CLOSE WINDOW

D4154
བོད་ཡིག

@#/ /rgya gar skad du/ nA gA nan+da nA ma nA Ta ka /bod skad du/ klu kun du dga' ba zhes bya ba'i zlos gar/ thams cad mkhyen pa la phyag 'tshal lo/ /dga' ma dga' ba'i zol las skyes pa'i spu langs dag gis bsgribs pa'i lus 'dzin cing / /'dzum dang ldan pas rgyal ba'i byang chub dag la bkod pa me tog snyim pa ni//gshog rtsal rab bskyod sgra sgogs sbrang rtsi byed rnams sbrang rtsi re bas bsten cing de'i/ /rkang pas bsnun pas kha zum tshogs phye ge sar gsar par gyur pa khyed la srungs/ /bsam gtan zol dag nye bar bzung nas skad cig mig phye su la sems par byed/ /skyob pa yin yang lus med 'das gzir skye bo 'di dag srung ba min la ltos//snying rjer ldan par brdzus te khyod las gzhan pa'i brtse med skyes bu ga la yod/ /bdud mo rnams kyis byang chub la 'di phrag dog gis brjod rgyal bas khyed la srungs/ /gzhan yang gzhu bkang 'dod pa dang ni rnga gsang brdung zhing sgra sgogs bdud kyi dpa' bo dang //smin 'khyog rab 'dar glal 'dzum logs su lta ba mtho ris bu mo'i skye bo dang / /grub pa yan lag mchog btud rnams dang mtshar bas sru langs lus can nor lha yis/ /byang chub 'thob la bsam gtan g.yo med ces bltas thub pa'i dbang pos khyed la srungs/ / shin tu mang bar 'gyur bas dga' bar byas te mdo 'dzin pa'o/ /di ring bdag po'i dga' ston la phyogs sna tshogs nas 'ongs pa dpal ldan dga' ba'i lha'i zhabs kyi pad+ma nye bar bsten pa'i rgyal po'i tshogs rnams kyis gus pa dang ldan par bos te/ bdag la smras pa/ ji ltar kho bo cag gi rje dpal ldan dga' ba'i lhas/sngar med pa'i dngos po'i rgyan rnam par bkod pa rig pa 'dzin pa'i skyes rabs las brtsams pa/ klu kun du dga' ba zhes bya ba'i zlos gar mdzad pa ni kho bo cag rnams kyi nyan pa po'i brgyud pa las thos te/ sbyor ba dag ni ma mthong ngo / /de'i phyir rgyal po de nyid la gus pa dang / kho bo cag la rjes su gzung ba'i blos sbyor ba ji lta ba bzhin du khyod kyis zlos gar dag byos shig ces so//de'i phyir re zhig tshon gyi bkod pa dag byas nas ji ltar mngon par 'dod pa bzhin yongs su rdzogs par bya'o/ /'dus pa'i skye bo 'di dag gi yid ni kun du tshim par gyur to zhes bya bar bdag gis nges te/ gang gi phyir/dpal ldan dga' ba snyan dngags mkhan po mkhas la 'dus pa 'di dag yon tan 'dzin/ /'jig rten du ni byang chub sems dpa'i spyod pa yid 'phrog zlos gar bdag cag mkhas/ /'dir ni dngos po re re dag kyang 'dod pa'i 'bras bu 'thob pa'i gnas yin na/ /bdag gi skal ba rgyas pas yon tan kun gyi tshogs 'dus 'di la smos ci dgos//des na re zhig khyim pa mo bos te gru dag la gnas par bya'o/ /yongs su bgrod cing phyir mngon par phyogs te bltas nas 'phags ma re zhig 'dir/de nas gar mkhan ma ngu zhing zhugs so/ /mdo 'dzin pas mthong nas/'phags ma klu kun du dga' ba zhes bya ba'i zlos gar bya ba yin na ci'i don du rgyu med pa nyid du ngu bar byed/gar mkhan mas jo bo ji ltar mi ngu ste/ gang gi phyir re zhig yab ni yum dang 'grogs nas rgan po'i dngos pos yid byung ste/ da ni khyod kyis gnyen tshan rmi khur dag 'dzin par bzod do zhes thugs la bzhag nas dka' thub kyi nags su gshegs so//mdo 'dzin pas bdag kyang yongs su btang nas ji ltar yab yum nags su gshegs/ rnam par bsams nas de la da ni ci zhig rigs par 'gyur/ /yang na bdag bla ma'i zhabs kyi rim gro byed pa'i bde ba yongs su btang nas ji ltar khyim du 'dug par byed/ ji ltar sprin gyi bzhon pa bzhin//dbang phyug rim pas 'ongs btang ste/ /pha ma'i sri zhu bsgrub pa'i phyir/ /bdag kyang nags su 'gro bar bya/ /song bar gyur te skabs dbye ba'o/ /de nas sprin gyi bzhon pa dang / bi dru Sha ka dag zhugs te/ 'dren pas/ chags pa'i gnas zhes bya bar bdag gis rig /'jig ces bya bar bdag gis ma rtogs min//bya dang bya min rnam par dpyad rnams la/ /phyir phyogs gyur pa ras la sus ma rig /pha ma'i sri zhu byed pa bdag gi ni/ /lang tsho dbang po'i dbang du gyur pa 'di/ /gal te gus pas 'di ltar nyid gyur na/ /de ltar smad par 'os kyang dga' byed 'gyur/ /bi dru Sha kas khros pa dang bcas par/kye gang gi tshe gson bzhin du shi ba'i rgan rgon 'di dag 'di ltar nags na 'dug pa la 'di snyed kyi dus su sdug bsngal nyams su myong yang byed ni yid byung bar ma gyur to/ /des na rab tu dang bas da dung yang re zhig bla ma'i zhabs kyi sri zhu la chags pa las phyir bzlog la rgyal srid kyi bde ba nyams su myong bar byos shig /'dren pas/ ji ltar yab kyi mdun du sar 'dug mdzes pa de lta seng ge'i khri la yod dam ci/ /yab kyi zhabs dag nyed pa las byung bde ba de ni rgyal srid dag la'ang yod dam ci/ /bla ma'i lhag ma spyad pa'i dga' ba gang 'dis sa gsum spyad pa dag la yod dam ci//bla mas btang ba'i rgyal srid nges par gdung byed dag ste des na yon tan ci zhig yod/ /bi dru Sha kas/ bdag nyid kyis rtogs par e ma 'di ni skye bo bla ma'i sri zhu la chags pa zhig go snyam du bsams nas/ des na 'dir yang re zhig brjod par bya'o//gsal bar kye grogs po nges par rgyal srid kyi bde ba 'ba' zhig gi ched du bdag gis 'di brjod pa ma yin ste/ gzhan yang khyod la bya ba dag yod pa nyid do/ /'dren pas/ 'dzum dang bcas pas bya ba bdag gis byas pa nyid ma yin nam ltos shig /rigs par 'os pa'i lam la blon po rnams sbyar dam pa rnams ni bde la bzhag /de bzhin gnyen gyi skye bo bdag mtshungs nyid byas rgyal srid dag kyang bsrung bar byas/ /yid la re ba las lhag 'bras ster dpag bsam shing yang slong ba rnams la byin/ /'di las gzhan pa'i bya ba ci zhig khyod kyi sems la gang zhig gnas pa spros/ bi dru Sha kas/kye grogs po shin tu thub chod ldan zhing nyams par byed pa'i lha/ ma tang ga 'di mi mthun pa'i phyogs su nye bar gnas pa la gtso bo dang gnyen dag yang dag par gnas kyang khyod med na bdag ni rgyal srid legs par gnas par mi rtog go/ /'dren pas ma tang gas rgyal srid len par 'gyur ro zhes bya ba'i dogs pa yod dam ci/gal te de ltar gyur na de las cir 'gyur/bdag gi lus la sogs pa thams cad gzhan gyi don nyid du yongs su bsrungs pa ma yin nam/ gang yang rang gis ma byin pa de ni yab kyi ngor yin no/ /des na don med pa'i bsam pa 'dis ci zhig bya/ yab kyis rjes su bstan pa nyid lhur bsgrub par bya'o//bi dru Sha kas/ kye yab kyis ci zhig bstan/ 'dren pas/ ji ltar nyi ma mang por yongs su dpyad pas dka' thub kyi nags 'di yam shing dang / ku sha dang / me tog dang / nye bar mkho ba'i rtsa ba dang / 'bras bu dang / sdong bu dang / dri zhim pa dang / rngad mang ba dag ring du byas par gyur gyis/de'i phyir/ ma la ya'i ri la song la bsti gnas 'ga' zhig rtogs shig ces yab kyis bdag la rjes su bstan to/ /de'i phyir re zhig ma la ya nyid du 'gro'o zhes te song bar gyur to/ /bi dru Sha kas mdun du bltas nas kye grogs po ltos shig ltos shig /rlan dang bcas shing stug po'i tsan dan gyi nags kyi khrod nas yongs su bskyod pa dri bzang rgya chen pos bsgos pa can ri'i ngos mi bzad pa las babs pas dum bur 'gyur ba'i chu rgyun las 'thor ba'i thigs pa bsil po 'dzin pa ma la ya'i rlung 'di ni nges par lam gyis yongs su dub pa dag sel zhing /dang por 'grogs par 'dod pa'i dga' ma la mgrin pa nas bzung ba bzhin du grogs po mdza' bo la sru long rgyas par byed pa 'dra'o//'dren pas kun du bltas nas a ye bdag cag gis ri ma la yar sleb par gyur to/ /brtags nas/ e ma 'di ni dga' bar bya ba zhig ste/ de ltar yang / dga' ldan phyogs kyi glang po 'gram pa'i ngos 'dar tsan dan dag ni chag cing zag /chu gter rlabs rnams rab tu bsnun pas phug dang lung pa dag ni cho nges sgogs/ /grub pa'i bud med bgrod pa rnams kyi rkang pa'i sgrug rtsis dmar ba mu tig rdo/ /bsten bya ri bo ma la ya 'dis bdag gi sems ni ci yang sred ldan byed/ / des na tshur shog /'di la 'dzegs te 'dug par 'os pa'i bsti gnas dag btsal bar bya'o/ /'jogs te mtshan ma gsal bar byas nas/ bdag gi mig ni g.yas pa g.yo/ /'bras bu 'dod pa 'ga' yang med/ /thub pa'i gsung yang brdzun ma yin/ /'di ni ci zhig 'chad 'gyur ke/ /bi dru Sha kas/kye grogs po grogs po la dga' ba 'ga' zhig nye bar ston to/ /'dren pas/ nges par ji ltar khyod kyis smras pa de bzhin no/ /bi dru Sha kas/ kye grogs po ltos shig ltos shig /khyad par dang bcas par stug cing snum pa'i rkang 'thung gis nye bar mdzes shing ba'i mar gyi dri'i snying pho can gyi du ba drag tu 'phyur la/ri dwags kyi tshogs 'jigs pa med cing lam du bag phab ste gnas pa 'di ni dka' thub kyi nags tshal bzhin du mtshon no/ /'dren pas/ grogs po yang dag par mtshon no/ /'di dag ni dka' thub kyi nags tshal nyid de/ gang gi phyir/ gos kyi don du shing shun rnams bcad rtse ba nyid kyis shin tu che ba min//ril ba rnying pa chag pas mtshan pa'i chu rgyun dag ni mkha' ltar rab tu dang / /'ga' zhig dag na muny+dza'i ske rags khye'u sa bcad cing dor bar gyur pa mthong / /rtag tu thos pas ne tsho dag kyang rig byed tshig 'di rab tu sgogs par byed/ / des na tshur sheg rab tu zhugs te/ nye bar mtshon par bya'o/ /rab tu zhugs te gar dag byed do/ /'dren pas/ e ma thub pa'i skye bo rab tu dga' ba rnams ni rig byed kyi tshig rgyas pa la the tshom rnam par gcod par byed la/ khye'u'i skye bo rnams ni ji ltar gsher ba gsher ba'i yam shing dag gcod cing / / dka' thub pa'i gzhon nu ma rnams ni ljon pa gsar pa'i kyo ra 'gengs par byed pa'i dka' thub kyi nags tshal ni rab tu zhi ba dang dga' bar byed pa nyid do/ /'di nyid na/ bung ba'i sgra yis legs par 'ongs sam zhes ni brjod pa bzhin/ /'di dag mgo ni 'bras bu dud pas 'dud par byed pa bzhin/ /me tog char pa 'thor zhing bdag la mchod yon ster ba bzhin//yal ga ldan pa yis kyang mgron gyi bsnyen bkur ji ltar bslabs/ /de'i phyir dka' thub kyi nags tshal 'dir ni 'dug par 'os pa zhig ste/ 'dir gnas na bdag cag gi sems bde bar 'gyur ro snyam mo/ /bi dru Sha kas/ kye grogs po 'on kyang nges par ri dwags 'di dag mgrin pa cung zad kyogs te g.yo ba med pa'i kha las cung zad zos pa'i rtswa kham nang na gnas pa zag cing rna ba gcig rab tu bslangs te gtad nas mig zum pa dang bcas pas nyan par byed pa lta bur mtshon no//'dren pas rna ba gtad nas/ gnas thob rab tu gsal ba'i 'gros can gdangs snyan dag gis rnam par gzhag pa 'dzin byed pa//bung ba'i sgra bzhin nges par yid 'phrog rgyud mangs dag gi rgyud mangs sgra dang ldan pa yis/ /gsal zhing rol sgeg tshig ldan gru ni kun du 'khyog pa'i lus can ri dgas 'di dag rnams/ /so yi bar na gnas pa rtswa yi kham ni gcod pa'i sgra dag bsdams nas nyan par byed//bi dru Sha kas/ kye grogs po dka' thub kyi nags tshal 'di na su zhig glu len par byed/ 'dren pas/ ji ltar sor mo 'jam pa'i 'dab mas mngon par bsnun pa'i rgyud mangs shin tu gsal ba ma yin par sgogs shing glu yang snyan cing phra ba gtsor len pa de ltar bdag rtog pa ni gnas 'di na lha dag mnyes par byed cing lha'i bud med rgyud mangs dang ldan pa'i gru len par byed do//bi dru Sha kas/ kye grogs po tshur shog /yu'u cag kyang lha'i gnas blta bar bya'o/ /'dren pas legs par brjod de/ nges par lha ni phyag bya bar 'os pa'o/ /nye bar song ste 'phral la 'dug nas grogs po gal te na skye bo 'di lta bar mi 'os pa srid do//de nas re zhig ta ma la'i gel pa 'di'i nang du 'dug ste lha lta ba'i skabs btsal bar bya'o/ /de ltar byas te/ de nas ma la ya can ma dang / 'bangs mo zhugs te sa la 'dug nas rgyud mangs byung bar byed do/ /'dren mas glu len pa/ go rI rab rgyas pad+ma'i ge sar gyi//dngul ltar dkar ba'i 'od can bcom ldan ma/ /khyod kyi bka' drin dag gis bdag gi ni/ /mngon par 'dod pa rab tu grub par mdzod/ /'dren pas rna gtad nas/ e ma ho gru/ e ma ho rol mo/ 'di la gsal byed kyi dbyangs rnam pa bcu po 'dis gsal ba thob cing / myur ba dang / bar ma dang / dal ba'i stabs rnam pa gsum rab tu gsal bar yongs su bcad de/ ba lang gi rnga ma la sogs pa rnam pa gsum gyi rim pas ngal bso bar byas pa de kho na'i tshogs kyi rjes su 'brang ba'i rol mo'i cho ga yang dag pa gsum bstan to/ /'bangs mos/ rje'i sras mo nges par yun ring du glu dag blangs nas khyod kyi lag rtse dag yongs su mi ngal lam/'dren mas/ grung mo bcom ldan ma'i mdun du rgyud mangs sgogs par byed pa la bdag ga la ngal/ 'bangs mos smod pa dang bcas par kye brtse med ma 'di'i mdun du rgyud mangs bsgrags pas ci zhig bya zhes bdag smra'o/ /gang zhig 'di snyed kyi dus su skye bo gzhon nu ma'i dka' thub bsnyen nas nges pa la gnas pas bstan kyang da dung khyod la dang bar mi ston no//ji dru Sha kas thos nas/ kye grogs po 'di ni nges par gzhon nu ma ste ci'i phyir mi lta/ 'dren pas skyon ci yod/ gzhon nu ma lta ba ni skyon med pa nyid do/ /'on kyang gal te na bdag cag mthong nas 'jigs te/ngo tsha ba gzhon nu ma la rnyed sla bas 'dir yun ring du mi sdod pa mi srid do/ /des na re zhig 'khri shing gi dra ba 'dis bsgribs te blta bar bya'o/ /gnyi gas bltas te/ bi dru Sha kas/ ya mtshan dang bcas par kye grogs po ltos shig ltos shig /ngo mtshar ro ngo mtshar ro/ /rgyud mangs kyi sgras rna ba'i bde ba skyed par byed pa 'ba' zhig tu ma zad de/ rnam par shes pa'i rjes su mthun pa'i gzugs 'dis mig gi yang bde ba skyed par byed do/ /de'i phyir 'di ni su zhig yin ci lha mo 'am/ klu'i bu mo'am/ yang na rig pa 'dzin pa'i bu mo 'am/yang na grub pa'i rigs las 'khrungs pa zhig go/ /'dren pas rnam par blta zhing chags pa dang bcas par grogs po 'di su zhig yin zhes bdag gis ma rtogs so/ /bdag gis 'di tsam shes te/gal te mtho ris bu mo yin na 'phrog byed mig stong ldan des don byas 'gyur//gal te klu yi bu mo yin na'ang 'di'i gdong yod tshe sa 'og zla bas stong ma yin/ /gal ste rig 'dzin ma yin gzhan rigs las rgyal bdag cag rigs ni 'bras dang bcas/ /gal te grub rigs las skyes de phyir grub pa 'jig rten gsum du grags par 'gyur/ /bi dru Sha kas/ 'dren pa la bltas nas dga' ba dang bcas shing rang gis rtogs par e ma'o//yun ring po zhig nas yid srub kyi spyod yul du lhung bar gyur to/ /bdag nyid la ston cing / yang na ma yin te/bram ze bdag gi'o/ /'bangs mos/ mdza' ba dang bcas par kye bram ze bdag smra'o/ /brtse med ma 'di'i mdun du rgyud mangs bsgrags pas ci zhig bya zhes te rgyud mangs 'phangs so//'dren mas bu mo bcom ldan ma go rI la ma smad cig /ke ding bcom ldan mas bka' drin mdzad pa bzhin no/ /'bangs mos/ rje'i sras mo re zhig ci 'dra ba dag spros shig /'dren mas/ bu mo nges par deng rmi lam du bdag 'di bzhin nyid du rgyud mangs bgreng ba la bcom ldan mas gsungs pa/bu mo khyod kyis rgyud mangs bgreng ba mkhas pa khyad par du 'phags pa 'di dang / bdag la thun mong ma yin pa'i gus pa bu mo'i dngos po la rnyed dka' ba 'dis bdag shin tu tshim par gyur to/ /de'i phyir yun ring po ma yin pa na rig pa 'dzin pa'i 'khor los sgyur bas lag pa 'dzin par 'gyur ro zhes so//'bangs mos dga' ba dang bcas par rje'i sras mo/ gal te de ltar yin na mi lam du zhes ci'i phyir brjod/ lha mos