CLOSE WINDOW

D4335
བོད་ཡིག

/ //rgya gar gyi mkhan po pra b+hA kar shrI mi tra dang / /zhu chen gyi lo tsA pa dge slong rin chen bzang pos bsgyur cing gtan la phab pa//[ ]@##/ /rgya gar skad du/ nI ti shA s+t+ra/ bod skad du/ lugs kyi bstan bcos/ thams cad mkhyen pa la phyag 'tshal lo/ /don gyi bstan bcos bye brag las/ /bstan bcos bdag la phan pa dang / /mi rnams blo ni bskyed bya'i phyir/ /ma surak+Shas bsdus te bshad/ /'jig rten dag ni dga' ba bskyed pa dang / /spyod pa ngan pa rnams ni spang phyir dang / /shes rab bslab cing yang dag don sgrub phyir//blo skyed phyir ni tshigs bcad tshul 'di brjod/ /dngos po kun la mkhas shing goms par bya/ /chos spyad gzhan gyi mngon sum bsrung bar bya/ /khro ba spang zhing mkhas pa bsten par bya/ /bden par smra zhing sgra nyams brjod mi bya//bram ze bkur zhing ngan la'ang brnyas mi bya/ /rgyal pos 'jigs shing spyod pa spa bar bya/ /dgra bos shes bya mi rnams brnyas mi bya/ /dregs pa spang zhing smad dngos bsten mi bya/ /phan pa'i zas bsten grogs po mnyes par bya/ /me la mi 'gom g.yul la blta mi bya//snyan ngag mnyan bya srog chags gnod mi bya/ /bya min mi bya khron pa bgom mi bya/ /rig pa blang zhing sbrul dang rtse mi bya/ /ci nus sbyin zhing dman la bslang mi bya/ /bdag la mi bstod gzhan la smad mi bya/ /de nyid shes bya mtshan mo rgyu mi bya/ /zhags pa dang bral glang po'i rjes mi 'gro/lham med mi 'gro grogs med lam mi 'gro/ /smyo byed blo ngan ring du spang bar bya/ /chung ma ma rungs spang zhing yid 'ong bsten/ /ma 'dris pa dang nam yang mthun mi 'jug /rgyal po'i bran mo 'dod spang ma'i ngag nyan/ /gang dang lhan cig zhe 'gras yong mi bya//be'u gzhon pa ring du spang bar bya/ /bud med rnams la nam yang yid mi brtan/ /chu bo rgal dka' rgya cher 'jug mi bya/ /chang 'thungs ra ro shing mthong 'dzeg mi bya/ /don rnams bsgrub cing chos dang nor mi spang / /gang du bsrung ba med pa'i yul du yang / / kun gyi gsang tshig nam yang mi smra ste/ /kun la yid brtan mi bya legs par brtag /khar rjer mi gtad skyes bu'i rtsol la 'bad/ /gsang bor smra zhing 'brel med tshig mi brjod/ /glo bur lcag mdun dus su legs 'ongs brjod/ /mi dang lha dang bram ze rnams la mchod/ / bsod nams yul ni rtag tu bsten par bya/ /rtag tu khrus dang gos dkar gyon la 'grus/ /ha cang bud med chags min zhu nas za/ /shes ldan gang zhig de ltar byed pa ni/ /'tsho ba nad med tshe ring shes par bya/ /sa surak+Shas byas pa'i lugs kyi bstan bcos las le'u dang po'o// //bdag gis gsang dang gzhan gyis gsang / /bu gcig gces bzhin bsrung bya ste/ /sa bzhin kun la snyoms byas nas/ /mi rnams dga' bas rab tu dga'/ /gnad kyi tshig rnams mi brjod cing / /gnad du phog 'gyur mi bsgrags te//gzhan gyi gnad rnams smra ba ni/ /skyes bus mtshon cha bzhin zhes bya/ /snying la tsham tshom med byas te/ /bu ram chu bzhin kha nas brjod/ /zhe 'gras yid ches byas nas ni/ /de nas ngag gam mtshon gyis gzhom/ /dgra rnams snyan pa brjod