CLOSE WINDOW

D4248
བོད་ཡིག

slob dpon dge srungs kyis mdzad pa rdzogs so// /[]/@##/ /rgya gar skad du/ pra mA Na pa rIk+Sha/ bod skad du/ tshad ma brtag pa/ bam po dang po/ thams cad mkhyen pa la phyag 'tshal lo/ /tha mal ma yin mig grub pas kyang rig min de yi rang bzhin las ldog pa//rig pa dang ldan 'khrul pa rnams kyis mi thob sna tshogs sdug bsngal zad pa ni/ /gang gis 'gro ba ma lus gsal bar bstan nas don du gnyer bas thob mdzad pa/ /tshad ma rab brjod bde gshegs de la phyag 'tshal nas ni tshad ma rab bshad bya/ /skyes bu'i sems kyi rnam par g.yeng ba'i mun pa ni//sel bar mdzad cing 'jig rten gsum na gnas pa yi/ /dngos po ma lus gsal ba'i tshig gi 'od zer gyis/ /rnam par 'god mdzad chos kyi grags pa nyi ma bzhin/ /tshad ma 'jug yul nges pa'i thob pa sgrub par byed pa yin par brjod//thob pa 'jug pa sngon 'gro can te 'jug pa'i gzhi ni shes pa yin/ /yul rab ston pas gtso bo yin phyir nges byed 'jug par byed pa can/ /de'i phyir nges pa'i tha dad dngos nges de yin de yang thob par nus/ /skyes bu'i don 'grub pa'i rgyu mtshan ni tshad ma yin pa'i phyir rtog ge ba'i bstan bcos las de'i mngon sum la sogs pa'i rang bzhin gyi rab tu dbye ba dang /de'i mtshan nyid rjes su rtog par byed do/ /tshad ma'i sgra 'di rgyu mtshan la ltos pa med par 'dod pa tsam gyis mngon sum la sogs pa'i shes pa'i bye brag rnams la 'jug pa ni ma yin te/gang gi phyir mu stegs byed gzhan gyis brtags pa'i tshad ma la 'di ni tshad ma ma yin no zhes 'gog pa'i phyir ro/ /rgyu mtshan med par tshad ma'i sgras brjod par bya ba yin na ni shes pa tshad ma ma yin par ji ltar 'gyur/ 'di skad du 'di ni tshad ma yin mod kyi 'on kyang /don 'grub pa'i rgyu ma yin no zhes ni brjod par rigs so/ /'di ltar rnam par rtog pa'i shes pa la gnas pa gang yin pa de ni ming gi sgras brjod par bya bar nus pa yin te/ dper na bum pa la sogs pa bzhin no/ /gzhan gyis mngon par 'dod pa'i shes pa yang de bzhin no//rnam par rtog pas bkod pa yang brjod par bya ba ma yin na ni 'ga' yang brjod par bya bar mi 'gyur ro/ /mngon par brjod pa dang 'brel par rung ba nyid kyis ni/ rnam par rtog pa'i yul la khyab pa yin gyi/ de yang brjod par bya ba yin pa la yod pa ma yin no/ /ming dang 'brel par byed pa'i rgyu ni de nyid yin te/de yod na brjod par bya ba ma yin pa nyid du mi 'gyur ro/ /des na brjod par bya ba ma yin pa rnams las mngon par brjod pa dang 'brel ba rung ba nyid ldog pa na rnam par rtog pa la gnas pa nyid kyang ldog par 'gyur ro/ /de ltar yin na gang la brjod par bya ba gzhan 'gog pa yang yin pa de ni rgyu mtshan dang bcas pa nyid de/dper na ba lang gi sgra 'khrul ba rta la sbyar ba bkag pa na de dang 'brel pa bzhin no/ /rgyu mtshan la ltos pa yang bye brag tu bshad pa'i las la brten pa gang yin pa de nyid dam/ yang na mngon par brjod pa'i dus su brten pa mngon par 'dod pa'i 'bras bu thob pa'i rgyu mtshan yin par 'gyur grang /de la bye brag tu bshad pa la brten pa ni byed pa sgrub pa'i tshad ma grub pa'i sgra'i brjod par bya ba byed pa'i dngos por rtogs pa yin la/ de nyid kyang sgra pa rnams kyis brjod bar bya bar rtogs pa yin te/gang gi phyir de ni 'jig rten pa nyid kyi yin gyi/ rnam par bshad pa'i don gzhan mi rigs pa des na tshad ma'i sgra ni 'jal bar byed pa byed pa po'i dngos po'i rgyu mtshan yin no zhe'o/ /phyogs 'di la ni shes pa thams cad 'jal bar byed pa po'i dngos por rtogs pa nyid kyis tshad mar 'gyur ba'i phyir tshad ma dang tshad ma ma yin pa'i rnam par dbye ba med par 'gyur ro//gang gi phyir gang kho na'i rgyus gang la byed pa'i tha snyad gang yin pa de ni de yod na de la 'jug par byed pa nyid yin te/ dper na dbyibs kyi khyad par can gyi 'bras bu sgrub pa'i nus pa tsam gyi rgyu mtshan gyis 'jim gong la bum par tha snyad byed pa bzhin no//de bzhin du tshad ma'i tha snyad kyang 'jal bar byed pa po dngos po tsam gyi rgyu mtshan gyi shes pa la byed pa yin no/ /de yod kyang mi 'jug na ni rgyu dang ldan pa'i tha snyad rgyu gzhan la ltos pas khyab la/rgyu gzhan dang ldan pa nyid ni de tsam gyi rgyu mtshan can ma yin pas gtan tshigs de tsam gyi rgyu mtshan nyid dang 'gal ba'i phyir 'gal ba dmigs pas gtan tshigs mi mthun pa'i phyogs las ldog pas bsgrub par bya ba dang 'brel pa zhes bya ba ni thal bar 'gyur ba'i rang bzhin gyi gtan tshigs so//shes pa thams cad la tshad ma'i tha snyad mi 'jug pa de'i phyir gang zhig yod kyang mi 'jug pa de'i phyir gzhan zhig yod kyang mi 'jug pa'i tha snyad gang yin pa de ni de tsam gyi rgyu mtshan can ma yin te/ dper na yod pa nyid kyis 'jim gong la bum pa'i tha snyad mi 'jug pa ni dbyibs la sogs pa'i khyad par la ltos pa bzhin no//de bzhin du tshad ma'i tha snyad kyang 'jal bar byed pa nyid yod na yang 'jug pa ma yin no zhes bya ba ni khyab par byed pa mi dmigs pas thal ba las ldog pa'o/ /gzhan yang gal te gzhal byar byed pa'i shes pa rang gi bsgrub par bya ba'i don bya bar nus pa de lta na yang rang bzhin des phyi rol gyi bsgrub par bya ba'i yan lag tu mi 'gyur bas na de don du gnyer ba rnams kyis de blang bar bya ba ma yin pa nyid do//sreg pa la sogs pa dang 'brel pa'i yan lag tu gyur pa'i shes pa ni de'i don bya ba don du gnyer ba rnams kyis bsten par bya ba bstan bcos las tshad ma'i sgras nye bar bstan cing brtag pa yin no//des na shes bya'i phyi rol gyi bsgrub par bya ba'i yan lag gang yin pa de nyid don du gnyer bar rtogs par bya ba yin pa na bstan bcos las brtag pa 'os pa'i tshad ma'i sgra 'jug pa'i rgyu mtshan yin no//'jal bar byed pa'i dngos po ni phyi rol gyi bsgrub bya'i yan lag ma yin te/ des na don du gnyer bar 'dod pa ma yin pas shes pa la rang gi rgyu mtshan can tshad ma'i tha snyad mi 'jug go/ /de'i phyir gang zhig don byed pa gang don du gnyer bas blang bar bya ba de ni de byed par rung bar 'dod pa yin te/dper na khrus la sogs pa don du gnyer bas chu bzhin no/ /rnam par shes pa 'ga' zhig kyang don du gnyer bas blang bar bya ba yin no/ /de don du gnyer ba nyid kyis len pa ni sgrub pa'i yul yin la/ sgrub par byed pa yang nges pa yin pa des na nges par khyab pa yin no/ /sgrub par byed pa'i dngos po med na ni nges pa'i rgyu med pa'i phyir khyab par byed par nges pa med pas na khyab par bya ba don du gnyer bas bslang bar bya ba med do zhes bya ba ni rang bzhin no//de lta na yang gang gi rang bzhin gang zhig mngon par 'dod pa'i 'bras bu'i yan lag ma yin pa de ni don du gnyer ba rnams kyis rang bzhin des de la brten par bya ba ma yin te/dper na grang ba ldog pa don du gnyer bas snang ba tsam gyi rang bzhin gyis sgron ma don du gnyer bar bya ba ma yin pa bzhin no/ /de bzhin du shes pa yang 'jal bar byed pa nyid kyis phyi'i don gyi yan lag ma yin no zhes bya ba ni khyab par bya ba med pa'o//de ltar na ni 'o na yod pa'i don 'dzin pa tshad ma yin la cig shos ni tshad ma ma yin pa de ltar na tshad ma dang tshad ma ma yin pa'i rnam par dbye ba grub pa yin no/ /yod pa'i don 'dzin pa'i shes pa ni don grub pa'i rgyu mtshan yin la/ yod pa'i don 'jal bar byed pa'i dngos po'i rgyu mtshan can yang tshad ma'i sgra yin no zhe na/rnam par dbye ba grub pa ni bden na shes pa'i yod pa'i don 'dzin pa ni mngon par 'dod pa'i rgyu mtshan ni ma yin no/ /gal te des don yod pa bzung du bcug pa de lta na yang / 'bras bu sgrub pa'i rgyu ni don de nyid yin gyi de 'dzin pa'i shes pa ni ma yin no//gal te ma bzung na ni mi 'thob la/ /ma thob na ni 'dod pa'i 'bras bu'i yan lag ma yin pa des na bsgrub par bya ba sgrub par rung ba thob par byed pa'i sgo nas don thob par byed pa yin pa'i phyir don bya ba'i yan lag yin la/ thob par byed pa de yang 'dzin pa sngon du 'gro ba can yin pa nyid do zhe na/gal te de lta na ni shes pa'i don bya ba thob par byed pa nyid don grub pa'i yan lag yin la/ yod pa'i don 'dzin pa ni thabs yin par 'gyur ro/ /gang kho na las don du gnyer ba rnams kyis 'bras bu'i yan lag gi rang bzhin du bstan pa de nyid tshad ma'i sgra 'jug pa'i rgyu mtshan brtag par 'os pa yin na/thabs 'di ni nges pa ma yin te/ gang gi phyir rjes su dpag pas zhen pas kyang don thob par byed pa'i phyir ro/ /gang zhig gang gis nges pa'i thabs ma yin pa de ni don du gnyer bas nges par bstan par bya ba ma yin gyi/dper na me don du gnyer bas me shel bzhin no/ /don 'dzin pa yang don thob par byed pa'i nges pa'i thabs nyid ma yin no/ /de'i rang bzhin ma yin pa de don du gnyer bas yongs su 'dzin pa ni de'i thabs kyi dngos po tsam la ltos pa yin no//thabs gang yin pa de yang de la yod pa yin te/ gzhan du na de tsam la ltos pa zhes bya ba nyid du mi 'gyur ro/ /des na bsten par bya ba nges pa la thabs nges pas khyab pa yin pa'i phyir khyab par byed pa mi dmigs pa'o/ /de'i phyir don 'dzin pa ni don byed pa'i yan lag gi rang bzhin ma yin gyi/'on kyang don thob par byed pa nyid yin no/ /de'i thabs nges pa yang ma yin te/ de'i phyir don byed pa don du gnyer ba bstan par bya ba ma yin pa na brtag par 'os pa ma yin pa tshad ma'i sgra'i rgyur ji ltar 'gyur/ de lta na 'o na ni mi slu ba ni tshad ma'i sgra'i rten du 'gyur la/de yang don byed pa thob par byed pa'i rang bzhin no/ /gal te yang don bya ba dngos po dang 'brel pa de lta na yang don grub par nus pa'i dngos po thob par byed pa'i phyir de thob par byed pa yin no/ /gal te de lta na yang tshad ma dang tshad ma ma yin pa'i rnam par dbye ba med par mi 'gyur ram/gang gi phyir shes pa 'ga' zhig las zhugs pa ni 'ga' yang mi 'thob pa ni yod pa ma yin no/ /gang gi phyir chu'i shes pas smig rgyu dang / skra shad kyi shes pas snang ba'i rdul phra rab la zhugs pa na smig rgyu tsam dang snang ba tsam yang mi 'thob pa ni ma yin no//de'i phyir rnam grangs 'dis ni shes pa thams cad don bya ba thob pa'i rgyu mtshan yin pas tshad mar 'gyur ro zhe na/ bshad pa/ don de byed pa la mi slu ba'i don de thob par byed par brjod do/ /sngar rtogs par byas pa de kho na ltar thob par byed pa ni 'jig rten na mi slu bar brjod kyi thob par byed pa tsam ni ma yin no//'di ltar don gang ji ltar bstan pa de de ltar thob par byed pa ni mi slu bar brjod do/ /shes pa yang don gang ji ltar bstan pa de ltar thob par byed pa ni mi slu bar 'dod do/ /des na don byed par rung bar shes pa gang zhig shes pa'i don de thob par byed pa'i sgo nas shes par byed pa'i bya ba la ltos pa shes par byas pa'i dngos po'i yul can ni don byed pa de thob par byed pa mi slu ba yin no//mi slu ba nyid 'jig rten na grags pa'i don gzung ba yin pa 'ba' zhig tu ma zad kyi/ tshad ma'i sgra'i don ni mi slu ba yin pa yang 'dzin