snying la 'dod pa'i mchog byin pa nyid yin no/ /bi dru Sha kas/ nges par bdag cag lha mo lta ba'i skabs su bab po//de'i phyir tshur sheg nye bar 'gro bar bya'o zhes te nye bar btud do/ /bi dru Sha kas/ mi 'dod bzhin du khyen nas jo mo grung mo bdag bden par smra ste/ 'di ni mchog byin pa nyid do/ /'dren mas 'jigs pa dang bcas par 'dren pa la mtshon te/ bu mo 'di su zhig ces so/ /'bangs mos/ gzhan dang thun mong ma yin pa'i rnam pa 'dis na/'di nyid bcom ldan mas bka' drin mdzad pa yin snyam mo/ /'dren mas chags pa dang bcas shing ngo tsha ba dang bcas par bltas so/ /'dren pas/ g.yo zhing yangs pa'i mig ldan dbugs 'byin cing / /'dar zhing mkhregs stug nu ldan 'khrul byed ma/ / lus 'di dka' thub nyid kyis shin tu ni/ /ngal gyur slar yang ci slad gdung bar byed/ /'dren mas/ bu mo shin tu 'jigs pas 'di la mngon du phyogs te 'dug par mi nus so zhes te/ logs la bltas nas 'khod do/ /bi dru Sha kas/ jo mo khyod kyi dka' thub kyi nags tshal 'di na gang zhig 'gron po 'ongs pa la tshig tsam gyis kyang phebs par smra ba ma yin pa 'di 'dra ba'i kun du spyod pa yod dam byu/'bangs mos rje'i sras mo/ 'gron po la bsnyen bkur bya ba rigs pa yin no/ /de'i phyir ji ltar mthu chen po dang ldan pa 'di dag la gus par bya ba la rmongs par gnas/ yang na khyod bzhugs shig /kho mo nyid kyis ji ltar rigs pa dag bya'i/'dren pa la mtshon te jo bo legs par 'ongs sam/ jo bo stan yongs su bzung bas phyogs 'di brgyan par mdzod cig /bi dru Sha kas/ kye grogs po 'di ni legs par smra'o/ /yud tsam zhig 'dug ste ngal gso bar bya'o/ /'dren pas/ khyod ni rigs par smra'o/ / gnyi ga 'khod do/ /'dren mas kwa yi bzhad gad kyi ngang tshul can ma de ltar ma byed/ gal te dka' thub pa 'ga' zhig gis mthong na 'di las bdag dul ba ma yin pa dang ldan par dogs par 'gyur ro/ /de nas dka' thub pa zhugs te/ rigs kyi bdag po kau shi kas bdag la bka' bsgos pa/ mnyes gshin shA Na Da l+ya/yab kyi bkas/ rgyal tshab bshes gnyen gyi dbyig gzhon nu sprin kyi bzhon pa rig pa 'dzin pa'i 'khor los sgyur bar 'gyur bdag ri ma ya 'di nyid kyi phyogs 'ga' zhig na gnas pa sring mo ma la ya can gyi khyem thab kyi slad du blta ba'i phyir di ring 'ongs te/ gal te de blta zhing ma la ya can gyi nyi ma gung gi mchod sbyin gyi dus yol bar 'gyur srid do/ /des na de bos la shog shig ces so/ /des na bdag re zhig go rI'i khang pa nyid du 'gro'o/ /'gro zhing sa la rnam par bltas nas/ a ye rdul dang ldan pa'i phyogs na rab tu gsal ba'i 'khor los mtshan pa'i rjes kyi phreng ba dag snang ba 'di su zhig gi yin/mdun du bltas te sprin gyi bzhon pa la nges par brtags nas 'di ni skyes bu chen po 'di yin nam snyam mo/ /gzhan yang / mgo la gtsug tor 'di gsal smin ma'i bar na mdzod spu 'di ni rnam par mdzes/ /mig ni pad+ma'i rjes su mthun zhing brang gdengs 'phrog byed dag la 'gran par byed//lag pa 'khor los mtshan pa ji ltar de ltar skyes bu dag ni su zhig 'di/ /rig pa 'dzin pa'i 'khor los sgyur ba'i gnas dag ma thob 'dug pa yin nam snyam/ /yang na the tshom gyis ci zhig bya ste/ shin tu gsal bar 'di ni sprin gyi bzhon pa yin par nges so/ / ma la ya can ma la bltas nas a ye 'di yang rgyal po'i bu mo'o/ /gnyi ga la bltas nas/ gal te phan tshun rjes su 'tsham pa 'di dag 'brel par byed na byed pa po ni yun ring po zhig na rig pa byed par gyur to/ /nye bar btud nas khyod ni dge bar gyur cig /'dren pas/ bcom ldan sprin gyi bzhon pa phyag bgyid do zhes te ldang bar 'dod do//dka' thub pas mngon du ldang mi dgos so/ /kye mngon 'ongs kun gyi bla ma nyid ces pas/ khyod nyid bdag cag gi bla ma yin no/ /des na ji ltar bde bar bzhugs shig /ma la ya can mas/ jo bo la phyag 'tshal lo/ /dka' thub pas de mthong nas/ rjes su 'tsham pa'i bdag po'i skal ba dang ldan par gyur cig /rgyal po'i bu mo/ khyod la rigs kyi bdag po kau shi kas bka' stsal pa/ khyod kyi mchod sbyin gyi dus yol bar 'gyur gyis myur du shog shig ces so/ /'dren mas/ mi dga' ba dang bcas par/ gang bla mas bka' stsal pa nyid do/ /rang gi rtogs par/gcig ni bla ma'i gsung dang gzhan/ /mdza' bo blta ba'i rtse dga' bzang / /'gro 'am mi 'gro 'gal ba la/ /bdag snying 'phyang mo yug par 'gyur/ /shugs phyung zhing langs te ngo tsha ba dang bcas shing chags pa dang bcas par 'dren pa la blta zhing dka' thub pa dang lhan cig song bar gyur to//'dren pas/ sred pa dang bcas par shugs phyung nas 'dren ma la blta zhing /tshang ra'i khyon gyi khur ldan zhing / /dman pa dag tu 'gro ma 'di/ /gzhan du 'gro yang bdag gi ni/ /snying la gom pa bkod par gyur/ /'bangs mos/tshur sheg chur sheg /rje'i sras mo zhes te/ma la ya can ma 'khor dang bcas pa song bar gyur to/ /bi dru Sha kas/ kye gang zhig blta bar bya ba dag mthong ngo / /da ni nyi ma gung gi nyi ma'i gdung ba nyis 'gyur du byas pa bzhin du bdag gi lto ba'i me dag lhab lhab byed do/ /de'i phyir 'di nas song ste/ gang gis bram ze dag gi mgron du 'gyur bar byas nas thub pa'i skye bo las dngos su rnyed pa'i rtsa ba dang chu ba la sogs pas srog gzung bar bya'o//'dren pas/ steng du bltas nas/ a ye/ bcom ldan 'od zer stong phrag ldan ni nam mkha'i dkyil na 'dzegs te bzhugs so/ /de ltar yang / gdung bas de dus tsan dan la bdar thang chus dkar ba'i 'gram pa 'dzin byed cing //rang gi rna ba bskyod pa'i rlung ni yang dag chags pas bzhin la g.yob byed cing / /lag pas gtor ba'i chu thigs snying khar khyad par du 'dren glang po'i bdag po 'di/ /da ni bzod dka' zug rngu drag pos zug pa lta bu'i gnas skabs 'dzin par byed/ /ces te gnyi ga song ngo //mtshan ma dang po'o// //de nas 'bangs mo zhugs te/ rje'i sras mo ma la ya can mas/bdag la gsungs pa/ bu mo me tog gsar ba can bdag gi ming po jo bo bshes gnyen gyi dbyig di ring yun ring du thogs so/ /de'i phyir song la 'ong ngam mi 'ong rtogs shig ces so/ /yongs su bgrod de phyi rol du mngon par phyogs shing bltas nas/'di nyid nas 'ongs pa 'di su zhig yin/nges par brtags nas ci grung mo'am/ 'bangs mo gnyis pa yang zhugs so/ /dang po mas nye bar btud nas/ grogs mo grung mo khyod kyang ci'i phyir mgyogs par 'gro bar byed/ gnyis pas rje'i sras mo ma la ya can mas bdag la gsungs pa/bu mo grung mo bdag gi lus kyis me tog thu ba'i yongs su ngal ba mi bzod do/ /ston ka'i gdung bas byas pa bzhin du bdag yongs su gdung bas shin tu lhag par gzir bar gyur to/ /des na khyod song la chu shing gzhon nu'i 'dab mas bsgribs pa tsan dan 'khri shing gi khang par/zla ba chu shel gyi rdo la mal stan chas gyis shig ces so/ /ji ltar gsungs pa bzhin du bdag gis kyang byas te/ de'i phyir song nas rje'i sras mo nyid la sbran par bya'o/ /dang po mas/ gal te de ltar yin na myur du chas dag gyis shig /der song na de'i gdung ba nye bar zhi bar 'gyur ro//gnyis pas bgad nas rang gis rtogs par gang zhig 'di 'dra ba'i gdung ba dag ni de lta bus nye bar zhi bar mi 'gyur ro/ /rnam par bkra zhing dga' bar bya ba tsan dan 'khri shing gi khang pa mthong nas de ni shin tu yang lhag par 'gyur ro zhes bdag rtog go/ /gsal bar grogs mo khyod song shig /bdag gis kyang rdo ba'i gzhi bstar ba bdag rje'i sras mo la sbran par bya'o zhes nas song ste 'jug par byed pa'o/ /de nas sred pa dang ldan pa'i ma la ya can ma dang / 'bangs mo yang zhugs so/ /'dren mas shugs nar phyung nas bdag nyid kyis rtogs par/ skye bo de la sems khyod kyis bdag ngo tshas/de ltar phyir phyogs par byas te/ da ni khyod nyid der 'gro ba'i phyir na/ e ma khyod ni bdag nyid rgyas par byed pa zhig go/ /gsal bar/ bu mo bcom ldan ma'i gnas su 'gro ba'i lam dag bdag la ston cig /'bangs mos rje'i sras mo tsan dan 'khri shing gi khang par gshegs pa ma lags sam/'dren mas/ ngo tsha dang bcas pas bu mo khyod kyis legs par dran par byas so/ /de'i phyir tshur sheg de nyid du 'gro bar bya'o/ /'bangs mos byon cig byon cig rje'i sras mo song bar gyur to/ /'dren ma gzhan du song ba na/ 'bangs mos phyir bltas nas mya ngan dang bcas shing bdag nyid kyis rtogs par kye sdem 'di ni snying gis stong ba zhig ste ji ltar yang lha mo'i gnas de nyid du 'jug par byed do//gsal bar de na tsan dan 'khri shing khang pa yod pa ma yin nam/ des na 'dir byon cig /'dren mas skyengs pa'i 'dzum dang bcas par de ltar byed do/ / 'bangs mos tsan dan 'khri shing gi khang pa de ni 'di lags so/ /des na nang du zhugs te zla ba chu shel gyi nor bu'i rdo la rje'i sras mo bzhugs par mdzod cig /'dren mas/ de ltar byas te shugs nar phyung nas bdag nyid kyis rtogs par/ bcom ldan me tog gi mtshon dang ldan pa gang gi gzugs kyis pham par byas pa de la ci yang mi bgyid par gnod pa ma byas shing bud med du gyur pa dag la bsnun par bgyid/ngo tsha ba ma mchis sam zhes te myos pa'i gnas skabs kyi gar dag byed do/ /gsal bar nges par byas nas bu mo ci'i phyir yal 'dab stug pos nyi ma'i 'od zer sgrib pa dang ldan pa'i tsan dan 'khri shing gi khang pa 'di dag ding bdag gdung ba'i sdug bsngal sel bar mi byed/'bangs mos 'dzum dang bcas par gdung ba'i rgyu ni bdag gis shes te/ 'on kyang rje'i sras mo/ bdag la thugs mi ches pas khas len par mi 'gyur ro/ /'dren mas/ bdag nyid kyis rtogs par 'dis bdag mtshon yang re zhig dri bar bya'o//gsal bar/ bu mo re zhig de dag gis ci/ de'i rgyu ci yin bdag smros shig /'bangs mos/ rje'i sras mo 'di ni byed kyi snying la 'dod pa'i mchog /'dren mas brtabs pa dang bcas shing dga' ba dang bcas par langs te/ mdun du gom pa gnyis gsum song nas de gang na gang na/'bangs mos langs te/ 'dzum pa dang bcas par rje'i sras mo ci lags/ 'dren mas/ ngo tsha dang bcas par 'dug ste kha 'og tu bltas nas 'khod do/ /'bangs mos rje'i sras mo bdag ni 'di skad brjod par 'dod de/ 'di ni byed kyi snying la 'dod pa'i mchog gdung ba'i rgyu yin pa gang gis na tsan dan 'khri shing gi khang pa rang bzhin gyis bsel yang khyod kyi gdung ba'i sdug bsngal sel bar mi nus so//'dren mas dga' ba dang bcas par 'bangs mo la 'khyud nas/ bu mo grung mo khyod ni nges par grung mo ste/ gzhan pa ci zhig dri bar bya/ des na sgros shig /'bangs mo rje'i sras mo da lta nyid khyod la smras pa yin no/ /des na mchog lta bas byas pa'i gdung ba 'dis re zhig gdung bar ma byed cig /gal te bdag grung mo yin pa de lta na de yang rje'i sras mo mthong ba med par yud tsam yang gzhan du mngon par dga' bar mi 'gyur ro/ /'di yang bdag gis shes pa nyid do//'dren mas mchi ma dang bcas par bu mo de lta bu'i skal ba bdag la ga la yod/ 'bangs mos rje'i sras mo de skad ci la gsungs/ khyab 'jug brang gi gzhi la dpal mo 'dzin pa yang bde bar ji ltar 'gyur/ 'dren mas skye bo legs pa ngag snyan pa bor nas/gzhan smra bar byed dam ci/ bu mo bdag gi gdung ba 'di bas kyang 'di shin tu lhag par gzir ba ste/ gang gzi byin chen po de la tshig tsam gyis kyang dga' bar ma byas pa bdag tshul dang mthun pa ma yin par mkhyen to zhes te ngus so/ /'bangs mos mchi ma dang bcas par rje'i sras mo ma bshums shig /langs nas yal 'dab blangs nas btsur te khu ba snying gar byugs so/ /rje'i sras mo/ bdag smra'o/ /ma bshums shig /nu ma'i ngos la byugs pa tsan dan yal 'dab kyi thang chu 'di ni nges par rgyun chad med par 'bab pa mchi ma'i thigs pa 'di dag gis dro bar byas pas khyod kyi snying ga'i gdung ba mi sel lo zhes te chu shing gi 'dab ma dag gis g.yob par byed do//'dren mas/ lag pas bzlog cing / bu mo ma g.yob ma g.yob chu shing gi 'dab ma'i rlung 'di ni shin tu pa'o/ /'bangs mos rje'i sras mo 'di'i skyon du ma byed cig /'di ltar snyam zhing stug pa'i tsan dan 'khri shing yal 'dab dang 'grogs pa chu shing gi 'dab ma'i rlung 'di ni shin tu bsel yang byed nyid kyi dbugs kyis tsha bar byas so//'dren mas mchi ma dang bcas par bu mo sdug bsngal 'di nye bar zhi ba'i thabs 'ga' zhig yod dam/ 'bangs mos rje'i sras mo gal te de nyid 'dir 'ongs na yod pa nyid do/ / de nas 'dren pa dang / bi dru Sha ka dag zhugs so/ /'dren pas/ phyir log dkar dang dkar min mig gi 'od kyis bsti gnas shing de rnams/ /yal ga la chags ri dwags pags pa'i tshogs kyis sgeg pa bzhin byed cing / /thub pa'i sngon du bdag la bltas pa gang de nyid kyis bdag ni bcom gyur na//me tog mda' can byed kyis don med mda' 'di dag ni ci slad 'phen par byed/ /bi dru Sha kas/ kye grogs po nges par khyod kyi brtan pa gang du song / 'dren pas/ grogs po bdag la brtan pa yod pa nyid ma yin nam/ gang gi phyir/ zla bas dag pa'i mtshan las min nam ci zhig ut+pal sngon po ma bsnams sam//rab rgyas dzA ti'i me tog dri ldang srod la'i rlung dag bzod pa min nam ci/ /pad tshal sbrang rtsi byed pa'i dar dir sgra dag ci zhig bdag gis ma mnyan nam/ /gdung ba dag gis gnod med bdag la mi brten pa zhes gang gis byed rjod byed/ /yang ni grogs po a ti'i rigs bdag gis yang dag par ma brjod do//lus med kyis 'phangs pa me tog gi mda' ni bud med kyi snying gis kyang bzod pa ma yin nam/ gang gis na de ring khyod kyi mdun du bdag gis bstan pa yin no zhes brjod par bya/ bi dru Sha kas/ bdag nyid kyis rtogs par 'di ltar brtan pa med pa nyid du yang khas len cing /'dis snying la gdung ba chen po gnas pa dag gsal bar byed do/ /des na re zhig ji ltar yang 'di g.yeng bar bya'o/ /gsal bar kye grogs po ding khyod bla ma'i bsnyen bkur myur ba nyid du byas nas ci'i slad du 'dir 'ongs/ 'dren pas/ grogs po gnas dag dris te gzhan su zhig la 'di smra bar bya/ding bdag gi mi lam du shes pa ni dga' ma'i mchog de nyid mdzub mos ston cing tsan dan 'khri shing gi khang pa zla ba chu shel gyi stan 'di la 'dug nas mdza' bas khros te/ bdag la 'ga' zhig smod bzhin du ngu zhing 'dug pa bdag gis mthong ngo / /des na mi lam du dga' ma dang 'grogs pa'i dga' ba nyams su myong bar gyur pa'i gnas 'di nyid du nyi ma bskyal bar 'dod do//de'i phyir tshur sheg de nyid du 'gro bar bya'o zhes te song ngo / /'bangs mos rings pa dang bcas par thos nas rje'i sras mo rkang pa'i sgra 'dra ba dag thos so/ /'dren mas rings pa dang bcas par bdag nyid la blta zhing /bu mo bdag gi spyod pa 'di 'dra ba 'di mthong nas 'di 'ga' zhig gis bdag gi sems rig par 'gyur ro/ /des na shing mya ngan med pa dmar po'i khrod 'dir 'dug ste/ 'di dag su zhig yin blta bar bya'o/ /de bzhin byas so/ /bi dru Sha kas/ 'di ni tsan dan 'khri shing gi khang pa ste/des na 'jug par bya'o/ /gar gyis rab tu zhugs par gyur to/ /'dren pas/ tsan dan 'khri shing dag gi khang pa ni/ /zla ba nor bu'i rdo dang ldan mod kyang / /zla bzhin ma bral 'di la bdag mi dga'/ /zla 'od dang bral mtshan mo'i sgo bzhin no/ /'bangs mos mthong nas rje'i sras mo dga' ba 'phel bar mdzod cig /khyod kyi snying sdug de ni 'di nyid do/ /'dren mas mthong nas dga' ba dang bcas shing rtabs pa dang bcas par bu mo 'di mthong bar shin tu 'jigs pa'i phyir/ 