CLOSE WINDOW

D4355
བོད་ཡིག

/ //[]@/ /gces pa bsdus pa'i 'phrin yig bod rje 'bangs la brdzangs pa bzhugs/ /@##/ /gces pa bsdus pa'i 'phrin yig btsun pa chen po dpal dbyangs kyis bod rje 'bangs la brdzangs pa/ bdag rtog skyon gyi phung po bshig /legs pa'i yon tan mthar phyin pa//'gro ba'i gnyen gcig ded dpon gtso/ /ma lus mkhyen la bdag phyag 'tshal/ /rgyal po rnams dang dge slong dang / /blon po las kyi sna la gtogs/ /so so'i ded dpon dbang byed dang / /zhing pa tshong pa zho shas 'tsho/ /mi yi skye ba blangs pa yi/ /dal 'byor rnyed dang ma rnyed dang //bud med rol mo mkhan rnams dang / /dbung mtha'i bod ni rje 'bangs la/ /'di dang phyi mar phan pa'i phyir/ /dge ba bcu dang bcu drug dang / /bsam ba bcu dang chos spyod bcu/ /pha rol phyin drug spyad pa yis/ /tshe rabs mang po bgrangs par yang / /legs pa'i gzhung gzugs bde 'gro dang //mthar ni sangs rgyas sgrub pa'i phyir/ /zhal nas gsungs pa'i mdo sde dang / /dge bshes pa rnams mnyes par mdzad/ /klu sgrub snying po blo gros dang / /ma la byams pas mdzad pa yi/ /byang chub sems dpa'i spyod pa dang / /bshes shing mdza' ba'i 'phrin yig dang / / rin chen phreng ba la sogs pa'i/ /nang nas phan pa'i gdams ngag dang / /mang zhing zab mo'i don rnams ni/ /rgyas par bshad na mi rtogs pas/ /de las bsgrub sla gzung bde rnams/ /nyung zad tsam zhig bdag gis bsdebs/ /dul ba'i dpal ni bskyed nas kyang / /bdud rtsi 'thung ba bzhin du nyon//dge bcu rmad du bya ba yi/ /mdo sde las ni 'di skad 'byung / /lus kyi spyod pa rab bsdams nas/ /srog gcod rku dang g.yem mi bya/ /phra ma brdzun dang tshig rtsub dang / /kyal pa smra bar mi bya'o/ /'dod pa rnams la mi chags shing / /zhe sdang sems kyang med par bya/ / log par lta ba kun spangs na/ /byang chub sems dpa'i spyod pa yin/ /zhes 'byung / mi dge ba bcu spyad pa'i rnam par smin pa cir 'gyur zhe na/ rin po che'i phreng ba las/ gsod pa yis ni tshe thung zhing / /dmyal ba'i gnas su yun ring 'gyur/ /rnam par 'tshe bas gnod pa mang / /tshe rabs kun du sdug bsngal 'gyur//rku ba yis ni longs spyod nyams/ /tshe rabs kun du yi dgas skye/ /byi po byed pas dgra dang bcas/ /chung ma snying ni ring bar 'gyur/ /brdzun du smra bas skur pa mang / /tshig ni nam du'ang mi btsun 'gyur/ /phra ma yis ni bshes dang 'bral/ /bdag la slu ba byed pa mang //tshig rtsub kyis ni mi snyan thos/ /mang po'ang ngan pa smra bar 'gyur/ /'khyal pa yis ni don mi rnyed/ /bdag la'ang rkyal pa byed par 'gyur/ /brnab sems yid kyi re ba 'joms/ /gnod sems 'jigs pa sbyin par byed/ /log par lta bas lta ngan nyid/ / chang gis 'jig rten myos 'gyur te/ /nor shor don rnams yal ba dang / /bya ba ma yin thams cad byed/ /des na chang ni tshod zin bya/ /zhes 'byung ngo / /mi chos bcu drug ni/ dkon mchog gsum la gcig tu dad/ /dge sbyong 'dzin cing bram zer 'dzin/ /drang zhing drang ba'i rang bzhin can/ /byas gzo byas la phan 'dogs dang //pha dang mar ni 'dzin pa dang / /rigs kyi rgan rims gus par byed/ /tshes grangs rgyud la mkhas pa dang / /dus tshigs gso sbyong byed pa dang / /bre srang 'jal lugs g.yo sgyu med/ /phan tshun 'gran sems gnod mi byed/ /'di ched phyi ma bsnyoms nas spyod/ / dge bcu'i steng du 'di bsnan te/ /tshul bzhin bsrungs na lha mi yi/ /lus thob don yod chud mi za/ /de phyir thub pa chen po yis/ /'jig rten pa yi yang dag lta/ /chen po su la yod gyur pa/ /de ni tshe rabs stong dag tu/ /ngan 'gror ltung bar mi 'gyur ro/ /zhes 'byung / rtag tu bsam pa bcu ni/nges par 'chi bsam las kyi bsags pa bgrang / /dkon mchog gsum bsten ngo bo gnyis med mos/ /byang chub sems brtan theg chen zhugs la byams/ /rtags bsam don chen dpal gyi phreng bas bsngags/ /zhes mdo sde dpal phreng las 'byung ste/ rtag tu bsam pa bcu po 'di dag dang ldan na yon tan ci 'thob ce na/yang mdo dag las/ dus gsum rgyal ba rnams kyis 'di dgongs pas/ /dug gsum skye ba'i ljon pa rtsa nas bcad/ /nyon mongs bud shing skam po tshang tshing la/ /ye shes me stag rang rig gsal 'bar ba/ /blo las byung nas thal ba bzhin du bsregs//bdud bzhi'i dmag dpung g.yul bzlog bkan phub nas/ /bdud kyi gnas khang kun gzhi gtan nas blangs/ /de dag phyin chad nga ni rgyal ba mngon phyung ste/ /lha mi kun gyi bde ston dpal gyi sdong po dang / /rtag tu bsam par bya ba bsams pas na/ /de phyir sangs rgyas zhes ni mtshan gsol to//zhes 'byung ngo / /chos spyod rnam pa bcu ni/ mgon po byams pas dbus mtha' las/ /yi ge 'dri mchod sbyin pa dang / /nyan dang 'dzin dang klog pa dang / /'chad dang kha don byed pa dang / /de sems pa dang sgom pa'o/ /'di bcu chos kyi sgo mo ste/ /'dren pa rnams kyi gshegs shul yin//rig pa'i gnas lnga kun mkhyen pas/ /thams cad mkhyen par mtshan gsol to/ /de phyir rigs ldan skyes bus kyang / /gnyid dang snyom las le lo dang / /'du 'dzi chags phyir khyim la dga'/ /bre mo'i gtam dang bsrung ldebs dang / /rgyan po 'gyed dang 'dus la lta//sdig pa'i grogs dang 'grogs pa dang / /chang dang mtshan mo 'gro ba dang / /long yod snyam pa'i 'du shes spang / /deng bya sang bya ma sems par/ /bang bya brtod de ma 'bad na/ /'chi bdag bdud ni drung na bya ra byed/ /ces 'byung ngo / /pha rol tu phyin pa bcu ni/ sbyin pa dang ni tshul khrims dang //bzod dang brtson 'grus bsam gtan dang / /shes rab thabs la sogs pa rnams/ /srid pa'i rgya mtsho sgrol ba'i gru/ /zhes 'byung / pha rol tu phyin pa drug po 'di dag ma spyad na sgo gzhan nas thabs med dam zhe na/ mdo las/ yun rings 'gron po'i rgyags su sbyin pa sme//lus sems rgyan dang chas su tshul khrims brjod/ /nyon mongs dgra tshogs 'joms par bzod pa dpa'/ /'phags lam bde 'grod bzhon par brtson 'grus bzang / /yang dag don chen rtogs par bsam gtan myur/ /ma rig mun pa bsal bar shes rab gsal/ /zhes pa dang / rin po che'i phreng ba las kyang / /sbyin pas longs spyod khrims kyis bde/ /bzod pas mdangs ldan dge bas brjid/ /bsam gtan gyis ni blo gros 'phel/ /snying brtse bas ni don kun 'grub/ /bdun po 'di dag ma lus par/ /cig car pha rol phyin spyad pas/ /sa thob ma gyur bar du yang //'khor ba'i bde ba phun sum tshogs/ /ngan song ming yang mi grag cing / /mi khom brgyad po gtan du spangs/ /de nas rim par sa thob nas/ /'jig rten mgon po nyid thob 'gyur/ /zhes 'byung ngo / /da ni de ltar dge ba bcu dang mi chos bcu drug dang / rtag tu bsam pa bcu dang / chos spyod rnam pa bcu dang / pha rol tu phyin pa drug la sogs pa nyams su blangs nas spyad dgos pa mdo tsam bstan nas da ni chos 'di dag tshig tsam du bzlas pas mi phan par bstan te/ de yang byang chub sems dpa'i spyod pa la 'jug pa'i nang nas/ sman pa'i ngag ma mnyan na sman dag gis//bcos dgos nad pa sos par ga la 'gyur/ /sman dpyad bklags pa tsam gyis ni/ /nad pa la ni de phan nam/ /zhes 'byung ste/ rgyal po chen po la gdams ngag gsol pa yang rgyal po ka ni sa ka la gsol ba'i 'phrin yig las/ gdams bgyi mang por mchis mod kyang / / thams cad gdams par sus rngo thogs/ /mdo tsam du ni gdams bgyi na/ /de ltar snyan gtod nyid kyi ched/ /bdag gis gsol ba 'di gson te/ /bsgrub dang gtang ba'i phyogs gnyis las/ /gang rigs de ni nyams su bzhes/ /gtang bar bgyi ba gtan ma mdzad/ /sa bdag tsher ma'i shing las sbrang rtsi ltar//dgra bo las kyang legs par smras pa gzung / /gser gyi ri la dug rgyun ji bzhin du/ /yid 'ong skye bo'i tshig ngan spang 'tshal te/ /mdo tsam gsol ba 'di dag nyams su bzhes/ /rgyal srid 'jig rten pha rol nas/ /bsnams te ma byon bsnams mi 'gyur/ / bsod nams rgyun las bsgrubs pa ste/ /de yang yud tsam cig tu bas/ /g.yung drung btsugs par ma dgongs shig /dge ba'i bshes gnyen bsten bgyi zhing / /gus dang zhe sar bcas pa yis/ /dam pa'i chos ni gsan par mdzod/ /gsan pa'i chos rnams rnam dpyad de/ /dpyad pa la ni mkhas par mdzod//mya ngan gyis ni ma gdungs shig /na gzhon nad med longs pa yi/ /dngos po da ltar byung ba yi/ /blo gros la ni mi nus med/ /longs spyod srid lam yengs par/ /mkhas pa rnams las dus su gson/ /'on tang rim gyis mkhyen par 'gyur/ /nyung du'ang bstsags na nges par ni//ring por mi thogs mang por 'gyur/ /rtag tu chu thigs re re'i rgyun/ /bar chad med par bab pa yis/ /gang zhig gang bar mi 'gyur ba'i/ /snod de ji lta bu zhig mchis/ /ji ltar dpe gsal de lta bu/ /rgyal pos tshad mar mdzad nas ni/ /dam pa'i chos ni gsan pa la//rtag par dgyes pa nyid du mdzad/ /zham rang blon po'i pu tshugs ni/ /yon tan nor gyi gnyer la gnyen/ /mkhas shing snying rje'i bdag nyid can/ /byas gzo phongs chos mi bgyid pa/ /bzang po khyod kyi slad du zhog /mi gang dka' ba spyod byed dang / /dor bar bya dka' 'dor ba dang //bzod par dka' ba bzod byed dang / /bkur dka' nyams su len pa dang / /ring por blta zhing nges pa dang / /'phral blo myur zhing sdug pa dang / /khong sran che zhing dpa' ba dang / /bslu bar mi tshugs gsang thub dang / /chos kyis rgyal srid skyong dga' dang / /dam chos mdzad la mi 'khor ba//rin gyis 'jal yang mi pham gyis/ /thugs brtan mdzod la spyan sngar zhog /khyod kyis blun dang phongs chos can/ /gzhung ngan gdong gang byed pa dang / /brkam zhing byas pa mi gzo dang / /kha gcam gtum po mi bzang ba/ /yul na'ang gnas sum stsal cig /gal te gzhung lugs bzang dgyes na//gong nas god du 'bar bar 'gyur/ /gal te ngan pa spyod mdzad na/ /'og nas 'og tu ltung bar 'gyur/ /khyu mchog dang ni khyus 'gro bzhin/ /khyod ni gya gyu la zhugs na/ /gya gyu kho na'i rjes 'brangs te/ /skye dgu khyod kyi rjes 'brangs pas/ /rgyal khams ngan par 'ong 'gyur ro//zla ba mar gyi ngo bzhin du/ /nyes pa'i tshogs rnams 'grib par mdzod/ /zla ba yar gyi ngo bzhin du/ /rgyal khams legs par rgyas par mdzod/ /dam chos bskyang ba'i khrims rnams mdzod/ /dam chos 'jig pa'i skye bo dang / /bka' khrims 'dral ba'i ngan pa rnams/ /lo thog rtsi thog rgyas pa la//thog dang ser ba bzhin du phob/ /'on dang ngan mig 'gag par 'gyur/ /le lo nyam bu shed ma mdzad/ /'chi bdag su dang mi bshes pa/ /glo bur dag tu 'bab 'gyur bas/ /sang dag bya zhes ma gzhes par/ /dam pa'i chos la smyur te mdzod/ /'chi bdag gis ni drangs pa na//dge dang sdig pa ma gtogs pa/ /'gro ba thams cad phyir log nas/ /'ga' yang khyod rjes mi 'brang bas/ /mkhyen par mdzod la legs par spyod/ /slob dpon chen po klu sgrub kyis/ /rgyal po bde spyod bzang po la/ /brdzangs pa'i 'phrin yig dag las kyang / / longs spyod g.yo ba snying po med mkhyen nas/ /dge slong bram za bkren dang bshes rnams la/ /sbyin pa tshul bzhin stsal bgyi pha rol tu/ /sbyin las gzhan pa'i gnyen mchog ma mchis so/ /khyod kyis dge slong bram ze la dang ni/ /mgron dang yab yum sras dang btsun mo dang //'khor gyi slad du sdig pa mi bgyi ste/ /dmyal ba'i rnam smin skal nod 'ga' ma mchis/ /sdig pa'i las rnams spyad pa 'ga' yang ni/ /mtshon