pa nyid do//'di ltar thob par bya ba'i don ston par byed pa mi slu ba'i skyes bu la ni tshad ma zhes brjod pa yin no/ /'jig rten na yang gang zhig gi ngag yongs su gcod par byed pa'i dngos por rtogs pa yongs su gcod pa la mi slu ba can du gyur pa yongs su gcod par byed pa yongs su gcad pa la mi slu ba can de la ni tshad ma'i sgra rten pa yin no//des na gzhal ba la mi slu ba'i shes pa la 'jal bar byed pa nyid du ni 'jig rten pa nyid las grub pa yin no/ /spyir bshad pa/ grags pa'i khyad par la brten pa'i sgra ni mthong ba yin te/ dper na rdza ma byed pa la 'jug par bshad pa ni rdza mkhan gyi sgra rigs kyi khyad par la 'jug pa bzhin no//de bzhin du 'jal bar byed pa la bshad pa'i tshad ma'i sgra 'di ni gzhal ba la mi slu ba nyid kyi khyad par la grags pa yin no/ /de nyid kyi phyir tshad ma'i sgra yang dag pa'i shes pa'i rnam grangs su ston par mdzad pa na/ de bstan pa'i phyir tshad ma rnam gnyis kho na zhes dam bcas pa dang /tshad ma slu med can shes pa/ /zhes kyang gsungs so/ /gdon mi za bar shes par byed pa po'i bya ba'i rgyu mtshan can shes pa'i dngos po'i yul can don bya ba thob par byed pa mi slu ba khas blang dgos te/ gzhan du na de yod na 'bras bu thob pas mi slu ba de tshad ma yin pa'i phyir/lag pa dang / rkang pa dang / byed pa'i tshogs dang / thob par byed pa'i sa gzhi la sogs pa yang thob pa'i rgyu mtshan yin te/ de dag med na thob par mi 'thad pa'i phyir ro/ /des na thams cad tshad mar thal lo/ /'jal bar byed pa nyid med pa'i phyir thal bar mi 'gyur ro zhe na/de ni ma yin te gang gi phyir de gang gi tshe gzhal ba'i dngos po'i yul can gyi don thob par byed pa mi slu bar 'dod na ni de'i tshe 'jal bar byed pa can med pa na khyad par can gyis don thob par byed pa med pas tshad mar thal bar mi 'gyur ro//don thob par byed pa tsam mi slu ba'i rgyu mtshan yin na ni dper na rnam pa 'ga' zhig ltar/ na ma da la sogs pa'i sgra bzhin du tshad ma'i sgra bshad pa'i rgyu mtshan la mi ltos par thams cad la 'jug par 'gyur ro/ /da lta ni gzhal ba'i dngos po'i bsgrub par bya ba'i 'bras bu'i thob pa'i rgyu mtshan tshad ma yin pa'i phyir shes pa nyid do//ji ltar shes pa 'dir 'jal bar byed pa yin yang don bya ba thob pa'i rgyu mtshan gzhan dag las khyad par du 'phags pa ci zhig yod de/ gang gis thob pa'i rgyu mtshan de nyid don bya ba don du gnyer bas bsten par bya ba yin pas na bstan bcos las rjes su rtogs par bya ba yin gyi gzhan ma yin/thob pa'i rgyu mtshan nyid du ni khyad par med pa'i phyir ro zhe na/ smras pa/ 'di la skyes bu'i 'dod pa grub pa ni don du gnyer ba tsam gyi rgyu mtshan can ni ma yin gyi 'on kyang phyi rol gyi sreg pa la sogs pa la rag las pa yin no//phyi rol gyi dngos po de yod pa tsam gyis ni don du gnyer ba 'ba' zhig gi 'dod pa grub pa'i rgyu ma yin te/ yod par khyad par med pa'i phyir thams cad kyi 'dod pa grub par thal ba'i phyir ro/ /'on kyang don du gnyer ba rnams kyis thob pa yin la/thob pa yang don du gnyer ba de'i bya ba dang mthun pa yin no/ /don du gnyer ba'i 'jug pa yang shes pa'i khyad par gyi rab tu gzhag pa'i yul yod na thob pa'i rgyu mtshan yin no/ /srog chags kyi yan lag dang 'dod pa la sogs pa ni shes pas nye bar gzhag pa'i yul de nyid la 'jug par rtsom pa na shes pa dang 'brel pa nyid do//des na 'jug pa'i yul rab tu 'jog par byed pas shes pa ni gtso bo'i rgyu yin la/ rgyu mtshan gzhan shes pa dang 'brel bas 'jug par byed pa shes pa dang 'brel pas 'jug pa de'i gzhan gyi dbang du gyur ba ni gtso bo ma yin pa yin no//de'i phyir 'jug pa'i yul nye bar 'jog pas gtso bo'i rgyur gyur pa'i shes pa nyid don byed pa thob par byed pa yin gyi gzhan ni ma yin no/ /de nyid kyi phyir tshad ma don thob pa'i rgyu mtshan yin yang shes pa kho na tshad ma yin no/ /de med par mi thob pa'i phyir tshad ma ni 'jug pa'i 'bras bu can du brjod la/de la yang shes pa gtso bor gyur pa'i phyir ro/ /de'i phyir 'jug pa'i rgyu gzhan ni shes pa'i gzhan gyi dbang du gyur pa yin no/ /gang gi phyir don med pa 'dzin pa'i shes pa skyes pa na yang des gzhag pa'i yul la 'jug pa rtsom pa'i phyir ro//gal te gzhan gyi dbang ma yin na don med pa'i yul la ci'i phyir 'jug par byed/ /rnam par shes pa ni de ltar de'i rgyu mtshan dang 'brel pa ma yin te/ des na 'jug pa la rang dbang can yin no/ /de'i phyir 'jug pa'i gtso bo'i rgyu yin no/ /thun mong ma yin pa'i yang phyir te/gang gi phyir rgyu mtshan gzhan rnams ni 'jug pa tha dad pa dang mthun pa ma yin gyi/ 'on kyang shes pa nyid yin no/ /'di snyam du rgyu gzhan dag la yang 'jug pa so so la/ rang gi mtshan nyid tha dad pa yod pa des na thun mong ma yin pa nyid do snyam na de ni mi rigs te/'gar yang rang gi mtshan nyid tha dad pa med pa ni ma yin no/ /rang gi mtshan nyid la tha dad yod kyang mang po rnams kyi thun mong du byed pa dgag par ni mi nus te/ tshad mas grub pa yin pa'i phyir ro/ /de byed pas de las gzhan dag las ldog pa rnam pa gcig tu 'dzin par 'jug pa'i rgyur gyur pa gcig nyid du nges pa ni tha mi dad pa ma yin no//tha snyad 'di yul med pa yang ma yin te/ yod pa ni don byed pa'i rgyu mtshan can nyid yin pa'i phyir ro/ /tha snyad 'di ni tshogs pa'i yin la/ tshogs pa yang med pa yin no zhes kyang bsam par mi bya ste/gang gi phyir gcig tu brtags pa'i tshogs pa dngos por ma gyur mod/ du ma'i bdag nyid kyi dngos po dngos po med par ji ltar 'gyur du ma gang ji snyed pa de thams cad dngos po med pa ni ma yin te/ ha cang thal ba'i phyir ro/ /rgyu dang 'bras bu dag gi rjes su 'gro ba dang ldog pa'i rjes su byed pa nyid kyang 'di lta bur gyur pa'i yul can kho nar brjod do//de'i phyir ji ltar don byed pa nyid kyis yod pa nyid yin pa de bzhin du khyad par can gyi don byed pa nyid kyi khyad par can gyi yod pa yin la/ ji srid du de byed pa yongs su rdzogs pa de thams cad ni gcig pa yin no//de la gcig tu ngo shes pa'i yul gyi don rnams tha dad pa yin na yang don byed pa 'ga' zhig rtogs nas chu'i tha snyad rten pa'i yod pa'i khyad par du rnam par gzhag pa'i chu'i don byed pa de ni myu gu'i rang bzhin thams cad la khyad par med do/ /khyad par can gyi myu gu byed pa nyid chu'i yod pa'i tha snyad kyi rgyu mtshan ni ma yin te/ha cang thal ba'i phyir ro/ /de'i phyir chu la sogs pa khyad par med kyang myu gu'i khyad par ni sa bon las yin no/ /des na de ni myu gu'i thun mong ma yin pa'i rgyu yin no/ /des na ji ltar gal te don grub pa'i thabs mang po yod pa de lta na yang me nyid thun mong ma yin pa'i thabs yin pa'i phyir de'i don nyid la 'jug go//de bzhin du gal te don grub pa'i thabs thob pa'i rgyu mang po yod pa de lta na yang 'jug pa'i yul gyi khyad par 'jig par byed pas tha dad par byed pa nyid ni thun mong ma yin pa'i phyir dang /rang dbang can yin pa'i phyir gtso bo'i rgyu ni shes pa yin no/ /thob pa de yang des 'tsho ba yin pa'i phyir tshad ma'i ming can brtag par 'os pa ni de nyid yin gyi gzhan ni ma yin no/ /shes par rab tu gzhag pa'i 'jug pa'i yul de yang gang yin zhe na shes pas zhe na par byed pa'i don gang yin pa ste/gang gi phyir de la ni don du gnyer bar 'gyur na skyes bu 'jug pa'i phyir ro/ /'di ltar shes pa'i don ni ma bzung yang shes pa'i rgyu mtshan can gyi 'jug pa'i yul du gyur pa shes pa'i 'jug pa'i yul du brjod do/ /des na gang gang gi zhen pa de ni de'i 'jug pa'i yul yin pa de'i thob par byed pa ni de yin te/ma nges na ni mi 'jug pa'i phyir ro/ /'di ltar shes pa ni don byed pa'i thabs skyed pas thob par byed pa ni ma yin gyi/ 'on kyang 'di la 'jug par byed pa yin la/ skyes bu rang nyid 'gro mi nus pa lag pa nas bzung nas 'jug par byed pa yang ma yin gyi/'on kyang 'jug pa'i yul ma shes par 'jug par mi nus pa la yul nye bar ston par byas pas so/ /don bstan pa yang lhag par zhen par byas pa yin no/ /de'i phyir don gang kho na la 'jug pa de ni shes pas nges pa yin la/nges par byed pa yang de'i 'jug par byed pa nyid de/ de nyid kyis 'jug pa'i phyir ro/ /des na tshad ma nges pa'i 'bras bu can du brjod do/ /'di'i 'jug par byed pa'i bya ba ni nges par byed pa nyid do zhes bstan pa'i phyir ma rtogs pa'i yul can tshad mar bshad do//'di ltar gal te 'jug par byed pa'i bya ba nges pa las tha dad pa yin na ni gcig gis rtogs pa'i don de la gzhan gyis bcug nas thob la 'jug pa'i thob par byed pa de nyid kyang tshad ma yin pa'i phyir rtogs pa'i yul can yang 'gyur ro//rtogs par byed pa tsam 'jug par byed pa yin na ni gang gis dngos po de rtogs par byed pa de nyid kyis 'jug pa'i yul de la skyes bu de tsam gyis 'jug par 'gyur bas thob par byed pa'i tshad ma yin no/ /gzhan la ni snga na med pa'i thob par byed pa med pas tshad ma ma yin no//ma nges na ni thabs gzhan med pa'i phyir 'jug par byed pa ma yin la 'jug pa'i yul ma yin pa yang thob par byed pa ma yin te/ thabs gzhan med pa'i phyir ro/ /des na mngon sum dang rjes su dpag pa dag 'jug pa'i yul nges par byas pa'i thob par byed pa yin pa'i phyir khyad par med pa'i dngos po'i yul can tshad ma zhes bshad do//ma nges na ni mngon sum gyis de snang ba'i sgo nas bzung du zin kyang mngon sum gyi tshad mas rnam par mi gzhag ste/ ma nges pa ni 'jug pa'i yul ma yin pa nyid kyis thob par mi nus pa'i phyir ro//des na don 'dzin pa la ltos na ni tshad ma ma yin te/ de tsam ni don thob par byed pa'i yan lag ma yin pa'i phyir ro/ /tshad ma'i 'jug pa'i yul thob par bya ba ni nges par byas pa'i don nyid yin gyi/gzung ba tsam ni ma yin no/ /'di ltar mngon sum skad cig gang yul du byas pa de nyid thob par byed pa ni ma yin te/ don gang rgyun du 'jug pa khyad par can gyi 'bras bu la nye bar sbyor ba de'i 'bras bu can ma yin pa dag las ldog pa mngon sum gyi stobs kyis skyes pa'i nges pas gcig tu yul du byas pa de thob par byed pas yul de tsam la tshad ma yin no//zhen par byas pa 'jug pa'i yul la ltos nas tshad ma yin na ni gcig kyang du ma'i yul du 'gyur te/ dper na sgra de nyid ni mngon sum gyis grub po//byas pa nyid ni rjes su dpag pa yin la 'di mi rtag pa nyid kyang rjes su dpag pa gzhan gyis so/ /gzhan du sgra mngon sum yin pa'i phyir ma bzung ba'i cha med pas tshad ma gzhan gyi yul du mi 'gyur ro/ /don du ma yang chad ma gcig gi yul yin te/ ji ltar gang du dngos po tha dad pa 'dzin par byed pa rnams la gcig nyid tshad mar gyur pa lta bu ste/dper na rgyud gcig tu rtogs pa'i skad cig ma du ma 'dzin par byed pa'i dbang po'i shes pa rnams bzung ba tha dad kyang nges pa'i 'jug pa'i yul gcig yin pa'i phyir sngar skyes pa tshad ma ma yin la/ /gzhan dag ni de la dran par byed pa yin no//yang ci 'dra