CLOSE WINDOW

D4255
བོད་ཡིག

@##/ /rgya gar skad du/ sa ha a ba lam+ba nA ma/ bod skad du/ lhan cig dmigs par nges pa zhes bya ba/ 'jam dpal gzhon nur gyur pa la phyag 'tshal lo/ /bde gshegs bde 'gro sbyin mdzad pa/ /gnyis med gsal dngos phyag byas nas/ /lhan cig dmigs par nges pa ni//'di ni rgyas par bshad par bya/ /'dir gnyis su med par smra bas gzung ba dang 'dzin pa bye brag med par lhan cig dmigs par nges pa'i gtan tshigs kyis/ zla ba gnyis pa la sogs pa'i dpe las nye bar 'brel pa can yongs su gzung bas rtogs par byed do//de ltar yang / dus gcig nges par rig pa ni/ /nges par shes dang lhan cig tu/ /yul min de las gzhan du na/ /rnam pa gang gis grub par 'gyur/ /zhes gsungs so/ /gzhan dag gis smras pa/ /lhan cig dmigs par nges par ma grub ste/ 'di ltar thog mar ni yul dmigs la/phyi nang shes pa ni shes pa gzhan gyis rang gi ngo bo yul du byed par nus pa'i phyir/ mngon sum gyi bdag nyid du shes pa dmigs pa yin te/ shes pa mngon sum du so sor rig par nus pa'i phyir ram don gyis go ba yin no/ /'di ltar yang / 'gas kyang don ni ma rtogs par//shes pa dmigs pa yod min te/ /de shes pas ni rjes dpag las/ /rtogs pa ru ni gyur pa yin/ /zhes smras pa yin no/ /'di ltar shes pa'i ngo bo spangs nas/ dang por dkar po dang ser po la sogs pa'i don gyi rnam pa so sor snang ba dmigs kyi/ yang phyogs bcur bltas kyang shes pa'i rnam pa dmigs pa ni med pas lhan cig dmigs par nges pa nyid ma grub na/ji ltar na ma grub pa grub pa dang ldan pa yin/ des ni lam phye mar byas so/ /'on te bde ba la sogs pa'i ngo bo nang gi 'gyur ba yin te/ shes pa'i rang gi ngo bo nyid dmigs pa nyid yin no zhe na/de ni mi rigs te/ bde ba la sogs pa'i rang bzhin 'dzin par byed pa med pa'i phyir ro/ /'dzin par byed pa nyid med pas sngon po la sogs pa'i gzung ba yod par mi 'gyur ro/ /'on te yang 'dzin par byed pa yin na de lta na yang lhan cig dmigs par nges pa med de/bde ba med kyang sdug bsngal dang lhan cig dmigs la/ sdug bsngal med kyang bde ba dang yin no/ /'on te bde ba la sogs pa dang lhan cig dmigs pa nges pa yin no zhe na/ ma yin te/ bsdus pa med pa'i phyir ro/ /rim gyis 'byung ba'i rang bzhin la bsdus pa mi srid de/lhan cig dmigs par nges pa nyid re zhig med pas bye brag med par ma grub po/ /sngon po dang ser po lhan cig dmigs par nges pa'ang tha dad par mthong ba'i phyir ro/ /'on te de dag la ni nges par med pas tha dad kyi 'dir yang ma nges pa nyid do zer na/ de ltar yin na nges pa'i rgyu mtshan smros shig /gang la nges pa yod pa de nyid la lhan cig dmigs par nges pa nyid kyi rgyu mtshan yod pas/ de nyid la 'bras bu las rgyu rjes su dpag go/ /'on te nges pa'i rgyu mtshan med pa'i phyir bye brag med pa yin no zhe na/ ma yin te/ de med pa'i ngo bo yin par ma grub pa'i phyir de la the tshom za ba nyid do//gzhan yang nges pa'i rgyu mtshan yod pas bye brag yod la lhan cig dmigs par nges pa gzugs dang snang ba bzhin no/ /ji nges pa'i rgyu mtshan med pa'i phyir lhan cig dmigs par nges par bye brag med de zla ba gnyis