CLOSE WINDOW

D4100
བོད་ཡིག

@##/ /rgya gar skad du/ u dA na brga bi ba ra Na/ bod skad du/ ched du brjod pa'i tshoms kyi rnam par 'grel pa/ thams cad mkhyen pa la phyag 'tshal lo/ /skal ldan mchod 'os blo yi gzer rnon gyis/ /'jigs pa'i gti mug mun sel sems can gyi/ / bde ba'i rgyu gcig mgon la rab btud de/ /shes rab go chas ched brjod bshad pa rtsom/ /'jig rten gzhung mang 'di la 'jigs pa dag /bsdus te bstan na bdag la dga' ba dang / /tshe dang blo dag shin tu chung ba'i phyir/ /de bas bsdus nas bstan la 'jig rten 'jug /thub mchog gsung gi tshig la 'jug pa yi//don la gang zhig blos ni mi dpyod pa/ /mi yi cha byang phyugs kyi skye bo de/ /sred pa'i rgya mtsho sdug bsngal gling med ltung / /dbyangs can tshig gi dri ma sun 'byin pa/ /thub gsung dri med chu rgyun dang mkhas pas/ /sbyangs kyang bdag 'dir dam pa'i rjes 'brang ba//nad mes 'bar ba'i lus kyang khrus la brten/ /ched brjod tshigs bcad sna tshogs don ldan zhing / /bdag blo don gyi de nyid 'dzin la blun/ /'on kyang de yi rnam par 'grel pa 'di/ /brtsams pa de la bdag blo gsal phyir byas/ /gang zhig ched brjod tshigs bcad tshul bzhin 'don//'dzin byed de ni skye bar skye ba dran/ /lta ngan mche bas mi nyen gzhan smras la/ /mi dga' rnam par grol ba bsgrub par 'gyur/ /dam pas 'di thos legs par yid la 'jog /'don dang 'chang dang don la'ang tshul bzhin du/ /rtag 'bad de dag yid bzhin nor bu ltar//mngon 'dod 'bras bu 'thob par cis mi 'gyur/ /drang srong che gsung pha rol bgrod dka' zhing / /don zab ldan pas thub min gzhan dag gis/ /legs par rab tu rtogs par mi nus phyir/ /de bas brgyud de 'ongs pa 'di bsten bya/ / dper na skyes bu chu bor rkyal byang yang / /gzings med rgya mtsho rgal bar mi nus ltar/ /de gzhan lung don cung zad shes gyur kyang / /bla ma med par gang yang nus pa med/ /de bas bla ma ston pa bzhin bsten cing / /brgyud pa'i man ngag la yang bsten par bya/ /gang phyir mi dag des bstan lam 'gro na//tshig don nyam nga de la'ang 'khrul pa med/ /de bas ji skad bshad bzhin slob dpon la/ /bsten nas de las phun sum tshogs nyid de/ /des na 'di dag tu yang smad med la/ /pha rol tu yang sdug bsngal med par 'gyur//byang chub go cha zhes bya byang chub gnyer/ /blo ldan tshig gsal smra dang rgyud mnyen dang / /dam pa'i gzhung spyod mdo sde 'don byed cing / /mdo sogs don gyi de nyid ston pa byung / /bag khal yul gyi ka ba d+h+yar skyes te/ /grags khyab bzod pas brgyan cing yang dag rtogs//gzhan yang dri med nor bu'i dam chos kyi/ /gsung gis brgyan cing gzhan phan mtha' yas byed/ /dam chos gsung la ma brten nyi ma'i 'od zer lta bu ste/ /blo rgya che zhing yang dag lam bsten skyes bu rmongs pa'i mun pa 'jig /bdag gi mkhan po dri med man ngag ma lus thos pas ched brjod pa//'di nyid gsal bar bya phyir rtsol blo'i tshul gyis don 'grel tshig nyung brtsams/ /lha yi me tog pas kyang mdzes shing 'phags pas bsten/ /blo yi rab rib sel ba'i sgron ma yon tan gyis/ /pad+ma'i nags tshal kha 'byed nyi ma lta bu yi/ / thub pa'i kun bzang gsung ni rab tu mnyan par gyis/ /de nas bde bar gshegs pa thams cad kyi gsung gi snying por gyur pa/ shin tu bkra shis pa'i sgra skad kyis ched du brjod pa zhes bya ba rgyal ba'i gsung gi yan lag gi rnam par 'grel pa'i tshig 'byed par 'dod nas de nyid kyi tshul bstan pa'i phyir/gnyid dang rmugs pa rnams sol la/ /zhes bya ba la sogs pa yin te/ de yang 'di ltar ched du brjod pa zhes bya ba ni thub pas gsungs pa thams cad kyi snying po ste/ mdor bsdus na sde snod gsum gyi don yang dag par gsal bar byed pas yid bzhin gyi nor bu rin po che bzhin du mngon par 'dod pa'i don thams cad phun sum tshogs par byed pa yin no//ched du brjod pa zhes bya ba yang de'i bkra shis pa des rab tu grags pa yin te/ bde bar gshegs pa thams cad kyi gsung ni yid bzhin gyi mtsho chen po lta bu ste/yid bzhin gyi mtsho chen po las pad+ma skyes pa lta bu'o/ /de ltar na phan tshun brgyud cing thos te yang dag par 'ongs pa yang 'di lta ste/ thub pa mchog rnams byung ba dang 'byung bar 'gyur ba rnams kyis tshig dang yi ge'i go rims 'di nyid kyis gsungs shing gsung bar 'gyur ba yin la/rgyal ba gcig gi zhal nas gsungs pa yang shin tu bkra shis par 'gyur ba yin na/ bde bar gshegs pa thams cad kyis gsungs pa lta ci smos te/ de yang bshad pa nyon mongs pa'i nad la gtan du phan pa'i nus pa kun du rmongs pas ldongs par gyur pa sel ba'i mig sman gyi thur ma bzang po de bzhin nyid shes pa'i 'od gsal ba'i mig skyed pa yin te/de bas na bde bar gshegs pa'i gsung ni bkra shis par gyur pa yin no/ /gsung rab kyi yan lag tu gyur pa'i phyir 'di ni gsung rab yan lag bcu gnyis las gcig yin te/ de la 'di nyid kyi brtag pa 'og nas bshad par bya'o//'di'i 'grel pa yang nges par bya dgos pa yin te/ don shin tu zab pa'i phyir ro/ /sangs rgyas kyi gsung ni rab tu rtogs par dka' ba yin te/ nyan thos kyi mchog rnams kyis kyang don ji lta ba bzhin du mi rtogs te/ ji srid du gsungs pa shin tu rtogs par dka' ba'i phyir dul ba'i mchog nye rgyal la sogs pa rnams kyang 'khrul cing rmongs par 'gyur ro zhes bya ba yin no//'dir ched du brjod pa'i tshoms kyi don gyi rnam par 'grel pa rtsom par 'dod pa la/ dri ba'i tshig rnam pa bzhi dang por 'byung ba yin te/'di tshul ji lta bur bstan pa dang / gang gis bstan pa dang / gang la bstan pa dang / ci'i phyir bstan pa'o/ /gang la khyod 'grel pa rtsom pa'i ngal ba chen po 'di lta bu myong bar byed de/ gang gi phyir bshad pa'i ngo bo yongs su shes pa med par ni de'i rnam par 'grel pa brtsams par mi rigs so//ston pa po med par tshig 'byung ba mi rigs te/ tshig la 'jug pa ni ston pa la rag lus pa'i phyir te/ ston pa khyad par can gyi tshig la ni don bzang po med kyang dga' bas gus par byed pa'i phyir gsum gyis nye bar 'god pa yin no/ /ji ltar tshe'i rig byed la stsogs pa bstan pa la yang ston pa'i khyad par gang zhe na/'di las lus 'byung ba yin no zhes bshad pa nye bar sbyor ro/ /'brel pa med pa'i tshig tu gyur pa mu stegs kyi lung las blangs pa ni tshig rab tu bzang po yin du zin kyang mkhas pas len par mi 'gyur te/mi gtsang ba'i phung po las bu ram shing phyung ba lta bu'o/ /dgos pa med pa ni lung khyad par can la brten pa yin yang / ji ltar gser gyi ri'i rtse mo las byung ba'i dug lta bur dgos pa med pa yin te/ bdag la phan par 'dod pa rnams kyi don khyad par can med do/ / de ltar bstan pa'i dgos pa dang brjod pa yod na ni 'brel pa dang brjod par bya ba yang yod pa nyid du 'gyur te/ de med na de nyid kyang med pa'i phyir dri tshig tha dad par ma byas so/ /de la re zhig dang po'i rtsod pa de'i lan bstan par bya ste/ sangs rgyas kyi gsung ched du brjod pa ni yan lag bcu gnyis kyi nang du bstan pa'i phyir mdo ji lta ba bzhin no//sangs rgyas kyi gsung de yang rnam pa gnyis te/ bstan pa dang / don gyi bdag nyid kyi phyir ro/ /gang bstan pa'i bdag nyid de ni ming gi tshogs la sogs pa'i rang bzhin te/ gang gi phyir ming med par ni sgra'i don gyi khyad par ston par mi nus so//'dir spyi dang lhag ma bya ba yin te ston par mi nus so/ /gal te de'i dngos po nges par yod na ni bdag nyid mi snang ste/ de ma yin par tha snyad thams cad rtogs pa med par thal bar 'gyur ro/ /gal te dngos po med na ni de ltar don shes par byed pa yang med de de'i phyir med pa ni ri bong gi rwa la sogs pas rnam par shes pa bskyed par mi 'gyur ba'am/yang na sa bon la sogs pas myu gu la sogs pa'o/ /de yang gsungs pa/ don rtogs yod par bya ba ni/ /dngos po yin phyir myu gu bzhin/ /de phyir yod par gyur na yang / /sa bon la sogs mi 'dod de//dus su myu gu skyes pa na/ /sa bon nyams pas nye bar mtshon/ /de yis 'phangs pa nyid kyis ni/ /sa bon ji bzhin de 'byung ngo / /de bzhin ming la sogs pa'i shes/ /don rnams 'dra bar shes gyur cing / /des na tha snyad de 'jug ste/ /de med 'gro ba de dag med//gang gi phyir 'das pa dang / ma 'ongs pa dang / thag ring ba dang / phra ba dang / gtan du med pa la sogs pa rnam par gnas pa la rang dbang gis yid kyi rnam par shes pa 'jug par mi 'dod la/ dbang po'i rnam par shes pas 'jug par 'dod de/ dbang po'i rnam par shes pa la rag lus pa'i phyir/de kho na nyid ma mthong ba la yid kyi rnam par shes pa 'byung ngo / /de la ni dbang po'i shes pa 'jug pa yang med de/ da ltar byung ba'i yul yin pa'i phyir lhag ma la dbang po'i shes pa 'byung ngo / /yul med par ni shes pa yang mi 'byung ste/ gnyis la brten nas rnam par shes pa 'byung ngo / /zhes khas len pa'i phyir sgron ma bzhin no/ /ming gi tshogs la sogs pa bsgrub pa 'dir tshogs tsam gyi mtshan nyid brjod par bya ste/ de la re zhig ming 'dogs pa ni dang po ming 'dogs pa dang 'jug par 'dod pa dag dang / rtog pa dang dpyod pa gnyis kyis lan du mar yid kyi rnam par shes pas brtags te/de nyid du skyes bu dngos po la chags pa'i phyir lan du ma zhig tu lag pa la rma rnying dus de nyid du don thams cad dang 'dra bar byed pa yin pas ming la sogs par 'gyur ro/ /de la tha snyad 'dogs pas bstan par bya ste/gzhan du go bar bya ba'i phyir ming gi sgra'i brdas btags pa yin te/ brda chags pa dang / yang rna bas de mnyan cing len pas rtog pa dang / dpyod pa'i yid kyis brtags te snga ma bzhin du ming la sogs pa skye ba'i rim gyis 'gyur te/ myur du 'jug pa'i phyir yang skad cig ma'i rgyun gyis skad cig ma nyid du bstan to//de nyid kyi dbang du byas nas chos mngon pa las gsungs pa ngag las ming 'jug par 'gyur ro/ /ming las don ston pa yin te/ de yang smras pa/ ngag dang yi ge las ni ming / /de dag las ni tshig shes bya/ /dbye bas mtshon pa'i dbye ba ni//dngos po sna tshogs shes par bya/ /gang yang don gyi bdag nyid kyi sangs rgyas kyi gsung de ni zag pa med pa'i ting nge 'dzin dang / tshul khrims dang / shes rab kyi ngo bo mdo sde dang 'dul ba dang mngon pa'i chos nyid kyi bdag nyid de/ de yang dri med rtse gcig tshul khrims dang /shes rab rang bzhin rim bzhin du/ /sde snod kyi ni dge bskyed de/ /rnam par smin pa rnam grol byed/ /ces gsungs so/ /de bas na rnam par gzhag pa ni 'di yin te/ bstan pa'i bdag nyid kyi ched du brjod pa ni ming gi tshogs la sogs pa'i dngos po'o//don gyi bdag nyid ni zag pa med pa dang / ting nge 'dzin la sogs pa'i rang bzhin sde snod gsum las bsdus pa yin pa'i phyir ro/ /sus nye bar bkod ces bya ba bstan pa de'i lan bstan pa'i phyir smras pa/ 'di'i ston pa po ni rnam pa gnyis te/ ston pa po dang / sdud pa po'i dbye bas so/ /gang gi phyir de bzhin gshegs pa ni tshig gi don lus pa med pa'i de bzhin nyid khyad par du rtogs par spyod pa'i phyir bde bar gshegs pa thams cad kyis bstod de ched du brjod pa bstan pa ni nyid kyis khyad par du gsungs pa yin pa'i phyir dang /bde bar gshegs pa ma lus pas gsungs pa'i phyir te/ 'di nyid nas bshad pa/ rgyal bas ched du brjod gsungs pa/ /zhes bya bas bstan te/ de yang smras pa/ khyad par don ldan ched du brjod/ /sangs rgyas rnams kyis rab gsungs pa/ /legs par gsungs pa 'di lta bu//gzhan gyis brjod par mi nus so/ /sdud pa po ni/ 'phags pa chos skyob yin la/ de yang 'di ltar thos te/ mnyan du yod pa na ded dpon zhig gi chung ma rang gi khyim thab dang phrad pa las de sems can dang ldan par gyur kyang rtags mi mngon pas des ma shes te/'di ni sems can dang mi ldan no zhes thams cad nges par gyur to/ /ded dpon de yang dus ji lta ba bzhin du tshong zong blangs te yul gzhan du song ngo / /de'i chung ma rim gyis sems can nang du cher skyes pa dang / bsam pa/ kyi hud 'di lta bu skyes pas ring po mi thogs par bdag gi ngo bo 'ong bar 'gyur la/bdag gis nyes pa med par yang nyes par spyad do zhes shes par 'gyur zhing / nye du'i 'khor thams cad kyis kyang shes par 'gyur ro zhes bsams nas/ ngo tsha bas yid brtan pa'i 'khor la shes par byas nas nad kyis thebs so zhes g.yo byas te gsang nas de na 'dug pa dang /ji tsam zhig na shin tu mdzes pa'i bu zhig btsas so/ /de shin tu yid du 'ong zhing blta na sdug la sdug pa'i bu yin yang 'phya ba la 'dzam pa'i phyir snying gi phyogs las snying phyung ba bzhin du khyim nas mtshan mo yid brtan pa'i na chung zhig gi lag tu gtad de/ srang bar du khyis zos pa ji bzhin du ci'i phyir mi 'dug pa zhes skye ba gzhan dag du ma la sdig pa bsags pa'i rnam par smin pa'i dbang gis khye'u de rgyal po'i lam srang zhig tu bor ro//de yang sngon gtum po tshangs pas byin zhes bya ba'i mdun na 'don du gyur te/ tshad med pa'i skye bo gsad par bya ba yongs su gtang ba las gyur pa'i bsod nams kyi mthus khyi dang glang dang glang po che dang rta dag gis yongs su bsrungs so//'di ni gdul ba'i dus la bab po snyam du dgongs nas tho rangs kyi dus su bcom ldan 'das dge slong gi tshogs kyis yongs su bskor zhing byon te/ 'di ni mnyan yod du tshong dpon chen por 'gyur zhing yun ring por bde ba nyams su myong nas nga'i bstan pa la rab tu byung ste/dgra bcom pa nyid mngon sum du byed par 'gyur ro zhes lung bstan te/ rgyal po gsal rgyal la gtad nas rgyal po chen po chos skyob ces bya ba'i khye'u 'di yongs su gsos shig ces bka' stsal te/des na 'di'i ming du gyur to/ /tshong dpon chen po zhes bstan pas de lta na ni bdag gi bur 'gyur na rim gyis tshong dpon chen por 'gyur ro zhes rgyal po la tshong dpon zhig gis don du gnyer te blangs pas des de la byin no/ /de yang chung ma mi srun pa zhig yod pas 'thabs te/ de 'di skad du ci re zhig bu gsum dang bu mo bzhi yod bzhin du 'di bu skal du byas te gsos pas ci zhig bya zhes zer zhing khye'u de gsad pa'i phyir mi mthun pa dug gis spags pa'i bza' ba dang btung ba yongs su longs spyad pa dang /bsreg pa dang / glang po che dang / rta'i bres dang / shing rta 'dren pa'i bar dag tu bor ba dang /grong khyer gyi phyi rol du rdza mkhan gyi gseb dag tu gzhug pa dang / grong stong pa dag tu khyer ba la sogs pa'i thabs kyis 'bad par byas kyang de'i srog dang bral bar ma nus te/ bdag nyid kyi bu gsum 'chi ba nyi tsher zad do/ /zas su sgrub pa'i snod bzhi mchan khung du thogs te/rang sangs rgyas mdun na yod pa la sbyin pa'i phyir 'ongs pa las khyi gsum zhig yod pa 'ongs te shin tu khros shing zug pas rdza mkhan gyi rdza ma bsreg pa'i gnas su bcug ste/ de ci'i phyir ma shi zhes bya ba'i ngag gi las kyi rnam par smin pas so/ /de grong de na 'dug pa las khye'u'i lag pa nyid yid brtan te khyim ma'i nang du las pa dag la yi ge bskur ro//ring po mi thogs par rgyal po'i khab nas 'ong bar 'gyur ro/ /zhes thos pa dang / dub pas sgo khang du mthe'u chung gis mdzub mo la yi ge dkris te khye'u gnyid log par gyur to/ /phun sum tshogs pa dang rgud pa ni lag pa'i mthil 'di la yod do zhes mtshan mkhan dag gi tshig mnyan te/myur du rje'u rigs kyi rigs tshong dpon gyi bu mo 'ongs nas de'i sor mo las yi ge phyung ste bltas na/ bde legs su gyur cig /grong gi phyi rol nas tshong dpon chen po'i rigs mthon por byung ba zhes bya bas khyim mi nang las pa la spring pa/yi ge 'di mthong ma thag nyid du nga'i rigs rgyun gcod par byed pa nyid gsang ste khyim sgor brdegs shing gsad par byos la dong gi nang du chug ces so/ /de nas de bsod nams kyi mthus yongs su bskul bas des de bsal nas yi ge gzhan du bris te/bde legs su gyur cig /ji srid du yi ge 'di mthong ma thag tu nga'i yid la re ba rdzogs par byed pa'i rgyun du gyur pa/ shin tu yid du 'ong ba'i gzugs can khye'u de la nga'i bu mo de sbyin par bya ste/ dge ba'i tshogs rgyun mi chad pa yin pas de la byin cig /dus 'byor pa yang 'di nyid yin te/gang bdag med na yang khyed nyid kyis 'di la nan tan gyis shig ces nas rgyal po dang blon po la sogs pa thams cad kyis mngon sum du rgya cher thams cad byas so/ /tshong dpon yang phyi 'bred kyi dus su phyin te/ de'i gtam thos pa dang / khrag dron mo skyugs te shi'o/ / rgyal po chen po des kyang khye'u de tshong dpon gyi go 'phang la bzhag nas/ de'i 'og tu khyim gyi bde ba nyams su myong nas rab tu byung ste/ dge sbyong gi 'bras bu'i mchog thob par gyur to/ /bdag ni chos kyis yongs su bskyabs pa yin te/ bstan pa'i chos ni chos thams cad kyi rtsa ba yin pa'i phyir/de nyid du de lhag par chos kyis 'jig rten rjes su gzung bar byed 'dod pa'i blo skyes te/ bde bar gshegs pa thams cad kyi zhal nas gsungs pa'i tshigs bcad 'di dag bsdu ba byas so/ /de yang sangs rgyas bcom ldan 'das bzhugs pa nyid na yin te/ gzhan du na gang yang bdag gis bram ze'i tshoms bshad do zhes bya ba ni btsun pa dge 'dun bsrungs kyis bram ze'i tshoms bshad pa dang /dga' bo'i ma'i mdo las kyang ched du brjod pa pha rol du 'gro ba yin no/ /sde snod phran tshegs las kyang da ltar byung ba 'di nyid kyi rim pa brjod par snang ste/ dge slong dag 'di la chos shes par bya ba ni 'di lta ste mdo'i sde dang /dbyangs kyis bsnyad pa la sogs pa'i gsung rab mang po nyams pa thob par 'gyur ro/ /gal te bye brag tu smra ba'i gzhung dang 'gal lo zhe na/ des ni dgongs pa ma rtogs pa'i phyir ston pa 'das te gsung rab las btsun pa chos skyob kyis ched du brjod pa'i tshoms byas pa bzhin no zhes bya ba gang bye brag pas bshad pa 'di'i don ni ston pa 'das pa'i gsung rab de dang de dag las bsdus pa ni 'phags pa kA t+yA ya na'i bus ye shes la 'jug pa las bsdus pa bzhin du/sangs rgyas bcom ldan 'das bzhugs pa nyid na btsun pa chos skyob kyis ched du brjod pa'i tshoms yang dag par bsdus pa yin pa'i phyir ro//dri ba gsum pa'i lan bstan pa ni de bzhin gshegs pa'i gsung rab las nye bar bsdus pa yin te/ gang gi phyir bcom ldan 'das kyis sems can gyi 'jig rten ma lus pa la thugs brtse bas gdul ba dag gi bsam pa dang bag la nyal yongs su mkhyen pas de dang rjes su mthun par skye bo de dang de dag dang /gang zag de dang de dag gi dbang du mdzad nas tshigs bcad de dang de gsungs te/ de las kyang tshoms kyi rim pa 'di nyid du bsdus shing gzhag pa yin no/ /ci'i phyir zhes pa de'i lan ni bstan bcos kyi dgos pa nges par brjod dgos pa'i phyir te/gang du yang dgos pa dang bral ba la ni rtogs pa dang ldan pa dag 'jug par mi 'gyur te/ ji skad du bshad pa/ gang phyir bstan bcos thams cad dam/ /las kyang rung ste la la dag /ji srid dgos pa ma bstan pa/ /de ni de srid su zhig len//zhes pa'o/ /sgrub pa yang rnam pa gnyis te/ dad pa dang chos kyis rjes su 'brang ba'i dbye bas so/ /de la dad pas rjes su 'brang ba ni gzhan gyi dring la 'jog cing 'jug /rjod cig ces bstan na brjod par bya ba'i dgos pa la mi rtog pa nyid du 'jug par 'gyur te/chos kyis rjes su 'brang ba ni ma yin no/ /de ni gang gi phyir dgos pa brtags nas 'jug pa yin te/ don dang bcas pa dang don med pa mthong nas rtsom pa'i phyir ro/ /de bzhin du ci 'di la de'i dgos pa thabs dang mthun nam mi mthun zhes rtog pa'o/ /de la re zhig ston pa rnam pa gnyis bstan pa las/dang po'i dgos pa ni dngos po'i de bzhin nyid bstan pa'i phyir/ gdul bya dag la 'di skad gsungs te/ de yang de bzhin nyid rtogs pa'i phyir ro/ /gang gi phyir de bstan pa med par ni de bzhin nyid rtogs pa med de/ dam pa'i chos bstan pa'i lag pa sbyin pas skal ba ji lta ba bzhin du 'dren par mdzad pa'i phyir ro//de bzhin nyid rtogs pa yang mya ngan las 'das pa shes pa dang rnam par grol bar 'gyur zhes pa ste/ lung las de nyid shes pas nges par legs pa rtogs zhes pa'i tshig gis so/ /mya ngan las 'das pa yang dgos pa thams cad kyi mthar thug pa yin te/'bras bu'i mthar thug pa'i ngo bo yin pa'i phyir/ ji srid du bshad pa/ gang gi phyir dgos pa rgyud pa 'di ni mchog tu mthar thug pa ma yin no zhes pas so/ /brjod par bya ba ni phung po lnga dang 'dus ma byas gsum yin te/ 'di ltar kye ma 'du byed rnams mi rtag /ces bya ba 'dis ni phung po lnga bshad do/ /de dag nye bar zhi ba bde/ /zhes bya ba 'dis ni so sor brtags pa'i 'gog pa chos thams cad bdag med par mthong ba'i shes rab ste/ gang 'dis ni nam mkha' dang so sor ma brtags pa'i 'gog pa yang brjod do/ /de ltar bstan pa dang de ltar brjod pas ni brjod pa dang /brjod par bya ba'i mtshan nyid 'brel ba nyid du bstan pa yin no/ /sdud pa po'i dbang du byas nas dgos pa la sogs pa brjod par bya ste/ bde bar gshegs pa thams cad kyis gsungs pa las 'byung ba'i tshigs bcad kyi khyad par rnams la rigs mthun pa'i tshoms re rer nye bar bkod pa'i phyir ji ltar yang don 'dra ba dag mtshon par byed pa'i tshigs bcad kyi khyad par dag gcig tu bsdus she na/don 'di las brtsams pa ste/ ci'i phyir zhe na/ bde blag tu zin pa dang / sems pa la mi g.yeng ba dang / smad pa med pa dang / gsal bar bya ba la sogs pa'i phyir ro/ /skud pa la brgyus pa'i me tog dang / g.yos zin pa'i kha zas dang / mgar ba mkhas pas brdungs pa'i rgyan dang / rgyu rkyen tshogs pa'i mar me bzhin du ste go rims bzhin no/ /ji ltar skud pa la brgyus pa'i me tog ni bde bas blang ba dang longs spyad du rung ba yin te/de bzhin du tshigs su bcad pa tshoms su bkod pa yang ngo / /ji ltar yang g.yos su byas pa'i kha zas dag la ltos shing mngon par 'dod pas bltas na de g.yeng zhing 'khrug pa med par 'gyur te/ de bzhin du bstan pa dang po 'dra ba dag la 'dul ba'i skye bo sgrub pa dag gis tshigs bcad len pa na g.yeng ba med par 'gyur ro//bar chad med par 'bar ba'i mes zas bsgrub cing rgyun mi 'chad pa 'dis glang po che ma rung pa 'dul ba yin no/ /bar ma chad par gtsub shing gis gtsubs na ni me 'byung ste/ de nyid kyis na rtag par 'dzin pa'i gdul bya dag gi don du mi rtag pa'i tshoms bkod pa yin no//'dod pa dag la bde bar 'dzin cing sbyor ba dang ldan pa la ni 'dod pa'i tshoms la stsogs pa yin no/ /ji ltar yang bzo bo mkhas pas brdungs pa'i rgyan la ni dam pa rnams kyis bsngags pa yin te/ de bzhin du skye bo mkhas pa dag gis yang dag par bsdus pa'i bstan pa yang ngo //ji ltar yang rgyu rkyen tshogs pa'i mar me ni shin tu 'bar ba yin te/ de bzhin du nye bar sbyar te bstan pa'i dbang gis blo'i kha 'byed par 'gyur ro/ /de ltar rim pa 'dis blo dag par gyur na ni spang bar bya ba spong ba dang / blang bar bya ba len cing / des na bya ba byas par 'gyur te/ lhag ma ni snga ma bzhin no/ /brjod par bya ba ni tshigs bcad kyi tshoms nye bar bkod pa yin te/ brjod pa dang brjod par bya ba'i mtshan nyid kyis 'brel pa yang yin no/ /yang dag par phye ba dang / brjod pa de med par mi bshad pa gsal bar mi 'gyur te/ji skad du bshad pa/ ji ltar lus 'di ma g.yogs kyang / /mgo ni rab tu g.yogs pa'i mis/ /rab tu gsal bar mi 'gyur ba/ /de bzhin bstan bcos phye spang ba'o/ /ji ltar lus la gos gyon kyang / /gdong ni bkab pa ma byas mi/ /shin tu gsal bar 'gyur ba ste//de bzhin bstan bcos phye ldan pa'o/ /mtshan mo mar me med pa yi/ /khyim na dka' bas sten par byed/ /de bzhin brjod bya med pas ni/ /bstan bcos dka' bas bsten par 'gyur/ /zhes so/ /de ste ci'i phyir dang por mi rtag pa'i tshoms bkod pa zhes bya ba la stsogs pa tshoms kyi go rims kyi rgyu brjod par bya'o//dge ba'i rtsa ba thams cad bsags pa la spro ba'i rgyu nyid kyi phyir dang / de las mi rtag pa'i 'du shes skye pa'i phyir mi rtag pa bstan te/ de la rag lus pa'i phyir ro/ /'di ltar rtag par 'dzin pa sngon du 'gro bas ni bdag tu lta'o/ /de'i rgyus ni nyon mongs pa thams cad 'byung ngo //nyon mongs pa'i rgyus ni mi dge ba thams cad 'byung ngo / /de las ni sdug bsngal gyi dra ba thams cad rab tu 'phel lo/ /gang gi tshe yang mi rtag pa bstan pa/ kun tu mnyan pa de'i tshe mi rtag pa'i 'du shes skye bar 'gyur ro/ /de las ni bdag med pa mthong bar 'gyur ro//de las ni 'dod chags la sogs pa kun tu mi spyod cing dge ba stsogs par 'gyur ro/ /de las ni bde ba skye bar 'gyur ba yin pa'i phyir dang por mi rtag pa'i tshoms bkod de/ de la sogs pa gzhan yang skabs ji lta ba bzhin du brjod par bya'o/ /dang por brjod par bya ba 'di dag ma lus par bstan nas da ni tshig gi rnam par dbye ba bshad do//de la ched du brjod pa dgod pa la skabs ma yin pa brjod pa mi rigs so zhe na/ de ni skabs nyid du 'phags pa chos skyob kyis bkod pa'i tshigs bcad gnyis yin te/ dang por de dgrol bar 'dod nas smras pa/rnam sol la zhes bya ba la sogs pa smos so/ /phun sum tshogs pa thams cad kyi rtsa ba ni chos mnyan pa yin pa'i phyir/ de'i thabs kyang dor bar bya ba dang blang bar bya ba spang zhing blang ba'i tshul yin te/ thabs des chos mnyan pa la 'jug par bya ba'i phyir dang po'i tshigs bcad bstan to zhes bya ba ni 'di'i bsdus pa'i don to//tshig gi don bshad par bya ste/ rnam sol la zhes bya ba ni rnam par bsal bar bya ste/ gnyen pos bsal ba dang / dor ba dang / spang ba nyid de rgyud las ring du tha dad par byas pa zhes bya ba'i don te/ snang ba'i 'du shes kyis gnyid dang rmugs pa sel bar 'gyur ro zhes gsungs pas so//'o na bkra shis pa la sogs pa ni bstan bcos dag la gsal bar grags pa yin te/ de bas na dam pa rnams kyi spyod pa bstan pa'i phyir dang por bkra shis pa'i tshig brjod par bya ba yin na/ rnam sol la zhes bya ba'i tshig 'di ni yongs su spang ba'i rnam grangs yin te/de ni bstan bcos yongs su spongs shig ces mtshon par 'gyur ro zhe na/ smras pa/ 'di ni nyes pa med de/ sangs rgyas kyi gsung la ni spong ba gtso bo nyid kyi phyir don gtso bor bya ba yin pas de nyid la bkra shis pa'i tshig ces bya ba nyes pa med de/de'i phyir 'di ltar chos mnyan pa'i ched du ma dad pa spong ba ni bkra shis pa'o/ /rab tu byung bas khyim na mi gnas shing mthong ba'i lam gyi mthong bas spang bar bya ba'i phra rgyas dang / bsgom pa'i lam gyi zag pa dang bcas pa thams cad dang / phung po lhag ma med pa'i mya ngan las 'das pa'i dbyings su phyin pa ni 'dus byas thams cad yongs su gtong ba la yang shin tu bkra shis pa'o//gang gi phyir spang bas ni sdug bsngal thams cad 'joms par byed do zhes shes te/ de yang smras pa/ gzhan dbang ji snyed yod pa dag /de ni sdug bsngal bkra mi shis/ /gang gis yongs su spangs pa de//de ni rab tu bkra shis 'dod/ /ces so/ /ji zhig bsal zhe na/ smras pa/ gnyid dang rmugs pa zhes bya ba'o/ /gnyid dang rmugs pa ni gnyid rmugs so/ /zlas dbye ba thams cad la pa ri b+hA Sha las gcig tu bsdus pas byas so zhes smos pas cho gas gcig tu byas so/ /gang gis bsgoms na sems dang sems las byung ba rmugs par 'gyur ba dang blun par 'gyur ba ste/dge ba byed pa la sbyor mi bzod par 'gyur ba de ni shin tu sbyangs pa'i mi mthun pa'i phyogs sems las byung ba rmugs pa ste/ sems blun par byed ces pa'i don to/ /gang gis rnam par shes pa yang 'gag par byed pa dang /lus kyi gzungs kyi rlung de ni sems las byung ba gnyid ces bya ba'i don te/ 'dis ni chos mnyan pa'i bgegs su gyur pa gtsor bstan te mthong bar bya ba la mun pa lta bu'o/ /rmugs pa ni nyon mongs pa'i sa chen po ba yin pa'i phyir gcig tu nyon mongs pa nyid yin te/des na 'dir bgegs su rigs bzung ba'i phyir te/ der 'dir de ni bgegs su rigs pa yin no/ /gnyid kyang bgegs nyid yin no/ /de ni yid kyi sa pa yin pa'i phyir gcig tu nyon mongs pa ni ma yin te/ lung las gnyid ni dge ba dang mi dge bar lung du ma bstan pas so//rna ba'i rnam par shes pas bstan pa gzung ba la'o/ /dang gi sgra ni ma dad pa la sogs pa yongs su gzung ba'i phyir te/ de dag kyang chos mnyan pa'i mi mthun pa'i phyogs so/ /de yang ji skad du/ ma dad med pa'i sems dang ni/ /sdang ba'am 'khrug pa med pa yis/ /dam chos shes par nus pa yin//zhes gsungs so/ /gzhan dag ni lhag ma dgag pa yongs su gzung ba'i phyir ro zhes ston te/ gang gi phyir 'dod pa las 'dun pa la sogs pa de yang bgegs nyid yin te/ chos mnyan pa mchog tu 'dzin pas shin tu spang bar bya'o/ /spang bar bya ba bstan nas/ blang bar bya ba bshad pa/ dga' ba bskyed de zhes bya ba la sogs pa smos te tshim pa dang / yid bde ba khyad par du sbyar bar bya'o zhes pa'i don to/ /dga' bar gyur na ni mnyan pa legs par nyan par 'gyur te/ nad pa la sman pa chen pos lung phog pa bzhin no/ /yang gi sgra ni chos mnyan pa'i yan lag lhag ma gzung ba'i phyir te/ji skad du rnam pa bcu drug gis chos mnyan par bya'o zhes rgya cher mdo las gsungs pa'o/ /gzhan du yang gsungs pa/ don du gnyer ba dang / 'tshe ba med pa dang / brtan pa dang / g.yeng ba med pa dang / mi smod pa dang / tshig dang ngag gi nus pas mi brnyas pa dang /shes pas nga rgyal med pa dang / dran pa ma nyams pa dang / bdag la phan par 'dod pas rna blags te nyan pa dang / dpyod par nus pa dang / gus pa dang / mchod pa byed pa ni chos rnam par dbye ba nyan par 'os pa yin no zhes so/ /gzhan dag ni yang gi sgra gnyis smos pa tha dad par bsgrub dgos pas 'dir gnyis bstan pa yin te/'di ltar gnyid dang rmugs pa bstsal nas yang yid dga' ba mi 'byung ba yod de gang gi phyir yid skyo bar gyur pas gnyid dang rmugs pa med kyang dga' ba med pa dang / yid dga' bar gyur na yang nges par rmugs pa dang gnyid dang bral ba ma yin pa/nyon mongs pa la dga' ba yang 'byung ba'i phyir gnyi gar yang rang las ltos pa nyid kyis brjod par bya ste/ ji ltar me tog dang 'bras bu gnyis khyer te shog ces byas na gnyi ga khyer te 'ong gi gcig khyer te shog ces byas na gnyis khyer te mi 'ong ba de bzhin no/ /ci zhig dga' ba yin zhe na/yid ces bya ba ste/ yid nyid yin pas yid de rang gi don nyid la 'phel bar bya bas sems zhes bya ba'i don to/ /yang gsungs pa/ mnyan bya'i chos la sa dang ni/ /ngan song gsum gyi rgyur gyur pa/ /gnyid dang rmugs gang bstsal nas ni/ /yid kyis legs par yid la bya//yid la yang dag dga' byas shing / /chos smra dag la gus byas te/ /tshig ni legs par go byas nas/ /mchog tu zhi ba'i rnam par gyis/ /zhes so/ /rnam pa gnyis po de byas nas ji zhig bsgrub ce na/ smras pa/ nyon zhes bya ba yin te rna gtod par gyis shig pa ste rna ba'i rnam par shes pa'i yul du gyis shig pa'i don to//sus smras she na/ bdag gis zhes bya ba 'phags pa chos skyob bdag nyid nye bar ston to/ /rab tu bshad par byas zhes bya ba ni dus phyi mar brjod par bya'o zhes bya ba yin te/ rab tu zhes bya ba'i sgra las dus phyi nas byed pa yin pa'i phyir tsha bo lta bu ste/ bu las dus phyis 'byung ba'i phyir ro//'dir yang bcom ldan 'das kyis bstan pa'i phyi nas bdag gis bshad par bya'o zhes pa ste/ 'dis ni sangs rgyas kyis gsungs pa nyid du mtshon pa yin no/ /de gang yin zhe na/ smras pa/ ched du brjod pa zhes bya ba yin te/ gtan dam pa zhes bya ba'i don to/ /ji skad du gsungs pa/ched du brjod pa mchog tu rnam par 'ong ba dang / yid mgu bar byed pa'i gtam bstan par byed ces bya ba'i don to/ /yang ched du brjod pa zhes bya ba ni gtam gyi rnam grangs yin pa'i phyir te/ ji skad du bshad pa/ ched du brjod pa yang zhes bya ba ni gtam des kyang zhes bya ba'i don to//ched du brjod pa'am ched du brjod pa dag ces bya ba'i sgra ni gnyi ga yang 'gal ba med de rtags gnyi ga la brten pa'i sbyor ba snang ba'i phyir ro/ /'dir yang tshigs bcad kyi khyad par spyir bstan pa yin pas ched du brjod pa dag ces bya'o/ /sangs rgyas kyis gsungs pa'i yan lag bcu gnyis las 'di ni yan lag gcig yin te/ji skad du bshad pa/ dge slong dag 'di la chos shes par gyis shig /'di lta ste/ mdo'i sde zhes bya ba ni kun rdzob dang don dam pa'i bden pa rgya che ba dag dang mthun par bstan pa'i tshig dag las tshig rkyang pas snying po'i don mdor bsdus pa ni mdo'i sde yin te/'di lta ste gang zag gcig 'jig rten du skye ba'o/ /'du byed thams cad ni mi rtag pa'o/ /chos thams cad ni bdag med pa'o/ /mya ngan las 'das pa ni zhi ba'o zhes go rims bzhin du dper brjod pa'o/ /dbyangs kyis bsnyad pa'i sde ni mdo'i don gyi rjes su yang dag par brjod cing lhag par tshigs su bcad pa dang ldan pa yin te/'di ltar nor ni bdun yin no zhes mdor bstan nas gsungs pa/ dad dang tshul khrims nor dang ni/ /ngo tsha khrel yod las skyes nor/ /thos dang gtong ba'i nor dag dang / /shes rab nor ni bdun pa yin//skyes pa'am yang na bud med kyang / /gang la nor ni yod gyur pa/ /de ni phongs pa ma yin zhing / /de yi 'tsho ba don yod yin/ /zhes pa'o/ /gzhan gyis dris par gyur na tshig kyang rjes su bstan pa las byung ba dang 'byung bar 'gyur ba dang / de ltar rjes su bstan pa ni lung du bstan pa ste/'di lta ste dper na lung du bstan pa rnam pa bzhi po mgo gcig tu lung du bstan pa la sogs pa'o/ /de yang / tshul ni ji srid rgal na bzang / /'das pa'i dus na rnam par gzigs/ /zhes bya ba'i de bzhin gshegs pa byung ba dang / ma 'ongs pa na ni byams pa zhes bya ba dang /da ltar gyi kun dga' bo song la dge slong 'di'i gnas mal chen po shoms la me tog dang / bdug pa dang / lda ldi la sogs pas brgyan par gyis shig /gang gi phyir de ni 'di nyid kyi nub mo la dgra bcom pa thob par 'gyur ro zhes pa'i rim pas bstan pa yin no/ /snga ma dang 'brel pa las bstod pa'i tshig gi sbyor ba dang ldan pa ni tshigs su bcad pa ste/'di ltar gsal rgyal gyi tshigs su bcad pa dang / brag gu'i tshigs su bcad pa la sogs pa ste/ rkang pa gsum dang / bzhi dang / lnga dang / drug gi rnam pas bstan pa'o/ /gang zag la la dag bstan pa la gnas pa kho na'i phyir kun du bstan pa dang dga' ba dang spro ba la ltos nas rab tu bstan pa ni ched du brjod pa ste/dper na glang po 'di'i glang po zhes bya ba la sogs pa lta bu'o/ /mngon par brjod pa'i gnas skabs kyi tshig ni gleng gzhi ste gzhi 'di dang 'brel pa zhes bya ba'i don no/ /de yang phal cher 'dul ba dang rjes su 'brel pa dang /de'i gleng gzhir rab tu 'byung ba'i phyir ro/ /don gzhan rtogs pa'i phyir gzhan gyi spyod pa bstan cing dpe rgya cher brjod pa dag ni rtogs pa brjod pa ste/ dper na pra ya na dang / ring po len dang / ma ga d+hA bzang mo'i rtogs pa brjod pa lta bu dag go/ /phan tshun brgyud de 'ongs nas bshad pa'i skyes bu'i gtam ni de lta bu 'byung ba ste/'di ltar bu mo bdun gyi rtogs pa brjod pa la sogs pa lta bu'o/ /byang chub sems dpa'i sngon gyi skyes bu kun du brjod pa ni skyes pa'i rabs te/ 'di lta ste/ thams cad sgrol dang dred dang ri dwags la sogs pa'i skyes pa'i rabs so//chos kyi gtam gyi dbye ba dang ldan pa rgya cher bstan pa ni shin tu rgyas pa ste/ 'di ltar lnga dang / gsum dang / sgyu ma dang / dra ba dang / 'khor lo dang / dri ba drug dang / khams kyi dbye ba dag go/ /dkon mchog gsum gyi lhag pa'i khyad par gsal bar byed pa ni rmad du byung ba'i chos te 'jig rten na rab tu mi spyod pa yongs su rdzogs pa ste/'di lta ste/ rmad du byung ba 'dus pa la sogs pa'o/ /mdo la sogs pa rnams kyi don rnam par 'grel cing ming gi lan brjod pa nye bar ston pa ni gtan la bab par bstan pa ste/ 'di lta ste/ 'jig rten pa'i chos kyi mchog gang gis 'di brjod ces bya ba la sogs pa'o//des na de nyid kyi phyir 'di ni gsung rab thams cad kyi gnas su gyur pa'i phyir bu'i ma lta bu yin pas ma mo zhes brjod do/ /chos kyi mtshan nyid mngon sum du gyur pa'i phyir dang / phyin ci ma log pa'i chos gsal bar byed pa'i phyir na mngon pa'i chos so//gsung rab kyi tshig bcu gnyis mngon par bsdu na ni sde snod gsum zhes brjod do/ /bstan pa shas che ba'i phyir de las gzhan pa'i gsung rab kyi tshig gi yan lag dang 'dres na yang ched du brjod pa zhes bya ba'i ming du mi rung ba nyid ma yin te/ mon sran gre'u la sogs pa dang 'bru'i tshogs 'dres na yang ming brjod pa de bzhin no//'dir brjod par bya ba ni gang zhig yin/ gang gis ni 'di gsungs shing gang gis mnyan par bya ba'i phyir/ 'di skad du bshad pa yin zhe na/ bshad pa rgyal bas gsungs pa zhes bya ba 'di lta ste/ sangs rgyas thams cad kyis gsungs pa'o//bdud bzhi las rnam par rgyal bas rgyal ba ste/ bde bar gshegs pa rgyal bas gsungs pa ni gsum pa'i bsdu ba'o/ /rgyal bas ched du brjod pa dag ces kha cig tu brjod do/ /mang po'i tshig dang gcig gi tshig tu brjod pa tha dad pa gnyi ga la yang 'dir nyes pa med do//'o na nyan thos kyis bshad pa yang 'di na yod de/ gang gi tshul gyis bsdus pa la sogs pa ste/ 'phags pa lan tshwa bzang pos bshad pa dang / so so'i skye bos bshad pa yang yod de/ gser gyi ri bos zhes bya ba la sogs pa nga las nus bshad pa'i phyir te/ de ji lta bu gcig tu rgyal bas gsungs she na/smras pa/ sngon sangs rgyas kyis bshad pa'i phyir te/ 'di ltar drug cu pa'i bdag po rgyal mo'i tshigs su bcad pa sngar sangs rgyas kyis gsungs pa 'di yang gnod sbyin dbyig gi mig dang / klu'i rgyal po e la'i 'dab gnyis kyis phud pa lta bu'o/ / tshig dang yi ge la sogs pa ji lta bus 'di bkod cing bstan pa dang / rgyal ba yang ji lta bu yin pa de smras pa/ thams cad mkhyen pa ston pa po/ /zhes bya ba la sogs pa ste/ ched du brjod pa'i tshoms 'di zhes bya ba ni tshig gi lhag ma'o/ /rtags gnyi ga yin pa'i phyir 'di ni ched du brjod pa'am ched du brjod pa dag ces bya ba ni 'gal ba med par sngar bstan to//mi lhag par dang mi nyung ba'i yi ge la sogs pa bkod pas ji ltar ston pas bstan pa de bzhin du phyin ci ma log par rab tu bshad par bya'o zhes pa'i don to/ /gsungs pa ni bstan pa dang bshad pa'i bar du'o/ /'dis ni bcom ldan 'das rtag tu mnyam par gzhag pa'i phyir skye dgu dag la nye bar gnas pa tsam gyis res 'ga' mi ston cing yid bzhin gyi nor bu bzhin du ston pa yin te/ji ltar rtsig pa la sogs pa las ston pa yin no zhes rgol ba 'dis gsal te/ tshig ni phyi'i sdug bsngal nyid sa bon yin pa'i phyir dang /mnyam par gzhag pa yang sems nang du bltas pa yang yin te/ rang gi sa bon spangs pa ste/ med pa'am sa bon gzhan las 'bras bu skye bar mi 'dod do zhe na/ rnam par rig byed kyang mnyam par gzhag pa'i sems kyis 'bras bu mngon sum gyis rjes su myong ba yin pa'i phyir me'i 'bras bu du ba bzhin du de la gang na yang 'khrul pa med do//nyes pa rnam pa drug gi dngos po dang ldan na ni phyin ci ma log pa'i don bshad par nus pa mi srid de/ 'di lta ste kun nas nyon mongs pa dang ldan pa dang / ci yang mi shes pa dang / le lo dang / snying rje med pa dang /mi brtan pa dang / dus kyi mtha' ring bar 'dod pa yin te/ 'di ltar kun nas nyon mongs pa dang ldan pa las ni gang la rjes su chags pas bu la sogs pa de nyid la ni phyin ci ma log par ston la/ gang dag la ni mi ston pa'o/ /'dod chags dang bral ba yin na yang gang shes pa de nyid kyis ni bstan par bya'i/gang mi shes pa des ni ji ltar bstan par bya ste/ 'phags pa maud gal gyi bu chen po'i slob ma gnyis ji ltar phyin ci log tu bstan pa'i dpe 'dir brjod do/ /spro ba med pas ni gang du rjes su ma chags shing shes par gyur na yang des bstan par mi nus so/ / snying rje med pa'i phyir spro ba la sogs pa dang ldan yang ji srid du 'di dag rmongs pa de srid du mchog yin no zhes 'di dag la ston par mi byed do/ /mi bstan pas ni bstan pa la zhugs par byas pa'i 'og tu phyed tsam mi bstan nas lhag ma gzhan dag tu 'jug pa'o/ /dus ring ba ni dus mang por bdag 'di nyid du gnas pas gzhan bstan par bya'o zhes smra zhing de bzhin nyid mi ston pa ste/de bzhin nyid ston pa'i bar chad ni drug po 'di dag go/ /bcom ldan 'das la ni 'di dag mi mnga' ste/ des na gang des gsungs pa ma lus shing phyin ci ma log par zhes bya ba yin no/ /de nyid kyang 'jig rten na ston pa'i gtso bo yin no zhes tshigs bcad 'di'i don gyis bstan pa'o//bdag gis ched du brjod pa'i rnam pa 'di gsungs she na/ smras pa/ bcom ldan 'das kyis zhes bya ba la sogs pa 'di lta ste/ sngar bstan pa'i nyes pa de dag rgyal ba la mi mnga' bar ston to/ / nyon mongs pa bcom pa dang ldan pas bcom ldan 'das te/ ji skad du gsungs pa/ 'dod chags de bzhin zhe sdang dang / /gti mug bcom pa'i 'dren pa ste/ /sdig pa bcom pa gang yin pa/ /de ni bcom ldan 'di yin no/ /zhes pa ste/ 'dis ni spangs pa phun sum tshogs pa bstan to/ /de yang bag chags dang bag la nyal rtsa nas spangs pa yin te/'di la nyon mongs pa zad pa med pa'o/ /bla ma la sogs pa la brtan pas nyon mongs pa bstsal ba yin te/ ji srid 'tsho'i bar du rab tu byung ba yongs su bsrung bar mthong ba'i phyir te/ gang dag la yang thabs gang gis dus nyung zad la kun du spyod pa ma yin pa med de gtan du kun du spyod pa yang de rnams la yang dag par 'byung ba ni mar me lta bu ste/gang gi phyir mar me ni dus ji ltar du rtsig pa dang snam bu dang lo ma la sogs pas de ltar bstsal na mi nus te/ ji ltar bar chad can dag la ni mngon par mi gsal ba yin no/ /de yang gtan du bral bar grub ste/'di ltar 'dod chags la sogs pa dang gtan du bral bar grub pa yin na/ gzhan ngan song du skye ba la sogs pa 'di dag ni nges par mi 'byung ngo / /de yang gnyen po dang bcas pa'i phyogs yin pa'i phyir sa bon bzhin te/ 'di ltar myu gu skye bar nus pa'i sa bon mi mthun pa'i phyogs mes tshig par gyur na thal bar 'gyur zhing nyams so//de bzhin du 'khor ba'i myu gu 'byung zhing skye bar nus pa 'jig tshogs la lta ba sngon du 'gro ba'i 'dod chags la sogs pa'i nyon mongs pa dag bdag med pa mthong ba dang 'brel par gyur na rtsa ba dang bcas par 'gyur te/de yang gsungs pa/ phyin ci log gis 'khor ba ni/ /rlung gis sprin gyi tshogs bzhin du/ /'khor bar 'gyur te mi rtag blos/ /de las log na de las grol/ /zhes so/ /so so'i skye bo'i sems dri ma dang bcas pa yang gser la sogs pa bzhin du dag par 'gyur te/ 'di ltar gser dang gos dang khar snod la sogs pa dri ma dang ldan pa rnams ni me dang chu dang thal ba la sogs pas yongs su dag par 'gyur ro//de bzhin du so so'i skye bo'i sems kyang rjes su mthun pa'i gnyen pos sems dri ma med pa ste/ nyon mongs pa nyid kyi'o/ /gal te de ni mi 'grub po zhe na/tshad mas grub pa'i phyir rtsod pa med de gang gi phyir de la re zhig rang gi rgyud la ni mngon sum gyis grub pa yin te/ rang rig pa'i phyir sems bzhin no/ /gzhan gyi rgyud la yang rjes su dpag par grub pa yin no/ /de'i 'bras bu mthong ba'i phyir me bzhin no/ /gang gi phyir de rnams kyi nang gi rab tu grub pa ni lus la sogs pa'i nyes par spyod pa'i mtshan nyid kyi 'bras bu snang ba yin la/nyon mongs pa med pa rnams la ni de med pa'i phyir te/ yang smras pa/ 'dod chags sogs 'bras mngon sum gyis/ /bdag dang gzhan la brtag pa ni/ /rtags dang rtags can du ba las/ /lkog tu gyur pa me bzhin gnas//zhes so/ /'dir thams cad du yang lung yin te/ sems can rnams ni ma rig pas bsgribs pas srid pa yang dag par sbyor ba yin te/ sred pas skyes bu skye bar 'gyur ro/ /'ching ba ni gsum ste/ 'dod chags ni 'ching ba'o/ /bcings pa nyid kyis 'ching ba'o/ / bcings pa nyid kyis 'jig rten 'di nas pha rol du 'gro ba'o zhes bya ba la sogs pa'o/ /sems kyi khyad par 'di nyid ni 'dod chags la sogs pa nyid yin no zhes shes par mi rung ste/ 'dod chags dang bcas pa'i sems la 'dod chags dang bcas pa'i sems so zhes yang dag pa ji lta ba bzhin du shes so zhes mdo gzhan dag las gsungs pa'i phyir sems dang sems lhan cig skye ba ni mi rung ste/sems can gyi sems kyi rgyud re res 'jug ste/ gnyis pa ni de ma thag pa'i rkyen med pa'i phyir ro zhes bya ba la sogs pa'i lung las bstan pa'i phyir ro/ /bdag nyid kyis 'di rjes su myong ngo zhes dran pa dang ngo zhes pa la sogs pa nyams par thal bar 'gyur ro//lha sbyin gyis rjes su myong na mchod sbyin gyis yang dag par dran pa la sogs pa ni tshogs pa dang mi ldan pa'i phyir ro/ /gzhung mangs kyis dogs pa'i phyir bcom ldan 'das kyis gsungs pa zhes bya ba ni yang mi bshad de gzhag go//thams cad mkhyen pa zhes bya ba ni thams cad lus pa med pa mngon sum du gnas pa bzhin du gsal bar mkhyen pa'i phyir thams cad mkhyen pa ste/ dus gsum dang 'dus ma byas gsum ji lta ba bzhin du rig ces bya ba'i don to/ / des na 'dis ni ye shes phun sum tshogs pa bstan to/ /thams cad mkhyen pa nyid kyang rigs pa dang lung gis grub pa yin te/ de la lung ni dge slong dag da ni thams cad mkhyen pa'o/ /thams cad gzigs pa ste/ de bzhin gshegs pa rnams la mi mkhyen pa'am mi gzigs pa'am/ mi rig pa'am rnam par mi mkhyen pa mi mnga'o//gang gi phyir sangs rgyas kyis ni 'das pa yang gzigs so/ /de bzhin du ma 'ongs pa dang da ltar byung ba yang gzigs so/ /des na 'dus byas rnams 'jig pa'i chos can du gzigs so zhes bya ba la sogs pa'o/ /rigs pa'ang rang dang 'brel pa med pa rnam par bzlog cing rgyas pa ste/ye shes gnyen po dang bcas pa yin pa'i phyir me bzhin no/ /de ni bud shing med pa'i phyir rnam par log pa yin la/ de bzhin du ye shes kyang shes bya med pa'i phyir ro/ /'on kyang ji srid du phyogs sgrib g.yogs dang bcas pa ni mun pas khyab pa yin te/de srid du snang bas khyab pa med do/ /de bzhin du srog chags ma lus pa'i dngos po gti mug gis khyab pa yin la de yang ye shes kyi rgyud gcig la gnas pas khyab par byed pa yin te/ dngos po ma lus pa la khyab par byed pa'i ye shes gang la yod pa de ni thams cad mkhyen pa'o//dri ma ma lus dang bral ba'i mig gis lta bar 'dod par 'gyur la/ yul dag la bar chad med pa'i phyir dngos po ma lus pa'i yul du gyur pa'i ye shes rang bzhin gyis grub pa yin no/ /ye shes kyi rab tu dang lhag par gyi rim pa'i dbye bas 'phel bar snang ba'i phyir yang thams cad mkhyen pas rig pa yin no//dngos po 'phel ba yod na de dang rjes su mthun pa'i tshogs 'byung ba yin pas las kyang shin tu mthar thug pa thob pa yin te me bzhin no/ /gang gi phyir de ni lhag par shas che bar gyur na srid pa gsum zad par byed par 'gyur ba'i skabs yod de 'jig pa'i skal ba na'o/ /de bzhin du ye shes kyang dngos po ma lus pa'i don rtogs nus pa'i gnas skabs thob pa yang rig pa nyid do//thams cad mkhyen pa nyid grub pa yin na de lta na ni ser skya dang rkang mig can la sogs pa yang thams cad mkhyen par thal bar 'gyur ro zhe na/ de ni nges par thams cad mkhyen pa ma yin te/ bdag dang bdag gir byed pa ma spangs pas so/ /de ni 'dod chags la sogs pa skye ba'i rtsa ba yin te/ gang gi phyir dngos po ji lta ba bzhin du shes par ma gyur pa'i phyir kun du rmongs pa yin te/ de las ni bdag tu 'dzin pa 'byung ngo / /de las ni bdag gir 'dzin pa 'byung la/ de las bdag la sogs par sred pa 'byung ngo //de dang rjes su mi mthun pa las ni zhe sdang 'byung la/ de las ni nga rgyal la sogs pa'o/ /bdag tu lta ba rnams kyis ni 'jig tshogs la lta ba la sogs pa spangs pa ma yin te/ nyon mongs pas sems dri ma can du byas pa la ni thams cad du thogs pa med pa'i ye shes de ga la zhig yod pas so//shes pa ni yul mtha' dag med pa yin no zhes rnal 'byor spyod pa dag smra ste/ de ni 'di ltar bab col yin te/ gang lhag par bsod nams dang ye shes kyi tshogs bsags pa'i phyir 'bras bu khyad par can de yang yang dag par 'thob pa yin te/ thub pa mchog gis ni shing dang bong par mnyam pa nyid du rnam par gnas par bstan to//'dir yang smras pa/ bdag ni ya mtshan can mi bsten/ /thams cad mkhyen pa skyabs su 'gro/ /gang zhig cung zad mi shes nyid/ /thams cad mkhyen pa ji ltar 'thob/ /'dod chags la sogs pa'i gnyen po'i dngos po btang snyoms pa'i bab col dang 'dra bar 'gyur te/de'i yang bag la nyal ni spangs par nges pa yin pas gang du zhes bya ba la sogs pas nges par bya ba yin te/ rgyal ba 'di'i thugs kyis de bzhin nyid ma lus pa'i yul du gyur pa thams cad la ston zhing khyad par du bstan pa yin no/ /gal te ma yin na ni sems can la phan pa'i thabs nges par rab tu gsungs pa/ji ltar de lta bu yin te/ legs par spyod pa bsags pa'i tshul nges par don med par 'gyur ro/ /de grub na phyi rol gyi don yang grub pa yin te/ de bas na khyod kyi phyogs nges par nyams par 'gyur ro/ /skyob pa po zhes bya ba ni gdul ba'i rgyud yongs su bsrung bas sems can la phan 'dogs pa mchog tu byed ces bya ba'i don te/ji skad du gsungs pa nyin lan gsum mtshan lan gsum du sangs rgyas kyi spyan gyis 'jig rten la gzigs te/ rgya mtsho chu srin rnams kyi gnas/ /dus rlabs yol bar 'gyur yang srid//ces bya ba la sogs pa'o/ /dam pa dag ni nam yang gzhan gyi don yongs su mi gtong ba yin te/ ji skad du gsungs pa/ ji ltar snang byed nyi ma dub med rta yis 'khor/ /rtag tu 'jig rten khur 'dzin sa ni skyo ba med/ /bdag nyid chen po rang don cung zad med ngang gis/ / 'jig rten gzhan phan dag la 'di ltar gcig tu dga'/ /gzhan la phan phyir 'brel bas brtson byed ral gyi yi/ /nags tshal nyid du'ang dam pa rnams ni bde gnas kyi/ /skad cig tsam yang lha yi bu mor 'grogs pa dang / /dga' ba'i tshal dag tu yang dga' ba ma yin no/ /thugs brtse ba zhes bya ba ni gzhan gyi sdug bsngal gzigs pa'i de ma thag nyid na rang gi bde ba las g.yos pa dang /gnod pa dang zhig par 'gyur ba ni thugs brtse ba ste/ de yang thugs rje chen po rnams zhes bya ba'i don te/ 'dis ni gzhan gyi don mdzad pa la mngon par brtson pa'i rgyu bstan te/ gang gi phyir thugs rje chen pos drangs ni de bzhin gshegs pa rnams gzhan gyi don la mi g.yel bar 'gyur te/ji skad du gsungs pa/ thugs rje 'dod bzhos tshol bas mi skyo ba/ /thams cad mkhyen pa'i rgyud la gnas pa yin/ /zhes rgya cher gsungs pa dang / zhi zhing dben pa las ni grong nang byon/ /zhes bya ba la sogs pa'o//thub pa zhes bya ba ni lus la sogs pa'i las nye bar zhi zhing g.yo spangs pa ni 'jig rten na thub pa zhes rab tu grags so/ /'dir yang thub pa ni g.yo sgyu las ldog pa dang / mi brtan pa med cing nye bar zhi ba ni sangs rgyas yin no zhes bya ba'i bar du ste/ mi brtan pa la dge ba med//yon tan brtan la gnas pa'o/ /zhes pa'i tshig gis ni gzhan gyi don la mchog tu brtan pas bsgos pa yin no zhes mtshon pa yin no/ /sku yi tha ma 'dzin pa'i tshe/ /zhes bya ba la/ mi rtag pas 'jig pa ni lus te/ bdag gi dngos po zhes bya ba'i don te/ /tha ma ni phyi ma ste gang gi 'og tu bdag srid pa gzhan dang mi 'brel ba'o//sku yang yin la tha ma yang yin pas sku tha ma'o/ /de gang 'chang ba de ni/ sku yi tha ma 'dzin pa'o/ /des na tha ma la gnas pa/ /zhes bya ba'i don to/ /'dis ni thub pa mi sdod par gzhan la phan 'dod pa'i rgyu nyid du bstan to/ /da 'dir ni dpyad par bya ste/bcom ldan 'das sku'i tha ma spangs te yongs su mya ngan las 'da' 'am zhe na/ 'dir smras pa/ yongs su mya ngan las 'da'o zhes nges par bya ba yin te/ rigs pa dang lung las shes pa'i phyir ro/ /de la lung ni bad s+ya'i mdo las ji skad du gsungs pa/ la la zhig nga'i gan du lhags te/kye gau ta ma nges par mya ngan las 'da' 'am mi 'da' zhes 'dri ba na/ de la ngas dri ba nyid kyis lung bstan te/ gang nga'i mdun du me 'bar ba dang ldan pa gang dang gang nyid rtswa dang shing la sogs pa la brten nas 'bar bar gyur ba de tha mar gzhan gyis ma bsnan na yongs su zad pa ltar len pa med pas mya ngan las 'da' bar 'gyur te/de sngon gyi gnas su 'gro bar 'gyur zhing phyir mi 'ong ba yin pa'i bar dang / de bzhin du bad s+ya tshul gang gis de bzhin gshegs pa btsas pa dang bcas par gyur pa'i tshul des de bzhin gshegs pa zad par 'gyur ba yin te/ ji srid rnam par shes pa rgyun du skye ba med pa'i chos la de snga ma'i gnas su 'gro ba yin no zhes rgya cher gsungs so//rigs pa ni gang gis rgyun 'jug pa de re zhig na gtan du yang chad pa yin te/ ji ltar sa bon lta bur de bzhin gshegs pa'i bdag gi rgyun 'jug pa de yang re zhig na rtsa ba dang bcas pa chad par 'gyur ro/ / sku yi tha ma 'dzin pa'i tshe/ /zhes bya ba bcom ldan 'das la ni dgongs pa cung zad kyang yod par mi snang ste/ sangs rgyas bcom ldan 'das rnams ni dgongs pa med par skad cig tsam yang gnas skabs la sogs pa'i bya ba mi 'dzin te/ gzhan la phan pa'i bya ba 'di'i dgongs pa nyid kyi gnas skabs kyis sems can gcig gis phan pa yod par gyur na yang de bzhin gshegs pa yongs su mya ngan las 'das par mi 'gyur ba'i phyir ro//gang gi tshe 'khor ba'i nags tshang tshing na sangs rgyas kyi gdul bya'i sems can gcig kyang ma lus par gyur pa de nyid kyi tshe na thub pa mchog yongs su mya ngan las 'da' bar 'gyur ro zhes bya ba ni yang dag par bstan pa'o//gzhan gyi don byas pa'i phyir yang dag par rdzogs pa'i byang chub thob pa yin te/ ji skad gsungs pa/ bdag nyid rgal cing 'gro ba thams cad bsrung / /gang phyir ldongs pa'i lam ni ston byed cing //de nyid mngon sum byas pas khyod kyis ni/ /da ni 'bras bus mgon dang gzhan phan spyod/ /ces pa'o/ /de bas na sangs rgyas kyi mdzad pa ma lus par mdzad pa'i phyir mya ngan las 'das pa nyid du bzhugs pa yin no/ /yang smras pa/ gzhan la phan pa spyod byed cing / /yun rings dus su mngon dgongs pa//thub pa mya ngan las 'das te/ /bud shing med pa'i me bzhin no/ /rga dang 'chi ba'i 'jigs pa dag /yongs spangs thar pa'i 'du shes kyis/ /rin chen gling bzhin shes