ba'i du ma'i don tshad ma gcig gi yul yin la/ ci 'dra ba zhig kyang du ma'i yin zhe na/ 'jug pa gcig gi yul ni du ma yin yang tshad ma gcig gi yul yin no/ /'jug pa tha dad pa'i yul ni ma nges te/ gcig gi yul dang du ma'i yang zhes rnam par dbye bas so//'jug pa gcig gi yul yang gang gi don du der 'jug pa de la nye bar sbyor ba ma nges par shes pa ste/ 'di ltar 'jug pa'i rgyu mtshan gyi 'bras bu la nye bar sbyor ba ma nges par shes pa rnams la dngos po gcig la nges par 'jug pa ni ma yin te/mngon par 'dod pa'i 'bras bu la nges par sbyor ba tsam gyis yul la 'jug pa yin na de ma nges na nges par ji ltar 'gyur/ /de tsam gyi rgyu mtshan can gang yin pa de ni ma nges na de yang ma nges par 'gyur te/ dper na sa bon la sogs pa'i tshogs pa tsam dang 'brel pa myu gu bzhin no zhes bya ba ni rang bzhin no//de tsam gyi rgyu mtshan can la ni gzhan la mi ltos pas khyab po/ /des na ni rgyu gzhan la ltos pas de nyid mi 'thad pa'i phyir ro/ /mngon par 'dod pa'i 'bras bu thob par 'dod pas byas pa 'dod pa de'i thabs tsam thob pa'i 'bras bu can gyi 'jug pa de yang de'i yul can nyid do//de brtsams pa na med na mi 'byung bas 'bras bu gzhan thob pa de ni 'jug pa gzhan dang 'brel pa yin no/ /'bras bu 'dod pas bskyed pa'i skyes bu'i bya ba ni 'jug pa yin no/ /de yang yul gyi bye brag gis tha dad pa 'jug pa'i yul tha dad pa can du byed pa'i phyir tha dad par 'gyur ro//de'i phyir 'bras bu gzhan 'dod pas bskyed pa'i 'jug pa 'bras bu gzhan thob pa'i rgyu ni gzhan kho na'o/ /gang yang 'bras bu gcig 'dod pa dang bcas pa de'i thabs kyi yul can ni gcig yin no/ /de yang rigs pa mtshungs pa'i skad cig ma gzhan la ltos na rgyu tha dad pa yin na thob par byed pa'i don la ltos pa'i bya ba 'jug pa gcig yin no//de'i phyir gang gi don du gnyer nas de'i rgyu'i dngos por brtsams pa de ni de'i bya bar brjod do/ /de med na mi 'byung bar gzhan 'bras bu gzhan gyi ni rgyu yin gyi/ thob par byed pa po'i bya ba ni ma yin no//gal te de ltar 'bras bu 'dod pas rab tu sbyar ba de'i thabs thob pa'i mthar thug pa 'jug pa gcig yin pa des na chu 'dod pas smig rgyu la zhugs pa las bye ma'i thang rnyed nas gam na 'dug pa'i khung gi chu mthong bar gyur pa des na de thob pa'i mthar thug pa 'jug pa gcig yin la/de'i phyir smig rgyu la chur shes pa yang 'jug pa thob par byed pa po yin pa'i phyir tshad mar 'gyur ro zhe na smras pa/ /'bras bu 'dod pa 'ba' zhig gis ni 'jug pa de'i thabs kyi yul can du mi 'gyur gyi/ 'on kyang de'i sgrub par byed pa'i rang bzhin dang yul dang dus nges pa'o//don bya ba bsgrub pa de'i yul dang dus dang rang bzhin nges pa shes na ni 'jug pa de'i yul can yin no/ /des na 'di ni thob pa de'i thabs 'dzin pa'i shes pa la yang rag las pa yin no/ /de nyid kyi phyir 'jug pa ni tshad ma dang 'brel bar brjod pa yin no/ /des na 'jug pa de ni shes par nye bar bstan pa yul dang dus nges pa de'i thabs kyi yul can yin no//mi slu bar byed pa'i shes pas shes pa'i yul gyi mthar thug par gyur na ni thob pa'i mthar thug par 'gyur zhing 'bras bu med par 'gyur na yang de las bzlog pa yin no/ /de'i phyir 'bras bu 'dod pas bcug pa de'i thabs kyi yul can du gyur pa'i rab tu 'jug par byed pa'i shes pas bstan pa de'i thabs tsam gyi mthar thug pa ni 'jug pa gcig yin no//rgyu mtshan gnyis dang 'brel pa'i phyir 'bras bu thabs mi thob pa'i khyad par gyis 'dod pa tsam gyi rgyu mtshan ma yin pa'i phyir ro//smig rgyu la ni shes pa gzhan dang 'brel pas 'jug pa yin pa'i phyir gzhan nyid do/ /de lta bur gyur pa 'bras bu la nye bar sbyor ba tha dad pa med par shes pa ni don du ma yin yang 'jug pa gcig gi yul yin no/ /ji ltar dus ma yin yang ma nges par nye bar sbyor bar shes par 'gyur zhe na//re zhig rigs tha dad pa ni 'bras bu tha dad pa nyid kyis nye bar sbyor ba nges pa yin no/ /rigs 'dra ba 'bras bu gcig pa ni skad cig tha dad pa'i rjes su 'brang ba dang rgyud tha dad pa'i rjes su 'gro bas tha dad do/ /de yang gzung ba'i skad cig la tha snyad byar med pas skad cig tha dad pa ni ma nges par blang bar 'dod pa'i phyir ma nges par nye bar sbyor ba kho na'o//rgyud tha dad pa yang mngon sum ni re zhig nye bar sbyor ba tha dad pa kho na'o/ /'di ltar tha dad par mthong ba la ni yul so so la tha dad par len par 'dod do/ /tha dad par blang bar 'dod pa'i rang bzhin gyi don byed pa la ni gzhan blang bar 'dod pa ma yin te/ha cang thal bar 'gyur ba'i phyir ro/ /blang bar 'dod pa tha dad du mthong ba gang yin pa de nyid blang bar bya ba yin te/ de'i phyir de nyid nye bar mkho ba yin gyi/ gzhan blang bar bya ba ma yin pa ni ma yin no/ /de'i phyir mtshungs par byed pas ni du ma la nges par nye bar sbyor ba ma yin gyi/'on kyang blang bar 'dod pa gcig gi yul du shes pas so/ /tha dad par blang bar 'dod pa na spong bar 'dod pa 'bras bu la nye bar mkho bar ji ltar 'dod/ de'i phyir 'bras bu gcig pa na yang tha dad du blang bar 'dod pa'i blang bar bya ba nyid nye bar mkho ba yin gyi/gzhan ni 'dod pa ma yin pa'i phyir mthong ba'i rgyud tha dad pa la ni nye bar sbyor ba nges pa nyid do/ /lkog tu gyur pa rgyud tha dad pa 'bras bu gcig pa bya ba tha dad pa la yang gang gi tshe thams cad kyi 'bras bu so sor 'dod pa de'i tshe yang 'bras bu tha dad pa la nye bar sbyor ba'i phyir nye bar mkho ba nges pa nyid de/dper na grang ba mang po tshogs pa na me mdag gi phung po bzhin no/ /gang gi tshe bya ba gcig 'dod pa de'i tshe yang yul tha dad pa rnams ni nye bar mkho ba nges pa nyid du shes te/ yul gzhan na 'dug pa len par 'dod pa na yul gzhan na 'dug pa nges par nyams pa'i phyir ro//yul gcig pa ni don gcig blang bar 'dod pas thams cad blang bar 'dod pa'i lkog tu gyur pa gang yin pa de dag la nges pa med par blang bar 'dod pa des na nye bar mkho ba ma nges pa nyid do/ /'di ltar 'bras bu mthong ba la yul gyi khyad par dang 'brel pa'i don byed par bzod pa'i rang bzhin du nges par blang bar 'dod pa yin la/de lta bu'i rang bzhin du ni thams cad khyad par med pa yin no/ /des na gcig blang bar 'dod pas thams cad blang bar 'dod pa yin te/ nges pa'i yul snang bar 'dod pa med pa'i phyir ro//de dag gi bdag nyid thun mong ma yin pa'i rang bzhin ni/ /de'i tshe tha dad par gzung ba med na gang gi yul nges par len 'dod par 'gyur/ thun mong pa'i rang bzhin gyi yul can len pa'i sems ni yul ma nges pa yin te/ 'di ltar khyim gyi dang ra gcig na 'dug pa'i me'i phung po bzhi las gang yang rung ba zhig blang bar bya ba yin te/yul bar ma chod pa gang yin pa'o/ /de dag las bdag gi 'dod pa 'di la 'byung ngo zhes ni mi sems so/ /de'i phyir rang bzhin tha dad pa ma bzung ba'i phyir nges pa med par blang bar 'dod pa 'bras bu gcig byed pa nye bar mkho ba ma nges par zhen par byas pa 'jug pa gcig gi yul ni mang po yul ni mang po yang tshad ma gcig gis bzung ba yin no//tha dad par ma bzung ba'i phyir ni ma nges par len par 'dod la/ des na nye bar mkho ba ma nges so/ /de'i phyir 'jug pa gcig gi yul yin pa des na mang po rnams tshad ma gcig gi yul du 'gyur ro//mngon sum gyis mthong ba'i skad gcig rnams la tshul 'di yin gyi/ rgyu tha dad pa dag la ni ma yin no/ /rang bzhin gyi khyad par gyi yul blang bar 'dod pa la ni blang bar bya ba gcig nye bar mkho ba yin gyi/ gzhan blang bar bya ba ni ma yin no//lkog tu gyur pa la ni yul gyi khyad par ma bzung ba'i phyir thun mong gi rang bzhin du zhen pas tha dad pa nges par blang bar mi 'dod de des na ma nges par blang bar bya ba rnams nye bar mkho ba ma nges pa yin no/ /nye bar mkho ba nges pa ni sngar bshad pa'i tshul gyis so/ /nye bar mkho ba ma nges pa la ni rim pa dang bcas pa'i shes pa rnams las dang po tshad ma yin la gzhan rnams ni dran par byed pa po nyid do//nye bar mkho ba nges pa rnams la ni so so kho nar ro/ /mngon sum ni skad cig gis yul mkho ba gcig pa nyid do/ /des na tshad ma gcig gi yul du ston pa na bsgrub par bya ba tha dad pa'i skad cig ma 'dzin pa ma gtogs pa dbang po rnams grub pa dang bde ba tha mi dad par bshad do//lkog tu gyur ba'i yul la ni thun mong gi 'bras bu la de dag nye bar sbyor ba tha mi dad do zhes bya ba la sogs pas rgyun la brten nas rnam pa gnyis su bshad do/ /des na gang zhig gang gis nges pa de ni des 'jug pa'i yul du byas pa yin la/de nyid de'i thob par byed pa yin pa na tshad ma yin pa'i phyir nges pa'i don 'jug pa'i yul yin zhing de yang tshad ma'i thob par bya ba yin no zhes bstan pa'i phyir 'di dag gis don yongs su bcad nas 'jug pa na don bya ba la slu ba med do zhes bshad do//yang gang gi tshe don byed pa'i thabs 'dod pas rab tu sbyar ba 'dod pa'i thabs thob pa'i don ched kyi bya ba 'jug pa yin pa de'i tshe yul shes pas nye bar gzhag pa na shes pa dang 'brel ba yin no/ /yul 'jog par byed pa nyid kyis shes pa ni rgyu yin no//'di ltar 'jug pa'i yul thams cad kyi 'jog par byed pa ni shes pa las mi 'da' ste/ 'di ltar the tshom gyis yul 'jog par byed pa'i shes pa dang / phyin ci log gi shes pa dang / phyin ci ma log pa'i yang dag pa'i shes pa rnams las 'jug pa gang yin pa de ji lta ji ltar yul shes pas nye bar bstan pa de'i rjes su 'gro ba dang ldog pa'i rjes su byed pa na de la 'khrul ba med pa'i phyir de'i rgyu mtshan can yin no//de'i rgyu ni dang po'i shes pa yin no/ /gzhan dag ni gang gi tshe don gzhan la zhugs pa na gzhan thob pa de'i tshe thob pa de ni shes pa snga mas byas pa'i snga ma'i 'jug pa las yin no//shes pa snga ma de de thob pa'i rgyur gyur pa'i 'jug pa'i yul 'jog par byed pa ni ma yin la/ rgyu yin pa kho na'o/ /dper na bum pa'i shes pa las bum pa'i don du zhugs pas bar du snam bu thob pa na de la 'jug par byed pa ni shes pa snga ma nyid yin te/de med na de la mi 'jug pa'i phyir ro/ /snga ma bum pa'i shes pa de snam bu ston par byed pa ni ma yin no zhes rtogs par byed do/ /de ni de ltar mi rigs te/ gang gi phyir de la yang snam bu'i yul can gyi 'jug pa ni bum pa'i shes pa'i rgyu can du 'jug par mi nus te/ gang gi phyir de'i rgyu can gyi dngos po ni de'i 'bras bu'i bdag nyid yin no/ /'bras bu yang rjes su 'gro ba dang ldog pa'i rjes su byed pa yin na snam bu'i yul can gyi 'jug pa ni bum pa'i shes pa'i rjes su 'gro ba dang ldog pa'i rjes su byed pa yang ma yin no/ /de med kyang gzhan gyi tshe de mthong ba'i phyir ro//snam bu 'dzin pa'i shes pa la ni nam yang 'khrul pa med pa'i phyir de dang 'brel pa yin no/ /de'i phyir ston pa po ma yin pa'i shes pa'i rjes su 'gro ba dang ldog pa'i rjes su mi byed pa'i rgyu'i dngos por mi 'thad pa'i phyir de ni 'jug pa'i rgyu ma yin no/ / des na bum pa'i