kyang ni//blo ldan btang snyoms mi bya'o/ /de nyid mthar ni gnod byed de/ /ji ltar dug gnod mi bzad bzhin/ /rang stobs chu bo mi brtan te/ /chu bo'i rgya khyon yongs brtags nas/ /de bzhin dus su brgal bya ste/ /rang don de bzhin rjes su bsam/ /ji srid 'jigs pa ma byung ba//de srid bar du 'jigs par bya/ /'jigs pa mngon sum byung na ni/ /'jigs pa btang ste brdeg par bya/ /don ni chu skyar bzhin du bsam/ /pha rol gnon pa seng ge bzhin/ /byi ba'i dri chor byi la ltar/ /shes nas shin tu brtul bar bya//seng ge'i gcig dang chu skyar gcig /bya gag gi ni bslab pa bzhi/ /bya rog lnga dang khyi yi drug /bong bu'i bslab pa gsum rnams so/ /bya ba mang nyung gang yang rung / /skyes bu gang zhig byed 'dod pa/ /rtog med bya ba kun bsal te/ /seng ge'i gcig ces grags pa yin//dbang po rnams ni rab bsdams shing / /yul dang dus la ci rigs par/ /bya ba rnams ni brtag dpyod de/ /skyes bu mdzangs pa chu skyar bzhin/ /tho rangs ldang dang 'thab pa dang / /gnyen la kha zas snyoms par 'gyed/ /mo la rab gnon nye bar spyod//khyim bya'i bslab pa bzhi yin no/ /mi mngon 'khrig dang rngom pa dang / /dus su gnas ni 'cha' ba dang / /bag yod pa dang yid mi ches/ /'di ni bya rog bslab pa lnga/ /mang du za dang cung zad chog /legs par gnyid log myur du sad/ /dpa' la snying nye brtan pa ste//khyi yi spyod pa drug yin no/ /khal gyis bkal na 'degs pa dang / /grang dang tsha bas mi skyo dang / /rtag tu chog ni shes pa ste/ /bong bu'i spyod pa gsum yin no/ /de ltar nyi shu shes bya ste/ /skyes bu gang zhig spyod 'gyur pa//'di ni dgra las rgyal 'gyur te/ /dgra rnams kun gyis tshugs mi 'gyur/ /ma surak+Shas byas pa'i lugs kyi bstan bcos las le'u gnyis pa'o// //ji srid dus la ma bab par/ /dgra ni phrag gong bkur bya ste/ /de bzhin dus su phyin gyur na//rdo la rdza ma bsnun bzhin gzhom/ /dman zhing snying rje'i skad brjod kyang / /dgra ni gtang bar mi bya'o/ /de la snying rje mi bya zhing / sngon chad gnod pa byed pa gzhom/ /bu lon me yi lhag ma dang / /de bzhin dgra yi lhag ma ni/ /yang dang yang du 'phel 'gyur bas//de bas lhag ma gzhag mi bya/ /byas la lan du phan bya ste/ /'chi ba byed la slar yang gtso/ /de la nyes par mi lta zhing / /ma ru dus byed la ma rungs bya/ /phongs ba'i don du nor rnams bsrung / /nor bas chung ma bsrung bar bya/ /nor dang chung ma gnyis pas kyang //thams cad don du bdag bsrung ngo / /lkog na 'phya ba byams byed cing / /mngon sum snyan par smra byed pa/ de 'dra'i grogs po spang bya ste/ /bum kha'i 'o ma'i dug bzhin no/ /brkam chags sbyin pa mi ster dang / /khengs pa thal mo mi sbyor dang //de 'dra'i glen pa'i rjes mthun par/ /ji lta de ltar thabs la mkhas/ /dgra la thal sbyar yid ches dang / /spyi bos gtugs te gus bya zhing / /gdung gyur mchi ma 'dzag sogs bya/ /'byor bar 'dod pas de ltar spyad/ /dgra bo stobs ldan rjes mthun bya//stobs chung dgra bo brlag bya ste/ /mthu stobs mnyam pa'i dgra la ni/ /mthun min dul min