CLOSE WINDOW

D4350
བོད་ཡིག

@/ /gnas brgyad chen po'i rtsa ba bzhugs/ /@##/ /thams cad mkhyen pa la phyag 'tshal lo/ /byA ka ra Na'i skad ni gnas brgyad de/ byed pa'i gnas dang / bsdu ba'i gnas dang / sgyur ba'i gnas dang / drang ba'i gnas dang / 'jug pa'i gnas dang / rnam par dbye ba'i gnas dang / phyogs kyi gnas dang / dngos po'i gnas so/ /de la byed pa'i gnas ni/ byed pa'i tshig brgyad kyi lugs dang / tshig drug gi lugs dang / tshig bzhi'i lugs so/ /de la tshig brgyad ni gang byed/ gang la byed/ gang gis byed/ gang gi phyir byed/ gang las byed/ gang gi byed/ gang na byed/ gang zhes bya ba byed//dang po ngo bo'i tshig /gnyis pa dmigs 'dzin pa'i tshig /gsum pa byed pa'i tshig /bzhi pa ched du bya ba'i tshig /lnga pa 'byung gnas kyi tshig /drug pa 'brel pa'i tshig /bdun pa gnas gzhi'i tshig /brgyad pa gdags pa'i tshig /tshig drug ni gang byed/ gang la byed/ gang gis byed/gang gi phyir byed/ gang las byed/ gang la byed/ dang po ngo bo'i tshig /gnyis pa las kyi tshig /gsum pa byed pa'i tshig /bzhi pa dgos ched kyi tshig /lnga pa rgyu'i tshig /drug pa gnas gzhi'i tshig /tshig bzhi'i ni gang byed/ gang la byed/ gang gis byed/ gang na byed/ dang po dngos po'i tshig /gnyis pa las kyi tshig /gsum pa byed pa'i tshig /bzhi pa gzhi'i tshig /de dag ni byed pa'i gnas zhes bya ste/ skad kyi dbyings la bsgyur ba'i lugs yin pas/ lugs re res byas pa gcig la sbyor ba yin gyi/ bi b+hak+ta lta bu ming ngo cog gi sgra la sbyor ba ma yin no//bsdu ba'i gnas ni brgyad de/ 'bru mang po pa'i bsdu ba dang / mdor bsdu ba dang / bye brag bsdu ba dang / yan lag gnyis kyi sgo nas kun sdud pa tsam byed pa'i sbyor ba yin no/ /gzhi bsdu ba ni gnyis te/ rigs bsal ba'i bsdu ba dang / rigs ma bsal ba'i bsdu ba'o/ /de dag ni de gnyis kyi sgo nas kun sdud pa tsam byed pa'i sbyor ba yin no//gzhi gcig tu bsdu ba'i sbyor ba ni gnyis te/ phyogs gcig tu byed pa'i bsdu ba dang / so so phyogs gcig tu byed pa'i bsdu ba'o/ /de dag ni gzhi bsdu ba'i sbyor ba phyogs su byas pa las mtshan nyid gcig tu bsdus pa'i sbyor ba yin no/ /skyes bu'i bsdu ba ni gsum ste/las 'dzin pa'i bsdu ba dang / ba gnyis pa'i bsdu ba dang / byed pa'i tshig gi bsdu ba'o/ /de rnams ni yan lag gtso bor ston pa'i sbyor ba yin no/ /zlas bsdu ba ni gnyis te/ mthun pa bsdu ba dang / mi mthun pa bsdu ba'o/ /de dag ni gcig gi zlas gcig shes pa'i sbyor ba yin no//bsgyur ba'i gnas ni bzhi ste/ brgyud de bsgyur ba dang / yan lag bsgyur ba dang / rnam grangs bsgyur ba dang / drang thad du bsgyur ba'o/ /de la brgyud de bsgyur ba ni/ sgra gcig gi zur las brgyud pas don rdzogs par ston nus pas sgra go ba ste/ ji ltar gu lu zhes bya ba las brgyud pas/'dzam bu'i 'bras bu smin pa ni/ /dri ma med pa'i chu la lhung / /nya yis bza' ba'i ched du ni/ /gu lu gu lu zhes su smra/ /zhes zer ro zhes bya ba la sogs pa lta bu'o/ /yan lag bsgyur ba ni/ tshig gcig gi sgra'i yan lag phral te/ ji ltar a pra shi kha zhes bya ba so sor phral la/ a las bsgyur na/ a ne na d+hi dza mi tre/ pra biSh+Te haM ban+d+ha re/ shi ra mA kra mya bA de ni/ kha gaM ne na muN+Do pa tshi t+ya/ zhes bya ba lta bu'o/ /rnam grangs bsgyur ba ni/ sgra gcig gi rnam grangs du