CLOSE WINDOW

D4253
བོད་ཡིག

/ //[]@##/ /rgya gar skad du/ k+Sha Na b+ha ga sid+d+hi/ bod skad du/ skad cig ma 'jig pa grub pa/ 'jam dpal gzhon nur gyur pa la phyag 'tshal lo/ /'dus byas thams cad ni skad cig ma'o zhes kha cig gis rtogs so//de la 'di la skad cig yod pas na skad cig dang 'brel ba'i dngos po ni skad cig mar brjod dgos na skad cig gi sgras brjod par bya ba'i don ni pha rol po dag gis rnam par gzhag par mi nus so/ /de dag gi gzhung ni skyes ma thag tu 'jig pa la brten pa skad cig ma yin no zhes bya ba yin na skyes pa'i don ni gdon mi za bar yod pa de 'du ba'i dus na gnas pa yin te/des na skyes ma thag tu 'jig pa dang 'brel par bsgrub par bya ba la dpe 'ga' yang mi 'thad do/ /khyab pa rab tu bsgrub pa'i tshad ma ston pa'i yul gyi dpe ni sgrub par byed pa'i sbyor ba dag la nges par nye ba yin no//blo dang me lce la sogs pa dpe'i dngos por nye bar blangs pa dag ni skad cig tsam gnas par the tshom za bas mngon par 'dod pa'i gtan tshigs kyis khyab pa sgrub pa'i tshad ma ston par mi nus so/ /don bya ba byed pa'i rang bzhin yod pa zhes bya ba'i gtan tshigs nye bar bkod pa ni skad cig ma yin pa la yang 'jug srid pa'i phyir skad cig ma nyid kyi khyab pa sgrub par dka' ba kho na'o//'di ltar dngos po skad cig ma ma yin pa yang lhan cig byed pa nye ba la ltos nas rim gyis 'bras bu skyed pa'i nus pa dang ldan pa gang gis bzlog par bya ba 'di snyam du cung zad kyang mi byed pa ni gzhan gyis ltos par bya bar mi 'thad do snyam na/de ni mi rigs te/ 'di ltar gzhig par bya ba'i dngos por khyad par sgrub pa'i byed pa la mi ltos kyang / /tho ba la sogs pa nye bas de zlog par byed la de dag nye bas kyang bzlog par bya ba'i dngos po la khyad par 'ga' zhig sgrub pa ni ma yin no//rjes su 'gro ba dang ldog pa dag las 'jig par byed pa nyid du rtogs pa ldog par byed pa'i dngos po'i byed pa ni bsnyon par mi nus so/ /yang dper na sa bon la sogs pa dag gtan med par myu gu la sogs pa'i 'du byed pa grub par mi byed bzhin du yod pa dang med pa'i rjes su byed pa'i sgo nas rtogs pa'i rgyu'i dngos po nyid bsnyon par mi nus pa de bzhin du tho ba la sogs pa dag kyang ldog par byed pa yin no//ji ltar tho ba la sogs pa dag dang nye ba dag las 'dres pa dang tha dad pa ma grub kyang bum pa la sogs par 'jig par byed pa'i dngos po nye ba la ltos nas 'gag pa de bzhin du skad cig ma ma yin pa yang khyad par sgrub par byed pa ma yin pa'i lhan cig byed pa nye ba dag las rang gi don bya ba la 'jug go//des na gang na yod pa de thams cad ni skad cig ma'o zhes bya ba ni mthong ba phyogs su byas pa mtha' dag la yang mi mthun pa'i phyogs las ldog par the tshom za ba nyid kyis 'di ni ma nges pa'i gtan tshigs ltar snang ba yin no//gzhan yang gtan tshigs 'di ni ma grub par yang bsgrub par nus te/ 'di ltar mngon sum gyi tshad mas rab tu grub pa'i dngos po rnams kyi yod pa gtan tshigs su byed pa na ci 'dra ba grub pa de 'dra ba'i kho na bzung ba yin pa na dngos po mtha' dag gi yul can gyi yod pa nyid ni skad cig ma ma yin par rab tu grub po//de 'dra ba ni skad cig ma grub par 'gal ba'i phyir nus pa med pas nye bar dgod par mi bya ba kho na'o//yod pa dag pa nye bar 'god na ni 'ga' yang tshad ma 'gas kyang ma grub pas ma grub po/ /ci 'dra ba grub pa de 'dra ba nye bar 'god na ni skad cig ma ma yin pa'i rang bzhin gyis yod pa bzung ba yin na de ni skad cig mar 'gal lo zhes sngar bstan pa kho na'o/ / de bzhin du mthong ba'i don gyi tshogs dang 'brel pa'i skad cig ma nyid bsgrub par bya ba yin na mngon sum gyis gnod do/ /'di ltar dbang po'i byed pa'i rjes su byed pa snang bzhin pa'i gsal ba'i tshogs la 'du ba tha mi dad pa'i rang bzhin 'dzin pa'i rtogs pa ba lang zhes bya ba de lta bu'i rnam pa can skye ba ni skad cig mar smra ba la gnod do//dbang po yod pa dang med pa'i rjes su med pas de las gzhan pa'i dbang po las skyes pa las khyad par med par rtogs pa 'di dag mngon sum ma yin par ni rtog par mi 'thad do/ /de bzhin du phyi'i don de'i nye ba ltos pa'i rang bzhin yin pa'i phyir don med par yang brtag par mi nus so//ji ltar mdun na gnas pa sngon po la sogs pa tsam gyis skyes pa'i rnam pa'i rjes su byed pa can mig la sogs pa'i shes pa dag med pa'i don 'dzin par byed pa la/ brten pa ma yin pa de bzhin du gsal ba yod na 'byung ba dang de la tha mi dad pa'i rnam pa'i rjes su byed pa'i rtog pa 'di dag kyang gsal ba la 'du ba tha mi dad pa'i rang bzhin 'dzin pa'i phyir don med pa can ma yin no//des na dbang po'i rjes su byed pa dang nye ba'i don 'dzin pas na mngon sum du gyur pa ni skad cig mar smra ba la gnod do/ /de bzhin du 'di la ni rjes su dpag pas gnod pas sgrub par nus so//'di ltar gang la shin tu tha dad pa srid pa de la ni dran pa dang ngo shes pa la sogs pa mi srid par mthong ste/ lha sbyin mthong ba dang ldan pa ni mchod sbyin la de nyid yin no zhes ngo shes pa ma yin la mthong bar byed pas gzhan du gyur na