bya ba'o/ /gang gis gdung 'gyur de mi bya/ /gang gis zhum 'gyur tshul mi spyad/ /mthar mi phyin pa'i las mi brtsam/ /mgo ltung mi 'gyur brdeg mi bya//pha rol mi rgal de mi brtsad/ /gang du dgra rnams der 'dug min/ /shing rtsa ma phyung phyung ba min/ /gnyis su ma gyur bcad pa min/ /rgan po med pa tshogs pa min/ /chos mi ston gang rgan pa min/ /gang la bden med chos ma yin/ /tshig don ma 'brel don ma yin//tsher ma gting du zugs pa dang / /chos las nyams pa nyid dang ni/ /dgra dang sha khon zhugs pa gsum/ /rtsa nas phyung ba bde ba yin/ /gtan du drang po mi bya ste/ /nags su song la yongs ltos dang / /der ni shing drang gcod 'gyur te//yon pa'i shing ni gnas la ltos/ /gang dang gang ni ci bsams pa/ /de dang de la phan bsams te/ /rjes su 'jug pa'i mkhas pa ni/ /myur du bdag gi dbang du 'gyur/ /'di ltar gsad bya gang yin de/ /mi brjod mchor gsad bya ste//ri dgas rgyal po rab 'khrugs pas/ /lus bskums na ni gnod byed ltar/ /snying la khon du dam bzung nas/ /gzhan la ma ltos spyad par bya/ /blo ldan bzod dang ldan byas nas/ /gzhan gyi skyon ni yang mi bgrang / /dper na khu byug grog ma dang / / dngul rdo lta bu'i mdog ldan pa'i/ /lag 'gro'i rkang mthil gang yin des/ /dus ma yin par nyams kyang ni/ /gang zhig blo gros la brten te/ /gdengs ka go 'phang mi smad cing / /de ni dug nyams mi 'gyur ltar/ /skyes bu nyams kyang go 'phang mtho/ /ci srid dag po pha rol la//'dir ni pus btsugs gdud bya ste/ /skye bo dam pa rnams la ni/ /bsnyen bkur sna tshogs spyod pa dang / /rngon pa'i spyod lam 'jab bu yis/ /ri dgas drung du phyin nas ni/ /dug bsgos mda' yis bsnun bzhin bya/ /ma surak+Shas byas pa'i lugs kyi bstan bcos las le'u gsum pa'o// //bdag don 'bad pas bya ba ste/ /gzhan don de bzhin bsam mi bya/ /bdag gzhan don rnams spangs pas ni/ /mdzangs pa thob par mi 'gyur ro/ /gzhan gyi don la mi brtul te/ /rang gi las la brtson pas bya//mig sman spyad na zad snang zhing / /grog ma yis ni bsags pa dang / /de bzhin du ni mkhas pa yis/ /bsags pa nyung du spyad par bya/ /ma rmongs thams cad rmongs bya zhing / /rmongs rnams rtag tu mgo bskor bya/ / yid mi ches la yid ches bya/ /bdag nyid sba zhing gzhan rjes bsam/ /nyi ma don med mi bya ste/ /sbyin pa kha ton las rnams bya/ /ji ltar srin 'od kha chu yis/ /grog ma bslus ba bzhin du bya/ /dam pa'i skye bo dga' bar bya/ /mi srun skye bo bsten mi bya/ /skye bo ma rungs yid mi brtan//skye bo dgra la dpa' brtan bya/ /bla ma'i skye bo bzod par bya/ /smad 'tshong ma ni brid par bya/ /gang gis de dag ma lus par/ /thams cad yongs su shes gyur pa/ /des ni blang dor dpyad pa yis/ /'jig rten 'jig rten shes pa yin//gang dang gang la nor ldan pa'i/ /skyes bu las la chags 'gyur ba/ /gang dang gang la dga' ba'i tshig /de dang de yi yon tan brjod/ /yid mi ches la yid mi brten/ /yid ches lhag par yid brtan min/ /yid ches pa las 'jigs pa 'byung / /rtsa ba las kyang gcod par byed//'byung po kun la yid