mar bsgyur ba ste/ ji ltar/ ri 'od sa dang rdo rje dang / /mtho ris ba lang phyogs rnams su/ /mkhas pas gau sgra shes par bya//zhes pa lta bu'am/ skye dang bden dang de bzhin yod/ /sems can 'das dang mi ma yin/ /cung zad lus dang sa la sogs/ /'byung ba'i sgra ni mkhas pas brjod/ /ces bya ba la sogs pa lta bu'o/ /drang thad du bsgyur ba ni/ nye bar bsgyur ba nyi tshe'i dbang du byas pa ste ji ltar bcom pa dang ldan pa'i don ni bcom ldan 'das zhes bya ba la sogs pa lta bu thams cad do//drang ba'i gnas ni mu bzhi ste/ yin pa dang / ma yin pa dang / gnyi ga yin pa dang / gnyi ga ma yin pa'o/ /de dag la yang dngos po gcig la mu bzhir drang ba dang / mu bzhi las dngos po gcig tu drang ba'o//de la gcig la mu bzhir drang ba la ni chos gcig bsgrub pa'i sgo nas ni yin pa bsgrub pa'o/ /mu bzhi las gcig tu drang ba la ni gnyis te/ ngo bo nyid kyi tshig dang / khyad par gyi tshig dang ldan pa'o/ /de la ngo bo nyid la ni ngo bo sgrub pa'i tshul gyis yin pa 'grub pa'o/ / ngo bo dgag pa'i tshul gyis ma yin pa 'grub bo/ /tshul gzhan gyi sgo nas ni gnyi ga yin pa 'grub po/ /tshul gzhan gcig gi sgo nas ni gnyi ga ma yin pa 'grub po/ /khyad par gyi tshig dang ldan pa la ni/ khyad par gyi gzhi yin la khyad par ma yin pa dang / khyad par yin la khyad par gyi gzhi ma yin pa dang /gnyi ga yin pa dang / gnyi ga ma yin pa'o/ /mu gsum pa la ni khyad par yin la khyad par gyi gzhi ma yin pa med do/ /mu gnyis la ni khyad par gyi gzhi yin pa'ang med do/ /yi ge 'jug pa'i gnas ni brgyad de/ sgra dang / skad dang / ming dang / mtshan ma dang / brda dang / tha snyad dang / tshig dang / don no/ /de la sgra ni shes bas zin pa las byung ba dang / ma zin pa dang / gnyi ga las byung ba la sems can du ston pa dang / mi ston bar phye ba dang / lung du ston pa dang / mi ston pa dag go/ /skad ni bzhi ste/ rang bzhin dang / 'dus byas dang / zur bcag pa dang / sha za'i 'o/ /ming ni chos rnams kyi ngo bo nyid kyi tshig bla dgas te yi ge 'dus pa'i bdag nyid do/ /mtshan ma ni 'dis mtshon par byed pas mtshan ma ste snang bar nus pa'o/ /brda ni ming dang ming can 'brel par byed pa ste sgra dang don gyi spyi'i rnam pa gzhan la smra bar byed pa'i dus can gyi bdag nyid do//tha snyad ni dngos po med pa la dngos por brtags pa ste/ de yang brtags pa dang 'jug pa dang brjod par bcas pa thams cad do/ /de la brda ni go bar byed pa'i bdag nyid yin la/ tha snyad ni 'jug par byed pa'i bdag nyid can yin no/ /tshig ni chos rnams kyi khyad par gyi tshig bla dgas yin te ming 'dus pa'i bdag nyid can no//don ni chos rang gi ngo bo ji ltar gnas pa'o/ /de rnams la yi ge ji ltar 'jug ce na/ don gyi dngos gzhi las don gyi spyi'i rnam pa skye'o/ /de las sgra spyi'i rnam pa skye'o/ /brda dang tha snyad 'byung ngo / /brda dang tha snyad kyi dus skabs na/ yi ge'i tshogs dang / ming gi tshogs dang / tshig gi tshogs kyi rnam pa yod do/ /de la rgyu rkyen gyi tshogs la brten nas sgra rang gi mtshan nyid du 'byung ste sgra zhes bya ba'i ming thob po/ /sgra des nyan pa po la sgra las byung ba'i shes pa skye ba na sngon brda'i dus kyi dang gcig tu sgo btags te spyi gsal bar byed do//des don gyi spyi sgro btags pa'i bdag nyid du