yang ngas sngar mthong ba ni de yin no zhes gzhan gyi dran pa ma yin no//de la dngos po rnams skad cig ma nyid yin na sngar gang mthong ba dang gang yang phyis mthong ba de gnyis lha sbyin dang / mchod sbyin bzhin du shin tu tha dad pa'i phyir/ ngo shes pa'i yul gyi dngos por mi 'gyur la/ lta ba dang ngo shes par byed pa dag tha dad pa'i phyir/ ngo shes pa'i rtogs pa yang mi skye bar 'gyur te/lha sbyin dang mchod sbyin gnyis bzhin no/ /de'i phyir gang ngo shes pa dang / gang gis ngo shes pa de ni yul gcig nyid du don gyis rtogs par bya'o/ /des na 'dir tha dad pa ni ngo shes pa'i yul ma yin pas khyab pa de dang 'gal ba ni ngo shes pa'i yul nyid yin te/des na khyab par byed pa 'gal ba dmigs pas tha dad pa sel to/ /des na tshad ma'i don ni 'di yin te/ gang ngo shes pa'i yul yin pa de ni tha dad pa ma yin te/ dper na rtogs pa po dag gis cig car mthong ba'i don gyi bdag nyid khyod kyis mthong ba gang yin pa de nyid ni ngas mthong ba 'di yin no zhes ngo shes par gyur pa yin no//de bzhin du dngos po 'ga' zhig kyang ngo shes par gyur pa yin te/ des na de dag la skad cig ma'i mtshan nyid tha dad pa med do/ /des na de ltar rjes su dpag pas rab tu grub pa'i gcig nyid ni skad cig ma nyid kyi bdag nyid can du ma nyid la gnod par nus pa kho na'o//ngo shes pa po la ltos pa'i tshad ma yang rjes su rtogs par bya'o/ /de bzhin du bcol ba dang bsgos pa dang smras pa la sogs pa dag la yang dran pa mthong ba na sngar bshad pa'i tshul gyis dran par byed pa'i gcig nyid ston par byed pa kho na yin pas skad cig mas byas pa'i du ma la gnod pa nyid do//des na de ltar skad cig ma nyid la ni sgrub par byed pa mngon sum med la rjes su dpag pa yang med cing gnod par byed pa ni mngon sum dang rjes su dpag pa yod pa yin no/ /'gro ba mtha' dag gi grags pas kyang dngos po rnams dus cung zad gnas pa yin pas grags pas kyang gnod do//des na skad cig ma nyid ni sgrub par mi nus so zhe na/ 'di la lan nyon cig /don gang zhig skad cig gi sgra'i brjod par bya ba nyid du 'gyur ba'i don de nyid mi shes so zhes gang brjod pa de ni mi rigs so/ /gang gi phyir 'jig rten dang skar ma shes pa'i gtsug lag dag tu skad cig gi sgra dus su cung zad brjod par rtogs par rab tu sbyor ba yin te/'di ltar skad cig gcig sdod cig ces smra ba yin no/ /skad cig thang cig yud tsam zhes bya ba yang dus cung zad brjod par rtogs pa skad cig gis smra ba yin no/ /des na bstan bcos gzhan dag gi rtogs pa'i rjes su 'brangs pa dang 'jig rten pa'i rtogs pa'i rjes su zhugs nas skad cig gi sgra dus cung zad brjod pa yin no//dus gang la snga phyi'i rnam par dbye ba rnam par gzhag par mi nus pa de ni snga phyi'i cha gnyis dang bral ba skad cig ces bya'o/ /dus gang la dus kyi rnam par dbye ba yod pa ni rnam par dbye ba'i dus la ltos te shin tu chung ba brjod mi nus so//dus shin tu chung ba yin pa'i phyir na dus shin tu chung ba brjod pa skad cig gi sgra ni snga phyi dben pa'i dus nyid la 'jug par lta'o/ /des na skad cig gi sgra ni tshig gi don shes pa can nyid do/ /skad cig ma nyid bsgrub par bya ba la dpe mi srid do zhes gang smras pa de la yang brjod par bya'o//'di la dpe ni yod kyang chos mthun pa tsam 'ba' zhig gis dngos po gzhan dag de'i rang bzhin du 'gyur ba rigs pa dang ldan pa ma yin no/ /des na khyab pa sgrub pa'i tshad mas bsgrub bya dang sgrub byed dag khyab bya khyab byed kyi dngos por bstan par bya ba yin no//khyab pa rab tu sgrub pa'i sgrub byed bstan pa na ni bsgrub par bya ba rtogs par 'gyur gyi gzhan du ni ma yin no zhes des na gal te yang dpe la skad cig mar 'jig pa de lta na yang khyab pa rab tu sgrub pa'i tshad mar rab tu bstan pa nyid las skad cig mar 'jig par grub po//gal te de ltar na bsgrub par bya ba'i chos can nyid la khyab pa'i sgrub pa'i tshad mas skad cig ma nyid du sgrub na yod pa zhes bya ba'i gtan tshigs nye bar blangs pa don med par 'gyur ro zhe na/ chos can nyid la khyab par sgrub par byed pa'i tshad ma rab tu bstan par ni mi nus pa ma yin te/'di ltar khyab pa sgrub pa'i tshad ma ni 'di ltar bstan par bya ste/ gal te sgra rtag par gyur na rim dang cig car dag gis don bya ba la nye bar sbyor bar mi 'gyur ro zhes so/ /'di la ni pha rol pos kyang ji ltar bum pa skad cig ma ma yin yang rim dang cig car dag gis mngon par 'dod pa'i 'bras bu bsgrub par nus pa de bzhin du sgra yang 'gyur ro zhes brjod par nus so//'di la yang lan/ bum pa yang ngas gnod par byed pa'i tshad ma'i yul du byas pa nyid do zhes brjod dgos so/ /des na rnam grangs 'dis pha rol gyi nye bar bkod pa mthong ba'i dngos po mtha' dag rgol bas gnod par byed pa'i tshad ma'i yul du bya ba yin no//gal te pha rol po dngos po 'ga' zhig skad cig ma ma yin par rim dang cig car gyi don byed par nus pa de bzhin sgra yang yin no zhes ma mthong ba yang dogs par byed na de la yang gal te 'ga' zhig der gyur na skad cig ma ma yin pa des kyang rim dang cig car dag gis