shes pa'i rgyu mtshan gyi 'jug pa ni gzhan yin la snam bu'i shes pa la 'khrul pa med pa snam bu thob pa'i rgyur gyur pa'i 'jug pa yang gzhan yin no zhes shes par bya'o/ /de ltar na 'jug pa gang gi rgyu mtshan yin pa de ni shes pa des nye bar bstan pa'i yul can nyid de/dper na ba lang gi shes pa'i rgyu mtshan can ba lang gi yul can gyi 'jug pa la ba lang gi shes pas nye bar bstan pa'i yul can yin pa bzhin no/ /des na nye bar bstan pa'i yul can ma yin pa'i 'jug pa la ni de'i rjes su 'gro ba dang ldog pa'i rjes su byed pa med pa'i phyir de'i rgyu mtshan can ldog par byed pa'i 'gal ba yod pa yin no//des na des nye bar bstan pa'i yul can nyid ni de'i rgyu mtshan can tsam gyi rjes su 'jug pa'i phyir rang bzhin yin no/ /yang gang zhig gang gi rgyu mtshan gyi 'jug pa'i yul yin pa de ni de'i 'jug pa'i yul yin par brjod pa yin te/des byas pa'i 'jug pa'i yul nyid ni de'i rgyu mtshan gyi dngos po nyid de/ des nye bar bstan pa'i yul yin pas so/ /des na 'jug pa'i yul nyid la ni nges pas khyab pa yin no/ /ma nges na de'i rgyu mtshan khyab par byed pa 'jug pa'i yul med pa'i phyir khyab par bya ba de'i yul med do//des na gang zhig gang gis ma nges pa de ni de'i 'jug pa'i yul ma yin la/ gang zhig gang gis nges par byed pa po ma yin pa de yang der 'jug par byed pa po ma yin te/ dper na ba lang gi shes pas nges par ma byas pa'i rta'am/de nyid rta'i nges par byed pa po ma yin pa bzhin no/ /yul dang yul can gyi chos la ltos nas khyab par byed pa mi dmigs so/ /'di lta bu'i rigs can gyi sbyor ba la phyogs kyi chos bsdu ba ni thams cad du log par rtogs pa'i yul la ltos par bya ba'am yin pa/de'i phyir ma byas so/ /'jug pa'i yul yang don byed par bzod pa'i dngos po nyid yin te/ de'i don du gnyer ba rnams gzhan du 'jug par mi 'thad pa'i phyir dang / don du mi gnyer ba 'jug pa'i dbang du ma byas pa'i phyir ro/ /rjes su 'gro ba dang ldog pa dag las dngos po'i rang bzhin rnam pa'i khyad par dang ldan pa nyid yin par mthong ste/dper na chu dang me la sogs pa bzhin no/ /rnam pa'i khyad par dang ldan pa'i rang bzhin de yang rang gi mtshan nyid 'dzin pa ni mngon sum mam rjes su dpag pas snang ba dang rnam par brtag pa tha mi dad par zhen pas nges par byas te/ji ltar rnam pa'i khyad par dang 'brel pa don bya ba la nye bar mkho bar mthong ba dngos po'i rang bzhin nyid yin pa de bzhin du 'das pa dang da ltar la sogs pa'i dus kyi khyad par dang / rten pa'i yul gyi khyad par yang nye bar mkho ba can gyi rang bzhin du mthong ngo / /de la rnam pa'i khyad par ni nges pa yin no//yul dang dus dag ni ma nges pa yin te/ des na rnam pa'i khyad par bzhin du dngos po yul dang dus gang du don bya ba la nye bar mkho ba snang ba'i yul dang dus de la 'khrul par lta ba'am rtog par 'dod pa'i shes pa ni log pa'i shes pa nyid do/ /gang gi phyir don byed pa la mi 'khrul ba'i yul lam/dus btang na ni dngos po de nyid yongs su spang bar 'gyur te/ yul dang dus tha dad pa yang dngos po tha dad par byed pa yin pa'i phyir ro/ /gzhan du na rnam par rtog pa tha dad pa yang tha dad par byed pa ma yin pa'i phyir thams cad gcig tu 'gyur ro/ / de'i phyir gang la yul dang dus dang rnam pa gang gi bya ba mthong ba de las gzhan pa'i yul dang dus dang rnam pa gang yang rung ba tha dad par 'dzin pa de ni log pa'i shes pa nyid de/ nus pa ma bzung ba'i phyir dang / bzung ba yang nus pa med pa'i phyir ro/ /gal te srog sna dang bcom brlag tu nyi ma phyed kyi dus na/gnyis kyi bdag nyid kyis mgo'i steng dang de bzhin du 'char ba dang nub pa'i dus na shing gi steng na nyi ma'i dkyil 'khor mthong ba ma yin nam/ de ni yul de na gnas pa ma yin la/ de 'dzin pa tshad ma ma yin pa yang ma yin no zhe na/ bden mod kyi/ 'on kyang don byed pa la nye bar mkho ba'i yul de dang de nyid dmigs pa yin no//yul gang dag gi don byed par 'dzin pa'i yul de la ma 'khrul bar shes pa de ni phyin ci ma log pa yin no/ /de'i phyir don la nges par sbyor ba'i dus su shes pas snang ba'i yul ma btang bar 'dod do/ /gang gi phyir gang gi khyad par can gyi yul gzung ba'i phyir don byed par dmigs pa de nyid de la don dam pa'i yul yin no//de'i phyir ji ltar gcig yul du mar 'gyur/ yul du mar snang ba ma yin nam zhe na/ yul du ma ni ma yin gyi/ 'on kyang yul thag ring po 'ba' zhig tu zad do/ /de yang thag ring bas yul thams cad la mngon du phyogs pa'i phyir der gnas kyang de ltar mngon pa yin no//de bzhin du shing la sogs pa mtha'i sa gzhi mthong zhing de'i bar ma mthong ba na 'byar ba gzung ba lta bur mngon no/ /thag ring por gnas pa gcig yin yang rang gi rjes su mthun par mthong ba dang /thag ring na mtha' 'byar ba lta bur thams cad kyis mthong bar 'gyur ro/ /des na tha dad pa'am/ des na gnas par mthong ba ni ma yin no/ /yul dang dus tha dad pas mthong ba dngos po la 'khrul pa 'ba' zhig tu ma zad kyi 'jug pa yang ngo //'di ltar yul gzhan gyi dngos po la yul gzhan dang 'brel bar gzung ba na yul dang dus gzhan dang 'brel pa la zhugs pa nam yang mngon par 'dod pa thob par mi 'gyur ro/ /de'i phyir yul dang dus dang rnam pa nges pa don byed pa yin par mthong ba'i phyir dang / don byed pa yang 'jug pa'i yul yin pa'i phyir yul dang dus dang rnam pa nges pa 'jug pa'i gzhi yin pa nyid kyis yul dang dus dang rnam pa'i dngos po don byed par nus pa ni 'jug pa'i yul yin la/ de lta bu nyid du gyur pa nges par byed pa po yang 'jug par byed pa yin no/ /de'i phyir yul dang dus dang rnam pa nges pa'i don gang zhig gang gis gtan la phebs pa de nyid de'i 'jug pa'i yul yin te/gtan la ma phebs pa ni 'jug pa'i yul ma yin pa'i phyir te/ yul dang dus dang rnam pa gzhan dang 'brel pa ni gzhan yin pa'i phyir ro/ /gzhan nges pa na gzhan nges pa ni ma yin te/ha cang thal ba'i phyir ro/ /nges pa nyid kyi 'jug pa'i yul thob par byed pa ni tshad ma yin la/ cig shos ni tshad ma ma yin no/ /de la don byed par nus pa'i rnam pa gzhan 'dzin pa ma yin pa'i phyir 'jug pa'i yul nyid ma yin te/ dper na smig rgyu la/tshur shes pas bkru ba la sogs pa nus pa'i rnam pa nyid gzung ba 'jug pa'i yul yin gyi/ smig rgyu ni ma bzung ba des na shes pa gzhan dang 'brel pa'i 'jug pa'i spyod yul thob par bya ba yin pa bzhin no/ /de bzhin du nor bu'i 'od la nor bur shes pa'i 'jug pa'i yul ni 'od kyi yul gyi nor bu nyid yin no//nor bu thob pa ni snga ma bzhin no/ /gang gi phyir don byed par rung ba mthong ba'i yul gang yin pa de nyid 'jug pa'i yul yin gyi gzhan ni ma yin no/ /gzugs mtshungs kyang yul tha dad pa yang tha dad par byed pa yin pa'i phyir gzhan nyid du nges so//yul gzhan na gnas pa nges pa na gzugs mtshungs pa'i phyir yul gzhan na gnas pa nges pa ni ma yin te/ ha cang thal ba'i phyir ro/ /de'i phyir yul gzhan na gnas pa'i nor bu 'dis ma nges pas 'di'i 'jug pa'i yul ma yin no/ /'jug pa'i yul ma yin par thob par byed pa yang sngar nyid du bsal zin to//khyad par du yang rjes su dpag pa ni chos can 'dzin pa yin no/ /de la 'khrul na ni der snang bar brjod do/ /de ni 'dir yang 'od kyis nor bu'i rang bzhin bsgrub pa na yul zhes bya ba'i chos can la phyin ci log par bsal ba ji ltar ma tshor/ji ltar rung rung du chos can yongs su rtog na ni/ nges pa ni gzhan nyid yin la thob pa yang gzhan yin par 'gyur ro/ /rjes su dpag pa ni de med na mi 'byung ba nges pa sngon du 'gro ba can du 'dod na 'di la ni de med do/ /'di yang bsgrubs zin to/ /ha cang spros pas chog go /tshad ma brtag pa/ bam po gnyis pa ste tha ma/ rnam pa thams cad du yul gzhan gnas pa nges pa'i shes pa las yul gzhan thob par smra ba na tshad ma'i yul mi shes pa yin te/ de la de las gzhan ci zhig brjod/ rnam par rtog pa 'di ni gnyi ga'i rang gi mtshan nyid mthong ba la ltos nas rang bzhin gzhan sgro 'dogs par byed pa yin te/dper na chu dang smig rgyu mthong ba la ltos nas smig rgyu la chur rtogs pa bzhin no/ /'di la sgro gdags par bya ba dang sgro btags pa'i yul gnyis 'brel pa'i phyir 'od kyi yul can gyi shes pa ni 'brel ba gzhan gyi yul can thob par byed pa'i shes pa gzhan gyi rgyu yin pa des na phan tshun thob par byed par brjod la/gzhan du ni de ltar ma yin no zhes bya ba ni khyad par ro/ /gang gi phyir rnam pa'i khyad par dang ldan pa'i rang bzhin gang zhig gang gis nges pa de nyid de'i 'jug pa'i yul yin no//de'i phyir dung la ser por shes pa'i 'jug pa'i yul ni ser po'i rang bzhin gyi dung nyid yin na de ni med la/ yod pa'i dkar po'i rang bzhin gang yin pa de yang ma nges pa de ni 'jug pa'i yul ma yin no/ /gang la dung dkar po nyid kyi rnam pa ma yin nam zhe na/gal te de lta na dkar po'i rang bzhin log na rang bzhin gzhan skyes pa'am/ ci ste dung gi rang bzhin gnyis ka ltar yang don byed pa la nye bar sbyor ba yin yang bla ste/ ji ltar tha snyad 'dogs pa po rnams kyis dkar po kho nar mthong bar 'gyur//yod pa ni don byed pa'i rang bzhin yin la rnam pa tha dad par nye bar sbyor ba dag gcig tu rig na dngos po tha dad par khas blang bar yang ji ltar nus/ snang ba'i kha dog gi rang bzhin ni dung yin par mi smra'i 'on kyang dbyibs yin no zhe na/ kha dog gi rang bzhin las dbyibs tha mi dad pa ma yin nam/don byed par nus pa'i kha dog dkar po btang na de'i dbyibs kyang btang ba yin la/ snang ba'i ser po'i rang bzhin dang dbyer med pa dang ldan pa'i dbyibs ni de'i rang bzhin nyid yin gyi ma mthong ba'i dkar po ni ma yin no/ /de nyid kyi phyir ser po bzhin du dngos po med pa bzhin no//'di ltar gang cung zad du ma'i thun mong du gtogs pa'i rang bzhin de ni du ma las tha mi dad pas de'i rang bzhin du yod pa yin gyi/ gcig gi rang bzhin du ni yod pa ma yin no/ /'di ltar mang po rnams rang bzhin gcig pa nyid tshad mas bsal ba nyid yin no/ / des na ji ltar skad cig ma nyid dam dngos po nyid du ma'i thun mong du brtags pa na/ sngon po la sogs pa du ma las tha mi dad pa de'i rang bzhin yin pas du ma nyid du bden pa yin la/ de la gcig pa nyid du ni btags pa yin no/ /de bzhin du dbyibs kyi khyad par yang sngon po la sogs pa du ma la thun mong du de'i rang bzhin du yod pas de kho nar 'gyur gyi rang dbang du ni ma yin te/rang nyid las ni tha dad pas mi bden pa'i phyir ro/ /gal te sngon po yang dbyibs du ma'i thun mong ba de'i rang bzhin du bden pa yin no/ /khyad par yod na yang brjod par bya'o zhe na smras pa/de du ma'i thun mong ba zhes bya ba ni gang zhig mthong na nges par rtogs shing ma mthong na mi rtogs la/ de'i rang bzhin du yang rtogs te/ dper na sngon po'i dngos po nyid sngon po la sogs pa du ma med na ni mi rtogs la/ de yod na ni de'i rang bzhin nyid du rtogs la/ de la thun mong bar yang brtags pa ni/du ma de'i bdag nyid du yod pa bzhin no/ /de ltar yang sngon po ni dbyibs mthong na mthong ba dang de'i rang bzhin du dmigs pa ma yin te/ dbyibs log kyang sngon po dmigs pa'i phyir dang / dbyibs nye yang rdul phra rab tsam gyi cha'i sngon po dbyibs kyi bdag nyid ma yin par dmigs pa'i phyir ro//dbyibs nyid sngon po de mthong na snang zhing de med na mi snang la/ snang na yang de'i rang bzhin du snang ba yin te/ sngon por snang ba btang na dbyibs mi rtogs pa'i phyir ro/ /de'i phyir sngon po nyid de la du ma yin zhing du ma'i thun mong ma yin pa dang /gzhi yang yin no/ /dbyibs ni de lta bu du ma yin gyi/ 'on kyang du ma'i thun mong dang / de la brten pa yin no/ /gang gi phyir de med par mi snang zhing sngon po la sogs pa yod na ni da bdag nyid du rtogs par 'gyur ba de'i phyir sngon po ni skad cig ma nyid la brten pa ma yin te/ de ma rtogs kyang sngon po ni de ma yin pa'i rang bzhin du snang ba'i phyir ro//skad cig ma nyid ni de la brten pa yin no/ /sngon po la sogs pa'i dngos po mthong na de rtogs pa'i phyir dang mthong ba de'i bdag nyid du rnam par 'jog pa'i phyir ro/ /ci ste thun mong du rtogs pa 'di du mar yod pa nyid du khas blangs nas de'i rang bzhin du yod par rnam par 'jog pa gang yin pa de la yid brten du ci yod ce na/bshad pa tha dad pa nyid don byed pa la nye bar sbyor bar snang ba'i phyir ro/ /mthong ba'i gzung ba khyad par kho na don byed pa la nye bar sbyor ba mthong gi spyi ni ma yin no/ /yod pa ni don byed pa'i rgyu mtshan can yin no//de nyid kyi phyir skad cig ma nyid ni snang ba sgra la sogs pa'i rang bzhin du don byed pa'i mtshan nyid du yod pa mthong ba las sgrub par byed do/ /de'i sgrub par byed pa yang khyad par can gyi chos can la brten pa yin no/ /de lta na 'o na dbyibs kyang don byed nus par mthong ba'i phyir ji ltar dngos po ma yin/'di ltar de'i rang bzhin yod pa nyid ni dbyibs kyi thabs kyi dung gis bsgrub par bya ba'i 'bras bu thob par byed do/ /de'i phyir dbyibs rang bzhin gzhan nyid de thob par byed pa yin pa'i phyir don byed pa la de nyid kyi nus pa mthong ba yin no/ / 'di la dbyibs ni sngon po'i bdag nyid kho nar rtogs pa yin no zhes bshad zin to/ /des na de'i bya ba gzung ba'i sgo nas sngon po nyid kyi bya ba gzung ba yin no/ /gzhan yang dung gi cha shas kyi bye brag nyid der don byed par mthong gi dbyibs gcig ni ma yin no/ /ji ste 'di ni tshad ma gzhan gyi bsgrub par bya ba yin gyi/mthong ba ni dbyibs gcig la gnas pa yin no zhe na/ de ni mi rigs te/ phyogs kyi dbye bas gnas pa rnams ni 'gal ba'i chos dang ldan pa'i phyir gcig tu brtags pa tshad mas sel bar byed do/ /phyogs kyi cha tha dad pa'i dung 'dzin pa'i shes pa ni gcig la dmigs par mi rigs te/de'i phyir mthong ba de nyid rigs pas du ma'i yul can sgrub par byed de/ tshu rol mthong ba'i phyogs tha dad pa 'dzin pa ni gcig gi yul can du mi rigs so/ /gzung ba de'i rang bzhin ni gcig dang 'gal ba yin pa'i phyir ro/ gzung ba sngon po'i rang bzhin ni nges pa'i rnam pa skad cig ma ma yin pa dang 'gal ba ma yin te/ snang ba'i rang bzhin de ni yul du gnas pa'am/ myur du 'gro ba gnyis ka ltar yang mi 'gal ba'i phyir ro/ /sngon po'i rnam pa don byed pas de skad cig ma nyid yin gyi/ de ltar 'dzin pa 'gal ba'i phyir ni ma yin no//'dir ni de gcig gam du ma yin yang bla ste/ rnam pa thams cad du phyogs tha dad pa'i rnam pa 'gal ba yod pa ma yin no zhes brjod par mi nus te/ phyogs tha dad pa ni gcig dang 'gal ba'i phyir ro/ /de'i phyir 'dir gcig yin na yang de ltar 'dzin pa mi 'thad pa'i phyir 'dzin pa nyid las dngos po du mas snang ba yin gyi gang gi skad cig ma ma yin pa nyid dang 'gal bar 'gyur ba sngon po'i shes pa ni skad cig skad cig ma du ma 'dzin par rnam par gzhag par nus pa ma yin no//de'i phyir mthong ba'i gzung ba nyid dngos po du ma'i bya ba dang ldan par snang ba yin la/de'i bdag nyid du gyur pa'i dbyibs gcig pa med pa'i phyir dang / tha dad pa yang mi dmigs pa'i phyir 'bras bu la rjes su 'gro ba dang ldog pa'i rjes su 'gro ba ji ltar 'gyur/ thams cad du de byed par thal bar 'gyur ro zhe na/ ma yin te/ gnas skabs kyi khyad par dang ldan pa de byed pa'i phyir ro//de tsam gyis ni de tha dad par mi 'gyur ro/ /de nyid kyi phyir dung gi sgra ni bum pa'i sgra bzhin du dbyibs kyi khyad par can 'dod do/ /gal te spyod pa phra mo bcug na rdul phra rab kyi blo med pa des na dbyibs sam kha dog kyang bla ste ma brtags na nyams dga' ba ji ltar snang ba bzhin du don byed nus par khas blang ba yin no zhe na bden te/shes bya nang gi la yin gyi phyi'i don gyi tshul la ni de lta ma yin no/ /tshad ma'am tshad ma ma yin pa nyid dam/ khyad par gyi mtshan nyid du blo tsam 'ba' zhig la ni slob dpon gyis rnam par ma bzhag ste/ rnam par shes pa smra ba la tshad ma dang tshad ma ma yin pa'i rnam par gzhag pa yang gzhan mdzad pa'i phyir ro//phyi rol gyi tshul gyi yul la tshad ma dang 'bras bu rnam par gzhag pa sngar mdzad nas yang rnam par shes pa smra ba la mdzad pa yin no/ /des na tshad ma rnam par gzhag pa yang de kho na ltar yin no//des na 'di ni de kho na ltar yin te/ gang gi phyir mngon sum gyi mtshan nyid bsam pa na dbang po'i rnam par shes pa rnam par rtog pa med pa nyid kyi gtan tshigs su don gyis bskyed pa nyid bkod pa yin no/ /brtags pa'i rnam pa'am/ rnam pa dang ldan pa'i rnam par shes pa las ni 'ga' zhig skye ba ni ma yin te/des na rnam par rtog pa med pa nyid ni de'i rgyu mtshan can du mi 'thad do/ /'di rnam par 'grel pa'i gzhung yang shes pa'i tshul la ni mthun pa ma yin no/ /gzhan gyi 'dod pas de skad bshad pa yin no zhe na/ ha cang thal bar 'gyur ba'i phyir dbang du byas pa'i gzhan gyi gzhung blang bar bya ba yin gyi gzhan ma yin pa ma yin nam/des na tshad ma'i mtshan nyid bshad pa ni ma nges pa'i tshul nyid du bzhed do/ /de dag gis don byed nus pa'i don ni rdul phra rab nyid yin la rdul phra rab kyi rang bzhin yang kha dog nyid yin gyi/ dbyibs ni ma yin no/ / des na dbyibs ni kun rdzob tu yod pa yin la/ kha dog ni don dam par yod pa yin no/ /'bras bu la nye bar mkho ba yang de nyid yin gyi dbyibs ni ma yin no/ /de'i phyir gang zhig don byed pa du ma'i thun mong du de mthong ba na de de'i rang bzhin du rtogs pa de ni tha dad pa ma yin te/ dper na skad cig ma nyid bzhin no//dbyibs kyang de bzhin no/ /tha dad par yod pa ni rnam pa tha dad par don la nye bar sbyor bas khyab pa yin te/ des khas mi len na rgyu mtshan med pa'i phyir ro/ /de dang 'gal ba ni tha dad pa med par yul la nye bar sbyor ba yin no/ /dbyibs ni nye bar sbyor ba med pa yin no zhes bshad zin to//de'i phyir dbyibs sam dngos po nyid dam/ skad cig ma'am gzhan gyi dbang du gyur pa gzhan yang rung ste/ du ma las don byed pa tha mi dad pa ni rten med na yod pa nyid ma yin no/ /des na dkar po'i rang bzhin med na de'i ngo bor gyur pa'i dbyibs med la/ser po'i dbyibs kyang ser po'i rang bzhin nyid bzhin du de'i rang bzhin ma yin la/ /de 'dzin pa yang phyin ci log yin no/ /de nyid kyi phyir smig rgyu la chur shes pa ni dngos po nyid la yang slu ba'i phyir tshad ma ma yin te/ smig rgyu ma bzung na der gyur pa'i dngos po nyid ma bzung ba'i phyir dang chu'i dngos po nyid bzung ba nyid kyang de'i rang bzhin ma yin pa'i phyir te dngos po med na de yang med par 'gyur ba'i phyir ro//reg pa la sogs pa ni mig gi rnam par shes pa la snang ba ma yin pa des na gzugs nyid nges par rtogs pa yin no/ /gal te dkar po'i dngos po nyid bzung mod kyi 'on kyang kha dog gi cha la 'khrul par zad do//dbyibs kyi cha la ni mi slu ste/ dper na sngon po'i shes pa sngon po'i cha la mi slu la/ skad cig ma'i cha la ni slu ba'i phyir cig shos kyi mngon sum ltar tshad ma ma yin pa bzhin no/ /tha dad par rtogs pa yang ldog pa'i bye brag gis yin no zhe na/smras pa/ sngon po'i shes pa la sngon po snang ba na skad cig ma nyid kyi don byed pa la ni de las tha dad pa med pa yin no/ /de nyid kyi phyir mthong ba'i rang bzhin gyi cha la 'khrul pa'i rgyu mtshan srid pa'i phyir dang / de las tha dad pa med pa'i phyir skad cig ma nyid ni de bzung nas bzung ba yin par brjod do//'dir ni dung ser por snang ba'i shes pa la don byed par nus pa'i rang bzhin 'ga' yang snang ba med pa'i phyir gang gis na dkar po'i rang bzhin du gzung ba nges par ma zin pa na shes pa gzhan gyis nges par gzung bar 'gyur ro/ /re zhig ser po nyid ni de las gzhan pa kho na'o//dbyibs kyang don byed pa'i nus pas gang gi phyir dkar po dang / tha mi dad par 'gyur/ nus pa tha mi dad pa nyid kyang sngar dpyad zin to/ /de'i phyir ser po'i shes pa la snang ba ni sngon po'i rang bzhin ltar yod pa ma yin na/ ji ltar skad cig ma nyid bzhin du don byed pa'i dkar po'i bdag nyid du brtag /gzhan yang snang ba'i sngon po'i rnam pa ni skad cig ma nyid dang mi 'gal zhing / /skad cig ma ma yin pa nyid snang ba ma yin te/ dus yun ring po dang bcas pa'i don mngon sum la snang ba med pa'i phyir ro/ /de'i stobs kyis bskyed pa'i nges pa'i shes pas gzhag pa ni ma yin no//de la ni 'gal ba med pa'i skad cig ma nyid yod par 'thad kyi/ dkar po ma yin pa'i ser po la sogs pa spangs nas gnas pa'i dkar po'i rang bzhin yod pa nyid ni ma mthong yang / /mthong ba'i ser po'i rang bzhin gyi dbyibs yin par rtogs pa ni chu dang me tha mi dad par rtogs pa bzhin du don med pa'i rgyu yin no//de'i phyir don byed pa gang las tha dad pa med pa de ni de'i bdag nyid kho nas yod pa yin la/ de'i bdag nyid du yod pa yang de mngon sum gyis bzung na de dag kyang bzung ba yin la/ ma bzung na ma bzung ba yin no zhes bya ba ni tshad ma'i 'bras bu'o/ / 'o na ji ltar mgal me la 'khor lo snang ba'i shes pa'i don yod par mi 'gyur te/ kha dog 'od gsal ba'i rang bzhin ni de la snang ba'i phyir dang / dbyibs kyang don la nye bar mi mkho bas dor ba dang blang ba dag la khyad par med pa'i phyir/ dper na ser por shes pa bzhin no zhe na/ yang 'phros pa 'di gang las byung //gang gi phyir dbyibs sngon po la sogs pa don byed pa du ma'i thun mong ba ni/ de la brten cing de'i rang bzhin du yod kyi/ tha dad pa ni ma yin pa de'i phyir dkar po'i rang bzhin de dang dbye ba med par 'jug pa'i dbyibs kyang btang bar 'gyur te/ dngos po nyid bzhin no/ / gzung ba gang yin pa de ni gzhan la brten pa nyid yin pas/ de yod na yod la/ med na ni med pa yin no/ /de la bsams nas ni shes pa yod pa 'dzin par byed pa/ zhes brjod pa ma yin la/ de tsam gyis kyang sngon po la sogs pa'i dngos po de dbyibs la ltos pa med par gzung bar bya ba yin no