pa la sogs pa bzhin no//nges pa'i rgyu mtshan yod de/ tshogs pa gcig pa'i dbang nyid yin no/ /de ltar yang / tshogs pa snga ma nyid kyis ni/ /shes dang yul gyi skad cig ma/ /snang bcas gzugs ni skyed byed bzhin/ /gang gi lhan cig myong ba yin/ /zhes gsungs so/ /'on kyang lhan cig rig pa yang tha dad par nges par rtogs pas tha mi dad par mi rigs so//gang gi rgyus grub ces sngar smras pa ma yin nam/ smras pa/ bden mod kyi smras pa tsam nyid kyis grub pa ni ma yin no/ /'di ltar mngon sum gyis tha dad pa nyid du rtogs pas de dang lhan cig rig ste/tha dad pa med na mi 'byung ba'i phyir tha dad pa nyid du sgrub par byed do/ /gtan tshigs de ni 'gal ba yin no/ /'on te zla ba gnyis su snang ba bye brag med kyang lhan cig dmigs pa srid do zhe na/ ma yin te/ de dang lhan cig dmigs pa 'khrul pa yin pa'i phyir ro/ / 'khrul pa yang zla ba gcig tu snang ba dus gzhan la sogs pas gnod pa'i phyir ro/ /de lta bas na 'khrul pa med par lhan cig dmigs pas tha dad pa nyid yin no/ /yang de lta bas na gtan tshigs 'gal ba yin no/ /de la dus gzhan la sogs par lhan cig tu snang ba med pas/ gang gi phyir de bas na 'khrul pa yin par grub po/ /de ltar yang gnod pa can med na 'khrul par mi 'grub po zhes gsungs so/ /gzhan yang lhan cig dmigs par nges pa zhes bya ba 'di rang bzhin gyi gtan tshigs yin te/ rang bzhin gyi gtan tshigs kyang mngon sum gyis grub pas tha snyad tsam sgrub par byed do//'dir mngon sum gyis bye brag tu grub pa med de des na 'di ji ltar na rang bzhin gyi gtan tshigs yin te/ de'i bdag nyid kyi 'brel pa ma grub na gzhan gang las rang bzhin gyi gtan tshigs su 'gyur/ gzhan yang bye brag med ces bya ba'i don gang zhig yin par 'dod/ci bye brag med pa tsam yin na/ 'on te bye brag las bzlog pa nyid gcig yin/ gal te re zhig med pa sgrub na/ de'i med pa dang lhan cig dmigs par nges pa lhan cig 'bral ba ci zhig yod/ 'di ltar bye brag tu snang bas des na lhan cig dmigs par 'dzin pa med do//de'i snang ba med pa'i phyir ci ltar de'i gtan tshigs sgrub par byed/ sngon po dang shes pa gnyis so sor snang ba med na lhan cig dmigs par nges pa med do/ /'on te lhan cig dmigs par nges par zhes bya ba'i gtan tshigs gcig gi don yin na/ de'i tshe yang gcig nyid la dmigs pa yin nam/rnam pa la yin/ de la rtog pa gnyis su 'gyur ro/ /de la gcig la dmigs pa yin na ni de nyid ma grub po/ /srog chags gnyis pa'i yang des dmigs pa'i phyir ro/ /'on te gnyis pa'i des dmigs pa med na rab rib can gyis skra shad la sogs pa de bzhin du de dag gis dmigs pa med do//ma yin te/ de la 'dir 'khrul pa yin pa'i phyir rnam pa gzhan dmigs pa ni med do/ /'dir yang mig ma nyams pa la sogs pa'i shes rab la 'khrul pa med do zhes bsgrubs so/ /de lta bas na lhan cig dmigs par nges pa gcig tu ma grub po//'on te nges par rig pas bye brag tu sgrub par byed na/ 'di ltar gang nges par rig pa de rnam pa yin pa'i bdag nyid yin no/ /ji ltar rang rig pa ni gzhan gyi ngo bo ma yin pa ltar/ nges par rig pa'i nang du 'dus pa rang rig pa zhes bya ba ni