ba gsungs pa ni ngo bo nyid gsum po kun brtags pa'i ngo bo nyid dang /gzhan gyi dbang gi ngo bo nyid dang / yongs su grub pa'i ngo bo nyid la brten te gsungs pa'i phyir gnas yod pa yin na/ de ltar mi shes shing ngo bo nyid gsum la ma brten par gsungs so snyam du gnas med par log par rtog pa ste/des kyang rab tu nyams shing chud za bar 'gyur bas de'i phyir de'i gnyen por/ don dam yang dag 'phags ngas chos rnams kyi ngo bo nyid med pa rnam pa gsum po 'di lta ste/ mtshan nyid ngo bo nyid med pa nyid dang / skye ba ngo bo nyid med pa nyid dang / don dam pa ngo bo nyid med pa nyid las dgongs nas chos thams cad ngo bo nyid med pa'o zhes bstan to zhes bya ba gsungs te/bcom ldan 'das kyis chos thams cad ngo bo nyid med pa zhes gsungs pa ni ngo bo nyid rnam pa gsum po dag la brten nas de dag gi ngo bo nyid med pa gsum las dgongs te gsungs pa yin pas gnas med pa ma yin no zhes bya ba'i tha tshig ste/ngo bo nyid med pa nyid gsum gyi tshig gi don ni 'og nas ston to/ /de ni gnas med par log par rtog pas chud za bar 'gyur ba'i gnyen po ngo bo nyid med pa nyid kyi ldem por dgongs pa la bstan pa yin no//de'i 'og tu dgongs pa med par log par rtog pas chud za bar 'gyur ba'i gnyen po bstan pa'i tshig gi don la sogs pa bshad par bya ste/ dgongs pa med par log par rtog pas chud za bar 'gyur ba zhes bya ba ni ngo bo nyid med pa nyid rnam pa gsum las dgongs pa yongs su spang ba'i phyir dgongs pa med par log par rtog pa ste/de yang ji lta bu zhe na/ bcom ldan 'das kyis chos thams cad ngo bo nyid med pa zhes gsungs pa ni ngo bo nyid med pa nyid gcig pu zhig las dgongs pa min gyi ngo bo nyid med pa nyid rnam pa gsum po mtshan nyid ngo bo nyid med pa nyid dang /skye ba ngo bo nyid med pa nyid dang / don dam pa ngo bo nyid med pa nyid las dgongs te gsungs pa yin pas dgongs pa yod pa yin na/ de ltar mi shes shing ngo bo nyid med pa gsum las ma dgongs so snyam du dgongs pa med par log par rtog pa ste/ des dang rab tu nyams shing chud za bar 'gyur bas de'i phyir de'i gnyen por/don dam yang dag 'phags de la chos rnams kyi mtshan nyid ngo bo nyid med pa nyid gang zhe na zhes bya ba la sogs pa gsungs te/ 'dir don du na/ bcom ldan 'das kyis chos thams cad ngo bo nyid med pa zhes gsungs pa la/chos thams cad ces bya ba ni mtshan nyid gsum po dag go/ /ngo bo nyid med pa zhes bya ba ni ngo bo nyid med pa nyid gsum po dag ste/ de yang mtshan nyid thams cad ngo bo nyid med pa thams cad gcig gis ngo bo nyid med pa ma yin gyi/ kun brtags pa'i mtshan nyid ni ming dang brdar rnam par gzhag pa'i mtshan nyid yin gyi rang gi mtshan nyid kyis rnam par gzhag pa ni ma yin pas/bden pa gnyis kar gtan med pa'i phyir de ni mtshan nyid ngo bo nyid med pa nyid kyis ngo bo nyid med pa yin la/ gzhan gyi dbang gi mtshan nyid ni rkyen gzhan gyi stobs kyis byung ba yin gyi bdag nyid kyis ni ma yin pas/kun rdzob kyi bden par sgyu ma tsam du yod pa'i phyir de ni skye ba ngo bo nyid med pa nyid kyis ngo bo nyid med pa yang yin la/ rnam par dag pa'i dmigs pa ma yin pas de la don dam pa'i ngo bo nyid med pa'i phyir don dam pa'i bden pa ma yin pas don dam pa ngo bo nyid med pa nyid kyis ngo bo nyid med pa yang yin yongs su grub pa'i mtshan nyid ni don dam pa yin la don dam pa ni chos thams cad kyi ngo bo nyid med pa nyid kyis rab tu phye ba yin la/don dam pa'i bden pa yang yin/ ngo bo nyid med pa nyid kyang yin pa'i phyir de ni don dam par ngo bo nyid med pa nyid kyis ngo bo nyid med pa yin pas na de'i phyir bcom ldan 'das kyis chos thams cad ngo bo nyid med pa zhes gsungs pa la dgongs pa med pa ma yin no zhes bya ba'i tha tshig ste/de ni dgongs pa med par log par rtog pas chud za bar 'gyur ba'i gnyen por ngo bo nyid med pa nyid kyi ldem por dgongs pa bstan pa yin no//de'i 'og tu don med par log par rtog pas chud za bar 'gyur ba'i gnyen por bstan pa'i tshig gi don la sogs pa bshad par bya ste/ don med par log par rtog pas chud za bar 'gyur ba zhes bya ba ni sgro btags pa med cing skur pa med pa'i don rnam par spangs pa'i phyir don med par log par rtog pa ste/de yang ji lta bu zhe na/ bcom ldan 'das kyis chos thams cad ngo bo nyid med ces gsungs pa ni sgro btags pa med pa dang skur pa med pa'i don dang ldan pa yin te/ kun brtags pa'i mtshan nyid mtshan nyid ngo bo nyid med pa ni nam mkha'i me tog dang 'dra bar bden pa gnyi gar gtan med pas de ni sgro btags pa med pa'i don dang ldan pa yin la/gzhan gyi dbang gi mtshan nyid skye ba ngo bo nyid med pa dang / don dam pa ngo bo nyid med pa ni sgyu ma byas pa dang 'dra bar kun rdzob kyi bden pa nyid du yod pa yin/ yongs su grub pa'i mtshan nyid don dam pa ngo bo nyid med pa nyid kyis ngo bo nyid med pa ni nam mkha' dang 'dra bar don dam pa'i bden pa nyid du yod pa yin pas/ de gnyis ni skur pa 'debs pa med pa'i don dang ldan pa yin pa'i phyir don yod pa yin na/ de ltar na mi shes shing sgro btags pa med pa dang /skur pa med pa'i don dang mi ldan no snyam du don med par log par rtog pa ste des kyang rab tu nyams shing chud za bar 'gyur bas de'i phyir de'i gnyen por/ don dam yang dag 'phags de la 'di lta ste/ dper na nam mkha'i me tog ji lta ba de lta bur ni zhes bya ba la sogs pa gsungs te/'dir don du na bcom ldan 'das kyis chos thams cad ngo bo nyid med pa zhes gsungs pa ste/ de yang mtshan nyid thams cad la skur pa btab pa ma yin te/ kun brtags pa'i mtshan nyid ni nam mkha'i me tog dang 'dra bar bden pa gnyis kar gtan med pas mtshan nyid ngo bo nyid med pa nyid kyis ngo bo nyid med pa yin pas/de ni sgro btags pa med pa'i don dang ldan pa yin la gzhan gyi dbang gi mtshan nyid ni sgyu ma byas pa dang 'dra bar kun rdzob kyi bden pa nyid du skye ba ngo bo nyid med pa nyid dang don dam pa ngo bo nyid med pa de las cig shos don dam pa'i ngo bo nyid med pa'i tshul du yod pa yin/yongs su grub pa'i mtshan nyid ni nam mkha' dang 'dra bar don dam pa'i bden pa nyid du don dam par ngo bo nyid med pa de las chos bdag med pas rab tu phye ba dang thams cad du spong ba/ don dam pa yang yin la ngo bo nyid med pa yang yin pa'i tshul du yod pa yin pas de gnyis ni skur pa med pa'i don dang ldan par gsungs pas na don med pa ma yin no zhes bya ba'i tha tshig go//don dam yang dag 'phags ngas ngo bo nyid med pa nyid rnam pa gsum po de dag las dgongs nas chos thams cad ngo bo nyid med pa'o zhes bstan to zhes bya ba ni gnas med pa dang /dgongs pa med pa dang / don med par log par rtog pa'i gnyen po sngar bstan pa gsum char gyi mjug bsdu ba yin te/ sa bcad pa ni tha ma'i nang du bsdu'o/ /de ni don dam med par log par rtog pas chud za bar 'gyur ba'i gnyen por ngo bo nyid med pa nyid kyi ldem por dgongs pa bstan pa yin no//de'i 'og tu ltos pa med par log par rtog pas chud za bar 'gyur ba'i gnyen po bstan pa'i tshig gi don la sogs pa bshad par bya ste/ ltos pa med par log par rtog pas chud za bar 'gyur ba zhes bya ba ni rang gi mtshan nyid kyi med pa gang yin pa de ni ma skyes pa yin zhes bya ba la sogs pa ltar/snga ma la phyi ma ltos pa'i phyir ltos pa med par log par rtog pa ste/ de yang ji lta bu zhe na/ bcom ldan 'das kyis chos thams cad ma skyes pa ma 'gags pa gzod ma nas zhi ba rang bzhin gyis yongs su mya ngan las 'das pa zhes gsungs pa ni mtshan nyid ngo bo nyid med pa nyid las dgongs nas 'di ltar rang gi mtshan nyid kyis med pa gang yin pa de ni ma skyes pa yin/ma skyes pa gang yin pa de ni ma 'gags pa yin/ ma skyes pa dang / ma 'gags pa gang yin pa de ni gzod ma nas zhi ba yin/ gzod ma nas zhi ba gang yin pa de ni rang bzhin gyis yongs su mya ngan las 'das pa yin zhes gsungs pa dang /yang de ni don dam pa ngo bo nyid med pa nyid chos bdag med pas rab tu phye ba las dgongs nas gsungs pa yang yin te/ 'di ltar don dam pa ngo bo nyid med pa nyid chos bdag med pas rab tu phye ba nyid 'dus ma byas pa nyon mongs pa thams cad dang bral ba yin te/'dus ma byas pa'i phyir ma skyes pa dang ma 'gags pa yin la/ nyon mongs pa thams cad dang bral ba'i phyir gzod ma nas zhi ba dang / rang bzhin gyis yongs su mya ngan las 'das pa yin no zhes gsungs pa ni snga ma las phyi ma ltos pa'i phyir ltos pa yod pa yin na/de ltar mi shes shing snga ma la phyi ma ma ltos ma skyes pa yang gzhan zhig yin la/ ma 'gags pa yang gzhan/ gzod ma nas zhi ba yang gzhan/ rang bzhin gyis yongs su mya ngan las 'das pa yang gzhan zhig yin par gsungs so snyam du ltos pa med par log par rtog pa ste/des kyang rab tu nyams shing chud za bar 'gyur bas de'i phyir de'i gnyen por/ don dam yang dag 'phags de la mtshan nyid ngo bo nyid med pa nyid las dgongs nas ngas chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa'o zhes bstan to zhes bya ba la sogs pa dang /don dam yang dag 'phags yang don dam pa ngo bo nyid med pa nyid chos bdag med pas rab tu phye ba las dgongs nas ngas chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa'o zhes bstan to zhes bya ba la sogs pa gsungs te/'dir don du na bcom ldan 'das kyis chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa zhes gsungs pa ni mtshan nyid ngo bo nyid med pa las dgongs pa yang yin te/rang gi mtshan nyid kyis med pa gang yin pa de ni ma skyes pa yin zhes bya ba la sogs pa ltar snga ma la phyi ma ltos pa'i phyir de yang ltos pa med pa ma yin la/ de ni don dam pa ngo bo nyid med pa nyid chos bdag med pas rab tu phye ba las dgongs pa yang yin te/de ni chos rnams kyi chos nyid 'dus ma byas pa nyon mongs pa thams cad dang bral ba yin pas de ni 'dus ma byas pa'i phyir ma skyes pa dang / ma 'gags pa yin la de ni nyon mongs pa thams cad dang bral ba'i phyir/ gzod ma nas zhi ba dang /rang bzhin gyis yongs su mya ngan las 'das pa yang gzhan zhig yin par zhes gsungs pa yang snga ma la phyi ma ltos pa'i phyir ltos pa med pa ma yin pas na/ de'i phyir ma skyes pa yang gzhan zhig yin la ma 'gags pa yang gzhan/ gzod ma nas zhi ba yang gzhan/ rang bzhin gyis yongs su mya ngan las 'das pa yang gzhan zhig yin par gsungs pa ma yin no zhes bya ba'i tha tshig ste/de ni ltos pa med par log par rtog pas chud za bar 'gyur ba'i gnyen por ngo bo nyid med pa nyid kyis ldem por dgongs pa bstan pa yin no/ /ngo bo nyid med pa nyid kyis ldem por dgongs pa bstan pa'i tshig gi don la sogs pa bshad zin to// //de'i 'og tu de la spyod pa'i gang zag gi bye brag bstan pa'i tshig gi don la sogs pa bshad par bya ste/ de la spyod pa'i gang zag gi bye brag ni rnam pa gnyis te/ sgrub pa'i bye brag dang / mos pa'i bye brag go/ /de la sgrub pa'i bye brag kyang rnam pa gnyis te/mdor bstan pa dang / rgyas par bshad par bya'o/ /mos pa'i bye brag kyang rnam pa gnyis te/ mdor bstan pa dang / rgyas par bshad pa'o/ /de la sgrub pa'i bye brag mdor bstan pa ni/ don dam yang dag 'phags ngas ni sems can gyi khams na zhes bya ba nas 'khor ba las mi 'da' ba'i phyir ro zhes gsungs pa'i bar gyis bstan to//sgrub pa'i bye brag rgyas par bshad pa ni/ don dam yang dag 'phags de la sems can gang dag dang po nyid nas dge ba'i rtsa ba ma bskyed pa zhes bya ba nas de'i phyir de bzhin gshegs pas de nyan thos kyi rigs su 'dogs so zhes gsungs pa'i bar gyis bstan to//mos pa'i bye brag mdor bstan pa ni/ don dam yang dag 'phags 'di ltar nga'i chos 'dul ba zhes bya ba nas/ rang bzhin gyis yongs su mya ngan las 'das pa'o zhes chos ston to zhes gsungs pa'i bar gyis bstan to/ / mos pa'i bye brag rgyas par bshad pa ni/ de la sems can gang dag dge ba'i rtsa ba chen po bskyed pa zhes bya ba nas/ don dam yang dag 'phags de bzhin de gzhan du ma yin gyi de ni de bzhin du zung shig ces gsungs pa'i bar gyis bstan to/ /de la dang por de la spyod pa'i gang zag gi bsgrub pa'i bye brag mdor bstan pa'i tshig gi don la sogs pa bshad par bya ste/sgrub pa'i bye brag mdor bstan pa zhes bya ba ni bcom ldan 'das kyis ngo bo nyid gsum po dag gi ngo bo nyid med pa yin par gsungs pas/ ngo bo nyid gsum las ngo bo nyid med pa gsum tha dad pa ma yin na sems can rnams kyis de ltar ma mthong zhing ngo bo nyid la mngon par zhen pas kun nas nyon mongs pa'i phyogs dang mthun par bsgrub cing yun ring por 'khor bar 'khor bar 'gyur ba'i bsgrub pa'i bye brag mdor bstan pa gang yin pa'o//de'i phyir de bstan pa'i dbang du mdzad nas/don dam yang dag 'phags ngas ni sems can gyi khams na zhes bya ba la sogs pa gsungs so/ /'dir mtshams sbyar ba ji lta bu zhe na/ ngo bo nyid gsum dang / ngo bo nyid med pa nyid gsum ni don tha dad pa ma yin te/ kun brtags pa'i ngo bo nyid ni mtshan nyid ngo bo nyid med pa nyid kyis ngo bo nyid med pa yin la/gzhan gyi dbang gi ngo bo nyid ni skye ba ngo bo nyid med pa nyid dang / don dam pa ngo bo nyid med pa gcig gis ngo bo nyid med pa yin/ yongs su grub pa'i ngo bo nyid ni don dam pa nyid med pa nyid kyis ngo bo nyid med pa yin pas ngo bo nyid gsum bstan pas ngo bo nyid med pa nyid gsum yang rtogs par 'gyur ba'i phyir ngo bo nyid gsum gdags par byas pa las logs shig tu ngo bo nyid med pa nyid gsum gdags mi dgos pa yin na/bcom ldan 'das kyis chos gdags pa rnam par gzhag pa mdzad pa'i gnas skabs de dang de dag tu ngo bo nyid gsum gdags pa yang mdzad pa de la dgos pa ni ci yod dgongs pa ni gang yin snyam du zhib mor brtags pa mkhas pa mdzangs pa'i shes rab dang ldan pa dag tshul bzhin du bzhugs pa'i bsam pas rtog cing rigs pas bskyed pa'i smra bas rgol bar 'gyur ba'i bsam pas brtags nas/bcom ldan 'das stobs bcu'i mkhyen pa mnga' ba thugs rje dang ldan pas sngar ngo bo nyid gsum gdags pa mdzad pa'i 'og tu ngo bo nyid med pa nyid gsum yang gdags pa mdzad pa'i skabs 'dir don dam yang dag 'phags ngas ni sems can gyi khams na sems can rnams kyi kun brtags pa'i ngo bo nyid/ngo bo nyid kyis tha dad par mthong zhing gzhan gyi dbang gi ngo bo nyid dang / yongs su grub pa'i ngo bo nyid kyang ngo bo nyid kyis tha dad par mthong na/ de'i phyir ngo bo nyid med pa nyid rnam pa gsum mi 'dogs kyi zhes bya ba la sogs pa gsungs te/'dir don du na ngo bo nyid gsum las ngo bo nyid med pa nyid gsum gyi don tha dad pa ma yin mod kyi/ sems can rnams kyi gal te de bzhin du kun brtags pa'i ngo bo nyid kyang mtshan nyid ngo bo nyid med pa nyid kyis ngo bo nyid med par mtshan nyid ma 'dres par mthong zhing gzhan gyi dbang gi ngo bo nyid dang /yongs su grub pa'i ngo bo nyid kyang skye ba ngo bo nyid med pa nyid dang / don dam pa'i ngo bo nyid med pa nyid kyi ngo bo nyid med par mtshan nyid ma 'dres par mthong na ni de'i tshe de dag gis mtshan nyid med pa'i chos yang dag pa ji lta ba bzhin du rab tu shes nas kun nas nyon mongs pa'i mtshan nyid kyi chos rab tu spangs shing /kun nas nyon mongs pa'i mtshan nyid kyi chos rab tu spangs nas rnam par byang ba'i mtshan nyid kyi chos thob par 'gyur ba nyid yin pas de'i phyir yang de dag gi don du ngo bo nyid med pa gsum 'dogs par yang mi mdzad pa zhig na/sems can rnams kyis de ltar ma mthong zhing gzhan gyi dbang dang yongs su grub pa'i ngo bo nyid la kun brtags pa'i ngo bo nyid du mngon par zhen te/ ji tsam du kun brtags pa'i ngo bo nyid du mngon par zhen pa'i bag chags kun gzhi'i rnam par shes pa bsams pa de tsam du gzhan gyi dbang gi ngo bo nyid lugs bzhin du skyes shing nyon mongs pa dang las dang /skye ba'i kun nas nyon mongs pas kun nas nyon mongs par 'gyur te/ yun ring por lam rgyud lngar 'khor zhing 'khor ba las mi 'da' ba'i phyir de dag gis ngo bo nyid gsum po dag ngo bo nyid med par rtogs par bya ba'i don du ngo bo nyid med pa nyid gsum 'dogs par mdzad de/de la dgos pa dang dgongs pa ni de yin no zhes ston to/ /de ltar ngo bo nyid la mngon par zhen cing ngo bo nyid med pa mi rtogs pas yun ring por 'khor bar mi 'khor bar 'gyur ba de nyid la spyod pa'i gang zag gi sgrub pa'i bye brag mdor bstan pa yin te/de ni kun nas nyon mongs pa'i phyogs dang mthun pa'i sgrub pa'i bye brag yin par sbyar ro/ /de ltar mtshams sbyar ba dang / brgal ba'i lan gyis spyi'i don bstan nas/ da ni tshig gi don bshad par bya ste/ de la kun brtags pa'i ngo bo nyid ngo bo nyid tha dad par mthong zhing zhes bya ba ni kun brtags pa'i ngo bo nyid mtshan nyid ngo bo nyid med pa nyid kyi ngo bo nyid med par tha dad par mthong ba'o//tha dad pa zhes bya ba'i sgra ni mtshan nyid ma 'dres pa ste/ kun brtags pa'i mtshan nyid sgro btags pa med pa de nyid gzhan gyi dbang dang yongs su grub pa'i mtshan nyid skur pa med pa dang / mtshan nyid ma 'dres par tha dad par mthong ba'o//gzhan gyi dbang gi ngo bo nyid dang yongs su grub pa'i ngo bo nyid kyang ngo bo nyid kyis tha dad par mthong na zhes bya ba yang ngo bo nyid de gnyis skye ba ngo bo nyid med pa nyid dang / don dam pa ngo bo nyid med pa nyid kyis ngo bo nyid med par tha dad par mthong na'o/ /tha dad pa zhes bya ba'i sgra ni snga ma bzhin te/bye brag tu ni gzhan gyi dbang gi kun rdzob tu skur pa med par yod la/ yongs su grub pa ni don dam par skur pa med par yod pa'i mtshan nyid ma 'dres par tha dad par mthong na'o/ /de'i phyir ngo bo nyid med pa nyid rnam pa gsum mi 'dogs shing zhes bya ba ni de ltar mthong na de'i tshe sgom pa'i rnam pas yongs su shes pa dang de'i 'bras bu bya ba med pa nyid yin pas de'i phyir yang de dag gi don du ngo bo nyid med pa nyid gsum mi 'dogs kyi de dag gis de ltar ma mthong bas de'i phyir de dag gi don du ngo bo nyid med pa gsum 'dogs par byed do zhes 'og nas 'byung ba dang sbyar bar bya'o//ji ltar na de dag gis ngo bo nyid gsum ngo bo nyid kyis tha dad par ma mthong zhe na/ de'i phyir de bstan pa'i dbang du mdzad nas/ sems can rnams gzhan gyi dbang dang yongs su grub pa'i ngo bo nyid la kun brtags pa'i ngo bo nyid du sgro btags nas zhes bya ba la sogs pa gsungs so/ / de la gzhan gyi dbang dang yongs su grub pa'i ngo bo nyid la kun brtags pa'i ngo bo nyid du sgro btags nas zhes bya ba ni de skad du ming du brtags nas zhes bya ba'i tha tshig go/ /kun brtags pa'i ngo bo nyid kyi mtshan nyid du rjes su tha snyad 'dogs te zhes bya ba ni tshig gis 'dogs par byed pa'o/ / tha snyad btags pas yongs su bsgos pa'i sems zhes bya ba ni kun brtags pa'i bag chags kyis bsgos pa kun gzhi rnam par shes pa'o/ /rjes su 'brel pa zhes bya ba ni bag chags sad pa'o/ /bag la nyal gyis zhes bya ba ni 'khrul pa'i rgyu rang bzhin nyid du gnas pa'o/ /mngon par zhen to zhes bya ba ni rnam par rtog go zhes bya ba'i tha tshig go//kun du bskyed de zhes bya ba ni yang 'byung ba'i srid par mtshams sbyor ba'o/ /nyon mongs pa dang las dang skye ba'i kun nas nyon mongs pa zhes bya ba ni lugs bzhin 'byung bas bsdus pa'o/ /'khor ba las mi 'da' ba'i phyir ro/ /de'i phyir de dag gis ngo bo nyid gsum ngo bo nyid kyis tha dad par ma mthong ngo zhes bka' stsal par sbyar ro//sgrub pa'i bye brag mdor bstan pa'i tshig gi don la sogs pa bshad zin to// //de'i 'og tu de la spyod pa'i gang zag gi sgrub pa'i bye brag rgyas par bshad pa'i tshig gi don la sogs pa bshad par bya ste/sgrub pa'i bye brag rgyas par bshad pa zhes bya ba ni de ltar sems can rnams kyi ngo bo nyid gsum tha dad par ma mthong bas de'i phyir de bzhin gshegs pa ngo bo nyid med pa nyid gsum 'dogs par mdzad pa la brten nas sems can rnams rnam par byang ba'i phyogs dang mthun pa'i las sgrub par byed pa'i sgrub pa'i bye brag rgyas par bshad pa gang yin pa'o//de yang gzhi gsum dang ldan pa yin te/ gzhi gsum dang ldan pa ni bstan pa'i gzhi dang ldan pa dang / rigs pa'i gzhi dang ldan pa dang / rkyen gyi gzhi dang ldan pa ste/ de dag ni rnam par byang ba'i phyogs dang mthun pa'i sgrub pa'i bye brag bstan pa yin no//de la bstan pa'i gzhi dang ldan pa ni don dam yang dag 'phags de la sems can gang dag dang po nyid nas dge ba'i rtsa ba ma skyes pa zhes bya ba nas/ sems can gyi rigs sna tshogs dag kyang med pa ni ma yin no zhes gsungs pa'i bar gyis bstan to/ / rigs kyi gzhi dang ldan pa ni/ don dam yang dag 'phags nyan thos kyi rigs can gyi gang zag zhi ba'i bgrod pa gcig pu pa ni zhes bya ba nas de'i phyir zhi ba'i bgrod pa gcig pu pa zhes bya'o zhes gsungs pa'i bar gyis bstan to/ /rkyen gyi gzhi dang ldan pa ni nyan thos byang chub yongs su 'gyur ba gang yin pa de ni ngas rnam grangs kyi byang chub sems dpa' yin par bstan to zhes bya ba nas/de'i phyir de bzhin gshegs pas de nyan thos kyi rigs su 'dogs so zhes gsungs pa'i bar gyis bstan to/ /de la dang por bstan pa'i gzhi dang ldan pa'i sgrub pa'i bye brag bstan pa'i tshig gi don la sogs pa bshad par bya ste/bstan pa'i gzhi dang ldan pa'i sgrub pa'i bye brag ces bya ba ni sems can las dang po pa dag de bzhin gshegs pas chos bstan pa'i gzhi la brten nas rnam par byang ba'i phyogs dang mthun pa'i lam sgrub par byed pa ste/de'i phyir de bstan pa'i dbang du mdzad nas/ don dam yang dag 'phags de la sems can gang dag ces bya ba la sogs pa gsungs so/ /'dir las dang po pa'i mtshan nyid rnam pa lnga bstan te/ rigs yang dag par ma bsgrubs pa dang / sgrib pa yongs su ma dag pa dang / rgyud yongs su ma smin pa dang /sems ma bskyed pa dang / shes rab yongs su ma smin pa'o/ /de la rigs yang dag par ma bsgrubs pa ni dang po nyid nas dge ba'i rtsa ba ma bskyed pa zhes bya bas bstan te/ rigs la rnam pa gnyis te/ rang bzhin gyis gnas pa'i rigs dang /yang dag par bsgrubs pa'i rigs so/ /de la rang bzhin gyis gnas pa'i rigs ni skye mched drug gi khyad par thog ma med pa'i dus nas brgyud de 'ongs pa chos nyid kyi thob pa gang yin pa ste/ de ni yang dag par sgrub mi dgos par sems can thams cad la rang bzhin gyis yod pa yin no//yang dag par bsgrubs pa'i rigs ni sngon dge ba'i rtsa ba goms par byas pa las thob pa gang yin pa ste/ de ni yang dag par ma bsgrubs kyi bar du mi thob pa la yang dag par bsgrubs na thob pa yin pas skabs 'dir ni rigs yang dag par ma bsgrubs pa zhes bya ba de ni yang dag par bsgrubs pa'i rigs de yang dag par ma bsgrubs pas ji ltar rigs de la gnas pa'i byang chub sems dpa' la rtags gang dag gis na 'di ni byang chub sems dpa' yin no zhes gzhan dag gis de ltar shes par 'gyur ba'i byang chub sems dpa'i pha rol tu phyin pa rnams kyi rigs kyi rtags dang mi ldan pas na/de'i phyir dang po nyid nas dge ba'i rtsa ba ma bskyed pa zhes bya'o/ /rigs 'di'i rnam par gzhag pa zhib tu ni rigs kyi gzhi dang ldan pa bshad pa'i skabs su 'og nas ston to/ /sgrib pa yongs su ma dag pa ni sgrib pa yongs su ma dag pa zhes bya bas bstan te/de yang byang chub sems dpa'i rigs yang dag par bsgrub pa de nyid kyi gnas skabs na rigs la gnas su zin kyang / ji srid du dkar po'i chos dang mi mthun pa nye ba'i nyon mongs pa bzhi po dag las zad par ram gcig gis nye ba'i nyon mongs pa can du ma gyur pa de srid du rang bzhin gyis byang chub sems dpa'i pha rol tu phyin pa rnams kyi rigs kyi rtags kyi dge ba'i chos de dag dang ldan par 'gyur la/gang gi tshe nye ba'i nyon mongs pa can du gyur pa de'i tshe de dkar po'i chos de dag la yang mi snang la ngan song dag tu yang skabs 'ga' skye bar 'gyur ba'i nye ba'i nyon mongs pa bzhi po de dag dang ma bral ba ste/dkar po'i chos dang mi mthun pa'i nye ba'i nyon mongs pa bzhi po de gang zhe na/ sngon bag med par gyur cing nyon mongs pa drag po dang / nyon mongs pa yun ring ba 'di ni nye ba'i nyon mongs pa dang po'o/ /blun zhing mi mkhas la sdig pa'i grogs po la brten pa 'di ni nye ba'i nyon mongs pa gnyis pa'o//bla ma dang / rje dpon dang / rgyal po dang / chom rkun dang / phyir rgol ba la sogs pas nan gyis mnan te/ bdag la dbang med pa dang / sems 'khrul pa 'di ni nye ba'i nyon mongs pa gsum pa'o/ /yo byad med cing 'tsho ba la lta ba 'di ni nye ba'i nyon mongs pa bzhi pa ste/nye ba'i nyon mongs pa bzhi po de dag dang ma bral ba'i phyir sgrib pa yongs su ma dag pa zhes bya'o/ /rgyud yongs su ma smin pa ni rgyud yongs su ma smin pa zhes bya bas bstan te/ de yang byang chub sems dpa' rigs yang dag par bsgrub pa de nyid kyi gnas skabs na rigs la gnas shing /sgrib pa yongs su dag tu zin kyang / rgyu bzhis bla na med pa yang dag par rdzogs pa'i byang chub thob par mi nus pa'i rgyud de dag dang ma bral ba ste/ bzhi gang zhe na/ 'di la byang chub sems dpa' dang po nyid nas kyang dge ba'i bshes gnyen nam sangs rgyas sam byang chub sems dpa' byang chub kyi lam phyin ci ma log pa ston pa dang ma phrad pa 'di ni rgyu dang po'o//gzhan yang byang chub sems dpa' dge ba'i bshes gnyen dang phrad du zin kyang byang chub sems dpa'i bslab pa dag la phyin ci log tu 'dzin cing phyin ci log tu slob pa 'di ni rgyu gnyis pa'o/ / gzhan yang byang chub sems dpa'i dge ba'i bshes gnyen dang yang phrad la/ byang chub sems dpa'i bslab pa dag la phyin ci log tu mi slob tu zin kyang sbyor ba de la sbyor ba g.yel zhing le lo byed pa yin te/ shas cher rgyun du brtson pa dang mi ldan pa 'di ni rgyu gsum pa'o/ /gzhan yang byang chub sems dpa' dge ba'i bshes gnyen dang yang phrad la/byang chub sems dpa'i bslab pa dag la yang phyin ci ma log par slob cing sbyor ba de dag la brtson 'grus brtsam du zin kyang / byang chub kyi phyogs kyi chos rnams yun ring du nyams 'og tu chud par ma byas pas dbang po yongs su ma smin pa dang byang chub kyi tshogs yongs su ma rdzogs pa 'di ni rgyu bzhi pa ste/rgyu bzhi po de dag dang ma bral ba'i phyir rgyud yongs su ma smin pa zhes bya'o/ /sems ma bskyed pa ni mos pa mi mang bas bstan te/ de yang byang chub sems dpa' rigs yang dag par bsgrubs nas rigs la gnas shing sgrib pa yongs su dag la rgyud yongs su smin du zin kyang /de'i 'og tu dang po byang chub tu sems ma bskyed pa'i gnas skabs na byang chub sems dpa' rnams kyis mos pa'i khams sangs rgyas kyi chos rnams la thob par nus pas yid ches pas rab tu phye ba mos pa'i gnas brgyad po mchog gi gnas dang /rgya che ba'i gnas dang / zab pa'i gnas dang / rgyu rig pa'i gnas dang / 'bras bu rig pa'i gnas dang / rtogs par bya ba'i gnas dang / bsgrub par bya ba'i gnas dang / bshad par bya ba'i gnas dang / dkon mchog gsum gyi yon tan dang / sangs rgyas dang byang chub sems dpa'i mthu dang / de kho na'i don dang / lam la gnas pa dang / 'bras bu thob pa dang / bla na med pa'i byang chub dang / byang chub sems dpa'i bslab pa dang / legs par gsungs pa'i chos mdo sde la sogs pa la mos pa'i khams brtas par byed pa'i rgyu gnyis po mos pa la goms pa lan mang du byed pa dang /bzod pa drag po med pas ma brtas pa ste/ de ni mos pa mi mang ba zhes bya'o/ /shes rab yongs su ma smin pa ni bsod nams dang ye shes kyi tshogs yang dag par ma grub pa zhes bya bas bstan te/ de yang byang chub sems dpa'i rigs yang dag par bsgrubs nas rigs la gnas shing sgrib pa yongs su dag pa rgyud yongs su smin cing de'i 'og tu sems bskyed du zin kyang /sems bskyed pa de'i gong du byang chub sems dpa'i spyod pa la sbyor ba'i gnas skabs na pha rol tu phyin pa drug gis bsdus pa'i bsod nams dang ye shes kyi tshogs dang /bsod nams dang ye shes kyi rgyu dang / bsod nams dang ye shes thob pa dang / gnas pa dang 'phel bar 'gyur ba la 'dun pa dang / mthun la mi mthun pa med pa'i rkyen dang / sngon yang bsod nams dang ye shes la goms pa dang / bsod nams dang ye shes kyi 'bras bu bsod nams la brten nas byang chub sems dpa' gnod pa med par 'khor bar 'khor zhing /sdug bsngal dag gis shin tu gzir ba med pa dang / ci dga' mgur sems can gyi don dang / sems can la phan 'dogs nus par 'gyur ba dang / ye shes la brten nas byang chub sems dpa' yang dag par bsod nams yongs su 'dzin par byed kyi log pas ma yin pa dang /mkhas par bya ba sna tshogs dpag tu med pa dag gis kyang bla na med pa yang dag par rdzogs pa'i byang chub tu mngon par rdzogs par sangs rgyas pa'i bar du 'gyur ba dag yang dag par ma grub pas shes rab yongs su ma smin pa ste/ de ni bsod nams dang ye shes kyi tshogs yang dag par ma bsgrubs pa zhes bya'o/ /las dang po pa'i mtshan nyid lnga po de dag las dang po gsum gyis ni rigs phun sum tshogs par ma gyur pa'i sgo nas las dang po par bstan to/ /bzhi pas ni mos pa phun sum tshogs par ma gyur pa'i sgo nas las dang po par bstan to//lnga pas ni shes rab phun sum tshogs par ma gyur pa'i sgo nas las dang po par bstan te/ de lta bu'i las dang po pa dag gis ngo bo nyid gsum ngo bo nyid kyis tha dad par ma mthong bas/ de'i phyir bcom ldan 'das kyis ngo bo nyid med pa nyid gsum gdags par mdzad cing chos bstan pa na gzhi de la brten nas rnam par byang ba'i phyogs dang mthun pa'i lam sgrub par byed pa ni bstan pa'i gzhi dang ldan pa'i sgrub pa zhes bya'o//de dag la ni nga skye ba ngo bo nyid med pa nyid las brtsams nas chos ston te zhes bya ba ni sngar sems can gyi khams na sems can rnams kyis gzhan gyi dbang gi ngo bo nyid ngo bo nyid kyis tha dad par mthong na ni de'i phyir skye ba ngo bo nyid med pa nyid mi 'dogs kyi/ma mthong bas 'dogs so zhes smos pa la ji ltar ma mthong ba sngar grub pa'i bye brag mdor bstan pa'i skabs su bstan nas der ma mthong bas/ de'i phyir skye ba ngo bo nyid med pa nyid 'dogs so zhes ji ltar 'dogs pa bstan to//'on kyang skye ba ngo bo nyid med pa nyid de la mtshan nyid ngo bo nyid med pa nyid dang / don dam pa ngo bo nyid med pa rnam pa gnyis yang dag pa ji lta ba bzhin du mi shes pas zhes bya ba la skye ba ngo bo nyid de la mtshan nyid med pa nyid yang dag pa ji lta ba bzhin du mi shes pas zhes bya ba ni gzhan gyi dbang gi ngo bo nyid la kun brtags pa'i ngo bo nyid gtan med par mi shes pa'o//skye ba ngo bo nyid med pa de la don dam pa ngo bo nyid med pa nyid rnam pa gnyis yang dag pa ji lta ba bzhin du mi shes pas zhes bya ba ni gzhan gyi dbang gi ngo bo nyid de nyid rnam par dag pa'i dmigs pa ma yin par don dam pa'i ngo bo nyid med cing kun rdzob tu sgyu ma byas pa dang 'dra bar kun nas nyon mongs pa'i mtshan nyid du mi shes pa dang de nyid gnas bsgyur cing rnam par dag pa'i dmigs pa don dam pa ngo bo nyid med pa nyid chos bdag med pas rab tu phye ba rnam par byang ba'i mtshan nyid kyis chos thob par bya ba mi shes pa'o//yang de bzhin gshegs pa de dag la 'di lta ste/ mtshan nyid ngo bo nyid med pa nyid dang / don dam pa ngo bo nyid med pa nyid las brtsams nas zhes bya ba la sogs pas ni sngar sems can gyi khams na sems can rnams kyis kun brtags pa'i ngo bo nyid ngo bo nyid kyis tha dad par mthong zhing yongs su grub pa'i ngo bo nyid kyang ngo bo nyid kyis tha dad par mthong na ni de'i phyir mtshan nyid ngo bo nyid med pa nyid dang /don dam pa ngo bo nyid med pa nyid mi 'dogs kyi ma mthong bas 'dogs so zhes smos pa las ji ltar ma mthong ba sngar bsgrub pa'i bye brag mdor bstan pa'i skabs su bstan nas de ltar ma mthong bas de'i phyir 'dogs so zhes ji ltar 'dogs pa bstan to//de dag gis chos de thos nas zhes bya ba la sogs pa ni sngar sgrub pa'i bye brag mdor bstan pa'i skabs su kun nas nyon mongs pa'i phyogs dang mthun pa'i sgrub pa ji skad bstan pa las bzlog pa yin no//tshe 'di la shes pa'i stobs bskyed pa zhes bya ba ni mtshan ma rnam par bshig pa'i phyir dang / gnas ngan len spangs pa'i phyir ro/ / phyi ma la rgyud yang dag par chad pas zhes bya bas ni tshe 'di la mtshan ma dang gnas ngan len spangs pa'i phyir phyi mar gzhan gyi dbang yang 'byung ba'i rgyu med pa'o//'gog par byed de zhes bya ba ni gnas 'gyur bar byed pa'o/ /lam 'di nyid dang sgrub pa 'di nyid kyis zhes bya ba ni rnam grangs te/ ngo bo nyid med pa nyid gdags pa mdzad pa 'di nyid kyis so/ /rnam par dag pa'i lam gcig pa yin la zhes bya ba ni nyon mongs pa'i sgrib pa las rnam par grol bar 'gyur ba'i lam thun mong yin pa'o//rnam par dag pa yang gcig ste zhes bya ba ni nyon mongs pa'i sgrib pa las rnam par grol ba'i 'bras bu'i dbang du mdzad de/ kun brtags pa'i ngo bo nyid kyi chos bdag med pa rtogs pa ni nyan thos dang rang sangs rgyas la yang yod pa'i phyir ro//'o na ci'i phyir rnam pa thams cad mkhyen pa nyid yin par mi 'gyur zhe na shes bya'i rnam par shes par bya ba ni de tsam du zad pa ma yin te/ gzhan gyi dbang gi ngo bo nyid kyi bye brag shes par bya ba du ma yod pa de dag da dung mi shes pa'i phyir ro//sems can gyi rigs sna tshogs can dag kyang med pa ni ma yin no zhes bya ba ni dbang po'i rim pa las theg pa rnam gsum gyi rigs su gdags pa dag kyang med pa ni ma yin no zhes bya ba'i tha tshig ste/ de ni bstan pa'i gzhi dang ldan pa'i sgrub pa'i bye brag bstan pa yin no// de'i 'og tu rigs kyi gzhi dang ldan pa'i sgrub pa'i bye brag bstan pa'i tshig gi don la sogs pa bshad par bya ste/ rigs kyi gzhi dang ldan pa'i sgrub pa zhes bya ba ni sems can nyan thos kyi theg pa mngon par rtogs pa'i rigs can dag de bzhin gshegs pas ngo bo nyid med pa nyid rnam pa gsum gdags pa mdzad cing chos bstan pa ni rang gi rigs kyi gzhi la brten nas/nyan thos kyi theg pas rnam par byang ba'i phyogs dang mthun pa'i lam sgrub par byed pa ste/ de'i phyir de bstan pa'i dbang du mdzad nas/don dam yang dag 'phags nyan thos kyi rigs can gang zag zhi ba'i bgrod pa gcig pu pa ni zhes bya ba la sogs pa gsungs so/ /de la rigs zhes bya ba ni skal ba dang ldan pa'i gzhi yin te/ de yang mdor bsdu na rnam pa gnyis te/ rang bzhin gyis gnas pa dang yang dag par bsgrubs pa'o//de la rang bzhin gyis gnas pa'i rigs ni skye mched drug gi khyad par thog ma med pa'i dus nas brgyud de 'ongs pa chos nyid kyis thob pa gang yin pa ste/ de yang rkyen gang dang ldan pa de nyid kyi 'bras bu thob pa'i skal ba dang ldan pa'i gzhi rnam par shes pa nyid yin no//yang dag par bsgrubs pa'i rigs ni sngon dge ba'i rtsa ba goms par byas pa las thob pa gang yin pa ste/ de yang rang bzhin gyis gnas pa'i rigs de la dang po kho nar rkyen gang yang dag par bsgrubs pa de'i 'bras bu thob pa'i skal ba dang ldan pa'i gzhi yod pa gang yin pa'o//de la rang bzhin gyis gnas pa'i rigs ni yang dag par bsgrub mi dgos par sems can thams cad la rang bzhin gyis yod pa yin no/ /yang dag par bsgrubs pa'i rigs ni yang dag par ma bsgrubs kyi bar du mi thob la/yang dag par bsgrubs na thob pa yin no/ /de la rang bzhin gyis gnas pa'i rigs ni kun gzhi'i rnam par shes pa'i 'jug pa rnam par gzhag pa'i tshul gyis ni 'khor ba'i mtha' ji srid kyi bar du rgyun rtag par gnas te/ nam yang med par mi 'gyur la kun gzhi rnam par shes pa'i ldog pa rnam par gzhag pa'i tshul gyis ni gnyen pos gnas bsgyur nas gnas gyur pas bsdus pa yang dag pa'i shes pa chos kyi dbyings kyis klas par ngo bo nyid rtag par gnas te/nam yang med par mi 'gyur bar rig par bya'o/ /yang dag par bsgrubs pa'i rigs ni yang dag par bsgrubs te thob phyin chad de dang mthun pa'i rkyen gyis yang dang yang du bsnan na ni phyir zhing phyir zhing ches 'od gsal ba dang /ches mthu dang ldan par 'gyur zhing / rigs bzang po phun sum tshogs pa dag mang du snang la/ sems bskyed pa la sogs pa 'bras bu yang dag par 'grub pa yang dus nye bar 'gyur ro//de dang mthun pa'i rkyen gyis ma bsnan na yang kun gzhi rnam par shes pa la yang rigs bzang po yang dag par bsgrubs pa/ dper na rdo ba'i phrag na gser phye yod pa dang 'dra bar gnas par byas pa de tshe rabs thams cad du rgyun mi 'chad cing /nam 'bras bu ma grub kyi bar du gzhan du mi 'gyur bar gnas la/ 'bras bu grub nas gal te des bsgrubs pa'i 'bras bu de mthar thug pa'i 'bras bu bla na med pa nyid yin na ni de las gong du bsgrub tu yang med do/ /gal te bla na med pa nyid ma yin na de'i gong du yang rang bzhin gyis gnas pa'i rigs de la mthar thug pa'i 'bras bu bla na med pa 'grub pa'i rkyen khyad par can yang dag par bsgrubs pa'i rigs thob cing /des mthar thug pa'i 'bras bu bla na med pa 'grub par 'gyur la/ de 'grub pa na rigs snga ma de gtan spong bar 'gyur ro/ /de bas na mdo sde las rigs lngar gsungs pa yang rang bzhin gyis gnas pa'i rigs ni lnga char la yang 'dra bar yod de/sems can thams cad la kun gzhi'i rnam par shes pa yod par 'dra ba'i phyir ro/ /de yang 'gro ba lngar 'khor ba'i rkyen dang theg pa gsum gyis yongs su mya ngan las 'da' bar 'gyur ba'i rkyen de dag gis rkyen ji lta ba bzhin du bkrir rung bas rang bzhin gcig tu nges pa ma yin te/chos thams cad rang bzhin gcig tu nges pa med par gsungs pa'i phyir ro/ /yang dag par bsgrubs pa'i rigs ni lnga char la 'dra bar yod pa ma yin te/ de dag la las ni ma bsgrubs/la las ni cha mnyam par bsgrubs/ la las ni tha dad par bsgrubs pa'i phyir ro/ /de yang 'bras bu ma grub kyi bar du ni gzhan du mi 'gyur bar gnas la/ 'bras bu grub nas gal te des bsgrubs pa'i 'bras bu de mthar thug pa'i 'bras bu bla na med pa nyid ma yin la de'i 'og tu yang rang bzhin gyis gnas pa'i rigs de la mthar thug pa'i 'bras bu bla na med pa 'grub pa'i rkyen khyad par can gzhan yang dag par bsgrubs pa'i rigs 'thob cing /des mthar thug pa'i 'bras bu bla na med pa nyid 'grub par 'gyur la/ de grub pa na rigs snga ma de gtan spong bar 'gyur bas rang bzhin gcig tu nges pa ma yin no//mthar thug pa'i 'bras bu bla na med pa nyid 'grub pa'i rigs de ni sngar kun gzhi'i rnam par shes pa'i ldog pa rnam par gzhag pa'i tshul bstan pa dang 'dra bar chos kyi dbyings kyis klas pa'i bar du ngo bo nyid rtag par gnas te/nam yang med par mi 'gyur bar rig par bya'o/ /de la rigs med pa zhes bya ba gang zhe na/ rang bzhin gyis gnas pa'i rigs ni yod la/ theg pa gsum gyis yongs su mya ngan las 'da' ba'i rkyen yang dag par bsgrubs pa'i rigs ni med pa ste/ gang gi tshe rkyen med pa de'i 'bras bu skye ba mi srid pas/de yang de'i tshe na theg pa gsum gyis yongs su mya ngan las 'da' ba'i rkyen med pas rigs med pa zhes bya bar zad kyi nam du yang mya ngan las 'da' bar 'gyur ba'i skal ba med par nges pa ni ma yin te/ sems can thams cad de bzhin gshegs pa'i snying po dang ldan pas gang gi tshe theg pa gsum po gang gis yongs su mya ngan las 'da' ba'i rkyen rnyed pa de'i tshe yongs su mya ngan las 'da' bar yang 'gyur ro//rkyen rnyed par 'gyur ba de la ni nges pa med de/ la las ni dus nye bar rnyed par 'gyur/ la las ni yun ring pos rnyed par 'gyur/ la las ni rkyen rnyed par 'gyur ram mi 'gyur ma nges te/ chos rnams kyi tshogs pa gcig tu nges pa med par gsungs pa'i phyir ro/ /rkyen rnyed par 'gyur ram mi 'gyur ma nges pa de la ni gtan rigs med pa yin no zhes gcig tu nges par bstan du mi rung ste/ bcom ldan 'das kyis sems can gyi rang bzhin gcig tu nges pa med pa dang /ma nges pa'i chos kyang ma nges par yod par gsungs pa'i phyir ro/ /rkyen rnyed par 'gyur ram mi 'gyur ma nges pa des phyis nam zhig na rkyen rnyed dam mi rnyed pa yang 'khor ba mtha' med pa dang / sems can gyi las dang rten cing 'brel par 'byung ba'i tshogs pa bsam gyis mi khyab pas des na gcig tu chad par byar mi rung ngo //de ltar rkyen rnyed par 'gyur ram mi 'gyur ma nges pa de la ni phyis kyang mi rnyed pas rigs med pa zhes byar mi rung ste/ de'i phyir bcom ldan 'das kyis rigs rnam par gzhag pa'i skabs su rigs 'bras bus yang dag par 'grub pa ni 'bras bu dang bcas pas rags pa yin la rigs 'bras bu yang dag par ma grub pa ni 'bras bu med pas cha phra ba yin te/de ni de bzhin gshegs pa nyag gcig gi spyod yul yin gyi/ gzhan gyis dpag pa'i yul ma yin no zhes gsungs so//de bas na rigs med pa zhes bya ba ni da ltar rkyen ma rnyed pa'i re zhig gi dus las dgongs pa yin gyi/ gtan du rigs med par gcig pu nges pa ma yin te/ des phyis rigs yang dag par bsgrubs pa'i rigs 'thob pa dang mi 'thob pa ni gcig pu ma nges par rig par bya'o/ /ma nges pa'i rigs can zhes bya ba ni sems can rang bzhin gyis gnas pa'i rigs can de dag kha cig gi theg pa gsum gyis yongs su mya ngan las 'da' ba'i rkyen yang dag par bsgrubs pa'i rigs can mnyam par 'thob cing byang chub rnam gsum mngon par rtogs par 'gyur ba'i skal ba dang ldan pa'i gzhi gsum char yod la/da dung theg pa gang du yang sems ma bskyed pa dang por byang chub rnam gsum gang 'thob pa ma nges pa gnas pa ste/ de ni sems bskyed khar theg pa rnam gsum las dang por gang gi rkyen gzhan gcig dang phrad pa de'i dbang du gyur pa yin pas gdon mi za bar gcig rkyen rnyed par 'gyur zhing /yongs su mya ngan las 'da' bar nges pa kho na yin te/ rkyen gzhan rnyed par 'gyur ba la dus nges pa ni med par rig par bya'o/ /ma nges pa'i rigs can de gal te dang por nyan thos sam rang sangs rgyas kyi theg pas yongs su mya ngan las 'da' bar gyur na yang ring por mi thogs par bla na med pa'i byang chub mngon par sangs rgyas pa'i rkyen rnyed par 'gyur zhing byang chub tu yongs su 'gyur bar nges pa kho na yin te/ji tsam gyis 'gyur ba'i dus ni nges pa med do/ /nyan thos dang rang sangs rgyas byang chub tu yongs su 'gyur ba de yang la la ni slob par gyur pa kho na'i tshe nyan thos dang rang sangs rgyas kyi smon lam las ldog cing byang chub chen por yongs su 'gyur ba yang yod/la la ni mi slob par gyur nas dbang po'i rim pa dang rkyen gyi rim pa la ltos nas ldog cing yongs su 'gyur bar byed de/ mi slob par gyur nas ldog cing yongs su 'gyur ba de yang phung po'i lhag ma med pa'i mya ngan las 'das pa'i dbyings su mya ngan las mi 'da' bar phung po'i lhag ma dang bcas pa'i mya ngan las 'das pa'i dbyings la gnas shing tshe'i 'du byed bsrings te/dbang po'i lus byin gyis brlabs nas sprul pa'i lus kyi chos mthun pa pa gzhan dag la bdag nyid phung po'i lhag ma med pa'i mya ngan las 'das pa'i dbyings su yongs su mya ngan las 'da' bar ston par byed de/des na gzhan dag 'di snyam du de ni phung po'i lhag ma med pa'i mya ngan las 'das pa'i dbyings su yongs su mya ngan las 'das so snyam du sems par zad kyi/de'i dbang po'i lus yongs su mya ngan las 'das pa ni ma yin no/ /de dbang po'i lus byin gyis brlabs pa des 'dzam bu'i gling 'di la sogs pa gar dga' bar ci nas kyang lha rnams kyis kyang mi mthong na/ sems can phal pa gzhan dag gis lta smos kyang ci dgos pa de lta bu'i lus kyis rab tu dben par gnas shing /'jig rten gyi khams rab 'byams de dang de dag tu de bzhin gshegs pa dang byang chub sems dpa' rnams la bsnyen bkur bya ba dang / byang chub kyi phyogs kyi lam la sbyor bar byed do//de de ltar sbyor ba na yang sngon nyon mongs pa shas che ba dang dbang po rtul ba'i shugs kyis mya ngan las 'da' ba la mngon par dga' ba dang / de bzhin gshegs pa dang byang chub sems dpa' rnams la bsnyen bkur bya ba dang / byang chub sems dpa'i tshogs kyi lam bsgoms pa la yang bag med pa skye ste/de'i tshe na sangs rgyas dang byang chub sems dpa' rnams kyis yang dang yang du yang dag par bskul bar mdzad do/ /yang dag par bskul ba na yang de yang dang yang du bag yod pa la rnal 'byor du byed cing rim gyis chos zab mo la bzod pa yang 'thob par 'gyur ro//de ltar sangs rgyas kyi sa la bsam pa nges pa/ nyon mongs pa thams cad spangs pa/ chos kyi dbyings rtogs pa/ chos zab mo la bzod pa thob pa de la de bzhin gshegs pas sangs rgyas su 'grub par lung ston te/ de de'i tshe na byang chub sems dpa' sa brgyad pa la gnas pa rnam par mi rtog pa lhun gyis 'grub par 'gyur ro//de ltar gyur pa dang yang srid pa gzhan len pas byang chub sems dpa'i spyad pa spyod cing / sems can yongs su smin par bya ba dang / bdag nyid kyi sangs rgyas kyi chos yongs su smin par byed pa'i rim gyis bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro//gang gi tshe bla na med pa yang dag par rdzogs pa'i byang chub mngon par rdzogs par sangs rgyas pa'i tshe na de bzhin gshegs pa nyid du gyur nas/ dgos pa'i dbang du phung po'i lhag ma med pa'i mya ngan las 'das pa'i dbyings su yongs su mya ngan las 'das pa ston par yang 'gyur ro//de ltar mi slob par gyur nas byang chub sems dpa' sa brgyad par gyur pa de srid pa gzhan len par byed pa'i rgyu gang zhe na/ de ni stobs rnam pa gnyis te/rkyen gyi stobs dang / rgyu'i stobs so/ /de la rkyen gyi stobs ni de mi slob par gyur te/ kun gzhi rnam par shes pa'i gnas gyur pa'i de bzhin nyid la gnas pa na nyon mongs pa'i sgrib pa thams cad spangs pas gnas gyur pa thob kyang shes bya'i sgrib pa ma spangs pas nyon mongs pa med pa'i ma rig pa'i bag chags phra mo ma spangs pa ni srid pa gzhan len pa'i rkyen gyi stobs yin no//rgyu'i stobs ni 'khor ba'i rgyu byed la dge ba'i rtsa ba dang mtshungs par ldan pa'i nyon mongs pa rnams te/ de dag kyang gang zhe na/ bsod nams kyi tshogs btsal bas yongs su mi ngoms pa dang /bsams bzhin du srid par skye ba yongs su 'dzin pa dang / sangs rgyas dang phrad par smon pa dang / sems can yongs su smin par bya ba la yongs su mi skyo ba dang / dam pa'i chos yongs su 'dzin pa la brtson pa dang / sems can gyi bya ba ci yod snyam pa la spro ba dang /chos 'dod pa'i bag la nyal mi 'dor ba dang / pha rol tu phyin pa la sbyor ba yongs su mi gtong ba ste/ dge ba'i rtsa ba rnam par smin pa'i bdag nyid du yongs su bsgyur ba de dag ma rig pa'i bag chags kyi rkyen gyi dbang gis brtas par gyur na yang srid par lus mngon par grub pa'i rgyur 'gyur bas rgyu rkyen de gnyis kyang srid pa len par byed do//de ltar mi slob par gyur nas byang chub tu yongs su 'gyur ba de'i tshe'i 'du byed du bsrings su zin kyang dbang po rtul ba dang / mya ngan las 'das pa la mngon par dga' ba'i phyir bla na med pa'i byang chub tu shin tu bul ba yin pas bskal pa grangs med pa gsum gyis nges par 'byung ba ni ma nges te/byang chub sems dpa' las dang po pa yang de bas ches mgyogs par rig par bya'o/ /sems can ma nges pa'i rigs can de theg pa chen pos yongs su mya ngan las 'da' bar 'gyur ba'i rkyen gzhan rnyed na ni dang po nyid nas bla na med pa'i byang chub tu sems bskyed cing /byang chub sems dpa'i sa'i rim gyis bla na med pa yang dag par rdzogs pa'i byang chub tu mngon par rdzogs par 'tshang rgya ste/ de yang sems bskyed pa nas sa dang po'i bar du 'jig rten pa'i lam la ni shin tu dbang po rtul ba dang /nyon mongs pa shas che ba dang / mi brtson pa'i shas che bas bskal pa grangs med pa dang pos nges par 'byung bar ma nges so/ /sa dang po thob pa yan chad ni mi brtson pa mi srid pas bskal pa grangs med pa gnyis kyis nges par 'byung bar nges pa yin no//de ltar na ma nges pa'i rigs can zhes bya ba yang sngar ni theg pa gsum gyis yongs su mya ngan las 'da' ba'i rkyen yang dag par bsgrubs pa'i rigs cha mnyam par thob pa yin la/ phyis sems bskyed pa'i gnas skabs na ni theg pa gang yang rung ba'i rkyen gzhan gcig gi dbang du 'gyur ba tsam la dgongs pa yin pas sems can gyi ris na gcig tu de ltar nges pa'i sde tshan du chad pa ni med de/de yang rang bzhin gcig tu ma nges pa yin par rig par bya'o/ /nyan thos dang rang sangs rgyas dang / de bzhin gshegs pa'i theg pa mngon par rtogs pa'i rigs can zhes bya ba gsum ni tshul 'dra ste/ sems can rang bzhin gyis gnas pa'i rigs can de dag las gang gis nyan thos kyi theg pas mya ngan las 'da' ba'i rkyen yang dag par bsgrubs pa'i rigs 'ba' zhig thob pa ni nyan thos kyi theg pa mngon par rtogs pa'i rigs can zhes bya/gang gis rang sangs rgyas kyi theg pas mya ngan las 'da' ba'i rkyen yang dag par bsgrubs pa'i rigs 'ba' zhig thob pa ni rang sangs rgyas kyi theg pa mngon par rtogs pa'i rigs can zhes bya/ gang gis theg pa chen pos mya ngan las 'da' ba'i rkyen yang dag par bsgrubs pa'i rigs 'ba' zhig thob pa ni de bzhin gshegs pa'i theg pa mngon par rtogs pa'i rigs can zhes bya ste/de dag kyang yang dag par bsgrubs pa'i rigs kyi rkyen ji lta ba bzhin rang rang gi theg pa mngon par rtogs shing /de'i 'bras bu so so'i byang chub thob par nges pa yin no/ /byang chub thob nas kyang de bzhin gshegs pa ni mthar thug pa'i 'bras bu mngon par rtogs pa bla na med pa yin pas de las gong du la zlar yang med do/ /nyan thos dang rang sangs rgyas kyi byang chub thob pa ni 'jig rten las 'das pa'i lam gyis rab tu phye ba gnas gyur pa thob pa'i chos nyid kyis na phyir sa 'og mar mi ltung bar nges pa dang /gong du mthar thug pa'i 'bras bu bla na med pa'i byang chub nges par 'thob pa kho na yin pas mjug tu ni thams cad kyang bla na med pa'i sangs rgyas nyid du 'grub par rig par bya'o//de la bye brag tu na nyan thos kyi theg pa mngon par rtogs pa'i rigs can gyis nyan thos kyi byang chub thob pa ni zhi ba'i bgrod pa gcig pu ba zhes bya ste/ de ni dang po nas kyang dbang po rtul ba dang / snying rje chung ba dang / sdug bsngal gyis 'jigs pa'i rang bzhin can yin par nyan thos kyi theg pas mya ngan las 'das pa'i rkyen yang dag par bsgrubs pa'i rigs 'ba' zhig thob pa yin la/nyan thos kyi theg pas nyan thos kyi byang chub thob pa'i dus na yang dbang po rtul ba dang / snying rje shin tu chung ba dang / sdug bsngal gyis shin tu 'jigs pa yin te/dbang po rtul bas ni myur du bla na med pa'i byang chub mngon par 'tshang rgya ba'i rkyen yang dag par bsgrubs pa'i rigs mi 'thob la/ snying rje chung bas ni sems can gyi don bya ba la mi phyogs par 'gyur/ sdug bsngal gyis 'jigs pas na 'du byed mngon par 'du bya ba thams cad la mi phyogs par 'gyur te/de ltar bla na med pa'i byang chub mngon par 'tshang rgya ba'i rkyen yang dag par bsgrubs pa'i rigs ma thob pa dang / sems can gyi don bya ba la shin tu mi phyogs pa dang / 'du byed mngon par 'du bya ba thams cad la shin tu mi phyogs pa de ni de'i tshe na bla na med pa yang dag par rdzogs pa'i byang chub mngon par rdzogs par sangs rgyas pa'i skal ba dang ldan pa'i gzhi med pa kho na yin pas bla na med pa'i byang chub kyi rigs med pa zhes bya ste/de'i tshe na ni dper na nor bu mching bu byi dor byas kyang yid bzhin gyi nor bu rin po cher mi 'gyur ba dang 'dra bar/sangs rgyas thams cad brtson pa dang ldan par gyur kyang byang chub kyi snying po la gzhag ste/ bla na med pa yang dag par rdzogs pa'i byang chub thob par mi nus so/ /de zhi ba'i bgrod pa gcig pu pa'i 'bras bu de nyid la gnas na snying rje chung ba dang /sdug bsngal gyis 'jigs pa'i rkyen de nyid kyis myur ba kho nar phung po'i lhag ma med pa'i mya ngan las 'das pa'i dbyings su yongs su mya ngan las 'da' zhing dbyings de ni kun gzhi rnam par shes pa gnas gyur pa'i de bzhin nyid la gnas te/ khams dang 'gro ba dang skye gnas su gtogs pa'i sems can gyi rigs gang gi khongs su yang mi bgrang bar zag pa med pa'i dbyings na so so rang rig pa'i shes pa tha snyad thams cad yang dag par chad pas gnas so// kun gzhi rnam par shes pa gnas gyur pa'i de bzhin nyid la gnas pa dang /nyon mongs pa'i sgrib pa thams cad spangs pas gnas gyur pa thob kyang shes bya'i sgrib pa ma spangs pas nyon mongs pa med pa'i ma rig pa'i bag chags phra mo rgyud la yod pa'i rkyen dang / sngon kun brtags pa'i ngo bo nyid kyi chos bdag med pa rtogs pa'i lam gyi kun gzhi rnam par shes pa de nas gyur pa'i sngar de bzhin gshegs pa'i snying po khams bzang po yod pa'i rgyu'i stobs kyang brtas nas nam zhig na zag pa med pa'i dbyings de ni so sor rig pa'i shes pa tha snyad thams cad yang dag par chad pa de sngon kun brtags pa'i ngo bo nyid kyis chos bdag med par rtogs pa'i rjes su rtogs pa'i dus kyang yong skabs kyang yod do//de'i dus na de bzhin gshegs pa thams cad kyi byin gyi rlabs bsam gyis mi khyab pas yang dag par bskul nas zag pa med pa'i dbyings de nas langs te/ yid las byung ba'i lus byin gyis rlob cing lus de sngar byang chub tu yongs su 'gyur ba'i skabs su ji skad bshad pa'i tshul bzhin du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro//rang sangs rgyas ma nges pa'i rigs can dang / rang sangs rgyas kyi theg pa mngon par rtogs pa'i rigs can gyis rang byang chub thob pa ni rnam pa gsum ste/nges par 'byed pa'i cha dang mthun pa thob pa sngon du btang ba dang / mngon par rtogs pa sngon du btang ba dang / sngon du ma btang ba'o/ /de la nges par 'byed pa'i cha dang mthun pa thob pa sngon du btang ba ni dang por rang byang chub kyi theg par sems bskyed nas nges par 'byed pa'i cha dang mthun pa'i dge ba'i rtsa ba bzhi thob pa la brten nas/slob pa'i sa bdun po gang yang mi thob par thal byung du mi slob pa'i sa rang byang chub kyi 'bras bu nyid thob pa ste/ de ni 'jig rten pa'i sa dang / mi slob pa'i sa ni yod la/ slob pa'i sa ni med pa yin no/ /mngon par rtogs pa sngon du btang ba ni dang por rang byang chub kyi theg par sems bskyed nas nges par 'byed pa'i cha dang mthun pa'i dge ba'i rtsa ba bzhi yang thob bo //slob pa'i sa bdun po dag mngon par rtogs pa yang thob pa la brten nas/ mi slob pa'i sa rang byang chub kyi 'bras bu nyid thob pa ste/de ni 'jig rten pa'i sa dang / slob pa'i sa dang / mi slob pa'i sa gsum char yod pa yin no/ /sngon du ma btang ba ni dang por rang byang chub kyi theg par sems bskyed nas thar pa'i cha dang mthun pa'i dge ba'i rtsa ba de nyid la brten nas/ bskal pa brgyar tshogs bsags te/ nges par 'byed pa'i cha dang mthun pa yang mi thob/ slob pa'i sa yang mi thob par thal byung du mi slob pa'i sa rang byang chub kyi 'bras bu nyid thob pa ste/ de ni 'jig rten pa'i sa thar pa'i cha dang mthun pa'i dge ba'i rtsa ba dang / mi slob pa'i sa ni yod la/ 'jig rten pa'i sa nges par 'byed pa'i cha dang mthun pa dang /slob pa'i sa ni med pa yin no/ /de la dang po gnyis kyis ni rang rgyal ba tshogs na spyod par 'gyur ro/ /tha mas ni bse ru lta bur 'gyur te/ de dag las byang chub tu yongs su 'gyur ba dang / zhi ba'i bgrod pa gcig pu par gdags pa dang / sgo de gnyis la ji ltar bla na med pa yang dag par rdzogs pa'i byang chub mngon par rdzogs par 'tshang rgya ba'i tshul ni nyan thos dang 'dra ba kho nar rig par bya'o//de ltar na nyan thos dang rang sangs rgyas dang / de bzhin gshegs pa'i theg pa mngon par rtogs pa'i rigs can zhes bya ba gsum yang theg pa so sos yongs su mya ngan las 'da' ba'i rkyen yang dag par bsgrubs pa'i rigs kyis rkyen gyi dbang gis 'gyur bar zad kyi /sems can gyi ris na de ltar nges pa'i sde tshan du chad pa ni med de/ de dag kyang rang bzhin gcig tu ma nges pa yin par rig par bya'o/ /de ltar na mdo sde las rigs lngar gsungs pa yang rang bzhin du gnas pa'i rigs ni thams cad la yang 'dra bar yod la/yang dag par bsgrubs pa'i rigs kyi bye brag las re zhig pa'i tshul gyis rnam pa lngar dbye bar zad kyi/ gtan du so sor nges pa ni ma yin par shes par bya'o/ /de dag ni rigs rnam par gzhag pa spyir bstan pa yin gyi/ skabs 'dir rigs kyi gzhi dang ldan pa zhes bya ba ni nyan thos kyi theg par mngon par rtogs pa'i rigs can zhi ba'i bgrod pa gcig pu pa nyi tshe gzung bar bya'o/ /de ltar spyi'i don bstan nas da ni de dag gi tshig gi don bshad par bya ste/ zhi ba'i bgrod pa gcig pu pa zhes bya ba la/ zhi zhes bya ba ni nyon mongs pa'i sgrib pa las rnam par grol ba'o//bgrod pa zhes bya ba ni lam dang 'bras bu ste/ nyan thos kyi theg pa'i lam dang / rnam par grol ba'i 'bras bu'o/ /gcig pu pa zhes bya ba ni de'i tshe bla na med pa'i byang chub tu yongs su 'gyur ba'i rkyen yang dag par bsgrubs pa'i rigs ma thob cing / nyan thos kyi rnam par grol ba dang mya ngan las 'das pa nyi tshe la gnas pa'o//sangs rgyas thams cad brtson pa dang ldan par gyur kyang byang chub kyi snying por gzhag ste/ bla na med pa yang dag par rdzogs pa'i byang chub thob par byar mi nus so zhes bya ba ni de'i tshe na de la bla na med pa'i byang chub tu yongs su 'gyur ba'i rkyen yang dag par bsgrubs pa'i rigs med pas/dper na nor bu mching bu byi dor byas kyang yid bzhin gyi nor bu rin po cher mi 'gyur ba dang 'dra bar sangs rgyas thams cad kyis bskul kyang bla na med pa'i byang chub mngon par 'tshang rgya ba'i skal ba med pa las dgongs pa yin gyi gtan du de lta bu ni ma yin te/ nam zhig na bla na med pa'i byang chub tu yongs su 'gyur ba'i rkyen yang dag par bsgrubs pa'i rigs 'thob par 'gyur zhing / sngar rigs kyi skabs su bstan pa'i rim pa bzhin du bla na med pa'i byang chub mngon par rdzogs par 'tshang rgya bar ni nges pa kho na yin te/ 'jig rten las 'das pa'i lam gyis rab tu phye ba gnas gyur pa thob pa'i chos nyid kyis na phyir sa 'og mar mi ltung bar nges pa dang /gong du mthar thug pa'i 'bras bu bla na med pa'i byang chub 'thob pa nges pa kho na yin pa'i phyir ro/ /de'i tshe na nor bu mching bu dang 'dra ba'o zhes bya ba'i dpe gsungs pa yang de'i gnas gyur pa'i sems kyi rang bzhin mching bu dang 'dra bar gzhan du bsgyur du mi rung ba ni ma yin gyi/nyan thos kyi theg pas bsdus pa'i bsam pa dang / mos pa'i khams dang / bag la nyal te mching bu dang 'dra bar bla na med pa'i byang chub kyi rgyu ma yin pa las dgongs pa yin te/ nyan thos kyi theg pa nyid bla na med pa'i byang chub kyi mngon sum gyi rgyu ma yin pas rgyu mi 'dra ba las 'bras bu mi skye'o zhes bya ba'i tha tshig go//don de nyid bstan pa'i phyir de ci'i phyir zhe na zhes bya ba la sogs pa gsungs so/ /rang bzhin gyis rigs dman pa kho na yin pa'i phyir ro zhes bya ba ni nyan thos kyi theg pa'i rkyen yang dag par bsgrubs pa'i rigs glo bur ba de la bla na med pa'i byang chub kyi rgyu med pas rang bzhin gyis dman pa kho na yin pa la bya'i/de'i kun gzhi rnam par shes pa gnas gyur pa'i ngo bo nyid la ni rang bzhin gyis dman par gcig tu nges pa med de/ bla na med pa'i byang chub kyi sa bon yang de la yod pa'i phyir ro/ /sems can gyi don bya ba la shin tu mi phyogs par 'gyur ro zhes bya ba ni sems can yongs su smin par mi byed pa'o//'du byed mngon par 'du bya ba thams cad la shin tu mi phyogs par 'gyur ro zhes bya ba ni bdag nyid kyi sangs rgyas kyi chos yongs su smin par mi byed pa'o/ /bla na med pa yang dag par rdzogs pa'i byang chub tu ngas ma bstan to zhes bya ba ni bla na med pa yang dag par rdzogs pa'i byang chub kyi rgyu ni sems can yongs su smin par byed pa dang /bdag nyid kyi sangs rgyas kyi chos yongs su smin par byed pa yin na/ de gnyis mi byed pa de la ni de'i tshe na ni de'i rgyu med pa'i phyir te/ de yang sbyor ba'i bye brag tsam du zad kyi/ sems kyi ngo bo nyid las gyur pa ni ma yin no/ /de'i phyir zhi ba'i bgrod pa gcig pu zhes bya'o zhes bya ba ni ji srid du bla na med pa'i byang chub kyi rkyen yang dag par bsgrubs pa'i rigs ma thob cing /rtsol bar mi byed pa de nyid kyi bar du zhes bya bar dgongs pa ste/ de ni rigs kyi gzhi dang ldan pa'i bsgrub pa'i bye brag bstan pa yin no/ /de'i 'og tu rkyen gyi gzhi dang ldan pa'i bsgrub pa'i bye brag bstan pa'i tshig gi don la sogs pa bshad par bya ste/rkyen gyi gzhi dang ldan pa zhes bya ba ni sems can ma nges pa'i rigs can nyan thos kyi theg pas nyan thos kyi byang chub thob pa dag de bzhin gshegs pas ngo bo nyid med pa nyid rnam pa gsum bstan pa mdzad cing chos bstan pa na/ de bzhin gshegs pas yang dag par bskul ba'i rkyen gyi gzhi la brten nas bla na med pa'i byang chub tu yongs su 'gyur ba'i lam sgrub par byed pa ste/ de'i phyir de bstan pa'i dbang du mdzad nas/ nyan thos byang chub tu yongs su 'gyur ba gang yin pa de ni ngas rnam grangs kyis byang chub sems dpa' yin par bstan te zhes bya ba la sogs pa gsungs so//nyan thos byang chub tu yongs su 'gyur ba 'di'i tshul bshad pa ni sngar rigs kyi rnam par gzhag pa bstan pa'i skabs su bshad pa kho na bzhin du rig par bya'o/ /'dir tshig gi don bshad par bya ste/ rnam grangs kyis byang chub sems dpa' yin par bstan te zhes bya ba ni de de'i tshe kho na na/nyan thos yin yang de ma thag tu byang chub sems dpa'i sa brgyad pa la gnas par 'gyur ba'i phyir byang chub sems dpa'i grangs su yang bstan to zhes bya ba'i tha tshig go/ /de la ci'i phyir byang chub tu yongs su 'gyur ba zhes bya zhe na/ de'i phyir 'di ltar de ni nyon mongs pa'i sgrib pa las grol nas de bzhin gshegs pa rnams kyis bskul na shes bya'i sgrib pa las sems rnam par grol bar byed pa'i phyir ro zhes bya ba gsungs te/'di ni mi slob par gyur nas nyan thos kyi smon lam las ldog cing de bzhin gshegs pa rnams kyis bskul ba'i rkyen gyis phung po'i lhag ma dang bcas pa'i lus des bla na med pa'i byang chub mngon par rdzogs par 'tshang rgya ba dang sbyar ro//'o na de ci'i phyir nyan thos zhes bya zhe na/ de'i phyir de ni dang por bdag gi don la sbyor ba'i rnam pas nyon mongs pa'i sgrib pa las rnam par grol te/ de'i phyir de bzhin gshegs pas de nyan thos kyi rigs su 'dogs so zhes bya ba gsungs te/dang po ma nges pa'i rigs can yin yang bar du nyan thos kyi theg pas nges par 'byung bas/ ji srid du bla na med pa'i byang chub tu yongs su ma gyur gyi bar du nyan thos kyi rigs su 'dogs so zhes bya ba'i tha tshig go/ /bsgrub pa'i bye brag rgyas par bshad pa'i tshig gi don la sogs pa bshad zin to// //de'i 'og tu de la spyod pa'i gang zag gi mos pa'i bye brag mdor bstan pa'i tshig gi don la sogs pa bshad par bya ste/ mos pa'i bye brag mdor bstan pa zhes bya ba ni de ltar bcom ldan 'das kyis ngo bo nyid med pa nyid rnam pa gsum gdags par mdzad pa 'di la sems can rnams kyi mos pa'i bye brag rnam pa du ma yod pa dang por mdor bsdus te bstan pa gang yin pa'o//de'i phyir de bstan pa'i dbang du mdzad nas/ don dam yang dag 'phags 'di ltar nga'i chos 'dul ba legs par gsungs pa shin tu gya nom pa/ bsam pa shin tu rnam par dag pa ston pa/ chos legs par bstan pa la ni sems can rnams kyi mos pa'i rim pa yang snang ste zhes bya ba la sogs pa gsungs so//de la chos 'dul ba zhes bya ba ni sangs rgyas bcom ldan 'das kyi bstan pa 'phags pa'i lam yan lag brgyad pa dang ldan pa nyid la bya ste/ yang dag pa'i lta ba dang / rtog pa dang / dran pa dang / ting nge 'dzin ni chos yin no//yang dag pa'i ngag dang / las kyi mtha' dang / 'tsho ba ni 'dul ba yin no/ /yang dag pa'i rtsol ba ni kun du 'gro ba yin no/ /legs par gsungs pa zhes bya ba la sogs pa ni chos 'dul ba de nyid khyad par du bshad par bya ste/ legs par gsungs pa zhes bya ba ni thog mar dge ba/bar du dge ba/ tha mar dge ba zhes gsungs so/ /shin tu gya nom pa zhes bya ba ni don bzang po/ tshig 'bru bzang po ma 'dres pa zhes gsungs pa'o/ /bsam pa shin tu rnam par dag pa ston pa zhes bya ba ni yongs su rdzogs pa dang / yongs su dag pa dang / yongs su byang ba zhes gsungs pa'o//chos legs par bstan pa zhes bya ba ni lha dang mi'i bar dag la yang dag par bstan pa zhes gsungs pa'o/ /drang ba'i don gyi mdo brjod pa'i rnam pas zhes bya ba ni chos thams cad ngo bo nyid med pa zhes bya ba la sogs pas ston te/ de yang mtshan nyid thams cad ngo bo nyid med pa thams cad kyis ngo bo nyid med pa ma yin gyi/kun brtags pa'i mtshan nyid ni mtshan nyid ngo bo nyid med pa nyid kyis ngo bo nyid med pa dang / gzhan gyi dbang gi mtshan nyid ni skye ba ngo bo nyid med pa nyid dang / don dam pa ngo bo nyid med pa gcig gis ngo bo nyid med pa dang / yongs su grub pa'i mtshan nyid ni don dam pa ngo bo nyid med pa nyid chos bdag med pas rab tu phye bas ngo bo nyid med pa las dgongs te gsungs pa dang /chos thams cad ma skyes pa zhes bya ba la sogs pa ni mtshan nyid ngo bo nyid med pa nyid dang don dam pa ngo bo nyid med pa nyid chos bdag med pas rab tu phye ba las dgongs te gsungs pa ni/ drang ba'i don gyi mdo sde brjod pa'i rnam pa zhes bya'o//mos pa'i bye brag mdor bstan pa'i tshig gi don la sogs pa bshad zin to// //de'i 'og tu de la spyod pa'i gang zag gi mos pa'i bye brag rgyas par bshad pa'i tshig gi don la sogs pa bshad par bya ste/ de ni rnam pa lnga ste rigs phun sum tshogs pa las gyur pa dang / mos pa phun sum tshogs pa las gyur pa dang /shes rab phun sum tshogs pa las gyur pa dang / de la sems can gang dag dge ba'i rtsa ba chen po bskyed pa zhes bya ba nas/ dad pa 'thob par 'gyur ro zhes gsungs pa'i bar gyis bstan to/ /rigs dang mos par ldan pa las gyur la/ shes rab dang bral ba ni gnyis pa ste de la sems can gang dag dge ba'i rtsa ba bskyed pa dang zhes bya ba nas gong du yang rgyud yongs su ma smin pa dag kyang yongs su smin par byed de zhes gsungs pa'i bar gyis bstan to/ / rigs dang mos pa las ldan par gyur pa dang / shes rab chung ngu las gyur pa ni gsum pa ste/ji ste sems can de dag las sems can gang dag bsod nams dang ye shes kyi tshogs chen po'i bar du yang dag par grub pa ma yin yang zhes bya ba nas/ de dag gi las kyi sgrib pa chen po dang ldan par nga smra'o zhes gsungs pa'i bar gyis bstan to/ /thams cad dang bral zhing bkri dgos pa las gyur pa ni bzhi pa ste/don dam yang dag 'phags de la sems can gang dag dge ba'i rtsa ba ma bskyed pa zhes bya ba nas sems can rnams kyi mos pa'i rim pa de lta bu dag kyang snang ngo zhes gsungs pa'i bar gyis bstan to/ /thams cad phun sum tshogs shing mgo glengs pas go ba las gyur pa ni lnga pa ste/de nas de'i tshe bcom ldan 'das la byang chub sems dpa' don dam yang dag 'phags kyis 'di skad ces gsol to zhes bya ba nas/ don dam yang dag 'phags de bzhin te/ gzhan du ma yin gyi de ni de bzhin du zung shig ces gsungs pa'i bar gyis bstan to/ /de la dang por mos pa'i bye brag rgyas par bshad pa dang po'i tshig gi don la sogs pa bshad par bya ste/rigs phun sum tshogs pa zhes bya ba ni de bzhin gshegs pa'i theg pa mngon par rtogs pa'i rigs dang ldan pa ste/ de ni de la sems can gang dag dge ba'i rtsa ba chen po bskyed pa/ sgrib pa yongs su dag pa/rgyud yongs su smin pa zhes bya bas bstan to/ /de la dge ba'i rtsa ba chen po bskyed pa zhes bya ba ni rigs la gnas pa'i byang chub sems dpa' la rtags gang dag gis ni 'di ni byang chub sems dpa' yin no zhes gzhan dag gis de ltar shes par 'gyur ba/ byang chub sems dpa'i pha rol tu phyin pa rnams kyi rigs kyi rtags phun sum tshogs pa dang ldan pa ste/de bzhin gshegs pa'i theg pa'i mngon par rtogs pa'i rigs yang dag par bsgrub pa de ni rang bzhin gyis yon tan dang ldan zhing bzang la dge ba dang / dkar po'i chos thams cad dang ldan pa'i phyir de bzhin gshegs pa'i go 'phang de tsam du bskyed par dka' ba/gtso bor gyur pa/ bsam gyis mi khyab pa/ mi g.yo ba bla na med pa de thob pa'i rgyur gyur pa yin pas na yang dag par bsgrubs pa'i rigs de thob pa ni dge ba'i rtsa ba chen po bskyed pa zhes bya'o/ /sgrib pa yongs su dag pa zhes bya ba ni byang chub sems dpa'i rigs yang dag par bsgrubs pa de nyid kyi gnas skabs na rigs la gnas su zin kyang ji srid du dkar po'i chos dang mi mthun pa'i nyon mongs pa bzhi po dag las zad par ram/kha cig gi nye ba'i nyon mongs pa can du ma gyur pa de srid du rang bzhin gyis byang chub sems dpa' pha rol tu phyin pa rnams kyi rigs kyi rtags kyi dge ba'i chos de dag dang ldan par gyur la/gang gi tshe nye ba'i nyon mongs pa can du gyur pa de'i tshe/ de dkar po'i chos de dag la yang mi snang la ngan song dag tu yang skabs 'ga' skye bar 'gyur ba'i nye ba'i nyon mongs pa bzhi po sngar bstan pa de dag dang bral ba'i sgrib pa yongs su dag pa zhes bya'o/ /rgyud yongs su smin pa zhes bya ba ni byang chub sems dpa'i rigs yang dag par bsgrubs pa de nyid kyi gnas skabs na rigs la gnas shing sgrib pa yongs su dag tu zin kyang rgyu bzhis bla na med pa yang dag par rdzogs pa'i byang chub thob par mi nus pa'i rgyu bzhi sngar bstan pa de dag dang bral ba'i phyir rgyud yongs su smin pa zhes bya'o//mos pa phun sum tshogs pa zhes bya ba ni byang chub sems dpa' rnams kyi mos pa'i khams sangs rgyas kyi chos rnams la 'thob par nus par yid ches pas rab tu phye ba'i khams brtas pa ste/ de ni mos pa mang ba zhes bya bas bstan to/ /de yang byang chub sems dpa'i rigs la gnas pa'i gong du dang po byang chub tu sems bskyed pa'i gnas skabs na mos pa'i gnas brgyad po sngar bstan pa dag la mos pa'i khams brtas par byed pa'i rgyu gnyis po sngar bstan pa dag yod pas mos pa'i khams brtas pa ste/de ni mos pa mang ba zhes bya'o/ /shes rab phun sum tshogs pa zhes bya ba ni chos rab tu rnam par 'byed pa dang /don dam pa'i bden pa 'dzin pa'i shes rab yongs su smin pa ste/ de ni bsod nams dang ye shes kyi tshogs chen po yang dag par grub pa zhes bya bas bstan to/ /de yang byang chub sems dpa' dang po sems bskyed pa'i gong du byang chub sems dpa'i spyod pa la sbyor ba'i gnas skabs na pha rol tu phyin pa drug gis bsdus pa'i bsod nams dang ye shes kyi tshogs dang /de'i rgyu dang 'bras bu sngar bstan pa dag yang dag par bsgrubs pa'i rim gyis shes rab yongs su smin pa ste/ de ni shes rab phun sum tshogs pa dang ldan par sbyar ro/ /de ltar ji skad bstan pa'i rnam pa de dag gis ni rigs phun sum tshogs pa dang /mos pa phun sum tshogs pa dang / shes rab phun sum tshogs pa bstan to/ rigs phun sum tshogs pa ni skal ba dang ldan pa'i gzhi yin la/ mos pa phun sum tshogs pa ni byang chub sems dpa'i spyod pa la sbyor ba'i gzhi yin/ shes rab phun sum tshogs pa ni byang chub chen po yongs su rdzogs par 'gyur ba'i gzhi yin pas de gsum gyis ni gzhi phun sum tshogs pa bstan to/ /rigs phun sum tshogs pa las gyur pa zhes bya ba la sogs pa la/ gyur pa zhes bya ba'i sgra ni gzhi de gsum las byung ba'i mos pa'i bye brag ces bya bar sbyar ro//mos pa'i bye brag ces bya ba'i sgra ni skabs 'dir chos dang / don rtogs pa zhes bya ba'i don du gzung ngo / /de dag kyang gang zhe na/ chos de thos na nga'i dgongs te bshad pa yang yang dag pa ci lta ba bzhin du rab tu shes shing zhes bya bas ni rigs phun sum tshogs pa las gyur pa'i mos pa'i bye brag bstan te/rigs dang ldan pa'i phyir ni chos de thos par gyur la/ rigs phun sum tshogs pa'i phyir ni dgongs te chos bshad pa yang yang dag pa ji lta ba bzhin du rab tu shes par sbyar ro/ /chos de la yang mos par 'gyur la zhes bya bas ni mos pa phun sum tshogs pa las gyur pa'i mos pa'i bye brag bstan te/mos pa dang ldan pa'i phyir ni chos de la mos par 'gyur la/ mos pa phun sum tshogs pa'i phyir ni chos de rtogs par sbyar ro/ /don de yang shes rab kyis yang dag pa ji lta ba bzhin du rtogs par 'gyur zhing zhes bya ba ni shes rab phun sum tshogs pa las gyur pa'i mos pa'i bye brag bstan to//de rtogs pa goms pas kyang zhes bya ba ni mos pa'i bye brag rnam pa gsum po ji skad bstan pa de rtogs pa goms par byas pa ste/ de gsum gyis ni rgyu phun sum tshogs pa bstan to/ /myur ba myur ba kho nar shin tu mthar thug pa nyid rjes su 'thob par 'gyur te zhes bya ba ni rigs phun sum tshogs pa'i gzhi la brten te/dgongs te bshad pa yang dag pa ji lta ba bzhin du rab tu shes pa'i rgyu phun sum tshogs pas ni bla na med pa yang dag par rdzogs pa'i byang chub mngon par rdzogs par 'tshang rgya ba'i skal ba can du 'gyur zhing mthu yod par 'gyur bas/ de ni myur ba myur ba kho nar skal ba dang ldan pa'i shin tu mthar thug pa nyid rjes su 'thob par 'gyur ro//mos pa phun sum tshogs pa'i gzhi la brten te chos de la mos par byed pa'i rgyu phun sum tshogs pas ni byang chub kyi phyogs kyi chos thams cad la sbyor bar 'gyur bas des ni myur ba myur ba kho nar byang chub sems dpa'i spyod pa la sbyar ba'i mthar thug pa nyid rjes su 'thob par 'gyur ro//shes rab phun sum tshogs pa'i gzhi la brten te/ don de shes rab kyis yang dag pa ji lta ba bzhin du rtogs pa'i rgyu phun sum tshogs pas bla na med pa yang dag par rdzogs pa'i byang chub yongs su rdzogs par 'gyur bas des ni myur ba myur ba kho nar byang chub chen po yongs su rdzogs pa'i mthar thug pa nyid rjes su thob par 'gyur te/de gsum gyis ni 'bras bu phun sum tshogs pa bstan to/ /nga la yang a la la bcom ldan 'das de ni yang dag par rdzogs pa'i sangs rgyas yin te zhes bya ba la sogs pa'i dad pa 'thob par 'gyur ro zhes bya bas ni de dag gis de ltar gzhi phun sum tshogs pa rnam pa gsum la brten te/rgyu phun sum tshogs pa rnam pa gsum gyis 'bras bu phun sum tshogs pa rnam pa gsum thob par 'gyur bar rjes su rtogs pa'i sgo nas de ston pa sangs rgyas bcom ldan 'das kyi che ba nyid yang dag par rjes su mthong bas ston pa la yang dad pa 'thob pa'i mos pa'i bye brag bstan pa yin te/de ni mos pa'i bye brag rgyas par bshad pa dang po yin no/ /de'i 'og tu mos pa'i bye brag rgyas par bshad pa gnyis pa'i tshig gi don la sogs pa bshad par bya ste/ rigs dang mos pa dang ldan pa zhes bya ba ni de bzhin gshegs pa'i theg pa mngon par rtogs pa'i rigs dang ldan la phun sum tshogs pa nyid ma yin pa dang /byang chub sems dpa' rnams kyi mos pa'i khams dang ldan la brtas pa nyid ma yin pa ste/ de ni de la sems can gang dag dge ba'i rtsa ba bskyed pa dang /sgrib pa yongs su dag pa dang / rgyud yongs su smin pa dang / mos pa chen po ma yin pa zhes bya bas bstan te/ chen po ma yin zhes bya ba'i sgra ni dge ba'i rtsa ba chen po bskyed pa ma yin pa/ sgrib pa yongs su dag pa chen po ma yin pa/ rgyud yongs su smin pa chen po ma yin pa/ mos pa mang ba chen po ma yin pa zhes bya bar thams cad dang sbyar te/des na rigs dang mos pa dang ldan la/ phun sum tshogs pa nyid ma yin par bstan pa yin no/ /de la dge ba'i rtsa ba chen po bskyed pa ma yin zhes bya ba ni rigs la gnas par byang chub sems dpa' la rtags gang gis ni 'di ni byang chub sems dpa' yin no zhes gzhan dag gis de ltar shes par 'gyur ba byang chub sems dpa'i pha rol tu phyin pa rnams kyi rigs kyi rtags dang ldan la phun sum tshogs pa ma yin pa'o//sgrib pa yongs su dag pa chen po ma yin zhes bya ba ni byang chub sems dpa'i rigs yang dag par bsgrubs pa de nyid kyi gnas skabs na/dkar po'i chos dang mi mthun pa'i nye ba'i nyon mongs pa bzhi po sngar bstan pa de dag dang shas cher bral la gtan bral ba ni ma yin no/ /rgyud yongs su smin pa chen po ma yin pa zhes bya ba ni byang chub sems dpa'i rigs yang dag par bsgrubs pa de nyid kyi gnas skabs na rigs la gnas shing sgrib pa yongs su zad du zin kyang byang chub thob par mi nus pa'i rgyu bzhi po sngar bstan pa de dag dang shas cher bral la gtan bral ba ma yin pa ste/de dag gis rigs dang ldan la phun sum tshogs pa nyid ma yin pa bstan to/ /mos pa mang ba chen po ma yin pa zhes bya ba ni byang chub sems dpa'i rigs la gnas pa'i gong du dang po byang chub tu sems bskyed pa'i gnas skabs na/mos pa'i gnas brgyad po sngar bstan pa dag la 'thob par nus par yid ches pas rab tu phye ba'i mos pa'i khams dang ldan la rgyu gnyis po sngar bstan pa med pas mos pa'i khams brtas pa nyid ma yin pa ste/des ni mos pa dang ldan la phun sum tshogs pa nyid ma yin pa bstan to/ /shes rab dang bral ba zhes bya ba ni chos rab tu rnam par 'byed pa dang / don dam pa'i bden pa 'dzin pa'i shes rab yongs su ma smin pa ste/ de ni bsod nams dang ye shes kyi tshogs chen po yang dag par ma grub pa zhes bya bas bstan te/chen po zhes bya ba'i sgras dang po sems bskyed pa'i gong du byang chub sems dpa'i spyod pa la sbyor ba'i gnas skabs na/ bsod nams dang ye shes kyi tshogs dang de'i rgyu dang 'bras bu shas kyis yod kyang yongs su ma smin pa yin la/ 'bras bu yang mong rtul las shes rab dang bral ba zhes bya ste/de'i phyir drang po dang drang po'i rang bzhin can/ rtog pa dang sel mi nus pa zhes bya ba gsungs so zhes bya ba ni rang bzhin gyi rnam pa'o/ /drang po'i rang bzhin can zhes bya ba ni g.yer bag gi sbyor ba mi rtsom pa'o/ rtog pa zhes bya ba ni gnyen po dang mi mthun pa'i phyogs la rtog pa de mi nus pa'o//sel ba zhes bya ba ni gnyen pos mi mthun pa'i phyogs sel ba de mi nus pa'o/ /de ltar ji ltar bstan pa'i rnam pa de dag gis ni rigs dang ldan la phun sum tshogs pa ma yin pa dang / mos pa dang ldan la phun sum tshogs pa ma yin pa dang shes rab dang bral ba bstan te/des na skal ba dang ldan pa'i gzhi dang ldan la phun sum tshogs pa ma yin pa dang / byang chub sems dpa'i spyod pa la sbyor ba'i gzhi dang ldan la phun sum tshogs pa ma yin pa dang / byang chub chen po yongs su rdzogs par 'gyur ba'i gzhi dang bral bar bstan pa yin no/ /rigs dang mos pa dang ldan pa las gyur pa zhes bya ba la/gyur la zhes bya ba'i sgra yang gzhi de gnyis las byung ba'i mos pa'i bye brag ces bya bar sbyar ro/ /mos pa'i bye brag ces bya ba'i sgra skabs 'dir ni chos dang don la dad pas mos pa zhes bya ba'i don du gzung ste/ de'i phyir rang gi lta ba mchog tu 'dzin par mi gnas pa zhes bya ba gsungs te/lta ba nyid dad pas mos pa'i rnam pa yin par sbyar ro/ /de dag kyang gang zhe na/ chos de thos na nga'i dgongs te bshad pa yang yang dag pa ji lta ba bzhin du rab tu mi shes mod kyi zhes bya ba ni rigs dang ldan pa las gyur pa ni mos pa'i bye brag bstan te/rigs dang ldan pas skal ba dang ldan pa'i gzhi yod pa'i phyir ni snga ma ltar chos de thos par 'gyur la rigs phun sum tshogs pa ma yin pas skal ba dang ldan pa'i gzhi phun sum tshogs pa ma yin pa'i phyir ni snga ma ltar dgongs te bshad pa yang dag pa ji lta ba bzhin du rab tu mi shes par sbyar ro//'on kyang chos de la mos pa byed cing dad pa yang thob ste zhes bya bas ni bsgom pa'i rnam pas sbyor bar ni mi nus so zhes bya ba'i bar gyis ni mos pa dang ldan pa las gyur pa'i bye brag bstan te/ mos pa dang ldan pas byang chub sems dpa'i spyod pa la sbyor ba'i gzhi yod pa'i phyir ni snga ma ltar chos de la mos par 'gyur ba mos pa phun sum tshogs pa ma yin pas byang chub sems dpa'i spyod pa la sbyor ba phun sum tshogs pa ma yin pa'i phyir ni snga ma ltar rtogs pa'i mos pa mi thob par sbyar ro//mdo sde 'di dag ni zhes bya ba ni drang ba'i don gyi mdo brjod pa'i rnam pa zhes sngar smos pa nyid yin par sbyar ro//zab pa zhes bya ba ni ngo bo nyid kyis so/ /zab par snang ba zhes bya ba ni rnal 'byor pas zab par rtogs shing blo la snang bar byar rung ba'o/ /stong pa nyid dang ldan pa zhes bya ba ni chos bdag med pas rab tu phye ba'o/ /mthong bar dka' ba zhes bya ba ni mthong ba'i lam dang bar chad med pa'i lam ma skyes kyi bar du thabs gzhan gyis mi mthong ba'o//rtogs par dka' ba zhes bya ba ni bsgom pa'i lam dang rnam par grol ba'i lam ma skyes kyi bar du thabs gzhan gyis mi rtogs pa'o/ /brtag mi nus pa zhes bya ba ni tshad mas gzhal bar mi nus pa'o//rtog ge'i spyod yul ma yin pa zhes bya ba ni 'phags pa so so rang rig pa'i shes pa'i spyod yul yin pa'i phyir ro/ /zhib mo zhes bya ba ni de kho na nyid kyi don la 'jug pa'i shes rab po/ /brtags pa zhes bya ba ni tshar byung gi don la 'jug pa'i shes rab po/ /mkhas pa zhes bya ba ni sbyor ba las byung ba'i shes rab bo//mdzangs pa zhes bya ba ni lhan cig skyes pa'i shes rab bo/ /shes rab rnon po de bzhi dang ldan pa'i gang zag ni zhib mo brtags pa mkhas pa mdzangs pa zhes bya ste/ gang zag de lta bus rig pa yin no zhes mos par byed do zhes bya bar sbyar te/ de dag gis ni sngar chos de la mos par byed cing zhes smos pa'i mtshan nyid gtso cher bstan par rig par bya'o//mdo sde de dag gis bstan pa dag la bdag mi shes so snyam nas 'dug ste zhes bya ba la sogs pas ni sngar rang gi lta ba mchog tu 'dzin par mi gnas pa zhes smos pa'i mtshan nyid gtso cher ston te/de'i sgo nas kyang dad pas mos pa'i mtshan nyid ston par sbyar ro/ /sangs rgyas kyi byang chub ces bya ba ni rtogs par thugs su chud pa'o/ /chos rnams kyi chos nyid ces bya ba ni sgro btags pa med pa dang / skur pa med pa'i chos nyid do/ /mos pa sna tshogs kyis 'jug pa yin te zhes bya ba ni gdul ba rnams kyi mos pa ji lta ba bzhin du sgo sna tshogs nas ston pa'o//de dag mdo sde de rnams goms par byas te yi ger bri bar yang byed ces bya ba la sogs pas ni sngar dang bya yang 'thob ste zhes smos pa'i mtshan nyid gtso cher ston te/ sgo de nas kyang dad pas mos pa'i bye brag ston par sbyar ro/ / bsgom pa'i rnam pas sbyor bar ni mi nus so zhes bya bas ni shes rab dang bral ba'i rgyu bstan te/ bsgom pa'i rnam pa la brten nas shes rab skye ba'i phyir ro/ /de dag gzhi des na zhes bya ba la sogs pas ni bsod nams dang ye shes dang de'i rgyu dang 'bras bu sngar bstan pa dag rim gyis 'phel ba'i sgo nas shes rab dang ldan par 'gyur ro zhes ston to//gong du yang rgyud yongs su ma smin pa dag kyang yongs su smin par byed do zhes bya bas ni shes rab dang ldan par gyur pa'i gong du byang chub chen po yongs su rdzogs par 'gyur ba'i gzhi dang ldan par byed do zhes bya ba'i tha tshig ste/ de ni mos pa'i bye brag rgyas par bshad pa gnyis pa yin no// //de'i mos pa'i bye brag rgyas par bshad pa gsum pa'i tshig gi don la sogs pa bshad par bya ste/ rigs dang mos pa dang ldan pa'i zhes bya ba ni de bzhin gshegs pa'i theg pa mngon par rtogs pa'i rigs dang ldan la phun sum tshogs pa nyid ma yin pa dang /byang chub sems dpa' rnams kyi mos pa'i khams dang ldan la brtas pa nyid ma yin pa ste/ sngar gnyis pa'i skabs su ji skad bstan pa kho na bzhin du blta bar bya'o/ /shes rab chung ngu zhes bya bas snga ma las bye brag tu bstan pa yin te/ de'i phyir ji ste sems can de dag las sems can gang dag bsod nams dang ye shes kyi tshogs chen po'i bar du yang dag par 'grub pa ma yin yang zhes bya ba la sogs pa gsungs so//bar du zhes bya ba'i sgra ni sngar gnyis pa'i skabs su dge ba'i rtsa ba bskyed pa dang / sgrib pa yongs su dag pa dang / rgyud yongs su smin pa dang /mos pa chen po ma yin pa zhes gsungs pa dag kyang 'dir bsdu ba'i tshig yin no/ /chen po zhes bya ba'i sgras dang po sems bskyed pa'i gong du/ byang chub sems dpa'i spyod pa la sbyor ba'i gnas skabs na bsod nams dang ye shes kyi tshogs dang / de'i rgyu dang 'bras bu shas kyis yod kyang yongs su ma yin par ni snga ma dang 'dra la/'phral du mong rtul ba ma yin pa'i phyir ni shes rab chung ngu dang ldan pa zhes bya ste/ de'i phyir drang po dang drang po'i rang bzhin can ma yin la rtog pa dang sel nus shing zhes bya bas snga ma las bye brag tu bstan te/ des na shes rab chung ngu dang ldan pas re zhig chud za bar 'gyur bar ston to//gyur pa zhes bya ba'i sgra yang gzhi de gsum las byung ba'i mos pa'i bye brag ces bya bar sbyar ro/ /mos pa'i bye brag ces bya ba'i sgra skabs 'dir ni chos la dad pas mos la/ don la sgra ji bzhin du mngon par zhen pa zhes bya ba'i don du gzung ste/de'i phyir lta ba mchog tu 'dzin par gnas pa zhes bya ba gsungs te/ lta ba nyid dad pas mos pa dang / sgra ji bzhin du mngon par zhen pa'i rnam pa yin par sbyar ro/ /de dag kyang gang zhe na/ chos de thos nas nga'i dgongs te bshad pa zab mo yang dag pa ji lta ba bzhin du rab tu mi shes te zhes bya bas ni rigs dang ldan pa las gyur pa'i mos pa'i bye brag bstan te/rigs dang ldan pas skal ba dang ldan pa'i gzhi yod pa'i phyir ni snga ma bzhin du chos de thos par 'gyur la/ rigs phun sum tshogs pa ma yin pas skal ba dang ldan pa'i gzhi phun sum tshogs pa ma yin pa'i phyir ni snga ma bzhin du dgongs te bshad pa zab mo yang dag pa ji lta ba bzhin du rab tu mi shes par sbyar ro//chos de la mos kyang zhes bya ba ni mos pa ldan pa las gyur pa'i mos pa'i bye brag bstan te/ mos pa dang ldan pas byang chub sems dpa'i spyod pa la sbyor ba'i gzhi yod pa'i phyir ni snga ma bzhin du chos de la mos par 'gyur la/mos pa phun sum tshogs pa ma yin pas byang chub sems dpa'i spyod pa la sbyor ba'i gzhi phun sum tshogs pa ma yin pa'i phyir ni snga ma bzhin du rtogs par mi 'gyur zhing / chos de la dad pas mos pa'i bye brag thob par sbyar ro/ /chos 'di dag thams cad kyi ngo bo nyid med pa kho na yin no zhes bya ba la sogs pas ni shes rab chung ngu las gyur pa'i mos pa'i bye brag bstan te/shes rab chung ngu de ni bsod nams dang ye shes kyi tshogs dang de'i rgyu dang 'bras bu yang dag par 'grub pa'i rim gyis thob pa ni ma yin gyi/ drang po dang drang po'i rang bzhin can ma yin la rtog pa dang sel nus pa tsam gyis shes rab yin pas shes rab chung ngu de las gyur pa'i mos pa'i bye brag de yang don la sgra ji bzhin kho nar mngon par zhen pas byed pa'i mtshan nyid thams cad la skur pa 'debs par byed pa/shes rab dang dge ba'i chos rnams las ma thob pa'i mnyam pas yongs su mnyam par byed pa yin te/sngar shes rab dang bral ba zhes bya ba ni shes rab yongs su ma smin pas chud za bar 'gyur ba yang med kyi/ shes rab chung ngu 'di ni re zhig chud za bar 'gyur bar rig par bya'o/ /de la chos 'di dag thams cad ni ngo bo nyid med pa kho na yin no/ /chos kyi don la sgra ji bzhin kho nar mngon par zhen par byed de zhes bya bas ni chos thams cad ngo bo nyid med ces gsungs pa ni mtshan nyid thams cad ngo bo nyid med pa nyid kyis ngo bo nyid med pa ma yin gyi/sngar drang ba'i don gyi mdo sde brjod pa'i rnam pas bstan pa lta bu yin na/ de ltar mi shes shing mtshan nyid thams cad ngo bo nyid med pa yin no zhes chos kyi don la sgra ji bzhin kho nar mngon par zhen par byed pa kho na'o//chos 'di dag thams cad ni ma skyes pa kho na'o zhes bya ba la sogs pa chos kyi don la sgra ji bzhin kho nar mngon par zhen par byed pa ma yin no/ /chos thams cad la med par lta ba dang zhes bya ba ni mtshan nyid med pa'i chos dang /kun nas nyon mongs pa'i mtshan nyid kyi chos dang / rnam par byang ba'i mtshan nyid kyi chos thams cad mgo mnyam du med par blta bar bya'o/ /mtshan nyid med pa la lta ba zhes bya ba ni kun brtags pa'i mtshan nyid dang / gzhan gyi dbang gi mtshan nyid dang /yongs su grub pa'i mtshan nyid thams cad mgo mnyam du med par blta ba'o / /'di ltar gzhan gyi dbang gi mtshan nyid dang yongs su grub pa'i mtshan nyid yod na ni kun brtags pa'i mtshan nyid kyang rab tu shes par 'gyur na zhes bya ba ni mtshan nyid de gnyis la ngo bo nyid dam bye brag tu ming dang brdar 'dogs pa nyid kun brtags pa'i mtshan nyid yin pa'i phyir ro//de lta bas na de dag ni mtshan nyid rnam pa gsum char la yang skur pa 'debs pa zhes bya'o zhes bya bas ni shes rab chung ngu las gyur pa'i mos pa'i bye brag nyid bstan pa yin no/ /de dag ni nga'i chos la chos su 'du shes pa dang zhes bya ba ni sangs rgyas kyi bka' yin par 'dzin pa ste/des ni rigs dang ldan pa dang mos pa dang ldan pa las gyur pa'i mos pa'i bye brag nyid bstan pa yin no/ /don ma yin pa la don du 'du shes pa yin te zhes bya ba ni chos kyi don la sgra ji bzhin kho nar zhes pa ste/ des ni shes rab chung ngu las gyur pa'i mos pa'i bye brag mtshan nyid rnam pa gsum char la yang skur pa 'debs pa nyid bstan to//de dag chos la mos pas dge ba'i chos rnams kyis 'phel mod kyi zhes bya bas ni rigs dang ldan pa dang mos pa dang ldan pa las gyur pa mos pa'i bye brag gi phan yon ston te/de dag de bzhin gshegs pa'i theg pa mngon par rtogs pa'i rigs yang dag par bsgrubs pa dang ldan zhing / de'i gong du dang po byang chub tu sems bskyed pa'i gnas skabs na mos pa'i gnas brgyad po dag la mos shing sangs rgyas kyi chos rnams la thob par nus par yid ches pas rab tu phye ba'i mos pa'i khams dang ldan pas/thar pa'i cha dang mthun pa'i dge ba'i rtsa ba bskyed zin pa'i phyir ring po mi thogs par nges par 'byed pa'i cha dang mthun pa'i dge ba'i rtsa ba skye zhing mthong ba'i lam dang bsgom pa'i lam dang / mthar thug pa'i 'bras bu yang rim gyis thob par 'gyur bas na/de'i phyir dge ba'i chos rnams kyi 'phel ba zhes bya ste/ phan yon dpag tu med pa dang ldan par bstan pa yin no/ /'on kyang don ma yin pa la mngon par zhen pas shes rab la yongs su nyams par 'gyur te zhes bya ba la sogs pas ni shes rab chung ngu las gyur pa'i mos pa'i bye brag gi nyes dmigs ston te/de dag shes rab chung ngu dang ldan pas don la sgra ji bzhin kho nar mngon par zhen cing mtshan nyid rnam pa gsum char la yang skur pa 'debs par byed pas/ re zhig nges par 'byed pa'i cha dang mthun pa'i dge ba'i rtsa ba dang mthong ba'i lam la sogs pas bsdus pa'i shes rab las ma thob pa'i nyams pas yongs su nyams par 'gyur ba'i nyes dmigs chen po dang ldan par ston to//shes rab las yongs su nyams na dge ba'i chos shin tu rgya che ba dang / shin tu dpag tu med pa rnams las kyang yongs su nyams par 'gyur ro zhes bya ba ni de ltar shes rab de dag las ma thob pa'i nyams pas yongs su nyams na shes rab de dag gis bsdus pa'i dge ba'i chos shin tu rgya che ba dang shin tu dpag tu med pa rnams las kyang ma thob pa'i nyams pas yongs su nyams par 'gyur ba ste/de tsam du 'gyur bar zad kyi kha na ma tho ba 'phel bar ni mi 'gyur ba'i don to//de dag las gzhan dag gi chos la chos su dang / don ma yin pa la don du thos nas zhes bya ba'i smra ba po shes rab chung ngu de dag las nyan pa po las dang po pa gzhan dag gis thos nas so/ /de la nyan pa po ni rnam pa gnyis te/ de dag gi lta ba la dga' bar byed pa dang /de dag gi lta ba la dga' bar mi byed pa'o/ /lta ba la dga' bar byed pa dag ni smra ba po de dag nyid dang 'dra bar chos la mos pa'i dge ba'i chos rnams kyis kyang 'phel bar 'gyur/ /don ma yin pa la mngon par zhen pas shes rab dang / dge ba'i chos rnams las yongs su nyams par 'gyur zhing kha na ma tho ba 'phel bar ni mi 'gyur te/de ni gang dag lta ba la dga' bar byed pa dag ni zhes bya ba la sogs pas bstan to/ /lta ba la dga' bar mi byed pa dag ni de dag gi lta ba la ma phyogs pa'i yon tan yod kyang / chos la yang mi mos shing skur pa 'debs pa la sogs pa'i rim gyis dge ba'i chos rnams kyis 'phel bar lta ga la 'gyur gyi/shes rab dang dge ba'i chos rnams las ma thob pa'i nyams pas yongs su nyams par 'gyur ba'i steng du/ kha na ma tho ba chen po yang 'phel bar 'gyur te/ de ni gang dag lta ba la dga' bar mi byed pa de dag ni zhes bya ba la sogs pas bstan to//de dag la chos rnams kyi ngo bo nyid med pa nyid thos shing zhes bya ba la sogs pa ni smra ba po de dag la sgra ji bzhin du thos pa'o/ /skrag cing zhes bya ba la sogs pa ni mtshan nyid rnam pa gsum char la skur pa 'debs pa'i lta ba la ma mos pa'i phyir ro//mdo sde dag la skur pa 'debs par byed ces bya ba la sogs pa ni smra ba po de dag gi lta ba la mos par lta ga la 'gyur gyi/ de dag gang la mos pa'i chos de bzhin gshegs pas gsungs pa'i mdo sde de dang de dag la yang skur pa 'debs shing gtan spang ba la sogs par byed pa yin no//gzhi des na zhes bya ba ni de bzhin gshegs pas gsungs pa'i mdo sde de dag la skur pa btab pa la sogs pa'i gzhi des so/ /phongs pa chen po thob par 'gyur zhing zhes bya ba ni dam pa'i chos kyis phongs par 'gyur ba'i sgrib pa chen po thob par 'gyur ba'am/ yang na gzhi des 'bras bu sdug bsngal chen po thob par 'gyur ba'o/ /las kyi sgrib pa chen pos kyang reg par 'gyur ro zhes bya ba ni dam pa'i chos kyis kyang phongs par 'gyur ba'i las kyi sgrib pa chen po'i 'bras bu sems can dmyal ba chen po gcig nas gcig tu brgyud pa 'phen pa dang ldan par 'gyur ro zhes bya ba'i tha tshig go//gzhi des kyang zhes bya ba ni nyan pa po rnam pa gnyis te/ de ltar rab tu nyams par byed pa'i gzhi des kyang ngo gang dag ces bya ba ni shes rab chung ngu las gyur pa'i mos pa'i bye brag dang ldan pa'i smra ba po dag go/ /de dag ni las kyi sgrib pa chen po dang ldan par nga smra'o zhes bya ba ni smra ba po de dag rang gi shes rab chung ngu las gyur pa'i mos pa'i bye brag gis ni shes rab dang /dge ba'i chos rnams las ma thob pa'i nyams pas yongs su nyams par 'gyur la kha na ma tho ba 'phel bar ni mi 'gyur mod kyi/ nyan pa po rnam gnyis rab tu nyams par byas pa'i gzhi des kha na ma tho ba gzhan 'phel zhing re zhig chud za bar 'gyur ro zhes bya ba'i tha tshig ste/de ni mos pa'i bye brag rgyas par bshad pa gsum pa yin no/ /de'i 'og tu mos pa'i bye brag rgyas par bshad pa bzhi pa'i tshig gi don la sogs pa bshad par bya ste/ thams cad dang bral zhing bkri ba dgos pa zhes bya ba ni rigs yang dag par ma bsgrubs pa dang /mos pa med pa dang shes rab 'chal pa mkhas pa rnams kyis snying rje'i zhags pas gzung zhing bkri dgos pa ste/ de la don dam yang dag 'phags de la sems can gang dag dge ba'i rtsa ba ma bskyed sgrib pa yongs su ma dag rgyud yongs su ma smin zhes bya ba ni rigs yang dag par ma bsgrubs pa bstan to//mos pa mi mang zhes bya bas ni mos pa med pa bstan to/ /bsod nams dang ye shes kyi tshogs yang dag par ma grub cing / drang po dang drang po'i rang bzhin can ma yin la rtog pa dang sel mi nus shing zhes bya bas ni shes rab 'chal pa bstan to//gyur pa zhes bya ba yang thams cad dang bral zhing bkri dgos pa las byung ba'i mos pa'i bye brag ces bya bar sbyar ro/ /mos pa'i bye brag ces bya ba'i sgra skabs 'dir ni chos dang don la chos ma yin pa dang / don ma yin par 'du shes pa zhes bya ba'i don du gzung ngo / / de'i phyir rang gi lta ba mchog tu 'dzin par gnas pa zhes bya ba gsungs te/ lta ba nyid 'du shes kyi rnam pa yin par sbyar ro/ /de dag kyang gang zhe na/ chos de thos na nga'i dgongs te bshad pa yang yang dag pa ji lta ba bzhin du rab tu mi shes shing zhes bya bas ni rigs yang dag par ma bsgrubs pa las gyur pa'i mos pa'i bye brag bstan te rang bzhin gyis gnas pa'i rigs yod pas ni chos de thos par 'gyur la/yang dag par bsgrubs pa'i rigs med pas ni/ dgongs te bshad pa yang dag pa ji lta ba bzhin du rab tu mi shes par sbyar ro/ /chos de la yang mos par yang mi 'gyur la zhes bya bas ni mos pa med pa las gyur pa'i mos pa'i bye brag bstan to//de dag chos de la chos ma yin par 'du shes shing don la don ma yin par 'du shes la zhes bya ba la sogs pas ni shes rab 'chal pa las gyur pa'i mos pa'i bye brag bstan to/ /slad kyang 'jud par byed de zhes bya ba ni don dang tshig la rang dga' dang 'dod phyogs la sogs pa byed cing dam pa'i chos ltar bcos pa ston par byed pa'o//de dag ni dang po nyid nas kyang las kyi sgrib pas bsgribs pa yin la zhes bya ba ni da ltar 'di lta bu'i gnas skabs su gyur pa'i rgyu sngon bsags pa gang yin pas so/ /las kyi sgrib pa de'i dang po ni gdags pa sla'i zhes bya bas ni sngon gyi dus 'di tsam zhig nas gzhi 'di lta bu las gyur te zhes dang po'i gzhi brtags pa'o//'byung bar 'gyur ro zhes gdags pa ni dka'o zhes bya ba ni sgrib pa de 'di tsam na spong bar 'gyur ro zhes de las thar par 'gyur ba'i phyi ma'i mtha' brtag par ni dka'o zhes bya ba'i tha tshig go//sems can rnams kyi mos pa'i rim pa de lta bu dag kyang snang ngo zhes bya bas ni de yan chad du mos pa'i bye brag mdor bstan pa dang / rgyas par rnam pa bzhi bstan pa de dag gi mjug bsdu ba bstan to/ /de ni mos pa'i bye brag rgyas par bshad pa bzhi pa'o/de nas bcom ldan 'das kyis de'i tshe tshigs su bcad pa 'di dag bka' stsal to zhes bya ba la sogs pa tshigs su bcad pa lngas ni bcom ldan 'das kyis de yan chad du chos rnams kyi ngo bo nyid med pa'i mtshan nyid ji skad bstan pa de dag gi dngos po bsdu ba bstan te/ de la tshigs su bcad pa dang po dang gnyis pas ni don la log par rtogs pa rnam pa bzhis chud za bar 'gyur ba'i gnyen por ngo bo nyid med pa nyid kyi ldem por dgongs pa sngar bsdu ba'i dngos po bsdu ba bstan to//tshigs su bcad pa gsum pas ni de la spyod pa'i gang zag gi bsgrub pa'i bye brag rgyas par bshad pa gsum sngar bstan pa'i dang po bstan pa'i gzhi dang ldan pa'i skabs su rnam par dag pa'i lam gcig dang /rnam par dag pa gcig dang / theg pa gcig pa dang / sems can gyi dbang po'i rim pa la rigs sna tshogs dag kyang med pa ni ma yin no zhes bshad pa'i dngos po bsdu ba bstan to//tshigs su bcad pa bzhi pa'i rtsa ba dang po gnyis kyis ni rigs kyi gzhi dang ldan pa'i skabs su gang zag nyan thos kyi rigs can zhi ba bgrod pa gcig pu pa zhes bshad pa de lta bu'i sems can mang po'i dngos po bsdu ba bstan to/ /rtsa ba 'og ma gnyis kyis ni rkyen gyi gzhi dang ldan pa'i skabs su nyan thos byang chub tu yongs su 'gyur ba bshad pa la sogs pa bla na med pa'i byang chub tu lam sgrub pa de lta bu'i sems can shin tu dkon pa'i dngos po bsdu ba bstan to//tshigs su bcad pa tha mas ni bcom ldan 'das kyis ngo bo nyid med pa nyid rnam pa gsum gdags pa mdzad pa de la spyod pa'i gang zag gi bsgrub pa'i bye brag dang /mos pa'i bye brag tha dad du zin kyang sgo de nas zhugs te rnam par grol ba'i 'bras bu thob pa rnams kyi mya ngan las 'das pa'i dbyings la bye brag med pa dang / de'i tshe brgya cher bstan pa yin no/ /de'i 'og tu mos pa'i bye brag rgyas par bshad pa lnga pa'i tshig gi don la sogs pa bshad par bya ste/thams cad phun sum tshogs shing mgo glengs pas go ba zhes bya ba ni 'phags pa don dam yang dag 'phags nyid 'dir rigs dang / mos pa dang / shes rab thams cad phun sum tshogs shing mgo glengs pas go ba'i tshad mar byas pa yin te/de dang 'dra bar byang chub sems dpa'i gnas pa mchog la yang dag par zhugs pa thams cad phun sum tshogs shing mgo glengs pas go ba gzhan dag kyang gzung bar bya'o/ /de'i phyir de bstan pa'i dbang du mdzad nas/ de nas de'i tshe bcom ldan 'das la byang chub sems dpa' don dam yang dag 'phags kyis 'di skad ces gsol to zhes bya ba la sogs pa gsungs so//skabs 'dir 'phags pa don dam yang dag 'phags nyid tshad mar byas pa yin pas de'i rigs dang / mos pa dang shes rab phun sum tshogs pa ni yod par mngon par zhar la glengs par zad kyi dmigs kyis bstan pa med do//de ji ltar mgo glengs pas go ba yin zhe na/ de'i phyir bcom ldan 'das kyis bka' stsal pa'i don bdag gis 'di ltar 'tshal te zhes bya ba gsungs te/ bcom ldan 'das kyis chos rnams kyi ngo bo nyid med pa'i mtshan nyid skabs de yan chad du mgo glengs te bka' stsal pa'i rjes la/'dir 'phags pa don dam yang dag 'phags nyid kyis de bzhin du go zhing rgya cher ston pa nyid mgo glengs pas go ba yin par sbyar ro/ /gyur pa zhes bya ba yang de lta bur phun sum tshogs shing mgo glengs pas go ba las byung ba'i mos pa'i bye brag ces bya bar sbyar ro//mos pa'i bye brag ces bya ba'i sgra skabs 'dir ni ngo bo nyid gsum ngo bo nyid kyis tha dad pa'i mthong ba'i rtogs pa bsgom pa'i rnam pa yongs su shes pa dang / de'i 'bras bu bya ba med pa nyid yin par sbyar ro/ /mos pa'i bye brag de dag kyang gang zhe na/ gzhung 'og ma rnams kyis ji skad ston pa dag yin par rig par bya'o//de la rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma la zhes bya ba ni tshig gi gzhi gcig tu bsdus te/ gzhan gyi dbang gi mtshan nyid la zhes bya ba'i tha tshig go/ /de la rnam par rtog pa zhes bya ba ni yang dag pa ma yin pa kun rtog pa ste/khams gsum pa'i sems dang sems las byung ba thams cad do/ /de'i spyod yul zhes bya ba ni kun brtags pa'i mtshan nyid kyi gnas 'du byed kyi mtshan ma nyid yin no/ /kun brtags pa'i mtshan nyid ces bya ba ni ji tsam du rjes su tha snyad gdags pa'i phyir ngo bo nyid dam bye brag tu ming dang brdar btags pa ste/de yang gnas med pa la gdags su mi rung bas de'i gnas kyang 'du byed kyi mtshan nyid yin no/ /de ltar na rnam par rtog pa'i spyod yul yang 'du byed kyi mtshan nyid la kun brtags pa'i mtshan nyid kyi gnas kyang 'du byed kyi mtshan ma yin no//'du byed kyi mtshan ma zhes bya ba ni 'du byed kyi rnam pa ste/ rnam par rtog pa nyid 'du byed kyi rnam par snang ba la/ rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma zhes bya'i/ rnam par rtog pa las gzhan pa phyi rol na de'i spyod yul du gyur pa'i dngos po gzhan ni med do//de nyid dngos po'i ngo bo nyid rkyen gzhan gyi dbang gis rten cing 'brel par 'byung ba gzhan gyi dbang gi mtshan nyid yin par rig par bya'o/ /gzhan gyi dbang gi mtshan nyid de la gzugs kyi phung po zhes bya ba la sogs par ngo bo nyid kyi mtshan nyid dam/bye brag gi mtshan nyid du ming dang brdar rnam par gzhag pa gang lags pa de ni kun brtags pa'i mtshan nyid lags te zhes bya ba ni gzhan gyi dbang gi mtshan nyid de la ji tsam du rjes su tha snyad gdags pa'i phyir ngo bo nyid kyi mtshan nyid du ming dang brdar btags pa dang /bye brag gi mtshan nyid du ming dang brdar btags pa gang yin pa de ni dngos po'i ngo bo nyid ma yin pa sgro btags pa yin pas kun brtags pa'i mtshan nyid yin par bstan to/ /de la brten nas bcom ldan 'das chos rnams kyi mtshan nyid ngo bo nyid ma mchis pa nyid 'dogs par mdzad lags so zhes bya ba ni kun brtags pa'i mtshan nyid de nyid mtshan nyid ngo bo nyid med pa nyid kyis ngo bo nyid med pa yin pas gang dag gis de ltar kun brtags pa'i ngo bo nyid mtshan nyid ngo bo nyid med pa nyid kyis ngo bo nyid med par tha dad par mthong ba de dag la ni bcom ldan 'das mtshan nyid ngo bo nyid med pa nyid 'dogs par mi mdzad kyi/gang dag gis de ltar mi mthong ba de dag la kun brtags pa'i mtshan nyid de la brten nas/ bcom ldan 'das chos rnams kyi mtshan nyid ngo bo nyid med pa nyid 'dogs par mdzad do zhes bya ba'i tha tshig go/ /rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma gang lags pa de ni gzhan gyi dbang gi mtshan nyid lags te zhes bya ba'i tha tshig gi don ni gong du bstan zin to// //de la brten nas bcom ldan 'das chos rnams kyi skye ba ngo bo nyid ma mchis pa nyid dang / don dam pa ngo bo nyid ma mchis pa nyid de las gcig kyang 'dogs par mdzad lags so zhes bya ba yang gzhan gyi dbang gi mtshan nyid de nyid skye ba ngo bo nyid med pa nyid dang /don dam pa ngo bo nyid med pa nyid kyis ngo bo nyid med pa yin pas gang dag gis de ltar gzhan gyi dbang gi ngo bo nyid skye ba ngo bo nyid med pa nyid dang / don dam pa ngo bo nyid med pa nyid kyis ngo bo nyid med par tha dad par mthong ba de dag la ni bcom ldan 'das skye ba ngo bo nyid med pa nyid dang /don dam pa ngo bo nyid med pa nyid 'dogs par mi mdzad kyi gang dag gis de ltar ma mthong ba de dag la gzhan gyi dbang gi mtshan nyid de la brten nas bcom ldan 'das chos rnams kyi skye ba ngo bo nyid med pa nyid dang /don dam pa ngo bo nyid med pa nyid 'dogs par mdzad do zhes bya ba'i tha tshig go/ /don dam pa ngo bo nyid ma mchis pa nyid de las gcig kyang zhes bya ba ni/ gzhan gyi mtshan nyid rnam par dag pa'i dmigs pa ma yin pa'i don dam pa'i ngo bo nyid med pa zhes sngar bstan pa de gzung bar bya'o//rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma de nyid kun brtags pa'i mtshan nyid der yongs su ma grub cing zhes bya ba ni gzhan gyi dbang gi mtshan nyid de nyid kun brtags pa'i mtshan nyid kyi ming dang brdar sgro btags pa der yongs su ma grub pa'o//ngo bo nyid med de kho nas ngo bo nyid ma mchis pa nyid ces bya ba ni kun brtags pa'i ngo bo nyid de kho nas so/ /chos bdag ma mchis pa de bzhin nyid ces bya ba ni de ltar kun brtags pa'i mtshan nyid der ma grub cing ngo bo nyid de kho nas ngo bo nyid med pa gzhan gyi dbang gi ngo bo nyid de'i de bzhin nyid de/chos kyi dbyings rnam par dag pa'o/ /rnam par dag pa'i dmigs pa gang lags zhes bya ba la rnam par dag pa zhes bya ba ni/ gnas gyur pas rab tu phye ba yang dag pa'i shes pa 'jig rten las 'das pa yang dag pa'o/ /de'i dmigs pa ni chos bdag med pa de bzhin nyid ces gong du bstan pa nyid yin no//de ni yongs su grub pa'i mtshan nyid lags te zhes bya ba ni de ltar chos bdag med pas rab tu phye ba de bzhin nyid de dang / gnas gyur pas rab tu phye ba yang dag pa'i shes pa 'jig rten las 'das pa rnam par dag pa de ni de bzhin nyid yongs su grub pa dang /yang dag pa'i shes pa yongs su grub pa yin pas yongs su grub pa'i mtshan nyid ces bya ste/ de yang yul dang yul can gyi dngos por gnyis su gnas pa ma yin gyi/ yang dag pa'i shes pa'i ngo bo nyid de bzhin nyid yin pas 'phags pa so sor rig pa'i ngo bo nyid yin par blta bar bya'o//de la brten nas bcom ldan 'das chos rnams kyi don dam pa ngo bo nyid ma mchis pa de nyid de las gcig 'dogs par mdzad lags so zhes bya ba ni yongs su grub pa'i mtshan nyid de nyid don dam pa ngo bo nyid med pa nyid kyis ngo bo nyid med pa yin pas gang dag gis de ltar yongs su grub pa'i ngo bo nyid don dam pa ngo bo nyid med pa nyid kyis ngo bo nyid med pa tha dad par mthong ba de dag la ni bcom ldan 'das don dam pa ngo bo nyid med pa nyid 'dogs par mi mdzad kyi gang dag gis de dag ma mthong ba de dag las yongs su grub pa'i mtshan nyid de la brten nas/bcom ldan 'das chos rnams kyi don dam pa ngo bo nyid med pa nyid 'dogs par mdzad do zhes bya ba'i tha tshig go/ /don dam pa ngo bo nyid ma mchis pa de nyid de las gcig ces bya bar ni yongs su grub pa'i mtshan nyid chos bdag med pas rab tu phye ba don dam pa ngo bo nyid med pa nyid ces sngar bstan pa de gzung bar bya'o//'phags pa don dam yang dag 'phags kyis bca' sga dang / ri mo bri ba'i gzhi dang / mar dang / nam mkha'i dpe bstan pa ni dngos po bstan pa tsam du zad kyi go rims de ltar nges pa kho nar dgongs pa ni ma yin pas/ 'di bla ma'i gnas lta bu dag gis dpe rnam pa de bzhis mtshon pa'i don gyi sgo nas go rims kyi shugs sbyar ba ni dang po mar gyi dpes bstan la de'i 'og tu bca' sga'i dpes bstan/de'i 'og tu ri mo bri ba'i gzhi'i dpes bstan / de'i 'og tu nam mkha'i dpes bstan to/ /go rims de ltar bkod pa'i dpe bzhi po dag gis ni tshul khrims dang /ting nge 'dzin gyi gtam dang / shes rab kyi gtam dang / kun rdzob kyi gtam dang / don dam pa'i gtam bstan te/ go rims bzhin du sbyar bar shes par bya'o/ /gtam de bzhi'i go rims ci'i phyir de ltar rnam par gnas par nges she na/ dang por lhag pa'i tshul khrims la gnas na lhag pa'i sems skye bar 'gyur bas de'i phyir dang po tshul khrims dang ting nge 'dzin gyi gtam bstan to//de'i 'og tu lhag pa'i sems de la brten nas lhag pa'i shes rab skye bar 'gyur bas de'i 'og tu shes rab kyi gtam bstan to/ /de'i 'og tu lhag pa'i shes rab kyis shes par bya ba'i yul ni rnam pa gnyis te/'jig rten pa'i lam dang / 'jig rten las 'das pa'i lam ste/ de la 'jig rten pa'i lam ni kun rdzob kyi bden pas bsdus pa yin pas de dang por rtogs par bya dgos pa'i phyir de'i 'og tu kun rdzob kyi gtam bstan to/ /'jig rten las 'das pa'i lam ni don dam pa'i bden pas bsdus pa yin pas kun rdzob kyi bden pa rtogs pa'i 'og tu don dam pa'i bden pa rtogs par bya dgos pa'i phyir de'i 'og tu don dam pa'i gtam bstan to//gtam de bzhi'i 'brel pa ni dpe rnam pa bzhis mtshon pa'i don nyid la de bzhin du snang bas na de'i phyir/ 'di lta ste dper bgyi na chab mar ni zhes bya ba la sogs pa'i dpes nges pa'i don bstan pa 'di yang drang ba'i don gyi mdo sde thams cad du brtsal na dga' ba dang mchog tu dga' ba chen por 'gyur lags so zhes bya ba'i bar gyi don bstan pas ni/ nges pa'i don bstan pa 'di drang ba'i don gyi mdo sde thams cad kyang sbyar na/don la sgra ji bzhin du mngon par zhen par mi 'gyur zhing mthong ba'i lam gyis bsdus pa'i mngon par rtogs pa drug po dag mthong bas dad pa mngon par rtogs pa'i sgo nas tshul khrims mngon par rtogs pa'i dus na 'phags pa dgyes pa'i tshul khrims kyis rab tu phye ba'i lhag pa'i tshul khrims dang ldan par 'gyur ba ni dga' ba chen por 'gyur ba yin la/lhag pa'i tshul khrims de la brten nas tshul khrims mngon par rtogs pa'i sgo nas bsam pa mngon par rtogs pa'i dus na/ bsam pa las byung ba'i shes rab chen po'i dga' ba kha na ma tho ba med pas rab tu phye ba'i lhag pa'i sems dang ldan par 'gyur ba ni mchog tu dga' ba chen por 'gyur ba zhes bya ste/de'i phyir mar gyi dpes ni tshul khrims dang ting nge 'dzin gyi gtam bstan to/ /de'i 'og tu 'di lta ste dper bgyi na bca' sga ni zhes bgyi ba la sogs pa'i dpes nges pa'i don bstan pa 'di yang drang ba'i don gyi mdo sde thams cad du brtsal bar bgyi ba lags so zhes bya ba'i bar gyi don bstan pas ni lhag pa'i sems de la brten nas bsam pa mngon par rtogs pa'i sgo nas mngon par rtogs pa'i shes pa bden pa mthong bar rtogs pa'i dus na rnam par ma bzhag pa'i bden pa la dmigs pa'i shes rab kyis rab tu phye ba'i lhag pa'i shes rab skye bar 'gyur ba ni drang ba'i don gyi mdo sde thams cad du brtsal bar bgyi ba zhes bya ste/de'i phyir bca' sga'i dpes ni shes rab kyi gtam bstan to/ /de'i 'og tu 'di lta ste dper bgyi na ri mo bri ba'i gzhi ni zhes bya ba la sogs pa'i dpes/ nges pa'i don bstan pa 'di yang drang ba'i don gyi mdo sde thams cad la ro gcig pa dang drang ba'i don de dag shin tu gsal bar bgyid pa lags so zhes bya ba'i bar gyi don bstan pas ni lhag pa'i shes rab de la brten nas mngon par rtogs pa'i shes pa mngon par rtogs pa'i sgo nas mngon par rtogs pa'i mtha' las byung ba'i shes pa la mngon pa mngon par rtogs pa'i dus na/rnam par gzhag pa'i bden pa la dmigs pa'i shes rab kyis rab tu phye ba 'jig rten pa'i lam kun rdzob kyi bden pas bsdus pa thams cad rtogs par 'gyur ba ni drang ba'i don thams cad la ro gcig pa dang / de dag shin tu gsal bar bgyid pa zhes bya ste/de'i phyir ri mo bri ba'i dpe bzhis ni kun rdzob kyi gtam bstan to/ /de'i 'og tu 'di lta ste dper bgyi na nam mkha' ni zhes bya ba la sogs pa'i dpes nges pa'i don bstan pa 'di yang drang ba'i don gyi mdo sde thams cad la ro gcig pa dang nyan thos kyi theg pa dang rang sangs rgyas kyi theg pa dang /theg pa chen por brtsal ba thams cad la sgrib pa mi 'gyur ba lags so zhes bya ba'i bar gyi don bstan pas ni lhag pa'i shes rab de nyid la brten nas mngon par rtogs pa'i mtha' las byung ba'i shes pa bden pa mngon par rtogs pa'i sgo nas mthar thug pa'i mngon par rtogs pa'i dus na zad pa dang /mi skye ba shes pas rab tu phye ba 'jig rten las 'das pa'i lam don dam pa'i bden pas bsdus pa thams cad rtogs par 'gyur ba ni drang ba'i don gyi mdo sde thams cad la ro gcig pa dang / brtsal ba thams cad la sgrib pa mi 'gyur ba zhes bya ste/ de'i phyir nam mkha'i dpes ni don dam pa'i gtam bstan to//de la nges pa'i don bstan pa 'di yang zhes bya ba ni bcom ldan 'das kyis chos thams cad ngo bo nyid med pa zhes gsungs pa yang mtshan nyid gsum la so sor nges pa bstan te/ kun brtags pa'i mtshan nyid ngo bo nyid med pa nyid kyis ngo bo nyid med pa yin/ gzhan gyi dbang gi mtshan nyid ni skye ba ngo bo nyid med pa dang /don dam pa ngo bo nyid med pa nyid kyis ngo bo nyid med pa yin / yongs su grub pa'i mtshan nyid ni don dam pa ngo bo nyid med pa nyid kyis ngo bo nyid med pa yin no zhes gsungs pa dang / chos thams cad ma skyes pa/ ma 'gags pa/ gzod ma nas zhi ba/rang bzhin gyis yongs su mya ngan las 'das pa zhes gsungs pa ni kun brtags pa'i mtshan nyid dang yongs su grub pa'i mtshan nyid yin par so sor nges pa bstan pa la bya'o/ /drang ba'i don gyi mdo sde zhes bya ba ni de ltar so sor nges pa ma bstan par chos thams cad ngo bo nyid med par/ chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa zhes gsungs pa ste/ de ni nges pa'i don ma yin pas drang zhing bshad dgos pa'i phyir drang ba'i don gyi mdo sde zhes bya'o/ /don dam yang dag 'phags de bzhin te gzhan du ma yin gyi de ni de bzhin du zung shig ces bya bas ni bcom ldan 'das kyis 'phags pa don dam yang dag 'phags nyid thams cad phun sum tshogs shing mgo glengs pas go ba tshad mar 'dzin pa yin te/de ni mos pa'i bye brag rgyas par bshad pa lnga yin no/ /mos pa'i bye brag rgyas par bshad pa'i tshig gi don la sogs pa bshad zin te/de la spyod pa'i gang zag gi tshig gi don la sogs pa bshad zin to// //de'i 'og tu mdo sde'i che ba nyid bstan pa'i tshig gi don la sogs pa bshad par bya ste/ de ni rnam pa bzhir rig par bya ste/ nges pa'i don gyi che ba nyid bstan pa dang /bsod nams skye ba'i che ba nyid bstan pa dang / nges pa'i tshig gi che ba nyid bstan pa dang / 'bras bu thob pa'i che ba nyid bstan pa'o/ /de la nges pa'i don gyi che ba nyid bstan pa ni / de nas bcom ldan 'das la byang chub sems dpa' don dam yang dag 'phags kyis yang 'di skad ces gsol to zhes bya ba nas/rtsod pa'i gzhi'i gnas su gyur pa ma lags so zhes gsungs pa'i bar gyis bstan to/ /bsod nams 'phel ba'i che ba nyid bstan pa ni bcom ldan 'das chos rnams kyi ngo bo nyid ma mchis pa nyid las brtsams zhes bya ba nas/ rgyu'i bar du yang mi 'gro'o zhes gsungs pa'i bar tha ma'i bar gyis bstan to//nges pa'i tshig gi che ba nyid bstan pa ni/ de skad ces bka' stsal pa dang / bcom ldan 'das la byang chub sems dpa' don dam yang dag 'phags kyis 'di skad ces gsol to zhes bya ba nas 'di don dam pa nges pa'i don bstan pa zhes bya bar zung shig ces bya ba'i bar gyis bstan to//'bras bu thob pa'i che ba nyid bstan pa ni/ don dam pa nges pa'i don 'di bstan pa 'di bshad pa ni zhes bya ba la sogs pa gzhung lhag ma thams cad kyis bstan to/ /de la dang por nges pa'i don gyi che ba nyid bstan pa'i tshig gi don la sogs pa bshad par bya ste/nges pa'i don gyi che ba nyid bstan pa zhes bya ba ni/ bcom ldan 'das kyis dang por nyan thos kyi theg pa la yang dag par zhugs pa rnams la/ 'phags pa'i bden pa bzhi lan gsum du bzlas te/ rnam pa bcu gnyis su chos kyi 'khor lo bskor ba dang / de'i 'og tu theg pa chen po la yang dag par zhugs pa rnams la stong pa nyid mos pa'i rnam pas chos kyi 'khor lo gnyis pa bskor ba de gnyis ni bla na yod pa/skabs yod pa/ drang ba'i don/ rtsod pa'i gzhi'i gnas su gyur pa yin gyi bcom ldan 'das kyis theg pa thams cad la yang dag par zhugs pa rnams la legs par rnam par phye ba dang ldan pa'i chos kyi 'khor lo gsum pa bskor ba 'di ni bla na med pa/skabs med pa/ nges pa'i don/ rtsod pa'i gzhi'i gnas su gyur pa ma yin pas/ drang ba'i don gyi chos kyi 'khor lo bskor ba snga ma gnyis pas nges pa'i don gyi chos kyi 'khor lo bskor ba gsum pa ni ches khyad par du 'phags pa'i che ba nyid bstan pa gang yin pa'o//de'i phyir de bstan pa'i dbang du mdzad nas/ bcom ldan 'das kyis dang po yul bA rA Na sI drang srong smra ba ri dgas kyi nags su nyan thos kyi theg pa la yang dag par zhugs pa rnams la zhes bya ba la sogs pa gsungs so//de nas 'phags pa'i bden pa bzhi'i rnam pa bstan pas zhes bya ba ni bden pa bzhi lan gsum du bzlas te/ rnam pa bcu gnyis su chos kyi 'khor lo bskor ba gang yin pa'o/ /chos kyi 'khor lo ngo mtshar rmad du byung ba zhes bya ba ni bzlas pa dang po la mthong ba'i lam skye ba dang /bzlas pa gnyis pa la slob pa'i lam skye ba dang / bzlas pa gsum pa la mi slob pa'i lam skye bas 'jig rten thams cad dang mi mthun pa'i phyir ro/ /chos dang mthun par zhes bya ba ni mya ngan las 'das pa dang mthun par ro/ /bla na mchis pa/skabs mchis pa/ drang ba'i don/ rtsod pa'i gzhi'i gnas su gyur pa zhes bya ba ni rnam grangs de nges pa'i don ma yin pas da dung gzhan du drang ba yod pa'i phyir ro zhes bya ba'i tha tshig go/ /stong pa nyid smos pa'i rnam pas zhes bya ba ni chos bdag med pa ston pa'o/ /chos ngo mtshar rmad du byung ba zhes bya ba ni theg pa chen po'i tshul gyis mthong ba dang /slob pa dang mi slob pa'i lam skye bas 'jig rten thams cad dang mi mthun pa'i phyir ro/ /chos kyi 'khor lo gnyis pa zhes bya ba ni nyan thos kyi theg pa la yang dag par zhugs pa rnams la chos kyi 'khor lo dang po bskor ba la ltos na gnyis pa ste/theg pa chen po drang ba'i don gyi mdo bshad pa thams cad spyir gzung ngo / /theg pa chen po thams cad la yang dag par zhugs pa rnams la zhes bya ba ni nyan thos dang rang sangs rgyas dang byang chub sems dpa' rnams kyi rnam par dag pa'i lam gcig pa dang /rnam par dag pa gcig pa dang / theg pa gcig tu bstan pa'i phyir ro/ /legs par rnam par phye ba dang ldan pa zhes bya ba ni nges pa'i don bstan pa'o/ /gcig tu ngo mtshar rmad du byung ba zhes bya ba ni theg pa thams cad kyi tshul gyis mthong ba dang / slob pa dang mi slob pa'i las skye bas 'jig rten thams cad dang mi mthun pa'i phyir ro//chos kyi 'khor lo gsum pa zhes bya ba ni theg pa chen po la yang dag par zhugs pa rnams la drang ba'i don gyi chos kyi 'khor lo gnyis pa bskor ba la ltos na gsum pa ste/ skabs 'dir don dam pa nges pa'i don dam pa bstan pa 'di nyid yin par sbyar ro//bla na ma mchis pa zhes bya ba la sogs pa'i tshig bzhi ni nges pa'i don yin pas de las gzhan du drang ba med pa'i phyir te/ de ni nges pa'i don gyi che ba nyid bstan pa yin no/ /de'i 'og tu bsod nams che ba'i 'phel ba nyid bstan pa'i tshig gi don la sogs pa bshad par bya ste/bsod nams 'phel ba'i che ba nyid bstan pa zhes bya ba ni don dam pa nges pa'i don bstan pa 'di la chos spyod pa rnam pa bcu'i rim gyis sbyor bar byed pa ni sems can yongs su smin par byed pa dang / bsod nams rgya chen po bskyed pa'i lam dang / sbyor ba'i lam dang /sgrib pa rnam par dag pa'i lam yin pas/ 'bras bu bla na med pa'i byang chub skyed par byed pa'i phyir dang / nges pa'i don bstan pa 'di la rigs kyi bu 'am/ rigs kyi bu mo gang dag chos spyod pa rnam pa bcu'i rim gyis sbyor bar byed pa de dag la spyod pa re re'i sgo nas kyang bsod nams dpag tu med pa grangs med pa skye ba'i che ba nyid bstan pa gang yin pa'o//de'i phyir de bstan pa'i dbang du mdzad nas/ bcom ldan 'das chos rnams kyi ngo bo nyid ma mchis pa nyid las brtsams zhes bya ba la sogs pa gsungs so/ /thos nas zhes bya ba la sogs pas ni chos spyod pa bcu po dag bstan te/ci rigs par sbyar ro/ /brgya'i char yang nye bar mi 'gro zhing / stong gi cha dang / 'bum gyi cha zhes bya ba ni 'jig rten na mang bar grags pa'i sgo nas mtshon pa yin no/ /grangs zhes bya ba ni mtshungs par rtsi ba nyid de/ dper na ri bo gangs can dang cig shos 'bigs byed ces bya ba ni mtshungs par rtsi ba'i grangs su rigs kyi/ri bo gangs can dang yungs 'bru ni mtshungs par rtsi ba'i grangs su mi rigs par blta'o/ /cha zhes bya ba ni yan lag ste / de yang rang bzhin 'dra ba yin te/ dper na rtse mo can rnams kyi rtse mo ni che ba yin gyi/ rtswa'i rtse mo ni de dag gi cha ma yin pa bzhin no//bgrang ba zhes bya ba ni de yang mtshungs pa yin te/ dper na ri rab dang gangs ri zhes bgrang gi /ri rab dang yungs 'bru zhes ni mi bgrang ba bzhin no/ /dpe zhes bya ba ni 'dra ba nyid de/ dper na ba lang dang 'dra ba la ba lang zhes bya'i/ sbrang ma la ma yin pa bzhin no/ /rgyur yang zhes bya ba ni de'i rgyu'i dngos por yang mi bzod pa ste/de ni bsod nams skye ba'i che ba nyid bstan pa yin no/ /de'i 'og tu nges pa'i tshig gi che ba nyid bstan pa'i tshig gi don la sogs pa bshad par bya ste/ nges pa'i tshig gi che ba nyid bstan pa zhes bya ba ni chos rnams kyi ngo bo nyid med pa'i mtshan nyid bstan pa'i le'u 'di'i ming don dam pa nges pa'i don bstan pa zhes nges pa'i tshig tu bstan pa gang yin pa'o//de'i phyir de bstan pa'i dbang du mdzad nas/ bcom ldan 'das dgongs pa nges par 'grel ba'i chos kyi rnam grangs 'dir bstan pa 'di'i ming ci lags/ 'di ji ltar gzung bar bgyi zhes bya ba la sogs pa gsungs so//dgongs pa nges par 'grel ba'i chos kyi rnam grangs 'dir zhes bya ba ni nges pa'i don bstan pa'i mdo sde 'di'i lus rnam par gzhag pa spyi la snyegs so/ /bstan pa 'di'i zhes bya ba ni chos rnams kyi ngo bo nyid med pa'i mtshan nyid bstan pa'i le'u 'di nyi tshe dang sbyar ro//don dam pa nges pa'i don bstan pa zhes bya ba la/ don dam pa zhes bya ba ni dam pa'i don ces bya bar sbyar te/ dam pa ni yang dag pa'i shes pa 'jig rten pa dang / 'jig rten las 'das pa'o/ /don ni de'i yul kun nas nyon mongs pa'i mtshan nyid kyi chos dang / rnam par byang ba'i mtshan nyid kyi chos so//'di don dam pa nges pa'i don bstan pa zhes bya bar zung shig ces bya ba ni ming de ltar zung shig ces bya ba'i tha tshig ste/ de ni nges pa'i tshig gi che ba nyid bstan pa yin no/ /de'i 'og tu 'bras bu 'thob pa'i che ba nyid bstan pa zhes bya ba ni sangs rgyas dang byang chub sems dpa' rnams kyis sems can rnams la chos bstan pa'i 'bras bu'i phan yon rgya che ba rnam pa lnga bstan pa gang yin pa ste/lnga gang zhe na de dag las sems can kha cig ni bla na med pa yang dag par rdzogs pa'i byang chub tu sems bskyed par 'gyur ba dang / de dag las sems can kha cig ni dam pa'i chos bstan pa de nyid kyi tshe chos rnams la chos kyi mig rdul med cing dri ma dang bral ba bskyed par 'gyur ba dang /de dag las sems can kha cig ni dam pa'i chos bstan pa'i mod la zag pa zad par 'gyur ba dang / de dag las sems can kha cig ni dam pa'i chos thos pa de nyid kyi mod la byang chub sems dpa'i bzod pa'i mchog thob par 'gyur ba dang /sangs rgyas dang byang chub sems dpa' rnams kyi dam pa'i chos bstan pas lung 'bogs pa dang / kha thon byed pa dang / yang dag par sgrub pa gcig nas gcig tu brgyud pa'i tshul gyis dam pa'i chos kyi tshul yun ring du gnas par byed pa ste/bstan pa'i 'bras bu'i phan yon rgya che ba lnga po de dag bstan pa ni 'bras bu thob pa'i phan yon gyi che ba nyid bstan pa zhes bya'o/ /de'i phyir de bstan pa'i dbang du mdzad nas/ don dam pa nges pa'i don bstan pa 'di bshad pa na srog chags drug 'bum ni bla na med pa yang dag par rdzogs pa'i byang chub tu sems skyes so zhes bya ba la sogs pa gsungs te/bstan pa'i 'bras bu'i phan yon rgya che ba lnga po de dag las dang po bzhi ni dkyus kyi tshig bzhi dang go rims bzhin du sbyar ro/ /lnga pa ni mdo sde thams cad kyi mjug nas bcom ldan 'das kyis de skad ces bka' stsal nas/lha la sogs pa'i 'jig rten yi rang ste/ mngon par dga'o zhes 'byung ba'i skabs dang sbyar te/ skabs 'dir dmigs kyis ma smos kyang mjug nas 'byung ba nyid skabs 'dir sbyar bar bya'o/ /de la rnam pa lnga po de dag gi rnam par gzhag pa ji lta bu zhe na/ de ni rnam pa gnyis te/ gang zag gi dbang du byas pa dang /chos kyi dbang du byas pa'o/ /de la gang zag gi dbang du byas pa yang rigs dang / bsam pa la sogs pa'i dbang gis rnam pa gnyis te/ nyan thos kyi theg pa pa'i gang zag dang / theg pa chen po pa'i gang zag go/ /nyan thos kyi theg pa pa'i gang zag kyang rgyud kyi dbang gis rnam pa gnyis te/mthong ba'i lam skye ba dang / bsgom pa'i lam gyis mi slob pa'i sa man chad 'thob pa ste/ dkyus kyi tshig bar ma gnyis dang go rims bzhin no/ /theg pa chen po pa'i gang zag kyang sems ma bskyed pa dang / bskyed pa'i dbang gis rnam pa gnyis te/ sems ma bskyed pa ni kun rdzob kyi sems dang /don dam pa'i sems ma bskyed pa skyed par byed de/ sems bskyed pa ni mi skye ba'i chos la bzod pa thob par 'gyur te/ dkyus kyi tshig dang po dang / tha ma gnyis dang go rims bzhin du sbyar ro/ /chos kyi dbang du byas pa ni bde bar gshegs pa'i bstan pa yun ring du gnas pa ste/tshig tha mas bstan to/ /de la bla na med pa yang dag par rdzogs pa'i byang chub tu sems skyes so zhes bya ba ni kun rdzob kyi sems dang / don dam pa'i sems skyes pa ci rigs par sbyar ro/ /chos rnams la chos kyi mig rdul med cing dri ma dang bral ba rnam par dag go zhes bya ba la chos rnams la zhes bya ba ni bden pa bzhi'i chos rnams la'o//chos kyi mig ces bya ba ni mthong ba'i lam gyi shes pa'o/ /rdul med cing zhes bya ba ni bar chad med pa'i lam gyi shes pa'o/ /dri ma dang bral ba rnams bya ba ni rnam par grol ba'i lam gyi shes pa'o/ /rnam par dag go zhes bya ba ni thob bo zhes bya ba'i tha tshig go//len pa med par zag pa rnams las sems rnam par grol lo zhes bya ba la len pa med par zhes bya ba ni mi skye ba shes pa'o/ /zag pa rnams las sems rnam par grol lo zhes bya ba ni zad pa shes pa'o/ /mi skye ba'i chos la bzod pa thob par 'gyur ro zhes bya ba ni sa brgyad pa thob bo zhes bya ba'i tha tshig ste/de ni 'bras bu thob pa'i che ba nyid bstan pa yin no/ / le'u bdun pa'i tshig gi don la sogs pa bshad zin to// //de ltar chos rnams kyi ngo bo nyid med pa'i mtshan nyid kyis kun rdzob kyi bden pa'i mtshan nyid yongs su shes par bya ba bstan nas/da ni chos gdags pa rnam par gzhag pa las brtsams nas/ rnal 'byor gyis yongs su bsdus pa'i zhi gnas dang lhag mthong gi rab tu dbye bas kun rdzob kyi bden pa'i mtshan nyid yongs su shes par bya ba bstan pa'i tshig gi don la sogs pa bshad par bya ste/ de'i phyir de bstan pa'i dbang du mdzad nas/de nas bcom ldan 'das la byang chub sems dpa' byams pas zhu ba zhus pa zhes bya ba la sogs pa byams pa'i le'u brgyad pa 'di gsungs so/ /de la le'u brgyad pa 'di'i bsdus pa'i don ni mdor bsdu na chos gdags pa rnam par gzhag pa las brtsams nas/rnal 'byor gyis yongs su bsdus pa'i zhi gnas dang lhag mthong gi lam gyi rab tu phye ba bstan pa yin no/ /de yang rnam par dbye na rnam pa drug gis rnal 'byor gyi lam bstan te/ yongs su shes pa dang / yongs su mi shes pa dang / ngo bo nyid dang / sbyor ba'i rgyu dang / 'thob pa dang /'thob pa'i thabs dang / chud mi za bar bya ba'i phyir gdags pa gtan la dbab pas de bstan to/ de la yongs su shes pa dang / yongs su mi shes pa zhes bya ba ni le'u 'di bsdus pa'i don chos gdags pa rnam par gzhag pa las brtsams nas rnal 'byor gyis yongs su bsdus pa'i zhi gnas dang lhag mthong gi lam gyi dbye ba zhes bya bas lam gyi rgyu dang /ngo bo nyid dang rab tu dbye ba bstan pa'i lus thams cad dang spyir sbyar te/ 'dir 'phags pa byams pas zhu ba rnam pa mang po zhus pa ni yongs su mi shes pa zhes bya'o/ /bcom ldan 'das kyis lan rnam pa mang po bka' stsal pa ni yongs su shes pa zhes bya'o//de ni gzhung thams cad la yang spyir 'dra ba yin mod kyi skabs 'dir zhus pa dang lan btab pa lhag par mang ba dang / bcom ldan 'das ni bdag nyid kyis yongs su mkhyen nas yongs su mi shes pa gzhan dag la ston par mdzad do zhes ston pa'i che ba nyid bstan pa'i phyir dmigs kyis smos te/le'u 'di mgo mjug gi bar du zhus pa dang lan btab pa'i gzhung thams cad dang ci rigs par sbyar ro/ /ngo bo nyid ces bya ba ni rnal 'byor gyis yongs su bsdus pa'i zhi gnas dang lhag mthong gi lam zhes bya bas bstan te/ de la rnal 'byor ces bya ba'i sgra ni sbyor ba zhes bya ba'i don te/lhag pa'i tshul khrims so/ /zhi gnas dang lhag mthong gis zhes bya ba ni lhag pa'i sems dang lhag pa'i shes rab ste/ lhag pa'i tshul khrims dang / lhag pa'i sems dang / lhag pa'i shes rab de la dngos dang / brgyud pa'i tshul du sbyor bar byed pas na lhag pa'i tshul khrims ni sbyor ba zhes bya ste/de ltar lhag pa'i tshul khrims kyi sbyor bas yongs su bsdus pa lhag pa'i sems dang / lhag pa'i shes rab ni rnal 'byor gyi lam gyi ngo bo nyid ces bya'o/ /yang gcig tu na rnal 'byor ces bya ba'i sgra ni rigs pa la yang bya ste/ rigs pa bzhi'o/ /zhi gnas dang lhag mthong ni sbyor ba'i rgyu la sogs pa la ltos pas rigs pas yongs su bsdus pa yang yin la mi mthun pa'i phyogs spong ba dang /gnyen po bskyed pa dang 'bras bu 'thob par byed pas bya ba byed pa'i rigs pas yongs su bsdus pa yang yin/ rnal 'byor pa'i mngon sum la sogs pa'i mtshan ma dang mi 'gal bas 'thad pas bsgrubs pa'i rigs pas yongs su bsdus pa yang yin te/rten cing 'brel par 'byung ba'i chos nyid yin pas chos nyid kyi rigs pas yongs su bsdus pa yang yin pas rigs pas yongs su bsdus pa'i zhi gnas dang lhag mthong ni rnal 'byor gyi lam gyi ngo bo nyid ces bya ste/de la tshig gi don spyir bsdu na/ lhag pa'i tshul khrims dang rigs pa bzhis yongs su bsdus pa'i zhi gnas dang lhag mthong ni rnal 'byor gyi lam gyi ngo bo nyid yin te/ 'di ltar lhag pa'i tshul khrims kyis ma bsdus pa'i zhi gnas dang lhag mthong ni nang gi rmugs pa dang /lta ba'i ngo bo nyid yin pas lam ma yin la/ rigs pas ma bsdus pa'i zhi gnas dang lhag mthong yang lam gol ba yin pas lam ma yin gyi/ lhag pa'i tshul khrims dang rigs pa'i rnal 'byor gyis bsdus pa'i zhi gnas dang / lhag mthong ni spangs pa dang / ye shes phun sum tshogs pas rab tu phye ba'i 'bras bu bla na med pa thob pa'i lam yin pas na/ de'i phyir rnal 'byor gyis yongs su bsdus pa'i zhi gnas dang lhag mthong gi lam ni ngo bo nyid de/ de yang le'u 'di las zhi gnas dang lhag mthong gi lam gyi ngo bo nyid bstan pa'i gzhung thams cad dang spyir sbyar ro//sbyor ba'i rgyu ni chos gdags pa rnam par gzhag pa las brtsams nas zhes bya bas bstan te/ de ni bcom ldan 'das byang chub sems dpa' ci la gnas ci la brten te zhes bya ba nas/ 'di lta ste/ dngos po'i mtha' dang dgos pa yongs su grub pa'o zhes gsungs pa'i bar gyis bstan to//'thob pa dang 'thob pa'i thabs dang / chud mi za ba'i gdags pa gtan la dbab pa ni rab tu dbye ba zhes bya bas bstan te/ de la 'thob pa ni bcom ldan 'das byang chub sems dpa'i zhi gnas dang lhag mthong gi dmigs pa'i dngos po bzhi po de dag la brten cing gnas nas zhes bya ba nas/de ltar na byang chub sems dpa' lhag mthong la mkhas pa yin no zhes gsungs pa'i bar gyis bstan to/ /'thob pa'i thabs ni bcom ldan 'das byang chub sems dpa' de sems la dmigs pa'i sems nang du yid la bgyid pa zhes bya ba nas/ byams pa lhag mthong ni ma yin te/ lhag mthong gi rjes su mthun pa'i mos pa dang mtshungs par ldan pa yin par brjod par bya'o zhes gsungs pa'i bar gyis brjod do/ /chud mi za ba'i phyir gdags pa gtan la dbab pa ni/ zhi gnas kyi lam dang / lhag mthong gi lam tha dad ces bgyi ba'am/tha dad pa ma lags zhes bgyi zhes bya ba la sogs pa le'u 'di nyid kyi gzhung lhag ma thams cad kyis bstan to/ /de la dang por sbyor ba'i rgyu'i tshig gi don la sogs pa bshad par bya ste/ sbyor ba'i rgyu zhes bya ba ni dang po so so'i skye bo'i gnas skabs na rnal 'byor pa las dang po pas rnal 'byor gyis yongs su bsdus pa'i zhi gnas dang lhag mthong gi lam gyi ngo bo nyid de la sbyor ba'i rgyu gang yin pa'o//de yang rnam pa gsum ste/ gnas kyi sbyor ba'i rgyu dang / rten gyi sbyor ba'i rgyu dang / dmigs pa'i sbyor ba'i rgyu bstan pa'o/ /de la dang por gnas kyi sbyor ba'i rgyu dang / rten gyi sbyor ba'i rgyu bstan pa'i tshig gi don la sogs pa bshad par bya ste/de la mtshams sbyor ba ji lta bu zhe na/ 'dir 'phags pas gzhan dag 'di snyam du rab 'byor gyis yongs su bsdus pa'i zhi gnas dang / lhag mthong gi lam gyi ngo bo nyid ni 'jig rten pa dang / 'jig rten las 'das pa thams cad la yang yod de/de la 'jig rten pa ni sa 'og ma'i rags pa nyid la gnas shing sa gong ma'i zhi ba nyid la gnas shing sbyor bar byed/ 'jig rten las 'das pa theg pa gnyis ni 'khor ba'i nyes dmigs la gnas shing mya ngan las 'das pa'i phan yon la brten te sbyor bar byed na/ 'jig rten las 'das pa'i theg pa chen po la rnal 'byor pa rnam pa ci la gnas shing ci la brten te rnal 'byor gyis yongs su bsdus pa'i zhi gnas dang lhag mthong gi lam gyi ngo bo nyid la sbyor bar byed snyam du sems pa rnams kyi bsam pa la brtags nas/ bcom ldan 'das byang chub sems dpa' ci la gnas ci la brten te/theg pa chen po la zhi gnas dang lhag mthong sgom par bgyid lags zhes zhus par sbyar ro/ /de la ci la gnas zhes bya bas ni gnas kyi sbyor ba'i rgyu gang lags zhes zhus pa yin te/ des ni thabs kyi rgyu bstan to/ ci la brten te zhes bya bas ni 'jig rten gyi sbyor ba'i rgyu gang lags zhes zhus pa yin te/des ni chud mi za ba'i rgyu ston to/ /theg pa chen po la zhes bya ba ni byang chub sems dpa'i lam 'bras bu dang bcas pa la zhes bya ba'i tha tshig ste/ des ni 'jig rten pa dang / theg pa gnyis las khyad par du 'phags pa'i lam ston to/ /zhi gnas dang lhag mthong zhes bya ba ni lhag pa'i tshul khrims dang /rigs pa bzhis yongs su bsdus pa'i sems dang / lhag pa'i shes rab ces bya ba'i tha tshig ste/ des ni rnal 'byor gyis yongs su bsdus pa'i zhi gnas dang / lhag mthong gi lam gyi ngo bo nyid ston to/ /sgom par bgyid pa lags zhes bya ba ni lam gyi ngo bo nyid de la ji ltar sbyor bar bgyid ces zhus pa yin te/des ni lam gyi ngo bo nyid la rnal 'byor du byed pa ston to/ /de nas bcom ldan 'das kyis kyang de dag bstan pa'i dbang du mdzad nas/ byams pa chos gdags pa rnam par gzhag pa dang / bla na med pa yang dag par rdzogs pa'i byang chub tu smon lam mi gtong ba la gnas shing brten nas so zhes bya ba gsungs te/chos gdags pa rnam par gzhag pa la ni gnas/ bla na med pa yang dag par rdzogs pa'i byang chub tu smon lam mi gtong ba la ni brten te/ theg pa chen po la rnal 'byor gyis yongs su bsdus pa'i zhi gnas dang /lhag mthong gi lam gyi ngo bo nyid bsgom par bya'o zhes bya bar sbyar ro/ /des ci bstan ce na/ chos gdags pa rnam par gzhag pa ni bshad pa'i chos kyi tshogs yin pa'i phyir de la gnas pa ni 'jig rten pa las 'das pa'i go 'phang thob pa'i sngon du 'gro ba yin pas/de ni 'jig rten pa'i gnas dang rten gyi sbyor ba'i rgyu las khyad par du 'phags pa'i gnas kyi sbyor ba'i rgyu yin la/ bla na med pa yang dag par rdzogs pa'i byang chub ni rtogs pa'i chos kyi sku yin pa'i phyir/ der smon lam mi gtong ba ni byang chub chen por 'dren par byed pa'i chos kyi sngon du 'gro ba yin pas de ni theg pa gnyis kyi gnas dang rten gyi sbyor ba'i rgyu las khyad par du 'phags pa'i rten gyi sbyor ba'i rgyu yin no zhes ston to//de la chos gdags pa rnam par gzhag pa zhes bya ba ni lung las sangs rgyas dang byang chub sems dpa' rnams kyi gdags pa rnam par gzhag pa ni rnam pa bzhi ste/chos gdags pa rnam par gzhag pa dang / bden pa gdags pa rnam par gzhag pa dang / rigs gdags pa rnam par gzhag pa dang / theg pa gdags pa rnam par gzhag pa ste/ de dag ni de bzhin gshegs pa'am/ byang chub sems dpa' kho na yang dag par 'dogs shing rnam par 'jog par mdzad kyi/lhar gyur pa'am/ mir gyur pa'am/ dge sbyong dang / bram zer gyur pa gzhan gang gis kyang mi nus/ de dag nyid las thob pa ni ma gtogs so zhes gsungs pa las chos gdags pa rnam par gzhag pa dang zhes bya ba dang sbyar te/mdo'i sde la sogs pa gsung rab tu gtogs pa yan lag bcu gnyis po go rims bzhin du sbyar ba dang / go rims bzhin du rnam par gzhag cing bsdeb pa gang yin pa de ni chos gdags pa rnam par gzhag pa zhes bya'o/ /de la gnas pa zhes bya ba ni de dag byang chub sems dpas legs par thos/legs par gzung / kha thon byang bar byas/ yid kyis legs par brtags/ mthong bas shin tu rtogs par byas pa'o/ /de la gnas nas 'khor bar srid pa dang / longs spyod la sogs par yongs su mi bsngo zhing 'jig rten las 'das pa'i lam la sbyor bar byed pas na/de ni 'jig rten pa las khyad par du 'phags pa'i gnas kyi zhi gnas dang lhag mthong gi lam la sbyor ba'i rgyu bstan to/ /bla na med pa zhes bya ba ni bla na med pa drug ste/ mthong ba bla na med pa dang / thos pa bla na med pa dang / rnyed pa bla na med pa dang / bslab pa bla na med pa dang / rim gro bla na med pa dang / rjes su dran pa bla na med pa'o/ /yang dag par rdzogs pa zhes bya ba ni chos thams cad kyi ngo bo nyid ma nor ba zhes bya ba'i tha tshig go/ /byang chub ces bya ba ni rtogs pa'i don to/ der smon lam mi gtong ba zhes bya ba ni dang po bla na med pa'i byang chub tu sems bskyed pa'i mtshan nyid lnga po yang dag pa'i smon lam dang po ngo bo nyid dang /bdag gi byang chub dang / sems can gyi don bsgrubs pa'i rnam pa dang / bla na med pa'i byang chub dang / sems can thams cad la dmigs pa'i dmigs pa dang / byang chub kyi phyogs dang mthun pa'i dge ba'i rtsa ba thams cad bsdus pa'i sngon du 'gro ba dang /sems can thams cad la brten pa'i lus dang ngag dang yid kyi nyes par spyod pa dang mi mthun pa'i yon tan dang / de las gzhan pa 'jig rten pa dang / 'jig rten las 'das pa'i don dag la yang dag pa'i smon pa'i dge ba de dag thams cad kyi nang na yang dag pa'i smon lam gyi mchog bla na med pas khyad par du 'phags pa dang ldan pa'i byang chub kyi sems rtag tu rgyun mi 'chad par bsam pa thag pa nas skyed par byed pa'o//de la brten nas so zhes bya ba ni de ltar bla na med pa'i byang chub kyi sems mi bskyed pa la nyan thos dang rang sangs rgyas kyi yid la byed pa'i go mi 'byed pa'i tshul gyis brten nas so//de la brten nas sems can gyi don yal bar mi 'dor zhing / mya ngan las 'das pa la mngon du phyogs pa la sogs par yongs su mi bsngo zhing bla na med pa'i byang chub kyi lam la sbyor bar byed pas na/de ni theg pa gnyis las khyad par du 'phags pa'i rten gyi zhi gnas dang / lhag mthong gi lam la sbyor ba'i rgyu yin te/ des ni chud mi za ba'i rgyu bstan to/ de ltar na chos gdags pa rnam par gzhag pa la ni gnas/ bla na med pa yang dag par rdzogs pa'i byang chub tu smon lam mi gtong ba ni rten te/theg pa chen po la zhi gnas dang / lhag mthong gi lam gyi ngo bo nyid bsgom par bya'o zhes bstan pa yin te/ de ni gnas kyi sbyor ba'i rgyu dang / rten gyi sbyor ba'i rgyu bstan pa yin no/ /de'i 'og tu dmigs pas sbyor ba'i rgyu bstan pa'i tshig gi don la sogs pa bshad par bya ste/de la mtshams sbyor ba ji lta bu zhe na/ 'dir 'phags pa byams pas gzhan dag 'di snyam du/ de ltar gnas dang rten gyi sbyor ba'i rgyu bstan pas rnal 'byor gyis yongs su bsdus pa'i zhi gnas dang / lhag mthong gi lam gyi ngo bo nyid la sbyor ba'i thabs dang chud mi za ba'i rgyu bstan du zin kyang de ni dmigs pa'i dngos po la brten te skye ba yin pas bde bar gshegs pas kyang mdo sde de dang de dag tu dmigs pa'i dngos po rnam pa bzhi bka' stsal te/bzhi gang zhe na/ khyab pa'i dmigs pa dang / spyad pa'i rnam par sbyong ba'i dmigs pa dang / mkhas pa'i dmigs pa dang /nyon mongs pa rnam par sbyong ba'i dmigs pa'o/ /de la khyab pa'i dmigs pa gang zhe na/ de yang rnam pa bzhi ste/ rnam par rtog pa dang bcas pa'i gzugs brnyan dang / rnam par mi rtog pa'i gzugs brnyan dang / dngos po'i mtha' dang / dgos pa yongs su grub pa'o/ /spyad pa rnam par sbyong ba'i dmigs pa gang zhe na/de ni rnam pa lnga ste/ mi sdug pa dang / byams pa dang / rkyen 'di pa nyid kyi rten cing 'brel par 'byung ba dang / khams rab tu dbye ba dang / dbugs rngub pa dang / dbugs 'byung ba dran pa'o/ /mkhas pa'i dmigs pa gang zhe na/ de yang rnam pa lnga ste/phung po la mkhas pa dang / khams la mkhas pa dang / skye mched la mkhas pa dang / rten cing 'brel par 'byung ba la mkhas pa dang / gnas dang gnas ma yin pa la mkhas pa'o/ /nyon mongs pa rnam par sbyong ba'i dmigs pa gang zhe na/ de ni 'jig rten pa dang 'jig rten las 'das pa'i lam gyi bye brag gis rnam pa gnyis te/'jig rten pa'i lam gyis nyon mongs pa rnam par sbyong ba'i dmigs pa yang rnam pa gnyis te/ sa 'og ma rnams la rags par lta ba dang / sa gong ma rnams la zhi bar lta ba'o/ /'jig rten las 'das pa'i lam gyis nyon mongs pa rnam par sbyong ba'i dmigs pa yang rnam pa gnyis te/rnam par bzhag pa'i bden pa la dmigs pa dang / rnam par ma bzhag pa'i bden pa la dmigs pa ste/ de ltar dmigs pa rnam pa bzhi po de dag gang la dmigs te/ rnal 'byor gyis yongs su bsdus pa'i zhi gnas dang lhag mthong gi lam gyi ngo bo nyid de la sbyar bar bya zhing dmigs pa gang ni lam gang gi dmigs pa yin snyam du sems pa rnams kyi bsam pa la brtags nas/mi pham pa nyid kyis khyab pa'i dmigs pa ni 'jig rten pa dang 'jig rten las 'das pa'i lam thams cad du 'gro zhing / spyad pa rnam par sbyong ba'i dmigs pa la sogs pa dmigs pa thams cad kyi rjes su song ba dang /'das pa dang / ma 'ongs pa dang / da ltar byung ba'i yang dag par rdzogs pa'i sangs rgyas thams cad kyis bshad pa yin pa dang / de dag ni lhag mthong gi phyogs dang / dngos po thams cad dang ldan pa dang / yang dag pa'i dngos po dang ldan pa dang /rgyu dang 'bras bu'i dngos po dang ldan pa'i dmigs pa yin te/ de la rnam par rtog pa dang bcas pa'i gzugs brnyan ni lhag mthong gi phyogs kyi dmigs pa yin la/ rnam par mi rtog pa'i gzugs brnyan ni zhi gnas kyi phyogs kyi dmigs pa yin no / /dngos po'i mtha' ni ji snyed yod pa nyid dang /ji lta ba bzhin du yod pa nyid kyi dngos po thams cad dang ldan pa dang / yang dag pa'i dngos po dang ldan pa'i dmigs pa yin/ dgos pa yongs su grub pa ni yid la byed pa yongs su grub pa'i rgyus 'bras bu gnas ngan len spangs pa dang / gnas gyur pa dang /dngos gzhi thob pa dang / shes bya la shes pa dang / mthong ba 'jug pa nyid kyis rgyu dang 'bras bu'i dngos po dang ldan pa'i dmigs pa yin pas/ de dag ni khyab pa'i dmigs pa zhes bya ste/ de nyid mngon du bya ba mkhyen nas/ bcom ldan 'das kyis zhi gnas dang / lhag mthong gi dmigs pa'i dngos po bzhi po 'di lta ste/rnam par rtog pa dang bcas pa'i gzugs brnyan dang / rnam par mi rtog pa'i gzugs brnyan dang / dngos po'i mtha' dang / dgos pa yongs su grub pa'o zhes gang dag bstan pa de la zhes bya ba la sogs pas dmigs pa sbyor ba'i rgyu gang yin pa dang /dmigs pa gang ni lam gang gi dmigs pa yin par sbyar ro/ /de la rnam par rtog pa dang bcas pa'i gzugs brnyan zhes bya ba ni lhag mthong gi rnam pas rab tu phye ba'i shes bya'i dngos po dang cha mthun pa sems kyi gzugs brnyan rang rig pa gang yin pa ste/ de la rnam par rtog pa dang bcas pa zhes bya ba ni sbyor ba'i lam gyi yid la byed pas rab tu phye ba'i lhag mthong gi rnam pa shes rab kyi spyod pa bzhis bsdus pa sgo gsum dang ldan pa bzhi rab tu dbye ba drug la dmigs pa gang yin pa'o//gzugs brnyan zhes bya ba ni rnam par rtog pa dang bcas pa'i lhag mthong gi rnam pa des rab tu phye ba/shes bya'i dngos po dang cha mthun pa/ sems kyi gzugs brnyan rang rig pa gang yin pa'o/ /de la sbyor ba'i lam gyis yid la byed pas rab tu phye ba'i lhag mthong gi rnam pa zhes bya ba ni mnyam par gzhag pa'i sa pa'i yid la byed pa la brten nas shes bya'i dngos po'i rnam pa rang gi blo la snang bar byas pa'i phyir/mos pa yid la byed pa'i lhag mthong gi rnam pa gang yin pa'o/ /shes rab kyi spyod pa bzhi gang zhe na rnam par 'byed pa dang / rab tu rnam par 'byed pa dang / yongs su rtog pa dang / yongs su dpyod pa'o/ /de la rnam par 'byed pa gang zhe na/ spyad pa rnam par sbyong ba'i dmigs pa dang /mkhas pa'i dmigs pa dang / nyon mongs pa rnam par sbyong ba'i dmigs pa dag la ji snyed yod pa nyid kyis rnam par 'byed par byed pa'i shes rab gang yin pa'o/ /rab tu rnam par 'byed pa gang zhe na/ dmigs pa de dag la ji lta ba bzhin du yod pa nyid kyis rab tu rnam par 'byed par byed pa'i shes rab gang yin pa'o//yongs su rtog pa gang zhe na/ shes rab de nyid dang ldan pa'i yid la byed pa rnam par rtog pa dang bcas pas mtshan mar 'dzin par byed pa'i tshe na ni yongs su rtog pa yin no/ /yongs su dpyod pa gang zhe na/ shes rab de gnyis dang ldan pa'i yid la byed pa rnam par rtog pa dang bcas pa de nyid kyis yang dag par rtog par byed pa'i tshe na ni yongs su dpyod pa yin/de dag kyang dang po ni rtogs pa yin la/ lhag ma gsum gyis ni rtogs pa de nyid bye brag tu bstan pa yin par rig par bya'o/ /de la lhag mthong gi sgo gsum gang zhe na/ mtshan ma tsam gyis rjes su zhugs pa dang /yongs su btsal ba'i rjes su zhugs pa dang / yongs su btsal ba las so sor rtog pa'i rjes su zhugs pa'o/ /de la mtshan ma tsam gyis rjes su zhugs pa gang zhe na/ gang gi tshe dam chos thos pa dang gzung ba 'am/ dge ba'i bshes gnyen gyi gdams ngag dang rjes su bstan pa la mnyam par gzhag pa'i yid la byed pa yid la byed cing sems par mi byed/rtog par mi byed/ 'jal bar mi byed/ nye bar rtog par mi byed pa de'i tshe na ni mtshan ma tsam gyis rjes su zhugs pa yin no/ /yongs su btsal ba'i rjes su zhugs pa gang zhe na/ gang gi dam pa'i chos thos pa dang gzung ba'am/dge ba'i bshes gnyen gyi gdams ngag dang rjes su bstan pa de la mnyam par gzhag pa'i yid la byed pas yid la byed cing sems par byed rtog par byed 'jal bar byed nye bar rtog par byed pa de'i tshe na ni yongs su btsal ba'i rjes su zhugs pa yin no/ /yongs su btsal ba la so sor rtog pa'i rjes su zhugs pa gang zhe na/gang gi tshe bsams shing brtags la gzhal zhing nye bar brtags nas ji ltar rnam par gzhag pa de bzhin du so sor rtog par byed pa de'i tshe na ni yongs su btsal ba las so sor rtog pa'i rjes su zhugs pa yin no/ /de la lhag mthong gi gzhi rab tu dbye ba drug la dmigs pa gang zhe na/de dmigs pas yongs su tshol bar byed pa na gzhi rnam pa drug yongs su tshol bar byed de/ don dang / dngos po dang / mtshan nyid dang / phyogs dang / dus dang / rigs pa yongs su tshol bar byed cing yongs su btsal nas kyang de dag la so sor rtog par byed do//de la ji ltar na don yongs su tshol bar byed ce na/ spyod pa rnam par sbyong ba dang / mkhas pa dang / nyon mongs pa rnam par sbyong ba'i dmigs pa de dag la smras pa de'i don ni 'di yin no zhes de ltar don yongs su tshol bar byed do/ /ji ltar dngos po yongs su tshol bar byed ce na/dmigs pa de dag nyid la dngos po rnam pa gnyis po nang gi dngos po dang / phyi rol gyi dngos po yongs su tshol bar byed de/ de ltar dngos po yongs su tshol bar byed do/ /ji ltar mtshan nyid yongs su tshol bar byed ce na/ dmigs pa de dag nyid la mtshan nyid rnam pa gnyis po rang gi mtshan nyid dang /spyi'i mtshan nyid yongs su tshol bar byed de/ de ltar mtshan nyid yongs su tshol bar byed do/ /ji ltar phyogs yongs su tshol bar byed ce na/ dmigs pa de dag nyid la phyogs rnam pa gnyis so/ /nag po'i phyogs dang / dkar po'i phyogs yongs su tshol bar byed de/nag po'i phyogs ni skyon dang nyes dmigs kyi sgo nas so/ /dkar po'i phyogs ni yon tan dang phan yon gyi sgo nas te de ltar phyogs yongs su tshol bar byed do/ /ji ltar dus yongs su tshol bar byed ce na/ dmigs pa de dag nyid la dus gsum po 'das pa'i dus na 'di lta bu zhig byung bar gyur to//ma 'ongs pa'i dus na 'di lta bu zhig 'byung bar 'gyur ro/ /da ltar byung ba'i dus na 'di lta bu zhig da ltar yod do zhes de ltar dus yongs su tshol bar byed do/ /ji ltar rigs pa yongs su tshol bar byed ce na/ dmigs pa de nyid la rigs pa bzhi po ltos pa'i rigs pa dang / bya ba byed pa'i rigs pa dang /'thad pas bsgrubs pa'i rigs pa dang / chos nyid kyi rigs pa yongs su tshol bar byed de/ de la ltos pa'i rigs pas ni kun rdzob kyang kun rdzob kyi sgo nas/ don dam pa yang don dam pa'i sgo nas/ gzhi yang gzhi'i sgo nas yongs su tshol bar byed do/ /bya ba byed pa'i rigs pas ni chos rnams kyi byed pa yongs su tshol bar byed de 'di ni chos so//'di ni byed pa'o/ /'di ni 'di'i byed pa'o zhes yongs su tshol bar byed do/ /'thad pas bsgrubs pa'i rigs pas ni tshad ma gsum po yid ches pa'i lung dang / mngon sum dang rjes su dpag pas yongs su tshol bar byed de/ci 'di la yid ches pa'i lung yod dam med/ ci mngon sum du dmigs sam/ 'on te ma yin/ ci rjes su dpag pas rigs sam/ 'on te ma yin zhes yongs su tshol bar byed do/ /chos nyid kyi rigs pas ni chos rnams kyi de ltar gyur pa nyid dang / grags pa'i chos nyid dang / bsam gyis mi khyab pa'i chos nyid dang / gnas pa'i chos nyid la mos par byed cing sems par mi byed/ rnam par rtog par mi byed de/ de ltar rigs pas yongs su tshol bar byed do/ /de la ci'i phyir gzhi rab tu dbye ba rnam pa drug rnam par gzhag ce na/ rtogs pa rnam pa gsum gyi dbang du byas pa'i phyir te/smras pa'i don rtogs pa dang / dngos po'i mtha' rtogs pa dang / yang dag pa ji lta ba bzhin du rtogs pa'o/ /de la don yongs su tshol bas ni smras pa'i don rtogs pa yin no/ /dngos po yongs su tshol ba dang / rang gi mtshan nyid yongs su tshol bas ni dngos po'i mtha' rtogs pa yin no//spyi'i mtshan nyid yongs su tshol ba dang / phyogs yongs su tshol ba dang / dus yongs su tshol ba dang / rigs pa yongs su tshol bas ni yang dag pa ji lta ba bzhin du rab tu rtogs pa yin te/ rnal 'byor pas shes par bya ba ni smras pa'i don dang / shes bya'i dngos po'i ji snyed yod pa nyid dang /ji lta ba bzhin du yod pa nyid gang yin pa de tsam du zad pa'i phyir ro/ /de ltar sbyor ba'i lam gyi yid la byed pas rab tu phye ba'i lhag mthong gi rnam pa shes rab kyi spyod pa bzhis bsdus pa sgo gsum dang ldan pa/ gzhi rab tu dbye ba rnam pa drug la dmigs pa gang yin pa de ni rnam par rtog pa dang bcas pa zhes bya ste/des ni lhag mthong thams cad yang dag par bsdus pa yin no/ /rnam par rtog pa dang bcas pa'i lhag mthong gi rnam pa des rab tu phye ba zhes bya ba'i dngos po dang cha mthun pa sems kyi gzugs brnyan rang rig pa gang yin pa de ni gzugs brnyan zhes bya'o zhes bya ba la/ shes bya'i dngos po gang zhe na/spyad pa rnam par sbyong ba'i dmigs pa dang / mkhas pa'i dmigs pa dang / nyon mongs pa rnam par sbyong ba'i dmigs pa sngar bstan pa de dag go/ /de dang cha mthun pa zhes bya ba ni rnal 'byor pas dmigs pa de dag las gang yang rung ba mthong ba'am/ thos pa'am/ yongs su brtags pa gcig gzung ste/dam pa'i chos thos pa dang gzung ba'am/ dge ba'i bshes gnyen gyi gdams ngag dang rjes su bstan pa la brten nas de nyid la mnyam par gzhag pa'i sa pa'i yid la byed pa mngon du byas te/ de'i rnam pa rang gi blo la snang bar bya ba'i phyir mos pa yid la byed cing / de ltar mos pa yid la byed pa na/mnyam par gzhag pa'i sa pa'i yid la byed pa de'i mthus shes bya'i dngos po de dang 'dra ba'i rnam pa rang gi blo la snang bar gyur pa gang yin pa ste/ de ni shes bya'i dngos po de nyid mngon sum du mthong ba ma yin gyi/ de la brten nas mos pa yid la byas pa'i mthus de dang cha mthun pa'i rnam pa blo la snang ba yin pas na shes bya'i dngos po dang cha mthun pa zhes bya'o//sems kyi gzugs brnyan rang rig pa zhes bya ba ni shes bya'i dngos po dang cha mthun pa de nyid kyi phyi rol shes bya'i dngos po ma yin gyi/ nang gi lhag mthong gi sems kyi rnam pa nyid gzugs brnyan rang rig pa de lta bur snang ba'i phyir te/de ni rnam par rtog pa dang bcas pa'i gzugs brnyan zhes bya'o/ /ci'i phyir rnam par rtog pa dang bcas pa'i gzugs brnyan zhes bya zhe na/ rnam par rtog pa dang bcas pa'i lhag mthong gi rnam pa'i sems des shes bya'i dngos po'i rnam pa rang gi blo la snang bar bya ba'i phyir mos pa yid la byas pas na rnam par rtog pa dang bcas pa'i lhag mthong gi rnam pa'i sems de nyid gzugs brnyan gyi rnam pa de lta bur snang ba'i phyir te/de bas na de ni lhag mthong gi rnam pas rab tu phye ba zhes bya'o/ /gzugs brnyan zhes bya ba'i sgra yang dper na gzugs la ltos te gzugs brnyan snang ba ni gzugs la ltos te byung ba yin la/gzugs dang 'dra zhing gzugs las tha dad pa ma yin yang gzugs las logs shig na snang bas gzugs brnyan zhes bya ba bzhin du/ 'di ltar gzugs lta bur lta ba ni rnam par rtog pa dang bcas pa'i lhag mthong gi rnam pa'i sems nyid yin la/ gzugs brnyan lta bur blta ba ni sems kyi gzugs brnyan rang rig pa blo la snang ba yin te/gzugs brnyan de ni rnam par rtog pa dang bcas pa'i lhag mthong gi rnam pa'i sems la ltos te byung ba yin la/ sems ji ltar mos pa de dang 'dra bar snang zhing / sems nyid de ltar snang bar sems las tha dad par yang ma yin te/ rnam par rtog pa dang bcas pa'i gzugs brnyan gyi dmigs pa 'thob pa dang lhag mthong gi lam skye ba ni 'byung ba'i dus kyang gcig /ngo bo nyid dang gcig mod kyi rnam par rtog pa'i sems kyi spyod yul lta bur blo la snang bas na gzugs brnyan zhes bya'o/ /gzhung gzhan las ting nge 'dzin las skyes pa'i gzugs bstan du med pa thogs pa med pa zhes 'byung ba yang 'di nyid yin par rig par bya'o//de ltar mthong ba'i lhag mthong gi sems de ni sbyor ba'i sems kyis yid la byed pas rab tu phye ba'i lhag mthong gi rnam pa shes rab kyi spyod pa bzhis bsdus pa sgo gsum dang ldan pa gzhi rab tu dbye ba rnam pa drug la dmigs pa yin la /da dung mtshan nyid so sor rig pa'i yid la byed pa dang / mos pa las byung ba dang / rab tu dben pa las byung ba dang / dga' ba sdud pa dang / dpyod pa'i yid la byed pa'i gnas skabs yin gyi/ sbyor ba mthar thug pa dang / sbyor ba mthar thug pa'i 'bras bu'i yid la byed pa'i gnas skabs ma yin pas/de'i phyir rnam par rtog pa dang bcas pa zhes bya'o/ /yang des shes bya'i dngos po dang cha mthun pa sems kyi gzugs brnyan rang rig pa de la yang dag par rtog par byed pa na yon tan dang skyon rnam par nges par rtog pa dang bcas pa'i phyir rnam par nges par rtog pa dang bcas pa zhes kyang bya'o//yang de rnam par shes pa'i ngo bo nyid las gzugs brnyan de yul gyi bye brag tu rtog pa dang bcas pa'i phyir bye brag tu rtog pa dang bcas pa zhes kyang bya'o/ /yang de gzugs brnyan de la rnam pa sna tshogs su rtog pa dang bcas pa'i phyir sna tshogs su rtog pa dang bcas pa zhes kyang bya'o//yang de gzugs brnyan de rnam par shes pa'i ngo bo nyid yin te/ gnyis med pa la gnyis su 'gal bar rtog pa dang bcas pa'i phyir 'gal bar rtog pa dang bcas pa zhes kyang bya ste/ de dag ni rnam par rtog pa dang bcas pa de'i ming gi rnam grangs yin no/ /gzugs brnyan de ni gzugs brnyan zhes kyang bya/ting nge 'dzin gyi mtshan ma dang / ting nge 'dzin gyi spyod yul gyi yul dang / ting nge 'dzin gyi thabs dang / ting nge 'dzin gyi sgo dang / yid la byed pa'i rten dang / nang du rnam par rtog pa'i lus dang / snang brnyan zhes kyang bya ste/ de dag ni gzugs brnyan de'i ming gi rnam grangs yin no//rnam par mi rtog pa'i gzugs brnyan zhes bya ba ni zhi gnas kyi rnam pas rab tu phye ba shes bya'i dngos po dang cha mthun pa sems kyi gzugs brnyan rang rig pa gang yin pa ste/ de la rnam par mi rtog pa zhes bya ba ni yid la byed pa thob pa'i lam gyis rab tu phye ba'i zhi gnas kyi rnam pa sems gnas pa dgus bsdus pa/stobs drug dang ldan pa yid la byed pa bzhis 'jug pa gang yin pa'o/ /gzugs brnyan zhes bya ba ni rnam par mi rtog pa'i zhi gnas kyi rnam pa des rab tu phye ba shes bya'i dngos po dang cha mthun sems kyi gzugs brnyan rang rig pa gang yin pa'o//de la yid la byed pa thob pa'i lam gyis rab tu phye ba'i zhi gnas kyi rnam pa zhes bya ba ni sngar rnam par rtog pa dang bcas pa'i lhag mthong gis rnam par gzhag pa'i sa pa'i yid la byed pa la brten nas shes bya'i dngos po'i rnam pa rang gi blo la snang bar bya ba'i phyir mos pas yid la byas sam/de kho na nyid yid la byas te/ rnam par rtog pa dang bcas pa'i gzugs brnyan gyi dmigs pa thob pa'i gnas skabs na de kho na nyid yid la byed pas gzugs brnyan de nyid la rtse gcig tu mnyam par 'jog pa'i zhi gnas kyi rnam pa gang yin pa'o/ /sems gnas pa dgu gang zhe na/sems 'jog par byed pa dang / yang dag par 'jog par byed pa dang / bsdus te 'jog par byed pa dang / nye bar 'jog par byed pa dang / dul bar byed pa dang / zhi bar byed pa dang / nye bar zhi bar byed pa dang / rgyud gcig tu byed pa dang / ting nge 'dzin du byed pa'o/ /de la ji ltar na 'jog par byed pa yin zhe na/phyi rol gyi dmigs pa thams cad las yang dag par bsdus te/ rnam par mi g.yeng bar bya ba'i phyir dang po nyid du nye bar rtogs par byed pa gang yin pa de ni 'jog par byed pa yin no/ /ji ltar yang dag par 'jog par byed pa yin zhe na/ dang por nye bar brtags pa'i sems gang yin pa de g.yo ba dang /rags pa dang / yang dag par mi gnas pa dang / yongs su mi gnas par gyur na de dmigs pa de nyid la brtod pa'i tshul dang / dang bar bya ba'i tshul gyis mngon par tshar bcad pa dang bcas pas phra bar byed cing / mngon par g.yeng bar mi byed pa gang yin pa de ni yang dag par 'jog par byed pa yin no//ji ltar na bsdus te 'jog par byed pa yin zhe na/ de ltar de'i sems gzhag pa dang / yang dag par gzhag pa de gal te brjed ngas pas phyi rol du rnam par g.yeng bar gyur na de yang phyis de nyid la sdud par byed de/ de ltar na bsdus te 'jog par byed pa yin no//ji ltar na nye bar 'jog par byed pa yin zhe na/ dang po kho nar de lta de ltar dran pa nye bar gzhag ste gnas shing sems de yang dag par 'jog par byed pa na/ ci nas kyang de'i sems de phyi rol du mi 'phro bar byed de/ de ltar na nye bar 'jog par byed pa yin no/ /ji ltar 'dul bar byed pa yin zhe na/gzugs dang / sgra dang / dri dang / ro dang / reg bya'i mtshan ma'am / 'dod chags dang / zhe sdang dang / gti mug dang / skyes pa dang / bud med kyi mtshan ma gang gis de'i sems rnam par g.yeng bar 'gyur na/ de la des dang po nyid nas nyes dmigs kyi 'du shes su bzung ba de nyid kyi dbang du byas nas/mtshan ma de dag la de'i sems 'phror mi ster bar byed de/ de ltar na dul bar byed pa yin no/ /ji ltar na zhi bar byed pa yin zhe na/ 'dod pa'i rnam par rtog pa la sogs pa rnam par rtog pa gang dag dang / 'dod pa la 'dun pa la sogs pa nye ba'i nyon mongs pa gang dag gis de'i sems kun tu 'khrugs par gyur na/de la des dang po nyid nas nyes dmigs kyi 'du shes su bzung ba de nyid kyi dbang du byas nas rnam par rtog pa dang nye ba'i nyon mongs pa de dag las de'i sems 'phror mi ster bar byed de/ de ltar na zhi bar byed pa yin no/ /ji ltar na nye bar zhi bar byed pa yin zhe na/ de brjed ngas pa'i phyir rnam par rtog pa dang nye ba'i nyon mongs pa de gnyis ka kun du 'byung bar 'gyur na/byung ngo cog dang du mi len cing spong bar byed de/ de ltar na nye bar zhi bar byed pa yin no/ /ji ltar na rgyud gcig tu byed pa yin zhe na/ mngon par 'du byed pa dang bcas pas bar du chad pa med pa dang / rgyun chags par ting nge 'dzin gyi rgyun la 'jog par byed de/de ltar na rgyud gcig tu byed pa yin no/ /ji ltar na ting nge 'dzin du byed pa yin zhe na/ kun du brten cing goms par byas lan mang du byas pa'i rgyus lhun gyis grub pa'i 'jug pa dang / rang gi ngang gis 'jug pa'i lam thob cing mngon du byed pa med pa dang / lhun gyis grub pa de nyid kyis de'i sems de rnam par g.yeng ba med pa'i ting nge 'dzin gyi rgyud la 'jug par 'gyur te/ de ltar na ting nge 'dzin du byed pa yin no/ /de la stobs drug gang zhe na/ thos pa'i stobs dang / bsam pa'i stobs dang / dran pa'i stobs dang / shes bzhin gyi stobs dang / brtson 'grus kyi stobs dang /yongs su 'dris pa'i stobs so/ /stobs drug po de dag gis sems gnas pa dgu po de dag 'grub ste/ de la thos pa'i stobs dang / bsam pa'i stobs kyis ni re zhig thos pa gang yin pa dang / bsam pa gang yin pa'i dbang du byas nas/ dang po kho nar sems dmigs pa la 'jog par byed pa dang /de nyid la brtod pa'i tshul gyis yang dag par 'jog par byed do/ /dran pa'i stobs kyis ni de ltar sems gtad pa las yang dag par bsdus pa dang / rnam par mi g.yeng bar byed pas bsdus te 'jog pa dang nye bar 'jog par byed do/ /shes rab kyi stobs kyis ni de nas rnam par rtog pa dang /nye ba'i nyon mongs pa'i mtshan ma dag la 'phro bar mi byed pas dul bar byed pa dang zhi bar byed do/ /brtson 'grus kyi stobs kyis ni de gnyis ka dang du mi len pa dang / rgyun chags par ting nge 'dzin gyi rgyun la 'jog par byed pas nye bar zhi bar byed pa dang rgyud gcig tu byed do//yongs su 'dris pa'i stobs kyis ni ting nge 'dzin du byed do/ /yid la byed pa bzhi gang zhe na/ bsgrims te 'jug pa'i yid la byed pa dang / skabs su 'chad cing 'jug pa'i yid la byed pa dang / skabs su 'chad pa med par 'jug pa yid la byed pa dang / rtsol ba med par 'jug pa yid la byed pa'o//sems gnas pa dgu po de dag ni yid la byed pa de bzhis 'jug ste/ de la 'jog par byed pa dang / yang dag par 'jog par byed pa ni bsgrims te 'jug pa'i yid la byed pas 'jug go/ /bsdus te 'jog par byed pa dang / nye bar 'jog par byed pa dang / dul bar byed pa dang / zhi bar byed pa dang / nye bar zhi bar byed pa ni skabs su 'chad cing 'jug pa'i yid la byed pas 'jug go/ /rgyud gcig tu byed pa ni skabs su 'chad pa med par yid la byed pas 'jug go/ /ting nge 'dzin du byed pa ni rtsol ba med par 'jug pa'i yid la byed pas 'jug ste/ de ltar yid la byed pa bzhi po de dag ni sems gnas pa dgu po dag la ni zhi gnas kyi phyogs yin no//nang gi sems kyi zhi gnas thob pa lhag mthong la rab tu rtsol bar byed pa la ni lhag mthong gi phyogs kyang yin te/ de ltar yid la byed pa thob pa'i lam gyis rab tu phye ba'i zhi gnas kyi rnam pa sems gnas pa dgus bsdus pa stobs drug dang ldan pa'i yid la byed pa bzhis 'jug pa gang yin pa de ni rnam par mi rtog pa zhes bya'o//rnam par mi rtog pa'i zhi gnas kyi rnam pa des rab tu phye ba shes bya'i dngos po dang cha mthun pa sems kyi gzugs brnyan rang rig pa gang yin pa de ni gzugs brnyan zhes bya'o zhes bya ba la/ shes bya'i dngos po dang cha mthun pa zhes bya ba ni snga ma bzhin te/sngar rnam par rtog pa dang bcas pa'i lhag mthong gis mnyam par gzhag pa'i sa pa'i yid la byed pa la brten nas/ shes bya'i dngos po'i rnam pa rang gi blo la snang bar bya ba'i phyir mos pa yid la byas sam de kho na nyid yid la byas te/ rnam par rtog pa dang bcas pa'i gzugs brnyan gyi dmigs pa thob pa de nyid do//de la bye brag tu na 'dir ni gzugs brnyan de nyid la lhag mthong gi rnam pas mos par mi byed par zhi gnas kyi rnam pas de kho na nyid yid la byed pa sems kyi ngo bo nyid du yid la byed cing / rtse gcig tu mnyam par byed do/ /sems kyi gzugs brnyan rang rig pa zhes bya ba yang snga ma bzhin te/shes bya'i dngos po dang cha mthun pa de nyid phyi rol gyi shes bya'i dngos po ma yin gyi/ nang gi zhi gnas kyi sems kyi rnam pa nyid gzugs brnyan rang rig pa de lta bur snang ba'i phyir te/ de ni rnam par mi rtog pa'i gzugs brnyan zhes bya'o/ /ci'i phyir rnam par mi rtog pa'i gzugs brnyan zhes bya zhe na/rnam par mi rtog pa'i zhi gnas kyi rnam pa'i sems des/ sems kyi gzugs brnyan rang rig pa de nyid la kho na nyid yid la byed pas sems kyi ngo bo nyid du yid la byed cing / rtse gcig tu mnyam par 'jog pa na rnam par mi rtog pa'i zhi gnas kyi rnam pa'i sems de nyid gzugs brnyan gyi rnam pa de lta bur snang ba'i phyir te/de bas na de nyid ni zhi gnas kyi rnam pas rab tu phye ba zhes bya'o/ /gzugs brnyan zhes bya ba'i sgra yang snga ma bzhin te/ 'dir gzugs brnyan lta bur lta ba ni rnam par mi rtog pa'i zhi gnas kyi rnam pa'i sems nyid yin la/gzugs brnyan lta bur lta ba ni sems kyi gzugs brnyan rang rig pa blo la snang ba yin te/ rnam par mi rtog pa'i gzugs brnyan gyi dmigs pa thob pa dang / zhi gnas kyi lam skye ba ni 'byung ba'i dus kyang gcig /ngo bo nyid dang gcig pa nyid kyi rnam par mi rtog pa'i sems kyi spyod yul lta bur blo la snang bas na gzugs brnyan zhes bya'o//de ltar mthong ba'i zhi gnas kyi sems de ni yid la byed pa thob pa'i lam gyis rab tu phye ba'i zhi gnas kyi rnam pa sems gnas pa dgus bsdus pa stobs drug dang ldan pa'i yid la byed pa bzhis 'jug pa yin la/ sbyor ba mthar thug pa'i lam gyi yid la byed pa'i gnas skabs yin pas de'i phyir rnam par mi rtog pa zhes bya'o//yang des sems kyi gzugs brnyan rang rig pa de la lhag mthong gi rnam pas rnam par 'byed par mi byed/ rab tu rnam par 'byed par mi byed/ yongs su rtog par mi byed/ yongs su dpyod par mi byed par dmigs pa'i mtshan ma de nyid mi gtong ba'i zhi gnas kyi rnam pas sems nang kho nar 'jog par byed/yang dag par 'jog par byed/ bsdus te 'jog par byed/ nye bar 'jog par byed/ dul bar byed/ zhi bar byed/ nye bar zhi bar byed/ rgyud gcig tu byed/ ting nge 'dzin du byed pas na rnam par mi rtog pa zhes bya'o//sngar rnam par rtog pa dang bcas pa'i rnam grangs ji skad bstan pa dag pas bzlog pa'i rnam grangs thams cad kyang de bzhin du ci rigs par sbyar te/ de dag ni rnam par mi rtog pa de'i ming gi rnam grangs yin no / /gzugs brnyan gyi ming gi rnam grangs ni snga ma kho na bzhin no//bye brag tu na snga ma ni lhag mthong gis rab tu phye ba yin la 'di ni zhi gnas kyis rab tu phye ba yin te/ de gnyis ka la yang lhag mthong dang zhi gnas gnyis ka'i cha yod mod kyi zung du 'brel pa'i lam ma thob pa'i gnas skabs na/ snga ma ni dmigs pa ma thob pa thob par byed pa yin pas rtog pa'i shas che ba'i phyir lhag mthong gis rab tu phye ba zhes bya/'di ni dmigs pa thob pa goms par byed pa yin pas rtogs pa shas chung ba'i phyir zhi gnas kyis rab tu phye ba zhes bya'o/ /dngos po'i mtha' zhes bya ba ni zung du 'brel pas rab tu phye ba dmigs pa dang gnas kyi dngos po'i mtha' gnas gyur pa'i ngo bo nyid gang yin pa ste/de la dngos po zhes bya ba ni lhag mthong dang zhi gnas kyi dmigs pa rnam par rtog pa dang bcas pa'i gzugs brnyan dang / rnam par mi rtog pa'i gzugs brnyan gyi dngos po kun gzhi rnam par shes pa'o/ /mtha' zhes bya ba ni de'i ji snyed yod pa nyid dang /ji lta ba bzhin du yod pa nyid kyi mthar gyur pa gnas gyur pa'i ngo bo nyid do/ /de ci'i phyir dmigs pa de nyid la dngos po zhes bya zhe na/ de gnyis ni zhi gnas dang lhag mthong gi dngos po'i dmigs pa dang gnas kyi dngos po yin pa'i phyir te/ de la dmigs pa'i dngos po'i zhes bya ba ni zhi gnas dang lhag mthong ni dmigs pa gang gis bskyed pa de nyid la dmigs pa yin pas mnyam par gzhag pa'i sa pa'i mos pa'i yid la byed pa dang /de kho na nyid yid la byed pa'i mthus rnam par rtog pa dang bcas pa dang / rnam par mi rtog pa'i gzugs brnyan gyi dmigs pa thob par gyur pa des zhi gnas dang lhag mthong bskyed la/zhi gnas dang lhag mthong yang gzugs brnyan gyi dmigs pa de nyid la dmigs par byed pa'i phyir gzugs brnyan gyi dmigs pa kun gzhi'i rnam par shes pa'i ngo bo nyid de ni zhi gnas dang lhag mthong sems las byung ba'i ngo bo nyid de'i dmigs pa'i dngos po zhes bya'o//de la gnas kyi dngos po zhes bya ba ni kun gzhi rnam par shes pa sems dang sems las byung ba'i chos thams cad kyi gnas kyi dngos po yin pas mnyam par gzhag pa'i sa pa'i mos pa'i yid la byed pa dang / de kho na nyid yid la byed pa'i mthus rnam par rtog pa dang bcas pa dang /rnam par mi rtog pa'i gzugs brnyan gyi dmigs pa thob par gyur pa de ni kun gzhi'i rnam par shes pa'i ngo bo nyid yin la/ dmigs pa de la brten te skyes pa'i zhi gnas dang lhag mthong ni mnyam par gzhag pa'i sa pa'i sems las byung ba'i ting nge 'dzin dang /shes rab kyi ngo bo nyid yin pa'i phyir gzugs brnyan gyi dmigs pa kun gzhi'i rnam par shes pa'i ngo bo nyid de ni zhi gnas dang lhag mthong de ni sems las byung ba'i ngo bo nyid de'i gnas kyi dngos po zhes bya ste/ de'i phyir gzugs brnyan de ni dmigs pa dang gnas kyi dngos po zhes bya'o//de la ci'i phyir dngos po de'i ji snyed yod pa nyid dang / ji lta ba bzhin du yod pa nyid la mtha' zhes bya zhe na/ de tsam gyis ni rnam grangs kyi mthar phyin pa dang / mtshan nyid kyi mthar phyin par gyur pa'i phyir te/ de la ji snyed yod pa nyid ces bya ba ni rnam grangs te/ dper na phung po ni lnga kho nar zad de/de dag gis 'dus byas thams cad bsdus so/ /khams ni bco brgyad kho na'o/ /skye mched ni bcu gnyis kho na ste / de dag gis ni 'dus byas dang 'dus ma byas kyi chos thams cad bsdus so/ /'phags pa'i bden pa ni bzhi kho na ste / de dag gis ni shes bya'i dngos po thams cad bsdus so zhes bya ba ni ji snyed yod pa nyid do//ji lta ba bzhin du yod pa nyid ni mtshan nyid de/ dper na ji snyed yod pa nyid kyi rnam pa de dag gis yang dag pa nyid dang / de bzhin nyid rigs pa bzhi dang ldan pa ni ji lta ba bzhin du yod pa nyid ces bya'o/ / de dang 'dra bar 'dir yang kun gzhi'i rnam par shes pa'i 'jug pa rnam par gzhag pa'i rnam grangs ji snyed pa thams cad ni ji snyed pa yod pa nyid do/ /ldog pa rnam par gzhag pa'i mtshan nyid ci 'dra ba ni ji lta ba bzhin du yod pa nyid ces bya ste/ de tsam gyis na dngos po de'i mthar phyin pa'i phyir ji snyed yod pa nyid dang /ji lta ba bzhin du yod pa nyid ni dngos po de'i mtha' zhes bya'o/ /de yang gang gi dus na dngos po de'i mthar gyur pa yin zhe na/ gang gi tshe kun gzhi'i rnam par shes pa gnas gyur pa de'i tshe na dngos po de'i rnam grangs dang mtshan nyid kyi mthar gyur pa yin no/ /de ltar na dmigs pa dang gnas kyi dngos po'i mtha' gnas gyur pa'i ngo bo nyid ni dngos po'i mtha' zhes bya ste/de ni spangs pa phun sum tshogs pa yin no/ /de yang gang gis rab tu phye ba yin zhe na/ zhi gnas dang lhag mthong zung du 'brel pas rab tu phye ba yin te/ gang gi tshe zung du 'brel pa'i lam skyes pa de'i tshe na gnas gyur pa thob pa yin la/gnas gyur pa'i de bzhin nyid de yang zung du 'brel pa'i lam gyi dmigs pa yin pas gnas gyur pa'i dmigs pa 'thob pa dang zung du 'brel pa'i lam skye ba ni 'byung ba'i dus kyang gcig ngo bo nyid dang gcig pas na zung du 'brel pas rab tu phye ba zhes bya ste/ de ni dngos po'i mtha' yin no//dgos pa yongs su grub pa zhes bya ba ni zung du 'brel pas rab tu phye ba sbyor ba mthar thug pa'i 'bras bu'i yid la byed pa yongs su grub pa yang dag pa'i shes pa'i ngo bo nyid yin pa ste/ de la dgos pa zhes bya ba ni sbyor ba mthar thug pa'i 'bras bu'i yid la byed pa'o/ /yongs su grub pa zhes bya ba ni de yongs su grub pa'i yang dag pa'i shes pa'i ngo bo nyid do//de la ci'i phyir sbyor ba'i mthar thug pa'i 'bras bu'i yid la byed pa la dgos pa zhes bya zhe na/ dgos pa zhes bya ba'i don ni 'bras bu dang bya ba yin la/ dgos pa mthar thug pa'i 'bras bu yang dngos gzhi thob pa'i 'bras bu yin pas de nyid dgos pa yin pa'i phyir dang de'i yid la byed pa yang bya ba yin pas de yang dgos pa yin pa'i phyir ro//de la ci'i phyir de yongs su grub pa yang dag pa'i shes pa'i ngo bo nyid la yongs su grub pa zhes bya zhe na/ de yongs su grub pa zhes bya ba ni dngos gzhi thob pa rdo rje lta bu'i ting nge 'dzin gyis gnas ngan len phra mo snying po la yod pa lta bu ma lus par spangs te zad pa dang mi skye ba shes pa thob pa na sbyor ba mthar thug pa'i 'bras bu'i yid la byed pa de yongs su grub pa yin la/de nyid shes bya thams cad la chags pa med pa dang / thogs pa med pa'i shes pa dang / mthong ba 'jug pa 'jig rten las 'das pa'i yang dag pa'i shes pa'i ngo bo nyid yin pa'i phyir te/de ltar na sbyor ba mthar thug pa'i 'bras bu'i yid la byed pa yongs su grub pa yang dag pa'i shes pa'i ngo bo nyid ni dgos pa yongs su grub pa zhes bya ste/ de ni ye shes phun sum tshogs pa yin no/ /de yang gang gis rab tu phye ba yin zhe na/zhi gnas dang lhag mthong zung du 'brel pas rab tu phye ba yin te/ gang gi tshe zung du 'brel pa'i lam skyes pa de'i tshe na yang dag pa'i shes pa thob pa yin la/ yang dag pa'i shes pa'i de bzhin nyid kyang zung du 'brel pa'i lam gyi dmigs pa yin pas yang dag pa'i shes pa'i dmigs pa 'thob pa dang zung du 'brel pa'i lam skye ba 'di 'byung ba'i dus kyang gcig ngo bo nyid kyang gcig pas na zung du 'brel pas rab tu phye ba zhes bya ste/de ni dgos pa yongs su grub pa yin no/ /de ltar dmigs pa'i dngos po bzhi bstan pa de dag ni khyab pa'i dmigs pa zhes bya ste/ 'jig rten pa dang 'jig rten las 'das pa'i lam thams cad du 'gro zhing / spyad pa rnam par sbyong ba'i dmigs pa la sogs pa dmigs pa thams cad kyi rjes su song ba dang / 'das pa dang / ma 'ongs pa dang / da ltar byung ba'i yang dag par rdzogs pa'i sangs rgyas thams cad kyi bshad pa yin pas na de'i phyir khyab pa'i dmigs pa zhes bya'o//yang de dag ni lhag mthong gi phyogs dang / zhi gnas kyi phyogs dang / dngos po thams cad dang ldan pa dang / yang dag pa'i dngos po dang ldan pa dang / rgyu dang 'bras bu'i dngos po dang ldan pa'i dmigs pa yin pas na de'i phyir yang khyab pa'i dmigs pa zhes bya ste/de la rnam par rtog pa dang bcas pa'i gzugs brnyan ni lhag mthong gi phyogs kyi dmigs pa yin no/ /rnam par mi rtog pa'i gzugs brnyan ni zhi gnas kyi phyogs kyi dmigs pa yin no/ /dngos po'i mtha' ni ji snyed yod pa nyid dang / ji lta ba bzhin du yod pa nyid kyi dngos po thams cad dang ldan pa dang /yang dag pa'i dngos po dang ldan pa'i dmigs pa yin no/ /dgos pa yongs su grub pa ni yid la byed pa yongs su grub pa'i rgyus 'bras bu gnas ngan len spangs pa dang / gnas gyur pa dang / dngos gzhi thob pa dang / shes bya la shes pa dang /mthong ba 'jug pa nyid kyis rgyu dang 'bras bu'i dngos po dang ldan pa'i dmigs pa yin no/ /de ni gzhan dag de snyam du rnal 'byor gyis yongs su bsdus pa'i zhi gnas dang lhag mthong gi lam gyi ngo bo nyid de ni dmigs pa la brten te skye ba yin na/ dmigs pa bzhi po gang la brten te skye snyam pa la/mi pham pa nyid kyis khyab pa'i dmigs pa de nyid mngon du bya bar mkhyen nas khyab pa'i dmigs pa bzhi bstan pa'i tshig gi don la sogs pa bshad pa yin no/ / de'i 'og tu dmigs pa gang ni lam gang gi dmigs pa yin snyam pa la dmigs pa du dang gang zhig lam gang gi dmigs pa yin pa bstan pa'i phyir/bcom ldan 'das su zhig zhi gnas kyi dmigs pa lags zhes bya ba la sogs pa zhus so/ /de la 'dir ci'i phyir zhi gnas dang por bstan ce na/ mnyam par ma bzhag pa'i sa pa'i sems chu bzhin du g.yo ba de dang por mnyam par gzhag pa'i sa pa'i zhi gnas snod dang 'dra bas btsal dgos pa'i phyir ro//'o na khyab pa'i dmigs pa rnam pa bzhi las dang por rnam par rtog pa dang bcas pa'i gzugs brnyan bstan la/ de'i 'og tu rnam par mi rtog pa'i gzugs brnyan bstan pa dang ji ltar mi 'gal zhe na 'gal ba med de/de ltar bstan pa ni dmigs pa thob pa dang / dmigs pa goms par byed pa'i dbang du mdzad pa yin gyi/ rnal 'byor pa las dang po pas dmigs pa yongs su tshol ba dang / dmigs pa thob pa dang / dmigs pa goms par byed pa dang / 'bras bu thob pa'i rigs ni dang po kho nar rnal 'byor pa dmigs pa yongs su tshol ba'i tshe na mnyam par ma bzhag pa'i sems kyi dmigs pa gang yang rung ba mthong ba'am/thos pa'am/ yongs su brtags pa gcig gzung ba'i dus na tshol ba dang / rnam par rtog pa dang bcas pa'i gzugs brnyan gyi dmigs pa yang mi thob/ lhag mthong gi lam yang mi skye'o//de'i 'og tu dam pa'i chos thos pa dang / gzung ba'am/ dge ba'i bshes gnyen gyi gdams ngag dang rjes su bsten pa la brten nas de nyid la mnyam par gzhag pa'i sa pa'i yid la byed pa mngon du byas te/ de'i rnam pa rang gi blo la snang bar bya ba'i phyir mos pa yid la byed pa'i dus na ni dang por mnyam par gzhag pa'i sa pa'i sems kyis mos pa yid la bya dgos pas dmigs pa yongs su tshol ba de'i tshe na ni zhi gnas sngon du 'gro ba yin no//de'i 'og tu de ltar mos pa'i yid la byed pa na mnyam par gzhag pa'i sa pa'i yid la byed pa de'i mthus shes bya'i dngos po de dang 'dra ba'i rnam pa rang gi blo la snang bar gyur pa'i dus na ni rnam par rtog pa dang bcas pa'i gzugs brnyan gyi dmigs pa thob pa dang /sbyor ba'i lam gyi yid la byed pas rab tu phye ba'i lhag mthong gi lam skyes pa yin no/ /de'i 'og tu dmigs pa thob pa de nyid la zhi gnas kyi rnam pas rtse gcig tu mnyam par 'jog pa'i dus na ni rnam par mi rtog pa'i gzugs brnyan gyi dmigs pa goms par byed pa dang /yid la byed pa thob pa'i lam gyis rab tu phye ba mtshan ma'i g.yeng ba zhi ba'i zhi gnas kyi lam nang gi rtse gcig pa nyid skyes pa yin te/ ji tsam du mtshan ma'i g.yeng ba zhi ba'i zhi gnas kyi lam nang gi sems rtse gcig pa nyid de yangs pa dang 'phel ba dang /rgyas par gyur pa de tsam du de'i mjug thogs su mthar thug pa'i lam gyi yid la byed pas rab tu phye ba gnas ngan len gyi zhi ba'i zhi gnas kyi lam dus dang sems shin tu sbyangs pa skye ba yang yangs pa dang / 'phel ba dang / rgyas par 'gyur la/ ji tsam du chos de gnyis yangs pa dang 'phel ba dang / rgyas par gyur pa de tsam du sbyor ba mthar thug pa'i lam gyi yid la byed pas rab tu phye ba'i lhag mthong sems kyi ngo bo nyid la gnyis med pa'i don rang rig pa'i ngo bo nyid rab tu dbye ba yang yangs pa dang / 'phel ba dang rgyas par 'gyur ro//de ltar zhi gnas dang lhag mthong gi sems de gnyis yangs pa dang / 'phel ba dang / rgyas par gyur pa'i tshe na zung du 'brel par 'jug pa'i lam skye zhing dngos po'i mtha' dang dgos pa yongs su grub pa'i dmigs pa dus gcig tu thob par gyur te/ de thob pa'i tshe na yangs pa phun sum tshogs pas rab tu phye ba'i 'bras bu gnas gyur pa'i ngo bo nyid dang /ye shes phun sum tshogs pas rab tu phye ba'i 'bras bu yang dag pa'i shes pa'i ngo bo nyid gcig tu thob pa yin no/ /'bras bu de gnyis thob pa ni rnam pa thams cad mngon par rdzogs par byang chub par sangs rgyas bcom ldan 'das kyi go 'phang bla na med pa nyid thob pa yin te/de'i dus na de bzhin gshegs pa nyid ces bya'o/ /de ltar na rnal 'byor pa las dang po pa thog ma kho nar dmigs pa yongs su tshol ba'i dus na zhi gnas sngon du 'gro ba yin la/ dmigs pa thob pa'i dus na ni lhag mthong gi shas che ba yin/dmigs pa goms par byed pa'i dus na ni zhi gnas kyi shas che ba yin/ 'bras bu thob pa'i dus na ni zung du 'brel pa'i lam gyi 'jug pa yin pas na de'i phyir 'dir dang por 'phags pa mi pham pa nyid kyis zhi gnas kyi lam gyi dmigs pa du dang gang lags zhes zhus par sbyar ro//gcig ste zhes bya bas ni du lags zhes zhus pa'i lan btab pa yin no/ /'di lta ste/ rnam par mi rtog pa'i gzugs brnyan no zhes bya bas ni gang lags zhes zhus pa'i lan btab pa yin te/ de ni dmigs pa thob pa'i gong du dmigs pa goms par byed pa'i gnas skabs dang sbyar ro//de ci'i phyir zhi gnas kyi dmigs pa yin zhe na/ rnam par mi rtog pa zhes bya ba ni yid la byed pa thob pa'i lam gyis rab tu phye ba'i zhi gnas kyi rnam pa sems gnas pa dgus bsdus pa/ stobs drug dang ldan pa/ yid la byed pa bzhis 'jug pa yin la/ gzugs brnyan zhes bya ba ni rnam par mi rtog pa'i zhi gnas kyi rnam pa des rab tu phye ba shes bya'i dngos po dang cha mthun pa'i sems kyi gzugs brnyan rang rig pa yin pa'i phyir ro//du zhig lhag mthong gi dmigs pa lags zhes bya bas kyang du dang gang lags zhes par sbyar ro/ /gcig kho na ste zhes bya bas ni du lags zhes zhus pa'i lan btab pa yin no//rnam par rtog pa dang bcas pa'i gzugs brnyan no zhes bya bas ni gang lags zhes zhus pa'i lan btab pa yin te/ de ni dmigs pa yongs su btsal ba'i gong du dmigs pa thob pa'i gnas skabs dang sbyar ro/ /de ci'i phyir lhag mthong gi dmigs pa yin zhe na / rnam par rtog pa dang bcas pa'i zhes bya ba ni sbyor ba'i lam gyi yid la byed pas rab tu phye ba'i lhag mthong gi rnam pa shes rab kyi spyod pa bzhis bsdus pa sgo gsum dang ldan pa/gzhi rab tu dbye ba rnam pa drug la dmigs pa yin la/ gzugs brnyan zhes bya ba ni rnam par rtog pa dang bcas pa'i lhag mthong gi rnam pa des rab tu phye ba shes bya'i dngos po dang cha mthun pa sems kyi gzugs brnyan rang rig pa yin pa'i phyir ro//du zhig de gnyis ka'i dmigs pa lags zhes bya bas kyang du dang gang lags zhes zhus par sbyar te/ de gnyis ka'i zhes bya ba ni zung du 'brel pa 'jug pa'i lam gyi zhes bya ba'i tha tshig go//gnyis te zhes bya bas ni du lags zhes zhus pa'i lan btab pa yin no/ /'di lta ste/ dngos po'i mtha' dang dgongs pa yongs su grub pa'o zhes bya bas ni gang lags zhes zhus pa'i lan btab pa yin te/ de ni dmigs pa goms par byas pa'i gong du sbyor ba mthar thug pa'i 'bras bu thob pa'i gnas skabs dang sbyar ro//de gnyis ci'i phyir zung du 'brel pa'i lam gyi dmigs pa yin zhe na/ zung du 'brel pa'i lam gyi zhi gnas kyi rnam pa ni yongs su 'dris pa'i stobs dang / rtsol ba med par 'jug pa'i yid la byed pas ting nge 'dzin du byed pa kho na yin la/ lhag mthong gi rnam pa ni yongs su dpyod pa'i rnam pas bsdus pa yongs su btsal ba la so sor rtog pa'i rjes su zhugs pa'i sgo dang ldan pa rtogs pa'i gzhi rab tu dbye ba la dmigs pa yin te/de gnyis mnyam par zung du 'brel pas 'jug pa'i lam de gang gi tshe skyes pa de'i tshe na dngos po'i mtha' dang dgos pa yongs su grub pa'i dmigs pa 'thob pa yin la/zung du 'brel pa'i lam de yang dmigs pa de gnyis la dmigs pa yin pas dmigs pa de nyid 'thob pa dang / zung du 'brel pa'i lam skye ba ni 'byung ba'i dus kyang gcig /ngo bo nyid kyang gcig pa'i phyir ro/ /de ni dmigs pas sbyor ba'i rgyu bstan pa yin te/sbyor ba'i rgyu'i tshig gi don la sogs pa bshad zin to// //de'i 'og tu 'thob pa'i tshig gi don la sogs pa bshad par bya ste/ 'thob pa zhes bya ba ni de ltar sbyor ba'i rgyu rnam pa gsum la brten te/ rnal 'byor gyis yongs su bsdus pa'i zhi gnas dang lhag mthong gi lam gyi ngo bo nyid la sbyor bar byed pa ni sbyor ba mthar thug pa'i lam gyi yid la byed pas rab tu phye ba'i zhi gnas dang lhag mthong gi lam gyi ngo bo nyid la sbyor bar byed pa na sbyor ba mthar thug pa'i lam gyi yid la byed pas rab tu phye ba'i zhi gnas dang lhag mthong thob pa gang yin pa'o//de la mtshams sbyar ba ji lta bu zhe na/'dir 'phags pa byams pas gzhan dag 'di snyam du de ltar rnal 'byor pas sbyor ba'i rgyu de lta bu la brten te/ rnal 'byor gyis yongs su bsdus pa'i zhi gnas dang lhag mthong gi lam gyi ngo bo nyid la sbyor bar byed pa ni sbyor ba mthar thug pa'i lam gyi yid la byed pas rab tu phye ba'i zhi gnas ni ji ltar yongs su btsal bar bya/lhag mthong la ni ji ltar mkhas par bya snyam du sems pa rnams kyi bsam pa la brtags nas sbyor ba mthar thug pa'i lam gyi yid la byed pas rab tu phye ba'i zhi gnas yongs su btsal ba dang / lhag mthong la mkhas pa bstan pa'i dbang du mdzad nas/ bcom ldan 'das byang chub sems dpa'i zhi gnas dang lhag mthong gi dmigs pa'i dngos po de dag brten cing /gnas nas ji ltar zhi gnas yongs su tshol bar bgyid pa dang / lhag mthong la mkhas pa lags zhes bya bar zhus par sbyar ro/ /de la ji ltar zhi gnas yongs su tshol bar bgyid ces bya ba ni sbyor ba'i rgyu yongs su tshol ba ma yin gyi/sbyor ba mthar thug pa'i lam gyi yid la byed pas rab tu phye ba'i zhi gnas yongs su tshol ba ste/ ji tsam gyis na de thob pa lags zhes bya ba'i tha tshig go/ /'di ltar lhag mthong la mkhas pa lags zhes bya ba yang sbyor ba'i lam gyi rab tu phye ba la mkhas pa ma yin gyi sbyor ba mthar thug pa'i lam gyi yid la byed pas rab tu phye ba'i lhag mthong la mkhas pa ste/ji tsam gyis na de thob pa lags zhes bya ba'i tha tshig go/ /de nas bcom ldan 'das kyis kyang zhi gnas ni mtshan ma dang gnas ngan len gyi g.yeng ba'i ngo bo nyid dang rab tu phye bas sems kyi gdung ba yongs su zhi ba'i ngo bo nyid yin pa'i phyir byang chub sems dpas yongs su btsal bar bya ba yin la/lhag mthong ni sems kyi ngo bo nyid la gnyis med pa'i don rang rig pa'i ngo bo nyid rab tu dbye bas chos rab tu rnam par 'byed pa'i ngo bo nyid yin pa'i phyir byang chub sems dpa' de la mkhas par bya ba bstan pa'i dbang du mdzad nas/byams pa ngas zhes bya ba la sogs pa gsungs te/ 'dir bcom ldan 'das kyi sbyor ba'i rgyu rnam pa gsum las gnas kyi sbyor ba'i rgyu ni dang por sbyor ba'i thabs kyi rgyu yin pas gtso cher bstan te/ rten gyi sbyor ba'i rgyu dang / dmigs pas sbyor ba'i rgyu yang sngar bstan pa bzhin du sbyar bar bya'o//de la chos gdags pa rnam par gzhag pa zhes bya ba ni mdor bstan pa yin te/ dper na bden pa gdags pa rnam par gzhag pa dang / rigs pa gdags pa rnam par gzhag pa dang / theg pa gdags pa rnam par gzhag pa dang zhes mdor bstan pa dang 'dra'o//'di lta ste zhes bya ba la sogs pa ni rgyas par bshad pa yin te/ dper na bden pa gdags pa rnam par gzhag pa ni bden pa gcig nas bcu'i bar ro/ /rigs pa gdags pa rnam par gzhag pa ni rigs pa bzhi'o/ /theg pa gdags pa rnam par gzhag pa ni theg pa gsum mo zhes rgyas par bshad pa dang 'dra'o//de la mdo'i sde zhes bya ba ni bcom ldan 'das kyis de dang de dag tu gdul ba de dang de dag dang / gdul ba'i spyod pa rnams las brtsams te phung po dang ldan pa'i gtam dang / skye mched dang ldan pa dang / rten cing 'brel par 'byung ba dang ldan pa dang / thod dang ldan pa dang /khams dang ldan pa dang / nyan thos dang / rang sangs rgyas dang / de bzhin gshegs pa dang ldan pa dang / dran pa nye bar gzhag pa dang / yang dag pa'i spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag dang / lam gyi yan lag dang ldan pa dang /mi sdug pa dang / dbugs rngub pa dang / dbugs dbyung ba dang / bslab pa dang / shes nas dad pa dang ldan pa'i gtam gsungs pa gang yin pa dag yang dag par sdud par byed pa rnams kyis yongs su bzung nas bstan pa yun ring du gnas par bya ba'i don du 'di lta ste/ don dge ba dang /don dang ldan pa tshangs par spyod pa dang ldan pa de dang de dag bstan par bya ba'i phyir ming gi tshogs dang / tshig gi tshogs dang / yi ge'i tshogs mthun pa dag gis ci rigs par rim gyis bkod cing rim gyis sbyar ba gang yin pa'o/ /dbyangs kyis bsnyad pa'i sde zhes bya ba ni gang gis tha ma'i mjug tu tshigs su bcad pa mngon par brjod pa dang /drang ba'i don gyi mdo sde gang yin pa'o/ /lung du bstan pa'i sde zhes bya ba ni gang las nyan thos shi 'phos pa dang 'dus byas pa dang / skye ba lung ston pa dang nges pa'i don gyi mdo sde gang yin pa'o/ /tshigs su bcad pa'i sde zhes bya ba ni rgyas par bshad pa ma yin pa ste/'di ltar rtsa ba gnyis pa'am/ rtsa ba gsum pa'am/ rtsa ba bzhi pa'am/ rtsa ba lnga pa'am/ rtsa ba drug par bsdebs bshad pa gang yin pa'o/ /ched du brjod pa'i sde zhes bya ba ni gang zag gi ming dang rigs yongs su ma brjod ma bstan par phyis dam pa'i chos yun ring du gnas par bya ba dang /bstan pa yun ring du gnas par bya ba'i phyir bshad pa gang yin pa'o/ /gleng gzhi'i sde zhes bya ba ni gang zag gi ming dang rigs brjod cing bstan te bshad pa dang / cung zad 'dul ba dang ldan pa'i byung ba dang bcas/ gleng gzhi dang bcas so sor thar pa'i mdo sde gang yin pa'o//rtogs pa brjod pa'i sde zhes bya ba ni dpe dang bcas par bstan pa ste/ dpe des don gyi ngo bo nyid de rnam par gsal bar 'gyur ba gang yin pa'o/ /de lta bu byung ba'i sde zhes bya ba ni cung zad sngon gyi sbyor ba dang ldan pa gang yin pa'o/ /skyes pa rabs kyi sde zhes bya ba ni 'das pa'i dus la brten te/bcom ldan 'das kyis 'chi 'pho dang skye ba de dang de dag tu byang chub sems dpa'i spyod pa dang dka' ba spyad pa bstan pa gang yin pa'o/ /shin tu rgyas pa'i sde zhes bya ba ni gang las bla na med pa yang dag par rdzogs pa'i byang chub dang / stobs bcu dang /sgrib pa med pa'i ye shes yang dag par bsgrubs pa'i phyir byang chub sems dpa' rnams kyi lam bstan pa gang yin pa'o/ /rmad du byung ba'i chos kyi sde zhes bya ba ni gang las sangs rgyas rnams dang / sangs rgyas kyi nyan thos dge slong rnams dang / dge slong ma rnams dang / dge tshul rnams dang /dge tshul ma rnams dang / dge bsnyen rnams dang / dge bsnyen ma rnams kyi thun mong dang / thun mong ma yin pa dang / de las gzhan pa khyad par 'phags pa'i yon tan khyad par can ngo mtshar rmad du byung bar grags pa dag bstan pa gang yin pa'o/ /gtan la phab par bstan pa'i sde zhes bya ba ni mdo sde 'dren mar byed cing /mdo sde rnam par 'chad par byed pa ma lta bu'i chos mngon pa thams cad do/ /gsung rab tu gtogs pa yan lag bcu gnyis po de dag la mdo sde yang yod/ 'dul ba yang yod/ chos mngon pa yang yod / de la re zhig mdo'i sde dang / dbyangs kyis bsnyad pa'i sde dang / lung du bstan pa'i sde dang / tshigs su bcad pa'i sde dang / ched du brjod pa'i sde gang yin pa de ni nyan thos kyi mdo sde'i sde snod do/ /shin tu rgyas pa'i sde dang / rmad du byung ba'i chos kyi sde gang yin pa de ni byang chub sems dpa'i mdo sde'i sde snod do/ /gleng gzhi'i sde dang /de lta bu byung ba'i sde dang skyes pa rabs kyi sde gang yin pa de ni gnyis ka'i 'dul ba'i sde snod do/ /gtan la dbab par bstan pa'i sde gang yin pa de ni gnyis ka'i chos mngon pa'i sde snod do/ /skabs kha cig nas ni gleng gzhi'i sde dang / gtan la dbab par bstan pa'i sde ma gtogs pa gzhan bcu ni gnyi ga'i mdo sde'i sde snod do//gleng gzhi'i sde ni gnyi ga'i 'dul ba'i sde snod do/ /gtan la dbab par bstan pa'i sde ni gnyi ga'i chos mngon pa'i sde snod do zhes kyang bshad do/ /gang dag byang chub sems dpa' rnams la bshad pa de dag ces bya bas ni theg pa gnyis las khyad par du 'phags pa byang chub sems dpa'i sde snod kyis bsdus pa'i chos gdags pa rnam par gzhag pa yin par bstan to//de ltar chos gdags pa rnam par gzhag pa mdor bstan pa dang / rgyas par bshad pa bstan nas/ da ni de la ji ltar gnas pas gnas pa'i rgyu bstan pa'i tshig gi don la sogs pa bshad par bya ste/de la gnas pa ni thos pa dang bsam pa'i shes rab kyi stobs bskyed pas lung gi chos de dag la gnas pa ste/ de'i phyir byang chub sems dpas zhes bya ba la sogs pa gsungs so/ /de la legs par thos zhes bya ba ni tshig dang don phyin ci ma log par thos pa'o//legs par gzung zhes bya ba ni thos pa de nyid mi brjed par gzung ba'o/ /kha thon byang bar byas zhes bya ba ni gzung ba de dag rnam par bshad pa dang / kha thon du goms par byas pa ste/ de dag gis thos pa'i shes rab kyi stobs bskyed pas lung gi chos de dag la gnas pa bstan to//yid kyis legs par brtags zhes bya ba ni kha thon byang bar byas pa de dag rigs pas yid kyi mngon sum du byas pa'o/ /mthong bas shin tu rtogs par byas nas zhes bya ba ni yid kyi mngon sum du byas pa de dag gi nges pa'i don dang / drang ba'i don gang yin par rigs pas bskyed pa'i blos legs par rtogs par byas pa ste/de dag gis ni bsam pa'i shes rab kyi stobs bskyed pas lung gi chos de dag la gnas pa bstan to/ /de ltar sbyor ba'i rgyu bstan pa de ni 'jig rten pa las khyad par du 'phags pa'i thabs kyi rgyu yin pas 'dir gtso cher smos par zad kyi byang chub sems dpa' zhi gnas yongs su tshol ba dang /lhag mthong la mkhas par 'dod pas ting nge 'dzin gyi tshogs bsrung zhing bsags pa gzhan dag la yang nges par sbyar bar bya dgos te/ de la ting nge 'dzin gyi tshogs bsrung zhing bsags pa gang zhe na/ de ni rnam pa bcu gsum ste/ bdag gi 'byor pa dang /gzhan gyi 'byor pa dang / dge ba'i chos la 'dun pa dang / tshul khrims kyi sdom pa dang / dbang po sdom pa dang / zas kyi tshod rig pa nyid dang / nam gyi cha stod dang cha smad la mi nyal bar sbyor ba'i rjes su brtson pa nyid dang / shes bzhin du spyod pa nyid dang / dge ba'i bshes gnyen dang / dam pa'i chos nyan cing sems pa dang /bar chad med pa dang / gtong ba spel ba dang / dge sbyong gi rgyan dang ldan pa'o/ /de dag ni 'jig rten pa dang / 'jig rten las 'das pa'i lam gang yang rung bas 'dod chags dang bral bar gyur pa'i ting nge 'dzin gyi tshogs rgya cher bstan pa yin te/ de dag gis nyams par gyur pa'i cha dang mthun pa'i chos rnams yongs su spangs shing khyad par du gyur pa ni cha dang mthun pa'i chos rnams la so sor brten pas de'i 'og tu rab tu dben pa dang /sems rtse gcig pa nyid la nges par sbyor ba'i rim gyis/ zhi gnas dang lhag mthong gi dmigs pa yongs su tshol ba bstan par bya ste/'dir dang por sbyor ba'i lam gyis yid la byed pas rab tu phye ba'i zhi gnas sngon du 'gro bar sbyar ro/ /de la rab tu dben pa la sbyor ba bstan pa'i dbang du mdzad nas de gcig pu dben par 'dug ste zhes bya ba gsungs so/ /de zhes bya ba ni byang chub sems dpa'o/ /gcig pu zhes bya ba ni lus dben pa'o//dben pa zhes bya ba ni sems dben par ro/ /'dug ste zhes bya ba ni rab tu dben pa la nges par sbyor ba'o/ /de la rab tu dben pa gang zhe na/ de ni rnam pa gsum ste/ gnas phun sum tshogs pa dang / spyod lam phun sum tshogs pa dang / dben pa phun sum tshogs pa'o/ / de la gnas phun sum tshogs pa zhes bya ba la/ gnas ni rnam pa gsum ste/ dgon pa dang / shing drung dang / khyim