brjod nas/ des don rang gi mtshan nyid khong du chud par 'gyur bas de dag yi ge'i 'jug pa zhes bya ba'o/ /rnam par dbye ba'i gnas ni brgyad de/ gang / gang la/ gang gis/ gang gi phyir/ gang las/ gang gi /gang la/ 'di rnams bod pa dang bcas pa ni/rnam par dbye ba bdun/ bod pa dang brgyad do/ /'di rnams gcig gi tshig dang / gnyis kyi tshig dang / mang po'i tshig dang / gsum gyis na nyi shu gcig go/ /de la sgyur byed kyi yi ge nyi shu rtsa gcig dang sgra tsam du phrad nas sgra gcig sgra thams cad du 'gyur du rung ba'i don ni/ bi b+hak+ta zhes bya ba rnam par 'byed pa'i don yin gyi/byed pa'i gnas lta bu skad kyi dbyings tsam la bsgyur ba ni ma yin no/ /de dag kyang / si au dzas pra tha mA/ am au shas dwi tI ya/ TA b+h+yaM b+hi sa tri tI ya de b+h+yAM b+h+yas tsa tur+thi/ da si b+h+yAM b+h+yas pany+tsa mi/ ngas os A ma ShaSh+Thi/ ngi os sub sap+ta mi zhes bya ba bsgyur na/rnam par dbye ba bdun po re re la yang / gang / gang dag /gang rnams/ gang la/ gang dag la/ gang rnams la/ gang gis/ gang dag gis/ gang rnams kyis/ gang gi phyir/ gang dag gi phyir/ gang rnams kyi phyir/ gang las/ gang dag las/ gang rnams las/ gang gi /gang dag gi /gang rnams kyi/ gang la/ gang dag la/ gang rnams la zhes bya ba bod pa dang bcas par 'gyur ba'i don yin no/ /phyogs kyi gnas ni/ sgra gcig shes pa dang / sgra gcig shes pas phyogs kun shes pa dang / sgra ji snyed pa shes pas phyogs kun shes pa dang / sgra phyogs med shes pas chos thams cad shes pa'o//de dag ni skyes bu rab 'bring gis phye ba yin no/ /dngos po'i gnas ni chos can gyi sgo nas chos nyid kyi dngos po sgrub pa'am/ sgra skad kyi sgo nas don gyi dngos po sgrub par byed pa ste bshad zin to/ /byed pas bye brag rnam par 'byed/ /bya ba yongs su rdzogs par ston//bsdus pas yi ge nyung 'gyur zhing / /'brel pa'am ming yang 'dogs par byed/ /bsgyur bas bsgyur bya'i mthu shes shing / /skad byings khongs su chud par 'gyur/ /drang bas bshad pa'i dmigs pa mkhas/ /gzhan sel ba yang shes par 'gyur/ /'jug pas brda dang tha snyad shes//dgos 'brel khong du chud par 'gyur/ /dbye bas sgyur byed rkyen la mkhas/ /sgra'o cog la mkhas par 'gyur/ /phyogs kyis skyes bu rab 'bring shes/ /dngos pos don gyi dngos gzhi rtogs/ /ming can tha dad ston pa dang / /ming dang ming can 'brel pa dang //dgos pa tha dad ston pa'o/ /kha cig sbyor ba tha dad kyang / /dgos pa tha dad ma yin dang / /phyogs gcig mthun par ston pa rnams/ /sgra yi ming gis shes pa yin/ /tshig la ming gis sbyor ba dang / /gang la tshig gis sbyor ba dang / /bye brag ji snyed yod pa rnams/ / gang gi tshig don gtso bo zhes/ /sbyor ba'i dgos pa tha dad pa'ang / /sgra yi ming gis shes pa yin/ /dbul ba 'joms byed rnyed dka' rin po che/ /bgrod dka' rgya mtsho che la gnas pa dag /legs par gru btsugs dar phyar rlung gis bskyod/ /rin chen thob byed gzhan du thabs med bzhin//sdug bsngal 'joms byed dam chos rin po che/ /rtogs dka' gsung rab rgya mtsho dag la gnas/ /yi ge ming dang tshig gi 'bru btsugs te/ /sgra yi dar phyar shes rab rlung gis bskyod/ /dam chos thob byed gzhan du thabs med do/ /ce khyi 'brug gis byA ka ra Na'i skad mdo tsam zhig bsgyur ba gnas brgyad po'i rtsa ba rdzogs so/