ma yin no//snang bar ma 'dus pa'i bum pa la sogs pa de snang ba nyid ces bya ba ni ma yin no/ /de lta bas na sngon po la sogs pa nges par rig pa nyid nges par rig par 'dus pa nyid ces bya bar grub ste/ nges par rig pa tha dad pa ma yin no zhe na/ de ni mi rigs te snang ba'i nang du 'dus pa nyid bzhin du nges par rtogs pa nyid du sngon po la sogs pa so sor snang ba 'dus pa ni ma yin te/phyi rol gyi ngo bo nyid du mngon sum gyis grub pa'i phyir ro/ /phyi rol gyi ngo bor rtogs pas de bas na bye brag med par mi rigs te/ bye brag med par mngon sum dang 'bral ba'i phyir ro//'on te spyi'i ngo bor rtogs pa yang nges par rig par 'dus pa nyid de/ rmi lam du nges par rtogs pa'i sngon po la sogs pa bzhin no zhe na/ de ni mi rigs te/ nges par rig pa'i sngon po la sogs pa de dag kyang tha dad pa nyid yin te/thams cad du phyi rol dmigs pa yin te/ yul dang dus la sogs pa gzhan gyi bdag nyid yin par bstan to/ /'on te yul la sogs pa gzhan du ji ltar snang zhe na/ yul thag ring po na gnas pa'i zla ba'i dkyil 'khor shing gi rtse mo na snang ba bzhin no//de lta bas na lhan cig dmigs par nges pa yang ma yin la nges par rig pa yang ma yin pas bye brag med par mi sgrub ste/ mngon sum gyi sa bye brag nyid du grub pa'i phyir ro/ /de bas na rnal 'byor spyod pa'i gzhung legs pa ma yin no/ /de ltar na rnam pa dang bcas pa'i shes rab ji ltar khas len zhe na/spyi dngos po sngon po la sogs pa nges par rig pa'i shes pa rnam pa nyid du mi rigs so/ /de ltar na rnam pa med par ji ltar gzhag ce na/ gal te rnam pa nges pa yin na sngon po'i don sngon po'i rnam pa las dang / ser po ser po'i rnam pa las zhes bya ba la sogs pa rnam pa de rtogs pa las de'i don rtogs pa nyid du 'gyur te/don so sor nges pa nyid yin no/ /gal te yang rtogs pa'i ngo bo tsam 'di yin na/ rtogs pa'i ngo bo thams cad kyi thun mong ma yin pa'i phyir sngon po dang ser po la sogs pa'i khyad par rtogs par ni mi 'gyur te/rtogs pa'i ngo bo tsam las ni gang gis 'di sngon po yin gyi ser po ni ma yin no zhes bya/ 'dir smras pa/ de rnam pa dang bcas pa yin na gsal bar don mi 'grub ste/ don mthong ba med pa'i phyir ro/ /gang mthong ba de ni shes pa'i rnam pa nyid yin no/ /spyod yul rnam pa la dmigs pas phyi'i don ni ma yin no//'dir smras pa/ rnam pa med na shin tu don rtogs pa nyid de/ don de'i rang gi ngo bo so sor nyams su myong ba'i phyir ro/ /ji ltar so sor snang ba thun mong nyid rtogs pa yin par ni mi 'gyur te/ so sor nges pa nyid du so sor snang ba las ngo bo so sor nges pa grub po//de lta na las so sor nges pas 'di thams cad legs par gnas so/ /don gyi rang gi ngo bor nges par rig pa la sogs pas kyang shes pa las tha mi dad par rtogs pa med de/ rang gi ngo bor nges par rig pa mngon sum gyi bdag nyid kyis lhan cig dmigs par nges pa rjes su dpag pas bsgrub par bya ba la gnod pa'i phyir ro//de bas na lhan cig dmigs par nges pas bye brag med pa ni ma yin no/ /'dir lan gdab par bya ste mngon par gyis phyi'i don dkar po dang ser po la sogs pa'i ngo bo