mi brtan/ /kun la yid ches bya ba'ang min/ /gang gi rang bzhin sba bya zhing / /gzhan gyi rang bzhin shes par gyis/ /gzhan gyi bud med dug yin te/ /de bzhin chung ma gzhan 'gro dang / /gnyis po de la yid rton pa'i//mi rnams 'chi sgor bsnyen pa yin/ /bud med rgyal po sbrul rnams dang / /kha don dag dang dgra rnams dang / /tshe dang longs spyod dag la ni/ /shes ldan rnams kyis yid brtan min/ /rig pa 'dod pas mkhas brten bya/ /shes par gyur pa gzhan sten byed//de bas las rnams thams cad ni/ /lus pa med par bslab par bya/ /sdig pa can la yid mi brtan/ /blo ldan bdag ces zer yang yin/ /gang phyir de la yid ches min/ /de yi 'tsho ba nyams par 'gyur/ /gshin rje gshed po 'chi ba dang / / sa 'og rgya mtsho gling rnams dang / /spra yi so dug sbrul dag ni/ /mi bsten phyogs gcig bud med yin/ /dgra yi phyogs byed spang par bya/ /bdag la dga' ba yongs su bsdu/ /kun la blo ni yod pa ste/ /yun ring blo ni dka' ba yin/ /mig 'byed mig 'dzums tsam yang rung / / dgra la mngon sum bya ba min/ /smod pa na yang 'on pa bzhin/ /dus bab ral gris bcad bzhin bya/ /gang du chu yod ngang pa gnas/ /chu skams mtsho ni 'dor bar 'gyur/ /chu yis gang na phyir gnas bzhin/ /ngang pa lta bu'i grogs mi brtan/ /rgyal po smad 'tshong ma dang ni/ /de bzhin nyi du dman pa dang //g.yog 'khor rnams la rtag tu yang / /ha cang gdung par mi bya'o/ /gang gi rgyu las mya ngan dang / /dar dang sdug bsngal nyid dang ni/ /lus kyi gnod byed rtsa ba de/ /gcig gam cung zad tsam yang rung / /mkhas pas spang zhing dor bar bya/ /gser ni rnam bzhis brtag bya ste/ /bdar bcad bsreg dang brdung bar bya//de bzhin rnam bzhis skyes bu brtag /thos dang tshul khrims rig la sogs/ /thams cad shes shing rig par bya/ /kun la dogs bya dus shes kyis/ /'jig rten sems ni bsrung bya ste/ /tshig rnams kun gyis yid ches bya/ /bdag gis gsang tshig gzhan mi smra//ma surak+Shas byas pa'i lugs kyi bstan bcos las le'u bzhi pa'o// //blon po blo ni phun sum tshogs/ /bstan bcos kun la 'jigs med cing / /dbang mdzod stobs dang ldan pa ni/ /ma bsad der ni phyir gsod 'gyur/ /yid ches skyes bu 'chi 'gyur te//smyig ma'i 'bras bu byung ba bzhin/ /yid ches zhags pas gsod 'gyur te/ /nags na gnas pa'i ri dgas bzhin/ /mig rtsa dmar zhing tshig 'jam smra/ /dga' bas sems can kun dang mthun/ /don rnams kun la gya gyur smra/ /gzhan tshig dag la 'jig rten smod//de ni g.yo can spyod lam ste/ /de snying nyes pa chen po yis/ /sdig pa nyi tshe'i tshogs bsags nas/ /grong gi tshogs de bzlog bya ste/ /grong khyer 'khrug byed g.yon can 'di/ /'byung khungs skye bo ngan pa'i gter/ /de ni 'jig rten spyi dgra yin//ma rungs skye bo kha snyan cing / /tsan dan lta bu bsul ba'i ngag /snying ni ma rungs bdag nyid de/ /sog le bas kyang khyad par 'phags/ /ma rungs bdag nyid tshig 'jam zhing / /skyon dang rjes mthun snyan smra ste/ /mi mngon khon bzung byams byed la//yid brtan byed pa gshin rje bzhin/ /thag ring mthong nas