don byed par mi nus so zhes spyir brjod par bya'o//des na srid par byas pa'i ma mthong ba de yang gnod par byed pa'i tshad ma'i yul nyid du khas blang bar bya ba nyid do/ /de lta yin pa dang mthong ba dang ma mthong ba'i dngos po mtha' dag la khyab pa sgrub pa'i tshad ma bstan par rnam par gnas pa na/gang dag bsgrub par bya ba'i chos can las tha dad pa'i dngos po de dag dpe'i dngos po la brten pa'i phyir bsgrub par bya ba'i chos can las tha dad pa gang dag la gtan tshigs yod pa de dag ni dpe yin te/ bsgrub par bya ba'i dngos po nges pa ni khyab pa sgrub pa'i tshad ma la rag las pa'i phyir ro/ /gal te dngos po mtha' dag gi yul can la khyab pa sgrub pa'i tshad ma srid na/ 'o na ni des na ji ltar dpe dag la bsgrub bya nges par khyab pa sgrub pa'i tshad ma dang 'brel pa de bzhin du bsgrub bya'i chos can la la yang rjes su 'gro ldog rab tu grub pa dag las mngon par 'dod pa grub pas phyogs kyi chos nye bar bstan pas ci bya zhe na/bden mod kyi 'on kyang dngos po'i tshogs ni mtha' yas la khyab pa bsgrub pa yang dngos po mtha' dag gi yul can yin pa des na sgra med kyang bsgrub bya sgrub byed dag gis khyab pa ni dngos po gzhan nyid las rab tu grub pa kho na'o//des na ji ltar ri bong gi rwa med par khyab pa grub pa de bzhin du sgra med par rab tu 'grub pa nyid do/ /de las khyab pa mi 'grub pa'i phyir na sgra'i yod pa ni ji ltar yang phan 'dogs par byed pa nyid ma yin no/ /de lta yin dang khyab pa 'grub pa la khas ma blangs pa'i byed pa can sgra'i yod pa nyid ni tshad ma gzhan kho na las rtogs par bya ba yin no//des na nges pa tshad ma gzhan la rag las pa sgra'i yod pa nyid ni sgra mi rtag par bsgrub par nus pa'i phyir phyogs kyi chos nye bar bsu bar bya ba kho na'o/ /gzhan yang dngos po rnams ni yod pa 'du ba la sogs pa'i dus la ltos pa yin no zhes smras pa/de ni 'du ba ltar re zhig zhog gi dngos po'i yul mtha' dag skad cig mar 'jig pa bsgrub pa na re zhig yod pa rtag pa nyid kyang dngos po med kyang de'i 'du bar lta ga la 'gyur/ ji skad du 'di na ji ltar/ gzhig par bya ba'i 'du byed bsgrub pa la ltos pa med kyang tho ba la sogs pa dngos po zlog par byed pa de bzhin du skad cig ma ma yin pa'i dngos po la khyad par du byed pa ma yin pa yang lhan cig byed pa'i rkyen dag gis don bya ba de dang de la nye bar sbyor bar byed do zhes smras pa de yang ma 'brel to//'di ltar rang gi rgyu dag las skyes pa'i phyir tho ba la sogs pa nye bas dngos po bdag nyid ni byed par mi nus so/ /'jig pa zhes bya ba'i dngos po gzhan zhig byed na ni gzhig par bya ba'i dngos po sngar dmigs pa'i don byed pa la sbyor bar rung bar gnas skabs 'dzin pa'i 'jig byed du mi 'thad do//'di snyam du 'o na ni tho ba la sogs pa dag dmigs pa'i sgrub pa'i rgyu yin no snyam na/ de yang brdzun te/ gang gi phyir dmigs pa'i bdag nyid las ma nyams pa'i bum pa la ni sgrib pa zhes bya ba 'ga' yang med do/ /dngos po rang gi ngo bos dmigs pa'i spyod yul du gyur pa ni ji srid rang bzhin de dang ma bral ba de srid du yul gyi dngos po dang mi 'brel lo//gyur pa ma yin na ni nam yang yul gyi dngos por mi 'gyur te khyad par med pa'i phyir ro/ /'di snyam du gang la tha dad pa dang tha mi dad pa'i rnam par rtog pa'i go skabs yod par 'gyur ba 'jig pa'i rgyu dag gis dngos po byas pa zhes bya ba ni ma yin gyi 'on kyang dngos po med pa nyid du byas pa yin no snyam na/dngos po med pa yang ma yin par 'jug pas don dam par yod pa'i don nyid du 'gyur ba na tha dad pa dang tha mi dad pa'i rnam par rtog pa las mi 'da'o/ /'on te dngos po ldog pa tsam dngos po med pa yin par brjod na de ltar na ni 'o na dngos po med par bya ba ma yin par 'gyur ro//'di ltar gang zhig sngon gyi gnas skabs las gnas skabs tha dad pa dang grub zin pa'i dngos po gzhan dag las kyang tha dad pa'i rang bzhin de ni 'ga' zhig gi ni rjes su 'gro ba dang ldog pa'i rjes su byed pa na des byas par 'gyur ro//dngos po med pa yang gal te sngar gyi gnas skabs las tha dad pa'i gnas skabs can dang don gzhan las tha dad pa'i rang bzhin can du khas len na de lta na ni 'o na de nyid don byed nus pa'i dngos por 'gyur ro/ /don gzhan dag las tha dad pa'i rnam pa dang /rang nyid kyis med pa'i gnas skabs las ldog pa de ni rnam pa dang ldan pa yin la/ rnam pa dang ldan pa gang yin pa de nyid kyang don byed nus pa yin no/ /'dir ni gang zhig rgyu dag gis khyad par can du byed pa de ni 'ga' zhig gi don byed par nus pa yin no//dper na sngon po la sogs pa bzhin no/ /dngos po med pa yang byed pa yin no zhes brjod par nus so/ /gal te ji ltar skyed par byed pa dag gis don byed par bsgrub pa'i nus pa byed pa de bzhin du dngos po med pa'i rang bzhin yang don bya ba tha dad la nus pa med pa'i rang bzhin du rgyu dag gis skyed pa ma yin nam zhe na/brjod pa ci yang rung ste de'i rang bzhin du gyur pa gang yin pa de ni spyi'i rnam par brtag nus pa yin no/ /brtag nus pa gang yin pa de yang thams cad mkhyen