rtogs nas shes pa yang dus phyis shes pa gzhan gyi shes pa'i ngo bo bzung nas mngon sum du byed do zhes 'dir re zhig gang smras pa de ni mi rigs te/nges par rig pa'i yul can dus phyis byung ba'i mngon sum ma dmigs pa'i phyir ro/ /don gyi rnam pa las tha dad pa'i shes pa snang ba ni med do//yul mi snang ba can la mngon sum zhes mi bya'o/ /de bas na nges par rig pa'i yul rtogs pa med pas/ mngon sum mi dmigs so/ /'dis ni don gyis go ba'i lan yang btab pa yin te/ don gyis go ba la don las tha dad pa'i shes pa ni mi snang ngo //yul gyi rnam pa mi snang ba can/ ji ltar don 'dzin par byed de don gyis go ba yin/ de lta bas na don rtogs pas nges par rig pa nyid kyang don rtogs pa yin te/ gzhan du na don rtogs pa nyid med do/ /nges par rig pa med na don gyis go ba nyid mi srid do/ /de ltar yang / 'dres pa dag ni mthong 'gyur las/ /mthong ba zhes ni bya bar nges/ /de ltar gang phyir 'dis de yang / /gzhan gyi mthong ba zhes byar brjod/ /ces gsungs so/ /de lta bas na lhan cig dmigs par grub pa yin no/ /lhan cig dmigs par nges su zin kyang / /ngo bo tha dad par rtogs pa ma yin nam/ji ltar bye brag med pa yin/ /de ltar na yang / ngo bo dbyer med mthong ba yis/ /blo ni dbyer med pa ru gzhag /ces gsungs so/ /'dir smras pa/ don tha dad par snang ba sngon po'i ngo bo nyams su myong ba las gzhan pa nyid ma yin no//de gnyis lhan cig dmigs par nges pa ni/ zla ba gnyis pa la sogs pa bzhin du 'khrul pa yin pa'i phyir zhes smras pa ma yin nam/ gnyis kyi ngo bor dmigs pa nyid ni med de/ 'dir ji ltar 'khrul pa dmigs pa de ltar tha dad pa yang yin te/ gnod sbyin ji ltar de ltar gtor ma yang de lta bur rigs pa yin no//de lta bas na dpe med pa'i phyir rjes su dpag pas bsgrub bya ma grub po/ /'dir smras pa/ bye brag tu dmigs pa nyid ces bya ba gang la ltos nas brjod/ nges par rig pa la ltos pa yin no zer na/ sngon po la sogs pas tha dad pas nges par rig pa rtogs pa nyid sngar bsgrubs zin to//'on te bde ba la sogs pa'i ngo bor nges par rig pa tha dad par nges par rig go zhes smras na/ de la yang smra bar bya ste/ bye brag tu smra ba med do zhes bya ba la sogs pa de'i don ni 'dir/ lhan cig dmigs par nges pa dag phan tshun phan par byed pa dang /phan par bya ba'i ngo bo nyid med pas/ gzung ba dang 'dzin pa yang med do/ /gang cung zad byed pa med pa ni 'dzin par gyur pa yin no/ /lhan cig dmigs pa la ni 'dzin par byed pa cung zad kyang med do/ /rang gi ngo bo grub pa nyid kyi phyir rnam par 'gyur ba yang mthong ba med do//gzhan du mthong ba med pa'i phyir ro/ /shes pa'i phyir ro zhes zer na/ shes pa nyid ces bya ba 'di ci zhig yin/ ci skyes pa yin nam/ rnam par 'gyur ba yin nam/ thob pa yin zhes bya ba rnam par rtog pa gsum du 'gyur ro/ / re zhig skyes pa ni ma yin te/ 'dzin pa don las skyes pa med pa'i phyir ro/ /rnam par 'gyur ba yang mi srid de/ sngon mthong ba las gzhan nyid du mthong ba la rnam par 'gyur ba nges par brjod do/ /'on te mi shes pa shes pa skyes pa nyid rnam par 'gyur ba ste/ 'di ltar 'on kyang 