CLOSE WINDOW

D4171
བོད་ཡིག

/rtsod pa'i dus kyi gtam slob dpon ma ti tsi tras mdzad pa rdzogs so// //rgya gar gyi mkhan po a dzi ta shrI b+ha dra dang / zhu chen gyi lo tsA ba dge slong shAkya 'od kyis bsgyur ba'o//[ ]@##/ /rgya gar skad du/ bi be ka ka thA/ bod skad du/ dben pa'i gtam/ byang chub sems dpa' 'jam dpal gzhon nur gyur pa la phyag 'tshal lo//dka' thub rnyed pa'i bde ba 'dod rnams kyis/ /'chol bar spyod pa rnams ni mthong gyur pa/ /rab tu dben pa yang dag bsten pa yi/ /dge slong 'di skad tshig tu brjod pas smra/ /phongs pa spang phyir de bzhin gshegs pa yis/ /rab bsngags zhi ba'i dbang bskur nyer blangs nas//dka' thub khyim dang 'dris pas rab chags pa'i/ /phongs nyid rgal dka' bying ba ji lta bur/ /'phags pa 'gran med shing drung gnas nas ni/ /'gro ba skye dang 'gag pa mthong bas na/ /zhi ba'i bde ba yongs smin tshe dge ba/ /mi las shin tu 'phags pa thob par 'gyur/ /sems kyi rnam par 'ching ba gnyen po yi//stobs kyis bsal bas skye bral nags dag tu/ /rnal 'byor nyer zhi'i bdud rtsis tshim gyur pas/ /bde bar gnyid log pa dang sad par 'gyur/ /mtshan mo zla ba'i snang dang rab gsal ba'i/ /skar ma'i me tog bkram par nyer mchod nas/ /dgon par brten pa'i yid ni nges zhi ba'i/ /lhag par dga' ba dag ni skye bar 'gyur/ /gang du dge slong dben pa'i rgyu mtshan gyis/ /kha na ma tho med pa zhi 'gyur bde/ /gang du yo byad yang dag bsten chags pas/ /sems ni sna tshogs phongs pas gdungs par 'gyur/ /ji ltar chu shing smyug ma 'od ma dag /'bras bu 'byin nas rang nyid 'jig pa ston/ /de bzhin dka' thub khyim las rnam grol nas/ /bdag nyid zil gyis gnon la chags mthong 'gyur//sa yi rdul gyis gos pa'i ri dgas dag /rtswa dang 'dab nas tsam zhig sgrub byed ltar/ /sems ni dben par gzhol ba 'dod 'gyur gyi/ /gling bzhi'i phun tshogs rgya chen dag la'ang min/ /shing drung 'bab chu bstan pa'i dka' thub dag /yongs su 'dzin pa dag ni rnam spangs nas/ /rang sems tsam dang rab tu 'brel pa yi//bde 'byung gang de rgyal po rnams la med/ /ljon shing sngon po'i rtse mo rlung dag gis/ /rnam g.yo phra la snyoms pa'i char 'bab pa'i/ /mi g.yo rnam brtags ri yi sul gnas ni/ /dge slong mtshan mo dge ba skyed par byed/ /rnyog can 'dod la 'dris pas 'phos pa yi/ /bdag bsnyen pa yi chags spangs ltos med cing / /skye bral nags gang yin par dga' bya yi//dge slong gyur nas don med 'gyur mi bya/ /dge slong rtags ni bdag nyid gnod med par/ /nyer blangs gang zhig sgrub par mi byed cing / /dman la yongs su 'dzin pa'i 'dam bying ba/ /de ni 'tsho ba'i 'jig rten slu byed yin/ /chu dang rdo khu rtsa ba med pa yi/ /sa dbang 'dzegs nas mi bzad yang dag tu/ /rtog dang ldan pas shi ba bzod bya yi//bslab pa yongs su nyams pas 'jug mi bya/ /rgya mtsho rnam par 'khrugs pa'i rlabs tshogs su/ /rin chen khur gyis gru dag nub pa bzhin/ /khyim dang 'dris pa'i rnyed chags khur dag gis/ /gang dag mchog brten rgya chen snub par byed/ /nags na brten pa'i zhi ba'i ri dgas ni/ /gzhon nu ma yi 'gro bas dkrugs mtshon pa//gnyen po ji bzhin bdag nyid zhi 'dod rnams/ /sdom can rab tu dben nyid yang dag rtsom/ /yul gyi ro yi dug gis nyer gdung blo can dag /chags pa nyung ngu dag gis gdung gyur na/ /de dag yongs su spong la rtsod med pa'i/ /dka' thub kyi hud e ma'o rab nyams 'gyur/ /sdom can rkang pas 'gro zhing 'jog pa ltar//de ltar 'dris pa 'dod pa 'phel 'gyur te/ /rang rlabs chab ngogs mngon brdabs 'jigs rung bas/ /sprin chen char gyis ya mu na bzhin no/ /dka' thub ji ltar dman pa dag la yang / /'dod lha'i dbang gis rjes su zhugs gyur pa/ /de ltar rang lag gis drang phun sum tshogs/ /rgyal chen khyim la khyim pa chags