pa'i mkhyen pa yod na rang bzhin tsam dang rjes su 'brel pa la snang bar 'gyur ro/ /dngos su rnam par shes pa'i gzung ba gang yin pa de ni mngon du byed pa'i rnam par shes pa skyed par byed pa yin te/skyed byed ma yin pa ni gzung bar mi 'thad pa'i phyir ro/ /des na ji srid du shes bya mtha' dag la khyab pa'i ye shes mi dgag pa de srid du rnam par rtog pas yul du byas pa'i rang bzhin don byed mi nus par brjod par mi nus so//thams cad mkhyen pa'i ye shes bzlog pa'i tshad ma yang gzhan la med la sgrub par byed pa ni yod pa yin no/ /des na dngos po med pa'i rang bzhin de yang don byed pa mi srid pa ma yin no/ /des na rgyu tha dad pas don bya ba tha dad par 'gyur gyi rgyu tha dad pas don byed pa gtan med par ni mi 'gyur te/rang bzhin tsam la gnas pa thams cad mkhyen pa'i ye shes kyi yul gyi dngos po bzlog par mi nus pa'i phyir ro/ /des na don bya ba mtha' dag med na rang bzhin dang 'gal ba rang bzhin med pa yin pa'i phyir ro/ /rang bzhin 'gal ba dmigs pas mi mthun pa'i phyogs las khyad par can gyi rang bzhin nyid ldog pa na don bya ba byed pa nyid kyis khyab pa'i phyir rang bzhin gyi gtan tshigs so//de bas na don byed pa'i dngos po nyid du 'gyur gyi dngos po med pa ma yin no/ /dngos po'i phyogs kyang de nyid gzhan nyid kyi rnam par rtog pa las ma 'das so//des na dngos po med pa rang bzhin dang bral ba'i ngo bo mtha' dag gis stong ba'i rang bzhin can rnam par brtag pa la ni bya ba mi 'thad pa'i phyir ro/ /dngos po med pa byed do zhes bya bas ni bya ba dngos po med pa dang 'brel ba mi 'thad pa'i phyir dgag pa dang lan cig 'brel pa yin no//de lta yin dang 'jig pa'i rgyus dngos po mi byed do zhes bya bas 'di dag gi don du rnam par gnas par 'gyur ro/ /mi byed pa'i byed pa po de yang rgyu nyid ma yin pa'i phyir 'jig pa'i rgyu 'ga' yang med do/ /gzhan yang gzhig par bya ba'i dngos po ci rang bzhin gyi rgyu las ldog pa'i chos can du skyes sam/'on te gnas pa'i chos can du skyes rtog pa dang po la ni dngos po ldog pa'i chos nyid kyis rang nyid kho na 'jig par 'gyur ba'i phyir 'jig pa'i rgyu cung zad kyang mi byed do/ /'on te dngos po rang gi ngo bo nyid kyis mi ldog pa'i chos yin na de ni 'jig pa'i rgyu brgya lhags kyang de'i bdag nyid las mi 'pho ba'i phyir gzhig par mi nus pas 'jig pa'i rgyu cung zad kyang mi byed pa kho na'o//'di snyam du rang gi rgyu dag la ltos nas 'jig pa'i rgyu la ltos par skye bas na ji srid 'jig pa'i rgyu dang ma phrad par de srid du gnas so zhe na/ de yang mi 'thad de/ 'di ltar phyogs 'di ltar ni dngos po rnams 'jig pa'i rgyu nye ba'i dus tshun chad du gnas par rgyus bskyed pa yin no/ /de lta yin dang 'jig pa la dus cung zad ltos par byed pa yin no/ /'jig pa'i rgyu nye ba na yang dus cung zad gnas pa'i chos can rnams la dus cung zad gnas pa'i sngar gyi rang bzhin yod dam 'on te med/gal te yod do zhe na ni yang dus cung zad gnas par 'gyur te/ dus de rdzogs kyang rang bzhin de nyid med pa'i phyir ro/ /rnam grangs 'dis kyang dus cung zad gnas par 'gyur bas nam yang 'jig par mi 'gyur ro/ /de nyid kyi phyir dngos po rang gi rgyu las dus cung zad gnas nas 'jig par 'gyur gyi skyes ma thag tu ni ma yin no zhes kun brtags pa gang yin pa de'i phyogs 'di yang mi rigs so//'di ltar mtshams su gyur pa'i dus rdzogs pa na slar yang dus cung zad gnas pa'i rang bzhin la brgal zhing brtag pa de nyid gnas pa'i phyir dngos po nam yang mi 'jig par 'gyur bas tshul 'di dngos po rtag par khas blang bar 'gyur ro//'on te yang dus kyi mtshams kyi mthar thug par rang bzhin gzhan skyes nas de lta na ni sngar gyi dngos po la ci 'di rtag pa yin nam 'on te mi rtag pa yin zhes brgal zhing brtag par bya ba yin no//gal te phyis rang bzhin rang nyid ldog pa'i mtshan nyid yin na de la 'jig pa'i rgyu'am 'jig pa'i dus la bsdad pas ci bya/ 'on te mi 'jig pa'i chos nyid yin na de lta na yang de la 'jig pa'i rgyu dag gam 'jig pa'i dus la ltos pas ci yang byar med do/ /des na 'jig pa'i rgyu dag ni cung zad kyang mi byed pa nyid do//dper na sa bon myu gu mngon par 'du byed pa ma yin yang myu gu'i rgyur 'gyur ba de bzhin du tho ba la sogs pa yang gzhig par bya ba mngon par 'du mi byed par rjes su 'gro ba dang ldog pa dag las zlog par byed pa'i dngos por rigs pa rnams ldog pa'i rgyur 'gyur ro zhes smras pa gang yin pa de yang mi rigs te/'di ltar bskyed par bya ba'i myu gu la ni gang zhig 'du bya ba dang 'du bya ba ma yin par brtag par 'gyur ba skyed pa'i dus na rang bzhin 'ga' yang yod pa ma yin no/ /sa bon la sogs pa rang gi ngo bo myu gu la sogs pa skyed par rung bar gyur pa na snga na med pa'i myu gu skyed par byed do//gzhig par bya ba'i dngos po gzhig pa'i dus na ni tho ba la sogs pa rang gi ngo bo dang ldan pa dag yod la gzhig par bya ba'i dngos po rang gi ngo bo dang ldan pa yang yod pas na gdon mi za bar brgal zhing brtag pa'i skabs yod par 'gyur te/ ci 'di rang gi ngo bos ldog pa'i chos nyid