CLOSE WINDOW

D4353
བོད་ཡིག

/tshad ma'i yon tan bkod pa'i le'u ste bco lnga pa'o// //[]@/ /sher snying 'grel pa sngags su 'grel pa bakhyugs/ /@##/ /bcom ldan rnam par snang mdzad dang / /de la sogs pa yum gnyis dang //tshogs kyi mchog gyur dge 'dun la/ /phyag 'tshal nas kyang skyabs su mchi'o/ /bka' gsum ldan pa'i mdo nyid las/ /sems can la dmigs byams sems dang / /snying rje kun dang mi 'bral phyir/ /mdo las sngags su bkrol ba 'di//skyes mchog rnams la bstan par bya/ /rtog ge rnams la bstan mi bya/ /'di skad bdag gis thos pa dus gcig na zhes pa ni 'di ni dus gzhan du ma yin te/ dus nye bar mtshon pa'o/ /de yang rang rig pa la sogs pa ma yin te/ 'di skad gzhan las thos pa'i dus so//yang na sdud pa po nyid thos pa che ba'i don to/ /dus ni gtso 'khor 'dus pa'i dus so/ /dus gcig na ni dus mang po'am/ yang la yang du zhus pa lta bu ma yin te/ gtso 'khor 'dzom pa'i dus gcig na'o/ /bcom ldan 'das zhes pa ni ston pa'i mtshan nyid ston te/de yang thun mong gis bcom pa ni bdud bzhi bcom nas pha rol tu phyin pa drug dang ldan/ log pa'i shes pa las 'das pa'o/ /khyad par gyis bcom pa ni phung po lnga la sogs pa'i snang srid lha'i ngang du bcom/ /de nyid kyi don dang ldan pa 'dzin pa'i yul las 'das pa'o//khyad par bla na med pa'i bcom pa ni 'khor 'das kyi chos snying po'i ngang du rtsol ba dang bral bar bcom pas/ rang rig pa'i ye shes chen po dang ldan pa/ gang gi yang ngo bor ma grub pas 'khor 'das gnyis su snang ba'i tshig gam mtha' las 'das pa'o//rgyal po'i khab bya rgod phung po'i ri la zhes ba ni gnas kyi bye brag ston te/ de yang phyi'i gnas ni rgyal po gzugs can snying po'i gnas yul ma ga d+hA'i shar phyogs na rin po che spungs pa lta bu'o/ /mchod rten zlum po lta bu'i ri la sangs rgyas rnams kyi bzhugs gnas ri kun gyi khyad par gnas pa'o//nang gi gnas ni 'og min gyi gnas te/ gzugs sam mtshan ma'am 'dzin pa'i 'og tu yang ma song ba'o/ /gsang ba'i gnas ni rig pa byang chub kyi sems te/ 'khor 'das kun gyi gnas su gyur pa'o/ /dge slong gi dge 'dun chen po dang byang chub sems dpa'i dge 'dun chen po dang thabs cig tu bzhugs te zhes pa ni 'khor ston te/phyi'i 'khor ni 'dun pa mos pa'i sa pa ste/ dge ba'i chos la gnas pas dge slong ngo / /lta sgom gyi don la spyod cing sems dpa' ni dge 'dun chen po la gzhan don nus pa ni byang chub sems dpa'i dge 'dun no//de la sogs pa'i 'khor rnams dang lhan cig tu bzhugs pa'o/ /nang gi 'khor ni rigs lnga'i sangs rgyas la sogs pa longs sku'i 'khor ro/ /gsang ba'i 'khor ni rang rig pa'i ye shes snying po dbyer mi phyed pa'o/ /de'i dus su chos bstan par bya'o//chos kyang phyi'i chos slob pa'i chos la sogs te dge ba bcu la sogs pa'o/ /nang gi chos ni theg pa chen po'i chos so/ /gsang ba'i chos ni rig pa ye shes so/ /de'i tshe bcom ldan 'das zab mo snang ba zhes bya ba'i chos kyi rnam grangs kyi ting nge 'dzin la snyoms par zhugs so zhes pa ni phun sum tshogs pa lnga dang ldan pa'i tshe/'khor rnams smin pa'i dus de'i tshe/ bcom ldan 'das kyis stong pa'i zab pa ste/ dngos po'i chos min pa'i zab mo'i don de