pa med/ /rang gi khyim dang gdong dag mchi 'dzag pas//brlan pa'i gnyen dag spangs par gyur nas ni/ /dman pa gzhan gyi khyim la chags pa yi/ /rab byung 'di la shin tu ngo tsha med/ /thar pa 'dod gang rang khyim spangs nas ni/ /mi shes gzhan gyi khyim dag 'dod byed pa/ /rgya mtsho rnam par 'khrugs pa'i rlabs tshogs las/ /bdag nyid rgal nas glang rjes bying dang mtshungs//sdig pa spong byed de bzhin gshegs pa yis/ /gnang ba'i sgrub pa dag gis 'di brtags gang / /dman pa'i nor la 'dod pa'i sred pa yis/ /gzhan khyim la chags dri ma can du 'gyur/ /chu bo ni lu tsha yi me tog lhung ba'i dum bus mtha' mar bris/ /bye ma dkar po'i ngogs dang ngang pa ka dam pa dag gnas//nags kyi glang chen khyu dag rtse bas tha dad 'thor rlabs can/ /dgon gnas brtul zhugs can la dga' ba rab tu skyed par byed/ /srid pa'i longs spyod don du gnyer ba'i yi dgas rnams bsal nas/ /ma brtsams yid 'ong bde ba bsten pa rnams kyi gnas skabs ni/ /pad+ma kha bye bzhin du dka' thub rang gi grags pa yis/ / 'jig rten yongs su dga' ba rab skyed kun du dpe las 'das/ /dka' thub ri dang nye ba'i shing rtsa rab yangs dang 'brel bar/ /gnas pa'i tshom bu mi snyoms lhod pa'i srubs bar la chags pa'i/ /ba mo'i dum bus gos pa tho rangs nyi ma'i 'od zer gyis/ /lag pa dag gis nyul ba bzhin du rnam par skems par byed/ /khang stong shing drung rlung ni rgyu gyur kha ba'i tshogs chen 'bab//mdangs zad rab rtsub lo ma dag gis gdu bu bzhin bskor ba'i/ /'dod pa kun spangs shes rab rno ba'i brtul zhugs can dag la/ /mtshan mo rnam par skyo ba dag ni skyed par zad mi byed/ /shing gi lo ma'i tha ma la chags ba mo'i chu dag gi /dum bu nyi ma 'char tshe mdog nor bu dang 'dra/ / thigs pa dag ni shing drung gnas pa'i dge slong la/ /'gro ba'i skye dang 'jig pa ji bzhin rab tu ston par byed/ /rab zhi'i bde ro shes pas 'khor los sgyur ba'i dpal 'byor kyang / /yongs su dpyad pas rnyings pa'i me tog phreng bzhin rnam spangs nas/ /lang tsho rang bzhin gyis g.yo ngang tshul can dag yol byas te/ /dgon par ri dgas 'drar 'chi zhi ba'i sems ni brtan par bya//'dod pa la 'jen phyin ci log pa'i sems la ku mu ta'i/ /dum bu ltar dkar mi thod so dang 'brel pas nyer dgod dang / /rlung gis bud pa'i ro bsregs me yis nye 'khor shing bsregs pa'i/ /dur khrod dka' thub gcig pu la ni mtshan mo dga' ba skyed par byed/ /ljon shing tshogs dang rgya ches ri yi rtsa ba sngor gyur cing //rdo bas khyab dang bsil la rab dang ba yi chu 'dzag 'bab/ /rma bya rab dga' sgra yis khyab pa'i ri sul nang du ni/ /khyim du 'chi ba'i skyo ba'i sems ni rab tu dga' bar byed/ /'gro ba'i don ma byas pa'i 'chi bar 'gyur ba khyim dag la/ /dga' ba dag la dben pa mchog la slob byed sems can mchog /rdzogs pa'i byang chub sems ni rnyed gyur pha rol tshogs 'thob pa/ /srid pa'i dug gi sdong po'i rtsa ba brtan po 'byin par byed/ /nags tshig pa yi bya dang 'dra bar sdug bsngal brgya yi gzhir gyur pa'i/ /khyim gang yin pa yongs su spangs nas nags su 'gro byed pa/ /des ni srid pa'i gnyid rab bsal ba 'gro ba kun gyi mgon//sangs rgyas rab tu mnyes par byed pa yin zhes de skad grags/ /margad sngon po dang 'dra ne'u gseng tshogs dag ni/ /shing rtsa nye bar bkod dang yal ga me tog gis bskor ba'i/ /zhi ba'i nags mtha' kye ma'o dge slong mchog gis spong byed pa/ /gsad phyir rngon pa'i glu yis drangs par gyur pa'i ri dgas mtshungs//'phags pa'i bzhed pa bde bar gshegs pa'i lam gyi rjes 'brangs nas/ /nags dang 'dra bar khyim gyi rang gi don dag sgrub byed kyang / /rnam par 'tshe ba rang bzhin gyis med nags ni dben pa yis/ /sems kyi 'ching ba dag ni 'bad pa med par gcod par byed/ /'dod