yin nam/'on te ma yin/ ci thob la sogs pa 'di cung zhig byed pas na ldog par byed pa yin nam/ de ste ci yang mi byed ces gzhig par bya ba'i dngos po la gnas pa'i rnam par rtog pa gnyis rtogs par bya'o/ /bskyed par bya ba la ni ngo bo med pa'i phyir rnam par rtog pa'i go skabs med do//gang yang bskyed par bya ba'i rang gi ngo bo bzhin du gzhig par bya ba la yang rjes su 'gro ba dang ldog pa'i rjes su byed pa mthong ba'i phyir ro/ tho ba la sogs pa ldog par byed pa yin no zhes smras pa gang yin pa de yang mi rigs te/ 'di ltar ji ltar tho ba la sogs pa rnams gyo mo'i gnas skabs skye ba la rjes su 'gro ba dang ldog pa'i rjes su byed pa yin nam 'on te bum pa la sogs pa 'jig pa'i ngang can du byed pa'am/yang na ldog pa tsam sgrub ces the tshom za ba'o/ /de la ldog pa tsam ni sngar bstan pa'i tshul gyis bya bar mi nus pa'i phyir dang /'jig pa'i rang bzhin yang de'i rang bzhin rgyu las skyes pa'i phyir ro/ /lhag mar gyur pa tho ba la sogs pa rnams nyid ni gyo mo'i gnas skabs skye ba la rjes su 'gro ba dang ldog pa'i rjes su byed pa yin no zhes gnas la/ de yang nged kyis khas blangs pa kho na'o/ /thob la sogs pa'i lhan cig byed pa la ltos pa'i nye bar len pa bum pa las gyo mo'i gnas skabs skye ba zhes bya ba ni kho bo cag gi phyogs yin no//des na ji ltar thob la sogs pa cung zad byed pa ma yin yang 'jig pa'i rgyu yin pa de bzhin du skad cig ma ma yin pa'i dngos po rnams la cung zad mi byed pa yang lhan cig byed pa'i rgyu yin par 'gyur ro zhes bya ba gang yin pa de yang dpe med pa'i phyir don la phyogs par gnas pa'i brgal ba bzlog par mi nus so//gal te skad cig ma ma yin pa dag bzhin du 'du byed skad cig ma rnams la yang lhan cig byed po mi 'thad pa ma yin nam/ 'di ltar dper na 'bras bu myu gu snga na med pa de bzhin du myu gu dang rjes su mthun pa'i khyad par dang po'i mtshan nyid kyi 'bras bu yang snga na med pa yin no/ /de la gal te sa bon lan cig byed pa dag gis khyad par du ma byas pa myu gu dang rjes su mthun pa'i khyad par dang po'i bye brag sgrub par nus pa yin na ni khyad par med pa'i phyir myu gu skyed pa la yang lhan cig byed pa dag gis phan ma byas pa nyid nus par 'gyur ro//de ste myu gu skyed pa lhan cig byed pas phan byas pa la ltos pa yin na khyad par dang po skye ba la yang de ltar 'gyur ro/ /skyes pa nas brtsams te gtan du sa la sogs pa sa bon la phan 'dogs par nus pa yang ma yin te/nges pa'i dus su skye ba'i myu gu las thams cad kyi tshe 'byung bar 'gyur ba'i phyir ro/ /'di ltar gal te gang yang rung ba na gnas pa'i sa la sogs pa dag gis sa bon dang myu gu la phan 'dogs par nus pa yin nas la sogs pa dang sa bon thams cad kyi tshe yod pa'i phyir sa bon gyi zhing la sogs pas byas pa'i phan pa thams cad kyi tshe yod par 'gyur ro//de lta yin dang de'i phan pa brgyud pa las byung ba'i myu gu'i zla ba'i mthar thug par skye ba'am/ lo phyed kyi mthar thug par skye ba'am/ lo'i mthar thug par skye ba'i rnam pa thams cad du rang gi dus tshigs su gtan 'byung bar 'gyur ba zhig na de ltar yang ma yin no//des na sa bon gyi zhing la sogs pas byas pa'i phan pa'i gtan yod pa ma yin no/ /de med pa'i phyir khyad par dang po skye ba na lhan cig byed pa'i rkyen la ltos par bya ba ma yin no//de bzhin du myu gu skye ba la yang ltos par bya ba ma yin par 'gyur ro/ /de ltar yin dang skad cig ma rnams kyi don bya ba yang lhan cig byed pa la ltos par mi 'thad do/ /'di snyam du khyad par gyi sa bon dang po skye ba la ni phan tshun nye bar 'du ba'i rkyen dag gis bye brag sgrub par byed la myu gu bskyed pa la ni zhing la sogs pa dag gis so snyam na de la yang sa bon gyi nye bar 'du ba'i rkyen gang yin pa de dag gi sa bon la phan 'dogs par byed pa'i nus pa yang ma yin no zhes rkyen gzhan dag gis bsgrub par bya ba yin la/de dag gi yang nye bar tshogs pa'i rkyen gzhan dag gis yin pa'i phyir thug pa med par 'gyur ro//'bras bu re re bskyed pa la phan tshun nye bar 'du ba'i rkyen tshad med pa sgrub par nus pa yang ma yin no zhe na/ 'di la brjod pa 'bras bu'i rnam pa gnyis te/ gcig ni lhan cig byed pa dag gis byas pa'i khyad par gyi bye brag brgyud pa las skye ba'i chos can yin la/gnyis pa ni lhan cig byed pa'i khyad par la mi ltos par skye ba can yin no/ /de la myu gu ni lhan cig byed pas byas pa'i khyad par brgyud pa las skye ba'i chos nyid yin la khyad par dang po ni lhan cig byed pas byas pa'i khyad par la mi ltos par skyed pa'i chos nyid yin no//sa bon ni rang gi rgyud du gtogs pa yang rung ste/ 'bras bu res 'ga' byed pa na rgyud gzhan dag gis khyad par byas pa yin gyi gzhan du ni ma yin no/ /rgyud gzhan ni res 'ga' 'bras bu skyed pa'i lhan cig byed pa'i rkyen gang yin pa de dag yin te/ dper na myu gu bskyed par bya ba zhing la sogs pa lhan cig byed pa rnams sa bon gyi nus pa sad pa'i rgyu yin pa bzhin no/ /res 'ga' ni lhan cig byed par de dag 'du ba'i rgyu gang yin pa de dag nyid nus