CLOSE WINDOW

D4140
བོད་ཡིག

@##/ /rgya gar skad du/ sa ma ya b+he do pa ra wa tsa na tsakra se na kA ya b+he do pa ri de sha naM nA ma saM gra ha/ bod skad du/ gzhung tha dad pa rim par bklag pa'i 'khor lo las sde pa tha dad pa bstan pa bsdus pa zhes bya ba/ dkon mchog gsum la phyag 'tshal lo/ /shar dang nub dang gangs rir gnas//'jig rten 'das par smra ba'i sde/ /btags par smra ba'i sde pa dang / /lnga tshan dge 'dun phal chen pa/ /gzhi kun pa dang 'od srungs sde/ /sa ston sde dang chos srung sde/ /mang thos gos dmar slob ma dang / /rnam par phye ste smra ba'i sde/ /thams cad yod par smra ba yin//rgyal byed tshal gnas 'jigs med gnas/ /gtsug lag khang chen gnas brtan pa/ /sa sgrogs ris dang srung ba pa/ /gnas ma bu yi sde rnams ni/ /kun gyis bkur ba rnam pa gsum/ /yul don slob dpon bye brag gis/ /tha dad rnam pa bco brgyad gsungs/ /sde pa bco brgyad las 'phags pa dge 'dun phal chen pa'i sde pa rnam pa lnga'i nang nas 'jig rten las 'das par smra ba'i sde ba'i lta ba la gzhan dang mi mthun pa'i rnam grangs mnga' bas na sngar de bshad la/lhag ma gzhan rnams phyis bshad na bde ba'i phyir de dang por bshad do/ /de la 'jig rten las 'das par smra ba'i sde pa rnams ni 'di skad ces zer te/thub pa ni 'jig rten las 'das pa/ rdzas yod pa/ sku dang tshe dang mtha' yas pa/ mnyam par gzhag pa/ skad cig skad cig la thams cad mkhyen pa/ zad pa dang mi skye ba'i blo rtag tu mnga' ba yin no/ /chos kyi 'khor lo bskor ba ni tshig gi yin no//byang chub sems dpa' la ni 'dod chags la sogs pa skye ba dang / mer mer po la sogs pa las skye ba med do/ /bden pa ni cig car mthong ngo / /mig la sogs pa'i sems kyis kyang 'dod chags dang bral bar 'gyur ro/ / gzugs dang gzugs med pa na yang mig la sogs pa'i rnam par shes pa yod do/ /dbang po rnams kyis ni yul mi 'dzin no/ /mnyam par gzhag pa yang tshig smra'o/ /sems la yang gzugs yod do/ /rang rig pa yin no/ /dgra bcom pa rnams la yang som nyi dang mi shes pa yod de bstan dgos so//'bras bu la gzhan gyis brda sprad dgos so/ /sdug bsngal smos shing sdug bsngal tshig tu brjod pas lam skye bar 'gyur ro/ /'jig pa yang yod do/ /brgyad pa la yang yun ring du gnas so/ /chos kyi cho ga las kyang nyams par 'gyur ro/ /rgyun du zhugs pa dang dgra bcom pa las ni nyams pa med do//dang po shos ni mtshams med pa ma gtogs pa gzhan byed do/ /'jig rten pa la ni yang dag pa'i lta ba'i dbang po med do/ /ma gsungs pa la ni bcas bcos byar med do/ /drang ba'i don ni med do/ /gzugs med pa ni gzugs med pa bzhi dang /'dus ma byas gsum dang / lam dang rten cing 'brel par 'byung ba'i lugs su gtogs pa dgu'o/ /sangs rgyas mang po cig car 'byung ba yod do/ /sems gnyis cig car 'byung ba dang / nyon mongs pa dang lam cig car 'byung ba dang / las dang las kyi 'bras bu cig car 'byung ba dang /sa bon dang myu gu cig car 'byung ba yod do/ /lus la ni sems kyis khyab po/ /sems ni 'od gsal ba'o/ /phra rgyas ni mi ldan pa'o/ /kun nas dkris pa ni mtshungs par ldan pa'o/ /zhig par gyur pa dang ma skyes pa dang / bar ma do'i srid pa ni med do/ /rgyun du zhugs pa ni bsam gtan thob pa'o//drug pa ni shes par bya ba yang ma yin/ rnam par shes par bya ba yang ma yin no zhes 'jig rten las 'das par smra ba'i sde pa rnams zer ro/ /de las gzhan pa rnams kyi khyad par 'di yin te/ thub pa ni btags pa'i sgo nas bla ma yin no zhes zer ro/ / btags par smra ba'i sde pa rnams ni skyes bu byed pa'i rtsal dang / dus ma yin par 'chi ba med do/ /lam ni bsod nams kyis 'thob bo/ /lam ni bsgom par bya ba yin no/ /lam ni 'jig par mi 'gyur ro zhes zer ro/ /shar gyi ri bo'i sde dang / nub kyi ri bo la gnas pa'i sde pa rnams ni byang chub sems dpa' ni ngan 'gro las rnam par grol ba ma yin no//mchod rten la mchod pa ni 'bras bu mchog tu gyur pa ma yin no zhes zer ro/ /gangs ri pa'i sde pa rnams ni phyi rol pa la ni mngon par shes pa lnga med do/ /lha rnams la ni lam bsgom pa med do zhes zer ro/ / 'phags pa thams cad yod par smra ba'i sde pa rnam pa bdun las gzhi thams cad yod par smra ba'i sde pa rnams ni dus gsum dang / ming dang / gzugs kyis ni 'dus byas thams cad bsdus so/ /drug pa dang mi ldan pa rnams dang / 'dus ma byas