'di dang shin tu nye bar 'dug mi bzod do/ /gal te na 'dis bdag mthong bar 'gyur ro//des na tshur sheg gzhan du 'gro'o/ /byen pa 'dar ba dang bcas par rkang pa bkod nas/bu mo/ bdag gi byin pa dag 'dar ro/ /'bangs mos bgad nas/ shin tu skrag ma 'dir 'khod kyang khyod su zhig gis mthong / shing mya ngan med pa dmar po'i khrod na gnas pa dag brjed dam/des na 'di nyid du 'khod la 'dug cig /de ltar byas so/ /bi dru Sha kas/ brtags nas kye grogs po zla ba nor bu'i rdo lam de 'di yin nam/ 'dren mas mchi ma dang bcas par shugs ring phyung ngo / /'bangs mos rje'i sras mo 'di 'di zhes pa'i gtam dag thos so/ /des na nges par brtags la mnyan par bya'o//de bzhin byas so/ /bi dru Sha kas/ lag pa bskyod cig /kye grogs po zla ba nor bu'i rdo lam de 'di yin nam byas pa na/ 'dren pas/ yang dag par mtshon cing lag pas bstan nas/ lag g.yon yal 'dab dag la rnam par dkar ba'i gdong pa bzhag nas ni/ /shugs ring dbugs 'byin yid la khro ba nges byas smin ma dag /cung zad bskyod cing yun ring thogs pa bdag la bsam pa gsal byas pa'i/ /dga' ma gang du bdag gis mthong ba'i zla ba nor bu'i rdo 'di'o/ /de'i phyir zla ba nor bu'i rdo 'di nyid la 'dug par bya'o/ /bi dru Sha kas/ gang khyod gsungs pa'o/ / gnyi ga nye bar 'khod do/ /'dren mas bsams pa/ 'dis sems par byed pa de su zhig yin/ 'bangs mos/ rje'i sras mo ji ltar yu bu cag gis bsgribs nas 'di dag mthong ba de bzhin nyid du/ khyod kyang 'di dag gis mthong ba yin pa srid do/ /'dren mas/ 'di ni rigs te/ 'on kyang mdza' bas khro ba'i dga' ma'i skye bo snying la byas nas rjod par byed do//'bangs mos/ 'di 'dra ba'i dogs pa ma byed cig /da dung re zhig mnyan par bya'o/ /bi dru Sha kas/ bdag nyid kyis rtogs par 'di'i gtam 'di ni mngon par dga'o/ /des na 'di nyid 'phel du gzhug par bya'o/ / gsal bar kye grogs po de nas ngu ba dang bcas pa de la khyod kyis ci zhig smras/ 'dren pas grogs po bdag gis 'di skad brjod de/ zla ba chu shel rdo dag ni/ /mchi ma'i chu yis bran pa 'di/ /khyod kyi bzhin gyi zla ba dag /shar ba 'di yis bzhu ba bzhin/ /'dren mas/ khro ba dang bcas par grung mo 'di las kyang gzhan mnyan par bya ba yod dam/mchi ma dang bcas par tshur sheg 'gro bar bya'o/ /'bangs mos rje'i sras mo de ltar ma sems shig /gang gis khyod mthong ba des gzhan du yang brjod do zhes bya ba la bdag yid mi ches so/ /des na gtam gyi mthar thug pa re zhig brtag par bya'o//'dren pas grogs po rdo ba'i gzhi 'di la de nyid bris te/ ri mor gyur pa de dang bdag nyid rtse zhing 'dug par bya'o snyam mo/ /des na ri'i ngos 'di nyid nas/ ldong ros kyi dum bu dag long la shog cig /grogs po gang khyod gsung ba'o/ /de ltar byas nas/ kye khyod kyi kha dog ci long zhes gsungs nas/bdag gis ni ri 'di las rnyed sla ba'i tshon kha dog lnga yang blangs te mchis so/ /des na legs par bris shig ces gtad do/ /'dren pas grogs po legs par byas so/ /blangs nas mngon par bris te spu long dang ldan par grogs po ltos shig ltos shig /ma nyams bim pa ltar mdzes mchu//mig gi dga' ston dga' ma yi/ /bzhin ras ri bong can gyi bzhin/ /dang po mthong 'dis sems dga' byed/ /ces bris so/ /bi dru Sha kas/ ya mtshan dang bcas par 'di ni ya mtshan che ste/ kye grogs po mngon sum du gyur pa ma yin yang de ltar mngon par 'dri ba ni ya mtshan che'o//'dren pas/ 'dzum pa dang bcas par/ dga' ma 'di yang kun rtog la/ /gnas pa dag ni nye ba nyid/ /de bltas bltas shing 'dri ba gang / /'di la ya mtshan ci zhig yod/ /'dren mas/ shugs ring phyung zhing mchi ma dang bcas par grung mo nges par gtam gyi mjug tu gyur to/ / des na tshur sheg /re zhig jo bo bshes gnyen gyi dbyeg kyang blta bar bya'o/ /'bangs mos yid 'byung ba dang bcas shing rang gis rtog par 'di'i gtam ni srog la yang ltos pa med pa bzhin no/ /gsal bar rje'i sras mo der me tog sar pa can song ba ma yin nam/ des na gal te jo bo bshes gnyen gyi dbyeg 'di nyid du 'ong ba yang dusrid do//des na bshes gnyen gyi dbyeg zhugs par gyur to/ /yab kyis bdag la bka' stsal pa/ bu bshes gnyen gyi dbyeg gzhon nu sprin gyi bzhon pa bdag gis yongs su brtag pa byas te 'di nyid na nye bar gnas so/ /'di ni bdag cag gi mag par 'os pa yin pas/de la bu mo ma la ya can ma sbyin par gyis shig /bdag ni byams pa'i dbang du gyur pas gzhan pa'i gnas skabs 'ga' zhig kyang sems par byed de gang gi phyir/ gang zhig rig 'dzin rgyal rigs thig le shes rab dam pa'i 'dod pa dag dang ldan/ /gzugs ni zla yod ma yin pha rol gnon pa'i nor ldan mkhas shing dul la gzhon//gang yang snying rjes sems can don la mngon sbyor srog kyang kun du gtong ba des/ /de la mtshungs med sring mo sbyin la dga' ba dang ni chags bral dang yang ldan/ /ji ltar sprin gyi bzhon pa 'di go rI'i bsti gnas dang nye ba tsan dan 'khri shing gi khang pa 'di nyid na gnas so zhes bya ba yang bdag gis thos so//des na tsan dan 'khri shing gi khang pa 'di nyid du 'gro bar bya'o/ /bltas nas zhugs te gar byed do/ /bi dru Sha kas/ rings pa dang bcas par mthong nas kye grogs po chu shing gi 'dab ma 'dis ri mor gyur pa 'di sgribs shig / grub pa'i rgyal tshab bshes gnyen gyi dbyeg 'di 'dir nges par 'ongs te/ gal te na mthong bar 'gyur ro/ /'dren pas de ltar byed do/ /bshes gnyen gyi dbyig nye bar btud nas gzhon du bshes gnyen gyi dbyig phyag bgyid do/ /'dren pas/ bshes gnyen gyi dbyig legs par 'ongs sam/ 'dir 'dug cig /'bangs mos/ rje'i sras mo jo bo bshes gnyen gyi dbyig ni byon pa nyid do/ /'dren mas/ bu mo blta bar bya'o/ /'dren pas bshes gnyen gyi dbyeg grub pa'i rgyal po kun gyi dbyeg dge 'am/ bshes gnyen gyi dbyeg gis dge'o/ /yab kyi gsung nyid kyis bdag ni khyod kyi mngon du 'ongs so//'dren pas grub pa'i rgyal po lags bdag la ci zhig gsung / 'dren mas/ re zhig yab kyis ci zhig gsungs pa dag mnyan par bya'o/ /bshes gnyen gyi dbyeg gis dga' ba dang bcas par yab ni 'di skad gsung ste/ bdag gi bu mo ma la ya can zhes bya ba grub pa'i rgyal rigs thams cad kyi srog lta bu de bdag gis byed la sbyin gyis blangs par mdzod cig ces so//'bangs mos bgad nas rje'i sras mo da ni khro bar ma mdzad cig /'dren mas bu mo tshim par ma byed cig /'dren pas/ skye bos dben par grog po dog pa dag tu lhung bar gyur na/ bdag gis ci zhig smra bar bya/be+e dru Sha kas/ kye khyod kyis sems de ma gtogs pa gzhan pa dag la mngon par dga' bar mi 'gyur ba bdag gis shes so/ /de lta na yang 'di la gang cung zad smros la gtang bar mdzod cig /'dren mas/khro ba dang bcas par kye 'bangs dag de sus mi shes/ 'dren pas/ spyod lta bu dang lhan cig 'brel pa bsngags par 'os pa 'di 'dra ba dag /su zhig mi 'dod/ 'on kyang gzhan du zhugs pa'i sems dag gzhan du rab tu 'jug par byed par mi nus so/ /de'i phyir bdag ni 'di len par spro ba med do/ /'dren mas/ rmongs pa'i gar dag byed do//'bangs mos/ rje'i sras mo dag rab tu ston cig rab tu ston cig /bi dru Sha kas/ 'di ni nges par gzhan gyi dbang du gyur pa zhig ste/ brjod pa 'di dag gis ci zhig bya/ song ste bla ma'i skye bo de nyid la don du gnyer bar bya'o/ /bshes gnyen gyi dbyig gis/ bdag nyid kyis rtogs par 'dis legs par brjod de/'di ni bla ma dag gi gsung las 'da' ba ma yin no/ /'di'i bla ma dag kyang / go rI'i bste gnas dang / nye ba 'di nyid na rab tu gnas so/ /des na re zhig song ste/ 'di'i pha ma dag la ma la ya can ma len du gzhug par bya'o/ /'dren ma dbugs phyin par gyur to//bshes gnyen gyi dbyig gis gsal bar 'di skad smra bar byed pa'i bdag nyid/ bdag cag rnams 'gog par byed cing gzhon nu nyid kyis shin tu mang bar mkhyen to/ /'dren mas/ ji ltar smad cing zhan par slar yang bshes gnyen gyi dbyeg smra bar byed/ bshes gnyen gyi dbyig song bar gyur to//'dren mas/ mchi ma dang bcas shing bdag nyid kyis rtogs par/ skal ba ngan pa'i rnyog pas dri mar byas shing / da dung yang / sdug bsngal bsten pa bdag gi lus 'dis ci zhig bya/ des na shing mya ngan med pa 'di nyid la/ a ti muk+ta'i 'khri shing 'di dag gis btags te/bdag nyid 'chi bar 'gyur ba de ltar re zhig bya'o/ /gsal bar 'dzum pas bu mo re zhig bshes gnyen gyi dbyig ring du song ngam ma song rtogs shig /de nas bdag cag kyang 'di nas 'gro bar bya'o/ /'bangs mos/ bdag nyid kyis rtogs par 'di'i sems ni gzhan pa zhig yod pa 'dra'o//des na 'di nyid nas bsgribs te/ 'di ci zhig byed pa dag blta bar bya'o/ /gsal bar rje'i sras mo gang gsung ba nyid do zhes te/ thon nas gom pa 'ga' zhig song zhing bsgribs te gnas so/ /'dren mas/ phyogs su bltas nas grung mo song ba dang 'khri shing gi zhags pa dag byas nas/mchi ma dang bcas par bcom ldan ma go rI gal te khyod kyis skye ba 'di la bka' drin mdzad na yang / re zhig skye ba gzhan la ji ltar 'di 'dra ba'i sdug bsngal dang ldan par mi 'gyur ba de ltar mdzod cig ces te mgrin pa la zhags pa bcug go//'bangs mos mthong nas rings pa dang bcas par jo bo jo bo skyobs shig skyobs shig /nges par rje'i sras mo 'di ni bdag nyid dpyangs te 'chi bar byed do/ /'dren pas/gang na gang na/ 'bangs mos/ mya ngan med pa'i shing 'di la'o/ /'dren pas mthong nas dga' ba dang bcas par a ye bdag cag gi yid la re ba'i sa gzhi de ni 'di yin no//'dren ma'i lag pa nas bzung ste zhags pa 'grol zhing /ma byed ma byed mdzes ma thub chod bya ba 'di/ /'khri shing yal 'dab rtse yi lag pa 'di dag thong / /gang gi me tog dag kyang btu bar nus min pa/ /de yis byed ni 'chi slad zhags pa ji ltar 'dzin//'dren mas/ 'jigs pa dang bcas par kye ma smad do/ /kye ma smad do/ /'di su zhig /nges par brtags nas khro ba dang bcas par lag pa 'grol zhing bdag zlog par byed pa'i/lag pa'i rtse mo dag thong shig thong shig /'chi ba yang khyod nyid la don du gnyer bar byed dam ci/'dren pas/ dga' ba dang bcas par/ gang gi khyod mgrin do shal gyi/ /'khri shing 'os la zhags pa bcug /gnod pa dang bcas bzung ba yi/ /lag pa 'di ni ji ltar gtong / /bi dru Sha kas/ kye grung mo khyod kyi rje'i sras mo 'di 'chi ba la mngon par zhen pa'i rgyu dag ci zhig yin//'bangs mos/ khyod kyi grogs po 'di nyid rgyu yin no/ /'dren pas/ ji ltar na/ nga nyid 'chi ba'i rgyu dag yin/ /'di ni nges par mi shes so/ /bi dru Sha kas/ kye bu mo de ji ltar/ 'bangs mos/ khro ba dang bcas par khyod kyi dga' ba'i grogs pos/ snying gi dga' grogs su zhig /rdo ba'i gzhi la bris pa de nyid kyi phyogs su lhung ba 'dis/ bshes gnyen gyi dbyeg gis byin par gyur kyang / bdag ma bzhed par gyur to zhes mya ngan skyes te/ 'di 'di lta bur gdung bar gyur tam snyam mo/ /'dren pas/ dga' ba dang bcas shing bdag nyid kyis rtogs par ji ltar kun gyi dbyig gi bu mo ma la ya can ma de 'di nyid yin nam/yang na zla ba tshes pa rin chen 'byung gnas las gzhan gang las 'khrungs par 'gyur/ kye ma yud tsam zhig gis bdag ma bslus so/ /bi dru Sha kas/ kye bu mo gal te de lta yin na bdag gi grogs po nyes pa med pa zhig ste/'di nyid der bris pa yin no/ /ci ste de ltar yid mi ches na/ bu mo byed nyid der song la rdo ba'i gzhi la blta bar byos shig /'dren mas/ dga' ba dang bcas shing ngo tsha ba dang bcas par 'dren pa la blta zhing lag pa 'dren par byed do/ /'dren pas/ ji srid bdag gis snying gi dga' ma rdo ba'i gzhi la mngon par bris pa ma mthong ba de srid du mi gtong ngo zhes te thams cad der song ngo //bi dru Sha kas/ chu shing gi 'dab ma bsal nas ltos shig ltos shig /'di nyid 'di'i snying gi dga' ma'o/ /'dren mas/ nges par brtags nas grung mo nga lta bu zhig bris pa 'dra'o/ / 'bangs mos nges par brtags nas rje'i sras mo nga 'dra ba zhig bris so zhes ci ste gsung /'di khyod 'dra ba ni gang gis na ci/ re zhig rdo ba'i gzhi 'di la rje'i sras mo khyod kyi gzugs brnyan dag 'phos pa yin nam 'on te khyed bris pa yin yang yongs su mi shes so/ /'dren mas bgad nas 'di yi ri mor gyur pa 'di ston par byed pa ni bdag gis ngan pa'i lugs dag byas so//bi dru Sha kas/ kye grogs po da ni khyod kyi dri za'i bag ma dag rdzogs par gyur to/ /da ni 'di'i lag pa'i rtse mo dag thong shig /'dren pas de ltar byed do/ /'bangs mos/ do ra las phyis mngon par phyogs te/ bltas nas nges par rings pa rings par 'di nyid du 'ong ba 'di su zhig yin/de nas 'bangs mos zhugs te/dga' ba dang bcas par nye bar btud nas/ rje'i sras mo dag dgyes pa 'phel bar mdzod cig /mnga' bdag gzhon nu sprin gyi bzhon pa'i bla ma dag gis gus pa dang bcas par dga' ba'i grogs la/khyed bzhes par gyur to/ /bi dru Sha kas/ dga' ba dang bcas par dga' ba'i grogs kyi yid la re ba rdzogs par gyur to/ /yang na de ma yin te/ ma la ya can ma khyod nyid kyi'o/ /yang na bram ze bdag nyid kyi'o zhes te/ zas kyi mngon par sbyor ba'i gar dag byed do//'bangs mos/ rgyal tshab bshes gnyen gyi dbyeg gis bdag la gsungs pa/ di ring nyid ma la ya can ma ni bag ma'o/ /des na bkra shis kyis khrus kyi don du myur bar bos la shog shig ces so/ /de'i phyir byon cig gshegs par bgyi'o/ /bi dru Sha kas/ 'bangs mo'i bu mo nges par khyod 'di bos te song nas 'di dag 'di nyid du 'dug par bya'am ci/ 'bangs mos/ a i rings par ma byed cig /khyed rnams kyi yang khrus kyi rdzas dag 'ong ba nyid do/ /'dren mas sgeg pa dang bcas par 'dren pa blta zhing song bar gyur to/ /phyi rol nas bstod pa mkhan klog par byed do//bi Sha ta ka'i char gyis lhun po dang mtshungs mdzes pa 'dzin pa ma la ya dag la/ /gser dang nor bu'i rkang gdub sgra ldan yid 'ong snyan sgrogs bud med rnams kyi gru ldan pa/ /khyod kyi bag ma'i khrus kyi dus ni grub pa'i slad du grub pa'i 'jig rten li khri yi/ /rdul bkod nyin mo rab tu rtsom pa'i mtshams kyi nyi 'od dpal dang ldan rnams sgrogs par byed//bi dru Sha kas thos nas/ kye grogs po e ma 'di ni khyod kyi khrus kyi rdzas dag 'ongs pa nyid do/ /'dren pas dga' ba dang bcas par grogs po da ni 'dir 'dug nas ci zhig bya/ /des na tshur shig yab la phyag 'tshal te khrus kyi gzhi nyid du 'gro bar bya'o//phyi rol nas slar yang bstod pa pos/ gzugs dang rjes chags rigs na tshod/ /mthun par phan tshun mthong byas pa/ /bsod nams ldan pa 'ga' zhig nyid/ /'grogs par 'gyur ba yin nam snyam/ /zhes te song bar gyur to/ /mtshan ma gnyis pa'o// //de nas rab tu 'bar ba'i chas dang ldan zhing lag na chang gi snod gzung ba'i bi Ta dang / 'bangs dag zhugs par gyur to/ /bi Tas/ gang zhig rtag tu chang 'thung dang / /gang yang dga' mar 'grogs byed pa/ /stobs kyi lha dang 'dod lha ste/ /skye bo'i lha gnyis che ba nyid/ / zur phud can bdag gis 'tsho ba ni bsngags par 'os pa yin te/ brang gi gzhi la dga' ma dang / /kha la ut+pal sngos bsgos chang du/ /mgo la me tog zur phud dag /gang la rtag tu gnas pa'o/ /yongs su 'gyel zhing kye sus nga la 'bul zhing yod/ nges par me tog gsar pa can yin no zhes dgod do//'bangs kyis/ jo bo de ni ma 'ongs so/ /bi Tas/ khro ba dang bcas par srod la dang po nyid