rab can/ /bya ba byas nas 'dir 'jug go/ /bcom ldan 'das kyis 'di skad gsungs zhes bstan pa la de ji skad du gsungs pa yin zhe na smras pa/kye ma 'du byed ces bya ba la sogs pa smos te/ tshigs bcad 'di'i gleng gzhi ni bcom ldan 'das rgyal po'i khab kyi ri ngos yangs na bzhugs te/ der bcom ldan 'das kyis dge slong rnams la bka' stsal pa/ dge slong dag 'du byed thams cad ni mi rtag pa ste/ji srid du rnam par grol bar gyis shig ces bya ba'i bar du'o/ /dge slong dag sngon byung ba na ri 'di'i ming pra tsi na bang sha zhes bya bar gyur te/ gang pra tsi na bang sha'i nye 'khor na mi rnams kyang gnas par gyur te/ mi de dag gi ming ni nyi mi ra zhes bya bar gyur to//ti mi ra'i mi rnams kyi tshe'i tshad ni lo stong phrag bzhi bcu yin no/ /dge slong dag ti mi ra'i mi rnams kyis ri pra tsi na bang sha la 'dzeg pa dang babs pa yang zhag bzhi bzhis 'dzeg cing babs so/ /de'i tshe na ston pa log par dad sel zhes bya ba 'jig rten du byung ste/ dge slong dag rgya cher bltas na ji srid du ri de'i ming yang nub par gyur to//mi de dag kyang dus las 'das so/ /ston pa de yang yongs su mya ngan las 'das so/ /tshe yang yongs su nyams par gyur to/ /de bzhin du dge slong dag mi rtag pa ni ji tsam na ri de'i ming ni bang ka zhes bya'o/ /mi rnams ni a bi ka zhes bya'o//ri de las babs shing 'dzeg pa yang nyin zhag gsum gsum gyis so/ /tshe'i tshad kyang lo stong phrag sum cu ste/ ston pa gser thub byung bar gyur to/ /yang ri de'i ming ni ngos bzangs zhes bya bar gyur to/ /mi rnams kyi ming ni ro hi ta a shra zhes bya'o/ /'dzeg pa dang babs pa yang nyin zhag gnyis gnyis so//de'i tshe'i tshad ni lo stong phrag nyi shu ste/ de bzhin gshegs pa 'od srungs zhes bya ba gshegs so/ /de bzhin du da ltar ri'i ming ni ngos yangs zhes bya'o/ /mi'i ming ni ma ga d+hA pa zhes bya'o/ /ri 'di'i 'dzeg pa dang babs pa la ni yud tsam re re'o/ /mi rnams kyi tshe lo ni brgya ste/ston pa ni nga nyid yin no/ /pra tsi bang sha ti mi ra/ /bang ka dang ni a bi ka /ngos bzangs ro hi tA shwa dang / /ngos yangs ma ga d+hA dag gi/ /de yi ming ni 'das pa ste/ /mi de dag kyang dus las 'das/ /tshe yang nyams te sangs rgyas kyang / /yongs su mya ngan las 'das gyur/ /kye ma 'du byed rnams mi rtag /ces bya ba la sogs pa la rgyal po zhig gi bu mo skye bo rnams kyi snying du rab tu sdug pa zhig yod pa las de'i gzugs phun sum tshogs pa la sogs pa thos nas rgyal po chen po bzhi dpung dang bcas te 'byor pa chen pos de'i yul du 'ongs nas de bslangs pa dang ji tsam na bu mo de rang nyid khyo 'dam pa'i phyir tshogs kyi nang du zhugs so//de dag gis mthong ba dang sngon ma thos pa'i/ kye ma 'du byed rnams mi rtag /ces bya ba la sogs pa'i tshig rkang bzhi mngon du gyur te/ de yang tshig rkang re re/ re re'i dbang du byas nas smras pa yin te/ de thos pa las rgyal po de dag gis kyang 'phags pa'i bden pa bzhi rtogs te rgyun du zhugs pa'i 'bras bu thob bo//bu mo de yang 'khor lnga dang bcas par rab tu byung ste dgra bcom pa'i 'bras bu thob bo/ /bcom ldan 'das kyis bka' stsal ba/ /dge slong dag tshigs bcad 'di legs par zung shig /'di ni sngon gyi de bzhin gshegs pa rnams kyis kyang gsungs pa yin no zhes pa ste/gzhan dag ni de'i gleng gzhi 'di ltar 'chad do/ /de la/ kye ma 'du byed rnams mi rtag /ces bya ba la/ 'du byed ni rnam pa gsum ste/ 'das pa dang ma 'ongs pa dang da ltar byung ba'i dbye bas so/ /de la 'das pa'i mi rtag pa ni skyes nas 'jig pa yin pa'i phyir de phyis kyang skye ba med pa dang zad pa med pa ste/de dag des na/ skye zhing 'jig pa'i chos can no/ /ma 'ongs pa na yang skye zhing 'jig pa'i chos can te/ skye bar 'gyur ba'i phyir/ skyes pa ni 'jig pa'i chos can yin te/ 'jig par 'gyur ba'i phyir yang skye ba med de/de nyid kyi phyir de dag mnyam pa nyid du brjod de skye zhing 'jig pa'i chos can gang dag yin pa de ni ma 'ongs pa'i skye zhing 'jig pa'i chos can du bstan te/ ci ste skye ba nyi tsher zad cing 'gag par mi 'gyur ram zhe na/ smras pa/ skyes nas 'jig par 'gyur ba ste/ /zhes bya ba smos so//gang skyes par gyur pa de nyid kyi phyir 'gag par 'gyur ba ste gang yang skyes nas 'gag par mi 'gyur ba de med de/ gang de dag thams cad ni sdug bsngal ba'o/ /da bde ba gang yin zhe na/ de smras pa/ de dag ces bya ba smos te ma 'ongs pa'i 'dus byas de dag gi rgyu zad par byas pa'i phyir gzhan du skye ba zad par byas pa de ni bde ba yin te/'di ni tshigs bcad kyis bsdus pa'i don no/ /yan lag gi don ni nges par rgyu dang 'bras bu spangs pa'i ngo bo ni rtag pa'o/ /de las gzhan pa ni mi rtag pa ste/ skad cig ma dang skyes ma thag pa dang / yun mi rings par gnas pa zhes bya ba'i bar du'o//kye ma zhes bya ba ni skyo ba bskyed pa ste/ 'di dag sdug bsngal lo zhes bya ba'i don to/ /gang mi rtag pa de ni sdug bsngal lo zhes mdo las gsungs te/ mi rtag pa nyid thugs rje chen po'i yul yin gyi/ sdug bsngal gyis nye bar gdungs pa nyid kyi don ma yin par mtshon pa'o//yang na rnam pa 'di ltar thugs brtse ba yin te/ sems can gyi 'du byed de'i yul la phan 'dogs par mdzad pa'i thugs rje bskyed par bya'o zhes bya ba'i don to/ /'du byed ni tshogs pa las skyes pa'i ngo bo phung po lnga'o/ /skye ba ni 'byung ba'o/ /'jig pa ni zad pa'o/ /chos de gnyis kyis nges par bsgos pa'i tshul gang la yod pa de ni skye zhing 'jig pa'i chos can te/skye ba dang 'jig pa'i gnas skabs kyis rjes su bsgos pa zhes bya ba'i don te/ rga ba'i chos la sogs pa bzhin du ste/ ji ltar nges par rga ba 'byung ba gang yin pa de ni rga ba'i chos zhes bya ba de bzhin no/ / skye ba med pa'i chos ni de dang 'dra ba las 'dus byas zhes bya ba brtags te/ ston gyi sprin la chu 'dzin zhes btags pa bzhin no/ /gang skyes pa ni da ltar byung ba'i dus su 'ongs nas myong ba zhes bya ba'i don te/ gang skyes pa de ni nges par 'gag par 'gyur ro zhes bsgrub pa'i phyir ro/ /nas zhes bya ba'i sgra ni gang gi phyir zhes bya ba'i don yang yin te/skyes pa dang ldan pa ni 'gag pa yin no zhes ston te 'gag pa dang zhig par 'gyur ba'o/ /'on kyang de ltar brjod par bya ba la ji ltar 'di dag mi rtag pa yin zhe na/ gang gi phyir/ skye zhing 'jig pa'i chos can yin/ /zhes bya ba ste/ skyes pa ni nges par 'jig pa'i phyir bum pa la sogs pa bzhin no//de las bzlog pa ni nam mkha'o/ /'di gnyis cig car byung ba yin te/ skye ba'i dus nyid 'gag pa'i dus yin pas des na 'das pa dang / da ltar byung ba gnyis gcig pa yin no zhes bstan to/ /skyes nas 'jig par 'gyur ba ste/ /zhes bya ste/da ltar byung bar gyur nas 'das par 'gyur ro zhes bya ba'i don no/ /'di dag ni sdug bsngal ba yin te/ thams cad kyang mi rtag pa'i phyir ro/ /gzhan la rag las pa ni bde ba med pa'i phyir yang ngo / /de lta na ni lam yang sdug bsngal thob par 'gyur ro zhe na/ bden pa'i lam gyi gnas skabs kyi sdug bsngal ni 'phags pa rnams dang mi mthun pa med pa'i phyir ro//gzhan ni sdug bsngal ma yin te/ gang mi rtag pa de thams cad sdug bsngal ba yin no zhes pa'i tshig gis so/ /ji ltar sdug bsngal ba ni kha ba la sogs pa'i btung ba 'thungs na nad nye bar zhi ba dang 'brel ba yin pa'i phyir sman bsten pa ni bde ba zhes brjod de/de bzhin du lam la sogs pa la yang brjod do/ /de'i sdug bsngal 'dus byas rnams nye bar zhe na khyad par gyi tshul gyis grub pa'i ye shes kyis thob pa'i zhi ba ni nye bar zhi ba ste/ so sor brtags pas thob pa'i 'gog pa'o/ /de na bde ba yin te phung po med pa ni bde ba'i mchog go zhes lung las smos pa'i phyir ro//yang smras pa/ mi gtsang che'am chung yang rung / /gtsang ma 'dod pa sten mi byed/ /de bzhin ming dang gzugs skad cig /phra rab bde ba 'dod pa yi/ /bdag nyid chen pos thams cad du/ /ma bsten 'khor ba spong bar 'gyur/mi gtsang cung zad ma bor yang / /khyim de gtsang zhes brjod pa min/ /thar pa mig gis gzung ma yin/ /bstan dang ngag gi lam yang min/ /las dang nyon mongs shes rab kyis/ /zad pas de yang thob par 'gyur/ /ji ltar dmus long gzugs brjod pa//sngon gyi ser po la sogs pas/ /gang du'ang yid ches mi 'gyur te/ /byis pa mya ngan de mi 'da'/ /zhes so/ /gleng gzhi gnyis pa ni de la brten nas yang phyin ci log bzhi'i gnyen po bstan pa'i tshul du byas pa mtshon pa yin te/ 'di ltar rgyal po de dag rtag pa dang / gtsang ba dang / bdag dang / bde ba ste 'dus byas rnams la phyin ci log tu gyur pa de'i don du des go rims bzhin du tshig rkang re re bstan pa yin te/ de la mi rtag pa zhes bya ba 'dis ni mi rtag pa la rtag par phyin ci log pa'i gnyen po bstan pa'o/ /mi rtag pa'i rnam pas nges par yid byung bar gyur pa dang ldan pa yin pas de mtshon pa'i phyir kye ma zhes bya ba'i sgra smros so//tshig rkang gnyis pas ni gtsang bar phyin ci log pa ste mi rtag pas gtsang ba bsal ba'i phyir 'du byed skye bas so/ /tshig rkang gsum pas ni bdag tu rmongs pa dag la skye ba dang / 'jig pa dang ldan pa'i phyir 'du byed thams cad ni bdag med pa yin no zhes rtogs par 'gyur ro//tha mas ni sdug bsngal la bde bar phyin ci log pa la thar ba nyid ni sdug bsngal gsum dang gtan du bral zhing don dam pa'i bde ba yin pa'i phyir mun pa ma lus pa dang bral zhing shin tu 'od gsal ba shar ba bzhin no/ /'dus byas kyi don gyi de nyid ni yid du mi 'ong ba yin na ji ltar 'di la khyed cag blo rmongs par gyur ces de dag la smras par gyur to//gnas skabs kyi rim pa bzhin du tshigs bcad 'dis 'phags pa'i bden pa bzhi yongs su gsal bar byed do zhes kyang gzhan dag 'dod do/ /de la dang po'i tshig rkang gis ni kun 'byung bstan te/gal te de rtag par gyur na ni 'bras bu'i dus na ci'i phyir mi snang zhes bya ba'o/ /gnyis pas ni sdug bsngal yin te/ 'bras bur gyur pa nyid kyis skye ba dang 'gag pas so/ /gsum pas ni lam ste 'dus byas nyid kyi phyir/ da ltar byung ba'i dus na de dang ldan pas so//bzhi pas ni 'gag pa ste dge ba rtag pa'i phyir de ni bde ba'o/ /'dir tshong dpon gyi bu spun bzhi zhig gi dper brjod pa yin no/ /de yang 'di skad thos te/ mnyan du yod pa na tshong dpon gyi bu spun bzhi zhig gnas te/ phyug cing rgya che ba'i nor dang ldan pa las de dag gis thos pa 'di lta ste/bcom ldan 'das bsod nams kyi zhing chen po de las cung zad tsam phul yang mngon par 'dod pa'i 'bras bu yid la re bzhin du 'thob pa yin no zhes nas des bstan pa mnyan te sdug pa yongs su btang nas 'gro bar bya'o zhes bsams te/ de dag gis bsod snyoms rgya che ba dag blangs te khyim nas byung nas bcom ldan 'das spyod yul du gshegs pa la lhung bzed bkang ste phul nas yang myur ba nyid du rang gi khyim du zhugs par gyur to//rim gyis nyi ma bzhi la re re'i dbang du byas nas thub pas tshig rkang re re bstan to/ /ji tsam na de dag khyim du lhags pa dang gtam du brjod de/bdag cag gis ni rnyed pa legs par rnyed de bdag cag gis bsam pa grub bo zhes so/ /de na gcig gis smras pa/ bdag gis ni/ kye ma 'du byed rnams mi rtag /ces bya ba de tsam zhig thos so zhes zer ro/ /gzhan dag kyang tshig rkang re re thos so zhes smra ste/ tshigs bcad kyi don nges par yid la byas pa las bden pa mngon par rtogs shing rgyun du zhugs pa'i 'bras bu thob ste rab tu byung nas dgra bcom pa'i 'bras bu thob par gyur to zhes pa'o/ /'di ni srid pa la mngon par dga' ba rnams dang mya ngan las 'das pa la rgyab kyis phyogs pa'i lus can rnams 'khor ba las skyob par bya ba'i phyir dang /thar pa las 'dod pa skyed pa'i phyir bshad do/ /sngar bshad pa'i tshigs bcad kyis nges par sdug bsngal dang bde ba gnyis spang bar bya ba dang blang bar bya ba gnyis kyi spang ba dang blang ba'i thabs gnyis 'khrul pa med par bstan pa'i phyir smras pa/de ltar rab tu 'bar ba zhes bya ba la sogs pa smos so/ /'di byung ba'i gleng gzhi mnyan du yod pa na de'i tshe dge slong rab tu mang po bsti gnas kyi khang pa dag tu 'dug ste 'dug nas 'di nyid kyi tshul gyis bar skabs kyi gtam brjod par gyur te/ bdag gi dngos po ni dga' ba skyed pa'o//yul dag kyang mgu ba skyed pa ste/ de ci'i phyir zhe na/ gang gi phyir 'di dag yongs su bsten cing bskyangs na ni dga' ba dang mgu ba yang skye bar 'gyur ro zhes brjod pa bcom ldan 'das lha'i snyan rnam par dag pa mi'i las 'das pas gsan par gyur to/ / gsan nas kyang bos te bka' stsal pa/ dge slong dag khyed cag ci'i phyir 'dus shing 'khod nas lus kyis gtam ngan pa dag brjod cing 'khod ces de ltar rgya cher 'khor ba smad par mdzad cing tshigs bcad 'di bka' stsal to/ /de dag gis de thos nas bsgoms te dgra bcom pa'i 'bras bu thob par gyur to//gang gi phyir sdug bsngal spangs pa la ni yid 'byung ba thabs yin te/ yid byung bar gyur na 'dod chags dang bral bar 'gyur ro zhes mdo las bstan to/ /zang zing dang bcas pa la chags pa ni skyo ba'i bgegs yin te/ don dam par nges par brtag pa med pa'o/ /don dam par nges par brtag pa'i zag pa med pa'i shes pa de nyid kyang mya ngan las 'das pa 'thob pa'i thabs te/gnyi gar sbyar ba'i phyir tshigs bcad 'di gsungs pa yin te/ 'di ni bsdus pa'i don to/ /yan lag gi don ni ci zhes bya ba ni gang zhig ce'am/ dgag pa'i don te mkhas pa rnams kyis dgag pa med ces bya ba'i don to//zhig ces bya ba ni dpyad par gyur na dga' ba la sogs pa yang dag par med do zhes bstan to/ /yang na nges par gzung ba yin te/ ci zhig kyang med do zhes bya ba'i don te/ tshig gi phrad la sogs pa ni sna tshogs pa'i don yin pa'i phyir ro/ /bdag dang 'brel pa de la chags pa dang 'brel ba'i bdag gi bde ba la yid tshim pa ni dga' ba'o//de skye ba ma rig pa dang lhan cig pas dga' ba'i tshul dang khyim du 'dzug pa ni mngon pa'i nga rgyal gyis so/ /'byor pas drangs pas de'i sred pa dang ldan pa ni mgu ba ste/ gzhan la ma blangs bzhin du byin pa'i dngos po lta bu'o//'di gnyi ga yang 'khor ba 'jug cing rmongs pa rnams phyin ci log pas bslad pa yin pa'i phyir ro/ /mkhas pa rnams la ni de gnyis med de/ yongs su brtag pas de bzhin nyid la 'jug pa'i phyir ro/ /de ltar na rmongs pa rnams la gang yin zhe na/ de ltar bdag nyid kyi dngos po dang yo byad kyi dngos po'i gnas skabs la'o//de la ji lta bu zhe na/ smras pa/ de ltar rab tu 'bar ba la/ /zhes bya ba smos te/ rnam pa 'di dang skabs 'dir rab tu grub pa ste/ rga ba dang na ba dang 'chi ba la sogs pa ni me 'bar ba lta bu yin no/ /gang du shin tu 'bar zhing yang dag par 'byung ba de ni rab tu 'bar ba ste/ji ltar mes bud shing zad par nus pa dang / ka rany+dza dang seng ldeng la sogs pa 'bar bar nus pa de bzhin du nyon mongs pa de las skyes pa'i sdug bsngal mngon par mi dga' ba bskyed pa dang yid du 'ong ba'i dngos po 'jig par byed pa la rno ba yin pa'i phyir rab tu 'bar bas dper brjod pa yin no//gang la la 'das pa dang ma 'ongs pa nyid kyi dngos po ni 'di lta bu yin gyi/ da ltar byung ba ni ma yin te/ 'di la mngon par dga' ba yin no zhes sems pa la smras pa/ la zhes smos te tha snyad yang dag pa la yod pa ni da ltar byung ba nyid yod pa ste/ de la ji skad du dge slong dag 'di la thams cad du kun du 'bar ba yin te/'dod chags kyi me dang zhe sdang gi me zhes bya ba la sogs pa mdo las gsungs te/ de nyid du 'dus byas rnams rtag tu gtses pa yin te/ ji ltar bya'i tshang gi shing la me sbar ba bzhin no/ /de kho na nyid mthong ba ni ji ltar yang dga' ba dang mgu ba gnyis skye bar mi 'gyur te yid skyo ba'i phyir ro zhes ston to//da ltar byung ba nyid ni ma bshad kyang grub pa yin te/ gang 'das pa dang ma 'ongs pa byung ba dang 'byung bar 'gyur ba gnyis ni 'di ltar mngon sum dang rjes su dpag pas bsgrub pa yin te/ des na ji skad du bshad pa/ mi rnams la ni bdag tu chags pa des//mngon sum du ni sdug bsngal shes pa ltar/ da bzhin lha la'ang sdug bsngal med mi shes/ /gang phyir rtag par gnas pa yod ma yin/ /zhes so/ /de ltar yod na thams cad du yang 'dus byas rnams 'tshogs pa las skyes pa'i phyir yod pa nyid de/ 'das pa dang ma 'ongs pa gnyis kyang skye ba la sogs pas mngon par gtses shing nye bar 'jig pa de nyid du bstan to//gal te de ltar nye bar gtses na ji ltar bdag cag gis khong du ma chud ce na/ smras pa nang zhugs zhes bya ba smos te/ chud pa'o/ /gang du zhe na/ smras pa/ mun pa zhes bya ba yin te/ mi shes pa zhes bya ba'i don to//yang bshad pa/ 'jig rten mthong bar nus pa la/ /ji ltar bgegs ni byed pa yi/ /mun pa de bzhin ma rig pa/ /de nyid mthong la bshad pa yin/ /phongs pa kun gyi gzhir gyur pa/ /de las gzhan ni rang byung yin/ /blo ldan phun sum tshogs kun rgyu//dpal la yid bzhin nor bu bzhin/ /zhes pa'o/ /de yang gang dag yin zhe na/ de smras pa/ gnas pa dag ces smos pas khyed cag ces bya ba nyid de/ so so'i skye bo yin pa'i phyir phung khrol thams cad kyi gnas su gyur pa ni so so'i skye bo yin no zhes pa'i tshig gis so/ /de la 'dis ni 'di ltar ston te/mi shes pa dang ldan pa de las ni las so/ /de las byung ba ni sdug bsngal yin no zhes bya bas so/ /phyin ci log sdug bsngal 'gog pa ni de bzhin nyid la lta ba dang mngon par dga' ba gnyis kyis te/ ye shes la yang dag par 'jug par bya'o zhes pa'i don te/ thar pa'i bde ba 'thob pa'i thabs kyang yang dag pa'i lta ba sngon du 'gro ba'i 'phags pa'i lam yin te/de nyid la gzud pa'i phyir smras pa/ sgron ma ni snang ba ste/ gang gi phyir 'phags pa'i lam gyi snang ba dang / dad pa dang brtson 'grus la sogs pa'i sgra'i ming du 'dir brjod de/ ji skad du bshad pa/chos la nges par sems pa'i bzod pa ni snang ba yin no zhes tshig bla dwags su btags pa yin no/ /dad pas ni 'khor ba'i rgya mtsho las rgal bar byed do/ /brtson 'grus kyis ni sdug bsngal spang bar 'gyur ro zhes dper brjod par bya'o/ /ji ltar phyi rol gyi mun pa la sgron me byung bar gyur na de sel bar nus pa yin te/de bzhin du mi shes pa'i mun pa de 'phags pa'i lam gyis bsal bar nus pa nyid de/ de bas na 'dra ba'i phyir sgron ma bzhin pas sgron ma yin no/ /de ci'i phyir tshol bar mi byed ces bya ba smos te/ de tshol bar mi byed pa ni de ji ltar rtogs pa'i phyir mi byed de 'bad pas bsgrub par gyis shig pa'i don to//bcom ldan 'das kyis 'dir nyes pa rnam pa gsum gyis sems can rnams la bskul ba yin te/ bag med pa dang / rang bzhin dang / sgrib pa'i skyon no/ /sems can 'di dag ni bde ba mngon par tshol ba la bde bar gnas pa ste/ bde bar myong ba lta bu ni yul dag la kun tu dga' zhing mgu ba yin te/'di dag ni bag med pa'i skyon no/ /gang du yang de mngon par dga' ba de thams cad ni nyon mongs pa'i me dang sdug bsngal gyi me rab tu 'bar ba yin te/ 'di ni rang bzhin gyi skyon no/ /de dag kyang ma rig pa'i mun par zhugs pa la zag pa med pa'i shes pa'i sgron ma mi tshol ba yin te/'di ni sgrib pa'i skyon no/ /des na bcom ldan 'das kyis nyes pa gsum bzlog pa'i phyir tshigs bcad 'di bka' stsal pa yin no/ /ji ltar mi rtag pa nyid kyi me rab tu 'bar bas bdag nyid kyi dngos po gang 'di zhes bya ba bstan pa de rtogs par bya ba la kun du spyod pa 'dis nye bar gnod par shes pa la 'bad pa med pa nyid du 'grub pa'i phyir smras pa/rus pa thi ba'i mdog 'dra ba/ /zhes bya ba la sogs pa smos so/ /'di'i byung ba ni mnyan yod na dge slong gsar bu rnams lhag par khrus dang gos dang rgyan la sogs pa gtsor byed cing gnas par gyur te/lus la lhag par zhen pas de dag gis glog pa dang la ton la sogs pa yongs su spangs pa dang / ji tsam na bcom ldan 'das kyis de dag la skyo ba bskyed pa'i phyir dur khrod du gshegs shing spyod par gyur to/ /de'i tshe na rkun po lnga brgya bsad de shi ba'i ro dag bor ba yod pas de dag la de nye bar bstan cing bcom ldan 'das kyis bka' stsal pa/dge slong dag ltos shig /shi ba'i ro 'di dag ni shin tu 'jigs su rung ba yin te/ 'khor bas chog shes par gyis shig /'khor ba'i longs spyod nye bar spyod pas kyang chog shes par gyis shig ces bka' stsal pa dang / ji tsam na de dag gis dgra bcom pa'i 'bras bu thob par gyur to//gzhan dag ni mngon pa'i nga rgyal can gyi dge slong lnga brgya tsam gyi dbang du byas nas 'di gsungs so zhes zer ro/ /de la 'dir yang rnam pa lngas mi rtag par yongs su ston pa yin te/ rnam par zhig pa dang / bral ba dang rnam par 'jig pa dang /nye bar gnas pa'i rnam pa dang / chos nyid kyi rnam pas bshad pa'o/ /de la bor ba gang yin 'di dag ni zhes bya bas ni rnam par zhig pas mi rtag pa nyid du bstan te/ gang gi phyir 'tsho ba'i srog yod pa yang rus pa rnam par 'jig pas de ltar bor bar 'gyur ba'o/ / phyogs dang phyogs su rnam 'thor ba/ /zhes bya ba 'dis ni bral bas mi rtag par bstan te/ phyogs sna tshogs pa la gnas pas phan tshun bral ba nyid du grub pa'i phyir ro/ /thi ba'i mdog 'dra ba zhes bya bas ni rnam par 'gyur bas mi rtag par bstan te/ sngon gyi yid du 'ong ba'i mdog las gzhan du gyur pa'i phyir ro//de mthong zhes bya ba ni nye bar gnas pa'i mi rtag pa bstan te/ rnam pa gsum po 'di nyid kyis mi rtag pa ste/ da ltar byung ba'i dus su nye ba zhes brjod do/ /de mngon sum du byed pa ni rnam pa'o/ /'di la ci zhig dga' zhes bya ba ni chos nyid kyi rnam pas mi rtag pa ste/'di'i lus kyang 'tsho ba nyid kyi chos las 'chi ba'i lus su gyur te rnam pa gsum gyis mi rtag pa nyid du nye bar gnas shing snang ste/ 'di na 'chi ba'i lus kyang de dang 'dra ba'i chos su gcig pa nyid de/ de la ci zhig dgar ci yod/ /ces bya ba ni bsdus pa'i don to/ /yan lag gi don ni gang yin zhes bya ba ni rus pa zhes bya ba dang sbyar ro//'di dag ni zhes bya ba ni phyogs nye ba na gnas pa'o/ /bor ba zhes bya ba ni nye bar 'dzin pa'i rlung dang bral bas bor ba'o/ /rnam par 'thor ba ni mi 'dra bar bkod cing rig pa med pa bzhin du 'tshol bar gnas pa ste/ mjing pa'i rus pa rnams ni gzhan/rkang pa'i rus pa rnams kyang gzhan zhes bya ba la sogs pa mdo las gsungs pa yin no/ /ci nas gang du rten nas bor ba dang / rnam par 'thor nas 'dug pa yin zhe na/ smras pa/ phyogs dang phyogs su zhes bya ba smos te/ 'di zlos pa ni phyogs kyi rnam pa mang po sna tshogs pa ste/ mtho ba dang dma' ba la sogs pa'i phyogs dag tu rnam par gtor ba zhes bya ba'i don to//ji lta bu yin zhe na/ smras pa/ thi ba'i mdog 'dra ba zhes bya ba yin te/ thi ba zhes bya ba ni phug ron zhes bya ba'i bya bzhin du mdog snang ba gang yin pa'i rus pa de nyid sngo skya zhes bya ba'i don to/ /de lta bu'i rus pa gang yin pa de mthong ba ni snang ba'o//'dir zin pa'i lus la ci zhig dga' zhing lhag par chags zhes bya ba'i don te/ kha dog dang dbyibs nyams pa dang ldan pa'i lus la'o/ /shes rab can ni nam yang mngon par dga' ba skye bar mi 'gyur te/ mthar yid du mi 'ong ba nyid yin pa'i phyir ro/ /de'i phyir bor ba ni tshigs rnams 'brel bzhin du rus pa bor ba nyid du bstan to//rnam par 'thor ba ni tshigs rnams bye ba nyid kyis 'thor bar bstan to/ /dbyibs nyams pa rnam pa gnyis kyis bsgrubs nas mdog nyams pa ni thi ba'i mdog 'dra zhes bya bas bstan to/ /de la 'dis 'dod chags rnam pa bzhi'i gnyen por gsungs pa yin te/de la 'thor ba zhes bya ba 'dis ni nye bar spyod pa'i 'dod chags kyi gnyen po bstan te/ de la nye bar spyod pa med pa'i phyir ro/ /rnam par 'thor ba zhes bya ba 'dis ni dbyibs kyi 'dod chags kyi gnyen po bstan te/ de na 'dod chags dang rjes su mthun pa'i dbyibs med pa'i phyir ro//thi ba'i mdog 'dra ba zhes bya bas ni kha dog gi 'dod chags kyi gnyen po bstan te/ mdog 'di ni mngon par mi 'dod pa'i phyir ro/ /rus pa zhes bya bas ni reg pa'i 'dod chags kyi gnyen po bstan te/ reg par mi bzod pa'i phyir ro/ /byung ba gnyis pa'i dbang du byas na yang de bzhin gshegs pas 'di skad du bstan par gyur te/'di lta ste gang 'dod chags dang ma bral ba de rnams kyis ni lan du mar lus la 'di bzhin du bsgom par bya ba yin te/ khyed cag kyang 'dod chags dang ma bral ba lta bu yin no zhes pa ste/ de yang 'dis bstan pas nges par bdag cag kyang ni 'dod chags dang ma bral ba dag ste 'dod chags dang bral ba bzhin du mngon pa'i nga rgyal skyes pas des na bdag cag la bcom ldan 'das kyis 'di ltar bskul ba yin no zhes skyo ba yang dag par skyes te/bcom ldan 'das kyis lam gzhan yang dag par bstan pas/ khams gsum las 'dod chags dang yang dag par bral ba thob par gyur to/ /des na lus la mngon par zhen pa rnams la de las skyo ba bskyed pa'i phyir tshigs su bcad pa 'di gsungs so/ /'dus byas rnams tha mar yid du mi 'ong ba gcig pur ma zad de/ dang po nas brtsams te yid du mi 'ong ba yin no zhes gsal bar bstan pa'i phyir smras pa/gang gi nub mo zhes bya ba la sogs pa smos so/ /'di byung ba'i gleng gzhi ni mnyan du yod pa na bcom ldan 'das kyis dge slong rnams la thams cad g.yo zhing 'jig rten thams cad 'chi ba'i dbang du 'gro zhes bka' stsal pa dang / ji tsam na dge slong zhig stan las langs te bla gos phrag pa gcig tu gzar nas 'di skad ces gsol to//ci btsun pa gang mngal na gnas pa yang rab tu mi gnas pa rab tu mi brtan pa nyid dam/ dge slong dag mtshan mo mi dag ma'i ltor 'jug pa de nyid nas brtsams te 'chi bdag gi drung du nye bar 'gro ste/de ci'i phyir zhe na/ dge slong dag 'di ltar 'dus byas thams cad ni mi rtag go zhes bya ba'i bar du ston pas de ltar bka' stsal to zhes bya ba'o/ /dang po'i tshig rkang gsum gyis ni skad cig mas tshe zad par bstan to/ /tha mas ni tshe zad pa las phyir yang mi 'ong ba nyid de/'di ni bsdus pa'i don te/ lus dang gnas kyi khyad par dang sdod pa dang ldog pa dang re ba dang bral bar 'dis ston pa yin no/ /dus de nyid ni dang po'o mtshan mor mngon par 'dod pa ni gnas so/ /ma'i mngal du gnas pa ni sdod pa'o/ /rtsib logs gcig tu gnas pa ni ldog pa'o/ /song nas yang 'byung ba yin no zhes bya ba ste/rnam pa bzhis yang yod do zhes re ba dag 'di la med pa yin te/ mkhas pa rnams ni 'tsho bas dregs par mi byed do zhes bya ba ni 'di'i bsdus pa'i don to/ /yan lag gi don ni gnas zhes bya ba ni bstan pa ste/ nub mo zhes bya ba dang sbyar te/ gang ma bstan pa'i nub mo gcig ste dgun nam de las gzhan pa'o//kho na zhes bya ba ni nges par gzung ba ste/ gang de mngal du 'jug pa'i nub mo de nyid ces bya ba'i don to/ /nub mo gang yin zhe na/ smras pa/ dang po ste mtshams sbyor ba'i skad cig ma nye bar mtshon pa zhes bya ba'i bar du'o/ /mngal du zhugs pa ni ma'i ltor zhugs te nur nur po la sogs pa'i gnas skabs su gyur pa ste/zho'i spris ma lta bu'i nur nur po la sogs pa sten par byed pa de lta bu dag yin no/ /de ltar byed pa su yin zhe na des smras pa/ mi'i sems can te yid gang la yod pa de ni mi ste sgra gcan bzhin no/ / bdag dang bdag gi la sogs pa'i nyon mongs pa ma spangs pa nyid mngal du 'jug pa yin no zhes mtshon pa'o/ /nub mo zhes smos pas ni nyin par mngal du 'jug pa med pa'i phyir zhes kha cig 'dod de/ gang phyir mun par 'jug pa yang / /mngal gnas mtshan mo de bzhin te/ /de nyid la ni 'byung 'gyur zhes//kha cig de skad rab tu smra/ /ji ltar nyer spyod mi zad pa/ /tshong dus nyid du 'phel ba bzhin/ /gzhan dag tu ni de lta min/ /de bzhin mtshan mo nying mtshams sbyor/ /zhes so/ /nyin par yang de 'dod pa skye ba yod pas mi 'gal te/ de tshogs pa la rag lus pa'i phyir rnam pa thams cad du de la yang nges pa med pas de'i phyir thub pas dus nges par ma gsungs te/gnas gsum mngon du gyur na bu dang bu mo skye bar 'gyur ro zhes bya ba la sogs pa yin no zhe na/ 'di ni phal che ba'i dbang du byas nas nub mo zhes bstan pa yin te/ de ltar lhag par 'khrig pa'i 'dod chags spyod pa'i phyir bshad pa/bya ba mang dang 'brel pa'i phyir/ /nyin par 'dod chags skye mi 'gyur/ /bya ba ma lus zhi ba'i phyir/ /mtshan mo 'dod chags rab tu skye/ /zhes pas so/ /sdod med ces bya ba ni gags med pa dang bgegs med par zhes bya ba'i don to//de ni zhes bya ba ni mi de'o/ /'gro 'gyur zhing zhes bya ba ni zad pa dang rnam par gyur pa dang 'gro ba zhes bya ba'i bar du'o/ /song ba las zhes bya ba ni 'chi ba'i drung du song ba las ni zhes bya ba'i sgra ni nges par gzung ba dang rim pa bzhin du yang 'di sbyar bar shes par bya ba'o/ /ldog pa med ces bya ba ni ldog pa nyid ni ma yin te/slar yang ldog par mi 'gyur ba'i don to/ /gang gi phyir 'tsho ba nyid g.yo ba ste des na srog gi nges pa yin no zhes nges par mi gzung ngo / /srog gis snyems pa la de spangs pa'i phyir tshigs bcad 'dis shes par bya ba yin no/ /bar du yang bdag gi dngos po yid du mi 'ong ba nyid du bstan pa'i phyir smras pa/snga dro zhes bya ba la sogs pa smos so/ /'di'i byung ba dang gleng gzhi ni mnyan yod na rgyal bu gsal rgyal gyi yul mi'i las kyi sna la gtogs pa'i skyes bu zhig lang tsho'i dregs pas snyems pa des gsar du blangs pa'i chung ma zhig gzugs mdzes shing blta na sdug la rab tu mdzes pas de la yang de shin tu lta zhing sems chags par gyur to//ji tsam dus gzhan zhig na de yul mi'i bya ba zhig byung nas de der song ngo / /de'i 'og tu de'i chung ma sbrul nag pos zin te dus byas so/ /de phyi dro 'ongs nas bsreg sar shing gi steng du bskyon nas bsregs pa mthong nas de nyid du bdag kyang zhugs te gnyi ga shi'o//de nas bcom ldan 'das kyis rgyal po de skyo ba yang dag par bskyed pa'i phyir der gshegs te bka' stsal pa/ rgyal po chen po mi rnams kyi 'tsho ba ni mi rtag go zhes bya ba la sogs pa gsungs nas/snga dro skye bo mang mthong ba/ /zhes bya ba la sogs pa'i tshigs su bcad pa bzhi bka' stsal pa yin no/ /srog ni yid brtan du mi rung ste dus nges pa med pa'i phyir mar me rlung khar ma bsrungs par gzhag pa la shi ba'i dus nges pa med pa bzhin du ste/'di ni bsdus pa'i don to/ /phyi dro zhes bya ba'i sgra ni tshig gi phrad yin te bdun pa'i don la 'jug ste nyin par gyi tha ma phyi 'phred kyi dus zhes bya ba'i don to/ /kha cig ni gcig 'ga'o/ /mthong mi 'gyur zhes bya ba ni ma dmigs pa'o/ /de gang yin zhe na/ smras pa/ snga dro ni thog ma ste de nyid nyi ma'i dang po'o//mthong ba ni yang dag par dmigs pa dang / yul du byas zhes bya ba'i don te/ sems can kha cig snga dro mthong ba las phyi dro btsal na shi bar gyur pa'i phyir ma mthong ba yin no/ /skye bo mang po ni skye bo chen po ste/ chen po'i sgra ni 'dir mang po ston par byed pa ste/ skye bo'i tshogs chen po 'dus so zhes bya ba bzhin no//snga dro kha cig ces bya ba ni gang nub mo de nyid kyi dang por mthong ba de nyid kyi tha mar ma mthong ba zhes bya ba'i don to/ /de ni don 'di ltar ston pa yin te/ sems can ni rnam pa gnyis te/ 'dod chags can dang / tshong gi tha snyad byed pa dag go/ /de la 'dod chags can bud med kyi skye bo nye bar longs spyod pa'i bde ba spyad pa'i dus su tshol ba na yang 'dod chags can gyis ma mthong ba de'i dbang du byas nas tshigs bcad kyi phyed dang po'o//gang yang tshong gi tha snyad byed pa'i bdag po la sogs pa des snga dro'i dus su tshong gi tha snyad dang bcas pa ste/ de tshong gi tha snyad rnams kyis grong dpon la sogs pas snga dro mi mthong ba tshigs bcad phyed 'og ma'o/ /dge ba'i las dag la phyi shol byed pa dag la sbyar ba'i phyir tshigs su bcad pa 'di gsungs so/ /gang gi phyir de ltar 'tsho ba'i srog nges pa med pa des na bdag la phan par 'dod pa rnams kyis 'dir yid brtan par bya ba ma yin pa nyid du bstan pa'i phyir smras pa/skyes pa bud med mang po dang / /zhes bya ba la sogs pa smos so/ /tshigs bcad snga mas ni dus la sogs pa la nges pa med par bstan nas/ 'dis ni na tshod kyi gnas skabs nges pa med pa nyid du bstan pa yin no//yang na yid brtan pa la yid mi ches pa'i rgyus 'dir yang yid brtan par bya ba gang yang med do zhes bya ba ni 'di'i bsdus pa'i don to/ /de la zhes bya ba ni nges pa dang bral ba ste zhes bya ba yin te/ gson pa zhes bya ba 'di dang sbyar ro/ /ci zhig ces bya ba ni gang zhig yod de gdeng drod med pa'i phyir te/mi zhes bya ba 'di dang sbyar ro/ /gdeng drod ni yid rton par byed pa dang / 'jigs pa med par 'dug pa'o/ /'chi ba'i chos can yin pas mi skye ba ste/ skye bar gyur na nges par 'chi ba yin pa'i phyir dang shes rab ces bya ba ni tshig gi lhag ma'o/ /yang na mi zhes bya ba ni shed las skyes so//yid kyis nye bar mtshon pa'i phyir de la blo dang ldan pa nyid du ston to/ /gson pa zhes bya ba ni yid brtan pa yin pa'i phyir te/ gang gi rnam pas yid brtan pa yin zhe na/ bdag ni gzhon no zhes bya ba ste/ na tshod dang po la bdag gnas pa yin no zhes pa 'di'i rnam pas so//de nyid de bzhin du 'tsho ba las yid brtan du mi rung ba ste/ mir gyur nas dar la bab pa ste/ re zhig bdag ni gnas skabs 'di la 'chi bar mi 'gyur ro zhes de de lta bur yid brtan par mi bya'o zhes bya ba'i don to/ /de ci'i phyir zhe na/ smras pa/ dar la bab pa'ang zhes pa ste/ gzhon par gyur kyang srog dang bral zhing 'chi ba yin na/rgas par gyur na lta smos kyang ci dgos pa'o/ /na zhes bya ba ni gang gi phyir zhes pa'i don to/ /mi la sogs pa ni de ltar 'chi ba yin gyi/ lha ni ma yin te/ mi 'chi ba'i phyir rga ba dang na ba dang 'chi ba med pa'i 'chi ba yin no zhes bram ze thang la 'bar gyis bshad pa ni 'jig rten pa yin pas de ni mi rigs te/sems can thams cad 'chi bar 'gyur zhes pa'i yung gis so/ /rigs pa yang lus ni byas pa yin pa'i phyir zhes bya ba la sogs pas so/ /skyes pa bud med ces bya ba 'dir ni thams cad 'dus pa yin te/ ma ning ni phyogs gnyi ga la brten pa'i phyir gnyi gas gzung ngo //yang na gtso bo yongs su gzung bas gzhan smos mi dgos pa'i phyir ro/ /mang po zhes bya ba ni lan mang po ste/ tshe rabs tshe rabs su yang dang yang zhes bya ba'i don to/ /gang yang 'chi ba ma yin no zhes bstan pa de ni tshig tsam du zad de/yang smras pa/ mi 'chi ba zhes bya ba ni ming nyi tsher zad de/ sum cu rtsa gsum pa'i ming ma btags par brjod pa yin no/ /rang gi las 'bras nye bar spyad nas kyang / /nges par ltung zhing nyams par 'gyur ba ste/ /gser gyi bye ma'i tshogs can mtsho bsten pa//rtswa 'jam brgyan pa'i sa phyogs nyams dga' dang / /lha yi bu mo'i bde ba nyams dga' rnams lta ba'ang / /'chi ba'i mtshan mas 'khyud cing nyam thag 'o dod 'bod/ /lang tshos dregs shing 'chi ba'i 'jigs pa dang bral ba dag la srid pa las skyo bar bya ba'i tshigs su bcad pa 'di gsungs so//lang tshos thob pa gcig pu 'chi bar 'gyur bar ma zad de lang tsho ma thob pa yang 'chi bar 'gyur ro zhes bstan pa'i phyir smras pa/ kha cig mngal du zhes bya ba la sogs pa smos so/ /grong khyer 'phags rgyal na spun bzhi zhig la chung ma yang bzhi yod de/ de las phu bo gnyis kyi bu spa ta la zhes bya ba dang /bde thos zhes bya ba gnyis shig shin tu sha rgyas shing gzugs dang ldan la mdzes pas rgyal po'i btsun mo'i 'khor gyi nang du song ba las de gnyis la rgyal po gtum po rab snang zhes bya ba de rab tu khros te/ de gnyis bsad nas de'i khyim la me btang ste/ de nas sbrum pa dang btsas pa'i bud med dang de'i mes po rgan po yang shi bar gyur to zhes bcom ldan 'das kyis gsan nas tshigs su bcad pa 'di gsungs so//'dir yang gnas skabs bzhi ston pa yin te/ mngal dang byis pa dang / gzhon nu dang / dar la bab pa'o/ /de la tshig rkang dang pos ni mngal gyi gnas skabs bstan to//gnyis pas ni byis pa'i gnas skabs so/ /gsum pas ni gzhon nu'i gnas skabs so/ /bzhi pas ni lang tsho'i gnas skabs te 'di ni bsdus pa'i don to/ /mngal zhes bya ba ni ma'i ltor nur nur po la sogs pa'i gnas skabs so/ /kha cig ces bya ba ni la las sam gcig ces bya ba'i don to//kha cig la de ltar mngal nas btsa' ba'i las med pa'i phyir ro/ /'chi bar 'gyur ba ni 'jig par 'gyur ba'o/ /de bzhin kha cig ces bya ba ni 'chi bar 'gyur ba'o/ /btsas pa'i sar zhes bya ba ni bud med btsas pa'i dus de nyid kyi tshe ste/btsas pa'i khyim du'o/ /gang du de btsas pa de nyid kyi khyim du ste/ khyim der da ltar yang de la gnas shing skyes pa nyid du byis pa de 'chi ba'o/ /gog tsam na zhes bya ba ni kun tu 'gre zhing yongs su rgyu ba ste/ de las yongs su 'khyam zhing rtse ba dang / srang la sogs pa dag tu rtag tu rtse ba'i gnas skabs yin no//na zhes bya ba'i sgra ni 'chi bar 'gyur ro zhes 'dren pa'i don to/ /yongs rgyug na zhes bya ba ni kun du rgyug pa'i ngang tshul gang la yod pa de nyid do/ /rigs pa ni 'dod pa la sogs pa nye bar longs spyod pa'i phyir dus ji lta ba bzhin du 'gro ba dang 'gro bar bya ba ma yin par ro//'tsho bas dregs pa rnams bsal ba'i phyir tshigs su bcad pa 'di gsungs so/ /sngar bstan pa dang ma bstan pa rnams kyi mdor bsdu ba'i phyir smras pa/ la la rgan dang zhes bya ba la sogs pa smos so/ /thams cad kyang dus phyi zhig na las ji ltar spyad pa bzhin du 'chi bar 'gyur ro zhes bya ba ni bsdus pa'i don to//la la zhes bya ba ni gang su dag rgan pa dang de dag thams cad nyid de/ rim gyis 'gro ba yin no/ /dang gi sgra ni yang gi sgra ste/ dar la bab pa la sogs pa nyi tshe ma yin zhes pa'i don to/ /de la rgan pa ni dbang po rnams yongs su smin pa'o//gzhon pa ni lus kyi yan lag nye bar rgyas pa'o/ /la la zhig ces bya ba ni gang yang nye bar 'phel ba dang 'grib pa gnyis ston pa'o/ /dar la bab pa zhes bya ba ni dar la bab pa'ang yin la mi yang yin pas dar la bab pa'i mi ste/ ut+pal sngon po bzhin no/ /dar la bab pa nyid yin pas dar la bab pa ste na tshod bar ma'o//skyes bu nyid yin pas mi'o/ /lo lnga bcu phan chad ni rgan po'o/ /lo sum cu'i bar du ni gzhon pa'o/ /bar ma ni dar la bab pa'o zhes kha cig 'dod do/ /tshe'i tshad rnam pa gsum du phye ste/ go rims bzhin du gzhon pa dang bar ma dang rgan po zhes kha cig zer ro//rim gyis zhes bya ba ni go rims bzhin du ste/ las ji ltar bsags pa bzhin du zhes bya ba'i don to/ /'gro 'gyur te zhes bya ba ni 'jug pa dang rab tu nyams par 'gyur ba'o/ /'dir dpe ni smin pa zhes bya ba ste/ yongs su smin pa'i dbang gis yan lag rnams zhig par gyur pa ste/'dir 'bras bu dang sbyar bar bya'o/ /bzhin zhes bya ba ni dpes nye bar 'jal ba ste/ 'bras bu smin pa lta bu zhes bya ba'i bar du'o/ /'bras bu smin pa de ga las 'gro zhing ltung bar 'gyur zhe na/ smras pa/ ltung ba zhes bya ba yin te/ ltung ba ni rtsa ba'i phyogs su zhes bya ba'i bar du'o//'dis ltung ba yin pas ltung ba ste/ ji ltar 'bras bu smin pa rlung la sogs pas gnod pa ma byas pa ltar rang nyid snyi bar gyur nas shing gi rtsa ba'i phyogs su ltung ba de bzhin du srog chags rnams kyang tshe yongs su rdzogs pa ni tshe yongs su nyams shing dbang po rnams ltung ste zhig par 'gyur te/byang gi sgra mi snyan ma gtogs par rab tu 'chi ba yod do zhes lung las gsungs te/ nyes par spyad pa'i rgyus 'chi ba yin no/ /'di lta bur skye bo rnams kyi 'tsho ba mi brtan zhing kun nas 'jig pa la dam pa rnams kyis yal bar mi dor zhing srid pa zad par bya ba'i phyir 'bad par bya'o zhes bya ba de la sbyar bar bya ba'i phyir tshigs su bcad pa 'di gsungs so//'di dag gi dpe dbye ba bstan pa'i phyir smras pa/ dper na 'bras bu smin pa zhes bya ba la sogs pa smos so/ /bcom ldan 'das dge slong gi tshogs kyis yongs su bskor te/nags tshal dag tu rgyu zhing gshegs pa na shing dag las 'bras bu ltung ba dag gzigs te dge slong rnams la bka' stsal pa/ dge slong dag srog ni yid brtan par bya ba dag ma yin no zhes bya ba'i tshigs bcad de/ de la dper na zhes bya bas dper brjod pa bstan to/ / rtag tu zhes bya ba ni rgyun du'o/ /de ci'i phyir zhe na/ 'bras bu smin pa rnams kyi 'jigs pa smras pa/ lhung ba zhes bya ba ni ltung ba ste 'brel pa'i rgyun las 'brel pa'o/ /'jigs pa ni sems dang 'brel ba yin pa'i phyir ji ltar 'bras bu dag la de yod ce na/ 'jigs pa lta bur 'jigs par btags pa ni nyes pa med de/ji ltar srog chags rnams la 'tsho ba'i srog dang bral ba'i 'jigs pa yod pa de bzhin du 'bras bu dag la yang ltung ba'i dus dang nye bar gyur pa na 'jig rten pa dag 'jigs pa'i sgrar brjod de/ ji ltar yur ba 'jigs par 'gyur ro zhes bya ba yur ba la de med pa nyid do//'jig rten pa rnams kyis gzhung lugs la rjes su 'brang ba yin te/ sangs rgyas kyis kyang kun rdzob kyi chos ni 'jig rten pa'i rjes su 'brang bas mi spang ngo zhes pa'i tshig gis so/ /'dir gcer bu pa dag gis 'bras bu la sogs pa la sems yod pa nyid do zhes bya ba de yang med de/'tsho ba'i rtags med pa'i phyir/ ji skad du gsungs pa/ bya ba'i sngon 'gro blo snang na/ /bdag dang gzhan dag de gzung ste/ /blo ni yang dag yod shes pa/ /tshul 'dis blo ni de la med/ /ces pa'o/ /de bzhin du phyi rol gyi dngos po shing la sogs pa la ni rtag pa med do/sems pa med pa dang / mi 'gul ba'i phyir dang bcad nas yang skye ba la sogs pa 'dir brjod par bya'o/ /de bzhin zhes bya ba ni 'di ltar ro/ /skyes par gyur pa zhes bya ba ni byung bar gyur pa ste/ ji skad du smras pa/ skye dgu rnams la dga' ba la sogs yod par gyur pa nyid de/rnam pa sna tshogs pa'i gnod pa 'jug cing 'byung bar gyur pa yin te/ shing ma skyes pa ni shin tu drag cing mi bzad pa'i rlung gis bskyod nas 'gul ba la sogs par mi 'gyur ro/ /mi zhes bya ba ni 'chi ba'i chos dang ldan pa'i phyir te/ sems can zhes bya ba'i don to//rtag tu zhes bya ba ni gnas skabs thams cad du 'jigs pa'o/ /ci'i phyir zhe na/ 'chi ba zhes bya ba yin te/ ris mthun pa chad pas zhes bya ba'i don to/ /'jigs pa ni 'chi bar dogs pa skyed par byed pa'i phyir sems kyi brtan pa nyams pa'o/ /'di skad bstan pa yin te/ji ltar 'bras bu ltung bar gyur pa'i chos can yin te/ rgyu des na de dag yongs su smin pa'i dbang ngam phyi rol gyi rkyen gyi dbang gis mi rtag cing ltung bas 'jigs pa de bzhin du skye bo 'di dag kyang 'chi ba'i chos can te/ des na 'di'i tshe yang bri zhing las zad pa dang phyi rol gyi [(]rgyen [,]rkyen [)]nye bar gyur pa las 'chi bas 'jigs pa yin no//skye bo rnams 'tsho ba'i dregs pas dge ba la bag med par gyur pa rnams bag med pa dor du gzhug pa'i phyir tshigs su bcad pa 'di gsungs so/ /sa bon las skyes pa 'ba' zhig tu ma zad de/ 'ji ba dang rgyu spun la sogs pa las skyes pa yang 'jig par 'gyur ba'i phyir smras pa/dper na rdza ma'i mkhan po zhes bya ba la sogs pa'i tshigs bcad lnga yin no/ /bcom ldan 'das gnas bcas kyi grong an dza na'i nags na bzhugs te/ de nas bcom ldan 'das snga dro'i dus su dge slong rab tu mang po dang thabs cig tu bzhugs pa las/ji tsam na gnas bcas kyi grod du bsod snyoms kyi phyir gshegs par gyur to/ /de'i tshe gnas bcas kyi grong na b+ha ra d+h+wa dza zhes bya ba'i bram ze rgas shing 'khogs la lo brgya nyi shu lon pa dus las 'das so/ /gnyis pa rigs kyi bu gzhon nu lo bdun lon pa zhig kyang shi'o//de gnyis khyogs la khyer te skye bo mang po'i tshogs mdun na 'gro zhing bud med rnams ni skra bshig cing du ste rgyab nas 'brang ba bcom ldan 'das kyis gzigs so/ /ji tsam na de'i phyir kun dga' bos bla gos bzhi bltab tu byas shing gdan bshams te/nyan thos rnams la chos bstan pa/ dge slong dag de ltar 'du byed thams cad ni mi rtag cing mi brtan pa'o zhes rgya cher 'chi bar 'gyur zhing srog ni mthar 'jig pa yin no zhes bstan te/ dge slong dag gang yang rgyal rigs shing sA la chen po lta bu nas dgra bcom pa dang /rang sangs rgyas dang / sangs rgyas bcom ldan 'das zhes bya ba'i bar du brjod par bya'o/ /dge slong dag sngon byung ba skye dgu rnams kyi tshe lo stong phrag brgyad cu sgra ngan zhes bya ba'i 'khor los sgyur ba'i rgyal po byung ste/ de'i skyed mos tshal du rab tu gnas pa zhes bya ba'i shing n+ya gro b+ha'i rgyal po de'i rtsa ba na rtsibs kyi mu khyud ces bya ba'i bram ze'i khye'u lnga brgya tsam la bram ze'i gsang tshig 'don du 'jug go//de gcig pu dben par song ste gab cing 'dug nas sems la 'di ltar sems shing rnam par rtog par gyur to/ /mi rnams ni tshe thung ba ste/ da lta na yang 'di lta ste don spyod pa dang / chos spyod pa dang / bsod nams spyod pa dang / bde ba spyod pa dang / dge ba spyod pa'i bar la mi rnams spro ba chung bar gnas pa yin te/ bdag skra dang kha spu bregs te bram ze'i khye'u dang bcas par rab tu 'byung ngo zhe na/ rtsibs kyi mu khyud kyis de ltar bstan par gyur to//shes pa brda sprod par gyur to/ /de sgrib pa lnga spangs shing tshad med pa bzhi bskyed de/ 'dod pa dag la 'dod chags dang bral bar gyur nas bram ze'i khye'u dag la chos ston par gyur te/ bram ze'i khye'u dag mi rnams kyi tshe ni shin tu thung ste/'di lta ste rdza mkhan dag sa las snod kyi rnam pa dag byed kyang de yang mthar 'jig par 'gyur ba yin te/ sa las byas pa'i snod ji lta ba de bzhin du mi rnams kyi srog kyang de dang 'dra'o/ /'di ltar thags brkyang ba la spun gang dang gang bcug pa spun gyis rting la gtugs pa bzhin no//'di lta ste gsad par bya ba'i mi gsad sar khyer ba dag bsad sa'i drung du bsnyen pa de bzhin no/ /'di lta ste ri gzang po las 'bab pa'i 'bab chu ni rgyun drag tu 'bab cing ring du 'gro la rgyun mi ldog pa de bzhin no/ /'di lta ste chu la ri mo bris pa yang myur du 'jig cing ring po mi thogs pa bzhin no zhes bya ba la sogs pa ste/de ma thag pa'i tshigs bcad dag gis spyir bstan nas re re la yang skabs ji lta ba bzhin du brjod do/ /dpe zhes bya ba ni dpe nye bar ston pa yin no/ /na zhes bya ba'i sgra ni nges par gzung ba ste rigs pas ni 'di dang thams cad la de ltar sbyar bar bya'o zhes bya ba'i don to//rdza mkhan ni rdza ma byed pa'o/ /byas pa ni bzo byas pa ste ji zhig byas pa yin zhe na/ smras pa/ 'ji ba'i snod ces bya ba smos te/ 'ji ba nyid yin pas 'ji ba ste/ 'ji ba'i rang bzhin gyi snod dam pa las byas pa'i snod dang che byad ces bya ba'i don to//de cir 'gyur zhe na/ smras pa/ tha mar 'jig par 'gyur zhes bya ba yin te/ tha mar cha shas kyis 'jig par 'gyur ba'i don to/ /tha mar 'jig par 'gyur ba 'di la yod pa zhes bya ba ni 'bru mang po yin no/ /thams cad ni ma lus pa ste/ cung zad kyang lus pa med pas zhes bya ba'i bar du ste/gang byas pa de ni mi rtag pa yin no zhes bstan pa'o/ /des na 'di ni dpe'i tshul gyis phyi rol gyi dngos po yang mi rtag pa nyid du mtshon par byed pa'o/ /mi rnams zhes bya ba ni srog chags te/ srog ni tshe'o/ /de bzhin no zhes bya ba ni tha mar 'jig par 'gyur ba ste/thams cad 'chi ba'i chos nyid yin pa'i phyir te/ ji ltar rdza mkhan gyis legs par byas pa'i sa las byas pa'i snod dag kyang snying po med pa'i phyir 'jig pa'i rkyen thob par sla bas thams cad kyang tha mar 'jig par 'gyur ba de bzhin du dge ba'i las kyis legs par sbyar ba'am/las rnam pa sna tshogs pa dang ldan pa'i srog kyang thams cad snying po med pa'i phyir mthar 'jig pa yin no zhes bya ba ni bsdus pa'i don to/ /'dir re re la nges par byung ba'i gleng gzhi ni rgyal byed kyi tshal dang nye ba zhig na rdza mkhan gyis sa las byas pa'i snod mang po dag la gzigs nas bcom ldan 'das kyis tshigs su bcad pa 'di bka' stsal te/dge slong dag 'di lta ste snod 'di dag ni rkyen dang bral bas thams cad kyang de bzhin du mthar 'jig pa yin te/ de bzhin du srog 'di yang de lta bu'o zhes gsungs shing tshigs su bcad pa 'di bka' stsal to//thams cad kyi srog kyang tha mar 'chi ba nyid du bstan pas de la rjes su chags pa spangs pa'i phyir 'di gsungs so/ /thams cad kyi gzhi ni sa yin te/ de bas na sa bstan nas de las byung ba'i dpe bstan pa'i phyir/ dper na thags ni zhes bya ba la sogs pa smos te/ bcom ldan 'das mnyan yod na bsod snyoms kyi phyir gshegs pa na/de na thags 'thag cing 'dug pa cig gzigs te de yang spun bcug cing phal cher rdzogs pa dag gzigs nas tshigs su bcad pa 'di gsungs pa ste/ ji ltar brkyang ba'i thags la snal ma gang dang gang bcug pa'i spun bcug pa des thags kyis btags par bya ba lus pa shin tu nyung bar 'gyur ro//de bzhin du sngon gyi las kyis dus shin tu nyung zad 'dzin pa'i srog la skad cig ma gang dang gang gis 'gro bar 'gyur te/ des tshe shin tu nyung zhing srog gtugs par 'gyur te/ ji srid mthar thug gi bar du zhes bya ba ni bsdus pa'i don to//dpe zhes bya ba ni rting la zhes bya ba dang 'dir sbyar bar bya'o/ /thags ni snal ma'i tshogs te snal mar sbrengs shing ring por byas pa'o/ /brkyang ba ni sbrengs shing ring du drangs pa'o/ /spun ni gang dang gang zhes bya ba la/ gang de dang 'byor ba'i skud pa gzung ba'i phyir zlos pa ste/skud pa gang dang gang gis 'phred du gzhug pa'i skud pas zhes bya ba'i don to/ /'dis spun du bya ba yin pas spun no/ /bar chad med par bcug pa ni bcug pa ste/ ji ltar zhing la sa bon bcug pa de bzhin du bcug pa zhes bya ba'i don te/ /gang thags brkyang pa de la 'thags par gyur pa de tsam na bar mtshams bkag cing go skabs med par 'gyur na gtugs shing lhag ma lus pa shin tu chung bar 'gyur te/spun gyis rting la bkag pa byas pa yin no/ /de bzhin du skad cig ma nyin dang mtshan gyis gtugs pa myong bar byas pas tshe nyung zad lus zhes bya ba'i don to//srog gis dregs pa btsal ba'i phyir tshigs su bcad pa 'di gsungs pa yin te/ yang gsungs pa/ 'tsho ba'i dregs pas dregs byed ni/ /nam yang bla ma mi bsten te/ /gang phyir dug gis slongs pa'i yid/ /yang dag 'gro bar ga la 'gyur/ /gang zhig yang dag ji bzhin shes pa ni//'di ni nyes pa'i tshogs su shes nas kyang / /dge ba rnam pa mang po rab byed pa/ /de nyid thar pa'i bsam yod mkhas pa yin/ /sems med pa bstan nas sems yod pa smras pa/ dper na nges par zhes bya ba la sogs pa smos so/ /rgyal po ma skyes dgras rkun ma gshed ma'i lag tu gtad de/de shing ka ra bI ra'i phreng ba mgo la btags te gshed mas bsdigs shing 'dug pa/ bcom ldan 'das kyis gzigs te/ de btang nas tshigs su bcad pa 'di gsungs so/ /dper na gsad par bya ba gsad pa'i phyir nges par khyer ba de bzhin du sems can rnams kyang 'chi ba'i phyir skyes pa yin no//ji ltar des gom pa gang dang gang bor ba de bzhin du skye bo 'di dag kyang skad cig ma gang dang gang gis nyin mtshan la sogs pa'i dus las 'das pa yin no/ /ji ltar de gsad pa'i drung du bsnyen pa de bzhin du 'di yang rigs mthun pa chad pa'i drung du bsnyen pa yin no zhes bya ba 'di'i bsdus pa'i don to//dper na zhes bya ba la/ ji ltar gsad pa'i drung du bsnyen pa nyid do/ /gsad par bya ba ni bsad pa dag go/ /nges pa ni nges par khyer ba ste/ de las phyir mi ldog cing rgyal po'i yul las phyir phyung ba ste/ grong gi phyi rol du nges par khyer ba'o//gang dang gang zhes bya ba ni bzlas pa nyid de/ gom pa 'dor zhing 'jog pa ste gang dang gang du 'deg pa dang 'jog pa'i don to/ /bor ba ni gom pa bor ba ste/ 'jigs par rtogs pa yin no/ /de ltar gom pa bor ba des ji zhig tu 'gyur zhe na/ smras pa drung du zhes bya ba smos te/ khyer te 'ongs nas gang du gsad par bya ba'i sa ste dur khrod do/ /gsad sa'i nyen 'khor gyi drung gang yin pa de ni de'o/ /de bzhin du srog kyang gsad sa'i drung du bsnyen pa yin te/ 'chi dang nye bar gyur pa zhes bya ba'i don to/ /bag med pas bdag la lhag par zhen pa rnams de las bzlog pa'i phyir tshigs su bcad pa 'di gsungs so//sa la sogs pa'i dpe bstan pa/ gzhan dag kyang bstan te/ chu klung drag tu zhes bya ba la sogs pa smos so/ /ri spos kyi ngad ldang gi rtse mo nas shugs chen pos brub pa'i 'bab chu dag gzigs te/ bcom ldan 'das kyis rigs kyi bu dga' bo'i dbang du mdzad de 'di gsungs so//drag po ni myur du 'gro ba'o/ /rgyun ni chu'i rgyun gang yin pa ste chu klung de drag tu 'bab pa'i rgyun yin te/ ri las chu klung drag tu 'bab pa zhes bya ba'i don to/ /chu klung ni 'bab chu'o/ /ji ltar zhes bya ba ni ji ltar rgyun ma chad par 'brub cing 'gro la slar mi 'ong ba ste/de bzhin mi yi tshe 'gro ba/ /song ba las ni ldog pa med/ /ces bya ba ni rtogs par sla'o/ /ji ltar chu'i rgyun drag tu 'bab cing chu klung dma' bar 'gro ba ni/ song nas slar mi ldog pa yin te/ de bzhin du tshe yang song nas slar mi ldog pa ste/ song nas phyir mi ldog ces bya ba ni bsdus pa'i don to//'dis ni gang dag rgas pa la sogs pa bcud kyis len gyi khyad par gyi sbyor bas na tshod slar bzlog par 'dod pa mchog tu 'dzin pa dag la dga' ba yin te/ gang 'das pa ni 'das pa nyid yin te/ de yang ji skad du bshad pa/ tshe dang na tshod dag dang ni//me lce'i rtse dang chu rgyun dang / /ngan pa dag gi tshe rnams ni/ /'das pa slar ni ldog pa med/ /ces so/ /ji ltar yang bcud kyis len gyi sbyor ba byas te/ skra dang sen mo dang pags pa la sogs pa brjes nas gzhan gsar cing bsngags pa'i mdog la sogs pa bzang po skye bar gyur na yang gang lang tsho la sogs pa 'das pa de ni 'das pa nyid yin te bcud kyis len nye bar spyad pa'i mthus bdag nyid sngar med pa gzhan gyi khyad par skye bar 'gyur te/lang tsho sngar 'das pa de ni phyir bzlog par mi nus so/ /gzhan du na bcud kyis