la chos kyi rnam grangs ni phyi nang gsang ba'i chos la de lta bu'i ting nge 'dzin dmigs pa med par snyoms par gnas pa ste/de yang phyi'i ting nge 'dzin dngos po'i chos la gnas pa'o/ /nang gi dngos po med pa'o/ /gsang ba'i de rnams su mi 'byed pa'i don to/ /yang de'i tshe byang chub sems dpa' sems dpa' chen po 'phags pa spyan ras gzigs dbang phyug shes rab kyi pha rol tu phyin pa zab mo spyod pa nyid la rnam par lta zhing /phung po lnga po de dag la yang rang bzhin gyis stong par rnam par blta'o zhes pa ni ston pa chos nyid dben pa'i ngang la gnas pa'i tshe/ 'khor gyi gtso bo yang rang bzhin gyis gnas par 'gyur te/ de yang byang chub sems dpa' ni phyi slob pa'i sa la gnas pa'o//nang gis bcu non pa yan chad do/ /gsang ba ni snying po'i don nyid do/ /de rnams dang ldan pas chen po'o/ /yang na byang chub sems dpa' ni bdag don grub pa la/ sems dpa' sems dpa' chen po ni gzhan don grub pa'o/ / thun mong gi 'phags pa ni nyon mongs pa'am 'khor ba las ring du 'phags pa'o/ /khyad par ni longs sku'i 'khor la/ bla na med pa ni rig pa'i snying po'i don chos sku'o/ /bdag don du spyan ras gzigs te rang nyid kyis don rtogs par byed pa dang / gzhan don du gzigs te gdul bya gang la gang mos ston nus pa'o//de'i phyir na bdag gzhan gnyis sam/ 'khor 'das gnyis la dbang phyug pa ste don bya ru yod pa'o/ /lung gi shes rab kyis 'khor 'das ston nus pa/ rig pa'i shes rab kyis don gtan la 'bebs pa/ dmigs pa med pa'i shes rab kyis gang du yang mi 'byed pas 'khor ba'i pha rol tu phyin pa ste/sdug bsngal med pa mya ngan las 'das pa'i pha rol tu phyin pa ste/ thugs rje 'byin pa'o/ /zab mo ni rang gi ngo bo dngos por mi snang bas zab la/ bstan par dka' bas zab pa/ rgyu rkyen las 'das pas zab pa'o//de lta bu'i don rang gi khong du chud de spyod pa'o/ /des na de nyid la yang dang yang du dmigs pa med par lta ba ste/ lta ba'i don rang ni phung po de nyid de/ de yang lnga ni grangs kyi nges pa yin la/ phung po lnga ni thun mong gi lnga ni gzugs la sogs pa lnga la khyad par gyi lnga ni rigs lnga'i sangs rgyas te/phung po lnga'i yon tan la bla na med pa'i ye shes lnga la/ de ni phung po lnga'i ngo bo de rnams la dag pa ste/ blo yis bsams nas dag par ldan pa ni sa lam pa ste/ mos pa'i gang zag go/ /rang bzhin gyis dag par lta ba ni don thugs su chud pa'o//de yang dag pa'i don de nyid stong pa ste/ stong pa ltos pa'i stong pa gcig la gcig med pa lta bu min/ med pa'i stong pa rig pa'i ngo bo la sogs pa dang / bzhi bcom byas pa'i stong pa rdul phra rab tu grub pa dang / rang bzhin gyis stong pa dngos po'am dmigs pa de snying po'i don to//de lta bu la dmigs pa med pa'i shes rab ni lta ba'i don to/ /de nas sangs rgyas kyi mthus tshe dang ldan pa shA ri'i bus byang chub sems dpa' sems dpa' chen po 'phags pa spyan ras gzigs dbang phyug la 'di skad ces smras so/ / rigs kyi bu gang la la dag shes rab kyi pha rol tu phyin pa zab mo spyad pa spyod par 'dod pa des ji ltar bslab par bgyi/ de skad ces smras pa dang zhes pas ni spyan ras gzigs la shA ri'i bus dris pa ste/ de