gyis stongs pa'o/ /de la dgon pa zhes bya ba ni gnas mal bla gab med pa dang / dur khrod dang / bas mtha'o/ /shing drung zhes bya ba ni nags 'dab po/ /khyim gyis stongs pa zhes bya ba ni gang na khyim gyi gnas bya ba med pa ste/ri khrod dang / ri phug dang / rtswa gseb bo/ /phun sum tshogs pa rnam pa lnga ste/ dang po kho nar gnas dbyibs su shis pa blta na sdug pa/ mdzes pa/ kun dga'i ra ba dang ldan pa/ nags tshal dang ldan pa/ rdzing bu dang ldan pa/ gtsang ba/ nyams dga' ba/ shang shing med pa/ sdong dum dang tsher ma'i gzhi ma yin pa/ rdo ba dang / gseg ma gyo dum mi mang ba gang des mthong na spong ba la brtson pa la gnas par bya ba'i phyir sems mngon par dang bar gyur cing / sems rangs pa dang / rab tu dga' bas spong ba la rab tu rtogs par byed pa gang yin pa de ni gnas phun sum tshogs pa dang po yin no//gzhan yang nyin mo mi sdug pa nyung la/ mtshan mo sgra chung zhing klag cor nyung ba dang / sha sbrang dang / sbrang bu mchu rings dang / rlung dang / nyi ma dang / sdig sbrul gyi reg pa nyung ba gang yin pa de ni gnas phun sum tshogs pa gnyis pa yin no//gzhan yang seng ge dang / stag dang gung dang / chom rkun dang / pha rol gyi dmag tshogs dang / mi dang mi ma yin pa'i 'jigs pa dang / 'jigs su rung ba med pa yid brtan cing bag tsha ba med pa bde ba la reg par gnas par 'gyur ba gang yin pa de ni gnas phun sum tshogs pa gsum pa yin no//gzhan yang gong du chos gos la sogs pa 'tsho ba'i yo byad rkyen du 'bab pa gang dag yin pa de dag tshegs chung ngus 'grub cing / bsod snyoms la sogs pas lus ngal ba med par 'tsho bar 'gyur ba gang yin pa de ni gnas phun sum tshogs pa bzhi pa yin no/ / gzhan yang gang du dge ba'i bshes gnyen gyis yongs su zin par 'gyur zhing / gang dag de la ma phye ba'i gnas rnams 'byed par byed cing / phye ba rnams kyang bsal bar byed pa dang / shes pa dang mthong ba rnam par dag par bya ba'i phyir zab mo'i don dang / tshig shes rab kyis so sor brtags nas legs par rab tu ston par byed pa dang /de lta bu'i tshangs pa mtshungs par spyod pa mkhas pa dag gnas pa gang yin pa de ni gnas phun sum tshogs pa lnga pa yin te/ de dag gcig tu bsdus pa ni gnas phun sum tshogs pa zhes bya'o / /de la spyod lam phun sum tshogs pa gang zhe na/ gnas phun sum tshogs pa de nyid du nyin mo 'chag pa dang /'dug pa dag gis 'da' bar byed cing / mtshan mo'i thun dang po la yang de bzhin byed pa dang / thun bar ma la glo g.yas pa phab ste/ rkang pa rkang pa'i steng du bzhag nas snang ba'i 'du shes dang / dran pa dang shes bzhin dang ldan pa kho na'i 'du shes yid la byed bzhin du thum phras kyis nyal bar byed pa dang /thun tha ma la myur ba myur ba kho nar langs te 'chag pa dang 'dug pa dag gis 'da' bar byed pa dang / 'chag pa na yang 'chag sa dkyus ring zhing ha cang yang mi che bar byas pa'i sa phyogs su 'jig rten dang mi 'gal zhing 'dul ba dang mi 'gal bar 'gro ba dang ldog pa dang ldan pa'i lus kyi las kyis ci ran par 'chag pa dang 'dug pa na yang sangs rgyas kyis gnang ba'i khri 'am khri'u 'am/rtswa bting ba'i steng du skyil mo krung bcas te lus drang por bsrang nas dran pa phyogs par gzhag ste 'dug pa'o/ /de la ci'i phyir skyil mo krung bca' zhe na/ rgyu rnam pa lnga'i phyir te/spyod lam des lus legs par bsgrims nas shin tu sbyangs pa skye ba dang spyod lam des 'dug pas yun ring du 'da' bar byed cing lus ngal bar mi 'gyur ba dang / spyod lam de gzhan du mu stegs can la sogs pa dang thun mong ma yin pa dang / spyod lam des 'dug pa gzhan dag gis mthong na shin tu dang ba skye ba dang /spyod lam de sangs rgyas dang sangs rgyas kyi nyan thos rnams kyis rjes su gnang ba yin pa'i phyir ro/ /de la lus drang por bsrang ba gang zhe na/ lus la bag yangs su drang por gzhag pa dang / sems la g.yo dang tshul 'chos pa med par drang por gzhag pa'o/ /de la lus bag yangs su drang por gzhag pas ni nang gi rmugs pa dang gnyid kyi sems yang dag par blangs te mi gnas la sems la g.yo dang tshul 'chos pa med par drang por gzhag pas ni phyi rol du rnam par g.yeng ba dang rgod pa'i sems yang dag par blangs te mi gnas so//dran pa phyogs par gzhag ste zhes bya ba ni dran pa'i phyir phyogs pa dang /mngon du phyogs par gzhag pa ste/ tshul bzhin yid la byed pa dang ldan pa'i dran pa ni nag po'i phyogs thams cad las phyir phyogs pa yin pa dang / ting nge 'dzin gyi mtshan ma la dmigs pa'i dran pa ni mnyam par gzhag pa'i sa pa'i dmigs pa thams cad la mngon du phyogs pa yin pas de ltar dran pa'i phyir phyogs pa dang /mngon du phyogs par gzhag pa ni dran pa phyogs par gzhag pa zhes bya ste/ de ni spyod lam phun sum tshogs pa zhes bya'o/ /de la dben pa phun sum tshogs pa gang zhe na rnam pa gnyis te/ lus dben pa dang / sems dben pa'o//de la lus dben pa ni khyim na gnas pa dang rab tu byung ba rnams dang gnyis lhan cig mi gnas pa'o/ /sems dben pa ni nyon mongs pa can dang / lung du ma bstan pa'i yid la byed pa spangs te mnyam par gzhag pa'i sa pa'i 'am/ ting nge 'dzin gyi tshogs kyi sbyor ba las byung ba'i yid la byed pa dge ba don dang ldan pa sgom par byed pa ste/de ni rab tu dben pa la nges par sbyor ba zhes bya'o/ /de'i 'og tu sems rtse gcig pa nyid la nges par sbyor ba bstan pa'i dbang du mdzad nas/ nang du yang dag bzhag nas zhes bya ba gsungs so/ /de la nang du yang dag 'jog ces bya ba ni ting nge 'dzin zhes kyang bya/dge ba'i sems rtse gcig pa zhes kyang bya ste/ de yang dang yang du rjes su dran pa dang cha mthun pa la dmigs pa dang / rgyun dang ldan pa dang / kha na ma tho ba med pa dang ldan pa dang / dga' ba dang ldan pa'i sems kyi rgyun gang yin pa'o/ /de la yang dang yang du rjes su dran pa'i sems kyi rgyun zhes bya ba ni mdo'i sde la sogs pa chos gang dag nyan cing gzung ba dang /bla ma la gdams ngag dang rjes su bstan pa thob pa gang yin pa de'i dbang du byas nas mnyam par gzhag pa'i sa pa'i mtshan ma mngon du byas te/ dmigs pa de la rgyun dang ldan pa'i dran pas rjes su 'jug par byed cing nye bar gtod par byed pa'o//cha mthun pa la dmigs pa'i sems kyi rgyun zhes bya ba ni mnyam par gzhag pa'i sa pa'i dmigs pa rnam pa du ma rnam pa mang po sna tshogs gang dag yin pa de dag ni shes bya'i dngos po dang cha mthun pa sems kyi gzugs brnyan rang rig pa yin pas shes bya'i dngos po dang cha mthun pa zhes bya ste/cha mthun pa'i dmigs pa de la mnyam par gzhag pa'i sa pa'i sems kyis dmigs par byed pa'o/ /rgyun dang ldan pa'i sems kyi rgyun zhes bya ba ni dmigs pa de la dran pa rnam par g.yeng ba med pa dang / rab tu chad pa med pa dang / rgyun chags pa dang / rtag tu gus par 'jug pa gang yin pa'o//kha na ma tho ba med pa dang ldan pa'i sems kyi rgyun zhes bya ba ni dmigs pa de nyid la nyon mongs pa med cing bde ba la reg par gnas pa'i dran pas lam du zhugs pa gang yin pa'o/ /dga' ba dang ldan pa'i sems kyi rgyun zhes bya ba ni dmigs pa de nyid la mngon par dga' zhing bde ba la reg par gnas pa'i dran pas lam du zhugs pa gang yin pa'o//sems rtse gcig pa nyid de la yang zhi gnas kyi phyogs kyang yod/ lhag mthong gi phyogs kyang yod de/ de la sems gnas pa dgu gang yin pa de ni zhi gnas kyi phyogs so/ /shes rab kyi spyod pa bzhi gang yin pa de ni lhag mthong gi phyogs te/de ni sems rtse gcig pa nyid la nges par sbyor ba zhes bya'o/ /de tsam gyis na rnal 'byor pa las dang po pas dmigs pa yongs su btsal ba yin te/ de ltar sbyor ba'i rgyu dang ting nge 'dzin gyi tshogs la gnas nas rab tu dben pa dang / sems rtse gcig pa nyid la nges par sbyar ba'i rim gyis sbyor ba'i lam gyi zhi gnas sngon du btang ste dmigs pa yongs su btsal nas da ni rnam par rtog pa dang bcas pa'i gzugs brnyan gyi dmigs pa thob pa dang /sbyor ba'i lam gyi yid la byed pas rab tu phye ba'i lhag mthong gi lam skye ba bstan pa'i dbang du mdzad nas/ ji ltar legs par bsams pa'i chos de dag nyid yid la byed cing zhes bya ba la sogs pa gsungs te/ji ltar legs par bsams pa'i chos de dag nyid ces bya ba ni sngar chos gdags pa rnam par gzhag pa gang dag legs par thos/ legs par gzung / kha thon byang bar byas/ yid kyis legs par brtags mthong bas shin tu rtogs par byas pa'i chos de dag nyid do//yid la byed cing zhes bya ba ni sngar shes bya'i dngos po'i mtshan ma bzung ste/ ji ltar legs par bzung ba'i chos de dag nyid la brten nas mnyam par gzhag pa'i sa pa'i mos pa yid la byas pa'i mthus rnam par rtog pa dang bcas pa'i gzugs brnyan gyi dmigs pa thob pa la sbyor ba'i lam gyi yid la byed pas rab tu phye ba'i lhag mthong gi phyogs kyi yid la byed pa bzhi po bsgrims te 'jug pa'i yid la byed pa dang /skabs su 'chad cing 'jug pa'i yid la byed pa dang / skabs su 'chad pa med par 'jug pa'i yid la byed pa dang / rtsol ba med par 'jug pa'i yid la byed pa dag gis ci rigs par yid la byed pa'o//de tsam gyis na rnal 'byor pa rnam par rtog pa dang bcas pa'i gzugs brnyan gyi dmigs pa thob pa dang / sbyor ba'i lam gyi yid la byed pas rab tu phye ba'i lhag mthong gi lam skyes pa yin te/ de'i dus na ni rnam par rtog pa dang bcas pa'i gzugs brnyan la dmigs pa yin no//de'i 'og tu dmigs pa 'thob pa de nyid la zhi gnas kyi rnam pas sems rtse gcig tu mnyam par 'jog pa'i dus na rnam par mi rtog pa'i gzugs brnyan gyi dmigs pa 'thob pa dang yid la byed pa thob pa'i lam gyi rab tu phye ba mtshan ma'i g.yeng ba zhi ba'i zhi gnas kyi lam skye ba bstan pa'i dbang du mdzad nas/sems gang gis yid la byed pa'i sems de nang du rgyun chags su yid la byed pas yid la byed do zhes bya ba gsungs te/ sems gang gis yid la byed pa'i sems de zhes bya ba ni sngar sbyor ba'i lam gyi yid la byed pas rab tu phye ba'i lhag mthong gi rnam pa'i sems gang gis rnam par rtog pa bcas pa'i gzugs brnyan gyi dmigs pa thob pa la lhag mthong gi phyogs kyi yid la byed pa bzhis ci rigs par yid la byed pa'i sems de nyid do//nang du rgyun chags su yid la byed pas yid la byed do zhes bya ba la nang du zhes bya ba ni zhi gnas kyi rnam pas sems rtse gcig tu mnyam par 'jog pa ste/de yang lhag mthong gi rnam pas sems de dang des mos pa yid la byas pa las byung ba rnam par rtog pa dang bcas pa'i gzugs brnyan blo la snang ba de gnyis/ sbyor ba'i lam gyi gnas skabs des na gzung ba dang 'dzin pa'i rnam pa lta bur gnyis su snang ba de la gnyis su med par sems kyi ngo bo nyid du de kho na nyid yid la byed pas gzugs brnyan gyi dmigs pa ma btang ba'i sems de nyid la zhi gnas kyi rnam pas rang rig pa'i tshul du mnyam par 'jog go zhes bya ba'i tha tshig go//rgyun chags so zhes bya ba ni zhi gnas de nyid la skabs su 'chad pa med par 'jug pa'i yid la byed pas rgyud gcig tu byed pa'i don to//de yang rnal 'byor pa dbang po rnon po sems las su rung ba'i shas che ba dag ni dang po zhi gnas kyi sems rtse gcig pa de nyid la brten nas brtson 'grus kyi stobs dang / skabs su 'chad pa med par 'jug pa'i yid la byed pas rgyud gcig tu byed pa'i dbang gis yongs su 'dris pa'i stobs dang /lhun gyis grub par 'jug pa'i yid la byed pa 'thob cing thal byung ting nge 'dzin du byed pas rgyun chags su yid la byed do/ /rnal 'byor pa dbang po rtul po sems las su rung ba'i shas mi che ba dag ni dang po zhi gnas kyi sems rtse gcig pa de la brten nas sems gnas pa dgu dang /stobs drug dang yid la byed pa bzhi sngar bstan pa'i rim pa kho na bzhin du rgyun chags su yid la byed cing tha mar ting nge 'dzin du byed de/ de ni yid la byed pa thob pa'i lam gyis rab tu phye ba mtshan ma'i g.yeng ba zhi ba'i zhi gnas kyi lam nang gi sems rtse gcig pa nyid kyi ngo bo nyid dang rab tu dbye ba yin no//de tsam gyis na rnal 'byor pa rnam par mi rtog pa'i gzugs brnyan gyi dmigs pa 'thob pa dang / yid la byed pa thob pa'i lam gyis rab tu phye ba'i zhi gnas kyi lam skyes pa yin te/ de'i dus na ni rnam par mi rtog pa'i gzugs brnyan la dmigs pa yin no//de'i 'og tu de ltar yid la byed pa thob pa'i lam gyis rab tu phye ba mtshan ma'i g.yeng ba zhi ba'i zhi gnas kyi lam nang gi sems rtse gcig pa nyid de yangs pa dang / 'phel ba dang / rgyas par gyur pa de'i mjug thogs su sbyor ba mthar thug pa'i lam gyi yid la byed pas rab tu phye ba gnas ngan len gyi g.yeng ba zhi ba'i zhi gnas kyi lam lus dang sems shin tu sbyangs pa'i ngo bo nyid rab tu dbye ba bstan pa'i dbang du mdzad nas de ltar zhugs shing de la lan mang du gnas pa de la lus shin tu sbyangs pa dang /sems shin tu sbyangs pa 'byung ba gang yin la de ni zhi gnas zhes bya ste zhes bya ba gsungs te/de ltar zhugs shing zhes bya ba ni yid la byed pa thob pa'i lam gyis rab tu phye ba mtshan ma'i g.yeng ba zhi ba'i zhi gnas kyi lam nang gi sems rtse gcig pa nyid du zhugs pa'o/ /de la lan mang du gnas pa zhes bya ba ni mtshan ma'i g.yeng ba zhi gnas kyi lam nang gi sems rtse gcig pa nyid de yangs pa dang 'phel ba dang /rgyas par gyur pa zhes bya ba'i tha tshig ste/ de yang sems gnas pa dgu dang / stobs drug dang / yid la byed pa bzhi po dag kun tu bsten cing goms par byas lan mang du byas pa'i rgyus tha mar yongs su 'dris pa'i stobs dang /lhun gyis grub pa'i 'jug pa'i yid la byed pa thob cing ting nge 'dzin du byed nus pa'i dus dang sbyar ro/ /de la lus shin tu sbyangs pa dang / sems shin tu sbyangs pa 'byung ba zhes bya ba ni sbyor ba mthar thug pa'i lam gyi yid la byed pas rab tu phye ba gnas ngan len gyi g.yeng ba zhi ba'i zhi gnas kyi lam gyi ngo bo nyid yin te/de la lus shin tu sbyangs pa zhes bya ba ni lus dben pa las skyes pa lus kyi gnas ngan len gyi gnyen po lus zo mdog bde ba'o/ /sems shin tu sbyangs pa zhes bya ba ni sems dben pa las skyes pa/ sems kyi gnas ngan len gyi gnyen po sems las su rung ba'o//yang gnyen po chos yid la byed pa'i rnam pa thos pas bsgom pas spang bar bya ba'i nyon mongs pa bsrabs pa'i phyir lus shin tu sbyangs pa yin la mthong bas spang bar bya ba'i nyon mongs pa bsrabs pa'i phyir sems shin tu sbyangs pa yin te/ lus ngal ba med pa'i phyir dang / sems yongs su gdung ba med pa'i phyir lus dang sems shin tu sbyangs pa zhes kyang bya'o//de ni zhi gnas zhes bya ste zhes bya ba ni mtshan ma'i g.yeng ba zhi ba'i zhi gnas kyi lam gyi yid la byed pas rab tu phye ba'i lhag mthong rnam par rtog pa dang bcas pa'i gzugs brnyan la dmigs pa'i gnas skabs na ji tsam du goms pa dang /yongs su dag pa'i stobs kyi dbang byas te/ yangs pa dang 'phel ba dang / rgyas par gyur pa de tsam du yid la byed pa thob pa'i lam gyis rab tu phye ba mtshan ma'i g.yeng ba zhi ba'i zhi gnas kyi lam nang gi sems rtse gcig pa nyid kyang yangs pa dang / 'phel ba dang / rgyas par gyur la/ ji tsam du nang gi sems rtse gcig pa nyid de yangs pa dang / 'phel ba dang / rgyas par gyur pa de tsam du de'i mjug thogs su sbyor ba mthar thug pa'i lam gyi yid la byed pas rab tu phye ba gnas ngan len gyi g.yeng ba zhi ba'i zhi gnas kyi lam lus dang sems shin tu sbyangs pa skye ba yang yangs pa dang /'phel ba dang / rgyas par 'gyur ro/ /ji tsam du lus dang sems shin tu sbyangs pa de yangs pa dang / 'phel ba dang / rgyas par gyur pa de tsam du nang gi sems rtse gcig pa de skabs 'dir yang yangs pa dang / 'phel ba dang / rgyas par 'gyur te/ de ltar na chos gnyis po nang gi sems rtse gcig pa nyid dang /lus dang sems shin tu sbyangs pa de gnyis ni gcig la gcig brten pa dang / gcig la gcig rag las pa yin par rig par bya'o/ /de ltar na byang chub sems dpa' zhi gnas yongs su tshol bar byed pa yin no zhes bya ba ni mjug bsdu ba'i tshig yin te/ de ltar na zhes bya ba'i sgras ni byang chub sems dpa' chos yid la byed pa kho nas zhi gnas yongs su tshol bar byed pa yin gyi gzhan gyis ni ma yin no zhes nges par 'byed do/ /zhi gnas zhes bya ba'i tshig gi don ni mtshan ma'i g.yeng ba dang / gnas ngan len gyi g.yeng ba zhi ba'i gnas te/ sems rtse gcig pa nyid ces bya ba'i tha tshig go//yongs su tshol ba zhes bya ba ni sbyor ba'i rgyu yongs su tshol ba'i ma yin gyi sbyor ba mthar thug pa'i lam gyi yid la byed pas rab tu phye ba yongs su tshol ba ste/ de tsam gyis na zhi gnas thob pa yin no zhes bya ba'i don to/ /de ltar zhi gnas yongs su tshol ba bstan nas/da ni byang chub sems dpa' ji ltar lhag mthong la mkhas pa bstan pa'i dbang du mdzad nas/ de lus shin tu sbyangs pa dang / sems shin tu sbyangs pa de thob nas zhes bya ba la sogs pa gsungs te/ de zhes bya ba ni byang chub sems dpa'o/ /lus shin tu sbyangs pa dang / sems shin tu sbyangs pa de thob nas zhes bya ba ni sbyor ba mthar thug pa'i lam gyi yid la byed pas rab tu phye ba'i zhi gnas kyi lam thob nas zhes bya bar sbyar ro//de nyid la gnas te zhes bya ba ni sbyor ba mthar thug pa'i lam gyi yid la byed pas rab tu phye ba'i zhi gnas kyi lam de nyid la gnas te/ sbyor ba mthar thug pa'i lam gyi yid la byed pas rab tu phye ba'i lhag mthong gi lam la mkhas par bya'o zhes bstan to//de yang mnyam par gzhag pa'i sa pa'i sems la gnas pa'i dus na zhi gnas dang lhag mthong gnas skabs tha dad pa ma yin te/ rtag tu 'brel mar byung ba yin mod kyi zung du 'brel pa'i lam ma thob kyi bar du shas che chung gi dbang du mdzad pa dang /mnyam par gzhag pa las yang dag pa ji lta ba bzhin du rab tu shes pa yang dag pa ji lta ba bzhin du rab tu mthong bar gyur pa'i rim pa bstan par bya ba dang / zhi gnas kyi sems de nyid la lhag mthong gi bya ba ji lta bu yin pa bstan pa'i phyir/ 'dir zhi gnas de nyid la gnas te zhes bya ba smos so/ /sems kyi rnam pa spangs nas zhes bya ba la/ sems kyi rnam pa zhes bya ba ni sbyor ba mthar thug pa'i lam gyi yid la byed pas rab tu phye ba'i zhi gnas kyi lam de'i dmigs pa rnam par mi rtog pa'i gzugs brnyan blo la dmigs pa'i rnam par snang ba'o//de spangs pa ni rnam pa de la sbyor ba mthar thug pa'i lam gyi yid la byed pas rab tu phye ba'i lhag mthong gis brtags pa'i ngo bo nyid du mngon par zhen pa med par gzhan gyi dbang gi ngo bo nyid yin par sems tsam du de kho na nyid yid la byed pas yang dag pa ji lta ba bzhin du rab tu shes yang dag pa ji lta ba bzhin du rab tu mthong ba'i dus na sems kyi rnam pa spangs pa zhes bya'o//'o na rtogs pa'i gnas skabs na yongs su grub pa'i ngo bo nyid kyi chos rnams med pa yin la/ de rab tu rnam par 'byed par byed pa'i lhag mthong gi sems ni shes rab kyi spyod pa bzhi dang sgo gsum dang gzhi rab tu dbye ba rnam pa drug la dmigs pa'i rnam pa dang bcas pa yin na/ji ltar rnam pa med pa'i chos rnams rnam pa dang bcas pa'i sems dang gcig tu byas te/ so sor brtags pa dang / mos par byar rung zhe na / dmigs par bya ba'i sems dang / dmigs par byed pa'i sems kyi rnam pa gnyis yod pa ma yin te/sems kyi ngo bo nyid la sems kyi ngo bo nyid kyis rang rig pa'i tshul du dmigs pa yin pas yul dang yul can lta bur mi 'gyur te/ de ni 'phags pa so so rang rig pa'i shes pa 'jig rten las 'das pa rnam par mi rtog pa'i ngo bo nyid yin par bzhed do zhes ston to//ji ltar bsams pa'i chos de dag nyid ces bya ba ni sngar chos gdags par rnam par gzhag pa gang dag legs par thos/ legs par gzung / kha thon byang bar byas/ yid kyis legs par brtags/ mthong bas shin tu rtogs par byas pa'i chos de dag nyid de/de yang dang po dmigs pa yongs su tshol ba'i dus na shes bya'i dngos po mtshan ma bzung ste/ chos de dag la brten nas mos pa yid la byas pa'i mthus rnam par rtog pa dang bcas pa'i gzugs kyi dmigs pa thob pa de nyid la zhi gnas kyi rnam pas rtse gcig tu mnyam par gzhag pa'i dus na rnam par mi rtog pa'i gzugs brnyan gyi dmigs pa thob pa de nyid la ji ltar bsams pa'i chos de dag nyid ces bya'i/dang po dmigs pa yongs su tshol ba'i dus na ji ltar bsams pa'i chos de dag nyid ni ma yin no/ /nang du zhes bya ba ni rnam par mi rtog pa'i gzugs brnyan gyi dmigs pa de nyid sems las phyi rol du ma gyur par nang du sems kyi ngo bo nyid du so sor rtog par byed/mos par byed ces bya bar sbyar ro/ /de'i phyir ting nge 'dzin gyi spyod yul gzugs brnyan du zhes bya ba gsungs te/ ting nge 'dzin gyi zhes bya ba ni mnyam par bzhag pa'i sems rtse gcig pa nyid do//spyod yul du gzugs brnyan du zhes bya ba ni sems de'i rang rig pa'i spyod yul sems kyi ngo bo nyid kyi gzugs brnyan du zhes bya ba'i tha tshig go/ /so sor rtog par byed ces bya ba ni rab tu rnam par 'byed par byed pa'o/ /mos par byed do zhes bya ba ni mos pa yid la byed pa ma yin gyi nges par 'byed do zhes bya ba'i tha tshig go//'o na ting nge 'dzin dang shes rab ni sa mang po pa yin pa'i phyir rtag tu sems dang 'jug pa yin na/ sems kyi rnam pa med na de gnyis kyang med par 'gyur ro/ /de gnyis med na zhi gnas ni ting nge 'dzin la lhag mthong ni shes rab yin pas zhi gnas dang lhag mthong yang med par 'gyur ro//de gnyis med na ji ltar chos de dag ting nge 'dzin gyi spyod yul gzugs brnyan du so sor brtag cing mos par byar rung zhe na/ sems gang yin pa dang ting nge 'dzin gang yin pa dang / shes rab gang yin pa dang / chos de dag gang dag yin pa de dag thams cad ni rtogs pa'i gnas skabs na sems las phyi rol du sbyor ba ma yin pa'i phyir sems bzhin du ngo bo nyid med pa dag yin no//sems kyi ngo bo nyid med pa nyid ni sems kyi ngo bo nyid sems med pa nyid yin te/ de skad du shes rab kyi pha rol tu phyin pa las kyang sems ni sems med pa yin te/ sems kyi rang bzhin ni 'od gsal ba nyid yin no zhes gsungs so/ /de'i phyir sems kyi rnam pa spangs nas ji ltar bsams pa'i chos de dag nyid nang du ting nge 'dzin gyi spyod yul gzugs brnyan du so sor rtog par byed mos par byed do zhes gsungs te/ de ni sbyor ba mthar thug pa'i lam gyi yid la byed pas rab tu lhag mthong sems kyi ngo bo nyid la gnyis med pa'i don rang rig pa'i ngo bo nyid bstan pa yin no//de'i 'og tu shes rab kyi spyod pa bzhi dang sgo gsum dang / gzhi rab tu dbye ba rnam pa drug la dmigs pas de nyid kyi rab tu dbye ba bstan pa'i dbang du mdzad nas/ de ltar zhes bya ba la sogs pa gsungs so//ting nge 'dzin gyi spyod yul gzugs brnyan de dag la zhes bya ba ni sems las phyi rol du ma gyur pa'i chos sems kyi ngo bo nyid de dag la'o/ /shes bya'i don de zhes bya ba ni gnyis med pa'i don de'o/ /rnam par 'byed pa dang / rab tu rnam par 'byed pa dang / yongs su rtog pa dang /yongs su dpyod pa zhes bya ba ni shes rab kyi dpyod pa bzhi zhes kyang bya/ lhag mthong rnam pa bzhi zhes kyang bya ste/ skabs 'dir ni sbyor ba mthar thug pa'i lam gyi yid la byed pas rab tu phye ba'i lhag mthong sems kyi ngo bo nyid la gnyis med pa'i don rang rig pa'i rnam pa yin par sbyar ro/ /'di bzhi'i tshig gi don ni sngar rnam par rtog pa dang bcas pa'i gzugs brnyan gyi dmigs pa bstan pa'i skabs su bshad pa bzhin du rig par bya'o//bzod pa dang / 'dod pa dang / bye brag 'byed pa zhes bya ba gsum gyis ni lhag mthong gi sgo gsum bstan te/ sgo gsum gang zhe na/ mtshan ma tsam gyis rjes su zhugs pa dang /yongs su btsal ba'i rjes su zhugs pa dang / yongs su btsal ba la so sor rtog pa'i rjes su zhugs pa'o/ /de la mtshan ma tsam gyis rjes su zhugs pa zhes bya ba ni gang gi tshe dam pa'i chos thos pa dang / bzung ba dang / dge ba'i bshes gnyen gyi gdams ngag dang rjes su bstan pa la mnyam par gzhag pa'i sa pa'i yid la byed cing sems par mi byed/rtog par mi byed/ 'jal bar mi byed/ nye bar rtog par mi byed pa yin la/ bzod pa zhes bya ba yang sems kyi ngo bo nyid la gnyis med pa'i don de mnyam par gzhag pa'i sa pa'i yid la byed pas yid la byed par bzod pa yin pas na/bzod pa zhes bya ba'i tshig gis ni mtshan ma tsam gyis rjes su zhugs pa'i sgo bstan te/ skabs 'dir ni thams cad kyang sbyor ba mthar thug pa'i lam gyi yid la byed pas rab tu phye ba'i lhag mthong gi sgo yin par sbyar ro/ /yongs su btsal ba'i rjes su zhugs pa zhes bya ba ni gang gi tshe dam pa'i chos thos pa dang /gzung ba'am dge ba'i bshes gnyen gyi gdams ngag dang rjes su bstan pa de la mnyam par gzhag pa'i sa pa'i yid la byed pas yid la byed cing sems par byed/ rtog par byed/ 'jal bar byed/ nye bar rtog par byed pa yin la/ 'dod pa zhes bya ba yang sems kyi ngo bo nyid la gnyis med pa'i don te/mnyam par gzhag pa'i sa pa'i yid la byed pas yid la byed cing sems par byed/ rtog par byed/ 'jal bar byed/ nye bar rtog par byed 'dod pa yin pas na 'dod pa zhes bya ba'i tshig gis ni yongs su btsal ba'i rjes su zhugs pa'i sgo ston to/ yongs su btsal ba la so sor rtog pa'i rjes su zhugs pa zhes bya ba ni gang gi tshe bsams shing brtags la gzhal zhing nye bar brtags nas ji ltar rnam par gzhag pa de bzhin du so sor rtog par byed pa yin la bye brag 'byed pa zhes bya ba yang sems kyi ngo bo nyid la gnyis med pa'i don de mnyam par gzhag pa'i sa pa'i yid la byed pas bsams shing brtags la gzhal zhing nye bar brtags nas ji ltar rnam par gzhag pa de bzhin du so sor rtog cing bye brag 'byed pa yin pas na bye brag 'byed pa zhes bya ba'i tshig gis ni yongs su btsal ba la so sor rtog pa'i rjes su zhugs pa'i sgo bstan to//lta ba dang rtog pa zhes bya bas ni gzhi rab tu dbye ba drug la dmigs pa bstan te/gzhi rab tu dbye ba drug gang zhe na/ don dang / dngos po dang / mtshan nyid dang / phyogs dang / dus dang / rigs pa yongs su tshol bar byed cing yongs su btsal nas kyang de dag la so sor rtog par byed pa ste/ de dag gi tshig gi don yang sngar bstan pa bzhin no/ /lta ba zhes bya ba ni yongs su tshol bar byed pa yin la/rtog pa zhes bya ba ni yongs su btsal nas de dag la so sor rtog pa yin pas na lta ba dang rtog pa zhes bya ba'i tshig gnyis kyis ni gzhi rab tu dbye ba drug po re re la yang yongs su tshol bar byed cing / yongs su btsal nas so sor rtog par byed pa'i rim gyis gzhi rab tu dbye ba drug la dmigs pa bstan to//de ni lhag mthong zhes bya ba ste lhag mthong zhes bya ba ni sbyor ba mthar thug pa'i lam gyis yid la byed pas rab tu phye ba'i lhag mthong gi sems kyi ngo bo nyid la gnyis su med pa'i don rang rig pa'i rnam pas so sor rtog par byed mos par byed pa'i ngo bo nyid dang /shes rab kyi dpyod pa bzhi dang / sgo gsum dang / gzhi rab tu dbye ba drug la dmigs pas de nyid kyi rab tu dbye ba bstan pa gang yin pa de ni lhag mthong zhes bya'o/ /de yang rnal 'byor pa yang dag par rab tu brtson pa de'i sbyor ba mthar thug pa'i lam gyi yid la byed pas rab tu phye ba'i zhi gnas rnam par mi rtog pa'i gzugs la dmigs pa'i gnas skabs na ji tsam du goms pa dang /yongs su dag pa'i stobs kyi dbang du byas te/ yangs pa dang 'phel ba dang rgyas par gyur pa de tsam du sbyor ba mthar thug pa'i lam gyi yid la byed pas rab tu phye ba'i lhag mthong gi ngo bo nyid dang / rab tu dbye ba 'di yang yangs pa dang /'phel ba dang / rgyas par 'gyur la/ ji tsam du lhag mthong gi ngo bo nyid dang / rab tu dbye ba 'di spangs pa dang / 'phel ba dang / rgyas par gyur pa de tsam du mtshan ma'i dbye ba dang gnas ngan len gyi g.yeng ba zhi ba'i zhi gnas kyi ngo bo nyid kyang yangs pa dang / 'phel ba dang rgyas par gyur te/de ltar na chos gnyis po zhi gnas kyi lam dang / lhag mthong gi lam de gnyis ni gcig la gcig brten pa dang / gcig la gcig rag las pa yin par rig par bya ste/ de yan chad ni zung du 'brel par 'jug pa'i lam dang dngos po'i mtha' dang dgos pa yongs su grub pa'i dmigs pa 'thob cing sbyor ba mthar thug pa'i 'bras bu'i yid la byed pa nyid la sbyor bar rig par bya'o//de ltar na byang chub sems dpa' lhag mthong la mkhas pa yin no zhes bya ba ni mjug bsdu ba'i tshig yin te/ de ltar na zhes bya ba'i sgras ni byang chub sems dpa' sems kyi ngo bo nyid la gnyis med pa'i don rang rig pa'i rnam pas yid la byed pa ni lhag mthong la mkhas pa yin gyi gzhan ni ma yin no zhes nges par shes par byed do//lhag mthong zhes bya ba'i tshig gi don ni rang dang spyi'i mtshan nyid dang ldan pa'i chos rnams rnam par gzhag pa'i phyir lta ba ni lhag mthong zhes bya'o//mkhas pa zhes bya ba ni sbyor ba'i lam gyi yid la byed pas rab tu phye ba'i lhag mthong la mkhas pa ma yin gyi/ sbyor ba mthar thug pa'i lam gyi yid la byed pas rab tu phye ba'i lhag mthong la mkhas pa ste/ de tsam gyis na lhag mthong thob pa yin no zhes bya ba'i don to//thob pa'i tshig gi don la sogs pa bshad zin to// //de'i 'og tu 'thob pa'i thabs kyi tshig gi don la sogs pa bshad par bya ste/ 'thob pa'i thabs zhes bya ba ni de ltar zhi gnas yongs su btsal ba dang / lhag mthong la mkhas pa ni sbyor ba mthar thug pa'i lam gyi yid la byed pas rab tu phye ba'i zhi gnas dang lhag mthong thob pa yin te/ji srid du ma thob kyi bar du sbyor ba'i lam gang gis de thos par 'gyur ba'i sgo ni thob pa'i thabs zhes bya'o / /de la mtshams sbyar ba ji lta bu zhe na/ 'dir 'phags pa byams pas gzhan dag 'di snyam du rnal 'byor gyis yongs su bsdus pa'i zhi gnas dang lhag mthong gi lam gyi ngo bo nyid ni mtshan ma'i g.yeng ba zhi ba nang gi sems rtse gcig pa nyid dang /gnas ngan len gyi g.yeng ba lus dang sems sbyangs pa'i ngo bo nyid dang / rab tu dbye ba ni zhi gnas kyi lam gyi ngo bo nyid yin la/ sems kyi ngo bo nyid la gnyis med pa'i don rang rig pa'i rnam pas yid la byed pa'i ngo bo nyid dang /rab tu 'byed pa ni lhag mthong gi lam gyi ngo bo nyid yin te/ de tsam gyis na sbyor ba mthar thug pa'i lam gyi yid la byed pas rab tu phye ba'i zhi gnas dang lhag mthong gi lam gyi ngo bo nyid yongs su rdzogs pa zhes bya na/ byang chub sems dpa'i yid la byed pa thob pa'i lam gyi gnas skabs na rnam par mi rtog pa'i gzugs brnyan gyi dmigs pa yid la byed pa'i tshe/mtshan ma'i g.yeng ba zhi ba'i zhi gnas kyi lam gyi sems rtse gcig pa nyid yid la byed pa na/ ji srid du sbyor ba mthar thug pa'i lam gyi yid la byed pas rab tu phye ba'i zhi gnas gnas ngan len gyi g.yeng ba zhi ba lus dang sems shin tu sbyangs pa nyid ma thob pa de'i bar du yid la byed pa thob pa'i lam gyi gnas skabs na rnam par mi rtog pa'i gzugs brnyan gyi dmigs pa yid la byed pa'i tshe/mtshan ma'i g.yeng ba zhi ba'i zhi gnas kyi lam nang gi sems rtse gcig pa nyid yid la byed pa de la ci zhes bya/byang chub sems dpa'i sbyor ba'i lam gyi yid la byed pa'i gnas skabs na rnam par rtog pa dang bcas pa'i gzugs brnyan gyi dmigs pa yid la byed pa na/ ji srid du sbyor ba mthar thug pa'i lam gyi yid la byed pas rab tu phye ba'i zhi gnas gnas ngan len gyi g.yeng ba zhi ba lus dang sems shin tu sbyangs pa nyid ma thob pa de'i bar du sbyor ba'i lam yid la byed pa'i gnas skabs na/rnam par rtog pa dang bcas pa gzugs brnyan gyi dmigs pa yid la byed pa de la ci zhes bya snyam du sems pa rnams kyi bsam pa la brtags nas bcom ldan 'das byang chub sems dpa' de zhes bya ba la sogs pa'i zhu ba rnam pa gnyis zhus par sbyar te go rims bzhin no//sems la dmigs pa'i sems nang du yid la bgyis pa na zhes bya ba ni yid la byed pa thob pa'i lam gyi gnas skabs na/ rnam par mi rtog pa'i gzugs brnyan gyi dmigs pa yid la byed pa'i tshe mtshan ma'i g.yeng ba zhi ba'i zhi gnas kyi lam nang gi sems rtse gcig pa nyid yid la byed pa na'o//de srid du lus shin tu sbyangs pa dang sems shin tu sbyangs pa ma thob pa de'i bar du zhes bya ba ni ji srid du sbyor ba mthar thug pa'i lam gyi yid la byed pas rab tu phye ba'i zhi gnas gnas ngan len gyi g.yeng ba zhi ba lus dang sems shin tu sbyangs pa nyid ma thob pa de'i bar du'o//yid la bgyid pa de la ci zhes bgyi zhes bya ba ni yid la byed pa thob pa'i lam gyi gnas skabs na rnam par mi rtog pa'i gzugs brnyan gyi dmigs pa yid la byed pa'i tshe mtshan ma'i g.yeng ba zhi ba'i zhi gnas kyi lam nang gi sems rtse gcig pa nyid yid la byed pa de la ci zhes bya ba'i tha tshig go//zhi gnas ni ma yin te zhes bya ba ni zhi gnas kyi lam yongs su rdzogs pa'i sbyor ba mthar thug pa'i lam gyi yid la byed pas rab tu phye ba'i zhi gnas gnas ngan len gyi g.yeng ba zhi ba lus dang sems shin tu sbyangs pa nyid thob pa yin gyi/'di ni yid la byed pa thob pa'i lam gyis rab tu phye ba rnam par mi rtog pa'i gzugs brnyan gyi dmigs pa yid la byed pa'i mtshan ma'i g.yeng ba zhi ba'i zhi gnas kyi lam nang gi sems rtse gcig pa nyid tsam du zad pas da rung zhi gnas kyi lam yongs su rdzogs pa ma yin no zhes bya ba'i tha tshig go//'o na de la ci zhes bya snyam pa la zhi gnas kyi rjes su mthun pa'i mos pa dang mtshungs par ldan pa yin par brjod par bya'o zhes bya ba gsungs te/ de ni sbyor ba mthar thug pa'i lam gyi yid la byed pas rab tu phye ba'i zhi gnas gnas ngan len gyi g.yeng ba zhi ba lus dang sems shin tu sbyangs pa'i rjes su mthun pa'i mos pa yid la byed pa dang mtshungs par ldan pa yin pas de'i phyir de ni sbyor ba mthar thug pa'i lam gyi yid la byed pas rab tu phye ba'i zhi gnas kyi lam yongs su rdzogs pa de'i 'thob pa'i thabs yin no zhes sbyar ro//ji srid du lus dang sems shin tu sbyangs pa ma thob pa de'i bar du zhes bya ni ji srid du sbyor ba mthar thug pa'i lam gyi yid la byed pas rab tu phye ba'i zhi gnas gnas ngan len gyi g.yeng ba lus dang sems shin tu sbyangs pa nyid ma thob pa de'i bar du'o/ /ji ltar legs par bsams pa'i chos de dag nang du ting nge 'dzin gyi spyod yul gzugs brnyan du yid la bgyid pa de la ci zhes bgyi zhes bya ba ni sbyor ba'i lam gyi yid la byed pa'i gnas skabs na rnam par rtog pa dang bcas pa'i gzugs brnyan gyi dmigs pa yid la byed pa de la ci zhes bya zhes bya ba'i tha tshig go//lhag mthong ni ma yin te zhes bya ba ni lhag mthong gi lam yongs su rdzogs pa ni sbyor ba mthar thug pa'i lam gyi yid la byed pas rab tu phye ba'i zhi gnas gnas ngan len gyi g.yeng ba zhi ba lus dang sems shin tu sbyangs pa de thob nas de nyid la gnas te sbyor ba mthar thug pa'i lam gyi yid la byed pas rab tu phye ba'i lhag mthong sems kyi ngo bo nyid la gnyis med pa'i don rang rig pa'i ngo bo nyid dang rab tu dbye ba thob pa yin gyi/'di ni sbyor ba'i lam gyi yid la byed pa'i skabs na rnam par rtog pa dang bcas pa'i gzugs brnyan gyi dmigs pa yid la byed pa tsam du zad pa dang / da dung lhag mthong gi lam yongs su rdzogs pa ma yin no zhes bya ba'i tha tshig go//'o na de la ci zhes bya snyam pa la lhag mthong gi rjes su mthun pa'i mos pa dang mtshungs par ldan pa yin par brjod par bya'o zhes bya ba gsungs te/ de ni sbyor ba mthar thug pa'i lam gyi yid la byed pa'i lhag mthong sems kyi ngo bo nyid la gnyis med pa'i don rang rig pa'i ngo bo nyid dang /rab tu dbye ba'i rjes su mthun pa'i mos pa dang mtshungs par ldan pa yin pas/ de'i phyir sbyor ba mthar thug pa'i lam gyi yid la byed pas rab tu phye ba'i lhag mthong gi lam yongs su rdzogs pa de'i 'thob pa'i thabs yin no zhes bya bar sbyar ro/ /'thob pa'i thabs kyi tshig gi don la sogs pa bshad zin to// //da ni chud mi za bar bya ba'i phyir gdags pa gtan la dbab pa'i tshig gi don la sogs pa bshad par bya ste/ chud mi za bar bya ba'i phyir gdags pa gtan la dbab pa zhes bya ba ni rnal 'byor gyis yongs su bsdus pa'i zhi gnas dang lhag mthong gi lam gyi ngo bo nyid bstan pa 'di las rab tu nyams shing chud za bar mi 'gyur bar bya ba'i phyir bstan pa dang bshad pa gdags pa gtan la dbab pa'o//de ni rnam pa bcu bzhi ste/ rnam par mi rtog pa'i shes pa la gnas pa'i ting nge 'dzin chud mi za bar bya ba'i phyir gdags pa gtan la dbab pa dang / rnam par mi rtog pa'i shes pa'i rtog pa chud mi za bar bya ba'i phyir gdags pa gtan la dbab pa dang /rgyu mtshan gsum sgom pa'i dus mi shes pa rnam par bshig cing chud mi za bar bya ba'i phyir gdags pa gtan la dbab pa dang / cung zad tsam gyis chog par 'dzin pa rnam par gzhig cing chud mi za bar bya ba'i phyir gdags pa gtan la dbab pa dang /dbang po yongs su nyams pa rnam par gzhig cing chud mi za bar bya ba'i phyir gdags pa gtan la dbab pa dang / dge ba'i 'phel ba chud mi za bar bya ba'i phyir gdags pa gtan la dbab pa dang / rtog pa dang g.yo ba gnyen po dang bcas pa chud mi za bar bya ba'i phyir gdags pa gtan la dbab pa dang /sgom pa'i rgyu mtshan yongs su shes pa chud mi za bar bya ba'i phyir gdags pa gtan la dbab pa dang / mngon pa'i nga rgyal rnam par gzhig cing chud mi za bar bya ba'i phyir gdags pa gtan la dbab pa dang / zhi gnas tsam gyis chud mi za bar bya ba'i phyir gdags pa gtan la dbab pa dang /phra ba kun tu 'byung bas yongs su shes pa chud mi za bar bya ba'i phyir gdags pa gtan la dbab pa dang / stong pa nyid la skrag pa rnam par gzhig cing chud mi za bar bya ba'i phyir gdags pa gtan la dbab pa dang / zhi gnas dang lhag mthong sgom pa la ngo bo nyid dang / rgyu dang 'bras bu dang / las dang / sbyor ba dang / 'jug pa'i don las brtsams te/ gdams ngag gi sbyin pa chud mi za bar bya ba'i phyir gdags pa gtan la dbab pa dang / bsgom pa la 'dun pa drag po med pa rnam par gzhig cing chud mi za bar bya ba'i phyir gdags pa gtan la dbab pa'o/ /de la rnam par mi rtog pa'i shes pa la gnas pa'i ting nge 'dzin chud mi za bar bya ba'i phyir gdags pa gtan la dbab pa ni /bcom ldan 'das zhi gnas kyi lam dang / lhag mthong gi lam tha dad ces bgyi 'am/ tha dad pa ma lags zhes bgyi zhes bya ba la sogs pa'o/ /rnam par mi rtog pa'i shes pa rtogs pa chud mi za bar bya ba'i phyir gdags pa gtan la dbab pa ni/bcom ldan 'das rnam par lta bar bgyid pa'i ting nge 'dzin gyi spyod yul gzugs brnyan gang lags pa de zhes bya ba la sogs pa'o/ /rgyu mtshan gsum bsgom pa'i dus mi shes pa rnam par gzhig cing chud mi za bar bya ba'i phyir gdags pa gtan la dbab pa ni/bcom ldan 'das byang chub sems dpa' ji tsam gyis ni gcig tu lhag mthong bsgom pa lags zhes bya ba la sogs pa'o/ /cung zad tsam gyis chog par 'dzin pa rnam par gzhig cing chud mi za bar bya ba'i phyir gdags pa gtan la dbab pa ni/bcom ldan 'das lhag mthong la rnam pa du mchis zhes bya ba la sogs pa'o/ /dbang po yongs su nyams pa rnam par gzhig cing chud mi za bar bya ba'i phyir gdags pa gtan la dbab pa ni/ bcom ldan 'das zhi gnas dang lhag mthong ni chos la gnas pa zhes kyang bgyi zhes bya ba la sogs pa la'o //dge ba 'phel ba chud mi za bar bya ba'i phyir gdags pa gtan la dbab pa ni/ bcom ldan 'das zhi gnas dang lhag mthong ni ma 'dres pa'i chos la dmigs pa zhes kyang bgyi zhes bya ba la sogs pa'o/ /rtog pa dang g.yo ba gnyen po dang bcas pa chud mi za bar bya ba'i phyir gdags pa gtan la dbab pa ni/bcom ldan 'das ji ltar na zhi gnas dang lhag mthong rtog pa dang bcas shing dpyod pa dang bcas pa'i ting nge 'dzin du 'gyur ba lags zhes bya ba la sogs pa'o/ /bsgom pa'i rgyu mtshan yongs su shes pa chud mi za bar bya ba'i phyir gdags pa gtan la dbab pa ni/bcom ldan 'das zhi gnas kyi rgyu mtshan ni gang lags zhes bya ba la sogs pa'o/ /mngon pa'i nga rgyal rnam par gzhig cing chud mi za bar bya ba'i phyir gdags pa gtan la dbab pa ni/ bcom ldan 'das byang chub sems dpa' zhi gnas dang / lhag mthong bsgom pa'i chos so so yang dag par rig pa dang /don so so yang dag par rig pa lags na zhes bya ba la sogs pa'o/ /zhi gnas tsam gyis chud mi za bar bya ba'i phyir gdags pa gtan la dbab pa ni/ bcom ldan 'das thos pa las byung ba'i shes rab kyis don so sor yang dag par rig pa gang lags zhes bya ba la sogs pa'o//phra ba kun tu 'byung bas yongs su shes pa chud mi za bar bya ba'i phyir gdags pa gtan la dbab pa ni/ bcom ldan 'das byang chub sems dpa' zhi gnas dang lhag mthong bsgom pa yid la bgyid pas gang gis mtshan ma gang ji ltar sel bar bgyid lags zhes bya ba la sogs pa'o//stong pa nyid la skrag pa rnam par bshig cing chud mi za bar bya ba'i phyir gdags pa gtan la dbab pa ni/ bcom ldan 'das theg pa chen po la byang chub sems dpa' rnams kyis gang rtogs na/ stong pa nyid kyi mtshan nyid la mngon pa'i nga rgyal ma mchis pas rab tu nyams par mi 'gyur ba'i stong pa nyid kyis stong pa nyid kyi mtshan nyid bsdus pa gang lags zhes bya ba la sogs pa'o//zhi gnas dang lhag mthong bsgom pa la ngo bo nyid dang / rgyu dang 'bras bu dang / las dang sbyor ba dang / 'jug pa'i don las brtsams te/ gdams ngag sbyin pa chud mi za bar bya ba'i phyir gdags pa gtan la dbab pa ni/bcom ldan 'das zhi gnas dang lhag mthong dag gis ting nge 'dzin du zhig bsdus lags zhes bya ba la sogs pa'o/ /bsgom pa la 'dun pa drag po med pa rnam par gzhig cing chud mi za bar bya ba'i phyir gdags pa gtan la dbab pa ni/ bcom ldan 'das byang chub sems dpa' zhi gnas dang lhag mthong la ji ltar bsgrubs na bla na med pa yang dag par rdzogs pa'i byang chub mngon par rdzogs par sangs rgyas par 'gyur ba lags zhes bya ba la sogs pas bstan to//de la dang por rnam par mi rtog pa'i shes pa la gnas pa'i ting nge 'dzin chud mi za bar bya ba'i phyir gdags pa gtan la dbab pa'i tshig gi don la sogs pa bshad par bya ste/rnam par mi rtog pa'i shes pa la gnas pa'i ting nge 'dzin zhes bya ba ni zhi gnas dang lhag mthong gi lam gcig dang tha dad pa'i mtha' gnyis dang bral ba'i shes pa la gnas pa'i ting nge 'dzin te/ de ni mtha' gnyis dang bral bas gnyis su dbyer med pa'i phyir rnam par mi rtog pa yang yin/lam gyi ngo bo nyid yin pas shes pa yang yin la/ de la gnas na sems kyi ting nge 'dzin grub pas rnam par mi rtog pa'i shes pa la gnas pa'i ting nge 'dzin zhes bya'o/ /chud mi za bar bya ba'i phyir gdags pa gtan la dbab pa zhes bya ba ni rnam par mi rtog pa'i shes pa la gnas pa'i ting nge 'dzin gyis rab tu phye ba'i zhi gnas dang lhag mthong gi ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang bshad pas rnam par mi rtog pa'i shes pa la gnas pa'i ting nge 'dzin gdags pa gtan la dbab pa'o//de la mtshams sbyar ba ji lta bu zhe na/'dir 'phags pa byams pas gzhan dag 'di snyam du ci zhig zhi gnas dang lhag mthong gi lam gyi ngo bo nyid de tha dad dam gcig pa yin/ gal te tha dad na ni sbyor ba mthar thug pa'i 'bras bu yid la byed pa'i gnas skabs na yang ji ltar zung du 'brel zhing dngos po'i mtha' dang dgos pa yongs su grub pa'i dmigs pa gcig la dmigs par 'gyur/gal te gcig na ni sbyor ba mthar thug pa'i lam gyi yid la byed pa'i gnas skabs na yang ji ltar rnam par rtog pa dang bcas pa dang / rnam par mi rtog pa'i gzugs brnyan gyi dmigs pa tha dad pa dmigs par 'gyur snyam du sems pa rnams kyi bsam pa la brtags nas/bcom ldan 'das zhi gnas kyi lam dang lhag mthong gi lam tha dad ces bgyi 'am/ tha dad pa ma lags zhes bgyi zhes bya ba zhus par sbyar ro/ /byams pa tha dad pa yang ma yin tha dad pa ma yin pa yang ma yin zhes bya'o zhes bya bas ni bstan pas chud mi za ba'i phyir gdags pa gtan la dbab pa bstan to//ci'i phyir tha dad pa ma yin zhe na zhes bya ba la sogs pas ni bshad pas chud mi za bar bya ba'i phyir gdags pa gtan la dbab pa bstan to/ /de la lhag mthong gi dmigs pa'i sems la dmigs pa'i phyir ro zhes bya bas ni zhi gnas kyi lam yang lhag mthong gi dmigs pa'i sems kyi ngo bo nyid la dmigs pas lam gyi ngo bo dmigs pa tha dad pa nyid du gcig pa'i phyir tha dad pa ma yin no zhes bstan to//rnam par rtog pa dang bcas pa'i gzugs brnyan la dmigs pa'i phyir ro zhes bya bas ni lhag mthong gi lam ni rnam par rtog pa dang bcas pa'i gzugs brnyan la dmigs pas zhi gnas dang dmigs pa tha dad pa'i phyir gcig pa ma yin no zhes bstan to//tshig gi don spyir bsdu na de gnyis lam gyi ngo bo nyid du gcig pa'i phyir na tha dad pa ma yin la/ dmigs pa'i rkyen tha dad pa'i phyir ni gcig pa ma yin te/ gal te lam gyi ngo bo nyid tha dad pa ni sbyor ba mthar thug pa'i 'bras bu yid la byed pa'i gnas skabs na yang zung du 'brel zhing dngos po'i mtha' dang dgos pa yongs su grub pa'i gnas dmigs pa gcig la dmigs par mi 'gyur la/dmigs pa'i rkyen gcig na ni sbyor ba mthar thug pa'i lam gyi yid la byed pa'i gnas skabs na yang rnam par rtog pa dang bcas pa dang rnam par mi rtog pa'i gzugs brnyan gyi dmigs pa tha dad pa la dmigs par mi 'gyur ba'i skyon du 'gyur bas de'i phyir de gnyis ni tha dad pa yang ma yin gcig pa yang ma yin no zhes bstan to//de ltar rnam par mi rtog pa'i shes pa la gnas pa'i ting nge 'dzin gyis rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang bshad pas rnam par mi rtog pa'i shes pa la gnas pa'i ting nge 'dzin gdags pa gtan la dbab pa bstan pa ni rnam par mi rtog pa'i shes pa la gnas pa'i ting nge 'dzin chud mi za bar bya ba'i phyir gdags pa gtan la dbab pa yin no// de'i 'og tu rnam par mi rtog pa'i shes pa rtog pa chud mi za bar bya ba'i phyir gdags pa gtan la dbab pa'i tshig gi don la sogs pa bshad par bya ste/ rnam par mi rtog pa'i shes pa rtog pa zhes bya ba ni ting nge 'dzin gyi spyod yul gzugs brnyan gnyis med pa'i shes pa sems kyi ngo bo nyid dang tha dad pa ma yin par rtogs pa ste/de ni gnyis med pas gnyis su dbyer med pa'i phyir rnam par mi rtog pa yang lam gyi ngo bo nyid yin pas shes pa yang yin la/ des sems dang tha dad pa ma yin par rtogs pa ni rnam par mi rtog pa'i shes pa rtog pa zhes bya'o//chud mi za bar bya ba'i phyir gdags pa gtan la dbab pa zhes bya ba ni rnam par mi rtog pa'i shes pa rtogs pas rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang bshad pas rnam par mi rtog pa'i shes pa rtogs pa gdags pa gtan la dbab pa'o//de la mtshams sbyar ba ji lta bu zhe na/ 'dir 'phags pa byams pas gzhan dag 'di snyam du rnal 'byor pa rnam par mi rtog pa'i shes pa rtogs pa'i ting nge 'dzin gyi spyod yul gzugs brnyan gang yin pa de sems de dang tha dad dam gcig pa yin/gal te tha dad na ni gzung ba dang 'dzin pa'i chos su gyur pas gnyis med pa rnam par mi rtog pa'i shes pa yang ji ltar rtogs par 'gyur/ gal te gcig na ni sems dang gzugs brnyan zhes gdags su yang ji ltar rung snyam du sems kyi bsam pa la brtags nas/ bcom ldan 'das rnam par lta bar bgyid pa'i ting nge 'dzin gyi spyod yul gzugs brnyan gang lags pa de ci lags sems de dang tha dad pa zhes bgyi'am/tha dad pa ma lags zhes bgyi zhes bya ba zhus par sbyar ro/ de la rnam par lta bar bgyid pa zhes bya ba ni lhag mthong dang ldan pa'i rnal 'byor pa rnam par mi rtog pa'i shes pa rtogs pa'o//ting nge 'dzin gyi spyod yul gzugs brnyan gang lags pa de zhes bya ba ni zhi gnas dang lhag mthong gi sems kyi ting nge 'dzin gyi spyod yul rnam par rtog pa dang bcas pa dang / rnam par mi rtog pa'i gzugs brnyan gang yin pa de'o/ /sems de dang zhes bya ba ni zhi gnas dang lhag mthong gi sems de dang ngo //byams pa tha dad pa ma yin zhes bya'o zhes bya ba ni bstan pas chud mi za bar bya ba'i phyir gdags pa gtan la dbab pa bstan to/ /ci'i phyir tha dad pa ma yin zhe na zhes bya ba la sogs pas ni bshad pas chud mi za bar bya ba'i phyir gdags pa gtan la dbab pa bstan to/ /de la gzugs brnyan de rnam par rig pa tsam du zad pa'i phyir te zhes bya bas ni gzugs brnyan de sems kyi ngo bo nyid yin pa'i phyir sems de dang tha dad pa ma yin te/de ltar tha dad pa ma yin par rtogs pa nyid rnam par mi rtog pa'i shes pa rtogs pa yin no zhes bstan to/ /'o na sems dang gzugs brnyan zhes gdags su yang ji ltar rung snyam pa las rnam par shes pa ni dmigs pa rnam par rig pa tsam gyis rab tu phye ba yin no zhes ngas bshad do zhes bya ba gsungs te/rnam par shes pa nyid gzugs brnyan gyi dmigs pa lta bur snang bas sems dang gzugs brnyan zhes gdags su yang rung la/ sems kyi ngo bo nyid las tha mi dad pa'i gzugs brnyan de ni rang rig pa'i tshul gyis rnam par rig pa ni rnam par shes pa'i mtshan nyid yin no zhes bstan to//de ltar tha dad pa ma yin na/ dper na mig nyid kyis mig nyid la brtag tu mi rung ba bzhin du sems nyid kyis sems nyid la ji lta bur brtag tu rung snyam pa dag gi phyir/bcom ldan 'das ting nge 'dzin gyi spyod yul gzugs brnyan de gal te sems de las tha dad pa ma lags na/ sems de nyid kyis sems de nyid la ji ltar rtog par bgyid lags zhes bya ba zhus so/ /de la gzhan dag 'di snyam du rtog par byed pa'i sems ni byed pa por gyur pa yin la brtag par bya ba gzugs brnyan ni las su gyur pa yin na/ji ltar de gnyis tha dad pa ma yin par rung ste/ 'jig rten ni byed pa po dang las ni tha dad par snang ba'i phyir ro snyam pa la/ yang dag par na tha dad pa ma yin pa nyid du bstan pa'i phyir/ byams pa de la chos gang yang chos gang la yang rtog par mi byed mod kyi zhes bya ba gsungs te/chos gang yang zhes bya ba ni byed pa por bstan pa yin la/ chos gang la yang zhes bya ba ni las su bstan pa yin te/ de ltar byed pa po dang las su gyur pa'i tshul gyis rtog par byed pa ni 'ga' yang med par ston to/ /ji lta zhe na chos gcig pu ni 'ga' yang med pas rtog par byed pa dang brtag par bya ba byed pa po dang /las su gyur pa 'ga' yang med pa'i phyir dang / yang dag par na sems dang sems las byung ba dang / sa rdul phra rab re re mi snang ba'i phyir byed pa po dang / las kyi tha snyad kyang med la/ 'dus pa dag la yang kun rdzob yin pa'i phyir ltos pa dang bcas pa'i phyir dang mthu med pa'i phyir byed pa po dang las kyi tha snyad med pa'i phyir dang dngos po rang dbang can ni 'ga' yang med pa yin na/'jig rten pa ni byed pa po la mngon par zhen pas bya ba dag 'jug par byed par zad de/ byed pa po mi rigs pa'i phyir bya ba dang las kyang mi rigs pa'i phyir ro//'o na sems kyi ngo bo nyid gcig tu de ji ltar gzung ba dang 'dzin pa'i rnam par snang bar 'gyur zhe na/ 'on kyang de skyes pa'i sems gang yin pa de de ltar snang ngo zhes bya ba gsungs te/ thog ma med pa'i dus nas kun brtags pa'i ngo bo nyid la mngon par zhen pa'i bag chags kyis yongs su bsgos pa'i kun gzhi'i rnam par shes pa nyid de ltar snang ngo zhes bya ba'i tha tshig go//de la chos gang yang chos gang la yang rtog par mi byed ces bya ba ni yongs su grub pa'i sems yongs su dag pa bstan la/ de ltar skyes pa'i sems gang yin pa de de ltar snang ngo zhes bya bas ni gzhan gyi dbang gis sems 'khrul par bstan to//byams pa 'di lta ste dper na zhes bya ba la sogs pas ni tha dad pa ma yin pa'i don de nyid gsal bar bya ba'i phyir dpe ston te/ dper na me long gi dkyil 'khor la gzugs brnyan gzhan 'byung ba med par gzugs nyid gzugs brnyan lta bur snang ba ni gzugs brnyan mthong ngo snyam du sems pa dang 'dra bar sems nyid gzugs brnyan lta bur snang bar zad kyi/sems las gzhan pa'i gzugs brnyan med do zhes bya bar ston to/ /'di la smra ba po dag me long gi dkyil 'khor dang gzugs la brten nas gzugs brnyan gzhan zhig 'byung bas brten te byung ba gang yin pa de dag thams cad ni yod pa yin na dpe 'di ji ltar rung bar 'gyur zhes zer ba dag kyang yod de/de dag la 'di skad ces gzugs dang gzugs brnyan gyi rnam pa'i rnam par shes pa las gzhan pa'i don byed pas rdzas gzhan ni med do/ /ji ltar don med ce na/ don med kyang rnam par shes pa skye ba snang ba'i phyir te/'di ltar 'das pa dang ma 'ongs pa dang rmi lam la sogs pa la don med par yang de'i rnam pa'i rnam par shes pa skye ba snang ba lta bu'o/ /yang gcig tu na don mtshungs pa la mos pa'i dbang gis rnam par rig pa tha dad pa dmigs pas kyang sems nyid gzugs brnyan du snang bar rigs te nges pa yin te/dper na chu klung gi dngos po gcig la dud 'gro rnams kyis ni gnas kyi rnam par mthong / yi dgas rnams kyis ni rnag gi rnam par mthong / mi rnams kyis ni chu'i rnam pa lta bur mthong ba dang / lha rnams kyis ni sa gzhi baiDU r+ya'i rang bzhin du mthong ba lta bu'o zhes brjod pas bya'o//de ltar mnyam par gzhag pa'i sa pa'i ting nge 'dzin gyi spyod yul gzugs brnyan de 'ba' zhig sems dang tha dad pa ma yin par zad dam/ 'on te mnyam par ma bzhag pa'i sa pa'i sems can rnams kyi spyod yul gzugs la sogs par snang ba de yang sems dang tha dad pa ma yin snyam pa dag gi phyir/bcom ldan 'das sems can rnams kyi zhes bya ba la sogs pa zhus te/ gzugs la sogs par snang ba zhes bya ba ni sngon po la sogs pa'i rdzas so/ /sems kyi gzugs brnyan zhes bya ba ni sems la snang bar gyur pa'o/ /rang bzhin du gnas zhes bya ba ni mnyam par gzhag pa'i sa pa rnams kyi spyod yul tha mal par gnas pa'o//byams pa tha dad pa ma yin zhes bya ste zhes bya ba ni bstan pa'o/ /byis pa phyin ci log gi blo can rnams ni zhes bya ba la sogs pa bshad pa ste/ des na ci'i phyir sems las tha dad pa lta bur snang snyam pa la/ byis pa de kho na nyid ma mthong ba lta ba rab rib kyis nyams par byas pa rnams ni phyi rol gyi don med bzhin du yod par mthong ba yin no zhes bstan to//de ltar rnam par mi rtog pa'i shes pas nyogs pa dang / rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang bshad pas rnam par mi rtog pa gdags pa gtan la dbab pa bstan pa ni rnam par mi rtog pa'i shes pa rtogs pa chud mi za bar bya ba'i phyir gdags pa gtan la dbab pa yin no//de'i 'og tu rgyu mtshan gsum bsgom pa'i dus mi shes pa rnam par gzhig cing chud mi za bar bya ba'i phyir gdags pa gtan la dbab pa'i tshig gi don la sogs pa bshad par bya ste/rgyu mtshan gsum bsgom pa'i dus mi shes pa zhes bya ba ni lhag mthong gi rgyu mtshan dang / zhi gnas kyi rgyu mtshan dang / btang snyoms kyi rgyu mtshan bsgom pa'i dus mi shes pa'o/ /rnam par gzhig cing chud mi za bar bya ba'i phyir gdags pa gtan la dbab pa zhes bya ba ni mi shes pa de rnam par gzhig cing rgyu mtshan gsum bsgom pa'i dus shes pas rab tu phye ba'i zhi gnas dang lhag mthong gi lam gyi ngo bo nyid de la rab tu nyams par mi 'gyur zhing chud mi za bar bya ba'i phyir bstan pa dang bshad pas rgyu mtshan gsum bsgom pa'i dus shes pa gdags pa gtan la dbab pa'o//de la mtshams sbyar ba ji lta bu zhe na/ 'dir 'phags pa byams pas gzhan dag 'di snyam du rnal 'byor yongs su bsdus pa'i zhi gnas dang lhag mthong gi ngo bo nyid la 'di la sbyor ba ni mi mthun pa'i phyogs spong ba dang / gnyen po 'phel ba'i dus shes par bya dgos na/ de la lhag mthong gi rgyu mtshan bsgom pa'i dus ni gang /zhi gnas kyi rgyu mtshan bsgom pa'i dus ni gang / btang snyoms kyi rgyu mtshan bsgom pa'i dus ni gang snyam du sems pa rnams kyi bsam pa la brtags nas/ bcom ldan 'das byang chub sems dpa' zhes bya ba la sogs pa zhu ba rnam pa drug zhus par sbyar ro/ /ji tsam gyis na gcig tu lhag mthong bsgom pa lags zhes bya bas ni lhag mthong gi rgyu mtshan bsgom pa'i dus gang lags zhes zhus pa yin no//gang gi tshe rgyun chags su yid la byed pas sems kyi mtshan nyid yid la byed pa'o zhes bya bas ni bstan pas lhag mthong gi rgyu mtshan bsgom pa'i dus mi shes pa rnam par gzhig cing chud mi za bar bya ba'i phyir gdags pa gtan la dbab pa bstan te/de la rgyun chags su yid la byed pas zhes bya bas ni lhag mthong bstan te/ sbyor ba mthar thug pa'i lam gyi yid la byed pa'i gnas skabs kyi lhag mthong sems kyi ngo bo nyid la gnyis med pa'i don rang rig pa'i ngo bo nyid dang / shes rab kyi spyod pa bzhi dang /sgo gsum dang gzhi rab tu dbye ba rnam pa drug la dmigs pa'i sems kyi ngo bo nyid la gnyis med pa'i don de rgyun chags su yid la byed pa ni lhag mthong gi lam gyi ngo bo nyid yin par bstan to/ /sems kyi mtshan nyid ces bya ba ni lhag mthong gi rgyu mtshan ni rnam pa gnyis te dmigs pa'i rgyu mtshan dang /gzhi'i rgyu mtshan no/ /de la dmigs pa'i rgyu mtshan ni lhag mthong yid la byed pa thob pa'i rgyu mtshan te/ lhag mthong gi dmigs pa ting nge 'dzin gyi spyod yul rnam par rtog pa dang bcas pa'i gzugs brnyan gang yin pa'o/ /gzhi'i rgyu mtshan ni lhag mthong gi lam yongs su dag pa'i rgyu ste/lhag mthong gi sems yongs su bsgoms nas de'i 'og tu lhag mthong gi lam yongs su dag par bya ba'i phyir zhi gnas kyi sems kyi mtshan ma nyid la sbyor ba gang yin pa ste/ skabs 'dir ni dmigs pa'i rgyu mtshan nyid gzung bar bya'o/ /yid la byed pa'o zhes bya ba ni lhag mthong gi rgyu mtshan sgom pa'i dus bstan te/zhi gnas kyi sems yongs su bsgoms pa'i dus sam/ ma bsgoms pa'i dang po'i dus su ni lhag mthong sgom pa'i dus yin te/ dus der lhag mthong gi rgyu mtshan de lhag mthong gi phyogs yid la byed pa bzhi po sngar bstan pa dag gis yid la byas na bying ba la sogs pa mi mthun pa'i phyogs spong zhing shes bya'i dngos po yang dag pa ji lta ba bzhin du rab tu shes pa la sogs pa gnyen po 'phel bar 'gyur ro zhes bya ba'i tha tshig go//ji tsam gyis na gcig tu zhi gnas bsgom pa lags zhes bya bas ni zhi gnas kyi rgyu bsgom pa'i dus mtshan gang lags zhus pa yin no//gang gi tshe rgyun chags su yid la byed pas bar chad med pa'i sems yid la byed pa'o zhes bya bas ni bstan pas zhi gnas kyi rgyu mtshan bsgom pa'i dus mi shes pa rnam par gzhig cing chud mi za bar bya ba'i phyir gdags pa gtan la dbab pa bstan te/ de la rgyun chags su yid la byed pas zhes bya bas ni zhi gnas bstan te/sbyor ba mthar thug pa'i lam gyi yid la byed pa'i zhi gnas mtshan ma dang gnas ngan len gyi g.yeng ba zhi ba'i ngo bo nyid dang sems gnas pa dgu dang stobs drug dang yid la byed pa bzhi'i rab tu dbye ba dang bcas pas sems rtse gcig tu rgyun chags su yid la byed pa ni zhi gnas kyi lam gyi ngo bo nyid yin par bstan to//bar chad med pa'i sems zhes bya bas ni zhi gnas kyi rgyu mtshan bstan te/ rgyu mtshan ni rnam pa gnyis te/ dmigs pa'i rgyu mtshan dang / zhi ba'i rgyu mtshan no/ /de la dmigs pa'i rgyu mtshan ni zhi gnas kyi yid la byed pa thob pa'i rgyu ste/ zhi gnas kyi dmigs pa'i ting nge 'dzin gyi spyod yul rnam par mi rtog pa'i gzugs brnyan gang yin pa'o//gzhi'i gzugs brnyan ni zhi gnas kyi lam yongs su dag pa'i rgyu ste/ zhi gnas kyi sems yongs su bsgoms nas de'i 'og tu zhi gnas kyi lam yongs su dag par bya ba'i phyir lhag mthong gi sems kyi mtshan ma nyid la sbyor ba gang yin pa ste/skabs 'dir ni dmigs pa'i rgyu mtshan nyid gzung bar bya'o/ /yid la byed pa'o zhes bya ba ni zhi gnas kyi rgyu mtshan bsgom pa'i dus bstan te/ sems rgod par gyur pa'i dus sam rgod du dogs pa'i dus su ni zhi gnas bsgom pa'i dus yin te/dus de zhi gnas kyi rgyu mtshan de zhi gnas kyi phyogs kyi yid la byed pa bzhi po sngar bstan pa dag gis yid la byas na rgod pa la sogs pa mi mthun pa'i phyogs spong zhing nang gi sems rtse gcig pa nyid dang / lus dang sems shin tu sbyangs pa la sogs pa gnyen po 'phel bar 'gyur ro zhes bya ba'i tha tshig go//ji tsam gyis na zhi gnas dang lhag mthong gnyis 'dres par gyur te mnyam par zung du 'jug pa lags zhes bya bas ni btang snyoms kyi rgyu mtshan bsgom pa'i dus gang lags zhes pa yin no/ /gang gi tshe sems rtse gcig pa nyid yid la byed pa'o zhes bya bas ni bstan pas btang snyoms [(]gyi [,]kyi [)]rgyu mtshan bsgom pa'i dus mi shes pa rnam par gzhig cing chud mi za bar bya ba'i phyir gdags pa gtan la dbab pa ste /de la sems rtse gcig pa nyid ces bya bas ni btang snyoms dang btang snyoms kyi rgyu mtshan bstan te/ sbyor ba mthar thug pa'i 'bras bu'i yid la byed pa'i gnas skabs kyi btang snyoms dngos po'i mtha' dang /dgos pa yongs su grub pa'i dmigs pa la/ kun nas nyon mongs pa'i sems mnyam pa dang / rnal du bab pa dang / rang gi ngang gis 'jug pa dang / sems nyams bde ba dang / sems las su rung ba'i rjes su rtsol ba med pa'i bya bas gdod cing /dmigs pa de la rgyun chags su brtsal mi dgos par sems rtse gcig pa nyid lhun gyis grub pa ni btang snyoms kyi lam gyi ngo bo nyid yin par bstan to/ /rgyu mtshan ni rnam pa gnyis te/ dmigs pa'i rgyu mtshan dang / gzhi'i rgyu mtshan no/ /de la dmigs pa'i rgyu mtshan ni btang snyoms kyi yid la byed pa thob pa'i rgyu ste/dngos po'i mtha' dang / dgos pa yongs su grub pa'i dmigs pa gang yin pa'o/ /gzhi'i rgyu mtshan ni btang snyoms kyi lam yongs su dag pa'i rgyu ste/ btang snyoms kyi sems de nyid ches shin tu gong nas gong du yongs su dag par bya ba'i phyir dmigs pa de nyid la ren par spyod cing /brtson 'grus ha cang lhag par brtson par mi byed pa gang yin pa ste/ skabs 'dir ni dmigs pa'i rgyu mtshan nyid gzung bar bya'o/ /yid la byed pa'o zhes bya bas ni btang snyoms kyi rgyu mtshan bsgom pa'i dus bstan te/ zhi gnas dang lhag mthong gi phyogs la sems bying ba dang rgod pa med pa'i dus su ni btang snyoms kyi rgyu mtshan bsgom pa'i dus yin te/dus der btang snyoms kyi rgyu mtshan de lhun gyis grub par yid la byed pas yid la byas na sems zhum pa dang rgod pa la sogs pa mi mthun pa'i phyogs thag ring du spong zhing dngos po'i mtha' dang /dgos pa yongs su grub pas rab tu phye ba spangs pa phun sum tshogs pa dang / ye shes phun sum tshogs pa'i 'bras bu thob par 'gyur ro zhes bya ba'i tha tshig go/ /bcom ldan 'das sems kyi mtshan ma gang lags zhes bya bas ni sngar lhag mthong gi dmigs pa'i rgyu mtshan bstan pa de'i bshad pa zhus pa yin no//byams pa lhag mthong gi dmigs pa ting nge 'dzin gyi spyod yul rnam par rtog pa dang bcas pa'i gzugs brnyan gang yin pa'i zhes bya bas ni bshad pas/ lhag mthong gi rgyu mtshan bsgom pa'i dus mi shes pa rnam par gzhig cing chud mi za bar bya ba'i phyir gdags pa gtan la dbab pa bstan te/sems kyi mtshan ma zhes bya ba ni sems kyi rnam pa ste/ rnam par rtog pa dang bcas pa'i gzugs brnyan yin par bstan to/ /bar chad ma mchis pa'i sems gang lags zhes bya bas ni sngar zhi gnas kyi dmigs pa'i rgyu mtshan bstan pa de'i bshad pa zhus pa yin no/ / byams pa zhi gnas kyi dmigs pa gzugs brnyan la dmigs pa'i sems gang yin pa'o zhes bya bas ni bshad pas zhi gnas kyi rgyu mtshan bsgom pa'i dus mi shes pa rnam par bshig cing chud mi za bar bya ba'i phyir gdags pa gtan la dbab pa bstan te/ bar chad med pa'i sems zhes bya bas ni de la bar chad med par lhag mthong 'byung ba ste/rnam par mi rtog pa'i gzugs brnyan la dmigs pa zhi gnas kyi sems nyid yin par bstan to/ /sems rtse gcig pa nyid gang lags zhes bya bas ni sngar btang snyoms kyi dmigs pa'i rgyu mtshan bstan pa de'i bshad pa zhus pa yin no/ /ting nge 'dzin gyi spyod yul gzugs brnyan de la 'di ni rnam par rig pa tsam yin no zhes bya bar rtogs te/de rtogs nas kyang de bzhin du yid la byed pa gang yin pa'o zhes bya bas ni bshad pas btang snyoms kyi rgyu mtshan bsgom pa'i dus mi shes pa rnam par gzhig cing chud mi za bar bya ba'i phyir gdags pa gtan la dbab pa bstan te/sems rtse gcig pa nyid ces bya bas dmigs pa gcig tu gyur pa ste/ gzugs brnyan rnam pa gnyis kyi dmigs pa las yang dag par 'das nas/ dngos po'i mtha' dang dgos pa yongs su grub pa'i dmigs pa gcig la zung du 'brel pa'i sems so/ /de ltar rgyu mtshan gsum bsgom pa'i dus mi shes pa de rnam par bshig cing rgyu mtshan gsum bsgom pa'i dus shes pas rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang bshad pas rgyu mtshan gsum bsgom pa'i dus shes pa gdags pa gtan la dbab pa bstan pa ni rgyu mtshan gsum bsgom pa'i dus mi shes pa rnam par gzhig cing chud mi za bar bya ba'i phyir gdags pa gtan la dbab pa yin no//de'i 'og tu cung zad tsam gyis chog par 'dzin pa rnam par gzhig cing chud mi za bar bya ba'i phyir gdags pa gtan la dbab pa'i tshig gi don la sogs pa bshad par bya ste/cung zad tsam gyis chog par 'dzin pa zhes bya ba ni zhi gnas dang lhag mthong gi lam gyi ngo bo nyid ni gzhi tha dad pa las byung ba dang / rnam pa tha dad pa dang / gnas skabs tha dad pa du ma yod pas rnal 'byor pas de dag thams cad yongs su shes par bya zhing kun chub par bya dgos pa yin na/ de dag la 'ga' tsam zhig yongs su shes par byas shing kun chub par byas pas chog par 'dzin pa ni cung zad tsam gyis chog par 'dzin pa zhes bya'o/ /rnam par gzhig cing chud mi za bar bya ba'i phyir gdags pa gtan la dbab pa zhes bya ba ni cung zad tsam gyis chog par 'dzin pa de rnam par gzhig cing /cung zad tsam gyis chog par mi 'dzin pas rab tu phye ba'i zhi gnas dang lhag mthong gi lam ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang bshad pas cung zad tsam gyis chog par mi 'dzin par gdags pa gtan la dbab pa'o/ /de la mtshams sbyar ba ji lta bu zhe na/'dir 'phags pa byams pas gzhan dag 'di snyam du rnal 'byor gyis yongs su bsdus pa'i zhi gnas dang lhag mthong gi lam gyi ngo bo nyid de gzhi gang las byung ba rnam pa du yod gnas skabs gang dag na yod snyam du sems pa rnams kyi bsam pa la brtags nas/ bcom ldan 'das lhag mthong la rnam pa du mchis zhes bya ba la sogs pa zhu ba rnam pa gnyis zhus par sbyar ro//byams pa rnam pa gsum ste zhes bya ba la sogs pas ni bstan pas lhag mthong cung zad tsam gyis chog par 'dzin pa rnam par gzhig cing chud mi za bar bya ba'i phyir gdags pa gtan la dbab pa bstan to/ /mtshan ma las byung ba dang /yongs su tshol ba las byung ba dang / so sor rtog pa las byung ba'o zhes bya ba ni lhag mthong gi lam gyi sgo gsum po mtshan ma tsam gyi rjes su zhugs pa dang / yongs su btsal ba'i rjes su zhugs pa dang / yongs su btsal ba la so sor rtog pa'i rjes su zhugs pa zhes ji skad bstan pa dang go rims bzhin du sbyar ro//de yang thos pa las byung ba dang / bsams pa las byung ba dang / bsgoms pa las byung ba yin no/ /yang dmigs pa rnam par dag pas rab tu phye ba dang / lam rnam par dag pas rab tu phye ba dang / dri ma med pas rnam par dag pa dang / rang bzhin rnam par dag pas rab tu phye ba yang yin te/de la dmigs pa rnam par dag pa zhes bya ba ni rtog pa dang bcas dpyod pa dang bcas pa'i ting nge 'dzin gyi spyod yul dam pa'i chos thos pa dang / gzung ba 'am/ dge ba'i bshes gnyen gyi gdams ngag dang rjes su bstan pa la mnyam par gzhag pa'i sa pa yid la byed pa dmigs pa'o//lam rnam par dag pa zhes bya ba ni de nyid la dmigs pa rnam par dag pas dmigs par byed cing / bsams pa las byung ba'i shes rab kyis sems par byed/ rtog par byed/ 'jal bar byed/ nye bar rtog par byed pa'i lam mo/ /dri ma med pa rnam par dag pa zhes bya ba ni de nyid la lam rnam par dag pas bsams shing brtags la gzhal zhing /nye bar brtags nas bsgoms pa las byung ba'i shes rab kyis ji ltar rnam par gzhag pa de bzhin du so sor rtog par byed pa na/ nyon mongs pa'i sgrib pa rnam par dag pas sems rnam par grol ba'o/ /rang bzhin rnam par dag pa zhes bya ba ni de nyid kyi tshe shes bya'i sgrib pa rnam par dag pas shes rab rnam par grol ba'o//yang ltos pa'i rigs pa dang / bya ba byed pa'i rigs pa'i mtshan ma las byung ba dang / 'thad pas bsgrubs pa'i rigs pas yongs su tshol ba las byung ba dang / chos nyid kyi rigs pas so sor rtog pa las byung ba yin no//mtshan ma las byung ba gang zhe na zhes bya ba la sogs pas ni bshad pas lhag mthong cung zad tsam gyis chog par 'dzin pa'i rnam pa gzhig cing chud mi za bar bya ba'i phyir gdags pa gtan la dbab pa bstan to// //ting nge 'dzin gyi spyod yul rnam par rtog pa dang bcas pa'i gzugs brnyan 'ba' zhig yid la byed pa'i lhag mthong gang yin pa'o zhes bya ba ni mtshan ma tsam gyis rjes su zhugs pa'i sgo yin te/de ni sbyor ba'i lam gyi yid la byed pas rab tu phye ba'i lhag mthong thos pa las byung ba dang / dmigs pa rnam par dag pas rab tu phye ba dang / ltos pa'i rigs pa dang /bya ba byed pa'i mtshan ma'i rigs pa las byung ba yin no/ /de dang der shes rab kyis shin tu legs par ma rtogs pa'i chos de dag nyid shin tu legs par rtogs par bya ba'i phyir yid la byed pa'i lhag mthong gang yin pa'o zhes bya bas ni yongs su btsal ba'i rjes su zhugs pa'i sgo yin te/de ni sbyor ba mthar thug pa'i lam gyi yid la byed pas rab tu phye ba'i lhag mthong bsams pa las byung ba dang / lam rnam par dag pas rab tu phye ba dang / 'thad pas bsgrubs pa'i rigs pas yongs su tshol ba las byung ba yin no/ /de la de dang der zhes bya ba ni sbyor ba mthar thug pa'i lam gyi yid la byed pas rab tu phye ba'i gzugs brnyan de dang de la'o/shes rab kyis zhes bya ba ni bsams pa las byung ba dang / lam rnam par dag pas rab tu phye ba dang / 'thad pas bsgrubs pa'i rigs pas yongs su tshol ba las byung ba'i shes rab kyis so/ /shin tu legs par ma rtogs pa'i chos de dag nyid ces bya ba ni sems kyi ngo bo nyid la gnyis med pa'i don rang rig par ma gyur pa'i gzugs brnyan gyi chos de dag nyid do//de dang der shes rab kyis shin tu legs par rtogs pa'i chos rnams la rnam par grol bas shin tu legs par bde ba dang reg par bya ba'i phyir yid la byed pa'i lhag mthong gang yin pa'o zhes bya bas ni yongs su btsal ba la so sor rtog pa'i rjes su zhugs pa'i sgo yin te/de ni sbyor ba mthar thug pa'i 'bras bu'i yid la byed pas rab tu phye ba'i lhag mthong bsgoms pa las byung ba dang / dri ma med par rnam par dag pa dang / rang bzhin rnam par dag pas rab tu phye ba dang /chos nyid kyi rigs pas so sor rtog pa las byung ba yin no/ /de la der zhes bya ba ni sbyor ba mthar thug pa'i 'bras bu yid la byed pas rab tu phye ba'i don rnam par rig pa tsam nyid kyis rab tu phye ba sems kyi ngo bo nyid de dang de la'o/ /shes rab kyis zhes bya ba ni bsgoms pa las byung ba dang / dri ma med pa rnam par dag pa dang / rang bzhin rnam par dag pas rab tu phye ba dang / chos nyid kyi rigs pas so sor rtog pa las byung ba'i shes rab kyis so/ /shin tu legs par rtogs pa'i chos rnams la zhes bya ba ni sems kyi ngo bo nyid la gnyis med pa'i don rang rig pa'i chos rnams la'o/ /rnam par grol bas zhes bya bas ni dri ma med pa rnam par dag pa sems rnam par grol ba dang /rang bzhin rnam par dag pa shes rab rnam par grol bas so/ /shin tu legs par bde ba la reg par bya ba'i phyir zhes bya ba ni dngos po dang dgos pa yongs su grub pa'i dmigs pa thob pas rab tu phye ba spangs pa phun sum tshogs pa dang ye shes phun sum tshogs pa'i 'bras bu thob par bya ba'i phyir ro//bar chad med pa'i sems zhes bya ba ni zhi gnas kyi sems te/ de la bar chad med par lhag par lhag mthong 'byung ba'i phyir ro/ /de'i rjes su 'brang bas zhes bya ba ni zhi gnas kyi sems de'i rjes su lhag mthong 'brang bas so/ / de yang rnam pa gsum du brjod par bya'o zhes bya ba ni zhi gnas kyi sems de'i rjes su 'brang ba lhag mthong rnam pa gsum yod pas de'i sngon du 'gro ba zhi gnas kyi sems de yang rnam pa gsum du brjod par bya'o zhes bya ba'i tha tshig ste/ zhi gnas dang mtshan ma las byung ba dang / yongs su tshol ba las byung ba dang / so sor rtog pa las byung ba rnam pa gsum yod par brjod par bya'o//'dir bstan pa dang bshad pas zhi gnas cung zad tsam gyis chog par 'dzin pa rnam par gzhig cing chud mi za bar bya ba'i phyir gdags pa gtan la dbab pa bstan pa yang lhag mthong las bzlog pa'i tshul gyis ci rigs par rig par bya ste/de dag ni zhi gnas dang lhag mthong gi lam gyi ngo bo nyid gzhi gang las byung ba dang / rnam pa du yod pa bstan pa yin no/ /yang zhi gnas ni rnam pa brgyad de zhes bya ba dang / yang rnam pa bzhi ste zhes bya bas ni bsam gtan dang / gzugs med pa'i rab tu dbye bas nang du bsdus pa rnam pa brgyad yod pa'i phyir dang / tshad med pa bzhi yang gnod sems la sogs pa sems yongs su gdung ba'i zhi ba'i ngo bo nyid yin pa'i phyir zhi gnas gtso cher rnam par bshad par zad kyi/ de dag gi rjes su 'brang ba'i lhag mthong yang rnam pa de snyed yod pa yin pas/ de dag gis ni zhi gnas dang lhag mthong gi ngo bo nyid gnas skabs gang dag na yod pa bstan pa yin te/de ltar cung zad tsam gyis chog par 'dzin pa de rnam par gzhig cing cung zad tsam gyis chog par mi 'dzin pas rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing / chud mi za bar bya ba'i phyir bstan pa dang bshad pa cung zad tsam gyis chog par mi 'dzin par gdags pa gtan la dbab pa bstan pa ni cung zad tsam gyis chog par 'dzin pa rnam par gzhig cing chud mi za bar bya ba'i phyir gdags pa gtan la dbab pa yin no//de'i 'og tu dbang po yongs su nyams pa rnam par gzhig cing chud mi za bar bya ba'i phyir gdags pa gtan la dbab pa'i tshig gi don la sogs pa bshad par bya ste/dbang po yongs su nyams pa zhes bya ba ni mngon par shes pa dka' ba'i lam ste/ skabs 'dir byang chub sems dpa' chos la mi gnas pa'i zhi gnas dang / lhag mthong la brten nas dad pas rjes su 'brang ba dbang po rtul por gdags pa gang yin pa'o/ /rnam par gzhig cing chud mi za bar bya ba'i phyir gdags pa gtan la dbab pa zhes bya ba ni dbang po yongs su nyams pa de rnam par gzhig cing /dbang po yongs su ma nyams pas rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang bshad pas dbang po yongs su ma nyams par gdags pa gtan la dbab pa'o//de la mtshams sbyar ba ji lta bu zhe na/ 'dir 'phags pa byams pas gzhan dag 'di snyam du rnal 'byor gyis yongs su bsdus pa'i zhi gnas dang lhag mthong gi lam gyi ngo bo nyid de la/ mngon par shes pa myur ba sla ba'i lam yang yod/mngon par shes pa bul ba dga' ba'i lam yang yod na/ de dag gi bye brag ji ltar shes par bya snyam du sems pa rnams kyi bsam pa la brtags nas/ bcom ldan 'das zhi gnas dang lhag mthong ni chos la gnas pa zhes kyang bgyi/ chos la mi gnas pa zhes kyang bgyi na/ chos la gnas pa ni gang lags/chos la mi gnas pa ni gang lags zhes bya ba zhus par sbyar ro/ /byams pa ji ltar gzung ba dang bsam pa'i chos kyi mtshan ma'i rjes su 'brang bas/ don la zhi gnas dang lhag mthong gang yin pa de ni chos la gnas pa yin no zhes bya ba la sogs pa ni bstan pas dbang po yongs su nyams pa rnam par gzhig cing chud mi za bar bya ba'i phyir gdags pa gtan la dbab pa bstan to//de la ji ltar gzung ba dang bsam pa'i chos zhes bya ba ni chos gdags pa rnam par gzhag pa ji skad bstan pa dag bdag nyid kyi rkyen gyi stobs kyis legs par thob pa la sogs pa'o/ /mtshan ma'i zhes bya ba ni tshig dang yi ge la sogs pa'i mtshan ma'i 'o//rjes su 'brang bas zhes bya ba ni de la brten nas zhes bya ba'i tha tshig go /don la zhes bya ba ni don rtogs par bya ba'i phyir zhes bya ba'i tha tshig ste/ chos de'i don rtogs par bya ba'i phyir bsgoms pa las byung ba'i zhi gnas dang lhag mthong gi gang yin pa de ni chos gdags pa rnam par gzhag pa la gnas pa yin no zhes bya bar sbyar ro//gzung ba dang bsams pa'i chos la mi ltos par zhes bya ba ni des bdag nyid kyi rkyen gyi stobs kyis chos gdags pa rnam par gzhag pa ji skad bstan pa de dag gzung ba la sogs par mi nus pas mdo'i sde la sogs pa'i chos gzung ba dang bsams pa med par zhes bya ba'i don to//gzhan gyis zhes bya ba ni gzhan gyi rkyen gyis 'jug pa yin gyi rang gi rkyen gyi stobs kyis ni ma yin pa'o/ /gdams ngag ces bya bas ni rtogs par bya ba'i ngag ste/ dang po lung phog pa'o/ /rjes su bstan pa zhes bya ba ni rtogs pa chud mi za bar bya ba'i phyir rjes su bstan pa'o/ /don la zhi gnas dang lhag mthong gang yin pa'o zhes bya ba ni de ltar gzhan gyis gdams pa dang rjes su bstan pa de'i don rtogs par bya ba'i phyir bsgoms pa las byung ba'i zhi gnas dang lhag mthong gang yin pa de ni chos gdags pa rnam par gzhag pa la dmigs pa yin no zhes bya bar sbyar ro//'di lta ste zhes bya ba la sogs pa'i chos bzung ba'i stobs kyis 'jug pa ma yin pas chos rnams la nges pa med pa'i phyir chos la gnas pa ma yin no zhes bstan to//byams pa de la nga ni zhes bya ba la sogs pas ni bshad pas dbang po yongs su nyams pa rnam par gzhig cing chud mi za bar bya ba'i phyir gdags pa gtan la dbab pa bstan to//chos gnas pa'i zhi gnas dang lhag mthong la brten nas byang chub sems dpa'i chos kyi rjes su 'brang ba dbang po rnon por 'dogs so zhes bya bas ni byang chub sems dpa' dbang po rnon po ji ltar thos pa dang gzung ba'i chos kyi rjes su 'brang ba ni rang gi blo'i stobs kyis chos la gnas pa'i zhi gnas dang lhag mthong brtan par skyes pa la bsgoms pa yin pas phyir mi ldog cing myur ba kho nar zung du 'brel pas 'jug pa mngon par shes pa myur bar bde ba'i lam thob pa'i phyir ro//de la ni dbang po rnon por 'dogs so zhes bstan to/ /chos la mi gnas pa la brtan nas dad pas rjes su 'brang ba dbang po rtul por 'dogs so zhes bya bas ni byang chub sems dpa' dbang po rtul po dang po nyid nas mdo'i sde la sogs pa'i chos nyan pa dang /'dzin par mi nus pa ni dad pas gzhan gyi rkyen gyis 'jug pa'i sgo nas zhi gnas dang lhag mthong gi lam thob kyang gzhan dag gis g.yo zhing zung du 'brel ba'i lam myur du mi thob pas mngon par shes pa bul ba dka' ba'i lam la gnas pa yin pa'i phyir de la ni dbang po rtul por 'dogs so zhes bstan to//de ltar dbang po yongs su nyams pa de rnam par gzhig cing dbang po yongs su ma nyams pas rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang bshad pas dbang po yongs su ma nyams par gdags pa gtan la dbab par bstan pa ni dbang po yongs su nyams pa rnam par gzhig cing chud mi za bar bya ba'i phyir gdags pa gtan la dbab pa yin no//de'i 'og tu dge ba'i 'phel ba chud mi za bar 'gyur ba'i phyir gdags pa gtan la dbab pa'i tshig gi don la sogs pa bshad par bya ste/dge ba 'phel ba zhes bya ba ni zhi gnas dang lhag mthong ma 'dres pa'i chos la dmigs pa dang / 'dres pa'i chos la dmigs pa dang / 'dres pa chung ngu'i chos la dmigs pa dang / 'dres pa chen po'i chos la dmigs pa dang /'dres pa tshad med pa'i chos la dmigs pa'i rim gyis gong nas gong du lung dang rtogs pa'i chos dpag tu med pa grangs med pa mngon par 'phel bar 'gyur ro/ /chud mi za bar bya ba'i phyir gdags pa gtan la dbab pa zhes bya ba ni dge ba 'phel bas rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing chud mi za bar byed pa'i bstan pa dang bshad pas dge ba'i 'phel ba gdags pa gtan la dbab pa'o//de la mtshams sbyar ba ji lta bu zhe na/ 'dir 'phags pa byams pas gzhan dag 'di snyam du chos la gnas pa'i zhi gnas dang lhag mthong gi lam gyi ngo bo nyid de'i dmigs pa yang ma 'dres pa'i chos dang /'dres pa'i chos dang / 'dres pa chung ngu dang / chen por gyur pa dang / tshad med pa'i chos la dmigs pa yin na/ de dag gi rab tu dbye ba ni ji lta bu yin/ byang chub sems dpa' ni ji tsam gyis ni 'dres pa'i chos la dmigs pa'i zhi gnas dang lhag mthong thob par 'gyur /sa gang la ni de rtogs shing thob par 'gyur snyam du sems pa rnams kyi bsam pa la brtags nas/ bcom ldan 'das zhi gnas dang lhag mthong ni ma 'dres pa'i chos la dmigs pa zhes kyang bgyi na zhes bya ba la sogs pa zhu ba rnam pa bzhi zhus par sbyar ro//byams pa gal te byang chub sems dpa' zhes bya ba la sogs pas ni bstan pas dge ba 'phel ba chud mi za bar bya ba'i phyir gdags pa gtan la dbab pa bstan to/ /ji ltar bzung ba dang bsams pa'i chos rnams la zhes bya ba ni stong pa nyid la sogs pa'i rnam pa gang gis mdo'i sde la sogs pa'i chos bzung ba dang bsam pa rnams kyi nang nas zhes bya ba'i tha tshig go//mdo'i sde la sogs pa'i chos so so la dmigs pa'i zhes bya bas ni gsung rab tu gtogs pa yan lag bcu gnyis po dag las yan lag gang yang rung ba cig gi rnam grangs sam/ mtshan nyid dang /nges pa'i tshig gam/ rab tu byed pa sna gcig la dmigs pa'i zhi gnas dang lhag mthong sgom par byed pa ni gsung rab na yang ma 'dres la gcig gi yang chos thams cad 'dres pa ma yin pa'i phyir ma 'dres pa'i chos la dmigs pa yin par ston to/ /gal te mdo'i sde la sogs pa'i chos de dag nyid ces bya ba la sogs pas ni gsung rab tu gtogs pa yan lag bcu gnyis po thams cad kyi rnam grangs dang /mtshan nyid dang / nges pa'i tshig rab tu dbye ba thams cad gcig tu bsres te thams cad ro gcig pa nyid du dmigs pa ni 'dres pa'i chos la dmigs pa yin par ston to / / gcig tu bzlums pa dang / gcig tu bsdu ba dang / gcig tu brtul ba dang / phung po gcig tu byas te zhes bya bas ni gsung rab tu gtogs pa yan lag bcu gnyis thams cad gcig tu bsres nas de dag spyi'i rnam grangs dang / mtshan nyid dang / nges pa'i tshig dang / rab tu dbye ba'i sde tshan bzhi tshoms bzhir bsdu ba bstan te go rims bzhin no//chos 'di dag thams cad ni zhes bya ba la sogs pas ni sde tshan bzhi tshoms bzhir bsdus pa de dag thams cad kyang de bzhin nyid dang / byang chub dang / mya ngan las 'das pa dag gnas gyur pa la gzhol ba dang / 'bab pa dang / bab par ro gcig pa nyid du dmigs pas ston to//de la de bzhin nyid ces bya ba ni chos kyi dbyings rnam par dag pa'o/ /gzhol ba dang / 'bab pa dang bab pa zhes bya ba ni phyogs dang mthun par gyur pa dang / ngo bo nyid du gyur pa ste/ ro gcig pa zhes bya ba'i tha tshig go/ /yang rnam pa gcig tu na rnal 'byor pa'i shes rab rnam gsum gyis mthong ba'i rim par yang bshad do//rnal 'byor pas sems bskyed dang / mos pas spyod pa la gnas pa dang / sar chud pa'i gnas skabs su thob pa'i bye brag tu yang bshad do/ /byang chub ces bya ba ni de bzhin nyid rtogs pa yang dag pa'i shes pa 'jig rten las 'das pa'o/ /mya ngan las 'das pa zhes bya ba ni 'dus ma byas pa'i dbyings so//gnas gyur pa zhes bya ba ni chos kyi sku'o/ /chos 'di dag thams cad ni zhes bya ba la sogs pas ni de ltar ro gcig pa'i chos de dag thams cad lung dang rtogs pa'i chos dge ba dpag tu med pa dag mngon sum du brjod pa dang 'dra bar mngon du snang ba dang / gsal ba dang / ston par byed pa'i sgo nas dge ba 'phel bar byed pa yin no zhes ston to/ /dge ba'i chos zhes bya ba ni lung gi gnas skabs na lam gyi ngo bo nyid ni ngo bo nyid kyi dge ba yang yin la mi dge ba'i gnyen po yang yin pas lam gyi ngo bo nyid dge ba dang / rtogs pa'i gnas skabs na mya ngan las 'das pa'i ngo bo nyid ni ngo bo nyid kyis dge ba yang yin la/nyon mongs pa dang bral ba yang yin pas mya ngan las 'das pa'i ngo bo nyid dge ba dag go/ /dpag tu med pa zhes bya ba ni zag pa med pa'i dge ba'i chos kyi dbyings la yongs su bcad du med pa'i phyir ro/ /grangs med pa dag ces bya ba ni dpag tu med pa de nyid kyi phyir te/grangs las yang dag par 'das pa'i phyir ro/ /mngon par brjod pas mngon par brjod pa yin no zhes bya ba ni mngon sum du brjod pa dang 'dra bar mngon sum du snang bar byed gsal bar byed ston par byed pa'i sgo nas dge ba 'phel bar byed pa yin no zhes bya ba'i tha tshig go/ /'dres pa'i chos la dmigs pa rnams kyi chung ngu dang chen por gyur pa dang /tshad med pa'i rab tu dbye ba bstan pa'i phyir/ bcom ldan 'das zhi gnas dang lhag mthong ni 'dres pa chung ngu'i chos la dmigs pa zhes kyang bgyi zhes bya ba la sogs pa zhus te 'di man chad kyis ni bshad pas dge ba 'phel ba chud mi za bar bya ba'i phyir gdags pa gtan la dbab pa bstan to//byams pa mdo'i sde nas zhes bya ba la sogs pas ni gsung rab tu gtogs pa yan lag bcu gnyis po dag las gang yang rung ba cig gi grangs dang / mtshan nyid dang / nges pa'i tshig dang / rab tu dbye ba thams cad dang po dang / bar dang / tha ma tshar phyin pas gcig tu bzlums te snga ma bzhin du chos 'di ni de bzhin nyid dang /byang chub dang / mya ngan las 'das pa dang / gnas gyur pa la gzhol ba 'bab pa bab pa ste/ chos 'di ni dge ba'i chos dpag tu med pa grangs med pa dag mngon par brjod pas mngon par rjod par byed pa yin no snyam du ro gcig par yid la byed pa'i zhi gnas dang /lhag mthong ni 'dres pa'i chos la dmigs pa yin la chos mtha' dag la dmigs pa yin pa'i phyir 'dres pa chung ngu'i chos la dmigs pa yin par rig par bya'o zhes bstan to/ /mdo'i sde la sogs pa de dag nyid ces bya ba la sogs pas ni gsung rab tu gtogs pa yan lag bcu gnyis po dag las gang yang rung ba gnyis sam gsum mam bcu gnyis man chad ji snyed bzung ba dang /bsam pa dag gi rnam grangs dang / mtshan nyid dang / nges pa'i tshig dang / rab tu dbye ba thams cad dang po dang / bar dang / tha ma tshar phyin par gcig tu bzlums te/ snga ma bzhin du chos 'di dag ni de bzhin nyid dang /byang chub dang / mya ngan las 'das pa dang / gnas gyur pa la gzhol ba 'bab pa bab pa dag ste chos 'di dag ni dge ba'i chos dpag tu med pa grangs med pa dag mngon par brjod pas mngon par brjod pa yin no snyam du yid la byed pa'i zhi gnas dang / lhag mthong ni 'dres pa'i chos la dmigs pa yang yin la/chos mang po la dmigs pa yang yin pa'i phyir 'dres pa chen por gyur pa'i chos la dmigs pa yin par rig par bya'o zhes bstan to/ /de bzhin gshegs pa rnams kyi zhes bya ba la sogs pas ni gsung rab tu gtogs pa yan lag bcu gnyis po thams cad dang / de dag gi rab tu dbye ba de bzhin gshegs pa'i chos bstan pa tshad med pa la sogs pa thams cad kyi rnam grangs dang /mtshan nyid dang / nges pa'i tshig dang / rab tu dbye ba thams cad dang po dang / bar ma dang / tha ma tshar phyin par gcig tu bzlums te snga ma bzhin du chos 'di dag thams cad ni de bzhin nyid dang / byang chub dang / mya ngan las 'das pa dang /gnas gyur pa la gzhol ba 'bab pa bab pa dag ste/ chos 'di dag thams cad ni dge ba'i chos dpag tu med pa grangs med pa dag mngon par brjod pas mngon par brjod pa yin no snyam du ro gcig par yid la byed pa'i zhi gnas dang lhag mthong ni chos gdags pa rnam par gzhag pa thams cad dang /de dag gi rab tu dbye ba thams cad la dmigs pa yin pa'i phyir 'dres pa tshad med pa'i chos la dmigs pa yin par rig par bya'o zhes bstan to/ /de la chos bstan pa tshad med pa rnams zhes bya ba ni de bzhin gshegs pa rnams kyi chos bstan pa dmigs pa thams cad kyi phyir sgo thams cad dang dus thams cad du 'dul ba'i skye bo thams cad kyi bsam pa yang dag par mgu bar byed pas 'jug pa gang yin pa de ni gsung rab tu gtogs pa yan lag re re la yang tshad med do zhes bya ba'i tha tshig go//chos kyi tshig dang yi ge tshad med pa rnams zhes bya ba yang de dang 'dra ste/ gsung rab tu gtogs pa re re la yang tshad med par sbyar ro//gong nas gong du shes rab dang spobs pa tshad med pa rnams zhes bya ba ni 'dul ba'i zhing gi rdul snyed po bsam pa tha dad pa/ mos pa tha dad pa/ the tshom tha dad pa/ skad tha dad pa rnams kyis dus gcig tu so so nas bskal pa'i zhing gi rdul snyed du zhu ba zhus kyang / de bzhin gshegs pa'i byin gyi rlabs cig car rlon par de lta bu'i shes rab dang spobs pa phyi ma'i mtha'i mur thug pa'i bar du gong nas gong du tshad med pa rnams so//de la dge ba 'phel ba'i rigs pa ni ma 'dres pa'i chos la dmigs pa'i zhi gnas dang lhag mthong gis kyang / lung dang rtogs pa'i dge ba'i chos dpag tu med pa grangs med pa dag 'phel bar 'gyur mod kyi/de bas kyang 'dres pa chung ngu dang / chen por gyur pa dang / tshad med pa'i chos la dmigs pa dag gong nas gong du ches shin tu khyad par du 'phel bar rig par bya'o/ /de 'thob pa'i rgyu bstan pa'i phyir/ bcom ldan 'das byang chub sems dpa' ji tsam gyis na zhes bya ba la sogs pas zhus so//byams pa de ni rgyu lnga las thob par 'gyur bar rig par bya ste zhes bya ba la sogs pas ni rgyu lnga po de dag gang gi tshe thob pa de'i tshe na de yang thob par brjod par bya'o zhes ston to/ /yid la byed pa'i tshe skad cig skad cig la gnas ngan len gyi rten thams cad 'jig pa byed pa dang zhes bya ba la gnas ngan len ni rnam pa gnyis te/'dod chags la sogs pa'i nyon mongs pa bsgom pas spang bar bya ba'i gnas ngan len dang / lta ba'i rnam pa'i nyon mongs pa mthong bas spang bar bya ba'i gnas ngan len te/ de'i rten ni kun gzhi'i rnam par shes pa'o/ /'dres pa'i chos la dmigs pa'i zhi gnas dang lhag mthong ni gnas ngan len de dag gi gnyen po yin pa'i phyir de yid la byed pa'i tshe skad cig skad cig la gnas ngan len de dag gi rten kun gzhi'i rnam par shes pa 'jig par byed do//'du shes sna tshogs rnam par spangs te chos kyi kun dga' la dga' ba thob pa dang zhes bya ba ni gnas ngan len gyi sgrib pa dang bral ba'i phyir lus dang sems shin tu sbyangs pa'i zhi gnas thob pas 'du shes sna tshogs dang bral ba sems rtse gcig pa nyid kyi chos kyi kun dga' la dga' ba thob pa'o//chos snang ba phyogs bcur tshad med cing rnam pa yongs su ma chad pa yang dag par shes pa dang zhes bya ba'i lus dang sems shin tu sbyangs pa'i zhi gnas thob pa'i phyir sems kyi ngo bo nyid la gnyis med pa'i don rang rig pa'i lhag mthong gi shes pa skye ba'o//dgos pa yongs su grub pa dang ldan pa rnam par dag pa'i cha dang mthun pa'i mtshan ma rnam par ma brtags pa rnams de la kun du 'byung ba dang zhes bya ba la dgos pa yongs su grub pa dang ldan pa rnam par dag pa zhes bya ba ni rnam pa thams cad mkhyen pa nyid de/bdag dang gzhan gyi don phun sum tshogs pa'i bya ba yongs su grub pa dang ldan zhing gang zag dang chos kyi rnam pa'i lta ba rnam par dag pas rab tu phye ba yin pa'i phyir ro//cha zhes bya ba ni rtog pa ste/ rnam pa thams cad mkhyen pa nyid thob pa'o/ /de dang mthun pa'i mtshan ma ni de thob pa'i rgyu ste/ zung du 'brel pas 'jug pa'i lam gyi dmigs pa dngos po'i mtha' dang dgos pa yongs su grub pa rnam par ma brtags pas gzugs brnyan las 'das pa lhun gyis grub pa'i sas bsdus pa dag rang gi ngang gis kun du 'byung ba'o//chos kyi sku thob pa dang / yongs su rdzogs pa dang / yongs su grub par bya ba'i phyir rgyu gong ma bas ches gong ma/ bzang po bas ches bzang po yang dag par yongs su 'dzin par byed pa'o zhes bya ba la chos kyi sku zhes bya ba ni rtogs pa'i chos kyi sku dang /bshad pa'i chos kyi tshogs so/ /de 'thob pas ni gsum pa la ste/ sa dang po la chos thams cad kyi de bzhin nyid rtogs pas gnyis pa la yongs su sbyang ba byas pa'i rgyus sa gsum pa la mi nyams pa'i ting nge 'dzin thob pa'i phyir dang / thos pa'i gzungs thob pa'i phyir rtogs pa'i chos kyi sku dang /bshad pa'i chos kyi tshogs thob pa yin no/ /yongs su rdzogs pa'i sa bcu pa la ste/ thams cad mkhyen pa nyid du dbang bskur ba'i phyir dang / chos kyi sprin yongs su rdzogs pa'i phyir ro/ /yongs su grub pa ni de bzhin gshegs pa'i sa la ste/mthar thug pa'i 'bras bu yin pa'i phyir ro/ /rgyu zhes bya ba ni sa dang pha rol tu phyin pa'i bsgom pa'i nges par 'byung ba'i lam mo/ /gong ma bas ches gong ma/ bzang po bas ches bzang po zhes bya ba ni 'thob pa'i rgyu bas yongs su rdzogs pa'i rgyu dang / yongs su rdzogs pa'i rgyu bas yongs su grub pa'i rgyu gong ma bas ches gong ma dang /bzang po bas ches bzang po yin te/ sa bcu'i mdo las gser gyi dpes bstan pa lta bu'o/ /rgyu lnga po de dag dus gcig tu 'thob par nges pa ni med do/ /'dres pa'i chos la dmigs pa'i zhi gnas dang lhag mthong des gang la rtogs shing thob pa bstan pa'i phyir/bcom ldan 'das 'dres pa'i chos la dmigs pa'i zhi gnas dang lhag mthong de zhes bya ba la sogs pas zhus so/ /sa dang po rab tu dga' ba la ni rtogs pa yin la zhes bya ba ni de la chos kyi dbyings thams cad du 'gro ba'i don rtogs pa'i phyir ro/ /sa gsum pa 'od byed pa la ni thob par rig par bya ste zhes bya ba ni de la zhi gnas dang lhag mthong gi lam gyi rab tu dbye ba bsam gtan dang gzugs med pa'i snyoms par 'jug pa thams cad thob pa'i phyir ro//las dang po pa dag rjes su gzung ba'i phyir/ byams pa de lta mod kyi byang chub sems dpa' las dang po pas kyang de la rjes su bslab cing yid la bya ba mi btang bar bya'o zhes bya ba gsungs te/de ltar dge ba 'phel bas rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing / chud mi za bar bya ba'i phyir bstan pa dang bshad pas dge ba 'phel ba gdags pa gtan la dbab pa bstan pa ni dge ba 'phel ba chud mi za bar bya ba'i phyir gdags pa gtan la dbab pa yin no//de'i 'og tu rtog pa dang g.yo ba gnyen po dang bcas pa chud mi za bar bya ba'i phyir gdags pa gtan la dbab pa'i tshig gi don la sogs pa bshad par bya ste/ rtog pa dang g.yo ba zhes bya ba ni rtog pa dang bcas shing dpyad pa dang bcas pa'i ting nge 'dzin to//gnyen po dang bcas pa zhes bya ba ni rtog pa dang bcas shing dpyod pa dang bcas pa de'i gnyen po ste/ rtog pa dang bcas pa'i gnyen po ni rtog pa med cing dpyod pa tsam gyi ting nge 'dzin to/ /dpyod pa dang bcas pa'i gnyen po ni rtog pa med pa dang dpyod pa med pa'i ting nge 'dzin to/ /chud mi za bar bya ba'i phyir gdags pa gtan la dbab pa zhes bya ba ni rtog pa dang g.yo ba gnyen po dang bcas pas rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing /chud mi za bar bya ba'i phyir bstan pa dang bshad pa dang rtog pa dang / g.yo ba gnyen po dang bcas pa gtan la dbab pa'o//de la mtshams sbyar ba ji lta bu zhe na/ 'dir 'phags pa byams pas gzhan dag 'di snyam du rnal 'byor gyis yongs su bsdus pa'i zhi gnas dang lhag mthong gi lam gyi ngo bo nyid des ni mnyam par gzhag pa'i sa snyoms par 'jug pa dang / skye ba dang bcas pa thams cad rab tu phye ba yin la/sa de dag ni ting nge 'dzin gsum gyis bsdus pa yin na zhi gnas dang lhag mthong gi lam gyi ngo bo nyid de ji ltar ting nge 'dzin gsum du 'gyur snyam du sems pa rnams kyi bsam pa la brtags nas/ bcom ldan 'das ji ltar na zhi gnas dang / lhag mthong rtog pa dang bcas shing /dpyod pa dang bcas pa'i ting nge 'dzin du gyur pa lags zhes bya ba la sogs pa zhus par sbyar ro/ /bcom ldan 'das kyis ting nge 'dzin gsum gyi rnam grangs dang pos ni bstan pas rtog pa dang g.yo ba gnyen po dang bcas pa chud mi za bar bya ba'i phyir gdags pa gtan la dbab pa bstan te/ rnam grangs 'og mas ni bshad pas de bstan par rig par bya'o/ /de la byams pa ji ltar bzung zhing brtags pa dang dpyad pa'i chos rnams la zhes bya ba la sogs pas ni byang chub sems dpas chos gdags pa rnam par gzhag pa ji ltar gzung ba de dag bsam gtan dang po las bsam gtan khyad par can ma gtogs pa ni mi lcogs pa med pa dang /dngos gzhi gang yang rung ba la brten te rtog pa dang dpyod pa gnyis ka dang mtshungs par ldan pa'i mos pa yid la byed pa dang de kho na nyid yid la byed pa las byung ba'i gzugs brnyan gyi dmigs pa rags pa thob pa la rjes su dpyod pa'i zhi gnas dang / lhag mthong gi bsam gtan dang po las bsam gtan khyad par can ma gtogs pa de nyid kyi sa pa yin pas na rtog pa dang bcas shing dpyod pa dang bcas pa'i ting nge 'dzin yin no zhes ston to//de la ji ltar gzung zhing zhes bya ba ni chos gdags pa rnam par gzhag pa thos pa dang bsam pa'i shes rab kyi stobs bskyed pas gzung ba'o//brtags pa dang dpyad pa zhes bya ba ni dmigs pa yongs su tshol ba'i dus na bsam gtan dang po las bsam gtan khyad par can ma gtogs pa mi lcogs pa med pa dang / dngos gzhi gang yang rung ba la brten te/ chos de dag la rtog pa dang dpyod pa gnyi ga dang mtshungs par ldan pa'i mos pa yid la byed pa dang /de kho na nyid yid la byed pas yid la byas pa'o/ /de dag gi mtshan ma zhes bya ba ni yid la byed pa 'thob pa'i dus na gzugs brnyan rnam gnyis kyi mtshan ma blo la snang ba'o/ /gsal zhing rags pa myong ba zhes bya ba ni bsam gtan dang po'i rtog pa dang bcas pa'i sa pa'i gzugs brnyan yin pa'i phyir ro//rjes su dpyod pa dang bcas pa zhes bya ba ni de nyid bsam gtan dang po'i dpyod pa dang bcas pa'i gzugs brnyan yin pa'i phyir ro/ /rtog pa dang bcas shing dpyod pa dang bcas pa'i ting nge 'dzin yin no zhes bya bas ni bsam gtan dang po las bsam gtan khyad par can ma gtogs pa'i sa pa'i zhi gnas dang /lhag mthong ni rtog pa dang bcas shing dpyod pa dang bcas pa'i ting nge 'dzin yin par bstan to/ /de dag nyid kyi zhes bya ba la sogs pas ni byang chub sems dpa' chos gdags pa rnam par gzhag pa ji ltar gzung ba de dag nyid bsam gtan dang po'i bsam gtan khyad par can 'ba' zhig la brten te rtog pa med cing dpyod pa tsam du mtshungs par ldan pa'i mos pa yid la byed pa dang /de kho na nyid yid la byed pa las byung ba'i gzugs brnyan gyi dmigs pa cha phra mo thos pa la rjes su dpyod pa'i zhi gnas dang lhag mthong ni bsam gtan khyad par can de nyid kyi sa pa yin pas na rtog pa med cing dpyod pa tsam gyi ting nge 'dzin yin no zhes ston to//de las mtshan ma gsal zhing rags pa myong ba'i rjes su dpyod pa ma yin gyi zhes bya ba ni dmigs pa rjes su tshol ba'i dus na bsam gtan khyad par can la brten te rtog pa med cing dpyod pa tsam dang mtshungs pa dang ldan pa'i mos pa dang /de kho na nyid yid la byas pa las byung ba'i phyir gzugs brnyan yin pa'i phyir ro/ /de snang ba la phyis dran pa tsam phra mo myong ba zhes bya ba ni bsam gtan khyad par can 'ba' zhig la brten te yid la byed pa'i thob pa'i gzugs brnyan de ni rtog pa med pa'i phyir cha phra mor bstan pa ste/dper na da ltar mngon sum gyi yul la dmigs pa'i dran pa lta bu ma yin pa 'das pa'i yul gyi rnam pa rjes su bstan pa la dmigs pa'i dran pa lta bu la bya'o/ /rjes su dpyod pa'i zhes bya ba ni de nyid bsam gtan khyad par can gyi dpyod pa tsam dang mtshungs par ldan pa'i gzugs brnyan yin pa'i phyir ro//rtog pa med cing dpyod pa tsam gyi ting nge 'dzin yin no zhes bya ba ni bsam gtan gyi khyad par can gyi sa pa'i zhi gnas dang lhag mthong ni rtog pa med cing dpyod pa tsam gyi ting nge 'dzin yin par bstan te/ de bsgoms na tshangs pa chen po nyid thob par 'gyur ro/ /de dag gi mtshan ma la zhes bya ba la sogs pas ni byang chub sems dpa' chos gdags pa rnam par gzhag pa ji ltar gzung ba de dag nyid bsam gtan gnyis pa yan chad srid pa'i rtse mo man chad kyi nyer bsdogs dang dngos gzhi gang yang rung ba la brten te rtog pa med pa dang /dpyod pa med pa'i mos pa yid la byed pa dang /de kho na nyid yid la byed pa las byung ba'i gzugs brnyan gyi dmigs pa lhun gyis grub pa thob pa la/ de kho na nyid yid la byed pas sems tsam du dpyod pa'i zhi gnas dang lhag mthong ni bsam gtan gnyis pa yan chad kyi sa pa yin pas na rtog pa med pa dang / dpyod pa med pa'i ting nge 'dzin yin no zhes ston to//de la thams cad kyi thams cad du lhun gyis grub par zhes bya ba ni dmigs pa yongs su tshol ba'i dus na bsam gtan gnyis pa'i nyer bsdogs yan chad gang yang rung ba la brten te rtog pa med pa dang / dpyod pa med pa'i mos pa dang / de kho na nyid yid la byed pa las byung ba'i gzugs brnyan yin pa'i phyir ro//chos myong ba yid la byed pas rnam par dpyod pa'i zhes bya ba ni sems kyi ngo bo nyid la gnyis med pa'i chos rang rig pas rnam par dpyod pa ste/ de nyid bsam gtan gnyis pa'i nyer bsdogs pa yan chad kyi rtog pa med pa dang dpyod pa med pa'i gzugs brnyan yin pa'i phyir ro / / rtog pa med pa dang dpyod pa med pa'i ting nge 'dzin yin no zhes bya bas ni bsam gtan gnyis pa'i nyer bsdogs yan chad srid pa'i rtse mo man chad kyi sa pa'i zhi gnas dang lhag mthong gi rtog pa med pa dang / dpyod pa med pa'i ting nge 'dzin yin par bstan te/ de dag kyang rtog pa dang dpyod pa'i 'dod chags dang bral ba'i sgo nas rtog pa med pa dang /dpyod pa med pa zhes bya ba'i kun du 'byung ba med pa ni ma yin te/ der skyes pa'i tshe dang langs pa rnams las byung ngo / /de dag ni khams su gtogs pa'i ting nge 'dzin gsum gyi tshul bstan pa yin no/ /de dag nyid la brten nas 'phags pa'i lam gyi 'jig tshogs 'gog pa'i mya ngan las 'das pa gsum thob pa'i ting nge 'dzin gsum ni khams su ma gtogs pa'i yin par rig par bya'o//yongs su tshol ba las byung ba zhes bya ba ni sngar sgo gsum bstan pa las yongs su btsal ba'i rjes su zhugs pa'i sgo dang sbyar ro/ /rtog pa dang bcas zhing zhes bya ba ni de'i tshe dam pa'i chos thos pa dang /bzung ba'am/ dge ba'i bshes gnyen gyi gdams ngag dang rjes su bstan pa de la mnyam par gzhag pa'i sa pa'i yid la byed pas yid la byed pa'i phyir ro/ /dpyod pa dang bcas pa zhes bya ba ni sems par byed/ rtog par byed/ 'jal bar byed/ nye bar rtog par byed pa'i phyir te/ 'dir yang rtog pa dang bcas shing dpyod pa dang bcas pa'i ting nge 'dzin gyis ni snga ma bzhin no/ /so sor rtog pa las byung ba zhes bya ba ni yongs su btsal ba la so sor rtog pa'i rjes su zhugs pa'i sgo dang sbyar ro/ /rtog par byed cing zhes bya ba ni de'i tshe bsam shing brtags la gzhal zhing nye bar brtags zin pa'i phyir ro//dpyod pa tsam gyi zhes bya ba ni ji ltar rnam par gzhag pa'i de bzhin du so sor rtog par byed pa'i phyir te/ 'dir yang sa ni snga ma bzhin no/ /'dres pa'i chos la dmigs pa zhes bya ba ni/ 'dres pa chung ngu dang chen por gyur pa dang / tshad med pa'i chos la dmigs pa dang sbyar ro//rtog pa med pa dang dpyod pa med pa zhes bya ba ni ro gcig pa nyid du dmigs pa'i phyir te/ 'dir yang sa ni snga ma bzhin no/ /de ltar rtog pa dang g.yo ba gnyen po dang bcas pas rab tu phye ba'i zhi gnas dang lhag mthong yin no// // de'i 'og tu bsgom pa'i rgyu mtshan yongs su shes pa chud mi za bar bya ba'i phyir gdags pa gtan la dbab pa'i tshig gi don la sogs pa bshad par bya ste/bsgom pa'i rgyu mtshan yongs su shes pa zhes bya ba ni zhi gnas bsgom pa'i dus su zhi gnas kyi rgyu mtshan dang / rab tu 'dzin pa bsgom pa'i dus su rab tu 'dzin pa'i rgyu mtshan dang / btang snyoms bsgom pa'i dus su btang snyoms kyi rgyu mtshan yongs su shes pa'o/ /chud mi za bar bya ba'i phyir gdags pa gtan la dbab pa zhes bya ba ni bsgom pa'i rgyu mtshan yongs su shes pas rab tu phye ba'i zhi gnas dang / lhag mthong gi lam gyi ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang bshad pas bsgom pa'i rgyu mtshan yongs su shes pa gdags pa gtan la dbab pa'o//de la mtshams sbyar ba ji lta bu zhe na/ 'dir 'phags pa byams pas gzhan dag 'di snyam du rnal 'byor pa rnal 'byor gyis yongs su bsdus pa'i zhi gnas dang / lhag mthong gi lam gyi ngo bo nyid de la sbyor ba na/ zhi gnas kyi dus su zhi gnas bsgom pa'i rgyu mtshan dang / rab tu 'dzin pa'i dus su rab tu 'dzin pa bsgom pa'i rgyu mtshan dang / btang snyoms kyi dus su btang snyoms bsgom pa'i rgyu mtshan yongs su shes par bya dgos na/ rgyu mtshan gsum po de dag gang yin snyam du sems pa rnams kyi bsam pa la brtags nas/bcom ldan 'das zhi gnas kyi rgyu mtshan ni gang lags/ rab tu 'dzin pa'i rgyu mtshan ni gang lags/ btang snyoms kyi rgyu mtshan ni gang lags zhes bya ba zhus par sbyar ro/ /'dir dus su yid la byed pa bstan pas ni bstan pas bsgom pa'i rgyu mtshan yongs su shes pa chud mi za bar bya ba'i phyir gdags pa gtan la dbab pa bstan to//dmigs pa'i rgyu mtshan dang / gzhi'i rgyu mtshan bstan pas ni bshad par rig par bya'o/ /byams pa sems rgod pa 'am rgod du dogs pa na zhes bya bas ni zhi gnas kyi dus bstan te/ dus der zhi gnas lhag par bsgom dgos pa'i phyir ro//de la sems rgod pa'am zhes bya ba ni rgod pa dang 'gyod pas sems nye bar ma zhi ba'o/ /rgod du dgos pa na zhes bya ba ni 'phro ba'i bsam pa nye bar gnas par gyur pa'o/ /'dir rgyu mtshan ni rnam pa gnyis te/ dmigs pa'i rgyu mtshan dang / gzhi'i rgyu mtshan no//de la dmigs pa'i rgyu mtshan ni yid la byed pa 'thob pa'i rgyu yin la/ gzhi'i rgyu mtshan ni lam yongs su dag pa'i rgyu yin par rig par bya'o/ /de la kun du skyo bar 'gyur ba dang / mthun pa'i chos rnams zhes bya bas ni zhi gnas kyi gzhi'i rgyu mtshan bstan te/ sdug bsngal dang kun 'byung ba'i rnam pa dag go//zhi gnas kyi sems yongs su bsgoms nas/ de'i 'og tu zhi gnas kyi lam yongs su dag par bya ba'i phyir lhag mthong gi sems kyi mtshan ma nyid la sbyor ba yang zhi gnas kyi gzhi'i rgyu mtshan yin no/ /de la snga mas ni mi mthun pa'i phyogs las bzlog la/ phyi mas ni gnyen po'i rjes su 'jug ste/skabs 'dir ni snga ma nyid gzung ngo / /bar chad med pa'i sems de zhes bya bas ni zhi gnas kyi dmigs pa'i rgyu mtshan bstan te/ rnam par mi rtog pa'i gzugs brnyan la dmigs pa zhi gnas kyi sems de'i yid la byed pa gang yin pa de ni zhi gnas kyi rgyu mtshan zhes bya ba'o zhes bya ba ni rgod pa nye bar zhi ba'i gnas ni zhi gnas yin la/de'i rgyu mtshan ni yid la byed pa de yin pas na zhi gnas kyi rgyu mtshan zhes bya'o zhes ston to/ sems bying ngam bying du dogs pa na zhes bya bas ni rab tu 'dzin pa'i dus bstan te/ dus der rab tu 'dzin pa lhag par bsgom dgos pa'i phyir ro/ / rab tu 'dzin pa zhes bya ba ni sems bying ba gzengs bstod cing dmigs pa la nye bar gtod pa ste/ lhag mthong gi cha yin no/ /de la sems bying ngam zhes bya ba ni rmugs pa dang gnyid kyis sems nyams par byas pa'o/ /bying du dogs pa na zhes bya ba ni bying ba'i rjes su mthun par gyur pa na'o/ /mngon par dga' bar 'gyur ba dang mthun pa'i chos rnams zhes bya bas ni rab tu 'dzin pa'i gzhi'i rgyu mtshan bstan te/'gog pa dang lam gyi rnam pa dag go/ /rab tu 'dzin pa'i sems yongs su bsgoms nas de'i 'og tu rab tu 'dzin pa'i lam yongs su dag par bya ba'i phyir zhi gnas kyi mtshan ma nyid la sbyor ba yang rab tu 'dzin pa'i gzhi'i rgyu mtshan yin no//de yang snga mas ni mi mthun pa'i phyogs las bzlog la/ phyi mas ni gnyen po'i rjes su 'jug ste/ skabs 'dir ni snga ma nyid gzung ngo / /sems kyi mtshan ma de zhes bya bas ni rab tu 'dzin pa'i dmigs pa'i rgyu mtshan bstan te/ lhag mthong gi dmigs pa rnam par rtog pa dang bcas pa'i gzugs brnyan de'o/ /yid la byed pa gang yin pa de ni rab tu 'dzin pa'i rgyu mtshan zhes bya'o zhes bya bas ni sems bying ba gzengs bstod cing dmigs pa la nye bar gtod pa ni rab tu 'dzin pa yin la/ de'i rgyu mtshan ni yid la byed pa de yin pas na rab tu 'dzin pa'i rgyu mtshan zhes bya'o zhes bstan to//zhi gnas la gcig tu nges pa'am/ lhag mthong la gcig tu nges pa'am/ zung du 'brel pa'i lam yang rung ste zhes bya bas ni btang snyoms kyi dus bstan te/ dus de gsum du btang snyoms lhag par bsgom dgos pa'i phyir ro//de gnyis ka nye ba'i nyon mongs pas nye bar nyon mongs pa med pa la zhes bya bas btang snyoms kyi gzhi'i rgyu mtshan bstan te/ zhi gnas la gcig tu nges pa'i lam la ni rgod pa dang 'gyod pa'i nye ba'i nyon mongs pa med la/ lhag mthong la gcig tu nges pa'i lam la ni rmugs pa dang gnyid kyi nye ba'i nyon mongs pa med/thung du 'brel pa'i lam la ni de gnyi ga'i nye ba'i nyon mongs pa med pa'o/ /btang snyoms kyi sems de nyid ces shin tu gong nas gong du yongs su dag par bya ba'i phyir dmigs pa de nyid la ran par dpyod cing brtson 'grus ha cang lhag par rtsom par mi byed pa yang btang snyoms kyi gzhi'i rgyu mtshan yin no//de yang snga mas ni mi mthun pa'i phyogs las bzlog la/ phyi mas ni gnyen po'i rjes su 'jug ste/ skabs 'dir ni snga ma nyid gzung ngo / /sems rang gi ngang gis 'jug pa na zhes bya bas ni btang snyoms kyi dmigs pa'i rgyu mtshan bstan te/ zung du 'brel pa'i lam gyi dmigs pa dngos po'i mtha' dang dgos pa yongs su grub pa'i gnas skyabs so//yid la byed pa lhun gyis grub pa gang yin pa de ni btang snyoms kyi rgyu mtshan zhes bya'o zhes bya bas ni yid la byed pa lhun gyis grub pa ni btang snyoms yin la/ de'i rgyu mtshan ni gnas skabs de dag ni yid la byed pa lhun gyis grub pa de yin pas na btang snyoms kyi rgyu mtshan zhes bya ba'o zhes bstan to//de ltar bsgom pa'i rgyu mtshan yongs su shes pas rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang bshad pas bsgom pa'i rgyu mtshan yongs su shes pa gdags pa gtan la dbab pa bstan pa ni bsgom pa'i rgyu mtshan yongs su shes pa chud mi za bar bya ba'i phyir gdags pa gtan la dbab pa yin no// // de'i 'og tu mngon pa'i nga rgyal rnam par bshig cing chud mi za bar bya ba'i phyir gdags pa gtan la dbab pa'i tshig gi don la sogs pa bshad par bya ste/mngon pa'i nga rgyal zhes bya ba ni zhi gnas dang lhag mthong gi lam gyi ngo bo nyid de la sbyor ba'i gnas skabs na zhi gnas tsam dang shes pa dang / mthong ba ngan ngon tsam skyes pa la brten nas yongs su ma shes pa dang / mngon sum du ma byas pa'i chos dang don gzhan dag kyang yongs su shes shing mngon sum du byas so snyam du mngon pa'i nga rgyal byed pa'o//rnam par gzhig cing chud mi za bar bya ba'i phyir gdags pa gtan la dbab pa zhes bya ba ni mngon pa'i nga rgyal de rnam par gzhig cing mngon pa'i nga rgyal med pas rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang bshad pas mngon pa'i nga rgyal med pa gdags pa gtan la dbab pa'o/de la mtshams sbyar ba ji lta bu zhe na/ 'dir 'phags pa byams pas gzhan dag 'di snyam du rnal 'byor pa rnal 'byor gyis yongs su bsdus pa'i zhi gnas dang lhag mthong gi lam gyi ngo bo nyid la sbyor bas ni bdag nyid chos dang don so so yang dag par rig pa la mngon pa'i nga rgyal med par bya dgos na/chos so so yang dag par rig pa dang / don so so yang dag par rig pa'i ngo bo nyid rab tu dbye ba ni ji lta bu yin de dag ji ltar na so so yang dag par rig par 'gyur snyam du sems pa rnams kyi bsam pa la brtags nas /bcom ldan 'das byang chub sems dpa' zhi gnas dang lhag mthong bsgom pa chos so so yang dag par rig pa dang / don so so yang dag par rig pa lags na zhes bya ba la sogs pa zhus par sbyar ro/ /'dir bcom ldan 'das kyis chos dang don so so yang dag par rig pa'i ngo bo nyid dang /rab tu dbye ba yang bstan/ de dag byang chub sems dpas ji ltar so so yang dag par rig pa yang bstan te/ de yang chos ni gnas yin la don ni gnas pa yin pas gnas kyis gnas pa mtshon dgos pa'i phyir dang po chos so so yang dag par rig pa'i ngo bo nyid dang rab tu dbye ba yang bstan/de byang chub sems dpas ji ltar so so yang dag par rig par bstan to/ /de la byams pa rnam pa lngas chos so so yang dag par rig pa yin te zhes bya ba la sogs pas ni bstan pas so so yang dag par rig pa la mngon pa'i nga rgyal rnam par gzhig cing chud mi za bar bya ba'i phyir gdags pa gtan la dbab pa bstan te/de nyid kyi chos so so yang dag par rig pa'i ngo bo nyid kyang bstan te / /ming gang zhe na zhes bya ba la sogs pas ni bshad pas de bstan te/ de nyid kyis so so yang dag par rig pa'i rab tu dbye ba yang bstan to//de ltar na zhes bya ba la sogs pas ni de byang chub sems dpas ji ltar so so yang dag par rig pa bstan to/ /de la chos so so yang dag par rig pa'i ngo bo nyid ni rnam pa gnyis te bshad pa'i chos dang / rtogs pa'i chos so/ /bshad pa'i chos ni rtogs pa'i chos kyi rtsa ba yin pa'i phyir de bstan pas rtogs pa'i chos ma bstan kyang zhar la rig par bya ste/bshad pa'i chos ni ming dang tshig dang / yi ge dang / so so ba dang / bsdus pa'i ngo bo nyid yin pa'i phyir ming dang tshig dang / yi ge dang / so so ba dang / bsdus pas so zhes bya ba gsungs so//ming gang zhe na/ kun nas nyon mongs pa dang / rnam par byang ba'i chos rnams la ngo bo nyid dang bye brag gi ming du btags pa gang yin pa'o zhes bya ba la/ kun nas nyon mongs pa'i chos rnams zhes bya ba ni 'dod chags la sogs pa'o/ /rnam par byang ba'i chos rnams zhes bya ba ni dad pa la sogs pa'o//ngo bo nyid kyi ming du bya bar btags pa zhes bya ba ni 'di ni 'dod chags so/ /'di ni dad pa'o zhes bya bar btags pa'o/ /bye brag gi ming du bya bar btags pa zhes bya ba ni 'dod chags 'di ni yongs su shes par bya ba'o/ /'di ni spang bar bya ba'o/ / dad pa 'di ni thob par bya ba'o/ /'di ni brten par bya ba'o zhes bya ba la sogs par btags pa'o/ /tshig gang zhe na kun nas nyon mongs pa pa dang rnam par byang ba pa'i don rjes su tha snyad gdags pa'i phyir gnas dang rten ming de dag nyid kyi tshogs la brten pa gang yin pa'o zhes bya ba ni ming de dag nyid kyi tshogs gnas dang /rten yin te de la brten pa ni tshig yin no zhes bya bar sbyar ro/ /don rjes su tha snyad gdags pa'i phyir zhes bya ba ni kun nas nyon mongs pa'i ming can gyi chos de dag spang bar bya'o zhe 'am/ rnam par byang ba'i ming can gyi chos de dag bsgom par bya'o zhes bya ba la sogs par de dag gi don mtshon par bya ba'i phyir ro//gnas dang rten zhes bya ba ni ming de dag nyid kyi tshogs gnas dang rten yin te/ de la tshig dang gnas shing brten pa'i phyir/ ming de dag nyid kyi tshogs zhes bya ba ni 'dod pa dang / sred pa'i 'dod chags yongs su shes par bya ba dang /spang bar bya ba zhes bya ba lta bu dang / las dang 'bras bu dang / bden pa dang dkon mchog la yid ches shing sems dang ba'i dad pa thob par bya ba dang / brten par bya ba zhes bya ba lta bu la sogs pa'o/ /brten pa gang yin pa'o zhes bya ba ni gnas dang rten du gyur pa'i ming de dag nyid kyi tshogs la tshig brten pa ste/ming de dag nyid kyi tshogs la de'i don rjes su tha snyad gdags pa'i phyir tshig tu brjod pa 'byung bas na ming la brten pa ni tshig yin no/ /yi ge gang zhe na/ de gnyi ga'i gnas kyi yig 'bru gang yin pa'o zhes bya ba ni ming dang tshig de gnyis ka'i gnas su gyur pa a A i I zhes bya ba la sogs pa'i yig 'bru ni yi ge yin no zhes bya ba'i tha tshig go//de dag so so las zhes bya ba ni ming dang tshig dang yig 'bru so so las so/ /ma 'dres pa la so so'i yid la byed pas zhes bya ba ni ming dang tshig dang yi ge bkod pa khyad par du 'phags pa dang ldan pa'i mdo'i sde la sogs pa'i chos rnams kyi ming ngam/yang na tshig gam/ yang na yi ge sna gcig la dmigs pa'i yid la byed pas so/ /bsdus pa las zhes bya ba la sogs pas ni snga ma las bzlog pa yin no/ /de dag thams cad gcig tu bsdus na chos so so yang dag par rig pa zhes bya ste zhes bya ba ni tshig dang /yi ge dang / so so ba dang / bsdus pas chos so so yang dag par rig pa de dag thams cad gcig tu bsdus nas chos so so yang dag par rig pa'i ngo bo nyid dang / rab tu dbye ba zhes bya'o zhes bya ba'i tha tshig go/ /de ltar na chos so so yang dag par rig pa yin no zhes bya bas ni de byang chub sems dpas ji ltar so so yang dag par rig pa bstan to//de ltar chos so so yang dag par rig pa'i ngo bo nyid dang / rab tu dbye ba dang / de byang chub sems dpas ji ltar so so yang dag par rig pa bstan nas/ de ni de la gnas pa don so so yang dag par rig pa'i ngo bo nyid dang rab tu dbye ba dang /de byang chub sems dpas ji ltar so so yang dag par rig pa bstan par bya ste/ de ni rnam pa bzhis bstan te/ shes bya'i don thams cad bsdus pa dang / bstan pa'i don thams cad bsdus pa dang / sems la brtag pa'i don thams cad bsdus pa dang /gnas dang gnas pa zab pa dang rgya che ba'i don thams cad bsdus pas so/ /de la shes bya'i don thams cad bsdus pas don so so yang dag par rig pa'i ngo bo nyid de rab tu dbye ba dang / de byang chub sems dpas ji ltar so so yang dag par rig pa ni byang chub sems dpas rnam pa bcus don so so yang dag par rig pa yin te zhes bya ba la sogs pa bstan te/'dir ji snyed yod pa nyid dang zhes bya ba la sogs pas ni bstan pas don so so yang dag par rig pa la mngon pa'i nga rgyal rnam par gzhig cing chud mi za bar bya ba'i phyir gdags pa gtan la dbab pa bstan te /de nyid kyis don so so yang dag par rig pa'i ngo bo nyid kyang bstan to/ /byams pa de la kun nas nyon mongs pa dang rnam par byang ba'i chos rnams la zhes bya ba la sogs pas ni bshad pas de bstan te/ de nyid kyis don so so yang dag par rig pa'i rab tu dbye ba yang bstan to//de byang chub sems dpas ji ltar so so yang dag par rig pa ni gnas skabs de dag thams cad kyis bstan par sbyar ro/ /de la shes bya'i don thams cad bsdus pa zhes bya ba ni shes bya'i dngos po ni ji snyed yod pa nyid dang ji lta ba bzhin du yod pa nyid do/ /shes bya'i dngos po gang zhe na/'dzin pa'i don dang gzung ba'i don to/ /'dzin pa'i don ni gzung ba'i don kyang yin te/ gzung ba'i don gang zhe na/ gnas kyi don dang longs spyod kyi don te/ de dag gis ni shes bya'i dngos po'i ji snyed yod pa nyid bstan to/ /'dzin pa'i don la sogs pa de dag nyid la phyin ci log gi don sngon du 'gro ba gang yin pa de ni kun nas nyon mongs pa'i don to//de dag nyid la phyin ci ma log pa'i don sngon du 'gro ba gang yin pa de ni rnam par byang ba'i don te/ de dag gis ni shes bya'i dngos po'i ji lta ba bzhin du yod pa nyid bstan te/ de ni bstan pa dang don so so yang dag par rig pa'i ngo bo nyid yin no/ /rnam par dbye ba zhes bya ba ni rnam grangs so//phung po rnams kyi ni grangs lngas so zhes bya ba ni phung po rnams kyi rnam pa rab tu dbye ba ni zhes bya bar sbyar te/ des ni ngo bo nyid bstan to/ /nang gi skye mched rnams kyi ni grangs drug gis so zhes bya ba yang rnam pa rab tu dbye ba ste/ des ni zab pa ma bstan to/ /phyi rol gyi skye mched rnams kyi yang grangs drug kho nas so zhes bya ba yang rnam pa rab tu dbye ba ste/des ni longs spyod bstan to/ /sogs pa'o zhes bya ba'i sgras ni kun nas nyon mongs pa dang rnam par byang ba'i chos thams cad kyi rnam pa rab tu dbye ba gzhan yang bsdu ba bstan to/ /de bzhin nyid gang yin pa de ni zhes bya ba ni mtshan nyid do//'byung ba'i de bzhin nyid ces bya ba ni nyon mongs pa dang las dang skye ba'i rgyun gyis 'khor bar 'byung ba ni rnam pa de dag gis gzhan du ma yin pas de bzhin nyid ces bya ste/ 'du byed rnams kyi thog ma dang / tha ma med pa nyid gang yin pa'o/ /mtshan nyid kyi de bzhin nyid ces bya ba ni mtshan nyid gsum po dag gang zag dang chos kyi ngo bo nyid med pa ni de dag gis gzhan du ma yin pas de bzhin nyid ces bya ste/chos thams cad kyi gang zag bdag med pa dang chos bdag med pa gang yin pa'o/ /rnam par rig pa'i de bzhin nyid ces bya ba ni gnyis med pa'i ngo bo nyid nas ngo bo nyid des gzhan du ma yin pas de bzhin nyid ces bya ste/'du byed rnams rnam par rig pa tsam gang yin pa'o/ /gnas pa'i de bzhin nyid ces bya ba ni sdug bsngal gyi ngo bo nyid dus la sogs par gnas pa ni ngo bo nyid des gzhan du ma yin pas de bzhin nyid ces bya ste/ sdug bsngal gyi bden pa bstan pa gang yin pa'o//log par bsgrub pa'i de bzhin nyid ces bya ba ni las dang nyon mongs pas skye ba bsgrub pa ni log par bsgrub pa de nyid kyis gzhan du ma yin par de bzhin nyid ces bya ste/ kun 'byung gi bden pa bstan pa gang yin pa'o/ /rnam par dag pa'i de bzhin nyid ces bya ba ni yang dag pa ma yin pa kun du rtog pa 'gags pas rnam par dag pa ni rnam par dag pa nyid kyis gzhan du ma yin pas de bzhin nyid ces bya ste/'gog pa'i bden pa bstan pa gang yin pa'o/ /yang dag par bsgrub pa'i de bzhin nyid ces bya ba ni log par bsgrub pa'i gnyen po 'phags pa'i lam gyi mya ngan las 'das pa bsgrub pa ni yang dag par sgrub pa de nyid kyis gzhan du ma yin pas de bzhin nyid ces bya ste/lam gyi bden pa bstan pa gang yin pa'o/ /byams pa de la zhes bya ba la sogs pas ni de bzhin nyid bdun po de dag sems can gyi bye brag dang /chos kyi bye brag dang / byang chub kyi bye brag dang lam gyi bye brag tu bsdu ba'i tshul ston to/ /sems can thams cad ni 'khor bar 'byung ba dang / sdug bsngal dang kun 'byung ba'i bye brag yin pas 'byung ba dang / gnas pa dang / log par bsgrub pa'i de bzhin nyid kyis mtshungs shing mnyam mo//chos thams cad ni bdag med pa dang rnam par rig pa tsam gyi bye brag yin pas mtshan nyid dang rnam par rig pa'i de bzhin nyid kyis mtshungs shing mnyam mo/ /byang chub thams cad ni 'gog pa'i bye brag yin pas rnam par dag pa'i de bzhin nyid kyis mtshungs shing mnyam mo//'o na byang chub thams cad mtshungs shing mnyam na ci'i phyir sangs rgyas kyi rnam par grol ba las ni chos kyi sku'i mtshan nyid kyis sems can gyi don la 'jug pa 'byung la/ nyan thos dang rang sangs rgyas kyi rnam par grol ba las ni ma yin zhe na/ de dag nyon mongs pa'i sgrib pa las rnam par grol bas mtshungs kyang shes bya'i sgrib pa las rnam par grol ba'i chos kyi skus mi mtshungs te/de yang sngon gyi smon lam gyi dbang tsam du zad kyi rang bzhin ni tha dad par nges pa ni ma yin te/ ji skad du/ ji ltar 'dud pa'i dbang gis na/ /gos la tshon bkra'i ri mo ltar/ /de bzhin shugs kyi dbang gis na//grol ba ye shes ri mo bkra/ /zhes bshad pa lta bu'o/ /thob pa thams cad 'dres pa'i chos la dmigs pa'i zhi gnas dang lhag mthong gis bsdus pa'i shes rab ces bya ba ni chos thams cad ro gcig pa nyid du dmigs pa'i lam gyi ngo bo nyid yin te/ las thams cad ni 'phags pa'i lam yan lag brgyad pa'i bye brag yin pas/yang dag par bsgrub pa'i de bzhin nyid kyis mtshungs zhing mnyam mo/ /'dzin pa'i don zhes bya ba ni dmigs pa dang bcas pa'o/ /gzung ba'i don ces bya ba ni dmigs par bya ba'o/ /yang 'dzin pa'i don gang yin pa de ni gzung ba'i don kyang yin no zhes bya ba ni chos thams cad yid kyi rnam par shes pa'i gzung ba yin pa'i phyir ro//gnas kyi don ces bya ba ni snod kyi 'jig rten gyi khams so/ /grong tshigs zhes bya ba ba ni grong gi mtshams te/ grong dang grong de nyid kyi 'khor du gtogs pa'i grong gi mtshams gcig go/ /grong tshigs brgya dang / de stong dang / de 'bum dang zhes bya ba ni mtshon pa tsam du zad kyi grangs kyi mtha' de dag tu nges pa ni ma yin no//rgya mtsho la thug pa'i sa zhes bya ba ni 'dzam bu'i gling gi dbus nas bzung ste/ phyogs bzhir rgya mtsho la thug pa bzhi yod par sbyar ro/ /de yang grong tshigs 'bum la rgya mtsho la thug pa'i sa gcig tu bsgre ba yang ma yin/rgya mtsho la thug pa'i sa 'bum la 'dzam bu'i gling gcig tu bsgre ba yang ma yin te/ grong tshigs dang 'bum la thag pa'i tshar gcig /rgya mtsho la thug pa'i sa yang 'bum la thug pa'i tshar gcig tu so sor gzhag pa yin no/ /'dzam bu'i gling la sogs pa la yang de bzhin du tshar so sor sbyar bar bya ste/de ltar grong tshigs dang de brgya la sogs pa bstan pa ni 'jig rten gyi khams dpag tu med par mngon par bsgrub pa'i rgyu yin gyi/ 'jig rten gyi khams kyi tshad mnyam pa de dang grangs des bsgre ba ni ma yin no/ /longs spyod kyi don ces bya ba ni yongs su longs spyad par bya ba'i gzhi'o//yongs su bzung ba zhes bya ba ni yongs su bzung ba'i dngos po bdun te/ bdag dang pha ma dang bu dang chung ma dang bran dang bran mo dang las byed pa dang / zho shas 'tsho ba dang mdza' bshes dang blon po dang nye du dang snag gi gnyen mtshams kyi dngos po dang zhing gi dngos po dang /khang khyim gyi dngos po dang / zong dgram pa'i dngos po dang / bsod nams bya ba'i dngos po dang / las kyi mtha' la sbyor ba'i dngos po dang / nor sogs pa'i dngos po'o/ /yo byad ces bya ba ni yo byad bcu ste/ zas dang / skom dang / bzhon pa dang /gos dang / rgyan cha dang / bzhad gad dang / glu bro dang / rol mo'i sgra dang / spos dang / me tog phreng dang / byug pa dang / snod spyad dang / snang ba dang / skyes pa dang / bud med kyis bsnyen bkur byed pa rnams so/ /phyin ci log gi don zhes bya ba ni phyin ci log rnam pa bzhis 'du shes dang /sems dang lta ba phyin ci log tu gyur pa'o/ /'dzin pa la sogs pa'i don de dag nyid la zhes bya ba ni 'dzin pa dang / gzung ba dang / gnas dang / longs spyod kyi don de dag la'o/ /'du shes phyin ci log ces bya ba ni phyin ci log bzhir 'du shes kyis yongs su rtog pa'o//sems phyin ci log ces bya ba ni sems phyin ci log bzhi po dag la lta bas mngon par zhen pa'i sems 'dod chags la sogs pas kun nas nyon mongs par gyur pa'o/ /lta ba phyin ci log ces bya ba ni 'du shes kyis yongs su rtog pa de nyid la de bzhin du bzod pa dang /'dod pa dang / rnam par 'jig pa dang / mngon par zhen pa'o/ /phyin ci ma log pa'i don ces bya ba ni phyin ci log gi don de las bzlog pa yin no/ /kun nas nyon mongs pa'i don ces bya ba ni 'dzin pa'i don de dag nyid la phyin ci log gi don sngon du 'gro ba gang yin pa ste/ de yang rnam pa gsum mo/ /nyon mongs pa'i kun nas nyon mongs pa zhes bya ba ni nyon mongs pa dang nye ba'i nyon mongs pa rnams so/ /de dag gi rab tu dbye ba ni rnam par gzhag ste/ ngo bo nyid dang / rab tu dbye ba dang / rgyu dang / gnas skabs dang / sgo dang / che ba dang / phyin ci log dang /rnam grangs dang / nyes dmigs kyis so/ /de la ngo bo nyid gang zhe na/ chos gang skye ba na bdag nyid kyang rab tu ma zhi ba'i mtshan nyid du skye la de skyes pas 'du byed kyi rgyud kyang rab tu ma zhi ba kho nar 'jug pa'o/ /rab tu dbye ba gang zhe na/ nyon mongs pa drug dang / nye ba'i nyon mongs pa mang po dag gi mtshan nyid rab tu dbye ba'o//rgyu gang zhe na/ rnam pa drug ste/ rten dang / dmigs pa dang / 'du 'dzi dang / bshad pa dang / goms pa dang / yid la byed pa las nyon mongs pa skye ba'o/ /gnas skabs gang zhe na/ rnam pa bdun te/ bag la nyal ba dang / kun nas dkris pa dang /kun brtags pa dang / lhan cig skyes pa dang / chung ngu dang / 'bring dang / chen po'i gnas skabs so/ /sgo gang zhe na/ rnam pa gnyis te/ kun nas dkris pa dang / bag la nyal gyi sgo'o/ che ba gang zhe na/ rnam pa drug ste/ lhung ba dang / skye ba dang / rgyud dang / gzhi dang / las kun nas slong ba dang / mthar gyur pa'o/ /phyin ci log gang zhe na/ rnam pa bdun te/ phyin ci log bzhi dang / de dag la 'du shes dang / lta ba dang / sems phyin ci log tu gyur pa'o/ /rnam grangs gang zhe na/ rnam grangs mang po 'di lta ste/ kun du sbyor ba dang / 'chi ba ba dang /bag la nyal ba dang / nye ba'i nyon mongs pa dang / kun nas dkris pa dang / chu bo dang / sbyor ba dang / nye bar len pa dang / mdud pa dang / sgrib pa dang / tha ba dang / dri ma dang / sdig pa dang / zug rngu dang / yongs su 'dzin pa dang / rtsa ba dang / nyes par spyod pa dang / zag pa dang /phongs pa dang / yongs su gdung ba dang / 'khrug pa dang / 'thab pa dang / me dang / rims nad dang / nags sbyor ba dang / gags dang / de lta bu dang mthun pa nyon mongs pa'i rnam grangs mang po dag go/ /nyes dmigs gang zhe na/ nyes dmigs rnam pa du ma 'di lta ste/ sems kun nas nyon mongs par byed pa dang / dmigs pa la phyin ci log par byed pa dang / bag la nyal brtan par byed pa dang / rgyu mthun pa'i 'du byed kyi rgyud 'jug par byed pa dang / bdag dang gzhan dang gnyi ga la gnod pa dang / tshe 'di dang phyi ma gnyis ka'i kha na ma tho ba bskyed pa dang / de la skyes pa'i sems las byung ba sdug bsngal ba dang / yid mi bde ba nyams su myong bar byed pa dang / skye ba la sogs pa'i sdug bsngal 'grub par byed pa dang / mya ngan las 'das pa las rgyud thag ring bar byed pa dang / dge ba'i chos rnams las yongs su nyams par byed pa dang / longs spyod nyams par byed pa dang /'khor gyi nang du zhum par 'gyur ba dang / phyogs dang phyogs mtshams rnams su sdig pa mi snyan pa'i sgra grags par 'gyur ba dang / dam pa rnams kyis smad par 'gyur ba dang / 'gyod bzhin du 'chi ba'i dus byed pa dang / lus zhig ste 'chi ba'i 'og tu ngan song ngan 'gro log par lta ba'i sems can rnams su skye ba dang /bdag gi don thob par mi 'gyur ba'o/ /las kyi kun nas nyon mongs pa zhes bya ba ni lus dang ngag dang yid kyi mngon par 'du byed pa rnams so/ /de dag gi rab tu dbye ba yang rnam pa dgus rnam par gzhag ste/ ngo bo nyid dang /rab tu dbye ba dang / rgyu dang / gnas skabs dang / sgo dang / che ba dang / phyin ci log pa dang / rnam grangs dang / nyes dmigs kyis so/ /de la ngo bo nyid gang zhe na/ chos gang skye ba na / mngon par 'du byed pa'i mtshan nyid kyang skye la de skyes pas lus dang ngag gi mngon par 'du byed pa yang 'jug pa'o//rab tu dbye ba gang zhe na/ rnam pa gnyis te/ dge ba bcu dang mi dge ba bcu'i las kyi lam yang dag par blangs te/ 'jug pa'i gang zag gi mtshan nyid rab tu dbye ba dang / las kyi lam de nyid kyi chos kyi mtshan nyid rab tu dbye ba'o/ /rgyu gang zhe na/rnam pa bcu gnyis te/ chags pa dang / zhe sdang dang / gti mug dang / bdag dang gzhan dang / gzhan gyi rjes su 'jug pa dang / zang zing dang / 'jigs pa dang / gnod pa bya ba'i phyir dang / rtse zhing dga' ba dang / chos su 'du shes pa dang / log par lta ba'o/ /gnas skabs gang zhe na/rnam pa lnga ste/ chung ngu dang / 'bring dang / chen po dang / byung ba dang / bag chags kyi gnas so/ /sgo gang zhe na/ rnam pa gnyis te/ 'bras bu 'byin pa'i sgo dang / gnod pa byed pa dang / phan 'dogs pa'i sgo'o/ /che ba gang zhe na/ rnam pa drug ste/ mngon par 'du byed pa dang / goms pa dang / ngo bo nyid dang / gzhi dang / mi mthun pa'i phyogs su gcig tu nges pa dang / mi mthun pa'i phyogs sel ba'o/ /phyin ci log gang zhe na/ rnam pa gsum ste/ bya ba phyin ci log dang / 'dzin pa phyin ci log dang / dga' ba phyin ci log go/ /rnam grangs gang zhe na/ las byas pa dang / ma byas pa dang / bsags pa dang / ma bsags pa dang / bsams pa las byung ba dang / ma bsams pa las byung ba dang / rnam par smin par nges pa dang / rnam par smin par ma nges pa dang / rnam par smin pa rnam par smin zin pa dang / rnam par smin pa rnam par ma smin pa dang /dge ba dang / mi dge ba dang / lung du ma bstan pa dang / sgom pas bsdus pa dang / sdom pa ma yin pas bsdus pa dang / sdom pas bsdus pa yang ma yin la/ sdom pa ma yin pas bsdus pa yang ma yin pa dang / sbyin pa las byung ba dang / tshul khrims las byung ba dang / bsgoms pa las byung ba dang / bsod nams dang / bsod nams ma yin pa dang / mi g.yo ba dang / bde ba myong bar 'gyur ba dang / sdug bsngal myong bar 'gyur ba dang / sdug bsngal yang ma yin/ bde ba yang ma yin pa myong bar 'gyur ba dang / tshe 'di la myong bar 'gyur ba dang / skyes nas myong bar 'gyur ba dang /lan grangs gzhan la myong bar 'gyur ba dang / 'das pa dang / ma 'ongs pa dang / da ltar byung ba dang / 'dod pa dang ldan pa dang / gzugs dang ldan pa dang / gzugs med pa dang ldan pa dang / slob pa dang / mi slob pa dang / slob pa yang ma yin/ mi slob pa yang ma yin pa dang /mthong bas spang bar bya ba dang / bsgom pas spang bar bya ba dang / spang bar bya ba ma yin pa dang / gnag la rnam par smin pa gnag pa dang / dkar la rnam par smin pa dkar ba dang / dkar la rnam par smin pa dkar gnag dang / gnag pa yang ma yin/ dkar ba yang ma yin la rnam par smin pa yang med de/las zad par 'gyur ba dang / yon po'i las dang / nye ba'i las dang / snyigs ma'i las dang / gtsang ma'i las dang mthun pa'i las dag go/ /nyes dmigs gang zhe na rnam pa bdun te / bdag la gnod pa dang / gzhan la gnod pa dang / gnyis ka la gnod pa dang / tshe 'di'i kha na ma tho ba skyed pa dang / tshe phyi ma'i kha na ma tho ba skyed pa dang / de las skyes pa'i sems las byung ba sdug bsngal ba dang / yid mi bde ba nyams su myong bar 'gyur ro/ /skye ba'i kun nas nyon mongs pa zhes bya ba ni nyon mongs pa'i kun nas nyon mongs pa dang /las kyi kun nas nyon mongs pa'i khams su skye ba med do/ /de'i rab tu dbye ba ni rnam pa bzhis rnam par gzhag ste/ rab tu dbye ba dang / sdug bsngal ba dang / ma nges pa dang / 'jug pas so/ /de la rab tu dbye ba ni rnam pa lnga ste/ khams kyi rab tu dbye ba dang / 'gro ba'i rab tu dbye ba dang /gnas gzhan gyi rab tu dbye ba dang / rigs kyi rab tu dbye ba dang / 'jig rten na lus kyi rab tu dbye ba'o/ /de la khams gsum gyi rab tu dbye ba ni khams gsum du skye ba'o/ /'gro ba'i rab tu dbye ba ni 'gro ba lngar skye ba'o/ /gnas gzhan gyi rab tu dbye ba ni 'dod pa'i khams na gnas gzhan sum cu rtsa drug dang /gzugs kyi khams na gnas gzhan bco brgyad dang / gzugs med pa'i khams na gnas gzhan bzhi ste/ de dag bsdoms na gnas gzhan lnga bcu rtsa brgyad du skye ba'o/ /rigs kyi rab tu dbye ba ni 'dod pa'i khams na mi rnams la skye ba rnam pa gsum yod de/rigs ngan par skye ba dang / rigs btsun par skye ba dang / rigs ngan par yang ma yin rigs btsun par yang ma yin par skye ba dang / 'dod pa na spyod pa'i lha rnams la yang skye ba rnam pa gsum yod de/ lha ma yin du skye ba dang / sa gzhi la brten pa'i nang du skye ba dang /nam mkha'i gzhal med khang du brten pa'i nang du skye ba dang / gzugs kyi khams na yang skye ba rnam pa gsum yod de/ so so'i skye bo rnams kyi 'du shes dang bcas pa dang / 'du shes med par skye ba dang / 'phags pa rnams kyi gnas gtsang mar skye ba dang /gzugs med pa'i khams na yang skye ba rnam pa gsum yod de/ 'du shes tshad med pa rnams kyi nang du skye ba dang / ci yang med par 'du shes pa rnams kyi nang du skye ba dang / 'du shes med 'du shes med min gyi lha rnams kyi nang du skye ba ste/ de dag bsdoms na rigs bcu gnyis su skye ba'o//'jig rten na lus kyi rab tu dbye ba ni phyogs bcu'i 'jig rten gyi khams tshad med pa dag na sems can tshad med pa rnams kyi skye ba tshad med pa dag yin par rig par bya'o/ /de la sdug bsngal ba'i rab tu dbye ba ni yun ring po nas skye ba de dag tu 'gro zhing 'khor ba rnams kyi yan lag dang nying lag bcad pa mang po nyams su myong ba las khrag zag cing 'bab pa dang /der pha ma dang phu nu dang bu sring gi phyir sdug bsngal ba dang / gnyen bshes dang / nor dang / longs spyod zad pa mang po nyams su myong ba rnams kyi mchi ma mang po zag cing 'bab pa dang / de dag tu ma'i nu zho 'thungs pa rgya mtsho chen po bzhi'i chu bas kyang ches mang ngo zhes gsungs pa dang de lta bu dang mthun pa rnams ni skye ba'i sdug bsngal ba'i rab tu dbye ba yin par rig par bya'o//de la ma nges pa'i rab tu dbye ba ni skye ba de dag tu 'gro zhing 'khor ba rnams kyi pha dang ma'i mthar thug pa med pa dang / pha ma dang / phu nu dang bu sring dang mkhan po dang / slob dpon dang / bla ma lta bur ma gyur pa med pa dang / gang zag gcig gi bskal pa gcig gi rus pa'i phung po yang gal te sdud pa cig yod pa bsdus nas kyang 'jig pa dang rul bar mi 'gyur du zin na ri bo ngos yangs tsam mo zhes gsungs pa dang / de lta bu dang mthun pa rnams ni skye ba'i ma nges pa'i rab tu dbye ba yin par rig par bya'o//de la 'jug pa'i rab tu dbye ba ni skye ba de dag tu 'gro zhing 'khor rnams kyi rten cing 'brel par 'byung ba'i ngo bo nyid dang / don dang rab tu dbye ba dang / go rims dang bsdu ba dang / rten rnam par gzhag pa dag yin par rig par bya'o//rnam par byang ba'i don ces bya ba ni 'dzin pa'i don la sogs pa de dag nyid la phyin ci ma log pa'i don sngon du 'gro ba gang yin pa'o/ /byang chub kyi phyogs dang mthun pa'i chos zhes bya ba ni dran pa nye bar gzhag pa la sogs pa'o/ /byams pa rnam pa bcu po de dag gis don thams cad bsdus par rig par bya'o zhes bya bas ni shes bya'i don thams cad bsdus pas don so so yang dag par rig pa'i ngo bo nyid dang /rab tu dbye ba dang / de byang chub sems dpas ji ltar so so yang dag par rig pas mjug bsdu ba bstan to/ /de'i 'og tu bstan pa'i don thams cad bsdus pas don so so yang dag par rig pa'i ngo bo nyid dang /rab tu dbye ba dang / de byang chub sems dpas ji ltar so so yang dag par rig pa ni byams pa yang byang chub sems dpas rnam pa lngas don so so yang dag par rig pa yin te zhes bya ba la sogs pas bstan te/ 'dir yang don rnam pa lnga gang zhe na zhes bya ba la sogs pas ni don so so yang dag par rig pa la mngon pa'i nga rgyal rnam par gzhig cing chud mi za bar bya ba'i phyir gdags pa gtan la dbab pa bstan te/ de nyid kyis don so so yang dag par rig pa ni ngo bo nyid kyang bstan to/ /byams pa de la yongs su shes par bya ba'i dngos po ni zhes bya ba la sogs pas ni bshad pas de bstan te/de nyid kyis don so so yang dag par rig pa'i rab tu dbye ba yang bstan to/ /de byang chub sems dpas ji ltar so so yang dag par rig pa ni gnas skabs de dag thams cad kyis bstan par sbyar ro//de la bstan pa'i don thams cad bsdus pa zhes bya ba ni sangs rgyas bcom ldan 'das rnams kyis chos bstan pa don yongs su shes par bya ba'i yul yongs su shes pa'i ngo bo nyid dang / yongs su shes pa'i 'bras bu thams cad dang bsdus pa ste/ de la yongs su shes par bya ba'i dngos po dang /yongs su shes par bya ba'i don to/ /yongs su shes par bya ba'i ngo bo nyid ni yongs su shes pa'o/ /yongs su shes par bya ba'i 'bras bu ni yongs su shes pa'i 'bras bu thob pa dang / de rab tu rig par byed pa ste/ de ni bstan pa dang / don so so yang dag par rig pa'i ngo bo nyid yin no//shes bya thams cad ces bya ba ni kun nas nyon mongs pa dang / rnam par byang ba'i phyogs dang mthun pa'i phyogs thams cad do/ /'di lta ste/ phung po rnams zhes bya ba'am zhes bya ba la sogs pas ni byang chub sems dpas yongs su shes par bya ba'i dngos po'i thog mar phung po la sogs pa yin par bstan to//de lta bu la sogs pa zhes bya ba'i sgras ni kun nas nyon mongs pa dang / rnam par byang ba'i phyogs dang mthun pa'i chos thams cad bsdu ba bstan to/ /rnam pa ji snyed kyis zhes bya ba ni rnam grangs ji snyed yod pa nyid kyis so//shes bya de'ang zhes bya ba ni yongs su shes par bya ba'i dngos po de'o/ /ji lta ba bzhin zhes bya ba ni mtshan nyid ji lta ba bzhin du yod pa nyid do/ /'dis ni sangs rgyas bcom ldan 'das rnams kyi chos bstan pa'i don rnam pa bcu ston te/ bden pa gnyis kyi don dang / nyes dmigs dang phan yon gyi don dang /rkyen las byung zhing dus rtogs pa'i don dang / mi rtag pa dang / sdug bsngal ba'i don dang / rnam par bzhag pa bden pa'i don dang / rnam par ma bzhag pa bden pa'i don dang / bsdu ba dang / dbye ba'i don dang / lan gdab pa'i don dang / gsang ba dang / bsgrags pa'i don to//de la bden pa gnyis kyi don ni kun rdzob dang don dam pa zhes bya bas bstan te/ sangs rgyas bcom ldan 'das rnams ni bden pa gnyis la brten nas chos bstan pa'i phyir ro/ /nyes dmigs dang phan yon gyi don ni skyon dang yon tan zhes bya bas bstan te/ bden pa gnyis bstan pa der yang kun nas nyon mongs pa'i skyon gyi nyes dmigs brjod la/rnam par byang ba'i phan yon brjod pa'i phyir ro/ /rkyen las byung zhing dus su rtog pa'i don ni rkyen dang dus zhes bya bas bstan te / kun nas nyon mongs pa dang rnam par byang ba'i chos de dag kyang rkyen rnams las byung ba yin gyi dbang phyug la sogs pa las byung ba ma yin pa dang /de dag kyang 'das pa dang ma 'ongs pa dang da ltar byung ba'i dus su rtogs pa yin pa'i phyir ro/ /mi rtag pa'i don ni skye ba dang gnas pa dang 'jig pa'i mtshan nyid ces bya bas bstan te/ kun nas nyon mongs pa dang / rnam par byang ba'i chos de dag kyang phal cher 'dus byas kyi mtshan nyid rnams kyis rab tu phye bas mi rtag pa'i phyir ro//sdug bsngal ba'i don ni nad la sogs pas zhes bya bas bstan te/ 'dus byas kyi mtshan nyid rnams kyis rab tu phye ba'i mi rtag pa de dag ni nad dang shu ba dang zug rngu dang / sdig pa la sogs pa'i mtshan nyid kyis sdug bsngal ba yin pa'i phyir ro//rnam par gzhag pa'i don ni sdug bsngal dang kun 'byung ba la sogs pa zhes bya bas bstan te/ kun nas nyon mongs pa dang / rnam par byang ba'i chos de dag kyang nyan thos kyi theg par ni bden pa bzhi rnam par gzhag par bstan pa'i phyir ro/ /rnam par ma bzhag pa'i bden pa'i don ni de bzhin nyid dang /yang dag pa'i mtha' dang / chos kyi dbyings zhes bya bas bstan te/ chos de dag kyang theg pa chen por ni de bzhin gshegs pa rnams byung yang rung ma byung yang rung ste/ chos rnams kyi chos nyid dbyings de ni chos gnas par bya ba'i phyir 'dug pa yin no zhes bstan pa'i phyir ro//bsdu ba dang dbye ba'i don ni bsdu ba dang dbye ba zhes bya bas bstan te / chos de dag kyang mdor bsdu ba dang / rgyas par dbye ba gnyis kyis ston par mdzad pa'i phyir ro/ /lan gdab pa'i don ni mgo gcig tu lan gdab pa dang / rnam par dbye ba dang / dris te lan gdab pa dang /gzhag pa zhes bya bas bstan te/ chos de dag gi dris pa lan 'debs na yang rnam pa de bzhis lan 'debs par mdzad pa'i phyir ro/ /de la mgo gcig tu lan gdab pa zhes bya ba ni sems can thams cad 'chi bar 'gyur ram zhes 'dri ba la thams cad 'chi bar 'gyur zhes mgo gcig tu lan gdab pa lta bu la sogs pa'o//rnam par dbye zhing lan gdab pa zhes bya ba ni shi ba thams cad skye bar 'gyur ram zhes 'dri ba la gang dag nyon mongs pa dang bcas pa de dag ni skye bar 'gyur ro/ /gang dag nyon mongs pa med pa de dag ni skye bar mi 'gyur ro zhes rnam par phye ste lan gdab pa lta bu la sogs pa'o//dris te lan gdab pa ni zhes bya ba ni mi rnams khyad par du 'phags pa yin nam dman pa yin zhes 'dri ba las gang la ltos te 'dri zhes phyir dris nas gal te ngan song rnams la ltos te 'dri'o zhes zer na ni khyad par du 'phags pa yin no zhes lan gdab pa dang /gal te lha rnams la ltos te 'dri'o zhes zer na ni dman pa yin no zhes lan gdab pa lta bu la sogs pa'o/ /gzhag pas lan gdab pa ni bdag phung po rnams dang gcig gam tha dad ces 'dri ba la bdag gtan med pas phung po rnams dang gcig gam tha dad par 'gyur ba yod re skan snyam du don gyi dbang de yid la byas te cang mi smra bas lan gdab pa la sogs pa'o//gsang ba dang bsgrags pa'i don ni gsang ba dang bsgrags pa zhes bya bas bstan te/ sems can snod du ma gyur pa dag la don zab mo gsang ba dang / snod du gyur pa dag la sgrogs par mdzad pa'i phyir ro//de la rnam pa ji snyed yod pa nyid kyis zhes bya ba ni kun rdzob dang don dam la sogs pa'i rnam pa dag gis so/ /mtshan nyid ji lta bu bzhin du yod pa nyid kyis shes par bya ba ni sdug bsngal la sogs pa'i mtshan nyid dag gis so/ /de gnyis kar 'dzin par byed pa zhes bya ba ni yongs su shes par bya ba'i dngos po dang /yongs su shes par bya ba'i don de gnyis ka 'dzin par byed pa yongs su shes par bya ba'i ngo bo nyid yin te/ de'i phyir byang chub kyi phyogs dang mthun pa'i chos gang yin pa dag ste zhes bya ba smos so/ /'dod chags dang zhe sdang dang gti mug 'dul ba zhes bya ba ni dran pa nye bar gzhag pa la sogs pas 'dod chags la sogs pa rtse 'jil ba'o//ma lus par spong ba zhes bya ba ni yongs su gtugs te sgom pa'o/ /dge sbyong nyid ces bya ba ni dri ma med pa'i lam mo/ /'bras bu zhes bya ba ni rgyun du zhugs pa la sogs pa'o//yon tan 'jig rten pa zhes bya ba ni bsam gtan dang tshad med pa la sogs pa'o/ /'jig rten las 'das pa zhes bya ba ni zad pa dang mi skye ba shes pa zhes bya ba la sogs pa'o/ /thun mong zhes bya ba ni nyon mongs pa med pa dang / smon pa zhes bya ba la sogs pa'o//thun mong ma yin pa zhes bya ba ni sangs rgyas kyi chos ma 'dres pa brgya bzhi bcu la sogs pa'o/ /mngon du bya ba ni 'bras bu thob pa'o/ /de rab tu rig par byed pa zhes bya ba ni yongs su shes pa'i 'bras bu 'thob/ de rab tu rig par byed pa zad pa dang mi skye ba shes pa'o//mngon sum du byas pa'i chos de dag nyid la zhes bya ba ni yongs su shes pa'i 'bras bu 'thob pa de dag nyid la'o/ /rnam par grol ba shes pa zhes bya ba ni bdag nyid kyis so/ /gzhan dag la yang rgya cher ston pa dang yang dag par ston pa zhes bya ba ni rang gis rtogs pa'i shes pa gzhan la brda sprod par byed pa'o//byams pa don lnga po de dag gis kyang don thams cad bsdus par rig par bya'o zhes bya bas ni bstan pa'i don thams cad bsdus pas don so so yang dag par rig pa'i ngo bo nyid dang / rab tu dbye ba dang / de byang chub sems dpas ji ltar so so yang dag par rig pa'i mjug bsdu ba bstan to//de'i 'og tu sems la brtags pa'i don thams cad bsdus pas don so so yang dag par rig pa'i ngo bo nyid dang / rab tu dbye ba dang / de byang chub sems dpas ji ltar so so yang dag par rig pa ni byams pa yang byang chub sems dpas rnam pa bzhis don so so yang dag par rig pa yin te zhes bya ba la sogs pas bstan te/'dir yang don rnam pa bzhi gang zhe na zhes bya ba la sogs pas ni bstan pas don so so yang dag par rig pa la mngon pa'i nga rgyal rnam par gzhig cig chud mi za bar bya ba'i phyir gdags pa gtan la dbab pa bstan te/de nyid kyis don so so yang dag par rig pa'i ngo bo nyid kyang bstan to/ /bshad pa dang rab tu dbye ba ni logs shig tu ma bstan te skabs de nyid kyis rig par bya'o/ /de yang byang chub sems dpas ji ltar so so yang dag par rig pa ni gnas skabs de dag thams cad kyis bstan par sbyar ro//de la sems la brtags pa'i don thams cad bsdus pa zhes bya ba ni sems kyi rgyu brtag pa dang / sems kyi myong ba brtag pa dang / sems kyi rnam par rig pa brtag pa dang / sems kyi kun nas nyon mongs pa brtag pa dang / rnam par byang ba brtag pas go rims bzhin du lus dang /tshor ba dang / sems dang / chos dran pa nye bar gzhag pa'i don thams cad bsdus pa ste/ de la sems kyi rgyu brtag pa ni sems kyi len pa'i don ces bya bas bstan te/ kun gzhi'i rnam par shes pa nyid mtshams sbyor ba'i rgyu gnyis po kun brtags pa'i ngo bo nyid la mngon par zhen pa'i bag chags dang /rten dang bcas pa'i dbang po gzugs can len pa ste/ de nyid kyi lus dran pa nye bar gzhag pa'i don thams cad bsdus pa yang bstan to/ /sems kyi myong ba brtag pa ni myong ba'i don ces bya bas bstan te /bdag go snyam du rnam par rig par tshor ba rnam pa gsum myong ba ste/ de nyid kyis tshor ba dran pa nye bar gzhag pa'i don thams cad bsdus pa yang bstan to/ /sems kyi rnam par rig pa brtag pa ni rnam par rig pa'i don ces bya bas bstan te/ dmigs pa rnam par rig pas sems tsam du rig pa ste/de nyid kyis sems dran pa nye bar gzhag pa'i don thams cad bsdus pa yang bstan to/ /sems kyi kun nas nyon mongs pa dang rnam par byang ba brtag pa ni kun nas nyon mongs pa dang / rnam par byang ba'i don ces bya bas bstan te/ sems de nyid kyi sems dang sems las byung ba dag gi gnas dang dmigs pa'i rnam pa ma rtogs pa dang /rtogs pa las kun nas nyon mongs pa dang / rnam par byang bar 'gyur ba ste/ de nyid kyis chos dran pa nye bar gzhag pa'i don thams cad bsdus pa yang bstan to/ /byams pa'i don rnam pa bzhi po de dag gis kyang don thams cad bsdus par rig par bya'o zhes bya ba ni sems la brtag pa'i don thams cad bsdus pas don so so yang dag par rig pa'i ngo bo nyid rab tu dbye ba dang /de byang chub sems dpas ji ltar so so yang dag par rig pa'i mjug bsdu ba bstan to//de'i 'og tu gnas dang gnas pa zab pa dang rgya che ba'i don thams cad bsdus pas don so so yang dag par rig pa'i ngo bo nyid dang / dbye ba dang / de byang chub sems dpas ji lta so so yang dag par rig pa ni byams pa byang chub sems dpas rnam pa gsum gyis don so so yang dag par rig pa yin te zhes bya ba la sogs pas bstan te/'dir yang don rnam pa gsum gang zhe na zhes bya ba la sogs pas ni bstan pa'i don so so yang dag par rig pa la mngon pa'i nga rgyal rnam par gzhig cing chud mi za bar bya ba'i phyir gdags pa gtan la dbab pa bstan te/de nyid kyis don so so yang dag par rig pa'i ngo bo nyid bstan to/ /byams pa de la tshig 'bru'i don ni zhes bya ba la sogs pas ni bshad pas de bstan te/ de nyid kyis don so so yang dag par rig pa'i rab tu dbye ba yang bstan to/ /de byang chub sems dpas ji ltar so so yang dag par rig pa ni gnas skabs de dag thams cad kyis bstan par sbyar ro//de la gnas dang / gnas pa dang / zab pa dang rgya che ba'i don thams cad bsdus pa zhes bya ba la gnas ni tshig 'bru'i don to/ / gnas pa ni don gyi don to/ /de gnyis ni bstan pa zab pa dang / don zab par shes par bya ste go rims bzhin no/ /khams kyi don gyis rgya che ste/ dpag tu med pa'i phyir ro/ /de ni bstan pa dang / don so so yang dag par rig pa'i ngo bo nyid yin no/ /ming gi tshogs la sogs pa zhes bya ba ni sngar chos so so yang dag par rig pa'i skabs su ming dang tshig dang yi ge so so ba dang bsdus pa bstan pa gang yin par blta bar bya'o//de kho na'i mtshan nyid ces bya ba ni gzung ba nyid kyis so/ /yongs su shes pa'i mtshan nyid ces bya ba ni 'dzin pa nyid kyis so/ /spang ba'i mtshan nyid ces bya ba ni 'bral ba nyid kyis so/ /mngon du bya ba'i mtshan nyid ces bya ba ni 'thob pa nyid kyis so//bsgom pa'i mtshan nyid ces bya ba ni chud mi za ba'i tshul gyis so/ /rnam par rab tu dbye ba'i mtshan nyid ces bya ba ni de kho na rnam pa gnyis te/ me long gi de kho na dang snang ba'i de kho na zhes bya ba lta bu dang / yongs su shes pa ni dgu ste/'dod pa dang ldan pa'i sdug bsngal dang / kun 'byung ba mthong bas spang bar bya ba'i nyon mongs pa rnams spangs pa ni yongs su shes pa dang po'o/ /gzugs dang gzugs med pa dang ldan pa'i sdug bsngal dang / kun 'byung ba mthong bas spang bar bya ba'i nyon mongs pa rnams spangs pa ni yongs su shes pa gnyis pa'o//'dod pa dang ldan pa'i 'gog pa mthong bas spang bar bya ba'i nyon mongs pa rnams spangs pa ni yongs su shes pa gsum pa'o/ /'dod pa dang ldan pa'i lam mthong bas spang bar bya ba'i nyon mongs pa rnams spangs pa ni yongs su shes pa bzhi pa'o//gzugs dang gzugs med pa dang ldan pa'i 'gog pa mthong bas spang bar bya ba'i nyon mongs pa rnams spangs pa ni yongs su shes pa lnga pa'o/ /gzugs dang gzugs med pa'i lam mthong bas spang bar bya ba'i nyon mongs pa rnams spangs pa ni yongs su shes pa drug pa'o//tha ma'i cha dang mthun pa'i kun du sbyor ba spangs pa ni yongs su shes pa bdun pa'o/ /gzugs kyi 'dod chags spangs pa ni yongs su shes pa brgyad pa'o/ /gzugs med pa'i 'dod chags spangs pa ni yongs su shes pa dgu pa'o zhes bya ba lta bu dang / spang ba ni rnam pa gnyis te/mthong bas spang ba dang / bsgom pas spang ba lta bu'o zhes bya ba lta bu dang / mngon du bya ba ni rnam pa gnyis te/ lam mngon du bya ba dang / 'bras bu mngon du bya ba lta bu'o zhes bya ba lta bu dang / bsgom pa ni rnam pa bzhi ste/ 'thob pa bsgom pa dang / brten pa bsgom pa dang /spang ba bsgom pa dang / gnyen po bsgom pa'o zhes bya ba lta bu la sogs par de dag gi rnam pa rab tu dbye ba gang yin pa'o/ /gnas dang gnas par 'brel ba'i mtshan nyid ces bya ba ni chos dang don du 'brel pa ste/ de yang de'i bdag nyid kyi mtshan nyid kyis 'brel pa dang / de las skyes pa'i mtshan nyid kyis 'brel pa'o//bar du gcod pa'i chos kyi mtshan nyid ces bya ba ni sgrib pa la sogs pa'o/ /rjes su mthun pa'i chos kyi mtshan nyid ces bya ba ni legs par mnyam pa la sogs pa'o/ /nyes dmigs dang phan yon gyi mtshan nyid ces bya ba ni bdag dang gzhan gyi don yongs su mnyam pa dang /phun sum tshogs par 'gyur ba'o/ /khams lnga ste zhes bya ba ni dpag tu med pa lnga ste/ de dag gis byang chub sems dpa' rnams thams cad la mkhas par byed par 'gyur ro/ /'jig rten gyi khams zhes bya ba ni 'jig rten gyi khams dpag tu med pa ste/snod kyi 'jig rten phyogs bcu dpag tu med cing ming yang dpag tu med pa byang chub sems dpas yongs su sbyang bar bya ba dag go/ /sems can gyi khams zhes bya ba ni sems can gyi khams dpag tu med pa ste/ rigs yang dag par bsgrubs pa dang / ma bsgrubs pa'i sems can gyi rigs drug cu rtsa bzhi po byang chub sems dpas yongs su smin par bya ba dag go//chos kyi khams zhes bya ba ni chos kyi khams dpag tu med pa ste/ dge ba dang / mi dge ba dang / lung du ma bstan pa'i chos gang dag gis/ 'jig rten gyi khams de dag na sems can gyi khams de dag kun nas nyon mongs pa dang /rnam par byang bar 'gyur ba byang chub sems dpas rtogs par bya ba dag go/ /gdul ba'i khams zhes bya ba ni gdul ba'i khams dpag tu med pa ste/ sems can de dag gi nang na sems can gang dag rigs yang dag par bsgrubs shing skal ba dang ldan pa gtan du sdug bsngal las thar bar byar rung ba byang chub sems dpas rnam par grol bar bya ba dag go//'dul ba'i thabs kyi khams zhes bya ba ni 'dul ba'i thabs dpag tu med pa ste/ sems can de dag nyid rnam par thar par bya ba'i thabs byang chub sems dpas lags par bstan par bya ba dag go//byams pa don rnam pa gsum po de dag gis kyang don thams cad bsdus par rig par bya'o zhes bya bas ni gnas dang gnas pa zab pa dang rgya che ba'i don thams cad bsdus pas don so so yang dag par rig pa'i ngo bo nyid dang rab tu dbye ba dang / de byang chub sems dpas ji ltar so so yang dag par rig pa'i mjug bsdu ba bstan to//de ltar mngon pa'i nga rgyal rnam par gzhig cing mngon pa'i nga rgyal med pas rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang bshad pas mngon pa'i nga rgyal med pa gdags pa gtan la dbab pa bstan pa ni mngon pa'i nga rgyal rnam par gzhig cing chud mi za bar bya ba'i phyir gdags pa gtan la dbab pa bstan pa yin no// // de'i 'og tu zhi gnas tsam gyis chud mi za bar bya ba'i phyir gdags pa gtan la dbab pa'i tshig gi don la sogs pa bshad par bya ste/zhi gnas tsam gyis zhes bya ba ni lhag mthong gi shes pa dang mthong ba med pa'i zhi gnas 'ba' zhig gis so/ /chud mi za bar bya ba'i phyir gdags pa gtan la dbab pa zhes bya ba ni zhi gnas kyis lhag mthong gi lam gyi ngo bo nyid yongs su rdzogs par mi 'gyur ba'i phyir de tsam gyis chog par 'dzin na zhi gnas dang lhag mthong gi lam gyi ngo bo nyid las rab tu nyams shing chud za bar 'gyur bas de las rab tu nyams par mi 'gyur zhing chud mi za bar bya ba'i phyir bstan pa dang bshad pas shes rab rnam pa gsum gyis don so so yang dag par rig pa'i bye brag dang /bsgoms pa las byung ba'i shes pa dang / mthong ba'i ngo bo nyid kyis rab tu phye ba'i lhag mthong gi lam gdags pa gtan la dbab pa'o/ /de la mtshams sbyar ba ji lta bu zhe na/ 'dir 'phags pa byams pas gzhan dag 'di snyam du rnal 'byor pa zhi gnas dang lhag mthong gi lam gyi ngo bo nyid la sbyor bar byed pas zhi gnas tsam dang /shes pa dang / mthong ba ngan ngon tsam gyis chog par mi bzung zhing zhi gnas kyi lam yongs su dag pa la brten te / lhag mthong gi lam yongs su rdzogs par bya dgos na/shes rab rnam gsum gyis don so so yang dag par rig pa'i bye brag dang / bsgoms pa las byung ba'i shes rab dang mthong ba'i ngo bo nyid kyis rab tu phye ba'i lhag mthong gi lam yongs su rdzogs pa gang yin snyam du sems pa rnams kyi bsam pa brtags nas/bcom ldan 'das thos pa las byung ba'i shes rab kyis don so so yang dag par rig pa gang lags pa dang zhes bya ba la sogs pa zhu ba rnam pa gnyis zhus par sbyar ro/ /'dir shes rab rnam gsum gyis don so so yang dag par rig pa'i bye brag bstan pas ni zhi gnas tsam gyis chud mi za bar bya ba'i phyir gdags pa gtan la dbab pa bstan to//bsgoms pa las byung ba'i shes pa dang / mthong ba'i ngo bo nyid bstan pas ni bshad pas de bstan to/ /thos pa las byung ba'i shes rab ces bya ba ni tshig 'bru la gnas te skye ba yin pas des ni tshig 'bru la sogs pa'i don so so yang dag par rig par byed do zhes ston to//de la tshig 'bru la gnas pa'i don ces bya ba ni ming dang / tshig dang / yi ge dang / so so ba dang / bsdus pa las brten pa'i don to/ /sgra ji bzhin pa'i don ces bya ba ni dgongs pa med pa'i don ces bya bas bstan to/ /mngon du ma gyur pa'i don ces bya ba ni mnyam pa'i sa pa'i dmigs pa shes bya'i dngos po dang cha mthun pa'i gzugs brnyan mngon du ma gyur pa'o//rnam par thar pa'i rjes su mthun pa'i don ces bya ba ni bsgoms pa las byung ba'i shes rab kyis don so so yang dag par rig pas rnam par thar par byed pa'i brgyud pa'i rgyu yin pa'i phyir ro//rnam par thar par byed pa ma yin pa'i don ces bya ba ni de nyid kyis mngon sum du rnam par thar par byed mi nus pa'i phyir ro/ /so so yang dag par rig par byed do zhes bya ba ni kha phyir bltas te 'jug pa'i shes rab kyis so/ /bsams pa las byung ba'i shes rab ces bya ba ni rigs pas tshul bzhin du rtogs pa las byung ba ste/de yang mnyam par gzhag pa'i sa pa nyid ma yin pas tshig 'bru la gnas pa'i don kho na so so yang dag par rig par byed pa yin mod kyi/ rigs pas tshul bzhin du rtog pa'i rgyus sgra ji bzhin ma yin pa'i don so so yang dag par rig par byed do zhes ston to//tshig 'bru la gnas pa kho na'i don ces bya ba ni thos pa'i don la brten pa'i phyir ro/ /sgra ji bzhin ma yin pa dgongs pa can gyi don ces bya ba ni rigs pas brtags pa'i don yin pa'i phyir ro/ /mngon du ma gyur pa'i don ces bya ba ni snga ma bzhin te/'on kyang mnyam par gzhag pa'i sa pa'i mos pas yid la byed pa'i don gyi rjes su 'jug pas snga ma las khyad par du 'phags pa yin no/ /rnam par thar pa'i rjes su ches mthun pa'i don zhes bya ba ni bar chad med pa'i lam gyi rten yin pa'i phyir ro/ /rnam par thar par byed pa ma yin pa'i don ces bya ba ni snga ma bzhin te/'on kyang de ma thag tu nyon mongs pa las rnam par thar par byed nus pa'i don gyi rjes su 'jug pas snga ma las khyad par du 'phags pa yin no/ /so so yang dag par rig par byed do zhes bya ba ni rigs pas tshul bzhin du rtog pa'i shes rab kyis so//bsgoms pa las byung ba'i shes rab ces bya ba ni chos nges par byas pa las byung ba ste/ des ni snga ma gnyis ka'i don dang de las khyad par du gyur pa tshig 'bru la gnas pa ma yin pa la sogs pa'i don so so yang dag par rig par byed do zhes ston to//tshig 'bru la gnas pa'i don ces bya ba ni snga ma gnyis ka'i don kyang rtogs pa'i phyir ro/ /tshig 'bru la gnas pa ma yin pa'i don ces bya ba ni brjod pa'i sgra dang ma 'dres pa'i phyir ro/ /sgra ji bzhin pa'i don ces bya ba ni thos pa'i don la dmigs pa'i phyir ro/ / dgongs pa can gyi don ces bya ba ni bsams pa'i don la dmigs pa'i phyir ro/ /shes bya'i dngos po dang cha mthun pa'i ting nge 'dzin gyi spyod yul gyi gzugs brnyan gyis mngon du gyur pa'i don ces bya ba ni mnyam par gzhag pa'i sa pa'i zhi gnas dang / lhag mthong gi lam gyis dmigs pa mngon du gyur pas rang rig pa'i don to//rnam par thar pa'i rjes su ches shin tu mthun pa'i don ces bya ba ni bar chad med pa'i lam gyi rang bzhin yin pa'i phyir ro/ /rnam par thar par byed pa'i don ces bya ba ni rnam par grol ba'i lam gyi de bzhin nyid yin pa'i phyir ro/ /so so yang dag par rig par byed de zhes bya ba ni nges par gyur pa'i shes rab kyis so//de dag tha dad du bya ba ni de yin no zhes bya bas ni mnyam par ma bzhag pa'i sa pa'i don dang / mnyam par bzhag pa'i sa pa'i rjes su mthun pa'i don dang / mnyam par gzhag pa'i sa pa'i don so so yang dag par rig par byed pas de dag gi bye brag bstan pa yin no//de ltar shes rab rnam gsum gyis don so so yang dag par rig pa'i bye brag bstan nas/ da ni bsgoms pa las byung ba'i shes pa dang mthong ba'i ngo bo nyid bstan pa'i phyir bcom ldan 'das byang chub sems dpa' zhi gnas dang lhag mthong bsgom pa zhes bya ba la sogs pa zhus so//rnam grangs du mas ston par byed mod kyi zhes bya ba ni shes pa ni don dam pa'i bden pa 'dzin pa dang / ji lta ba bzhin du yod pa nyid 'dzin pa dang / sna tshogs ma yin pa 'dzin pa'o/ /mthong ba ni kun rdzob kyi bden pa 'dzin pa dang / ji snyed yod pa nyid 'dzin pa dang / sna tshogs pa'o zhes bya ba la sogs pa'i dbye bas so/ /mdor bsdus te bshad par bya'o zhes bya ba ni ngo bo nyid bstan par bya'o zhes bya ba'i tha tshig go/ /'dres pa'i chos la dmigs pa'i zhi gnas dang lhag mthong gi shes rab gang yin pa de ni shes pa yin no zhes bya ba ni don dam pa'i bden pa dang /ji lta ba bzhin du yod pa nyid dang rnam pa sna tshogs ma yin pa'i phyir ro/ /ma 'dres pa'i chos la dmigs pa'i zhi gnas dang lhag mthong gi shes rab gang yin pa de ni mthong ba yin no zhes bya ba ni kun rdzob kyi bden pa dang ji snyed yod pa nyid dang / rnam pa sna tshogs yin pa'i phyir ro/ /de ltar zhi gnas tsam gyis lhag mthong gi lam gyi ngo bo nyid yongs su rdzogs par mi 'gyur ba'i phyir de tsam gyis chog par 'dzin na zhi gnas dang lhag mthong gi lam gyi ngo bo nyid las rab tu nyams shing chud za bar 'gyur bas de las rab tu nyams par mi 'gyur zhing /chud mi za bar bya ba'i phyir bstan pa dang bshad pas shes rab rnam gsum gyi don so so yang dag par rig pa'i bye brag dang /bsgoms pa las byung ba'i shes pa dang / mthong ba'i ngo bo nyid kyis rab tu phye ba'i lhag mthong gi lam gdags pa gtan la dbab pa bstan pa ni zhi gnas tsam gyis chud mi za bar bya ba'i phyir gdags pa gtan la dbab pa yin no//de'i 'og tu phra ba kun du 'byung bas yongs su shes pa chud mi za bar bya ba'i phyir gdags pa gtan la dbab pa'i tshig gi don la sogs pa bshad par bya ste/ phra ba kun du 'byung bas zhes bya ba ni rnam par rig pa'i de bzhin nyid mnyam par gzhag pa'i sa pa'i shes rab rnam gsum gyis yid la byed pas so//yongs su shes pa zhes bya ba ni gzhan gyi dbang gi mtshan nyid la kun brtags pa'i mtshan nyid med pa'i chos yongs su shes shing / gzhan gyi dbang gi kun nas nyon mongs pa'i chos rab tu spangs te/ yongs su grub pa'i rnam par byang ba'i mtshan nyid kyi chos thos pa'o//chud mi za bar bya ba'i phyir gdags pa gtan la dbab pa zhes bya ba ni phra ba kun du 'byung bas yongs su shes pas rab tu phye ba'i zhi gnas dang / lhag mthong gi lam gyi ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang /bshad pas phra ba kun du 'byung bas yongs su shes pa gdags pa gtan la dbab pa'o/ /de la mtshams sbyar ba ji lta bu zhe na/ 'dir 'phags pa byams pas gzhan dag 'di snyam du rnal 'byor pa rnal 'byor gyis yongs su bsdus pa'i zhi gnas dang /lhag mthong gi lam gyi ngo bo nyid la sbyor bar byed pa ni rnam par rig pa'i de bzhin nyid mnyam par gzhag pa'i sa pa'i shes rab rnam gsum gyis yid la byed pas gzhan gyi dbang gi mtshan nyid la kun brtags pa'i mtshan nyid med pa'i chos yongs su shes shing /gzhan gyi dbang gi kun nas nyon mongs pa'i mtshan nyid kyi chos rab tu spangs te/ yongs su grub pa'i rnam par byang ba'i mtshan nyid kyi chos thob par bya dgos na/ de dag gi rnam par gzhag pa'i tshul ji lta bu yin snyam du sems pa rnams kyi bsam pa la brtags nas/bcom ldan 'das byang chub sems dpa' zhi gnas dang lhag mthong bsgom pas yid la bgyid pa gang gis mtshan ma gang ji ltar rnam par sel bar bgyid pa lags zhes bya ba la sogs pas zhus pa rnam pa lngar zhus pa sbyar ro/ /de la zhu ba dang po 'dir ni yid la bgyid pa gang gis mtshan ma gang ji ltar rnam par sel bar bgyid ces don rnam pa gsum zhus pa yin te/de dag gis ni bstan pas phra ba kun du 'byung bas yongs su shes pa chud mi za bar bya ba'i phyir gdags pa gtan la dbab pa bstan to/ /zhu ba lhag ma bzhis ni bshad pas de bstan par rig par bya'o//de la yid la bgyid pa gang gis zhes zhus pa'i lan du/ de bzhin nyid yid la byed pas zhes bya ba gsungs te/ rnam par rig pa'i de bzhin nyid rnam par gzhag pa'i sa pa'i shes rab rnam pa gsum gyis yid la byed pa ste/ de ni phra ba kun 'byung bas zhes bya ba'i don to//mtshan ma gang rnam par sel bar bgyid lags zhes zhus pa'i lan du chos kyi mtshan ma dang don gyi mtshan ma rnam par sel bar byed de zhes bya ba gsungs te/ gzhan gyi dbang gi mtshan nyid kyi mtshan ma rnam par sel bar byed de/ des ni gzhan gyi dbang gi kun nas nyon mongs pa'i mtshan nyid kyi chos rab tu spang ba bstan to//de la chos zhes bya ba ni sngar chos so so yang dag par rig pa'i skabs su ming dang tshig dang yi ges so so yang dag par rig par bya ba bstan pa gang yin pa'o/ /don ces bya ba ni sngar don so so yang dag par rig par bya ba'i skabs su rnam pa bcu dang lnga dang bzhi dang /gsum gyis so so yang dag par rig par bya ba bstan pa gang yin pa'o/ /mtshan ma zhes bya ba ni chos dang don nyid mtshan ma ste/ sems kyi rnam pa zhes bya ba'i tha tshig go/ /de ni gzhan gyi dbang gi mtshan nyid rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma kun nas nyon mongs pa'i mtshan nyid kyi chos yin pas gnas gyur par bya dgos pa'i phyir rnam par bsal bar bya ba yin no//ji ltar rnam par sel bar bgyid ces zhus pa'i lan du/ ming dang ming gi ngo bo nyid mi dmigs shing de'i gnas mtshan ma yang yang dag par rjes su mi mthong bas rnam par sel to zhes bya ba la sogs pa gsungs te/gzhan gyi dbang gi mtshan nyid la kun brtags pa'i mtshan nyid med pa'i chos yongs su shes shing gzhan gyi dbang gi kun nas nyon mongs pa'i mtshan nyid kyi chos rab tu spangs pas de sel to//de la chos dang don gyi mtshan ma ni gzhan gyi dbang gi mtshan nyid de kun nas nyon mongs pa'i mtshan nyid kyi chos yin la/ ming la sogs pa'i kun brtags pa'i mtshan nyid de mtshan nyid med pa'i chos yin no/ /ming la ming gi ngo bo nyid dmigs shing zhes bya bas ni gzhan gyi dbang gi mtshan nyid la kun brtags pa'i mtshan nyid kyi chos de la ngo bo nyid med pa'i chos yongs su shes pas rnam par sel ba bstan te/gzhan gyi dbang gi mtshan nyid rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma kun nas nyon mongs pa'i mtshan nyid kyi chos de la ngo bo nyid dam/bye brag tu ming btags pa gang yin pa de ni kun brtags pa'i mtshan nyid yin pas ming de ni mtshan nyid ngo bo nyid med pa yin pa'i phyir kun brtags pa'i ming la ming gi ngo bo nyid mi dmigs pas rnam par sel to//de'i 'og nas mtshan ma yang yang dag par rjes su mi mthong bas zhes bya bas ni gzhan gyi dbang gi kun nas nyon mongs pa'i mtshan nyid kyi chos rab tu spangs pas rnam par sel ba bstan te/ kun brtags pa'i ming de'i gnas gzhan gyi dbang gi mtshan nyid rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma kun nas nyon mongs pa'i mtshan nyid kyi chos gang yin pa de ni skye ba ngo bo nyid med pa nyid kyis ngo bo nyid med pa yin pa'i phyir kun brtags pa'i ming de'i gnas gzhan gyi dbang gi mtshan ma yang yang dag par rjes su mi mthong bas rnam par sel to//rnam par sel to zhes bya bas ni de ltar byang chub sems dpas gzhan gyi dbang gi mtshan nyid la kun brtags pa'i mtshan nyid med pa'i chos yongs su shes shing gzhan gyi dbang gi kun nas nyon mongs pa'i mtshan nyid kyi chos rab tu spangs pas gzhan gyi dbang gi mtshan nyid kyi mtshan ma de rnam par sel to//de rnam par bsal nas yongs su grub pa'i rnam par byang ba'i mtshan nyid kyi chos thos pa yin te/ gnas gyur pas rab tu phye ba yongs su grub pa'i de bzhin nyid kyi don so so yang dag par rig pa yin no zhes bya ba'i tha tshig go//ming la ji lta ba bzhin du tshig dang yi ge la yang de bzhin te/ de dag gis ni chos kyi mtshan ma ji ltar rnam par sel ba bstan te/ don thams cad ces bya ba la sogs pas ni don gyi mtshan ma ji ltar rnam par sel ba bstan to/ /rnam pa bcu dang /lnga dang / bzhi dang / gsum po dag ni kun brtags pa'i mtshan nyid yin la/ de dag gis so so yang dag par rig par bya ba'i don ni gzhan gyi dbang gi mtshan nyid yin pas gzhan gyi dbang gi mtshan nyid la kun brtags pa'i mtshan nyid med pa'i chos yongs su shes na gzhan gyi dbang gi kun nas nyon mongs pa'i mtshan nyid kyis chos rab tu spong zhing yongs su grub pa'i rnam par byang ba'i mtshan nyid kyi chos thob par 'gyur ba la yang de bzhin du rig par bya'o//khams kyi bar la zhes bya ba ni sngar don so so yang dag par rig pa rnam pa bcu smos pa nas bzung ste/lnga dang / bzhi dang / gsum gyi tha mar khams kyi don rnam pa lnga po 'jig rten gyi khams dang / sems can gyi khams dang / chos kyi khams dang / gdul ba'i khams dang / gdul ba'i thabs kyi khams zhes smos pa'i bar dag bzung ste/ khams kyi kun brtags pa'i ngo bo nyid mi dmigs shing /kun brtags pa'i ngo bo nyid de'i gnas gzhan gyi dbang gi mtshan ma yang yang dag par rjes su mi mthong bas don gyi mtshan ma gzhan gyi dbang gi kun nas nyon mongs pa'i mtshan nyid kyi chos rnam par sel to zhes bya bar sbyar ro/ /bcom ldan 'das ci lags de bzhin nyid kyi don so so yang dag par rig pa'i mtshan ma gang lags pa de yang rnam par sel bar bgyid lags sam zhes bya bas ni de ltar gzhan gyi dbang gi mtshan ma rnam par bsal na kun nas nyon mongs pa'i mtshan nyid kyi chos spong zhing /rnam par byang ba'i mtshan nyid kyi chos thob pa yin na rnam par byang ba'i mtshan nyid kyi chos thob pa'i dus na yongs su grub pa'i de bzhin nyid kyi don so so yang dag par rig pa'i mtshan ma gang yin pa de yang rnam par bsal bar bya ba yin nam zhes zhus pa yin no//byams pa de bzhin nyid kyi don so so yang dag par rig pa la ni mtshan ma med de mi dmigs na de la ci zhig rnam par sel bar 'gyur te zhes bya ba la/de bzhin nyid ces bya ba ni yongs su grub pa'i de bzhin nyid do/ /don so so yang dag par rig pa ni rnam pa thams cad mkhyen pa nyid yin no/ /mtshan ma zhes bya ba ni gnyis su dmigs pa'o/ / med de mi dmigs na zhes bya ba ni rnam pa thams cad mkhyen pa nyid la gnyis su dmigs pa ste/ de skad du shes rab kyi pha rol tu phyin pa'i le'u las kyang / rab 'byor rnam pa thams cad mkhyen pa nyid kyi dmigs pa ni dngos po med pa yin/ rnam pa ni zhi ba yin/ bdag po ni dran pa yin/mtshan nyid ni med pa yin no zhes gsungs so/ /de la ci zhig rnam par sel bar 'gyur te zhes bya ba ni btsal ba ci yang med do zhes bya ba'i tha tshig go/ /gang med pa rnam par sel bar blo 'jug pa de ni de bzhin gshegs pas gsungs pa'i chos bdag med pa chud pa'i gnas ma yin no zhes gsungs pa'i phyir ro//de bzhin nyid kyi don so so yang dag par rig pas ni chos dang don gyi mtshan ma thams cad zil gyis gnon gyi zhes bya ba ni gnas gyur pas rab tu phye ba yongs su grub pa'i de bzhin nyid kyi don so so yang dag par rig pa ni yang dag pa ma yin pa kun brtags pas rab tu phye ba gzhan gyi dbang gi mtshan ma thams cad kyi gnyen po yin pas des de rnam par sel to zhes bya ba'i tha tshig go//de ni gang gis kyang zil gyis mnan par bya ba yin par nga mi smra'o zhes bya ba ni yongs su grub pa'i de bzhin nyid kyi don so so yang dag par rig pa de ni rnam par bsal bar bya ba ma yin pa'i phyir ro//bcom ldan 'das kyis chab rnyog ma can mchis pa'i snod kyi dpe dang / me long yongs su ma dag pa'i dpe dang / mtshe'u 'khrugs pa'i dpes zhes bya ba la sogs pas ni de bzhin nyid yid la byed pas zhes bya ba la/de bzhin nyid ni rnam par rig pa'i de bzhin nyid do/ /yid la byed pa ni mnyam par gzhag pa'i sa pa'i shes rab rnam gsum gyis yid la byed pas so zhes bshad pa de nyid dmigs kyis ston to/ /de la dpe de gsum ni mdo gzhan dag las sems rnyog pa can du gyur pa'i nyes pa ni gsum ste/tshul bzhin ma yin pa yid la byed pa'i nyes pa dang / bag la nyal gyi nyes pa dang / kun nas dkris pa'i nyes pa'o/ /de dag gis thos pa dang / bsams pa dang / bsgoms pa las byung ba'i sems rnyog pa can du gyur na de bzhin nyid yid la byed cing yang dag pa ji lta ba bzhin du shes par mi nus kyi de las bzlog pas ni mi nus so zhes gsungs pa'i dpe yin no//ma bsgoms pa'i sems kyis zhes bya ba ni mnyam par gzhag pa'i sa pa'i sems nyes pa snga ma gsum gyis rnyog pa can du gyur pas so / /yang dag pa ji lta ba bzhin du shes par mi nus kyi zhes bya ba ni rnam par rig pa'i de bzhin nyid yid la byed cing yang dag pa ji lta ba bzhin du shes par mi nus so//sems kyis so sor brtags pa ni gang lags zhes bya ba ni mnyam par gzhag pa'i sa pa'i sems gang dag gis rnam par rig pa'i de bzhin nyid yid la bgyid lags zhes bya ba'i tha tshig go//de bzhin nyid ni gang las dgongs zhes bya ba ni mnyam par gzhag pa'i sa pa'i shes rab rnam gsum gyis yid la bgyi ba'i de bzhin nyid de gang lags zhes bya ba'i tha tshig go/ /byams pa sems kyi so sor brtags pa rnam pa gsum gyi phyir te zhes bya bas ni chu rnyog pa can gyi snod la sogs pa las bzlog pa'i dpes sems nyes pa gsum gyis rnyog pa can du ma gyur pas rnam par rig pa'i de bzhin nyid yid la byed cing /yang dag pa ji lta ba bzhin du shes par nus pa'i sems rnam pa gsum bstan te/mnyam par gzhag pa'i sa pa'i thos pa las byung ba'i sems la sogs pas rnam par rig pa'i de bzhin nyid la so sor brtag pa'o/ /rnam par rig pa'i de bzhin nyid las dgongs te yongs su bstan pa yin no zhes bya bas ni de ltar mnyam par gzhag pa'i sa pa'i shes rab rnam gsum gyis yid la bya ba'i de bzhin nyid ni rnam par rig pa'i de bzhin nyid 'du byed rnams rnam par rig pa tsam nyid gang yin pa'o zhes bstan to//de ltar mnyam par gzhag pa'i sa pa'i shes rab rnam gsum gyis rnam par rig pa'i de bzhin nyid la so sor rtog pa ni de bzhin nyid yid la byed pas zhes sngar smos pa yin te/des ni phra ba kun du 'byung bas zhes bya ba'i don bstan to/ /bcom ldan 'das byang chub sems dpa' de ltar chos dang don so so yang dag par rig pa dang / mtshan ma rnam par sel ba la zhugs pa'i zhes bya ba la sogs pas ni sngar mtshan ma gang ji ltar rnam par sel bar bgyi lags zhes zhus pas gzhan gyi dbang gi mtshan ma mtshan nyid med pa'i chos yongs su shes pa dang /kun nas nyon mongs pa'i mtshan nyid kyi chos kyis rab tu spangs pas rnam par sel to zhes bstan pa de las gzhan gyi dbang gi mtshan ma rnam par bsal dka' ba gang yin pa dang /de dag gnyen po gang gis sel ba ston te/ de ni yongs su shes pa zhes bya ba'i don to/ /mtshan ma du zhig ni rnam par bsal dka' ba dag lags la zhes bya bas ni sngar chos kyi mtshan ma dang don gyi mtshan ma rnam par sel bar byed do zhes smos pa de dag gi nang nas gnas skabs su mtshan ma rnam par bsal dka' ba mchis zhes bya bar sbyar ro//gang gis na de dag rnam par sel lags zhes pa ni gnyen po gang gis zhes bya bar sbyar ro/ /du zhig ni rnam par bsal dka' ba dag lags la zhes bya ba'i lan du bcu ste zhes bya ba gsungs te/chos dang don so so yang dag par rig par byed pa sngar bstan pa dag gi nang nas gnas skabs bcu la mtshan ma rnam par bsal ba yod do zhes bya bar sbyar te / gnas skabs bcu la mtshan ma rnam par bsal dka' ba ni bcu drug yod par rig par bya'o/ /gang gis de dag rnam par sel lags zhes zhus pa'i lan du/de dag ni stong pa nyid kyis rnam par sel to zhes bya ba gsungs te/ gnas skabs bcu la mtshan ma rnam par bsal dka' ba bcu drug yod pa de dag stong pa nyid bcu drug gis rnam par sel to zhes bya bar sbyar ro/ /bcu gang zhe na zhes bya ba ni gnas skabs bcu gang zhes bya bar sbyar te/gnas skabs bcu po 'di'i mtshan ma thams cad rnam par bsal dka' ba ni ma yin gyi/ dka' sla 'dren mar yod pa las 'dir ni sla ba rnams ma smos par dka' ba nyi tshe ston te/ dka' ba yang gnas skabs bcu po kha cig la re re yod/ kha cig la gnyis gnyis yod/ la la la bzhi yod pas rnam pa bcu drug tu 'gyur ro/ /chos kyi don so so yang dag par rig par byed pa'i zhes bya ba ni gnas skabs dang po ste/ sngar chos so so yang dag par rig par byed pa bstan pa dang sbyar ro/ /de la ni mtshan ma rnam par bsal dka' ba cig yod de/tshig dang yi ge'i mtshan ma sna tshogs gang yin pa'o/ /de ni ming dang tshig dang yi ge'i gnas chos kyi mtshan ma sna tshogs yin pas kun brtags pa'i tha snyad la mngon par zhen pa'i rgyu yin pa'i phyir rnam par bsal dka' ba zhes bya'o/ /de ni chos thams cad stong pa nyid kyis rnam par sel to zhes bya ba ni ming dang /tshig dang yi ge'i gnas 'dus byas dang / 'dus ma byas kyi chos thams cad stong par mnyam par gzhag pa'i sa pa'i shes rab rnam gsum gyis yid la byas na de rnam par sel bar 'gyur ba'i phyir ro/ /gnas pa'i de bzhin nyid kyi don so so yang dag par rig par byed pa'i zhes bya ba ni gnas skabs rnam pa gnyis te/sngar de bzhin nyid rnam pa bdun gyi nang na gnas pa'i de bzhin nyid ni ngas sdug bsngal gyi bden pa bstan pa gang yin pa'o zhes bstan pa'i don so so yang dag par rig par byed pa dang sbyar ro//de la yang mtshan ma rnam par bsal dka' ba cig yod de/ skye ba dang / 'jig pa dang / gnas pa dang gzhan du 'gyur ba nyid kyi rgyun gyi rjes su 'jug pa'i mtshan ma gang yin pa'o/ /de ni sdug bsngal gyi bden pa sdug bsngal gsum dang brgyad kyi nang nas 'du byed kyi sdug bsngal yin pas shin tu rtogs par dka' ba'i phyir rnam par bsal dka' ba zhes bya'o//de ni mtshan nyid stong pa nyid dang / thog ma dang tha ma med pa stong pa nyid kyis rnam par sel to zhes bya ba ni mtshan nyid dang / mtshan gzhi med pa dang / sngon dang / phyi ma'i mtha' med pas stong pa nyid du yid la byas na de la rnam par sel ba'i phyir ro//'dzin pa'i don so so yang dag par rig par byed pa'i zhes bya ba ni gnas skabs gsum pa ste/ sngar don so so yang dag par rig pa bcu'i skabs su 'dzin pa'i don ni skye mched gzugs can lnga dang / sems dang / yid dang / rnam par shes pa dang / sems las byung ba'i chos rnams so zhes bstan pa'i don so so yang dag par rig par byed pa dang sbyar ro/ /de la ni mtshan ma rnam par bsal dka' ba gnyis yod de/ 'jig tshogs la lta ba'i mtshan ma dang / nga'o snyam pa'i mtshan ma gang yin pa'o//de gnyis ni 'dzin pa'i don rnams las sems las byung ba'i chos 'jig tshogs la lta ba dang / nga'o snyam pa'i nga rgyal yin pas shin tu dbul bar dka' bar bya ba'i phyir rnam par bsal dka' ba zhes bya'o/ /de ni nang stong pa nyid dang / mi dmigs pa stong pa nyid kyis rnam par sel to zhes bya ba ni nang gi phung po stong pa dang /bdag mi dmigs par yid la byas na de gnyis rnam par sel bar 'gyur ba'i phyir ro/ /gzung ba'i don so so yang dag par rig par byed pa'i zhes bya ba ni gnas skabs bzhi pa ste/ sngar don so so yang dag par rig pa rnam pa bcu'i skabs su bzung ba'i don gyi phyi rol gyi skye mched drug po dag yin no zhes bstan pa so so yang dag par rig par byed pa dang sbyar ro//de la yang mtshan ma rnam par bsal dka' ba cig yod de/ longs spyod la lta ba'i mtshan ma gang yin pa'o//de ni yul yid du 'ong ba bdag gir bya ba yin pas rjes su 'chags pa'i gnas yin pa'i phyir rnam par bsal dka' ba zhes bya'o/ /de ni phyi stong pa nyid kyis rnam par sel to zhes bya ba'i phyi'i yul rnams stong par yid la byas nas de rnam par sel bar 'gyur ba'i phyir ro//yongs su longs spyod pa'i don du skyes pa dang / bud med kyi bsnyen bkur dang yo byad dang ldan pa so so yang dag par rig par byed pa'i zhes bya ba ni gnas skabs lnga pa ste/ sngar don so so yang dag par rig pa rnam pa bcu'i skabs su longs spyod kyi don ni yongs su longs spyad pa'i phyir ngas sems can rnams kyi yongs su bzung ba dang /yo byad bstan pa gang dag yin pa rnams so zhes bstan pa'i don so so yang dag par rig par byed pa dang sbyar ro/ /de la yang mtshan ma rnam par bsal dka' ba gnyis yod de/ nang gi bde ba'i mtshan ma dang / phyi rol gyi sdug pa'i mtshan ma gang yin pa'o/ /de gnyis ni yongs su bsdu ba'i dngos po bdun dang yo byad bcu po dag las nang gi tshor ba las log par bde bar mos pa dang / phyi rol gyi bsnyen bkur la sogs pa log par sdug par mos pa yin pas mngon par zhen pa'i gnas kyi rnam pa yin pa'i phyir rnam par bsal dka' ba zhes bya'o//de ni phyi nang stong pa nyid dang / rang bzhin gyis stong pa nyid kyis rnam par sel to zhes bya ba ni nang gi bde ba dang / phyi rol gyi sdug bsngal ba'i mtshan ma rmi lam bzhin du phyi nang stong pa dang / nang dang phyi rol la log par mos pa rang bzhin gyis stong par yid la byas na de gnyis rnam par sel bar 'gyur ba'i phyir ro//gnas kyi don so so yang dag par rig par byed pa'i zhes bya ba ni gnas skabs drug pa ste/ sngar don so so yang dag par rig pa rnam pa bcu'i skabs su gnas kyi don ni 'jig rten gyi khams gang yin pa ste zhes bstan pa'i don so so yang dag par rig par byed pa dang sbyar ro//de la yang mtshan ma rnam par bsal dka' ba cig yod de/ tshad med pa'i mtshan ma gang yin pa'o/ /de ni phyogs bcu'i 'jig rten gyi khams tshad med pa la rtog pa yin pas g.yeng ba'i rnam pa yin pa'i phyir rnam par bsal dka' ba zhes bya'o//de ni chen po stong pa nyid kyis rnam par sel to zhes bya ba ni phyogs bcu'i 'jig rten gyi khams tshad med pa thams cad nam mkha' dang 'dra bar stong pa yid la byas na de rnam par sel bar 'gyur ba'i phyir ro/ /gzugs med pa la brten te zhes bya ba ni gnas skabs bdun pa ste/sngar don so so yang dag par rig pa rnam pa bcu'i skabs su kun nas nyon mongs pa'i don ni rnam pa gsum ste/ khams gsum pa'i don nyon mongs pa dang las dang skye ba'i kun nas nyon mongs pa'i zhes bstan pa'i nang nas/ gzugs med pa'i khams kyi nyon mongs pa dang las dang skye ba'i kun nas nyon mongs pa'i don so so yang dag par rig par byed pa dang sbyar ro//de la yang mtshan ma rnam par bsal dka' ba cig yod de/ nang gi zhi ba'i rnam par thar pa'i mtshan ma gang yin pa'o/ /de ni med pa dang ci yang med pa dang /phra bar 'du shes pa la zhi ba rnam par thar par lta ba yin pas 'jig tshogs la lta ba'i rnam pa yin pa'i phyir rnam par bsal dka' ba zhes bya'o/ /de ni 'dus byas stong pa nyid kyis rnam par sel to zhes bya ba ni de yang 'dus byas kyi khongs su gtogs la/ 'dus byas thams cad rkyen la rag las pas stong pa nyid du yid la byas na de rnam par sel bar 'gyur ba'i phyir ro//mtshan nyid kyi de bzhin nyid kyi don so so yang dag par rig par byed pa'i zhes bya ba ni gnas skabs brgyad pa ste/ sngar de bzhin nyid rnam pa bdun gyi nang nas mtshan nyid kyi de bzhin nyid kyi chos thams cad kyi gang zag bdag med pa dang /chos bdag med pa gang yin pa'o zhes bstan pa'i don so so yang dag par rig par byed pa dang sbyar ro/ /de la ni mtshan ma rnam par bsal dka' ba bzhi yod de / gang zag bdag med pa'i mtshan ma dang / chos bdag med pa'i mtshan ma dang /rnam par rig pa tsam gyi mtshan ma dang / don dam pa'i mtshan ma gang yin pa'o/ /de dag ni yang dag pa ma yin pa'i kun du rtog pas de ltar 'dzin pa yin pas / mtshan nyid la mngon par zhen pa'i rnam pa yin pa'i phyir rnam par bsal dka' ba zhes bya'o//de la dang po ni mtha' las 'das pa stong pa nyid kyis rnam par sel to/ / gang zag gtan med pas dgag pa yang gtan med pa'i phyir ro/ /gnyis pa ni dngos po med pa stong pa nyid kyis rnam par sel te/ chos dngos po med pas dgag pa yang gtan med pa'i phyir ro//gsum pa ni dngos po med pa'i ngo bo nyid stong pa nyid kyis rnam par sel te/ 'khrug pa'i rang bzhin gyi rnam par rig pa ni gnyis med pas dngos po med pa'i ngo bo nyid yin pa'i phyir ro/ /bzhi pa ni don dam pa stong pa nyid kyis rnam par sel te/ yang dag pa'i shes pa dam pa dang /de'i don de bzhin nyid ni kun brtags pa'i tha snyad dang bral ba dang / yang dag pa ma yin pas kun rtog pa gnas gyur pas rab tu phye ba yin pa'i phyir ro/ /rnam par dag pa'i de bzhin nyid kyi don so so yang dag par rig par byed pa'i zhes bya ba ni gnas skabs dgu pa ste/ sngar de bzhin nyid rnam pa bdun gyi nang nas rnam par dag pa'i de bzhin nyid ni ngas 'gog pa'i bden pa bstan pa gang yin pa'o zhes bstan pa'i don so so yang dag par rig par byed pa dang sbyar ro/ /de la yang mtshan ma rnam par bsal dka' ba gnyis yod de/ 'dus ma byas kyi mtshan ma dang /'gyur ba med pa'i mtshan ma gang yin pa'o/ /de gnyis ni 'gog pa la 'dus ma byas pa dang / phung po med pa nyid du mngon par zhen pa yin pas 'jig tshogs 'gog pa la dmigs pa'i mtshan ma phra mo yin pa'i phyir rnam par bsal dka' ba zhes bya'o/ /de la dang po ni 'dus ma byas stong pa nyid kyis rnam par sel te/'dus ma byas stong pa nyid yin pa'i phyir ro/ /gnyis pa ni 'gyur ba med pa stong pa nyid kyis rnam par sel te/ 'gyur ba med pa zhes kyang bya/ dor ba med pa zhes bya ste/ 'gyur ba dang dor ba zhes bya ba ni phung po'i ming gi rnam grangs so//de med pa ni 'gog pa mya ngan las 'das pa ste/ /de ni don dam pa'i ngo bo nyid med pa nyid kyis stong pa'i phyir/ de yid la byas na mtshan ma de rnam par sel bar 'gyur ba'i phyir ro/ /mtshan ma de'i gnyen po stong pa nyid de nyid yid la byed pa'i zhes bya ba ni gnas skabs bcu pa ste/sngar don so so yang dag par rig pa rnam pa bcu'i skabs su rnam par byang ba'i don ni kun nas nyon mongs pa rnam pa gsum po de dag nyid dang bral bar bya ba'i phyir byang chub kyi phyogs dang mthun pa'i chos gang dag yin pa rnams te zhes bstan pa las rnam par ma bzhag pa'i de bzhin nyid kyi don so so yang dag par rig par byed pa dang sbyar ro//de la yang mtshan ma rnam par bsal dka' ba cig yod de/ stong pa nyid kyi mtshan ma gang yin pa'o/ /de ni stong pa nyid shes pa gang gis mtshan ma thams cad rnam par sel bar 'gyur ba'i stong pa nyid de la mngon par zhen pa yin pas/mthun pa'i chos la sred pa yin pa'i phyir rnam par bsal dka' ba zhes bya'o/ /de ni stong pa nyid stong pa nyid kyis rnam par sel to zhes bya ba ni stong pa nyid shes pa gang gis mtshan ma thams cad rnam par sel bar 'gyur ba'i stong pa nyid de yang stong pa nyid du mnyam par gzhag pa'i sa pa'i shes rab rnam gsum gyis yid la byas na mtshan ma de rnam par sel bar 'gyur ba'i phyir ro//de dag gis kyang gzhan gyi dbang gi mtshan nyid la kun brtags pa'i mtshan nyid med pa'i chos yongs su shes na gzhan gyi dbang gi kun nas nyon mongs pa'i mtshan nyid kyi chos rab tu spong ba bstan pa yin no//bcom ldan 'das mtshan ma rnam pa bcu rnam par sel bar bgyid pa na zhes bya ba la sogs pa ni gzhan gyi dbang gi kun nas nyon mongs pa'i mtshan nyid kyi chos rab tu spangs nas yongs su grub pa'i rnam par byang ba'i mtshan nyid kyi chos thob par 'gyur ba ston to//byams pa ting nge 'dzin gyi spyod yul gzugs brnyan gyi mtshan ma rnam par sel bar byed cing zhes bya ba ni zhi gnas dang / lhag mthong gi dmigs pa gzugs brnyan gnyis rnam par sel bar byed pa ste/ des ni gzhan gyi dbang gi mtshan nyid la kun brtags pa'i mtshan nyid du mngon par zhen pa med pa bstan to//kun nas nyon mongs pa'i 'ching ba'i mtshan ma las yongs su grol bar 'gyur la zhes bya ba ni gzhan gyi dbang gi kun nas nyon mongs pa'i mtshan nyid kyi chos rab tu spong bar 'gyur ba ste/ des ni gnas gyur pa nyid bstan to//de yang rnam par sel to zhes bya ba ni gang las grol bar 'gyur ba'i 'ching ba de yang rnam par sel te/ des ni kun nas nyon mongs pa'i mtshan nyid kyi chos rab tu spangs na rnam par byang ba'i mtshan nyid kyi chos thob par 'gyur ba nyid bstan pa yin no/ /byams pa stong pa nyid de dag ni zhes bya ba la sogs pas ni sngar byams pa de bzhin nyid kyi don so so yang dag par rig pas ni chos dang don gyi mtshan ma thams cad zil gyis gnon gyi zhes smos pa'i don te/yongs su grub pa'i de bzhin nyid yid la byed pa ni gzhan gyi dbang gi kun nas nyon mongs pa'i mtshan nyid kyi chos thams cad kyi gnyen po yin no zhes bya ba'i tha tshig go /byams pa 'di lta ste dper na zhes bya ba la sogs pa'i tshig gi don ni go sla'o/ /de ltar phra ba kun du 'byung bas yongs su shes pas rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang /bshad pas phra ba kun du 'byung bas yongs su shes pa gdags pa gtan la dbab pa bstan pa ni phra ba kun du 'byung bas yongs su shes pa chud mi za bar bya ba'i phyir gdags pa gtan la dbab pa yin no/ /de'i 'og tu stong pa nyid la skrag pa rnam par gzhig cing chud mi za bar bya ba'i phyir gdags pa gtan la dbab pa'i tshig gi don la sogs pa bshad par bya ste/stong pa nyid la skrag pa zhes bya ba ni kun brtags pa'i mtshan nyid kyis stong pa gzhan gyi dbang dang yongs su grub pa'i mtshan nyid kyi don ma rtogs na des skrag par 'gyur ro//rnam par gzhig cing chud mi za bar bya ba'i phyir gdags pa gtan la dbab pa zhes bya ba ni skrag pa de rnam par gzhig cing kun brtags pa'i mtshan nyid kyis gzhan gyi dbang dang / yongs su grub pa'i mtshan nyid kyis rab tu phye ba'i zhi gnas dang / lhag mthong gi lam gyi ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang /bshad pa stong pa nyid kyis skrag pa rnam par gzhig cing gdags pa gtan la dbab pa'o/ /de la mtshams sbyar ba ji lta bu zhe na/ 'dir 'phags pa byams pas gzhan dag 'di snyam du de dag gzhan gyi dbang gi mtshan nyid kyi don so so yang dag par rig par byed pa'i gnas skabs bcu'i mtshan ma rnam par bsal dka' ba rnam pa bcu drug ni stong pa nyid bcu drug gis rnam par sel cing stong pa nyid re re la yang mtshan ma thams cad kyi gnyen por mi 'gyur ba ni ma yin no zhes gsungs na theg pa chen po la byang chub sems dpa' rnams kyis gang rtogs na stong pa nyid kyi mtshan nyid la mngon pa'i nga rgyal med pas rab tu nyams par mi 'gyur ba'i stong pa nyid kyi mtshan nyid bsdus pa gang yin snyam du sems pa rnams kyi bsam pa la brtags nas/bcom ldan 'das theg pa chen po la/byang chub sems dpa' rnams kyis gang rtogs na stong pa nyid kyi mtshan nyid la mngon pa'i nga rgyal ma mchis pas rab tu nyams par mi 'gyur ba'i stong pa nyid kyi mtshan nyid bsdus pa gang lags zhes bya ba zhus pa dang sbyar ro/ /'dir legs so zhes bya ba byin to zhes bya ba la sogs pa ni bstan pas stong pa nyid la skrag pa rnam par gzhig cing chud mi za bar bya ba'i phyir gdags pa gtan la dbab pa bstan par bya ste/nyid ni byang chub sems dpa' rnams kyi chud za bar 'gyur ba'i rgyu mngon pa'i nga rgyal gyi gnyen po yin pa'i phyir/ byang chub sems dpa' rnams kyis de'i mtshan nyid yongs su shes par byas na chud mi za bar 'gyur bas de'i phyir byams pa khyod de ltar byang chub sems dpa' rnams stong pa nyid las rab tu nyams par mi 'gyur bar bya ba'i phyir de bzhin gshegs pa la khyod don 'di nyid 'dri ba legs so zhes bka' stsal pa nyid kyis de mdor bstan pa yin pa'i phyir ro//stong pa nyid las rab tu nyams pa zhes bya ba ni stong pa nyid kyi mtshan nyid yongs su mi shes pa zhes bya ba'i tha tshig go/ /theg pa chen po mtha' dag las kyang rab tu nyams par 'gyur ba'i phyir ro zhes bya ba ni stong pa nyid kyi mtshan nyid yongs su mi shes pas ni theg pa chen po'i don kyang yongs su mi shes pa'i phyir theg pa chen po byang chub sems dpa'i lam 'bras bu dang bcas pa mtha' dag las ma thob pa'i nyams pas yongs su nyams par 'gyur ba'i phyir ro//byams pa de'i phyir nyon cig dang stong pa nyid kyi mtshan nyid bsdus pa khyod la bshad par bya'o zhes bya ba la sogs pas ni bshad pas stong pa nyid la skrag pa rnam par gzhig cing chud mi za bar bya ba'i phyir gdags pa gtan la dbab pa bstan to//gzhan gyi dbang gi mtshan nyid dang yongs su grub pa'i mtshan nyid rnam pa thams cad du kun nas nyon mongs pa dang /rnam par byang ba'i kun brtags pa'i mtshan nyid dang / shin tu rnam par bral ba nyid ces bya ba ni gzhan gyi dbang dang / yongs su grub pa'i mtshan nyid la gzhan gyi dbang gi kun nas nyon mongs pa yin no/ /yongs su grub pa ni rnam par byang ba yin no zhes ngo bo nyid dang bye brag tu ming brdar sgro 'dogs pa ni kun brtags pa'i mtshan nyid yin pas/mtshan nyid snga ma gnyis kun brtags pa'i mtshan nyid dang / shin tu rnam par bral ba nyid ni mtshan nyid de gnyis kun brtags pa'i mtshan nyid kyis stong pa yin pas stong pa nyid ni mtshan nyid bsdus pa yin no zhes bya ba'i tha tshig go//de la dmigs pa gang yin pa zhes bya ba ni gzhan gyi dbang dang / yongs su grub pa'i mtshan nyid la kun brtags pa'i mtshan nyid de dmigs pa gang yin pa'o/ /de ni theg pa chen po la stong pa nyid kyi mtshan nyid bsdus pa zhes bya'o zhes bya bas ni kun brtags pa'i mtshan nyid ni mtshan nyid ngo bo nyid med pa nyid kyis ngo bo nyid med pa yin la/gzhan gyi dbang gi mtshan nyid ni skye ba ngo bo nyid med pa nyid dang / don dam pa ngo bo nyid med pa nyid kyis kyang ngo bo nyid med pa yin/ yongs su grub pa'i mtshan nyid ni don dam pa ngo bo nyid kho nas ngo bo nyid med pa yin pas/gzhan gyi dbang gi mtshan nyid med pa'i chos la kun brtags pa'i mtshan nyid med pa'i chos yang dag pa ji lta ba bzhin du rab tu shes na gzhan gyi dbang gi kun nas nyon mongs pa'i mtshan nyid kyi chos rab tu spong zhing / gzhan gyi dbang gi kun nas nyon mongs pa'i mtshan nyid kyi chos rab tu spangs nas/yongs su grub pa'i rnam par byang ba'i mtshan nyid kyi chos thos par 'gyur ba ni theg pa chen po la stong pa nyid kyi mtshan nyid kyis bsdus pa yin no zhes bstan to/ /de ltar stong pa nyid la skrag pa rnam par gzhig cing kun brtags pa'i mtshan nyid kyis stong pa gzhan gyi dbang dang /yongs su grub pa'i mtshan nyid kyis rab tu phye ba'i zhi gnas dang / lhag mthong gi lam gyis ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang bshad pa stong pa nyid la skrag pa rnam par gzhig cing gdags pa gtan la dbab pa bstan pa ni stong pa nyid la skrag pa rnam par gzhig cing chud mi za bar bya ba'i phyir gdags pa gtan la dbab pa yin no//de'i 'og tu zhi gnas dang lhag mthong bsgom pa la ngo bo nyid dang / rgyu dang 'bras bu dang / lam dang sbyor ba dang / 'jug pa'i don las brtsams te/gdams ngag gi sbyin pa chud mi