86a5 /nus pa phan tshun rgyu can dang / /thogs med dus nas 'jug pa yin/ /dmigs pa brtags pa slob dpon phyogs kyi glang pos mdzad pa rdzogs so//[ @#/ /rgya gar skad du/ A laM ba na pa rIk+Shi br-it+ti/ bod skad du/ dmigs
86a6 pa brtag pa'i 'grel pa/sangs rgyas dang byang chub sems dpa' thams cad la phyag 'tshal lo/ /gang dag mig la sogs pa'i rnam par shes pa'i dmigs pa phyi rol gyi don yin par 'dod pa de dag ni de'i rgyu yin pa'i phyir rdul phra rab dag yin pa'am der snang ba'i shes pa skye ba'i phyir de
86a7 'dus pa yin par rtog grang na/de la re zhig /dbang po rnam par rig pa'i rgyu/ /phra rab rdul dag yin mod kyi/ /der mi snang phyir de yul ni/ /rdul phran ma yin dbang po bzhin/ /yul zhes bya ba ni shes pas gang gis rang gi ngo bo nges par 'dzin pa yin te de'i rnam par skye ba'i phyir ro/ /rdul
86b1 phra mo dag gi ni de'i rgyu nyid yin du zin kyang de lta ma yin te dbang po bzhin no//de ltar na re zhig rdul phra mo dag dmigs pa ma yin no/ /'dus pa ni der snang ba nyid yin du zin kyang / gang ltar snang de de las min/ /don gang zhig rang snang ba'i rnam par rig pa bskyed pa de ni dmigs pa yin par rigs te/
86b2 'di ltar de ni skye ba'i rkyen nyid du bshad pas so/ /'dus pa ni de lta yang ma yin te/ rdzas su med phyir zla gnyis bzhin/ /dbang po ma tshang ba'i phyir zla ba gnyis mthong ba ni der snang ba nyid yin du zin kyang de'i yul ma yin no/ /de bzhin du rdzas su yod pa ma yin pa nyid kyis rgyu ma yin pa'i phyir 'dus pa
86b3 dmigs pa ma yin no//de ltar phyi rol gnyis kar yang / /blo yi yul du mi rung ngo / /yan lag gcig ma tshang ba'i phyir phyi rol gyi rdul phra mo dang tshogs pa zhes bya ba'i don ni dmigs pa ma yin no/ /'di la ni/ kha cig 'dus pa'i rnam pa dag /sgrub pa yin par 'dod par byed/ /don thams cad ni rnam pa du ma
86b4 can yin pas de la rnam pa 'ga' zhig gis mngon sum nyid du 'dod do//rdul phra rab rnams la yang 'dus par snang ba'i shes pa skyed pa'i rgyu yod do/ /rdul phran rnam par rnam rig gi /don min sra nyid la sogs bzhin/ /ji ltar sra nyid la sogs pa ni yod bzhin du yang mig gi blo'i yul ma
86b5 yin pa ltar rdul phra mo nyid kyang de dang 'dra'o//de dag ltar na bum pa dang kham phor sogs blo mtshungs par 'gyur/ bum pa dang kham phor la sogs pa'i rdul phra mo rnams la ni mang du zin kyang khyad par 'ga' yang med do/ /gal te rnam pa'i dbye bas dbye/ /gal te 'di snyam du mgrin pa la
86b6 sogs pa'i rnam pa'i khyad par las gang gis ni blo'i khyad par du 'gyur ba'i khyad par yod do snyam du sems na khyad par 'di ni bum pa la sogs pa la yod kyi/de ni rdul phran rdzas yod la/ /med de tshad dbye med phyir ro/ /rdul phra rab rnams ni rdzas gzhan yin du zin kyang zlum po la ni dbye ba
86b7 med do//de phyir de rdzas med la yod/ /rnam pa'i dbye ba ni kun rdzob tu yod pa dag kho na la yod kyi rdul phra mo rnams la ma yin no/ /bum pa la sogs pa ni kun rdzob tu yod pa nyid do / /rdul phran yongs su bsal na ni/ /der snang shes pa nyams 'gyur phyir/ /rdzas su yod pa rnams la ni 'brel
87a1 pa can bsal du zin kyang kha dog la sogs pa bzhin du rang gi blo 'dor bar byed do//de lta bas na dbang po'i blo rnams kyi yul ni phyi rol na ma yin par 'thad do/ /nang gi shes bya'i ngo bo ni/ /phyi rol ltar snang gang yin de / /don yin phyi rol gyi don med bzhin du phyi rol lta
87a2 bur snang ba nang na yod pa kho na dmigs pa'i rkyen yin no//rnam shes ngo bo'i phyir/ /de rkyen nyid kyang yin phyir ro/ /nang gi rnam par shes pa ni don du snang ba dang / de las skyes pa yin pas/ chos nyid gnyis dang ldan pa'i phyir nang na yod pa kho na dmigs pa'i rkyen yin no/ /re zhig
87a3 de ltar snang ba nyid yin la ni rag la /de'i phyogs gcig po lhan cig skyes pa go ji ltar rkyen yin zhe na/ gcig na'ang mi 'khrul phyir na rkyen/ /lhan cig par gyur du zin kyang 'khrul pa med pa'i phyir gzhan las skye ba'i rkyen du 'gyur te/ 'di ltar gtan tshigs yod pa dang med pa
87a4 dag ni yod pa dang med pa dag gi de dang ldan pa nyid na rgyu dang ldan pa rim gyis skye ba dag gi yang mtshan nyid yin par smra'o//yang na/ nus pa 'jog phyir rim gyis yin/ /rim gyis kyang yin te/ don du snang bas de ni rang snang ba dang mthun pa'i 'bras bu skyed par byed par nus pa/ rnam par
87a5 shes pa'i rten can byed pas mi 'gal lo//gal te 'o na ni nang gi gzugs kho na dmigs pa'i rkyen yin na/ ji ltar de dang mig la brten na mig gi rnam par shes pa skye zhe na/ lhan cig byed dbang nus pa yi / /ngo bo gang yin dbang po'ang yin/ /dbang po ni rang gi 'bras bu las nus
87a6 pa'i ngo bo nyid du rjes su dpag gi 'byung ba las gyur pa nyid du ni ma yin no//de yang rnam rig la mi 'gal/ /nus pa'i rnam par shes pa la yod kyang rung / bstan du med pa'i rang gi ngo bo la yod kyang rung ste/ 'bras bu skyed pa la khyad par med do/ /de ltar yul gyi ngo bo dang / /nus pa phan tshun
87a7 rgyu can dang //thog ma med du 'jug pa yin/ /mig ces bya ba'i nus pa dang / nang gi gzugs la brten nas rnam par shes pa don du snang ba dmigs kyis ma bstan pa skye'o/ /'di gnyis kyang phan tshun gyi rgyu can dang / thog ma med pa'i dus can yin te/ res 'ga' na nus pa yongs su
87b1 smin pa las rnam par shes pas yul gyi rnam pa nyid 'byung la res 'ga' ni de'i rnam pa la nus pa'o//rnam par shes pa las de gnyis gzhan nyid dang gzhan ma yin pa nyid du ci dgar brjod par bya'o/ /de ltar nang gi dmigs pa ni chos nyid gnyis dang ldan pa'i phyir yul du mthong ngo / /dmigs
pa brtags pa'i 'grel pa slob dpon phyogs kyi glang pos mdzad pa'o /