yang sangs rgyas shAkya thub pa'i mthus spyan ras gzigs grol la/ de'i mthus shA ri'i bus dri ba'i stobs dang ldan par nus pa ste/de'i phyir na sangs rgyas kyi mthus so/ /skye 'chi las grol bas 'chi med kyi tshe dang ldan pa ste/ rigs gzhan ma yongs su spangs pa ste/ ma shAkya'i rigs so/ /de nyid kyis gzhan don la dmigs te zhus pa'i don gyis smras/theg pa chen po la mos pa'i rigs kyi bu la la dag ni/ dmigs pa med pa'i shes rab kyi pha rol tu phyin pa zab mo'i don la spyan ras gzigs spyod pa de la gzhan spyod par 'dod na bslab pa'i thabs ci ltar bslab ces dris pa'o/ /byang chub sems dpa' sems dpa' chen po 'phags pa spyan ras gzigs kyis tshe dang ldan pa sha ra dwa ti'i bu la 'di skad ces smras so zhes pa ni zhus pa'i lan bstan pa'o//shA ri'i bu rigs kyi bu'am rigs kyi bu mo gang la la dag shes rab kyi pha rol tu phyin pa zab mo spyod pa spyad par 'dod pa des/ 'di ltar bslab par bya ste zhes pa ni gsung bar zhal gyis bzhes pa ste/theg pa chen po la mos par rigs/ pho'am mo'am gang la la dmigs pa med pa'i shes rab la da spyod ba'i don la khyed spyod par 'dod na 'di ltar slobs zhes pa'i don to/ /phung po lnga po de dag kyang rang bzhin gyis stong par rnam par rjes su blta'o zhes pa ni thun mong gi phung po lnga la sogs pa de rnams ni ye nas stong pa yin pas/de dag khyed kyis kyang rang bzhin gyis stong bar rnam par nga'i rjes su ltos shig /de rnams la mos pa'i don gyis ba'o/ /gzugs stong pa'o zhes pa ni gzugs kyi ngo bo nyid stong pa'i rang bzhin no//stong pa nyid gzugs so zhes pa ni stong pa nyid don rig pa ma 'gags pas gzugs ltar snang ba'o/ /gzugs stong ba nyid las gzhan ma yin no zhes pa ni gzugs stong pa de las 'khor 'das kyi chos gzhan snang ba ma yin zhes pa ni/stong pa'i yon tan ma 'gags pa de las gzhan gzugs snang ba gzhan ma yin no/ /gzugs de bzhin du gnas pa de bzhin du/ de la gnas pa'i tshor ba dang / 'du shes dang 'du byed la sogs pa rnams ni gzugs bzhin du gnas pa'i don to/ / shA ri'i bu de lta bas na chos thams cad stong pa nyid de zhes pa ni/ shA ri'i bu 'khor ba'i dngos po gzugs la sogs pa dngos po med par stong pa nyid du de lta bas na/ mya ngan las 'das pa'i chos thams cad ni rang bzhin gyis stong pa nyid do/ /stong pa nyid don stong pa nyid kyi don rang ni 'di lta bu ste/gzugs sam stong pa'i mtshan nyid gang yang med pa rgyu rkyen gang gis kyang ma bskyed pa rang gi ngo bo'i yon tan gang du yang ma 'gags pa/ dngos po'i dri ma gang yang med pa/ de yang ye thog ma nas gzung 'dzin gyi phyogs gang du yang ma lhung bas/ dri ma dang bral ba yang med/snying po'i don de rkyen gyis bri ba med pa/ rgyu gzhan lta gcig gis bskyed nas yon tan gyis gang ba'i rgyu yang med do/ /shA ri'i bu de lta bas na zhes pas ni dmigs par bya ba'i stong pa de nyid las/ nyams su blang ba'i rgyu dang dngos bo grub pa med de/ gzugs stong pa nyid yin pa'i phyir na/ tshor ba la sogs pa yang gnyis su med la/ mig la sogs pa'i dbang po'i sgo lnga dang / de la las lnga la sogs pa dang / chos lnga yang gang yang dmigs su yang med do/ /de rnams kyi mig