za bar bya ba'i phyir gdags pa gtan la dbab pa'i tshig gi don la sogs pa bshad par bya ste/ 'dir ni zhi gnas dang lhag mthong bsgom pa la ngo bo nyid la sogs pa don las brtsams te/ gdams ngag sbyin pas rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang /bshad pas zhi gnas dang / lhag mthong bsgom pa la ngo bo nyid la sogs pa'i don las brtsams te/ gdams ngag sbyin pa gdags pa gtan la dbab pa bstan pa ni zhi gnas dang lhag mthong bsgom pa la ngo bo nyid la sogs pa'i don las brtsams te/gdams ngag sbyin pa chud mi za bar bya ba'i phyir gdags pa gtan la dbab pa zhes bya'o/ /de la mtshams sbyar ba ji lta bu zhe na/ 'dir 'phags pa byams pas gzhan dag 'di snyam du/ rnal 'byor pas rnal 'byor gyis yongs su bsdus pa'i zhi gnas dang lhag mthong gi lam gyi ngo bo nyid la sbyor bar byed pas ni zhi gnas dang lhag mthong bsgom pa la ngo bo nyid la sogs pa'i don las brtsams te/ gdams ngag sbyin pas rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing chud mi za bar bya ba'i phyir ngo bo nyid la sogs pa'i don las brtsams te/gdams ngag sbyin pa gdags pa gtan la dbab pa shes par bya dgos na/ zhi gnas dang lhag mthong gi lam bsgom pa la ngo bo nyid kyi don las brtsams te/gdams ngag sbyin pa ni ji lta bu yin/ rgyu dang / 'bras bu dang / las dang / sbyor ba dang 'jug pa'i don las brtsams te/ gdams ngag sbyin pa ni ji lta bu yin snyam du sems pa rnams kyi bsam pa la brtags nas/ bcom ldan 'das zhi gnas dang / lhag mthong dag gis ting nge 'dzin du zhig bsdus lags zhes bya ba la sogs pa zhus par sbyar ro/ /'dir zhi gnas dang lhag mthong dag gis ting nge 'dzin du zhig bsdus lags zhes bya ba zhus pa dang po 'dis ni ngo bo nyid kyi don las brtsams te/ gdams ngag sbyin pa ji lta bu yin zhes zhus pa yin te/de lan dang bcas pas ni bstan pas zhi gnas dang lhag mthong bsgom pa la gdams ngag sbyin pa chud mi za bar bya ba'i phyir gdags pa gtan la dbab pa bstan to/ /lhag ma rnams kyis ni rgyu dang 'bras bu dang / las dang sbyor ba dang / 'jug pa'i don las brtsams te/gdams ngag sbyin pa ji lta bu yin pa rim bzhin du ston te/ de dag gis ni bshad pas zhi gnas dang lhag mthong bsgom pa la gdams ngag sbyin pas chud mi za bar bya ba'i phyir gdags pa gtan la dbab pa bstan to/ /de la byams pa ngas zhes bya ba la sogs pas ni zhi gnas dang lhag mthong gi lam ni ting nge 'dzin yin la/de'i dmigs pa'i khyab pa'i dmigs pa dang spyad pa rnam par sbyong ba'i dmigs pa dang / mkhas pa'i dmigs pa dang / nyon mongs pa rnam par sbyong ba'i dmigs pa yin pas lam dang dmigs pa'i ngo bo nyid des ni theg pa thams cad dang ldan pa'i ting nge 'dzin nyer bsdogs dang /dngos gzhi dang bcas pa thams cad bsdus pa'i phyir rnal 'byor pa theg pa thams cad kyi ting nge 'dzin gang yang rung ba la sbyor bar 'dod pas ni zhi gnas dang / lhag mthong gi lam dang dmigs pa'i ngo bo nyid de la brtson par bya'o zhes ngo bo nyid kyi don las brtsams te/gdams ngag sbyin pa chud mi za bar bya ba'i phyir gdags pa gtan la dbab pa bstan to/ /de'i 'og tu rgyu'i don las brtsams te/ gdams ngag sbyin pa chud mi za bar bya ba'i phyir gdags pa gtan la dbab pa bstan pa'i phyir/ bcom ldan 'das zhi gnas dang lhag mthong rgyu gang las byung ba lags zhes bya ba zhus so/ /byams pa tshul khrims rnam par dag pa'i rgyu las byung ba dang / thos pa dang bsams pa las byung ba'i lta ba rnam par dag pa'i rgyu las byung ba yin no zhes bya ba la zhi gnas ni lhag pa'i sems yin pas de ni lhag pa'i tshul khrims la brten te byung ba'i tshul khrims rnam par dag pa'i rgyu las byung ba ni zhi gnas yin no//lhag mthong ni bsgoms pa las byung ba lhag pa'i shes rab yin pas de ni thos pa dang bsams pa las byung ba'i lta ba rnam par dag pa la brten te byung ba'i phyir thos pa dang bsams pa las byung ba'i lta ba rnam par dag pa'i rgyu las byung bas ni lhag mthong yin te/des ni rnal 'byor pa zhi gnas dang lhag mthong gi lam gyi ngo bo nyid la sbyor bar 'dod pas ni tshul khrims rnam par dag pa dang / lta ba rnam par dag par bya'o zhes rgyu'i don las brtsams te/gdams ngag sbyin pa chud mi za bar bya ba'i phyir gdags pa gtan la dbab pa bstan to/ /de'i 'og tu 'bras bu'i don las brtsams te/ gdams ngag sbyin pa chud mi za bar bya ba'i phyir gdags pa gtan la dbab pa bstan pa'i phyir/ bcom ldan 'das de dag gi 'bras bu gang lags par brjod par bgyi zhes bya ba zhus so//byams pa sems rnam par dag pa ni 'bras bu yin/ shes rab rnam par dag pa ni 'bras bu yin no zhes bya bas ni zhi gnas kyi mtshan ma'i g.yeng ba dang gnas ngan len gyi g.yeng ba'i ngo bo nyid dang / rab tu dbye ba yin pas des sems rnam par grol bar 'gyur ba'i phyir sems rnam par dag pa ni zhi gnas kyi 'bras bu yin no//lhag mthong gi sems kyi ngo bo nyid la gnyis med pa'i don rang rig pa'i ngo bo nyid dang / rab tu dbye ba yin pas des shes rab rnam par grol bar 'gyur ba'i phyir sems rnam par dag pa ni lhag mthong gi 'bras bu yin no zhes bstan to//byams pa yang zhes bya ba la sogs pas ni theg pa gsum char gyi dge ba'i chos 'jig rten pa dang 'jig rten las 'das pa thams cad kyang lam dang dmigs pa'i ngo bo nyid kyi rab tu phye ba yin pas zhi gnas dang lhag mthong gi 'bras bu yin par bstan te /des ni rnal 'byor pa zhi gnas dang lhag mthong gi lam gyi ngo bo nyid la sbyor bar 'dod pas ni sems rnam par dag pa dang / theg pa thams cad kyi dge ba'i chos 'jig rten pa dang / 'jig rten las 'das pa thams cad kyang thob par bya'o zhes 'bras bu'i don las brtsams te/gdams ngag sbyin pa chud mi za bar bya ba'i phyir gdags pa gtan la dbab pa bstan to/ de'i 'og tu lam gyi don las brtsams te/ gdams ngag sbyin pa chud mi za bar bya ba'i phyir gdags pa gtan la dbab pa bstan pa'i phyir/bcom ldan 'das zhi gnas dang lhag mthong gi las ci lags zhes bya ba zhus so/ /mtshan ma'i 'ching ba dang / gnas ngan len gyi 'ching ba las rnam par thar par byed pa yin no zhes bya ba la mtshan ma ni gzhan gyi dbang gi mtshan nyid de khams gsum pa'i sems dang sems las byung ba yin pas 'ching ba zhes bya'o//gnas ngan len ni kun brtags pa'i mtshan nyid de tha snyad la mngon par zhen pa'i bag chags yin pas 'ching ba zhes bya'o/ /de gnyis las rnam par thar pa ni yongs su grub pa'i mtshan nyid de gnas gyur pa yin pas rnam par thar pa zhes bya'o//de gnyis las rnam par thar pa dang de thob par byed pa ni zhi gnas dang lhag mthong gi lam yin te/ des ni rnal 'byor pa zhi gnas dang lhag mthong gi lam gyi ngo bo nyid la sbyor bar 'dod pas ni gzhan gyi dbang dang kun brtags pa'i 'ching ba las rnam par thar par bya zhing yongs su grub pa thob par bya'o zhes las kyi don las brtsams te/gdams ngag sbyin pa chud mi za bar bya ba'i phyir gdags pa gtan la dbab pa bstan to/ /de'i 'og tu sbyor ba'i don las brtsams te/ gdams ngag sbyin pa chud mi za bar bya ba'i phyir gdags pa gtan la dbab pa bstan pa'i phyir/bcom ldan 'das kyis gags rnam pa lnga gsungs pa gang dag lags pa de dag las zhes bya ba la sogs pa zhus te/ gags lnga dang / sgrib pa lnga dang / rnam par g.yeng ba lnga po dag lam gang gi yang yin pa shes par bya zhing de dag rnam par bsal te zhi gnas dang lhag mthong gi ngo bo nyid la sbyor ba bstan pa ni sbyor ba'i don las brtsams te/gdams ngag sbyin pa chud mi za bar bya ba'i phyir gdags pa gtan la dbab pa yin par ston to/ /gags rnam pa lnga zhes bya ba ni lus la lta ba dang / longs spyod la lta ba dang / 'phags pa'i gtam 'dod pa bzhin ma thos pa dang / 'dres par gnas pa dang / cung zad tsam gyis chog par 'dzin pa ste 'dod pa'i yon tan la chags pa med pa dang / 'jig rten las 'das pa'i chos 'thob pa'i bar chad byed pas na gags zhes bya'o/ /lus la lta ba zhes bya ba ni nang gi skye mched la chags pa'o//longs spyod la lta ba zhes bya ba ni phyi rol gyi skye mched la chags pa ste/ de gnyis ni nyon mongs pa'i 'dod pa dang 'dod pa'i 'dod pa la 'dun pa'i rang bzhin yin pas tshul khrims rnam par dag pa'i mi mthun pa'i phyogs yin pa'i phyir zhi gnas kyi gags yin no//'phags pa'i gtam 'dod pa bzhin ma thos pa zhes bya ba ni 'bel ba'i gtam rnam par gtan la 'bebs pa dang thos pa dang bsam pa'i sgo gnyis ka nas ma thob pa ste/ de ni thos pa dang bsams pa las byung ba'i lta ba rnam par dag pa'i mi mthun pa'i phyogs yin pa'i phyir lhag mthong gi gags yin no//'dres par gnas pa zhes bya ba ni lus mi dben pa'o/ /cung zad tsam gyis chog par 'dzin pa zhes bya ba ni sems mi dben pa'o/ /de la yang cig shos 'dres par gnas pas ni zhi gnas dang lhag mthong la sbyor bar mi byed la/cig shos cung zad tsam gyis chog par 'dzin pas ni sbyor ba mthar thug par mi 'gyur bas de gnyis ni/ zhi gnas dang lhag mthong de gnyis ka'i gags yin no/ /sgrib pa lnga zhes bya ba ni rgod pa dang / 'gyod pa dang / rmugs pa dang / gnyid dang / the tshom dang / 'dod pa la 'dun pa dang /gnod sems te/ de kho na'i don la sgrib g.yogs byed pas sgrib pa zhes bya'o/ /de la rgod pa zhes bya ba ni nye du dang / yul dang mi 'chi bar rtog pa la brten nas sngon bgad pa dang / rtses pa dang / dga' ba dang / dga' mgur spyad pa rjes su dran pa ni sems rnam par ma zhi zhing 'phyar ba skye ba gang yin pa'o//'gyod pa zhes bya ba ni nye du la sogs pa de dag nyid la rtog pa ni ci'i phyir bdag gis de dag spangs te/ rab tu byung snyam pa de lta bu'i rkyen gyis sems 'gyod cing yid la gces pa skye ba gang yin pa ste/ de'i phyir rgod pa dang 'gyod pa de gnyis ni gzhi mthun pas sgrib pa gcig tu mdzad do//gzhan yang 'gyod pa zhes bya ba ni bya ba ma byas pa dang / mi bya ba byas pa dang / 'gyod pa dang po skyes pa de ma rtogs pa de 'gyod pa'i gnas dkris pa de nyid bsal ma nus nas phyi ma'i dus su sems kyi rgyun 'gyod cing yid la gcags pa skye ba yang yin te/de ni rgod pa dang gzhi mi mthun mod kyi ji ltar rgod pas rnam par g.yeng ba'i rnam pas nye bar zhi bar mi byed pa ni de bzhin du 'di dang yid mi bde ba'i rnam pas nye bar zhi bar mi byed pa'i phyir 'dir yang rgod pa dang bya ba mthun pas na sgrib pa gcig tu mdzad de/ de ni lhag ma'i sems kyi de kho na'i don la sgrib g.yogs byed pas na zhi gnas kyi sgrib pa yin no//rmugs pa zhes bya ba ni tshul khrims dang lta ba dang / 'tsho ba nyams pa la sogs pa la brten nas spong ba la sbyor ba ma byas pa'i nyon mongs pa thams cad skye ba dang / mthun pa lus dang sems rmugs shing las su mi rung ba gang yin pa'o//gnyid ces bya ba ni sems mngon par sdud pa ste/ rmugs pa ni nyon mongs pa skyed pas spong ba'i sbyor ba 'jig par byed la/ gnyid ni sems mngon par sdud pas spong ba'i sbyor ba 'jig par byed pas bya ba mthun pa'i phyir sgrib pa gcig tu mdzad do//the tshom ni zhes bya ba ston pa'am chos sam bslab pa'am gdams ngag dang rjes su bstan pa'am rtogs pa'am/ dus gsum mam/ bde ba nem nur byed cing the tshom za ba gang yin pa'o/ /de la rmugs pa ni las su mi rung ba slong ba yin la/ gnyid ni mngon par sdud pas slong ba yin/the tshom ni yid gnyis za bar lhag pa'i shes rab kyi de kho na'i don la sgrib g.yogs byed pas na de dag ni lhag mthong gi sgrib pa yin no/ /'dod pa la 'dun pa zhes bya ba ni sdug pa'i mtshan ma'i rjes su 'brang zhing 'dod pa'i yon tan lnga la lta ba la sogs par 'dod pa dang / sngon myong ba rjes su dran nas rtog par 'dod pa gang yin pa'o//gnod sems zhes bya ba ni khong khro ba'i rgyu gang yang rung ba rjes su dran pa'i sems kyi kun nas mnar sems dang / gnod par bya bar 'dod pa khong khro'i rgyu de nyid la shas cher rjes su rtog pa'i sems kyis kun nas mnar sems gang yin pa'o//de gnyis ni 'dod pa las dben pa sdig to mi dge ba'i chos las dben pas rab tu phye ba'i zhi gnas dang / lhag mthong gi lam gyi de kho na'i don la sgrib g.yogs byed pas na de gnyis ka'i sgrib pa yin no/ /de ltar sgrib pa bstan nas de dag spangs pas zhi gnas dang lhag mthong gi lam yongs su dag pa la sbyor ba'i don las brtsams te/gdams ngag sbyin pa chud mi za bar bya ba'i phyir gdags pa gtan la dbab pa bstan pa'i phyir/ bcom ldan 'das ji tsam gyis na zhes bya ba la sogs pa zhus so/ /rmugs pa dang gnyid ni nang du zhum par byed pa yin pas de gnyis legs par rab tu choms par 'gyur/zhi gnas kyi lam yongs su dag pa yin no/ /rgod pa dang 'gyod pa ni phyi rol du rnam par g.yeng ba yin pas de gnyis legs par rab tu choms par gyur na/ lhag mthong gi lam yongs su dag pa yin te/ sngar sgrib pa'i gnas skabs ni sbyor ba'i lam yin pas der ni zhi gnas la rgod pa dang /'gyod pa sgrib pa lhag mthong la rmugs pa dang gnyid sgrib par bstan gyi/ 'dir yongs su dag pa'i gnas skabs ni sbyor ba mthar thug pa'i lam yin pas snga ma las bzlog ste sbyar ro/ /bcom ldan 'das byang chub sems dpa' zhi gnas dang lhag mthong la zhugs pas rnam pa du dag gis sems rnam par yongs su 'tshal bar bgyid lags zhes bya bas ni zhi gnas dang lhag mthong gi ting nge 'dzin thams cad bsdus la/ting nge 'dzin de dag gi bar du gcod par byed pa'i chos ni sems rnam par g.yeng ba yin pas de dag yongs su shes par bya ste/spang bar bya ba'i gdams ngag sbyin dgos pas de skad zhus so/ /byams pa rnam pa lngas te zhes bya ba la sogs pas ni theg pa chen po la yang dag par zhugs pa'i byang chub sems dpa' theg pa dman pa yid la byed pa la sogs pa'i g.yeng ba ni 'jig rten las 'das pa rnam par mi rtog pa'i shes pa'i rten du gyur pa'i ting nge 'dzin gyi bar du gcod par byed pa yin pas yongs su shes par byas te spang bar bya'o zhes ston to/theg pa chen po dang ldan pa'i yid la byed pa zhes bya ba ni byang chub sems dpa'i lam 'bras bu dang bcas pa dang ldan pa chos bdag med pa yid la byed pa'o//nyan thos dang rang sangs rgyas dang ldan pa'i yid la byed pa zhes bya ba ni dge sbyong gi lam la gnas pa dang / 'bras bu thob pa dang ldan pa gang zag bdag med par yid la byed pa'o/ /'dod pa'i yon tan lnga zhes bya ba ni 'dod pa'i khams kyi dngos po'i 'dod pa'i gzugs la sogs pa lnga'o//'du 'dzi zhes bya ba ni rab tu byung ba dang / khyim pa dang 'grogs pa la sogs pa'o/ /mtshan ma dang zhes bya ba ni skyes pa dang bud med la sogs pa'i dbyibs kyi mtshan ma'o/ /rnam par rtog pa zhes bya ba ni 'dod pa dang gnod sems kyi rnam par rtog pa la sogs pa'o//nye ba'i nyon mongs pa zhes bya ba ni sems nye bar nyon mongs par byed pa dang mthun pa'i gzhi thams cad do/ /phyi rol gyi dmigs pa zhes bya ba ni yul gyi rnam pa thams cad de de dag la de dag dang 'brel pa'i sems skye bas sems 'phror gtong ba zhes bya bar sbyar ro//rmugs pa dang gnyid kyis bying ba 'am zhes bya ba ni rmugs pa dang gnyid kyis bying ba drangs pa gang yin pa des sems nye bar nyon mongs par 'gyur ro zhes bya ba'i tha tshig go/ /snyoms par 'jug pa'i ro myang ba zhes bya bas ni bsam gtan dang snyoms par 'jug pa'i ro myong bar byed pa ni lha tshe ring po rnams su skye ba sgrub pa yin pas bsam gtan dang snyoms par 'jug par 'gyur bar mi nus pas des sems can gyi don nyams par 'gyur ba'i phyir ro//snyoms par 'jug pa'i nye ba'i nyon mongs pa zhes bya ba ni zhum pa dang rgod par 'gyur ba la sogs pa'o//phyi rol gyi mtshan ma la brten nas nang gi ting nge 'dzin gyi spyod yul gyi mtshan ma yid la byed na zhes bya ba ni rgyu ba'i gnas skabs na phyi rol gyi mtshan ma sdug pa dang mi sdug pa gzung ba gang yin pa de la brten nas gnas pa'i skabs su de la rjes su chags pa dang /khong khro ba la sogs pa sems la mtshan mar byed pa dang / yang phyi rol gyi mtshan ma dang brtan pa la sogs pa 'dra bar nang gi gzugs brnyan la lta ba dang / yang rnyed pa dang bkur sti la sogs pa'i rgyu mtshan gyi phyir ting nge 'dzin gyi mtshan ma yid la byed pa ni mtshan ma med pa'i ting nge 'dzin gyi mi mthun pa'i phyogs yin pa'i phyir ro//gang gis yid la byed pa la brten nas byung ba'i tshor ba la zhes bya ba ni 'jig tshogs la lta ba la brten pa yid la byed pa la brten nas byung ba'i lus dang / sems kyi tshor ba zag pa dang bcas pa srid pa dang rjes su chags pa 'phags pa'i lam thams cad dang mi mthun pa la'o//gnas ngan len gyi lus kyis zhes bya ba ni nyon mongs pa dang bcas pa'i lus kyis so/ /de dag gis ni gags lnga dang / sgrib pa lnga dang / rnam par g.yeng ba lnga po dag lam gang gis gang yin pa shes par bya zhing de dag rnam par bsal te zhi gnas dang lhag mthong gi ngo bo nyid la sbyar bar bya'o zhes sbyor ba'i don las brtsams te/gdams ngag sbyin pa chud mi za bar bya ba'i phyir gdags pa gtan la dbab pa bstan pa'o// // de'i 'og tu 'jug pa'i don las brtsams te/ gdams ngag sbyin pa chud mi za bar bya ba'i phyir gdags pa gtan la dbab pa bstan pa'i phyir/bcom ldan 'das zhi gnas dang lhag mthong dag byang chub sems dpa'i sa dang po nas bzung ste / de bzhin gshegs pa'i sa'i bar la gang gi gnyen po lags zhes bya ba zhus te/ sa thams cad kyi mi mthun pa'i phyogs kyi gnyen po zhi gnas dang lhag mthong gi lam gyi ngo bo nyid la 'jug pa bstan pa ni 'jug pa'i don las brtsams te/gdams ngag sbyin pa chud mi za bar bya ba'i phyir gdags pa gtan la dbab pa yin par ston to/ /byams pa zhi gnas dang lhag mthong gi dang po la ni ngan song ba'i nyon mongs pa dang /las dang skye ba'i kun nas nyon mongs pa'i gnyen po yin no zhes bya ba ni sa dang po'i mi mthun pa'i phyogs ni ngan song dang po so so'i skye bo nyid yin la/ zhi gnas dang lhag mthong gi lam gyi ngo bo nyid kyis rab tu phye ba bdag med pa'i shes pa thob pa ni de'i gnyen po yin pa'i phyir ro//gnyis pa ni ltung ba phra mo'i 'khrul pa kun du 'byung ba rnams kyi'o zhes bya ba ni sa gnyis pa'i mi mthun pa'i phyogs ni ngang tshul ngan pa dang / log par bsgrubs pa yin la zhi gnas dang lhag mthong gi lam gyi ngo bo nyid kyis rab tu phye ba tshul khrims rnam par dag pa dang /yang dag par bsgrub pa thob pa ni de'i gnyen po yin pa'i phyir ro/ /gsum pa la ni 'dod pa'i 'dod chags kyi'o zhes bya ba ni sa gsum pa'i mi mthun pa'i phyogs ni 'dod pa'i 'dod chags yin la/ zhi gnas dang lhag mthong gi lam gyi ngo bo nyid kyis rab tu phye ba mi nyams pa'i bsam gtan dang snyoms par 'jug pa thob pa ni de'i gnyen po yin pa'i phyir ro//bzhi pa la ni snyoms par 'jug pa la sred pa dang / chos la sred pa'i 'o zhes bya ba ni sa bzhi pa'i mi mthun pa'i phyogs kyi snyoms par 'jug pa la sred pa dang / chos la sred pa yin la zhi gnas dang lhag mthong gi lam gyi ngo bo nyid kyis rab tu phye ba byang chub kyi phyogs dang mthun pa'i chos rnams lan mang du gnas pa dang /mdo'i sde la sogs pa'i chos nas tshogs kyi nga rgyal rnam par bsal ba thob pa ni de'i gnyen po yin pa'i phyir ro/ /lnga pa la ni 'khor ba dang mya ngan las 'das pa dag la gcig tu mi phyogs pa nyid dang mngon du phyogs pa nyid kyi'o zhes bya ba ni lam lnga pa'i mi mthun pa'i phyogs ni kun nas nyon mongs pa dang rnam par byang ba'i phyogs kyi rgyud tha dad par lta ba yin la zhi gnas dang lhag mthong gi lam gyi ngo bo nyid kyis rab tu phye ba 'phags pa'i bden pa bzhi sgom pa na kun nas nyon mongs pa dang /rnam par byang ba'i phyogs kyi rgyud tha dad par mi dmigs pa thob pa ni de'i gnyen po yin pa'i phyir ro/ / drug pa la ni mtshan ma mang po kun du 'byung ba'i'o zhes bya ba ni sa drug pa'i mi mthun pa'i phyogs ni rten cing 'brel par 'byung ba zab mo'i mngon du ma gyur pas mtshan ma mang po kun du 'byung ba yin la/zhi gnas dang lhag mthong gi lam gyi ngo bo nyid kyis rab tu phye ba rten cing 'brel par 'byung ba zab mo'i de bzhin nyid mngon du gyur pas kun nas nyon mongs pa dang rnam par byang ba'i mtshan ma nag po dang / dkar po'i phyogs mi dmigs pa thob pa ni de'i gnyen po yin pa'i phyir ro//bdun pa la ni mtshan ma phra mo kun du 'byung ba'i'o zhes bya ba ni sa bdun pa'i mi mthun pa'i phyogs ni mngon par 'du byed pa dang / rtsol ba'i mtshan ma phra mo kun du 'byung ba yin la/ zhi gnas dang lhag mthong gi lam gyi ngo bo nyid kyis rab tu phye ba bgrod pa gcig pa'i lam dang /'brel pa mtshan ma med pa'i gnas pa thob pa ni de'i gnyen po yin pa'i phyir ro/ /brgyad pa la ni mtshan ma med pa la rtsol ba dang / mtshan ma la dbang du ma gyur pa'i'o zhes bya ba ni sa brgyad pa'i mi mthun pa'i phyogs ni mtshan ma med pa la rtsol ba dang /mtshan ma dang dbang ma thob pa yin la zhi gnas dang lhag mthong gi lam gyi ngo bo nyid kyis rab tu phye ba mngon par 'du byed pa med cing mtshan ma la gnas pa dang / mtshan ma zil gyis mnan te/ dbang bcu thob pa dang / sangs rgyas kyi zhing yongs su sbyong bar byed pa ni de'i gnyen po yin pa'i phyir ro//dgu pa la ni rnam pa thams cad du chos ston pa la dbang du ma gyur pa'i'o zhes bya ba ni sa dgu pa'i mi mthun pa'i phyogs ni blo gros rgya chen pos gzhan dag la chos yang dag par ston pa bla na med pa las brtsams nas chos kyi rnam grangs dang / mtshan nyid dang / nges pa'i tshig dang /rab tu dbye bas chos kyi 'khor lo bskor ba la dbang du ma gyur pa yin la zhi gnas dang lhag mthong gi lam gyi ngo bo nyid kyis rab tu phye ba smra ba'i brtson pa phun sum tshogs pas bdag dang sems can yongs su smin par bya ba'i phyir gong nas gong du ye shes khyad par can yongs su tshol zhing chos ston par byed pa ni de'i gnyen po yin pa'i phyir ro//bcu pa la ni chos kyi sku yongs su rdzogs pas so so yang dag par rig pa mi 'thob pa'i'o zhes bya ba ni sa bcu pa'i mi mthun pa'i phyogs ni bla na med pa yang dag par rdzogs pa'i byang chub tu chos kyi dbang bskur ba chen po ma thob pa yin la/zhi gnas dang lhag mthong gi lam gyi ngo bo nyid kyis rab tu phye ba yongs su sbyang ba byas pa'i sa bsdus pa dang / ting nge 'dzin yongs su rdzogs pa thob pa dang / dbang bskur ba thob pa dang / che ba nyid mthar phyin par song ba la sogs pas chos kyi sku yongs su rdzogs pa so so yang dag par rig pa thob pa ni de'i gnyen po yin pa'i phyir ro//de bzhin gshegs pa'i sa la ni nyon mongs pa dang shes bya'i sgrib pa shin tu phra ba mchog ces shin tu phra ba'i gnyen po yin te zhes bya ba ni de bzhin gshegs pa'i sa'i mi mthun pa'i phyogs ni gnas ngan len phra mo snying po la yod pa lta bu rdo rje lta bu'i ting nge 'dzin gyis yang dag par ma bcom pa yin la zhi gnas dang lhag mthong gi lam gyi ngo bo nyid kyis rab tu phye ba rdo rje lta bu'i ting nge 'dzin gyis gnas ngan len snying po la yod pa lta bu de spangs te/rnam pa thams cad mkhyen pa nyid mngon par rdzogs par byang chub pa ni de'i gnyen po yin pa'i phyir ro//de legs par bcom pas de thams cad la chags pa med pa dang / thogs pa med pa'i shes pa dang / mthong ba thob pa zhes bya ba ni sgrib pa phra mo de legs par ma lus par bcom pas shes bya thams cad la mngon du mi phyogs pa'i phyir chags pa med pa dang /gang la nyan thos la sogs pa'i shes pa thogs par 'gyur ba de la mi thogs pa'i phyir thogs pa med pa'i shes pa dang mthong ba brnyes pa'o/ /dgos pa yongs su grub pa'i dmigs pa la zhes bya ba ni ye shes phun sum tshogs pa bdag dang gzhan gyi don mthar phyin pa thob pa na zhes bya bar sbyar ro//chos kyi sku shin tu rnam par dag pa la gnas pa yin no zhes bya ba ni gnas gyur pas rab tu phye ba de bzhin gshegs pa'i gnas pa la gnas pa yin no zhes bya ba'i tha tshig go/ /lhag mthong bsgom pa la ngo bo nyid la sogs pa'i don las brtsams te/gdams ngag sbyin pas rab tu phye ba'i zhi gnas dang lhag mthong gi lam gyi ngo bo nyid las rab tu nyams par mi 'gyur zhing chud mi za bar bya ba'i phyir bstan pa dang bshad pas zhi gnas dang lhag mthong bsgoms pa la ngo bo nyid la sogs pa'i don las brtsams te/gdams ngag sbyin pa gdags pa gtan la dbab pa bstan pa ni zhi gnas dang lhag mthong bsgoms pa la ngo bo nyid dang / rgyu dang / 'bras bu dang / las dang / sbyor ba dang 'jug pa'i don las brtsams te/ gdams ngag sbyin pa chud mi za bar bya ba'i phyir gdags pa gtan la dbab pa yin no// // de'i 'og tu bsgom pa la 'dun pa drag po med pa rnam par gzhig cing chud mi za bar bya ba'i phyir gdags pa gtan la dbab pa'i tshig gi don la sogs pa bshad par bya ste/ bsgom pa la 'dun pa drag po med pa zhes bya ba ni zhi gnas dang lhag mthong gi lam gyi ngo bo nyid la sbyor ba na/ji ltar bla na med pa yang dag par rdzogs pa'i byang chub mngon par rdzogs par sangs rgyas par 'gyur ba dang ji ltar byang chub sems dpa' mthu chen po mngon par bsgrub pa dang / ji ltar phung po'i lhag ma med pa'i mya ngan las 'das pa'i dbyings su yongs su tshor ba thams cad 'gag par 'gyur zhing shes na/bsgom pa'i 'bras bu ma rtogs pas bsgom pa la 'dun pa drag po med pa'o/ /rnam par gzhig cing chud mi za bar bya ba'i phyir gdags pa gtan la dbab pa zhes bya ba ni 'dun pa drag po med pa de rnam par gzhig cing 'dun pa drag pos rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang bshad pas bsgom pa las 'dun pa drag po med pa rnam par gzhig pa gdags pa gtan la dbab pa'o//de la mtshams sbyar ba ji lta bu zhe na/'dir 'phags pa byams pas gzhan dag 'di snyam du rnal 'byor pa rnal 'byor gyis yongs su bsdus pa'i zhi gnas dang lhag mthong gi lam gyi ngo bo nyid la sbyor bas ji ltar bsgrubs na bla na med pa yang dag par rdzogs pa'i byang chub mngon par rdzogs par 'tshang rgya ba dang /byang chub sems dpa'i mthu chen po mngon par 'grub pa dang / tshor ba thams cad 'gag par 'gyur snyam du sems pa rnams kyi bsam pa la brtags nas/ bcom ldan 'das byang chub sems dpa' zhi gnas dang lhag mthong la ji ltar bsgrub na bla na med pa yang dag par rdzogs pa'i byang chub tu mngon par rdzogs par sangs rgyas par 'gyur lags zhes bya ba la sogs pa zhu ba rnam pa gsum zhus par sbyar ro//de la zhu ba dang po 'di lan dang bcas pas ni bstan pas zhi gnas dang lhag mthong bsgom pa la 'dun pa drag po med par rnam par gzhig cing chud mi za bar bya ba'i phyir gdags pa gtan la dbab pa bstan to//zhu ba lhag ma gnyis po lan dang bcas pas ni bshad pas de bstan to/ /byams pa 'di la byang chub sems dpa' zhi gnas dang lhag mthong thob nas zhes bya ba ni dang po sbyar ba'i lam gyi yid la byed pa'i gnas skabs na rnam par rtog pa dang bcas pa dang /rnam par mi rtog pa'i gzugs brnyan gyi dmigs pa thob pa dang sbyar ro/ /de bzhin nyid rnam pa bdun las brtsams te zhes bya ba la sogs pas ni zung du 'brel pa'i lam gyi dmigs pa ji ltar thob pa ston to/ /de bzhin nyid rnam pa bdun ni 'byung ba'i de bzhin nyid la sogs pa sngar bstan pa dag go//ji ltar thos pa dang bsam pa'i chos rnams la zhes bya ba ni chos gdags pa rnam par gzhag pa zhi gnas dang lhag mthong dang de bzhin nyid bdun gyi dmigs par gyur pa rnams la ste / des ni thos pa dang bsams pa las byung ba'i shes rab bstan to//mnyam par gzhag pa'i sems kyis zhes bya ba ni bsgoms pa las byung ba'i shes rab bstan to/ /legs par bzung ba dang / legs par bsams pa dang / legs par rnam par gzhag pa'i zhes bya ba ni shes rab rnam gsum gyi rim gyis te/ de tsam gyis na de bzhin nyid de nang du yid la byar rung bar ston to//de bzhin nyid de nyid nang du yid la byed de zhes bya ba ni de bzhin nyid bdun gyi don sems tsam du rtogs pa de nyid sems tsam las bzlas te/ de bzhin nyid du yid la byed pa'o/ /de de ltar de bzhin nyid yid la byed pa na zhes bya ba la sogs pas ni sbyor ba mthar thug pa'i lam gyi yid la byed pa las 'da' zhing /sa dang po'i zung du 'brel pa'i lam skye ba dang / dngos po'i mtha'i dmigs pa'i rim pa ston to/ /mtshan ma phra mo zhes bya ba ni gzhan gyi dbang gi ngo bo nyid kyi rnam par rtog pa'o/ /sems lhag par btang snyoms su 'jog na zhes bya ba ni kun brtags pa'i ngo bo nyid du mngon par zhen par mi byed na zhes bya ba'i tha tshig go//mtshan ma rags pa zhes bya ba ni kun brtags pa'i tha snyad kyi rnam par rtog pa zhes bya ba ni gzugs zhes bya ba la sogs par tshig gi gdags pa dag go/ /byams pa de la mtshan ma phra mo ni 'di dag yin te zhes bya ba la mtshan ma phra mo nyi shu rtsa gcig la dang po bzhi'i don ni dran pa nye bar gzhag pa bzhi'i rjes su 'brang bas rig par bya'o//lhag ma rnams kyi don ni stong pa nyid bcu drug gi rjes su 'brang bas rig par bya ste/ dor ba med pa stong pa nyid la ni tshig gnyis bsdus pa'i mtshan ma gcig dang sbyar bar bya'o//mtshan nyid stong pa nyid la ni mtshan ma gnyis so/ /lhag ma rnams ni re re dang sbyar bar rig par bya'o/ /sems kyi len pa'i mtshan ma zhes bya ba ni kun gzhi rnam par shes pa nying mtshams sbyor ba'i rgyu gnyis po kun brtags pa'i ngo bo nyid la mngon par zhen pa'i bag chags dang /rten dang bcas pa'i dbang po gzugs can len pa ste/ de blangs pa'i nang gi lus dang phyi'i lus dang / phyi nang gnyis ka'i lus la lus kyi rjes su lta zhing lus dran pa nye bar gzhog pa na lus de la mi gtsang ba'i mtshan ma dang / de bzhin nyid kyi mtshan ma ting nge 'dzin gyi spyod yul gzugs brnyan gyi rnam par snang ba gang yin pa nyid 'dir sems kyi len pa'i mtshan ma zhes bya'o//myong ba'i mtshan ma zhes bya ba ni sems de nyid kyi bdag tu rmongs pa dang / bdag tu lta ba dang / bdag tu nga rgyal dang / bdag la chags pa ste/ des myong ba'i nang gi tshor ba dang /phyi'i tshor ba dang / phyi nang gnyi ga'i tshor ba la tshor ba'i rjes su lta zhing tshor ba dran pa nye bar 'jog pa na/ tshor ba la sdug bsngal gyi mtshan ma dang / de bzhin nyid kyi mtshan ma ting nge 'dzin gyi spyod yul gzugs brnyan gyi rnam par snang ba gang yin pa nyid 'dir sems kyi myong ba'i mtshan ma zhes bya'o//rnam par rig pa'i mtshan ma zhes bya ba ni sems de nyid kyi dmigs pa rnam par rig pa ste/ des sems tsam du rnam par rig pa'i nang gi sems dang / phyi rol gyi sems dang / phyi nang gnyis ka'i sems la sems kyi rjes su lta zhing sems dran pa nye bar 'jog pa na/sems de la mi rtag pa'i mtshan ma dang / de bzhin nyid kyi mtshan ma ting nge 'dzin gyi spyod yul gzugs brnyan gyi rnam pa gang yin pa nyid 'dir sems kyi rnam par rig pa'i mtshan ma zhes bya'o/ /kun nas nyon mongs pa'i mtshan ma dang rnam par byang ba'i mtshan ma zhes bya ba ni sems de nyid sems dang /sems las byung ba dag ste/ de dag gi gnas dang / dmigs pa'i chos la nang gi chos dang / phyi'i chos dang / phyi nang gnyis ka'i chos la chos kyi rjes su lta zhing chos dran pa nye bar 'jog pa na chos de dag ma rtogs pas sdug bsngal ba dang /kun 'byung ba bdag med pa'i rnam pas kun nas nyon mongs par 'gyur ba'i mtshan ma dang / de dag gi de bzhin nyid kyi mtshan ma dang / chos de dag rtogs pas 'gog pa dang lam dang bdag med pa'i rnam pas rnam par byang bar 'gyur ba'i mtshan ma dang / de dag gi de bzhin nyid kyi mtshan ma ting nge 'dzin gyi spyod yul gzugs brnyan gyi rnam par snang ba gang yin pa nyid 'dir sems kyi kun nas nyon mongs pa dang /rnam par byang ba'i mtshan ma zhes bya'o/ /nang gi mtshan ma zhes bya ba ni nang stong pa nyid rtogs pa'i rnam pa'o/ /phyi rol gyi mtshan ma zhes bya ba ni phyi stong pa nyid rtogs pa'i rnam pa'o//de gnyis ka'i mtshan ma zhes bya ba ni phyi nang stong pa nyid rtogs pa'i rnam pa'o/ /sems can thams cad kyi don la sbyar bar bya'o snyam pa'i mtshan ma zhes bya ba ni stong pa nyid stong pa nyid rtogs pa'i rnam pa ste/ de ni de ltar phyi nang gnyi ga stong pa nyid yin na/stong pa nyid la ni ci yang bsgrub tu med do snyam nas sems can gyi don yal bar 'dor ba'i gnyen por ci yang bsgrub tu med do snyam pa'i stong pa nyid de yang stong pas sems can thams cad kyi don la sbyar bar bya'o snyam du stong pa nyid stong pa nyid du rtogs pa'o//shes pa'i mtshan ma zhes bya ba ni chen po stong pa nyid rtogs pa'i rnam pa ste/ phyogs bcu'i 'jig rten gyi khams thams cad phyi rol gyi dngos po ma yin gyi shes pa'i ngo bo nyid du rtogs pa'o/ /de bzhin nyid dang / sdug bsngal dang / kun 'byung ba dang / 'gog pa dang / lam gyi mtshan ma zhes bya ba ni don dam pa stong pa nyid rtogs pa'i rnam pa ste/rnam par ma bzhag pa'i de bzhin nyid dang / rnam par bzhag pa'i bden pa bzhi rtogs pa'o/ /'dus byas kyi mtshan ma zhes bya ba ni 'dus byas stong pa nyid rtogs pa'i rnam pa ste/ 'dus byas stong pa nyid du rtogs pa'o//'dus ma byas kyi mtshan ma zhes bya ba ni 'dus ma byas stong pa nyid rtogs pa'i rnam pa ste/ 'dus ma byas stong pa nyid du rtogs pa'o/ /rtag pa'i mtshan ma ni zhes bya ba ni mtha' las 'das pa stong pa nyid rtogs pa'i rnam pa ste/ rtag pa rtag pa'i dus dang / ther zug ther zug gi dus su gang zag gtan med par rtogs pa'o//mi rtag pa'i mtshan ma zhes bya ba ni thog ma dang tha ma med pa stong pa nyid rtogs pa'i rnam pa ste/ 'dus byas sngon dang phyi ma'i mtha' med pa mi rtag pa stong pa nyid rtogs pa'o/ /sdug bsngal dang / 'gyur ba dang bcas pa'i rang bzhin gyi mtshan ma zhes bya ba ni dor ba med pa stong pa nyid rtogs pa'i rnam pa ste/sdug bsngal gyi rang bzhin dang / 'gyur ba dang bcas pa'i rang bzhin zhes bya ba tshig gnyis bsdus pa'i mtshan ma gcig dang sbyar ro/ /de la sdug bsngal gyi rang bzhin yang phung po'o//'gyur ba dang bcas pa'i rang bzhin yang phung po ste/ sdug bsngal gyi bden pa nyid yin pa'i phyir mi rtag pa'i ngo bo nyid yin pa'i phyir ro/ /sdug bsngal gyi rang bzhin gyi phung po dang / 'gyur ba dang bcas pa'i rang bzhin gyi phung po de ni dor ba zhes bya ste/ phung po'i ming gi rnam grangs yin no// dor ba med pa ni mya ngan las 'das pa ste/ de ni sdug bsngal gtan 'gags pa dang / 'gyur ba med pa'i ngo bo nyid yin pa'i phyir ro/ /de rtogs pa'i rnam pa ni sdug bsngal dang 'gyur ba med pa'i sa pa'i rang bzhin gyi mtshan ma zhes bya'o//de la mi 'gyur ba'i rang bzhin gyi mtshan ma zhes bya ba ni rang bzhin gyis stong pa nyid rtogs pa'i rnam pa ste/ sdug bsngal dang 'gyur ba dang bcas pa'i rang bzhin de mi 'gyur ba'i rang bzhin rtag pa yin no snyam pa de rang bzhin gyi stong pa nyid du rtogs pa zhes bya bar sbyar ro//de la yang la la 'di snyam du gal te chos thams cad rang bzhin gyis stong pa nyid yin la/ sems can rnams kyi rang bzhin du gyur pa'i 'dod chags la sogs pa'i spyod pa dang / bsam pa dang / bag la nyal dang / mos pa dang / khams dang / rigs zhes bya ba la sogs pa mi 'gyur ba'i rang bzhin can gang dag gi dbang gis bsam pa dang / bag la nyal sna tshogs mkhyen pa dang / mos pa sna tshogs mkhyen pa dang / khams sna tshogs mkhyen pa dang zhes bya ba la sogs pa sangs rgyas kyi chos ma 'dres pa rnams 'jug par 'gyur ba'i chos gang yin pa de dag 'thad par mi 'gyur te/de bas na mi 'gyur ba'i rang bzhin gyi chos de dag ni don dam par yod do snyam du sems pa'i chos de dag rang bzhin gyis stong pa nyid du yid la byed pa na stong pa nyid du mthong ba'i rnam pa de ni mi 'gyur ba'i rang bzhin gyi mtshan ma zhes bya ba'o //'dus byas kyi mtshan nyid mi 'dre ba'i mtshan ma 'am/ de'i rang gi mtshan nyid kyi mtshan ma zhes bya ba ni mtshan nyid stong pa nyid rtogs pa'i rnam pa ste/ 'dus byas kyi mtshan nyid mi 'dra ba ni 'dus ma byas pa ste don dam pa'i bden pa'o/ /de'i rang gi mtshan nyid ni 'dus byas te kun rdzob kyi bden pa'o//mtshan nyid de gnyis rang bzhin med pa stong pa nyid du rtogs pa ste mtshan ma gnyis so sor bgrang ngo / /thams cad thams cad ces bya bar rig nas thams cad kyi mtshan ma zhes bya ba ni thams cad stong pa nyid rtogs pa'i rnam pa ste/'dus byas dang 'dus ma byas kyis bsdus pa'i chos thams cad stong pa nyid du rtogs pa'o/ /gang zag bdag med pa'i mtshan ma zhes bya ba ni mi dmigs pa stong pa nyid rtogs pa'i rnam pa ste/ gang zag mi dmigs pa stong pa nyid du rtogs pa'o/ /chos bdag med pa'i mtshan ma zhes bya ba ni dngos po med pa stong pa nyid rtogs pa'i rnam pa ste/chos rnams dngos po med pa stong pa nyid du rtogs pa'o/ /de ltar zhugs shing zhes bya ba ni gzhan gyi dbang gi mtshan ma thams cad kyi gnyen po de bzhin nyid la zhugs pa'o/ /de la mang du gnas pa zhes bya ba ni de bzhin nyid de kun du rten goms par byas lan mang du byas pa'o//dus dus su zhes bya ba ni zhi gnas kyi dus dang / lhag mthong gi dus dang / gnyis ka'i dus su'o/ /de ltar zhugs pa'i byang chub sems dpa' de la ci zhig 'byung bar 'gyur zhe na/ nang gi so so'i bdag nyid la so so rang rig pa de bzhin nyid rnam pa bdun so sor rtogs pa'i shes pa rnam pa bdun skye bar 'gyur te zhes bya ba gsungs te/de la nang gi so so'i bdag nyid la zhes bya ba ni sems kyi ngo bo nyid la'o/ /so sor rang rig pa zhes bya ba ni gnyis med pa'o/ /de bzhin nyid rnam pa bdun so sor rtogs pa'i zhes bya ba ni 'byung ba'i de bzhin nyid la sogs pa ste/shes bya'i dngos po'i ji lta ba bzhin du yod pa nyid kyi mtshan nyid ni de bdun du 'dus pa'i phyir ro/ /shes pa rnam pa bdun skye bar 'gyur te zhes bya ba ni de bzhin nyid rnam pa bdun rtogs pa'i sgo nas shes pa yang rnam pa bdun zhes bya bar zad kyi shes pa'i ngo bo nyid la ni rnam pa bdun du dbye ba med de/mthong ba'i lam gyi ngo bo nyid gcig tu zad do/ /de ni de'i mthong ba'i lam yin no zhes bya ba ni sems kyi ngo bo nyid la gnyis med pa'i don so so yang dag par rang rig pa'i shes pa de'o//de thob pas zhes bya ba ni mthong ba'i lam de'o/ /yang dag pa nyid skyon med pa zhes bya ba ni dang po kho nas de kho na mthong ba'o/ /de bzhin gshegs pa'i rigs zhes bya ba ni gdon mi za bar de bzhin gshegs pa nyid du 'gyur bar nges pa'o/ /sa dang po zhes bya ba ni rab tu dga' ba'o//sa de'i phan yon zhes bya ba ni sa dang po dang phan yon gang dag bstan pa de dag go/ /des sngar zhes bya ba ni mthong ba'i lam ma thob pa'i dus na ste / sbyor ba'i lam gyi yid la byed pa'i gnas skabs na'o/ /da ltar ni mthong ba'i lam thob pas dngos po'i mtha'i dmigs pa thob pa yin te zhes bya ba ni des sangs rgyas kyi sa nyid la yongs su grub pa yin mod kyi/dang por sa dang po la rtogs pa'i phyir ro/ /dgos pa yongs su grub pa'i dmigs pa yang med pa ma yin mod kyi yongs su rdzogs pa ma yin pas de thob bo zhes ma bstan to/ /des gong ma gong ma rnams su zhes bya ba ni sa gnyis pa yan chad du'o//dmigs pa rnam pa gsum po de dag nyid yid la byed pa na zhes bya ba ni rnam par rtog pa dang bcas pa'i gzugs brnyan dang / rnam par mi rtog pa'i gzugs brnyan dang / dngos po'i mtha'i dmigs pa'o//nang gi mtshan ma rnam par sel ba nyid kyis zhes bya ba ni dmigs pa gsum po de la gnyis med pa'i don gyis te/ de nyid khye'u ches phra mo lta bur blta bar bya'o/ /kun nas nyon mongs pa'i cha dang mthun pa'i rnam pa thams cad ces bya ba gzhan gyi dbang gi mtshan ma ste/de ni khye'u sbom po lta bur blta bar bya'o/ /mtshan ma rnams zhes bya ba ni gzhan gyi dbang gi mtshan ma rnams so/ /gnas ngan len rnams zhes bya ba ni kun brtags pa'i bag chags rnams so/ /gser lta bur zhes bya ba ni sa bcu pa'i mdo las dang po nas sa bcu pa'i bar du sems rnam par sbyong ba gser la dpe blangs pa dang sbyar ro//tshul des na bla na med pa yang dag par rdzogs pa'i byang chub kyi bar du mngon par rdzogs par sangs rgya zhing dgos pa yongs su grub pa yang 'thob ste zhes bya ba gsungs te/ dgos pa yongs su grub pa'i dmigs pa ni ye shes phun sum tshogs pa'o//byams pa byang chub sems dpa' zhi gnas dang lhag mthong la de ltar sgrub na bla na med pa yang dag par rdzogs pa'i byang chub mngon par rdzogs par sangs rgya bar 'gyur ro zhes bya ba ni sngar zhus pa'i lan gyi bsdu ba bstan te/ des ni bstan pas bsgom pa la 'dun pa drag po med pa rnam par gzhig cing chud mi za bar bya ba'i phyir gdags pa gtan la dbab pa bstan to// // de'i 'og tu byang chub sems dpas ji ltar bsgrubs na byang chub sems dpa'i mthu chen po mngon par 'grub pas bsgom pa la 'dun pa drag po med par rnam par gzhig cing chud mi za bar bya ba'i phyir gdags pa gtan la dbab pa bstan pa'i phyir/byang chub sems dpa' ji ltar sgrub par bgyid na byang chub sems dpa' mthu chen po mngon par sgrub pa lags zhes bya ba mngon par zhus so/ /de la byang chub sems dpa' mthu chen po rnam pa lnga ste/ mngon par shes pa'i mthu dang / chos kyi mthu dang / lhan cig skyes pa'i mthu dang / thun mong gi mthu dang / thun mong ma yin pa'i mthu'o/ /de la mngon par shes pa'i mthu gang zhe na mngon par shes pa drug ste/ rdzu 'phrul gyi yul zhes pa mngon du bya ba'i mngon par shes pa dang / lha'i rna ba'i shes pa mngon du bya ba'i mngon par shes pa dang /sems kyi rnam grangs shes pa mngon du bya ba'i mngon par shes pa dang / sngon gyi gnas rjes su dran pa'i shes pa mngon du bya ba'i mngon par shes pa dang / 'chi 'pho dang skye ba shes pa mngon du bya ba'i mngon par shes pa dang / zag pa zad pa shes pa mngon du bya ba'i mngon par shes pa'o//de la rdzu 'phrul gyi yul shes pa mngon du bya ba'i mngon par shes pa zhes bya ba la rdzu 'phrul gyi yul ni gang / rdzu 'phrul gyi shes pa ni gang / rdzu 'phrul gyi yul shes pa mngon du bya ba ni gang zhe na/ rdzu 'phrul gyi yul zhes bya ba ni gcig tu gyur pas mang por 'gyur zhes bya ba la sogs pa nas rgyas par tshangs pa'i 'jig rten gyi bar du lus kyis dbang sgyur bar byed do zhes bya ba'i bar gang yin pa ste/rdzu 'phrul gyi yul shes pa des yul de nyams su myong ba dang / nye bar ston par byed pas na de'i phyir rdzu 'phrul gyi yul zhes bya'o/ /de la rnam par bsgyur ba dang sprul pa'o//de la yongs su bsgyur ba zhes bya ba ni dngos po yod pa'i rang bzhin gzhan du bsgyur ba ste g.yo bar byed pa dang / 'bar bar byed pa dang / khyab par byed pa dang / rnam par ston pa dang / gzhan du 'gyur bar byed pa dang / 'gro ba dang 'ong bar byed pa dang / sdud pa dang rgyas par byed pa dang /gzugs thams cad lus su 'jug par byed pa dang / skal ba mnyam pa'i gam du 'gro bar byed pa dang / snang bar byed cing mi snang bar yang byed pa dang / dbang byed pa dang / gzhan gyi rdzu 'phrul zil gyis gnon par byed pa dang / spobs pa sbyin pa dang / dran pa sbyin pa dang /bde ba sbyin pa dang / 'od zer 'byin pa dang / de lta bu dang mthun pa dag ni yongs su bsgyur ba zhes bya'o/ /de la sprul pa zhes bya ba ni dngos po med pa las sprul pa'i sems kyis ji ltar 'dod pa bzhin du sprul pa ste/ de ni rnam pa gsum ste/ lus sprul pa dang / ngag sprul pa dang / yul sprul pa'o/ /de la lus sprul pa ni bdag dang 'dra ba'am mi 'dra bar sprul pa dang / gzhan dang 'dra ba 'am mi 'dra bar sprul pa dang / lus kyi sprul pa mang po sprul pa ste/ de dag kyang dbang po dang 'dra ba dang / dbang po'i rten sprul par byed kyi dbang po nyid ni ma yin no//ngag sprul pa ni gdangs snyan pa dang / skad gsal ba dang / bdag dang 'brel pa dang / gzhan dang 'brel pa dang / gnyis ka dang ma 'brel pa dang / chos ston par rtogs pa dang / bag med pa la bskul bar rtogs pa'o/ /yul sprul pa ni zas dang skom la sogs pa dang / nor bu dang mu tig la sogs pa dang /gzugs dang / sgra dang / dri dang / ro dang / reg byar rtogs pa phyi rol gyi yo byad thams cad ji ltar 'dod pa bzhin du sprul pa ste/ yongs su bsgyur ba dang / sprul pa de gnyis gcig tu bsdus pa ni rdzu 'phrul gyi yul zhes bya'o/ /rdzu 'phrul gyi yul shes pa zhes bya ba ni mthu de dang ldan pa'i shes pa bsgoms pa las byung ba'i bsgoms pa'i 'bras bu gang yin pa ste/shes pa de ni yul de nyams su myong ba dang / nye bar ston par 'gyur bas na de'i rdzu 'phrul gyi yul shes pa zhes bya'o/ /rdzu 'phrul gyi yul shes pa mngon du bya ba zhes bya ba ni shes pa de nyid kyi sa bon skye ba'i rkyen gyis yongs su zin cing yongs su brtas pa gang zag de'i rgyud kyi rjes su 'jug pa gang yin pa ste/sa bon yongs su brtas pas gang zag des shes pa de mngon du byed par gyur pas de'i phyir de ni rdzu 'phrul gyi yul shes pa mngon du bya ba zhes bya'o//de dag thams cad gcig tu bsdus pa ni rdzu 'phrul gyi yul shes pa mngon du bya ba'i mngon par shes pa zhes bya'o/ /de'i las ni rnam pa gnyis te/ sems can rnams rdzu 'phrul gyi cho 'phrul gyis 'dun par byas nas sangs rgyas kyi bstan pa la 'dzud par byed pa dang / sems can sdug bsngal ba rnams la phan gdags pa rnam pa du ma mang po sna tshogs nye bar sgrub par byed pa'o/ /lha'i rna ba'i shes pa mngon du bya ba'i mngon par shes pa zhes bya ba la/ lha'i rna ba ni gang / lha'i rna ba'i shes pa ni gang / lha'i rna ba'i shes pa mngon du bya ba ni gang zhe na/ lha'i rna ba zhes bya ba ni lha'i gnas pa bsam gtan rnams bsgoms pa'i 'bras bu rna bas bsdus pa'i gzugs dang ba gang yin pa ste/lha'i rna ba de lha'i gnas pa de la brten pa dang / de'i 'bras bu dang des bsdus pas na de'i phyir lha'i rna ba zhes bya'o/ /des ni lha dang mi'i sgra dang / 'phags pa rnams dang / 'phags pa ma yin pa rnams dang / sgra bo che rnams dang / sgra chung ngu rnams dang / gsal ba rnams dang / mi gsal ba rnams dang / sprul pa rnams dang / sprul pa ma yin pa rnams dang / thag ring ba rnams dang / thag nye ba rnams thos pa yin te/ de dag kyang mdor bsdu na/'gro ba'i gnas kyi khyad par dang / legs par gsungs pa dang / nyes par bshad pa'i khyad par dang / che chung gi khyad par dang / go bar byed pa dang mi byed pa'i khyad par dang / mthu dang ldan pa dang mi ldan pa'i khyad par dang / thag nye ring gi khyad par yin pas der sgra'i khyad par thams cad 'dus par blta bar bya'o//de la gsal te 'og dang steng dang thad kar 'jig rten gyi khams gzhan las brtsams te/ thos par 'jug par mi byed na ni 'og tu mnar med pa la thug pa yan chad/ steng du 'og min la thug pa man chad thad kar stong gsum gyi stong chen po'i khams gcig tshun chad kyi sgra thos so//gal te 'jug par byed na ni 'og dang sting dang thad kar 'jig rten gyi khams dpag tu med pa grangs med pa dag gi sgra thams cad thos te/ de ni lha'i rna ba zhes bya'o/ /lha'i rna ba'i shes pa zhes bya ba ni rna ba de la brten pa'i rnam par shes pa dang mtshungs par ldan pa'i shes pa bsgoms pa las byung ba bsgoms pa'i 'bras bu gang yin pa ste/shes pa de ni sgra de dag thos pa dang / nyams su myong bar 'gyur bas na de'i phyir lha'i rna ba'i shes pa zhes bya'o/ /lha'i rna ba'i shes pa mngon du bya ba ni shes pa de nyid kyi sa bon skye ba'i rkyen gyis yongs su zin cing yongs su brtas pa gang zag de'i rgyud kyi rjes su 'jug pa gang yin pa ste/sa bon yongs su brtas pas gang zag des shes pa de mngon du byed par 'gyur bas na de'i phyir de ni lha'i rna ba'i shes pa mngon du bya ba zhes bya'o/ /de dag thams cad gcig tu bsdus pa ni lha'i rna ba'i shes pa mngon du bya ba'i shes pa zhes bya'o//de'i las ni ngag gi spyod pa dge ba dang mi dge ba dag thos nas sems can de dag la ci rigs ci 'os par na nan tan byed pa yin no/ /sems kyi rnam grangs shes pa mngon du bya ba'i mngon par shes pa zhes bya ba la sems kyi rnam grangs ni gang /sems kyi rnam grangs shes pa ni gang / sems kyi rnam grangs shes pa mngon du bya ba ni gang zhe na/ sems kyi rnam grangs zhes bya ba ni phyogs bcu'i 'jig rten gyi khams dpag tu med grangs med pa dag na sems can 'khod pa rnams kyi sems nyon mongs pas kun nas dkris pa dang /nyon mongs pas kun nas dkris pa dang bral ba dang nyon mongs pa dang 'brel cing bag la nyal dang bcas pa dang / nyon mongs pa dang 'brel pa ma yin zhing bag la nyal med pa dang / smon lam log par btab pa dang / smon lam legs par btab pa dang / dman pa dang / bar ma dang / gya nom pa dang / bde ba dang ldan pa dang / sdug bsngal dang ldan pa dang / sdug bsngal ba yang ma yin bde ba yang ma yin pa dang ldan par 'jug pa gang yin pa'o/ /sems kyi rnam grangs shes pa zhes bya ba ni de la dmigs pa'i shes pa mthu dang ldan pa bsgoms pa las byung ba'i bsgoms pa'i 'bras bu gang yin pa ste/shes pa gcig gis sems can gcig gi sems gang yin pa dang / ji lta bu dang / ji 'dra ba dang / ji snyed par gnas pa thams cad cig car yang dag pa ji lta ba bzhin du shes so/ /shes pa gcig kho nas sems can mang po dag gi sems gang yin pa dang ji lta bu dang ji 'dra ba dang ji snyed nye bar gnas pa thams cad dang cig car yang dag pa ji lta ba bzhin du shes pas na de'i phyir sems kyi rnam grangs shes pa zhes bya'o//sems kyi rnam grangs shes pa mngon du bya ba zhes bya ba ni snga ma bzhin te/de dag thams cad gcig tu bsdus pa ni sems kyi rnam grangs shes pa mngon du bya ba'i mngon par shes pa zhes bya'o/ /de'i las ni sems can rnams kyi dbang po mchog dang mchog ma yin pa shes pa dang / mos pa sna tshogs shes pa dang / khams dang spyod pa sna tshogs shes pa dang /mya ngan las 'das par 'gro ba'i lam sna tshogs shes pas de dag tu ci rigs par sbyor ba byed pa yin no/ /sngon gyi gnas rjes su dran pa'i shes pa mngon du bya ba'i mngon par shes pa zhes bya ba la/ sngon gyi gnas rjes su dran pa ni gang / sngon gyi gnas rjes su dran pa'i shes pa ni gang /sngon gyi gnas rjes su dran pa'i shes pa mngon du bya ba ni gang zhe na/ sngon gyi gnas rjes su dran pa zhes bya ba ni phyogs bcu'i sems can gyi ris rnam pa sna tshogs dag na/ sems can ming dang brda sna tshogs rnam par gzhag pa tha dad pa rnams kyi sngon 'das pa'i rabs dag gi lus kyi rnam pa mngon par brjod pa na/tha snyad kyi gzhi brgyad la brten pa'i spyod pa drug rjes su dran pa gang yin pa ste/ tha snyad kyi gzhi brgyad gang zhe na/ ming ni 'di zhes bya/ rigs ni 'di zhes bya/ rus ni 'di zhes bya/ zas ni 'di lta bu zhig za za/ bde ba dang sdug bsngal ni 'di lta bu zhig myong /tshe ring khyad ni 'di tsam zhig /yun ni 'di srid cig gnas gnas/ tshe ni 'di tsam zhig thub ces bya ba'o/ /tha snyad kyi gzhi brgyad la brten pa'i spyod pa drug gang zhe na/ bod pa'i brda dang / rgyal rigs la sogs pa'i rigs rnams dang / pha ma dang zas skom la sogs pa'i bya ba dang /dar ba dang / rgud pa dang / tshe'i rnam pa sna tshogs te/ 'di ltar 'jig rten tha snyad kyi gzhi brgyad po de dag la brten nas bdag dang / gzhan dag gi spyod pa drug po dag tha snyad 'dogs pa na bdag gam/ 'di'i ming ni 'di zhes bya/ bdag gam 'di'i rigs ni rgyal rigs la sogs pa ni 'di zhes bya/bdag gam 'di'i pha ma ni 'di yin pas rus ni 'di zhes bya / bdag gam 'di'i zas skom la sogs pa'i bya bas zas ni 'di lta bu zhig za za/ bdag gam 'di dar ba dang rgud pas bde ba dang sdug bsngal ni 'di lta bu zhig 'byung / bdag gam 'di'i na tshod ni gzhon pa'am/bar ma 'am rgan pa 'di tsam zhig gnas gnas so zhes tha snyad 'dogs par byed pa'i phyir te/ bdag dang gzhan dag gi sngon 'das pa'i tshe rabs dag gi lus kyi rnam pa tha snyad kyi gzhi brgyad la brten pa'i spyod pa drug po de dag rjes su dran pa ni sngon gyi gnas rjes su dran pa zhes bya ba'o //sngon gyi gnas rjes su dran pa'i shes pa zhes bya ba ni dran pa de la brten cing de dang mtshungs par ldan pa'i shes pa mthu dang ldan pa bsgoms pa las byung ba bsgoms pa'i 'bras bu gang gis de la dran pa 'jug pa gang yin pa ste/ shes pa des bdag dang gzhan dag gi sngon gyi gnas dang /srid pa bar ma dang / sngon gyi spyod pa nyung ngu dang / mang po dang / tshad med pa dang / skad cig dang / thang cig dang / yud tsam la sogs pa'i rgyun bar chad med pa'i tshul gyis zhugs pa dang / bskal pa bgrang ba'i tshul gyis grangs su byar nus pa'i cha dang / grangs su byar mi nus pa'i dus dpag tu med pa dag dang / gang 'dod pa dang / ji tsam 'dod pa la shes pa thogs pa med par 'jug par 'gyur bas na de'i phyir sngon gyi gnas rjes su dran pa'i shes pa zhes bya'o/ /de mngon du bya ba ni snga ma bzhin te/ de dag thams cad gcig tu bsdus pa ni sngon gyi gnas rjes su dran pa'i shes pa mngon du bya ba'i mngon par shes pa zhes bya'o//de'i las ni sems can rnams sangs rgyas bcom ldan 'das la dad pa bskyed pa dang / 'khor ba las skyo ba bskyed pa'i phyir byang chub sems dpa'i spyod pa mchog rmad du byung ba skyes pa'i rabs kyi sde snod sna tshogs bstan pa dang /sems can rnams kyi las kyi 'bras bu rnam par smin pa las brtsams te/ sngon gyi tshul dang ldan pa'i de lta bu byung ba'i sde snod sna tshogs ston pa dang / sngon gyi mthar rtog pa rtag par smra ba dang / kha cig rtag par smra ba rnams kyi rtag par lta ba sel bar byed pa yin no//'chi 'pho dang skye ba shes pa mngon du bya ba'i mngon par shes pa zhes bya ba la 'chi 'pho dang skye ba ni gang / 'chi 'pho dang skye ba shes pa ni gang / 'chi 'pho dang skye ba shes pa mngon du bya ba ni gang zhe na/ 'chi 'pho dang skye ba zhes bya ba ni sems can 'chi 'pho ba dang / skye ba dang /kha dog ngan pa dang / kha dog bzang ba dang / ngan pa dang / ngan 'gror 'gro ba dang / bde 'gror 'gro ba dang / lus dang / ngag dang yid kyis nyes par spyod pa dang / ldan pa log par lta ba 'phags pa la skur pa 'debs pa/ log pa'i las ni mngon par 'du byed pa/ yang dag par blangs pa'i rgyus rgyu de dang /rkyen des lus zhig ste shi ba'i 'og tu ngan song ngan 'gro log par ltung ba sems can dmyal ba rnams su skye ba dang / lus dang / ngag dang / yid kyis legs par spyod pa dang ldan pa yang dag par lta ba 'phags pa rnams la yid ches pa/ yang dag pa'i lam mngon par 'du byed pa yang dag par blangs pa'i rgyus rgyu de dang /rkyen des lus zhig ste shi ba'i 'og tu bde 'gro mtho ris kyi 'jig rten gyi lha dang mi rnams kyi nang du skye bar 'gyur ba sems can gyi ris de dang de nas shi 'phos nas sems can gyi ris de las gzhan par skye ba gang yin pa'o//'chi 'pho dang skye ba shes pa zhes bya ba ni lha'i mig gi shes pa ste/ lha'i mig ces bya ba ni lha'i gnas pa bsam gtan rnams bsgoms pa'i 'bras bu mig gis bsdus pa'i gzugs dang ba gang yin pa ste/ lha'i mig de lha'i gnas pa de la brten pa dang / de'i 'bras bu dang / des bsdus pas na de'i phyir lha'i mig ces bya'o/ /des na 'chi 'pho ba dang / skye ba'i rab tu dbye ba ji skad bstan pa de dag dang / snang ba dang / cha phra ba dang / gzugs sprul pa dang / lha'i gzugs dang ba yang mthong ste/ der gzugs kyi khyad par thams cad 'dus par blta bar bya'o/ /de la gal te 'og dang steng dang thad kar 'jig rten gyi khams gzhan las brtsams te/mthong ba 'jug par mi byed na ni 'og tu mnar med pa la thug pa yan chad steng du 'og min la thug pa man chad thad kar stong gsum gyi stong chen po'i khams gcig tshun chad kyi gzugs mthong ngo / gal te 'jug par byed na 'og dang steng dang thad kar 'jig rten gyi khams dpag tu med pa grangs med pa dag gi gzugs thams cad mthong ste/de ni lha'i mig ces bya'o/ /lha'i mig gi shes pa zhes bya ba ni mig de la brten pa'i rnam par shes pa dang mtshungs par ldan pa'i shes pa bsgoms pa las byung ba bsgoms pa'i 'bras bu gang yin pa ste/shes pa de ni gzugs de dag mthong ba nyams su myong bar 'gyur bas na de'i phyir lha'i mig gi shes pa zhes bya ste/ de nyid 'chi 'pho ba dang skye ba shes pa zhes bya'o/ /de mngon du bya ba ni snga ma bzhin te/ de dag thams cad gcig tu bsdus pa ni 'chi 'pho dang skye ba shes pa mngon du bya ba'i mngon par shes pa zhes bya'o//de'i las ni phyogs bcu'i sems can rnams kyi lus kyi spyod pa dge ba dang mi dge ba dag gzigs nas ci rigs ci 'os par de dag la nan tan byed pa yin no/ /zag pa zad pa shes pa mngon du bya ba'i mngon par shes pa zhes bya ba la/zag pa zad pa ni gang / zag pa zad pa shes pa mngon du bya ba ni gang zhe na/ zag pa zad pa zhes bya ba ni kun du sbyor ba ma lus par 'jug pa gang yin pa'o/ /zag pa zad pa shes pa zhes bya ba ni 'jig rten pa'i zag pa shes pa dang / mi skye ba shes pas zag pa zad pa de shes pa de gang yin pa ste/zag pa thams cad kyi bag la nyal ba ma lus par spangs pa'i phyir de'i gnyen por gyur pa zag pa med pa'i sems dang zag pa med pa'i shes rab lhag pa'i sems dang / lhag pa'i shes rab mchog gis bsdus pa ni zag pa zad pas zag pa med pa'i sems rnam par grol ba dang /shes rab rnam par grol ba zhes bya ste/ de yang mthong ba'i lam dang / bsgom pa'i lam la brten te thos nas slob pa dang / mi slob pa'i sa de nyid la bdag gis thob bo snyam du zag pa zad pa shes pa 'dis yang dag pa ji lta ba bzhin du shes la des gzhan dag gis de thob pa dang /ma thob pa dang / bdag dang gzhan dag gis de 'thob pa'i thabs dang thabs ma yin pa dang / gzhan dag gis de 'thob pa ni mngon pa'i nga rgyal dang / mngon pa'i nga rgyal med pa yang yang dag pa ji lta ba bzhin du shes pas ni de'i phyir de ni zag pa zad pa zhes bya'o//de mngon du bya ba ni snga ma bzhin te/ de yang byang chub sems dpas ni de mkhyen kyang bdag nyid kyis mngon du mi mdzad de zag pa dang bcas pa'i dngos po zag pa dang lhan cig tu mi spong bar zag pa dang bcas pa'i dngos po de la kun nas nyon mongs pa med pas dpyod de/de ni mthu thams cad kyi nang na ches mthu che ba yin par rig par bya'o/ /de dag thams cad gcig tu bsdus pa ni zag pa zad pa shes pa mngon du bya ba'i mngon par shes pa zhes bya'o/ /de'i las ni bdag nyid kyang kun nas nyon mongs pa can du mi 'gyur la gzhan la ston cing mngon pa'i nga rgyal yang sel bar byed pa yin no//shes pa drug po de dag dang ldan pa'i rnal 'byor pa ni dus la bab na nye bar ston pa'am/ gnas pa'am gzhan dag gi don kun du spyod pa'am/ de la dri ba dris pa'i lan gdab pa mngon par shes par 'gyur bas na de'i phyir mngon par shes pa zhes bya'o//de la mngon par shes pa dang po gsum ni mngon par shes pa kho na yin gyi rig pa ni ma yin no/ /tha ma gsum ni mngon par shes pa yang yin la rig pa yang yin te/ dus gsum la kun du rmongs pa'i gnyen por gyur pa'i phyir ro/ / de la dang pos ni gzhan dag 'dun par byed de bdag la gzhan dag gus pa dang ri mo cher skyed par yang byed do/ /gnyis pas ni gzhan dag gi ngag gi spyod pa dge ba dang mi dge ba shes nas de dag la bskul ba dang rangs par yang byed do/ /gsum pas ni gzhan dag gi sems kyi rgyud dge ba dang mi dge ba kun shes par byas nas legs par 'doms par yang byed do//tha ma gsum gyis ni rtag pa'i mtha' dang chad pa'i mtha' spangs nas zag pa zad pa la mngon pa'i nga rgyal med par dbu ma'i lam legs par ston cing de la 'doms par yang byed de/ de ni mngon par shes pa'i mthu yin no//de la chos kyi mthu gang zhe na/ sbyin pa'i mthu dang / tshul khrims kyi mthu dang / bzod pa'i mthu dang / brtson 'grus kyi mthu dang / bsam gtan gyi mthu dang / shes rab kyi mthu'o/ /chos kyi mthu de dag kyang rnam pa bzhi ste/ mi mthun pa'i phyogs spong ba dang /tshogs yongs su smin par byed pa dang / bdag dang gzhan la phan gdags pa dang / phyi ma la 'bras bu 'byin par byed pa'o/ /de la sbyin pa'i mthu rnam pa bzhi ji lta bu zhe na/ byang chub sems dpa' sbyin pa byin pa na mi mthun pa'i phyogs ser sna spong ba ni mi mthun pa'i phyogs spong ba yin no//de'i sbyin pa de dag nyid kyi byang chub kyi phyogs su gyur pa yang yin la / bsdu ba'i dngos po sbyin pas kyang sems can yongs su smin par byed pa ni tshogs yongs su smin par byed pa yin no/ /sbyin pa'i snga rol du yang yid dga' la sbyin pa'i tshe yang sems dang bar byed cing byin pa'i 'og tu yang 'gyod pa med de/dus gsum du dga' ba'i sems kyis bdag nyid la phan 'dogs pa dang / gzhan dag gi bkres pa dang / skom pa dang / grang ba dang / tsha ba dang / na ba dang / 'dod pas phongs pa dang / 'jigs pa'i sdug bsngal sel bas gzhan la phan 'dogs pa ni bdag dang gzhan la phan 'dogs pa yin no//phyi rol du yang gang dang gang du skyes par phyug pa dang / longs spyod che ba dang / rtsa 'jing che ba dang / g.yog 'khor mang du 'gyur la/ sbyin pa yang mos par 'gyur ba ni phyi ma la 'bras bu 'byin par byed pa yin no//tshul khrims kyi mthu rnam pa ji lta bu zhe na/ byang chub sems dpa'i lus dang ngag gi sdom pa'i tshul khrims yang dag par len pa na/ mi mthun pa'i phyogs 'chal ba'i tshul khrims spong ba ni mi mthun pa'i phyogs spong ba yin no/ /de'i tshul khrims yang dag par blangs pa de bdag nyid kyi byang chub kyi phyogs su gyur pa yang yin la/bsdu ba'i dngos po don mthun pas kyang sems can rnams yongs su smin par byed pa ni tshogs yongs su smin par byed pa yin no/ /'chal ba'i tshul khrims kyi rkyen gyis 'jigs pa dang / kha na ma tho ba dang /'khon du 'dzin pa spong ba ni bde bar gnyid kyis log cing bde bar sad par 'gyur ba dang / 'gyod pa med cing mchog tu dga' ba nas sems ting nge 'dzin du 'gyur ba'i bar gyis bdag nyid la phan 'dogs pa dang / sems can thams cad la yang rnam pa thams cad kyis tho mi 'tshams pas mi 'jigs pa sbyin pas gzhan la phan 'dogs pa ni bdag dang gzhan la phan 'dogs pa yin no//lus zhig nas kyang gzhi des bde 'gro mtho ris kyi 'jig rten gyi lha rnams kyi nang du skye bar 'gyur la/ tshul khrims la yang mos par 'gyur ba ni phyi ma la 'bras bu 'byin par byed pa yin no//bzod pa'i mthu rnam pa bzhi ji lta bu zhe na/ byang chub sems dpa' bzod pa dang ldan pa'i mi mthun pa'i phyogs mi bzod pa spong ba ni mi mthun pa'i phyogs spong ba yin no/ /de'i bzod pa de bdag nyid kyi byang chub kyi phyogs su gyur pa yin la/bsdu ba'i dngos po don mthun pas kyang sems can rnams yongs su smin par byed pa ni tshogs yongs su smin par byed pa yin no/ /bdag nyid 'jigs pa chen po las skyob pas bdag nyid la phan 'dogs pa dang gzhan dag kyang 'jigs pa chen po las skyob pas gzhan la phan 'dogs pa ni bdag dang gzhan la phan 'dogs pa yin no//gzhi des phyi ma la 'khon pa mang bar mi 'gyur zhing 'byed pa mi mang la/ sdug bsngal ba dang yid mi bde ba mang bar mi 'gyur te/ 'gyod pa med par 'chi ba'i dus byed par 'gyur la/lus zhig nas kyang bde 'gro mtho ris kyi 'jig rten du lha rnams kyi nang du skye bar 'gyur la/ bzod pa la yang mos par 'gyur ba ni phyi ma la 'bras bu 'byin par byed pa yin no/ /brtson 'grus kyi mthu rnam pa bzhi ji lta bu zhe na/ byang chub sems dpa' brtson 'grus brtsams te rnam pa mi mthun pa'i phyogs le lo spong ba ni mi mthun pa'i phyogs spong ba yin no//de'i brtson 'grus de bdag nyid kyi byang chub kyi phyogs su gyur pa yang yin la/ bsdu ba'i dngos po don mthun pas kyang sems can rnams yongs su smin par byed pa ni tshogs yongs su smin par byed pa yin no//brtson 'grus brtsams pas sdig pa mi dge ba'i chos rnams dang ma 'dres par bde ba la reg par gnas pa sngon las gong du khyad par du gyur pa mthong nas dga' zhing mchog tu dga' bas bdag nyid la phan 'dogs pa dang / dge ba'i phyogs la brtson pas gzhan la lus dang ngag gis rnam par mi 'tshe ba dang /gzhan dag kyang brtson 'grus rtsom pa la 'dun pa skyed pas gzhan la phan 'dogs pa ni/ bdag dang gzhan la phan 'dogs pa yin no/ /phyi ma la yang rgyu stobs dang ldan pa skyes bu'i rtsal mngon par dga' bar 'gyur ba ni phyi ma la 'bras bu 'byin par byed pa yin no//bsam gtan gyi mthu rnam pa bzhi ji lta bu zhe na byang chub sems dpa' bsam gtan la snyoms par 'jug pa na/ mi mthun pa'i phyogs tshig gi rtog pa dang / dga' ba dang / bde ba dang / gzugs kyi 'du shes la sogs pa spong ba ni mi mthun pa'i phyogs spong ba yin no//de'i bsam gtan de dag nyid kyi byang chub kyi tshogs su gyur pa yang yin la/ bsdu ba'i dngos po don mthun pas kyang sems can rnams yongs su smin par byed pa ni tshogs yongs su smin par byed pa yin no/ /tshe 'di nyid la bde bar gnas pas bdag nyid la phan 'dogs pa dang /zhi zhing rab tu zhi la 'dod chags dang bral bas sems can rnams kyi nang na gnod pa med cing rnam par mi 'khrugs pas gzhan la phan 'dogs pa ni bdag dang gzhan la phan 'dogs pa yin no/ /bsam gtan gyi 'bras bu phyi ma la ye shes rnam par dag pa dang /mngon par shes pa mngon par bsgrub pa dang / rnam par dag pa'i lhar skye bar 'gyur ba ni phyi ma la 'bras bu 'byin par byed pa yin no/ /shes rab kyi mthu rnam pa bzhi ji lta bu zhe na/ byang chub sems dpa' shes rab dang ldan pa mi mthun pa'i phyogs ma rig pa spong ba ni mi mthun pa'i phyogs spong ba yin no//de'i shes rab de bdag nyid kyi byang chub kyi tshogs su gyur pa yang yin la/ bsdu ba'i dngos po sbyin pa dang snyan par smra ba dang don mthun pa dang / don spyod pas kyang sems can rnams yongs su smin par byed pa ni tshogs yongs su smin pa yin no//shes bya'i dngos po'i don ji lta ba bzhin du so sor rtogs pa dang ldan pa'i dga' ba dang mchog tu dga' ba rgya chen pos bdag nyid la phan 'dogs pa dang / thams cad du rigs par lung 'bogs pas tshe 'di dang tshe phyi ma la phan pa dang /bde bas sems can rnams la phan 'dogs pa ni bdag dang gzhan la phan 'dogs pa yin no/ /phyi ma la des dge ba'i rtsa ba thams cad yang dag par sdud par byed pa dang / sgrib pa gnyis dang bral ba mngon du byed par 'gyur ba ni phyi ma la 'bras bu 'byin par byed pa yin te/chos thams cad ni pha rol tu phyin pa drug tu 'dus la/ pha rol tu phyin pa drug gi mthu ni rnam pa bzhi po de dag tu 'dus pas de ni chos kyi mthu yin no/ /de la lhan cig skyes pa'i mthu gang zhe na/ rang bzhin gyis tshe rabs dran pa dang / sems can rnams kyi don gyi phyir so sor brtags nas sdug bsngal yun ring po rnam pa sna tshogs mi bzad pa rgyun mi 'chad pas mi mdzes pa dang /sems can rnams kyi don kho na'i phyir sems can gyi don sgrub pa'i sdug bsngal bas dga' ba dang / dga' ldan du skyes nas tshe'i tshad ji srid par dga' ldan na gnas pa dang /dga' ldan du skyes pa'i lha'i bu gzhan dag gnas gsum po lha'i tshe dang / lha'i kha dog dang / lha'i grags pa zil gyis gnon pa dang / dga' ldan nas 'bab pa la sogs pa nas rdo rje'i gdan la mngon par rdzogs par 'tshang rgya ba dang /chos kyi 'khor lo bskor ba dang / yongs su mya ngan las 'da' ba'i bar gyi mthu chen po ngo mtshar rmad du byung ba dag ni mngon par shes pas mngon par 'du byas pa ma yin gyi/ rang bzhin gyi mthu yin pas na de'i phyir de dag ni lhan cig skyes pa'i mthu zhes bya'o//de la thun mong gi mthu ni gang thun mong ma yin pa'i mthu ni gang zhe na/ nyan thos dang / rang sangs rgyas rnams dang thun mong ma yin pa'i mthu ni rnam pa gsum ste/ cha phra ba dang / rnam pa dang / khams so/ /de la cha phra ba zhes bya ba ni de bzhin gshegs pa'am byang chub sems dpa' ni mthu'i thabs dpag tu med pa grangs med pas ji ltar sems can dpag tu med grangs med pa rnams kyi don mdzad pa de yang dag pa ji lta ba bzhin du rab tu mkhyen pa gang yin pa'o//rnam pa zhes bya ba ni mngon par shes pa'i mthu dang / chos kyi mthu dang lhan cig skyes pa'i mthu rnam pa thams cad dang ldan pa gang yin pa'o//khams zhes bya ba ni 'jig rten pa'i khams thams cad dang / sems can gyi khams thams cad de'i mthu'i yul du gyur pa gang yin pa ste de ni thun mong ma yin pa'i mthu zhes bya'o/ /thun mong gi mthu ni rnam pa de dag ma gtogs pa sangs rgyas dang byang chub sems dpa'i mthu de las gzhan pa thams cad ni nyan thos dang rang sangs rgyas dang thun mong ma yin pa'am yang na de'i phyir de ni thun mong gi mthu zhes bya'o//byang chub sems dpa' rnams kyi mthu rnam pa lnga po de dag ni re re zhing yang rgyu lngas bsam gyis mi khyab par rig par bya ste/rtog ge thams cad las yang dag par 'das pa nyid kyi phyir dang / 'jig rten dpe dmigs su med pa nyid kyi phyir dang / mthu de sems shin tu sbyang ba byas pa kho na dang 'brel pa nyid kyi phyir dang / mnyam par ma bzhag pa'i sa pa'i sems dang gcig tu cha mi mthun pa nyid kyi phyir dang /de mnyam par bzhag pa'i sems dang 'brel pa nyid yin pa'i phyir te/ de dag ni byang chub sems dpa'i mthu chen po zhes bya'o/ /byams pa byang chub sems dpa' gnas drug la mkhas pa ni byang chub sems dpa'i mthu chen po mngon par sgrub pa yin te/sems kyi skye ba la mkhas pa dang / gnas pa la mkhas pa dang / bslang ba la mkhas pa dang / 'phel ba la mkhas pa dang / 'grib pa la mkhas pa dang / thabs la mkhas pa'o zhes bya ba ni byang chub sems dpa' rnams kyi mthu de dag ni rtog ge thams cad las yang dag par 'das pa la sogs pa'i rgyu lnga po ji skad sngar bstan pa de dag gis bsam gyis mi khyab pa yin pas de dag mngon par bsgrub pa ni sems kyi skye ba la mkhas pa la sogs pa la rag las pa yin no zhes ston to//brtan pa dang snod rnam par rig pa mi rig pa'i sems kyi skye ba ni 'di lta ste/len pa'i rnam par shes pa'i skye ba'o zhes bya ba ni len pa'i rnam par shes pa ni rten rnam par rig pa mi rig pa dang / snod rnam par rig pa mi rig pa yin pas de ni skye ba la mkhas pa ni/ byang chub sems dpa'i mthu chen po mngon par sgrub pa yin no zhes bya bar sbyar ro//de la brtan pa zhes bya ba ni len pa'i rnam par shes pa nyid yin te/ kun nas nyon mongs pa dang rnam par byang ba'i chos rnams kyi bag chags kyi gnas yin pa'i phyir ro/ /snod ces bya ba ni snod kyi 'jig rten no/ /rnam par rig pa zhes bya ba ni kun gzhi'i ngo bo nyid du rang rig pa'i tshul du rnam par rig pa'o//mi rig pa zhes bya ba ni rnam pa dang dmigs pa yongs su ma chad pa'i phyir ro/ /de'i skye ba la mkhas pa ni kun gzhi'i rnam par shes pa'i sgrib pa dang gnas ngan len thams cad rnam par bsal ba'i phyir byang chub sems dpa'i mthu chen po mngon par sgrub pa yin no//dmigs pa rnam pa sna tshogs rnam par rig pa'i sems kyi skye ba ni 'di lta ste/ rnam par rtog pa'i yid kyi rnam par shes pa'i skye ba'o zhes bya ba ni yid kyi rnam par shes pa ni dmigs pa rnam pa sna tshogs rnam par rig pa yin pas de'i skye ba la mkhas pa ni/ byang chub sems dpa'i mthu mngon par sgrub pa yin no zhes bya bar sbyar ro/ /de la dmigs pa rnam pa sna tshogs rnam par rig pa zhes bya ba ni gzugs la sogs pa yul cig car 'dzin pa'i phyir ro/ /rnam par rtog pa zhes bya ba ni nges par rtog pa dang / rjes su dran par nus pa'i phyir ro//yid kyi rnam par shes pa zhes bya ba la ma na zhes bya ba ni zhes pa ste/ 'jug pa'i rnam par shes pa rnams so/ /de dag rnam par rig par byed pa ni ma na bi dz+nyA na ste / shes pa rnam par shes pa zhes bya'o/ /de'i 'jug pa ni thun mong dang thun mong ma yin pa gnyis yod de/ thun mong ba ni phyi rol dang nang gi yul cig car 'dzin pa zhes bya bas bstan te/ phyi rol gyi yul ni gzugs la sogs pa'o/ /nang gi yul ni dbang po dang sems dang sems las byung ba dag go/ /cig car 'dzin pa ni phyi nang gi yul nas skyes pa'i tshor ba cig car myong bar byed pa'i phyir ro//thun mong ma yin pa ni skad cig dang / thang cig dang / yud tsam cig la zhes bya ba la sogs pas bstan to/ /cig car ting nge 'dzin mang po la snyoms par 'jug pa zhes bya ba ni ting nge 'dzin mang po dag gi bya ba gang yin pa de ni gcig pu bya'o snyam nas ting nge 'dzin mang po la snyoms par 'jug pa'o//sangs rgyas kyi zhing mang po mthong ba/ de bzhin gshegs pa mang po mthong ba zhes bya ba la mthong ba ni mig gi rnam par shes pa'i yul yin na/ yid kyi rnam par shes pas mthong bar ji ltar rung zhe na/ yid kyi rnam par shes pa nye bar gnas pa las byung ba ni 'jug pa'i rnam par shes pa thams cad dang /gnas dang dmigs pa mthun par 'jug pa des mthong ba la 'gal ba med de/ dper na sems pa las lus dang ngag gi las bzhin no/ /dmigs pa'i mtshan ma chung ngu rnam par rig pa'i sems kyi skye ba ni 'di lta ste/ 'dod pa dang ldan pa'i sems kyi skye ba zhes bya ba ni khams chung ba dang /mnyam par ma bzhag pa'i sa pa yin pa'i phyir ro/ /dmigs pa'i mtshan ma chen por gyur pa rnam par rig pa'i sems kyi skye ba ni 'di lta ste/ gzugs dang ldan pa'i sems skye ba'o zhes bya ba ni khams che ba dang /mnyam par ma bzhag pa'i sa pa yin pa'i phyir ro/ /dmigs pa'i mtshan ma tshad med pa rnam par rig pa'i sems kyi skye ba ni 'di lta ste/ nam mkha' dang / rnam shes mtha' yas skye mched dang ldan pa'i sems kyi skye ba'o zhes bya ba ni mtha' yas so snyam pa'i 'du shes tshad med pa'i sa pa yin pa'i phyir ro//dmigs pa'i mtshan ma phra mo rnam par rig pa'i sems kyi skye ba ni 'di lta ste/ ci yang med pa'i skye mched dang ldan pa'i sems kyi skye ba'o zhes bya ba ni 'jig tshogs la lta ba dang ldan pa'i 'du shes ci yang med do snyam pa'i phra ba'i sa pa yin pa'i phyir ro/ /dmigs pa'i mtshan ma mthar thug pa rnam par rig pa'i sems kyi skye ba ni 'di lta ste/'du shes med min skye mched dang ldan pa'i sems kyi skye ba'o zhes bya ba ni khams dang sa dang 'jig rten pa'i lam gyi mthar thug pa yin pa'i phyir ro/ /mtshan ma med pa rnam par rig pa'i sems kyi skye ba ni 'di lta ste/'jig rten las 'das pa dang / 'gog pa la dmigs pa'i sems kyi skye ba'o zhes bya ba ni 'jig rten las 'das pa rnam par mi rtog pa dang / 'gog pa'i snyoms par 'jug pa la dmigs pa mtshan ma med pa'i phyir ro/ /sdug bsngal dang ldan pa'i sems kyi skye ba ni 'di lta ste/ sems can dmyal ba pa'i sems skye ba'o zhes bya ba ni de dag gi kun gzhi'i rnam par shes pa'i tshor ba btang snyoms kyang glo bur gyi sdug bsngal gyi tshor ba zil gyis mnan pa'i phyir ro/ /tshor ba 'dren ma dang ldan pa'i sems kyi skye ba ni 'di lta ste/ 'dod pa na spyod pa'i sems kyi skye ba'o zhes bya ba ni las kyi rnam par smin pa 'dren ma dang ldan pa'i phyir ro//dga' ba dang ldan pa'i sems kyi skye ba ni 'di lta ste/ bsam gtan dang po dang gnyis pa'i sems kyi skye ba'o zhes bya ba ni dben pa las skyes pa'i dga' ba dang / ting nge 'dzin las skyes pa'i dga' ba dang ldan pa'i phyir ro//bde ba dang ldan pa'i sems kyi skye ba ni 'di lta ste/ bsam gtan gsum pa'i sems kyi skye ba'o zhes bya ba ni nang yongs su dang ba las skyes pa'i bde ba dang ldan pa'i phyir ro/ /sdug bsngal yang ma yin bde ba yang ma yin pa'i sems kyi skye ba ni 'di lta ste/ bsam gtan bzhi pa dang /'du shes med 'du shes med min skye mched pa'i bar gyi sems kyi skye ba'o zhes bya ba ni skyon brgyad pa'o/ /rtog pa dang / dpyod pa dang / dbugs rngub pa dang / dbugs dbyung ba dang / bde ba dang sdug bsngal ba dang / yid bde ba dang yid mi bde ba dang bral ba'i phyir ro/ / nyon mongs pa can dang ldan pa'i sems kyi skye ba ni 'di lta ste/ nyon mongs pa dang nye ba'i nyon mongs pa dang ldan pa'i sems kyi skye ba'o zhes bya ba ni nyon mongs pa can gyi yid kyi sems yod pa'i gnas skabs thams cad kyi'o/ /dge ba dang ldan pa'i sems skye ba ni 'di lta ste/ dad pa la sogs pa dang ldan pa'i sems kyi skye ba'o zhes bya ba ni sems yod pa'i gnas skabs thams cad na dge ba bcu gcig gam/dbang po lnga dang ldan pa'o / /lung du ma bstan pa dang ldan pa'i sems kyi skye ba ni 'di lta ste/ de gnyi ga dang mi ldan pa'i sems kyi skye ba'o zhes bya ba ni sems yod pa'i gnas skabs snga ma gnyis ma gtogs pa rnam par smin pa las skye ba dang /spyod lam las byung ba dang / bzo'i gnas las byung ba dang / sprul pa byed pa'i sems kyi skye ba'o/ /sems kyi skye ba zhes bya ba ni sems kyi 'jug pa dang sems ldog pa ste/ de dag ni sems kyi skye ba rnam pa bcu drug yin no//ji ltar na gnas pa la mkhas pa yin zhe na/ gal te rnam par rig pa'i de bzhin nyid yang dag pa ji lta ba bzhin du rab tu shes pa'o zhes bya ba ni sems kyi gnas pa ni gnyis pa'i ngo bo nyid yin pas/ rnam par rig pa'i de bzhin nyid 'du byed rnams rnam par rig pa tsam nyid du shes pa ni de la mkhas pa yin par ston to//ji ltar na bslang ba la mkhas pa yin zhe na zhes bya ba la sogs pas ni sems kyi bslang bar ni gzhan gyi dbang dang / kun brtags pa'i 'ching ba las rnam par grol zhing yongs su grub pa'i de bzhin nyid du gnas par gyur pa yin pas/ de ltar shes pa ni de la mkhas pa yin par ston to//mtshan ma'i 'ching ba zhes bya ba ni gzhan gyi dbang gi mtshan ma'o/ /gnas ngan len gyi 'ching ba zhes bya ba ni kun brtags pa'i bag chags so/ /yang dag pa ji lta ba bzhin du rab tu shes te zhes bya ba ni gzhan gyi dbang gi kun nas nyon mongs pa'i mtshan nyid du shes la/kun brtags pa ni mtshan nyid med par shes pa'o/ /de las sems 'di bslang bar bya'o zhes bya ba la mkhas pa yin no zhes bya ba ni 'ching ba de gnyis de ltar shes nas de las rnam par grol bar bya zhing yongs su grub pa'i de bzhin du gnas gyur par bya ba la mkhas pa ste/de tsam gyis na sems kyi bslang ba la mkhas pa yin no zhes bya ba'i tha tshig go /ji ltar na 'phel ba la mkhas pa yin zhe na zhes bya ba la sogs pas ni sems kyi 'phel ba ni gnas gyur pa'i ngo bo nyid yin pas de zung du 'brel pa'i lam gyi sa skye ba dang 'phel ba shes pa ni de la mkhas pa yin par ston to//gnyen po'i sems gang yin pa ste zhes bya ba ni yongs su grub pa'i de bzhin du gnas gyur pa'i sems so/ /skye ba dang 'phel ba zhes bya ba ni zung du 'brel pa'i lam gyi rang gi mtshan nyid skye ba dang rgyun 'phel ba'o/ /ji ltar na 'grib pa la mkhas pa yin zhe na zhes bya ba la sogs pas ni sems kyi mtshan ma dang gnas ngan len gyi nyon mongs pa can du gyur pa'i sems pa yin pas de zung du 'brel pa'i lam gyis 'grib pa dang 'bri bar shes pa ni de la mkhas pa yin par ston to//de dang mi mthun pa'i phyogs su gyur pa zhes bya ba ni 'phel ba de dang ngo / /'grib cing 'bri ba zhes bya ba ni zung du 'brel pa'i lam gyi rang gi mtshan nyid 'grib pa dang rgyun 'bri ba'o//ji ltar na thabs la mkhas pa yin zhe na zhes bya ba la sogs pas ni sngar zhus pa'i lan gyi mjug bsdu ba bstan te/ des ni bshad pas bsgom pa la 'dun pa drag po med pa rnam par gzhig cing chud mi za bar bya ba'i phyir gdags pa gtan la dbab pa bstan to// // de'i 'og tu byang chub sems dpa' phung po'i lhag ma med pa'i mya ngan las 'das pa'i dbyings su tshol ba thams cad 'gog pa shes pa bsgom pa la 'dun pa drag po med pa rnam par gzhig cing chud mi za bar bya ba'i phyir gdags pa gtan la dbab pa bstan pa'i phyir/bcom ldan 'das bcom ldan 'das kyis phung po'i lhag ma med pa'i mya ngan las 'das pa'i dbyings su tshor ba thams cad ma lus par 'gag go zhes gang gsungs pa la zhes bya ba la sogs pa zhus so/ /bcom ldan 'das gang 'gag pa'i tshor ba de dag gang lags zhes bya ba ni phung po'i lhag ma dang bcas pa'i mya ngan las 'das pa'i gnas skabs na yod pa'i tshor ba dang /phung po'i lhag ma med pa'i mya ngan las 'das pa'i gnas skabs su 'gag pa'o/ /gnas kyi gnas ngan len rig pa zhes bya ba la gnas zhes bya ba ni gnas ma gyur pa'i gnas skabs na ni kun gzhi'i rnam par shes pa nyid yin te/sems dang sems las byung ba'i chos rnams dang / bag chags thams cad kyi gnas yin pa'i phyir ro/ /skabs 'dir ni gnas gyur pa phung po'i lhag ma dang bcas pa'i mya ngan las 'das pa'i gnas skabs yin pas kun gzhi'i rnam par shes pa gnas gyur pa rnam par mi rtog pa'i ye shes nyid la gnas zhes bya ste/mnyam pa nyid kyi ye shes la sogs pa dang / stobs bcu la sogs pa'i shes pa thams cad kyi gnas yin pa'i phyir ro/ /gnas ngan len zhes bya ba ni gnas gyur pa'i gnas skabs na ni kun gzhi'i rnam par shes pa nyon mongs pa'i bag chags gnas ngan len dang bcas pa la bya ste/lus dang sems las su mi rung ba dang / gnas ngan len par byed pa'i phyir ro/ /skabs 'dir ni gnas gyur pa phung po'i lhag ma dang bcas pa'i mya ngan las 'das pa'i gnas skabs yin pas phung po'i lhag ma tsam yod pa la gnas ngan len ces bya ste/tshor ba'i gzhi yin pa'i phyir ro/ /rig pa zhes bya ba ni tshor ba ste gnas ma gyur pa'i gnas skabs na ni kun gzhi'i rnam par shes pa'i tshor ba sdug bsngal yang ma yin/ bde ba yang ma yin pa dang / de la glo bur gyi tshor ba blo bde ba dang /sdug bsngal ba dang / gnyis ka ma yin pa dag rig pa'o/ /skabs 'dir ni gnas gyur pa'i phung po'i lhag ma dang bcas pa'i mya ngan las 'das pa'i gnas skabs yin pas gnas gyur pa'i tshor ba btang snyoms la bya ste/ de yang phung po'i lhag ma med pa'i mya ngan las 'das pa'i dbyings su 'gag go zhes bya bar sbyar ro//de'i dbyings su yul ring pa zhes bya ba la de'i zhes bya ba ni gnas kyi gnas ngan len rig pa de'i 'o/ /'bras bu zhes bya ba ni de'i ngo bo nyid lam logs shig tu na yul gzhan med mod kyi/ rnam pa lta bur snang bas 'bras bu zhes bya'o//yul rig pa zhes bya ba ni spyod yul du snang bar rig pa'i tshor ba'o/ /de yang gnas ma gyur pa'i gnas skabs na ni kun gzhi'i rnam par shes pa nyon mongs pa'i bag chags gnas ngan len dang bcas pa de'i 'bras bu lus dang longs spyod gnas kyi rnam par snang ba'i spyod yul ma dag pa rnam par rig pa'i tshor ba yin no//skabs 'dir ni gnas gyur pa'i phung po'i lhag ma dang bcas pa'i mya ngan las 'das pa'i gnas skabs yin pas/ sangs rgyas kyi zhing yongs su dag pa dbang sgyur ba'i rnam par rig pa shin tu rnam par dag pa'i mtshan nyid rig pa ste/de yang phung po'i lhag ma med pa'i mya ngan las 'das pa'i dbyings su 'gag go zhes bya bar sbyar ro/ /gnas kyi gnas ngan len rig pa de'i rab tu dbye ba bstan pa'i phyir de la gnas kyi gnas ngan len rig pa de ni rnam pa bzhir rig par bya ste zhes bya ba gsungs te/de ni gnas ma gyur pa so so'i skye bo dang / slob pa rnams la yang rang rang gi sbyor ba ji lta ba bzhin du yod mod kyi/ skabs 'dir ni gnas gyur pa phung po'i lhag ma dang bcas pa'i mya ngan las 'das pa'i dbyings na yod pa dang sbyar te/ nyan thos dang rang sangs rgyas dang bag chags dang bcas pa yin pas 'dir ni de bzhin gshegs pa nyid dang sbyar ro//gzugs kyi gnas ngan len rig pa zhes bya ba ni gnas ma gyur pa'i gnas skabs na ni 'dod pa dang gzugs kyi khams su gtogs pa'i phung po gzugs kyi gnas kun gzhi'i rnam par shes pa gzugs kyi bag chags dang bcas pa'i rig pa'i tshor ba yin no//skabs 'dir ni gnas gyur pa phung po'i lhag ma dang bcas pa'i mya ngan las 'das pa'i gnas skabs yin pas gzugs kyi phung po'i gnas kun gzhi'i rnam par shes pa gzugs kyi bag chags dang bcas pa gnas gyur pa'i phyir zhing sku dang mtshan dang dpe byad dang gsung dbyangs mtha' yas pa dang /spyi gtsug bltar mi snang ba la sogs pa gzugs kyi phung po gnas gyur pa'i tshor ba btang snyoms rig pa la bya'o/ /gzugs med pa'i gnas ngan len rig pa zhes bya ba ni gnas ma gyur pa'i gnas skabs na ni khams gsum du gtogs pa'i phung po gzugs can ma yin pa'i gzhi'i gnas kun gzhi rnam par shes pa phung po gzugs can ma yin pa'i bag chags dang bcas pa rig pa'i tshor ba yin no//skabs 'dir ni gnas gyur pa phung po'i lhag ma dang bcas pa'i mya ngan las 'das pa'i gnas skabs yin pas tshor ba'i phung po gnas kun gzhi'i rnam par shes pa tshor ba'i bag chags dang bcas pa gnas gyur pa'i phyir bde ba dang kha na ma tho ba med pa tshad med pa rgya chen po la gnas pa la sogs pa tshor ba'i phung po'i gnas gyur pa'i tshor ba btang snyoms rig pa dang /'du shes kyi phung po'i gnas kun gzhi'i rnam par shes pa 'du shes pa 'du shes kyi bag chags dang bcas pa gnas gyur pa'i phyir ming gi tshogs dang / tshig gi tshogs dang yi ge'i tshogs thams cad kyis ston pa la dbang 'byor pa la sogs pa 'du shes kyi phung po'i gnas gyur pa'i tshor ba btang snyoms rig pa dang /'du byed kyi phung po'i gnas kun gzhi'i rnam par shes pa 'du byed kyi bag chags dang bcas pa gnas gyur pa'i phyir yongs su bsgyur ba dang / sprul pa dang / 'khor bsdu ba dang /dkar po'i chos can dgug pa la sogs pa 'du byed kyi phung po gnas gyur pa'i tshor ba btang snyoms rig pa dang / rnam par shes pa'i phung po'i gnas kun gzhi rnam par shes pa rnam par shes pa'i bag chags dang bcas pa gnas gyur pa'i phyir me long lta bu dang / mnyam pa nyid dang /so sor rtog pa dang / bya ba sgrub pa'i ye shes la sogs pa rnam par shes pa'i phung po gnas gyur pa'i tshor ba btang snyoms rig par bya'o/ /'bras bu grub pa'i gnas ngan len rig pa zhes bya ba ni gzugs kyi gnas rig pa dang / gzugs med pa'i gnas rig pa de dag nyid dang da ltar phung po'i rgyud nyid la nyams su myong ba ste/de'i phyir da ltar gyi gang yin pa'o zhes gsungs so/ /de yang gnas ma gyur pa'i gnas skabs na ni gnas ma gyur pa'i gnas skabs kyi gzugs kyi gnas rig pa dang / gzugs med pa'i gnas rig pa de dag nyid da ltar na bag chags dang bcas pa'i phung po'i rgyud nyid nyams su myong ba ste/de ni zag pa dang bcas pa yin pas gnas ngan len rig pa zhes bya'o/ /skabs 'dir ni gnas gyur pa'i phung po lhag ma dang bcas pa'i mya ngan las 'das pa'i gnas yin pas gnas gyur pa'i gnas skabs kyi gzugs kyi gnas rig pa dang /gzugs med pa'i gnas rig pa'i de dag nyid da ltar phung po lhag ma dang bcas pa'i mya ngan las 'das pa'i rgyud nyid la nyams su myong ba ste/ de ni phung po lhag ma tshad yod pa yin pas gnas ngan len rig pa zhes bya'o//'bras bu ma grub pa'i gnas ngan len rig pa zhes bya ba ni gzugs kyi gnas rig pa dang / gzugs med pa'i gnas rig pa de dag nyid dang da ltar phung po'i rgyud nyid la nyams su myong ba ma yin gyi/ phyis nyams su myong ba'i rgyud da ltar gyi sa bon gyi tshul du phung po'i rgyud la yod pa ste/de'i phyir ma 'ongs pa'i rgyur gyur pa gang yin pa'o zhes gsungs so/ /de yang gnas ma gyur pa'i gnas skabs na 'ching ba mtha' dag yod pa so so'i skye bo rnams la ni nyon mongs pa can gyi ma rig pa'i 'dus te reg pa las byung ba'i gzugs kyi gnas rig pa dang /gzugs med pa'i gnas rig pa dag phyis nyams su myong bar 'gyur ba'i rgyu ni da ltar sa bon gyi tshul du phung po'i rgyud la yod pa rkyen nye bar ma gyur pas da dung nyams su ma myong ba la bya'o/ /'ching ba ma tshang ba slob pa rnams la ni nyon mongs pa can dang / nyon mongs pa ma yin pa'i ma rig pa'i 'dus te reg pa las byung ba'i gzugs kyi gnas rig pa dang gzugs med pa'i gnas rig pa dag phyis nyams su myong bar 'gyur ba'i rgyu ni da ltar sa bon gyi tshul du phung po'i rgyud la yod la rkyen nye bar ma gyur pas da dung nyams su ma myong ba la yang bya'o//slob par gyur pa ni phyis gnas gyur cing mi slob par gyur pa'i dus na gnas gyur pa'i gnas skabs kyi gzugs kyi gnas rig pa dang / gzugs med pa'i gnas rig pa myong bar 'gyur ba'i rgyu rig pa'i 'dus te reg pa las byung ba'i tshor ba dang da ltar slob pa nyid kyi rgyud la yod pa la yang 'bras bu ma grub pa ma 'ongs pa'i rgyur gyur pa zhes bya'o//gnas gyur pa'i gnas skabs na mi slob pa'i rgyud la gnas gyur pas rab tu dbye ba'i gzugs kyi gnas rig pa dang / gzugs med pa'i gnas rig pa de dag nyid la 'bras bur grub zin te/ phyis 'bras bu gzhan thob par 'gyur ba med kyang 'bras bur grub pa de nyid kyi rgyun phyi ma nyams su myong bar 'gyur ba'i rkyen ni nye bar ma gyur pa rgyu ni gnas gyur pa phung po'i lhag ma dang bcas pa'i mya ngan las 'das pa'i rgyud de la yod pa la yang 'bras bu ma grub pa ma 'ongs pa'i rgyur gyur pa zhes bya ste/skabs 'dir ni so so'i skye bo dang / slob pa'i rnam grangs snga ma shos dang mi sbyar gyi/ slob pa'i rnam grangs phyi ma shos dang mi slob pa'i rgyud la yod pa dang sbyar ro/ /de'i 'bras bu yul rig pa'i rab tu dbye ba bstan pa'i phyir yul rig pa yang rnam pa bzhir rig par bya ste zhes bya ba gsungs te/de dag nyid kun gzhi rnam par shes pa'i ngo bo nyid yin mod kyi/ yul gyi rnam pa lta bur snang bas 'bras bu zhes bya'o/ /gnas rig pa zhes bya ba ni snod kyi 'jig rten rig pa ste/ de yang gnas gyur pa'i gnas skabs na ni gnas kyi rnam par snang ba snod kyi 'jig rten ma dag pa rnam par rig pa yin no//skabs 'dir ni gnas gyur pa phung po'i lhag ma dang bcas pa'i mya ngan las 'das pa'i gnas skabs yin pas sangs rgyas kyi zhing yongs su dag pa de bzhin gshegs pa'i gnas gzhal med khang chen po kha dog phun sum tshogs pa dang / dbyibs phun sum tshogs pa la sogs par sngar gyi gleng gzhi'i skabs su bstan pa lta bu rnam par rig pa la bya'o/ /yo byad rig pa zhes bya ba ni gnas de nyid las lus kyi yo byad 'byung ba dag rig pa ste/ de yang gnas ma gyur pa'i gnas skabs na ni lus kyi yo byad bcu sngar bstan pa lta bu dag rig pa yin no//skabs 'dir ni gnas gyur pa phung po'i lhag ma dang bcas pa'i mya ngan las 'das pa'i gnas skabs yin pas 'jig rten las 'das pa'i yo byad phun sum tshogs pa dag rnam par rig pa la bya'o/ /longs spyod rig pa zhes bya ba ni gnas dang yo byad de dag las longs spyod pa sna tshogs kyi rnam par rig pa ste/de yang gnas ma gyur pa'i gnas skabs na ni lus kyi yo byad la longs spyod pa rig pa yin no/ /skabs 'dir ni gnas gyur pa phung po'i lhag ma dang bcas pa'i mya ngan las 'das pa'i gnas skabs yin pas longs spyod rdzogs pa'i sku dang /sprul pa'i sku dang / bdag dang gzhan dag theg pa chen po'i chos kyi longs spyod pa myong bar mdzad par rig pa la bya'o/ /ltos pa'i rig pa zhes bya ba ni gnas dang yo byad dang longs spyod rig pa de dag rgyu gang la ltos pa'i rgyu'i rgyu mtshan yongs su ma rdugs par yod par rig pa ste/de yang gnas ma gyur pa'i gnas skabs na ni gnas dang yo byad dang longs spyod rig pa'i rgyu sngon dge ba dang mi dge ba la sogs pa'i las byas shing bsags pa dag gi rgyun da ltar 'bras bu myong ba'i gnas skabs na yang yongs su ma rdugs par yod pa ni rig pa yin no//skabs 'dir ni gnas gyur pa phung po'i lhag ma dang bcas pa'i mya ngan las 'das pa'i gnas skabs yin pas da lta gnas dang / yo byad dang longs spyod rig pa'i rgyu sngon sbyin pa la sogs pa bsod nams dang ye shes kyi tshogs rgya chen po bsags pa dag gi rgyun da ltar 'bras bu nyams su myong ba'i gnas skabs na yang yongs su ma rdugs par yod par rig pa yin te/ltos pa zhes bya ba ni rgyu'i don yin no/ /de ltar gnas ngan len rig pa dang de'i 'bras bu yul rig pa de ni gnas ma gyur pa so so'i skye bo dang slob pa rnams la yang rang rang gi sbyor ba ji lta ba bzhin du yod kyi/skabs 'dir ni gnas gyur pa phung po'i lhag ma dang bcas pa'i mya ngan las 'das pa'i dbyings na yod pa dang sbyar ba bstan pa'i phyir/ de yang phung po'i lhag ma dang bcas pa'i mya ngan las 'das pa'i dbyings na'o zhes bya ba gsungs te/de yang zhes bya ba ni gnas kyi gnas ngan len gyi rig pa rnam pa bzhi dang / de'i 'bras bu yul rig pa rnam pa bzhi'o/ /phung po'i lhag ma dang bcas pa'i mya ngan las 'das pa'i dbyings na'o zhes bya ba ni de na tshor ba de dag yod do zhes bya ba'i tha tshig go /nyan thos dang rang sangs rgyas la yang de dag yod mod kyi/de ni bag chags dang bcas pa'i mya ngan las 'das pa yin pas skabs 'dir ni de bzhin gshegs pa nyid kyi phung po'i lhag ma dang bcas pa'i mya ngan las 'das pa dang sbyar ro/ /'bras bu ma grub pa zhes bya ba la sogs pa ni slob par gyur pa phyis gnas gyur cing mi slob par gyur pa'i dus na gnas gyur pa'i gnas skabs kyi gzugs kyi gnas rig pa dang /gzugs med pa'i gnas rig pa myong bar 'gyur ba'i rgyu rig pa'i 'dus te reg pa las byung ba'i tshor ba da lta slob pa nyid kyi rgyud la yod pa myong ba'i slob pa rnams kyis ni tshor ba 'dren mar myong ba ston to//rig pa'i 'dus te reg pa las byung ba'i tshor ba myong ba zhes bya ba ni slob pa rnams te/ de dag la yang ma rig pa'i 'dus te reg pa las byung ba'i tshor ba yod mod kyi/ de ni phyis gnas gyur cing mi slob par gyur pa'i dus na gnas gyur pa'i gnas skabs kyi gzugs kyi gnas rig pa dang /gzugs med pa'i gnas rig pa myong bar 'gyur ba'i rgyu ma yin pas 'dir ma smos so/ /slob pa rnams kyi mthong ba'i lam dang / bsgom pa'i lam gyis rab tu phye ba'i rig pa'i 'dus te reg pa las byung ba'i tshor ba ni de'i rgyu yin pas 'bras bu ma grub pa ma 'ongs pa'i rgyur gyur pa zhes bya ba ste de lta bu'i tshor ba myong ba'i gang zag slob pa rnams kyi 'bras bu ma grub pa'i gnas ngan len rig pa zhes bya bar sbyar ro//de'i mi mthun pa'i phyogs thams cad kyi thams cad du 'gag pa ma yin te zhes bya ba ni rig pa'i 'dus te reg pa las byung ba'i tshor ba de'i mi mthun pa'i phyogs nyon mongs pa can gyi ma rig pa'i 'dus te reg pa las byung ba'i tshor ba dang /nyon mongs pa'i ma rig pa'i 'dus te reg pa las byung ba'i tshor ba bsgom pas spang bar bya ba dag go /'dren mar myong ngo zhes bya ba ni rig pa'i 'dus te reg pa las byung ba'i tshor ba dang /ma rig pa'i 'dus te reg pa las byung ba'i tshor ba 'dren mar myong ba'o/ /nyan thos dang rang sangs rgyas kyi mi slob pas kyang nyon mongs pa can gyi ma rig pa'i 'dus te reg pa las byung ba'i tshor ba spangs kyang nyon mongs pa med pa'i ma rig pa'i 'dus te reg pa las byung ba'i tshor ba ma spangs pas de dag kyang rig pa'i 'dus te reg pa las byung ba dang /nyon mongs pa med pa'i ma rig pa'i 'dus te reg pa las byung ba'i tshor ba 'dren mar myong bar sbyar ro/ /'bras bu grub pa myong ba ni zhes bya ba la sogs pas ni de bzhin gshegs pa'i phung po'i lhag ma med pa'i mya ngan las 'das pa'i dbyings na 'bras bu grub pa'i tshor ba myong ba la ni ma rig pa med de/rig pa'i 'dus te reg pa las byung ba'i tshor ba 'ba' zhig myong bar ston to/ /tshor ba rnam pa de gnyi ga thams cad kyi thams cad du 'gags te zhes bya ba ni nyon mongs pa can gyi ma rig pa'i 'dus te reg pa las byung ba'i tshor ba dang /nyon mongs pa med pa'i ma rig pa'i 'dus te reg pa las byung ba'i tshor ba de gnyis ka'o/ /rig pa'i 'dus te reg pa las byung ba'i tshor ba 'ba' zhig myong ngo zhes bya ba ni sgrib pa rnam pa gnyis dang bral ba'i ye shes kyis rab tu phye ba'i phyir ro//phung po'i lhag ma med pa'i mya ngan las 'das pa'i dbyings su yongs su mya ngan las 'da' ba na de yang 'gag par 'gyur te zhes bya ba ni rig pa'i 'dus te reg pa las byung ba'i tshor ba de yang 'gag par 'gyur te/ phrad pa'i tshor ba dang /'bral ba'i tshor ba'i skye ba'i sa bon kun gzhi rnam par shes pa yongs su zad pa'i phyir ro/ /de'i phyir zhes bya ba la sogs pas ni sngar zhus pa'i lan gyi mjug bsdu ba bstan te/ des kyang bshad pas sgom pa la 'dun pa drag po med pa rnam par gzhig cing chud mi za bar bya ba'i phyir gdags pa gtan la dbab pa bstan to//gal te de bzhin gshegs pa phung po'i lhag ma med pa'i mya ngan las 'da' ba'i dbyings su mya ngan las 'das na ji ltar 'khor ba'i mtha'i bar du gzhan gyi don mdzad pa 'grub par 'gyur zhe na/ de bzhin gshegs pa ni sngon gyi smon lam gyi shugs kyis na yongs su mya ngan las 'da' ba ston kyang sems can gyi don mdzad pa rgyun mi gcod de/de bzhin gshegs pa'i rnam par grol ba ni sna tshogs yin pa'i phyir ro/ /de ltar sgom pa la 'dun pa drag po med pa rnam par gzhig cing 'dun pa drag pos rab tu phye ba'i zhi gnas dang lhag mthong gi lam gyi ngo bo nyid de las rab tu nyams par mi 'gyur zhing chud mi za bar bya ba'i phyir bstan pa dang bshad pas sgom pa la 'dun pa drag po med pa rnam par gzhig pa gdags pa gtan la dbab pa bstan pa ni sgom pa la 'dun pa drag po med pa rnam par gzhig cing chud mi za bar bya ba'i phyir gdags pa gtan la dbab pa bstan pa yin no//chud mi za bar bya ba'i phyir gdags pa gtan la dbab pa'i tshig gi don la sogs pa bshad zin to// // da ni 'di man chad ni dam pa'i chos yongs su gzung ba dang /mdo sde'i lus rnam par gzhag pa'i dngos po bsdu ba dang / mdo sde'i nges pa'i tshig bstan pa dang / 'bras bu thob pa'i che ba nyid rnams kyi mjug bsdu ba bstan to/ /de la dam pa'i chos yongs su gzung ba ni/ de skad ces bka' stsal nas zhes bya ba la sogs pas bstan te/de la rnal 'byor gyi lam zhes bya ba ni tshul khrims dang / rig pa'i rnal 'byor gyis yongs su bsdus pa'i zhi gnas dang / lhag mthong gi lam gyi ngo bo nyid gang yin pa'o/ /yongs su rdzogs pa zhes bya ba ni sbyor ba'i rgyu dang /'thob pa dang / 'thob pa'i thabs dang / chud mi za bar bya ba'i phyir gdags pa gtan la dbab pa dag gis so/ /shin tu yongs su dag pa zhes bya ba ni khyab pa'i dmigs pa bzhi po dag las zhi gnas kyi lam dang / lhag mthong gi lam dang / zung du 'brel pa'i lam shin tu yongs su dag pa'o//rnal 'byor la shin tu rnam par nges shing zhes bya ba ni gtan la dbab pa zhes bya ba'i tha tshig go /mkhas pas zhes bya ba ni skabs su bab par zhes bya ba'i don to/ /legs so legs so zhes bya ba ni bstod pa dang /rjes su yi rang bar mdzad pa ste des na gzhan dag dam pa'i chos 'di yongs su 'dzin par 'gyur ro/ /ngas kyang zhes bya ba la sogs pas ni dam pa'i chos 'di yongs su gzung ba'i 'os yin par ston to/ /rigs kyi bu rnams dang rigs kyi bu mo dag gis 'di la shin tu brtson par bya ba'i rigs so zhes bya bas ni de bzhin gshegs pa'i gdung rgyun mi gcad pa'i man ngag gi dam pa'i chos yongs su 'dzin du gzhug pa bstan te/de dag ni dam pa'i chos yongs su gzung ba bstan pa yin no/ /mdo'i sde'i lus rnam par gzhag pa'i dngos po bsdu ba ni/de nas bcom ldan 'das kyis de'i tshe tshigs su bcad pa 'di dag bka' stsal to zhes bya ba la sogs pa tshigs su bcad pa rnams kyis bstan te/ de la tshigs su bcad pa dang pos ni sngar sbyor ba'i rgyu rnam pa gnyis po gnas kyis sbyor ba'i rgyu dang /rten gyis sbyor ba'i rgyu bstan pa las gnas kyis sbyor ba'i rgyu chos gdags pa rnam par gzhag pa de la gnas pa'i phan yon ston to/ /chos rnams gdags pa rnam par gzhag pa gang yin pa de ni zhes bya ba ni mdo'i sde la sogs pa chos gdags pa rnam par gzhag pa gang yin pa'o//rnal 'byor zhes bya ba ni tshul khrims dang rig pa'i rnal 'byor gyis yongs su bsdus pa'i zhi gnas dang / lhag mthong gi lam gyi ngo bo nyid la zhes bya bar sbyar ro/ /bag yod ces bya ba ni nan tan dang brtson 'grus kyis bag yod par sgrub pa'i rnal 'byor pa rnams la zhes bya ba'i tha tshig go//don chen yin zhes bya ba ni phan 'dogs pa'i phyir ro/ /ji ltar phan 'dogs pas don che ba yin zhe na/ gang dag chos der brten nas rnal 'byor 'dir/ /yang dag brtson pa de dag byang chub thob/ /ces bya ba gsungs te/rnal 'byor pa gang dag chos gdags pa rnam par gzhag pas de la gnas nas/ rnal 'byor gyis yongs su bsdus pa'i zhi gnas dang lhag mthong gi lam gyi ngo bo nyid la yang dag par brtson pa de dag bla na med pa'i byang chub thob pa'i phyir ro zhes bstan to/ /tshigs su bcad pa gnyis pas ni chos gdags pa rnam par gzhag pa de la bsam pa thag pa nas mi gnas pa'i nyes dmigs ston te/gang dag glags lta zhes bya ba ni gang dag chos bdud rtsi 'di gtan gzhig pa'am/ dam pa'i chos ltar bcos pa spel lo snyam pa'i bsam pas bstan pa 'di la glags lta ba'o//de skad rgol ba las thar bar lta bas zhes bya bas ni rtog ge pa la la gzhan dang grub pa'i mtha' bsgran cing brtsad pa dang / rang gi grub pa'i mtha' nyams la thug pa'i tshe sangs rgyas kyi bstan pa las gtan tshigs dang dpe dang / rig pa la sogs pa bslabs pa phas kyi rgol ba de las bdag thar bar bya'o snyam du sems pa'o/ /chos kun chub byed pa zhes bya ba ni de ltar glags lta ba'i bsam pa dang / de skad rgol ba las thar bar lta ba'i lam bsam pas sangs rgyas kyi chos 'di sgrub par byed pa'o//byams pa zhes bya ba ni bod pa'i tshig go/ /de dag rnal 'byor 'di las ni/ /thag ring gnam sa ring ba ji bzhin no/ /zhes bya ba ni gang zag de dag rnal 'byor gyis yongs su bsdus pa'i lam 'di thag ring ste/ dper na gnam sa thag ring ba bzhin no zhes bya ba'i tha tshig go//tshigs su bcad pa gsum pa'i rtsa ba dang po gnyis kyis ni sngar brten cing sbyor ba'i rgyu bla na med pa'i byang chub tu smon lam mi gtong ba bstan pa'i phan yon ston te/ blo ldan zhes bya ba ni byang chub sems dpa'o/ /sems can don zhes bya ba ni sems can gyis gces par byed pa'o//de dag las/ lan byed rig nas sems can don brtson min/ /zhes bya ba ni sems can de dag las lan du phan pa byed par 'os par rig nas sems can gyi don la brtson pa ni ma yin no zhes bya ba'i tha tshig ste/tshig gi don spyir na bla na med pa'i byang chub tu smon lam mi gtong ba'i byang chub kyi sems de'i rgyu ni snying rje yin la/ snying rje'i yul ni sems can thams cad yin pas snying rjes ni sems can gyi don gces par byed la/ sems can gyi don byed pa na/ 'gro la phan phyir sangs rgyas 'grub par shog /ces bla na med pa'i byang chub tu sems skyed par byed pa ni bla na med pa'i byang chub tu smon lam mi gtong ba yin no zhes bya bar sbyar ro/ /tshigs su bcad pa gsum pa'i rtsa ba 'og ma gnyis kyis ni zang zing gi bsam pas sems can gyi don byed pa la byang chub kyi sems med pa'i nyes dmigs ston te/lan der rtog na zhes bya ba ni sems can gyi don la cung zad sbyor ba na/ de dag las lan 'ong du re zhing de la rtog na'o/ /kun gzhi dam pa zhes bya ba ni kun rdzob kyi byang chub kyi sems so//zang zing med pa'i dga' ba zhes bya ba ni don dam pa'i byang chub kyi sems dang po rab tu dga' bas rab tu phye ba'o/ /tshigs su bcad pa bzhi pas ni gnas kyi sbyor ba'i rgyu chos gdags pa rnam par gzhag pa de la gnas nas kyang rab tu dben pa dang /sems rtse gcig pa nyid la mi sbyor ba'i nyes dmigs ston te / gang dag 'dod phyir chos kyi lung 'bogs pa/ /zhes bya ba ni chos gdags pa rnam par gzhag pa chub par byas nas rab tu dben pa dang / sems rtse gcig pa nyid la mi sbyor bar rnyed pa dang /bkur sti la sogs pa zang zing 'dod pa'i phyir grong dang 'du 'dzi'i nang na gnas shing chos kyi lung 'bogs pa'o/ /de dag 'dod pa spongs pa phyir len te/ /zhes bya ba ni sngar rab tu byung ba la sogs pa'i rim gyis dngos po'i 'dod pa spangs pa'i phyir len pa yin te zhes bya ba'i tha tshig go//rmongs pa de dag chos kyi rin po che/ /rin thang med pa rnyed kyang spong zhing rgyu/ /zhes bya ba ni gang zag rmongs pa de dag ni dper na la la zhig gis rin po che rin thang med pa rnyed kyang de spangs te/ spong zhing rgyu ba dang 'dra bar chos kyi rin po che rin thang med pa rnyed kyang 'dod pa'i longs spyod la spong zhing 'khor ba na rgyu ba yin no zhes bya ba'i tha tshig go//tshigs su bcad pa lnga pas ni phan yon dang nyes dmigs de lta bu dag yod pas de'i phyir sbyor ba'i rgyu rnam pa gnyis la brten la/rnal 'byor gyis yongs su bsdus pa'i lam la brtson par gyis shig ces bya ba'i tha tshig go/ /de phyir rtsod dang 'du 'dzi spros ldan pa/ /rnam par spong ba zhes bya ba ni 'dod pa'o/ /brtson 'grus mchog byos te zhes bya ba ni le lo spang ba bstan te/ de dag gis ni gnas kyi sbyor ba'i rgyu la brten cing bskul ba bstan to//lhar bcas 'jig rten bsgral bar bya ba'i phyir/ /zhes bya ba ni snying rjes sems can la dmigs pa'i sgo nas byang chub tu sems bskyed pa bstan te/ des ni rten gyi sbyor ba'i rgyu la brten cing zhes bskul ba bstan to/ /rnal 'byor 'di la rab tu brtson par gyis//zhes bya ba ni de ltar sbyor ba'i rgyu rnam pa gnyis la brten nas rnal 'byor gyis yongs su bsdus pa'i lam gyi ngo bo nyid la brtson par gyis shig ces bskul ba bstan to/ /mdo'i sde'i nges pa'i tshig bstan pa ni/ de nas bcom ldan 'das la byang chub sems dpa' byams pas 'di skad ces gsol to zhes bya ba la sogs pas bstan te/de la dgongs pa nges par 'grel pa'i chos kyi rnam grangs 'dis zhes bya ba ni nges pa'i don bstan pa'i mdo sde 'di'i lus rnam par gzhag pa spyi la snyegs so/ /bstan pa 'di zhes bya ba ni rnal 'byor nges pa'i don bstan pa'i le'u 'di nyi tshe dang sbyar ro//rnal 'byor nges pa'i don bstan pa zhes bya ba ni tshul khrims dang rig pa'i rnal 'byor gyis yongs su bsdus pa'i zhi gnas dang lhag mthong gis lam gyi ngo bo nyid kyi don nges par bstan pa zhes bya ba'i tha tshig go/ /'bras bu thob pa'i che ba nyid ni/rnal 'byor nges pa'i don bstan pa 'di bshad pa na zhes bya ba la sogs pas bstan te/ 'bras bu thob pa'i che ba nyid ces bya ba ni sangs rgyas dang byang chub sems dpa' sems can rnams la chos bstan pa'i 'bras bu'i phan yon che ba rnam pa lnga bstan pa gang yin pa ste lnga gang zhe na/de dag las sems can kha cig ni bla na med pa yang dag par rdzogs pa'i byang chub tu sems bskyed par 'gyur ba dang / de dag las sems can kha cig ni dam pa'i chos bstan pa de nyid kyi tshe chos rnams la chos kyi mig rdul med cing dri ma dang bral ba bskyed par 'gyur ba dang /de dag las sems can kha cig ni dam pa'i chos bstan pa'i mod la zag pa zad par 'gyur ba dang / de dag las sems can kha cig ni dam pa'i chos thos pa de nyid kyi mod la byang chub sems dpa'i bzod pa mchog thob par 'gyur ba dang /sangs rgyas dang byang chub sems dpa' rnams kyis dam pa'i chos bstan pas lung 'bogs pa dang / kha thon byed pa dang / yang dag par sgrub pa gcig nas gcig tu brgyud pa'i tshul gyis dam pa'i chos kyi tshul yun ring du gnas par byed pa ste/ lnga po dag las dang po bzhi ni/ srog chags drug 'bum ni bla na med pa yang dag par rdzogs pa'i byang chub tu sems skyes so zhes bya ba la sogs pa'i don bzhi dang go rims bzhin du sbyar ro/ /lnga pa ni mdo sde thams cad kyi mjug nas/ bcom ldan 'das kyis de skad ces bka' stsal nas/lha la sogs pa'i 'jig rten yi rang ste mngon par dga'o zhes 'byung ba'i skabs dang sbyar ro/ /skabs 'dir dmigs kyis ma smos kyang mjug nas 'byung ba nyid skabs 'dir sbyar bar bya'o/ /de dag gi tshig gi don ni sngar bshad pa bzhin no/ /rnal 'byor chen po'i yid la byed pa thob par gyur to zhes bya ba ni snang ba med pa'i ting nge 'dzin mngon du gyur pa ste/de nyid kyis bzod pa mchog thob pa bstan to/ /le'u brgyad pa'i tshig gi don la sogs pa bshad zin to// // de ltar chos gdags pa rnam par gzhag pa las brtsams nas/ rnal 'byor gyis yongs su bsdus pa'i zhi gnas dang lhag mthong gi lam gyi rab tu dbye bas kun rdzob kyi bden pa'i mtshan nyid yongs su shes par bya ba bstan nas/de'i 'og tu theg pa rnam par gzhag pa las brtsams nas/ theg pa'i rnam par dbye ba ji lta ba bzhin du bstan nas kun rdzob kyi bden pa'i mtshan nyid yongs su shes par bya ba bstan pa'i tshig don la sogs pa bshad par bya ste/de'i phyir de bstan pa'i dbang du mdzad nas/ de nas bcom ldan 'das la byang chub sems dpa' spyan ras gzigs dbang phyug gis zhu ba zhus pa zhes bya ba la sogs pa 'phags pa spyan ras gzigs kyi le'u dgu pa 'di gsungs so//de la le'u dgu pa 'di'i bsdus pa'i don ni mdor bsdu na theg pa rnam par gzhag pa las brtsams nas theg pa'i rnam par dbye ba ji lta ba bzhin bstan pa yin no/ /de yang rnam par dbye ba na pha rol tu phyin pa yongs su rdzogs pa la mkhas par bya ba las brtsams nas dris pa dang lan brjod pa ste/pha rol tu phyin pa rnams theg pa chen pos bsdus pa'i phyir ro/ /de la pha rol tu phyin pa yongs su rdzogs pa la mkhas par bya ba brtsams nas shes par bya ba ni theg pa rnam par gzhag pa las brtsams nas zhes bya bas bstan te/ theg pa rnam par gzhag pa zhes bya ba ni theg pa chen po byang chub sems dpa'i lam 'bras bu dang bcas pa'o//de la byang chub sems dpa'i lam ni sa dang pha rol tu phyin pa rnams so/ /'bras bu ni sangs rgyas kyi sa'o/ /de dag ni lam 'dis 'gro ba'i phyir theg pa dang / 'bras bu bgrod par bya ba'i phyir theg pa zhes bya ba ste/de ltar na theg pa chen po byang chub sems dpa'i lam 'bras bu dang bcas pa rnam par gzhag pa las brtsams pa yin mod kyi/ de ltar theg pa chen po byang chub sems dpa' lam dang 'bras bu dang bcas pa rnam par gzhag pa de las pha rol tu phyin pa ni gang lam ni gang 'bras bu ni gang zhes de dag gi rnam par dbye ba ji lta ba bzhin bstan pa na sa ni rtogs pa yin la/pha rol tu phyin pa la spyod pa ni rtogs pa dang spyod pa de gnyis ka yin la/ 'bras bu ni sangs rgyas kyi sa yin pas spyod pa yongs su rdzogs pas rtogs pa yang yongs su rdzogs par 'gyur la/ spyod pa dang rtogs pa'i lam de yongs su rdzogs pas 'bras bu sangs rgyas kyi sa yang yongs su rdzogs par 'gyur ba'i phyir spyod pa thog mar 'gro ba'i go rims kyi dbang du byas nas pha rol tu phyin pa yongs su rdzogs par bya ba mkhas par bya ba las brtsams nas zhes bya ba smos par zad kyi/dngos su theg pa chen po byang chub sems dpa'i lam 'bras bu dang bcas pa rnam par gzhag pa las brtsams nas zhes bya bar sbyar te/de ni le'u 'di la lus rnam par gzhag pa spyi dang sbyar ro/ /dris pa dang lan brjod pa zhes bya ba ni theg pa'i rnam par dbye ba ji lta ba bzhin bstan pa zhes bya bas bstan te/pha rol tu phyin pa yongs su rdzogs pa la mkhas pa'i rnam par dbye ba ji lta ba bzhin du bstan zhes bya ba'i tha tshig go/ /pha rol tu phyin pa yongs su rdzogs pa la mkhas pa de yang rnam pa gnyis te/ ji ltar yongs su rdzogs pa dang / gang dag yongs su rdzogs pa'o//de la ji ltar yongs su rdzogs pa zhes bya ba ni rtogs pa yongs su rdzogs pa'i sgo nas spyod pa yongs su rdzogs par mngon pa'i phyir sa rab tu dbye bas pha rol tu phyin pa yongs su rdzogs par bstan pa ste/ de'i phyir 'dir rtogs pa yongs su rdzogs pa rab tu dbye ba thog mar ston te /de ni bcom ldan 'das byang chub sems dpa' rnams kyi sa bcu gang lags pa de dag ni 'di lta ste zhes bya ba nas de'i phyir smon lam rgya chen pos 'gro ba dang / smon lam gyi stobs can rnams zhes gsungs pa'i bar gyis bstan to/ /gang dag yongs su rdzogs pa zhes bya ba ni sbyin pa'i pha rol tu phyin pa la sogs pa pha rol tu phyin pa drug dang bcu yongs su rdzogs par bstan pa ste/de'i phyir 'dir rtogs pa yongs su rdzogs pa'i rab tu dbye ba bstan pa'i 'og tu spyod pa yongs su rdzogs pa'i pha rol tu phyin pa rab tu dbye ba ston pa ste/ de ni bcom ldan 'das byang chub sems dpa' rnams kyi bslab pa'i gzhi du mchis lags zhes bya ba nas/de nas bcom ldan 'das kyis de'i tshe tshigs su bcad pa 'di dag bka' stsal to zhes bya ba la thug pa'i bar gyis bstan to/ /de la dang por sa rab tu dbye ba'i tshig gi don la sogs pa bshad par bya ste de yang rnam pa gnyis te/bstan pa dang / bshad pa'o/ /de la bstan pa ni bcom ldan 'das byang chub sems dpa' rnams kyi sa bcu gang lags pa de dag ni 'di lta ste zhes bya ba nas sangs rgyas kyi sa ni bcu gcig lags na zhes gsungs pa'i bar gyis bstan te / des ni byang chub sems dpa'i gnas pa bcu dang de bzhin gshegs pa'i gnas pa bstan to//de la byang chub sems dpa'i gnas pa bcu ni rab tu dga' ba'i sa la gnas pa dang / lhag pa'i tshul khrims la gnas pa dang / lhag pa'i sems la gnas pa dang / byang chub kyi phyogs dang ldan pa'i lhag pa'i shes rab la gnas pa dang /bden pa dang ldan pa'i lhag pa'i shes rab la gnas pa dang / rten cing 'brel par 'byung ba dang ldan pa'i lhag pa'i shes rab la gnas pa dang / mtshan ma med pa la gnas pa mngon par 'du byed pa dang bcas shing rtsol ba dang bcas pa dang / mtshan ma med pa la gnas pa mngon par 'du byed pa med pa la lhun gyis grub pa dang /so so yang dag par rig pa la gnas pa dang / gnas pa mchog go/ /de la rab tu dga' ba la gnas pa ni byang chub sems dpa'i sa rab tu dga' ba zhes bya bas bstan te/ rigs la gnas pa dang mos pas spyod pa la gnas pa las yang dag par 'das te/lhag pa'i bsam pa dag pa'i byang chub sems dpa'i gnas pa gang yin pa'o/ /lhag pa'i tshul khrims la gnas pa ni dri ma med pa zhes bya bas bstan te/ lhag pa'i bsam pa dag pa'i gzhis rang bzhin gyis tshul khrims dang ldan pa'i gnas gang yin pa'o/ /lhag pa'i sems la gnas pa ni 'od byed pa zhes bya bas bstan te/lhag pa'i tshul khrims la gnas pa rnam par dag pa'i gzhi dag gis 'jig rten pa'i bsam gtan dang rnam par thar pa dang / ting nge 'dzin dang snyoms par 'jug pa dag la gnas pa gang yin pa'o/ /byang chub kyi phyogs dang mthun pa'i lhag pa'i shes rab la gnas pa ni 'od 'phro can zhes bya bas bstan te/'jig rten pa'i shes pa rnam par dag pa'i gnas su gyur pa'i ting nge 'dzin la brten nas bden pa rtogs par bya ba'i phyir/ dran pa nye bar gzhag pa la sogs pa byang chub kyi phyogs dang mthun pa'i chos sum cu rtsa bdun yang dag par rab tu rnam par 'byed pa'i gnas pa gang yin pa'o//bden pa dang ldan pa'i lhag pa'i shes rab la gnas pa ni shin tu sbyang dka' zhes bya bas bstan te/ byang chub kyi phyogs rab tu rnam par 'byed pa la brten nas 'phags pa'i bden pa rnams yang dag pa ji lta ba bzhin du rtogs pa'i gnas gang yin pa'o//rten cing 'brel par 'byung ba dang ldan pa'i lhag pa'i shes rab la gnas pa ni mngon du gyur ces bya bas bstan te/ bden pa rtogs pa de nyid kyi dbang du byas nas/ de ma shes pas sdug bsngal 'byung ba rgyu dang bcas pa rab tu rnam par 'byed pas rab tu phye ba dang /de shes pas sdug bsngal 'gog pa rgyu dang bcas pa rab tu rnam par 'byed pas rab tu phye ba'i gnas gang yin pa'o/ /mtshan ma med pa la gnas pa mngon par 'du byed pa dang bcas shing rtsol ba dang bcas pa ni/ ring du song ba zhes bya bas bstan te/lhag pa'i shes rab la gnas pa snga ma de gsum gyi dbang du byas nas mngon par 'du byed pa rtsol bas rgyun chags su bar chad med par chos thams cad la de bzhin nyid rnam par mi rtog pa'i shes rab bsgom pa dang ldan pa'i gnas pa gang yin pa'o/ /mtshan ma med pa la gnas pa mngon par 'du byed pa med cing lhun gyis grub pa ni mi g.yo ba zhes bya bas bstan te/mtshan ma med pa la snga ma de nyid shas cher bsgoms pas rang gi ngang nyid kyis rgyun chags su bar chad med par 'jug pa'i lam dang ldan pa'i gnas gang yin pa'o/ /so so yang dag par rig par gnas pa ni/ legs pa'i blo gros zhes bya bas bstan te/shes rab dang ldan pa'i ting nge 'dzin shin tu yongs su dag cing mi g.yo ba de nyid la brten nas blo gros chen po rgya cher rab tu thob ste/ gzhan dag la chos yang dag par ston pa bla na med pa las brtsams nas / chos rnams kyi rnam grangs dang mtshan nyid dang nges pa'i tshig dang rab tu dbye ba rab tu rnam par 'byed pa'i gnas pa gang yin pa'o//gnas pa'i mchog ni chos kyi sprin zhes bya bas bstan te/ byang chub sems dpa' gang la gnas nas byang chub sems dpa'i lam gyi mthar thug ste/ bla na med pa yang dag par rdzogs pa'i byang chub tu chos kyi dbang bskur ba chen po thob bo//skye ba gcig gis thogs pa 'am/ yang na srid pa tha ma par gyur pa ste/ gnas pa de'i mjug thogs su bar chad med pa kho nar bla na med pa yang dag par rdzogs pa'i byang chub mngon par rdzogs par 'tshang rgya zhing sangs rgyas kyi phrin las thams cad mdzad par 'gyur ba'i gnas pa gang yin pa'o//de bzhin gshegs pa'i gnas pa ni sangs rgyas kyi sa zhes bya bas bstan te/ gnas pa mchog de nyid las 'das te/ bla na med pa yang dag par rdzogs pa'i byang chub mngon par rdzogs par sangs rgyas nas shes bya thams cad la chags pa med pa dang / thogs pa med pa'i shes pa dang mthong ba brnyes te/sku gsum dang ye shes bzhi dang sangs rgyas kyi chos ma 'dres pa brgya bzhi bcu la sogs pa'i che ba nyid mthar phyin cing sangs rgyas kyi phrin las thams cad mdzad pa'i gnas pa gang yin pa'o/ /sa de dag gi tshig gi don ni ming la mkhas pa'i skabs su 'og nas bstan to//bshad pa ni rnam pa bdun te/ 'bras bu la mkhas pa dang / mi mthun pa'i phyogs dang / gnyen po la mkhas pa dang / ming la mkhas pa dang / mi mthun pa'i phyogs rab tu dbye ba la mkhas pa dang / gnyen po'i dbye ba la mkhas pa dang / bdag dang gzhan gyi rgyud yongs su smin pa'i gnas pa la mkhas pa dang /bsam pa yongs su rdzogs par bya ba'i thabs la mkhas pa'o/ /de la 'bras bu la mkhas pa ni/ sa de dag rnam par dag pa du dag dang zhes zhus pa dang / spyan ras gzigs dbang phyug sa de dag ni rnam pa bzhi dang zhes bka' stsal pa'i gnas skabs nas bzung ste/spyan ras gzigs dbang phyug de las dang po ni bsam pa rnam par dag pas bsdus so zhes bya ba la sogs pas bstan to/ /mi mthun pa'i phyogs dang gnyen po la mkhas pa ni/ yan lag du dag gis bsdus lags zhes zhus pa dang / yan lag bcu gcig gis bsdus par rig par bya'o zhes bka' stsal pa'i gnas skabs nas bzung ste/yan lag bcu gcig gang zhe na zhes bya ba la sogs pas bstan to/ /ming la mkhas pa ni/ bcom ldan 'das ci'i slad du sa dang po la rab tu dga' zhes bgyi zhes bya ba la sogs pas bstan to/ /mi mthun pa'i phyogs kyi rab tu dbye ba la mkhas pa ni/bcom ldan 'das sa de dag la kun du rmongs pa ni du mchis gnas ngan len mi mthun pa'i phyogs ni du mchis lags zhes bya ba la sogs pas bstan to/ /gnyen po'i rab tu dbye ba la mkhas pa ni bcom ldan 'das de dag rnam par dag pa du dag gis rnam par gzhag lags zhes bya ba la sogs pas bstan to//bdag dang gzhan gyi rgyud yongs su smin pa'i gnas la mkhas pa ni/ bcom ldan 'das ci'i slad du srid par skye ba thams cad kyi nang na/ byang chub sems dpa'i skye ba rab mchog ces bgyi lags zhes bya ba la sogs pas bstan to//bsam pa yongs su rdzogs par bya ba'i thabs la mkhas pa ni/ bcom ldan 'das ci'i slad du byang chub sems dpa' rnams smon lam rgya chen pos mchi ba dang / smon lam gya nom pa dang ldan pa dang smon lam gyi stobs can lags zhes bya ba la sogs pas bstan to/ /de la dang por 'bras bu la mkhas pa'i tshig gi don la sogs pa bshad par bya ste/'bras bu zhes bya ba ni sa thams cad ni rgyu'i lus dang 'bras bu'i mtshan nyid kyis rab tu phye ba 'jug pa dang gnas pa'i ngo bo nyid yin te/ byang chub sems dpa'i gnas pa bcu dang / de bzhin gshegs pa'i gnas pa de dag thams cad kyang snga ma snga ma ni rgyu'i lus yin la/phyi ma phyi ma ni 'bras bu'i mtshan nyid yin pas/ rgyu'i lus ni 'jug pa'i ngo bo nyid yin 'bras bu'i mtshan nyid ni gnas pa'i ngo bo nyid yin mod kyi/ rigs la gnas pa dang mos pas spyod pa la gnas pa 'jig rten pa de gnyis la brten nas rab tu dga' ba la gnas pa yan chad ni thams cad kyang 'jig rten las 'das pa'i gnas pa mngon par rtogs pa yin pas 'bras bu zhes bya'o//'bras bu la mkhas pa zhes bya ba ni 'bras bu de dag kyang rnam par dag pa bzhis bsdus pas sa rab tu dbye ba la mkhas pa gang yin pa ste/ de'i phyir de bstan pa'i dbang du mdzad nas/ sa de dag rnam par dag pa du dag dang zhes bya ba la sogs pa zhus nas/spyan ras gzigs dbang phyug de dag gi rnam par dag pa bzhi dang zhes bya ba la sogs pa gsungs so/ /de las sa dang po ni bsam pa rnam par dag pas bsdus so zhes bya ba ni sa dang po ni lhag pa'i bsam pa rnam par dag pa'i gnas yin la/ bsam pa rnam par dag pa yang byang chub sems dpa' rnams kyi bsam pa'i khams sangs rgyas kyi chos rnams la yod pa nyid du yid ches pas rab tu phye ba dang /lhag pa'i bsam pa'i khams sangs rgyas kyi chos rnams la yon tan dang ldan pa nyid du yid ches pas rab tu phye ba'i rgyu las byung ba/ bsam pa mngon par rtogs pa'i ngo bo nyid bsams pa las byung ba'i shes rab chen po'i ngo bo nyid dang de dang ldan pa'i byang chub kyi phyogs dang mthun pa'i chos kyi ngo bo nyid yin pa'i phyir sa dang po ni bsam pa rnam par dag pas bsdus pa yin no//bsam pa mngon par rtogs pa'i ngo bo nyid de yang byang chub sems dpa'i lhag pa'i bsam pa sangs rgyas kyi chos rnams la mos pa dang /so sor rtog pa dang nges par 'byed pa dad pa sngon du 'gro ba dang / chos rnam par 'byed pa sngon du 'gro ba gang yin pa'o/ /de ni rnam pa bco lnga ste/ mchog gi bsam pa dang / tshul khrims kyi bsam pa dang / pha rol tu phyin pa'i bsam pa dang /de kho na'i don gyi bsam pa dang / mthu'i bsam pa dang / phan pa'i bsam pa dang / bde ba'i bsam pa dang / sdug pa'i bsam pa dang / brtan pa'i bsam pa dang / mi slu ba'i bsam pa dang / ma dag pa'i bsam pa dang / dag pa'i bsam pa dang / shin tu dag pa'i bsam pa dang /tshar gcad pa'i bsam pa dang / lhan cig skyes pa'i bsam pa'o/ /de la mchog gi bsam pa zhes bya ba ni sangs rgyas dang chos dang dge 'dun dkon mchog rnams la byang chub sems dpa'i lhag pa'i bsam pa gang yin pa'o/ /tshul khrims kyi bsam pa zhes bya ba ni byang chub sems dpa' tshul khrims kyi sdom pa yang dag par blangs pa las lhag pa'i bsam pa gang yin pa'o//pha rol tu phyin pa'i bsam pa zhes bya ba ni sbyin pa dang tshul khrims dang bzod pa dang brtson 'grus dang bsam gtan dang shes rab yang dag par 'grub par bya ba'i lhag pa'i bsam pa gang yin pa'o//de kho na'i don gyi bsam pa zhes bya ba ni chos dang gang zag bdag med pa don dam pa chos rnams kyi de bzhin nyid zab mo la lhag pa'i bsam pa gang yin pa'o/ /mthu'i bsam pa zhes bya ba ni sangs rgyas dang byang chub sems dpa' rnams kyi mngon par shes pa'i mthu 'am/ lhan cig skyes pa'i bsam gyis mi khyab pa la lhag pa'i bsam pa gang yin pa'o/ /phan pa'i bsam pa zhes bya ba ni sems can rnams la dge ba nye bar sgrub par 'dod pa gang yin pa'o/ /bde ba'i bsam pa zhes bya ba ni sems can rnams la phan gdags pa nye bar sgrub par 'dod pa gang yin pa'o//sdug pa'i bsam pa zhes bya ba ni sems can rnams la zang zing med pa'i sems dang / sdug pa'i rnam par smin pa dang / 'brel pa med pa'i sems gang yin pa'o/ /brtan pa'i bsam pa zhes bya ba ni bla na med pa yang dag par rdzogs pa'i byang chub tu sems gcig tu nges pa gang yin pa'o//mi slu ba'i bsam pa zhes bya ba ni sems can gyi don gyi thabs dang byang chub kyi thabs la phyin ci ma log pa'i shes pa dang ldan pa'i mos pa gang yin pa'o/ /ma dag pa'i bsam pa zhes bya ba ni mos pas spyod pa'i sa thams cad la byang chub sems dpa' rnams kyi lhag pa'i bsam pa gang yin pa'o//dag pa'i bsam pa zhes bya ba ni bsam pa dag pa'i sa nas bzung ste/ spyod pa nges pa'i sa'i bar la byang chub sems dpa' rnams kyi lhag pa'i bsam pa gang yin pa'o/ /shin tu dag pa'i bsam pa zhes bya ba ni mthar thug par 'gro ba'i sa la byang chub sems dpa' rnams kyi lhag pa'i bsam pa gang yin pa'o//tshar gcad pa'i bsam pa zhes bya ba ni ma dag pa'i bsam pa gang yin pa de nyid yin te/ so so brtag par bya ba'i phyir ro/ /lhan cig skyes pa'i bsam pa zhes bya ba ni dag pa dang shin tu dag pa'i bsam pa gang yin pa de nyid yin te/ rang bzhin gyis de'i bdag nyid du gyur pa dang /rten la shin tu gnas pa'i phyir ro/ /bsam pa bco lnga po de dag kyang mdor bsdu na rnam pa bzhir gyur te/ don gang la lhag pa'i bsam pa dang / khyad par gang gis lhag pa'i bsam pa dang / sa gang la lhag pa'i bsam pa dang / go rims gang gis lhag pa'i bsam par gyur pa'o//de la don gang zhe na/ bdag dang gzhan gyi don la ste/ bdag gi don gyi gzhi ni rnam pa lnga ste/ mchod pa'i gzhi dang / dge ba'i chos kyi gzhi dang dge ba'i chos sgom pa rtag tu byed pa'i gzhi dang / kun nas nyon mongs pa med pa'i sems kyis 'khor bar 'khor ba'i gzhi dang / sangs rgyas kyi bstan pa la snying thag pa nas dad par bya ba'i gzhi'o/ /de la lhag pa'i bsam pa yang rnam pa lnga ste/ mchog gi bsam pa nas mthu'i bsam pa'i bar du go rims bzhin no/ /gzhan gyi don ni rnam pa gnyis te/ tshe rabs gzhan du phan pa'i gzhi dang / tshe rabs 'di la bde ba'i gzhi'o//de gnyis la ni lhag pa'i bsam pa gnyis te/ phan pa'i bsam pa dang bde ba'i bsam pa dang go rims bzhin no/ /khyad par gang gis she na/ rnam pa gsum gyis te/ gzhan gyi don gyi thabs dang / bdag gi don gyi thabs dang / gnyis ka'i don gyi khyad par gyis te/ lhag pa'i bsam pa dang / brtan pa'i bsam pa dang / mi slu ba'i bsam pa dang go rims bzhin no/ /sa gang la zhe na/ sa gsum pa la yod de ma dag pa'i sa dang / dag pa'i sa dang / shin tu dag pa'i sa la ste/ ma dag pa'i bsam pa dang / dag pa'i bsam pa dang / shin tu dag pa'i bsam pa dang /go rims bzhin no/ /go rims gang gis she na/ rnam pa gsum gyis te/ ma dag pa'i bsam pas dag pa'i bsam pa bskyed la dag pa'i bsam pas shin tu dag pa'i bsam pa bskyed pa ste/ tshar gcad pa'i bsam pa dang / lhan cig skyes pa'i bsam pa dang go rims bzhin no//byang chub sems dpa' rnams ni lhag pa'i bsam pa dge bas thams cad du rtogs pa bco lnga po de dag gis bya ba bcu byed de/ mchog gi bsam pas ni dkon mchog la mchod pa dang / byang chub kyi tshogs thams cad kyi mchog tu gyur pa'i rnam pa thams cad la sbyor bar byed de /tshul khrims kyi bsam pas ni byang chub sems dpa'i tshul khrims so/ /sdom pa yang dag par blangs pa la srog gi phyir yang bsams bzhin du nyes par 'byung bar mi byed la/ nyes pa byung na yang myur ba myur bar so sor 'chags par byed do/ /pha rol tu phyin pa'i bsam pas ni//dge ba'i chos rnams bsgom pa rtag tu byed pas bag yod par gnas shing mchog tu bag yod par gnas par byed pa'o/ /de kho na'i don gyi bsam pas ni sems can gyi phyir kun nas nyon mongs pa can ma yin pa'i sems kyis 'khor bar 'khor bar byed la mya ngan las 'das pa'i lhag pa'i bsam pa mi gtong bar yang byed do//mthu'i bsam pas ni bstan pa la snying thag pa nas dad cing ston par yang byed la bsgom pa la gces par 'dzin te/ 'dod pa skyes pas shas cher gnas la thos pa dang bsam pa tsam gyis chog par mi 'dzin par byed do/ /phan pa'i bsam pa dang / bde ba'i bsam pa dang /lhag pa'i bsam pas ni sems can gyi don gyi bya ba rnam pa thams cad la sbyor bar byed de/ /sbyor ba byas kyang yongs su skyob mi skyed par byed do/ /brtan pa'i bsam pas ni brtson 'grus 'bar ba dang / brtson 'grus rgya chen po yang dag par rtsom pa la gnas te/ /sbyor ba lhod par mi 'gyur zhing sbyor ba nyams par mi 'gyur bar byed do//mi slu ba'i bsam pas ni dge ba'i chos mngon par bsgrub pa de dang de dag la mngon par shes pa myur bar 'gyur te/ khyad par thob pa dma' ba dang / cung zad tsam dang ngan ngon tsam gyis chog par mi 'dzin par byed do//tshar gcad pa'i bsam pas ni lhan cig skyes pa'i lhag pa'i bsam pa 'dren par byed do/ /lhan cig skyes pa'i bsam pas ni lha dang mi rnams kyi don dang phan pa dang bde ba'i phyir myur du bla na med pa yang dag par rdzogs pa'i byang chub mngon par rdzogs par sangs rgyas par byed do//bcom ldan 'das kyis skabs de dang de dag tu byang chub sems dpa' rnams kyi lhag pa'i bsam pa bstan pa dang / gdags pa dang bshad pa thams cad kyang bsam pa bco lnga po 'dir 'dus la dus gsum gyi byang chub sems dpa' thams cad kyang bsam pa bco lnga po 'dis bla na med pa yang dag par rdzogs pa'i byang chub mngon par rdzogs par 'tshang rgya bas na bsam pa bco lnga po 'di dag ni byang chub chen po'i 'bras bu'i phan yon can yin pa'i phyir/'bras bu la mkhas pa'i skabs su bstan to/ /sa dang po'i skabs 'dir ma dag pa'i bsam pa ni dag par gyur la/ shin tu dag pa'i bsam pa ni rgyu'i lus su yod pas/bsam pa rnam par dag pa bco lnga po thams cad kyis bsdus par blta bar bya'o/ /sa gnyis pa ni lhag pa'i tshul khrims rnam par dag pas so zhes bya ba ni sa gnyis pa ni lhag pa'i tshul khrims la gnas pa yin la/ lhag pa'i tshul khrims rnam par dag pa ni byang chub sems dpa' rnams kyi sems kyi dge ba mi lcogs pa med pa la sogs pa'i gnas thams cad la brten te dmigs pa'i rgyu las byung ba'i tshul khrims mngon par rtogs pa 'phags pa dgyes pa'i lus dang /ngag gi las dang / yid kyi ngo bo nyid dang de dang ldan pa'i byang chub kyi phyogs dang mthun pa'i chos kyi ngo bo nyid yin pa'i phyir/sa gnyis pa ni lhag pa'i tshul khrims rnam par dag pas bsdus pa yin no/ /tshul khrims mngon par rtogs pa'i ngo bo nyid la yang byang chub sems dpa'i lhag pa'i tshul khrims bslab pa rnam par dag pa shes nas dad pa thob pas rab tu phye ba gang yin pa'o//de ni rnam pa dgu ste/ /tshul khrims kyi ngo bo nyid dang / tshul khrims thams cad dang / dka' ba'i tshul khrims dang / thams cad kyi sgo nas tshul khrims dang / skyes bu dam pa'i tshul khrims dang / rnam pa thams cad kyi tshul khrims dang / phongs shing 'dod pa la tshul khrims dang /'di dang gzhan du bde bar 'gyur ba'i tshul khrims dang / rnam par dag pa'i tshul khrims so/ /byang chub sems dpa'i tshul khrims kyi phung po chen po 'di ni byang chub sems dpa'i 'bras bu skyed pa ste/ 'di la brten nas byang chub sems dpa'i tshul khrims kyi pha rol tu phyin pa yongs su rdzogs nas bla na med pa yang dag par rdzogs pa'i byang chub mngon par rdzogs par sangs rgyas pas na 'bras bu la mkhas pa'i skabs su bstan to//sa gsum pa ni lhag pa'i sems rnam par dag pas so zhes bya ba ni sa gsum pa ni lhag pa'i sems la gnas pa yin la/lhag pa'i sems rnam par dag pa ni 'dod pa'i 'dod chags dang bral bas rab tu phye ba bsam gtan dang snyoms par 'jug pa nyer bsdogs dang / dngos gzhir bcas pa'i ngo bo nyid yin pa'i phyir sa gsum po ni lhag pa'i sems rnam par dag pas bsdus pa yin no/ / bsam gtan dang snyoms par 'jug pa nyer bsdogs dang dngos gzhir bcas pa'i ngo bo nyid de yang byang chub sems dpa'i lhag pa'i sems kyi bslab pa rnam par dag pa bsam gtan thob pas rab tu phye ba gang yin pa'o/ /de yang rnam pa dgu ste/ bsam gtan gyi ngo bo nyid dang / dngos gzhir bcas pa'i ngo bo nyid bsam gtan gyi ngo bo nyid dang /dka' ba'i bsam gtan dang / thams cad kyi sgo nas bsam gtan dang / skyes bu dam pa'i bsam gtan dang / rnam pa thams cad kyi bsam gtan dang / phongs shing 'dod pa la bsam gtan dang / 'di dang gzhan du bde bar 'gyur ba'i bsam gtan dang /rnam par dag pa'i bsam gtan no / /byang chub sems dpa' rnams kyi bsam gtan dpag tu med pa 'di dag ni byang chub chen po'i 'bras bur gyur pa ste/ de dag la brten nas byang chub sems dpa' rnams bsam gtan gyi pha rol tu phyin pa yongs su rdzogs nas bla na med pa yang dag par rdzogs pa'i byang chub mngon par rdzogs par sangs rgyas pas na 'bras bu la mkhas pa'i skabs su bstan to//sa bzhi pa nas bzung ste/ sangs rgyas kyi sa'i bar ni lhag pa'i shes rab rnam par dag pa gong nas gong du gya nom pa bas kyang ches gya nom pas bsdus par rig par bya ste zhes bya ba ni sa bzhi pa'i byang chub kyi phyogs dang ldan pa'i lhag pa'i shes rab la gnas pa yin/sa lnga pa ni bden pa dang ldan pa'i lhag pa'i shes rab la gnas pa yin/ sa drug pa ni rten cing 'brel par 'byung ba dang ldan pa'i lhag pa'i shes rab la gnas pa yin/sa bdun pa ni gnas pa snga ma de gsum gyi dbang du byas nas mtshan ma med pa la gnas pa mngon par 'du byed pa dang bcas shing rtsol ba dang bcas pa yin pas de yang lhag pa'i shes rab kyis rab tu phye ba yin/ /sa brgyad pa ni mtshan ma med pa la gnas pa snga ma de nyid shas cher bsgoms pas mtshan ma med pa la gnas pa mngon par 'du byed pa med cing lhun gyis grub pa yin pas de yang lhag pa'i shes rab kyis rab tu phye ba yin/sa dgu pa'i shes rab dang ldan pa'i ting nge 'dzin shin tu yongs su dag cing mi g.yo ba de nyid la brten nas so so yang dag par rig pa la gnas pa yin pas de yang lhag pa'i shes rab kyis rab tu phye ba yin/sa bcu pa ni bla na med pa yang dag par rdzogs pa'i byang chub tu chos kyi dbang bskur ba chen po thob pas gnas pa mchog yin pa'i phyir de yang lhag pa'i shes rab kyis rab tu phye ba yin/ sangs rgyas kyi sa ni 'bras bu'i gnas te spangs pa dang ye shes phun sum tshogs pa yin pas de yang lhag pa'i shes rab kyis rab tu phye ba yin la lhag pa'i shes rab rnam par dag pa ni shes bya ji lta ba bzhin du yod pa nyid kyis rtogs pa'i shes rab dang shes bya ji snyed yod pa nyid kyis rtogs pa'i ye shes kyi ngo bo yin pas na sa bzhi pa yan chad ni shes rab rnam par dag pas bsdus pa yin no//shes rab dang ye shes kyi ngo bo nyid de yang slob pa dang mi slob pa'i rgyu de la mnga' ba don dam pa'i bden pa dang / kun rdzob kyi bden pa yang dag pa ji lta ba bzhin du 'byed pa gang yin pa'o/ /de yang rnam pa dgu ste/ shes rab kyi ngo bo nyid dang / shes rab thams cad dang /thams cad kyi sgo nas shes rab dang / skyes bu dam pa'i shes rab dang / rnam pa thams cad kyi shes rab dang / phongs pa'i 'dod pa la shes rab dang / 'di dang gzhan du bde bar 'gyur ba'i shes rab dang / rnam par dag pa'i shes rab bo/ /byang chub sems dpa' rnams kyi shes rab shin tu rnam par nges shing dpag tu med pa 'di ni byang chub chen po'i 'bras bur 'gyur ba ste/de la brten nas byang chub sems dpa' rnams shes rab kyi pha rol tu phyin pa yongs su rdzogs te/ bla na med pa yang dag par rdzogs pa'i byang chub tu mngon par rdzogs par sangs rgyas pas na/ 'bras bu la mkhas pa'i skabs su bstan to//sa de dag ni rnam par dag pa bzhi po dag gis bsdus pa yin no zhes bya ba ni mjug bsdu ba yin te/ /sa de dag ni zhes bya bas ni 'bras bu bstan to/ /rnam par dag pa bzhi po de dag gis bsdus pa yin no zhes bya bas ni 'bras bu la mkhas pa bstan te/ de yang mdor bsdu na 'jig rten pa'i sa las yang dag par 'das pa ma mthong ba'i lam gyis rab tu phye ba lhag pa'i bsam pa rnam par dag pas ni sa dang po'i 'bras bu thams cad bsdus pa yin la mthong ba'i lam de nyid shes nas dad pa'i tshul khrims thob pa la brten te/bsgom pa'i tshul khrims rnam par dag pas ni sa gnyis pa'i 'bras bu thams cad bsdus so//lhag pa'i tshul khrims rnam par dag pa de la brten te bsam gtan la snyoms par 'jug pa thob pa'o lhag pa'i sems rnam par dag pas ni sa gsum pa'i 'bras bu thams cad bsdus pa yin la/ lhag pa'i sems rnam par dag pa de dag la brten te shes bya'i dngos po ji snyed yod pa nyid dang ji lta ba bzhin du yod pa nyid yang dag pa ji lta ba bzhin du shes pa dang mthong ba'i lhag pa'i shes rab rnam par dag pas ni sa bzhi pa yan chad kyi 'bras bu thams cad bsdus par rig par bya'o//de la lhag pa'i bsam pa rnam par dag pa ni mthong ba'i lam gyi ngo bo nyid yin pas gcig tu yang zad na/lhag pa'i tshul khrims rnam par dag pa dang / lhag pa'i sems rnam par dag pa dang / lhag pa'i shes rab rnam par dag pa ni bslab pa'i ngo bo nyid yin na ci'i phyir grangs gsum du nges she na/ de ni ting nge 'dzin gyi gnas kyi don dang / shes pa'i rten gyi don dang /bya ba byas pa'i don gyi phyir te/ de la ting nge 'dzin gyi gnas kyi don ni lhag pa'i tshul khrims kyi bslab pa yin te/ lhag pa'i tshul khrims la gnas na sems rtse gcig pa'i ting nge 'dzin la reg par 'gyur ba'i phyir ro/ /shes pa'i rten gyi don ni lhag pa'i sems kyi bslab pa yin te/sems mnyam par gzhag pa'i dran pa rtse gcig pa la shes bya'i dngos po la yang dag pa ji lta ba bzhin du shes pa dang mthong ba 'jug pa'i shes pa skye ba'i phyir ro/ /bya ba byas pa'i don ni lhag pa'i shes rab kyi bslab pa yin te/ shes pa dang mthong ba 'ba' zhig tu rnam par dag pas nyon mongs pa dang shes bya'i sgrib pa spong ba mngon sum du byed pa'i phyir ro//de ni rang gi don bla na med pa yin pas bya ba byas pa'i don ces bya ba ste/ sgrib pa gnyis spong ba de ni bya ba'i mchog yin pas de'i gong du bya ba gzhan med pa'i phyir ro/ /'o na bslab pa de gsum go rims ci'i phyir de ltar rnam par gzhag ce na/lhag pa'i tshul khrims la gnas na lhag pa'i sems kyi ting nge 'dzin 'thob la/ lhag pa'i sems la brten nas lhag pa'i shes rab skye ba'i phyir ro/ /'o na ci'i phyir lhag pa'i tshul khrims dang / lhag pa'i sems dang / lhag pa'i shes rab ces bya zhe na/lhag pa zhes bya ba ni dbang du bya ba'i don dang lhag pa'i don te/ de la dbang du bya ba'i don ni lhag pa'i sems kyi dbang du byas pa'i tshul khrims gang yin pa de ni lhag pa'i tshul khrims kyi bslab pa yin no/ /lhag pa'i shes rab kyi dbang du byas pa'i ting nge 'dzin gang yin pa de ni lhag pa'i sems kyi bslab pa yin no//sgrib pa spong ba'i dbang du byas pa'i shes pa dang mthong ba gang yin pa de ni lhag pa'i shes rab kyi bslab pa yin te/ de ni dbang du bya ba'i don to/ /lhag pa'i don ni bslab pa de rnams ni bde bar gshegs pa'i bstan pa 'di kho na la yod kyi 'di las phyi rol pa rnams dang thun mong ma yin pas phyi rol pa las lhag pa'i don te/de ni lhag pa'i don to/ /'o na bslab pa de gsum pa de dag la ji skad bstan pa bzhin so sor nges pa kho na yin nam zhe na/ lhag pa'i tshul khrims kyi bslab pa yod la lhag pa'i sems dang / lhag pa'i shes rab kyi bslab pa med pa yang yod kyi/ lhag pa'i shes rab kyi bslab pa yod la lhag pa'i sems dang lhag pa'i tshul khrims kyi bslab pa med pa dang /lhag pa'i sems kyi bslab pa yod la lhag pa'i tshul khrims kyi bslab pa med pa ni mi srid de/ de'i phyir gang na lhag pa'i shes rab kyi bslab pa yod pa de na lhag pa'i sems dang / lhag pa'i tshul khrims kyi bslab pa yang yod la/gang na lhag pa'i sems kyi bslab pa yod pa de na lhag pa'i tshul khrims kyi bslab pa yang yod par rig par bya ste/ bslab pa gsum gyis bsdus pa'i sa'i yon tan gzhan thams cad kyang tshul de bzhin du rig par bya'o/ /'bras bu la sogs pa'i tshig gi don la sogs pa bshad zin to// // de'i 'og tu mi mthun pa'i phyogs dang gnyen po la mkhas pa'i tshig gi don la sogs pa bshad par bya ste/ da ni sa bcu gcig po de dag gi so so'i mi mthun pa'i phyogs spang ba dang / gnyen po sgom pa dang / bsgoms pa'i 'bras bu thob pa dang / de gnyis ka'i gnas yongs su rdzogs pa la mkhas pa'o//de'i phyir yan lag du dag gis bsdus pa lags zhes zhus pa dang / yan lag bcu gcig gis bsdus par rig par bya'o zhes bya ba la sogs pa gsungs so/ /de la sa dang po'i mi mthun pa'i phyogs spang ba gang zhe na/ mos pas spyod pa'i sa zhes bya bas bstan te/ sa dang po'i mi mthun pa'i phyogs ni so so'i skye bo nyid do/ /de yang mos pas spyod pa'i sa man chad 'jig rten las 'das pa'i lam ma thob pa thams cad yin par sbyar ro/ /gnyen po bsgom pa gang zhe na/ byang chub sems dpa'i chos spyod pa rnam pa bcu po dag la mos pa shin tu bsgoms pa'i phyir bzod pas de las yang dag par 'das nas zhes bya bas bstan te/dang po sems bskyed pa nas bzung ste/ 'jig rten pa'i chos kyi mchog la thug gi bar du chos spyod pa bcu po/ theg pa chen po dang ldan pa'i mdo sde la sogs pa'i chos byang chub sems dpa'i sde snod kyis bsdus pa dag yi ger 'drir bcug ste/'dzin pa dang / mchod pa dang / gzhan dag la sbyin pa dang / ston pa na gus par byas te nyan pa dang / bdag nyid klog pa dang / kun chub par lung mnod pa dang / lung 'bogs pa rnams rgya cher dbyangs kyis kha don byed pa dang / gzhan dag la rgya cher yang dag par ston pa dang / gcig pu dben par song ste sems pa dang sgom pa'i rnam pas rjes su 'jug par byed pa dag gis bsdus pa'i dge ba'i rtsa ba shin tu bsags shing nges par byed pa'i cha dang mthun pa'i mos pa shin tu bsgom pa'i phyir chos stong pa la bzod pas mos pos spyod pa'i sa de las yang dag par 'das pa'i gnyen po bsgoms pa yin no//bsgoms pa'i 'bras bu thob pa gang zhe na/ byang chub sems dpa' nyid kyang skyon med pa la 'jug go zhes bya bas bstan te/ byang chub sems dpa'i yang dag pa nyid skyon med pa zhes bya ba ni 'jig rten las 'das pa'i sems dang po mngon par 'grub pa ste/sa dang po thob pa'o/ /de ni rnam pa bzhis bstan te/ gnas pa dang nges pa'i tshig dang / rab tu gnas pa dang / khyad par ro/ /de la gnas pa zhes bya ba ni thog mar na byang chub sems dpa' ji lta bu dag la sems de skye ba ste/ dge ba'i rtsa ba shin tu bsags pa'i gnas yod pa'o/ / dge ba'i rtsa ba shin tu bsags pa de yang rnam pa dgur rig par bya ste/ tshul khrims 'khor dang bcas pa legs par byas pa nyid kyi phyir chos bsags pa dang / ting nge 'dzin 'khor dang bcas pa legs par byas pa nyid kyi phyir spyod pa bsags pa dang / thos pa las byung ba'i shes pa legs par byas pa nyid kyi phyir bsnyen bkur byas pa bsags pa dang /bsams pa las byung ba'i shes pas pha rol tu phyin pa la sogs pa dge ba'i chos legs par rtogs pa nyid kyi phyir yongs su bsdus pa bsags pa dang / de kho na rtogs par sbyor ba'i sgom pa la gdams ngag legs par rnyed kyi phyir yongs su bzung ba bsags pa dang /de kho na rtogs pa thob pa nyid kyi phyir bsam pa rnam par dag pa bsags pa dang / sems can gyi don bya ba lhag pa'i bsam pa nyid kyi phyir shin tu rgyas pa bsags pa dang / thams cad mkhyen pa'i ye shes 'dod pa nyid kyi phyir mos pa bsags pa dang /snying brtse ba dang snying rje la mang du gnas pa'i phyir mngon du gyur pa bsags pa ste/ byang chub sems dpa' dge ba'i rtsa ba shin tu bsags pa'i gnas te de lta bu yod pa la sems de skye bas sa dang po la gnas pa yin no/ /gang gi phyir zhes bya ba ni ci la dmigs nas de skye ba ste/ sangs rgyas kyi ye shes yongs su zhes bya ba dang / spong ba dang mngon sum du byed pa dang / bsgom pa bla na med pa dang ldan pa mngon par 'dod pa'i phyir ro/ /sangs rgyas kyi ye shes de la yang las rnam pa dgu'i bye brag gis rnam pa dgur rig par bya ste/ sangs rgyas kyi stobs kyi ye shes dris pa lan 'debs pa'i las can dang /sangs rgyas kyi mi 'jigs pa'i ye shes phas kyi rgol ba tshar bcad pa'i las can dang / sangs rgyas kyi mnyam pa nyid kyi ye shes gang zag dang bdag med par rtogs par bya ba'i phyir gdams ngag sbyin pa'i las can dang / sangs rgyas kyis yongs su bskyab pa'i ye shes bsdu ba'i dngos po bzhi po dag gis sems can yongs su smin par byed pa'i las can dang /sangs rgyas kyi rnam par sbyong ba'i ye shes sems can yongs su smin par byed pa de'i gzhi yongs su sbyang ba'i las can dang / sangs rgyas kyis ma lus par mkhyen pa'i ye shes sangs rgyas kyi spyan gyis 'jig rten la nyin mtshan drug tu rnam par gzigs pa'i las can dang /sangs rgyas kyi chos yongs su sbyong ba'i ye shes dang / sems thogs pa med pa'i phyir/ zhing thams cad du thogs pa med pa dang / nyon mongs pa can ma yin pa'i sprul pas 'jug par byed pa'i las can dang / sangs rgyas kyi thugs su chud pa'i ye shes sems can de dag gi dus gsum gyi bsam pa bag la nyal skad cig gcig gis mkhyen pa'i las can dang /sangs rgyas kyi chos kyi 'khor lo rab tu bskor ba'i ye shes 'dzam bu'i gling bye ba phrag brgyar cig car chos kyi 'khor lo bskor bas rnam par thar pa'i thabs la mkhas pa'i las can te/sangs rgyas kyi ye shes de lta bu mngon par 'dod pa'i phyir sems de skye bas sa dang po la gnas pa yin no/ /gzhi gang yin pa zhes bya ba ni gzhi gang las sems ji lta bur mtshan nyid ci 'dra zhing gang gi bdag nyid du skye ba ste/ snying rje chen po sngon du 'gro ba'i gzhi las snying rje'i bdag nyid skye ba'o//snying rje chen po sngon du 'gro ba de yang snying rje chen po nyid rnam pa dgur rig par bya ste/ phra ba'i sdug bsngal nyid shes pa'i dbang gis skye ba nyid kyi phyir dbang du gyur pa chen po nyid dang / sems can sdug bsngal ba yongs su bskyab pa'i thabs la mkhas pa yongs su zad pa nyid kyi phyir yongs su 'dzin pa chen po nyid dang /de'i dus dang 'khor ba ji srid par sems can gyi don bya bar khas len pas 'phel ba nyid kyi phyir rab tu rtogs pa chen po nyid dang / de bzhin gshegs pa'i stobs dpag tu med pa 'bras bu yongs su 'dzin pa nyid kyi phyir dpag tu med pa chen po dang rgya chen po la mos pa dang zab mo shes pas mi mthun pa'i phyogs las rgyal ba nyid kyi phyir shin tu rnam par phye ba rnam par 'byed pa chen po nyid dang /rang gis mngon par rdzogs par byang chub pa la gzhol ba nyid kyi phyir rjes su mthun pa nyid dang khyad par du 'gro ba'i man ngag yongs su tshol ba nyid kyi phyir yang dag par tshol ba nyid dang /yon tan yongs su gzung ba gtsor byed pa nyid kyi phyir dam pa chen po dang / 'bras bu yid du 'ong ba'i rgyu zad mi shes pa dang / mya ngan las 'das pa la gzhol ba nyid kyi phyir gnas pa dang / mthar phyin pa chen po nyid dang /snying rje chen po sngon du 'gro ba'i gzhi de lta bu las snying rje'i bdag nyid du sems de skye bas sa dang po la gnas pa yin no/ /ci 'dra ba'i sems skye ba zhes bya ba ni sems de skyes na phan yon cir 'gyur ba ste/ sems de bskyed ma thag tu so so skye bo'i sa las shin tu 'das pa de 'dra ba'i sems skye ba'o/ /so so'i skye bo'i sa las shin tu 'das pa ni 'phags pa nyid de 'jig rten las 'das pa'i lam thob par ston to//shin tu 'das pa de yang rnam pa brgyad du rig par bya ste/ mngal du zhugs pa dang mthun pas 'jig rten las 'das pa'i sems dang por mngon par 'grub pa nyid kyi phyir zhugs pas shin tu 'das pa dang /rigs su skyes pa dang mthun pas de bzhin gshegs pa'i rigs su skyes pa nyid kyi phyir rigs kyi shin tu 'das pa dang 'dra ba'i bu dang mthun par theg pa chen po'i spyod pa las skyes pa nyid kyi phyir nad med pas shin tu 'das pa dang / 'gro ba gzhan du skyes pa dang mthun pas 'jig rten pa'i 'gro bas ma bsdus la 'jig rten las 'das pa'i 'gro ba las shin tu 'das pa dang /lung gi rang bzhin dang mthun pas snying rje'i bdag nyid kyis gzhan gyi dgongs pa bdag gi dgongs pa nyid yin pa'i phyir chos nyid kyis shin tu 'das pa dang / btsas nas gnas pa dang / mthun pas 'khor bar yongs su mi gtong la kun nas nyon mongs pa med pa'i thabs la mkhas pa gnas pa nyid kyi phyir gnas pa shin tu 'das pa dang / btsas nas 'tsho ba dang mthun pas stong pa nyid rtogs pa'i 'phags pa'i shes rab kyi phyir mnyam pa nyid kyis shin tu 'das pa dang / phun sum tshogs pa dang mthun pas sangs rgyas kyi rigs las yongs su mi nyams shing /mya ngan las 'das pa las gzhol ba nyid kyi phyir nges pas shin tu 'das pa ste/ de ltar sems de bskyed ma thag tu so so'i skye bo'i sa las shin tu 'das pa de 'dra ba'i sems skye bas sa dang po la gnas pa yin no/ /de la nges pa'i tshig ces bya ba ni ci'i phyir sa dang po rab tu dga' ba zhes bya bar rnam par gzhag ce na/bdag dang gzhan gyi don phun sum tshogs pa'i gnas pa nyid bla na med pa thog mar thob pas mchog tu dga' ba zhes bya ba'i phyir rab tu dga' ba zhes bya ste/ de ni 'og ma nas mi la mkhas pa'i skabs su bstan to/ /de la rab tu gnas pa zhes bya ba ni bsam pa phun sum tshogs pa dang /sbyor ba phun sum tshogs pa dang / yongs su bsngo ba phun sum tshogs pas sa rgya cher yongs su sbyong ba dang sbyor bar byed pa'o/ /de la bsam pa phun sum tshogs pa zhes bya ba ni yid ches pa dang / dang ba'i dbang gis bsam pa phun sum tshogs pas sbyor bar byed pa'o//yid ches pa de yang dngos po gang dag la yid ches pa de dbang byed pa de'i bye brag gis dbang byed pa de rnam pa dgur rig par bya ste/ dkon mchog gsum po dag la yid ches pa'i dbang dang / bdag gis rtogs pa la rnam par dag pa'i yid ches pa'i dbang dang / gzhan gyis rtogs pa la srid par 'dzin pa'i yid ches pa'i dbang dang / sems can yongs su smin par bya ba'i phyir snying brtse ba dang / snying rje'i yid ches pa'i dbang dang / sems can yongs su smin par bya ba de nyid kyi phyir byams pa'i yid ches pa'i dbang dang / de yongs su smin par bya ba tshe rabs du mar rab tu bsgrub pa'i phyir yun ring du 'khor bar khas blangs pa'i phyir yongs su mi skyo ba'i dad pa'i dbang dang /nyon mongs pa can ma yin par 'khor bar bya ba'i phyir ser sna la sogs pa pha rol tu phyin pa'i mi mthun pa'i phyogs kyi chos la 'dzem pa'i phyir tshul gang dang ngo tsha shes shing khrel yod pa'i dad pa'i dbang dang /chos mthun pa la rnam par tho mi mtshams pa'i phyir des pa'i dad pa'i dbang ste / de la bsti stang byed pa'i phyir bstan pa la yid ches pa'i dbang ste/ de lta bu'i bsam pa phun sum tshogs pas sbyor bar byed pa yin no/ /sbyor ba phun sum tshogs pa zhes bya ba ni dge ba'i rtsa ba la sogs pa la rgyun mi 'chad par mngon par brtson pas sbyor bar byed pa'o//dge ba'i rtsa ba ba sogs pa de yang rnam pa brgyad du rig par bya ste/ chud mi za bar bya ba'i phyir bsnyen bkur byed pa sogs pa dang / 'brel pa'i gtam rnam par gtan la 'bebs pa la dga' ba'i phyir chos kyi kun dga' dag la sogs pa dang /mang du thos pa tshol ba la ngoms mi myong ba'i phyir mang du thos pa la sogs pa dang / ji skad thos pa'i chos la tshul bzhin du rtog pa'i phyir rtog pa sogs pa dang / bsam gtan ro myang ba med pa'i phyir gnas med pa sogs pa dang / byang chub sems dpa'i bslab pa rnams la bar du gcod pa yongs su spang ba'i phyir rnyed pa dang bkur sti thob pa dang / ma thob pa la lhag par chags pa med pa la sogs pa dang / de nyid kyi phyir yo byad la mngon par dga' ba med pa la sogs pa dang / 'jig rten las 'das pa'i sems rgyun mi 'chad par mngon du byed pa'i phyir rin po che lta bu'i sems la sogs pa ste/de lta bu ni sbyor ba phun sum tshogs pas sbyor bar byed pa yin no/ /yongs su bsngo ba phun sum tshogs pa zhes bya ba ni thams cad mkhyen pa'i sa mngon par 'dod pa'i thabs kyis sbyor bar byed pa thams cad mkhyen pa'i sa mngon par 'dod pa dang /ji ltar mngon par 'dod pa'i bye brag gi rnam pa bcu gcig tu rig par bya ste/ de bzhin gshegs pa'i stobs la sogs pa la dmigs pas thams cad mkhyen pa'i sa mngon par 'dod pa dang / rnam par dag pas thams cad mkhyen pa'i sa mngon par 'dod pa dang /yongs su spong bas thams cad mkhyen pa'i sa mngon par 'dod pa dang / de skad smras pa de bzhin byed pas thams cad mkhyen pa'i sa mngon par 'dod pa dang / rjes su bsrung bas thams cad mkhyen pa'i sa mngon par 'dod pa dang / rigs su 'byin par byed pas thams cad mkhyen pa'i sa mngon par 'dod pa dang /mi g.yo bas thams cad mkhyen pa'i sa mngon par 'dod pa dang / mi 'dor la ldan pas thams cad mkhyen pa'i sa mngon par 'dod pa dang / sogs pas thams cad mkhyen pa'i sa mngon par 'dod pa dang / tshol bas thams cad mkhyen pa'i sa mngon par 'dod pa ste/ de lta bu ni yongs su bsngo ba phun sum tshogs pas sbyor bar byed pa yin no/ /de ltar bsam pa phun sum tshogs pa dang / sbyor ba phun sum tshogs pa dang / yongs su bsngo ba phun sum tshogs pa ni sa rgya cher yongs su sbyong ba ni sbyor bar byed pa yin te/ sbyor ba ni rnam pa bzhi ste/ dad pa dang / 'dun pa dang /brtson 'grus dang / thabs so/ /de la bsam pa phun sum tshogs pa las dad pa'i dbang zhes bya ba ni dad pa ste/ des na 'dun pa gsum pa yin no/ /sbyor ba phun sum tshogs pa las dge ba'i rtsa ba sogs pa las rgyun mi 'chad par mngon par brtson pa zhes bya ba ni brtson 'grus yin no/ /yongs su bsngo ba phun sum tshogs pa las thams cad mkhyen pa'i sa mngon par 'dod pa zhes bya ba ni thabs yin no//de la khyad par zhes bya ba ni sa dang po la gnas pa khyad par gang gis nyan thos dang rang sangs rgyas rnams las khyad par du 'phags pa'o/ /de ni rnam pa gsum ste/ 'dun pa'i khyad par dang / sgrub pa'i khyad par dang /'bras bu'i phan yon gyi khyad par ro/ /de la 'dun pa'i khyad par zhes bya ba ni smon lam chen po mngon par bsgrub pa'o/ /smon lam chen po mngon par sgrub pa de yang dge ba'i smon lam gyi bye brag las rnam pa bcur rig par bya ste/ phyi ma la de bzhin gshegs pa la mchod pa dang / rim gro rnam pa thams cad dpag tu med par bya ba'i smon lam chen po dang / sangs rgyas bcom ldan 'das rnams kyi dam pa'i chos yongs su gzung zhing bsrung ba dang / chos kyi tshul yang dag par gzung bar bya ba'i smon lam chen po dang / dga' ldan gyi gnas na bzhugs pa nas yongs su mya ngan las 'das pa'i bar gyi smon lam chen po dang /byang chub sems dpa'i spyod pa'i rnam pa thams cad legs par spyad par bya ba'i smon lam chen po dang / sems can yongs su smin par bya ba'i smon lam chen po dang / 'jig rten gyi khams thams cad rnam par bsten par bya ba'i smon lam chen po dang / sangs rgyas kyi zhing yongs su dag par bya ba'i smon lam chen po dang / theg pa chen po la 'jug par bya ba'i phyir byang chub sems dpa' thams cad dang / bsam pa dang sbyor ba gcig par bya ba'i smon lam chen po dang / yang dag pa'i sbyor ba thams cad 'bras bu yod par bya ba'i smon lam chen po dang /bla na med pa yang dag par rdzogs pa'i byang chub mngon par rdzogs par sangs rgyas par bya ba'i smon lam chen po ste/ de ltar yang dag pa'i smon lam gyi bye brag smon lam chen po bcu po de dag re re la yang smon lam gyi 'khor 'bum phrag grangs med pa dag mngon par sgrub par byed pa ni 'dun pa'i khyad par zhes bya'o//sgrub pa'i khyad par zhes bya ba ni de ltar smon lam shin tu sgrub pa ste las su rung ba'i sems dang gnyen po'i sems su gyur pas dad pa la sogs pas yongs su sbyong ba'i chos sgrub par byed pa'o/ /'bras bu'i phan yon gyi khyad par ni rnam pa bzhi ste/ las su rung ba'i 'bras bu'i phan yon gyi khyad par dang /'jug pa'i 'bras bu'i phan yon gyi khyad par dang / rnam par smin pa yongs su 'dzin pa'i 'bras bu'i phan yon gyi khyad par dang / smon lam shes pa 'bras bu'i phan yon gyi khyad par ro/ /de la las su rung ba'i 'bras bu'i phan yon gyi khyad par zhes bya ba ni gser gyi sa le sbram yongs su sbyang ba byas nas las su rung ba dang 'dra bar dad pa la sogs pa'i dge ba'i chos de dag sangs rgyas dang chos dang dge 'dun la mchod pa byed pas phan yon gyi zhing bkod pa dang /sems can yongs su smin par byed pas snying rje'i zhing bkod pa dang / byang chub tu yongs su sngo bar byed pas bla na med pa'i 'bras bu dgod pas yongs su sbyang ba byas na gong nas gong du las su rung bar 'gyur ba'o//'jug pa'i 'bras bu'i phan yon gyi khyad par zhes bya ba ni ded dpon chen pos 'gron pa mang po rgya mtsho las sgrol ba dang 'dra bar byang chub sems dpa' ded dpon chen por gyur pas sems can 'gron pa phal po che thams cad mkhyen pa nyid kyi grong khyer chen por phyin par bya ba'i phyir yang dag par sbyor bar byed pa'o//rnam par smin pa yongs su 'dzin pa'i 'bras bu'i phan yon gyi khyad par zhes bya ba ni rnam pa gnyis te/ lus kyi che ba ni 'dzam bu'i gling gi dbang phyug nyid du 'gyur ba'o//rgyu mthun pa rgya che ba ni gtong ba chen pos sems can rnams sdud pa'i gtso bor gyur cing ser sna'i dri ma zlog pa la mkhas pa dang / de bzhin gshegs pa'i bstan pa la rab tu byung ba dang / skad cig thang cig yud tsam cig la ting nge 'dzin brgya rab tu thob cing snyoms par 'jug pa la sogs pa'o //smon lam shes pa'i 'bras bu'i phan yon gyi khyad par zhes bya ba ni de yan chad byang chub sems dpa'i smon lam gyi stobs can rnams smon lam khyad par can gyi rnam par 'phrul te/ de dag gi lus sam/ 'od dam/ rdzu 'phrul lam/ mig gam/ spyod yul lam/ dbyangs sam/ spyod pa'am/ bkod pa'am/ byin gyis brlabs sam/ mos pa'am/ mngon par 'du byed pa dag kyang bskal pa bye ba khrag khrig 'bum phrag ji snyed pa de snyed du yang brjod par sla ba ma yin no zhes gsungs so/ /gnas pa dang khyad par de dag thob pas na de yan lag des yongs su rdzogs pa yin zhes bya ba gsungs te/mi mthun pa'i phyogs spangs pa dang / gnyen po bsgom pa dang / bsgoms pa'i 'bras bu thob pa'i phyir ro/ /sa gnyis pa'i mi mthun pa'i phyogs spangs pa gang zhe na/ ltung ba phra mo'i 'khrul pa kun du 'byung ba dag la shes bzhin du spang bar mi nus pas/ de yan lag des yongs su rdzogs pa yin te zhes bya bas bstan te/ sa gnyis pa'i mi mthun pa'i phyogs ni lus la sogs pas sems can rnams la log par bsgrub pa'o/ /de yang sa dang po la lhag pa'i bsam pa dag pa la gnas su zin kyang byang chub sems dpa'i tshul khrims kyi ltung ba phra mo sems bskyed pa la sogs pa ngo bo nyid kyi 'khrul pa la so sor brtag pa'i bya bas bsrung dgos pa nyid yin par sbyar ro//gnyen po'i bsgom pa gang zhe na/ de yan lag des yongs su rdzogs par bya ba'i phyir 'bad pas zhes bya bas bstan te/ sa dang po nas gnyis par 'phar ba'i gnas skabs na 'byung bar byed pa rnam par dag pa zhes bya ba drang po'i bsam pa thob pas sa dang po las gnas 'phar zhing gnyis pa gnon par gyur pa de la 'bad pa'o//de la 'byung bar byed pa rnam par dag pa zhes bya ba ni byang chub sems dpa'i sa dang po la legs par yongs su sbyang ba byas pa'i byang chub sems dpa'i sa gnyis pa la mngon par 'dod pa na/mngon par rtogs pa dang ldan pa'i byang chub sems dpa'i 'jig rten las 'das pa'i lam la gnas te/ tshul khrims rnam par dag pa'i dbang du byas nas/ sa dang po nas gnyis pa'i bar du 'byung bar byed pa'o/ /drang po'i bsam pa zhes bya ba ni so sor brtag pa'i bya ba med pas tshul khrims rnam par dag pa'i dbang du byas pa'i sems kyi bsam pa ste/de la 'bad pa ni gnyen po bsgoms pa yin no/ /bsgoms pa'i 'bras bu thob pa gang zhe na/ de yang 'thob po zhes bya bas bstan te/ sa gnyis pa la rang bzhin rnam par dag pas gnas pa dang /'bras bu'i phan yon gyi khyad par gyis khyad par bstan pa thob po/ /de la rang bzhin rnam par dag pa zhes bya ba ni tshul khrims rnam par dag pa rnam pa gsum ste/ sdom pa'i tshul khrims rnam par dag pa dang / dge ba'i chos sdud pa'i tshul khrims rnam par dag pa dang / sems can gyi don bya ba'i tshul khrims rnam par dag pa'o/ /de la sdom pa'i tshul khrims rnam par dag pa ni rnam pa gnyis te/ rnam pa thams cad spangs pa dang / rtag tu rgyun mi 'chad par rjes su bsrung bar skyon med pa'o/ /de la rnam pa thams cad spangs pa zhes bya ba ni mi dge ba bcu'i las kyi lam thams cad spang zhing dge ba bcu'i las kyi lam thams cad yang dag par blangs te gnas pa'o//rtag tu rgyun mi 'chad par rjes su bsrung ba skyon med pa zhes bya ba ni de ltar dge ba bcu'i las kyi lam thams cad yang dag par blangs te/ gnas pa de la 'byung 'jug med pa ste/ de gnyis kyis ni ngang tshul ngan pa'i dri ma dang bral ba bstan to//dge ba'i chos sdud pa'i tshul khrims rnam par dag pa yang rnam pa gnyis te/ mi mthun pa'i phyogs dang gnyen por gyur pa la 'bras bu dang bcas pa'i las kyi lam du rab tu brtags nas gnyen po mngon par sgrub par sbyor bar 'dod pa dang /dge ba'i las kyi lam gong nas gong du rnam par dag pas 'bras bu dang bcas la rab tu brtags nas mchog mngon par sgrub par sbyor bar 'dod pa'o/ /de la dang po ni ngan 'gro dang bde 'gro'i las kun du spyod pa'i rgyus 'bras bu yang dag par 'grub pa rnam par gzhag pa yang dag pa ji lta ba bzhin du rab tu shes nas ngan 'gro'i rgyu'i las yang dag par len par byed pa'o//gnyis pa ni dge ba bcu'i las kyi lam de dag theg pa gsum gyi tshul gyis sgrub pa'i rgyus gong nas gong du 'bras bu yang dag par 'grub pa rnam par gzhag pa yang dag pa ji lta ba bzhin du rab tu shes nas/ de lta bas na bdag gis mngon par sgrub tu 'dra ba la rnam pa thams cad yongs su sbyang zhing mngon par sgrub pa nyid la brtson par bya'o zhes de bas kyang yang dag par slob par byed pa ste/de gnyis ni log par rtsol ba'i dri ma dang bral ba bstan to/ /sems can gyi don bya ba'i tshul khrims rnam pa lnga ste/yongs su shes pa dang / smon lam dang / sgrub pa dang / rgyu mthun pa dang / rgyu mthun pa'i 'bras bu'o/ /de la yongs su shes pa ni rnam pa gsum ste/ gnas skabs kyi 'bras bu yongs su shes pa ni mi dge ba'i las kyi lam chen po dang / 'bring dang / chung ngu ngan song gsum du rim bzhin du 'gro bar yongs su shes pa'o//rnam par smin pa ni 'bras bu'i bye brag yongs su shes pa ni mi dge ba'i las kyi lam re res kyang ngan song gsum du rnam par smin pa'i 'bras bu bskyed par yongs su shes pa'o/ /rgyu mthun pa'i 'bras bu'i bye brag yongs su shes pa ni brgya la mir skye na yang rgyu mthun pa'i 'bras bu gnyis gnyis myong bar 'gyur bar yongs su shes pa'o//smon lam zhes bya ba ni sems can gyi don bya ba'i don du dge ba'i chos bsdu ba'i phyir theg pa chen po'i mngon par dga' ba nyid kyi bsam pa smon pa'o/ /sgrub pa zhes bya ba ni bdag kyang dge ba'i las kyi lam la gnas par byed cing /de'i mi mthun pa'i phyogs spong bar byed la gzhan dag kyang de la 'jog par sgrub pa'o/ /rgyu mthun pa zhes bya ba ni snying rje skyes pa la brten nas sems can rnams la de bas kyang shas cher snying rje'i sems bskyed pa'o/ /rgyu mthun pa'i 'bras bu zhes bya ba ni snying rje'i khyad par gyis yongs su zin pa'i mthun pa'i khyad par gyis sems can rnams la sdug bsngal bar rtog cing gnyen po sgrub par byed pa ste/de la ngas kyang log par rtsol ba'i dri ma dang bral bar bstan to/ /'bras bu'i phan yon gyi khyad par zhes bya ba ni sngar sa dang po'i skabs su las su rung ba'i 'bras bu'i phan yon gyi khyad par dang /'jug pa'i 'bras bu'i phan yon gyi khyad par gyi rnam par smin pa yongs su 'dzin pa 'bras bu'i phan yon gyi khyad par dang / smon lam shes pa 'bras bu'i phan yon gyi khyad par bstan pa dag nyid 'dir snga ma las gong nas gong du khyad par du 'phags pa ci rigs pa'o//de gnyi ga'i gnas yongs su rdzogs pa gang zhe na/ de yan lag des yongs su rdzogs pa yin zhes bya bas bstan te/ mi mthun pa'i phyogs spang ba dang / gnyen po de gnyi ga'i gnas pa'i dngos gzhi yongs su rdzogs pa yin te/ bsgoms pa'i 'bras bu thob pa'i phyir sa gsum pa'i mi mthun pa'i phyogs spang ba gang zhe na/'jig rten pa'i ting nge 'dzin yongs su rdzogs pa la snyoms par 'jug pa dang / thos pa'i gzungs yongs su rdzogs par thob par mi nus pas de yan lag des yongs su ma rdzogs pa yin te zhes bya bas bstan te/ sa gsum pa'i mi mthun pa'i phyogs ni thos pa dang bsam pa dang /bsgom pa'i chos rnams brjed pas mun pa'i tshul can nyid do/ /de yang sa gnyis pa la lhag pa'i bsam pa dag pa'i gzhis rang bzhin gyis tshul khrims dang ldan pa la gnas su zin kyang 'jig rten pa'i bsam gtan dang / rnam par thar pa dang /ting nge 'dzin dang / snyoms par 'jug pa dag la dbang yongs su rdzogs pa mthong ba dang / thob pa yongs su tshol ba'i gzungs yongs su rdzogs pa nyid ma thob pa nyid yin pa dang sbyar ro/ /gnyen po sgom pa gang zhe na/ de yan lag des yongs su rdzogs par bya ba'i phyir 'bad pas zhes bya bas bstan te/sa gnyis pa nas gsum par 'phar ba'i gnas skabs na 'dod chags dang bral bar sbyor ba 'byung bar byed pa zhes bya ba dag pa'i sems kyi bsam pa yin la byed pa'i rgyus 'dod chags dang bral bar sbyor ba zhes bya ba sbyor ba rnam pa gsum thob pas sa gnyis las 'phar zhing gsum pa gnon par 'gyur ba de la 'bad pa'o//de la 'dod chags dang bral ba sbyor ba 'byung bar byed pa zhes bya ba ni byang chub sems dpa'i sa gnyis pa la lhag pa'i bsam pa yongs su sbyang ba'i byang chub sems dpa' de byang chub sems dpa'i sa gsum pa gnon pa na 'dod pa'i 'dod chags dang bral ba'i bsam gtan dang /gzugs med pa'i snyoms par 'jug pa la sbyor ba'i rgyu 'dod chags dang bral bar sbyor ba zhes bya ba sbyor ba rnam pa gsum 'byung bar byed pa'i sems kyi bsam pa yid la byed pa'o/ /dag pa'i sems kyi bsam pa yid la byed pa zhes bya ba ni 'dod chags dang bral bar sbyor ba'i sems kyi bsam pa dag pa de 'byung ba'i rgyu yid la byed pa'o//'dod chags dang bral bar sbyor ba ni zhes bya ba ni 'dod pa'i 'dod chags dang bral ba'i bsam gtan dang / gzugs med pa'i snyoms par 'jug pa nye bar sgrub ste/ gnas par ma gyur gyi bar du de la sbyor ba'i rgyu gang yin pa'o//sbyor ba rnam pa gsum zhes bya ba ni kun nas nyon mongs pa las kun du bsrung ba'i sbyor ba dang / theg pa dman pa kun du bsrung ba'i sbyor ba dang / thabs yongs su gzung ba'i sbyor ba'o/ /de la kun nas nyon mongs pa las kun du bsrung ba'i sbyor ba ni rnam pa gnyis te/ 'du byed du gyur pa thams cad la mi rtag pa'i yongs su rtog pa dang /mngon du brten par bya ba ma yin par yongs su rtog pa'o/ /de la mi rtag par yongs su rtog pa zhes bya ba ni 'du byed thams cad la tshe'i 'du byed mi gnas pas nyes dmigs sna tshogs kyis sun 'byin par byed pa'o/ /mngon du brten par bya ba ma yin par yongs su rtog pa zhes bya ba ni de dag la rten med pas sems skyo ba skyed par byed pa'o//theg pa dman pa la kun du bsrung ba'i sbyor ba ni rnam pa gsum ste/ de bzhin gshegs pa'i ye shes la yang dag par gtong ba dang / sems can rnams la sems kyi bsam pa nye bar 'jog pa dang /sems can yongs su skyob pa'i phyir brtson 'grus rtsom par byed pa'o/ /de la de bzhin gshegs pa'i ye shes la yongs su gtong ba zhes bya ba ni sangs rgyas kyi ye shes yon tan yongs su 'dzin pa che ba nyid dang / rnam par dag pa che ba nyid dang ldan pa la yon tan sna tshogs kyis phan yon du lta zhing de la 'dod pa skyes pa yin no//sems can rnams la sems kyi bsam pa nye bar 'jog pa zhes bya ba ni snying theg pa nas 'dug pas sems can gyi khams la mgon med pa'i sdug bsngal rnam pa sna tshogs kyi sdug bsngal bar blta'o/ /sems can yongs su skyob pa'i phyir brtson 'grus rtsom par byed pa zhes bya ba ni rnam pa gsum ste/gang las yongs su bskyab par bya ba'i las dang / nyon mongs pa dang skye ba'i kun nas nyon mongs pa las so/ /ji ltar yongs su bskyab par bya ba ni bslab pa gsum 'dzin du gzhug pa'o/ /ji ltar na yongs su skyob pa por gyur pa ni mya ngan las 'das pa'i dbyings rnam pa gnyis thob par byed pa'o//thabs yongs su gzung ba'i sbyor ba yang rnam pa gsum ste/ mthar phyin pa'i rtogs pa dang / mthar phyin pa sgrub pa'i gong nas gong ma rtogs pa dang / de sgrub pa'i gnas la sbyor ba rtogs pa'o/ /de la mthar phyin pa rtogs pa zhes bya ba ni sems can de dag gtan du sdug pa las rnam par grol bar bya ba'i thabs ni nyon mongs pa thams cad kyis ma bsgribs pa sangs rgyas kyi mthar phyin pa'i ye shes kho na yin par mthong ba'o//mthar phyin pa sgrub pa'i gong nas gong ma rtogs pa zhes bya ba ni shes rab kyi snang ba de sgrub pa'i gnas ni bsam gtan dang /ting nge 'dzin yin la de la sbyor ba ni byang chub sems dpa'i sde snod mnyan pa sngon du 'gro ba yin par mthong ba ste/ 'di'i dus na gang zag la mngon par zhen pas 'phangs pa chos khong du chud pa'i mngon pa'i nga rgyal ni yod do/ /de la kun nas nyon mongs pa las kun du sbyor bas ni 'dod pa'i 'dod chags dang bral bar byed pa theg pa dman pa las kun du bsrung ba'i sbyor bas ni nyan thos dang rang sangs rgyas kyi sar lhung bar mi byed do//thabs yongs su gzung bas ni shes rab kyi snang ba tshad med pa'i gnas su gyur pa'i ting nge 'dzin dang thos pa'i gzungs mngon par sgrub par byed de/de la 'bad pa ni gnyen po sgom pa yin no/ /bsgoms pa'i 'bras bu thob pa gang zhe na/ de yang 'thob po zhes bya bas bstan te/ sa gsum pa la 'dod chags dang bral ba dang 'dod chags dang bral ba'i 'bras bu'i gnas pa dang / 'bras bu'i phan yon gyi khyad par gyis khyad par thob par bstan pa'o//de la 'dod chags dang bral ba zhes bya ba ni bsam gtan dang gzugs med pa'i snyoms par 'jug pa thob pa'o/ /'dod chags dang bral ba'i 'bras bu zhes bya ba ni tshad med pa bzhi dang / mngon par shes pa lnga thob pa'i gzungs thob pa'o/ /'bras bu'i phan yon gyi khyad par ni snga ma bzhin no//gnas pa dang khyad par de dag thob pas na de yan lag des yongs su rdzogs pa yin zhes bya ba gsungs te/ mi mthun pa'i phyogs spang ba dang / gnyen po bsgom pa dang / bsgoms pa'i 'bras bu thob pa'i phyir ro/ /sa bzhi pa'i mi mthun pa'i phyogs spang ba gang zhe na/byang chub kyi phyogs dang mthun pa'i chos ji ltar thob pa dag gis de la mang du gnas par bya ba dang / snyoms par 'jug pa la sred pa dang / chos la sred pa las sems lhag par btang snyoms su 'jog mi nus pas de yan lag des yongs su rdzogs pa yin te zhes bya bas bstan te/sa bzhi pa mi mthun pa'i phyogs ni 'jig tshogs la lta ba la sogs pas bsdus pa'i lhan cig skyes pa'i nyon mongs pa phra mo kun du 'byung ba'o/ /de yang gsum pa las lhag pa'i tshul khrims la gnas pa'i rnam par dag pa'i gzhi dag gis 'jig rten pa'i bsam gtan dang / rnam par thar pa dang /ting nge 'dzin dang / snyoms par 'jug pa dag la gnas su zin kyang bden pa rtogs par bya ba'i phyir dran pa nye bar gzhag pa la sogs pa byang chub kyi phyogs dang mthun pa'i chos sum cu rtsa bdun yang dag par rab tu rnam par 'byed par mi nus pa dang / 'jig rten pa'i snyoms par 'jug pa dang thos pa'i chos la sred pa las sems lhag par btang snyoms su 'jog mi nus pa nyid yin pa dang sbyar ro//gnyen po bsgoms pa gang zhe na/ de yan lag des yongs su rdzogs par bya ba'i phyir 'bad pas zhes bya bas bstan te/ sa gsum pa nas bzhi par 'phar ba'i gnas skabs na/rnam par dag pa dang gnyen po sgom pa 'phel ba'i rgyu rnam par gzhag pa zhes bya ba chos la snang bar 'jug pa thob pas gsum pa las 'phar zhing bzhi pa nod par gyur pa de la 'bad pa'o/ /de la rnam par dag pa dang gnyen po bsgom pa 'phel ba'i rgyu zhes bya ba ni sa gsum pa la snang ba shin tu yongs su dag pa'i byang chub sems dpa' de byang chub sems dpa'i sa bzhi pa nod pa nas bzhi pa la rnam par dag pa 'phel ba zhes bya ba ye shes yongs su smin par byed pa'i chos kyi ye shes yongs su smin pas de bzhin gshegs pa'i rigs su de'i bdag nyid kyi chos thos pa'i phyir de bzhin gshegs pa'i rigs su yang dag par grub pa dang /gnyen po sgom pa 'phel ba zhes bya ba kun nas nyon mongs pa'i gnyen po byang chub kyi phyogs dang mthun pa'i chos bsgom pa 'phel bar 'gyur ba de gnyis kyi rgyu'o/ /chos la snang bas 'jug pa zhes bya ba de bzhin gshegs pa'i bstan pa'i chos rnam par dpyad pa tha dad pa la sa gsum pa'i sa rtogs pa'i shes rab kyi snang bas chos rnam par dpyad pa tha dad pa de dag rtogs par byed pa ste/de ni sa gsum pa'i dus na gang zag la mngon par zhen pas 'phangs pa chos khong du chud pa'i nga rgyal gyi gnyen po dag sa bzhi pa nyid kyi rnam par dag pa dang /gnyen po sgom pa 'phel ba'i rgyu yang yin te/ de la 'bad pa ni gnyen po bsgoms pa yin no/ /bsgoms pa'i 'bras bu 'thob pa gang zhe na/ de yang 'thob po zhes bya bas bstan te/ sa bzhi pa rnam par dag pa 'phel ba rnam par gzhag pa dang / gnyen po bsgoms pa rnam par 'phel ba rnam par gzhag pa dang /de'i 'bras bu rnam par gzhag pas gnas dang 'bras bu'i khyad par gyis khyad par thob pa bstan pa thob pa'o/ /de la rnam par dag pa 'phel ba zhes bya ba ni yongs su smin par byed pa'i chos kyi yongs su smin pas de bzhin gshegs pa'i rigs su de bdag nyid kyis thob pa'i phyir de bzhin gshegs pa'i rigs su yang dag par 'grub pa yin no//de la ye shes yongs su smin par byed pa'i chos thob pa zhes bya ba ni ye shes bzhi po rang gi gnas la gnas pa'i ye shes byang chub sems dpa'i theg pa chen po la gnas pa yongs su smin par byed pa'i chos kyi phyir mi ldog pa'i bsam pa dang /dkon mchog gsum la dad pa dang ldan pa'i ye shes dkon mchog gsum gyi rnam pa shes nas dad pa yongs su smin par byed pa'i chos dkon mchog gsum la dad pa mi byed pa'i mthar thug pa'i 'gro ba dang / de bzhin nyid kyi ye shes gang zag dang / chos bdag med pa'i de bzhin nyid shes pa yongs su smin par byed pa'i chos 'du byed kyi skye ba dang 'jig pa dang /rang bzhin gyis ma skyes par rnam par 'jig pa dang / rnam par gzhag pa'i ye shes kun nas nyon mongs pa dang / rnam par byang ba rnam par gzhag pa shes pa yongs su smin par byed pa'i chos 'jig rten 'byung ba dang /las kyi srid par skye ba la rnam par 'jig pa la sogs pa thob pa'o/ /de bzhin gshegs pa'i rigs su de'i bdag nyid kyi chos thob pa zhes bya ba ni chos gang gis de bzhin gshegs pa rab tu phye ba shes bya'i sgrib pa gcod pa yongs su 'dzin par 'gyur ba'i chos thob pa'o//de bzhin gshegs pa'i rigs su yongs su grub pa yin no zhes bya ba ni de ltar ye shes yongs su smin par byed pa'i chos kyi ye shes yongs su smin pas mang du thos pa'i gnas kyis ye shes khyad par du zhugs par gyur pas shes bya'i sgrib pa spong ba yongs su 'dzin pa'i khyad par yongs su grub pa ste/de'i dus na dus gsum gyi sangs rgyas rnams kyi stobs la sogs pa rnam par dag pa'i rgyud tha dad par lta ba'i nga rgyal ni yod do/ /gnyen po bsgom pa'i 'phel ba zhes bya ba ni kun nas nyon mongs pa'i gnyen po byang chub kyi phyogs dang mthun pa'i chos bsgom pa 'phel ba'o/ /de yang rnam pa gnyis te/kun nas nyon mongs pa las kun du bsrung ba'i phyir bsgom pa 'phel ba dang / theg pa dman pa las kun du bsrung ba'i phyir bsgom pa 'phel ba'o/ /de la kun nas nyon mongs pa las kun du bsrung ba'i phyir bsgom pa 'phel ba zhes bya ba ni 'dod pa'i 'dod chags la sogs pa bsgom pas spang bar bya ba'i kun nas nyon mongs pa spang ba'i phyir byang chub kyi phyogs dang mthun pa'i chos sum cu rtsa bdun bsgom pa'o//theg pa dman pa las kun du bsrung ba'i phyir sgom pa zhes bya ba ni byang chub kyi phyogs de dag sems can thams cad lta ba dang bcas pas sgom pa'o/ /de'i 'bras bu zhes bya ba ni rnam pa drug ste/nyon mongs pa'i kun nas nyon mongs pa spang ba dang / las kyi kun nas nyon mongs pa spang ba dang / khyad par thob par bya ba'i phyir 'dun pa drag po dang / de ston pa'i ston pa la byas pa gzo ba dang / de'i thabs la sbyor ba la brtson 'grus brtsams pa dang / de sngon du 'gro ba'i khams brtas pa'o/ /'bras bu'i phan yon gyi khyad par ni snga ma bzhin no/ /gnas dang khyad par de dag thos pas na de yan lag des yongs su rdzogs pa yin zhes gsungs te/ mi mthun pa'i phyogs spang ba dang / gnyen po bsgom pa dang / bsgoms pa'i 'bras bu thob pa'i phyir ro//sa lnga pa'i mi mthun pa'i phyogs spang ba gang zhe na/ bden pa rnams rnam par dpyad pa dang 'khor ba dang mya ngan las 'das pa dag la gcig tu mi phyogs pa nyid dang / mngon du phyogs pa'i yid la byed pa rtag par btang snyoms su gzhag pa ste/ thabs kyis yongs su zin pa'i byang chub kyi phyogs dang mthun pa'i chos rnams bsgom par mi nus pas de yan lag des yongs su rdzogs pa yin te zhes bya bas bstan te/sa lnga pa'i mi mthun pa'i phyogs ni theg pa dman pas yongs su mya ngan las 'da' ba'o/ /de yang sa bzhi pa la 'jig rten pa'i shes pa rnam par dag pa'i gnas su gyur pa'i ting nge 'dzin la brten nas bden pa rtogs par bya ba'i phyir dran pa nye bar gzhag pa la sogs pa byang chub kyi phyogs dang mthun pa'i chos sum cu rtsa bdun yang dag par rab tu rnam par 'byed pa la gnas su zin kyang gnas pa'i bden pa rnams yang dag pa ji lta ba bzhin du rtogs par mi nus pa dang /dus gsum gyi sangs rgyas rnams kyi stobs la sogs pa rnam par dag pa'i rgyu tha dad par lta ba'i nga rgyal yod pa nyid yin par sbyar ro/ /gnyen po bsgom pa gang zhe na/ de yan lag des yongs su rdzogs par bya ba'i phyir 'bad pas zhes bya bas bstan te/ sa bzhi pa nas lnga par 'phar ba'i gnas skabs na nga rgyal gyi khyad par gyi gnyen po rnam par gzhag pa zhes bya ba rnam par dag pa la sems kyi mnyam pa nyid thob pas sa bzhi pa las 'phar zhing sa lnga pa gnon par gyur pa de la 'bad pa'o//de la nga rgyal gyi khyad par gyi gnyen po rnam par gzhag pa zhes bya ba ni byang chub sems dpa'i sa bzhi pa la lam yongs su rdzogs par byas pa'i byang chub sems dpa' de byang chub sems dpa'i sa lnga pa la 'jug pa na/des sngar sa gsum pa la gang zag la mngon par zhen pas 'phangs pa chos khong du chud pa'i nga rgyal spangs kyang / sa bzhi pa nyid kyi tshe na rnam par dag pa 'phel bas dus gsum gyi sangs rgyas rnams stobs la sogs pa rnam par dag pa'i rgyud tha dad par lta ba'i mngon pa'i nga rgyal ma spangs pas nga rgyal snga ma las khyad par du gyur pa'i nga rgyal de'i gnyen po rnam par gzhag pa yin no// rnam par dag pa la sems kyi mnyam pa nyid ces bya ba la rnam par dag pa zhes bya ba ni dus gsum gyi sangs rgyas rnams kyi stobs la sogs pa sangs rgyas kyi chos rnam par dag pa ste/de yang sangs rgyas kyi chos gang dag yin pa dus gsum gyi stobs la sogs pa dag dang ji ltar sangs rgyas kyi chos rnams su 'gyur ba tshul khrims dang /ting nge 'dzin dang / shes rab dang / sems can yongs su smin par byed pa dag go/ /sems can gyi bsam pa mnyam pa nyid ces bya ba ni rnam par dag pa de dag gi rgyud tha mi dad par mthong ba ste/ de la 'bad pa ni gnyen po bsgom pa yin no/ /bsgoms pa'i 'bras bu thob pa gang zhe na/de yang thob pa zhes bya bas bstan te/ sa lnga pa mi gnas pa'i lam sgrub pa'i khyad par rnam par gzhag pa dang / de'i 'bras bu rnam par gzhag par gnas pa dang / 'bras bu'i phan yon gyi khyad par bstan pa thob po de la mi gnas pa'i lam sgrub pa'i khyad par zhes bya ba ni shes bya la shes pa rnam par dag pa'i khyad par gyi bden pa mngon par rtogs pas 'khor ba la mi gnas pa dang /'dus byas thams cad brdzun pa la sogs pa'i mtshan nyid du rig nas sems can snying brtse bas brtson 'grus sgrub pa'i khyad par gyi mya ngan las 'das pa la mi gnas pa'o//de la zhes bya ba la shes pa rnam par dag pa'i khyad par gyis bden pa mngon par rtogs pa zhes bya ba ni rnam pa gnyis te/ sdug bsngal gyi bden pa la sogs pas rab tu shes pa'i phyir bden pa'i chos nyid rnam par gzhag pa ni de bzhin gshegs pa rnams byung yang rung ma byung yang rung ste/rgyu dang 'bras bu tha dad pas bden pa gnyis ni kun nas nyon mongs pa'i chos nyid yin la/ gnyis ni rnam par byang ba'i chos nyid du rnam par gzhag pas rab tu shes pa'o/ /kun rdzob kyi bden pa la sogs pa rab tu shes pa'i phyir sems can yongs su grol ba'i thabs rnam par gzhag pa ni nyan thos kyi 'dul ba dang /theg pa chen po'i 'dul ba tha dad pa dag la kun rdzob kyi bden pa la sogs pa dang / byang chub sems dpa'i rim pa thams cad la mtshams sbyar ba bsgrubs nas/ de bzhin gshegs pa'i ye shes yang dag par 'byung ba'i bar gyi bden pa la mkhas pa rnam par gzhag pa rab tu shes pa ste/de gnyis kyis ni bden pa mngon par rtogs pas 'khor ba la mi gnas pa bstan to / /'dus byas thams cad brdzun pa la sogs pa'i mtshan nyid du rig nas zhes bya ba ni rtag pa la sogs pa'i mtshan ma med pas brdzun pa dang / rtag pa la sogs pa'i mngon par zhen pa'i gzhi yin pas slu ba'i chos can dang dar ba'i mtha' rgud pa yin pas 'du shes pa dang phun sum tshogs pas skye bo blun po phyogs pa'i phyir byis pa 'drid par rig par bya'o/ /sems can rnams la snying brtse bas zhes bya ba ni sems can rnams la snying rje chen po mngon du 'gyur zhing /byams pa chen po'i snang ba yang rab tu 'byung ba ste/ de la snying rje chen po ni rgyu gnyis kyis mngon du 'gyur te/ rten cing 'brel par 'byung ba la so sor rtog pas sdug bsngal la yang dag pa ji lta ba bzhin du dmigs pa dang dus ring po nas 'brel ba'i sdug bsngal rnam pa sna tshogs la/so sor rtog pas sdug bsngal drag po la dmigs pa las so/ /byams pa chen po'i snang ba ni de ltar sdug bsngal gyis nyam thag pa'i sems can de dag shin tu rnam par dag pa thob par gyur pa nas/ stobs bcu'i stobs kyis ye shes chags pa med pa'i bar gyis mthar thug pa thob par bya ba'i don du 'byung bar 'gyur ro//brtson 'grus sgrub pa'i khyad par zhes bya ba ni de dag gi don du bdag nyid gcig pu gnyis su med par gyur nas bsod nams dang ye shes kyi tshogs sogs shing sems can thams cad yongs su skyob par byed pa ste/ de dag gis ni mya ngan las 'das pa la mi gnas pa bstan to//de'i 'bras bu rnam par gzhag pa zhes bya ba ni rnam pa bzhi ste/ yon tan yongs su 'dzin pa'i khyad par rnam par gzhag pa dang / sgrub pa'i khyad par rnam par gzhag pa dang / sems can yongs su smin par byed pa'i khyad par rnam par gzhag pa dang /de dang mthun par 'jig rten pa'i shes pa mngon par sgrub pa'i khyad par rnam par gzhag pa'o/ /de la yon tan yongs su 'dzin pa'i khyad par zhes bya ba ni thos pa dang / tshul khrims dang / shes pa yongs su 'dzin pa'i khyad par du rig par bya'o/ /sgrub pa'i khyad par zhes bya ba ni mngon par mtho ba'i rgyu dang /nges par legs pa'i rgyu sgrub pa la sogs pa'o/ /sems can yongs su smin par byed pa'i khyad par zhes bya ba ni/ bsdu ba'i dngos po bzhi la sogs pa'o/ /de dang mthun par 'jig rten pa'i shes pa mngon par sgrub pa'i khyad par zhes bya ba ni gnod pa dang nye ba'i nyon mongs pa'i gnyen po yi ge la sogs pa dang /sdom pa'i cho ga la gnas pa la sogs pa'o/ /'bras bu'i phan yon gyi khyad par ni snga ma bzhin no/ /gnas pa dang khyad par de dag thob pas na de yan lag des yongs su rdzogs pa yin zhes bya ba gsungs te mi mthun pa'i phyogs spang ba dang /gnyen po bsgom pa dang / bsgoms pa'i 'bras bu thob pa'i phyir ro/ /sa drug pa'i mi mthun pa'i phyogs spang ba gang zhe na/ 'du byed kyi 'jug pa ji lta ba bzhin du mngon sum du byas nas de la skyo ba mang ba dang / mtshan ma med pa yid la byed pas mang du gnas par mi nus pas de yan lag des yongs su ma rdzogs pa yin te zhes bya bas bstan te/sa drug pa'i mi mthun pa'i phyogs ni mtshan ma rags pa kun du 'byung ba'o/ /de yang sa lnga pa la byang chub kyi phyogs rab tu rnam par 'byed pa la brten nas 'phags pa'i bden pa rnams yang dag pa ji lta ba bzhin du rtog pa la gnas su zin kyang de ma shes pas sdug bsngal 'byung ba rgyu dang bcas pa rab tu rnam par 'byed par rab tu phye ba dang /de shes pas sdug bsngal 'gog pa rgyu dang bcas pa rab tu rnam par 'byed pas rab tu phye ba'i skyo ba mang po bskyed par mi nus pa dang / chags pa med pa'i ye shes la mngon par phyogs pa zhes bya ba'i shes rab kyi pha rol tu phyin pa la gnas pa snang ba'i tshul gyis mngon du ma gyur par mtshan ma med pa yid la byed pas mang du gnas par mi nus pa nyid yin par sbyar ro//gnyen po sgom pa gang zhe na/ de yan lag des yongs su rdzogs par bya ba'i phyir 'bad pas zhes bya bas bstan te/sa lnga pa nas sa drug par 'phar ba'i gnas skabs na/ nga rgyal gyi khyad par gyi gnyen po rnam par gzhag pa zhes bya bas chos mnyam pa nyid thob pas sa lnga pa las 'phar zhing sa drug pa gnon par 'gyur ba de la 'bad pa'o/ / de la nga rgyal gyi khyad par gyis khyad par rnam par gzhag pa zhes bya ba ni byang chub sems dpa'i sa lnga pa la lam shin tu yongs su rdzogs pa'i byang chub sems dpa' de byang chub sems dpa'i sa drug pa la 'jug pa na/ sngar sa bzhi pa la sa gsum pa'i dus na gang zag la mngon par zhen pas 'phangs pa chos khong du chud pa'i mngon pa'i nga rgyal gyi gnyen po bstan pa dang /sa lnga pas bzhi pa'i dus na dus gsum gyi stobs la sogs pa rnam par dag pa'i rgyud tha dad pa lta ba'i mngon pa'i nga rgyal gyi gnyen po bstan pa de las khyad par du gyur pa sa lnga pa'i dus na chos la mngon par zhen pa las byung ba'i kun nas nyon mongs pa dang /rnam par byang ba'i chos tha dad par lta ba'i mngon pa'i nga rgyal de'i gnyen po rnam par gzhag pa la bya'o/ /chos mnyam pa nyid thob pas zhes bya bas ni skye mched bcu gnyis po dag gi kun brtags pa'i ngo bo nyid med par mnyam pa nyid du rtogs pa ste/de la 'bad pa ni gnyis po bsgom pa yin no/ /bsgoms pa'i 'bras bu thob pa gang zhe na/ de yang 'thob po zhes bya bas bstan te/ sa drug pa la mi gnas par lam sgrub pa'i khyad par rnam par gzhag pa dang / de'i 'bras bu rnam par gzhag pas gnas pa dang / 'bras bu'i phan yon gyi khyad par gyis khyad par bstan pa thob pa'o//de la mi gnas pa'i lam sgrub pa'i khyad par zhes bya ba ni dus gsum gyi snying rje'i khyad par yongs su 'dzin pas sems can la lta ba dang bcas pa'i phyir mya ngan las 'das pa la mi gnas pa dang / rten cing 'brel par 'byung ba cha phra ba'i rnam pa thams cad la so sor rtog pa zhes bya ba la ye shes rnam par dag pa'i phyir 'khor ba la mi gnas pa'o//de la dus gsum gyi snying rje'i khyad par yongs su 'dzin pas sems can la lta ba zhes bya ba ni snying rje chen po sngon du 'gro ba dang / snying rje chen po la dbang bya ba dang / snying rje chen po yongs su rdzogs par bya ba'i phyir 'jig rten gyi 'byung ba dang / 'jig pa la rnam par lta ba dang / des ni mya ngan las 'das pa la mi gnas par bstan to/ /rten cing 'brel bar 'byung ba cha phra ba'i rnam pa thams cad la so sor rtog pas zhes bya ba la ye shes rnam par dag pa zhes bya ba ni rten cing 'brel par 'byung ba'i 'jug pa cha phra ba la sgo gsum nas rtog pa ste/sgo gsum ni sgrub pa dang / brgal ba'i lan dang / mtshan nyid rnam par gzhag pa'i sgo dang / don dam pa'i bden pa rnam par gzhag pa'i sgo dang / kun rdzob kyi bden pa rnam par gzhag pa'i sgo nas so//de la sgrub pa rnam par gzhag pa zhes bya ba ni rten cing 'brel par 'byung ba la bdag med par sgrub pa'o/ /brgal ba'i lan rnam par gzhag pa zhes bya ba ni bdag med du zin na/ bdag ni mngon par zhen pa ji ltar 'byung snyam pa la byis pa'i blo can du gyur pa'i phyir ro zhes lan btab pa'o/ / mtshan nyid rnam par gzhag pa zhes bya ba ni rten cing 'brel par 'byung ba'i yan lag bcu gnyis po dag mtshan nyid gang gis rnam par gnas shing 'byung ba rnam par gzhag pa'o/ /don dam pa'i bden pa rnam par gzhag pa'i sgo zhes bya ba ni ji ltar de yongs su shes pas rnam par grol bar gyur pa de yongs su brtag pa'o//kun rdzob kyi bden pa rnam par gzhag pa'i sgo zhes bya ba ni ji ltar yongs su rtogs pas don dam pa'i bden pa la 'jug pa ste/ don rnam pa drug ste/ kun nas nyon mongs pa'i gnas yongs su brtag pa dang / rgyu nyid du yongs su brtag pa dang / nyes dmigs bsdu bar yongs su brtag pa dang / nyes pa spang ba yongs su brtag pa dang / yid mi 'byung ba dang yid 'byung ba'i rgyur yongs su brtag pa dang / zab pa nyid du yongs su brtag pa'o/ /de la kun nas nyon mongs pa'i gnas yongs su brtag pa zhes bya ba ni srid pa'i yan lag rnam pa bdag dang bral ba'i sems tsam la brten pas sems gcig pu la brten par yongs su brtag pa'o//rgyu nyid du yongs su brtag pa zhes bya ba ni rnam pa gnyis te/ rang gi bya ba byed pas yan lag gzhan gyi rgyud yongs su brtag pa'i phyir gzhan gyi rgyud yongs su brtag pa dang /ma rig pa la sogs pa rang gi rigs kyi rgyu'i dngos por rkyen du yongs su brtag pa'i phyir bdag nyid du yongs su brtag pa'o/ /nyes dmigs bsdus par yongs su brtag pa zhes bya ba ni yan lag bcu gnyis nyon mongs pa dang / las dang sdug bsngal gyi lam gsum gyis bsdus par brtag pa'o//nyes pa yongs su spang bar brtag pa zhes bya ba ni rten cing 'brel par 'byung ba smra ba la nyes pa gsum yod pa gzhan rtog pa yongs su spong ba ste/ nyes pa gsum ni rgyu bye brag med pa'i phyir thams cad kyi lus cig car mngon par 'grub pa'i nyes pa dang /byed po med pa las bdag gir bya ba med par 'gyur ba'i nyes pa dang / 'bras bu ma bskyed par rgyu 'gag pas las rnams chud za ba'i nyes pa ste/ nyes pa de gsum ni dus gsum gyi mthar bltas pas rim bzhin du yongs su spang bar brtag go/ /yid mi 'byung ba dang /yid 'byung ba'i rgyur yongs su brtag pa zhes bya ba ni sdug bsngal gsum las 'du byed kyi sdug bsngal cha phra mo ni yid 'byung bar mi 'gyur la/ sdug bsngal gyi sdug bsngal dang / 'gyur ba'i sdug bsngal rags pas ni yid 'byung bar brtag go//zab pa nyid yongs su brtag pa zhes bya ba ni rnam pa bzhi ste/ rang gi rgyud las byung ba'i phyir srid pa'i yan lag rnams gzhan gyis ma byas pa dang / rkyen las byung ba'i phyir srid pa'i yan lag rnams bdag gis ma byas pa dang / bya ba'i dus na mi gnas pas byed pa med pa'i phyir skye ba tsam la rag las pas gnyis kas ma byas pa dang /srid pa'i lugs bzhin du 'byung bas rgyu med pa las ma byung bas zab par yongs su brtag pa ste/ de dag gis ni shes bya la ye shes rnam par dag pa'i phyir 'khor ba la mi gnas par bstan to/ /de'i 'bras bu rnam par gzhag pa zhes bya ba ni rnam pa lnga ste/gnyen po 'thob pa dang / mi mthun pa'i phyogs nyams pa'i khyad par dang / sgrub pa dang gnas pa'i khyad par thob pa dang / ting nge 'dzin gyi khyad par thob pa dang / bsam pa'i khyad par thob pa dang / nus pa'i khyad par thob pa rnam par gzhag pa'o/ /de la gnyen po thob pa dang mi mthun pa'i phyogs nyams pa'i khyad par zhes bya ba la/gnyen po thob pa zhes bya ba ni rnam par thar pa'i sgo gsum po dag thob pa'o/ /mi mthun pa'i phyogs nyams pa zhes bya ba ni 'du shes rnam pa gsum po bdag dang gzhan gyi 'du shes dang / byed pa po dang tshor ba po'i 'du shes dang / yod pa dang med pa'i 'du shes dang bral ba'o/ /sgrub pa dang gnas kyi khyad par thob pa zhes bya ba la sgrub pa'i khyad par ni sgrub pa rnam pa gnyis te/ go cha'i sgrub pa 'dus byas la nyes pa mang po'i skyon chags par yongs su shes pa las dang nyon mongs pa'i 'ching ba dang / skye ba'i tshogs pa spong ba sems can gyi don byed pa khyad par can dang /skyes bu'i byed pa'i sgrub pa rnam par sun 'byin pa'i gnyen po nyes pa mang po skyon chags par so sor rtog pa dang / spong ba'i gnyen pos rang dang spyi'i mtshan nyid rang bzhin gyis med par so sor rtog pa'o/ /gnas pa'i khyad par ni ye shes dang snying rje'i khyad par dang ldan pas mi gnas pa'i lam la gnas pa dang /de'i tshogs yongs su ma rdzogs pa'i phyir chags pa med pa'i ye shes la mngon par phyogs pa zhes bya ba'i shes rab kyi pha rol tu phyin pa la gnas pa snang ba'i tshul gyis mngon du gyur pa dang / 'dus byas dang mya ngan las 'das pa mnyam pa nyid du rab tu rtogs pas de dang mi 'grogs mi gnas pa'o//ting nge 'dzin gyi khyad par zhes bya ba ni stong pa nyid dang / mtshan ma med pa dang / smon pa med pa'i sgo ting nge 'dzin 'bum phrag bcu mngon du 'gyur ba'o / /bsam pa'i khyad par zhes bya ba ni bstan pa'i phyir mi phyed pa'i bsam pa de bzhin gshegs pa'i byang chub la shin tu song ba thob pa'o//nus pa'i khyad par zhes bya ba ni phas kyi rgol ba tshar gcod pa'i nus pa dang / the tshom sel ba'i nus pa dang / theg pa la mi g.yo ba'i nus pa dang / gsang ba'i gnas la mos pa'i nus pa la sogs pa thob pa'o//'bras bu'i phan yon gyi khyad par ni snga ma bzhin no/ /gnas pa dang khyad par de dag thob pas na de yan lag des yongs su rdzogs pa yin zhes bya ba gsungs te/ mi mthun pa'i phyogs spang ba dang / gnyen po bsgom pa dang / bsgoms pa'i 'bras bu thob pa'i phyir ro/ /sa bdun pa'i mi mthun pa'i phyogs spang ba gang zhe na/bar chad med pa dang / rgyun mi 'chad par mtshan ma med pa'i yid la byed pa'i mang du gnas par mi nus pas de yan lag des yongs su ma rdzogs pa yin te zhes bya bas bstan te/ sa bdun pa'i mi mthun pa'i phyogs ni mtshan ma phra ba kun du 'byung ba'o//de yang sa drug pa la bden pa rtogs pa de nyid kyi dbang du byas nas de ma shes pas sdug bsngal 'byung ba rgyu dang bcas pa rab tu rnam par 'byed pas rab tu phye ba dang / de shes pas sdug bsngal 'gog pa rgyu dang bcas pa rab tu rnam par 'byed pas rab tu phye ba la gnas su zin kyang mngon par 'du byed pa dang rtsol bas rgyun chags su bar chad med par chos thams cad la de bzhin nyid rnam par mi rtog pa'i shes rab sgom par mi nus pa nyid yin par sbyar ro//gnyen po sgom pa gang zhe na/ de yan lag des yongs su rdzogs par bya ba'i phyir 'bad pas zhes bya bas bstan te/sa drug pa nas bdun par 'phar ba'i gnas skabs na mngon par 'du byed pa med pa la mngon par dga' ba'i gnyen po rnam par gzhag pa zhes bya ba thabs dang shes rab kyi yang dag par skyes pa'i lam gzhan rtsom pa'i khyad par thob pas sa drug pa las 'phar zhing bdun pa non par 'gyur ba de la gnon pa'o//de la mngon par 'du byed pa med pa la mngon par dga' ba'i gnyen po rnam par gzhag pa zhes bya ba ni byang chub sems dpa'i sa drug pa la lam shin tu yongs su rdzogs pa'i byang chub sems dpa'i sa bdun pa gnon pa nas sngar sa drug pa la chags pa med pa'i ye shes la mngon par phyogs pa zhes bya ba la shes rab kyi pha rol tu phyin pa la gnas pa snang ba'i tshul gyis mngon du gyur pas shes rab kyi shas ni che la/thabs kyi shas ni chung bas mngon par 'du byed pa med pa nyid la sems mngon par dga' zhing / mngon par 'byung ba'i lam mngon par 'du byed pa la mi dga' ba'i gnyen po rnam par gzhag pa'o//thabs dang shes rab kyis yang dag par bskyed pa'i lam gzhan rtsom pa'i khyad par zhes bya ba dang / thabs dang shes rab ces bya ba ni chos bdag med pa'i ye shes sems can la lta ba dang bcas pa'o/ / yang dag par bskyed pa zhes bya ba ni mngon par sgrub pa'o/ /lam zhes bya ba ni gnyen pos zin pa mngon par 'byung ba'i lam mo/ /gzhan zhes bya ba ni 'jig rten las 'das pa gzhan dang 'jig rten pa'i mngon par 'byung ba'i lam las gzhan du gyur pa'o/ /bsam pa zhes bya ba ni sgrub pa'o//khyad par zhes bya ba ni lam gzhan brtsams pa de yon tan bzhis khyad par du 'phags pa ste/ longs spyod dang / lus kyi khyad par gyi rgyur gyur pa dang / nyes par spyod pa las kun du bsrung ba'i rgyur gyur pa dang / dge ba'i rtsa ba kun du bsrung ba'i rgyur gyur pa dang / sems can la phan 'dogs pa'i rgyur gyur pa ste/ de la 'bad pa ni gnyen po bsgom pa yin no/ /bsgoms pa'i 'bras bu thob pa gang zhe na/ de yang 'thob pa'o zhes bya bas bstan te/ sa bdun pa la de'i rnam par g.yeng ba'i gnyen po rnam par gzhag pa dang / zung du 'brel pa'i lam rab tu 'thob pa rnam par gzhag pa dang /sa snga phyi'i khyad par rnam par gzhag pa dang / de'i 'bras bu rnam par gzhag pas gnas pa dang / 'bras bu legs pa'i khyad par gyis khyad par bstan pa 'thob pa'o/ /de la de'i rnam par g.yeng ba'i gnyen po rnam par gzhag pa zhes bya ba ni rnam pa gnyis te/zhi ba'i shas che ba'i gnyen por de bzhin gshegs pa'i yul tshad med pa'i rnam pa bsgom