'dzin par byed pa'i shes pa bskyed pa ni thob pa zhes bya'o//de yang don las tha dad pa yin nam/ /don las tha dad pa ma yin/ gal te tha dad pa yin na don gyi rnam par 'gyur ba zhes bya bar 'brel ba ci zhig yod shes pa de ni don gyis bskyed do zhes zer na/ de ltar na shes pa ci zhig yod/bskyed bya dang lhan cig rten dang brten pa'i ngo bo yin no zhe na/ mi rigs te/ 'dam du lhung ba la snyam sa'o snyam pas gnas skabs der 'grub pa ni med do/ /rten dang brten pa'i ngo bo'i nus pas/ las kyi ngo bor nus par 'gyur ba ni med do/ /'on te bskyed bya'i shes pa de yang shes pa'i dngos pos bskyed na/de yang tha dad pa'i nyid yin na/ yang shes pa bskyed pas thug pa med par 'gyur ro/ /don te don las shes pa tha dad na/ shes pa las don tha dad pas/ don dang shes pa tha dad pa las thal bar 'gyur ro/ /de lta bas na nges par rig pa'i bdag nyid yin pa'i phyir ro//shes pa las tha dad pa med pas/ lhan cig dmigs par nges pa las mngon par 'dod pa'i don grub po/ /'dzin pa'i rnam pa nyid ji lta ba de bzhin du gzung ba'i rnam pa yang yin te/ bde ba la sogs pa bzhin du sngon po'i rnam pa yin pas rang rig pa kho na yin pa'i phyir rnam par rig pa tsam du grub po//'di ltar bde ba la sogs pa yod pas sngon po la sogs pa rnams las tha dad par 'dzin par byed pa nyid tha dad pa ni ma yin te/ lhan cig dmigs par nges pa med pa nyid kyis lhan cig tu gyur pa la bya ba med pa las/de gnyis tha dad pa med par ma grub ste/ tha dad par rtogs pa nyid ma yin nam/ 'dir smras pa/ bde ba la sogs pa dang / sngon po'i rnam pa tha dad pa med par bsgrub pa 'ba' zhig tsam gyi skabs ma yin te/ 'on kyang bde ba la sogs pa'i rnam pa rang rig pa nges par rig pa dang /lhan cig sngon po'i rnam pa dang bye brag med do zhes bya ba ni tshad ma'i don yin no/ /de bas na de nyid kyi phyir sngon po de shes pa de zhes bya ba la/ de zhes bya ba 'di ni sngon po nyid la 'jug ste/ de bas na sngon po'i shes pa dang / sngon por bye brag med do//bde ba'i rnam pa'i shes pa ni sngon po'i bde ba nyid ma yin te/ bde bar shes pas nges par rig par bya'o/ /de lta bas na bde ba'i 'dzin par byed pa bde bar 'dus la/ de bzhin du sngon po la sogs pas 'dzin par byed pa sngon por 'dus pa nyid kyis/ de gnyis lhan cig dmigs par nges pa yin no//sngon por dmigs pa spangs nas dmigs par nus pa med do/ /dmigs par dmigs pas de'i dmigs pa las tha dad na/ gzhan du dmigs par 'gyur bas/ tha dad pa med par lhan cig dmigs pa yin te/ chu dang 'o ma bzhin no//de bas na gang lhan cig dmigs par nges par de tha dad par ma dmigs te/ de bas na de tha dad pa ma yin no/ /gzhan du na dngos po thams cad kyi tha dad pa dang tha dad pa med par gzhag pa nyams te/ dngos po thams cad 'dres pas rnam par dbye ba med de/ me dang lcags kyi gong bu bzhin no//de lta yin na tha dad par snang ba nyid kyang sngon po'i ngo bo nyams su myong ba las/ don gzhan nyid ma yin par ci ltar de skad smras/ bde ba la sogs pa nges par rig pa rnams dang sngon po la sogs pa gzung ba dang 'dzin par gzhan dag 'dod pas