mgo smad cing / /shin tu dam pa'i tshig brjod la/ /skad gsang chung bas smra ba ni/ /g.yon can rnams kyi mtshan nyid yin/ gang zhig sngon chad gnod byas dang / /de ltar gang gis gnod byed pa//de la yid ches mi rigs te/ /khung na gnas pa'i lag 'gro bzhin/ /'bab chu sder mo can rnams dang / /rwa can lag na mtshon thog dang / /rgyal po'i pho brang bud med la/ /yid brtan bzod par mi bya'o/ /me chu bud med blun po dang / /sbrul dang rgyal rigs dag la ni//rtag tu 'bad pas sten byed pa/ /'phral du srog 'phrog de drug yin/ /nor rnams mang po ster byed pa'i/ /dgra la gang zhig dpa' brtan dang / /chung ma khyo la ma chags gnyis/ /de yi 'tsho bar rab tu gcong / /sngon chad dgrar 'gyur sten byed cing //khon pa gzhi med 'khrug byed pa/ /grogs po 'dod pa zlog byed pa'i/ /de 'dra'i grogs po ring du spang / /dgra dang bshes gnyen g.yog 'khor dang / /bar gnas rgan po nyam chung rnams/ /rmongs pas bye brag mi shes pas/ /de ni skyes bu tha shal yin//rkun ma'i chos pa gsad pa dang / /grogs 'khu myur du brjod bar bya/ /chung ma 'khu ba mal stan byed/ /bram ze shes byed spyan mi drang / /bdag gis mngon sum ma gyur par/ /gang gis nyes pa smra byed pa/ /gang gis dmyal bar ltung ba'i rgyu/ /lam de brtsam bar mi bya'o//bdag nyid bdag gi gnyen yin zhing / /bdag nyid bdag gi dgra yang yin/ /mtho res dmyal ba de bzhin du/ /thams cad bdag gi dbang du bya/ /ma surak+Shas byas pa'i lugs kyi bstan bcos las le'u lnga ba'o// // blon pos legs par mnyam bzhag ste/ /spyod pa gzhan la smra mi byed/ /nyi ma bzhin du dgra rnams la/ /gzi brjid kyis ni gdung bar byed/ /mi srun lhan cig spyod pa dag /dang po dga' zhing mnyan pa dang / /bar du rtsod pas dga' med do/ /tha mar sha khon zhugs pa yin//bdag nyid tshe dang mtshungs par byed/ /dang po chung ngur bshes byed cing / /bar du de bas lhag par 'gyur/ /tha mar rab tu dga' bas mdza'/ /dam pa'i bshes ni 'bab chu 'dra/ /dang po myur zhing rab tu che/ /rim gyis rim gyis rgya cher 'phel//'gro ba phyir ni bzlog pa med/ /dud 'gro dri yis mthong bar byed/ /rig byed kyis ni bram ze mthong / /sman gyi rig pas sman pa mthong / /rgyal po nyan rnams mthong bar byed/ /mi yi dgra ni gzhom 'dod pas/ /rtag tu snyan smra dran pa bsam//glu yis bying pa'i ri dgas bzhin/ /sems 'khrul 'gyur nas gsad par bya/ /gang la nor yod bshes gnyen dang / /gang la nor yod nye du ste/ /gang la nor yod 'jig rten mi/ /gang la nor yod de mdzangs yin/ /nor med gyur na gnyan bshes dang //bu dang chung ma nye du dang / /skye po sdug pa rnams kyis spong / /nor ldan gyur na phyir yang bsten/ /nor ni 'jig rten mi yi gnyen/ /go 'phang mchog thob gyur na ni/ /bshes gnyen grogs po la sogs pa/ / sngon ma mthong ba rnams kyang 'dud/ /nor zad go 'phang nyams dus na/ /rang mi rnams kyang dgrar 'gyur la/ /nor dang mi ldan skye bo yis/ /bden pa smras kyang spong bar byed/ /gsang ngam khong ni grims pa dang / /brnag pa mthar phyin byed dus dang //dgra