pa dang thabs kyi shas che ba'i gnyen por mngon par 'byed pa med pa'i lam la sbyor ba yin no/ /zung du 'brel pa'i lam rab tu thob pa rnam par gzhag pa zhes bya ba ni rnam pa bzhi ste/gnyis cig car rgyun du 'byung ba dang / mos pa rnam par gzhag pa'i khyad par dang / don chen po byed pa dang / byang chub kyi phyogs rab tu dbye ba'o/ /de la gnyis cig car rgyun du 'byung bas zhes bya ba ni skad cig gcig la zhi gnas dang lhag mthong gi lam gnyis mngon sum du byed cing spyod lam thams cad du de dang ldan pa'o//mos pa rnam par dag pa'i khyad par zhes bya ba ni sgrib pa med pas spyod lam thams cad la gnas shing de bzhin gshegs pa'i yul tshad med pa'i rnam pa de lta bu'i 'du shes yid la byed pa dang mi 'bral ba yin no//don chen po byed pa zhes bya ba ni sems bskyed pa re re la yang pha rol tu phyin pa bcu yang dag par sgrub pa'o/ /byang chub kyi phyogs rab tu dbye ba zhes bya ba ni theg pa chen por gtogs pa'i pha rol tu phyin pa rnams dang / sems can yongs su smin par byed par gtogs pa'i bsdu ba'i dngos po rnams dang /nyon mongs pa'i sgrib pa rnam par dag par rtogs pa'i bden pa dang / byang chub kyi phyogs dang / rnam par thar pa'i sgo rnams dang / shes bya'i sgrib pa rnam par dag par rtogs pa'i byang chub kyi yan lag gi chos thams cad skad cig la yongs su rdzogs par 'gyur ro//sa snga phyi'i khyad par rnam par gzhag pa zhes bya ba ni sa bdun pa 'di sa 'og ma rnams las khyad zhugs pa dang / sa gong ma bas dman par bstan pa'o/ /de la 'og ma rnams las khyad zhugs pa'i zhes bya ba ni sa bdun pa la sbyor ba can gyi spyod pa yongs su rdzogs par byed pas ye shes dang mngon par shes pa'i spyod pa gnon pa'i phyir ro//sa gong ma bas dman pa zhes bya ba ni ye shes mngon par sgrub par sbyor ba'i yan lag rnams 'bad pa dang bcas pa yongs su rdzogs par byed pa'i phyir ro/ /de'i 'bras bu rnam par gzhag pa zhes bya ba ni zung du 'brel pa'i lam gyi 'bras bu rnam par gzhag pa bzhi ste/las rnam par dag pa dang / ting nge 'dzin gyi khyad par thob pa dang sa las shin tu 'das pa dang / gnas pa'i khyad par thob pa'o/ /de la las rnam par dag pa la yang bzhi ste/ / tshul khrims rnam par dag pa'i khyad par dang / 'jig rten pa'i shes pa rnam par dag pa'i khyad par dang / bsam pa sbyor bas mnyam pa med pa'i lus kyi khyad par thob pa dang / bsam gtan la sogs pa mngon sum du byed pa'i khyad par gyis nus pa'i khyad par thob pa'o//ting nge 'dzin gyi khyad par thob pa zhes bya ba ni byang chub sems dpa'i ting nge 'dzin rnam par 'byed pas shin tu rnam par phye ba zhes bya ba la sogs pa ye shes dang mngon par shes pa chen po'i sgo'i ting nge 'dzin yongs su sbyor bar byed pa brgya stong phrag bcu la snyoms par 'jug pa'o//sa las shin tu 'das pa zhes bya ba ni thabs dang shes rab kyis yongs su sbyangs pa'i ting nge 'dzin de thob nas snying brtse ba dang / snying rje'i stobs kyis nyan thos dang rang sangs rgyas kyi sa las shin tu 'das pa dang / shes rab dang ye shes kyis rnam par dpyad pa'i sa brgyad pa dang /nye bar 'gyur ba yin no/ /gnas pa'i khyad par thob pa zhes bya ba ni yang dag pa'i mtha' la gnas pa dang / 'gog pa mngon sum du mi byed pa dang / srid pa mi gtong bas gnas pa'i khyad par thob pa yin no/ /'bras bu legs pa'i khyad par ni snga ma bzhin no//gnas pa dang khyad par de dag thob pas na de yan lag des yongs su rdzogs pa yin zhes gsungs te/ mtshan ma phra mo kun du 'byung ba las yang dag par 'das pa'i phyir ro/ /sa brgyad pa'i mi mthun pa'i phyogs spang ba gang zhe na/ de yan lag des yongs su rdzogs pa yin te/mtshan ma med par rnam pa de la rtsol ba ltag par btang snyoms su gzhag pa dang / mtshan ma la dbang thob par mi nus pas zhes bya bas bstan te/ sa brgyad pa'i mi mthun pa'i phyogs ni mtshan ma med pa nyid du mngon par 'du byed pa'o/ /de yang sa bdun pa la lhag pa'i shes rab la gnas pa snga ma de gsum gyi dbang du byas nas mngon par 'du byed pa dang rtsol bas rgyun chags su bar chad med par chos thams cad la de bzhin nyid la rnam par mi rtog pa'i shes rab sgom pa dang ldan pa la gnas su zin kyang rang gi dang nyid kyis rgyun chags su bar chad med par 'jug pa'i lam dang ldan pa la gnas par mi nus pa nyid yin par sbyar ro//gnyen po sgom pa gang zhe na/ de yan lag des yongs su rdzogs par bya ba'i phyir 'bad pas zhes bya bas bstan te/ sa bdun pa nas brgyad par 'phar ba'i gnas skabs na yongs su sbyang ba byas pa'i sa bsdus pa zhes bya bas sa bdun po spyi dang so sos bsdus pa'i yon tan thob pa des rnam par dag pa'i bzod pa thob pa zhes bya ba ni mi skye ba'i chos la bzod pa'i dmigs pa thob pas sa bdun pa las 'phar zhing brgyad pa gnon par 'gyur ba de la 'bad pa'o//de la yongs su sbyang ba byas pa'i sa bsdus pa zhes bya ba ni byang chub sems dpa' byang chub sems dpa'i sa bdun po dag la yongs su sbyang ba byas pa de byang chub sems dpa'i sa brgyad pa la 'jug pa na sbyor ba can gyi spyod pa la 'jug pa'i sa yongs su sbyang ba byas pa bdun po dag yongs su sbyangs pas sa bdun po dag gi sa'i yon tan thams cad thob pa'o//sa bdun po spyi dang so sos bsdus pa'i yon tan thob pa zhes bya ba la/ sa bdun po spyis bsdus pa'i yon tan thob pa zhes bya ba ni bdag med pa rnam pa gnyis gong nas gong du rab tu rtogs pa dang /thabs kyis bsdus pa'i shes rab kyis mi gnas pa'i lam de yongs su sbyong ba dang / sbyor bas bsdus pa'i tshogs yongs su rdzogs par byed pa'i yon tan thob pa'o/ /sa bdun po so sos bsdus pa'i yon tan thob pa zhes bya ba ni sa dang po la smon lam shin tu btab pa la sogs pa dang sa gnyis pa la de lta bas na bdag gi mngon par sgrub tu 'dra ba la rnam pa thams cad yongs su sbyang zhing mngon par sgrub pa nyid la brtson par bya'o zhes bya ba la sogs pa dang sa gsum pa la 'dod pa'i 'dod chags dang bral ba las mi nyams pa'i bsam gtan la sogs pa thob pa'i phyir rang gi dge ba'i rtsa ba'i stobs bskyed pa thob pa dang /sa bzhi pa la ye shes yongs su smin par byed pa'i chos thob pas shes bya'i sgrib pa rnam par dag pa'i khyad par gyis sangs rgyas kyi chos yid la bya ba dang ldan pa dang /sa lnga pa la rnam par dag pa la sems kyi bsam pa mnyam pa nyid kyis lhag pa'i bsam pa'i brnag pa shin tu yongs su sbyangs pa dang / sa drug pa la dus gsum gyi snying rje'i khyad par yongs su 'dzin pa dang / rten cing 'brel par 'byung ba phra mo'i rnam pa thams cad la rtog pas bsod nams dang ye shes kyi stobs kyis mngon par 'phags pa dang /sa bdun pa la lam gzhan brtsams pa'i khyad par rnams kyis sems can rnams la sbyor ba mi gtong ba dang / de bzhin gshegs pa'i yul tshad med pa'i rnam pa bsgoms pa la sogs pa'i yon tan ji skad bstan pa thams cad 'dis thob pa'o//rnam par dag pa'i bzod pa 'thob pa zhes bya ba ni sa brgyad pa la mi skye ba'i chos la bzod pa'i tshul khong du chud par gyur pa'i dmigs pa'i chos thob pa'o/ /mi skye ba'i chos la bzod pa'i dmigs pa thob pa zhes bya ba ni mi skye ba rnam pa bzhi ste/yod pa mi skye ba dang / rang bzhin mi skye ba dang / grangs tha dad pa mi skye ba dang / las tha dad pa mi skye ba'o/ /de la yod pa mi skye ba zhes bya ba ni gzhan gyis yod par brtags pa rnam pa bdun po rnam par byang ba'i phyogs kyi chos rnams snga nas yod pa dang /gsar du skye ba yod pa dang / mtshan nyid yod pa dang / tha ma'i mtha' yod pa dang / kun nas nyon mongs pa'i phyogs kyi thog ma'i mtha' yod pa dang / sems can rnams kyi mtha' rdzogs pa yod pa dang rnam par byang nas kun nas nyon mongs pa yod par brtags pa de dag mi skye ba'o//rang bzhin mi skye ba zhes bya ba ni chos bdag med pa'i rang bzhin mi skye ba'o/ /grangs tha dad pa'i mi skye ba zhes bya ba ni kun nas nyon mongs pa dang / rnam par byang ba'i chos rnams dus gsum du 'bri ba dang /'phel ba'i grangs tha dad pa mi skye ba'o/ /las tha dad pa mi skye ba zhes bya ba ni de bzhin nyid rnam par dag pa las sangs rgyas kyi ye shes tha dad du bya ba mi skye ba ste/ mi skye ba'i chos la bzod pa'i dmigs pa bzhi po de dag thob pas mi skye ba'i chos la bzod pa'i tshul khong du chud par 'gyur te/de la 'bad pa ni gnyen po bsgom pa yin no/ /bsgoms pa'i 'bras bu thob pa gang zhe na/ de yang 'thob po zhes bya bas bstan te/ sa brgyad pa la mi skye ba'i chos la bzod pa'i tshul khong du chud pa dang / gnas pa'i khyad par thob pa dang /sangs rgyas kyi zhing yongs su sbyong ba dang / dbang thob pa dang che ba nyid kyi khyad par dang / nges pa'i tshig rab tu dbye bas gnas pa dang / 'bras bu legs pa'i khyad par gyis khyad par du bstan pa thob pa'o/ /de la mi skye ba'i chos la bzod pa'i tshul khong du chud pa zhes bya ba la/mi skye ba'i chos la bzod pa'i tshul zhes bya ba ni rnam par smin pa dang rlom sems can dang yul rnam par rig pas bsdus pa'i rnam par rtog pa'i rang bzhin gyi 'du shes dang bral ba ste/ de yang rnam pa gsum gyis sa 'og ma las khyad par du 'phags te/ lhun gyis grub pa dang /khyab pa dang / rang gi tshul gyi de bzhin nyid la bzhugs pa'i phyir mi g.yo bas khyad par du 'phags so/ /de khong du chud pa zhes bya ba ni sngar sa bdun pa nas brgyad par 'phar ba'i gnas skabs na rnam par dag pa'i bzod pa 'thob pa zhes bya ba mi skye ba'i chos la bzod pa'i dmigs pa thob pa'i rgyus sa brgyad pa la rnam par dag pa'i bzod pa thob par gyur pa nyid yin no//gnas pa'i khyad par thob pa zhes bya ba ni rnam pa gsum ste/ gnas pa snga ma'i skyon spangs pa dang / zhi ba'i mtha' las bzlog pa dang / ye shes dang mngon par shes pa'i las dpag tu med pa nye bar bsgrub pa'o//de la gnas pa snga ma'i skyon spangs pa zhes bya ba ni mtshan ma med pa la gnas pa snga ma la de'i skyon rnam pa bzhi po gang yin pa de dag spangs pa ste/ rtsol bar mngon par 'du byed par spangs pa dang / rnam par dag pa'i gnas gong ma la snying las su gyur pa spangs pa dang /rnam pa thams cad du sems can gyi don bya nus pa la snying las su gyur pa spangs pa dang / 'du shes phra mo kun du 'byung ba spangs pa'o/ /de la rtsol ba'i mngon par 'du byed pa spangs pa zhes bya ba ni gnas pa zab mo thob pa'o/ /rnam par dag pa'i gnas pa gong ma la snying las su gyur pa spangs pa zhes bya ba ni dper na dge slong 'gog pa la snyoms par zhugs pa g.yo ba dang rlom sems dang bral ba bzhin du 'di yang 'bad pa thams cad dang bral te/lhun gyis grub pa'i chos nyid thob cing lus dang ngag dang sems kyi rtsol ba dang bral nas rnam par smin pa la gnas pa zhi ba nyid thob pa yin no//rnam pa thams cad du sems can gyi don bya nus pa la snying las su gyur pa spangs pa zhes bya ba ni dper na mi gnyid kyis log pa'i rmi lam na bdag nyid chu bo chen pos khyer ba las ci thar du 'bad cing rtsol ba chen pos rtsol ba las de nyid kyis sad ma thag tu 'bad cing rtsol ba thams cad bral ba bzhin du 'di yang sems can gyi tshogs chu bo chen po bzhis khyer bar shes nas 'bad cing rtsol ba chen po rtsom pa las byang chub sems dpa'i sa mi g.yo ba thob ma thag tu 'bad pa thams cad dang bral ba yin no//'du shes phra mo kun du 'byung ba spangs pa zhes bya ba ni dper na tshangs pa'i 'jig rten du skyes shing gnas pa la 'dod pa na spyod pa'i nyon mongs pa rnams kun du mi 'byung ba bzhin du 'di la yang sa 'og ma'i sems dang rnam par shes pa'i kun du 'byung ba kun du mi 'byung ba yin no//zhi ba'i mtha' las bzlog pa zhes bya ba ni rnam pa gsum ste/de bzhin gshegs pas bskul ba dang / yang dag par 'dzin du 'jug pa dang / mngon par sgrub pa'i sgo ston pa'o/ /de la de bzhin gshegs pas bskul ba zhes bya ba ni sangs rgyas kyi chos phun sum tshogs pa ma thob pa thob par byed nus pa'i dbang du byas nas bzlog par mdzad pa dang /sems can gyi don byed pa'i don che ba'i dbang du byas nas bzlog par mdzad pa dang / smon lam dang sems can yongs su smin par byed pa dang / ye shes kyi tshogs 'bras bu med par 'gyur ba'i dbang du mdzad nas bzlog par mdzad pa dang / thun mong ma yin pa'i don gyis dub pa 'bras bu med par 'gyur ba'i dbang du byas nas bzlog par mdzad pa'o/ /yang dag par 'dzin du gzhug pa zhes bya ba ni sangs rgyas kyi chos phun sum tshogs pa'i nus pa yang dag par 'dzin du gzhug pa dang / de bzhin gshegs pa rnams kyi bde bar gnas pa'i khyad par yang dag par 'dzin du gzhug pa dang /'jig rten gyi khams dang sems can dang chos rab tu dbye ba ji ltar mthong bas byang chub par bstan pa yang dag par 'dzin du gzhug pa'o/ /mngon par sgrub pa'i sgo ston pa zhes bya ba ni ye shes mngon par sgrub pa'i sgo tshad med pa de dag la sogs pa gang dag gis byang chub sems dpa' ye shes rnam par phye ba tshad med pa mngon par sgrub pa'i las mngon par bsgrub pa dag nye bar sgrub par mdzad pa'o//ye shes dang mngon par shes pa'i las dpag tu med pa nye bar sgrub pa zhes bya ba ni rnam pa gnyis te/ yon tan yongs su 'dzin pa'i rgyu'i khyad par dang mngon par shes pa myur ba'i rgyu'i khyad par ro/ /de las yon tan yongs su 'dzin pa'i rgyu'i khyad par zhes bya ba ni sems can yongs su smin par byed pa dang / tshogs sogs pa dang / sgrib pa rnam par dag pa'i dbang du byas nas ye shes kyi las dpag tu med pa nye bar sgrub pa'o//mngon par shes pa myur ba'i rgyu'i khyad par zhes bya ba ni dper na rgya mtsho chen por 'gro ba'i gru bo che rgya mtsho chen po la ma thug gi bar du ched du bskyod pa'i 'gro bar bya bar rgya mtsho chen po la zhen ma thag tu rlung gis dal gyis bskyod nas ched du bskyod mi dgos par 'gro ste/des rgya mtsho chen po la nyin gcig gis ci chod pa de ni sngon ched du bskyod cing 'gro bas lo brgyar yang de srid du tshad med par phyin par mi nus pa bzhin du byang chub sems dpa'i sa brgyad pa'i spyod pa'i rgya mtshor phyin nas lhun gyis grub pa'i ye shes kyis yud tsam zhig la thams cad mkhyen pa'i ye shes ji tsam gnon pa de ni sngon gyi ched du bya ba'i las kyis bskal pa brgya stong du yang de snyed du dpag tu med par gnon par mi nus pa de lta bus mngon par shes pa'i las dpag tu med pa nye bar sgrub pa'o//sangs rgyas kyi zhing yongs su sbyong ba zhes bya ba yang rnam pa gsum ste/ snod kyi 'jig rten la dbang ba'i sbyor ba dang / sems can gyi 'jig rten la dbang ba'i sbyor ba dang / ye shes mngon par rdzogs par byang chub pa la dbang ba'i sbyor ba'o/ /de la snod kyi 'jig rten la dbang ba zhes bya ba ni rnam pa lnga ste/gang 'dod pa de kun du ston pa'am mi snang bar byed pa dang / ci 'dra ba 'dod pa de 'dra ba ston pa dang / dus ji srid du 'dod pa de srid du ston pa dang / bsdus pa dang rgyas pa ji ltar 'dod pa bzhin du byed pa dang / ji snyed 'dod pa de snyed ston pa'o//sems can gyi 'jig rten la dbang ba'i phyir zhes bya ba ni de dag gi nang du rang gi lus rnam par phye ba ston pa la dbang byed pa'i phyir sbyor ba ste/ gdul ba rnams kyi lus dang sems dang mthun pa'i lus dang sems ston pa'o/ /ye shes mngon par rdzogs par byang chub pa la dbang ba'i sbyor ba zhes bya ba ni rnam pa gnyis te/don dam pa'i ye shes dang / kun rdzob kyi ye shes so/ /de la don dam pa'i ye shes mngon par rdzogs par byang chub pa la dbang ba'i sbyor ba zhes bya ba ni rang dang gzhan gyi rgyud yongs su mi gcod pas lus su rnam par rtog pa thams cad med pa dang lus mnyam pa nyid thob pa'o//kun rdzob kyi ye shes kyis mngon par rdzogs par byang chub pa la dbang ba'i sbyor ba zhes bya ba ni kun nas nyon mongs pa dang / rnam par byang ba dang / gnyis ka ma yin par shes pa'i phyir sems can dang / snod kyi 'jig rten dang / de skye ba'i rgyu las kyi lus dang /theg pa rnam pa gsum gyi ye shes dang / chos kyi lus dang nam mkha'i lus rab tu shes pa'o/ /dbang thob pa zhes bya ba ni de ltar snod kyi 'jig rten dang / sems can gyi 'jig rten dang / ye shes mngon par rdzogs par byang chub pa la dbang ba'i sbyor ba'i rnam pa gsum gyis byang chub sems dpa'i dbang bcu thob pa'o//che ba nyid kyi khyad par zhes bya ba ni rnam pa gsum ste/ ye shes kyi che ba nyid dang / las kyi che ba nyid dang / de gnyis ka'i gnas yon tan gyi che ba nyid do/ /de la ye shes kyi che ba nyid ces bya ba ni 'khor ba dang mya ngan las 'das pa la mi gnas pa'i ye shes bsam gyis mi khyab pa dang ldan pa ste/de yang bsgom pa khyad par zhugs pas bsam gyis mi khyab pa dang / shes bya rab tu rtogs pas bsam gyis mi khyab pa dang / mi mthun pa'i phyogs bsal bas bsam gyis mi khyab pa yin no//las kyi che ba nyid ces bya ba ni de lta bu'i ye shes kyi rjes su song zhing ye shes de lta bu dang ldan pas lus dang ngag dang yid kyi las kha na ma tho ba shin tu med pa kun du 'byung ba ste de yang ye shes sngon du 'gro ba dang / ye shes kyi rjes su 'brang bas 'byung bar byed pa dang /'byung ba'i dus na byung bas kha na ma tho ba med pa dang / kun nas nyon mongs pa med pa dang / sems can gyi don byed pa'i lam gyis lam yongs su 'dzin pas kha na ma tho ba med pa dang / bdag dang gzhan gyi sbyor ba'i rgyus rgyu yongs su 'dzin pas kha na ma tho ba med pa dang /sems can gyi don dang / sangs rgyas kyi zhing yongs su sbyong ba dang / sangs rgyas kyi chos yang dag par sdud pa'i bya ba sgrub pas kha na ma tho ba med pa yin no/ /de gnyis ka'i gnas yon tan gyi che ba nyid ces bya ba ni yon tan rnam pa bdun gyi dbang du byas pa ste/shin tu brtan pa'i lam gyi yon tan dang / nyams pa med pa'i yon tan dang / ngag phun sum tshogs pa'i yon tan dang / sems phun sum tshogs pa'i yon tan dang / rgyu'i yon tan dang / sbyor ba'i yon tan dang /'dus pa'i yon tan no/ /nges pa'i tshig rab tu dbye ba zhes bya ba ni rnam pa gnyis te/ sa'i nges pa'i tshig rab tu dbye ba dang / gang zag gi nges pa'i tshig rab tu dbye ba ste/ de ni 'og nas ming la mkhas pa'i skabs su rgya cher ston to/ /'bras bu legs pa'i khyad par ni snga ma bzhin no//gnas pa dang khyad par de dag thob pas na de yan lag des yongs su rdzogs pa yin zhes bya ba gsungs te/ mtshan ma med pa nyid du mngon par 'du byed pa las yang dag par 'das pa'i phyir ro/ /sa dgu pa'i mi mthun pa'i phyogs spang ba gang zhe na/rnam grangs dang mtshan nyid nges pa'i tshig dang rab tu dbye bas rnam pa thams cad du chos ston pa la dbang thob par mi nus pas de yan lag des yongs su ma rdzogs pa yin te zhes bya bas sa dgu pa'i mi mthun pa'i phyogs ni sems can gyi don bya ba la mngon par 'du bya ba med pa'o//de yang sa brgyad pa la mtshan ma med pa la gnas pa snga ma de nyid shas cher bsgoms pas rang gi ngang nyid kyis rgyun chags su bar chad med par 'jug pa'i lam dang ldan pa la gnas su zin kyang blo gros rgya che ba rjes su thob ste/ gzhan dag la chos yang dag par ston pa bla na med pa las brtsams nas chos rnams kyi rnam grangs dang /de'i mtshan nyid dang / nges pa'i tshig dang / rab tu dbye ba rab tu rnam par 'byed mi nus pa nyid yin par sbyor ro/ /gnyen po bsgom pa gang zhe na/ de yan lag des yongs su rdzogs par bya ba'i phyir 'bad pas zhes bya bas bstan te/sa brgyad pa nas sa dgu par 'phar ba'i gnas skabs na smra ba'i brtson pa phun sum tshogs pa zhes bya ba bdag dang gzhan gyi don gyi dbang du byas pa'i chos thob pas sa brgyad pa las 'phar zhing dgu pa gnon par gyur pa'i chos de la 'bad pa'o//de la smra ba'i brtson pa phun sum tshogs pa zhes bya ba ni byang chub sems dpa' de ltar ye shes tshad med pas rnam par dpyad pa'i blos byang chub sems dpa'i sa dgu pa gnon pa nas brgyad pa la gnas pa'i khyad par thob pa dang / sangs rgyas kyi zhing yongs su sbyong ba dang /dbang thob pa dang che ba nyid kyi khyad par thob pa tsam gyis chog par mi 'dzin par gong du ye shes khyad par du 'phags pa'i rjes su 'gro ba'i rim gyis chos kyi 'khor lo bskor bar 'gyur ba'i rgyu'i chos phun sum tshogs pa la bya'o/ /bdag dang gzhan gyi don gyi dbang du byas pa'i chos thob pa zhes bya ba ni gzugs med pa rnams su thar pa thob par 'gyur bar 'du shes pa'i gdul ba bzlog pas gzhan gyi don dang /sangs rgyas kyi ye shes ma thob pa thob par byed pas bdag gi don la sogs pa'i chos thob pa ste/ de la 'bad pa ni gnyen po bsgom pa yin no//bsgoms pa'i 'bras bu thob pa gang zhe na/ de yang 'thob po zhes bya bas bstan te/ sa dgu pa la ye shes phun sum tshogs pa dang / spyod pa la 'jug pa phun sum tshogs pa dang / bshad pa phun sum tshogs pas gnas pa dang / 'bras bu legs pa'i khyad par gyis khyad par bstan pa thob po//de la ye shes phun sum tshogs pa zhes bya ba ni chos bshad par bya ba dge ba dang / mi dge ba dang / lung du ma bstan pa gang dag yin pa de dag shes nas ston par byed pa'o/ /spyod pa 'jug pa phun sum tshogs pa zhes bya ba ni sems can gyi spyod pa nyon mongs pa dang /las kyi kun nas nyon mongs pa gnas pa dang bcas pa las brtsams pa dang / skye ba'i kun nas nyon mongs pa dang ldan pa'i 'gro ba kun nas nyon mongs pa dang / rnam par byang ba la nges pa dang / ma nges par rnam par gnas pa las brtsams te/de dag gi spyod pa thibs po rgyu ba yongs su shes par byed pa'o/ /bshad pa phun sum tshogs pa zhes bya ba ni de ltar sems can gyi spyod pa rnam pa tha dad pa de lta bu dag shes nas de bzhin du thar pa'i nye bar sgrub pa nye bar sgrub pa ste/ de yang rnam pa gsum ste/ye shes phun sum tshogs pa dang / ngag phun sum tshogs pa dang / smra ba phun sum tshogs pa'o/ /de la ye shes phun sum tshogs pa zhes bya ba ni gang shes nas gang gi dbang du byas te ston pa'o/ /gang shes nas ston ce na/yongs su smin par gyur pas rnam par grol ba'i snod dang / gdul bas rnam par grol ba'i rang bzhin dang / theg pa gsum tha dad pas rnam par grol ba'i rab tu dbye ba shes nas ston pa'o/ /gang gi dbang du byas te ston zhe na/ gnyen po'i man ngag gi snod dang /chos bstan pa'i snod dang / dpe ji lta bu nye bar sgrub pa'i snod dang / rnam grangs ji lta bu'i snod la sogs pa'i dbang du byas te ston pa'o/ /de la ngag phun sum tshogs pa zhes bya ba ni de ltar ye shes la mkhas pa tshad med pa dang ldan pas byang chub sems dpa'i so so yang dag par rig pa bzhis mngon par sgrub pa'i tshig gis chos ston pa ste/de la byang chub sems dpa'i so so yang dag par rig pa bzhi ma 'dres pa 'di lta ste/ chos so so yang dag par rig pa dang / don so so yang dag par rig pa dang /nges pa'i tshig so so yang dag par rig pa dang / spobs pa so so yang dag par rig pa rtag tu 'byung ba'o/ /so so yang dag par rig pa bzhi'i yul ni chos nyid dang / chos nyid spyod yul dang / go bar byed pa sgo du ma ste go rims bzhin no//de la chos nyid ces bya ba ni mtha' gnyis rnam par spangs pa'i rigs kyis bsdus pa'i chos gang yin pa'o/ /chos nyid spyod yul zhes bya ba ni rigs kyis bsdus pa'i chos nyid de nyid ji ltar shes pa'i yul du gyur pa'o/ /go bar byed pa zhes bya ba ni ji ltar shes pa'i yul de nyid brjod par go bar byed pa'o//go bar byed pa'i sgo du ma zhes bya ba ni brjod pas gzhan la go bar byed pa de nyid kyi rnam grangs tshad med pa shes pa'o/ /smra ba phun sum tshogs pa zhes bya ba ni rnam pa bzhi ste/ gzungs phun sum tshogs pa dang /rab tu ston pa phun sum tshogs pa dang / dris pa lung ston pa phun sum tshogs pa dang / 'dzin pa phun sum tshogs pa'o/ /de la gzungs phun sum tshogs pa dang zhes bya ba ni de ltar so so yang dag par rig pa'i ye shes de la mkhas pa de bzhin gshegs pa'i chos kyi mdzod thos pa chos smra ba chen po byed pa de don dang ldan pa'i gzugs la sogs pa gzungs kyi sgo grangs med pa brgya stong phrag bcu thob ste/gzungs kyi sgo grangs med pa brgya stong phrag bcu dang ldan pa'i dbyangs kyi yan lag mkhas pa de snyed du tshad med pa dang ldan pa'i spobs pa rnam par phye ba'i sgos chos ston pa'o//rab tu ston pa phun sum tshogs pa zhes bya ba ni de lta bu'i gzungs thob cing spobs pa thob pas chos kyi gtam bya ba'i phyir 'dug na/ stong gsum gyi stong chen po'i 'jig rten gyi khams thams cad rgyas par bkang ste/chos kyi stan la 'dug cing bsam pa ji lta ba bzhin du rnam par phye ste sems can rnams la chos ston pa'o/ /dris pa lung ston pa phun sum tshogs pa zhes bya ba ni gal te stong gi 'jig rten gyi khams na stong gnyis pa dang /stong gsum pa nas stong gsum gyi stong chen po'i 'jig rten gyi khams brjod du med par gtogs pa'i sems can rnams lhags te/ de la skad cig thang cig yud tsam cig la dri ba yongs su 'dri zhing de dag re res kyang sgra rnams tha dad pa tshad med pas yongs su dris la/gcig gis gang dris pa de gnyis pas ma yin na yang byang chub sems dpa' des skad cig thang cig yud tsam cig nyid la thams cad bzung ste/ tshig gcig brjod pas thams cad go bar byed pa'o/ /'dzin pa phun sum tshogs pa zhes bya ba ni de bas kyang ye shes kyi snang ba 'di lta bu rab tu 'dzin par rtsom ste/gal te skra'i rtse mo'i go gcig la 'jig rten gyi khams brjod du med pa'i rdul phra rab kyi rdul ji snyed pa de snyed kyi de bzhin gshegs pa bzhugs la/ de snyed du tshad med pa'i 'khor gyi dkyil 'khor na chos ston cing de bzhin gshegs pa de dag re res kyang de snyed du tshad med pa'i sems can rnams la chos tha dad pa ston la/sems can gyi bsam pa'i rgyud re re la yang de nyid du tshad med pa'i chos nye bar sgrub pa nye bar bsgrub ste/ de bzhin gshegs pa gcig gis ji lta ba bzhin du de bzhin gshegs pa thams cad kyang de bzhin la/skra'i rtse mo'i go gcig la ji lta ba bzhin du chos kyi dbyings thams cad na yang de bzhin na yang de thams cad zin par 'gyur ba de lta bu'i ye shes kyi snang ba rab tu 'dzin pa brtson par byed pa yin no/ /'bras bu legs pa'i khyad par ni snga ma bzhin no//gnas pa dang khyad par de dag thob pas na de yan lag des yongs su rdzogs pa yin zhes bya ba gsungs te/ sems can gyi don bya ba la mngon par 'du bya ba med pa las yang dag par 'das pa'i phyir ro/ /sa bcu pa'i mi mthun pa'i phyogs spang ba gang zhe na/chos kyi sku yongs su rdzogs pa so so yang dag par rig pa thob par mi nus pas de yan lag des yongs su ma rdzogs pa yin te zhes bya bas bstan te/ sa bcu pa'i mi mthun pa'i phyogs ni chos rnams la dbang ma thob pa'o/ /de yang sa dgu pa la shes rab dang ldan pa'i ting nge 'dzin shin tu yongs su dag cing mi g.yo ba de nyid la brten nas blo gros chen po rgya che ba shin tu thob ste/gzhan dag la chos yang dag par ston pa bla na med pa las brtsams nas chos rnams kyi rnam grangs dang / mtshan nyid dang / nges pa'i tshig dang /rab tu dbye ba rab tu rnam par 'byed pa la gnas su zin kyang byang chub sems dpa' gang la gnas nas/ byang chub sems dpa'i lam gyi mthar thug ste/ bla na med pa yang dag par rdzogs pa'i byang chub tu chos kyi dbang bskur ba chen po thob pa skye ba gcig gis thogs pa'am yang na srid pa tha mar gyur te/gnas pa de'i mjug thogs su bar chad med pa kho nar bla na med pa yang dag par rdzogs pa'i byang chub mngon par rdzogs par sangs rgyas shing sangs rgyas kyi phrin las thams cad mdzad par 'gyur ba'i gnas pa ma thob pa nyid yin par sbyar ro/ /gnyen po bsgom pa gang zhe na/de yan lag des yongs su rdzogs par bya ba'i phyir 'bad pas zhes bya bas bstan te/ sa dgu pa nas bcu par 'phar ba'i gnas skabs na yongs su sbyang ba byas pa'i sa yongs su rdzogs pa zhes bya ba rnam par 'byed pas shin tu rnam par phye bas sa dgu po rnams yongs su rdzogs par byas pa thob pa sa dgu pa las 'bar zhing bcu pa gnon par 'gyur ba de la 'bad pa'o//de la yongs su sbyang bar bya ba'i sa yongs su rdzogs pa zhes bya ba ni byang chub sems dpa' de ltar sa dgu pa'i bar du shes bya tshad med la rnam par brtags pa'i blos rnam par 'byed pas shin tu rnam par phye ba de byang chub sems dpa'i sa bcu la gnon pa na/shes bya mngon par rdzogs par byang chub par bya ba sgom pa yongs su rdzogs par byed pas sa dgu po dag gi sa'i yon tan thams cad rdzogs par 'gyur ro/ /rnam par 'byed pas shin tu rnam par phye ba zhes bya ba ni sa dgu pa'i ye shes rnam par 'byed pa zhes bya bas shes bya'i rnam pa thams cad shin tu rnam par phye ba ste/de la 'bad pa ni gnyen po bsgom pa yin no/ /bsgoms pa'i 'bras bu thob pa gang zhe na/ de yang 'thob po zhes bya bas bstan te/ sa bcu pa la ting nge 'dzin yongs su rdzogs pa thob pa dang / dbang bskur ba thob pa dang / che ba nyid mthar phyin par song ba dang / sa'i nges pa'i tshig dang /mthu bla na med pa dang / bla na yod pas gnas pa dang / 'bras bu legs pa'i khyad par gyis khyad par bstan pa 'thob pa'o/ /de la ting nge 'dzin yongs su rdzogs pa thob pa zhes bya ba ni byang chub sems dpa' ye shes de lta bu dang ldan zhing dbang bskur ba'i sa thob pa de la byang chub sems dpa'i ting nge 'dzin dri ma med pa zhes bya ba 'khor dang bcas pa la sogs pa ting nge 'dzin grangs med pa brgya stong phrag bcu mngon du gyur cing ting nge 'dzin de dag thams cad la snyoms par 'jug cing ldang ba dang /ting nge 'dzin la mkhas pa dang / ting nge 'dzin gyi bya ba ji snyed pa de dag thams cad rab tu myong ba dang /ting nge 'dzin grangs med pa brgya stong phrag bcu ji snyed pa'i tha ma la byang chub sems dpa'i ting nge 'dzin thams cad mkhyen pa'i ye shes dang khyad par med pa dbang bskur ba dang ldan pa zhes bya ba mngon du gyur pa'o/ /dbang bskur ba thob pa zhes bya ba ni rnam pa drug ste/ stan gang dang / lus kyi tshad ji tsam pa dang /'khor gang dang / mtshan ma gang 'byung bar 'gyur ba dang / gang gis dang / ji ltar dbang bskur ba'o/ /de la stan gang la dbang bskur zhe na/ mtshan nyid rnam pa bcu dang ldan pa'i stan la ste / tshad kyi mtshan nyid ni stong gsum brgya stong phrag bcu'i gtos dang mnyam pa'o/ /mchog gi rang bzhin gyi rjes dang 'brel ba'i mtshan nyid ni rin po che chen po'i rgyal po'i pad ma'o//mtshan nyid kyi rang bzhin gyis khyad par gyi mtshan nyid ni rin po che'i rnam pa thams cad kyis spras pa'o/ /sa'i mtshan nyid ni 'jig rten gyi yul thams cad las shin tu 'das pa'o/ / rgyu'i mtshan nyid ni 'jig rten las 'das pa'i dge ba'i rtsa ba las byung ba'o/ /grub pa'i mtshan nyid ni sgyu ma'i rang bzhin gyi spyod yul du yongs su grub pa'o/ /don dam pa'i mtshan nyid ni chos kyi dbyings la shin tu gnas par snang ba'o/ /lha'i dri bsung las shin tu 'das pas yon tan gyi mtshan nyid ni lha'i yul las shin tu 'das pa'o//chu ba la sogs pa rang bzhin gyi mtshan nyid ni nor bu rin po che bai DUr+ya chen po'i chu ba can/ tsan dan gyi rgyal po mtshungs pa med pa'i snying po can/ rdo'i snying po chen po'i ze ba can 'dzam bu chu bo'i gser ltar snang ba'i lo ma can 'od zer dpag tu med pas rgyas pa'i lus can no//rgyan gyi mtshan nyid ni rin po che thams cad kyis nang rab tu spras pa rin po che'i dra ba mu med pas kun nas g.yogs pa stong gsum brgya stong phrag bcur tshang ba'i rdul phra rab kyi rdul snyed kyi pad ma'i 'khor dang ldan pa yin no//lus kyi tshad ji tsam la dbang bskur zhe na/ stan de'i rkyen du bab pa'i lus kyi tshad la ste/ byang chub sems dpa' de'i lus kyang de dang 'tsham zhing de'i rkyen du bab par gnas te/ thams cad mkhyen pa'i ye shes dang khyad par med pa dbang bskur ba dang ldan pa'i ting nge 'dzin thob ma thag tu rin po che chen po'i pad ma'i stan de la 'dug par kun du snang ngo //'khor gang gi nang na dbang bskur zhe na/ rin po che chen po'i pad ma'i stan de'i 'khor gyi pad ma dag la 'khod pa'i byang chub sems dpa'i 'khor gyi nang du ste /byang chub sems dpa' de rin po che chen po'i rgyal po'i pad ma de la 'dug ma thag tu de nas rin po che'i rgyal po'i 'khor pad ma ji snyed byung ba de snyed kyi byang chub sems dpas de bskor nas pad ma de dag la 'khod par snang ste/ byang chub sems dpa' de nyid la blta zhing de dag re re la yang ting nge 'dzin stong phrag bcu bcu la snyoms par 'jug go//mtshan ma gang byung bar gyur na dbang bskur zhe na/ 'od zer byung ba ste/ 'od zer de yang las gsum dang ldan pa yin te/ phan 'dogs pa'i las can dang / sbron pa'i las can dang / 'gugs pa'i las can no//de la phan 'dogs pa'i las can zhes bya ba ni byang chub sems dpa' de rin po che chen po'i rgyal po'i pad ma'i stan de la 'dug ma thag tu de'i lus kyi yan lag thams cad kyi yan lag re re nas kyang 'od zer grangs med pa brgya phrag bcu bcu dang / steng gi yan lag gi dam pa mgo las stong gsum grangs med pa brgya phrag bcur tshang ba'i rdul phra rab kyi rdul snyed kyi 'od zer byung bas/phyogs bcu'i ngan song gsum dang mi dang lha dang lha ma yin dang nyan thos dang rang sangs rgyas dang / byang chub sems dpa' dang bdud dang de bzhin gshegs pa'i 'khor gyi dkyil 'khor thams cad snang bar byas nas sdug bsngal zhi ba dang /chos kyi snang ba'i sgo dang / ting nge 'dzin gyi sgo'i tshul dang / shes rab dang thabs la mkhas pa'i tshul nye bar sgrub pa dang / mchod pa dang / rim gro bya ba 'od shin tu gsal ba zhes bya ba rab tu 'byed pas 'jig rten gyi khams thams cad ma lus par g.yo ba dang /ngan song thams cad rgyun chad pa dang / chos kyi dbyings thams cad snang bas rgyas pa dang / 'jig rten gyi khams thams cad yongs su dag pa dang / zhing thams cad du sangs rgyas kyi sgra grag pa dang / spyod pa mthun pa'i byang chub sems dpa' 'du ba dang /'jig rten gyi khams thams cad kyi lha dang mi'i rol mo glu dang rol mo'i sgra dang / sil snyan gyi sgra 'byung ba dang / sems can thams cad bde ba skye ba dang / yang dag par rdzogs pa'i sangs rgyas thams cad la mchod pa dang / rim gro bya ba bsam gyis mi khyab par byed pa 'byung bar 'gyur ro//sbron pa'i las can zhes bya ba ni de nas 'od zer de dag gis de bzhin gshegs pa'i dkyil 'khor thams cad snang bar byas te/ 'jig rten la lan bcu bskor ba byas te de bzhin gshegs pa rnams kyi zhabs kyi mthil gyi 'og tu nub par gyur te/ de nas de bzhin gshegs pa de dag dang /byang chub sems dpa' de dag gis 'jig rten gyi khams rab 'byam che ge mo zhig na byang chub sems dpa' spyod pa de lta bu dang ldan pa zhig dbang bskur ba'i dus la bab par thugs su chud par 'gyur ro/ /dgug pa'i las can zhes bya ba de nas byang chub sems dpa' sa dgu pa la rab tu gnas pa'i bar gyi byang chub sems dpa' mtha' yas pa dag phyogs bcu nas der lhags nas byang chub sems dpa' de la kun nas bskor te/mchod pa chen po byas nas byang chub sems dpa' de nyid la blta zhing ting nge 'dzin stong phrag bcu bcu la snyoms par 'jug par 'gyur ba dang / byang chub sems dpa' dbang bskur ba'i sa thob pa gzhan dag gi dpal be'u dang /rdo rje dang / bkra shis las bdud kyi dgra las rnam par rgyal ba zhes bya ba'i 'od zer chen po gcig 'od zer gyi grangs med brgya phrag bcu dang bcas pa 'byung ste/ phyogs bcu snang bar byas nas cho 'phrul mu med pa yang dag par bstan te/byang chub sems dpa' de'i dpal be'u dang / rdo rje dang / bkra shis su nub par 'gyur zhing / nub ma thag tu byang chub sems dpa' de stobs dang / mthu yang brgya phrag stong gyur pas dang lhag par mngon par 'phel bar snang ngo / /gang gis dbang bskur zhe na/ de bzhin gshegs pa dag gi 'od zer rnams dang /byang chub sems dpa' de gzhan dang gzhan dag gi ye shes dang mnyam pa nyid du yang dag par rab tu 'dzin pas te/ de nas de bzhin gshegs pa de dag gi mdzod spu dag nas thams cad mkhyen pa nyid kyi mngon par shes pa dang ldan pa zhes bya ba'i 'od zer grangs med pa brgya stong phrag bcu dag 'byung ste/de dag gis phyogs bcu thams cad kyi 'jig rten gyi khams thams cad ma lus par snang bar byas nas 'jig rten la lan bcu bskor ba byas te/ de bzhin gshegs pa rnam par 'phrul pa chen po rnams bstan/ byang chub sems dpa' bye ba khrag khrig brgya stong mang po bskul/sangs rgyas kyi zhing rab 'byam thams cad rnam pa drug tu bskyod/ ngan song thams cad kyi 'chi 'pho dang 'gro ba skye ba rab tu zhi bar byas/ bdud kyi gnas thams cad mog mog por byas/ de bzhin gshegs pa thams cad mngon par rdzogs par byang chub par rnam par sangs rgyas pa'i sangs rgyas kyi gdan kun du bstan/sangs rgyas thams cad kyi 'khor gyi dkyil 'khor bkod pa'i mthu rab tu bstan/ 'jig rten gyi khams chos kyi dbyings kyis klas pa/ nam mkha'i khams kyi mthas gtugs pa thams cad snang bar byas nas phyir log ste/byang chub sems dpa'i 'khor gyi dkyil 'khor thams cad kyi steng nas bskor ba byas nas bkod pa chen po bstan te/ byang chub sems dpa' de'i yan lag gi dam par nub par 'gyur la/ de'i 'khor gyi 'od zer rnams ni de ltar 'dus pa'i byang chub sems dpa' rnams kyi mgor nub par 'gyur te/'od zer de dag gis phog ma thag tu byang chub sems dpa' de dag gis sngon ma thob pa'i ting nge 'dzin stong phrag bcu bcu rab tu thob la/ 'od zer de dag dus gcig tu byang chub sems dpa' de dag gi yan lag gi dam pa la bab pas/ byang chub sems dpa' de yang dag par rdzogs pa'i sangs rgyas kyi yul la mngon par dbang bskur ba zhes bya ba la/stobs bcu yongs su rdzogs nas ni yang dag par rdzogs pa'i sangs rgyas su bgrang ba yang 'thob par 'gyur ba ste/ de lta bus dbang bskur ba yin no/ /ji ltar dbang bskur zhe na/'khor los sgyur ba'i rgyal po'i bu thu bo lta bur te / 'di lta ste dper na/ 'khor los sgyur ba'i rgyal po'i bu thu bo gzhon nu btsun mo dam pa las btsas pa rgyal po'i mtshan dang ldan par gyur pa de 'khor los sgyur ba'i rgyal pos lha'i glang po rin po che la gser gyi khri bzang po'i steng du bzhag ste/steng nas bla re bres shing gdugs dang rgyal mtshan dang ba dan dang rol mo'i bkod pa rgya chen po byas te/ rgya mtsho chen po bzhi las chu blangs pa gser gyi bum pas bcus te/ chu des gzhon nu'i spyi bo nas dbang bskur na/ de dbang bskur ma thag tu rgyal po rgyal rigs spyi bo nas dbang bskur ba zhes bya ba'i grangs su 'gro ste/dge ba bcu'i las kyi lam yongs su rdzogs nas ni 'khor los sgyur ba zhes bya ba'i ming thob pa de bzhin du byang chub sems dpa' de yang sangs rgyas bcom ldan 'das de dag gis dbang bskur ma thag tu ye shes kyi dbang bskur bas dbang bskur ba zhes bya ste/stobs bcu yongs su rdzogs nas ni yang dag par rdzogs pa'i sangs rgyas kyi grangs su 'gro ba de ltar dbang bskur te/ de ni dbang bskur ba thob pa zhes bya'o/ /che ba nyid mthar phyin par spong ba zhes bya ba ni rnam pa lnga ste/ shes pas che ba nyid dang / rnam par thar pas che ba nyid dang /ting nge 'dzin gyis che ba nyid dang / gzungs kyis che ba nyid dang / mngon par shes pas che ba nyid do/ /de la shes pas che ba nyid ces bya ba ni shes bya'i de kho na mngon par rdzogs par byang chub pa'i don dang 'brel ba ste/ de yang rnam pa bdun te/ yang dag par grub pa shes pas che ba nyid dang / sprul pa shes pas che ba nyid dang /byin gyis brlabs pa shes pas che ba nyid dang / phra ba la 'jug pa'i shes pas che ba nyid dang / gsang ba'i gnas shes pas che ba nyid dang / bskal pa la 'jug pa shes pas che ba nyid dang / lam la gzud pa shes pas che ba nyid do/ /yang dag par 'grub pa shes pas che ba nyid ces bya ba ni thams cad mkhyen pa nyid la the tshom za ba gcod nus pa'i dbang du byas pa ste/chos kyi khams yang dag par 'grub pa la sogs pa shes pa yin no/ /sprul pa shes pas che ba nyid ces bya ba ni de la gnas pas mngon par bsgrub nus pa'i dbang du byas pa ste/ sems can du sprul pa la sogs pa shes pa yin no//byin gyis brlabs pa shes pas che ba nyid ces bya ba ni de nyid de lta bur 'jug nus pa'i dbang du byas pa ste/ sangs rgyas su byin gyis brlabs pa la sogs pa shes pa yin no/ /phra ba la 'jug pa shes pas che ba nyid ces bya ba ni sprul pa dang byin gyis brlabs pa de gnyis ka la gnyis su med pa'i ye shes kun du 'byung ba'i dbang du byas pa ste/spyod pa phra ba la 'jug pa'i mkhyen pa la sogs pa shes pa yin no/ /gsang ba'i gnas shes pas che ba nyid ces bya ba ni sems can yongs su ma smin pa'i skrag pa bsal ba'i dbang du byas pa ste/sku gsang ba la sogs pa shes pa yin no/ /bskal pa la 'jug pa shes pas che ba nyid ces bya ba ni tshe'i 'du byed byin gyis brlabs pa dang / gtong ba la dbang ba'i dbang du byas pa ste/ bskal pa gcig la bskal pa grangs med par yang dag par gzhol ba la sogs pa yin no//lam la gzud pa shes pas che ba nyid ces bya ba ni gnyen po'i man ngag gi dbang du byas pa ste/ byis pa'i lam gyis gzud pa mkhyen pa la sogs pa shes pa yin te/ de dag ni shes pas che ba nyid rnam pa bdun yin no/ /rnam par thar pas che ba nyid ces bya ba ni sems la dbang ba'i don dang 'brel ba ste/de ltar byang chub sems dpa'i sa 'di dang ldan pa'i byang chub sems dpa' de byang chub sems dpa'i rnam par thar pa bsam gyis mi khyab pa zhes bya ba 'khor dang bcas pa la sogs pa rnam par thar pa'i sgo brgya stong grangs med dpag tu med pa rab tu thob pa yin no//ting nge 'dzin gyis che ba nyid ces bya ba ni don thams cad 'grub pa sems bskyed pa tsam la rag las pa'i don dang 'brel pa ste/ de bzhin du ting nge 'dzin brgya stong grangs med pa rab tu thob pa yin no/ /gzungs kyis che ba nyid ces bya ba ni 'khor ba ji srid par sems can gyi don bya ba'i rjes su 'jug pa dang 'brel pa ste/de bzhin du gzungs brgya stong grangs med dpag tu med pa rab tu thob pa yin no/ /mngon par shes pas che ba nyid ces bya ba ni sems can yongs su smin par byed pa'i nus pa dang 'brel pa ste/ de bzhin du mngon par shes pa bsgrub pa brgya stong grangs med dpag tu med pa rab tu thob pa yin te/de ni che ba nyid mthar phyin par song ba zhes bya'o/ /sa'i nges pa'i tshig ces bya ba ni sa 'di'i ming chos kyi sprin zhes bya ba ste/ de yang sprin dang 'dra ba'i chos rnam pa gsum ste/ thos pa'i chos sprin lta bus sa 'di ba'i lus nam mkha' lta bu la khyab par byed pas khyab pa dang /chos des sems can rnams kyi nyon mongs pa'i rdul dang me lce rab tu zhi bas zhi bar byed pa dang / dga' ldan gyi gnas la sogs pa'i rim gyis sems can 'don pa'i phyir sprin gyi char gyis lo tog 'don pa bzhin du 'don pa ste/ de dag ni ming la mkhas pa'i skabs su mgo nas rgya cher bstan to//mthu bla na med pa dang bla na yod pa zhes bya ba ni sems can gzhan gyi mthu la ltos te bla na med pa dang / de bzhin gshegs pa'i mthu la ltos te bla na yod pa'o/ /de yang rnam pa drug ste/ gnas dang / gzhi dang / rang gi mtshan nyid dang / bya ba bsgrub pa dang yongs su tshim par byed pa dang / rgya che ba'o/ /de la mthu'i gnas ni rnam pa bzhi ste/ rnam par thar pa bsam gyis mi khyab pa dang / rgya mtsho ltar 'byor pa'i ting nge 'dzin dang / ye shes mngon par sgrub pa dang ldan pa'i gzungs dang / rdzu 'phrul gyi bya ba mngon par shes pa'o//gzhi ni rnam pa gnyis te/ phyi rol gyi dngos po sa la sogs pa dang / nang gi dngos po rang gi lus la sogs pa'o/ /rang gi mtshan nyid kyang rnam pa gnyis te/ yongs su bsgyur ba dang / sprul pa'o/ /bya ba sgrub pa ni mchod pa'i sgo nas byang chub kyi tshogs sogs par byed pa'o/ / yongs su tshim par byed pa ni rnam pa gnyis te/ the tshom du gyur pa la rang gi mthu kun du ston pa dang / chos thams cad ston pas so/ /rgya che ba yang rnam pa gnyis te/ mthu rgya che ba dang grangs rgya che ba'o/ /'bras bu legs pa'i khyad par ni snga ma bzhin no/ /gnas pa dang khyad par de dag thob pas na de yan lag des yongs su rdzogs pa yin zhes bya ba gsungs te/chos rnams la dbang ma thob pa las yang dag par 'das pa'i phyir ro/ /mi mthun pa'i phyogs spang ba gang zhe na/ shes bya thams cad la chags pa med pa dang / thogs pa med pa'i shes pa dang / mthong ba thob par mi nus pas de yan lag des yongs su ma rdzogs pa yin te zhes bya bas bstan te/sangs rgyas kyi sa'i mi mthun pa'i phyogs ni gnas ngan len phra mo snying po la yod pa lta bu ma spangs pa'o/ /de yang sa bcu pa ji srid du gnas pa mchog de nyid las 'das te/ bla na med pa yang dag par rdzogs pa'i byang chub mngon par rdzogs par sangs rgyas nas shes bya thams cad la chags pa med pa dang /thogs pa med pa'i shes pa dang / mthong ba brnyes te/ sku gsum dang / ye shes bzhi dang / sangs rgyas kyi chos ma 'dres pa brgya bzhi bcu la sogs pa'i che ba nyid mthar phyin cing /sangs rgyas kyi phrin las thams cad mdzad pa'i gnas pa thob pa nyid yin par sbyar ro/ /gnyen po bsgom pa gang zhe na de yan lag des yongs su rdzogs par bya ba'i phyir 'bad pas zhes bya bas bstan te/ sa bcu pa nas sangs rgyas kyi sar 'phar ba'i gnas skabs na slob pa thams cad kyi mthar thug pa'i lam gyis bsdus pa rdo rje lta bu'i ting nge 'dzin zhes bya bas zag pa med pa'i chos kyi dbyings la mnyam par gzhag ste/kun gzhi rnam par shes pa'i gnas ngan len phra mo snying po la yod pa lta bu yang dag par bcom nas gnas gyur par rab tu phye bas sangs rgyas kyi sa 'thob pa la 'bad pa'o//bsgoms pa'i 'bras bu 'thob pa gang zhe na/ de yang 'thob ste zhes bya bas bstan te/ sangs rgyas kyi sa la spangs pa dang / ye shes kyis rab tu phye ba'i sku gsum dang / ye shes bzhi dang / sangs rgyas kyi chos ma 'dres pa brgya bzhi bcus gnas pa dang khyad par bstan pa 'thob pa'o//de la spangs pa zhes bya ba ni sgrib pa rnam pa gnyis kyi bag chags dang bcas pa'i kun gzhi gnas gyur pa'o/ /ye shes zhes bya ba ni gnas gyur pas rab tu phye ba'i shes pa'o/ /sku gsum zhes bya ba ni chos kyi sku dang / gzugs kyi sku rnam gnyis so/ /ye shes bzhi zhes bya ba ni me long lta bu la sogs pa bzhi'o/ /sangs rgyas kyi chos ma 'dres pa brgya bzhi bcu zhes bya ba ni skyes bu chen po'i mtshan sum cu rtsa gnyis dang / dpe byad bzang po brgyad cu dang / rnam pa thams cad yongs su dag pa bzhi dang /de bzhin gshegs pa'i stobs bcu dang / mi 'jigs pa bzhi dang / dran pa nye bar gzhag pa gsum dang / bsrung ba med pa gsum dang / thugs rje chen po dang / bsnyel ba mi mnga' ba'i chos nyid dang / bag chags yang dag par bcom pa dang / rnam pa thams cad dang mchog mkhyen pa'o/ / gnas pa dang khyad par de dag thob pas na de yan lag des yongs su rdzogs pa yin no zhes bya ba gsungs te/ gnas ngan len phra mo snying po la yod pa lta bu yang dag par bcom pa'i phyir ro/ /de yan lag des yongs su rdzogs pa'i phyir yan lag thams cad yongs su rdzogs pa yin te zhes bya ba ni byang chub sems dpa'i sa bcu po dag ni sgrib pa dang bcas pa'i mngal na gnas pa'i lus kyi dus bcu dang 'dra la/sangs rgyas kyi sa ni shes bya'i spyod yul thams cad rab tu myong ba btsas pa'i dus dang 'dra bas/ de la mi mthun pa'i phyogs ni yod kyi gnyen po med pa'i phyir ro//mngal gyi nang na gnas pa'i lus kyi dus bcu ni/ mer mer po'i dus dang / nur nur po'i dus dang / ltar ltar po'i dus dang / mkhrang 'gyur gyi dus dang / lus dang mthun pa'i dus dang / rang bzhin dang mthun pa'i dus dang / las dang bcas pa'i dus dang / yongs su rdzogs pa'i dus gsum ste /dbang po yongs su rdzogs pa dang / dpe byad yongs su rdzogs pa dang / chu zheng yongs su rdzogs pa'i dus so/ /spyan ras gzigs dbang phyug de dag ni yan lag bcu gcig po de dag gis bsdus par rig par bya'o zhes bya ba ni mjug bsdus pa'i tshig go/ /yan lag bcu gcig ces bya ba ni gnyen po bsgom pa bcu gcig dang sbyar ro//mi mthun pa'i phyogs dang gnyen po la mkhas pa'i tshig gi don la sogs pa bshad zin to// // de'i 'og tu ming la mkhas pa'i tshig gi don la sogs pa bshad par bya ste/ ming la mkhas pa zhes bya ba ni sa bcu gcig po de nges pa'i tshig bstan pa la mkhas pa gang yin pa'o//de'i phyir de bstan pa'i dbang du mdzad nas/ bcom ldan 'das ci'i slad du sa dang po la rab tu dga' ba zhes bgyi zhes bya ba la sogs pa zhus so/ /de la sa dang po ni zhes bya ba la sa dang po'i nges pa'i tshig ni rgyu dang 'bras bu'i sgo nas rab tu dga' ba mang bas rab tu dga' ba zhes bya bar bstan to//de la rgyu'i sgo nas bstan pa ni/ don che ba 'dris pa ma yin pa 'jig rten las 'das pa'i sems thob pas zhes bya bas bstan to/ /de la don che ba zhes bya ba ni 'jig rten las 'das pa'i sems thob pa de dag dang gzhan gyi don phun sum tshogs pa dang ldan pa'i phyir ro/ / 'dris pa ma yin pa zhes bya ba ni de 'jig rten dang 'jig rten ma yin te/ sngon chad thob ma myong ba'i phyir ro/ /'jig rten las 'das pa'i sems zhes bya ba ni byang chub sems dpa' mos pas spyod pa la gnas pa las rab tu dga' ba'i gnas pa la 'jug pa na byang chub sems dpa' smon pa'i bla na med pa yang dag par rdzogs pa'i byang chub kyi smon lam snga ma byang chub legs par ma rtogs pa/byang chub par bya ba'i thabs legs par ma rtogs pa phal cher gzhan gyi rkyen gyis 'gro ba nges pa ma yin pa de spangs nas byang chub sems dpa'i smon lam shin tu rnam par nges pa rang gi bsgoms pa las byung ba sar pa/shin tu rnam par nges pa'i khyad par drag po de bzhin nyid la dmigs pa ro gcig pa'i rnam pas dmigs pa'i rnam pa shin tu rnam par nges pa dang / 'jig rten las 'das pa nyid de 'jig rten pa'i yul ma yin pas rang bzhin gyis shin tu rnam par nges pa dang / chos chen po'i dbyings nyid de sangs rgyas kyi chos thams cad kyi rtsa ba yin pas gtso bor shin tu rnam par nges pa dang /de nam mkha' ltar zad pa med pa'i phyir 'bras bu rtag pa'i yid du 'ong ba 'grub pa'i rgyu nyid shin tu rnam par nges pa dang mya ngan 'das pa la gzhol ba'i phyir 'bras bu rtag pa'i rgyu nyid du shin tu rnam par nges pa dang ldan pa gzhan skyed par byed de/byang chub sems dpa'i smon lam shin tu rnam par nges pa khyad par rnam pa drug dang ldan pa de ni sa dang po la zhugs pa'i don dam pa'i sems bskyed pa yin pas na 'jig rten las 'das pa'i sems zhes bya'o/ /de 'thob pa zhes bya ba ni gnas gang yod pa dang /gang gi phyir dang / gzhi gang yin pa dang / ci 'dra ba'i sems skye bas sa dang po la gnas pa'i gnas skabs na thob pa yin te/ rgyu de las rab tu dga' ba skye bas na de ni rgyu'i sgo nas nges pa'i tshig bstan pa yin no/ /'bras bu'i sgo nas bstan pa ni dga' ba dang mchog tu dga' ba rgya che ba'i phyir zhes bya bas bstan te/de ni rnam pa gnyis te sa 'di la rab tu dga' ba mang bas rab tu dga' ba yin no zhes bstan pa'i phyir rab tu dga' ba ji 'dra ba dang dmigs pa ji 'dra bas rab tu dga' ba'o/ /de la rab tu dga' ba ci 'dra bas rab tu dga' ba yin zhe na/ dga' ba zhes bya bas bstan te/byang chub sems dpa'i sa rab tu dga' ba la gnas pa'i byang chub sems dpa' ni de ltar 'jig rten las 'das pa'i sems thob pas shes nas dad pas rab tu phye ba'i mchog tu dga' ba mang po yin no/ /de yang rnam pa dgu ste/ dkon mchog rnam pa gsum po dag la dang ba'i mchog tu dga' ba dang /dmigs pa la dga' bas tshim pa'i phyir dga' ba'i mchog tu dga' ba dang / bdag gi khong du chud pa'i khyad par la rtog pa'i phyir rangs pa'i mchog tu dga' ba dang / rang gi lus dang sems la phan btags pas brtas pa'i phyir mgu ba'i mchog tu dga' ba dang /rang gi lus dang sems la khyad par phan btags pas dga' rlabs kyi mchog tu dga' ba dang / byang chub tu nye bar gyur par rtogs pa'i phyir spro ba'i mchog tu dga' ba dang / rang gi rgyud yongs su smin par bya ba'i phyir 'bel ba'i gtam rnam par gtan la 'bebs pa'i dus na 'khrul ba med pa'i mchog tu dga' ba dang /gzhan yongs su smin par bya ba'i phyir sems can sdud pa'i dus na snying rje dang des pas rnam par mi 'tshe ba'i phyir rnam par 'tshe ba med pa'i mchog tu dga' ba dang / de log par zhugs pa'i dus su bzod pa'i phyir khro ba med pa'i mchog tu dga' ba mang bas rab tu dga' ba zhes bya'o//dmigs pa ji 'dra bas rab tu dga' ba yin zhe na mchog tu dga' ba rgya che ba'i phyir zhes bya bas bstan te/ de ni rnam pa gnyis te/ ma 'ongs pa na thob par bya ba dang / da ltar thob pa'o/ de la ma 'ongs pa na thob par bya ba'i dmigs pa ni de ltar byang chub sems dpa'i sa rab tu dga' ba la gnas pa'i byang chub sems dpa' ni sangs rgyas bcom ldan 'das rnams rjes su dran pa dang rab tu dga' ba yin te/sangs rgyas bcom ldan 'das de dag ci 'dra bar ma 'ongs pa na bdag kyang de 'dra bar bya'o snyam nas rab tu dga' ba yin no/ /de yang rnam pa dgu ste/ sangs rgyas kyi chos rnams rjes su dran pa dang /byang chub sems dpa' rnams rjes su dran pa dang / byang chub sems dpa'i chos rjes su dran pa dang / pha rol tu phyin pa rnams rjes su dran pa dang / byang chub sems dpa'i sa'i khyad par rjes su dran pa dang / byang chub sems dpa'i mi 'phrogs pa rjes su dran pa dang / de bzhin gshegs pa'i gdams ngag dang rjes su bstan pa rjes su dran pa dang /sems can gyi don rab tu thob par byed pa rjes su dran pa dang / de bzhin gshegs pa'i ye shes la 'jug pa'i sbyor ba rjes su dran pa'i sgo nas sangs rgyas rjes su dran pa'i rab tu dga' ba yin no/ /da ltar thob pa'i dmigs pa ni bdag ni 'gro ba thams cad kyi yul las phyir log go snyam nas phyir zhing mchog tu dga' ba dang ldan pa yin te/'gro ba'i longs spyod las phyir log pa'i phyir ro/ /de yang rnam pa dgu ste/ sangs rgyas dang nye bar gyur pas phyir log pa dang / byis pa so so'i skye bo'i sa las ring du gyur pas phyir log pa dang /ye shes kyi sa dang nye bar gyur pas phyir log pa dang / ngan song ngan 'gro log par ltung ba thams cad kyi rgyun chad pas phyir log pa dang / sems can thams cad kyi ston par gyur pas phyir log pa dang / de bzhin gshegs pa rnams mthong ba dang nye bar gyur pas phyir log pa dang /sangs rgyas kyi yul la yang dag par byung bas phyir log pa dang / byang chub sems dpa' thams cad kyi mnyam pa nyid dang ldan par gyur pas phyir log pa dang / 'jigs pa dang sdang ba dang bag tsha ba dang bral bas phyir log go zhes mchog tu dga' ba bskyed pa ste/de'i phyir sa dang po ni rab tu dga' ba zhes bya'o zhes bya bar sbyar ro/ /sa gnyis pa ni zhes bya ba la sa gnyis pa'i nges pa'i tshig ni ngang tshul ngan pa'i dri ma dang / log par rtsol ba'i dri ma dang bral ba'i phyir dri ma med pa zhes bya ba ston to/ /de la ngang tshul ngan pa'i dri ma dang bral ba ni ltung ba phra mo'i dri ma thams cad dang bral ba nyid kyi phyir zhes bya bas bstan te/sa gnyis pa la rang bzhin rnam par dag pas bstan pa la rang bzhin rnam par dag pa zhes bya ba tshul khrims rnam par dag pa gsum sdom pa'i tshul khrims rnam par dag pa ni/ ngang tshul ngan pa'i dri ma dang bral ba'i phyir dri ma med pa zhes bya bar bstan to//log par rtsol ba dri ma dang bral ba ni/ 'chal ba'i tshul khrims kyi dri ma thams cad dang bral ba nyid kyi phyir zhes bya bas bstan to / /dge ba'i chos sdud pa'i tshul khrims dang / sems can gyi don bya ba'i tshul khrims rnam par dag pas ni log par rtsol ba'i dri ma dang bral ba'i phyir dri ma med pa zhes bya bar bstan to//de'i phyir sa gnyis pa ni dri ma med pa zhes bya'o zhes bya bar sbyar ro/ /sa gsum pa ni zhes bya ba la sa gsum pa'i nges pa'i tshig ni sbyin pa dang 'bras bu'i gnas skabs kyis chos kyi snang ba chen po byed pa'i phyir 'od byed pa zhes bya bar ston to//de la sbyor ba'i gnas skabs ni ting nge 'dzin dang thob pa'i gzungs te zhes bya bas bstan te/ sa gnyis pa nas sa gsum par 'phar ba'i gnas skabs na 'dod chags dang bral ba'i sbyor ba 'byung bar byed pa zhes bya ba dag pa'i sems kyi bsam pa yid la byed pa'i rgyus 'dod chags dang bral bar sbyor ba zhes bya ba sbyor ba rnam pa gsum gyis 'dod pa'i 'dod chags dang bral bas bsam gtan la sbyor zhing shes pa'i snang ba tshad med pa'i gnas su gyur pa'i ting nge 'dzin dang thos pa'i gzungs te mngon par sgrub par byed pa'i phyir ro//'bras bu'i gnas skabs ni shes pa'i snang ba tshad med pa'i gnas nyid yin pa'i phyir zhes bya ba bstan te/ sa gsum pa la 'dod chags dang bral ba dang / 'dod chags dang bral ba'i 'bras bu gnas pa zhes bya ba sngar bstan pa la/ 'dod chags dang bral ba zhes bya ba ni bsam gtan dang gzugs med pa'i snyoms par 'jug pa thob pa ste/ting nge 'dzin de zhes gsungs pa dang sbyar ro / /'dod chags dang bral ba'i 'bras bu zhes bya ba ni tshad med pa bzhi dang / mngon par shes pa lnga dang thos pa'i gzungs thob pa ste/ thos pa'i gzungs de zhes gsungs pa dang sbyar ro//de ltar ting nge 'dzin de dang thos pa'i gzungs de thob pa na de nyid shes pa'i snang ba tshad med pa'i gnas nyid yin pa'i phyir des bdag dang gzhan gyi rgyud la chos kyi snang ba chen po byed pas na 'od byed pa zhes bya ste/ de'i phyir sa gsum pa ni 'od byed pa zhes bya'o zhes bya bar sbyar ro//sa bzhi pa ni zhes bya ba la sa bzhi pa'i nges pa'i tshig ni gnyen po bsgom pa dang / de'i 'bras bu'i sgo nas rdo rje lta bu'i ting nge 'dzin gyis rab tu phye ba'i ye shes kyi me 'byung ba'i drod dang ldan pas 'od 'phro can zhes bya bar ston to/ /de la gnyen po bsgom pa'i sgo nas bstan pa ni/nyon mongs pa'i shing bsreg pa'i phyir byang chub kyi phyogs dang mthun pa'i chos bsgom pa ste zhes bya bas bstan te/ sa bzhi pa la gnyen po bsgom pa 'phel ba zhes bya ba nyon mongs pa'i gnyen po byang chub kyi phyogs dang mthun pa'i chos bsgom pa 'phel ba de nyid phyis sa bcu pa nas sangs rgyas kyi sar 'phar ba'i gnas skabs na slob pa thams cad kyi mthar thug pa'i lam gyis bsdus pa rdo rje lta bu'i ting nge 'dzin zhes bya bas rab tu phye ba'i ye shes kyi mes nyon mongs pa dang /shes bya'i sgrib pa'i shing bsreg pa byung ba'i drod du gyur pa'i drod de dang ldan pas na 'od 'phro can zhes bya ste/'od 'phro zhes bya ba ni me byung ba'i 'od 'phro la mi bya'i me da dung ma byung ba 'byung ba'i drod la bya'o/ /de'i 'bras bu'i sgo nas bstan pa ni/ ye shes kyi me'i 'od 'phro bar gyur pa'i phyir zhes bya bas bstan te/ sa bzhi pa la de'i 'bras bu zhes bya ba gnyen po bsgoms pa de'i 'bras bu drug po nyon mongs pa'i kun nas nyon mongs pa spangs pa la sogs pa thos pa'i dus na/sngar gnyen po bsgoms pa'i skabs su byang chub kyi phyogs dang mthun pa'i chos bsgoms pas 'bras bur gyur pa de nyid snga ma bzhin du rdo rje lta bu'i ting nge 'dzin gyis rab tu phye ba'i ye shes kyi me phyis 'byung ba'i drod du gyur pa'i phyir 'od 'phro can zhes bya ste/de'i phyir sa bzhi pa ni 'od 'phro can zhes bya'o zhes bya bar sbyar ro/ /sa lnga pa ni zhes bya ba la sa lnga pa'i nges pa'i tshig ni mi gnas pa'i lam sgrub pa'i khyad par dang /de'i 'bras bu'i rnam par gzhag pa'i sgo nas 'khor ba dang mya ngan las 'das pa la mi gnas pa'i shes pa shin tu sbyang bar dka' ba shin tu sbyangs pas shin tu sbyang dka' ba zhes bya ba bstan to/ /de la mi gnas pa'i lam sgrub pa'i khyad par gyi sgo nas bstan pa ni byang chub kyi phyogs dang mthun pa'i chos de dag nyid thabs kyis bsgom pa de la zhes bya bas bstan te/sa lnga pa la mi gnas pa'i lam sgrub pa'i khyad par zhes bya ba shes bya la ye shes rnam par dag pa'i khyad par gyis bden par rtogs pas 'khor ba la mi gnas pa dang /'dus byas thams cad la brdzun pa la sogs pa'i mtshan nyid du rig pa nas sems can la snying brtse bas brtson 'grus sgrub pa'i khyad par gyis mya ngan las 'das pa la mi gnas pa'i dus na kun nas nyon mongs pa las kun du bsrung ba'i phyir byang chub kyi phyogs dang mthun pa'i chos shes rab kyis shin tu bsgoms pa des theg pa chung ngus yongs su mya ngan las mi 'da' bar thabs la mkhas pas theg pa chung ngu las kun du bsrung ba'i phyir byang chub kyi phyogs dang mthun pa'i chos de la thabs kyis bsgom zhing 'khor ba dang mya ngan las 'das pa la mi gnas pa'i shes pa shin tu sbyang bar dka' ba des sa lnga pa la gnas pa'i byang chub sems dpa' des mi gnas pa'i las sgrub pa'i khyad par des sbyar zhing 'khor ba dang mya ngan las 'das pa la mi gnas par byed pas na shin tu sbyang dka' zhes bya'o//de'i 'bras bu rnam par gzhag pa'i sgo nas bstan pa ni/ dbang bar bya bar dka' ba nyid kyi phyir zhes bya bas bstan te/ sa lnga pa la de'i 'bras bu rnam par gzhag pa zhes bya ba mi gnas pa'i lam sgrub pa'i khyad par de'i 'bras bu rnam pa bzhi'i yon tan yongs su 'dzin pa'i khyad par la sogs pa thob pa'i dus na/shin tu sbyang bar dka' ba'i lam dbang bya bar dka' ba de shin tu sbyangs shing dbang du byas pa na de'i phyir shin tu sbyang dka' ba zhes bya ste/ de'i phyir sa lnga pa ni shin tu sbyang dka' zhes bya bar sbyar ro//sa drug pa ni zhes bya ba la/ sa drug pa'i nges pa'i tshig ni mi gnas pa'i las sgrub pa'i khyad par gyi sgo nas rten cing 'brel par 'byung ba'i 'jug pa phra mo mngon du gyur pa dang / de'i 'bras bu rnam par gzhag pa'i sgo nas chags pa med pa'i ye shes la mngon par phyogs pa zhes bya ba'i shes rab kyi pha rol tu phyin pa la gnas pa snang ba'i tshul gyis mngon du gyur pa'i phyir mngon du gyur zhes bya bar ston to//de la mi gnas pa'i lam sgrub pa'i khyad par gyi sgo nas rten cing 'brel par 'byung ba'i 'jug pa phra mo mngon du gyur pa ni/ 'du byed kyi 'jug pa la mngon sum du gyur pa nyid ces bya bas bstan te/ sa drug pa la mi gnas pa'i lam bsgrub pa'i khyad par zhes bya ba dus gsum gyi snying rje'i khyad par yongs su 'dzin pas sems can la lta ba'i phyir mya ngan las 'das pa la mi gnas pa dang / rten cing 'brel par 'byung ba phra mo'i rnam pa thams cad la rtogs pas shes bya la ye shes rnam par dag pa'i phyir 'khor ba la mi gnas pa'i dus na/rten cing 'brel par 'byung ba'i 'jug pa phra mo la sgo gsum nas brtag pas mngon du gyur pa'o/ /de'i 'bras bu rnam par gzhag pa'i sgo nas chags pa med pa'i ye shes la mngon par phyogs pa zhes bya ba'i shes rab kyi pha rol tu phyin pa la gnas pa la snang ba'i tshul gyis mngon du gyur pa ni/mtshan ma med pa mang du yid la byed pa mngon du gyur pa'i phyir zhes bya bas bstan te/ sa drug pa la de'i 'bras bu rnam par gzhag pa zhes bya ba mi gnas pa'i lam sgrub pa'i khyad par de'i 'bras bu gnas pa'i khyad par thob pa'i dus na de bzhin gshegs pa'i ye shes chags pa med pa la mngon par phyogs pa zhes bya ba'i shes rab kyi pha rol tu phyin pa la gnas pa mtshan ma med pa snang ba'i tshul gyis mang du yid la byed pa mngon par gyur pas mngon du gyur zhes bya ste/de'i phyir sa drug pa ni mngon du gyur zhes bya'o zhes bya bar sbyar ro/ /sa bdun pa ni zhes bya ba la sa bdun pa'i nges tshig ni sa snga phyi'i khyad par rnam par gzhag pa'i sgo nas 'og ma rnams las khyad zhugs pa dang / de'i 'bras bu'i rnam par gzhag pa'i sgo nas sa las shin tu 'das par ring du song ba zhes bya bar ston to//de las snga phyi'i khyad par rnam par gzhag pa'i sgo nas 'og ma rnams las khyad zhugs pa ni mtshan ma med pa'i yid la byed pa bar chad med cing rgyun mi 'chad par ring du rjes su zhugs pa zhes bya bas bstan te/ sa bdun pa la snga phyi'i khyad par rnam par gzhag pa zhes bya ba sa bdun pa 'di sa 'og ma rnams las khyad zhugs pa dang /sa gong ma bas dman par bstan pa las sa 'og ma rnams las khyad zhugs pa zhes bya ba ni sa bdun pa la sbyor ba can gyi spyod pa yongs su rdzogs par byed pas ye shes dang mngon par shes pa'i spyod pa gnon pa'i phyir sa 'og ma rnams las khyad zhugs pas ring du song ba zhes bya'o//de'i 'bras bu rnam par gzhag pa'i sgo nas sa las shin tu 'das pa ni rnam par dag pa'i sa dang rjes su 'brel pa nyid kyi phyir zhes bya bas bstan te/ sa bdun pa la de'i 'bras bu rnam par gzhag pa zhes bya ba zung du 'brel ba'i lam gyi 'bras bu sa las shin tu 'das pa nyan thos dang rang sangs rgyas kyi sa las shin tu 'das pa dang /shes rab dang ye shes kyis rnam par dpyad pa'i sa dang nye bar gyur pa zhes bstan pa las shes rab dang ye shes kyis rnam par dpyad pa'i sa dang nye bar gyur pa zhes bya ba ni rnam par dag pa'i sa brgyad pa dang rjes su 'brel pa nyid yin pas de'i phyir yang ring du song ba zhes bya ste/de'i phyir sa bdun pa ni ring du song ba zhes bya'o zhes bya bar sbyar ro/ /sa brgyad pa ni zhes bya ba la sa brgyad pa'i nges pa'i tshig rab tu dbye ba'i sgo nas rnam pa gnyis te/ sa'i nges pa'i tshig rab tu dbye ba dang /gang zag gi nges pa'i tshig rab tu dbye ba'o / /de la sa'i nges pa'i tshig rab tu dbye ba ni mtshan ma med pa'i lhun gyis grub pa nyid ces bya bas bstan te / byang chub sems dpa'i ye shes kyi sa 'di ni mtshan ma med pa la lhun gyis grub pa nyid kyi phyir mi g.yo ba zhes bya bar ston to/ /de yang rnam pa bcur rig par bya ba mi 'phrogs pa'i phyir mi g.yo ba'i sa dang /ye shes mi zlogs pa'i phyir phyir mi ldog pa'i sa dang / 'gro ba thams cad kyis shes par dka' ba'i phyir bsnyen par dka' ba'i sa dang / kha na ma tho ba med pa'i phyir gzhon nu'i sa dang / bsam pa ji lta ba bzhin du dbang byed pa'i phyir skye ba'i sa dang /yang bya ba med pa'i phyir yongs su grub pa'i sa dang / ye shes kyis rnam par dbye ba shin tu byas pa'i phyir mthar thug pa'i sa dang / smon lam shin tu mngon par bsgrubs pa'i phyir mya ngan las 'das pa'i sa dang / gzhan gyis rnam par mi 'khrugs pa'i phyir byin gyi rlabs kyi sa dang /sngon gyi mtha' mngon par bsgrubs pa'i phyir lhun gyis grub pa'i sa zhes bya'o/ /gang zag gi nges pa'i tshig rab tu dbye ba ni/ mtshan ma'i nyon mongs pa kun du 'byung bas mi bskyod pa nyid kyi phyir zhes bya bas bstan te/ byang chub sems dpa' mtshan ma'i nyon mongs pa kun du 'byung bas mi bskyod pa nyid kyi phyir sa mi g.yo ba thob pa zhes bya bar ston to//de ni rnam pa gnyis kyis ston te/ gcig tu mi g.yo ba dang / gcig pa nyid du mi g.yo bas sa mi g.yo ba thob pa zhes bya'o/ /de la gcig tu mi g.yo ba zhes bya ba ni rtag par rgyun du de bzhin gshegs pa'i byin gyi rlabs kyis shin tu byin gyis brlabs pa yin te/de yang yon tan rnam pa lnga'i dbang du byas par rig par bya ste/ brgya byin dang / tshangs pa dang / 'jig rten skyong bas bsdu bas mchod pa'i yon tan dang / lag na rdo rje rtag par phyi bzhin du 'brang bas kun du bsrungs pa'i yon tan dang /ting nge 'dzin gyi stobs ma btang bas gnas kyi yon tan dang / lus rnam par phye ba tshad med pa mngon par bsgrubs pas zhing yongs su dag pa'i yon tan dang / sems can yongs su smin par byed pa'i yon tan rnam pa lnga ste/ lus kyi spyod pa'i stobs thams cad dang ldan pas ched du bsams te skye ba yongs su 'dzin pa'i yon tan dang mngon par shes pa chen po rnam par smin pa yongs su grub pas dbang po dang bsam pa dang bag la nyal shes pa'i nus pa'i yon tan dang /ting nge 'dzin mtha' yas pa la dbang byed pas chos kyi tshul la gzud pa'i phyir chos mtha' yas pa 'dzin pa'i nus pa'i yon tan dang /lung bstan pa tshad med pa yang dag par nod pas 'dzin nus pa'i yon tan dang / 'gro ba ji ltar yongs su smin pa bzhin du mngon par rdzogs par byang chub pa ston pas bshad pa'i nus pa'i yon tan gyis gcig tu mi g.yo bas sa mi g.yo ba thob pa zhes bya'o/ / gcig pa nyid du mi g.yo ba zhes bya ba ni theg pa chen po'i dkyil 'khor tha dad pa med par zhugs pa yin te / de ni tha mi dad pa rnam pa dgus rig par bya ste/ shin tu rnam par dpyad pa'i ye shes dang mngon par shes pa chen po dang ldan pas ye shes tha mi dad pa dang / rtag par rgyun du shes rab kyi snang ba'i 'od zer rab tu gtong bas bshad pa tha mi dad pa dang /chos kyi dbyings chags pa med pa'i lam du zhugs pas rnam par grol ba tha mi dad pa dang / 'jig rten gyi khams kyi lam rnam par dbye ba la mkhas pas zhing yongs su dag pa tha mi dad pa dang / yon tan gyi rnam pa thams cad yang dag par ston pas theg pa chen po las 'jug pa tha mi dad pa dang /rang gi sems sems bskyed pa la dbang byed pas thams cad shes pa tha mi dad pa dang / sngon gyi mtha' dang phyi ma'i mtha' shin tu rtogs pa'i ye shes dang ldan pas dri ba lung ston par nus pa tha mi dad pa dang /bdud kyi las thams cad 'jug pa dang ldog pa'i ye shes dang ldan pas byang chub kyi snying po la 'jug pa tha mi dad pa dang / de bzhin gshegs pa'i yul dang spyod yul thams cad kyi rjes su zhugs pas mngon par rdzogs par byang chub pa tha mi dad pas gcig pa nyid du mi g.yo ba thob pa zhes bya ste/de'i phyir sa brgyad pa ni mi g.yo ba zhes bya'o zhes bya bar sbyar ro/ /sa dgu pa ni zhes bya ba las sa dgu pa'i nges pa'i tshig ni ye shes phun sum tshogs pa'i yul la/ ngag phun sum tshogs pas chos ston pa mngon par sgrub pa'i so so yang dag par rig pa'i blo gros rgya chen po thob pas legs pa'i blo gros zhes bya bar ston to//de la ye shes phun sum tshogs pa'i yul ni/ rnam pa thams cad du chos ston pa'i dbang la zhes bya bas bstan te/ sa dgu pa la ye shes phun sum tshogs pa zhes bya ba la gang shes nas gang gi dbang du byas te ston pa zhes bstan pa la gang shes nas ston ce na/yongs su smin par gyur pa'i grol ba'i snod dang / gdul bas rnam par grol ba'i rang bzhin dang / theg pa gsum tha dad pas rnam par grol ba'i bar du dbye ba shes nas ston pa'o/ /gang gi dbang du byas nas ston ce na/ gnyen po'i man ngag gi snod dang /chos bstan pa'i snod dang / dpe ji lta bu nye bar sgrub pa'i snod dang / rnam grangs ji lta bu'i snod la sogs pa'i dbang du byas te ston pa shes pa'i ye shes phun sum tshogs pa'i yul ni rnam pa thams cad du chos ston pa'i dbang zhes bya ste/ ngag phun sum tshogs pas chos ston pa mngon par sgrub pa'i so so yang dag par rig pa'i blo gros rgya chen po 'thob pa ni/kha na ma tho ba med pa'i blo gros shin tu yangs pa thob pa nyid kyi phyir zhes bya bas bstan te/ sa dgu pa la ngag phun sum tshogs pa zhes bya ba de ltar ye shes tshad med pa dang ldan pas byang chub sems dpa'i so so yang dag par rig pa bzhis mngon par bsgrub pa'i tshig gis chos ston pa zhes bstan pa la/tshig gis chos ston pa zhes bya ba ni ngag phun sum tshogs pas chos ston pa yin no/ /de mngon par sgrub pa byang chub sems dpa'i so so yang dag par rig pa bzhi thob pa ni ngag phun sum tshogs pas chos ston pa mngon par bsgrub pa'i so so yang dag par rig pa'i blo gros rgya chen po thob pa zhes bya ste/de ni shes rab dang ldan pa'i ting nge 'dzin shin tu yongs su dag cing mi g.yo ba nyid la brten nas blo gros rgya chen po rgya che ba shin tu thob ste/ gzhan dag la chos yang dag par ston pa bla na med pa las brtsams nas chos kyi rnam grangs dang /mtshan nyid dang / nges pa'i tshig dang / rab tu dbye ba rab tu rnam par 'byed par 'byed pa'i blo gros yin pas na de thob pa ni kha na ma tho ba med pa'i blo gros shin tu yangs pa thob pa zhes bya ste/ de'i phyir sa dgu pa legs pa'i blo gros zhes bya'o zhes bya bar sbyar ro//sa bcu pa ni zhes bya ba la sa bcu pa'i nges pa'i tshig ni bstan pa las sa 'di la sprin dang 'dra ba'i chos rnam pa gsum gyis chos kyi sprin zhes bya bar ston te/ thos pa'i chos sprin lta bus sa bcu pa'i lus nam mkha' lta bu la khyab par byed pas khyab pa dang /chos des sems can rnams kyi nyon mongs pa'i rdul dang / me lce rab tu zhi bar byed pas rab tu zhi bar byed pa dang / dga' ldan gyi gnas la sogs pa'i rim gyis sems can 'don pa'i phyir sprin gyi char gyis lo tog 'don pa bzhin du 'don pas so/ /de la khyab par byed pa ni gnas ngan len gyi lus nam mkha' lta bu la chos kyi tshogs sprin chen po lta bus khyab cing zhes bya bas bstan te/de phyogs bcu'i sangs rgyas bcom ldan 'das dpag tu med pa las skad cig thang cig yud tsam cig las chos kyi snang ba chen po dang / chos kyi gsal ba chen po dang / chos kyi sprin chen po tshad med pa bzod pa dang / yang dag par len pa dang / bdag gir byed pa dang yang dag par 'dzin par byed pa yin no/ /rab tu zhi bar byed pa dang / 'don par byed pa ni khebs pa'i phyir zhes bya bas bstan te/ chos de dag sems can rnams kyi nyon mongs pa'i rdul dang /me lce rab tu zhi bar byed pa zhes bya ba ni byang chub sems dpa'i sa chos kyi sprin la gnas pa'i byang chub sems dpa' ni rang gi smon lam gyi stobs bskyed pas snying brtse ba dang / snying rje chen po'i sprin gyi chos kyi snang ba chen po bsgrag pa'i 'brug sgra chen po rab tu sgrogs pa dang / bdud kyi tshogs shin tu tshar gcod pa kun nas bsdus pa'i skad cig thang cig yud tsam cig la phyogs bcu'i 'jig rten gyi khams rgyas par bkang nas dge ba'i bdud rtsi'i char gyi rgyun chen pos bsam pa ji lta ba bzhin du sems can rnams kyi mi shes pa las langs pa'i rdul dang me lce thams cad rab tu zhi bar byed pa yin no//dga' ldan gnas la sogs pa'i rim gyis sems can 'don pa zhes bya ba ni byang chub sems dpa'i sa'i chos kyi sprin la gnas pa'i byang chub sems dpa' ni 'jig rten gyi khams thams cad na dga' ldan gyi pho brang na bzhugs pa nas bzung ste/ 'pho ba dang / gshegs pa dang / lhums na bzhugs pa dang / bltams pa dang / gzhon nu rol pa dang / btsun mo'i 'khor gyi nang na bzhugs pa dang / mngon par 'byung ba dang / dka' ba spyod pa dang / byang chub kyi snying por gshegs pa dang / bdud btul ba dang / mngon par rdzogs par byang chub pa dang /chos kyi 'khor lo bskor ba dang / yongs su mya ngan las 'das pa chen po ston pa'i bar du de bzhin gshegs pa'i mdzad pa thams cad sems can rnams kyi bsam pa ji lta ba dang / 'dul ba ji lta ba bzhin du byin gyis brlabs pas sprin gyi char gyis lo tog 'don pa bzhin du sems can 'don par byed pa yin te/de'i phyir sa bcu pa ni chos kyi sprin zhes bya'o zhes bya bar sbyar ro/ /sa bcu gcig pa ni zhes bya ba la/ sangs rgyas kyi sa'i nges pa'i tshig ni spangs pa dang ye shes kyi sgo nas shes bya'i rnam pa thams cad la chags pa med pa dang / thogs pa med pa'i snang ba 'jug pas kun du 'od ces bya bar ston to/ /de la spangs pa'i sgo nas bstan pa ni nyon mongs pa dang shes bya'i sgrib pa shin tu phra mo spangs pas zhes bya bas bstan te/ ye shes kyi sgo nas bstan pa ni/ chags pa med cing thogs pa med par shes bya'i rnam pa thams cad mngon par rdzogs par byang chub pa nyid kyi phyir zhes bya bas bstan to//sangs rgyas kyi sa zhes bya'o zhes bya bas ni shes bya'i rnam pa thams cad la chags pa med pa dang / thogs pa med pa'i snang ba 'jug pas sangs rgyas kyi sa kun du 'od ces bya bar bstan pa yin no/ /ming la mkhas pa'i tshig gi don la sogs pa bshad zin to// // de'i 'og tu mi mthun pa'i phyogs kyi rab tu dbye ba la mkhas pa'i tshig gi don la sogs pa bshad par bya ste/ mi mthun pa'i phyogs kyi rab tu dbye ba ni sngar sa rnams kyi mi mthun pa'i phyogs bstan pa de nyid kyi rab tu dbye ba'o//de ni rnam pa gnyis te/ shes rab rnam par grol ba'i mi mthun pa'i phyogs dang / sems rnam par grol ba'i mi mthun pa'i phyogs so/ /de'i phyir de bstan pa'i dbang du mdzad nas/ bcom ldan 'das de dag la kun du rmongs pa ni du mchis/ gnas ngan len mi mthun pa'i phyogs ni du mchis lags zhes bya ba zhus so //kun du rmongs pa nyi shu rtsa gnyis zhes bya ba ni sa bcu gcig la gnyis gnyis su sbyar te/ de ni ma rig pa yin pas shes rab kyi rnam par grol ba'i mi mthun pa'i phyogs yin no/ /gnas ngan len mi mthun pa'i phyogs bcu gcig ces bya ba ni sa bcu gcig la re rer sbyar te de ni bag la nyal yin pas sems rnam par grol ba'i mi mthun pa'i phyogs yin no//sa dang po la ni zhes bya ba la/ sa dang po'i mi mthun pa'i phyogs so so'i skye bo nyid kyi rab tu dbye ba ni gang zag dang chos la mngon par zhen pa kun du rmongs pa dang / ngan song ba'i nyon mongs pa'i kun du rmongs pa ste/so so'i skye bo'i dus na bdag tu mngon par zhen pa dang mi dge ba spyod pa'o/ /ma rig pa de gnyis yod na mthong ba'i lam gyi shes rab rnam par grol ba mi skye bas de'i phyir de gnyis ni sa dang po'i shes rab rnam par grol ba'i mi mthun pa'i phyogs yin no//de'i gnas ngan len mi mthun pa'i phyogs so zhes bya ba ni de gnyis kyi bag chags te/ de yod na mthong ba'i lam gyi sems rnam par grol ba mi skye bas de'i phyir de ni sa dang po'i sems rnam par grol ba'i mi mthun pa'i phyogs yin no/ /gnyis pa ni zhes bya ba la sa gnyis pa'i mi mthun pa'i phyogs log par sgrub pa'i rab tu dbye ba ni ltung ba phra mo'i 'khrul pa kun du rmongs pa dang /las kyi rnam pa sna tshogs pa kun du rmongs pa ste / sa dang po'i dus na ngang tshul ngan pa'i dri ma kun du rmongs pa dang / log pa'i rtsol ba'i dri ma kun du rmongs pa'o/ /ma rig pa de gnyis yod na sa dang po nas gnyis par 'phar ba'i gnas skabs na 'byung bar byed pa rnam par dag pa zhes bya ba drang po'i bsam pa thob pas na/dang po las 'phar zhing gnyis pa non par gyur pa'i shes rab rnam par grol ba mi skye bas de'i phyir de ni sa gnyis pa'i shes rab rnam par grol ba'i mi mthun pa'i phyogs yin no//de ni gnas ngan len mi mthun pa'i phyogs so zhes bya ba ni de gnyis kyi bag chags te/ de yod na sa gnyis pa la rang bzhin rnam par dag pas gnas pa'i sems rnam par grol ba mi skye bas de'i phyir de ni gnas pa'i sems rnam par grol ba'i mi mthun pa'i phyogs yin no//gsum pa la ni zhes bya ba la/ sa gsum pa'i mi mthun pa'i phyogs thos pa la sogs pa'i chos rnams brjod pas mun par byed pa'i rab tu dbye ba ni 'dod pa'i 'dod chags kun du rmongs pa dang / thos pa'i gzungs yongs su rdzogs pa las kun du rmongs pa ste/sa gnyis pa'i dus na ting nge 'dzin la kun du rmongs pa dang / thos pa'i gzungs la kun du rmongs pa'o/ /ma rig pa de gnyis yod na sa gnyis pa nas gsum par 'phar ba'i gnas skabs na 'dod chags dang bral bar sbyor ba 'byung bar byed pa zhes bya ba dag pa'i sems bsam pa yid la byed pa'i rgyus 'dod chags dang bral bar sbyor zhes bya ba sbyor ba rnam pa gsum thob pas sa gnyis pa las 'phar zhing gsum pa la gnon par 'gyur ba'i shes rab rnam par grol ba mi skye bas de'i phyir de ni sa gsum pa'i shes rab rnam par grol ba'i mi mthun pa'i phyogs yin no//de'i gnas ngan len mi mthun pa'i phyogs so zhes bya ba ni de gnyis kyi bag chags te/de yod na sa gsum pa la 'dod chags dang bral ba dang / 'dod chags dang bral ba'i 'bras bus gnas pa'i sems rnam par grol bas mi skye bas de'i phyir de ni sa gsum pa'i sems rnam par grol ba'i mi mthun pa'i phyogs yin no/ /bzhi pa la ni zhes bya ba la/sa bzhi pa'i mi mthun pa'i phyogs 'jig tshogs la lta ba la sogs pas bsdus pa'i nyon mongs pa phra mo kun du 'byung ba'i rab tu dbye ba ni snyoms par 'jug pa la sred pa kun du rmongs pa dang / chos la sred pa kun du rmongs pa ste/ sa gsum pa'i dus na 'dod chags dang bral ba'i ting nge 'dzin la srid pa'i kun du rmongs pa dang /'dod chags dang bral ba'i 'bras bu thob pa'i gzungs kyi chos la sred pa'i kun du rmongs pa'o/ /ma rig pa de gnyis yod na sa gsum pa nas sa bzhi par 'phar ba'i gnas skabs na rnam par dag pa dang gnyen po bsgom pa 'phel ba ni rgyu zhes bya ba chos la snang ba la 'jug pa thob pas sa gsum pa las 'phar zhing bzhi pa gnon par 'gyur ba'i shes rab rnam par grol ba mi skye bas de'i phyir de ni sa bzhi pa'i shes rab rnam par grol ba'i mi mthun pa'i phyogs yin no//de'i gnas ngan len mi mthun pa'i phyogs so zhes bya ba ni de gnyis bag chags te/de yod na sa bzhi pa la rnam par dag pa 'phel ba dang / gnyen po bsgom pa 'phel ba dang de'i 'bras bus gnas pa'i sems rnam par grol ba mi skye bas de'i phyir de ni sa bzhi pa'i sems rnam par grol ba'i mi mthun pa'i phyogs yin no/ /lnga pa la ni zhes bya ba la sa lnga pa'i mi mthun pa'i phyogs theg pa chung ngus yongs su mya ngan las 'das pa'i rab tu dbye ba ni/'khor ba la gcig tu mi phyogs pa nyid dang / mngon du phyogs pa nyid yid la byed pa kun du rmongs pa dang / mya ngan las 'das pa la gcig tu mi phyogs pa nyid dang mngon du phyogs pa nyid yid la byed pa kun du rmongs pa ste/sa bzhi pa'i dus na 'phags pa'i bden pa bzhi la kun du rmongs pa dang / dus gsum gyi sangs rgyas rnams kyi stobs la sogs pa rnam par dag pa'i rgyu tha dad par lta ba'i kun du rmongs pa'o/ /ma rig pa de gnyis yod na sa bzhi pa nas lnga par 'phar ba'i gnas skabs nas nga rgyal gyi khyad par gyi gnyen po rnam par gzhag pa zhes bya ba rnam par dag pa las sems kyi bsam pa mnyam pa nyid thob pas sa bzhi pa las 'phar zhing lnga pa gnon par 'gyur ba'i shes rab rnam par grol ba mi skye bas de'i phyir de ni sa lnga pa'i shes rab rnam par grol ba'i mi mthun pa'i phyogs yin no//de'i gnas ngan len mi mthun pa'i phyogs so zhes bya ba ni de gnyis kyi bag chags te/de yod na sa lnga pa la mi gnas pa'i lam du sgrub pa'i khyad par dang / de'i 'bras bu rnam par gzhag pas gnas pa'i sems rnam par grol ba mi skye bas de'i phyir de ni sa lnga pa'i sems rnam par grol ba'i mi mthun pa'i phyogs yin no//drug pa la ni zhes bya ba la sa drug pa'i mi mthun pa'i phyogs mtshan ma rags pa kun du 'byung ba'i rab tu dbye ba ni/ 'du byed kyi 'jug pa mngon sum du bya ba nyid la kun du rmongs pa dang / mtshan ma mang po kun du 'byung ba kun du rmongs pa ste/ sa lnga pa'i dus na rten cing 'brel par 'byung ba'i 'jug pa phra mo mngon sum du bya ba la kun du rmongs pa dang /chags pa med pa'i ye shes la mngon par phyogs pa zhes bya ba'i shes rab kyi pha rol tu phyin pa la gnas pa snang ba'i tshul gyis mngon du bya ba la kun du rmongs pa'o/ /ma rig pa de gnyis yod na sa lnga pa nas drug par 'phar ba'i gnas skabs na nga rgyal gyi khyad par gyi gnyen po rnam par gzhag pa zhes bya ba chos mnyam pa nyid thob pas sa lnga pa las 'phar zhing drug pa gnon par 'gyur ba'i shes rab rnam par grol ba mi skye bas de'i phyir de ni sa drug pa'i shes rab rnam par grol ba'i mi mthun pa'i phyogs yin no//de'i gnas ngan len mi mthun pa'i phyogs so zhes bya ba ni de gnyis kyi bag chags te/ de yod na sa drug pa la mi gnas pa'i lam sgrub pa'i khyad par de'i 'bras bu rnam par gzhag pas gnas pa'i sems rnam par grol ba mi skye bas de'i phyir de ni sa drug pa'i sems rnam par grol ba'i mi mthun pa'i phyogs yin no//bdun pa la ni zhes bya ba la sa bdun pa'i mi mthun pa'i phyogs mtshan ma phra mo kun du 'byung ba'i rab tu dbye ba ni/ mtshan ma phra mo kun du 'byung ba kun du rmongs pa dang / mtshan ma med pa gcig pu yid la byed pas thabs kun du rmongs pa ste/ sa drug pa'i dus na rten cing 'brel par 'byung ba'i 'jug pa phra mo mngon du gyur pas mtshan ma phra mo kun du 'byung ba kun du rmongs pa dang /chags pa med pa'i ye shes la mngon par phyogs pa zhes bya ba'i shes rab kyi pha rol tu phyin pa la gnas pa snang ba'i tshul gyis mngon du gyur pas shes rab kyi shas che la thabs la kun du rmongs pa'o/ /ma rig pa de gnyis yod na sa drug pa nas bdun par 'phar ba'i gnas skabs na mngon par 'du byed pa med pa la mngon par dga' ba'i gnyen po rnam par gzhag pa zhes bya ba thabs dang shes rab kyis mngon par sgrub pa'i lam gzhan brtsams pa'i khyad par thob pas sa drug pa las 'phar zhing bdun pa gnon par 'gyur ba'i shes rab rnam par grol ba mi skye bas de'i phyir de ni sa bdun pa'i shes rab kyi rnam par grol ba'i mi mthun pa'i phyogs yin no//de'i gnas ngan len mi mthun pa'i phyogs so zhes bya ba ni de gnyis kyi bag chags te/ de yod na sa bdun pa la de'i rnam par g.yeng ba'i gnyen po'i rnam par gzhag pa dang /zung du 'brel ba'i lam rab tu thob pa rnam par gzhag pa dang / sa snga phyi'i khyad par rnam par gzhag pa dang / de'i 'bras bu rnam par gzhag pas gnas pa'i sems rnam par grol ba mi skye bas de'i phyir de ni sa bdun pa'i sems rnam par grol ba'i mi mthun pa'i phyogs yin no/ /brgyad pa la ni zhes bya ba la/sa brgyad pa'i mi mthun pa'i phyogs mtshan ma med pa nyid du mngon par 'du byed pa'i rab tu dbye ba ni/ mtshan ma med pa la rtsol ba kun du rmongs pa dang / mtshan ma rnams la mi dbang ba kun du rmongs pa ste/ sa bdun pa'i dus na mtshan ma med pa la rang gi ngang nyid kyis rgyun chags su bar chad med par 'jug mi nus pas mtshan ma med pa la rtsol ba kun du rmongs pa dang /mtshan ma med pa'i zil gyis gnon pa'i dbang ma thob pas mtshan ma la mi dbang ba kun du rmongs pa'o/ /ma rig pa de gnyis yod na sa bdun pa nas brgyad par 'phar ba'i gnas skabs na yongs su sbyang ba byas pa'i sa bsdus pas zhes bya ba sa bdun po spyi dang /so sos bsdus pa'i yon tan thob pa des rnam par dag pa'i bzod pa thob pa zhes bya ba mi skye ba'i chos la bzod pa'i dmigs pa thob pas sa bdun pa las 'phar zhing brgyad pa gnon par 'gyur ba'i shes rab rnam par grol ba mi skye bas de'i phyir de ni sa brgyad pa'i shes rab rnam par grol ba'i mi mthun pa'i phyogs yin no//de'i gnas ngan len mi mthun pa'i phyogs so zhes bya ba ni de gnyis kyi bag chags te/ de yod na sa brgyad pa la mi skye ba'i chos la bzod pa'i tshul khong du chud pa dang / gnas pa'i khyad par thob pa dang / sangs rgyas kyi zhing yongs su sbyong ba dang /dbang thob pa dang che ba nyid kyi khyad par dang / nges pa'i tshig rab tu dbye bas gnas pa'i sems rnam par grol ba mi skye bas de'i phyir de ni sa brgyad pa'i sems rnam par grol ba'i mi mthun pa'i phyogs yin no/ /dgu pa la ni zhes bya ba la/ sa dgu pa'i mi mthun pa'i phyogs sems can gyi don bya ba la mngon par 'du byed pa med pa'i rab tu dbye ba ni/chos bstan pa dpag tu med pa dang / chos kyi tshig dang yi ge dpag tu med pa dang / gong nas gong du shes rab dang / spobs pa la gzungs kyi dbang la kun du rmongs pa dang / spobs pa'i dbang la kun du rmongs pa ste/sa brgyad pa'i dus na blo gros chen po rgya che ba rjes su thob ste/ gzhan dag la chos yang dag par ston pa bla na med pa las brtsams nas chos rnams kyi rnam grangs dang mtshan nyid dang nges pa'i tshig dang rab tu dbye ba rab tu rnam par mi nus pas chos bstan pa dpag tu med pa dang / chos kyi tshig dang yi ge dpag tu med pa la gzungs kyi dbang la kun du rmongs pa dang /gong nas gong du shes rab dang / spobs pa la spobs pa'i dbang la kun du rmongs pa'o/ /ma rig pa de gnyis yod na sa brgyad pa nas dgu par 'phar ba'i gnas skabs na smra ba'i brtson pa phun sum tshogs pa zhes bya ba bdag dang gzhan gyi dbang du byas pa'i chos thos pas brgyad pa las 'phar zhing dgu pa gnon par 'gyur ba'i shes rab rnam par grol ba mi skye bas de'i phyir de ni sa dgu pa'i shes rab kyi rnam par grol ba'i mi mthun pa'i phyogs yin no//de'i gnas ngan len mi mthun pa'i phyogs so zhes bya ba ni de gnyis kyi bag chags te/de yod na sa dgu pa la ye shes phun sum tshogs pa dang / spyod pa la 'jug pa phun sum tshogs pa dang / bshad pa phun sum tshogs pas gnas pa'i sems rnam par grol ba mi skye bas de'i phyir de ni sa dgu pa'i sems rnam par grol ba'i mi mthun pa'i phyogs yin no/ / bcu pa la ni zhes bya ba la/ sa bcu pa'i mi mthun pa'i phyogs chos rnams la dbang ma thob pa'i rab tu dbye ba ni/ mngon par shes pa chen po la kun du rmongs pa dang / gsang ba dang phra ba la 'jug pa la kun du rmongs pa ste/ sa dgu pa'i dus na che ba nyid mthar phyin par song ba mthong bas mngon par shes pa che ba nyid la kun du rmongs pa dang /gsang ba'i gnas shes pa che ba nyid dang phra ba la 'jug pa shes pa che ba nyid la kun du rmongs pa'o/ /ma rig pa de gnyis yod na sa dgu pa nas bcu par 'phar ba'i gnas skabs na yongs su sbyang ba bya ba'i sa yongs su rdzogs pa zhes bya ba shin tu rnam par dbye bas sa dgu po rnams yongs su rdzogs par bya ba thob pas sa dgu pa las 'phar zhing bcu pa gnon par 'gyur ba'i shes rab rnam par grol ba mi skye bas de'i phyir de ni sa bcu pa'i shes rab rnam par grol ba'i mi mthun pa'i phyogs yin no//de'i gnas ngan len mi mthun pa'i phyogs so zhes bya ba ni de gnyis kyi bag chags te/de yod nas sa bcu pa la ting nge 'dzin yongs su rdzogs pa thob pa dang / dbang bskur ba thob pa dang / che ba nyid mthar phyin par song ba dang / sa nges pa'i tshig dang / mthu bla na med pa dang / bla na yod pas gnas pa'i sems rnam par grol ba mi skye bas de'i phyir de ni sa bcu pa'i sems rnam par grol ba'i mi mthun pa'i phyogs yin no//sangs rgyas kyi sa la ni zhes bya ba la/ sangs rgyas kyi sa'i mi mthun pa'i phyogs gnas ngan len phra mo snying po la yod pa lta bu ma spangs pa'i rab tu dbye ba ni/ shes bya thams cad la chags pa shin tu phra mo kun du rmongs pa dang /thogs pa kun du rmongs pa ste/ sa bcu pa'i dus na gnas ngan len phra mo snying po la yod pa lta bu ma spangs pas shes bya thams cad la chags pa shin tu phra mo kun du rmongs pa dang / thogs pa med pa shin tu phra mo kun du rmongs pa'o/ / ma rig pa de gnyis yod na sa bcu pa nas sangs rgyas kyi sar 'phar ba'i gnas skabs na slob pa thams cad kyi mthar thug pa'i lam gyis bsdus pa rdo rje lta bu'i ting nge 'dzin zhes bya bas zag pa med pa'i chos kyi dbyings la mnyam par gzhag ste/ kun gzhi rnam par shes pa'i gnas ngan len phra mo snying po la yod pa lta bu yang dag par bcom nas gnas gyur pas rab tu phye ba sangs rgyas kyi sa thob pa'i shes rab rnam par grol ba mi skye bas de'i phyir de ni sangs rgyas kyi sa'i shes rab rnam par grol ba'i mi mthun pa'i phyogs yin no//de'i gnas ngan len mi mthun pa'i phyogs so zhes bya ba ni de'i bag chags te/de yod na sangs rgyas kyi sa la spangs pa dang / ye shes kyis rab tu bye ba'i sku gsum dang / ye shes bzhi dang / sangs rgyas kyi chos ma 'dres pa brgya bzhi bcus gnas pa'i sems rnam par grol ba'i mi mthun pa'i phyogs yin no/ /bla na med pa yang dag par rdzogs pa'i byang chub ni mi ldan pa yin no zhes bya ba ni thob pa'i dus na mi mthun pa'i phyogs spang bar bya ba med pa'i don to//ngo mtshar lags so zhes bya ba ni de ltar bla na med pa yang dag par rdzogs pa'i byang chub thob pa'i dus na mi mthun pa'i phyogs spang bar bya ba med pa de'i phan yon dang 'bras bu chen po la bstod pa yin no//mi mthun pa'i phyogs kyi rab tu dbye ba la mkhas pa'i tshig gi don la sogs pa bshad zin to// // de'i 'og tu gnyen po'i rab tu dbye ba la mkhas pa'i tshig gi don la sogs pa bshad par bya ste/ gnyen po'i rab tu dbye ba zhes bya ba ni sngar sa rnams kyi gnyen po bstan pa de dag re re la yang sar chud pa'i dge ba rnam par dag pa rnams brgyad brgyad kyis rab tu dbye ba'o//de'i phyir de bstan pa'i dbang du mdzad nas/ bcom ldan 'das de dag rnam par dag pa du dag gis rnam par gzhag pa lags zhes bya ba zhus so//brgyad kyis te zhes bya ba ni sangs rgyas kyi sa la ni skye ba rnam par dag pa ma gtogs pa lhag ma bdun no/ /sa bdun po de dag la sa re rer yang rnam par dag pa rnam pa brgyad brgyad kyis rab tu dbye ba rnam par gzhag pa ston to/ /lhag pa'i bsam pa rnam par dag pa zhes bya ba ni sngar sa dang po'i skabs su bsam pa bco lngas bstan pa de dag nyid sangs rgyas kyi sa'i bar du gong nas gong du ches shin tu rnam par dag pa yin no//sems rnam par dag pa zhes bya ba ni sngar sa dang po'i skabs su byang chub sems dpa'i smon lam shin tu rnam par nges pa'i rang gi bsgoms pa las byung bas sar shin tu rnam par nges pa'i khyad par drug dang ldan pa skye bas smon lam chen po re re la yang 'khor brgya stong grangs med pa dang bcas pa'i smon lam chen po bcu mngon par sgrub pa'i sems rnam par dag pa'i gser shin tu sbyangs pa lta bu bstan pa de nyid sangs rgyas kyi sa'i bar du gong nas gong du ches shin tu rnam par dag pa yin no//snying rje rnam par dag pa zhes bya ba ni sangs rgyas dang byang chub sems dpa' rnams kyi snying rje'i ngo bo nyid dang / gnas dang / 'bras bu'i phan yon te/ ngo bo nyid ni rnam pa gnyis te/ bsam par rtogs pa dang / sgrub par rtogs pa'o / /de la bsam par rtogs pa ni phan pa'i bsam pa dang / bde ba'i bsam pa'o/ /sgrub par rtogs pa bsam pa de nyid sems can la ci nus ci lcogs kyis lus dang ngag gis nye bar sgrub pa'o/ /gnas ni rnam pa lnga ste/ sems can sdug bsngal ba rnams dang /nyes par spyad pa spyod pa rnams dang / bag med pa rnams dang / log par zhugs pa rnams dang / nyon mongs pa'i bag la nyal dang ldan pa rnams so/ /'bras bu'i phan yon sems can rnams la 'khon spong ba dang / sems can gyi don bya ba thams cad la yid zhum pa med par sbyor ba dang /sbyor ba de la yongs su mi skyo ba dang / snying brtse bas shas cher gnas pa dang / kha na ma tho ba med par tshe 'di la bde bar gnas pa dang / tshe phyi ma la phan par 'gyur ba dang / byams pa'i phan yon de'i lus la dug gis mi tshugs mtshon gyis mi tshugs zhes bya ba la sogs pa gang dag gsungs pa de dag thams cad kyang yin par rig par bya ste/de yang sa dang po la nye bar 'jigs pa dang sdang ba dang / bag tsha ba dang / spu zing zhes byed pa med pa'i byang chub sems dpa' ni snying rje chen po sngon du 'gro ba'i phyir lhag pa'i bsam pa ma nyams pa dang mi dma' bas dge ba'i rtsa ba thams cad yang dag par bsdu ba'i phyir shin tu brtson par byed do zhes bstan pa nyid sangs rgyas kyi sa'i bar du gong du ches shin tu rnam par dag pa yin no//pha rol tu phyin pa rnam par dag pa zhes bya ba ni sangs rgyas dang byang chub sems dpa' rnams kyi pha rol tu phyin pa drug po ngo bo nyid dang /thams cad dang / dka' ba dang / thams cad kyi sgo dang / skyes bu dam pa dang / rnam pa thams cad dang / phongs shing 'dod pa dang / 'di dang gzhan gyi bde bar 'gyur ba dang / rnam par dag pas rab tu phye ba dag las ngo bo nyid yang dag par blangs nas sbyin pa thams cad shes rab thams cad kyi bar dag kun du bsten cing shin tu rnam par dag par byas ma thag kun du rdzogs par byas pas bla na med pa yang dag par rdzogs pa'i byang chub dang /rdo rje'i snying po'i sku dang dam pa'i chos yun ring du gnas pa'i 'bras bu mngon par 'grub pa dang / dka' ba'i sbyin pa la sogs pa kun du bsten pa la sogs pas de bzhin gshegs pa'i ngo mtshar rmad du byung ba'i chos mtshungs pa med pa dang ldan pa'i 'bras bu mngon par 'grub pa dang thams cad kyi sgo nas sbyin pa la sogs pa kun du bsten pa la sogs pas de bzhin gshegs pa thams cad la gtso bor gyur pa'i sems can lha dang mi rnams kyis mchod par gyur pa'i 'bras bu mngon par grub pa dang /skyes bu dam pa'i sbyin pa la sogs pa kun du bsten pa la sogs pas de bzhin gshegs pa'i sems can thams cad kyi mchog tu gyur pa'i 'bras bu/ mngon par 'grub pa dang /rnam pa thams cad kyi sbyin pa la sogs pa kun du bsten pa la sogs pa de bzhin gshegs pa'i skyes bu chen po'i mtshan sum cu rtsa gnyis dang / dpe byad bzang po brgyad cu'i sku bsod nams sna tshogs dpag tu med pas yongs su bsdus pa'i 'bras bu mngon par 'grub pa dang /phongs shing 'dod pa la sbyin pa la sogs pa kun du bsten pa la sogs pa de bzhin gshegs pa byang chub kyi snying po la bzhugs pa'i tshe bdud dang / phyir rgol ba thams cad kyis gnon par bya ba dang / tho 'tshams pa dang / bskyod par mi nus pa'i 'bras bu mngon par 'grub pa dang /'di dang gzhan du bde bar 'gyur ba'i sbyin pa la sogs pa kun du bsten pa la sogs pas de bzhin gshegs pa'i yon tan dang rnam par thar pa dang / ting nge 'dzin dang snyoms par 'jug pa'i bde ba'i mchog gi 'bras bu mngon par 'grub pa dang / rnam par dag pa'i sbyin pa la sogs pas de bzhin gshegs pa'i rnam pa thams cad yongs su dag pa bzhi po sku dang dmigs pa dang thugs dang ye shes rnam par dag pa la sogs pa'i 'bras bu mngon par 'grub pa ste/de yang sa dang po la de'i sbyin pa'i pha rol tu phyin pa shas che ba yin te/ lhag ma rnams ci nus kyi tshul du yang dag par mi sgrub pa ni ma yin no zhes bstan pa de nyid sangs rgyas kyi sa'i bar du gong nas gong du ches shin tu rnam par dag pa yin no//sangs rgyas mthong zhing bsnyen bkur byed pa rnam par dag pa zhes bya ba ni sangs rgyas dang byang chub sems dpa' rnams kyis dkon mchog gsum la mchod pa rnam par dag pa ste/de la de bzhin gshegs pa la mchod pa ni rnam pa bcu ste/ sku la mchod pa dang / mchod rten la mchod pa dang / mngon sum du mchod pa dang / mngon sum ma yin par mchod pa dang / bdag gis byas pa'i mchod pa dang /gzhan byed du bcug pa'i mchod pa dang / rnyed pa dang / bkur sti'i mchod pa dang / rgya chen po'i mchod pa dang / kun nas nyon mongs pa ma yin pa'i mchod pa dang / sgrub pa'i mchod pa'o/ /de la sku la mchod pa ni de bzhin gshegs pa'i gzugs kyi sku nyid la mchod pa byed pa'o//mchod rten la mchod pa ni de bzhin gshegs pa'i mchod rten nam gdung khang byur bu 'am gtsang khang ngam mchod rten rnying pa'am mchod rten sar pa la mchod pa byed pa'o/ /mngon sum du mchod pa ni de bzhin gshegs pa'i sku'am mchod rten la mngon sum du mchod pa byed pa'o//mngon sum ma yin par mchod pa ni de bzhin gshegs pa'i sku gsum mam mchod rten mngon sum du ma gyur pa la de'i phyir dmigs te mchod pa byed pa'o/ /mngon sum dang mngon sum ma yin pa thun mong gi mchod pa yang yod de/ /de bzhin gshegs pa'i sku 'am mchod rten gcig la mngon sum du mchod pa byed pa na lhag pa'i bsam pa 'di lta bus de bzhin gshegs pa gcig dang mchod rten gcig gi chos nyid gang yin pa de ni phyogs bcu dus gsum gyi de bzhin gshegs pa dang /mchod rten thams cad kyi ched nyid yin pas bdag gis de bzhin gshegs pa dang mchod rten mngon du gyur pa 'di la mchod pas phyogs bcu dus gsum gyi de bzhin gshegs pa dang /gzhan thams cad la yang mchod do snyam pa'i sems kyis mchod pa byed pa ste/ de la mngon sum gyi mchod pa ni bsod nams kyi 'bras bu rgya che ba yin no//mngon sum du ma yin pa'i mchod pa ni de bas bsod nams kyi 'bras bu rgya che ba yin no/ /mngon sum dang mngon sum ma yin pa thun mong gi mchod pa ni de bas kyang bsod nams kyi 'bras bu rgya che bar rig par bya'o/ /bdag gis byas pa'i mchod pa ni de bzhin gshegs pa 'am mchod rten la rang gi lag gis mchod pa byed de/le lo dang snyom las dang bag med pa la brten te gzhan byed du mi 'jug pa'o/ /gzhan byed du bcug pa'i mchod pa ni mchod pa'i yo byad chung shas bdog pa snying rje dang ldan pa'i sems kyis sems can sdug bsngal ba bsod nams chung zhing mi nus pa gzhan dag la bstan te mchod pa byed du bcug pa'o//bdag gis byas pa dang gzhan byed du bcug pa'i thun mong gi mchod pa yang yod de/ bdag nyid kyang byed la gzhan dag kyang byed du 'jug pa ste/ de la bdag gis byas pa'i mchod pa ni/ bsod nams kyi 'bras bu rgya che ba yin no/ /gzhan byed du bcug pa'i mchod pa ni de bas bsod nams kyi 'bras bu rgya che ba yin no/ /bdag gis byas pa dang gzhan byed du bcug pa'i thun mong gi mchod pa ni de bas kyang bsod nams kyi 'bras bu rgya che bar rig par bya'o//rnyed pa dang bkur sti'i mchod pa ni de bzhin gshegs pa'am/ mchod rten la na bza' dang zhal zas dang gzims cha dang bsnyun gyi gsos sman yo byad dang / gus par smra ba dang / phyag 'tshal ba dang / mngon du ldang ba dang / thal mo sbyar ba dang /mchod pa'i las dang / bstod pa dang / rin po che dang / yo byad la sogs pas mchod pa byed pa'o/ /rgya che ba'i mchod pa ni de bzhin gshegs pa'am mchod rten la mchod pa byed pa ni dngos po bdun rgya che ba yin te/ yun ring por mchod pas dus rgya che ba dang / dngos po mang pos mchod pas dngos po mang po rgya che ba dang /dngos po gya nom pas mchod pas dngos po gya nom pa rgya che ba dang / mngon sum dang mngon sum ma yin par mchod pas gnas kyi khyad par rgya che ba dang / bdag gis byas pa dang gzhan byed du gzhug pas mchod pa byed pa'i gang zag gi khyad par rgya che ba dang /snying thag pa nas dga' ba mngon du gyur cing mos pa drag pos mchod pas bsam pa rgya che ba dang / dge ba'i rtsa ba de bla na med pa'i byang chub tu yongs su bsngo zhing mchod pas 'bras bu bsngo ba rgya che ba'o/ /kun nas nyon mongs pa can ma yin pa'i mchod pa ni kun nas nyon mongs pa can gyi mchod pa rnam pa drug spangs pa ste/rang gi lag gis byed pas le los gzhan byed du 'jug pa'i kun nas nyon mongs pa med pa dang / gus pas byed pas ma gus pa'i kun nas nyon mongs pa med pa dang / sems mi g.yeng bas byed pas sems g.yeng ba'i kun nas nyon mongs pa med pa dang /bsam pa dag pas byed pas bsam pa ma dag pa'i kun nas nyon mongs pa med pa dang / tshul 'chos pa med pas byed pas tshul 'chos pa'i kun nas nyon mongs pa med pa dang / mi mthun pa'i dngos po ba blas byugs pa dang /mar khus bkru ba dang / gu gul gyis bdug pa dang / arga'i me tog gis gtor ba la sogs pa spangs te / mthun pa'i dngos pos byed pa'i mi mthun pa'i kun nas nyon mongs pa med pa'o/ /sgrub pa'i mchod pa ni nyan thos dang thun mong tshad med pa'i rgyu bsgom pa dang /'du shes bsgom pa dang / rjes su dran pa bsgom pa dang / thun mong ma yin pa de kho na'i don bsgom pa dang / bslab pa gsum bsgom pa dang / byang chub kyi phyogs bsgom pa la sogs pa cung zad cung zad dang / yud tsam du tha na ba 'jos tsam gyi bar du yang bsam pa dang /sbyor ba sgrub par byed pa ste/ de mchod pa'i mchog dam pa gya nom pa gong na med pa yin te/ snga ma'i rnyed pa dang bkur sti'i mchod pa rnam pa thams cad kyis brgya'i cha dang stong gi cha nas rgyu'i bar du yang nye bar mi 'gro ba yin no/ /de bzhin gshegs pa la ji lta ba bzhin du chos dang dge 'dun la yang de bzhin du ci rigs par sbyar te/dkon mchog gsum la mchod pa rnam pa bcu po de dag byed pa'i byang chub sems dpa' ni lhag pa'i bsam pa drug gis byed de yon tan gyi zhing bla na med pa'i lhag pa'i bsam pa dang / phan 'dogs pa bla na med pa lhag pa'i bsam pa dang /sems can thams cad kyi mchog tu gyur pa'i lhag pa'i bsam pa dang / u dum wA ra'i me tog bzhin du shin tu dkon pa'i lhag pa'i bsam pa dang / stong gsum gyi stong chen po'i 'jig rten gyi khams na gcig pu ste/ 'ba' zhig lhag pa'i bsam pa dang /'jig rten dang 'jig rten las 'das pa'i phun sum tshogs pa'i don thams cad ston pa'i lhag pa'i bsam pas byed pas na rnam par dag pa yin te/ de yang sa dang por skad cig gcig la sangs rgyas brgya mthong zhing mchod pa dang bsnyen bkur dpag tu med pa byed do zhes bstan pa de nyid sangs rgyas kyi sa'i bar du gong nas gong du ches shin tu rnam par dag pa yin no//sems can yongs su smin par byed pa rnam par dag pa zhes bya ba ni sangs rgyas dang byang chub sems dpa' rnams kyi sems can yongs su smin par byed pa rnam pa drug ste/yongs su smin pa'i ngo bo nyid dang / yongs su smin par bya ba'i gang zag dang / yongs su smin pa'i rnam par dbye ba dang / yongs su smin par bya ba'i thabs dang / yongs su smin par byed pa'i gang zag dang / yongs su smin pa'i gang zag gi mtshan nyid do/ /de la yongs su smin pa'i ngo bo nyid ni dge ba'i chos kyi sa bon dang ldan pa'i dge ba'i chos rnams la kun du bsten pa'i rgyus yang dag pa'i sbyor ba gang yin pa'i mthar thug pa na de'i mod la rnam par dag pa mngon sum du bya'i skal ba dang ldan zhing mthu yod pa'o//yongs su smin par bya ba'i gang zag na rnam pa bzhi ste/nyan thos kyi rigs yang dag par bsgrubs pa'i rigs can nyan thos kyi theg pas yongs su smin par bya ba dang / rang sangs rgyas kyi rigs yang dag par bsgrubs pa'i rigs can rang sangs rgyas kyi theg pas yongs su smin par bya ba dang / sangs rgyas kyi rigs yang dag par bsgrubs pa'i rigs can theg pa chen pos yongs su smin par bya ba dang /theg pa gsum gyi rigs yang dag par ma sgrubs pa bde 'gror 'gro ba'i phyir yongs su smin par bya'o/ /yongs su smin pa'i rnam par dbye ba ni rnam pa drug ste/ dbang po yongs su smin pa dang /dge ba'i rtsa ba yongs su smin pa dang / shes pa yongs su smin pa dang / yongs su smin pa chung ngu dang / 'bring dang / chen po'o/ /yongs su smin par bya ba'i thabs ni rnam pa nyi shu rtsa bdun te/ khams brtas pa dang / da ltar gyi rkyen nye bar sgrub pa dang / 'jug pa dang /dga' bar 'dzin pa dang / dang po 'jug pa dang / dang po 'jug pa ma yin pa dang / rnam par dag pa thag ring ba dang / rnam par dag pa thag nye ba dang / sbyor ba dang / bsam pa dang / zang zing gi nye bar sgrub pa dang / chos nye bar sgrub pa dang /rdzu 'phrul gyis 'dun par byed pa dang / chos ston pa dang / gsang ste chos brjod pa dang / rnam par phye ste chos brjod pa dang / sbyor ba chung ngu dang / sbyor ba 'bring dang / sbyor ba chen po dang / thos pa dang / sems pa dang / sgom pa dang / sdud pa dang / tshar gcod pa dang /bdag gis byed pa dang / gzhan la rtsol ba dang / gnyi gas sbyor ba'o/ /yongs su smin par byed pa'i gang zag ni sa drug la gnas pa'i byang chub sems dpa' rnams te/ mos pas spyod pa'i sa la gnas pa'i dus byang chub sems dpa' mos pas spyod pa dang / lhag pa'i bsam pa dag pa'i sa la gnas pa'i byang chub sems dpa' lhag pa'i bsam pa dag pa dang / spyod pa la zhugs pa'i byang chub sems dpa' spyod pa la zhugs pa dang / nges pa'i byang chub sems dpa' nges par gyur pa dang / nges par spyod pa sgrub pa'i sa la gnas pa'i byang chub sems dpa' nges par spyod pa la zhugs pa dang /mthar thug pa'i sa la gnas pa'i byang chub sems dpa' mthar thug par gyur pa'o/ /yongs su smin pa'i gang zag gi mtshan nyid ni theg pa gsum gyis yongs su smin par byas pa'i gang zag rnams kyi yongs su smin pa chung ngu dang /'bring dang / chen po'i mtshan nyid de/ de la nyan thos ni sngon dge ba la goms pas gang gi tshe yongs su smin pa chung ngu la gnas pa'i tshe na ni 'dun pa chung ba dang / sbyor ba chung ba yin te/ ngan song rnams su yang 'gro la tshe de nyid la dge sbyong gi 'bras bu yang mi 'thob cing tshe de nyid la mya ngan las 'das pa yang mi thob bo//gang gi tshe yongs su smin pa 'bring la gnas pa'i tshe na ni 'dun pa 'bring dang / sbyor ba 'bring yin te/ ngan song rnams su yang mi 'gro la tshe de nyid la dge sbyong gi 'bras bu ni 'thob kyi mya ngan las 'das pa ni mi thob po/ /gang gi tshe yongs su smin pa chen po la gnas pa'i tshe na ni 'dun pa che ba dang /sbyor ba che ba yin te/ ngan song rnams su yang mi 'gro la tshe 'di nyid la dge sbyong gi 'bras bu yang thob mya ngan las 'das pa yang thob po/ /rang sangs rgyas kyi theg pas yongs su smin pa'i mtshan nyid ni nyan thos dang 'dra bar rig par bya'o//theg pa chen pos yongs su smin pa'i mtshan nyid ni mos pas spyod pa'i sa la gnas pa ni yongs su smin pa'i chung ngu yin te/ /'dun pa chung ba dang sbyor ba chung bas ngan song rnams su yang 'gro la bskal pa grangs med pa'i dang por gtogs pa yin te/dge ba'i chos byang chub kyi phyogs dang mthun pa sbyangs pa dang mi g.yo ba dang / shin tu rnam par dag pa thams cad dang mi ldan pa yin no/ /lhag pa'i bsam pa dag pa'i sa la gnas pa ni yongs su smin pa 'bring yin te/ 'dun pa 'bring dang sbyor ba 'bring yin pas ngan song rnams su mi 'gro la bskal pa grangs med pa'i gnyis par gtogs pa yin te/dge ba'i chos byang chub kyi phyogs dang mthun pa sbyangs pa dang / mi g.yo ba dang ni mi ldan la shin tu rnam par dag pa dang ni mi ldan pa yin no/ /nges pa dang mthar thug par gyur pa ni yongs su smin pa chen po yin te/'dun pa che ba dang sbyor ba che bas ngan song rnams su yang mi 'gro la bskal pa grangs med pa gsum par gtogs pa yin te/ dge ba'i chos byang chub kyi phyogs dang mthun pa sbyangs pa dang / mi g.yo ba dang shin tu rnam par dag pa thams cad dang ldan pa yin no //de la sbyangs pa zhes bya ba ni so sor brtags shing byed pa rang bzhin gyis brling ba dang / gsal ba dang / 'bras bu che ba dang phan yon che ba'o/ /mi g.yo ba zhes bya ba ni dge ba'i rtsa ba ji ltar thob pa rnams dang / ji ltar bsags pa de dag las phyir mi ldog pa dang yongs su mi nyams pa dang khyad par du 'gro ba'o//shin tu rnam par dag pa zhes bya ba ni byang chub sems dpa'i sa la de dag las ches yongs su dag pa gong na med pa'o/ /sems can yongs su smin par byed pa de yang sa dang po la skad cig gcig la sems can brgya yongs su smin par byed do zhes bstan pa sangs rgyas kyi sa'i bar du gong nas gong du ches shin tu rnam par dag pa yin no//skye ba rnam par dag pa zhes bya ba ni byang chub sems dpa' rnams kyi skye ba rnam pa bzhi ste/ las kyi dbang gis skye ba dang / smon lam gyi dbang gis skye ba dang /ting nge 'dzin gyi dbang gis skye ba dang / 'byor pa'i dbang gis skye ba'o/ /de la las kyi dbang gis skye ba ni mos pas spyod pa'i sa la gnas pa rnams las kyi dbang gis 'dod pa'i khams su skye ba'o/ /smon lam gyi dbang gis skye ba ni sar chud pa rnams smon lam gyi dbang gis sems can yongs su smin par bya ba'i phyir dud 'gro la sogs pa'i gnas ngan par skye ba'o//ting nge 'dzin gyi dbang gis yongs su skye ba ni bsam gtan thob pa rnams bsam gtan rnam par bzlog nas 'dod pa'i khams su skye ba'o/ /'byor pa'i dbang gis skye ba ni sprul pa rnams kyis dga' ldan gyi gnas la sogs par skye ba'o//lhag pa'i bsam pa dag pa'i sar chud pa yan chad skye ba de dag gang gis skye yang rung ste/ byang chub sems dpa' rnams kyi skye ba sems can thams cad la phan pa dang bde ba'i phyir kha na ma tho ba med pa thams cad ni mdor bsdu na rnam pa lnga ste/gnod pa yang dag par zhi bar byed pa'i skye ba dang / de dang skal ba mnyam par mthun par 'jug pa'i skye ba dang / chen por skye ba dang / bdag por skye ba dang / tha ma'i skye ba'o/ /de la gnod pa yang dag par zhi bar byed pa'i skye ba ni mu ge las gyur pa'i gnod pa yang dag par zhi bar byed pa'i skye ba dang /khams ma snyoms pa las gyur pa'i gnod pa yang dag par zhi bar byed pa'i skye ba dang / gzhan gyis sprul pa las gyur pa'i gnod pa yang dag par zhi bar byed pa'i skye ba dang / log par lta bas bsgrubs pa las gyur pa'i gnod pa yang dag par zhi bar byed pa'i skye ba'o//de la mu ge las gyur pa'i gnod pa yang dag par zhi bar byed pa'i skye ba ni byang chub sems dpa' 'jig rten du mu ges phongs shing gnod pa chen po 'byung ba'i dus dag tu smon lam btab nas sems can rnams tshegs chung ngus 'tsho bar 'gyur ba'i rgyur bdag nyid nya chen po la sogs pa'i skye gnas rnams su skye bar byed cing /'gro ba mtha' dag rang gi shas tshim par byed pa'o/ /khams ma snyoms pa las gyur pa'i gnod pa yang dag par zhi bar byed pa ni 'jig rten du sems can rnams la khams ma snyoms pa'i nad mang po byung ba'i dus dag tu nad de dag rab tu zhi bar bya ba'i smon lam btab nas bdag nyid rig sngags 'chang grub pa'i sman pa chen po'i lus yongs su 'dzin cing sems can rnams kyi nad rab tu zhi bar byed pa'o//gzhan gyis sprul pa las gyur pa'i gnod pa yang dag par zhi bar byed pa'i skye ba ni pha rol gyi dmag tshogs las gyur pa'i gnod pa yang dag par zhi bar byed pa'i skye ba pha rol gyi dmag tshogs kyis shin tu gnod par gyur pa'i sems can rnams la chos bzhin du snyoms par thabs mkhas pas pha rol gyi dmag tshogs kyi gnod pa rab tu zhi bar bya ba'i phyir bdag nyid stobs dang ldan pa'i rgyal por skye ba yongs su 'dzin cing de dag gi gnod pa rab tu zhi bar byed pa dang /phan tshun mi mthun pa las gyur pa'i gnod pa yang dag par zhi bar byed pa'i skye ba sems can zhe 'gras pa phan tshun mi mthun pa rnams la bsdums bya ba dang /khon gyi bsam pa spang ba'i phyir bdag nyid tshig brtsan pa dang ldan pa'i gtso bor skye ba yongs su 'dzin cing de dag gnod pa rab tu zhi bar byed pa dang / rgyal po chos bzhin mi byed pa las gyur pa'i gnod pa yang dag par zhi bar byed pa'i skye ba rgyal po 'bangs rnams la mi rigs pa'i chad pa dang 'ching ba dang /gnod pa sna tshogs byed pa la zhugs pa dag la sems can gyi gnod pa de dag nyid bsal ba'i phyir bdag nyid de lta bu rgyal po'i pho brang du rgyal po chos dang ldan pa'i sems can la snying brtse ba can du skye ba yongs su 'dzin cing de dag gi gnod pa rab tu zhi bar byed pa'o/ / log par lta ba sgrub pa las gyur pa'i gnod pa yang dag par zhi bar byed pa'i skye ba ni sems can gang dag lha'i gnas 'ga' zhig la mos nas log par lta zhing sdig pa byed pa de dag la snying brtse bas log par lta ba dang sdig pa byed pa de spang ba'i phyir bdag nyid lha'i gnas de dag tu skye zhing de dag gi gnod pa yang dag par zhi bar byed pa'o//de dang skal ba mnyam par mthun par 'jug pa'i skye ba ni smon lam gyis sam dbang thob pas sems can dud 'gro'i skye gnas rnam pa sna tshogs su skyes pa rnams dang / lha dang klu dang gnod sbyin dang lha ma yin la sogs pa gcig la gcig 'khu zhing mi mthun pa rnams dang /bram ze log par lta ba rnams dang nyes par spyad pa spyod cing des tshol der mngon par dga' ba rnams dang / 'dod pa rnams la ha cang lhag par zhen pa 'dod pa la mos pa rnams la nyes pa de bzlog pa'i phyir sems can de dag dang skal ba mnyam par gtso bor skye zhing sems can de dag dge ba gang kun du mi spyod pa de ni kun du spyod cing de dag la chos ston te/chos bstan pa de dang mi mthun par kun du spyod pa de dang thabs mkhas pa des de dag nyes pa de dag las zlog par byed pa yin no/ /chen por skye ba ni byang chub sems dpa' skye ba ni rang bzhin gyis 'jig rten thams cad las khyad par du 'phags pa'i chos kha dog dang /rigs dang dbang phyug la sogs pa'i rnam par smin pa mngon par 'grub par 'gyur zhing rnam par smin pa des kyang bdag dang gzhan gyi don rnam pa thams cad byed pa'o/ /bdag por skye ba ni byang chub sems dpa'i rab tu dga' ba la gnas pa dang po nas bzung ste/gnas pa bcu pa'i bar dag gis skye ba brjod pa 'dzam bu'i gling gi dbang phyug nas bzung ste/ 'og min las 'das nas skye ba'i gnas thams cad las khyad par du 'phags pa gang du gnas par mchog thob pa kho na'i byang chub sems dpa' rnams skye bar gyur pa dbang phyug chen po'i bar de'i bdag por skye ba zhes bya ste/de ni de dag gi las kyi dbang gis 'grub pa yin no/ /tha ma'i skye ba ni skye ba gang du byang chub sems dpa'i byang chub kyi tshogs yongs su rdzogs nas mdun na 'don gyi khyim mam rgyal po'i pho brang du skyes te bla na med pa yang dag par rdzogs pa'i byang chub mngon par rdzogs par 'tshang rgya zhing sangs rgyas kyi phrin las thams cad mdzad pa de /skye ba de las gzhan med pa tha ma'i skye ba zhes bya'o/ /skye ba lnga po de dag kyang mdor bsdus na dang po gsum ni gzhan gyi don phun sum tshogs pa mngon par sgrub pa ste/de yang dgos pa gsum gyi dbang du byas pa yin te/ yid du mi 'ong ba'i 'bras bu las bzlog pa dang / yid du mi 'ong ba'i 'bras bu'i rgyu las bzlog pa dang / yid du 'ong ba'i 'bras bu'i rgyu la 'dzud pa'i skye ba ste go rims bzhin no//bzhi pa ni bdag gi don phun sum tshogs pa mngon par sgrub pa ste/ bdag nyid rnam par smin pa yongs su 'dzin pa 'bras bu'i legs pa'i khyad par la gnas pa'i phyir ro/ /lnga pa ni bdag dang gzhan gnyi ga'i don phun sum tshogs pa mngon par sgrub ste/bdag nyid mngon par rdzogs par sangs rgyas pa dang / mdzad pas gzhan la phan 'dogs pa'i phyir ro/ /byang chub sems dpa' 'das pa dang / ma 'ongs pa dang / da ltar byung ba'i dus dag tu dge ba dang bzang ba dang shis pa'i skye ba rnams su skyes pa dang /skye bar 'gyur ba dang / skye ba gang du yang rung ba de dag thams cad dang skye ba lnga po 'di dag tu skye bar zad de skye ba de la brten nas bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /skye ba rnam par dag pa de yang sa dang po nas sangs rgyas kyi sa de ma gtogs pa bcu pa'i bar du gong nas gong du ches shin tu rnam par dag pa yin no//mthu rnam par dag pa zhes bya ba ni sangs rgyas dang byang chub sems dpa' rnams kyi mthu chen po rnam pa lnga ste/ mngon par shes pa'i mthu dang / chos kyi mthu dang /lhan cig skyes pa'i mthu dang / thun mong gi mthu dang / thun mong ma yin pa'i mthu'o/ /de dag gi rab tu dbye ba ni sngar 'phags pa byams pa'i le'ur bstan pa yin no/ /de yang sa dang po nas sangs rgyas kyi sa'i bar du gong nas gong du ches shin tu rnam par dag pa yin no//sangs rgyas kyi sa la skye ba rnam par dag pa ma gtogs pa zhes bya ba ni sangs rgyas su grub nas skye ba len pa med pa'i phyir ro/ /de'i yon tan dang yang mnyam la zhes bya ba ni sa 'og ma rnams kyi yon tan yang de na yod pas de dang mnyam pa'o/ /gnyen po'i rab tu dbye ba'i tshig gi don la sogs pa bshad zin to// // de'i 'og tu bdag dang gzhan gyi rgyud yongs su smin pa'i gnas la mkhas pa'i tshig gi don la sogs pa bshad par bya ste/ bdag dang gzhan gyi rgyud yongs su smin pa'i gnas la mkhas pa zhes bya ba ni byang chub sems dpa'i dge ba'i rtsa ba shin tu rnam par dag pa yang dag par grub pas so sor brtags te skye ba len pa dang /'gro ba thams cad yongs su bskyab pa'i snying rje dang ldan pas bdag nyid kun nas nyon mongs pa can ma yin te/ nyid dang gzhan gyi kun nas nyon mongs pa rnam par zlog par byed pa nyid kyi srid par skye ba ni bdag dang gzhan gyi rgyud yongs su smin pa'i gnas yin te/de la mkhas par bya ba'i don 'dir bstan pa yin no/ /de'i phyir de bstan pa'i dbang du mdzad nas/ bcom ldan 'das ci'i slad du srid par skye ba thams cad kyi nang na byang chub sems dpa'i skye ba rab mchog ces bgyi lags zhes bya ba zhus te/srid par skye ba mngal du 'jug na yang so so'i skye bo phal pa ni mi shes par 'jug cing gnas te/ 'khor los sgyur ba ni shes bzhin du 'jug pa la mi shes par gnas shing 'byung / nyan thos dang rang sangs rgyas ni shes bzhin du 'jug cing gnas par mi shes par 'byung gi /byang chub sems dpa' ni shes bzhin du 'jug cing gnas te 'byung ba dang / skye gnas dang / khams dang / 'gro ba gang du skyes kyang byang chub sems dpa'i chen por skye ba rang bzhin gyis 'jig rten thams cad las khyad par du 'phags pa'i tshe dang /kha dog dang / rigs dang / dbang phyug la sogs pa'i rnam par smin pa des kyang 'grub par 'gyur zhing / rnam par smin pa des kyang bdag dang gzhan gyi rgyud yongs su smin par byed pa de ci'i phyir zhes zhus pa yin no/ /rnam pa bzhi'i phyir te zhes bya ba la/rgyu rnam pa bzhi 'og nas 'byung ba dang po gnyis kyang rgyu dang 'bras bu 'og ma gnyis kyang rgyu dang 'bras bur 'brel par srid pas skye ba len pas na byang chub sems dpa'i skye ba bdag dang gzhan gyi rgyud yongs su smin par byed pa'i gnas yin pa'i phyir srid par skye ba thams cad kyi nang na rab mchog ces bya bar ston to//dge ba'i rtsa ba shin tu rnam par dag pa yang dag par 'grub pa nyid kyi phyir zhes bya ba ni 'og nas so sor brtags te legs pa nyid kyi phyir zhes 'byung ba'i rgyu yin te/ de la dge ba'i rtsa ba zhes bya ba ni sbyin pa la sogs pa dge ba'i rtsa ba byang chub kyi phyogs dang mthun pa thams cad do//shin tu rnam par dag pa zhes bya ba ni kun du spyod pa dang / phul du byung ba dang / rnam par dag pas shin tu rnam par dag pa zhes bya ste/ de la kun du spyod pa zhes bya ba ni rgyu gsum gyis te/ lus dang ngag dang yid kyis so//phul du byung ba la ni rgyu gnyis te/ rgya che ba dang / kun nas nyon mongs pa can ma yin pas so/ /de la rgya che ba ni sems can la dbye ba med pa dang / dngos po la dbye ba med pa dang / dus la dbye ba med pa ste/ sems can la dbye ba med pa ni byang chub sems dpa' sems can thams cad la brten te brtsams nas sbyin pa la sogs pa dge ba'i rtsa ba de dag kun du spyod pa byed kyi bdag 'ba' zhig kho na'i phyir ma yin pa'o//dngos po la dbye ba med pa ni sbyin pa la sogs pa dge ba'i rtsa ba de dag thams cad dang rnam pa thams cad du yang dag par blangs te kun du spyod pa'o//dus la dbye ba med pa ni tshe 'di la mtshan mo dang nyin mo rtag tu rgyun mi 'chad par sbyor ba mi gtong zhing / brtson pa mi 'dor ba dang / rgyu de nyid kyis tshe rabs thams cad du yang dge ba'i rtsa ba de dag kun du spyod par byed pa'o/ /kun nas nyon mongs pa can ma yin pa'i mchog tu dga' ba dang /mi mthun pa med pa dang / gus pa dang mi brten pa ste/ mchog tu dga' ba ni byang chub sems dpa' sems dga' ba dang / sdug bsngal ba med pa dang / yid mi bde ba med pas dge ba'i rtsa ba de dag la rten par byed cing gzhi des 'gyod par yang mi byed pa'o//mi mthun pa med pa'i gzhan la gnod pa med pa dang / lta bar gyur pa rnams la mngon par zhen pa med par dge ba'i rtsa ba de dag kun du spyod pa'o/ /gus pas ni gus pa dang snying thag pa nas de dag nyid la yon tan dang snying por lta la shin tu nges pa dang /gzhan gyi dring mi 'jog pa dang gzhan gyis mi bkri bar dge ba'i rtsa ba de dag yang dag par blangs te kun du spyod pa'o/ /mi brten pa'i dge ba'i rtsa ba de dag gi rnam par smin pa 'khor los sgyur ba nyid dam/ brgya byin nyid dam/ bdud nyid dam/ tshangs pa nyid du re ba med pa dang /gzhan las len du phan 'dogs pa dang / rnyed pa dang bkur sti dang tshigs su bcad pa la brten pa med pa'o/ /de la rnam par dag pa ni rgyu gsum gyis te/ sbyangs pa dang / mi g.yo ba dang / shin tu rnam par dag pas so/ /de la sbyangs pa dang mi g.yo ba ni lhag pa'i bsam pa dag pa'i sa la zhugs pa'i dge ba'i rtsa ba ste/sbyangs pa zhes bya ba ni so sor brtags shing byed pa rang bzhin gyis brling ba dang / gsal ba dang / 'bras bu che ba dang / phan yon che ba'o/ /mi g.yo ba zhes bya ba ni dge ba'i rtsa ba ji ltar thob pa rnams dang / ji ltar bsags pa de dag las phyir mi ldog pa dang / yongs su mi nyams pa dang / khyad par 'gro ba'o/ /shin tu rnam par dag pa ni nges pa'i dang mthar thug par gyur pa'i dge ba'i rtsa ba ste/ byang chub sems dpa'i sa la de dag las ches yongs su dag pa gong na med pa'o/ / de ltar dge ba'i rtsa ba rgyu gsum gyis kun du spyod pa dang / rgyu gnyis kyis phul du byung ba dang / rgyu gsum gyis rnam par dag pa ni shin tu rnam par dag pa zhes bya'o/ /yang dag par grub pa nyid kyi phyir zhes bya ba ni dge ba'i rtsa ba shin tu rnam par dag pa de yang dag par 'grub pa ni byang chub sems dpa'i rang gi rigs pa dang /dang po sems bskyed pa dang / byang chub sems dpa'i spyod pa la sbyor ba'i rim gyis yang dag par 'grub ste/ ji ltar byang chub sems dpa'i ni rang gi rigs la brten cing gnas nas bla na med pa yang dag par rdzogs pa'i byang chub mngon par rdzogs par 'tshang rgya ba'i skal ba can du 'byung zhing mthu yod par 'gyur bas/rang gi rigs ni skal ba dang ldan pa'i gzhi yin la/ dang po sems bskyed pa la brten cing gnas nas sbyin pa la sogs pa bsod nams dang ye shes kyi tshogs dang / byang chub kyi phyogs kyi chos thams cad la sbyor bar byed pas dang po sems bskyed pa ni byang chub sems dpa'i spyod pa la sbyor ba'i gzhi yin/byang chub sems dpa'i spyod pa la sbyor ba de nyid la brten cing gnas nas bla na med pa yang dag par rdzogs pa'i byang chub mngon par rdzogs par 'tshang rgya bar 'gyur bas byang chub sems dpa'i spyod pa la sbyor ba ni byang chub chen po yongs su rdzogs pa'i gzhi yin pas/gzhi de gsum gyi rim gyis dge ba'i rtsa ba shin tu rnam par dag pa de yang dag par 'grub la/ de yang dag par 'grub pas so sor brtags te skye ba len par byed do//so sor brtags te len pa nyid kyi phyir zhes bya ba ni dge ba'i rtsa ba shin tu rnam par dag pa yang dag par grub pa de'i 'bras bu ste/ sngar byang chub sems dpa'i skye ba rnam par dag pa ji skad bstan pa dag yin par sbyar ro/ /'gro ba thams cad yongs su bskyab pa'i snying rje dang ldan pa nyid kyi phyir ro zhes bya ba ni 'og nas bdag nyid kun nas nyon mongs pa can ma yin pa nyid dang /gzhan gyi kun nas nyon mongs pa rnam par zlog par byed pa nyid kyi phyir ro zhes 'byung ba'i rgyu yin no/ /sngar byang chub sems dpa'i snying rje rnam par dag pa ji skad bstan pa dag yin par sbyar ro/ / bdag nyid kun nas nyon mongs pa can ma yin pa nyid dang / gzhan gyi kun nas nyon mongs pa rnam par zlog par byed pa nyid kyi phyir ro zhes bya ba ni 'gro ba thams cad yongs su bskyab pa'i snying rje dang ldan pa de'i 'bras bu ste/ bdag nyid kun nas nyon mongs pa can ma yin pa nyid ces bya ba ni byang chub sems dpa' nang gi sangs rgyas kyi chos yongs su smin par bya ba las brtsams pa'i thabs la mkhas pa rnam pa drug dang ldan pa'i phyir te/drug gang zhe na/ byang chub sems dpa' sems can thams cad la snying rje dang ldan par lta ba dang / 'du byed thams cad yang dag pa ji lta ba bzhin du yongs su shes pa dang /bla na med pa yang dag par rdzogs pa'i byang chub kyi ye shes 'dod pa dang / sems can thams cad la snying rje dang ldan par blta ba la brten nas 'khor ba yongs su mi gtong ba dang / 'du byed thams cad yang dag pa ji lta ba bzhin du yongs su shes pa la brten nas kun nas nyon mongs pa can ma yin pa'i sems kyis 'khor ba nas 'khor ba dang /bla na med pa yang dag par rdzogs pa'i byang chub kyi ye shes 'dod pa la brten nas brtson 'grus 'bar ba'o/ /gzhan gyi kun nas nyon mongs pa rnam par zlog par byed pa nyid ces bya ba ni byang chub sems dpa'i pha rol gyi sems can yongs su smin par bya ba las brtsams pa'i thabs la mkhas pa rnam pa drug dang ldan pa'i phyir te/drug gang zhe na/ byang chub sems dpa' sems can rnams kyi dge ba'i rtsa ba chung ngu rnams 'bras bu tshad med par sgrub par byed pa dang /tshegs chung ngus dge ba'i rtsa ba rgya che zhing tshad med pa yang dag par skyed cing nye bar sgrub par byed pa dang / sangs rgyas kyi bstan pa la zhe 'gras pa rnams kyi khong khro ba sel bar byed pa dang / tha mal pa rnams 'dzud par byed pa dang / zhugs pa rnams yongs su smin par byed pa dang /yongs su smin pa rnams rnam par grol bar byed pa'o/ /de ltar thabs la mkhas pa de dag gis bdag nyid kun nas nyon mongs pa can ma yin pa nyid dang gzhan gyi kun nas nyon mongs pa rnam par zlog par byed pa nyid kyi phyir byang chub sems dpa'i skye ba ni rab mchog ces bya'o//bdag dang gzhan gyi rgyud yongs su smin pa'i gnas la mkhas pa'i tshig gi don la sogs pa bshad zin to// // de'i 'og tu bsam pa yongs su rdzogs par bya ba'i thabs la mkhas pa'i tshig gi don la sogs pa bshad par bya ste/ bsam pa yongs su rdzogs pa'i thabs la mkhas pa zhes bya ba ni byang chub sems dpa' yang dag pa'i tshig gi don la smon lam mngon par sgrub pa nyid kyi sangs rgyas kyi chos yongs su rdzogs par bya ba dang /sems can yongs su smin par bya ba'i bsam pa yongs su rdzogs par bya ba'i thabs yin pas de la mkhas par bya ba'i don 'dir bstan pa'o//de'i phyir de bstan pa'i dbang du mdzad nas/ bcom ldan 'das ci'i slad du byang chub sems dpa' rnams smon lam rgya chen pos mchi ba dang / smon lam gya nom pa dang ldan pa dang / smon lam gyi stobs can lags zhes bya ba zhus te/ byang chub sems dpa'i yang dag pa'i smon lam thams cad ni mdor bsdu na rnam pa lnga ste/sems bskyed pa'i smon lam dang / skye ba'i smon lam dang / spyod yul gyi smon lam dang / yang dag pa'i smon lam dang / smon lam chen po'o/ /byang chub sems dpa' yang dag pa'i smon lam de lta bu mngon par bsgrub cing bsam pa yongs su rdzogs par 'gyur ba'i de'i rgyu gang lags zhes zhus pa yin no//de la smon lam rgya chen pos mchi ba zhes bya ba ni sems bskyed pa'i smon lam dang / skye ba'i smon lam gyis 'gro ba ste/ sems bskyed pa'i smon lam zhes bya ba ni byang chub sems dpa'i rigs yang dag par sgrub pa'i gong du dang po bla na med pa yang dag par rdzogs pa'i byang chub tu sems bskyed pa'o/ /skye ba'i smon lam zhes bya ba ni phyi ma la sems can gyi don dang mthun pa'i 'gro ba rnams su skye ba'i smon lam pa'o//de la sems bskyed pa'i smon lam gyis ni dang po sems bskyed pa yan chad nas bla na med pa yang dag par rdzogs pa'i byang chub mngon par rdzogs par 'tshang rgya ba'i bar du bdag gi don phun sum tshogs pa'i gnas thams cad du 'gro la skye ba'i smon lam gyi sna de'i bar du gzhan gyi don phun sum tshogs pa'i gnas thams cad du 'gro ba'i phyir smon lam rgya chen pos 'gro ba zhes bya'o//smon lam gya nom pa dang ldan pa zhes bya ba ni/ spyod yul gyi smon lam gya nom pa dang ldan pa ste/ spyod yul gyi smon lam zhes bya ba ni/chos rab tu rnam par 'byed par smon pa dang tshad med pa la sogs pa dge ba'i chos sgom pa'i yul la smon pa'o/ /de ni byang chub sems dpa'i spyod yul thams cad bsgom pa'i smon lam bzang po dang ldan pas na smon lam gya nom pa dang ldan pa zhes bya'o/ / smon lam gyi stobs can zhes bya ba ni yang dag par smon lam dang chen po'i stobs dang ldan pa ste/ yang dag pa'i smon lam zhes bya ba ni phyi ma la mdo dang rgyas par byang chub sems dpa'i dge ba thams cad sdud pa yon tan thams cad bsdu ba'i phyir smon pa'o/ /smon lam chen po zhes bya ba ni yang dag pa'i smon lam de nyid las rig par bya ste/de yang rnam pa bcu ste/ phyi ma la de bzhin gshegs pa la mchod pa dang / rim gro ba thams cad dpag tu med par bya ba'i smon lam chen po dang / sangs rgyas bcom ldan 'das rnams kyi dam pa'i chos yongs su gzung zhing bsrung bar bya ba'i smon lam chen po dang /chos kyi tshul yang dag par gzung bar bya ba'i phyir smon lam chen po dang / dga' ldan gyi gnas na bzhugs nas yongs su mya ngan las 'das pa'i bar gyi smon lam chen po dang / byang chub sems dpa'i spyod pa'i rnam pa thams cad legs par bya ba'i smon lam chen po dang /sems can thams cad yongs su smin par bya ba'i smon lam chen po dang / 'jig rten gyi khams thams cad yang dag par bstan par bya ba'i smon lam chen po dang / sangs rgyas kyi zhing yongs su dag par bya ba'i smon lam chen po dang /theg pa chen po la 'jug par bya ba'i phyir byang chub sems dpa' thams cad dang / bsam pa dang sbyor ba gcig par bya ba'i smon lam chen po dang / yang dag pa'i sbyor ba thams cad 'bras bu yod par bya ba'i smon lam chen po dang / bla na med pa yang dag par rdzogs pa'i byang chub mngon par rdzogs par 'tshang rgya bar bya ba'i smon lam chen po'o//de dag re re la yang smon lam gyi 'khor 'bum phrag grangs med pa dag yod de/ de yang lhag pa'i bsam pa dag pa'i sa yan chad byang chub sems dpa' smon lam gyi stobs can rnams smon lam khyad par can gyis rnam par 'phrul pas na smon lam gyi stobs can zhes bya'o//rnam pa bzhi'i phyir te zhes bya ba ni 'og nas rgyu rnam pa bzhi'i 'byung ba dang po gnyis ni gnyen po yin/ tha ma gnyis ni mi mthun pa'i phyogs de lta bu'i gnyen po thob kyang mi mthun pa'i phyogs mi spong bas so so'i skye bo dang nyan thos la sogs pa las khyad par du 'phags pa'i phyir bsam pa yongs su rdzogs par bya ba'i thabs kyi yang dag pa'i smon lam mngon par bsgrub pa yin no zhes bya bar sbyar ro//de ltar byang chub sems dpa' rnams ni mya ngan las 'das pa'i bde ba la gnas pa la mkhas pa zhes bya ba ni mya ngan las 'das pas skrag par mi 'gyur ba ste/byang chub sems dpa'i stong pa nyid la mos pa des sbyor ba de mya ngan las 'das pas yid mi skrag pas mya ngan las 'das pa'i phan yon mthong ba dang /de la yod pa'i yon tan mthong ba'i dad pa dang / mos pa mi spong ba'i phyir gong du mya ngan las 'das pa'i tshogs yongs su rdzogs par byed pas na de nyid mya ngan las 'das pa'i bde ba la gnas pa la mkhas pa zhes bya ste/ de ni rgyu dang po yin no/ /de myur du thob par nus pa zhes bya ba ni 'khor ba yang dag pa ji lta ba bzhin du rab tu shes pa ste/byang chub sems dpa' ni stong pa nyid la mos pa des sbyor ba na/ 'khor ba yang dag pa ji lta ba bzhin du rab tu shes pas 'dod chags la sogs pa kun nas nyon mongs pa thams cad la sems lhag par btang snyoms su 'jog par nus te/de la sems lhag par btang snyoms su gzhag na sems kun nas nyon mongs pa can ma yin pas 'khor bar 'khor bar 'gyur la de ltar gyur nas/ sangs rgyas kyi chos dang sems can yongs su smin par bya ba dang / mya ngan las 'das pa'i bde ba la gnas pa myur du 'thob par nus pa yin te/de ni rgyu gnyis pa yin no/ /myur du 'thob pa de dang bde bar gnas pa de yang spangs te zhes bya ba ni mya ngan las 'das pa'i don du gnyer ba ste/ byang chub sems dpa' ni stong pa nyid la mos pa de sbyor ba na mya ngan las 'das pa don du gnyer bar myur ba nyid du yongs su mya ngan las 'das par mi 'gyur te/mya ngan las mi 'da' bas sangs rgyas kyi chos dang sems can yongs su smin par byed pa'i phyir ro/ /myur du 'thob pa de dang bde bar gnas pa de yang spangs pa yin te/ de ni rgyu gsum pa yin no//sems can gyi don rgyu med pa dgos pa med pa sdug bsngal mang po sna tshogs yun ring po 'byung ba la yid kyis smon par byed pa zhes bya ba ni 'khor bas yid skyo bar mi byed pa ste/ byang chub sems dpa' ni stong pa nyid la mos pa des sbyor ba na 'khor bas yid skyo ba med pas myur du yongs su mya ngan las 'das par mi 'gyur te/mya ngan las mi 'da' bar sems can gyi don la yid kyis smon par byed pa yin te/ da ni rgyu bzhi pa yin no/ /bsam pa yongs su rdzogs par bya ba'i thabs la mkhas pa'i tshig gi don la sogs pa bshad zin to// sa rab tu dbye ba bshad zin to// // sngar le'u dgu pa 'di'i bsdu ba'i don ni pha rol tu phyin pa yongs su rdzogs pa la mkhas par bya ba las brtsams nas dris pa dang lan brjod pa ste/ pha rol tu phyin pa yongs su rdzogs pa la mkhas pa de yang rnam pa gnyis te/ji ltar yongs su rdzogs pa dang / gang dag yongs su rdzogs pa'o/ /de la ji ltar yongs su rdzogs pa zhes bya ba ni rtogs pa yongs su rdzogs pa'i sgo nas spyod pa yongs su rdzogs par mngon pa'i phyir rab tu dbye bas pha rol tu phyin pa yongs su rdzogs par bstan te zhes smon pa'i rab tu dbye ba ni de yan chad du bshad zin to// // da ni gang dag yongs su rdzogs pa zhes bya ba ni sbyin pa'i pha rol tu phyin pa la sogs pa pha rol tu phyin pa drug dang bcu yongs su rdzogs pa bstan pa ste zhes smos pa ni pha rol tu phyin pa rab tu dbye ba'i tshig gi don la sogs pa bshad par bya ste/de'i phyir de bstan pa'i dbang du mdzad nas/ bcom ldan 'das byang chub sems dpa' rnams kyi bslab pa'i gzhi du mchis lags zhes bya ba zhus so/ /pha rol tu phyin pa rab tu dbye ba ni rnam pa nyi shu ste/ bdag dang sems can yongs su smin par bya ba'i thabs la mkhas pa ni/ bcom ldan 'das byang chub sems dpa' rnams kyi bslab pa'i gzhi du mchis lags zhes bya ba la sogs pa'o/ /gnas pa la mkhas pa ni/ bcom ldan 'das gzhi drug po de dag las du ni lhag pa'i tshul khrims kyi bslab pa lags zhes bya ba la sogs pa'o//mngon par mtho ba dang nges par legs pa'i thabs mkhas pa ni/ bcom ldan 'das bslab pa'i gzhi drug po de dag las du ni bsod nams kyi tshogs lags zhes bya ba la sogs pa'o/ /legs par shin tu bslab pa la mkhas pa ni/bcom ldan 'das bslab pa'i gzhi drug po de dag la byang chub sems dpa' ji ltar bslab par bgyi lags zhes bya ba la sogs pa'o/ /mthar thug pa bsdu ba la mkhas pa ni/ bcom ldan 'das ci'i slad du bslab pa'i gzhi de dag grangs drug tu gdags par rig par bgyi lags zhes bya ba la sogs pa'o//grogs la mkhas pa ni/ bcom ldan 'das ci'i slad du pha rol tu phyin pa gzhan dag grangs bzhir gdags par rig par bgyi lags zhes bya ba la sogs pa'o/ /'byung ba la mkhas pa ni bcom ldan 'das ci'i slad du pha rol tu phyin pa drug po de dag go rims ji ltar bstan par rig par bgyi lags zhes bya ba la sogs pa'o//tha dad pa'i rab tu dbye ba la mkhas pa ni/ bcom ldan 'das pha rol tu phyin pa de dag rnam pa dur rab tu dbye lags zhes bya ba la sogs pa'o//rdzogs pa la mkhas pa ni/ bcom ldan 'das ci'i slad du pha rol tu phyin pa de dag pha rol tu phyin pa rnams zhes bgyi ba la sogs pa'o/ /gdags pa bsdu ba la mkhas pa ni/ bcom ldan 'das rnam pa lnga po de dag gi so so'i las gang lags zhes bya ba la sogs pa'o//yon tan gyi khyad par la mkhas pa ni/ bcom ldan 'das pha rol tu phyin pa de dag gi rgya che ba nyid gang lags zhes bya ba la sogs pa'o/ /rgyun mi 'chad pa la mkhas pa ni/ bcom ldan 'das ci'i slad du byang chub sems dpa' rtag tu pha rol tu phyin pa'i rnam par smin pa'i 'bras bu 'dod pas 'tshal ba dang pha rol tu phyin pa 'tshal ba dang ldan pa lags zhes bya ba la sogs pa'o//rgyu nyid la gnas pa'i thabs la mkhas pa ni bcom ldan 'das byang chub sems dpa' pha rol tu phyin pa rnams la ji lta ba de ltar pha rol tu phyin pa'i rnam par smin pa'i 'bras bu 'dod pa la dad pas gnas pa ma lags zhes bya ba la sogs pa'o//bya ba sgrub pa la mkhas pa ni/ bcom ldan 'das pha rol tu phyin pa de dag gi so so'i mthu gang lags zhes bya ba la sogs pa'o/ /yongs su bsdu ba'i yang dag par 'grub pa'i phan yon la mkhas pa ni/bcom ldan 'das pha rol tu phyin pa de dag rgyu gang las byung ba dang / 'bras bu gang dang ldan pa dang / don gang dang ldan pa lags zhes bya ba la sogs pa'o/ /sems can la phan gdags pa'i bgegs la mkhas pa ni bcom ldan 'das gal te byang chub sems dpa' rnams longs spyod pas ma 'tshal ba dang ldan pa dang /snying rje can lags na ci'i slad du 'jig rten na dbul po gang lags zhes bya ba la sogs pa'o/ /thabs la 'jug pa chud mi za ba la mkhas pa ni bcom ldan 'das byang chub sems dpa' chos rnams kyi ngo bo nyid ma mchis pa nyid pha rol tu phyin pa gang gis 'dzin lags zhes bya ba la sogs pa'o//'grib pa dang 'phel ba la mkhas pa ni/ bcom ldan 'das pha rol tu phyin pa zhes kyang bgyi zhes bya ba la sogs pa'o/ / kun nas nyon mongs pa'i rgyus rjes su 'dzin pa gzhig pa la mkhas pa ni/ bcom ldan 'das sa de dag la nyon mongs pa'i bag la nyal rnam pa du mchis lags zhes bya ba la sogs pa'o/ /nges par 'byin pa'i bye brag gi rab tu dbye ba la mkhas pa ni/ bcom ldan 'das kyis nyan thos kyi theg pa gang yin pa dang /theg pa chen po gang yin pa de ni theg pa gcig go zhes bka' stsal pa de la dgongs pa gang lags zhes bya ba la sogs pa'o/ /de la dang por bdag dang sems can yongs su smin par bya ba'i thabs la mkhas pa'i tshig gi don la sogs pa bshad par bya ste/bdag dang sems can yongs su smin par bya ba'i thabs la mkhas pa zhes bya ba ni/ pha rol tu phyin pa drug ni bdag dang sems can yongs su smin par bya ba'i thabs yin te/ de la mkhas par bya ba'i don 'dir bstan pa'o//de'i phyir de bstan pa'i dbang du mdzad nas bcom ldan 'das byang chub sems dpa' rnams kyi bslab pa'i gzhi du mchis lags zhes bya ba zhus so/ /bslab pa'i gzhi zhes bya ba ni byang chub sems dpas bdag dang sems can yongs su smin par bya ba'i thabs su gang la bslab par bya ba'i gzhi ste/pha rol tu phyin pa drug go/ /drug ste zhes bya ba la pha rol tu phyin pa drug po re re la yang rnam pa dgu dgur shes par bya'o/ /sbyin pa rnam pa dgu ni sbyin pa'i ngo bo nyid dang / thams cad sbyin pa dang / dka' ba'i sbyin pa dang /thams cad kyi sgo nas sbyin pa dang / skyes bu dam pa'i sbyin pa dang / rnam pa thams cad kyi sbyin pa dang / phongs shing 'dod pa la sbyin pa dang / 'di dang gzhan du bde bar 'gyur ba'i sbyin pa dang / rnam par dag pa'i sbyin pa'o/ /de la sbyin pa'i ngo bo nyid gang zhe na/ mtshan nyid rnam pa lnga po rang bzhin dang / sgo dang / dngos po dang / bsam pa dang / len pa'i mtshan nyid dang ldan pa'i sbyin pa'o/ /de la rang bzhin ni yo byad thams cad dang rang gi lus la mi lta ba'i ma chags pa dang lhan cig skyes pa'i sems pa'o/ /sgo ni des kun nas bslang la sbyin par bya ba'i dngos po yongs su gtong ba'i lus dang ngag gi las so//dngos po ni sbyin par bya ba'i dngos po kha na ma tho ba med pa thams cad gtong ba'o/ /bsam pa ni sdom pa la gnas pa dang / 'ong ba mthong zhing 'bras bu la lta ba'o / /len pa ni su gang 'dod pa de la dngos po de so sor sbyin par byed pa'o//thams cad sbyin pa gang zhe na rnam pa gnyis te/ nang dang phyi rol gyi dngos po sbyin pa'o/ /de yang ci rigs par rnam pa gsum ste/ dngos po dang / rgyu dang bye brag go/ /dka' ba'i sbyin pa gang zhe na/ rnam pa gsum ste sbyin par bya ba'i dngos po chung ngu bdog pa bdag nyid la gnod par byas te/sdug bsngal dang du blangs nas gzhan dag la sbyin par byed pa dang / sdug pa'i dngos po rang bzhin gyis byams pa'am/ yun ring po nas 'dris pa'am/ shas cher phan pa'am/ sbyin par bya ba'i dngos po mchog dang rab mchog tu gyur pa la zhen pa bsal nas gzhan dag la sbyin par byed pa dang /sbyin par bya ba'i chos tshegs chen pos sgrub pa rnams gzhan dag la sbyin par byed pa'o/ /thams cad kyi sgo nas sbyin pa gang zhe na rnam pa bzhi ste/ sbyin par bya ba'i dngos po bdag la bdog pa yang sbyin par yang byed pa dang /gzhan dag las bslangs te/ yang sbyin par byed pa dang / len pa po bdag gi tshal pa la sogs pa yang sbyin par byed pa dang / slong mo pa gzhan 'dod pa rnams la yang sbyin par byed pa'o/ /skyes bu dam pa'i sbyin pa gang zhe na rnam pa lnga ste/dad pas sbyin pa byed pa dang / gus pas sbyin pa byed pa dang / rang gi lag nas sbyin pa byed pa dang / gzhan la mi gnod par sbyin pa byed pa'o/ /rnam pa thams cad kyi sbyin pa gang zhe na/ yon tan rnam pa drug dang / rnam pa bdun te spyir bsdoms na rnam pa bcu gsum mo//de la yon tan rnam pa drug ni mi rten par sbyin pa dang / mi sri bar byed pa dang / dga' bar sbyin pa dang / rgyun mi 'chad par sbyin pa dang / snod la sbyin pa dang / snod ma yin pa la sbyin pa'o/ /rnam pa bdun ni thams cad sbyin pa dang /kun la sbyin pa dang / dus thams cad du sbyin pa dang / kha na ma tho ba med pa'i sbyin pa dang / sems can gyi dngos po sbyin pa dang / yul gyi dngos po sbyin pa dang / nor dang 'bru'i dngos po sbyin pa'o/ /phongs shing 'dod pa la sbyin pa gang zhe na rnam pa brgyad de/zas dang skom gyis phongs shing 'dod pa rnams la zas dang skom sbyin pa dang / bzhon pas phongs shing 'dod pa rnams la bzhon pa sbyin pa dang / gos kyis phongs shing 'dod pa rnams la gos sbyin pa dang / rgyan gyis phongs shing 'dod pa rnams la rgyan sbyin pa dang /snod spyad kyis phongs shing 'dod pa rnams la snod spyad sbyin pa dang / spos dang me tog phreng dang byug pas phongs shing 'dod pa rnams la spos dang me tog phreng dang byug pa sbyin pa dang / gnas kyis phongs shing 'dod pa rnams la gnas sbyin pa dang / snang bas phongs shing 'dod pa rnams la snang ba sbyin pa'o//'di dang gzhan du bde bar 'gyur ba'i sbyin pa gang zhe na rnam pa dgu ste/ zang zing gi sbyin pa ser sna dang / gsog 'jog gi dri ma bsal nas bzang po dang / gtsang ba dang / rung ba sbyin pa gsum dang / mi 'jigs pa sbyin pa dud 'gro la sogs pa dang /mi dang / sems can du bgrod pa ma yin pa las bskyab pa gsum dang / chos kyi sbyin pa phyin ci ma log par chos ston pa dang / rigs par ston pa dang / bslab pa'i gzhi yang dag par 'dzin du 'jug pa gsum mo//rnam par dag pa'i sbyin pa gang zhe na rnam pa bcu ste/ thogs pa med pa'i sbyin pa dang / mchog tu 'dzin pa med pa'i sbyin pa dang / bsags pa med pa'i sbyin pa dang / khengs pa med pa'i sbyin pa dang / mi rten pa'i sbyin pa dang / zhum pa med pa'i sbyin pa dang / ngan pa ma yin pa'i sbyin pa dang / rgyab kyis phyogs pa med pa'i sbyin pa dang / lan la mi lta ba'i sbyin pa dang / rnam par smin pa la mi lta ba'i sbyin pa'o/ /tshul khrims rnam pa dgu yang snga ma bzhin no/ /de la tshul khrims kyi ngo bo nyid gang zhe na/ yon tan rnam pa bzhi po pha rol las legs par yang dag par blangs pa dang /bsam pa shin tu rnam par dag pa dang / nyams par gyur na phyir gso bar byed pa dang / mi nyams par bya ba'i phyir gus pa bskyed de dran pa nye bar gnas pa dang ldan pa'i sdom pa'o/ /tshul khrims thams cad gang zhe na/rnam pa gnyis te/ khyim pa'i phyogs su gtogs pa dang / rab tu byung ba'i phyogs su gtogs pa'o/ /de yang ci rigs par rnam pa gsum ste/ sdom pa'i tshul khrims dang / dge ba'i chos sdud pa'i tshul khrims dang / sems can gyi don bya ba'i tshul khrims so //dge ba'i chos sdud pa'i tshul khrims gang zhe na rnam pa gsum ste/ byang chub sems dpa' longs spyod che la dbang phyug la dbang byed cing 'dun pa las de spangs nas tshul khrims kyi sdom pa yang dag par len pa dang / tshul khrims blangs nas nyam thag ste srog la thug kyang tshul khrims kyi sdom pa yang dag par blangs pa de nyams par mi byed cing /med par mi byed pa dang / ji srid 'tsho'i bar du ci nas nyes pa phra rab kyang mi 'byung na/ lci ba lta 'byung bar ga la 'gyur ba de ltar spyod pa dang / gnas pa dang /yid la byed pa thams cad la dran pa nye bar gnas shing bag yod pa yin no/ /thams cad kyi sgo nas tshul khrims gang zhe na rnam pa bzhi ste/ yang dag par blangs pa dang / rang bzhin gyi tshul khrims dang / goms pa dang / thabs dang ldan pa'o/ /skyes bu dam pa'i tshul khrims gang zhe na/rnam pa lnga ste/ byang chub sems dpa' bdag nyid kyang tshul khrims dang ldan pa dang / gzhan dag kyang tshul khrims yang dag par len du 'jug pa dang / tshul khrims kyi bsngags pa brjod pa dang / chos mthun pa mthong na yid dga' bar 'gyur ba dang nyes par gyur na chos bzhin du 'chos pa'o//rnam pa thams cad kyi tshul khrims gang zhe na/ yon tan rnam pa drug dang rnam pa bdun te/ spyir bsdoms na rnam pa bcu gsum mo/ /de la yon tan rnam pa drug ni rgya che ba dang / kha na ma tho ba med pa dang /rab tu dga' ba'i gnas dang mthun pa dang / rtag tu byed pa dang / brtan pa dang / tshul khrims rgyan dang ldan pa'o/ /rnam pa bdun ni ldog pa'i tshul khrims dang / 'jug pa'i tshul khrims dang / kun nas bsrung ba'i tshul khrims dang / skyes bu chen po'i mtshan rnam par smin par byed pa'i tshul khrims dang /lhag pa'i sems rnam par smin par byed pa'i tshul khrims dang / sdug pa'i 'gro ba rnam par smin par byed pa'i tshul khrims dang / sems can gyi don rnam par smin par byed pa'i tshul khrims so/ /phongs shing 'dod pa la tshul khrims gang zhe na rnam pa brgyad de/gsang ba dang / ma byin par len pa dang / 'dod pas log par g.yem pa dang / brdzun smra ba dang / phra ma dang / ngag rtsub mo dang / ngag 'khyal pa dang / lag pa dang / bong ba dang / lcag la sogs pas rnam par 'tshe ba dang /bdag nyid la gzhan gyis byas na des bdag nyid phongs shing de'i gnyen po 'dod pa bzhin du bdag gis gzhan dag la byas na yang des gzhan dag phongs shing de'i gnyen po 'don par 'gyur ro snyam du so sor brtags nas nyes pa de brgyad kun du mi spyod pa'o/ /'di dang gzhan du bde bar 'gyur ba'i tshul khrims gang zhe na rnam pa dgu ste/byang chub sems dpa' sems can dgag par bya ba'i gnas su 'gyur ba rnams 'gog par byed pa dang / gnang bar bya ba'i gnas su gyur pa rnams gnang bar byed pa dang / bsdu bar bya ba rnams sdud par byed pa dang /tshar gcad par bya ba rnams tshar gcod par byed pa dang / sbyin pa dang ldan pa'i tshul khrims dang / bzod pa dang ldan pa dang / brtson 'grus dang ldan pa dang / bsam gtan dang ldan pa dang / shes rab dang ldan pa'i tshul khrims dang / rnam par dag pa'i tshul khrims gang zhe na rnam pa bcu ste/dang po nyid nas legs par blangs pa dang / ha cang zhum pa ma yin pa dang / ha cang thal ba ma yin pa dang / bag yod pas yongs su zin pa dang / smon lam legs par btab pa dang / cho ga phun sum tshogs pas yongs su zin pa dang / 'tsho ba phun sum tshogs pas yongs su zin pa dang /mtha' gnyis rnam par spangs pa dang / nges par 'byed pa dang / yongs su ma nyams pa'o/ /bzod pa rnam pa dgu yang snga ma bzhin no/ /de la bzod pa'i ngo bo nyid gang zhe na/ khyad par rnam pa bzhi po rten gyi khyad par dang / gnas kyi khyad par dang / dmigs pa'i khyad par dang / rgyu'i khyad par dang ldan pa'i ji mi snyam pa'o/ /de la rten gyi khyad par ni/ so sor brtags pa'i stobs dang / bsgoms pa'i stobs la brten pa'o/ /gnas kyi khyad par ni sems can mdza' bshes dang / dgra bo dang /tha mal pa bde ba dang sdug bsngal ba dang / sdug bsngal ba yang ma yin bde ba yang ma yin pa thams cad la gnas pa'o/ /dmigs pa'i khyad par ni gnod pa dang / sdug bsngal ba dang / chos la rtog pa thams cad la dmigs pa'o/ /rgyu'i khyad par ni/ zang zing med pa'i sems dang snying rje 'ba' zhig gis ji mi snyam pa'o/ /bzod pa thams cad gang zhe na rnam pa gnyis te/ khyim pa'i phyogs la brten pa dang / rab tu byung ba'i phyogs la brten pa'o/ /de yang ci rigs par rnam pa gsum ste/ gzhan gnod pa byed pa la ji mi snyam pa'i bzod pa dang /sdug bsngal dang du len pa'i bzod pa dang / chos la nges par sems pa la mos pa'i bzod pa'o/ /dka' ba'i bzod pa gang zhe na rnam pa gsum ste/ sems can nyam chung ba rnams kyis gnod pa byas pa bzod pa dang / bdag nyid rje dpon du gyur pa bran g.yog gis gnod pa byas pa bzod pa dang /sems can bdag pas rigs dang rus ches dman pa dag gis gnod pa mchog tu chen po byas pa bzod pa'o/ /thams cad kyi sgo nas bzod pa gang zhe na rnam pa bzhi ste/ mdza' bo dang / mi mdza' ba dang /tha mal pa dang / gsum char gyis dma' ba dang / mtshungs pa dang lhag pa rnams kyis gnod pa byas pa bzod pa'o/ /skyes bu dam pa'i bzod pa gang zhe na rnam pa lnga ste/ bzod pa la phan yon du lta ba dang / bdag nyid kyis kyang bzod pa dang / gzhan yang bzod pa yang dag par 'dzin du 'jug pa dang / bzod pa'i bsngags pa brjod pa dang / gang zag bzod pa can mthong ba yang yid dga' ba'o/ /rnam pa thams cad kyi bzod pa gang zhe na/ yon tan rnam pa drug dang rnam pa bdun te/ spyir bsdoms na rnam pa bcu gsum mo//de la yon tan rnam pa drug ni/ rnam par smin pas 'jigs pas bzod pa dang / byams pas bzod pa dang / byang chub 'dod pa'i rgyus bzod pa dang / chos yang dag par blangs pas bzod pa dang / rang bzhin gyis bzod pa dang / chos la nges par sems pas bzod pa'o// rnam pa bdun ni gnod pa dang / yul dang / dus dang / gnas skabs dang / lus dang / ngag dang / yid kyi rnam pa thams cad kyis bzod pa'o/ /phongs shing 'dod pa la bzod pa gang zhe na rnam pa brgyad de/ slong mo ba sdug bsngal ba rnams las slong ba'i gnod pa bzod pa dang /sems can ma rungs pa sdig pa chen po'i las byed pa rnams la chos kyi snying rje chen po la brten nas kun nas mnar sems mi byed pa'i bzod pa dang / rab tu byung ba tshul khrims 'chal ba rnams la chos kyi snying rje chen po la brten nas kun nas mnar sems mi byed pa dang /brtsal ba rnam pa lnga po sems can sdug bsngal ba rnams kyi sdug bsngal bsal ba'i phyir 'bad pa dang / chos rnams yongs su btsal ba dang / chos kyi rjes su mthun pa'i chos sgrub pa dang /chos de dag nyid gzhan dag la rgya cher bstan pa dang / sems can gyi byed pa rnams dang / bya ba rnams la yang dag pa'i grogs su 'gro ba'i brtsal ba mi brjod pa'o/ /'di dang gzhan du bde bar 'gyur ba'i bzod pa gang zhe na rnam pa dgu ste/ grang ba dang / tsha ba dang /bkres pa dang / skom pa dang / sbrang bus zin pa dang / sha sbrang gis zin pa dang / rlung dang / nyi ma dang / sdig sbrul dang / lus dang / sems dub pa dang / 'khor ba'i sdug bsngal bzod pa'o/ /rnam par dag pa'i bzod pa gang zhe na rnam pa bcu ste/ gnod pa byas pa la phyis gnod pa dang /'khrug pa dang / dgra'i bsam pa mi 'dzin pa dang / sngar ji lta ba bzhin du phyis kyang phan gdags pa'i phyir brtson par byed pa dang / gnod par byed pa rnams la yang bdag nyid kyis shad kyis byang bar byed pa dang / mi dga' bar byas pa ni mi dga' bar gyur kyang rung zhes gzhan dag 'chags su mi gzhug pa dang /de nyid kyi rkyen byas nas mi bzod pa las brtsams te/ shas cher ngo tsha shes pa dang / khrel yod pa dang ldan pa dang / bzod pa las brtsams te ston pa la shas cher sdug par 'dzin cing gus pa dang ldan pa dang /sems can la rnam par tho mi 'tshams pa las brtsams te/ sems can rnams la shas cher snying rje ba'i bsam pa dang ldan pa dang / mi bzod pa'i chos grogs dang bcas pa thams cad kyi thams cad du spangs pas 'dod pa'i 'dod chags dang bral ba'o//brtson 'grus rnam pa dgu yang snga ma bzhin no/ /de la brtson 'grus kyi ngo bo nyid gang zhe na/ khyad par rnam pa bzhi po la dmigs pa dang / rnam pa dang / sbyor ba dang / rgyu mthun pa dang ldan pa'i yongs su g.yo ba'o/ /de la dmigs pa'i dge ba'i chos dpag tu med pa bsdu ba dang /sems can gyi don bya ba'i phyir ro/ /rnam pa ni sems mngon par spro ba'o/ /sbyor ba ni sbyangs pa'i bar chad med pa'i phyin ci log pa'o/ /rgyu mthun pa ni de las byung ba'i lus dang ngag dang yid kyis yongs su g.yo ba'o/ /brtson 'grus thams cad gang zhe na/rnam pa gnyis te/ khyim pa'i phyogs la brten pa dang / rab tu byung ba'i phyogs la brten pa'o/ /de yang ci rigs par rnam pa gsum ste/ go cha'i brtson 'grus dang / dge ba'i phyogs kyi chos sdud pa dang / sems can gyi don byed pa'o/ / dga' ba'i brtson 'grus gang zhe na/ rnam pa gsum ste/ gos dang zas dang mal cha dang stan dang bdag tu 'du shes kyang mi byed par dge ba'i chos rnams bsgom pa la rtag tu rgyun mi 'chad par zhugs pa dang / rigs mthun pa ma bor gyi bar du dus thams cad du brtson 'grus rtsom pa de lta bu des zhugs pa dang /mnyam pa nyid khong du chud pa'i yon tan dang ldan pa ha cang zhum pa yang ma yin/ ha cang gtugs pa yang ma yin la phyin ci ma log cing don dang ldan pa'i brtson 'grus dang ldan pa'o/ /thams cad kyi sgo nas brtson 'grus gang zhe na rnam pa bzhi ste/nyon mongs pa can gyi chos rnam par spong bar byed pa dang / dkar po'i chos 'grub par byed pa dang / las yongs su dag par byed pa dang / shes pa rnam par 'phel bar byed pa'o/ /skyes bu dam pa'i brtson 'grus gang zhe na/ rnam pa lnga ste/ma btang ba dang / nyams pa myong ba dang / zhum pa med pa dang / phyin ci ma log pa dang / bstun te sbyor ba'o/ /rnam pa thams cad kyi brtson 'grus gang zhe na/ yon tan rnam pa drug dang rnam pa bdun te/ spyir bsdoms na rnam pa bcu gsum mo/ /de la yon tan rnam pa drug ni/rtag pa'i brtson 'grus dang / gus pa'i brtson 'grus dang / rgyu mthun pa'i brtson 'grus dang / sbyor ba las byung ba'i brtson 'grus dang / mi 'khrugs pa'i brtson 'grus dang / chog mi shes pa'i brtson 'grus so/ / rnam pa bdun po ni 'dun pa dang ldan pa dang /mthun pa dang ldan pa dang / khyad par can dang / tshol ba po dang / bslab pa'i brtson 'grus dang / bdag nyid kyis yang dag par sbyor ba kun nas bsrung zhing 'khrul pa chos bzhin du phyir 'chos pa'i brtson 'grus so/ / phongs shing 'dod pa la brtson 'grus gang zhe na rnam pa brgyad de/ slong mo ba sdug bsngal ba rnams la slong ba'i snod la mngon par spro ba dang / sems can ma rungs pa'i sdig pa chen po'i las byas pa rnams la chos kyi snying rje chen po la brten nas de dang bral ba'i phyir mngon par spro ba dang /rab tu byung ba tshul khrims 'chal pa rnams la chos kyi snying rje chen po la brten nas de dang bral ba'i mngon par spro ba dang / btsal ba rnam pa lnga po sems can sdug bsngal ba rnams kyi sdug bsngal bsal ba'i phyir 'bad pa dang / chos rnams yongs su btsal ba dang / chos kyi rjes su mthun pa'i chos bsgrub pa dang /chos de dag nyid gzhan dag la rgya cher bstan pa dang / sems can gyi don byed pa dang / bya ba rnams yang dag par grogs su 'gro ba'i btsal ba la mngon par spro ba'o/ /'di dang gzhan du bde bar 'gyur ba'i brtson 'grus gang zhe na rnam pa dgu ste/grang ba dang / tsha ba dang / bkres pa dang / skom pa dang / sbrang bus zin pa dang / sha sbrang gis zin pa dang / rlung dang / nyi ma dang / sdig sbrul dang / lus dang / sems dub pa dang / 'khor ba'i sdug bsngal la mngon par spro ba'o/ /rnam par dag pa'i brtson 'grus gang zhe na/rnam pa bcu ste/ 'tsham pa dang / goms pa dang / mi g.yeng ba dang / legs par zin pa dang / dus su goms par brtson pa dang / mtshan ma rtog pa dang ldan pa dang / zhum pa med pa dang / snyoms pa dang / byang chub chen por yongs su bsngo ba'o//bsam gtan rnam pa dgu yang snga ma bzhin no/ /de la bsam gtan gyi ngo bo nyid gang zhe na/ khyad par rnam pa bzhi po rten dang / rnam pa dang / ngo bo nyid dang phyogs kyis rab tu dbye ba'i sems rtse gcig pa nyid do/ /de la rten ni byang chub sems dpa'i sde snod thos pa dang /bsams pa sngon du 'gro ba'o/ /rnam pa ni 'jig rten pa dang / 'jig rten las 'das pa'o/ /ngo bo nyid ni sems rtse gcig pa dge ba la sems gnas pa'o/ /phyogs ni zhi gnas kyi phyogs dang / lhag mthong gi phyogs dang / zung du 'brel pa'i lam gyi phyogs gang yin pa'o//bsam gtan thams cad gang zhe na rnam pa gnyis te/ 'jig rten pa'i dang / 'jig rten las 'das pa'o/ /de yang ci rigs par rnam pa gsum ste/ tshe 'di la bde bar gnas par bya ba'i bsam gtan dang / byang chub sems dpa'i ting nge 'dzin gyi yon tan bsgrub pa'i bsam gtan dang /sems can gyi don bya ba'i bsam gtan no/ /dka' ba'i bsam gtan gang zhe na rnam pa gsum ste/ byang chub sems dpa' bsam gtan la gnas pa mngon par bsgrub pa rgya chen po rnam pa sna tshogs shin tu 'dris pa dag gi gnas nas rang dgar bsam gtan gyi bde ba mchog de bzlog ste/sems can gyi don du 'dod pa'i khams su skye ba dang / byang chub sems dpa' bsam gtan la brten nas byang chub sems dpa'i bsam gtan dpag tu med grangs med pa bsam gyis mi khyab pa nyan thos dang /rang sangs rgyas kyi yul thams cad las yang dag par 'das pa mngon par bsgrub pa dang / byang chub sems dpa' bsam gtan la brten nas/ bla na med pa yang dag par rdzogs pa'i byang chub mngon par rdzogs par sangs rgyas par byed pa'o/ / thams cad kyi sgo nas bsam gtan gang zhe na rnam pa bzhi ste/ rtog pa dang bcas/ dpyod pa dang bcas pa dang / dga' ba dang ldan pa dang / rim pa'i bde ba dang ldan pa dang / btang snyoms dang ldan pa'o/ /skyes bu dam pa'i bsam gtan gang zhe na rnam pa lnga ste/ ro myong ba med pa dang / byams pa dang ldan pa dang / snying rje dang ldan pa dang / dga' ba dang ldan pa dang / btang snyoms dang ldan pa'o/ /rnam pa thams cad kyi bsam gtan gang zhe na/ yon tan rnam pa drug dang / rnam pa bdun te/ spyir bsdoms na rnam pa bcu gsum mo//de la yon tan rnam pa drug ni/ dge ba'i bsam gtan dang / sprul pa dang sprul pa la lung du ma bstan pa'i bsam gtan dang / zhi gnas kyi phyogs kyi bsam gtan dang / lhag mthong gi phyogs kyi bsam gtan dang / bdag dang gzhan gyi don legs par nges pa'i bsam gtan dang /mngon par shes pa'i mthu yon tan mngon par bsgrub pa'i bsam gtan no/ / rnam pa bdun ni ming la dmigs pa dang / don la dmigs pa dang / zhi gnas kyi mtshan ma la dmigs pa dang / rab tu 'dzin pa'i mtshan ma la dmigs pa dang /btang snyoms kyi mtshan ma la dmigs pa dang / tshe 'di la bde bar gnas pa dang / gzhan gyi don bya ba'i bsam gtan no/ /phongs shing 'dod pa la bsam gtan gang zhe na rnam pa brgyad de/ dug dang / thog dang / rims drag po dang / 'byung ba dang / gdon la sogs pa'i gnod pa yang dag par zhi ba bsgrub pa'i gsang sngags rnams byin gyis rlob pa'i bsam gtan dang / khams 'khrug pa las gyur pa'i nad rnam pa sna tshogs rnam par zhi bar byed pa'i bsam gtan dang / mu ge'i ngu 'bod chen po dag byung ba'i tshe char sgrub par byed pa'i bsam gtan dang /mi dang mi ma yin pas byas pa'i 'jigs pa sna tshogs chu dang skom la yod pa rnams las legs par yongs su bskyab pa'i bsam gtan dang / 'brog dgon pa na gnas pa zas dang skom gyis phongs pa rnams la zas skom nye bar bsgrub pa'i bsam gtan dang /dbul po longs spyod med pa rnams kyi longs spyod nye bar bsgrub pa'i bsam gtan dang / phyogs bcu dag na sems can bag med pa rnams la legs par bskul ba'i bsam gtan dang / sems can gyi don bya ba 'byung do cog legs par bya ba'i bsam gtan no//'di dang gzhan du bde bar 'gyur ba'i bsam gtan gang zhe na/ rnam pa dgu ste/ rdzu 'phrul gyi cho 'phrul gyis sems can rnams gdul ba'i bsam gtan dang / kun brjod pa'i cho 'phrul dang rjes su bstan pa'i cho 'phrul gyis sems can rnams gdul ba'i bsam gtan dang /sdig pa byed pa rnams la ngan song gis rnam par ston pa'i bsam gtan dang / sems can spobs pa med pa rnams la spobs pa nye bar sgrub pa'i bsam gtan dang / sems can brjed ngas pa rnams la dran pa nye bar sgrub pa'i bsam gtan dang /dam pa'i chos yun ring du gnas par bya ba'i phyir phyin ci ma log pa'i bstan bcos dang / snyan dngags dang / ma mo sbyar ba rnam par gzhag pa'i bsam gtan dang / 'jig rten pa rnams kyi bzo dang las kyi gnas don dang ldan pa sems can rnams la phan pa rnams dang /yi ge dang rtsis dang shod 'god pa dang / grangs dang lag rtsis la sogs pa dang / khri dang / khri'u dang / gdugs dang lham la sogs pa dang / gnod byed rnam pa sna tshogs rnam pa mang po rnams 'byung bar byed pa'i bsam gtan dang /sems can ngan song gi sar skyes pa rnams kyi ngan song gi sdug bsngal de'i mod la bsal ba'i phyir 'od zer 'gyed pa'i bsam gtan no/ /rnam par dag pa'i bsam gtan gang zhe na rnam pa bcu ste/ 'jig rten pa'i rnam par dag pas rnam par dag pa ro myang ba med pa'i bsam gtan dang /'jig rten las 'das pa'i dag pas dag pa nyon mongs pa can ma yin pa'i bsam gtan dang / sbyor ba'i dag pas dag pa dang / dngos gzhi thob pas dag pa dang / dngos gzhi las khyad par gong ma rnam par dag pas rnam par dag pa'i bsam gtan dang /'jug pa dang / gnas pa dang / ldang ba la dbang ba rnam par dag pa'i bsam gtan dang / bsam gtan bzlog nas yang snyoms par 'jug pa dbang ba rnam par dag pas rnam par dag pa'i bsam gtan dang / mngon par shes pas rnam par 'phrul pa la dbang ba rnam par dag pas rnam par dag pa'i bsam gtan dang /lta bar gyur pa thams cad dang bral ba rnam par dag pas rnam par dag pa'i bsam gtan dang / nyon mongs pa dang / shes bya'i sgrib pa spong nas rnam par dag pas rnam par dag pa'i bsam gtan no/ / shes rab rnam pa dgu yang snga ma bzhin no/ /de la shes rab kyi ngo bo nyid gang zhe na khyad par rnam pa gsum po rnam par gzhag pa dang / ngo bo nyid dang dmigs pas rab tu phye ba'i chos rab tu rnam par dbye ba'o/ /de la rnam par gzhag pa ni/ shes bya thams cad la 'jug pa dang /shes bya thams cad la zhugs pa'o/ /ngo bo nyid ni chos rnams rab tu rnam par 'byed pa'o/ /dmigs pa ni rig pa'i gnas lnga la dmigs nas 'jug pa'o/ /shes rab thams cad gang zhe na rnam pa gnyis te/ 'jig rten pa dang / 'jig rten las 'das pa'o//de yang ci rigs par rnam pa gsum ste/ shes bya la de kho na khong du chud pa'i rtog par byed pa dang / rig pa'i gnas lnga dang / tshogs gsum la mkhas par byed pa dang / sems can gyi don byed pa'i shes rab bo/ /dka' ba'i shes rab gang zhe na/ rnam pa gsum ste/chos bdag med pa zab mo shes par dka' ba shes pa'i shes rab dang / sems can rnams gdul ba'i thabs shes par dka' ba shes pa'i shes rab dang / shes bya thams cad la sgrib pa med pa shes pa mchog tu dka' ba shes pa'i shes rab bo/ /thams cad kyi sgo nas shes rab gang zhe na rnam pa bzhi ste/nyan thos kyi sde snod dang / byang chub sems dpa'i sde snod las brtsams te/ thos pa las byung ba'i shes rab dang / bsams pa las byung ba'i shes rab dang / so sor brtags nas byang chub sems dpa'i bya ba la 'jug pa dang /bya ba ma yin pa las ldog pa so sor brtags pa'i stobs kyis bsdus pa'i shes rab dang / bsgoms pa'i stobs kyis bsdus pa mnyam par gzhag pa'i shes rab tshad med pa'o/ /skyes bu dam pa'i shes rab gang zhe na rnam pa lnga ste/ dam pa'i chos mnyan pas yang dag par thob pa dang /so sor rang gi tshul bzhin yid la byed pa dang ldan pa dang / bdag dang gzhan gyi don bsgrub pa'i thabs dang ldan pa dang chos rnams kyi chos gnas pa chos rnam par gnas pa phyin ci ma log pa las brtsams te/ shin tu rnam par gtan la 'bebs pa'i shes rab dang /nyon mongs pa rnam par spangs pa'i shes rab bo/ /rnam grangs gzhan yang shes bya ji lta ba bzhin du yod pa nyid la 'jug pa'i phyir cha phra ba dang / shes bya ji snyed yod pa de nyid la 'jug pa'i mkhas pa dang / ye shes kyi tshogs sngar yang dag par thob pa'i phyir lhan cig skyes pa dang /sangs rgyas rnams dang sa chen po la bzhugs pa'i byang chub sems dpa' rnams kyis yang dag par bstan pa'i chos dang / don len cing 'dzin pa'i phyir lung dang ldan pa dang / bsam pa dag pa'i sa yan chad mthar thug par 'gro ba'i sa man chad yongs su gzung ba'i phyir rtog pa dang ldan pa'o//rnam pa thams cad kyi shes rab gang zhe na/ yon tan rnam pa drug dang / rnam pa bdun te/ spyir bsdoms na rnam pa bcu gsum mo/ /de la yon tan rnam pa drug ni bden pa rnams la sdug bsngal shes pa dang /kun 'byung ba shes pa dang / 'gog pa shes pa dang / lam shes pa dang / mthar thug pa zad pa shes pa dang / mi skye ba shes pa'o/ / rnam pa bdun ni/ chos shes pa dang / rjes su rtog pa shes pa dang / kun rdzob shes pa dang / mngon par shes pa shes pa dang / mtshan nyid shes pa dang / stobs bcu sngon du 'gro ba'i shes pa dang / rigs pa bzhi po dag la rigs pa shes pa'o/ /phongs shing 'dod pa la shes rab gang zhe na rnam pa brgyad de/ chos rnams kyi rnam grangs shes pa las brtsams te/ byang chub sems dpa'i chos yang dag par rig pa dang / chos rnams kyi mtshan nyid shes pa las brtsams te/ don so so yang dag par rig pa dang / chos rnams kyi nges pa'i tshig shes pa las brtsams te/ nges pa'i tshig so so yang dag par rig pa dang / chos rnams kyi rnam pa'i gzhi rab tu dbye ba las brtsams te/spobs pa so so yang dag par rig pa dang / phas kyi rgol ba thams cad tshar gcod pa'i byang chub sems dpa'i shes rab dang / bdag gi smra ba rnam par gzhag pa thams cad rnam par 'jog pa'i shes rab dang / khyim pa'i rgyud legs par bskyang ba dang /khyim 'byor par bya ba'i shes rab dang / rgyal po'i tshul dang 'jig rten pa'i tha snyad kyi tshul rnams la byang chub sems dpa'i nges pa'i shes rab bo/ /'di dang gzhan du bde bar 'gyur ba'i shes rab gang zhe na rnam pa dgu ste/nang gi rig pa la shin tu rnam par byang zhing rab tu gnas pa'i shes rab dang / gso ba'i rig pa dang / gtan tshigs kyi rig pa dang / sgra'i rig pa dang / 'jig rten pa'i bzo dang / las kyi gnas kyi rig pa la ni shin tu rnam par byang la/ rab tu gnas pa ma yin pa'i shes rab dang /rig pa'i gnas lnga po shin tu rnam par byang ba de dag nyid la brten nas gdul ba rmongs pa rnams dang / bag med pa rnams dang / zhum pa rnams dang / yang dag par zhugs pa gzhan dag la go rims bzhin du yang dag par bstan pa dang yang dag par 'dzin du gzhug pa dang /yang dag par gzengs bstod pa dang / yang dag par rab tu dga' bar bya ba byang chub sems dpa'i shes rab gang yin pa'o/ /rnam par dag pa'i shes rab gang zhe na rnam pa bcu ste/ de kho na'i don ji snyed yod pa nyid dang /ji lta ba bzhin du yod pa nyid 'dzin pa'i phyir de kho na'i don rnam pa gnyis dang / rgyu dang 'bras bu legs par 'dzin pa'i phyir 'jug pa'i don rnam pa gnyis dang / phyin ci ma log pa dang phyin ci ma log pa yang dag pa ji lta ba bzhin du yongs su shes pa'i phyir lan pa'i don rnam pa gnyis dang /bya ba dang bya ba ma yin pa thams cad yang dag pa ji lta ba bzhin du yongs su shes pa'i phyir thabs kyi don rnam pa gnyis dang / kun nas nyon mongs pa la kun nas nyon mongs pa dang / rnam par byang ba la rnam par byang ba yang dag pa ji lta ba bzhin du yongs su shes pa'i phyir mthar thug pa'i don kyang rnam pa gnyis te/shes rab rnam pa lnga'i rab tu dbye ba bcu po de dag ni/ rnam par dag pa mchog gis rnam par dag par rig par bya'o/ /bdag dang sems can yongs su smin par bya ba'i thabs la mkhas pa'i tshig gi don la sogs pa bshad zin to// // de'i 'og tu gnas dang gnas pa la mkhas pa'i tshig gi don la sogs pa bshad par bya ste/ gnas dang gnas pa la mkhas pa zhes bya ba ni pha rol tu phyin pa drug bslab pa gsum du bsdus pa las bslab pa gsum po snga ma snga ma ni gnas pa yin la/phyi ma phyi ma ni gnas pa yin te/ de la mkhas par bya ba'i don 'dir bstan pa'o/ /de'i phyir de bstan pa'i dbang du mdzad nas/ bcom ldan 'das gzhi drug po de dag las du ni lhag pa'i tshul khrims kyi bslab pa lags zhes bya ba la sogs pa zhus so//dang po gsum ni lhag pa'i tshul khrims kyi bslab pa yin par rig par bya'o zhes bya ba ni sbyin pa dang / tshul khrims dang bzod pa gsum ste/ sbyin pa ni tshul khrims yang dag par len pa'i rgyu yang yin te mi 'jigs pa sbyin pa tshul khrims kyi ngo bo nyid kyang yin la tshul khrims ni lhag pa'i tshul khrims kyi ngo bo nyid yin/bzod pa ni tshul khrims kyi 'khor yin pa'i phyir ro/ /bsam gtan ni lhag pa'i sems kyi bslab pa yin no zhes bya ba ni sems rtse gcig pa'i ngo bo nyid yin pa'i phyir ro//shes rab ni lhag pa'i shes rab kyi bslab pa yin no zhes bya ba ni chos rab tu rnam par 'byed pa'i ngo bo nyid yin pa'i phyir ro/ /brtson 'grus ni kun du 'gro ba yin par nga smra'o zhes bya ba ni dge ba'i chos thams cad la sbyor ba'i ngo bo nyid yin pa'i phyir ro//bslab pa gsum gyi grangs dang / go rims dang / nges pa'i tshig dang / yod pa dang med pa la sogs pa rgya cher ni sngar 'bras bu la mkhas pa'i skabs su bstan pa bzhin du rig par bya'o/ /gnas dang gnas pa la mkhas pa'i tshig gi don la sogs pa bshad zin to// // de'i 'og tu mngon par mtho ba dang nges par legs pa'i thabs la mkhas pa'i tshig gi don la sogs pa bshad par bya ste/ mngon par mtho ba dang / nges par legs pa'i thabs la mkhas pa zhes bya ba la mngon par mtho ba ni mtho ris so/ / nges par legs pa ni mya ngan las 'das pa'o/ /thabs ni de gnyis ka thob pa'i rgyu bsod nams dang ye shes kyi tshogs te/ de la mkhas par bya ba'i don 'dir bstan pa'o/ /de'i phyir de bstan pa'i dbang du mdzad nas / bcom ldan 'das bslab pa'i gzhi drug po de dag las du ni bsod nams kyi tshogs lags zhes bya ba la sogs pa zhus so//lhag pa'i tshul khrims kyi bslab pa gang yin pa de ni bsod nams kyi tshogs yin no zhes bya ba ni/ sbyin pa dang / tshul khrims dang / bzod pa ste/ bsod nams bya ba'i dngos po gsum gyi ngo bo nyid yin pa'i phyir ro//de la sbyin pa ni sbyin pa las byung ba'i bsod nams bya ba'i dngos po yin la des ni longs spyod phun sum tshogs pa thob bo/ /tshul khrims ni tshul khrims las byung ba'i bsod nams bya ba'i dngos po yin la des ni lus phun sum tshogs pa thob/bzod pa ni tshad med pa bzhi la sogs pa bsgom pa las byung ba'i bsod nams bya ba'i dngos po yin la/ des ni 'khor phun sum tshogs pa thob pas na/ longs spyod dang lus dang / 'khor phun sum tshogs pa'i rgyu bsod nams kyi tshogs de ni mngon par mtho ba'i thabs yin no//lhag pa'i shes rab kyi bslab pa gang yin pa de ni ye shes kyi tshogs yin no zhes bya ba ni shes rab ste/ ye shes ni shes bya la phyin ci ma log par kun rdzob kyi bden pa dang / ji snyed yod pa nyid dang / rnam grangs 'dzin pa yin la/shes rab kyang chos rab tu rnam par 'byed pa'i don dam pa'i bden pa dang / ji lta ba bzhin du yod pa dang / mtshan nyid 'dzin pa yin pas bden pa gnyis phyin ci ma log par shes pa'i shes pa dang / mthong bas ni mya ngan las 'das pa thob pa'i phyir ye shes kyi tshogs de ni nges par legs pa'i thabs yin no//brtson 'grus dang bsam gtan ni kun du 'gro ba yin par nga smra'o zhes bya ba ni brtson 'grus dang bsam gtan la brten nas ni sbyin pa dang / tshul khrims yang dag par len cing bsrung ba dang / byams pa la sogs pa tshad med pa bsgom pa la sogs pa ni bsod nams kyi phyogs yin no//de gnyis la brten nas shes rab rnam pa gsum la sbyor bar byed cing / mkhas par bya ba'i thams cad la mkhas pa dang / bden pa rnams la so sor rtog pa dang / dge ba dang mi dge ba'i chos la sogs pa yang dag pa ji lta ba bzhin du rab tu 'byed cing so sor rtog pa ni ye shes kyi phyogs yin no//bsod nams dang ye shes la ni rgyu yang yod/ 'bras bu yang yod de/ rgyu ni rnam pa gsum ste/ bsod nams dang ye shes mthong ba dang / gnas pa dang 'phel bar 'gyur la 'dun pa dang / mthun pa la mi mthun pa med pa'i rkyen dang / sngon yang bsod nams dang ye shes la goms pa'o/ /'bras bu gang zhe na/ bsod nams la brten nas byang chub sems dpa' gnod pa med par 'khor bar 'khor zhing sdug bsngal dag gis shin tu gzir ba med pa dang / ci dga' mgur sems can gyi don dang /phan 'dogs nus par 'gyur te/ de gnyis ni bsod nams kyi 'bras bu'o/ /ye shes la brten nas byang chub sems dpa' yang dag par bsod nams yongs su 'dzin par byed kyi log pas ma yin pa dang / mkhas par bya ba sna tshogs dpag tu med pa dag gis kyang /bla na med pa yang dag par rdzogs pa'i byang chub mngon par rdzogs par 'tshang rgya ba'i bar du 'gyur te/ de gnyis ni ye shes kyi 'bras bu yin no/ /de ltar bsod nams dang ye shes kyi tshogs rgyu dang 'bras bur bcas pa de ni mngon par mtho ba dang /nges par legs pa'i thabs yin no/ /mngon par mtho ba dang nges par legs pa'i thabs la mkhas pa'i tshig gi don la sogs pa bshad zin to// // de'i 'og tu legs par shin tu bslab pa la mkhas pa'i tshig gi don la sogs pa bshad par bya ste/legs par shin tu bslab pa la mkhas pa zhes bya ba ni/ pha rol tu phyin pa drug la legs par shin tu bslab pa ste/ de la mkhas par bya ba'i don 'dir bstan pa'o/ /de'i phyir de bstan pa'i dbang du mdzad nas/ bcom ldan 'das bslab pa'i gzhi drug po de dag la byang chub sems dpas ji ltar bslab par bgyi lags zhes bya ba zhus so//de ni rnam pa lngas shes par bya ste/ khams brtas pa dang / tshogs yang dag par bsgrub pa dang / legs pa las yongs su mi nyams pa dang / som nyi med pa dang /gnas skabs kyis so/ /de la khams brtas pa zhes bya ba ni/ byang chub sems dpa'i rigs yang dag par bsgrub pa la gnas pa'i khams bla na med pa'i byang chub tu sems bskyed pas brtas pa ste/ de ni pha rol tu phyin pa dang ldan pa'i dam pa'i chos bstan pa/byang chub sems dpa'i sde snod la thog ma kho nar shin tu mos pa zhes bya ba bstan te/ sems can rang bzhin gyis gnas pa'i rigs can gyi de bzhin gshegs pa'i theg pa mngon par rdzogs pa'i rigs yang dag par bsgrub pa'i khams bla na med pa'i byang chub tu sems bskyed pas brtas par gyur pa'i byang chub sems dpa'i pha rol tu phyin pa dang ldan pa'i dam pa'i chos bstan pa'i byang chub sems dpa'i sde snod la thog ma kho nar shin tu mos pa zhes bya ste/de lta bus bslab pa'i gzhi drug po de dag la legs par shin tu bslab par bya'o zhes ston to//de la thog ma kho nar shin tu mos pa zhes bya ba la/ byang chub sems dpa' rnams kyi mos pa'i khams ni sangs rgyas kyi chos rnams la thob par nus par yid ches pas rab tu phye ba yin te/ mos pa'i khams de bla na med pa'i byang chub tu sems bskyed pas brtas pa'i dus na byang chub sems dpa' rnams kyi mos pa'i gnas pa ni rnam pa brgyad de/mchog gi gnas dang / rgya che ba'i gnas dang / zab pa'i gnas dang / rgyu rigs pa'i gnas dang / 'bras bu rigs pa'i gnas dang / rtogs par bya ba'i gnas dang /bsgrub par bya ba'i gnas dang / bshad par bya ba'i gnas dang / dkon mchog gsum gyi yon tan dang / sangs rgyas dang byang chub sems dpa'i mthu dang / de kho na'i don dang / lam la gnas pa dang / 'bras bu thob pa dang / bla na med pa'i byang chub dang / byang chub sems dpa'i bslab pa dang / legs par gsungs pa'i chos mdo sde la sogs pa dag go/ /bdag ji ltar mos pa'i gnas su 'gyur zhe na/ dang po kho nar dkon mchog gsum ni mos pa mchog gi gnas yin pas de dag gi yon tan la mos pa skye'o/ /de ltar mchog gi gnas la mos par gyur na sangs rgyas dkon mchog dang /dge 'dun dkon mchog gi yon tan la mos pa'i dbang gis ni rgya che ba'i gnas sangs rgyas dang byang chub sems dpa'i mthu la mos pa skye'o/ /chos dkon mchog gi yon tan la mos pa'i dbang gis ni zab pa'i gnas de kho na'i don la mos pa skye'o//yang dge 'dun dkon mchog gi yon tan la mos pa'i dbang gis ni rgyu rigs pa'i gnas dang / 'bras bu rigs pa'i gnas lam la gnas pa dang / 'bras bu thob pa la mos pa skye'o/ / chos dkon mchog gi yon tan la mos pa'i dbang gis ni rtogs par bya ba'i gnas dang /bsgrub par bya ba'i gnas dang / bshad par bya ba'i gnas dang / bla na med pa'i byang chub dang / byang chub sems dpa'i bslab pa dang / legs par gsungs pa'i chos mdo'i sde la sogs pa la mos pa skye ba'i phyir ro//mos pa'i gnas brgyad po de dag ni/ pha rol tu phyin pa dang ldan pa'i dam pa'i chos bstan pa'i byang chub sems dpa'i sde snod ces bya bas bsdus par bstan te/ 'di ltar theg pa chen po thams cad sdud par byed pa'i chos ni rnam pa brgyad de/ byang chub sems dpa'i sde snod bstan pa dang /de nyid du sangs rgyas dang byang chub sems dpa'i mthu bstan pa dang / chos thams cad kyi de kho na'i don bstan pa dang / de tshul bzhin du nyan pa dang / sems pa dang / bsgom pa dang / bsgoms pa'i 'bras bu yongs su grub pa dang / 'bras bu de nyid gtan du nges par 'byin pa'o/ /de dag gis theg pa chen po thams cad ji ltar sdud par byed ce na/ gang la bstan nas thabs gang dang bsgrub pa gang gis 'bras bu gang thob pa dang / khyad par gang gis khyad par du 'gro bas theg pa chen por 'gyur ba'i phyir te/de la gang la brten nas she na/ bstan pa'i gzhi las te/ byang chub sems dpa'i sde snod bstan pa'o/ /thabs gang gis she na/ skyo ba med pa dang / nyon mongs pa med pa'i thabs kyis te/ mthu dang de kho na'i don to/ /sgrub pa gang gis she na/shes rab rnam pa gsum sgrub pas de nyan pa dang / sems pa dang / sgom pa'o/ /bsgoms pa'i 'bras bu ci thob ce na/ bla na med pa'i byang chub ste/ bsgoms pa'i 'bras bu yongs su grub pa'o/ /khyad par gang gis she na/ zad pa dang / mi skye ba'i ye shes kyis de 'bras bu de nyid gtan du nges par 'byin pa'o//de dag gis ji ltar theg pa chen por 'gyur zhe na/ rnam pa gsum mo/ /gang gis 'degs she na bar ma gsum mo/ /gang du 'degs she na tha ma gnyis su 'degs te/ de tsam gyis theg pa chen po thams cad bsdus pa'i phyir ro/ / mos pa'i gnas brgyad po de dag ni theg pa chen po thams cad sdud par byed pa'i chos brgyad po 'dis bsdus te/ mchog gi gnas ni/ byang chub sems dpa'i sde snod bstan pas bsdus te/ gang gis bstan pa dang / gang bstan pa dang / gang la bstan pa'i rnam pa ni dkon mchog gsum gyi yon tan yin pa'i phyir ro//rgya che ba'i gnas dang / zab pa'i gnas ni de nyid du mthu dang / de kho na'i don bstan pa bsdus so/ /rgyu rigs pa'i gnas dang / 'bras bu rigs pa'i gnas pa'i sgrub par byed pa yin la/ rtogs par bya ba'i gnas dang / bsgrub par bya ba'i gnas dang / bshad par bya ba'i gnas ni bsgrub par bya ba yin pas/ sgrub par byed pa bsgrub par bya ba de ji ltar sgrub ce na/ de nyan pa dang / sems pa dang / bsgom pas so/ /de ltar bsgrubs na 'bras bu ci thob ce na/ bsgoms pa'i 'bras bu yang dag par grub pa dang /'bras bu de nyid gtan du nges par 'byin pa thob ste/ de ltar mos pa'i gnas brgyad ni theg pa chen po thams cad sdud par byed pa'i chos brgyad kyis bsdus la theg pa chen po thams cad sdud par byed pa'i chos brgyad ni pha rol tu phyin pa dang ldan pa'i dam pa'i chos bstan pa byang chub sems dpa'i sde snod kyis bsdus pa des ni mos pa'i gnas bstan to//de la byang chub sems dpa' rnams kyi mos pa'i ngo bo nyid ni sangs rgyas kyi chos rnams la thob par nus par yid ches pas rab tu phye ba yin pas de ni pha rol tu phyin pa dang ldan pa'i dam pa'i chos bstan pa byang chub sems dpa'i sde snod la thog ma kho nar shin tu mos pa yin te/de lta bu bslab pa'i gzhi drug po de dag la legs par shin tu bslab par bya'o zhes bya bar sbyar ro/ /tshogs yang dag par sgrub pa zhes bya ba ni de ltar khams brtas pas thar pa'i cha dang mthun pa'i dge ba'i rtsa ba yang dag par grub pa'i 'og tu mos pas spyod pa'i sa la chos spyod pa bcu po dag gi rim gyis shes rab rnam gsum skyes pas nges par 'byed pa'i cha dang mthun pa'i dge ba'i rtsa ba yang dag par grub pa ste/de ni de'i 'og tu chos spyad pa bcu po dag gis thos pa dang /bsams pa dang bsgoms pa las byung ba'i shes pas bsgrub pa zhes bya bas bstan te/ byang chub sems dpa'i khams brtas pas thar pa'i cha dang mthun pa'i dge ba'i rtsa ba yang dag par grub pa'i 'og tu mos pas spyod pa'i sa la chos spyad pa bcu po dag gi rim gyis shes rab rnam pa gsum skyes pas nges par 'byed pa'i cha dang mthun pa'i dge ba'i rtsa ba yang dag par grub pa ni de'i 'og tu chos spyad pa bcu po dag gis thos pa dang /bsams pa dang / bsgoms pa las byung ba'i shes rab dang ldan pa yin pas de lta bus bslab pa'i gzhi drug po de dag la legs par shin tu bslab par bya'o zhes bstan to//de la chos spyod pa bcu po dag ces bya ba ni/ theg pa chen po dang ldan pa'i mdo sde la sogs pa'i byang chub sems dpa'i sde snod kyis bsdus pa dag gi yi ger 'drir bcug ste/'dzin pa dang / mchod pa dang / gzhan dag la sbyin pa dang / ston pa la gus par byas te/ sems pa dang bsgom pa'i rnam pas rjes su 'jug par byed pa ste/ de dag thams cad ni bsod nams rgya chen po dang ldan pa'i mdo sde la sogs pa skye ba'i lam yin no//dgu pa ni sbyor ba'i lam yin no/ /bcu pa ni sgrib pa rnam par sbyor ba'i lam mo/ /de dag lam dang po brgyad kyis thos pa las byung ba'i shes pa bskyed do/ /dgu pas ni bsams pa las byung ba'i shes pa bskyed do/ /bcu pas ni bsgoms pa las byung ba'i shes pa bskyed do//de la byang chub sems dpa' thos pa las byung ba'i shes pa skyed par byed pas ni/ dang por bdag nyid chos spyad pa dang po brgyad kyis thos pa las byung ba'i shes pa bskyed par bya ba'i phyir chos btsal bar bya'o/ /de'i 'og tu gzhan dag chos spyad pa brgyad po de nyid kyis thos pa las byung ba'i shes pas bskyed du gzhug pa'i phyir chos bstan par bya'o//de la byang chub sems dpa' bdag nyid chos spyad pa dang po brgyad kyis thos pa las byung ba'i shes pa bskyed par bya ba'i phyir/ chos tshol bas ji ltar tshol/ ci'i phyir chos tshol zhe na/ mdor bsdu na byang chub sems dpa'i sde snod dang / nyan thos kyi sde snod dang / phyi rol gyi bstan bcos dang / 'jig rten pa'i bzo dang / las kyi gnas shes pa rnams tshol lo/ /de la byang chub sems dpa'i sde snod ni gsung rab tu gtogs pa yan lag bcu gnyis las shin tu rgyas pa'i sde zhes bya ba yin no//nyan thos kyi sde snod ni yan lag lhag ma rnams yin no/ /phyi rol gyi bstan bcos ni rnam pa gsum ste/ gso ba'i bstan bcos dang / gtan tshigs kyi bstan bcos dang / sgra'i bstan bcos so/ /'jig rten pa'i bzo dang /las kyi gnas shes pa ni/ bzo dang las kyi gnas kyi rig pa'o/ /byang chub sems dpas btsal bar bya ba de dag kyang mdor bsdu na/ rig pa'i gnas lnga po nang gi rig pa dang / gso ba'i rig pa dang / gtan tshigs kyi rig pa dang / sgra'i rig pa dang / bzo dang las kyi gnas kyi rig pa dag yin no//de la nang gi rig pa ni/ gsung rab tu gtogs pa yan lag bcu gnyis te/ de ni rnam pa bzhir rig par bya ste/ gzhi gdags pa rnam par gzhag pa dang / ming rab tu dbye ba gdags pa rnam par gzhag pa dang / bstan pa'i don bsdu ba dang / sangs rgyas kyi bka' zhes bya ba'i gnas so//de la gzhi gdags pa rnam par gzhag pa zhes bya ba ni mdo sde dang / 'dul ba dang / ma mo'i gzhi gsum gyis sangs rgyas kyi bka' bsdu ba'o/ /ming rab tu dbye ba gdags pa rnam par gzhag pa zhes bya ba ni sangs rgyas kyi bka' bsdus pa'i chos thams cad kyi ming rab tu dbye ba'o//bstan pa'i don bsdu ba zhes bya ba ni sangs rgyas kyi bkas bsdus pa'i bstan pa mtha' yas pa thams cad mdor bsdu ba'o/ /sangs rgyas kyi bka' zhes bya ba'i gnas ni sangs rgyas kyi bka' zhes bya ba thams cad bsdus pas na sangs rgyas kyi bka' nyid shes par bya ba'i gnas yin pa'o//rang gi rig pa de ni mdor bsdu na rnam pa gnyis kyis 'jug ste rgyu dang 'bras bu yang dag ston pa'i rnam pa dang / byas pa chud mi za zhing ma byas pa dang phrad par mi 'gyur bas ston pa'i gnas so/ /gso ba'i rig pa ni gso ba'i bstan bcos te/nad gso ba shes pa'o/ /de ni rnam pa bzhir blta bar bya ste/ nad la mkhas pa dang / nad ci las gyur pa la mkhas pa dang / nad byung ba bsal ba la mkhas pa dang / nad bsal nas phyis mi 'byung bar bya ba la mkhas pa'o/ /de ni rnam pa bzhi po de dag nyid kyis 'jug pa yin no//gtan tshigs kyi rig pa ni gtan tshigs kyi bstan bcos te/ brtag pa'i dus su yod pa'i dngos po gang yin pa'o/ /de ni rnam pa bdun du blta bar bya ste/ smra ba dang / smra ba'i zhal che ba dang / smra ba'i gzhi dang / smra ba'i rgyan dang / smra ba'i chad pas bcad pa dang /smra ba las byung ba dang / smra ba gces pa la dgos pa'i chos rnams so/ /de yang rnam pa gnyis 'jug ste/ pha rol klan ka tshol ba la brjod pa'i phan yon ston pa'i rnam pa dang / gzhan las byung ba'i phas kyi rgol ba las thar pa'i phan yon ston pa'i rnam pas so//sgra'i rig pa ni sgra'i bstan bcos te/ gdags pa'i rnam par gzhag pa brda sprod par byed pa'o/ /de ni rnam pa drug tu blta bar bya ste/ chos gdags pa rnam par gzhag pa dang / don gdags pa rnam par gzhag pa dang / gang zag gdags pa rnam par gzhag pa dang /dus gdags pa rnam par gzhag pa dang / grangs gdags pa rnam par gzhag pa dang / gzhi yan lag dang bcas pa gdags pa rnam par gzhag pa'o/ /yang rnam pa gnyis kyis 'jug ste/ skad kyi byings kyi ngo bo nyid bsgrub pa rnam par gzhag pa ston pa'i rnam pa dang /tshig legs par sbyar ba'i phan yon ston pa'i rnam pas so/ /bzo dang las kyi gnas kyi rig pa ni 'jig rten pa'i bzo dang las kyi gnas shes pa'o/ /de ni rnam pa bcu gnyis su blta bar bya ste/ snam su bya ba'i bzo dang / nyo tshong gi bzo dang / rgyal po'i zham 'bring bya ba'i bzo dang /yi ge dang / rtsis dang / shod 'god pa dang / grangs dang lag rtsis kyi bzo dang / ltas su lta ba'i bzo dang / blo gros kyi bzo dang / bskyed pa'i bzo dang / rdungs kyi bzo dang / snam bya ba'i bzo dang / sbyor ba'i bzo dang / g.yos bya ba'i bzo dang / rol mo'i bzo'o/ /de ni rang rang gi las dang /bzo'i gnas bsgrubs pa'i 'bras bu yongs su grub pa ston pa'i rnam pas 'jug go/ /ji ltar tshol zhe na mdor bsdu na byang chub sems dpa'i rnam pa gsum gyis tshol te/ gus pa chen po nye bar gzhog pa dang / 'gro ba phun sum tshogs pa dang / nyan pa phun sum tshogs pas so//de la gus pa chen po nye bar gzhog pa ni rnam pa gnyis te/ sdug bsngal nyams su len cing tshol ba dang / bde ba khyad du gsod cing tshol ba'o/ /'gro ba phun sum tshogs pa ni rnam pa bzhi ste/ yon tan 'dod pas chos smra ba'i gam du 'gro ba'i klan ka'i sems kyis ma yin pa dang /gus pa dang bcas pas 'gro ba'i nga rgyal gyis khengs pa ma yin pa dang / dge ba ji lta bu zhig btsal snyam pas 'gro ba'i bdag nyid sgrub pa'i phyir ma yin pa dang / bdag dang gzhan dag dge ba'i rtsa ba yang dag par sbyar bar bya'o snyam pas 'gro ba'i rnyed pa dang /bkur sti'i phyir ma yin pa'o/ /nyan pa phun sum tshogs pa ni rnam pa gnyis te/ kun nas nyon mongs pa med pas nyan pa dang / rnam par mi g.yeng bas nyan pa'o/ /de la kun nas nyon mongs pa med pas nyan pa ni kun nas nyon mongs pa gsum dang bral bas nyan pa ste/ khengs pa kun nas nyon mongs pa dang bral ba dang / khyad du gsod pa'i kun nas nyon mongs pa dang bral ba dang / zhum pa'i kun nas nyon mongs pa dang bral bas nyan pa'o/ /de la rnam pa drug gis na khengs pa'i kun nas nyon mongs pa dang bral bar 'gyur te/ dus su nyan pa dang / bkur sti byed pa dang /sri zhu byed pa dang / mi khro ba dang / rjes su grub pa dang / klan ka mi tshol bas so/ /rnam pa bzhi ni khyad du gsod pa'i kun nas nyon mongs pa dang bral bar 'gyur te/ chos la gus pa nye bar gzhag pa dang / chos smra ba'i gang zag la gus pa nye bar gzhag pa dang / chos la khyad du mi gsod pa dang / chos smra ba'i gang zag khyad du mi gsod pa'o/ /rnam pa gcig gis ni zhum pa'i kun nas nyon mongs pa dang bral bar 'gyur te/ bdag nyid kyis mi lcogs so snyam du bdag nyid khyad du mi gsod pa'o/ /rnam par mi g.yeng bas nyan pa ni rnam pa lnga ste/ kun nas shes par bya ba'i sems dang ldan pa dang / sems rtse gcig pa dang / rna blags pa dang / yid btud pa dang / sems kun gyis bsams nas nyan pa'o/ /ci'i phyir tshol zhe na/ byang chub sems dpa' nang gi rig pa ni rnam pa gnyis kyi phyir tshol te/ chos kyi rjes su mthun pa'i chos kyi nan tan gyis yang dag par bsgrub par bya ba'i phyir dang / gzhan dag la yang dag par bstan par bya ba'i phyir ro//gso ba'i rig pa yang rnam pa gnyis kyi phyir tshol te/ sems can rnams kyi rnam pa sna tshogs rnam par gzhag pa'i phyir dang / skye bo'i tshogs chen po la phan gdags pa'i phyir ro/ /gtan tshigs kyi rig pa ni rnam pa bzhi'i phyir tshol te/ de nyid legs par bshad pa dang /nyes par bshad pa yang dag pa ji lta ba bzhin du shes par bya ba'i phyir dang / phas kyi rgol ba tshar gcod pa'i phyir dang / bstan pa 'di la ma dad pa rnams dad par bya ba'i phyir dang / dad pa rnams phyir zhing 'phel bar bya ba'i phyir ro/ /sgo'i rim pa ni rnam pa gnyis kyi phyir tshol te/ tshig dang yi ge nges tshig bzang pos spyod pas legs par spyad de brjod pa la mos pa rnams gdags la yid ches pa bskyed pa'i phyir dang /don gcig la yang nges pa'i tshig rnam pa sna tshogs kyis rjes su tha snyad gdags pa la 'jug par bya ba'i phyir ro/ /bzo dang las kyi rig pa ni rnam pa gsum gyi phyir tshol te/ sems can rnams kyi don du tshegs chung ngus longs spyod bsgrub pa'i phyir dang /sems can rnams kyi gces par bya ba bskyed pa'i phyir dang / bzo dang las kyi gnas shes pa byin pa'i phan 'dogs bsdu bar bya ba'i phyir ro/ /de dag ni rig pa'i gnas lnga pos so so'i dgos pa bstan pa yin gyi/ byang chub sems dpa'i rig pa'i gnas lnga po de dag tshol ba ni bla na med pa'i byang chub kyi ye shes kyi tshogs chen po yongs su rdzogs par bya ba'i phyir te/thams cad la de ltar ma bslabs na rim gyis thams cad mkhyen pa'i ye shes sgrib pa med pa thob par mi 'gyur ba'i phyir ro/ /de'i 'og tu byang chub sems dpa' gzhan dag chos spyad pa brgyad po de nyid kyis thos pa las byung ba'i shes pa bskyed du gzhug pa'i phyir chos ston pas ci zhig ston ci'i phyir ston zhe na/gang btsal ba de nyid ston to/ /bdag gi phyir btsal ba de nyid kyi phyir ston to/ /ji ltar ston zhe na/ rnam pa gnyis kyis ston te/ mthun pa'i gtam brjod pa dang /yongs su dag pas ston to/ /de la mthun pa'i gtam brjod pa zhes bya ba ni gzhan gyi don dang mthun pa ste/ de rnam pa bco lnga ste spyod lam dang tshul dang mthun par gnas pa la ltos pa dang / chos la ser sna dang slob dpon gyi dpe mkhyud med par ston pa dang tshig dang yi ge go rims bzhin du ston pa dang /don go rims bzhin du ston pa dang / chos kyang don dang ldan pa don kyang chos dang ldan par ston pa dang / yang dag par bstan par 'os pa rnams la yang dag par ston pa dang / yang dag par 'dzin du gzhug par 'os pa rnams la yang dag par 'dzin du gzhug pa dang / yang dag par gzengs bstod par 'os pa rnams yang dag par gzengs bstod pa dang yang dag par dga' bar bya bar 'os pa rnams yang dag par dga' bar byed pa dang /'jug sla bar ston pa dang / tshad ma gsum dang ldan par ston pa dang / bde 'gror 'gro ba dang / mthun par ston pa dang / rnam par ma 'khrugs par ston pa dang / 'phags pa'i bden pa dang ldan par ston pa dang / 'khor thams cad dang ldan par ston te/ mdo gzhan las dus dang / bkur sti dang / go rims dang / mtshams sbyor ba dang / rjes su mthun pa dang / dga' bar byed pa dang / 'dod par byed pa dang / mgu bar byed pa dang / spro bar byed pa dang / sma mi 'bebs pa dang / rigs pa dang /'tsham pa dang / ma 'dres pa dang / chos dang ldan pa dang / 'khor ji lta ba bzhin du chos ston to zhes gsungs pa dang / go rims bzhin no/ /yongs su dag pas ston pa zhes bya ba ni kun nas nyon mongs pa dang ma 'dres pa ston pa ste/ sems 'di rnam pa lnga ste/ sems can gnod pa byed pa rnams la byams pa'i sems kyis ston pa dang /nyes par ston pa rnams la phan pa'i sems kyis ston pa dang / bag med pa zhum pa rnams la snying brtse ba'i sems kyis ston pa dang / bdag la ni mi bstod/ gzhan la ni mi smod par ston pa dang / rnyed pa dang / bkur sti dang tshigs su bcad pa la mi re bar ston pa ste/mdo gzhan las byams pa'i sems dang / phan pa'i sems dang / snying brtse ba'i sems dang / phrag dog med pa'i sems dang / zang zing med pa'i sems kyis ston to zhes gsungs pa dang go rims bzhin no/ /de'i 'og tu byang chub sems dpa' chos spyod pa/ gus pas bsams pa las byung ba shes pa skyed par byed pa na gcig pu dben par song ste/sems pa ni ji skad thos pa'i sems rnams la mi mthun pa'i phyogs spong ba dang / gnyen po yid la byed pa rnam pa brgyad