pa zad pa'i rgyur 'gyur te/ dper na sa bon la sogs pa'i khyad par dang po skye ba la nye bar 'du ba'i rkyen rnams nus pa sad pa'i rgyu yin pa bzhin no//rnam pa thams cad ni sa bon gyi rgyu gzhan gyi sa nus pa skyed pa kho na 'bras bu'i khyad par res 'ga' bar byed pa rtsom pa yin no/ /nus pa sad pa'i rgyu ni gnyis te/ lhan cig byed pa dang nye bar 'du ba'i rkyen no/ /gang yang nye bar 'du ba'i rkyen tshad med pa dag bstan par bya dgos so zhes smras pa de la yang nye bar 'du ba'i rgyu rnam pa gnyis te/snga na med pa skyes pa dang / yul gzhan nas 'ongs pa'o/ /re zhig gang du snga na med pa skyes pa gang yin pa de dag ni rang gi rgyu dag kho na las nus pa skye ba yin no//yul gzhan nas 'ongs pa gang yin pa de dag rang 'gugs pa'i rgyu kho nas nus pa skyed pa yin pa'i phyir nye bar 'du pa'i rkyen tshad med par brtag pa ci zhig bya des na skad cig ma rnams la phan 'dogs par byed pa ma yin/ yang 'bras bu'i khyad par la la lhan cig byed pa'i rkyen 'thad la/'bras bu la la ni phan pa sgrub pa gtsor byed pa nyid do zhes bya bar nges so/ /gang yang pha rol pos yod pa zhes bya ba'i gtan tshigs dag pa ni ma grub la/ rtag pa dang rjes su 'brel pa ni mi rtag pa la 'gal ba yin no zhes gzhan smras pa gang yin pa de yang dpyad par bya'o//'di la tshad ma ni thob par byed pa yin no/ /thob par byed pa yang don byed nus pa'i dngos po la 'jug par byed pa nyid do/ /'jug par byed pa yang 'jug pa'i yul ston par byed pa tsam mo/ /de la 'jug pa'i yul bstan na shes pas skyes bus bcug cing don yang thob par byed pa yin pa'i phyir tshad ma bya ba rdzogs pa nyid do//des thob par byed pa nyid las gzhan pa'i tshad ma'i byed pa ni med la/ shes pa'i thob par byed pa yang 'jug par byed pa las gzhan ma yin zhing 'jug par byed pa nyid kyang yul rab tu ston pa las gzhan ma yin te/ de lta yin dang mngon sum gyis 'jug pa'i yul ston pa ni 'jug pa'i yul zhen par byed pa yin la rjes su dpag pa ni 'jug pa'i yul nges par byed pa yin no/ /de lta na yang 'di la ni med na mi 'byung ba'i dngos po mthong ba'i stobs kyis rtogs pa'i phyi rol rjes su dpag par bya ba'i don yod pa nyid do zhes nges pa yin la/mngon sum ni mthong bzhin pa'i dngos po med na mi 'byung ba 'dzin pa sngon du 'gro ba can ma yin pa des na nges par byed pa ma yin no/ /ma zhen pa la ni mngon sum gyis 'jug par byed mi nus pas zhen pa nyid 'jug par byed pa yin no/ /zhen pa'i mthar thug pa tshad ma'i bya ba yin pa na yang zhen pa'i yul gang yin pa de nyid mngon sum gyi yin no//zhen pa yang ldog pa'i yul can yin la/ ldog pa yang ldog mtshams kyi dbye bas tha dad pa yin no/ /des na dngos po gcig gi ldog pas gang ji snyed pa de mtha' dag rnam par rtog pa gcig gi yul du byed par mi nus so//de nyid kyi phyir mngon sum gyi sgra la sgra nyid du zhen gyi skad cig ma nyid du ni ma yin no/ /de lta yin dang rnam par rtog pas ni gdon mi za bar ldog pa gcig bdag gir bya ba yin la/ ldog pa gzhan dag la ni nges pa med do/ /ldog pa gcig pa 'dzin pa gdon mi za bar bya ba yin pas na rnam par rtog pa ni ldog pa gcig zhen pa'i byed pa can yin la/mngon sum yang rnam par rtog pa'i byed pa can yin no/ /des na tshad ma'i byed pa ni ldog pa gcig zhen par byed pa'i mthar thug pa yin no/ /de lta yin dang rtag pa zhes bya ba ni mi rtag pa las ldog pa yin la/yod pa zhes bya ba ni don bya ba mi byed pa las ldog pa yin pas tshad mas byed pa gcig gi yul ma yin no/ /des na tshad ma'i byed pa tha dad pa'i yul mngon sum gyi grub pa yod pa dag pa nyid gtan tshigs su len to/ / tshad ma'i byed pa gzhan gyi yul du gyur pa rtag pa nyid ni ci 'thad dam 'on te mi 'thad ces dpyad par bya ba yin no/ /tshad ma'i byed pa la mi mkhas pa gzhan gyis ni rtag pa dang yod pa dag tshad ma gcig gi yul du bzung nas brtsad pa des na de bsal bar bya ba yin no/ /gang yang ngo shes pa'i mngon sum gyi skad cig ma nyid la gnod do zhes bya ba la de yang dpyad dgos so//'di la gang zhig mngon sum gyi stobs las byung ba'i zhen pas don 'di ni ngas bzung ngo zhes bya ba nyid du zhen par byas pa de nyid mngon sum gyis bzung ba'i don du brjod do/ /gang zhig don 'di bzung ngo zhes shes par ma byas pa de ni mngon sum gyis bzung bar mi brtag ste/de lta yin na ha cang thal bar 'gyur ro/ /gang cung zad ma mthong ba de ni mngon sum gyi yul nyid du brtag par thal lo zhes bya ba ni ha cang thal ba'o/ /'di la gling gzhan nas 'ongs pa 'ga' zhig la slob dpon gyis 'di ni ba lang ste/'di la rkang pas reg par mi bya'o zhes nye bar bstan pas yul dang dus gzhan du ba lang mthong ba na bdag gis chu 'thung ba na mthong ba gang la rkang pas reg pa bkag pa'i ba lang de nyid ni 'di yin te/ de bas na 'di la ni rkang pas reg par mi bya'o snyam du ngo shes pa skye'o//des na gong bu tha dad pa dag la yang don gcig tu 'dzin pa'i ngo shes pa skye bar mthong ngo / /de la gong bu gcig pa ni 'ga' yang med pa'i phyir rab rib can gyi shes pa bzhin don