bzhin 'phral du lus la mi gcod kyang / /gang du phyin pa'i sa phyogs de na sdod/ /thar pa dag la rag lus 'di la ni/ /gzhan gyis grogs bgyir cir yang ma mchis kyis//de ltar nyid kya rtsal gyis 'bad par mdzod/ /tshe ni gnod mang rlung gis btab pa yi/ /chu yi chu bur bas kyang mi rtag ste/ /dbugs rngub dbugs phyung gnyid kyis log pa las/ /sad khom gang lags de dag ngo mtshar che/ /lus mtha' thal ba mthar skam mthar 'drul zhing //tha mar mi gtsang snying po ma mchis pa/ /rnam par 'jig dengs myags par 'gyur ba de/ /so sor gyes chos can du rig par mdzod/ /rgya mtsho gcig gnas gnya' shing bu ga dang / /rus sbal phrad pa bas kyang dud 'gro las/ /mi nyid ches 'thob dka' bas mi dbang gis/ / dam chos spyad pas de 'bras mchis par mdzod/ /gang zhig gser snod rin chen spras pa yi/ /snod du ngan skyugs phyag dar bgyid pa bas/ /gang zhig mi ru skyes nas sdig pa dag /bgyid pa de ni ches rab blun pa lags/ /sras dang btsun mo yab yum 'khor rnams kyang / /nges pa ma mchis las kyi rlung dmar gyis//bdas pa tsam ste bdag tu bzung ba bas/ /pha ni bu nyid ma ni chung ma nyid/ /skye bo dgrar gyur pa yang bshes nyid dang / /bzlog pa nyid du mchis pas de slad du/ /'khor ba dag na nges pa 'ga' ma mchis/ /thugs brtan ma mdzad 'di kun bslu ba'i bdud/ /bsnyengs dang bral ba mang du gsol ci 'tshal//phan pa'i gdams ngag dam pa 'di lags te/ /khyod kyis thugs dul mdzod cig bcom ldan gyis/ /sems ni chos kyi rtsa ba lags par gsungs/ /rin po che'i phreng ba las kyang / dam pa'i chos dang chos smra la/ /nyid kyis bkur sti mchog dang ni/ /gus par mdzod de gdan las bzhengs//me tog gtor nas chos mnyan cing / /chos kyi sbyin pa dag kyang mdzod/ /'jig rten gtam la dga' ma mdzad/ /'jig rten 'das la dgyes bar mdzod/ /'khor rnams zil gyis mnan pa'i phyir/ /lhun stug brtan dang nges par mdzad/ /bka' lung mi 'gyur nges par gsungs//snyan khung mi yangs stug pa dang / /bud med chags phyir 'phyar g.yeng dang / /srab chos bus pa ltar ma mdzad/ /cung zad tsam gyis khrom mdzad/ /ji ltar rgyal srid bskyang ba dang / /'bangs kun bde la 'god pa dang / /bsngo ba'i dgra rnams gdul ba dang / /rgyal khams chos kyis bskyang bgyi ba//zhib tu dgongs nas grub par mdzod/ /'grub bam mi 'grub ma nges par/ /dgongs ma thag tu ma gsungs shig /yun ji srid cig chos sgrub cing / /ser sna 'jur 'gegs ma mdzad par/ /bdog pa thams cad gtugs te mdzod/ /khyod ni bdog pa kun bor nas//gcig pu gshed gshegs 'tshal ba/ /chos kyi slad du spyad pa kun/ /khyod kyi mdun du 'ong ba nyid/ /'bangs la re ba ma 'jog par/ /zhal bzhugs tshe na myur bar mdzod/ /gtsug lag khang dag brtsig pa dang / /mchod rten brtsig dang na bza' gsol/ /zhig ral bcos dang mchod pa gzugs//lha khang la sogs gzhan bgyi ba/ /snga lugs bzhin du rgyas par mdzod/ /dam chos tshul bzhin spyod pa yi/ /dge slong dge bsnyen la sogs pa/ /gzhan gyis gtse ba med pa yi/ /dpung gnyen skyabs dang kha 'dzin mdzod/ /'di kun yun du bde ba yi//mya ngan 'da' ba'i dge tshogs lags/ /bgres khar dgon par gshegs nas ni/ /mi ru 'khrungs pa'i don yod mdzod/ /blon po rnams dang las kyi sna/ /mnga' ris dbus mtha'i 'bangs rnams ni/ /dran pa can gyis bsgrubs byas pa/ /rnam pa mang po yod na yang / /sngon gyi drang srong mkhas rnams kyis//gdams ngag mdo tsam 'dir bstan gyis/ /bdud rtsi 'thung ba bzhin du slobs/ /gting nas khros shing 'khrugs gyur kyang / /mdog mdangs ldan zhing 'dzum par smra/ /'khon gcugs che zhing sha chags kyang / /phran tshigs khro gtum gnod mi byed/ / dgra bo 'thab zlar gyur kyang 'phral tshul ci dgar 'drid/ /pha rol tshig ngan rdzogs kyang ngan du lan mi smra/ /bdag gi rgyab tu lta zhing lam sel thub thabs srang srub tshol/ /gnyen sbyar ran par tshol zhing so nam zhib mor sgrub/ /phaT ral rtsing dang gtum chos nga rgyal chung / / rnam smin med pa'i so nam yal bar bor nas ni/ /gzhan gyi nor la rtsis gdab chom rkun gzan btsal yang / /pha ma'i nor dang drin chen dga' mdza'i nor/ /dkon mchog dkor dang lha klus dbang byas nor/ /nam du'ang mi spyod phongs chos khrel dor spang / /bya'o cog la yid ring sran dang ldan/ / rna khung ran par che zhing phra ma'i kha na lci/ /drin can pha khu ma dang gnyen bshes la/ /gsong des bkur sti rim gro bran ltar byed/ /byed dgu ran la tshod zin brtan par gzhung la mkhas/ /dogs pa'i don lam lus le lo med/ /gya tshom mi smra shes kyang ma bcol rang zhugs yong mi byed/ / zin khar mi 'dor 'og nas sngar mi smra/ /lhag par khe mthong btsal glags yod kyang mi rigs 'dod chen yong mi byed/ /dbang dang tshan gyis thub kyang 'phyas gnon gzan mi tshol/ /nye zhes nye mgon mi byed ring zhes snyom las yong mi spyod/ /dbang sar phyin cing kun gyis bkur yang mtha' dag sems bsrung bya//legs nyes bsam zhing srod dang tho rangs dge ba spyad/ /nga rgyal khengs sems mur cor smra dang rgyags chos med/ /tshan kar mi 'dor gzhan gyis brtsi sar yun rings sdod/ /phyi tshul mi 'chos nang gi g.yo sgyu med/ /gsong des mnyen dang gsal stug 'jam la ring //ngan la khyad du mi gsod zhe sa phangs med mnyam/ /phrag dog 'gran sems nor ngan gzhan la 'phya mi byed/ /bdag la rang bstod mi byed gzhan la mtshang mi 'bru/ /dpa' la sran che byed dgu mdzangs las slob/ /chang dang bud med dad dang khe brkam gcam bu'i las/ /nam du'ang mi byed chung ma ngan pa'i khar mi gtang //yong ni 'phya la mi