len la sogs pa'i thabs kyis shi ba'i pha ma la sogs pa yang 'dren par nus par 'gyur na gang gi phyir 'das pa ni gang gi khyad par gyis kyang bzlog par mi nus pa yin pas 'di la rtsod pa med pa nyid do//de lta bu'i gnas skabs kyi 'tsho ba ldog pa med pa la tshe ring ba yin no zhes bsam par mi bya'o/ /bag med pa dag yang dag par bskul ba'i phyir tshigs su bcad pa 'di bstan pa yin no//chu klung drag tu 'bab pa'i dpes bstan pa/ dal bus 'bab pas smras pa/ dka' ba nyid dang zhes bya ba la sogs pa smos so/ /bcom ldan 'das chu klung du rgyu zhing gshegs te/ gang gA'i ngogs su byon pa na/bcom ldan 'das kyi phyogs zhig na gnod sbyin gyi bu zhig chu dang nye ba na 'dug cing dbyig pas god pa dang stsogs pa'i rtsibs kyis chu la ri mo 'dri zhing yang dang yang phyung bas zhig par gyur pa gzigs te/ ji tsam na dge slong rnams la dus de'i dbang du mdzad nas 'di gsungs so//de la 'dis ni mi rnams kyi 'tsho ba rnyed dka' bas 'thob pa dang sdug bsngal mang ba dang mi rtag pa nyid dang 'brel par bstan pa yin no/ /dka' ba nyid dang zhes bya bas ni rnyed dka' bas 'thob par bstan te/ legs par spyad pa mang po la 'bad pa thob pa'i phyir ro/ / thung ba dang sdug bsngal zhes bya ba ni sdug bsngal mang ba nyid dang / yun thung bar gnas pa'i phyir te/ 'dod pa'i gags la sogs pa'i sdug bsngal stong phrag gis mngon par gtses pa'i phyir ro/ /myur ba nyid du 'jig 'gyur te/ /chu la dbyu gus bris pa bzhin/ /zhes bya bas ni mi rtag pa nyid dang 'brel ba dang /de bsgrub pa'i dpe bstan pa yin te/ de'i phyir lang tsho dang srog kyang rga ba dang mi rtag pa'i dbang du 'gyur ro zhes bya ba ni bsdus pa'i don to/ /dka' ba ni shin tu rnyed par dka' ba ste/ sngar bshad pa'i tshigs bcad kyi tshe zhes bya ba dang sbyar ro//dang gi sgra ni bsdu ba'i phyir te/ gcig tu dka' ba nyid yin pa'i phyir ro/ /dka' bas 'thob pa yin yang yun ring du mi gnas pa'i phyir smras pa/ thung ba dang zhes bya ba smos te dus mi ring ba nyid du gnas pa yin no/ /thung bar gyur kyang ji srid 'jug gi bar du bde ba yin no zhe na/smras pa/ de yang zhes smos te/ de lta bur gyur pa'i tshe nyid kyang sdug bsngal mang po dang 'brel pa yin te/ bde ba shin tu chung zhes bya ba'i don to/ /'dir ji ltar bde ba shin tu chung ba yin zhe na/ gang gi phyir rkyen sna tshogs pa'i dbang gis skyes pas dus ma yin pa nyid du 'jig par 'gyur ro//myur ba kho na zhes bya ba ni ring po mi thogs pa nyid do/ /ji lta bu yin zhe na/ des smras pa/ chu la dbyug pas ri mor byas pa ni dbyu gus bris pa ste/ dbyug pa'i ri mo'o/ /bzhin du zhes bya ba ni dpes nye bar 'jal ba'o/ /ji lta chu la dbyug pas bris pa ni myur du 'jig pa yin te/de bzhin du sems can gyi srog gi rgyun yang nam zhig dka' bas 'thob ste myur du 'bral ba yin no/ /srog la lhag par zhen pa dag la de spang ba'i phyir 'di gsungs so/ /srog 'ba' zhig mi rtag pa'i phyir 'dor ba nyid du ma zad de/ de nye bar 'joms pa'i rkyen du gyur pa yang mi rtag pa nyid du bstan pa'i phyir smras pa/dper na phyugs rdzi zhes bya ba la sogs pa smos so/ /bcom ldan 'das mnyan yod du nang par shin tu snga ba'i dus zhig tu gshegs te/ ba lang rdzi ba lang gi tshogs gnas su dbyug pas 'byin par byed pa gzigs nas 'di gsungs so//dper na zhes bya ba ni gzhan ston par byed pa yin no/ /dbyig thogs zhes bya ba la 'dis 'dul bar byed pas na dbyig pa ste/ lam log pa las blan pa'i cha byad shing gi bye brag go/ /des glang srung bar byed pas na phyugs rdzi'o/ /phyugs rnams zhes bya ba ni phyugs kyi tshogs te/ mang po'i tshig ni las so/ /phyin par byed pa ni thob par byed pa'o/ /dbyug pa'i rgyus ba lang rdzi de ltar byed pa yin te/ ba lang gi spyod yul ji lta ba de bzhin du phyin par byed ces pa'i don to/ /dpe bstan nas dpes mtshon par byed pa'i don smras pa/ de bzhin ni de ltar ro/ /nad ni rims la sogs pa'i nad rnam pa sna tshogs pa'i tshul gyis kun tu gnod par byed pa'i phyir ro//rga ba ni lus lhod cing rkang lag zhig par byed pa dang 'gyur ba yin no/ /rga bas rnyis par gyur na nus pa med par 'gyur ro zhes bya ba'i don to/ /ji skad du bshad pa/ gzugs nyams stobs kyang nyams par 'gyur//zhes bya ba yin no/ /dang gi sgra ni nad gcig pur ma zad pa rga ba yang yin no zhes pa'i don to/ /yis zhes bya ba ni nges par gzung ba ste/ gtsor 'di rnams kyis mi rnams 'chi bdag gi drung du skyel zhes bya ba'i don to/ /'chi bdag ni 'chi ba'i las so/ /skyel ba ni phyin par byed pa'o//gang phyin par byed pa yin zhe na/ smras pa/ mi ste sems can zhes bya ba'i don to/ /de la dbyig pa lta bu ni nad de gnod par byed pa'i phyir ro/ /phyugs rdzi lta bu ni rga ba de nad kyi dbyig pa thogs pa'i phyir te/ phal cher rga ba las nad du ma byung ba'i phyir ro/ /phyugs rnams kyi gnas lta bu ni 'chi bdag ste/gang gi phyir de nyid kyis 'chi ba'i gnas su phyin par byed pa'i phyir ro/ /ji ltar ba lang rdzis dbyig pas brgyab ste gang du ba lang rnams gnas pa'i ba lang gi spyod yul du phyin par byed pa de bzhin du nad kyis nyen par byas shing rga bas mi nyams 'chi bar byed de/gang du 'chi ba yod pa der rang gi las kyi 'bras bu la nye bar sbyor ro/ /bag med pa bzlog pa'i phyir tshigs su bcad pa 'di gsungs so/ /ji ltar 'di nges par nad dang rga bas mi rnams 'chi bdag gi drung du skyel zhe na/ smras pa/ 'tsho ba'i gnas te dus dang 'tsho ba ni rang bzhin gyis mi gnas pa dang mi brtan pa yin zhing dngos po gang des de nyams par byed pa yin no//ji ltar rang bzhin gyis de gnyis mi gnas pa yin zhe na/ smras pa/ chu bran gyi ni chu lta bur/ /zhes bya ba la sogs pa smos so/ /bcom ldan 'das kyis rgyal po'i khab tu dge slong rnams la bka' stsal pa/dge slong dag mi rnams kyi tshe ni shin tu thung ba yin no zhes shes par gyis shig ces rgya cher gsungs pa na bdud sdig can bram ze'i khye'u'i cha byad du sprul te bcom ldan 'das la 'di skad ces gsol to/ /nyin par dang mtshan mo la ni 'das pa med cing srog kyang 'jig par mi 'gyur la mi rnams kyi tshe yang mi zad de/shing rta'i 'khor lo'i chings ma bzhin zhes zhus pa dang / bcom ldan 'das kyis bka' stsal pa/ chu bran gyi ni chu lta bur/ /nyin dang mtshan mo 'das pa yis/ /zhes bya ba smos so/ /gzhan dag na re chu bran gyi chu dag la sos ka'i rab tu tsha ba'i tsha bas gdungs shing chu rab tu zad de de nyung du gyur pa gzigs nas bcom ldan 'das kyis 'di gsungs so zhes so//'das pa ni rab tu thal ba dang zhig pa yin te/ gang gi phyir dus la rag lus pa'i srog ni nyin mtshan gyi bdag nyid kyi dus 'das pa'i phyir gnas 'jig pa nyid kyis gnas pa 'tsho ba yang 'jig pa yin te/'chi bdag gi drung du 'gro bar byed ces bya ba'i don to/ /de lta bu'i rnam pa'i don du gzhan dag 'dod do/ /'das pa nyid yin gyi/ dus 'das pa ni med do zhes ston to/ /gang 'das pa yin zhe na/ nyin dang mtshan mo ste/ gling dag tu snang ba'i gnas skabs ni nyin par ro//mun pa'i gnas skabs ni mtshan mo'o/ /gang gi phyir de tsam gyi dus de ni tshe dang srog yin no/ /kyang gi sgra ni nyin mtshan gcig pu 'das par ma zad de/ 'jig pa yin pa'i phyir srog kyang 'jig par 'gyur zhing zad par 'gyur zhes bya ba'i don to/ / phung po lnga ma smos pa nyid gtso bo yin pa'i phyir/ srog smos pa ni gang gi phyir nang gi phung po rnams ni srog la gnas pa yin te/ 'dir khang bzangs ka ba gcig pa'i dpe sbyar bar bya'o/ /de ltar na nyin dang mtshan mo 'das pa bzhin du srog kyang 'jig par 'gyur zhing mi gnas pa yin te/ des na smras pa/mi rnams zhes bya ba la sogs pa smos so/ /tshe ni 'dir srog gi yo byad du dgongs pa yin te/ yo byad ces bya ba'i sgra phyi nas byas pa yin no/ /tshe'i yo byad kyang rnam pa gnyis te/ nang gi lus dang phyi rol gyi bza' ba dang btung ba la sogs pa ste/ de gnyis kyang zad par nus pa'i phyir ro//gang gi phyir dus kyis rab tu zad par nus pa yin pas 'du byed thams cad de ltar 'gyur ba'i phyir srog gam srog gi yo byad tshe ste srog gi dbang po'o/ /rab tu bsgrub par bya ba ni 'dod par gtogs pa'i 'tsho ba ni nyin mtshan dang 'brel pa'i phyir ro/ /sa gong ma dag gi tshe ni de dang 'brel pa med do//de ltar tshe zad pa de yang slar ldog par mi 'gyur te/ tshigs su bcad pa snga ma'i tshul gyis zad pa dang myur du 'jig pa nyid do/ /gal te sems can thams cad 'chi bar 'gyur ba yin na/ mi rnams smos pa ci'i phyir zhe na/ 'di ni mi rnams kyi dbang du byas nas bstan cing 'jug pa yin pas 'gal ba med do//yang na 'chi ba'i chos can nyid la mi'i sgra yod de mi nyid ni ma yin no/ /'dir dpe bstan cing smras pa/ chu bran zhes bya ba ni chu lag go/ /chu bran de la 'di ltar sos ka'i dus kyi nyi ma'i 'od zer shin tu tsha bas rab tu gdungs pas skam zhing cung zad lus pa'i chu lta bu ste/de bzhin du bdag nyid skal ba chung ba'i 'tsho ba yang 'khor ba'i gnas su nad la sogs pas rab tu gdungs shing myur du 'jig pa yin no/ /srog la lhag par zhen pa dag bzlog pa'i phyir 'di gsungs so/ /'di ltar de bzhin gshegs pa ni gzhan la phan pa'i phyir chos ston par mdzad pa yin te/gzhan gyi bsam pa la sogs pa mkhyen nas ston pa yin gyi/ gzhan dag las bdag nyid kyis go bar bya ba sgrub pa'i phyir ni ma yin te/ ji skad du gsungs pa/ thub rnams chu yis sdig pa 'khru bar mi mdzad cing / /'gro ba'i sdug bsngal phyag gis kyang ni sel mi mdzad//bdag gis gzhan la rtog pa spos pa ma yin te/ /chos nyid zhi ba gsung zhing rab tu sgrub pa yin/ /zhes pas so/ /skye ba 'di nyid las skye ba gzhan du srog 'di zad par gyur na/ sdug bsngal thams cad du gyur pa'i 'du byed nye bar zhi ba yin te/de bas na tshe zad pa la smad par mi bya'o zhes bstan pa'i phyir smras pa/ mel tse byed la zhes bya ba la sogs pa smos te/ dge slong rnams bsti gnas kyi khang pa dag tu 'dus shing 'khod pa na bar skabs su tshig 'di lta bu'i gtam brjod par gyur te/ tshe dang ldan pa dag ci zhig ring ba zhes pa na/kha cig gis smras pa/ mel tse byed pa la mtshan mo ring ngo zhes so/ /gzhan dag ni lam gyis dub pa la dpag tshad ring ngo zhes brjod pa/ bcom ldan 'das kyis gsan nas tshigs su bcad pa 'di gsungs so/ /gzhan dag ni lha zhig 'ongs te bcom ldan 'das la 'di skad ces zhus te/mel tse byed la ci zhig ring / /lam gyis dub la ring 'gyur gang / /byis pa la ni ji zhig ring / /dri tshig bdag la bka' stsal gsol/ /zhes pa la/ bcom ldan 'das kyis bka' stsal pa/ mel tse byed la mtshan mo ring / / zhes bya ba la sogs pa'o/ /gzhan dag ni rgyal po gsal rgyal gnyid med pa dang 'gron po'i skyes bu dub pa dag las brtsams te tshigs su bcad pa 'di gsungs so zhes so/ /tshe dang bcas pa'i 'khor ba ni sdug bsngal ba yin te/ de bas na chos yongs su shes par bya ba la 'bad pas nan tan du gyis shig ces bya ba ni 'di'i bsdus pa'i don to//ring ba ni rgya che zhing yangs pa ste/ rab tu dub pa ni 'di'i rnam par dbye ba'o/ /la ni gang gi phyir zhes pa'i don to/ /gang la ring zhe na smras pa/ mel tse byed la zhes bya ba smos te gnyid mi thob pa'i skyes bu'o/ /mtshan mo ni mun pa ste 'di la 'dod chags can dag lhag par chags pa skye bas na mtshan mo ste/'di ni nges pa'i tshig go/ /mel tse byed pa ni mtshan mo cung zad las ma lus kyang nyis 'gyur sum 'gyur du yod pa snyam sems so zhes bya ba'i don to/ /lam gyis dub pa zhes bya ba ni lam gyis ngal ba las skyes pa'i nyam chung ba dang mi bde bas 'gro ba la sogs pa'i bya ba'i ched du lus dang sems blun zhing dub pa dang ldan pa ni lam gyis dub pa'o//dpag tshad ni 'dir rgyang grags bzhi'i lam mo/ /la zhes bya ba'i sgra yang 'dir rjes su 'brang ba ste/ ji ltar mel tse byed pa la mtshan mo ring bar brjod pa de bzhin du lam gyis dub pa la yang dpag tshad tsam gyi lam la yang ring bar shes pa yin te/de bzhin du byis pa rnams 'khor ba cung zad tsam yin na yang zhes so/ /byis pa ni mi shes pa ste so so'i skye bo thar pa dang srid pa'i yon tan dang skyon 'dis mi shes pa'o/ /yang dang yang 'khor ba dang sred pa'i mthar phyin par ga la 'gyur te/chos gcig kyang mngon par mi shes shing rab tu mi shes pas ni sdug bsngal gyi mthar byed par 'gyur ro zhes nga mi smra'o zhes mdo las gsungs so/ /'khor ba ni srid par skye ba yongs su gzung ba zhes bya ba'i don to/ /byis pa'i khyad par gyis thabs kyi rgyu bstan pa'i phyir smras pa/dam chos zhes bya ba smos pa ni bden par 'gyur ba'i chos te/ de ni 'phags pa'i bden pa bzhi'i bdag nyid do/ /de yongs su shes pa la ni mthong ba'i mig gis re ltar thogs na srid pa bdun zhes bya ba yin pa'i phyir ro/ /mi shes pa zhes bya ba ni khong du ma chud pa dang ma rtogs pa zhes bya ba'i bar du'o//'phags pa'i bden pa bzhi ji lta ba bzhin du ma mthong bas ni 'khor bar 'gyur ro zhes bya ba'i tha tshig gis te/ shes pas ni thar pa yin la/ mi shes pas ni 'khor ba yin no/ /'khor ba'i rtsa ba ni ma rig pa yin pa'i phyir/ dge slong dag ma rig pas bsgribs na ni rgyun mi 'chad par 'khor bar 'khor ro zhes bya ba la sogs pa mdo las gsungs pa'i phyir ro//gzhan dag 'grel pa ni ring ba ni dka' ba yin te/ mtshan mo mel tse byed pa'o/ /lam gyis dub pa la ni dpag tshad kyang dka' ba ste/ nyam thag pa'i phyir ro/ / de bzhin du so so'i skye bo la yang 'khor ba na gnas par dka' ba yin te/ dam pa'i chos mi shes pa'i phyir ro/ /da ni byis pa so so'i skye bo thos pa dang mi ldan pa sdig pa'i las mi byed pa ma yin no zhes mi smra'o zhes gsungs so/ /sdig pa byas pas ni 'khor ba'i sdug bsngal gyi rang bzhin nam/'khor ba'i 'bras bu'o/ /las thams cad ni sdig pa nyid yin pas mi 'dod pa'i 'bras bu 'di yin pa'i phyir nye bar len pa'i phung po lnga'i bdag nyid de'i 'bras bu sdug bsngal yin pa'i phyir ro/ /de yang byis pas ma spangs pa ste/ de bas na 'khor bas 'jigs pa rnams kyis chos kyi ngo bo yongs su brtag pa la 'bad par bya'o zhes de la sbyar ba'i tshigs su bcad pa 'di gsungs so//dam pa'i chos yongs su ma shes pas ni bdag dang bdag gir 'dzin pas brlag par 'gyur te/ de ltar gyur na ni 'khor bar 'jug pa yin no zhes bstan pa'i phyir smras pa/ bdag la bu yod de bzhin du//zhes bya ba la sogs pa smos so/ /mnyan yod na kun dga' bo zhes bya ba'i tshong dpon zhig gnas te/ de la bu brgyad kyang yod la/ dbyig dang gser dang bran pho dang bran mo la sogs pa rnam pa du ma yang yod de/ de bu dang nor gyi dregs pas bsnyems pas bdag dang bdag gir byed cing brlag par 'gyur te/gang la 'di lta bu'i bu dang nor yod pa de ni 'jigs pa ga la yod ces bag phab ste 'dug par gyur to/ /ji tsam na nad kyis btab ste/ gang las kyang yongs su skyob pa ma rnyed nas shi ste ngan song du lhung nas de'i ched du tshigs su bcad pa 'di gsungs te de thos pas srog chags stong phrag brgyad cus chos mngon par rtogs par gyur to//gzhan dag na re dga' bo zhes bya ba'i tshong dpon phyug cing nor mang ba bkren zhing g.yo che ba zhig ste/ de khwa la yang gtor ma mi ster ro/ /de la bu can ngan zhes bya ba yang yod do//de bu dang nor gnyis kyis rgya cher dregs par gyur cing shi bar gyur te/ gdol pa mo long zhing rgan pa zhig gi mngal du skyes par gyur to/ /ji tsam na slong ba'i phyir rang gi khyim du zhugs pa las sgo srung gis brdungs shing lus snang par byas te/ de bas na de'i dbang du byas nas tshigs su bcad pa 'di gsungs so//bdag dang bdag gi la sred pas ni nang dang phyi rol gyi dngos po la zhen par gyur te/ 'gro ba 'di dag kyang bdag med pa de'i ched du sdug bsngal myong zhes bya ba ni bsdus pa'i don to/ /bu zhes bya ba ni bu nyid de/ yun zhes bya ba ni dmyal ba de las skyob pa'i phyir bu'i sgra 'jug ste/ji skad du nges brjod kyi rig byed las bshad pa/ 'dir bu lon phra bar gyur pa yin te phas bu gson bzhin du ma mthong na'o/ /bdag la bu yod pas de bas na 'jig rten pha rol 'grub pa yin no zhes byis pa sems pa'o/ /bdag ces bya ba ni bdag gi'o//yod pa ni bdog pa'o/ /nor zhes bya ba ni mi rnams kyis bdog pa yin no zhes byas shing gzung ba ste gser la sogs pas zhes bya ba'i don to/ /la la zhes bya ba ni bdag la yod do zhes rjes su 'dren pa'i don to/ /'dis ni 'jig rten 'di'i grub pa'i rgyud nyid de ji ltar bstan pa/tshul khrims gtsang dang bzod dang mthun pa dang / /'jam dang cho rigs mtho bar skyes pa yang / /skyes bu nor rnams med par gyur pa ni/ /de dag thams cad mdzes par 'gyur ma yin/ /zhes so/ /de bzhin du zhes bya ba ni nges par gzung ba'o/ /'di ni re zhig 'jig rten du grags pa'i gtso bo'i dngos po yin par ston pa'o//zhes pas zhes bya ba ni lhag par te bya ba'i khyad par nyid de/ brlag ces bya ba des khyad par du byed do/ /cis brlag pa yin zhe na/ yod ces pas so/ /byis pa ni rmongs pa ste sdug bsngal med par shes pa'i phyir ro/ /brlag pa ni nye bar gtses pa yin te 'dir ni nyon mongs pa du mas so//phyi mar ni ngan song gi sdug bsngal gyis zhes bya ba'i don to/ /gang gi phyir byis pa bdag nyid bdag dang bdag gir 'dzin pa gnyis kyis dkrugs shing sdug bsngal ba yin te/ 'dir yang de bu la sred pas bu gso bar bya'o zhes bya ba dang /nor la sred pas nor btsal bar bya'o zhes bya ba ste/ thang dang chu la 'gro ba dang / zhing rmed pa dang / rgyal po'i zhabs 'bring la sogs pas shin tu brlag cing nyon mongs pa'i phyir ro/ /tshe phyi mar yang ngan song du skyes te rang gi nyes par spyod pas drangs pa'i shin tu drag pa'i sdug bsngal myong bas brlag pa'o//gang gi phyir byis pa ni sems can du brjod pa thams cad kyis dngos po sdug bsngal gyi rgyu yin te/ mig dang bral ba dag rin po che'i phung po la rkang pa 'dor bas nyams par 'gyur ba dang / 'phrod pa'i zas yin du zin kyang mang du zos pa la sogs pas nad 'byung bar 'gyur ro zhes bya ba la sogs par bstan pa dang 'dra ba yin no//ci'i phyir bdag dang bdag gir 'dzin pa gnyis kyis 'di brlag par 'gyur zhe na/ log par shes pas te/ ji ltar dgon pa dag tu smig rgyu la chu klung la sogs par 'khrul pas sdug bsngal sna tshogs rnyed pa bzhin no//gal te don dam par bdag nyid yod pa yin na ni de'i bdag gi yang grub pa yin na de yang med pas de bdag gis ji ltar 'grub pa'o/ /phyi rol nang na bdag ces bya la/ bdag ni nang gi byed pa skyes bu rtag pa dang / las rnams kyis byed pa po dang / 'bras bu myong bar byed pa zhes bya ba ni gzhan dag gi gzhung ngo / /na zhes bya ba ni rim pa gzhan du sbyar bar shes par bya'o gang gi phyir med na ste gang gis bdag med ce na/ smras pa/ bdag ces smos te/ rang gi rgyud de mi rnams kyi bdag gi ngo bo phung po lnga'i bdag nyid ces bya ba'i don to//gang la la dge sbyong ngam bram ze bdag go zhes mngon par smra ba de thams cad ni phung po lnga po 'di dag yin no zhes mdo las gsungs pa yin no/ /gal te 'di la bdag yod pas gnas par gyur na ni ji ltar rga ba dang 'chi bar 'gyur ba'o/ /des na drang srong chen pos 'gro ba 'di dag bdag med pa yin no zhes gsungs te/gal te yang bdag gi bdag yod na ni des na bu la sogs pa bdag gir yang yongs su gzung ba yin na/ de ni med de/ des na yang su'i bu ste bdag gi yod par 'gyur ba'o/ /ji zhig nor ni 'di ni ring du spang bar bya ste bdag gir byed pa 'di zhes bya ba'i don to/ / gzhan dag ni gzhan gyis yongs su brtag pa ste/ de la bdag tu nges par brtags na ni rang gi ngo bor bdag nyid med do zhes bya ba'i don te/ bdag nyid med na bdag gi ga la yod do zhes pa'i don to/ /bdag dang bdag gi la chags pa spang ba'i phyir tshigs su bcad pa 'di gsungs so/ /gal te 'jigs kyang phung po'i stobs kyis 'byor ba skyed de de'i stobs kyis nam zhig bcud kyis len la sogs pa nye bar spyad pas skyes pa'am bud med 'chi bar mi 'gyur ro zhe na/smras pa/ skyes pa bud med ces bya ba la sogs pa smos so/ /ded dpon zhig lan bdun gyi bar du rgya mtshor song ste bsgrubs nas nor mang po bsags te tha mar 'khor ba de nyid kyi nyi ma la rang gi khyim du zhugs ma thag 'chi ba'i dus byas so//de la bu med pas de'i nor thams cad rgyal pos khyer ro/ /de'i sdug bsngal gyis gdungs pas chung ma yang shi ste/ de'i phyir rgya cher tshigs su bcad pa 'di gsungs so//nor dpag tu med cing khyad par can gyi longs spyod bsgrubs kyang sems can rnams 'chi ba las 'das par mi 'gyur ro zhes bya ba ni bsdus pa'i don to/ /stong nyid yin pas grangs stong ngo / /stong de brgya ni stong phrag brgya pa'o/ /mang po ni du ma ste brgya stong gi grangs gang yin pa'i skyes pa'am bud med de yin te/des na yang de ltar stong phrag mang po'i grangs zhes bya ba'i don te/ skad cig ma re re la 'khor ba dag tu brgya stong du ma 'chi bar 'gyur bas so/ /skyes pa ni skyes bu'o/ /bud med ni bud med nyid do/ /dang zhes bya ba'i sgra ni brgya stong phrag mang po 'dren pa'i don te de dag 'chi bdag gi drung du 'gro bar 'gyur te rag lus par gyur ces bya ba'i don to//ci lan cig yin nam zhe na/ smras pa/ mang po zhes bya ba ste lan du mar ro/ /dmyal ba'i gnas nas yi dwags skye zhing de las sum cu gsum/ /'gro 'gyur de las dge ba nyams te dud 'gro'i skye gnas skye//dud 'gro'i las kyang nyams te mi yi 'gro bar skye 'gyur bas/ /las kyis 'phangs pa'i 'gro ba 'phyan cing shing rta'i 'khor lo bzhin/ /ci longs spyod ma thob pas 'tsho ba'i yo byad nyams par 'gyur ram zhe na/ smras pa longs spyod ces smos te/ dbyig dang gser dang yul la sogs pa ni gtsor 'tsho ba'i yo byad yin no zhes bya ba'i don to//legs par bsgrubs pa ni yang dag par bsags pa'o/ /'chi bdag ces bya ba ni ris mthun pa rgyun chad pa'i mtshan nyid 'chi ba'o/ /dbang ni de'i bka'i rjes su 'gro zhing rag lus pa'o/ /'gro bar 'gyur ba ni thob pa'o//'di yang bdag dang bdag gi la chags pa spangs pa'i phyir bstan to/ /de ni phyi rol dang nang gi dngos po thams cad bsdus te mthar 'jig pa nyid du bstan pa'i phyir smras pa/ bsags pa kun gyi zhes bya ba la sogs pa smos so/ /mnyan yod na tshong dpon bzhi zhig yod pa las gcig ni nor la sogs pa mchog tu 'dzin to//gnyis pa ni gnas khang mchog tu byed do/ /gsum pa ni gnyen dang phrad pa mchog tu byed do/ /bzhi pa ni bcud kyis len gyi sbyor ba mchog tu byed par gyur to/ /ji tsam na rgyal pos nor ma lus par phrogs pa dang / khyim mes tshig par gyur pa dang /gnyen dang bral bar gyur pa dang / shi bar gyur nas go rims bzhin du de dag gi dbang du mdzad nas 'di gsungs so/ /yo byad dang bcas par srog 'jig par 'gyur ro zhes bya ba ni 'di'i bsdus pa'i don to/ /kun gyis zhes bya ba ni ma lus pa'o//zad pa'i mtha' gang yin pa de ni mtha' zad pa ste/ mthar zad par 'gyur ba dang / mthar 'jig par 'gyur ro zhes bya ba'i don te/ /bsags pa zhes bya ba ni gser la sogs pa'i nor legs par bsgrubs pa'o/ /mtha' ni 'gyel bar 'gyur zhes bya ba ni tha mar zhig par 'gyur ba'o//gang yin zhe na/ smras pa/ bslang ba zhes bya ba yin te/ legs par rim gyis bslang zhing bkod pa gang yin pa'i khyim zhes bya ba'i don to/ /gzhan dag na re bslang ba ni lus yin no zhes zer te 'khor dang / longs spyod kyi ched du ni bdag gis bslang ba btang ba ma yin no zhes smon lam gyi tshig gis shes pa'i phyir ro//phrad pa ni nye du'i skye bo dang phrad pa'o/ /mthar 'bral zhes bya ba ni de dag spong ba'i phyir ro/ /mthar 'chi ba zhes bya ba ni tha mar 'chi ba ste gang 'di dag sngar bstan pa gcig pur ma zad de 'tsho ba yang ngo //ni zhes bya ba'i sgra ni nges par gzung ba ste thams cad du ci rigs par sbyar bar bya ste/ mtha' zad cing zhes bya ba la sogs pa la sbyar ba yin pa'i phyir ro/ /de gang yin zhe na/ smras pa/ gson pa ni tshe ste des na gang spyod pa de nor bstsags pa dang gang du spyod pa ste khang pa'i nang du dang /gang gis spyod pa ste lus kyis dang / gang dang lhan cig spyod pa ste pha ma dang / bud smad la sogs pa dang / gang gi phyir spyod pa ste gson pa'i phyir te de thams cad kyang mthar 'jig par 'gyur ro zhes rtogs par bya'o/ /longs spyod la sogs pa dang / khyim dang / lus dang / chung ma dang / gson pas dregs shing bsnyems pa la de spang ba'i phyir 'di gsungs pa yin no/ /gal te kha cig gson pa'i mtha' 'chi bar 'gyur gyi/ thams cad 'chi bar mi 'gyur ro zhe na/ smras pa/ gson mtha' 'chi ba yin pas na/ /zhes bya ba la sogs pa'i tshigs su bcad pa gnyis smos so//ko sa lar byung ba'i rgyal po gsal rgyal gyi chung ma sdug cing yid du 'ong ba 'chi ba'i dus byas so/ /des de phyung ste bsregs nas de la mtshun gtor yang byas te nyin re bzhin ngus pas gos dang skra dag gsher bar gyur to/ / ji tsam na de bcom ldan 'das ga la ba der song nas/ btsun pa gal te bdag btsun mo ar+ya'i ka'i phyir 'tsho ba glang po che'i lus thob par gyur te/ glang po che'i lus kyang bdag yongs su btang bar byas la btsun mo ar+ya'i ka'i phyir ji srid du bdag rgyal po byed pa dang / ji srid du bcom ldan 'das kyis legs par gsungs pa mchis kyi bar du'o//bcom ldan 'das kyis de'i phyir 'di skad bka' stsal te/ sems can thams cad dang / srog chags thams cad dang / 'byung po thams cad mthar 'chi ba yin zhing 'chi ba mthar 'gag pa yin te/ skyes nas mi 'chi ba med do zhes bya ba'i tshigs bcad kyis rgya cher ro//srog chags thams cad ni nges par 'chi ba yin no/ /de la yang rgyu ni kun nas nyon mongs pa'i las kyis yang de dang rjes su mthun pa skye bar 'gyur gyi/ dgra bcom pa ni ma yin no zhes bya ba ni bsdus pa'i don to/ /sems can thams cad ni srog chags ma lus pa'o//'chi 'gyur zhing zhes bya ba srog yongs su 'dor bar 'gyur ba'o/ /ci'i phyir zhe na/ 'di ltar srog ni tha mar 'chi ba yin te/ 'dus byas yin pa'i phyir srog ni bum pa bzhin du 'jig par rig pa dang 'di dag gi chos nyid yin pa'i phyir sa'i khams kyi sra ba bzhin no//ci srog gi rgyun chad cing skye bar 'gyur ram zhe na/ smras pa/ ji bzhin las zhes bya ba smos te/ las dang rjes su mthun pas las kyi 'bras bu dmigs pa'i phyir nyon mongs pa yang rtogs pa yin te du ba las me bzhin no/ /des na las ji lta ba bzhin du yang 'dir shes par bya'o//'di skad du ston pa yin te/ las dang nyon mongs pa ma spangs pa dag ni rjes su 'brang ba yin te/ de'i dbang du 'gro zhes bya ba ni lhag ma'o/ /'dod chags dang bral ba ni ma yin no/ /ji dang ji lta bu'i las byas pa ste legs par spyad pa'am nyes par spyad pas 'phangs pa'i rnam pas de'i gnas su 'gro ba ni rigs pa'o//rjes su 'breng zhes bya ba ni 'gro ba'o/ /de gang yin zhe na/ las ji lta ba bzhin 'gro ba de gang gi phyir/ dge sdig 'bras bur nyer 'gro ba'i/ /zhes bya ba smos te/ bsod nams dang sdig pa gnyis kyis legs par spyad pa dang ngan par spyad pa de gnyis kyi 'bras bu la yid du 'ong ba dang yid du mi 'ong ba 'byung bar 'gyur te/bsod nams dang sdig pa'i 'bras bu ji lta bar nye bar 'gro ba dang / rjes su 'gro ba dang / bsod nams dang sdig pa'i 'bras bu nye bar bsten pas ni yid du 'ong ba dang yid du mi 'ong ba'i 'bras bu la spyod cing ma spangs pa yang skye bar 'gyur zhes bya ba'i don to//'di ltar des las dang nyon mongs pa bzhin du yid du 'ong ba dang yid du mi 'ong ba'i 'bras bu nges par myong bar 'gyur te/ des na 'jig rten gzhan dag tu 'brang ba yin no/ / las kyi rgyu can 'dod pa dang mi 'dod pa'i 'bras bu myong ba'i srog 'di ni mi brtan pa yin no zhes shes par byas nas mkhas pa rnams kyis legs par spyod pa la 'bad cing bsgom par bya'o zhes bstan pa'i phyir 'di gsungs so/ /ji bzhin las zhes bstan pa la las gang gis 'gro ba gar rjes su 'brang bar 'gyur zhe na/smras pa/ sdig pa'i las kyis dmyal ba dang / /zhes bya ba la sogs pa smos te/ bde ba med pa yang so sa la sogs pa'i gnas kyi dmyal ba'o/ /der rnam par smin pa las byung ba'i bde ba med pa'i phyir gcig tu sdug bsngal ba ni dmyal ba'o zhes mdo las gsungs pa'i phyir ro//sdig pa'i las gang yin pa de dag ni sdig pa'i las te/ nyes par spyod pa'i las kyis nges par dmyal bar 'gro bar 'gyur te/ dmyal ba ni ngan song gsum ste sogs pa'i sgras phyis pa'am gtso bo smos pa yin no/ /bsod nams byas pas zhes bya ba ni sbyin pa la sogs pa legs par spyad pa bsags pa'o//sa zhes bya ba'i sgra ni khyad par gyi don nam yang gi sgra'i don no/ /bde 'gro ni dam pa'am rab tu bsngags pa'i 'gro ba yin pas na bde 'gro ste/ de ni lha dang mi'i 'gro ba zhes bya ba'i bar du'o/ / gang su dag bsod nams byas pa de dag thams cad nyid ci bde 'gror 'gro bar 'gyur ram zhe na/ de ni ma yin pa'i phyir smras pa/ gzhan dag gis ni lam bsgoms pas/ /zhes bya ba smos te/ shin tu bsgom zhing yang dang yang du mngon sum du byas zhes bya ba'i don to/ /gzhan dag ces bya ba ni gang gi phyir gzhan kha cig gis bsod nams lhag par byas pa'o//lam ni 'phags pa'i lam yan lag brgyad do/ /mya ngan las 'das par gyur ces bya ba ni song nas nges par byung ba ste/ mya ngan las 'das pa'i grong khyer du 'jug par 'gyur ba'o/ /ji lta bu zhe na/phung po lhag ma med par 'gro ba yin no zhes bstan pa'i phyir smras pa/ zag med ces smos te/ mthong ba dang bsgom pa'i lam gyis spang bar bya ba'i bag chags spangs nas te/ bag chags lhag ma dang bcas par ni mya ngan las 'da' ba med do/ /'dir sems can las bdag gir byed pa ste/de yang 'chi bas 'jigs pa la bsgom pa'i lam gyis thar pa yongs su bstan to/ /phung po lhag ma med par gyur pa la ni 'chi bas mi 'jigs pa nyid yin gyi/ gzhan dag la ni ma yin no/ /zhes bstan pa'i phyir/ smras pa/ gang du gnas na zhes bya ba la sogs pa smos te/phung po lhag ma med pa'am yongs su mya ngan las 'das pa ma yin pa dag ni ji ltar ngos la brten pas dgra las mi thar ba de bzhin du 'chi ba las ni ji ltar yang thar bar mi 'gyur ro zhes bstan pa'o/ /gang du gnas nas zhes bya ba la sogs pa smos so//ji ltar du kha ma tri ka zhes bya ba'i blon po skyes bu gti mug can de'i dbang gis rgyal po 'phags skyes pos ser skya'i gzhi la gnod pa bsams te/ de'i tshe las kyi stobs bstan pa'i phyir bcom ldan 'das kyis shAkya'i bu gzhon nu gnyis ni zla ba'i dkyil 'khor gyi nang du gzhag go//gnyis ni rgya mtsho'i nang du gzhag go/ /gnyis ni ri rab kyi gseb tu gzhag go/ /gnyis ni nyid kyi lhung bzed kyi nang du gzhag pa las shAkya rnams bsad par gyur pa dang shAkya'i bu de dag kyang shi bar gyur to/ /nye 'khor na gnas pa'i nye gnas rnams kyi ched du mdzad nas tshigs su bcad pa 'di gsungs so//de thos pas sems can stong phrag brgyad cus chos mngon par rtogs par gyur to/ /de la bsdu na ni gnas gsum ste/ nam mkha' dang / chu dang / thang ngo / /thang la yang rnam pa gnyis te/ ri dang / sa'i steng ngo / /'dir gnas pa de dag thams cad du yang shi ba las thar bar ma gyur to zhes bya ba ni bsdus pa'i don to//yan lag gi don ni med ces bya ba ni gcig tu dgag pa'o/ /mi tshugs pa zhes bya ba 'di ni gcig tu gnod pa byed pas so/ /gang du gnas pas yin zhe na/bar snang la zhes smos te bar snang gi dkyil te gang la skar ma dang rgyu skar yod pa ste nam mkha' zhes bya ba'i don to/ /rgya mtsho'i nang ni chu gter gyi gting du'o/ /ri bo rnams ni gang ri rab la sogs pa dang 'brel pa'i gseb ste phug la sogs pa'o/ /zhugs pa ni song nas gnas pa zhes bya ba'i don to//yod pa ma yin te zhes bya ba ni med pa'o/ /de zhes bya ba ni 'og nas smos pa'i sa phyogs te/ sa'i cha zhes bya ba'i don to/ /gang du gnas zhes bya ba ni sa phyogs de na gnas pa ste/ srog chags zhes bya ba ni tshig gi lhag ma'o/ /mi tshugs pa ni zil gyis mi non pa dang mi thub pa'o//'chi bas zhes bya ba ni 'chi bdag gis so/ /'chi ba'i 'jigs pa de ni thams cad na yang yod pa nyid de/ de bas na des 'jigs pa rnams kyis lam nyid bsgom par bya'o zhes bstan pa'i phyir 'di gsungs so/ /gal te da ltar byung ba'i dus nyid la 'chi ba'i 'jigs pas mngon par gtses pa yin gyi gzhan dag tu ni ma yin no zhes rtog pa la de bstan pa'i phyir smras pa/byung dang zhes bya ba la sogs pa smos so/ /mnyan yod du skye dgu'i bdag mo chen mo gau ta mi dus las 'das nas/ bcom ldan 'das nyan thos kyi dge 'dun dang bcas pa der gshegs te/'di ltar 'du byed thams cad ni 'di lta bu'i chos can yin no zhes bya ba la sogs pas chos bstan to/ /ji tsam na 'char kas bcom ldan 'das la 'di skad ces gsol to/ /bcom ldan 'das ji ltar mya ngan mi mdzad/ de ci'i phyir zhe na/ 'di ni bcom ldan 'das kyi yum sru gso zhing skyed pa lags na zhes zhus pa dang 'di gsungs so//gang 'jigs pa shes par bya ba lus 'di spang ba'i 'jigs pa dang / gang shes par byed pa ji lta ba bzhin du shes pa'i mkhas pa dang / gang la brten nas shes par bya ba'i sangs rgyas kyis bstan pa'i chos dang /gang bya ba'i tshangs par spyod pa spyad pa ste/ 'dis ni 'di bzhi ston to zhes bya ba ni bsdus pa'i don to/ /byung ba zhes bya ba ni gang sems can gnas par gyur pa de'i gnas skabs kyi sgrub pas 'gro ba sems can dang 'brel pa'i bya ba'i ming yin pa'i phyir te lus 'di btang nas zhes bya ba'i tshig gis so//'byung bar 'gyur ba ni skye bar 'gyur ba ste/ ma 'ongs pa'i dus na yang sangs rgyas de bzhin no zhes pa'i tshig gis so/ /dang gi sgra ni bsdu ba'i don to/ /byung ba dang 'byung bar 'gyur ba zhes bya ba'i don to/ /'gro ba zhes bya ba'i don ni 'jig rten pha rol du'ang mya ngan las 'das pa ste/ji bzhin las kyis zhes bya ba ji skad du sngar bstan pa yin te sdig pa'i las kyis dmyal ba dang zhes bya ba la sogs par ro/ /gang dag byung bar gyur pa de yang 'gro ba yin te/ byung ba 'das par gyur pa yin pa rtogs pa'i phyir te de'i dus kyis gdul bya gzhan dag 'das te yang ldog pas ma bstan to//ci zhig spangs nas 'gro ba'am 'das par gyur pa yin zhe na/ smras pa/ lus 'di btang nas zhes smos te/ zin pa'i lus 'di spangs pa'o/ /de kun 'jig par zhes bya ba ni thams cad 'jig cing mi rtag pa nyid de/ de nyid kyi rnam pas thams cad 'das pas ni mi rtag pa'o//de sus rtogs pa yin zhe na/ mkhas pas te blo dang ldan pas so/ /rtogs pa ni khong du chud par bya'o/ /gang du gnas nas rtogs pa yin zhe na/ des smras pa/ chos la gnas kyis zhes bya ba smos te/ skyes bu dam pa la brten cing dam pa'i chos nyan pa dang /tshul bzhin yid la byed pa dang / so so thar pa'i sdom pa la sogs pa'i tshul gyis tshogs la rigs pas 'jug pa'o/ /de la gnas nas ci zhig byed ce na/ smras pa/ tshangs par spyod pa zhes bya ba smos te/ 'phags pa'i lam tshangs pa'i 'bras bu'i spyod pa ni tshangs par spyod pa ste/mya ngan las 'das par 'gro ba la 'bad cing lam bsgom pa zhes bya ba'i don to/ /spyod ces bya ba ni sgoms shig ces bya ba yin te/ ji skad du gsungs pa/ tshul khrims la brten cing tshul khrims la rab tu gnas pas ni chos nyid bsgom par bya ste/zhi gnas dang lhag mthong ngo zhes bya'o/ /mi rtag pa las bzlog par 'dod pas ni tshogs kyi lam la 'bad par bya'o zhes bstan pa'i phyir 'di gsungs so/ /'gro ba rnams la rga ba dang mi rtag pas nye bar gtses pa mthong nas tshogs kyi lam la sogs pa la nan tan du bsgrub pa dang /mkhas pa rnams kyis 'bad pas brtsam par bya'o zhes bstan pa'i phyir smras pa/ rga ba zhes bya ba la sogs pa smos so/ /bram ze zhig gis bcom ldan 'das la kye gau ta ma khyod kyis 'dod pa rnams spang ba dang yang bar bya'o zhes bstan to//zhes bdag gis thos na btsun pa 'di ltar 'dod pa rnams yid du 'ong ba yin yang ci ltar yongs su spang bar bya zhes zhus pa las/ de la bcom ldan 'das kyis bdag nyid drang ba'i phyir gtam rgya cher mdzad de 'di gsungs so/ /gzhan dag ni 'jig rten pa'i chos ni bzhi ste/sdug pa/ dben pa/ phangs pa/ yid du 'ong ba'o/ /de thams cad kyang tha mar 'jig pa yin no zhes bya ba la sogs pa'o zhes so/ /ci nas kyang rga ba la sogs pa mthong nas ni 'dod pa rnams spong ste gang spong ba ni bstan pa'o/ /gang la 'jig rten pa rnams kyis ni de dag spang bar shin tu dka' ba yin te/'dir gsum po 'di dag ma mthong bas zhes bya ba ni bsdus pa'i don to/ /rga ba'i zhes bya ba ni rga bas zil gyis gnon pa'i sems can no/ /mthong ba ni kun du snang ba'o/ /nad kyis sdug bsngal dang zhes bya ba ni tshor ba mi bzad pas yongs su nyam thag pa'o/ / glo bur du byung ba dang lhan cig skyes pa'i nad kyis te/ go rims bzhin du sbyar ro/ /dang gi sgra ni mthong ngo zhes bya ba 'dren pa'i don to/ /shi ba mthong nas ni zhes bya ba ni dus las 'das pa'o/ /ni zhes bya ba'i sgra ni rnam pa gsum gyis mthar phyin pa bstan pa'i phyir ro/ /shi ba'i rang bzhin smras pa/sems dang bral ba'i zhes bya ba smos pa ni rnam par shes pa spangs pa zhes bya ba'i don to/ /gtsor 'di smos pa yin gyi tshe dang drod dang yang bral bar bsgrub pa yin te/ ji skad du gsungs pa/ tshe dang drod dang rnam shes kyis/ /gang tshe lus 'di spangs pa na/ / de tshe sems med shing bzhin du/ /sa yi steng du bor bar 'gyur/ /zhes bya ba'i tshig gis so/ /'di la 'jig rten pha rol la dmigs nas skyo ba'i gzhis brtan pa gang byed pa de ston pa yin te/ spangs pa ni dor ba'o/ /brtan pa ni mkhas pa ste 'dod pa'i nyes dmigs shes pa'o//gang gi phyir ma rtogs pa ni brtan pa mi 'byung ba'i phyir ro/ /ci zhig spangs pa yin zhe na/ btson ra 'dra ba'i khyim zhes bya ba smos te/ khyim la sogs pa yongs su gzung ba la gang 'dun cing chags pa de ni btson ra 'dra ba'i khyim ste/ des der byis pa 'ching bar byed pa yin te/khyim gyi nyes dmigs yul gyi 'ching ba des 'khor bar gnas pa'i phyir ro/ /de yang rgyu gang gis brtan pa nyid spong gi gzhan ma yin zhe na/ smras pa/ 'dod spang zhes bya ba yin te/ 'dod pa ni 'dun pa'i 'dod chags de'i yul lam/ gzugs sdug pa la sogs pa'o//bas zhes bya ba ni gang gi phyir yul ring por 'jig rten pa 'dod pa dag la goms te/ des na brtan pa ma yin pas spong bar mi nus pa yin no/ /'jig rten pa ni zhes bya ba ni so so'i skye bo ste/ yul dag la brkam pa ni 'jig rten te yul la brkam chags can zhes bya ba'i don to//nus re skan zhes bya ba ni bde bas spong bar mi nus te spang bar dka'o zhes bya ba'i don to/ /byung ba gnyis pa la brten nas ni rga ba dang / sdug bsngal ba dang / nad dang shi ba'i sgras ni lang tsho dang phun sum tshogs pa dang / nad med pa dang / srog gi rgud pa bstan te/ lhag ma ni snga ma bzhin no//gzhan gyi rgud pas skyo bar bya ba'i phyir gnas yin te/ des na yang dang yang du blta bar bya'o zhes bstan pa'i phyir 'di gsungs so/ /rga ba la sogs pas ni nang dang phyi rol gyi dngos po dag la phal cher mnyam par gtses par bstan pa'i phyir/ smras pa/ rgyal po'i shing rta zhes bya ba la sogs pa smos so/ /rgyal po chen po chos gsum po 'di dag ji srid yod kyi bar du 'jig rten dag la mi 'dod pa yin te/ gsum po 'jig rten la yod pa yang 'di lta ste/ nad dang / rga ba dang / 'chi ba'o/ /de bzhin gshegs pa dgra bcom pa yang dag par rdzogs pa'i sangs rgyas 'jig rten du byung bar gyur na ni ma yin te/de bzhin gshegs pas gsungs pa'i chos 'dul ba la sogs pa bstan pa med par ni shes rab kyis skyo ba med pa'o zhes bya ba la sogs pa mdo las gsungs so/ /tshigs su bcad pa 'di ni rgyal po gsal rgyal gyi dbang du mdzad nas gsungs so//gzhan dag na re btsun mo phreng ldan ma lang tsho'i dregs pas bsnyems te/ rgyal po'i shing rta la zhon nas 'ongs pa dang 'khor dang bcas pa'i dbang du byas pa yin no zhes zer ro/ /'di'i bsdus pa'i don ni/gang yang dor bar bya ba phyi dang nang gi dngos po rga ba'i chos can te/ gang gzung bar bya ba de'i gnyan por gyur pa'i chos zhes bya ba de yongs su bstan pa yin no/ /'jig pa ni rga bas rnam par 'gyur ba'o/ /'ang ni 'jig rten pa nyid de nges par 'chi ba yin gyi/ 'dir gzhan du mi 'gyur ba'o zhes bya ba'i don to//de gang yin zhe na/ smras pa/ rgyal po'i shing rta ste dbang phyug dam pas yongs su bsrungs pa yang rnam par 'jig par 'gyur na/ gzhan dag lta smos kyang ci dgos zhes ston to/ /yo byad med pa ma sbyar ba ni nges par 'jig par 'gyur ba yin no zhes smras pa/shin tu bkra ba zhes smos te/ a ni dang / nor bu rin po che dang / pags pa dang / la ba dkar po la sogs pas legs par sbyar ba ste/ chas pa yin yang zhes bya ba'i don to/ /shing rta'i theg pas rgya che ba nyid yin pa'i phyir de la nye bar gnas pa yang bstan te/ phyi rol gyi dngos po thams cad nye bar 'gyur ba nyid du nye bar mtshon pa'o//de bzhin zhes bya ba ni de ltar te/ ji ltar rgyal po'i shing rta legs par bkod pa yang 'jig par 'gyur ba de bzhin du lus kyang yongs su bsrungs su zin kyang rga ba nye bar 'gro ste/ rnam par 'gyur bar nye bar 'gro zhes bya ba'i don to//'dis ni nang gi dngos por 'gyur ba bstan to/ /gal te gzugs dang lus rga bar 'gyur ba yin na de lta na gang rga bar mi 'gyur zhe na/ smras pa/ dam pa rnams kyi chos zhes bya ba yin te/ sangs rgyas dang / sangs rgyas kyi nyan thos rnams kyi chos kyi sku'o//kyang gi sgra ni khyad par gyi don to/ khyad par de nyid smras pa/ rgas mi 'gyur zhes bya ba ni rnam par 'gyur ba'i gnas ma yin te/ thams cad ni rnam par 'gyur ba'i gzhi yin mod kyi chos kyi sku ni ma gtogs so/ /de rga bar mi 'gyur bar ji ltar shes pa yin zhe na/ smras pa/ dam pa ste zhes bya ba smos te/ gang gi phyir skyes bu dam pa rnams ni phyin ci ma log pa'i chos rtogs shing gzhan dag la ston par byed pas so/ /gal te yang chos kyi sku de lus bzhin du rga bar gyur na ni de rga zhing rnam par gyur te nus pa zad pa'i phyir nus pa chung bas dam pas mi mchog dag las rtogs par byed pa dang rtogs par mi nus so//'di zhes bya ba ni chos so/ /mi mchog gzhan zhes bya ba ni snod du gyur cing skal ba dang ldan pa dag go/ /rtogs par byed ces bya ba ni khong du chud par byed pa'o/ /yang na gcig la gcig gtod par byed pa yin te/ bstan pa'i chos dang mngon par 'brel ba'i phyir 'di ltar skyes bu dam pa dag gis sde snod gsum brgyud de/ byin pa'i tshul gyis skyes bu dam pa dag nyid la bstan pa'i chos gnas par bya ba yin te/ des na ji srid 'jig rten du 'phags pa bzhugs pa de srid du chos de yang gnas pa yin no//rnam pa gzhan du na ma bshad du zin kyang don de shes rab dang tshul khrims dang / ting nge 'dzin gyi rang bzhin gyi sde snod gsum gyi don ni gnas pa yin pa'i phyir ro/ /gzugs dang lus la mos pa rnams la sangs rgyas kyi chos kyi sku la mos pa dang / dang ba bskyed pa'i phyir 'di gsungs so//gang gi phyir rga ba ni thams cad du bye brag med par 'jug cing gzugs mi sdug par byed pa yin te/ des na smad pa'i phyir smras pa/ rga ba khyod ni blun zhing ngan/ /zhes bya ba la sogs pa smos so/ /bcom ldan 'das gyos po'i gnas kun dzi ka zhes bya ba na bzhugs te/de nas bcom ldan 'das dgun gyi dus su nyi ma la sku rgyab gtad de gdugs bsnams shing bzhugs pa la/ tshe dang ldan pa 'char ka bcom ldan 'das kyi sku rdzi bcag byed cing zhus pa/ btsun pa bcom ldan 'das kyi sku sngon ni gya nom zhing / gya nom par gnas pa lags so zhes gsol ba dang /ji tsam na bcom ldan 'das kyis bka' stsal pa/ rga ba khyod ni zhes bya ba la sogs pa smos so/ /'dir smad pa nyid dang / smad par bya ba dang / smad par byed pa gsungs so/ /khyod ni ngan zhes bya ba ni smad pa'i tshig yin pa'i phyir ro//rga ba zhes bya ba ni smad pa'i dngos po bstan pa yin no/ /blun zhing khyod ni mi rigs zhes bya ba la sogs pa ni smod par byed pa'i rgyu yin no zhes bya ba ni bsdus pa'i don to/ /ngan pa ni smad pa'o/ /gang gi dbang du byas te ngan pa zhes smad ce na/ smras pa khyod ni zhes bya ba rga ba ste/ rga ba khyod la smad par bya bar 'gyur zhes bya ba'i don to//gang la smad par bya ba de la bod pa'i tshul gyis bstan pa'o/ /rga ba ni lus mi sdug par byed pa ste/ gang gi phyir smad pas smad pa'i tshul du byas pa'o/ /blun pa zhes bya ba ni blun pa las skyes pa yin pas blun pa ste/ rga ba las bye brag mi shes pa zhes bya ba'i don to//mi rigs pa byed pa'i phyir yang blun pa yin te/ ci'i phyir zhe na/ blun pa 'dis ni 'di ltar thams cad la khyod mi rigs pa byed pa yin te/ lus sdug pa dang bral bar byed ces bya ba'i don to/ /de ltar thams cad du mi rigs pa byed par ji ltar shes par bya zhe na/ smras pa/ yid du 'ong ba'i gzugs 'di yang zhes bya ba smos te/ de ltar sangs rgyas bcom ldan 'das kyi sku yid du 'ong ba gang bsod nams dang ye shes kyi tshogs chen po bskal pa grangs med pa gsum du bsags pas skyes bu chen po'i mtshan sum cu rtsa gnyis dang / dpe byad bzang po brgyad cus rnam par mdzes pa de lta bu'i yid du 'ong ba'i 'jig rten na de las ches yid du 'ong ba ni cung zad kyang med de/de khyod kyis mngon par bcom par byas pa'o/ /'di yang zhes bya ba ni de lta bu'o/ /yid mngon par dga' bar byed pa yin pas yid du 'ong ba ste sems dga' ba'o/ / gzugs ni lus so/ /khyod kyis zhes bya ba ni rga bas te/ gang 'di ltar mngon par bcom pa ste zil gyis mnan pa'o/ /de ltar thub pa mchog sems can thams cad las khyad par du gyur pa'i sku la yang rga ba'i chos yod na/ gzhan dag gi lta smos kyang ci dgos zhes bstan to/ /lus la lhag par chags pa spang ba'i phyir 'di gsungs so//'dir rga ba 'ba' zhig gis gtses par ma zad de 'chi ba la sogs pas kyang gtses pa yin no zhes bstan pa'i phyir gang zhig lo ni brgyar zhes bya ba la sogs pa smos so/ /mnyan yod na tshong dpon chen po shin tu tshe ring ba zhig nad dang rga bas mngon par gtses te shi ba las bsod snyoms la song ba dag gis shes te de lta bu'i gtam bcom ldan 'das kyis dge slong de dag las gsan te/bcom ldan 'das kyis 'di gsungs so/ /gang gi tshe 'chi bar 'gyur ba ni dus dang dus ma yin par yang 'chi ste/ ji ltar nad dang rga bas phal cher 'chi bar 'gyur ro zhes 'dir ston to zhes bya ba ni bsdus pa'i don to//gang zhig ces bya ba ni gang la la ste thams cad kyang mthar 'chi ba yin no/ /yang gi sgras ni dus ma yin par yang 'chi bar ston to/ /lo brgya zhes bya ba ni lo brgya ste/ dus tshigs brgya zhes bya ba'i don to//gang zhig dus 'di ji srid du 'tsho bar gyur ba de yang 'chi bdag nyid kyis khrid pa yin te/ nges par 'chi ba yin no zhes bya ba ni yang gi sgra'o/ /nges pa med de gang zhig lo brgya 'tsho ba yang ste/ lo stong dang 'brel ba med pa 'di ni dus de tsam du yang sems can de 'chi ba las phyogs par nges pa zhes bya ba'i don to//ji ltar 'chi bdag gis khrid ce na/ smras pa/ 'di dag ces bya ba ni rjes su 'gro ba'am rjes su 'brang ba ste srog chags so/ /gang yin zhe na/ smras pa/ rga ba zhes bya ba yin te/ rga bas 'joms shing gnod par byed pa ste/ gang lo brgya tshang bar lon pa de ni rga bas bcom pa ste gzugs rnyed par byas shing che'i gnas med pa ste smin pa'i 'bras bu bzhin no//gang ma tshang bar nad kyis bcom pa ni 'di nyid yin no zhes bstan pa'i phyir/ yang na na ba'am zhes smos te/ la la 'dod chags bdo bas kyang 'joms par 'gyur ro/ /yang na zhes bya ba ni rnam pa gnyis su brtag pa ste/rga ba ma byung bar yang gang la la dag nad kyis bcom ste shi ba yin no zhes thos te/ dper na 'phags pa pi lin nga'i bu la sogs pa lta bu ste shing tog ma smin pa dbyig pas bsnun pa lta bu'o/ /de gnyi ga med cing mi rtag pa ni sngon gyi las kyi dbang gis 'chi bas 'joms par 'gyur te/gang tshe thung ba'i las 'dzin par 'gyur ba de bstan pa'i phyir smras pa/ 'chi bas 'joms zhes bya ba smos te/ yang na 'chi bdag nyid kyis 'di dag 'joms par 'gyur ro zhes pa'i don te/ mngal la sogs pa na yang 'chi ba yod pa'i phyir ro//nad dang rga ba ni bcud kyis len la sogs pas de bcos su yod kyi/ 'chi ba ni ma yin no zhes bstan to/ /srog dang nad med pa dang lang tsho'i dregs pas dregs pa rnams la de'i dregs pa spang ba'i phyir 'di gsungs so/ /'dus byas rnams ni 'jig pa'i rgyu la ma brten par skad cig mas 'jig pa yin te/rang bzhin gyis 'jig pa yin no zhes bstan pa'i phyir smras pa/ rtag tu 'gro zhes bya ba la sogs pa smos te/ a yo rgya ya zhes bya ba'i grong khyer chu bo gang gA dang nye ba na/ nya pa shin tu rgas shing 'khogs pa zhig gnas te nya gson dag bye thang gi steng du chu rab tu khol ba dag yod pa'i nang du brtse ba med pas bcug ste/de ltar 'gul ba la lta zhing dga' ba dang dgod pa gzigs te/ de'i dbang du mdzad nas tshigs su bcad pa 'di dag gsungs so/ /sems can 'di dag ni rgyun mi 'chad cing ldog pa med pas 'chi ba'i drung du skad cig ma'i rgyun gyis 'gro ba yin no zhes bya ba ni bsdus pa'i don to//rtag tu zhes bya ba ni gnas skabs thams cad du 'chi bdag gi drung du 'gro ba yin te/ byis pa dang / gzhon nu dang / lang tsho dang / bar ma dang / rgan pa'i gnas skabs gzhan du 'thob pa yin pas rtag tu 'gro ba nyid yin zhing gnas skabs gang du yang mi sdod pa'o//ci re zhig na ldog par yang 'gyur ro zhe na/ smras pa/ ldog pa med pa zhes bya ba smos te/ 'dis ni nges par gzung ba'i 'bras bu bstan te/ gnas skabs phyi mar song bas gnas skabs snga mar mi gnas pa yin no//gal te mtshan mo dang nyin mor ldog par mi 'gyur ram zhe na/ smras pa/ nyin dang mtshan du zhes bya ba smos te/ nyin zhes bya ba ni nyin par te/ mtshan mo yang yin no/ /zla ba phyed dang / zla ba dang / lo la sogs pa 'di ni rnam grangs yin pa'i phyir de tsam du bshad do/ / rab tu 'jig pa zhes bya ba ni skad cig ma re re la gzugs dang nad med pa dang stobs la sogs pa'i khyad par yongs su zad pa zhes bya ba'i don to/ /'di dag gis ni na tshod kyi gnas skabs nyin bar dang mtshan mo re re la skad cig mas mi rtag pa nyid du bstan to/ /lhag mas ni sdug bsngal gyis sdug bsngal ba nyid du bstan pa'i phyir smras pa/chu tshan zhes bya ba smos pa ni las 'dzin pa'i bsdu ba ste/ chu yang yin la tsha ba yang yin pas chu tshan te/ chu de'i nang du bskol ba zhes bya ba'i don to/ /yang na gang la chu tsha ba yod pa'i thang ste/ rab tu bskol ba'i chu'i nang du'o//nya dang 'dra ba zhes bya ba ni ji ltar nya lta bu'o/ /gdungs pa zhes bya ba ni bskol ba'o/ /ji ltar nya chu tshan gyi nang du bcug ste bskol ba de bzhin du sems can 'di dag kyang rab tu sdug bsngal ba yin no/ /sems can 'di dag ji ltar sdug bsngal ba yin zhe na/ smras pa/ skye dang 'chi ba'i zhes bya ba smos te/sdug bsngal ba ni 'du byed la sogs pa mi 'dod pas so/ /sdug bsngal gyi rang bzhin nyid smras pa/ skye dang 'chi ba'i zhes bya ba ste/ 'khor ba yin pa'i phyir ro/ /'khor bas ni skye ba dang 'jig pa mtshon pa'i phyir te/ gnyis pa 'khrul 'khor dang 'dra bas 'gro ba rnams gzir ba yin te/sdug bsngal gsum dang ldan pa'i phyir rigs dang ldan pa dang 'byor ba dang lang tsho la sogs pa yid du 'ong ba'i dngos po rnam par 'gyur ba nyid du bstan pas 'khor ba la lhag par chags pa spang ba'i phyir tshigs su bcad pa 'di gsungs so/ / dus thams cad dang spyod lam thams cad du srog 'gag pa nyid du 'gyur ba'i phyir smras pa/ tshe 'di nyin dang mtshan mo zhes bya ba la sogs pa smros so/ /ri gangs can gyi gnas na drang srong lnga brgya rga ba dang 'chi ba med par bya ba'i phyir dka' thub spyod cing 'dug go/ /de 'dul ba'i phyir bcom ldan 'das der gshegs te/'dod pa la rnam par rtog pa la sogs pas ni ngan song du 'gro'o zhes bstan cing skyo ba skyed de/ ri kha ba can gyi phyogs ri'i steng nas 'og tu gang gA'i chu rgyun 'bab pa la gzigs shing srog la mi 'chi bar bag phab ste 'dug pa de'i dbang du mdzad de 'di gsungs so//rtag tu rgyun mi 'chad par tshe zad pa yin no zhes bya ba ni bsdus pa'i don du bstan to/ /tshe ni srog go/ /nyin dang mtshan mo ni nyi ma dang mun pa'o/ /'dis ni dus thams cad du tshe zad par bstan to/ /'gro ba dang ni zhes bya ba ni gal te 'gro na yang grib ma bzhin no//'dug pa na zhes bya ba ni dbugs 'byung ba dang rngub pa bzhin te/ 'dug pa na yang lus kyi gnas skabs thams cad du ste/ g.yo ba dang mi g.yo ba'i gnas skabs lus kyi spyod lam thams cad yongs su gzung ngo / /'dir dpe bstan pa/ chu klung chen po'i zhes bya ba la sogs pa smos te/rgyun ni chu'i rgyun no/ /chu klung chen po ni chu bo gang gA la sogs pa'o/ /bzhin du zhes bya ba ni dpe'o/ /'gro bar 'gyur zhes bya ba ni thug pa med par 'gro bar bstan pa yin te/ tshe ni chu klung chen po'i chu bzhin no/ /phyir mi ldog par zhes bya ba ni tshe 'das par yang ldog pa med pa'i phyir ro//chu klung chen po dang 'dra bar ni sems can no/ /rgyun lta bu ni tshe'o/ /ji ltar gnas skabs thams cad du chu bo chen po'i rgyun 'gro zhing ldog pa med pa de bzhin du tshe yang de lta bu'o zhes bstan pa yin no/ /tshe rtag pa yin no zhes rtog pa spang ba'i phyir 'di gsungs so/ /chos kyi sku ni rtag pa nyid de mchog tu 'gyur ba med pa dang 'dod pa'i 'bras bu yin pa'i phyir te/gzugs kyi lus ni ma yin no zhes bstan pa'i phyir smras pa/ gson mtha' zhes bya ba la sogs pa smos so/ /mnyan yod na u ta ra zhes bya ba'i gnas brtan na tshod lo brgyad cu tsam lon pa las rab tu byung ba rga ba dang nad kyis shin tu gtses shing nyam thag ste/stan las ldang ba dang rtsol ba la sogs pa mi nus pa zhig yod de khyad par du de'i