la ma la ya can gyi bag ma'i bkra shis dag tshar ro/ /des na yugs mo de da dung ci'i phyir mi 'ong / rnam par bsams nas dga' ba dang bcas par yang na di ring ma la ya can ma'i bag ma'i dga' ston chen po 'di la grub pa dang rig pa 'dzin pa'i 'jig rten thams cad rang rang gi dga' ba'i skye bo dang lhan cig skyed mos tshal me tog gi 'byung gnas su chang 'thung ba'i bde ba nyams su myong bar byed cing yod do//de nyid na me tog sar pa can yang bdag lta zhing yod dam snyam mo/ /des na de nyid du 'gro bar bya ste/ me tog sar pa med pa'i zur phud kyis ci byed/yongs su 'gyel zhing song ngo / /'bangs kyis nges par skyed mos tshal 'dir 'jug par bya'o/ /gnyi gas zhugs so/ /de nas bi dru Sha kas phrag pa la gos zung dag bkod de zhugs par gyur to/ /bi byu Sha kas/ dga' ba'i grogs po di ring skyed mos tshal me tog gi 'byung gnas su 'gro bar 'gyur ro zhes bdag gis thos so//des na skyed mos tshal me tog gi 'byung gnas 'dir re zhig 'jug par bya'o/ /zhugs nas bung ba 'bab pa'i tshul rmis gar dag byed do/ /gzir ba dang bcas par ci'i phyir sbrang rtsi'i byed pa 'di dag bdag nyid la mngon par 'bab par 'gyur/bdag nyid la mnos nas rig pa dag shes par gyur te/ ma la ya can ma'i gnyen 'dun gyi skye bo'i mag pa'i dga' grogs yin no zhes gus pa dang bcas par byug pa rnams kyis byugs pa dang lha'i me tog rnams kyi cod pan dag byed do/ /des na shin tu gus par byas pa de dag da ni 'dir gnod pa'i rgyur gyur to//des na 'dir bdag gis ci zhig bya/ yang na ma la ya can ma las dngos su thob pa'i gos dmar zung gcig po 'di dag gis bud med bzhin yongs su g.yogs te/ stod g.yogs kyis bcing ba byas nas 'gro bar byed de/ re zhig 'bangs phrug ngan pa sbrang rtsi byed pa 'di dag gis bdag la ci zhig byed par 'gyur ba blta bar bya'o zhes te de ltar byed do//bi Tas/ nges par brtags nas dga' ba dang bcas par ke ke 'bangs po sor mos ston cing dgod pa dang bcas par 'di ni nges par me tog sar pa can te/ bdag mthong nas nga yun ring po zhig nas 'ongs so zhes khros te/gos kyis g.yogs te sa gzhan du 'gro'o/ /des na ma tshor bar mgrin pa nas bzung ste 'di dang bar bya'o/ /'phral la nye bar btud de bzung na khar tam bu la sbyin par 'dod do/ /bi dru Sha kas/ chang gi dri tshor te sna bzung nas gdong gzhan du phyogs te/ ji ltar na gcig tu sbrang rtsi byed pa rnams las ji lta ji ltar yang thar bar gyur na gzhan du ngan pa chang gis myos pa dag gi khar ltung ngo //bi Tas/ ji ltar khro bas gdong gzhan du phyogs pa gyur phyag 'tshal bar byed cing / bi dru Sha ka'i rkang pa la bdag nyid kyi mgo bo gtugs nas bzod par mdzod cig /me tog sar pa can bzod par mdzod cig /de nas 'bangs mo zhugs par gyur te/ rje'i sras mo'i mas bdag la gsungs pa/ bu mo me tog sar pa can skyed mos tshal me tog gi 'byung gnas su song la/ skyed mos tshal bsrung ba la yal 'dab can ma la di ring khyad par bcas par shing ta ma la'i gnas dag legs par bstar bar byos shig /ma la ya can ma dang bcas pa'i mag pa dag der 'ong bar 'gyur ro zhes smros shig ces so/ /bdag gi yal 'dab can ma la smras zin te/ des na re zhig mtshan mo bral bas sred pa'i 'phel ba'i mdza' bo zur phud can la blta bar bya'o/ /mthong nas khro ba dang bcas par ji ltar bud med gzhan su zhig la dad par byed/bi Tas/ seng ge 'phrog byed mes po dag la yang / /'dud par mi byed khengs dang ldan pa gang / /zur phud can des me tog sar pa can/ /khyod kyi rkang pa dag la gtugs gyur to/ /bi dru Sha kas khro ba dang bcas par 'bangs phrug chang gis myos pa/'di na me tog sar pa can gang na yod/ 'bangs mos/ brtags nas 'dzum pa dang bcas par ji ltar myos pa dang bcas/ 'dod pa'i gzhan dbang du gyur pa'i zur phud can gyi jo bo a tre'i rigs la nga yin par byas nas dang bar byed do/ /des na re zhig kyal ka'i khro bar byas te/ 'di gnyi ga la tho btsams par bya'o//'bangs kyis mthong nas lag pas bskyod cing jo bo thong shig /'di ni me tog sar pa can ma yin te/ me tog sar pa can de ni khro bas dmar ba'i mig gis blta zhing 'ongs par gyur to/ /'bangs mos zur phud can 'di nges par su zhig la dang bar byed/ bi dru Sha kas gos kyis dkris pa dag 'grol zhing skal ba ngan par gyur pa'i bu bdag go//bai Tas/ bi dru Sha ka la nges par brtags nas/ kye'i spre'u ser skya khyod kyis kyang zur phud can bdag bslus so/ /'bangs ji srid du me tog sar pa can dang bar gyur pa de srid du 'di zung shig /'bangs kyis rje gang gsungs pa nyid do//bi Tas/ bi dru Sha kas btang nas 'bangs mo'i rkang pa dag la gtugs te dang bar mdzod cig /me tog sar pa can dang bar mdzod cig /baM drU Sha kas bdag nyid kyis rtogs par 'di ni bdag 'bros pa'i gnas skabs yin no zhes te/ 'bros par 'dod pa dang / 'bangs kyis bi drU Sha ka'i tshangs skud nas bzung bas tshangs skud chad par gyur to//spre'u ser skya gang dang gang du 'bros/ /stod g.yogs kyis mgrin pa nas btags te drang ngo / /bi dru Sha kas/ bu mo me tog sar pa can ma bdag la bka' drin mdzod la gtong du chug cig /'bangs mos bgad nas gal te sa la mgo bo bkod nas bdag gi rkang pa dag la gtugs na'o//bi dru Sha kas khro ba dang bcas par ji ltar rgyal po'i grogs por gyur nas 'bangs kyi bu mo khyod kyi rkang pa la gtugs par byed/ 'bangs mos mdzub mo 'dzugs shing 'dzum pa dang bcas par da lta nyid khyod gtugs par 'gyur ro/ /zur phud can longs shig /khyod la bdag rab tu dang bar gyur to/ /mgrin pa nas bzung ste/ 'di ni mag pa'i dga' grogs te de la khyod kyis ngan pa dag byas so/ /de dag gal te gsan na jo bo bshes gnyen gyi dbyeg khro bar 'gyur ro/ /des na 'di ni gus pa dang bcas par mchod de gtang bar bya'o/ / bi Tas/ ji ltar me tog sar pa can gsungs pa bzhin no/ /bi drU Sha ka'i mgrin pa nas bzung ste/ kye khyod ni dga' grogs kyi 'brel pa yin par byas te/ bdag gis kyal ka dag byas so/ /'khor zhing nges par zur phud can myos pa yin nam ci/ des na bzhad gad dag byas pa yin no//stod g.yogs bzlums te stan du byin nas/ 'brel ba dag 'dir bzhugs shig /bi drU Sha kas/ e ma ho 'di ni myos pas gzir ba dang bral bar gyur to/ /nye bar 'khod do/ /bi Tas/ me tog sar pa can khyod kyang 'di'i logs nyid du nye bar 'dug cig /gang gis na khyod gnyi ga yang mnyam pa nyid du bdag gis mchod par bya'o//'bangs mos bgad nas 'khod do/ /bi Tas/ 'bangs dag chang gi snod 'di chang dag gis gang bar byos shig /'bangs kyis gar byed cing gang bar byas so/ /bi Tas/ rang gi mgo'i zur phud las me tog blangs nas chang gi snod du bkod de pus mo dag btsugs nas me tog sar pa can la nye bar bstabs te/bi drU Sha ka la bltas nas me tog sar pa can gyi kha yi reg pa sde khyad par du ro 'phel bar gyur pa zur phud can las gzhan su yis kyang sngar ma myong ba yin no/ /de bas na 'di 'thung shig /khyod la 'di las gzhan pa'i bkur ste bya ba ci zhig yod/bi drU Sha kas/ skyengs pa'i 'dzum dag byas nas zur phud can nges par bdag ni bram ze yin no/ /bi Tas/ gal te khyod bram ze yin na khyod kyi tshangs skud ga re/ bi drU Sha kas/ de ni 'bangs 'dis 'then nas bcad do/ /'bangs mos/ gal te de lta yin na rig byed kyi yi ge 'ga' zhig rjod cig /bi drU Sha kas/ bu mo chang gi dris bdag gi rig byed kyi yi ge dag nyams par gyur to/ /yang na bu mo khyod la rtsod pa 'dis bdag la ci zhig bya/ bram ze bdag khyod kyi rkang pa dag la gtug go zhes te/ rkang pa dag la gtugs par 'dod do/ /'bangs mos lag pa dag gis zlog cing /jo bo 'di lta bu nges par ma byed/ zur phud can bden pa nyid du 'di ni bram ze zhig go/ /bi drU Sha ka'i rkang pa dag la gtugs nas jo bo khyod khro bar mi bya'o/ /'brel pa la rjes su 'tsham pa'i kyal ka 'di ni nges par bdag gis byas so/ /bi Tas/ bdag gis kyang 'di dang bar bya'o//rkang pa dag la gtugs na jo bo myos pa'i dbang du gyur pa bdag gis gnod pa gang byas pa dag bzod par mdzod cig /bdag kyang me tog sar pa can dang 'grogs nas/ chang 'thung ba dag can du 'gro'o/ /bi drU Sha kas/ bdag gis bzod kyis song shig /bdag gis kyang dga' ba'i grogs po blta bar bya'o//'bangs mo dang / bi Ta dag song bar gyur to/ /bi drU Sha kas bram ze bdag gi dus ma yin pa'i 'chi ba dag song bar gyur to/ /des na re zhig myos pa'i skye bos reg pas skyon can du byas pa dag rdzing bu 'dir khrus bya'o/ /de ltar byed de/ phyi rol tu mngon par phyogs nas 'di ni nges par dga' ba'i grogs pos dpal mo mchog gis gzugs las rgyal ba/ma la ya can ma bzung nas 'di nyid du 'ong ba dag go/ /des na re zhig de'i logs nyid du 'gro bar bya'o/ /de nas ches mchog gis brgyan pa'i 'dren pa dang / ma la ya can ma dang / rnam par 'byor ba'i 'khor dang bcas pa dag zhugs par gyur to//'dren pas bltas na mig ni 'og tu ster zhing smras pa dag la kun du smra mi byed/ /mal stan dag la bzlog nas 'khod cing stobs kyis 'khyud pa dag la 'dar bar byed/ /grogs mo rnams ni phyir song tshe na gnas khang dag las 'thon pa nyid du 'dod/ /mi mthun nyid kyis di ring bag gsar dga' ma bdag gi shin tu dga' slad gyur//ma la ya can ma la blta zhing dga' ma ma la ya can ma/ /hUM zhes ster byed dag gis so so'i tshig la smra bcad sten pa gang yin dang / /lus 'di zla 'od nags me 'bar ba lta bus gdungs par gyur pa gang yin dang / /nyin mtshan shin tu mang bar yid gzhan med par bsams pa gang yin dka' thub de'i//'bras bu gang dag da ltar dga' ma khyod kyi bzhin 'di lta ba 'di nyid do/ /'dren mas bsgribs te bu mo gzugs bzang ba 'ba' zhig tu ma zad de/ nges par snyan par smra ba yang shes pa zhig go/ /'bangs mos bgad nas I mdza' bo'i phyogs su rtsang ma 'di ni bden pa nyid de/'di la snyan par smra ba ci zhig yod/ 'dren pas/ grung mo skyed mos tshal me tog gi 'byung gnas kyi lam dag ston cig /'bangs mos jo bo tshur gshegs tshur gshegs/ 'dren mas 'gro zhing 'dren ma la mtshon te/ khyod dal bu dal bur shog cig /nu ma'i khur nyid khyod kyi rked pa ngal slad gyur na do shal gzhan gyis ci/ /byin pa zung ni tshang ra'i khyar gyis gdung bar byed na dril chung 'dis kyang ci/ /rkang gnyis dag gis byin pa zung ni khur nus min na rkang gdub ga la zhig /rang lus nyid kyis brgyan pa khyod ni nyon mongs slad du rgyan dag ci la 'dzin//'bangs mos 'di ni skyed mos tshal me tog gi 'byung gnas te/ jo bo zhugs shig /thams cad zhugs par gyur to/ /zhugs nas 'dren pas e ma skyed mos tshal me tog gi 'byung gnas kyi dpal ni 'di nyid na'o/ /'khri shing khang bzangs bkod pa byas mthar tsan dan dag las zags pa rnams kyis bsil bar byed//rgyun gyi khang pa dag dang nye bar mgrin sngon rnams kyi sgra ni gsal bar rjes su sgogs/ /'khrul 'khor gyis btang chu yi tshogs ni me tog rdul dag babs par gyur pa'i tshogs pa rnams/ /rol par khyer bas ser ba 'di dag yal ga can gyi kyo ra 'gyengs shing mgyogs par 'bab//gzhan yang 'khri shing khang bzangs sa gzhi glu yi brtson pas mu cor du byed cing / /me tog rdul gyis gsal bar dga' ston rtags dag gis ni reg gyur te/ /lhan cig spyod pa dang 'grogs sbrang rtsi'i ro ni rdzogs par 'thung byed pa'i//bung ba 'di dag kun nas chang 'thung longs spyod nyams su myong byed bzhin/ /bi drU Sha kas skyes pa khyod rgyal bar gyur cig /bu mo khyod shis par gyur cig /'dren pas/ grogs po de tsam gyi dus su gang du 'dug /bi dru Sha kas/ bdag ni mgyogs pa nyid du 'ongs te/ 'on kyang bag ma'i dga' ston la 'dus pa grub pa dang rig pa 'dzin pa'i chang 'thung rnams lta ba'i dge mtshan la 'di snyed kyi dus su bdag 'dug par gyur to/ /des na grogs po yang re zhig gzigs shig /'dren pas blta zhing ji ltar byed brjod pa bzhin no/ /ha ri tsan dan gyis byugs lus can lha yi me tog phreng ba rab tu 'dzin//nor bu'i rgyan gyi 'od dag reg pas dwangs shing bkra bar byas pa'i gos dang ldan/ /grub pa'i skye bo dag dang lhan cig spel bar gyur pa'i rig 'dzin 'di dag rnams/ /tsan dan grib bsil dag la dga' ma'i 'thungs lhag tu gyur chang dag 'thung bar byed/ /des na tshur sheg yu cag kyang shing ta ma la'i bsti gnas su 'gro bar bya'o//yongs su song ngo / /bi drU Sha kas/ 'di ni nges par shing ta ma la'i gnas so/ /bu mo khyod kyi bzhin 'di ni ston ka'i tshad pa dag gis yongs su nyams par byas pa bzhin mtshon to/ /des na shel kyi rdo'i gzhi 'di nyid la nye bar 'dug cig /'dren pas/ grogs po yang dag par mtshon no/ /dga' ma'i gdong 'di 'gram pa dag /mdzes pas zla ba pham byas nas/ /gdung bas mngon par dmar ba'i mig /pad+mo dag las rgyal 'dod bzhin/ /ma la ya can ma'i lag pa bzung nas dga' ma 'dir 'dug cig thams cad 'khod do//'dren pas/ 'dren ma'i gdong ba bteg nas blta zhing / bdag cag skyed mos tshal me tog gi 'byung gnas don med par lta ba'i dge mtshan can rnams kyis byed yongs su ngal bar byas te/ gang gi phyir/ smin ma'i 'khri shing rab mjos shing / /mchu yi yal 'dab dmar po can/ / bzhin 'di dga' ba'i skyed tshal te/ /'di las gzhan pa nags 'ba' zhig /'bangs mos/ 'dzum pa dang bcas par bi drU Sha ka la mtshon nas byed kyis rje'i sras mo'i gdong ji ltar bsngags pa thos sam/ bi drU Sha kas grung mo de lta bu'i khengs pa 'dzin par ma byed cig /'dzum pa dang bcas par bdag cag gi nang na yang skye bo blta bar 'os pa ni yod pa nyid do//phrag dog 'ba' zhig gis su yang bsngags par mi byed do/ /'bangs mos/ /'dzum pa dang bcas par jo bo khyod bdag gis bsngags par bgyi'o/ /bi drU Sha kas/ dga' ba dang bcas par 'tsho ba dag tu byas so/ /bu mo khyod kyis gang gis na slar yang 'ga' zhig gis bdag la ji ltar khyod ni 'di ltar spre'u ser skya'o zhes mi brjod pa de ltar bka' drin mdzod cig /'bangs mos/ bag ma la gnyid ma log par khyod di ring gnyid du 'gro zhing mig zum pa dang ldan pa mdzes par bdag gis mthong ngo / /des na de ltar nyid du 'dug cig /bi drU Sha kas/ de ltar byas so//'bangs mos/ re zhig shing ta ma la'i yal 'dab kyi khu ba rams kyi khu ba'i rjes su mthun pa dag gis 'di'i bzhin nag por bya'o/ /langs nas yal 'dab blangs te 'tshir ba'i gar byed do/ /'dren pa dang / 'dren mas bi drU Sha ka mthong bar gyur to/ /'dren pas grogs po bdag cag rnams gnas pa la khyod nyid kha bsgyur ba ni skal ba dang ldan pa'o//'bangs mos shing ta ma la'i yal 'dab kyi thang chus bi dru Sha ka'i bzhin nag por byas so/ /'dren mas 'dzum pa dang bcas pas bi dru Sha ka mthong nas 'dren pa la blta'o/ /'dren pas/ 'dzum pa'i me tog rgyas pa 'di//khyod mchu'i yal 'dab dag la mthong / /'bras bu lta byed bdag gi ni/ /mig la smin no mig mdzes ma/ /bi drU Sha kas/ bu mo khyod kyis ci zhig byas/ 'bangs mos kye bsngags pa byas so/ /bi drU Sha kas/ lag pas gdong la byugs te/ lag pa la bltas nas byed khro ba dang bcas pas shing gi dbyug pa phyar te/'bangs mo'i bu mo 'di rgyal po'i khab yin pas khyod la ci zhig bya/ 'dren pa la mtshon nas kye khyod kyi mdun nyid du bdag 'bangs kyi bu mos sma phab bo/ /des na bdag 'dir 'dug ste ci zhig bya/ gzhan du 'gro bar bya'o/ /song bar byur to/ /'bangs mos nges par jo bo bdag la khros pas/re zhig song la 'di dang bar bya'o/ /'dren mas bu mo grung mo bdag gcig pu dor nas khyod gang du 'gro/ 'bangs mos 'dren ma la mtshon nas 'dzum pa dang bcas pas khyod gcig pu 'di lta bu nyid du yun ring du 'ong bar shog shig song bar gyur to/ /'dren pas/ nyin byed zer byi reg pas yongs su dmar ba'i mdzes pa 'dzin byed cing / /rab 'phro so yi 'od zer rnams kyis ge sar dag ni gsal bar byas/ /a yi mdzes ma khrod kyi bzhin 'di bden par pad+mo dang mtshungs te/ /'on kyang 'di la sbrang rtsi byed pa 'thung zhing rnam par spyod pa med/ /'dren mas bgad nas gdong dud par gyur te/'dren pas de nyid brjod do/ /de nas 'bangs mo zhugs te/ 'phral la nye bar btud nas nges par rgyal tshab bshes gnyen gyi dbyig 'di don gyis bzhin du gzhon nu lta ba la 'ongs par gyur to/ /'dren pas/ dga' ma khyed bdag nyid kyi khang par song shig /bdag kyang bshes gnyen gyi dbyig bltas nas myur du 'ong ba nyid do//'dren ma 'bangs mo dang 'grogs te song bar gyur to/ /de nas bshes gnyen gyi dbyig rab tu zhugs so/ /nus dang ldan la de ma bcom/ /sprin gyi bzhon pa dag la ni/ /khyed kyi rgyal srid dgras khyen zhes/ /ngo tsha med bdag ji ltar gleng / / de lta mod kyi ma brjod par 'gro ba yang rigs pa ma yin pa'i phyir brjod de 'gro bar bya'o/ /nye bar btud do/ /'dren pas mthong nas bshes gnyen gyi dbyig 'dir 'dug cig /bshes gnyen gyi dbyeg gis nye bar 'khod do/ /'dren pas/ nges par brtags nas bshes gnyen kyi dbyeg ni khros pa bzhin du mtshon no//bshes gnyen gyi dbyig gis bgad nas/ ma tang ga nyams pa la nges par ci zhig khro/ /'dren pas ma tang gas ci byas bshes gnyen gyi dbyig gis rang nyams par bya ba'i slad du khyed kyi rgyal srid blangs so zhes grag go/ /'dren pas dga' ba dang bcas shing bdag nyid kyis rtogs par nges par yang 'di ni bden pa zhig go//bshes gnyen gyi dbyig gis de gzhom par bya ba'i phyir bdag la gzhon nus bka' sgos shig /mang pos ci zhig bya/ mtha' dag nam mkha' lam du byas te bgrod pa'i gzhal yas khang dag kun nas rab 'dud pas/ /dbyar bzhin nyi ma'i 'od zer sgrib cing nyin par dag ni nag po nyid du byed pa yi//grub pa 'di rnams khyod kyi gsung dag thob na 'di nas 'phral du g.yul la 'gro byed cing / /'phyar ba'i sgra brlag 'jigs bcas rgyal po'i tshogs 'dud khyod kyi rgyal srid rang gir 'grub par 'gyur/ /yang na dpung gi tshogs kyis ci zhig bya/ /drag tu nges par phyung ba ral gri'i 'od zer tshogs kyis ni//ral pa'i tshogs kyis mjes par gyur pa bdag nyid gcig pus kyang / /rgyang nas mchongs pa'i seng ge dag gis glang po'i dbang po bzhin/ /nyams pa ma tang ga ni g.yul du 'joms pa nyid rig mdzod/ /'dren pas/ bdag nyid kyis rtog par rna ba bsgribs nas a ha ha mi bzad pa dag mngon par brjod do//yang na re zhig 'di skad ces gsal bar 'dzum pa dang bcas te bshes gnyen byi dbyig de dag ci/ dpung ba'i stobs dang ldan pa khyod la 'di las shin tu lhag pa dag kyang yod do/ /'ong kyang gzhan gyi don du rang gi lus dag kyang / /bslangs pa med par brtse bas sbyin pa gang //de ni rgyal srid ched du srog chags dag /gsod pa'i gdug pa ji ltar khas len byed/ /gzhan yang nyon mongs pa las gzhan pa dag la dgra'i blo bdag la yod pa ma yin no/ /des na khyod gal te bdag la dga' bar bya bar 'dod pa de lta na nyon mongs pas dbang du/ byas pa'i gdung ba can 'di la rjes su brtse bar byos shig /bshes gnyen gyi dbyeg gis khro ba'i rgod pa dang bcas par ji ltar 'di bdag cag la phan par byed pa'am/ phongs pa yin pas rjes su brtse ba ji ltar mi byed/ 'dren pas bsgribs te gsar pa'i khro bas 'phangs pa'i sems dang ldan pa 'di re zhig bzlog par mi nus te/des na re zhig 'di skad ces/ gsal bar bshes gnyen gyi dbyeg longs shig /nang du 'jug par bya ste/ de nyid du khyod la rtog par bya'o/ /nub kyi phyogs su bltas nas ji ltar nyin par yang yongs su gyur to/ /de ltar yang da ni bcom ldan 'od zer stong phrag can 'di/mtshan mo med par gnyid kyi rgya yis bcings pa'i gdung ba sel zhing pad+mo'i mdzod dag las/ /rab mchog rang gi zer gyis phyogs 'gengs bya ba gcig pus thams cad ma lus tshim byed pa/ /rgyun du bstod pa'i mu cor bzhi ldan grub pa rnams kyis bltas pa gang gi ngal dub ni/ / gzhan phan rgyu nyid du gyur nyi ma gcig pu 'di ni nub par gyur yang bsngags par 'os/ thams cad song bar gyur to/ /mtshan ma gsum pa'o// //de nas gos zung cig bzung ba'i nyug rum pa dang / sgo srungs kyang zhugs par gyur to/ /nyug rum pas/ btsun mo'i 'khor du rnam gzhag bsgrubs gyur pa//dga' bas gzir ba bdag ni khrims lugs kyis/ /gnas dang gnas su 'gyel ba srung byed cing / /spyod pa thams cad mi bdag rjes su mthun/ /sgo srungs kyis kye jo bo khyod gang du gshegs/ nyug rum pas/lha mo bshes gnyen gyi dbyig gi yum gyis bdag la gsungs pa/nyug rum pa khyed kyis ji srid zhag bcu'i bar du ma la ya can ma dang / mag pa la gos dmar po dag sbyin par bya'o zhes so/ /rgyal po'i bu mo yang gyos sgyug gi khab tu 'khod do/ /gzhon nu sprin byi bzhon pa yang rgyal tshab bshes gnyen gyi dbyeg dang 'grogs te rgya mtsho'i 'gram blta ru di ring song ngo zhes bdag gis thos so /des na re zhig rgyal po'i bu mo'i sngon du 'gro'am/ mag pa'i sngon du 'gro bdag gis ma shes so/ /sgo srungs kyis/ jo bo sngon la rgyal po'i bu mo'i sngon du song shig /de nyid du gal te na/ dus 'di tsam du mag pa yang slar 'ong bar 'gyur ro/ /nyug rum pas/ rab dga' legs pa dag bstan to//khyod kyang gang du 'gro/ sgo srungs kyis/ bdag la yang rgyal po chen po kun gyi dbyig gis bka' stsal ba/ ji ltar rab dga' song la bshes gnyen gyi dbyig la smros shig /tshes gcig gi sgron ma'i dga' ston 'di la ma la ya can ma dang / mag pa la yang 'ongs nas dga' ston de la 'os pa rnams cung zad nye bar bsgrub par bya'o zhes so//des jo bo rgyal po'i bu mo'i sngon du song shig /bdag kyang bshes gnyen dbyeg bod pa'i slad du 'gro bar bya'o/ /gnyi ga song bar gyur to/ /'jug par byed pa'o/ /de nas sprin gyi bzhon pa dang / bshes gnyen gyi dbyig zhugs par gyur to/ /'dren pas mal stan rtswa 'jam dag dang gdan ni rdo gtsang khang pa ljon pa dag gi 'og /btung ba chu rgyun bsil ba dag dang kha zas gtsang ba grogs ni ri dwags te/ /de ltar ma bslangs 'byor pa thams cad rnyed pa'i nags tshal 'di na spyon cig ste/ /gang zhig slong ba rnyed dka' gzhan don bsgrub pa'i 'bras med don bral nyid du gnas pa'o/ /bshes gnyen gyi dbyig gis steng du bltas nas gzhon nu myur bar mdzod cig /'di ni chu'i phung po bskyod pa'i dus so/ /sprin gyi bzhon pas thos nas legs par mtshon no/ /de ltar yang / rab sgogs chu yi glang chen dbang po'i shugs kyis bsnun pas rjes 'brel rab rgyas shing / /ri yi phug nang dag gi sa gzhi thams cad sgra snyan rab tu sgrogs byed pa//thos pa'i lam 'gog sgra 'di ji ltar drag tu sgogs par byed pa de lta bar/ /rab 'phar grangs med dung dang ldan pa'i rlabs 'di dag ni nye bar 'ongs pa 'dra/ /bshes gnyen gyi dbyig gis/ gzhon nu byung ba nyid ma yin nam ltos shig /li shi'i yal 'dab dag ni zos gyur pa'i/ /lag ldan chu srin gregs pa'i dri bzangs kyi//chu dang ldan pa rgya mtsho'i dba' rlabs 'di/ /rin chen 'od zer dag gis spras te mdzes/ /'dren pas/ bshes gnyen gyi dbyig /ston gyi dus kyi chu 'dzin ni/ /dkar ba'i sgrib byed kyis bsgribs pa/ /ma la ya yi rtse mo 'di/ /gangs can ri rtse'i dpal dag 'dzin/ /bshes gnyen gyi dbyeg gis/ /gzhon nu 'di dag ni ri ma la ya'i rtse mo ma yin te/nges par 'di dag ni klu rnams kyi rus pa'i tshogs so/ /sprin gyi bzhon pas/ mya ngan sdug bsngal dang bcas par rgyu mtshan ci'i phyir 'di snyed dus gcig tu shi bar gyur/ bshes gnyen gyi dbyeg gis/ gzhon nu 'di dag dus gcig tu shi ba nyid ma yin te/ 'di dag ji ltar gyur pa mnyan par mdzod cig /sngon rang gi gshog pa'i rlung gis rgya mtsho'i chu bskyod de sa 'og nas blangs nas bya khyung gis nyi ma so so la lag 'gro du ma za bar byed lo/ /sprin gyi bzhon pas sdug pa shin tu dka' ba dag byed do/ /de nas bshes gnyen gyi dbyig gis de nas nam zhig gi tshe klu'i 'jig rten mtha' dag brlag tu dogs nas klu'i rgyal po nor rgyas kyis bya khyung la smras pa/sprin gyi bzhon pas gus pa dang bcas par dang por nga zo shig ces pa'am ci/ bshes gnyen gyi dbyeg gis ma yin no/ /sprin gyi bzhon pas smad pa dang bcas par gzhan ci/ bshes gnyen gyi dbyig gis 'di brjod/ khyod kyi mngon par 'debs pas skrag nas lag 'gro ma stong phrag rnams kyi mngal nga bar byed cing phru gu rnams kyang lnga pa nyid du nye bar 'gro'o//de ltar bdag cag gi rgyun chad par gyur na khyod nyid kyi rang gi don nyams par byas par 'gyur ro/ /des na gang gi don du khyod sa 'og tu mngon par babs pa de'i don du nyi ma so sor rgya mtsho'i 'gram na gnas pa la re re nga nyid kyis bskul te gtang bar bya'o zhes so//sprin gyi bzhon pas sdug pa de ltar klu'i rgyal pos klu rnams legs par bsrungs lo/ /gang gi lce ni stong phrag gnyis nang na/ /gang gis sbrul gcig bsrung phyir sbrul dgra la/ /ding bdag bdag nyid ster zhes smra ba yi/ /lce de de la gcig kyang med dam ci//bshes gnyen gyi dbyig gis/ de dag kyang bya'i rgyal pos khas blangs so/ /de ltar nyi ma so so re re rnam bzhag bsgrubs gyur pa'i/ /gang zhig sbrul bdag rnams ni 'dab chags rgyal pos za bar byed/ /de dag rnams kyi rus phung gangs ri dag gi 'od can 'di/ /nyi ma so sor 'phel bar gyur cing 'gyur la 'gyur ba yin//sprin gyi bzhon pas ngo mtshar dang bcas par/ /gtsang ba min pa kun gyi gter/ /byas pa mi gzo rnam par 'jig /lus ngan dag gi ched du yang / /rmongs pa dag ni sdig par byed/ /kye ma klu rnams kyi rgud pa la 'di ni mthar thug pa med do/ /bdag nyid kyis rtogs par rang gi lus yongs su btang bas gdengs can cig tsam yang bdag gis yongs su srung bar byed nus par gyur na ci ma rung 'on kyang bshes gnyen gyi dbyeg gnas so//de nas sgo skyong zhugs par gyur to/ /ri'i rtse mor ni bdag gis 'dzegs so/ /rnam par bltas nas bshes gnyen gyi dbyeg 'di mag pa dang nye ba na 'khod do/ /re zhig drung du 'gro bar bya'o//nye bar btud de/ gzhon nu rgyal bar gyur cig /bshes gnyen gyi dbyeg gis/ rab dga' dgos pa ci'i sbad du 'ongs/ sgo srungs kyis rna bar shub par byed do/ /bshes gnyen gyi dbyig gis/ gzhon nu yab kyis bdag 'bod par byed do/ /'dren pas gshegs mdzod cig / bshes gnyen gyi dbyig gis/ gzhon nu yang gnod pa mang ba'i phyogs 'dir ltad mo la yun ring du gnas par mi bya'o/ /sgo srungs dang 'grogs te song bar gyur to/ /sprin gyi bzhon pas/ re zhig bdag gis kyang ri'i rtse mo 'di las babs te rgya mtsho'i 'gram blta bar bya'o/ /babs nas song ngo / /phyi rol na kyi hud bu sdug /kyi hud bu sdug /dung gi gtsug khyod gsod par byed zer na bdag gis ji ltar blta bar bya/ sprin gyi bzhon pas a ye bud med lta bu gzir ba'i cho nge dag go/ /des na re zhig nye bar btud de/ 'di su zhig yin/ 'di'i 'jigs pa gang las yin zhes gsal bar bya'o/ /de nas rgan mo ngu zhing rjes su 'brang ba'i dung gi gtsug zhugs par gyur to//gos zung dag spras pa'i king ka ra yang ngo / /rgan mos mchi ma dang bcas par kyi hud bu sdug gdung gi gtsug /di ring khyod gsod par 'gyur ba bdag gis ji ltar blta bar bya/ o sko nas bzung ste/ khyod kyi bzhin byi zla ba 'di dang bral bas ni di ring bdag gi sa 'og mun par 'gyur ro//dung gi gtsug gis/ma ma 'di ltar shin tu smre sngags 'don cing bdag rab tu gdung bar byed/ rgan mos nges par brtags nas/ bu'i lus la reg cing / kyi hud bu sdug khyod kyi lus nyi ma ma mthong bas shin tu gzhon pa 'di ji ltar na snying la brtse ba med pa'i mkha' lding gis nges par za bar 'gyur/mgrin pa nas bzung ste ngu bar byed do/ /dung gi gtsug gis yum smre sngags kyis ci zhig phan ltos shig /dang po gang tshe skyes pa na/ /mi rtag nyid kyi pang du byed/ /ma yis phyis nas ma mas bzhin/ /de tshe mya ngan rim pa ci/ /rgan mos bu sdug yud tsam zhig 'dug dang / re zhig khyod kyi bzhin blta bar bya'o//king ka ras tshur shog tshur shog gzhon nu dung gi gtsug /de dag brjod par byed la ci/ /nges par bu la chags pas rmongs pa 'di dag gis ni rgyal po'i bya ba mi shes so/ /dung gi gtsug gis bzang po 'ong ba 'di nyid do/ /king ka ras bdag nyid kyis rtogs par nges par bdag gis dung gi gtsug gsod pa'i rdo dang nye bar khrid zin to//re zhig gsod pa'i rtags 'di byin to gsod pa'i rdo dag bstan par bya'o/ /sprin gyi bzhon pas mthong nas/ a ye 'di ni bud med do/ /dung gi gtsug mthong nas nges par 'di ni 'di'i bu yin par brtag par bya'o//des na nges par ci'i don du ngu bar byed/ kun du bltas nas/ nges par 'jigs pa'i rgyu ni ci yang ma mthong ngo / /des na 'di'i 'jigs pa gang las 'byung bar 'gyur/ /ci zhig nye bar btud nas dri bar bya'o/ /yang na 'di ni 'di ltar rgyun du cho nge 'don pas gal te 'di nyid las gsal bar 'gyur ro//des na yal 'dab can gyis bsgribs te mnyan par bya'o/ /king ka ras mchi ma dang bcas par thal mo sbyar nas gzhon nu dung gi gtsug 'di ni nges par jo bo'i bka' yin no zhes bya ste/ mi bzad pa 'di 'dra ba dag smra'o/ /dung gi gtsug gis bzang por spros shig /king ka ras klu'i rgyal po nor rgyas kyis khyod la bka' byed to//dung gi gtsug gis gus pa dang bcas par spyi bor thal mo sbyar nas rje yis ci zhig bka' byed/ king ka ras gos dmar po zung 'di dag gyon la gsod pa'i rdo la 'dzegs shig /gang gis gos dmar po'i rtags kyis nye bar mtshon pa dag mkha' lding gis bzung nas zas kyi don du 'khyer bar 'gyur ro//sprin gyi bzhon pas mchi ma dang bcas par 'di nyid sdug pa nor rgyas kyis yongs su btang ba zhig go/ /king ka ras/ dung gi gtsug 'di long shig /gos zung dag gtod do/ /dung gi gtsug gis gus pa dang bcas par blangs te/ mgo la bzung nas rje la gus par byed do/ /rgan mos bu'i lag na gos dag 'dug pa mthong nas brang brdung ba dang bcas par kyi hud mnyes gshin gang gis 'jigs pa rdo rje rtsang ba ni 'di nyid do/ /brgyal bar gyur to/ /king ka ras nges par mkha' lding 'ong ba'i dus la nye bar gyur to/ /des na myur du 'bros par bya'o//king ka ra song bar gyur to/ /dung gi gtsug gis yum dbugs phyin par gyur cig /rgan mo dbugs phyung ste mchi ma dang bcas par kyi hud kyi hud bu sdug yid la re ba brgya yis thob pa bo/ /khyod phyis bdag gis gang du mthong bar 'gyur/ /mgrin pa la bzung ste/ sprin gyi bzhon pas mchi ma dang bcas par kun du rmongs shing yang yang mchi ma'i rgyun gtong smre sngags mang du brjod byas nas//bdag gi bu sdug skyob pa su zhes phyogs rnams dag tu phongs pas mig 'phen ma'i/ /ma yi pang na nye bar bsten pa'i bu 'di brtse ba dor nas za byed pa/ /bya yi bdag po'i mchu nyid ma yin snying yang rdo rje dag las byas sam snyam//dung gi gtsug gis bdag nyid kyi lag pas ma'i gdong yongs su 'phyi zhing yum shin tu 'khrugs pas ci zhig phan dbugs phyung shig /rgan mos