mkhas shing / /byed du bcug na nor par rtsom/ /zhib tu dpyad de las rnams brtsam/ /mang po rnams ni kha bsdus la/ /ngan pa'ang khyad du mi gsod par/ /gros su byas dang 'gyod pa med/ /mdzangs ba rnams ni las su brko/ / yul du gsar khung byung ba yin/ /dpa' bo rnams kyis 'thab sna drang / /drang rgan rnams kyis mdun sa gzung / /drang po rnams kyis zhal lce gcad/ /g.yog rnams 'khor gyis mel tse bsgrim/ /nyes na chad par na par gcad/ /ches na bus kyang mi bzod 'gyur/ /thog tu bab pa'i las rnams bya//'on tang kun gyis bsngags par 'gyur/ /legs pa'i ngo 'phral sbyin pa yang / /thog tu bab dang phrag dog med/ /nyes pa'i skyon yang mi 'phel lo/ /nyes pa ma legs byung na yang / /mi ni gting nas yi mi gcad/ /phya nas chu gang dran par 'gyur/ /phyugs ni dus gcig sun mi dbyung //'on dang lcags skyed che bar 'gyur/ /bran ni 'os shing rigs bkol dang / /yun du snying ni nye bar 'gyur/ /bu tsha mkhas par bslab pa ni/ /gtan gyi srid du phyi phyir che/ /skyes pa mdzangs par gyur pa ni/ /nor du mkhas dang gtam snyan sgrub/ /bud med mdzangs par gyur pa ni//khyo la sri zhu rim gro dang / /rigs las bsgrubs pa'i bdog don dang / /mi smra rna khung che ba dang / /dgos pa'i mgron la yangs pa dang / /skyes bu gzhan du mi tshol dang / /bya ba rnams lam rmongs na/ /lkugs pa bzhin du 'dug kyang bla/ /zhes pa la sogs pa sngon gyi drang srong gis gdams ngag mdo tsam bstan pa yang tshe 'di'i ched dang /tshe phyi ma'i ched kyang gong du bstan pa bzhin byas la ngang drang na yun gyi srid chen po yang zhar la yod de/ rgyal pos drang por byas dang rgyal srid mi nyams che/ /blon pos drang por byas dad che btsan yun du rtag /de yi gzhi las thar pa thob par 'gyur//zhes 'byung / gzhan dag las kyang / rtsod pa med par chos smra ba ni mkhas pa'i rab/ /ji ltar ngan par glengs par gyur yang ma 'khrugs pa ni bdud kyi yul las 'das/rgyal po'i phrin las bya ba ni/ /gtso cher 'bangs kyi spu 'dam mo/ /blon po'i las su bya ba ni//drang snyoms mi ni thabs kyis bcos/ /phyugs ni mig gis btsa' ba dang / /nor ni dgos pa'i don dang sbyar/ /mo ni sman dang yul mi 'chor/ /skyid pa'i mtha' ni ring por 'gyur/ /dal gyis 'bab pa'i chu bo ni/ /yun du gzhung ni btsan par 'gyur/ /sprin ni hal hol can dag gis/ / zhing pa dga' ba'i char mi phebs/ /mi ni khra khro can dag gis/ /dgos pa'i don ni shor bar 'gyur/ /dal bus song bas gang du'ang phyin/ /'jam par smras pas su yang go/ /bsrings nas bsgrubs pa ci yang 'grub/ /blon po rnams kyis bya ba'i mdo/ /khrims su bcas pa brtan por bzung //bka' lung btsan zhing snyan par bsgrub/ /sgo phyed yal bar bor nas ni/ /gtso cher spyi ched srog dang bsngo/ /mna' ni gzan du mi bor zhing / /'thams pa thams cad btsan par bya/ /dam chos bsrung la brtson pa dang / /gtso cher yun gyi srid du ni/ / dam chos spyod pa mchog yin no/ /zhes 'byung / blon po gcig pur ma zad kyi/ /mi yi ris su skyes pa yi/ /glen lkugs 'on pa ma gtogs par/ /thams cad kun gyis de bzhin spyad/ /'on tang 'di dang phyi mar yang / /bde ba phun sum tshogs par 'gyur/ /de dag gdams ngag dam pa yin//da ni rab tu byung ba'i dge slong dang / dge tshul dang / dge slong ma la gdams ngag bya ba/ dang por rab tu ji ltar byung / /sems thag bcad nas skra bregs shing / /ston pa'i na bza' ngur smrig bgos/ /pha dang ma dang gnyen bshes la'ang / /chags pa med pa'i tshul byas pas//kun gyi mchod gnas yin pas na/ /'jig rten pa yis ma 'phyas pas/ /bslab pa 'di ltar rim bzhin bya/ /ston pa rkang gnyis gtso bo dang / /'dod chags bral ba chos kyi gtso/ /'dus ba'i gtso ste dge 'dun la/ /gus par skyabs su mchi bar bgyi/ /slob dpon mkhan po khrims dbang dang //phrin las mdzad pa'i dge 'dun la/ /gus par zhus te dge bsnyen dang / /dge tshul dge slong bar slob dang / /dge slong ma yi sdom pa dang / /byang chub sems dpa'i bslab pa rnams/ /rim pa bzhin du mnos nas kyang / /nyes byas med par bsrung bar bya'o//maN+Dal chag chag phyag dar dang / /zhu gnas bca' dang lhung bzed bkru/ /bla ma dge 'dun bgres pa yi/ /dgos pa'i yan lag thams cad bya/ /srod dang tho rangs thun gnyis la/ /mi nyal kha thon dge ba bya/ /'dri klog nyan 'dzin bsam pa dang / /sgom dang bden pa bzhi la bsam//de nas rim gyis brtson ldan par/ /bla ma mgu bar byas nas ni/ /phung po khams dang skye mched dang / /rten cing 'brel bar 'byung ba'i lugs/ /'dul ba mdo sde mngon pa rnams/ /theg pa kun las 'jam par bslab/ /kun gyi phul du phyin bya'i phyir/ /rig pa'i gnas lnga dag dang ni//rig pa'i gnas ni bco brgyad la/ /thogs pa med par bslab par bya'o/ /bkur sti'i gnas su gyur nas kyang / /nga rgyal khengs sems phrag dog spang / /rang mthong sger bu'i las mi bya/ /kha nas smra ba'i tshig rnams dang / /don du mthun par chos bzhin spyod/ /nga mkhas gzhan ni mi shes zhesarka//kun la 'phya ba'i las mi brtsam/ /slob par 'dod pa'i gang zag rnams/ /ci la dga' bar bshad par bya'o/ /sngon gyi slob dpon drin can la/ /bkur sti rim gro bran bzhin bya'o/ /gtsor na snying rje brtser ldan zhing / /tshad med bzhi yi go cha bgos/ /dus ngan tha mar skyes pa yi//da lta'i dge slong rang mthong can/ /cung zad yon tan rnyed pa dang / /khengs shing rang mthong gyong bu byed/ /mar gyis ko khengs bskus mnyes na/ /mi dul ba ni gcig kyang med/ /de bzhin chos kyi mar gyis kyang / /mi shes ko khengs 'dra ba 'dul/ /grod