dbang du mdzad nas 'di gsungs so/ /lang tshos dregs pa spang phyir dang / /rga ba dang nad kyis 'jig cing 'chi ba dang / mi gtsang ba nyid du bstan pa ni 'dir bsdus pa'i don to//yongs su rga ba dang zhes bya ba ni rga bas yongs su nyams shing bcom pa zhes bya ba'i don to/ /lus 'di zhes bya ba ni zin pa'i phung po'o/ /nad kyi tshang zhes bya ba ni nad kyi gnas so/ /myur du 'jig cing zhes bya ba ni rang bzhin gyis 'jig pa nyid du 'dis bstan to//mchog tu 'jig pa'i ngang tshul gyi gzhi yin te rkyen tshogs pa nyid kyis 'jig pa'i bdag nyid de ji ltar las spyod pas yan lag dang nying lag rnams la mtshon la sogs pas lus bcad pa la sogs pa yod pa'i phyir ro/ /'jig par 'gyur zhes bya ba ni bral ba ste/ gzugs kyi lus dang ming gi tshogs bral ba'i phyir te/ 'dis ni 'chi ba nyid ston to/ /'dis dus ji srid gnas pa'i dus de srid kyi bar du gtsang ba dang dri zhim pa'i rdzas 'dus pa'i bdag nyid yin nam zhe na/ de yang med par bstan pa'i phyir smras pa/ rnag gi tshogs kyang zhes bya ba smos te/dri nga ba'i rdzas bsags pa zhes bya ba'i don to/ /sgra ba dag tshogs ni lus so zhes brjod pas rnag gi tshogs ma yin pa'i zhes gzhan du brjod par 'gyur te/ dri nga ba'i rdzas 'dus pa yin pa'i phyir 'di ni lus ma yin pa yang 'jig par 'gyur ro zhes bya ba'i don to/ /ci'i phyir 'di ni nges par 'jig pa yin zhe na/mtha' 'chi ba yin pa'i phyir zhes bya ba smos te/ gang gi phyir srog thams cad ni mthar 'chi ba yin pa'i phyir ro/ /chos nyid kyi rigs pa smras pa/ ji ltar me ni tsha ba'i bdag nyid ces bya ba la sogs pa yin te/ gang gi phyir srog yod cing lus gnas pa yin pa'i phyir 'di ni srog 'jig pa yin te/des na gnas nyams na gnas pa nyams pa'i phyir nges par 'jig par 'gyur ro/ /lang tsho la sogs pas dregs pa dag la de spang ba'i phyir 'di gsungs so/ /'jig par 'gyur ro zhes bstan pa la 'di ji ltar 'jig par 'gyur zhe na/smras pa/ kye ma lus 'di mi thogs par/ /zhes bya ba la sogs pa smos so/ /mnyan yod na bcom ldan 'das dur khrod du gshegs shing rgyu ba na phyogs 'ga' zhig na shi ba'i ro myags pa dag gzigs te/ rgyal po la sogs pa rigs mtho ba las rab tu byung ba dag zhag bdun gyi 'og tu nges par 'chi ba las brtsams te 'di gsungs so//lus 'di mi rtag pa nyid dang stong pa nyid du yongs su bstan pa yin no zhes bya ba ni bsdus pa'i don to/ /mi thogs pa zhes bya ba ni yun ring por mi thogs pa ste zhag bdun tsam gnas pa yin pa'i phyir srog ni myur du 'chi ba'i chos nyid du bstan pa'o//kye ma zhes bya ba ni srog chags dang / de'i lus la snying brtse ba dang rjes su brtse ba yin pa'i phyir ro zhes bstan pa yin no/ /lus 'di zhes bya ba ni zin pa'i phung po'o/ /sa'i steng du zhes bya ba ni dur khrod la sogs pa'i sa phyogs so//'gyel bar 'gyur zhes bya ba ni lhags pa ste/ sa'i steng du lhung zhing gnas pa'i don to/ /stong zhing zhes bya ba ni gnas pa gsum dang bral ba ste/ bdag med pa zhes bya ba'i don to/ /'o na rnam par shes pa'i bdag de yang mi gnas sam zhe na/ smras pa/ rnam shes dang bral nas zhes bya ba smos te/bral ba ni so sor bral ba ste/ rnam par shes pa 'di las bral zhing sems dang bral ba'i don te/ ji skad du/ tshe dang drod dang rnam shes kyis/ /gang tshe lus 'di spangs pa na/ /dper na sems med shing bzhin du/ /sa yi steng du nyal bar 'gyur/ / zhes so/ /bdag med cing rnam par shes pa dang bral ba'i phyir 'chi ba yin no zhes rtogs par bya'o/ /'dir dpe bstan pa/ dur khrod bor ba zhes bya ba yin te/ dur khrod bor ba'i mgal dum bzhin/ /zhes bya ba la/ dgos pa med pa'i shing yin te/ /skyes bu shing gi bsags pa byed par 'dod pas nags tshal du zhugs te/shing drang po bcad cing blangs nas lhag ma khong stong dang rul pa dgos pa med cing / snying po med pa'i shing ni yongs su 'dor ba yin no/ /dper na nags tshal dag na dgos pa med pa'i shing dag bor na spyod pa med cing gnas pa de bzhin du lus 'di yang rang bzhin gyis bdag gis stong la rnam par shes pa dang bral zhing 'chi ba'i gnas skabs na g.yo ba med cing dur khrod kyi phyogs na 'gyel bar 'gyur ba yin no//gzhan dag ni mgal me'i dum bu yin no zhes 'dod de/ sdug pa'i lag mthil gyis gzung dri zhim phreng ba phye ma'i dris mchod cing //bde ba'i lus 'di dur khrod gnas su mgal dum ltar ni yongs bor nas/ /gdug pa'i gcan gzan brkam pa'i mthus ni mig dag sha lpags snag gu dag /'jig par byed de ngan pa'i rang bzhin mi brtan 'jig rten sgyu ma bzhin/ /zhe'o/ /gzhan dag ni sog mar 'dod de/ji skad du/ ji ltar btab kyang rung ste sa bon ni/ /bsod nams can gyis lo tog mang po thob/ /bsod nams med na ser bas bcom 'gyur te/ /mgal dum tsam yang 'thob pa ma yin no/ /zhes so/ /lus 'di ni tha mar dur khrod pa yin no zhes bstan pa ste/ de la lhag par zhen pa rnams spangs pa'i phyir 'di gsungs so//des na yang lus 'di ni nges par dur khrod kyi gnas yin te/ 'dis ni 'tsho bar gyur na yang mkhas pa rnams kyis dgos pa med do zhes bstan pa'i phyir smras pa/ rgyun du zhes bya ba la sogs pa smos te/ rma'i sgo nas rab tu 'dzag cing gsher ba dang nye du dang sman pa rnams kyis spangs shing bzhi mdor bor ba mdze can zhig gzigs te/dge slong rnams la bka' stsal pa/ dge slong dag 'di ni nyes pa mang pos ma rung ba ste/ lus ni byas pa chud gzon pa dang dri nga ba yin no zhes rgya cher gsungs so/ /dge slong zhig gis bcom ldan 'das la 'di skad ces gsol to//btsun pa de ltar lus 'di ni shin tu ma rung ba lags te/ shin tu smad cing phyag dar gyi phung po lta bu lags so/ /dge slong dag de de bzhin no/ /de de bzhin te zhes bya ba la sogs pa ste/ tshigs su bcad pa gnyis gsungs so//gang gi phyir sems can 'di dag brtag par bya na 'di ltar lus 'di la phal cher 'dod pas chags shing gang mi gtsang ba dang / sdug bsngal ba dang mi rtag pa nyid yin te/ de la rgyu gang gis 'dir gtsang ba dang / bde ba dang / rtag pa'i phyin ci log gi gnyen po 'dir bstan to zhes bya ba ni bsdus pa'i don to//yang na bstod pa dang / smad pa la sogs pa gsal bar byed pa'i don te/ gang smras pa/ dor ba cir mi rung zhes bya ba ni smad cing bshud pa'i tshig yin no/ /'di zhes bya ba ni zin pa'o/ /smad par bya ba nyid smras pa/ lus zhes bya ba smos te/ dri nga ba'i rdzas bsags par gyur ba'i lus te/'dis bya ba cir yang mi rung zhing 'di ci zhig tu dgos zhes bya ba yin no/ /'di'i khyad par gyi tshul gyis smad pa'i rgyu smras pa/ mi gtsang 'dzag pa zhes bya ba smos te/ 'byung zhing 'dzag pa yin te/ rma'i sgo dgu nas rgyun mi 'chad par mi gtsang ba rnam pa mang po 'byung zhes bya ba'i don to//'di la mi gtsang zhing dri nga ba yod pa ni mi gtsang ba ste/ des mi 'dod pa'i dri nga ba dang rab tu nyams pa'i dri'o/ /tshig rkang gnyis pa 'dis ni kha dog dang dri rnam par 'gyur ba bstan to/ /de las gzhan pa dang ldan zhing skye ba yin par smras pa/rgyun du nad kyis mngon gdung zhing / /zhes bya ba smos te/ rtag tu nyam thag par byed pa yin te/ bkres pa dang / skom pa dang / cham pa dang rims tshad par 'khru ba la sogs pa'i nad kyis mngon par gdungs pa yang yin no/ /rga ba dang 'chi bas 'tsher 'grib pa'i zhes bya ba ni rga ba dang 'chi ba gnyis kyis skrag pa'i phyir 'jig pa yin te/rga ba dang 'chi ba gnyis la rtag tu dogs pa zhes bya ba'i don to/ /de'i phyir rga ba ste nus pa thams cad med par byed pa dang / ris mthun pa chad pa'i 'chi bas rtag tu gnod pa yin te/ lus 'di ni 'byor ba dang mi ldan pa yin no/ /phyin ci log spang pa'i phyir tshigs su bcad pa 'di gsungs so//ci lus 'di ni gcig tu dgos pa med pas ci yang mi bya ba nyid kyis dor bar bya'o zhes rtog pa la de spang ba'i phyir smras pa/ myur du zhes bya ba la sogs pa smos so/ /skyon du ma dang ldan zhing g.yo ba'i gzhi yin du zin kyang thar pa thob pa la phan 'dogs pa'i phyir 'dir bsngags par bya ba yin no zhes bya ba ni bsdus pa'i don to//'di yis zhes bya ba ni zin pas so/ /yang na 'dod pa na spyod pas so/ /rnag dang ldan pa zhes bya ba ni mi gtsang ba'i rdzas 'dus par gyur pa'i lus kyis so/ /myur du 'jig cing zhes bya ba ni 'jig pa'i ngang tshul yod pa ste/'dis ni mi rtag pa nyid du bstan to/ /na ba zhes bya ba ni nad kyis nyam thag pa ste/ des zil gyis non pa zhes bya ba'i don to/ /'dis ni sdug bsngal ba nyid du bstan to/ /'dir mi gtsang bas ni lus kyi rang bzhin gyi mtshan nyid kyi skyon bstan to/ /mi rtag pa dang /sdug bsngal ba nyid kyis ni spyi'i mtshan nyid kyi skyon bstan to/ /don du gnyer bar gyis zhes bya ba ni rjes su shes par gyis shig pa ste bsam pa dang kun du shes par gyis shig ces bya ba'i don to/ /de ltar stobs kyis don du gnyer bar bya ba de gang yin zhe na/ smras pa/ zhi mchog ces bya ba smos te/mi gtsang ba'i lus la sogs pa 'di de na med pa nyid de gtan du mya ngan las 'das pa phung po lhag ma med pa'i mya ngan las 'das pa'i dbyings su gtsor sdug bsngal nye bar zhi ba zhes bya ba'i don to/ /grub dang bde ba zhes bya ba ni rtag pa nyid du grub pas 'jog pa med pa'o//bla na med pa ni sdug bsngal med pa'i phyir ro/ /yang na grub pa dang bde ba ni grub pa dang bde ba'o/ /mya ngan las 'das pa de na 'bral ba med pas grub pa ni gtan du bde ba nyid kyi phyir ro/ /dge ba yin pa'i phyir bde ba ste/ sdug bsngal mtha' dag dang bral ba'i phyir ro/ /bla na med pa zhes bya ba ni dngos po thams cad ni bla na yod pa yin la/thar pa ni bla na med pa ste/ rtag tu dge ba nyid yin pa'i phyir ro/ /yang bshad pa/ rtag pa'i dge ba med pa ste/ /nam mkha' blo ni 'gog byed pa/ /dad pa la sogs mi rtag dge /gnyis las thar pa bla med yin/ /zhes so/ /nyon mongs pa dang nye ba'i nyon mongs pa thams cad yang dag par gcad pas ni phung po lhag ma dang bcas pa'i mya ngan las 'das pa ste/mchog tu zhi ba'o/ /'dus byas thams cad gtan du spangs pa phung po lhag ma med pa'i mya ngan las 'das pa'i dbyings ni grub pa dang bde ba bla na med pa'o zhes gzhan dag zer ro//gzhan dag ni nyan thos dang rang sangs rgyas kyi byang chub dang mi gnas pa'i mya ngan las 'das pa gsum du bshad pa dang zhi ba dang / grub pa dang / bde ba bla na med pa gsum go rims bzhin du sbyar ro zhes so/ /lus la mngon par dga' ba rnams dang mya ngan las 'das pas skrag pa rnams la skyon dang yon tan bstan pa'i phyir 'di gsungs so//gang gi phyir de lta bu'i rnam par grol ba de thob par bya ba'i phyir 'di dag bsten pa la 'bad par bya ba yin te/ gzhan dag la ni yid brtan par bya ba ma yin no zhes bstan pa'i phyir smras pa/ dgun ka dang ni zhes bya ba smos so//mnyan yod na ma na si zhes bya ba'i tshong dpon gyi bu zhig yod de nor rnam pa sna tshogs kyi 'byor pa phun sum tshogs pa dang ldan zhing de yang 'dod pa la zhen pa zhig ste/ de dus ji lta ba bzhin du 'dod pa la rab tu longs spyod par 'dod pas yo byad dang bcas pas dgun dang dpyid dang dbyar gyi dus su nye bar longs spyod pa'i khang pa shin tu nyams dga' ba gsum byas so//des der yang yid la 'dod pa'i 'bras bu ma spyad pa nyid du shi ba'i dus byas te/ de'i dbang du mdzad nas 'di gsungs so/ /'di thos pas srog chags stong phrag drug cu bden pa mngon par rtogs par gyur to//gzhan dag ni tshong dpon chen po nor mang po pa zhes bya ba rnam par rtog pa shin tu mang ba zhig yod pa de'i dbang du mdzad pa'o zhes so/ /mi rigs par sems par byed pa ni dgun ka dang dpyid ka dang dbyar ka 'di dag bya'o zhes sems par byed pa'o/ /mi rigs par sems par byed pa po byis pa zhes bya ba 'dis so//mi rigs par byed pa'i rgyu ni bar chad mthong bar ma gyur to zhes bya ba ste 'di ni bsdus pa'i don to/ /'di dag ces bya ba ni khyim dang skyed mos tshal la sogs pa'o/ /dbyar ka zhes bya ba ni dbyar gyi dus so/ /bya'o zhes bya ba ni brtsam par bya ba ste/de'i dus dang mthun pa'i 'dod pa'i bde ba nyams su myong bar bya'o zhes pa'i don to/ /dgun ka dang ni dpyid ka dang / /zhes bya ba la dang gi sgra ni 'di dag go zhes bya bar drang ba'i don to/ /ni zhes bya ba ni dbye ba'o/ /nges pa med pa'i gnas la ro myang bar bya ba ni rigs pas 'di nyid yin no zhes bya ba ni 'dir blta bar bya'o//'di ltar su zhig sems par byed ce na/ smras pa/ byis pa zhes bya ba smos te/ blo ma bye zhing mi shes pa ste/ yon tan dang skyon mi shes pa zhes bya ba'i don to/ /rnam par sems byed pas zhes bya ba ni rnam par rtog par byed pa'o/ /pas zhes bya ba ni de ltar sngar bstan pa'i dgun ka zhes bya ba la sogs pa ston pa yin no//gang mkhas pa de ni 'tsho ba 'di la bar chad mang po yod par rtogs pa yin pa'i phyir 'di ltar sems par byed de/ gang dag ni dbugs dbyung ba dang rngub pa tsam du 'tsho ba 'di yang legs par rnyed pa yin no zhes so/ /ci'i phyir byis pa dag de ltar mi sems she na/smras pa/ bar chad mthong bar ma gyur to/ /zhes bya ba yin te/ gang yang srog 'di la ni bar chad mang po yod de/ de'i phyir ma 'ongs pa'i don phal che ba dag la brtag par mi bya'o/ /gang gi phyir dngos po 'di dag thams cad ni srog gi bar du gcod par byed pa ste/ de shes par mi nus so/ /yang smras pa/ 'tsho ba gcod byed ma lus pa'i/ /'dus byas dug dang 'dra ba yin/ /'di dag rtag par gyur na ni/ /dug tu mi 'gyur gang yang med/ /bar du gcod pa zhes bya ba ni gang 'tsho ba'i bar du gcod pa'i rkyen no/ /thung ba ni shin tu yun thung bar gnas pa'i 'tsho ba yod pa ste/tshe yod pa'o/ /tshe de yang mi brtan pa yin te/ 'jig pa'i chos can yin pa'i phyir/ ji skad du gsungs pa/ rang bzhin gyis ni lus can 'chi 'gyur zhing / /skad cig tsam zhig srog ni gnas gyur pa/ /skye bo de ni rnyed dang ldan pa ste/ /srog ni rnam par 'gyur zhes mkhas pas shes//zhes so/ /mi 'chi ba la sogs par rnam par rtog cing las kyi mtha' ring ba dag la skyo ba bskyed pa'i phyir 'di gsungs so/ /bag med pa'i gnas 'dod pa la chags pa nyi tsher yang ma zad de/ bu la sogs pa la chags pa yang bstan pa'i phyir smras pa/ bu dang nor zhes bya ba la sogs pa smos so//gang gA'i klung gi 'gram gyi grong khyer na gang gA'i lha zhes bya ba'i khyim bdag bu mang zhing g.yog 'khor dang nor dang phyugs dang las byed pa la sogs pa dang ldan pa zhig gnas so/ /ji tsam na nub mo gnyid kyis log cing bag phab ste 'dug pa las chu bo chen pos grong khyer thams cad gang gA'i nang du bdas te/khyer ba de'i dbang du mdzad de tshigs su bcad pa 'di gsungs so/ /gzhan dag na re dge slong ma gau ta mi'i dbang du mdzad nas gsungs so zhes so/ /rmongs pas 'khor ba'i yo byad legs par bsags pa dang bsrungs pa la sogs pa mchog tu byed pa'i mi ni 'chi bdag gis blangs te khyer bar 'gyur zhes bya ba ni 'di'i bsdus pa'i don to//bu dang nor mang po de dag ma 'byor pa med pa de la rnam par chags shing lhag par zhen pa'i mi'i yid gang yin pa de ni de lta bu'o/ /'di ltar 'jig rten 'di na phal cher rigs brgyud kyi phyir ni bu 'dod do//yul la nye bar longs spyod pa'i phyir ni nor dang phyugs phun sum tshogs pa 'dod do/ /de la nor ni nor dang 'bru la sogs pa'o/ /phyugs ni ba lang dang ma he la sogs pa rkang pa bzhi'o/ /de la rnam par chags pas dus dus su sbyin pa dang / tshul khrims dang /thos pa dang / bsam pa dag la sbyor ba med pa'o/ /mi zhes bya ba ni srog chags so/ /ci nas de ji ltar 'chi bdag gis blangs nas 'gro zhe na/ 'dir dpe bstan pa/ nyal grong zhes bya ba ni grong na gnas pa'i skye bo nub mo gnyid log par gyur pa'o//bzhin du zhes bya ba ni dpe'i don te/ ji ltar dbyar gyi dus su chu'i tshogs chen po glo bur du byung nas blangs te chu bo chen po'i nang du ded par byed pa de bzhin du bu la sogs pa la yid rnam par chags shing log par spyod pa dag byed pa na bag med pa'i gnyid kyis log pa ni 'chi bdag nam mkha' lding lta bus klu blangs te 'gro ba bzhin no//khyim gyi yongs su bzung ba dag la chags shing bsod nams byed pa la bag med pa rnams skyo ba bskyed pa'i phyir 'di gsungs so/ /bu la sogs pas ni 'chi ba las yongs su skyob par mi nus pa ma yin te/ de'i mthus 'chi bdag gi chu srin gyi kha'i drung nas slar ldog par snang ste/de bas na de la lhag par chags pa ni dgos pa dang bcas pa yin na ci'i phyir de la smad ces bya bar rtog na/ de ni med de 'di ltar tshe yongs su zad pa las ni bu la sogs pas yongs su skyob par mi byed de/ de nyid smras pa/ 'chi ba'i dus la bab pa na//zhes bya ba la sogs pa smos so/ /rgyal po'i khab na mchod sbyin 'dod pa zhes bya ba'i bram ze sA la chen po lta bu rgas shing 'khogs nas gzer ba lo brgya nyi shu lon pa zhig yod de/ de la bdag nyid las skyes pa'i bu nyi shu dang / tsha bo dag mang zhing rgya che ba dang / nye du'i tshogs de rnams dang lhan cig tu skyed mos tshal zhig tu shin tu dga' zhing spyod pa las de dus byas nas de'i dbang du mdzad nas 'di gsungs so//gzhan dag ni dge slong ma zhig slong mo spyod cing bu tsha la sogs pa gso bar byed pa las brtsams te 'di gsungs so zhes zer ro/ /gang cung zad sus kyang 'chi ba las yongs su bskyab par ni mi nus te/'chi ba ni bzlog par bya ba ma yin pa'i phyir ro zhes bya ba ni bsdus pa'i don to/ /mi 'gyur zhes bya ba ni med pa'o/ /gang yin zhe na/ smras pa/ bu rnams zhes bya ba ste/ lus las skyes pa'o/ /skyabs zhes bya ba ni 'chi ba'i 'jigs pa las yongs su thar bar byed pa'i phyir ro//gang yang 'chi ba las yongs su skyob par byed pa'i bu ni 'gro ba dag na med cing 'chi ba las yongs su skyob par byed pa ni mi 'byung ste/ bdag nyid kyang de bas yongs su ma thar pa'i phyir ro/ /pha yang ma yin zhes bya ba ni skyed par byed pa ste/pha dang ma gnyis kyis kyang bu rnams 'chi bdag las yongs su skyob par mi nus so/ /gnyen 'dun min zhes bya ba ni nye du dag gis kyang 'chi ba las cung zad skyob par mi nus so/ /gang gi phyir sems can kha cig ni bu'i dpung yod do snyam nas bag med pas gnas so/ / kha cig ni pha'i dpung gis so/ /kha cig ni nye du'i dpung gis so/ /kha cig ni gnyis kyis so/ /kha cig ni de dag thams cad la re ba dag yongs su spang pa'i phyir bcom ldan 'das kyis 'di gsungs so/ /dpung 'di dag gis ni yid brtan par mi bya ste/ gang gi phyir don 'di dag gang gis ji ltar yang mi nus so//su'i zhe na smras pa/ 'chi ba'i dus la bab pa na/ /zhes smos te/ 'chi bdag gis dbang du byas pa'o/ /gal te de ltar re res ni mi nus kyang de dag tshogs pas ni nus par 'gyur te/ mi ro'i phyogs 'debs pa dang 'dra'o zhe na/ de yang med par bstan pa'i phyir smras pa/khyod la skyabs su 'gyur ba med/ /ces bya ba smos te/ bu la sogs pa de dag 'dus pas kyang gang zhig 'chi ba las yongs su skyob pa med pa nyid de/ 'jig rten ni rang gi las kyi 'bras bu la spyod do zhes bya ba'i tshig gis so/ /'phags pa'i lam nyid ni 'chi ba las yongs su skyob pa yin pas de la gzud pa'i phyir 'di gsungs so//las gang zhig mthar ma phyin par de las gzhan dag rtsom pa ni 'chi ba la sogs pa'i 'jigs pa dang bral ba ma yin no zhes bstan pa'i phyir smras pa/ 'di ni bya ba byas zin zhes bya ba la sogs pa smos so//rgyal po'i khab na b+ha ba yab d+ha ka zhes bya bas rgyun du zhugs pa'i 'bras bu thob kyang gong ma'i lam bsgom pa la bag med par gyur te/ 'di ltar yang bdag gis ni ngan song gi sgo ni bkag pas da ni lha dang mi'i 'dod pa la rol cing rjes su myong bar byas te/ khyad par du 'phags pa'i bden pas mya ngan las 'das par bya'o zhes bsam pa las ji tsam na dus las 'das te/ khyim thab spyugs pa zhig gi chung ma'i rum du zhugs te/ btsas nas de bran mo zhig gis mtshan mo lam gyi bzhi mdor tsher ma dang bcas par sgren mor bor ba las shin tu sdug bsngal bas 'gre ldog cing 'o dod 'bod pa 'od ma'i tshal na gnas pa'i dge bsnyen dag gis thos te/de blangs nas yid dang rjes su mthun pa thob par gyur te/ tshul bzhin du rol pa dang / srid pa'i nyes dmigs mthong ba rnam pa mang po byas te/ de rnams kyis phan btags pa byas nas yongs su mya ngan las 'das so//de ltar gyur pa'i gtam dge bsnyen dag las bcom ldan 'das kyis gsan te/ tshigs su bcad pa gnyis po 'di gsungs so/ /de la re zhig dang po smras pa/ 'di ni bya ba zhes bya ba la sogs pa smos te/ 'jig rten pa'i bya ba dag la zhen pa dag gis ni 'chi ba la sogs pas mngon par bcom par 'gyur te/'jig rten las 'das pa'i bya ba la mngon du brtson pa ni ma yin no zhes bya ba ni bsdus pa'i don to/ /'di ni byas zhes bya ba ni 'di mthar phyin pa'o/ /bya ba zhes bya ba ni bya ba'i rgyu dang bya ba'o/ /bya ba ni rnam pa gsum ste/ gang byas pa dang / gang bya bar brtsams pa dang / gang ma brtsams pa brtsam par bya ba'o/ /de la dang po ma gtogs pa'i brtsam par bya ba smras pa/ don 'di bya zhes bya ba smos te/ da ni bya ba 'di nyid kyi dus la bab pa'i bya ba'o/ /de dag byas nas zhes bya ba ni brtsams pa de dag yongs su rdzogs par bya ba'o//bdag ni bdag nyid do/ /'di bya'o zhes bya ba ni 'di'i 'og tu bsgrub par bya'o/ /de ltar zhes bya ba ni sngar bshad pa'i rnam par rtog pa'i rnam pa bstan to/ /ni zhes bya ba ni nges par gzung ba ste/ 'dir mngon par bcom pa nyid du shes par bya'o/ /su zhig mngon par bcom pa yin zhe na/smras pa/ mi zhes bya ba smos te sems can no/ /yongs su shom pa na zhes bya ba ni yongs su rtsom pa ste/ rtog pa ngan pa dpag tu med pas sems rnam par g.yen spyo ba'o/ /mngon du bcom zhes bya ba ni zil gyis gnon pa dang / 'jig pa dang zhig par byed pa zhes bya ba'i don to//de gang yin zhe na smras pa/ 'chi dang rga bas zhes bya ba smos te/ 'chi dang bcas pa'i rga ba ste/ 'chi ba dang rga ba gnyis kyis 'chi bar skyel bar byed pa yin pas bar gyi tshig mi mngon par byas te rdo rje'i bye ma bzhin no/ /nad dang lhan cig rjes su 'brang ba yin pa'i phyir nad dang bcas so//mthar ma phyin pa yongs su rtog pa'i bya ba la ni 'jig rten pa dag rga bas yongs su nyams par byas shing nad kyis gzir te/ 'chi bdag gi dbang du 'gyur ro/ /des na bya ba gzhan thams cad yongs su btang bas 'chi ba la sogs pa bzlog pa'i bya ba la 'bad par bya'o/ /zhes thub pa mchog gis yongs su bstan to//'jig rten pa'i las ni mtha' med pa'i phyir te/ ji skad du gsungs pa/ rgyal po dug can la sogs pas/ /bya ba dag ni ma byas te/ /de nas de nyid bya ba dang / /de yang bcas shing 'gag par 'gyur/ /de bzhin bya ba 'di dag la/ /de nyid mthar ni ma phyin par/ /de nas 'jig rten de 'dra'i dgra//'chi ba dag ni 'ong bar 'gyur/ /zhes pa'o/ /bya ba ma yin pa'i bya ba mang po dag la yun ring du byed cing mi 'chi ba la sogs pa rnam par rtog pa mang po dag la skyo ba bskyed pa'i phyir 'di gsungs so/ /gang gi phyir de ltar 'jig rten pa'i bya bas rnam par g.yengs pa'i skye bo rga ba dang 'chi ba dang nad dang bcas pas mngon du bcom pa yin te/de bas na 'jig rten las 'das pa'i bya ba bsgrub pa'i phyir smras pa de ltar zhes bya ba la sogs pa smos te/ 'di'i bsdus pa'i don ni ting nge 'dzin gyi sbyor ba'i rgyu dang / ting nge 'dzin gyi sbyor bas yongs su skyo ba med pa'i yid dang /ting nge 'dzin thob nas ting nge 'dzin tsam gyis chog mi shes pa des mthong ba dang bsgom pa'i lam yongs su rdzogs par bya ba dang / lam bsgom pa'i 'bras bu dang / 'bras bu de'i phan yon 'dir bstan pa yin no/ /de'i phyir de ltar zhes bya ba 'dis ni ting nge 'dzin gyi sbyor ba'i rgyu bstan to/ / de ltar rtag tu ting 'dzin la dga' mnyam par zhog/ /brtson pa skyed la skye dang rga ba'i mtha' ma ltos/ /bdud rnams sde dang bcas pa mngon par zil gnon la/ /dge slong dag gis skye shi'i pha rol 'gro bar gyis/ /zhes bya ba 'di dag gis ni go rims bzhin du lhag ma rnams bstan to/ /da ni tshig so so'i don bshad par bya ste/de ltar zhes bya ba ni sngar bshad pa'i rgyu ston te/ 'di ltar/ de ltar mi ni yongs su shom pa na/ /rga dang nad bcas 'chi bas mngon du bcom/ /zhes bya ba ste/ rgyu de ltar ro/ /'di ni sbyor ba'i rgyu bstan te/ /'chi ba la sogs pas skyo ba skyed de de ltar shes shing skyo ba skye ba las ni ting nge 'dzin la sbyor ba yod pa nyid de/'dis ni gus par byed pa'i sbyor ba bstan nas/ rtag tu byed pa'i sbyor ba smras pa rtag tu zhes bya ba ni dus thams cad du'o/ /ting nge 'dzin la dga' zhes bya ba ni ting nge 'dzin la dga' ba ste/ bsam gtan la dga' ba zhes bya ba'i don to/ /ting nge 'dzin la dga' ba thob pas ni de'i sbyor ba la yongs su gdung ba med pa'i phyir ro/ /mnyam par zhog ces bya ba ni sems rtse gcig pa ste bsam gtan mngon du byas pa zhes bya ba'i don to/ /brtson pa skyed la zhes bya ba ni brtun pas 'bad pa'i brtson 'grus gang la yod pa de ni brtson pa skyed pa ste brtson 'grus brtsam pa zhes bya ba'i don to//brtson 'grus dang ldan pa la ni khyad par thob par bya ba la chog mi shes pa nyid du ston te/ ji skad du bshad pa/ khyad par spel la nges par ni/ /khyod ni nam yang ngal ma gyur//brtson 'grus drag pos dka' ba las/ /skyo ba yod pa ma yin no/ /zhes bya ba la sogs pa'o/ /'jig rten las 'das pa'i lam 'dod pas ting nge 'dzin tsam gyis chog par mi bya ba nyid du 'dis bstan te/ skye dang rga ba'i mtha' ma ltos/ /zhes bya ba 'di smos so/ /skye ba dang rga ba ni skye rga'o//de gnyis kyi mtha' ma ni zad pa ste/ de lta bu'i tshul gang dag la yod pa de nyid ni 'di ltar mthong ba'i lam yongs su rdzogs pa ste/ phal cher skye ba zad de yun ring du thogs nas srid pa bdun yin pa'i phyir skye ba dang rga ba mthong bar 'gyur ro/ /bsgom pa'i lam yongs su rdzogs pa la ni skye ba mthar thug pa yin pa'i phyir yang 'khor bar skye ba dang rga ba'i mtha' ma mthong bar 'gyur ro//ci zhig byas shing ji ltar 'gyur zhe na/ smras pa/ bdud rnams zhes bya ba la sogs pa ste/ nyon mongs pa ni bdud de 'chi ba'i chos nye bar bsgrub pa'i phyir ro/ /sde dang bcas pa zhes bya ba ni 'khor dang bcas pa ste/nye ba'i nyon mongs pa dang bcas pa'i las zhes bya ba'i don to/ /mngon par zil gnon la zhes bya ba ni spangs pa ste/ 'dis ni bsgom pa'i lam gyi 'bras bu bstan to/ /de yang gang dag gis 'di ltar lam bsgom par nus she na/ smras pa/ dge slong dag gis zhes bya ba smos te/dge slong dag ces bya ba ni rab tu byung zhing yongs su bzung ba spangs pa zhes bya ba'i don te/ de dag gis lus dang sems rnam par dben pa dang / de dang rab tu 'brel ba'i phyir lam bsgom pa yod par 'gyur ro/ /'gro bar 'gyur ba zhes bya ba ni de nyid las skye bar 'gyur gyi/ gzhan la ma yin no zhes bya ba'i don to/ /gzhan dag tu ni 'gro bar gyis/ /zhes brjod de/ 'di'i don ni khyed cag gis 'grub cing 'di'i pha rol du 'gro bar gyis shig ces bya'o/ /skye shi'i pha rol 'gro ba zhes bya ba ni 'khor ba'i pha rol du phung po lhag ma med pa'i mya ngan las 'das pa'i dbyings der 'gro ba yin pas pha rol 'gro ba ste/nyon mongs pa dang nye ba'i nyon mongs pa rnams spangs pa la phan yon 'di yod de gang phung po lhag ma med pa'i mya ngan las 'das pa'i dbyings su 'jug pa yin no/ /bya ba ngan pa la gnas shing 'brel pa dag 'phags pa'i lam la sbyor ba'i phyir bsrungs so//mi rtag pa'i tshoms kyi rnam par 'grel ba ste dang po rdzogs so// //de'i 'og tu 'dod pa'i tshoms dgod pa'i skabs brjod par bya ste/ mi rtag pa bstan pas skyo ba yang dag par bskyed nas 'dod chags dang bral ba'i dngos po thob par bya ba'i phyir 'di nye bar 'god pa yin no//gang gi phyir thams cad kyi dang por ni 'dod pa dag las chags pa med pa 'byung ngo / /de nas gzugs dang gzugs med pa las chags pa med pa 'byung ste/ ma ma'i gos las thog ma dri ma rags pa dang bral bar byed la/ de'i 'og tu ni phra ba dag dang bral bar byed pa de bzhin du skabs brjod pa yin no//kun rtog las zhes bya ba la sogs pa smos te/ 'di'i gleng gzhi ni bud med cig skyes pa gzhan zhig la chags te/ de la lta ba dang kun du smra bas g.yen spyo ste chu blang pa'i phyir khron pa las bum pa dang chu blang bar bya'o zhes bsams nas rang gi bu mgrin pa la thag pas bcings te/nang du yud tsam zhig btang ba las de nas bu shi bar mthong ste/ de skyo ba yang dag par skyes pa las tshigs bcad 'di gsungs so/ /'di yang ji ltar gnas pa yin zhe na/ de yang bcom ldan 'das phyogs der gshegs te/de la bcom ldan 'das kyis tshe dang ldan pa kun dga' bo la bka' stsal pa/ kun dga' bo yang dag par rdzogs pa'i sangs rgyas kyis yang dag par gsungs pa'i tshigs su bcad pa 'di zung shig ces gsungs te/ ci nas kyang 'dod pa'i 'dod chags skye ba dang / ci nas kyang skye ba med pa yin no zhes bya ba ni bsdus pa'i don to//tshig gi don so so'i bshad pa/ 'dod pa zhes bya ba ni 'dod par byed pas na 'dod pa ste/ don du gnyer bar byed ces pa'i don to/ /de yang 'dod pa'i yon tan lnga la 'dun pa'i 'dod chags la dgongs so/ /de la bod pa yin te/ kye 'dod pa zhes so//shes kyis te zhes bya ba ni 'di nyid nges par byas pa yin te/ de gang yin zhe na/ smras pa/ khyod ni rtsa bar zhes bya ba yin te/ 'dod pa skyed par byed pa'i rgyu ste/ gang gi phyir de ni 'khrig pa dang ldan pa kun tu rtog pa'i rtsa ba ste/ de dag nyid kyi yul la mi 'gro ba'i 'du shes las ni 'dod chags mi skye la mi dge ba'i 'du shes kyis kyang 'dod chags dang bral bar 'gyur ro//gnas stong pa dag la yang log pa'i kun tu rtog pa'i 'dod chags kyis brlag pa yin no zhes 'dod pa'i rtsa ba bstan pa'i phyir smras pa/ kun rtog las ni zhes bya ba smos te/ tshul bzhin ma yin pa yid la byed pa dang ldan pas rang bzhin med pa dag la gnas rjes su dran zhing gzugs su brtag pa de la ni 'dod pa'i 'dod chags skye bar 'gyur te/kye 'dod pa zhes so/ /'dod pa zhes bya ba yang smos pa ni gcig tu ma rung ba yin pas spang bar bya ba nyid du bsgrub pa'i phyir ro/ /yang na de'i yul la mi bzod pa bsgrub pa'i phyir ro//skyes pas zhes bya ba mngon du byung ba dang / sems kyi rgyud las skyes pa zhes bya ba'i don to/ /sman la sogs pa'i gzhis yongs su spangs pa ma yin pa'i tshul bstan pa'i phyir smras pa/ khyod ni kun rtog ma byed dang / /zhes bya ba smos te/ 'dod pa dag la dge bar ma sems dang rnam par grol bar 'gyur ro zhes so//des na khyod la 'byung mi 'gyur/ /zhes bya ba ni de bas na dge bar kun tu ma rtogs pas khyod kyi rgyud la skye bar mi 'gyur te/ rgyu med pas 'bras bu med pa nyid kyi phyir ro/ /'byung bar mi 'gyur ba ni rab tu skye bar mi 'gyur zhing rab tu skye bar mi nus pa nyid du ston to//'dod pa'i 'dod chags spong bar 'dod pa rnams la gzhi med par bya ba bstan pa'i phyir dang / yul yongs su spangs pa tsam gyis 'dod pa'i 'dod chags spong ba yin no zhes smra ba rnams tshar gcad pa'i gnas dang / bdag tu smra ba rnams tshar bcad pa'i phyir 'di gsungs so//'dod pa yul dang bcas pa 'di dag ni ches kyang spang bar bya ba yin te/ gnod pa thams cad kyi rgyur gyur pa'i phyir ro/ ci'i phyir zhe na/ 'di ltar/ 'dod pa rnams las mya ngan skye/ /zhes bya ba smos te/ bud med de nyid bu dang bral ba yod pa'i dbang gis brang brdung zhing mya ngan gyis gdungs te/smre sngags 'don pa dang / khyim thab la 'jigs pa yin te/ des 'di lta bu'i don thos par gyur na bdag la gnod pa byed par 'gyur ro zhes pa de'i dbang du byas nas tshigs su bcad pa 'di dag gsungs so/ /de la re zhig dang po'i rnam par 'grel ba smras pa/'dod pa rnams las zhes bya ba smos te/ 'dod pa rnams la ro myang bar byas pa'i nyes dmigs dang / nges par 'byung ba byas pa'i phan yon 'dir bstan pa yin te/ de la 'dod pa ni rnam pa gnyis te/ yul gyi 'dod pa ste gzugs sdug pa la sogs pa dang / nyon mongs pa'i 'dod pa dag ste yul de dag nyid la chags pa'o/ /'dod pa byed pa'am/ 'dod par byed pa dag ni rgod pa la brten pa'i phyir ro/ /de gnyi ga dag las skye ba ni 'byung ba'o/ /mya ngan zhes bya ba ni sdug pa dang bral ba'i sems kyi gdung ba'o/ /bdag nyid kyi gzi mdangs skem par byed pa zhes bya ba ni nges pa'i tshig gis so//'jigs pa zhes bya ba ni mtshan ma dag la dmigs nas gnod par 'gyur ro zhes dogs pa skye ba'i sems kyi las te/ yang dag par skrag pa zhes bya ba'i don to/ /de gnyi ga yang go rims bzhin du nyon mongs pa dang yul gyi 'dod pa dag las skyes pa ste/gang gi phyir yul med pa dag la yongs su gzung ba med pa'am yod par gyur na yang 'dod chags dang bral ba rnams la ni de dang bral ba las skyes pa'i mya ngan dang / de dang bral du dogs pa las skyes pa'i 'jigs pa med par 'gyur bas so//re zhig 'di dag gi ni 'dod pa dang / mi 'dod pa dag gi nyes dmigs bstan to/ /rgyu med pa'i phyir 'bras bu med pa nyid du bstan pa'i phyir smras pa/ 'dod pa dag ni rnam spangs na/ /zhes bya ba smos te/ 'dod pa dag la 'dod chags dang bral ba'i phan yon bstan pa yin te/ gang yang so sor brtags pa'i stobs sam bsgoms pa'i stobs kyis 'dod pa rnams la chags pa med pas btsal ba dang rtsa ba dang bcas par spangs na gnyis kyis 'dod pa dag las chags pa dang bral ba dag la ni sdug pa dang bral bar gyur kyang mya ngan med cing gnod pa byung bar dogs pa'i 'jigs pa lta ga la yod par 'gyur ba'o//mya ngan gyis ni da ltar gyi nye bar gnas pa'i gnod pa bstan to/ /'jigs pas ni 'byung bar 'gyur ba'i gnod pa bstan to/ /'dod pa'i don du gnyer ba dang / 'dod pa la lhag par chags pa dag 'dod pa dag la 'dun pa'i 'dod chags spang ba'i phyir 'di gsungs so//ji ltar nyon mongs pa'i 'dod pa de lta bu ni yul gyi 'dod pa dag gi phan yon las byung ba ma yin te/ de yang tshor ba'i rang bzhin gyi dbang yin te/ tshor ba'i rkyen gyis sred pa zhes bya ba'i tshig gis te/ des na rtsa ba'i rtsa ba nyid bstan pa'i phyir smras pa/ dga' ba rnams las mya ngan skyes//zhes bya ba smos te/ shin tu chags par byed pa'i phyir dga' ba dag ste/ /nyon mongs pa dang lhan cig skyes pa'i chags pa yid bde ba ste/ de dag las lhag ma ni snga ma bzhin du brjod par bya'o/ /'dis ni 'di skad ston te/ 'dod pa de gnyis ni tshe las mya ngan la sogs pa 'byung bar ma zad kyi/nyon mongs pa'i 'dod pa'i tshogs 'jug par gyur pa yang yin te/ sems dang sems las byung ba de dag nyid ma spangs pa dag la mya ngan la sogs pa 'jug cing 'di dag las ni dga' ba dang shin tu chags pa dang rjes su mthun pa'i phyir ro/ /mngon sum du smos pa ni gzhan dag tu de dang mtshungs par ldan pa de bzhin du blta bar bya ste/chags pa dang rjes su mthun pa'o/ /'di la ji skad du gsungs pa bde bar tshor ba dag ni chags pa la gnas pa yin te/ gang bde ba dang bde ba'i tshor ba 'di zhes bya ba la sogs pa'o/ /'dod pa mya ngan la sogs pa'i rgyur gyur pa yang gang gi don du nye bar spyod pa yang dga' ba nye bar spyad pa'i don te/des byas pa yin pas 'di dag thams cad ni 'dod pa'i nyes dmigs su shes par bya'o/ /gang yul gyis 'dod chags spangs kyang kun tu rtog pa'i 'dod chags kyis rnam par rtog pa'i dga' ba spangs pa'i phyir 'di gsungs so//'dir 'di dag gis mya ngan dang 'jigs pa'i nyes dmigs 'ba' zhig tu ma zad de/ sdig pa'i dra ba ma lus pa 'di dag kyang 'byung ba yin no zhes bstan pa'i phyir smras pa/ 'dod dga'i rnam smin sdug bsngal te/ /zhes bya ba la sogs pa smos so/ /skyes bu gti mug can 'phags skyes bos 'gran zla'i sha khon can ma lus par bsad cing phyung ste/rgyal srid kyi bde ba la longs spyod cing bden pa mthong ba'i shAkya dpag tu med pa rnams bsad pa de'i 'og tu zhag bdun pa'i nyi ma la btsun mo'i 'khor dang blon po dang g.yog 'khor dang bcas pa chu la rtse ba'i phyir chas pa na dmyal ba'i me 'bar bas kun du bskor te/'o dod 'bod bzhin du mnar med pa'i dmyal ba chen por skyes te/ de'i dbang du mdzad nas 'di gsungs so/ /'dir bsdus pa'i don ni 'dod pa dag la ro myong bar byed pa ni dang po mngar bas bstan to/ /lhag ma ni nyes dmigs te 'bras bu tsha bas ni mthong ba'i chos kyi nyes dmigs bstan te mya ngan gyi rgyu yin pa'i phyir ro//rnam par smin pa sdug bsngal bas ni 'jig rten pha rol gyi nyes dmigs bstan te/ sreg par byed pa dang chos mthun pa yin pas me sgron gyi dpe bstan pa yin no/ /mngar ba ni yid du 'ong ba dang dga' ba dang sdug pa'o//dang po la sogs pa gang yin pa de ni de nyid do/ /'dir dang po'i sgra ni thog ma'i tshig ste/ sngar chu btang nas bsod snyoms byin pa bzhin te/ 'dod pa rnams ni thog mar dga' ba zhes bya ba'i don to/ /'bras bu tsha ba zhes bya ba ni tsha zhing yid du mi 'ong ba dang /mi 'dod pa'i 'bras bu rnam par smin pa de ni 'bras bu tsha ba'o/ /ji skad du gsungs pa/ 'dod pa dag las 'jig rten bsad dang bcing ba byung / /mya ngan 'jig dang ngal dang sna tshogs sdug bsngal te/ /'dod pa de nyid kyis kyang rgyal po ltung gyur te/ / chos nyams bab col pha rol tu ni dmyal bar 'gro/ /zhes so/ /de'i phyir 'dis ni mthong ba'i chos nyid la mya ngan dang smre sngags 'don pa dang sdug bsngal ba dang yid mi bde ba rnams tha mar 'byung ba dang / de'i rgyus ngan par spyod pa bsags pas ngan song gi sdug bsngal rnam par smin pa myong bar 'gyur te/des na smras pa/ rnam sman sdug bsngal te zhes bya ba smos te/ rnam par smin pa'i 'bras bu ni mngon par mi 'dod pa yin te ngan song gi 'bras bu yin pa'i phyir ro/ /yang ci 'di dag gnas skabs thams cad du de ltar yin nam zhe na/ thams cad la ni de lta ma yin te/ 'on kyang dga' zhes bya ba smos te/mngon par don du gnyer ba ste gang gi phyir sred pa dang bcas pa'i 'dod pa mngon par 'dod pa de dag nyid la dang po mngar bzhin 'bras bu tsha la rnam par smin pa sdug bsngal bar 'gyur te/ dga' ba med par 'dod chags dang bral ba rnams la ni ma yin no/ /rnam par smin pa sdug bsngal ba yang yin la dga' ba yang yin pas dga' ba'i rnam smin sdug bsngal ba ste/las 'dzin pa'o/ /tshig rkang 'og ma ni tha dad par byas la 'di ni bsdu ba byas pa ci'i phyir zhe na/ smras pa/ spyi dang khyad par bsgrub pa'i phyir te/ spyi ni 'di ltar 'phags pa dang 'phags pa ma yin pa gnyis kyi 'di dag dang po mngar ba dang 'bras bu tsha ba yin no//sdig pa spyod par 'jug pa rnams dga' bar gyur na ni rnam par smin pa sdug bsngal ba ste/ dang po dga' ba yin no/ /'dod pa zhes bya ba ni gzugs sdug gu la sogs pa'o/ /ji ltar dga' ba yod pa las rnam par smin pa sdug bsngal bar 'gyur zhe na smras pa/sreg byed ces bya ba smos te/ rjes su mched nas yongs su sreg par byed pa'o/ /gang sreg par byed ce na/ smras pa/ byis pa zhes bya ba smos te/ 'dod pa'i rjes su 'gro ba so so'i skye bo ste/ de yang bya ba dang bya ba ma yin pa la kun tu rmongs pa'o//ji lta bur sreg par byed ce na/ smras pa/ me sgron zhes bya ba smos te/ 'bar ba dang bcas bzhin du phyar bas bzung ba'o/ /me sgron gyis gang sreg par byed ce na/ smras pa/ ma bor ba zhes bya ba smos te/ gang ma bor ba de'i lag pa sreg par byed do/ /de bzhin du gang dag 'dod pa dag la dga' ba de nyid des tshig par 'gyur te/mthong ba'i chos la ni mya ngan gyi mes so/ /pha rol du ni sdug bsngal gyi mes so/ /'dod pa dag la mnog tu mthong zhing nyes dmigs su ma mthong ba rnams la 'dod pa rnams skyo ba bskyed pa'i phyir 'di gsungs so/ / 'dod pa'i ching ma dag ni dgrol bar dka' ba yin no zhes bstan pa'i phyir smras pa/ nor bu'i rna cha zhes bya ba la sogs pa'i tshigs su bcad pa gnyis smos so/ /rgyal po gsal rgyal gyis skye bo'i tshogs chen po rnam par bcings zhes grag ste/ kha cig ni lcags kyi ching mas bcings so//kha cig ni shing gi ching mas bcings so/ /kha cig ni gres ma'i ching mas bcings so/ /dge slong rnams mnyan yod du bsod snyoms spyod pa dag gis de thos nas bcom ldan 'das la gsol te/ de'i tshe bcom ldan 'das kyis 'di gsungs so/ /gzhan dag ni g.yul las rgyal ba zhes bya ba skyo ba chen po skyes te rab tu byung nas de'i sngar gyi bu khye'u gnyis zhig nye bar gzhag ste/chags pa med par byung ba las bu de chags pas yang dang yang du bzlog nas ji srid du bdun pa nyid la dgra bcom pa thob par gyur te/ de'i dbang du mdzad nas 'di gsungs so/ / 'phags pa dag gang bcings pa dam po ma yin par 'dod pa dang / gang dam por 'dod pa dang / ji ltar yang gang gis de dam por yin yang 'phags pa rnams kyis myur du gcod par byed pa yin te/ 'di ni tshigs bcad 'di gnyis kyi bsdus pa'i don yin no/ /de dag dam po min zhes bya ba de brtan pa ma yin zhing gcad par mi nus pa ma yin zhes bya ba'i don to//de dag ces bya ba ni ching ma'o/ /gang gzhan gyi dbang du gyur pa de ni ching ma ste/ gzhan dbang gi yo byad ces bya ba'i don to/ /'phags pa ni lung dang sangs rgyas dang de'i nyan thos so/ /gsungs pa ni nye bar bstan pa'o//de gang zhig yin zhe na smras pa/ gang lcags zhes bya ba ni lcags las gyur pa ste/ de yang lcags kyi rang bzhin lcags sgrog la sogs pa'o/ /shing ni shing gi rang bzhin las gyur pa ste/ shing gi rnam pa las byas pa'o/ /gres ma ni rtswa las byas pa ste/thag pa la sogs pa'o/ /'dis ni phyi rol gyi 'ching ba la 'phags pa rnams brtan po ma yin par 'dod pa nyid du rab tu shes pa yin no/ /de lta na gang dam po yin zhe na/ smras pa/ yongs su chags sems zhes bya ba la sogs pa smos te/ gang la kun du chags pa'i sems yod pa de ni yongs su chags sems te/sems la nye ba'i nyon mongs pas kun du nyon mongs pa zhes bya ba'i don to/ /gang yang nyon mongs pa ma yin pa'i yid kyis yongs su chags pa'i sems ni 'di lta ste/ byang chub sems dpa' rnams sems can la snying rje dang bcas pa'i ngo bo yin zhing sred pa'i ngo bo ni ma yin te/yun ring snying rjes 'brel pa'i phyir/ /zhes bya ba'i bstod pa las so/ /de gang la 'jug pa yin zhe na/ smras pa/ nor bu'i rna cha zhes bya ba smos te/ nor bu'i rna cha ni nor bu'i rna cha ste zlas dbye ba ste/ de dag la'o/ /nor bu zhes bya ba ni bzo ma byas pa'i nor gyi dpe'i don to//bzo byas pa'i dpe'i don ni rna cha ste/ rna ba'i rgyan zhes bya ba'i don to/ /'dis ni sems can du gtogs pa ma yin pa'i dngos po de la ltos pa nyid du ston to/ /bu dang bu mo la zhes bya ba ni sems can du gtogs pa'i dngos po la ltos pa nyid du ston to//bu la zhes bya ba ni bdag las skyes pa'o/ /bu mo la zhes bya bas ni chung ma yang bsdu'o/ /dang gi sgra ni nor bu la sogs pa nyi tshe ma yin gyi/ bu la sogs pa la yang yin pa'i phyir dang gi sgra smos so/ /gang yin la ltos zhes bya ba ni sred pa yongs su ma spangs pa'i bsam pa can zhes bya ba'i don to//ji skad du gsungs pa ltos pa dang ldan pa ni sred pa dang ldan pa zhes bya ba'i don to/ /rab tu dgrol bar dka' zhes 'phags pas gsungs/ /zhes bya ba ni yongs su chags pa'i sems la ltos pa zhes bya ba'o/ /'di nyid ni shin tu 'ching ba dam po yin no zhes mkhas pa rnams ston te/ci'i phyir zhe na smras pa/ 'dod pa'i ching mas zhes bya ba la sogs pa smos te/ gang yin zhes bya ba'i sgra ni rgyu bstan pa'i phyir ro/ /'di ltar 'di dag la ltos pa'i ching ma ni spang bar bya ba la 'gog cing gags byed pas 'dod chags pa la sogs pa bcad par mi nus pa'i phyir te/bcings pa ni ji ltar 'dod pa bzhin du 'gro ba ste/ rgyug pa dang mchong ba la sogs pa bya ba'i mthu med do/ /lag na mtshon cha la sogs pa dang ldan pas ni bde bar bcad du rung ba'i phyir grol bar yang 'gyur ro/ /'di ni de lta ma yin te/ des na de nyid kyi phyir 'di ni dgrol bar dka'o zhes 'phags pas gsungs so//gzhan dag na re 'dod pa'i ching ma ni chags par byed pa ste/ sems 'phrog par byed pa'i phyir ro/ /lhod kyang zhes bya ba 'gro ba thams cad du bcings kyang nyam nga ba med do/ /lhod pa'i phyir dgrol sla ba yin no zhes rtog pa dag bzlog pa'i phyir smras pa/rab tu dgrol bar dka' zhes bya ba smos te/ dka' bas thar cing bcad par bya/ /zhes bya ba'i don to/ /mtshon dang me dang chu dang / sngags dang sman la sogs pa dang / thams cad du rab tu smra ba rnams kyis shin tu dgrol bar mi nus pa'i phyir ro/ /'di nyid ni ching ma dam po yin te/gang gi phyir ltos pa'i ching ma de la btsal bar 'dod cing de bzhin du gang brjod par gyur na yang gcod par mi nus pa'i phyir ro/ /lhod pas ji ltar 'dod pa bzhin du 'jug pa na bdag ni bcings so zhes mi shes pa yin no/ /de rab tu dgrol bar dka' bas dgrol bar 'dod kyang dgrol bar mi nus pa yin te/sangs rgyas kyi bstan pa dang / brtan pas so sor brtags pa dang / bsgoms pa'i stobs ni ma gtogs so/ /rgyu 'di gsum gyis ni ltos pa'i bcings pa nyid dam po yin gyi/ lcags la sogs pa ni ma yin te/ 'di nyid 'ching ba dam po yin no//rab tu dgrol dka' ba de ji ltar su zhig gis gcad par nus she na/ smras pa/ de dag gtubs nas zhes smos te/ gtubs pa ni bcad pa'o/ /myur du zhes bya ba ni ring po mi thogs par te/ lam myur du byed pa'i phyir te sbyor ba gcig gis kyang khams gsum po thams cad kyi bag la nyal spangs par gyur pa'i phyir ro//de dag myur du gtubs nas ci zhig byed ce na/ smras pa/ 'gro bar byed ces bya ba yin te/ 'khor ba yongs su spangs nas mya ngan las 'das par 'gro ba'o/ /mya ngan las 'das par 'gro ba ni dgra bcom pa nyid du'o zhes bya ba'i tshig gis so//ji ltar byas nas she na/ smras pa/ mi lta bar zhes bya ba smos te/ ltos shing sred pa gang la yod pa de ni lta ba ste/ de dgag pa ni mi lta ba ste/ ma chags pa'o/ /gang la zhe na/ smras pa/ 'dod pa'i bde la zhes bya ba yin te/ 'dod pa'i longs spyod la zhes bya ba'i don to//lus dang sems dben pa nyid rtog par smras pa/ brtan rnams zhes bya ba ste/ blo dang ldan pas so sor brtags pa dang bsgoms pa'i stobs kyis skyo ba med pa ste/ de yang brtson 'grus dang shes rab kyi stobs kyis mi dge ba la 'jug pa'i sbyor ba rtsom pa de la ltos pa bcad pas phung po lhag ma med pa'i mya ngan las 'das pa'i dbyings rtogs shing yongs su 'gro bar 'gyur te/phung po lhag ma med pa'i mya ngan las 'das pa'i dbyings thob par 'gyur ro/ /phyi rol gyi 'ching bas skyo bar byas te/ nang gi lus la sred pas bcings pa la yongs su skyo ba skyed pa'i phyir tshigs su bcad pa 'di gsungs so//'di dag yang dag par brtags na ni sred pa nyid 'dod pa yin te/ yul ni ma yin no zhes bstan pa'i phyir smras pa/ 'jig rten sna tshogs zhes bya ba la sogs pa smos so/ /yul kau shAm+bI na dge bsnyen rab tu mang po ltad mo lta ba'i khang pa na 'dus shing 'dug pa las bar skabs su 'di lta bu'i gtam brjod par gyur te/'dod pa zhes bya ba gang yin zhe'o/ /de na kha cig gis 'di skad du/ yid du 'ong ba'i chung ma'o zhes zer ro/ /gzhan dag na re zhes ngag nyan pa'i bu yin no zhes so/ /gzhan dag ni mig gi rnam par shes pa'i yul gzugs yin no zhe'o//ji tsam na bcom ldan 'das kyi spyan sngar song ba dang / bcom ldan 'das kyis bka' stsal pa/ 'dun pa'i 'dod chags nyid 'dod pa yin gyi/ phyi rol gyi bems po gzugs sdug pa la sogs pa 'di dag ni ci zhig byed par 'gyur zhes rgya cher gsungs te tshigs su bcad pa 'di bka' stsal to//'di'i bsdus pa'i don ni gang 'dod pa ma yin pa dang / ci nas kyang de bstan pa'o/ /de 'dod min zhes bya ba ni yul rnams rang bzhin gyis 'dod pa yin no zhes bya ba dgag pa yin no/ /gang dang de gnyis ni rtag tu 'brel pa yin te/ de yang gang yin zhe na/gang 'dod pa zhes bya ba de smras pa/ 'jig rten sna tshogs gang zhes bya ba smos te/ gang ni gang zhig go/ /'jig rten ni 'gro ba'o/ /sna tshogs pa ni sems skyo bar byed pa ste/ yid tshim par byed pa'i phyir rnam pa sna tshogs pa'i yid du 'ong ba 'dod pa'i 'dod chags dang rjes su mthun pa ste/gzugs dang sgra dang dri dang ro dang reg bya'o/ /de ni 'dir 'dod pa ma yin te/ seng ge'i phug seng ger mi 'gyur ba de bzhin no/ /de ltar na 'dod pa zhes smos pa de gang yin zhe na smras pa/ kun rtog 'dod chags zhes bya ba smos te/ 'dod pa la rnam par rtog pa dang mtshungs par ldan pa'i 'dod chags sam/tshul bzhin ma yin pa yid la byed pa las skyes pa'o/ /'dir 'das pa'am ma 'ongs pa'i yul rnams la tshul bzhin ma yin pa yid la byed pas brtags pa ni kun tu rtog pa'o/ /da ltar byung ba la lhag par zhen pa ni 'dod chags so/ /yang na ma thob pa thob pa'i phyir bskyed pa ni kun du rtog pa'o//thob pa la zhen pa ni 'dod chags te/ kun du rtog pa dang lhan cig pa'i 'dod chags ni kun rtog 'dod chags so/ /yang na 'dun pa'i 'dod chags ni 'dun pa nyid 'dod chags yin pas 'dun pa'i 'dod chags te/ don du gnyer ba'i 'dod chags so//'dun pa yod la 'dod chags med pa yang yod de/ dper na 'gro bar 'dod pa la sogs pa'o/ /'dod chags yod la 'dun pa med pa yang yod de/ dper na gos la mngon par zhen pa lta bu ste/ de bas na 'dir gnyi ga gzung ngo / /skyes bu zhes bya ba ni kun nas nyon mongs pa ste/yang dang yang du las dang nyon mongs pa 'joms pa'i phyir ro/ /yang ci 'dod pa'i rgyu ni kun rtog nyid yin gyi/ dngos po sna tshogs ni ma yin par bstan pa'i phyir smras pa/ 'di ltar sna tshogs gnas kyang ni/ /zhes bya ba smos te/ gzugs la sogs pa rnam pa sna tshogs gnas pa yin no//de bzhin du zhes bya ba ni 'dod pa'i gnas skabs kyi gzugs gang yin pa gzugs la sogs pa rnam pa sna tshogs pa gnas pa bzhin du 'dod chags dang bral ba'i gnas skabs na yang de bzhin du gnas pa'o/ /'on kyang zhes bya ba ni de lta mod kyi zhes bya ba'i don to//'di la zhes bya ba ni gzugs rnam pa sna tshogs pa'i yul la'o/ /brtan pa rnams zhes bya ba ni blo dang ldan pa rnams te/ so sor brtags pa dang bsgoms pa'i stobs dang ldan pa'o/ /'dul zhes bya ba ni rnam par sel bar byed pa ste/ rnam par 'jig par byed ces bya ba'i don to//'dun pa ni 'dod chags te/ don du gnyer ba'i sred pa'o/ /gal te yul rnams 'dod pa yin par gyur na ni des na rnam pa thams cad du yang dag par gcod par mi nus pa nyid yin gyi brtan rnams 'dod pa spang bar 'dod pas 'dun pa de nyid 'dul bar byed de gang gi phyir gnas pa bzhin du yang de la blo dang ldan pa rnams spong bar 'dod pas des na 'dun pa nyid 'dul bar byed de/de bas na 'dun pa'i 'dod chags nyid 'dod pa'i yin gyi/ yul ni ma yin no/ /gzhan du na su yang 'dod chags dang bral bar mi 'gyur te/ yul ni de bzhin du gnas pa'i phyir ro/ /gang dag yul spangs pa tsam gyis 'dod pa dag las thar par 'gyur ro zhes rtog pa de tsam spangs pas chog par 'dzin pa rnams kun du rtog pa'i 'dod chags spang ba la gzung ba'i phyir 'di gsungs so//rnam pa gzhan gyis yul dag la yang 'dod pa nyid du bstan pa'i phyir smras pa/ mi rnams la ni zhes bya ba la sogs pa smos so//kun du rgyu zhing 'di ltar lta zhing 'di skad smra ste/ 'dod pa'i gzugs la sogs pa ni med de/ de ci'i phyir zhe na/ gzugs la sogs pa de dag nyid la/ la la la ni yid du 'ong / la la la ni yid du mi 'ong ba ste skyes bu so sos dngos po de bzhin dang gzhan du bsgom pa mi rigs so//ji tsam na bcom ldan 'das rgyal po'i khab 'od ma'i tshal ka lan da ka'i gnas na bzhugs par des thos te/ bcom ldan 'das kyi spyan sngar song nas don 'di zhus te/ de'i dbang du mdzad nas 'di gsungs so/ /'di'i bsdus pa'i don ni tshig rkang dang pos ni nyes dmigs yongs su bstan to//gnyis pas ni ro myang ba la skye bo gang gis chags pa'o/ /lhag mas ni nyes dmigs mthong bas nges par 'byung ba ste/ gang gi phyir ro myang ba la rgyab kyis bltas pa yin pa'i phyir nges par 'byung ba yin no/ /da ni tshig gi don brjod par bya ste/ med ces bya ba ni yod pa ma yin pa ste 'dod pa'o//ji ltar med ce na/ smras pa/ rtag pa zhes bya ba smos te/ rnam par mi 'gyur ba'i chos can no/ /mi rtag pa ni yod do/ /'dis ni ji ltar 'dod pa rnams yongs su shes par bya ba med pa ma yin pas de ltar ston to/ /gang la zhe na smras pa/ mi rnams la zhes bya ba smos te/ shed bu dag la'o//'di la rnam par 'gyur ba'i chos can rnams 'dod pa dag 'jig pa nye bar mthong ba'i phyir yid ches par bya ba rnyed sla ba yin pas mi zhes bya ba tsam smos kyi/ 'dod pa thams cad kyang tshul de lta bu nyid do/ /gal te 'di dag rtag par med na ni de lta na dngos po yod pa zla ba gnyis la sogs pa bzhin du med pa yin no zhe na smras pa/de yod pa'ang zhes bya ba smos te/ re zhig yod pa'i rkyen la yod pa yin no/ /yang gi sgra ni dngos po yang dag par yod pa ste/ 'bras bu dang ldan pa'i sa bon bzhin no/ /'dus ma byas kyang yod dam zhe na/ des na khyad par bstan pa'i phyir smras pa/ mi rtag pas zhes bya ba smos te/rnam par 'jig pa'i chos can yin pas mi rtag pa'o/ /gang la yod ce na/ 'di ltar 'dod can zhes bya ba smos te/ 'dod pa la 'dun pa'i 'dod chags gang la yod pa de ni 'dod can te/ 'dod pa la 'dod chags dang ma bral ba'o/ /gang la zhes bya ba ni yul gyi 'dod pa dag la'o//chags pa ni rang dbang du ma byas pa'o/ /gang gi phyir btson ra'i nang na yod na su zhig bsdams par mi 'gyur bas so/ /de ltar rtag pa nyid du yang dag par brtags te yod pa de spangs shing bor nas 'dod pa rnams yongs su shes par bya'o zhes ston to/ /de gang yin zhe na/ blang bar bya ba dang / dor bar bya ba dang / lhag par btang snyoms su bya ba gsum po 'di'i dngos po yod cing gnas pa'i phyir ro/ /smras pa/ spang bar bya ba ni nges par zag pa dang bcas pa'i phyir de la dmigs pa'i nyon mongs pa spang gi de nyid ni spang bar bya ba ni rdzogs par mi 'gyur