mchi ma dang bcas par ji ltar dbugs phyin par 'gyur/ ci bdag ni bu gcig pa can no zhes bya ste brtse ba dang bcas par klu'i rgyal pos ma bsams so//kyi hud brtse med mthar byed da lta brtse ba med pa'i snying can khyod kyis 'di ltar rgyas shing gson pa'i 'jig rten na bdag gi bu sdug gcig pu dran no/ /rnam pa thams cad du skal ba zhan pa bdag bcom par gyur to/ /brgyal lo/ /sprin gyi bzhon pas/ gzir zhing mgrin par srog phyin te//rang gi gnyen gyis yongs btang ba/ /'di ni gal te ma bsrungs na/ /bdag gi lus kyi yon tan ci/ /des na re zhig nye bar 'gro bar bya'o/ /dung gi gtsug gis yum bdag nyid brtan par mdzod cig /rgan mos kyi hud bu sdug rnyed dka' ba rnyed pa dung gi gtsug /gal te re zhig klu'i 'jig rten yongs su srung bar byed pa nor rgyas kyis byed yongs su btang ba de la su zhig gis khyod yongs su skyob par 'gyur/sprin gyi bzhon pas 'phral la nye bar btud de kye bdag go/ /rgan mos 'jigs pa dang bcas par stod g.yogs kyis bu g.yogs nas sprin gyi bzhon pa la nye bar btud de/ bi na ta'i bu bdag la 'tshe ba gyis shig /bdag ni khyod kyi zas kyi rgyur yongs su brtags pa'o/ /sprin gyi bzhon pas/ mchi ma dang bcas par/ e ma'o bu la byams pa'o/ /'di yi bu la byams pa yis/ /'khrugs pa 'di ni mthong gyur nas/ /snying la brtse med lag 'gro yi/ /dgra yang brtse ba byed dam snyam//dung gi gtsug gis yum skrag pas ci zhig phan/ 'di ni nges par klu'i dgra ma yin no/ /ltos shig /klu chen mgo bo bskam zhing khrag gzags pa'i/ /zer mas byugs pa gtum po'i mchu dang ldan/ /gang na mkha' lding dag ste gang na yang / /zhi ba'i rang bzhin gzugs can dam pa 'di//rgan mos bu sdug bdag ni khyod gsod pas 'jigs te thams cad mkha' lding nyid du mthong ngo / /sprin gyi bzhon pas/ kye yum ma 'jigs shig /bdag ni rig pa 'dzin pa'i gzhon nu ste/ khyod kyi bu bsrung ba nyid kyi don du 'ongs pa yin no/ /rgan mos dga' ba dang bcas par bu slar yang de brjod cig /sprin gyi bzhon pas/yum yang dang yang du brjod pa 'di yis ci/ las nyid kyis rdzogs par bya'o/ /rgan mos spyi bor thal mo sbyar nas bdag gi bu sdug yun ring du 'tsho bar gyur cig /sprin gyi bzhon pas/ yum gcig gsod rtags 'di ni bdag la gsol//rang lus g.yogs te khyod kyi bu yi ni/ /srog dag bsrung phyir be+e na ta skyes kyi/ /kha zas dag la bdag gis stsal bar bgyi'o/ /rgan mos rna ba bsgribs te tshig de zhi bar gyur cig /khyod kyang dung gi gtsug dang / khyad par med par bdag gi bu nyid do/ /yang na dung gi gtsug pas kyang khyod shin tu lhag pa nyid do//gang zhig gnyen gyi skye bos kyang yongs su btang ba bdag gi bu lus sbyin pas kyang bsrung bar 'dod pa'i phyir ro/ /dung gi gtsug gis ya mtshan dang bcas par e ma ho sems can chen po 'di'i spyod pa ni 'gro ba dag las bzlog pa zhig ste/ gang gi phyir/ gang gi slad du kun gyi bshes kyi gtum po bzhin du sngon tshe khye sha zos gyur cing //gang gi ched du go ta ma yis de la phan byas tA la'i byin pa rab tu bsad/ /gang gi don du mkha' lding 'od srung bu 'dis nyi ma so sor lto 'phye 'joms byed pa/ /srog de nyid ni rtswa bzhin gang zhig brtse bas gzhan gyi don du ster bar byed pa mtshar/ / sprin gyi bzhon pa la mtshon nas kye bdag nyid chen po khyod kyis bdag nyid rab tu rtsom pa'i zol med pa'i brtse ba dang ldan pa dag bdag la bstan to/ /des na 'bad pa 'di yis ci zhig bya/ltos shig /bdag lta srog chags phra mo rnams/ /skye ba dang ni 'chi 'gyur te/ /gzhan gyi don la nus ldan pa/ / khyod 'dra 'byung ba ga la zhig /des na 'dis ci zhig bya/ zhen pa 'di thong shig /sprin gyi bzhon pas dung gi gtsug gi lag nas bzung ste/ gzhon nu dung gi gtsug bdag gis gzhan gyi don phun sum tshogs pas yid la re ba'i skabs yun ring po nas rnyed pa dag gi bar chad bya bar mi 'os so/ /rnam par rtog pa med par gsod pa'i rtags dag byin cig /dung gi gtsug gis sems dpa' chen po don med pa'i gdung ba chen po 'dis ci zhig bya/ dung gi gtsug gis dung skyong gi rigs dung ltar dkar ba dri ma can du byed dam ci/ ci ste khyod bdag la rjes su brtse bar byed pa de lta na bdag cag gi yum 'di ji ltar 'tsho ba stong par mi 'gyur ba de lta bu'i thabs bsam par mdzod cig /sprin gyi bzhon pas kye thabs bsams pa nyid ma yin nam/ 'dir ci zhig bsam/ de ni byed nyid kyi dbang du gyur to/ /dung gi gtsug gis ji ltar sprin byi bzhon pas gang zhig khyod ni shi gyur na/ /'chi zhing gson na gson 'gyur ba/ /de ni gal te gson 'dod na//bdag gi srog gis bdag nyid srungs/ /'di ni thabs yin te/ des na bdag la gsod pa'i mtshan ma myur du gsol cig /'dis bdag nyid g.yogs te gsod pa'i rdo la 'dzegs par bya'o/ /khyod kyang ma'i mdun du brdar te gnas 'di nas ldog par byos shig /gal te na gsod pa'i gnas nye bar gyur pa 'di mthong nas bud med rang bzhin gyis sdar ma'i ngang can srog btang bar srid do//bsad pa'i klu rnams kyis keng rus kyis dkrigs pa'i dur khrod chen po khyod kyis ma mthong ngam ci/ de ltar yang g.yo ba'i mchu yis drangs shing phyed lhung sha yi cha ni zos pas 'dod pa 'phel gyur pa'i/ /bya rgod rnams kyi gshog pa gnyis ni skyod par byed pas mun pa stug po nyid byas shing //khrag gi rgyun 'bebs mang po'i zhag ni rgyun du zag cing rul pa'i dri nga ldang ba 'dir/ /ce spyang rnams kyi kha nas rab 'bar me yi phreng ba lhung zhing lhab ces sgogs par byed/ /dung gi gtsug gis ji ltar bdag gis ma mthong sbrul gyi zas kyis nyi ma so sor ni//mi stong bya ba'i 'dren pas dga' byas pa/ /ri bong can dkar rus pa thod pa can/ /dur khrod 'di ni drag po'i lus bzhin no/ /des na song zhig skrag par nye bar bkod pa 'di dag gis ci zhig bya/ nges par mkha' lding 'ong ba'i dus ni nye bar gyur to/ /ma'i mdun du pus mo btsugs nas spyi bor thal mo sbyar ba bkod de/da ni yum khyod kyang log cig/ /yum gcig gang dang gang du bdag /rab tu skye ba nyid 'gyur ba/ /de dang der ni bu la byams/ /khyod nyid bdag gi mar gyur cig /rkang pa la gtugs so/ /rgan mos mchi ma dang bcas pas kyi hud ji ltar khyod kyi tshig ni mchi ma med pa'o//nges par bu sdug khyod btang nas gzhan du bdag gi rkang pa mi 'dor ro/ /des na khyod nyid dang lhan cig tu 'gro bar bya'o/ /dung gi gtsug gis longs nas re zhig bdag gis kyang shin tu mi ring ba na legs ldan lho phyogs go kar+Na yod pa la bskor ba byas te/ rje'i bka' la gnas par bya'o/ /gnyi ga song bar gyur to/ /sprin gyi bzhon pas/ kye ma mngon par 'dod pa grub par ma gyur to/ /des na 'di la thabs ci zhig yod 'phral la nyug rum par zhugs par gyur te gos zung 'di sprin gyi bzhon pas mthong nas dga' ba dang bcas shing bdag nyid kyis rtogs pa e ma ma brtags par rnyed pa'i gos dmar po zung cig po 'dis bdag gi mngon par 'dod par grub par gyur to//nyug rum pas/ gos zung cig po 'di ni lha mo bshes gnyen gyi dbyeg gi yum gyis gzhon nu la bskur ba yin no/ /des na gzhon nus 'di yongs su bzhes shig /sprin gyi bzhon pas langs nas blangs te bdag nyid kyis rtogs par bdag gi ma la ya can ma'i lag pa bzung ba ni 'bras bu dang bcas par gyur to//gyon nas gsal bar kye nyug rum pa gshegs shig khyod kyis bdag tshig gis lha mo la phyag 'tshal bar bya ste/ ji ltar yun ring du thogs pa'i sprin gyi bzhon pa la phyag 'tshal bar byed do/ /nyug rum pas/ ji ltar gzhon nus bka' byed pa bzhin no//song ngo sprin gyi bzhon pas/ gzhan gyi don du lus gtong ba'i/ /dus la bab tshe byung gyur pa/ /gos ni dmar po zung 'di dag /dga' ba shin tu chen po byed/ /rnam par bltas nas ji ltar ri ma la ya'i rdo'i tshogs g.yo ba dang rlung drag tu ldang ba de ltar bya'i rgyal po nye bar gyur to zhes bdag rtog go//gzhan yang 'jig pa'i sprin dang mtshungs pa gshog rtsa'i phreng ba dag gis nam mkha' rab tu sgrib byed cing / /shugs kyi rlung gis bskyod pa'i rgya mtshos sa gzhi 'gengs pa bzhin du chu dag ngogs su 'phen/ /phyogs kyi gnyis 'thung dbang po rnams kyi dus mthar dogs pa byed cing 'jigs bcas bltas gyur te//bcu gnyis nyi ma ltar 'bar lus kyi 'od kyis phyogs bcu dag ni rab tu ser skyar byed/ /des na ji srid dung gi gtsug 'di 'ongs par ma gyur pa de srid du gsod pa'i rdo 'di la myur bar bdag 'dzeg par bya'o/ /de ltar byed do/ /'dug ste reg pa'i gar byed cing / /e ma 'di yi rig pa'o//ji ltar mngon par 'dod don grub pa'i slad/ /gsod pa'i rdo 'di la sbyar de ltar ni/ /ma la ya yi tsan dan ros brlan pa'i/ /ma la ya can mas kyang bde mi byed/ /yang na ma la ya can ma ci zhig /ma yi pang du byes pa ni/ /bde bar nyal bas gang thob pa'i/ /bde de bdag gis gsod pa yi/ /rdo 'di yi ni steng du thob//des na bya khyung 'dir 'ong ste/ /re zhig bdag nyid bsgribs te 'dug par bya'o/ /de ltar byed do/ /de nas mkha' lding zhugs par gyur to/ /lhag ma can gzugs 'jigs pas rlum por byas pa dran zhing bsel zer can gyi dkyil 'khor 'phangs/ /shing rta'i rta ni skrag nas nyi ma bskyod tshe sngon la skyes pas kun dga' ldan par mthong //mtha' nas chu 'dzin tshogs pa dag ni nges par 'bab pas gshog pa ring po nyid gyur pa/ /sbrul zas la dga' bdag ni mgyogs pas skad cig nyid la ri bo ma la yar phyin to/ /sprin gyi bzhon pas smon lam byed do/ /klu ni srung byed bdag gi bsod nams gang / /rang lus sbyin las de ring gang bsgrubs pa//de yis bdag nyid srid pa srid par ni/ /gzhan phan snying por ldan pa'i lus thob shog /mkha' lding gis sprin gyi bzhon pa la nges par brtags nas/ lhag ma'i klu rnams bsrung phyir gsod pa'i rngo 'di dag la nges par lhung gyur pa'i/ /snying kha la ni rdo rje'i dbyug pa rab drag mchu yis rab tu bcom byas nas/ / bdag la 'jigs pas snying dag dral zhing zag pa'i khrag gis rab tu byugs pa bzhin/ /gos dmar gyis g.yogs gdengs can dag ni bza' bar bya phyir myur bar blang bar bya/ /mngon par btab ste blangs so/ /mtha' nas me tog ltung bar byed do/ /mkha' lding gis ya mtshan dang bcas par a ye steng nas me tog gi char pa dang rnga bo che'i sgra 'di dag kyang mthong zhing thos nas//bung ba kun du dga' bar byed pa'i dri ldang me tog char 'di mkha' las ci phyir 'bab/ /mtho ris phyogs kyi 'khor lo rnga chen rnams kyi sgra 'dis mu cor dag tu ci slad byed/ /de yang 'di ltar shes te/ bdag gi shugs kyi rlung gis yongs 'du dag ni bskyod pa dang / / 'jigs pa'i sprin gyi tshogs rnams dus mthar dogs pa skyes te 'di yang bsgrags pa yin nam snyam/ sprin gyi bzhon pas e ma bdag gi don byas par gyur to/ /mkha' lding gis rtog cing klu rnams srung bar byed pa 'di/ /ji ltar bdag la lji bar snang / /de ltar sbrul dag za 'dod pa/ /gsal bar di ring sel bar 'gyur/ /des na re zhig ri ma la ya'i rtse mor 'dzegs te ji ltar 'dod par 'di bza' bar bya'o//khyer nas song bar gyur to/ /mtshan ma bzhi pa'o// //de nas sgo srungs rab dga' zhugs par gyur to/ /mdza' bos rang khyim skyed tshal gnas la yang / /mdza' ba dag la ldig pa dogs 'gyur na/ /gnod mang mthong zhing 'jigs su rung ba yi//'brog dgon dbus na gnas la smos ci dgos/ /de ltar yang sprin byi bzhon pa rgya mtsho'i rlabs lta ba'i ltad mo la song ba ni yun ring du thogs so zhes rgyal po chen po kun gyi dbyig sdug bsngal dang ldan par gnas so/ /de yis bdag la dka' bsgos pa rab dga' bdag gi mkha' lding gi 'jigs pa dang nye ba'i phyogs su mag pa sprin rmi bzhon pa song bar gyur to zhes thos so//tshul 'dis dogs par gyur te/ des na myur bar song la ci 'di rang gi khyim du 'ongs sam/ ma 'ongs shes par gyis shig ces so/ /re zhig de nyid du 'gro bar bya'o/ /song ba dang mdun du mthong nas/ a ye 'di ni rgyal po'i drang srong sprin gyi bzhon pa'i yab sprin gyi tog bsti gnas kyi khyams na yum chos spyod ma dang lhan cig rgyal po'i bu mos rim gro byed cing 'khod do//de ltar yang rab dkar 'khyog po g.yo zhing bskyod pa lbu ba ldan pa'i chu dang mtshungs pa 'dzin/ /na tshod mtshungs shing bsod nams che ldan lha mos rnam mdzes snu'i bu mo bzhin/ /ji ltar rlabs kyis mdzes bzhin gang gi drung na ma la ya can nye bar gnas//sprin gyi tog 'di nyid ni chu gter dag dang rab tu mtshungs pa'i dpal 'di 'dzin/ /des na re zhig nye bar 'gro bar bya'o/ /de nas sprin gyi tog gdan la gnas shing btsun mo dang mna' ma dang bcas pa zhugs par gyur to/ /lang tsho dag gi bde ba spyad cing grags pa rgyas par byas//brtan pa'i blo yis rgyal srid la 'dug dka' thub rnam par spyad/ /bu 'di bsngags 'os mna' ma 'di ni rigs mtshungs legs las skyes/ /ka ye don byas bdag gi di ring 'chi ba bsam par byas/ /rab dgas 'phral la nye bar btud nas sprin gyi bzhon pa'i sprin gyi tog gis rna ba bsgribs nas sdog pa zhi bar gyur cig /yum gyis nges par bkra mi shis pa 'di nyams par gyur cig /ma la ya can mas bdag nyid kyis rtogs par mtshan ma ngan pa 'dis bdag gi snying 'dar ba bzhin no/ /sprin gyi tog gis bzang po sprin gyi bzhon pa ci/ rab dgas sprin gyi bzhon pa'i lam lta ba la rgyal po chen po kun gyi dbyig gis khyod kyi drung du bdag btang ngo //des na rgyal po chen po bdag la bka' spyod cig /bdag gis rje la ji skad ces rtogs par bgyi/ sprin gyi tog gis/ ci bu de nyid na nye bar mi gnas sam rab dgas ma mchis so/ /yum gyis mya ngan dang bcas par rgyal po chen po de yang med na da ni bdag gi bu gang du song /gang gis na de ltar yun ring du thogs/ sprin gyi tog gis nges par bdag cag gi srog bsrung ba'i don du ring du song bar gyur to/ /ma la ya can mas mya ngan dang bcas shing bdag nyid kyis rtogs par bdag gis kyang rje'i sras yud tsam zhig kyang ma mthong bas gzhan nyid 'ga' zhig dogs so/ /rab dgas rgyal po chen po bka' byed cig /bdag gis rje la ji skad gsol ba bgyi/ sprin gyi tog gis mig g.yon pa 'gul bas gsal bar byed do/ /sprin gyi bzhon pa yun ring du thogs so zhes bdag 'khrugs shing sems par byed pa na mi 'dod bsal bar bya ba'i phyir/ yang yang g.yas pa min pa'i mig /ci zhig la g.yo mig ngan khyod//g.yo ba nyi mas sel gyur cig /steng du lta zhing / bcom ldan 'od stong pa 'di ni srid pa gsum gyi mig gcig pu ste/ sprin gyi bzhon pa dge legs dag gsal bar ston cig /ya mtshan dang bcas par/ bltas par gyur na mig la sdug bsngal rab tu ster/ /khrag gi zer ma dang mtshungs 'od zer gsal bo 'gyed//ltas ngan rlung gis bskyod byas skar ma dang mtshungs 'di/ /glo bur nyid du mkha' las ci slad mdun du 'bab/ /ji ltar bdag gi rkang pa nyid la 'bab/ /thams cad kyis nges par brtags so/ /sprin gyi tog gis a ye sha rlon pa dang skra dang bcas pa'i gtsug gi nor bu 'di su zhig gi yin par 'gyur/yum gyis mya ngan dang bcas par gtsug gi rin po che 'di ni bdag gi bu'i yin pa 'dra'o/ /ma la ya can mas/ yum de skad ma gsungs/ rab dgas rgyal po chen po de ltar ma rtogs par gdung bar ma byed cig /'dir ni klu mkha' lding gis zos pa rnams kyi gtsug gi nor bu sder mo dang khas bcom pa du ma dag ltung ba nyid do//sprin byi tog gis/ lha mo rab dgas rig pa dag brjod do/ /gal te de ltar yang yin pa srid do/ /yum byis rab