skogs mar dang lhan cig kyang //mnye btul ma byas gyong bur 'dug /de bzhin chos kyi mar gyis bskus/ /shes bzhin dran pas ma mnyes na/ /chos mar bskus kyang gong bur 'dug /mnyes pa bzhin du dul bar gyis/ /bslab pas mi ngoms mnyan par byos/ /mkhas pa rnams la dri ba phros/ / che 'chos sa ni shor dogs par/ /thos pa mang po ma yin yang / /'ga' tsam goms la'ang mnyen par byos/ /grogs po rnams la 'gran sems bor/ /rgan pa rnams ni rim par khur/ /gzhan la 'phya ba mi dgos kyis/ /rang nyid de ltar ma byed cig /chos kyi spun dang bral nas ni/ / mi chos gnyen la mnyes ma byed/ /sems can ngan mag ma skyed cig /khyod kyis bya ba'i las min pa/ /chung ma blang dang bu tshang klag /'khrug pa bya dang khe tshong bya/ /bre zol bya dang srang zol bya/ /sgyu ni rnam pa sna tshogs dang / /'phyar dang rta gad rtsab hral dang / /chos gos med par grong rgyu dang //gzhan gyi chung ma bsten pa dang / /srog chags gsad dang brdzun smra dang / /chom rkun bya ba'i pho nya dang / /phra ma mi dbyes la sogs pa/ /'chi bar bsams nas mi bya'o/ /bcom ldan shAkyas bka' stsal pa/ /nga yi bstan pa'i dam chos ni/ /mu stegs can gyis mi bshigs te//seng ge'i khog pa ji bzhin du/ /nga yi slob mas gzhig par 'gyur/ /nga yi bstan pa dam chos ni/ /nan tan snying por byed pa yi/ /gang zag dge slong lag na gnas/ /bka' bzhin byed pa'i dge slong ni/ /'jigs pa med par ngas bshad de/ /dam pa'i chos 'jig ngan sna 'dren/ /ngan song gsum gyi 'jigs chen las/ nams kyang thar par ngas ma gsungs/ /bdud kyi slu bas zin pa la/ /thar pa'i glags ni med 'gyur gyis/ /dang po'i dam bcas ji bzhin du/ /chos kyi klung du 'gro bar byos/ /bu smad 'dod pa'i sred pa dang / /nams kyang gnas par ma byed cig /gal te bu smad 'dod ces te/ /khyim pa'i dngos po byed ce na/ /dang po khyod ni su yis bslus//dkon mchog gsum bslu ci yi phyir/ /slob dpon mkhan po ci la dgos/ /skye bo'i mchod gnas ci phyir bya/ /'dreg pa'i bye brag gsum yod de/ /sog po rnams ni bcos kyis 'dreg /dud 'gro phal ni las kyis 'dreg /dge 'dun rnams ni yon tan gyis/ /'dreg pa yin na gang phyir bregs//ston pa'i na bza' chud re zos/ /na bza' chos gos 'o re brgyal/ /dang po 'dod chags bral zhe na/ /ci'i phyir da ni bu smad la/ /mi shes skye bo 'ju ba bzhin/ /khong nas gdung sems yod re che/ /'dod pa rnams la de bzhin 'dun/ /dang po'i dam bca' gang tsug song / /de yis mya ngan 'da' 'gyur ram//sdug bsngal grong khyer 'jig 'gyur ram/ /ji ltar bshang gci gsher ba la/ /ngan skyugs khyi phag chags pa ltar/ /de bzhin bshang gci gsher ba la/ /'dod ldan ban de phag ltar chags/ /bdag lus bud med mi gtsang par/ /da dung bar du ma rtogs par//mi rtag sgyu ma'i bu smad la/ /yang dang yang du chags pa ni/ /mi gtsang don du khyi rnams bzhin/ /e ma'o gzu lum sa e ma'o blun/ /e ma'o skye bos khrel du rung / /slob dpon mkhan po khrims dpang rnams/ /khyud skor los kyang mthong mi byed/ /chur ma'i gnyen la dge bshes bzhin//skyo ba tsam du 'khor bar byed/ /des ci 'khor ba'i rgya mtsho las/ /myur du rgal bar 'gyur zhe'am/ /ga sha khu ljo ma byas tsam/ /glegs bam thag pas khu ljo yi/ /dkri ba'i thag pa ma byas tsam/ /sku gzugs dar ma lha cha rnams/ /byi brun thigs pa du bas non/ /g.yang sa gtsang mar bskyal na rung / / gal te legs don ma yin yang / /'bum la khyim par gyur yang ni/ /bde gshegs bslab pa dran byas nas/ /gnas khang so sor 'dug byas la/ /nyes pa bshags shing dge ba spyad/ /bslab la 'grus par brtson par bskyed/ /btsun pa rnams la bkur sti bya/ /rang skyon sba phyir mtshang mi 'bru/ /'on tang sdig zhad 'bri la phan//sems la lta zhing don la sgom/ /tshul khrims rnam par dag par 'gyur/ /dge slong ma yang ci yi phyir/ /dang po khas blangs dam bcas nas/ /sngar tshul bstan pa'i dge slong bzhin/ /legs par rab tu byung byas nas/ /rang bslus sdig pa'i khur bu drags/ /ston pa'i bka' ni khyad du gsad//khyim pa skye bo'i 'og na nyal/ /dang po skra ni 'drag pa'i tshe/ /khyim bdag snying du mi sdug gam/ /pha ma sdang ngam mgo rgyan med/ /khyim thab mchis sam nyes skyon byung / /ci yi phyir na tshul khrims dral/ /snying nas dam chos spyod ce na/ /las 'phro ngan cing blo zhan pas/ /mkhas pa'i phul du mi 'grub kyis//sems thag chod la btsun par sgrubs/ /klog dang don la brtson 'grus bskyed/ /skyes pa rnams la mi lta zhing / /rang gi gnas khang dag tu 'dug /thos pa bsags na nam zha yi/ /chos kyi gter ni gzung bar 'gyur/ /bya byed dag la yong ma 'jug /de dag tsam ni theg tshad yin/ /da 'di man chad ni/spyir dge ba spyad cang sdig pa spang bar gdams ngag byed/ de yang byang chub sems dpa'i spyod pa la 'jug pa'i nang nas mdo tsam bstan pa/ dal 'byor 'di ni rnyed par shin tu dka'/ /skyes bus don grub thob par gyur pa la/ /gal te 'di la phan pa ma bsgrubs na/ /phyis 'di yang dag 'byor par ga la 'gyur/ / bdag gi 'byor pa drug gzhan gyi 'byor pa bdun te bcu gsum mo/ /de la bdag gi 'byor pa drug la/ yul gyi dbus su skyes pa dang / dbang po tshang ba dang / gnas la dad par gyur pa dang / smon lam dag pas sdig pa'i grogs po dang ma phrad pa dang / las kyi mtha' ma log pa dang / lta ba ngan pas mi 'phrogs pa'o/ /gzhan gyi 'byor pa la/sangs rgyas 'jig rten byung ba dang / dam pa'i chos bstan pa dang / bstan pa gnas pa dang / chos kyi rjes su 'jug pa'i grogs po zang zing la mi lta ba dang phrad pa dang / theg pa