la rigs pa spyod pa ni/ /dgra bo 'jigs 'gyur the tshom med/ /dgra yi phyogs la mkhas pa yis/ /dang po rtsa ba gcad par bya/ /de nas rang gi phyogs bcas pas/ /sngon chad gnod pa byed pa gsad/ /gang zhig dgrar 'gyur skye bo dang / /slar ni 'dum par 'dod gyur pa//de ni 'chi ba nyer len te/ /dre'u mo yi ni mngal bzhin no/ /dgra dang lhan cig 'dum byed cing / /yid brtan bde bar nyid log pa/ /de ni shing rtser gnyid log pa/ /lhung nas gsad pa ji bzhin no/ /gal te bu'am spun zla'am/ /snag gi gnyen mtshams 'grogs bshes rnams//rgyal pos bar du gcod byed na/ /gsang byar 'di la the tshom med/ /mnyen pas mi mnyen 'jig pa ste/ /'jam pos rtsub pa 'jig par byed/ /mnyen pas mi 'dul cung zad med/ /de bas mnyen pa shin tu rno/ / nor mnyam nus pa mnyam pa dang / /gnas la mkhas shing brtson 'grus che/ /rgyal srid dngos du 'phrog pa'i mi/ /gal te ma bsad des gsod 'gyur/ /zab mo blo ldan ngag 'jam zhing / /dman par smra la dbang po thul/ /bden par smra zhing gzhan dbang can/ /shis ba'i tshig ldan de nyid rig /rje bo la ni rtag gus pas/ /de 'dra'i g.yog 'khor bzang po yin/ /shin tu mchog shes le lo med/ /legs par gnyid log rab tu sad/ /bde dang sdug bsngal grogs byed pa'i/ /g.yog 'khor 'jig rten rab tu dkon/ /g.yo can rnams la g.yo ston cing //drang la drang ba'i spyod pa ston/ /dga' dang dga' ba nyid dang ni/ /mi dga' ba la mi dga' ston/ /dngos po gang la gang dga' ba'i/ /skyes pa'am bud med ston byed pa/ /dam pa rnams kyi 'jug sgo ni/ /nam du yang ni mi 'dor ro/ /skye bo ngan dang 'grogs na ni//skye bo dam pa'ang nyams byed na/ /chu dang 'dam du 'dres na ni/ /dang pa'ang dri ma can du 'gyur/ /kha la sbrang rtsis bsgos bzhin dang / /khong na rnyog pa'i bdag nyid de/ /nang na ra gan phyi dngul lam/ /kha yi nang gi rdo phye bzhin/ /tshig 'jam brtse med shes rab ldan//mi mngon shin tu mi bzad pa/ /bu ram dug 'dres lta bu yi/ /de 'dra'i skyes bu bsten mi bya/ /shin tu ma rungs skye bo la/ /rjes su mthun pas zhi bya zhing / /mngar ba'i ngag gis bsgo bya ste/ /mkhris pa'i nad 'byung ji bzhin no/ /n+ya grong+ha zhes bya ba yi/ / shing gi rgyal por grags pa yod/ /de yi myu gu bu rnams ni/ /rtsa ba zugs nas gting gnas te/ /gcig la gcig ni 'brel byas nas/ /de nas shing de 'jig par 'gyur/ /de bzhin bu dang tsha bo dang / /blon po'i tshogs dang bcas pa yi/ /rgyal po gnas nas skyod byed de/ /n+ya grong+ha yi myu gu bzhin//ma su rak+Shas byas pa'i lugs kyi bstan bcos las le'u drug pa'o// //sa bdag gi ni g.yog 'khor gyi/ /mtshan nyid bshad kyis mnyan par gyis/ /rgyal po ji ltar shes nyen ldan/ /g.yog 'khor de ltar brtag par bya/ /ji ltar dbang po la sogs pa'i//me ni lha rnams kun gyi kha/ /de bzhin rgyal po'i blon po yang / /yul 'khor rgyu dang mi rgyu'i kha/ /brtan zhing zas mo'i blo dang ldan/ /mdangs ldan chos dang bstan bcos rig /dul zhing bden par smra ba dang / /rgyal po'i 'khor la phan par sems/ /rigs btsun rgyud ni mnyen pa dang //bla ma la ni gus nyan dang / /skye dgu rjes brtser ldan pa yi/ /rgyud byung de ni rgyal sras yin/ /rgyal po snying rje phan sems ldan/ /bla ma'i skyon ni sbed pa dang / /g.yul 'jug slar yang mi ldog cing / /bde dang sdug bsngal mnyam par shes/ /rigs dang tshul khrims phun sum tshogs//chos lugs 'chad pa mkhas pa ste/ /de bzhin dul dang dad pa dang / /grims pa rgyal por rab grags so/ /tshig gsal blo ni phun sum tshogs/ /lugs kyi bstan bcos dag la mkhas/ /ngang 'jam dpyod par byed pa ste/ /rgyal po'i blon po de 'dras bya//yid gzhungs tshig gsal shes rab ldan/ /gzhan sems nye bar mtshon nus dang / /brtan zhing ji skad bsgo bzhin smra/ /rgyal po'i pho nya de 'dras byas/ /rig byed yan lag de nyid shes/ /bzlas brjod sbyin sreg mchog tu brtson/ /rtag tu shis pa rjod byed pa//shes rab ldan de mdun na 'don/ /sgra rig rtsis kyang shes pa ste/ /yi ge byang zhing lag pa myur/ /yid gzhungs tshig ni gsal ba dang / /grangs dang sbyin ldan yi ge pa/ /yi ge byang zhing sgra la mkhas/ /sgra yi mtshan nyid rtogs byed cing / /dri za bzhin du dbyangs mkhas te/ / de 'dra'i klog mkhan bsgo bar bya/ /brtan zhing dbang por rjes su 'os/ /shes rab che zhing legs nyes rtogs/ /gtsang zhing rgyal po'i sku phyed brten/ /de 'dra chad pa gcod byed yin/ /che yi rig byed goms pa dang / /chos rig yid 'ong snyan smra zhing / /cho ga ngang tshul phun sum tshogs//thang la 'bar bzhin gso mkhas shing / /nad kyi mtshan nyid kun la mkhas/ /rgyal po de 'dra'i sman pa bstan/ /gzhan gyi sbyong lam zur gyis shes/ /stobs ldan snyan par smra ba dang / /gzhan gyis bsam pa rtag tu shes/ /sgo dpon de 'dra bsgo par bya//mtshon la goms shing nus dang ldan/ /bzhon pa dag la bya bzhin goms/ /dpa' zhing brtan pa phun sum tshogs/ /de 'dra dmag dpon yin par shes/ /pha mes rgyud byung grims par shes/ /bstan bcos rig cing zhim par 'tshed/ /gtsang sbra che zhing snying nye ba//de lta bu yis phyag tshang bya/ /shes cher dpyad med phun sum tshogs/ /bstan bcos kun la 'jigs med dang / /rigs ni chen por skyes gyur pa/ /de ni nang blon shes par bya/ /long ba 'phye bo theng po dang / /snying nye brtan la rtag 'grus te/ /ri bo bzhin du mi 'gul ba//de 'dras btsun mo'i srung ma bya/ /lus kyi 'gyur ba bcas pa yis/ /glu tshig lam la mkhas pa dang / /gar dang sdeb sbyor mchog shes pa/ /de 'dra'i srung mkhan bsten par bya/ /bstan zhing rgyal ba 'thob pa dang / /gdugs dkar ba dan dkar ba ste/ / g.yul las rtag par rgyal ba na/ /rgyal po'i bu zhes rab tu grags/ /ji ltar khyi zhig bkres nyen te/ /rus pa skam po khar bcangs nas/ /khrag byung sdug bsngal bde snyam pa/ /de bzhin 'dod rmongs rnams kyis ni/ /bud med rnams la bde snyam sems/ /ma su rak+Shas byas pa'i lugs kyi bstan bcos las le'u bdun pa'o//lugs kyi bstan bcos rdzogs so// //rgya gar gyi mkhan po A tsA r+yang+harma shrIb+hadra dang / /lo tsA ba dge slong shAkya blo gros la sogs pas bsgyur cing zhus te gtan la phab pa'o// //