ro/ /gang mig la 'dun pa'i 'dod chags de spang bar 'dod pas 'dun pa'i 'dod chags spangs pa nyid yin gyi//gang lta ba de yang nyams par 'gyur ro zhes mdo'i don ma dmigs pa'i phyir ro/ /rab spongs la zhes bya ba ni de la dmigs pa'i nyon mongs pa thob pa bcad pas de spangs pa'o//rnam pa zhes bya ba ni rnam pa'i don nam rim pa gzhan du yang blta bar bya ste/ mi 'gyur zhes bya ba 'di'i don to/ /de zhes bya ba ni 'dod pa'o/ /ji ltar 'di spang bar bya ba yin zhe na smras pa/ yang srid med phyir zhes bya ba smos te/ ci nas kyang yang skye ba med par 'gyur ba ste/'phags pa'i lam gyis spang bar bstan pa'o/ /de'i phyir dge slong dag gang 'phags pa'i shes rab kyis spang bar bya'o zhes pa'i tshig gis te/ gang 'phags pas 'di dag spangs pa ni yang srid par mi 'gyur ro/ /so so'i skye bo rnams kyis spangs pa 'di dag ni yang skye bar 'gyur ba'i phyir ro//de ltar spang bar bya ba'i 'dod pa'i phra rgyas gang yin zhe na smras pa/ mi 'gyur bar zhes bya ba smos te/ mi 'ong bar zhes bya ba nyid de/ 'phags pa'i gang zag de zhes bya ba ni tshig gi lhag ma'o/ /mi 'gyur bar zhes bya ba de gang yin zhe na/ smras pa/ 'chi ba'i gnas zhes smos te/ 'chi ba'i gnas ni gnas pa gang la yod pa de 'chi ba'i gnas te/ 'chi ba'i gnas ni skye ba'i sgo ste/ yang skye ba zhes bya ba'i don to/ /gang gi phyir ma skyes na ni 'chi bar mi 'gyur te/ gang zhig skyes nas mi 'chi ba ni med de des na skye ba la brten pa ni 'chi ba'o//gzhan dag na re 'chi ba nyid 'chi ba'i gnas yin te/ ming nyid ming gi gnas lta bu'o zhes so/ /'o na yang gtan du 'dod chags dang bral ba yang phyir mi 'ong bar mi 'gyur te/ 'chi ba'i gnas nyid du 'ong ba yod do zhe na/ de ni de ltar bden pa nyid de 'on kyang nges par ni 'ong ba med do//yang na srid pa tha ma pa'i dbang du byas te/ de la dgongs pa yin pas nyes pa med do/ /yang na thams cad bsdus te spang ba'i dus su de dang bral ba'i thob pa rnyed pa'i phyir de spang ba bstan te/ ji skad du gsungs pa/ dgra bcom pa'i gnas skabs de la 'dod pa'i zag pa dang / srid pa'i zag pa dang / ma rig pa'i zag pa las sems rnam par grol bar 'gyur ro zhes so/ /kha cig tu ni mi 'gro bar zhes brjod do/ /mi 'ong ba dang mi skye ba zhes bya ba'i don zhes gsungs pa zhes bya ba'i don ni bdag nyid kyis de skad bshad pa yin gyi/ /gzhan dag gis ni ston par mi nus so zhes ston to//'di skad ston pa yin te/ rgyu gsum gyis ni 'dod pa rnams spang bar mi rung bar 'gyur te/ gal te yang rtag par gyur na ni gter lta bu'o/ /gal te mi rtag par gyur na ni ri bong gi rwa lta bur 'gyur ro/ /gal te gnod par ma gyur na ni 'phags pa'i lam lta bur 'gyur ro//'di ltar 'dod pa ni rtag pa med de/ mi rtag pa ni yod do/ /yul 'di dag la yang 'dod pa can chags pa yin te/ des na gtan du 'di dag yang srid pa med par bya ba'i phyir spang bar bya ste/ 'di spangs pas ni 'chi ba'i gnas su mi 'gyur ba'i tshul gyis phan yon bstan pa yin no//'dod pa rnams yongs su shes par bya ba nas shes shing gzung ba'i phyir 'di gsungs so/ /'dod pa rnams spang bar gyur pa la ni dgra bcom pa nyid ma thob kyang 'dod pa spangs pa'i phan yon bshad pa/ 'dun pa skyes zhes bya ba la sogs pa smos te/ mdo las phyir mi 'ong ba ni rnam pa lnga zhes gsungs so//bar ma dor yongs su mya ngan las 'da' ba dang / skyes nas yongs su mya ngan las 'da' ba dang / mngon par 'du byed pa dang bcas pas yongs su mya ngan las 'da' ba dang / mngon par 'du mi byed pas yongs su mya ngan las 'da' ba dang / gong du 'pho ba zhes bya ba bstan pa las bcom ldan 'das kyis 'di gsungs so//'dir yang mdor bsdu na tshul khrims la rab tu gnas pa'i dge slong gis khyad par rtog par bya ba'i phyir gang gis yang dag par sbyor ba dang / gang yang dag par sbyor ba dang / gang yang dag par sbyor ba'i 'bras bu dang / gang yang de'i 'bras bu'i phan yon de dag 'dir bstan pa yin no//de la 'dun pa skyes pa zhes pas ni gang gis yang dag par sbyor ba'o/ /zad par mi byed pa dang / sems la skyon med pa dang dran pas ni gang yang dag par sbyor ba'o/ /gcig gis ni grong du bsod snyoms kyi phyir rgyu ba na dbang po'i sgo yongs su bsdams pas cho ga dag pa'o//gnyis pa la gnas pas ni sgrib pa dag las sems yongs su sbyangs pa ste/ gnas pa dag pa'o/ /gsum pas ni yongs su dag pa'i spyod pa la gnas shing ting nge 'dzin la brten nas bag chags spangs pa'i phyir de'i gnyen po dran pa nye bar gzhag pa bsgom pas so//'di yang mnyam par ma bzhag pa'i gnas skabs na yang dag par sbyor ba rnam pa gnyis so/ /mnyam par bzhag pa'i gnas skabs na ni rnam pa gcig tu bstan to/ /gang yang dag par sbyor ba'i 'bras bu ni 'dod pa rnams la so sor ma chags pa zhes bya bas bstan to//'bras bu de'i phan yon ni gang du 'pho ba ste 'di dag go/ /tshig re re'i dbye ba yang 'dun pa zhes bya ba ni gang la 'dun pa 'di skyes pa yod pa de ni 'dun pa skyes pa ste/ 'dod pa skyes pa zhes bya ba'i don to/ /gang la 'di lta bu'i tshul gyis chos ni 'dun pa skyes pa yin te/ nam zhig na de'i tshe skye mched rdzogs par byas te gnas par bya'o zhes bya ba dang /gang 'phags pa'i skye mched rdzogs par byas te gnas par bya'o zhes bya ba ni 'dun pa skyes pa'i sgra'i don to/ /'dis ni dang po'i sbyor bas gong du 'pho ba bstan to/ /zag par mi byed dang zhes bya ba ni nyon mongs pa'i yul la 'jug pa ni zag pa'o//rgyun du zag cing 'byung ba'i phyir rnag 'dzag pa lta bu ste/ de gang la yod pa de ni zag pa ste/ dbang po'i sgo ma bsdams pa'o/ /de'i phyir mdo las gsungs pa/ ji ltar yang dge slong dag rab tu zag par 'gyur ba yin zhe na/ dbang po'i sgo ma bsdams par gnas pa'o zhes pas so//ci'i phyir de la zag pa zhes bya zhe na/ smras pa/ de la skye mched drug dag las yul rnams su zag par byed pa ste/ rkyal pa'i bug pa dag las chu 'dzag pa bzhin no/ /zag par mi byed pa ni de las bzlog par rig par bya'o/ /sems la skyon med ces bya ba ni yid la skyon dang rnyog pa med pa ste/rnyog pa'i kun du rtog pas kun du mi rtog pa'o/ /rnyog pa'i kun du rtog pa de yang 'dod pa dang gnod sems dang rnam par 'tshe ba'i kun du rtog pa zhes grags pa ste/ nges par mi 'byung ba dang / gnod sems dang / rnam par 'tshe ba'i kun du rtog pa dag gi skyon med par gyur pa'i phyir te/de ltar na mdo las gsungs pa yin no/ /ji ltar skyon med par kun du rtog par 'gyur zhe na/ nges par 'byung ba dang / gnod sems med pa dang / rnam par 'tshe ba'i kun du rtog par mi 'gyur ba yin no/ /de ltar rim pa 'dis snod du gyur pa dang / rnal 'byor can bden pa rtog par bya ba'i phyir sbyor ba rtsom 'dod par 'gyur te/ dang por dran pa nye bar gzhag pa bzhi'i bsgom pa 'di nyid la brtson par 'gyur ba bstan pa'i phyir smras pa/ dran pa dang zhes bya ba smos te/ dran pa nye bar gzhag pa bzhi la gnas pa yin te/ de ltar na mdo las gsungs pa yin no//yang dge slong ji ltar dran par 'gyur zhe na/ 'di la nang gi lus la lus kyi rjes su lta zhing gnas te/ rgya cher chos la'o zhes pa'o/ /ji 'di tsam nyid la gong du 'pho ba yin nam zhe na/ de ni ma yin te smras pa/ 'on kyang 'dod pa rnams la so sor ma chags pa gang zhes bya ba smos te/gzugs la sogs pa'i yul dag la chags pa med pa ste/ gang gi 'dod pa'i 'dod chags kyi bag la nyal zag pa med pa'i lam gyis rab tu spangs pa zhes bya ba'i don to/ /de ni gong du 'pho ba yin zhes gsungs zhes bya ba la/ gong ni shas cher steng du'o/ /'pho ba ni 'gro ba ste/gang gi skye ba rang gi gnas dang 'og tu ma yin pa gang du skye ba zhes bya ba'i don to/ /phyir mi 'ong ba rnam pa bzhi ma gtogs pa de ltar de nyid smos pa ni nyams pa'i gnas skabs yin pa'i phyir ro/ /'di ltar 'dod pa na spyod pa'i so so'i skye bo thams cad dang so so'i skye bo ma yin pa dag ni nyams pa nyid de/'di ni phyir mi 'ong ba thams cad la yang gang 'gros gzhan pas khyad par ma thob pa de ni nges par gang du 'gro bar 'gyur de la lam gyi tshogs 'dun pa skyes pa la sogs pa dang dran pas ni lam bstan to/ /lhag mas ni phan yon dang bcas pa'i lam gyi 'bras bu yongs su bstan to//gzhan dag ni gzhi dang bcas pa'i bslab pa gsum rnam par dag pa'i thabs 'bras bu dang bcas pa dang / phan yon dang bcas pa 'dir bstan to zhes zer te/ de la 'dun pa skyes pa zhes bya bas ni bzhi'o/ /zag par mi byed ces bya bas ni lhag pa'i tshul khrims kyi bslab pa rnam par dag pa'i thabs so//sems la skyon med ces bya bas ni lhag pa'i sems kyi bslab pa rnam par dag pa'i thabs te/ 'dir ting nge 'dzin la ro myang ba med pas skyon med pa'i sems su rig par bya'o/ /dran pas ni lhag pa'i shes rab kyi bslab pa rnam par dag pa'i thabs so//'og ma dag gis ni phan yon dang bcas pa dang de'i 'bras bu bstan to/ /de la 'di ni 'dod chags dang ma bral ba'i 'phags pa rnams 'dod pa'i khams las 'da' bar bya ba'i phyir dang / de las 'dod chags dang bral ba rnams kyis mi slob pa'i lam mngon sum du bya ba'i phyir 'di gsungs so//ci dge ba'i 'dun pa la sogs pa'i yon tan 'thob pa dang / skyon thams cad spang ba cig car du'am/ 'on te gnyi ga rim gyis 'gyur zhes bya ba la de nyid nges par bstan pa'i phyir smras pa/ mgar ba yis ni zhes bya ba la sogs pa smos te/ dge slong zhig du ma'i sgo nas nyon mongs pa nye bar bstan pa thos te/ bdag gis nyon mongs pa spang bar bya ba ni ji ltar nus te/ 'di dag ni mtha' yas pa'i phyir cig car spang bar sus kyang mi nus so zhes rnam par rtog cing yid mi bde ba chen po skyes par gyur pa las ji tsam na bcom ldan 'das de gdul ba'i phyir grong khyer du rgyu zhing gshegs pa las dngul mgar dngul la rim gyis dri ma sel bar byed pa dag gzigs pa dang /yang dge slong de la bka' stsal pa/ dge slong mgar ba 'dis rim gyis dngul gyi dri ma mtha' dag sel bar byed pa ltos shig / btsun pa de de bzhin no zhes gsol to/ /de bzhin du dge slong khyod kyis cung zad tsam gyis sems kyi dri ma bstsal bar byas na ring po mi thogs par dri ma med par 'gyur ro zhes bstan nas tshigs su bcad pa 'di gsungs so/ /gang gi tshe dang gang gis dang / ji ltar yang nyon mongs pa spang bar nus pa de dang mthun pa dang /dpe de 'dir bstan pa yin no zhes bya ba ni bsdus pa'i don to/ /de la rim pa bzhin zhes bya bas ni gang gi tshe zhes bya ba'i dus bstan to/ /gang gis zhes bya ba ni blo gros dang ldan pas so/ /ji ltar zhes bya ba ni/ skad cig skad cig cung zad tsam//zhes bya bas bstan to/ /mgar ba dang dngul gyis ni dpe bstan to/ /rim pa bzhin zhes bya ba ni bsam pa phun sum tshogs pa ste/ dge ba'i bshes gnyen bsten pa dang tshul khrims dang thos pa la sogs pa'i tshogs yongs su rdzogs pa'i rim pas so/ /de dang rjes su mthun pa'i tshogs med par ni yon tan 'thob pa med de/ji skad gsungs pa de la re zhig dge slong dag dge slong la gus pa med par gnas pa ni ma bsngags te/ tshangs pa mtshungs par spyod pa dag la ji srid yang dag par kun du spyod pas chos yongs su rdzogs par 'gyur ba dang / rgya cher rnam par rol pa'i ye shes mthong ba'i phung po yongs su rdzogs par 'gyur ba 'di ni gnas med de/de bas na rim pa bzhin du bslab na rab tu shes pa yin te/ tshul khrims dang rtogs par 'gyur ro zhes bya ba la sogs pa'o/ /blo gros dang ldan pa zhes bya ba ni shes rab dang blo gang la yod pa de ni blo gros dang ldan pa ste/ blo dang ldan zhing thabs shes pa bzhin bya ba'i don to/ /cung zad cung zad ces bya ba ni nyung du nyung du ste dri ma zhes bya ba 'di dang sbyar ro/ /skad cig skad cig tsam zhes bya ba ni yang nas yang ste/ rtag tu zhes bya ba'i don to/ /de lta na 'di ji lta bu zhe na/ 'dir dpe smras pa/ mgar ba zhes bya ba ste/ lcags dang gser dang dngul la sogs pa thams cad byed pa dag la mgar ba zhes bya'o//'dir ni gleng gzhi'i dbang gis dngul mgar la dgongs pa yin no/ /dngul bzhin du zhes bya ba ni dngul lta bu ste/ de'i phyir des bsregs pa dang brdungs pa la sogs pa'i thabs kyis dngul gyi dri ma nag po sel ba de bzhin du blo gros dang ldan pas rang gi dri ma bsal bar bya zhes bya ba yin te/zag pa med par bya ba dang / spang bar bya ba dang / zad par bya ba'o/ /dri ma ni 'dod chags la sogs pa'i bag chags la lus 'di'i dri ma zhes brjod do/ /rang gi zhes bya ba la rkyen gyi dngos po yin pa'i phyir 'dir ni rang gi sems kyi don la blo gros dang ldan pa rnams kyis bdag tu dgongs so//chos thams cad bdag med pa yin na yang de'i dri ma ni nyon mongs pa nyid do/ /de la 'di ni brtson 'grus brtsams pa myur du zag pa zad par 'dod pa rnams rgyud yongs su ma smin pa de dag ma thob pas yongs su skyo ba la de mi skyo bar bya ba'i phyir 'di gsungs so//ji srid dri ma spangs pa de tsam du phan yon du 'byung ba yin no zhes bstan pa'i phyir smras pa/ lham mkhan gyis ni zhes bya ba la sogs pa smos so/ /grong gi tsher ma zhes bya ba ni 'dod pa 'di'i tshig bla dwags yin te/ gang gi phyir dge slong dag 'dod pa ni shin tu sdug bsngal ba yin te/ji srid 'di yongs su spangs pa de srid na yid bde ba 'thob par 'gyur zhes so/ /de'i tshe yul ko sa lar byung ba'i rgyal po gsal rgyal gyi lham mkhan dang ha cang mi ring ba zhig na rgyal po'i shing rta'i bzo byed de de dang nye bar 'tsham pa'i ko ba dag yongs su sbyor bar byed pa las rgya cher de nyid kyi dpe'i dbang du byas nas 'di gsungs so//'dod pa rnams ni sdug bsngal ba yin pa'i phyir de yongs su spangs na ni bde ba 'thob bo zhes bya ba ni 'di'i bsdus pa'i don to/ /lham mkhan zhes bya ba ni gang lham mkhan byed cing lham gyi bzo la mkhas pa zhes bya ba'i don to//ltar zhes bya ba ni dpe nye bar 'jal ba ston to/ /ko ba dag ces bya ba ni ba lang dang ma he la sogs pa'o/ /yongs su sbyangs nas zhes bya ba la sbyangs pa ni bcad pa ste mtshon gyis bskyed cing sbyangs pa'o/ /yongs su zhes bya ba ni thams cad nas te/ kun nas sbyangs nas zhes bya ba'i don to//ci zhig yongs su sbyangs pa yin zhe na/ smras pa/ lham zhes bya ba smos te/ shing rta'i 'khor lo la bcing ba ste ko ba gang gis shing rta'i 'khor lo bcing zhing nye bar spel ba de ni lham zhes bya ba'i sgrar brjod de/ nA ha ban da na zhes bya ba'i skad kyi byings kyis bstan pa'i phyir ro//yang na lham mkhan ni ko lpags mkhan te/ 'dis rkang pa la nye bar 'gebs pa yin pas lham ste/ rkang pa skyob pa zhes bya ba'i don to/ /gang dang gang spangs pa zhes bya ba dang ko ba zhes bya bar sbyar ro/ /de ni 'di skad bstan pa yin te/ ji ltar lham mkhan gyis lham de'i mtha' 'di la yang gang dgos pa yongs su sbyangs nas gang dang gang mi dgos pa'i ko ba dag ni yongs su dor bar byas pas de dang des mngon par 'dod pa'i don 'grub par byed do//de bzhin du 'dod pa spong bar byed pas kyang gang dang gang cung zad skyes pa'i rnam pa spang bar byas pa de dang des ni bde ba dang ldan par 'gyur te/bde ba'i rgyu zhes bya ba'i don to/ /de yongs su spang bas ni de'i gzhis sdug bsngal mi 'byung ba'i phyir dang nges par 'byung ba'i bde ba 'byung ba'i phyir bde ba dang ldan pa yin pas rgyu la 'bras bu btags pa'i phyir te/ 'di ltar bde ba ni nad sel ba'i sman bsten pa bde ba yin no zhes bya ba de bzhin no//'di ltar 'dod pa yang rnam pa gnyis te/ dngos po dang nyon mongs pa'i bdag nyid do/ /de la dngos po'i 'dod pa ni gzugs la sogs pa yul rnam pa lnga dang / khyim rnams yongs su gzung ba pha dang ma dang bu smad la sogs pa'o/ /rab tu byung ba rnams kyi ni rnyed pa dang bkur sti'o//nyon mongs pa'i bdag nyid ni 'dod pa de yang dngos po de dag nyid la 'dod pa ste/ gang 'dun pa'i 'dod chags so/ /de gnyi ga'i sbyor ba 'di dag gi rnam pa yongs su spangs pa de ni bde ba dang ldan pa'o/ /ji skad du gsungs pa/ yongs su bzung ba spang byas na/ /gnod pa de dag mi 'byung ste//de bzhin sems kyi dri ma dag /spang byas gnod pa de mi 'byung / /zhes so/ /de la 'di ni 'dod pa la mngon par dga' ba rnams 'dod pa spangs pa la gzud pa'i phyir gsungs so/ /'dod pa rnams ni cung zad tsam spangs pa las bde ba cung zad tsam nyid yin la mtha' dag spangs na ni bde ba phun sum tshogs pa nyid yin no zhes bstan pa'i phyir smras pa/gal te bde ba zhes bya ba la sogs pa smos so/ /bram ze zhig bcom ldan 'das kyi spyan sngar song ste/ gsol pa/ kye gau ta ma ci zhig spangs na bde ba thams cad thob par 'gyur zhes pa dang / de'i dbang du mdzad de tshigs su bcad pa 'di gsungs so//'dod pa thams cad spangs pa phan yon dang bcas pa bstan to zhes bya ba ni 'di'i bsdus pa'i don to/ /kun zhes bya ba ni 'jig rten dang 'jig rten las 'das pa'i bde ba ma lus pa gzung ngo / /gal te zhes bya ba ni ji ste'o/ /bde ba ni 'dod pa rjes su myong ba la sogs pa'o//'dod pa zhes bya ba ni rjes su 'brel ba dang mngon par 'dod pa'o/ /'dod pa thams cad ces bya ba ni dngos po'i 'dod chags dang nyon mongs pa'i 'dod chags so/ /yongs su spong zhes bya ba ni rab tu dor ba'o/ /'dod pa gang dang gang spangs pa/ /zhes bya ba ni bde ba'i 'du shes kyi 'dod pa rnams phyogs gcig ma spangs na ni zang zing med pa'i bde ba phun sum tshogs pa thob par mi 'gyur te/des na bcom ldan 'das kyis bka' stsal pa/ gal te bde ba yongs su rdzogs 'dod na/ /'dod pa thams cad yongs su spang bar bya//zhes bya ba yin te/ ci'i phyir zhe na/ smras pa/ 'dod pa thams cad ces bya ba smos te/ gang gi phyir 'dod pa thams cad yongs su gtong ba'i ngang tshul gang yin pa de ni 'dod pa thams cad yongs su spangs pa'o/ /ji ltar yang 'dod pa thams cad yongs su spong bar 'gyur zhe na/ smras pa/ mthong ba dang bsgom pa'i lam gnyis kyis 'dod pa na spyod pa'i nyon mongs pa'i ris gnyis spong bas so//mchog tu zhes bya ba ni gtan du'o/ /yang na zag pa med pa'i lam gyis spangs pas bde ba khyad par can du gyur pa ste/ khyad par du gyur pa zhes bya ba'i don to/ /bde ba thob pa zhes bya ba ni bde ba rjes su myong ba dang /bde ba la gnas pa dang thob pa zhes bya ba'i don to/ /ji ltar de yongs su spangs pas mchog tu bde ba thob pa yin zhe na/ gang gi phyir de ni phyir mi 'ong bar gyur nas 'dod pa'i khams su yang mi 'ong ba dang / phung po lhag ma med pa'i mya ngan las 'das pa'i dbyings su 'gro ba yin te/des na gnod pa dang bcas pa'i khams las yang dag par 'das pa'i phyir mngon par 'dod pa'i bde ba 'thob pa yin no/ /'dod pa phyogs gcig spangs pas chog par 'dzin pa dag 'dod pa thams cad spangs pa la gzud pa'i phyir 'di gsungs so/ /ci'i phyir 'dod pa spangs pas mchog tu bde ba thob par brjod ce na/gang gi phyir ngoms mi shes pa'i phyir 'dod pa ni sdug bsngal ba yin te/ des na 'dod pa de dag spangs pa 'di ni bde ba yin no zhes bstan pa'i phyir smras pa/ ji srid 'dod pa'i rjes 'brang ba/ /zhes bya ba la sogs pa smos so/ /bde ba 'dod pa zhes bya ba'i gcer bu pa de ni 'di ltar lta zhing 'di skad smras te/'di lta ste dka' thub drag pos thar pa thob pa de nyid ngoms pa yin no zhe'o/ /mchod sbyin gyi bdag po zhes bya ba'i bram ze de yang 'di ltar lta zhing 'di skad smras te/ 'di lta ste/ ji ltar 'dod pa bzhin du 'dod pa las longs spyod pa nyid kyis ngoms pa yin gyi/thabs gzhan gyis ni ma yin te/ dper na chu nye bar longs spyod pas skom pa dang bral ba ni de'i dngos po nyid kyis thar pa'o/ /de bas na de gnyis kyi dbang du byas nas tshigs su bcad pa 'di gnyis gsungs so/ /de la re zhig dang po'i bshad pa smras pa/ ji srid ces bya ba ni dus ji srid kyi bar du'o//'dod pa'i rjes 'brang ba zhes bya ba ni gzugs sdug pa la sogs pa yul gyi rjes su 'brang zhing rab tu ston pa dang spyod pa'o/ /de srid bar du ngoms mi 'gyur/ /zhes bya ba ni dus de srid kyi bar du sred pa dang bral ba'i mtha' gnyis so/ /yang thabs gang gis ngoms pa rnyed par 'gyur zhe na/ smras pa/ de las zhes bya ba smos te/ 'dod pa dag las so/ /ldog byed ces bya ba ni spangs pa'o/ /de'i phyir ji srid ji srid du 'dod pa spong bar gyur pa de dang de srid du don gnyer ba dang bral ba yin te/ ji skad du gsungs pa/ gcig tu spang bya spang bya ste/ /yang dag spyan na 'dzeg par 'gyur/ /rang gi lus la 'dod pa yi//skas ni bya bar mi rigs so/ /zhes so/ /lus dang sems kyi skyo bar yang dag par bstan pas ting nge 'dzin 'thob par 'dis ston pa yin no/ /gang gi phyir sred pa bsal ba'i thabs ni dben pa'o/ /ci zhig byas nas nyon mongs pa dang 'dod pa rtsa ba nas 'byin par 'gyur zhe na/ smras pa/ shes rab kyis ni zhes bya ba smos te/ zag pa med pa'i ye shes kyis 'dod pa ji lta ba bzhin du yongs su shes pa yin te/ ji skad du gsungs pa las/ gcig kyang mngon par mi shes shing yongs su mi shes pas sdug bsngal gyi mthar byed par 'gyur ro zhes nga mi smra'o zhes so/ / gang dag ces bya ba ni gang la la ste sngar bstan pa'i rim pas dmigs te/ rgyal rigs dang bram ze la sogs pa'i rigs la ltos pa med de/ de bzhin gshegs pa ni rus dang rigs dang rgyud la yongs su mi gzigs te/ dge ba dang mi dge ba'i las la yang dag par gzigs so/ /gang gi phyir dag pa ni shes rab la rag las pa yin gyi/rigs la rag las pa ni ma yin no/ /tshim pa zhes bya ba ni sred pa dang bral ba ste/ don du gnyer ba spangs pa'o/ /de dag ces bya ba ni phyin ci ma log pa'i thabs rjes su 'brang ba ste/ gang dag gi sgras bstan to/ /'thob ces bya ba ni rnyed pa'o//gang shin tu dka' bas dka' thub la gnas pa dang 'dod pa la brten pa ni bzlog pa yin no zhes ston te/ yun ring por yang 'dod pa la brten pa'i phyir ro/ /'di skad ston pa yin te/ 'dod pa dag la bde blag tu rjes su sbyor ba'i phyir te/ de yang bdag nyid nyon mongs pa la sbyor ba yin pa'i phyir dang /de yang ngoms par mi byed pa dang / rab tu bsgrubs pa'o/ /yang dag pa'i lta bas yang dag par gzung bas ni ngoms par byed pa nyid du ston to/ /de la 'di ni 'dod pa bsten pa dang dka' thub byas pa las ni ngoms par mi 'gyur gyi/ de kho na nyid phyin ci ma log par shes pa dang thabs shes pas ni ngoms par 'gyur bas de nyid la gzud pa'i phyir 'di gsungs so//dus ji srid 'dod pa nye bar longs spyad pas kyang ngoms pa nyid do zhes rtog pa la smras pa/ 'dod pas ngoms par mi 'gyur bas/ /zhes bya ba la sogs pa smos so/ /skyid pa zhes bya ba ni skyid par byed pa ste 'dod pa la longs spyod pa'i ngoms pa bas khyad par du ngoms pa zhes bya ba'i don to//ngoms pa zhes bya ba ni 'dir sbyar te/ gang zhig gis ngoms she na/ smras pa/ shes rab kyis zhes bya ba smos te/ gang de bzhin nyid shes pa'i rgyu des bskyed pa'i ngoms pa de'o/ /ci'i phyir zhe na/smras pa/ mi 'gyur bas zhes bya ba smos te/ 'dod pa nye bar longs spyod pas su zhig gtan du ngoms par 'gyur te mi 'gyur bas so/ /'dod pa dag las ldog par 'dod pas kyang 'dod pa dag la brten par mi bya'o/ /ci'i phyir zhe na/ smras pa/ 'dod pas ngoms par mi 'gyur bas/ / zhes smos te/ /'di ltar nam yang 'dod pa la longs spyod pas ni chags pa dang bral bar mi 'gyur te/ rgas pa'i gnas skabs na yang dregs pa dang 'dod pa las ldog par mi 'gyur te/ ji skad du bshad pa/ rga bas lus ni rgas gyur cing / /mgo ni skya bor gyur pa dang / /dbang po rnams ni rnyis gyur kyang //'dod chags zhe sdang rga mi 'gyur/ /zhes pa'o/ /gang gi phyir rgas pa na 'dod pa dag la lhag par bsten du ni lus mtha' dag skams par gyur te/ sred pas sems la khyab par gyur kyang de la longs spyod par mi nus pa yin te/ des na mi bsten pa yin gyi ngoms pa ni ma yin pa'i phyir ro//shes rab kyis kyang de bzhin du ngoms par mi 'gyur ram zhe na/ de ni ma yin te ci'i phyir zhe na/ smras pa/ shes rab kyis ni zhes bya ba smos te/ zag pa med pa'i shes rab kyis skyes bu gang ngoms na ni srid pa dang bral ba yin te/ de ni yang 'dod cing sred pa'i dbang du mi 'gro'o//de nyid smras pa/ srid pa'i dbang du mi 'gyur ro/ /zhes bya ba smras te/ dbang du mi byed pa ni bdag dang rjes su mthun pa sred pa'i gzhan gyi dbang du mi 'gro ba ste/ de'i bdag nyid la rag ma lus pa zhes so/ /ngoms par 'dod pas ni ye shes nyid la goms par bya'i 'dod pa bskyed par ni mi bya'o zhes nges pa bskyed par bya ba'i phyir 'di gsungs so//'dod pa'i dbang du 'gro ba ni skyon 'di yod de/ gang du ngan par spyod pa'i rgyur gyur pa dang / 'dod pas ni de bzhin nyid shes pa la bar du gcod par byed pa yin no zhes bsgrub pa'i phyir smras pa/ 'dod la chags pa'i zhes bya ba la sogs pa tshigs bcad gnyis so//yul yangs pa can na khyim bdag drag shul can zhes bya ba bran pho dang bran mo dang las byed pa dag la chad pas bsdigs pa dang 'jigs pas bsdigs pa dag byas nas nyin par bud med kyi tshogs dang rol mos rtse zhing dga' bar spyod la skyed mos tshal nas skyed mos tshal du 'gro ba de gzigs nas/bcom ldan 'das kyis 'di gsungs so/ /'dod pa la sred pa ni ngan par spyod pa'i rgyur gyur pa dang / kun tu rmongs par bstan pa dang / de la chags pas bya ba ma yin pa la 'bad cing 'jug par 'gyur bas nges par mi rtag par 'gyur ba des ma mthong ba yin no zhes bya ba ni bsdus pa'i don to//'dod la zhes bya ba ni dngos po'i 'dod pa la'o/ /mi gang yin zhes bya ba ni sems can gang dag go/ /chags pa zhes bya ba ni lhag par zhen pa ste/ so so'i skye bo 'dod pa na spyod pa dag go/ /chos min zhes bya ba ni lus dang ngag dang yid kyis nyes par spyod pa ste/ji skad du gsungs pa/ chos ma yin pa gang zhe na/ 'di la gcig ste/ srog gcod par 'gyur ba'o zhes bya ba la sogs pa mdo las rgya cher gsungs so/ /kye ma zhes bya ba ni 'dod pa la lhag par zhen pa rnams la bcom ldan 'das mi gtsang ba'i tshogs kyi nang na srin bu gnas pa bzhin du thugs brtse ba yin te/mi gang dag 'dod pa la chags pa de dag dang 'dod pa rnams kyi don phun sum tshogs pas dregs pas ngan par spyod pa byed cing dga' bar 'gyur ba la'o/ /de dag ces bya ba ni gang sngar bstan pa'i 'dod pa la chags pa de dag go//chos ma yin pa ngan par spyod pa rnam pa bcu po de dag la dga' ba zhes bya ba ni dga' ba dang ldan pa'o/ /ji skad du gsungs pa/ 'dod pa ni gsod par byed pa yin te/ 'dod pa'i gzhi dang 'dod pa'i rgyus rgyal rigs dang rgyal rigs su 'thab par 'gyur ro/ /de dag 'dod pa la chags pa dang chos ma yin pa la dga' ba des kyang 'dod pas blo rnam par g.yen spyo ba de dag gis 'chi ba la nye bar gnas par gyur ba dang /bar chad mthong bar ma gyur pa yin te/ gags ma rtogs shing bar du gcod pa mi bzad pa ma rtogs pa zhes bya ba'i don to/ /'dod pa dang ldan pa rnams la gang yod na glo bur du 'chi ba'i mtshan nyid kyi bgegs yod par 'gyur zhe na/smras pa/ cung zad gson por 'dug pa na/ /zhes bya ba smos te/ dus shin tu thung bar gnas pa'i tshe yod par gyur pa la ste gang de ltar yun ring du 'tsho ba de yang lo brgya'o zhes lung las gsungs pas so/ /rgyu mtshan gyi 'dun pa'am cung zad gson pa'i ched du bar chad mthong bar ma gyur pa yin te/ji skad du bshad pa/ lkog mar srog phyin par gyur na ni thams cad kyang gzhan gyi lag tu 'gro ba nyid de ji srid 'tsho ba de srid kyi bar du ni 'dod pa yod do/ /de dang bral na ni 'dod pa dang yang bral bar 'gyur ro zhes so/ /de la 'di ni 'dod pa la zhen pa dag de las 'dun pa bzlog pa'i phyir gsungs so//ji ltar yang 'dod pa la chags pa dang / chos ma yin pa la dga' bas bdag dang gzhan gnyi ga nye bar 'joms pa yin no zhes bstan pa'i phyir smras pa/ blo ngan longs spyod kyis zhes bya ba la sogs pa smos so/ /blo ngan ni byis pa ste/longs spyod kyis byas pa'i sred pa'i kun nas nyon mongs pa dang sred pas byas pa'i ngan par spyod pa'i kun nas nyon mongs pa zhes bya ba ni 'dir bsdus pa'i don to/ /bcom pa ni nye bar gdung bar byed pa ste/ dge ba'i chos ring du byed cing rgyud rgud par byed pa'o/ /gang yin zhe na/ smras pa/ blo ngan zhes bya ba smos te/ blo ngan pa gang la yod pa de ni blo ngan te shes rab dang rtog pa ngan pa ste/ rmongs pa zhes bya ba'i don to/ /de yang gang gis she na/ smras pa/ longs spyod kyi zhes bya ba smos te/ 'dod pas nye bar spyod pa'i phyir longs spyod de/ 'dod pa'i yul rnams so/ /de dag kyang rmongs pa'i skye bo nyid bcom par 'gyur zhing ji srid skyo ba chung ba'i 'phags pa'i gang zag rnams kyang g.yen spyo bar 'gyur ro zhes bstan to//mi byed cing zhes bya ba ni nam yang pha rol tshol bar mi byed pa yin te/ 'dod pa dag las pha rol tu nges par 'byung ba ste/ de tshol ba'i ngang tshul gang la yod pa de ni de ste/ de lta bur mya ngan las 'das pa tshol ba med pa ste so so'i skye bo zhes bya ba'i don to/ /gzhan dag tu ni bdag nyid tshol ba zhes brjod de/ bdag nyid la phan pa tshol ba yin pa'i phyir mkhas pa zhes bya ba'i don to/ /'dod pas rmongs pa zhes bya ba la/ rmongs pa'i skye bo ni nye bar gdung ba yin te nye bar chags par 'gyur ro//des na ngan par spyod pa bsags pas bdag dang gzhan la nye bar gnod pa yin no zhes bstan pa'i phyir smras pa/ bdag dang gzhan yang phung bar byed/ /ces bya ba smos te/ de yang longs spyod la chags pa dang longs spyod la sred pas bdag phung bar byed de de ngan song nye bar slong ba'i ngan par spyod pas so//gzhan yang zhes bya ba ni sems can gzhan yang phung bar byed pa yin te/ rnam pa mang po'i gnod pa byed pas so/ /dang gi sgra ni phung bar byed pa nyid du nges par gzung ba'i phyir ro/ /de gang yin zhe na/ bsam brlag ces bya ba smos te/ gang gi phyir longs spyod ma thob kyang de ni sred pa skyed par byed de/de yang de la sred pa'i bag chags sgom par byed do/ /de ltar na des longs spyod kyis phung bar 'gyur te/ rang dbang med par 'gyur ro/ /de de ltar longs spyod la sred pa des phung bas bdag nyid kyang phung bar byed de ngan par spyod pa kun du spyod pa'i phyir ro//lhag ma ni snga ma bzhin no/ /gang gis de ltar phung bar byed pa yin zhe na/ smras pa/ 'dod la sred pa yis zhes bya ba smos te/ longs spyod la sred pas so/ /longs spyod don du gnyer ba dang longs spyod la chags pa rnams 'dun pa de las bzlog pa'i phyir 'di gsungs so/ /bcom pa zhes bstan pa la ji ltar 'di dag bcom pa yin zhe na/smras pa/ chog mi shes pa'i phyir dang / mnog chung ba'i phyir dang / nyes pa mang bas so/ /'di nyid smras pa/ kAr ShA pa Na'i char bab kyang / /zhes bya ba la sogs pa'i tshigs su bcad pa bzhi smos so/ /rgyal po nga las nus brgya byin brgya rtsa bcu bzhi'i tshe tshad dang mnyam pa snyed du lha dang mi'i bde ba nyams su myong nas/de'i tha mar rgya cher smras pa/ bdag gis ni shin tu yun ring por nye bar longs spyod cing lhag par rol par byas kyang 'dod pa rnams kyis ma ngoms te/ de bas na/ kAr ShA pa Na'i char bab kyang //zhes bya ba la sogs pa smras so/ /gzhan dag na re mnyan yod na ba ka zhes bya ba rab tu byung ba la ni mngon par mi dga' la 'dod pa dag la ni dga' bas de dang dge slong dag las brtsams te dang po'i tshigs su bcad pa gnyis gsungs zhes so/ /de dag kyang gcig la gcig 'brel pa zhes bya ba ni 'dir bsdus pa'i don to//ji ltar yang 'dod pa rnams yongs su shes par bya ba ni chog mi shes pa dang / mnog chung ba dang / nyes dmigs mang ba'o/ /gal te 'dir ngoms par 'gyur na ni mnog chung ba dang nyes pa mang du zin kyang ngoms par 'gyur ba'i phyir don du gnyer bar 'gyur ro//yang na mnog che bar gyur cing nyes pa med na ngoms par mi byed du zin kyang bde ba'i phyir don du gnyer bar bya'o/ /yang na mnog chung ba yod cing sdug bsngal chung ba yin yang de lta na yang bde ba'i phyir don du gnyer bar bya ba nyid na/ gang gi phyir 'dod pa rnams ni ngoms par mi byed pa dang mnog chung ba dang nyes pa mang ba yin te/de bas na de ltar yongs su shes par bya'o/ /gang rdzogs pa'i sangs rgyas dang / nyan thos kyis ni de yul du mi byed pas gang 'dod pa la ma chags pa'i phan yon rnams/ de'i 'bras bu ni mya ngan las 'das pa la mngon par dgyes pa ste de 'dir bstan pa yin no//kAr ShA pa Na'i char bab kyang / /zhes bya ba la/ kAr ShA pa Na'i gzugs bcom pa'i tshong gi tha snyad la dgongs pa ste/ gser la sogs pa las byas pa'i pa Na'i bye brag go/ /gzhan dag na re zangs ma'i pa Na'i tshad kAr ShA yin no zhes zer ro/ /de dag 'bab pa ni char te rgyun mi chad par 'bab pa'o//des kyang sred pa dang ldan pa dag 'dod pas ngoms pa med do/ /ji skad du bshad pa/ gang las rnyed pa de la chags/ /rnyed las chags pa skye bar 'gyur/ /zhes pa dang / sred pa'i dong 'di gting med de/ /dgang dka' ci yis khengs par 'gyur/ /gang zhig chen po blugs gyur kyang //khengs med gting du rgo bar 'gyur/ /zhes so/ /gzhan dag na re rin po che sna bdun gyi char yin no zhes zer te/ 'di ltar yang rgyal po nga las nu'i pho brang gi nang du zhag bdun gyi bar du rin po che sna bdun gyi char bab ste/ rin po che mang po 'dir thob par gyur pa'i phyir kAr ShA pa Na ni de mtshon par bya ba'i phyir smras pa yin no//ngoms pa ni shin tu skom pa dang bral ba'o/ /gang gis mi ngoms she na/ smras pa/ 'dod pa rnams kyis te gzugs la sogs pas so/ /nor phun sum tshogs pa las ni 'dod pa'i sred pa 'phel bar byed do zhes bstan pa yin no/ /mi 'gyur zhes bya ba ni med pa ste/shes rab nyid kyis 'dir ngoms kyi/ /'dod pa'i yo byad yongs su gzung bas ni ma yin no zhes pa'i don to/ /ji ltar na shes rab kyis ngoms she na/ de bzhin nyid yid la byed pa'i phyir ro/ /de ltar ngoms par mi byed pa'i skyon bstan nas gzhan bstan pa'i phyir smras pa/'dod pa mnog chung zhes bya ba smos te/ dug dang 'dres pa'i kha zas lta bur bde ba chung ba dang / rmi lam dang 'dra ba'i phyir ro/ /nyes pa mang ba zhes bya ba ni sdug bsngal mang po gang la yod pa de ni nyes pa mang ba yin no zhes tshig rnam par sbyar te/ gnod pa mang po zhes bya ba'i don to/ /ji skad bshad pa/gang zhig ri rab yungs 'bru'i khyad par dang / /rgya mtsho'i che dang thigs pa'i khyad par dang / /blo ngan bzang po gnyis kyi bye brag kyang / /mkhas pas bde dang sdug bsngal de ltar 'dod/ /ces so/ /khong du chud pa zhes bya ba ni de bzhin nyid nges par byas shing tshul shin tu rtogs pa'o/ / mkhas pa ni blo rnam par gsal ba'i phyir mi dge ba la sogs pa la yang dag par yongs su brtags pas lam gyi tshogs la 'jug pa zhes bya ba'i don to/ /de ltar rnam pa gsum gyis 'dod pa yongs su shes par byas nas ci zhig ce na/ smras pa/ lha'i 'dod pa rnams las so/ /zhes bya ba smos te/lha nyid yin pas lha'o/ /de'i 'dod pa ni lhag par yid du 'ong ba ste/ de dag la ma 'ongs pa'i nyes dmigs mthong ba'i phyir mkhas pas de nam yang mngon par mi 'thob na/ mi'i 'dod pa rnams la yang lta smos kyang ci dgos zhes bya ba ni yang gi sgra'o/ /de de ltar 'dod pa rnams la ni mngon par dga' ba med na/gang la mngon par dga' bar 'gyur ba yod ce na/ smras pa/ sred pa zad pas dgyes par 'gyur/ /zhes bya ba smos te mya ngan las 'das pas mngon par dgyes pa zhes bya ba'i don to/ /ci thams cad kyang nges par 'dod pa dag la mi dga' zhing sred pa zad pas dga' bar 'gyur ram zhe na/de ni ma yin te/ smras pa/ rdzogs sangs rgyas dang nyan thos rnams/ /zhes bya ba smos te/ de nyid gcig pu ji ltar dgyes par 'gyur gyi/ gzhan ni ma yin te/ 'di ltar phyi rol gyi dngos po dag la 'dod chags dang bral bar gyur nas bsam gtan la dga' bar gyur pa'am/yang na gzugs med pa la dga' ba'o/ /phyin ci ma log pa'i tshogs des de bzhin nyid kyi dngos po'i don mtha' dag rtogs par bya ba'i phyir rdzogs pa'i sangs rgyas so/ /de'i nyan thos ni/ de'i bka'i rjes su 'brang ba ste/ de nyid la yang dag par rjes su zhugs pa'i phyir ro//de la 'di ni 'dod pa rnams kyi ro myong bar byed pa'i nyes dmigs bstan pas de las bzlog pa'i phyir 'di gsungs so/ /kAr ShA pa Na'i char bab pa nyi tshes ma ngoms pa ma yin te/ gser gyi ri bo thob par gyur kyang 'dod pa dag gis ngoms pa ma yin no zhes bstan pa'i phyir smras pa/gangs can zhes bya ba la sogs pa smos so/ /bcom ldan 'das shi la ba ti zhes bya ba'i shAkya rnams kyi grong rdal na bzhugs so/ /de nas bcom ldan 'das 'di snyam du dgongs te/ rgyal srid ni nges par gsad pa dang gsod par byed du 'jug pas thob par bya ba'o zhes gsungs pa dang / ji tsam na bdud 'ongs te zhus pa/btsun pa rgyal srid ni thob par bya ba rdzu 'phrul gyis te/ de ltar 'dod pa'i rgyal srid do/ /sdig can ci'i phyir de skad ces smra zhes bka' stsal pa dang / btsun pa bdag gis ni bcom ldan 'das las mngon sum du thos shing bzung ste gang la la zhig gis rdzu 'phrul gyi rkang pa bzhi kun du bsten pa dang /bsgoms pa dang / mang du byas pa dang / 'dod par byas pa des ni ri gangs can dang mnyam pa'i gser gyi ri bo las kyang grol te de yang de bzhin du 'gyur gyi gzhan du ma yin no/ /btsun pa bcom ldan 'das ni rdzu 'phrul gyi rkang pa bzhi dang ldan no zhes rgya cher smras te/de bas na bdag de ltar smra'o zhes pa dang / ji tsam na bcom ldan 'das kyis tshigs su bcad pa gnyis po 'di gsungs so/ /de la 'dir dang po'i tshigs bcad kyis ni yang dag par bstan pa dang / yang dag par 'dzin du 'jug par byed pa yin te/ de la 'di ji ltar yang dag par bstan pa yin zhe na/'dod cing sred pa'i nyes pa ste mang zhing mchog tu gyur pa thun mong ma yin pa'i nor rnyed par gyur kyang ngoms pa med pa'i phyir ro/ /gang la yang dag par 'dzin du 'jug pa yin zhe na/ 'dod cing sred pa'i gzhis ngan par spyod pa las bzlog pa dang / legs par spyod pa la gzud pa ni bsdus pa'i don to//ri bo yod gyur kyang zhes bya ba ni tshogs yod par gyur kyang yang ngo / /gang gi zhe na/ smras pa/ gser gyi ri zhes bya ba smos te/ 'dzam bu chu bo'i gser gyi zhes bya ba'i don to/ /tshad ji lta bu zhe na/ smras pa/ mnyam pa ni 'dra ba'o/ /gang dang zhe na/ gangs can te lhag par kha ba mang po gang la yod pa de ni kha ba can te/des na ri chen po de dang ngo / /'dis ni nor mang po rnyed pas rnyed pa bstan te/ gser gyi zhes bya ba ni nor yod cing rnyed par gyur pa'o/ /de lta mod kyi ri gangs can dang mnyam pa'i gser gyi phung po yod par gyur kyang tshim pa ma yin te zhes bya ba smos te/ chog cing ngoms par mi 'gyur ro zhes bya ba'i don to//su zhe na/ smras pa/ gcig kyang zhes bya ba smos te/ gcig kyang sred pa zad par mi 'gyur na mang po lta ci smos/ 'dis ni thun mong ma yin pa'i dus bstan to/ /nor des zhes bya ba ni de'i nor ro/ /yang na 'dis shes pa yin pas nor de bde'o zhes rig cing thob pa dang rjes su myong ba ni nor zhes bya ba'i don to//gyis la zhes bya ba ni de'i phyir zhes bya ba'i don te/ gang gi phyir ngoms par mi 'gyur ba de bas na 'dod pa yongs su spongs la dge ba gyis shig ces bya ba'i don to/ /gang yin zhe na/ smras pa/ rtogs pa zhes bya ba smos te/ yon tan dang skyon brtag pa la mkhas pa'o/ /de ltar rtogs par byas nas ci zhig bya zhe na/ smras pa/ legs par spyod ces bya ba smos te/ legs par spyad pa la 'jug par gyis shig pa ste/ legs par spyad pa la 'jug pas legs par spyod pa nyid spyad par bya'i/ nor la chags pa'i phyir sems can la mi mthun par spyad par ni mi bya'o/ /sems can mtha' dag gi spyod pa ni legs par spyod pa la rag las pa'i phyir ro/ /nye du mdza' bshes rtsa lag ni/ /sdug bsngal byung nas ldog par 'gyur/ /gang gis lhan cig 'gro 'gyur ba'i/ /dge ba'i las ni bsten par gyis//zhes so/ /nor rnyed pa'i ched du ngan par spyad pa spyod pa dag de las skyo ba bskyed pa'i phyir 'di gsungs so/ /gang 'di ltar 'dod pa rnams kyis nye bar gtses pa yin no zhes rtogs pa de nyid ni de las 'dod chags dang bral bar 'gyur ro zhes bstan pa'i phyir smras pa/ gang dag sdug bsngal zhes bya ba la sogs pa smos te/'dir tshigs su bcad pa phyed dang pos ni 'dod pa dag las ma nyams na sdug bsngal gyi rgyu yin pa'i phyir skyon bstan te/ gang gi phyir 'dod pa dag yod na ni phyir rgol ba rnams dang / mang po gsad pa dang bcing ba dang sdug bsngal rnam pa mang po 'thob par 'gyur ro/ /tshigs bcad phyed 'og mas ni 'dod pa nyams pa la lhag par chags pa'i skyon bstan to//gang gi phyir de nyams na ni zug rngus zug pa bzhin du sdug bsngal bar gnas shing mya ngan dang bcas pa ni 'di'i bsdus pa'i don to/ /gang dag ces bya ba ni gang la la'o/ /shes pa zhes bya ba ni rtogs pa ste de kho na nyid mthong ba'o//ci zhig shes pa yin zhe na/ sdug bsngal zhes bya ba nye bar len pa'i phung po lnga ste/ mdor bsdu na nye bar len pa'i phung po lnga ni sdug bsngal lo zhes gsungs pa'i phyir ro/ /sdug bsngal gsum dang ldan pa yang yin te/ ci rigs par thams cad kyi sdug bsngal la sbyar te ji skad du gsungs pa/sdug bsngal gsum dang ldan pa ni ci rigs par thams cad la sbyar ro zhes gsungs pas so/ /de'i rgyus zhes bya ba ni 'di las skyes pa ste/ rgyu mtshan 'di dang 'dod pa'i rgyus/ /zhes bya ba'i don te/ sred pa ni kun 'byung gi bden pa yin no zhes pas so/ /'dod pa la zhes bya ba ni yul du gyur pa la ste/nam yang dga' mi 'gyur zhes bya ba 'di dang sbyar ro/ /de dag ces bya ba ni shes pa'o/ /nam yang dga' mi 'gyur zhes bya ba la/ sdug bsngal thams cad kyi rtsa ba 'dod pa yin no zhes mkhas pas shes pa yin pa'i phyir ro/ /des na 'dod pa mnyam pa la yang su zhig khyad par du dga' bar byed de/ji ltar 'dod cing sred pa skyed par byed pa'o/ /'dod pa nyams pa la yang bde ba yod par 'gyur ram zhe na de yang med de/ ci'i phyir zhe na/ smras pa/ 'jig rten dag na zhes bya ba smos te/ 'dod pa'i 'jig rten nyams par gyur kyang mya ngan gyi zug rngu skyed par byed pa des mi 'dod pa nyid kyi 'dod pa'o//zug rngur 'gyur ba'i rgyur shes par byas nas so/ /'dod pa'i 'du shes kyi yul gyi dngos po'i rgyu ni nye bar longs spyod pa'i phyir sbyin pa dang yongs su gzung ba byas pa yin te/ 'di lta ste/ pha dang / ma dang / bu smad dang / bran pho dang / bran mo dang / las byed pa dang / zho shas 'tsho ba dang /mdza' bshes dang / blon po dang / nye du dang / snag gi gnyen mtshams dang / rta dang / glang po dang / ba glang dang / ra lug dang / nor dang / 'bru dang / dbyig dang / gser dang / bang mdzod dag yongs su bstsags pa yin no/ /de nyams pa'i dus na yang shin tu mi bzad pa'i mya ngan gyi zug rngu 'byung bar 'gyur te/des na 'di 'dod chen can dag la zug rngur gyur pa yin no/ /de dag ces bya ba ni zug rngur gyur pa'i rgyu'o/ /brtan pa ni mkhas pa'o/ /gdul phyir zhes bya ba ni bral ba dang spang ba'i phyir ro/ /slob par byed ces bya ba ni spong bar byed pa'i lam la brten pa'o/ / bslab pa gsum ni gang gi phyir lam zhes brjod de/ tshul khrims dang / ting nge 'dzin dang / shes rab kyi phung po ni 'phags pa'i lam du gzud pa'i phyir ro/ /'dod pa la mngon par dga' ba dang / 'dod pa la lhag par zhen pa rnams de las 'dun pa bzlog pa'i phyir 'di gsungs so/ /yang gcer bu pa'i phyogs la 'di skad smra ste/bde ba'i yo byad spang ba'i shAkya rnams la ni 'dod chags dang bral ba ga la yod ces smra ba la de dag 'dod pa'i nyes dmigs bstan pas 'dod chags dang bral bar 'gyur gyi/ yul gyi bsngags pa brjod pas ni ma yin no zhes bstan pa'i phyir gsungs pa'o//'dod pa'i tshoms te gnyis pa'i rnam par 'grel pa rdzogs so// //sred pa nyid don dam par 'dod pa yin gyi yul ni ma yin no zhes nges par bsgrub pa'i phyir/ /de'i 'og tu sred pa'i tshoms bkod pa yin no/ /gang gi phyir ji skad du gzugs la sogs pa la 'dod pa'i sgro btags pa ni bram ze'i khye'u la me'i sgro btags pa lta bu'o//'o na/ 'jig rten sna tshogs gang de 'dod min gyi/ /zhes bya ba gong du bstan zin na/ ji ltar de'i don du yang 'di'i don la 'bad par bya zhe na/ de ni de lta mod kyi skyes bu'i 'dod pa ni kun du rtog pa'i 'dod chags yin no zhes bya ba ni 'di'i bsdus pa'i don du bshad la/da ni rgya cher dbye ba bshad pa yin te/ lus can rnam par rtog pas zhes bya ba la sogs pa smos so/ /'di byung ba'i gleng gzhi ni bcom ldan 'das kyis dge slong dag gsum po 'di dag ni byis pa thos pa dang mi ldan pa so so'i skye bo'i sdig pa mi dge ba la rnam par rtog pa yin te/gsum po gang zhe na/ 'dod pa'i rnam par rtog pa dang / gnod sems kyi rnam par rtog pa dang / rnam par 'tshe ba'i rnam par rtog pa ste/ gang gi phyir byis pa ni ngan par bsam pa sems so zhes rgya cher bshad do/ /'phags pa la ni dge ba'i rnam par rtog pa gsum mnga' ste/nges par 'byung ba'i rnam par rtog pa la sogs pa'o zhes bstan nas tshigs su bcad pa 'di gnyis gsungs so/ /de la re zhig dang po smras pa/ rnam par rtog pas rab bcom pa/ /zhes bya ba ni 'dir 'dod pa'i sred pa rgyu dang bcas pa 'phel bar bstan to//tshul bzhin ma yin pa'i yid la byed pa dang / brjed ngas pa dang / phyin ci log gis de 'phel bar 'gyur te/ rgyu gsum po 'di dag 'dir go rims bzhin du ston pa yin no/ /mi 'dra bar rtog pas rnam par rtog pa ste/ tshul bzhin ma yin pa yid la byed pa dang mtshungs par ldan pa'i kun du rtog pa'o//des bcom pa ni rtog pa dang dbang po byas pa ste/ ji skad du gsungs pa/ ji ltar rnam par rtog pas rab tu bcom par 'gyur zhe na/ sngar thos pa dang sngar spyad pa'i 'dod pa rnams la tshul bzhin ma yin par yid la byed de/ dge ba'i rnam par rtog pas rnam par rtog par mi byed de sdig pa la zhen cing gnas pa'o zhes so//lus can zhes bya ba ni lus de gang la yod pa ste sems can zhes bya ba'i don to/ /phyi rol gyi dngos po rtsig pa la sogs pa la ni sred pa med pa'i phyir ro/ /ci 'di la log pa'i rnam par rtog pa tsam gyis sred pa 'phel bar 'gyur ram zhe na/smras pa/ de ni ma yin te/ 'on kyang 'dod chags mi bzad ces bya ba smos te/ 'dod chags drag po gang la yod pa de ni zhes bya bar tshig rnam par sbyar ro/ /'dod pa'i 'dod chags bag la nyal gyi rgyu nye bar bsags shing gnyen po ma bsten pas so/ /de'i gnyen po lus la sogs pa'i rnam pa dran pa'o//ji ltar 'dod chags mi bzad pas 'gyur zhe na/ sngar skye ba gzhan dag tu 'dod pa'i 'dod chags kun du bsten pa dang / bsgoms pa dang mang du byas pa de'i rgyus 'di yin no/ /de lta mod kyi tshul bzhin du yid la byas pas sems kyi 'dod chags rjes su sel bar byed do zhes bya ba'i tshig gis so//gtsang bar rjes su lta bas zhes bya ba ni kha dog dang dbyibs dang reg pa dang nye bar spyod pa la sdug pa dang gtsang ba ste/ de ltar rjes su lta zhing dmigs pa'i tshul gang la yod pa de ni gtsang bar lta ba ste/ de'i phyir gsungs pa/ ji ltar gtsang bar rjes su lta bas yin zhe na/dbang po sdom pas nye bar mi gnas pa des bud med mthong bar gyur na dran pa rtse gcig pas chags par 'gyur te/ tshul bzhin ma yin pas gtsang ba'i mtshan mar nye bar 'dzin te/ gzhi des na lus mngon par gdung ba dang / sems mngon par gdung bar byed pa yin no zhes so//de ltar gyur pa'i lus can 'di la ni 'dod chags phyir zhing rab tu 'phel bar 'gyur te/ 'dod pa'i 'dod chags shas cher 'phel bar 'gyur ro/ /rtags rnam pa lngas sred pa 'phel bar rig par bya ste/ 'dod chags kyi yul chung ba la yang 'dod pa'i 'dod chags mi bzad pas kun nas dkris shing lhag par chags par 'gyur na gya nom pa la lta smos kyang ci dgos/chos ma yin pas gang longs spyod mang po yang dag par len pa yin te/ chos ni ma yin no/ /longs spyod shin tu mang po kun du 'dzin par 'gyur te/ de mi gces shing dgos pa med pa'i dngos po yang 'dor bar mi byed na/gces pa lta smos kyang ci dgos/ dgos pa chung zhing ngan don tsam gyi don du yang ngan par spyod pa mang po spyod na/ dgos pa chen po la lta smos kyang ci dgos/ legs par spyod pa chung ngu yang de'i sems bsgrub cing 'jug par mi dga' na/chen po la lta smos kyang ci dgos/ mya ngan las 'das pa thos par yang mi 'dod na/ thob par bya ba lta ci smos pa ste/ gang de lta bus ni sred pa 'phel bar 'gyur ro/ /de yis dam por byed ces bya ba ni de nyid kyis lus can la 'ching ba dam por byed do/ /gang gi phyir dam por byed pa ni 'bad pas kyang dgrol bar dka' ba'i phyir ro//rnam pa gsum gyis ni 'ching ba dam po nyid du 'gyur te/ shin tu sra ba dang / reg na sdug bsngal ba dang / dus yun ring du 'brel pa'o/ /de la mthong ba'i chos la ngan par spyod pa'i rtsa ba ni chags pa dang zhe sdang dang gti mug go/ /de ni shin tu sra ba'i 'ching bar rig par bya'o//dmyal ba la sogs pa'i ngan song du skye bar rig na sdug bsngal ba nyid du rig par bya'o/ /yun ring por 'khor ba na gnas pa ni dus yun ring po dang 'brel par blta'o/ /rang gi 'ching ba zhes bya ba ni rang gi rgyud la gnas pa'i sred pa 'ching ba'i gnas skabs so//yang na sdug bsngal gyi 'ching ba yin te/ gang gi phyir sred pa 'phel ba las skye ba la sogs pa'i sdug bsngal lan du mar 'byung ba'i phyir ro/ /de la 'di ni sred pa'i skyon bstan pas de nges par spang pa'i phyir gsungs so/ /sred pa spong ba'i gzugs nye bar blang ba nyid du ston pa'i phyir smras pa/gang dag rnam rtog nye bar zhi dga' zhing / /zhes bya ba la sogs pa smos so/ /'di'i don ni tshigs su bcad pa snga ma'i gnyen po nyid du shes par bya'o/ /gang gis 'dod pa la sogs pa'i rnam par rtog pa nye bar zhi bar byas pa de ni rnam par rtog pa nye bar zhi ba ste/ nges par 'byung ba la sogs par rtog pa'o//de la gang dag dga' ba ni mgu ba yang dag par skyes pa ste/ ji skad du bshad pa/ 'dod pa'i rnam par rtog pa skyes pas yongs su ma bsgoms shing spangs pa dang / bsal ba dang nges par byas pa'o zhes so/ /mi sdug sgom par byed ces bya ba ni lus kyi rnam par 'gyur ba ste rnam par bsngos pa dang /rnam par rul par nang du dmigs pa gang yin pa'i yid la byed pa de ni sdug pa dang dmigs pa yin pa'i phyir mi sdug pa zhes brjod de phyin ci ma log par de bsgom zhing yang dang yang du mngon du byed pas so/ /rtag tu dran pa zhes bya ba ni dus thams cad dran pa la gnas pa ste/'dod chags kyi 'jigs pa ni dus thams cad du dran pa la nye bar gnas shing bsgom par bya ste bar chad med par byed pa dang / skyo ba med pa'i brtson 'grus kyis de ltar 'di la 'dod chags kyis skabs rnyed par mi 'gyur ro/ /des de ltar ldan par byas nas ni yun ring pos nges par sred pa spong bar 'gyur te/de nyid bstan pa'i phyir smras pa/ de yis sred pa zhes bya ba smos te/ mnyam par ma bzhag pa'i sa la bye brag med par bstan pa'o/ /de yis de ltar yang dag par ldan par byas pas rnal 'byor spyod pas ji srid du ma spangs pa de srid du de dag rul par byed pa ni de nyid nyam chung bar byed pa ste spong zhing dgag par nus pa'o//sred pa spangs pa'i thabs la gzud pa'i phyir 'di gsungs so/ /sred pa ma spangs pa dag la ni rga ba dang 'chi ba la sogs pa'i sdug bsngal 'byung bar 'gyur ro zhes bstan pa'i phyir smras pa/ 'dod pa mun nag 'dra bas g.yogs/ /zhes bya ba la sogs pa smos so//de nas bcom ldan 'das shAkya bzang ldan la sogs pa gdul ba'i dus la bab par mkhyen pa dang / gzhan yang khyad par du 'phags pa dag rab tu byung bar bya ba'i phyir chu bo nas rgyu zhing gshegs pa las chu bo'i 'gram zhig na skye bo'i tshogs chen po dga' ston gyi dus zhig la bab ste/gar dang glu la sogs pa len pa de dang nye ba zhig na nya mang po zin pa dang / ba'i tshogs kyi rjes su 'o ma la sred pa'i be'u mang po dag 'breng ba gzigs te yang dge slong rnams la bka' stsal pa/ dge slong dag 'jig rten ni 'dod pas ldongs pa yin te/ 'dod pa'i dra bas g.yogs pa'o zhes rgya cher bka' stsal te/tshigs su bcad pa 'di gnyis gsungs so/ /'dir bsdus pa'i don ni kun 'byung gi bden pa rnam pa lnga dang / sdug bsngal gyi bden pa rnam pa gnyis bstan pa yin te/ rnam pa lnga gang zhe na/ da ltar byung ba'i yul la chags pa dang / 'das pa'i yul la rjes su myong nas chags pa'i kun du rtog pa dang /ma 'ongs pa'i yul la 'dod pa dang / de rnams skyes pa la lhag par zhen pa dang / de yang dge ba byed pa la rang dbang med par byed pa'o/ /rnam pa gnyis gang zhe na/ da ltar byung ba'i gnas pa gzhan du gyur pa'i rga ba dang /ris mthun pa'i rgyun chad pa ste 'chi ba'o/ /'dod pa mun gnag dang 'dra bas g.yogs pa ni zlas dbye ba'o/ /de la 'dod pa ni kun du rtog pa'i 'dod chags te/ skyes bu'i 'dod pa ni 'dod pa'i 'dod chags so zhes pa'i tshig gis so/ /mun pa ni des 'dod pa'i skyon mi shes pa dang / chos dang chos ma yin pa mi shes pa'i phyir te/ji skad du bcom ldan 'das kyis mun nag gis ldongs par 'jug pa yin te/ ldongs pas 'jug pa gang yin pa'i skyes bu ni 'dod chags dang lhan cig pa yin no zhes gsungs so/ /'dod pas kyang dra bas nya'i tshogs bzhin du rnam par rtog pa rnam pa mang po dang ldan pas kun nas g.yogs pa dang /yongs su mkhyud par byed pa de 'dod chags can gyi rgyud la'o/ /gang du rjes su myong ba'i yul la 'dod chags shing de nyid la rnam pa mang po'i sgo nas kyang 'dod chags kyis kun du rtog pas so/ /sred pa'i dgab pas bkab pa dang / /zhes bya ba ni da ltar byung ba dang 'das pa'i sred pa bshad nas/'dis ni ma 'ongs pa la dmigs pa'i sred pa bshad de/ sred pa ni sems can gyi rgyud la dgab pa'am sgrib pa lta bu yin te/ nyi ma'i 'od zer sprin la sogs pas bkab pa lta bu'o/ /des bkab pa ni bsgribs pa ste 'dod pa la