chen po'i dge ba'i bshes gnyen gzhan gyi don du snying rje chen po dang phrad pa dang / chos byed pa la byams pa'i grong khyer du nye bar skyes pa dang /rgyal po chos bzhin byed pa'i yul du skyes pa'o/ /ji ltar mtshan mo'i mun nag sprin rum nas/ /glog 'gyus skad cig bar snang ston pa ltar/ /de bzhin sangs rgyas mthus kyang brgya lam na/ /'jig rten bsod nams blo gros thang 'ga' 'byung / /de ltar dge ba nyam chung nyid la rtag /sdig pa stobs chen shin tu mi bzad pa/ /de ni rdzogs pa'i byang chub sems min pa/ /dge gzhan gang gis zil gyis gnon par 'gyur/ /sdug bsngal 'dor 'dod sems yod kyang / /sdug bsngal nyid la mngon par rgyug /bde ba 'dod kyang gti mug pas/ /rang gi bde ba dgra ltar 'joms//yid brtan mi rung 'chi bdag 'di/ /byas dang ma byas mi sdod pas/ /na dang mi na kun gyis kyang / /glo bur tshe la yid mi brtan/ /thams cad bor te chas dgos par/ /bdag gis de ltar ma shes nas/ /mdza' dang mi mdza'i don gyi phyir/ /sdig pa rnam pa sna tshogs byas/ /mi mdza' rnams kyang med 'gyur zhing //mdza' ba rnams kyang med par 'gyur/ /bdag kyang med par 'gyur ba nyid/ /de bzhin thams cad med par 'gyur/ /rmi lam nyams su myong ba bzhin/ /re zhig gson tshe 'di nyid la/ /mdza' dang mi mdza' du ma 'das/ /de dag don du byas pa'i sdig /mi bzad gang yin mngon na gnas//de ltar bdag ni glo bur zhes/ /bdag gis rtogs par ma gyur pas/ /gti mug chags dang zhe sdang gis/ /sdig pa rnam pa du ma byas/ /nyin mtshan sdod pa yong med par/ /tshe 'di rtag tu 'god 'gyur zhing / /snon pa gud nas 'ong med na/ /bdag lta 'chi bar cis mi 'gyur/ /bdag ni ma lan 'dug bzhin du//gnyen bshes mang pos mtha' bskor yang / /srog gcod pa yi tshor bdag /bdag nyid gcig pus myong bar 'gyur/ /gshin rje'i pho nyas zin pa la/ /gnyen pas ci phan bshes ci phan/ /de tshe bsod nams gcig skyabs na/ /de yang bdag gis ma bsten to/ /'jigs pa 'di 'dra ma 'tshal nas//mi rtag tshe 'di'i ched dag tu/ /sdig pa mang po nye bar bsgrubs/ /de ltar 'jigs chen yod pas na/ /dge bshes bsten la bsod nams byos/ /gnyen dang bshes rnams rnam spangs nas/ /gcig pu ga shed 'gro dgos na/ /mdza' dang mi mdza' kun cir rung / /mi dge ba las sdug bsngal 'byung //de las ji ltar nges thar zhes/ /nyin mtshan rtag tu bdag gis ni/ /de nyid rtag tu bsam par rigs/ /da ni bdag gis ci nas kyang / /mi ru skyes pa'i don yod bya/ /long bas phyag dar phung po las/ /ji ltar rin chen rnyed pa ltar/ /de bzhin ji zhig ltar stes nas/ /byang chub sems ni bdag la skyes//blo 'dir rab tu shugs dbyung ngo / /ding nas brtson pa ma byas na/ /'og nas 'og tu 'gro bar 'gyur/ /sems can rnams la phan mdzad pa'i/ /sangs rgyas grangs med 'das gyur kyang / /bdag ni rang gis nyes pa de'i/ /gso ba'i spyod yul ma gyur to/ /da dung de bzhin bdag byed na/ /ngan 'gro ngan dang 'chi ba dang //sdug bsngal sna tshogs myong bar 'gyur/ /de bzhin gshegs pa byung ba dang / /dad dang mi lus thob pa dang / /dge goms rung ba de lta bur/ /dkon pa nam zhig thob par 'gyur/ /nad med nyi ma 'di lta bur/ /zas bcas 'tshe ba med kyang ni/ /tshe ni skad cig slu ba ste/ /lus ni thang cig brnyan po bzhin//bdag gi spyod pa 'di 'dras ni/ /mi lus phyis ni thob mi 'gyur/ /mi lus thob par ma gyur na/ /sdig pa 'ba' zhig dge ba med/ /gang tshe dge spyad skal ldan yang / /dge ba bdag gis ma byas na/ /ngan song sdug bsngal kun rmongs pa/ /de tshe bdag gis ci byar yod/ /dge ba dag kyang ma byas la/ /sdig pa dag ni cher bsags na//bskal pa bye ba brgyar yang ni/ /bde 'gro'i sgra yang thos mi 'gyur/ /don med dgra yis rma srol btod pa yang / /lus la rgyan dang 'dra bar srel byed na/ /don chen sgrub phyir yang dag brtson gyur la/ /bdag la sdug bsngal ci'i phyir gnod byed yin/ /nya pa zhing pa gdol ba la sogs pa/ / rang gi 'tsho ba tsam zhig sems pa yang / /grang dang tsha la sogs pa gnod bzod na/ /yun gyi bde phyir bdag lta ci zhig smos/ /de phyir sdig ni sems las byung bas na/ /bslab pa bsrung bar 'dod pa yis/ /rab tu bsgrims te sems gdul te/ /sems 'di gdul ba ma byas na/ /bslab pa bsrung bar yong mi nus//sems kyi glang po yan btang bas/ /mnar med gnod pa byed pa ltar/ /glang chen ma dul myos pa yis/ /'di na de 'dra'i gnod mi byed/ /kun nas dran pa'i thag pa yis/ /sems kyi glang po dam btags na/ /'jigs pa thams cad med par 'gyur/ /dge ba thams cad lag tu 'ong //sems 'di kho na thul ba yis/ /gnod byed thams cad 'dul bar 'gyur/ /sems can mi srun nam mkha' bzhin/ /de dag gzhom gyis ga la lang / /khro ba'i sems ni gcig bcom na/ /dgra de thams cad choms dang 'dra/ /sa stengs 'di kun kos g.yog tu/ /de snyed ko ba ga la yod/ / rkang mthil gang gi ko bas ni/ /sa stengs thams cad g.yogs dang 'dra/ /de phyir phyi rol dngos po yang / /bdag gis phyir bzlog mi lang gis/ /bdag gi sems 'di phyir bzlog bya'i/ /gzhan rnams bzlog go ci zhig dgos/ /gang gis chos kyi don po mchog /sems kyi gsang 'di ma shes na/ / bde 'dod sdug bsngal gzhom 'dod kyang / /de dag don med gyi na 'khyam/ /de ltar bdag gi sems 'di ni/ /legs gzung legs par rtogs par bya/ /sems bsrung brtul zhugs ma gtogs pa/ /brtul zhugs mang pos ci zhig bya/ /ma grangs grol ba'i khrod gnas na/ /bsgrims te rma yi bag byed bzhin//skye bo ngan khrod gnas pas kyang / /sems kyi rma ni rtag tu bsrung / /sems rma rtag tu bsrung ba yang / /bla ma dang ni 'grogs pa las/ /mkhas