la sogs pa'i khams kyang dbyer mi phyed pa'o//de ltar na snying po'i don de la ma rig pa yang med de/ de zad pa'i rgyu yang med do/ /stong pa'i don de nyid la rgas pa dang shi ba yang med de/ de ltar skye rga na 'chi rten 'brel la zad pa yang med do/ /de ltar don de nyid la sdug bsngal te dug lnga las grub pa yang med la/ de las byung ba'i kun nas nyon mongs pa med de/de'i don gyis sdug bsngal ba bde bar 'gog pa yang med la/ de'i don gyis 'khor ba'i dngos po nyams su blang ba med pa na/ mya ngan las 'das par byed pa'i lam la yang thob pa'i rgyu med de/ lam dang sa rnams kyang sbyang zhing bgrod du med do/ / thun mong gi ye shes lnga la sogs pa yang med don snying po'i don de las gzhan nas thob pa yang med la/ rang gi dngos po'i don ye nas rang chas su yod pas/ ma thob pa'i rgyu yang med do/ /shA ri'i bu de lta bas na/ byang chub sems dpa' rnams la thob pa med pa'i phyir/ shes rab kyi pha rol tu phyin pa la brten cing gnas te zhes pa ni shA ri'i bu lam la gzhan nas thob pa'i rgyu med pa de lta bas na/'bras bu gzhan nas thob pa med pa'i phyir na/ dmigs pa med pas shes rab kyi pha rol tu phyin pa la/ snying po'i chos kun la zhes bya ste/ 'bras bu de kha la brten cing gnas pa zhes bya'o//sems la sgrib pa med pas skrag pa med de phyin ci log las shin tu 'das te mya ngan las 'das pa'i mthar phyin to zhes pa ni 'bras bu'i don rang chas su gnas pas de las gzhan med pas sems la sgrib pa'i chos med la/ gzhan nas ma thob kyis dogs pa'i skrag pa yang med de/log pa'i shes pa rnams las shin tu 'das te/ 'khor ba'i dmigs pa'i shes pa med par mya ngan las 'das te/ sangs rgyas kyi sa la mthar phyin to/ /dus gsum du rnam par bzhugs pa'i sangs rgyas thams cad kyang shes rab kyi pha rol tu phyin pa la brten nas bla na med pa yang dag par rdzogs pa'i byang chub tu mngon par rdzogs par sangs rgyas so zhes pa ni de ltar na 'bras bu'i rgyu gcig la bzhag nas thob pa'i rgyu med pa ma yin te/'das pa dang ma byon pa dang da ltar gyi sangs rgyas rnams kyang dmigs pa med pa'i don la brten nas sangs rgyas thams cad kyi bla na med pa las log pa'i don med de/yang dag par ston pa la sogs pa rdzogs pa/ shes bya'i sgrib pa rnams byang ba/ snying po'i don la chub pa rang gzhan gyi don/ rang la rang chas su mngon bar yon tan thams cad rdzogs par sangs rgyas so//shA ri'i bu de lta bas na shes rab kyi pha rol tu phyin pa'i sngags so zhes pa ni de lta bur dmigs pa'i yul dang / nyams su blang ba'i thabs dang / mthar phyin pa'i 'bras bu rnams gzhan nas 'byung ba ma thob pa'i rgyu med pas na de'i don ni shes pa'i rab 'khor ba'i pha rol tu phyin pa ste/de'i don ni sngags zhes bya ba ni yon tan lnga dang ldan pa'o/ /gzhan gyi don la rag ma lus rang nyid la gnas pas sngags zhes bya'o/ /de'i yon tan yang rang nyid kyis rang rig pas rig pa chen mo'i sngags la/ gzhan la bzlas su med pas bla na med pa la dngos por grub pa med pas mtshan ma dang mi mnyam pa/mtshan ma nyid de'i yon tan yin pas na/ dbyer mi phyed pa'i snying po'i don du mnyam pa'o/ /snying po'i don de rtogs nas