zhes brjod par mi 'gyur ro//'di ltar sngon po'i rdul phra rab ni lus can nyid kyis phan tshun gyi rang bzhin gyis yongs su spangs nas skye ba la bum pa la sogs pa bzhin du dbyibs kyi rnam pa 'ga' zhig gis 'ga' zhig gi don byed pa ni de kho na ltar 'dzin pa yin no/ /de ltar snang ba de dag la phyogs kyi rjes su 'gro ba gcig tu brtags pa'i rags pa ni don du ma snang ba'i chos yin gyi dngos po'i rang bzhin ni ma yin no//spyi'i don gyi tshul la mang po rnams kyi rang bzhin la de lta bu'i dbyibs su brten pa du mar yang med pa ni ma yin te/ de lta bu'i rang bzhin du gyur pa ni yod par mi 'gal ba'i phyir ro//de ni mang po rnams kyi rang bzhin yin no zhe na/ de ci du ma'i dngos po thams cad gcig yin nam/ de'i phyir ji lta bu'i dbyibs dang ldan pas don byed par nus pa'i dbyibs de btang na dngos po nyid yongs su btang ba yin te/ dbyibs de ltar gzung ba de mi 'dzin pa'i phyir ro//des ni dbyibs tha dad pa can gyi 'khor lo snang ba na snang ba la dbyibs gzhan dang ldan pa'i mgal me med pa'i phyir ro/ /phyogs kyi cha khyab pa reg pa'i khyad par dang ldan par mthong ba'i 'khor lo don byed nus pa yang 'di la snang ba med pa yin no/ /de nyid kyi phyir ljon shing 'gro bar 'dzin pa don byed pa yin te/de la snang bar nges pa ci 'dra ba de 'dra bar gyur ba ni 'bras bu sgrub par ma mthong ba'i phyir ro/ /gang zhig don byed nus pa'i rang bzhin la 'khrul pa med pa de ni 'khrul pa med pa yin pa des na mngon sum ma yin no/ /des na chos gang mthong ba nyid 'bras bu byed pa'i dngos po mthong ba yin pa de btang na dngos po btang ba yin no zhes bya ba ni tshad ma'i don to//ji ltar lhag par zhen pa mi thob pa'i phyir/ mi bden pa'i don can de rjes su dpag pa yang ma yin te/ des na tshad ma ma yin no/ /gal te de ltar na 'jig rten na gsal ba tha dad pa la rnam par dbye ba med par dper na thag ring po nas ne'u gseng la sogs pa la ljang gu'i mdog gcig tu 'dzin pa dang /de bzhin du shin tu gsal ba'i kha dog la yang mi gsal bar 'dzin pa dper na lha khang dkar po la sogs pa rdul gyis g.yogs pa lta bu dang /de bzhin du tshad ma gzhan dang ldan pa la 'gal ba'i tshad ma ldan pa dper na thag ring po nas mi la sogs pa lta bu dang / de bzhin du yi ge gsal ba'i sgra la gzhan du yongs su gcod pa dper na chod pa na 'dod pa lta bu'o zhe'o/ /de dag ni bden pa'i rang bzhin yin te/ don byed pa la nye bar sbyor bar mthong ba'i phyir ro/ /de'i phyir tshul 'dis nye ba dang ring ba la sogs pa'i dbye bas mngon sum 'ga' zhig kyang don byed pa'i rang bzhin 'dzin pa ma 'khrul bar mi 'gyur ro/ /de nyid kyi phyir phyi rol gyi don spong ba yin no zhe na/ phyi rol gyi tshul la yang slob dpon gyis lam 'dir bzhud pa ma yin nam/des na rnam pa 'di lta bu yang tshad ma ma yin pa'am/ /dbyibs tsam la phyin ci log pa yang tshad mar 'gyur ba'i phyir 'dir brdas nas 'thor ba yin no zhe na/ bden te/ dbyibs la mngon par zhen pa ni cung zad kyang med kyi/ 'on kyang gang gis don byed nus pa ji lta ba bzhin du 'dzin pa de 'dra ba'i shes pa de ni de la phyin ci ma log pa bzhin no//thag ring po nas ma 'dres pa dang / gsal ba dang / tshad chen po la gcig dang mi gsal ba dang / tshad chung ngur snang ba'i shes pa ni de la dmigs pa yin te/ de las de thob pa'i phyir ro//'o na ni de lta na ljon shing 'gro bar snang ba dang / zla ba dngos por 'dzin par 'gyur te/ de las de thob pa'i phyir ro/ /ji ltar snang ba na ma thob pa'i phyir ji ltar thob pa yang mi snang ba'i phyir de ltar ma yin no zhe na/ de ni gzhan la yang mtshungs te/ gsal ba dang ma 'dres pa dang tshad chen po ni de las bzlog pa dang 'gal ba'i phyir ro//'o na ni rtog pa po thams cad la 'khrul ba med par mthong ba'i dngos po gang yin pa de ni thag ring ba dang nye ba 'dzin pa'i yul gyi khyad par gyis tha dad kyang chad ma yin no/ /'dir ni rab rib can dang / grur zhugs pa 'ba' zhig gis de ltar rtogs pa yin no zhe na/'di la yang nye ba rnams kyis de ltar ma mthong ba'i phyir 'khrul par mtshungs so/ /yul bskal pas rnam pa gzhan du snang yang rnam pa gzhan gyi 'dzin par byed pa yin no zhes bya ba ni don 'brel pa ma yin no/ /de lta na ni 'o na ci 'dra ba zhig nyid don byed pa la nye bar sbyor bar snang ba de nyid yod pa yin la/der snang ba'i mthong ba yang de ltar snang ba yin no zhe na/ ma 'khrul ba nye bar bkod pa rnams la yang brjod par bya'o zhe na/ 'di la bar chad can gang yin pa'i dngos po gnyis dang de'i bar chad gang yin pa ste/dngos po gsum po ni tha dad par mthong ba yin no/ /des na bar chad ni gzhan nyid yin par mthong ste/ /dper na lo ma rnams la snang ba'i bdag nyid kyi gseng bzhin no/ /dngos po de yang gzhan yin no/ /nye ba dang ring ba'i bye brag gis ni 'ga' zhig gis cung zad cig mthong gi thams cad ni ma yin no//nye ba na 'dug pa'i bar chad dang bcas pa'i lo ma dmigs pa'i phyir bar chad dang bcas pa nyid du 'dzin la/ ring po na 'dug pas ni bar chad mi mthong bas mi snang ba'i phyir lo ma 'ba' zhig snang ba na sngon po'i dngos po gcig tu snang bar shes pa yin no//de tsam gyis ni de'i dngos po med par snang ba ma yin no/ /bar chod bya ba'i rdzas ma bzung ba na de ltar snang ba mi 'gal ba'i phyir ro/ /de'i phyir thag ring po na 'dug pa nyid rang gi ngo bo nyid bar chod pa med par shes pa gcig gis bzung ba'i phyir ring po na 'dug pa'am/ gzhan na 'dug pa la ma nges pa nyid kyi shes pa'i snang ba la ltos nas 'khrul ba yin gyi 'dres pa mthong ba ni ma yin no//dper na 'dres pa dag la gang rung cig gzung ba na 'ba' zhig par 'khrul pa bzhin no/ /de bzhin du skar khung gi bu ga nas gsal ba lta bus thams cad khyab pa'i rdul gyi cha yod pa dag gis sa'i dkyil 'khor khyab pa bzhin du shin tu mtho ba'i ri la gnas pa dag gis mthong ba yin no//mthar thug par gnas na ni de mthong bar 'gyur/ nyi ma'i 'od bzhin no/ /ring po na gnas pa mang po bsags pa ni bzung ba na mthong ba rnam par 'gyur ba'i rgyu yin gyi/ nyung ngu tshogs pa ni de ltar mthun pa ma yin no//des na dngos po'i don byed pa'i khyad par dang ldan pa'i dbyibs rdul dang 'dres pa ring po nas snang ba na rnam pa gnyis tha dad par snang ba med kyang mi gsal bar snang bar 'gyur te/ dper na dngul gyi cha cung zad dang ma 'dres pa'i gser la/ dngul gyi cha mi snang bar ser po nyid mdog mi bzang bar snang ba bzhin no/ /'dres pa bzung ba na de ltar snang ba yin gyi/ der rdzas gzhan nyid skyes pa ni ma yin te/ yang mkhas pa dag gis de rnam par 'byed pa'i phyir ro/ /gcig ni dbye bar nus pa ma yin no/ /kha dog gzhan skyes su chug pa de lta na yang /de nye bar len pa las phyis 'gal ba'i rang bzhin gyis don gnyis ji ltar skye/ de'i phyir ji ltar rdul gyi tshogs nyung ngu dang 'dres par bzung ba'i rnam pa gsal ba de nyid yang rdul gyi tshogs mang po dang 'dres pa mi gsal bar 'dzin pa yin no/ /de'i phyir de nyid don gzhan dang lhan cig tu bzung bas mi gsal bar snang ba yin te/dper na rta rmig gis brtul ba'i sa rdul langs pa des gos pa'i kho dog bzhin no/ /des na mi gsal bar 'dzin pa gsal ba'i dngos po'i yul can du mi srid par ji ltar 'gyur/ yang na ni tshu rol mthong ba'i mthong ba thams cad ni mi bden pa dang 'dres pa'i bden pa yin te/'di ltar rnam par shes pa mi bden pa ston pa'i nus pa ni sems tsam du smra ba rnams dang rnam pa dang bcas pa dang / rnam pa med pa'i shes pa'i gzung ba phyi'i don yod par smra ba dag gis kyang khas blang bar bya ba yin no//thun mong gi rang bzhin ni 'da' bar bya ba ma yin pa des na/ thag ring po na yod pa ma yin pa'i rang bzhin gzhan dang 'dres par 'dzin pa la 'gal ba med do/ /gal te rnam par byed pa don ma yin nam/ de las 'das na ni gzung ba ma nges par 'gyur ro zhe na/ de lta ma yin te/gang gi phyir bdag nyid gsal ba'i rgyu'i don te rang gi sems la rang gi dngos po'i gzung ba'i don yod pa ma yin par gtod par byed kyi gzhan ni ma yin no/ /don gzhan dang 'brel pas ni dbyibs kyi khyad par can gyi dngos po de nyid gnyis ka'i bdag nyid can nam/ yul gzhan na gnas pa ni mi 'gyur la/gang gi zla ba gnyis sam/ ljon shing 'gro bar shes pa bden pa'i don can du 'gyur/ don gzhan dang 'dres pa'i phyir na dngos po dang mi gsal bar yang mi 'gyur gyi/ 'on kyang mi mngon pa'i rang bzhin gyi don gzhan gyi nges par brtag par bya ba'i kha dog tu 'gyur ba 'ba' zhig tu zad do//de nyid kyi phyir nges par brtags pa'i kha dog 'dzin pa na tha dad par ma byas pa'i phyir mi gsal bar snang ba yin te bstan pa'i dpe bzhin nam/ rdul gyis bsgribs pa'i kha dog bzung ba na rdul dang 'dres pa'i kha dog mthong ba bzhin no//de'i phyir mi gsal bar snang ba yang dngos po 'dzin pa yin no/ /gang zhig rang bzhin gzhan dang rnam pa dbyer med pa'i mthong ba'i don byed nus pa'i dngos po 'dzin pa de ni don byed nus pa'i yul can yin te/ dper na sgro btags kyi rnam pa dang rnam pa dbyer med pa snang ba'i rang bzhin snang ba'i yul can gyi rnam par rtog pa'i shes pa bdag nyid la mi slu ba'i mngon sum yin pa bzhin no//thag ring po na gnas pa ni 'dzin par mi gsal ba'i snang ba'i shes pa yang de bzhin no/ /de lta bur gyur pa'i mi gsal bar snang ba las don gzhan dang 'dres pa'i sngar bshad pa'i don de thob pa na 'dzin pa'i shes pa dngos po'i yul can ma yin pa ni rgyu med pa yin no zhes pa ni rang bzhin no//de'i phyir yul med pa 'ba' zhig mi gsal bar snang ba ni ma yin gyi/ 'on kyang yul gzhan dang 'dres pa yang yin no zhes bya ba ni don dam pa'o//de nyid kyi phyir ji srid thag ring po nas dbyibs kyi khyad par dang ldan pa mi gsal bar mthong ba de srid du mngon sum yin no/ /kha dog btang na ni kha khyer gyi mthar thug pa na gnas pa'i rdul gyi tshogs nyid snang ba yin la/ rdul nang na gnas pa de nyid dbyibs de dang 'dra ba yin pa des na dbus na gnas pa'i kha dog gi dngos po mthong ba dbyibs kyi rjes su dpog pa yin no//'dis ni mtshan mo mun pas chod pa rtog pa rjes su dpag par bshad pa yin te/ dper na khyad par can gyi dbyibs dang ldan pa'i ral gu bzung ba las de dang mthun pa'i dngos po de'i nang na 'dug pa rjes su dpog pa bzhin no//de bzhin du phan tshun gyi rang bzhin dang / yul yongs su spangs nas/ skyes pa'i rdul phra rab rnams la/ lus can yin pas yul gyi khyad par gyis khyab pa'i mtshan nyid kyi dbyibs ni yod pa nyid kyi/ tshad gcig ni mi 'thad do/ /rnam pa thams cad du chen po'am chung ngu yang rung ste/gang zhig phyogs kyi rjes su 'gro ba'i tshad ni yod pa ma yin te/ des na de ni snang bar 'gyur ba yin gyi/ dngos por 'gyur ba ni ma yin no/ /'di ltar mtshungs pa mang po bar mchod pa snang ba rnams la/ lus can nyid kyi phyogs kyi rnam par dbye ba sngon