kyis sems par byed de/ thog ma kho nar bsam par bya ba ma yin pa'i gnas rnams spangs nas chos rnams bsam pa rtsom par byed pa dang /rtag tu sbyor ba dang / gus par sbyor ba dang / rgyun du sbyor bar byed do/ /lhod par mi byed pa dang / rigs pas dpyad par bya ba la rigs pas dpyod cing rigs pa dang 'gal bar mi byed pa dang / mos par bya ba la mos par byed cing mos pas yid la byed pa gtong bar mi byed pa dang /don la rton par byed kyi tshig 'bru la mi rton pa dang / nag po bstan pa dang / chen po bstan pa dag kyang yang dag pa ji lta ba bzhin du shes par byed pa dang / thog mar 'jug pa nas kyang sems la 'jug cing skabs ma yin pa la mi 'jug pa dang / zhugs nas kyang yang dang yang du yid la byed pas na snying po nyid thob par byed de/yal bar mi 'dor bas sems so / /de ltar mi mthun pa'i phyogs spong ba dang / gnyen po yid la byed pa rnam pa brgyad kyis sems par byed pa la go rims bzhin du phan yon rnam pa brgyad yod de/ thog ma kho nar bsam par bya ba ma yin pa'i gnas rnams spangs nas chos rnams bsam pa rtsom par byed na sems rmongs pa dang /rnam par g.yeng bar mi 'gyur ro/ /rtag tu sbyor ba dang gus pas sbyor bas rgyun du sbyor bar byed de/ lhod par mi byed na sngar ma rtogs pa'i don rtogs shing khong du chud par 'gyur la/rtogs pa'i don yang chud mi za zhing mi gsal bar mi 'gyur ro/ /rigs pas dpyad par bya ba la rigs pas dpyod cing rigs pa dang 'gal bar mi byed na/ rigs pas brtags pa'i chos de la gzhan gyi dring mi 'jog par 'gyur ro/ /mos par bya ba la mos par byed cing / mos pas yid la byed pa gtong bar mi byed na/de bzhin gshegs pa'i spyod yul gyi/ bdag gi blo'i spyod yul ma yin no/ /chos de dag yid ches shing mi spong bas bdag nyid ma smas ma nyams par 'gyur zhing / kha na ma tho ba med par 'gyur ro/ /don la rton par byed kyi tshig 'bru la mi rton na/sangs rgyas bcom ldan 'das rnams kyis dgongs te gsungs pa thams cad kyi rjes su 'jug par 'gyur ro/ /nag po bstan pa'i mdo sde la mi 'jug /'dul ba la mi snang ba chos nyid dang 'gal ba dang / chen po bstan pa'i mdo sde la 'jug /'dul ba la snang / chos nyid dang mi 'gal bar yang dag pa ji lta ba bzhin du rab tu shes na/de kho na'i don las sus kyang bskyod pa'am/ bsgul bar mi nus par 'gyur ro/ /thog mar 'jug pa nas kyang sems pa la 'jug cing skabs ma yin pa mi 'jug pa na bzod pa sngon ma thob pa thob par 'gyur ro/ /zhugs nas kyang yang dang yang du yid la byed pas snying po nyid thob par byed de/yal bar mi 'dor bar sems na sgom pa la rjes su 'jug par 'gyur ro/ /de'i 'og tu byang chub sems dpa'i chos spyad pa bcu pas bsgoms pa las byung ba'i shes pa skyed par byed pa ni/ bsam pa rnam pa brgyad po de dag yongs su rdzogs nas bsgom pa'i rnam pas rjes su 'jug par byed na zhi gnas dang /lhag mthong dang / zhi gnas dang lhag mthong la goms pa dang / zhi gnas dang lhag mthong la mngon par dga' ba sgom par byed de/ de la zhi gnas gang zhe na/ byang chub sems dpa' bsam pa rnam pa brgyad po de dag shin tu rdzogs pa'i phyir brjod du med pa'i dngos po tsam dang /don tsam gyi dmigs pa la sems nges par gtad nas spros pa thams cad dang bral ba dang / sems yongs su g.yeng ba thams cad dang bral ba'i 'du shes yid la byed pas dmigs pa thams cad la mos pa na/nang gi ting nge 'dzin mtshan ma rnams la sems gnas pa dgu dang / stobs drug dang / yid la byed pa bzhis 'jug pa'o/ /lhag mthong gang zhe na/ zhi gnas yongs su bsgom pa'i yid la byed pa de nyid kyis ji ltar bsams pa'i chos de dag nyid kyi mtshan ma yid la byed pa'i shes rab kyi spyod pa bzhi dang /gzhi rab tu dbye ba drug la dmigs pa dang / yid la byed pa bzhis 'jug pa'o/ /zhi gnas dang lhag mthong la goms pa gang zhe na/ zhi gnas dang lhag mthong la rtag tu sbyor zhing gus par sbyor ba'o/ /zhi gnas dang lhag mthong la mngon par dga' ba gang zhe na/zhi gnas dang lhag mthong gi mtshan ma de dag gnyis las sems mi g.yo ba la rang gi ngang gis mngon par 'du ba med par 'jug cing gnas pa dang / sdud cing mi 'phro ba gang yin pa'o/ /de la byang chub sems dpa' ni ji lta ji ltar zhi gnas dang lhag mthong la goms par byed pa de lta de ltar zhi gnas dang lhag mthong la mngon par dga' bar gnas par 'gyur ro//ji lta ji ltar zhi gnas dang lhag mthong la goms pa de lta de ltar zhi gnas dang lhag mthong yongs su dag par 'gyur ro/ /ji lta ji ltar zhi gnas yongs su dag pa de lta de ltar lus shin tu sbyangs pa dang /sems shin tu sbyangs pa che ba dang / 'phel ba dang / rgyas par 'gyur ro/ /ji lta ji ltar lhag mthong yongs su dag pa de lta de ltar shes pa dang / mthong ba che ba dang / 'phel ba dang / rgyas par 'gyur ro/ /bsgom pa'i bya ba ni 'dir zad de/rten la yod pa'i gnas ngan len bsal bar bya ba dang / shes bya thams cad la shes pa dang / mthong ba rnam par dag par bya ba ste/ byang chub sems dpa'i bsgom pa'i lam de thams cad kyang bsgom pa rnam pa bzhi po 'dis 'grub par 'gyur ro/ /de ltar byang chub sems dpa' khams brtas pas thar pa'i cha dang mthun pa'i dge ba'i rtsa ba yang dag par grub pa'i 'og tu mos pas spyad pa'i sa la chos spyod pa bcu'i rim gyis shes rab rnam pa gsum skyes pa ni/nges par 'byed pa'i cha dang mthun pa'i dge ba'i rtsa ba'i tshogs yang dag par grub pa yin te/ chos yang dag par grub pa des bslab pa'i gzhi drug po de dag la legs par shin tu bslab par bya'o zhes bya bar sbyar ro/ /theg pa las yongs su mi nyams pa zhes bya ba ni byang chub sems dpa' rnams kyi theg pa bdag dang gzhan gyi don phun sum tshogs pa yang dag par grub pa mi gnas pa'i mya ngan las 'das pa'i lam las shes rab dang /snying rje gnyis kyis yongs su mi nyams te/ de ni byang chub kyi sems rjes su bsrung ba zhes bya bas bstan te/ byang chub sems dpa' rang gi theg pa las yongs su mi nyams pas bslab pa'i gzhi drug po de dag la legs par shin tu bslab par bya'o zhes ston to//de la byang chub kyi sems zhes bya bas ni/ byang chub sems dpa'i theg pa bstan te/ byang chub sems dpa' rnams kyi theg pa ni bdag dang gzhan gyi don phun sum tshogs pa yang dag par 'grub pa mi gnas pa'i mya ngan las 'das pa'i lam ste/ de byang chub kyi sems zhes kyang bya yang dag pa'i smon lam zhes kyang bya'o//de la byang chub kyi sems zhes bya ba ni bla na med pa'i byang chub dang sems can thams cad la dmigs pa'i bsam pa ste/ bla na med pa'i byang chub la dmigs pa'i bsam pa ni bdag gi don phun sum tshogs pa yin pas des ni 'khor ba la mi gnas la/ sems can thams cad la dmigs pa'i bsam pa ni gzhan gyi don phun sum tshogs pa yin pas des ni mya ngan las 'das pa la mi gnas so//de nyid yang dag pa'i smon lam zhes bya ste/ yang dag pa'i smon lam thams cad ni mdor bsdu na rnam pa lnga ste/ sems bskyed pa'i smon lam dang / skye ba'i smon lam dang / spyod yul gyi smon lam dang /yang dag pa'i smon lam dang / smon lam chen po ste/ de dag gis rab tu dbye ba ni sngar bsam pa yongs su rdzogs par bya ba'i thabs la mkhas pa'i skabs su bstan pa bzhin no/ /rjes su bsrung ba zhes bya ba ni theg pa de las yongs su mi nyams par bstan te / de ni shes rab dang snying rjes yongs su mi nyams te/shes rab kyis chos thams cad yang dag pa ji lta ba bzhin du rtogs pas bla na med pa'i byang chub la dmigs pa'i bsam pa'i khams brtas pa'i phyir bdag gi don phun sum tshogs pa yang dag par grub cing 'khor ba la mi gnas la/ snying rjes sems can thams cad yongs su mi gtong bas sems can thams cad la dmigs pa'i bsam pa'i khams brtas pa'i phyir gzhan gyi don phun sum tshogs pa yang dag par grub pa'i mya ngan las 'das pa la mi gnas pas de'i phyir shes rab dang snying rje ni bla na med pa'i byang chub dang /sems can thams cad la dmigs pa'i bsam pa'i khams brtas par byed pa dang /bdag dang gzhan gyi don phun sum tshogs pa yang dag par grub par byed pa dang / 'khor ba dang mya ngan las 'das pa la mi gnas par byed pa yin pas theg pa de las yongs su mi nyams shing rjes su bsrung ba yin te/ de lta bus bslab pa'i gzhi drug po de dag la legs par shin tu bslab par bya'o zhes bya bar sbyar ro//som nyi med pa zhes bya ba ni som nyi ni yang dag par sgrub pa thams cad kyi bar du gcod pa yin la/ byang chub sems dpa' rnams kyi dge ba'i bshes gnyen som nyi thams cad yang dag par sel bar byed pa yin pas dge ba'i bshes gnyen la brten pa ni som nyi med pa ste/de ni dge ba'i bshes gnyen la brten pa zhes bya bas bstan te/ dge ba'i bshes gnyen la brten nas som nyi med par 'gyur la/ som nyi med pas bslab pa'i gzhi drug po de dag la legs par shin tu bslab par bya'o zhes ston to de la rnam pa du ma dang ldan na byang chub sems dpa'i dge ba'i bshes gnyen du rig par bya/rnam pa dus ni dge ba'i bshes gnyen gyi bya ba don yod pa yin/ rnam pa du dang ldan na dge ba'i bshes gnyen dad pa'i gzhi'i gnas la mkhas pa yin/ dge ba'i bshes gnyen gyis 'dul ba gzhan dag la dge ba'i bshes gnyen gyi bya ba du yod/ byang chub sems dpa' dge ba'i bshes gnyen la brten pa ni rnam pa dus rdzogs par 'gyur/byang chub sems dpa' 'du shes dus ni dge ba'i bshes gnyen la chos mnyan par bya/ byang chub sems dpa' dge ba'i bshes gnyen gang zag chos smra ba la gnas/ du ni yid la mi bya zhe na rnam pa brgyad dang ldan na byang chub sems dpa'i dge ba'i bshes gnyen du rig par bya ste/tshul khrims la gnas pa dang / mang du thos pa dang / rtogs pa dang ldan pa dang / snying rje dang ldan pa dang / 'jigs pa med pa dang / bzod pa dang ldan pa dang / yid yongs su mi skyo ba dang / dge ba'i tshig dang ldan pa yin no/ /rnam pa lngas ni dge ba'i bshes gnyen gyi bya ba don yod pa yin te/ma gsol bar sems can thams cad kyi don byed pa dang / tshe 'di dang phyi ma'i don yang dag pa ji lta ba bzhin du shes pa dang / yang dag pa'i lam du 'dzud pas phan 'dogs pa dang / dam bcas pa'i rtsom pa 'bras bu yod par byed pa dang / phyogs mi 'dzin cing snying rje snyoms pas so/ /rnam pa lnga dang ni dge ba'i bshes gnyen dad pa'i gzhi'i gnas la gnas pa yin te/spyod yul phun sum tshogs pa dang / brtan pa dang ldan pa dang / tshul 'chos pa med pa dang / phrag dog med pa dang / yo byad bsnyungs pa yin no/ /dge ba'i bshes gnyen gyi gdul ba gzhan dag la/ dge ba'i bshes gnyen gyi bya ba ni rnam pa lnga yod de/gleng bar byed pa dang / dran par byed pa dang / 'doms par byed pa dang / rjes su ston par byed pa dang / chos ston par byed pa yin no/ /byang chub sems dpas dge ba'i bshes gnyen la brten pa ni rnam pa bzhis rdzogs par 'gyur te/ rim gro byed pa dang / bsnyen bkur byed pa dang / yo byad stobs pa dang /bka' bzhin byed pas so/ /byang chub sems dpa' 'du shes lngas dge ba'i bshes gnyen la chos mnyan par bya ste/ dkon pa'i don gyis rin po che'i 'du shes dang / lhan cig skyes pa'i shes rab rgya chen po thob pa'i rgyu'i rang bzhin gyi don gyis mig gi 'du shes dang / shes bya yang dag pa ji lta ba bzhin gyi rnam pa thams cad yang dag par ston pa'i don gyis snang ba'i 'du shes dang /tshe 'di la zhi gnas dang lhag mthong gi dga' ba kha na ma tho ba med pa'i rgyu'i dngos po'i don gyis dga' ba kha na tho ba med pa'i 'du shes dang / mya ngan las 'das pa dang / rdzogs pa'i byang chub bla na med pa'i go 'phang thob pa'i rgyu'i dngos po'i don gyi 'bras bu dang /phan yon che ba'i 'du shes kyis so/ /byang chub sems dpa' dge ba'i bshes gnyen gang zag chos smra ba la gnas lnga yid la mi byed de/ tshul khrims nyams par yid la mi bya ba dang rigs dma' bar yid la mi bya ba dang / byad bzhin ngan par yid la mi bya ba dang /snyan pa med par yid la mi bya'o/ /de ltar byang chub sems dpa' dge ba'i bshes gnyen de lta bu la rnam pa de lta bus bstan te/ som nyi med par gyur pas/ bslab pa'i gzhi drug po de dag la legs par shin tu bslab par bya'o zhes bya bar sbyar ro/ /gnas skabs zhes bya ba ni byang chub sems dpa'i khyim pa'i phyogs la gnas pa dang /rab tu byung ba'i phyogs la gnas pa'i gnas skabs na rgyun mi 'chad par dge ba'i phyogs la sbyor ba ste/ de ni rgyun mi 'chad par dge ba'i phyogs la sbyor ba zhes bya bas bstan te/ byang chub sems dpa'i khyim pa'i phyogs la gnas pa dang / rab tu byung ba'i phyogs la gnas pa'i gnas skabs nas rgyun mi 'chad par dge ba'i phyogs la sbyor bas bslab pa'i gzhi drug po de dag legs par shin tu bslab par bya'o zhes ston to/ /de la byang chub sems dpa' khyim pa'i phyogs la gnas pa dang / rab tu byung ba'i phyogs la gnas pa'i gnas skabs rgyun mi 'chad par dge ba'i phyogs la sbyor ba'i chos ni mdor bsdu na rnam pa bzhi ste/las kyi mtha' legs par byed pa dang / mkhas pa dang / gzhan la phan 'dogs pa dang / yongs su bsngo ba'o/ /de la las kyi mtha' legs par byed pa ni/ rnam pa bzhi ste/ pha rol tu phyin pa rnams nges par 'byed pa dang /byang bar byed pa dang / rtag tu byed pa dang / kha na ma tho ba med par byed pa'o/ /mkhas pa ni rnam pa bcu ste/ sems can zhe 'gras pa rnams kyi sdang ba bsal ba dang / tha mal pa rnams 'jug par bya ba dang / zhugs pa rnams yongs su smin par byed pa dang /yongs su smin pa rnams rnam par grol bar bya ba thabs la mkhas pa dang / 'jig rten pa'i bstan bcos thams cad la mkhas pa dang / byang chub sems dpa'i sdom pa yang dag par blangs pa'i bya ba la mkhas pa dang / yang dag pa'i smon lam la mkhas pa dang /nyan thos kyi theg pa la mkhas pa dang / rang sangs rgyas kyi theg pa la mkhas pa dang / theg pa chen po la mkhas pa'o/ /gzhan la phan 'dogs pa ni bsdu ba'i dngos po bzhis kha cig la phan pa nye bar bsgrub pa dang / kha cig la bde ba nye bar bsgrub pa dang / kha cig la phan pa dang /bde ba nye bar sgrub par byed pa yin no/ /yongs su bsngo ba ni byang chub sems dpa' las kyi mtha' legs par byed pa dang mkhas pa dang / gzhan la phan 'dogs pa'i sgo gsum po dag gis 'das pa dang / ma 'ongs pa dang / da ltar byung ba'i dge ba'i rtsa ba ci bsags so cog thams cad snying thag pa nas dad pas bla na med pa yang dag par rdzogs pa'i byang chub tu yongs su sngo bar byed pa'o//de ltar byang chub sems dpa' khyim pa dang rab tu byung ba'i phyogs la gnas pa gnyis ka chos bzhi po de dag la yang dag par sbyor du zin kyang / byang chub sems dpa' khyim pa pas rab tu byung ba shin tu khyad ches khyad par du 'phags par rig par bya ste/'di ltar byang chub sems dpa' khyim pa ni bu smad yongs su 'dzin pa'i nyes pa las yongs su ma grol gyi/ rab tu byung ba ni de las yongs su grol ba dang / khyim pa ni yongs su 'dzin pa de nyid kyi ched du zhing las dang nyo tshong dang / rgyal po la zho shas 'tsho ba la sogs pas nyon mongs pa dang /chags pa'i sdug bsngal las yongs su ma grol gyi/ rab tu byung ba ni de las yongs su grol ba dang / khyim pas ni tshangs par spyod pa gcig pu nges par lu gu rgyud bzhin du bstan par spyod mi nus kyi rab tu byung bas ni nus pa dang / khyim pas ni byang chub kyi phyogs kyi chos thams cad la mngon par shes pa dul zhing /dge ba gang dang gang rtsom pa de dang de nyid myur du mthar phyin par mi 'gyur gyi/ rab tu byung ba ni de lta ma yin pa dang / khyim pa ni brtul zhugs la nges par gnas pa ma yin pas gzhan dag la tshig mi btsun gyi rab tu byung ba ni de lta ma yin pa'i phyir te/rab tu byung ba ni de lta bu dang mthun pa'i chos thams cad kyis khyim pa las shin tu khyad ches khyad par du 'phags par rig par bya'o/ /de ltar gnas skabs de lta bu dag nas rgyun mi 'chad par dge ba'i phyogs la sbyor bas bslab pa'i gzhi drug po de dag la legs par shin tu bslab par bya'o zhes sbyar ro//legs par shin tu bslab pa la mkhas pa'i tshig gi don la sogs pa bshad zin to// // @##/ /de'i 'og tu mthar thug pa bsdu ba la mkhas pa'i tshig gi don la sogs pa bshad par bya ste/ de ni pha rol tu phyin pa drug po rnams kyi grangs kyi mtha' rnam pa drug tu thug par bsdu ba la mkhas par bya'o//de'i phyir bcom ldan 'das ci'i slad du bslab pa'i gzhi de dag grangs drug tu gdags par rig par bgyi lags zhes bya ba zhus so/ /rnam pa gnyis kyi phyir te/ sems can la phan gdags pa dang /nyon mongs pa'i gnyen po nyid kyi phyir ro zhes bya ba ni phyi rol gyi sems can yongs su smin par bya ba dang / bdag nyid kyis sangs rgyas kyi chos yongs su smin par bya ba nyid kyi phyir te go rims bzhin no/ de la gsum ni sems can la phan gdags pa yin la zhes bya ba ni sbyin pa dang /tshul khrims dang / bzod pa gsum ste/ de yang phan pa nye bar sgrub pas phan 'dogs pa dang / gnod pa nye bar mi sgrub pas phan 'dogs pa dang /phas kyi gnod pa dang du len pas phan 'dogs pa go rims bzhin te/ de tsam gyis ni pha rol gyi sems can yongs su smin par 'gyur ba'i phyir ro/ /gsum ni nyon mongs pa'i gnyen po yin par rig par bya ste zhes bya ba ni brtson 'grus dang /bsam gtan dang / shes rab gsum ste/ de yang dge ba'i phyogs la sbyor bas nyon mongs pa'i gnyen po dang / rnam par gnon pas nyon mongs pa'i gnyen po dang / bag la nyal legs par 'joms pas nyon mongs pa'i gnyen por go rims bzhin te/de tsam gyis na bdag nyid kyi sangs rgyas kyi chos yongs su smin par 'gyur ba'i phyir ro/ /de la phan pa nye bar sgrub pas phan 'dogs pa ni yo byad nye bar sgrub pa'i phan 'dogs pas phan 'dogs so zhes bya bas bstan to//gnod pa nye bar mi sgrub pas phan 'dogs pa ni/ tshul khrims kyis ni phongs pa dang / gnod pa dang rnam par tho 'tshams pa nye bar mi sgrub pa'i phan 'dogs pas phan 'dogs so zhes bya bas bstan to //phas kyi gnod pa dang du len pas phan 'dogs pa ni phongs pa dang / gnod pa dang / tho 'tshams pa la ji mi snyam pas phan 'dogs te zhes bya bas bstan to/ /de gsum gyis ni sems can la phan 'dogs so zhes bya bas ni de tsam gyis na phyi rol gyi sems can yongs su smin par 'gyur ba'i phyir ro//dge ba'i phyogs la sbyor bas nyon mongs pa'i gnyen po ni/ brtson 'grus kyis ni nyon mongs pa rnam par bcil ba dang / nyon mongs pa yang dag par bcom pa'i tshogs la sbyor bar byed do zhes bya bas bstan to//rnam par gnon pas nyon mongs pa'i gnyen po ni/ bsam gtan gyis ni nyon mongs pa rnams rnam par gnon to zhes bya bas bstan to/ /bag la nyal legs par 'joms pas nyon mongs pa'i gnyen po ni/ shes rab kyis ni bag la nyal legs par 'joms par byed do zhes bya bas bstan to//de gsum ni nyon mongs pa'i gnyen po yin no zhes bya ba ni de tsam gyis na bdag nyid kyi sangs rgyas kyi chos yongs su smin par 'gyur ba'i phyir ro/ /mthar thug pa bsdu ba la mkhas pa'i tshig gi don la sogs pa bshad zin to// //de'i 'og tu grogs la mkhas pa'i tshig gi don la sogs pa bshad par bya ste/ de ni pha rol tu phyin pa bzhi po dag la mkhas par bya'o/ /de'i phyir bcom ldan 'das ci'i slad du pha rol tu phyin pa gzhan dag grangs bzhir gdags par bgyi lags zhes bya ba zhus so//pha rol tu phyin pa drug po de dag nyid kyi grogs su gyur pa nyid yin pa'i phyir te zhes bya ba ni thabs la mkhas pa ni sbyin pa dang / tshul khrims dang / bzod pa gsum gyi grogs yin la/ smon lam ni brtson 'grus kyi grogs yin/ stobs ni bsam gtan gyi grogs yin/ye shes ni shes rab kyi grogs yin pas/ grogs kyi grangs kyang bzhir rig par bya'o zhes bstan to/ /de la pha rol tu phyin pa gsum gyis sems can rnams la phan btags pas zhes bya ba ni sbyin pa dang / tshul khrims dang / bzod pa gsum gyis phan pa nye bar sgrub pa dang /gnod pa nye bar mi sgrub pa dang / phas kyi gnod pa dang du len pas phan btags nas so/ /byang chub sems dpa' bsdu ba'i dngos pos zin pa'i thabs la mkhas pa'i dge ba la 'jog par byed de zhes bya bas byang chub sems dpa' rnams kyi lus dang ngag dang yid kyi las bsdu ba'i dngos po bzhis yongs su zin pa ni thabs la mkhas pa yin par ston to// 'di ltar sems can rnams gdul ba dang / bsdu ba'i thabs ni rnams pa bzhi ste / phan 'dogs pa dang / 'dzin du 'jug pa dang / 'jug par byed pa dang / mthun par sgrub pa'o/ /des bsdu ba'i dngos po sbyin pas phan 'dogs pas thabs yin te/ zang zing gi sbyin pa sna tshogs kyis phan btags na sems can rnams de'i tshig mnyan pa dang / bya bar sems pa'i phyir ro/ /snyan par smra ba ni 'dzin du 'jug pas thabs yin te/sbyin pas phan 'dogs pa rnams kyi de dang de la kun tu rmongs pa ma lus par bsal ba'i phyir rig pa 'dzin du bcug na kun tu rmongs pa thams cad dang bral bar 'gyur ba'i phyir ro/ /don spyod pa ni 'jug par byed pas thabs yin te/ rig pa 'dzin du bcug pa rnams kyi dge ba'i gnas kyis bslang ste/dge ba'i gnas su btsud na dul bar 'gyur ba'i phyir ro/ /don mthun pa ni mthun par sgrub pas thabs yin te/ de ltar btsud pa rnams de las khyod bdag nyid kyang da dung dad pa dang / tshul khrims dang / gtong ba dang / shes rab dang ldan pa ma yin na ci'i phyir khyod gzhan dag de yang dag par 'dzin du 'jug par byed ces gdul ba dag de la smra bar mi 'gyur bas des bdag nyid kyang don mthun par sgrub na gzhan dag gdul bar 'gyur ba'i phyir te/de ltar byang chub sems dpa' rnams kyi lus dang ngag dang yid kyi las bsdu ba'i dngos po bzhi po thams cad dam/re res zin pa des ni thabs la mkhas pa yin pas sngar pha rol tu phyin pa gsum gyis phan btags nas de'i thabs la mkhas pa des dge ba la 'jog par byed pas/ de'i phyir ngas thabs la mkhas pa'i pha rol tu phyin pa ni gsum po dag gi grogs su 'gyur ba yin par yongs su ston to zhes bya ba gsungs so//gal te byang chub sems dpa' tshe 'di nyid la nyon mongs pa mang bas rtag tu bsgom mi nus pa zhes bya ba ni brtson 'grus kyi pha rol tu phyin pa'i mi mthun pa'i phyogs yin no/ /mos pa dman pa'i phyir lhag pa'i bsam pa stobs chung bas sems nang du 'jog mi nus pa zhes bya ba ni bsam gtan gyi pha rol tu phyin pa'i mi mthun pa'i phyogs yin no//byang chub sems dpa'i sde snod thob pa'i dmigs pa la bsam gtan yongs su ma bsgoms pas 'jig rten las 'das pa'i shes rab mngon par sgrub mi nus pa zhes pa ni shes rab kyi pha rol tu phyin pa'i mi mthun pa'i phyogs yin te mi mthun pa'i phyogs de gsum spong zhing pha rol tu phyin pa de gsum gyi grogs su pha rol tu phyin pa gzhan gsum rim bzhin du sbyar ro//de la brtson 'grus kyi pha rol tu phyin pa'i mi mthun pa'i phyogs ji skad smras pa de spong zhing brtson 'grus kyi pha rol tu phyin pa'i grogs ni/bsod nams kyi tshogs yang dag par blangs te/ gnas shing phyi ma la nyon mongs pa chung ba nyid du yid kyis smon par byed/ de ni smon lam gyi pha rol tu phyin pa ste / de la nyon mongs pa chung ba dang / brtson 'grus rtsom nus par 'gyur bas de'i phyir smon lam gyi pha rol tu phyin pa ni brtson 'grus kyi pha rol tu phyin pa'i grogs su 'gyur ba nyid yin no zhes bya bas bstan to// gong nas gong du ye shes khyad par can don du gnyer ba ni smon lam gyi pha rol tu phyin pa yin no/ /bsam gtan gyi pha rol tu phyin pa'i mi mthun pa'i phyogs ji skad bstan pa de spong zhing /bsam gtan gyi pha rol tu phyin pa'i grogs ni/ des skyes bu dam pa la yang dag par brten pa dang / dam pa'i chos mnyan pa la brten nas/ tshul bzhin yid la byed pa thob cing lhag pa'i bsam pa stobs chung ba nyid rnam par rtog pa na khams gya nom pa las bsam pa'i stobs thob par 'gyur ba de ni/de'i stobs kyi pha rol tu phyin pa yin te/ des sems nang du 'jog nus pa yin pas de'i stobs kyi pha rol tu phyin pa ni bsam gtan gyi pha rol tu phyin pa'i grogs zhes bya bas bstan te/ /bdud thams cad kyis lam mi chod pa ni stobs kyi pha rol tu phyin pa yin no//shes rab kyi pha rol tu phyin pa'i mi mthun pa'i phyogs ji skad bstan pa de spong zhing shes rab kyi pha rol tu phyin pa'i grogs ni/ de la byang chub sems dpa'i sde snod thob pa'i dmigs pa yongs su bsgom pa la bsam gtan byed de/ de ni de'i ye shes kyi pha rol tu phyin pa yin te/ des 'jig rten las 'das pa'i shes rab sgrub nus par 'gyur bas de'i phyir des ye shes kyi pha rol tu phyin pa ni shes rab kyi grogs su gyur pa yin par yongs su bstan to zhes bya bas bstan te/ de la shes rab ni rang dang spyi'i mtshan nyid rab tu dbye ba'i rnam pa yin/ye shes ni rgyu dang 'bras bu'i 'jug pa rab tu dbye ba'i rnam pa yin no/ /yang gcig tu na shes rab ni don dam pa'i bden pa 'dzin pa'i rnam pa yin/ ye shes ni kun rdzob kyi bden pa 'dzin pa'i rnam pa yin no/ /grogs la mkhas pa'i tshig gi don la sogs pa bshad zin to// //de'i 'og tu 'byung ba la mkhas pa'i tshig gi don la sogs pa bshad par bya ste/ de ni pha rol tu phyin pa drug po dag snga ma snga ma las phyi ma phyi ma 'byung ba'i go rims la mkhas par bya'o/ /de'i phyir bcom ldan 'das ci'i slad du pha rol tu phyin pa drug po de dag gi go rims de ltar bstan par bgyi lags zhes bya ba zhus so//de nas gang du 'grub pa'i rten gyis yin pa'i phyir te zhes bya ba ni go rims kyi tshul rnam pa gsum ste/ snga ma la brten nas phyi ma 'byung ba dang / snga ma dman pa yin la/ phyi ma dam pa yin pa dang / snga ma rags pa yin la/phyi ma phra ba yin pa'i phyir te/ de'i phyir byang chub sems dpas lus dang / longs spyod la mi lta na tshul khrims yang dag par len par byed do zhes bya ba la sogs pa gsungs so/ /'byung ba la mkhas pa'i tshig gi don la sogs pa bshad zin to// // de'i 'og tu tha dad pa la rab tu dbye ba mkhas pa'i tshig gi don la sogs pa bshad par bya ste/ de'i phyir pha rol tu phyin pa drug po re re yang rnam pa gsum gsum du tha dad pa'i rab tu dbye ba la mkhas par bya'o/ /de'i phyir bcom ldan 'das pha rol tu phyin pa de dag rnam pa du mar rab tu dbye ba lags zhes bya ba zhus so//rnam pa gsum zhes bya ba ni drug po re re la yang rnam pa gsum gsum du rab tu dbye'o/ /sbyin pa rnam pa gsum zhes bya ba la/ chos sbyin pa yang rnam pa gsum ste/ glegs bam sbyin pa dang / gzhung bzhin 'chad pa dang / mkhan por ston pa'o/ /zang zing sbyin pa yang rnam pa gsum ste/phyi'i zang zing gi sbyin pa dang / nang gi zang zing gi sbyin pa dang / phyi nang gnyis ka'i zang zing gi sbyin pa'o/ /mi 'jigs pa sbyin pa yang rnam pa gsum ste/ rkyen gyi sdug bsngal las bskyab pa dang / srog gi bar chad las bskyab pa dang / 'khor ba'i rgyud las bskyab pa'o//de la yon tan gyi mthu rnam pa gsum du 'gyur te/ chos sbyin pas ni 'jig rten las 'das par 'gyur/ zang zing sbyin pas ni longs spyod chen po 'thob par 'gyur/ mi 'jigs pa sbyin pas ni tshe la bar chad med par 'gyur ro/ /tshul khrims rnam pa gsum ni zhes bya ba la/mi dge ba las ldog pa'i tshul khrims kyang rnam pa gsum ste/ lus mi dge ba las ldog pa dang / ngag mi dge ba las ldog pa dang / yid mi dge ba las ldog pa'o/ /dge ba la 'jug pa'i tshul khrims kyang rnam pa gsum ste/ dkon mchog gsum la skyabs su rton par 'jug pa dang /bsod nams la yid rton par 'jug pa dang / chos kyi dbyings rtogs par 'jug pa'o/ /sems can gyi don la 'jug pa'i tshul khrims kyang rnam pa gsum ste/ yongs su ma smin pa smin par bya ba dang / rnam par ma grol ba dgrol ba dang /yongs su mya ngan las ma 'das pa mya ngan las bzla ba'o/ /de la yang yon tan gyi mthu rnam pa gsum du 'gyur te/ mi dge ba las ldog pa'i tshul khrims kyis ni mtho ris su skye bar 'gyur/ dge ba la 'dzud pa'i tshul khrims kyis ni byang chub kyi tshogs rdzogs par 'gyur/ sems can gyi don la 'jug pa'i tshul khrims kyis ni bdag dang gzhan gyi don phun sum tshogs par 'gyur ro/ /bzod pa rnam pa gsum ni zhes bya ba la/ gnod pa la mi mjed pa'i bzod pa rnam pa gsum ste/ gshe yang phyir mi gshe bar bya ba dang / brdeg kyang phyir mi brdeg par bya ba dang /smad kyang phyir mi smad par bya ba'o/ /sdug bsngal la ji mi snyam pa'i bzod pa yang rnam pa gsum ste/ ma 'ongs pa'i dus kyi sems can thams cad kyi don bya bas mi skyo ba'i bzod pa dang / spyod lam dam pa la log par bsgrub pa'i sdug bsngal gyis spa mi bkong ba'i bzod pa dang /'dod chags la sogs pa nyon mongs pa zhi zhing spong bar bzod pa'o/ /chos la nges par rtog pa'i bzod pa yang rnam pa gsum ste / stong pas mi skrag pa dang / mtha' gnyis la mi chags pa dang / dka' ba spyod pa la brtan par bzod pa'o/ /de la yang yon tan gyi mthu rnam pa gsum du 'gyur te/gnod pa byed pa la mi mjed pa'i bzod pas ni 'khor phun sum tshogs pa dang ldan par 'gyur/ sdug bsngal la ji mi snyam pa'i bzod pas ni ma rabs kyi sems spong bar 'gyur/ chos la nges par rtog pa'i bzod pas ni zag pa med pa'i shes rab skye bar 'gyur ro//brtson 'grus rnam pa gsum ni zhes bya ba la/ go cha'i brtson 'grus kyang rnam pa gsum ste/ byams pa chen po'i go bgo ba dang / snying rje chen po'i mthu brtan pa dang / brtson 'grus chen po'i mthu brtan pa'o/ /dge ba la sbyor ba'i brtson 'grus kyang rnam pa gsum ste/dad pa chen pos don la rton pa dang / spyod pa chen pos dge ba la 'jug pa dang / bsngo ba chen pos sems can la khyab pa'o/ /sems can gyi don la sbyor ba'i brtson 'grus kyang rnam pa gsum ste/ snyoms pa dang tshul khrims la khyad par med par brtson pa dang /bsdu ba rnam pa bzhi'i thabs kyis chos kyi don la 'jog par brtson pa dang / gnyen po mi 'gong ba'i shes rab kyis thabs su brtson pa'o/ /de la yang yon tan gyi mthu rnam pa gsum du 'gyur te/ go cha'i brtson 'grus kyis ni bdud bzhi thul bar 'gyur/ dge ba la sbyor ba'i brtson 'grus kyis ni sa bcu yongs su rdzogs par 'gyur/sems can gyi don la sbyor ba'i brtson 'grus kyis ni 'dren pa chen po'i thabs dang ldan par 'gyur ro/ /bsam gtan rnam pa gsum ni zhes bya ba la/ rnam par mi rtog cing zhi la rab tu zhi bas nyon mongs pa dang sdug bsngal gyi gnyen po bde bar gnas pa'i bsam gtan yang rnam pa gsum ste/sems chos la mi rtog pa dang / chos sems la mi rtog pa dang / btang snyoms kyi sems gnyi gar mi rtog pa'o/ /yon tan mngon par sgrub pa'i bsam gtan yang rnam pa gsum ste/ sku'i yon tan mngon par sgrub pa dang /ye shes kyi yon tan mngon par sgrub pa dang / stobs la sogs pa'i yon tan mngon par sgrub pa'o/ /sems can gyi don mngon par sgrub pa'i yon tan yang rnam pa gsum ste/ bsngo ba'i ting nge 'dzin dang / khyab pa'i ting nge 'dzin dang / mi 'gyur ba'i ting nge 'dzin to//de la yang yon tan gyi mthu rnam pa gsum du 'gyur te / rnam par mi rtog cing zhi ba rab tu zhi bas nyon mongs pa dang sdug bsngal gyi gnyen po bde bar gnas pa'i bsam gtan gyis ni rnam par mi rtog pa lhun gyis grub par 'gyur/ yon tan mngon par sgrub pa'i bsam gtan gyis ni rgyu phun sum tshogs pa 'thob par 'gyur/sems can gyi don sgrub pa'i bsam gtan gyis ni snying rje chen pos sems can gyi don la sbyor bar 'gyur ro/ /shes rab rnam pa gsum ni zhes bya ba la/ kun rdzob kyi bden pas dmigs pa yang rnam pa gsum ste/ 'dus byas kyi mtshan nyid la mkhas pa dang /'khor ba'i rgyud la mkhas pa dang / 'khor ba'i rgyud las ldog pa la mkhas pa'o/ /don dam pa'i bden pa la dmigs pa la yang rnam pa gsum ste/ stong pa nyid pas mi gnas pa dang / mtshan ma med pas mi rtog pa dang / smon pa med pas mi chags pa'o//sems can gyi don la dmigs pa la rnam pa gsum ste/ /rang bzhin gyi sdug bsngal la ting nge 'dzin gyis sbyor ba dang / 'du byed kyi sdug bsngal la gnyen pos gcod pa dang / the tshom gyi sdug bsngal la rgyas par 'grel pa'i shes rab 'o / /de la yang yon tan gyi mthu rnam pa gsum du 'gyur te/kun rdzob kyi bden pa la dmigs pa'i shes rab kyis ni 'khor ba la mi chags par 'gyur/ don dam pa'i bden pa la dmigs pa'i shes rab kyis ni 'phags pa'i shes rab mngon par 'thob par 'gyur/ sems can gyi don la dmigs pa'i shes rab kyis ni sprul pa mngon par ston par 'gyur ro//tha dad pa'i rab tu dbye ba la mkhas pa'i tshig gi don la sogs pa bshad zin to// //de'i 'og tu rdzogs pa la mkhas pa'i tshig gi don la sogs pa bshad par bya ste/ de ni pha rol tu phyin pa de dag rgyu rnam pa lnga dang /rnam par dag pa bsdus pa dang / so so bas rdzogs par 'gyur ba la mkhas par bya'o/ /de'i phyir/ bcom ldan 'das ci'i slad du pha rol tu phyin pa de dag pha rol tu phyin pa rnams zhes bgyi lags zhes bya ba zhus so/ /lnga'i phyir te zhes bya bas ni rgyu de lngas pha rol tu phyin pa rdzogs par ston to//chags pa med pa nyid ces bya ba la/ rdzogs pa lnga'i gnas su gyur pa chos rnams thams cad la chags pa med pa nyid dang / de'i 'bras bu dang zang zing la sems 'brel pa med pa nyid dang / nye ba'i nyon mongs pa rnam pa thams cad rnam par spangs pa nyid dang /kun brtags pa'i ngo bo nyid du ji lta ba nyid dang / bla na med pa yang dag par rdzogs pa'i byang chub thob par smon lam 'debs pa nyid dang / go rims bzhin du sbyar te/ de ltar na byang chub sems dpa' rnams kyi pha rol tu phyin pa yang yon tan lngas yongs su zin pa de dag ni sbyin pa'i ngo bo nyid ces bya ba nas rnam par dag pa'i sbyin pa zhes bya ba dang /shes rab kyi ngo bo nyid ces bya ba nas rnam par dag pa'i shes rab dag yin par rig par bya'o/ /pha rol tu phyin pa dang mi mthun pa'i phyogs dngos po gang lags zhes zhus pas ni/ chags pa med pa nyid rgya cher ston te tshig gi don ni go sla'o/ /pha rol tu phyin pa de dag gi rnam par smin pa'i 'bras bu gang lags zhes zhus pas ni mi nyid rgya cher ston te/ de dag gi tshig gi don kyang go sla'o / /pha rol tu phyin pa de dag la kun nas nyon mongs pa can gyi chos dang 'dres pa gang lags zhes zhus pas ni/kha na ma tho ba nyid rgya cher ston te de dag gi tshig gi don kyang go sla'o/ /de las gzhan pa'i pha rol tu phyin pa dag la de las gzhan pa'i pha rol tu phyin pa bsgom pa'i nyams pa zhes bya ba ni dper na sbyin pa ni sbyin la/ tshul khrims ni nyams pa lta bu'o/ / thabs ma lags pa byung ba zhes zhus pas kha na ma tho ba nyid rgyu chen por ston te/ de dag gi tshig gi don kyang go sla'o / /bcom ldan 'das pha rol tu phyin pa de de dag gi rnam par dag pa du mchis lags zhes bya ba la sogs pas ni rnam par dag pa bsdus pa dang / so so bas pha rol tu phyin pa rdzogs par 'gyur ba la mkhas par bya ba'i don to//de la pha rol tu phyin pa thams cad kyi rnam par dag pa bsdu ba ni/ rnam pa bdun gyis rig par bya ste zhes bya ba ni yon tan gyi dri ma bdun po 'dod pa dang / lta ba dang / yid kyis dang / nga rgyal dang / rgyags pa dang / bag la nyal dang /ser sna dang bral bas rnam par dag pa ste/ dkyus kyi tshig bdun dang go rims bzhin du sbyar ro/ /rnam par dag pa so so tha dad pa de yang rnam pa bdun kho nar rig par bya ste zhes bya ba ni drug po re re la yang rnam pa bdun bdun du 'gyur ro/ /sbyin pa rnam par dag pa rnam pa bdun pa zhes bya ba ni rnam pa bdun 'og nas byung ba re re la yang rnam pa bcu bcur rig par bya'o//de las sbyin par bya ba'i dngos po rnam par dag pa rnam pa bcu ni/ mang po dang sna tshogs nyid kyis rgya chen po sbyin par byed pa dang / mi mang mi nyung ba nyid kyis mtshungs par sbyin par byed pa dang / 'dod pa'i dus nyid kyis dus su sbyin par byed pa dang /kha dog la sogs pa phun sum tshogs pa nyid kyis gya nom par sbyin par byed pa dang / mi gtsang ba'i dngos po dang ma 'dres pa nyid kyis gtsang bar sbyin par byed pa dang / kha na ma tho ba med pa dang ldan pa nyid kyis rung ba sbyin par byed pa dang / slong mo pa'i bsam pa nyid kyis ci 'dod pa sbyin par byed pa dang / brtson pa nyid kyis phan pa sbyin par byed pa dang / slong mo pa la ltos pa nyid kyis cig car ram rim gyis sbyin par byed pa dang / rgyun mi 'chad pa nyid kyis rtag tu sbyin par byed pa'o/ /tshul khrims rnam par dag pa rnam pa bcu ni/bsgrub pa'i brtson 'grus kyis thob pa'i longs spyod rnams sbyin par byed pa dang / rang gi zho shas bsgrub pa dag sbyin par byed pa dang / rdul zhing dri ma chags chags su bsgrub pa dag sbyin par byed pa dang / chos rnams kyis chos bzhin thob pa dag sbyin par byed pa dang / sdig pa las log pa dag sbyin par byed pa dang /dbang po thul bas sbyin par byed pa dang / gus par byas te sbyin par byed pa dang / rab tu btud de sbyin par byed pa dang / rang gi lag nas sbyin par byed pa dang / dang po rang gi tshal za'i 'khor rnams la legs par ri mo byas legs par mchod pa byas nas/de'i 'og tu slong mo pa gzhan dag la sbyin par byed do/ /lta ba rnam par dag pa rnam pa bcu ni/ bdag ni sbyin par byed pa'o bdag gi sbyin pa'o snyam du rlom sems med pas sbyin par byed pa dang / bdag nyid gzhan dang mi sgrub par sbyin par byed pa dang / bdag nyid gzhan dag pas che ba'am mnyam pa 'am chung ngu snyam du mi sems par sbyin par byed pa dang /gzhan las lan mang du phan 'dogs pa la mi lta bar sbyin par byed pa dang / phyi ma la srid pa khyad par can nam longs spyod khyad par can la mi lta bar sbyin par byed pa dang / sbyin pa'i 'bras bu med do snyam du mi lta bar sbyin par byed pa dang /'bras bu tshul dang mi mthun pa dang / 'bras bu phyin ci log yin no snyam du mi lta bar sbyin par byed pa dang / 'tsho ba dang bcas pa ni dge ba'o snyam du mi lta bar sbyin par byed pa dang / ngo mtshar dang bkra shis su mi lta bar sbyin par byed pa dang /grags pa dang sgra dang tshigs su bcad pa'i phyir ma yin par sbyin par byed pa'o/ /sems rnam par dag pa rnam pa bcu ni/ rang bzhin gyis sems can thams cad la byams pa'i sems kyis sbyin par byed pa dang / sbyin pa la rin po che'i sems kyis sbyin par byed pa dang / mdza' bshes dang dgra bo dang tha mal pa dag la snyoms pa'i sems kyis sbyin par byed pa dang / ser sna'i dri ma dang gsog 'jog gi dri ma bsal ba'i sems kyis sbyin par byed pa dang / slong mo pa'i dus la bzod cing skyo ba med pa'i sems kyis sbyin par byed pa dang / rnam par 'tshe ba rnams la byams pa'i sems kyis sbyin par byed pa dang /sdug bsngal ba rnams la snying rje'i sems kyis sbyin par byed pa dang / yon tan dang ldan pa rnams la dga' ba'i sems kyis sbyin par byed pa dang / mdza' bshes rnams la btang snyoms kyi sems kyis sbyin par byed pa'o/ /ngag rnam par dag pa rnam pa bcu ni/sbyin pa'i snga rol nyid kyis sbyin no zhes skabs 'byed pa dang / 'ongs pa na tshur shog legs par 'ongs so zhes smra ba dang / khro gnyer med cing bzhin gyi mdog gsal la 'dzum pa sngar gtong zhing tshig gi lam 'jam po dag gis gtam 'dre bar byed phebs par smra bar byed kun dga' bar byed pa dang /slong mo pa rnams kyi mjug thogs su sbyin par bya ba'i zhes sbyin par bya ba'i dngos pos kun dga' bar byed pa dang / nga ni khyod la sbyin par byed pa yin no zhes bya ba'i tshig kun rjod par byed pa dang / da ni dus byed pa na khro bas kun nas bslang ba'i tshig rtsub mo rjod par mi byed pa dang /slong mo pa la mngon sum dang lkog nas mi smod mi sgrogs pa dang / sbyin par bya ba'i chos mi bdog na yang legs par shad kyis sbyangs te gtong bar byed pa dang / slong mo pa la mngon sum du smon par mi byed khyad du gsod par mi byed bsting bar mi byed co 'dri bar mi byed pa dang /sma dbab pa nye bar sgrub par mi byed pa'o/ /shes pa rnam par dag pa rnam pa bcu ni/ sbyin pa la brten pa'i shes pa rnam par dag pa dang / slong mo pa la brten pa'i shes pa rnam par dag pa dang / sbyin par bya ba'i chos la brten pa'i shes pa rnam par dag pa dang /sbyin pa'i sbyor ba la brten pa'i shes pa rnam par dag pa dang / sbyin pas sems can yongs su smin par bya ba la brten pa'i shes pa rnam par dag pa dang / thabs la mkhas pa la brten pa'i shes pa rnam par dag pa dang / 'dod pa rnams kyi nyes dmigs la brten pa'i shes pa rnam par dag pa dang /dri ma bsal ba la brten pa'i shes pa rnam par dag pa dang / sdig pa'i grogs po yongs su spangs pa dang dge ba'i bshes gnyen yongs su bzung ba la brten pa'i shes pa rnam par dag pa dang / phyogs drug gi dgab pa nyid la brten pa'i shes pa rnam par dag pa'o//dri ma rnam par dag pa rnam pa bcu ni/ le lo'i dri ma dang bral ba'i sbyin pa sbyin par byed pa dang / chags pa'i dri ma dang bral ba'i sbyin pa sbyin par byed pa dang / zhe sdang gi dri ma dang bral ba'i sbyin pa sbyin par byed pa dang / gti mug gi dri ma dang bral ba'i sbyin pa sbyin par byed pa dang / gegs kyi dri ma dang bral ba'i sbyin pa sbyin par byed pa dang /mi rigs pa'i dri ma dang bral ba'i sbyin pa sbyin par byed pa dang / ma rdzogs pa'i dri ma dang bral ba'i sbyin pa sbyin par byed pa dang / rnam par ma dag pa'i dri ma dang bral ba'i sbyin pa sbyin par byed pa dang / 'chal ba'i shes rab kyi dri ma dang bral ba'i sbyin pa sbyin par byed pa dang /thabs ma yin pa'i dri ma dang bral ba'i phyir sbyin pa sbyin par byed pa'o/ /de'i 'og tu tshul khrims rnam par dag pa rnam pa bdun la 'di lta ste/ byang chub sems dpa'i sdom pa bcas pa la bslab pa'i gzhi rnam pa thams cad la mkhas pa zhes bya bas ni byang chub sems dpa'i tshul khrims thams cad ces bya ba yin te/de ni rnam pa gnyis te/ khyim pa'i phyogs su gtogs pa dang / rab tu byung ba'i phyogs su gtogs pa'o/ /de yang ci rigs par rnam pa gsum ste / sdom pa'i tshul khrims dang / dge ba chos sdud pa'i tshul khrims dang /sems can gyi don bya ba'i tshul khrims so/ /tshul khrims rnam pa gsum po de dag kyang bya ba gsum ste/ sdom pa'i tshul khrims kyis ni sems gnas par byed la/ dge ba chos sdud pa'i tshul khrims kyis ni bdag nyid kyis sangs rgyas kyi chos yongs su smin par byed/sems can gyi don bya ba'i tshul khrims kyis ni sems can yongs su smin par byed do/ /byang chub sems dpa'i bya ba thams cad 'di lta ste/ tshe 'di la bde bar gnas par bya ba'i phyir sems gnas pa dang / lus dang sems dub pa med par sangs rgyas kyi chos yongs su smin par bya ba dang /sems can yongs su smin par bya ba de tsam du zad de/ tshul khrims kyang de dag tu zad la/ tshul khrims kyi phan yon yang de dag tu zad de/ dus gsum gyi byang chub sems dpa' byang chub chen po 'dod pa thams cad kyang 'di la bslabs shing bla na med pa'i byang chub mngon par sangs rgyas na tshul khrims thams cad ces kyang bya/bslab pa'i gzhi rnam pa thams cad ces kyang bya ste/ de la mkhas pa ni tshul khrims rnam par dag pa yin no/ /ltung ba las bslang ba la mkhas pa zhes bya ba ni/ rgyu gsum gyis ltung ba las bslang ba la mkhas pa ste gsum gang zhe na/'gyod pa lnga bskyed pa dang / yan lag lngas bsdus pa'i bag yod pa dang / rnam pa lngas 'gyod pa bsal ba'o/ /de la 'gyod pa lnga bskyed pa gang zhe na/ ltung ba gang yang rung ba zhig byung ba na/ bdag nyid la gzhi des tshul khrims dag gis smad par 'gyur ro snyam nas 'gyod pa skyed par byed pa dang /gzhan dang lha dag gis smad par 'gyur ro snyam nas 'gyod pa skyed par byed pa dang / ston pa tshangs par mtshungs par spyod pa mkhas pa rnams kyis smad par 'gyur ro snyam nas 'gyod pa skyed par byed pa dang / phyogs dang phyogs mtshams rnams su sdig pa can gyi bsngags pa'i grags pa dang /sgra dang tshigs su bcad pa mngon par 'phel bar 'gyur ro snyam nas 'gyod pa skyed par byed pa dang / bdag lus zhig nas ngan song dang ngan 'gro log par ltung ba rnams su skye bar gyur na mi rung ngo snyam nas 'gyod pa skyed par byed pa'o//yan lag lngas bsdus pa'i bag yod pa gang zhe na/ 'das pa'i dus la brten nas ltung ba byung ba gang yin pa de yang chos bzhin du phyis byed pas sngon gyi mtha' dang ldan pa'i bag yod pa dang / ma 'ongs pa'i dus la brten nas ltung ba byung ba gang yin pa de yang chos bzhin du phyis byed pas phyi ma'i mtha' dang ldan pa'i bag yod pa dang /da ltar byung ba'i dus la brten nas ltung ba byung ba gang yin pa de yang chos bzhin du byed pas dbus kyi mtha' dang ldan pa'i bag yod pa dang / ltung ba ma byung ba'i snga rol nas phyis ltung ba mi 'byung bar bya ba'i phyir ji lta ji ltar spyod cing gnas na phyis ltung ba 'byung bar mi 'gyur ba de lta de ltar spyod cing gnas pas dus snga nas bya ba'i bag yod pa dang /'phral du yang phyi nas kyang ltung ba mi 'byung ba de ltar spyod cing gnas pas lhan cig spyod pa'i bag yod pa dang ldan pa'o/ /rnam pa lngas 'gyod pa bsal ba gang zhe na/ bcom ldan 'das kyis gzhi dang bcas nges par 'byung ba dang bcas pa'i chos bstan pa dang ltung ba las ldang ba'i skabs yod do snyam nas 'gyod pa sel bar byed pa dang / mi shes pa dang bag med pa dang nyon mongs pa mang ba dang ma gus pa'i dbang gis ltung ba 'byung ba'i shes pa nas ma gus pa'i bar ni spangs shing shes pa nas gus pa'i bar de ni yang dag par skyes so snyam nas 'gyod pa sel bar byed pa dang /yang ltung ba mi 'byung bar bya ba'i phyir bsam pa thag pa nas sems skyes so snyam nas 'gyod pa sel bar byed pa dang / tshangs pa mtshungs par spyod pa mkhas pa rnams kyi mdun du so sor bshags zin to snyam nas 'gyod pa sel bar byed pa dang /bdag legs par gsungs pa'i chos 'dul ba la rab tu byung nas bslab pa dang mi 'gal zhing 'gyod pa med pa gang yin pa de ni bdag la dge ba dang legs pa yin te bcom ldan 'das kyis 'gyod pa'i rgyun sgrib pa'i gnas lta bu rnam grangs du mar smad pa bar du gcod par byed pa gang yin pa des mang du gnas shing dang du len par byed la/sel bar mi byed pa gang yin pa de ni bdag la dge ba dang legs pa ma yin no snyam nas 'gyod pa sel bar byed pa ste/ rnam pa de dag gis ltung ba las bslangs pa mkhas pa yang tshul khrims rnam par dag pa yin no//de la nges pa'i tshul khrims can zhes bya ba ni bslab pa'i gzhi mi 'bul ba'o/ /yang nges pa'i don ni chags pa med pa'i don te / tshul khrims 'chal ba dang ma 'dres pa'i phyir te/ des kyang tshul khrims rnam par dag pa yin no//bstan pa'i tshul khrims can zhes bya ba ni bslab pa'i gzhi nyams par mi byed pa'o/ /yang srog gi phyir yang bslab pa'i gzhi mi gtong ba ste/ des kyang tshul khrims rnam par dag pa yin no/ /rtag tu byed pa zhes bya ba ni bslab pa'i gzhi 'bul bar mi byed pa'o//yang rtag tu byed pa ni lus kyis te/ des kyang tshul khrims rnam par dag pa yin no/ /rtag tu 'jug pa zhes bya ba ni/ bslab pa'i gzhi ral nas yang phyis chos bzhin byed pa'o/ /yang rtag tu 'jug pa ni ngag gis te des kyang tshul khrims rnam par dag pa yin no/ / bslab pa'i gzhi rnams par dag par blangs te/ slob par byed pa zhes bya ba ni/ bslab pa'i gzhi mtha' dag rjes su bsrung ba'o/ /yang don dang tshig 'bru dang phyin ci ma log par yongs su 'dzin cing lhag chad med par slob pa ste/ des kyang tshul khrims rnam par dag pa yin no/ /de'i 'og tu bzod pa rnam par dag pa rnam pa bdun la 'di lta ste/thams cad la gnod pa nye bar gnas pa na bdag nyid kyi las kyi rnam par smin pa rton pas mi 'khrugs pa zhes bya ba ni dang po sbyor ba'i gnas skabs na mi 'khrugs pa'o/ /lan bya ba'i phyir slar spyo ba dang / gshe ba dang / brdeg pa dang / bsdigs pa dang / mtshang 'dru ba'i gnod pa dag gis sbyor bar mi byed pa zhes bya ba ni/ bar du dngos kyi gnas skabs phyir gnod pa mi byed pa'o/ /khon gyi bsam pa mi 'dzin pa zhes bya ba ni/ tha mar mjug gi gnas skabs na sems la mi 'dzin pa ste/ de ltar sbyor ba dang dngos gzhi dang / mjug gi gnas skabs su bzod pa rnam pa de gsum ni rnam par dag pa'i bzod pa rnam pa bcu sngar bstan pa'i dang po dang sbyar ro//shad kyis 'chags pa na yongs su nyon mongs par mi byed pa zhes bya ba ni/ sems can nyam chung ba rnams kyis gnod pa byas pa bzod pa'o/ /shad kyis 'chags pa la mi sdod pa zhes bya ba ni bdag nyid rje dpon du gyur pa bran g.yog gis gnod pa byas pa bzod pa'o//'jigs pa dang zang zing gi sems kyis 'jigs par byed pa ma yin pa zhes bya ba ni/ sems can gdags pas rigs dang / rus ches dman pa dag gis gnod pa mchog tu chen po byas pa bzod pa ste/de gsum ni dka' ba'i bzod pa rnam pa gsum sngar bstan pa dang sbyar ro/ /phan gdags par bya ba la yal bar mi 'dor ba zhes bya ba ni bzod pa la phan yon du lta ba dang / bdag nyid kyis kyang bzod pa dang / gzhan la yang bzod pa yang dag par 'dzin du 'jug pa dang / bzod pa'i bsngags pa yang brjod pa dang /gang zag bzod pa can mthong na yid dga' ba ste/ skyes bu dam pa'i bzod pa rnam pa lnga sngar bstan pa dang sbyar ro/ /de'i 'og tu brtson 'grus rnam par dag pa rnam pa bdun la 'di lta ste/ brtson 'grus kyi mnyam pa nyid rab tu shes pa zhes bya ba ni snyoms pa'i brtson 'grus ha cang yang mi zhum ha cang yang snyun mi ngas par brtson 'grus rtsom zhing sbyor ba snyoms par byed de/brtsam par bya ba thams cad la snyoms shing gus par byed pa ste/ rnam par dag pa'i brtson 'grus kyi skabs su snyoms pa zhes sngar bstan pa dang sbyar ro/ /brtson 'grus brtsams pa des bdag la mi stod cing gzhan la mi smod pa zhes bya ba ni/rgyun du byed pa'i phyir rtag pa'i brtson 'grus rtsom zhing sbyor ba snyoms par byed de/ mthu dang ldan pa zhes bya ba ni lhun sbyor ba'i phyir gus pa'i brtson 'grus so/ /brtson 'grus dang ldan pa zhes bya ba ni sngon gyi rgyu'i stobs kyis bskyed pa'i phyir rgyu mthun pa'i brtson 'grus so//spro ba dang ldan pa zhes bya ba ni so sor brtags nas dge ba'i phyogs la sbyor ba'i phyir sbyor ba las byung ba'i brtson 'grus so/ /brtul ba brtan pa zhes bya ba ni sdug bsngal gyi gnod pa thams cad kyis mi 'khrugs shing gzhan du sgyur du med pa'i phyir mi 'khrugs pa'i brtson 'grus so//dge ba'i chos rnams la brtson pa zhes bya ba ni sbyor ba dag pas dag pa ste/ bsam gtan dang po'i dngos gzhi la sbyor ba'i thabs sam rgyu'am mtshan mar gyur pa mi lcogs pa med pa ni mtshan ma zhes bya ste/ de legs par rtogs pa la brten nas dngos gzhi'i thabs rnam par dag pas byang chub sems dpa' rnams kyi zhi gnas dang lhag mthong dang btang snyoms yongs su dag pa'i ting nge 'dzin la bsam gtan byed pa'o//yongs su rdzogs pa'i ting nge 'dzin la bsam gtan pa zhes bya ba ni dngos gzhi thob pas dag pa ste/bsam gtan dang po'i dngos gzhi thob pa na rtog pa dang bcas shing dpyod pa dang bcas pa'i ting nge 'dzin dang / rtog pa med la dpyod pa tsam gyi ting nge 'dzin bsgrubs te gnas pa ni yongs su rdzogs pa'i ting nge 'dzin ces bya ste/ de la brten nas dngos gzhi thob pa rnam par dag pas byang chub sems dpa' rnams kyi zhi gnas dang lhag mthong dang btang snyoms yongs su dag pa'i ting nge 'dzin la bsam gtan byed pa'o//gnyi ga'i cha'i ting nge 'dzin la bsam gtan pa zhes bya ba ni/ dngos gzhi la khyad par gong ma rnam par dag pas rnam par dag pa ste/ bsam gtan dang po'i dngos gzhi dang /bsam gtan gnyis pa'i nyer bsdogs gnyi ga thob pa nas bzung ste/ ci yang med pa'i skye mched kyi dngos gzhi dang / srid pa'i rtse mo de nyer bsdogs gnyi ga thob pa'i bar gyi dngos gzhi gcig dang / gnyis thob ste/ rtog pa yang med dpyod pa yang med pa'i ting nge 'dzin bsgrubs te gnas pas na snang ba yang yang dag par shes la/gzugs rnams kyang mthong ba ni gnyi ga'i cha'i ting nge 'dzin zhes bya ste/ de la brten nas dbang gi thabs rnam par dag pas byang chub sems dpa' rnams kyi zhi gnas dang / lhag mthong dang btang snyoms yongs su dag pa'i ting nge 'dzin la bsam gtan byed pa'o//shugs kyis 'byung ba'i ting nge 'dzin la bsam gtan pa zhes bya ba ni 'jug pa dang / gnas pa dang / ldang ba dang dbang ba rnam par dag pas rnam par dag pa ste/ srid pa'i rtse mo man chad kyi nyer bsdogs dang / dngos gzhi thams cad thob pa na snyoms par 'jug pa dang /gnas pa dang / ldang ba la btsal mi dgos par rang gi ngang gis 'grub pa ni shugs kyis 'byung ba'i ting nge 'dzin ces bya ste/ de la brten nas gnas pa la dbang ba rnam par dag pas byang chub sems dpa' rnams kyi zhi gnas dang lhag mthong btang snyoms yongs su dag pa'i ting nge 'dzin la bsam gtan byed pa'o//mi gnas pa'i ting nge 'dzin la bsam gtan pa zhes bya ba ni/ bsam gtan bzlog nas yang snyoms par 'jug pa la dbang ba rnam par dag pas rnam par dag pa ste/ bsam gtan dang rnam par thar pa dang ting nge 'dzin dang / snyoms par 'jug pa thams cad thob pa na de dag la ro myong ba med cing lugs dang lugs ma yin pa dang /thod rgal dang / yan lag bsdu ba dang / dmigs pa bsdu ba dang / yan lag zung du bya ba dang / dmigs pa zung du bya ba dang / yan lag dang dmigs pa zung du bya ba'i dbang po thob pa ni mi gnas pa'i ting nge 'dzin zhes bya ste/de la brten nas mngon par shes pa sgrub pa la dbang ba rnam par dag pas byang chub sems dpa' rnams kyi zhi gnas dang lhag mthong dang btang snyoms yongs su dag pa la bsam gtan byed pa'o/ /shin tu sbyang ba byas pa'i ting nge 'dzin la bsam gtan pa zhes bya ba ni/mngon par shes pas rnam par 'phrul pa la dbang rnam par dag pas rnam par dag pa ste/ bsam gtan dang / rnam par thar pa dang / ting nge 'dzin dang / snyoms par 'jug pa de dag thams cad thob pa na mngon par shes pa dang / rnam par thar pa'i sgo shes pa dang / so so yang dag par rig pa'i shes pa dang /nyon mongs pa med pa'i shes pa dang / smon nas shes pa la sogs pa dbang thob pa ni shin tu sbyang ba byas pa'i ting nge 'dzin zhes bya ste/ de la brten nas sems can yongs su smin par bya ba la dbang ba rnam par dag pas byang chub sems dpa' rnams kyi zhi gnas dang / lhag mthong dang / btang snyoms yongs su dag pa'i ting nge 'dzin la bsam gtan byed pa'o/ /byang chub sems dpa'i sde snod kyi dmigs pa yongs su bsgoms pa dpag tu med pa'i ting nge 'dzin la bsam gtan pa zhes bya ba ni/ lta bar gyur pa thams cad dang bral ba rnam par dag pa dang / nyon mongs pa dang shes bya'i sgrib pa spong ba rnam par dag pas rnam par dag pa ste/bsam gtan dang / rnam par thar pa dang / ting nge 'dzin dang / snyoms par 'jug pa de dag thob pa na/ byang chub sems dpa'i sde snod thob pa dang / bsam pa sngon du 'gro ba'i dmigs pa la brten te /byang chub sems dpa'i ting nge 'dzin gyi yon tan sgrub pa'i bsam gtan stobs bcu'i rigs kyis bsdus pa'i ting nge 'dzin rnam pa sna tshogs bsam gyis mi khyab cing / tshad med pa sgrub par byed pa dang / ting nge 'dzin gang dag nyan thos dang rang sangs rgyas rnams kyis ming yang mi shes na/snyoms par 'jug par lta ga la 'gyur ba dang / rnam par thar pa dang / zil gyis non pa'i skye mched dang / zad par gyi skye mched dang / so so yang dag par rig pa dang / nyon mongs pa med pa dang / smon nas shes pa la sogs pa'i yon tan nyan thos dang / thun mong ba rnams mngon par sgrub par byed pa'i ting nge 'dzin dpag tu med pa la dbang thob pa ni byang chub sems dpa'i sde snod dmigs pa yongs su bsgoms pa dpag tu med pa'i ting nge 'dzin zhes bya ste/de la brten nas mu stegs can tshar gcad pa la dbang ba rnam par dag pa dang / 'brel pa bla na med pa rnam par dag pas byang chub sems dpa' rnams kyi zhi gnas dang lhag mthong dang btang snyoms yongs su dag pa'i ting nge 'dzin la bsam gtan byed pa ste/de dag ni rnam par dag pa'i bsam gtan sngar bstan pa dang ci rigs par sbyar ro/ /de'i 'og tu shes rab rnam par dag pa rnam pa bdun la 'di lta ste/de'i shes rab de sgro 'dogs pa'i mtha' dang skur pa 'debs pa'i mtha' rnam par spangs te dbu ma'i lam gyis nges par 'byung ba zhes bya ba ni rang gi don thob par bya ba'i thabs kyis lam yang dag par ston pa'i shes rab ste/ legs par zin pa ma yin pa'i mtha' rnam par spangs pas rnam par dag pa yin no//shes rab des stong pa nyid dang / smon pa med pa dang / mtshan ma med pa rnam par thar pa'i sgo gsum po dag la rnam par thar pa'i don kyang yang dag pa ji lta ba bzhin du rab tu shes pa zhes bya ba ni rnam par thar pa'i don yang dag par ston pa'i shes rab ste/ rnam par grol bas rnam par dag pa yin no//rnam par thar pa'i sgo gsum gyi tshig gi don ni sngar gleng gzhi'i skabs su bstan pa bzhin no/ /kun brtags pa dang / gzhan gyi dbang dang / yongs su grub pa'i ngo bo nyid kyi don kyang yang dag pa ji lta ba bzhin du rab tu shes pa zhes bya ba ni ngo bo nyid kyi don yang dag par ston pa'i shes rab ste/kun nas nyon mongs pa'i chos shes na rnam par byang ba'i ngo bo nyid kyi chos thob pas rnam par dag pa yin no/ /ngo bo nyid gsum gyi tshig gi don ni sngar 'phags pa yon tan 'byung gnas kyi le'ur bstan pa bzhin no/ /mtshan nyid dang skye ba dang don dam pa ngo bo nyid med pa gsum po dag la ngo bo nyid med pa'i don kyang yang dag pa ji lta ba bzhin du rab tu shes pa zhes bya ba ni/ngo bo nyid med pa'i don yang dag par ston pa'i shes rab ste/ ngo bo nyid med pa'i don rab tu shes na rab tu nyams par mi 'gyur bas rnam par dag pa yin no/ /ngo bo nyid med pa nyid rnam pa gsum gyi tshig gi don ni sngar 'phags pa don dam yang dag 'phags kyi le'ur bstan pa yin no//rig pa'i gnas lnga po dag la kun rdzob kyi bden pa'i don kyang yang dag pa ji lta ba bzhin du rab tu shes pa zhes bya ba ni/ kun rdzob kyi bden pa yang dag par ston pa'i shes rab ste/ kun rdzob kyi bden pa shes na don dam pa'i bden pa la 'jug par 'gyur bas rnam par dag pa yin no//rig pa'i gnas lnga'i tshig gi don ni sngar legs par shin tu bslab pa la mkhas pa'i skabs su bstan pa yin no/ /de bzhin nyid rnam pa bdun gyis don dam pa'i bden pa'i don kyang yang dag pa ji lta ba bzhin du rab tu shes pa zhes bya ba ni/don dam pa'i bden pa yang dag par ston pa'i shes rab ste/ don dam pa'i bden pa shes na yongs su grub pa'i mngon par rtogs pas rnam par dag pa yin no/ /de bzhin nyid rnam pa bdun gyi tshig gi don ni sngar 'phags pa byams pa'i le'ur bstan pa bzhin no//rnam par mi rtog cing spros pa med pa la tshul gcig tu de la mang du gnas pa dang 'dres pa tshad med pa'i chos la dmigs pa'i lhag mthong gi chos kyi rjes su mthun pa'i chos sgrub pa yang dag par sgrub par byed pa zhes bya ba ni zhi gnas dang lhag mthong yang dag par ston pa'i shes rab ste/tshigs su bcad pa dang po ni shes bya'i sgrib pa rnam par dag pa'i ye shes kyi spyod yul gyi de kho na la dmigs pa'i zhi gnas yang dag par ston pa'i shes rab bo/ /'og ma shos ni de bzhin gshegs pa rnams kyis chos bstan pa tshad med pa rnams dang / chos kyi tshig dang /yi ge tshad med pa rnams dang / gong nas gong du shes rab dang spobs pa tshad med pa rnams gcig tu bzlums te yid la byed pa'i lhag mthong gi chos kyi rjes su mthun pa'i chos sgrub par byed pa'i shes rab yin te de gnyis kyi gnas gyur pa 'thob par byed pas rnam par dag pa yin no//rdzogs pa mkhas pa'i tshig gi don la sogs pa bshad zin to// //de'i 'og tu gdags pa bsdu ba la mkhas pa'i tshig gi don la sogs pa bshad par bya ste/ gdags pa bsdu ba la mkhas pa zhes bya ba ni chags pa med pa nyid la sogs pa yon tan lngas pha rol tu phyin pa yongs su rdzogs par gdags pa de dag so so'i las gang yin pa bsdu ba la mkhas par bya ba'i don 'dir bstan pa'o//de'i phyir de bstan pa'i dbang du mdzad nas/ bcom ldan 'das rnam pa lnga po de dag gis so so'i las gang lags zhes bya ba zhus so/ /de dag gi las kyang rnam pa lngar rig par bya ste zhes bya ba ni/lnga po re re'i las kyang re rer bsdu ba'o/ /chags pa med pa nyid kyis ni zhes bya ba la sogs pas ni pha rol tu phyin pa'i gags su gyur pa'i chos rnam pa thams cad la chags pa med pa nyid kyis tshe 'di la pha rol tu phyin pa la bag yod do zhes bstan to/ / mi lta ba nyid kyis ni zhes bya ba la sogs pa ni de'i 'bras bu dang zang zing la sems 'brel pa med pa nyid kyis phyi ma la pha rol tu phyin pa la bag yod pa'i rgyu yongs su 'dzin par byed do zhes bstan to/ /kha na ma tho ba med pa nyid kyis ni zhes bya ba la sogs pa ni nye ba'i nyon mongs pa rnam pa thams cad rnam par spangs pa nyid kyis pha rol tu phyin pa phun sum tshogs pa sgom par byed do zhes bstan to//rnam par mi rtog pa nyid kyis ni zhes bya ba la sogs pas ni kun brtags pa'i ngo bo nyid du mi lta ba nyid kyis myur du pha rol tu phyin pa yongs su rdzogs par byed do zhes bstan to/ /yongs su bsngo ba nyid kyis ni zhes bya ba la sogs pa ni bla na med pa yang dag par rdzogs pa'i byang chub thob par smon lam 'debs pa nyid kyis rnam par smin pa'i 'bras bu yang zhar la 'grub la pha rol tu phyin pa mi zad pa nyid kyang thob par byed do zhes bstan to//gdags pa bsdu ba la mkhas pa'i tshig gi don la sogs pa bshad zin to// //de'i 'og tu yon tan gyi khyad par la mkhas pa'i tshig gi don la sogs pa bshad par bya ste/ yon tan gyi khyad par la mkhas pa zhes bya ba ni pha rol tu phyin pa'i yon tan rnam pa gnyis te/ phul du byung ba dang / rnam par dag pa'o/ / de la phul du byung ba ni rgyu rnam pa gnyis kyis te/ rgya che ba dang / kun nas nyon mongs pa can ma yin pas so/ /rnam par dag pa ni rgyu gsum gyis te / sbyangs pa nyid dang / mi g.yo ba nyid dang / shin tu rnam par dag pa nyid kyis te/ de la mkhas par bya ba'i phyir 'dir bstan pa'o/ / de la rgya che bas phul du byung ba bstan pa'i dbang du mdzad nas/ bcom ldan 'das pha rol tu phyin pa de dag gi rgya che ba nyid gang lags zhes bya ba zhus so/ /de la rgya che ba ni sems can la dbye ba med pa dang / dngos po la dbye ba med pa dang / dus la dbye ba med pa ste/ sems can la dbye ba med pa ni byang chub sems dpa' sems can thams cad la brten cing brtsams nas sbyin pa la sogs pa dge ba'i rtsa ba de dag kun du spyod par byed kyi bdag 'ba' zhig kho na'i phyir ma yin no//dngos po la dbye ba med pa ni sbyin pa la sogs pa dge ba'i rtsa ba de dag thams cad dang /rnam pa thams cad yang dag par blangs te kun du spyod pa'o/ /dus la dbye ba med pa ni tshe 'di la mtshan mo dang nyin mo rgyun mi 'chad par sbyor ba mi gtong zhing brtson pa mi 'dor ba dang / rgyu de nyid kyis tshe rabs thams cad du dge ba'i rtsa ba de dag kun du spyod par byed pa'o/ /de'i phyir chags pa med pa nyid dang /mi lta ba nyid dang / yongs su bsngo ba nyid gang yin pa'o zhes bya ba gsungs te/ chags pa med pa la sogs pa gsum po re re yang sems can la dbye ba med pa la sogs pa gsum gsum gyis rgya che ba'i phyir ro/ /kun nas nyon mongs pa can ma yin pas phul du byung ba bstan pa'i dbang du mdzad nas/kun nas nyon mongs pa ma mchis pa nyid gang lags zhes bya ba zhus so/ /kun nas nyon mongs pa can ma yin pa ni mchog tu dga' ba dang / mi mthun pa med pa dang / gus pa dang / mi brten pa dang / mchog tu dga' ba ste/ byang chub sems dpa' sems dga' ba dang / sdug bsngal ba med pa dang / yid mi bde ba med pas dge ba'i rtsa ba de dag la rten par byed cing gzhi des 'gyod par yang mi byed pa'o/ /mi mthun pa med pa ni gzhan la gnod pa med pa dang / lta bar gyur pa rnams la mngon par zhen pa med par dge ba'i rtsa ba de dag kun du spyod pa'o//gus pa ni gus pa dang snying thag pa nas de dag nyid la yon tan dang snying por lta ba shin tu nges pa dang / gzhan gyi dring mi 'jog pa dang / gzhan gyis mi bkri bar dge ba'i rtsa ba de dag yang dag par blangs te kun du spyod pa'o//mi brten pa ni dge ba'i rtsa ba de dag gi rnam par smin pa 'khor los sgyur ba nyid dam/ brgya byin nyid dam/ bdud nyid dam/ tshangs pa nyid du re ba med pa dang / gzhan las lan du phan 'dogs pa dang / rnyed pa dang bkur sti dang / tshigs su bcad pa la brten pa med pa'o/ / de'i phyir kha na ma tho ba med pa nyid dang / rnam par mi rtog pa gang yin pa'o zhes gsungs te/ kha na ma tho ba med pa nyid la sogs pa gnyis po re re yang mchog tu dga' ba la sogs pa bzhi bzhis kun nas nyon mongs pa can ma yin pa'i phyir ro/ /de ltar rgya che ba dang / kun nas nyon mongs pa can ma yin pa'i phyir pha rol tu phyin pa phul du byung ba dang /bla na med pa dang / thun mong ma yin par rig par bya'o/ /sbyangs pa nyid kyis rnam par dag pa bstan pa'i dbang du mdzad nas/ sbyangs pa nyid gang lags zhes bya ba zhus so/ /sbyangs pa nyid ces bya ba ni bsam pa dag pa'i sa la zhugs pa'i dge ba'i rtsa ba so sor brtag cing byed pa rang bzhin gyis brling pa dang /gsal ba dang / 'bras bu che ba dang / phan yon che ba ste/ de'i phyir so sor brtag cing bya ba nyid gang yin pa'o zhes bya ba gsungs so/ /mi g.yo ba nyid kyi rnam par dag pa bstan pa'i dbang du mdzad nas/ mi g.yo ba nyid gang lags zhes bya ba zhus so//mi g.yo ba zhes bya ba ni bsam pa'i sa la zhugs pa'i dge ba'i rtsa ba ji ltar thob pa rnams dang / ji ltar bsags pa de dag las phyir mi ldog pa dang / yongs su mi nyams pa dang / khyad par du 'gro ba ste/ de'i phyir sar chud pa rnams kyi yongs su mi nyams pa'i chos nyid gang yin pa'o zhes bya ba gsungs so//shin tu rnam par dag pa nyid kyis rnam par dag pa bstan pa'i dbang du mdzad nas/ shin tu rnam par dag pa nyid gang lags zhes bya ba zhus so/ /shin tu rnam par dag pa zhes bya ba ni nges pa dang mthar thug par gyur pa'i dge ba'i rtsa ba byang chub sems dpa'i sa la de dag las ches yongs su dag pa gang na med pa dang /sangs rgyas kyi sar gtogs pa'i dge ba'i rtsa ba ste/ de'i phyir sa bcu par gtogs pa nyid dang / sangs rgyas kyi sar gtogs pa nyid gang yin pa'o zhes bya ba gsungs te/ de ltar sbyangs pa nyid dang / mi g.yo ba nyid dang / shin tu rnam par dag pa nyid yin pa'i phyir pha rol tu phyin pa rnam par dag par rig par bya'o/ /yon tan gyi khyad par la mkhas pa'i tshig gi don la sogs pa bshad zin to// //de'i 'og tu rgyun mi 'chad pa la mkhas pa'i tshig gi don la sogs pa bshad par bya ste/rgyun rgyun mi 'chad pa la mkhas pa zhes bya ba ni pha rol tu phyin pa'i rnam par smin pa'i 'bras bu 'dod pa zad mi shes pa yang rtag tu ldan la pha rol tu phyin pa zad mi shes pa dang yang rtag tu ldan te/ rnam par smin pa dang sbyor ba'i rgyun rgyun mi 'chad pa la mkhas par bya ba'i don 'dir bstan pa'o//de'i phyir de bstan pa'i dbang du mdzad nas/ bcom ldan 'das ci'i slad du byang chub sems dpa' rtag tu pha rol tu phyin pa'i rnam par smin pa'i 'bras bu 'dod pas ma 'tshal ba dang / pha rol tu phyin pas ma 'tshal ba dang ldan pa lags zhes zhus pas so//gcig la gcig brten nas 'grub pa bsgom pa nyid kyi phyir ro zhes bya ba ni/ sngon pha rol tu phyin pa spyad pa la brten nas/ rnam par smin pa'i 'bras bu zad mi shes pa dang ldan pas de la brten nas kyang pha rol tu phyin pa'i sbyor ba rgyun mi gcod pas de lta bu'i brgyud pa'i tshul gyis rnam par smin pa dang /sbyor ba'i rgyun rgyun mi 'chad par 'gyur ba yin no/ /rgyun rgyun mi 'chad pa la mkhas pa'i tshig gi don la sogs pa bshad zin to// // de'i 'og tu rgyu nyid la mkhas pa'i thabs la mkhas pa'i tshig gi don la sogs pa bshad par bya ste/ rgyu nyid la gnas pa'i thabs la mkhas pa zhes bya ba ni pha rol tu phyin pa'i rnam par smin pa'i 'bras bu'i rgyu'i pha rol tu phyin pa rnams la dad pas gnas par bya ba ltar pha rol tu phyin pa'i rnam par smin pa'i 'bras bu 'dod pa la dad pas gnas par bya ba ma yin pa la mkhas par bya ba'i don 'dir bstan pa'o//de'i phyir de bstan pa'i dbang du mdzad nas/ bcom ldan 'das ci'i slad du byang chub sems dpa' rnams pha rol tu phyin pa rnams la ji lta ba de ltar pha rol tu phyin pa'i rnam par smin pa'i 'bras bu 'dod pa la dad pas gnas pa ma lags zhes bya ba zhus so/ /rgyu lnga'i phyir te zhes bya ba ni rgyu'o//gnas 'byung ba lnga'i phyir na pha rol tu phyin pa rnams la dad pas gnas pa ltar pha rol tu phyin pa'i rnam par smin pa'i 'bras bu 'dod pa la dad pas gnas par bya ba ma yin te/ de nyid rgyu nyid la gnas par bya ba'i thabs la mkhas pa yin par ston to/ /pha rol tu phyin pa rnams ni ches lhag par bde ba dang /yid bde ba'i rgyu yin pa'i phyir zhes bya ba ni/ rnam par smin pa'i 'bras bu la gnas pa ni/ gal te na skyo ba dang yid 'byung ba'i rgyu yang yin gyi/ pha rol tu phyin pa la dad pas gnas pa ni de ltar ma yin pa'i phyir ro/ /bdag dang gzhan la phan 'dogs pa'i rgyu yin pa'i phyir zhes bya ba ni/rnam par smin pa'i 'bras bu la gnas pa ni bdag la phan pa tsam du zad kyi/ pha rol tu phyin pa la dad pas gnas pa ni bdag nyid kyi sangs rgyas kyi chos yongs su smin pa dang / sems can yongs su smin pa'i rgyu yin pa'i phyir ro/ /phyi ma la de'i rnam par smin pa'i 'bras bu 'dod pa'i rgyu yin pa'i phyir zhes bya ba ni/rnam par smin pa'i 'bras bu la gnas pa ni gzhan la phan pa yang ma yin/ tshe phyi ma la phan pa yang ma yin gyi/ pha rol tu phyin pa la dad pas gnas pa ni gzhan la phan pa dang / tshe phyi ma la phan pa'i rgyu yin pa'i phyir ro/ /kun nas nyon mongs pa med pa'i gzhi yin pa'i phyir zhes bya ba ni rnam par smin pa'i 'bras bu la gnas pa ni gal te kha na ma tho ba dang bcas pas kun nas nyon mongs pa'i gzhir yang 'gyur gyi/pha rol tu phyin pa la dad pas ni de ltar ma yin pa'i phyir ro/ /mi mthun pa'i chos nyid yin pa'i phyir ro zhes bya ba ni rnam par smin pa'i 'bras bu la gnas pa ni zad pa'i chos can gyi pha rol tu phyin pa la dad pas gnas pa ni bla na med pa'i byang chub kyi rgyu yin pas zad mi shes pa'i phyir ro//rgyu nyid la gnas pa'i phyir thabs la mkhas pa'i tshig gi don la sogs pa bshad zin to// // de'i 'og tu bya ba sgrub pa la mkhas pa'i tshig gi don la sogs pa bshad par bya ste/ bya ba sgrub pa la mkhas pa zhes bya ba ni/ pha rol tu phyin pa drug po so so'i chos kyi mthu la mkhas par bya ba'i don 'dir bstan pa'o/ /de'i phyir de bstan pa'i dbang du mdzad nas/ bcom ldan 'das pha rol tu phyin pa de dag gi so so'i mthu gang lags zhes bya ba zhus so//de dag gi so so'i mthu ni rnam pa bzhir rig par bya ste zhes bya ba ni mi mthun pa'i phyogs spong ba dang / tshogs yongs su smin par byed pa dang / bdag dang gzhan la phan 'dogs par byed pa dang / phyi ma la 'bras bu 'byin par byed pa'o//de la mi mthun pa'i phyogs spong ba ni pha rol tu phyin pa bsgom pa na mi mthun pa'i phyogs ser sna dang / 'chal ba'i tshul khrims dang / sems 'khrugs pa dang / le lo dang / rnam par g.yeng ba dang / lta ba'i rnam pa rab tu spong ba zhes bya ba bstan to/ /tshogs yongs su smin par byed pa ni/bla na med pa yang dag par rdzogs pa'i byang chub kyi tshogs su 'gyur ba zhes bya bas bstan to/ /bdag dang gzhan la phan 'dogs pa ni/ tshe 'di la bdag dang sems can rnams la phan 'dogs par 'gyur ba zhes bya bas bstan to/ /phyi ma la 'bras bu 'byin par byed pa ni phyi ma la rnam par smin pa'i 'bras bu 'dod pa rgya chen po zad mi shes pa 'thob par 'gyur ba'o zhes bya bas bstan te/rnam pa bzhi po de dag so so'i rab tu dbye ba ni sngar 'phags pa byams pa'i le'u chos kyi mthu bstan pa'i skabs su rgya cher bstan pa bzhin no/ /bya ba sgrub pa'i tshig gi don la sogs pa bshad zin to// //de'i 'og tu yongs su bsdus pa'i yang dag par 'grub pa'i phan yon la mkhas pa'i tshig gi don la sogs pa bshad par bya ste/ yongs su bsdus pa'i yang dag par 'grub pa'i phan yon la mkhas pas zhes bya ba ni pha rol tu phyin pa de dag rgyu gang dang 'bras bu gang dang don chen po gang gis yongs su bsdus pa'i de'i don yang dag par 'grub pa'i phan yon te/rgyu de dang 'bras bu de dang don de dag nyid de'i yang dag par 'grub pa'i phan yon yin pas de la mkhas par bya ba'i don 'dir bstan pa'o//de'i phyir de bstan pa'i dbang du mdzad nas/ bcom ldan 'das pha rol tu phyin pa de dag rgyu gang las byung ba dang / 'bras bu gang dang ldan pa dang / don gang dang ldan pa lags zhes bya ba zhus so/ /snying rje'i rgyu las byung ba zhes bya ba ni/ snying rje ni byang chub kyi sems kyi rtsa ba yin pa'i phyir ro//rnam par smin pa'i 'bras bu 'dod pa dang / sems can la phan 'dogs pa'i 'bras bu dang ldan pa zhes bya bas ni rnam par smin pa dang rgyu mthun pa'i 'bras bu dang ldan pa'i phyir ro/ /byang chub chen po yongs su rdzogs par byed pa'i don chen po dang ldan pa yin no zhes bya ba ni de'i dbang du byas pa'i phyir ro//yongs su bsdus pa'i yang dag par 'grub pa'i phan yon la mkhas pa'i tshig gi don la sogs pa bshad zin to// //de'i 'og tu sems can la phan 'dogs pa'i gegs la mkhas pa'i tshig gi don la sogs pa bshad par bya ste/ sems can la phan gdags pa'i gegs la mkhas pa zhes bya ba ni/byang chub sems dpa' longs spyod zad mi shes pa dang ldan pas sbyin par bya ba'i chos kyang bdog la/ snying rje can yin pas sems can sdud pa yin yang / sems can dbul po dag tu snang ba ni byang chub sems dpa' sems can la phan gdags pa'i gegs su sems can de dag gi rang gi las kyi nyes pa yod pa ste/de la mkhas par bya ba'i don 'dir bstan pa'o/ /de'i phyir de bstan pa'i dbang du mdzad nas/ bcom ldan 'das gal te byang chub sems dpa' rnams longs spyod pas ma 'tshal ba dang ldan pa dang /snying rje can lags na ci'i slad du 'jig rten na dbul po gda' lags zhes bya ba zhus so/ /de ni sems can rnams kyis rang gi las kyi nyes pa kho na yin no zhes bya ba ni byang chub sems dpas sems can la phan gdags pa'i gegs ni sems can rang gi las kyi nyes pa yin par ston to//de la rtag tu bya ba nyid la zhugs pa zhes bya ba ni byang chub sems dpa' de dag la snying rjes sems can gyi don bya ba nyid la zhugs pa rtag tu yod pa'o/ /'bras bu med par gyur pa zhes bya ba ni byang chub sems dpa' la longs spyod dang snying rje yod kyang sems can dbul po snang ba'o//sems can la phan gdags pa'i gegs la mkhas pa'i tshig gi don la sogs pa bshad zin to// //de'i 'og tu thabs la mkhas pa'i tshig gi don la sogs pa bshad par bya ste/ thabs la 'jug pa chud mi za ba la mkhas pa zhes bya ba ni chos nyid rtogs par bya ba'i thabs la 'jug pa chud mi za bar bya ba ste/de yang don dam par chos thams cad ngo bo nyid med pa yin pas ngo bo nyid med pa'i chos kyi ngo bo nyid med pa'i chos 'dzin pa yang med mod kyi / 'on kyang tha snyad kyi sgo nas ma bstan na chos nyid rtogs par bya ba'i thabs med pa na/tha snyad kyi sgo nas shes rab kyi pha rol tu phyin pas 'dzin to zhes bstan pa ni chos nyid rtogs par bya ba'i thabs la 'jug pa chud mi za ba zhes bya ba ste/ de la mkhas par bya ba'i don 'dir bstan pa'o/ /de'i phyir de bstan pa'i dbang du mdzad nas/ bcom ldan 'das byang chub sems dpas chos rnams kyi ngo bo nyid ma mchis pa nyid pha rol tu phyin pa gang gis 'dzin pa lags zhes bya ba zhus so//shes rab kyi pha rol tu phyin pas 'dzin to zhes bya ba ni chos rnams kyi ngo bo nyid med pa ni don dam pa'i ngo bo nyid med pa nyid de ni de'i gnas skabs na gzung ba dang 'dzin pa'i rnam pa nyid med mod kyi/'on kyang tha snyad kyi sgo nas de'i don rtogs par bya ba'i thabs med pas 'dir tha snyad kyi sgo nas shes rab kyi pha rol tu phyin pa 'dzin to zhes bya ba gsungs pa ni chos nyid rtogs par bya ba'i thabs la 'jug pa chud mi za ba yin par ston to/ /gal te shes rab kyi pha rol tu phyin pas ngo bo nyid ma mchis pa nyid 'dzin na/ngo bo nyid dang bcas pa nyid kyang ci'i slad du mi 'dzin lags zhes bya bas ni chos thams cad ngo bo nyid med pa nyid ces bya ba ni don dam pa'i ngo bo nyid med pa nyid chos bdag med pas rab tu phye ba yin pas de ni tha snyad thams cad yang dag par chad pa'i mtshan nyid de/de la ni gang gzung ba dang gang 'dzin pa'i tha snyad med pa yin na/ des shes rab kyi pha rol tu phyin pas yongs su 'dzin na ni ngo bo nyid med pa'i chos zhes bya ba gzung ba'i dngos por rtag tu rung ba cig yod par gyur pas de lta na dngos po med pa'i zla dngos po yod pa cig kyang yod pa'i rigs pas de yang ci'i phyir mi 'dzin zhes gal gzung ste zhus pa yin no//da ni ngo bo med pa nyid kyis ngo bo nyid med pa nyid 'dzin par mi smra mod kyi zhes bya ba ni/ don dam par na shes rab kyi pha rol tu phyin pa dang / chos kyi ngo bo nyid med pa zhes bya ba gzung ba dang 'dzin pa'i rnam pa gnyis med pas na shes rab kyi pha rol tu phyin pa yang ngo bo nyid med pa yin la chos rnams kyi ngo bo nyid kyang ngo bo nyid med pa yin par ro gcig pas des de 'dzin to zhes mi smra ste /de tsam du gzhag na chos nyid rnam par 'khrugs pa med pas chos nyid dang mi 'gal mod kyi/ tha snyad la ma brten par don dam par 'dogs par mi 'gyur bas chos nyid rtogs par bya ba'i thabs la 'jug pa chud za bar mi 'gyur ro zhes bya bar dgongs pa yin no//'on kyang zhes bya ba la sogs pas ni chos rnams kyi ngo bo nyid med pa nyid shes rab kyi pha rol tu phyin pa 'dzin to zhes bya ba'i yi ges bstan pa med par don dam pa yi ge med par so sor rig pa de bstan par nus pas de skad ma bstan na chos nyid rtogs par bya ba'i thabs la 'jug pa chud za bar bstan to//de'i phyir ngo bo nyid med pa nyid 'dzin to zhes de skad brjod do zhes bya bas ni chos nyid rtogs par bya ba'i thabs la 'jug pa chud mi za bar bya ba'i phyir de skad brjod do zhes bstan to//thabs la 'jug pa chud mi za ba la mkhas pa'i tshig gi don la sogs pa bshad zin to// //de'i 'og tu 'grib pa dang 'phel ba'i tshig gi don la sogs pa bshad par bya ste/ 'grib pa dang 'phel ba la mkhas pa zhes bya ba ni/'dir pha rol tu phyin pa dang / nye ba'i pha rol tu phyin pa dang / pha rol tu phyin pa chen po zhes bya ba gsum smos pa la snga ma snga ma ni chung ba'i phyir 'grib pa zhes bya/ phyi ma phyi ma ni che ba'i phyir 'phel ba zhes bya ste/ de la mkhas par bya ba'i don 'dir bstan pa'o/ / de'i phyir de bstan pa'i dbang du mdzad nas/ bcom ldan 'das pha rol tu phyin pa zhes kyang bgyi zhes bya ba la sogs pa zhus so/ /dus dpag tu med pa nas yongs su bsgoms pa'i zhes bya ba ni mos pas spyod pa'i sa la gnas pa yongs su smin pa chung ngu la gnas pa ste/ bskal pa grangs med pa dang por gtogs pa yin no//sbyin pa la sogs pa'i dge ba'i chos rnams dang ldan pa yang yin la zhes bya ba ni/ sbyin pa la sogs pa dge ba'i chos byang chub kyi phyogs dang mthun pa sbyangs pa nyid dang / mi g.yo ba nyid dang / shin tu rnam par dag pa nyid ma yin pa de gsum las gzhan pa dag dang ldan pa'o//de la nyon mongs pa yang kun tu 'byung zhing zhes bya ba ni de 'dun pa chung ba dang / sbyor ba chung bas nyon mongs pa kun nas dkris pa kun tu 'byung ba dang ldan pa'o/ /de zil gyis mnan par mi nus kyi des zil gyis non par 'gyur ba zhes bya ba ni nyon mongs pa de dang des te/ngan song rnams su yang lan 'ga' 'gro ba'o/ /'di lta ste/ mos pas spyod pa'i sa la mos pa chung ngu dang / 'bring la zhugs pa zhes bya ba ni 'jig rten pa'i chos kyi mchog ma gtogs pa man chad do/ /yang dus dpag tu med pa nas ches yongs su bsgoms pa'i zhes bya ba ni lhag pa'i bsam pa dag pa'i sa la zhugs pa yongs su smin pa 'bring la zhugs pa ste/bskal pa grangs med pa gnyis par gtogs pa yin no/ /dge ba'i chos de dag nyid dang ldan zhing zhes bya ba ni sbyin pa la sogs pa dge ba'i chos byang chub kyi phyogs dang mthun pa sbyangs pa nyid dang mi g.yo ba nyid dang ni ldan la/shin tu rnam par dag pa nyid dang mi ldan pa'o/ /de la nyon mongs pa yang kun 'byung la zhes bya ba ni de 'dun pa 'bring dang sbyor ba 'bring dang ldan pas nyon mongs pa ngan song ma yin pa kun du 'byung ba'o/ /de zil gyis gnon cing de zil gyis gnon par mi 'gyur ba zhes bya ba yang nyon mongs pa de dang des te ngan song rnams su mi 'gro ba'o//'di lta ste/ sa dang po nas bzung ba zhes bya ba ni sa dang po yan chad nas sa bdun pa man chad do/ /yang dus dpag tu med pa nas chos shin tu yongs su bsgoms pa'i zhes bya ba ni/nges pa dang mthar thug par gyur pa'i sa la zhugs pa yongs su smin pa chen po la gnas pa ste/ bskal pa grangs med pa gsum par gtogs pa yin no/ /dge ba'i chos de dag nyid dang ldan zhing zhes bya ba ni sbyin pa la sogs pa dge ba'i chos byang chub kyi phyogs dang mthun pa sbyangs pa nyid mi g.yo ba nyid dang /shin tu rnam par dag pa rnams dang ldan pa'o/ /de la rnam pa thams cad kyi thams cad du nyon mongs pa kun tu mi 'byung ba'i chos can du gyur pa zhes bya ba ni/ de 'dun pa che ba dang sbyor ba che bas nyon mongs pa kun nas dkris pa kun tu mi 'byung zhing ngan song rnams su mi 'gro ba'o//'di lta ste/ sa brgyad pa nas bzung ba zhes bya ba ni sa brgyad pa yan chad/ sa bcu pa man chad do/ /'grib pa dang 'phel ba la mkhas pa'i tshig gi don la sogs pa bshad zin to// // de'i 'og tu kun nas nyon mongs pa'i rgyun rjes su 'dzin pa gzhig pa la mkhas pa'i tshig gi don la sogs pa bshad par bya ste/kun nas nyon mongs pa'i rgyun rjes su 'dzin pa gzhig pa la mkhas pa zhes bya ba ni spyod pa yongs su rdzogs pa'i pha rol tu phyin pa'i ji skad bstan pa de dag gis rab tu phye ba'i rtogs pa yongs su rdzogs pa'i sa rab tu dbye ba ji skad bstan pa de dag la kun nas nyon mongs pa'i bag la nyal gyi rgyun rjes su 'dzin pa gang dang gang yod pa de dang de dag gzhig pa la mkhas par bya ba'i don 'dir bstan pa'o//de'i phyir de bstan pa'i dbang du mdzad nas/ bcom ldan 'das de dag la nyon mongs pa'i bag la nyal rnam pa du mchis lags zhes bya ba zhus so//rnam pa gsum ste zhes bya ba ni grogs yang dag par bcom pa dang / bag la nyal stobs chung ba dang / bag la nyal phra mo'o/ /de la grogs yang dag par bcom pa zhes bya ba ni/ sa dang po nas sa lnga pa man chad la nyon mongs pa'i bag la nyal yod pa ni/sa de dag nyon mongs pa lhan cig skyes pa kun tu 'byung ba yod pa de'i grogs lhan cig skyes pa ma yin pa'i nyon mongs pa de yang dag par bcom pas nyon mongs pa lhan cig skyes pa kun tu 'byung ba'i grogs lhan cig skyes pa ma yin pa yang dag par bcom pa'i phyir bag la nyal de lhan cig skyes pa ma yin pa'i nyon mongs pa kun tu 'byung ba dang ni mi ldan la/lhan cig skyes pa'i nyon mongs pa kun tu 'byung ba grogs yang dag par bcom pa dang ni ldan pas na grogs yang dag par bcom pa zhes bya ste/ dngos su na grogs yang dag par bcom pa'i nyon mongs pa kun tu 'byung bar mi bya'i/de dang ldan pa'i nyon mongs pa'i bag la nyal la bya'o/ /de'i phyir 'di lta ste/ sa lnga po dag na zhes bya ba la sogs pa gsungs te/ sa lnga po dag na zhes bya ba ni/ sa dang po nas sa lnga pa'i bar dag na'o/ /nyon mongs pa lhan cig skyes pa kun tu 'byung ba zhes bya ba ni/sa de lnga la nyon mongs pa kun tu 'byung ba chen po dang 'bring thams cad ni spangs so/ /kun du 'byung ba chung ngu ma spangs pa de ni glo bur gyi kun nas brtags pa ma yin gyi rang bzhin du lhan cig skyes pa yin pas/ nyon mongs pa lhan cig skyes pa kun tu 'byung ba zhes bya'o//grogs zhes bya ba ni/ lhan cig skyes pa kun tu 'byung ba de'i grogs so/ /nyon mongs pa lhan cig skyes pa ma yin pa kun tu 'byung ba zhes bya ba ni/ dper na mos pas spyod pa'i sa man chad la nyon mongs pa lhan cig skyes pa kun tu 'byung ba de'i grogs la nyon mongs pa lhan cig skyes pa ma yin pas glo bur gyi yul gyi rkyen la rjes su chags pa dang /khong khro ba la sogs pa kun tu 'byung ba lta bu la bya'o/ /de de'i tshe de la med pas zhes bya ba ni/ nyon mongs pa lhan cig skyes pa kun tu 'byung ba'i grogs nyon mongs pa lhan cig skyes pa ma yin pa kun tu 'byung ba de sa dang po nas sa lnga pa'i bar dag thob pa de'i tshe byang chub sems dpa' de la med pas so//de'i phyir grogs yang dag par bcom pa zhes bya'o zhes bya ba ni sa dang po nas sa lnga pa'i bar dag la nyon mongs pa'i bag la nyal yod pa de ni nyon mongs pa'i lhan cig skyes pa kun tu 'byung ba grogs yang dag par bcom pa de dang ldan pas na/bag la nyal de yang grogs yang dag par bcom pa zhes bya ste/ sa dang po nas sa lnga pa'i bar dag la nyon mongs pa'i bag la nyal de lta bu ma spangs pa yod do zhes bya ba'i tha tshig go/ /bag la nyal stobs chung ba zhes bya ba ni/sa drug pa dang bdun pa gnyis la bsgoms pa'i stobs kyis sbyor ba can gyi spyod pa yongs su rdzogs pa dang / mthar thug pas nyon mongs pa'i bag la nyal lnga pa man chad kyi lta bu stobs dang ldan pa ni med kyi/ mi skye ba'i chos la bzod pa rnam par dag pa la gegs byed pa'i nyon mongs pa cha phra mo kun tu 'byung ba de yang bsgom pa'i thabs kyis mnan pas nyams dmas shing kun tu 'byung ba de dang ldan pa'i nyon mongs pa'i bag la bya'o//de'i phyir 'di lta ste/ sa drug pa dang bdun pa la zhes bya ba gsungs so/ /cha phra mo kun tu 'byung ba nyid ces bya ba 'di ni mi skye ba'i chos la bzod pa rnam par dag pa la gegs byed pa'i nyon mongs pa cha phra mo kun du 'byung ba'o//bsgoms pas mnan pas kun tu 'byung ba nyid ces bya ba ni cha phra mo kun tu 'byung ba de yang bsgoms pa'i stobs kyis mnan pas nyams dmas shing kun tu 'byung ba'i phyir ro zhes bya ba ni de ltar kun du 'byung ba cha phra mo de yod pa'i phyir de kun nas slong ba'i bag la nyal ni bag la nyal stobs chung ba zhes bya ste/sa drug pa dang bdun pa la bag la nyal de lta bu ma spangs pa yod do zhes bya ba'i tha tshig go/ /bag la nyal phra mo zhes bya ba ni sa brgyad pa yan chad sa bcu pa man chad la nyon mongs pa kun nas dkris pa kun tu 'byung ba cha phra mo bag la nyal cha phra mo tsam zhig yod pa'o//de'i phyir 'di lta ste/ sa brgyad pa dang / de'i gong ma rnams la zhes bya ba la sogs pa gsungs so/ /nyon mongs pa thams cad kyi thams cad du kun du mi 'byung ba dang / shes bya'i sgrib pa tsam la gnas pa nyid kyi phyir ro zhes bya ba ni de yan chad la nyon mongs pa kun nas dkris pa kun tu 'byung ba ni med kyi shes bya'i sgrib pa snying po la yod pa lta bu ma spangs pas de'i gzhir gyur pa'i bag la nyal phra mo yod pa ni nyon mongs pa'i bag la nyal phra mo zhes bya'o//bcom ldan 'das bag la nyal de dag gnas ngan len spangs pa rnam pa dus rab tu phye ba lags zhes bya ba la sogs pas kyang kun nas nyon mongs pa'i rgyun rjes su 'dzin pa la mkhas pa ston to//de la bag la nyal de dag ces bya ba ni grogs yang dag par bcom pa dang bag la nyal stobs chung ba dang / bag la nyal phra mo zhes bya'o//bstan pa gsum po de dag go/ /gnas ngan len spangs pa rnam pa dus zhes bya ba ni shes bya'i sgrib pa'i phyogs dang mthun pa'i gnas ngan len spangs pa rnam pa dus zhes bya bar sbyar ro/ /rab tu phye ba lags zhes bya ba ni/ ma spangs par yod pa'i don to/ /nyon mongs pa'i sgrib pa'i phyogs dang mthun pa'i gnas ngan len gsum po de dag shes bya'i sgrib pa'i phyogs dang mthun pa'i gnas ngan len rnam pa du spangs pas kyang da dung ma spangs par yod par rig par bya zhes zhus pa yin no//de yang ji lta bu zhe na/ sa bcu gcig po thams cad la nyon mongs pa'i sgrib pa'i phyogs dang mthun pa'i gnas ngan len gsum dang shes bya'i sgrib pa'i phyogs dang mthun pa'i gnas ngan len rnam pa gsum po spong bar byed de/nyon mongs pa'i sgrib pa'i phyogs dang mthun pa'i gnas ngan len rnam pa gsum ni ngan song ba'i nyon mongs pa'i phyogs dang mthun pa'i gnas ngan len dang /mi skye ba'i chos la bzod pa rnam par dag pa la gegs byed pa'i nyon mongs pa'i phyogs dang mthun pa'i gnas ngan len dang / nyon mongs pa'i bag la nyal phra mo'o/ /de la sa dang po la ngan song ba'i nyon mongs pa'i phyogs dang mthun pa gnas ngan len thams cad kyi thams cad du spong ngo //kun tu 'byung ba las ni nyon mongs pa'i phyogs dang mthun pa chen po dang 'bring thams cad kyang spong ngo / /sa brgyad pa la ni mi skye ba'i chos la bzod pa rnam par dag pa la gegs byed pa'i nyon mongs pa'i phyogs dang mthun pa'i gnas ngan len thams cad kyi thams cad du spong ngo //kun tu 'byung ba las ni nyon mongs pa thams cad spong ngo / /sa bcu pa la ni nyon mongs pa'i bag la nyal phra mo thams cad spong ste/ de yang de bzhin gshegs pa'i gnas pa la 'jug pa'i tshe na'o/ /de ltar na ngan song ba'i nyon mongs pa'i phyogs dang mthun pa'i gnas ngan len ni sa dang po la spangs zin pas sa thams cad la med do//mi skye ba'i chos la bzod pa rnam par dag pa la gegs byed pa'i nyon mongs pa'i phyogs dang mthun pa'i gnas ngan len ni sa brgyad pa la spong pas sa dang po yan chad bdun pa man chad la da dung ma spangs par yod de de ni grogs yang dag par bcom pa dang bag la nyal stobs chung ba zhes sngar bstan pa gnyis yin no//nyon mongs pa'i bag la nyal phra mo ni sa bcu pa la de bzhin gshegs pa'i gnas pa la 'jug pa'i tshe na spangs pas sa bcu pa man chad la yang yod de/ de ni bag la nyal phra mo'i zhes sngar bstan pa yin no//shes bya'i sgrib pa'i phyogs dang mthun pa'i gnas ngan len rnam pa gsum ni/ pags shun la yod pa lta bu dang / spri la yod pa lta bu dang / snying po la yod pa lta bu'o/ /de la pags shun la yod pa lta bu ni sa dang po la spong ba'o/ /spri la yod pa lta bu ni sa brgyad pa la spong ba'o//snying po la yod pa lta bu ni de bzhin gshegs pa'i gnas pa la spong ba ste/ sgrib pa thams cad rnam par dag pa'i ye shes kyang de yin no/ /de ltar na sa dang po la shes bya'i sgrib pa'i phyogs dang mthun pa'i gnas ngan len pags shun la yod pa lta bu spangs kyang nyon mongs pa'i sgrib pa'i phyogs dang mthun pa'i gnas ngan len grogs yang dag par bcom pa dang /bag la nyal stobs chung ba gnyis da dung ma spangs par yod la/ sa brgyad pa la shes bya'i sgrib pa'i phyogs dang mthun pa'i gnas ngan len spri la yod pa lta bu spangs kyang nyon mongs pa'i phyogs dang mthun pa'i gnas ngan len bag la nyal da dung ma spangs par yod pas na/nyon mongs pa'i bag la nyal gsum zhes bya ba'i sgrib pa'i gnas ngan len rnam pa de gsum las rnam pa du spangs pas kyang da dung ma spangs par yod ces dri ba'i phyir bag la nyal de dag gnas ngan len spangs pa rnam pa dus rab tu phye lags zhes zhus par sbyar ro//rnam pa gnyis kyis te zhes bya ba ni nyon mongs pa'i bag la nyal grogs yang dag par bcom pa bag la nyal stobs chung ba dang / bag la nyal phra mo de dag ni shes bya'i sgrib pa'i phyogs dang mthun pa'i gnas ngan len rnam pa gsum po pags shun la yod pa lta bu dang /spri la yod pa lta bu dang / snying po la yod pa lta bu dag las pags shun la yod pa lta bu dang / spri la yod pa lta bu gnyis spangs pas kyang da dung ma spangs par yod do zhes bya ba'i tha tshig go/ /de'i phyir gnas ngan len pags shun la yod pa lta bu spangs pa ni dang po dang gnyis pas rab tu dbye ba yin no//spri la yod pa lta bu spangs pa ni gsum pa'o zhes bya ba gsungs te/ gnas ngan len pags shun la yod pa lta bu spangs pas sa dang po la shes bya'i sgrib pa'i gnas ngan len rags pas pags shun la yod pa lta bu spangs pa'o/ /de spangs pas na ngan song ba'i nyon mongs pa'i phyogs dang mthun pa'i gnas ngan len thams cad kyi thams cad du spangs kyang mi skye ba'i chos la bzod pa rnam par dag pa'i gegs byed pa'i nyon mongs pa'i phyogs dang mthun pa'i gnas ngan len pa ma spangs pas na/dang po dang gnyis pas rab tu phye ba yin no zhes gsungs te/dang po ni grogs yang dag par bcom pa'o/ /gnyis pa ni bag la nyal stobs chung ba ste/ de gnyis ni mi skye ba'i chos la bzod pa rnam par dag pa la gegs byed pa'i nyon mongs pa'i phyogs dang mthun pa'i gnas ngan len yin pas sa brgyad pa la spong ba'i phyir sa dang po la shes bya'i sgrib pa'i gnas ngan len pags shun la yod pa lta bu spangs kyang da dung ma spangs par yod do zhes bya ba'i tha tshig go//spri la yod pa lta bu spangs pas zhes bya ba ni sa brgyad pa la shes bya'i sgrib pa'i gnas ngan len 'bring spri la yod pa lta bu spangs pa'o/ /de spangs pa na mi skye ba'i chos la bzod pa rnam par dag pas gegs byed pa'i nyon mongs pa'i phyogs dang mthun pa'i gnas ngan len thams cad kyi thams cad du spangs kyang nyon mongs pa'i bag la nyal phra mo ma spangs pas na gsum po zhes gsungs te/gsum pa ni bag la nyal phra mo ste/ de ni sa brgyad pa yan chad kyi bag la nyal phra mo yin pas/sa bcu pa nas de bzhin gshegs pa'i gnas pa la 'jug pa'i tshe na gzod spong ba'i phyir sa brgyad pa la shes bya'i sgrib pa'i gnas ngan len phra mo spri la yod pa lta bu spangs pas kyang da dung ma spangs par yod do zhes bya ba'i tha tshig go/ /'o na shes bya'i sgrib pa'i phyogs dang mthun pa'i gnas ngan len snying po la yod pa lta bu spangs la/nyon mongs pa'i phyogs dang mthun pa'i bag la nyal yod dam med snyam pa la med par bstan pa'i phyir gnas ngan len snying po la yod pa lta bu spangs pa gang yin pa de ni thams cad kyi thams cad du bag la nyal med pa'i gnas skabs yin te/sangs rgyas kyi sa yin par ngas yongs su bstan to zhes bya ba gsungs te/ gnas ngan len snying po la yod pa lta bu spangs pa zhes bya ba ni de bzhin gshegs pa'i gnas pa la shes bya'i sgrib pa phra mo rkang la yod pa lta bu ste/ sgrib pa thams cad rnam par dag pa'i ye shes kyang de yin no//thams cad kyi thams cad du bag la nyal ba med pa'i gnas skabs yin te zhes bya ba ni nyon mongs pa'i sgrib pa bag la nyal med pa zhes bya ba ni med pa'i gnas skabs yin te/ de'i phyir sangs rgyas kyi sa yin par yongs su bstan to zhes bya ba gsungs so//bcom ldan 'das gnas ngan len de dag bskal pa grangs ma mchis pa du dag gis spong bar 'gyur lags zhes bya ba la sogs pas ni kun nas nyon mongs pa'i rgyu rjes su 'dzin pa de bzhin pa la mkhas par ston to/ /de la gnas ngan len de dag ces bya ba ni nyon mongs pa'i sgrib pa dang mthun pa'i gnas ngan len dang /shes bya'i sgrib pa'i phyogs dang mthun pa'i gnas ngan len sngar bstan pa de dag go/ /bskal pa grangs ma mchis pa zhes bya ba la bskal pa grangs med pa zhes bya ba ni rnam pa gnyis te/ nyung ngu dang / mang po'o/ /de dag la bskal pa grangs med pa nyung ngu zhes bya ba ni bskal pa chen po gcig la bya ste/de la yang nyin mtshan dang zla ba dang zla ba phyed du bgrang ba'i tshul gyis dus dpag tu med pa'i phyir bskal pa grangs med pa zhes bya'o/ /bskal pa grangs med pa mang po zhes bya ba ni bskal pa chen po nyid bgrang ba'i tshul gyis grangs kyi 'gres drug cu la thug pa ste/'jig rten na grangs kyi rim pa de las gong na med pa'i phyir bskal pa grangs med pa zhes bya'o/ /du dag gis spong bar 'gyur lags zhes bya ba ni dang po sems bskyed pa nas bzung ste gnas pa mchog thob cing de bzhin gshegs pa'i gnas la 'jug pa'i bar du byang chub sems dpa'i gnas pa thams cad la gnas ngan len de bskal pa grangs med pa nyung ngu dang mang po gnyis las dus spong zhes gsungs pa yin no//grangs med pa gsum gyis sam zhes bya ba ni bskal pa grangs med pa gsum gyis te/ de yang byang chub sems dpa'i gnas pa bcu gnyis so//rigs la gnas pa dang / mos pas spyod pa la gnas pa dang / rab tu dga' ba la gnas pa dang / lhag pa'i tshul khrims la gnas pa dang / lhag pa'i sems la gnas pa dang / byang chub kyi phyogs dang ldan pa'i lhag pa'i shes rab la gnas pa dang / bden pa'i lhag pa'i shes rab la gnas pa dang /rten cing 'brel par 'byung ba dang ldan pa'i lhag pa'i shes rab la gnas pa dang / mtshan ma med pa la gnas pa la mngon par 'du byed pa dang bcas shing rtsol ba dang bcas pa dang mtshan ma med pa la gnas pa mngon par 'du bya ba med cing lhun gyis grub pa dang /so so yang dag par rig pa la gnas pa dang / gnas pa mchog ces sngar bstan pa de dag las rigs la gnas pa'i dus na ni da dung sems ma skyes pas na gnas ngan len spong bar mi byed do/ /rigs la gnas pa'i 'og tu dang po bla na med pa'i byang chub tu sems bskyed pa tshun chad mos pas spyod pa la gnas pa'i dang po yin pas de tshun chad gnas ngan len spong bar byed de/dang po sems bskyed pa'i dus de nas bzung ste/ gnas pa mchog la gnas par 'gyur gyi bar du byang chub sems dpa'i gnas pa bcu gcig po de dag thams cad ni bskal pa grangs med pa mang po shos gsum gyis yang dag par 'grub ste/grangs med pa mang pos ni mos pas spyod pa la gnas pa las yang dag par 'das nas rab tu dga' ba la gnas pa thob ste/ de yang rtag tu 'bad pas thob kyi/ mi 'bad pas ni ma yin no/ /grangs med pa gnyis pas ni rab tu dga' ba la gnas pa na mtshan ma med pa la gnas pa mngon par 'du byed pa dang bcas shing rtsol ba dang bcas pa'i bar las yang dag par 'das te mtshan ma med pa la gnas pas mngon par 'du byed pa med cing lhun gyis grub pa thob ste/de ni bsam pa dag pa'i sar chud pa yan chad la rtag tu mi 'bad pa med pas nges pa kho na yin no//grangs med pa gsum pas ni mtshan ma med pa la gnas pas mngon par 'du bya ba med cing lhun gyis grub pa dang so so yang dag par rig pa la gnas pa las yang dag par 'das nas gnas pa mchog thob ste/de yang nges pa kho na yin no/ /de yang bskal pa grangs med pa mang po shos gsum gyis gnas pa bcu gcig thob pa de la yang brtson 'grus chen po'i yang chen pos sbyor bar byed pa de'i nang nas la las ni bskal pa bar ma mang po zhig 'dums par byed do/ /la la ni bskal pa grangs med pa nyung ngu shos zhes bya ba bskal pa chen po gcig gam gnyis sam mang po dag gi bar du 'dums par byed mod kyang grangs med pa mang po shos 'dums par byed pa ni 'ga' yang med par rig par bya'o//de ltar gnas pa 'thob pa'i tshul bstan pa de gnas ngan len spong ba'i tshul yin par rig par bya'o//dus tshigs dang zla ba dang zla ba byed dang zhag dang nyi ma dang thun dang thun phyed dang skad cig dang thang cig dang yud tsam dang bskal pa grangs med pa dag gis spong ngo zhes bya ba ni bskal pa grangs med pa nyung ngu shos dang sbyar te gdul bya bsam pa tha dad pa dag la go bar bya ba'i phyir sgra tha dad pas bstan to//de yang sngar bskal pa grangs med pa mang po shos ni gsum kho nas spong bar bstan to/ /'dir bskal pa grangs med pa nyung ngu shos ni dpag tu med pa dag gis spong bar ston to/ /'dir bskal pa zhes bya ba'i sgra ni dus kyi ming yin pas dus tshigs zhes bya ba nas/yud tsam dang bskal pa zhes bya ba'i bar thams cad la skabs zhes bya'o/ /bskal pa de lta bu du dag gis dang po sems bskyed pa nas gnas pa mchog thob par gyur pa'i bar gyis gnas pa bcu gcig thob cing de dag gi gnas ngan len spong bar 'gyur zhe na/ dpag tu med pa dag gis de dus tshigs btsan par bya na yang dus tshigs dpag tu med pas so//zla ba phyed btsan par bya na yang zla ba phyed dpag tu med pas so/ /zhag btsan par bya na yang zhag dpag tu med pas so/ /nyi ma btsan par bya na yang nyi ma dpag tu med pas so/ /thun btsan par bya na yang thun dpag tu med pas so//thun phyed btsan par bya na yang thun phyed dpag tu med pas so/ /skad cig btsan par bya na yang skad cig dpag tu med pas so/ /thang cig btsan par bya na yang thang cig dpag tu med pas so/ /yud tsam btsan par bya na yang yud tsam dpag tu med pas so/ / bskal pa btsan par bya na yang bskal pa dpag tu med pa dag gis so zhes de dag re re la yang dpag tu med pa'i sgra re re dang sbyar ro/ /de dag gi dpag tu med pa zhes bya ba'i yun yang dus ji tsam zhig la rtag ce na/ dus tshigs la sogs pa de dag gang yang rung ste/ dpag tu med pa zhes bya ba ni yun ni sngar bskal pa grangs med pa mang po shos gsum pa de'i yun dang mnyam ste/dus tshigs la sogs pa gang yang rung ste/ nam zhig na bskal pa chen po grangs med pa gsum thal bar gyur pa de na dus tshigs la sogs pa dpag tu med pa zhes bya ba yang mthar thug par rig par bya ste/mdor bsdus na bskal pa grangs med pa mang po shos gsum dang bskal pa grangs med pa nyung ngu shos dpag tu med pa zhes bya bar lung bstan par rig par bya'o/ /de lta bas na byang chub sems dpa'i gnas pa thams cad thob cing gnas ngan len thams cad spong ba ni bskal pa chen po grangs med pa gsum du bstan te/de lta yin pa las 'dir bskal pa grangs med pa gsum gyis sam dus tshigs dang zla ba dang zla ba phyed dang / zhag dang nyi ma dang thun dang thun phyed dang skad cig dang thang cig dang yud tsam dang bskal pa dpag tu med pa dag gis spong ngo zhes bya bas bskal pa grangs med pa mang po shos gsum dang nyung ngu shos dpag tu med pa dag gis so zhes bstan pa ni gdul ba'i skye bo'i bsam pa dang /dbang po tha dad pa dag la go bar bya ba'i grangs su bstan pa yin no/ /'o na byang chub sems dpa'i gnas pa de dag re re la yun ji tsam gyis 'thob cing gnas ngan len spong bar 'gyur zhe na/gnas pa re re la yang bskal pa bye ba 'bum phrag du ma 'am yang na de bas kyang ches mang bas 'thob cing gnas ngan len spong bar 'gyur ro zhes bla ma'i khyad par bdag nyid chen po dang ldan pa rnams kyis nges par bstan pa'i gzhung dag snang ngo / /de bas na dus tshigs gcig gam zla ba phyed dam zhag gcig gam nyi ma gcig gam/thun gcig gam thun phyed dam skad cig gcig gam/ thang cig gcig gam/ yud tsam gcig gam bskal pa gcig gis gnas pa thob cing gnas ngan len spong ba ni 'di lta ste/ byang chub sems dpa' rnams kyi gnas pa'i khyad par re re'i yon tan yang bskal pa grangs med pa gang gA'i klung gi bye ma snyed du brjod kyang mthar phyin par sla ba ma yin pa'i phyir ro//bcom ldan 'das de dag la byang chub sems dpa' rnams kyi nyon mongs pa skye ba'i mtshan nyid ni gang lags/ skyon ni gang lags yon tan ni gang lags par bgyi zhes bya ba la sogs pas ni lhag pa'i bsam pa dag pa'i sar chud pa yan chad kyis de dag la byang chub sems dpa' rnams kyi nyon mongs pa ji skad bstan pa de dag ni so so skye bo sred pa'i rjes su 'brang ba rnams dang nyan thos dang rang sangs rgyas sred pa 'gog pa rnams kyi dge ba'i rtsa ba rnams zil gyis gnon par 'gyur ba phan yon chen po dang ldan pa yin par ston to//kun nas nyon mongs pa med pa'i mtshan nyid yin no zhes bya ba ni sred pa'i rjes su mi 'brang bas kun nas nyon mongs pa'i dbang du mi 'gyur ba'i phyir ro/ /de'i phyir sa dang po la so sor nges pa kho nar chos kyi dbyings thams cad rab tu rtogs pa'i phyir te zhes bya ba la sogs pa gsungs so//rang gi rgyud la sdug bsngal skyed par mi nus pa nyid kyi phyir skyon med pa yin no zhes bdag nyid kyi sangs rgyas kyi chos yongs su smin par byed pa'i rgyu yin pa'i phyir ro/ / sems can gyi khams sdug bsngal rnam par bzlog pa'i rgyu nyid yin pa'i phyir yon tan dpag tu med pa yin no zhes bya ba ni sems can yongs su smin par byed pa'i rgyu yin pa'i phyir ro/ /gang la zhes bya ba ni 'og nas byang chub ces 'byung ba dang sbyar ro/ /sems can dang / nyan thos dang / rang sangs rgyas thams cad kyi dge ba'i rtsa ba rnams de tsam du zil gyis gnon par bgyid na zhes bya ba ni sred pa'i rjes su mi 'brang ba dang sred pa 'gog par mi byed pa'i phyir ro/ /byang chub ji tsam du don che ba ni ngo mtshar lags so zhes bya ba ni tshogs dpag tu med pas byang chub pa'i sgo nas yon tan de lta bu thob pa'i phyir ro//kun nas nyon mongs pa'i rgyun rjes su 'dzin pa gzhig pa la mkhas pa'i tshig gi don la sogs pa bshad zin to// // de'i 'og tu nges par 'byin pa'i bye brag gi rab tu dbye ba la mkhas pa'i tshig gi don la sogs pa bshad par bya ste/ nges par 'byin pa'i bye brag gi rab tu dbye ba la mkhas pa zhes bya ba ni theg pa'i khyad par la mkhas pa'i don 'dir bstan pa'o//de'i phyir bstan pa'i dbang du mdzad nas/ bcom ldan 'das kyis nyan thos kyi theg pa gang yin pa dang / theg pa chen po gang yin pa de ni theg pa chen po'o zhes bka' stsal to//de la dgongs pa gang lags zhes bya ba zhus so/ /ngas nyan thos kyi theg par chos sna tshogs kyi ngo bo nyid/ ngas theg pa chen por chos kyi dbyings tshul gcig par bstan pa bshad de zhes bya ba ni nyan thos kyi theg par ni chos kyi dbang du byas te bstan la/ theg pa chen por ni chos nyid kyi dbang du byas te/bstan pa chos dang chos nyid tha mi dad pa'i phyir nga ni theg pa tha dad par mi smra'o zhes gsungs so/ /de la gang dag don la sgra ji bzhin kho nar rnam par rtog pa kha cig ni sgro 'dogs par byed ces bya ba ni gzugs la sogs pa'i mtshan nyid kyis yod par rtogs pa gang dag theg pa gsum gtan par tha dad par smra ba dag go//kha cig ni skur pa 'debs par byed cing zhes bya ba ni chos thams cad ngo bo nyid med pa'o zhes smra ba de mtshan nyid thams cad la skur pa 'debs pa gang dag theg pa gcig tu yang gtan med par smra ba dag go/ /de gnyis mi mthun par sems shing phan tshun rtsod par zad de zhes bya ba ni gcig dang du mar tha dad pa de gnyis so//nges par 'byin pa'i bye brag gi rab tu dbye ba la mkhas pa'i tshig gi don la sogs pa bshad zin to// // de nas bcom ldan 'das kyis de'i tshe tshigs su bcad pa 'di dag bka' stsal to zhes bya ba la sogs pas ni snga ma rnams kyis dngos po bsdu ba ston to//de la tshigs su bcad pa dang po dang gnyis pas ni nges par 'byin pa'i bye brag gi rab tu dbye ba la mkhas pa de nyid kyis dngos po bsdu ba bstan te tshig gi don ni go sla'o/ / tshigs su bcad pa gsum pas ni le'u dgu pa 'di nyid kyi mgo mjug gi don ji skad bstan pa thams cad kyis dngos po bsdu ba bstan te//de las rnams zhes bya bas ni sngar 'bras bu la mkhas pa zhes smos pa bstan to/ /bsdus dang zhes bya bas ni sngar mi mthun pa'i phyogs dang gnyen po la mkhas pa zhes smos pa bstan to//ming dang zhes bya bas ni sngar ming la mkhas pa zhes smos pa bstan to/ /mi mthun pa'i phyogs zhes bya bas ni sngar mi mthun pa'i phyogs kyi rab tu dbye ba la mkhas pa zhes smos pa bstan to/ /khyad par zhes bya bas ni sngar gnyen po'i rab tu dbye ba la mkhas pa zhes smos pa bstan to/ /skye dang zhes bya bas ni sngar bdag dang gzhan gyi rgyud yongs su smin pa'i gnas la mkhas pa zhes smos pa bstan to//smon dang zhes bya bas ni sngar bsam pa yongs su rdzogs par bya ba'i thabs la mkhas pa zhes bya bas bstan to/ /bslab pa rnams zhes bya bas ni sngar pha rol tu phyin pa rab tu dbye ba rnam pa nyi shu smos pa rnams spyir bstan to//de ni sangs rgyas rnams kyis theg chen bstan/ /zhes bya bas ni/ de ltar rab tu dbye ba rnam pa bdun dang / pha rol tu phyin pa'i rab tu dbye ba rnam pa nyi shus bstan pa de ni theg pa chen po byang chub sems dpa'i lam yin par bstan to/ / 'di la gang brtson de dag sangs rgyas 'gyur/ /zhes bya bas ni theg pa chen po byang chub sems dpa'i lam gyi 'bras bu bstan te/ de dag 'dis spyir na sngar theg pa rnam par gzhag pa las brtsams nas theg pa'i rnam par dbye ba ji lta ba bzhin bstan pa zhes smos pa'i dngos po bsdu ba bstan to//bcom ldan 'das dgongs pa nges par 'grel pa'i chos kyi rnam grangs 'dir bstan pa de'i ming ci lags zhes bya ba la sogs pas ni mdo'i le'u dgu pa 'di'i nges pa'i tshig bstan to/ /byang chub sems dpa' bdun khri lnga stong gis byang chub sems dpa'i ting nge 'dzin theg pa chen po snang ba thob par gyur to zhes bya bas ni bstan pa'i 'bras bu rgya che ba bstan to//le'u dgu pa'i tshig gi don la sogs pa bshad zin to// //de ltar theg pa rnam par gzhag pa las brtsams nas theg pa'i rnam par dbye ba ji lta ba bzhin bstan pas kun rdzob kyi bden pa'i mtshan nyid yongs su shes par bya ba bstan nas/da ni theg pa rnam par gzhag pa kho na las brtsams nas de bzhin gshegs pa'i bya ba sgrub pa'i rab tu dbye bas kun rdzob kyi bden pa'i mtshan nyid yongs su shes par bya ba bstan pa'i tshig gi don la sogs pa bshad par bya ste/ de'i phyir de bstan pa'i dbang du mdzad nas/de nas bcom ldan 'das la byang chub sems dpa' 'jam dpal gyis zhu ba zhus pa zhes bya ba la sogs pa 'phags pa 'jam dpal gyi le'u bcu pa 'di gsungs so/ /de la le'u bcu pa 'di'i bsdus pa'i don ni mdor bsdu na theg pa rnam par gzhag pa kho na las brtsams nas de bzhin gshegs pa'i bya ba sgrub pa'i rab tu dbye ba bstan pa yin no//de yang da rnam par dbye na rnam pa gsum ste/ de bzhin gshegs pa'i rgyu phun sum tshogs pa dang / 'bras bu phun sum tshogs pa dang / mdzad pa phun sum tshogs pa'o/ /de la de bzhin gshegs pa'i rgyu phun sum tshogs pa ni theg pa rnam par gzhag pa kho na las brtsams te/sa dang pha rol tu phyin pa shin tu bsgom pa'i nges par 'byung bas zhes bya bas bstan to/ /'bras bu phun sum tshogs pa ni de bzhin gshegs pa ste/ gnas gyur pa yang dag par grub pa yin no zhes bya ba la sogs pas bstan to//mdzad pa phun sum tshogs pa ni bya ba sgrub pa'i rab tu dbye ba ste/ bcom ldan 'das de bzhin gshegs pa rnams kyis skye ba 'byung ba'i mtshan nyid ji lta bur rig par bgyi lags zhes bya ba la sogs pa gzhung lhag ma thams cad kyis bstan to/ de la dang por 'phags pa 'jam dpal gyis gdul ba de bzhin gshegs pa'i sku la shin tu rmongs pa'i gnyen po rnam par gzhag pa bstan pa'i sgo nas de bzhin gshegs pa'i rgyu phun sum tshogs pa dang / 'bras bu phun sum tshogs pa dang / mdzad pa phun sum tshogs pa bstan pa'i dbang du mdzad nas/bcom ldan 'das de bzhin gshegs pa rnams kyi chos kyi sku zhes bgyi na/ bcom ldan 'das de bzhin gshegs pa rnams kyi chos kyi sku'i mtshan nyid ji lta bu lags zhes bya ba zhus so/ /de bzhin gshegs pa'i sku la shin tu rmongs pa'i gnyen po rnam par gzhag pa ni rnam pa gnyis te/mi rtag par rtog pa'i gnyen por chos kyi sku bstan pa dang / nor bar rtog pa'i gnyen por skye ba 'byung bar bstan pa'o/ /de la zhus pa snga ma'i skabs 'dir ni mi rtag par rtog pa'i gnyen por chos kyi sku bstan par zhus pa yin te/ de bstan pa'i sgo nas de bzhin gshegs pa'i rgyu phun sum tshogs pa dang /'bras bu phun sum tshogs pa dang / mdzad pa phun sum tshogs pa ston to/ /nor bar rtog pa'i gnyen por skye ba 'byung ba bstan pa ni 'og nas mdzad pa phun sum tshogs pa'i skabs su bstan to/ /de la de bzhin gshegs pa rnams kyi chos kyi sku zhes bgyi zhes bya ba ni 'phags pa sum brgya pa'i mdo las/'dren pa ni chos kyi sku zhes gsungs pa lta bu la sogs pa mdo sde dang de las de bzhin gshegs pa rnams kyi chos kyi sku bstan pa de'i dbang du mdzad nas zhus pa yin no/ /de bzhin gshegs pa rnams kyi chos kyi sku'i mtshan nyid ji lta bu lags zhes bya bas ni mi rtag par rtog pa'i gnyen por chos kyi sku bstan pa rnam par gzhag pa nyid zhus pa yin no//de nas bcom ldan 'das kyis kyang de bzhin gshegs pa'i sku la shin tu rmongs pa mi rtag par rtog pa'i gnyen por chos kyi sku bstan pa rnam par gzhag pa de nyid bstan pa'i sgo nas de bzhin gshegs pa'i rgyu phun sum tshogs pa dang /mdzad pa phun sum tshogs pas bstan pa'i skabs su mdzad nas/ 'jam dpal de bzhin gshegs pa rnams kyi chos kyi sku'i mtshan nyid ni zhes bya ba gsungs so/ /de ni de bzhin gshegs pa'i rgyu phun sum tshogs pa bstan pa'i tshig gi don la sogs pa bshad par bya ste/de bzhin gshegs pa'i rgyu phun sum tshogs pa zhes bya ba ni theg pa rnam par gzhag pa kho na las brtsams pa'o/ /de'i phyir de bstan pa'i dbang du mdzad nas/ sa dang pha rol tu phyin pa shin tu bsgom pa'i nges par 'byung bas zhes bya ba gsungs te/ sa ni rtog pa yin la/ pha rol tu phyin pa ni dpyod pa yin pas rtog pa dang dpyod pa ni byang chub sems dpa'i lam yin pa'i phyir/ sa dang pha rol tu phyin pa dag shin tu bsgom pa'i nges par 'byung ba las zhes bya ba ni gnas gyur pa yang dag par 'grub pa'i thabs kyi rgyu yin pas na de ni de bzhin gshegs pa'i rgyu phun sum tshogs pa zhes bya'o//sa dang pha rol tu phyin pa'i rab tu dbye ba ni sngar 'phags pa spyan ras gzigs kyi le'ur theg pa rnam par gzhag pa bstan pa'i skabs su rgya cher bstan zin to/ /de'i phyir skabs 'dir theg pa rnam par gzhag pa kho na las brtsams nas zhes bya ba smos so//de bzhin gshegs pa'i rgyu phun sum tshogs pa'i tshig gi don la sogs pa bshad zin to// //de'i 'og tu 'bras bu phun sum tshogs pa'i tshig gi don la sogs pa bshad par bya ste/ 'bras bu phun sum tshogs pa zhes bya ba ni de bzhin gshegs pa'o//de'i phyir de bstan pa'i dbang du mdzad nas/ gnas gyur pa yang dag par grub pa yin no zhes bya ba la sogs pa gsungs te/ gnas gyur pa yang dag par grub pa ni yang dag pa'i ye shes dang de bzhin nyid phyin ci ma log pa dang 'gyur ba med par yongs su grub pa chos kyi sku'i mtshan nyid yin pa'i de bzhin gshegs pa zhes bya ste/de bas na bla na med pa yang dag par rdzogs pa'i byang chub kyi dngos po bstan to/ /byang chub kyi dngos po de ni rnam pa lngas rig par bya ste/ ngo bo nyid dang / mthu dang / thabs dang / 'jug pa dang / ldog pas so/ /de la ngo bo nyid gang zhe na/nyan thos dang rang sangs rgyas las khyad par du 'phags pa'i gnas gyur pa gang yin pa'o/ /de yang rnam pa bzhis rig par bya ste/ 'jug pa'i gnas dang / mi 'jug pa'i gnas dang / shes bya legs par yongs su brtags pa'i 'bras bu dang / chos kyi dbyings rnam par dag pa'i mtshan nyid kyis so//de la 'jug pa'i gnas ni sangs rgyas kyi rgyud la mnga' ba'i 'jig rten las 'das pa'i lam gyi gnas yin pa'i phyir ro/ /mi 'jug pa'i gnas ni bag chags dang bcas pa'i nyon mongs pa rnams mi 'jug pa'i gnas yin pa'i phyir ro/ / shes bya legs par yongs su brtags pa'i 'bras bu ni gnas gyur pa de shes bya'i de kho na legs par yongs su brtags pa'i 'bras bu yin pa'i phyir ro/ /chos kyi dbyings rnam par dag pa'i mtshan nyid ni gnas gyur pa de mtshan ma thams cad zil gyis gnon pa'i phyir chos kyi dbyings shin tu rnam par dag pa'i mtshan nyid kyis rab tu phye ba yin pa'i phyir ro//mthu gang zhe na/ mdor bsdu na stobs bcu dang / mngon par shes pa drug dang / dbang bcu la mthu zhes bya'o/ /thabs gang zhe na/ mdor bsdu na sprul pa rnam pa bzhi ni thabs zhes bya ste/sems can yongs su ma smin pa rnams yongs su smin par bya ba'i phyir byang chub sems dpa'i spyod pa sprul pa dang / sems can yongs su smin pa rnams rnam par grol bar bya ba'i phyir stong gsum gyi stong chen po'i 'jig rten gyi khams kyi 'dzam bu'i gling bye ba phrag brgyar cig car du de bzhin gshegs pa'i skur sprul pa'i thabs yongs su 'dzin pa dang /nyan thos kyis 'dul ba rnams la de sprul pa dang rang sangs rgyas kyis 'dul ba rnams la de sprul pa ste/ sangs rgyas bcom ldan 'das ni phyogs bcur sprul pa rnam pa bzhi po de dag la thogs pa med pa'i mthu dang ldan pa yin par blta bar bya'o//'jug pa gang zhe na/ de ni rnam pa gnyis su blta bar bya ste/ de'i mod la 'jug pa dang / de gtan 'jug pa'o/ /de la de'i mod la 'jug pa ni ji srid du sems can rnams yongs su ma smin cing rnam par ma grol ba de srid du sangs rgyas rnams kyi sprul pa 'jug pa'o//de gtan 'jug pa ni sangs rgyas rnams kyi ngo bo nyid mi zad cing bsam gyis mi khyab pa 'jig rten ji srid yod kyi bar du sems can rnams kyi bya ba sgrub pa la rjes su 'jug pa'i phyir 'jug par mdzad pa'o/ /ldog pa gang zhe na/ de yang rnam pa gnyis su blta bar bya ste/ de'i mod la ldog pa dang /de gtan ldog pa'o/ /de la de'i mod la ldog pa ni sems can rnams yongs su smin cing rnam par grol bar gyur pa na de'i mod la sangs rgyas rnams yongs su mya ngan las 'das pas ldog par mdzad pa'o/ /de gtan ldog pa ni bag chags dang bral ba'i nyon mongs pa rnams dang /sdug bsngal gnas dang bcas pa gtan zad pa las rig par bya'o/ /byang chub kyi dngos po bstan pa des ni mi rtag par rtog pa'i gnyen por chos kyi sku bstan pa bshad de/ mi rtag par rtog pa zhes bya ba ni chos kyi sku kun gzhi'i rnam par shes pas rab tu phye ba yin par rtog pa'o//de'i gnyen por gnas gyur pas rab tu phye ba yin par bstan te/ 'di ltar kun gzhi'i rnam par shes pa ni mi rtag pa dang len pa dang bcas pa yin la gnas gyur pa ni rtag pa dang len pa med pa yin pa dang / kun gzhi'i rnam par shes pa ni gnas ngan len dang ldan pa yin la/ gnas gyur pa ni gnas ngan len dang ldan pa ma yin la/ gnas gyur pa ni gnas ngan len thams cad dang bral ba yin pa dang / kun gzhi'i rnam par shes pa ni nyon mongs pa rnams 'jug pa'i rgyu yin zhing lam gyi 'jug pa'i rgyu ma yin la/ gnas gyur pa ni nyon mongs pa rnams kyi 'jug pa'i rgyu ma yin zhing lam gyi 'jug pa'i rgyu yin pa dang /kun gzhi'i rnam par shes pa ni dge ba dang lung du ma bstan pa'i chos rnams la dbang mi byed la/ gnas gyur pa ni dge ba dang lung du ma bstan pa'i chos rnams la dbang byed pa yin pa'i phyir ro/ /de yang rgyu gnyis kyis bsam gyis mi khyab pa'i mtshan nyid du rig par bya ste zhes bya ba ni gnas gyur pas rab tu phye ba'i chos kyi sku de yang rgyu gnyis bsam gyis mi khyab pa'i mtshan nyid du bstan te/brjod du med pa'i don gyis tshig gi spyod yul las 'das pas de'i phyir bsam gyis mi khyab pa dang / 'jig rten las 'das pa nyid kyis 'jig rten de'i dpe med pas de'i phyir bsam gyis mi khyab pa yin no zhes rgyu 'og ma gnyis kyis go rims bzhin du bstan to//de la de ni spros pa med cing mngon par 'du bya ba med pa nyid kyi phyir dang zhes bya bas ni brjod du med pa'i don gyi tshig gi spyod yul las 'das pas de'i phyir bsam gyis mi khyab par ston to//de yang spros pa med pa'i phyir mngon par 'du bya ba med pa yin te/ de la spros pa med pa zhes bya ba ni 'gag pa med pa dang / skye ba med pa dang / rtag pa med pa dang / chad pa med pa dang / don tha dad pa ma yin pa dang / don gcig pa ma yin pa dang / 'ong ba med pa dang / 'gro ba med pa'o/ /de'i phyir de dag las bzlog pa'i tshul du mngon par 'du bya ba med pa yin te/ 'phags pa klu sgrub kyis chos kyi sku la bstod pa las/ gcig min du ma ma yin bdag dang gzhan la phan pa phun sum tshogs pa'i gzhir gyur la / /dngos med dngos po med pa ma yin mkha' ltar ro gcig rtogs par dka' ba'i rang bzhin can//gos pa med cing zhi 'gyur zhi la mi mnyam mnyam pa khyad par can te spros med pa/ /so so rang rig rgyal ba rnams kyi chos sku dpe med gang yin de la bdag phyag 'tshal/ / zhes ji skad gsungs pa lta bu'o/ /sems can rnams ni spros pa dang mngon par 'du bya ba la mngon par zhen pa nyid kyi phyir ro zhes bya bas ni 'jig rten las 'das pa nyid kyis 'jig rten na de'i dpe med pas de'i phyir bsam gyis mi khyab pa yin par bstan te/ tshig gi don ni snga ma las bzlog pa yin no//rgyu de gnyis kyis bsam gyis mi khyab pa de yang rnam pa lngar rig par bya ste/ ngo bo nyid dang / yul dang / gcig pa nyid dang / tha dad pa nyid dang / bya ba sgrub pas so/ /de la ji ltar ngo bo nyid la bsam gyis mi khyab pa yin zhe na/ phung po dang / khams dang / skye mched dam/ phung po dang / khams dang / skye mched las gzhan zhes bya ba dang / dngos po 'am dngos po med pa zhes bya ba de ltar bsam gyis mi khyab pa yin no/ /ji ltar yul la bsam gyis mi khyab pa yin zhe na/ khams dang / 'gro ba dang / phyogs dang / phyogs mtshams rnams khams dang / 'gro ba dang / phyogs dang / phyogs mtshams rnams las gzhan zhes bya ba de ltar bsam gyis mi khyab pa yin no/ /ji ltar gnas pa las bsam gyis mi khyab pa yin zhe na/ bde bar gnas pa dang / zhi bar gnas pa dang / sems dang bcas pa'i gnas pa dang /sems med pa'i gnas pa dang / lha dang tshangs pa dang 'phags pa'i gnas pa 'di dang 'di lta bus gnas so zhes bya ba de ltar bsam gyis mi khyab pa yin no/ /ji ltar gcig pa nyid dang / tha dad pa nyid las bsam gyis mi khyab pa yin zhe na/ zag pa med pa'i dbyings gcig la gnas pa'i sangs rgyas rnams gcig pa nyid yin zhes bya ba de ltar bsam gyis mi khyab pa yin no//ji ltar bya ba de ltar bsam gyis mi khyab pa yin zhe na/ de bzhin gshegs pa khams mnyam pa dang / ye shes dang / mgyogs pa dang / stobs dang / pha rol la gnon pa mnyam pa zag pa med pa'i dbyings la gnas pa rnams gnas gyur pa de nyid la brten nas 'di ltar sems can gyi don dang sems can gyi bya ba mdzad do zhes bya ba de ltar bsam gyis mi khyab pa yin no/ /bcom ldan 'das ci lags nyan thos dang rang sangs rgyas rnams kyi gnas gyur pa gang lags pa de yang chos kyi sku lags par brjod par bgyi 'am zhes bya ba la sogs pas ni nyan thos dang rang sangs rgyas rnams la yang nyon mongs pa'i sgrib pa las rnam par grol ba'i sgo nas gnas gyur pa zhes bya ba'i tha snyad rnam par gzhag pa yod mod kyi/de ni shes bya'i sgrib pa'i bag chags dang bcas pa yin pas yang dag pa'i ye shes dang / de bzhin nyid yongs su grub pa'i mtshan nyid ma yin pa'i phyir rnam par grol ba'i lus tsam du zad kyi/ chos kyi sku zhes ni mi bya'o zhes ston to/ /rnam par grol ba'i lus yin te zhes bya ba ni nyon mongs pa'i sgrib pa kun tu 'byung ba las rnam par grol ba'i lus yin pa'o//rnam par grol ba'i lus kyis ni de bzhin gshegs pa rnams dang / nyan thos dang rang sangs rgyas rnams kyang mtshungs shing mnyam mo zhes bya bas ni lung las gzhan las rnam par grol ba dang / rnam par grol ba la bye brag med do zhes gsungs pa nyid kyi don bstan pa yin no/ /chos kyi skus ni khyad par du 'phags te zhes bya bas ni de bzhin gshegs pa rnams ni bag chags dang bcas pa'i nyon mongs pa ma lus par spangs pas gnas gyur pa'i chos kyi sku yang dag par grub pa yin la/nyan thos dang rang sangs rgyas rnams ni de lta ma yin pa'i phyir ro/ /chos kyi sku khyad par du 'phags na yon tan gyi khyad par dpag tu med pas kyang khyad par du 'phags pa yin te zhes bya ba ni sku gsum dang ye shes bzhi dang / sangs rgyas kyi chos ma 'dres pa brgya bzhi bcu la sogs pa dag gis so//de dag la ni dper bya bar yang sla ba ma yin no zhes bya ba ni bskrun pa'i zla ma yin pa'i phyir ro/ /'bras bu phun sum tshogs pa'i tshig gi don la sogs pa bshad zin to// //de'i 'og tu mdzad pa phun sum tshogs pa'i tshig gi don la sogs pa bshad par bya ste/mdzad pa phun sum tshogs pa zhes bya ba ni bya ba sgrub pa'i rab tu dbye ba'o/ /de ni rnam pa bcu ste/ de bzhin gshegs pa rnams kyi skye ba 'byung ba bstan pa dang / sku ston pa bstan pa dang / gsung brjod pa bstan pa dang / sems 'byung ba bstan pa dang /spyod yul bstan pa dang / yul bstan pa dang / mngon par rdzogs par byang chub pa bstan pa dang / chos kyi 'khor lo bskor ba bstan pa dang / yongs su mya ngan las 'das pa chen po ston pa bstan pa dang / de bzhin gshegs pa la blta ba dang nyan pa dang bsnyen bkur byed pa las dge ba'i rtsa ba bskyed pa bstan pa'o//de la de bzhin gshegs pa rnams kyi skye ba 'byung ba bstan pa ni/ bcom ldan 'das de bzhin gshegs pa rnams kyi skye ba 'byung ba'i mtshan nyid ji lta bur rig par bgyi lags zhes bya ba la sogs pa'o/ /sku ston pa bstan pa ni bcom ldan 'das sprul pa'i skur ston pa'i thabs la mkhas pa gang lags par blta bar bgyi ba lags zhes bya ba la sogs pa'o//gsung brjod pa bstan pa ni/ bcom ldan 'das de bzhin gshegs pa'i byin gyi rlabs kyis sku gsung gang dag brjod pas zhes bya ba la sogs pa'o/ /sems 'byung ba bstan pa ni bcom ldan 'das de bzhin gshegs pa'i sems 'byung ba'i mtshan nyid ji lta bur rig par bgyi lags zhes bya ba la sogs pa'o//spyod yul bstan pa dang / yul bstan pa gnyis ni/ bcom ldan 'das de bzhin gshegs pa'i spyod yul gang lags/ de bzhin gshegs pa'i yul gang lags pa de gnyis la tha dad du bgyi ba ci mchis lags zhes bya ba la sogs pa'o//mngon par rdzogs par byang chub pa bstan pa dang / chos kyi 'khor lo bskor ba bstan pa dang / yongs su mya ngan las 'das pa chen po ston pa bstan pa gsum ni bcom ldan 'das de bzhin gshegs pa'i mngon par rdzogs par byang chub pa gang lags pa dang /chos kyi 'khor lo bskor ba gang lags pa dang / yongs su mya ngan las 'das pa chen po gang lags pa de dag gi mtshan nyid ji lta bur rig par bgyi lags zhes bya ba la sogs pa'o/ /de bzhin gshegs pa la blta ba dang /nyan pa dang / bsnyen bkur byed pa las dge ba'i rtsa ba bskyed pa bstan pa ni/ bcom ldan 'das sprul pa'i sku la blta ba dang / nyan pa dang / bsnyen bkur bgyid pa dag gis sems can rnams bsod nams bskyed pa de ci'i slad du de bzhin gshegs pa las 'byung bar rig par bgyi lags zhes bya ba la sogs pas ston to// bya ba sgrub pa'i rab tu dbye ba rnam pa bcu po de dag ni/ 'phags pa de bzhin gshegs pa skye ba 'byung ba bstan pa'i mdo las/ kye rgyal ba'i sras de bzhin gshegs pa rnams kyi skye ba 'byung ba bstan pa dang / sku ston pa bstan pa dang / gsung brjod pa dang / sems 'byung ba dang / spyod yul bstan pa dang / yul gyi gnas pa dang / mngon par rdzogs par byang chub pa dang / chos kyi 'khor lo bskor ba mngon par sgrub pa dang / yongs su mya ngan las 'das pa chen po ston pa dang / de bzhin gshegs pa la blta ba dang /nyan pa dang / bsnyen bkur byed pa las dge ba'i rtsa ba bskyed pa de legs par bshad du gsol zhes 'byung ba dang go rims bzhin du sbyar ro/ /de la dang por de bzhin gshegs pa rnams kyi skye ba 'byung bar bstan pa'i tshig gi don la sogs pa bshad par bya ste/ de bzhin gshegs pa rnams kyi skye ba 'byung ba bstan pa zhes bya ba ni de bzhin gshegs pa rnams kyi gzugs kyi sku rnam pa gnyis 'jig rten du skye ba 'byung ba'i mtshan nyid bstan pa'o//de'i phyir de bstan pa'i dbang du mdzad nas/ bcom ldan 'das de bzhin gshegs pa rnams kyi skye ba 'byung ba'i mtshan nyid ji lta bur rig par bgyi lags zhes bya ba zhus te/des ni de bzhin gshegs pa'i sku la shin tu rmongs pa nor par rtog pa'i gnyen por skye ba 'byung bar ston to/ /sprul pa'i sku'i mtshan nyid de bzhin gshegs pa rnams kyi skye ba 'byung ba'i mtshan nyid ni de bzhin gshegs pa rnams sprul pa'i skus 'byung ba'i mtshan nyid dang ldan pa ste/de ni longs spyod rdzogs pa'i skus 'byung ba'i mtshan nyid dang ldan pa yin mod kyi/ sprul pa'i sku de ni 'jig rten thams cad du grags pa yin gyi/ longs spyod rdzogs pa'i sku ni de lta ma yin pas sprul pa'i sku de gzung ngo / /de bzhin gshegs pa'i sku la shin tu rmongs pa ni nor bar rtog pa'i gnyen por skye ba 'byung bar bstan pa de ni 'phags pa de bzhin gshegs pa skye ba 'byung ba bstan pa'i mdo las de skad ces bstan pa dang /byang chub sems dpa' sems dpa' chen po kun tu bzang pos byang chub sems dpa' chen po de bzhin gshegs pa'i rigs su byung ba'i dpal la dmigs nas byang chub sems dpa'i tshogs thams cad la smras pa/kye rgyal ba'i sras dag 'di lta ste/ de bzhin gshegs pa dgra bcom pa yang dag par rdzogs pa'i sangs rgyas rnams kyi skye ba 'byung ba bstan pa'i gnas de ni chos tshad med pa dag gis byung ba bsam gyis mi khyab pa yin te/de bzhin gshegs pa rnams kyi skye ba 'byung ba ma yin/ byed rgyu gcig gis ma yin no/ /de ci'i phyir zhe na/ kye rgyal ba'i sras dag de bzhin gshegs pa rnams ni chos bcu la sogs pa chos thams cad tha dad pa brgya stong tshad med pa grangs med pa yongs su rdzogs pa'i tshul yang dag par 'grub pa'i byed rgyu dag gis 'byung ba'i phyir ro//bcu gang zhe na/ 'di lta ste/ sngon byang chub kyi sems tshad med pa 'gro ba thams cad yongs su bskyab pa'i sems bskyed pa yang dag par 'grub pa'i byed rgyu dang / sngon bsam pa dang lhag pa'i bsam pa tshad med pa shin tu sbyangs pa yang dag par 'grub pa'i byed rgyu dang / byams pa chen po dang snying rje chen po tshad med pas 'gro ba thams cad yongs su bskyab pa yang dag par 'grub pa'i byed rgyu dang / spyod pa dang smon lam tshad med pa rgyun mi 'chad pa yang dag par 'grub pa'i byed rgyu dang /bsod nams dang ye shes kyi tshogs tshad med pas ngoms mi shes pa yang dag par 'grub pa'i byed rgyu dang / sangs rgyas la mchod pa dang rim gro bya ba dang sems can yongs su smin par bya ba'i bkod pa tshad med pas yang dag par 'grub pa'i byed rgyu dang / thabs dang shes rab kyi lam tshad med pa shin tu yongs su sbyangs pa yang dag par 'grub pa'i byed rgyu dang /yon tan gyi bkod pa rnam par dag pa rnam pa tshad med pa yang dag par 'grub pa'i byed rgyu dang / lam gyi yan lag rnam par gzhag pa tshad med pa'i shes pa yang dag par 'grub pa'i byed rgyu dang /don dang chos tshad med pa khong du chud par bya ba la nges par rtogs pa'i shes pa yang dag par 'grub pa'i byed rgyu ste/ kye rgyal ba'i sras dag de bzhin gshegs pa rnams ni chos bcu po de dag la sogs pa chos tha dad pa brgya stong tshad med grangs med pa yongs su rdzogs pa'i tshul yang dag par 'grub pa'i byed rgyu dag gis 'byung ngo zhes gsungs pa bzhin du blta bar bya'o//'jig rten gyi khams 'byung ba dang 'dra'o zhes bya ba ni/ de bzhin gshegs pa rnams kyi skye ba 'byung ba bstan pa de 'jug pa'i sgo rnam pa bcus 'jig rten gyi khams 'byung ba dang 'dra bar bstan pa ste/de yang 'phags pa de bzhin gshegs pa skye ba 'byung ba bstan pa'i mdo las/ kye rgyal ba'i sras dag 'di lta ste/ dper na stong gsum gyi stong chen po'i 'jig rten gyi khams 'byung ba ni rgyu gcig gis 'byung ba ma yin/ byed rgyu gcig gis ma yin gyi/ rgyu tshad med pa dag dang / byed rgyu tshad med pa dag dang / yang dag par 'grub pa tshad med pa dag gis 'byung ste/ 'di lta ste/ stong gsum gyi stong chen po'i 'jig rten gyi khams su gtogs pa'i sems can rnams kyis lhan cig skyes pa'i las byas shing bsags pa dang / byang chub sems dpa' rnams kyis dge ba'i rtsa ba'i stobs bskyed pa dang /de bzhin gshegs pa rnams kyi byin gyi rlabs dang chos nyid kyis thob pas 'di lta ste/ sprin chen po rnams kyis char gyi dus las mi 'da' bar char legs par rab tu 'bebs pa las kyang brten/ rlung gi dkyil 'khor chen po bzhi rgyun mi 'chad par ldang ba las kyang brten nas te/bzhi gang zhe na/ 'di lta ste/ rlung gi dkyil 'khor yongs su 'dzin pa zhes bya ba de chu'i phung po phyi rol du mi 'phro bar bya ba'i phyir ldang ba dang / rlung gi dkyil 'khor yongs su skems pa zhes bya ba de nang gi chu'i phung po yongs su bskam pa'i phyir ldang ba dang / rlung gi dkyil 'khor yongs su 'gyod pa zhes bya ba de gzhal med khang thams cad yongs su 'gyod pa'i phyir ldang ba dang / rlung gi dkyil 'khor 'byes pa zhes bya ba de bkod pa thams cad shin tu rnam par 'byes shing rnam par dbye ba'i phyir ldang ba'o/ /de dag la sogs pa rgyu tshad med pa dag dang byed rgyu tshad med pa dag dang yang dag par 'grub pa tshad med pa dag gis 'byung ba yang de las 'byung bar byed pa 'ga' yang med mod kyi 'byung bar 'gyur ba yang yod do//kye rgyal ba'i sras dag de bzhin du de bzhin gshegs pa rnams kyi skye ba 'byung ba yang rgyu gcig gis 'byung ba ma yin/byed rgyu gcig gis ma yin gyi/ rgyu tshad med pa dag dang byed rgyu tshad med pa dag gis 'byung ste/ 'di lta ste / sngon gyi de bzhin gshegs pa rnams las chos kyi sprin chen po'i char yang dag par rab tu 'bab pas ngo mi shes pa'i bsam pa la yang dag par dga' ba yang brten/de bzhin gshegs pa'i ye shes kyi rlung gi dkyil 'khor chen po bzhi rgyun mi 'chad par ldang ba las kyang brten nas te/ bzhi gang zhe na/ 'di lta ste/ de bzhin gshegs pa'i ye shes kyi rlung gi dkyil 'khor chen po dran pas yang dag par 'dzin cing bsrung bas chud mi za ba rnam par g.yeng ba med pa zhes bya ba de bzhin gshegs pa thams cad kyi sprin chen po'i char yang dag par gzung ba'i phyir ldang ba dang /de bzhin gshegs pa'i ye shes kyi rlung gi dkyil 'khor chen po zhi gnas dang / lhag mthong mngon par grub pa zhes bya ba de nyon mongs pa thams cad yongs su bskam pa'i phyir ldang ba dang /de bzhin gshegs pa'i ye shes kyi rlung gi dkyil 'khor chen po yongs su bsngo ba la mkhas pa zhes bya ba de dge ba'i rtsa ba thams cad yongs su bsngo ba'i phyir ldang ba dang / de bzhin gshegs pa'i ye shes kyi rlung gi dkyil 'khor chen po sprul pa mngon par bsgrub pa'i bkod pa shin tu rnam par 'byes shing rnam par 'byed pa zhes bya ba de sngon yongs su smin par byas pa'i sems can rnams kyi lhan cig skyes pa'i dge ba'i rtsa ba yongs su sbyangs pa dang /de bzhin gshegs pa'i zag pa med pa'i dge ba'i rtsa ba'i stobs bskyed pa'i phyir ldang ba'o// de dag la sogs pa rgyu tshad med pa dag dang / byed rgyu tshad med pa dag dang / chos nyid kyis thob pas 'byung yang de la 'byung bar byed pa 'ga' yang med mod kyi 'byung bar 'gyur ba yang yod de/ kye rgyal ba'i sras dag byang chub sems dpa' sems dpa' chen pos 'jug pa'i sgo dang po des de bzhin gshegs pa dgra bcom pa yang dag par rdzogs pa'i sangs rgyas rnams kyi skye ba 'byung ba bstan pa khong du chud par bya'o zhes bya ba la sogs pa 'jug pa'i sgo rnam pa bcu gsungs pa bzhin du blta bar bya'o//sprul pa'i sku de 'byor pa ji lta bu dang ldan pa yin zhe na/de'i phyir sprul pa'i sku'i mtshan nyid 'byung ba ni de bzhin gshegs pa'i yon tan bkod pa'i 'byung ba'i rgyan gyi rnam pa thams cad kyis byin gyis brlabs pa'i mtshan nyid du blta bar bya'o zhes bya ba gsungs pa ste/ de bzhin gshegs pa'i yon tan gyi bkod pa rnam pa thams cad dang ldan pa yin no zhes bya ba'i tha tshig go//de yang 'phags pa de bzhin gshegs pa skye ba 'byung ba bstan pa'i mdo las/ kye rgyal ba'i sras dag byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas rnams kyi skye ba 'byung ba bstan pa ni 'di ltar khong du chud par bya ste/spyod pa tshad med pa yang dag par bsgrub pa'i phyir tshad med pa'i rjes su song bar khong du chud par bya'o/ /phyogs thams cad du khyab pa'i phyir rgya che bar khong du chud par bya'o/ /skye ba dang / 'jig pa dang / gnas pa dang bral ba'i phyir blang ba med pa dang dor ba med par khong du chud par bya'o//sems dang / yid dang rnam par shes par sgro btags pa med pa'i phyir spros pa med pa dang spros pa dang bral bar khong du chud par bya'o/ /nam mkha'i ngo bo nyid yin pa'i phyir lus med par khong du chud par bya'o/ / sems can thams cad bdag med pa'i phyir mnyam par khong du chud par bya'o/ /zhing thams cad mi zad pa'i zhing yin pa'i phyir mi zad par khong du chud par bya'o/ /phyi ma'i mtha'i mur rgyun mi 'chad pa'i phyir mi zlog par khong du chud par bya'o/ /de bzhin gshegs pa'i ye shes la gnyen po med pa'i phyir mi 'phrogs par khong du chud par bya'o//'dus byas dang / 'dus ma byas kyi chos mnyam par rtogs pa'i phyir gnyis su med pa'i khong du chud par bya'o/ /sngon legs par yongs su smin par bya ba'i sems can gyi bsam pa'i khyad par yongs su rdzogs par mdzad pa'i phyir 'gro ba thams cad nye bar 'tsho bar khong du chud par bya ste/kye rgyal ba'i sras dag byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas rnams kyi skye ba 'byung ba bstan pa ni/ de dag la sogs pa rnam par byang ba'i bye brag bstan pa tshad med pa dag gis khong du chud par bya'o zhes gsungs pa bzhin du blta bar bya'o//chos kyi sku la ni skye ba 'byung ba med do zhes bya ba ni chos kyi sku'i ngo bo nyid kyis rtag pa'i phyir te/ des ni de bzhin gshegs pa rnams kyi skye ba bstan pa zhes bya bas ni/ de bzhin gshegs pa rnams kyi gzugs kyi sku rnam pa gnyis 'jig rten du skye ba 'byung ba'i mtshan nyid yin par bstan to//de dag gis ni de bzhin gshegs pa'i sku la shin tu rmongs pa nor bar rtog pa'i gnyen por skye ba 'byung bar bstan pa bshad de/ nor bar rtog pa zhes bya bas ni/ de bzhin gshegs pa rnams skye ba 'byung ba bstan pa chos bcu la sogs pa chos tha dad pa brgya stong tshad med grangs med pa yongs su rdzogs pa'i tshul yang dag par 'grub pa'i byed rgyu dag gis 'byung ba dang 'jug pa'i sgo rnam pa bcus 'jig rten gyi khams 'byung ba dang 'dra ba dang /de bzhin gshegs pa'i yon tan bkod pa'i rgyan gyi rnam pa thams cad kyis byin gyis brlabs pa'i mtshan nyid du mi shes pa ste/de'i gnyen por de bzhin gshegs pa rnams kyi skye ba 'byung ba bstan pa'i mtshan nyid ji skad smos pa de dag ma nor bar bstan pa yin no/ /de bzhin gshegs pa rnams kyi skye ba 'byung bar bstan pa'i tshig gi don la sogs pa bshad zin to// //de'i 'og tu de bzhin gshegs pa rnams kyi sku ston pa mdzad pa'i tshig gi don la sogs pa bshad par bya ste/ sku ston pa zhes bya ba ni de bzhin gshegs pa rnams kyi sprul pa'i sku ston pa'i thabs la mkhas pa'o/ /de'i phyir de bstan pa'i dbang du mdzad nas bcom ldan 'das sprul pa'i sku ston pa'i thabs la mkhas pa gang lags par blta bar bgyi lags zhes bya ba zhus so//sprul pa'i sku ston pa'i thabs la mkhas pa ni zhes bya bas ni 'jig rten gyi khams rab 'byams ma lus pa thams cad du sangs rgyas 'byung ba thams cad kyi dang po dga' ldan gyi pho brang na bzhugs pa dang /'pho ba dang / gshegs pa dang / lhums na bzhugs pa dang / bltams pa dang / gzhon nu'i rol pa dang / btsun mo'i 'khor gyi nang na bzhugs pa dang / mngon par 'byung ba dang / dka' ba spyod pa dang / byang chub kyi snying por gshegs pa dang /bdud 'dul ba dang / mngon par rdzogs par byang chub pa dang / chos kyi 'khor lo bskor ba dang / yongs su mya ngan las 'das pa chen po ston par mdzad pa phun sum tshogs pa ston pa'i thabs la mkhas pa gang yin pa ston to/ /stong gsum gyi stong chen po'i sangs rgyas kyi zhing thams cad du zhes pas ni 'jig rten gyi khams rab 'byams ma lus pa thams cad du sangs rgyas 'byung ba thams cad kyi mdzad pa ston to//bdag por grags pa zhes bya ba ni rgyal po'o/ /sbyin gnas su grags pa zhes bya ba ni rgyal po'i mdun na 'don to / /mngal du 'jug pa zhes bya bas ni dang por dga' ldan na bzhugs pa dang /'pho ba dang / gshegs pa bstan te/ gshegs pa nyid mngal du 'jug pa yin par sbyar ro/ /btsas pa zhes bya bas ni lhums na bzhugs pa dang / bltams pa gnyis bstan to/ /skye ba zhes bya bas ni gzhon nu'i rol pa bstan to/ /'dod pa la longs spyod pa zhes bya bas ni btsun mo'i 'khor gyi nang na bzhugs pa bstan to//mngon par 'byung ba zhes bya bas ni mngon par 'byung ba bstan te khab nas rab tu byung ba'o/ /dka' ba spyod pa zhes bya bas ni dka' ba spyod pa bstan te lo drug tu dka' thub mdzad pa'o/ /de btang ba zhes bya bas ni byang chub kyi snying por gshegs pa bstan te/dka' ba spyod pa de btang ste/ dang po byang chub pa'i gnas nas rdo rje'i gdan la gshegs pa'o/ /mngon par rdzogs par byang chub pa'i rim pa zhes bya bas ni/ /bdud 'dul ba dang / mngon par rdzogs par byang chub pa dang / chos kyi 'khor lo bskor ba dang / yongs su mya ngan las 'das pa chen por ston pa bstan to//kun du ston pa yin par blta bar bya'o zhes bya bas ni mdzad pa de dag kyang stong gsum gyi stong chen po'i 'jig rten gyi khams gcig dga' ldan gyi gnas bye ba phrag brgya na 'dzam bu'i gling bye ba phrag brgyar dus gcig tu rim gyis mdzad pa ston pa dang / gdul ba'i skal ba ji lta ba bzhin du 'jig rten gyi khams rab 'byams ma lus pa thams cad du yang de bzhin du ston pa bstan to//de bzhin gshegs pa rnams kyi sku ston pa'i thabs la mkhas pa de ni mdzad pa re re la yang 'jug pa'i sgo rnam pa bcus khong du chud par bya ste/ de yang 'phags pa de bzhin gshegs pa skye ba 'byung ba bstan pa'i mdo las de skad ces smras pa dang /byang chub sems dpa' sems dpa' chen po de bzhin gshegs pa'i rigs su byung ba'i dpal gyis/ byang chub sems dpa' sems dpa' chen po kun tu bzang po la 'di skad ces smras so/ /kye rgyal ba'i sras byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas rnams kyi sku ston pa ji ltar khong du chud par bya/de skad ces smras pa dang / byang chub sems dpa' sems dpa' chen po kun tu bzang pos byang chub sems dpa' sems dpa' chen po de bzhin gshegs pa'i rigs su byung ba'i dpal la 'di skad ces smras so//kye rgyal ba'i sras byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas rnams kyi sku ston pa ni tshad med pa'i rjes su song bar khong du chud par bya'o//de ci'i phyir zhe na/ rgyal ba'i sras dag de bzhin gshegs pa rnams kyi sku ston pa ni chos gcig las sam/ sku gcig las sam/ byams pa gcig las sam/ zhing gcig las sam/ sems gcig las sam/ byed rgyu gcig las khong du chud par bya ba ma yin gyi/thams cad kyi rjes su song ba khong du chud par bya ba'i phyir ro/ /kye rgyal ba'i sras dag 'di lta ste/ dper na nam mkha'i khams ni thams cad kyi rjes su song ba ste/ gzugs can dang gzugs can ma yin pa'i dngos po thams cad kyi rjes su song yang gang du yang song ba med la gang nas kyang 'ong ba med de/de ci'i phyir zhe na/ nam mkha'i lus med pa'i phyir ro/ /kye rgyal ba'i sras dag de bzhin du de bzhin gshegs pa rnams kyi sku yang thams cad du song ba ste/ sems can thams cad dang chos thams cad dang zhing thams cad kyi rjes su song yang gang du yang song ba med la gang nas kyang 'ong ba med de/de ci'i phyir zhe na/ de bzhin gshegs pa rnams kyi sku ni lus med pa'i phyir ro/ /'on kyang sems can gyi rnam par rig pa la brten nas de bzhin gshegs pa rnams kyi gzugs kyi sku snang bar yang 'gyur te/ kye rgyal ba'i sras dag byang chub sems dpa' sems dpa' chen pos 'jug pa'i sgo dang po de bzhin gshegs pa dgra bcom pa yang dag par rdzogs pa'i sangs rgyas rnams kyi sku ston pa khong du chud par bya'o zhes bya ba la sogs pa 'jug pa'i sgo rnam pa bcu gsungs pa bzhin du blta bar bya'o//de bzhin gshegs pa rnams kyi sku ston pa bstan pa'i tshig gi don la sogs pa bshad zin to// //de'i 'og tu de bzhin gshegs pa rnams kyi gsung brjod pa bstan pa'i tshig gi don la sogs pa bshad par bya ste/ gsung brjod pa zhes bya ba ni chos kyi sku'i byin gyi rlabs las byung ba gzugs kyi sku rnam pa gnyis las gdul bya rnams kyi bsam pa ji lta ba bzhin du sde snod gsum bstan pa'i gsung 'byung ba'o//de'i phyir de bstan pa'i dbang du mdzad nas/ bcom ldan 'das de bzhin gshegs pa'i byin gyi rlabs kyi skus gsung gang dag brjod pas zhes bya ba la sogs pa gsungs te/ 'di man chad ni 'dul ba sde snod gdags pa la shin tu rmongs pa rnams kyi gnyen po de ma nor bar bstan pa ston to//de la de bzhin gshegs pa'i byin gyi rlabs kyis skus zhes bya bas ni chos kyi skus byin gyis brlabs pas byung ba gzugs brnyan gyi sku rnam pa gnyis so/ /gdul ba'i khams zhes bya ba ni rang bzhin gyis gnas pa'i rigs dang ldan pa'i sems can gyi khams rnam par dag pa thag ring ba las bye brag tu 'byung ba ste/yang dag par bsgrub pa'i rigs dang ldan pa'i gdul ba'i khams rnam par dag pa thag nye ba la bya'o/ /yongs su ma smin pa zhes bya ba ni 'dod chags dang / zhe sdang dang /gti mug dang / nga rgyal la sogs pa shas che bas da dung yongs su smin pa chung ngu dang / 'bring dang / chen po gang la yang mi gnas pa'o/ /yongs su smin par mdzad la zhes bya ba ni mi sdug pa dang / byams pa dang / rten cing 'brel par 'byung ba dang / khams rab tu dbye ba la sogs pa'i dmigs pas yongs su smin pa chung ngu dang /'bring dang / chen po la gnas par mdzad pa'o/ /yongs su smin pa zhes bya bas ni yongs su smin pa chung ngu dang / 'bring dang / chen po la gnas pa de'i mjug thogs su rnam par grol bar byar rung ba'o dmigs pa de nyid kyis zhes bya ba ni mi sdug pa dang /byams pa dang / rten cing 'brel par 'byung ba dang / khams rab tu dbye ba'i dmigs pa la sogs pa gang gis su smin par gyur pa de nyid kyis so/ /rnam par grol bar mdzad pa zhes bya ba ni skal ba ji lta ba bzhin du theg pa gsum gyi lam gyis rnam par grol ba chung ngu dang /'bring dang / chen po thob par mdzad pa ste/ dper na 'dod chags dang / zhe sdang dang / gti mug dang / nga rgyal la sogs pa'i shas che ba'i gdul bya mdzes dga' dang / sor phreng dang / lteng rgyas 'od srungs dang / rgyal po chen po ka pi na la sogs pa mi sdug pa dang /byams pa dang / rten cing 'brel par 'byung ba dang / khams rab tu dbye ba'i dmigs pa la sogs pas yongs su smin par mdzad nas dmigs pa de nyid kyis rnam par grol bar mdzad pa la sogs pa lta bu'o/ /gsung brjod pa du zhig brjod par mdzad lags zhes bya ba ni gsung gi yan lag mtha' yas mod kyi sde snod bsdu ba'i tshul khrims gsung brjod pa du zhig brjod par mdzad lags zhes zhus pa yin no//'jam dpal de bzhin gshegs pa'i gsung brjod pa ni gsum po 'di dag yin te/ mdo sde brjod pa dang / 'dul ba brjod pa dang /ma mo brjod pa'o zhes bya ba yang sde snod bsdu ba'i tshul khrims rnam pa gsum du bstan pa yin no/ /mdo sde dang / 'dul ba dang / ma mo'i rnam grangs dang / nges pa'i tshig dang / rab tu dbye ba mtha' yas pa dag las gang brjod kyang rung ste/ re re zhing yang 'jug pa'i sgo rnam pa bcu bcus khong du chud par bya ste/de yang 'phags pa de bzhin gshegs pa skye ba 'byung ba bstan pa'i mdo las/ de skad ces smras pa dang / byang chub sems dpa' sems dpa' chen po de bzhin gshegs pa'i rigs su byung ba'i dpal gyis/ byang chub sems dpa' sems dpa' chen po kun tu bzang po la 'di skad ces smras so//kye rgyal ba'i sras byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas kyi gsung brjod pa ji ltar khong du chud par bya/ de skad ces smras pa dang / byang chub sems dpa' sems dpa' chen po kun tu bzang pos byang chub sems dpa' sems dpa' chen po de bzhin gshegs pa'i rigs su byung ba'i dpal la 'di skad ces smras so//kye rgyal ba'i sras byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas rnams kyi gsung brjod pa ni dbyangs kyi dkyil 'khor tshad med pas khyab pa'i phyir thams cad kyi rjes su song bar khong du chud par bya'o//chos bstan pas mgu bar mdzad pa'i phyir sems can thams cad bsam pa ji lta ba bzhin du yang dag par tshim par mdzad par khong du chud par bya'o//sems rab tu tshim par mdzad pas 'khor gyi dkyil 'khor thams cad mos pa ji lta ba bzhin du mgu bar mdzad par khong du chud par bya'o/ /dus las mi 'da' ba'i phyir dus ji lta ba bzhin du mgu bar mdzad par khong du chud par bya'o/ /brag ca dang 'dra ba'i phyir rtag tu skye ba med pa dang 'gag pa med par khong du chud par bya'o//sems can gyi las nye bar bsags pa brjod par mdzad pa'i phyir bdag po med par khong du chud par bya'o/ /gting dpag dka' ba'i phyir zab pa dang ldan par khong du chud par bya'o/ /chos kyi dbyings la nges par rtogs pa'i phyir mi choms par khong du chud par bya'o//chos kyi dbyings la yang dag par gzhol ba'i phyir rgyun mi 'chad par khong du chud par bya'o/ /shin tu mthar thug pa'i phyir bskyod du med par khong du chud par bya ste/ de bzhin gshegs pa rnams kyi gsung brjod pa ni bdag po yod pa'ang ma yin/ bdag po med pa'ang ma yin/rnam par rig pa yod pa'ang ma yin/ rnam par rig pa med pa'ang ma yin par khong du chud par bya'o/ /de ci'i phyir zhe na/ rgyal ba'i sras dag 'di lta ste dper na 'jig rten gyi khams 'jig par 'gyur ba'i tshe chos nyid kyis thob pas sgra skad chen po bzhi 'byung ba de dag ni bdag po med pa bdag gi med pa 'dzin pa med pa ste/bzhi gang zhe na/ kye rgyal ba'i sras dag 'jig rten gyi khams 'jig par 'gyur ba'i tshe chos nyid kyis thob pas kye ma grogs po dag bsam gtan dang po ni bde bar 'dod pa dang / gnod sems dang bral ba ste/ 'dod pa'i khams las yang dag par 'da' bar 'gyur ba'o zhes de lta bu'i sgra skad chen po dang po de 'byung ste/ sems can rnams kyis sgra de thos nas bsam gtan dang po bsgrubs te/ 'dod pa'i khams las yang dag par 'das nas tshangs pa'i 'jig rten du skye'o/ /de nas kyang chos nyid kyis thob pas kye ma grogs po dag bsam gtan gnyis pa ni bde ba rtog pa med pa dpyod pa med pa ste/tshangs ris kyi lha las yang dag par 'da' bar 'gyur ba'o zhes de lta bu'i sgra skad chen po gnyis po de 'byung ste/ sems can rnams kyis sgra de thos nas bsam gtan gnyis pa bsgrubs te/tshangs ris kyi lha las yang dag par 'das nas 'od gsal gyi lha rnams dang skal ba mnyam par skye'o/ /de nas kyang chos nyid kyis thob pas kye ma grogs po dag bsam gtan gsum pa ni bde ba dga' ba med pa ste/ 'od gsal gyi lha las yang dag par 'da' bar 'gyur ro zhes de lta bu'i sgra skad chen po de 'byung ste/sems can rnams kyis sgra de thos nas bsam gtan gsum pa bsgrubs te/ 'od gsal gyi lha las yang dag par 'das nas dge rgyas kyi lha rnams dang skal ba mnyam par skye'o/ /de nas kyang chos nyid kyis thob pas kye ma grogs po dag bsam gtan bzhi pa ste/ dge rgyas kyi lha las yang dag par 'da' bar 'gyur ba'o zhes de lta bu'i sgra skad chen po bzhi po de 'byung ste/ sems can rnams kyi sgra de thos nas bsam gtan bzhi pa bsgrubs te / dge rgyas kyi lha las yang dag par 'das nas 'bras bu che ba'i lha rnams dang skal ba mnyam par skye'o/ / kye rgyal ba'i sras dag de ltar 'jig rten gyi khams 'jig par 'gyur ba'i tshe chos nyid kyis thob pas sgra skad chen po bzhi 'byung ba de dag ni bdag po med pa bdag gi med pa 'dzin pa med kyang sgra de dag ni yon tan tshad med pa de dag dang ldan pa yin no/ /kye rgyal ba'i sras dag de bzhin du de bzhin gshegs pa rnams las chos nyid kyis thob pas de bzhin gshegs pa'i gsung gi sgra skad chen po bzhi 'byung ba de dag kyang bdag po med par rjod par byed pa med pa ma spros pa ma blangs pas 'khor ba yin te/bzhi gang zhe na/ 'di lta ste/ chos nyid kyis thob pas kye ma grogs po dag 'du byed 'di dag thams cad ni sdug bsngal ba'o//sems can dmyal ba dang dud 'gro'i skye gnas ni sdug bsngal ba'o/ /gshin rje'i 'jig rten ni sdug bsngal ba'o/ /bsod nams ma byas pa ni sdug bsngal ba'o/ /bdag gir 'dzin pa ni sdug bsngal ba'o/ /sdig pa'i las spyod pa ni sdug bsngal ba ste/lha dang mir skye ba'i phyir dge ba'i rtsa ba dag skyed cig/ 'phags pa'i gnas yongs su zung shig / mi khom par skye ba rnam par spongs shig ces de lta bu'i sgra skad chen po dang po de 'byung ste/ sems can rnams kyis sgra de thos nas de bzhin nyid du sgrub par byed cing de bzhin nyid du bsgrubs nas dge ba'i rtsa ba spyod par byed de /dge ba'i rtsa ba spyod pa la zhugs pa na mi khom par skye ba yongs su spong bar byed cing lha dang mi'i phun sum tshogs pa yongs su 'dzin par byed do/ /de nas yang chos nyid kyis thob pas kye ma grogs po dag 'du byed 'di dag thams cad ni sdug bsngal ba kun tu 'bar ba rab tu 'bar ba/kun tu rab tu 'bar ba / kun nas me lcer gyur pa/ me lce gcig tu gyur pa lcags kyi thu lum dang 'dra bar mi rtag par 'gyur ba'i chos can no/ /'dus ma byas ni zhi ba dang gdung ba med pa bsil bar gyur pa yongs su gdung ba thams cad dang bral ba'o zhes de lta bu'i sgra skad chen po gnyis pa de 'byung ste/sems can rnams kyis sgra de thos nas dge ba'i chos la mngon par brtson par byed cing mngon par brtson pa na nyan thos kyi theg pa la sgra'i rjes su 'gro ba'i bzod pa thob par gyur to/ /de nas yang chos nyid kyis thog pas kye ma grogs po dag nyan thos kyi theg pa 'di ni chung ba gzhan las nyan pa'i sgra'i rjes su 'gro ba'o//de bas ches rgya che ba'i theg pa yod de / 'di lta ste/ rang sangs rgyas kyi theg pa slob dpon med par rang gis mngon par rdzogs par byang chub pa'o zhes de lta bu'i sgra skad chen po gsum pa de 'byung ste/sems can ches rgya chen po la mos pa rnams kyis sgra de thos nas nyan thos kyi theg pa spangs te/ rang sangs rgyas byang chub par bya ba'i phyir nan tan du byed do/ /de nas yang de bzhin gshegs pa las chos nyid kyis thob pas kye ma grogs po dag theg pa chen po ni nyan thos dang rang sangs rgyas kyi theg pa las yang dag par 'das pa/byang chub sems dpa'i spyod pa dang mthun pa byang chub sems dpa'i pha rol tu phyin pa drug rgyun mi 'chad pa/ 'khor ba dpag tu med pa yongs su 'dzin pa bsod nams dang ye shes kyi tshogs mtha' yas pa yongs su rdzogs pa ste /nyan thos kyi theg pa ni gzhan gyi sgra'i rjes su 'brang ba'o/ /rang sangs rgyas kyi theg pa ni chung ngu ba'o/ /theg pa chen po ni theg pa dam pa/ theg pa gtso bo/ /theg pa rab mchog/ theg pa bla na med pa/ sems can thams cad nye bar 'tsho ba'i theg pa'o zhes de lta bu'i sgra skad chen po bzhi pa de 'byung ste/sems can ches shin tu rgya chen po la mos pa dbang po rno ba sngon dge ba'i rtsa ba bskyed pa / de bzhin gshegs pa'i byin gyi rlabs kyis brlabs pa rnams kyis sgra de thos nas lhag pa'i bsam pas de bzhin gshegs pa nyid dang /rang 'byung nyid kyi phyir bla na med pa yang dag par rdzogs pa'i byang chub tu sems skyed par byed de/ de bzhin gshegs pa'i gsung de yang sku las byung ba ma yin/ thugs las byung ba ma yin mod kyi/ sems can rnams kyi dge ba'i las shin tu bsags pa rnam par rig par yang mdzad pa'i phyir ro//kye rgyal ba'i sras dag byang chub sems dpa' sems dpa' chen pos 'jug pa'i sgo dang po des de bzhin gshegs pa dgra bcom pa yang dag par rdzogs pa'i sangs rgyas rnams kyi gsung brjod pas khong du chud par bya'o zhes bya ba la sogs pa 'jug pa'i sgo rnam pa bcu gsungs pa bzhin du blta bar bya'o//de nas 'phags pa 'jam dpal gyis mdo sde dang / 'dul ba dang / ma mo'i mtshan nyid rgya cher bstan pa'i dbang du mdzad nas/ bcom ldan 'das mdo sde ni gang lags/ 'dul ba ni gang lags/ ma mo ni gang lags zhes bya ba zhus so//'di lta ste/ dngos po bzhi 'am zhes bya bas ni bye brag tu rtogs pa'am/ khas len pa dang sgrub pa dang mthar thug pa ston te/ de tsam gyis thams cad bsdus pa yin no/ /dgu 'am zhes bya bas ni phung po rnams dang / skye mched rnams dang / khams rnams dang /zas rnams dang / bden pa rnams dang / rten cing 'brel par 'byung ba rnams dang / dkon mchog gsum po sangs rgyas dkon mchog dang / chos dkon mchog dang / dge 'dun dkon mchog ston te rim bzhin du sbyar ro/ /nyi shu rtsa dgu zhes bya bas ni kun nas nyon mongs pa dang rnam par byang ba'i phyogs kyi dngos po bsdu ba ston to//dbang du byas nas zhes bya bas ni de dag la brten nas zhes bya ba'i tha tshig ste/ de yang skabs kha cig tu ni dngos po gcig la brten nas so/ /kha cig tu ni gnyis la brten nas so/ /kha cig tu ni mang po la brten nas te mdo sde thams cad dang ci rigs par sbyar ro//chos rnams kyi zhes bya bas ni rang dang spyi'i mtshan nyid 'dzin pa'i chos kun nas nyon mongs pa dang rnam par byang ba'i rab tu dbye ba 'di lta ste/ gzugs can rnams dang / gzugs can ma yin pa rnams dang / bstan du yod pa rnams dang /bstan du med pa rnams dang / thogs pa dang bcas pa rnams dang / thogs pa med pa rnams dang / bstan du med pa thogs pa med pa rnams dang / bstan du yod pa thogs pa dang bcas pa rnams dang / zag pa dang bcas pa rnams dang / zag pa med pa rnams dang / nyon mongs pa dang bcas pa rnams dang /nyon mongs pa can ma yin pa rnams dang / zang zing dang bcas pa rnams dang / zang zing med pa rnams dang / zhen pa la brten pa rnams dang / mngon par 'byung ba la brten pa rnams dang / 'jig rten pa rnams dang / 'jig rten las 'das pa rnams dang /rtogs pa rnams dang / ma rtogs pa rnams dang / 'dus byas rnams dang / 'dus ma byas rnams dang / shes par bya ba rnams dang / rnam par shes par bya ba dang / dmigs pa rnams dang / rnam par gnas pa 'dren pa'i tshogs rnams dang / rnam par smin pa dang bcas pa rnams dang /rnam par smin pa rnams dang / rgyu dang bcas pa rnams dang / rgyu med pa rnams dang / 'bras bu dang bcas pa rnams dang / 'bras bu med pa rnams dang / rten cing 'brel par 'byung ba'i chos rnams dang / nang gi rnams dang / phyi rol gyi rnams dang /ming dang gzugs kyis bsdus pa rnams dang / zin pa rnams dang / ma zin pa rnams dang / 'byung ba chen po rnams rgyur byas pa dang / 'byung ba chen po rnams rgyur byas pa ma yin pa dang / srid pa rnams dang / srid pa ma yin pa rnams dang / bla na yod pa rnams dang / bla na med pa rnams dang / bsgom par bya ba rnams dang /'das pa rnams dang / ma 'ongs pa rnams dang / da ltar byung ba rnams dang / 'dod pa dang ldan pa rnams dang / gzugs dang ldan pa rnams dang / gzugs med pa dang ldan pa rnams dang / dge ba rnams dang / mi dge ba rnams dang / lung du ma bstan pa rnams dang /slob pa rnams dang / mi slob pa rnams dang / slob pa yang ma yin mi slob pa yang ma yin pa rnams dang / mthong bas spang bar bya ba rnams dang / bsgoms pas spang bar bya ba rnams dang / spang bar bya ba ma yin pa rnams dang / zab mo mthong bar dka' ba'i chos rnams kyi rab tu dbye ba rnams par gzhag pa rnams kyi'o//dngos po bsdu ba tsam ngas gang du bstan pa de ni mdo sde yin no zhes bya bas ni don mdor bstan pas na mdo sde zhes bya'o/ /gsung rab tu gtogs pa yan lag bcu gnyis pa gleng gzhi'i sde dang / gtan la dbab par bstan pa'i sde gnyis ma gtogs pa lhag ma bcu dang /spyir ci rigs pas sbyar ro/ /dngos po bzhi gang zhe na/ 'di lta ste zhes bya ba la sogs pa'i dngos po zhes bya bas ni bye brag tu rtogs pa bstan te/ de yang byang chub sems dpa' thos pa yongs su tshol ba ni ci zhig tshol zhe na/ mdor bsdu na byang chub sems dpa'i sde snod dang /nyan thos kyi sde snod dang / phyi rol gyi bstan bcos dang / 'jig rten pa'i bzo dang / las kyi gnas zhes bya ba rnams tshol lo/ /de la byang chub sems dpa'i sde snod ni gsung rab tu gtogs pa yan lag bcu gnyis las shin tu rgyas pa'i sde zhes bya ba yin no//nyan thos kyi sde snod ni yan lag thams cad lhag ma rnams yin no/ /phyi rol gyi bstan bcos ni rnam pa gsum ste/ gso ba'i bstan bcos dang / gtan tshigs kyi bstan bcos dang / sgra'i bstan bcos so/ /'jig rten pa'i bzo dang las kyi gnas shes pa ni rnam pa bcu gnyis te/snoms su byas pa'i bzo dang / nyo tshong gi bzo dang / rgyal po'i zhabs 'bring bya ba'i bzo dang / yi ge dang rtsis dang shod 'god pa dang grangs dang lag rtsis kyi bzo dang / ltas su lta ba'i bzo dang / blo gros kyi bzo dang / brdungs pa'i bzo dang / bskyed pa'i bzo dang /sbyor ba'i bzo dang / g.yos byas pa'i bzo dang / rol mo'i bzo'o/ /byang chub sems dpas btsal bar bya ba de dag kyang mdor bsdu na rig pa'i gnas lnga po nang gi rig pa dang / gso ba'i rig pa dang / gtan tshigs kyi rig pa dang / sgra'i rig pa dang / bzo dang las kyi gnas kyi rig pa dag yin te/byang chub sems dpa' thos pa yongs su tshol bas thos pa'i dngos por rig pa'i gnas lnga po de dag btsal na mkhas par bya ba sna tshogs dag bye brag tu gtogs par 'gyur ba de ni bye brag tu rtogs pa bstan to/ /skyabs su 'gro ba'i dngos po zhes bya bas ni khas len pa bstan te/de yang byang chub sems dpa' gsum la skyabs su 'gro bar khas len pas ni gnas lnga po lus kyi las yongs su dag pa dang / ngag gi las yongs su dag pa dang / yid kyi las yongs su dag pa dang / sems can rnams la snying rje che ba dang / bla na med pa dang ldan pa nyid kyis skyabs kyi 'os nye bar brtags nas skyabs su 'gro bar bya ste/de la skyabs su 'gro bar bya ba ni du/ rgyu gang gis na de dag nyid la skyabs su 'gro/ ji tsam gyis na skyabs su song ba yin/ skyabs su song bas ni ji ltar bsgrub par bya ste / skyabs su song ba'i phan yon ni gang zhe na/skyabs su 'gro bar bya ba ni gsum ste/ sangs rgyas dkon mchog dang / chos dkon mchog dang / dge 'dun dkon mchog go/ /rgyu bzhis na de dag nyid la skyabs su 'gro ba ste / sangs rgyas dkon mchog ni shin tu dul ba'i bdag nyid yin la rnam pa thams cad du gdul bya 'dul ba'i thabs la mkhas pa dang /thugs rje che ba dang / zang zing gi mchod pa thams cad kyis mnyes par bya ba ma yin pa dang / bsgrub pa'i mchod pas mnyes par bya ba yin pas so/ /de lta bus bstan pa'i chos dkon mchog dang / de'i gsung las skyes pa'i dge 'dun dkon mchog kyang rnam pa de lta bu kho nas skyabs su 'os pa yin no//rgyu bzhis na skyabs su song ba yin te/ yon tan shes pa dang / khyad par shes pa dang / khas blangs pa dang / skyabs gzhan mi smra bas so/ /skyabs su song ba'i yang dag pa'i sgrub pa ni rnam pa bzhi ste/skyes bu dam pa la legs par brten pa dang / dam pa'i chos mnyan pa dang / tshul bzhin yid la bya ba dang / chos kyi rjes su mthun pa'i chos sgrub pa'o/ /gzhan yang yang dag pa'i sgrub pa rnam pa bzhi ste/ dbang po mi rgod par bya ba dang / bslab pa'i gzhi yang dag par blang bar bya ba dang /sems can rnams la snying rje bar bya ba dang / dus dus su dkon mchog mchod pa la brtson par bya'o/ /skyabs su song ba'i phan yon ni bzhi ste/ bsod nams rgya chen po thob pa dang / dga' ba dang mchog tu dga' ba rgya chen po thob pa dang / ting nge 'dzin thob pa dang / rnam par dag pa thob pa'o//gzhan yang phan yon bzhi ste/ bsrung ba chen po dang ldan pa dang / log par mos pa'i sgrib pa thams cad bsrabs pa dang yongs su zad pa dang yongs su rtogs pa thob pa dang / dam pa yang dag par song ba skyes bu dam pa rnams kyi nang du bgrang bar gyur pa dang / ston pa dang tshangs pa mtshungs par spyod pa rnams dang bstan pa la mngon par dad pa'i lha rnams kyi yid du 'ong zhing dga' bar 'gyur ba'o//de ltar byang chub sems dpa' gsum la skyabs su 'gro ba ni skyabs su gzhan khas mi len par dkon mchog gsum la skyabs su 'gro bar khas len pa'i phyir des ni khas len pa ston to/ /bslab pa'i dngos po zhes bya bas ni sgrub pa bstan te /de yang byang chub sems dpa' rnams gang la slob pa dang / ji ltar slob pa dang / gang dag slob pa de dag thams cad gcig tu bsdus pa ni byang chub sems dpa'i spyod pa zhes bya ste/ de nyid bslab pa'i dngos po yang yin sgrub pa'ang yin no/ /de la byang chub sems dpa' rnams gang la slob ce na/gnas bdun la slob ste/ bdag gi don dang / gzhan gyi don dang / de kho na'i don dang / mthu dang / sems can yongs su smin par bya ba dang / rang gi sangs rgyas kyi chos yongs su smin par bya ba dang / bla na med pa yang dag par rdzogs pa'i byang chub la slob pa'o//de la bdag gi don gang zhe na/ rnam pa bcu ste/ 'ba' zhig pa dang / gzhan dang 'brel ba dang / phan pa'i rgyu dang / bde ba'i rgyu dang / rgyur bsdus pa dang / 'bras bur bsdus pa dang / tshe 'di pa dang / tshe rabs gzhan pa dang / gtan du ba dang / gtan du ba ma yin pa'o/ / gzhan gyi don gang zhe na/ de yang rnam pa bcu ste/ bdag gi don gyi gnas skabs su bstan pa bcu po de dag nyid gzhan gyi don du sbyar ba yin no/ /de kho na'i don gang zhe na/ mdor bsdu na rnam pa gnyis te/ ji lta ba bzhin du yod pa nyid las brtsams te/ chos rnams kyi yang dag pa nyid gang yin pa dang /ji snyed yod pa nyid las brtsams te/ chos rnams kyi thams cad mkhyen pa nyid gang yin pa ste / de ltar yang dag pa nyid dang thams cad nyid ni chos rnams kyi de kho na'i don mtha' dag yin par rig par bya'o/ /de yang rab tu dbye na rnam pa bzhi ste/ 'jig rten gyi grags pa'i de kho na dang / rigs pas grags pa'i de kho na dang / nyon mongs pa'i sgrib pa rnam par dag pa'i shes pa'i spyod yul gyi de kho na dang / shes bya'i sgrib pa rnam par dag pa'i shes pa'i spyod yul gyi de kho na'o/ /de dag las dang po gnyis ni tha ma'o/ /gsum pa ni 'bring / bzhi pa ni mchog yin par rig par bya'o//mthu gang zhe na/ rnam pa lnga ste/ mngon par shes pa'i mthu dang / chos kyi mthu dang / lhan cig skyes pa'i mthu dang / thun mong gi mthu dang / thun mong ma yin pa'i mthu'o/ /sems can yongs su smin par bya ba gang zhe na/ de yang rnam pa drug ste/ ngo bo nyid dang / yongs su smin par bya ba'i gang zag dang /yongs su smin pa'i rnam par dbye ba dang / yongs su smin par bya ba'i thabs dang / yongs su smin par bya ba'i gang zag dang / yongs su smin par byed pa'i gang zag gi mtshan nyid do/ /rang gi sangs rgyas kyi chos yongs su smin par byed pa gang zhe na/ de yang rnam pa drug ste/sems can yongs su smin par bya ba'i thabs su bstan pa drug po de dag nyid rang gi sangs rgyas kyi chos yongs su smin par bya bar sbyar ba yin no/ /bla na med pa yang dag par rdzogs pa'i byang chub gang zhe na/ rnam pa lnga ste/ ngo bo nyid dang / dam par gyur pa dang / yon tan dang /'byung ba dang / khyad par gyis rig par bya'o/ /de las ngo bo nyid ni spangs pa phun sum tshogs pa dang / ye shes phun sum tshogs pa dang / sangs rgyas kyi chos ma 'dres pa dang / che ba nyid thams cad dang ldan pa'o/ /dam par gyur pa ni dam pa rnam pa bdun po sku dam pa dang / sgrub pa dam pa dang /phun sum tshogs pa dam pa dang / ye shes dam pa dang / mthu dam pa dang / spangs pa dam pa dang / gnas pa dam pa dang ldan pa'o/ /yon tan ni de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/'jig rten mkhyen pa/ skyes bu 'dul ba'i kha lo sgyur ba / bla na med pa/ lha dang mi rnams kyi ston pa sangs rgyas bcom ldan 'das zhes bya'o/ /'byung ba ni 'jig rten gyi khams gcig tu gnyis mi 'byung ba dang / 'jig rten gyi khams thams cad du don mdzad pa dang / 'jig rten thams cad na sangs rgyas 'byung ba srid pa la sogs pa'o//khyad par ni sangs rgyas thams cad khyad par bzhi po sku tshe dang / mtshan dang / gdung dang / gzugs kyi sku ma gtogs par thams cad mtshungs par mnyam ste/ khyad par med pa'o/ /de la byang chub sems dpa' rnams ji ltar slob ce na/ de yang rnam pa bdun te mos pa mang bar bya ba dang / chos btsal bar bya ba dang / chos bstan par bya ba dang / chos kyi rjes su mthun pa'i chos bsgrub par bya ba dang / legs par gdams shing rjes su bstan par bya ba dang / legs par gdams shing rjes su bstan pa la gnas par bya ba dang / thabs kyis yongs su zin pa'i lus dang / ngag dang yid kyi las can du bya'o/ /de la ji ltar mos pa mang bar bya zhe na/ byang chub sems dpa' rnams kyi mos pa'i gnas brgyad po mchog gi gnas dang / rgya che ba'i gnas dang / zab pa'i gnas dang / rgyu rigs pa'i gnas dang / 'bras bu rigs pa'i gnas dang /rtogs par bya ba'i gnas dang / bsgrub par bya ba'i gnas dang / bshad par bya ba'i gnas dang / dkon mchog gsum gyi yon tan dang / sangs rgyas dang byang chub sems dpa'i mthu dang / de kho na'i don dang / lam la gnas pa dang / 'bras bu thob pa dang / bla na med pa'i byang chub dang byang chub sems dpa'i bslab pa dang /legs par gsungs pa'i chos mdo'i sde la sogs pa byang chub sems dpa' rnams kyi mos pa'i khams sangs rgyas kyi chos rnams la thob par nus par yid ches pas rab tu phye bas mos pa mang bar bya'o/ /ji ltar chos btsal bar bya zhe na/ byang chub sems dpa' tshol bas ci zhig tshol/ji ltar tshol/ ci'i phyir tshol zhe na/ mdor bsdu na byang chub sems dpa' ni byang chub sems dpa'i sde snod dang / nyan thos kyi sde snod dang / phyi rol gyi bstan bcos dang / 'jig rten pa'i bzo dang / las kyi gnas shes pas bsdus pa rig pa'i gnas lnga po nang gi rig pa dang /gso ba'i rig pa dang / gtan tshigs kyi rig pa dang / sgra'i rig pa dang / bzo dang las kyi gnas kyi rig pa dag tshol lo/ /ji ltar tshol zhe na/ mdor bsdu na byang chub sems dpa' ni rnam pa gsum gyis chos tshol te/ gus pa chen po nye bar gzhog pa dang / 'gro ba phun sum tshogs pa dang /nyan pa phun sum tshogs pas so/ /ci'i phyir tshol zhe na/ mdor bsdu na byang chub sems dpa'i rig pa'i gnas lnga po de dag tshol ba ni bla na med pa'i byang chub kyi ye shes kyi tshogs chen po yongs su rdzogs par bya ba'i phyir tshol lo/ /ji ltar chos bstan par bya zhe na/ byang chub sems dpas chos ston pa ci zhig ston/ji ltar ston/ ci'i phyir ston zhe na/ gang btsal ba de nyid ston to/ /gang gi phyir btsal ba de nyid kyi phyir ston to/ /ji ltar ston zhe na/ rnam pa gnyis kyis ston te/ mthun pa'i gtam brjod pa dang / yongs su dag pas ston to/ /ji ltar chos kyi rjes su mthun pa'i chos bsgrub par bya zhe na/mdor bsdu na rnam pa lngar rig par bya ste/ ji ltar btsal ba dang ji ltar gzung ba'i chos de dag nyid lus dang ngag dang yid kyi rjes su sgrub pa dang / legs par sems pa dang / legs par bsgom pa dang / bcom ldan 'das kyis chos gang dag lus dang ngag dang yid kyis byed du ma gnang ba de dag yongs su spang ba dang /gang dag lus dang ngag dang yid kyis byed du gnang ba de dag la so sor brten par byed pa yin no/ /ji ltar legs par gdams shing rjes su bstan par bya zhe na/ gdams ngag ni mdor bsdu na rnam pa brgyad du rig par bya ste/byang chub sems dpa' dang de bzhin gshegs pa ni gang la 'dams par mdzad pa de la dang por sems btsal te mkhyen to/ /sems btsal nas dbang po btsal te mkhyen to/ /dbang po btsal nas bsam pa btsal te mkhyen to/ /bsam pa btsal nas bag la nyal btsal te mkhyen to//bag la nyal btsal nas ci rigs par 'jug pa'i sgo spyod pa rnam par sbyong ba'i dmigs pa la 'dzud par mdzad do/ /ci rigs par 'jug pa'i sgor btsud nas legs par ma zin pa rtag par lta ba'i gnyen por dbu ma'i lam ston par mdzad do/ / de nas legs par ma zin pa khyad par lta ba'i mtha'i gnyen por dbu ma'i lam ston par mdzad do/ /de nas ma byas pa dang / ma thob pa dang / ma reg pa dang / mngon sum du ma khyab pa la mngon sum du bya'o snyam pa'i mngon pa'i nga rgyal 'dor du 'jug par mdzad pa'o/ /gdams ngag rnam pa brgyad po de dag kyang mdor bsdu na gnas gsum gyis bsdu bar rig par bya ste/sems mi gnas pa gnas par bya ba'i phyir thog mar dmigs pa la legs par gtong ba'i gnas dang / sems gnas pa la rang gi don thob par bya ba'i phyir thabs kyi lam yang dag par bstan pa'i gnas dang /rang gi don thob pa mthar phyin pa bar ma do'i gnas 'dor du 'jug pa'i gnas kyis te/ de la gdams ngag dang po lnga ni gnas dang por bsdus so/ /bar ma gnyis ni gnas gnyis par bsdus so/ /tha ma ni gnas tha mar bsdus par rig par bya'o/ /rjes su bstan pa gang zhe na/de ni rnam pa lngar rig par bya ste/ kha na ma tho ba dang bcas pa kun du spyod pa dgag pa dang / kha na ma tho ba med pa kun du spyod pa gnang ba dang / dgag pa dang gnang ba'i chos rnams la 'khrul par kun du spyod pa bskul ba dang / yang dang yang du gus par gyur te 'khrul pa la rnyog pa med pa dang /mi mthun pa med pa dang / snum pa'i bsam pa sma dbab pas brtan par byed du gzhug pa dang yang dag par zhugs pa la dgag pa dang / gnang ba'i chos rnams kyi yon tan yang dag pa dang dgag pa bsnyad pas yang dag par dga' bar bya'o/ /rjes su bstan pa lnga po de dag kyang mdor bsdu na dgag pa dang /gnang ba dang / bskul ba dang / sma dbab pa dang / yang dag par dga' bar bya ba yin no/ /ji ltar legs par gdams shing rjes su bstan pa la gnas par bya zhe na/ gdams ngag rnam pa brgyad dang rjes su bstan pa rnam pa lnga po ji skad bstan pas gzhan la gdams shing rjes su bstan par bya ba de dag nyid kyang legs par gnas par bya'o//ji ltar thabs kyis yongs su zin pa'i lus dang ngag dang yid kyi las can bya zhe na/ bsdu ba'i dngos po bzhi'i thabs kyis yongs su zin pa'i lus dang ngag dang yid kyis pha rol tu phyin pa drug dang /bsdu ba'i dngos po bzhi dang / dkon mchog mchod pa dang / dge ba'i bshes gnyen bsten pa dang / tshad med pa bsgom pa dang / byang chub kyi phyogs bsgom pa dang / byang chub sems dpas thams cad slob pa'i las can du bya'o/ /de la gang dag slob ce na/ mdor bsdu na byang chub sems dpas rnam pa bcu po dag slob par byed de/rigs la gnas pa dang / zhugs pa dang / bsam pa ma dag pa dang / bsam pa dag pa dang / yongs su ma smin pa dang / yongs su smin pa dang / nges par zhugs pa ma yin pa dang / nges par zhugs pa dang / skye ba gcig gis thogs pa dang /srid pa tha ma'o / /de la rigs la gnas pa ni byang chub sems dpa'i rigs yang dag par sgrub pa la gnas la sems ma bskyed pa'o/ /zhugs pa'i rigs la gnas pa de nyid slob slob pa na sems skyed par byed pa'o/ /bsam pa ma dag pa ni zhugs pa de nyid ji srid du bsam pa dag pa'i sa la ma zhugs pa'o//bsam pa dag pa ni de nyid bsam pa dag pa'i sa la zhugs pa'o/ /yongs su ma smin pa ni bsam pa dag pa de nyid ji srid du mthar thug par 'gro ba'i sa la ma zhugs pa'o/ / yongs su smin pa ni de nyid mthar thug par 'gro ba'i sa la zhugs pa'o//yongs su smin pa nges par zhugs pa ma yin pa ni yongs su smin pa de nyid ji srid du nges pa dang / spyod pa nges pa'i sa la ma zhugs pa'o/ /nges par zhugs pa ni de nyid nges pa dang spyod pa nges pa'i sa la zhugs pa'o/ /skye ba gcig gis thogs pa ni tshe phyi ma la bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba'o//srid pa tha ma pa'i tshe 'di nyid la gnas bzhin du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba gang yin pa'o/ /de ltar gang la slob pa dang /ji ltar slob pa dang / gang dag slob pa de dag thams cad gcig tu bsdus pa ni byang chub sems dpa'i spyod pa zhes bya ste/ de nyid la bslab pa'i dngos po yin pa'i phyir des ni sgrub pa bstan to/ /byang chub kyi dngos po zhes bya bas ni mthar thug pa bstan no / /bla na med pa yang dag par rdzogs pa'i byang chub kyi dngos po ni rnam pa lngas rig par bya ste/ngo bo nyid dang / mthu dang / thabs dang / 'jug pa dang / ldog pas so/ /de dag gi rnam par dbye ba ni sngar 'bras bu phun sum tshogs pa'i skabs su bshad zin te/ de ni gnas gyur pa yang dag par grub pa chos kyi sku'i mtshan nyid yin pa'i phyir de ni mthar thug pa bstan to//de la ci'i phyir thos pa dang skyabs su 'gro ba dang bslab pa dang byang chub kyi dngos po de bzhi tshoms gcig tu mdzad ce na/ de tsam gyis thams cad bsdus pa'i phyir te/ thos pas bye brag tu rtogs pa dang / skyabs su 'gro ba khas blangs pa dang /bslab pas bslabs pa dang / byang chub kyi mthar thug par bstan pa'i rim pa des chos 'di pa'i dngos po sems bskyed pa nas tha mar 'bras bu mchog thob pa'i bar thams cad bsdus pa'i phyir ro/ /de'i 'og tu dngos po dgu gang zhe na zhes bya ba la/ sems can du gdags pa'i dngos po zhes bya bas ni phung po rnams bstan te/de la phung po ni lnga ste/ gzugs kyi phung po dang / tshor ba'i phung po dang / 'du shes kyi phung po dang / 'du byed kyi phung po dang / rnam par shes pa'i phung po'o/ /de dag gi rnam par gzhag pa ni rnam pa drug gis bstan te/ ngo bo nyid dang /don dang / rab tu dbye ba dang / go rims dang / bsdu ba dang / rten gyis so/ /de la phung po rnams kyi ngo bo nyid ni rnam par gzhag pa gang zhe na/ gzugs kyi phung po'i ngo bo nyid rnam par gzhag pa ni rnam pa bcu gcig ste/ mig la sogs pa reg bya'i mthar thug pa'i bar gyi skye mched bcu dang /chos kyi skye mched du gtogs pa'i gzugs so/ /de yang mdor bsdu na 'byung ba chen po bzhi dang / 'byung ba chen po bzhi dag rgyur byas pa ste/ thams cad kyang gzugs su rung ba'i mtshan nyid yin no/ /tshor ba'i phung po'i ngo bo nyid rnam par gzhag pa gang zhe na/de ni rnam pa drug ste/ mig dang / rna ba dang / sna dang / lce dang / lus dang / yid kyi 'dus te reg pa las byung ba'o/ /de yang mdor bsdu na myong ba rnam pa gsum ste/ bde ba dang / sdug bsngal ba dang / sdug bsngal ba yang ma yin bde ba yang ma yin pa'o/ /de yang rnam pa gnyis te/lus kyi dang / sems kyi ste / gzugs can la brten pa ni lus kyi'o/ /gzugs can ma yin pa la brten pa ni sems kyi ste thams cad dang myong ba'i mtshan nyid yin no/ /'du shes kyi phung po'i ngo bo nyid rnam par gzhag pa gang zhe na/ de yang rnam pa drug ste/ mig dang / rna ba dang / sna dang / lce dang / lus dang / yid kyi 'dus te reg pa las byung ba'i 'du shes so/ /de dag kyang rnam pa drug ste/ chung ngu dang / chen por gyur pa dang / tshad med pa dang / ci yang med pa dang / mtshan ma dang bcas pa dang / mtshan ma med pa'o/ /de la chung ngu ni 'dod pa na spyod pa'i'o/ / chen por gyur pa ni gzugs na spyod pa'i'o/ /tshad med pa ni gzugs med pa nam mkha' dang / rnam shes mtha' yas skye mched na spyod pa'i'o/ /ci yang med pa'i skye mched na spyod pa'i ste/ de dag thams cad ni mtshan ma dang bcas pa yin no/ /mtshan ma med pa ni srid pa'i rtse mo dang 'jig rten las 'das pa slob pa dang /mi slob pa'i'o/ /de dag kyang mdor bsdu na rnam pa gnyis te/ 'jig rten pa dang / 'jig rten las 'das pa'i ste/ thams cad kyang kun shes par byed pa'i mtshan nyid yin no/ /'du byed kyi phung po'i mtshan nyid rnam par gzhag pa gang zhe na/de yang rnam pa drug ste/ mig dang / rna ba dang / sna dang / lce dang / lus dang / yid kyi 'dus te reg pa las byung ba'i sems pa'o/ /de yang yul dang mthun par byed pa dang / de dang phrad par byed pa'i mtshan nyid yin no/ /rnam par shes pa'i phung po'i ngo bo nyid rnam par gzhag pa gang zhe na/de ni rnam pa brgyad de/ kun gzhi rnam par shes pa dang / nyon mongs pa can gyi yid dang / 'jug pa'i rnam par shes pa drug go/ /de yang mdor bsdu na dbye ba rnam pa gsum ste/ myong ba'i dbye ba dang / dmigs pa la mtshan mar 'dzin pa'i dbye ba dang /gnas skabs kyi dbye ba'o/ /de la myong ba'i dbye ba ni rnam pa gsum ste/ bde ba dang / sdug bsngal ba dang / sdug bsngal ba yang ma yin bde ba yang ma yin pa'o/ /dmigs pa'i mtshan mar 'dzin pa'i dbye ba ni rnam pa drug ste/ chung ngu dang / chen por gyur pa dang / tshad med pa dang / ci yang med pa dang / mtshan ma dang bcas pa dang / mtshan ma med pa'o/ /gnas skabs kyi dbye ba yang rnam pa gsum ste/ dge ba dang / mi dge ba dang / lung du ma bstan pa'o/ /dbye ba de dag gcig tu bsdus na rnam pa bco brgyad du 'gyur te/ thams cad kyang dmigs pa rnam par rig pa'i mtshan nyid yin te/de ni phung po rnams kyi ngo bo nyid rnam par gzhag pa yin no/ /de la phung po rnams kyi don rnam par gzhag pa gang zhe na/ rnam pa gnyis te/ nges pa'i tshig dang / dgos pa'o/ /de la nges pa'i tshig ni/ ci'i phyir phung po zhes bya zhe na/phung po'i don bstan pa ste/ de yang dus dang / rgyu dang / rnam par grol ba dang / yul tha dad pa'i gzugs la sogs pa mdor bsdus pa nyid kyi phyir bsdu ba dang / bsdus pa'i don ni phung po'i don to/ /de la gzugs gang yin pa ci yang rung ste/ 'das pa dang / ma 'ongs pa dang / da ltar byung ba dang / nang gi dang / phyi rol gyi dang / rags pa dang / cha phra ba dang / ngan pa dang / bzang po dang / thag nye ba dang / thag ring ba dang / tshor ba dang / 'du shes dang / 'du byed dang / rnam par shes pa'i bar yang de bzhin te/ de la 'das pa dang / ma 'ongs pa dang / da ltar byung ba dang zhes bya bas ni dus tha dad pa bstan to/ /nang gi dang phyi rol gyi zhes bya bas ni rgyud tha dad pa bstan to/ /rags pa dang phra ba zhes bya bas ni rnam pa tha dad pa bstan to/ /ngan pa dang bzang po zhes bya bas ni/ 'gro ba tha dad pa bstan to/ /thag nye ba dang / thag ring ba zhes bya bas ni yul tha dad pa bstan te/ de dag gcig tu bsdus pas ni rnam pa thams cad bsdus pa yin pa'i phyir bsdus pa'am/ spungs pa'i don ni phung po'i don to/ /dgos pa ci'i phyir na phung po rnam par gzhag pa yongs su bstan ce na/ phung po rnam par gzhag pa'i dgos pa bstan pa ste/phung po de dag ni bdag nyid sna tshogs mang po yin pa'i phyir 'du byed tsam ste/ de las don gzhan pa'i bdag med par yongs su bstan pa'i phyir phung po rnam par gzhag par rig par bya ste/ de ni phung po rnams kyi don rnam par gzhag pa yin no/ /de la phung po rnams kyi rab tu dbye ba rnam par gzhag pa gang zhe na/gzugs kyi phung po'i rab tu dbye ba rnam par gzhag pa ni rnam pa drug ste/ dngos po dang / mtshan nyid dang / rnam par shes pa gnas pa dang / mi gnas pa dang / rnam par shes pa dben pa dang / mi dben pa dang / 'du shes kyi spyod yul dang mtha'o//de la dngos po'i rab tu dbye ba ni gzugs gang yin pa ci yang rung ste/ de thams cad 'byung ba chen po bzhi dag dang / 'byung ba chen po bzhi rgyur byas pa'o/ /mtshan nyid kyi rab tu dbye ba ni rang dang spyi'i mtshan nyid de/ gzugs kyi rang gi mtshan nyid ni mdor bsdu na dang ba dang dang ba'i dang ba dang /yid kyis bzung ba'i gzugs so/ /spyi'i mtshan nyid ni gzugs su rung ba'i mtshan nyid do/ /rnam par shes pa gnas pa dang / mi gnas pa'i rab tu dbye ba ni mi zad pa'i gzugs gang yin pa de ni rnam par shes pa gnas pa zhes bya ste/ de yang rnam par shes pa dang 'dres pa grub pa dang bde ba gcig pa'i don gyis 'jug pa gang yin pa dang /tshor ba rnams skye ba'i rkyen du gyur pa gang yin pa'o/ /de las bzlog pa gang yin pa de ni ma zin pa ste/ rnam par shes pa mi gnas pa yin par rig par bya'o/ /rnam par shes pa las dben pa dang /mi dben pa'i rab tu dbye ba ni rnam par shes pa las mi dben pa'i gzugs gang yin pa de ni mtshungs pa zhes bya ste/ rnam par shes pa dang mtshungs par don la 'jug pa nyid kyi phyir ro/ /rnam par shes pa las dben pa'i gzugs gang yin pa de ni de dag dang mtshungs pa zhes bya ste/rang gi rgyud dang mtshungs par rjes su 'jug pa nyid kyi phyir ro/ /'du shes kyi spyod yul gyi rab tu dbye ba ni 'du shes gsum po 'di dag ni gzugs la dmigs pa yin te/ gzugs kyi 'du shes dang / thogs pa'i 'du shes dang / sna tshogs kyi 'du shes so//gzugs kyang mtshan nyid gsum ste/ snang ba dang bcas pa'i mtshan nyid dang / yul gnas pa'i mtshan nyid dang / rgyas pa'i mtshan nyid dang / de dag kyang go rims bzhin du 'du shes gsum po dag gi spyod yul du gyur pa yin par blta bar bya'o/ /de la sngon po la sogs pa'i kha dog 'dzin par byed pa ni gzugs kyi 'du shes so//'gro ba thogs pa 'dzin par byed pa ni thogs pa'i 'du shes so/ /skyes pa dang bud med dang khang khyim dang zhing la sogs par nye bar 'dogs pa 'dzin par byed pa ni sna tshogs kyi 'du shes so/ /mtha'i rab tu dbye ba ni mdor bsdu na gzugs kyi mtha' rnam pa gnyis te/khams 'og ma dang bar ma bar mar gtogs pa ste/ 'dod pa na spyod pa dang / gzugs na spyod pa'o/ /de la tshor ba'i phung po'i rab tu dbye ba gang zhe na/ de ni rnam pa lnga ste/ dngos po dang / mtshan nyid dang / rab tu skye ba dang / nye bar brtags pa dang /nges par 'byung ba'o/ /de la dngos po'i rab tu dbye ba ni myong ba nyid dang / myong ba'i gnas dang / mthun pa'i chos rnams so/ /mtshan nyid kyi rab tu dbye ba ni rang dang spyi'i mtshan nyid de/ rang gi mtshan nyid de rang gi mtshan nyid bde ba dang / sdug bsngal ba dang / sdug bsngal ba yang ma yin bde ba yang ma yin pa'i tshor ba'o//spyi'i mtshan nyid ni/ bde ba'i tshor ba ni mtshan nyid brgyud pa'i sdug bsngal nyid kyis sdug bsngal ba dang / sdug bsngal gyi tshor ba ni sdug bsngal gyi sdug bsngal gyis sdug bsngal ba dang / sdug bsngal yang ma yin bde ba yang ma yin pa'i tshor ba ni 'du byed kyi sdug bsngal nyid kyis sdug bsngal ba'i dbang du mdzad nas/gang ci tshor yang rung ste/ de ni 'dir sdug bsngal ba'o zhes gsungs pa'o/ /rab tu skye ba'i rab tu dbye ba ni reg pa bcu drug la tshor ba rnams rab tu skye bar 'gyur ba ste / mig dang / rna ba dang /sna dang / lce dang / lus dang / yid kyi 'dus te reg pa rnams dang / thogs pa'i 'dus te reg pa dang / tshig bla dgas kyi 'dus te reg pa dang / bde ba'i tshor ba dang mthun pa'i 'dus te reg pa dang / sdug bsngal gyi tshor ba dang / mthun pa'i 'dus te reg pa dang / sdug bsngal yang ma yin bde ba yang ma yin pa'i tshor ba dang mthun pa'i 'dus te reg pa dang /rjes su chags pa'i 'dus te reg pa dang / khong khro ba'i 'dus te reg pa dang / reg pa'i 'dus te reg pa dang / ma rig pa'i 'dus te reg pa dang / rig pa yang ma yin ma rig pa yang ma yin pa'i 'dus te reg pa las so//bcu drug po de dag kyang yul 'dzin par byed pa nyid la brten nas ni 'dus te reg pa drug po rnams dang / thogs pa'i 'dus te reg pa rnam par gzhag pa'o/ /yul la rnam par rtog pa nyid la brten nas ni tshig bla dgas kyi 'dus te reg pa rnam par gzhag go//yul myong bar byed pa nyid la brten nas ni bde ba la sogs pa'i tshor ba dang mthun pa'i 'dus te reg pa gsum rnam par gzhag go/ /kun nas nyon mongs pa dang / rnam par byang ba nyid la brten nas rjes su chags pa dang / khong khro ba dang / ma rig pa dang / rig pa dang / rig pa yang ma yin/ma rig pa yang ma yin pa'i 'dus te reg pa rnam par gzhag go/ /nye bar brtags pa'i rab tu dbye ba ni tshor ba nye bar brtags pa rnam pa brgyad de/ rang gi mtshan nyid nye bar brtags pa dang / tshe 'di la 'byung ba'i rgyu nye bar brtags pa dang / de 'gog pa nye bar brtags pa dang /tshe phyi ma la 'byung ba'i rgyu nye bar brtags pa dang / de 'gog pa nye bar brtags pa dang / de gnyis ka las 'byung ba'i rgyu nye bar brtags pa dang / de gnyis ka las 'byung ba nye bar brtags pa dang / rnam par byang ba nye bar brtags pas so / /de dag ni/ mdo las bcom ldan 'das nyag gcig dben par gshegs te/nang du yang dag par 'jog pa la bzhugs pa na thugs la thugs kyi yongs su rtog pa 'di lta bu byung ste/ tshor ba ni gang / tshor ba kun 'byung ba ni gang / tshor ba 'gog pa ni gang / tshor ba kun 'byung bar 'gyur ba'i lam ni gang /tshor ba'i ro myang ba ni gang / tshor ba'i nyes dmigs ni gang / tshor ba la nyes par 'byung ba ni gang snyam nas/ de 'di snyam du dgongs te/ tshor ba ni gsum po 'di dag yin te/ bde ba dang / sdug bsngal ba dang / sdug bsngal ba yang ma yin/ bde ba yang ma yin pa'o//reg pa kun 'byung bas tshor ba kun 'byung ngo / /reg pa 'gags pas tshor ba 'gag go/ /tshor ba la mngon par dga' ba dang / mngon par brjod pa dang / lhag par chags pa dang / lhag par chags shing gnas pa gang yin pa de ni tshor ba kun 'byung bar 'gyur ba'i lam yin no//tshor ba la mngon par dga' ba med pa dang / mngon par mi brjod pa dang / lhag par chags shing mi gnas pa gang yin pa 'di ni tshor ba 'gog par 'gyur ba'i lam yin no/ /tshor ba la brten te bde ba skye ba dang / yid bde ba skye ba gang yin pa de ni tshor ba'i ro myong ba yin no//tshor ba mi rtag pa dang / sdug bsngal ba dang 'gyur ba'i chos can gang yin pa 'di ni tshor ba'i nyes dmigs yin no/ /tshor ba la 'dun pa'i 'dod chags 'dul ba dang / 'dun pa'i 'dod chags spang ba dang / 'dun pa'i 'dod chags las yang dag par 'da' ba gang yin pa 'di ni tshor ba las nges par 'byung ba yin no snyam mo zhes gsungs pa dang go rims bzhin du sbyar ro//nges par 'byung ba'i rab tu dbye ba ni tshor ba'i dbang po lnga las nges par 'byung ba ste/ yid mi bde ba'i dbang po las nges par 'byung ba ni bsam gtan dang po'o/ /sdug bsngal gyi dbang po las nges par 'byung ba ni bsam gtan gnyis pa'o//yid bde ba'i dbang po las nges par 'byung ba ni bsam gtan gsum pa'o/ / bde ba'i dbang po las nges par 'byung ba ni bsam gtan bzhi pa'o/ /btang snyoms kyi dbang po las nges par 'byung ba ni mtshan nyid med pa'i dbyings so/ / de la 'du shes kyi phung po'i rab tu dbye ba rnam par gzhag pa gang zhe na/ de yang rnam pa lnga ste/ dngos po dang / mtshan nyid dang / phyin ci log dang / phyin ci ma log pa dang / yongs su gcod pa'o/ /de la dngos po'i rab tu dbye ba ni dmigs pa mtshan mar 'dzin pa dang / de'i gnas dang mthun pa'i chos rnams so//mtshan nyid kyi rab tu dbye ba ni rang dang spyi'i mtshan nyid de/ rang gi mtshan nyid ni rnam pa drug ste / chung ngu dang / chen por gyur pa dang / tshad med pa dang / ci yang med pa dang / mtshan ma dang bcas pa dang / mtshan ma med par sngar bstan pa bzhin du blta bar bya'o//spyi'i mtshan nyid ni kun shes par byed pa'i mtshan nyid do/ /phyin ci log gi rab tu dbye ba ni byis pa mi mkhas pa rig pa dang ldan pa'i tshul bzhin ma yin pa yid la byed pa/ dmigs pa mi rtag pa la rtag pa dang / sdug bsngal ba la bde ba dang / mi sdug pa la sdug pa dang /bdag med pa la bdag tu mtshan mar 'dzin pa ste/ de ni 'du shes phyin ci log yin no/ /'du shes phyin ci log de yang khyim pa rnams la ni sems phyin ci log tu 'gyur la/ rab tu byung ba 'di las phyi rol pa dag la ni lta ba phyin ci log tu 'gyur ro/ /rnam grangs gzhan yang dngos po bzhi po de dag la log par mtshan mar 'dzin pa gang yin pa de ni 'du shes phyin ci log yin no//yul de la de ltar kun du shes pa'i kun du 'dod chags pa gang yin pa de ni sems phyin ci log yin no/ /phyin ci log gi dngos po de nyid la de ltar kun du shes shing lhag par chags pa'i mngon par shes pa dang /'dod pa dang / ston pa dang / rnam par 'jog pa gang yin pa de ni lta ba phyin ci log yin no/ /phyin ci ma log pa'i rab tu dbye ba ni mdzangs pa mkhas par rig pa dang ldan pa tshul bzhin yid la byed pa/ dmigs pa mi rtag pa dang / sdug bsngal ba la sdug bsngal ba dang /mi sdug pa la mi sdug pa dang / bdag med pa la bdag med do zhes yang dag par mtshan mar 'dzin pa gang yin pa ste/ de ni de'i 'du shes dang / sems dang / lta ba phyin ci ma log pa yin no/ /yongs su gcod pa'i rab tu dbye ba ni rnam pa lnga ste/ yul yongs su gcod pa dang / myong ba yongs su gcod pa dang / brda yongs su gcod pa dang / log par yongs su gcod pa dang / bden pa'i don yongs su gcod pa'o/ /de la yul yongs su gcod pa ni yul la mtshan ma dang mngon rtags su 'dzin pa'o//myong ba yongs su gcod pa ni yul la nges par 'byung ba'i tshor ba 'dzin pa'o/ /brda yongs su gcod pa ni bdag gam gzhan dag la ming ni 'di zhes bya/ rigs ni 'di zhes bya/ rus ni 'di zhes bya ba la sogs pa'i tha snyad du 'dzin pa'o/ /log par yongs su gcod pa ni yul phyin ci log tu 'dzin pa'o//bden pa'i don yongs su gcod pa ni yul la phyin ci ma log par 'dzin pa'o/ /de la 'du byed kyi phung po'i rab tu dbye ba rnam par gzhag pa gang zhe na/ de yang rnam pa lnga ste/ yul dang / gnas skabs dang / kun nas nyon mongs pa dang / rnam par byang ba dang /mngon par 'du byed pa'o/ /de la yul gyi rab tu dbye ba ni sems pa'i tshogs drug po rnams 'du byed du rnam par gzhag pa yin no/ /gnas skabs kyi rab tu dbye ba ni skye ba dang / rga ba la sogs pa sems dang mi ldan pa'i 'du byed rnams kyi rnam par gzhag pa yin no/ /kun nas nyon mongs pa'i rab tu dbye ba ni 'du byed kun nas nyon mongs par byed pa'i nyon mongs pa dang /nye ba'i nyon mongs pa rnams kyi rnam par gzhag pa yin no/ /rnam par byang ba'i rab tu dbye ba ni dad pa la sogs pa rnam par byang ba'i chos rnams kyi rnam par gzhag pa yin no/ /mngon par 'du byed pa'i rab tu dbye ba ni rnam pa lnga ste/yul dang mthun par byed pa dang / de dang phrad par bya ba dang / de dang 'bral bar bya ba dang / kun nas nyon mongs pa dang / las kun du bslab par bya ba dang / sems kyis dbang bsgyur bar bya ba'i phyir sems mngon par 'du byed pa rnam pa lngar blta bar bya'o zhes sngar bstan pa bzhin no//de yang rnam par shes pa'i phung po'i rab tu dbye ba rnam par gzhag pa gang zhe na/ de yang rnam pa lnga ste/ kun nas zhen pa dang / kun nas nyon mongs pa dang / gnas dang / gnas pa dang / rnam pa sna tshogs so/ /de la kun du zhen pa'i rab tu dbye ba ni 'dod pa'i khams na 'dod pa can rnams kyi rnam par shes pa ni phyi rol gyi gzugs la mngon par zhen pa la gzugs la kun du zhen pa kho na zhes bya'o//gzugs kyi khams na rnam par dag pa'i lha rnams kyi rnam par shes pa ni nang gi ming dang gzugs la mngon par zhen la las de gnyi ga la kun du zhen pa zhes bya'o//gzugs med pa'i khams na gzugs med pa'i sems can rnams kyi rnam par shes pa ni nang gi ming la mngon par zhen pa la ming la kun du zhen pa zhes bya'o/ /kun nas nyon mongs pa'i rab tu dbye ba ni byis pa rnams kyi rnam par shes pa ni sgo gnyis nas nyon mongs par 'gyur ba ste/tshe 'di la yul la yongs su spyod pa'i sgo dang / tshe phyi ma la skye ba dang rga ba la sogs pa sdug bsngal gyi sgo nas so/ /gnas kyi rab tu dbye ba ni rnam par shes pa rjes su 'jug pa'i gnas ni lhan cig 'byung ba'i gnas dbang po lnga dang /de ma thag pa'i gnas yod pa dang / sa bon gyi gnas kun gzhi rnam par shes pa'o/ /gnas pa'i rab tu dbye ba ni rnam par shes pa gnas bzhi po dag ste/ gzugs la nye bar song ba'i rnam par shes pa gnas pa dang / tshor ba dang / 'du shes dang / 'du byed rnams la nye bar song ba'i rnam par shes pa gnas pa ste/de ni gzugs can gyi khams na'o/ /gzugs can ma yin pa'i khams na'o/ /gzugs can ma yin pa'i khams ni tshor ba la sogs pa'o/ /rnam pa sna tshogs kyi rab tu dbye ba ni rnam pa nyi shu ste/ mdo las sems 'dod chags dang bcas pa dang /'dod chags dang bral ba dang / zhe sdang dang bcas pa dang / zhe sdang dang bral ba dang / gti mug dang bcas pa dang / gti mug dang bral ba dang / kun du bsdus pa dang / rnam par g.yeng ba dang / zhum pa dang / rab tu gzung ba dang / rgod pa dang / rgod pa ma yin pa dang /nye bar zhi ba dang / nye bar zhi ba ma yin pa dang / mnyam par gzhag pa dang / mnyam par gzhag pa ma yin pa dang / legs par bsgom pa dang / legs par bsgom pa ma yin pa dang / shin tu rnam par grol ba dang / shin tu rnam par grol ba ma yin pa zhes gsungs pa'o//yang khams kyi rab tu dbye ba las/ 'dod pa na spyod pa rnams ni sems bzhi yod de/ dge ba dang / mi dge ba dang / bsgribs la lung du ma bstan pa dang / ma bsgribs la lung du ma bstan pa'o/ /gzugs dang gzugs med pa na spyod pa rnams la ni gsum gsum ste/mi dge ba ma gtogs pa rnams so/ /zag pa med pa'i sems ni slob pa dang / mi slob pa'i sems so/ /yang spang bar rab tu dbye ba la 'dod pa na spyod pa rnams la ni bden pa bzhi mthong bas spang bar bya ba bzhi dang / bsgom pas spang bar bya ba lnga yod do/ / gzugs dang gzugs med pa na spyod pa rnams la yang de bzhin du lnga lnga yod do/ /de ni phung po rnams kyi rab tu dbye ba rnam par gzhag pa yin no/ /de la phung po rnams kyi go rims rnam par gzhag pa gang zhe na/ rnam pa lnga ste/ skye ba las gyur pa dang / gnyen po las gyur pa dang / 'jug