med pa ni mngon sum gyi tshad mar 'os pa ma yin no/ /'di snyam du gang dmigs pas ngo shes pa yul med par mi 'gyur ba gong bu de gnyis ba lang nyid yin no zhes bya ba'i rang bzhin yod pa yin no snyam na de yang mi rung ste/'di ltar ngo shes pa 'di ni mi 'dzin par ma rtogs so/ /de'i yul ni de'i stobs las byung ba'i rnam par rtog pas bzung ba nyid du zhen pa gang yin pa de nyid yin no zhes bshad zin to//'di ni bzung ba'i spyi yin par rnam par rtog pas zhen pa med do/ /'di ltar ngo shes pas ni skye ba dang rga ba dang na ba dang 'chi ba'i chos can gyi gong bu bzung ba'i zhen pa yin na spyi ni skye ba dang gnas pa dang 'jig par mi 'thad do//chos de dang ldan pa ni gsal ba nyid yin pas na de nyid bzung ba yin par rigs so/ /'di snyam du ngo shes pa la ni spyi ni gsal ba gnyi ga snang ba yin no/ /de la skye ba la sogs pa tha dad pa'i chos can gsal ba snang du zad mod 'gal ba med do zhe na/de ni mi rigs te gang gi phyir de la ni sngon po la sogs pa kha dog gi khyad par can cha shas dbyibs kyi khyad par dang ldan pa dang skye ba la sogs pa'i chos snang bar zhen gyi gzhan ni 'ga' yang ma yin no/ /de 'dra ba yang gsal ba yin pa'i phyir ji ltar na zhen bzhin pa'i spyi snang bar brtag//'di snyam du gang dag gsal ba dag las spyi tha dad par 'dod pa de dag la nyes pa 'di 'gyur gyi kho bo cag gi ltar na ni tha dad pa ma yin la tha mi dad pa yang ma yin te/ 'on kyang spyi ni brjod par bya ba yin no snyam na/ spyi brjod par bya ba ma yin mod kyi 'on kyang rtog pa rnam pa tha mi dad pa can gyi yul rab tu gzhag pa'i don du spyi khas blang ba yin no//des na gal te ji ltar spyi ste rang gi ngo bo tha dad pa dang tha dad pa ma yin pa de bzhin du spyi 'dzin pa'i shes pas kyang ma khyab pa'i rang bzhin du bzung bar 'gyur la de'i tshe yang shes pa mi 'dzin pa nyid du mi 'gyur ro//des na ldog pa'i rnam pa can gyi shes pa'i gzung ba ni gsal ba yin la rjes su 'gro ba'i rnam pa can gyi rtog pa'i gzung ba ni spyi yin no/ /de la rjes su 'jug pa'i rnam pa can gyi rtog pa la ni rjes su 'jug pa'i rnam pa'i rang bzhin 'ga' zhig gzung ba nyid du brtan par bya ba yin te/dper na ldog pa'i rnam pa can gyi rtog pa la ldog pa'i gsal ba gzung bya nyid du 'dzin pa yin pa bzhin no/ /rjes su 'jug pa'i rnam pa can gyi rtog pa la yang rjes su zhugs pa'i rang bzhin ni 'ga' yang snang bar zhen pa med kyi gsal ba'i rang bzhin ldog pa yul dang dus nges pa can skye ba la sogs pa'i chos dang ldan pa kha dog dang dbyibs kyi khyad par can snang bar zhen to//de bas na ngo shes pas ni rjes su 'gro ba'i rang bzhin 'dzin pa'i dri yang zhen par mi nus pa'i phyir ro/ /ji ltar na de spyi 'dzin par brtag /gang zhig spyi brtag par bya ba skye ba la sogs pa'i mtshan nyid can gyi rang bzhin las bla lhag tu 'gyur ba 'di ba lang ngo zhes bya ba'i sgra brjod par bya ba ni de la snang ba med do/ /gal te ngo shes pa gsal ba la dmigs pa nyid yin na gsal ba rnams tha dad pa'i phyir tha dad pa'i rnam pa can du 'gyur gyi tha mi dad pa'i rnam par ni ma yin no//gcig gi rnam pa can du yang nyams su myong ste/ des na 'dis tha mi dad pa'i rang bzhin 'ga' zhig rung ba yin no zhe na/ de ni mi 'thad de/ gang gi phyir ngo shes pa ni de nyid 'di yin no zhes bya ba de lta bu'i rnam pa can yin no//de zhes bya ba ni lkog tu gyur par bzung ba yin na 'di zhes bya ba ni mngon sum du 'gyur ba yin na/ /de la ngo shes pas lkog tu gyur pa dang mngon sum du gyur pa mtshams sbyor bar byed pa 'ga' zhig tu zad kyi de don gcig pa ni ma yin te/ mngon sum du gyur pa dang lkog tu gyur pa dag tha dad pa'i phyir ro//mtshams sbyor ba zhes bya ba'i don ci zhe na/ 'ga' zhig la ltos nas tha dad pa dag kyang tha mi dad par sdom pa ni mtshams sbyor ba yin no/ /'dra ba'i mtshams sbyor ba ni spyi gcig rjes su 'jug pas stong pa nyid du tha dad pa la yang 'jug ste/ dper na lha sbyin dang mchod sbyin dag la gcig nyid bzhin no/ /de dag 'bras bu 'ga' zhig la tshogs pa'i phyir tha mi dad par sdom par byed do/ /de bzhin 'jig rten na yang bdag cag 'bras bu 'di la gcig tu 'gyur ro zhe na/ myu gu skyed pa la sa la sogs pa gcig tu gyur to zhes smra ste/de dag gcig nyid ni ma yin no/ /de bzhin du 'dir yang ngo shes pas tha dad pa dag gcig tu sre bar byed pa yin gyi tha dad pa med pa'i rang bzhin dmigs pa ni ma yin te/ 'di nyid de 'di'o zhes mngon sum dang lkog tu gyur ba 'dzin par mi 'thad pa'i phyir ro/ /tha dad pa med pa'i rang bzhin 'dzin pa la yang skye ba la sogs pa'i khyad par 'dzin pa mi 'thad pa'i phyir ro zhes bshad zin to//de'i phyir 'di ni tha dad pa'i phyir don kho na la dmigs pa rang gi chos dang ldan pa dag bya ba 'ga' zhig la tha dad pa med par sgro 'dogs par byed pas 'jug pas na don med pa yin gyi mi 'dzin pa mngon sum ni ma yin te/spyi snang ba med pa'i phyir ro/ /gang yang skad cig 'jig pa la ni rjes su dpag pas gnod pa yod do zhes brjod pa de yang ma 'brel te/ gang gi