pas rjes su bstan pa dang / /'jigs pas skal ldan gus byed la/ /dran pa shin tu skye bar 'gyur/ /de phyir dge bshes mkhas pa bsten/ / don med g.yeng bar lta ba ni/ /ban des nam yang mi bya ste/ /skye bo mdzangs pa'ang de bzhin spyod/ /gang zhig mig lam 'ongs na yang / /bltas nas legs par mgu bar bya/ /dgos na thag ring dag tu'ang lta/ /gang zhig bsams nas byar brtsams pa/ /de las gzhan du mi bsam ste/ /der gtad pa yi bsam pa yis//de nyid kho na bsgrub par bya/ /de ltar na ni kun 'grub 'gyur/ /gzhan du gnyis kar mi 'grub po/ /khyi ni cung peng snyeg pa dang / /lha khang bar gyi khyi bzhin du/ /dran drod thams cad mi bya'o/ /ring zhig lon nas dal ba'i mchog /rnyed pa yang dang yang bsams nas/ /dge slong yin na 'khor g.yog dang / /drung du 'ongs pa'i lha mi rnams//thams cad dge la gzud par bya/ /khyim pa yin na'ang bu dag dang / /chung ma pha ma gnyen 'dun rnams/ /gros btab thams cad dge la gzung / /'on tang byang chub spyod pa rdzogs/ /bran g.yog bkol du mi btub pa/ /zas la sogs pa mi sbyin ltar/ /dge ba mi byed lus 'di la/ / bsnyod kyang de'u re gzhan 'gro la/ /sdig lus bsnyod cing gos bskon yang / /phan med sdig byed ji ste gso/ /khyod ma 'grangs pas phung 'og bcug /khyod 'grangs pas na phung mgo btsugs/ /dkon mchog pha ma dga' mdza' dang / /drin yod drin med rnams kyi nor/ /sgyus brkus mthus phrogs thabs kyis bslus//ma 'grangs ma g.yogs sdig lus khyad/ /mjug tu 'bu sbrang nyod par song / /khyod ma sos pas dmyal bar btang / /bsad pa'i sdig pa khyod las byung / /khyod ma mgu bas 'phrog rlom byas/ /yi dgas gnas su khyod kyis btang / /khyod ma sos pas long chung ste/ /dge bshes ma bsten chos ma nyan//des na dud 'gro blun por gyur/ /gtan du 'khyams pa khyod kyis nyes/ /khyod ni dge ba spyod gyur na/ /rin chen phung po phangs pa'i gtso/ /khyod la brten nas sangs rgyas chos/ /'bras bu bla med byang chub dang / /bar du'ang bde 'gro skyid pa ni/ /long btags don yod byed pas na/ /'gro dang 'ong pa'i rten tsam du//lus la gru yi blo zhog ste/ /'di la gla rngan byin nas ni/ /da ni rang gi don byed chug /rmongs pa'i sems khyod ci zhig zer/ /gzugs su 'dzin pa khyod rang yin/ /lus su lta ba khyod rang yin/ /don med shes pa gzhan nas 'ongs/ /'byung bas bsgrubs pa'i khu khrag la/ /khyod kyis ngar 'dzin byas nas ni//bu dang bu mor khyod kyis bzung / /gzhan gyis 'byung ba'i khu khrag la/ /gzhan zhes dgra ru lta bar byed/ /sdig pas bsgrubs pa'i zang zing la/ /gzhan gyis khyer snyam phrag dog langs/ /don med byis pa'i spyod pa 'dra/ /khyed kyis shes na de min pa'i/ /bzang po'i dpal ta re yod na/ /de las ma shes ci byar yod//nga yi nyes pa ci yang med/ /nyes pa thams cad khyod las byung / /khyod kyis rtsa ya kun bcom na/ /gang du 'gro ba kho bos lta/ /khyod kyis ngar 'dzin ma byas na/ /nga ni 'byung ba'i bag la zha/ /nga ma gso bar khyed bder sgrubs/ /skyon can khyod kyi nyes pa kun/ /dran drod ma smra so sor 'dug /khyod la gsol bag ci ma lus//gzhan yang tshigs su bcad pa la/ /deng bya sang bya le lo phyi shol gyis/ /sngon 'das du sa nas da srid 'gyangs pas chog /'chi bdag dgra dang bang bya brtod nas ni/ /bka' bsngos myur te bya ba'i mi rigs sam/ /skra dkar skyes shing gnyer ma'i tshogs bgrangs kyang / / byis pa sheng ma bye dang 'dra ba ni/ /don la mkhas pas brtags na snying re rje/ /gzhan yang / bskal pa stong du bsags pa yi/ /sbyin dang bde gshegs mchod la sogs/ /legs spyad gang yin thams cad kyang / /khong khro gcig gis 'joms par byed/ /zhe sdang lta bu'i sdig pa med/ /bzod pa lta bu'i dka' thub med//de bas bzod la nan tan du/ /sna tshogs tshul bzhin bsgom par bya/ /zhe sdang zug rngu'i sems 'chang na/ /yid ni bde ba'i nyams mi myong / /sgyu mar bsams nas bzod pa bsgoms/ /gal te bcos su yod na ni/ /de la mi dga' byar yang med/ /'on te bcos su med na yang / /de la mi dga' byas ci phan/ / la la bdag gi khrag mthong na/ /phyir zhing khong dgrar 'gyur ba'ang yod/ /la la gzhan gyi khrag mthong na/ /'bog cing brgyal bar 'gyur ba'ang yod/ /de ni sems kyi ngang brtan dang / /sdar ma'i tshul las gyur pa yin/ /de bzhin dge ba bsgrub pa yang / /sems thag gcad dam mi gcad zan/ /khyim dang 'bral bar mi nus dang //so nam yal bar dogs pa dang / /dam chos bsgrub par bsam pa dang / /yun gyi bde ba bsgrub pa ni/ /gnyis ka yong ye 'grub mi 'gyur/ /sbyin pa gtang bar bya ba dang / /zad par dogs pa gnyis mi 'phrugs/ /dpa' bo bya bar bsam pa dang / /shi bar dogs pa gnyis mi 'phrugs/ /mang po dga' bar bya ba dang //khro gtum bya ba gnyis mi 'phrugs/ /bslab la 'grus par bya ba dang / /zang zing btsal ba gnyis mi 'phrugs/ /btsun pa'i phul du byung ba dang / /yul la chags pa gnyis mi 'phrugs/ /kun gyis bkur bar 'dod pa dang / /spyod lam ngan pa gnyis mi 'phrugs/ /rgyal po mnyes par bya ba dang / khyim na nyal ba gnyis mi 'phrugs/ /sangs rgyas bsgrub par bya ba dang / /sdig pa spyad pa gnyis mi 'phrugs/ /de bzhin gang zhig sgrub na yang / /sems thag gcod par byed par bya/ /'on tang dgos pa thams cad 'grub/ /'jig rten mgon pos de skad gsungs/ /mdo sde rnams las bslab pa snang / /rtag tu mdo sde blta bar bya'o//de dag gang zhig sgrub na bde/ /rlung med g.yo ba'ang med pa bzhin/ /bsod nams brtson 'grus med mi 'gyur/ /sgyid lug snyom pa'i stobs bcom ste/ /nyin mtshan phyed par bsgrub par bya'o/ /des