pa las gyur pa dang /gnas pa las gyur pa dang / rnam par gzhag pa las gyur pa'o/ /de la skye ba las gyur pa'i go rims rnam par gzhag pa ni/ mig dang gzugs rnams la brten nas mig gi rnam par shes pa skye ba dang / yid dang chos rnams la brten nas yid kyi rnam par shes pa skye ba'o zhes bya ba'i bar du gsungs pa'i dbang du mdzad pa ste/de la ni dang por gzugs kyi phung po bstan la/ de'i 'og tu rnam par shes pa'i phung po/ /de'i 'og tu tshor ba'i phung po'o/ /de'i 'og tu 'du shes dang 'du byed kyi phung po bstan to/ /gnyen po las gyur pa'i go rims rnam par gzhag pa ni phyin ci log bzhi po mi gtsang ba la gtsang bar phyin ci log pa dang /sdug bsngal ba la bde bar phyin ci log pa dang / bdag med pa la bdag tu phyin ci log pa dang / mi rtag pa la rtag par phyin ci log dag gi gnyen por dran pa nye bar gzhag pa bzhi bstan pa'i dbang du mdzad pa ste/de la ni dang por gzugs kyi phung po bstan la/ de'i 'og tu tshor ba'i phung po/ /de'i 'og tu ni rnam par shes pa'i phung po/ /de'i 'og tu 'du shes dang 'du byed kyi phung po bstan to/ /'jug pa las gyur pa'i go rims rnam par gzhag pa ni dbang po dang yul la brten nas yul so sor myong ba dang /yul la mtshan mar 'dzin pa dang / de nas tshe 'di la yul la yongs su longs spyod pa'i kun nas nyon mongs pa dang / dge ba dang mi dge ba'i las mngon par 'du byed pas tshe phyi ma la skye ba la sogs pa'i sdug bsngal 'byung ba dang / kun nas nyon mongs par 'gyur ba gang yin pa'i rim gyis 'khor bar 'jug pa'i dbang du mdzad pa ste/de la ni dang por gzugs kyi phung po bstan la/ de'i 'og tu tshor ba dang / 'du shes dang / 'du byed dang / rnam par shes pa'i phung po bstan to/ /gnas pa las gyur pa'i go rims rnam par gzhag pa ni/ rnam par shes pa'i gnas bzhi po gzugs dang / tshor ba dang / 'du shes dang / 'du byed rnams dang / de dag la gnas pa rnam par shes pa nyid kyi dbang du mdzad pa ste/ de la yang dang por gzugs dang / tshor ba dang / 'du shes dang / 'du byed kyi phung po bstan la/ de'i 'og tu rnam par shes pa'i phung po bstan to/ /rnam par gzhag pa las gyur pa'i go rims ni dang por gang zag mthong nas gzugs kyis so sor ngo shes par 'gyur ba dang / de'i 'og tu tshor bas 'byor pa dang / rgud pa dang / bde ba dang / sdug bsngal ba'o zhes rnam par 'jog pa dang /de'i 'og tu 'du shes kyi ming ni 'di zhes bya/ rigs ni 'di zhes bya/ rus ni 'di zhes bya zhes bya ba la sogs pa rnam par 'jog pa dang / de'i 'og tu 'du byed kyis/ de lta bu ni byis pa'o/ /de lta bu ni mkhas pa'o zhes bya bar rnam par 'jog pa dang / de'i 'og tu rnam par shes pas/nang gi sems can du bgrang ba'i bdag rnam par 'jog par byed pa'i dbang du mdzad pa ste/ de la yang dang por gzugs kyi phung po bstan la/ de'i 'og tu tshor ba dang / 'du shes dang / 'du byed dang / rnam par shes pa'i phung po bstan to/ /rnam par gzhag pa las gyur pa'i go rims rnam par gzhag pa'i rnam grangs gzhan yang rnam pa gsum ste/rags pa'i rim pa dang / snod la sogs pa'i dpe'i rim pa dang / kun nas nyon mongs pa skye ba'i rim pa'i dbang du mdzad nas go rims de ltar rnam par gzhag pa yin no/ /de la rags pa'i rim pa'i dbang du mdzad pa ni gzugs ni thogs pa dang bcas pa dang /rnam par shes pa'i tshogs lnga'i gnas yin pa dang / rnam par shes pa'i tshogs drug gi dmigs pa yin pa'i phyir phung po gzhan bzhi pas ches rags pas dang por bstan to/ /tshor ba ni rgyu ba rags pa'i phyir phung po gzhan gsum pas ches rags te/'di ltar na 'jig rten na nga'i klad par tshor ro/ /klad pa phyed la tshor ro zhes tha snyad du bya ba'i phyir de'i 'og tu bstan to/ /'du shes ni mtshan mar 'dzin pa ste/ 'jug pa shin tu rtogs par sla ba'i phyir phung po gzhan gnyis pas ches rags pas de'i 'og tu bstan to//'du byed rnams ni mngon par 'du byed pa'i mtshan nyid yin pas 'dod chags la sogs pa kun tu 'byung ba gsal bar rtogs pa'i phyir rnam par shes pa pas ches rags pas de'i 'og tu bstan to/ /snod la sogs pa'i rim pa'i dbang du mdzad pa ni gzugs kyi phung po ni tshor ba la sogs pa'i gnas yin pas zas bzhag pa'i snod lta bu yin pa'i phyir dang por bstan to//tshor ba'i phung po ni sems can gyi lus la phan pa dang gnod pa byed pa zas lta bu yin pa'i phyir de'i 'og tu bstan to/ /'du shes kyi phung po ni bde ba dang / sdug bsngal ba dang /sdug bsngal ba yang ma yin bde ba yang ma yin pa'i tshor ba la mdza' bshes dang / dgra bo dang / tha mal pa lta bur 'dzin pas tshod ma dang 'dra ba'i phyir de'i 'og tu bstan to/ /'du byed kyi phung po ni de'i dbang gis 'dod pa dang mi 'dod pa'i rnam par smin pa mngon par grub par byed pas byan po lta bu yin pa'i phyir de'i 'og tu bstan to//rnam par shes pa ni de la bdag tu 'dzin cing sdug bsngal dang bde ba la sogs pa rnam par shes par byed pas za ba po lta bu yin pa'i phyir thams cad kyi tha mar bstan to/ /kun nas nyon mongs pa skye ba'i rim pa'i dbang du mdzad pa ni gzugs kyi phung po la brten nas thog ma med pa can gyi 'khor ba na skyes pa dang bud med rnams phan tshun kha dog dang dbyibs la mngon par dga' ba las thog mar kun nas nyon mongs pa 'byung bas de'i phyir dang por gzugs kyi phung po bstan to//gzugs kyi sgo nas bde ba'i tshor ba la mngon par chags pa la kun nas nyon mongs pa 'byung bas de'i 'og tu tshor ba'i phung po bstan to//tshor ba'i sgo nas bde ba la sogs pa mtshan mar 'dzin pa'i 'du shes phyin ci log 'byung bas kun nas nyon mongs pa 'byung bas de'i 'og tu 'du shes kyi phung po bstan to/ /'du shes phyin ci log de ni 'du byed kyi nyon mongs pa la gnas pas de'i 'og tu 'du byed kyi phung po bstan to//'du byed kyi las dang nyon mongs pa rnams kyis 'gro ba gzhan du rnam par shes pa kun nas nyon mongs par 'gyur bas de'i 'og tu rnam par shes pa'i phung po thams cad kyi 'og tu bstan to/ /de ltar go rims bzhin du bstan pa'i skabs 'di nyid kyis grangs kyang bstan te/phung po rnams ni lnga kho nar zad de mi nyung mi mang bar nges so/ /de ci'i phyir zhe na/ bdag gi nye bar spyad pa'i dngos po dang / bdag gi dngos po'i dbang du mdzad pa'i phyir te/ de la bdag gi lus la brten pa dang / yul la bde ba dang / sdug bsngal myong bar byed pa dang / bdag dang gzhan la ming ni 'di zhes bya/ rigs ni 'di zhes bya/ rus ni 'di zhes bya zhes bya ba la sogs pa rjes su tha snyad 'dogs par byed pa dang / de gnyis la brten nas chos dang chos ma yin pa nye bar stsogs par byed de/ de ltar na de dag gi nye bar spyad pa'i dngos po yin par rig par bya'o/ /phung po tha ma ni bdag gi dngos po nyid yin par rig par bya ste/ 'di ltar 'jig rten phal cher rnam par shes pa ni bdag tu 'dzin la/ lhag ma bzhi la ni bdag gir 'dzin pa'i phyir de skad bstan par zad kyi dngos po rnam par shes pa'i dngos po'i dbang du mdzad nas phung po'i grangs lnga kho nar nges par bstan te/de ni phung po rnams kyi go rims rnam par gzhag pa yin no/ /de la phung po rnams kyi bsdu ba rnam par gzhag pa ni gzugs kyi phung po ni phung po du dag dang / khams du dag dang / skye mched du dag dang /srid pa'i yan lag du dag dang / gnas dang gnas ma yin pa du dag dang / dbang po du dag gis bsdus/ gzugs kyi phung po ji lta ba bzhin du tshor ba dang / 'du shes dang / 'du byed dang / rnam par shes pa'i phung po'i bar du yang phung po la sogs pa du dag gis bsdus she na/de la gzugs kyi phung po ni phung po gcig kho nas bsdus te/ gzugs kyi phung po nyid kyis so/ /khams dang skye mched bcu bcus bsdus te/ mig dang / rna ba dang / sna dang / lce dang / lus kyi khams dang / gzugs dang / sgra dang /dri dang / ro dang / reg bya'i khams rnams dang / de dag gi skye mched rnams kyis so/ /khams dang skye mched gcig gi phyogs kyis kyang bsdus te/ khams bco brgyad kyi nang nas khams gcig ni chos kyi khams te/ de'i phyogs ni chos kyi khams brgyad las rnam par rig byed ma yin pa'i gzugs so//skye mched bcu gnyis kyi nang nas skye mched gcig kyang chos kyi skye mched de/ de'i phyogs kyang chos kyi skye mched brgyad las rnam par rig byed ma yin pa'i gzugs kyis so/ /srid pa'i yan lag drug gi phyogs kyis bsdus te 'du byed dang / ming dang gzugs dang /skye mched drug dang / srid pa dang / skye ba dang / rga shi'i nang nas gzugs kyi phyogs re re bzung bas so/ /gnas dang gnas ma yin pa'i phyogs gcig gis bsdus te/ gzugs kyi rgyu dang 'bras bu ma nor ba'i gnas dang nor ba'i gnas ma yin pa'i phyogs so//dbang po bdun gyis bsdus te/ mig dang / rna ba dang / sna dang / lce dang / lus dang / pho dang / mo'i dbang po rnams kyis so/ /tshor ba'i phung po ni phung po gcig kho nas bsdus te tshor ba'i phung po nyid kyis so/ /khams dang skye mched gcig gis phyogs bsdus te/ khams bco brgyad kyi nang nas khams gcig ni chos kyi khams te/de'i phyogs ni chos kyi khams brgyad las tshor ba'o/ /skye mched bcu gnyis kyi nang nas skye mched gcig kyang chos kyi skye mched de de'i phyogs kyang chos kyi skye mched brgyad las tshor bas so/ /srid pa'i yan lag gcig gis bsdus te tshor bas so//srid pa'i yan lag gsum gyi phyogs kyis kyang bsdus te/ ming dang / gzugs dang / skye ba dang / rga shi'i nang nas tshor ba'i phyogs re re bzung bas so/ /gnas dang gnas ma yin pa'i phyogs gcig gis bsdus te/ tshor ba'i rgyu 'bras bu ma nor ba'i gnas dang /nor ba'i gnas ma yin pa'i phyogs so/ /dbang po lngas bsdus te/ yid mi bde ba dang / sdug bsngal ba dang / yid bde ba dang / bde ba dang / btang snyoms kyi ni dbang pos so/ /dbang po gsum gyi phyogs kyis kyang bsdus te/ mi shes pa kun shes pa dang / kun shes pa dang / kun shes pa dang ldan pa'i dbang po gsum re re yang dbang po dgu dgu yod pa las tshor ba'i dbang por gtogs pa'i phyogs re re bzung bas so/ /'du shes kyi phung po ni phung po gcig kho nar bsdus te/ 'du shes kyi phung po nyid kyis so/ /khams dang skye mched gcig gis phyogs kyis kyang bsdus te/khams bco brgyad kyi nang nas khams gcig gi ni chos kyi khams te/ de'i phyogs ni chos kyi khams brgyad las 'du shes so/ /skye mched bcu gnyis kyi nang nas skye mched gcig dang / chos kyi skye mched de/ de'i phyogs dang chos kyi skye mched brgyad las 'du shes kyis so//srid pa'i yan lag gsum gyi phyogs kyis bsdus te/ ming dang gzugs dang / skye ba dang / rga shi'i nang nas 'du shes kyi phyogs re re bzung bas so/ /gnas dang gnas ma yin pa'i phyogs gcig gis bsdus te/ 'du shes kyi rgyu dang /'bras bu la nor ba'i gnas dang / nor ba'i gnas pa yin pa'i phyogs kyis so/ /dbang po ni gang gis kyang ma bsdus so/ /'du byed kyi phung po ni phung po gcig kho nas bsdus te/ 'du byed kyi phung po nyid kyis so/ /khams dang skye mched gcig gi phyogs kyis bsdus te/ khams bco brgyad kyi nang nas khams gcig ni chos kyi khams te/ de'i 'og ni brgyad pa las 'du byed do/ /skye mched bcu gnyis kyi nang nas/ skye mched gcig kyang chos kyi skye mched de/ de'i phyogs kyang chos kyi skye mched brgyad las 'du byed kyis so/ /srid pa'i yan lag bzhis bsdus te/ma rig pa dang / reg pa dang / sred pa dang / len pas so/ /srid pa'i yan lag lnga'i phyogs kyis kyang bsdus te/ 'du byed dang / ming dang / gzugs dang / srid pa dang / skye ba dang / rga shi'i nang nas gzugs la sogs pa ma yin pa 'du byed kyi phyogs re re bzung bas so//gnas dang gnas ma yin pa'i phyogs gcig gis bsdus te/ 'du byed kyi rgyu dang / 'bras bu ma nor ba'i gnas dang / nor ba'i gnas ma yin pa'i phyogs kyis so/ /dbang po drug gis bsdus te/ dad pa dang / brtson 'grus dang / dran pa dang / ting nge 'dzin dang / shes rab kyi dbang po dang / srog gi dbang pos so/ /dbang po gsum gyi phyogs kyis kyang bsdus te/ mi shes pa kun shes pa dang / kun shes pa dang / kun shes pa dang ldan pa'i dbang po gsum po re re la yang dbang po dgu dgu yod pa las/dad pa la sogs pa lnga'i phyogs re re bzung bas so/ /rnam par shes pa'i phung po ni phung po gcig kho nas bsdus te/ rnam par shes pa'i phung po nyid kyis so/ /khams bdun gyis bsdus te/ rnam par shes pa'i khams drug dang / yid kyi khams kyis so//skye mched gcig gis bsdus te/ chos kyi skye mched kyis so/ /srid pa'i yan lag gcig gis bsdus te/ rnam par shes pas so/ /srid pa'i yan lag bzhi'i phyogs kyis kyang bsdus te/ ming dang gzugs dang / skye mched drug dang / skye ba dang / rga shi'i nang nas rnam par shes pa'i phyogs re re bzung bas so//gnas dang gnas ma yin pa'i phyogs kyis bsdus te/ rnam par shes pa'i rgyu dang / 'bras bu ma nor ba'i gnas dang / nor ba'i gnas ma yin pa'i phyogs kyis so/ /dbang po gcig gis bsdus te/ yid kyi dbang pos so//dbang po gsum gyi phyogs kyis bsdus te/ mi shes pa kun shes pa dang / kun shes pa dang / kun shes pa dang ldan pa'i dbang po gsum po re re la yang dbang po dgu dgu yod pa las/ yid kyi dbang po'i phyogs re re bzung bas so/ /phung po rnams kyis bsdus pa rnam par gzhag pa'i rnam grangs gzhan yang rnam pa bcu yod de/khams kyis bsdus pa ni phung po de dag nyid dang rang gi sa bon gyis bsdus pa gang yin pa'o/ /mtshan nyid kyis bsdus pa ni phung po de dag nyid rang dang spyi'i mtshan nyid kyis bsdus pa gang yin pa'o/ /rigs kyis bsdus pa ni phung po de dag nyid rang gi rigs zad par gyis bsdus pa gang yin pa'o//gnas skabs kyis bsdus pa ni phung po de dag nyid bde ba'i tshor ba dang mthun pa la sogs pa'i gnas skabs rnams kyis bsdus pa gang yin pa'o/ /tha mi dad pas bsdus pa ni phung po de dag nyid kyis chos re re yang phung po 'khor dang bcas pa thams cad kyis bsdus pa gang yin pa'o//dus kyis bsdus pa ni 'das pa dang / ma 'ongs pa dang / da ltar byung ba'i phung po de dag nyid dus de nyid kyis bsdus pa gang yin pa'o/ /yul gyis bsdus pa ni phung po de dag nyid yul gang du 'jug pa dang /gnas gang nas 'byung ba'i yul de nyid kyis bsdus pa gang yin pa'o/ /mtha' dag gis bsdus pa ni phung po de dag nyid lnga nyid kyis bsdus pa gang yin pa'o/ /phyogs gcig gis bsdus pa ni phung po de dag nyid rnam par phye na/gcig gi nang na gzhan med pa'i rang rang gi phyogs kyis bsdus pa gang yin pa'o/ /don dam pas bsdus pa ni phung po de dag nyid de bzhin nyid kyi mtshan nyid kyis bsdus pa gang yin pa'o/ /de dag thams cad gcig tu bsdus nas phung po rnams kyi bsdu ba rnam pa bcu drug yod de /de ni phung po rnams kyi bsdu ba rnam par gzhag pa yin no/ /de la phung po rnams kyi rten par gzhag pa ni gzugs kyi phung po ni gnas du dag las brten nas 'jug par 'gyur/ ming gis bsdus pa'i phung po dag ni gnas du dag las brten nas 'jug par 'gyur zhe na/gzugs kyi phung po ni gnas drug la brten nas 'jug par 'gyur te/ rten gyi gnas snod kyi 'jig rten dang / gnas kyi gnas khang khyim la sogs pa dang / yo byad kyi gnas yo byad bcu dang / dbang po'i gnas dgur byas pa'i gzugs dang / dbang po'i rten gyi gnas 'byung ba chen po'i gzugs dang /mthu las byung ba'i ting nge 'dzin gyi spyod yul gyi gnas bstan du med pa thogs pa med pa'i gzugs la'o/ /ming gis bsdus pa'i phung po dag ni gnas bdun la brten nas 'jug par 'gyur te/ 'dod pa dang / re ba dang / yul dang / rnam par rtog pa dang / yang dag par shes pa dang / dag pa'i sbyor ba dang / dag pa la'o/ /de la 'dod pa la longs spyod pa rnams kyi gnas skabs ni bzhi'o/ /sdom pa la gnas pa'i sdom brtson pa rnams kyi ni gcig go/ /nyer bsdogs thob pa mnyam par gzhag pa rnams kyi yang gcig go//dngos gzhi la gnas pa rnams kyi yang gcig go/ /de ltar na gnas bdun po de dag ni gnas skabs bzhir 'gyur te/ de ni phung po rnams kyi rten rnam par gzhag pa yin no/ /phung po rnams kyi rnam par gzhag pa ji skad bstan pa de dag ni sems can du ston pa yin pa'i phyir des ni sems can du gdags pa'i dngos po bstan to//de'i longs spyod kyi dngos po zhes bya bas ni skye mched rnams kyis bstan te/ de las skye mched ni bcu gnyis te/ mig gi skye mched dang / gzugs kyi skye mched dang / rna ba'i skye mched dang /sgra'i skye mched dang / sna'i skye mched dang / dri'i skye mched dang / lce'i skye mched dang / ro'i skye mched dang / lus kyi skye mched dang / reg bya'i skye mched dang / yid kyi skye mched dang / chos kyi skye mched do/ /de dag gi rnam par gzhag pa yang rnam pa bcu drug gis bstan te/ngo bo nyid dang / don dang / rab tu dbye ba dang / go rims dang / bsdu ba dang / rten gyis so/ /de la skye mched rnams kyi ngo bo nyid rnam par gzhag pa gang zhe na/ mig gi skye mched kyi ngo bo nyid ni mig thob cing ma spangs la/ de ma thag tu lus la 'gog pa'i chos can ma yin pa gang yin pa'o//mig gi skye mched ji lta ba bzhin du skye mched lhag ma rnams kyang ngo bo nyid las de bzhin du blta bar bya ste/ de ni skye mched rnams kyi ngo bo nyid rnam par gzhag pa yin no/ /de la skye mched rnams kyi don rnam par gzhag pa gang zhe na/ rnam pa gnyis te/nges pa'i tshig dang / dgos pa'o/ /de la nges pa'i tshig ni ci'i phyir skye mched ces bya zhe na/ skye mched kyi don bstan pa ste/ de ni sems dang sems las byung ba'i chos rnams kyi skye ba'i sgo'i don dang / rkyen gyi don dang / thabs kyi don dang / tshogs pa'i dngos po'i don dang /rten gyi don dang / de dag snang ba'i gnas kyi don to/ /dgos pa ni ci'i phyir na/ skye mched rnam par gzhag pa yongs su bstan ce na/ skye mched rnam par gzhag pa'i dgos pa bstan pa mtshungs pa de ma thag pa dang / dmigs pa dang / bdag po'i rkyen rnams pa gsum yongs su bstan par bya ba'i phyir skye mched rnam par gzhag pa ste/de ni skye mched rnams kyi don rnam par gzhag pa yin no/ /de la skye mched rnams phyi rab tu dbye ba rnam par gzhag pa gang zhe na/ mdor bsdu na rnam pa drug tu blta bar bya ste/ skye ba'i sgo'i skye mched mig la sogs pa dag gi skye mched rnams so//dag pa'i skye mched ni gang zag rigs la gnas pa rnams kyi skye mched gang dag yin pa'o/ /rang bzhin gyi skye mched ni skye mched bcu gnyis po de dag nyid thog ma med pa'i dus nas skye ba dang / phyi ma dag rab tu grub pa gang yin pa dang /gang zag rigs la gnas pa dang / rigs la gnas pa ma yin pa rnams kyi yongs su mya ngan las 'da' ba dang / yongs su mya ngan las 'da' ba ma yin pa'i chos nyid du grub pa gang yin pa'o/ /yongs su bsgoms pa'i skye mched ni sngon dge ba dang /mi dge ba yongs su bsgoms pa de dag nyid 'khor bar skye ba dang / 'bri ba dang / bye brag dang / mya ngan las 'das pa thob pa'i skye mched nyid gang yin pa'o/ /'bras bu bskyed pa'i skye mched ni de dag nyid 'bras bu bskyed nas 'gags pa gang yin pa'o//'bras bu ma bskyed pa'i skye mched ni de dag nyid 'bras bu ma bskyed la 'gags pa'am ma 'gags pa gang yin pa ste/ de ni skye mched rnams kyi rab tu dbye ba rnam par gzhag pa yin no/ /de la skye mched rnams kyi go rims rnam par gzhag pa gang zhe na/ de ni mdor bsdu na rnam pa gnyis te/gnyis kyi go rims dang / drug gi go rims so/ /de la gnyis kyi go rims ni nang dang phyi ste/ nang gi rnam par shes pa'i gnas yin la/ gnas de la rnam par shes pa yul gcig pa'i don gyis brten pas dang po bstan la/ phyi'i ni dmigs pa yin pas de'i 'og tu bstan to/ /drug gi go rims ni dang por mig dang gzugs bstan pa nas tha mar yid dang chos kyi skye mched bstan pa'i bar gyis te / de yang mig nas reg bya'i bar ni rgyu rnam pa drug gi go rims de ltar bstan te/mig dang gzugs ni spyod yul ches phal che ba dang / sna tshogs pa dang yang dang yang 'byung ba'i phyir dang por bstan to/ /lhag ma rnams kyang rim gyis de bzhin pas de'i 'og tu rim gyis bstan te/ de ni rgyu dang po yin no/ /yang 'jig rten gyi tha snyad rjes su 'jug pa las te/'jig rten pa rnams ni dang por gcig la gcig lta bar byed pas de'i phyir mig dang / gzugs dang por bstan to/ /de'i 'og tu kun du smra bar byed pas rna ba dang sgra bstan to/ /de'i 'og tu 'dus shing za ba dang / lhag par za bar byed pas na sna dang dri dang por myong bas sna dang dri bstan to//de'i 'og tu lce dang / ro myong bas lce dang ro bstan to/ /de'i 'og tu nyi ma nub cing nam sros pa nam la shom zhing mal stan la sogs pa'i reg pa la rten par byed pas lus dang reg bya bstan te/ de ni rgyu gnyis pa yin no/ /yang dga' ba'i bye brag gi gnas las te/mig gis ni rgyang ring po nas gzugs mthong bas dga' ba'i bye brag skye bas dang por mig dang gzugs bstan to/ /lhag ma rnams rim gyis de bzhin pas de'i 'og tu rim gyis bstan te/ de ni rgyu gsum pa yin no/ /yang mdzes pa'i bye brag yongs su 'dzin pa las te/'dod pa la longs spyod pa rnams kyi mig tshugs dang / mig sman la sogs pas mdzes par byas pa ni mig go/ /rna cha dang rna rgyan la sogs pas mdzes par byas pa ni rna ba yin no/ /gzhan ni de lta ma yin pas rim bzhin bstan te/ de ni rgyu bzhi pa yin no/ / yang bya ba dang / zas dang / 'khrig pa'i dbang las te/ sems can rnams ni lus dang ngag gi las dge ba dang mi dge ba dag gis thams cad la rtsol bar byed/ yongs su rtsol bar byed pas mig dang / gzugs dang / rna ba dang / sgra bstan to/ /de'i 'og tu kham gyi zas dag za bar byed pas sna dang /dri dang / lce dang / ro ston to/ /de'i 'og tu tshim zhing rgyas pa dang 'khrig pa sten par byed pas lus dang reg bya bstan te/ de ni rgyu lnga pa yin no/ /yang las dang bya ba'i bye brag yongs su 'dzin pa las te/ mig gis gzugs dag mthong nas 'gro ba la sogs pa la dka' ba byed pas dang por mig dang gzugs bstan to//rna bas ni sgra sna tshogs dag nyan pa la sogs par byed de / snga ma bas las sla bas de'i 'og tu rna ba dang sgra bstan to/ /sna ni dri sna tshogs dag snom pa la sogs par byed de snga ma bas las sla bas de'i 'og tu sna dang dri bstan to//lce ni ro sna tshogs dag myong ba la sogs par byed de/ snga ma bas las sla bas de'i 'og tu lce dang ro bstan to/ /lus ni reg bya sna tshogs dag reg pa la sogs par byed de/ snga ma bas las sla bas de'i 'og tu lus dang reg bya bstan te/de ni rgyu drug pa yin no/ /yid dang chos ni mig la sogs pa'i drug po de dag gi rnam grangs thams cad dang thams cad du 'gro ba yin pa'i phyir thams cad kyi tha mar bstan par rig par bya ste/ de ni skye mched rnams kyi go rims rnam par gzhag pa yin no/ /de la skye mched rnams kyi bsdu ba rnam par gzhag pa gang zhe na/mig la sogs pa lnga dang / gzugs la sogs pa lnga dang / chos kyi skye mched kyi phyogs rnam par rig par byed pa ma yin pa'i gzugs ni gzugs kyi phung por gtogs pas gzugs kyi phung pos phung po dang / skye mched dang /khams dang / srid pa'i yan lag dang / gnas dang gnas ma yin pa dang / dbang po dag bsdu bar sngar bstan pa kho na bzhin du sbyar ro/ /yid kyi skye mched ni rnam par shes pa'i phung por gtogs pas rnam par shes pa'i phung pos phung po dang / skye mched dang / khams dang /srid pa'i yan lag dang / gnas dang gnas ma yin pa dang / dbang po dag bsdu ba sngar bstan pa kho na bzhin du sbyar ro/ /chos kyi skye mched kyi phyogs tshor ba dang / 'du shes dang / 'du byed gsum ni tshor ba dang / 'du shes dang / 'du byed kyi phung por gtogs pas tshor ba dang /'du shes dang / 'du byed kyi phung pos phung po dang / skye mched dang / khams dang / srid pa'i yan lag dang / gnas dang gnas ma yin pa dang / dbang po du dag bsdus pa sngar bstan pa kho na bzhin du sbyar ro/ /chos kyi skye mched kyi phyogs 'dus ma byas pa rnam pa bzhi ni khams su ma gtogs pa yin pas phung po la sogs pa gang gis kyang ma bsdus so//gzhan yang bcom ldan 'das kyis mdo sde las zil gyis gnon pa'i skye mched brgyad dang / zad par gyi skye mched bcu dang / nam mkha' mtha' yas skye mched la sogs pa bzhi dang /'du shes med pa'i skye mched dang / 'du shes med 'du shes med min skye mched gnyis dang / reg pa'i skye mched la sogs pa skye mched kyi sgrar bstan pa'i chos gang dag gsungs pa de dag kyang skye mched bcu gnyis po dag gi mtshan nyid ji skad smos pa ci rigs par bsdus par rig par bya ste/de ni skye mched rnams kyi bsdu ba rnam par gzhag pa yin no/ /de la skye mched rnams kyi rten rnam par gzhag pa gang zhe na/ skye mched gzugs can rnams ni gzugs kyi phung por gtogs pas gzugs kyi phung po gnas drug la brten nas 'jug par 'gyur ba sngar bstan pa kho na bzhin du sbyar ro//skye mched gzugs can ma yin pa rnams kyi ming gis bsdus pa'i phung po bzhir gtogs pas ming gis bsdus pa'i phung po bzhi po dag gnas bdun la brten pas 'jug par 'gyur ba sngar bstan pa kho na bzhin du sbyar te/de ni skye mched rnams kyi rten rnam par gzhag pa yin no/ /skye mched bcu gnyis kyi rnam par gzhag pa ji skad bstan pa de dag gi sgo nas sems can du gdags pa'i dngos pos phyi nang gi longs spyod nyams su myong ba'i phyir/ des ni de'i longs spyod kyi dngos po bstan to//de 'byung ba'i dngos po zhes bya bas ni khams rnams bstan te/ de la khams ni bco brgyad de/ mig gi khams dang / gzugs kyi khams dang / mig gi rnam par shes pa'i khams dang / rna ba'i khams dang / sgra'i khams dang / rna ba'i rnam par shes pa'i khams dang /sna'i khams dang / dri'i khams dang / sna'i rnam par shes pa'i khams dang / lce'i khams dang / ro'i khams dang / lce'i rnam par shes pa'i khams dang / lus kyi khams dang / reg bya'i khams dang / lus kyi rnam par shes pa'i khams dang / yid kyi khams dang /chos kyi khams dang / yid kyi rnam par shes pa'i khams so/ /de dag gi rnam par gzhag pa yang rnam pa drug gis bstan to/ / ngo bo nyid dang / don dang / rab tu dbye ba dang / go rims dang / bsdu ba dang / rten gyis so/ /de la khams rnams kyi ngo bo nyid rnam par gzhag pa gang zhe na/mig gi khams kyi ngo bo nyid ni mig ma spangs pa'am/ spangs pa srog gi dbang pos yongs su zin pa gang yin pa'o/ /mig gi khams ji lta bu zhe na/ rna ba dang / sna dang / lce dang / lus dang / yid dang / de dag gi rnam par shes pa rnams dang /chos kyi khams kyi phyogs 'dus ma byas ma gtogs pa rnams kyang de bzhin no/ /gzugs kyi khams ni ngo bo nyid ni dbang po rnams kyis byung ba'i gzugs gang yin pa de la de'i dbang gis gzugs kyi khams zhes bya'o/ /gzugs kyi khams ji lta ba bzhin du sgra dang /dri dang / ro dang / reg bya'i khams rnams kyang de bzhin no/ /chos kyi khams kyi phyogs 'dus ma byas kyi ngo bo nyid ni yongs su g.yo ba'i gzhi dang / mi skye ba'i gzhi'i ngo bo nyid yin te/ de ni khams rnams kyi ngo bo nyid rnam par gzhag pa yin no/ /de la khams rnams kyi don rnam par gzhag pa gang zhe na/rnam pa gnyis te/ nges pa'i tshig dang / dgos pa'o/ /de la nges pa'i tshig ni/ ci'i phyir khams zhes bya zhe na/ khams kyi don bstan pa ste/ khams kyi don ni rgyu'i don dang / sa bon gyi don dang / rang bzhin gyi don dang / rigs kyi don dang / cha phra ba'i don dang / gzhi'i don to/ /dgos pa ni ci'i phyir na/ khams rnam par gzhag pa yongs su bstan zhe na/ khams rnam par gzhag pa'i dgos pa bstan pa ste/ rgyu'i rkyen yongs su bstan par bya ba'i phyir dang / dbang po dang yul dang nye bar spyod pa yongs su bstan par bya ba'i phyir te/de ni khams rnams kyi don rnam par gzhag pa yin no/ /de la khams rnams kyi rab tu dbye ba rnam par gzhag pa gang zhe na/ mdor bsdu na rnam pa drug tu bsdu bar bya ste/ mtshan nyid 'dzin pa'i khams ni mig la sogs pa dag gi khams rnams so//dag pa'i khams ni gang zag rigs la gnas pa rnams kyi khams dag pa yin no/ /rang bzhin gyi khams ni khams bco brgyad po ji skad bstan pa de dag nyid thog ma med pa'i dus nas rab tu grub pa gang yin pa dang /gang zag rigs la gnas pa dang / rigs la gnas pa ma yin pa rnams ni yongs su mya ngan las 'das pa dang / yongs su mya ngan las 'da' ba ma yin pa'i chos nyid du rab tu grub pa gang yin pa'o/ /yongs su bsgom pa'i khams ni sngon dge ba dang / mi dge ba yongs su bsgom pa de dag 'khor bar skye ba dang / 'bri ba dang / bye brag dang / mya ngan las 'das pa thob pa'i rgyu gang yin pa'o/ /'bras bu skye ba'i khams ni de dag nyid 'bras bu bskyed nas 'gags pa gang yin pa'o/ /'bras bu ma bskyed pa'i khams ni de dag nyid 'bras bu ma bskyed la/ma 'gags pa gang yin pa ste/ de ni khams rnams kyi rab tu dbye ba rnam par gzhag pa yin no/ /de la khams rnams kyi go rims rnam par gzhag pa gang zhe na/ de ni mdor bsdu na rnam pa gnyis te/ gsum gyi go rims dang / drug gi go rims so//de dag gi rnam par dbye ba ni skye mched kyi skabs su bstan pa bzhin du ci rigs par sbyar te/ de ni khams rnams kyi go rims rnam par gzhag pa yin no/ /de la khams kyi bsdu ba rnam par gzhag pa gang zhe na/ skye mched kyi skabs su bstan pa bzhin ci rigs par sbyar ro/gzhan yang bcom ldan 'das kyis mdo sde las khams drug dang / khams gsum dang / 'dus byas dang / 'dus ma byas kyi khams gnyis dang / 'jig rten gyi khams dang / chos kyi khams dang / sems can gyi khams dang / gdul ba'i khams dang /gdul ba'i khams kyi thabs la sogs pa khams kyi sgrar bstan pa'i chos gang dag gsungs pa de dag kyang / khams bco brgyad po dag gi mtshan nyid ji skad smos pas ci rigs par bsdus par rig par bya ste/ de ni khams rnams kyi bsdu ba dang rnam par gzhag pa yin no//de la khams rnams kyi rten rnam par gzhag pa gang zhe na/ skye mched kyi skabs su bstan pa bzhin ci rigs par sbyar te/ de ni khams kyi rten rnam par gzhag pa yin no/ /khams bco brgyad kyi rnam par gzhag pa ji skad bstan pa de dag las sems can du gdags pa'i dngos po la sogs pa 'byung ba'i phyir des ni de 'byung ba'i dngos po bstan to//de 'byung ba gnas pa'i dngos po zhes bya ba nas zas rnams bstan te/ de la zas ni bzhi ste/ khams kyi zas dang / reg pa'i zas dang / yid la sems pa'i zas dang / rnam par shes pa'i zas so//de dag gi rnam par gzhag pa yang rnam pa drug gis bstan te/ ngo bo nyid dang / don dang / rab tu dbye ba dang / go rims dang / bsdu ba dang / rten gyis so/ /de la zas rnam par gzhag pa gang zhe na/ kham gyi zas kyi ngo bo nyid ni dri dang /ro dang / reg bya'i skye mched gsum gyis bsdus pa'i kham gyi zas yongs su 'jug pa'i tshe/ dri dang / ro dang / reg bya'i mthu dang / rnam par smin pa la sogs pa'i stobs kyis rnam par shes pa la phan 'dogs par byed cing / phan btags pa'i rnam par shes pa stobs dang ldan pa des dbang po gzugs can lnga dang /yid kyi dbang po dang / dbang po'i rten gyi 'byung ba chen po rnams 'phel zhing / yangs pa dang / rgyas par 'gyur ba gang yin pa'o/ /reg pa'i zas kyi ngo bo nyid ni reg pa'i skye mched drug gis bsdus pa'i reg pa bde ba'am/yid bde ba dang / btang snyoms kyi tshor ba skyed par byed pa da ltar byung ba'i bde ba 'am/ btang snyoms kyi stobs kyis rnam par shes pa la phan 'dogs par byed cing / phan btags pa'i rnam par shes pa stobs dang ldan pa des dbang po gzugs can lnga dang /yid kyi dbang po dang / dbang po'i rten gyi 'byung ba chen po rnams 'phel zhing yangs pa dang / rgyas par 'gyur ba gang yin pa'o/ /yid la sems pa'i zas kyi ngo bo nyid ni chos kyi skye mched kyi phyogs kyis bsdus pa'i sems pa yul 'dod pa 'thob pa'i rgyu yang dag pa'i thabs nyon mongs pa can nam/nyon mongs pa can ma yin pa la brten nas re ba'i yid bde ba ma 'ongs pa'i yul la dmigs pas ma 'ongs pa'i yul 'dod pa thob tu re ba'i yid la sems pa'i stobs kyis rnam par shes pa la phan 'dogs par byed cing phan btags pa'i rnam par shes pa stobs dang ldan pa des dbang po gzugs can lnga dang yid kyi dbang po'i rten gyi 'byung ba chen po rnams 'phel zhing yangs pa dang rgyas par gyur pa gang yin pa'o//rnam par shes pa'i zas kyi ngo bo nyid ni nyid kyi skye mched kyis bsdus pa rnam par shes pa zas gsum po rnams kyi da ltar dang /ma 'ongs pa la dmigs pas phan btags shing stobs dang ldan pa des dbang po gzugs can lnga dang / yid kyi dbang po dang / dbang po'i rten gyi 'byung ba chen po rnams 'phel zhing yangs pa dang / rgyas par 'gyur ba gang yin pa ste/de ni zas rnams kyi ngo bo nyid rnam par gzhag pa yin no/ /de la zas rnams kyi don rnam par gzhag pa gang zhe na/ rnam pa gnyis te/ nges pa'i tshig dang / dgos pa'o/ /de la nges pa'i tshig ni zas zhes bya zhe na/ zas kyi don bstan pa ste/zas kyi don ni khams gsum na spyod pa'i sems can skyes shing 'byung ba rnams kyi gnas pa sgrub par byed pa'i don to/ /dgos pa ci'i phyir zas rnam par gzhag pa yongs su bstan zhe na/ zas rnam par bzhag pa'i dgos pa bstan pa ste/ gnas pa sgrub par byed pa'i chos rnams kyi rab tu dbye ba bstan pa'i phyir te/de ni zas rnams kyi rab tu dbye ba rnam par gzhag pa yin no/ /de la zas rnams kyi rab tu dbye ba rnam par gzhag pa gang zhe na/ rnam pa bdun te/ khams kyi rab tu dbye ba dang / rags pa dang cha phra ba'i rab tu dbye ba dang /dngos po'i rab tu dbye ba gang zhe na/ gnas skabs kyi rab tu dbye ba dang / zas dang zas ma yin pa'i rab tu dbye ba dang / bya ba byed pa'i rab tu dbye ba dang / mu bzhir bcad pa'i rab tu dbye ba'o/ /de la khams kyi rab tu dbye ba gang zhe na/ kham gyi zas kyis ni 'dod pa na spyod pa'i sems can rnams gnas shing 'tsho ba'o//reg pa dang / yid la sems pa dang / rnam par shes pa'i zas kyis ni khams gsum na spyod pa'i sems can thams cad gnas shing 'tsho ba'o / /rags pa dang cha phra ba'i rab tu dbye ba gang zhe na/khams kyi zas rags pa ni dud 'gro dang / yi dgas dang / mi btsas pa'i dus tshun chad la gnas pa rnams kyi'o/ /cha phra ba ni sems can mngal na gnas pa mer mer po la sogs pa'i dus rnams dang / lha'i ris drug po dag gi ste/ de dag ni kham gyi zas zos pa'i mod la lus kyi yan lag thams cad du cig car 'ju zhing rim gyis ma yin pas de dag la bshang ba dang /gci bar gyur pa yang med do/ /nyi tshe ba'i sems can dmyal ba kha cig ma gtogs pa sems can dmyal ba pa rnams la yang kham gyi zas med de/ de dag ni rlung cha phra mo rjes su zhugs pa zas kyi tha snyad la ma gtogs pa dang /las kyi dbang gis gnas shing 'tsho'o/ /reg pa dang / yid la sems pa dang / rnam par shes pa'i zas rags pa gang zhe na/ 'dod pa na spyod pa rnams kyi'o/ /cha phra ba gang zhe na/ gzugs dang gzugs med pa na spyod pa rnams kyi'o//dngos po'i rab tu dbye ba gang zhe na/ kham gyi zas kyis ni 'da' gu dang / snum khur dang / 'bras chan dang / zan dron dang / zhun mar dang / sbrang rtsi dang / bu ram gyi dbu ba dang / sha dang / nya sha dang / sha skam dang / lan tshwa dang /'o ma dang / zho dang / mar dang / gzhan yang de lta bu'i yo byad gang dag kham du byas te/ bzar rung ba dag ste/ de'i phyir kham gyi zas zhes bya'o/ /reg pa'i zas kyis ni reg pa'i skye mched drug gis bsdus pa'i reg pa'i tshor ba drug po bde ba dang / yid bde ba dang /btang snyoms kyi tshor ba skyed par byed pa ltar byung ba dag go/ /yid la sems pa'i zas kyi 'dus te reg pa'i tshogs drug gis bsdus pa'i sems pa'i tshogs drug po ma 'ongs pa'i yul 'dod pa las dmigs pa dag go/ /rnam par shes pa'i zas kyis ni yid kyi skye mched kyis bsdus pa rnam par shes pa'i tshogs brgyad po zas gsum po rnams kyis da ltar dang ma 'ongs pa las dmigs pas phan btags shing stobs dang ldan pa dag go//gnas skabs kyi rab tu dbye ba gang zhe na/ kham gyi zas dus gang gi tshe zas nyid du rnam par gzhag ce na/'jug pa'i tshe kho na zas su rnam par gzhag gi/ za ba'i tshe na ni ma yin no/ /reg pa dang / yid la sems pa dang / rnam par shes pa'i zas ni gang gi tshe dbang po dang 'byung ba chen po rnams 'phel zhing yangs pa dang rgyas par 'gyur ba'i tshe na zas su rnam par gzhag go//zas dang zas ma yin pa'i rab tu dbye ba gang zhe na/ kham gyi zas ni dbang po dang 'byung ba chen po 'phel zhing yangs pa dang rgyas par byed pa ni zas yin la/ de las bzlog pa ni zas ma yin te/ de la kham gang za ba'i tshe na/ yid du 'ong bar za ba po'i dbang po tshim par byed pa de ni da dung ma zhu bas dbang po dang 'byung ba chen po rnams 'phel zhing yangs pa dang /rgyas par mi byed pa'i phyir kham gyi zas zhes brjod par ni mi bya mod kyi/ 'on kyang de'i reg pa'i skye mched drug car nas dbang po dang 'byung ba chen po rnams 'phel zhing yangs pa dang rgyas par byed pas reg pa'i zas zhes brjod par bya'o//kham de 'phrod pas dbang po dang 'byung ba chen po rnams 'phel zhing yangs pa dang / rgyas par 'gyur bar 'ju ba ni de 'ju ba'i tshe na kham gyi zas yin par brjod par bya'o/ /gal te kham de zhu yang dbang po dang 'byung ba chen po rnams 'phel zhing yangs pa dang /rgyas par mi 'gyur na ni de zhur zin kyang kham gyi zas ma yin par brjod par bya'o/ /kham gang za ba'i tshe na kha ba dang / tsha ba la sogs pas gnod pa byed pa dang / 'du ba'i tshe phan 'dogs par byed pa de ni kham gyi zas yin par brjod par bya'o//kham gang za ba'i tshe na zhim la 'ju ba'i tshe na mi 'phrod pa de ni kham gyi zas ma yin par brjod par bya'o/ /kham gang dri dang ro dang reg bya'i skye mched kyis bsdus pa ni legs par zhu bas phan 'dogs pa kham gyi zas yin gyi/ gzugs dang sgra'i skye mched ni phan par yang mi 'ju gnod par yang mi 'ju ba'i kham gyi zas yin par brjod par mi bya'o//reg pa dang / yid la sems pa dang / rnam par shes pa'i zas ni sngar so so'i ngo bo nyid ji skad bstan pa de dag ni dbang po dang / 'byung ba chen po rnams 'phel zhing yangs pa dang /rgyas par gyur par zas yin par brjod par bya'o/ /sdug bsngal dang yid mi bde ba'i tshor ba skyed par byed pa'i reg pa dang / yul 'dod pa thob tu mi re ba dang / yul mi 'dod pa thob tu dogs pa'i yid la sems pa dang / zas gsum dang bral zhing zas gsum gyi mi mthun pa'i phyogs dang phrad pa'i rnam par shes pa gnod pas nyam thag pa dang /'chi kha'i rnam par shes pa la sogs pa ni dbang po dang 'byung ba chen po rnams 'phel zhing yangs pa dang / rgyas par mi 'gyur bas zas ma yin par brjod par bya'o//bya ba byed pa'i rab tu dbye ba gang zhe na/ kham gyi zas kyis ni yongs su 'ju ba'i tshe dri dang ro dang reg bya'i mthu dang / rnam par smin pa la sogs pa'i stobs kyi rnam par shes pa la phan 'dogs par byed cing phan btags pa'i rnam par shes pa stobs dang ldan pa des dbang po dang 'byung ba chen po rnams 'phel zhing yangs pa dang /rgyas par byed pas zas kyi bya ba byed do/ /reg pa dang yid la sems pa dang / rnam par shes pa'i zas kyis ni so so'i stobs kyis rnam par shes pa la phan 'dogs par byed cing phan btags pa'i rnam par shes pa stobs dang ldan pa des dbang po dang 'byung ba chen po rnams 'phel zhing yangs pa dang /rgyas par byed pas zas kyi bya ba byed do/ /de la rnam par shes pa ji ltar na yid kyi dbang po'i zas yin zhe na/ de ltar zas rnam pa gsum gyis nye bar brtags pa'i rnam par shes pa de yid kyi dbang po gong nas gong du ches brtas pa dang /ches stobs dang ldan par skye ba'i rgyur gyur pa'i phyir ro/ /mu bzhir bcad pa'i rab tu dbye ba gang zhe na/ kham gang yin pa de zas kyang yin la/ zas gang yin pa de yang kham yin nam zhe na/mu bzhi ste/ kham yin la zas ma yin pa ni/ kham gang dbang po dang 'byung ba chen po 'phel bar mi 'gyur ba'o/ /zas yin la kham ma yin pa ni reg pa dang / yid la sems pa dang / rnam par shes pa gang dbang po dang 'byung ba chen po 'phel bar 'gyur ba'o//zas kyang yin la kham yang yin pa ni kham gang dbang po dang 'byung ba chen po 'phel bar 'gyur ba'o/ /kham yang ma yin la zas kyang ma yin pa ni reg pa dang / yid la sems pa dang / rnam par shes pa gang dbang po dang 'byung ba chen po 'phel bar mi 'gyur ba'o//reg pa la sogs pa lhag ma rnams la yang mu bzhi de bzhin du ci rigs par brjod par bya ste/ de ni zas rnams kyi rab tu dbye ba rnam par gzhag pa yin no/ /de la zas rnams kyi go rims rnam par gzhag pa gang zhe na/rnam pa lnga'i phyir te/ mang ba'i rim pa dang / brda phrad pa'i rim pa dang / phan 'dogs pa'i rim pa dang / srog gi dbang po 'dzin pa'i rim pa dang / dran pa nye bar gzhag pa la 'jug pa'i phyir ro/ /de la mang ba'i rim pa ni kham gyi zas ni dri dang / ro dang / reg bya'i skye mched kyis bsdus pa'i kham du bya ba'i zas sgo mang po sna tshogs nas byung ba dang por bstan to/ /reg pa'i zas ni bde ba dang / yid bde ba dang / btang snyoms kyi tshor ba skyed par byed pa'i reg pa'i tshogs nyi tshe las byung bas snga mas kyang nyung ba'i phyir de'i 'og tu bstan to//yid la sems pa'i zas ni yul 'dod pa thob tu re ba la sems pa'i yid la sems pa 'ba' zhig las byung bas snga ma bas kyang ches nyung ba'i phyir de'i 'og tu bstan to/ /rnam par shes pa'i zas snga ma gsum po dag gis phan btags pa'i rnam par shes pa nyi tshe las byung bas snga ma bas kyang ches shin tu nyung ba'i phyir de'i 'og tu bstan to//brda phrad par sla ba'i rim pa ni kham gyi zas ni byis pa yan chad kyis kyang gzung ba dang / 'jug pa dang / rtogs par sla bas dang por bstan to/ /reg pa'i zas ni ngo bo nyid dang /gnas dang / dmigs pa dang / grogs dang las la sogs pa snga ma bas brda phrad par dka' bas de'i 'og tu bstan to/ /yid la sems pa'i zas ni ngo bo nyid la sogs pa snga ma bas kyang ches brda phrad par dka' bas de'i 'og tu bstan to/ /rnam par shes pa'i zas ni ngo bo nyid la sogs pa snga ma bas kyang ches shin tu brda phrad par dka' bas de'i 'og tu bstan to//phan 'dogs pa'i rim pa ni kham gyi zas ni dbang po dang / 'byung ba chen po 'phel ba la phan 'dogs pa'i mthu che bas dang por bstan te/ /reg pa'i zas ni snga ma bas phan 'dogs pa'i mthu chung bas de'i 'og tu bstan to//yid la sems pa'i zas ni snga ma bas kyang phan 'dogs pa'i mthu ches chung bas de'i 'og tu bstan to/ /rnam par shes pa'i zas ni snga ma bas kyang phan 'dogs pa'i mthu ches shin tu chung bas de'i 'og tu bstan to//srog gi dbang po 'dzin pa'i rim pa ni kham gyi zas ni de yod na srog gi dbang po re zhig mi 'gags pas dang por bstan to/ /reg pa'i zas ni kham gyi zas med na de yod kyang srog gi dbang po myur du 'gags pas de'i 'og tu bstan to/ / yid la sems pa'i zas ni kham dang reg pa'i zas med na de yod kyang srog gi dbang po ches myur du 'gags pas de'i 'og tu bstan to/ /rnam par shes pa'i zas ni kham dang / reg pa dang / yid la sems pa'i zas med na gtan med pas srog gi dbang po ches shin tu myur du 'gags pas de'i 'og tu bstan to//dran pa nye bar gzhag pa la 'jug pa'i rim pa ni kham gyi zas ni lus dran pa nye bar gzhag pa la 'jug pa'i sgo yin pas dang por bstan to/ /reg pa'i zas ni tshor ba dran pa nye bar gzhag pa la 'jug pa'i sgo yin pas de'i 'og tu bstan to//yid la sems pa'i zas ni chos dran pa nye bar gzhag pa la 'jug pa'i sgo yin pas de'i 'og tu bstan to/ /rnam par shes pa'i zas ni sems dran pa nye bar gzhag pa la 'jug pa'i sgo yin pas de'i 'og tu bstan te/ de ni zas rnams kyi go rims rnam par gzhag pa yin no//de la zas rnams kyi bsdu ba rnam par gzhag pa gang zhe na/ kham gyi zas ni gzugs kyi phung por gtogs pas de ni gzugs kyi phung po'i chos gang dag bsdus pa de dag bsdus so/ /reg pa dang yid la sems pa'i zas ni 'du shes kyi phung por gtogs pas de gnyis kyis ni 'du byed kyi phung pos chos gang dag bsdus pa de dag bsdus so//rnam par shes pa'i zas ni rnam par shes pa'i phung por gtogs pas des ni rnam par shes pa'i phung pos chos gang dag bsdus pa de dag bsdus par blta bar bya'o//de la gnyid dang ya nga ba spangs pa dang / tshangs par spyod pa dang / snyoms par 'jug pa dag kyang dbang po dang 'byung ba chen po rgyas par byed pa yin na/ ci'i phyir zas yin par rnam par mi gzhag ce na/ rgyas par ni gnyis po 'di dag yin te/ don gzhan la phan 'dogs pas rgyas pa dang / gnod par mi byed pas rgyas pa'o/ /de la gnyid la sogs pa ni rgyas pa phyi ma shos kyis rgyas par byed pa yin gyi/ snga ma shos kyis ma yin te/ de'i phyir de dag zan yin par mi gzhag go/ /ci'i phyir lus gnas par byed pa'i srog gi dbang po zas yin par rnam par mi gzhag ce na/de ni zas med na rgyas par byed pa ma yin pa'i phyir ro/ /gang gi tshe rgyu bdun gyis 'du byed rnams gnas par 'gyur te/ bdun gang zhe na/ skye ba dang / srog gi dbang po dang / zas dang / sems la dbang ba rnams kyi rdzu 'phrul dang /rgyu dang rkyen tshogs pa dang / sngon gyi las kyis 'phen pa dang / bar du gcod pa med pa ste/ rgyu bdun po de dag gis 'du byed rnams gnas par gyur pa dmigs pa de'i tshe ci'i phyir sems can skyes shing 'byung ba rnams zas bzhi po kho nas gnas par gsungs te/zas bzhi ni mang ba'i phyir dang / brda phrad sla ba'i phyir dang / phan 'dogs par byed pa'i phyir dang / srog gi dbang po 'dzin pa'i phyir dang / dran pa nye bar gzhag pa la 'jug pa'i sgo yin pa'i phyir sems can skyes shing 'byung ba rnams zas bzhis gnas pa kho na yin par gsungs te/de ni zas rnams kyi bsdu ba rnam par gzhag pa yin no/ /de la zas rnams kyi rten rnam par gzhag pa gang zhe na/ kham gyi zas ni gzugs kyi phung por gtogs la reg pa dang yid la sems pa dang / rnam par shes pa'i zas ni ming gis bsdus pa'i phung po yin pas de dag gi rten dang /sngar gzugs kyi phung po ni gnas drug la brten te 'jug la ming gis bsdus pa'i phung po bzhi po dag ni gnas bdun la brten te 'jug par 'gyur ro zhes bstan pa bzhin du ci rigs par sbyar te/de ni zas rnams kyi rten rnam par gzhag pa yin no/ /de ltar zas rnams kyi rten rnam par gzhag pa ji skad bstan pa de dag gis sems can skyes shing 'byung ba rnams gnas shing tshor bar 'gyur ba'i phyir des ni de 'byung ba'i dngos po bstan to/ /de'i kun nas nyon mongs pa dang rnam par byang ba'i dngos po zhes bya bas ni bden pa rnams bstan te/sdug bsngal 'phags pa'i bden pa dang / kun 'byung ba dang / 'gog pa dang / lam 'phags pa'i bden pa'o/ /de dag gi rnam par gzhag pa yang rnam pa drug gis bstan te/ ngo bo nyid dang / don dang / rab tu dbye ba dang / go rims dang / bsdu ba dang / rten gyis so/ /de la bden pa rnams kyi ngo bo nyid rnam par gzhag pa gang zhe na/ sdug bsngal gyi bden pa zhes bya ba la sogs pas ni bden pa rnams bstan te/ de la bden pa ni bzhi ste/sdug bsngal la 'phags pa'i bden pa'i ngo bo nyid ni skye ba'i kun nas nyon mongs pa sdug bsngal brgyad dang gsum gyis bsdus pa gang yin pa'o/ /kun 'byung ba'i bden pa'i ngo bo nyid ni nyon mongs pa'i kun nas nyon mongs pa dang / las kyi kun nas nyon mongs pa dang /sred pas bsdus pa gang yin pa'o/ /'gog pa'i bden pa'i ngo bo nyid ni sdug bsngal dang / kun 'byung ba ma lus par spangs pa nyon mongs pa 'gog pa dang / phung po 'gog pas bsdus pa gang yin pa'o/ /lam gyi bden pa'i ngo bo nyid ni sdug bsngal dang /kun 'byung ba spong ba 'phags pa'i lam yan lag brgyad pa tshogs kyi lam dang / sbyor ba'i lam dang / rnam par dag pa'i lam gyis bsdus pa gang yin pa ste/ de ni bden pa rnams kyi ngo bo nyid rnam par gzhag pa yin no/ /de la bden pa rnams kyi don rnam par gzhag pa gang zhe na/rnam pa gnyis te/ nges pa'i tshig dang / dgos pa'o/ /de la nges pa'i tshig ni ci'i phyir bden pa zhes bya/ ci'i phyir 'phags pa'i bden pa zhes bya/ ci'i phyir sdug bsngal dang / 'gog pa dang / lam zhes bya/ci'i phyir sdug bsngal bden pa dang / kun 'byung ba bden pa dang / 'gog pa bden pa dang / lam bden pa zhes bya zhe na/ bden pa zhes bya ba'i don ni bstan pa dang mi mthun pa med pa'i mtshan nyid kyi don dang / de mthong na rnam par dag pa'i rgyur 'gyur ba'i don to//ci'i phyir 'phags pa'i bden pa zhes bya zhe na/ 'phags pa'i bden pa'i don ni 'phags pa rnams kyi bden pa de dag chos nyid kyi sgo dang / rtogs pa'i sgo gnyi ga nas de kho na lta bu yin par yang dag pa ji lta ba bzhin mkhyen cing gzigs kyi/ byis pa rnams kyi yang dag pa ji lta ba bzhin du mi shes mi mthong bas na/de'i phyir 'phags pa'i don zhes bya ste/ byis pa rnams la yang de dag chos nyid kyi sgo nas ni don med mod kyi/ rtogs pa'i sgo nas ni ma yin gyi/ 'phags pa rnams la ni de gnyi ga'i sgo nas bden pa yin no/ / ci'i phyir sdug bsngal dang / kun 'byung ba dang / 'gog pa dang / lam zhes bya zhe na/ sdug bsngal gyi don ni nyon mongs pa las 'byung ba'i 'du byed do / /kun 'byung ba'i don ni sdug bsngal bskyed pa'i don to/ /'gog pa'i don ni de gnyi ga nye bar zhi ba'i don to/ / lam gyi don ni don gsum po de dag sgrub pa'i don to/ /ci'i phyir sdug bsngal bden pa dang / kun 'byung ba bden pa dang / 'gog pa bden pa dang / lam bden pa zhes bya zhe na/ sdug bsngal yang sdug bsngal ba'i don to/ / lam gyi bar yang lam gyi don gyis yang dag pa de bzhin pa ma nor ba ste/phyin kyi ma log cing ma bslad pa dang / rang gi mtshan nyid kyis mi slu ba'i phyir ro/ /de la dgos pa ni ci'i phyir bden pa rnam par gzhag pa yongs su bstan zhe na/ kun nas nyon mongs pa dang rnam par byang ba'i phyogs su gtogs pa'i rgyu dang 'bras bu rnam par gzhag pa bstan pa'i phyir te/sdug bsngal gyi bden pa ni kun nas nyon mongs pa'i phyogs su gtogs pa'i 'bras bu yin la/ kun 'byung ba'i bden pa ni de skyed par byed pa'i rgyu yin no/ /'gog pa'i bden pa ni rnam par byang ba'i phyogs su gtogs pa'i 'bras bu yin la /lam gyi bden pa ni de thob par byed pa'i rgyu yin te/ de ni bden pa rnams kyi don rnam par gzhag pa yin no/ /de la bden pa rnams kyi rab tu dbye ba rnam par gzhag pa gang zhe na/ rnam pa drug ste / ngo bo nyid kyi rab tu dbye ba dang /mngon sum dang rjes su dpag pa'i rab tu dbye ba dang / mi mthun pa'i phyogs dang gnyen po'i rab tu dbye ba dang / yid la byed pa'i rab tu dbye ba dang / mngon par rtogs pa'i rab tu dbye ba dang / 'bras bu thob pa'i rab tu dbye ba'o/ /de la ngo bo nyid kyi rab tu dbye ba gang zhe na/sdug bsngal gyi bden pa'i ngo bo nyid ni skye ba'i kun nas nyon mongs pa sdug bsngal brgyad dang gsum gyis bsdus pa gang yin pa'o zhes bstan pa de la skye ba'i kun nas nyon mongs pa ni gang / sdug bsngal brgyad ni gang zhe na / skye ba'i kun nas nyon mongs pa zhes bya ba ni nyon mongs pa'i kun nas nyon mongs pa dang / las kyi kun nas nyon mongs pas khams gsum du skye'o/ /de'i 'og tu rab tu dbye ba ni rnam pa bzhis rnam par gzhag ste/ rab tu dbye ba dang / sdug bsngal ba dang /ma nyes pa dang / 'jug pas so/ /de la rab tu dbye ba ni rnam pa lnga ste/ khams kyi rab tu dbye ba dang / 'gro ba'i rab tu dbye ba dang / gnas gzhan gyi rab tu dbye ba dang / rigs kyi rab tu dbye ba dang / 'jig rten na lus kyi rab tu dbye ba'o//de la khams kyi rab tu dbye ba ni khams gsum du skye ba rnam pa gsum mo/ /'gro ba'i rab tu dbye ba ni 'gro ba lngar skye ba rnam pa lnga'o/ /gnas gzhan gyi rab tu dbye ba ni 'dod pa'i khams na gnas gzhan sum cu rtsa drug dang / gzugs kyi khams na gnas gzhan bco brgyad dang /gzugs med pa'i khams na gnas gzhan lnga bcu rtsa brgyad du skye'o/ /rigs kyi rab tu dbye ba ni 'dod pa'i khams na mi rnams la skye ba rnam pa gsum yod de/ rigs ngan par skye ba dang / rigs btsun pa dang / rigs ngan pa yang ma yin btsun pa yang ma yin par skye ba dang / 'dod pa na spyod pa'i lha rnams la yang skye ba rnam pa gsum yod de/ lha ma yin du skye ba dang / sa gzhi la brten pa'i nang du skye ba dang / nam mkha'i gzhal med khang la brten pa'i nang du skye ba'o/ / gzugs kyi khams na yang skye ba rnam pa gsum yod de/ so so'i skye bo rnams kyi 'du shes dang bcas par skye ba dang / 'du shes med par skye ba dang / 'phags pa rnams kyi gnas gtsang mar skye ba'o/ / gzugs med pa'i khams na yang skye ba rnam pa gsum yod de/'du shes rgya che ba rnams kyi nang du skye ba dang / 'du shes tshad med pa rnams kyi nang du skye ba dang / 'du shes med 'du shes med min gyi lha rnams kyi nang du skye ba ste / de dag bsdoms na rigs bcu gnyis su skye ba'o/ /'jig rten na lus kyi rab tu dbye ba phyogs bcu'i 'jig rten gyi khams tshad med pa dag na gnas pa rnams kyi skye ba tshad med pa dag yin par rig par bya'o/de la sdug bsngal ba'i rab tu dbye ba ni yun ring po nas skye ba de dag 'gro zhing 'khor ba rnams kyi yan lag dang nying lag bcad pa mang po nyams su myong ba las khrag 'dzag cing 'bab pa dang /der pha ma dang / phu nu dang / bu sring gi phyir sdug bsngal ba dang / gnyen bshes dang / nor dang / longs spyod zad pa mang po nyams su myong ba rnams kyis mchi ma mang po 'dzag cing 'bab pa dang / de dag tu ma'i nu zho 'thungs pa yang rgya mtsho chen po bzhi'i chu bas kyang ches mang ngo zhes gsungs pa dang /de lta bu dang mthun pa rnams ni skye ba'i sdug bsngal ba'i rab tu dbye ba yin par rig par bya'o/ /de la ma nges pa'i rab tu dbye ba ni skye ba de dag tu 'gro zhing 'khor ba rnams kyi pha dang ma'i mtha' thug pa med pa dang /pha ma dang / phu nu dang / bu sring dang / mkhan po dang / slob dpon dang / bla ma dang / bla ma lta bur ma gyur pa med pa dang / gang zag gcig gi rus pa'i phung po yang sdud pa zhig yod la bsdus kyang 'jig pa dang / rul bar mi 'gyur du zin na ni ri ngos kyi dpangs tsam mo zhes gsungs pa dang /de lta bu dang mthun pa rnams ni skye ba'i ma nges pa'i rab tu dbye ba yin par rig par bya'o/ /de la 'jug pa'i rab tu dbye ba ni skye ba de dag tu 'gro zhing 'khor ba rnams kyi rten cing 'brel par 'byung ba'i ngo bo nyid dang / don dang / rab tu dbye ba dang / go rims dang / bsdu ba dang / rten rnam par gzhag pa dag yin par rig par bya'o/ /de la sdug bsngal brgyad gang zhe na/ skye ba'i sdug bsngal dang / rga ba'i sdug bsngal dang / na ba'i sdug bsngal dang / 'chi ba'i sdug bsngal dang / mi sdug pa dang phrad pa'i sdug bsngal dang / sdug pa dang bral ba'i sdug bsngal dang / 'dod pas phongs pa'i sdug bsngal dang / mdor na nye bar len pa'i phung po lnga sdug bsngal ba'o/ /de la ji ltar na skye ba sdug bsngal ba yin zhe na/ rnam pa lnga ste/ sdug bsngal dang ldan pa'i phyir dang /gnas ngan len dang ldan pa'i phyir dang / sdug bsngal gyi gnas yin pa'i phyir dang / nyon mongs pa'i gnas yin pa'i phyir dang / mi 'dod bzhin du 'bral ba'i chos nyid yin pa'i phyir ro/ /rga ba yang rnam pa lngas sdug bsngal nyid yin te/ gzugs bzang ba yongs su nyams pa'i phyir dang / mthu stobs yongs su nyams pa'i phyir dang / dbang po yongs su nyams pa'i phyir dang / yul longs spyod pa yongs su nyams pa'i phyir dang / tshe yongs su nyams pa'i phyir ro/ /na ba yang rnam pa lngas sdug bsngal ba nyid yin te/lus kyi rang bzhin 'gyur ba'i phyir dang / sdug bsngal dang yid mi bde ba mngon par 'phel zhing de la shas cher gnas pa'i phyir dang / yul gyi longs spyod yid du 'ong ba mi 'dod pa'i phyir dang / yul gyi longs spyod yid du 'ong ba mi 'dod bzhin du yongs su spyad dgos pa'i phyir dang /srog gi dbang po dang bral bar 'gyur ba'i phyir ro/ /'chi ba yang rnam pa lngas sdug bsngal nyid yin te/ longs spyod sdug pa phun sum tshogs pa dang 'bral ba nyid kyi phyir dang / rtsa 'jing sdug pa phun sum tshogs pa dang 'bral ba nyid kyi phyir dang /'khor phun sum tshogs pa dang 'bral ba nyid kyi phyir dang / lus sdug pa phun sum tshogs pa dang 'bral ba nyid kyi phyir dang / 'chi ba'i tshe sdug bsngal dang yid mi bde ba rab tu drag po nyams su myong bar 'gyur ba nyid kyi phyir dang /mi sdug pa dang phrad pa yang rnam pa lngas sdug bsngal ba nyid yin te/ de dang phrad pas sdug bsngal dang yid mi bde ba nyid kyi phyir dang / chad pas 'jigs pa'i gnas nyid kyi phyir dang / nyam nga bzhin du 'chi ba'i 'jigs pa'i gnas nyid kyi phyir dang /chos dang 'gal bas ngan 'gros 'jigs pa'i gnas nyid kyi phyir ro/ / sdug pa dang bral ba yang rnam pa lngas sdug bsngal ba nyid yin te/ de dang bral bas mya ngan skyes pa nyid kyi phyir dang / smre sngags 'don pa nyid kyi phyir dang / lus la gnod pa nyid kyi phyir dang /yon tan rnam pa lngas rjes su dran zhing 'dod pas yid yongs su gdung ba nyid kyi phyir dang / de'i longs spyod mtshan nyid kyi phyir dang / sdug pa dang bral ba'i sdug bsngal gyi snod nyid kyi ji lta ba bzhin du 'dod pas phongs pa'i sdug bsngal yang rnam pa de lngas sdug bsngal ba nyid yin par rig par bya'o//mdor na nye bar len pa'i phung po lnga sdug bsngal ba yang rnam pa lngas sdug bsngal nyid yin te/ mngon par grub pa'i sdug bsngal gyi snod nyid yin pa'i phyir dang / mngon par grub pa la brten pa'i sdug bsngal gyi snod nyid yin pa'i phyir dang /sdug bsngal gyi sdug bsngal gyi snod nyid yin pa'i phyir dang / 'gyur ba'i sdug bsngal gyi snod nyid yin phyir dang / 'du byed kyi sdug bsngal gyi rang bzhin yin pa'i phyir ro/ /de la skye ba'i sdug bsngal zhes bya ba ni skye ba'i tshe na lus dang sems kyi sdug bsngal gyi tshor ba 'byung ba la bya'i/skye ba nyid ni sdug bsngal ma yin te/ sdug bsngal gyi gzhi ni de yin no/ /de bzhin du 'dod pas phongs pa'i sdug bsngal zhes bya ba'i bar yang 'dod pas phongs pa'i sdug bsngal gyi tshor ba 'byung ba la bya'i/ 'dod pas phongs pa nyid ni sdug bsngal ma yin te/sdug bsngal gyi gzhi ni de yin no zhes snga ma bzhin du sbyar ro/ /mdor na nye bar len pa'i phung po lnga sdug bsngal ba zhes bya ba ni skye ba la sogs pa de dag gi rnam grangs dag gi sdug bsngal kho na yin te/ sdug bsngal brgyad po de dag kyang skye ba'i kun nas nyon mongs pa nyid kyis rab tu phye ba yin par rig par bya'o//de la sdug bsngal gsum gang zhe na/ sdug bsngal gyi sdug bsngal dang / 'gyur ba'i sdug bsngal dang / 'du byed kyi sdug bsngal lo/ /skye ba'i sdug bsngal dang / rga ba'i sdug bsngal dang / na ba'i sdug bsngal dang /'chi ba'i sdug bsngal dang / mi sdug pa dang phrad pa'i sdug bsngal zhes smos pa dang po lnga'o/ /'gyur ba'i sdug bsngal gang zhe na/ sdug pa dang bral ba'i sdug bsngal dang / 'dod pas phongs pa'i sdug bsngal zhes smos pa bar ma gnyis so/ /'du byed kyi sdug bsngal gang zhe na/mdor na nye bar len pa'i phung po lnga sdug bsngal ba zhes smos pa tha ma gcig go/ /yang rnam grangs gzhan du na sdug bsngal gyi sdug bsngal ni dang po bdun gyis bstan to/ /'gyur ba'i sdug bsngal la ni bdun po de dag las drug gi gnyen po dkar po'i phyogs drug po rga ba'i gnyen po nad med pa dang /'chi ba'i gnyen po gson pa dang / mi sdug pa dang phrad pa'i gnyen po sdug pa dang / sdug pa dang bral ba'i gnyen por mi sdug pa dang bral ba dang / 'dod pas phongs pa'i gnyen po 'dod pa phun sum tshogs pa gang yin pa rnams dang /'dod chags la sogs pa'i nyon mongs pa rnams so/ /'du byed kyi sdug bsngal ni snga ma bzhin te/ de yang mdor bsdu na sdug bsngal gyi sdug bsngal dang / 'gyur ba'i sdug bsngal sngar bstan pa'i rten du gyur pa phung po ma gtogs pa de las gzhan pa'i phung po sdug bsngal yang ma yin/bde ba yang ma yin pa de dag ni 'du byed kyi sdug bsngal zhes bya ste/ sdug bsngal gsum po de dag kyang skye ba'i kun nas nyon mongs pa nyid kyi rab tu dbye ba yin par rig par bya'o/ /sdug bsngal gyi bden pa'i ngo bo nyid rab tu dbye ba ji skad bstan pa de yang mdor bsdu na rnam pa brgyad de/shin tu rgyas la bsrabs pa dang / shin tu rgyas la bsrabs pa yang ma yin ma bsrabs pa yang ma yin pa dang / bar ma ma bsrabs pa dang / bsrabs la ma bsrabs pa dang / ches bsrabs la ma bsrabs pa dang /shin tu ches bsrabs la ma bsrabs pa dang / sdug bsngal ma yin la sdug bsngal du snang zhing bsrabs pa chen por nye bar gnas pa'o/ /de la dang po ni 'dod pa na spyod pa dge ba'i rtsa ba ma bsags pa rnams kyi sdug bsngal gang yin pa'o//gnyis pa ni 'dod pa na spyod pa thar pa'i cha dang mthun pa'i dge ba'i rtsa ba bskyed pa rnams kyi sdug bsngal gang yin pa'o/ /gsum pa ni 'dod pa na spyod pa 'jig rten pa'i lam gyis 'dod chags dang bral ba nyid dang bral bar bya ba'i phyir dge ba'i rtsa ba bsags pa rnams kyi sdug bsngal gang yin pa'o//bzhi pa ni gzugs kyi khams su skyes pa thar pa'i cha dang mthun pa rnam par spangs pa rnams kyi sdug bsngal gang yin pa'o/ /lnga pa ni gzugs med pa'i khams su skyes pa thar pa'i cha dang mthun pa rnams par spangs pa rnams kyi sdug bsngal gang yin pa'o//drug pa ni slob pa bzhi mthong ba rnams kyi sdug bsngal gang yin pa'o/ /bdun pa ni mi slob pa phung po'i lhag ma dang bcas pa rnams kyi srog gi dbang po'i rkyen gyis ming dang gzugs gang yin pa'o/ /brgyad pa ni byang chub sems dpa' pha rol tu phyin pa thob pa bsams bzhin du srid par skye ba rnams kyi sdug bsngal gang yin pa ste/de ni sdug bsngal gyi bden pa'i ngo bo nyid kyi rab tu dbye ba yin no/ /kun 'byung ba'i bden pa'i ngo bo nyid ni nyon mongs pa'i kun nas nyon mongs pa dang / las kyi kun nas nyon mongs pa sred pas bsdus pa gang yin pa'o zhes bstan pa de la nyon mongs pa'i kun nas nyon mongs pa ni gang /las kyi kun nas nyon mongs pa ni gang / sred pa ni gang zhe na/ nyon mongs pa'i kun nas nyon mongs pa zhes bya ba ni nyon mongs pa dang nye ba'i nyon mongs pa rnams so//de dag gi rab tu dbye ba ni rnam pa dgus rnam par gzhag ste/ ngo bo nyid dang / rab tu dbye ba dang / rgyu dang / gnas skabs dang / sgo dang / che ba dang / phyin ci log dang / rnam grangs dang / nyes dmigs kyis so/ /de la ngo bo nyid gang zhe na/ chos gang skye ba na bdag nyid rab tu ma zhi ba'i mtshan nyid du skye la/de la skyes pas 'du byed kyi rgyud kyang rab tu ma zhi ba zhi ba kho nar 'jug pa'o/ /rab tu dbye ba gang zhe na/ nyon mongs pa drug dang / nye ba'i nyon mongs pa mang po dag gi mtshan nyid rab tu dbye ba'o/ /rgyu gang zhe na/ rnam pa drug ste/ rten dang / dmigs pa dang / 'du 'dzi dang / bshad pa dang / goms pa dang / yid la byed pa las nyon mongs pa skyes pa'o/ /gnas skabs gang zhe na/ rnam pa bdun te/ bag la nyal dang / kun nas dkris pa dang / kun brtags pa dang / lhan cig skyes pa dang / chung ngu dang / 'bring dang / chen po'i gnas skabs so/ /sgo gang zhe na/ rnam pa gnyis te/ kun nas dkris pa dang / bag la nyal gyi sgo'o/ /che ba gang zhe na/ rnam pa drug te/ ltung ba dang / skye ba dang / rgyud dang / gzhi dang / las kun nas slong ba dang / mthar gyur pa'o/ /phyin ci log gang zhe na/rnam pa bdun te/ phyin ci log bzhi dang / de dag la 'du shes dang / lta ba dang / sems phyin ci log tu gyur pa'o/ /rnam grangs gang zhe na/ rnam grangs mang po 'di lta ste/ kun nas sbyor ba dang / 'chi ba dang / bag la nyal ba dang / nye ba'i kun nas nyon mongs pa dang /kun nas dkris pa zhes bya ba la sogs pa dag go/ /nyes dmigs gang zhe na/ nyes dmigs rnam pa du ma 'di lta ste/ sems kun nas nyon mongs par byed pa dang / dmigs pa la phyin ci log par byed pa dang / bag la nyal ba brtan par byed pa dang / rgyu mthun pa'i 'du byed kyi rgyun 'jug par byed pa zhes bya ba la sogs pa dag go//las kyi kun nas nyon mongs pa zhes bya ba ni lus dang ngag dang yid kyi mngon par 'du byed pa rnams so/ /de dag gi rab tu dbye ba yang rnam pa dgus rnam par gzhag ste/ ngo bo nyid dang / rab tu dbye ba dang / rgyu dang / gnas skabs dang / sgo dang / che ba dang / phyin ci log dang / rnam grangs dang / nyes dmigs kyis so/ /de la ngo bo nyid gang zhe na/ chos gang skye ba na mngon par 'du byed pa'i mtshan nyid kyang skye la/ de skyes pas lus dang ngag gi mngon par 'du byed pa yang 'jug pa'o/ /rab tu dbye ba gang zhe na/rnam pa gnyis te/ dge ba bcu dang / mi dge ba bcu'i las kyi lam yang dag par blangs te 'jug pa'i gang zag gi mtshan nyid kyi rab tu dbye ba dang / las kyi lam de nyid kyi rab tu dbye ba'o/ /rgyu gang zhe na/ rnam pa bcu gnyis te/ chags pa dang / zhe sdang dang / gti mug dang /bdag dang / gzhan dang / gzhan gyi rjes su 'jug pa dang / zang zing dang / 'jigs pa dang / gnod pa bya ba'i phyir dang / rtse zhing dga' ba dang / chos su shes pa dang / 'dir sa bcad gcig chad 'dug kyang ma dpe ma rnyed/ log par lta ba'i gnas skabs gang zhe na/ rnam pa lnga ste/ chung ngu dang /'bring dang / chen po dang / byung ba dang / bag chags kyi gnas skabs so/ /sgo gang zhe na/ rnam pa gnyis te/ 'bras bu 'byin pa'i sgo nas dang / gnod pa byed pa dang phan 'dogs pa'i sgo'o/ /che ba gang zhe na/ rnam pa drug ste/ mngon par 'du byed pa dang / mngon par 'du byed pa med pa dang /ngo bo nyid dang / gzhi dang / mi mthun pa'i phyogs gcig tu nges pa dang / mi mthun pa'i phyogs sel ba'o/ /phyin ci log gang zhe na/ rnam pa gsum ste/ bya ba phyin ci log dang / 'dzin pa phyin ci log dang / dga' ba phyin ci log go/ /rnam grangs gang zhe na/ las byas pa dang / ma byas pa dang / bsags pa dang / ma bsags pa zhes bya ba la sogs pa dag go/ /nyes dmigs gang zhe na/ rnam pa bdun te/ bdag la gnod pa dang / gzhan la gnod pa dang / gnyi ga la gnod pa dang / tshe 'di'i kha na ma tho ba bskyed pa dang / tshe phyi ma'i kha na ma tho ba bskyed pa dang /de las skyes pa'i sems las byung ba sdug bsngal ba dang / yid mi bde ba nyams su myong bar 'gyur ro/ /sred pa gang zhe na/ rnam pa bzhi ste/ bdag tu sred pa dang / rtag par sred pa dang / bde bar sred pa dang / gtsang bar sred pa'o/ /de la bdag tu sred pa la brten nas ni lus la chags pa dang ldan pa'i sred pa 'byung ngo //rtag par sred pa la brten nas ni yang 'byung ba'i sred pa 'byung ngo / /bde bar sred pa la brten nas ni dga' ba'i 'dod chags dang ldan pa'i sred pa 'byung ngo / /gtsang bar sred pa la brten nas ni de dang der mngon par dga' ba'i sred pa 'byung ste/sred pa rnam pa bzhi de dag las dang po ni sred pa'i bag la nyal gyi rnam pa yin la/ tha ma gsum ni sred pa'i kun nas dkris pa'i rnam pa yin par rig par bya'o/ /de la lus chags pa dang ldan pa'i sred pa gang zhe na/ lus la chags shing sbyor bar byed pa gang yin pa'o//yang 'byung ba'i sred pa gang zhe na/ phyi ma'i lus kyi khyad par 'dod pa gang yin pa'o/ /dga' ba'i 'dod chags dang ldan pa'i sred pa gang zhe na/ gzugs la sogs pa yul yid du 'ong ba thob pa rnams la yid mi bde zhing lhag par chags pa dang ldan pa gang yin pa'o/ /de dang der mngon par dga' ba'i sred pa gang zhe na/gzugs la sogs pa yul yid du 'ong ba ma thob pa rnams la kun du sbyor bar 'dod pa dang ldan pa gang yin pa'o/ /sred pa'i kun nas dkris pa'i rnam pa gsum po de dag kyang mdor bsdu na rnam pa gnyis te/ yang 'byung ba'i sred pa la sred pa dang / de'i longs spyod kyi yul la sred pa'o/ /de la yang 'byung ba'i sred pa ni 'byung ba'i sred pa yin no/ /dga' ba'i 'dod chags dang ldan pa'i sred pa dang / de dang der mngon par dga' ba'i sred pa gnyis ni de'i longs spyod kyi yul la sred pa ste/ de yang yul thob pa dang /ma thob pa la sred pa go rims bzhin no/ /sred pa rnam pa bzhi po de dag gis bsdus pa'i nyon mongs pa'i kun nas nyon mongs pa dang / las kyi kun nas nyon mongs pa ji skad bstan pa de dag ni kun nas 'byung ba'i bden pa'i ngo bo nyid yin par rig par bya'o//de la bcom ldan 'das kyis ma mo'i mtshan nyid kyi tshul gyis yang 'byung ba'i las dang nyon mongs pa sdug bsngal skyed par byed pa gang dag yin pa de dag kun 'byung ba'i bden pa yin par gsungs pa na / ci'i phyir mdo sde'i tshul gyis lus la chags pa dang ldan pa'i sred pa kho na kun 'byung ba'i bden pa yin par gsungs she na/de ni gtso bo yin pa'i phyir te/ 'di ltar sred pa'i bag la nyal de ni nyon mongs pa kun nas slong bar byed pa dang / las kun nas slong bar byed pa dang / sred pa'i kun nas dkris pa rnam pa gsum po yang 'byung ba'i sred pa dang /dga' ba'i 'dod chags dang ldan pa'i sred pa dang / de dang der mngon par dga' ba'i sred pa kun nas slong ba dngos po la khyab par byed pa dang / de skye ba nas gnod pa rnam pa mang po rgyas par byed pas de ni gtso bo yin pa'i phyir te/ de ni kun 'byung ba'i bden pa'i ngo bo nyid kyi rab tu dbye ba yin no/ /'gog pa'i bden pa'i ngo bo nyid ni sdug bsngal dang / kun 'byung ba ma lus par spangs pa'i nyon mongs pa'i 'gog pa dang / phung po 'gog pas bsdus pa gang yin pa'o zhes bstan pa de la/ sdug bsngal dang / kun 'byung ba ma lus par spangs pa ni gang / nyon mongs pa 'gog pa ni gang / phung po 'gog pa ni gang zhe na/ sdug bsngal dang kun 'byung ba ma lus par spangs pa zhes bya ba ni de gnyis kyi sa bon 'phags pa'i lam gyis so sor brtags te bkag pa'o//nyon mongs pa 'gog pa zhes bya ba ni phung po'i lhag ma dang bcas pa'i mya ngan las 'das pa'i dbyings te/ sred pa zad pa dang 'dod chags dang bral ba zhes bya ba yin no/ /phung po 'gog pa zhes bya ba ni phung po lhag ma med pa'i mya ngan las 'das pa'i dbyings te/'gog pa dang mya ngan las 'das pa zhes bya ba yin no/ /'gog pa'i bden pa'i ngo bo nyid de yang rab tu dbye na rnam pa bcu gnyis te/ mtshan nyid dang / zab pa dang / brdar btags pa dang / don dam pa dang / yongs su ma rdzogs pa dang / yongs su rdzogs pa dang / rgyan med pa dang / rgyan dang bcas pa dang / lhag ma dang bcas pa dang / lhag ma med pa dang / khyad par du 'phags pa dang / rnam grangs so/ /de la mtshan nyid gang zhe na/ de bzhin nyid dang / lam dang / nyon mongs pa mi 'byung ba ste gang du 'gog pa dang /gang gis 'gog pa dang / gang 'gog pa'o/ /zab pa gang zhe na/ 'gog pa de 'du byed rnams zad pa las gzhan zhes kyang mi bya/ gzhan ma yin pa zhes kyang mi bya/ /gzhan dang gzhan ma yin pa zhes kyang mi bya/ gzhan yang ma yin gzhan ma yin pa yang ma yin zhes kyang mi bya'o//brdar btags pa gang zhe na/ 'jig rten pa'i lam gyis sa bon nyams smad pas 'gog pa ste/ de ni mya ngan las 'das pa ni ma yin gyi de'i yan lag gis mya ngan las 'das pa zhes bya'o/ /don dam pa gang zhe na/ 'phags pa'i shes rab kyis sa bon kun tu bcom pas 'gog pa gang yin pa'o//yongs su ma rdzogs pa gang zhe na/ slob pa rnams kyi 'gog pa gang yin pa'o/ /yongs su rdzogs pa gang zhe na/ mi slob pa rnams kyi 'gog pa gang yin pa'o/ /rgyan med pa gang zhe na/ dgra bcom pa shes rab kyis rnam par grol ba rnams kyi 'gog pa gang yin pa'o//rgyan dang bcas pa gang zhe na/ dgra bcom pa gnyi ga'i cha las rnam par grol ba rig pa gsum dang / mngon par shes pa drug dang ldan pa rnams kyi 'gog pa gang yin pa'o/ /lhag ma dang bcas pa gang zhe na/phung po'i lhag ma dang bcas pa'i 'gog pa gang yin pa'o/ /lhag ma med pa gang zhe na/ phung po'i lhag ma med pa'i 'gog pa gang yin pa'o/ /khyad par du 'phags pa gang zhe na/ sangs rgyas dang byang chub sems dpa' rnams kyis mi gnas pa'i mya ngan las 'das pas bsdus pa'i 'gog pa gang yin pa'o//rnam grangs gang zhe na/ ma lus par spangs pa dang / nges par spangs pa dang / byang bar gyur pa dang / zad pa dang / 'dod chags dang bral ba dang / 'gog pa dang / rnam par zhi ba dang / nub pa zhes bya ba la sogs pa'o//rab tu dbye ba rnam pa bcu gnyis su 'gyur ba'i gnas kyi snod nyid du 'gyur ba'i phyir ro/ /sbyor ba'i lam gang zhe na/ tshogs kyi lam gang yin pa de nyid sbyor ba'i lam yang yin mod kyi sbyor ba'i lam yin la tshogs kyi lam ma yin pa yang yod de/ tshogs bsags pa'i gong du nges par 'byed pa'i cha dang mthun pa'i dge ba'i rtsa ba bzhi po dro bar gyur pa dang / rtse mo dang / bden pa'i rjes su mthun pa'i bzod pa dang / 'jig rten pa'i chos kyi mchog rnams so/ / rnam par dag pa'i lam gang zhe na/ de ni rnam pa gsum ste/mthong ba'i lam dang / bsgom pa'i lam dang / mthar thug pa'i lam mo/ /de la mthong ba'i lam gang zhe na/ 'jig rten pa'i chos kyi mchog gi mjug thogs kho nar skad cig ma bcu drug po la bden pa mngon par rtogs pa'i shes pa gang yin pa'o/ /bsgom pa'i lam gang zhe na/mthong ba'i lam ma thob pa'i gong du bsgom pa'i lam rnam par dbye ba bcu gcig po dag ste/ zhi gnas bsgom pa dang / lhag mthong bsgom pa dang / 'jig rten pa'i lam bsgom pa dang / 'jig rten las 'das pa'i lam bsgom pa dang / lam chung ngu bsgom pa dang /lam 'bring po bsgom pa dang / lam chen po bsgom pa dang / sbyor ba'i lam bsgom pa dang / bar chad med pa'i lam bsgom pa dang / rnam par grol ba'i lam bsgom pa dang / khyad par gyi lam bsgom pa'o/ /mthar thug pa'i lam gang zhe na/ gnas ngan len thams cad rgyun bcad pa dang / phrad pa'i thob pa rnams kyi rgyun bcad pa dang / bral ba'i thob pa rnams thob pa'i phyir rdo rje lta bu'i ting nge 'dzin la brten nas de ma thag tu gnas ma lus par gyur te/ zad pa dang mi zad pa skye ba shes pa dang / mi slob pa'i chos bcu thob pa'i shes pa gang yin pa'o//lam gyi bden pa'i ngo bo nyid de yang rab tu dbye na rnam pa bcu gcig ste/ dngos po la yongs su rtog pa'i lam dang / rtsol ba las byung ba'i lam dang / ting nge 'dzin yongs su sbyong bar byed pa'i lam dang / mngon par rtogs pa la sbyor ba'i lam dang / mngon par rtogs pa dang 'dres pa'i lam dang / mngon par rtogs pa'i lam dang / rnam par dag par nges par 'byin pa'i lam dang / gnas dang dbang po tha dad pa'i lam dang / bslab pa gsum yongs su sbyong ba'i lam dang / yon tan thams cad sgrub par byed pa'i lam dang /lam sdud pa'i lam mo/ /de dag kyang dran pa nye bar gzhag pa dang / yang dag par spong pa dang / rdzu 'phrul gyi rkang pa dang / dbang po dang / stobs dang / byang chub kyi yan lag dang / 'phags pa'i lam yan lag brgyad pa dang / lam bzhi dang / chos kyi gnas bzhi dang /zhi gnas dang / lhag mthong dang / dbang po gsum dang go rims bzhin no/ /de ni lam gyi bden pa'i ngo bo nyid kyi rab tu dbye ba yin no/ / de dag ni ngo bo nyid kyi rab tu dbye ba rnam par gzhag pa yin no/ /de la rnam pa'i rab tu dbye ba gang zhe na/ bden pa bzhi po dag gi mtshan nyid rnam pa bzhi bzhis so sor rig par bya'o// de la sdug bsngal gyi bden pa'i mtshan nyid ni rnam pa bzhi po mi rtag pa'i rnam pa dang / sdug bsngal ba'i rnam pa dang / stong pa'i rnam pa dang / bdag med pa'i rnam pas so sor rig par bya'o//rnam pa bzhi po de dag gi rnam par gzhag pa ni/ sdug bsngal gyi bden pa la rnam pa bcus yongs su rtog par byed pa na/ rnam pa bzhi po de dag gi rjes su 'jug par 'gyur te/ bcu gang zhe na/ 'gyur ba'i rnam pa dang / 'jig pa'i rnam pa dang /bral ba'i rnam pa dang / chos nyid kyi rnam pa dang / nye ba'i rnam pa dang / kun tu sbyor ba dang 'ching ba'i rnam pa dang / mi sdug pa'i rnam pa dang / grub pa dang bde ba med pa'i rnam pa dang / dmigs su med pa'i rnam pa dang /rang dbang med pa'i rnam pas so/ /de la mi rtag pa'i rnam pa ni rnam pa dang po lngas bsdus so/ /sdug bsngal gyi rnam pa ni rnam pa bar ma gsum gyis bsdus so/ /stong pa'i rnam pa ni rnam pa tha ltag gcig pus bsdus so/ / bdag med pa'i rnam pa ni rnam pa tha mas bsdus so/ /de la 'gyur ba'i rnam pa gang zhe na/ 'gyur ba rnam pa bco lnga dang / 'gyur ba'i rnam pa brgyad kyis 'du byed rnams 'gyur ba ste/ 'gyur ba'i rnam pa bco lnga gang zhe na/ gnas skabs las gyur pa dang /kha dog las gyur pa dang / dbyibs las gyur pa dang / 'byor pa dang rgud pa las gyur pa dang / yan lag dang nying lag tshang ba dang ma tshang ba las gyur pa dang / yongs su ngal ba las gyur pa dang / gzhan gyis gnod pa byas pa las gyur pa dang /grang ba dang dro ba las gyur pa dang / spyod lam las gyur pa dang / rig pa las gyur pa dang / kun nas nyon mongs pa las gyur pa dang / na ba las gyur pa dang / 'chi ba las gyur pa dang / rnam par bsngos pa la sogs pa las gyur pa dang /thams cad kyi thams cad du mi snang zhing yongs su zad pa las gyur pa'i 'gyur ba'o/ /'gyur ba'i rgyu rnam pa brgyad gang zhe na/ dus kyis yongs su 'gyur ba dang / gzhan gyis gnod pa byas pa dang / longs spyod pa dang / dus tshigs 'gyur ba dang / mes tshig pa dang / chus khyer ba dang / rlung gis skams pa dang / rkyen gzhan dang phrad pa ste/ 'gyur ba rnam pa bco lnga dang / 'gyur ba'i rgyu rnam pa brgyad kyis 'du byed rnams 'gyur ba ni/ 'gyur ba'i rnam pas bsdus pa'i mi rtag pa'i rnam pa yin no/ / 'jig pa'i rnam pa gang zhe na/ 'du byed rnams skad cig skad cig la rkyen gyi dbang gis 'byung zhing byung nas kyang 'jig pa'i rkyen med par rang gi ngang gis 'jig pa gang yin pa ste/ de ni 'jig pa'i rnam pas bsdus pa'i mi rtag pa'i rnam pa yin no/ /bral ba'i rnam pa gang zhe na/phyi nang gi dngos po sngon rje dpon la sogs pa dang / longs spyod yod cing bdog pa las de dang bral bar 'gyur ba ste/ de ni 'bral ba'i rnam pas bsdus pa'i mi rtag pa'i rnam pa yin no/ /chos nyid kyi rnam pa gang zhe na/ 'gyur ba'i mi rtag pa dang / 'jig pa'i mi rtag pa dang / bral ba'i mi rtag pa de dag da ltar byung ba'i dus su nye bar ma gyur du zin kyang ma 'ongs pa'i dus su de lta bur 'gyur ba'i chos nyid yin pas te / de ni chos nyid kyi rnam pas bsdus pa'i mi rtag pa yin no/ /nye ba'i rnam pa gang zhe na/ 'gyur ba'i mi rtag pa dang / 'jig pa'i mi rtag pa dang / bral ba'i mi rtag pa de dag da ltar mngon sum du nye bar gyur pa ste/ de ni nye ba'i rnam pas bsdus pa'i mi rtag pa'i rnam pa yin no/ /de ltar na mi rtag pa'i rnam pa ni 'gyur ba'i rnam pa dang / 'jig pa'i rnam pa dang /bral ba'i rnam pa dang / chos nyid kyi rnam pa dang / nye ba'i rnam pa lngas bsdus pa yin no/ /kun du sbyor ba dang 'ching ba'i rnam pa gang zhe na/ bde ba dang mthun pa'i 'du byed rnams dang / bde ba'i tshor ba 'gyur ba'i sdug bsngal nyid kyis sdug bsngal ba gang yin pa ste/de dag ni sred pa'i kun du sbyor ba'i gnas yin la/ sred pa'i kun du sbyor ba yang skye ba dang / rga ba dang / na ba dang / 'chi ba la sogs pa dang / 'dod chags dang / zhe sdang dang / gti mug gi 'ching ba'i gnas yin pa'i phyir ro//mi sdug pa'i rnam pa gang zhe na/ sdug bsngal dang mthun pa'i 'du byed rnams dang / sdug bsngal gyi tshor ba sdug bsngal gyi sdug bsngal ba nyid kyis sdug bsngal ba gang yin pa ste/ de dag ni zag pa dang bcas pa dang / nye bar len pa dang bcas pa dang /yid mi bde ba dang ldan pa dang / gnas ngan len dang ldan pa dang / sdug bsngal nyid las rnam par grol ba dang / mi rtag pa dang / 'gog pa'i chos can yin pa'i phyir ro/ /grub pa dang bde ba med pa'i rnam pa gang zhe na/sdug bsngal yang ma yin bde ba yang ma yin pa dang / 'dun pa'i 'du byed rnams dang / sdug bsngal ba yang ma yin bde ba yang ma yin pa'i tshor ba 'du byed kyi sdug bsngal nyid kyis sdug bsngal ba gang yin pa ste/ de dag ni zag pa dang bcas pa dang /nye bar len pa dang bcas pa dang / gnas ngan len dang ldan pa dang / bde ba dang sdug bsngal gyi sa bon dang ldan pa dang / sdug bsngal gyi sdug bsngal dang / 'gyur ba'i sdug bsngal las rnam par ma grol ba dang / mi rtag pa dang 'gog pa'i chos can yin pa'i phyir ro//de ltar na sdug bsngal ba'i rnam pa ni kun du sbyor ba dang / 'ching ba'i rnam pa dang / mi rtag pa'i rnam pa dang / grub pa dang bde ba med pa'i rnam pa gsum gyis bsdus pa yin no/ /dmigs su med pa'i rnam pa gang zhe na/ dbang po tsam dang /yul tsam dang / de las byung ba'i tshor ba tsam dang / sems tsam zhig snang bar zad kyi de dag las bdag dang bdag gi zhes bya ba dmigs su med pas 'du byed thams cad stong pa dang / bdag med pa dang / de ltar na stong pa'i rnam pa ste/ dmigs su med pa'i rnam pas bsdus pa yin no//rang dbang med pa'i rnam pa gang zhe na/ rang gi mtshan nyid dang / mi rtag pa'i mtshan nyid dang / sdug bsngal gyi mtshan nyid dang ldan pa'i 'du byed thams cad ni rten cing 'brel par 'byung ba'i phyir rang dbang med pa yin la/ rang dbang med pa gang dag yin pa de dag ni bdag med pa ste/ de ltar na bdag med pa'i rnam pa ni rang dbang med pa'i rnam pas bsdus pa yin no/ /de ltar na sdug bsngal gyi bden pa'i mtshan nyid ni rnam par gzhag pa bzhi po rnam pa bcus bsdus pa de dag gis so sor rig par bya'o//de la kun 'byung ba'i bden pa'i mtshan nyid ni rnam pa bzhi po rgyu dang / kun 'byung ba dang / rab tu skye ba dang / rkyen gyi rnam pas so sor rig par bya ste/ de la rgyu ni srid pa ste/ sdug bsngal 'phen par byed pa yin pa'i phyir ro/ /kun 'byung ba ni 'phangs nas mngon par 'grub par byed cing sdug bsngal kun 'byung bar byed pa'i phyir ro//rab tu skye ba ni sdug bsngal mngon par grub pa ste srid pa de las rab tu skyes pa'i phyir ro/ /rkyen ni sred pa de ma 'ongs pa'i sdug bsngal gyi sa bon yongs su 'dzin pa dang / rim gyis sdug bsngal yang dag par grub par byed pa'i phyir ro//rnam grangs gzhan dang sred pa de ni len pa'i rgyur gyur pa yin pa dang / len pa dang len pa'i rgyu las byung ba'i sred pa kun 'byung bar byed pa gang yin pa dang / srid pa sngon du btang ba'i skye ba'i rab tu skyes par byed pa yin pa dang /skye ba'i rkyen gyis rga ba dang / na ba dang / 'chi ba dang / mya ngan la sogs pa mngon par 'grub par byed pa'i phyir rgyu dang / kun 'byung ba dang / rab tu skye ba dang / rkyen zhes bya ste go rims bzhin no/ /rnam grangs gzhan yang sred pa'i bag la nyal la sogs pa nyon mongs pa'i bag la nyal lus la zhen pa gang yin pa de ni phyi ma la yang srid pa mngon par 'grub pa'i rgyu yin no//rgyu de las skyes pa'i srid pa'i kun nas dkris pa rnam pa gsum ni kun 'byung ba dang / rab tu skye ba dang / rkyen yin te/ de yang 'byung ba'i sred pa yang dag par 'grub par byed pa'i phyir kun 'byung ba yin no/ /yang 'byung ba'i sred pa yang de yang dag pa'i 'dod chags dang ldan pa'i sred pa rab tu skye bar byed pa yin no/ /dga' ba'i 'dod chags dang ldan pa'i sred pa skyes pa de ni de dang der mngon par dga' ba'i sred pa'i rkyen yin te/de ltar sred pa'i bag la nyal gyi rnam pa dang / sred pa'i kun nas dkris pa rnam pa gsum la brten nas phyi ma la yang 'byung ba'i sred pa mngon par grub pa 'byung bar 'gyur bas na/ de'i phyir rgyu dang /kun 'byung ba dang / rab tu skye ba dang / rkyen zhes bya bar gsungs so/ /de ltar na kun 'byung ba'i bden pa'i mtshan nyid ni rnam pa bzhi po de dag gis so sor rig par bya'o/ /de la 'gog pa'i bden pa'i mtshan nyid ni rnam pa bzhi po 'gog pa dang /zhi ba dang / gya nom pa dang / nges par 'byung ba'i rnam pas so sor rig pa dang / de la 'gog pa ni kun 'byung ba'i bden pa ma lus par zad pa'i phyir ro/ /zhi ba ni sdug bsngal gyi bden pa ma lus par zad pa'i phyir ro/ /gya nom pa ni de mchog dang / gco bo dang / bla na med pa yin pa'i phyir ro/ /nges par 'byung ba ni 'gyur ba med pa'i sgo nas rtag pa'i phyir te/ de ltar na 'gog pa'i bden pa'i mtshan nyid rnam pa bzhi po de dag gis so sor rig par bya'o/ /de la lam gyi bden pa'i mtshan nyid ni rnam pa bzhi po lam dang / rigs pa dang / sgrub pa dang / nges par 'byin pa'i rnam pas so sor rig par bya ste/ de la lam ni shes bya yongs su tshol ba'i don to/ /rigs pa ni yang dag pa yongs su tshol ba'i don to/ /sgrub pa ni sgo bzhis rjes su 'jug pa'i don to / /nges par 'byin pa ni mya ngan las 'da' bar 'gro ba'i phyir bgrod pa gcig pa'i don to//de ltar na lam gyi bden pa'i mtshan nyid ni rnam pa bzhi po de dag gis so sor rig par bya ste/ de ni rnam pa'i rab tu dbye ba rnam par gzhag pa yin no/ /de la mngon sum dang rjes su dpag pa'i rab tu dbye ba gang zhe na/bden pa bzhi la bzod pa brgyad dang shes pa brgyad las chos shes pa'i phyogs su gtogs pa'i bzod pa bzhi dang / shes pa bzhi ni khams 'di pa yin pas mngon sum gyi rab tu dbye ba yin no/ /rjes su dpag pa'i shes pa'i phyogs su gtogs pa'i bzod pa bzhi dang /shes pa bzhi ni khams gong ma yin pas rjes su dpag pa'i rab tu dbye ba yin no/ /de la bden pa bzhi la bzod pa brgyad dang shes pa brgyad gang zhe na/ sdug bsngal la chos shes pa'i bzod pa dang / sdug bsngal la chos shes pa dang / sdug bsngal la rjes su rtogs pa'i bzod pa dang /sdug bsngal la rjes su rtogs pa'i shes pa dang / kun 'byung ba la chos shes pa'i bzod pa dang / kun 'byung ba la chos shes pa dang / kun 'byung ba la rjes su rtogs pa'i shes pa'i bzod pa dang / kun 'byung ba la rjes su rtogs pa'i shes pa dang /'gog pa la chos shes pa'i bzod pa dang / 'gog pa la chos shes pa dang / 'gog pa la rjes su rtogs pa'i shes pa'i bzod pa dang / 'gog pa la rjes su rtogs pa'i shes pa dang / lam la chos shes pa'i bzod pa dang / lam la chos shes pa dang /lam la rjes su rtogs pa'i shes pa'i bzod pa dang / lam la rjes su rtogs pa'i shes pa'o/ /de la bzod pa zhes bya ba ni bar chad med pa'i lam ste/ bden pa la bzod cing nyon mongs pa spong bar byed pa yin no/ /shes pa zhes bya ba ni rnam par grol ba'i lam ste/bden pa la nges shing rnam par grol ba mngon sum du byed pa yin no/ /de dag gi rim pa ji lta bu zhe na/ sngar rnam pa'i rab tu dbye ba'i skabs su rnal 'byor pas bden pa bzhi'i mtshan nyid rnam pa bzhi bzhis so sor rig pa'i dus na bdag nyid kyi phung po lkog tu ma gyur pa rnams la bden par shes pa gang yin pa dang /khams mi 'dra ba'i phung po lkog tu gyur pa rnams la rjes su dpag pa'i sgo nas shes pa gang yin pa de ni phyis chos shes pa dang / rjes su rtogs pa'i shes pa dag skye ba'i sa bon lta bu yin te/ de nyid la brten nas bden pa rnams la zhugs pa na mya ngan las 'das pa la mngon par dga' ba'i bar du gcod par byed pa nga'o snyam pa'i nga rgyal rags pa gang yin pa de kun du spyod pa'i sgo nas spong bar 'gyur zhing dmigs par bya ba dang /dmigs par byed pas mnyam zhing mtshungs pa'i ye shes skye bar 'gyur te/ye shes bzod pa chung ngu dang ldan par gyur pa ni dro bar gyur pa zhes bya/ bzod pa 'bring dang ldan par gyur pa ni rtse mo zhes bya/ bzod pa chen po dang ldan par gyur pa ni bden pa'i rjes su mthun pa'i bzod pa zhes bya'o/ /de thams cad kyi tha ma rnam par mi rtog pa'i sems de'i mjug thogs su sngar dpyad pa'i bden pa rnams la bdag nyid rtsol bar byed pa'i skad cig gang yin pa de ni 'jig rten pa'i chos kyi mchog yin te/de yan chad 'jig rten las 'das pa'i sems kho nas skye bar 'gyur gyi/'jig rten pa'i sems mi skye ba dang / de ni 'jig rten pa'i 'du byed rnams kyi mtshams dang mthar thug pa yin pas na de'i phyir 'jig rten pa'i chos kyi mchog ces bya'o/ /de ltar nges par 'byed pa'i cha dang mthun pa'i dge ba'i rtsa ba skyes pa de dag gi rjes su sngar dpyad pa'i bden pa rnams la rtsol bar byed cing mthong ba'i lam bskyed pa'i gnas skabs su bzod pa brgyad dang /shes pa brgyad 'byung bar rig par bya'o/ /de la sdug bsngal la chos shes pa'i bzod pa zhes bya ba ni 'dod par gtogs pa'i sdug bsngal gyi bden pa'i chos dang chos shes pa'i sa la nges pa'i shes pa skyed pa po'i blo'i bye brag ste/bden pa la bzod pas na de'i phyir bzod pa zhes bya'o/ /sdug bsngal la chos shes pa zhes bya ba ni 'dod par gtogs pa'i sdug bsngal gyi bden pa'i chos dang / chos shes pa'i sa la nges pa'i shes pa dri ma med pa gang yin pa'o//chos shes pa'i sa zhes bya ba ni sa gang la brten nas chos shes pa'i nges pa'i shes pas 'di skye ba'i sa drug ste/ mi lcogs pa med pa dang / bsam gtan khyad par can dang / bsam gtan bzhi po rnams so/ /sdug bsngal la rjes su rtogs pa'i shes pa'i bzod pa zhes bya ba ni de ltar 'dod par gtogs pa'i sdug bsngal gyi chos shes pa'i 'og tu gzugs dang gzugs med par gtogs pa'i sdug bsngal gyi bden pa rjes su rtogs pa'i shes pa bzod pa dang /rjes su rtogs pa'i shes pa'i sa la nges pa'i shes pa bskyed pa'i blo'i bye brag ste/de yang bden pa la bzod pas na de'i phyir bzod pa zhes bya ba'o / /sdug bsngal la rjes su rtogs pa'i shes pa zhes bya ba ni gzugs dang gzugs med par gtogs pa'i sdug bsngal gyi bden pa rjes su rtogs pa dang / rjes su rtogs par shes pa'i sa la nges pa'i shes pa dri ma med pa gang yin pa'o//rjes su rtogs par shes pa'i sa zhes bya ba ni sa gang la brten nas rjes su rtogs par shes pa'i nges pa'i shes pa 'di skye ba'i sa dgu ste/ chos shes pa'i sa drug dang / gzugs med pa bzhi las srid pa'i rtse mo la gtogs pa gsum mo//de la sdug bsngal la chos shes pa'i bzod pa skye ba na sdug bsngal mthong bas spang bar bya ba'i nyon mongs pa 'dod par gtogs pa rnams kyi thob pa nas bzung ste 'gag la/ sdug bsngal la chos shes pa yang de dag gi mya ngan las 'das pa'i sa thob pa nas bzung ste skye'o//sdug bsngal la rjes su rtogs pa'i shes pa'i bzod pa skye ba na sdug bsngal mthong bas spang bar bya ba'i nyon mongs pa gzugs dang / gzugs med par gtogs pa rnams kyi thob pa nas bzung ste 'gag la/ sdug bsngal la rjes su rtogs pa'i shes pa yang de dag gi mya ngan las 'das pa'i sa thob pa nas bzung ste skye'o//de ltar na sems bzhi po de dag gis khams gsum pa'i sdug bsngal gyi bden pa mngon par rtogs par 'gyur ro/ /ji ltar sdug bsngal gyi bden pa sems bzhis mngon par rtogs pa de bzhin du kun 'byung ba dang /'gog pa dang lam gyi bden pa rnams kyang sems bzhi bzhis mngon par rtogs par khong du chud par bya'o/ /de ltar bzod pa brgyad dang shes pa brgyad kyi sems bcu drug gis khams gsum gyi nyon mongs pa spang bar bya ba brgyad cu rtsa brgyad spangs nas bden pa bzhi mngon par rtogs te/rgyun du zhugs pa'i 'bras bu yang thob par 'gyur ro/ /de ni mngon sum dang rjes su dpag pa'i rab tu dbye ba rnam par gzhag pa yin no/ /de la mi mthun pa'i phyogs dang gnyen po'i rab tu dbye ba gang zhe na/ bden pa bzhi mthong bas spang bar bya ba dang /bsgom pas spang bar bya ba khams gsum pa'i nyon mongs pa dgu bcu rtsa brgyad ni mi mthun pa'i phyogs kyi rab tu dbye ba yin no/ /mthong ba'i lam dang / bsgom pa'i lam gyis bar chad med pa'i lam dang / rnam par grol ba'i lam rnams ni gnyen po'i rab tu dbye ba yin no//de la bden pa bzhi mthong bas spang bar bya ba dang / bsgom pas spang bar bya ba khams gsum pa'i nyon mongs pa dgu bcu rtsa brgyad gang zhe na/ nyon mongs pa'i rtsa ba rnam pa drug ste/ 'dod chags dang / khong khro ba dang / nga rgyal dang / ma rig pa dang / lta ba dang / the tshom dang / drug po de dag las 'dod chags rnam pa gnyis te/ 'dod pa'i 'dod chags dang / srid pa'i 'dod chags so/ /lta ba rnam pa lnga ste/ 'jig tshogs la lta ba dang / mthar 'dzin par lta ba dang / log par lta ba dang /lta ba mchog tu 'dzin pa dang / tshul khrims dang brtul zhugs mchog tu 'dzin pa ste/ de ltar phye na rnam pa bcu gcig tu 'gyur ro/ /de la 'dod pa'i khams na mthong bas spang bar bya ba'i nyon mongs pa sum cu rtsa gnyis dang / bsgom pas spang bar bya ba bzhi ste/ spyir sum cu rtsa drug yod do/ /gzugs kyi khams na mthong bas spang bar bya ba'i nyon mongs pa nyi shu rtsa brgyad dang / bsgom pas spang bar bya ba gsum ste/ spyir sum cu rtsa gcig yod do/ /gzugs med pa'i khams na yang de dang 'dra bar sum cu rtsa gcig ste/ de dag gcig tu bsdus na dgu bcu rtsa brgyad du 'gyur te /de dag las brgyad cu rtsa brgyad ni mthong bas spang bar bya'o/ /bcu ni bsgom pas spang bar bya'o/ /de la 'dod par gtogs pa'i mthong bas spang bar bya ba sum cu rtsa gnyis gang zhe na/ 'dod pa na sdug bsngal mthong bas spang bar bya ba bcu ste/'dod pa'i 'dod chags dang / khong khro ba dang / nga rgyal dang / ma rig pa dang / lta ba lnga dang / the tshom mo/ /kun 'byung ba mthong bas spang bar bya ba bdun te/ de dag gi nang nas 'jig tshogs la lta ba dang / mthar 'dzin par lta ba dang / tshul khrims dang / brtul zhugs mchog tu 'dzin pa ma gtogs pa rnams so//'gog pa mthong bas spang bar bya ba yang bdun te / de dag nyid do/ /lam mthong bas spang bar bya ba yang brgyad de/ bdun po de dag nyid dang / tshul khrims dang / brtul zhugs mchog tu 'dzin pa ste/ de dag bsdoms na sum cu rtsa gnyis su 'gyur ro//bsgom pas spang bar bya ba bzhi gang zhe na/ lta ba rnams dang / the tshom ma gtogs pa rnams te/ de ltar de dag ni 'dod par gtogs pa'i nyon mongs pa sum cu rtsa drug yin no/ /gzugs su gtogs pa'i mthong bas spang bar bya ba nyi shu rtsa brgyad gang zhe na/gzugs na sdug bsngal mthong ba'i spang bar bya ba dgu ste/ snga ma las khong khro ba ma gtogs pa rnams so/ /kun 'byung ba mthong bas spang bar bya ba drug ste/ de yang snga ma las khong khro ba ma gtogs pa rnams so/ /'gog pa'i mthong bas spang bar bya ba yang drug ste/de dag nyid do/ /lam mthong bas spang bar bya ba bdun te/ de yang snga ma las khong khro ba ma gtogs pa rnams te/ de dag bsdoms pas nyi shu rtsa brgyad du 'gyur ro/ /bsgom pas spang bar bya ba gsum gang zhe na/ snga ma las khong khro ba ma gtogs pa rnams te / de ltar de dag ni gzugs su gtogs pa'i nyon mongs pa sum cu rtsa gcig yin no/ /gzugs med par gtogs pa'i nyon mongs pa sum cu rtsa gcig kyang de bzhin te/ de dag ni bden pa bzhi mthong bas spang bar bya ba dang /bsgom pas spang bar bya ba khams gsum pa'i nyon mongs pa dgu bcu rtsa brgyad yin no/ /de la mthong ba'i lam dang bsgom pa'i lam gyi bar chad med pa'i lam dang rnam par grol ba'i lam rnams gang zhe na/ de la re zhig 'dod pa'i khams kyi bar chad med pa'i lam ni sngar mngon sum gyi rab tu dbye ba'i skabs su chos shes pa'i bzod pa brgyad bstan pa rnams so//rnam par grol ba'i lam ni chos shes pa brgyad bstan pa rnams te/ de dag gis 'dod par gtogs pa'i mthong bas spang bar bya ba'i nyon mongs pa sum cu rtsa gnyis spong bar byed do//gzugs dang gzugs med pa'i khams kyi bar chad med pa'i lam sngar rjes su gtogs pa'i shes pa'i bzod pa brgyad bstan pa rnams so/ /rnam par grol ba'i lam ni rjes su rtogs pa'i shes pa brgyad bstan pa rnams te/de dag gis gzugs dang gzugs med par gtogs pa'i mthong bas spang bar bya ba'i nyon mongs pa lnga bcu rtsa drug spong bar byed do/ /de la skad cig ma bco lnga ni mthong ba'i lam ste/rgyun du zhugs pa'i 'bras bu mngon du bya ba'i phyir zhugs pa'i gnas skabs yin no/ /skad cig ma bcu drug pa ni bsgom pa'i lam ste/ rgyun du zhugs pa'i gnas skabs yin no/ /de la bsgom pa'i lam gyi bar chad med pa'i lam dang / rnam par grol ba'i lam gang zhe na/de la re zhig 'dod par gtogs pa'i 'dod chags dang / khong khro ba dang / nga rgyal dang / ma rig pa 'dam du sbam pa'i tshul du bsdus nas rim pa dgur phye ste/ chen po'i chen po dang / chen po'i 'bring dang / chen po'i chung ngu dang / 'bring po'i chen po dang /'bring po'i 'bring po dang / 'bring po'i chung ngu dang / chung ngu'i chen po dang / chung ngu'i 'bring dang / chung ngu'i chung ngu'o/ /de dag gi gnyen po bar chad med pa'i lam dang / rnam par grol ba'i lam yang de bzhin du rim pa dgu dgur rig par bya'o//de la nyon mongs pa'i rnam pa chen po'i chen po'i gnyen po bar chad med pa'i lam dang / rnam par grol ba'i lam gyi rnam pa chung ngu'i chung ngu ste/ de bzhin du nyon mongs pa'i rnam pa chung ngu'i chung ngu'i gnyen par ni lam chen po'i chen po'i bar du'o/ /de la 'dod pa'i khams kyi bsgom pas spang bar bya ba'i nyon mongs pa'i rnam pa dgu la rnam pa drug spangs nas/lan cig phyir 'ong bar 'gyur ro/ /dgu pa spangs na phyir mi 'ong bar 'gyur ro/ /gzugs dang gzugs med par gtogs pa'i bar chad med pa'i lam dang / rnam par grol ba'i lam ni gzugs kyi khams na bsam gtan bzhi dang gzugs med pa bzhi ste/spyir sa brgyad yod pa'i sa re re la yang srid pa'i 'dod chags dang / nga rgyal dang ma rig pa snga ma bzhin du rnam pa dgu dgur phye ste/ de dag gi gnyen po bar chad med pa'i lam dang / rnam par grol ba'i lam yang rnam pa dgu dgur khong du chud par bya'o//de ltar nyon mongs pa rnams mthar gyis spangs par gnas te/ srid pa'i rtse mo'i nyon mongs pa'i rnam pa chung ngu'i chung ngu spangs nas dgra bcom par 'gyur te/ de ni mi mthun pa'i phyogs dang / gnyen po'i rab tu dbye ba rnam par gzhag pa yin no//de la yid la byed pa'i rab tu dbye ba gang zhe na/ 'phags pa'i bden pa bzhi po dag la brtsams nas dgra bcom pa nyid thob kyi bar du yid la byed pa bdun rim gyis 'byung bar 'gyur te/ bdun gang zhe na/ mtshan nyid so sor rig pa'i yid la byed pa dang /mos pa las byung ba'i yid la byed pa dang / rab tu dben pa'i yid la byed pa dang / spyod pa'i yid la byed pa dang / dga' ba sdud pa'i yid la byed pa dang / sbyor ba mthar thug pa'i yid la byed pa dang / sbyor ba mthar thug pa'i 'bras bu yid la byed pa'o//de la mtshan nyid so sor rig pa'i yid la byed pa gang zhe na/ dang po'i rnam pa'i rab tu dbye bas bden pa bzhi po dag gi mtshan nyid rnam pa bzhi bzhis so sor rig par byed pa'i yid la byed pa yin no/ /mos pa las byung ba'i yid la byed pa gang zhe na/de ltar mtshan nyid so sor rig pa'i yid la byed pa thob pa yan chad nas 'jig rten pa'i chos kyi mchog gi rab tu dbye ba bden pa bzhi po dag la thos pa dang bsam pa las byung ba'i yid la byed pa dang / ma 'dres par gcig tu bsgom pa'i rnam pas mos par byed pa'i yid la byed pa yin no//rab tu dben pa'i yid la byed pa gang zhe na/ mngon sum dang rjes su dpag pa'i rab tu dbye ba'i bzod pa brgyad dang / shes pa brgyad kyis bden pa bzhi mngon par rtogs nas mthong bas spang bar bya ba'i nyon mongs pa rnams spangs te/ rgyun tu zhugs pa'i sa thob pa'i yid la byed pa yin no//dpyod pa'i yid la byed pa gang zhe na/ bsgom pa'i lam thams cad la nyon mongs pa spangs pa dang / ma spangs pa la so sor brtags shing dpyad nas lam ji ltar thob pa goms par byed pa'i yid la byed pa yin no/ / dga' ba sdud pa'i yid la byed pa gang zhe na/ dpyod pa'i yid la byed pa de nyid kyi gnas skabs na lam ji ltar thob pa goms par byas nas de'i 'og tu dus dus su kun du skyo bar 'gyur ba'i chos rnams la sems skyo bar byed pa dang / dus dus su mngon par dga' bar 'gyur ba'i chos rnams la sems mngon par dga' bar byed pa'i yid la byed pa yin no//sbyor ba mthar thug pa'i yid la byed pa gang zhe na/ de ltar dga' ba sdud pa'i yid la byed pa de kun du brten zhing goms par byas/ lan mang du byas pa'i rgyus bsgom pas spang bar bya ba'i nyon mongs pa ma lus par spang bar bya ba'i phyir thams cad kyi tha mar slob pa'i rdo rje lta bu'i ting nge 'dzin skyes par gyur pa'i yid la byed pa yin no//sbyor ba mthar thug pa'i 'bras bu yid la byed pa gang zhe na/ rdo rje lta bu'i ting nge 'dzin skyes ma thag tu nyon mongs pa'i phyogs su gyur pa gnas ngan len gyi sa bon thams cad yang dag par bcom pa'i phyir sems shin tu rnam par grol ba dang /rigs yongs su dag pa thob pa dang / zad pa dang mi skye ba shes pa skyes pa'i dgra bcom pa nyid thob par 'gyur ba'i yid la byed pa yin te/ de ni yid la byed pa'i rab tu dbye ba rnam par gzhag pa yin no//de la mngon par rtogs pa'i rab tu dbye ba gang zhe na/ bden pa mngon par rtogs pa'i mtshan nyid dang / rnam par bstan pa ste/ de la bden pa mngon par rtogs pa'i mtshan nyid gang zhe na/ rnam par grol ba'i lam gyis bsdus pa'i shes pa rnams dang /mthong ba'i lam gyi gnas skabs na bden pa rnams la nges pa'i shes rab lhan cig 'byung ba dang rgyu dang bcas pa dang / de ni re zhig mtshan nyid yin no/ /bden pa mngon par rtogs pa la rnam pa du yod ce na/ rnam pa drug ste/ bsam pa mngon par rtogs pa dang / dad pa mngon par rtogs pa dang /tshul khrims mngon par rtogs pa dang / mngon par rtogs pa'i shes pa bden pa mngon par rtogs pa dang / mngon par rtogs pa'i mtha' las byung ba'i bden pa mngon par rtogs pa dang / mthar thug pa'i mngon par rtogs pa'o/ /de la bsam pa mngon par rtogs pa gang zhe na/bden pa rnams la nges par sems pa bsam pa las byung ba'i shes rab chen po'i ngo bo nyid dang / de dang ldan pa'i byang chub kyi phyogs dang mthun pa'i chos kyi ngo bo nyid yin no/ /dad pa mngon par rtogs pa gang zhe na/ 'jig rten pa dang / 'jig rten las 'das pa'i dad pa chen po thos pa las byung ba'i shes rab nges pa dkon mchog la dmigs pa'i ngo bo nyid dang /de dang ldan pa'i byang chub kyi phyogs dang mthun pa'i chos kyi ngo bo nyid yin no/ /tshul khrims mngon par rtogs pa gang zhe na/ ngan song ba'i las mi byed cing nges par sdom pa thob pa 'phags pa dgyes pa'i tshul khrims kyi ngo bo nyid dang /de dang ldan pa'i byang chub kyi phyogs dang mthun pa'i chos kyi ngo bo nyid yin no/ /mngon par rtogs pa'i shes pa bden pa mngon par rtogs pa gang zhe na/ rnam par ma bzhag pa'i bden pa la dmigs pa'i shes rab kyi ngo bo nyid dang /de dang ldan pa'i byang chub kyi phyogs dang mthun pa'i chos kyi ngo bo nyid yin te/ de ni sngon sbyor ba'i lam la tshogs shin tu bsags pa'i tshe sems yongs su sbyangs pa legs par byas pa na/ 'jig rten pa'i nges par 'byed pa'i cha dang mthun pa'i dge ba'i rtsa ba mthar thug pa'i rjes la so so'i bdag nyid la sems can gyi brda bstsal ba'i chos la dmigs shing mthong bas spang bar bya ba'i nyon mongs pa'i phyogs dang mthun pa'i gnas ngan len chung ngu dang bral ba'i sems dang po skye ba dang /de'i rjes la so so'i bdag nyid la chos kyi brda bstsal ba'i chos la dmigs shing mthong bas spang bar bya ba'i nyon mongs pa'i phyogs dang mthun pa'i gnas ngan len 'bring dang bral ba'i sems gnyis pa skye ba dang /de'i rjes la sems can thams cad chos thams cad kyi brda bstsal ba'i chos la dmigs shing mthong bas spang bar bya ba'i nyon mongs pa'i phyogs dang mthun pa'i gnas ngan len thams cad dang bral ba'i sems gsum pa skye ba gang yin pa ste/sems gsum po de dag las dang po gnyis ni chos shes pa dang mtshungs par ldan pa yin la/ tha ma gsum pa gcig pu ni rjes su rtogs pa'i shes pa dang mtshungs par ldan pa yin te/de dag kyang zhi gnas dang / lhag mthong zung du 'brel pas 'jug pa'i lam yin no/ /de ltar zhi gnas dang / lhag mthong gi phyogs dang mthun pa'i sems gsum po de dag gis mthong bas spang bar bya ba'i nyon mongs pa nye bar zhi ba mngon du byed pa dang /nyon mongs pa dang phung po thams cad zhi bar byed pa 'jig rten las 'das pa'i lam thob pa gang yin pa de ni mngon par rtogs pa'i shes pa bden pa mthong bar rtogs pa zhes bya'o/ /mngon par rtogs pa'i mtha' las byung ba'i shes pa bden pa mngon par rtogs pa gang zhe na/rnam par gzhag pa la bden pa'i dmigs pa'i shes rab kyi ngo bo nyid dang / de dang ldan pa'i byang chub kyi phyogs dang mthun pa'i chos kyi ngo bo nyid yin te/ de yang sems gsum pa'i mjug thogs su mthong ba'i lam las langs pas mngon du byas nas nga sngon 'jig rten pa'i shes pas dpyad nas rnam par gzhag pa'i bden pas 'og ma pa sa 'og ma'i dbang gis byung ba dang /sa 'og ma pa sa gong ma'i dbang gis byung ba rnams la chos shes pa dang / rjes su rtogs pa'i shas pa dang 'dra ba kun rdzob shes pa dang / 'jig rten dang 'jig rten las 'das pa'i rjes la thob pa'i shes pas bden pa re re la yang go rims bzhin du 'dod pa'i shes pa dang /mngon par rtogs pa nges pa'i shes pa gnyis gnyis byung ste/ de ltar mngon par rtogs pa'i snga ma las langs pa las gong ma'am gong ma'i bden pa dag la shes pa gnyis gnyis 'byung ba gang yin pa de ni mngon par rtogs pa'i rjes las thob pa'i shes pa yin pas na/de'i phyir mngon par rtogs pa'i mtha' las byung ba'i shes pa bden pa mngon par rtogs pa zhes bya'o/ /de la shes pa snga ma ni brda bstsal ba'i chos la dmigs pa'i phyir rnam par rtog pa med pa dang / rnam par ma bzhag pa'i bden pa la dmigs pa yin no//shes pa phyi ma ni brda ma bstsal ba'i chos la dmigs pa'i phyir rnam par rtog pa dang bcas pa dang / rnam par bzhag pa'i bden pa dmigs pa yin no/ /yang snga mas ni mthong bas spang bar bya ba'i nyon mongs pa'i bag la nyal gnas pa spong bar byed do//phyi mas ni dmigs pa yid la byed pas de dag nyid kyis 'jug pa spong bar byed do/ / yang snga mas ni bsgom pa'i lam la 'jig rten las 'das pa'i lam gyis spong bar byed do/ /phyi mas ni 'jig rten pa dang 'jig rten las 'das pa'i lam gyis spong bar byed do//mthar thug pa'i mngon par rtogs pa gang zhe na/ zad pa dang mi skye ba shes pa'i ngo bo nyid dang de dang ldan pa'i byang chub kyi phyogs dang / mthun pa'i chos kyi ngo bo nyid yin te/ de yang bsgom pas spang bar bya ba dag spangs pa la zad pa shes pa dang mi skye ba'i shes pa gcig tu 'jig rten las 'das pa dang /'jig rten pa dang 'jig rten las 'das pa'i tshe 'di la nyon mongs pa thams cad nges par spangs pa dang / phyi ma la yang phung po thams cad nges par 'gags pas na de'i phyir mthar thug pa'i mngon par rtogs pa zhes bya'o/ /de la 'jig rten las 'das pa'i zad pa shes pa gang zhe na/zad pa la rnam par mi rtog pa'i shes pa gang yin pa'o/ /'jig rten pa dang 'jig rten las 'das pa'i zad pa shes pa gang zhe na/ zad pa la rnam par rtog pa dang bcas pa'i shes pa gang yin pa'o/ /'jig rten las 'das pa'i mi skye ba shes pa gang zhe na/phung po 'gags pa de nyid kyi rgyu'i don gyis phyi mar phung po mi skye ba las rnam par mi rtog pa'i shes pa gang yin pa'o/ /'jig rten pa dang 'jig rten las 'das pa'i mi skye ba shes pa gang zhe na/ phyi mar phung po mi skye ba la rnam par rtog pa dang bcas pa'i shes pa gang yin pa ste/de ni mngon par rtogs pa'i rab tu dbye ba rnam par gzhag pa yin no/ /de la 'bras bu thob pa'i rab tu dbye ba gang zhe na/ bden pa bzhi mngon par rtogs pa'i 'bras bu 'phags pa'i gang zag brgyad rnam par gzhag pa ste/ rgyun du zhugs pa'i 'bras bu mngon sum du bya ba'i phyir zhugs pa dang /rgyun du zhugs pa dang / lan cig phyir 'ong ba'i 'bras bu mngon sum du bya ba'i phyir zhugs pa dang / lan cig phyir 'ong ba dang / phyir mi 'ong ba'i 'bras bu mngon sum du bya ba'i phyir zhugs pa dang / phyir mi 'ong ba dang / dgra bcom pa nyid kyi 'bras bu mngon sum du bya ba'i phyir zhugs pa dang /dgra bcom pa'o/ /de la rgyun du zhugs pa'i 'bras bu mngon sum du bya ba'i phyir zhugs pa gang zhe na/ mthong ba'i lam gyis skad cig ma bco lnga mngon par rtogs pa ste/ de yan chad 'phags pa'i gang zag ces bya'o/ /rgyun du zhugs pa gang zhe na/bsgom pa'i lam du gtogs pa lam la rjes su rtogs pa'i shes pa zhes bya ba skad cig ma bcu drug pa mngon par rtogs pa ste/ mya ngan las 'das pa'i rgyun gyi lam du zhugs pas rgyun du zhugs pa zhes bya'o/ /de ni rnam pa gnyis te/ de ltar thogs na srid pa lan bdun pa dang / rigs nas rigs su skye ba'o/ /de la re zhig thogs na srid pa lan bdun pa zhes bya ba ni mi rnams kyi nang du de las gzhan pa'i srid pa bdun pa dang / srid pa'i bar ma bdun dang / 'dod pa na spyod pa'i lha rnams kyi nang du yang de las gzhan pa'i srid pa bdun dang / srid pa bar ma bdun nying mtshams sbyor bar byed de/de ltar srid pa nyi shu rtsa brgyad kyi bar du nying mtshams sbyar nas yongs su mya ngan las 'das pa'i ngang tshul can gang yin pa'o/ /de yang thams cad ni de ltar ma yin pas de ltar thogs na zhes bya ba gsungs te/ thams cad kyi tha shal ba dang sbyar ro/ /rigs nas rigs su skye ba zhes bya ba ni rnam pa gnyis te/lha'i rigs nas rigs su skye ba dang / mi'i rigs nas rigs su skye ba'o/ /de la lha'i rigs nas rigs su skye ba ni 'dod pa na spyod pa'i lha rnams kyi nang du skye ba gnyis sam gsum du 'khor nas lha'i rigs de nyid dam gzhan du yongs su mya ngan las 'da' ba gang yin pa'o//mi'i rigs nas rigs su skye ba ni mi rnams kyi nang du skye ba gnyis sam gsum du 'khor nas gling de nyid dam gzhan du yongs su mya ngan las 'da' ba gang yin pa'o/ /lan cig phyir 'ong ba'i 'bras bu mngon sum du bya ba'i phyir zhugs pa gang zhe na/rgyun du zhugs pa'i 'bras bu la gnas pa de nyid kyis 'dod pa'i khams kyi bsgom pas spang bar bya ba'i nyon mongs pa rnam pa dgu las rnam pa gcig nas rnam pa lnga'i bar du spangs pa gang yin pa'o/ /lan cig phyir 'ong ba gang zhe na/ zhugs pa de nyid kyis 'dod pa'i khams kyi bsgom pas spang bar bya ba'i nyon mongs pa rnam pa drug spangs pa ste/ 'dod pa na spyod pa'i lha rnams kyi nang du song nas mi'i 'jig rten du lan cig phyir 'ong ba'i phyir lan cig phyir 'ong ba zhes bya'o/ /de ni bar chad gcig pa zhes bya ste/ mya ngan las 'das pa la tshe gcig gis chod pa'i phyir dang / phyir mi 'ong ba'i 'bras bu la nyon mongs pa'i rnam pa gcig gis chod pa'i phyir ro/ /de yang rgyu gsum gyis na bar chad gcig pa yin te/ 'dod pa'i khams kyi bsgom pas spang bar bya ba'i nyon mongs pa'i rnam pa bdun nam brgyad spangs pa'i phyir dang /de'i gnyen po zag pa med pa'i dbang po thob pa'i phyir dang / tshe gcig lus pa'i phyir ro/ /phyir mi 'ong ba'i 'bras bu mngon sum du bya ba'i phyir zhugs pa gang zhe na/ lan cig phyir 'ong ba'i 'bras bu la gnas pa de nyid kyis 'dod pa'i khams kyi bsgom pas spang bar bya ba'i nyon mongs pa rnam pa bdun nam brgyad spangs pa gang yin pa de nyid yin no//phyir mi 'ong ba gang zhe na/ zhugs pa de nyid kyi 'dod pa'i khams kyi bsgom pas spang bar bya ba'i nyon mongs pa'i rnam pa dgu spangs pa ste/ 'dod pa'i khams su phyir mi 'ong bas phyir mi 'ong ba zhes bya'o//de ni rnam pa gsum ste/ gzugs su nye bar 'gro ba dang / gzugs med par nye bar 'gro ba dang / tshe 'di la yongs su mya ngan las 'da' ba'o/ /de la gzugs su nye bar 'gro ba zhes bya ba ni 'dod pa'i 'dod chags dang bral ba gzugs kyi khams su skye ba'i rim gyis yongs su mya ngan las 'da' ba'o//de ni rnam pa lnga ste/ bar ma dor yongs su mya ngan las 'da' ba dang / skyes nas yongs su mya ngan las 'da' ba dang / mngon par 'du byed pa dang bcas par yongs su mya ngan las 'da' ba dang / mngon par 'du byed pa med par yongs su mya ngan las 'da' ba dang /gong du 'pho ba'o/ /de la bar ma dor yongs su mya ngan las 'da' ba zhes bya ba ni/ gzugs kyi khams kyi lha'i rigs gang yang rung ba nas shi 'phos nas gzugs kyi khams kyi lha'i ris gang yang rung ba'i bar ma do'i skye ba'i srid pa la gnas pa ste/skye ba'i srid pa mngon par ma grub pa'i skabs su phung po'i lhag ma med pa'i mya ngan las 'da' ba'i dbyings su yongs su mya ngan las 'da' ba'i ngang tshul gang yin pa'o/ /de yang rnam pa gsum ste/ shi 'phos ma thag kho nar bar ma do'i srid pa mngon par grub pa'i tshe bar ma do'i srid pa mngon par grub par byed cing mngon par grub pa dang /dus mnyam pa kho nar yongs su mya ngan las 'da' ste / dper na sbur ma'i me stag byung ma thag kho nar 'chi ba lta bu dang / bar ma do'i srid pa mngon par 'grub par byed cing bar ma do'i srid pa mngon par 'grub pa de la gnas pa'i dus gzhan gyis yongs su mya ngan las 'da' zhing skye ba'i srid pa ga la ba der ni da rung mi gzhol ba dper na lcags kyi thu lum mam lcags glebs pa mer bsregs shing rab tu 'bar ba dag lcags kyi tho ba dag gis brdungs pa na/lcags kyi tsha tsha gnam du yar nas phyir ma log pa'i skabs kho nar 'chi ba lta bu dang /bar ma do'i srid pa mngon par 'grub par byed cing mngon par grub nas kyang skye ba'i srid pa ga la ba der gzhol bar byed la/ gzhol nas kyang skye ba'i srid pa cung zad ma skyes pa'i skabs kho nar yongs su mya ngan las 'da' ba dper na lcags kyi tsha tsha de nyid gnam du yar nas phyir log ste sa la cung zad ma lhung ba'i skabs kho nar 'chi ba lta bu dag go//skyes nas yongs su mya ngan las 'da' ba zhes bya ba ni/ gzugs kyi khams kyi lha'i ris gang yang rung bar skyes ma thag kho nar phung po'i lhag ma dang bcas pa'i mya ngan las 'da' bas yongs su mya ngan las 'da' ba'i ngang tshul can gang yin pa'o//de yang rnam pa gsum ste/ skyes nas yongs su mya ngan las 'da' ba de nyid dang / de'i khyad par gnyis po mngon par 'du byed pa dang bcas pa dang / mngon par 'du byed pa med par yongs su mya ngan las 'da' ba ste/de dag thams cad kyang skyes nas yongs su mya ngan las 'da' ba dag yin pa'i phyir ro/ /mngon par 'du byed pa dang bcas par yongs su mya ngan las 'da' ba zhes bya ba ni mngon par 'du byed pa dang / 'bad pa dang / ngal bas lam mngon du byas shing der skyes nas yongs su mya ngan las 'da' ba'i ngang tshul can gang yin pa'o//mngon par 'du byed pa med par yongs su mya ngan las 'da' ba zhes bya ba ni mngon par 'du byed pa med pa dang / 'bad pa med pa dang / ngal ba med pas lam mngon du byas shing der skyes nas yongs su mya ngan las 'das pa gang yin pa'o//gong du 'pho ba gang zhe na/ gzugs kyi khams kyi lha'i ris gang du skyes pa de ni yongs su mya ngan las mi 'da' ba'i bar gang du 'gro ba'i rim gyis yongs su mya ngan las 'da' ba'i ngang tshul can gang yin pa'o/ /de ni rgyu dang 'bras bu'i sgo nas rnam pa gnyis te/rgyu'i sgo nas ni bsam gtan spel ba dang / bsam gtan ma spel ba gnyis so/ /'bras bu'i sgo nas ni 'og min gyi bar du 'gro ba dang / srid pa'i rtse mo'i bar du 'gro ba gnyis so/ /de la gang gis bsam gtan spel ba de ni 'og min gyi bar du song nas der yongs su mya ngan las 'da' ba'i ngang tshul can yin no//gang gis bsam gtan ma spel ba de ni srid pa'i rtse mo'i bar du song nas der yongs su mya ngan las 'da' ba'i ngang tshul can yin no/ /de'i gong du 'pho ba bsam gtan spel bas 'og min gyi bar du 'gro ba de yang rnam pa gsum ste/ 'phar ba dang / khyad par du 'phar ba dang / gnas thams cad du 'chi 'pho ba'o/ /de la 'phar ba zhes bya ba ni sngar 'dod pa'i khams 'dir bsam gtan bzhi pa thob pa zag pa dang bcas pa dang zag pa med pa'i bsam gtan spel mar bsgoms pas bsam gtan gnyis pa dang gsum pa dang bzhi pa las nyams la bsam gtan dang po las ni ma nyams bsam gtan dang po'i ro myong ste/tshangs ris su skyes nas/ bsam gtan gnyis pa dang / gsum par mi skye bar sngon goms pa'i dbang gis bsam gtan bzhi pa'i so so'i skye bo'i gnas dang gnas gtsang ma'i zag pa dang bcas pa dang zag pa med pa spel mar bsgoms te/tshangs ris nas shi 'phos nas gnas bar ma dag tu mi skye ba thal byung 'og min du skye ba gang yin pa'o/ /phyed du 'phar zhes bya ba ni de nyid tshangs ris nas shi 'phos nas gnas gtsang ma lnga las dang po'am gnyis pa'am gsum pa'am bzhi pa gang yang rung ba cig tu skyes la de nas shi 'phos nas 'og min du skye ba gang yin pa'o//gnas thams cad 'chi 'pho ba zhes bya ba ni de nyid kyis bsam gtan gnyis pa dang / gsum pa dang / bzhi pa thams cad mthar gyis bskyed de spel nas/tshangs ris nas 'og min gyi bar gyi gnas rnams las tshangs chen ma gtogs pa thams cad du skyes shing shi 'phos nas tha mar 'og min du skye ba gang yin pa'o/ /'phags pa ni tshangs chen du mi skye ste/ lta ba'i gnas yin pa'i phyir dang gtso bo gcig tu zad pa'i phyir ro//bsam gtan spel ba zhes bya ba ni bsam gtan bzhi pa spel bar byed pa ste/ bsam gtan de ni thams cad pa las su rung ba dang mngon par shes pa'i sla ba'i lam rnams kyi nang na mchog yin pa'i phyir ro/ /de yang 'di ltar spel bar byed de/ dgra bcom pa'am phyir mi 'ong ba'ang rung dang por zag pa med pa'i bsam gtan bzhi rgyun dang ldan pa la snyoms par 'jug cing de las langs nas bsam gtan bzhi pa de nyid kyi zag pa dang bcas pa rgyun dang ldan pa la yun ring du snyoms par 'jug la/de las langs nas yang bsam gtan bzhi pa de nyid kyi zag pa med la rgyun dang ldan pa la'ang yun ring du snyoms par 'jug go//tshul de bzhin du snyoms par 'jug pa las khad kyi khad kyis rgyun je chung je chung du phri nas gang gi tshe zag pa med pa'i skad cig ma gnyis la snyoms par 'jug cing / de las langs nas zag pa dang bcas pa'i skad cig ma gnyis la snyoms par 'jug pa de las langs nas yang zag pa med pa'i skad cig ma gnyis la snyoms par 'jug ste/zag pa med pa dang / zag pa dang bcas pa'i skad cig ma re re spel ba ni sangs rgyas bcom ldan 'das ma gtogs pa gzhan gyis mi nus pas/de'i phyir dgra bcom pa dang / phyir mi 'ong ba dag ni rgyun chags su yun ring po nas bzung ste skad cig ma gnyis gnyis spel ba'i mthar thug pa la snyoms par 'jug pa rdzogs pa yin par blta'o/ /de la rgyun chags gsum las dang po gnyis ni bar chad med pa'i lam lta bu yin la/gsum pa ni rnam par grol ba'i lam lta bu yin te/ zag pa dang bcas pa gang yin pa de'i dbang gis ni de dag tu skye'o/ /de la gong du 'pho ba bsam gtan ma spel ba srid pa'i rtse mo'i bar du 'gro ba gang zhe na/ tshangs ris su skyes pa de nyid kyis bsam gtan dang po nas gnyis pa dang gsum pa dang bsam gtan bzhi pa'i so so'i skye bo'i gnas gsum pa'i snyoms par 'jug pa rnams kyis ro myong bar byed cing gnas de dag thams cad du skye la/gnas gtsang ma rnams su mi 'jug par gzugs med par skye ba'i rim gyis srid pa'i rtse mor song nas yongs su mya ngan las 'da' ba ste/'di ni zhi gnas spyad pa yin no/ /snga ma ni lhag mthong spyad pa yin no/ /gong du 'pho ba de dag bar skabs su yang yongs su mya ngan las 'da' bar rung bar blta'o/ /'og min dang srid pa'i rtse mo'i mthar thug pa nyid ni de phan chad 'gro ba med de/dper na rgyun du zhugs pa re ltar thogs na srid pa lan bdun pa nyid bzhin te/ de ni re zhig gzugs su nye bar 'gro ba'i phyir mi 'ong ba lnga yin no/ /mdo las/ skyes bu dam pa'i 'gro ba bdun/ /zhes bstan pa ni bar ma dor yongs su mya ngan las 'da' ba gsum dang /skyes nas yongs su mya ngan las 'da' ba gsum dang / gong du 'pho ba rnams ma phye bar gcig tu bsdus pa la bya'o/ /de la gzugs med par nye bar 'gro ba zhes bya ba ni/ phyir mi 'ong ba gzugs kyi 'dod chags dang bral ba 'dod pa'i khams 'di nas shi 'phos nas gzugs med pa dag gi nang du skye ba gang yin pa ste/de yang gzugs su nye bar 'gro ba lnga las bar ma dor yongs su mya ngan las 'da' ba ma gtogs pa bzhi po dag gi khyad par yin no/ /de la tshe 'di la yongs su mya ngan las 'da' ba zhes bya ba ni phyir mi 'ong ba 'dod pa'i khams su tshe 'di la yongs su mya ngan las 'da' zhing khams gong ma gnyis su mi skye ba gang yin pa ste/de ni gzugs su nye bar 'gro ba lnga dang gzugs med par nye bar 'gro ba bzhi po gang yang ma yin mod kyi/ 'on kyang mngon par 'du byed pa dang bcas pa mngon par 'du byed pa med pas mya ngan las 'da' ba ni yin no//phyir mi 'ong ba de dag las gang la las 'gog pa'i snyoms par 'jug pa thob pa de ni mya ngan las 'das pa dang 'dra ba'i chos lus kyis mngon sum du byed pa'i phyir lus kyis mngon par 'du byed pa zhes bya'o/ /ji ltar lus kyis mngon par 'du byed ce na/sems med pas lus la brten te skye ba'i phyir ro/ /dgra bcom pa nyid kyi 'bras bu mngon sum du bya ba'i phyir zhugs pa gang zhe na/ phyir mi 'ong ba de nyid kyis bsam gtan dang po bsgom pas spang bar bya ba'i nyon mongs pa'i rnam pa dgu las rnam pa gcig spangs pa nas bzung ste/srid pa'i rtse mo'i rnam pa dgu las rnam pa brgyad kyi bar spangs pa gang yin pa'o/ /de srid pa'i rtse mo'i rnam pa dgu po spong bar byed pa'i bar chad med pa'i lam la gnas pa na yang dgra bcom pa nyid kyi 'bras bu mngon sum du bya ba'i phyir zhugs pa yin te/ bar chad med pa'i lam de ni rdo rje lta bu'i ting nge 'dzin zhes bya'o//dgra bcom pa gang zhe na/ zhugs pa de nyid kyi srid pa'i rtse mo'i nyon mongs pa'i rnam pa dgu pa spong bar byed pa'i bar chad med pa'i lam rdo rje lta bu'i ting nge 'dzin gyi mjug thogs su nyon mongs pa rnam pa dgu pa ma lus par spangs pa'i rnam par grol ba'i lam tha ma thob pa yin te/zad pa shes pa dang / mi skye ba shes pa dang mi slob pa'i chos thob pa yin la/ de nyid kyi phyir de gzhan gyi don byed par 'os pa'i phyir dang / 'dod chags dang bcas pa thams cad kyis mchod par 'os pa'i phyir dgra bcom pa zhes bya'o//de ni rnam pa drug ste/ yongs su nyams pa'i chos can dang / 'chi bar sems pa'i chos can dang / rjes su srung ba'i chos can dang / gnas pa las mi bskyod pa dang / rtogs pa'i skal ba can dang / mi g.yo ba'i chos can no/ / de la yongs su nyams pa'i chos can gang zhe na/dgra bcom pa dbang po rtul po gal te na 'bras bu thob pa las yongs su nyams par 'gyur ba'i ngang tshul can gang yin pa'o/ /'chi bar sems pa'i chos can gang zhe na/ dgra bcom pa dbang po rtul po gal te bdag tshe 'di la 'bras bu thob pa las yongs su nyams par gyur na ma legs kyi myur du phung po lhag ma med pa'i dbyings su yongs su mya ngan las 'da' bar bya'o snyam du sems pa'i ngang tshul can gang yin pa'o//rjes su srung ba'i chos can gang zhe na/ dgra bcom pa dbang po rtul po ci nas kyang tshe 'di la 'bras bu thob pa las yongs su mi nyams par bya'o snyam nas 'bad pa dang bcas pas rjes su srung bar byed pa'i ngang tshul can gang yin pa'o//gnas pa las mi bskyod pa gang zhe na/ dgra bcom pa dbang po rtul po yongs su nyams par 'gyur ba'i rkyen stobs dang ldan pa med na rjes su ma bsrungs kyang rnam par 'gyur ba'i skal ba can yin zhing nyams par mi 'gyur ba dang /mngon par brtson pa med na 'phel bar yang mi 'gyur ba'i ngang tshul can gang yin pa'o/ /rtogs pa'i skal ba can gang zhe na/ dgra bcom pa dbang po rtul po mi g.yo bar rtogs par 'gyur ba'i ngang tshul can gang yin pa'o//mi g.yo ba'i chos can gang zhe na/ dgra bcom pa dbang po yongs su nyams par mi 'gyur ba'i ngang tshul can gang yin pa'o/ /de dag kyang yongs su nyams pa'i chos can yang gdon mi za bar yongs su nyams par 'gyur ba ma yin la/ rtogs pa'i skal ba can gyi bar du yang rtogs par 'gyur ba kho nar nges pa ni ma yin gyi srid pa'i phyir de skad ces bshad do//de ltar 'bras bu la gnas pa bzhi po de dag ni dge sbyong gi tshul gyi 'bras bu zhes bya ste/ dge sbyong gi tshul zhes bya ba ni zag pa med pa'i lam mo/ /de'i 'bras bu ni bzhi po de dag yin pas dge sbyong gi tshul gyi 'bras bu'o//'bras bu de dag kyang 'dus byas dang 'dus ma byas yin te/ rnam par grol ba'i lam ni 'dus byas yin la/ bral ba ni 'dus ma byas yin no/ /de la ci'i phyir 'bras bu rnam pa bzhir rnam par gzhag ce na/ bcom ldan 'das kyis spong ba'i lam gyi gnas skabs gang la rgyu lnga srid pa de la 'bras bur rnam par gzhag go//lnga gang zhe na/ lam lnga ma btang ba dang / lam gzhan thob pa dang / spangs pa bsdus pa dang / shes pa brgyad thob pa dang / rnam pa bcu drug thob pa'o/ /de la lam lnga ma btang ba ni zhugs pa bzhi'i lam btang ba'o//lam gzhan thob pa ni 'bras bu la gnas pa bzhi'i lam thob pa'o/ /spangs pa bsdus pa ni 'bras bu bzhi'i gnas skabs na nyon mongs pa spangs pa thams cad kyi thob pa gcig rnyed pa'o/ / shes pa brgyad thob pa ni 'bras bu bzhi'i gnas skabs na chos shes pa bzhi dang / rjes su rtogs pa'i shes pa thob pa bzhi rnyed pa'o/ /rnam pa bcu drug thob pa ni 'bras bu bzhi'i gnas skabs na bden pa bzhi la mi rtag pa'i rnam pa la sogs pa bcu drug thob pa ste/ rgyu lnga po de dag ni 'bras bu bzhi po re re la yang lnga lnga yod do//de la 'bras bu bzhi la gnas pa'i gang zag ji skad bstan pa de dag ni rigs kyi sgo nas rnam pa drug tu 'gyur te/ so so'i skye bo dbang po rtul po dang rnon po'i rigs can gang yin pa de gnyis mthong ba'i lam la sems kyi skad cig bco lnga po rnams la dad pas rjes su 'brang ba dang /chos kyi rjes su 'brang ba zhes bya ba gnyis su 'gyur ro/ /de gnyis bsgom pa'i lam sems kyi skad cig ma bcu drug pa nas bzung ste/ srid pa'i rtse mo'i nyon mongs pa'i rnam pa dgu pa spong ba'i bar chad med pa'i lam gyi bar la dad pas mos pa dang /mthong bas thob pa zhes bya ba gnyis su 'gyur ro/ /de gnyis mi slob pa'i lam la zad pa shes pa nas bzung ste/ sems kyi skad cig ma tha ma mya ngan las 'das pa'i bar dus kyi rnam par grol ba dang / dus dang mi sbyor bar rnam par grol ba zhes bya ba gnyis su 'gyur te/dgra bcom pa rnam pa drug bstan pa dang po lnga dang / tha ma gcig dang / go rims bzhin no/ /de ni 'bras bu thob pa'i rab tu dbye ba rnam par gzhag pa yin te/ bden pa rnams kyi rab tu dbye ba rnam par gzhag pa bshad zin to// // de la bden pa rnams kyi go rims rnam par gzhag pa gang zhe na/yongs su shes par bya ba dang / spang bar bya ba dang / mngon sum du bya ba dang / bsgom par bya ba yin pa'i phyir bden pa bzhi po dag gi go rims sdug bsngal dang / kun 'byung ba dang / 'gog pa dang / lam zhes bya ba de ltar rnam par gzhag go//de la ci'i phyir sdug bsngal gyi bden pa yongs su shes par bya zhe na/ sdug bsngal gyi bden pa ni phyin ci log bzhi po rtag pa dang bde ba dang gtsang ba dang bdag tu phyin ci log pa'i gnas yin la/ sdug bsngal gyi bden pa'i mtshan nyid ni mi rtag pa dang / sdug bsngal ba dang /stong pa dang bdag med par so sor rig na phyin ci log bzhi spong bar 'gyur bas de'i phyir de ni dang por yongs su shes par bya ba yin no/ /gang gi tshe bden pa bzhi po thams cad kyang yongs su shes par bya ba dag yin pa'i tshe ci'i phyir sdug bsngal gyi bden pa 'ba' zhig yongs su shes par bya zhes gsungs she na/sdug bsngal gyi bden pa ni rang gi mtshan nyid dang / spyi'i mtshan nyid kyis yongs su shes par bya ba yin gyi/ de las gzhan pa'i bden pa gsum ni rang gi mtshan nyid kho na ste/ kun 'byung ba'i bden pa la rgyu la sogs pa'i rnam pa dag gis yongs su shes par bya ba de yang de'i rang gi mtshan nyid yongs su shes par bya ba yin la/'gog pa'i bden pa la 'gog pa la sogs pa'i rnam pa dag gis yongs su shes par bya ba de yang de'i rang gi mtshan nyid yin/ lam gyi bden pa la lam la sogs pa'i rnam pa dag gis yongs su shes par bya ba de yang de'i rang gi mtshan nyid yin pas de'i phyir mtshan nyid gnyis kyis mi rtag pa dang /sdug bsngal ba dang / stong pa dang / bdag med pa'i rnam par yongs su shes par bya dgos pa'i sdug bsngal gyi bden pa 'ba' zhig yongs su shes par bya zhes gsungs so//ci'i phyir kun 'byung gi bden pa spang bar bya zhe na/ kun 'byung gi bden pa ni sdug bsngal gyi bden pas bsdus pa yin pa'i phyir sdug bsngal gyi bden pa yongs su shes su zin kyang da dung kun 'byung ba'i bden pa dang rjes su 'brel ba'i phyir/ kun 'byung ba'i bden pa ni de'i 'og tu spang bar bya ba yin no//gang gi tshe sdug bsngal gyi bden pa yang spang bar bya ba yin pa de'i tshe ci'i phyir kun 'byung ba'i bden pa 'ba' zhig spang bar bya zhes gsungs she na/ sdug bsngal gyi bden pa spong ba ni kun 'byung ba'i bden pa spang bas rab tu phye ba yin te/ de'i phyir kun 'byung ba'i bden pa 'ba' zhig spang bar bya zhes gsungs so/ /ci'i phyir lam gyi bden pa bsgom par bya zhe na/ mngon sum du byas pa ni mngon sum du bya ba'i don yin pas de mngon du byas na 'gog pa mi skrag cing dga' ba yongs su 'dzin pa'i phyir 'gog pa'i bden pa ni de'i 'og tu mngon sum du bya ba yin no//ci'i phyir lam gyi bden pa bsgom par bya zhe na/ ji skad smos pa'i don gsum po dag bsgrub pa'i phyir lam goms par bya ba rtogs pas na lam gyi bden pa ni de'i 'og tu bsgom par bya ba yin no/ /go rims kyi rnam grangs gzhan yang gang gis sdug bsngal bar gyur pa de ni dang por bstan to//ji ltar sdug bsngal bar gyur pa de ni gnyis pa yin no/ /nag po'i phyogs gtugs nas yang gang gis bde bar gyur pa de ni gsum pa yin no/ /ji ltar bde bar gyur pa de ni bzhi pa yin te/ dper na nad dang /de'i rgyu dang / nad med pa dang / sman lta bu yin no/ /rnam grangs gzhan yang 'jig rten pa'i sdug bsngal 'byung ba'i go rims bzhin du bden pa rnams kyi go rims gzhag par bya ste/ 'jig rten pa dag ni dang por sdug bsngal gang yang rung ba zhig gis thebs pa na de la rtogs par byed do//de'i 'og tu de dag las byung ba la'o/ /de'i 'og tu de las thar pa la'o/ /de'i 'og tu de las thar pa'i thabs rtogs par byed pa'i phyir ro/ /de'i bden pa rnams kyi go rims rnam par gzhag pa yin no/ /de la bden pa rnams kyi bsdu ba rnam par gzhag pa gang zhe na/bden pa bzhi las sdug bsngal dang / kun 'byung ba dang / lam gsum ni 'dus byas yin la/ 'gog pa ni 'dus ma byas yin pas sngar phung po dang / khams dang / skye mched dang / srid pa'i yan lag dang / gnas dang gnas ma yin pa dang / dbang po rnams la 'dus byas pa dang 'dus ma byas kyi phyogs gang gis bsdus pa kho na bzhin du blta bar bya'o//de ni bden pa rnams kyi bsdu ba rnam par gzhag pa yin no/ /de la bden pa rnams kyi rten rnam par gzhag pa gang zhe na/ sdug bsngal ba dang / kun 'byung ba dang / lam gyi phung po lngas bsdus pa yin pas sngar phung po lnga'i rten ji skad bstan pa la brten par ci rigs par sbyar ro//'gog pa ni ci la yang mi rten mi gnas par brjod par bya ste/ de ni bden pa rnams kyi rten rnam par gzhag pa yin no/ /de ltar bden pa rnams kyi rten rnam par gzhag pa ji skad bstan pa de dag gis sems can skyes shing 'byung ba rnams kun nas nyon mongs pa dang rnam par byang bar 'gyur ba'i phyir des ni de'i kun nas nyon mongs pa dang rnam par byang ba'i dngos po bstan to//de'i sna tshogs kyi dngos po zhes bya bas ni rten cing 'brel par 'byung ba bstan te/ rten cing 'brel par 'byung ba zhes bya ba ni gzhan gyi dbang gi ngo bo nyid kyi chos kun nas nyon mongs pa dang /rnam par byang ba'i phyogs su gtogs pa gang yin pa'o/ /de yang rnam pa drug gis rnam par gzhag ste/ ngo bo nyid dang / don dang / rab tu dbye ba dang / go rims dang / bsdu ba dang / rten gyis so//de la rten cing 'brel par 'byung ba'i ngo bo nyid rnam par gzhag pa gang zhe na/ nang dang phyi rol gyi rten cing 'brel par 'byung ba dgu dang / rkyen dang / 'bras bu rab tu dbye ba gang yin pa'o/ /de la rten cing 'brel par 'byung ba'i don rnam par gzhag pa gang zhe na/ rnam par gnyis te/nges pa'i tshig dang / dngos po'o/ /de la nges pa'i tshig ni 'di lta ste/ 'di yod pas 'di 'byung la/ 'di skyes pa'i phyir 'di skye ba ste zhes bya ba'i don 'di'i dbang du byas nas de nges pa'i tshig tu blta bar bya'o/ /de'i don gang zhe na/ sems can med pa'i don dang /mi rtag pa'i don dang / ring por mi thogs par nye bar gnas pa'i don dang / gzhan gyi dbang gi don dang / byed pa med pa'i don dang / rgyu dang 'bras bu rgyun mi chad pa'i don dang / rgyu dang 'bras bu mthun par 'jug pa'i don dang / las bdag gir bya ba'i don ni rten cing 'brel par 'byung ba'i don to//dgos pa gang zhe na/ rgyu dang rkyen rnams kyis rang gi kun nas nyon mongs pa dang / rnam par byang ba'i don yongs su bstan pa'i phyir ro / /de la rten cing 'brel par 'byung ba'i rab tu dbye ba rnam par gzhag pa gang zhe na/ rnam pa gsum ste/ nang gi rten cing 'brel par 'byung ba'i ngo bo nyid kyi rab tu dbye ba dang / phyi rol gyi rten cing 'brel par 'byung ba'i ngo bo nyid kyi rab tu dbye ba dang / de gnyis ka'i rgyu dang rkyen dang 'bras bu'i rab tu dbye ba rnam par gzhag pa'o/ /de la nang gi rten cing 'brel par 'byung ba'i ngo bo nyid kyi rab tu dbye ba rnam par gzhag pa gang zhe na/rnam pa gnyis te/ rgyu 'brel pa dang / rkyen 'brel pa'o/ /de la nang gi rten cing 'brel par 'byung ba'i rgyu 'brel pa gang zhe na/ 'di lta ste/ ma rig pa'i rkyen gyis 'du byed rnams/ 'du byed kyi rkyen gyis rnam par shes pa / rnam par shes pa'i rkyen gyis ming dang gzugs/ming dang gzugs kyi rkyen gyis skye mched drug /skye mched drug gi rkyen gyis reg pa/ reg pa'i rkyen gyis tshor ba/ tshor ba'i rkyen gyis sred pa/ sred pa'i rkyen gyis len pa/ len pa'i rkyen gyis srid pa/ srid pa'i rkyen gyis skye ba/ skye ba'i rkyen gyis rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'byung ste/ de ltar ni sdug bsngal gyi phung po 'ba' zhig pa 'di 'byung bar 'gyur ro zhes gsungs pa'o/ /nang gi rten cing 'brel par 'byung ba'i rkyen 'brel pa gang zhe na/khams drug po sa'i khams dang / chu'i khams dang / me'i khams dang / rlung gi khams dang / nam mkha'i khams dang / rnam par shes pa'i khams 'dus pa'o/ /de la phyi rol gyi rten cing 'brel par 'byung ba'i ngo bo nyid kyi rab tu dbye ba rnam par gzhag pa gang zhe na/de yang rnam pa gnyis te/ rgyu dang 'brel pa dang / rkyen dang 'brel pa'o/ /de la phyi rol gyi rten cing 'brel par 'byung ba'i rgyu 'brel pa gang zhe na/ 'di lta ste/ sa bon las myu gu/ myu gu las 'dab ma/ 'dab ma las sdong bu/ sdong bu las sbu bu/ sbu bu las snying po//snying po las me tog /me tog las 'bras bu'o zhes gsungs so/ /phyi rol gyi rten cing 'brel par 'byung ba'i rkyen 'brel pa gang zhe na/ khams drug po sa'i khams dang / chu'i khams dang / me'i khams dang / rlung gi khams dang / nam mkha'i khams dang /dus kyi khams rnams bsdus pa'o/ /de la gnyis ka'i rgyu dang rkyen dang 'bras bu'i rab tu dbye ba rnam par gzhag pa gang zhe na/ rnam pa bzhir rig par bya ste/ mtshan nyid dang / gnas dang / rab tu dbye ba dang / rnam par gzhag pa'o/ /de la mtshan nyid gang zhe na/ snga ma yod pa gang yin pa gang la brten nas gang phrad na chos gang skye ba'am/'thob pa'am/ 'grub par 'gyur ba'am/ 'grub pa'am/ gnas pa'am/ byed par 'gyur ba de ni rgyu dang / rkyen dang 'bras bu'i mtshan nyid yin te/ de la snga na yod pa ni rgyu'i mtshan nyid do/ /gang la brten nas zhes bya ba dang / gang la phrad na zhes bya ba ni/ rkyen gyi mtshan nyid do/ /chos gang skye ba'am zhes bya ba la sogs pa ni 'bras bu'i mtshan nyid de/ de la rgyu ni phan pa'i don/ rkyen ni gnas par bya ba'i don/ 'bras bu ni 'grub pa'i don to/ /de la snga na yod pa ci zhig /ci la brten nas/ ci dang phrad na/ chos ci zhig skye bar 'gyur zhe na/rang gi sa bon ni snga na yod pa ste/ sa bon gyi gnas ma gtogs pa de las gzhan pa'i gnas gzugs can dang / gzugs can ma yin pa la yang brten la/ las la yang brten nas grogs dang dmigs pa dang yang phrad na 'dod pa dang / gzugs dang / gzugs med pa dang ldan pa dang / ldan pa ma yin pa'i chos rnams skye bar 'gyur te / de yang ci rigs par sbyar ro/ /snga na yod pa ci zhig /ci la brten nas/ ci dang phrad na/ chos ci zhig thob par 'gyur zhe na/ nyan thos dang / rang sangs rgyas dang / de bzhin gshegs pa'i rigs ni snga na yod pa ste/nang gi yan lag gi stobs la brten nas/ phyi rol gyi yan lag gi stobs dang phrad na nyon mongs pa dang bral ba mya ngan las 'das pa thob par 'gyur ro/ /snga na yod pa ci zhig /ci la brten nas/ ci dang phrad na/ chos ci zhig 'grub par 'gyur zhe na/ shes bya la mos shing 'dod pa'i snga na yod pa ste/ dam bca' ba dang / gtan tshigs dang / dpe la brten nas phyir rgol ba dang mi mthun pa med pa'i 'khor dang phrad na bsgrub par bya ba'i don 'grub par 'gyur ro/ /snga na yod pa ci zhig /ci la brten nas/ ci dang phrad na/ chos ci zhig 'grub ce na/ bzo shes pa ni snga na yod pa ste/ de dang mthun pa'i brtson pa la brten nas bzo'i las kyi gnas dang mthun pa'i cha byad yo byad dang phrad na bzo'i las kyi gnas de dang de dag 'grub par 'gyur ro/ /snga na yod pa ci zhig /ci la brten nas/ci dang phrad na/ chos ci zhig gnas par 'gyur zhe na/ sred pa ni snga na yod pa ste/ zas la brten pa'i lus la brten nas/ zas rnam bzhi dang phrad na sems can 'byung ba rnams gnas shing 'tsho ba la brta bar 'gyur ro/ /snga na yod pa ci zhig /ci la brten nas/ci dang phrad na / chos ci zhig byed par 'gyur zhe na/ rang gi sa bon ni snga na yod pa ste/ skye ba la brten na skye ba'i rkyen dang phrad na rang gi chos kyi rang gi byed pa yod cing rang gi las byed de/ 'di lta ste/ mig ni lta bar byed pa dang / dbang po lhag ma rnams kyang rang rang gi bya ba byed pa dang /sa ni brtan par byed pa dang / de lta bu dang mthun pa'i phyi rol gyi dngos po rnams kyang rang rang gi bya ba byed par rig par bya ste/ de ni rgyu dang rkyen dang / 'bras bu'i mtshan nyid yin no/ /de la rgyu dang rkyen dang 'bras bu'i gnas gang zhe na/ bco lnga ste/ tshig dang / myong ba dang /bag chags dang / rlan dang bcas pa'i sa bon dang / phrad nas 'gag pa dang / yul dang / dbang po dang / byed pa dang / skyes bu'i byed pa dang / de kho na la lta ba dang / mthun pa dang / mthu sna tshogs dang / tshogs pa dang / bar du gcod pa dang / bar du gcod pa ma yin pa'o//de la tshig ni rtog pas kun nas bslang ba'i ngag go/ /myong ba ni bde ba dang sdug bsngal la sogs pa nyams su myong ba'o/ /bag chags ni dge ba dang mi dge ba'i las kyis bsgos pa'i 'du byed kyi bag chags so/ /rlan dang bcas pa'i sa bon ni srid pa dang bcas pa'i las dang chu'i rlan dang bcas pa'i lo tog gi sa bon no//phrad nas 'gag pa ni 'gags ma thag pa'i rkyen no/ /yul ni dmigs pa'o/ /dbang po ni bdag po'o/ /byed pa ni 'du byed rnams dang rang rang gi las byed pa'o/ /skyes bu'i byed pa ni bya ba sgrub pa'i phyir skyes bu'i rtsol ba'o//de kho na la lta ba'i 'jig rten pa dang / 'jig rten las 'das pa'i yang dag pa'i lta ba'o/ /mthun pa ni rigs mthun pa'o/ /mthu sna tshogs ni 'du byed rnams kyi so so'i nus pa tha dad pa'o/ /tshogs pa ni lhan cig 'byung ba'o/ /bar du gcod pa ni skye ba la sogs pa la bar chad byed pa'o//bar du gcod pa ma yin pa ni skye ba la sogs pa la bar chad mi byed pa ste/ de dag ni rgyu dang rkyen dang 'bras bu'i gnas yin no/ /de la rgyu dang rkyen dang 'bras bu'i rab tu dbye ba gang zhe na/ rgyu bcu dang rkyen bzhi dang / 'bras bu lnga ste/ de la rgyu bcu gang zhe na/ rjes su tha snyad 'dogs pa'i rgyu dang /ltos pa'i rgyu dang / 'phen pa'i rgyu dang / mngon par 'grub pa'i rgyu dang / yongs su 'dzin pa'i rgyu dang / 'dren pa'i rgyu dang / so sor nges pa'i rgyu dang / lhan cig byed pa'i rgyu dang / mi mthun pa'i rgyu dang / mi mthun pa med pa'i rgyu'o/ /de la rjes su tha snyad 'dogs pa'i rgyu gang zhe na/chos thams cad kyi ming dang ming sngon du 'gro ba'i 'du shes dang / 'du shes sngon du 'gro ba'i brjod pa gang yin pa de ni chos de dang de dag gis rjes su tha snyad 'dogs pa'i rgyu yin no/ /ltos pa'i rgyu gang zhe na/ gzhi gang las ltos shing rgyu gang gis dngos po gang la 'dod pa dang len par 'gyur ba de ni de'i ltos pa'i rgyu yin no//'phen pa'i rgyu gang zhe na/ sa bon ni rang gi 'bras bu tha ma'i bar gyis 'phen pa'i rgyu yin no/ /mngon par 'grub pa'i rgyu gang zhe na/ sa bon de nyid ni rang gi 'bras bu mngon par 'grub pa'i rgyu yin no/ / yongs su 'dzin pa'i rgyu gang zhe na/ sa bon ma gtogs pa de las gzhan pa'i rkyen rnams ni yongs su 'dzin pa'i rgyu yin no/ /'dren pa'i rgyu gang zhe na/ sa bon las grub pa'i 'bras bu de ni sa bon gyis 'phangs pa'i 'bras bu phyi ma'i rgyu yin no/ /so sor nges pa'i rgyu gang zhe na/ chos rnam pa sna tshogs rnam pa tha dad pa'i rang rang gi rgyu ni so sor nges pa'i rgyu yin no//lhan cig byed pa'i rgyu gang zhe na/ ltos pa'i rgyu dang / 'phen pa'i rgyu dang / mngon par 'grub pa'i rgyu dang / yongs su 'dzin pa'i rgyu dang / 'dren pa'i rgyu dang / so sor nges pa'i rgyu gang yin pa de dag thams cad gcig tu bsdus pa ni lhan cig byed pa'i rgyu yin no//mi mthun pa'i rgyu gang zhe na/ skye ba la sogs pa la bar du gcod pa'i rgyu mi mthun pa'i rgyu yin no/ /mi mthun pa med pa'i rgyu gang zhe na/ skye ba la sogs pa la bar du gcod pa med pa'i rgyu ni mi mthun pa med pa'i rgyu yin no//rgyu bcu po de dag ni 'jig rten pa'i lo tog la sogs pa lung du ma bstan pa'i dngos po thams cad dang / kun nas nyon mongs pa dang / rnam par byang ba'i phyogs kyi dngos po thams cad phyin ci ma log par 'gyur ba'i rgyu yin te/ de la rgyu bcu po de dag gis 'jig rten pa'i dngos po thams cad ni ji ltar 'byung bar 'gyur/kun nas nyon mongs pa ni ji ltar 'gyur/ rnam par byang ba ni ji ltar 'gyur zhe na/ 'di ltar 'jig rten na 'bru'i grangs su gtogs pa'i lo tog gang dag gis 'jig rten 'di 'tsho bar byed pa gang yin pa de dag gi ming dang /'du shes dang tshig tu brjod pa rnam pa sna tshogs 'di lta ste/ nas dang / 'bras dang / sA lu dang / gro dang / til dang / sran ma la sogs pa zhes bya ba la sogs pa 'di ni de dag gi tha snyad du khyer te shog /thogs shig /zhog cig ces bya ba la sogs pa'i rjes su tha snyad 'dogs pa'i rgyu yin no//bkres pa dang / skom pa dang / nyam chung ba dang / lus gnas par bya ba la ltos pa dang / kham gyi zas kyi myang bar bya ba la ltos nas/ nas la sogs pa de dag 'dod pa dang / tshol ba dang / len pa dang / longs spyod par byed pa 'di ni de dag gi ltos pa'i rgyu yin no//nas la sogs pa'i rang rang gi sa bon gang dang gang la lo tog gang dang gang 'byung ba'i sa bon de ni de'i 'phen pa'i rgyu yin no/ /sa bon de ni myu gu de'i mngon par 'grub pa'i rgyu yin no/ /sa dang char pa la sogs pa'i rkyen las myu gu 'byung bar 'gyur ba de ni de'i yongs su 'dzin pa'i rgyu yin no//myu gu dang sdong bu dang lo ma gcig nas gcig tu brgyud pa'i rgyun de ni lo tog de 'grub pa dang yongs su smin pa'i 'dren pa'i rgyu yin no/ /nas kyi sa bon las kyang nas kyi myu gu dang nas kyi lo tog 'byung bar 'gyur gyi gzhan ma yin la/ 'bru gzhan dag las kyang de bzhin pa de ni de dag gi so sor nges pa'i rgyu yin no/ /ltos pa'i rgyu nas bzung ste/ so sor nges pa'i rgyu la thug pa'i bar gyi rgyu drug po de dag thams cad gcig tu bsdus pa ni lo tog de 'grub pa'i lhan cig byed pa'i rgyu yin no/ /ser ba dang lo tog la gnod pa 'byung ba la sogs pa bar du gcod pa rnams ni de'i mi mthun pa'i rgyu yin no//de dag med de bar du gcod pa med pa ni mi mthun pa med pa'i rgyu yin te/ de ltar rgyu bcu po de dag ni 'bru bsdus pa rnams la ji lta ba bzhin du de las gzhan pa'i 'jig rten pa'i dngos po dag la yang ci rigs par sbyar bar rig par bya'o//de la kun nas nyon mongs par ji ltar 'gyur zhe na/ 'di ltar rten cing 'brel par 'byung ba thams cad kyi ming dang 'du shes dang / tshig tu brjod pa 'di lta ste/ ma rig pa dang / 'du byed rnams dang / rnam par shes pa dang / ming dang gzugs nas/ rgyas par rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa zhes bya ba'i bar de ni re zhig kun nas nyon mongs pa'i tha snyad ma rig pa'i rkyen gyis 'du byed rnams zhes bya ba nas skye ba'i rkyen gyis rga shi zhes bya ba la sogs pa'i rjes su tha snyad 'dogs pa'i rgyu yin no//bde ba la sogs pa'i yul myong ba la ltos nas srid pa'i yan lag 'di dag 'jug pa de ni/ kun nas nyon mongs pa de'i ltos pa'i rgyu yin no/ /tshe 'di la skyes shing 'byung ba'i ma rig pa la sogs pa'i chos rnams kyi sa bon gang dag yin pa de dag ni skye ba gzhan gyi skye ba dang rga shi 'phen pa'i rgyu yin no//ma rig pa la sogs pa'i rang gi sa bon ni mngon par 'grub pa'i rgyu yin no/ /skyes bu dam pa ma yin pa la brten pa dang / dam pa'i chos ma yin pa thos pa dang / tshul bzhin ma yin pa yid la byed pa dang / sngon goms pa'i 'phen pa ni ma rig pa la sogs pa dag 'byung ba'i yongs su 'dzin pa'i rgyu yin no//ma rig pa la sogs pa sred pa la thug pa de dag ni phyi ma phyi ma 'dren cing gcig nas gcig tu brgyud pa tshe gzhan gyi skye ba rga shi de'i 'dren pa'i rgyu yin no/ /ma rig pa la sogs pa mthar thug pa rang gi sa bon rnams dang bcas pa gzhan dag sems can dmyal bar skye bar 'gyur ba dang /gzhan dag dud 'gro dang / yi dgas dang / mi dang / lhar skye bar 'gyur ba de ni kun nas nyon mongs pa'i so sor nges pa'i rgyu yin no/ /ltos pa'i rgyu nas bzung ste/ so sor nges pa'i rgyu la thug pa'i bar gyi rgyu drug po de dag thams cad gcig tu bsdus pa ni kun nas nyon mongs pa'i lhan cig byed pa'i rgyu yin no//kun nas nyon mongs pa de'i mi mthun pa'i rgyu ni rigs dang ldan pa dang / sangs rgyas rnams 'byung ba dang / dam pa'i chos bstan pa dang / skyes bu dam pa la brten pa dang / dam pa'i chos nyan pa dang / tshul bzhin yid la byed pa dang / chos kyi rjes su mthun pa'i chos sgrub pa dang / byang chub kyi phyogs kyi chos thams cad do/ /mi mthun pa med pa'i rgyu ni ji skad bstan pa'i chos 'di dag nyid med pa dang bral ba nyid de/ de ltar rgyu bcu po de dag gis sems can thams cad kyi kun nas nyon mongs pa thams cad rig par bya'o//de la rnam par byang bar ji ltar 'gyur zhe na/ rnam par byang ba'i chos thams cad dang 'gog pa mya ngan las 'das pa la ming dang / 'du shes dang tshig tu brjod pa gang yin pa 'di lta ste/ dran pa nye bar gzhag pa dang / yang dag par spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag dang / 'phags pa'i lam yan lag brgyad pa dang / ma rig pa 'gags pas 'du byed 'gag ces bya ba nas/ skye ba 'gags pas rga shi 'gag ces bya ba'i bar de dag dang /de lta bu dang mthun pa rnams ni rnam par byang ba'i rjes su tha snyad 'dogs pa'i rgyu yin no/ /'du byed kyi nyes dmigs la ltos nas rnam par byang ba'i tshol ba dang / rnam par byang ba yongs su 'dzin pa dang rnam par byang ba yongs su grub pa gang yin pa de ni de'i ltos pa'i rgyu yin no//gang zag rigs la gnas pa'i rigs dang ldan pa phung po'i lhag ma dang bcas pa dang lhag ma med pa'i mya ngan las 'das pa'i dbyings 'thob pa'i sngon du 'gro ba gang yin pa de ni rnam par byang ba'i 'phen pa'i rgyu yin no/ /rigs kyis bsdus pa'i zag pa med pa byang chub kyi phyogs kyi chos kyi sa bon de dag ni byang chub kyi phyogs kyi chos de dag gi mngon par 'grub pa'i rgyu yin no//skyes bu dam pa la brten pa dang / dam pa'i chos mnyan pa dang / tshul bzhin yid la byed pa dang / sngon dbang po yongs su smin par byas pa ni rnam par byang ba'i yongs su 'dzin pa'i rgyu yin no//byang chub kyi phyogs kyi chos kyi rang gi sa bon las mngon par 'grub pa de ni phung po'i lhag ma dang bcas pa dang lhag ma med pa'i mya ngan las 'das pa'i dbyings kyi rim gyis 'dren pa'i rgyu yin no/ /nyan thos kyi rigs gang yin pa de ni nyan thos kyi theg pas yongs su mya ngan las 'da' bar 'gyur ba dang /rang sangs rgyas kyi theg pas yongs su mya ngan las 'da' bar 'gyur ba dang / theg pa chen po'i rigs ni theg pa chen pos yongs su mya ngan las 'da' bar 'gyur ba de ni rnam par byang ba'i so so'i nges pa'i rgyu yin no/ /ltos pa'i rgyu nas bzung ste/so sor nges pa'i rgyu la thug pa'i bar gyi rgyu drug po de dag thams cad gcig tu bsdus pa ni rnam par byang ba'i lhan cig byed pa'i rgyu yin no/ /rigs dang mi ldan pa dang rang sangs rgyas rnams mi 'byung ba dang / mi khom par skyes pa dang / skyes bu dam pa ma yin pa la brten pa dang /dam pa'i chos ma yin pa mnyan pa dang / tshul bzhin ma yin pa yid la byed pa dang / log par sgrub pa ni rnam par byang ba'i mi mthun pa'i rgyu yin no/ /mi mthun pa'i rgyu de nyid med pa dang bral ba nyid gang yin pa de ni mi mthun pa med pa'i rgyu yin no/ /de ltar rgyu bcu po dag gis kun nas nyon mongs par 'gyur la bcu po nyid kyis rnam par byang bar 'gyur te/'das pa'i dus na byung ba dang ma 'ongs pa'i dus na 'byung bar 'gyur ba'i kun nas nyon mongs pa'am rnam par byang ba'i rgyu gzhan ni 'di las gong na yang med la 'di las lhag pa yang med do/ /rgyu bcu po de dag kyang mdor bsdu na rgyu gnyis kyis bsdus te/bskyed pa'i rgyu dang / thabs kyi rgyu'o/ /de la 'phen pa'i rgyu dang / mngon par 'grub pa'i rgyu gnyis ni bskyed pa'i rgyu yin no/ /rgyu lhag ma brgyad ni thabs kyi rgyu yin par rig par bya ste/ de ni rgyu'i rab tu dbye ba yin no/ /de la rkyen bzhi gang zhe na/rgyu'i rkyen dang / de ma thag pa'i rkyen dang / dmigs pa'i rkyen dang / bdag po'i rkyen no / /de la rgyu'i rkyen gang zhe na/ sa bon thams cad pa kun gzhi'i rnam par shes pa gang yin pa'o/ /phyi rol gyi dngos po dag la yang 'phen pa'i rgyu dang mngon par 'grub pa'i rgyur grags pa thams cad ni rgyu'i rkyen yin no//de ma thag pa'i rkyen gang zhe na/ sems dang sems las byung ba'i chos gang dag gi mjug thogs su sems dang sems las byung ba'i chos gang dag byung ba de dag ni de dag gi de ma thag pa'i rkyen zhes bya'o/ /rnam par shes pa drug po 'gags ma thag pa gang yin pa de dag gi rnam par shes pa drug po gang dag de'i mjug thogs su skye ba ni de ma thag pa'i rkyen yin te/de dag ni 'gags so/ / yid las yid ces bya ba dang / yid kyi skye mched ces bya ba dang / yid kyi khams zhes bya bar yang btags so//dmigs pa'i rkyen gang zhe na/ gzugs la sogs pa yul lnga po dag ni rnam par shes pa'i tshogs lnga po dag ni dmigs pa'i rkyen yin no/ /nang dang phyi rol gyi skye mched bcu gnyis po thams cad ni yid kyi rnam par shes pa'i dmigs pa'i rkyen yin no/ /bdag po'i rkyen gang zhe na/ mig la sogs pa'i skye mched lhan cig 'byung ba rnams ni mig gi rnam par shes pa la sogs pa'i bdag po'i rkyen yin no//rnam par shes pa rnams dmigs pa la gtod par byed pa'i yid la byed pa la yang rnam par shes pa rnams kyi bdag po'i rkyen yin no/ /sems dang sems las byung ba'i chos lhan cig byung ba rnams kyang gcig gi bdag po'i rkyen gcig yin pas bdag po'i rkyen yin no//dge ba dang mi dge ba'i las sngon byas pa rnams dang phyis 'bras bu 'dod pa dang mi 'dod pa rnam par smin par 'gyur ba'i bdag po'i rkyen yin no/ /zhing dang lud dang chu la sogs pa ni lo tog mngon par 'grub pa'i bdag po'i rkyen yin no//bzo shes pa dang bzo'i las dang de dag ni 'jig rten pa'i bzo dang las kyi gnas de dang de dag mngon par 'grub pa'i bdag po'i rkyen yin no/ /de la rgyu'i rkyen ni rgyu yang yin rkyen yang yin te skyed pa'i rgyu yin no/ /de las gzhan pa'i rkyen gsum po dag ni rkyen kho na yin gyi rgyu ni ma yin te/thabs kyi rgyu yin no/ /de la yang bdag po'i rkyen ni gtso cher thabs kyi rgyu thams cad yin no/ /de ma thag pa'i rkyen dang dmigs pa'i rkyen ni yongs su 'dzin pa'i rgyus bsdus pa'i sgo nas thabs kyi rgyu yin par rig par bya ste de ni rkyen gyi rab tu dbye ba yin no//de la 'bras bu lnga gang zhe na/ rnam par smin pa'i 'bras bu dang / rgyu mthun pa'i 'bras bu dang / bral ba'i 'bras bu dang / skyes bu byed pa'i 'bras bu dang / bdag po'i 'bras bu'o/ /de la rnam par smin pa'i 'bras bu gang zhe na/ mi dge ba'i chos rnams kyi rnam par smin pa ngan song rnams su rnam par smin par 'gyur ba dang /dge ba zag pa dang bcas pa rnams kyi rnam par smin pa bde 'gro rnams su rnam par smin par 'gyur ba gang yin pa de ni rnam par smin pa'i 'bras bu'o/ /rgyu mthun pa'i 'bras bu gang zhe na/ mi dge ba la goms pas mi dge ba la dga' zhing mi dge ba mang bar gnas pa dang /dge ba la goms pas dge ba la dga' zhing dge ba mang bar gnas pa dang / sngon gyi las dang mthun par phyis rjes su 'jug pa gang yin pa de ni rgyu mthun pa'i 'bras bu'o/ /bral ba'i 'bras bu gang zhe na/ 'phags pa'i lam yan lag brgyad pas nyon mongs pa 'gog pa gang yin pa de ni bral ba'i 'bras bu'o//skyes bu byed pa'i 'bras bu gang zhe na/ la la chos 'di nyid la bzo dang las kyi gnas kyi gnas gang yang rung ba la brten nas skyes bu'i byed pas yang na zhing rmed dam/ yang na tshong byed dam/ yang na rgyal po'i zha 'bring byed dam/ yi ge dang rtsis dang shod 'god dang bgrang ba dang lag rtsis kyi lo tog la sogs pa dang /rnyed pa la sogs pa'i 'bras bu mngon par 'grub pa gang yin pa de ni skyes bu byed pa'i 'bras bu'o/ /bdag po'i 'bras bu gang zhe na/ mig gi rnam par shes pa ni mig gi dbang po'i 'bras bu'o/ /yid kyi rnam par shes pa'i bar yang yid kyi dbang po'i bar gyi bdag po'i 'bras bu'o//de bzhin du srog dang ma bral ba ni srog gi dbang po'i bdag po'i 'bras bu'o/ /de bzhin du dbang po nyi shu rtsa gnyis po thams cad kyi so so'i dbang gis 'bras bu gang 'grub pa de ni bdag po'i 'bras bu yin par rig par bya ste/de ni 'bras bu'i rab tu dbye ba yin no/ /de la rgyu dang rkyen dang 'bras bu rnam par gzhag pa gang zhe na/ rgyu'i gnas la brten nas rjes su tha snyad 'dogs par byed de/ de ci'i phyir zhe na/ 'di ltar 'dod pa dang gzugs dang gzugs med pa dang ldan pa dang ldan pa ma yin pa'i chos rnams la ming rnam par gzhag pa sngar byung nas 'du shes 'jug go//'du shes sngar byung nas tshig 'byung ngo / /tshig gis ni ji ltar mthong ba dang thos pa dang bye brag phyed pa dang rnam par shes pa bzhin du rjes su tha snyad 'dogs pa'i phyir te/de bas na tshig la brten nas rjes su tha snyad 'dogs pa'i rgyu 'dogs so/ /de la rgyu'i gnas myong ba la brten nas ltos pa'i rgyu 'dogs par byed de/ ci'i phyir zhe na/ 'di ltar 'dod pa dang ldan pa'i bde ba 'dod pa gang yin pa de ni de la ltos nas 'dod pa rnams rnyed pa'am/ kun rdzogs pa'am/so sor bsten pa yongs su tshol ba dang / gzugs dang gzugs med pa dang ldan pa'i bde ba 'dod pa gang yin pa de ni de la ltos nas de'i rkyen rnyed pa'am/ so sor bsten pa yongs su tshol ba dang ldan pa ma yin pa'i bde ba 'dod pa gang yin pa de yang de la ltos nas de'i rkyen rnyed pa 'am / so sor bsten pa yongs su tshol ba dang / sdug bsngal mi 'dod pa gang yin pa de yang de la ltos nas de'i rkyen rnams spong ba'am/ de spong ba'i rkyen rnams rnyed pa'am/ so sor bsten pa'am/ yongs su tshol ba'i phyir te/ de bas na myong ba la brten nas ltos pa'i rgyu 'dogs so/ /de la rgyu'i gnas bag chags la brten nas 'phen pa'i rgyu 'dogs par byed de/de ci'i phyir zhe na/ 'di ltar dge ba dang / mi dge ba'i las kyis yongs su bsgos pa'i 'du byed rnams kyi khams gsum du sdug pa dang mi sdug pa'i 'gro ba rnams su sdug pa dang mi sdug pa'i lus rnams 'phen par byed pa dang / de nyid kyi dbang gis phyi rol gyi dngos po rnams kyang phun sum tshogs pa dang rgud par 'gyur ba'i phyir te/de bas na bag chags la brten nas 'phen pa'i rgyu 'dogs so/ /de la rgyu'i gnas rlan dang bcas pa'i sa bon la brten nas mngon par 'grub pa'i rgyu 'dogs par byed de/ de ci'i phyir zhe na/ 'di ltar 'dod pa dang gzugs dang gzugs med pa dang ldan pa'i chos rnams rang rang gi sa bon las 'byung bar 'gyur ba dang / sred pa ni sa bon gyi rlan ces bya ste/ des sa bon brlan nas lus 'phangs pa rnams mngon par 'grub par 'gyur ba'i phyir te/ skye ba'i rgyu ni las yin la/mngon par 'grub pa'i rgyu ni sred pa yin no zhes ji skad gsungs pa lta bu'o/ /de bas na rlan dang bcas pa'i sa bon la brten nas mngon par 'grub pa'i rgyu 'dogs so/ /de la rgyu'i gnas phrad nas 'gags pa dang yul dang dbang po dang byed pa dang skyes bu'i byed pa dang de kho na la lta ba la brten nas yongs su 'dzin pa'i rgyu 'dogs par byed de/de ci'i phyir zhe na/ 'di ltar 'dod pa dang / gzugs dang gzugs med pa dang ldan pa chos rnams kyi nang nas 'du byed rnams kyis 'jug pa 'byung ba ni phrad nas 'gags pa dang yul dang dbang po dang byed pa dang skyes bu'i byed pas yongs su zin pa las 'byung ba de kho na la lta bas yongs su zin pa'i chos de las gzhan pa ldan pa ma yin pa rnams kyang 'byung bar 'gyur ba'i phyir te/de bas na phrad nas 'gags pa dang yul dang dbang po dang byed pa dang skyes bu'i byed pa dang de kho na la lta ba la brten nas yongs su 'dzin pa'i rgyu 'dogs so//de la rgyu'i gnas mthun pa la brten nas 'dren pa'i rgyu 'dogs par byed de/ de ci'i phyir zhe na/ 'di ltar 'dod pa dang ldan pa'i dge ba'i chos rnams ni 'dod pa dang ldan pa'i dge ba'i chos khyad par can rnams dang gzugs dang gzugs med pa dang ldan pa dang ldan pa ma yin pa'i chos rnams 'dren pa dang /de bzhin du gzugs dang ldan pa'i dge ba'i chos rnams kyang gzugs dang ldan pa'i dge ba'i chos khyad par can rnams dang gzugs med pa dang ldan pa dang / ldan pa ma yin pa'i chos rnams 'dren pa dang / de bzhin du gzugs med pa dang ldan pa'i dge ba'i chos rnams kyang gzugs med pa dang ldan pa'i dge ba'i chos khyad par can rnams dang ldan pa ma yin pa'i chos rnams 'dren pa dang /de bzhin du ldan pa ma yin pa'i dge ba'i chos rnams kyang ldan pa ma yin pa'i dge ba'i chos khyad par can rnams dang 'dus ma byas pa mngon sum du bya ba la 'dren pa de bzhin du mi dge ba'i chos rnams kyang mi dge ba'i chos khyad par can rnams 'dren pa dang /de bzhin du lung ma bstan pa'i chos rnams kyang lung du ma bstan pa'i chos khyad par can rnams dang lung du ma bstan pa'i kun gzhi'i rnam par shes pa dge ba dang mi dge ba'i sa bon can gyis dge ba dang mi dge ba'i chos rnams kyang 'dren pa'i phyir te/de dag ni de dag dang ci rigs par mthun pa'i phyir ro/ /de bas na mthun pa la brten nas 'dren pa'i chos so/ /de la rgyu'i gnas mthu sna tshogs la brten nas so sor nges pa'i rgyu 'dogs par byed de/de ci'i phyir zhe na/ 'di ltar 'dod pa dang gzugs dang gzugs med pa dang ldan pa dang ldan pa ma yin pa'i chos ngo bo nyid rnam pa sna tshogs pa rnams ni ngo bo nyid kyi khyad par rnam pa sna tshogs mthu rnam pa sna tshogs can las byung ba'i phyir te/ de bas na mthu sna tshogs la brten nas so sor nges pa'i rgyu 'dogs so//de la rgyu'i gnas tshogs pa la brten nas lhan cig byed pa'i rgyu 'dogs par byed de / de ci'i phyir zhe na/ 'di ltar 'dod pa dang gzugs dang gzugs med pa dang ldan pa dang ldan pa ma yin pa'i chos rnams rang skye ba'i tshogs pa dang phrad nas skye ba dang skye ba'i tshogs pa ji lta ba bzhin du 'thob pa dang 'grub par 'gyur ba dang grub pa dang gnas pa dang byed pa'i tshogs pa dang phrad na byed par 'gyur ba'i phyir te/de bas na tshogs pa la brten nas lhan cig byed pa'i rgyu 'dogs so/ /de la rgyu'i gnas bar du gcod pa la brten nas mi mthun pa'i rgyu 'dogs par byed de/de ci'i phyir zhe na/ 'di ltar 'dod pa dang gzugs dang gzugs med pa dang ldan pa dang ldan pa ma yin pa'i chos rnams skye ba la gal te bar du gcod pa nye bar gnas par gyur na skye bar mi 'gyur ba dang / de bzhin du 'thob pa dang grub par 'gyur ba dang /grub pa dang gnas pa dang byed pa la yang de de dang 'dra ba'i phyir te/ de bas na bar du gcod pa la brten nas mi mthun pa'i rgyu 'dogs so/ /de la rgyu'i gnas bar du gcod pa ma yin pa la brten nas mi mthun pa med pa'i rgyu 'dogs par byed de/ de ci'i phyir zhe na/ 'di ltar 'dod pa dang gzugs dang gzugs med pa dang ldan pa dang ldan pa ma yin pa'i chos rnams skye ba la gal te bar du gcod pa ma yin pa nye bar gnas par gyur na de dag skye ba dang / de bzhin du 'thob pa dang grub par 'gyur ba dang grub pa dang / gnas pa dang byed pa la yang de dang 'dra ba'i phyir te/de bas na bar du gcod pa ma yin pa la brten nas de mi mthun pa med pa'i rgyu 'dogs te/ de ni rgyu'i rnam par gzhag pa yin no/ /de la rkyen gyi rnam par bzhag pa gang zhe na/ rkyen gyi gnas bag chags dang rlan dang bcas pa'i sa bon la brten nas rgyu'i rkyen 'dogs par byed do//rkyen gyi gnas phrad nas 'gags pa la brten nas de ma thag pa'i rkyen 'dogs par byed do/ /rkyen gyi gnas yul la brten nas dmigs pa'i rkyen 'dogs par byed do/ /rkyen gyi gnas dbang po la sogs pa de las gzhan pa rnams la brten nas bdag po'i rkyen 'dogs par byed de/de ni rkyen gyi rnam par gzhag pa yin no/ /de la 'bras bu'i rnam par gzhag pa gang zhe na/ 'bras bu'i gnas bag chags la brten nas rnam par smin pa'i 'bras bu 'dogs par byed do/ / 'bras bu'i gnas mthun pa la brten nas/ rgyu mthun pa'i 'bras bu 'dogs par byed do/ /'bras bu'i gnas de kho na lta ba la brten nas bral ba'i 'bras bu 'dogs par byed do/ /'bras bu'i gnas skyes bu'i byed pa la brten nas/ skyes bu'i byed pa'i 'bras bu 'dogs par byed do/ /'bras bu'i gnas de la gzhan rnams la brten nas bdag po'i 'bras bu 'dogs par byed do//de ni 'bras bu'i rnam par gzhag pa yin te/ rten cing 'brel par 'byung ba'i rab tu dbye ba rnam par gzhag pa bshad zin to// //de la rten cing 'brel par 'byung ba'i go rims rnam par gzhag pa gang zhe na/ srid pa'i yan lag bcu gnyis kyi go rims bstan pa ste/thog ma kho nar shes bya'i dngos po la rmongs pa ni ma rig pa'o/ /rmongs pa de nyid la log par mngon par 'du byed pa ni 'du byed rnams so/ /log par mngon par 'du byed pas sems phyin ci log tu 'gyur ba ni rnam par shes pa'o/ /sems phyin ci log tu gyur pas nying mtshams sbyor ba ni ming dang gzugs so//nying mtshams sbyor bas dbang po yongs su rdzogs par 'gyur ba ni skye mched drug go/ /dbang po yongs su rdzogs pa las yul la yongs su longs spyod par byed pa ni reg pa'o/ /yul la yongs su longs spyad pa las lhag par zhen par 'gyur ba ni tshor ba'o//lhag par zhen pa las de 'dod par 'gyur ba ni sred pa'o/ /'dod nas yongs su tshol bas nyon mongs pa bsogs par 'gyur ba ni len pa'o/ /nyon mongs pa bsags pas yang srid pa sdug pa dang mi sdug pa'i las kun nas ldang ba ni srid pa'o//las bsags pa kun nas ldang ba ni 'gro ba lnga'i 'khor bar sdug bsngal mngon pa ni skye ba'o/ /sdug bsngal mngon par 'grub par byas pas lus yongs su 'gyur ba'i rgyu las byung ba'i sdug bsngal 'byung ba ni rga shi'o/ /yul yongs su 'gyur ba'i rgyu las byung ba'i sdug bsngal 'byung ba ni mya ngan dang smre sngags 'don pa dang /sdug bsngal ba dang / yid mi bde ba dang / 'khrug pa dag yin te/ de lta bas na bcom ldan 'das kyis yan lag bcu gnyis po de dag go rims kyis bstan to/ /go rims kyi rnam grangs gzhan yang rten cing 'brel par 'byung ba'i yan lag bcu gnyis las brtsams pa'i rkyen rnam pa gnyis yod de/lus kyi rkyen dang / yul la nye bar spyod pa'i rkyen no / /de la lus kyi rkyen ni yan lag dang po drug gis bsdus te/ thog mar lus la bdag tu 'dzin pa la sogs pas rmongs pa ni ma rig pa'o/ /de nas las rnams kyi 'bras bu rnam par smin pa sdug bsngal bar ma shes nas las byed pa ni 'du byed rnams so//las byas nas kyang de nyid la shas cher rjes su rtogs pa ni rnam par shes pa'o/ /de na grogs rnam par shes pa de dang ldan pa'i las kyi phyi ma la dbang po 'grub pas bsdus pa'i ming dang gzugs kyi sdug bsngal dang /dbang po yongs su rdzogs pas bsdus pa'i skye mched drug gi sdug bsngal dang / yul la longs spyod pas bsdus pas reg pa'i sdug bsngal rnam pa gsum mngon par 'grub ste/ de ni lus kyi rkyen gyi dbang du byas pa'i go rims yin no//de la yul la nye bar spyod pa'i rkyen ni yan lag lhag ma drug gis bsdus te/ de ltar lus mngon par grub nas tshe 'di la yang reg pa'i rkyen gyis tshor ba la sred pa bskyed pa ni tshor ba dang sred pa yin no/ /de nas btsal ba'i sgo nas rnyed pa dang / bkur sti'i sgo nas tshul khrims dang brtul zhugs kyi sgo dang thar pa'i sgo nas 'dod pa yongs su tshol ba'am/lus yongs su tshol ba'am/ thar pa yongs su tshol ba yang rung ste/ yul la yongs su longs spyod pa'i rkyen dang ldan pa yongs su tshol bar byed pa ni len pa'o/ /log par yongs su tshol bar byed pa nyon mongs pa rnams dang de sngon du 'gro ba'i las rnams byas shing bsags pa ni srid pa'o//srid pa'i dbang gis 'gro ba lnga'i 'khor bar lus mngon par 'grub pa ni skye ba'o/ /skyes nas rgas shing 'chi bar 'gyur ba ni rga shi ste de ni yul la nye bar spyod pa'i rkyen gyi dbang du byas pa'i go rims yin no//go rims kyi rnam grangs gzhan yang sems can gyi tshogs gsum yod de/ 'jig rten las 'das pa'i rnam par dag pa 'dod pa rnams dang / 'jig rten pa'i rnam par dag pa 'dod pa rnams dang / yul lhur 'dzin pa rnams so/ /de la dang po rnams ni dkar po'i phyogs rten cing 'brel par 'byung ba'i 'gog par byed cing nag po'i phyogs 'phel bar mi byed pas de dag la ni go rims rnam par gzhag tu yang med do//gnyis pa rnams la ni bden pa rnams yang dag pa ji lta ba bzhin du mi shes pa ni ma rig pa yin no/ /dran pa la nye bar gnas shing bsod nams dang mi g.yo ba zag pa dang bcas pa bsgom pa las byung ba'i las byed pa ni 'du byed rnams so//dran pa la nye bar gnas pa ma yin du zin kyang bsod nams ma yin pa las 'gyod pas yongs su bsgom pa'am/ 'gyod pa med pa'i lam mchog tu dgag pas yongs su bsgom pa'i sems kyis shas cher gnas pa ni rnam par shes pa'o//des na snga ma bzhin du phyi ma la skye ba'i gnas tha ma dang 'bring dang khyad par du 'phags pa dag tu mthar gyis ming dang gzugs dang skye mched drug dang reg pas bsdus pa'i sdug bsngal rnam pa gsum mngon par grub par 'gyur ro/ /sems can gsum pa da ltar byung ba'i yul longs spyod pas byung ba'i tshor ba la gnas pa rnams kyis ni snga ma bzhin du yan lag drug po gzhan sred pa nas rga shi la thug pa rnams rim gyis 'byung bar blta bar bya ste/de ni rten cing 'brel par 'byung ba'i go rims rnam par gzhag pa yin no//de la rten cing 'brel par 'byung ba'i bsdu ba rnam par gzhag pa gang zhe na/ sngar phung po rnams kyi bsdu ba bshad pa'i skabs su srid pa'i yan lag rnams kyi phung po dang / khams dang / skye mched dang / gnas dang / gnas ma yin pa dang / dbang po dag bsdu bar bstan pa kho na bzhin ci rigs par sbyar te/de ni rten cing 'brel par 'byung ba'i bsdu ba rnam par gzhag pa yin no/ /de la rten cing 'brel par 'byung ba'i rten rnam par gzhag pa gang zhe na/ rten cing 'brel par 'byung ba gzugs can ni gzugs kyi phung por gtogs la gzugs can ma yin pa ni ming gi phung por gtogs pas sngar phung po gzugs can dang gzugs can ma yin pa rnams kyi rten rnam par gzhag pa ji skad bstan pa bzhin ci rigs par sbyar te/de ni rten cing 'brel par 'byung ba'i rten rnam par gzhag pa yin no/ /de ltar rten cing 'brel par 'byung ba'i rnam par gzhag pa rnam pa drug po de dag gis sems can du btags pa dang de'i longs spyod kyi dngos po sna tshogs su snang bas na/de'i phyir des ni de'i sna tshogs kyi dngos po bstan to/ /ston pa'i dngos po dang bstan par bya ba'i dngos po dang 'khor gyi dngos po zhes bya ba'i dngos po gsum gyis dkon mchog gsum po sangs rgyas dkon mchog dang /chos dkon mchog dang / dge 'dun dkon mchog bstan te go rims bzhin no/ /de la dkon mchog ces bya ba ni rin po che dang 'dra bar dkon pa dang rin che ba dang dga' bar byed pa dang phan 'dogs pa dang mi ma yin pa la sogs pa gnod par byed pa'i gnyen por gyur pa'i phyir dkon mchog ces bya'o//de la dkon pa ni dper na yid bzhin gyi nor bu rin po che ni dngos rgyal ba'i sku gdung las 'gyur bas klu'i rgyal po rgya mtsho dang klu'i rgyal po dbang bsgyur la sogs pa sems can chen po sngon bsags pa kha cig la bdog gi/ sems can tshogs ma bsags pa rnams kyis 'phral gyi skyes bu byed pas btsal du mi rnyed pas dkon pa yin no//de bzhin du sangs rgyas dkon mchog ni byang chub sems dpa' srid pa dang longs spyod la ma chags pa lus dang srog la mi lta ba rgyun mi 'chad par byang chub kyi phyogs la zhugs pa rnams kyis bskal pa grangs med pa gsum gyis thob par bya ba yin gyi skye bo phal ba rnams kyis rang gi rigs dang /dang po sems bskyed pa tsam gyis mi thob pas/ de'i phyir sangs rgyas 'byung ba ni u dum wA ra'i me tog dang 'dra bar dkon pa yin no/ /sangs rgyas 'byung ba dkon pas na chos dang dge 'dun dkon mchog kyang sangs rgyas 'byung ba la rag las pa'i phyir dkon pa yin no//rin che ba ni dper na yid bzhin gyi nor bu rin po che ni de bzhin gshegs pa'i sngon gyi smon lam gyi dbang dang bdag po'i bsod nams kyi stobs kyis thob pa'i phyir 'dzam bu'i gling dang 'dra/rin thang dpag tu med pas na rin po che yin no/ /de bzhin du sangs rgyas dkon mchog ni 'dod dgu mthar phyin pa'i gnas thob pa rnams kyi bsod nams dang ye shes kyi tshogs gnyis kas thob pa yin la/ chos dkon mchog ni 'dus byas thams cad yongs su btang bas thob pa yin/dge 'dun dkon mchog ni 'khor ba'i 'bras bu 'grub pa las khyad par du gyur pa'i phyir 'phags pa'i nor bdun gyi dbyig dang 'dra bar rin thang gdab tu med pas na rin che ba yin no/ /dga' bar byed pas ni dper na yid bzhin gyi nor bu rin po che ni gzi byin mtha' yas pa yin pas mthong ba dang thos pa dang rjes su dran na dga' bar byed pa'i phyir dga' ba'i rgyur 'gyur bas dga' bar byed pa yin no//de bzhin du sangs rgyas dkon mchog ni 'od dang gzi brjid dang sku mdog dang dpal gyis tshangs pa dang bdud dang lha dang mi zil gyis mnan te mdzes shing lham me lhan ne lhang nger bzhugs pa yin la/chos dkon mchog ni bag chags dang bcas pa'i nyon mongs pa thams cad spangs pas mya ngan las 'das pa'i grong khyer dang 'dra ba yin/ dge 'dun dkon mchog ni mchod par 'os pa dang bsod nams kyi zhing yin pas mthong ba dang thos pa dang rjes su dran na dga' bar byed pa'i phyir dga' bar 'gyur bas dga' bar byed pa yin no//phan 'dogs pa ni dper na yid bzhin gyi nor bu rin po che ni nad sel ba dang / dbul ba 'dor ba la sogs pa'i sgo nas gzhan la phan 'dogs pa yin no/ /de bzhin du dkon mchog gsum yang bsu ba dang / bskyal ba dang / yongs su shes par bya ba rnams kyis sems can rnams la phan 'dogs pa'i phyir te/ ji skad du/ khyod la bsu bas dpal du byed/ /bsnyen bkur byas na bde bar byed/ /kun du tshol bas blo gros byed/ /yongs su shes byed rnam par sbyor/ /zhes bya ba brjod pa lta bu'o/ / mi ma yin pa la sogs pa gnod pa byed pa'i gnyen por gyur pa ni yid bzhin gyi nor bu rin po che ni klu'i rgyal po la sogs pa su'i lus sam mgul lam gtsug gi nor bu la btags na/ de'i lus dang phyogs der nam mkha' lding la sogs pa mi ma yin pa gnod par byed pa gang gis kyang glags mi rnyed pas/mi ma yin pa la sogs pa gnod pa byed pa'i gnyen por gyur pa yin no/ /de bzhin du dkon mchog gsum yang rnam pa las rjes su dran par byas na de la mi ma yin pa la sogs pa thams cad zhi bar 'gyur te/ ji skad du mdo chen po rgyal mtshan mchog ces bya ba las/ tshong pa dag 'di lta ste/dper na sngon lha dang lha ma yin g.yul nye bar gyur pa na lha'i dbang po brgya byin gyis sum cu rtsa gsum pa'i lha rnams la smras pa/ grogs po dag gal te khyed cag lha dang lha ma yin gyi g.yul du zhugs pa na 'jigs pa'am/ bag tsha ba'am/ spu zing zhes byed pa skye bar 'gyur na/de'i tshe khyod kyis nga'i rgyal mtshan mchog rnam par rgyal byed yang dag par rjes su dran par gyis shig /gal te mi dran na yang lha'i bu dbang ldan gyi rgyal mtshan mchog yang dag par rjes su dran par gyis shig /gal te lha'i bu dbang ldan gyi mi dran na yang lha'i bu chu lha'i rgyal mtshan mchog rnam par rgyal byed yang dag par rjes su dran par gyis shig dang /de'i tshe 'jigs pa'am/ bag tsha ba'am/ spu zing zhes byed pa 'byung bar 'gyur ba gang yin pa de med par 'gyur ro zhes smras so/ /tshong pa dag de bzhin du gal te khyed cag kyang dgon par song na 'jigs pa'am / bag tsha ba'am/ spu zing zhes byed pa skye bar gyur na/ de'i tshe khyed kyis nga rnam pa las yang dag par rjes su dran par gyis shig /gal te nga mi dran na yang nga'i chos rnam pa yang dag par rjes su dran par gyis shig /gal te chos mi dran na yang nga'i dge 'dun rnam pa yang dag par rjes su dran par gyis shig dang /de'i tshe 'jigs pa'am/ bag tsha ba'am/ spu zing zhes byed pa 'byung bar 'gyur ba gang yin pa de med par 'gyur ro zhes gsungs pa lta bu'o/ /de ltar na dkon pa dang rin che ba dang dga' bar byed pa dang phan 'dogs pa dang / mi ma yin pa la sogs pa gnod pa byed pa'i gnyen por gyur pa'i phyir rin po che dang 'dra bas na dkon mchog ces bya'o//gsum zhes bya ba ni dkon mchog gsum po sangs rgyas dkon mchog dang / chos dkon mchog dang / dge 'dun dkon mchog go/ /de la sangs rgyas dkon mchog gang zhe na/ shes bya thams cad la chags pa med cing thogs pa med par mkhyen pa'i mthu brnyes pas gnas gyur pa ni sangs rgyas dkon mchog ste/de ni zag pa dang bcas pa'i chos thams cad kyi sa bon dang bral ba zag pa med pa'i chos thams cad kyi sa bon rgyas pa mthu stobs mtha' yas yongs su gzung ba'i phyir yid bzhin gyi nor bu rin po che ltar lhun gyis grub pas sems can ma lus pa'i don mdzad par spyod pa yin no//chos dkon mchog gang zhe na/ rnam pa gsum ste/ bstan pa'i chos gsung rab tu gtogs pa yan lag bcu gnyis dang / sgrub pa'i chos 'phags pa'i lam yan lag brgyad pa 'khor dang bcas pa dang /don dam pa'i chos mya ngan las 'das pa'o/ /dge 'dun dkon mchog gang zhe na/ 'phags pa'i gang zag brgyad dang / byang chub sems dpa' sa bcu la rim par gnas pa rnams so/ /de la sangs rgyas dang chos dang dge 'dun dkon mchog rnams kyi khyad par ni rnam pa drug gis rig par bya ste/mtshan nyid dang / phrin las dang / mos pa dang / sgrub pa dang / rjes su dran pa dang / bsod nams 'phel bas so/ /de la mtshan nyid las gyur pa'i khyad par ni sangs rgyas dkon mchog ni rang mngon par rdzogs par byang chub pa'i mtshan nyid do//chos dkon mchog ni mngon par rdzogs par byang chub pa'i 'bras bu'i mtshan nyid do/ /dge 'dun dkon mchog ni gzhan gyi man ngag gis yang dag par sgrub pa'i mtshan nyid do/ /phrin las gyur pa'i khyad par ni sangs rgyas dkon mchog ni lung legs par 'bogs pa'i phrin las can no//chos dkon mchog ni nyon mongs pa dang sdug bsngal spong ba la dmigs pa'i phrin las can no/ /dge 'dun dkon mchog ni spro ba mngon par 'phel bar byed pa'i phrin las can no/ /mos pa las gyur pa'i sangs rgyas dkon mchog ni bsnyen bkur la gus pas zhen par bya'o//chos dkon mchog ni mngon du bya ba la gus pas zhen par bya'o/ /dge 'dun dkon mchog la ni chos mthun pa'i dngos pos lhan cig 'grogs pa la gus pas zhen par bya'o/ /sgrub pa las gyur pa'i khyad par ni sangs rgyas dkon mchog la ni mchod pa dang rim gro nye bar bsdus pas bsgrub par bya'o//chos dkon mchog la ni rnal 'byor gyi sbyor ba goms par bya bas bsgrub par bya'o/ /dge 'dun dkon mchog la ni chos dang zang zing gi longs spyod thun mong gis bsgrub par bya'o/ /rjes su dran pa las gyur pa'i khyad par ni sangs rgyas dkon mchog ni 'di ltar bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa bde bar gshegs pa 'jig rten mkhyen pa skyes bu 'dul ba'i kha lo sgyur ba bla na med pa lha dang mi rnams kyi ston pa sangs rgyas bcom ldan 'das yin no zhes rnam pa gzhan dag gis rjes su dran par bya'o//chos dkon mchog ni legs par gsungs pa yang dag par mthong ba nad med pa dus chad pa med pa nye bar ston pa 'di mthong ba la don yod pa mkhas pa rnams kyis rang gis rig par bya ba yin no zhes rnam pa gzhan gyis rjes su dran par bya'o/ /dge 'dun dkon mchog ni legs par zhugs pa rig par zhugs pa drang por zhugs pa mthun par zhugs pa chos kyi rjes su mthun par spyod pa yin no zhes rnam pa gzhan dag gis rjes su dran par bya'o//bsod nams 'phel ba las gyur pa'i khyad par ni sangs rgyas dkon mchog la ni sems can gcig gi dbang du byas pa'i bsod nams mchog 'phel bar 'gyur ro//chos dkon mchog la ni chos kyi dbang du byas pa'i bsod nams mchog 'phel bar 'gyur ro / /dge 'dun dkon mchog la ni sems can mang po'i dbang du byas pa'i bsod nams mchog 'phel bar 'gyur ro/ / de ltar na ston pa'i dngos po dang bstan pa'i dngos po dang / 'khor gyi dngos pos ni dkon mchog gsum po sangs rgyas dang chos dang dge 'dun dkon mchog bstan pa yin no/ /de'i 'og tu dngos po nyi shu rtsa dgu gang zhe na zhes bya ba la sogs pa ni kun nas nyon mongs pa dang rnam par byang ba'i phyogs kyi dngos po bsdus pa ston to//de la re zhig kun nas nyon mongs pa'i phyogs las brtsams te zhes bya ba la sogs pa ni kun nas nyon mongs pa'i phyogs kyi dngos po bsdu ba ston to/ /de ni rnam pa gsum ste/ kun nas nyon mongs pa'i ngo bo nyid rnam par gzhag pa dang / de'i 'jug pa rnam par gzhag pa dang /de'i rgyu rnam par gzhag pa'o/ /de la kun nas nyon mongs pa'i ngo bo nyid rnam par gzhag pa ni 'du byed bsdu ba'i dngos po zhes bya bas bstan te/ nye bar len pa dang bcas pa'i phung po lnga po sdug bsngal gyi bden pas bsdus pa nyid gang yin pa'o/ /de'i 'jug pa'i rnam par gzhag pa ni de'i go rims rjes su 'jug pa'i dngos po zhes bya bas bstan te/phung po'i go rims rnam pa lnga sngar bstan pa de dag nyid kyis kun nas nyon mongs pa'i dngos po de 'khor bar 'jug pa gang yin pa'o/ /de'i rgyu rnam par gzhag pa ni gang zag la mngon par zhen pa dang /chos la mngon par zhen pa'i dbang gis rnam pa gnyis te/ de dag nyid la gang zag gi ming du byas nas phyi mar 'byung ba'i rgyu'i dngos po dang / chos kyi ming du byas nas phyi mar 'byung ba'i rgyu'i dngos po zhes bya ba gnyis kyis bstan to/ / bdag dang chos su nye bar 'dogs pa las kun nas nyon mongs par 'gyur zhing 'khor bar 'jug pa gang yin pa'o//de'i 'og tu rnam par byang ba'i phyogs las brtsams te zhes bya ba la sogs pas ni rnam par byang ba'i phyogs kyi dngos po bsdu ba ston to// // de ni rnam pa bzhi ste/ gnyen po bsgom pa rnam par gzhag pa dang /de'i 'bras bu rnam par gzhag pa dang / de la sbyor ba'i rgyu rnam par gzhag pa dang / de'i mi mthun pa'i phyogs rnam par gzhag pa'o/ /de la gnyen po bsgom pa rnam par gzhag pa ni kun nas nyon mongs pa'i phyogs kyi gnyen po byang chub kyi phyogs kyi chos rnams bsgom pa rnam par gzhag pa'o//de'i 'bras bu rnam par gzhag pa ni gnyen po bsgoms pa'i 'bras bu ye shes dang spangs pa rnam par gzhag pa'o/ /de la sbyor ba'i rgyu rnam par gzhag pa ni gnyen po bsgom pa de la sbyor ba'i rgyu legs par gsungs pa'i chos 'dul ba 'di la 'jig rten pa'i yang dag pa'i lta ba rnam par gzhag pa'o//de'i mi mthun pa'i phyogs rnam par gzhag pa ni de la sbyor ba'i rgyu de mi mthun pa'i phyogs ni mi bsgom pas yongs su nyams pa rnam par gzhag pa ste de dag kyang go rims bzhin du dkyus kyi tshig rnams kyis ston to//de la re zhig gnyen por bsgom pa rnam par gzhag pa ni kun nas nyon mongs pa'i phyogs kyi gnyen po byang chub kyi phyogs kyi chos rnams kyi bsgom pa rnam par gzhag pa'o zhes bya ba de la byang chub kyi phyogs kyi chos rnams gang zhe na/ dran pa nye bar gzhag pa bzhi dang / yang dag par spong ba bzhi dang /rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad pa'o/ /de dag ni byang chub kyi phyogs dang mthun pa zhes bya ste/ de la byang chub ces bya ba ni zad pa shes pa dang / mi skye ba shes pa'i gang zag gi bye brag gis nyan thos kyi byang chub dang /rang sangs rgyas kyi byang chub dang / bla na med pa yang dag par rdzogs pa'i byang chub ste/ zad pa dang mi skye ba shes pa de gnyis kyi go rims bzhin du ma rig pa ma lus par spangs pa'i phyir dang / rang gi don yang dag pa ji lta ba bzhin du byas pa nyid kyi phyir dang /spang byar med pa nyid rtogs pa'i byang chub ces bya'o / /de dang mthun pa'i phyir ming gi sgo nas byang chub kyi phyogs dang mthun pa'i chos rnams zhes bya ste/ de dang mthun pa yang de thob pa'i lam yin pa'i phyir te/ de dag ni dngos po la yongs su rtogs pa'i lam dang rtsol ba las byung ba'i lam dang /ting nge 'dzin yongs su sbyong bar byed pa'i lam dang / mngon par rtogs par bya ba la sbyor ba'i lam dang / mngon par rtogs pa dang / 'dres pa'i lam dang / mngon par rtogs pa'i lam dang / rnam par dag par nges par 'byin pa'i lam yin te go rims bzhin no//de la dang po dran pa nye bar gzhag pa dag la ni dmigs pa la sems nye bar gtod par rig par bya'o/ /de'i 'og tu dmigs pa de nyid la sems gnas par bya ba'i phyir yang dag par spong ba rnams kyis rtsom par rig par bya'o/ /de'i 'og tu ting nge 'dzin thob pa'i ting nge 'dzin yongs su rdzogs par bya ba'i phyir rdzu 'phrul gyi rkang pa la sbyor bar rig par bya'o//de'i 'og tu ting nge 'dzin yongs su rdzogs pa'i mtshan ma dang / gnas ngan len thams cad dang bral ba'i phyir dbang po rnams dang / stobs rnams kyi sbyor ba'i lam yang dag par rtsom par rig par bya'o// de la dbang po rnams kyis ni sbyor ba chung ngu yang dag par rtsom par byed do/ /stobs rnams kyis chen po'o/ /de'i 'og tu sbyor ba yang dag par brtsams pa'i byang chub kyi yan lag rnams kyis yang dag pa'i mtha' rtogs par rig par bya'o/ /de'i 'og tu yang dag pa'i mtha' rtogs pa ni 'di lta ste/sgrib pa thams cad las rnam par thar par bya ba'i phyir lam gyi yan lag rnams kyis bla na med pa yang dag par rdzogs pa'i byang chub kyi bar du rjes su thob par rig par bya'o/ /de la dran pa nye bar gzhag pa bzhi ni dmigs pa la nye bar gtod pa'i dngos po zhes bya bas bstan to//de ni dngos po la yongs su rtogs pa'i lam bstan to/ /de la dran pa nye bar gzhag pa bzhi gang zhe na/ lus dran pa nye bar gzhag pa dang / tshor ba dran pa nye bar gzhag pa dang / sems dran pa nye bar gzhag pa dang / chos dran pa nye bar gzhag pa'o/ / de la ci'i phyir dang po kho nar dran pa nye bar gzhag pa bzhi rnam par gzhag pa yongs su bstan zhe na/rnal 'byor pas rigs yang dag par bsgrubs te sems bskyed pa'i gong du tshogs kyi lam bsgrubs nas thar pa'i cha dang mthun pa'i dge ba'i rtsa ba skyed par byed pa na/ dang po kho nar phyin ci log bzhi spangs pa dang /bden pa bzhi la 'jug pa dang / lus la sogs pa dang bral bar bya ba'i phyir dran pa nye bar gzhag pa bzhi rnam par gzhag pa yongs su bstan to/ /de la ji ltar phyin ci log bzhi spong bar 'gyur zhe na/ bcom ldan 'das kyis dran pa nye bar gzhag pa bzhis ni phyin ci log bzhi'i gnyen por rnam par gzhag pa yin no//de la lus dran pa nye bar gzhag pa ni mi gtsang ba la gtsang bar phyin ci log pa'i gnyen por rnam par gzhag pa yin te/ 'di ltar lus dran pa nye bar gzhag pa bsgoms pa las mi sdug pa dang ldan pa'i dur khrod rnam pa bzhi po kha dog dang dbyibs dang reg pa dang nye bar spyad pa mi sdug pa bstan pas des de dag lan mang du yid la byed pa na/mi gtsang ba la gtsang bar phyin ci log pa gang yin pa de spong ba'i phyir ro/ /tshor ba dran pa nye bar gzhag pa ni sdug bsngal la bde bar phyin ci log pa'i gnyen por rnam par gzhag pa yin te/'di ltar tshor ba dag la tshor ba'i rjes su lta zhing gnas pa gang cung zad ci tshor yang rung ste de dag de la sdug bsngal lo zhes yang dag pa ji lta ba bzhin du rab tu shes pas na/ de'i phyir/ de'i sdug bsngal la bde bar phyin ci log pa gang yin pa de spong bar 'gyur ba yin pa'i phyir ro//sems dran pa nye bar gzhag pa ni mi rtag pa la rtag par phyin ci log pa'i gnyen por rnam par gzhag pa yin te/ 'di ltar de'i sems 'dod chags dang bcas pa la sogs pa'i rab tu dbye bas nyin mo dang mtshan mo dang skad cig dang thang cig dang yud tsam de dang de dag 'das par 'gyur ba'i phyir/sems rnam pa du mas rnam pa sna tshogs mang po mthong nas dmigs pa las rtag par phyin ci log pa gang yin pa de spong bar 'gyur ba'i phyir/ chos dran pa nye bar gzhag pa ni bdag med pa la bdag tu phyin ci log pa'i gnyen por rnam par gzhag pa yin te/'di ltar de la bdag tu lta ba la sogs pa'i nyon mongs pa gang yin pa rnams ni yod pa la bdag med par lta ba la sogs pa'i dge ba'i chos de dag ni med pa'i phyir phung po rnams la bdag tu lta bar 'gyur bas des de dag rang dang spyi'i mtshan nyid kyi sgo nas chos la chos kyi rjes su lta zhing yang dag pa ji lta ba bzhin du mthong na bdag med pa la bdag tu phyin ci log pa gang yin pa de spong bar 'gyur ba'i phyir ro//de la ji ltar na bden pa bzhi la 'jug par 'gyur zhe na/ lus kyi gnas ngan len dang bcas pa'i phung po'i 'du byed kyi mtshan nyid yin pas de la yongs su brtags pas sdug bsngal gyi bden pa la 'jug go//tshor ba ni sred pa'i rgyu yin pas de la yongs su brtags pas kun 'byung ba'i bden pa la 'jug go/ /sems ni mngon par zhen pa'i gzhi yin pas de la yongs su brtags na bdag chad par dogs pa'i 'jigs pa med pa'i 'gog pa'i bden pa la 'jug go//chos ni kun nas nyon mongs pa dang rnam par byang ba'i ngo bo nyid yin pas de la yongs su brtags pas lam rmongs par byed pa'i phyir lam gyi bden pa la 'jug pa'o/ /de la ji ltar na lus la sogs pa dang bral bar 'gyur zhe na/ dran pa nye bar gzhag pa bzhi'i dmigs pa dang /yid la byed pa thob pa ste gnyen po bsgom pa'i dus na nyan thos dang rang sangs rgyas rnams ni lus dang tshor ba dang sems dang chos rnams dang bral bar 'gyur la/ byang chub sems dpa' rnams ni bral bar yang mi 'gyur bar mi gnas pa'i mya ngan las 'da' bar 'gyur ba'i phyir ro/ / yang rnam grangs gzhan yang 'jig rten pa ni phal cher 'di ltar zhugs pa yin te/ phung po rnams la phung po tsam dang chos tsam du yang dag pa ji lta ba bzhin du rab tu mi shes pas 'di ltar bdag ni lus la brten pa yin te/ de la brten nas tshor ba bde ba dang sdug bsngal ba myong bar 'gyur ba de myong ba na chos dang chos ma yin pa dag gis kun nas nyon mongs pa dang rnam par byang bar 'gyur ro zhes de ltar zhugs pa yin pas de la bdag nyid kyi lus kyi dngos po la kun du rmongs pa bsal bar bya ba'i phyir ni lus dran pa nye bar gzhag pa rnam par gzhag go//bdag de nyid kyi myong ba'i dngos po kun du rmongs pa bsal bar bya ba'i phyir ni tshor ba dran pa nye bar gzhag pa rnam par gzhag go//de dag sems dang yid dang rnam par shes pa gang kho na la bdag tu 'dzin pas kun du rmongs par 'gyur ba'i bdag gi gzhi la kun du rmongs pa bsal bar bya ba'i phyir ni sems dran pa nye bar gzhag pa rnam par gzhag go//sems de kho na'i kun nas nyon mongs pa dang / rnam par byang ba'i dngos po la kun du rmongs pa bsal bar bya ba'i phyir ni chos dran pa nye bar gzhag pa rnam par gzhag pa yin no/ /rnam grangs gzhan yang gang la las byed pa dang /gang gi don du byed pa dang / gang zhig las byed pa dang / gang gis byed pa de dag thams cad gcig tu bsdus nas dran pa nye bar gzhag pa bzhi rnam par gzhag pa yin te/ de gang la las byed ce na/ lus kyis byed do/ / gang gi don byed ce na/ tshor ba'i don du byed do/ /gang zhig las byed ce na sems kyis byed do/ /gang gis byed ce na/ dge ba dang mi dge ba'i chos rnams kyis byed do/ /rnam grangs gzhan yang gang la kun nas nyon mongs pa dang rnam par byang bar 'gyur ba dang / gang las dang / gang zhig dang / gang gis kun nas nyon mongs pa dang rnam par byang bar 'gyur ba de dag thams cad gcig tu bsdus nas dran pa nye bar gzhag pa bzhi rnam par gzhag pa yin te/ de la gang la zhe na/ lus la kun nas nyon mongs pa dang rnam par byang bar 'gyur ro/ /gang las she na/ tshor ba dag las so//gang zhig ce na/ sems so/ /gang gis she na/ chos kyi kun nas nyon mongs pa dang rnam par byang bar 'gyur ro/ /de la dran pa nye bar gzhag pa bzhi ni dmigs pa dang / ngo bo nyid dang / grogs dang / bsgom pa dang / bsgoms pa'i 'bras bus rig par bya ste/de la dmigs pa gang zhe na/ lus dang / tshor ba dang sems dang chos te/ de yang bdag gi gnas kyi dngos po dang bdag gi longs spyod kyi dngos po dang bdag gi dngos po dang / bdag kun nas nyon mongs pa dang rnam par byang ba'i dngos po yin no/ /ngo bo nyid gang zhe na/ shes rab dang / dran pa'o/ /grogs gang zhe na/ /de dag dang mtshungs par ldan pa sems dang sems las byung ba'i chos rnams so/ /bsgom pa gang zhe na/ nang gi lus la sogs pa la lus la sogs pa'i rjes su lta zhing dran pa nye bar 'jog pa'o/ /bsgoms pa'i 'bras bu gang zhe na/phyin ci log bzhi spong ba dang / bden pa bzhi la 'jug pa dang / lus la sogs pa dang bral ba'o/ /de dag kyang mdo sde las de nang dang phyi rol gyi lus dang tshor ba dang sems dang chos la chos kyi rjes su lta zhing dran pa nye bar gzhag ste/ gnas pa yin zhes gsungs pas bstan te/de lus dang / tshor ba dang / sems dang / chos la zhes gsungs pas ni dmigs pa bstan to/ /rjes su lta dang dran pas zhes gsungs pas ni ngo bo nyid bstan to/ /de nyid kyis gnas skabs kyi grogs bstan to/ /dran pa nye bar gzhag ste zhes gsungs pas ni bsgom pa bstan to//gnas pa yin zhes gsungs pas ni bsgoms pa'i 'bras bu bstan to/ /de la lus dang tshor ba dang sems dang chos ni gang / de la rjes su lta ba ni gang / dran pa ni gang / dran pa nye bar gzhag pa ni gang / gnas pa ni gang zhe na/lus ni rnam pa sum cu rtsa lnga yod do/ /nang gi dang / phyi rol dang / dbang pos zin pa dang / dbang pos zin pa ma yin pa dang / sems can du bgrang ba dang / sems can du bgrang ba ma yin pa dang / gnas ngan len dang ldan pa dang / shin tu sbyangs pa dang ldan pa dang /'byung ba'i lus dang / 'byung ba las gyur pa'i lus dang / ming gi lus dang / gzugs kyi lus dang / sems can dmyal ba dang / dud 'gro'i skye gnas pa dang / yi dgas kyi yul pa dang / mi'i dang / lha'i dang / rnam par shes pa dang bcas pa dang / rnam par shes pa med pa dang /nang gi lus dang / phyi'i lus dang / yongs su gyur pa dang / yongs su ma gyur pa dang / bud med kyi lus dang / skyes pa'i lus dang / ma ning gi lus dang / mdza' bshes kyi lus dang / dgra bo'i lus dang / tha mal pa'i lus dang / lus ngan pa dang /lus 'bring dang / lus bzang po dang / gzhon nu'i lus dang / lang tsho'i lus dang / rgan po'i lus te/ de ni re zhig lus kyi rab tu dbye ba yin no/ /de la tshor ba gang zhe na/ 'di lta ste/ bde ba dang / sdug bsngal ba dang / sdug bsngal yang ma yin bde ba yang ma yin par tshor ba ste/de dag kyang lus kyi dang / sems kyi'o/ /zang zing dang bcas pa dang / /zang zing med pa dang / zhen pa la brten pa dang / nges par 'byung ba la brten pa ste/ de dag ni tshor ba nyi shu rtsa gcig rnam pa dgur 'gyur ro/ /de la sems gang zhe na/ 'di lta ste/sems 'dod chags dang bcas pa dang / 'dod chags dang bral ba dang / zhe sdang dang bcas pa dang / zhe sdang dang bral ba dang / gti mug dang bcas pa dang / gti mug dang bral ba dang / kun du bsdus pa dang / rnam par g.yeng ba dang / zhum pa dang / rab tu gzung ba dang /rgod pa dang / rgod pa ma yin pa dang / nye bar zhi ba dang / nye bar zhi ba ma yin pa dang / mnyam par bzhag pa dang / mnyam par bzhag pa ma yin pa dang / legs par bsgoms pa dang / legs par bsgoms pa ma yin pa dang / sems shin tu rnam par grol ba dang / sems shin tu rnam par grol ba ma yin pa ste/de dag ni sems rnam pa nyi shu yin no/ /de la chos rnams gang zhe na/ 'di lta ste/ 'dod chags dang / 'dod chags 'dul ba dang / zhe sdang dang / zhe sdang 'dul ba dang / gti mug dang / gti mug 'dul ba dang / kun du bsdus pa dang / rnam par g.yeng ba dang / zhum pa dang / rab tu 'dzin pa dang / rgod pa dang / rgod pa ma yin pa dang / nye bar zhi ba dang / nye bar zhi ba ma yin pa dang / legs par mnyam par bzhag pa dang / legs par mnyam par bzhag pa ma yin pa dang / lam legs par bsgoms pa dang / lam legs par bsgoms pa ma yin pa dang / shin tu rnam par grol ba dang / shin tu rnam par ma grol ba ste/ de dag ni nag po dang dkar po'i phyogs rnam par gzhag pa kun nas nyon mongs pa dang / rnam par byang ba'i phyogs kyi chos nyi shu yin par rig par bya ste/ de dag ni dmigs pa ma yin no//de dag la rjes su lta ba gang zhe na/ shes rab rnam pa gsum ste/ lus dang / tshor ba dang / sems chos kyi dbang du byas nas/ thos pa las byung ba dang / bsam pa las byung ba dang / bsgom pa las byung ba'i shes rab gang yin pa ste/ shes rab des lus dang / tshor ba dang / sems dang /chos thams cad la rnam pa thams cad du yang dag pa kho nar nye bar rtogs par byed cing kun du rtogs par byed rjes su 'jug par byed rjes su rtogs par byed rnam par rtog pa'i gzugs brnyan gyi lus la sogs pa dang rang bzhin gyi gzugs kyi lus la sogs pa la mnyam pa nyid du lta ba gang yin pa'o//de la dran pa gang zhe na/ ting nge 'dzin yang dag par sdud par byed pa'i dran pa ste/ des lus dang / tshor ba dang / sems dang / chos kyi dbang du byas nas/ chos gang dag gzung ba'i chos de dag kho na'i don bsam pa gang yin pa dang / gang dag bsgoms pas mngon sum du byas pa'i tshig 'bru dang don dang mngon sum du byas pa de sems kyis mi brjed pa gang yin pa ste/de ltar rjes su lta ba'i shes rab dang ting nge 'dzin yang dag par sdud pa'i dran pa de ni ngo bo nyid yin no/ /de ltar ngo bo nyid bstan pa'i gnas skabs de nyid kyis de dag dang mtshungs par ldan pa'i sems dang sems las byung ba'i grogs rnams kyang bstan pa yin te/de dag ni mtshungs par ldan pa las dran pa nye bar gzhag pa yin no/ /de la dran pa nye bar gzhag pa gang zhe na/ bdag gi nang gi lus la sogs pa'i chos de dag legs par bzung ngam/'on te ma bzung shes rab kyis de dang de dag la legs par brtags sam/ 'on te ma brtags/ rnam par grol bas de dang de dag la legs par reg par byas sam/ 'on te ma byas zhes dran pa nye bar gzhag pa yin no/ /gzhan yang dran pa kun bsrung ba dang yul gyi kun nas nyon mongs pa med pa dang /dmigs pa nye bar gtod pa'i rgyu gsum po de dag gis dran pa legs par nye bar gzhag pa gang yin pa de ni dran pa nye bar gzhag pa zhes bya ste/ de yang las dang po pa sbyor ba'i gnas skabs na ni las la mi sdug pa'i rnam par rjes su lta/ tshor ba la sdug bsngal ba'i rnam par rjes su lta/sems la mi rtag pa'i rnam par rjes su lta/ chos la bdag med pa'i rnam par rjes su lta zhing gnas so/ /de'i 'og tu yid la byed pa thob pa'i gnas skabs na ni lus dang tshor ba dang sems dang chos la de bzhin nyid kyi lus dang tshor ba dang sems dang chos kyi rjes su lta zhing gnas so//de la ji ltar nang gi lus la lus kyi rjes su lta zhing gnas pa yin/ ji ltar na phyi rol gyi lus la lus kyi rjes su lta zhing gnas pa yin/ ji ltar na nang