sred pa de nyid kyis ma 'ongs pa'i dus las brtsams nas de'i skyon bstan pa yin te/gang gi phyir yid la yang thar pa 'dod par mi byed na/ de thob pa'i ched du brtson par byed pa lta smos kyang ci dgos/ bag med pa ni bag med pa'i gnas so/ /de'i phyir de ltar gyur pa'i rgyud 'dod pa dag las kyang sems bsrung la ngan par spyod pa dang des bsgom pa las sems bsrung ba yin no//de yang de lta bur gang zag nyon mongs pas rang dbang med par byed pa'i phyir bcings par gyur pa yin te/ de nyid smras pa/ 'ching bas bcings pa dag ces bya ba smos te/ 'di la bcings pa yin pas 'ching ba ste/ 'khor ba'i btson rar zhes bya ba'i don to//sred pa'i 'ching ba des 'dod pa can bcings pa yin no/ /ji lta bu yin zhe na/ smras pa/ tshed mar chud pa'i nya dang 'dra/ /zhes bya ba smos te/ nya ni chu'i nang du spyod pa'i srog chags nya nyid do/ /tshed ma ni rgya ste dra ba zhes bya ba'i don to/ /der chud pa ni de'i kha dang nang du'o/ / gzhan dag ni chu de'i nang na gnas pa'i chu srin kum bi ra la sogs pa'i rigs de dag gi khar chud pa'i nya ji lta ba bzhin no zhes 'chad do/ /gzhan dag ni lcug ma las byas pa'i nang yangs shing spun la sogs pas bar tshag dam pa kha yod pa nya'i rigs 'dzin par byed cing 'ching ba ni tshed ma yin no zhes zer ro//ji ltar nya der 'dzin par byed pa de bzhin du nyon mongs pa'i dbang du gyur pa yang 'khor ba'i nang nas mi 'byung ba'i tshul gyis so/ /der bcings pa la re zhig rgyun mi 'chad par bde ba khyad par can thob pa yin nam zhe na/ smras pa/ rga dang 'chi ba'i rjes su 'gro 'gyur te/ /zhes bya ba yin te/rga ba'i sdug bsngal dang 'chi ba'i sdug bsngal thob par 'gyur ro zhes bya ba'i don to/ /rga ba dang 'chi ba ni rga shi ste/ zlas dbye ba gcig tu byas pa'o/ /rjes su 'gro ba ni 'ong bar 'gyur ba dang thob par 'gyur ba de gang du rga ba dang 'chi ba yod pa der 'gro ba 'di dag 'brang bar 'gyur ro/ / ji lta bur zhe na/ smras pa/ ma drung nu zho 'dod pa'i be+e'u dang 'dra/ /zhes bya ba smos te/ ba'i be+e'u nu zho 'thung ba 'o ma la sred pa de ni rtag tu ma'i rjes su 'gro ba yin te/ 'dis ni 'di'i thar pa ring du gnas pa ston pa yin no/ /sred pa dang ldan pa 'khor ba'i btson rar yongs su 'khyam pa dang sdug bsngal nyams su myong ba yin pas de spang ba'i phyir 'di gsungs so//'dir rga ba dang 'chi ba la sogs pa'i sdug bsngal myong nas der gnas pa ni yang myong bar bya ba ma yin te/ mthong ba nyid du dug gis gnod pa bzhin no zhes mi bden par smra ba la de dgag pa'i phyir smras pa/ skyes bu zhes bya ba la sogs pa smos te/de nas bram ze zhig dgon pa'i gnas zhig tu lo bzhi bcur tshangs par spyod pa byas nas bu med pas ni gong mar 'gro ba med do zhes bsams te chung ma blang ba'i phyir mnyan yod du 'ongs te/ de la dgos pa'i nor bslangs pa las rgyal po gsal rgyal gyis khang pa brgya byin par khas blangs te/gzhan du ma slongs shig ces smras so/ /rgyal po chen po de ni stsal na gzhan yang khang pa brgya dang stong dang grong gi phyed nor dang bcas pa slong ngo zhes smras te/ yang khas blangs so/ /rgyal po chen po 'di yang stsal lags na/gzhan yang bslang ngo zhes smra ba de dang de'i tshe rgyal byed kyi tshal dang nye ba na nags stug po na spre'u shing thog 'dod pa shing nas shing du rgyu ba las ltung ste shi bar gyur pa gzigs nas bcom ldan 'das de nyid kyi tshe gtsug lag khang du gshegs te/ ji tsam na dus de'i gdul bya dag gi dbang du mdzad nas 'di gsungs so//ci rigs par sred pa 'phel bar 'gyur ba de'i skyon gang der bstan pa yin no/ /skyes bu zhes bya ba ni mi ste de'i tshe nye bar gnas pa'i phyir ro/ /yang na sems can te de'i rnam grangs yin pa'i phyir sems can gyi rgyu nyid la 'jug gi/ gzhan la ni ma yin no/ / ji lta bu zhe na/ smras pa/ bag med rab tu spyod byed pa zhes bya ba smos te/ bag med par gyur nas rab tu spyod par byed pa ste/ de'i dbang po ma bsrungs pas yul dag la spyod par gyur pa zhes bya ba'i don to/ /sred pa 'phel 'gyur zhes bya ba ni 'dod pa'i sred pa dang / yang srid pa'i sred pa yang 'phel bar 'gyur ba ste/yang dang yang shas cher spyad pa'i phyir dang / ngan par spyod pa lhag par spyod pa'i phyir ro/ /ji lta bur 'phel bar 'gyur zhe na smras pa/ 'khri shing bzhin du zhes bya ba smos te/ 'khri shing rigs ma lu ta zhes bya ba yod de/ de ni shing la brten nas 'phel bar 'gyur gyi/ ma brten par ni ma yin te/ shing de nyid la yang gnod par byed do/ /de bzhin du sred pas bag med par spyod pa la brten nas 'phel bar 'gyur te/ de nyid kyis gnod par yang byed do/ /yang ji ltar yang gnod par byed ce na/ smras pa/ de yis 'khor bar 'khyam zhes bya ba smos te/ sred pa 'phel ba de nyid kyis gang gi phyir 'khor bar 'khyam pa yin te/ 'khor bar 'khor ba'i phyir shin tu gnod pa yin no/ /yang dang yang du zhes bya ba ni so so so so zhes bya ba'i don te/ de dang de 'gro ba sna tshogs pa dag tu rnam pa sna tshogs kyi rim pa las ji lta ba bzhin du bsgrubs pa zhes bya ba'i don to//gzhan dag na re yang dang yang zhes bya ba'i don to zhes kyang brjod to/ /de la 'dis ni 'di'i 'khor ba ring ba nyid du ston to/ /'bras bu 'dod pa zhes bya ba ni shing tog za bar 'dod pa ste/ ji ltar spre'u nags na zhes bya ba shing stug po'i nang du spre'u ltogs pa 'bras bu 'dod pas rgyun mi 'chad par yang dang yang kun du 'khyam pa de bzhin du bag med pa rab tu spyod par byed pa yang sred pa 'phel bas 'khor bar 'khyam par 'gyur ro//thar pa 'dod pas bag med pa rnams bag yod pa la gzud pa'i phyir 'di gsungs so/ /sred par byas pa nyid kyis phyir zhing yang skye ba'i kun nas nyon mongs pa bstan pa'i phyir smras pa/mi dag dran par byed ces bya ba la sogs pa'o/ /yul kun du na rgyal po ko ra bya ri dwags bshor ba'i tshal na tshe dang ldan pa yul 'khor skyong gnas te/ rgyal po de yang re zhig cig na btsun mo'i 'khor dang bcas te de la shin tu mkhas pa rnams kyis yongs su brtags shing skyed mos tshal du song ste rjes su rgyu ba las yul 'khor skyong mthong ste mngon par dga' ste/de nyid kyi mdun du 'dug cing gtam rnam pa sna tshogs pa byas nas smras pa/ grogs po bzhi po 'di dag gi nyes pas gnod par gyur na ni dge sbyong dang bram ze dag khyim nas khyim med par rab tu byung bar 'gyur te/'di lta ste/ skye ba dang / rga ba dang / na ba dang / nye du'i longs spyod yongs su nyams pa'o/ /yul 'khor skyong khyod ni da rung 'di dag ma nyams pa ste/ lo ni nyi shu'am nyi shu las lhag pa tsam lon na ci'i phyir rab tu 'byung zhes smras pa las/ rgyal po chen po dang de gnyis la bcom ldan 'das kyis khyim pa'am rab tu byung bas gnas lnga la so sor brtag par bya zhes rgya cher tshigs su bcad pa 'di gsungs so//dran par byed pas na dran pa ste/ dran pa dang mtshungs par ldan zhing lhag par gnas pa zhes bya ba'i don to/ /'dis ni sngar rjes su myong ba'i yul la sred par byed pa bstan to//dang gi sgra ni bsdu ba'i don to/ /'di dang 'og nas brjod pa mang ngo / /chags byed dang zhes bya ba 'dis ni da ltar byung ba'i yul la lhag par chags pa'i tshul gyis sred pa bstan to/ /nye bar longs spyod pa ni chags par 'gyur ba'o/ /yid bde ba dang zhes bya ba ni shin tu bsngags pa'i yid gang yin pa de ni yid bde ba ste/nyon mongs pas mi dga' ba med pa'o/ /nye bar longs spyod pa na mngon du phyogs pa dang / 'thob pa la mngon par phyogs pa'i yul la yid bde bar 'gyur ba ste/ 'dis ni ma 'ongs pa'i yul la don du gnyer ba'i tshul gyis sred pa bstan to//de'i phyir 'das pa'i dus la ni dran pa dang ldan pas 'jug go/ /da ltar byung ba'i yul la ni chags pa'i ngo bo nyid do/ /ma 'ongs pa la ni dga' ba dang ldan pas 'jug ste/ dga' ba mngon du 'gro ba'i yid bde ba'o zhes brjod do/ /sdug bsngal dang nye bar gnas pa'i phyir des na dran par byed ces bya ba la sogs pa bsdu bar bya ba yin no//gang la 'di dag 'gyur zhe na/ smras pa/ mi dag ces bya ba so so'i skye bo la ste/ skye ba la dga' ba yin pas skye bo'o/ /gang dag 'di dag yod pa de'i nyes dmigs gang yin zhe na/ smras pa/ mi gang rtag tu zhes bya ba la sogs pa smos te/gang yang 'das pa'i bde ba dran pa dang / da ltar byung ba la lhag par zhen pas chags pa dang / ma 'ongs pa'i bde ba la yang rgyun mi 'chad pa'i mi de nyid ni rgyun mi 'chad par skye ba dang 'chi ba la sogs pa myong bar 'gyur ro/ /gzhan dag na re gang la 'di dag nye bar spyod pa gang yin zhe na/smras pa/ gang dag sa ta si ta zhes bya ba la/ sa ta ni bde ba myong ba'o/ /de'am de la si ti ni chags pa yin pas sa ta si ta ste shin pa na da na zhes skad kyi byings las bstan pa'i phyir ro/ /bde ba gang la chags pa yin zhe na/ smras pa/ 'di ltar bde ba 'dod byed pa/ /zhes bya ba smos te/bde ba 'dod pa'i tshul gang dag la yod pa de ni bde ba 'dod par byed pa ste/ bde ba myong bar 'dod pa'i tshul gang la bde ba myong ba'i 'dod chags la lhag par chags pa de nyid yang bde ba myong bar don du gnyer bar byed de/ de nyid dran par 'gyur ba yin no zhes bya ba'i don to/ /de ltar gyur pa des byas pa'i skyon thob par bstan pa'i phyir smras pa/de nyid ces bya ba ni de nyid kyis so/ /skye dang rga bar nye bar 'gro 'gyur zhing / /zhes bya ba ni skye ba dang rga ba nyid du nye bar 'gro zhing 'jug pa ste/ skye ba dang rga bar nye bar 'gro ba ni yun ring por skye ba dang rga bar 'gyur ro zhes bya ba'i don to/ / 'dis ni bdag nyid grub par byas pa dang / bdag nyid rnam par 'gyur bar byas pa'i sdug bsngal nyid bstan te/ dus gsum la dmigs pa'i nyon mongs pa'i nye bar spyod pa'i dmigs pa dang / de'i 'bras bu rga ba dang 'chi ba'i sdug bsngal gyis 'jigs pa rnams sred pa'i rgyu spang ba la gzud pa'i phyir 'di gsungs so//gzhan dag ni gleng gzhi dang tshig mi mthun par 'chad do/ /rgyal po'i khab na phyis khung gi phag las brtsams nas gsungs pa yin te/ skye ba dang chags par byed pa dang / yid bde ba la rtog par byed pa ste/ de la skye bar byed pa ni 'dod chags skye ba dang / rtog par byed pa'i yid du 'ong ba dang /sems 'phrog par byed pa dang / 'jam zhing 'jam pa'i tshig zur gyis smra ba la sogs pa'i ngag gi spyod pa zhes bya ba'i don to/ /yid bde ba zhes bya ba ni mngon par 'dod pa'i lus dang ngag gi spyod pa rjes su dpag pa dang / yid la 'dod pa dang rig pa'o/ /dang gi sgra gsum ni bsdus pa'i don to//sdig pa ni mthong ba dang dmigs pa'o/ /gang yin zhe na/ smras pa/ mi dag ces bya ba smos te/ skyes pa dang bud med de gang gi phyir de gnyi ga gcig la gcig mngon par dga' ba'o/ /de la rtog par byed pas ci zhig tu 'gyur zhe na/ smras pa/ rtag tu bde ba 'dod par byed ces bya ba ste/gang bud med kyis skye bo skyes pa la chags pa ni bud med de nyid kyi mngon par 'dod pas lta bar byed pa yin te/ de la chags pas bde ba'i khyad par 'dod de/ des ma 'ongs pa'i don du gnyer zhing chags par 'gyur ba yin no/ /de bzhin du skyes pa bud med la zhes bya ba la sogs pa brjod par bya'o//rtag pa'i dngos po yin pas rtag tu ste/ skye ba dang rga bar nye bar 'gro bar 'gyur ro zhes bya ba 'di dang sbyar ro/ /de ni 'khor ba na yun ring du gnas pa ste/ lhag ma ni snga ma bzhin no/ /tshig gnyi ga yang 'gal ba med mod kyi/ phran tshegs kyi sde snod brjod pa las ni snga ma bzhin no//dri ma dang bcas pa'i sdug bsngal las 'dun pa bzlog pa'i phyir 'di gsungs so/ /mkhas pas nges par brtags na ni sred pa nyid kyis sdug bsngal skyed pa yin no zhes rnam pa gzhan gyis bshad pa bstan pa'i phyir smras pa/ skye dgu sred pa rnams kyis mdun du bdar//zhes bya ba la sogs pa smos so/ /yul bA rA Na sI na dge slong rab tu mang po dur khrod du rgyu ba na de'i tshe byi bo byed pa'i skye bo mang po ka ra bI ra'i phreng ba mgo la btags te/ gshed ma bas ca co chen pos khyer bzhin du bsad do/ /de dang ha cang yang mi ring ba zhig na ri bong gi rgya brkyang pa gang du ri bong mang po zin te phan tshun mchong bar gyur kyang ma thar ba dag mthong ste/yang snying rje skyes nas 'di skad du gtam du brjod de/ re zhig mi 'di dag ni ngan par spyod pa spyad pas bsad pa yin na/ ri dwags 'di dag ni shin tu dka' ba spyod de rtswa dang chu nyung zad tsam la spyod cing 'tsho bas gnas par byed pa yin na/de ji ltar nyes pa med par gsod par byed ces so/ /gnas skabs 'di lta bu dag bcom ldan 'das kyis gsan te 'di gsungs so/ /gzhan dag ni rgyal po'i khab na bcom ldan 'das dge slong gi tshogs kyis yongs su bskor cing bzhugs te/ phyi sa khung na phag cig 'gre zhing ldog la mngon par dga' ba de'i dbang du mdzad de gsungs pas des kyang de thos te sems mngon par dad nas/de nas shi 'phos te gser gyi sa'i rgyal po'i rigs su skyes te/ bden pa mthong bar gyur to zhes zer ro/ /de la 'dir bsdus pa'i don ni 'khor ba'i rgyu dang / 'khor bar byed pa dang sdug bsngal mang po nyid du bstan pa yin te/gang kun 'byung gi bden pa ni sred pa rnams kyis mdun du bdar zhes bya ba 'dis bstan to/ /kun sbyor ro la dga' ba zhes bya bas ni 'khor bar byed pa bstan to/ /sdug bsngal gyi bden pa yang dang yang sdug bsngal thob par 'gyur zhes bya ba yin no//sred pa rnams kyis mdun du bdar ba ni mngon par brdas pa dang zil gyis non pa'o/ /de yang gang yin zhe na/ smras pa/ skye dgu zhes bya ba smos te/ sred pa rnam pa sna tshogs dang bcas pa'i sems can gyi 'jig rten ston pa yin no/ /so so'i skye bo ni gang dang gang du skye ba de dang der sred pa rjes su 'brang ba yin te/des bskul nas sdug bsngal rjes su myong ngo / /yongs su rgyug pa zhes bya ba ni kun nas yongs su 'khor ba yin te/ 'gro ba thams cad skye ba thams cad du 'gro ba yin pa'i phyir 'dir dpe bstan pa/ ri bong bzhin zhes bya ba smos te/ 'di gang la yongs su rgyug pa yin zhe na/ rgya gang zhes bya ba smos te/ ri dwags rnams yongs su gzung ba'i dra ba ste rgya'o/ /ji ltar ri bong bde ba la sred pas 'ong ba dang 'bros par byed na yang rgya de nyid du 'jug par byed pa de bzhin du skye dgu bde ba la sred pas sdug bsngal nyid la yongs su rgyug pa yin no/ /de nyid du yongs su rgyug pas rgyu gang gis ci zhig thob pa yin zhe na/smras pa/ kun sbyor zhes bya ba smos te/ sred pa'i kun du sbyor ba la brten pa'i ro ni kun sbyor ro'o/ /'dir ro yang bde ba nyid du rig par bya ste/ ji skad bshad pa 'dod pa'i ro yang gang zhe na/ gang 'dod pa'i yon tan la brten nas skyes pa'i yid bde ba'i bde ba 'byung ba yin no zhes bya ba ste/nyon mongs pa'i bde ba zhes bya ba'i don to/ /de la dga' zhing lhag par zhen pa ni sred pa'i kun du sbyor ba la brten nas bde ba myong zhing rjes su 'khor bar 'gyur ro/ /de yang gang zhe na/ smras pa/ byis pa zhes bya ba smos te/ khyad par du 'dun pa'i rgyu 'dis byas pa ste/ mi shes pa dag dug dang 'dres pa'i kha zas la dga' ba bzhin du gang gi phyir de dang de'i nyes dmigs ma mthong ba'i rmongs pa de yang kun sbyor ro la dga' ba'o/ /des na yang ngan par spyod pa rnam pa mang po byas nas yang dang yang du sdug bsngal thob par 'gyur zhes bya ba yin te/ lan du mar ngan song ngan 'gro'i sdug bsngal lam bsad pa dang bcing ba dang brdung ba la sogs pa'i sdug bsngal lo//ngan par spyod pas bkag na ni mi 'dod pa ma lus pa 'byung ba mi 'thob cing mi rnyed pa yin no/ /de la 'di ni sred pa mang zhing 'khor ba la mngon par dga' ba'i gdul bya dag la 'khor bas skyo bar bya ba'i phyir gsungs so//sred pa'i dbang gis sems can 'di dag dga' ba dang 'chi ba'i rjes su 'gro ba yin no zhes bstan pa'i phyir smras pa/ sred pa rnams kyis mdud pa'i zhes bya ba la sogs pa smos so/ /sred pa ni rnam pa gsum ste/ 'dod pa'i sred pa dang / srid pa'i sred pa dang /srid pa med pa'i sred pa'o/ /zhes bstan pa'i phyir tshigs su bcad pa gnyis po 'di gsungs so/ /gzhan dag na re gang su dag sdig pa rnam pa du ma dang mi dge ba'i chos yang dag par 'byung ba de thams cad ni sred pa'i kun du sbyor bas yin te/ 'di lta ste/ mdor bsdu ba'i phyir sred pa'i kun du sbyor ba ni de rnams kyi nang nas mchog tu bshad pa'i phyir ro zhes zer te/dper na gang la la zhig gis glang sna phug nas khal bkal na des khal thams cad 'degs shing khal gnas pa yin no zhes brjod do/ /'di la bsdus pa'i don ni tshig rkang dang pos ni sred pa bstan to//tshig rkang gnyis pas ni sred pa'i las bstan to/ /lhag mas ni de'i nyes dmigs bstan to/ /de la sred pa rnams zhes bya ba ni bdag la sred pa'i phyir de dang 'brel pa ni kun nas nyon mongs pa thams cad do/ /mdud pa zhes bya ba ni bcing zhing gzhan gyi dbang du byas pa ste/ 'jig rten 'di na sred pas 'khol ba'o zhes mdo las gsungs so/ /gzhan dag na re 'dod pa'i sred pas mdud pa yin no zhes zer ro/ /srid dang srid min dag la sems chags shing / /zhes bya ba ni chags pa'i sems gang la yod pa de ni sems chags pas so/ /srid pa dang srid pa ma yin pa ni srid dang srid min no//gang bdag la sred pa de la brten nas rtag par lta ba de ni srid pa la chags pa'i sems te mngon par dga' ba'o/ /gang la yang chad par lta ba de ni srid pa med pa la sems chags shing mngon par dga' ba'o/ /'dir srid pa'i sgra ni khams gsum la brjod de/ 'dir srid pa gsum yang 'dod pa'i srid pa dang / gzugs kyi srid pa dang / gzugs med pa'i srid pa'o zhes mdo las gsungs so/ /'dir sred pa ma yin pa'i sgra ni sred pa med pa la brjod de/ khams gsum gyi ris mthun pa mi rtag pa'am med pa de la dmigs pa'i sred pa ste/ sred pa med pa la dgongs so//de'i phyir gsungs pa/ 'di la gcig tu sdug bsngal la sogs pa de nyid du 'gyur ro zhes smra ste/ kye ma'o bdag ni chad par 'gyur ba ste zhig nas pha rol tu skye ba la sogs par mi 'gyur ro zhes smra ba yin no/ /'di ltar gyur pa la skyon cir 'gyur zhe na/ smras pa/ bdud kyi sbyor ba de zhes smos te/ sred pas mdud pa rnams sred pa gsum dang srid pa ma yin pa dag la sems chags pa rnams kyi nyes dmigs bstan te/ 'dis sbyor bar byed pas sbyor ba ste 'ching ba'o/ /de dang ldan pa ni 'ching ba'i sbyor ba dang ldan pa'o/ /bdud kyi zhes bya ba ni nyon mongs pa ste bdud kyi 'ching bas bcings pa ste/de thos na de las rgyal bar bya ba'i las la gzhan gyi dbang du byas zhes bya ba'i don to/ /bdud kyi sbyor ba dang ldan pa rnams la ni sdug bsngal dang bcas pa dang / 'jigs pa dang bcas pa nyid du bstan pa'i phyir smras pa/ grub dang bde rnams dang bral zhing / / zhes bya ba smos te/ grub pa ni bde ba dang 'brel pa'o/ /bde ba ni 'jigs pa med pa'o/ /grub pa dang bde ba med pa ni grub pa dang bde ba dang bral ba ste/ bral ba yod pa de nyid ni de ste/ sdug bsngal ba dang 'jigs pa yod pa zhes bya ba'i don to/ /ci'i phyir zhe na/ de nyid smras pa/ gang gi phyir de rga ba dang 'chi ba zhes bya ba smos te/rga bas ni sdug bsngal ba nyid dang / 'chi bas ni 'jigs pa nyid bstan to/ /rjes su 'gro 'gyur te zhes bya ba ni thob par 'gyur ba dang rjes su 'brang bar 'gyur ba'o/ /gang gis ji lta bu zhe na/ ma drung nu zho 'dod pa'i be'u dang 'dra/ /zhes bya ste/ ji ltar nu zho 'thung ba'i be'u 'o ma la sred pas 'gro ba dang /de ltar rtag tu rjes su 'brang ba de bzhin du sred pa'i 'dun pa yod na ni rga ba dang 'chi ba dang rjes su mthun par 'jug par 'gyur zhing rga ba dang 'chi ba nyid kyi rjes su 'gro'i/ mya ngan las 'das par ni ma yin no/ /sred pa'i nyes dmigs bstan pas de spangs pa la gzud pa'i phyir 'di gsungs so//sred pa spangs pa las mya ngan las 'das pa yin no zhes bstan pa'i phyir smras pa/ 'di ni sred pa de 'dra zhes bya ba la sogs pa smos so/ /sred pa rnam pa gsum po de bkag cing gtan du spangs pa dang / de spangs pa'i phan yon rab tu bstan pa ni 'di'i bsdus pa'i don to//de zhes bya ba ni gang sngar bstan pa'i bdag la sred pa'am 'dod pa'i sred pa'o/ /'dra zhes bya ba ni khyad par gyi don te/ gang de la rjes su 'brang ba ni 'khor ba nyid kyi rjes su 'brang ba yin la gang yang de spang ba ni mya ngan las 'das pa'i grong khyer du 'gro ba yin no zhes khyad par du byed do/ / spong byed pa zhes bya ba ni rjes su mthun pa'i gnyen pos de thob pa rgyud las bstsal pa'o/ /'di na zhes bya ba ni bstan pa 'di la ste/ gzhan dag tu ni de spong ba med pa'i phyir ro/ /de spangs na ni de'i las med pa yin no zhes bstan pa'i phyir smras pa/ srid dang srid min dag la sred bral zhing / /zhes bya ba smos te/bral ba ni mi ldan pa'o/ /sred pa la mngon par dga' ba'i tshul gang la yod pa de ni de ste/ gang la sred pa spangs par gyur pa la ni srid pa dang srid pa med pa la dmigs pa'i mngon par dga' ba med ces bya ba'i don to/ /'dir gang gis sred pa spangs par byas pa'i phan yon bstan pa'i phyir smras pa/sred pa zil gyis gnon byed pa zhes bya ba la sogs pa smos te/ sred pa'i kun du sbyor ba thob par gtan du drungs phyung zhing bcad pa'i phyir te/ bkag pa tsam gyis spang ba ni ma yin te/ gtan du bral bar gyur pa'o/ /dge slong zhes bya ba ni nyon mongs pa thams cad bcom pa'i phyir ro//lhag ma med pa zhes bya ba la/ gang la grib ma yod pa ma yin pa de ni lhag ma med pa ste/ tshor ba po nyams pa yin no/ /de yang rnam par shes pa'i shing la grib ma lta bu ni tshor ba yin no zhes kun dga' bo'i mdo'i tshig gis so/ /des na gang gis sred pa phyogs gcig spangs pas ni de'i yan lag gi yongs su mya ngan las 'das pa lhag ma dang bcas pas yongs su mya ngan las 'das pa ste/tshor ba dang bcas pa'i rnam par shes pa'i shing yongs su ma bcad pa'i phyir ro/ /gang gis sred pa thams cad spangs pas ni yan lag thams cad kyis yongs su mya ngan las 'das pa ste/ de ni lhag ma med pas yongs su mya ngan las 'das pa'o zhes brjod de tshor ba dang bcas pa'i rnam par shes pa'i shing nyid bkag cing gzhan yang ma skyes pa'i phyir ro//sred pa spangs pa'i phan yon bstan pa'i phyir 'di gsungs so/ /sred pa ma spangs pa dang sred pa spangs pa'i nyes dmigs dang phan yon go rims bzhin du bstan pa'i phyir smras pa/gang zhig 'jig rten zhes bya ba la sogs pa'i tshigs su bcad pa gsum smos so/ /kha cig ni nye ser skya'i dbang du mdzad nas 'di gsungs so zhes zer ro/ /gzhan dag na re bcom ldan 'das dgon pa na nyan thos kyi tshogs dang dbyar gyi dus su lhan cig tu bzhugs so//ji tsam na bi ran zhes bya ba'i rtswa'i rigs 'phel zhing rgyas pa gzigs te/ dge slong sred pa shas che ba dag gi don du 'di gsungs so/ /dge slong dag sred pa ni dra ba dang yul la sred pa yin te/ 'khor ba'i 'ching ba yin no zhes bya ba la sogs pa gsungs so zhes zer ro//'di la bsdus pa'i don yang 'dod pa'i sred pa'i skyon mthong ba'i chos 'di nyid la rnam pa bzhi yod de zhes bstan te/ shin tu zil gyis gnon pa dang / dmigs pa dman pa dang / las la mngon par dga' ba dang / zil gyis gnon par dka' zhing mya ngan 'phel ba'o/ /de'i phyir dang por 'dod pa'i sred pa la lhag par btang snyoms kyi sems su 'gyur ro//de nas dmigs pa dman pa dang sdig pa'i las la mngon par dga' bar 'gyur ro/ /de nas ngan par spyod pas srid par 'gyur ro/ /de nas 'dod pa'i dngos po yongs su 'gyur bas mya ngan shas cher 'phel bar 'gyur ro//gang zhig ces bya ba ni sems can no/ /'dis zhes bya ba ni 'dod pa'i sred pas so/ /khol ba zhes bya ba ni zil gyis mnan pa'o/ /ji lta bur zhe na/ smras pa/ bud med ces bya ba smos te/ dman pa'i dngos po la dmigs pa'i phyir dang / ngan par spyod pa bskyed pa'i phyir dang 'dod pa'i bde ba rjes su spyod pa ni dman pa nyid tha mal pa zhes bya ba la sogs pa'i mdo'i tshig gis so//sred pa zhes bya ba ni 'khor ba don du gnyer ba'i las bskyed pa'o/ /'jig rten spang dka' zhes bya ba ni mu stegs pa'i 'jig rten te/ 'di la dka' bas spang zhing dor bas yod pa de ni spang bar dka' ba'am/'da' bar dka' ba'am/ dor bar dka' ba zhes bya ba'i don to/ /bdag med pa'i 'du shes de ni de'i gnyen po yin te/ phyi rol pas mi rtog pa'i phyir ro/ /sangs rgyas kyi bstan pa la ni 'di spang bar dka' ba ma yin te/ phyin ci ma log pas de'i gnyen po dmigs pa'i phyir ro//de yi mya ngan 'phel bar 'gyur/ /zhes bya ba ni gang gi phyir dngos po gang la 'dod pa'i sred pas zil gyis gnon pa ni dngos po de med cing rnam par 'gyur ba las lhag par zhen pa'i skyes bu'i mya ngan te/ yid kyi gdung ba'o/ /'phel bar 'gyur ba ni stsogs par 'gyur ba ste/ ji srid du gang la sred pa'i dngos po yod pa de ni gang dag rnam par 'gyur ba de srid du mya ngan 'phel bar 'gyur te/'dir dpe bstan pa/ rtswa la char pa bab pa bzhin/ /zhes bya ba smos te/ char bab pa ni brlan pa dang / chus blug pa'o/ /'dir rtswa ni bi ra na zhes bya ba'i rtswa'i rigs yod de/ gang gi rtsa ba u shir yin pa'o//dper na bi ra na zhes bya ba'i rtswa la ji ltar char bab cing brlan pa de lta de ltar 'phel bar 'gyur ro/ /de bzhin du ji lta ji ltar rang gi sems kyi rgyud la brten pa'i mya ngan gyi sa bon sred pa 'phel bar 'gyur ba de lta de ltar mya ngan 'phel bar 'gyur ro/ /sred pa'i skyon bstan pas de spang ba la gzud pa'i phyir 'di gsungs so//dkar po'i phyogs kyi phan yon bstan pa'i phyir smras pa/ gang zhig 'jig rten zhes bya ba la sogs pa smos so/ /gang gis yang yang sred pa 'dis 'khol ba de zil gyis mnan pa dang spangs pa ste/ bud med ces bya ba la sogs pa'i rnam pa'i don to//de yi mya ngan ldog 'gyur te/ /zhes bya ba ni srid pa spangs pa'i gang zag de'i ste sems kyi gdung ba thams cad sel ba yin no/ /gang la ji lta bu zhe na/ smras pa/ pad ma la ni chu yi thigs pa bzhin/ /zhes bya ba ste/ pad ma zhes bya ba ni pu ka ra ste/ ji ltar pad ma'i 'dab ma la chu'i thigs pa byung ba ni ldog cing de de'i nang du 'jug par mi 'gyur ro//de bzhin du 'dod pa'i sred pa spangs pa yang sdug pa rnam par 'gyur ba las gyur pa'i mya ngan sems la 'jug par mi 'gyur ro/ /'dod pa'i sems spangs pa'i phan yon bstan pa'i phyir 'di gsungs so/ /gang gi phyir sred pa 'phel ba las ni phung khrol 'byung ba yin pas de spang ba'i phan yon bstan pa'i phyir 'di lta ste/de phyir ji snyed ces bya ba la sogs pa smos te/ 'dir bcom ldan 'das kyis snod du gyur pa la bstan pa dang / phyogs su ma lhung bas bstan pa dang / yang dag par bsgrub pa bstan pa dang / yang dag par bsgrub pa'i phan yon bstan pa yin te/ de'i phyir khyed la zhes bya ba la sogs pas ni snod du gyur pa bstan to//de'i phyir ji snyed ces bya ba la sogs pas de'i phyir phan pa'i bsam pas bstan pa'o/ /u shir phyir ni zhes pa dang / sred pa rtsar bcas zhes bya ba la sogs pas ni yang dag par bsgrub pa bstan to/ /sred pa drungs nas phyung shig dang / / zhes bya ba la sogs pas de'i phan yon bstan to zhes bya ba ni bsdus pa'i don to/ /de'i phyir zhes bya ba ni de bas na ste/ gang gi phyir sred pa la ni rjes su 'jug pa ni ma dag pa yin par snang la/ de spangs pa ni phan yon yod pa nyid de/ de'i phyir khyod kyis de spangs pa la 'bad par gyis shig pa'o/ /brgya la de la bdag cag skal ba dang mi ldan pa yin no zhe na/smras pa/ khyod la zhes bya ba smos te/ khyed cag la zhes bya ba'i don to/ /smra yis zhes bya ba ni bshad do zhes bya ba'o/ /ci zhe na smras pa/ khyed bde shog ces bya ba smos te/ khyed cag phun sum tshogs pa dang ldan par gyur cig pa'o/ /'di skad ston pa yin te/khyed cag snod du gyur pa yin pas des na ngas khyed la smra bar bya ste/ 'di ni bde ba yin te tshe dang ldan pa khyed cag nye bar gnas pa ste/ 'di lta ste ston pa yang mngon sum du gyur la khyed cag kyang sred pa gnyen pos spong nus pa yin pas so/ /de lta bu gang yin zhe na/ smras pa/ ji snyed bya ba ni tshad ji tsam pa ste/tshe dang ldan pa gang khyed cag nyid do/ /'dir lhags pa zhes bya ba ni khyed cag nye bar gnas shing gan du phyin pa ste/ khyed cag thams cad do/ /gang yin zhe na/ smras pa/ sred pa ste 'khor ba la 'dod chags pa'am/ 'dod pa'i 'dod chags so/ /rtsar bcas zhes bya ba ni rgyu dang bcas pa ste/ma rig pa dang bcas pa zhes bya ba'i don to/ /gang gi phyir sred pa'i rtsa ba ni ma rig pa'o/ /gzhan dag na re tshor ba yin te tshor ba'i rkyen gyis sred pa zhes bya ba'i mdo'i tshig gis so/ /rtsa ba dang lhan cig pa yin pas rtsar bcas so/ /bi ra na'i rtsa ba ni u shi ra ste de las skyes pa'i rtswa'i rigs so//u shi ra don du gnyer ba ni u shi ra'i phyir te/ de dgos pa yod pa'i phyir ro/ /gang u shi ra 'dod pa de ni rtswa bi ra na rtsa ba dang bcas pa gzhor la sogs pas drungs nas 'byin pa de bzhin du ma rig pa dang bcas par sred pa drungs nas phyung na nya ser skya bzhin du nyams pa thob par mi 'gyur ro/ / de bzhin du yang dag par bsgrub pa'i phan yon smras pa/ sred pa drungs nas phyung shig dang / /zhes bya ba smos te/ phyung shig ces bya ba ni bton pa'o/ /'di rtsa ba nas bton pa gang yin pa de ni rtsa ba nas phyung ba'o/ /de ltar rtsa ba nas byung bar gyur na mya ngan med cing zhes bya ba yin te/ de ltar byung ba'i dus na yang yid gdung ba med cing sdug bsngal ba med do//'jigs pa med ces bya bas ni ma 'ongs pa'i dus sdug bsngal yang med pa nyid do/ /gang gi phyir sred pa dang bcas pa rnams la ni da ltar byung ba'i sdug bsngal dang mya ngan yod pa yin la ma 'ongs pa na sdug bsngal ba ste 'jigs pa yod do/ /gzhan dag ni gdul bya nye bar gnas pa dag la tshig rkang drug gis yang dag par len pa dag ste/rgan po dang bar ma dang gsar bu rnams la tshig rkang snga ma gnyis kyis ni yang dag par gzengs bstod cing yang dag par 'jug pa dag spro ba bskyed pa'i phyir ro/ /tshig rkang phyi ma gnyis kyis ni yang dag par bsgrub pa dag la phyin ci ma log par 'dzin du gzhug pa'i phyir ro//tshig rkang gsum pa gnyis kyis ni yang dag par bsgrubs pa'i phan yon bstan pa ni bsdus pa'i don yin no zhes zer ro/ /'di ni sred pa spang ba la gzud pa'i phyir gsungs so/ /yang sred pa skye ba nyid ni skyon ma lus pa'i dra ba yin no zhes bstan pa'i phyir smras pa/skyes bu sred pa zhes bya ba la sogs pa smos so/ /'di'i gleng gzhi ni bcom ldan 'das kyis ji ltar sred pa'i kun du sbyor ba dang gang zhig mi ldan par sems can rnams yun ring po'i dus su 'khyam zhing 'gro bar 'gyur ba ni ngas gcig kyang ma mthong ngo zhes bya ba la sogs pa gsungs nas/tshigs bcad gnyis gsungs so/ /kha cig ni dge slong dag 'jig rten ni sred pas 'khol cing thug pa med par 'gro ste/ de lhar skyes nas mir 'gyur ro/ /mir skyes nas ji srid du dmyal ba'i bar du 'gyur te/ de lta bas na sred pa yongs su spongs shig dang / de nyid kyis khyod kyi sdug bsngal zad par 'gyur ro zhes zer ro//gzhan dag ni lo drug cu'i bar du mngal du gnas te/ skra dkar dang gnyer ma byung zhing thig le nag pos lus nyams par byas pa'i rgan po zhig gi dbang du byas nas gsungs zhes zer ro/ /de gnyis las re zhig dang po bshad par bya ste/ skyes bu sred pa dang 'grogs na//zhes bya ba la sogs pa smos so/ /'di'i bsdus pa'i don ni sred pa dang 'grogs pa dang nye bar len pa gnyis kyis ni kun 'byung gi bden pa bstan to/ /yang dang yang du mngal du 'jug /ces bya bas ni sdug bsngal gyi bden pa bstan to/ /sred pa'i gnyis pa gang ba'i skyes bu de ni sred pa'i gnyis pa ste/sred pa'i grogs zhes bya ba'i don to/ /sred pa'i rjes su 'gro ba'i phyir dang / sems can gyi rgyud de'i rjes su 'gro ba'i phyir ro/ /skyes bu zhes bya ba ni rtsub pa la sogs pa'i las kyis gang ba yin no zhes bya ba ni nges pa'i tshig ste/ so so'i skye bo zhes bya ba'i don to/ /yun ring zhes bya ba ni thog ma med pa ste/ji skad du bshad pa/ dge slong dag skye ba'i 'khor ba ni thog ma dang tha ma med do zhes gsungs pa'i phyir ro/ /dus zhes bya ba ni 'khor ba dag tu zad pa ste/ mi rtag pas nyams par byas pa zhes bya ba'i don to/ /'khyam 'gyur bas zhes bya ba ni 'khor ba ste/ 'gro ba'i 'gro ba dag tu las ji lta ba bzhin du 'gro ba'o//ci zhig byed par 'gyur zhe na/ smras pa/ yang dang yang du nyer len cing / /zhes bya ba smos te/ rtag tu nye bar len pa rnam pa bzhi nye bar len te/ 'dod pa'i 'dod chags la sogs pa 'dus pas nye bar len pa'i rkyen ni las yin no zhes bya ba'i tshig gis so//las med pa ni nye bar len pa mi 'byung ste/ las kyi dbang gis yang mngal du/ /zhes bya ba smos te/ mngal gyi gnas su mi gtsang ba'i nang du dmyal ba dang 'dra bar las kyi dbang gis 'jug pa yin no/ /de ltar nye bar 'gro zhing mngal gyi gnas su nye bar song nas yang ci zhig byed pa yin zhe na/ smras pa/ gnas skabs 'gyur dang zhes bya ba la sogs pa smos so/ /gnas skabs 'gyur bas mngal nas byung ste/ de'i dus phyi zhig na rim gyis bdag nyid yongs su rdzogs par byed pa'i gnas skabs dag ston pa yin te/ 'di lta bu'i rnam pa'i dngos po yin pas gnas skabs 'gyur ba'o//de las gzhan du 'gyur ba ni/ snga ma las mi 'dra bar gyur pa ste/ 'dis ni lus yang dang yang nad dang rga ba dang / 'chi bas byas pa'i rnam par 'gyur ba nyid ston to/ /sems can 'ong dang zhes bya ba ni srid pa las sems can 'ong ba'am/ de'i rjes su 'ong ba ste 'jig rten pha rol las 'dir 'ong zhing mi mthong ba'o//'gro bar byed ces pa ni 'jig rten 'di las yang 'jig rten pha rol tu 'gro bar byed pa ste/ 'dis ni sred pa'i skyon bstan to/ /de la 'dir yang skyon bsdu na rnam pa gnyis su rig par bya ste/ nyon mongs pa'i kun nas nyon mongs pa'i rgyur gyur pa'i phyir dang / sdug bsngal gyi kun nas nyon mongs pa'i rgyur gyur pa'i phyir te/de'i phyir yang dang yang nye bar len pa dang mngal la sogs pas go rims bzhin du bstan to/ /sdug bsngal yang 'dir rnam pa gsum du bshad do/ /de yang mngal gyi gnas kyi sdug bsngal dang / skyes nas 'dod pa dang mi 'dod pa'i gnas skabs gzhan du 'gyur ba'i sdug bsngal dang /'gro ba dag tu 'pho ba'i sdug bsngal lo/ /de bas na 'di dag thams cad ni sred pa la gnas pa yin no zhes shes par byas nas de spang bar bya ba'i phyir 'bad par bya'o zhes bstan pa'i ched du 'di gsungs so/ /sred pa spangs pa'i phan yon bstan pa'i phyir smras pa/'dir ni spang dka'i sred pa ste/ /zhes bya ba la sogs pa smos so/ /de la sred pa ni gtan du spang bar dka' ba nyid dang / de'i phan yon yang 'dir bstan pa yin no/ /sred pa de spongs la zhes bya ba ni gang sngar bstan pa ste/ rang dang rjes su mthun pa'i gnyen pos zhes bya ba ni tshig gi lhag ma'o//dang gi sgra ni khyad par gyi don to/ /gang sred pa dang 'grogs pa ni 'khor ba yin gyi gang de spangs pa dang ma yin no zhes bya ba'i don to/ /'dir ni zhes bya ba ni bstan pa 'di la'o/ /yang na 'jig rten gyi yid du 'ong ba'i yul la'o/ /ci zhig byas nas sred pa spang bar brjod par bya zhe na/ smras pa/ rgyun chod cig dang zhes bya ba smos te rtsa ba nas rab tu phyung shig pa'o/ /gang gi phyir phyi rol pa rnams kyi ni de spangs pa de yang rtsa ba'i rgyun las gcod par mi nus pa yin te/ sred pa la gnas pas spang bar mi nus pa'i phyir ro/ /dper na la la zhig gis dug shing bcad par gyur na yang de'i rtsa ba drungs nas ma phyung bar ni de yang dbyar gyi dus su skye bar 'gyur ba de bzhin no//spang dka' zhes bya ba ni bsal bar dka' ba ste/ srid pa'i rtse mo'i nyon mongs pa thams cad kyi bya ba ni 'phags pa'i lam nyid kyis spang ba yin te/ de yang shin tu rnyed par dka' ba'i phyir ro/ /yang na rgyun ni sa bon te skal ba mnyam pa'i rgyu zhes bya ba'i don to//gang gi tshe sred pa des yang so sor brtag pa'i 'gog pas de'i sa bon rtsa ba nas ma spangs pa de'i tshe ni yang skye bar 'gyur ro/ /de ni yang du 'khor mi 'gyur/ /zhes bya ba ni sred pa'i sa bon bcad pa'i 'phags pa'i nyan thos de ni yang 'khor bar mi 'khor ro zhes bya ba yin no//ji ltar phyi rol pa de dag gis ni sa bon ma bcad pa'i phyir 'khor bar 'gyur la/ 'di ni de lta ma yin no zhes bstan pa/ ci'i phyir zhe na/ smras pa/ de la sred pa med 'gyur zhing / /zhes bya ba smos te/ gang gi phyir de nyid la ni thams cad kyi thams cad du sred pa med la phyi rol pa rnams la ni lhag ma dang bcas pa'i phyir de ni yang skye ba yin te/byi ba'i dug rnam par gyur pa bzhin no/ /sred pa thams cad spong bar rab tu zhugs pa'i phyir 'di gsungs so/ /sred pa gtan du ma spangs pa'i nyes dmigs smras pa/ dal 'byor chud ni mi gsan par/ /zhes bya ba la sogs pa'i tshigs bcad phyed dang gnyis smos so//thams cad la phyin ci ma log pa'i rjes su bstan pa sbyin par ni dge slong maud gal gyi bu chen pos kyang mi nus na gzhan gyis lta smos kyang ci dgos/ re ba ta ka zhes bya ba de'i nye gnas la ji ltar yang de'i 'dod pa'i 'dod chags kyi rgyu zhes bya ba la sogs pas bstan nas 'di gsungs so//'di'i bsdus pa'i don ni gang bcings pa dang / gang gis dang de la ji ltar bsgrub par bya ba dang de sgrub pa'i dus kyang mi rtag pa nyid kyis de'i dus 'das pa nyid na sdug bsngal ba dang yid mi bde ba drag po dang ldan pa nyid du bstan to/ /gang gis zhes bya ba ni yul la sred pa dang lus la sred pa zhes bya ba'i don to//lha zhes bya ba ni rgyal chen ris bzhi la sogs pa'o/ /mi ni 'dzam bu gling pa la sogs pa'o/ /dud 'gro ni ngan 'gro rnams kyang ngo / /bcings nas 'jog byed pa zhes bya ba ni chags nas gnas par byed pa'o/ /nas zhes bya ba ni tshig gi kha skong ba'am yang na 'byed pa yin no/ /gang gis 'ching ba ni gzhan yang 'ching ba yin mod kyi/srid pa gtsor bstan pa ste/ bcings pa de nyid do/ /don gnyer zhes bya ba ni 'dod pa'i phun sum tshogs pa don du gnyer bar byed pa yin te/ de la lha rnams ni 'dod pas yongs su tshol bar bya ba med de/ 'on kyang 'dod pa dag rab tu thob pa la shin tu chags pa'i sems kyis gnas pa yin te/de nas bcings nas 'jog pa yin no/ /mi rnams ni 'dod pa yongs su tshol bas rtag tu don du gnyer bar byed pa yin no/ /yang na gzugs dang gzugs med pa na spyod pa'i lha rnams ni snyoms par 'jug pa la chags pas bcings nas 'jog par byed pa de nyid do//'dod pa na spyod pa'i lha dang mi rnams ni da ltar byung ba'i 'dod pa dag la 'dod cing chags la ma 'ongs pa dag la don du gnyer ba'i sgrar brjod do/ /don du gnyer ba'i ngang tshul gang la yod pa de ni don du gnyer ba'o/ /yul la sred pa zhes bya ba ni yul rnam pa sna tshogs la kun du chags pa de ni yul la sred pa ste/'dis ni sred pa'i rang gi ngo bo bstan to/ /de las rgol zhes bya ba ni sred pa spongs shig pa dang / 'da' bar gyis shig pa'o/ /'dir bag med par ma byed cig pa ste/ dal ba las 'das par ma byed cig pa'o/ /bya ba ma yin pa mi bya ba nyid bstan pa'i phyir smras pa/dal 'byor chud ni mi gsan par/ /zhes bya ba smos te/ mi ni mi khom pa brgyad spangs pa'i dal ba ste/ de khyod kyis chung ma gsan cig pa ni thob nas 'das pa dang don med pas 'da' bar ma byed cig pa'i don to/ /ci'i phyir de ltar sbyar ba yin zhe na/ smras pa/ dal 'byor thal bas zhes bya ba smos te/dal ba ni ji skad du bstan pa nyid do/ /thal ba ni dal ba las 'das pa ste dal ba nyams pa'o/ /bas zhes bya ba ni rgyu bstan pa'i don te/ gang gi phyir 'di ltar dal 'byor la gnas nas bag med pas sred pa'i dbang du ci dgar spyod pa de ni dmyal ba dag tu skye bar 'gyur ba yin te/ bag med pa dang sred pa de gnyis kyis 'bras bu mngon sum du gyur na ni 'gyod par 'gyur te/srid pa'i dbang gis sngon bag med pa byas pa ni bdag gis legs par ma byas so zhes so/ /gang gi phyir sngon bdag gis byas pa ma dran par gyur pa de'i tshe na yang sdug bsngal gyi tshor ba'i reg pa drag pos mya ngan dang smre sngags 'don par 'gyur te/kyi hud bdag ni sdug bsngal ba'o zhes bya ba la sogs pa'o/ /lha dang mi rnams kyi 'ching ba don du gnyer ba nyid bstan nas/ ngan song pa rnams kyi yang de la ji lta bu yin zhe na/ de'i phyir rnam par smin pa'i sgrib pas bcings pa yin te/ des na thar pa thob par mi 'gyur ro/ /lha dang mi rnams kyi yang sred pa'i sgrib pa nyid yin te/des na nus su zin kyang gzung ba ni skyon dang bcas pa yin pas sred pa spang ba la gzud pa'i phyir bstan to/ /sred pa las 'da' bar ma byas na sdug bsngal thams cad 'byung ba nyid du bstan pa'i phyir smras pa/ gang phyir sred pa'i mtsho zhes bya ba la sogs pa smos so//yang na ci'i sred pa nyid kyis 'gyod par 'gyur zhe na/ smras pa/ gang phyir sred mtsho zhes bya ba la sogs pa'o/ /sred pa ni gsum ste/ 'dod pa'i sred pa dang / gzugs kyi sred pa dang / gzugs med pa'i sred pa'o zhes mdo las gsungs pa yin pas 'di gsungs so/ /sred pa ma spangs pa la ni rgyun mi 'chad par sdug bsngal gyi 'khor lo 'khor ba yin no zhes bya ba ni 'dir bsdus pa'i don to//sred pa zhes bya ba ni rjes su chags pa'i kun du sbyor ba'o/ /gang phyir zhes bya ba ni de nyid kyi don te/ sred pa kho na zhes bya ba'o/ /gang gi phyir de nyid ni gtso bo'i rgyu nyid du bsgrub pa ste/ 'di ltar yang sdug bsngal gyi rgyu nyid yin te/ma btul na zhes bya ba 'di dang sbyar bar bya'o/ /rgyur gyur pa zhes bya ba ni bye brag med pas 'khor ba 'grub pa'i rgyur gyur pa yin te/ kun 'byung gi bden pa gang zhe na/ sred pa'o zhes mdo las gsungs pa'i phyir ro/ /'dir mtsho zhes bya ba ni chu bo ste/ de dang chos mthun pa yin pas sred pa'i mtsho de brlan pa'i bdag nyid dang /'pho zhing rgyun las 'bab pa'i bdag nyid kyi phyir te/ 'di ltar chu bo yang rgyun las 'bab cing gsher ba yin te de bzhin du sred pa'o/ /yul la sred pa zhes bya ba ni yul rnam pa sna tshogs la kun du chags shing lhag par zhen pa'i phyir ro/ /'bras kyi gzhi zhes bya ba ni rnag mang po la sogs pas khengs pa'i 'brum bu'i mtshan ma las/mi gtsang zhing sdug bsngal gyi gzhi'i lus la 'jug pa'i phyir ro/ /khebs byed pa zhes bya ba ni rnam par rtog pa sna tshogs pa 'byung bas srid pa gsum khyab pa zhes bya ba'i don to/ /dra ba zhes bya ba ni shin tu sdug pa'i dra ba gang la yod pa de ni dra ba ste/lta ba drug cu rtsa gnyis kyi dra ba'i rnam pa yin pa'i phyir ro/ /'khri shing zhes bya ba ni nags kyi 'khri shing dang 'dra ba ste g.yo ba'i phyir dang / ma 'ongs pa'i phun sum tshogs pa ring ba la bsam pa rjes su 'jug pa'i phyir ro/ /gdung bar byed pa zhes bya ba ni 'dod pa'i yul gyi longs spyod thob pa rnams kyis ngoms pa med pa'i phyir ro//ma btul na zhes bya ba ni ma spangs pa zhes ma dor na'o/ /rnam pa kun zhes bya ba ni rgyu dang 'bras bu dang rnam pa'i sa de dang / yang na mthong ba dang bsgom pas spang bar bya ba'o/ /de ltar na rnam pa kun du zhes bya ba 'dis ni rnam pa thams cad du spangs pa zhes bya ba'i don to/ / ldog mi 'gyur zhes bya ba la sogs pas ni sred pas byas pa'i sdug bsngal bstan te/ ldog par mi 'gyur ba ni skye ba dang rab tu 'byung ba'o/ /sdug bsngal ni nang gi skye ba la sogs pa'o/ /'di ni zhes bya ba ni mngon sum du nye bar blangs pa'am 'khor ba'o/ /yang dang yang zhes bya ba ni ma bcad na yang dang yang du ste/'jig rten gyi gzhi nyams na yang sdug bsngal ldog pa med pa nyid du bstan to/ /sred pa ma spangs na 'jig rten pa dang 'dod chags dang bral ba rnams yang dang yang du 'ong ba'i phyir ro/ /sred pas byas pa'i nyes dmigs bstan pas de spang ba la gzud pa'i phyir 'di gsungs so//'dar yang dpes don bsgrub pa'i phyir smras pa/ dper na ljon shing bzhin zhes bya ba la sogs pa smos so/ /bad sa'i rgyal po 'char byed btsun mo'i 'khor dang bcas te/ skyes mos tshal du rtse ba'i phyir zhugs so/ /yang drang srong lnga brgya tsam nam mkha' la 'phur bas phyogs de nas sgra shin tu yid du 'ong ba thos pa dang dri bsung bzang zhing dga' ba dag bsnams pa las mthu nyams par gyur te/gshog pa chad pa'i bya bzhin du de'i skyed mos tshal du lhung bar gyur te/ ji tsam na des de dag gi lag pa dang rkang pa bcings par gyur to/ /dus gzhan zhig na rgyal po de dang ba skyes te/ de ltar lhung ba dag la bltas nas smras pa/bcom ldan 'das de bzhin gshegs pa dgra bcom pa yang dag par rdzogs pa'i sangs rgyas de la phyag 'tshal lo/ /phyag 'tshal lo/ /gang gi nyan thos kyang yul khyad par can brtan pas mi 'gyur ba yin no zhes smras so/ /drang srong de rnams kyis sangs rgyas zhes bya ba'i sgra sngon ma thos pa thos pas ba spu thams cad langs par gyur to//de nas rgyal po des de dag khyer te bcom ldan 'das ga la ba de logs su song ste zhes bya ba nas/ rgya cher dgra bcom pa'i 'bras bu thob par gyur te/ de'i dbang du mdzad nas bad sa'i rgyal po 'char byed la bos te tshigs su bcad pa 'di gsungs so//kun 'byung gi bden pa gtan du ma spangs pa las ni sdug bsngal gyi bden pa gtan du 'gag par mi 'gyur ro zhes bya ba ni 'di'i bsdus pa'i don to/ /dper na zhes bya ba ni ji ltar ro/ /rtsa ba zhes bya ba ni skyes pa'i gzhi'o/ /ma bton na zhes bya ba ni nyams par ma byas pa dang ma phyung ba dang ma bshig pa'i don to//na zhes bya ba ni yang dag par yod pa ste/ mi 'jug pa nyid du'o/ /bcad kyang ljon shing zhes bya ba ni sta re la sogs pas shing dum bu gnyis su byas kyang phyir zhing skye ba kho nar zad ces bya ba yin te/ yang skye bar 'gyur ro/ /dpe bstan pas dpes mtshon pa'i don bshad pa'i phyir smras pa/de bzhin zhes bya ba ni de ltar ro/ /srid pa'i phra rgyas zhes bya ba ni srid pa'i kun du sbyor ba ste rtsa bar gyur pa'o/ /ma bton na zhes bya ba ni rtsa ba'am drungs nas ma lus par ma phyung ba ste/ 'di ltar srid pa'i rtse mo'i sred pa 'khor ba'i rtsa ba de yang phyi rol pas spang bar mi nus so/ /'dis ni 'jig rten pa'i 'dod chags dang bral bas yid brtan du mi rung ba nyid du bstan to//mi ldog ces bya ba ni shin tu sdug bsngal ba'i phung po'i bdag nyid skye bar 'gyur ba'o/ /'di zhes bya ba ni nang ngo / /yang dang yang du zhes bya ba ni phyir zhing phyir zhing ste/ 'khor ba thog ma med pa nas sred pa des yang dang yang du sdug bsngal ba'i phung po 'byung ba'i phyir ro//'jig rten pa'i lam gyi nus pa bstan pas 'jig rten las 'das pa'i lam bsgom pa la gzud pa'i phyir 'di gsungs so/ /gang la gnas pas sred pa skye ba nyid kyis nges par me bzhin du phung bar 'gyur ro zhes bsgrub pa'i phyir smras pa/ dper na bdag nyid kyis ni zhes bya ba la sogs pa'i tshigs su bcad pa gnyis smos so//mgar ba zhig mtshon byas pa rnams 'tshong zhing 'tsho bar byed pa zhig yod de/ ji tsam dus gzhan zhig na bdag nyid kyis byas pa'i ral gyi mchan khung du bcug ste/ bya ba zhig gi phyir grong bar du chas so/ /de lam de na rkun po sdig pa can dag gnas te/des de mtshon de nyid kyis bsad nas rdzas khyer te song ba las de'i dbang du mdzad de 'di gsungs so/ /sred pa bdag nyid las skyes pa ste/ rang gi sa bon tshul bzhin ma yin pa yid la byed pa sa bon lta bu las lcug ma la bsgos pas lcug ma de 'phel ba dang 'phel bar byed pa'o/ /de bzhin du sdig pa skyed par byed pas mi 'dod pa'i 'bras bu ngan song yin no zhes bya ba ni 'dir bsdus pa'i don du bstan to//dper na zhes bya ba ni ji ltar ro/ /mtshon ni mda'i mde'u la sogs pa'i mtshon te/ phyi rol gyi mtshon gyis nang gi mtshon gyi dpe byas pa yin no/ /bdag nyid kyis ni byas pa zhes bdag nyid kyis byas pa yin te/gzhan gyis byas pa ni ma yin pa'o/ /bdag nyid ces bya ba ni don 'di la tshig gi phrad du byung ba ste/ bdag ces bya ba bdag nyid 'dod pas byas pa ste/ gzhan gyis byed du bcug pa ni ma yin no/ /de yis bdag gsod pa ltar zhes bya ba ni gang byas pa de nyid kyis bsad pa'o//ji lta bu zhe na/ smras pa/ rkun po'i mthu yis zhes bya ba smos te/ mthu gang la yod pa de ni mthu can te/ mthu dang ldan pa des yongs su gzung ste lus la bsnun pa de bzhin du/ phyi rol gyi mtshon dang chos mthun par sbyar ba yin pas de bzhin du zhes bya ba yin no//nang gi sems las byung ba zhes bya ba ni bdag dang 'brel nas 'byung ba ste/ bdag nyid kyi rgyud las skyes pa zhes bya ba'i don to/ /dper na mtshon bdag nyid kyis byas pa de bzhin du sred pa 'di yang nang nyid las byung ba yin te/ 'dis ni sred pa rang gi rgyud nyid las skyes pa nyid du ston te/ dbang phyug la sogs pas byas pa dang /byed du bcug pas ni ma yin no/ /dper na mtshon ni bdag nyid byed pa po 'jig pa yin la de bzhin du sred pa de nyid kyis kyang bdag nyid 'jig pa yin te/ gang gis bsgos shing 'phel bar byas pa de nyid la phyis kyang gsod par 'gyur te/ ngan song dag tu sdug bsngal drag po mang po 'byung ba'i phyir ro//dper na mtshon mthu dang ldan pa'i lag na 'dug na gsod par byed de de bzhin du sred pa yang ngan song gi stobs dang ldan pa'i las la gnas na sems can rnams ngan song du gsod par 'gyur zhing 'gro ba dang nye bar 'gro bar 'gyur ro/ /'di na zhes bya ba ni 'dod pa'i khams na'o/ / lus can zhes bya ba ni sred pa dang ma bral ba'i sems can no/ /ci'i phyir khyer bar byed ce na/ smras pa/ gsod par byed pa ste rnam pa sna tshogs pa'i gnod pa'i sdug bsngal nyams su myong ba'i phyir ro/ /bdag nyid la sred pa phan 'dogs pa nyid yin no zhes mi bden par smra ba dag dgag pa'i phyir 'di gsungs so//gang gi phyir rnam pa sna tshogs pa'i nyes pas ma rung bar gyur pa 'di ni sred pa las byung ba yin te/ des na spang par bya'o zhes bstan par bya ba'i phyir smras pa/ de ltar sred pas zhes bya ba la sogs pa smos te/ dang po'i tshig rkang gnyis kyis 'dir sred pa spang ba'i rgyu bstan to zhes bya ba ni 'di'i bsdus pa'i don to//de ltar nyes dmigs zhes bya ba ni gnod pa 'di dag go/ /shes gyis te zhes bya ba ni phyin ci ma log par shes pa'o/ /nyes dmigs kyi rang gi ngo bo gang yin zhe na/ smras pa/ sred las zhes bya ba smos te/ sred pa'i kun tu sbyor ba las so/ /de ni gang gi phyir rang nyid gnod par byed pa ste/gcig tu nyon mongs pa yin pa'i phyir ro/ /gzhan dag ni nyon mongs pa dang 'brel ba yin no zhes de nyid gsal bar bstan pa'i phyir smras pa/ sdug bsngal 'byung ba zhes bya ba smos te/ sdug bsngal rab tu 'byung ba'i rgyu yin pa'i phyir te/ de las ni sdug bsngal rab tu 'byung ba yin la sred pa dang bral ba rnams la ni sdug bsngal mi 'byung ba'i phyir ro//'di las 'byung ba yin pas 'byung ba ste rgyu'o/ /yang na de ltar zhes bya ba ni gang sngar bstan pa'i tshigs bcad kyis nyes dmigs bstan pa ste/ sred pas lus can 'di na gsod sar khyer bar byed/ /ces bya ba yin te/ji ltar yang gsod sar khyer bar byed ce na/ ngan song gi las nye bar bsgrubs nas ngan song rnams su nye bar len pa yin no zhes 'di la nyes dmigs chen por shes par byas nas so/ /sred las sdug bsngal 'byung ba zhes bya ba 'dis ni nyes dmigs gnyis pa bstan pa yin te/ 'khor ba'i rgyu'i gtso bo yin pa'i phyir ro//sred spongs zhes bya ba ni bral zhing spangs pa'i sred pa gang yin pa de ni sred pa spangs pa ste/ sred pa'i bag chags thams cad spangs pa'i phyir ro/ /de spangs na 'khor ba'i 'ching ba'i gzhi thams cad spangs pa yin par bstan pa'i phyir smras pa/ nye bar len med ces bya ba smos te/len pa nges par spangs pa ni 'di'i nye bar len pa med pa ste/ len pa'i rkyen srid pa spangs pa'i phyir de ni 'jig rten du cung zad kyang len pa med de/ 'dod pa'am/ lta ba'am/ tshul khrims dang brtul zhugs sam/ bdag tu smra ba'o/ /dran ldan zhes bya ba ni dran pa nye bar gzhag pa bzhi la sems yang dag par nye bar gnas pa yin no//dge slong zhes bya ba ni yongs su bzung ba mtha' dag spangs pa yin te/ gzhan las blangs pa la sogs pas thob pa tsam la mngon par phyogs shing chog shes pa'o/ /'dis ni lus dang sems dben zhing chog shes pa la sogs pa'i khyad par dang ldan par bstan to//yang na nyon mongs pa bcom pa'i phyir phung po lhag ma dang bcas pa'i mya ngan las 'das pa bstan to/ /yongs su rgyus zhes bya ba 'dis ni lhag ma med pa'i mya ngan las 'das pa ste/ 'og nas brjod pa'i phyir ro/ /des na yang 'di gnyis kyis ni sred pa dang bral zhing nye bar len pa med pa'i thabs rtogs pa yin no//kun du rgyus zhes bya ba ni yongs su mya ngan las 'das pa'o/ /'dir kun du zhes bya ba ni yongs su zhes bya ba'i tshig yin te/ yongs su 'gro ba yin pas gang yang skye ba gcig mi 'dzin pa'i phyir srid pa'i rtse mo ma yin par yang zhes bya ba'i don to//yang na sred pa dang bral ba ni sems can la phan gdags pa'i phyir thams cad du 'gro zhes bya ba'i don te/ ji skad du gsungs pa/ dge slong dag nga ni 'ching ba thams cad las grol bas na gang lha dang mi'i bar du 'gro ste/ yul dag tu rgyu zhing skye bo mang po la phan pa'i phyir zhes rgya cher gsungs so//sred pa'i skyon mngon par ma shes pa dang / de spangs pa'i phan yon mi shes pa la gnyi ga bstan pa'i phyir 'di gsungs so/ /sred pa'i tshoms kyi rnam par 'grel pa ste gsum pa rdzogs so// //de'i 'og tu sred pa spong bar nus pa'i gnyen po bstan pa'i phyir bag yod pa'i tshoms bkod pa yin te/de'i phyir bshad pa/ skyes bu bag med rab tu spyod byed pa/ /'khri shing bzhin du sred pa 'phel 'gyur te/ /zhes bya bas so/ /bag med pas de 'phel ba'i rgyu nyid du 'grub pa yin pas 'dir ma bshad kyang de ltar 'grub pa nyid do zhe na/ 'di lta ste bag med pa 'di ni sred pa zad pa dang /'gog pa yin pa'i phyir tshoms 'di nyid kyi 'grel pa