rnams ni shes par bya ba yang ma yin/ rnam par shes par bya ba yang ma yin no//'dus ma byas ni rnam pa gsum mo/ /nyon mongs pa ni mtshungs par ldan pa'o/ /thub pa ni rnam pa gnyis so/ /de'i gsung rab dang dbang po rnams ni gzugs can rnams nyi tshe la yod do/ /mchod rten la mchod pa ni 'bras bu che'o/ /byang chub sems dpa' ngan 'gro spangs pa ni rnam pa gnyis su 'dod pa yod do zhes zer ro//bsod nams lam gyi tshogs su 'gyur ro zhes zer ba la sogs pa ni mi 'dod do/ /de las gzhan pa rnams kyi khyad par ni 'od srungs sde'i slob ma rnams ni yongs su shes la ma spangs pa dang / ma 'ongs pa'i rgyud las 'byung ba med do//slob ma'i chos rnams ni rnam par smin pa yod pa'o zhes bya ba'i gzhung la brten to/ /sa ston sde'i slob ma rnams kyi gzhung lugs ni ma 'ongs pa med do/ /'das pa med do/ /ma 'ongs pa med do/ /da ltar byung ba med do/ /bden pa cig car mthong ngo / / phyi rol pa la nyon mongs pa zad pa med do/ /lha yul pa la ni lam med do/ /bar ma do'i srid pa med do/ /dgra bcom pa la yang bsod nams skye ba yod do/ /phra rgyas ni sems las tha dad do/ /'dus ma byas kyi dngos po ni dgu ste/ mi g.yo ba dang ldan pa gsum dang / dge ba dang mi dge ba dang lung dum bstan pa gnyis dang /rten cing 'brel par 'byung ba dang / lam rnams te rtag tu gnas pa yin no/ /ston pa ni dge 'dun gyi nang du gtogs te/ de'i phyir dge 'dun la phul ba lhag par don che'o/ /rgyal ba nyan thos dang bcas pa rnams ni lam dang rnam par grol ba gcig go zhes de skad ces zer ro//chos srung sde pa rnams ni sangs rgyas ni dge 'dun gyi nang du ma gtogs so/ /sangs rgyas la phul ba 'bras bu che'o/ /sangs rgyas dang / nyan thos rnams kyi lam ni tha dad do/ /phyi rol pa la ni mngon par shes pa med do/ / dgra bcom pa'i lus ni zag pa med pa'o zhes zer ro/ /mang du thos pa'i sde pa rnams ni mi rtag pa dang / bdag med pa dang / stong pa'i shes pa dang / lam dang / mya ngan las 'das pa 'di rnams ni thub pa'i 'jig rten las 'das pa'i chos yin no/ /lhag ma rnams ni 'jig rten pa'o zhes zer ro//dgra bcom pa la som nyi yod do zhes bya ba la sogs par 'dod do/ /'pho bar smra ba de dag ni gos dmar gyi sde pa nyid de/ de'i phyir sems can 'pho'o/ /phung po bzhi ni rang bzhin gcig tu nges so/ /lam gyi mthus ni phung po rnams 'gag go zhes zer ro/ / rnam par phye ste smra ba'i sde pa rnams ni gang zag ni don dam par yod do/ /'bras bu ma smin pa'i don ma gtogs pa 'das pa med do/ /'bras bu las gzhan pa'i ma 'ongs pa med do/ /rigs mi mthun pa'i da ltar byung ba yang med do/ /chos ni de ma thag pa'i rgyur mi 'gyur ro/ /gzugs kyi 'dra ba'i rgyu yang med do zhes de ltar blta'o//'phags pa gnas brtan pa'i sde pa rgyal byed tshal gnas pa'i sde dang / 'jigs med ring gnas pa'i sde dang / gtsug lag khang chen gnas pa'i sde 'di gsum ni lta ba mthun te/ lha rnams la ni lam bsgom pa med do zhes zer ro/ / 'phags pa thams cad yod par smra ba'i sde pa rnam pa bdun las gzhi thams cad yod par smra ba las byung ngo / /thub pa ni legs par sbyar ba mi gsung ngo / /byang chub sems dpa' ni bskal pa grangs med pa bcu phan chad nas sum cu tshun chad kyis 'grub bo/ /thar pa ma gtogs pa 'dus ma byas pa med do//log par shes pa dang mi shes pa med do/ /phra rgyas ni sems las tha dad do/ /'gog pa'i snyoms par 'jug pa la ni sems yod do zhes zer ro/ /'phags pa kun gyis bkur ba'i sde pas sgrogs rigs kyi sde dang / srung ba pa'i sde dang / gnas ma'i bu'i sde 'di gsum yang lta ba mthun te/gang zag ni phung po rnams kyang ma yin la/ phung po rnams las thar pa tha dad pa yang ma yin no/ /phung po rnams ni dus gzhan du yang brtan par 'dug go/ /rnam par shes pa lnga'i sgo nas ni 'dod chags skye bar yang mi 'gyur la/ 'dod chags dang bral bar yang mi 'gyur ro//mthong ba'i lam ni sems kyi skad cig bcu gnyis so/ /de phan chad ni 'bras bu dang ldan par gnas so/ /shes par bya ba ni brjod du yod pa dang / brjod du med pa'o zhes zer te/ yul dang slob dpon gyi bye brag gis 'dir bye brag drug tu brjod do/ / gzhung tha dad pa rim par bklag pa'i 'khor lo btsun pa dbyig bshes kyis mdzad pa las/ sde pa tha dad pa bsdus pa zhes bya ba 'dul ba 'dzin pa slob dpon dul ba'i lhas mdzad pa rdzogs so// //