dang phyi rol gyi lus la lus kyi rjes su lta zhing gnas pa yin/ ji ltar na nang gi tshor ba dang sems dang chos la chos kyi rjes su lta zhing gnas pa yin/ji ltar na phyi rol gyi tshor ba dang sems dang chos la chos kyi rjes su lta zhing gnas pa yin/ ji ltar na nang dang phyi rol gyi tshor ba dang sems dang chos la chos kyi rjes su lta zhing gnas pa yin zhe na/ gang gi tshe sems can bgrang ba nang gi so sor rang gi lus la lus kyi rjes su lta zhing gnas pa de ni nang gi lus la lus kyi rjes su lta zhing gnas pa yin no//gang gi tshe sems can du bgrang ba ma yin pa'i phyi rol gyi gzugs la dmigs par byed pa ni phyi rol gyi lus la lus kyi rjes su lta zhing gnas pa yin no//gang gi tshe sems can du bgrang ba'i phyi rol gzhan gyi gzugs la dmigs par byed pa de ni nang dang phyi rol gyi lus la lus kyi rjes su lta zhing gnas pa yin no/ /de la sems can du bgrang ba nang gi so sor rang rang gi gzugs la brten te skyes pa'i tshor ba dang / sems dang chos gang dag la dmigs par byed pa de dag ni nang gi tshor ba dang sems dang chos rnams la chos kyi rjes su lta zhing gnas pa yin no//sems can du bgrang ba ma yin pa'i phyi rol gyi gzugs la brten te skyes pa'i tshor ba dang sems dang chos gang dag yin pa de dag la dmigs par byed pa de dag ni phyi rol gyi tshor ba dang sems dang chos rnams la chos kyi rjes su lta zhing gnas pa yin no//sems can du bgrang ba phyi rol gzhan gyi gzugs la brten te skyes pa'i tshor ba dang sems dang chos gang dag yin pa de dag la dmigs par byed pa de ni nang dang phyi rol gyi tshor ba dang sems dang chos rnams la chos kyi rjes su lta zhing gnas pa yin no//rnam grangs gzhan yang dbang pos zin pa'i gzugs la dmigs par byed pa ni nang gi lus la lus kyi rjes su lta zhing gnas pa yin no/ /dbang pos ma zin pa zin pa ma yin zhing ma zin pa'i gzugs la dmigs par byed pa ni phyi rol gyi lus la lus kyi rjes su lta zhing gnas pa yin no//dbang pos ma zin pa kho na yin la/ zin cing zin par 'gyur ba'i nang gi gzugs la dmigs par byed pa ni nang dang phyi rol gyi lus la lus kyi rjes su lta zhing gnas pa yin no/ /de bzhin du gzugs gsum po de dag la brten te/ skyes pa'i tshor ba dang sems dang chos gang dag yin pa de dag la ci rigs par dmigs par byed pa ni de ltar rjes su lta zhing gnas pa yin no zhes snga ma bzhin du rig par bya ba yin no//rnam grangs gzhan yang mnyam par gzhag pa'i sa'i gzugs shin tu sbyangs pa dang ldan pa la dmigs par byed pa gang yin pa de ni nang gi lus la lus kyi rjes su lta zhing gnas pa yin no//nang gi rang kho na'i gzugs mnyam par gzhag pa'i sa pa ma yin pa gnas ngan len dang ldan pa la dmigs par byed pa gang yin pa de ni phyi rol gyi lus la lus kyi rjes su lta zhing gnas pa yin no/ / gzhan gyi gzugs shin tu sbyangs pa dang ldan pa dang gnas ngan len dang ldan pa la dmigs par byed pa gang yin pa de ni nang dang phyi rol gyi lus la lus kyi rjes su lta zhing gnas pa yin no/ /de bzhin du de dag la brten te skyes pa'i tshor ba dang sems dang chos gang dag yin pa de dag la yang ci rigs par sbyar ro //rnam grangs gzhan yang gang gi tshe nang gi rnam par shes pa dang bcas pa'i lus la dmigs par byed pa ni nang gi lus la lus kyi rjes su lta zhing gnas pa yin no/ /sems can du bgrang ba'i gzugs rnam par shes pa med pa rnam par bsngos pa la sogs pa'i gnas skabs su gyur pa la dmigs par byed pa de ni phyi rol gyi lus la lus kyi rjes su lta zhing gnas pa yin no//rnam par shes pa med pa'i gzugs 'das pa'i dus na rnam par shes pa dang bcas pa dang / rnam par shes pa dang bcas pa'i gzugs ma 'ongs pa'i dus na/ rnam par shes pa med par gyur na chos mtshungs pa nyid dang chos mnyam pa nyid dang dmigs pa de ni nang dang phyi rol gyi lus la lus kyi rjes su lta zhing gnas pa yin no//de bzhin du de dag la brten te skyes pa'i tshor ba dang sems dang chos gang dag yin pa de dag la yang ci rigs par sbyar ro/ /rnam grangs gzhan yang bdag nyid kyi skra dang spu dang sen mo la sogs pa'i rnam pa dag gis dmigs par byed pa ni nang gi lus la lus kyi rjes su lta zhing gnas pa yin no//gzhan dag gi nang gi lus la skra dang spu dang sen mo la sogs pa'i rnam pa dag gis dmigs par byed pa ni phyi rol gyi lus la lus kyi rjes su lta zhing gnas pa yin no//bdag nyid kyi phyi rol gyi lus rnam par bsngos pa la sogs pa'i rnam pa dag gis nyams pa dang gzhan dag gi phyi rol gyi lus rnam par bsngos pa la sogs pa'i rnam pa dag gis nyams yang rung ma nyams yang rung ba la chos nyid mtshungs par dmigs par byed pa'i nang dang phyi rol gyi lus la lus kyi rjes su lta zhing gnas pa yin no//de dag la brten te skyes pa'i tshor ba dang chos gang dag yin pa de dag la yang de bzhin du ci rigs par sbyar ro / /de la dran pa nye bar gzhag pa zhes bya ba'i don gang zhe na/ gang la dran pa nye bar 'jog par byed pa dang /gang gis dran pa nye bar 'jog par byed pa de ni dran pa nye bar gzhag pa zhes bya'o/ /de la gang la dran pa nye bar 'jog par byed ce na/ dmigs pa la'o/ /gang gis dran pa nye bar 'jog par byed ce na/ rjes su lta ba'i shes rab dang ting nge 'dzin yang dag par sdud par byed pa'i dran pas so//gzhan yang lus dang tshor ba dang sems dang chos rnams kyi dbang gis dge ba zag pa dang bcas pa dang zag pa med pa'i lam yang dag par skyes pa gang yin pa de ni dran pa nye bar gzhag pa yin te/ de yang thos pa las byung ba dang bsam pa las byung ba dang bsgom pa las byung ba ste/de la thos pa dang bsam pa las byung ba ni zag pa dang bcas pa kho na yin no/ /bsgom pa las byung ba ni zag pa dang bcas pa yang yod/ zag pa med pa yang yod de de ni bsgom pa yin no/ /de la gnas pa gang zhe na/ yid la byed pa thob pa'i gnas skabs na phyin ci log bzhi spangs pa dang bden pa bzhi la zhugs pa dang lus la sogs pa dang bral bar gnas pa gang yin pa ste de ni bsgoms pa'i 'bras bu yin no//de ltar dran pa nye bar gzhag pa bzhi po de dag ni dngos po la yongs su rtogs pa'i lam yin pas na de'i phyir dmigs pa la nye bar gtod pa'i dngos po zhes bya ste/de tsam gyis na dmigs pa la sems nye bar gtad pa dang phyin ci log rags pa dag bsal ba dang / bden pa bzhi la zhugs pa dang mi mthun pa'i phyogs dang gnyen po rnam pa thams cad du shes pa yin no/ /yang dag par spong ba bzhi ni de nyid la sogs pa'i dngos po zhes bya bas bstan te/des ni rtsol ba las byung ba'i lam bstan to/ /de la yang dag pa'i spong ba bzhi gang zhe na/ sdig pa mi dge ba'i chos ma skyes pa rnams mi skyed pa dang / sdig pa mi dge ba'i chos skyes pa rnams spang ba'i phyir/ / 'dun pa skyed par byed/ 'bad par byed/ brtson 'grus rtsom par byed cing sems rab tu 'dzin par byed/ rab tu 'jog par byed pa dang / dge ba'i chos ma skyes pa rnams bskyed pa dang / dge ba'i chos skyes pa rnams gnas pa dang / mi brjed pa dang bsgom pa yongs su rdzogs par bya ba'i phyir 'dun pa skyed par byed 'bad par byed brtson 'grus rtsom par byed cing sems rab tu 'dzin par byed rab tu 'jog par byed pa'o//de la rim pa ji lta bu zhe na/ de de ltar dran pa nye bar gzhag pa bzhi po dag la yongs su sbyang ba byas shing phyin ci log rags pa dag bsal te mi mthun pa dang gnyen po'i chos rnams yongs su shes pa na dmigs pa de nyid la sems gnas par bya ba dang /mi mthun pa'i phyogs bsal zhing gnyen po bskyed pa'i phyir yang dag par spong ba bzhis rtsol bar rig par bya'o/ /de la yang dag pa'i rtsol ba bzhi yang dmigs pa dang /ngo bo nyid dang / grogs dang / bsgom pa dang / bsgoms pa'i 'bras bus rig par bya ste/ de la dmigs pa gang zhe na/ mi mthun pa'i phyogs dang / gnyen po skyes pa dang ma skyes pa'o/ /ngo bo nyid gang zhe na/ brtson 'grus so/ /grogs gang zhe na/ de dang mtshungs par ldan pa sems dang sems las byung ba'i chos rnams so//bsgom pa gang zhe na/ 'dun pa skyed par byed / 'bad par byed / brtson 'grus rtsom par byed cing sems rab tu 'dzin par byed rab tu 'jog par byed pa'o/ /bsgoms pa'i 'bras bu gang zhe na/mi mthun pa'i phyogs ma lus par 'gags pa dang / gnyen po thob pa dang / de la sdig pa mi dge ba'i chos rnams ni gang / de dag ma skyes pa ni gang / skyes pa ni gang zhe na/ sdig pa mi dge ba'i chos rnams zhes bya ba ni 'dod pa na spyod pa'i lus dang ngag dang yid kyi las nyon mongs pa can rnams te/lus dang / ngag dang yid kyis nyes par spyad pa gang dag yin pa dang / de dag kun nas slong bar byed pa'i nyon mongs pa gang dag yin pa rnams so/ /de dag ma skyes pa gang zhe na/ gang dag phrad par ma gyur cing mngon du ma gyur pa dag go//skyes pa rnams gang zhe na/ gang phrad par gyur cing mngon du phrad pa dag go/ /yang de bzhin nyid kyi dmigs pa la nye bar gtad pa'i sems la mtshan ma dang gnas ngan len gyi snang bar gyur pa thams cad dang nang du yang dag par ma skyes pa rnams ni sdig pa mi dge ba'i chos ma skyes pa rnams zhes bya'o//de las bzlog pa ni sdig pa mi dge ba'i chos skyes pa rnams zhes bya'o/ /de la sdig pa mi dge ba'i chos ma skyes pa rnams mi skyed pa'i phyir 'dun pa skyed par byed pa ni gang / skyes pa rnams spang ba'i phyir 'dun pa skyed par byed pa ni gang zhe na/ gang gi tshe sdig pa mi dge ba'i chos ma skyes pa rnams dang po nas mi skyed pa'i phyir spro ba skyes par byed smon lam 'debs par byed cing dang du len par mi 'dod pa gang yin pa de ni ma skyes pa rnams mi skyed pa'i phyir 'dun pa yin no/ /skyes pa rnams dang du mi len cing spong bar byed pa gang yin pa de ni skyes pa rnams spang ba'i phyir 'dun pa yin no//de las ma skyes pa rnams mi skyed pa dang skyes pa rnams spang ba'i 'bad pa byed pa ni gang / brtson 'grus rtsom par byed pa ni gang zhe na/ sdig pa mi dge ba'i chos de dag kyang 'das pa dang ma 'ongs pa dang da ltar byung ba'i dngos po la dmigs te skye la/gang dag 'das pa dang ma 'ongs pa'i dngos pos dmigs te skyes pa de dag ni lkog tu gyur pa'i yul la dmigs pa yin/ gang dag da ltar byung ba'i yul la dmigs pa yin te/ skye ba de dag ni mngon sum gyi yul la dmigs pa yin te/de la lkog tu gyur pa'i yul la dmigs pa'i sdig pa mi dge ba'i chos ma skyes pa rnams mi skyed pa dang / skyes pa rnams spang ba'i phyir ni 'bad par byed pa yin no/ /mngon sum gyi yul la dmigs pa'i sdig pa mi dge ba'i chos ma skyes pa rnams mi skyed pa dang skyes pa rnams spang ba'i phyir ni brtson 'grus rtsom par byed pa yin no//gzhan yang kun nas dkris pa chung ngu dang 'bring po ma skyes pa rnams mi skyed pa dang / skyes pa rnams spang ba'i phyir ni 'bad par byed pa yin no/ /kun nas dkris pa chen po ma skyes pa rnams mi skyed pa dang skyes pa rnams spang ba'i phyir ni brtson 'grus rtsom par byed pa yin no//gzhan yang sdig pa mi dge ba'i chos gang dag kun du rtog pa'i dbang po kho nas skye la yul stobs kyis ma yin pa 'di lta ste/ gnas pa na gang dag 'das pa dang ma 'ongs pa'i dmigs pa la skye ba de dag ma skyes pa mi skyed pa dang /skyes pa rnams spang ba'i phyir ni 'bad par byed pa yin no/ /sdig pa mi dge ba'i chos gang dag kun du rtog pa'i dbang dang yul gyi stobs kyis kyang skyes pa 'di lta ste/ rgyu ba na gang dag da ltar byung ba'i dmigs pa las skye ba de dag ma skyes pa rnams mi skyed pa dang /skyes pa rnams spang ba'i phyir ni brtson 'grus rtsom par byed pa yin no/ /de la sdig pa mi dge ba'i chos ma skyes pa rnams mi skyed pa dang / skyes pa rnams spang ba'i phyir ni 'dun pa skyed par byed 'bad par byed brtson 'grus rtsom par byed pa na/ sems rab tu 'dzin par byed pa ni gang /rab tu 'jog par byed pa ni gang zhe na/ gang gi tshe sdig pa mi dge ba'i chos ma skyes pa rnams mi skyed pa dang / skyes pa rnams spang ba'i phyir 'dun pa skyed par byed 'bad par byed brtson 'grus rtsom par byed cing sems de nyid zhi gnas bsgom pa dang rtse gcig tu byed pa'i tshe nang du mngon du bsdu na zhum pa'am zhum du dogs na mthong ba de'i tshe na/rab tu 'dzin pa'i mtshan ma dang bar 'gyur ba gang yang rung bas rab tu 'dzin par byed cing rab tu dga' bar byed pa de ni sems rab tu 'dzin par byed pa yin no/ /de ltar rab tu 'dzin par byed pa'i dus na sems rgod dam rgod du dogs par mthong ba de'i tshe na sems nang du mngon par sdud par byed cing zhi gnas la rab tu 'jog par byed pa de ni rab tu 'jog par byed pa yin no//de la dge ba'i chos rnams ni gang / de dag ma skyes pa ni gang skyes pa ni gang zhe na/dge ba'i chos rnams zhes bya ba ni/ gang dag sdig pa mi dge ba'i chos de dag gi gnyen por gyur pa'i chos rnams te/ nyes par spyad pa'i gnyen por gyur pa dang / sgrib pa'i gnyen por gyur pa dang / kun du sbyor ba'i gnyen por gyur pa rnams so/ / de dag ma skyes pa gang zhe na/ gang dag phrad par ma gyur cing mngon sum du ma gyur pa dag go/ /skyes pa rnams gang zhe na/ gang dag phrad par gyur cing mngon sum du gyur pa dag go/ /yang de bzhin nyid kyi dmigs pa la nye bar gtad pa'i sems la mtshan ma med pa dang shin tu sbyangs pa mi snang bar gyur pa thams cad dang nang du yang dag par ma skyes pa rnams ni dge ba'i chos ma skyes pa rnams zhes bya'o//de las bzlog pa ni dge ba'i chos skyes pa rnams zhes bya'o/ /de la dge ba'i chos ma skyes pa rnams bskyed pa'i phyir 'dun pa skyed par byed pa ni gang /skyes pa rnams gnas pa dang mi brjed pa dang bsgom pa yongs su rdzogs par bya ba'i phyir 'dun pa skyed pa byed pa ni gang zhe na/ dge ba'i chos gang dag phrad par ma gyur cing mngon sum du ma gyur pa de dag thob par bya ba dang / mngon sum du bya ba'i phyir spro ba skyed par byed sems kyis smon par byed cing de shas cher thob par 'dod pa dang /mngon sum du bya bar 'dod pa la nye bar gnas pa de ni dge ba'i chos ma skyes pa rnams bskyed pa'i phyir 'dun pa skyed par byed pa yin no/ /dge ba'i chos skyes pa rnams gnas pa dang / mi brjed pa dang / bsgom pa yongs su rdzogs par byed pa'i phyir 'dun pa skyed par byed ces bya ba la/dge ba'i chos thob pa dang mi 'bral zhing thob pa yongs su mi nyams par bya ba'i dbang du mdzad nas gnas par bya ba'i phyir zhes bya ba gsungs so/ /mngon sum du gyur pa nyid gsal bar bya ba'i dbang du mdzad nas/mi brjed par bya ba'i phyir zhes bya ba gsungs so/ /dge ba'i chos thob pa dang mngon sum du gyur pa de dag nyid kun du brten pa'i rgyus yongs su grub pa dang / mthar phyin par bya ba'i dbang du mdzad nas/ bsgom pa yongs su rdzogs par bya ba'i phyir zhes bya ba gsungs te/ de la yang spro ba skyed par byed sems kyis smon par byed cing de shas cher gnas par 'dod pa dang /mi brjed par 'dod pa dang / /bsgom pa yongs su rdzogs par 'dod pa la nye bar gnas pa de ni dge ba'i chos skyes pa rnams gnas pa dang / mi brjed pa dang bsgom pa yongs su rdzogs par bya ba'i phyir 'dun pa skyed par byed pa yin no//de la dge ba'i chos ma skyes pa rnams bskyed pa dang / skyes pa rnams gnas pa dang / mi brjed pa dang / /bsgom pa yongs su rdzogs par bya ba'i phyir 'bad par byed pa ni gang / brtson 'grus rtsom par byed pa ni gang zhe na/ dge ba'i chos thob pa rnams mngon du bsgom pa'i phyir ni 'bad par byed pa yin no//dge ba'i chos ma thob pa rnams thob par bya ba'i phyir ni brtson 'grus rtsom par byed pa yin no/ /gzhan yang dge ba'i chos skyes pa rnams gnas pa dang mi brjed par bya ba'i phyir ni 'bad par byed pa yin no/ /bsgom pa yongs su rdzogs par bya ba'i phyir ni brtson 'grus rtsom par byed pa yin no//gzhan yang dge ba chung ngu dang 'bring ma skyes pa rnams skyed pa dang / skyes pa rnams gnas pa dang / mi brjed pa dang / bsgom pa yongs su rdzogs par bya ba'i phyir ni 'bad par byed pa yin no/ /dge ba'i chos chen po ma skyes pa rnams bskyed pa dang /skyes pa rnams gnas pa dang / mi brjed pa dang / bsgom pa yongs su rdzogs par bya ba'i phyir ni/ brtson 'grus rtsom par byed pa yin no/ /de la dge ba'i chos ma skyes pa rnams bskyed pa dang / skyes pa rnams gnas pa dang / mi brjed pa dang / bsgom pa yongs su rdzogs par bya ba'i phyir 'dun pa skyed par byed/ 'bad par byed/ brtson 'grus rtsom par byed pa na sems rab tu 'dzin par byed pa ni gang / rab tu 'jog par byed pa ni gang zhe na/ gang gi tshe dge ba'i chos ma skyes pa rnams bskyed pa dang / skyes pa rnams gnas pa dang /mi brjed pa dang / bsgom pa yongs su rdzogs par bya ba'i phyir 'dun pa skyed par byed/ 'bad par byed/ brtson 'grus rtsom par byed cing sems zhi gnas bsgom pa dang rtse gcig tu byed pa'i tshe nang du mngon par bsdus pa na zhum pa'am zhum du dogs par mthong ba'i tshe na rab tu 'dzin pa'i mtshan ma dang bar 'gyur ba gang yang rung bas rab tu 'dzin par byed cing rab tu dga' bar byed de ni sems rab tu 'dzin par byed pa yin no//de ltar rab tu 'dzin pa'i dus na sems rgod dam rgod du dogs par mthong ba de ni de'i tshe na sems nang du mngon par sdud par byed cing /zhi gnas la rab tu 'jog par byed pa de ni rab tu 'jog par byed pa yin no/ /yang dag pa'i spong ba bzhi po de dag las dang po ni spang bas spong ba yin te/ sdig pa mi dge ba'i chos ma skyes pa gang yin pa de dag ni kun du mi spyad pa'i sgo nas spang bar bya ba yin pas spong bas spong ba zhes bya'o//gnyis pa ni bsdams pas yongs su spang ba yin te/ sdig pa mi dge ba'i chos skyes pa gang yin pa de dag ni bsdam par bya zhing dang du mi blang bar bya ba yin pas bsdams pas spong ba zhes bya'o/ /gsum pa ni bsgom pas spong ba yin te/ dge ba'i chos ma skyes pa rnams bskyed pa'i phyir dge ba'i chos rnams la kun du brten par byed cing sgom par byed na ma thob pa thob par 'gyur zhing /thob pa yang mngon du byed par 'gyur ba'i phyir ro/ /bzhi pa ni rjes su bsrung bas spong ba yin te dge ba'i chos thob cing mngon sum du byas pa dag la bag med pa spangs te/bag yod pas brtan par byed pa gang yin pa de ni dge ba'i chos rnams gnas pa dang / mi brjed pa dang / bsgom pa yongs su rdzogs par 'gyur ba'i phyir te/ de ni re zhig yang dag pa'i spong ba rnams kyi rnam par dbye ba rgyas pa yin no/ /don mdor bsdu ba gang zhe na/ nag po dang dkar po'i phyogs kyi dngos po btang ba dang blang ba'i bsam pa phun sum tshogs pa dang sbyor ba phun sum tshogs pa yongs su bstan pa yin no/ /de la bsam pa phun sum tshogs pa ni 'dun pa skyed par byed ces bya bas bstan to/ /sbyor ba phun sum tshogs pa ni 'bad par byed/brtson 'grus rtsom par byed cing sems rab tu 'dzin par byed/ rab tu 'jog par byed ces bya ba dag gis bstan te/ rnal 'byor pas bya ba ni 'di tsam du zad de spang bar bya ba'i dngos po gang yin pa spang bar bya ba dang / thob par bya ba'i dngos po gang yin pa thob par bya ba'i phyir dang po kho nar 'bad pas spro ba bskyed par bya ba dang /kun nas dkris pa spang bar bya ba'i phyir brtson 'grus kyis brtson 'grus rtsom par bya ba dang / bag la nyal spang bar bya ba'i phyir sems rab tu 'dzin pas dus dus su zhi gnas dang rab tu 'dzin pa dang btang snyoms kyi mtshan ma dag bsgom par bya ba dang kun nas dkris pa dang bag la nyal gnyi ga spang bar bya ba'i phyir rab tu 'jog par byed pas gnyen po'i phyogs kyi dge ba gang dag yin pa de dag yang dag par bsgrub par bya ba ste/de dag thams cad yang dag pa'i spong ba bzhi po dag gis yongs su bstan pas na de ni mdor bsdus pa yin no//de ltar yang dag pa'i spong ba bzhi po de dag ni rtsol ba las byung ba'i lam yin pas na de'i phyir de nyid la rtsol ba'i dngos po zhes bya ste/ de tsam gyis na mi mthun pa'i phyogs ma lus par 'gags pa dang / gnyen po thob pa dang 'phel ba yin pas de bzhin nyid kyi dmigs pa la nye bar gtad pa'i sems la mtshan ma dang /gnas ngan len mi snang zhing nang du yang dag par mi skye ba yin no/ /rdzu 'phrul gyi rkang pa bzhi ni sems gnas pa'i dngos po zhes bya bas bstan te/ des ni ting nge 'dzin yongs su sbyor bar byed pa'i lam bstan to//de la rdzu 'phrul gyi rkang pa bzhi gang zhe na/ 'dun pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa dang / brtson 'grus kyi ting nge 'dzin spong ba'i 'du byed dang ldan pa'i rdzu 'phrul gyi rkang pa dang / sems kyi ting nge 'dzin spong ba'i 'du byed dang ldan pa'i rdzu 'phrul gyi rkang pa dang /dpyod pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa'o/ /de la rig pa ji lta bu zhe na/ de de ltar yang dag pa'i spong ba bzhi po dag gis mi mthun pa'i phyogs ma lus par spangs pa dang / gnyen po thob cing 'phel bas de bzhin nyid kyi dmigs pa la nye bar gtad pa'i sems la mtshan ma dang gnas ngan len mi snang zhing nang yang dag par mi skye ba na de'i 'og tu ting nge 'dzin thob pa'i ting nge 'dzin yongs su rdzogs par bya ba'i phyir rdzu 'phrul gyi rkang pa la sbyor bar rig par bya'o// de la rdzu 'phrul gyi rkang pa bzhi yang dmigs pa dang / ngo bo nyid dang / grogs dang / bsgom pa dang / bsgoms pa'i 'bras bus rig par bya ste/ de la dmigs pa gang zhe na/ ting nge 'dzin 'grub pa'i bya ba'o/ /ngo bo nyid gang zhe na/ ting nge 'dzin to/ /grogs gang zhe na/ 'dun pa dang / brtson 'grus dang / sems dang / dpyod pa dang / de dag dang mtshungs par ldan pa'i sems dang sems las byung ba'i chos rnams so/ /bsgom pa gang zhe na/ spong ba'i 'du byed brgyad goms par byed pa'o/ /bsgoms pa'i 'bras bu gang zhe na/ de ltar ting nge 'dzin legs par yongs su sbyang ba byas nas chos mngon par shes par bya ba gang dang gang mngon du bya bar 'dod pa de dang de la sems mngon par gtod pa de rang rang gi gnas kyi chos rnams la mngon du gyur pa'i skal ba can du 'gyur ro//de la ting nge 'dzin ni bzhi ste/ 'dun pa'i ting nge 'dzin dang / brtson 'grus kyi ting nge 'dzin dang / sems kyi ting nge 'dzin dang / dpyod pa'i ting nge 'dzin to/ /de la 'dun pa'i ting nge 'dzin gang zhe na/ 'dun pa'i dbang du byas nas ting nge 'dzin thob pa gang yin pa'o/ /brtson 'grus dang sems dang dpyod pa'i ting nge 'dzin gang zhe na/brtson 'grus dang sems dang dpyod pa'i dbang du byas nas ting nge 'dzin thob pa gang yin pa'o/ /yang gus par sbyor ba la brten nas sems rtse gcig pa nyid la reg pa gang yin pa de ni 'dun pa'i ting nge 'dzin to/ /rgyun du sbyor ba la brten nas sems rtse gcig pa nyid la reg pa gang yin pa de ni brtson 'grus kyi ting nge 'dzin to//sngon ting nge 'dzin bsgoms pa la brten nas sems rtse gcig pa nyid la reg pa gang yin pa de ni sems kyi ting nge 'dzin to/ /chos rab tu rnam par 'byed pa la brten nas sems rtse gcig pa nyid la reg pa gang yin pa de ni dpyod pa'i ting nge 'dzin to//yang 'dun pa skyed par byed pa na sems rtse gcig pa nyid la reg pa gang yin pa de ni 'dun pa'i ting nge 'dzin to/ /'bad par byed brtson 'grus rtsom par byed pa na sems rtse gcig pa nyid la reg pa gang yin pa de ni brtson 'grus kyi ting nge 'dzin to//sems rab tu 'jog par byed pa na sems rtse gcig pa nyid la reg pa gang yin pa de ni sems kyi ting nge 'dzin to/ /sems rab tu 'dzin par byed pa na sems rtse gcig pa nyid la reg pa gang yin pa de ni dpyod pa'i ting nge 'dzin to/ /de la 'dun pa'i dbang du bya ba'i ting nge 'dzin gang zhe na/gang gi tshe de re zhig 'dun pa kho na nyi tshe skyed par byed cing 'dun pa skyes nas sdig pa mi dge ba'i chos de dag la ngo bo nyid dang gzhi dang nyes dmigs dang gnyen po'i sgo nas legs pa kho nar nges par rtogs par byed cing dran pa rtse gcig tu 'jog par byed pa dang /de bzhin du dge ba'i chos rnams la yang ngo bo nyid dang gzhi dang phan yon dang nges par 'byung ba'i sgo nas legs pa kho nar nges par rtogs par byed cing dran pa rtse gcig tu byed pa dang / de lan mang du byas pas kun nas dkris pa'i rgyu ba thag ring du byed pa'i tshul gyis rtse gcig pa nyid la reg par byed cing da dung sdig pa mi dge ba'i chos rnams kyi bag la nyal yang dag par 'joms par mi byed pa gang yin pa de ni de'i 'dun pa'i dbang du byas pa'i ting nge 'dzin zhes bya'o//brtson 'grus kyi dbang du byas pa'i ting nge 'dzin gang zhe na/ 'das pa dang ma 'ongs pa dang da ltar byung ba'i dmigs pa sdig pa mi dge ba'i chos dang mthun pa nyon mongs pa'i kun nas dkris pa chung ngu dang 'bring dang chen po dang mthun pa ma skyes pa mi bskyed pa dang skyes pa spong ba'i phyir 'bad par byed/brtson 'grus rtsom par byed pa'i tshe dmigs pa de la dpyod pas na dmigs pa de'i ngo bo nyid bzhi dang nyes dmigs dang gnyen po'i sgo nas legs pa kho nar nges par rtogs par byed cing dran pa rtse gcig tu 'jog par byed pa dang /de la lan mang du gnas par byed pa la kun nas dkris pa'i rgyu thag ring du byed pa'i tshul gyis sems rtse gcig pa nyid skye bar 'gyur zhing da dung sdig pa mi dge ba'i chos rnams kyi bag la nyal yang dag par 'joms par mi byed pa gang yin pa de ni de'i brtson 'grus kyi dbang du byas pa'i ting nge 'dzin zhes bya'o//sems kyi dbang du byas pa'i ting nge 'dzin gang zhe na/ sems bying ba rab tu 'dzin par byed cing sems rab tu bzung nas ting nge 'dzin du byed pa dang dus dus su lhag par btang snyoms su byed pa dang / sdig pa mi dge ba'i chos rnams dang mthun pa'i chos dang dge ba dang mi dge ba'i chos dang dge ba dang mi dge ba'i chos dang mthun pa'i chos gang yin pa dag la ngo bo nyid gzhi dang nyes dmigs dang phan yon dang gnyen po dang nges par 'byung ba'i sgo nas legs pa kho nar nges par rtogs par byed cing dran pa rtse gcig tu 'jog par byed pa dang /de la lan mang du gnas par byed pa la kun nas dkris pa'i rgyu ba thag ring du byed pa'i tshul gyis sems rtse gcig pa nyid skye bar 'gyur zhing da dung sdig pa mi dge ba'i chos rnams kyi bag la nyal yang dag par 'joms par ni mi byed pa gang yin pa de ni de'i sems kyi dbang du byas pa'i ting nge 'dzin zhes bya'o//dpyod pa'i dbang du byas pa'i ting nge 'dzin gang zhe na/ tshul bzhin ma yin pa yid la byed pa'i sdig pa mi dge ba'i chos dang mthun pa'i chos gang dag yin pa de dag nyid ni tshul bzhin yid la byed pa'i dge ba'i chos dang mthun pa'i chos rnams yin pas na de ltar de'i kun nas dkris pa thag ring du byas pa rnams dang /kun nas dkris pa'i gnyen po ting nge 'dzin la sogs pa dge ba'i chos skyes pa rnams la sdig pa mi dge ba'i chos de dag kun du mi 'byung bas na de 'di snyam du sems te/ci sdig pa mi dge ba'i chos rnams yod cing med pa ma yin pa la myong bar mi 'gyur ram/ 'on te med cing yod pa ma yin pas myong bar mi 'gyur ba dag gis yongs su dpyad par bya'o snyam nas de dpyod pa'i yid la byed pa'i dbang du byas te/spangs pa dang ma spangs pa la dpyod par byed de legs pa kho nar nges par rtogs par byed cing dran pa rtse gcig tu 'jog par byed pa dang / de la lan mang du gnas par byed pas sems rtse gcig pa nyid la reg par 'gyur te/des na bdag gis sems ni kun nas dkris pa tsam las rnam par grol bar zad kyi bag la nyal thams cad kyi thams cad las ni ma yin no zhes bya ba dang / bdag gis kun nas dkris pa de dag gi gnyen po ting nge 'dzin la sogs pa dge ba'i chos rnams thob cing bsgom pa tsam du zad kyi/bag la nyal gyi gnyen po rnams ni ma yin no zhes yang dag pa ji lta ba bzhin du rab tu shes shing mngon pa'i nga rgyal med pa gang yin pa de ni de'i dpyod pa'i dbang du byas pa'i ting nge 'dzin zhes bya'o/ /de la ting nge 'dzin rnam pa bzhi po de dag gi dbang du byas te kun nas dkris pa rnams thag ring du byas pa na sdig pa mi dge ba'i chos rnams kyi bag la nyal rnam pa thams cad kyi thams cad du yang dag par gzhom pa dang /de'i gnyen po dge ba'i chos rnams la yang dag par bsgrub pa'i phyir yang rgya cher 'dun pa skyed par byed/ 'bad par byed/brtson 'grus rtsom par byed cing yang dag par spong ba bzhi po dag gis rab tu brtson par byed de/ de ltar rab tu brtson zhing de ltar gyur pa de la spong ba'i chos 'du byed brgyad 'byung bar 'gyur te/ de dag gis de'i bag la nyal yang dag par 'joms pa dang ting nge 'dzin yongs su rdzogs par 'gyur zhing sems las su rung bar 'gyur ro//spong ba'i 'du byed brgyad gang zhe na/ 'dun pa dang / rtsol ba dang / dad pa dang / shin tu sbyangs pa dang / dran pa dang / shes bzhin dang / sems dang / btang snyoms so/ /de la 'dun pa ni nam zhig na bdag gi ting nge 'dzin yongs su rdzogs par 'gyur zhing sdig pa mi dge ba'i chos rnams kyi bag la nyal spong bar 'gyur zhig gu snyam du sems pa'o//rtsol ba ni gnyen po bsgom pa la sbyor ba mi gtong ba nyid gang yin pa'o/ /dad pa ni sbyor ba ma btang bar gnas pa'i gong du rtogs par bya ba dang /dad cing mngon par yid ches pa gang yin pa'o/ /shin tu sbyangs pa ni dad pa dang dang ba sngon du btang ba'i mchog tu dga' ba dang dga' ba ste/ yid dga' bar 'gyur ba'i rim gyis sdig pa mi dge ba'i chos kyi phyogs kyi gnas ngan len spangs shing sbyangs pa gang yin pa'o//dran pa ni zhi gnas kyi phyogs kyi sems gnas pa dgu yang dag par 'dzin par byed pa gang yin pa'o/ /shes bzhin ni lhag mthong gi phyogs kyi shes rab kyi spyod pa bzhi dang bzhi'i rab tu dbye ba rnam pa drug gang yin pa'o/ /sems pa ni sems mngon par 'du byed pa ste/spangs pa dang ma spangs pa la dpyod par byed pa'i sems mngon par 'du byed pa gang yin pa dang / zhi gnas dang lhag mthong dang rjes su mthun pa'i lus kyi las dang ngag gi las kun nas slong bar byed pa gang yin pa'o/ /btang snyoms ni 'das pa dang ma 'ongs pa dang da ltar byung ba'i sdig pa mi dge ba'i chos dang mthun pa dag la dpyod pa'i sems kun nas nyon mongs pa med cing sems mnyam pa nyid du byed pa gang yin pa'o//spong ba'i 'du byed brgyad po de dag ni bag la nyal yang dag par 'joms pa'i sbyor ba bzhi 'dun pa dang /brtson 'grus dang / dad pa dang / thabs yin te/ de la 'dun pa ni 'dun pa'i sbyor ba yin/ rtsol ba ni brtson 'grus kyi sbyor ba yin/ dad pa ni dang ba'i sbyor ba yin/ shin tu sbyangs pa dang dran pa dang shes bzhin dang sems pa dang btang snyoms ni thabs kyi sbyor ba yin no//spong ba'i 'du byed brgyad po de dag ni yan lag bzhis bsdus pa yang yin te/ bsgom pa'i yan lag dang / khyad par nyon mongs pa'i yan lag dang / nye ba'i nyon mongs pa'i rjes su bsrung ba rtogs pa'i yan lag dang / nye ba'i nyon mongs pa rnam par dag pa'i phyir sdud pa'i yan lag gis so//de la bsgom pa'i yan lag ni 'dun pa dang / rtsol ba ste/ 'di ltar 'dun pa dang / rtsol ba gnyis la brten nas rdzu 'phrul gyi rkang pa sgom par byed pa'i phyir ro/ /khyad par rtogs pa'i yan lag ni dang ba dang shin tu sbyangs pa ste/'di ltar dad pas ni khyad par rtogs nas gong ma'i rnam par thar pa la mngon par dad par byed la/ shin tu sbyangs pas ni lus dang sems kyi gnas ngan len shin tu sbyong bar byed pa'i phyir ro/ /nye ba'i nyon mongs pa rjes su bsrung ba rtogs pa'i yan lag ni dran pa dang / shes bzhin te/ 'di ltar dran pas ni zhi gnas dang lhag mthong gi nye ba'i nyon mongs pa ma byung ba srung bar byed la/ shes bzhin gyis ni byung ba rtogs par byed pa'i phyir ro/ /nye ba'i nyon mongs pa rnam par dag pa'i phyir sdud pa'i yan lag gi sems pa dang / btang snyoms te/ 'di ltar sems pas ni sems zhum pa'i phyir 'dzin par byed la/btang snyoms kyis ni rgod pa nang du sdud par byed pa'i phyir ro/ /spong ba'i 'du byed brgyad po de dag ni nyes pa lnga spong ba'i phyir 'du byed pa yin pas de'i phyir spang ba'i 'du byed ces bya'o/ / nyes pa lnga gang zhe na/ le lo dang / gdams ngag brjed pa dang /bying ba dang rgod pa dang / bying ba dang rgod pa rab tu zhi bar bya ba'i dus na mngon par 'du mi byed pa dang / bying ba dang rgod pa rab tu zhi ba'i tshe na mngon par 'du byed pa'o/ /de dag spang ba'i phyir spong ba'i 'du byed brgyad ji ltar rnam par gzhag ce na/ le lo spang ba'i phyir ni spong ba'i 'du byed bzhi rnam par gzhag ste/'dun pa dang / rtsol ba dang / dad pa dang / shin tu sbyangs pa'o/ /de dag kyang gnas dang de la gnas pa dang rgyu dang 'bras bu yin te / 'dun pa ni rtsol ba'i gnas yin no/ /rtsol ba ni 'dun pa de la gnas pa yin no/ /dad pa ni gnas 'dun pa'i rgyu yin no//shin tu sbyangs pa ni gnas pa rtsol ba de'i 'bras bu yin no/ /nyes pa de'i lhag ma bzhi spang ba'i phyir ni spong ba'i 'du byed lhag ma bzhi go rims bzhin du rnam par gzhag ste/ dran pa ni dmigs pa ma brjod pa yin la/ shes bzhin ni dran pa ma brjed par gyur na bying ba dang rgod pa rtogs pa yin/sems pa ni rtogs nas de dang bral ba'i phyogs mngon par 'du byed pa yin/ btang snyoms ni bying ba dang rgod pa de nye bar zhi bar 'gyur ba na rnal du 'jog pa yin pa'i phyir ro/ /de ltar 'dun pa la sogs pa'i ting nge 'dzin snga ma gang dag yin pa dang spong ba'i 'du byed 'di dag gang dag yin pa de dag thams cad gcig tu bsdus te bag la nyal spangs shing ting nge 'dzin yongs su grub pa ni 'dun pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa zhes bya ba dang /brtson 'grus dang / sems dang / dpyod pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa zhes bya ste/nyes pa lnga spong ba'i 'du byed brgyad bsgoms pa'i rgyu las byung ba ni 'dun pa dang / brtson 'grus dang / sems dang / dpyod pa'i ting nge 'dzin yin la/ ting nge 'dzin bzhi po de dag nyid rdzu 'phrul gyi rkang pa bzhi yin par rig par bya'o//de la ci'i phyir rdzu 'phrul gyi rkang pa zhes bya zhe na/ 'di lta ste/ dper na gang la rkang pa yod pa des 'gro ba dang ldog pa dang pha rol gnas par nus pa de bzhin du gang la nyes pa lnga spong ba'i 'du byed brgyad kyi chos de dag kyang yod la/ de dag bsgoms pa'i rgyu las byung ba 'dun pa la sogs pa'i ting nge 'dzin bzhi po de dag kyang yongs su rdzogs par yod cing de de ltar sems yongs su dag pa dang /yongs su byang ba dang / nyon mongs pa med pa dang / nye ba'i nyon mongs pa dang bral ba dang / drang por gyur pa dang / las su rung bar gnas pa dang / mi g.yo ba thob par gyur na 'jig rten las 'das pa'i chos rnams thob par bya ba dang / ldog pa dang / pha rol gnon par nus te/ de 'di ltar 'jig rten las 'das pa'i chos de dag gi rdzu 'phrul dam pa dang 'byor ba dam pa yin pas na/ de thob par bya ba'i gzhir gyur pa'i ting nge 'dzin bzhi po de dag ni rdzu 'phrul gyi rkang pa zhes bya'o/ /de ltar rdzu 'phrul gyi rkang pa bzhi po de dag ni yongs su sbyong bar byed pa'i lam yin pas na sems gnas pa'i dngos po zhes bya ste/ de tsam gyis na nyon mongs pa'i dngos po bag la nyal yang dag par bcom pa dang /de'i gnyen po ting nge 'dzin yongs su rdzogs pa thob pa dang / thar pa'i cha dang mthun pa'i dge ba'i rtsa ba rnams bskyed zin pa dang / nges par 'byed pa'i cha dang mthun pa'i dge ba'i rtsa ba rnams la sbyor ba'i lam rtsom par rig par bya'o//de'i 'og tu dngos po bcu bzhis ni sems gnas pa'i dngos po rdzu 'phrul gyi rkang pa bzhis ting nge 'dzin yongs su sbyong bar byed pa'i lam bstan pa de gnyis kyi gnas skabs rgya cher ston to/ /de dag gi bsdus pa'i don ni rnam pa bzhi ste/ sa dang / dmigs pa dang / ngo bo nyid dang / de'i yan lag go/ /de las ni bsam gtan bzhi'o/ /dmigs pa ni dmigs pa bzhi'o/ /ngo bo nyid ni 'phags pa'i bden pa bzhi shes pa'o/ /de'i yan lag ni 'phags pa'i bden pa bzhi shes pa de'i yan lag brgyad de/ sbyor ba'i yan lag dang / rnam pa'i yan lag dang /yid la byed pa'i yan lag dang / mi mthun pa'i phyogs kyi yan lag dang / gnyen po'i yan lag dang / gnyen po'i gnas kyi yan lag dang / gnyen po'i bsgom pa las mi nyams pa'i thabs kyi yan lag ste dngos po gcig dang / bzhi dang / re re dang / go rims bzhin no//de la re zhig sa gang na sems gnas pa'i sa pa'i dngos po de yod ce na/ de'i phyir tshe 'di la bde bar gnas pa'i dngos po zhes bya ba gsungs te/ sa ni bsam gtan bzhi po dag ste/ de dag ni sems gnas pa'i dngos po de yod do zhes bya bar sbyar ro/ /de ni mtshon pa tsam du zad kyi 'dod pa'i khams dang mi lcogs pa med pa dang nyer bsdogs rnams dang gzugs med pa bzhin yang sems gnas pa'i dngos po de yod par rig par bya'o//de la bsam gtan bzhi gang zhe na/ de 'dod pa dag las dben pa sdig pa mi dge ba'i chos rnams las dben pa rtog pa dang bcas pa dpyod pa dang bcas pa dben pa las skyes pa'i dga' ba dang bde ba can bsam gtan dang po bsgrubs te gnas so zhes bya ba dang /de rtog pa dang dpyod pa dang bral zhing nang yongs su dang ste sems kyi rgyud gcig tu gyur pas rtog pa med pa dpyod pa med pa'i ting nge 'dzin las skyes pa'i dga' ba dang bde ba can bsam gtan gnyis pa bsgrubs te gnas so zhes bya ba dang /de dga' ba'i 'dod chags dang bral bas btang snyoms la gnas shing dran pa dang shes bzhin can yin te bde ba lus kyis myong la 'phags pa rnams kyis gang de dran pa dang ldan pa bde ba la gnas pa btang snyoms pa'o zhes brjod pa ste/dga' ba med pa'i bsam gtan gsum pa bsgrubs te gnas so zhes bya ba dang / de bde ba spangs te snga nas sdug bsngal yang spangs shing yid bde ba dang yid mi bde ba yang nus pas bde ba yang ma yin sdug bsngal yang ma yin pa btang snyoms dang dran pa yongs su dag pa bsam gtan bzhi pa bsgrubs te gnas so zhes bya ba'o//de la bsam gtan dang po'i skabs na 'dod pa dag ces bya ba ni rnam pa gnyis te/ nyon mongs pa'i 'dod pa dang /dngos po'i 'dod pa'o/ /'dod pa dag las dben pa zhes bya ba yang rnam pa gnyis te/ mtshungs par ldan pa'i dben pa dang / dmigs pa'i dben pa'o/ /sdig pa mi dge ba'i chos rnams las dben pa zhes bya ba ni 'dod pa'i rgyu las byung ba nye ba'i nyon mongs pa mi dge ba'i chos 'di lta ste/lus kyis nyes par spyad pa dang / ngag gis nyes par spyad pa dang / yid kyis nyes par spyad pa dang / mtshon 'byin pa dang / dbyig pa 'byin pa dang / 'thab mo dang mtshang 'dru ba dang / rtsod pa dang / 'gyed pa dang / g.yo byed pa dang / slu ba dang / snying rje med pa dang / brdzun du smra ba dang / kun 'byung ba gang yin pa dag ste/ de dag spang ba'i phyir sdig pa mi dge ba'i chos rnams las dben pa zhes bya'o/ /de la ci'i phyir 'dod pa dag las dben pa zhes gsungs nas sdig pa mi dge ba'i chos rnams las dben pa zhes gsungs she na/'dod pa rnams kyi rang gi mtshan nyid bstan pa'i phyir 'dod pa dag ces gsungs la/ 'dod pa rnams kyi nyes dmigs kyi mtshan nyid bstan pa'i phyir/ sdig pa mi dge ba'i chos rnams zhes gsungs so/ /de la nyes dmigs kyi mtshan nyid ni 'di yin te/'dod pa rnams kyi nyes par spyod pa kun nas bslangs nas 'og tu ltung bar byed pa'i phyir sdig pa yin no/ /dge ba skye ba dang mi mthun pa'i phyir mi dge ba yin no/ /rnam grangs gzhan yang nyon mongs pa'i kun nas nyon mongs pa spang ba yongs su bstan pa'i phyir dang / sngon bsags pa'i las kyi kun nas nyon mongs pa spang ba yongs su bstan pa'i phyir 'dod pa dag las dben pa sdig pa mi dge ba'i chos rnams las dben pa zhes gsungs so/ /rnam grangs gzhan yang khyim na gnas pa rnams kyi dngos po la yongs su longs spyod pa'i sgo nas 'dod pa spang bar yongs su bstan pa'i phyir dang /rab tu byung ba rnams kyi rnam par rtog pa'i sgo nas de spang ba yongs su bstan pa'i phyir 'dod pa dag las dben pa sdig pa mi dge ba'i chos rnams las dben pa zhes gsungs so/ /rnam grangs gzhan yang 'dod pa'i rnam par rtog pa spang ba yongs su bstan pa'i phyir dang /gnod sems dang rnam par 'tshe ba'i rnam par rtog pa spang ba yongs su bstan pa'i phyir/ 'dod pa dag las dben pa sdig pa mi dge ba'i chos rnams las dben pa zhes gsungs so/ /rnam grangs gzhan yang phyi rol pa'i drang srong rnams 'khor ba thob pa'i rtags mngon du bstan pa'i phyir dang /de dag bsam gtan las yongs su nyams pa rnams kyi dmod pa 'dor ba yongs su bstan pa'i phyir/ 'dod pa dag dang sdig pa mi dge ba'i chos rnams zhes gsungs so/ /rtog pa dang bcas dpyod pa dang bcas pa zhes bya ba ni rtog pa dang dpyod pa dag las skyon du mi lta ba'i phyir/'dod pa'i gnyen pos rang gi sa'i rtog pa dang dpyod pa dge ba dag dang ldan pas na rtog pa dang bcas pa dpyod pa dang bcas pa zhes gsungs so/ /dben pa las zhes bya ba ni 'dod pa las dben pa sbyor ba mthar thug pa'i yid la byed pa las so//skyes pa zhes bya ba ni rgyu de dang rkyen des de'i mjug thogs kho nar yang dag par skyes par bya ste/ de'i phyir dben pa las skyes pa zhes bya ba gsungs so/ /dga' ba dang bde ba can zhes bya ba ni 'dod pa dang re ba'i don thob cing dga' ba la skyon du mi lta ba'i phyir dang gnas ngan len thams cad dang bral zhing sems dang lus las su rung ba rgya chen po dang ldan pas na dga' ba dang bde ba can zhes bya'o//bsam gtan zhes bya ba ni dmigs pa la yang dag par nye bar gtod pa dang dran pa rtse gcig tu 'dod pa'i phyir bsam gtan zhes bya'o//dang po zhes bya ba ni dang po'i 'dod pa'i khams nas bskyod pa'i go rims bzhin du bgrang ba'i phyir dang po zhes bya'o/ /bsgrubs te zhes bya ba ni sbyor ba mthar thug pa'i 'bras bu yin pa'i phyir bsgrubs te zhes bya ba'o / /gnas so zhes bya ba ni phyir rgol ba lan mang du bsgrubs pas ci 'dod pa bzhin thob pa dang dka' ba med par thob pa dang tshegs med par thob pa'i phyir bsam gtan gyi snyoms par 'jug pa des mtshan mo dang nyin mo dang nyin mtshan bdun gyi bar ram/ji srid kyi bar du 'da' bar byed pas na gnas so zhes bya ba gsungs pas so//bsam gtan gnyis pa'i skabs nas de rtog pa dang dpyod pa dang bral zhing nang yongs su dang ste zhes bya ba ni/ rtog pa dang bcas dpyod pa dang bcas pa'i ting nge 'dzin gyi mtshan ma dag las sems rnam par bzlog nas rtog pa med pa dang dpyod pa med pa'i ting nge 'dzin gyi mtshan ma dag la legs par gtod cing /dmigs pa mi rtag par dpyod pa las rnam par phral te/ dmigs pa la brtan par dpyod pa la dang gcig gis sems zhi ba dang dang bar 'jug par byed cing rnam par 'jog par byed pas na/de'i phyir rtog pa dang dpyod pa dang bral zhing nang yongs su dang ste zhes bya ba gsungs so/ /sems kyi rgyud gcig tu gyur pas zhes bya bas ni de bsgom pa goms par bya ba'i phyir rtog pa dang dpyod pa med pa'i ting nge 'dzin de nyid la rtog pa dang dpyod pas bar du gcod pa'i skabs su chad pa'i gnas skabs las yang dag par 'das te/bar du gcod pa med pa dang skabs su 'chad pa med pa'i gnas skabs thob pas na de'i phyir rgyud gcig tu gyur pas zhes bya ba gsungs so/ /rtog pa med pa dpyod pa med pa zhes bya ba ni rtog pa dang dpyod pa dag rnam pa thams cad kyi thams cad du spang ba'i phyir rtog pa med pa dpyod pa med pa zhes bya'o//ting nge 'dzin las zhes bya ba ni sbyor ba mthar thug pa'i yid la byed pa'i ting nge 'dzin las so/ /skyes pa zhes bya ba ni rgyu de dang rkyen des de'i mjug thogs kho nar yang dag par skyes pa la bya ste/de'i phyir ting nge 'dzin las skyes pa zhes bya ba gsungs so/ /dga' ba dang bde ba can zhes bya ba ni/ 'dod pa dang bde ba'i don thob cing dga' ba la skyon du mi lta ba yang dag par rab tu dga' ba dang ldan zhing yid bde ba dang ldan pa'i phyir dang / bsam gtan dang po'i rtog pa dang dpyod pa dang nyon mongs pa'i phyogs gnas ngan len thams cad dang bral bas de'i gnyen po sems dang lus shin tu sbyangs shing las su rung ba'i bde ba dang ldan pa'i phyir dga' ba dang bde ba can zhes bya'o//bsam gtan gnyis pa bsgrubs te gnas so zhes bya ba la/gnyis zhes bya ba ni go rims bzhin du bgrangs pa'i phyir ro/ /lhag ma thams cad ni snga ma bzhin du rig par bya'o/ /bsam gtan gsum pa'i gnas skabs nas de dga' ba'i 'dod chags dang bral bas zhes bya ba ni dga' ba'i mtshan ma dag la skyon du lta ba'i phyir te/de'i phyir de dga' ba'i 'dod chags dang bral bas zhes bya ba gsungs so/ /btang snyoms la gnas shing zhes bya ba ni dga' ba med pa bsam gtan gsum pa la sems gtod par byed pa de'i tshe na/ de'i sems kun du 'khrug par byed pa'i skyon rnam pa gnyis so/ /bsam gtan gnyis pa la rtog pa dang dpyod pa dang da ltar gyi dga' ba dag dang bral bas na de'i phyir btang snyoms la gnas shing zhes bya ba gsungs te/sems kun du 'khrug par byed pa'i chos de gnyis ni sems rgyun du btang snyoms su gzhag pa la gegs byed pa yin pas na sems kun du 'khrug par byed pa zhes bya'o//de la bsam gtan dang po la ni rtog pa dang dpyod pa yod pas des na rgyun du btang snyoms la 'jug par mi 'gyur ro/ /bsam gtan gnyis pa la ni dga' ba yod pas des na der yang rgyun du btang snyoms la 'jug par mi 'gyur te/ de lta bas na bsam gtan dang po dang bsam gtan gnyis pa de dag la btang snyoms shas cher med pas/de'i phyir bsam gtan gsum pa la snyoms par zhugs pa'i bsam gtan pa de ni btang snyoms la gnas pa zhes bya'o/ /dran pa dang shes bzhin can yin te zhes bya bas ni btang snyoms la gnas pa na ji lta ji ltar dga' ba dang ldan pa'i 'du shes yid la byed pa de dag kun 'byung bar mi 'gyur ba de lta de ltar dran pa nye bar gzhag ste gnas pa med do//gal te bsam gtan gsum pa la legs par goms par ma byas par brjed ngas pa'i phyir brgya lam brgya lam na dga' ba dang ldan pa'i 'du shes yid la byed pa de dag kun du 'byung bar byed na myur ba myur ba kho nar de dag la shes rab kyis so sor rtogs par byed legs par kho nar rab tu shes par byed cing 'byung ngo cog dang du mi len par spong bar byed/sel bar byed byang bar byed cing sems btang snyoms su byed pas na de'i phyir dran pa dang shes bzhin can yin te zhes bya ba gsungs so//bde ba lus kyis myong la zhes bya ba ni de de'i tshe na gzugs kyi lus dang yid kyi lus tshor ba'i bde ba dang shin tu sbyangs pa'i bde ba so sor myong bar byed pas na de'i phyir bde ba lus kyis myong zhes bya ba gsungs so//'phags pa rnams kyis gang de dran pa dang ldan pa bde ba la gnas pa btang snyoms pa'o zhes brjod pa ste zhes bya ba ni/ bsam gtan gsum pa'i 'og ma dag la ni bde ba de lta bu yang med la / bsam gtan gsum pa'i gong ma dag la ni btang snyoms yod kyang bde ba de lta bu yang med de/de ltar 'og ma dag la bde ba dang btang snyoms pa dang gong ma dag la bde ba med pa'i phyir bsam gtan gsum pa 'di ni de dag gi gnas yin pas na 'phags pa rnams kyang de la dmigs te gnas pa'i gang zag yin pa de ni dbang du mdzad nas gang des dran pa dang ldan pa bde ba la gnas pa btang snyoms pa'o zhes brjod de/'phags pa rnams zhes bya ba ni sangs rgyas dang sangs rgyas kyi nyan thos rnams so/ /dga' ba med pa zhes bya ba de ltar btang snyoms la gnas te des de'i tshe dran pa dang shes bzhin dang kun du brten zhing goms par byas/lan mang du byas pa'i rgyus dga' ba dang ldan pa'i tshor ba sems dga' bar byed pa de spong bar byed cing dga' ba'i gnyen po dga' ba med pa zhi ba dang rab tu zhi ba'i tshor ba sems pa skye bar 'gyur bas na de'i phyir dga' ba med pa zhes bya ba gsungs so//bsam gtan gsum pa bsgrubs te gnas so zhes bya ba ni snga ma bzhin du rig par bya'o/ /bsam gtan bzhi pa'i skabs nas de bde ba yang spangs te zhes bya ba'i gnyen po rigs 'dra ba'i phyir spong ba'i gnyen po ma bstan par de'i gnyen pos byas pa bde ba spangs pa gang yin pa de nyid bstan te/de'i gnyen po yang gang zhe na/ 'di lta ste/ btang snyoms dang dran pa dang shes bzhin no/ /de la brten zhing goms par byas lan mang du byas pas bsam gtan gsum pa'i las bskyed cing bsam gtan gsum pa'i sa pa'i bde ba gang yin pa de spong bar byed pas na de'i phyir de bde ba yang spangs te zhes bya ba gsungs so//snga nas sdug bsngal yang spangs shing yid bde ba dang yid mi bde ba yang nub pas zhes bya ba ni/ de'i tshe na bsam gtan pa des bde ba dang sdug bsngal las yang dag par 'das pa rjes su thob pa des sngon spangs pa gang yin pa dang /da ltar spong bar byed pa gang yin pa de dag gcig tu bsdus pas na/ de'i phyir snga nas sdug bsngal yang spangs shing yid bde ba dang yid mi bde ba yang nub pas zhes bya ba gsungs so/ /de la bsam gtan bzhi pa la snyoms par 'jug pa'i tshe na ni bde ba spangs so//bsam gtan gnyis pa la snyoms par 'jug pa'i tshe na ni sdug bsngal spangs so/ /bsam gtan gsum pa la snyoms par 'jug pa'i tshe na ni yid bde ba nub po / /bsam gtan dang po la snyoms par 'jug pa'i tshe na ni yid mi bde ba nub po//bde ba yang ma yin sdug bsngal yang ma yin zhes bya ba ni des re zhig bde ba dang sdug bsngal spang ba'i phyir de la lhag ma'i tshor ba bde ba yang ma yin/ sdug bsngal yang ma yin pa nyi tshe yod pas na de'i phyir bde ba yang ma yin sdug bsngal yang ma yin pa zhes gsungs so//btang snyoms dang dran pa yongs su dag pa zhes bya ba ni des de'i tshe na bsam gtan dang po yan chad kyi sa 'og ma'i skyon 'di lta ste/ rtog pa dang dpyod pa dang dga' ba dang dbugs rngub pa dang dbugs dbyung ba thams cad spangs par gyur cing / de dag spangs pa'i phyir de la btang snyoms dang dran pa gang yod pa de yongs su dag pa dang yongs su byang bar 'gyur te/des na bsam gtan bzhi pa la snyoms par zhugs pa de'i sems de mi g.yo bar gnas shing g.yo ba thams cad dang bral bas na de'i phyir btang snyoms dang dran pa yongs su dag pa zhes bya ba gsungs so//bsam gtan bzhi pa bsgrubs te gnas so zhes bya ba ni snga ma bzhin du rig par bya'o/ /bsam gtan bzhi po de dag ni rnam pa bzhis rig par bya ste/ kun nas nyon mongs pa dang / rnam par byang ba dang /rnam par gzhag pa dang / rnam par dag pas so/ /de la kun nas nyon mongs pas ji ltar rig par bya zhe na/ lung du ma bstan pa'i rtsa ba bzhi po sred pa dang / lta ba dang / nga rgyal dang / ma rig pa ste/ sred pas ni kun nas nyon mongs pa'i kun nas nyon mongs so/ / lta bas ni lta ba'i shas che ba'i bsam gtan pa nyid kyis kun nas nyon mongs so/ /nga rgyal gyis ni nga rgyal gyi shas che ba'i bsam gtan pa nyid kyis kun nas nyon mongs so/ /ma rig pas ni the tshom gyi shas che ba'i bsam gtan nyid kyis nyon mongs te/ de ltar sems kun nas nyon mongs pa dag la gzugs na spyod pa'i nyon mongs pa dang nye ba'i nyon mongs pa rnams byung ba na de'i phyir des ni kun nas nyon mongs pa bstan to//rnam par byang bas ji ltar rig par bya zhe na/ dag pa'i bsam gtan ni dge ba'i phyir rnam par byang ba zhes bya ste/ de'i phyir des ni rnam par byang ba bstan to//rnam par gzhag pas ji ltar rig par bya zhe na/ de ni rnam pa bzhi ste/ grangs dang mi mthun pa'i phyogs dang / yan lag rnam par gzhag pa dang / snyoms par 'jug pa rnam par gzhag pa dang / tshad rnam par gzhag pa dang / ming du gdags pa rnam par gzhag pa'o//de la grangs rnam par gzhag pa ni ci'i phyir bsam gtan bzhi po kho nar zad de ches mang ba yang ma yin la ches nyung ba yang ma yin zhe na/ bde ba dang sdug bsngal las shin tu 'das shing yongs su rdzogs pa'i phyir te/ 'di ltar bsam gtan dang po nas mthar gyis bzhi pa'i bar du bde ba dang /sdug bsngal las shin tu 'das shing yongs su rdzogs pa'i phyir ro/ /mi mthun pa'i phyogs rnam par gzhag pa ni bsam gtan dang po'i mi mthun pa'i phyogs gang zhe na lnga ste/ 'dod pa'i 'dod chags dang gnod sems dang /rnam par 'tshe ba'i rnam par rtog pa dang / yid mi bde ba dang / 'chal ba'i tshul khrims dang / rnam par g.yeng ba'o/ /bsam gtan gnyis pa'i mi mthun pa'i phyogs gang zhe na/ de yang lnga ste/ bsam gtan dang po'i 'dod chags dang / rtog pa dang dpyod pa dang / sdug bsngal dang /rgod pa dang / ting nge 'dzin ma rdzogs pa'o/ /bsam gtan gsum pa'i mi mthun pa'i phyogs gang zhe na/ bzhi ste/ bsam gtan gnyis pa'i 'dod chags dang / yid bde ba dang / dga' ba dang / ting nge 'dzin ma rdzogs pa'o/ /bsam gtan bzhi pa'i mi mthun pa'i phyogs gang zhe na/de yang lnga ste/ dbugs rngub pa dang / dbugs dbyung ba dang / bsam gtan gsum pa'i 'dod chags dang / bde ba la sogs pa dang / ting nge 'dzin ma rdzogs pa'o/ /yan lag rnam par gzhag pa ni bsam gtan dang po'i yan lag du zhe na/lnga ste/ rtog pa dang / dpyod pa dang / dga' ba dang / bde ba dang / sems rtse gcig pa nyid do/ /bsam gtan gnyis pa'i yan lag du zhe na/ bzhi ste/ nang yongs su dang ba dang / dga' ba dang / bde ba dang / sems rtse gcig pa nyid do/ /bsam gtan gsum pa'i yan lag du zhe na/de yang lnga ste/ dran pa dang / shes bzhin dang / btang snyoms dang / bde ba dang / sems rtse gcig pa nyid do/ /bsam gtan bzhi pa'i yan lag du zhe na/ de yang bzhi ste/ btang snyoms yongs su dag pa dang / dran pa yongs su dag pa dang /sdug bsngal yang ma yin bde ba yang ma yin pa dang / sems rtse gcig pa nyid do/ /ci'i phyir bsam gtan bzhi po de dag yan lag lnga pa dang bzhi par rnam par gzhag ce na/ gnas pa'i rten dang gnas pa la phan pa dang gnas pa'i ngo bo nyid yin pa'i phyir te/de la bsam gtan dang po'i yan lag lnga las rtog pa dang / dpyod pa dang / bsam gtan gnyis pa'i yan lag bzhi las nang yongs su dang ba dang / bsam gtan gsum pa'i yan lag lnga las dran pa dang / shes bzhin dang / btang snyoms dang / bsam gtan bzhi pa'i yan lag bzhi las btang snyoms dag pa dang dran pa yongs su dag pa ni bsam gtan bzhi po rang rang gi gnas pa'i rten yin no/ /bsam gtan dang po'i dga' ba dang bde ba dang / gnyis pa'i dga' ba dang bde ba dang / gsum pa'i bde ba dang /bzhi pa'i sdug bsngal yang ma yin bde ba yang ma yin pa ni rang rang gi gnas pa la phan pa yin no/ /bsam gtan bzhi par sems rtse gcig pa bzhi ni rang rang gi gnas pa'i ngo bo nyid yin par rig par bya'o/ /rnam grangs gzhan yang dmigs pa yid la byed pa dang /dmigs pa yongs su spyod pa dang / dmigs pa la mi 'phro ba'i phyir ro/ /rnam grangs gzhan yang phan 'dogs pa'i rten dang / lhag pa'i sems kyi rten dang / lhag pa'i shes rab kyi rten yin pa'i phyir ro/ /rnam grangs gzhan yang mi mthun pa'i phyogs nye ba'i nyon mongs pa can mi gnas pa rnam pa gsum po nyon mongs pa can gyi gnas pa dang /sdug bsngal ba'i gnas pa dang / kun du rmongs pa'i gnas pa'i gnyen po'i phyir ro/ /rnam grangs gzhan yang bsam gtan pa rnams kyi 'dod pa la longs spyod pa dang chos mthun pa yin par lta bar byed do//'dod pa la longs spyod pa rnams kyi yang dag par bya ba ni gsum po 'di dag yin te/ longs spyod legs par yongs su tshol ba dang / yongs su btsal ba rnams la legs par longs spyod pa dang / de la dbang sgyur ba la rang dbang yod pa'o//de bzhin du bsam gtan pa rnams kyi yan lag kyang legs par bya ba gsum la brten nas rnam par gzhag go/ /rnam grangs gzhan yang bsam gtan pa rnams kyi yan lag ni dka' thub drag po'i gnyen po rnam pa gsum du rnam par gzhag ste / gnyen po ma yin pa'i gnyen po dang / lus dang sems la gnod pa'i gnyen po dang / sems phyi rol du 'phro ba nye bar ma zhi ba'i gnyen po'o/ /rnam grangs de dag la bsam gtan bzhi po dang / ngag gi yan lag lnga dang bzhi dum bu gsum gsum du bcad pa'i tshul ni snga ma bzhin du rig par bya'o//snyoms par 'jug pa'i rnam par gzhag pa ni yid la byed pa bdun gyis bsam gtan rnams la snyoms par 'jug pa ste/ mtshan nyid so sor rig pa'i yid la byed pa dang / mos pa las byung ba'i yid la byed pa dang / rab tu dben pa'i yid la byed pa dang / dpyod pa'i yid la byed pa dang / dga' ba sdud pa'i yid la byed pa dang / sbyor ba mthar thug pa'i yid la byed pa dang / sbyor ba mthar thug pa'i 'bras bu'i yid la byed pa dag gis so/ /de la bsam gtan dang po la yid la byed pa bdun gyis ji ltar snyoms par 'jug ce na/ mnyam par gzhag pa'i sa pa'i yid la byed pa gang gis 'dod pa rnams la rags pa'i mtshan nyid dang / bsam gtan dang po la zhi ba'i mtshan nyid du so sor rig par byed pa de ni de'i mtshan nyid so sor rig pa'i yid la byed pa yin te/ de ni thob pa dang bcas pa dang 'dres pa yin par rig par bya'o//des de ltar 'dod pa rnams la rags pa'i mtshan nyid dang bsam gtan dang po la zhi ba'i mtshan nyid du so sor rig nas/ bsam gtan dang po la yongs su tshol ba dang rags pa zhi ba'i mtshan nyid ji lta ba bzhin gyi thos pa dang bsam pa las yang dag par 'das nas gcig tu bsgom pa'i rnam pas mos par byed cing /mtshan ma de nyid la dmigs pa'i zhi gnas dang lhag mthong sgom par byed de/ sgom par byed pas na ji ltar yongs su tshol ba dang rags pa / zhi ba'i mtshan nyid de dag la yang dang yang du zhi bar byed pa de ni de'i mos pa las byung ba'i yid la byed pa yin no//de kun du bsten zhing goms par byas pa lan mang du byas pa'i rgyus dang po kho na nyon mongs pa chen po spong ba'i lam skye bar 'gyur zhing / lam de dang ldan pa'i yid la byed pa de ni rab tu dben pa'i yid la byed pa zhes bya'o/ /des dang por 'dod pa na spyod pa'i nyon mongs pa spangs pa dang /de'i phyogs kyi gnas ngan len dang bral ba'i phyir de'i 'og tu spong ba la dga' ba dang / rab tu dben pa la dga' bar 'gyur zhing spong ba de la phan yon du mthong ba dang / rab tu dben pa las skyes pa'i dga' ba dang bde ba chung ngu la reg nas 'di lta ste/rmugs pa dang gnyid dang rgod pa spang ba'i phyir dus su rab tu dang bar 'gyur ba'i yid la byed pas yang dag par rab tu dga' bar byed pa kun du skyo bar 'gyur ba'i yid la byed pas kun du skyo bar byed pa de ni de'i dga' ba sdud pa'i yid la byed pa zhes bya'o//de ltar spong ba'i dga' ba dang bsgom pa'i dga' ba la yang dag par rab tu brtson pa na rgyu'am gnas kyang rung ste/ de la dge ba'i phyogs la sbyor ba la gegs byed par 'dod pa dang ldan pa'i nyon mongs pa'i kun nas dkris pa kun du 'byung bar mi 'gyur ba na de 'di snyam du sems te/ci bdag la 'dod pa rnams la 'dod pa la 'dun pa yin bzhin du mi myong ngam 'on te med pas mi myong snyam du sems te/ de yongs su dpyod par 'dod pas rab tu dang bar 'gyur ba'i mtshan ma sdu gu gang yang rung ba yid la byed de de'i bag la nyal thams cad kyi thams cad du spang ba'i phyir mtshan ma de yid la byed pa na bsten pa la gzhol ba dang /'bab pa dang bab pa'i sems 'byung bar 'gyur zhing btang snyoms su mi gnas la/ yid byung ba dang smod pa dang phyir ldog pa dang / mi mthun par mi gnas na 'di snyam du sems te/bdag gi sems ni 'di lta ste/ 'dod pa rnams las yang dag par 'dod chags dang bral zhing rnam par grol ba ma yin no snyam nas/ de bag la nyal de'i lhag ma lus pa rgya cher spang ba'i phyir bdag gi sems mngon par 'du byed pas mngon par zin pa dang chu bzhin du bcus pa dang /chos nyid kyis mngon par zin pa des spong ba ci la dga' ba dang / bsgom pa la dga' ba la rgya cher gnas par bya'o snyam pa de ni de'i dpyod pa'i yid la byed pa zhes bya'o/ /de de ltar spong ba la dga' ba dang bsgom pa la dga' la rgya cher gnas shing zhi gnas dang /lhag mthong bsgom pa la rab tu brtson par byed pa na yang dang yang du dpyod par byed cing de'i gnyen po sgom par byed de/ dus dus su spangs pa dang ma spangs pa gnyis la dpyod par byed pa na/ 'dod pa na spyod pa'i nyon mongs pa thams cad las re zhig tsam gyi tshul gyis sems 'bral bar byed cing /sa bon gtan bcom pa ma yin la de'i tshe na bsam gtan dang po la sbyor ba'i lam gyi mthar thug pa nyon mongs pa thams cad kyi gnyen por gyur pa'i yid la byed pa gang yin pa skyes pa de ni de'i sbyor ba mthar thug pa'i yid la byed pa zhes bya'o//de'i mjug thogs kho nar rgyu de dang rkyen des bsam gtan dang po'i dngos gzhi la snyoms par 'jug cing / bsam gtan gyi dngos gzhi dang ldan pa'i yid la byed pa skyes pa de ni de'i sbyor ba mthar thug pa'i 'bras bu yid la byed pa zhes bya'o//de la rab tu dben pa'i yid la byed pa dang dga' ba sdud pa'i yid la byed pa skyes par gyur pa'i tshe na ni dben pa las skyes pa'i dga' ba dang bde bas lus yongs su tshim par byed do/ /sbyor ba mthar thug pa'i yid la byed pa skyes par 'gyur ba'i tshe na ni lan 'ga' ni bde ba'i dngos po chung ngu'i tshul gyis khyab par byed do//lan 'ga' lan 'ga' ni bde ba'i dngos po shin tu mang po dang shin tu rgya chen po'i tshul gyis khyab par byed do/ /sbyor ba mthar thug pa'i 'bras bu'i yid la byed pa skyes par gyur pa'i tshe na ni 'di lta ste lus thams cad dben pa las skyes pa'i dga' ba dang bde bas khyab pa dang khyab par bya ba cung zad kyang med de/de'i tshe na ni 'dod pa dag las dben pa sdig pa mi dge ba'i chos rnams las dben pa/ rtog pa dang bcas dpyod pa dang bcas pa dben pa las skyes pa'i dga' ba dang bde ba can bsam gtan dang po'i yan lag lngas bsgrubs te gnas pa dang /'dod pa na spyod pa'i gnyen po'i lam bsgoms pa'i 'bras bu la gnas pa dang 'dod pa rnams las 'dod chags dang bral ba thob pa zhes bya'o/ /ji ltar yid la byed pa bdun gyis bsam gtan dang po la snyoms par 'jug pa de bzhin du bsam gtan gnyis pa dang gsum pa dang bzhi pa dang gzugs med pa rnams la yang yid la byed pa bdun gyis snyoms par 'jug par ci rigs par rig par bya ste/de la yang mtshan nyid so sor rig pa'i yid la byed pas ni spang bar bya ba gang yin pa de yang yongs su shes par byed thob par bya ba gang yin pa de yang yongs su shes par byed cing /spang bar bya ba spang ba dang / thob par bya ba thob par bya ba'i phyir sems gtod par yang byed do/ /mos pa las byung ba'i yid la byed pa ni spang bar bya ba dang thob par bya ba spang zhing thob par bya ba'i phyir yang dag par sbyor ba rtsom par byed do //rab tu dben pa'i yid la byed pas ni nyon mongs pa chen po spong bar byed do/ /dga' ba sdud par byed pas ni nyon mongs pa'i rnam pa 'bring spong bar byed do/ /dpyod pa'i yid la byed pas ni thob pa la mngon pa'i nga rgyal med pas sems 'jog par byed do/ /sbyor ba mthar thug pa'i yid la byed pas ni nyon mongs pa'i rnam pa chung ngu spong bar byed do//sbyor ba mthar thug pa'i 'bras bu'i yid la byed pas ni yid la byed pa'i rnam pa de dag bsgoms pa'i 'bras bu nyams su myong bar byed do/ /gzhan yang mtshan nyid so sor rig pa'i yid la byed pa dang /mos pa las byung ba'i yid la byed pa gang yin pa de ni sun 'byin pa'i gnyen po dang ldan te rjes su mthun pa'i yid la byed pa yin no/ /rab tu dben pa'i yid la byed pa dang sbyor ba mthar thug pa'i yid la byed pa gang yin pa de ni spong ba'i gnyen po dang ldan pa ste/ gnyen po yid la byed pa yin no/ /dga' ba sdud pa'i yid la byed pa gang yin pa de ni kun 'dzin pa gnyen po dang ldan pa ste/ dang bar gyur pa'i yid la byed pa yin no/ /dpyod pa'i yid la byed pa gang yin pa de ni thag bsrings pa gnyen po dang ldan pa ste/ so sor rtog pa'i yid la byed pa yin no//sbyor ba mthar thug pa'i 'bras bu'i yid la byed pa gang yin pa de ni de dag gi 'bras bu yin no/ /tshad rnam par gzhag pa ni bsam gtan chung ngu dang 'bring dang chen po yongs su bsgoms pa'i 'bras bu ni bsam gtan dang po'i skye ba gsum mo/ / bsam gtan gnyis pa dang gsum pa dang bzhi pa'i so so skye bo'i gnas rnam pa chung ngu dang 'bring dang / chen por yongs su bsgoms pa'i 'byus bu ni bsam gtan gnyis pa dang / gsum pa dang / bzhi pa'i so so skye bo'i gnas skabs kyi skye ba gsum mo/ /gnas gtsang ma lnga po dag chung ngu dang 'bring dang /chen po dang shin tu che ba dang / shin tu ches che bar yongs su bsgoms pas gnas gtsang ma lngar rim bzhin du skye ba lnga'o/ /ming du btags pa rnam par gzhag pa ni bsam gtan bzhi po dag gis bsdus pa'i ting nge 'dzin ji snyed la sangs rgyas dang byang chub sems dpa' rnams snyoms par 'jug pa de dag gi ming yang nyan thos dang rang sangs rgyas rnams kyis mi shes pa de snyed kyi ming du btags pa rnam par gzhag pa yod pa ste/de'i phyir de dag gis ni rnam par gzhag pa bstan to/ /rnam par gzhag pas ji ltar rig par bya zhe na/ rab kyi mthar phyin pa'i bsam gtan dang po nas bzhi pa'i bar dag gis rnam par dag pa zhes bya'o/ /de ltar bsam gtan bzhi po de dag ni bsam gtan zhes kyang bya/ ting nge 'dzin zhes kyang bya/ zhi gnas zhes kyang bya/ rtse gcig pa zhes kyang bya/ tshe 'di la bde bar gnas pa zhes kyang bya bas de'i phyir tshe 'di la bde bar gnas pa'i dngos po zhes bya ste/sa de dag na sems gnas pa'i dngos po de yod pas na des nis bstan to/ /sa de dag na sems gnas pa'i dngos po de dmigs pa gang la dmigs te skye zhe na/ de'i phyir sdug bsngal thams cad las yang dag par 'da' ba'i thabs kyis dmigs pa'i dngos po zhes bya ba gsungs te /dmigs pa ni dmigs pa bzhi po dag ste/ sa de dag na dmigs pa de dag la dmigs nas sems gnas pa'i dngos po de skye'o zhes bya bar sbyar ro/ /de la dmigs pa bzhi gang zhe na/ khyab pa'i dmigs pa dang / spyad pa rnam par sbyong ba'i dmigs pa dang / mkhas pa'i dmigs pa dang / nyon mongs pa rnam par sbyong ba'i dmigs pa'o/ /de la khyab pa'i dmigs pa gang zhe na/ de yang rnam pa bzhi ste/ rnam par rtog pa dang bcas pa'i gzugs brnyan dang / rnam par rtog pa med pa'i gzugs brnyan dang /dngos po'i mtha' dang / dgos pa yongs su bsdus pa'o/ /spyad pa rnam par sbyong ba'i dmigs pa gang zhe na/ de ni rnam pa lnga ste/ mi sdug pa dang / byams pa dang / rkyen 'di pa nyid kyis rten cing 'brel par 'byung ba dang / khams rab tu dbye ba dang / dbugs rngub pa dang /dbugs dbyung ba dran pa'o/ /mkhas pa'i dmigs pa gang zhe na/ de yang rnam pa lnga ste/ phung po la mkhas pa dang / khams la mkhas pa dang / skye mched la mkhas pa dang / rten cing 'brel par 'byung ba la mkhas pa dang / gnas dang gnas ma yin pa la mkhas pa'o//nyon mongs pa rnam par gcod pa'i dmigs pa gang zhe na/ de ni rnam pa gnyis te/ 'jig rten pa'i dang / 'jig rten las 'das pa'i'o/ /de la 'jig rten pa'i ni rnam pa gnyis te/ sa 'og ma rnams kyi zhi ba nyid gang yin pa'o/ /'jig rten las 'das pa'i ni rnam pa bzhi ste/sdug bsngal 'phags pa'i bden pa dang / kun 'byung ba dang / 'gog pa dang / lam 'phags pa'i bden pa'o/ /de ltar dmigs pa bzhi po de dag ni 'jig rten dang 'jig rten las 'das pa'i lam gyi 'dod chags dang bral bar gyur pa'i thabs kyis dmigs pa yin pas na/de'i phyir sdug bsngal thams cad las yang dag par 'da' ba'i thabs kyis dmigs pa'i dngos po zhes bya'o/ /de dag na sems gnas pa'i dngos po de dmigs pa de dag la dmigs te skye ba nas/ des ni dmigs pa bstan to/ /sa de dag na dmigs pa de dag la dmigs te skye ba sems gnas pa'i dngos po de'i ngo bo nyid gang zhe na/'phags pa'i bden pa bzhi shes pa ste/ de yang ji lta bu zhe na/ rnal 'byor pa dang po dran pa nye bar gzhag pa bzhi bsgom pa na 'phags pa'i bden pa bzhi la zhugs pa/ de nyid yang dag pa'i spong ba bzhis brtan par byas pa des rdzu 'phrul gyi rkang pa bzhi bsgoms pas ting nge 'dzin yongs su rdzogs par 'gyur ba gang yin pa de'i ngo bo nyid ni 'phags pa'i bden pa bzhi shes pa yin pas na/de'i phyir sems gnas pa'i dngos po de'i ngo bo nyid ni 'phags pa'i bden pa bzhi shes pa yin par rig par bya'o//de la 'phags pa'i bden pa bzhi shes pa gang zhe na/ sdug bsngal yongs su shes pa dang / kun 'byung ba spang bar bya ba dang / 'gog pa mngon sum du bya ba shes pa dang / lam bsgom pa shes pa ste/ de yang zhi gnas dang lhag mthong gis bsdus pa'i sems gnas pa'i dngos po dang /sems gnas pa'i dngos po des sdug bsngal yongs su shes par byed/ kun 'byung spong bar byed/ 'gog pa mngon du byed/ lam sgom par byed pas na de'i phyir de ni bden pa shes pa zhes bya'o/ /de la re zhig yongs su shes par bya ba'i dngos po sdug bsngal gyi bden pa shes pa'i yongs su shes pa'i dngos po bstan pa'i dbang du mdzad nas/de yongs su shes pa'i dngos po ni zhes bya ba la sogs pas sdug bsngal gyi bden pa'i mtshan nyid so sor rig pa dang / de la gang zag bdag med pa dang / chos bdag med par shes pa'i yongs su shes pa'i dngos po rnam pa gsum ston to//de la yongs su shes pa'i dngos po zhes bya ba ni rdzu 'phrul gyi rkang pa bzhi bsgom pa'i gnas skabs kyi shes pa gang gis sdug bsngal bden pa'i mtshan nyid so sor rig pa dang / de la gang zag bdag med pa dang / chos bdag med par shes pa bden pa shes pa'i yongs su shes pa gang yin pa shes pa de ni yongs su shes pa'i dngos po zhes bya'o/ /de la phyin ci log gi gnas yongs su shes pa zhes bya ba ni/ sdug bsngal gyi bden pa 'di phyin ci log bzhi'i gnas yin pas bden pa shes pa'i yongs su shes pa des sdug bsngal gyi bden pa'i mtshan nyid mi rtag pa dang /sdug bsngal ba dang / stong pa dang / bdag med pas so sor rig pa gang yin pa de ni phyin ci log gi gnas yongs su shes pa zhes bya ste/ des ni sdug bsngal gyi bden pa'i mtshan nyid so sor rig pa bstan to//sems can du 'du shes pa las brtsams te phyi rol gyi sems can rnams log par sgrub pa'i gnas yongs su shes pa zhes bya ba ni/ sdug bsngal gyi bden pa de nyid la gang zag la ming du byas nas phyi mar 'byung ba'i rgyu'i dngos po sems can du 'du shes pa las brtsams te phyi rol gyi sems can gzhan dag dang gang zag gzhan rnams la bya ba phyin ci log dang /'dzin pa phyin ci log dang / dga' ba phyin ci log dag gis log par sgrub pa'i gnas ni nye bar len pa'i phung po lnga po sdug bsngal gyi bden pas bsdus pa yin pas/ bden pa shes pa'i yongs su shes pa des sdug bsngal gyi bden pa de gang zag la bdag med par yongs su shes pa gang yin pa de ni sems can du 'du shes pa las brtsams te phyi rol gyi sems can rnams la log par sgrub pa'i gnas yongs su shes pa zhes bya ste/des ni sdug bsngal gyi bden pa la gang zag bdag med par bstan to//nang la mngon pa'i nga rgyal med pa'i gnas yongs su shes pa zhes bya ba ni/ nang gi bdag nyid kyi nye bar len pa'i phung po lnga po sdug bsngal gyi bden pas bsdus pa gang zag med bzhin gang zag tu bdag tu lta ba'i mngon pa'i nga rgyal med kyang chos su nye bar 'dogs shing chos la bdag tu lta ba'i gnas ni nye bar len pa'i phung po lnga po sdug bsngal gyi bden pas bsdus pa nyid yin pas bden pa shes pa'i yongs su shes pa des sdug bsngal gyi bden pa de la chos bdag med par yongs su shes pa gang yin pa de ni nang la mngon pa'i nga rgyal med pa'i gnas yongs su shes pa zhes bya ste/des ni sdug bsngal gyi bden pa la chos bdag med par shes pa bstan to/ /de yang rnam pa gsum zhes bya ba ni sdug bsngal gyi bden pa'i mtshan nyid so sor rig pa dang / de la gang zag bdag med pa dang /chos bdag med par shes pa'i yongs su shes pa rnam pa gsum po bstan ma thag pa la bya ste/ de gsum dngos po gcig tu bsdu'o/ /de'i 'og tu spang bar bya ba'i dngos po kun 'byung ba'i bden pa spang ba shes pa bstan pa'i dbang du mdzad nas/ bsgom pa'i gnas kyi dngos po zhes bya ba gsungs te/bsgom pa'i lam gyi bden pa'o/ /de'i gnas ni kun 'byung ba'i bden pa spang bar bya ste/ de spang bar bya ba la gnas shing brten nas lam bsgom pa la sbyor ba'i phyir ro/ /de bas na kun 'byung ba'i bden pa ni sdug bsngal gyi bden pas bsdus pa ma yin pa'i phyir sdug bsngal gyi bden pa yongs su shes su zin kyang da dung kun 'byung ba'i bden pa dang rjes su 'brel pa'i phyir kun 'byung ba'i bden pa de'i 'og tu spang bar bya ba yin pas/de'i phyir des ni kun 'byung ba spang bar bya ba shes pa'i dngos po bstan to//de'i 'og tu mngon sum du bya ba'i dngos po 'gog pa'i bden pa mngon sum du bya ba shes pa bstan pa'i dbang du mdzad nas/ mngon du bya ba'i dngos po zhes bya ba gsungs te/ mngon sum du bya ba ni mngon sum du bya ba'i don yin pas de mngon du byas na 'gog pa la mi skrag cing dga' ba yongs su 'dzin pa'i phyir 'gog pa'i bden pa ni de'i 'og tu mngon du bya ba yin pas de'i phyir des na 'gog pa'i bden pa mngon sum du byas pa shes pa bstan to//de'i 'og tu bsgom par bya ba'i dngos po lam gyi bden pa bsgom pa shes pa bstan pa'i dbang du mdzad nas/bsgom pa'i dngos po zhes bya ba gsungs te/ ji skad smos pa'i don gsum po dag bsgrub pa'i phyir lam goms par bya dgos pas na lam gyi bden pa ni de'i 'og tu bsgom par bya ba yin pas de'i phyir de ni lam gyi bde ba bsgom pa shes pa bstan te/de ltar 'phags pa'i bden pa bzhi shes pa ji skad bstan pa de dag gis ni sa de dag na dmigs pa de dag la dmigs te skye ba'i sems gnas pa'i dngos po de'i ngo bo nyid bstan to/ /de ltar sa de dag na dmigs pa de dag la dmigs te skye ba'i sems gnas pa'i dngos po 'phags pa'i bden pa bzhi shes pa'i ngo bo nyid de'i yan lag gang zhe na/de'i yan lag ni 'phags pa'i bden pa bzhi shes pa'i yan lag rnam pa brgyad de sbyor ba'i yan lag dang / rnam pa'i yan lag dang / dmigs pa'i yan lag dang / yid la byed pa'i yan lag dang / mi mthun pa'i phyogs kyi yan lag dang / gnyen po'i yan lag dang / gnyen po'i gnas kyi yan lag dang / gnyen po'i bsgom pa las mi nyams pa'i thabs kyi yan lag ste dngos po re re dang go rims bzhin no/ /de la dang po sbyor ba'i yan lag gang zhe na / de snying por bya ba'i dngos po zhes bya bas bstan te/sems gnas pa'i dngos po 'phags pa'i bden pa bzhi shes pa'i ngo bo nyid de la sbyor ba'i yan lag ni de snying por bya ba'i dngos po yin no/ /de yang gus pas sbyor ba'i sbyor ba dang rtag tu sbyor ba'i sbyor bas de snying por bya ba ste/ de gus par sbyor ba'i sbyor bas ni de chud mi za bar 'gyur la/rtag tu sbyor ba'i sbyor bas ni de mthar phyin par 'gyur bas na de ltar chud mi za ba dang / mthar phyin pa'i sbyor bas sems gnas pa'i dngos po de snying por bya ba'i phyir des ni sbyor ba'i yan lag bstan to/ / rnam pa'i yan lag gang zhe na/ de'i rnam pa'i dngos po zhes bya bas bstan te/ sems gnas pa'i dngos po 'phags pa'i bden pa bzhi shes pa'i ngo bo nyid de'i rnam pa'i dngos po gang zhe na/ zhi gnas kyi rnam pa dang / lhag mthong gi rnam pa dang / zung du 'brel ba'i rnam pa'o/ /de la zhi gnas kyi rnam pa ni sems gnas pa dgu dang /stobs drug dang / yid la byed pa bzhi sngar bstan pa dag go/ /zung du 'brel ba'i rnam pa ni zhi gnas dang lhag mthong gnyis 'dres par gyur te mnyam par zung du 'jug pa'i sems rtse gcig pa nyid yid la byed pa gang yin pa ste/de dag gis ni sems gnas pa'i dngos po de'i rnam pa'i yan lag bstan to/ /dmigs pa'i yan lag gang zhe na/ de'i dmigs pa'i dngos po zhes bya bas bstan te/ sems gnas pa'i dngos po 'phags pa'i bden pa bzhi shes pa'i ngo bo nyid de'i rnam pa'i dngos po ji skad bstan pa de'i dmigs pa'i dngos po gang zhe na/zhi gnas kyi dmigs pa'i rnam par rtog pa med pa'i gzugs brnyan no/ /lhag mthong gi rnam pa'i dmigs pa ni rnam par rtog pa dang bcas pa'i gzugs brnyan no/ /zung du 'brel ba'i rnam pa'i dmigs pa ni dngos po'i mtha' dang dgongs pa yongs su grub pa ste/de dag gis ni sems gnas pa'i dngos po de'i dmigs pa'i yan lag bstan to/ /yid la byed pa'i yan lag gang zhe na/ spangs pa dang ma spangs pa dpyod pa la mkhas pa'i dngos po zhes bya bas bstan te/ sems gnas pa'i dngos po 'phags pa'i bden pa bzhi shes pa'i ngo bo nyid de'i yid la byed pa'i dngos po gang zhe na/yid la byed pa bdun po mtshan nyid so sor rig pa'i yid la byed pa dang / mos pa las byung ba'i yid la byed pa dang / rab tu dben pa'i yid la byed pa dang / dpyod pa'i yid la byed pa dang /dga' ba sdud pa'i yid la byed pa dang / sbyor ba mthar thug pa'i yid la byed pa dang / sbyor ba mthar thug pa'i 'bras bu'i yid la byed pa thams cad yin mod kyi/ skabs 'dir ni gtso cher dpyod pa'i yid la byed pa bstan pa'i dbang du mdzad nas/ spangs pa dang ma spangs pa dpyod pa la mkhas pa'i dngos po zhes bya ba gsungs te/ de yang bsgom pa'i lam thams cad la nyon mongs pa spangs pa dang ma spangs pa so sor brtags shing dpyad nas lam ji ltar thob pa goms par byed pa'i yid la byed pa yin mod kyi/ skabs 'dir mnyam par gzhag pa'i sa thams cad bsgom pa'i lam zhes bya ba'i sgras bsdus pa'i rdzu 'phrul gyi rkang pa bzhi bsgom pa'i gnas skabs kyi dpyod pa'i yid la byed pa dang sbyar te/des ni sems gnas pa'i dngos po de'i yid la byed pa'i dngos po bstan to/ /mi mthun pa'i phyogs kyi yan lag gang zhe na/de la rnam par g.yeng ba'i dngos po zhes bya bas bstan to/ /sems gnas pa'i dngos po 'phags pa'i bden pa bzhi shes pa'i dngos po de la rnam par g.yeng ba'i dngos po gang zhe na/ rnam pa lnga ste/ yid la byed pa'i rnam par g.yeng ba dang /phyi rol du sems rnam par g.yeng ba dang / nang du sems rnam par g.yeng ba dang / mtshan ma'i rnam par g.yeng ba dang / gnas ngan len gyi rnam par g.yeng ba'o/ /de dag gi rab tu dbye ba ni sngar 'phags pa byams pa'i le'ur rgya cher bstan pa bzhin te/ des ni sems gnas pa'i dngos po de'i mi mthun pa'i phyogs kyi yan lag bstan to//gnyen po'i yan lag gang zhe na/ de la rnam par mi g.yeng ba'i dngos po zhes bya bas bstan te/ sems gnas pa'i dngos po 'phags pa'i bden pa bzhi shes pa'i ngo bo nyid de las rnam par mi g.yeng ba'i dngos po gang zhe na/rnam par g.yeng ba'i dngos po lnga po de nyid nye bar zhi bar 'gyur ba gang yin pa ste/ des ni sems gnas pa'i dngos po de las rnam par g.yeng ba'i gnyen po'i yan lag bstan to/ /gnyen po'i gnas kyi yan lag gang zhe na/ rnam par mi g.yeng ba'i gnas kyi dngos po zhes bya bas bstan te/sems gnas pa'i dngos po 'phags pa'i bden pa bzhi shes pa'i ngo bo nyid de las rnam par mi g.yeng ba'i gnas kyi dngos po gang zhe na/ gcig tu zhi gnas bsgom pa rgyun chags su yid la byed pas bar chad med pa'i sems yid la byed pa dang /gcig tu lhag mthong bsgom pa rgyun chags su yid la byed pas sems kyi mtshan ma nyid yid la byed pa dang / zhi gnas dang lhag mthong gnyis 'dres par gyur te mnyam par zung du 'jug pa sems rtse gcig pa nyid yid la byed pa gang yin pa ste/de dag gis ni sems gnas pa'i dngos po de las rnam par g.yeng ba'i dngos po de'i gnyen po rnam par mi g.yeng ba'i gnas kyi yan lag bstan to/ /gnyen po bsgom pa las mi nyams pa'i thabs kyi yan lag gang zhe na/ bsgom pa las yongs su skyo ba'i sbyor ba bsal ba'i dngos po zhes bya bas bstan te/sems gnas pa'i dngos po 'phags pa'i bden pa bzhi shes pa'i ngo bo nyid de bsgom pa las yongs su sbyor ba'i sbyor ba ni gang / de bsal ba'i dngos po ni gang zhe na/ de bsgom pa la yongs su skyo ba'i sbyor ba ni zhi gnas kyi rgyu mtshan yid la mi byed pa dang /rab tu 'dzin pa'i dpe'i rgyu mtshan yid la mi byed pa dang / btang snyoms kyi rgyu mtshan yid la mi byed pa'o/ /de bsal ba'i dngos po ni de dag yid la byed pa'o/ /de la zhi gnas kyi rgyu mtshan ni gang / rab tu 'dzin pa'i rgyu mtshan ni gang /btang snyoms kyi rgyu mtshan ni gang zhe na/ sems rgod pa'am rgod du dogs pa na kun du skyo bar 'gyur ba dang mthun pa'i chos rnams dang / bar chad med pa'i sems de yid la byed pa gang yin pa de ni zhi gnas kyi rgyu mtshan zhes bya'o/ /sems bying ngam bying du dogs pa na mngon par dga' bar 'gyur ba dang mthun pa'i chos rnams dang /sems kyi mtshan ma de yid la byed pa gang yin pa de ni rab tu 'dzin pa'i rgyu mtshan zhes bya'o/ /zhi gnas la gcig tu nges pa'am/ lhag mthong la gcig tu nges pa'am/ zung du 'brel ba'i lam yang rung ste/de gnyi ga'i nye ba'i nyon mongs pas nye bar nyon mongs pa med pa la sems rang gi ngang gis 'jug pa na yid la byed pa na lhun gyis grub pa gang yin pa de ni btang snyoms kyi rgyu mtshan zhes bya ste/ de dag gis ni sems gnas pa'i dngos po de las rnam par g.yeng ba'i gnyen po rnam par mi g.yeng ba bsgom pa la mi nyams pa'i thabs kyi yan lag bstan to//de ltar dngos po bcu bzhis sems gnas pa'i dngos po de'i sa dang / dmigs pa dang / ngo bo nyid dang / yan lag bstan pa de dag thams cad kyis ni sems gnas pa'i dngos po rdzu 'phrul gyi rkang pa bzhis ting nge 'dzin yongs su sbyong bar byed pa'i lam bstan pa de nyid kyi gnas skabs rgya cher bstan pa yin no//dbang po lnga ni/ bsgoms pa'i phan yon gyi dngos po zhes bya bas bstan te / des ni mngon par rtogs par bya ba la sbyor ba'i lam bstan to//de la bsgom pa ni rdzu 'phrul gyi rkang pa bzhi bsgom pa'o/ /de'i phan yon ni dbang po lnga skyes pa ste/ de dag skyes pas mngon par rtogs par bya ba'i sbyor ba'i lam thob par rig par bya'o/ /de la dbang po lnga po gang zhe na/ dad pa'i dbang po dang /brtson 'grus kyi dbang po dang / dran pa'i dbang po dang / ting nge 'dzin gyi dbang po dang / shes rab kyi dbang po'o/ /de la rim pa ji lta bu zhe na/ de ltar gnas pa'i dngos po rdzu 'phrul gyi rkang pa bzhis ting nge 'dzin yongs su sbyong bar byed pa'i lam thob cing ting nge 'dzin la gnas pa des nyon mongs pa'i bag la nyal yang dag par bcom pa dang /de'i gnyen po'i ting nge 'dzin yongs su rdzogs par thob pa dang / thar pa'i cha dang mthun pa'i dge ba'i rtsa ba rnams bskyed zin nas/ de'i gong du ting nge 'dzin yongs su rdzogs pa'i mtshan ma dang gnas ngan len chen po dang 'bring dang bral bar bya ba dang /nges par 'byed pa'i cha dang mthun pa'i dge ba'i rtsa ba dro bar gyur pa dang rtse mo gnyis bskyed par bya ba'i phyir dbang po rnams kyis sbyong ba'i lam chung ngu yang dag par rtsom par byed de/ de yang rdzu 'phrul gyi rkang pa bzhi ji ltar thob pa'i ting nge 'dzin la gnas ting nge 'dzin la brten nas lhag pa'i sems kyi bslab pa dang ldan pa'i shes rab kyi bslab pa la rnal 'byor du byed pa ni dbang po lnga dag rim gyis skye zhing de dag gis nges par 'byed pa'i cha dang mthun pa'i dge ba'i rtsa ba dro bar gyur pa dang rtse mo zhes bya ba gnyis thob par rig par bya'o//de yang dbang po lnga yang dmigs pa dang / ngo bo nyid dang / grogs dang / bsgom pa dang / bsgoms pa'i 'bras bur rig par bya ste/ de la dmigs pa gang zhe na/ 'phags pa'i bden pa bzhi rnams so / /ngo bo nyid gang zhe na/dad pa dang / brtson 'grus dang / dran pa dang / ting nge 'dzin dang / shes rab bo/ /grogs gang zhe na/ de dag dang mtshungs par ldan pa'i sems dang sems las byung ba'i chos rnams so/ /bsgom pa gang zhe na/ dad pa'i dbang po ni bden pa rnams la mngon par yid ches pa'i tshul gyis bsgom mo//brtson 'grus kyi dbang po ni mngon par yid ches pa skyes nas bde ba mngon par rtogs par bya ba'i phyir spro ba'i tshul gyis brtson 'grus rtsom par bsgom mo/ /dran pa'i dbang po ni brtson 'grus brtsams nas bden pa rnams la nye bar gnas pa'i dran pa mi brjed pa'i tshul gyis bsgom mo//ting nge 'dzin gyi dbang po ni bden pa rnams la nye bar gnas pa'i dran pa ma brjed pas sems rtse gcig pa'i tshul gyis bsgom mo/ /shes rab kyi dbang po ni bden pa rnams la sems rtse gcig tu mnyam par gzhag nas chos rab tu rnam par 'byed pa'i tshul gyis bsgom mo//bsgoms pa'i 'bras bu gang zhe na/ bden pa rnams myur du rtogs pa dang dro bar 'gyur ba dang / rtse mo chung ngu dang / 'bring dang / chen po dag skye bar 'gyur ro/ /de la dad pa'i dbang po gang zhe na/ de ltar ting nge 'dzin la gnas ting nge 'dzin la brten nas lhag pa'i sems kyi bslab pa dang /lhag pa'i shes rab kyi bslab pa la rnal 'byor du byed pa na/ ston pa dang nyan thos gzhan dag gis rtogs pa la mngon par yid ches pa dang / rab tu dang ba dang dad pa gang yin pa de ni dad pa'o/ /de ni dbang byed pa'i don gyis dad pa'i dbang po zhes bya ste/gang la dbang byed ce na/ 'jig rten las 'das pa'i chos skye ba dang brtson 'grus dang / ting nge 'dzin dang shes rab kyi dbang po la sogs pa skye ba la dbang byed pa yin no/ /brtson 'grus kyi dbang po gang zhe na/ mthong bas spang bar bya ba'i nyon mongs pa spang ba'i phyir sbyor ba las byung ba'i yang dag pa'i spong ba bzhi po dag ni 'dir brtson 'grus zhes bya'o//de yang dbang byed pa'i don gyis brtson 'grus kyi dbang po zhes bya ste/ gang la dbang byed ce na/ 'jig rten las 'das pa'i chos skye ba dang dran pa dang ting nge 'dzin dang shes rab kyi dbang po la sogs pa skye ba la dbang byed pa yin no//dran pa'i dbang po gang zhe na/ phyin ci log ma lus par spong ba'i phyir 'jug par 'gyur ba'i dran pa nye bar gzhag pa bzhi po dag ni 'dir dran pa zhes bya'o/ /de yang dbang byed pa'i don gyis dran pa'i dbang po zhes bya ste/gang la dbang byed ce na/ 'jig rten las 'das pa'i chos skye ba dang / ting nge 'dzin dang shes rab kyi dbang po la sogs pa skye ba la dbang byed pa yin no/ /ting nge 'dzin gyi dbang po gang zhe na/ phyir mi 'ong ba nyid du sbyor ba las byung ba'i bsam gtan bzhi po dag ni 'dir ting nge 'dzin zhes bya'o//de yang dbang po byed pa'i don gyis ting nge 'dzin gyi dbang po zhes bya ste/ gang la dbang byed ce na/ 'jig rten las 'das pa'i chos skye ba dang / shes rab kyi dbang po la sogs pa skye ba la dbang byed pa yin no/ / shes rab kyi dbang po gang zhe na/ 'phags pa'i bden pa bzhi po dag mngon par rtogs par bya ba dang / dge sbyong gi tshul gyi 'bras bu thob par bya ba'i phyir 'jug par 'gyur ba'i bden pa shes pa dag ni 'dir shes rab ces bya'o/ /de yang dbang byed pa'i don gyis shes rab kyi dbang po zhes bya ste/gang la dbang byed ce na/ 'jig rten las 'das pa'i chos skye ba la dbang byed pa yin no / /dbang po lnga ni de dag gi don dang rnam par gzhag pa dang rab tu dbye ba bstan te/ de la dbang po lnga'i don gang zhe na/ dbang byed pa'i don to/ /ji zhig yongs su bstan pa'i don du dbang byed ce na/gzhi de dang de la chos de dang de dag la gtso bor yongs su bstan pa'i don du dbang byed do/ /de la dbang po lnga'i rnam par gzhag pa gang zhe na/ dbang po lnga ni 'jig rten pa'i rnam par dag pa la dbang byed pa'i don dang /rnam par byang ba la dbang byed pa'i don dang / kun nas nyon mongs pa'i gnyen po la dbang byed pa'i don dang / lus rnam par grol ba la dbang byed pa'i don dang / sems can gyi mngon par mtho ba'i thabs la dbang byed pa'i don dang / sems can gyi yon tan dang skyon yongs su bstan pa la dbang byed pa'i don dang /dad pa nas shes rab kyi bar ni 'di lta bu dang ldan zhes bya ba la dbang byed pa'i don dang / dge sbyong gi tshul gyi 'bras bu la sbyor ba'i lam dbang byed pa'i don gyis rnam par gzhag pa'o/ /de la dbang po lnga'i rab tu dbye ba ni dbang po lnga dag gis ci byed ce na/bde 'gror skye ba dang mya ngan las 'das pa'i tshogs yongs su rdzogs par byed pa dang / dbang po de dag gi rjes su yod pa yin pa dang / de dag ni sems las byung bas bsdus pa yin pa dang / de dag ni 'dus byas yin pa dang /de dag ni dge ba yin pa dang / de dag ni rnam par smin pa dang bcas pa yin pa dang / de dag gi phyogs gcig ni rnam par smin pa med pa ma yin pa dang / de dag gi sa bon rnam par smin pa ma yin pa ma yin pa dang de dag nyid rnam par smin pa ma yin pa las skyes pa yin pa dang /de dag ni khams gsum du gtogs pa yin pa dang / khams gsum du ma gtogs pa yang yin pa dang / sa thams cad dmigs pa yin pa dang / zag pa dang bcas pa dang / zag pa med pa yang ma yin pa dang / spang bar bya ba dang spang bar bya ba ma yin pa dang /'jig rten pa dang 'jig rten las 'das pa yang yin no zhes bya ba la sogs pa rab tu dbye ba'o/ /de dbang po de dag kun du bsten zhing goms par byas lan mang du byas pa'i rgyus nges par 'byed pa'i cha dang mthun pa'i dge ba'i rtsa ba bzhi po dag las dro bar gyur pa dang rtse mo chung ngu dang 'bring dang chen po dag skyed par byed do//de la dro bar gyur pa ni snang ba thob pa'i rtse mo ni snang ba mched pa ste/ dper na mes me'i bya ba byed par 'dod cing me don du gnyer ba'i mi la la zhig gis gtsub gtan gyi steng du gtsub shing gtsubs te mngon par gtsubs shing 'bad par byed/sgrim par byed/ rtsol bar byed na/ de'i 'bad pa dang / sgrim pa dang rtsol ba'i sgo nas gtsub gtan las drod skye bar 'gyur ro/ /drod de nyid mngon par 'phel bas na rtse mor 'byung ba de bzhin du ji ltar gtsub gtan gyi steng du gtsub shing gtsubs te mngon par gtsubs shing 'bad par byed/sgrim par byed/ rtsol bar byed / de ltar ni dbang po lnga dag la kun du bsten zhing goms par byed lan mang du byed par blta bar bya'o/ /ji ltar dang po kho nar gtsub gtan las drod skye bar 'gyur ba de ltar ni me de lta bus nyon mongs pa'i bud shing sreg par byed pa rnams skye ba'i sngon du 'gro zhing rgyur 'gyur ba'i dro bar gyur pa dag blta bar bya'o//ji ltar drod de nyid mngon par 'phel ba na rtse mor byung ba de ltar ni dro bar gyur pa de dag nyid shas cher 'phel ba'i rtse mo dag la blta bar bya'o/ /de la dro bar gyur pa thob pa ni brgya la yongs su nyams na yang nam zhig na nges par mya ngan las 'das pa'i chos can yin no//rtse mo thob pa ni brgya la yongs su nyams shing ngan song du 'gro ba dang / mtshams med pa dag byed pa yang dge ba'i rtsa ba rnams mi 'chad pa'i chos can yin no/ /de ltar dbang po lnga po de dag las /stobs lnga ni/ de brtan pa'i dngos po zhes bya bas bstan te/ des ni mngon par rtogs pa dang 'dres pa'i lam bstan to/ /de la de zhes bya ba ni dbang po'o/ /brtan pa zhes bya ba ni stobs te dbang po de brtan zhing stobs su gyur pa na mngon par rtogs pa dang 'dres pa'i lam thob par rig par bya'o//de la stobs lnga gang zhe na/ dad pa'i stobs dang / brtson 'grus kyi stobs dang / dran pa'i stobs dang / ting nge 'dzin gyi stobs dang / shes rab kyi stobs so/ /de la rim pa ji lta bu zhe na/ de ltar bsgoms pa'i phan yon gyi dngos po dbang po lngas mngon par rtogs par bya ba la sbyor ba'i lam thob pa des ting nge 'dzin yongs su rdzogs pa'i mtshan ma dang gnas ngan len chen po dang 'bring dang bral zhing nges par 'byed pa'i cha dang mthun pa'i dge ba'i rtsa ba dro bar gyur pa dang rtse mo thob ste/sbyor ba'i lam chung ngu dang 'bring yang dag par brtsams nas/de'i gong du yang ting nge 'dzin yongs su rdzogs pa'i mtshan ma dang gnas ngan len chung ngu dang 'bring dang bral bar bya ba dang / nges par 'byed pa'i cha dang mthun pa'i dge ba'i rtsa ba bden pa dang rjes su mthun pa'i bzod pa dang / 'jig rten pa'i chos kyi mchog gnyis bskyed par bya ba'i phyir stobs rnams kyi sbyor ba'i lam chen po yang dag par brtson par byed par rig par bya'o//de la stobs lnga yang dmigs pa dang / ngo bo nyid dang / grogs dang / bsgom pa dang / bsgoms pa'i 'bras bus rig par bya ste/ dmigs pa dang /ngo bo nyid dang / grogs dang / bsgom pa ni dbang po rnams ji lta ba bzhin du rig par bya'o/ /bsgoms pa'i 'bras bu gang zhe na/ bden pa rnams myur du mngon par rtogs pa dang / bden pa dang rjes su mthun pa'i bzod pa chung ngu dang 'bring dang chen po dang 'jig rten pa'i chos kyi mchog skye bar 'gyur ro//de la dad pa dang / brtson 'grus dang / dran pa dang / ting nge 'dzin dang / shes rab kyi ting nge 'dzin ni sngar dbang po lnga'i skabs su bstan pa kho na dag yin no/ /de la bye brag ni 'di yod de/ dbang po rnams la ni dbang byed pa'i don gyis rnam par gzhag go//'dir stobs rnams la ni de dag nyid brtan zhing stobs dang ldan pas mi choms pa'i don gyis stobs rnams zhes bya ste/ ci zhig gis mi choms she na/ de dag ni ma dad pa la sogs pa mi mthun pa'i phyogs rnams dang mi 'dre zhing lha 'am bdud dam tshangs pa'am/su yang 'jig rten na chos dang mi mthun pas mi 'phrogs pa dang nyon mongs pa'i kun nas dkris pas mi 'phrogs pas na de'i phyir mi choms pa zhes bya'o/ /de stobs de dag gis stobs dang ldan par gyur pas bdud kyi stobs thams cad las rnam par rgyal bar byas te/zag pa rnams zad par bya ba'i phyir rab tu brtson par byed pas na de'i phyir stobs rnams zhes bya'o/ /de stobs de dag kun du bsten zhing goms par byas lan mang du byas pa'i rgyus nges par 'byed pa'i cha dang mthun pa'i dge ba'i rtsa ba gzhan gnyis po bden pa dang rjes su mthun pa'i dpe bzod pa chung ngu dang 'bring dang chen po dang 'jig rten pa'i chos kyi mchog skyed par byed do//de la bden pa dang rjes su mthun pa'i bzod pa ni de kho na'i don gyis phyogs gcig la rjes su zhugs pa yin no/ /'jig rten pa'i chos kyi mchog ni bar chad med pa'i ting nge 'dzin yin te/dper na me'i drod 'dod pa de nyid mngon par 'phel ba'i rtse mor byung ba na du ba 'thul bar 'gyur ro/ /rgya cher mngon par 'phel bar byed pa na/ me lce med pa'i me 'byung bar 'gyur ro/ /de bzhin du ji ltar du ba 'thul ba de ltar ni bden pa dang rjes su mthun pa'i bzod pa rnams blta bar bya'o//ji ltar mngon par rgya cher 'phel bar gyur pa na me lce med pa'i me 'byung bar 'gyur ba de ltar ni 'jig rten pa'i chos kyi mchog blta bar bya ste/ de ni skad cig gcig kho nar zad do/ /de la bden pa dang rjes su mthun pa'i bzod pa thob pa ni brgya la yongs su nyams kyang ngan song du mi 'gro ste/bde 'gro'i las dang / nyon mongs pa thag bsrings pa'i phyir ro/ /bzod pa thob pa kho nas 'gro ba dang skye gnas dang skye ba dang / lus dang srid pa dang nyon mongs pa rnams las kha cig gis mi skye ba'i chos nyid thob ste/ngan song gi 'gro ba rnams dang / sgo nga las skyes pa dang / drod gsher las skyes pa'i skye gnas dang / 'du shes med pa'i sems can dang / byang gi sgra mi snyan dang / tshangs pa chen por skye ba rnams dang / za ma dang ma ning mtshan gnyis pa'i lus rnams dang / brgyad la sogs pa'i srid pa rnams dang /mthong bas spang bar bya ba'i nyon mongs pa'i dpe kun nas dkris pa rnams kyis mi skye ba'i chos nyid thob bo/ /'jig rten pa'i chos kyi mchog thob pa ni bar chad med par skad cig gnyis pa la mthong ba'i lam thob pa'i chos nyid yin no/ /de la gang zag nyan thos kyi rigs can gyis dro bar gyur pa dang rtse mo gnyis thob pa ni nyan thos kyi rigs las bzlog nas sangs rgyas kyi rigs su 'gyur bar srid kyi/bzod pa thob pa ni de lta bu mi srid do / /des bzod pa man chad gsum thob pa ni nyan thos kyi rigs las bzlog ste/rang sangs rgyas su 'gyur bar srid kyi/ 'jig rten pa'i chos kyi mchog thob pa ni de lta bu mi srid do/ /rang sangs rgyas bse ru lta bu dang / sangs rgyas kyi rigs can rnams ni nges par 'byed pa'i cha dang mthun pa bzhi po gang las kyang bzlog tu mi rung ste/ de gnyis ni g.yo ba dang gsal ba'i phyir bsam gtan bzhi pa kho na la brten te/rgyun chags kho nar nges par 'byed pa'i cha dang mthun pa rnams nas bzung ste/ byang chub kyi bar du skyed par byed pa'i phyir ro/ /rang sangs rgyas kyi tshogs na spyod pa'i rigs can rnams ni nyan thos dang 'dra bar bzlog tu rung ngo //de la theg pa gsum po gang yang rung ba'i rigs can gyis gang zag rnams tshe dang po kho na la sems bskyed pa la sogs pa'i sbyor ba byas te/ nges par 'byed pa'i cha dang mthun pa rnams bskyed pa dang / 'phags pa'i lam skyed par byed pa yod dam zhe na/ de lta bu ni med de/thams cad pas shin tu myur ba yang dper na sa bon 'debs pa dang lo tog skye ba dang 'bras bu chags pa bzhin du tshe dang po gcig la ni thar pa'i cha dang mthun pa'i dge ba'i rtsa ba skyed par byed do/ /tshe gnyis pa la ni nges par 'byed pa'i cha dang mthun pa'i dge ba'i rtsa ba skyed par byed do//tshe gsum pa la ni 'phags pa'i lam skyed par byed de/ chos nyid 'di la ni rgyud rim gyis 'jug pa dang yongs su smin pa dang rnam par grol bar 'gyur ro/ /de ltar stobs de dag ni mngon par rtogs pa dang 'dres pa'i lam yin pas na de brtan pa'i dngos po zhes bya ste/de tsam gyis na ting nge 'dzin yongs su rdzogs pa'i mtshan ma dang gnas ngan len chung ngu dang bral zhing nges par 'byed pa'i cha dang mthun pa'i dge ba'i rtsa ba dang bden pa dang rjes su mthun pa'i bzod pa dang 'jig rten pa'i chos kyi mchog thob ste/ sbyor ba'i lam chen po yang dag par brtsams pa yin par rig par bya'o//byang chub kyi yan lag bdun ni/ 'phags pa'i dbang phyug bsdu ba'i dngos po zhes bya bas bstan te/ des ni mngon par rtogs pa'i lam bstan to/ /de la 'phags pa'i dbang phyug ni mngon par rtogs pa dang / mthong ba'i lam mo//de sdud pa'i dngos po ni mngon par rtogs pa'i lam ste/ byang chub kyi yan lag bdun no/ /de dag skyes pa'i dus na 'phags pa'i dbang phyug bsdus shing mthong ba'i lam thob par rig par bya'o/ /de la byang chub kyi yan lag bdun gang zhe na/ dran pa yang dag byang chub kyi yan lag dang /chos rnam par 'byed pa yang dag byang chub kyi yan lag dang / brtson 'grus yang dag byang chub kyi yan lag dang / dga' ba yang dag byang chub kyi yan lag dang / shin tu sbyangs pa yang dag byang chub kyi yan lag dang / ting nge 'dzin yang dag byang chub kyi yan lag dang /btang snyoms yang dag byang chub kyi yan lag go/ /de la rim pa ji lta bu zhe na/ de ltar bstan pa'i dngos po stobs lngas mngon par rtogs pa dang 'dres pa'i lam thob pa des ting nge 'dzin yongs su rdzogs pa'i mtshan ma dang gnas ngan len chung ngu dang bral zhing nges par 'byed pa'i cha dang mthun pa'i dge ba'i rtsa ba bden pa dang rjes su mthun pa'i bzod pa dang /'jig rten pa'i chos kyi mchog thob ste/ sbyor ba'i lam chen po yang dag par brtsams pa na/ de'i gong du sbyor ba yang dag par brtsams pa'i byang chub kyi yan lag rnams kyi yang dag pa'i mtha' rtogs par byed par rig par bya'o//de yang ji lta bu zhe na/ 'jig rten pa'i chos kyi mchog gi mjug thogs su sdug bsngal la chos shes pa'i bzod pa zag pa med pa skye ste/ de skyes na 'phags pa'i gang zag ces kyang bya/ mthong ba'i lam thob pa zhes kyang bya'o//de'i mjug thogs su sdug bsngal la chos shes pa dang / sdug bsngal rjes su rtogs par shes pa'i bzod pa dang / sdug bsngal la rjes su rtogs par shes pa nas lam la rjes su rtogs par shes pa'i bar gyi skad cig bco lnga po de dag skye ste/ de tsam gyis na mthong ba'i lam yongs su rdzogs pa zhes kyang bya'o//de dag kyang gang gis yongs su rdzogs par byed ce na/ dper na me lce med pa'i me de byung ma thag kho nar me lce byung bar gyur te/ me lce byung zhing 'bar ba des me'i bya ba byed pa de bzhin du ji ltar me lce byung bar gyur te me lce byung zhing 'bar ba des me'i bya ba byed pa de ltar ni gang zag 'jig rten pa'i chos kyi mchog gis yang dag par zin pa'i dbang po lnga po dag gi mjug thogs kho nar byung ba 'jig rten las 'das pa zag pa med pa'i chos rnams blta bar bya'o//de dag kyang gang zhe na/ byang chub kyi yan lag bdun po dag ste/yang dag pa nyid skyon med pa la zhugs pa'i gang zag gis yang dag pa ji lta ba bzhin du rtogs pa de ni byang chub ces bya'o/ /de'i yan lag tu gyur pa ni byang chub kyi yan lag rnams zhes bya ste/ de dag gis sdug bsngal la chos shes pa'i bzod pa zag pa med pa nas lam la rjes su rtogs par byed pa'i bzod pa'i bar gyi mthong ba'i lam gyi skad cig bco lnga po dag yongs su rdzogs par byed do//de la nyan thos dang rang sangs rgyas kyi rnam par gzhag pa'i bden pa la dmigs shing yang dag pa'i mtha' mngon du byed pa'i tshul gyis yongs su rdzogs par byed do//byang chub sems dpa' ni rnam par ma bzhag pa'i bde ba la dmigs shing yongs su 'dris pa'i shes pas yongs su rdzogs par byed do / /spyi'i tshul ni de lta'o/ /de la byang chub kyi yan lag bdun yang dmigs pa dang / ngo bo nyid dang / grogs dang / bsgom pa dang / bsgoms pa'i 'bras bus rig par bya ste/ de la dmigs pa gang zhe na/ 'phags pa'i bden pa bzhi po dag gis yang dag pa nyid ji lta ba'o/ /ngo bo nyid gang zhe na/ dran pa dang / chos rnam par 'byed pa dang / brtson 'grus dang / dga' ba dang / shin tu sbyangs pa dang /ting nge 'dzin dang / btang snyoms so/ /de la dran pa ni yang dag pa nyid skyon med pa la zhugs pa'i gang zag gis yang dag pa ji lta ba nyid bzhin du rtogs pa'i byang chub de'i gnas kyi yan lag go/ /chos rnam par 'byed pa ni ngo bo nyid kyi yan lag go/ /brtson 'grus ni nges par 'byung ba'i yan lag go//dga' ba bzhi ni phan yon gyi yan lag go/ /shin tu sbyangs pa dang ting nge 'dzin dang btang snyoms ni de'i kun nas nyon mongs pa med pa'i gzhi dang gnas dang ngo bo nyid kyi yan lag ste/ gang gis kyang kun nas nyon mongs par mi 'gyur ba dang / gang du yang kun nas nyon mongs par mi 'gyur ba dang / kun nas nyon mongs pa med pa ste go rims bzhin no/ /grogs gang zhe na/ de dag dang mtshungs par ldan pa sems dang sems las byung ba'i chos rnams so/ /bsgom pa gang zhe na/ dran pa yang dag byang chub kyi yan lag dben pa la gnas pa 'dod chags dang bral ba la gnas pa 'gog pa la gnas pa rnam par spong ba yongs su bsngos pa bsgom pa dang /lhag ma rnams la yang de bzhin no/ /'dis ni bden pa la dmigs pa byang chub kyi yan lag bsgom par yongs su bstan to/ /bsgoms pa'i 'bras bu gang zhe na/mthong bas spang bar bya ba'i nyon mongs pa rnams spangs pa'o/ /de la dran pa yang dag byang chub kyi yan lag gang zhe na/ shes bya mi shes pa shes par bya ba'i phyir shes pa thams cad la dran pa dpyod pa ni dran pa'o/ /yang dag ces bya ba ni mthong ba'i lam gyi bar chad med pa'i lam dang rnam par grol ba'i lam gyis rab tu phye ba'o//byang chub kyi yan lag ces bya ba ni mthong ba'i lam gyi yang dag pa nyid med pa la zhugs pa'i gang zag gi yang dag pa ji lta ba bzhin du rtogs pa gang yin pa de ni byang chub ces bya ste/ de'i yan lag dang 'khor dang yo byad dang rgyu zhes bya ba'i rnam grangs so//dben pa la gnas pa zhes bya ba ni chos shes pa'i bzod pa bzhi skyes nas bden pa bzhi mthong bas spang bar bya ba'i nyon mongs pa'i 'dod pa'i khams su gtogs pa rnams kyis thob pa nas bzung ste/ 'gag pa ni dben pa zhes bya ste/de la byang chub kyi yan lag de gnas pa'o/ /'dod chags dang bral ba la gnas pa zhes bya ba ni chos shes pa bzhi yang de dag gis mya ngan las 'das pa thob pa nas bzung ste skye ba ni 'dod chags dang bral ba zhes bya ste/ de la byang chub kyi yan lag gnas pa'o//'gog pa la gnas pa zhes bya ba ni rjes su rtogs par shes pa'i bzod pa bzhi skyes nas bden pa bzhi mthong bas spang bar bya ba'i nyon mongs pa dang gzugs dang / gzugs med pa'i khams su gtogs pa rnams kyis thob pa nas bzung ste 'gag pa ni 'gag pa zhes bya ste/de la byang chub kyi yan lag de gnas pa'o/ /rnam par spong bar yongs su bsngos pa zhes bya ba la/ de rnam par spong ba zhes bya ba ni mya ngan las 'das pa'o/ /der yongs su bsngos pa zhes bya ba ni skad cig ma bcu drug pa lam la rjes su rtogs par shes pa ni bsgom pa'i lam yin pas de ma gtogs pa mthong ba'i lam du gtogs pa rjes su rtogs par shes pa gsum po dag kyang de dag gi mya ngan las 'das pa thob pa nas bzung ste skye ba ni da dung bsgom pas spang bar bya ba'i nyon mongs pa thams cad ma lus par spang ba'i thob pa nas bzung ste skyes pa ma yin gyi de dang mthun pa'am der gzhol ba'am der yongs su bsngos pa tsam du zad pas rnam par spong ba yongs su zad pa zhes bya ste/mthong ba'i lam gyis byang chub kyi yan lag de der yongs su bsngos pa yin no zhes bya ba'i tha tshig go/ /chos rnam par 'byed pa yang dag byang chub kyi yan lag gang zhe na/rtog pa dang mtshan ma thams cad 'joms shing de bzhin nyid rnam par 'byed pa ni chos rnam par 'byed pa'o/ /yang dag dang byang chub kyi yan lag dang / dben pa la gnas pa zhes bya ba la sogs pa'i tshig gi don ni snga ma bzhin te lhag ma thams cad la yang de bzhin du rig par bya'o//brtson 'grus yang dag byang chub kyi yan lag gang zhe na/ myur du mngon par shes pa thob par bya ba'i phyir brtson 'grus rab tu 'jug pa ni brtson 'grus so/ /dga' ba yang dag byang chub kyi yan lag gang zhe na/ brtson 'grus brtsams pas chos snang ba de'i dga' ba lus dang sems thams cad rtag tu dga' bar gyur pa ni dga' ba'o//shin tu sbyangs pa yang dag byang chub kyi yan lag gang zhe na/ gnas ngan len gyi sgrib pa thams cad rab tu bcom ste/ lus dang sems las su rung bar gyur na ni sems rab tu sbyangs pa'o//ting nge 'dzin yang dag byang chub kyi yan lag gang zhe na/ bsam pa'i don thams cad 'grub pa'i rten du gyur pa zhi gnas dang lhag mthong gi sems rtse gcig pa nyid ni ting nge 'dzin to/ /btang snyoms yang dag byang chub kyi yan lag gang zhe na/ rnam par mi rtog pa'i ye shes ni btang snyoms zhes bya ste/de dang de'i rjes la thob pa dag la 'jig rten pa'i ye shes kyi thams cad du kun nas nyon mongs pa med par ci 'dod pa bzhin du gnas so/ /byang chub kyi yan lag bdun po de dag ni zhi gnas kyi phyogs dang lhag mthong gi phyogs dang gnyi ga'i phyogs su gtogs pa yang yin te/de la chos rnam par 'byed pa dang / brtson 'grus dang / dga' ba gsum ni lhag mthong gi phyogs so/ /shin tu sbyangs pa dang / ting nge 'dzin dang / btang snyoms gsum ni zhi gnas kyi phyogs so/ /dran pa ni gnyis ka'i phyogs de kun nas nyon mongs pa zhes bya'o//de ltar byang chub kyi yan lag bdun po de dag ni mngon par rtogs pa'i lam yin pas na 'phags pa'i dbang phyug bsdu ba'i dngos po zhes bya ste/ de tsam gyis na sbyor ba yang dag par brtsams pa de'i byang chub kyi yan lag rnams kyis yang dag pa'i mtha' rtogs pa yin te /de'i tshe na nyan thos ni slob pa bzhi mthong ba chos rnams la chos kyi mig rdul med cing dri ma dang bral ba chos mthong ba chos thob pa chos rig pa chos rtogs pa som nyi las brgal ba the tshom las brgal ba gzhan gyi dring mi 'jog pa ston pa'i bstan pa la gzhan gyis mi bkri ba chos rnams la mi 'jigs pa thob pa rgyun du zhugs pa'i 'bras bu mngon sum du bya ba'i phyir zhugs pa yin no//skad cig ma bcu drug thob pa nas ni rgyun du zhugs pa'i 'bras bu la gnas pa yin no / /byang chub sems dpa'i yang dag pa nyid skyon med pa la de bzhin gshegs pa'i rigs su skyes pas sa dang po thob pa dang sa de'i phan yon yang nyams su myong ba yin par rig par bya'o//'phags pa'i lam yan lag brgyad pa ni/ 'phags pa'i phyogs dang 'khor bsdu ba'i dngos po zhes bya bas bstan te/des ni rnam par dag pa nges par 'byin pa'i lam bstan to/ /de la 'phags pa'i phyogs dang 'khor dang rnam par dag pa ste bsgom pa'i lam mo/ /de sdud pa'i dngos po ni rnam par dag par nges par 'byin pa'i lam ste/ 'phags pa'i lam yan lag brgyad pa'o/ /de skyes pa'i dus na 'phags pa'i phyogs dang 'khor bsdus shing bsgom pa'i lam thob par rig par bya'o/ /de la 'phags pa'i lam yan lag brgyad pa gang zhe na/ yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang / yang dag pa'i 'tsho ba dang / yang dag pa'i rtsol ba dang / yang dag pa'i dran pa dang / yang dag pa'i ting nge 'dzin to/ /de la rim pa ji lta bu zhe na/ de byang chub kyi yan lag rnams thob pa'i phyir de'i tshe na slob pa bzhi mthong ba'am byang chub sems dpa'i sa dang po yin te/de'i mthong bas spang bar bya ba'i nyon mongs pa rnams ni spangs zin gyi/ bsgom pas spang bar bya ba'i nyon mongs pa rnams lus pa na de dag spang ba'i phyir phung po gsum pa 'phags pa'i lam yan lag brgyad pa sgom par byed de/des sgrib pa thams cad las rnam par thar par 'gyur zhing bla na med pa yang dag par rdzogs pa'i byang chub kyi bar du rjes su thob par rig par bya'o/ /de la 'phags pa'i lam yan lag brgyad pa yang dmigs pa dang / ngo bo nyid dang / grogs dang / bsgom pa dang /bsgoms pa'i 'bras bus rig par bya ste / de la dmigs pa gang zhe na/ de'i 'og tu 'phags pa'i bden pa bzhi po rnams kyi yang dag pa nyid ji lta ba'o/ /ngo bo nyid gang zhe na/ 'phags pa'i lam yan lag brgyad pa ste/ de la yang dag pa'i lta ba ni bsgom pa'i lam gyi tshe mthong ba'i lam la yongs su gcod pa'i yan lag ste 'jig rten las 'das pa'i rjes la thob pa'i 'jig rten pa des rang gi rtog pa de yongs su gcod pa'i phyir ro//yang dag pa'i rtog pa dang yang dag pa'i ngag ni gzhan go bar byed pa'i yan lag ste kun nas slong ba dang bcas pa'i ngag gis de go bar byed pa'i phyir ro//yang dag pa'i ngag dang yang dag pa'i las kyi mtha' dang yang dag pa'i 'tsho ba gsum ni gzhan yid ches par byed pa'i yan lag ste/ yang dag pa'i ngag gis rnyed pa dang 'brel ba'i gtam rnam par gtan la 'bebs pas shes rab la yid ches par 'gyur ro//yang dag pa'i las kyi mtha' bya ba ma yin pa mi byed par tshul khrims la yid ches par 'gyur ro/ /yang dag pa'i 'tsho bas chos gos la sogs pa tshod zin par tshol bas yo byad bsnyungs pa la yid ches par 'gyur ro//yang dag pa'i rtsol ba dang yang dag pa'i dran pa dang / yang dag pa'i ting nge 'dzin ni mi mthun pa'i phyogs kyi gnyen po'am yan lag ste/ mi mthun pa'i phyogs ni rnam pa gsum ste/ bsgom pas spang bar bya ba nyon mongs pa dang / nyal ba'i nyon mongs pa dang / rgod pa'i dbang gis mi mthun pa'i phyogs yon tan khyad par can mngon par 'grub pa'i gegs su gyur pa'o/ /de la dang po'i gnyen po ni yang dag pa'i rtsol ba ste des lam bsgom pa'i phyir ro/ /gnyis pa'i gnyen po ni yang dag pa'i dran pa ste/zhi gnas la sogs pa'i rgyu mtshan rnams la dran pa shin tu nye bar gnas pas bying ba dang rgod pa med pa'i phyir ro/ /gsum pa'i gnyen po ni yang dag pa'i ting nge 'dzin te/ bsam gtan la gnas nas mngon par shes pa la sogs pa yon tan mngon par 'grub pa'i phyir ro//grogs gang zhe na/ de dag dang mtshungs par ldan pa sems dang sems las byung ba'i chos rnams so/ /bsgom pa gang zhe na/ byang chub kyi yan lag bzhi'o/ /bsgoms pa'i 'bras bu gang zhe na/ yongs su gcod pa dang gzhan go bar byed pa dang gzhan yid ches par byed pa dang nyon mongs pa'i sgrib pa rnam par dag pa dang nye ba'i nyon mongs pa'i sgrib pa rnam par dag pa dang yon tan khyad par can la sgrib pa rnam par dag cing bsgom zhes spang bar bya ba nyon mongs pa dang bral ba'o//de la yang dag pa'i lta ba gang zhe na/byang chub kyi yan lag gi dus de kho na rtogs shing thob pa gang yin pa dang / thob nas ji ltar rtogs shing khong du chud pa de nyid shes rab kyis rnam par 'jog par byed pa gang yin pa de gnyis gcig tu bsdus pa ni yang dag pa'i lta ba zhes bya'o//de yang mdor bsdu na rnam pa bcu gcig tu blta bar bya ste/ nad du lta ba dang / 'bras dang / zug rngu dang / sdig pa dang / mi rtag pa nyid dang / sdug bsngal ba nyid dang / stong pa nyid dang / bdag med pa nyid dang / kun du sbyor ba byed pa dang bral ba dang 'bral bar byed par blta'o//de la 'du byed rnam pa bzhi po nyon mongs pa'i kun nas dkris pa dang ldan pa rnams dang / nyon mongs pa'i bag la nyal dang ldan pa rnams dang / ro myang ba dang ldan pa rnams dang / nyes dmigs dang ldan pa rnams la ni yang dag pa'i lta ba bzhi po nad dang 'bras dang zug rngu dang sdig par lta ba dag go rims bzhin du rig par bya'o//'du byed rnams la 'byung ba dang 'jig par lta ba ni mi rtag pa nyid du lta ba yin no/ /sdug bsngal gsum dang rjes su 'brel par ldan pa ni sdug bsngal nyid du lta ba yin no/ /de la bdag dang bdag gi dang bral bar lta ba ni stong pa nyid du lta ba yin no//bdag dang bdag gi mtshan nyid med par lta ba ni bdag med pa nyid du lta ba yin te/ bzhi po de dag ni sdug bsngal gyi bden pa la mi rtag pa dang / sdug bsngal ba dang stong pa dang bdag med pa'i rnam par lta ba go rims bzhin no//kun 'byung ba'i bden pa la rgyu dang kun 'byung ba dang / rab tu skye ba dang rkyen du lta ba gang yin pa de ni kun du sbyor bar byed par lta ba zhes bya ste/ 'di ltar kun 'byung ba'i bden pa'i sdug bsngal gyi bden pa kun nas nyon mongs pa dang kun du sbyor bar byed pa yin pa'i phyir ro//'gog pa'i bden pa la 'gog pa dang zhi ba dang gya nom pa dang nges par 'byung bar lta ba gang yin pa de ni bral bar lta ba zhes bya ste/ 'gog pa'i bden pa ni nyon mongs pa dang phung po thams cad dang bral bas rab tu phye ba yin pa'i phyir ro/ /lam gyi bden pa la lam dang rigs pa dang sgrub pa dang /nges par 'byin par lta ba gang yin pa de ni 'bral bar byed par lta ba zhes bya ste/ 'di ltar lam gyi bden pa ni 'bral ba'i phyir 'gro ba yin pa'i phyir ro/ /gang gis tshe sngar mi rtag pa dang sdug bsngal ba dang stong pa dang bdag med par lta ba skye la /phyis nad dang 'bras dang zug rngu dang sdig par lta ba skye bar 'gyur ba de'i tshe ci'i phyir nad la sogs pa ston ce na/ gang zag mthong ba'i lam thob pa la dgongs nas nad la sogs pa sngar ston te/ 'di ltar slob ma mthong ba'i lam mthong ba ni lhag pa'i bsam pas phung po rnams la nad la sogs par lta la /de ltar lta ba de'i bsgom pas spang bar bya ba'i kun du sbyor ba lhag ma rnams spang ba'i phyir gong du mi rtag pa la sogs par lta ba dag ces yongs su dag par 'gyur ba'i phyir ro/ /mi rtag pa la sogs par lta ba de yang mdor bsdu na rnam pa gnyis te/ nad la sogs par lta ba ma thob par thob par bya ba'i phyir/sngar mi rtag pa la sogs par lta ba yongs su ma dag par ni tshogs kyi lam la sogs pa'i gnas skabs na so so'i skye bo rnams kyi'o/ /nad la sogs pa'i lta ba thob pa'i phyir zhing 'byung ba dang / sems shin tu rnam par grol bar bya ba'i phyir nad la sogs par lta ba la brten pa yongs su dag pa ni mthong ba'i lam la sogs pa'i gnas skabs na slob pa bzhi mthong ba rnams kyi'o//yang dag pa'i lta ba rnam pa bcu gcig po de dag la stong pa nyid dang bdag med pa gnyis ni rnam par thar pa'i sgo stong pa nyid kyi rnam pa yin no//lhag ma brgyad ni smon pa med pa'i rnam pa yin no/ /'gog pa'i bden pa la bral bar lta ba gang yin pa gcig pu ni mtshan ma med pa'i rnam pa yin te/ de ni yang dag pa'i lta ba'i rab tu dbye ba yin no/ /yang dag pa'i rtog pa gang zhe na/ re zhig rnam par rtog pa dag las sems 'jug par 'gyur na/yang dag pa'i lta ba de nyid kyi dbang du byas nas nges par 'byung ba'i rtog pa dang gnod sems med pa'i rtog pa dang rnam par 'tshe ba med pa'i rtog pa dang de lta bu dang mthun pa'i rtog pa dag la yang dag par rtog par byed pa gang yin pa'o//yang dag pa'i ngag gang zhe na/ gal te gtam las sems 'jug par 'gyur na yang dag pa'i lta ba de nyid kyi dbang du byas nas yang dag pa'i rtog pa dge ba de dag gis kun nas bslang ba'i gtam chos dang ldan pa 'di lta ste/ sems kyi sgrib pa spong ba dang mthun par 'gyur ba'i gtam mam/ tshul khrims kyi gtam mam/ ting nge 'dzin gyi gtam mam/ shes rab kyi gtam mam/ rnam par grol ba'i gtam mam/ rnam par grol ba'i shes pa dang mthong ba'i gtam mam/ 'dod pa chung ba'i gtam mam/chog shes pa'i gtam mam/ 'dod chags dang bral ba'i gtam mam/ 'gog pa'i gtam mam/ mi stsogs pa'i gtam mam/ 'du 'dzi med pa'i gtam mam/ rkyen 'di pa gnyis kyi rten cing 'brel par 'byung ba dang rjes su mthun pa'i gtam dag tshig 'bru 'byor ba dang /'brel ba dang / rjes su mthun pa dang / rjes su 'phrod pa dang / thabs dang ldan pa dang / 'tsham pa dang mthun pa dang 'grus skyong gi yan lag gi tshogs dang ldan par zer ba gang yin pa'o/ /yang dag pa'i las kyi mtha' gang zhe na/ gal te las kyi mtha' la spyod par gyur na yang dag pa'i lta ba de nyid kyi dbang du byas nas 'gro ba dang ldog pa la shes bzhin du spyod par byed pa dang cung zad bltas pa dang rnam par bltas pa dang / bskum pa dang / brkyang ba dang / snam sbyar dang / chos gos dang / lhung bzed dang bcas pa dang /zos pa dang / 'thungs pa dang / 'chos pa dang / myangs pa dang / song ba dang / sdod pa dang / 'dug pa dang / nyal ba dang / mi nyal ba dang / smra ba dang / mi smra ba dang / gnyid kyi snyom pa bsang ba la yang shes bzhin du spyod par byed pa gang yin pa'o/ / yang dag pa'i 'tsho ba gang zhe na/ gal te 'tsho ba'i yo byad bsgrubs par gyur na yang dag pa'i lta ba de nyid kyi dbang du byas nas chos gos dang / bsod snyoms dang / mal stan dang / nad kyi gsos sman dang / yo byad dag chos kyis yongs su tshol bar byed cing log pas 'tsho bar byed pa'i tshul 'chos dang /kha gsag dang / gzhogs slong dang / thob kyis 'jal ba dang / rnyed pas rnyed par byed 'dod pa dag rnam par spang ba gang yin pa'o/ /de ltar spong ba yang dag par bsdus pa yang dag pa'i ngag dang / las kyi mtha' dang / 'tsho ba de gsum ni des dang po kho nar mthong ba'i lam la zag pa med pa'i yid la byed pa thob pa na byang chub kyi yan lag rnams dang lhan cig kho nar thob pa yin te/de dag ni 'phags pa dgyes pa'i tshul khrims rnams zhes bya'o/ /ci'i phyir zhe na/ 'di ltar de ni 'phags pa dam pa yang dag par spong ba rnams ci nas kyang bdag gis ngag gi nyes par spyad pa dang /lus kyis nyes par spyad pa dang / log pas 'tsho ba dag mi bya ba'i sdom pa de thob par bya'o zhes yun ring po nas dgyes pa dang sdug pa dang phangs pa dang thugs su 'thad par mdzad pa yin te/ de dag gis yun ring po nas dgyes pa dang sdug pa dang phangs pa dang thugs su 'thad pa mdzad pa gang yin pa de/des de'i tshe na thob pas na de ni 'phags pa dgyes pa zhes bya'o/ /de ltar 'phags pa dgyes pa'i tshul khrims mngon par rtogs pa na shes bzhin du brdzun gyi tshig smra bar mi byed/ bsams bzhin du srog chags kyi srog gcod par mi byed/ma byin par len par mi byed/ 'dod pas log par g.yem par mi byed/ chos ma yin pas chos gos la sogs pa yongs su tshol bar mi byed pas na de ltar 'phags pa dgyes pa'i tshul khrims de dag nyid kyi dbang du byas te bsgom pa'i lam gyi tshe dag 'jug pa gang yin pa dang /lus kyi las gang yin pa dang / 'tsho ba gang yin pa de dag kyang yang dag pa'i ngag dang las kyi mtha' dang 'tsho ba zhes bya'o/ /yang dag pa'i rtsol ba gang zhe na/ yang dag pa'i lta ba dang rtog pa dang ngag dang las kyi mtha' dang 'tsho ba dag la brten te/bsgom pa'i lam la zhugs pa de'i kun du sbyor ba lhag ma rnams spang ba'i phyir chos kyi rjes su mthun pa'i chos sgrub par byed pa na/ 'dun pa dang / brtson 'grus dang / rtsol ba dang / nges par 'byung bar byed pa dang / pha rol gnon par byed pa dang /mthu dang / rtsol ba dang / sems yang dag par rab tu 'dzin par byed pa dang / brtson 'grus gang yin pa'o/ /yang dag pa'i dran pa gang zhe na/ de ltar yang dag pa'i rtsol ba dang ldan pa de'i dran pa nye bar gzhag pa bzhi'i dbang du byas nas phyin ci ma log par bsdus pa'i dran pa gang yin pa'o//yang dag pa'i ting nge 'dzin gang zhe na/ de ltar yang dag pa'i dran pa la brten nas phyin ci ma log pas yang dag par bsdus pa'i dran pa de la zhi gnas kyi sems gnas pa dgu dang stobs drug dang yid la byed pa bzhis 'jug pa gang yin pa'o//de la sems gnas pa dgu gang zhe na/ sems nang kho nar 'jog par byed pa dang / yang dag par 'jog par byed pa dang / bsdus te 'jog par byed pa dang / nye bar 'jog par byed pa dang / dul bar byed pa dang / zhi bar byed pa dang /nye bar zhi bar byed pa dang / rgyud gcig tu byed pa dang / ting nge 'dzin du byed pa'o/ /de la ji ltar na 'jog par byed pa yin zhe na/ phyi rol gyi dmigs pa thams cad las yang dag par bsdus te/ rnam par mi g.yeng bar bya ba'i phyir dang po nang du nye bar gtod par byed pa gang yin pa de ni 'jog par byed pa yin no//ji ltar na yang dag par 'jog par byed pa yin zhe na/ dang po nye bar gtad pa'i sems gang yin pa de g.yo ba dang rags pa dang yang dag par mi gnas pa dang yongs su mi gnas par gyur pa na/ de dmigs pa de nyid la gtad pa'i tshul dang dang bar bya ba'i tshul gyis mngon par tshar bcad pa dang bcas pas 'phro bar mi byed cing mngon par g.yeng bar mi byed pa gang yin pa de ni yang dag par 'jog par byed pa yin no//ji ltar na bsdus te 'jog par byed pa yin zhe na/ de ltar de'i sems gzhag pa dang yang dag par gzhag pa de gal te brjed ngas pas phyi rol du rnam par g.yeng bar gyur na/des yang phyir de nyid la sdud par byed do/ /de ltar na bsdus te 'jog par byed pa yin no/ /ji ltar na nye bar 'jog par byed pa yin zhe na/ dang po kho nar de lta de ltar dran pa nye bar gzhag ste/gnas shing sems de yang dag par 'jog par byed pa na/ zhi gnas dang de'i sems de phyi rol du mi 'gro bar byed de/ de ltar na nye bar 'jog par byed pa yin no/ /ji ltar na dul bar byed pa yin zhe na/ gzugs dang /sgra dang / dri dang / ro dang / reg bya'i mtshan ma dang / 'dod chags dang / zhe sdang dang / gti mug dang / skyes pa dang / bud med kyi mtshan ma gang gis de'i sems rnam par g.yeng bar gyur na/ de la des dang po nyid nas nyes dmigs kyi 'du shes bzung ba de nyid kyi dbang du byas nas mtshan ma de dag la de'i sems 'phror mi ster bar byed de/de ltar na dul bar byed pa yin no/ /ji ltar na zhi bar byed pa yin zhe na/ 'dod pa'i rnam par rtog pa la sogs pa rnam par rtog pa gang dag dang / 'dod pa la 'dun pa la sogs pa nye ba'i nyon mongs pa gang dag gis de'i sems kun du 'khrugs par gyur na/de la des dang po nyid nas nyes dmigs kyi 'du shes su bzung ba de nyid kyi dbang du byas nas rnam par rtog pa dang nye ba'i nyon mongs pa de dag la de'i sems 'phror mi ster bar byed de/ de ltar na zhi bar byed pa yin no/ /ji ltar na nye bar zhi bar byed pa yin zhe na/ de brjed ngas pa'i phyir rnam par rtog pa dang nye ba'i nyon mongs pa de gnyis ka kun du 'byung bar gyur na/ byung ngo cog dang du mi len cing spong bar byed de / de ltar na nye bar zhi bar byed pa yin no/ / ji ltar na rgyud gcig tu byed pa yin zhe na/ mngon par 'du byed pa dang bcas pas bar du chad pa med pa dang rgyun chags par ting nge 'dzin gyi rgyun la 'jog par byed de/ de ltar na rgyud gcig tu byed pa yin no/ /ji ltar na ting nge 'dzin du byed pa yin zhe na/ kun du bsten zhing goms par byas lan mang du byas pa'i rgyus lhun gyis grub par 'jug pa dang rang gi ngang gis 'jug pa'i lam thob cing mngon par 'du byed pa med pa dang /lhun gyis grub pa de nyid kyis de'i sems de rnam par g.yeng ba med pa'i ting nge 'dzin gyi rgyun la 'jug par 'gyur te/de ltar na ting nge 'dzin du byed pa yin no/ /de la stobs drug gang zhe na/ thos pa'i stobs dang / bsam pa'i stobs dang / dran pa'i stobs dang / shes bzhin gyi stobs dang / brtson 'grus kyi stobs dang / yongs su 'dris pa'i stobs so/ /stobs drug po de dag gis sems gnas pa dgu po de dag 'grub ste/de la thos pa'i stobs dang bsam pa'i stobs kyis ni re zhig thos pa gang yin pa dang bsam pa gang yin pa'i dbang du byas nas dang por kho nar sems dmigs pa la 'jog par byed pa dang de nyid la gtod pa'i tshul gyis yang dag par 'jog par byed do//dran pa'i stobs kyis ni de ltar sems gtad pa la yang dag par sdud pa dang rnam par mi g.yeng bar byed pas bsdus te 'jog nye bar 'jog par byed do/ /shes bzhin gyi stobs kyis ni de nas rnam par rtog pa dang nye ba'i nyon mongs pa'i mtshan ma dag la 'phro bar mi byed pas dul bar byed pa dang zhi bar byed do//brtson 'grus kyi stobs kyis ni de gnyi ga dang du mi len pa dang rgyun chags par ting nge 'dzin gyi rgyun la 'jog par byed pas zhi bar byed pa dang rgyun gcig tu byed do/ /yongs su 'dris par byed pa'i stobs kyis ni ting nge 'dzin du byed do//de la yid la byed pa bzhi gang zhe na/ bsgrims te 'jug pa'i yid la byed pa dang / skabs su 'chad cing 'jug pa'i yid la byed pa dang / skabs su 'chad pa med par 'jug pa'i yid la byed pa dang / rtsol ba med par 'jug pa'i yid la byed pa'o/ /sems gnas pa dgu po de dag ni yid la byed pa de bzhis 'jug ste/de la 'jog par byed pa dang yang dag par 'jog par byed pas ni bsgrims te 'jug pa'i yid la byed pas 'jug go/ /bsdus te 'jog par byed pa dang nye bar 'jog par byed pa dang dul bar byed pa dang zhi bar byed pa dang nye bar zhi bar byed pas ni skabs su 'chad cing 'jug pa'i yid la byed pas 'jug go//rgyud gcig tu byed pa ni skabs su 'chad pa med par 'jug pa'i yid la byed pas 'jug go/ /ting nge 'dzin du byed pa'i rtsol ba med par 'jug pa'i yid la byed pas 'jug go/ /'dir bsgom pa'i lam la ni thams cad du yang sems gnas pa dgu las ting nge 'dzin du byed pa dang /stobs drug las yongs su 'dris pa'i stobs dang / yid la byed pa bzhi las rtsol ba med par 'jug pa yid la byed pa shas cher 'jug ste/ de yang dag pa'i ting nge 'dzin gyi rab tu dbye ba yin no/ / 'phags pa'i lam yan lag brgyad pa de dag thams cad kyang mdor bsdu na rgyu ba'i tshe na bya ba dang / gnas pa'i tshe na bya ba ni de la yang dag pa'i ngag dang las kyi mtha' dang 'tsho ba dag ni rgyu ba'i tshe na bya ba yin no/ /gnas pa'i tshe na bya ba ni rnam pa gnyis te/ zhi gnas dang / lhag mthong ngo //de la yang dag pa'i lta ba rtog pa dang rtsol ba gang yin pa de ni lhag mthong yin no/ /yang dag pa'i dran pa dang ting nge 'dzin gang yin pa de ni zhi gnas yin no/ /de ltar yang dag pa'i ngag dang las kyi mtha' dang 'tsho ba yongs su dag pa la brten nas dus dus su zhi gnas dang lhag mthong sgom par byed pa de ni kun du sbyor ba ma lus par spangs pa mngon sum du byed cing 'bras bu'i mchog dgra bcom pa nyid kyang thob par 'gyur bas brgyad po de dag ni 'phags pa'i lam gyi yan lag yin no//de la gang gi tshe 'jig rten las 'das pa'i phung po lnga po thams cad lam gyis bsdus pa yin pa de'i tshe ci'i phyir yang dag pa'i lta ba mngon du btang ba'i 'phags pa'i lam yan lag brgyad pa lam gyi bden pa zhes bya zhe na/'phags pa slob pa bzhi mthong ba rnams kyi bslab pa gsum gyi dbang du byas pa'i phyir te/ slob pa ni 'di ltar dus dus su lhag pa'i tshul khrims kyi bslab pa yang slob par byed cing /lhag pa'i sems kyi bslab pa yang slob par byed/ lhag pa'i shes rab kyi bslab pa yang slob par byed la/ bslab pa gsum ni 'phags pa'i lam yan lag brgyad pa yin pas de'i phyir lam gyi bden pa zhes bya'o//de la yang dag pa'i ngag dang las kyi mtha' dang 'tsho ba ni lhag pa'i tshul khrims kyi bslab pa yin no/ /ci'i phyir zhe na/ yang dag pa'i chos kyi longs spyod dang yang dag pa'i zang zing gi longs spyod kyi dbang du byas pa'i rgyu gnyis kyis te / yang dag pa'i ngag dang yang dag pa'i las kyi mtha' ni rtsa ba'i tshul khrims yin te/tshul khrims ni chos kyi longs spyod thams cad kyi gzhi yin pas de gnyis kyi yang dag pa'i chos la longs spyod kyi dbang du byas pa yin no/ /yang dag pa'i 'tsho ba ni tshul 'chos pa la sogs pa log par 'tsho bar byed pa'i chos rnams la mi brten par chos gos la sogs pa yongs su tshol ba'i rtsa ba dang /gzhi yin pas de ni yang dag pa'i zang zing gi longs spyod kyi dbang du byas pa yin no/ /yang dag pa'i lta ba dang rtog pa ni rtsol ba dang lhag pa'i shes rab kyi bslab pa yin no/ /de ci'i phyir zhe na/ shes rab kyi lam gyis ni mdor bsdu na rnam pa gsum yod la/de dag ni chos gsum po de dag gis yongs su rdzogs par byed pa'i phyir te/ chos kyi de kho na'i don rtogs par byed pa'i las kyi de kho na'i don rtogs nas/ de nyid gzhan dag la ston par byed pa'i las dang kun du sbyor ba lhag ma rnams spangs pa'i phyir chos kyi rjes su mthun pa'i sgrub par byed pa'i las te/las de gsum ni yang dag pa'i lta ba dang rtog pa dang rtsol ba dag gis go rims bzhin du yongs su rdzogs par byed pa'i phyir ro/ /yang dag pa'i dran pa dang ting nge 'dzin ni lhag pa'i sems kyi bslab pa yin no/ /de ci'i phyir zhe na/rnam pa gnyis kyis te/ ngo bo nyid dang / rkyen gyis so/ /de la yang dag pa'i ting nge 'dzin ni lhag pa'i sems kyi ngo bo nyid yin no/ /yang dag pa'i dran pa ni rgyu bzhis lhag pa'i sems kyi rten gyi bya ba byed pa yin te/ dran pa nye bar gzhag pa bzhi po dag la sems dmigs pa la nye bar gtod par byed pa dang /dbang po'i sgo bsdam pa dang / shes bzhin du spyod pa dang / dang bar gyur pa'i gnas lta bu'i dran pa yid la byed pa ting nge 'dzin gyi rjes su mthun pa dang / sgrib pa'i gnyen po mi sdug pa la sogs pa yid la bya ba dag la lam la sgrib pa spong ba dang / rab tu dben pa'i zhi gnas dang /rab tu 'dzin pa dang / btang snyoms kyi mtshan ma rtag tu byed pa dang gus par byed pa'i sbyor ba dag la mtshan ma yid la byed pa lan mang du byed pas so/ /de ltar 'phags pa'i lam yan lag brgyad po de dag ni rnam par dag pa nges par 'byin pa'i lam yin pas na 'phags pa'i phyogs dang 'khor bsdu ba'i dngos po zhes bya ste/de tsam gyis yang dag pa'i mtha' rtogs pas 'di lta ste / sgrib pa thams cad las rnam par thar bar bya ba'i phyir lam gyi yan lag rnams kyis bla na med pa yang dag par rdzogs pa'i byang chub kyi bar du rjes su thob par rig par bya'o/ / gnyen po bsgoms pas rnam par gzhag pa'i tshig gi don la sogs pa bshad zin to// //de'i 'bras bu rnam par gzhag pa ni gnyen po bsgom pas de'i 'bras bu ye shes dang spangs pa rnam par gzhag pa'o zhes smos pa la ye shes rnam par gzhag pa gang zhe na/ de kho na rab tu rtogs pa'i dngos po zhes bya bas bstan te/byang chub kyi phyogs bsgoms pa'i dbang gis 'jig rten pa dang 'jig rten las 'das pa'i lam rnams la de kho na'i don rab tu rtogs pa'i shes pa ni de kho na nyid rab tu shes pa'i dngos po zhes bya ste de ni ye shes rnam par gzhag pa yin no/ /de la de kho na'i don gang zhe na/mdor bsdu na rnam pa gnyis te/ ji ltar yod pa las brtsams te chos rnams kyi yang dag pa nyid gang yin pa dang / ji snyed yod pa las brtsams te chos rnams kyi thams cad nyid gang yin pa ste de ltar yang dag pa nyid dang thams cad nyid ni chos rnams kyi de kho na'i don mtha' dag yin par rig par bya'o//de kho na'i don de yang rab tu dbye ba rnam pa bzhi ste/ 'jig rten gyi grags pa'i de kho na dang / rigs pas grags pa'i de kho na'i don dang / nyon mongs pa'i sgrib pa rnam par dag pa'i shes pa'i spyod yul gyi de kho na dang / shes bya'i sgrib pa rnam par dag pa'i shes pa'i spyod yul gyi de kho na'o//de la 'jig rten gyi grags pa'i de kho na gang zhe na/ brda dang kun rdzob 'dris pa'i rjes su 'gro bas zhugs pa'i blos dngos po gang la 'jig rten pa thams cad kyi lta ba mtshungs par gyur pa 'jig rten thams cad kyi nges par mos pa'i spyod yul gcig nas gcig tu 'ongs pa'i ming gi rang gi rnam par rtog pa la grags pa ma bsams ma dpyad ma brtags pa bzung ba'i dngos po gzugs she'am sgra zhes bya ba la sogs pa gang yin pa de ni 'jig rten gyi grags pa'i de kho na'o zhes bya'o//rigs par grags pa'i de kho na gang zhe na/dam pa rigs pa'i don la mkhas pa mdzangs pa rtog ge'i dpyod pa dang ldan pa rtog ger rtogs pa'i sa'i rang gi spobs pa las byung ba so so'i skye bo dpyod pa'i rjes su dpyod pa la gnas pa rnams kyi shes pa shin tu rnam par phye ba rnam par nges pa'i spyod yul shes bya'i dngos po mngon sum dang rjes su dpag pa dang yid ches pa'i lung gi tshad ma la brten nas 'thad pa sgrub pa'i rigs pas rab tu bsgrubs shing rnam par gzhag pa rang dang spyi'i mtshan nyid gang yin pa de ni rigs pas grags pa'i de kho na zhes bya'o//nyon mongs pa'i sgrib pa rnam par dag pa'i shes pa'i spyod yul gyi de kho na gang zhe na/nyan thos dang rang sangs rgyas thams cad kyi zag pa med pa dang zag pa med pa thob par byed pa dang / zag pa med pa'i rdzas las thob pa 'jig rten pa'i shes pas spyod yul du bya ba 'phags pa'i bden pa bzhi gang yin pa de ni nyon mongs pa'i sgrib pa rnam par dag pa'i spyod yul gyi de kho na zhes pa'o//shes bya'i sgrib pa rnam par dag pa'i shes pa'i spyod yul gyi de kho na gang zhe na/ chos thams cad brjod du med pa'i ngo bo nyid las brtsams te/ byang chub sems dpa' rnams dang sangs rgyas bcom ldan 'das rnams kyi ye shes chos bdag med pa la 'jug pa dang zhugs par gyur pa shin tu rnam par dag pa'i tshig tu btags pa'i ngo bo nyid rnam par mi rtog pa dang mtshungs par spyod yul gyi yul du bya ba de bzhin mchog bla na med pa'i shes bya'i mthar thug pa gang yin pa de ni shes bya'i sgrib pa rnam par dag pa'i shes pa'i spyod yul gyi de kho na zhes bya ste/de kho na de dag rab tu rtogs pa'i dngos po'i ye shes rnam par gzhag pa de ni gnyen po bsgoms pa'i 'bras bu rnam par gzhag pa gcig yin no/ /spangs pa rnam par gzhag pa gang zhe na/ mya ngan las 'das pa yang dag par 'thob pa'i dngos po zhes bya bas bstan te/byang chub kyi phyogs bsgoms pa'i dbang gis mthong bas spang bar bya ba dang / bsgom pas spang bar bya ba'i nyon mongs pa ma lus par spangs pa na de dag gis mya ngan las 'das pa thob pa zag pa med pa 'dus ma byas pa yang dag par thob pa ni mya ngan las 'das pa yang dag par thob pa'i dngos po zhes bya ste/de ni spangs pa rnam par gzhag pa yin no/ /de ni phung po'i lhag ma dang bcas pa dang lhag ma med pa'i mya ngan las 'das pa'i rgyud kyis yang dag par bsdus pa yin te/ de yang gnyen po bsgoms pa de'i 'bras bu rnam par gzhag pa gcig yin no//de'i 'bras bu rnam par gzhag pa'i tshig gi don la sogs pa bshad zin to // //de la sbyor ba'i rgyu rnam par gzhag pa ni gnyen po bsgom pa de la sbyor ba'i rgyu legs par gsungs pa'i chos 'dul ba 'di la 'jig rten pa'i yang dag pa'i lta ba rnam par gzhag pa'o zhes smos pa de la legs par gsungs pa'i chos 'dul ba 'di la 'jig rten pa'i yang dag pa'i lta ba rnam par gzhag pa gang zhe na/legs par gsungs pa'i chos 'dul ba la 'jig rten pa'i yang dag pa'i lta ba 'di las phyi rol pa thams cad kyi yang dag pa'i lta ba dag las spyi bor gyur pa nyid kyi dngos po zhes bya bas bstan te/de la legs par gsungs pa'i chos 'dul ba zhes bya ba ni bde bar gshegs pa'i gsung rab bo/ /de legs par gsungs pa'i zhes bya ba ni dam pa'i chos tshangs par spyod pa thog mar dge ba bar du dge ba tha mar dge ba zhes bya ba la sogs pa'o//chos 'dul ba zhes bya ba ni 'phags pa'i lam yan lag brgyad pa ste/ yang dag pa'i lta ba dang / rtog pa dang / rtsol ba dang / dran pa dang / ting nge 'dzin ni chos so/ /yang dag pa'i ngag dang / las kyi mtha' dang / 'tsho ba ni 'dul ba'o/ /'jig rten pa'i yang dag pa'i lta ba zhes bya ba ni dang po sems bskyed pa nas bzung ste tshogs kyi lam dang sbyor ba'i lam thams cad la thar pa'i cha dang mthun pa dang / nges par 'byed pa'i cha dang mthun pa'i dge ba'i rtsa bas bsdus pa'i yang dag pa'i lta ba 'byin pa dang mchod sbyin dang las dang 'bras bu dang pha dang ma dang dgra bcom pa yod do zhes bya ba la sogs par lta ba gang yin pa'o//'di las phyi rol pa thams cad kyi yang dag pa'i lta ba dag las spyi bor gyur pa nyid kyis dngos po zhes bya la/ 'di las phyi rol pa zhes bya ba ni bde bar gshegs pa'i bstan pa 'di las phyi rol pa mu stegs can dang 'jig rten pa gzhan dag go//de dag gi yang dag pa'i lta ba dag ni phyin ci log dang 'brel pa yin no/ /de dag gi yang dag pa'i lta ba dag las spyi bor gyur pa ni chos 'di pa'i 'jig rten pa'i yang dag pa'i lta ba de ni lung las/'jig rten pa yi yang dag lta/ /chen po su la yod gyur pa/ /de ni bskal pa stong rnams su/ /ngan 'gror 'gro bar mi 'gyur ro/ /zhes gsungs pa'i phyir te/ de nyid bsgom pa de la bsgom pa'i rgyu yin no/ /de la sbyor ba'i rgyu rnam par gzhag pa'i tshig gi don la sogs pa bshad zin to// //de'i mi mthun pa'i phyogs rnam par gzhag pa ni de la sbyor ba'i rgyu de'i mi mthun pa'i phyogs ni/ de mi bsgom pas yongs su nyams pa rnam par gzhag ste zhes smos pa las/ de bsgom pas yongs su nyams pa gang zhe na/ de mi bsgom pas yongs su nyams pa'i dngos po ste zhes bya bas bstan te/de zhes bya ba ni legs par gsungs pa'i chos 'dul ba 'di 'jig rten pa'i yang dag pa'i lta ba de'o/ /de mi bsgom pas ji ltar yongs su nyams par 'gyur zhe na/ de'i phyir 'di ltar legs par gsungs pa'i chos 'dul ba ni mi bsgom pas yongs su nyams par 'gyur gyi zhes bya ba gsungs te/de la sbyor ba'i rgyu de mi bsgom pa ni ma thob pa'i nyams pas yongs su nyams par 'gyur ba'i phyir ro/ /lta ba'i nyes pas ni ma yin no zhes bya bas ni legs par gsungs pa'i chos 'dul ba 'di la lta ba'i nyes pa med pa'i phyir ro//de ltar na dngos po bzhi'am dgu'am nyi shu dgu po de dag gi dbang du mdzad nas bcom ldan 'das kyis chos rnams kyi dngos po bsdu ba tsam gong du bstan pa de ni mdo sde yin te/ gsung rab tu gtogs pa yan lag bcu gnyis las/ mdo'i sde dang / dbyangs kyis bsnyad pa'i sde dang /lung du bstan pa'i sde dang / tshigs su bcad pa'i sde dang / ched du brjod pa'i sde gang yin pa de ni nyan thos kyi mdo sde'i sde snod do/ /shin tu rgyas pa'i sde dang / rmad du byung ba'i sde gang yin pa de ni byang chub sems dpa'i mdo sde'i sde snod do/ /skabs kha cig nas ni gleng gzhi'i sde dang /gtan la phab par bstan pa'i sde ma gtogs pa gzhan bcu ni gnyis ka'i mdo sde'i sde snod do zhes kyang bshad do/ /de'i 'og tu 'dul ba'i mtshan nyid bstan pa'i dbang du mdzad nas/ 'jam dpal ngas gang du nyan thos rnams dang byang chub sems dpa' rnams kyis zhes bya ba la sogs pa gsungs so//de la so sor thar pa'am zhes bya ba ni ris bdun po dge slong dang / dge slong ma dang / dge bsnyen dang / dge bsnyen ma dang / sdom pa'i tshul khrims kyis bsdus pa'i 'dul ba gang yin pa ste / de yang 'dul ba bzhi po rnam par 'byed pa dang /gzhi dang / phran tshegs dang / dris lan las so sor thar pa'i mdo'i ma mo rgya cher brgyud de 'ongs pa de bzhin gshegs pas gsungs pa'i bsngags pa bstod pa yin no/ /so sor thar pa dang ldan pa zhes bya ba ni de rnam par 'byed pa ste//de rnam par dbye na gzhi dang phran tshegs dang dris lan yang zhar las byung bas 'dul ba dum bu bzhi char yang yin par rig par bya'o/ /de ni 'dul ba'i dngos po yin no zhes bya ba ni so sor thar pa dang ldan pa ni 'dul ba'i ma mo yin no zhes bya ba'i don to/ /'dul ba'i ma mo de yang mdor bsdu na don rnam pa bcu dang ldan pa yin te/bcu gang zhe na/ phan yon dang / sde tshan dang / sdud pa dang / rjes su spyod pa dang / mi mthun pa dang / mthun pa dang / nye bar zhi ba dang / yongs su shes pa dang / dad cing 'phel bar 'gyur ba dang / stobs so/ /de la phan yon gang zhe na/ de bzhin gshegs pas phan yon bcu yang dag par gzigs nas 'dul ba la nyan thos rnams kyi bslab pa'i gzhi bcas pa ste/ 'di lta ste/ dge 'dun bsdu ba'i phyir dang / dge 'dun legs par bya ba'i phyir dang / dge 'dun bde bar gnas par bya ba'i phyir dang / gnong mi bkur ba'i gang zag rnams tshar gcad pa'i phyir dang / ngo tsha shes pa rnams bde bar gnas par bya ba'i phyir dang / mngon par ma dad pa rnams mngon par dad par bya ba'i phyir dang / mngon par dad pa rnams phyir zhing dad par bya ba'i phyir dang /tshe 'di'i zag pa rnams bsdams pa'i phyir dang / tshe rabs phyi ma'i zag pa rnams gzhom pa'i phyir dang / nga'i tshangs par spyod pa skye bo mang po la phan par gyur pa lha dang mi rnams kyi bar la yang dag par rab tu bstan pa yun ring du gnas pa'i phyir ro zhes gsungs pa'o//sde tshan gang zhe na/ ltung ba'i sde tshan lnga dang / ltung ba las bslang ba'i sde tshan bzhi ste/ ltung ba'i sde tshan lnga ni pham pa dang / dge 'dun lhag ma dang / ltung byed dang /so sor bshags par bya ba dang / nyes byas te / nyes pa sbom pa dang / spong ba'i ltung ba dang / ma nges pa dag ni de dag nyid du 'dus pas ci rigs par rig par bya'o/ /ltung ba las bslang ba'i sde tshan bzhi ni pham pa ma gtogs pa de las gzhan pa'i ltung ba'i sde tshan bzhi las bslang ba ste/pham pa las kyang bslang ba yod mod kyi de ni gang zag gi bye brag tsam nyid las brten pa yin gyi/ thams cad la khyad par med pa ma yin pas de'i phyir de las bslang ba'i sde tshan ni mgo gcig tu rnam par mi gzhag go/ / sdud pa gang zhe na/ 'dul ba sdud par byed pa'i chos lnga ste/ rang bzhin gyi kha na ma tho ba dang / bcas pa dang / dgag pa dang / gnang ba dang / bsgrub pa'o/ /rjes su spyod pa gang zhe na/ 'dul ba'i rjes su spyod pa'i chos lnga ste/ gnas pa dang / gnas dang /rten dang / longs spyod dang / las so/ /mi mthun pa gang zhe na/ dge slong 'dul ba'i bslab pa la brtson pa'i bslab pa dang mi mthun pa'i chos lnga ste/ bar du gcod pa dang / dam pa'i chos ltar bcos pa dang / sdig pa'i grogs po dang / glen zhing nyon mongs pa spang ba dang /sngon gyi tshogs stobs chung ba'o/ /mthun pa gang zhe na/ dge slong 'dul ba'i bslab pa la brtson pa'i bslab pa dang mthun pa'i chos lnga ste/ mi mthun pa lnga las bzlog pa'o/ /nye bar zhi ba gang zhe na/ dge slong 'dul ba'i bslab pa la brtson pa'i nye bar zhi ba dang dul ba dang zhi bar 'gyur ba'i chos lnga ste/nges shing 'grogs na bde ba nyid dang / spong ba dang / spong ba'i yan lag dang / bsnyen bkur dang / rtsod pa nye bar zhi ba'o/ /yongs su shes pa gang zhe na/ dge slong 'dul ba'i bslab pa la brtson pas yongs su shes par bya ba dang /ltung ba yongs su shes par bya ba dang / gang zag yongs su shes par bya ba dang / rdzas yongs su shes par bya ba dang / gnod pa yongs su shes par bya ba'o / /dad cing 'phel bar 'gyur ba gang zhe na/dge slong 'dul ba'i bslab pa la brtson pa la ma dad pa rnams dad pa dang / dad pa rnams phyir zhing 'phel bar 'gyur ba'i chos lnga ste/ tshul khrims phun sum tshogs pa dang / lta ba phun sum tshogs pa dang / cho ga phun sum tshogs pa dang / 'tsho ba phun sum tshogs pa dang / phan tshun 'thab rtsod med pa'o/ /stobs gang zhe na/ dge slong 'dul ba'i bslab pa la brtson pa'i yang dag pa'i sbyor ba rnam pa thams cad du phun sum tshogs par 'gyur ba'i stobs lnga ste/ sbyor ba'i stobs dang / bsam pa'i stobs dang /rtogs pa'i stobs dang / shes pa'i stobs dang / gnas pa'i stobs so/ /de ltar 'dul ba'i ma mo don bcu dang ldan pa bstan pa des ni 'dul ba'i ngo bo nyid bstan to// //de'i 'og tu de'i rab tu dbye ba bstan pa'i phyir/ bcom ldan 'das byang chub sems dpa' rnams kyis so sor rnam par thar pa dus bsdus par rig par bgyi lags zhes bya ba gsungs so//'jam dpal rnam pa bdun gyis te zhes bya ba la/ yang dag par blang ba'i cho ga bstan pa zhes bya ba ni dang por gsum la skyabs su btang ba dang /dge bsnyen gyi sdom pa byin nas de'i 'og tu las bzhi po gsol ba'i las dang / gsol ba dang gnyis kyi las dang / gsol ba dang bzhi'i las dang / las gsum brjod pa'i las kyis rab tu byung ba dang bsnyen par rdzogs par bya ba'i chos bstan pa'o//pham pa'i gnas lta bu'i dngos po bstan pa zhes bya ba ni ltung ba'i sde tshan lnga'i dang po dang sbyar ro/ /ltung ba'i gnas lta bu'i dngos po bstan pa zhes bya ba ni ltung ba'i sde tshan lnga'i tha ma bzhi dang sbyar ro/ /ltung ba'i ngo bo nyid bstan pa zhes bya ba ni rnam pa gsum ste/nyon mongs pa can ma yin pa'i ltung ba dang / nyon mongs pa can gyi ltung ba dang / ltung ba rnams kyi chung ngu dang 'bring dang chen po nyid bstan pa'o/ /de la nyon mongs pa can ma yin pa'i ltung ba ni rgyu gnyis kyis 'byung ste/ mi shes pa dang / bag med pa'o/ /nyon mongs pa can gyi ltung ba yang rgyu gnyis kyis 'byung ste/ nyon mongs pa mang ba dang / ma gus pa'o/ /ltung ba rnams kyi chung ngu dang 'bring dang chen po ni rnam pa lngas rig par bya ste/ ngo bo nyid dang / byed pa dang / bsam pa dang / gzhi dang / tshogs pa'o/ / de la ngo bo nyid las chung ngu dang 'bring dang chen po nyid ni pham pa ni ltung ba chen po yin no/ /dge 'dun lhag ma ni 'bring ngo / /de las gzhan pa ni ltung ba chung ngo / /rnam grangs gzhan yang pham pa dang / dge 'dun lhag ma rnams ni chen po yin/ ltung byed dang so sor bshags par bya ba rnams ni 'bring yin /nyes byas rnams ni chung ngu yin pa'o/ /byed pa las ni mi shes pas byas pa dang / bag med pas byas pa ni chung ngu yin/ nyon mongs pa mang bas byas pa ni 'bring yin/ ma gus pas byas pa ni chen po yin pa'o / /bsam pa las ni 'dod chags dang zhe sdang dang gti mug gis kun nas dkris pa chung ngus byas pa ni chung ngu yin/'bring gis byas pa ni 'bring yin/ chen pos byas pa ni chen po yin pa'o/ /gzhi las ni zhe sdang gis kun nas dkris pa mtshungs pas dud 'gro'i skye gnas su skyes pa'i srog chags bsams bzhin du bsad na ni ltung byed yin pas chung ba'am/mir chags pa pha ma ma yin pa bsad na ni pham pa yin la/ mtshams med pa ma yin pas 'bring / pha ma bsad na ni pham pa yang yin la mtshams med pa yin pas che ba lta bu'o//stsogs pa las ni ltung ba gcig dang gnyis dang gsum nas lnga'i bar du byung yang chos bzhin du phyir mi byed pa de ni chung ngu yin/ bcu'am nyi shu 'am sum cu 'am shes par bya nus pa'i bar du byung ba chos bzhin du phyir mi byed pa ni 'bring yin/ ltung ba dpag tu med pa byung la bdag la ltung ba 'di snyed cig byung ngo zhes shes par mi nus pa de ni chen por rig par bya'o//ltung ba ma yin pa'i ngo bo nyid bstan pa zhes bya ba ni bya ba rnam pa lnga kho nas ltung ba mi 'byung ba ste/ dbang po rnams kyi sgo bsdams te gnas pa dang / zas kyi tshod rig pa nyid dang /nam gyi cha stod dang nam gyi cha smad la mi nyal bar sbyor ba'i rjes su brtson pa dang / shes bzhin du spyod pa de ni bya ba gcig yin no/ /gzhan yang dge sbyong gi tshul shas cher lta ba dang ston pa dang tshangs pa mtshungs par spyod pa rnams la dad pa dang /gus pa chen po dang kha na ma tho ba kun du spyod pas shas cher ngo tsha shes shing khrel yod pas zhugs pa de ni bya ba gnyis pa yin no/ /gzhan yang bya ba nyung ba dang don nyung ba dang las kyi mtha' nyung ba dang 'du 'dzi nyung ba de ni bya ba gsum pa yin no/ /gzhan yang khyim pa dang rab tu byung ba rnams dang mi 'dre bar gnas pa dang /bag yod par ltung ba dang ltung ba med pa la mkhas pa dang dge ba'i phyogs la gcig tu nges par byed pa de ni bya ba bzhi pa yin no/ /gzhan yang las dang po pa dang smyos pa dang sems 'khrugs pa dang tshor bas nyen pa de ni bya ba rnam pa lnga yin te/bya ba lnga po de dag gi/ dang po nyid nas ltung ba mi 'byung bar rig par bya'o/ /ltung ba las byung ba bstan pa zhes bya ba ni rgyu gsum gyis ltung ba las ldang ba ste/ gsum gang zhe na/ 'gyod pa lnga bskyed pa dang / yan lag lngas bsdus pa'i bag yod pa dang /rnam pa lngas 'gyod pa bsal ba'o/ /de la 'gyod pa skyed pa gang zhe na/ ltung ba gang yang rung ba zhig byung ba na bdag nyid la gzhi 'dis tshul khrims dag gis smad par 'gyur ro snyam nas 'gyod pa skyed par byed pa dang / gzhan dang lha dag gis smad par 'gyur ro snyam nas 'gyod pa skyed par byed pa dang /ston pa dang tshangs pa mtshungs par spyod pa mkhas pa rnams kyis smad par 'gyur ro snyam nas 'gyod pa skyed par byed pa dang / phyogs dang phyogs mtshams rnams su sdig pa can gyi mi bsngags pa grags pa dang sgra dang tshigs su bcad pa mngon par 'phel bar 'gyur ro snyam nas 'gyod pa skyed par byed pa dang /bdag lus zhig nas ngan song ngan 'gro log par ltung ba rnams su skye bar gyur na mi rung ngo snyam nas 'gyod pa skyed par byed pa'o/ /yan lag lngas bsdus pa'i bag yod pa gang zhe na/ 'das pa'i dus la brten nas ltung ba byung ba gang yin pa de yang chos bzhin du byed pa la sngon gyi mtha' dang ldan pa'i bag yod pa dang /ma 'ongs pa'i dus la brten nas ltung ba byung ba gang yin pa de yang chos bzhin du phyir byed pas phyi ma'i mtha' dang ldan pa'i bag yod pa dang / da ltar byung ba'i dus la brten nas ltung ba byung ba gang yin pa de yang chos bzhin du phyir byed pas dbus kyi mtha' dang ldan pa'i bag yod pa dang /ltung ba ma byung ba'i snga rol nas phyis ltung ba mi 'byung bar bya ba'i phyir ji lta ji ltar spyad cing gnas na phyis ltung ba mi 'byung bar 'gyur ba de lta de ltar spyod cing gnas pas dus snga nas byas pa'i bag yod pa dang /'phral du yang ci nas kyang ltung ba mi 'byung ba de ltar spyod cing gnas pas lhan cig spyod pa'i bag yod pa dang ldan pa'o/ /rnam pa lngas 'gyod pa bsal ba gang zhe na/ bcom ldan 'das kyis gzhi dang bcas nges par 'byung ba dang bcas pa'i chos bstan pas ltung ba las ldang ba'i skabs yod do snyam nas 'gyod pa sel bar byed pa dang /mi shes pa dang bag med pa dang / nyon mongs pa mang ba dang ma gus pa gang gis ltung ba byung ba mi shes pa nas ma gus pa'i bar de ni spangs shing /shes pa nas gus pa'i bar de ni yang dag par skyes so snyam nas 'gyod pa sel bar byed pa dang / mi shes pa dang ltung ba mi 'byung bar bya ba'i phyir bsam pa thag pa nas sems skyes so snyam nas 'gyod pa sel bar byed pa dang / tshangs pa mtshungs par spyod pa mkhas pa rnams kyi mdun du so sor bshad zin to snyam nas 'gyod pa sel bar byed pa dang /bdag legs par gsungs pa'i chos 'dul ba las rab tu byung nas bslab pa dang mi 'gal zhing 'gyod pa med pa gang yin pa de ni bdag la dge ba dang legs pa yin gyi/ bdag bcom ldan 'das kyis 'dod pa'i rgyun sgrib pa'i gnas lta bu rnam grangs du mas bar du gcod par byed pa gang yin pa gsungs pa de mang du gnas shing dang du len par byed nas sel bar mi byed pa gang yin pa de ni bdag la dge ba dang legs pa ma yin no snyam nas 'gyod pa sel bar byed pa ste/rnam pa de dag gis ltung ba las ldang bar byed do/ /sdom pa gtong ba bstan pas so zhes bya ba la rgyu dus ni dge slong gi sdom pa blangs kyang gtong bar 'gyur zhe na/ mdor bsdu na rgyu lnga ste/ bslab pa'i gzhi 'bul ba dang / ltung ba'i rtsa ba lhag par spyod pa dang / mtshan nub cing mtshan gnyis skyes pa dang /dge ba'i rtsa ba chad pa dang / rigs mthun pa spangs pa'o/ /dam pa'i chos rab tu rnam par zhig pa dam pa'i chos nub cing dge slong gi sdom pa blang ba ni blang du med la sngar blangs pa ni yongs su mi gtong bar rig par bya'o/ /dge bsnyen gyi sdom pa ni mi mthun pa'i sems bskyed pa dang /dge ba'i rtsa ba chad pa dang / rigs mthun pa spangs pas gtong bar rig par bya'o/ /dam pa'i chos nub pas ni dge slong gi sdom pa ji lta ba bzhin du dge bsnyen gyi sdom pa dang / dge bsnyen ma'i sdom pa yang de bzhin du rig par bya'o/ /bsnyen gnas pa'i sdom pa gtong ba ni nyi ma shar ba dang /gal te sems mi mthun pa bskyed pa dang / snga rol du rigs mthun pa spong zhing 'chi ba'i dus byed pa las khong du chud par bya'o/ /de ltar 'dul ba'i ngo bo nyid dang rab tu dbye ba de dag ni lus dang ngag dang yid sdom zhing nyon mongs pa 'dul bar byed pas na 'dul ba zhes bya ste/gsung rab tu gtogs pa yan lag bcu gnyis las/ gleng gzhi'i sde dang / rtogs pa brjod pa'i sde dang / de lta bu byung ba'i sde dang / skyes pa'i rabs kyi sde dang ci rigs par sbyar ro/ /skabs kha cig nas ni gleng gzhi'i sde nyi tshe dang sbyar ro zhes kyang bshad do// // de'i 'og tu ma mo'i mtshan nyid bstan pa'i dbang du mdzad nas/ 'jam dpal ngas gang du mtshan nyid rnam pa bcu gcig bshad pa dang / rnam par phye ba dang bstan pa gang yin pa de ni ma mo zhes bya'o zhes bya ba la sogs pa gsungs te/ mdo sde dang 'dul ba ji skad bstan pa de dag gtan la phebs par byed la /gtan la dbab par bstan pa'i sde thams cad ni ma mo zhes bya ba ste chos mngon pa'i sde snod kyang yin no/ /de la mtshan nyid rnam pa bcu gcig gang zhe na zhes bya ba la/ ma mo'i mtshan nyid bcu gcig gang yin pa de ni mtshan nyid lngar 'gyur te/ kun rdzob kyi mtshan nyid dang / don dam pa'i mtshan nyid gnyis ni bstan pa'i mtshan nyid do/ /byang chub kyi phyogs dang mthun pa'i chos rnams kyi dmigs pa'i mtshan nyid dang / rnam pa'i mtshan nyid dang / ngo bo nyid kyi mtshan nyid gsum ni yongs su rtogs pa'i mtshan nyid do/ /de'i 'bras bu'i mtshan nyid dang /de myong ba'i rnam par bsnyad pa'i mtshan nyid gnyis ni 'bras bu'i mtshan nyid do/ /de'i bar du gcod pa'i chos kyi mtshan nyid dang / rjes su mthun pa'i chos kyi mtshan nyid gnyis ni de dag gi gegs dang phan 'dogs pa'i mtshan nyid do/ /de'i nyes dmigs kyi mtshan nyid dang /phan yon gyi mtshan nyid gnyis ni de'i nyes pa dang yon tan gyi mtshan nyid do/ /'jam dpal de la kun rdzob kyi mtshan nyid ni rnam pa gsum ste/ gang zag bstan pa dang / kun gdags pa'i ngo bo nyid bstan pa dang / chos rnams kyi byed pa dang g.yo ba dang las byed pa bstan par blta bar bya'o zhes bya ba la/gang zag bstan pa zhes bya ba ni bdag dang sems can dang srog dang gang zag ces bya ba la sogs pa mu stegs can gyis bdag tu brjod pa'i rnam grangs lung las bstan pa'o/ /kun brtags pa'i mtshan nyid bstan pa zhes bya ba ni rnam par rtog pa'i spyod yul kun brtags pa'i mtshan nyid kyi gnas 'du byed kyi mtshan ma la ngo bo nyid kyi mtshan nyid dam bye brag gi mtshan nyid du ming dang brdar rnam par gzhag pa'o//chos rnams kyi byed pa dang g.yo ba dang las byed pa zhes bya ba ni rnam grangs te spyir na byed pa pos byed pas las kyi bya ba byed do zhes bstan pa dag go//de dag thams cad ni glo bur du sgro btags pa yin gyi dngos su yod pa ma yin pas na kun rdzob kyi mtshan nyid ces bya ste/ de ni kun rdzob tu bstan pa'i mtshan nyid yin no/ /de la don dam pa'i mtshan nyid de bzhin nyid rnam pa bdun bstan pa yin par blta bar bya'o zhes bya ba la/de bzhin nyid rnam pa bdun ni sngar 'phags pa byams pa'i le'ur byung ba'i de bzhin nyid dang / mtshan nyid kyi de bzhin nyid dang / rnam par rig pa'i de bzhin nyid dang / gnas pa'i de bzhin nyid dang / log par sgrub pa'i de bzhin nyid dang / rnam par dag pa'i de bzhin nyid dang / yang dag par sgrub pa'i de bzhin nyid bstan pa dag go/ /de dag ni de'i ngo bo nyid de de bzhin nyid bden pa yin pas na don dam pa'i bden pa'i mtshan nyid ces bya ste de ni don dam par bstan pa'i mtshan nyid yin no/ /dmigs pa'i mtshan nyid ni shes bya'i dngos po rnam pa thams cad bstan pa yin par blta bar bya'o zhes bya ba la/shes bya'i dngos po rnam pa thams cad ces bya ba ni sngar dran pa nye bar gzhag pa la sogs pa byang chub kyi phyogs dang mthun pa'i chos sum cu rtsa bdun gyi dmigs pa ji skad bstan pa dag yin te/ de ni byang chub kyi phyogs kyi chos rnams kyi brtags pa'i mtshan nyid yin no//rnam pa'i mtshan nyid ni brtag pa rnam pa brgyad bstan par blta bar bya ste zhes bya ba ni brtag pa rnam pa brgyad po de dag kyang sems kyi rnam pa tsam du zad pas rnam pa'i mtshan nyid ces bya ste/ de ni sems kyis brtags pa'i mtshan nyid yin no/ /brtag pa rnam pa brgyad gang zhe na zhes bya ba la/bden pa'i rnam pa yang bden pa'i sgo nas brtag gnas pa'i rnam pa yang gnas pa'i sgo nas brtag /skyon dang yon tan dang tshul dang 'jug pa dang rigs pa dang bsdus pa dang rgyas pa'i rnam pa yang de dag gi so so'i sgo nas de dag nyid yin par brtag go zhes bya bar sbyar ro//de la bden pa ni de bzhin nyid gang yin pa'o zhes bya ba ni sngar don dam pa'i mtshan nyid de bzhin nyid rnam pa bdun bstan pa'o/ /gnas pa ni gang zag rnam par gzhag pa'am/ kun brtags pa'i ngo bo nyid rnam par gzhag pa'am/ mgo gcig dang rnam par dbye ba dang dris te lan gdab pa rnam par gzhag pa'am/gzhag pa rnam par gzhag pa'am/ gsang ba dang rnam par dbye ba lan btab pa rnam par gzhag pa gang yin pa'o zhes bya ba la/ gang zag rnam par gzhag pa dang kun brtags pa'i ngo bo nyid rnam par gzhag pa ni sngar kun rdzob kyi mtshan nyid bstan pa'i skabs su bshad pa bzhin no//mgo gcig tu lan btab par rnam par gzhag ces bya ba ni sems can thams cad 'chi bar 'gyur ram zhes 'dri ba la thams cad 'chi bar 'gyur ro zhes mgo gcig tu lan gdab pa lta bu la sogs pa'o//rnam par dbye zhing lan gdab pa rnam par gzhag pa zhes bya ba ni shi ba thams cad skye bar 'gyur ram zhes 'dri ba la gang dag nyon mongs pa dang bcas pa de dag ni skye bar 'gyur ro/ /gang dag nyon mongs pa med pa de dag ni skye bar mi 'gyur ro zhes rnam par phye bas lan gdab pa lta bu la sogs pa'o//dris te lan gdab pa rnam par gzhag pa zhes bya ba ni mi rnams khyad par du 'phags pa yin nam/ dman pa yin zhes dris pa las gang la ltos te 'dri zhes phyir dris nas gal te ngan song rnams la ltos nas 'dri'o zhes zer na ni khyad par du 'phags pa yin no zhes lan gdab pa dang /gal te lha rnams la ltos te 'dri'o zhes zer na ni dman pa yin no zhes lan gdab pa lta bu la sogs pa'o/ /gzhag pa las lan gdab pa rnam par gzhag pa zhes bya ba ni bdag phung po rnams dang gcig gam tha dad ces 'dri ba la bdag gtan med pa phung po rnams dang gcig gam tha dad pa nyid du 'gyur ba yod re skan snyam du don gyi dbang de yid la byas te cang mi smra bas lan gdab pa lta bu la sogs pa'o//gsang ba zhes bya ba ni sems can snod du ma gyur pa dag la don zab mo gsang ba'o/ /rnam par dbye ba lan gdab pa rnam par gzhag pa zhes bya ba ni snod du gyur pa dag la sgrogs par mdzad do//skyon rnams ni ngas kun nas nyon mongs pa'i chos rnams kyi nyes dmigs rnam grangs du mar bstan pa gang yin pa dag go zhes bya ba la kun nas nyon mongs pa'i chos rnams zhes bya ba ni nyon mongs pa dang las dang kun nas skye ba'i nyon mongs pas bsdus pa'i chos rnams so//de dag gi nyes dmigs rnam grangs du mar bstan pa gang zhe na/ nyon mongs pa'i kun nas nyon mongs pa'i nyes dmigs ni rnam pa du ma 'di lta ste/ sems kun nas nyon mongs par byed pa dang / dmigs pa la phyin ci log tu byed pa dang /bag la nyal brtan par byed pa dang / rgyu mthun pa'i 'du byed kyi rgyud 'jug par byed pa dang / bdag dang gzhan dang gnyis ka la gnod pa dang / tshe 'di dang phyi ma gnyis ka'i kha na ma tho ba bskyed pa dang / de las skyes pa'i sems de las byung ba'i sdug bsngal ba dang yid mi bde ba nyams su myong bar byed pa dang /skye ba la sogs pa'i sdug bsngal 'grub par byed pa dang / mya ngan las 'das pa las rgyud thag ring bar byed pa dang / dge ba'i chos yongs su nyams par byed pa dang / longs spyod nyams par byed pa dang / 'khor gyi nang du zhum par 'gyur ba dang /phyogs dang phyogs mtshams su sdig pa mi snyan pa'i sgra grags par 'gyur ba dang / dam pa rnams kyis smad par 'gyur ba dang / 'gyod bzhin du 'chi ba'i dus byed pa dang / lus zhig ste shi ba'i 'og tu ngan song ngan 'gro log par ltung ba'i sems can dmyal ba rnams su skye ba dang /bdag gi don thob par mi 'gyur ba'o/ /las kyi kun nas nyon mongs pa'i nyes dmigs ni rnam pa bdun te/ bdag la gnod pa dang / gzhan la gnod pa dang / gnyis ka la gnod pa dang / tshe 'di'i kha na ma tho ba bskyed pa dang / tshe phyi ma'i kha na ma tho ba bskyed pa dang /tshe 'di dang phyi ma'i kha na ma tho ba bskyed pa dang / de las skyes pa'i sems las byung ba'i sdug bsngal ba dang yid mi bde ba de nyams su myong bar 'gyur ba'o/ /skye ba'i kun nas nyon mongs pa'i nyes dmigs ni skye ba'i rab tu dbye ba dang sdug bsngal ba dang ma nges pa dang 'jug pa dag las ci rigs par rig par bya'o//yon tan rnams ni ngas rnam par byang ba'i chos rnams kyi phan yon rnam grangs du mar bstan pa gang yin pa dag go zhes bya ba la rnam par byang ba'i chos rnams zhes bya ba ni tshogs kyi lam dang sbyor ba'i lam dang rnam par dag pa'i lam rnams so/ / de dag gi phan yon rnam grangs du ma bstan pa ni mi mthun pa'i phyogs spong ba dang gnyen po bskyed pa'i rim gyis mthar thug pa'i 'bras bu thob pa'i bar du ji skad bstan pa yin no/ /tshul ni rnam pa drug tu rig par bya ste/ de kho na'i don gyi tshul dang / thob pa'i tshul dang /bshad pa'i tshul dang / mtha' gnyis rnam par spangs pa'i tshul dang / bsam gyis mi khyab pa'i tshul dang / dgongs pa'i tshul lo zhes bya ba la sangs rgyas kyi bka' shes bya'i gnas thams cad ni mdor bsdu na tshul drug po de dag khong du chud par bya'o/ /de la tshul snga ma gsum ni tshul phyi ma gsum gyis khong du chud par bya ste/'di lta ste/ de kho na'i tshul gyis mtha' gnyis rnam par spang ba'i tshul gyis khong du chud par bya'o/ /thob pa'i tshul ni bsam gyis mi khyab pa'i tshul gyis khong du chud par bya'o/ /bshad pa'i tshul ni dgongs pa'i tshul gyis khong du chud par bya'o//de la de kho na'i don 'di tshul yin pas de kho na'i don gyi tshul te/ dgongs pa nyid tshul yin pas dgongs pa'i tshul gyi bar du'ang de bzhin no/ /tshul gyi don ni de dang de la ma nor ba nyid dang ji lta ba de bzhin nyid dang phyin ci ma log pa yin pa'o/ /de la de kho na'i don ni mdor bsdu na rnam pa drug tu rig par bya ste/'jig rten pa'i grags pa'i de kho na dang / rigs pas grags pa'i de kho na dang / nyon mongs pa'i sgrib pa rnam par dag pa'i shes pa'i spyod yul gyi de kho na dang / shes bya'i sgrib pa rnam par dag pa'i shes pa'i spyod yul gyi de kho na dang /rnam par bzhag pa'i de kho na dang / rnam par ma bzhag pa'i de kho na'o/ /de la 'jig rten gyi grags pa'i de kho na gang zhe na/ brda dang kun rdzob la 'dris pa'i rjes su 'gro bas zhugs pa'i blos dngos po gang la 'jig rten pa thams cad kyi lta ba mtshungs pa 'jig rten pa thams cad kyi nges pa'i spyod yul gcig nas gcig tu 'ongs pa'i ming gis rang gi rnam par rtog pa la grags pa ma bsams ma dpyad ma brtags par bzung ba'i dngos po gzugs zhe'am /sgra zhes bya ba la sogs pa gang yin pa de ni 'jig rten gyi grags pa'i de kho na zhes bya'o/ /rigs pas grags pa'i de kho na gang zhe na/dam par rigs pa'i don la mkhas pa mdzangs pa rtog ge'i dpyod pa dang ldan pa rtog ger rtogs pa'i sa rang gi spobs pa las byung ba so so skye bo pa dpyod pa'i rjes su spyod pa rnams kyi shes pa shin tu rnam par phye ba rnam par nges pa'i spyod yul shes bya'i dngos po mngon sum dang rjes su dpag pa dang yid ches pa'i lung gi tshad ma la brten nas 'thad pa bsgrubs pa'i rigs pas rab tu bsgrub cing rnam par gzhag pa rang dang spyi'i mtshan nyid gang yin pa de ni rigs pas grags pa'i de kho na zhes bya'o//nyon mongs pa'i sgrib pa rnam par dag pa'i spyod yul gyi de kho na gang zhe na/nyan thos dang rang sangs rgyas thams cad kyi zag pa med pa dang zag pa med pa thob par byed pa dang / zag pa med pa'i rjes la thob pa 'jig rten pa'i shes pas spyod yul du bya ba 'phags pa'i bden pa bzhi gang yin pa de ni nyon mongs pa'i sgrib pa rnam par dag pa'i shes pa'i spyod yul gyi de kho na zhes bya'o//shes bya'i sgrib pa rnam par dag pa'i shes pa'i spyod yul gyi de kho na gang zhe na/ chos thams cad brjod du med pa'i ngo bo nyid las brtsams te byang chub sems dpa' rnams dang sangs rgyas bcom ldan 'das rnams kyi ye shes chos bdag med pa la 'jug pa dang zhugs par 'gyur ba shin tu rnam par dag pa tshig tu btags pa'i ngo bo nyid rnam par mi rtog pa dang mtshungs par spyod yul gyi yul du bya ba de bzhin nyid mchog bla na med pa shes bya'i mthar thug pa gang yin pa de ni shes bya'i sgrib pa rnam par dag pa'i shes bya'i spyod yul gyi de kho na zhes bya'o//rnam par gzhag pa'i de kho na gang zhe na/ 'phags pa'i bden pa bzhi ste sdug bsngal ni sdug bsngal du rnam par gzhag pa dang / lam gyi bar du lam du rnam par gzhag pa'o/ /de ci'i phyir zhe na/ 'di ltar de ni kun rdzob rnam pa gsum gyis rnam par 'jog par byed pa'i phyir te/'jig rten gyi kun rdzob dang / rigs pa'i kun rdzob dang / rtogs pa'i kun rdzob kyis so/ /de la 'jig rten gyi kun rdzob ni/ khang khyim dang bum pa dang dmag dang nags tshal dang grangs la sogs pa rnam par gzhag pa dang / bdag dang sems can la sogs pa rnam par gzhag pas rnam par 'jog go//rigs pa'i kun rdzob kyis ni phung po dang / khams dang / skye mched la sogs pa rnam par gzhag pas rnam par 'jog go/ /rtogs pa'i kun rdzob kyis ni rgyun du zhugs pa'i 'bras bu la sogs pa dang de dag gi gnas rnam par gzhag pas rnam par 'jog go//de dag kyang mdor bsdu na rnam par gzhag pa rnam pa bzhir 'gyur te/ ji skad bstan pa rnam pa gsum dang don dam pa'i kun rdzob kyis don dam pa'i bden pa rnam par gzhag pa ste/ don dam pa de'i don ni so sor rang rig pa yin pa'i phyir don dam pa de shes pa skye ba dang mthun pa nyid la brten te/kun rdzob kyi tha snyad du don dam pa'i bden pa zhes rnam par 'jog go/ /rnam par ma bzhag pa'i de kho na gang zhe na/ chos rnams kyi de bzhin nyid yongs su grub pa'i ngo bo nyid 'phags pa'i ye shes kyi spyod yul 'phags pa'i ye shes kyi yul 'phags pa'i ye shes kyi dmigs pa gang yin pa'o//'thob pa gang zhe na/ 'thob pa ni mdor na rnam pa bzhi ste/ sems can rnams kyi las kyi rnam par smin pa'i 'thob pa dang / nyan thos kyi theg pa 'thob pa dang / rang sangs rgyas kyi theg pa 'thob pa dang / theg pa chen po 'thob pa'o//de la sems can rnams kyi rnam par smin pa 'thob pa ni las dge ba dang mi dge ba mngon par 'du byed pas las bdag gir bya ba nyid la brten nas rgyu des 'gro ba lnga'i 'khor bar sems can rnams kyi rnam par smin pa mngon par 'grub pa dang rnam par smin pa so sor myong ba gang yin pa'o//nyan thos kyi theg pa 'thob pa ni skyabs su 'gro ba la sogs pa nas dge sbyong gi rgyan gyi bar du tshogs kyi lam la brten nas rnam pa lnga 'thob pa gang yin pa ste/ sa thob pa dang / shes pa thob pa dang / dad pa thob pa dang / 'bras bu thob pa dang / yon tan thob pa'o/ /de la sa thob pa ni sa gsum ste/mthong ba'i sa dang / bsgom pa'i sa dang / mthar thug pa'i sa'o/ /shes pa thob pa ni dgu ste/ chos shes pa dang / rjes su rtogs pa shes pa dang / sdug bsngal shes pa dang / kun 'byung shes pa dang / 'gog pa shes pa dang / lam shes pa dang / de dag gi rjes las thob pa kun rdzob shes pa dang /zad pa shes pa dang / mi skye ba shes pa'o/ /dad pa thob pa ni shes nas dad pa bzhi po dag ste/ dkon mchog gsum dang / 'phags pa dgyes pa'i tshul khrims so/ /'bras bu thob pa ni dge sbyong gi 'bras bu bzhi po dag ste/ rgyun du zhugs pa nas dgra bcom pa nyid kyi bar ro//yon tan thob pa ni tshad med pa dang / rnam par thar pa dang / zil gyis gnon pa'i skye mched dang / zad par gyi skye mched dang / nyon mongs pa med pa dang smon nas shes pa dang so sor yang dag par rig pa dang / mngon par shes pa thob pa'o/ /nyan thos kyi theg pa thob par byed pa'i rgyu ni 'jig rten pa'i lam gyi 'dod chags dang bral ba dang /thar pa'i cha dang mthun pa dang / nges par 'byed pa'i cha dang mthun pa'i dge ba'i rtsa ba dag yin no/ /rang sangs rgyas kyi theg pa thob pa ni mdor bsdu na rnam pa gsum ste/ nges par 'byed pa'i cha dang mthun pa thob pa sngon du btang ba dang /rtogs pa sngon du btang ba dang sngon du ma btang ba'o/ /de la nges par 'byed pa'i cha dang mthun pa thob pa sngon du btang ba ni dang por byang chub kyi theg par sems bskyed nas nges par 'byed pa'i cha dang mthun pa'i dge ba'i rtsa ba bzhi thob pa la brten nas slob pa'i sa bdun po gang yang mi thob par thal byung du mi slob pa'i sa rang byang chub kyi 'bras bu nyid thob pa ste/de ni 'jig rten pa'i sa dang mi slob pa'i sa ni med pa yin no/ /mngon par rtogs pa sngon du btang ba ni dang por rang byang chub kyi theg par sems bskyed nas nges par 'byed pa'i cha dang mthun pa'i dge ba'i rtsa ba bzhi yang thob/slob pa'i sa bdun po dag mngon par rtogs pa yang 'thob pa la brten nas mi slob pa'i sa rang byang chub kyi 'bras bu nyid thob pa ste/ de ni 'jig rten pa'i sa dang slob pa'i sa dang mi slob pa'i sa gsum char yod pa yin no/ /sngon du ma btang ba ni dang por rang byang chub kyi theg par sems bskyed nas thar pa'i cha dang mthun pa'i dge ba'i rtsa ba bskyed pa de nyid la brten nas bskal pa brgyar tshogs bsags te/nges par 'byed pa'i cha dang mthun pa yang mi slob pa'i sa yang mi thob par thal byung / mi slob pa'i sa rang byang chub kyi snying po 'bras bu nyid thob pa ste/ de ni 'jig rten pa'i sa thar pa'i cha dang mthun pa'i dge ba'i rtsa ba dang mi slob pa'i sa ni yod la 'jig rten pa'i sa nges par 'byed pa'i cha dang mthun pa dang slob pa'i sa ni med pa yin no//de la dang po gnyis kyis ni rang rgyal ba tshogs dang spyod par 'gyur ro/ /tha mas ni bse ru lta bur 'gyur ro//theg pa chen po thob pa ni rnam pa brgyad de/ sems bskyed pa thob pa dang / snying rje thob pa dang / pha rol tu phyin pa thob pa dang / bsdu ba'i dngos po thob pa dang / sa thob pa dang / dpag tu med pa lnga las de bzhin nyid khong du chud pa thob pa dang / mthu bsam gyis mi khyab pa thob pa dang /sangs rgyas kyi chos ma 'dres pa thob pa gang yin pa'o/ /de la bshad pa ni mdor bsdu na gnas gsum gyis bsdus pa yin te/ sde snod bsdu ba dang / ma mo bsdu ba dang / de gnyi ga bsdu ba'o/ /de la sde snod bsdu ba ni nyan thos kyi sde snod dang / theg pa chen po'i sde snod do//ma mo bsdu ba ni rnal 'byor spyod pa'i sa bcu bdun dang / de'i ba bzhi ste/ rnal 'byor spyod pa'i sa bcu bdun ni rnam par shes pa'i tshogs lnga dang ldan pa'i sa dang / yid kyi sa dang / rtog pa dang bcas shing dpyod pa dang bcas pa'i sa dang / rtog pa med la dpyod pa tsam gyi sa dang /rtog pa yang med dpyod pa yang med pa'i sa dang / mnyam par bzhag pa'i sa dang / mnyam par ma bzhag pa'i sa dang / sems yod pa'i sa dang / sems med pa'i sa dang / thos pa las byung ba'i sa dang / bsam pa las byung ba'i sa dang / bsgom pa las byung ba'i sa dang /nyan thos kyi sa dang / rang sangs rgyas kyi sa dang / byang chub sems dpa'i sa dang / phung po dang bcas pa'i sa dang / phung po med pa'i sa'o/ /de'i bsdu ba bzhi ni rnal 'byor spyod pa'i sa de'i rnam par gtan la dbab pa bsdu ba dang / gzhi bsdu ba dang / rnam grangs bsdu ba dang / rnam par bshad pa bsdu ba'o/ /de gnyi ga bsdu ba ni mdor bsdu na rnam pa bcu ste/ bden pa'i mtshan nyid bshad pa dang / yongs su shes pa bshad pa dang / spang ba bshad pa dang / mngon du shes pa bshad pa dang / bsgom pa bshad pa dang / de dag nyid kyi rnam pa rab tu dbye ba bshad pa dang /de dag nyid kyi gnas dang gnas pa'i 'brel pa bshad pa dang / yongs su shes pa la sogs pa'i bar du gcod pa'i chos bshad pa dang / yongs su shes pa la sogs pa rjes su mthun pa'i chos bshad pa dang / yongs su shes pa la sogs pa dang nyes dmigs dang phan yon bshad pa ste/de dag gis sde snod bsdu ba dang / ma mo bsdu ba de gnyis ka sdud par byed pas na gnyis ka bsdu ba zhes bya'o/ /yang mdor bsdu na bshad pa rnam pa bcu gnyis yod de/ dngos po bshad pa dang / ming gi rnam grangs bshad pa dang / rang gi gzhung lugs brtag pa bshad pa dang /gzhan gyi gzhung lugs brtag pa bshad pa dang / drang ba'i don bshad pa dang / nges pa'i don bshad pa dang / kun rdzob kyi bden pa bshad pa dang / don dam pa'i bden pa bshad pa dang / gsang ba bshad pa dang / rnam par dbye ba bshad pa dang / lan gdab pa'i dngos po bshad pa dang /lan mi gdab pa'i dngos po bshad pa'o/ /de la dngos po bshad pa ni gzugs la sogs pa dang mig la sogs pa'i chos rnams so sor bshad pa gang yin pa'o/ /ming gi rnam grangs bshad pa ni sangs rgyas bcom ldan 'das rnams kyis chos bshad pa phung po dang khams dang skye mched rten cing 'brel par 'byung ba dang gnas dang gnas ma yin pa dang dbang po dang bden pa'i ming dang dran pa nye bar gzhag pa la sogs pa'i ming dang gzugs can dang gzugs can ma yin pa dang bstan du yod pa dang bstan du med pa dang thogs pa dang bcas pa dang thogs pa med pa la sogs pa'i ming gi rnam grangs dpag tu med pa dag rgya cher bshad pa gang yin pa'o//rang gi gzhung lugs brtag pa bshad pa ni rnam par bshad pa bsdu ba la brten nas mdo sde dang dbyangs kyis bsnyad pa'i sde dang lung du bstan pa'i sde la sogs pa bshad pa dang yang dag par bshad pa gang yin pa'o//gzhan gyi gzhung lugs brtag pa bshad pa ni gtan tshigs kyi rigs pa rnam pa bdun la brten nas phas kyi rgol ba tshar gcod pa dang rang gi sgra pa'i gzhung gzugs pa gang yin pa ste gtan tshigs kyi rigs pa rnam pa bdun ni 'di lta ste/ smra ba dang / smra ba'i zhal che ba dang /smra ba'i gzhi dang / smra ba'i rgyan dang / smra ba chad pas gcad pa dang / smra ba las byung ba dang / smra ba gces smra ba la dgos pa'i chos rnams so/ /drang ba'i chos bshad pa ni bcom ldan 'das kyis mdo'i sde dang dbyangs kyis bsnyad pa'i sde dang lung du bstan pa'i sde la sogs pa gang bshad pa don rnams rnam par ma phye ba drang bar bya dgos pa gang yin pa'o//nges pa'i don bshad pa ni de las bzlog par rig par bya'o/ /kun rdzob kyi bden pa bshad pa ni tshig gi lam gyis brjod pa gang ci yang rung ste/ ming dang 'du shes dang brjod pa'i dbang du bya ba 'di lta ste/mtshan ma dang ming dang rnam par rtog pa gang ci yang rung ba bshad pa'o/ /don dam pa'i bden pa bshad pa ni 'phags pa'i bden pa bzhi bshad pa dang de bzhin nyid dang yang dag pa'i mtha' dang chos kyi dbyings bshad pa gang yin pa bshad pa'o/ /gsang ba bshad pa ni 'di lta ste/ phal cher ni nyan thos kyi sde snod bshad pa gang yin pa'o//rnam par phye ba bshad pa ni 'di lta ste/ phal cher ni theg pa chen po'i sde snod bshad pa gang yin pa'o/ /lan btab pa'i dngos po bshad pa ni chos kyi mdo bzhi po dag bshad pa 'di lta ste/ 'dus byas thams cad mi rtag pa zhes bya ba nas mya ngan las 'das pa ni zhi ba'o zhes bya ba'i bar dang /de lta bu dang mthun pa dag bshad pa gang yin pa'o/ /lan mi gdab pa'i dngos po bshad pa ni 'jig rten rtag gam zhes dris nas de ni bdag gis lan ma btab po zhes smra zhing lan 'debs par mi byed pa dang / de bzhin 'ongs pa shi phan chad yod pa yang ma yin med pa yang ma yin nam zhes bya ba'i bar du lan mi gdab pa'i dngos po bcu bzhir dris na de ni bdag gis lan btab po zhes smra zhing lan 'debs par mi byed pa gang yin pa'o//de la lan mi 'debs pa'i dngos po bshad pa ni rgyu rnam pa bzhis rig par bya ste/ med pa'i phyir lan mi gdab pa yang yod de/ 'di lta ste/ ci bdag phung po rnams dang gzhan nam gzhan ma yin nam rtag gam mi rtag ces bya ba la sogs pa'o/ /don dang mi ldan pa'i phyir lan mi 'debs pa yang yod de/ 'di lta ste/ shing sha pa'i lo ma'i dpe'i mdo las/ ngas ni 'di snyed cig mngon par rtogs par thugs su chud kyang ma bstan te/de ci'i phyir zhe na/ chos de dag don dang ldan pa ma yin pa'i phyir ro zhes ji skad gsungs pa lta bu'o/ /zag pa'i phyir lan mi 'debs pa yang yod de/ 'di lta ste/ bdag yod dam zhes 'dri na phung po rnams la bdag tu 'dzin par gyur tam/phung po rnams la don gzhan du gyur pa yod pa 'dzin na mi rung bas lan mi 'debs pa dang / bdag med dam zhes 'dri na skyes bu'i tha snyad la skur pa 'debs sam 'dzin par gyur na mi rung bas lan mi 'debs pa dang / de bzhin du de bzhin 'ongs pa shi phan chad yod dam zhes bya ba nas yod pa'ang ma yin med pa'ang ma yin zhes bya ba'i bar du 'dri na zab pa'i phyir lan mi 'debs pa lta bu'o//de bzhin nyid kyi mtshan nyid rnam par gzhag pa las lan mi 'debs pa yang yod de/ 'di lta ste/ chos de dag lan gzhan nam gzhan ma yin zhes 'dri na/ lan mi 'debs pa lta bu ste 'di ltar mtshan nyid de ni gzhan pa nyid kyang ma yin gzhan pa ma yin par rnam par gnas pa yin pa'i phyir ro/ /gzhan yang lan mi gdab pa'i dngos po bshad pa ni rgyu rnam pa bzhis rig par bya ste/ mu stegs can rnams kyis bshad pa yin pa'i phyir dang / tshul bzhin ma yin pa'i phyir dang / don dang mi ldan pa'i phyir dang / rtsod pa'i gzhi'i gnas su gyur pa 'ba' zhig yin pa'i phyir ro/ /mtha' gnyis rnam par spangs pa gang zhe na/ der ni mdor bsdu na rnam pa drug tu blta bar bya ste/ yod pa ma yin pa la sgro 'dogs pa'i mtha' rnam par spang ba dang /yod pa la skul pa 'debs pa'i mtha' rnam par spang ba dang / rtag par 'dzin pa'i mtha' rnam par spang ba dang / chad par 'dzin pa'i mtha' rnam par spang ba dang / 'dod pa'i bsod nams la sbyor ba'i mtha' rnam par spang ba dang / bdag nyid ngal bar sbyor ba'i mtha' rnam par spang ba'o//bsam gyis mi khyab pa gang zhe na/ mdor bsdu na bsam gyis mi khyab pa drug ste/ bdag la sems pa dang / sems can la sems pa dang / 'jig rten la sems pa dang / sems can rnams kyi las kyi rnam par smin pa la sems pa dang / bsam gtan pa rnams kyi bsam gtan pa'i yul dang /sangs rgyas rnams kyi sangs rgyas kyi yul lo/ /de la bdag la sems pa dang / sems can la sems pa dang / 'jig rten la sems pa ni lta ba la brten na ni bsam gyis mi khyab pa dag yin no/ /de la bdag la sems pa ni 'di ltar 'di na la la 'jig tshogs la lta ba la brten nas 'di snyam du sems te ci bdag 'das pa'i dus na byung bar gyur tam zhes bya ba la sogs par sems pa'o//sems can la nges pa ni 'di ltar 'di na la la 'jig tshogs la lta ba la brten nas 'di snyam du sems te/sems can gang las byung sems can byed pa po su yin sems can gang gi bar du 'gro sems can gang gi bar du 'gag par 'gyur snyam du sems pa'o/ /'jig rten la sems pa ni 'di ltar 'di na la la 'jig tshogs la lta ba la brten nas 'di snyam du sems te/ 'jig rten rtag go zhes bya ba la sogs par sems pa'o//yang de dag ni chos nyid las brtsams nas kyang 'di snyam du sems te/ bdag gi chos nyid dang sems can gyi chos nyid dang 'jig rten gyi chos nyid 'di ci las de ltar byung snyam du bsam zhing chos nyid kyi rigs pa kho nas mi 'jug pa yin te/ de'i phyir yang bsam gyis mi khyab pa'i gnas la sems pa zhes bya'o/ /sems can rnams kyi las kyi rnam par smin pa la sems pa ni rnam pa bzhis bsam gyis mi khyab pa yin te/ gnas dang / dngos po dang / rgyu dang / rnam par smin pa las so/ /bsam gtan pa rnams kyi bsam gtan pa'i yul ni rnam pa gsum gyis bsam gyis mi khyab pa yin te/de bzhin nyid zab pa'i don dang dbang sgyur ba dang zag pa zad pa'i dbyings yang dag par 'grub pas so/ /sangs rgyas rnams kyi sangs rgyas kyi yul ni rnam pa lngas bsam gyis mi khyab pa yin te/ ji skad bstan pa rnam pa gsum po de dag nyid dang /gzhan gnyis te sgrib pa med pa dang / sems can gyi don gyi bya ba mdzad pas so/ /dgongs pa gang zhe na/ mdor bsdu na rnam pa bcu drug ste/ yang dag par ston pa'i dgongs pa dang / 'dun pa bzlog pa'i dgongs pa dang / yang dag par 'dzin du 'jug pa'i dgongs pa dang yang dag par gzengs bstod pa'i dgongs pa dang yang dag par rab tu dga' bar mdzad pa'i dgongs pa dang /gzud pa'i dgongs pa dang / the tshom gcad pa'i dgongs pa dang / yongs su smin par bya ba'i dgongs pa dang / ting nge 'dzin du bya ba'i dgongs pa dang / rnam par grol bar bya ba'i dgongs pa dang / don gzhan dang 'brel pa'i dgongs pa dang / rtogs par byed pa rnams la kha na ma tho ba med pa'i dgongs pa dang / mchog tu dga' ba bskyed pa'i dgongs pa dang / smra ba po la nyan pa rnams rin po cher bskyed pa'i dgongs pa dang / chos kyi tshul 'jug pa'i dgongs pa dang /dge ba mang bar bya ba'i dgongs pa dang / mtshan ma thams cad zil gyis gnon pa'i dgongs pa'o/ /de la mtha' gnyis spang ba'i tshul gyis de kho na'i don gyi tshul khong du chud na thob par bya ba'i don thob pa'o/ /de kho na'i don gyi tshul khong du chud pa'i skyon med pa la 'jug pa ni rnam pa lngar rig par bya ste/'di lta ste/ 'dod chags dang ma bral ba'i skyon med pa la 'jug pa dang / 'dod chags dang shas cher bral ba'i skyon med pa la 'jug pa dang / 'dod chags dang bral ba'i skyon med pa la 'jug pa dang / rang sangs rgyas kyi skyon med pa la 'jug pa dang / byang chub sems dpa'i skyon med pa la 'jug pa'o/ /thob par bya ba'i don thob na de las gzhan pa'i thob pa'i tshul yang bsam gyis mi khyab pa'i tshul gyis de khong du chud par bya'o/ /bshad pa'i tshul thams cad ni sangs rgyas bcom ldan 'das rnams kyi dgongs pa'i tshul gyis ci rigs par khong du chud par 'gyur ro//'jug pa ni dus gsum dang 'dus byas kyi mtshan nyid gsum dang rkyen bzhi po dag go zhes bya ba ni gang du 'jug pa dang ji ltar 'jug pa dang gang gis 'jug pa bstan to/ /rigs pa ni rnam pa bzhir rig par bya ste zhes bya ba ni chos so cog gi dbang byed pa rigs pa'i rnam grangs smos pa 'jig rten na rgyal po dag bdag gi ris su ci 'dod pa'i ngag gi dbang phyug gis 'grub pa bzhin du chos so cog la bdag gi phyogs su gzung ba yang ji ltar 'dod par rigs pa'i dbang gis 'grub ste/chos thams cad kyi rgyal po lta ba'i rigs zhes bya ba chos kyi rjes su gsungs pa'i rigs pa bzhi brjod pa'o//ltos pa'i rigs pa dang / bya ba byed pa'i rigs pa dang / 'thad pas sgrub pa'i rigs pa dang / chos nyid kyi rigs pa'o zhes bya ba la rigs pa de bzhi'i phyogs tsam zhig mdor brjod na/ ltos pa'i rigs pa zhes bya ba ni chos rnams kyi rgyu dang 'bras bu'i ltos pa bstan pa yin no//bya ba byed pa'i rigs pa zhes bya ba ni chos rnams kyi bya ba byed pa'i las bstan pa yin no/ /'thad pas sgrub pa'i rigs pa zhes bya ba ni tshad ma gsum gyi 'thad pas so sor don sgrub pa'i rigs pa bstan pa yin no/ / chos nyid kyi rigs pa zhes bya ba ni chos rnams kyi gnas dang gnas ma yin pa'i mtshan nyid so sor nges pa'i chos nyid bstan pa yin no/ /de la ltos pa'i rigs pa'i mtshan nyid gang zhe na/ de la ltos pa'i rigs pa ni 'du byed rnams 'byung ba dang rjes su tha snyad btags pa'i rgyu gang dag yin pa dang rkyen gang dag yin pa ste/de ni ltos pa'i rigs pa yin no zhes bya ba gsungs te 'du byed rnams 'byung ba dang rjes su tha snyad gdags pa la rang dbang med de / rgyu dang rkyen du nges pa'i tshogs pa la ltos shing 'byung ba dang rjes su tha snyad 'dogs dgos pas de dag gi rgyu dang 'bras bu'i ltos pa bstan pa ni ltos pa'i rigs pa zhes bya'o//de la 'du byed rnams zhes bya ba ni rnam pa gnyis te/ phyi dang nang gi 'du byed rnams so/ /de la gzugs nas chos kyi bar gyi khams drug ni phyi'i 'du byed rnams so/ /mig gi dbang po dang rnam par shes pa'i khams nas yid kyi dbang po dang rnam par shes pa'i khams kyi bar ni nang gi 'du byed rnams te/de dag gi 'jig rten pa'i lo tog la sogs pa lung ma bstan pa'i dngos po thams cad dang nyon mongs pa dang las dang skye ba'i mtshan nyid kyi kun nas nyon mongs pa'i phyogs kyi dngos po thams cad dang byang chub kyi phyogs dang mthun pa'i chos la sogs pa rnam par byang ba'i phyogs kyi dngos po thams cad ci rigs par bsdus par rig par bya'o//'byung ba zhes bya ba ni gang ma byung ba gdod 'byung ba'o/ /rjes su tha snyad gdags pa'i zhes bya ba ni dngos po rnams la ngo bo nyid dam bye brag gi rnam pa ming dang brdar btags pa'o //de dag kyang 'dra ba la ltos te mi 'dra ba'i cha yod pa dang gnyis su 'gyur te/ de dag gi mtshan nyid rab tu dbye ba ni dbang phyug dam pa'i mnga' bdag dpal lha btsan byang chub rdzu 'phrul gyis mdzad pa bka' yang dag pa'i tshad ma las 'byung ba bzhin du blta bar bya'o//rgyu gang dag yin pa dang / rkyen gang dag yin pa ste zhes bya ba ni 'du byed byung ba dang rjes su tha snyad gdags pa'i 'bras bu de dag 'byung ba dang rjes su tha snyad 'dogs pa'i tshe na rgyu dang rkyen de dag la ltos par bya ba yin pas ltos pa'i rigs pa zhes bya'o zhes bya ba bstan to//de la 'du byed rnams 'byung ba dang rjes su tha snyad gdags pa'i rgyu dang rkyen ni gang dag yin/ rgyu dang rkyen de dag la ltos te byung ba dang rjes su tha snyad btags pa'i 'bras bu ni gang dag yin zhe na/ rgyu bcu dang / rkyen bzhi dang / 'bras bu lnga ste/de la rgyu bcu gang zhe na/ rjes su tha snyad 'dogs pa'i rgyu dang / ltos pa'i rgyu dang / 'phen pa'i rgyu dang / mngon par 'grub pa'i rgyu dang / yongs su 'dzin pa'i rgyu dang / 'dren pa'i rgyu dang / so sor nges pa'i rgyu dang / lhan cig byed pa'i rgyu dang / mi mthun pa'i rgyu dang / mi mthun pa med pa'i rgyu'o//de la rjes su tha snyad 'dogs pa'i rgyu ma gtogs pa rgyu lhag ma dgu ni 'byung ba'i rgyu yin te/ de la yang mi mthun pa'i rgyu ni mi mthun pa med par gyur na 'byung ba'i rgyu yin par sbyar ro/ /rjes su tha snyad 'dogs pa'i rgyu nyid ni rjes su tha snyad 'dogs pa'i rgyu yin par sbyar ro//de la rjes su tha snyad 'dogs pa'i rgyu gang zhe na/ chos thams cad kyi ming dang ming sngon du 'gro ba'i 'du shes dang 'du shes sngon du 'gro ba'i brjod pa gang yin pa de ni chos de dang de dag gi rjes su tha snyad 'dogs pa'i rgyu yin no/ /ltos pa'i rgyu gang zhe na/ gzhi gang la ltos shing rgyu gang gis dngos po gang la 'dod pa dang len par gyur pa de ni de'i ltos pa'i rgyu yin no//'phen pa'i rgyu gang zhe na/ sa bon ni rang gi 'bras bu tha ma'i bar gyi 'phen pa'i rgyu yin no/ /mngon par 'grub pa'i rgyu gang zhe na/ sa bon de nyid rang gi 'bras bu mngon par 'grub pa'i rgyu yin no//yongs su 'dzin pa'i rgyu gang zhe na/ sa bon ma gtogs pa de las gzhan pa rkyen rnams ni yongs su 'dzin pa'i rgyu yin no/ /'dren pa'i rgyu gang zhe na/ sa bon las grub pa'i 'bras bu de ni sa bon gyis 'phangs pa'i 'bras bu phyi ma'i 'dren pa'i rgyu yin no//so sor nges pa'i rgyu gang zhe na/ chos rnam pa sna tshogs rnam pa tha dad pa'i rang rang gi rgyu so sor nges pa'i rgyu yin no/ /lhan cig byed pa'i rgyu gang zhe na/ ltos pa'i rgyu dang 'phen pa'i rgyu dang mngon par 'grub pa'i rgyu dang yongs su 'dzin pa'i rgyu dang 'dren pa'i rgyu dang so sor nges pa'i rgyu gang yin pa de dag thams cad gcig tu bsdus pa ni lhan cig byed pa'i rgyu yin no//mi mthun pa'i rgyu gang zhe na/ skye ba la sogs pa la bar du gcod pa'i rgyu ni mi mthun pa'i rgyu yin no/ /mi mthun pa med pa'i rgyu gang zhe na/ skye ba la sogs pa la bar du gcod pa med pa'i rgyu ni mi mthun pa med pa'i rgyu yin no//rgyu bcu po de dag ni nang dang phyi'i 'du byed 'jig rten pa'i lo tog la sogs pa lung du ma bstan pa'i dngos po thams cad dang nyon mongs pa dang las dang / skye ba'i mtshan nyid kyi kun nas nyon mongs pa'i phyogs kyi dngos po thams cad dang / byang chub kyi phyogs dang mthun pa'i chos la sogs pa rnam par byang ba'i phyogs kyi dngos po thams cad phyin ci ma log par 'byung ba dang rjes su tha snyad 'dogs pa'i rgyu yin no/ /de la rgyu bcu po de dag gis 'jig rten pa'i lo tog la sogs pa lung du ma bstan pa'i dngos po thams cad ji ltar 'byung zhing rjes su tha snyad 'dogs par byed ce na/'di ltar 'jig rten na 'bru'i grangs su gtogs pa'i lo tog gang gis 'jig rten 'dir byed pa gang yin pa de dag gi ming du 'du shes dang tshig tu brjod pa rnam pa sna tshogs pa 'di lta ste/ nas dang 'bras dang sA lu dang gro dang til dang sran ma zhes bya ba la sogs pa ni de dag gi tha snyad nas la sogs pa khyer de shog thogs shog zhig ces bya ba la sogs pa'i tha snyad 'dogs pa'i rgyu yin no//bkres pa dang skom pa dang nyam chung ba dang lus gnas par bya ba la ltos pa dang kham gyi zas myang bar bya ba la ltos nas nas la sogs pa de dag 'dod pa dang tshol ba dang len pa dang longs spyod par byed pa 'di ni de dag gi ltos pa'i rgyu yin no//nas la sogs pa'i rang rang gi sa bon gang dang gang la lo tog gang dang gang 'byung ba'i sa bon de ni de'i 'phen pa'i rgyu yin no/ /sa bon de ni myu gu de'i mngon par 'grub pa'i rgyu yin no//sa dang char pa la sogs pa'i rkyen las myu gu 'byung bar 'gyur ba de ni de'i yongs su 'dzin pa'i rgyu yin no/ /myu gu dang sdong bu dang lo ma gcig nas gcig tu brgyud pa'i rgyun de ni lo tog de 'grub pa dang yongs su smin pa'i 'dren pa'i rgyu yin no/ / nas kyi sa bon las kyang nas kyi myu gu dang nas kyi lo tog 'byung bar 'gyur gyi gzhan ma yin la 'bru gzhan dag las kyang de bzhin pa de ni de dag gi so sor nges pa'i rgyu yin no/ /ltos pa'i rgyu nas bzung ste so sor nges pa'i rgyu la thug pa'i bar gyi rgyu drug po de dag thams cad gcig tu bsdus pa ni lo tog de 'grub pa'i lhan cig byed pa'i rgyu yin no//ser ba dang lo tog la gnod pa 'byung ba la sogs pa bar du gcod pa rnams ni de'i mi mthun pa'i rgyu yin no/ /de dag med de bar du gcod pa med pa ni mi mthun pa med pa'i rgyu yin te/ de ltar rgyu bcu po de dag gis 'bru bsdus pa rnams la ji bzhin du de las gzhan pa'i 'jig rten pa'i lung du ma bstan pa'i dngos po dag la yang ci rigs par sbyar bar rig par bya'o//de la rgyu bcu po de dag gis nyon mongs pa dang las dang skye ba'i mtshan nyid kyi kun nas nyon mongs pa'i phyogs kyi dngos po thams cad ji ltar 'byung zhing rjes su tha snyad 'dogs par byed ce na/'di ltar rten cing 'brel par 'byung ba thams cad kyi ming dang 'du shes dang tshig tu brjod pa 'di lta ste/ ma rig pa dang 'du byed rnams dang rnam par shes pa dang ming dang gzugs las rgyas pa rga shi dang mya ngan dang smre sngags 'don pa dang sdug bsngal ba dang yid mi bde ba dang 'khrug pa zhes bya ba'i bar de ni re zhig kun nas nyon mongs pa'i tha snyad ma rig pa'i rkyen gyis 'du byed rnams zhes bya ba nas/skye ba'i rkyen gyis rga shi zhes bya ba la sogs pa'i rjes su tha snyad 'dogs pa'i rgyu yin no/ /bde ba la sogs pa'i rgyu yul myong ba la ltos nas srid pa'i yan lag 'di dag 'jug pa de ni kun nas nyon mongs pa de'i ltos pa'i rgyu yin no//tshe 'di la skye shi 'byung ba'i ma rig pa la sogs pa'i chos rnams kyi sa bon gang dag yin pa de dag ni skye ba gzhan gyi skye ba dang rga shi'i 'phen pa'i rgyu yin no//ma rig pa la sogs pa'i rang rang gi sa bon ni mngon par 'grub pa'i rgyu yin no / /skyes bu dam pa ma yin pa la brten pa dang dam pa'i chos ma yin pa thos pa dang tshul bzhin ma yin pa yid la byed pa dang / sngon goms pa'i 'phen pa ni ma rig pa la sogs pa dag 'byung ba'i yongs su 'dzin pa'i rgyu yin no//ma rig pa la sogs pa srid pa la thug pa de dag gi phyi ma 'dren zhing gcig nas gcig tu brgyud pas tshe gzhan gyi skye ba dang rga shi ni 'dren pa'i rgyu yin no/ /ma rig pa la sogs pa srid pa'i mthar thug pa rnams rang gi sa bon rnams dang bcas pa gzhan dag sems can dmyal bar skye bar 'gyur ba dang gzhan dag dud 'gro dang /yi dgas dang mi dang lhar skye bar 'gyur ba de ni kun nas nyon mongs pa'i so sor nges pa'i rgyu yin no/ /ltos pa'i rgyu nas bzung ste/ so sor nges pa'i rgyu la thug pa'i bar gyi rgyu drug po de dag thams cad gcig tu bsdus pa ni kun nas nyon mongs pa'i lhan cig byed pa'i rgyu yin no//kun nas nyon mongs pa de'i mi mthun pa'i rgyu ni rigs pa dang ldan pas sangs rgyas rnams 'byung ba dang dam pa'i chos bstan pa dang skyes bu dam pa la brten pa dang dam pa'i chos nyan pa dang tshul bzhin yid la bya ba dang chos kyi rjes su mthun pa'i chos sgrub pa dang byang chub kyi phyogs kyi chos thams cad do//mi mthun pa med pa'i rgyu ni ji skad bstan pa'i chos 'di dag nyid med pa dang bral ba nyid de/ de ltar rgyu bcu po de dag gis sems can thams cad kyi kun nas nyon mongs pa thams cad rig par bya'o/ /de la rgyu bcu po de dag gis byang chub kyi phyogs dang mthun pa'i chos la sogs pa rnam par byang ba'i phyogs kyi dngos po thams cad ji ltar 'byung zhing rjes su tha snyad 'dogs par byed ce na/rnam par byang ba'i phyogs kyi chos thams cad 'gog pa mya ngan las 'das pa la ming dang 'du shes dang tshig tu brjod pa 'di lta ste/ dran pa nye bar gzhag pa dang /yang dag par spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag dang / 'phags pa'i lam yan lag brgyad pa dang / ma rig pa 'gags pas 'du byed 'gag ces bya ba nas/ skye ba 'gags pas rga shi 'gag ces bya ba'i bar de dag dang /de lta bu dang mthun pa rnams ni rnam par byang ba'i rjes su tha snyad 'dogs pa'i rgyu yin no/ /'du byed kyi nyes dmigs la ltos nas rnam par byang ba tshol ba dang rnam par byang ba yongs su 'dzin pa dang rnam par byang ba yongs su grub pa gang yin pa de ni de'i ltos pa'i rgyu yin no/ /gang zag rigs la gnas pa'i rigs dang ldan pa phung po'i lhag ma dang bcas pa dang /lhag ma med pa'i mya ngan las 'das pa'i dbyings thob pa'i sngon du 'gro ba gang yin pa de ni rnam par byang ba 'phen pa'i rgyu yin no/ /rigs kyis bsdus pa zag pa med pa'i byang chub kyi phyogs kyi chos kyi sa bon de dag ni byang chub kyi phyogs kyi chos de dag gi mngon par 'grub pa'i rgyu yin no//skyes bu dam pa la brten pa dang / dam pa'i chos nyan pa dang / tshul bzhin yid la bya ba dang / sngon dbang po yongs su smin par byas pa ni rnam par byang ba'i yongs su 'dzin pa'i rgyu yin no/ /byang chub kyi phyogs kyi chos rang gi sa bon las mngon par 'grub pa de dag ni phung po lhag ma dang bcas pa dang lhag ma med pa'i mya ngan las 'das pa'i dbyings kyi rim gyis 'dren pa'i rgyu yin no//nyan thos kyi rigs gang yin pa ni nyan thos kyi theg pas yongs su mya ngan las 'da' bar 'gyur ba dang / rang sangs rgyas kyi rigs gang yin pa ni/rang sangs rgyas kyi theg pas yongs su mya ngan las 'da' bar 'gyur ba dang / theg pa chen po'i rigs ni theg pa chen pos yongs su mya ngan las 'da' bar 'gyur ba de ni rnam par byang ba'i so sor nges pa'i rgyu yin no/ / ltos pa'i rgyu nas bzung ste/ so sor nges pa'i rgyu la thug pa'i bar gyi rgyu drug po de dag thams cad gcig tu bsdus pa ni rnam par byang ba'i lhan cig byed pa'i rgyu yin no//rigs dang mi ldan pa dang sangs rgyas rnams mi 'byung ba dang / mi khom par skye ba dang / skyes bu dam pa ma yin pa la brten pa dang / dam pa'i chos ma yin pa nyan pa dang /tshul bzhin ma yin pa yid la byed pa dang / log par sgrub pa ni rnam par byang ba'i mi mthun pa'i rgyu yin no/ /mi mthun pa'i rgyu de nyid med pa dang bral ba nyid gang yin pa de ni mi mthun pa med pa'i rgyu yin no/ /de ltar rgyu bcu po de dag ni lung du ma bstan pa dang kun nas nyon mongs pa dang rnam par byang ba'i dngos po thams cad kyi rgyu yin te/'das pa'i dus na byung ba dang / ma 'ongs pa'i dus na 'byung bar 