du 'gro ba can phyi rol ma yin pa'i tshad kyang snang bar 'gyur ro//de yang btags par yod pa yin no/ /de la thag ring po nas ches mang po dngos po mthong bas khyab pa rnams las mthong ba'i cha chung ngus khyab pa gcig mthong ba na shes pa las tshad snang bar 'gyur ba yin no//tshad de dngos po'i chos ma yin yang rdzas nyung ngu la ma 'khrul bas mang po la tshad gzhan dang ldan par mthong ba na/ mang po ma yin pa'i rdzas mthong bas dmigs par byed pa ji ltar 'gyur/ mang po la ni nyung ngur 'dzin par 'jug pa phyin ci ma log pa zhes bya ba ma yin no zhe na/ gal te tshad gzhan du sgro btags nas 'dzin pa nyung ngu nyid nges par bzung ba ni bden na/'on kyang nyung ngu mang po ni so sor nges pa nyid kyi yul gyi khyad par gnon pa'i bya ba dang ldan pa'i phyir thag ring po nas tshad chung ngu bzung yang mang po'i yul khyab pa'i dngos po mthong ba de na tshad gzhan dang ldan yang khyad par can gyi yul khyab pa'i dngos po nyung ngur bzung ba ma yin no//gal te yang ji ltar 'grib pa de ltar bya ba nyams na ni de'i tshe dngos po gzhan gzung ba'i phyir ji lta ba nyid ma yin pa snang ba nyid yin no/ /de'i phyir thag ring po nas tshad chung ngu dang ldan par snang yang dngos po 'dzin pa yin no/'o na ci'i phyir thag ring por mya ngam dag na chung ngu la tshad gzhan dang ldan par 'dzin pa la 'khrul pa yin zhe na/ gang gi phyir de la tshad chen por 'dzin pa na yul gang khyab pa de ni dngos po yod pa ma yin zhing / der gyur pa 'dzin pa de'i yul gyi rang bzhin ma yin pa la de'i yul gyi rang bzhin can du 'dzin pa'i phyir 'khrul pa'i shes pa yin gyi/gzhan la ni dngos po de gang la med pa der yang 'dzin pa ni ma yin no/ /sgra yang dbang po ma nyams pa nye bar 'dug pa dang / sgra yang re re nas ma 'khrugs par thos na ni yi ge'i cha thams cad yul du 'gyur te/ skad cig so so gnas dang byed pa phrad pa tha dad pa las bar chad dang bcas pa mngon pa yin no//de nyid kyi phyir yi ge'i rnam pa ma bzung bas na zur chag pa dang / ring du 'phos pa ni thag ring po na gnas pa dang / rna ba nyams pa'i yul yin no/ /ca co'i gnas skabs su yang gnas dang byed pa phrad pa'i khyad par las 'khrugs par skyes pa na snga ma bzhin yul yin no//'di dag la yang tshad ma ni/ thag ring po kho na nas yin no/ /thag nye ba la ni 'di lta bu'i rigs can yul gzhan la 'jug pa rang bzhin gzhan gyi yul can tshad ma ma yin no/ /gang yang dung yod pa nyid la de'i shes pa skye ba de ni 'khrul pa rnams rgyu nges pa can yin pa'i phyir ro//zla ba gnyis su snang ba la sogs pa'i phyin ci log gi shes pa ni yul dang dus la sogs pa rgyu'i khyad par la ltos nas 'jug pa nyid do/ /dper na sprin med pa'i nam mkha'i phyogs zla ba dang 'brel pa'i phyogs su zla ba gnyis pa'i shes pa yin no//de la rjes su 'gro ba dang ldog pa dag las zla ba ni rab rib bzhin du rgyu yin gyi/ rang gi rnam par 'jog pa mi nus pas na yul ni ma yin pa de bzhin du dung dkar po yang yin no/ /de nyid kyi phyir gal te de lta bu'i rnam par shes pa zla ba gcig gam yul gcig na gnas pa'i shing la sogs pa ma mthong ba rjes su 'dod pa de'i tshe 'gal ba med do//gang gi phyir nges pa'i 'jug yul thob par byed pa'i phyir tshad ma yin pa de'i phyir log pa'i shes pas don mi 'thob po/ /'di ltar gal te 'jug pa'i yul thob par byed na ni de'i tshe yang dag pa'i shes pa nyid yin la/de thob par mi byed na yang ji ltar don thob pa yin/ de'i phyir sngar bshad pa'i tshul gyis gzhan du na de'i bya ba med pa'i phyir ro/ /des na gang log pa'i shes pa yin pa de ni zhen par byas pa'i don thob pa'i rgyu ma yin te/ dper na smig rgyu la chur shes pa bzhin no/ /de bzhin du rtsod pa'i gzhir gyur pa yang log pa'i shes pa yin no/ /don thob pa'i rgyu nyid ni yang dag pa'i shes pas khyab pa yin te/ rgyu mtshan gzhan dang 'brel pa'i yang dag pa'i shes pa nyid med pa'i phyir ro/ /gal te the tshom gyi shes pas kyang mngon par 'dod pa thob na de yang dag pa'i shes pa nyid ni ma yin no zhe na/de las ni don mi thob ste/ gang gi phyir the tshom ni yod dam med ces gnyis ka la dmigs nas 'jug la/ dngos po dang dngos po med pa las ma gtogs pa ma nges pa'i dngos po yang 'jig rten na yod pa ma yin no//de las ni zhugs pa las nges par byed pa thob pa'i rgyu'i tshad ma gzhan 'jug pa yin no/ /de lta na ni 'o na sgra'am gzhan las kyang rung ste/ gang gi tshe rang gi ngang gis nges pa'i rnam pa can gyi shes pa skye ba de'i tshe don thob po snyam na/ de ltar ni mi rigs te/ gang gi phyir don gyi rang bzhin snang ba'i rnam par shes pa'am/ de'i rang bzhin 'dzin pa dang bral ba'i rtogs par byed pa'i shes pa skye bar 'gyur grang / de la de snang ba'i rnam par shes pas gzung na ni snang ba la nges par 'jug pa nyid do/ /rtog pa'i shes pa ni de rnam pa dang mi ldan pas rgyu mtshan med pa'i phyir ji ltar nges par byed/de med na mi 'byung ba mthong na ni nges par rigs pa yin no/ /de'i phyir nges pa med par dngos po rtogs pa yang nges par byed pa'i rgyu mtshan med pa'i phyir cha gcig tu 'jug par 'dod kyang de ni the tshom gyi phyogs su rtogs so//gang gi tshe du bar 'dod pa'i sbrang bu'i tshogs mthong ba las me la shes pa skyes pa de'i tshe gnyi ga la dmigs pa ma yin pa des na de ni mi slu ba yin no zhe na/ du ba'i rgyu mtshan can gyi nges pa ni du ba yod na yod la/ ma nges na yang the tshom nyid do snyam pas du ba'i rjes su 'brang bas yang dag pa'i du ba'i rang bzhin nges par ma rtogs pa'i phyir/de ma nges pa'i yul nyid du gzhag pa ma yin nam/ des na the tshom nyid do/ /des na de'i rang bzhin bzung ba'am/ de'i rang bzhin med na mi 'byung ba bzung ba kho na nges pa yin no/ /gzhan du ni ma nges pa'i yul can nyid kyis srid par brtags pa the tshom gyi rang bzhin shes pa yin no//gnyis ka'i bdag nyid kyi dngos po yang med pas thob par byed pa ni ma yin no/ /de nyid kyi phyir yang dag pa'i shes pas nges pa'i don thob pa des na 'bad pas ston par byed do/ /gzhan du na ni de bstan pa don med par 'gyur te/thob pa'i rgyu gzhan srid pa'i phyir ro/ /de nyid kyi phyir nges pa smos pa yin no/ /'o na gal te nges pa'i don thob par byed pa nyid tshad ma ma yin na ni de lta na ni 'o na rgyu 'ga' zhig las spang bar bya ba dang blang bar bya ba'i don la ma zhugs sam/zhugs kyang 'gal ba'i rkyen nye bas thob par byed pa ma yin pa'i 'jug par byed pa tshad ma ma yin par 'gyur ro zhe na/ de ni mi rigs te/ gang gi phyir shes pas skyes bu mi 'dod kyang / gal te gzhug par bya ba'am/ 'gal ba'i rkyen nye ba yang spang bar bya ba ni ma yin gyi/'on kyang 'jug pa'i yul nye bar bstan par bya ba 'ba' zhig tu zad do/ /de tsam gyis ni de tshad ma ma yin no zhes brjod pa ma yin no/ /don thob pa ni phyis kyi don la dmigs pa'i shes pa'i bdag nyid yin na/ gzhan ni gzhan gyi rang bzhin du 'gyur bar mi 'os te/ ha cang thal ba'i phyir ro//des na zhig par gyur pa gang zhig thob par byed pa po gang yin pa de yang / dus phyis thob pa'i rang bzhin ni ma yin no/ /des na thob par byed pa'i nus pa'i don thob par byed pa po'i tshad ma nyid ni shes pa'i rang bzhin nyid yin par blta bar bya'o/ /don thob pa'i nus pa de yang rgyu mtshan med pa can du ni rigs pa ma yin te/thams cad kyang thal bar 'gyur ba'i phyir ro/ /phyis kyi thob pa'i shes pas byas pa yang ma yin te/ gang gi phyir nus pa ni rang bzhin las tha dad pa ma yin no/ /rgyu yang brtags na thob par bya ba'i don de nyid yin te/gang gis de las skyes pa de'i phyir na nges par de thob par byed pa yin no/ /yang gang zhig zhen par byas pa'i don las ma skyes pa de ni de dang ma 'brel ba'i phyir thob par byed pa ma yin no/ /de las skyes pa'i rgyu mtshan can gyi de thob pa'i nus pa de ni gang gis 'jug par byed pa ma yin pa de la yang dgag pa med pas na de yang tshad ma nyid do//gal te de ma thag pa'i rgyu nyid nus pa yin pa de lta na yang dngos po gzhan bzlog pa la phyogs pa'i ngag la/ 'di nyid lhan cig byed pa dag gis bogs phyung bas nus pa yin gyi/ bum pa ni ma yin no zhes sbyang nang na gnas pa'i sa bon myu gu'i rgyu yin par brjod pa de bzhin du log pa'i shes pa'i 'jug pa ni brgyud pas kyang nus pa med par bstan pa'i phyir brgyud pas thob par byed pa po yang dag pa'i shes pa nyid yin par brjod do//gang gi phyir don du gnyer bar 'dod pa la 'jug par byed pa de ni 'dir 'thob par byed pa yin la/gzhan ni rnam par dpyad nas rnam par gzhag go/ /don byed par snang ba'i shes pa las bsams pa'i don grub pa ni 'ga' yang 'jug pa med de/ gang gi phyir de nyid dgos par 'dod pa yin gyi/ thob par bya ba gzhan ni yod pa ma yin pa de'i phyir/shes pa de'ang skad cig ma ni tshu rol mthong bas dpyad par 'os pa ma yin no/ /lhag mar gyur pas 'di dpyod par byed pa ni 'jug par byed pa nyid yin no/ /de nyid brgyud pas ma nges par rgyur gnas pa'i phyir de nyid ni tshad ma yin te gzhan med pa'i phyir ro/ / ci ste de las skyes pas byas pa'i de thob par nus pa ji ltar nges par bzung zhe na/ re zhig rjes su dpag pa dang don byed pa'i shes pa'i mngon sum ni rang bzhin mthong ba nyid las so/ /gang gi phyir yod pa ni don byed par nus pa nyid yin pas de bzung na/ don du gnyer bar bya ba'i dngos po gzhan ci yod de/de'i phyir de ni rang kho nas don yod par nges pa yin no/ /yang don byed pa med par dngos po 'dzin pa'i mngon sum bdag nyid kyi yul bsgrub par bya bas don du gnyer ba yul la 'jug par byed pa gang yin pa de ni cung zad ni gzhan las tshad ma yin te/gang zhig dngos po 'dzin pa nyid du ni nges la khyad par 'dzin pa nyid du ma yin no/ /dper na thag ring po nas dmar lam me ba'i rnam pa can gyi shes pa skyes pas na ci 'di pa la sha'i me tog gi dog pa'i tshogs sam/ 'on te me'i phung po bzhin zhes khyad par la the tshom za yang /dmar lam me ba'i rang bzhin gzung bar nges la/ khyad par gzung ba nyid du ni ma yin pa lta bu'o/ /dmar lam me ba tsam la ni dngos por 'dzin pa nges pa dang 'jug par byed pa yang yin no/ /khyad par la nges pa ni du ba la sogs pa'i 'brel pa mthong ba las sam/drung na 'dug pa'i mngon sum nyid kyis yin no/ /yul de la thob par byed pa ni snga ma de nyid yin par 'dod do/ /'di ltar rjes su dpog pa ni med na mi 'byung ba dang ldan pa nges pa las dngos po nges par byed pa'i tshad ma yin no/ /mngon sum ni bzung ba'i rnam pa nges par byed pa las yin gyi/med na mi 'byung ba mthong ba las ni ma yin no/ /'dir ni don byed pa la nye bar mkho ba'i dmar lam me ba gang yin pa de nyid kyi yul dang dus dang rnam pa nges pa shes pa snga ma de la snang bar rnam par gnas pa yin te/ gzhan du na dngos po de'i yul la brten pa'i the tshom nyid du mi 'gyur