de'i bsam pa las lhan cig dmigs par nges pas tha dad pa med par bsgrubs pa la nyes pa med do//'di ltar lhan cig dmigs par nges pa yin na phan tshun phan pa byed pa med pas rang rig pa yin te/ tha dad pa yang tha dad pa ma yin te rang rig pa'i bdag nyid yin pa'i phyir ro//de ltar na/ rang rig gi ngo bor 'dus pas de gnyis tha dad par 'dzin pa mi srid pa'i phyir thams cad kyi bdag nyid kyang tha dad pa nyid ma yin no/ /'dis ni ma grub pa dang 'gal ba dang ma nges pa nyid kyis nges pa thams cad spangs so/ /bye brag tu rig pa med pas tha dad pa yin no zhes brtag par mi nus so//de ltar na rang rig pa de rang rig ngo bo 'dus pas gzhan rig par gyur pa mi rigs so/ /de las gzhan ni cung zad med/ /ces gsungs so/ /bde ba nyams su myong ba'i dus su de'i sdug bsngal nyams su myong ba med de/ de bzhin du sngon po la sogs pa yang yin te zhes bya ba ni tshad ma'i don yin no//de ltar gnyis med pa yin na ci ltar rjes su dpag par 'gyur/ gal te tha dad pa la brten pa rjes su dpag pa yin na/ de'i tshe gnyis med pa dang yang 'gal ba yin no/ /gang zhig yang tha mi dad pa la brten pa yang gzhan gyi mtshan nyid dang mi dmigs pa'i mtshan nyid dang /bdag nyid gcig par shin tu rig pa nyid yin te/ de bzhin du gang mngon sum gyi tha dad pa las ldog par nyams su myong ba de dag ni tha dad pa med pa nyid yin te/ dper na sngon po de nyid la sogs pa'i rang gi ngo bo la ltos nas/tha dad pa las log par nyams su myong ba bzhin no/ /de bzhin du yang dngos po thams cad rang dang gzhan gyi ngo bo ltos nas tha dad pa las log pas mngon sum gyis rtogs pa ni rang bzhin gyi gtan tshigs yin te/ tha dad pa las log par rtogs pa tsam dang 'brel pa thams cad tha dad par rtogs pa med do//de lta bas na rang bzhin gyi gtan tshigs kyi mtshan nyid rjes su dpag pa grub po/ /de bzhin du gang zhig ma dmigs pa de ni de ltar tha snyad du bya ba ma yin te/ dper na ka ba la sogs pa mi dmigs pas bum pa la sogs pa bzhin no//dngos po thams cad bye brag tu mi dmigs pa ni mi dmigs pa'i mtshan nyid rjes su dpag pa zhes bya'o/ /'on te 'bras bu'i mtshan nyid med do zhes zer na/ de lta yin na rnam par rig pa tsam la ji ltar phyi'i don grub ces bya ba'i yang 'gal bar 'gyur ro//'on kyang rnam par rig pa tsam gyi phyogs la phyi'i don 'gegs pa nyid kyi phyir de'i sgo nas rgol ba ni ma yin te/ gang zhig gis gang sun phyung ba de dang de'i sgo nas rtsod pa sbyor ba ni ma yin te/ gzhan du na gang cung zad rtsod pa mi sbyor ba med par 'gyur ro//de mod kyi gnyis su med par smra bas kyang rgyu dang 'bras bu'i ngo bo bkag pa kho na yin te/ de dag kyang sgo de nas rtsod do zhes bya ba de ni gang cung zad kyang ma yin no/ /gzhan yang gnyis su med par smra ba rnams bye brag 'di dag thams cad kun rdzob tu khas len te/ gal te de ltar yin na mngon sum dang rjes su dpag pa'i bye brag yod pas 'dir ci zhig 'gal ba yod/ de ltar re zhig spyir lan btab pa bstan nas/ da ni rgol ba tha dad pa'i lan gdab par bya ste/ lhan cig dmigs par ma grub ste/ 'di ltar sngar yul dmigs