dgas gal te na dus 'di tsam gyis gyos sgyug gi khab nyid du bdag gi bu 'ongs pa srid do/ /des na song la rtogs te myur du 'phrin srings shig /rab dgas ji ltar lha mos gsungs pa bzhin no/ /song bar gyur to/ /sprin gyi tog gis/ lha mo klu dag gi gtsug gi nor bu yin pa yang srid do/ /de nas dung gi gtsug gos dmar po dag bzung ste zhugs par gyur to/ /mchi ma dang bcas par brlag go/ /kye ma brlag go/ /myur bar rgya mtsho'i 'gram du go kar+Na la btud byas nas//lto 'phye chen po gsod pa'i sa gzhi der ni bdag phyin na/ /rig pa 'dzin pa kha dang sder mos snying kha bcom pa de/ /khyen nas mkha' lding dag ni mkha' la rab tu song bar gyur/ /kye hud rgyu med pa'i gnyen gcig po/ kye hud mchog gi snying rje can kyi hud gzhan byi sdug bsngal ba can/ kye khyod ni gang du gshegs bdag gi tshig gi lan byin cig /nyams pa dung gi gtsug mngal na gnas pa nyid na ci'i phyir ma shi byed kyis ci zhig byas/ klu rnams bskyabs las grags pa cig ma thob/ /bsngags par 'os pa'i rje yi gsung ma bsgrubs/ /gzhan gyis bdag nyid btang bsrungs mya ngan 'os/ /kye ma kyi hud smad bdag bslus so bslus//des na rnam pa 'di ltar gyur pa bdag ni skad cig tsam 'tsho zhing bdag nyid la nye bar bgad par mi bya'o/ /re zhig 'di'i rjes su song ste brtag par bya'o/ /yongs su 'gro zhing sa la bltas te/ dang por sa gzhi khyab byas de nas mdun du thigs pa rags pa grol ba dag tu lhung / /rdo rnams la lhung brdabs shing 'thor gyur thigs phran ldan pa'i thang la srog chags rnams kyis dkrigs/khams kyi ngos la mtshon dka' bzhin stug dag gi rtse dang phug rnams dag la chags gyur pa/ /khrag gi rgyun 'di'i rjes su legs par 'brangs te mkha' lding lta 'dod bdag ni 'gro bar bya/ /yum gyis thos nas skrag pa dang bcas par/ rgyal po chen po su zhig ngu ba'i bzhin dang ldan pa 'di ni 'di nyid du myur bar 'ong zhing bdag gi snying 'khrugs par byed des na re zhig 'di su yin shes par byos shig /sprin gyi tog gis/ ji ltar lha mo smra ba bzhin no/ /dung gi gtsug gis kyi hud 'jig rten gsum gyi gtsug gi nor bu gcig pu khyod bdag gi gang du blta bar bya/ bcom par gyur to/ /sprin gyi tog gis thos nas dga' ba dang bcas par bgad nas lha mo mya ngan thong shig /'di'i gtsug gi nor bu 'di sha la chags pa'i bya 'ga' zhig gis mgo las bcad de khyen ba lhung ba yin nam snyam mo/ /yum gyis tshim pa dang bcas par ma la ya can ma la 'khyud nas a yI yugs sa mor ma gyur ma brten par mdzod cig /khyod ni rnam pa 'di 'dra ba dag gis nges par yugs sa'i sdug bsngal nyams su myong bar 'gyur ba ma yin no//ma la ya can mas dga' ba dang bcas par yum khyod kyi shis par brjod pa yis so zhes te zhabs la gtugs so/ /sprin gyi tog gi dung gi gtsug la nye bar btud nas bu byed kyi gtsug gi nor bu stor ram ci/ dung gi gtsug gis rje bdag gcig pu'i ma yin gyi/'jig rten gsum gyi yang ngo / /sprin kyi tog gi bu ji ltar na dung gi gtsug gi sdug bsngal gyi khur chen po dang ldan pas mchi mas mgrin pa nye bar bsgags pa bdag gis brjod par mi nus so/ /sprin gyi tog gis rang gi mya ngan shin tu bzod par dka' ba dag bdag la spros shig /de bdag la 'phos pa gang gis na khyod kyis bzod par bya bar 'gyur ro//dung gi gtsug gis gsan par mdzod cig /nges par bdag ni klu dung gi gtsug ces bya ba'o/ /zas kyi res la bab nas klu'i rgyal po nor rgyas kyis bi na ta'i bu la bsrings so/ /mang pos ci zhig bya/ gal te khrag gi rgyun gyi lam 'di rdul gyis bsgribs te mtshan dka' bar 'gyur ro/ /des na mdor bsdus pa bshad par bya'o//sems ni snying rje dang ldan pa/ /rig pa 'dzin pa su zhig gis/ /rang nyid mkha' lding la byin nas/ /bdag gis srog ni bsrungs par gyur/ /sprin gyi tog gis/ mnyes gshin gzhan la phan pa la zhen pa de lta bu bdag gi bu las gzhan pa su zhig yod/ kye bu sprin gyi bzhon pa yis zhes gsal bar brjod cig /kyi hud skal ba ngan pa bdag bcom mo/ /yum gyis kyi hud bu sdug pa khyod kyis 'di ci la byas/ ma la ya can mas/ kyi hud ji ltar bdag la mtshan ma ngan pa ni bden pa nyid du gyur to/ /brgyal bar gyur to/ /dung gi gtsug gis mchi ma dang bcas par a ye nges par sems dpa' chen po de'i yab yum ni 'di dag go//bdag gi mi 'dod pa brjod nas 'di dag gnas skabs 'di la bkod do/ /yang na dug 'dzin gye kha nas dug las gzhan pa ci zhig 'byung bar 'gyur/ kye ma srog rab tu ster ba sprin gye bzhon pa la de dang mtshungs pa'i phan pa dung gi gtsug gis byas so/ /des na da lta nyid du bdag nyid kyis gsad par bya'am ci/ yang na re zhig 'di dag dbugs dbyung bar bya'o//yab dbugs phyin par mdzod cing / /yum dbugs phyin par mdzod cig /gnyi ga dbugs phyin par gyur to/ /yum gyes bu mo longs shig /rings par ma byed cig /bdag cag kyang sprin gyi bzhon pa med par 'tsho 'am ci/ des na re zhig dbugs phyin par gyis shig /ma la ya can mas dbugs phyin nas kyi hud rje'i sras khyod gang du bdag gis blta bar bya//sprin gyi tog gis/ kyi hud bu bla ma'i zhabs kyi bsnyen bkur gyi cho ga shes pa khyod bdag gis gang du blta bar bya/ khyod kyis bdag gi rkang pa la/ /gtsug gi nor bu gtug tu bcug /'jig rten gzhan du 'gro na yang / /dul ba'i rim pa ma dor ro//gtsug gus nor bu blangs nas kyi hud khyod kyis bdag la 'di tsam kho na bstan par byas/ snying la brlan nas a ha ha gus pas shin tu rings nas 'dug cing mgo btud pas/ /rtag tu bdag gi rkang la phyag 'tshal khyod kyi ni/ /gtsug gi nor bu 'di rtsub min yang brdar ba yis /bdag gi snying ni shin tu 'joms par byed pa ci//yum kyis kyi hud bu sprin gyi bzhon pa gang khyod ni bla ma'i zhabs kyi sri zhu bor nas gzhan pa'i bde ba nyid la sred pa ma yin na/ de ji ltar da ni yab spangs nas mtho ris kyi bde ba nyams su myong bar byed du song bar gyur/ sprin gyi tog gis mchi ma dang bcas par lha mo yu cag sprin gyi bzhon pa med par 'tsho'am ci gang gis na de lta bu'i smre sngags rjod par byed/ma la ya can mas rkang pa dag la gtugs te/ thal mo sbyar nas yab rje'i sras kyi mtshan ma gtsug gi nor bu dag khrod cig /gang gis na 'di snying la byas pas me bcug ste bdag nyid kyi gdung ba bsal bar bya'o/ /sprin gyi tog gis bdag po'i brtul zhugs ma ci la 'khrugs par byed/bdag cag thams cad 'di nyid du nges pa ma yin nam/ yum kyis kye rgyal po chen po de lta na ci zhig la thogs/ sprin gyi tog gis ci la yang ma yin no/ /'on kyang bsgrubs pa'i me las gzhan pa'i mes 'dus bya ba mngon par bsgrubs pa ma yin no/ /des na mchod sbyin gyi khang pa las me blangs te bdag cag rnams bsreg par bya'o//dung gi gtsug gis bdag nyid rtogs par ji ltar sdig can bdag gcig pu'i don du rig pa 'dzin pa'i rigs 'di mtha' dag chad par 'gyur te/ des na re zhig 'di skad do/ /gsal bar yab nges pa nyid du ma gyur par 'di 'dra ba'i thub chod sgrub par regs pa ma yin no//byed po'i rnam 'phrul ni rnam par bkra ba yin te/ gal te na klu'i dgras 'di klu ma yin pa zhig go zhes shes te/ sprin gyi bzhon pa 'tsho ba dang bcas pa nyid gtong ba yang srid do/ /des na khrag gi rgyun 'di nyid kyis re zhig bi na ta'i bu'i rjes su 'brang bar bya'o/ /yum gyis rnam pa kun du lha rnams kyi bka' drin gyis bu 'tsho ba dang ldan pa nyid mthong bar gyur cig /ma la ya can mas bdag nyid kyis rtogs par nges par 'di ni skal ba zhan pa bdag la dkon no/ /sprin gyi tog gis/ bu khyod kyi tshig mi bden pa ma yin par gyur cig /de lta na yang me dang bcas pa nyid du bdag nyid 'gro bar rigs so/ /des na khyod rjes su song shig /bdag cag kyang me'i khang pa nas me blangs te myur ba nyid du 'ong ngo / /sprin gyi tog btsun mo dang mna' ma dang bcas pa song bar gyur to/ /dung gi gtsug gis des na re zhig mkha' lding gi rjes su 'brang bar bya'o/ /'jig rten 'das gyur spyod pa dag gis gtsang ba'i lus dang ldan/ /bya yi bdag po blo gros 'khrul pa dag gis khyer ba 'di//ji srid zos par ma gyur de srid rab tu bsrung ba'i phyir/ /sa gzhi 'dzin pa mchog tu mtho ba'i phyir ni 'gro bar bya/ /zhes te dung gi gtsug song bar gyur to/ /mtshan ma lnga pa'o// //des na dung gi gtsug zhugs par gyur te/ mdun du nges par brtags nas/ khrag gis brlan pa'i mchu dag brdar bas ri la dro Ni gsar pa bzhin byed cing //rang gi 'dren byed 'od zer me yi phreng bas nye ba'i nags kyi khongs dag bsregs/ /'jigs rung rdo rje ltar rtsub sder mo dag ni mtha' ru sa la brdab cing byeng / /sbrul gyi dgra 'di ma la ya yi cog gi rtse mor ring po dag nas mthong / /de nas mdun du sprin gyi bzhon pa 'gyel ba'i mkha' lding zhugs par gyur to//mkha' lding gi bdag nyid kyis rtogs pa skyes nas bzung ste lag 'gro'i bdag po dag zos par gyur na/ 'di 'dra ba'i ya mtshan dang bcas pa ni bdag gis sngar ma mthong ngo / /gang zhig sems dpa' chen po 'di la gdung ba med pa 'ba' zhig tu ma zad de/ dga' ba rgya chen po dang bcas pa bzhin du yang mthong ngo //de ltar yang / brtan pa'i rgya mtsho 'di yi khrag ni lhag par 'thungs kyang dman par 'gyur ba med/ /sha dag rab tu bcad pa las skyes gdung ba 'dzin yang dga' bas bzhin rab dwangs/ /gang zhig lus ni zos pa min pa de la spu long 'di ni gsal pos mtshan/ /gnod byed bdag la yang ni 'di yi mig dag phan pa byed pa bzhin du blta//des na 'di yi brtan pa'i tshul gyis bdag ni dge mtshan dang ldan pa bzhin du byas so/ /'di ni bza' bar mi bya'i/ re zhig su yin brtag par bya'o/ /sprin gyi bzhon pas mkha' lding la bltas nas/ bdag gi lus la da dung sha dag yod/ /rtsa sgo rnams las khrag ni zag pa nyid/ / khyod kyang tshim par gyur pa ma mthong na/ /mkha' lding zas kyi don la chags bral ci/ /mkha' lding gi bdag nyid kyis rtogs shing ngo mtshar dang bcas par ji ltar na 'di gnas skabs 'di la yang 'di ltar snying stobs dang ldan pa nyid du mngon par brjod/ gsal bar/ khyod kyi snying las khrag dag ni/ /bdag gi mchu yis rab tu 'phrog /slar yang khyod kyi brtan pya pa 'dis/ /bdag gi snying nyid phrogs par gyur/ /de'i phyir khyod su yin thos par 'dod do/ /sprin gyi bzhon pas/ 'di ltar bkres pa'i sdug bsngal kyis/ /gzir la khyod kyis mnyan mi 'os/ /re zhig bdag gi sha dang ni/ /khrag rnams dag gis tshim par mdzod/ /dung gi gtsug gis rings pa dang bcas par nye bar btud de/mkha' lding mkha' lding nges par thub chod dag bsgrub par mi bya'o/ /'di ni klu ma yin pas yongs su thong la bdag zo shig /bdag ni klu'i rgyal po nor rgyas kyis khyod kyi zas kyi don du btang ba'o brang bstan to/ /sprin gyi bzhon pas dung gi gtsug la lta zhing kye ma dung gi gtsug 'ongs te/bdag gi yid la re ba 'bras bu med par byas so/ /mkha' lding gis gnyi ga la bltas nas/ gnyi ga yang gsod pa'i mtshan ma dang ldan pas gang nges par klu yin zhes bdag gis ma rtogs so/ /dung gi gtsug gis khyod ni gnas ma yin pa la 'khrul pa ste/ brang la bkra shis mtshan ma lta zhog bdag gi lus la shun pa ma mthong ngam /rjod par byed bzhin du yang lce gnyis dag ni khyod kyis nges par ma 'grangs sam/ /mi bzad dug gi me yi du ba'i tshogs kyis rin chen 'od zer nyams byed cing / /bzod dka' gdung bas sdud byas rlung gis rgyas gyur gdengs ka 'di gsum ma mthong ngam/ /mkha' lding gis dung gi gtsug gi gdengs ka mthong nas/sprin gyi bzhon pa la lta zhing nges par 'di su zhig bdag gis bsad par gyur/ dung gi gtsug gis/ kye 'di ni rig pa 'dzin pa sprin gyi bzhon pa'o/ /mkha' lding gis/ 'di rig pa 'dzin pa'i rigs kyi thig le sprin gyi bzhon pa yin nam/ ri rab man+d+ra ra'i ngos dang gangs kyi rtse dang dbang chen dag gi ri//ke la sha yi rdo ba'i gzhi dang ma la ya yi ngos kyi cha dag dang / /phyogs ni de dang de dag rnams su gang gi grags pa rnam mngo 'jig rten dang / /'jig rten min par rnam dpyod rgyu ba'i tshogs rnams dag gis glur len de dag thos/ /rnam pa thams cad du grags pa ma yin pa'i 'dam chen por bying bar gyur to/ /sprin gyi bzhon pas gdengs can gyi bdag po ci'i phyir 'di ltar yid 'byung bar byed/dung gi gtsug gis/ 'di yid 'byung ba'i gnas ma yin nam ci/ rang gi lus kyis bdag gi lus 'di mkha' lding las yongs su bsrungs pa khyod kyis bdag sa 'og las kyang 'og tu dgyer bar 'os so/ /mkha' lding gis a ye ji ltar brtse bas brlan pa'i sems dang ldan pa'i bdag nyid chen po 'di bdag gis bza' ba'i spyod yul du gyur pa'i gdengs can rnams kyi srog yongs su bsrung ba'i phyir bdag nyid rang zas kyi don du nye bar 'ongs so//des na bdag gi bya ba ma yin pa chen po byas so/ /mang pos ci zhig bya/ byang chub sems dpa' chen po 'di nyid gsad par gyur to/ /des na sdig pa chen po 'di dag par byed pa ni me rab tu 'jug pa las gzhan ma mthong ngo /des na nges par bdag gis me dag gang du rnyed par 'gyur/ phyogs rnams su blta zhing a ye su zhig 'dis me blangs nas 'di nyid du 'ong bar byed de/ re zhig 'dir rjes su bskyang bar bya'o/ /de nas dung gi gtsug gis gzhon nu khyod kyi yab yum 'di dag byon to//sprin gyi bzhon pas/ rings pa dang bcas par dung gi gtsug nye bar 'dug ste stod g.yogs 'dis lus yongs su bsgribs pa byas nas nye bar gnas pas bdag gzung bar bya'o/ /gzhan du gal te na 'phral la 'di 'dra ba mthong na yum gyi srog gtong bar 'gyur ro/ /dung gi gtsug gis logs su 'dug ste stod g.yogs bzung nas de ltar byed do//de nas sprin gyi tog btsun mo dang mna' mar bcas pa zhugs par gyur to/ /sprin gyi tog gis mchi ma dang bcas par/ bu sprin byi bzhon pa/ bdag dang gzhan gyi 'di zhes bden par snying rje'i rim pa bdag la ga la yod/ /ci zhig mang po'am gcig nyid bsrung zhes khyod la bsam pa ji ltar skyes ma gyur//mkha' lding dag las sbrul 'di bsrung phyir rang srog gces pa yongs su gtong bar byed mod kyi/ /gang zhig gis ni bdag dang pha ma chung ma dag gi tshogs 'di lus pa med par bcom/ /ma la ya can mas kyi hud rje'i sras rjes su 'brang ba'i skye bo dor nas gcig pu gang du gshegs/skal ba zhan ma bdag rjes su skyongs shig /yum gyis ma la ya can ma la mtshon nas bu mo yud tsam ma ngu zhig /mchi ma rgyun du lhung bas me nyams par byed do/ /thams cad song bar gyur to/ /mkha' lding gis kyi hud bu sprin gyi bzhon pa zhes smra ba 'di gsal bar 'di'i yab yin no/ /des na 'di'i mes bya ba med de/bu bsad pas ngo tsha bas na 'di'i bzhin la blta bar mi nus so/ /yang na me'i ched du yongs su 'khrugs pas ci zhig bya/ bdag chu gter gyi ngogs nyid du gnas par bya'o/ /de nas re zhig da ni 'jig rten gsum za ro la bskyod pa'i dus kyi lce rtse dang 'dra 'bar zhing 'khyog /kun nas rab tu g.yo zhing rgya mtsho dag ni rtswa bzhin kham du byed par 'dod//rang gi gshog rlung ltas ngan rlung rab dkrigs 'dra rab tu gsal bas bskyod byas pas/ /'jigs rung bskal pa tha ma'i me 'dra rta gdong me 'di la ni bdag mchong ngo / /ldang bar 'dod do/ /sprin gyi bzhon pas/ kye 'dab chags kyi rgyal po sdig pa 'di dag par byed pa ni rtsom pa 'di ma yin no//mkha' lding gis pus mo btsugs te thal mo sbyar nas bdag nyid chen po 'o na ci yin smros shig /sprin gye bzhon