'gyur ba'o/ /lung du ma bstan pa kun nas nyon mongs pa dang rnam par byang ba'i rgyu gzhan ni 'di las gong na yang med la 'di las lhag pa yang med do/ / rgyu bcu po de dag kyang mdor bsdu na rgyu gnyis kyis bsdus te/ bskyed pa'i rgyu dang thabs kyi rgyu'o/ /de la 'phen pa'i rgyu dang mngon par 'grub pa'i rgyu gnyis ni bskyed pa'i rgyu yin / rgyu lhag ma brgyad ni thabs kyi rgyu yin par rig par bya'o/ /de la rkyen bzhi gang zhe na/ rgyu'i rkyen dang / de ma thag pa'i rkyen dang /dmigs pa'i rkyen dang / bdag po'i rkyen no/ /rkyen bzhi po de dag ni 'du byed rnams 'byung ba dang rjes su tha snyad 'dogs pa'i rkyen du ci rigs par sbyar ro/ /de la rgyu'i rkyen gang zhe na/ sa bon thams cad pa kun gzhi rnam par shes pa gang yin pa'o/ /phyi rol gyi dngos po dag la yang 'phen pa'i rgyu dang mngon par 'grub pa'i rgyur grags pa thams cad ni rgyu'i rkyen yin no//de ma thag pa'i rkyen gang zhe na/ sems dang sems las byung ba'i chos gang dag gi mjug thogs su sems dang sems las byung ba'i chos gang dag 'byung ba de dag ni de dag gi de ma thag pa'i rkyen zhes bya'o/ / rnam par shes pa drug po 'gags ma thag pa gang yin pa de dag ni rnam par shes pa drug po gang dag de'i mjug thogs su skye ba'i de ma thag pa'i rkyen yin te/ de dag ni 'gags ma thag pa'i yid la yid ces bya ba dang / yid kyi skye mched ces bya ba dang / yid kyi khams zhes bya bar yang gdags so//dmigs pa'i rkyen gang zhe na/ gzugs la sogs pa yul lnga po dag ni rnam par shes pa'i tshogs lnga po dag gi dmigs pa'i rkyen yin no/ /nang dang phyi rol gyi skye mched bcu gnyis po thams cad ni yid kyi rnam par shes pa'i dmigs pa'i rkyen yin no/ /bdag po'i rkyen gang zhe na/mig la sogs pa skye mched lhan cig byung ba rnams ni mig gi rnam par shes pa la sogs pa'i bdag po'i rkyen yin no/ /rnam par shes pa rnams dmigs pa la gtod par byed pa'i yid la byed pa yang rnam par shes pa rnams kyi bdag po'i rkyen yin no/ /sems dang sems las byung ba'i chos lhan cig byung ba rnams kyang gcig gi bdag po'i rkyen gcig yin pas bdag po'i rkyen yin no//dge ba dang mi dge ba'i las sngon byas pa rnams dang phyis 'bras bu 'dod pa dang mi 'dod pa rnam par smin par 'gyur ba ni bdag po'i rkyen no/ /zhing dang lud dang chu la sogs pa ni lo tog mngon par 'grub pa'i bdag po'i rkyen no//bzo shes pa dang bzo'i las dang de dag ni 'jig rten pa'i bzo dang las kyi gnas dang de dag mngon par 'grub pa'i bdag po'i rkyen yin no/ /de la rgyu'i rkyen ni rgyu yang yin rkyen yang yin te/ bskyed pa'i rgyu yin no/ /de la gzhan gyi rkyen gsum po dag ni rkyen kho na yin gyi rgyu ni ma yin te/thabs kyi yin no / /de yang bdag po'i rkyen ni gtso cher thabs kyi rgyu thams cad yin no/ /de ma thag pa'i rkyen dang dmigs pa'i rkyen ni yongs su 'dzin pa'i rgyus bsdus pa'i sgo nas thabs kyi rgyu yin par rig par bya'o/ /de la 'bras bu lnga gang zhe na/rnam par smin pa'i 'bras bu dang / rgyu mthun pa'i 'bras bu dang / bral ba'i 'bras bu dang / skyes bu byed pa'i 'bras bu dang / bdag po'i 'bras bu'o/ /'du byed 'byung ba dang rjes su tha snyad btags pa'i 'bras bu de dag dang ci rigs par sbyar ro/ /de la rnam par smin pa'i 'bras bu gang zhe na/mi dge ba'i chos rnams kyi rnam par smin pa ngan song rnams su rnam par smin par 'gyur ba dang / dge ba zag pa dang bcas pa rnams kyi rnam par smin pa bde 'gro rnams su rnam par smin par 'gyur ba gang yin pa de ni rnam par smin pa'i 'bras bu'o/ /rgyu mthun pa'i 'bras bu gang zhe na/mi dge ba la goms pas mi dge ba la dga' zhing mi dge ba mang bar gnas pa dang dge ba la goms pas dge ba la dga' zhing dge ba mang bar gnas pa dang / sngon gyi las dang mthun par phyis 'bras bu rjes su mthun pa gang yin pa de ni rgyu mthun pa'i 'bras bu'o/ / bral ba'i 'bras bu gang zhe na/ 'phags pa'i lam yan lag brgyad pas nyon mongs pa 'gog pa gang yin pa de ni bral ba'i 'bras bu'o/ /skyes bu byed pa'i 'bras bu gang zhe na/ la la tshe 'di nyid la bzo dang las kyi gnas gang yang rung ba la brten nas skyes bu byed pas yang na ni zhing rmod dam/yang na tshong byed dam/ yang na rgyal po'i zha 'bring byed dam/ yi ge dang rtsis dang shod 'god pa la bgrang ba dang lag rtsis kyis lo tog la sogs pa dang rnyed pa la sogs pa'i 'bras bu mngon par sgrub pa gang yin pa de ni skyes bu byed pa'i 'bras bu'o/ / bdag po'i 'bras bu gang zhe na/ mig gi rnam par shes pa ni mig gi dbang po'i bdag po'i 'bras bu'o/ /yid kyi rnam par shes pa'i bar yang yid kyi dbang po'i bar gyi bdag po'i 'bras bu'o/ /de bzhin du srog dang ma bral ba ni srog gi dbang po'i 'bras bu'o/ /de bzhin du dbang po nyi shu rtsa gnyis po thams cad kyi so so'i dbang gis 'bras bu gang grub pa de ni bdag po'i 'bras bu yin par rig par bya'o//de ltar 'du byed 'byung ba dang rjes su tha snyad gdags pa'i 'bras bu lnga po de dag 'byung ba dang rjes su tha snyad 'dogs pa'i tshe na rgyu bcu po dang rkyen bzhi po de dag la ltos par bya ba yin pas de ni ltos pa'i rigs pa yin no zhes bya bar sbyar ro//bya ba byed pa'i rigs pa'i mtshan nyid gang zhe na/ chos rnams thob pa'am/ skyes pa rnams las byed par 'gyur ba'i rgyu gang yin pa dang / rkyen gang yin pa de dag ni bya ba byed pa'i rigs pa yin no zhes bya ba gsungs te/ de la thob pa'am 'grub pa zhes bya ba ni byed pa'i bye brag nyid yin te/gtso bo yin pa'i phyir so sor smos so/ /de la thob pa ni rnyed pa dang ldan pa la bya ste/ de yang sa bon tsam du rgyu thob pa dang / 'bras bu ngo bo thob pa dang gnyis so/ /de la sa bon tsam du rgyu thob pa gang zhe na/ 'phags pa'i sa dang 'bras bu thob pa'i dge ba'i rtsa ba dang /lha dang mi'i bde ba 'thob par 'gyur ba'i bsod nams byas pa dang / ngan 'gro'i sdug bsngal myong bar 'gyur ba'i sdig pa byas pa dang lung du ma bstan pa'i rgyu mthun pa dang de dag gi sa bon bag chags dang ldan pa'o/ /'bras bu'i ngo bo nyid thob pa gang zhe na/de dag gi 'bras bu mngon du thob pa yin te/ mya ngan las 'das pa dang sa dang 'bras bu mngon sum du thob pa'am/ bsod nams kyi 'bras bu thob pa'am/ sdig pa'i 'bras bu myong ba'o/ /'grub pa ni gang gis dngos por red pa las kyang don gyi mtha' yongs su rdzogs par byed pa yin te/dper na myu gu las sdong bu'am 'bras bu smin pa'i bar du de la gnod pa bsrung zhing phan pa bsdu ba'i nan tan gyis rdzogs par byed pa'o/ /myu gu la ji lta ba bzhin du 'jig rten pa'i chos la mgo 'byung ba rnams mthar phyin par bsgrubs pa dang / 'phags pa'i sa thob pas gong nas gong ma'i sa yongs su 'grub par byed pa la sogs pa yang de bzhin no//skyes pa rnams las byed par 'gyur ba'i zhes bya ba ni skyes pa rnams kyis thob pa'i bya ba'am 'grub pa'i bya ba gang yin pa byed pa ste/ dngos por yod pa de dag ji srid du rgyun yod pa de srid du bya ba byed pa yod de/ dper na shing lcug ma la sogs par skyes phyin chad lcug ma ni bcing ba'i las byed/sdong po ni ka ba'i las byed me tog ni rgyan gyi las byed/ lo tog ni dkri ba'i las byed/ 'bras bu ni 'greng ba'i las byed/ 'phags pa'i chos las rang rang gi sa'i bye brag gis sems can la phan 'dogs pa yang thabs kyi sgo tha dad pa nas so so'i lam la 'jog pa la sogs pa chos gang gi rgyur nges pa de'i 'bras bu so sor skyed pa dang /dbang po drug shes pa dang bcas pa rang rang gi yul du nges pa la 'jug pa dang / bya la sogs pa ni 'phur/ nya la sogs pa ni rkyal/ phyugs la sogs pa ni rgyug pa dang /'di lta bu'i tshul gyis dngos po so so'i mthu ci yod pas gang la gang rigs pa'i bya ba byed pa yin no/ /rgyu gang dag yin pa dang rkyen gang dag yin pa dang zhes bya ba ni gang byed pa'i yan lag tu gtogs pa gzhir gyur pa dag yin te/ rgyu bcu dang rkyen bzhi gong du smos pa rnams yin no//de ltar chos rnams kyi bya ba byed pa'i las bstan pa gang yin pa de ni bya ba byed pa'i rigs pa yin no zhes bya bar sbyar ro/ / 'thad pas sgrub pa'i rigs pa'i mtshan nyid gang zhe na/ so so'i shes pa dang bshad pa dang / smras pa'i don sgrub pa dang / legs par khong du chud par bya ba'i rgyu gang dag yin pa dang /rkyen gang dag yin pa de ni 'thad pas sgrub pa'i rigs pa yin no zhes gsungs te/ 'thad pas sgrub pa'i rigs pa zhes bya ba ni tshad ma gsum mngon sum dang rjes su dpag pa dang yid ches pa'i lung gi 'thad pas so so'i don bsgrub pa bstan pa yin no//de la tshad ma gsum po mngon sum dang rjes su dpag pa dang yid ches pa'i lung gi don ni/ so so'i shes pa'i don dang / bshad pa dang / smras pa'i don ces bya ba dang / go rims bzhin du sbyar te/ de dag kyang mngon sum gyi don dang lkog tu gyur pa'i don dang / shin tu lkog tu gyur pa'i don dang /go rims bzhin no/ /de la so so'i don zhes bya ba la so so'i shes pa gang zhe na/ mngon sum gyi tshad ma bzhi po dbang po'i shes pa dang / yid kyi shes pa dang / rang rig pa dang / rnal 'byor pa'i shes pa so so'i shes pa'o/ /don zhes bya ba so so'i shes pa'i yul te/ mngon sum gyi tshad ma'i yul mngon sum gyi don rang gi mtshan nyid kyis bsdus pa'o/ /bshad pa'i don zhes bya ba la bshad pa gang zhe na/ rjes su dpag pa'i tshad ma gnyis po rang gi don du rjes su dpag pa dang gzhan gyi don du rjes su dpag pa sangs rgyas bcom ldan 'das kyis bshad pa'am smra ba po gzhan dag gis bshad pa'o//don zhes bya ba ni bshad pa'i yul te/ rjes su dpag pa'i tshad ma'i yul lkog tu gyur pa'i don spyi'i mtshan nyid kyis bsdus pa'o/ /smras pa'i don ces bya ba la smras pa gang zhe na/ yid ches pa'i lung gi tshad ma gnyis po de ston pa thams cad mkhyen pa yin pa dang /des bstan pa'i lung la tshig 'gal ba med pa gtan la dbab par bstan pa thams cad mkhyen pas gsungs pa'o/ /don zhes bya ba ni gsungs pa'i yul te yid ches pa'i lung gi tshad ma'i yul shin tu lkog tu gyur pa'i don rang dang spyi'i mtshan nyid kyis bsdus pa'o/ /sgrub pa dang legs par khong du chud par bya ba zhes bya ba ni tshad ma gsum po de dag kho na bzhin yin gyi gzhan du ma yin par tshad ma gsum gyi 'thad pas rab tu bsgrub pa'o//legs par khong du chud par bya zhes bya ba ni don de dag gzhan gyis ji ltar ma log pa yang dag pa'i don nyid du go bar bya'o//rgyu gang dag yin pa dang rkyen gang dag yin pa zhes bya ba la tshad ma gsum po de dag gi don gsum po de dag sgrub pa dang legs par khong du chud par bya ba'i rgyu dang rkyen gang dag yin zhe na/ mngon sum gyi tshad ma'i don sgrub pa dang / legs par khong du chud par bya ba'i rgyu dang rkyen ni mngon sum la log par rtog pa rnam pa bzhi bsal bas ma nor bar shes pa ste/log par rtog pa rnam pa bzhi gang zhe na/ grangs la log par rtog pa dang / rang gi ngo bo la log par rtog pa dang / spyod yul la log par rtog pa dang / 'bras bu la log par rtog pa'o/ /de la grangs la log par rtog pa ni kha cig ni tshad ma gcig /kha cig ni gsum/ kha cig ni bzhi/ kha cig ni drug tu rtog pa'o/ /de bsal ba gang zhe na/ yang dag pa'i shes pa ni rnam pa gnyis te/ mngon sum dang / rjes su dpag pa'o zhes bya bas mngon sum rnam pa bzhi po dbang po'i shes pa dang / yid kyi rnam par shes pa dang /rang rig pa dang / rnal 'byor pa'i shes pa bstan pa'o/ /rang gi ngo bo la log par rtog pa ni 'di lta ste/ kha cig ni mngon sum rtog pa dang bcas pa dang / kha cig ni rnam par rtog pa med par rtog pa'o/ /de bsal ba gang zhe na/ mngon sum ni rtog pa dang bral zhing ma 'khrul ba'o zhes bya bas mngon sum gyi mtshan nyid rtog pa med pa dang ma 'khrul pa bstan pa'o//spyod yul la log par rtog pa ni 'di lta ste/ kha cig ni mngon sum spyod yul rang gi mtshan nyid kho na'o/ /rjes su dpag pa'i spyod yul ni spyi'i mtshan nyid kho na'o zhes bya ba brjod la gzhan dag ni gzhan du brjod pa lta bu'o//de bsal ba gang zhe na/ mngon sum de'i yul ni rang gi mtshan nyid yin te zhes bya bas mngon sum gyi tshad ma bstan pa gang yin pa de'i yul ni rang gi mtshan nyid kho na yin par blta bar bya'i spyi'i mtshan nyid ma yin te/ spyi ni dngos po med pa yin pa dang mngon sum du ni dngos po'i rang gi ngo bo la dmigs pa'i phyir ro zhes bstan pa'o//'bras bu la log par rtog pa ni 'di lta ste/ kha cig ni tshad ma las 'bras bu tha dad par khas len la/ kha cig ni tha dad pa ma yin par khas len pa lta bu'o/ /de bsal ba gang zhe na/ mngon sum gyi shes pa de nyid tshad ma'i 'bras bu ste zhes bya bas mngon sum gyi shes pa de nyid tshad ma'i 'bras bu yin gyi/mngon sum las gud na tshad ma'i 'bras bu med do zhes bstan pa'o/ /de ltar na de lta bu'i log par rtog pa rnam pa bzhi bsal bas/ rnam pa thams cad du mngon sum gyi tshad ma ma nor ba yang dag pa'i shes pa rang gi ngo bo bstan pa yin te/de ni mngon sum gyi tshad ma'i 'thad pas bsgrub pa'i rigs pa yin no/ /rjes su dpag pa'i tshad ma'i don bsgrub pa dang legs par khong du chud par bya ba'i rgyu dang rkyen yang rjes su dpag pa la log par rtog pa rnam pa bzhi bsal bas ma nor ba shes pa ste/grangs la log par rtog pa ni snga ma kho na bzhin no/ /de la bsal ba gang zhe na/ yang dag pa'i shes pa ni rnam pa gnyis te/ mngon sum dang / rjes su dpag pa'o zhes bya bas rjes su dpag pa rnam pa gnyis po rang gi don du rjes su dpag pa dang / gzhan gyi don du rjes su dpag pa bstan pa ste/gang gis rtogs par 'gyur ba de ni rang gi don yin la/ gang gis gzhan la go bar byed pa de ni gzhan gyi don yin par khong du chud par bya'o/ /rang gi ngo bo la log par rtog pa ni 'di lta ste/ kha cig rjes su dpag pa'i tshad ma'i mtshan nyid tshul gsum gyi rtags las gzhan du rtog pa'o//de bsal ba gang zhe na/ rjes su dpag pa tshul gsum pa nyid kyis rtag pa rjes su dpag par bya ba la yod pa nyid dang / mthun pa'i phyogs la yod pa nyid dang / mi mthun pa'i phyogs la med pa nyid du nges pa'i tshul dang / rtags gsum po mi dmigs pa dang /rang bzhin dang 'bras bu'i gtan tshigs ma grub pa dang / 'gal ba dang ma nges pa'i skyon gsum spangs pas rjes su dpag pa'i tshad ma'i mtshan nyid bstan pa'o/ /spyod yul la log par rtog pa ni 'di lta ste/ kha cig rjes su dpag pa'i spyod yul spyi'i mtshan nyid las gzhan las gzhan du rtog pa'o//de bsal ba gang zhe na/ gzhan ni spyi'i mtshan nyid de/ /de'i rjes su dpag pa'i yul yin na zhes bya bas rjes su dpag pa'i yul ni spyi'i mtshan nyid kho na yin te/ rjes su 'gro ba dang ldog pa dang ldan pa nyid kyis khyab pa'i phyir ro zhes bstan pa'o/ /'bras bu la log par rtog pa ni 'di lta ste/kha cig rjes su dpag pa'i tshad ma las 'bras bu tha dad par khas len pa'o/ /de la bsal ba gang zhe na/ 'dir yang tshad ma'i 'bras bu rnam par gzhag pa ni mngon sum dang 'dra'o zhes bya bas ji ltar mngon sum la shes pa de nyid tshad ma'i 'bras bur bshad pa de bzhin du 'dir yang rjes su dpag pa'i shes pa nyid tshad ma'i 'bras bu yin te/don gtan la 'bebs pa'i rang bzhin can yin pa'i phyir ro zhes bstan pa'i phyir ro/ /de ltar na de lta bu'i log par rtog pa rnam pa bzhi bsal bas/ rnam pa thams cad du rjes su dpag pa'i tshad ma ma nor bar yang dag pa'i shes pa'i shes bya'i rang gi ngo bo bstan pa yin te/de'i rjes su dpag pa'i tshad ma'i 'thad pas sgrub pa'i rigs pa yin no/ /yid ches pa'i lung gi tshad ma'i don sgrub pa dang legs par khong du chud par bya ba'i rgyu dang rkyen ni de ston pa thams cad mkhyen pa yin pa de dang de la bstan pa'i lung la tshig 'gal ba med pas ma nor bar shes pa ste/de la de ston pa thams cad mkhyen pa yin pa ni 'og nas thams cad mkhyen pa'i mtshan nyid lnga 'byung bas rig par bya'o/ /de bstan pa'i lung la tshig 'gal ba med pa ni ji ltar mu stegs can dag gi gzhung las chos ma yin pa ni 'dod chags la sogs pa rtsa ba las byung ba gang+ga'i nang du khrus byas pas 'byung ngo zhes zer ba dang /chos ni rnam par mi 'tshe ba yin la/ srog chags gsod pa'i mchod sbyin byas nas grol lo zhes zer ba la sogs pa lta bu ni tshig 'gal ba yin gyi/ thams cad mkhyen pas gsungs pa'i lung las skye ba'i kun nas nyon mongs pa ni nyon mongs pa'i kun nas nyon mongs pa dang /las kyi kun nas nyon mongs pa'i rgyu las byung la/ nyon mongs pa'i kun nas nyon mongs pa dang las kyi kun nas nyon mongs pa spangs na/ skye ba'i kun nas nyon mongs pa skye bar 'gyur ro zhes gsungs pa dang /bag chags dang bcas pa'i nyon mongs pa thams cad gtan spangs pa'i gnas gyur pa ni 'phags pa'i lam bsgoms pas thob la/ 'phags pa'i lam gyis ni nyon mongs pa thams cad spangs par 'gyur zhes gsungs pa la sogs pa lta bu ni lung la tshig 'gal ba med pa yin no//de ltar na de ston pa thams cad mkhyen pa yin pa dang / des bstan pa'i lung la tshig 'gal ba med pas rnam pa thams cad du yid ches pa'i lung gi tshad ma ma nor ba yang dag pa'i shes pa'i rang gi ngo bo bstan pa yin no / /de ni yid ches pa'i lung gi tshad ma'i 'thad pa bsgrubs pas bsgrub pa'i rigs pa yin no//de la mngon sum dang rjes dpag dang yid ches pa'i lung gi tshad ma gsum po de dag gi don gsum po de dag sgrub pa dang / legs par khong du chud par bya ba'i rgyu dang rkyen ji ltar bstan pa de dag nyid kyang sngar rgyu bcu dang rkyen bzhi bstan pa dag gis ci rigs par bsdus pa yin te/de ni 'thad pas sgrub pa'i rigs pa yin no zhes bya bar sbyar ro/ / da 'di man chad ni 'thad pas sgrub pa'i rigs pa ji skad bstan pa de'i yan lag bstan to/ /de'i phyir yang mdor bsdu na rnam pa gnyis te zhes bya ba la sogs pa gsungs so/ / de yang zhes bya ba ni 'thad pas sgrub pa'i rigs pa dang sbyar ro/ /yongs su dag pa dang yongs su ma dag pa'o zhes bya ba'i tshad ma'i yongs su dag pa dang ma dag pa'i bye brag bstan pa yin te/ bshad pa ni zhib tu 'og nas 'byung ngo / /'thad pas sgrub pa la de'i rgyu dang rkyen du gtogs pa'i mtshan nyid yongs su dag pa dang ldan pa'i tshad mas 'jal ba ni don la mi 'khrul par rtogs te/bdag kyang yang dag pa'i lta ba la gnas shing gzhan yang yang dag pa'i lta ba la 'jog pas sdig pa'i grogs po'i lag tu mi ltung bar shes bzhin tshor ba bzhin du spyod do/ /yongs su dag pa'i mtshan nyid dang ldan pa'i mtshan mas 'jal ba'i don la 'khrul par dmigs te/bdag kyang log par lta ba la gnas shing gzhan yang log par lta ba la 'jog ste sdig pa'i grogs po'i lag tu song nas rmongs bzhin yengs bzhin spyod do/ /de lta bas na yongs su dag pa'i mtshan nyid bsten par bya zhing yongs su ma dag pa'i mtshan nyid spang bar bya ba'i phyir 'jig rten mkhyen pas kyang 'thad pas sgrub pa'i rigs pa ji skad bstan pa de'i yan lag 'di dag bka' stsal to//de la yongs su dag pa'i mtshan nyid ni lnga'o/ /yongs su ma dag pa'i mtshan nyid ni bdun no zhes bya ba ni grangs kyi sdom pa bstan pa ste/ming bstan pa dang / bshad pa 'og nas 'byung ba go rims bzhin du bstan to/ /de la yongs su dag pa'i mtshan nyid lnga po dag gang zhe na/ de mngon sum du dmigs pa'i mtshan nyid dang / de la gnas pa'i gnas pa mngon sum du dmigs pa'i mtshan nyid dang / rang gi rigs kyi dpe nye bar sbyar ba'i mtshan nyid dang / yongs su dag pa'i mtshan nyid dang / lung shin tu rnam par dag pa gtan la dbab par bstan pa'i mtshan nyid do zhes bya ba ni sngar so so'i shes pa dang / bshad pa dang / smras pa'i don sgrub pa dang / legs par khong du chud par bya ba'i rgyu gang dag yin pa dang rkyen gang dag yin pa de ni 'thad pas sgrub pa'i rigs pa yin no zhes gsungs pas mngon sum gyi tshad ma dang rjes su dpag pa'i tshad ma dang yid ches pa'i lung gi tshad ma gsum gyi yul mngon sum shes pa'i so so'i shes pa'i yul lung dang tshad ma gzhan dag las bshad pa gang dang gang yin pa dag kyang bsdu'o//de ltar na mngon sum gyi tshad ma rnam pa bzhi po so so'i shes pa'i don de mngon sum gyi tshad ma'i mtshan nyid rtog pa med pa dang ma 'khrul pa'i shes pas dmigs pa gang yin pa'o/ /de mngon sum du dmigs pa'i mtshan nyid yin no zhes bya bar sbyar te/ tshig gi don ni bshad pa bzhin du sbyar ro/ /de'i 'og tu rjes su dpag pa'i tshad ma'i tshul gsum po de dag la gnas pa mngon sum du dmigs pa'i mtshan nyid dang / rang gi rigs kyi dpe nye bar sbyar ba'i mtshan nyid kyis yongs su dag par bstan pa bshad par bya ste/ de la rjes su dpag pa'i chos ni gang mngon sum gyi dmigs pa de'i rjes su 'jug pa'i blos de dang 'brel pa'i dngos po mngon sum gyi ma dmigs pa yul dang dus dang rang bzhin gyis ma bskal ba lkog tu gyur pa'i don la rjes su dpag par bya ba yin pas/'dir yang rjes su dpag par bya ba'i chos can de la sgrub par byed pa'i phyogs kyi chos so so'i shes pa'i don mngon sum gyi tshad ma'i yul mngon sum gyi don rang gi mtshan nyid kyis bsdus pa gnas pa mngon sum gyi tshad ma'i mtshan nyid rtog pa dang bral zhing ma 'khrul pa mngon sum du ma dmigs pa'i sgo nas bsgrub par bya ba'i chos bshad pa'i don rjes su dpag pa'i tshad ma'i yul lkog tu gyur pa'i don spyi'i mtshan nyid kyis bsdus pa yul dang dus dang rang bzhin gyis ma bskal ba de nyid rjes su dpag par bya'o//de'i rjes su dpag pa yang rnam pa gnyis te/ rang gi don rjes su dpag pa dang / gzhan gyi don rjes su dpag pa'o//de la gang gi bdag nyid kyis rtogs par 'gyur ba de ni rang gi don yin la/ gang gis gzhan la go bar byed pa de ni gzhan gyi don yin par khong du chud par bya'o/ /de ltar rang dang gzhan gyi rjes su dpag pa de'i mtshan nyid ni rjes su dpag par bya ba la tshul gsum pa nyid kyi rtags las bdag nyid kyis rtogs pa gang gzhan la go bar byed pa yin te/tshul gsum gang zhe na/ rjes su dpag par bya ba la yod pa nyid dang / mthun pa'i phyogs la yod pa nyid dang / mi mthun pa'i phyogs la med pa nyid du nges pa'o/ /rtags gang zhe na/ tshul gsum po dag ni rtags gsum kho na dang ldan te/mi dmigs pa dang / rang bzhin dang / 'bras bu'o/ /de la mi dmigs pa las ni dngos po med par rjes su dpag par bya/ rang bzhin las ni mi rtag pa dang skad cig ma nyid la sogs par rjes su dpag par bya / 'bras bu las ni rgyu rjes su dpag par bya'o/ /de la tshul gsum gyi mtshan nyid gang zhe na/rjes su dpag par bya ba la yod pa nyid ces bya ba la/ rjes su dpag par bya ba la zhes bya ba ni 'dir shes par 'dod pa'i bye brag dang ldan pa'i chos can la'o/ /yod pa zhes bya ba ni rjes su dpag par bya ba'i chos can de la bsgrub par bya ba'i chos dngos po med pa'am/ mi rtag pa'am/ skad cig ma nyid la sogs pa'am/ rgyu dang sgrub pa phyogs kyi chos mi dmigs pa'am/ rang bzhin nam/ 'bras bu yod pa ste/ des ni mig gis bzung ba yin pa'i phyir ro zhes bya ba la sogs pa'i ma grub pa bkag go/ /nyid ces bya ba ni bsnan pa ste/ des ni phyogs kyi phyogs gcig ma grub pa la sogs pa bsal lo //mthun pa'i phyogs la yod pa nyid ces bya ba la mthun pa'i phyogs ni bsgrub par bya ba'i chos kyi spyi dang rang gi don dang mthun pa ste/ chos mthun pa'i dpe yin no/ /yod pa zhes bya ba ni mthun pa'i phyogs de la bsgrub par bya ba'i phyogs spyi dang mthun par byed pa'i phyogs kyi chos yod pa ste/des ni thun mong ma yin pa'i ma nges pa bsal to/ /nyid ces bya ba ni bsnan pa ste des ni thun mong gi ma nges pa bsal to/ /gnyi ga smos pas ni 'gal ba bsal to/ /mi mthun pa'i phyogs la med pa nyid du nges pa zhes bya ba la mi mthun pa'i phyogs ma yin pa de las gzhan pa de dang 'gal ba de med pa ste/chos mi mthun pa'i dpe yin no/ /med pa zhes bya ba ni mi mthun pa'i phyogs de la bsgrub par bya ba'i don dang / lkog tu gyur pa'i don dang / shin tu lkog tu gyur pa'i don rnam pa gsum po dag bsgrubs pa dang /legs par khong du chud par bya ba'i rgyu dang rkyen mngon sum la log par rtog pa rnam pa bzhi bsal bas ma nor ba shes pa dang rjes su dpag pa la log par rtog pa rnam pa bzhi bsal bas mngon par shes pa dang / de ston pa thams cad mkhyen pa yin pa dang / de ston pa'i lung la tshig 'gal ba med pas ma nor bar shes pa ni 'thad pas sgrub pa'i rigs pa yin par bstan pa'i tshad ma gsum po de dag ni mtshan nyid lnga po 'di dag gis yongs su dag ste/tshad mar rung bar ston to/ /de la mngon sum gyi tshad ma ni de mngon sum du dmigs pa'i mtshan nyid kyis yongs su dag ste/tshad mar rung bar bstan to/ /rjes su dpag pa'i tshad ma ni de la gnas pa mngon sum du dmigs pa'i mtshan nyid dang rang gi rigs kyi dpe nye bar sbyar ba mtshan nyid kyis yongs su dag ste/ tshad mar rung bar ston to/ /yongs su dag pa'i mtshan nyid kyis ni mngon sum gyi tshad ma dang rjes su dpag pa'i tshad ma gnyi ga yongs su dag ste/tshad mar rung bar ston to/ /yid ches pa'i lung gi tshad ma ni lung shin tu rnam par dag par gtan la dbab par bstan pa'i mtshan nyid kyis yongs su dag ste/ tshad mar rung bar ston to/ /de la dang po mngon sum gyi tshad ma dang /de la mngon sum du dmigs pa'i mtshan nyid kyi yongs su dag par bstan pa'i phyir/ de la 'du byed thams cad mi rtag pa nyid dang / 'du byed thams cad sdug bsngal ba nyid dang / chos thams cad bdag med pa nyid 'jig rten na mngon sum du dmigs pa dang /de lta bu dang mthun pa gang yin pa de ni de mngon sum du dmigs pa'i mtshan nyid yin no zhes gsungs so/ /de mngon sum du dmigs pa'i mtshan nyid ces bya ba la/ de zhes bya ba ni so so'i shes pa'i don mngon sum gyi tshad ma'i yul mngon sum gyi don rang gi mtshan nyid kyis bsdus pa'i de'o//mngon sum du dmigs pa zhes bya ba ni so so'i shes pa'i don mngon sum gyi tshad ma'i yul mngon sum gyi don rang gi mtshan nyid kyis bsdus pa'i de'o/ /mngon sum du dmigs pa zhes bya ba ni so so'i shes pa'i don mngon sum gyi tshad ma'i yul mngon sum gyi don rang gi mtshan nyid kyis rtog pa dang bral zhing ma 'khrul pas mngon sum du dmigs so//mtshan nyid ces bya ba ni mngon sum gyi tshad ma'i mtshan nyid de/ de mngon sum du dmigs pa rtog pa dang bral zhing ma 'khrul pa'i shes pa de nyid mngon sum gyi tshad ma'i mtshan nyid yin pa'o//de ltar mngon sum gyi tshad ma ni de mngon sum du dmigs pa'i mtshan nyid des yongs su dag ste/ tshad mar rung la mngon sum gyi tshad ma dang de mngon sum du dmigs pa'i mtshan nyid de yang mtshan nyid kyi tshul gyis ngo bo nyid gcig par rig par bya'o/ /de la so so'i shes pa'i don mngon sum gyi tshad ma'i don mngon sum gyi tshad ma'i yul mngon sum gyi don rang gi mtshan nyid kyis bsdus pa de yang gang zhe na/'du byed thams cad mi rtag pa nyid ces bya ba la sogs pa ste/ de la 'du byed thams cad mi rtag pa nyid ces bya ba ni 'chi 'pho ba dang skye ba dang 'jig pa dang chags pa'i mtshan nyid gang yin pa'o//'du byed thams cad sdug bsngal ba nyid ces bya ba ni nad la sogs pa sdug bsngal nyid du grub pa gang yin pa'o/ /chos thams cad bdag med pa zhes bya ba ni bde ba dang sdug bsngal la sogs pa dag la rang dbang med pa nyid du grub pa gang yin pa'o/ / 'jig rten mngon sum du dmigs pa zhes bya ba ni 'du byed thams cad mi rtag pa nyid dang / 'du byed thams cad sdug bsngal ba nyid dang / chos thams cad bdag med pa nyid ji skad bstan pa de dag ni 'jig rten na mngon sum yin pa'i phyir ro/ /'o na 'du byed thams cad mi rtag pa nyid la sogs pa de dag mngon sum rnam pa bzhi po dbang po'i shes pa dang /yid kyi shes pa dang / rang rig pa dang / rnal 'byor pa'i shes pa gang gi yul yin zhe na/ bzhi char gyi yul yin te ci rigs par sbyar ro/ /de lta bu dang mthun pa gang yin pa de ni zhes bya ba ni dbang po'i shes pa dang / yid kyi rnam par shes pa dang /rang rig pa dang / rnal 'byor pa'i chos kyi spyi dang / sgrub par byed pa'i phyogs kyi chos med pa ste/ des ni thun mong gi ma nges pa dang 'gal ba bstsal to/ /nyid ces bya ba ni brnan pa ste/ des ni mi mthun pa'i phyogs la phyogs gcig yod pa'i ma nges pa spangs so//nges pa'o zhes bya ba ni mtha' mar smos pa'i phyir gsum char la yang nges pa nyid rig par bya'o/ /tshul gsum po de dag ni rang gi tshad ma ji lta bu dag gis nges pa yin par gzung bar bya'i/ gzhan du na ni rjes su dpag par bya ba la yid ches par bya bar mi nus pa nyid do/ /rtags gsum gyi mtshan nyid gang zhe na/mi dmigs pa dang / rang bzhin dang / 'bras bu'o zhes bya ba la/ gang gi phyir rjes su dpag par bya ba ni dngos po med pa dang dngos po'i ngo bos rnam pa gnyis yin pa de'i phyir dngos po med pa sgrub pa dang dngos po bsgrub pa'i rtags kyang rnam pa gnyis te/ de la mi dmigs pa ni dngos po med pa bsgrub pa'i rtags te/dgag pa'i gtan tshigs so/ /de yang med na mi 'byung ba'i mtshan nyid kyi 'brel ba ste/ rjes su dpag par bya ba'i chos can de la dmigs pa'i rig byar gyur pa'i dngos po mi dmigs pa'i rtags kyis dngos po med pa bsgrub par bya'o/ /rang bzhin dang 'bras bu gnyis dngos po bsgrub pa'i rtags te/dngos po'i gtan tshigs so/ /de gnyis dang bsgrub par bya ba'i dngos po dang tha dad pa dang / bsgrub par bya ba'i dngos po dang tha mi dad pa'i bye brag gis rnam pa gnyis te/ tha mi dad pa ni bsgrub par bya ba dang sgrub par byed pa de'i bdag nyid kyi mtshan nyid kyi 'brel ba ste/rang bzhin gyi rtags so/ /tha dad pa ni bsgrub par bya ba dang sgrub par byed pa de las skyes pa'i mtshan nyid kyi 'brel pa ste/ 'bras bu'i rtags so/ /de dag ni re re la yang tshul gsum char yod pa lta bu'i tshul re re ba'am gnyis gnyis pa ni ma yin no/ /de ltar tshul gsum dang ldan pa'i rtags de dag ni gtan tshigs kyi skyon gsum po ma grub pa dang /'gal ba dang / ma nges pa spangs pa yang yin te/ 'di ltar rjes su dpag par bya ba la yod pa nyid kyi tshul gyis rjes su dpag par bya ba'i chos can de la bsgrub par bya ba'i chos dngos po med pa'am mi rtag pa dang skad cig ma nyid la sogs pa'am rgyu sgrub par byed pa'i phyogs kyi chos mi dmigs pa'am rang bzhin nam 'bras bu'i rtags yod pa nyid bstan pa'i gtan tshigs med na mi 'byung ba'i mtshan nyid kyi 'brel pa'am/de'i bdag nyid kyi mtshan nyid kyis 'brel pa mthun pa'i phyogs la yod pa nyid kyi tshul gyis rjes su 'gro ba dang mi mthun pa nyid phyogs la med pa nyid du nges pa'i tshul gyis ldog pa dang ldan pa de ni gzhi ma grub pa dang /rang la ma grub pa dang gzhan la ma grub pa la sogs pa med pa'i phyir ma grub pa'i skyon spangs pa yin no/ /bsgrub par bya ba la sgrub par byed pa log par bsgrub pa'i 'gal ba med pa'i skyon spangs pa yang yin no//thun mong gi ma nges pa dang thun mong ma yin pa'i ma nges pa dang / mi mthun pa'i phyogs kyi phyogs gcig la yod pa'i ma nges pa dang mthun pa'i phyogs kyi phyogs gcig la yod pa'i ma nges pa la sogs pa med pa'i phyir ma nges pa'i skyon spangs pa yin no//de ltar tshul gsum dang ldan pa'i rtags gtan tshigs kyi skyon ma grub pa dang 'gal ba dang ma nges pa spangs pa ni rjes su dpag pa gang bsgrub par bya ba'i chos de 'grub par 'gyur te/ de nyid rjes su dpag pa'i tshad ma'i 'bras bu yin no/ /de ltar rjes su dpag par bya ba la tshul gsum pa nyid kyi rtags las bdag nyid kyis rtogs pa dang gzhan la go bar bya ba la/skabs 'dir rjes su dpag par bya ba la yod pa nyid kyi tshul ni de la gnas pa mngon sum du dmigs pa'i mtshan nyid ces bya ba bstan to/ /mthun pa'i phyogs la yod pa nyid kyi tshul ni rang gi rigs kyi dpe la nye bar sbyar ba'i mtshan nyid ces bya ba bstan to//mi mthun pa'i phyogs la med pa nyid du nges pa'i tshul ni lung dang tshad ma gzhan dag las ni dngos su yang bstan/ skabs 'dir ni chos mthun pa'i dpe rjes su 'gro ba bstan pas/ chos mi mthun pa'i dpe'i ldog pa zhar la 'grub pas bcom ldan 'das kyis dngos su ma bstan te shes par 'dod na ni ci rigs par sbyar te 'og tu bstan par bya'o//de la dang por rjes su dpag pa'i tshad ma de la gnas pa mngon sum du dmigs pa'i mtshan nyid kyis yongs su dag par bstan pa'i phyir/ 'du byed thams cad skad cig ma nyid dang /'jig rten pha rol yod pa nyid dang / las dge ba dang mi dge ba chud mi za ba de la gnas pa'i mi rtag par rags pa nyid mngon sum du dmigs pa gang yin pa dang / sems can sna tshogs las sna tshogs pa la gnas pa mngon sum du dmigs pa gang yin pa dang /sems can bde ba dang sdug bsngal ba las dge ba dang mi dge ba las gnas pa mngon sum du dmigs pa gang yin pa dang / gang gis mngon sum du ma gyur pa las rjes su dpag par bya ba dang / de lta bu dang mthun pa gang yin pa de ni de la gnas pa mngon sum du dmigs pa'i mtshan nyid yin no zhes bya ba gsungs so//de la gnas pa mngon sum du dmigs pa'i mtshan nyid ces bya ba la/ de la zhes bya ba ni rjes su dpag par bya ba'i chos can de la'o/ /gnas pa zhes bya ba ni sgrub par byed pa'i chos thams cad kyi chos mi dmigs pa'am/ rang bzhin nam 'bras bu'i rtags so/ / so so'i shes pa'i don mngon sum gyi tshad ma'i don rang gi mtshan nyid kyis bsdus pa gnas pa'o/ /mngon sum du dmigs pa zhes bya ba ni sgrub par byed pa'i phyogs kyi chos mi dmigs pa'am/ rang bzhin nam 'bras bu'i rtags so so'i shes pa'i don mngon sum gyi tshad ma'i yul mngon sum gyi don rang gi mtshan nyid kyis bsdus pa gnas pa de mngon sum gyi tshad ma'i mtshan nyid rtog pa dang bral zhing ma 'khrul bas mngon sum du dmigs pa'o//mtshan nyid ces bya ba ni rjes su dpag pa'i tshad ma'i mtshan nyid de/ de ltar rjes su dpag par bya ba la tshul gsum pa'i rtags kyis bsgrub par bya ba'i chos mngon sum gyis mi dmigs pa rjes su dpag ste bdag nyid kyis rtogs pa dang /gzhan la go bar gyur pa nyid rjes su dpag pa'i tshad ma'i mtshan nyid yin no/ /de ltar na rjes su dpag pa'i tshad ma de la gnas pa mngon sum du dmigs pa'i mtshan nyid des yongs su dag ste/ tshad mar rung la rjes su dpag pa'i tshad ma dang de la gnas pa mngon sum du dmigs pa'i mtshan nyid de yang mtshan gzhi dang mtshan nyid kyi tshul gyi ngo bo nyid gcig par rig par bya'o//rjes su dpag par bya ba'i chos can de la gnas pa sgrub par byed pa'i phyogs kyi chos mngon sum du dmigs pa'i rtags kyis bsgrub par bya ba'i chos mngon sum gyis mi dmigs pa rjes su dpag par bya ba de dag gang zhe na/'du byed thams cad skad cig ma nyid dang / 'jig rten pha rol yod pa nyid dang / las dge ba dang mi dge ba chud mi za ba zhes bya ba dag ste/ de dag ni bshad pa'i don rjes su dpag pa'i tshad ma'i yul lkog tu gyur pa'i don spyi'i mtshan nyid kyis bsdus pa yin no//bsgrub par bya ba'i chos mngon sum gyis ma dmigs pa rjes su dpag par bya ba de dag sgrub par byed pa'i gtan tshigs de la gnas pa mngon sum du dmigs pa'i rtags dag gang zhe na/ de la gnas pa'i mi rtag pa rags pa nyid mngon sum du dmigs pa gang yin pa dang /sems can sna tshogs las sna tshogs la gnas pa mngon sum du dmigs pa gang yin pa dang / sems can bde ba dang sdug bsngal ba las dge ba dang / mi dge ba la gnas pa mngon sum du dmigs pa gang yin pa zhes bya ba dag ste/de dag ni so so'i shes pa'i don mngon sum gyi tshad ma'i yul mngon sum gyi don rang gi mtshan nyid kyis bsdus pa yin no/ /de ltar rjes su dpag par bya ba'i chos can de la sgrub par byed pa'i phyogs kyi chos so so'i shes pa'i don mngon sum gyi tshad ma'i yul mngon sum gyi don rang gi mtshan nyid kyis bsdus pa gnas pa mngon sum du dmigs pa'i sgo nas bsgrub par bya ba'i chos bshad pa'i don rjes su dpag pa'i tshad ma'i yul lkog tu gyur pa'i don mi rtag pa'i mtshan nyid kyis bsdus pa de rjes su dpag par bya ste/de la gnas pa'i mi rtag par gnas pa nyid mngon sum du dmigs pa gang yin pa zhes bya ba'i rtags 'dis ni 'du byed thams cad skad cig ma nyid ces bya ba bsgrub par bya ba'i chos 'di rjes su dpag par bya'o//de la dpag pa'i mi rtag par rags pa nyid mngon sum du dmigs pa gang yin pa zhes bya ba la/ de la zhes bya ba ni rjes su dpag par bya ba'i chos can 'du byed kyi dngos po de la'o//gnas pa'i mi rtag pa rags pa nyid ces bya ba ni/ skad cig la 'jig pa ma yin pa'i mi rtag pa la rags pa 'chi 'pho ba dang / skye ba dang 'jig pa'i mtshan nyid de/ de'i sgrub par byed pa'i phyogs kyi chos rang bzhin gyi rtags so so'i shes pa'i don mngon sum gyi tshad ma'i yul mngon sum gyi don rang gi mtshan nyid kyis bsdus pa yin no//mngon sum du dmigs pa gang yin pa zhes bya ba ni sgrub par byed pa'i phyogs kyi chos rang bzhin gyi rtags so so'i shes pa'i don mngon sum gyi tshad ma'i yul mngon sum kyi don rang gi mtshan nyid kyis bsdus pa de nyid mngon sum gyi tshad ma'i mtshan nyid rtog pa dang bral zhing ma 'khrul bas mngon sum du dmigs pa ste/de ltar sgrub par byed pa'i phyogs kyi chos rang bzhin gyis rtags mi rtag pa'i rags pa nyid mngon sum du dmigs pa de'i sgo nas bsgrub par bya ba'i chos skad cig ma nyid rjes su dpag par bya'o/ /de la skabs 'dir tshul gsum pa nyid kyi rtags dang ji ltar sbyar zhe na/rjes su dpag par bya ba la sogs pa yod pa nyid kyi tshul ni de las zhes bya bas bstan te/ rjes su dpag par bya ba la zhes bya ba ni chos can 'du byed kyi dngos po de la'o/ /yod pa nyid ces bya ba ni chos can 'du byed kyi dngos po de la sgrub par byed pa'i chos skad cig ma nyid sgrub par byed pa'i phyogs kyi chos rang bzhin gyi rtags mi rtag pa rags pa nyid mngon sum du dmigs pa yod pa nyid de/de'i phyir chos can zhes bya'o/ /skabs 'dir chos can de la bsgrub par bya ba'i chos dngos po med pa rgyu dang / sgrub par byed pa'i phyogs kyi chos mi dmigs pa dang /'bras bu'i rtags ni med do/ /de bas na rjes su dpag pa nyid sgrub par byed pa'i phyogs kyi chos rang bzhin gyi rtags mi rtag pa rags pa nyid mngon sum du dmigs pa yod pa nyid de ni bsgrub par bya ba dang sgrub par byed pa de'i bdag gi mtshan nyid kyis 'brel pa yin pas de'i phyir rang bzhin gyi gtan tshigs zhes bya'o//mthun pa'i phyogs la yod pa nyid kyi tshul ni chos mthun pa'i dpe ste/ gang la mi rtag pa rags pa nyid mngon sum du dmigs pa de ni skad cig ma nyid yin te/ dper na nang dang phyi rol gyi 'du byed rnams la 'jig rten thams cad la grags pa'i 'chi 'pho ba dang skye ba dmigs pa nye bar sbyar ba lta bu ste/de ni rang gi rigs kyi dpe nye bar sbyar ba'i mtshan nyid bstan pa'i skabs su 'og nas ston to/ /mi mthun pa'i phyogs la med pa nyid du nges pa'i tshul ni chos mi mthun pa'i dpe ste/ de ni lung dang tshad ma gzhan dag las ni dngos su yang bstan/skabs 'dir ni chos mthun pa'i dpe rjes su 'gro ba bstan pas chos mi mthun pa'i dpe'i ldog pa zhar la 'grub pas bcom ldan 'das kyis dngos po ma bstan te/ shes par 'dod na ni gang la mi rtag par gnas pa nyid mngon sum du mi dmigs pa de ni skad cig ma nyid ma yin te/dper na nam mkha' lta bu'o zhes brjod par bya'o/ /de ltar tshul gsum dang ldan pa'i rang bzhin gyi rtags de ni gtan tshigs kyi skyon gsum po ma grub pa dang 'gal ba dang ma nges pa spangs pa yang yin te/ 'di ltar rjes su dpag par bya ba la yod pa nyid kyi tshul gyis chos can 'du byed kyi dngos po de la bsgrub par bya ba'i chos skad cig ma nyid sgrub par byed pa'i phyogs kyi chos kyi rang bzhin gyi rtags mi rtag pa rags pa nyid mngon sum du dmigs pa yod pa nyid bstan pa'i rang bzhin gyi gtan tshigs bsgrub par bya ba dang sgrub par byed pa de'i bdag nyid kyi 'brel pa'i mtshan nyid kyis 'brel pa mthun pa'i phyogs la yod pa nyid kyi tshul gyis rjes su 'gro ba dang /mi mthun pa'i phyogs la med pa nyid du nges pa'i tshul gyis ldog pa dang ldan pa de ni gzhi ma grub pa dang rang la ma grub pa dang gzhan la ma grub pa la sogs pa med pa'i phyir ma grub pa'i skyon spangs pa yin no//bsgrub par bya ba las sgrub par byed pa log par byed pa'i 'gal ba med pa'i phyir 'gal ba'i skyon spangs pa yang yin no/ /thun mong ma yin pa'i ma nges pa dang thun mong gi ma nges pa dang mi mthun pa'i phyogs kyi phyogs gcig la yod pa'i ma nges pa dang / mthun pa'i phyogs kyi phyogs gcig la yod pa'i ma nges pa la sogs pa med pa'i phyir ma nges pa'i skyon spangs pa yin no/ /sems can sna tshogs las sna tshogs la gnas pa mngon sum du dmigs pa gang yin pa zhes bya ba'i rtags 'dis ni 'jig rten pha rol yod pa nyid ces bya ba'i bsgrub par bya ba'i chos 'di rjes su dpag par bya'o//sems can sna tshogs las sna tshogs la gnas pa mngon sum du dmigs pa gang yin pa zhes bya ba la sems can sna tshogs zhes bya ba ni khams dang 'gro ba dang skye gnas tha dad pa'i bye brag la gnas pa'i sems can sna tshogs te/ des ni rjes su dpag par bya ba'i chos can bstan to//las sna tshogs la gnas pa zhes bya ba ni 'jig rten mi la sogs pa 'greng ste 'gro ba dang / phyugs la sogs pa dud de 'gro ba dang / sbrul la sogs pa 'phye zhing 'gro ba dang / bya la sogs pa nam mkha' la lding ba dang / nya la sogs pa chu la 'phyo ba dang /de 'dra ba'i tshul gyis mi mthun pa sna tshogs pa ma bslabs par rang shes te rtsol ba dang / la la'i gnas ci la 'cha'/ la la'i zas su ci za/ la la'i yon tan ci yod/ la la'i skyon ci la chags te/ sna tshogs kyi spyod pa mi 'dra ba la sogs pa dang / skam la gnas pa ni chu'i gting du 'dug par mi bzod/chu la gnas pa ni skam la 'dug par mi bzod/ grang bas ni tshad khung mi thub pa / dros pas ni grang mo mi thub pa la sogs pa rang gi chos ma yin pa byed mi nus pa dang / de'i nang nas kyang la la ni bslabs na lobs pa dang bsgoms na goms su rung ba yang yod pa dang /la la ni bslabs kyang mi lobs la bsgoms kyang goms su mi rung ba yang yod pa dang / glang po che dang rta la sogs pa mi bas nyams rtsal che la bang mgyogs pa yang mis bkol du rung ba dang lji ba dang shig la sogs pa mi bas chung ba yang mi la za ba dang / khams dang 'gro ba dang skye gnas tha dad pa nas skyes pa'i tshul mi mthun pa dang de lta bu la sogs pa sems can sna tshogs las sna tshogs la gnas pa ste/des ni sgrub par byed pa'i phyogs kyi chos 'bras bu'i rtags so so'i shes pa'i don mngon sum gyi tshad ma'i yul mngon sum gyi don rang gi mtshan nyid kyis bsdus pa bstan to//mngon sum du dmigs pa gang yin pa zhes bya ba ni sgrub par byed pa'i phyogs kyi chos 'bras bu'i rtags so so'i shes pa'i don mngon sum gyi tshad ma'i yul mngon sum gyi don rang gi mtshan nyid kyis bsdus pa de nyid kyi mngon sum gyi tshad ma'i mtshan nyid rtog pa dang bral zhing ma 'khrul bas mngon sum du dmigs pa ste/de ltar sgrub par byed pa'i phyogs chos 'bras bu'i rtags las sna tshogs la gnas pa mngon sum du dmigs pa de'i sgo nas bsgrub par bya ba'i chos 'jig rten pha rol tshe snga ma yod pa nyid de rjes su dpag par bya'o/ /de la skabs 'dir tshul gsum pa nyid kyi rtags dang ji ltar sbyar zhe na/rjes su dpag par bya ba la yod pa nyid kyi tshul ni sems can sna tshogs zhes bya bas bstan te rjes su dpag par bya ba la zhes bya ba ni chos can sems can sna tshogs la'o/ /yod pa nyid ces bya ba ni chos can sems can sna tshogs de la bsgrub par bya ba'i chos 'jig rten pha rol tshe snga ma yod pa nyid du sgrub par byed pa'i phyogs kyi chos 'bras bu'i rtags las sna tshogs las mngon sum du dmigs pa yod pa nyid de/de'i phyir chos can zhes bya'o/ /skabs 'dir chos can de la bsgrub par bya ba'i chos dngos po med pa dang mi rtag pa dang / skad cig ma nyid la sogs pa dang / sgrub par byed pa'i phyogs kyi chos ni mi dmigs pa dang rang bzhin gyi rtags ni med do/ /de bas na rjes su dpag par bya ba'i chos can sems can sna tshogs de la sgrub par byed pa'i phyogs kyi chos 'bras bu'i rtags las sna tshogs la gnas pa mngon sum du dmigs pa de la bsgrub par bya ba'i chos 'jig rten pha rol tshe snga ma yod pa nyid mngon sum gyi ma dmigs pa de yod pa nyid du rjes su dpag ste/de ltar chos can sems can sna tshogs de la bsgrub par bya ba'i chos 'jig rten pha rol tshe snga ma yod pa nyid sgrub par byed pa'i phyogs kyi chos 'bras bu'i rtags las sna tshogs la gnas pa mngon sum du dmigs pa yod pa de nyid de ni bsgrub par bya ba dang /sgrub par byed pa las skyes pa'i mtshan nyid kyis 'brel pa yin pa de'i phyir 'bras bu'i gtan tshigs zhes bya'o/ /mthun pa'i phyogs nyid la yod pa'i tshul ni chos mthun pa'i dpe ste/gang la las sna tshogs la gnas pa mngon sum du dmigs pa de la ni 'jig rten pha rol yod pa nyid de/ dper na nang dang phyi rol gyi 'du byed rnams la 'jig rten thams cad la grags pa'i skye ba la sogs pa sdug bsngal dmigs pa nye bar sbyar ba lta bu ste/ de la rang gi rigs kyi bde ba nye bar sbyar ba'i mtshan nyid bstan pa'i skabs su 'og nas ston to//mi mthun pa'i phyogs la med pa nyid du nges pa'i tshul ni chos mi mthun pa'i dpe ste/ de yang lung dang tshad ma gzhan dag las ni dngos su yang bstan / skabs 'dir ni chos mthun pa'i dpes rjes su 'gro ba bstan pas chos mi mthun pa'i dpe'i ldog pa zhar la 'grub pas bcom ldan 'das kyis dngos su ma bstan te/shes par 'dod na ni gang la las sna tshogs gnas pa la mngon sum du mi dmigs pa de la ni 'jig rten pha rol med pa nyid de/ dper na ri bong gi rwa lta bu'o zhes brjod par bya'o//de ltar tshul gsum dang ldan pa'i 'bras bu'i rtags de yang gtan tshigs kyi skyon gsum po ma grub pa dang 'gal ba dang ma nges pa spangs pa yin te/ snga ma bzhin du ci rigs par sbyar ro/ /sems can bde ba dang sdug bsngal ba dang las dge ba dang mi dge ba la gnas pa mngon sum du dmigs pa gang yin pa zhes bya ba'i rtags 'dis ni las dge ba dang mi dge ba chud mi za ba zhes bya ba'i bsgrub par bya ba'i chos 'di rjes su dpag par bya'o//sems can bde ba dang sdug bsngal las dge ba dang mi dge ba la gnas pa'i mngon sum du dmigs pa gang yin pa zhes bya ba la sems can bde ba dang sdug bsngal zhes bya ba ni skyid pa dang sdug pa la sogs pa'i bye brag yod pa ste/de ni rjes su dpag par bya ba'i chos can bstan to/ /las dge ba dang mi dge ba la gnas pa zhes bya ba ni tshe snga ma'i las dge ba dang mi dge ba'i rgyu las byung ba'i 'bras bu bde ba dang sdug bsngal la gnas pa ste des ni sgrub par byed pa'i phyogs kyi chos 'bras bu'i rtags so so'i shes pa'i don mngon sum gyi tshad ma'i yul mngon sum gyi don rang gi mtshan nyid kyis bsdus pa yin no//mngon sum du dmigs pa gang yin pa zhes bya ba ni sgrub par byed pa'i chos 'bras bu'i rtags so so'i shes pa'i don mngon sum gyi tshad ma'i yul mngon sum gyi don rang gi mtshan nyid kyis bsdus pa de nyid mngon sum gyi tshad ma'i mtshan nyid rtog pa dang bral zhing ma 'khrul pas mngon sum du dmigs pa ste/de ltar sgrub par byed pa'i phyogs kyi chos 'bras bu'i rtags las dge ba dang mi dge ba la gnas pa mngon sum du dmigs pa de'i sgo nas bsgrub par bya ba'i chos las dge ba dang mi dge ba chud mi za bar de rjes su dpag par bya'o//de la skabs 'dir tshul gsum pa nyid kyi rtags dang ji ltar sbyar zhe na rjes su dpag par bya ba la yod pa nyid kyi tshul ni sems can bde ba dang sdug bsngal zhes bya ba bstan te/rjes su dpag par bya ba la zhes bya ba ni chos can sems can bde ba dang sdug bsngal ba la'o/ /yod pa nyid ces bya ba ni chos can sems can bde ba dang sdug bsngal ba de la bsgrub par bya ba'i chos las dge ba dang mi dge ba chud mi za bar byed pa'i phyogs kyi chos 'bras bu'i rtags las dge ba dang mi dge ba la gnas pa mngon sum du dmigs pa yod pa nyid de de'i phyir chos can zhes bya'o//skabs 'dir yang chos can de la bsgrub par bya ba'i chos dngos po med pa dang mi rtag pa dang skad cig ma nyid la sogs pa dang sgrub par byed pa'i phyogs kyi chos mi dmigs pa dang rang bzhin gyi rtags ni med do//de bas na rjes su dpag par bya ba'i chos can sems can bde ba dang sdug bsngal ba de la sgrub par byed pa'i phyogs kyi chos 'bras bu'i rtags las dge ba dang mi dge ba la gnas pa mngon sum du dmigs pa de la bsgrub par bya ba'i chos las dge ba dang mi dge ba chud mi za ba mngon sum gyis ma dmigs pa de chud mi za bar rjes su dpag ste/de ltar chos can sems can la bde ba dang sdug bsngal ba de la bsgrub par bya ba'i chos can las dge ba dang mi dge ba chud mi za bar sgrub par byed/ phyogs kyi chos 'bras bu'i rtags las dge ba dang mi dge ba la gnas pa mngon sum du dmigs pa yod pa nyid de de yang bsgrub par bya ba dang sgrub par byed pa de las skyes pa'i mtshan nyid kyi 'brel pa yin pas/de'i phyir 'bras bu'i gtan tshigs zhes bya'o/ /mi mthun pa'i phyogs la yod pa nyid kyi tshul ni chos mthun pa'i dpe ste/gang la las dge ba dang mi dge ba la gnas pa'i mngon sum du dmigs pa de la ni las dge ba dang mi dge ba chud mi za ba ste/ dper na nang dang phyi rol gyi 'du byed rnams la 'jig rten thams cad la grags pa'i rang dbang med pa dmigs pa nye bar sbyar ba dang phyi rol dag la yang 'jig rten thams cad la grags pa'i 'byor pa dang rgud pa dmigs pa nye ba lta bu ste/de yang rang gi rigs kyi dpe nye bar sbyar ba'i mtshan nyid nye bar bstan pa'i skabs su 'og nas ston to/ /mi mthun pa'i phyogs la med pa nyid du nges pa'i tshul ni chos mi mthun pa'i dpe ste/de yang lung dang tshad ma gzhan dag las ni dngos su yang bstan te / skabs 'dir ni chos mthun pa'i dpes rjes su 'gro ba bstan pas chos mi mthun pa'i dpe'i ldog pa zhar la 'grub pas bcom ldan 'das kyis ma bstan te/ shes par 'dod na ni gang la las dge ba dang mi dge ba la gnas pa mngon sum du mi dmigs pa de la ni las dge ba dang mi dge ba chud mi za ba med de/dper na nam mkha'i me tog lta bu'o zhes brjod par bya'o/ /de ltar tshul gsum pa'i rtags dang ldan pa'i 'bras bu'i rtags de yang gtan tshigs kyi skyon ma grub pa dang 'gal ba dang ma nges pa spangs pa yin te/snga ma bzhin du ci rigs par sbyar ro/ /gang gis mngon sum du ma gyur pa la rjes su dpag par bya ba zhes bya ba ni rjes su dpag pa'i don spyir bstan pa ste rjes su dpag go/ /phyogs ni gang mngon sum gyis dmigs pa de'i rjes su 'jug pa'i blo de dang 'brel pa'i dngos po mngon sum gyis ma dmigs pa yul dang dus dang rang bzhin gyis ma bskal ba lkog tu gyur pa'i don la rjes su dpag par bya ba yin no zhes ston te/gang gis zhes bya ba ni sgrib pa de dang bcas pa'i skyes bu la bya'o/ /mngon sum du ma gyur pa zhes bya ba sgrib pas bsgribs pa la bya'o/ / rjes su dpag pa zhes bya ba ni lkog tu gyur pa'i don rtogs par 'dod cing 'jal ba la bya ste/ de la tshul gsum pa'i rtogs kyis rang bzhin gyi don rjes su dpag pa ni snga ma bzhin ci rigs par sbyar ro/ /de lta bu dang mthun pa gang yin pa de ni zhes bya ba ni rjes su dpag par bya ba la tshul gsum pa'i rtags dang rang dang gzhan gyi don rjes su dpag pa'i mtshan nyid sngar bstan pa de lta bu dang mthun pa gzhan dag dang ci rigs par sbyar te/de yang mi dmigs pa la dngos po med par rjes su dpag pa dang rang bzhin las mi rtag pa la sogs par rjes su dpag pa dang 'bras bu las rgyu rjes su dpag pa thams cad du yang tshul gsum pa'i rtags kyis rang dang gzhan gyi don rjes su dpag par bya ste/de la mi dmigs pa las dngos po med pa dang rjes su dpag par bya ba la tshul gsum pa nyid kyi rtags dang ji ltar sbyar zhe na/ rjes su dpag par bya ba la yod pa nyid kyi tshul ni dper na phyogs kyi bye brag 'ga' zhig na bum pa med de/dmigs pa'i rig byar gyur pa las mi dmigs par gyur pa'i phyir ro zhes bya ba lta bu ste/ rjes su dpag par bya ba la zhes bya ba ni chos can bum pa med pa'i phyogs kyi bye brag 'ga' zhig na'o/ / yod pa nyid ces bya ba ni chos can bum pa med pa'i phyogs kyi bye brag de ni bsgrub par bya ba'i chos dngos po med pa sgrub par byed pa'i phyogs kyi chos mi dmigs pa'i rtags mi dmigs pa'i rig byar gyur pa'i bum pa mi dmigs pa yod pa nyid de/ de'i phyir chos can zhes bya'o/ /skabs 'dir chos de la bsgrub par bya ba'i chos mi rtag pa la sogs pa dang rgyu dang sgrub par byed pa'i phyogs kyi chos rang bzhin dang 'bras bu'i rtags ni med do//de bas na rjes su dpag par bya ba'i chos bum pa med pa'i phyogs kyi bye brag 'ga' zhig na sgrub par byed pa'i phyogs kyi chos mi dmigs pa'i rtags bum pa mngon du dmigs pa de las bsgrub par bya ba'i chos dngos po med pa nyid mngon sum gyis ma dmigs pa de dngos po med pa nyid du rjes su dpag ste/de ltar chos can bum pa med pa'i phyogs kyi bye brag 'ga' zhig na bsgrub par bya ba'i chos dngos po med pa nyid sgrub par byed pa nyid kyi chos mi dmigs pa'i rtags bum pa med pa mngon sum du dmigs pa de nyid ni bsgrub par bya ba dang sgrub par byed pa med na mi 'byung ba'i mtshan nyid kyi 'brel pa yin pas de'i phyir mi dmigs pa'i gtan tshigs zhes bya'o//mthun pa'i phyogs la yod pa nyid kyi tshul ni chos mthun pa'i dpe ste/phyogs kyi bye brag gang na dmigs pa'i rig byar gyur pa'i bum pa mi dmigs pa de na bum pa med de/ dper na bar snang stong pa bzhin no zhes bya ba lta bu ste/ de yang rang gi rigs kyi dpe nye bar sbyar ba'i mtshan nyid bstan pa'i skabs nas de lta bu dang mthun pa gang yin pa de ni zhes bya ba ci rigs par ston to//mi mthun pa'i phyogs la med pa nyid du nges pa'i tshul ni chos mi mthun pa'i dpe ste/ de yang lung dang tshad ma gzhan dag las ni dngos su yang bstan skabs 'dir ni chos mthun pa'i dpes rjes su 'gro bas bstan pa chos mi mthun pa'i dpe'i ldog pa zhar la 'grub pas bcom ldan 'das kyis dngos su ma bstan te/shes par 'dod na ni phyogs bye brag gang na dmigs pa'i rig byar gyur pa'i bum pa dmigs pa de na bum pa yod de/ dper na dngul gzhong gi steng du rgun 'brum blugs pa bzhin no zhes brjod par bya'o/ /de ltar tshul gsum dang ldan pa'i mi dmigs pa'i rtags de yang gtan tshigs kyi skyon gsum po ma grub pa dang 'gal ba dang ma nges pa spangs pa yin te/snga ma bzhin du ci rigs par sbyar ro/ /de la rang bzhin las mi rtag pa la sogs par rjes su dpag par bya ba la tshul gsum pa nyid kyi rtags dang ji ltar sbyar zhe na/ rjes su dpag par bya ba la yod pa nyid kyi tshul ni dper na sgra ni mi rtag pa ste byas pa'i phyir ro zhes bya ba lta bu ste/rjes su dpag par bya ba la zhes bya ba ni chos can sgra la'o/ /yod pa nyid ces bya ba ni chos can sgra de la bsgrub par bya ba'i chos mi rtag pa nyid du sgrub par byed pa'i phyogs kyi chos rang bzhin gyi rtags byas pa'i phyir ro zhes bya ba yod pa nyid de/de'i phyir chos can zhes bya'o/ /skabs 'dir yang chos can de bsgrub par bya ba'i chos dngos po med pa dang rgyu dang sgrub par byed pa'i phyogs kyi chos mi dmigs pa dang dmigs pa dang 'bras bu'i rtags ni med do/ /de bas na rjes su dpag par bya ba'i chos can sgra de la sgrub par byed pa'i phyogs kyi chos rang bzhin gyi rtags byas pa'i phyir ro zhes bya ba mngon sum du dmigs pa de las bsgrub par bya ba'i chos mi rtag pa nyid mngon sum gyis ma dmigs te mi rtag pa nyid du rjes su dpag ste/de ltar chos can sgra de la bsgrub par bya ba'i chos mi rtag pa nyid sgrub par byed pa'i phyogs kyi chos rang bzhin gyi rtags byas pa'i phyir zhes bya ba mngon sum du dmigs pa yod pa nyid de yang bsgrub par bya ba dang sgrub par byed pa de'i bdag nyid kyi mtshan nyid kyis 'brel pa yin pas/de'i phyir rang bzhin gyi gtan tshigs zhes bya'o/ /mthun pa'i phyogs la yod pa nyid kyi tshul ni chos mthun pa'i dpe ste/gang la byas pa yod pa de ni mi rtag pa ste/ dper na bum pa bzhin no zhes bya ba lta bu ste/ de yang rang gi rigs kyi dpe nye bar sbyar ba'i mtshan nyid bstan pa'i skabs nas de lta bu dang mthun pa gang yin pa de ni zhes bya bas ci rigs par ston to//mi mthun pa'i phyogs la med pa nyid du nges pa'i tshul ni chos mi mthun pa'i dpe ste/ de yang lung dang tshad ma gzhan dag las ni dngos su yang bstan/ skabs 'dir ni mthun pa'i dpes rjes su 'gro ba bstan pas chos mi mthun pa'i dpe'i ldog pa zhar la 'grub pas bcom ldan 'das kyis dngos su ma bstan te/shes par 'dod na ni gang la byas pa med pa de ni rtag pa ste/ dper na 'dus ma byas lta bu'o zhes brjod par bya'o/ /de ltar tshul gsum dang ldan pa rang bzhin gyi rtags de yang gtan tshigs kyi skyon gsum po ma grub pa dang /'gal ba dang / ma nges pa spangs pa yin te/ snga ma bzhin du ci rigs par sbyar ro/ /de la 'bras bu las rgyu rjes su dpag par bya ba la/ tshul gsum pa nyid kyi rtags dang ji ltar sbyar zhe na/ rjes su dpag par bya ba la yod pa nyid kyi tshul ni dper na gang na du ba 'thul ba de na me yod do zhes bya ba lta bu ste/rjes su dpag par bya ba la zhes bya ba ni chos can sa phyogs gang na du ba 'thul ba'i sa phyogs de na me yod pa nyid ces bya ba'i chos can phyogs gang na du ba 'thul ba'i sa phyogs de na bsgrub par bya ba'i chos me grub par byed pa'i phyogs kyi chos 'bras bu'i rtags du ba 'thul ba mngon sum du dmigs pa yod pa nyid de/de'i phyir chos can zhes bya'o/ /skabs 'dir yang chos can de la bsgrub par bya ba'i chos dngos po med pa dang mi rtag pa la sogs pa dang sgrub par byed pa'i phyogs kyi chos mi dmigs pa dang rang bzhin gyi rtags ni med do//de bas na rjes su dpag par bya ba'i chos can sa phyogs gang na du ba 'thul ba'i phyogs de na sgrub par byed pa'i phyogs kyi chos 'bras bu'i rtags du ba 'thul ba mngon sum du dmigs pa de las bsgrub par bya ba'i chos me mngon sum gyis ma dmigs pa de yod pa nyid du rjes su dpag ste/de ltar chos can sa phyogs gang na du ba 'thul ba'i sa phyogs de na bsgrub par bya ba'i chos me sgrub par byed pa'i phyogs kyi chos 'bras bu'i rtags du ba 'thul ba mngon sum du dmigs pa yod pa nyid de yang bsgrub par bya ba dang sgrub par byed pa de las skyes pa'i mtshan nyid kyis 'brel pa yin pas de'i phyir 'bras bu'i gtan tshigs zhes bya'o//mthun pa'i phyogs la yod pa nyid kyi tshul ni/ chos mthun pa'i dpe ste/ gang na du ba 'thul ba de na me yod de dper na tshang bang lta bu'o zhes bya ba de yang rang gi rigs kyi dpe nye bar sbyar ba'i mtshan nyid bstan pa'i skabs nas de lta bu dang mthun pa gang yin pa de ni zhes bya bas ci rigs par ston to//mi mthun pa'i phyogs la med pa nyid du nges pa'i tshul ni chos mi mthun pa'i dpe ste/ de yang lung dang tshad ma gzhan dag las ni dngos su yang bstan/ skabs 'dir ni chos mthun pa'i dpes rjes su 'gro ba bstan pas chos mi mthun pa'i dpe'i ldog pa zhar la 'grub pas bcom ldan 'das kyis dngos su ma bstan te/ shes par 'dod na ni gang du du ba mi 'thul ba de na me med de/ dper na rdzing chen po lta bu'o zhes bya ba brjod par bya ste/ de ltar tshul gsum dang ldan pa'i 'bras bu'i rtags de yang gtan tshigs kyi skyon gsum po ma grub pa dang / 'gal ba dang / ma nges pa spangs pa yin te/ snga ma bzhin du ci rigs par sbyar ro/ /de ltar rjes su dpag par bya ba'i chos can de la sgrub par byed pa'i phyogs kyi chos mi dmigs pa'am rang bzhin nam 'bras bu'i rtags so so'i shes pa'i don mngon sum gyi tshad ma'i yul mngon sum gyi don rang gi mtshan nyid kyis bsdus pa gnas pa mngon sum gyi tshad ma'i mtshan nyid kyi rtog pa dang bral zhing ma 'khrul bas mngon sum du dmigs pa'i sgo nas bsgrub par bya ba'i chos dngos po med pa'am mi rtag pa la sogs pa'am/rgyu bshad pa'i don rjes su dpag pa'i tshad ma'i yul lkog tu gyur pa'i don spyi'i mtshan nyid kyis bsdus pa yul dang dus dang rang bzhin gyis ma bskal ba de rjes su dpag pa'i tshad ma'i mtshan nyid tshul gsum pa nyid kyi rtags kyis rjes su dpag ste/rang gis rtogs pa dang gzhan la go bar byed pa gang yin pa de ni de la gnas pa mngon sum du dmigs pa'i mtshan nyid yin no zhes bya bar sbyar te/ tshig gi don ni gong du bshad pa bzhin no/ /de'i 'og tu rjes su dpag pa'i tshad ma rang gi rigs kyi dpe nye bar sbyar ba'i mtshan nyid kyis yongs su dag par bstan pa'i phyir/nang dang phyi rol gyi 'du byed rnams la 'jig rten thams cad la grags pa'i 'chi 'pho ba dang skye ba mi dmigs pa nye bar sbyar ba dang / skye ba la sogs pa'i sdug bsngal dmigs pa nye bar sbyar ba dang /rang dbang med pa dmigs pa nye bar sbyar ba dang / phyi rol dag la yang 'jig rten thams cad la grags pa'i 'byor pa dang rgud pa dmigs pa nye bar sbyar ba dang / de lta bu dang mthun pa gang yin pa de ni rang gi rigs kyi dpe ste nye bar sbyar ba'i mtshan nyid yin par rig par bya'o zhes bya ba gsungs so//rang gi rigs kyi dpe nye bar sbyar ba'i mtshan nyid ces bya ba la rang gi zhes bya ba ni rjes su dpag par bya ba la yod pa nyid kyi tshul gyis rjes su dpag par bya ba'i chos can la bsgrub par bya ba'i chos can sgrub par byed pa'i phyogs kyi chos yod pa nyid bstan pa dang sbyar ro//rigs kyi dpe zhes bya ba ni rjes su dpag par bya ba la yod pa nyid kyi tshul bstan pa de dang chos mthun pa'i dpe ste mthun pa'i phyogs la yod pa nyid kyi tshul gyis rjes su 'gro ba bstan pa dang sbyar ro/ /nye bar sbyar ba zhes bya ba ni rjes su dpag par bya ba la yod pa nyid kyi tshul bstan pa de dang chos mthun pa'i dpe de 'dra bar sbyar ba'o//mtshan nyid ces bya ba ni rjes su dpag pa'i tshad ma'i mtshan nyid de/ de ltar rjes su dpag par bya ba la yod pa nyid kyi tshul bstan pa de mthun pa'i phyogs la yod pa'i dpes rjes su 'gro ba nyid du grub na mi mthun pa'i phyogs las ldog pa yang zhar la 'grub pas de ni rjes su dpag pa'i tshad ma'i mtshan nyid yin pa'o//de ltar na rjes su dpag pa'i tshad ma ni rang gi rigs kyi dpe nye bar sbyar ba'i mtshan nyid des yongs su dag ste/ tshad mar rung la rjes su dpag pa'i tshad ma dang rang gi rigs kyi dpe nye bar sbyar ba'i mtshan nyid de yang mtshan gzhi dang mtshan nyid kyi tshul gyis ngo bo nyid gcig par rig par bya'o//de la 'dir rang gi rigs kyi dpe nye bar sbyar ba'i tshig bzhi smos pa la/ dpe'i mtshan nyid dang rtags kyi mtshan nyid ni thams cad du yang mngon sum gyi don yin par bzhed pas/ dpe'i tshig bzhi po 'di dag ni sngar de mngon sum du dmigs pa'i mtshan nyid bstan pa'i skabs su 'du byed thams cad ni mi rtag pa nyid dang / chos thams cad bdag med pa nyid 'jig rten na mngon sum du dmigs pa zhes smos pa'i tshig gsum po de dag gi ngo bo nyid yin te/ dpe'i tshig tha ma gnyis gcig tu bsdus pa'i go rims bzhin no/ /de de yang dpe'i tshig 'di dag gis de mngon sum du dmigs pa'i mtshan nyid kyi tshig gsum po de dag bsgrub pa ni ma yin gyi/ de mngon sum du dmigs pa'i mtshan nyid kyi skabs su bstan pa'i mi rtag pa nyid dang sdug bsngal ba nyid dang bdag med pa nyid kyi ngo bo nyid kyi dpe gsum po 'di dag gis de la gnas pa mngon sum du dmigs pa'i mtshan nyid bstan pa'i skabs su bsgrub par bya ba'i chos gsum po dag sgrub par byed pa'i phyogs kyi chos gsum gyis bsgrubs pa de dag gi chos mthun pa'i dpe go rims bzhin du ston par rig par bya'o//de la nang dang phyi rol gyi 'du byed rnams la 'jig rten thams cad la grags pa'i 'chi 'pho ba dang skye ba dmigs pa nye bar sbyar ba zhes bya ba 'di ni sngar de mngon sum du dmigs pa'i mtshan nyid bstan pa'i skabs su 'du byed thams cad mi rtag pa nyid 'jig rten na mngon sum du dmigs pa'i zhes smos pa de'i ngo bo nyid yin te/de ltar mi rtag pa'i ngo bo nyid kyi dpe 'dis sngar de la gnas pa mngon sum du dmigs pa'i mtshan nyid rjes su dpag par bya ba'i chos can 'du byed kyi dngos po la sgrub par byed pa'i phyogs kyi chos rang bzhin gyi rtags mi rtag pa rags pa nyid gnas pa mngon sum du dmigs pa de dag las bsgrub par bya ba'i chos skad cig ma nyid mngon sum gyis ma dmigs pa de skad cig ma nyid rjes su dpag ste zhes bshad pa de'i chos mthun pa'i dpe ston to//de yang ji ltar sbyar zhe na/ gang la mi rtag pa rags pa nyid mngon sum du dmigs pa de ni skad cig ma nyid yin te/dper na nang dang phyi rol gyi 'du byed rnams la 'jig rten thams cad la grags pa'i 'chi 'pho dang skye ba dmigs pa nye bar sbyar ba lta bu'o zhes bya bar sbyar te/ 'chi 'pho dang skye ba dmigs pa nye bar sbyar ba zhes bya bas ni tha ma'i bye brag gi dpe snga nas dang 'jig pa sgrub ste/gang la 'jig pa yod pa de'i ni mi rtag pa yin la/ gang la mi rtag par rags pa nyid mngon sum du dmigs pa de ni skad cig ma nyid yin pas de'i phyir rjes su dpag par bya ba'i chos can 'du byed kyi dngos po de la sgrub par byed pa'i phyogs kyi chos rang bzhin gyi rtags mi rtag pa rags pa nyid mngon sum du dmigs pa de las bsgrub par bya ba'i chos skad cig ma nyid mngon sum gyis ma dmigs pa de skad cig ma nyid du rjes su dpag pa'i chos mthun pa'i dpe sgrub pa'o//nang dang phyi rol 'du byed rnams la 'jig rten thams cad la grags pa'i skye ba la sogs pa'i sdug bsngal dmigs pa nye bar sbyar ba zhes bya ba ni sngar de mngon sum du dmigs pa'i mtshan nyid bstan pa'i skabs su 'du byed thams cad sdug bsngal ba nyid 'jig rten na mngon sum du dmigs pa zhes smos pa de'i ngo bo nyid yin te/de ltar sdug bsngal ba'i ngo bo nyid kyi dpe 'dis sngar de la gnas pa mngon sum du dmigs pa'i mtshan nyid bstan pa'i skabs su rjes su dpag par bya ba'i chos can sems can sna tshogs de las sgrub par byed pa'i phyogs kyi chos 'bras bu'i rtags las sna tshogs la gnas pa mngon sum du dmigs pa de las bsgrub par bya ba'i chos 'jig rten pha rol tshe snga ma yod pa nyid mngon sum gyis ma dmigs pa de yod pa nyid du rjes su dpag ste zhes bshad pa'i chos mthun pa'i dpe ston to//de yang ji ltar sbyar zhe na/ gang la las sna tshogs la gnas pa mngon sum du dmigs pa de la ni 'jig rten pha rol yod pa nyid de dper na nang dang phyi rol gyi 'du byed rnams la 'jig rten thams cad las grags pa'i skye ba la sogs pa'i sdug bsngal dmigs pa nye bar sbyar ba lta bu'o zhes bya bar sbyar te/skye ba la sogs pa'i sdug bsngal dmigs pa nye bar sbyar ba zhes bya bas ni tha mal par gnas pa'i skabs la 'ang sdug bsngal ba nyid du sgrub ste/gang la sdug bsngal ba yod pa de la ni las bdag gir bya ba yod la / gang la las sna tshogs la gnas pa mngon sum du dmigs pa de la ni 'jig rten pha rol yod pa nyid yin pas de'i phyir rjes su dpag par bya ba'i chos can sems can sna tshogs de la sgrub par byed pa'i phyogs kyi chos 'bras bu'i rtags las sna tshogs la gnas pa mngon sum du dmigs pa de las bsgrub par bya ba'i chos 'jig rten pha rol tshe snga ma yod pa nyid mngon sum gyis ma dmigs pa de yod pa nyid du rjes su dpag par bya ba'i chos mthun pa'i dpe 'grub bo//nang dang phyi rol gyi 'du byed rnams la 'jig rten thams cad la grags pa'i rang bzhin med pa dmigs pa nye bar sbyar ba dang / phyi rol la yang 'jig rten thams cad la grags pa'i 'byor pa dang rgud pa dmigs pa nye bar sbyar ba zhes bya ba 'di ni sngar de mngon sum du dmigs pa'i mtshan nyid bstan pa'i skabs su chos thams cad bdag med pa nyid 'jig rten na mngon sum du dmigs pa zhes smos pa de'i ngo bo nyid yin te/de ltar bdag med pa'i ngo bo nyid kyi dpe 'dis sngar de la gnas pa mngon sum du dmigs pa'i mtshan nyid bstan pa'i skabs su rjes su dpag par bya ba'i chos can sems can bde ba dang sdug bsngal ba de la bsgrub par bya ba'i phyogs kyi chos 'bras bu'i rtags las dge ba dang mi dge ba la gnas pa mngon sum du dmigs pa de las bsgrub par bya ba'i chos la dge ba dang mi dge ba chud mi za bar mngon sum gyis ma dmigs pa de chud mi za bar rjes su dpag ste zhes bshad pa de'i chos mthun pa'i dpe ston to//de yang ji ltar sbyar zhe na/ gang la las dge ba dang mi dge ba la gnas pa mngon sum du dmigs pa de la ni las dge ba dang mi dge ba chud mi za ba ste/ dper na nang dang phyi rol gyi 'du byed rnams la 'jig rten thams cad la grags pa'i rang dbang med pa dmigs pa nye bar sbyar ba dang /phyi rol dag la yang 'jig rten thams cad la grags pa'i 'byor pa dang rgud pa dmigs pa nye bar sbyar ba lta bu'o zhes bya bar sbyar te/ rang dbang med pa dmigs pa nye bar sbyar ba zhes bya ba ni bdag med par sgrub par byed pa'i dpe yin te/gang dag la de'i rang dbang med pa de dag ni de'i tshe bdag po ngo bo nyid kyis stong par 'gyur ro/ /phyi rol dag la yang zhes bya ba ni skyes bu'i byed pa la rag las pas lo tog la sogs pa'i 'byor pa dang rgud pa las chud mi za bar sgrub ste/ gang la rang dbang med pa dang 'byor pa dang rgud pa yod pa de la ni bdag med cing las yod la/gang la las dge ba dang mi dge ba la gnas pa mngon sum du dmigs pa de la ni las dge ba dang mi dge ba chud mi za ba de'i phyir rjes su dpag par bya ba'i chos can sems can bde ba dang sdug bsngal ba de sgrub par byed pa'i phyogs kyi chos 'bras bu'i rtags las dge ba dang mi dge ba la gnas pa mngon sum du dmigs pa de la bsgrub par bya ba'i chos las dge ba dang mi dge ba chud mi za ba mngon sum gyis ma dmigs pa de chud mi za bar rjes su dpag pa'i chos mthun pa'i dpe 'grub bo//de lta bu dang mthun pa gang yin pa de ni zhes bya ba ni rjes su dpag par bya ba la tshul gsum pa nyid yin gyi/rtags kyi rang dang gzhan gyi don du rjes su dpag pa'i chos mthun pa'i dpe'i mtshan nyid sngar bstan pa de lta bu dang mthun pa gzhan dag kyang ci rigs par sbyar ba ste/ de yang mi dmigs pa las dngos po med pa rjes su dpag pa dang /rang bzhin las mi rtag pa la sogs par rjes su dpag pa dang / 'bras bu las rgyu rjes su dpag pa la thams cad du yang chos mthun pa'i dpes rang dang gzhan gyi don du rjes su dpag par bya ste/ de la mi dmigs pa las dngos po med par rjes su dpag par bya ba la rjes su dpag par bya ba'i chos can bum pa med pa'i phyogs kyi bye brag 'ga' zhig na sgrub par byed pa'i phyogs kyi chos mi dmigs pa'i rtags bum pa med pa mngon sum du dmigs pa de las bsgrub par bya ba'i chos dngos po med pa nyid mngon sum gyis ma dmigs pa de dngos po med pa nyid du rjes su dpag ste zhes bya ba'i chos mthun pa'i dpe ni phyogs kyi bye brag gang na dmigs pa'i rig byar gyur pa'i bum pa mi dmigs pa de bum pa med de dper na bar snang stong pa bzhin no zhes bya ba lta bu'o//rang bzhin las mi rtag pa la sogs par rjes su dpag par bya ba la rjes su dpag par bya ba'i chos can sgra de la sgrub par byed pa'i phyogs kyi chos rang bzhin gyi rtags byas pa'i phyir ro zhes bya ba mngon sum du dmigs pa de la bsgrub par bya ba'i chos mi rtag pa nyid mngon sum du ma dmigs pa de mi rtag pa nyid du rjes su dpag par bya ba'i chos mthun pa'i dpe ni gang la byas pa yod pa de ni mi rtag pa ste/dper na bum pa bzhin no zhes bya ba lta bu'o/ /'bras bu la rgyu rjes su dpag par bya ba la rjes su dpag pa'i chos can sa phyogs gang na du ba 'thul ba'i sa phyogs de na sgrub par byed pa'i phyogs kyi chos 'bras bu'i rtags du ba 'thul ba mngon sum du dmigs pa de la bsgrub par bya ba'i chos me mngon sum gyis ma dmigs pa de yod pa nyid rjes su dpag pa'i chos mthun pa'i dpe ni gang na du ba 'thul ba de na me yod de/dper na tshang bang lta bu'o zhes bya ba dag yin no/ /de ltar rjes su dpag par bya ba la yod pa nyid kyi tshul bstan pa de dang mthun pa'i phyogs la yod pa nyid kyi tshul gyis chos mthun pa'i dpe de 'dra bar sbyar ba gang yin pa de ni rang gi rig pa'i dpe nye bar sbyar ba'i mtshan nyid yin par rig par bya'o zhes bya bar sbyar te/tshig gi don ni gong du bshad pa bzhin du sbyar ro //de'i 'og tu yongs su sreg pa'i mtshan nyid kyis mngon sum gyi tshad ma dang rjes su dpag pa'i tshad ma gnyi ga yongs su dpag par bstan pa'i phyir/ de ltar de mngon sum du dmigs pa'i mtshan nyid dang / de la gnas pa mngon sum du dmigs pa'i mtshan nyid dang / rang gi rigs kyi dpe nye bar sbyar ba'i mtshan nyid gang yang rung ba de bsgrub par bya ba la gcig tu nges pa'i phyir yongs su sreg pa'i mtshan nyid yin par rig par bya'o zhes bya ba gsungs so//yongs su sreg pa'i mtshan nyid ces bya ba la yongs su sreg pa zhes bya ba ni so so'i shes pa'i don dang bshad pa'i don mngon sum gyi tshad ma'i yul dang rjes su dpag pa'i tshad ma'i yul gnyis sgrub pa dang legs par khong du chud par bya ba de bsgrub par bya ba la mngon sum dang rjes su dpag pa'i tshad ma'i 'thad pas sgrub pa'i rigs pas bsgrubs te/shin tu nges shing yongs su grub pa la bya'o/ / mtshan nyid ces bya ba ni mngon sum gyi tshad ma'i mtshan nyid dang / rjes su dpag pa'i tshad ma'i mtshan nyid de/ de mngon sum du dmigs pa rtog pa dang bral zhing ma 'khrul ba de nyid mngon sum gyi tshad ma'i mtshan nyid yin la/ de la gnas pa mngon sum du dmigs pa'i mtshan nyid dang rang gi rigs kyi dpe nye bar sbyar ba ni mtshan nyid kyis rjes su dpag par bya ba tshul gsum pa nyid kyi rtags kyis bsgrub par bya ba'i chos mngon sum gyis ma dmigs pa rjes su dpag ste /bdag nyid kyis rtogs pa dang / gzhan la go bar gyur pa nyid rjes su dpag pa'i tshad ma'i rigs pas bsgrubs te/mtshan nyid gang yin pa'o/ /de ltar na tshad ma de gnyis ni yongs su sreg pa'i mtshan nyid des yongs su dag ste tshad mar rung la/ tshad ma de gnyis dang yongs su sreg pa'i mtshan nyid de yang mtshan gzhi dang mtshan nyid kyi tshul gyis ngo bo nyid gcig par ci rigs par rig par bya'o//de la mngon sum du dmigs pa'i mtshan nyid kyis ni so sor shes pa'i don mngon sum gyi tshad ma'i yul bsgrub pa dang legs par khong du chud par bya ba de bsgrub par bya ba la gcig tu nges pa yin la/ de la gnas pa mngon sum du dmigs pa'i mtshan nyid dang /rang gi rigs kyi dpe nye bar sbyar ba'i mtshan nyid kyis ni bshad pa'i don rjes su dpag pa'i tshad ma'i yul sgrub pa dang legs par khong du chud par bya ba de bsgrub par bya ba la gcig tu nges pa'i yongs su sreg pa'i mtshan nyid yin par rig par bya'o zhes bya bar sbyar ro/ /de la de mngon sum du dmigs pa'i mtshan nyid de la gnas pa mngon sum du dmigs pa'i mtshan nyid dang /rang gi rigs kyi dpe nye bar sbyar ba'i mtshan nyid gsum bstan pas ni mngon sum gyi tshad ma dang rjes su dpag pa'i tshad ma gnyis kyi ngo bo nyid bstan pa yin la/ yongs su sreg pa'i mtshan nyid kyis ni tshad ma de gnyis kyi yul so so'i shes pa'i don dang sbyar ba'i don sgrub pa dang legs par khong du chud par bya ba de 'grub par bya ba la mngon sum dang rjes su dpag pa'i tshad ma'i 'thad pas sgrub pa'i rigs pas bsgrubs te shin tu nges shing yongs su grub pa bstan te/de'i phyir yongs su sreg pa'i mtshan nyid logs shig tu smos so//de'i phyir yid ches pa'i lung gi tshad ma lung shin tu rnam par dag pa gtan la phebs par bstan pa'i mtshan nyid kyis yongs su dag par bstan pa'i phyir/ 'jam dpal gtan la dbab par bstan pa thams cad mkhyen pas gsungs pa 'di lta ste/mya ngan las 'das pa ni zhi ba'o zhes bya ba dang / de lta bu dang mthun pa gang yin pa de ni lung shin tu rnam par dag pa gtan la dbab par bstan pa'i mtshan nyid yin par rig par bya'o zhes bya ba gsungs so/ /lung shin tu rnam par dag pa gtan la dbab par bstan pa'i mtshan nyid ces bya ba la/lung zhes bya ba ni dus gsum gyi sangs rgyas thams cad kyis chos mthun par bstan pa'i lung ste/ des ni rtogs pa thams cad mkhyen pa yin par bstan to/ /shin tu rnam par dag pa gtan la dbab par bstan pa zhes bya ba ni rang gis tshad mar byas pa'i mtshan nyid dang ldan la/rang bzo'i lhad ma zhugs pa ste/ des ni des bstan pa'i lung la tshig 'gal ba med pa bstan to/ /mtshan nyid ces bya ba ni yid ches pa'i lung gi tshad ma'i mtshan nyid de yid ches pa'i lung gi tshad ma zhes bya ba ni ston pa thams cad mkhyen pa yin pa dang / des bstan pa'i lung la tshig 'gal ba med pa yin no//de'i mtshan nyid ni chos kyi phyag rgya gsum po rnam par thar pa'i sgo stong pa nyid dang mtshan ma med pa dang smon pa med pa ston pas bstan pa yin te/ de nyid yid ches pa'i lung gi tshad ma'i mtshan nyid yin pa'o/ /de ltar na yid ches pa'i lung gi tshad ma ni lung shin tu rnam par dag pa gtan la dbab pa bstan pa'i mtshan nyid des yongs su dag ste tshad mar rung la/yid ches pa'i lung la tshad ma dang lung shin tu rnam par dag pa gtan la dbab par bstan pa'i mtshan nyid de yang mtshan nyid dang mtshan nyid kyi tshul gyis ngo bo nyid gcig par rig par bya'o//de la smras pa'i don yid ches pa'i lung gi tshad ma'i yul shin tu lkog tu gyur pa'i don rang dang spyi'i mtshan nyid kyis bsdus pa de gang zhe na/ gtan la dbab par bstan pa thams cad mkhyen pas gsungs pa zhes bya ba bstan te/ gtan la dbab par bstan pa zhes bya bas ni des bstan pa'i lung la tshig 'gal ba med pa bstan to//thams cad mkhyen pas gsungs pa zhes bya bas ni de ston pa thams cad mkhyen pa yin par bstan to/ /'o na de ston pa thams cad mkhyen pa yin pa dang / des bstan pa'i lung la tshig 'gal ba med pa smra ba'i don yid ches pa'i lung gi tshad ma'i yul yin la lkog tu gyur pa'i don rang dang spyi'i mtshan nyid kyis bsdus pa de'i phyir de'i mtshan nyid gang zhe na/'di lta ste/ mya ngan las 'das pa ni zhi ba'o zhes bya ba dang / de lta bu dang mthun pa gang yin pa zhes bya bas bstan te/ de la mya ngan las 'das pa ni rnam pa gnyis te/phung po lhag ma dang bcas pa dang / phung po lhag ma med pa'o/ /zhi ba zhes bya ba ni phung po lhag ma dang bcas pa'i mya ngan las 'das pa ni nyon mongs pa zhi ba yin no/ /phung po lhag ma med pa'i mya ngan las 'das pa ni nyon mongs pa dang phung po zhi ba yin no/ /mya ngan las 'das pa de yang theg pa chen po dang /nyan thos kyi theg pa'i tshul gyis rnam pa gnyis te/ de la theg pa chen po'i tshul ni chos thams cad gdod ma nas zhi bas rang bzhin gyis mya ngan las 'das par khong du chud de/ chos de dag kyang mya ngan las bzlar med pas mi gnas pa'i mya ngan las 'das pa'o/ /nyan thos kyi theg pa'i tshul ni sdug bsngal gyis skyo bar dmigs nas sdug bsngal zhi ba'i mya ngan las 'das pa ste/de ltar rnam pa gnyis su bshad pa de yang drang ba'i don dang nges pa'i don gyi bye brag tu shes par bya'o/ /de lta bu dang mthun pa gang yin pa zhes bya ba ni thams cad mkhyen pas gsungs pa'i gsung rab tu gtogs pa yan lag bcu gnyis po dag las yul dang dus dang rang bzhin gyis bskal pa'i don mngon sum dang rjes su dpag pa'i tshad ma'i yul ma yin pa rang gi tshad mar bya ba gang dag bstan pa dag kyang bsdu ba'o//de ltar gtan la dbab par bstan pa thams cad mkhyen pas gsungs pa mya ngan las 'das pa ni zhi ba'o zhes bya ba la sogs pa gsung rab tu gtogs pa yan lag bcu gnyis po dag las yul dang dus dang rang bzhin gyis bskal pa'i don mngon sum dang rjes su dpag pa'i tshad ma'i yul ma yin pa rang gi tshad mar bya ba gang dag bstan pa de ni lung shin tu rnam par dag pa'i gtan la dbab par bstan pa'i mtshan nyid yin par rig par bya ste/de ni smras pa'i don yid ches pa'i lung gi tshad ma'i yul shin tu lkog tu gyur pa'i don rang dang spyi'i mtshan nyid kyis bsdus pa yin par rig par bya'o/ /de lta bas na mtshan nyid lnga po de dag gis rigs pas brtags pa yongs su dag pa yin te/yongs su dag pa'i phyir bstan par bya'o zhes bya ba ni yongs su dag pa'i mtshan nyid lnga po de dag gi mjug bsdu ba yin te/ de la de mngon sum du dmigs pa'i mtshan nyid kyis ni so so'i shes pa'i mngon sum gyi tshad ma'i yul mngon sum gyi don rang gi mtshan nyid kyis bsdus pa bsgrub pa dang legs par khong du chud par bya ba de bsgrub par bya ba la mngon sum gyi tshad ma'i rigs pas brtags pa yongs su dag pa yin no//de la gnas pa mngon sum du dmigs pa'i mtshan nyid dang rang gi rigs kyi dpe nye bar sbyar ba'i mtshan nyid kyis ni bshad pa'i don rjes su dpag pa'i tshad ma'i yul lkog tu gyur pa'i don spyi'i mtshan nyid kyis bsdus pa sgrub pa dang legs par khong du chud par bya ba de grub par gyur pa rjes su dpag pa'i tshad ma'i rigs pas brtags pa yongs su dag pa yin no//yongs su dag pa'i mtshan nyid kyis ni de gnyi ga'i don sgrub pa dang legs par khong du chud par bya ba de grub par bya ba la tshad ma gnyi ga'i rigs pas brtags pa yongs su dag pa yin no//lung shin tu rnam par dag pa gtan la dbab par bstan pa'i mtshan nyid kyis ni smras pa'i don yid ches pa'i lung gi tshad ma'i yul shin tu lkog tu gyur pa'i don rang dang spyi'i mtshan nyid kyis bsdus pa sgrub pa dang legs par khong du chud par bya ba de bsgrub par bya ba yid ches pa'i lung gi tshad ma'i rigs pas brtags pa yongs su dag pa yin no//de ltar yongs su dag pa'i phyir 'thad pas sgrub pa la de'i rgyu dang rkyen du gtogs pa'i mtshan nyid yongs su dag pa dang ldan pa'i tshad mas 'jal ba ni don la mi 'khrul bar rtogs te/bdag kyang yang dag pa'i lta ba la gnas shing gzhan yang yang dag pa'i lta ba la 'jog pas sdig pa'i grogs po'i dbang du mi ltung bas shes bzhin tshor bzhin du spyod par 'gyur bas de ni bsten par bya'o//de ltar smras pa'i don yid ches pa'i lung gi tshad ma yul shin tu lkog tu gyur pa'i don rang dang spyi'i mtshan nyid kyis bsdus pa de sgrub pa dang legs par khong du chud par bya ba'i phyir rgyu dang rkyen ni de ston pa thams cad mkhyen pa yin par des bstan pa'i lung la tshig 'gal ba med pa'o zhes smos pa la/da 'dir de ston pa thams cad mkhyen pa yin par bstan pa'i phyir bcom ldan 'das thams cad mkhyen pa'i mtshan nyid rnam pa dus rtogs par bgyi lags zhes bya ba zhus so/ /'jam dpal lnga ste zhes bya ba la gang su yang rung ba zhig byung na 'jig rten du thams cad mkhyen pa nyid du sgra rnam par grags pa zhes bya ba la/gang su yang rung ba zhig byung na zhes bya ba ni de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa bde bar gshegs pa 'jig rten mkhyen pa skyes bu 'dul ba'i kha lo sgyur ba bla na med pa lha dang mi rnams kyi ston pa sangs rgyas bcom ldan 'das zhes bya ba yul dang dus dang yab yum dang rigs la dgongs te 'jig rten du 'byung ba'o//'jig rten du thams cad mkhyen pa nyid du rnam par grags pa zhes bya ba ni lung las/ snyan pa'i ba dan 'jig rten gsum du grags//zhes gsungs pas/ bcom ldan 'das 'jig rten gsum po thams cad du thams cad mkhyen pa yin par grags pa dang 'jig rten pa'i rig byed las su gang bdag nyid glang po che dkar po mche ba drug par rmi lam du bstan te skyes pa'i byang chub sems dpa' yon tan rgya mtsho dang ldan pa de ni 'jig rten du thams cad mkhyen pa nyid du sgra rnam par grags shing snying rje chen pos mi 'chi bar goms par rnam par dag pa brnyes te 'jig rten kun gyi phar 'gyur ro zhes 'byung bas mu stegs can dag la thams cad mkhyen par grags pa la sogs pa 'jig rten gsum po kun du snyan pas khyab pa la bya'o//skyes bu chen po'i mtshan sum cu rtsa gnyis dang ldan pa zhes bya ba la skyes bu chen po'i mtshan sum cu rtsa gnyis gang zhe na/ zhabs shin tu gnas pa dang / phyag dang zhabs kyi mthil 'khor lo'i mtshan dang ldan pa dang / sor mo ring ba dang zhabs kyi rting pa yangs pa dang / phyag dang zhabs 'jam zhing gzhon sha chags pa dang / phyag dang zhabs dra bas 'brel pa dang / zhabs 'bar 'bur med pa dang / byin pa ri dgas e na ya'i lta bu dang / sku ma btud pa dang / mdoms kyi sba ba sbubs su nub pa dang / shing n+ya gro d+ha ltar chu zheng gab pa dang / sku'i spu gyen du phyogs pa dang /spu re re nas skyes shing g.yas su 'khyil pa dang / sku mdog gser 'dra zhing 'od 'dom gang dang ldan pa dang / pags pa srab pa dang / bdun mtho ba dang / ro stod seng ge'i 'dra ba dang / dpung mgo legs par grub pa dang / thal gong rgyas pa dang / sku che zhing ring ba dang / tshems bzhi bcu mnga' ba dang / tshems mnyam pa dang / tshems thags bzang ba dang / tshems shin tu dkar ba dang / 'gram pa seng ge'i 'dra ba dang / ljags ring zhing srab pa dang / ro bro bar mkhyen pa dang / tshangs pa'i dbyangs dang / spyan mthon mthing dang / rdzi ma ba'i lta bu dang / dbu gtsug tor dang ldan pa dang /smin mtshams kyi mdzod spu dung gi mdog 'dra ba la g.yas su 'khyil pa dang ldan pa'o/ /skyes bu chen po'i mtshan sum cu rtsa gnyis po de dag gi rang rang gi mtshan nyid dang rgyu dang 'bras bu ston te/ shes rab kyi pha rol tu phyin pa las bshad pa bzhin no/ /skyes bu chen po'i mtshan sum cu rtsa gnyis po de dag rten gyi tshul gyis 'dzin zhing gzugs bzang po mdzes par byed pa'i dpe byad bzang po brgyad cu yang zhar la rig par bya ste/de la dpe byad bzang po drug cu ni mgur yan chad ma gtogs pa sku man chad du gtogs pa yin la/ nyi shu ni mgur yan chad du gtogs pa yin no//de la phyag dang zhabs kyi sor mo nyi shu tshigs dang sor mo dang bcas pa dpe byad bzang po nyi shu dang / phyag dang zhabs gnyis dang lag ngar gnyis dang dpung pa gnyis dang mthil rgyab brgyad de phyag gnyis la bzhi dang zhabs gnyis la bzhi ste dpe byad bzang po brgyad dang /long bu gnyis dang pus mo gnyis dang brla gnyis te rnam pa drug rgyas pa dpe byad bzang po drug dang phyag gi mkhrig ma gnyis dang lag ngar gnyis dang dpung pa gnyis te rnam pa drug rgyas pa dpe byad bzang po drug dang / sta zur dpe byad bzang po gcig dang / rked pa dpe byad bzang po gcig dang /'bras bu gnyis dpe byad bzang po gnyis dang / mdoms dpe byad bzang po gcig dang / rkub tshos gnyis dpe byad bzang po gnyis dang / phyal dpe byad bzang po gcig dang / lte ba dpe byad bzang po gcig dang / rtsib logs gnyis dang /mchan khung gnyis dang nu ma gnyis bsdus pa dpe byad bzang po drug dang / brang dpe byad bzang po gcig dang / thugs ka dpe byad bzang po gcig dang / mgur dpe byad bzang po gcig dang / rgyab dpe byad bzang po gcig ste/ dpe byad bzang po drug cu po de rnams ni mgur yan chad ma gtogs pa sku man chad du gtogs pa yin no//tshems phreng ba gnyis dpe byad bzang po gnyis dang / rkan 'thon kor dang bcas pa dpe byad bzang po gcig dang / sgros gnyis dpe byad bzang po gnyis dang / mgur shin tu rgyas pa dpe byad bzang po gcig dang / 'gram pa rgyas shing dbyibs legs pa dpe byad bzang po gnyis dang /spyan gnyis 'thon kor dang bcas pa dpe byad bzang po gnyis dang / smin ma gnyis dpe byad bzang po gnyis dang / shangs kyi sbubs gnyis dpe byad bzang po gnyis te/ dpral ba dpe byad bzang po gcig dang / spyan gyi grwa gnyis dpe byad bzang po bzhi dang /dbu skra dang bcas pa dpe byad bzang po gcig ste/ dpe byad bzang po nyi shu po de dag nyid ni mgur yan chad du gtogs pa yin no/ /stobs bcus sems can thams cad kyi the tshom thams cad gcod pa zhes bya ba la stobs bcu gang zhe na/ gnas dang gnas ma yin pa mkhyen pa'i stobs dang / las bdag gir bya ba mkhyen pa'i stobs dang / bsam gtan dang rnam par thar pa dang ting nge 'dzin la snyoms par 'jug pa mkhyen pa'i stobs dang / dbang po mchog dang mchog ma yin pa mkhyen pa'i stobs dang / mos pa sna tshogs mkhyen pa'i stobs dang /khams sna tshogs mkhyen pa'i stobs dang / thams cad du 'gro ba'i lam mkhyen pa'i stobs dang / sngon gyi gnas rjes su dran pa mkhyen pa'i stobs dang / 'chi 'pho dang skye ba mkhyen pa'i stobs dang / zag pa zad pa mkhyen pa'i stobs so/ / mi 'jigs pa bzhis chos ston pas de'i tshig la phas kyi rgol ba thams cad kyis brgal du med cing brtsad du med pa gang yin pa zhes bya ba la mi 'jigs pa bzhi gang zhe na/ chos thams cad mngon par rdzogs par byang chub pa la mi 'jigs pa dang / zag pa thams cad zad par mkhyen pa la mi 'jigs pa dang /bar du gcod pa dang chos rnams gzhan du mi 'gyur bar nges pa'i lung bstan pa la mi 'jigs pa dang / phun sum tshogs pa thams cad thob par 'gyur ba nges par 'byung ba'i lam de bzhin du 'gyur ba la mi 'jigs pa'o/ / su'i chos 'dul ba la 'phags pa'i lam yan lag brgyad pa snang zhing dge sbyong bzhi snang ba yin te zhes bya ba la 'phags pa'i lam yan lag brgyad pa gang zhe na/ yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang / yang dag pa'i 'tsho ba dang /yang dag pa'i rtsol ba dang / yang dag pa'i dran pa dang / yang dag pa'i ting nge 'dzin to/ /dge sbyong bzhi gang zhe na/ lam rgyal ba dang / lam ston pa dang / lam gyis 'tsho ba dang / lam sun par byed pa'o/ /de la lam rgyal ba ni bde bar gshegs pa gang yin pa'o/ / lam ston pa ni chos smra ba gang yin pa'o/ /lam gyis 'tsho ba ni legs par zhugs pa gang yin pa'o/ /lam sun par byed pa gang yin pa ni log par zhugs pa gang yin pa'o/ /de la bde bar gshegs pa zhes bya ba ni 'dod chags dang zhe sdang dang gti mug ma lus par zad pa rjes su brnyes pa gang yin pa'o//chos smra ba zhes bya ba ni 'dod chags dang zhe sdang dang gti mug 'dul ba'i phyir chos ston pa gang yin pa'o/ /legs par zhugs pa zhes bya ba ni 'dod chags dang zhe sdang dang gti mug btul ba'i phyir zhugs pa gang yin pa'o/ /log par zhugs pa zhes bya ba ni tshul khrims 'chal pa dang sdig pa'i chos gang yin pa'o//gzhan yang slob pa dang mi slob pa dag ni mthong ba dang bsgom pas spang bar bya ba'i nyon mongs pa dag las rnam par rgyal ba'i phyir lam rgyal ba zhes bya'o/ /de bzhin gshegs pa dang byang chub sems dpa' phyis byang chub kyi phyir 'jug pa dang nyan thos mdo sde 'dzin pa dang 'dul ba 'dzin pa dang /ma mo 'dzin pa rnams dang gang dag brdar btags pa'i chos 'dul ba 'dzin zhing chos kyi tshul la 'jug pa de dag ni lam ston pa zhes bya'o/ /so so'i skye bo dge ba dag la phan pa'i phyir zhugs pa ngo tsha ba dang ldan pa 'gyod pa dang ldan pa bslab pa 'dod pa ma thob pa thob par bya ba dang ma rtogs pa rtogs par bya ba dang mngon sum du ma byas pa mngon sum du bya ba'i phyir rab tu brtson pa mngon sum du ma byas pa mngon sum du bya ba'i bar gyi mthu gang dag yin pa de dag ni lam gyis 'tsho ba zhes bya ste/de dag la drod yod pa'i phyir de dag 'phags pa'i shes rab kyi dbang po bskyed pa'i phyir ma shi zhing gson pa yin pas de'i phyir lam gyis 'tsho ba zhes bya'o/ /gang zag tshul khrims 'chal pa sdig pa'i chos can nang rul ba phyir zags par gyur pa dge sbyong ma yin par dge sbyong du khas 'che ba tshangs par spyod pa ma yin par tshangs par spyod par khas 'che ba gang yin pa de ni lam sun par byed pa zhes bya ste/des ni lam gzhi dang po nas sun par bya ba'i phyir des na de lam bskyed par bya ba dang lam bstan pa yod cing med pa ma yin/ lam rtogs par bya ba yod cing med par bya ba ma yin pa na yang skal ba dang mthu med la snod du gyur pa ma yin pas na de'i phyir lam sun par byed pa zhes bya'o//bcom ldan 'das kyis kyang de dag las dgongs nas gang la 'phags pa'i lam yan lag brgyad pa yod pa de la ni dag sbyong gi dngos po yang yod la dge sbyong gi bzhi pa'i bar yang yod kyi phas kyi rgol ba dag la ni dge sbyong dang bram ze dag gis stong ngo //de bas na chos 'dul ba 'di la ni 'phags pa'i lam yan lag brgyad pa yang yod la dge sbyong bzhi yang yod do zhes gsungs so/ /de ltar na 'byung ba dang / mtshan dang / the tshom gcod pa dang /brgal du med pa'i brtsad du med pa dang / dge sbyong dmigs pa thams cad mkhyen pa'i mtshan nyid lngar rig par bya'o zhes bya ba ni thams cad mkhyen pa'i mtshan nyid lngar ji skad bstan pa de dag gi mjug bsdu ba ste/ go rims bzhin du sbyar ro/ /des bstan pa'i lung la tshig 'gal ba med pa ni sngar bstan pa bzhin te/de ltar na smras pa'i don yid ches pa'i lung gi tshad ma'i yul shin tu lkog tu gyur pa'i don rang dang spyi'i mtshan nyid kyis bsdus pa de bsgrub pa dang legs par khong du chud par bya ba'i rgyu dang rkyen ni de ston pa thams cad mkhyen pa yin pa dang / des bstan pa'i lung la tshig 'gal ba med pa yin no//de lta bas na lung shin tu rnam par dag pa gtan la dbab par bstan pa'i mtshan nyid ston pa yang thams cad mkhyen pa yin la thams cad mkhyen pa'i mtshan nyid de lta bu yin par lung shin tu rnam par dag pa'i mtshan nyid las byung ba thams cad mkhyen pa'i mtshan nyid dang lung gi mtshan nyid ni gcig la gcig ltos nas de gnyi ga khong du chud par 'gyur te de nyid yid ches pa'i lung gi tshad mas 'thad pas sgrub pa'i rigs pa yin no//de ltar na 'thad pas sgrub pa'i rigs pa de ni mngon sum gyi tshad ma dang rjes su dpag pa'i tshad ma dang yid ches pa'i lung gi tshad mas mtshan nyid lnga po dag gis yongs su dag pa yin na zhes bya ba ni sngar so so'i shes pa dang bshad pa dang smras pa'i don sgrub pa dang legs par khong du chud par bya ba'o//rgyu gang dag yin pa dang rkyen gang dag yin pa de ni 'thad pas sgrub pa'i rigs pa ste/de yang mtshan nyid lngas yongs su dag par bstan pa de'i mjug bsdu ba ston to / /de la de ltar na zhes bya ba ni sngar 'thad pas sgrub pa'i rigs pa mtshan nyid lngas yongs su dag par bstan pa de ltar na'o/ /'thad pas sgrub pa'i rigs pa de ni zhes bya ba ni sngar so so'i shes pa dang bshad pa dang /smras pa'i don sgrub pa dang / legs par khong du chud par bya ba'i rgyu gang dag yin pa dang rkyen gang dag yin pa de ni 'thad pas sgrub pa'i rigs pa yin no zhes smos pa de'o/ /mngon sum gyi tshad ma dang rjes su dpag pa'i tshad ma dang yid ches pa'i lung gi tshad mas mtshan nyid lnga po dag gis yongs su dag pa yin no zhes bya ba la mngon sum gyi tshad ma zhes bya ba ni sngar so so'i shes pa zhes smos pa tshad ma bzhi po dbang po'i shes pa dang /yid kyi shes pa dang / rang rig pa'i shes pa dang / rnal 'byor pa'i shes pa so so'i shes pa'o/ /rjes su dpag pa'i tshad ma zhes bya ba ni sngar bshad pa zhes smos pa ste/rjes su dpag pa'i tshad ma gnyis po rang gi don du rjes su dpag pa dang gzhan gyi don du rjes su dpag pa sangs rgyas bcom ldan 'das rnams kyis bshad pa'am smra ba po gzhan dag gis bshad pa'o/ /yid ches pa'i lung gi tshad ma zhes bya ba ni sngar smras pa zhes smos pa ste/yid ches pa'i lung gi tshad ma gnyis po de ston pa thams cad mkhyen pa yin pa dang / des bstan pa'i lung gi tshig 'gal ba med pa gtan la phab pas ston pa thams cad mkhyen pas gsungs pa'o/ /'thad pas sgrub pa'i rigs pa de ni tshad ma de gsum gyis yongs su dag pa yin/tshad ma de gsum ni mtshan nyid lnga po dag gis yongs su dag pa yin no zhes bya ba sbyar te/ mngon sum gyi tshad ma so so'i shes pa'i don sgrub pa dang legs par khong du chud par bya ba'i rgyu dang rkyen gyi mngon sum la log par rtog pa rnam pa bzhi bsal bas ma nor bar shes par bya ste/de nyid mngon sum gyi tshad ma'i 'thad pas sgrub pa'i rigs pa yongs su dag pa yin no/ /de mtshan nyid lnga po dag las gang gis yongs su dag pa yin zhe na/ de mngon sum du dmigs pa'i mtshan nyid kyis yongs su dag pa yin te/ de ltar mngon sum gyi tshad ma'i 'thad pas sgrub pa'i rigs pa yongs su dag pa de ni de mngon sum du dmigs pa'i mtshan nyid kyis yongs su dag pa yin la/de gnyis kyang mtshan gzhi dang mtshan nyid kyi tshul gyis ngo bo gcig par rig par bya'o/ /rjes su dpag pa'i tshad ma bshad pa'i don sgrub pa dang legs par khong du chud par bya ba'i rgyu dang rkyen ni rjes su dpag pa la log par zhugs pa rnam pa bzhi bsal bas ma nor bar shes pa ste/de nyid rjes su dpag pa'i tshad ma'i 'thad pas sgrub pa'i rigs pa yongs su dag pa yin no/ /de mtshan nyid lnga po dag las gang gis yongs su dag pa yin zhe na/ de la gnas pa mngon sum du dmigs pa'i mtshan nyid dang /rang gi rigs kyi dpe nye bar sbyar ba'i mtshan nyid kyis yongs su dag pa yin te/ de ltar rjes su dpag pa'i tshad ma'i 'thad pas sgrub pa'i rigs pa yongs su dag pa de ni de la gnas pa mngon sum du dmigs pa'i mtshan nyid dang rang gi rigs kyi dpe nye bar sbyar ba'i mtshan nyid kyis yongs su dag pa yin la /de dang de gnyis kyang mtshan gzhi dang / mtshan nyid kyi tshul gyis ngo bo nyid gcig par rig par bya'o/ /yongs su dag pa'i mtshan nyid kyis ni mngon sum gyi tshad ma dang rjes su dpag pa'i tshad ma'i 'thad pas sgrub pa'i rigs pa yongs su dag pa de gnyi ga yongs su dag pa yin te/de yang gnyis dang mtshan gzhi dang mtshan nyid kyi tshul gyis ngo bo nyid gcig par rig par bya'o/ /yid ches pa'i lung gi tshad ma'i smras pa'i don sgrub pa dang legs par khong du chud par bya ba'i phyir rgyu dang rkyen ni de ston pa thams cad mkhyen pa yin pa dang /des bstan pa'i lung la tshig 'gal ba med pas ma nor bar shes pa ste/ de nyid yid ches pa'i lung gi tshad ma'i 'thad pas sgrub pa'i rigs pa yongs su dag pa yin no/ /de mtshan nyid lnga po dag las gang gis yongs su dag pa yin zhe na/ lung shin tu rnam par dag pa gtan la dbab par bstan pa'i mtshan nyid kyis yongs su dag pa ste/de ltar yid ches pa'i lung gi tshad ma'i 'thad pas sgrub pa'i rigs pa yongs su dag pa de ni lung shin tu rnam par dag pa gtan la dbab par ston pa'i mtshan nyid kyis yongs su dag pa yin la de gnyis dang mtshan gzhi dang mtshan nyid kyi tshul gyis ngo bo nyid gcig par rig par bya'o//de la yongs su dag pa'i mtshan nyid lnga po de dag gi mtshan gzhi yongs su dag pa gang zhe na/ tshad ma gsum po dag ste/ de mngon sum du dmigs pa'i mtshan nyid kyi mtshan gzhi ni mngon sum gyi tshad ma'i 'thad pas sgrub pa'i rigs pa yongs su dag pa yin/de la gnas pa mngon sum du dmigs pa'i mtshan nyid dang rang gi rigs kyi dpe nye bar sbyar ba'i mtshan nyid kyi mtshan gzhi ni rjes su dpag pa'i tshad ma'i 'thad pas sgrub pa'i rigs pa yongs su dag pa yin/ yongs su dag pa'i mtshan nyid kyi mtshan gzhi ni mngon sum gyi tshad ma dang rjes su dpag pa'i tshad ma'i 'thad pas sgrub pa'i rigs pa yongs su dag par ci rigs par lung shin tu rnam par dag pa gtan la dbab par bstan pa'i mtshan nyid kyi mtshan gzhi ni yid ches pa'i lung gi tshad ma'i 'thad pas sgrub pa'i rigs pa yongs su dag pa yin te/de ltar mtshan nyid dang mtshan gzhi dang mngon sum gyi tshad ma yongs su dag pa gsum po de dag gis rang rang gi don sgrub pa dang legs par khong du chud par byed pa de ni 'thad pas sgrub pa'i rigs pa zhes bya'o/ /de la tshad ma ni ci'i phyir gsungs/ tshad ma'i tshig gi don ni ci yin/tshad ma gsum ni ci'i phyir gsungs she na/ 'jig rten na dus gsum gyi sems can dag tshad ma yin pa tshad mar ston cing tshad mar mi rung ba la tshad mar 'dzin pa byung ba dang 'byung bar 'gyur ba mkhyen nas/ de dag gi log par lta ba'i dra ba bsal ba'i phyir tshad ma 'di dag gsungs so//tshad ma zhes bya ba ni ci ring thung sor la sogs pas gzhal ba dang / mang nyung bre la sogs pas gzhal ba dang / lci yang srang la sogs pas gzhal ba lta bu yin no/ /tshad ma gsum du gsungs pa ni gzhal bya rnam pa gsum yod pa'i phyir te/ gzhal bya rnam pa gsum ni gzhal bya mngon sum gyi don dang lkog tu gyur pa'i don dang /shin tu lkog tu gyur pa'i don to/ so so'i shes pa'i don dang bshad pa'i don dang gsungs pa'i don ces bya ba dang go rims bzhin no/ /de la mngon sum gyi don zhes bya ba ni da ltar byung ba'i dus dang / skad cig ma gcig dang / rang gi mtshan nyid kyis bsdus pa yul dang dus dang /rang bzhin gyis ma bskal ba'i yul lo/ /lkog tu gyur pa'i don zhes bya ba ni 'das pa dang / ma 'ongs pa'i dus dang / skad cig ma snga phyi'i rgyun dang / spyi'i mtshan nyid kyi yul dang / dus dang rang bzhin gyis bskal pa'i yul lo/ / shin tu lkog tu gyur pa'i don zhes bya ba ni dus gsum dang / skad cig ma'i rgyud kyi rgyun dang / rang dang spyi'i mtshan nyid kyis bsdus pa yul dang / dus dang rang bzhin gyis bskal ba dang / ma bskal ba gnyi ga'i yul rtog ge'i spyod yul ma yin pa'o/ /gzhal bya gsum 'jal ba'i tshad ma ni mngon sum dang rjes su dpag pa dang yid ches pa'i lung dang go rims bzhin no//yongs su ma dag pa'i mtshan nyid rnam pa bdun gang zhe na/ de las gzhan dang mthun par dmigs pa'i mtshan nyid dang / de las gzhan dang mi mthun par dmigs pa'i mtshan nyid dang / thams cad mthun par dmigs pa'i mtshan nyid dang /thams cad mi mthun par dmigs pa'i mtshan nyid dang / gzhan gyi rigs kyi dpe nye bar sbyar ba'i mtshan nyid dang yongs su ma 'dres pa'i mtshan nyid dang / lung shin tu rnam par ma dag pa'i mtshan nyid do zhes bya ba ni sngar so so'i shes pa dang / bshad pa dang smras pa'i don sgrub pa dang /legs par khong du chud par bya ba'i rgyu gang dag yin pa de ni 'thad pas sgrub pa'i rigs pa yin no zhes gsungs pas mngon sum gyi tshad ma dang rjes su dpag pa'i tshad ma dang / yid ches pa'i lung gi tshad ma gsum gyis yul mngon sum gyi don dang shin tu lkog tu gyur pa'i don rnam pa gsum po dag sgrub pa dang legs par khong du chud par bya ba'i rgyu dang rkyen mngon sum la log par rtog pa rnam pa bzhi bsal bas ma nor bar shes pa dang /rjes su dpag pas log par rtog pa rnam pa bzhi bsal bas ma nor bar shes pa dang / de ston pa thams cad mkhyen pa yin pa dang /des bstan pa'i lung la tshig 'gal ba med pas ma nor ba ni 'thad pas sgrub pa'i rigs pa yin par bstan pa'i tshad ma gsum po de dag ni mtshan nyid lnga sngar bstan pa dag gis ni yongs su dag ste/ tshad mar rung gi mtshan nyid bdun po 'di dag gis yongs su ma dag ste tshad mar mi rung bar ston te/de la mngon sum gyi tshad ma ni sngar mngon sum la log par rtog pa rnam pa bzhi bsal bas ma nor bar shes pa ji skad bstan pa de nyid kyis yongs su dag la/ de las bzlog pa yongs su ma dag pa yin pas 'dir de'i ma dag pa mtshan nyid bdun dang dmigs kyis sbyar ba ni med do //'on kyang 'dir yongs su ma dag pa'i mtshan nyid rnam pa bdun las dang po bzhi'i nang nas chos can dang ma rtogs pa log par dmigs pa byung ngo cog ni mngon sum yongs su ma dag pa yin pa yang ci rigs par rig par bya'o/ /rjes su dpag pa'i tshad ma ni tshul gsum pa nyid kyi rtags las rang dang gzhan gyi don du rjes su dpag pa yin pas de la gtan tshigs dang dpe'i skyon rnam pa du ma yod pas de dag ma bsal na rjes su dpag pa'i mtshan nyid yongs su ma dag par bstan pa'i phyir 'dir gtso cher ston te/rjes su dpag pa'i mtshan nyid ma dag pa bzhi'i skyon ni 'dir yongs su ma dag pa'i mtshan nyid dang po drug gis ston to//yid ches pa'i lung gi tshad ma'i mtshan nyid dang / mi mthun pa'i skyon ni 'dir lung shin tu rnam par ma dag pa bstan pa'i mtshan nyid kyis ston to/ /de la rjes su dpag pa'i tshad ma tshul gsum pa nyid kyi rtags las rang dang gzhan gyi don du rjes su dpag pa la gtan tshigs kyi skyon gsum po ma grub pa dang 'gal ba dang ma nges pa zhes sngar smos pa la ma grub pa'i skyon ni rjes su dpag par bya ba la yod pa nyid kyi tshul khas mi len cing phyogs kyi chos ma grub pa rnams la gzhi ma grub pa dang /rang la ma grub pa dang gzhan la ma grub pa la sogs pa'i skyon yod kyi/'dir rjes su dpag par bya ba la yod pa nyid kyi tshul khas len cing phyogs kyi chos grub pa rnams la med la/ 'gal ba'i skyon yang sgrub par byed pa las bsgrub pa log par bsgrub pa dper na sgra ni rtag pa ste/ byas pa'i phyir ro zhes zer ba dang / sgra ni mi rtag pa ste rtsol ba las mi 'byung ba'i phyir ro zhes zer ba lta bu dag la yod kyi/'dir bsgrub par bya ba las log par sgrub par mi byed pa dag la med pas de'i phyir 'dir bcom ldan 'das kyis ma grub pa dang 'gal ba'i skyon ni bka' ma stsal te/ shes par 'dod na ni lung dang tshad ma gzhan dag las rig par bya'o//'dir ni ma nges pa'i skyon gyis gtan tshigs ltar snang ba dang dpe'i skyon gyis dpe ltar snang ba gtso cher bka' stsal te/ de gnyis kyi bsgrub pa la gcig tu ma nges pa'i phyir rjes su dpag pa yongs su ma dag pa yin par ston to/ /de la ma nges pa'i skyon gyis gtan tshigs ltar snang ba ni rnam pa bzhi ste/mi mthun pa'i phyogs kyi phyogs gcig la yod pa'i ma nges pa dang / mthun pa'i phyogs kyi phyogs gcig la yod pa'i ma nges pa dang / thun mong gi ma nges pa dang / thun mong ma yin pa'i ma nges pa ste yongs su dag pa'i mtshan nyid bzhi dang go rims bzhin no / /de la mi mthun pa'i phyogs kyi phyogs gcig la yod pa'i ma nges pa ji lta bu zhe na/dper na sgra rtsol ba las 'byung bar sgrub pa dag gis sbyor ba'i tshig las 'di skad ces yang sgra 'di rtsol ba las 'byung ste mi rtag pa'i phyir ro/ /gang dang gang na mi rtag pa de ni rtsol ba las 'byung ste/ chos mthun pa'i dpe ni bum pa la sogs pa bzhin no//gang dang gang rtag pa de ni rtsol ba las mi 'byung ste/ chos mi mthun pa'i dpe ni nam mkha' dang glog dang nags kyi me tog la sogs pa lta bu'o zhes zer ro/ /de ltar rjes su dpag go cog ni tshul gsum pa nyid kyi rtags las rang dang gzhan gyi don rjes su dpag pa yin pas 'dir yang rjes su dpag par bya ba la yod pa nyid dang /mthun pa'i phyogs la yod pa nyid dang / mi mthun pa'i phyogs la med pa nyid du nges pa'i tshul dang sbyar dgos te/ 'dir rjes su dpag par bya ba la yod pa nyid ces bya ba la rjes su dpag par bya ba la zhes bya ba ni rjes su dpag par bya ba'i chos can sgra la'o//yod pa nyid ces bya ba ni rjes su dpag par bya ba'i chos can sgra de la bsgrub par bya ba'i chos brtsal ba las 'byung ba sgrub par byed pa'i phyogs kyi chos mi rtag pa'i phyir zhes bya ba yod pa nyid de/ de'i phyir chos can zhes bya'o/ /de ltar chos can de la sgrub par byed pa'i phyogs kyi chos mi rtag pa'i phyir ro zhes bya ba de yod pa nyid yin pas rjes su dpag par bya ba yod pa nyid kyi tshul yang rung /mthun pa'i phyogs la yod pa nyid ces bya ba la mthun pa'i phyogs la zhes bya ba ni brtsal ba las 'byung ba de'i phyir mthun pa'i dpe bum pa la sogs pa la'o/ / yod pa nyid ces bya ba ni brtsal ba las byung ba de'i chos mthun pa'i dpe bum pa la sogs pa de la bsgrub par bya ba'i chos brtsal ba las 'byung ba'i spyi dang sgrub par byed pa'i phyogs kyi chos mi rtag pa'i phyir zhes bya ba yod pa nyid de/ de'i phyir mthun pa'i phyogs zhes bya'o/ /de ltar mthun pa'i phyogs de la bsgrub par bya ba'i chos brtsal ba las 'byung ba'i spyi dang sgrub par byed pa'i phyogs kyi chos mi rtag pa'i phyir zhes bya ba yod pas mthun pa'i phyogs la yod pa nyid kyi tshul yang rung /mi mthun pa'i phyogs la med pa nyid du nges pa zhes bya ba la mi mthun pa'i phyogs la zhes bya ba ni brtsal ba las byung ba de'i chos mi mthun pa'i dpe nam mkha' dang glog dang nags kyi me tog la sogs pa la'o//med pa nyid du nges pa zhes bya ba ni brtsal ba las 'byung ba de'i chos mthun pa'i dpe nam mkha' dang glog dang nags kyi me tog la sogs pa de la bsgrub par bya ba'i chos brtsal ba las 'byung ba'i spyi dang sgrub par byed pa'i phyogs kyi chos mi rtag pa'i phyir zhes bya ba med pa nyid du nges na ni de'i tshe mi mthun pa'i phyogs de la sgrub par byed pa'i phyogs kyi chos mi rtag pa'i phyir zhes bya ba de med pa nyid du nges pa mi mthun pa'i phyogs med pa nyid du nges pa zhes bya ba'i tshul yang rung bas gtan tshigs ma nges pa med pa'i phyir yongs su dag par 'gyur ba zhig na mi mthun pa'i phyogs de la sgrub par byed pa'i phyogs kyi chos mi rtag pa'i phyir zhes bya ba de med pa nyid du ma nges te/'di ltar mi mthun pa'i phyogs kyi phyogs cig shos nam mkha' la ni sgrub par byed pa'i phyogs kyi chos mi rtag pa'i phyir zhes bya ba de med pa nyid du nges pas mi mthun pa'i phyogs kyi phyogs gcig la med pa yin yang mi mthun pa'i phyogs cig shos glog dang nags kyi me tog la sogs pa la sgrub par byed pa'i phyogs kyi chos mi rtag pa'i phyir zhes bya ba de yod pa nyid du nges pas mi mthun pa'i phyogs kyi chos gcig par sgrub par byed pa'i phyogs kyi chos mi rtag pa'i phyir zhes bya ba de yod pa de ni mi mthun pa'i phyogs kyi phyogs gcig la yod pa'i ma nges pa zhes bya ste/de ni de las gzhan dang mthun par dmigs pa'i mtshan nyid ces bya bas ston to/ /de la de las zhes bya ba ni mthun pa'i phyogs cig shos de las te/dper na sgra brtsal ba las 'byung bar bsgrub pa dag gi brtsal ba las 'byung ba de'i mi mthun pa'i phyogs kyi phyogs cig shos dang nam mkha' lta bu de las so/ /gzhan dang zhes bya ba ni mi mthun pa'i phyogs kyi phyogs cig shos de las gzhan dang mi mthun pa'i phyogs cig shos dang ste/dper na sgra brtsal ba las 'byung bar bsgrub pa dag gi brtsal ba las 'byung ba de'i mi mthun pa'i phyogs kyi phyogs cig shos nam mkha' de las gzhan pa brtsal ba las 'byung ba de'i mi mthun pa'i phyogs kyi phyogs cig shos glog dang nags kyi me tog la sogs pa lta bu dang ngo //mthun par dmigs pa zhes bya ba ni mi mthun pa'i phyogs kyi phyogs cig shos de las sgrub par byed pa'i phyogs kyi chos de yod pa'i phyogs/ dper na sgra brtsal ba las 'byung bar bsgrub pa dag gi brtsal ba las byung ba de'i mi mthun pa'i phyogs kyi phyogs cig shos glog dang nags kyi me tog la sogs pa de la sgrub par byed pa'i phyogs kyi chos mi rtag pa'i phyir zhes bya ba de yod pa lta bu'o//de ltar na de las gzhan dang mthun par dmigs pa zhes bya ba de ni mi mthun pa'i phyogs kyi phyogs gcig la yod pa'i ma nges pa yin par rig par bya'o/ /mtshan nyid ces bya ba ni rjes su dpag pa yongs su dag pa'i mtshan nyid yin te/des na de ni tshad mar mi rung bar rig par bya'o/ /de la mthun pa'i phyogs kyi phyogs gcig la yod pa'i ma nges pa ji lta bu zhe na/ dper na sgra brtsal ba las mi 'byung bar bsgrub pa dag gi gtan tshigs lta bu ste/ de yang sgra ni brtsal ba las mi 'byung ste rtag pa'i phyir ro//chos mthun pa'i dpe ni nam mkha' dang / glog dang nags kyi me tog la sogs pa'o/ /chos mi mthun pa'i dpe ni bum pa la sogs pa lta bu'o zhes zer ro/ /de la yang rjes su dpag go cog ni tshul gsum pa nyid kyi rtags rang dang gzhan gyi don du rjes su dpag pa yin pas/'dir yang rjes su dpag par bya ba la yod pa nyid dang / mthun pa'i phyogs la yod pa nyid dang / mi mthun pa'i phyogs la med pa nyid du nges pa'i tshul dang sbyar dgos te/ 'dir rjes su dpag par bya ba la zhes bya ba ni rjes su dpag par bya ba'i chos can sgra la'o/ /yod pa nyid ces bya ba ni rjes su dpag par bya ba'i chos can sgra de la bsgrub par bya ba'i chos brtsal ba las mi 'byung ba sgrub par byed pa'i phyogs kyi chos rtag pa'i phyir zhes bya ba de yod pa gcig la grub pa de'i phyir chos can zhes bya ste/rjes su dpag par bya ba la yod pa nyid kyi tshul rung bas kyang rjes su dpag par bya ba'i chos can sgra de la bsgrub par bya ba'i brtsal ba las mi 'byung ba sgrub par byed pa'i phyogs kyi chos rtag pa'i phyir zhes bya ba de yod par gcig la ma grub pas 'dir rjes su dpag par bya ba las yod pa nyid kyi tshul yang mi rung ngo //mi mthun pa'i phyogs la med pa nyid du nges pa zhes bya ba la mi mthun pa'i phyogs la zhes bya ba ni /brtsal ba las mi 'byung ba de'i chos mi mthun pa'i dpe bum pa la sogs pa la'o/ /med pa nyid du nges pa zhes bya ba ni brtsal ba las mi 'byung ba de'i chos mi mthun pa'i dpe bum pa la sogs pa de la bsgrub par bya ba'i chos brtsal ba las mi 'byung ba'i spyi dang sgrub par byed pa'i phyogs kyi chos rtag pa'i phyir zhes bya ba de med pa nyid du nges pa ste/de'i phyir mi mthun pa'i phyogs zhes bya'o/ /de ltar mi mthun pa'i phyogs de la bsgrub par bya ba'i chos brtsal ba las mi 'byung ba'i spyi dang sgrub par byed pa'i phyogs kyi chos rtag pa'i phyir zhes bya ba de med pa nyid du nges par mi mthun pa'i phyogs la med pa nyid du nges par mi mthun pa'i phyogs la med pa nyid du nges pa'i tshul ni mthun pa'i phyogs la zhes bya ba ni brtsal ba las mi 'byung ba las mi 'byung ba de'i chos mthun pa'i dpe nam mkha' dang glog dang nags kyi me tog la sogs pa la'o//yod pa nyid ces bya ba ni brtsal ba las mi 'byung ba de'i chos mthun pa'i dpe nam mkha' dang glog dang nags kyi me tog la sogs pa de la bsgrub par bya ba'i chos brtsal ba las mi 'byung ba'i spyi dang sgrub par byed pa'i phyogs kyi chos rtag pa'i phyir zhes bya ba yod pa nyid yin na ni de'i tshe mthun pa'i phyogs de la sgrub par byed pa'i phyogs kyi chos rtag pa'i phyir zhes bya ba de yod pa nyid yin pas mthun pa'i phyogs la yod pa nyid ces bya ba'i tshul rung ba zhig na mthun pa'i phyogs de la sgrub par byed pa'i phyogs kyi chos rtag pa'i phyir zhes bya ba de yod pa nyid ma yin te/'di ltar mthun pa'i phyogs kyi phyogs cig shos glog dang nags kyi me tog la sogs pa la sgrub par byed pa'i phyogs kyi chos rtag pa'i phyir zhes bya ba de yod pa nyid ma yin pas mthun pa'i phyogs gcig la med pa nyid yin la/ mthun pa'i phyogs kyi phyogs cig shos nam mkha' la sgrub par byed pa'i phyogs kyi chos rtag pa'i phyir zhes bya ba de yod pa nyid tsam du zad pas mthun pa'i phyogs kyi phyogs gcig la sgrub par byed pa'i phyogs kyi chos rtag pa'i phyir zhes bya ba de yod pa de ni mthun pa'i phyogs kyi phyogs gcig la yod pa'i ma nges pa zhes bya ste/de ni de las gzhan dang mi mthun par dmigs pa'i mtshan nyid ces bya ba ston to//de la de las zhes bya ba ni mthun pa'i phyogs cig shos de las te / dper na sgrub pa brtsal ba las mi 'byung bar bsgrub pa dag gi brtsal ba las mi 'byung ba de'i mthun pa'i phyogs kyi phyogs cig shos nam mkha' lta bu de las so/ /gzhan dang zhes bya ba ni mthun pa'i phyogs kyi phyogs cig shos de las gzhan pa mthun pa'i phyogs kyi phyogs cig shos dang ste/dper na sgra brtsal ba las mi 'byung ba de'i mthun pa'i phyogs kyi phyogs cig shos nam mkha' de las gzhan pa brtsal ba las mi 'byung ba de'i mthun pa'i phyogs kyi phyogs cig shos glog dang nags kyi me tog la sogs pa lta bu dang ngo //mi mthun pa'i dmigs pa zhes bya ba ni mthun pa'i phyogs kyi phyogs cig shos de la sgrub par byed pa'i phyogs kyi chos de yod pa'i don to / /dper na sgra la brtsal ba las mi 'byung bar bsgrub pa dag gi brtsal ba las mi 'byung ba de'i tshe mthun pa'i phyogs kyi chos cig shos glog dang nags kyi me tog la sogs pa de las sgrub par byed pa'i phyogs kyi chos rtogs pa'i phyir bya ba de med pa lta bu'o//phyogs kyi phyogs gcig la sgrub par byed pa'i phyogs kyi chos de med par grub na mthun pa'i phyogs kyi phyogs gcig la yod pa zhar la 'grub pas/de'i phyir de la gzhan dang mi mthun par dmigs pa zhes bya ba de ni mthun pa'i phyogs kyi phyogs gcig la yod pa'i ma nges pa yin par rig par bya'o/ /mtshan nyid ces bya ba ni rjes su dpag pa yongs su ma dag pa'i mtshan nyid yin te/ des na de yang tshad mar mi rung bar rig par bya'o//yang rnam pa gzhan du na mthun pa'i phyogs kyi phyogs gcig la yod pa'i ma nges pa ni de las gzhan dang mthun par dmigs pa'i mtshan nyid ces bya bas bstan la/ mi mthun pa'i phyogs kyi phyogs gcig la yod pa'i ma nges pa ni de las gzhan dang mi mthun par dmigs pa'i mtshan nyid ces bya bas bstan par yang sbyar du rung ste/de la mthun pa'i phyogs kyi phyogs gcig la yod pa'i ma nges pa de las gzhan dang mthun par dmigs pa'i mtshan nyid dang sbyar na/ de las zhes bya ba ni mthun pa'i phyogs kyi phyogs cig shos de las te/ dper na sgra brtsal ba las mi 'byung bar bsgrub pa dag gi brtsal ba las mi 'byung ba de'i mthun pa'i phyogs kyi phyogs cig shos glog dang nags kyi me tog la sogs pa lta bu de la'o//gzhan dang zhes bya ba ni mthun pa'i phyogs kyi phyogs cig shos las gzhan pa mthun pa'i phyogs kyi phyogs cig shos dang ste/dper na sgra brtsal ba las mi 'byung bar bsgrub pa dag gi brtsal ba las mi 'byung ba de'i mthun pa'i phyogs kyi phyogs cig shos glog dang nags kyi me tog la sogs pa de las gzhan pa brtsal ba las mi 'byung ba de'i mthun pa'i phyogs kyi phyogs cig shos nam mkha' dang ngo //mthun pa'i dmigs pa zhes bya ba ni mthun pa'i phyogs cig shos de la sgrub par byed pa'i phyogs kyi chos de yod pa'i don te/ dper na sgra brtsal ba las mi 'byung bar bsgrub pa dag gi brtsal ba las mi 'byung ba de'i mthun pa'i phyogs kyi phyogs cig shos nam mkha' de las sgrub par byed pa'i phyogs kyi chos rtag pa'i phyir zhes bya ba de yod pa lta bu'o//de ltar na de las gzhan dang mthun par dmigs pa'i mtshan nyid ces bya ba de ni mthun pa'i phyogs kyi phyogs gcig la yod pa'i ma nges par yod par sbyar du rung bar rig par bya'o/ /mi mthun pa'i phyogs kyi phyogs gcig la yod pa'i ma nges pa de las gzhan dang mi mthun par dmigs pa'i mtshan nyid dang sbyar na/de las zhes bya ba ni mi mthun pa'i phyogs kyi phyogs cig shos de las te/ dper na sgra brtsal ba las bsgrub pa dag gi brtsal ba las mi 'byung ba de'i mi mthun pa'i phyogs kyi chos cig shos glog dang nags kyi me tog la sogs pa de lta bu de las so//gzhan dang zhes bya ba ni mi mthun pa'i phyogs kyi phyogs cig shos de las gzhan pa mi mthun pa'i phyogs kyi phyogs cig shos dang ste/ dper na sgra brtsal ba las 'byung bar bsgrub pa dag gi brtsal ba las 'byung ba de'i mi mthun pa'i phyogs kyi phyogs cig shos glog dang nags kyi me tog la sogs pa gzhan brtsal ba las 'byung ba de'i mi mthun pa'i phyogs kyi phyogs cig shos nam mkha' lta bu dang ngo //mi mthun pa'i dmigs pa zhes bya ba ni mi mthun pa'i phyogs kyi phyogs cig shos de la sgrub par byed pa'i phyogs kyi chos de med pa'i don de dper na sgra brtsal ba las 'byung bar bsgrub pa dag gi rtsol ba las 'byung ba de mi mthun pa'i phyogs kyi phyogs cig shos nam mkha' de la sgrub par byed pa'i phyogs kyi chos mi rtag pa'i phyir zhes bya ba de med pa lta bu'o//de ltar mi mthun pa'i phyogs kyi phyogs gcig la sgrub par byed pa'i phyogs kyi chos med par grub na mi mthun pa'i phyogs kyi phyogs gcig la yod pa zhar la 'grub pas/de'i phyir de las gzhan dang mi mthun par dmigs pa'i mtshan nyid ces bya ba de ni mi mthun pa'i phyogs kyi phyogs gcig la yod pa'i ma nges pa yin pas sbyar du yang rung bar rig par bya'o//de las thun mong gi ma nges pa ji lta bu zhe na/ dper na sgra rtag par bsgrub pa dag gi gtan tshigs lta bu ste/ de yang sgra mi rtag pa ste gzhal bya yin pa'i phyir ro/ /chos mthun pa'i dpe ni nam mkha' la sogs pa'o/ /chos mi mthun pa'i dpe ni bum pa la sogs pa lta bu'o zhes zer ro//de las yang rjes su dpag go cog ni tshul gsum pa nyid kyi rtags las rang dang gzhan gyi don du rjes su dpag pa yin pas/ 'dir yang rjes su dpag par bya ba yod pa nyid dang mthun pa'i phyogs la yod pa nyid dang mi mthun pa'i phyogs la med pa nyid du nges pa'i tshul dang sbyar dgos te/'dir rjes su dpag par bya ba la yod pa nyid ces bya ba la rjes su dpag par bya ba la zhes bya ba ni rjes su dpag pa'i chos can sgra la'o/ /yod pa nyid ces bya ba ni rjes su dpag par bya ba'i chos can sgra de las bsgrub par bya ba'i chos rtag pa sgrub par byed pa'i phyogs kyi chos gzhal bya yin pa'i phyir zhes bya ba yod pa nyid de de'i phyir chos can zhes bya'o//de ltar chos can de la sgrub par byed pa'i phyogs kyi chos gzhal bya yin pa'i phyir zhes bya ba de yod pa nyid yin pas rjes su dpag par bya ba la yod pa nyid kyi tshul ni rung / mi mthun pa'i phyogs la yod pa nyid ces bya ba la mthun pa'i phyogs la zhes bya ba ni rtag pa de'i chos mthun pa'i dpe nam mkha' la sogs pa'o//yod pa nyid ces bya ba ni rtag pa'i chos mthun pa'i dpe nam mkha' la sogs pa de la bsgrub par bya ba'i chos rtag pa zhes bya ba'i spyi dang sgrub par byed pa'i phyogs kyi chos gzhal bya yin pa'i phyir zhes bya ba yod pa nyid de/de'i phyir chos mthun pa'i phyogs zhes bya'o/ /de ltar mthun pa'i phyogs de la sgrub par byed pa'i chos rtag pa'i spyi dang sgrub par byed pa'i phyogs kyi chos gzhal bya yin pa'i phyir zhes bya ba yod pa mthun pa'i phyogs la yod pa nyid kyi tshul yang mi mthun pa'i phyogs la med pa nyid du nges pa zhes bya ba la mi mthun pa'i phyogs la zhes bya ba ni rtag pa de'i chos mi mthun pa'i dpe bum pa la sogs pa la'o//med pa nyid du nges pa zhes bya ba ni rtag pa de'i chos mi mthun pa'i dpe bum pa la sogs pa de la bsgrub par bya ba'i chos rtag pa'i spyi dang sgrub par byed pa'i phyogs kyi chos gzhal bya yin pa'i phyir zhes bya ba med pa nyid du nges na ni de'i tshe mi mthun pa'i phyogs de la sgrub par byed pa'i phyogs kyi chos gzhal bya yin pa'i phyir zhes bya ba de med pa nyid du nges pas mi mthun pa'i phyogs la med pa nyid du nges pa zhes bya ba'i tshul yang rung bas gtan tshigs ma nges pa med pa'i phyir yongs su dag par 'gyur ba zhig na mi mthun pa'i phyogs de la sgrub par byed pa'i phyogs kyi chos gzhal bya yin pa'i phyir zhes bya ba de med pa nyid du ma nges te/'di ltar mi mthun pa'i phyogs bum pa la sogs pa yang gzhal bya nyid yin pas/ de'i phyir sgrub par byed pa'i phyogs kyi chos gzhal bya yin pa'i phyir zhes bya ba de ni mthun pa'i phyogs la yod pa nyid du nges te/de ltar mthun pa'i phyogs nam mkha' la sogs pa dang / mi mthun pa'i phyogs bum pa la sogs pa gnyi ga la sgrub par byed pa'i phyogs kyi chos gzhal bya yin pa'i phyir zhes bya ba de yod pa de ni thun mong gi ma nges pa zhes bya ste/de ni thams cad mthun par dmigs pa'i mtshan nyid ces bya bas ston to/ /de la thams cad ces bya bas ni rjes su dpag par bya ba'i chos can dang mthun pa'i phyogs dang mi mthun pa'i phyogs thams cad de/ dper na sgra rtag par bsgrub pa dag gi rjes su dpag par bya ba'i chos can sgra dang rtag pa de'i mthun pa'i phyogs nam mkha' la sogs pa dang /rtag pa de'i mi mthun pa'i phyogs bum pa la sogs pa lta bu thams cad do/ /mthun par dmigs pa zhes bya ba ni rjes su dpag par bya ba'i chos can dang mthun pa'i phyogs dang mi mthun pa'i phyogs thams cad la sgrub par byed pa'i phyogs kyi chos de yod pa'i don te/dper na sgra rtag par sgrub pa dag gi rjes su dpag par bya ba'i chos can sgra dang rtag pa de'i mthun pa'i phyogs nam mkha' la sogs pa dang / rtag pa de'i mi mthun pa'i phyogs bum pa la sogs pa thams cad la sgrub par byed pa'i phyogs kyi chos gzhal bya yin pa'i phyir zhes bya ba de yin pa lta bu'o//de ltar thams cad mthun par dmigs pa zhes bya ba de ni thun mong gi ma nges pa yin par rig par bya'o/ /mtshan nyid ces bya ba ni rjes su dpag pa yongs su ma dag pa'i mtshan nyid yin te/ des na de yang tshad mar mi rung bar bya'o//de la thun mong ma yin pa'i ma nges pa ji lta bu zhe na/ dper na sgra mi rtag par bsgrub pa dag gtan tshigs lta bu ste/ de yang sgra ni mi rtag pa ste grags pa'i phyir ro/ /'di ni chos mthun pa'i dpe bum pa la sogs pa la yang med do/ /chos mi mthun pa'i nam mkha' la sogs pa yang med do zhes zer ro//de la yang rjes su dpag go cog ni tshul gsum pa nyid kyi rtags las rang dang gzhan gyi don du rjes su dpag pa yin pas/ 'dir yang rjes su dpag par bya ba la yod pa nyid dang mthun pa'i phyogs la yod pa nyid dang mi mthun pa'i phyogs la med pa nyid du shes pa'i tshul dang sbyar dgos te/'dir rjes su dpag par bya ba yod pa nyid ces bya ba la rjes su dpag par bya ba la zhes bya ba ni rjes su dpag par bya ba'i chos can sgra la'o/ /yod pa nyid ces bya ba ni rjes su dpag par bya ba'i chos can sgra de la bsgrub par bya ba'i chos mi rtag pa sgrub par byed pa'i phyogs kyi chos grags pa'i phyir zhes bya ba la yod pa nyid de/de'i phyir chos can zhes bya'o/ /de ltar chos can de la sgrub par byed pa'i phyogs kyi chos grags pa'i phyir zhes bya ba de yod pa nyid yin pas rjes su dpag par bya ba la yod pa nyid kyi tshul ni rung / mthun pa'i phyogs la yod pa nyid ces bya ba la mthun pa'i phyogs la zhes bya ba ni mi rtag pa de'i chos mthun pa'i dpe bum pa la sogs pa la'o//yod pa nyid ces bya ba ni mi rtag pa de'i chos mthun pa'i dpe bum pa la sogs pa de la bsgrub par bya ba'i chos mi rtag pa zhes bya ba'i spyi dang sgrub par byed pa'i phyogs kyi chos grags pa'i phyir zhes bya ba yod pa nyid yin na ni de'i tshe mthun pa'i phyogs de la sgrub par byed pa'i phyogs kyi chos grags pa'i phyir zhes bya ba de yod pa nyid yin pa'i phyir mthun pa'i phyogs la yod pa nyid ces bya ba'i tshul yang rung ba zhig na/mthun pa'i phyogs de la sgrub par byed pa'i phyogs kyi chos grags pa'i phyir zhes bya ba yod pa nyid ma yin te/'di ltar grags pa'i phyir zhes bya ba ni sgra 'ba' zhig la ma 'dres par yod kyi/ bum pa la sogs pa med pas phyogs kyi chos de mthun pa'i phyogs la yod pa nyid ma yin no/ /mi mthun pa'i phyogs la med pa nyid du nges pa zhes bya ba la mi mthun pa'i phyogs la zhes bya ba ni mi rtag pa de'i chos mi mthun pa'i dpe nam mkha' la sogs pa la'o//med pa nyid du nges pa zhes bya ba ni mi rtag pa de'i chos mi mthun pa'i dpe nam mkha' la sogs pa de la bsgrub par bya ba'i chos mi rtag pa'i spyi dang sgrub par byed pa'i phyogs kyi chos grags pa'i phyir zhes bya ba med pa nyid du nges pa ste/de'i phyir mi mthun pa'i phyogs zhes bya'o/ /de ltar sgrub par byed pa'i phyogs kyi chos grags pa'i phyir zhes bya ba de mthun pa'i phyogs la yang med pa nyid yin la mi mthun pa'i phyogs la yang med pa nyid du nges pa de ni thun mong ma yin pa'i ma nges pa zhes bya ste/de ni thams cad mi mthun par dmigs pa'i mtshan nyid ces bya bas ston to/ /de la thams cad ces bya ba ni 'dir rjes su dpag par bya ba'i chos can ma gtogs pa mthun pa'i phyogs dang / mi mthun pa'i phyogs thams cad de dper na sgra mi rtag par sgrub pa dag gi rjes su dpag par bya ba'i chos can ma gtogs pa mi rtag pa de'i mthun pa'i phyogs bum pa la sogs pa dang /mi rtag pa de'i mi mthun pa'i phyogs nam mkha' la sogs pa lta bu thams cad do/ /mi mthun par dmigs pa zhes bya ba ni rjes su dpag par bya ba'i chos can ma gtogs pa mthun pa'i phyogs dang /mi mthun pa'i phyogs thams cad la phyogs kyi chos de med pa'i don te/ dper na sgra mi rtag par bsgrub pa dag gi rjes su dpag par bya ba'i chos can sgra ma gtogs pa mi rtag pa de'i mthun pa'i phyogs bum pa la sogs pa dang / mi rtag pa de'i mi mthun pa'i phyogs nam mkha' la sogs pa thams cad sgrub par byed pa'i phyogs kyi chos grags pa'i phyir te zhes bya ba de med pa lta bu'o//de ltar na thams cad mi mthun par dmigs pa zhes bya ba de ni thun mong ma yin pa'i ma nges pa yin par rig par bya'o/ /mtshan nyid ces bya ba ni rjes su dpag pa'i yongs su ma dag pa'i mtshan nyid yin te/des na de yang mtshan mar mi rung bar rig par bya'o/ /de ltar ma nges pa rnam pa bzhi po de dag ni de'i ma nges pa'i skyon gyis gtan tshigs ltar snang ba yin no/ /de la dpe'i skyon gyis dpe ltar snang ba zhes bya ba ni bsgrub par bya ba med pa'am/ sgrub par byed pa med pa'am/gnyi ga med pa'i dpe ste/ de ni gzhan gyi rigs kyi dpe nye bar sbyar ba'i mtshan nyid ces bya bas ston to/ /de la gzhan gyi rigs kyi dpe zhes bya ba ni rjes su dpag par bya ba la yod pa nyid kyi tshul gyis rjes su dpag par bya ba'i chos sgrub par byed pa'i phyogs kyi chos yod pa nyid bstan pa la gzhan pa'i dpe ste/bsgrub par bya ba med pa'am sgrub par byed pa med pa'am gnyi ga med pa'i dpe'o/ /nye bar sbyar ba zhes bya ba ni dpe de lta bus rjes su dpag par bya ba la yod pa nyid kyi tshul gyis rjes su 'gro bar sbyor ba'o/ /mtshan nyid ces bya ba ni rjes su dpag pa dpes yongs su ma dag pa'i mtshan nyid yin no//de ltar gtan tshigs ma nges pa'i skyon gyis gtan tshigs ltar snang ba dang / dpe'i skyon gyis dpe ltar snang ba des gnyis kyis bsgrub pa la gcig tu ma nges pa'i phyir rjes su dpag pa yongs su ma grub pa ni yongs su ma dag pa'i mtshan nyid ces bya ste/de ni yongs su ma dag pa'i mtshan nyid ces bya bas ston to/ /de la yongs su ma dag pa ni rnam pa gnyis te/ mi mthun pa'i phyogs kyi phyogs gcig la yod pa'i ma nges pa dang / mthun pa'i phyogs kyi phyogs gcig la yod pa'i ma nges pa gzhan gyi rigs kyi dpe nye bar sbyar ba'i mtshan nyid dang bcas pa la thun mong ma yin pa'i ma nges pa yod pas yongs su ma dag pa dang mthun pa'i phyogs kyi phyogs gcig la yod pa'i ma nges pa dang mi mthun pa'i phyogs kyi phyogs gcig la yod pa'i ma nges pa gzhan gyi rigs dpe nye bar sbyar ba'i mtshan nyid dang bcas pa la thun mong gi ma nges pa yod pas yongs su ma dag pa ste/de dag ni 'og nas yongs su ma dag pa'i mtshan nyid bshad pa'i skabs su ston to/ /yid ches pa'i lung gi tshad ma'i mtshan nyid dang mi mthun pa'i skyon ni de ston pa thams cad mkhyen pa ma yin pa dang / des bstan pa'i lung la tshig 'gal ba yod pa ste/de ni shin tu lung rnam par dag par bstan pa'i mtshan nyid ces bya bas ston to/ /de yang 'og nas rang gnas skabs su ston to/ /de ltar ji skad du bstan pa de dag ni yongs su ma dag pa'i mtshan nyid bdun bstan pa'i tshig gi don gyis dmigs dngos su bstan pa yin no//da ni yongs su ma dag pa'i mtshan nyid bdun bshad pa'i tshig gis de dag gi mtshan nyid sdeb par bshad par bya ste/ de la mtshan nyid dang po gnyis dang gzhan gyi rigs kyi dpe nye bar sbyar ba'i mtshan nyid ni yongs su ma dag pa'i mtshan nyid bshad pa'i skabs su 'og nas rigs pas grags pas mtshan nyid bsdebs te sbyar na bde bas skabs 'dir bde bar gshegs pas kyang bka' ma stsal to//mtshan nyid gsum pa dang bzhi pa ni skabs 'dir yang 'jig rten gyi grags pa dang rigs pas bshad la/ yongs su ma dag pa'i mtshan nyid bshad pa'i skabs su 'og nas kyang rigs pas grags pas mtshan nyid bsdebs te sbyar na de kho na nyid kyi tshul dang mi mthun pas yongs su ma dag pa'i mtshan nyid yin par rtogs par 'gyur bas 'jig rten mkhyen pas kyang don gyi dbang de gzigs nas bshad pa'i skabs 'dir yang 'jig rten gyi grags pa dang rigs pas grags pa'i dbang du mdzad de bka' stsal la/yongs su ma dag pa'i mtshan nyid bshad pa'i skabs su 'og nas dang rigs pas grags pa'i mtshan nyid bsdebs te sbyar ba'i dbang du mdzad de ston to/ /de la dang por mtshan nyid gsum pa 'jig rten gyi grags pa dang rigs pas bshad pa'i sgo nas de kho na nyid kyi tshul dang mi mthun pas yongs su ma dag pa'i mtshan nyid yin par bstan pa'i phyir de la chos thams cad yid kyi rnam par shes pas rnam par shes par bya ba nyid gang yin pa de ni thams cad mthun par dmigs pa'i mtshan nyid yin no zhes bya ba gsungs so//de la mtshan nyid gsum pa ni thams cad mthun par dmigs pa'i mtshan nyid de/ de ji ltar na 'jig rten na grags pa'i bshad pa'i sgo nas de kho na nyid kyi don gyi tshul dang mi mthun pas yongs su ma dag pa'i mtshan nyid yin par rig par bya zhe na/chos thams cad yid kyi rnam par shes pas rnam par shes par bya ba nyid do zhes mtshan nyid kyi mi mthun pa'i chos rnams 'dra bar dmigs pa ni thams cad mthun par dmigs pa'i mtshan nyid ces bya ste/ de ni 'jig rten gyi grags pas bshad pa'i sgo nas de kho na nyid kyi tshul dang mi mthun pas yongs su ma dag pa'i mtshan nyid yin par rig par bya'o//de yang ji lta bu zhe na/ 'di ltar gzugs la sogs pa'i phyi rol gyi yul lnga po dag la dbang po gzugs can gyi rnam par shes pas ma drangs pa'i yid kyi rnam par shes pas kyang dbang po gzugs can gyi rnam par shes pas drangs pas 'dra bar dmigs par 'dzin pa dang /gzhan gyis bsgribs pa'i dngos po lkog na 'dug pa dag la yang yid kyis mngon sum du dmigs pa snyam du 'dzin pa dang / 'das pa'i dus na che ge mo zhig byung ngo zhe'am/ ma 'ongs pa'i dus na che ge mo zhig 'byung bar 'gyur ro zhes thos pa 'am rjes su dpog pa'am bdag nyid kyis don mngon sum du dmigs pa'i bag chags dran pas gzung ba'i dngos po spyi'i mtshan nyid la yang da ltar byung ba'i gzung ba'i dngos po'i rang gi mtshan nyid la dmigs pa dang 'dra bar yid kyi rnam par shes pa'i mtshan nyid gsum gyis dmigs pa tsam du 'dzin pa dang /gzhan la de lta bu dang mthun pa'i mtshan nyid kyis mi mthun pa'i chos rnams 'dra bar dmigs pa ni thams cad mthun par dmigs pa'i mtshan nyid ces bya ba de ni 'jig rten gyi grags pas bshad pa'i sgo nas de kho na nyid kyi don gyi tshul dang mi mthun pas yongs su ma dag pa'i mtshan nyid yin par rig par bya'o//de ji ltar na rigs pas drangs pas bshad pa'i sgo nas de kho na nyid kyi don gyi tshul dang mi mthun pas yongs su ma dag pa'i mtshan nyid yin par rig par bya zhe na/ chos thams cad yid kyi rnam par shes pas rnam par shes par bya ba nyid yin pas yid kyi rnam par shes pa'i gzhal bya yin no zhes thun mong gi ma nges pa'i skyon sngar bstan pa lta bur rjes su dpag par bya ba'i chos can sgra dang mthun pa'i phyogs nam mkha' la sogs pa dang /mi mthun pa'i phyogs bum pa la sogs pa thams cad la bsgrub par bya ba'i chos rtag pa sgrub par byed pa'i phyogs kyi chos gzhal bya yin pa'i phyir zhes bya ba yod pa'i gtan tshigs kyi sgra rtag par sgrub pa lta bu ni thams cad mthun par dmigs pa'i mtshan nyid ces bya ste/de ni rigs pas grags pas bshad pa'i sgo nas de kho na nyid kyi don gyi tshul mi mthun pas yongs su ma dag pa'i mtshan nyid yin par rig par bya'o//de'i 'og tu mtshan nyid bzhi pa 'jig rten gyi grags pa dang rigs pas grags pas bshad pa'i sgo nas de kho na nyid kyi don gyi tshul dang mi mthun pa'i yongs su ma dag pa'i mtshan nyid yin pas bstan pa'i phyir rtags dang ngo bo nyid dang / las dang / chos dang / rgyu dang / 'bras bu dang / mtshan nyid mi mthun pa gang yang rung bas phan tshun mtshan nyid mi mthun par nges pa nyid yin pa de ni thams cad mi mthun pa'i mtshan nyid yin no zhes bya ba gsungs so/ /de la mtshan nyid bzhi pa ni thams cad mi mthun par dmigs pa'i mtshan nyid de/de ji ltar na 'jig rten gyi grags pas bshad pa'i sgo nas de kho na nyid kyi don gyi tshul dang mi mthun pas yongs su ma dag pa'i mtshan nyid yin par rig par bya zhe na/ chos rnams kyi rab tu dbye ba'i tshul ni mdor bsdu na rnam pa lngar rig par bya ste/ rtags dang / ngo bo nyid dang /las dang / chos dang / rgyu dang 'bras bu'o/ /de la rtags ni lus dang rgyu ba dang / gnas pa las rig par bya'o/ /ngo bo nyid ni rang gi rigs kyi mtshan nyid dang bye brag gi mtshan nyid las rig par bya'o/ /las ni rang gi bya ba byed pa dang yang dag pa dang log par sgrub pa las rig par bya'o//chos ni kun nas nyon mongs pa dang rnam par byang ba dang kun rdzob dang don dam pa'i bden pa las rig par bya'o/ /rgyu dang 'bras bu ni thag nye ba dang ring ba dang 'dod pa dang mi 'dod pa las rig par bya'o/ /de ltar chos rnams kyi rab tu dbye ba'i tshul tha dad pa de dag las rnam pa kha cig gis mi mthun/yang rnam pa kha cig gis mthun pa yod pa la tshul nyid mi mthun pa gang yang rung ba 'ga' tsam gyis mi mthun par dmigs pa'i sgo nas thams cad phan tshun mtshan nyid mi mthun par nges pa nyid du dmigs pa gang yin pa de ni thams cad mi mthun par dmigs pa'i mtshan nyid ces bya ste/de ni 'jig rten gyi grags pas bshad pa'i sgo nas de kho na nyid kyi don gyi tshul dang mi mthun pas yongs su ma dag pa'i mtshan nyid yin par rig par bya'o/ /de ji ltar na rigs pas grags pas bshad pa'i sgo nas de kho na nyid kyi don gyi tshul dang mi mthun pas yongs su ma dag pa'i mtshan nyid yin par rig par bya ste/mtshan nyid mi mthun pa rnams kyi mtshan nyid mi mthun pa gang yang rung ba 'ga' tsam gyis mi mthun par dmigs pa'i sgo nas thams cad kyi thams cad du phan tshun mtshan nyid mi mthun par nges pa nyid du dmigs nas/ thun mong ma yin pa'i nges pa'i skyon sngar bstan pa lta bur rjes su dpag par bya ba'i chos can sgra ma gtogs pa mthun pa'i phyogs bum pa la sogs pa dang /mi mthun pa'i phyogs nam mkha' la sogs pa thams cad bsgrub par bya ba'i chos mi rtag pa sgrub par byed pa'i phyogs kyi chos grags pa'i phyir zhes bya ba byed pa'i gtan tshigs kyis sgra mi rtag par sgrub pa lta bu ste thams cad mi mthun par dmigs pa'i mtshan nyid ces bya ste/de ni rigs pas grags pas bshad pa'i sgo nas de kho na nyid kyi don gyi tshul dang mi mthun pas yongs su ma dag pa'i mtshan nyid yin par rig par bya'o//de la da ni yongs su ma dag pa'i mtshan nyid bshad pa'i skabs 'dir mtshan nyid dang po gnyis dang mtshan nyid gsum pa dang bzhi pa dang gzhan gyi rigs kyi dpe nye bar sbyar ba'i mtshan nyid rnam par rigs pas grags pas mtshan nyid bsdebs te sbyar ba'i sgo nas de kho na nyid kyi don gyi tshul dang mi mthun pas yongs su ma dag pa'i mtshan nyid yin par ston te/de yang mtshan nyid dang pos ni gtan tshigs ma nges pa'i skyon gyis gtan tshigs ltar snang ba dang / gzhan gyi rigs kyi dpe nye bar sbyar ba'i mtshan nyid kyis dpe'i skyon gyis dpe ltar snang ba de nyid kyis bsgrubs la/gcig tu ma nges pa'i rjes su dpag pa'i yongs su ma grub pa ni yongs su ma dag pa'i mtshan nyid ces bya'o zhes ston to/ /de la de dag gi mtshan nyid bsdebs pa ni rnam pa gnyis te/ mi mthun pa'i phyogs kyi phyogs gcig la yod pa'i ma nges pa dang /mthun pa'i phyogs kyi phyogs gcig la yod pa'i ma nges pa gzhan gyi rigs kyi dpe nye bar sbyar ba'i mtshan nyid dang bcas pa la thun mong ma yin pa'i ma nges pa yod pa yongs su ma dag pa dang / mthun pa'i phyogs kyi chos gcig la yod pa'i ma nges pa dang /mi mthun pa'i phyogs kyi phyogs gcig la yod pa'i ma nges pa gzhan gyi rigs kyi dpe nye bar sbyar ba'i mtshan nyid dang bcas pa la thun mong gi ma nges pa yod pas yongs su ma dag pa'o/ /de la dang por mi mthun pa'i phyogs kyi phyogs gcig la yod pa'i ma nges pa dang / mthun pa'i phyogs kyi phyogs gcig la yod pa'i ma nges pa gzhan gyi rigs kyi dpe nye bar sbyar ba'i mtshan nyid dang bcas pa la thun mong ma yin pa'i ma nges par yod pa yongs su ma dag pa la bstan pa'i phyir/ 'jam dpal de la de las gzhan dang mthun par dmigs pa'i mtshan nyid dpe dang bcas pa la thams cad mi mthun par dmigs pa'i mtshan nyid yod pas des na de grub par bya ba la gcig tu ma nges pa'i phyir de ni yongs su ma dag pa'i mtshan nyid ces bya'o zhes gsungs so//de la de las gzhan dang mthun par dmigs pa'i mtshan nyid ces bya ba ni mi mthun pa'i phyogs kyi phyogs gcig la yod pa'i ma nges pa yin/mthun pa'i phyogs kyi phyogs gcig la yod pa'i ma nges pa yang yin te/ de gnyi ga yin par ji ltar sbyar ba'i tshig gi don ni gong du bstan pa bzhin du sbyar ro/ /dpe dang bcas pa la zhes bya ba ni ma nges pa de gnyi ga gzhan gyi rigs kyi dpe nye bar sbyar ba'i mtshan nyid dang bcas pa la ste/de la ma nges pa snga ma'i dpe ni dper na sgra brtsal ba las byung bar bsgrub pa ngag gi brtsal ba las byung ba dag gi mi mthun pa'i phyogs kyi phyogs cig shos nam mkha' de las gzhan pa brtsal ba las byung ba de'i mi mthun pa'i phyogs kyi phyogs cig shos glog dang nags kyi me tog la sogs pa de la sgrub par byed pa'i phyogs kyi chos mi rtag pa'i phyir zhes bya ba de yod pas mi mthun pa'i phyogs kyi phyogs gcig la yod pa'i ma nges pa zhes bya ba lta bu'o//ma nges pa'i 'og ma'i dpe ni dper na sgra brtsal ba las mi 'byung ba bsgrub pa dag gi brtsal ba las mi 'byung ba de'i mthun pa'i phyogs kyi phyogs cig shos glog dang nags kyi me tog la sogs pa de las gzhan pa brtsal ba las mi 'byung ba de'i mthun pa'i phyogs cig shos nam mkha' de las sgrub par byed pa'i phyogs kyi phyogs rtag pa'i phyir zhes bya ba de yod pas mthun pa'i phyogs kyi phyogs gcig la yod pa'i ma nges pa zhes bya ba lta bu'o//thams cad mi mthun par dmigs pa'i mtshan nyid yod pas zhes bya ba ni de ltar ma nges pa'i dpe dang bcas pa de gnyis la thun mong ma yin pa'i ma nges pa yod pa ste/ de yang ma nges pa snga ma dpe dang bcas pa las thun mong ma yin pa'i ma nges pa ji ltar yod ce na/dper na sgra brtsal ba las byung ba dag gi bsgrub par bya ba'i chos brtsal ba las byung ba sgrub par byed pa'i phyogs kyi chos mi rtag pa'i phyir zhes bya ba ni mi mthun pa'i phyogs kyi phyogs gcig la yod pa'i ma nges pa dpe dang bcas pa des brtsal ba las byung ba zhes bya ba mi mthun pa'i rnam grangs de grub par bya ba la gcig tu ma nges par yang ma zad kyi/sgra mi rtag pas brtsal ba las 'byung bar sgrub pa'i skabs de nyid du sgra la grag pa yang yod pas sgra mi rtag par sgrub pa dag gi bsgrub par bya ba'i chos mi rtag pa sgrub par byed pa'i phyogs kyi chos grags pa'i phyir zhes bya ba thun mong ma yin pa'i ma nges pa des mi rtag pa zhes bya ba brtsal ba las byung ba'i rnam grangs de bsgrub par bya ba la gcig tu ma nges pa de yang 'byung bar 'gyur te/des na brtsal ba las byung ba yang mi 'grub la mi rtag pa yang mi 'grub pas de'i phyir mi mthun pa'i phyogs gcig la yod pa'i ma nges pa dpe dang bcas pa la thun mong ma yin pa'i ma nges pa yang yod pa yin no//ma nges pa'i 'og ma dpe dang bcas pa la thun mong ma yin pa'i nges pa ji ltar yod ce na/ dper na sgra brtsal ba las mi 'byung bar sgrub pa dag gis bsgrub par bya ba'i chos brtsal ba las mi 'byung ba sgrub par byed pa'i phyogs kyi chos rtag pa'i phyir zhes bya ba gcig la ma grub pa'i gtan tshigs mthun pa'i phyogs kyi phyogs gcig la yod pa'i ma nges pa dpe dang bcas pa des brtsal ba las mi 'byung ba zhes bya ba rtag pa'i rnam grangs de grub par bya ba la gcig tu ma nges par yang ma zad kyi/sgra rtag pas brtsal ba las mi 'byung bar bsgrub pa'i skabs de nyid du sgra la grag pa yang yod/ sgra mi rtag par sgrub pa dag gi bsgrub par bya ba'i chos mi rtag pa sgrub par byed pa'i phyogs kyi chos grag pa'i phyir zhes bya ba thun mong ma yin pa'i ma nges pa des mi rtag pa zhes bya bas brtsal ba las mi 'byung ba dang mi mthun pa de grub par bya ba la gcig tu ma nges pa de yang 'byung bar 'gyur te/des na brtsal ba las mi 'byung ba yang mi 'grub la mi rtag pa yang mi 'grub pas de'i phyir mthun pa'i phyogs kyi phyogs gcig la yod pa'i ma nges pa dpe dang bcas pa la yang thun mong ma yin pa'i ma nges pa yod pa yin no//des na zhes bya ba ni de ltar ma nges pa gnyis po dpe dang bcas pa la thun mong ma yin pa'i ma nges pa yang yod pa'i gtan tshigs des na'o/ /de grub par bya ba la zhes bya ba ni bsgrub par bya ba'i chos de grub par bya ba la ste /dper na sgra brtsal ba las 'byung ba dang brtsal ba las mi 'byung ba dang mi rtag par bsgrub pa de bsgrub par bya ba lta bu la'o/ /gcig tu ma nges pa'i phyir zhes bya ba ni sgrub par byed pa'i phyogs kyi chos gcig tu ma nges pa'i phyir te/ dper na sgra brtsal ba las 'byung bar sgrub pa dag gi mi mthun pa'i phyogs kyi phyogs gcig la yod pa'i ma nges pa dpe dang bcas pa ni sgra brtsal ba las 'byung bar bsgrub pa'i chos de grub par bya ba la gcig tu ma nges la sgra brtsal ba las mi 'byung bar grub pa dag gi mthun pa'i phyogs kyi phyogs gcig la yod pa'i ma nges pa dpe dang bcas pa ni sgra brtsal ba las mi 'byung bar bsgrub pa'i chos de grub par bya ba la gcig tu ma nges pa dang /sgra mi rtag par bsgrub pa dag gi ma nges pa gnyi ga la thun mong ma yin pa'i ma nges pa yod pa ni sgra mi rtag par sgrub pa'i chos de bsgrub par bya ba la gcig tu nges pa lta bu'i phyir ro/ /de ni yongs su ma dag pa'i mtshan nyid ces bya'o zhes bya ba ni rjes su dpog pa yongs su ma dag pa'i mtshan nyid de dper na sgra brtsal ba las 'byung bar sgrub pa dag gi mi mthun pa'i phyogs kyi phyogs gcig la yod pa'i ma nges pa dpe dang bcas pa ni sgra brtsal ba las 'byung bar bsgrub pa'i chos de'i grub par bya ba la gcig tu ma nges pa'i phyir sgra brtsal ba las 'byung bar sgrub pa'i rjes su dpog pa yongs su ma dag pa'i mtshan nyid yin la sgra brtsal ba las mi 'byung bar bsgrub pa dag gi mthun pa'i phyogs kyi phyogs gcig la yod pa'i ma nges pa dpe dang bcas pa ni sgra brtsal ba las mi 'byung bar sgrub pa'i chos de grub par bya ba la gcig tu ma nges pa'i phyir sgra brtsal ba las mi 'byung bar sgrub pa'i rjes su dpag pa yongs su ma dag pa'i mtshan nyid yin pa dang /sgra mi rtag par sgrub pa dag gi ma nges pa gnyi ga la thun mong ma yin pa'i ma nges pa yod pa ni/ sgra mi rtag par sgrub pa'i chos de grub par bya ba la gcig tu ma nges pa'i phyir sgra mi rtag par sgrub pa'i rjes su dpag pa yongs su ma dag pa'i mtshan nyid yin pa lta bu ste/des na de'i tshad mar mi rung bar rig par bya'o/ /de'i 'og tu mthun pa'i phyogs kyi phyogs gcig la yod pa'i ma nges pa dang / mi mthun pa'i phyogs kyi phyogs gcig la yod pa'i ma nges pa gzhan gyi rigs kyi dpe nye bar sbyar ba'i mtshan nyid dang bcas pa la thun mong gi ma nges pa yod pas yongs su ma dag pa bstan pa'i phyir/de las gzhan dang mi mthun pa'i dmigs pa'i mtshan nyid dpe dang bcas pa la yang thams cad mthun par dmigs pa'i mtshan nyid yod pas des na de 'grub par bya ba la gcig tu ma nges pa'i phyir de yang yongs su ma dag pa'i mtshan nyid ces bya'o zhes bya ba gsungs so/ / de la de las gzhan dang mi mthun par dmigs pa'i mtshan nyid ces bya ba ni mthun pa'i phyogs kyi phyogs gcig la yod pa'i ma nges pa yang yin/ mi mthun pa'i phyogs kyi phyogs gcig la yod pa'i ma nges pa yang yin te/ de gnyi ga yin par ji ltar sbyar ba'i tshig gi don ni gong du bstan pa bzhin du sbyar ro/ / dpe dang bcas pa la yang zhes bya ba ni ma nges pa de gnyi ga gzhan gyi rigs kyi dpe nye bar sbyar ba'i mtshan nyid dang bcas pa la ste/ de la ma nges pa snga ma'i dpe ni dper na sgra brtsal ba las mi 'byung bar sgrub pa dag gi brtsal ba las mi 'byung ba de'i mthun pa'i phyogs kyi phyogs cig shos nam mkha' de las gzhan pa brtsal ba la yang mi 'byung ba de'i mthun pa'i phyogs kyi phyogs cig shos glog dang nags kyi me tog la sogs pa de la sgrub par byed pa'i phyogs kyi chos rtag pa'i phyir zhes bya ba de med pas mthun pa'i phyogs kyi phyogs gcig la yod pa zhes bya ba lta bu'o//ma nges pa 'og ma'i dpe ni dper na sgra brtsal ba las 'byung bar sgrub pa dag gi brtsal ba las 'byung ba de'i mi mthun pa'i phyogs kyi phyogs cig shos glog dang nags kyi me tog la sogs pa de las gzhan pa brtsal ba las 'byung ba de'i mi mthun pa'i phyogs kyi phyogs cig shos nam mkha' de la sgrub par byed pa'i phyogs kyi chos mi rtag pa'i phyir zhes bya ba de med pas mi mthun pa'i phyogs kyi phyogs gcig la yod pa'i ma nges pa zhes bya ba lta bu'o//thams cad mthun par dmigs pa'i mtshan nyid yod pas zhes bya ba ni de ltar ma nges pa dpe dang bcas pa de gnyi ga la thun mong gi ma nges pa yod pa ste/ de la ma nges pa dpe dang bcas pa la thun mong gi ma nges pa ji ltar yod ce na/dper na sgra brtsal ba las mi 'byung bar sgrub pa dag gi bsgrub par bya ba'i chos brtsal ba las mi 'byung bar sgrub par byed pa'i phyogs kyi chos rtag pa zhes bya ba gcig la ma grub pa'i gtan tshigs mthun pa'i phyogs kyi phyogs gcig la yod pa'i ma nges pa dpe dang bcas pa des brtsal ba las mi 'byung ba zhes bya ba rtag pa'i rnam grangs des grub par bya ba la gcig tu ma nges par yang ma zad kyi/sgra rtag pas brtsal ba las mi 'byung ba sgrub pa'i skabs de nyid du sgra ni gzhal bya yang yin pas sgra rtag par bsgrub pa dag gi bsgrub par bya ba'i chos rtag pa sgrub par byed pa'i phyogs kyi chos gzhal bya yin pa'i phyir zhes bya ba thun mong gi ma nges pa des rtag pa zhes bya ba la brtsal ba las mi 'byung ba'i rnam grangs de grub par bya ba la gcig tu ma nges pa de yang 'byung bar 'gyur te/des na brtsal ba las mi 'byung ba yang mi 'grub la/ rtag par yang mi 'grub pas de'i phyir mthun pa'i phyogs kyi phyogs gcig la yod pa'i ma nges pa dpe dang bcas pa la thun mong gi ma nges pa yang yod pa yin no//ma nges pa 'og ma dpe dang bcas pa la thun mong gi ma nges pa ji ltar yod ce na/ dper na sgra brtsal ba las 'byung bar bsgrub pa dag gi bsgrub par bya ba'i chos brtsal ba las 'byung ba sgrub par byed pa'i phyogs kyi chos mi rtag pa'i phyir zhes bya ba mi mthun pa'i phyogs kyi phyogs gcig la yod pa'i ma nges pa dpe dang bcas pa des brtsal ba las 'byung ba zhes bya ba mi rtag pa'i rnam grangs de grub par bya ba la gcig tu ma nges par yang ma zad kyi/sgra mi rtag pa las brtsal ba las 'byung bar bsgrub pa'i skabs de nyid du sgra de sgra ni gzhal bya yang yin pas sgra rtag par bsgrub pa dag gi bsgrub par bya ba dag chos rtag pa sgrub par byed pa'i phyogs kyi chos gzhal bya yin pa'i phyir zhes bya ba thun mong gi ma nges pa des rtag pa zhes bya ba brtsal ba las 'byung ba dang /mi mthun pa de grub par bya ba la gcig tu ma nges pa de yang 'byung bar 'gyur te/ des na brtsal ba las 'byung yang mi 'grub la rtag pa yang mi 'grub pas/de'i phyir mi mthun pa'i phyogs kyi phyogs gcig la yod pa'i ma nges pa dpe dang bcas pa la yang thun mong ma nges pa yod pa yin no/ /des zhes bya bas ni de ltar ma nges pa gnyis po dpe dang bcas pa la thun mong gi ma nges pa yang yod pa'i gtan tshigs des na'o//de grub par bya ba la zhes bya ba ni bsgrub par bya ba'i chos de grub par bya ba la ste/ dper na sgra brtsal ba las mi 'byung ba dang / brtsal ba las 'byung ba dang / rtag par sgrub pa de grub par bya ba lta bu'o/ /gcig tu ma nges pa'i phyir zhes bya ba ni sgrub par byed pa'i phyogs kyi chos gcig tu ma nges pa'i phyir zhes dper na sgra brtsal ba las mi 'byung bar sgrub pa dag gi mthun pa'i phyogs kyi phyogs gcig la yod pa'i ma nges pa dpe dang bcas pa ni sgra brtsal ba las mi 'byung bar bsgrub pa'i chos de grub par bya ba la gcig tu ma nges pa la sgra brtsal ba las 'byung bar bsgrub pa dag gi mi mthun pa'i phyogs kyi phyogs gcig la yod pa'i ma nges pa dpe dang bcas pa ni sgra brtsal ba las 'byung bar sgrub pa'i chos de grub par bya ba la gcig tu ma nges pa dang sgra rtag par bsgrub pa dag gi ma nges pa gnyi ga la thun mong gi ma nges pa yod pa ni sgra rtag par bsgrub pa'i chos de grub par bya ba la gcig tu ma nges pa lta bu'i phyir ro//de yang yongs su ma grags pa'i mtshan nyid ces bya'o zhes bya ba ni rjes su dpag pa yongs su ma grags pa'i mtshan nyid de dper na sgra brtsal ba las mi 'byung bar bsgrub pa dag gi mi mthun pa'i phyogs kyi phyogs gcig la yod pa'i ma nges pa dpe dang bcas pa ni sgra brtsal ba las mi 'byung bar bsgrub pa'i chos de grub par bya ba la gcig tu ma nges pa'i phyir/sgra brtsal ba las mi 'byung bar sgrub pa'i rjes su dpag pa yongs su ma dag pa'i mtshan nyid yin la/ sgra brtsal ba las 'byung bar bsgrub pa dag gi mi mthun pa'i phyogs kyi phyogs gcig la yod pa'i ma nges pa dpe dang bcas pa ni sgra brtsal ba las 'byung bar sgrub pa'i chos de grub par bya ba la gcig tu ma nges pa'i phyir/sgra brtsal ba las 'byung bar sgrub pa'i rjes su dpag pa yongs su ma dag pa'i mtshan nyid yin pa dang / sgra rtag par bsgrub pa dag gi ma nges pa gnyi ga la thun mong gi ma nges pa yod pa ni sgra rtag par sgrub pa'i chos de grub par bya ba la gcig tu ma nges pa'i phyir sgra rtag par bsgrub pa'i rjes su dpag pa yongs su ma dag pa'i mtshan nyid yin pa lta bu ste/des na de yang tshad mar mi rung bar rig par bya'o/ /yongs su ma dag pa'i phyir rigs pas brtag pa yongs su ma dag pa yin te/ yongs su ma dag pa'i phyir bstan par mi bya'o zhes bya ba ni de ltar yongs su ma dag pa'i mtshan nyid bshad pa'i skabs der mtshan nyid dang po gnyis dang /mtshan nyid gsum pa dang / bzhi dang / gzhan gyi rigs kyi dpe nye bar sbyar ba'i mtshan nyid rnams rigs pas grags pas mtshan nyid bsdebs te sbyar ba'i sgo nas de kho na nyid kyi don gyi tshul dang mi mthun pas yongs su ma dag pa'i mtshan nyid yin par bstan pa ste/de dag gi mjug bsdu ba yin te/ de yang ma nges pa gnyi ga dpe dang bcas pa la thun mong ma yin pa'i ma nges pa yod pas yongs su ma dag pa dang ma nges pa gnyi ga dpe dang bcas pa la thun mong gi ma nges pa yod pas yongs su ma dag pa'i phyir rjes su dpag pa'i rigs pas brtag pa yongs su ma dag pa yin te/de ltar yongs su ma dag pa'i phyir 'thad pas sgrub pa la de'i rgyu dang rkyen du gtogs pa'i mtshan nyid yongs su ma dag pa'i mtshan nyid dang ldan pa'i tshad ma las ni don la 'khrul par dmigs te/ bdag kyang log par lta ba la gnas shing gzhan yang log par lta ba la 'jug ste/sdig pa'i grogs po'i lag tu song nas rmongs bzhin du spyod par 'gyur bas de ni bsten par mi bya'o zhes bya bar sbyar ro/ /de'i 'og tu yid ches pa'i lung gi tshad ma'i mtshan nyid mi mthun pa'i skyon gyi lung shin tu rnam par ma dag pa bstan pa'i mtshan nyid bstan pa'i phyir/ de la lung shin tu rnam par ma dag pa bstan pa'i mtshan nyid ni rang bzhin gyis yongs su ma dag pa yin par rig par bya'o zhes bya ba gsungs so//de la lung shin tu rnam par ma dag pa bstan pa'i mtshan nyid ni de ston pa thams cad mkhyen pa ma yin pa dang / des bstan pa'i lung la tshig 'gal ba yod pa rang bzhin gyis yongs su ma dag pa yin par rig par bya'o//de la de ston pa thams cad mkhyen pa nyid ma yin pa ni thams cad mkhyen pa'i mtshan nyid lnga dang mi ldan pas sgrib pa ma spangs pa'i phyir thabs mi mkhas shing 'chal ba'i shes rab tu gyur pa dang / ye shes ma rdzogs pa'i phyir shes pa mtha' dang bcas pa yin no/ /des bstan pa'i lung la tshig 'gal ba yod pa ni phyin ci log tu bstan pas chos ma yin pa ni 'dod chags la sogs pa'i rtsa ba las byung ba gang gA'i nang du khrus byas pas 'byung ngo zhes zer ba dang /chos ni rnam par mi 'tshe ba yin la/ srog chags bsad de mchod sbyin byas na grol lo zhes zer ba lta bu yin no/ /de ltar na de ston pa thams cad mkhyen pa ma yin par yang des bstan pa'i lung la tshig 'gal ba yod pa las shes la/des bstan pa'i lung la tshig 'khyal pa yod par yang de ston pa thams cad mkhyen pa ma yin pa las shes pas/ de'i phyir de ni rang bzhin nyid kyis yongs su ma dag pa yin par rig par bya'o/ /chos nyid kyi rigs pa'i mtshan nyid gang zhe na/ de la de bzhin gshegs pa rnams byung yang rung /ma byung yang rung ste/ chos gnas par bya ba'i phyir chos nyid dbyings gnas pa gang yin pa de ni chos nyid kyi rigs pa yin no zhes bya ba gsungs so/ /de la chos nyid kyi rigs pa zhes bya ba ni chos rnams kyi gnas dang gnas ma yin pa'i mtshan nyid so sor nges pa'i chos nyid gang yin pa ste/de ni chos rnams kyi grags pa'i chos nyid dang / bsam gyis mi khyab pa'i chos nyid dang / rnam pa'i chos nyid yin pas de bzhin gshegs pa rnams byung yang rung ma byung yang rung ste/ chos gnas par bya ba'i phyir chos nyid dbyings gnas yin pas de la ni mos par bya bar zad kyi bsam par mi bya/ brtag par mi bya ste/ des ni chos rnams kyi chos nyid kyis de 'dra bar shes par bya'o/ /de ltar chos rnams kyi gnas dang gnas ma yin pa'i mtshan nyid so sor nges pa'i chos nyid gang yin pa de ni chos rnams kyi chos nyid kyi rigs pa yin pas na de'i phyir chos nyid kyi rigs pa zhes bya'o/ /rigs pa bzhi bshad zin to// //de la bsdus pa dang rgyas pa ni mdor bsdus te tshig gcig gis bstan pa'i chos tshig phyi ma phyi ma dag gis rab tu phye ste mthar thug par byed pa gang yin pa'o zhes bya ba la mdor bsdus te tshig gis bstan pa'i chos zhes bya ba ni bsdus pa yin no//tshig phyi ma dag gis rab tu phye ste mthar thug par byed pa ni rgyas pa yin te/ de bsdus pa zhes bya ba ni yi ge gcig gang yin pa'o//rgyas pa zhes bya ba ni yi ge mang po gang yin pa'o/ /yang rnam grangs gzhan du na bsdus pa zhes bya ba ni yongs su ma rdzogs pa'i tshig ste/ de tshig 'bru ma rdzogs pa dang don ma rdzogs pa las blta bar bya'o/ /rgyas pa zhes bya ba ni yongs su rdzogs pa'i tshig ste/ tshig 'bru rdzogs pa dang don rdzogs pa gang yin pa ste/ dper na sdig pa thams cad ces bya ba'i tshig 'bru dang don yongs su ma rdzogs pa de mi bya ste zhes bya ba'i tshig 'bru dang don gyis yongs su rdzogs par 'gyur ba lta bu'o/ /yang rnam grangs gzhan du na bsdus pa zhes bya ba ni bsgrub pa'i tshig yin la/ rgyas pa zhes bya ba ni sgrub par byed pa'i tshig yin te/dper na/ kye ma 'du byed mi rtag ste/ /zhes bya ba bsgrub pa'i tshig ste/ skye zhing 'jig pa'i chos can yin/ /zhes bya bas sgrub par byed pa lta bu'o/ /yang rnam grangs gzhan du na bsdus pa zhes bya ba ni bstan pa'i tshig yin la/ rgyas pa zhes bya ba ni bshad pa'i tshig yin te/ dper na dam pa rnams zhes bya ba bstan pa'i tshig de yang dag par spong ba rnams dang skyes bu dam pa rnams zhes bya bar bshad par byed pa'o//de dag ni rnam pa'i mtshan nyid yin no/ /ngas rnam pa dang bcas pa'i dmigs pa 'dzin pa byang chub kyi phyogs dang mthun pa'i chos dran pa nye bar gzhag pa la sogs pa gang dag bstan pa ni de dag gi ngo bo nyid kyi mtshan nyid do zhes bya ba la/rnam pa dang bcas pa'i dmigs pa 'dzin pa zhes bya ba ni sems kyi rnam pa nyid la dmigs par zad kyi/ phyi rol gyi yul med pa'i don te/ byang chub kyi phyogs dang mthun pa'i chos dran pa nye bar gzhag pa la sogs pa bsgom pa na rnam par rtog pa dang bcas pa'i gzugs brnyan dang / rnam par mi rtog pa'i gzugs brnyan la dmigs pa nyid rnam pa dang bcas pa'i dmigs pa 'dzin pa yin no//de dag gi ngo bo nyid kyi mtshan nyid ces bya ba ni ma mo de dag gi mtshan nyid de/ ma mo ni chos mngon pa yin la chos mngon pa ni zag pa med pa'i shes rab 'khor dang bcas pa yin pas de'i phyir byang chub kyi phyogs kyi chos rnams ni ma mo'i ngo bo nyid kyi mtshan nyid yin no//'jig rten pa dang 'jig rten las 'das par bcas pa'i nyon mongs pa spangs pas de'i 'bras bu 'jig rten pa dang 'jig rten las 'das pa'i yon tan mngon par sgrub pa gang yin pa de ni/ de'i 'bras bu thob pa'i mtshan nyid yin no zhes bya ba la 'jig rten pa dang 'jig rten las 'das par bcas pa'i nyon mongs pa spong bas zhes bya ba ni/'jig rten pa'i lam dang 'jig rten las 'das pa'i lam gyi go rims su'o / /de'i 'bras bu 'jig rten pa dang 'jig rten las 'das pa'i yon tan mngon par bsgrub pa zhes bya ba ni mngon par shes pa lnga dang / rnam par grol ba la sogs pa dag go//de'i 'bras bu thob pa'i mtshan nyid yin no zhes bya ba ni ma mo'i ngo bo nyid byang chub kyi phyogs kyi skabs de'i 'o/ /de nyid rnam par grol ba'i shes pas so so yang dag par rig pa gang yin pa gzhan dag la yang rgya cher sgrogs pa dag 'chad pa dang yang dag par ston pa de na de myong ba rnam par bsnyad pa'i mtshan nyid yin no zhes bya ba la/de nyid rnam par grol ba'i shes pas so so yang dag par rig pa zhes bya ba ni 'bras bu thob pa de nyid do/ /de myong ba rnam par bsnyad pa'i mtshan nyid yin no zhes bya ba ni so so yang dag par rig pa de myong ba'o/ /byang chub kyi phyogs dang mthun pa'i chos de dag nyid bsgom pa la bar chad byed pa'i gnas lta bu nyon mongs pa can gyi chos gang yin pa de ni de'i bar du gcod pa'i chos kyi mtshan nyid yin no zhes bya ba la/bar chad byed pa'i gnas lta bu nyon mongs pa can gyi chos zhes bya ba ni sgrib pa la sogs pa dag go/ /de'i bar du gcod pa'i chos kyi mtshan nyid yin no zhes bya ba ni ma mo'i ngo bo nyid byang chub kyi phyogs kyi chos bsgom pa de'i 'o//de dag nyid la gces spras byed pa'i chos gang dag yin pa de ni de dang rjes su mthun pa'i chos kyi mtshan nyid yin no zhes bya ba la/ de dag nyid la gces spras byed pa'i chos zhes bya ba ni byang chub kyi phyogs bsgom pa de dag nyid la phan 'dogs pa'i chos te tshogs kyi lam dang /sbyor ba'i lam dang / rnam par dag pa'i lam gyi gnas skabs thams cad dang ci rigs par sbyar ro/ /de dang rjes su mthun pa'i phyogs kyi mtshan nyid ces bya ba ni ma mo'i ngo bo nyid byang chub kyi phyogs bsgom pa dang ngo / /bar du gcod pa rnams kyi skyon gang yin pa de ni nyes dmigs kyi mtshan nyid yin no zhes bya ba'i sgrib pa lnga la sogs pa'i nyes dmigs mang po dag go//rjes su mthun pa rnams kyi yon tan gang yin pa de ni phan yon gyi mtshan nyid yin par rig par bya'o zhes bya ba ni tshogs kyi lam dang sbyor ba'i lam dang / rnam par dag pa'i lam gyi gnas skabs kyi phan yon mang po dag go/ /ma mo'i mtshan nyid bshad zin to// //de ni de bzhin gshegs pa rnams kyi gsung brjod pa bstan pa de nyid kyi skabs las glengs te bstan pa mtha' dag gi don bsdus pa'i gzungs kyi don bstan pa'i phyir/ de nas bcom ldan 'das la byang chub sems dpa' 'jam dpal gyis 'di skad ces gsol to zhes bya ba la sogs pa gsungs so//gzungs kyi don gang gis zhes bya bas ni bstan pa mtha' dag gi don mtshan nyid gang gis bsdus pa'i gzungs kyi don gyis so / /byang chub sems dpa' rnams de bzhin gshegs pa'i chos zab mo rnams kyi ldem po dgongs par rjes su 'jug par 'gyur ba zhes bya ba ni bstan pa mtha' dag gi don mtshan nyid gang gis bsdus pa'i gzungs kyi don des so//byang chub sems dpa' rnams kyi mdo sde dang / 'dul ba dang / ma mo de dag gi gzungs kyi don ma lus pa zhes bya ba ni bstan pa mtha' dag gi sde snod gsum du 'dus la/ sde snod gsum po de dag gi don mtshan nyid gang gis bsdus pa'i gzungs kyi don ma lus pa'o//'di las slad rol pa rnams dang thun mong ma lags pa bshad du gsol zhes bya ba ni chos 'di pa las phyi rol du gyur pa'i mu stegs can rnams dang thun mong ma yin pa'o/ /'jam dpal de'i phyir nyon cig dang 'di ltar byang chub sems dpa' rnams nga'i ldem po ngag la 'jug par bya ba'i phyir gzungs kyi don ma lus pa khyod la bshad par bya'o zhes bya ba la sogs pas ni bstan pa mtha' dag gi don bdag med pa gnyis kyis bsdus pas gzungs kyi don ston te/de dag gi bsdus pa'i don ni rnam pa bzhi ste/ bdag med pa gnyis kyis gzungs kyi don bstan pa dang / so so'i skye bo rnams de la mngon par zhen pa bstan pa dang /gzungs kyi don rtogs pa'i phan yon bstan pa dang / de dag gi dngos po bsdu ba bstan pa'o/ /de la dang por bdag med pa gnyis kyis gzungs kyi don bstan pa la/ gang zag bdag med pas gzungs kyi don bstan pa ni 'jam dpal kun nas nyon mongs pa'i chos gang dag yin pa dang rnam par byung ba'i chos gang dag yin pa de dag thams cad ni g.yo ba med pa'i gang zag med pa yin te/de'i phyir ngas chos rnams rnam pa thams cad du byed pa med par bstan to zhes bya bas bstan to/ /chos bdag med pas gzungs kyi don bstan pa ni/kun nas nyon mongs pa rnams kyang kun nas nyon mongs pa can du gyur la phyis rnam par byang bar 'gyur ba yang ma yin/ rnam par byang ba'i chos rnams kyang phyis rnam par byang la kun nas nyon mongs pa can du gyur pa ma yin no zhes bya bas bstan te/ kun nas nyon mongs pa'i phyogs spangs te/rnam par byang ba'i phyogs thob par bya ba gang yin pa de ni bstan pa'i don yin la/ de ni bdag med pa gnyis kyis bsdus pa'i phyir gzungs kyi don zhes bya bar sbyor ro/ /gal te gang zag kyang med la bya ba yang med na ji ltar bdag gis mthong ngo zhes bya ba la sogs pa 'byung bar 'gyur zhe na/ de'i phyir so so'i skye bo rnams de la mngon par zhen pa bstan pa'i phyir/ /de la byis pa so so'i skye bo rnams gnas ngan len gyi lus la chos dang gang zag gi ngo bo nyid du mngon par len pa'i bag la nyal la brten nas gzhan nam bdag gir 'dzin zhing des na mthong ngo thos so bsgom mo myang ngo reg go rnam par shes so//bza'o byed do kun nas nyon mongs so/ /rnam par byang ngo zhes log par mngon par 'du byed pa 'byung ngo zhes bya ba gsungs te/ gnas ngan len gyi lus la zhes bya ba ni kun gzhi rnam par shes pa'o/ /mngon par zhen pa'i bag la nyal zhes bya ba ni de dang ldan pa'o / /bdag gam bdag gir 'dzin zhing zhes bya ba la sogs pas ni gang zag la mngon par zhen pa'o//kun nas nyon mongs so zhes bya ba la sogs pas ni chos la mngon par zhen pa'o/ /de'i 'og tu gzungs kyi don rtogs pa'i phan yon bstan pa'i phyir/ gang la las de ltar yang dag pa ji lta ba bzhin du rab tu shes pa de ni gnas ngan len gyi lus rab tu spong zhing nyon mongs pa thams cad kyi gnas ma yin pa shin tu rnam par dag pa spros pa med pa/'dus ma byas pa mngon par 'du bya ba med pa'i lus thob par 'gyur ro zhes bya ba gsungs te/ de ltar yang dag pa ji lta ba bzhin du rab tu shes pa zhes bya ba ni bdag med pa gnyis su shes pa'o//gnas ngan len gyi lus rab tu spong zhing zhes bya ba ni bag chags dang bcas pa'i kun gzhi rnam par shes pa rab tu spong ste/ des ni spangs pa phun sum tshogs pa ston to/ /nyon mongs pa thams cad kyi gnas ma yin pa zhes bya ba la sogs pas ni gnas gyur pa'i ye shes phun sum tshogs pa bstan to//'jam dpal de ni gzungs kyi don ma lus pa yin par rig par bya'o zhes bya ba ni gong du kun gyi mjug bsdu ba yin te/ de ltar bdag med pa gnyis rtogs pa dang kun nas nyon mongs pa spangs te/ rnam par byang ba thob par bya ba dang / de'i 'bras bu spangs pa dang ye shes phun sum tshogs pa thob pa de ni bstan pa mtha' dag gi don bsdus pa yin pa'i phyir gzungs kyi don to zhes bya bar sbyar ro//de nas bcom ldan 'das kyis de'i tshe tshigs su bcad pa 'di dag bka' stsal to zhes bya ba la sogs pa'i tshigs su bcad pa gsum gyis ni de dag gi dngos po bsdus pa bstan te/tshig gi don snga ma dang ci rigs par sbyar ro/ /de bzhin gshegs pa rnams kyi gsung brjod pa bstan pa'i tshig gi don la sogs pa bshad zin to// //de'i 'og tu de bzhin gshegs pa rnams kyi sems 'byung ba bstan pa'i tshig gi don la sogs pa bshad par bya ste/ sems 'byung ba zhes bya ba ni chos kyi sku'i byin gyi rlabs las byung ba gzugs kyi sku rnam gnyis kyi sems sngon thabs dang shes rab bsgom pa mngon par 'du byas pa las sprul pa lta bur mngon par 'du byed pa med par 'byung ba bstan pa gang yin pa'o//de'i phyir de bstan pa'i dbang du mdzad nas/ bcom ldan 'das de bzhin gshegs pa'i sems 'byung ba'i mtshan nyid ji lta bur rig par bgyi ba lags zhes bya ba zhus te/'di man chad ni de bzhin gshegs pa'i sems 'byung ba la rmongs pa'i gnyen por de ma nor bar ston to/ /'jam dpal de bzhin gshegs pa rnams ni sems dang yid dang / rnam par shes pas rab tu phye ba ma yin mod kyi zhes bya ba ni chos kyi sku ni gnas gyur pas rab tu phye ba yin pas de la ni sems dang yid dang rnam par shes pa med na gang las sems de 'byung zhes bya bar dgongs pa'o//'o na sems gang gis sprul pa 'byin par mdzad pa de gang las 'byung zhe na/ de'i phyir 'on kyang de bzhin gshegs pa'i sems ni mngon par 'du byed pa med par 'byung zhes bya bar gsungs so//sprul pa lta bur rig par bya'o zhes bya ba ni sprul pa'i sku 'byung ba ji lta ba bzhin du sems 'byung ba yang de dang 'dra'o zhes bya'i tha tshig go/ /de bzhin gshegs pa rnams kyi sems 'byung ba bstan pa de yang 'phags pa de bzhin gshegs pa skye ba 'byung bar bstan pa'i mdo las/de skad ces smras pa dang / byang chub sems dpa' sems dpa' chen po de bzhin gshegs pa'i rigs su byung ba'i dpal gyis byang chub sems dpa' kun du bzang po la 'di skad ces smras so/ /kye rgyal ba'i sras byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas rnams kyi sems 'byung ba ji ltar khong du chud par bya/de skad ces smras pa dang / byang chub sems dpa' sems dpa' chen po kun du bzang pos byang chub sems dpa' sems dpa' chen po de bzhin gshegs pa'i rigs su byung ba'i dpal la 'di skad ces smras so//kye rgyal ba'i sras de bzhin gshegs pa dgra bcom pa yang dag par rdzogs pa'i sangs rgyas rnams ni sems kyis rab tu phye ba yang ma yin/ rnam par shes pas rab tu phye ba yang ma yin mod kyi/kye rgyal ba'i sras 'on kyang de bzhin gshegs pa dgra bcom pa yang dag par rdzogs pa'i sangs rgyas rnams kyi sems 'byung ba ni ye shes tshad med par khong du chud par bya'o/ /kye rgyal ba'i sras 'di lta ste dper na nam mkha' la brten nas bya ba thams cad rab tu shes kyang nam mkha' ni rten ma yin no//kye rgyal ba'i sras de bzhin du de bzhin gshegs pa'i ye shes la brten nas/ 'jig rten pa dang 'jig rten las 'das pa'i shes pa thams cad rab tu shes kyang de bzhin gshegs pa'i ye shes ni rten pa med pa yin te/ kye rgyal ba'i sras byang chub sems dpa' sems dpa' chen pos 'jug pa'i sgo dang po des/de bzhin gshegs pa dgra bcom pa yang dag par rdzogs pa'i sangs rgyas rnams kyi sems khong du chud par bya'o zhes bya ba la sogs pa 'jug pa'i sgo rnam pa bcu gsungs pa bzhin du blta bar bya'o/ /bcom ldan 'das gal te de bzhin gshegs pa rnams kyi chos kyi sku mngon par 'du bgyi ba thams cad dang bral ba lags na/'o na ji ltar mngon par 'du bgyi ba ma mchis par sems 'byung bar 'gyur lags zhes bya ba ni chos kyi sku ni gnas gyur pas rab tu phye ba mngon par 'du byed pa thams cad dang bral ba yin na/ de las sprul pa'i sku'i rang bzhin gyi sems ji ltar 'byung zhes zhus pa yin no//sngon thabs dang shes rab bsgoms pa mngon par 'du byas pa'i phyir te zhes bya ba ni thabs dang shes rab kyi ngo bo nyid bsgom pa gang yin pa de bsgoms pas shugs dang mngon par 'du byed pa zhes bya ba rnam grangs kyi shugs de la brten nas so zhes bya ba'i don to//'di lta ste dper na gnyid log pa sems med pa la zhes bya ba la sogs pa dpe'i don ni mdo las byung ba bzhin du rig par bya'o/ /ci lags de gzhigs pas sprul pa la sems mchis sam ma mchis zhes bgyi zhes bya ba ni de bzhin gshegs pa'i sprul pa'i sku chos kyi sku'i byin gyi rlabs las byung ba yin na sprul pa'i sku la sems yod ces bya 'am sems med ces bya zhes zhus pa yin no//sems yod pa yang ma yin sems med pa'ang ma yin te/ sems rang dbang med pa nyid dang sems gzhan gyi dbang nyid yin pa'i phyir ro zhes bya ba la sems rang dbang med ces bya ba ni de'i sems can gzhan dag ltar sems la rang dbang med pa ste/de'i phyir sems yod pa yang ma yin no/ /sems gzhan gyi dbang nyid yin pa'i phyir zhes bya ba ni de bzhin gshegs pa'i sems kyi dbang nyid yin pa'i phyir te/ des na sems med pa yang ma yin no//de bzhin gshegs pa rnams kyi sems 'byung ba bstan pa'i tshig gi don la sogs pa bshad zin to// //de'i 'og tu de bzhin gshegs pa rnams kyi spyod yul bstan pa dang / yul bstan pa gnyis kyi tshig gi don la sogs pa bshad par bya ste de la spyod yul zhes bya ba ni de bzhin gshegs pa thams cad kyi spyod yul thun mong ba sangs rgyas kyi zhing yongs su dag pa zhes bya ba yin no//yul zhes bya ba ni de bzhin gshegs pa thams cad kyi thun mong ma yin pa khams lnga po dag go/ /de'i phyir de gnyis bstan pa'i dbang du mdzad nas/ bcom ldan 'das de bzhin gshegs pa'i spyod yul gang lags pa dang de bzhin gshegs pa'i yul gang lags pa de gnyis la tha dad du bgyi ba ci mchis lags zhes bya ba zhus te 'di man chad ni de bzhin gshegs pa'i spyod yul dang yul la shin du rmongs pa'i gnyen por de ma nor ba bstan pa ston to//de bzhin gshegs pa'i spyod yul ni de bzhin gshegs pa thams cad kyi thun mong ba yon tan bsam gyis mi khyab pa dang tshad med pa'i rgyan bkod pa'i sangs rgyas kyi zhing yongs su dag pa gang yin pa'o zhes bya ba la thun mong ba zhes bya ba ni byang chub sems dpa' rnams ni sangs rgyas kyi zhing so sor rnam par sbyong bar mi byed kyi/mngon par rdzogs par sangs rgyas nas ni sangs rgyas kyi zhing tha dad pa dag na bzhugs te/zhing mnyam pa'i phyir thun mong ba zhes bya'i gcig pa nyid ni ma yin te/ 'di ltar sangs rgyas so so'i longs spyod rdzogs pa'i sku rnams ni 'jug pa'i rnam par shes pa gnas gyur pa'i mtshan nyid yin pas tha dad do/ /chos kyi sku rnams ni kun gzhi'i rnam par shes pa gnas gyur pa yin no//sprul pa'i sku ni kun brtags pa'i ngo bo nyid yin pas de ni ci yang ma yin no/ /de bzhin gshegs pa'i chos kyi sku'i dbang gis sems can rnams la rnam par rig par snang ba dag tu 'byung ngo / /yon tan bsam gyis mi khyab pa dang tshad med pa'i rgyan bkod pa'i sangs rgyas kyi zhing yongs su dag pa gang yin pa'o zhes bya ba ni sngar gnas phun sum tshogs pa bstan pa lta bu ste/des na spyod lam bzhis bzhugs pas spyod yul yin no/ /de bzhin gshegs pa rnams kyi spyod yul bstan pa de yang 'phags pa de bzhin gshegs pa skye ba 'byung ba bstan pa'i mdo las de skad ces smras pa dang /byang chub sems dpa' sems dpa' chen po de bzhin gshegs pa'i rigs su byung ba'i dpal gyis/ byang chub sems dpa' sems dpa' chen po kun du bzang po la 'di skad ces smras so/ /kye rgyal ba'i sras byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas rnams kyi spyod yul ji ltar khong du chud par bya/de skad ces smras pa dang byang chub sems dpa' sems dpa' chen po kun du bzang pos byang chub sems dpa' sems dpa' chen po de bzhin gshegs pa'i rigs su byung ba'i dpal la 'di skad ces smras so//kye rgyal ba'i sras byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas rnams kyi spyod yul ni chags pa med pa'i spyod yul yin par khong du chud par bya ste/ kye rgyal ba'i sras 'di lta ste dper na de bzhin nyid ni sngon gyi mthar ma byung phyi ma'i mthar mi 'pho da ltar byung ba mngon par ma grub pa yin no//kye rgyal ba'i sras de bzhin du byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas rnams kyi spyod yul yang ma byung ba dang mi 'pho ba dang mngon par ma grub par khong du chud par bya'o zhes bya ba la sogs pa gsungs pa bzhin du blta bar bya'o//de bzhin gshegs pa'i yul ni khams lnga po sems can gyi khams dang 'jig rten gyi khams dang / chos kyi khams dang / gdul bya'i khams dang gdul bya'i thabs kyi khams rnam pa thams cad de zhes bya ba la/de bzhin gshegs pa'i yul ni sangs rgyas kyi zhing yongs su dag pa dag na bzhugs bzhin du de las gzhan pa'i khams lnga po gzhan gang dag tu phrin las mdzad pa'o/ /de bzhin gshegs pa rnams kyi yul bstan pa de yang 'phags pa de bzhin gshegs pa skye ba 'byung ba bstan pa'i mdo las/de skad ces smras pa dang / byang chub sems dpa' sems dpa' chen po de bzhin gshegs pa'i rigs su byung ba'i dpal gyis byang chub sems dpa' sems dpa' chen po kun du bzang po la 'di skad ces smras so/ /kye rgyal ba'i sras byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas rnams kyi yul ji ltar khong du chud par bya/de skad ces smras pa dang / byang chub sems dpa' sems dpa' chen po kun du bzang pos/ byang chub sems dpa' sems dpa' chen po de bzhin gshegs pa'i rigs su byung ba'i dpal la 'di skad ces smras so//kye rgyal ba'i sras 'di la byang chub sems dpa' sems dpa' chen pos chags pa med pa dang 'jug pa med pa'i shes rab dang ye shes kyi 'jug pas 'gro ba thams cad kyi yul dang / sa thams cad kyi yul dang / 'jig rten thams cad kyi yul dang /zhing thams cad kyi yul dang / chos thams cad kyi yul dang / sems can thams cad kyi yul dang / sangs rgyas thams cad kyi yul dang / de bzhin nyid dbyer med pa'i yul dang / chos kyi dbyings sgrib pa med pa'i yul dang / yang dag pa'i mtha' med pa'i yul dang / nam mkha'i khams tshad med pa'i yul dang /mya ngan las 'das pa'i dbyings kyi yul dang yul med par yul dang bral ba las de bzhin gshegs pa'i yul khong du chud par bya'o zhes bya ba la sogs pa gsungs pa bzhin du blta bar bya'o/ /de bzhin gshegs pa rnams kyi spyod yul dang yul bstan pa gnyis kyi tshig gi don la sogs pa bshad zin to// //de'i 'og tu de bzhin gshegs pa rnams kyi mngon par rdzogs par byang chub pa bstan pa dang / chos kyi 'khor lo bskor ba bstan pa dang / yongs su mya ngan las 'das pa gsum gyi tshig gi don la sogs pa bshad par bya ste/ mngon par rdzogs par byang chub pa zhes bya ba ni yongs su sbyang bar bya ba'i don du dang po mngon par rdzogs par byang chub pa ston to//chos kyi 'khor lo bskor ba zhes bya ba ni rnam par dag pas bden pa bzhi la lan gsum bzlas nas rnam pa bcu gnyis su chos kyi 'khor lo bskor ba la sogs pa'o/ /yongs su mya ngan las 'das pa chen po zhes bya ba ni sangs rgyas kyi mdzad pa mdzad nas re zhig lkog pa'i tshul gyis phung po lhag ma med par mya ngan las 'das pa chen po ston pa'o//de'i phyir de gsum bstan pa'i dbang du mdzad nas/ bcom ldan 'das de bzhin gshegs pa'i mngon par rdzogs par byang chub pa gang lags pa dang / chos kyi 'khor lo bskor ba gang lags pa dang /yongs su mya ngan las 'das pa chen po gang lags pa de dag gi mtshan nyid ji lta bur rig par bgyi lags zhes bya ba zhus te/ 'di man chad ni de gsum la shin tu rmongs pa'i gnyen por de gsum ma nor bar ston to/ /gnyis su med pa'i mtshan nyid yin te zhes bya ba la/chos kyi sku shin tu rnam par dag pa nyid kyi phyir zhes bya bas ni mngon par rdzogs par byang chub pa yang ma yin pa dang / chos kyi 'khor lo bskor ba yang ma yin pa dang / yongs su mya ngan las 'das pa chen po yang ma yin par ston te/ mngon par rdzogs par byang chub pa ni yongs su sbyang bar bya ba'i don du yin pas spros pa yin la rnam par dag nas ni chos kyi 'khor lo bskor ba dang /yongs su mya ngan las 'das pa chen po spros par 'gyur ba'i phyir ro/ /sprul pa'i sku kun du ston pa nyid kyi phyir zhes bya bas ni mngon par rdzogs par byang chub pa yang ma yin pa dang / chos kyi 'khor lo bskor ba yang ma pa dang /yongs su mya ngan las 'das pa chen po med pa yang ma yin te zhes bya bas ston te/ de dag nyid bya ba sgrub pa'i mdzad pa yin pa'i phyir ro/ /de la de bzhin gshegs pa rnams kyis mngon par rdzogs par byang chub pa ston pa de yang 'phags pa de bzhin gshegs pa skye ba 'byung ba bstan pa'i mdo las de skad ces smras pa dang /byang chub sems dpa' sems dpa' chen po de bzhin gshegs pa'i rigs su byung ba'i dpal gyis/ byang chub sems dpa' sems dpa' chen po kun du bzang po la 'di skad ces smras so/ /kye rgyal ba'i sras byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas rnams kyi mngon par rdzogs par byang chub pa ji ltar khong du chud par bya/de skad ces smras pa dang / byang chub sems dpa' sems dpa' chen po kun du bzang pos/ byang chub sems dpa' sems dpa' chen po de bzhin gshegs pa'i rigs su byung ba'i dpal la 'di skad ces smras so//kye rgyal ba'i sras 'di la byang chub sems dpa' sems dpa' chen pos sems can gyi don la rnam par spyod pa mnyam pa nyid kyis chos thams cad mnyam pa nyid la nem nur med pas gnyis su med pa rtogs pa las/ de bzhin gshegs pa'i mngon par rdzogs par byang chub pa khong du chud par bya'o/ /mtshan nyid med pa rtogs pa dang / rgyu med pa rtogs pa dang / gnas med pa rtogs pa dang / mtha' dang dbus med pa rtogs pa dang / sangs rgyas mtha' yas pa rtogs pa dang / mtha' dang mtha' med pa yongs su spangs pa dbus na gnas pa rtogs pa dang /yi ge dang sgra dang brjod pa 'byung ba thams cad rtogs pa dang / sems can thams cad kyi sems dang spyod pa 'grub pa mnyam pa nyid du rtogs pa dang / bsam pa dang dbang po dang nyon mongs pa dang bag chags dang bag la nyal dang rang bzhin so sor rtog pa rtogs pa las/de bzhin gshegs pa rnams kyi mngon par rdzogs par byang chub pa yongs su chud par bya'o zhes bya ba la sogs pa gsungs pa bzhin du blta bar bya'o/ /de bzhin gshegs pa rnams kyis chos kyi 'khor lo bskor ba ston pa de yang / 'phags pa de bzhin gshegs pa skye ba 'byung ba bstan pa'i mdo las/de skad ces smras pa dang / byang chub sems dpa' sems dpa' chen po de bzhin gshegs pa'i rigs su byung ba'i dpal gyis byang chub sems dpa' sems dpa' chen po kun du bzang po la 'di skad ces smras so/ /kye rgyal ba'i sras byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas rnams kyi chos kyi 'khor lo bskor ba mngon par sgrub pa ji ltar khong du chud par bya/de skad ces smras pa dang / byang chub sems dpa' sems dpa' chen po kun du bzang pos/ byang chub sems dpa' sems dpa' chen po de bzhin gshegs pa'i rigs su byung ba'i dpal la 'di skad ces smras so//kye rgyal ba'i sras 'di la byang chub sems dpa' sems dpa' chen pos gtan kun nas slong bar byed pa'i tshul gyis de bzhin gshegs pa'i sems la zhugs shing / mngon par grub pa'i chos kyi 'khor lo bskor bar khong du chud par bya'o//mtha' dang lta ba thams cad dang bral ba'i phyir 'khor gsum yongs su dag pa'i chos kyi 'khor lo bskor bar khong du chud par bya'o/ /nam mkha'i mtha'i rjes su 'gro bas 'dod chags dang bral ba'i chos kyi 'khor lo bskor bar khong du chud par bya'o//brjod du med pa'i tshul gyis rjes su 'gro ba med par rab tu phye ba'i chos kyi 'khor lo bskor bar khong du chud par bya'o/ /mya ngan las 'das pa'i ngo bo nyid kyis chos thams cad gtan nye bar zhi ba'i chos kyi 'khor lo bskor bar khong du chud par bya'o/ /de bzhin gshegs pa'i gsung thams cad du 'gro ba'i phyir yi ge dang sgra dang tshig gi las thams cad kyis chos kyi 'khor lo bskor bar khong du chud par bya'o//chos kyi tshul gyi ngo bo nyid yin pa'i phyir grag pa'i sgra bsgrags pa'i ngo bo nyid kyi chos kyi 'khor lo bskor bar khong du chud par bya'o/ /sngon gyi smon lam shin tu yongs su sbyangs pa'i phyir gsung gcig brjod pa las sgra thams cad 'byung ba'i chos kyi 'khor lo bskor bar khong du chud par bya'o//nang dang phyi rol sbyong bar byed pa'i tshul gyis yi ge mi zad pa'i chos kyi 'khor lo bskor bar khong du chud par bya'o/ /chos nyid kyi rjes su 'gro bas gtan mi skye mi 'gag pa'i chos kyi 'khor lo bskor bar khong du chud par bya'o zhes bya ba la sogs pa gsungs pa bzhin du blta bar bya'o//de bzhin gshegs pa rnams kyis yongs su mya ngan las 'das pa chen po ston pa de yang / 'phags pa de bzhin gshegs pa skye ba 'byung ba bstan pa'i mdo las/de skad ces smras pa dang / byang chub sems dpa' sems dpa' chen po de bzhin gshegs pa'i rigs su byung ba'i dpal gyis/ byang chub sems dpa' sems dpa' chen po kun du bzang po la 'di skad ces smras so/ /kye rgyal ba'i sras byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas rnams kyi yongs su mya ngan las 'das pa chen po ji ltar khong du chud par bya/de skad ces smras pa dang / byang chub sems dpa' sems dpa' chen po kun du bzang pos/ byang chub sems dpa' sems dpa' chen po de bzhin gshegs pa'i rigs su byung ba'i dpal la 'di skad ces smras so//kye rgyal ba'i sras 'di la byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas rnams kyi yongs su mya ngan las 'das pa chen po khong du chud par 'dod pas rang bzhin gyi ngo bo nyid khong du chud par blo dang ldan par bya ste/des de bzhin nyid kyi yongs su mya ngan las 'das pa ji lta ba de ltar de bzhin gshegs pa yongs su mya ngan las 'das pa khong du chud par bya'o/ /yang dag pa'i mtha'i yongs su mya ngan las 'das pa ji lta ba de ltar de bzhin gshegs pa yongs su mya ngan las 'das pa khong du chud par bya'o//chos kyi dbyings kyi yongs su mya ngan las 'das pa ji lta ba de ltar de bzhin gshegs pa yongs su mya ngan las 'das pa khong du chud par bya'o/ /nam mkha'i khams kyi yongs su mya ngan las 'das pa ji lta ba de ltar de bzhin gshegs pa yongs su mya ngan las 'das pa khong du chud par bya'o//rang bzhin gyi yongs su mya ngan las 'das pa ji lta ba de ltar de bzhin gshegs pa yongs su mya ngan las 'das pa khong du chud par bya'o/ /'dod chags dang bral ba'i mtha'i yongs su mya ngan las 'das pa ji lta ba de ltar de bzhin gshegs pa yongs su mya ngan las 'das pa khong du chud par bya'o//mtshan nyid med pa'i mtha'i yongs su mya ngan las 'das pa ji lta ba de ltar de bzhin gshegs pa yongs su mya ngan las 'das pa khong du chud par bya'o/ /bdag gi ngo bo nyid kyi mtha'i yongs su mya ngan las 'das pa ji lta ba de ltar de bzhin gshegs pa yongs su mya ngan las 'das pa khong du chud par bya'o//chos thams cad kyi rang bzhin gyis yongs su mya ngan las 'das pa ji lta ba de ltar de bzhin gshegs pa yongs su mya ngan las 'das pa khong du chud par bya'o/ /ji lta ba bzhin gyi mtha'i yongs su mya ngan las 'das pa ji lta ba de ltar de bzhin gshegs pa yongs su mya ngan las 'das pa khong du chud par bya'o//de ci'i phyir zhe na/ 'di ltar chos thams cad ni gdod ma nyid nas gtan ma byung ba ma skyes pa yin pas/ gdod ma nyid nas gtan ma byung ma skyes pa'i chos gang yin pa de la ni 'bral ba 'ga' yang med pa'i phyir ro zhes bya ba la sogs pa gsungs pa bzhin du blta bar bya'o//de bzhin gshegs pa rnams kyis mngon par rdzogs par byang chub pa ston pa dang / chos kyi 'khor lo bskor ba ston pa dang / yongs su mya ngan las 'das pa chen po ston pa gsum gyi tshig gi don la sogs pa bshad zin to// //de'i 'og tu de bzhin gshegs pa la blta ba dang nyan pa dang / bsnyen bkur byed pa las dge ba'i rtsa bstan pa'i tshig gi don la sogs pa bshad par bya ste/ de bzhin gshegs pa'i sprul pa'i sku la blta ba dang / nyan pa dang bsnyen bkur byed pa las bsod nams kyi tshogs skye bar 'gyur ba'o//de'i phyir de bstan pa'i dbang du mdzad nas/ bcom ldan 'das sprul pa'i sku la blta ba dang / nyan pa dang / bsnyen bkur bgyi ba dag gis sems can rnams bsod nams bskyed pa de ci'i slad du de bzhin gshegs pa las 'byung bar rig par bgyi lags zhes bya ba zhus te/des na de bzhin gshegs pa bsod nams kyi zhing bla na med pa yin pa la shin tu rmongs pa'i gnyen por de ma nor bar ston to/ /de bzhin gshegs pa la lhag par dmigs pa'i bya ba nyid yin pa'i phyir zhes bya ba ni sems can rnams sprul pa'i sku la blta ba dang nyan pa dang /bsnyen bkur byed pa na/ de bzhin gshegs pa nyid la lhag par dmigs pa'i bsam pa dang sbyor bar byed pa'i phyir/ de la bsod nams skyes pa de yang de bzhin gshegs pa nyid las 'byung ba zhes bya bar ston to/ /sprul pa'i sku yang de bzhin gshegs pa'i byin gyi rlabs nyid yin pa'i phyir ro zhes bya ba ni de bzhin gshegs pa'i byin gyi rlabs kyis byung ba'i phyir te/de ni de bzhin gshegs pa nyid yin par brjod par bya'o zhes bya ba'i tha tshig go/ /de bzhin gshegs pa la blta ba dang nyan pa dang bsnyen bkur byed pa las dge ba'i rtsa ba bskyed par bstan pa de yang /'phags pa de bzhin gshegs pa skye ba 'byung ba bstan pa'i mdo las/ de skad ces smras pa dang / byang chub sems dpa' sems dpa' chen po de bzhin gshegs pa'i rigs su 'byung ba'i dpal gyis/ byang chub sems dpa' sems dpa' chen po kun du bzang po la 'di skad ces smras so//kye rgyal ba'i sras byang chub sems dpa' sems dpa' chen pos de bzhin gshegs pa dgra bcom pa yang dag par rdzogs pa'i sangs rgyas rnams la blta ba dang / nyan pa dang bsnyen bkur byed pa las dge ba'i rtsa ba ji ltar khong du chud par bya/de skad ces smras pa dang / byang chub sems dpa' sems dpa' chen po kun du bzang pos/ byang chub sems dpa' sems dpa' chen po de bzhin gshegs pa'i rigs su byung ba'i dpal la 'di skad ces smras so/ / kye rgyal ba'i sras 'di la byang chub sems dpa' sems dpa' chen pos khom pa mngon par sgrub pa'i blo dang ldan pa'i de bzhin gshegs pa dgra bcom pa yang dag par rdzogs pa'i sangs rgyas rnams la blta ba dang nyan pa dang bsnyen bkur byed pa las dge ba'i rtsa ba bskyed pa ni don yod par khong du chud par bya'o//de bzhin gshegs pa dgra bcom pa yang dag par rdzogs pa'i sangs rgyas rnams la blta ba dang nyan pa dang /bsnyen bkur byed pa las dge ba'i rtsa ba skye ba ni bar chad med pa'i gnas dang / gcig tu mthar thug par 'gro ba dang / slu ba med pa dang / bsam pa thams cad yongs su rdzogs par byed pa dang / 'dus byas kyi spyod pa thams cad mi zad pa dang /'dus ma byas rjes su rtogs pa dang / de bzhin gshegs pa'i ye shes rnam par mi rtog pa dang / phyi ma'i mtha'i mur thug pa med par gnas pa dang / rnam pa thams cad kyi mchog dang ldan pa'i rang 'byung gis thob pa las kyang khong du chud par bya'o zhes bya ba la sogs pa gsungs pa bzhin du blta bar bya'o//bcom ldan 'das mngon par 'du bgyi ba ma mchis pa 'dra lags na/ ci'i slad du de bzhin gshegs pa'i chos kyi sku kho na las sems can rnams la ye shes kyi snang ba chen po 'byung zhing sprul pa'i gzugs brnyan dpag tu ma mchis pa dag kyang 'byung la/ nyan thos dang rang sangs rgyas kyi rnam par grol ba'i lus las ni mi 'byung lags zhes bya ba ni sngar de bzhin gshegs pa la blta ba dang nyan pa dang /bsnyen bkur byed pa las dge ba'i rtsa ba skye ba bstan pa'i skabs su sprul pa'i sku yang de bzhin gshegs pa'i byin gyi rlabs nyid yin pa'i phyir ro zhes gsungs pa de nyid las glengs te gsungs pa yin par sbyar ro//'jam dpal 'di lta ste dper na zhes bya ba la sogs pa'i tshig gi don la zla ba dang nyi ma'i dkyil 'khor ni de dag nyid na gnas pa'i sems can mthu chen po dang / gling bzhi pa'i sems can gnyis kyi las kyis yongs su sbyang ba byas pa'i phyir de de dag la snang ba chen po 'byung bar byed do//lhag ma ni mdo las 'byung ba bzhin du rig par bya'o/ /bcom ldan 'das de bzhin gshegs pa dang byang chub sems dpa'i byin gyi rlabs kyi mthus/ 'dod pa'i khams kyi mi'i lus phun sum tshogs pa rgyal rigs dang / bram ze'i rigs shing sA la chen po lta bu rnams zhes bya ba la sogs pa dang / de bzhin gshegs pa la blta ba dang nyan pa dang / bsnyen bkur byed pa las dge ba'i rtsa ba skye ba bstan pa de nyid kyi zhar las glengs te zhus pa yin no/ /tshig gi don gzhan ni go sla bas ma bshad do/ /lus ngan par skye ba yang de bzhin gshegs pa'i byin gyi rlabs kyi mthu las 'byung bar rig par bya'o zhes bya ba ni gang dag lam de dang sgrub pa de ni phyir spang zhing mi snyan par brjod la/de bzhin gshegs pa la yang kun nas mnar sems kyi sems dang / khong khro'i sems dang ldan zhing 'chi ba'i dus byed pa de dag de bzhin gshegs pa la dmigs pa'i mi dge ba gang yin pa de'i mthu las lus ngan pa thob par 'gyur bas na/de bzhin gshegs pa'i byin gyi rlabs las 'byung zhes bya'o/ /bcom ldan 'das 'jig rten gyi khams yongs su ma dag pa dag na gang na gang ni dkon pa lags/ yongs su dag pa dag na gang ni mod pa lags / gang ni dkon pa lags zhes bya ba ni sngar de bzhin gshegs pa rnams kyi spyod yul dang yul bstan pa'i skabs las glengs te zhus pa yin no/ /'on kyang 'jig rten gyi khams dag pa dang ma dag pa na mod pa dang dkon pa de gnyi ga yang de bzhin gshegs pa'i byin gyi rlabs las byung ba yin pas/'dir de bzhin gshegs pa la blta ba dang / nyan pa dang / bsnyen bkur byed pa las dge ba'i rtsa ba skye ba bstan pa'i skabs su bsdu'o/ /'jam dpal 'jig rten gyi khams yongs su ma dag pa dag na dngos po brgyad ni mod la gnyis ni dkon te zhes bya ba la sogs pas/'jig rten gyi khams yongs su ma dag pa na gnyis dkon pa ni sgrub par byed pa la snyegs so/ /'jig rten gyi khams yongs su dag pa dag na brgyad dkon pa ni dngos po med pa'i don te / de bzhin gshegs pa la blta ba dang nyan pa dang / bsnyen bkur byed pa las dge ba'i rtsa ba bskyed pa'i gtan tshigs kyi don la sogs pa bshad zin to// mdzad pa phun sum tshogs pa bshad zin to// //de nas bcom ldan 'das la byang chub sems dpal 'jam dpal gyis 'di skad ces gsol to zhes bya ba la sogs pas ni mdo sde le'u bcu pa 'di'i ming ston to/ /dgongs pa nges par 'grel pa'i chos kyi rnam grangs 'di zhes bya ba ni mdo sde 'di'i lus spyir snyegs so//bstan pa zhes bya ba ni le'u bcu pa 'di nyi tshe dang sbyar ro/ /'di'i ming ci lags zhes bya bas ni ming zhus pa bstan to/ /'di ji ltar gzung bar bgyi zhes bya bas ni ming zhus pa'i dgos pa bstan te/ tha snyad gdags pa'i sgo nas 'di ji ltar gzung bar bgyi zhes bya ba'i tha tshig go//yang na 'di'i ming ci lags zhes bya ba ni bdag gi don du zhu ba'o/ /'di ji ltar gzung bar bgyi zhes bya ba ni gzhan gyi don du zhu ba ste/ chos kyi rnam grangs 'di gzhan dag ji ltar 'dzin du gzhug par bgyi zhes bya ba'i tha tshig go//yang na tshig gnyis ma smos pa ni chos kyi rnam grangs 'di don che ba'i phyir/ dang bas 'dun par bya ba'i sems kyis yang dang yang du zhu bar byed pa yin no/ /'di ni de bzhin gshegs pa'i bya ba sgrub pa nges pa'i don bstan pa yin te zhes bya bas ni ming bstan pa yin te/de bzhin gshegs pa'i rgyu phun sum tshogs pa dang / 'bras bu phun sum tshogs pa dang / mdzad pa phun sum tshogs pa gtan la dbab par bstan pa ni/ de bzhin gshegs pa'i bya ba sgrub par nges pa'i don bstan pa yin te/ de'i phyir 'di de bzhin gshegs pa'i bya ba sgrub pa nges pa'i don bstan pa yin zhes bya bar zung shig ces bya ba gsungs te/zhus pa'i tshig gnyis dang go rims bzhin du sbyar ro/ /de bzhin gshegs pa'i bya ba sgrub pa nges pa'i don bstan pa 'di bshad pa na / byang chub sems dpa' bdun khri lnga stong gis chos kyi sku yongs su rdzogs pa so so yang dag par rig pa thob par gyur to zhes bya bas ni bstan pa'i 'bras bu rgya che ba bstan pa ste/de la chos kyi sku zhes bya ba ni rtogs pa'i chos kyi sku dang / bshad pa'i chos kyi tshogs so//de ni sa gsum pa la ni thob pa yin/ sa bcu pa la ni yongs su rdzogs pa yin/ de bzhin gshegs pa'i sa la ni yongs su 'grub pa yin pas/ 'dir chos kyi sku yongs su rdzogs pa so so yang dag par rig pa thob par gyur to zhes bya bas ni/ sa bcu pa thob par gyur to zhes bya ba'i tha tshig go///le'u bcu pa'i tshig gi don la sogs pa bshad zin to/ / bcom ldan 'das kyi mgur nas bka' stsal pa'i/ /bdud rtsi'i mchog de gsal bar rnam phye 'di/ bris shing gzhan la snang bar bstan pas ni/ gu Na shrI dang sems can thams cad kun/ ma rig mun pa'i sgrib pa rnam dag ste/ shes rab sgron ma mchog ni thob par shog /'phags pa dgongs pa nges par 'grel pa'i mdo'i rnam par bshad pa rdzogs so// //