bshad par bya ste/ de'i phyir smras pa/ bag yod 'chi med gnas yin te/ /zhes bya ba la sogs pa smos so/ /'di'i gleng gzhi ni yul kau shAm+bI na gan di ka zhes bya ba'i blon pos nyes pa med pa dpe med pa'i bud med sngo bsangs can zhes bya ba la sogs pa lnga brgya me la bsregs so//de'i phyir yang bad sa'i rgyal po 'char byed kyis blon po lnga brgya bsad de/ de las bcom ldan 'das kyis tshigs su bcad pa 'di gnyis gsungs so/ /de la tshig rkang dang pos ni lam gyi bden pa dang / 'gog pa'i bden pa bstan to/ /gnyis pas ni kun 'byung gi bden pa dang /sdug bsngal gyi bden pa bstan to/ /gsum pas ni gang dag gis 'gog pa thob pa'o/ /bzhi pas ni gang dag gis ma thob pa'o zhes bya ba ni bsdus pa'i don to/ /bag yod pa zhes bya ba ni kun du zag pa dang dag pa'i gnas kyi chos gang dag las sems kun du srung ba'o//dge ba'i chos rnams la bsgom pa ni bag yod pa'i chos so zhes bstan pa yin te/ 'di ltar 'di'i mtshan nyid bstan pa ste/ rang la phan pa skyes pa'i lus dang ngag dang yid kun du bsrung ba mchog tu byed pa bag med pa dang 'gal ba'i chos ni bag yod pa'o/ /gang gi dge ba dag las bag med par mi 'gyur ba dang /mi zhig pa ste/ dge ba'i rtsa ba thams cad kyis brten pa'i phyir te/ ji skad du 'di lta ste dge slong dag dud 'gro'i skye gnas kyi srog chags gang ji snyed pa'i rjes de dag thams cad ni glang po che'i rjes kyi nang du 'dus shing de'i khongs su 'dus shing de'i khongs su gtogs par 'gyur te/ glang po che'i rjes ni de rnams las mchog tu bshad de/'di lta ste che ba nyid kyis so/ /de bzhin du gang dag dge ba'i chos de dag thams cad kyi rtsa ba ni bag yod pa yin te/ bag yod pa ni de dag thams cad kyi mchog tu bshad do zhes gsungs so/ /'chi med gnas zhes bya ba ni gang du 'chi ba med pa de ni 'chi med de/mya ngan las 'das pa zhes bya ba'i don to/ /de na 'chi ba la sogs pa'i gnod pa med pa'i phyir ro/ /de'i gnas ni bzhi ste gang gi phyir bag yod pa la gnas pas mya ngan las 'das pa 'thob pa'o/ /yang na 'dis 'chi ba med pa rtog par byed pas gnas te/ mya ngan las 'das pa 'thob par byed pa'i thabs zhes bya ba'i don to//bag med ces bya ba ni/ bag yod pa'i mtshan nyid las bzlog par shes par bya'o/ /'chi ba'i gnas zhes bya ba 'chi ba nyid kyi gzhi ste/ bag med pa la gnas pas 'khor ba dag tu yang dang yang du 'chi bar 'gyur ba'o/ /yang na 'chi ba 'thob pa'i thabs yin no/ / ci'i phyir yang bag yod pa ni mi 'chi ba'i gnas yin la/ bag med pa ni 'chi ba'i gnas yin zhe na/ 'dir smras pa/ 'di ltar bag yod 'chi bar mi 'gyur te/ /zhes bya ba yin te/ bag yod pa shA ri'i bu la sogs pa ni 'chi ba med pa'i gnas su zhugs te/ nam yang 'chi bar mi 'gyur ro/ / bag med pa ni nya ser skye la sogs pa lta bu'o/ /de ltar na sngon gyi mtha' dang phyi ma'i mtha' gnyis dang 'dir yang 'chi ba'i chos yin pa'i phyir rtag tu 'chi bar brjod par bya'o/ /bag yod pas mi 'chi ba zhes bshad pa yang ci pha'i bag yod pas bu mi 'chi bar 'gyur ram/ bu'i bag yod pas kyang pha mi 'chi bar 'gyur ram/de bzhin du bla ma dang slob ma la sogs pa la yang brjod par bya'o/ /bag yod pas kyang mi 'chi bar mi 'gyur ro zhe na/ de ni ma yin te 'on kyang / bag yod 'chi bar mi 'gyur te/ zhes bya ba smras te/ gang bdag nyid kyi bag yod pa'am/ bag med pa de nyid kyis te bag yod pas ni 'chi bar mi 'gyur ro//bag med pas ni 'chi bar 'gyur te/ gzhan gyi rgyud kyis rnam pa'i bag yod pa'am/ bag med pa gnyis kyis ni gang la yang mi 'chi ba dang / 'chi ba 'thob par mi 'gyur ro/ /gal te yang thob par 'gyur na ni gang sangs rgyas bcom ldan 'das nyid la bag yod pa mnga' bas sems can thams cad kyang 'chi bar mi 'gyur ro//de la 'di ni bag med pa rnams bag yod pa la gzud pa'i phyir dang / bag yod pa rnams brtan par bya ba'i phyir dang / lam ngan pa'i brtul zhugs dang / dka' thub dang mchod sbyin la sogs pas 'chi ba med pa'i gnas thob par bya'o zhes mi bden par smra ba dag dgag pa'i phyir gsungs so//bag yod pa'i yon tan yongs su shes pa'i mkhas pa ni de nyid du 'jug par 'gyur ro zhes bstan pa'i phyir de'i khyad par zhes bya ba la sogs pa smos so/ /'di'i bsdus pa'i don ni 'di'i lam yongs su shes shing bag yod pa'i khyad par shes pa des mkhas pa dag bag dang bcas pa las mi nyams par byed do//bag yod pa yang rnam pa gnyis te/ ye shes phun sum tshogs pa dang / 'bad pa la gnas pa phun sum tshogs pa'o/ /de la de ltar rab tu zhugs pa las ni bag med pa kha na ma tho ba med pa ma yin no zhes bstan to/ / 'phags pa'i spyod yul la dga' ba nyid kyis ni snga phyi'i khyad par rtogs pa'o/ /de'i zhes bya ba ni gang sngar bstan pa'i tshigs su bcad pa bag yod pa'i khyad par bstan pa ste/ bag yod 'chi med gnas yin te/ /zhes bya ba la sogs pa'o/ /de nyid kyi khyad par rig pa ni 'dir phan yon no/ /khyad par nyid yin pas khyad par ro//de rig pas zhes bya ba ni thos pa las byung ba la sogs pa'i shes rab mtshon pa nyid do/ /gang gi khyad par zhe na/ smras pa/ bag dang bcas zhes bya ba smos te/ 'dir bag med pa'i skyon rig pa'o zhes kyang brjod par bya ste/ gcig gis gnyis pa mtshon pa yin no/ / yang na yon tan yang dag par sgrogs pa nyid la mngon par sbyor bar byed de/ mkhas pa rnams ni skyon brjod pa ma yin no zhes ston pa yin no/ /mkhas pa zhes bya ba ni snga ma'i tshogs kyi rnam pa la 'jigs pa med pa dang lhan cig skyes pa'i shes rab dang ldan pa ste/ gang gi phyir de nyid kyis ni nus pa dang ldan pa'i phyir ro//rig par byas nas ci zhig tu 'gyur zhe na/ smras pa/ bag yod pa zhes bya ba smos te/ bag yod pa la gnas pa'o/ /de'i gnas skabs kyi phan yon bstan pa'i phyir smras pa/ rab dga' ba zhes bya ba smos te/ rab tu tshim pa dang mgu ba thob pas rab tu dga' ba nyid do//dge ba rgya che ba dag la nges par 'byung ba dang ldan zhing bsam gtan 'thob pas so/ /dran pa bsgom pa sngon du 'gro ba bstan pa'i phyir smras pa/ 'phags pa'i spyod yul zhes bya ba smos te/ sangs rgyas dang sangs rgyas kyi sras kyi spyod yul te/ dran pa nye bar gzhag pa bzhi la gnas pa zhes bya ba'i don to//de'i phyir bcom ldan 'das kyis gsungs pa/ dran pa nye bar gzhag pa bzhi ni 'phags pa'i spyod yul zhes gsungs so/ /dga' ba yin zhes bya ba ni mngon par dga' ba ste bstan pa'i ro shes pa des gzhan gyis bkrir mi nus pa nyid du bstan to/ /bag yod pa dang thar pa'i lam rnyed par dka' ba yin no zhes bstan pa'i phyir 'di gsungs so//bag yod 'chi med gnas yin te/ /zhes bstan pa de ji lta bu zhe na/ 'dir go rims bzhin du bstan pa'i phyir/ de la rgyun du bsgom pa dang / /zhes bya ba la sogs pa smos so/ /dge slong sho na ka'i dbang du mdzad nas 'di gsungs so//sho na ka bag yod pa ni gzhi yin te/ dge ba'i chos gang ji rnyed pa ni bag yod pa las rab tu 'byung ba dang / de bzhin gshegs pa dgra bcom pa yang dag par rdzogs pa'i sangs rgyas kyis byang chub kyang bag yod par 'thob pa yin te/ de bas na khyod kyis dge ba dag la bag med par mi bya'o zhes bya ba'i bar du gsungs te/tshigs su bcad pa 'di bka' stsal to/ /'dir ting nge 'dzin gyis bsdus pa'i don ni ting nge 'dzin bsgoms pa dang / ting nge 'dzin bsgom pa'i thabs dang / ting nge 'dzin bsgoms pa'i 'bras bu dang / grub pa dang bde ba bla na med pa'i phan yon bstan pa yin no//de zhes bya ba ni bag yod pa'o/ /bsgom pa'i ngang tshul gang la yod pa de ni bsgom pa ste/ bsam gtan dang po la sogs pa thob pa'o/ /yang na gang dag zhi gnas dang lhag mthong sgom par byed pa ste/ 'di gnyis ni gcig la gcig 'brel pa nyid de/ji skad du bshad pa/ bsam gtan med par ni shes rab med do/ /shes rab med par yang bsam gtan med do zhes pa'o/ /de yang rang bzhin gyis bsam pa bzang bar byas te/ bag yod pa la brten nas dge ba'i bshes gnyen nye bar bsten pa yin te/ des na yang rnal 'byor dang rjes su mthun pa'i nye bar bsten pa la gus par byed cing nyan par byed la/thos nas kyang phyin ci ma log par des rnam par bsams te/ thos pa las byung ba la sogs pa'i shes rab bskyed pa'i rim gyis ting nge 'dzin 'thob pa'i phyir bsgom par 'gyur ro/ /rgyun du zhugs pa zhes bya ba ni rtag par yin pas rgyun du ste/bsgom pa de nyid la rtag tu sbyor ba'i phyir ro/ /de dgun dang so ga la sogs par mi rtag pa yin nam zhe na/ rgyun mi 'chad par sbyor ba'i phyir te/ ji srid mthar thug gi bar du'o/ /'di ni rtag tu byed pa nyid du bstan to/ /pha rol gnon brtan pa'i zhes bya ba la brtan pa ni mi lhod pa'o/ / pha rol gnon pa ni spro ba gang la yod pa ste/ 'dis ni mi lhod pa dang gus par sbyor ba bstan te/ rtsod pa dang 'tshe ba thams cad kyis kyang brtson 'grus nyams pa med pa'i phyir ro/ /reg pa yin zhes bya ba ni thob par 'gyur ba'o/ /'dir reg pa yang rnam pa gnyis te/ lam dang mya ngan las 'das pa'o/ / de la 'dir ni mya ngan las 'das pa nyid la dgongs te/ 'di nyid 'og nas brjod pa'i phyir ro/ /brtan pa ni blo dang ldan pa ste/ thabs 'di dag dang ldan pa nyid du pha rol gnon brtan pa'i zhes bya bas bstan pa'i phyir ro/ /gang gi phyir brtan pa'i bar du mi skrag cing sgyid lug par mi 'gyur ro/ /mya ngan las 'das pa zhes bya ba ni sdug bsngal mthar byed pa ste 'gog pa'o//grub pa dang bde ba zhes bya ba ni rig pa ste/ 'bad pas bsgrubs pa'i yang dag pa'i lta ba sngon du 'gro ba'i lam ni grub pa'o/ /des thob pa ni bde ba ste/ grub pa dang bde ba'i mya ngan las 'das pa ni 'jig pa thams cad dang gtan du 'bral ba'i phyir ro//'jig rten pa'i bsam gtan yang rnam grangs kyi mya ngan las 'das par ni bcom ldan 'das kyis gsungs te/ ji srid du srid pa'i rtse mo'i rgyun gyi bar du ni bla na yod pa'o/ /'di ni khyad par che ba yin pas bye brag bstan pa'i phyir smras pa/ bla na med pa zhes bya ba yin no/ /bag med pa'i skyon mi shes pa dang /bag yod pa ni phan yon thams cad kyi gzhi yin pas gzud pa'i phyir 'di gsungs so/ /bag med pa spangs pa ni phan yon lhag pa ste/ che ba nyid du bstan pa'i phyir smras pa/ gang tshe mkhas pa zhes bya ba la sogs pa smos so/ /las ngan pas 'tsho ba'i khye'u zhig la chos bstan pa'i dbyig pas drang ba sbyin pa'i thabs kyis las ngan pa'i mi gtsang ba'i phung po las dbyung ba dang /yang dag pa'i bsgrub pa la gzhag pas khyad par du bden pa thob par bya ba dang / de la 'di skad gsungs so/ /gzhan dag na re longs spyod chen po rgya che ba spangs nas rab tu byung ste/ bsgrub pas khams gsum las 'dod chags dang bral ba'i 'phags pa 'od srungs chen po'i dbang du byas nas gsungs so zhes zer ro/ /dang po'i tshig rkang gnyis kyis ni nag po'i phyogs spangs pa dang / dkar po'i phyogs bsten pa nyid du bstan to/ /gsum pas ni de'i 'bras bu shes rab kyi mthar phyin pa bstan to//lhag mas ni de'i phan yon bstan to zhes bya ba ni bsdus pa'i don to/ /bag med pa ni bdag dang gzhan gyi phan pa nyams pa ste/ tha mal pa'o/ /yang na rnam pa bzhi ste/ srog dang stobs dang / sems dang nyon mongs pa kun du mi bsrung ba yin te/ yang dag pa'i sbyor ba la rjes su mi 'jug pa'i sbyor bas so//bag yod pa shes pa la bag med pa'i mtshan nyid las bzlog pa ni bag yod par gnas pa yin te/ 'di ni bag med par gsal bar nus te/ rjes su mthun pa'i gnyen po yin pa'i phyir mun pa'i sgron ma bzhin no/ /gang gi tshe zhes bya ba gang gi dus na'o//bcom pa ni rab tu spangs pa'o/ /de gang gis spong bar byed nus pa yin zhe na/ smras pa/ mkhas pa zhes bya ba la mkhas pa ni rtogs pa ste/ slob pa zhes bya ba'i don to/ /mi slob pa'i gnas skabs bstan pa'i phyir smras pa/ shes rab khang bzangs zhes bya ba la sogs pa smos te/ gang ji skad du gsungs pa bag yod pa la brten pas ji skad bstan pa bag med pa spong ba yin te/de nyid khyad par du byed pas mi slob pa'i shes rab thob par 'gyur ro/ /shes rab ni khang bzangs bzhin du thams cad kyi steng na gnas pa'i phyir dang / shin tu nyams dga' bar gyur pa'i phyir ro//'dzeg pa ni phyin pa'o/ /'dzegs nas ji lta bus ci zhig byed pa yin zhe na/ smras pa/ mya ngan med ces bya ba la sogs pa smos te/ mya ngan dang bral ba gang yin pa de ni mya ngan med pa ste/ 'dis mya ngan dang bral bar bdag la mthong ba yin te/ sdug bsngal thams cad dang bral ba'i phyir ro/ / des gzhan dag la yang ji ltar mthong ba yin zhe na/ smras pa/ gdung ba zhes bya ba smos te/ mya ngan gang la yod pa de ni gdung ba ste byis pa zhes bya ba de dang sbyar ro/ /sdug bsngal gyi tshogs chen po'i gnas yin pa'i phyir dpag tu med pa'i yid kyi gdung ba dang ldan pa'o/ /ji lta bu gang yin zhe na/ 'dir dpe bstan pa/sa'i steng ri bo'i spo dag las zhes te/ sa'i steng na gnas pa yin pas sa steng ngo / /de ri'i steng na gnas pa yin pas ri bo'i spo dag las te/ dper na ri'i rtse mo las mig dang ldan pas srog chags kyi rnam pa la 'og tu bltas na 'bad mi dgos par mthong ngo / /de bzhin du khyad par du 'phags pa thob pa'i shes rab kyi khang bzangs kyi steng du 'dzegs te/ngan pa'i phung po la gnas pa'i byis pa rnams la lta zhing rtog par byed ces bya ba'i don to/ /brtan rnams zhes bya ba ni zhum pa med pa ste/ gzhan gnod par bya ba'i byed pa la zhes bya ba ni tshig gi lhag ma ste/ de'i don la lta ba'o/ /bag yod pa dang brtan pa dang //bdag nyid la ni rtag tu dga'/ /zhes bya ba'i tshigs bcad kyi phyed 'dis gzhan dag brjod mod kyi/ 'di ni yang dag pa ma yin te/ phran tshegs kyi sde snod las tshig rkang drug po 'di nyid smos pa'i phyir dang / 'dir don lhag pa yang med pas brjod par mi bya'o/ /bag med pa rnams thar par 'dod pa la gzud pa'i phyir 'di gsungs so//bag yod pa gcig pus ni mngon par 'dod pa'i don mi 'grub pa ste/ 'on kyang 'bras bu'i tshogs thams cad kyi tshogs pa la rag lus pa'i phyir brtson 'grus dang bcas pa nyid du 'dir bstan pa'i phyir smras pa/ brtson 'grus dang ni zhes bya ba la sogs pa smos so//a si bad da ka'i bu grong dpon zhig bcom ldan 'das kyi spyan sngar song ste phyin nas 'di skad ces gsol to/ /de bzhin gshegs pa ni gcig la thugs brtse bar gyur pa btsun pa rgyu gang lags rkyen gang lags zhes gsol pa dang / grong dpon de ni gnas med de ji srid du 'di lta ste/ ji ltar yang zhing pa khyim bdag gi zhing ni gsum yod de/ de la zhing dang po ni legs par rmos pa dang / legs par bdal zhing bsnyams pa dang / sa snum zhing 'jam pa dang / rtswa dang tsher ma med pa'o/ /gnyis pa ni legs par rmos pa ste dgon dung ngo / /gsum pa ni tshwa sgo can ma rmos pa'o/ /de la grong dpon zhing pa khyim bdag gis sa bon gang du 'debs par byed/snga ma ma gtogs par gzhan du ni ma yin te/ de med na ni gnyis pa'o/ /grong dpon de bzhin du de bzhin gshegs pas gdul bya'i bsam pa la ltos te/ chos ston pa la sogs pa'i bya ba mdzad par 'gyur ro zhes bya ba ste/ ji tsam na 'di gsungs so//gzhan dag na re 'od ma'i tshal na gnas brtan lam phran bstan las brtsams pa yin no zhes zer ro/ /gzhi dang bcas pa'i tshul khrims dang / sems dang lta ba rnam par dag pa dang / de'i 'bras bu 'dir bstan to zhes bya ba ni 'di'i bsdus pa'o/ /brtson 'grus ni kun nas slong zhing brtson 'grus rtsom pa ste/de med par ni mngon par 'dod pa'i 'bras bu mi 'thob bo/ /bag yod pa zhes bya ba ni don 'di la shes bzhin gyis gnas pa des sems srung ba ste/ bag yod pa des so/ /yang dag par sdom pa ni lus dang ngag yang dag par sdom pa ste/ des sdig pa la khyad du gsod pa las ldog pa yin no//dul ba dang zhes bya ba ni dbang po'i sgo bsrung ba des mig la sogs pa'i dbang po rnams yongs su 'dul ba ste/ gang yul gyis mi 'phrogs pa'o/ /dang gi sgra ni 'dis gling du byed pa yang yin no zhes pa'o/ /gling zhes bya ba ni mya ngan las 'das par rab tu 'jug pa'i phyir te/ de'i phyir mdo sde pa la las mya ngan las 'das pa'i rnam grangs su brjod de/'di ltar 'dus ma byas dang / blta bar dka' ba dang / mi 'gyur ba dang / mtha' yas pa dang / zag pa med pa dang / gnas dang / gling dang / skyob pa zhes rgya cher gsungs so/ /des byas pa ni mya ngan las 'das pa 'thob bo zhes bya ba'i don te/'dir byas pa ni theg pa la 'jug ste/ ji ltar gzhan dag tu bshad pa/ sdug bsngal mthar byed pa yin no zhes pa'o/ /mkhas pa zhes bya ba ni yul ji lta ba nyid la shes pa'i mkhas pa de gang la yod pa ste/ bden pa mthong ba zhes bya ba'i don to/ /chu bo chen po mngon du bzlog /ces bya ba ni gang de mkhas pas gling du byas pas ni zhes bya bas chu bo rnam pa bzhis zil gyis mnan par mi 'gyur zhing 'phrogs par mi 'gyur ro/ /'di skad ston pa yin te/ brtson 'grus phun sum tshogs pa ste/ 'phags pa'i nyan thos brtson 'grus phun sum tshogs pa la gnas pas bag yod par 'gyur zhing shes bzhin la gnas par 'gyur ro//bag yod pa la gnas pas ni nyes par spyod pa dang / kun nas nyon mongs pa la lus dang ngag gis yang dag par sdom par byed do/ /tshul khrims yongs su sbyangs pa'i phyir yul dang nyon mongs pa las dbang po 'dul bar byed do//sems yongs su sbyangs pa'i phyir dam pa rnams kyi sdom pa dang bcas shing / tshul khrims la sogs pa rnam par dag pa la brten nas gling du byed do/ /gang du nyon mongs pa zad pa thob na ni yang chu bo bzhis 'phrogs par mi 'gyur ro/ /brtson 'grus kyis ni brtson 'grus kyi dbang po bstan to//bag yod pas ni dran pa'i dbang po la nye bar gnas pa ste/ gang gi phyir dran pa yod na ni bag yod par 'gyur ro/ /yang dag par sdom pas ni yul la mched pa'i sems yang dag par sdom pa yin pa'i phyir ting nge 'dzin gyi dbang po bstan to/ /dul bas ni shes rab kyi dbang po bstan te/ gang gi phyir shes rab kyis sems yongs su 'dul bar byed do//ji ltar yang nyon mongs pas byas pa'i rnam par smin par yang mi 'gyur ro/ /mkhas pas gling du byas nas ni/ /zhes bya ba ni/ 'phags pa'i nyan thos de 'di la dad pas thar pa don du gnyer bas ni dbang po rnam pa bzhi 'bras bu dang bcas par bstan pa yin no zhes bya ba'i tshig gi rnam pa'i don to//de la 'di ni thar pa 'dod pa rnams kyis le lo la sogs pa'i skyon de spang bar bya ba'i phyir 'di gsungs so/ /ston gyi zla ba dri ma med pa las kyang lhag pa'i dri ma med pa'i grags pa ni bag yod pa nyid las 'thob par 'gyur ro zhes bstan pa'i phyir smras pa/brtson 'grus ldan zhing zhes bya ba la sogs pa smos so/ /grags pa 'dod pa'i rgyal po'i bu zhig bcom ldan 'das kyi spyan sngar 'ongs te/ kye gau ta ma gang gis grags pa 'phel bar 'gyur zhes gsol pa dang / de nas bcom ldan 'das kyis tshigs su bcad pa 'di gsungs so/ /gzhan dag na re rgyal po'i khab tu kun pa go sha zhes bya ba las brtsams te gsungs so zhes 'di la bsdus pa'i don ni brtson 'grus ldan zhing zhes bya ba ni brtson 'grus kyi dbang po'o//dran pa ni dran pa'i dbang po'o/ /spyod pa gtsang ba zhes bya ba ni ting nge 'dzin gyi dbang po ste/ gang gi phyir bsam gtan thob na ni tshul khrims yongs su dag go//brtags nas byed pa zhes bya ba ni shes rab kyi dbang po ste/ de'i dbang gis ni 'jig rten las 'das pa'i lam 'thob cing yang dag par sdom pa la sogs pa rnams kyis tshul khrims dang 'tsho ba dang sems shin tu yongs su dag par kun du bstan pa'i phyir ro/ / brtson 'grus gang la yod pa de ni brtson 'grus dang ldan pa ste/ brtson 'grus rtsom pa dang ldan pa'o/ /dran pa dang ldan pa zhes bya ba ni dran pa gang la yod pa de ni dran pa dang ldan pa'o/ /spyod pa gtsang ba dang ldan pa zhes bya ba la gtsang zhing dri ma med pa'i spyod pa'i tshul 'di la yod pa'o/ /brtags nas byed pa zhes bya ba ni brtags shing nges par rtog pa dang legs par spyod pa'i tshul gang 'di la yod pa ste/rtog par byed pa zhes bya ba'i don to/ /yang dag par sdom par byed pa zhes bya ba ni sdig pa las gtan du ldog pa dang / mi byed pa'i sdom pa thob pas 'phags pa'i gang zag gtan du yang dag par sdom par 'gyur ro//yang dag par sdom pa dag pa'i thabs bstan pa/ chos kyis 'tsho ba dang zhes bya ba la chos ni rigs pa ste/ des 'tsho ba'i ngang tshul 'di la yod pa de ni de lta bu ste shes rab kyis 'tsho bas so/ /yang na tshul 'chos pa la sogs pa log pa'i 'tsho ba spangs pa'o/ /bag yod rnams kyis zhes bya ba ni bag yod pa'i phyir gang yang 'byung bar mi 'gyur ba de ni 'dir don dam pas bag yod cing dgra bcom pa yin te/drug la rtag tu gnas pa yin no/ /grags pa mngon par 'phel zhes bya ba ni snyan pas srid pa gsum ma lus par khyab par 'gyur te/ ji skad du pa ri dza ka'i mdo las gsungs pa/ sum cu rtsa gsum pa'i lha rnams lha'i 'dun sa'i chos bzangs su 'dus shing 'khod nas yang dang yang du dge slong dgra bcom pa zag pa zad pa'i grags pa sgrogs pa'i tshul gyis 'dug go zhes so/ /grags pa khyad par du 'phags pa 'di lta bu 'dod pa rnams kyis bag yod pa la nan tan du sbyar ba'i phyir 'di gsungs so//bag yod pa ni yon tan thams cad kyi gnas yin pas gang spang ba'i dngos po de bstan pa'i phyir/ dman pa'i chos la mi rten cing / /zhes bya ba la sogs pa'i tshigs su bcad pa gnyis smos so/ /'di'i gleng gzhi ni log pa'i lta ba mchog tu kha na ma tho ba med pa la log par lta ba'i skyes bu gang zag gang yang lus kyi las la de ltar lta ba zhes bya ba la sogs pa rgya cher tshigs su bcad pa 'di gnyis gsungs so//gzhan dag ni dge slong zhig dman pa la mos shing le lo can zhig gi dbang du mdzad nas gsungs zhes zer ro/ /tshig rkang dang pos ni tshul khrims 'chal ba bzlog cing lhag pa'i tshul khrims la gzud pa yin no//tshig rkang gnyis pas ni 'dod pa'i yon tan dag la g.yeng ba las bzlog cing lhag pa'i sems la gzud pa'o/ /gsum pas ni phyin ci log gi lta ba la mchog tu 'dzin pa bzlog pa ste/ lhag pa'i shes rab la gzud pa yin no/ /bzhi pas ni bslab pa'i 'bras bu ston to zhes bya ba ni bsdus pa'i don to//yang na tshig rkang dang pos ni sdig pa spyod pa las bzlog pa'o/ /gnyis pas ni 'dod pa spyod pa las bzlog pa'o/ /gsum pas ni dka' ba spyod pa las bzlog pa yin te/ gang gi dka' thub kyis bdag nyid yongs su gdung bar byed cing 'dis yongs su dag par blta ba'o//bzhi pas ni de bsten pa'i nyes dmigs bstan to/ /yan lag gi don ni/ dman pa'i chos la mi rten cing / /zhes bya ba ni ngan par spyod pa lhag par mi byed pa 'dis ngan par spyod pa'i kun nas nyon mongs pa las bzlog pa yin no/ /bag med pa la brten mi bya/ /zhes pa ni bag med pa'i dngos po dang lhan cig mi rten cing mi 'brel bar bya ba ste/'dis ni yul la sred pa'i nyon mongs pa las bzlog pa yin no/ /log par lta la 'dod med dang / /zhes bya ba ni sdug bsngal la sogs pa gcod par byed pa/ lta ba ngan pa'i lta ba de la 'dod pa med pa ste/ /de'i yul la 'dod par mi bya ste/'dis ni lta ba'i kun nas nyon mongs pa las bzlog pa yin no/ /'jig rten 'phel bar mi bya'o/ /zhes bya ba ni 'jig rten sogs par mi byed pa ste/ gang gis 'jig rten 'phel ba ni skye ba gzhan du 'khor ba ste/ rgyu dang 'bras bu rgyun chags par 'byung bas so/ /'jig rten ni nye bar len pa'i phung po lnga'o zhes bstan to//de yang 'jig cing rab tu 'jig pa yin pas 'jig rten no/ /'phel bar bya ba ma yin pa ni 'phel bar mi bya'o/ /'jig rten gyi 'phel ba ni 'jig rten 'phel ba'o/ /de la 'dis ni kun nas nyon mongs pa gsum spang zhing yongs su sbyor bar bstan pa yin no//de dag yongs su ma spangs na ni 'khor ba 'phel bar 'gyur la yongs su spangs na ni 'phel bar mi 'gyur ro zhes bstan to/ /yang na dman pa zhes bya ba ni 'jig rten dang 'jig rten las 'das pa ste/ nyan thos la sogs pa'i lam ni gzhan gyi don byed par 'dod pa spangs pa'i phyir ro/ /bag med pa zhes bya ba ni de spong ba'i lam gyi gnyen po dang bral ba nyid du ston to//log par lta la zhes bya ba ni skyon thams cad rtsa ba nas 'byin pa la gzud pa'o/ /de lta na ni 'dir phan 'dogs pa nyid du nye bar bstan pa'i phyir smras pa/ 'jig rten 'phel bar mi bya'o/ /zhes bya ba yin no/ /'khor ba yongs su spong bar 'dod pas ni ji skad du bshad pa spyad par mi bya'o zhes yang dag par 'dzin par byed du gzhug pa'i phyir 'di gsungs so//gang sngar bshad pa'i/ log par lta la 'dod med dang / /zhes bya ba de dang por gang gis sel ba yin zhe na/ 'jig rten pa'i yang dag pa'i lta bas yin te/ des na de nyid bstan pa'i phyir smras pa/'jig rten pa yi yang dag lta/ /zhes bya ba la sogs pa smos te/ re zhig 'jig rten pa'i yang dag pa'i lta ba yang mthu 'di lta bu yod de/ 'di ltar ngan song gsum du ltung ba 'gog par byed pa yin na/ 'jig rten las 'das pa lta smos kyang ci dgos so zhes phan yon bstan pa ni 'di'i bsdus pa'i don to//phyin ci ma log pa la 'jug pa'i lta ba ni yang dag pa'i lta ba ste/ gang so so'i skye bo'i dge ba gang mthong ba'i dbang gis las dang / 'bras bu yod pa nyid las brtsams te/ dkon mchog gsum dang bden pa rnams la yid ches shing mos pa dang 'dod pa'o/ / chen po zhes bya ba ni shas che ba dang ldan pa ste/ mdor na khyad par gyi gnas skabs thob pa'i don te/ de'i phyir dro bar gyur pa yang dag par 'dzin pa ni tha ma'o/ /rtse mo yang dag par 'dzin pa ni bar ma'o/ /bzod pa yang dag par 'dzin pa ni chen po'o/ /'jig rten pa nyid yin pas 'jig rten pa'o ste zag pa dang bcas pa'o//gang gi gnas skabs kyis 'jig rten pa'i yang dag pa'i lta ba chen po yin zhe na/ smras pa/ 'di lta ste so so'i skye bor gyur pa 'di la 'phags pa'i bden pa bzhi la bzod pa chen po yod pa ste/ de yang nges par 'byed pa'i cha'i bzod pa thob pa'i so so'i skye bo zhes brjod do//su la zhes bya ba ni gang zag go/ /yod par gyur pa zhes bya ba ni rgyud la yod pa'o/ /de ni tshe rabs stong du yang / /zhes bya ba ni 'khor ba na 'khor ba'i skye ba stong phrag du yang 'jig rten pa'i yang dag pa'i lta ba chen po thob par gyur pa de ni ngan 'gror 'gro bar mi 'gyur te/ ngan song gsum du skye bar mi 'gyur ba nyid de/de ni des na so sor brtag pa'i 'gog pa thob par gyur pa'i phyir te/ bzod thob ngan song gsum du mi ltung ngo / /zhes pa'i lung gis so/ /ngan song gis 'jigs shing lam ngan pa la zhugs pa'i 'jig rten pa rnams la yang dag pa'i lta ba'i phan yon bstan pas gzud pa'i phyir 'di gsungs so/ /gang gi phyir yang bag med pa dang /bag yod pa gnyis nyes dmigs dang phan yon dang ldan pa 'di lta bu yin pas bag yod pa nyid 'dzin du gzhug pa'i phyir smras pa/ lhag pa'i sems la bag bya ste/ /zhes bya ba la sogs pa'o/ /yang dag par rdzogs pa'i sangs rgyas 'od srungs kyi nyan thos rab tu mang po snyoms par 'jug pa'i ro la myong bar byed cing gnas pa las de'i dbang du mdzad nas so sor thar pa mdor bsdus pa'i tshigs su bcad pa 'di gsungs so//gzhan dag ni rgyal byed kyi tshal na dge slong glo bur du 'ongs pa zhig shin tu bag med pa'i dbang du mdzad de 'di gsungs so zhe'o/ /'dir bsdus pa'i don ni tshig rkang dang pos ni tshul khrims dang ldan zhing mang du thos la thos pa tsam gyis chog par 'dzin cing shes rab kyi tshogs kyi bya ba dang ldan pa dag lhag pa'i sems kyi bslab pa la sbyor ba yin no//tshig rkang gnyis pas ni tshul khrims yongs su dag cing mi lhod pa dang / lhag pa'i sems kyi bslab pa bsgom par 'gyur ba'i phyir lhag pa'i tshul khrims kyi bslab pa la sbyor ba'o//lhag mas ni de ltar slob pa'i 'bras bu'i phan yon bstan to/ /lhag pa'i sems zhes bya ba la/ sems lhag pa yod pa ni lhag pa'i sems so/ /lhag pa'i sems las ni bsam gtan 'byung ngo / /gang gi phyir bsam gtan gyis ni sems dbang du 'gyur ro//yang na gang la lhag pa'i sems yod pa de ni lhag pa'i sems so/ /bag bya ste zhes bya ba ni bag med pa mi byed pa'o/ /ji ltar na lhag pa'i sems la bag bya ba yin zhe na/ gal te sems rtse gcig pas yang dag pa'i yid la byed pa skyes par gyur pa de la ni mya ngan med pa yin zhes bya ba 'di dang sbyar ro//'dis ni dge slong bsam gtan gyi ro myong bar byed pa zlog par byed pa yin te/ de'i bde ba ni chags pa'i gnas yin pas bag med par byed pa'i phyir ro/ /thub pa'i zhes bya ba ni thub pa zhes bya ba'i don to/ /des nye bar bstan pa'i phyir thub pas zhes bya ba yin no//gang thub pas bstan pa ni mi g.yo ba yin te/ gang blo dang ldan pa thub pas bstan pa'i tshul lo/ /'dod chags dang zhe sdang dang gti mug spangs shing bral bar gyur pa yin no zhes bstan pa ni don dam pa'i thub pa ste thub pa'i dbang po'o/ /de lta na ni dgra bcom pa thams cad kyang thub pa yin no zhe na/sangs rgyas bcom ldan 'das ni thub pa chen po'o zhes bstan pas so/ /thub pas gsungs pa'i gzhi ni thub pa'i gzhi ste/ de yang bcom ldan 'das kyis bcas pa'i bslab pa'i gzhi rnams so/ /thub pa nyid yin pas thub pa ste de'i gzhi 'di dag go/ /de dag la rab tu gnas na ni thub pa'i dngos po dgra bcom pa nyid thob par 'gyur ro//bslab ces bya ba ni brtson pas bya ba ste/ da ltar byung ba'i thub pa'i gzhi dag la'o/ /mya ngan med pa yin zhes bya ba ni yid kyi gdung ba de la mi skye ba nyid de/ 'di la nyon mongs pa'i skyon med pa dang / nyon mongs pa spangs pa'i phyir ro/ /ji lta bu la 'dir mya ngan med pa yin zhe na/smras pa/ skyob pa zhes bya ba ste rnam par grol bas chos yongs su ma nyams pa'o/ /nye bar zhi ba zhes bya ba ni nyon mongs pa dang bral ba las/ lhag par nye bar zhi ba thob pa'o/ /'dis ni nyon mongs pa spangs pa phun sum tshogs pa bstan to/ /rtag tu dran ldan pa zhes bya ba ni rtag tu dran pa mngon du byas pa ste/dran pa nyams pa med pa'i chos yin pa'i phyir dang / drug la gnas pa'i phyir ro/ /tshul khrims la brten nas ting nge 'dzin bsgoms pas mngon par 'dod pa'i don thob pa de la gzud pa'i phyir 'di gsungs so/ /khyad par rig pas bag yod pa la 'bad par bya ba yin te/'di ltar/ bag med pa la sbyor byed pa/ /zhes bya ba la sogs pa'i tshigs su bcad pa gnyis gsungs so/ /mnyan yod na ded dpon gnyis yod de/ gcig ni phyug cing nor mang ngo / /gcig ni nor nyung ba zhig yod do/ /ji tsam na nor mang shos ni bud med dang rgyan po la sogs pa la chags pas 'byor pa zad par gyur te/slong mo'i 'tsho ba la zhugs so/ /cig shos kyis ni brtson 'grus la gnas par byas te/ rgya mtshor 'gro ba la sogs pa'i rim gyis nor nye bar bsags te/ 'byor ba dang bde ba phun sum tshogs par gyur to/ /de lta bu'i gtam rgyal po gsal rgyal gyis bcom ldan 'das la gsol to//bcom ldan 'das kyis kyang de'i dbang du mdzad nas 'di gsungs so/ /de la 'dir tshig rkang dang pos log par bsgrub pa bstan to/ /gnyis pas ni log par bsgrub pa'i rgyu bstan to/ /lhag mas ni yang dag par bsgrub pa de'i rgyud dang de'i dpe bstan pa ni 'di'i bsdus pa'i don to//bag med pa zhes bya ba ni bya ba nan tan du bsgrub pa la yal bar dor bas nye bar mtshon pa'i sems las byung ba'o/ /sbyor byed pas zhes bya ba ni rjes su 'gro ba ste/ dge ba dang mi mthun pa'i chos bsten pas zhes bya ba'i don to/ /'dis ni log par bsgrub pa bstan to/ /byis pas ni rmongs pa ste 'dis ni mi shes pa dang ldan par bstan to//bsam brlag ces bya ba 'dis ni log par shes pa dang ldan par bstan to/ /kha cig na re mi shes pa las ni bag med pa 'byung ste/ chos ma thos pa'i phyir ro/ /kha cig na re log par shes pa las bag med pa 'byung ste/ chos log par thos pa'i phyir dper na bram ze bu 'dod pa'i phyir tshangs par spyod pa byed pa dang /mtho ris 'dod pa'i phyir phyugs gsod cing rig byed 'don pa dang / tshig kyal pa smra bar byed pas bdag ni bag yod pa yin no snyam pa dang / gcer bu pa dag thar pa 'dod pa'i phyir shin tu dka' ba'i dka' thub la sogs pa spyod pa yin no/ / skye bo zhes bya ba ni skye ba'i chos dang ldan pa'i phyir 'gro ba thams cad de/ yongs su ma smin pa'i sems can gyi tshogs ston pa yin no/ /mkhas pas bag dang ldan par bya/ /zhes bya ba ni sngar bshad pa'i mtshan nyid kyi bag med pa de mkhas pas bsrung bar bya ba'o/ /dang gi sgra ni khyad par te/ byis pa las mkhas pa khyad par gyi las la brten pas khyad par du byed pa'i phyir ro//'di ltar byis pa ni bag med pa la gzhol bar 'gyur te/ 'di ni bag yod pa'o/ /mkhas pa gang la yod pa de ni blo dang ldan pa ste/ phyin ci ma log par shes pa zhes bya ba'i don to/ /ji lta bur bag yod pa 'di ni bsrungs pa yin zhe na/smras pa/ tshong dpon ltar zhes bya ba smos te/ ji ltar zhes pa dang / rin che ba'i nor zhes kyang 'di dang sbyar te/ dbyig dang gser dang nor bu la sogs pa ni nor te/ dper na 'byor ba 'dod pa'i skyes bus nor bu rin po che la sogs pa bsags pa byas nas/ yongs su srung bar byed pa de bzhin du mkhas pa bag yod pa bsrung ba yin te/bdag gi dad pa'i dbang po la sogs pa las yongs su nyams par mi 'gyur ro/ /de la 'di ni byis pa dang mkhas pa'i mtshan nyid la kun du rmongs pa rnams la de bstan pa'i phyir dang / rab tu chags pa rnams bag yod pa la gzud pa'i phyir gsungs so//des na yang de nyid la gzud pa'i phyir/ bag med pa la mi sbyor zhing / /zhes bya ba la sogs pa smos so/ /tshig rkang dang pos ni ngan par spyod pa'i kun nas nyon mongs pa bzlog pa yin no/ /gnyis pas ni 'dod pa'i kun nas nyon mongs pa las bzlog pa yin no/ /gsum pas ni snyoms par 'jug pa'i kun nas nyon mongs pa las bzlog pa yin no//snyoms par zhugs pa'i kun nas nyon mongs pa yang rnam pa gnyis te/ ro myang ba dang / rtag tu sgom par mi byed pa'o/ /de la bag yod pa zhes bya ba ni ro myang ba ma yin par bstan to/ /rtag tu sems byed pa zhes bya bas ni rtag tu bsgom pa nyid du bstan to//zag pa zad pa thob par 'gyur/ /zhes bya ba ni/ kun nas nyon mongs pa gsum las rnam par grol ba'i phan yon bstan to/ /yang na tshig rkang snga ma gnyis kyis ni zag pa zad pa dang 'gal ba'i chos las bzlog pa yin no/ /'og ma gnyis kyis ni zag pa zad pa thob par byed pa'i chos la yang dag par sbyor ba yin no//bag med pa la mi sbyor zhing / /zhes bya ba ni bag med pa'i skyon 'di lta bu'o zhes rtogs nas rjes su mi 'jug pa ste/ dge ba'i chos mi bsgom pa'i tshul gyis le lo las ldog pa'o/ /'dod la dga' ba mi sogs dang //zhes bya ba ni/ 'dod pa'i dga' ba dang mtshungs par ldan pa'i yid bde ba ni yid dga' ba'o/ /de la sogs pa ni 'brel ba dang 'dris pa ste/ 'dir yang mi sbyor zhing zhes bya ba rjes su 'brang ngo / /'dod pa la dga' bas byas pa'i mtshungs par ldan pas gnas pa las bzlog pa'o/ /rgyu gnyis kyis sangs rgyas kyi bstan pa la byung bar gyur kyang zag pa zad pa las ring du gnas pa yin te/le lo dang dge ba'i chos bsgom pa na 'dod pa la dga' ba bsten pa ste/ gang de thob pa la 'gal ba'i chos bsten pa des na de nyid kyi phyir gnyis po de las ldog pa yin no/ /ji ltar zhe na/ 'di ltar bag yod ces bya ba smos te/gang bag med pa la mi sbyor zhing brtson 'grus rtsom pa zhes bya ba'i don to/ /rtag tu sems byed pa zhes bya ba ni rtag tu bsgom pa'i ngang tshul 'di la yod pa ste/ zhi gnas dang lhag mthong gi tshul gyis rgyun mi 'chad par bsgom pa la 'jug cing mi mthun pa'i phyogs sel bar byed pa yin te/gang 'dod pa la dga' ba la sogs pa la mi sbyor ba de zhes bya ba'i don to/ /thob par gyur pa ni phyin par 'gyur ba'i don to/ /zag pa zad pa ni nyon mongs pa zad pa ste dgra bcom pa nyid do/ /de thob par gyur na ni zag pa gsum zad par 'gyur ro/ /de la tshigs su bcad pa 'di ni thar pa 'dod pa la le lo che ba dang /yul la mngon par dga' ba rnams la de'i gnyen po la gzud pa'i phyir gsungs so/ /gang gi phyir bag yod pas zag pa zad pa thob pa yin te de'i phyir smras pa/ zag pa zad pa ma thob kyang / /zhes bya ba smos so/ /bcom ldan 'das nyan thos kyi tshogs dang dgon pa dag tu rgyu zhing gshegs pa las ri dwags kyi ma zhig gis g.yang sa nas ltung ba'i seng ge ral pa can srog dang ldan pa'i mig gnyis phyung ba gzigs nas bag med pa'i dge slong dag gi dbang du mdzad de 'di gsungs so//'di'i bsdus pa'i don ni tshigs bcad snga ma phyed kyis ni lam rnam par nyams par ston to/ /'og ma phyed kyis de rnam par nyams pa'i 'bras bu ston to//dus 'dir bag med mi bya ste/ /zhes bya ba ni mi khom pa brgyad spangs pa'i mi'i lus 'di ni 'dir khom pa zhes bya ba'i don to/ /de yang bag med pas yal bar dor zhing 'bras bu med par bya ba ni mi rigs te/ gang yod par gyur zhe na/ ma thob kyang zhes bya ba smos te/ma rtogs kyang ngo / /zag pa zad pa zhes bya ba ni khams gsum gyi nyon mongs pa spangs pa'o/ /dper na rin po che'i gling nas 'ongs la rin po che bsags pa ma byas pa ni rab tu dga' bar byas pa ma yin pa de bzhin no/ /de la 'dis ni zag pa zad pa thob par bya ba'i phyir/ bag yod pa bsgom pa la gzud pa yin te/ci'i phyir zhe na/ bag med pa dag bsad par 'gyur/ /zhes smos te/ dge ba'i chos srog dang 'dra ba 'dis gsod pa yin pas nyams par byed ces bya ba'i don te/ 'chi bdag dang nyon mongs pa la sogs pas so/ /bag med pa rjes su 'brang ba zhes bya ba ni gsod pa'i phyir rjes su 'gro ba yin te/'dir dpe bstan pa/ ri dwags ma yis seng ge ltar/ /zhes bya ba ste/ ri dwags kyi mas gsad pa'i phyir seng ge'i rjes su 'brang ba bzhin no/ /ri dwags kyi ma zhes bya ba'i rigs yod de/ de seng ge'i rjes su 'brangs nas lces bldag cing de ltar bde bar byed do/ /ji tsam na de gnyid shin tu stug pos non te gnyid log pa de'i tshe mig gnyis 'dru bar byed pa yin no//'di ltar seng ge de yang bag med pa'i gnyid kyi rjes su 'gro bas nyams pa yin na/ ri dgas gzhan lta smos kyang ci dgos/ de lta de ltar stobs dang ldan pa'i dge ba'i rtsa ba la rab tu gnas pa seng ge dang 'dra ba'i slob pa dang mi slob pa'i gang zag kyang bag med pa'i nyon mongs pa'i bdud rjes su 'brang nas ye shes kyi mthong ba nyams par byed na/so so'i skye bo'i yon tan nyams par byed pa lta smos kyang ci dgos/ 'chi bdag gi bdud kyis bya ba ma byas pa'i slob pa dag kyang bag med pas gsod par byed na/ 'dod chags dang zhe sdang dang gti mug dang le lo dang log pa'i chos ma spangs pa dang /de'i gnyen po dge ba'i chos ma bsgoms pa'i byis pa rnams lta smos kyang ci dgos/ gzhan dag tu ni/ ri dgas ma yis seng ge ltar/ /zhes brjod de/ ri dgas ma ni ri dwags mo ste/ seng ge bza' ba'i ched du rjes su 'brang ba de bzhin du bag med pa'i bdud do//de la 'di ni bag med pa'i skyon bstan pas bag yod pa la gzud pa'i phyir gsungs so/ /bag med pa'i nyes dmigs ni/ bag med pha rol zhes bya ba la sogs pa smos so/ /rgyal po'i khab na gzhan gyi bud med la 'gro ba'i skyes bu gzhan gyi chung ma dang dga' bar spyod cing 'dug pa la rgyal po'i skyes bus bzung nas ma skyes dgras gshed ma la gtad de/lag pa dang rkang pa dang skyes pa'i dbang po dang phral nas dur khrod kyi gnas su bskyal lo/ /de bkres pa dang skom pa la sogs pas nye bar gdungs bzhin du de nas shi ba'i dus byas te dmyal bar skyes pa de'i dbang du mdzad nas 'di gsungs so//gzhan dag ni mgon med zas sbyin gyi snag gi tsha bo k+She ma ka zhes bya ba'i tshong dpon gyi bu las brtsams pa yin no zhes zer ro/ /gzhan gyi bud med la chags pas ni nyes pa rnam pa bzhi 'thob par 'gyur te/ 'di lta ste rang gi las dang / gzhan gyi chung ma dang / 'jig rten 'di dang / 'jig rten pha rol nas go rims bzhin du bsod nams ma yin pa'i las sogs par bstan pa yin no zhes bya ba ni bsdus pa'i don to/ /gnas skabs zhes bya ba ni gnas kyi nyes dmigs zhes bya ba'i don te/ 'dir sdug bsngal bas gnas pa ni gnas skabs yin te/de yang sdug bsngal ba'i bdag nyid kyi nyes dmigs tshigs bcad 'og mas gsal bar byed par 'gyur ro/ /bzhi zhes bya ba ni bde blag tu khong du chud par bya ba'i phyir grangs smos so/ /mi gang yin zhes bya ba ni 'dod chags can gyi sems can no//bag med pa ni mchog tu bag med pa yin te/ gang gi phyir bag yod pas ni skyon 'di dag mi 'thob po/ /'byung zhes bya ba ni 'thob par 'gyur ba'o/ /mi gang gis 'di dag thob par 'gyur zhe na/ smras pa/ pha rol bud med sten byed pa'i/ /zhes bya ba ste/ mi gang zhig gis gzhan gyi bud med la spyod cing /gzhan gyi chung ma la 'khyud par byed pa'i rang bzhin can byi po byed pa zhes bya ba'i don to/ /de nyid la gnas skabs 'di dag bstan pa yin no/ /bsod nams mi thob ces bya ba la bsod nams med pa ni bsod nams ma yin pa yin te/ ngan par spyod pa'o/ / de thob pa ni rnyed pa ste re zhig 'di ni gnas skabs dang po'o/ /bde bar mi nyal dang zhes bya ba smos pa la/ bag med par nyal po byed pa ni 'jol nyog gi bde ba'o/ /de la nyal ba ni rjes su myong ba ste/ rgyu la 'bras bu btags pa yin pas sman pa bsten pa'i bde ba lta bu'o/ /bde bar nyal ba ma yin pa ni bde bar mi nyal ba ste/bde blag tu 'dod pa nye bar longs spyod pa ma yin pa'o/ /'di ni gnas skabs gnyis pa yin no/ /gsum pa smad 'gyur zhes bya ba ni 'jig rten thams cad kyis smad pa'o/ /gsum tshang ba yin pas gsum pa'o/ /bsod nams mi 'thob pa ni dang po yin la/ bde bar mi nyal ba ni gnyis pa'o zhes ci'i phyir ma bstan zhe na/smras pa/ gdul bya dbang po tha ma la phan gdags pa'i phyir 'di ltar bstan pa yin te/ de yang gcig bstan pas gnyis grangs ma smos pa yang 'dzin par nus te/ lhag pa ni ma yin no zhes 'dzin par nus pa yin te/ des na de ltar byas so//yang na bshad pa'i rnam grangs bstan pa'i phyir te/ grangs dang bcas pa ni dbang po zhan pa la bstan to/ /grangs med pa ni dbang po rno ba la bstan to/ /bzhi pa dmyal bar 'gyur zhes bya ba ni dmyal ba ni ngan song gsum mo/ /'byung zhes bya ba ni 'dir yang rjes su 'breng ngo / /rna ba bye ba ri'i rtogs pa brjod pa las shan pa dang /byi bo byed pa mthong ba yang 'dir dper brjod par bya'o/ /gzhan gyi bud med la chags pa'i gang zag dag de las skyo ba bskyed pa'i phyir 'di gsungs so/ /tshigs bcad snga mar bshad pa'i gzhan gyi bud med la brten pa'i nyes dmigs kyi skyon de nyid bstan pa'i phyir smras pa/bsod nams ma thob ces bya ba la sogs pa smos te/ 'di dang pha rol gnyi ga la skyon dang bcas pa yin no zhes bstan pa ni 'di'i bsdus pa'i don to/ /bsod nams ma thob par gyur na sdig pa'i 'gro bar los kyang skye bar 'gyur te/ gang gi phyir bsod nams ma thob pa dang /de dang 'brel bas ni bdag la gnas skabs ngan pa'i 'gro ba yin no zhes bstan pa'i phyir dang gi sgra gnyis smos so/ /dper na lhas char phab pa dang lo tog kyang skye'o zhes bya ba lta bu'o/ /'di ni re zhig bsod nams ma yin pa 'thob pa'i skyon no/ /'jigs pa dang zhes bya ba ni rang gi rgyud la 'jigs pas g.yen spyo ba ste/skyes bus 'jigs pa des bud med dang lhan cig bde ba chung ba yin te/ nye bar longs spyod pa'i bde ba chung ba yin no/ /'di ni bde bar mi nyal ba'i skyon bstan to/ /rgyal po zhes bya ba ni mi'i bdag po ste/ yul gyi rje'o/ / chad pa chen po zhes bya ba ni yan lag bcad pa la sogs pa'i chad pa chen po'o/ /gcod par 'gyur ba ni byed par 'gyur ba'o/ /dang gi sgra ni thams cad du yang bsdu ba'i don te/ 'di dang 'di'i skyon yin no zhes mtshon pa yin no/ /'di ni smad 'gyur zhes bya ba ni skyon bstan pa yin te/ 'jig rten thams cad kyis smad par 'gyur na de'i gtam rgyal pos thos nas chad pas gcod par 'gyur ro//lus zhig ces bya ba ni ris mthun pa chad pa'i 'og tu'o/ dmyal ba rnams su 'tshed ces bya ba ni yang sos la sogs pa'i dmyal ba'i mes nya chu tshan gyi nang du 'dus pa bzhin du 'tshed pa'o/ / 'di ni dmyal bar 'gro ba'i nyes dmigs kyi skyon bstan pa yin no/ /'dod pas log par g.yem pa la chags pa dag bzlog pa'i phyir 'di gsungs so/ /bag yod pa ni phun sum tshogs pa thams cad kyi gzhi yin pas de la gzud pa'i phyir gang zhig bdag bde zhes bya ba la sogs pa smos so/ / bcom ldan 'das sa ke ta'i a na'i nags na bzhugs te/ de nas bcom ldan 'das dge slong rab tu mang po dang thabs cig tu sa ke ta'i grong khyer du bsod snyoms kyi phyir gshegs so/ /de'i tshe gzhan zhig shing rta lam bzang po bor nas lam log pa dag tu song ste/ shing rta'i srog shing chag par gyur nas/de nas lam bzang po bor ba de phyogs gcig tu 'dug ste/ sems khong du chud pa bcom ldan 'das kyis gzigs nas/ shing rta pa de la rgya cher tshigs su bcad pa gsum po 'di gsungs so/ /de la dang po re zhig bshad par bya ste/ gang zhig bdag bde zhes bya ba ni brten pas phan pa nyid du rtogs pas nan tan du byas la gzhan thams cad spangs nas der bdag med par ni mi bya ste/shing rta ba de bzhin du sdug bsngal bsten par 'gyur ro zhes bya ba ni gang bdag la phan 'dogs par 'dod pas brtag par bya zhing shes par bya ste/ gang dang gang phan 'dogs par byed pa ste/'di dang gzhan dang mya ngan las 'das pa la bdag nyid kyi phan 'dogs pa la lta zhing de dang de nyid dang por bag yod par bya ba la dmigs par byas la mkhas pas de la bag med pas 'jug par ni mi bya ste/ nor gyi ched dang dge ba byas pa la le lo mi bya'o/ /bdag gi phan pa grub na ni gzhan la phan pa yang de la rag las shing des 'grub pa yin pas gzhan la phan pa ni ma bshad do//'dir dpe ni mi mthun pa'i chos kyi dpe bstan pa yin te/ shing rta ba bzhin zhes bya ba smos te/ shing rtas nyo tshong byed pa ni shing rta ste tshong pa'o/ /ji ltar 'di bag med pas mig 'bru mar gyis bskus te/ lam bzang po bor nas lam log par song ba las srog shing chag par gyur to sems khong du chud pa de bzhin du'o//shing rta ba yang ji lta bu zhe na/ smras pa/ byis pa zhes bya ba smos te blun po'o/ /rmongs pa med par ni bya ba rnams la brtson 'grus zhan par mi 'gyur ro/ /bstan pa zhes bya ba ni sgyid zhan pa med pa ste/ gang bdud dang g.yul 'gyed par 'dod pa yon tan dang /skyon gyi bye brag shes pa dang brtan pa'i phyir ro/ /brtson 'grus zhan mi bya zhes bya ba smos te/ mi bya ba zhes bya ba ni sgyid zhan pa dang 'bad pa chung bar mi bya'o zhes bya ba'i don to/ /yun ring du 'dug pa dang bag med par gnas pa bag yod pa la gzud pa'i phyir gsungs so//dpe de nyid tshigs su bcad pa gnyis kyis gsal bar bstan pa'i phyir smras pa/ dper na byis pa'i shing rta dag /ces bya ba la sogs pa smos te/ de la 'dir/ de bzhin chos ni spangs nas kyang / /zhes bya ba tshigs bcad kyi phyed dang pos ni bag med pa'i ngo bo nyid bstan to/ /byis pa zhes bya ba 'dis ni bag med pa'i gzhi bstan te/rmongs pa ni bag med pa'i rgyu yin pa'i phyir ro/ /lhag mas ni bag med pa'i nyes dmigs bstan to/ /tshigs bcad snga mas ni mthun pa'i chos kyi dpe bstan to zhes bya ba ni 'dir bsdus pa'i don to/ /dper na zhes bya ba ni ji ltar ro/ /byis pa zhes bya ba ni shes rab nyam chung ba'o//bzang po zhes bya ba ni skye bo mang po rgyus shing rdo dang tsher ma la sogs pa'i skyon dang bral ba'o/ /bor nas zhes bya ba ni spangs nas so/ /lam chen zhes bya ba ni lam yangs pa ste/ rgyal po'i lam srang zhes bya ba'i don to/ /lam ngan dag tu 'gro byed pa/ /zhes bya ba ni rdo dang tsher ma dang rdul la sogs pa'i skyon dang ldan pa'i lam la brten cing gnas pa'o//mig chag ces bya ba mig 'di la chag pa yod pa ni mig chag ste/ shing rta'i 'khor lo chag ces bya ba'i don to/ /khong du chud pa zhes bya ba ni khong du chud cing mya ngan byed pa'o/ /ji lta bur khong du chud pa yin zhe na/smras pa/ sems khong du chud pa zhes bya ba yin te/ yid mi bde ba 'di la yod pa de ni sems khong du chud pa ste/ yid mi bde ba'i mes gdungs pa zhes bya ba'i don to/ /'di skad du bstan pa yin te/ rmongs pas gang gi shing rta dang bral bas skyon thams cad 'byung ba ste/ rgyal po'i lam srang bor nas shin tu ngan pa'i lam bsten pas gang las gnod pa 'di lta bu 'byung zhing shing rta mig chag par gyur pa de'i gso ba mi shes pa yin te/des rgyud gdung bar byed cing de sems pa yin pa ltar/ de bzhin spangs nas kyang zhes bya ba smos te/ de ltar bor ba'o/ /gang spangs pa yin zhe na/ chos zhes bya ba smos te/legs par spyod pa dang bde 'gro dang thar pa'i thabs zhes bya ba'i don to/ /chos min rjes su 'jug byed pa/ /zhes bya ba ni ngan par spyod pa yang 'di lta bu yin te/ gang du ltung ba'i rgyu la nan tan gyis byed pa'o/ /de gang yin zhe na/ smras pa/ byis pa ste blun pa'o/ /'chi bdag dbang 'gro zhing zhes bya ba ni 'chi ba'i rjes su 'gro zhing 'chi bdag la rag las pa'o//dper na byis pa'i shing rta lta bu ni bag med pa'i chos la gnas pa'i gang zag yin no/ /ji ltar lam chen po bzang po lta bu ni bde 'gror 'jug cing 'brel ba'i chos yin no/ /ji ltar lam ngan par 'gro ba lta bu ni chos ma yin pa'o/ / ji ltar shing rta lta bu ni de dang des skyes pa'i bdag gi dngos po'o/ /ji ltar lam chen po bzang po bor nas lam ngan pa dag tu 'gro bar byed pa'i shing rta lta bu ni 'di la nang gi chos spangs nas chos ma yin pa la 'jug pa'i gang zag go/ /ji ltar de mig chag cing sems yongs su gdung ba ste/ da ji ltar bya zhes sems khong du chud cing yid la gcags te/de gso ba mi shes pa de bzhin du bag med pa la gnas pa'i gang zag 'chi bdag gi dbang du 'gro ba na yang des spang bar mi nus shing yid la gcags par gyur nas bcom pa 'thob pa ste/ rnam par nyams par 'gyur zhing mngon par 'dod pa'i 'bras bu ma thob pa'i phyir dang /mtha' med par ltung ba'i phyir ro/ /ji lta bur bcom pa yin zhe na/ smras pa/ mig chag bzhin du zhes bya ba smos te/ mdor bsdus pa la dga' ba'i sems can rjes su gzung ba'i phyir yang rgya cher ma bstan te/ dpe ni mdor bsdus pa yin no/ /yang na dpe des 'dul ba dag la rjes su gzung ba'i phyir ro//yang na dpe 'di ni snga ma'i khyad par yin pa'i phyir ro/ /'di ji lta bur 'chi bdag gi dbang du 'gro zhing bcom pa yin zhe na/ mig chag ces bya ba smos te/ chag cing 'gag pa'i mig dang dbang po gang yin pa ste/ mig la sogs pa'i dbang po nyams pa zhes bya ba'i don te/'chi ba'i dus su rim gyis mig la sogs pa'i dbang po 'gag pa yin no/ /de bzhin du zhes bya ba ni de nyid kyi don te bcom pa nyid do/ /yang na bzhin zhes bya ba'i sgra ni cig car 'chi ba nyid du ston pa'i phyir te/ der yang ngan song du ltung bas bcom pa nyid do/ / gnod pa thams cad kyi rgyu bag med pa spang ba la gzung ba'i phyir 'di gsungs so/ /bag med pa'i 'bras bu ni zag pa 'phel ba dang thar pa shin tu thag ring ba yin pas de bstan pa'i phyir/ gang zhig bya ba rnams spangs nas/ /zhes bya ba la sogs pa smos so/ /rgyal po'i khab na lha sbyin gyis 'od srungs stobs bcu pa las bsgrubs te/de'i rdzu 'phrul gyi lam gyis brtul zhing rdzu 'phrul gyis gzhon nu ma skyes dgra rnam pa sna tshogs kyis dga' bar byas nas/ de'i dpung gis bya ba ma yin pa rnam pa du ma byas te/ 'di lta ste dge 'dun gyi dben pa dang / bcom ldan 'das bgrongs pa'i phyir sgyogs 'phangs pa dang /glang po che smyon pa nor skyong zhes bya ba btang ba la sogs pa byas te de'i dbang du mdzad nas 'di gsungs so/ /'dir bsdus pa'i don yang nyams pa rnam pa gnyis te/ kun 'byung gi bden pa 'phel zhing 'gog pa'i bden pa dang ring du gyur pa dang / de'i rgyu bya ba ma yin pa byed pa yongs su bstan pa yin no//gang zhig bya ba zhes bya ba ni bsgrub pa'i las te/ dran pa nye bar gzhag pa bzhi bsgom pa la sogs pa'o/ /yang na lus su gtogs pa dran pa ste ji skad du gsungs pa/ chos gcig bsgom par bya ste/ 'di lta ste lus su gtogs pa dran pa'o zhes pa'o/ /rnams spangs zhes bya ba ni bstsal ba ste des nges par bya ba'o//mi bya ba dag byed pa dang / /zhes smos te/ dge 'dun gyi dbyen la sogs pa'i gleng gzhi dang sbyar bar bya'o/ /yang na sred pa rnam pa bzhi bskyed pa yin te/ ji skad du gsungs pa/ chos gos kyi phyir sred pa bskyed cing rab tu gnas pa dang /ji srid du zas dang gnas mal dang 'khor ba'i 'byor ba'i ched du'o/ /kye ma zhes bya ba ni thugs brtse ba yin te/ rjes su mi mthun pa'i tshul gyis spyod cing bag med pa de la thub pa'i dbang po rnams thugs brtse bar mdzad do/ /gang yang de ltar byed pa de'i nyes dmigs bstan pa'i phyir/rlom byed pa zhes bya ba smos te/ mtho ba dang bsnyems shing log par spyod pa ste/ gang yang mi bsten zhing nga rgyal che la spyod pa log pa de thams cad ni bya ba ma yin pa bsten par 'gyur te/ 'dis ni bya ba ma yin pa byed pa'i rgyu bstan to/ /bag med pa zhes bya ba ni bya ba la nan tan med cing mngon par mi brtson pa ste/'dis ni bya ba mi byed pa'i rgyu bstan te/ gang gi phyir bag med pas ni bya ba spong bar 'gyur ro/ /de dag rnams kyi zhes bya ba ni de ltar gyur ba'i rgyud la ni zag pa 'phel bar 'gyur ba ste/ zag pa ni ma skyes pa skye ba dang skyes zin pa'i phyir zhing rgyas par 'gyur ba'o/ /zag pa ni khams gsum gyi nyon mongs pa dang nye ba'i nyon mongs pa'o//zag pa 'phel ba'i skyon smras pa/ /'phel gyur pa zhes bya ba ni/ gang de ltar zag pa 'phel ba skye ba ni zag pa med pa rgyang ring ba na gnas pa yin te/ mya ngan las 'das pa thag ring du gyur pa'o/ /'dir rgyang ma zhes bya ba'i sgra ni shin tu thag ring ba'i dngos po'i tshig go//sdug bsngal gyi rgyu zag pa yod par gyur na ni sdug bsngal kho na nye bar gnas par 'gyur te/ de zhi bar ni mi 'gyur ro/ /de las ldog pas dkar po'i phyogs smras pa/ gang zhig ces bya ba la sogs pa smos so/ /shA ri'i bu dang maud gal gyi bu gnyis kyis dge 'dun phye ba'i nyi ma de nyid la de'i bsdums byas te/de'i dbang du