pas/ skad cig sdod cig /bdag gi pha ma dag 'ongs pa 'di dag la re zhig phyag bya'o/ /mkha' lding gis de bzhin no/ /sprin kyi tog gis/ dga' ba dang bcas par lha mo dga' ba 'phel bar mdzod cig /bu sprin gyi bzhon pa 'di ni 'tsho'i/ /'tsho ba 'ba' zhig tu ma zad de/ slob mas bya ba bzhin du mkha' lding gis thal mo sbyar zhing nye bar bsten te gnas so/ /yum gyis rgyal po chen po nyams pa med pa nyid du bu'i bzhin mthong ba ni bdag cag don byas pa yin no/ /ma la ya can mas/ gang bden par rje'i sras mthong bzhin du yang shin tu mdza' bas bdag gi snying yid mi ches so//sprin gyi tog gis nye bar btud nas/ bu tshur shog tshur shog /bdag la yongs su 'khyud cig /sprin gyi bzhon pas ldang bar 'dod pa na stod g.yogs lhung zhing brgyal bar gyur to/ /dung gi gtsug gis gzhon nu thugs rton cig /sprin gyi tog gis nye bar btud nas/bu ji ltar mthong yang bdag yongs su dor nas 'gro'am/ yum gyis kyi hud bu tshig tsam byis kyang byed phebs par mi smra'am/ ma la ya can mas rje'i sras ji ltar na nyid bla ma'i skye bo la yang ltos par mi bgyid lags brgyal bar gyur to/ /dung gi gtsug gis bdag nyid la mtshon te/ nyams pa dung gi gtsug byed mngal nyid du ci la mi 'chi/ gang gis na 'di ltar skad cig skad cig la 'chi ba bas lhag pa'i sdug bsngal nyams su myong bar byed/ /mkha' lding gis/ 'di thams cad ni gtum po ma brtags par byed pa bdag gis bskyed pa'o/ /des na re zhig 'di ltar bya'o/ /gshog pas rlung g.yob cing yid brtan par mdzod cig /bdag nyid chen po yid brtan par mdzod cig /sprin gyi bzhon pas yid brtan nas dung gi gtsug bla ma dag dbugs dbyung bar mdzod cig rjo/ dung gi gtsug gis de ltar byed do/ /yab yum dbugs phyin par mdzod cig sprin gyi bzhon pa ni dbugs phyin par gyur to/ /ci mi lta'am slar la khyed nyid du dbugs dbyung ba'i slad du nye bar 'khod de gnas so//gnyi ga dbugs phyin par gyur to/ /yum gyis kyi hud bu bdag cag gis mthong bzhin nyid du mthar byed nyams pas khyod pham par byed do/ /sprin gyi tog gis 'tsho zhing tshe dang ldan bzhin du bkra mi shis pa 'di lta bu ma brjod cig /des re zhig mna' ma yang dbugs phyung shig /yum gyi gdong gos kyis bsgribs nas ngu bar byed do/ /'di ltar bkra mi shis pa nyams par gyur cig ngu bar mi bya'o/ /bu mo dbugs phyin par gyis shig /dbugs phyin byed par gyis shig /longs shig 'di nyid kyi dus su khyod kyis bdag po'i gdong mthong ngo / /ma la ya can ma dbugs phyin nas kyi hud rje'i sras dga' ba yang btang nas gcig pu nyid du gshegs par bzhed dam/yum gyis ma la ya can ma'i kha lag pas bsgribs nas bu mo de ltar ma brjod cig /'di dag nyams par gyur cig /sprin gyi tog gis mchi ma dang bcas shing bdag nyid kyis rtogs par/ yan lag kun zos gnas med bzhin//srog 'gro mgrin pa'i phyogs la ni/ /brten pa'i bu ni mthong gyur nas/ /sdog bdag ji ltar brgyal mi 'gyur/ /ma la ya can mas/ bdag ni shin tu sdig pa byed ma ste/ gang rje'i sras 'di ltar gyur pa mthong yang da dung yang srog yongs su mi gtong ngo / /yum gyi 'dren pa'i lus la kun du reg cing /mkha' lding la mtshon nas/gtum po khrod kyis da ji ltar bdag gi bu na tshod yongs su ma rdzogs shing mdzes pa'i lus can 'di lta bu'i gnas skabs su byas par gyur/ sprin kyi bzhon pas yum de ltar ma brjod cig /'dis ci zhig byas/ sngon du yang don dam par 'di lta bu nyid do/ / ltos shig /tshil dang rus pa dag dang rkang / /sha khrag tshogs ni pags pas g.yogs/ /lus kyi ming can rtag tu ni/ /'jigs rung ston la mdzes pa ci/ /mkha' lding gis kye bdag nyid chen po dmyal ba'i me 'bar ba nyams su myong bar byed pa bzhin du bdag nyid sems par byed cing sdug bsngal bar gnas so/ / des na nye bar bstan par mdzod cig /gang gis sdig pa las grol bar 'gyur/ sprin gyi bzhon pas yab bdag la gnang ba gsol cig /'di'i sdig pa yongs su 'dzad pa nye bar bstan par bya'o/ /sprin gyi tog gis bu de bzhin gyis shig /sprin kyi bzhon pas bi na ta'i bu nyon cig /mkha' lding gis thal mo sbyar nas pus mo btsugs te bka' stsol cig /sprin gyi bzhon pas/ rtag tu srog chags gsod la rnam par log cing sngar byas pa yang rjes su 'gyod par byos/ /sems can kun la mi 'jigs ster zhing bsod nams dag gi rgyu ni 'bad pas rab tu bsgrubs/ /gang gis srog chags 'tshe ba dag las thob sdig de 'dir 'bras bu yongs su smin mi 'gyur//gting mtha' rtogs par dka' ba mtsho yi chu nang dag tu lan tsha'i cha ni 'phangs pa bzhin/ /mkha' lding gis/ rmongs pa'i gnyid du song ba bdag /khyod kyis rab tu sad par byas/ /srog chags gsod pa thams cad las/ /ding nas bzung ste bdag ldog go/ / sprin gyi bzhon pas legs so/ /sems dpa' chen po legs so/ /bdag cag rjes su yi rang ngo / /rnam pa thams cad du brtan par gnas par mdzod cig /dung gi gtsug la mtshon nas dung gi gtsug da ni khyim du 'gro bar mdzod cig /dung gi gtsug shugs rings phyung nas kha 'og tu bltas te 'dug go/ / sprin gyi bzhon pas/ dung gi gtsug ci'i slad du shugs ring phyung ste/ kha 'og tu bltas nas 'dug par byed/ song la ma la ltos shig /khyod ni mkha' lding mchu rtse yis/ /rab tu bcom par rnam rtog cing / /khyod kyi ma de khyed sdug pas/ /sdug bsngal sdug bsngal ldan par gnas/ /yum gyis mchi ma dang bcas par gang zhig nges par mkha' lding gi khar lhung yang lus nyams pa med pa'i bu mthong ba de ni skal ba dang ldan pa zhig go//dung gi gtsug gis/ gal te gzhon nu rnal du gnas par gyur na 'di dag bden pa nyid do/ /sprin gyi bzhon pas tshor bar ldan pa'i gar byed do/ /a ha ha gzhan don phun tshogs ro yis g.yengs gyur te//'di snyed dus su bdag gis rig ma gyur/ /da ni gnad gcod pa yi tshor ba dag/ bdag ni gzir ba'i slad du rtsom par byed/ /'chi ba'i skabs kyi gar byed do/ /sprin gyi tog gis rtabs pa dang bcas par/ bu de ltar ci zhig byed yum gyis/ kyi hud 'di dag ci zhig byung / brang rdung ba dang bcas par yongs su skyobs shig /yongs su skyobs shig /bdag gi bu 'di ni 'chi bar byed do/ /ma la ya can mas/ kyi hud rje'i sras po khyod ni yongs su 'dor bar 'dod pa bzhin du mtshon no 'di ci zhig byung rjo/ sprin gyi bzhon pas thal mo sbyar bar 'dod cing / dung gi gtsug bdag gi lag pa sbyor cig /dung gi gtsug gis de ltar byed cing mchi ma dang bcas par kye ma cung zad nas 'gro ba mun par gyur to//sprin gyi bzhon pas phyed rab tu bye ba'i mig gis pha ma blta zhing yab yum 'di ni bdag gi phyi ma yod pa ma yin pa'i phyag go/ /sems dang bral ba'i lus 'di dag ni las su mi rung zhing / /rna bas tshig dang yi ge gsal po'i sgra dag thos ma yin//mig 'di 'phral la su zhig dag gis zum par byas pa bzhin/ /yab lags dbang bral bdag gi srog kyang kye ma 'gro bar byed/ /'gyel bar gyur to/ /yum gyis kyi hud bu kyi hud snying rjes mnyes gshin sprin gyi bzhon pa khyod slar gang du blta bar bya/ sprin gyi tog gis/ kyi hud sprin gye bzhon pa/ kyi hud don gnyer byi skye bo la byams pa/kyi hud yon tan kun gyi gter/ gang du song / bdag gi tshig lan byin cig /lag pa bsgrengs te sdug bsngal lo/ /kye ma sdug bsngal lo/ /brtan pa bdag la gzhi med dul ba lam ni gang du 'gro bar 'gyur/ /bzod pa 'dzin bzod su zhig 'di na sbyin pa lhur len dag dang bral/ / bde nas bde bar bcom ste snying rje sdug pa de ring gang du 'gro/ /bu khyod 'jig rten gzhan du song tshe 'gro ba stong pa nyid 'gyur ro/ /ma la ya can mas/ kyi hud rje'i sras bdag yongs su btang nas khyod gang du gshegs/ ma la ya can brtse med ma ci zhig 'di blta bar bya ba'i phyir 'di snyed kyi dus su 'tsho 'am/ dung gi gtsug gis gzhon nu srog las kyang lhag par phangs pa'i 'khor bdag btang nas gang du gshegs/des na nges par dung gi gtsug rjes su bkri bar bya'o/ /mkha' lding gis sdug bsngal lo/ /bdag nyid chen po 'di grongs par gyur to/ /da ni bdag gis ci zhig bya/ yum gyis mchi ma dang bcas par steng du bltas nas bcom ldan 'jig rten skyong ba rnams ji lta ji ltar yang bdud rtsis bran nas bdag gi bu 'tsho bar mi mdzad dam/mkha' lding gis dga' ba dang bcas shing bdag nyid kyis rtogs par bdud rtsi smos pas legs par dran te/ bdag grags pa nyams pa dang bral bar gyur to snyam mo/ /des na lha'i bdag po la mngon par blangs te des byin pa'i bdud rtsi'i char gyis sprin gyi bzhon pa 'ba' zhig tu ma zad de sngar so'i dug can zos pa'i rus pa'i phung po 'di dag kyang sbar 'tsho bar bya'o//ci ste 'di ma byin na de'i tshe/ bdag gis chu yi mgon po gshog pas 'thung zhing lus ni rab tu bskyod tshe drag po'i rlung dang ldan/ /me dang bcas pa'i nyi ma bcu gnyis mig gi 'od kyis sreg cing brgyal 'khrugs 'gyel 'gyur ba'i//mchu yis brgya byin rdo rje nor lha'i be con yi dwags dbang po'i dbyig pa bcom byas nas/ /rang dgar gshog pa spangs te skad cig bdud rtsi'i rang bzhin char ni mngon par dbab par bya/ /des na bdag 'ongs so zhes te song bar gyur to/ /sprin gyi tog gis/dung gi gtsug da dung bsdad nas ci zhig bya/ shing dag spungs la sreg khang sgrubs shig /gang gis na bdag cag 'di nyid dang lhan cig 'gro bar bya'o/ /yum gyis bu dung gi gtsug myur du myur du sgrubs shig /bdag cag med na khyod kyi grogs po 'o brgyal bar gnas so/ /dung gi gtsug gis mchi ma dang bcas par bla ma dag gis ji ltar bka' stsal pa bzhin no//'dir khyed cag las kho bo sngon du 'gro ba ma yin nam/ langs nas sreg khang brtsigs te gar byas nas yab sreg khang 'di ni bsgrubs zin to/ /sprin gyi tog gis lha mo ngu ba gzhan gyis ci zhig bya/ des na longs shig sreg khang la 'dzeg par bya'o//thams cad langs par gyur to/ /ma la ya can mas thal mo sbyar te steng du bltas nas bcom ldan ma gau rI khyod kyis bdag la rig pa 'dzin pa'i 'khor los sgyur ba khyod kyi bdag por 'gyur ro zhes bka' stsal na de yang ji ltar bdag skal ba zhan pa'i slad du khyod kyang bden pa gsung ba ma yin pa nyid du gyur to//de nas gau rI rtabs pa dang bcas par zhugs te/ rgyal po chen po sprin gyi tog thub chod dag nges par mi bya'o/ /sprin gyi tog gis/ ji ltar na mthong ba don yod ma/ bcom ldan ma gau rIs ma la ya can ma la mtshon te/ bu mo ji ltar na bdag bden pa ma yin pa smra ba yin ltos shig /sprin gyi bzhon pa la mngon par btud de/ril ba'i chus bran nas/ rang gi 'tsho ba dag gis kyang / /'gro ba rnams la phan byed pa/ /khyod la yongs su tshim mo bu/ /sprin gyi bzhon pa 'tsho gyur cig /sprin gyi bzhon pa langs so/ /sprin gyi tog gis dga' ba dang bcas par lha mo dga' ba 'phel bar mdzod cig /slar yang sprin gyi bzhon pa ni nyams pa med pa'i lus dang ldan no//yum gyis langs te dga' ba dang bcas par bcom ldan ma'i bka' drin byis so/ /rkang pa dag la gtugs so/ /gnyi gas sprin gye bzhon pa la 'khyud do/ /ma la ya can mas rje'i sras slar 'tsho bar byas pa ni dga'o/ /gau rI'i zhabs dag la gtugs so//sprin kyi bzhon pas gau rI mthong ste thal mo sbyar te/ ji ltar bcom ldan gau rI/ mngon par 'dod las lhag pa'i mchog ster ma/ /skye bo phongs pa'i rgud 'phrog skyob byed ma/ /gau rI rig 'dzin rigs kyi lha nyid ma/ /khyod kyi zhabs gnyis dag la bdag phyag 'tshal/ /zhabs dag la gtugs so/ /thams cad steng du blta'o//sprin gyi tog gis/ ji ltar sprin du med pa'i char 'bab/ bcom ldan ma 'di ci zhig gau rIs/ rgyal po chen po sprin gyi bzhon pa dang / lto 'phye'i bdag po rus pa'i lhag mar gyur pa 'di dag slar 'tsho bar bya ba'i phyir 'dab chags kyi bdag po 'gyod pa yang dag par skyes pas lha'i 'jig rten nas bdud rtsi'i char 'bebs par byed do//mdzub mos ston cing khyod kyis ma mthong ngam ci/ gdengs ka'i nor bu gsal zhing rab 'bar yan lag mchog ldan nyams pa med pa'i lus thob cing / /bdud rtsi'i ro ni myang ba la chags lce rtse gnyis kyis sa la rab tu ldag byed cing / /dug 'dzin bdag po 'di dag da ni mgyogs pa dang bcas 'khyog por 'jug pa'i lam dag nas//ri bo ma la ya yi klung gi chu rgyun bzhin du chu yi phung pos 'jug par byed/ /sprin gyi bzhon pa la mtshon nas bu sprin byi bzhon pa khyod la 'tsho ba tsam nyid 'os pa ma yin no/ /des na gzhan 'di yang khyod la bsgrub par bya'o/ /ngang pa'i phrag pas gser kyi pad bcom rdul gyis reg pa'i 'dam ni spangs gyur cing spyo//bdag gi yid mtsho las byung rgyun chad med pa'i chu ni dag pa chen po yis/ /rang 'dod kyis sprul rin chen bum pa bkod de bdag rang nyid kyis dbang bskur nas/ /dga' bas khyod ni rig pa 'dzin pa'i 'khor los sgyur bar skad cig nyid la bya/ /gzhan yang gser gyi 'khor lo 'di ni mdun du byung bar gyur pa dang //so bzhi dag gis mtshan pa'i gnyis 'thung dkar po 'di dang ni/ /sngo bsangs rta mchog ma la ya can yang ste 'di dag ni/ /khyod kyi rin chen rnams so 'khor los sgyur ba legs par ltos/ /gzigs par mdzod cig /ma tang ga de ba la sogs pa rig pa 'dzin pa'i bdag po 'di rnams bdag gis bskul te/gtsug gi nor bu rab tu mdzes pa'i 'od zer gyis dbang po'i gzhu'i phreng ba 'god cing gus pas slob ma'i lus mngon par btud de phyag 'tshal bar byed do/ /bu slar yang khyod la dga' ba ci zhig bya/ sprin gyi bzhon pas/ 'di las gzhan pa'i dga' ba ci zhig yod/dung gi gtsug 'di 'dab chags bdag po'i kha las bskyabs shing bi na ta las skyes pa btul/ /de yis sngar zos dug 'dzin bdag po gang yin de dag rnams kyang thams cad sos par byas/ /bdag srog rnyed pas bla ma rnams kyi 'tsho ba ma btang 'khor los sgyur ba nyid dag thob/ /khyod kyang mngon sum du mthong 'di las dga' ba gzhan gang bdag ni ci zhig don du gnyer//de lta mod kyis 'di ltar gyur cig rma bya rab dga'i 'jo sgeg ltar byed chu 'dzin dag ni dus su char 'be+ebs shing / /sa gzhi rgyun du rab 'khrungs lo thog ljang gu'i gos dang ldan par byed gyur cig /ngogs bzhin lus kyi tshogs gtam 'ga' zhig dag tu gling gi rnam pa dang //'ga' zhig dag tu lus po bskyil ba'i 'khor lo dag tu 'khrul bar byed/ /'ga' zhig tu yang rgya mtsho'i chur bying zam pa dag dang mtshungs pa ste/ /klu yi tshogs rnams rgya mtsho chen por bde ba nyid du rol gyur cig /gzhan yang khyod kyi grags pa 'di dag tsan dan dag gi nags tshal 'dir ni klu yi na chung rnams//li khris byugs bzhin rab rdo nyi ma'i 'od zer reg pas 'gram pa dmar ba dang ldan zhing / /skra yi tshogs pa rab 'dzin dgod pa'i ngal dub dag gis lus dman gdung ba mi rtsi bar/ /ting ting shag lhung blangs nas khu byug bzhin du shin tu rab snyan chags las sgogs gyur cig / rgud pa dang bral phrag dog med pa'i yid kyis legs byas rab tu rgyas byed cing / /stug po'i gnyen 'dun grogs kyi tshogs kyis rab dga' skye dgu rnams ni dga' pya gyur cig /thams cad song bar gyur ro/ /mtshan ma drug pa'o/ /klu kun du dga' ba zhes bya ba'i zlos gar dpal dga' ba'i lhas mdzad pa rdzogs so// //yon tan phul du byung ba dpag tu med pas spras pa'i bla ma dam pa chos kyi rgyal po dang / dpon chen shAkya bzang po'i bka' lung gis/ rgya gar gyi mkhan po la k+Sh+mi kar dang bod kyi lo tsA ba dge slong shong ston gyis dpal sa skya'i gtsug lag khang du bsgyur ba'o// //