chags gang dag de la dgos par 'gyur bas kun 'phel zhing / /legs spyad thub pa'i bstan pa dag kyang nyams byas nas/ /me dpung rab tu 'bar ba rgal dka'i khongs ni mthar thug pa'i/ /ngan song dag tu dge slong bde chung la chags 'gro bar 'gyur/ /gang zhig nyes pa ma lus gdung ba zad byed sangs rgyas pa'i/ /legs par bshad pa khas blangs nas ni ngan 'gror ngan 'byin pa/ /ut+pal sngon po'i snying po'i dri mchog dag dang chu dum bu//sar la bsil ldan rlung gis de dag ji ltar tshim par 'gyur/ /sa ra sa yi sgra ni rang bzhin snyan pa'i glu dbyangs dag /ldog pa med par sgrogs par gyur pas mchog rnams khyab gyur pas/ /brtul zhugs can gyis 'gro dang gnas pa dag las dub skyes dang / /lus lhod gyur pa'i mtshan gyi gung thun gnyid dag sad par byed//rang gi 'od kyi dkyil 'khor gyis spras yongs su gnas pa yis/ /zla ba'i 'od zer tshogs kyi dpal 'joms shin tu zil gnon pas/ /dge ba'i rtsa ba nyer bsags skal ldan 'jig rten la gzigs shing / /rang byung 'phags pa mchog ni dgon pa de yang sten par mdzad//ci ste gang zhig nang gi dgra las nges rgyal bya ba byas pa yi/ /ston pa 'jig rten mtha' gzigs de yang nags dag sten mdzad na/ /yang dag mi rtogs skye bo mi gtsang 'dam du bying gyur pa'i/ /sdom can zhi 'dod bde gshegs rjes su ci phyir 'jug mi byed/ /bdag tu log par 'dzin par gyur pas nyin dang mtshan/ /srin bus ji bzhin rnam rtog sdig can dag gis zos pas na//nyon mongs rnag gis nyer gos zhi ba'i chu yi bum pa yis/ /bkrus pa bzhin du sems ni skye ba med nags bsten par gyis/ /'bras bu'i lcid kyis yal ga gug pa'i tha ma lo ma yis/ /gsal gyur lcug ma me tog kha bye'i dga' byed rgyu ldan pa'i/ /nags kyi shing ni dge slong phongs bral bsten pa la//mdza' bo bzhin du shin tu dbugs ni 'byin par byed/ /zla ba shar ba kha ba 'bab pa bsgrigs pas 'gog 'gyur ba'i/ /dgun gyi mtshan mo dag ni rab zhi bde ba 'dod rnams kyi/ /rnal 'byor rtswa yi stan la dga' ba dag la tho rangs dag /nags kyi shing na yib pa'i bya rnams 'dra bar byed/ /shing dang nye ba'i ri yi rked du mi g.yo skyil krung bcas//me tog gis bskor rab dga'i rlung gis g.yo bar byed pa na/ /'gro gnyen srid gsum rnam rgyal dus na byang chub snying po yi/ /gdan la bzhugs bzhin sdom can mtshan mo rjes su sgrub par byed/ /dman pa'i 'gro ba'i sems kyis reg byas dregs pa'i chags pa dag /'dod bya don du gnyer ba rnams kyis khyad par spangs nas ni//'phags pas rjes chags brtan pa mi snang 'ching ba 'jigs pa yi/ /'dod pa lhag ma med par dga' bzhin nags su zhi bar bya/ /skye dang 'chi dang na ba'i sdug bsngal mthar ni ma byas par/ /srid pa'i rgya mtsho dag tu bying 'gyur bag med ma byed cig /mthar byed kun gyi srog kyang 'phrog par byed pa gang 'di ni//rgyun mi chad par 'gro la sta re'i so dag 'dar bar byed/ /sa 'dzin pa yi chu bo'i tshogs dag 'bab pa lta bu ni/ /chos kun gnas pa'i rang bzhin rjes su shes nas ni/ /ro la sems ldan gzhan las dam pas legs par 'gro ba yis/ /srid la chags bral rab zhi dga' ba dag la brten par gyis/ /smra ba tsam ni nus su zin kyang tshig la gnas pa'ang grub med de//skyes bu tshig dang snying por byed pa ston gyi chu bral sprin dang mtshungs/ /gang phyir de bzhin gshegs pa'i bstan pa 'di la sgrub pa snying po nyid/ /de phyir de nyid la 'jug blo gros yin bzo'i tshig la mkhas/ /kun nas nyon mongs dgra 'di yi/ /bdag nyid bran du gyur pa ste/ /de bas bdag sems zhi byed cing //rang nyid yongs su smra bar byed/ /dben pa'i gtam slob dpon chen pos 'tsho byin gyis mdzad pa rdzogs so// //rgya gar gyi mkhan po dI paM ka ra dang / zhu chen gyi lo tsA ba dge slong dge ba'i blo gros kyis bsgyur cing zhus te gtan la phab pa'o// //