ba'i phyir ro//de tsam gyis kyang dngos po la mngon sum gyi bya ba yongs su rdzogs pa yin no/ /de la phyis rgyu kha cig las mthong zhing nges pa'i don med na mi 'byung bar the tshom za zhing / dngos po la yang reg par 'gyur ba yin no/ /de nges par 'gyur na ni mthong zhing nges pa'i dngos po la the tshom yang mi gnas par 'gyur ro//de'i phyir shes pa gzhan las ni shes pa'i bdag nyid kyi med na mi 'byung ba'i mtshan nyid tshad ma de nyid sngar ma nges pa nges par bya ba yin gyi/ dngos po ni ma yin no/ /sngar gyi mthong ba'i 'du byed ma nyams pa de la zhen par byed pa zhen pa ni dran pa yin no/ / dngos po tha dad pa 'dzin na ni rang gi yul la tshad ma nyid de/ dper na lhan cig spyod pa'i reg pa 'dzin pa bzhin no/ /gang gis 'dzin par byed pa nyid la/ med na mi 'byung bar the tshom za bar gzhan la nges par bya bar 'gyur ba skad cig ma nyid ni de ltar bzung zhing nges pa ma yin gyi/ 'on kyang dngos po de nyid shes par bya ba yin no/ /de'i phyir ji ltar smig rgyu la chur sgro btags pa med par ma nges pa'i phyir de'i rang gi mtshan nyid 'dzin pa'i shes pa de la tshad ma ma yin pa de bzhin du skad cig ma nyid dam/ gzhan ni rjes su dpag par bya ba yin gyi mngon sum ni ma yin no//gal te bar du nges par byed pa'i shes pa gzhan ma byung na ni don byed pa'i shes pa las kyang yin no/ /des na ji ltar bden pa'i khyad par la gzhan las tshad ma yin pa de bzhin du dngos po tsam du 'dzin pa yang yul gyi khyad par la ltos nas de kho na ltar tshad mar nges pa yin no/ / khyad par nyid du the tshom za ba rnam pa gnyis gang yin pa de yang gzhan las de'i rang bzhin nges par byed de/ dper na mer snang ba'i shes pa 'dir bdag la skyes par tshor na ci skyes sam zhes bya ba dang / yang na gang gi tshe mer snang ba'i shes pa nyams su myong ba the tshom yang mi za'i/ ci 'di don med pa can yin nam snyam pa de'i tshe 'jug pa'i yul ni thams cad du snang ba nyid yin la/'jug pa'i yul rnam par 'jog pa yin pa na tshad ma yang snga ma nyid yin no/ /'ga' zhig ni rang nyid kho na las tshad ma yin te/ 'brel ba can gyi khyad par du 'gyur ba'i dngos po 'dzin pa'o/ /gang gi phyir 'khrul ba'i shes pa ni yul dang dus dang gsal byed dang /rgyu nges pa dang ldan par skye ba yin te/ mya ngam dang chung ngu la chen por 'khrul pa dang / thag ring na 'dres par snang ngo / /nyi ma gung la tshad pas nyams pa'i shes pa mi gsal ba'i phyir smig rgyu la chur nges pa dang / mar mes gsal bar byas pa na ut+pa la sngon po la sogs pa la dmar por 'dzin pa dang /rab rib kyis nye bar bslad pas zla ba gnyis su 'dzin pa lta bu ste/ 'khrul pa 'di thams cad ni dngos po nges pas bskyed pa yin no/ /de'i phyir yul nye ba dang / dus kyi khyad par can dang / gsal byed khyad par can dang /dbang po ma nyams pa dang / bdag nyid gnyid la sogs pas ma gdungs pas yul nges pa la sogs pa'i gnas skabs can gyi 'dzin par byed pa dang ldan pa'i dngos po mthong ba las na 'dzin par byed pa don mi 'byung bar shes par 'gyur ro/ /'di ltar de lta bur gyur pa'i rnam par shes pa lan cig ma yin par don 'dzin pa nyams su myong ba'i tha snyad goms pa las de'i rang bzhin rig par 'gyur ba yin no//rtogs par byed pa po nyams su myong ba kho nas de'i bdag nyid nges par byed do/ /gang yang rnam par mtshungs pa'i phyir skyes pa'i dus su ni mngon sum dang der snang ba dag la tha dad pa yod pa ma yin no zhes zer ba de ni mi bden te/'brel pa can gyi khyad par gzung bas nges pa'i phyir ro/ /de lta bur gyur pa'i yul la sogs pa nyid du the tshom za'am/ phyin ci log tu 'gyur gyi thams cad du ni ma yin no/ / gzhan du na du ba mngon sum nyid kyis rnam par 'byed pa ston pa ji ltar 'gyur te/ 'khrul pa'i rgyu ni yod pa nyid do/ /de ni mngon sum nyid kyis de'i 'bras bur nges la/ shes pa ni ma yin no zhes bya ba 'di la rgyu ci yod/ tha snyad las ni tshad ma nyid ces bya ba yang goms pas yang tha snyad du dgongs nas bshad pa yin gyi/don byed pa'i shes pa kho nar ni ma yin no/ /de nyid kyi phyir de 'dra ba'i ni rjes su dpag pa las tshad ma nyid ma yin no/ /sngar goms pa las 'di'i don nges pa na rjes su dpag par bya ba nyid do zhe na/ de lta na ni du ba yang rjes su dpag par thal lo//'di ltar de ni sngar me'i 'bras bu nyid du nges shing phyis ni mthong ba nyid las de ni 'di yin no zhes dran par byed pa yin gyi rjes su dpag pa ni ma yin no/ /gang yang 'jig rten rgyang pan pa'i dbang du mdzad nas de ni rjes su dpag par bya ba las ma 'das so zhes gsungs pa der ni rang dang gzhan gyi rgyud la yod pa'i dbang po'i shes pa'i gsal ba thams cad la don thob pa'i nus pa rjes su dpog par bya ba yin gyi nyams su myong ba la ni ma yin no//de nyid kyi phyir nyams su myong ba'i yul can ma rtogs pa zhes gsungs so/ /de'i phyir 'dir ni don med na mi 'byung ba nyams su myong ba yin no//rnam pa 'ga' zhig gi gtan tshigs kyi phyir de'i thob pa'i nus pa rjes su dpog gi nyams su myong ba'i shes pa'i gsal ba la ni ma yin pa'i phyir mi mtshungs so/ /gang yang nye ba'i yul la shes pa don la mi slu bar mthong nas/de las dbang po ma nyams par shes te yul nye ba ma yin pa la yang de'i rang bzhin du rtogs par byed do zhes zer ba de yang yang dag pa ma yin te/ gang gi phyir zla ba gnyis su snang ba'i rnam par shes pa ji snyed pa yang nye ba'i nam mkha'i ngogs dri ma med pa snang ba la mi slu bar mthong ba'i phyir ro//shes pa de dag nyid tha dad pa nyid do zhes bya ba yang mna' chu btung ba bsten par bya ba yin no/ /tha dad pa yin du chug pa de lta bu yid brtan du med de/ bden pa dang mi bden pa dag cig car 'dzin pa'i phyir ro/ /de'i phyir sngar bshad pa'i 'brel pa'i khyad par can gyi dngos po'i yul can tha snyad goms pa'i mngon sum gyi shes pa thams cad ni de med na mi 'byung bar nges pa ni rtag tu rang kho na las tshad ma yin no//khyad par la the tshom za ba ni thag ring po'i yul can ni rtag tu gzhan las so/ /dngos po'i rang bzhin spyi tsam la ni rang kho na las so//khyad par bzung ba nyid du the tshom za ba rnam pa gnyis po gang yin pa de yang gzhan kho na las so/ /mngon sum gyi rnam pa dngos po zhes bya ba'am shing zhes bya bar ni nges la khyad par nges par ma rtogs pa'am mer nges pa la bden par the tshom za ba ni gzhan las nges pa yin no/ /gang gi phyir the tshom skyes pa'i sngon du 'jug pa'i yul shes pa'i phyir ro//de la 'jug par byed pa ni mngon sum yin gyi phyis kyi the tshom ni ma yin te/ de'i rnam pa la mi 'jug pa'i phyir ro/ /gal te 'jig rten the tshom las kyang mi 'jug na ni the tshom skyes pa na 'jug par mi bya bar 'gyur ro/ /de'i phyir tshad ma gzhan las tshad ma yin gyis the tshom las 'jug pa ni ma yin no//'jug pa'i thog ma nyid du 'gal ba'i rang bzhin du lhag par nges na ni/ mngon sum gyi rnam par 'jug pa'i gzhi ma yin te/ dper na smig rgyu 'dzin pa lta bu'o/ /rnam par rtog pa'i shes pa la rnam pa snang bas na 'jug pa'i yul shes pa ma yin la/lhag par nges pa yang med na mi 'byung ba ma mthong na the tshom za'o/ /des na the tshom de nyid la 'jug pa yin no/ /gang lan cig tha dad pa ma rtogs pa'i mngon sum gyi yul don gzhan dang 'dra ba'i dngos po de ni lan gsum mam/ bzhi mthong ba'i dus su tha dad par rnam par ma phyed kyang /goms pa'i dbang gis tha dad pa nyid mngon sum du 'ga' zhig gis byed pa yin te/ dper na dngul dang nor bu mkhan la sogs pas de'i rang bzhin rig pa bzhin no/ /de bzhin du mngon sum du shes pa yang ngo / /gtan tshigs ma grub pa yang ma yin no//gang gi phyir de ni rang rig pa nyid do/ /tha dad pa ma nges kyang yul dang dus dang gsal byed dang 'dzin par byed pa'i khyad par can don med na mi 'byung ba'i shes pa la mi 'khrul ba dag ni mtshon par nus pa'i phyir lan cig mthong ba tha dad pa ma nges par phyis tha dad pa mngon sum du byed pa'i rgyu mtshan ni 'di tsam du zad la/de yang 'di la yod pa yin no/ /mngon sum du mi byed na ni/ rgyu mtshan gzhan la ltos pas khyab la/ de tsam gyi rgyu mtshan can nyid dang 'gal ba yin no/ /de'i phyir rgyu mtshan ma tshang ba med pa nyid 'gal ba dmigs pas mi mthun pa'i phyogs las ldog pa na mthun pa'i phyogs nyid grub pa'i rang bzhin no//shing gi spyi nges pa ni de dang tha mi dad pa'i dang ba la sogs pa'i yul yin no/ /de la 'jug par byed pa ni sngar gyi mngon sum nyid do/ /snga ma de khyad par 'dzin par byed pa nyid du ni rang las ma nges kyi phyis gzhan las nges par 'gyur ro//de ltar shes pa khyad par 'dzin par byed pa la ni the tshom za bar blta'o/ /de tsam gyis ni phan tshun bsten par 'gyur ba 'ga' yang yod pa ma yin te/ the tshom las kyang 'jug pa mthong ba'i phyir ro/ /don byed mi slu ba yin te//de nus thob byed tshad mar 'dod/ /de ni gal te gzhal bya la/ /ltos par 'dod na kun gyi min/ /des na de las gzhan min te/ /de ldan nyid ni rtogs pa yin/ /thob pa'i 'bras can 'jug pa la/ /de gtso yin phyir rnam gnyis 'dod/ /tha dad rang dbang dang ldan par/ /yul 'jog phyir na shes pa la//thob par byed pa nyid du 'dod/ /de phyir de nyid tshad ma yin/ /nges par 'jug pa'i yul dang ni/ /thob bya'ang gzhan du mi 'jug dang / /thob pa'ang gzhan du med phyir ro/ /'jug par byed pa'ang nges pa ste/ /yul shes med pa gzhan ma yin/ /de ni tshad mar rab tu grags//'jug yul la ltos de nyid de/ /de ni dngos la rnam pa gnyis/ /'bras bu 'dod pas rab skyed cing / /de yi nyer len spyod yul can/ /ye shes dngos po'i mthar thug pa'i/ /bya ba 'jug pa'i rab tu brjod/ /rang gi yul can shes pa yi/ /yod med rjes 'jug gcig yin gyi//rnam shes gzhan dang 'brel min te/ /gzhan nges gzhan med thob phyir ro/ /gcig tu nyer mkho rab shes shing / /len 'dod gcig gis gzung bya ba/ /tha dad med pa'i nges 'gyur ni/ /du ma'ang 'jug pa gcig gi yul/ /'jug pa gcig gi yul nyid kyang / /tshad ma gcig gi spyod yul yin//gzhan la don gnas med pa'i phyir/ /gcig pa de nyid thob byed yin/ /yul dang dus dang gsal byed dang / /rmugs med 'dzin par byed pa dang / /'brel ba dag gi khyad par las/ /rang nyid las kyang 'di nges 'gyur/ /gzhan las tshad ma yin na yang //phan tshun bsten pa yod min te/ /gang phyir 'jig rten don gnyer 'di/ /the tshom las kyang 'jug phyir ro/ /nga rgyal gyis khengs sems dang mkhas la sdang ba kho bos mi shes pa yin la/ /gzhung gi mdud pa bkrol bas dga' ba'ang rnyed par dka' ba mi shes pa yin te//'on kyang snang ba nyid la glang chen lta bas bltas te gzhan du srid byas nas/ /mngon par 'dod cing dga' ba'i yul la 'jig rten 'di ni 'jug par mi byed min/ /tshad ma'i sgra bstan slob dpon nyid kyis ni/ /re re ba dang mtha' dag dngos bsdus las/ /dge ba thob pa gang des chos mchog bdag /