nas phyis nges par rig pa 'di rtogs pa'i mngon sum las don gyis go ba yin no zhes re zhig gang smras pa de'i lan gdab ste/yul gyi rnam pa spangs nas/ shes pa tha dad par rtogs pa'i mngon sum mam/ don gyis go ba de bzhin du mthong ba ni med pa kho na'o/ /don dang 'brel zhing shes pa nyams su myong ba mthong na yul gyi don ji ltar rtogs te/de'i tshe sngon po'i don rtogs pa med pa'i phyir ro/ /nges par rig pa'am/ don nges par rig pa ste ji ltar shes pa rtogs pa yin/ 'on te blo yang de'i tshe nges par rig na shes pa rig pa yin no/ /yul nges par rig pa'i dus na yul las tha dad pa'i shes pa'i rnam pa nges par rig pa med pa'i phyir ro//gang yang 'ga' zhig gis yul shes pa med pa zhes bya ba la sogs pa smras pa de dpyad par bya ste/ yul las tha mi dad pa'i blo ma rtogs te don mi dmigs pa zhes bya ba yin na 'dir grub pa bsgrub pa kho na'o//'on te tha dad pa min na de ma shes pas de yang mi dmigs so/ /rjes su dpag pas shes so zhes zer na/ yul gyi rnam pa dang bral bas rjes su dpag pas kyang nges par rig pa ma yin no/ /bde ba la sogs pa 'dzin par byed pa ma yin no zhes gang smras pa de las tha dad pa'i sngon po la ltos nas rigs pa kho na yin no//nges par rig pa dang tha mi dad na ni yang sngon po la sogs pa gang dag yin pa thams cad kyi 'dzin par byed pa nyid yin te/ gang cung zad gzhan gyis smras pa bzhin no/ / gang lhan cig dmigs par nges pa nyid du bsgrubs pa re zhig bye brag med pa ni ma yin te/ sngon po dang ser po gnyis tha dad par yang lhan cig nges par dmigs pa'i phyir ro zhes smras pa de mi rigs te/ de la nges par mthong ba med pa'i phyir ro/ /bde ba la sogs pa nges pa de nges par rig pas sngon po la sogs pa de nges par rig pa yin pas lhan cig dmigs par nges pa med pa ni ma yin te/sngon po dang ser po bzhin no/ /nges par rgyu mtshan de smros shig ces gang smras pa de la/ lhan cig dmigs par nges pa'i rgyu mtshan yin no zhes rtogs par bya'o/ / de ltar yang tshogs pa snga ma'i zhes bya ba la sogs pa smras pa de rigs pa ma yin te/ tha dad par grub pa yin na tshogs pa gcig pa'i dbang gis lan gdab par rigs na/ 'dir yang sngon po dang ser po nges par rig pa tha dad pa med par dmigs pa med par nges pa nyid do/ / gzugs dang snang ba gnyis kyang gang zhig tha dad pa med par dmigs na gang cung zad kyang tha dad pa med par 'dod do/ /lhan cig dmigs par nges pas tha dad pa med de zla ba gnyis pa bzhin no zhes bya ba de la zla ba gnyis pa dang / de nges par rig pa gnyis 'dir tha dad pa nyid du cung zad kyang mi 'dod de bzlog par 'khrul pa mi srid pa'i phyir ro//ji ltar rig pa de bzhin du don med pa'i phyir ro/ /lhan cig rig pa yang bye brag tu rig na bye brag med par mi rigs so zhes gang smras pa de yang dgag par bya ste tha dad par rtogs so zhes bya ba de nyid ma grub ste/ gzung ba dang 'dzin pa gnyis mngon sum gyis tha dad par rtogs pa med do zhes bsgrubs zin to//lhan cig nges par rig pa dang med na mi 'byung ba'i phyir tha dad par sgrub par byed pa yin no zhes gang smras pa de yid la re