phyir tha dad pa'i ngo bo shes pa'i yul ma yin pas ma khyab po/ / de lta yin dang rgyud gcig gi khongs su gtogs pa nye bar len pa dang nye bar len pa las byung bar gyur pa'i skad cig rnams tha dad pa yang yin la/ rgyud kyi nang du gtogs pa'i mthong ba'i yul la dmigs pa'i dran pa skyed par nus pa yang gal te yin mod 'di la mi 'thad pa ci yod des na bsal zin pa 'di dag la skad cig 'jig par sgrub pa'i tshad ma nyon cig /gang yod pa de thams cad ni mi rtag ste/ dper na bum pa la sogs pa bzhin no/ /rtsod pa'i gnas su gyur pa'i sgra la sogs pa yang yod pa ma yin no zhes bya ba'o/ /gang yang dngos po rnams yod pa yang yin la skad cig ma yin pa yang yin mod ces smras pa de la brjod pa don bya ba byed pa'i bdag nyid can gyi yod pa nyid ni rim dang cig car dag gis khyab po//don bya ba byed pa ni rim gyis byed dam yang na cig car du byed pa yin gyi rnam pa gzhan ni med do/ /'di ltar dngos po rnams ni cig car ram rim gyis bya ba dag la 'jug par nus pa mngon sum gyis dmigs so//cig car nyid ni cig car gyi bdag nyid du gyur par mngon sum gyis myong bas dmigs pa yin la/ rim pa yang de bzhin no/ /gal te rim dang rim ma yin pa'i rang bzhin rnam pa gsum pa yod na ni de'i rim dang /rim ma yin pa'i rang bzhin gnyis po yang da lta bdag cag gis mthong ba ci 'dra ba de 'dra ba kho nar 'gyur ro/ /de lta na yang snang bzhin pa'i rim dang cig car 'di dag kyang gcig gi bdag nyid can du mi 'gyur ro/ /de ltar gyur dang rim dang cig shos kyi rang bzhin la cig car yang rim gyi rang bzhin du 'gyur ro//de lta na gnyis ka la yang phan tshun gyi rang bzhin dmigs pa dang / rang bzhin gyi rgyu mtshan can don bya ba yang yod par thal bar 'gyur na rang bzhin nam don bya ba mthong ba yang med de/ 'o na ci zhe na/ rim dang cig car ni mi slu ba dang ldan par re re'i bdag nyid mngon sum gyis dmigs so//de lta yin dang snang ba'i rim dang cig car gang yin pa de dag ni phan tshun tha dad pa'i rang bzhin yin pas 'di 'dra ba'i rim dang cig car dag gis gcig par ji ltar 'gyur te/ dngos po tha dad pa'i rang bzhin tha dad pa'i mtshan nyid yin pa'i phyir ro//'di 'dra ba ma yin na ni rim dang cig car nyid du mi 'gyur ro/ /de ltar gyur dang gang cung zad mthong ba'am brtags pa'i rang bzhin gnyis po ni rang bzhin de dag dang ldan pa'i mi srid pa kho na'o/ /de bas na mngon sum gyi tshad ma rang bzhin gnyis yongs su gcod par nus pa nyid rim dang rim ma yin pa dag las gzhan pa'i rnam pa med pas bstan pa yin no//de lta yin dang rim dang rim ma yin pa dag gis don bya ba byed pa nyid la khyab pa grub pa'o/ /skad cig ma ma yin pa nyid la ni rim dang rim ma yin pa'i mi 'thad do//'di ltar dngos po rnams ni rang gi rang bzhin gyis don bya ba la nye bar sbyor ro zhes 'chad par 'gyur ro/ /gang gi phyir 'bras bu rjes su 'gro ba dang ldog pa gang yod pa dang med pa'i rjes su byed pa de ni 'bras bu skyed pas nus pa yin no/ /'bras bu rjes su 'gro ba dang ldog pas rjes su byas pa yang dngos po rnams kyi rang bzhin yin te des na rang bzhin nyid nus pa yin no//skad cig ma ma yin pa'i rang bzhin gyis skad cig gnyis par 'byung ba'i 'bras bu'i rang bzhin gang yin pa de ni skad cig dang po yang nye ba yin pa/ de'i phyir skad cig gnyis pa la sogs par bskyed par bya ba'i 'bras bu'i tshogs gang yin pa de skad cig dang por yang skye bar 'gyur ro//de ltar yin dang skad cig ma ma yin pa la rim pa mi 'thad do/ /tha dad pa dang tha mi dad pa'i khyad par sgrub par mi nus pa'i rang bzhin lhan cig byed pa'i rkyen dag ni skad cig pa ma yin pa'i don gyis ltos par bya ba mi 'thad do zhes bya ba ni gzhan dag tu yang lhan cig ma yin par bshad zin to//des na 'dir mi spro'o/ /'di snyam du 'du byed skad cig ma nyid ma yin pa dag la ni rang las skye ba'i 'bras bu mtha' dag cig car skyed par byed do snyam na de yang mi 'thad do//gang gi phyir skad cig ma nyid ma yin pa des skad cig dang por cung zad rang gi bdag nyid kyis bskyed par bya ba'i 'bras bu ji snyed pa de thams cad ni skad cig gnyis pa la sogs par yang skyed par 'gyur ro/ / 'bras bu'i tshogs sgrub par rung ba'i bdag nyid de ni skad cig gnyis pa la sogs pa dag na yang nye ba'i phyir ro/ /des na 'di rnam grangs skad cig ma nyid ma yin pa ni rim dang cig car dag gis don byed par mi 'thad pa'i phyir mi mthun pa'i phyogs skad cig ma nyid ma yin pa las khyab par byed pa med pas de las bzlog pa na skad cig ma nyid kyis khyab pa yin no zhes bya ba ni rang bzhin gyi gtan tshigs so//rigs pa pa chen po lta ba ngan pa'i rab rib ma lus pa 'joms par mdzad pa sa'i steng na rgyal ba'i mdzad pa la de nyid gnyis par gyur pa/ dpal slob dpon chos kyi grags pa'i legs par bshad pa mchog gis thugs yongs su rgyas pa tshul khrims rin po che dang /rtsom pa dam pa'i rgyan dang go chas rnam par mdzes shing mi bzlogs pa'i chos can/ slob dpon chos mchog gis sbyar ba skad cig ma 'jig pa grub pa zhes bya ba'i rab tu byed pa rdzogs so/