255a2 #/ /rgya gar skad du/ saM ban+d+ha pa rIk+Sha pra ka ra Na/ bod skad du/ 'brel pa brtag pa'i rab tu byed pa/ 'jam dpal gzhon nur gyur pa la phyag 'tshal lo/ /gzhan dbang kho nar 'brel pa ni/ /grub na gzhan dbang ci zhig yod/ /de phyir dngos po thams cad kyi/ /'brel pa
255a3 yang dag nyid du med// ngo bo 'dres pa 'brel yin du/ /gnyis nyid yin na ji ltar 'gyur/ /de phyir rang bzhin tha dad pa/ /'brel pa yang dag nyid du med/ /gzhan ltos pa ni 'brel par yang / /med na de ni ji ltar ltos / /yod na'ang kun la rag ma las/ /dngos po ji ltar ltos pa yin/ /gnyis
255a4 ni 'brel pa gcig pu yis//ci ste 'brel na de dang gnyis/ /'brel pa gang yin thug pa med/ /de bzhin 'brel med shes par bya/ /dngos po de gnyis de las gzhan/ /de dag thams cad bdag nyid gnas/ /de bas rang dngos ma 'dres la/ /de dag rtogs pas 'dres par byed/ /
255a5 dngos po tha dad rtogs bya'i phyir/ /de yi rjes su 'brang ba yis/ /bya dang byed pa po yi tshig /smra ba po dag 'god par byed/ /rgyu dang 'bras bu'i 'brel pa yang / /de gnyis lhan cig mi gnas pas/ /gnyis la gnas pa ji ltar grub/ /gnyis la mi gnas ji ltar 'brel/ /rim
255a6 las dngos po gcig la gnas//gzhan la re ba med pa yin/ /de med par yang yod pa'i phyir/ /gcig la gnas pa 'brel pa med/ /gzhan du 'di ni 'dug pa na / /ci ste de ni gcig la ltos/ /ltos pa phan pa byed par 'gyur/ /med na ji ltar phan par byed/ /ci ste don gcig
255a7 'brel pa'i phyir//de gnyis rgyu 'bras nyid yin na/ /gnyis nyid la sogs 'brel pa'i phyir/ /g.yas g.yon rwa yang de nyid 'thob/ /'ga' zhig gnyis gnas 'brel pa yin/ /de mtshan de las gzhan du min/ /yod dang med pa'i bye brag can/ /sbyor ba ci ste rgyu 'bras
255b1 na//sbyor ba'i bye brag can de nyid/ /'dir ni rgyu 'bras ci phyir min/ /tha dad ces bya'i sgra 'di ni/ /smra byed la brten ma yin nam/ /gang zhig mthong na ma mthong mthong / /de ma mthong na ma mthong ba/ /'bras bu yin pa nyid du ni/ /ston pa'i skye bo med par shes/ /mthong dang ma mthong
255b2 ma gtogs par//'bras bu'i blo ni mi srid phyir/ /'di la 'bras bu la sogs sgra/ /tha snyad sla ba'i phyir bkod do/ /de yod yod phyir de 'bras rtogs/ /gang yang rjes su smra ba yi/ /brda yi yul du de brjod de/ /lkog shal la sogs glang rtogs bzhin/ /yod 'gyur
255b3 yod na de yod cing //yod pa nyid na'ang yod 'gyur ba/ /ngon sum mi dmigs pa dag las/ /rgyu 'bras kho nar rab tu grub/ /re zhig de tsam yang dag don/ /rgyu dang 'bras bu'i spyod yul rnams/ /rnam par rtog pas ston pa ni/ /don log pa yi don bzhin ston/ /
255b4 tha dad yin na ci zhig 'brel/ /tha dad min na rgyu 'bras gang / /gzhan zhig yod na ma 'brel gnyis/ /de gnyis 'brel pa ji ltar byed/ /sbyor dang 'du ba la sogs pa/ /thams cad des kyang dpyad pa yin/ /phan tshun phan pa mi byed phyir/ /de 'dra ba la 'brel pa med/ /
255b5 'du ba can ni 'ga' zhig gis/ /'bras bu skyed par byed na yang / /de tshe 'du ba can 'di med/ /shin tu thal phyir de gnyis min/ /de gnyis dang ni 'du ba dang / /gzhan yang phan pa mi byed par/ /ci ste 'brel na mtha' dag kyang / /phan tshun 'brel pa can du 'gyur/ /
255b6 la sogs sbyor ba can grub phyir/ /sbyor ba skyed kyang des de gnyis/ /sbyor ba can du mi 'dod de/ /gnas par byed pa'ang rab tu brjod/ /sbyor ba la sogs pa yi gnas/ /rung ba'i dngos po de 'gyur na/ /rung ba'i dngos po rtag na ni/ /de dang bral bar 'gal phyir ro/ /de
255b7 bas bral dang ldan pa dang //'gro sogs rung ba brjod pa na/ /ngo bo 'di la nges par brjod/ /'gro sogs gzhan rtags ci zhig bya/ /de dag rnams la yod na yang / /'di'i zhes 'brel pa mi 'grub phyir/ /skad cig so sor skye ba yi/ /dngos po tha dad 'di yin rigs/ /
256a1 'brel pa brtag pa'i rab tu byed pa/ slob dpon mkhas pa chen po chos kyi grags pas mdzad pa rdzogs so// //rgya gar gyi mkhan po dz+nyA na gar+b+ha dang / lo tsA ba ban+de nam mkhas bsgyur / /slad kyi paN+Di ta rab 'byor zhi ba dang / lo tsA ba ting nge 'dzin
bzang pos bcos shing gtan la phab pa /