ba tsam mo/ /lhan cig pa'i don ni tha dad pa las bzlog par 'dod pa'i phyir ro/ /lhan cig pa ni lhan cig kho nar dmigs pa ste/ tha dad pa med ces bya ba'i bar du'o//'o ma dang chu lhan cig pa'i gnas skabs bzhin no/ /de lta bas na mngon sum gyis tha dad pa med par grub pa la rang bzhin gyi gtan tshigs kyis tha snyad tsam bsgrub po zhes bya ba de nyid ni rigs pa yin no/ /gang sngar lhan cig dmigs par nges pa'i phyir zhes bya ba'i don gang yin par 'dod ces bya ba la sogs pa bsgrubs pa/de yang rnam par rtog pa'i spros pa tsam 'ba' zhig ste/ tha dad pa med pa nyid lhan cig dmigs par nges pa ste/ tha mi dad par bsgrubs pa la gnod pa can med do/ /gang lhan cig dmigs par nges pa'i phyir zhes bya ba'i gtan tshigs kyi don de la yang brtag pa rnam pa gnyis te/gcig dmigs par byed pa yin nam/ nges pa gcig dmigs pa zhes bya gal te rnam pa gcig yin na des de ma grub ste/ gzung ba dang 'dzin pa dag tha dad par rtogs pa'i phyir ro/ /'on te skyes bu gcig dmigs pa lhan cig dmigs pa yin na/de'i tshe yang gsal ba kho nar gsung ba'i rnam pa rtsig pa la sogs pa dang / skyes bu gzhan yang rtogs pa'i phyir ro zhes smras pa/ de lta bu de dag thams cad ni nam mkha' ldang ba yin te/ rnam pa gcig tu dmigs pa la gnod pa med pas/ bye brag med par bsgrub par bya ba la gnod pa med do//'dis ni skyes bu gcig pa dmigs pa zhes bya ba'i lan yang btab ste/ skyes bu gzhan dmigs par ni rang rig pa'i mngon sum gyis gnod pa las na/ skyes bu gzhan dmigs par rang rig pas ni mi dmigs pa'i phyir ro/ / rjes su dpag pa yang mngon sum mi 'jug par 'jug pa med pa'i phyir ro/ /yang spyi yul nyid yin pa'i phyir/ rang gi mtshan nyid gzhan nges par rtogs pa rjes su dpag pas ni bsgrub par mi nus so/ /gzhan nges par rtogs pa la mi slu ba ni ma yin te/ rmi lam na yang de lta bu'i tha snyad kyis rjes su dpag pa mthong ba'i phyir ro//'on te nges par tha dad pa med par sgrub na zhes bya ba la sogs pa sun 'byin pa phyi'i ngo bor rtogs pa'i phyir zhes gang smras pa de ni mi rigs te/ phyi'i ngo bor rtogs par ma grub pa'i phyir ro/ /dkar po dang bde ba la sogs pa'i ngo bo 'dzin par byed pa nyid las phyi'i ngo bor rtogs pa ni med do//dkar po dang bde ba la sogs pa'i 'dzin par byed pa ni dkar po dang / bde ba la sogs pa rig bya dang / bdag nyid gcig pas na nang du 'dus pa'i phyir ro/ /gang dang gang nang du 'dus pa de dang / de ni phyi'i ngo bor rig bya yin par mi rung ste/de lta bas na nges par rig pa dang / sngon po la sogs pa gnyis dbyer med do zhes bya ba ni grub pa'i mtha' yin no/ /mngon sum gyi tha dad pa nyid du grub po zhes gang smras pa/ de'i lan yang btab pa kho na yin te/ gzung ba las mngon sum gyis bye brag ma grub pa'i phyir ro//lhan cig dmigs par nges par grub pa zhes bya ba/ rtsod par smra ba'i mchog slob dpon dpal shes rab 'byung gnas sbas pa'i zhal snga nas kyis mdzad pa rdzogs so// //bal yul gyi paN+Di ta tsa haM du shAn ti b+ha dra'i zhal snga nas dang / bod kyi lo tsA ba 'bro seng dkar dge slong shAkya 'od kyis bsgyur ba'o/