na 'bras bu med mi srid/ /srid pa'i rgya mtsho rgal ba dang / /'jig rten 'jig rten 'das pa yi/ /dgos pa ma lus bos pa bzhin//sems can mos pa sna tshogs pa/ /rgyal bas kyang ni mi mgu na/ /bdag 'dra ngan pas ci zhig smos/ /de bas 'jig rten bsam pa btang / /sems can rnyed pa med la smod/ /rnyed pa can la mi snyan brjod/ /rang bzhin 'grogs dka' de dag gis/ /dga' ba ji ltar skye bar 'gyur/ /des na dben par gnas par bya'o//bdag gis mkhas pa'i rjes bsnyags la/ /bag yod gdams ngag dran byas te/ /gnyid dang rmugs pa bzlog par bya/ /rgyal sras thugs rje chen po ltar/ /rigs pa'i sran du gzugs bya ste/ /byis pa'i spyod pa btang byas nas/ /mdor na bdag dang gzhan rnams la/ /phan pa 'ba' zhig lhur bya'o//de ltar gdams ngag byas nas kyang / /bdag gis spyad par ma grub cing / /nyams kyis lcogs par ma gyur na/ /tshe rabs kun du phan pa yang / /de bzhin gshegs pa'i zhal nas gsungs/ /sdig pa thams cad zad byed cing / /dge ba ma lus rdzogs byed pa/ /'di dag brjod pa'i bsod nams gang //gal te de la gzugs yod gyur/ /gang gA'i bye ma snyed kyi ni/ /'jig rten khams su shong mi 'gyur/ /tshigs su bcad pa nyi shu 'di/ /gtsug lag khang ngam mchod khang ngam/ /mchod rten sku gzugs spyan snga'am/ /gzhan du'ang rung ste 'di skad brjod/ /nyin mtshan lan ni gsum gsum brjod//sangs rgyas chos dang dge 'dun dang / /byang chub sems dpa' rnams la yang / /sgo gsum btud de skyabs su mchi'o/ /mchod 'os rnams la phyag 'tshal lo/ /sdig pa'i las las bzlog bgyid cing / /bsod nams thams cad yongs su gzung / /lus can rnams kyi bsod nams dag /kun la rjes su yi rang ngo / /bdag ni spyis btud thal sbyar te//chos kyi 'khor lo bskor slad dang / /'gro gnas rab tu bzhugs slad du/ /rdzogs pa'i sangs rgyas rnams la gsol/ /de ltar bgyis pa'i bsod nams dang / /bdag gis bgyis dang ma bgyis gang / /des ni sems can thams cad kyang / /bla med byang chub sems ldan shog /sems can thams cad dri med dbang //yongs rdzogs mi khom kun 'das shing / /spyod pa rang dbang yod pa dang / /'tsho ba bzang dang ldan par shog /lus can dag ni thams cad kyang / /lag na rin chen nyid ldan zhing / /yo byad thams cad mtha' yas pa/ /'khor ba ji srid mi zad shog /bud med thams cad rnam kun du/ / phan tshun phrag dog 'gran sems dang / /rang bzhin bzang por skyes gyur nas/ /skyes mchog nyid du 'gyur bar shog /lus can thams cad rig pa dang / /rkang par ldan pa nyid du shog /lus can kha dog ldan pa dang / /gzugs bzang gzi brjid che ba dang / /blta na sdug cing nad med dang / /stobs can tshe dang ldan par shog /thams cad thabs la mkhas gyur te/ /sdug bsngal kun las thar ba dang / /dkon mchog gsum la gzhol ba dang / /dmu rgod mi nag med par shog /gtsug lag khang dang dben gnas kyi/ /gnas dang nye bar gnas par shog /sangs rgyas chos nor ldan pa dang / /tshad med bzhi dang ldan pa dang / / pha rol phyin drug ldan par shog /tshogs rnams thams cad yongs rdzogs te/ /mtshan dang dpe byad gsal ba dang / /bsam gyis mi khyab sa bcu dag /rgyun mi 'chad par bgrod par shog /bdag kyang yon tan de dag dang / /gzhan kun gyis kyang rgyan ldan te/ /nyes pa'i skyon las grol ba dang / /sems can kun mchog byams pa dang //sems can thams cad yid re ba'i/ /bde ba thams cad rdzogs byed cing / /rtag tu lus can thams cad kyi/ /sdug bsngal sel bar byed par shog /'jig rten kun na skye bo gang / /su dag 'jigs pas nyen pa rnams/ /bdag gi ming tsam thos pas kyang / /shin tu 'jigs pa med par shog /bdag ni mthong dang dran pa dang / /ming tsam thos pas skye bo rnams/ /rab tu 'khrug med rnal ma dang / /rdzogs pa'i byang chub mkhas pa rnams/ /tshe rabs kun du rjes 'brangs pa'i/ /mngon shes lnga po thob par shog /sems can kun la rnam kun du/ /rtag tu phan bde byed par shog /'jig rten kun na skye bo gang //sdig pa byed par 'dod gyur ba/ /de dag thams cad gnod med par/ /rtag tu cig car zlog gyur cig /sa dang chu dang me dang rlung / /sman dang dgon pa'i shing bzhin du/ /rtag tu sems can thams cad kyis/ /rang dgar dgag med spyod par shog /sems can la bdag srog bzhin phangs/ /de dag bdag la ches phangs shog /bdag la de dag sdig smin cing / /bdag dge ma lus der smin shog /ji srid sems can 'ga' zhig kyang / /gang na ma grol de srid du/ /de phyir bla na med pa yi/ /byang chub thob kyang gnas gyur cig /bdag ni dge slong dpal dbyangs kyis/ /gces pa'i phreng ba las bsdus pa'i/ /gdams ngag brtsam par byas pa yis//gdams ngag 'di ni sus thos pa/ /gdams pa'i rjes su spyod gyur nas/ /byang chub myur du thob par shog /bod la dge slong ming yang med pa las/ rje byang chub sems dpa' khri srong lde btsan gyis dam pa'i chos brnyes nas dpal lha btsan po dad pa bskyed de/ rab tu byung ba'i ming dpal dbyangs zhes bgyi/btsun pa'i phul du phyin/ mdzangs pa'i zhi rab tu phyin/ /bod kyi mdun sar bsres na dpe zla med pa des mdzad de/ /btsan po la bka' gros dag gsol ba las/ la la ni gnang / la la ni ma gnang bas 'khon nas gyed de lhor bzhud/ gdams ngag 'di slar rje blon dang /ser chags yongs dang / bod rje 'bangs la brdzangs pa lags so/ /mjug 'khon pas legs te/ btsun pas ni bzang po'i spyod pa 'grub/ /bod rje 'bangs ni grogs kyis dma' zhes gda'o/ /gdams ngag gces pa bsdus pa'i 'phrin yig btsun pa dpal dbyangs kyi sa sngon nas las kyis 'brel cing bshes par gyur pa bod rje 'bangs la brdzangs pa rdzogs so/