log pa'i sdug bsngal rnams rab tu mchog tu zhi bar byed de/ dmigs pa med pa'i ngang la gnas pa'i sngags de'i don mi brdzun te snying po'i don du bden par shes te/ de'i phyir na shes rab kyi pha rol tu phyin pa thams cad kyi sngags spyan ras gzigs kyis smras pa/ tar+Ya thA/ zhes pa ni/ 'khor 'das kyi don snying por gcig pa 'di lta ste/ zhes pa'i don to/ /de yang dmigs pa med par gcig pa/ 'byed pa med par gcig pa/ rang bzhin mi 'gyur ba'i don 'di lta ste/ oM ni 'khor ba'i dus su dug lnga ltar du snang ba 'bras bu'i dus su rigs lnga yab lnga ltar snang ba de ni log pa'i shes pa la snang gi de nyid la dmigs pa med pa'o//shes rab gzhan mi gnas par rtogs pa/ 'bras bu'i pha rol tu ga te ni bdag don du phyin la/ gzhan don du yang ga te sa phyin pa'i don to/ /pA ra ga te ni bdag don gyi mchog tu phyin te gzhan la re ba'i yul med do zhes pa'o/ /pA ra sang+ga te ni gzhan don gyi mchog gam phul du phyin te/gdul bya dmigs pa'i thugs rje 'byung ba yang / gdul bya las dag pa la snang ba sprul sku rang bzhin dag pa la snang ba longs sku/ bo d+hi rgyun mi 'chad pa thugs rje/ gdul bya la shes rab kyi pha rol tu phyin pa'i don du 'byung ngo / / swA hA ste/ rgyud rnams rang bzhin gyis grol lo zhes bya ba'i don te/ de yang nyid kyis nyid grol ba'i don to/ /gzhan la snying po'i don nam rag lus pa med pa'o/ /shA ri'i bu de ltar zab pa'i don la bslab par bya'o zhes bstan pa'o/ /de nas bcom ldan 'das ting nge 'dzin las bzhengs te/byang chub sems dpa' sems dpa' chen po 'phags pa spyan ras gzigs dbang phyug la legs so zhes bya ba byin nas zhes pas ni/ dus gzhan gyis bar mchod par spyan ras gzigs kyis shA ri'i bu la bstan pa'i rjes de nas bcom ldan 'das kyis 'khor smin par byed pa'i ting nge 'dzin las bzhengs nas 'phags pa spyan ras gzigs la dam pa'i chos ma nor bar ngas bstan pa ltar khyod ston pa legs par byin no//de ltar na ston pa legs so/ /rigs kyi bu rang don de bzhin no/ /gzhan gyi don dang rang chas su ngas gzhi lam 'bras bur chas par ston pa de de bzhin te/'phags pa spyan ras gzigs khyod kyis shA ri'i bu la bstan pa de bzhin du gdul bya rnams kyis ye shes rang la rang chas su shes rab kyi pha rol tu phyin pa yod pas bslab par bya'o zhes bcom ldan 'das kyis gsungs pa bka' dngos so//de bzhin gshegs pa rnams kyang rjes su yi rang ngo zhes pas ni bcom ldan 'das kyis gsungs pa'i bka' dngos dang byin gyis brlabs pa'i bka' spyan ras gzigs gnyis mthun pas de bzhin gshegs pa'i rigs thams cad kyang bka' mthun pa'i don de la yi rang ngo //bcom ldan 'das kyis de skad ces bka' stsal nas zhes pa la sogs pa ni bka' mthun pa'i don la dgyes te ston pas chos dang 'khor 'phags pa spyan ras gzigs la bstan pa'o/ /'khor rnam pa bzhi la sogs pa'i 'khor dang / lha'i dbang po brgya byin dam pa'am mchog tu gyur pa dang /lha ma yin gyi rgyal po thags bzangs ris dang / dri za'i rgyal po zur phud lnga la sogs pa rnams kyis bstod pa'o/ /shrI siM has mdzad pa'i 'grel pa mdo las sngags su bai ro tsa na'i don du bkol ba'i tshig nyung la don che ba gsal ba'i sgron ma rdzogs so/