mdzad nas 'di gsungs so/ /'dir bsdus pa'i don ni dran pa dang shes bzhin mi nyams pa'i thabs bstan pa dang / lhag mas de'i phan yon bstan pa'o/ /gang zhig ces bya ba ni gang dag bdag nyid chen po dag go/ /legs par brtsams pa zhes bya ba ni phyin ci ma log pa dang gus pas bsgom pa'o//rtag tu zhes bya ba ni rgyun du'o/ /lus gtogs dran pa zhes bya ba ni lus kyi rnam pa yin pas lus gtogs te lus la dmigs pa'o/ /dran pa ni shes rab de'i tshogs te dran pa shas cher 'jug pa'i phyir ro/ /dran pa de nye bar gnas par byas pa 'dis ni dran pa nye bar gzhag pa bzhi bstan te/de'i phyir bcom ldan 'das kyis gsungs pa dge slong ji ltar yang rna blags te nyan pa dang gus par byed pa dang / zhen par byed pa dang / sems rtse gcig tu byed pa dang / sems thams cad kyis bsams pa lus su gtogs pa'i dran pa bsgom pa yin te/ dge slong dag 'di la nang gi lus la lus kyi rjes su lta zhing gnas pa nas ji srid du chos kyi bar du'o//ji ltar yang tshor ba la sogs pa lus nyid du gzhag ce na/ lus ni tshogs te ming gi tshogs yongs su gzung ba'i phyir ro/ /de yang gsungs pa/ tshor ba'i tshogs drug dang rnam par shes pa'i tshogs drug dang / sems pa'i tshogs drug go zhes bya ba yin te/de yang tshor ba dang sems dang chos kyi lus yin pa'i phyir ro/ /lus su gtogs pa'i dran pa bsgom pa'i phan yon bstan pa'i phyir smras pa/ bya ba ma yin zhes bya ba smos te las ma yin pa'o/ /lus su gtogs pa'i dran pa bsgom pa de ni mi byed cing mi spyod par 'gyur ro/ / bya ba ni las dang bsgrub pa ste/ de la yang rgyun du byed par 'gyur te rtag tu byed pa'i ngang tshul 'di la yod pa de ni de nyid de rgyun du lhag par spyod pa zhes bya ba'i don to/ /bya ba byas pa dang / byed pa byas pa 'di nyid kyi phan yon bstan pa'i phyir smras pa/ dran dang shes bzhin zhes bya ba smos te/ dran pa'i khyad par gyis ni sems rab tu gnas pa'o//shes bzhin dang ldan pa ni phyin ci ma log pa'i don blos rtogs pa'o/ /zad par 'gyur ba ni mi snang bar 'gyur ba ste/ ma skyes pa skye bar 'gyur ba dang / skyes pa zad par 'gyur ba'o/ /gang gi zag pa zad gyur pa/ /zhes bya ba 'dis ni gang gi nyon mongs pa dang nye ba'i nyon mongs pa rim gyis spong bar 'gyur ba yin te/zag med thob ces bya ba la brjod par bya'o zhes bya ba ni tshig gi lhag ma ste/ mya ngan las 'das pa thob par gyur cig ces bya ba'i don to/ /lam gyi chos la bag med pa ma byas pa'i phan yon bstan pas bag yod pa la gzud pa'i phyir 'di gsungs so//yang dag par mi bsgrub pa la bag yod pa'i phan yon du mi brjod do zhes bstan pa'i phyir ro/ /ji tsam du zhes bya ba la sogs pa smos so/ /btsun pa chos 'dzin pa ni dge slong zhes brjod na/ btsun pa ji tsam gyis dge slong chos 'dzin par 'gyur zhes zhus pa na rgya cher tshigs su bcad pa 'di gsungs so//dge slong gi las ni gsum ste/ bsam gtan dang / klog pa dang / dge 'dun gyi las byed pa'o/ /de la 'dir bsam gtan gyi phan yon bstan pas gzhan las gnyis po ni rnam par gcad pa yin te/ thos pa mang ba dang dge 'dun gyi las byed pa ni/yang dag par chos 'dzin pa ma yin no zhes bya ba ni bsdus pa'i don to/ /de dag ma yin zhes bya ba ni de tsam gyi khyad par gyis so/ /dam chos 'dzin pa ni chos 'dzin pa yin pas chos ston pa ste/ gang mngon par mtho ba dang nges par legs pa 'grub pa'i dam pa'i chos legs par spyod pa de dang /rjes su mthun par 'jug pa ni dam pa'i chos 'dzin pa zhes 'dod do/ /gang dang de gnyis rtag tu 'brel ba nyid du bstan pa'i phyir smras pa/ ji tsam ni khyad par gyis so/ /mang du smra byed pa zhes bya ba ni mdo mang po 'don cing ston pa ste/ lha sbyin dang ser skya dang nye dga' la sogs pa 'dir dper brjod par bya ste/de dag kyang sde snod gsum dang bcas pa smra zhing spobs pa yod la chos 'dzin par 'dod do/ /de lta bas na yang dag par chos 'dzin pa gang yin zhe na/ chos dag mngon sum byas zhes bya ba smos te/ gang yang chos bsgrub pa'i tshul de ni tshogs kyi lam gyi 'bras bu'i tshul mya ngan las 'das pa mngon sum du byas pa ni reg pa'am goms par byas pa ste/ji lta ba bzhin no/ /gang gis mngon sum du byas she na/ lus kyis zhes bya ba smos te/ rgyud la gnas par byas pa ste/ lam gyi ye shes kyis kun 'byung ba las thar pa ni phung po'am tshogs kyi rnam grangs yin pa'i phyir ro//ye shes kyi yang ming gi tshogs yongs su gzung bas de ltar rtogs pa'o/ /thos nyung yang zhes bya ba ni tshigs su bcad pa gcig gam phyed tsam thos pa yang ste/ ko le ta dang / lam phran bstan dang / spun bzhi la sogs pa yang 'dir dper brjod par bya'o//gang dag ces bya ba ni gang bstan pa'i chos 'dzin pa de ni chos 'dzin pa ma yin no/ /gang yang bstan pa tsam gyis lam dang thar pa rtogs pa dang / mngon sum du byas pa de ni don dam pa'i chos 'dzin pa yin no/ /'di la zhes bya ba ni bstan pa 'dir gang gi phyir lung phog pa nyung zad kyis kyang byang chub kyi lam thob pa yin te/mu stegs pa thams cad kyi tshig mi gtsang ba dang 'dre ba lta bus ni ma yin no/ /de dag ni de nyid do/ /dam chos 'dzin pa yin zhes bya ba ni don dam pa'i chos 'dzin pa'i phyir ro/ /de gang yin zhe na/ smras pa/ gang dag chos la bag byed pa/ /zhes bya ba smos te/dge ba'i chos bsgom pa'i tshul dang / de'i 'bras bu tha dad par mi 'gyur ro/ /gang yang dag par nan tan du 'bad pa'i chos de nyid ni bstan pa yin no/ /bag med pa rnam par bsgrub pa la bstan pa tsam gyis grol ba 'thob par 'gyur ro zhes 'dod pa bsgrub pa la gzud pa'i phyir 'di gsungs so//'o na sde snod gsum shes pa yang dam pa'i chos 'dzin pa nyid yin la/ mdo sde 'dzin pa la sogs pa yang chos 'dzin pa yin no zhes rgol ba'i lan bstan pa'i phyir dang / tshigs bcad snga mar dam bcas pa nyid bsgrub pa'i phyir/ gal te zhes bya ba la sogs pa smos so/ / rgyal po'i khab tu lha sbyin gyis dge slong ma ut+pa la'i mdog khu tshur gyis bsnun te bsad nas bya ba ma yin pa sna tshogs pa byed cing / dus gzhan zhig na 'khor mang po'i nang du 'dug nas rnam grangs du mas snyan par chos ston to/ /bcom ldan 'das kyis bya rgod phung po'i ri la dus ji tsam nyid na de nyid dang nye ba'i phyi 'bred kyi dus su ba lang bgrang zhing 'gro ba gzigs te/de la 'di gsungs so/ /de'i tshe lam phran bstan shing zhig gi drung na 'dug cing bsgom pa de'i dbang du mdzad nas/ gal te rigs bcas nyung ngu zhes bya ba'i tshigs bcad gsungs so/ /gzhan dag ni grogs po gnyis shig yod de/de las gcig ni klog pa la mngon par brtson no/ /gcig ni bsgom pa la mngon par brtson par byed pa zhig ste/ de gnyis kyi dbang du mdzad nas 'di gsungs so zhes zer ro/ /de las re zhig dbang po rnam par dgrol bar bya ste/ smras pa/ mang po yang zhes bya ba ni phal cher yang ngo //gal te zhes bya ba ni ci ste'o/ /rigs bcas zhes bya ba ni rigs pa dang lung dang 'brel pa'o/ /yang na snga phyi mi 'gal ba'o/ /smras pa ni ston pa'o/ /de ltar mi byed pa ni tshig lhur byed cing tshig de'i bsgrub pas ni sbyor bar mi byed pa ste/ chos ma yin pa sgrub par byed kyi/chos ni ma yin no zhes bya ba'i don to/ /thub pa'i dbang po'i gsung rab la ni sgrub pa snying po bya ba yin gyi/ tshig 'bru lhur blangs pa ma yin no/ /de ltar mi byed pa su zhig yin zhe na/ bag med mi zhes bya ba smos te/ gang de ltar bag med pa la gnas pa'i gang zag de nyid de ltar byed do/ / gang gi phyir zhes bya ba'i sgra ni rab tu bsgrub pa'i phyir ram/ yang na rgyu bstan pa'i phyir te/ gang gi phyir bag med pa de'i phyir de ltar mi byed pa ste gang de ltar mi byed pa bstan pa'o/ /de dag dge sbyong skal ba thob pa yin/ /zhes bya ba ni des 'phags pa'i lam gyis 'thob pa mi rnyed de/ 'dir dpe bstan pa/dper na phyugs rdzi zhes bya ba ste/ phyugs skyong ba bzhin no/ /phyugs bgrangs pa ni phyugs kyi tshogs rtsis btab pa'o/ /gzhan gyi zhes bya ba ni pha rol gyi'o/ /dper na phyugs rdzis snga dro'i dus su phyugs bgrangs shing blangs nas yang phyi dro'i dus su bdag po la sbyin par byed de/ de ni de las gla rngan tsam zhig 'thob kyi/skal ba cher mi 'thob cing de las snying po 'o ma dang zho dang zhun mar la sogs pa mi 'thob pa de bzhin du gang rigs pa dang bcas pas mang du smras kyang de dang rjes su mthun par sgrub pa ma byas na de ni tshig dang ldan pa yin no zhes bsngags pa nyi tshe tsam thob par zad kyi/dge sbyong gi 'bras bu thob pa ni ma yin no/ /tshig 'bru tsam la brten pa rnams sgrub pa la gzud pa'i phyir 'di gsungs so/ /de ltar na gang gis dge sbyong gi skal ba 'thob ce na/ gal te rigs bcas nyung ngu zhes bya ba la sogs pa smos so/ /sngar bstan pa'i tshigs bcad kyi dkar po'i phyogs zhes bya ba ni 'di yin par shes par bya'o//nyung yang zhes bya ba ni cung zad kyang zhes bya ba ste/ yang gi sgra ni mang po lta ci smos zhes pa'i sgrub pa'i don to/ /gal te rigs bcas smra zhes bya ba ni tshigs bcad kyi don to/ /gang gi phyir chos kyi rjes su zhes bya la/ gang phyir zhes bya ba ni rgyu bstan pa'i don te/gang gi phyir de bzhin gshegs pas bstan pa ni khyad par du gyur pa yin te/ des na 'di nyid kyis chos la spyad par bya'o zhes pa'i don to/ /bstan pa'i chos gang la yod pa ni chos kyi rjes su spyod pa ste/ bstan pa'i chos de dang rjes su mthun par bsgrub cing chos la nan tan du byed pa'i ngang tshul can no//sgrub pa'i chos la nan tan du byed pa de'i phan yon ni 'dod chags zhe sdang zhes bya ba smos te/ rjes su chags pa dang khong khro ba'i kun du sbyor ba'o/ /gti mug ni ma rig pa'i kun du sbyor ba zhes bya ba'i don to/ /spong byed pa zhes bya ba ni gnyen po bsgom pas de'i 'thob pa bcad pa'o//de dag ni de dag gnyis kyis te/ dge sbyong dang 'phags pa'i lam gyi skal ba 'thob par 'gyur ba ni rnyed par 'gyur ba'o/ /sgrub pa nyid kyis mya ngan las 'das pa yang dag par 'dzin du gzhug pa ste/ de bas na thabs 'dis rtogs pa nyid du bya ba'i phyir 'di gsungs so/ / bag med pa dang bag yod pas spang ba dang / blang ba'i skyon dang yon tan bshad de/ bag yod bsngags pa zhes bya ba la sogs pa smos so/ /yul ko sa lar byung ba'i rgyal po gsal rgyal sems la 'di lta bu'i rnam par rtog pa skyes te/ chos gcig brten cing bsgom pa dang mang du byas pas mthong ba'i chos la don yongs su rdzogs par 'gyur ba dang /phyi ma'i don yongs su rdzogs par 'gyur ba'am/ tshe 'di dang phyi ma'i don yongs su rdzogs par 'gyur ba yod dam snyam pa na/ ji tsam na bcom ldan 'das kyis bka' stsal pa/ rgyal po chen po yod de 'di ltar dge ba'i chos thams cad la bag yod pa'o zhes gsungs nas tshigs bcad gsum bka' stsal to//gzhan dag ni yul yangs pa can gyi khang pa brtsegs pa'i gnas lha'i dbang po brgya byin gyis 'di ltar zhus pa las brtsams pa yin no zhes zer ro/ /bag yod bsngags pa zhes bya ba ni ji skad bstan pa'i mtshan nyid kyis bag yod pa la rab tu bstod pa yin te/dam pa de'i bye brag la mkhas pa'o/ /bag med pa la smos pa ni gshung ba'o/ /rtag tu zhes bya ba ni rgyu'i dus dang 'bras bu'i dus na'o/ /gang gi phyir bag yod pa yon tan gyis rtag tu bsngags pa dang / de'i mi mthun pa'i phyogs bag med pa la smod par byed pa de gang gis she na/'di ltar bag yod ces bya ba smos te/ de'i rgyus so/ /bdag dang mnyam pa'i mchod sbyin te gzhan la med pas mchod sbyin brgya pa yin pa'i phyir mchod sbyin brgya pa zhes bya'o/ /lha rnams zhes bya ba ni rgyal chen ris bzhi dang sum cu rtsa gsum mo/ /gtso bor gyur zhes bya ba ni dbang po 'thob pa'o//gal te rgyu 'dis ni bag yod pa'i bsngags pa brjod pa yin na/ de lta na bag med pa'i smad pa gang zhig gis byed pa yin zhe na/ smras pa/ 'dir bskang bar bya ste/ bag med pas ni dmyal ba mi bzad pa thob ces bya ba ni tshig gi lhag ma ste/ don mthar ma phyin pa'i gzhung dag la ni tshig gi lhag mas rjes su dpag pa ni rigs pa yin no//yang na rgyal pos chos gcig mchis sam zhes zhus pa dang / thub pas bag yod pas bstan pa nyid kyi mdor brjod pa bstan pa'o/ /de lta na ni bag med pa la smod pa zhes brjod pa mi rigs so zhe na/ bag yod pa'i sgrib pa nan gyis spang bar bya ba bsgrub pa'i phyir nyes pa med do//bde 'gro'i khyad par 'dod pas de la gzud pa'i phyir 'di gsungs so/ /bag yod pa ni thams cad du bsngags pa yin no zhes bstan pa'i bya ba byas rung zhes bya ba la sogs pa smos so/ /bstod pa smra ba yin pas bsngags pa brjod pa'o/ /gang la zhe na/bya ba byas rung ma byas rung / /zhes bya ba smos te/ gang rnam par dag cing rjes su mthun pa'i lus dang ngag dang yid kyi las de ni bya ba byas pa'o/ /gang de las gzhan pa bde 'gro dang rjes su mthun pa yang de dang rjes su mthun par byas pa'o/ /mkhas pa ni mngon par rig pa ste/ de yang 'jig rten pa dang 'jig rten las 'das pa'o//de la 'jig rten las 'das pa ni sangs rgyas dang sangs rgyas kyi nyan thos rnams so/ /'jig rten pa ni 'jig rten na grags pa'i mkhas pa'o/ /de'i phyir rim pa bzhin du/ bya ba byas rung ma byas rung / /zhes bya ba la bag yod pa'i bsngags pa brjod pa yin no/ / gnyis po ni gnyi ga yin pas gnyi ga nyid do/ /ci'i phyir 'di la de ltar bsngags pa smra ba yin zhe na/ 'di ltar bag dang bcas pas don gnyis zhes bya ba smos te/ bag yod pa'i gang zag gi phan yon ni rnam pa gnyis so/ /len par byed ces bya ba ni rab tu brtan par len pa'o/ /gang yin zhe na/mkhas pa yis ni zhes bya ba smos te/ bya ba dang bya ba ma yin pa rtogs pa'o/ /blun pa ni ma yin te/ des ni bdag dang gzhan la phan pa'i rnam pa gnyis mi shes pas so/ /ji ltar rjes su myong ba'i don yin zhe na/ tshe 'di'i zhes bya ba smos te/ bdag nyid kyi phung po'am mthong ba'i phung po nyid la rjes su myong ba ste zin pa'i phung po la zhes bya ba'i don to//don ni gang yin dang zhes bya ba la ni zhes bya ba'i sgra ni khyad par bsgrub pa'i don to/ /gang tshe 'di'i phan yon khyad par du gyur pa ni nor gyi 'byor pa la sogs pa'i mtshan nyid do/ /phyi ma'i don ni gang yin dang / /zhes bya ba ni 'jig rten pha rol gyi ste/bde 'gror 'gro ba la sogs pa'i tshul lo/ /sngar bshad pa'i mkhas pa zhes bstan pa de'i ngo bo nyid smras pa/ rtogs pas ni zhes bya ba smos te/ don gyi de nyid rtogs pa'o/ /yang na 'phags pa'i bden pa bzhi rtogs pa'o/ /brtan pa ni brtson 'grus kyi sbyor ba khyad par du 'phags pa ste/le los ni don ji lta ba bzhin du rtag par mi nus pa'i phyir te/ de bas na rtog pa dang brtson 'grus rnam pa gnyis kyis khyad par du blo rnam par gsal ba'i phyir mkhas pa'o zhes bya ba ni de nyid kyi don to/ /'di nyid kyis mkhas pa yin gyi/ gzhan gyis ni ma yin no zhes so/ /mkhas pa bsgrub par 'dod pa rnams la de kho na nyid brtag pa dang /brtson 'grus brtsams pa la gzud pa'i phyir 'di gsungs so/ /yang rnam pa gzhan gyis bag yod pa'i yon tan bstan pa'i phyir/ dge slong bag yod la dga' zhing / /zhes bya ba la sogs pa smos so/ /dge slong rab tu mang po rgyal byed kyi tshal dang nye ba zhig na nags stug po'i nang du yang dag par bstan pa la brtson 'grus brtsams shing bsam gtan bsgom pa byas pa khyad par gyi go 'phang thob bo//de nas bcom ldan 'das kyis de las gzhan pa'i dge slong yang khyad par de la gzud par dgongs nas/ rgyal byed kyi tshal nas mngon par byung zhing gang na dge slong de dag yod pa der gshegs so/ /de dag gis kyang bcom ldan 'das rgyang ring po nas de ltar gshegs pa mthong nas zhe sa dang bcas par bcom ldan 'das kyi sngon bsu ba byas so/ /ji tsam na de rnams dang thabs cig tu dgon pa'i phyogs rgyu zhing gshegs pa dang /phyogs de na yul ko sa la'i rgyal po gsal rgyal gyi pra be+e ka zhes bya ba glang po che 'dam du zhugs pa las skye bo'i tshogs chen pos phyung bar gyur to/ /de nas yang gshegs pa dang / rlung shugs dang ldan pas shing gi lo ma rnams lhags par byed pa gzigs so//de'i 'og tu me mched de nags chen po tshig pa gzigs so/ /de bzhin du phyogs nyams dga' ba zhig na/ pad ma dang bcas pa'i chu mig dang skyed mos tshal gzigs te/ gnas skabs de dag dang mthun pa'i tshigs su bcad pa drug gsungs so/ /de thos pas dge slong rab tu mang po dang /lha rab tu mang po yang khyad par thob par gyur to/ /bag yod pa la dga' ba yin pas bag yod dga' ba ste/ bag yod pa'i phan yon bstan pas de nyid la ro myang ba thob par gyur ces bya ba'i don to/ /de nyid gang yin zhe na/ dge slong zhes bya ba smos te/ bya ba ngan pa/ g.yeng ba bcom pa dang /rab tu byung zhing dben pa yin no/ /gang gi phyir dben pa la ni bag yod pa yod kyi/ 'du 'dzi dang 'brel pa byas pa la ni med do/ /bag med pa la 'jigs lta bas/ /zhes bya ba smos te/ gang la 'jigs pa mthong ba'i lta bas so/ /bag med pa'i nyes dmigs bstan pas/ bag med pa la 'jigs par lta zhing gnyen po dge ba'i chos bsgom pa la mngon par rtsom par bstan to//bag yod pa'i phan yon bstan pa'i phyir/ ngan 'gro las 'dren te zhes bya ba smos te/ ngan 'gror 'gro ba ni ngan par spyod pa'am 'bras bu las kun nas slong zhing 'dren pa yin no/ /bdag nyid ces bya ba ni bdag rang ngan song du ltung ba'am/de la gzhol ba'o/ /gang bag med pa chung ngus kyang ngan par spyod cing des ngan 'gror 'gro bar 'gyur gyi/ bag med pa chen pos ni ma yin te/ sor mo'i phreng ba dang / dzen ta ka krid ces bya ba la sogs pa yang 'dir dper brjod par bya'o/ /'di ltar gang zhig ji lta bu zhe na/ 'dam rdzab las ni glang chen bzhin/ /zhes bya ba smos te/ skye bo'i tshogs chen po'i grogs la brten nas glang po che 'dam du bying ba las 'byin pa de bzhin du bag yod pa la brten nas bdag nyid shes pa'i dge slong gis ngan 'gro las grol bar byed pa yin te/ nges par 'byed pa'i cha dang mthun pa'i bzod pa thob pa'i phyir ro//ngan song gi 'jigs pa rnams la bag yod pa nyid la brten pa la gzud pa'i phyir 'di gsungs so/ /bag yod pa la brten pas ngan song gsum spong ba yin no zhes bstan nas mi dge ba'i chos kyang 'dis spong ba yin no zhes bstan pa'i phyir/ dge sbyong bag yod la dga' zhing //zhes bya ba la sogs pa smos so/ /tshigs bcad phyed kyi don ni sngar bstan pa'i phyir da yang mi bshad do/ /spyugs par byed pa ni spong bar byed pa'o/ /ci zhig spong bar byed pa yin zhe na/ sdig pa'i chos rnams zhes bya ba smos te/ mi dge ba'i 'dus byas rnams te 'dod pa na spyod pa'i mthong ba dang bsgom pas spang bar bya ba zhes pa'i don te/gang gi phyir de spang na ni mi dge ba thams cad spang ba'i phyir ro/ /'dir dpe bstan pa/ rlung gis ljon shing lo ma bzhin/ /zhes bya ba smos te/ bzhin zhes bya ba'i sgra ni nyid kyi don to/ /rlung ni rlung drag po'o/ /dper na rlung gi shugs drag pos lo ma smin pa la phyogs pa cung zad lhod pa dag sprugs shing lhung ba dang 'brul bar byas pa de bzhin du bag yod pa'i dge slong gis 'jig rten pa'i 'dod chags dang bral ba'i lam la sogs pa la goms par byas shing kun du spyod pa la lhod par byas te/mi dge ba'i chos rnams spang bar bya'o//gzugs dang gzugs med pa la spyod pa'i phra rgyas rnams kyang 'dis spong ba yin no zhes bstan pa'i phyir/ dge slong bag yod la dga' zhing / /zhes bya ba la sogs pa smos so/ /'dis kun du sbyor ba yin pas na kun du sbyor ba ste/ mdo las kun du sbyor ba dgu bstan pa las 'dir spyi'i tshig tu yongs su gzung ngo //phra sbom dag ces bya ba ni phra ba dang rags pa'o/ /'di ltar bsam gtan dang po'i sa pa'i kun du sbyor ba ni rags pa'o/ /bsam gtan gnyis pa'i sa pa'i kun du sbyor ba ni phra ba'o zhes bya ba la sogs pa yin no/ /'dis ni chung ngu dang 'bring dang chen po'i rnam pas spong zhing rab tu spong bar ston to//'dir dper brjod pa/ me yis bsregs pa bzhin du 'gro/ /zhes bya ba yin te/ dper na me ni chen po'am chung ngu yang rung bdag nyid thob nas shing la sogs pa sreg par byed do/ /de bzhin du zag pa med pa'i ye shes kyi mes kyang kun du sbyor ba rnams bsregs shing yang skye ba med par byed do//zag pa med pa'i lam bsgom pa la gzud pa'i phyir 'di gsungs so/ /bag yod pa'i stobs nyid kyis zad pa shes pa thob par 'gyur ro zhes ston pa'i phyir ro/ /dge slong bag yod ces bya ba la sogs pa smos so/ /nyams su myong bar 'gyur zhes bya ba ni rig par 'gyur ba'o//rim gyis zhes bya ba ni mthar gyis te/ 'di ltar thog mar ni lam chung ba skye bar 'gyur ro/ /de nas ni bar ma zhes bya ba la sogs pa'o/ /dang po yang nyon mongs pa rags pa spong bar 'gyur ro/ /de nas ni bar ma zhes bya ba la sogs pa lung las gsungs so//kun du sbyor ba kun zad pa/ /zhes bya ba ni kun du sbyor ba dgu spangs pa ste/ gang gi phyir zad pa shes pa'i ye shes 'thob pa'i dus su khams gsum gyi kun du sbyor ba rnams las gcig tu bral ba'i 'thob pa rnyed pa yin no/ /khams gsum gyi kun du sbyor ba spang ba'i phyir srid pas skyo ba rnams la gzud pa'i ched du 'di gsungs so//bag yod pa ma spangs pa las phung po lhag ma dang bcas pa dang lhag ma med pa'i mya ngan las 'das pa'i dbyings kyang thob par 'gyur ro zhes bstan pa'i phyir/ dge slong bag yod la dga' zhes bya ba la sogs pa smos so/ /so sor rtog pa zhes bya ba ni mngon par rtogs pa bsgrub par gyis shig pa'i don to//go 'phang zhes bya ba ni gnas so/ /ji lta bu zhe na/ zhi ba'i zhes bya ba smos te/ 'khor ba'i me 'bar ba lta bu thams cad nye bar zhi ba'o/ /'du byed nyer zhi zhes bya ba la 'dir 'du byed ni yang srid par 'gyur ba'i phung bo'o/ /nye bar zhi ba dang bsal ba 'di la thob pa de ni de nyid do//zhi ba'i zhes bya ba ni 'chi ba la sogs pa'i 'jigs pa med pas phung po'i lhag ma med pa'i mya ngan las 'das pa'i dbyings thob pa yin no/ /zhi bar byed pa yin pas zhi ba ste/ zhi ba la sbyor bar byed ces bya ba'i don to/ /yang srid pa'i sdug bsngal mi 'dod pa rnams la zad pa shes pa thob pa la sbyar ba'i phyir 'di gsungs so//mi skye ba shes pa thob pas mthong ba'i chos las yongs su nyams pa med par ston te/ dge slong bag yod la dga' zhes bya ba la sogs pa smos so/ /mi srid do zhes bya ba ni mi rigs pa'o/ /gang mi rigs she na/ yongs su nyams par 'gyur zhes bya ba smos te/yongs su nyams pa ni dgra bcom pa'i 'bras bu las thag ring du gyur pa'o/ /gang la skye ba shes pa'i ye shes skyes pa de la ni lam dang de'i 'bras bu yongs su nyams pa med par ston pa yin no/ /phyi rol pa'i 'dod chags dang bral ba dag las khyad par du gyur pa yin te/gang gi phyir de dag ni yongs su nyams pa'i chos can te/ mya ngan las 'das pa las ring ba yin zhing gong ma dag tu skyes nas der mngon par rtogs pa med pa yin te/ 'di la rnam pa 'di ltar der mthar thug pa yin no zhes lung las 'byung ba yin pa'i phyir ro/ /chos 'di'i dngos po la yang dag par zhugs na ni yongs su nyams par yang mi 'gyur te/mya ngan las 'das pa dang nye bar 'gyur ro/ /mya ngan 'das dang zhes bya ba ni yang 'khor bar mi skye ba yin no/ /phung po lhag ma dang bcas pa dang lhag ma med pa'i mya ngan las 'das pa gnyis ni phan tshun nye bar gyur pa'i phyir sa bon dang myu gu bzhin no//nye ba'i phyir zhes bya ba ni mi ring ba dang drung na 'dug pa yin te lhag ma dang bcas pa'i mya ngan las 'das pa'i dbyings na gnas pa yang phung po lhag ma med pa'i mya ngan las 'das pa'i dbyings kyi tshul du gnas pa yin no zhes rig par bya ste/ de la gzhol ba'i phyir dge slong dgra bcom pa ni mya ngan las 'das pa la gzhol ba dang /mya ngan las 'das pa la 'bab pa zhes bya ba la sogs pa mdo las gsungs te/ de dag ni gcig tu yongs su mya ngan las 'das pa yin no/ /'khor bas skyo ba rnams 'di la gzud pa'i phyir 'di gsungs so/ /tshigs bcad snga ma dag gis 'jig rten gnyi ga'i nges par legs pa dang phan pa brtson 'grus dang bag yod pas byed pa yin no zhes yang dag par bstan nas/da ni de nyid yang dag par 'dzin du gzhug pa'i phyir/ brtson 'grus ldan zhing zhes bya ba la sogs pa smos so/ /lha zhig bcom ldan 'das kyi spyan sngar 'ongs te zhus pa/ gang gis 'jig rten 'di dang pha rol du mchog tu bde ba 'thob pa lags/blo gros chen po bcom ldan 'das kyis bdag la bshad du gsol/ bdag gis de la nan tan du bgyi'o zhes gsol pa dang / bcom ldan 'das kyis bka' rtsal pa/ brtson 'grus ldan zhing zhes bya ba la sogs pa'i tshigs su bcad pa 'di gsungs so/ / brtson 'grus ni ldang ba dang dge ba bya ba dag la kun du spro zhing kun du rtsom pa byed pa'i phyir ro/ /bag yod pas ni bya ba brtsams pa dag la bar du gcod par mi 'gyur te/ bag med par gyur na ni res 'ga' brtson 'grus rtsom par mi 'gyur ro/ /brtson 'grus dang bag yod pa la gnas nas ci zhig byed pa yin zhe na/smras pa/ chos spyod ces bya ba la sogs pa yin te rigs pa spyod pa'o/ /chos kyi ngo bo nyid smras pa/ legs par spyod ces bya ba la sogs pa ste lus la sogs pa'i dge ba'i chos te/ de gang zhe na/ srog gcod pa las slar ldog pa la sogs pa mdo las gsungs pa'o//'di'i phan yon ni/ chos spyod pas ni zhes bya ba smos te/ chos la legs par spyod cing byed pa'i ngang tshul gang la yod pa de ni bde ba 'thob pa ste/ bde ba la gnas pa'o/ /de ni 'khor ba'i gnas su gdung ba med par gnas pa'i don te/ gang legs par spyod pa la ni rnam par smin pa yid du mi 'ong ba 'thob pa ni gnas ma yin zhing go skabs med do zhes bya ba la sogs pa mdo las gsungs so//'jig rten 'di ni skye ba 'di'o/ /pha rol ni skye ba gzhan no/ /thams cad du bde ba 'dod pa rnams de'i thabs ma shes pa dang phyin ci log tu 'jug pa rnams la phyin ci ma log par bstan pa'i phyir 'di gsungs so//bstan ma thag pa de ni bar chad dang bcas pa yin te/ de'i khyad par bstan pa'i phyir/ /rtsol ba dang ni brtson 'grus skyed/ /ces bya ba la sogs pa smos so/ /mnyan yod du dge slong gsar bu ba mang po bcom ldan 'das kyi spyan sngar phyin te 'di skad ces gsol to/ / btsun pa bdag cag gis gang gis ji ltar bslab par bya ba dang / gang bslab pa'i bar chad du 'gyur zhing bdag cag gis gang spangs te/ bde bar gnas pas gnas par bgyi zhes gsol pa dang / de'i dbang du mdzad de tshigs su bcad pa gnyis gsungs so/ /brtson 'grus skyed ces bya ba ni brtson 'grus bslang shing brtsams par gyis shig pa ste/yon tan thams cad kyi thabs su gyur pa'i phyir dang / phongs pa thams cad kyi rgya mtsho las sgrol ba'i bkra shis kyi theg pa'i snod du gyur pa'i phyir ro/ /'dis ni ngan song las slong ba'i thabs mthong ba'i lam la gzud pa'o/ /rtsol ba dang ni zhes bya ba ni 'bad pa'i khyad par brtsams pas 'dod pa'i khams las 'das par sbyor ba yin no//bslab pa la brten dang zhes bya ba ni 'bad pa mi lhod pa ste mnyam par gzhag pa'i sa pa rnams kyis ni spang dka' ba yin te/ de spong bar byed pa'i lam rnyed par dka' ba'i phyir brtan zhes bya ba bstan to//ci'i phyir zhi bar bya zhe na/ mya ngan las 'das pa thob par bya ba'i phyir te/ khams gsum gyi nyon mongs pa zad pa'i phyir zhes bya ba'i don to/ /'di ltar bslab pa rnam gsum la bslabs pas ni bgegs thams cad zad pa'i phyir ro/ /'dis ni khams gong ma'i spang ba la gzud pa'i phyir ro/ / de ltar bslab pa gsum la 'jug pas bgegs mi 'byung bar bya ba'i phyir/ mi dran pa dang zhes bya ba la sogs pa smos te/ mi dran pa ni dran pa nyams pa'o/ /dang gi sgras ni log pa'i dran pa yang gzung ngo / /bag med dang zhes bya ba ni dge ba'i chos rnams la mi bsgom pa'o/ /dang gi sgras ni nyon mongs pa'i chos bsgom pa yang gzung ngo //brtson 'grus chung dang zhes bya ba ni le lo ste brtson 'grus zhan pa'o/ /dang gi sgras ni thabs ma yin pa la 'jug cing spro ba'o/ /kun sdom med ces bya ba ni yang dag par mi sdom pa'o/ /yang na lus dang ngag dang dbang po mi 'dul ba'o/ /gnyid ni gnyid nyid do/ /snyom pa pa ni le lo'i rnam pa ste gang gi dbang gis lus nyam chung bar byed cing dge ba'i chos bya ba dang byed pa dag la des gnyid 'byung ba dang /rjes su mthun pa'i sems las byung ba'i chos de ni snyom pa'o/ /g.yeng ba zhes bya ba ni rnal 'byor med pa ste/ sems dang sems las byung ba gcig tu dmigs par sbyor ba las 'phro ba ting nge 'dzin la kun du sbyor ba'i mi mthun pa'i phyogs ni g.yeng ba'o//'di dag ces bya ba ni sngar bshad pa'i mi dran pa la sogs pa'o/ /bslab pa'i bar chad pas zhes bya ba ni tshul khrims dang ldan pa'i bslab pa'i bgegs te/ bar chad dang bgegs de na yod pa ni bgegs byed pa dang bar du gcod pa zhes bya ba'i don to//der zhes bya ba ni de'i phyir te gang gi phyir 'di dag bar chad yin pas de bas na'o/ /khyod kyis so sor rtogs la zhes bya ba ni 'og nas 'chad do/ /yan lag ces bya ba ni skyes bu sdug pa la bod pa yin te/ kye skal ldan zhes bya ba'i don to/ /so sor rtogs zhes bya ba ni so sor rig cing nges par bya ba'o//'di dag ni lam gyi bar du gcod pa yin te/ de bas na khyod kyis so sor rtogs shig ces bya ba 'og nas smos so/ /dran pa med pa'i nyes dmigs su 'gro ba shes pa byas nas/ bde bar yongs su gzung bar bya ste skyon de med par bstan pa'i phyir/dran pa chud ni ma gsan cig /ces bya ba smos te/ dran pa ni lus la sogs pa'i rnam pa de'i ngo bo la dmigs pa ste/ dran pa ma nyams pa de'o/ /khyod kyi zhes bya ba ni khyod nyid kyi rgyud la'o/ /chud ni ma gsan cig ces bya ba ni nyams par ma byed cig pa ste/de nyams na ni lam gyi tshogs thams cad chud za bar 'gyur ba dang / bar du gcod pa thams cad kyang mngon du 'byung bar 'gyur ro/ /des na bag yod pas ni bgegs thams cad sel bar 'gyur ba'i ngang tshul can yin pas/ dran pa nyid ni 'bad pas srog bzhin du bsrung bar bya'o zhes gzud pa'i phyir 'di gsungs so//bar du gcod pa 'di dag gis ni 'khrul bar byed pa yin pas/ gnyen po la sbyar ba'i phyir/ dge slong tshul khrims bzang ba dang / /zhes bya ba la sogs pa smos so/ /yul u dza ya na na tshong dpon gyi bu bzhi gnas te/ de nas gcig ni bag med pa la gnas so//gnyis pa ni gzhan gyi chung ma la 'gro zhing ngan par spyod do/ /gsum pa ni log pa'i rnam par rtog pa la gnas so/ /bzhi pa ni dran pa brjed ngas par gyur to/ /bcom ldan 'das der gshegs nas de'i dbang du mdzad de dge slong la bstan pa'i tshul gyis 'di gsungs so/ / bag yod pa zhes bya ba la/ de la khyod kyis dga' ba thob par gyis shig pa ste/ dge ba'i chos thams cad kyi rtsa ba ni bag yod pa yin no zhes bya ba la sogs pa mdo las gsungs so/ /'dis ni bag med pa rnams bag yod pa la sbyor ba'o/ /tshul khrims bzang ba dang zhes bya ba ni mdzes pa'i tshul khrims kyis spyod pa gang yin pa de ni tshul khrims bzang po ste/gzugs bzang po bzhin no/ /yang na tshul khrims yongs su rdzogs pa ste/ bum pa gang ba bzhin no/ /yang na tshul khrims legs par byas pa ste/ bza' ba dang btung ba legs par spyad pa bzhin no/ /'dis ni tshul khrims phun sum tshogs pa yang dag par 'dzin du bcug pa yin te/yon tan thams cad de la gnas pa'i phyir ji skad du gsungs pa/ dper na lus can dag dang nags tshal dang / /ljon shing rnams kyang sa la gnas pa ltar/ /de bzhin dge ba'i chos rnams 'di dag gi /rab tu 'byung zhing gnas pa'ang tshul khrims yin//zhes pa'o/ /dge slong zhes bya ba ni bod pa ste/ gang tshul khrims dang ldan pa nyid dge slong yin pa'i phyir dang / tshul khrims yod pa dge slong yin/ /zhes pa'i tshig gis so/ /kun rtog legs par mnyam gzhag ste/ /zhes bya ba ni ting nge 'dzin la legs par 'jug pa ste/ kun du rtog pa mnyam par gzhag pa gang yin pa de nyid ni legs par mnyam par gzhag pa'i kun du rtog pa ste/nges par 'byung ba la sogs par kun du rtog pa zhes bya ba'i don to/ /'dis ni tshul khrims la sogs pa dag pa'i thabs bstan to/ /ji skad du gsungs pa/ tshul khrims rnam par dag pa brjod pa gang zhig yin zhe na/mi dge ba'i rnam par rtog pa rnams kyis ma bcom pa yin no zhes rgya cher bshad do/ /rang gi sems ni rjes su srungs/ /zhes bya ba ni dran pa'i stobs kyi bdag nyid kyis sems rjes su skyongs shig pa ste/ dran pas sgo bsrungs pa dang ldan pa'i 'phags pa'i nyan thos ni mi dge ba'i chos thams cad spong zhing dge ba'i chos thams cad bsgom pa yin no zhes mdo las gsungs so//sgo bsrungs pa yin pas sgo bsrungs so/ /'dis ni bag yod pa la sogs pa la rab tu gnas pas 'phags pa'i lam mngon sum du bya ba'i thabs bstan te/ gang gi phyir dran pa nyams par gyur pas ni dri ma med pa'i lam thob par mi 'gyur ro//'di sten cing thos pas ni 'khor de dag thams cad kyis rgyun du zhugs pa'i 'bras bu thob par gyur to/ /dge slong lnga brgya tsam yang len pa med par zag pa las sems rnam par grol lo/ /'dir snga mas ni rgyu bstan to/ /phyi mas ni 'bras bu bstan par shes par bya'o//gang gi phyir bag yod pas ni tshul khrims bzang po yin la/ des kyang yang dag pa'i rtog pa yin no/ /de las ni yang dag pa'i dran pa yin no/ /bag med pa la sogs pa de'i skyon la brten pa dag de dag gi gnyen po la sbyar ba'i phyir 'di gsungs so//bag yod pa la brten cing mngon par 'dod pa'i yon tan la sogs pa'i tshul bstan pa'i phyir/ brtsam par bya zhes bya ba la sogs pa smos so/ /sin du'i yul ro ru ka zhes bya ba'i grong khyer chen po'i rgyal po u tra ya nas shar phyogs kyi rgyal po gzugs can snying po la ma mthong ba'i grogs po yin no zhes khas blangs te/rin po che'i rang bzhin gyi khrab rin thang med pa zhig bskur ro/ /rgyal po gzugs can snying pos de dang rjes su mthun pa'i skyes ma rnyed de bcom ldan 'das la thams cad du bsten par bya'o zhes bsams nas phyin te zhu ba zhus so/ /ji tsam na ras la sangs rgyas kyi sku gzugs bris pa dang /dge ba bcu'i las kyi lam dang rten cing 'brel par 'byung ba las brtsams pa'i tshigs su bcad pa gnyis bris so zhes bya ba la sogs pa 'dir dper brjod cing gleng gzhir sbyar bar bya'o/ /brtsam par bya zhes bya ba ni rtsom pa'i dang por bya ba yin pas brtsam par bya ba ste/skyabs su 'gro zhing yang dag par len pa la sogs pa la yang dag par gzud pa yin te/ bstan pa 'di ni rgya mtsho chen po 'dra bas de la 'jug pa dang 'dra bar rtsom pa'o/ /'byung bar bya zhes pa ni rab tu 'byung ba ste de'i phyir gang dag lhod cing sgrib pas khyim gyi gnas yongs su gtong bar mi nus pa dag snang na de nyid la gzud pa yin te/skyabs su song ba'i 'og tu rab tu byung ba yongs su gzung ba ni rjes su mthun pa'i phyir ro/ /de med par ni so sor thar pa'i sdom pa med do/ /yang na skyabs su 'gro ba nyid kyis kyang zhes bya ba'i tshig gis so/ /'jug par bya zhes bya ba ni 'bad par bya zhes bya ba yin te/ji skad du gsungs pa/ tshul khrims la gnas shing tshul khrims la brten pas chos gnyis bsgom par bya ste/ zhi gnas dang lhag mthong ngo zhes so/ /'chi bdag sde ni gzhom par bya/ /zhes bya ba ni 'phags pa'i lam bsgom pa'i 'bras bu la sbyor ba yin no//'chi bdag gi sde ni khams gsum gyis mthong ba dang bsgoms pas spang bar bya ba'i nyon mongs pa dang nye ba'i nyon mongs pa ste 'chi bdag dang rjes su mthun par 'jug pa'i phyir ro/ /de gzhom pa ni spangs pa ste de'i 'thob pa gcad cing rgyud la gnas pa las bsal ba'o//'dir mthun pa'i chos kyi dpe bstan pa/ 'dam bu'i khyim na glang chen bzhin/ /zhes bya ba yin te/ 'dam bu dag gi khyim ni 'dam bu'i khyim ste 'dam bu'i khang pa'o/ /dper na glang po che smyon pa 'dam bu'i khyim la btang na de ma thag 'joms shing phye mar 'thag par byed do/ /de bzhin du khyed kyis 'chi bdag gi sde gnyen po bsgoms pa'i stobs kyis rgyud la bsal bar gyis shig pa'o//bcom ldan 'das ni sgrub pa 'bras bu med par de ltar mi sbyor zhing mi ston pa ste/ de bas na lam bsgom pas nyon mongs pa bsal ba'i khyad par bstan pa'i phyir/ gang zhig chos 'dul zhes bya ba la sogs pa smos so//gang zhig ni gang la la ste/ skye ba la sogs pa la ltos pa med par thams cad la 'byung ba yin no/ /ni zhes bya ba'i sgra ni rgyu bstan pa'i phyir ro/ /'di la zhes bya ba ni bde bar gshegs pas bstan pa 'di la'o/ /chos 'dul zhes bya ba ni chos kyi tshul gyi 'dul ba yin pas chos 'dul te skyon med par 'dul ba'i thabs zhes bya ba'i don to//yang na de la chos kyis 'dul bas 'dul ba ste/ gang sangs rgyas kyi bstan pa la'o/ /'dir ni mtshon chas bsnun pa dang nor phrog pa la sogs pas 'dul ba ni ma yin no/ /yang na lam yan lag lnga ste/ yang dag pa'i lta ba dang /rtog pa dang / rtsol ba dang / dran pa dang / ting nge 'dzin to/ /yang na 'dul ba ni gsum ste/ yang dag pa'i ngag dang / las kyi mtha' dang / 'tsho ba'o/ /des na yang chos 'dul ba ni 'dir 'phags pa'i lam yin no/ /bag dang ldan par spyod byed pa/ /zhes bya ba ni bag med pa la sogs pa ngan par spyod pa thams cad dang bral bar spyod pa yin no//'di skad ston pa yin te/ 'di ltar gang gis g.yeng ba thams cad spangs shing zag pa med pa'i lam bsgom pa la 'jug par byed pas 'khor ba'i skyon thams cad ni spangs la/ kha na ma tho ba med pa'i bde ba'i ngo bo thar pa'i lam ni sgrub par byed pa'o/ / rab spangs pa zhes bya ba ni yongs su dor ba'o/ /skye ba'i 'khor ba zhes bya ba ni skye ba nye bar mtshon pa ste/ khams gsum gyi bdag gi dngos po'o/ /gang gi phyir skye ba med pa ni khams gsum na yod pa'i grangs su mi 'gro ste/ mya ngan las 'das pa'o zhes bya ba'i tshig gis so/ /sdug bsngal tha mar zhes bya ba ni tha ma rnam pa gsum las phung po lhag ma med par mya ngan las 'das pa zhes bya ba'i don to//byed par 'gyur zhes bya ba ni thob pa dang / de'i bdag nyid du byed pa'o/ /bag yod pa'i tshoms te bzhi pa'i rnam par 'grel pa rdzogs so// //de'i 'og tu sdug pa'i tshoms dgod pa ni bag yod pa mchog tu byed pas kyang /bdag nyid sdug pa la chags pa'i bgegs las bzlog pa'i phyir te gang gi phyir sdug pa la chags par gyur na ni dge ba la mngon par brtson pa khyad du gyur pa thams cad kyang spangs nas/ des na sdug pa'i skye bo dag rjes su dran zhing 'khor ba'i lam dag srung la yang dag par ston par byed do//'di ka ling ka dang shAkya tsi tra zhes bya ba la sogs pa yang dper brjod par bya'o/ /da ni sde tshoms kyi rnam par 'grel pa bshad de sdug pa rnams las zhes bya ba la sogs pa smos so/ /mnyan yod na dga' ba can zhes bya ba'i khye'u gzugs zla med par bzang ba zhig gis dga' mo zhes bya ba'i bu mo de dang mnyam pa'i gzugs yod pa zhig blangs so//de'i khyim thab zla ba drug tsam nas dus byas par gyur to/ /de dang bral bas de smyos par gyur te/ gcer bus mnyan yod thams cad du shi ba'i khyim thab tshol zhing rgyus so/ /ji tsam na bcom ldan 'das kyis de gdul ba'i dus la bab par gzigs nas/tshe dang ldan pa kun dga' bo rjes su 'breng ba dang de'i thad du gshegs so/ /de nas bcom ldan 'das mthong ma thag dran pa rnyed de rang gi lus la gos med par mthong nas shin tu ngo tsha bar gyur to/ /tshe dang ldan pa kun dga' bos de'i bsam pa shes nas bla gos de la byin te/de lus la gyon te bcom ldan 'das kyi spyan sngar 'ongs te gus pa dang bcas par byas nas phyag 'tshal te/ thub pa mchog gis shis par brjod pa'i tshigs su bcad pa 'di gsungs so/ /gang gis chos gcig ma spangs pas/ /'gro ba 'di kun bcings par gyur//kun rmongs 'jigs rung 'di lta bu/ /rtsa nas khyod kyis zad gyur cig /ces so/ /de nas kun dga' bo la lhung bzed gtad de/ sngon su yang ma shi ba'i khyim las chu long la shog shig ces bka' stsal pa dang / de bcom ldan 'das kyi mthus bye ba phrag bco brgyad kyi khyim dag tu myur ba nyid du song ba dang /des chu ma rnyed nas lhung bzed stong pa nyid du slar 'ongs so de bstan nas tshigs su bcad pa gnyis po 'di gsungs so/ /gzhan dag ni bu dang chung ma dang mna' ma shi ba'i nye du zhig rgyun mi 'chad par mya ngan byed pa las brtsams pa ni tshigs su bcad pa dang po'o//byi sha ka zhes bya ba'i dge bsnyen dang / yul yangs pa can gyi lits+tsha bI las brtsams pa ni gnyis pa yin no zhes zer ro/ /de nas dang po'i dbye ba bshad pa/ sdug pa rnams las zhes bya ba la sogs pa smos so/ /'di la bsdus pa'i don ni 'dod chags dang bcas pa dang / 'dod chags dang bral ba dag gi nyes dmigs dang phan yon bstan pa'o//sdug pa rnams las zhes bya ba ni sdug pa'i yul dag las zhes bya ba yin te/ 'dir nyon mongs pa dang bcas pa'i sdug pa bstan pa ste/ mya ngan la sogs pa'i rgyur gyur pa'i phyir ro/ /don yang rnam pa gnyis te/ sems dang ldan pa dang sems dang mi ldan pa ste/gang la sred pa 'jug pa'o/ /gang dang 'brel pa zang zing la dga' zhing rjes su myong ba de la sdug pa zhes brjod do/ /'di lta ste/ pha dang / ma dang / bu dang / chung ma dang / dbyig dang / gser dang / nor bu dang / gos dang / skyed mos tshal la sogs pa'o/ /de dang bral zhing spangs te zhig pa las ni mya ngan skye zhes bya ba smos te/shin tu sems gdung zhing yid mi bde bar gyur ces bya ba'i don to/ /dper na shing bcad pa lhung ba la tsha ba'i dus kyi nyi ma'i 'od kyis skam pa lta bu ni mya ngan no/ /de yang bshad pa/ yid la gdung ba 'phel ba'i mis/ /bdud rtsi dag la longs spyad kyang / /nyin re bzhin du skam 'gyur te//khong stong shing gi me bzhin no/ /'das pa dag gi gnod pa bstan nas/ da ltar byung ba'i rnam pa de dang de dag las yang smras pa/ sdug pa dag las 'jigs pa skye/ /zhes bya ba 'jigs pa yin pas 'jigs pa ste/ ma 'ongs pa na gnod pa 'byung bar dogs pa skye ba'i sems gnod pa zhes bya ba'i don to//dgra las 'jigs pa skye zhes ma brjod ce na/ mya ngan gyi 'jigs pa ni sdug pa nyid kyi dbang las gyur pa yin pa'i phyir de ltar ni ma bstan to/ /de dag nyid las mya ngan dang 'jigs pa 'byung ba yin te/ ci'i phyir zhe na/ de nyid smras pa/ sdug pa dag ni rnam spangs na/ /zhes bya ba smos te/ji skad bstan pa'i mtshan nyid kyi sdug pa rnams la chags pa med cing / de la ma dmigs na sred pa zad pa'i phyir ro/ /khams gsum gyi 'dod chags dang bral ba rnams la ni 'dod chags thams cad spangs pa'i phyir de dang 'brel ba'i mya ngan dang 'jigs pa med do//sdug pa'i dngos po dang 'brel ba mya ngan la sogs pa de spang ba la sbyar ba'i phyir 'di gsungs so/ /sdug pa dang 'brel na ni nyes dmigs 'di sogs pa yin no zhes bsgrub pa'i phyir/ sdug gu ma las zhes bya ba la sogs pa smos so/ /kha cig 'di skad smra ste/ mnyan yod na bram ze zhig gi bu gnyis dang /glang bzhi dang 'bras kyi zhing dag la ser ba bab ste shi zhing nyams par gyur to/ /chung ma yang khyim gyi las byed pa las de zhig nas lhung ste dus las 'das so/ /de de dag dus byas pa dang 'bras kyi zhing nyams par gyur pa las smyos shing gcer bur byung ste/ sems 'khrugs par gyur nas kun du rgyu ba de'i dbang du mdzad de gsungs so zhe'o//sdug pa nyid dang bral ba las de ltar gyur pa yin gyi/ gzhan du ni de lta ma yin no/ /skyes pa ni 'byung ba'o/ /mya ngan ni sgyid lug pa'o/ /sdug bsngal ni kun 'byung sred pa'i 'bras bur gyur pa'i phung po zhes pa'i tshig gis so//'jigs pa ni sems kyi gnod pa'o/ /sdug pa las gsum po de dag 'byung ba 'ba' zhig tu ma zad de/ sdug gu ma dag gzhan gyur na/ /zhes bya ba ni med pa dang bral bar gyur pa'i don to/ /yi mug 'gyur ba zhes bya ba ni sems 'khrugs pa'o/ /thob par 'gyur ba zhes bya ba ni rnyed par 'gyur ba'o//gnod pa thams cad spang bar 'dod pas sdug pa yongs su spang bar bya ba la gzud pa'i phyir 'di gsungs so/ /sdug pa dang 'brel na de las gzhan pa'i gnod pa bstan pa'i phyir/ 'jig rten sdug bsngal zhes bya ba la sogs pa smos so/ /bram ze zhig bcom ldan 'das kyi thad du phyin nas/kye gau ta ma gang la brten nas mya ngan dang smre sngags 'don pa dang / sdug bsngal ba dang yid mi bde bar 'gyur zhes gsol ba dang / de'i phyir bcom ldan 'das kyis tshigs su bcad pa drug gsungs so/ /ji rnyed pa zhes bya ba ni gang dag 'jig rten na mya ngan la sogs pa yod pa'o//smre sngags 'don pa zhes bya ba ni gang cung zad yid mi bde bas bskyed pa'i tshig brjod pa'o/ /sdug bsngal zhes bya ba ni nang gi nad do/ /ji lta bu zhe na/ rnam pa du ma zhes bya ba smos te/ rnam pa sna tshogs pa'o/ /'dis ni mya ngan la sogs pa thams cad khyad par du byed pa yin te/de re re yang mtha' yas pa'i dbye ba yod pa'i phyir ro/ /'di lta bu su la 'byung ba yin zhe na/ smras pa/ 'jig rten zhes bya ba ste sems can gyi 'jig rten yin gyi snod kyi 'jig rten ni ma yin te/ sems med pa'i phyir mya ngan la sogs pa med pa nyid do/ /sdug pa dag la brten te zhes bya ba ni sdug pa'i dngos po la gnas pa'o//byung zhes bya ba ni rab tu skye ba'o/ /de dag ces bya ba ni mya ngan la sogs pa sngar bshad pa'o/ /ci'i phyir de lta bu yin zhe na/ sdug kyang zhes bya ba smos pa la/ yang gi sgra ni gang gi phyir zhes bya ba'i don te/ gang gi phyir sdug pa spangs shing med par gyur na mya ngan la sogs pa de dag med par 'gyur te/de dag 'byung bar mi 'gyur ro/ /'di gnyis ni rgyu dang rgyu can gyi mtshan nyid du brjod do/ /gang rgyu yod na ni 'byung la gang med na ni mi 'byung ste/ de yang dper na sa bon dang myu gu bzhin no/ /mya ngan med pa'i bde ba'i khyad par 'dod pa ste/ bram ze de sdug pa yongs su spang ba la gzud pa'i phyir gsungs pa/gang phyir zhes bya ba la sogs pa smos so/ /gang yin zhes bya ba'i sgra ni nyid kyi don te/ bde ba nyid yin no/ /'di ltar de dag ni 'dod chags dang bral ba'i rnam pa ste/ khams gang na yang cung zad sdug pa med de khams gsum gyi 'dod chags spangs pa'i phyir ro//de bas gdung med ces bya ba ni gang gi phyir de ltar bde ba yang dag par skyes pa de bas na de la mngon par phyogs shing bde ba thob par 'dod pas ni 'ga' la yang sdug pa skyes par mi bya ste/ gdung ba thams cad dang sred par byed pa thams cad ni de dang 'brel pa'i phyir ro/ /gdung med ces bya ba ni gang la mya ngan med pa thob pa de nyid de/gdung ba thams cad bsal ba zhes bya ba'i don to/ /rdul bral zhes bya ba ni nyon mongs pa dang bral ba ste 'dir 'dod chags nyid rdul yin gyi/ sa'i rdul ni ma yin no zhes pa'i lung gis so/ /go 'phang zhes bya ba ni mya ngan las 'das pa ste/ de nyid na sdug bsngal de'i rgyu med pa'i phyir ro//don gnyer ba zhes bya ba ni kun du 'dod pa'o/ /yang na thob par 'dod pa ste sgrub par 'dod pa'o/ /sdug par bya ba de mi bya/ /zhes bya ba ni chags pa'i dngos po yongs su gzung bar mi bya ba'o/ /nam yang zhes bya ba ni rnam pa gang gis kyang ste/nang dang phyi rol des mnyam par gzhag pa dang mnyam par gzhag pa'i sa la sogs pa'o/ /sdug pa dang phrad par 'dod pa bram ze de'i dga' ba dang bcas pa'i blo nges par byas pa las bzlog pa'i phyir/ sdug pa ma mthong zhes bya ba la sogs pa smos so/ /nam yang 'dod chags kyis kun nas dkris pa'i yul la phrad par ma byed cig pa'o//nam yang zhes bya ba ni nam zhig kyang ngo / /gdol ba la sogs pa'i sdug pa dang phrad pa yang phung khrol chen por bskyed na/ bram ze la sogs pa'i lta ci smos zhes bya ba'i don to/ /ci sdug pa dang phrad pa bzhin du mi sdug pa dang phrad pa yang 'gag gam ma yin zhe na/mi sdug mthong na'ang de bzhin no/ /mi 'dod pa'i dngos po rnams dang yang nam yang phrad par ma byed cig pa'o/ /'ang zhes bya ba'i sgras ni khyad par du sdug pa dang phrad pa dgag pa yin no/ /ci'i phyir zhe na/ 'di ltar/ sdug pa ma mthong sdug bsngal la/ /zhes bya ba smras te/ bral ba la sogs pas sdug pa mthong na ni gdung ba skye bar 'gyur ro//mi sdug dang yang phrad mi bya/ /zhes bya ba la/ yang gi sgras ni sdug bsngal rjes su 'brang ngo / /sngon ma mthong ba'i dngos po dang phrad na yang rgyun du sdug bsngal mang po 'byung ngo / /des na yang sdug pa dang mi sdug pa gnyis mthong ba dang ma mthong ba sdug bsngal gyi rgyur gyur pa mnyam pa yin te/'di bya ba ma yin no/ /sdug pa dang mi sdug pa mthong ba dang ma mthong ba las sdug bsngal zhes bya ba de gang las she na/ sdug pa dang ni zhes bya ba smos te/ sdug pa ni pha dang ma dang bu dang chung ma la sogs pa dang rjes su chags pa'i yul dang / bye zhing bral ba zhes bya ba smos te/bral bar snang ba na mya ngan mi bzad skye bar 'gyur zhes bya ba 'di dang sbyar ro/ /mi sdug pa dang phrad pa yis zhes bya ba la mi sdug pa yang dgra bo la sogs pa yang phrad pa'o/ /mya ngan mi bzad skye bar 'gyur/ /zhes bya ba ni gdung ba chen po skye ba yin no/ /gdung ba che nyid bstan pa'i phyir//gang gis mi dag rgas byed pa'i/ /zhes bya ba smos te/ gang mya ngan skyes pa ni 'dam bu brngas pa nyi mas gdungs pa bzhin du 'dod chags can 'joms par 'gyur te/ bram ze ba la bya zhes bya ba'i bu mo dang slob ma gnyis yun ring por bltas pas rjes su chags pa rgya cher gyur to//dus cung zad cig bral ba las shin du phrad par 'dod de/ phrad par gyur pa la phan tshun gcig la gcig shas cher chags shing 'khyud pa tsam gyis shi zhing lus skams par gyur to/ /tsaN+Da gi ri ka zhes bya ba la bltas pa tsam nyid kyis tsam pa'i pha shi ba yang 'dir dper brjod par bya'o//gson pa la mi sdug pa nyid de dang 'brel ba'i mya ngan la sogs pa bstan nas/ 'chi bar 'gyur ba'i bstan par bya ste/ sdug pa shi bar gyur pa na/ /zhes bya ba smos te/ nye du dang rtsa lag dang grogs bshes la sogs pa ni sdug pa'o/ /shi bar gyur pa ni dus las 'das pa ste/ srog dang bral bar gyur pa'o//na zhes bya ba ni gang gi phyir sdug pa dang bral na nye du la sogs pa sdug bsngal zhing yun ring du mya ngan byed pa yin pa'i phyir/ 'tsho ba'i tshe gcig pur ma zad de/ sdug bsngal mi bzad pas gdungs par gyur pa yin no/ /de bas na sdug pa'i skye bo yongs su spang bar bya'o zhes bstan to//sdug bsngal gyis nyam thag pa ni lus dang sems kyi sdug bsngal gyis gnod pa'o/ /gang yin zhe na/ gnyen 'dun zhes bya ba smos te/ pha dang ma dang gnyen du 'brel pa la sogs pa ste/ rang bzhin gyis gnyen du 'brel par ston pa yin no/ /bcos ma ni mdza' bshes zhes bya ba smos te/mdza' bshes dag la shin tu brtse ba'i snying yod pa de ni mdza' bshes so/ /ji ltar mya ngan byed cing gdung bar byed ce na/ smras pa/ mang po ste lhag ma'i rnam pa du ma'o/ /dus ji tsam zhe na/ smras pa/ yun ring dus su zhes bya ba yin te/ dus ring po zhes bya ba'i don to/ /des na de'i phyir/ sdug dang bral bas sdug bsngal 'gyur/ /zhes bya ba smos te/ gdung bar byed pa ni skye bo sdug pa dang bral ba sdug bsngal gyi rgyu yin pa'i phyir shin tu mi bzad pa'i dug bzhin no/ /gang gi phyir ji skad du gsungs pa ste/ de'i phyir/ sdug par byed pa mi bya'o/ /zhes bya ba smos te/ chags pa'i dngos po ni cung zad kyang mi bya'o//ci'i phyir zhe na/ sdug nyid sdig can la zhes bya ba smos te/ gang la sdug pa bstan pa yod pa ni nyon mongs pa'i dga' ba zhes bya ba'i don te/ de yang dpag tu med pa'i sdig pa'i rgyu yin pa'i phyir sdig pa dang bcas pa zhes bya ba'i don to/ /'di ltar gang las ngan par spyod pa thams cad kyi gzhi ni 'di las byung ba yin pas de bas na byed par mi bya'o//yang na sdug pa nyid ces bya ba ni sdug pa'i dngos po sems dang bcas pa dang sems med pa'i dngos po la chags pa ste/ spyir rab tu gzung ngo / /mi sdug pa la yang 'di las bzlog par brjod par bya ste/ mi sdug pa dag ma shi bar gyur na gnyen 'dun dang mdza' bshes mang po dus yun ring du mya ngan byed de/mi sdug pa dang phrad pa'i sdug bsngal gyis so/ /des na de mi sdug par byed par mi bya'o zhes bya ba yin te/ sdug nyid sdig can la zhes bya ba lta bu'o/ /sdug pa dang mi sdug pa gnyis kyi skabs yin pa'i phyir de'i 'og tu yang 'di gnyis kyi mjug bsdu ba'i tshig snang ba'i phyir ro//ci'i phyir mngon sum du mi brjod ce na/ smras pa/ zhe sdang gi gnyen por spyod pa dang bcas pa ni spang bar sla ba yin no zhes gsal bar bstan pa'i phyir dang / sred pa'i bcas pa ni rab tu spang bar dka' zhes bstan pa'i phyir mngon sum du de nyid gzung ba yin no//de la mdud pa yod min pas/ /zhes bya ba ni mdud pa rnam pa bzhi ste/ brnab sems lus kyi mdud pa dang / gnod sems dang / tshul khrims dang brtul zhugs mchog tu 'dzin pa dang / 'di bden no snyam du mngon par zhen cing mchog tu 'dzin pa'o/ /de dag med pa ni lam bsgom pas de'i thob pa bcad pa'o//de gang yin zhe na/ gang la med ces bya ba smos te/ sdug pa dang sdug pa ma yin pa ni sdug dang sdug min no/ /gang la rjes su chags pa dang / khong khro ba med pa'i phyir sdug pa dang / mi sdug pa'i dngos po med de/ de kho na la mdud pa thams cad med pa yin no/ /mdud pa med pas ni gnod pa dang mya ngan la sogs pa med do//gang zhig sdug pa yongs su 'dzin par byed pa de ni don yongs su btang nas gnod pa chen po thob par 'gyur ro zhes bstan pa'i phyir smras pa/ sdug la bltas te zhes bya ba la sogs pa'o/ /rgyal byed kyi tshal na dge slong grogs po gsum zhig gnas pa las de dag la bos te bka' stsal ba/dge slong khyed kyis thos sam/ skye mched drug gi reg pa zhes bya ba'i dmyal ba gang du mig gis mthong ba na yid du mi 'ong ba nyid du mthong ste yid du mi 'ong bar gyur cing ji tsam na 'di ltar yang dge ba'i las rnams nges par ma byas pa'i phyir dang / sdig pa'i las rnams nye bar bsags pa'i phyir ro//dge slong dag thos sam skye mched drug gi reg pa zhes bya ba la/ gang du mig gis gzugs rnams mthong ba na yid du 'ong bar mthong ba yin te zhes bya ba nas/ rgya cher tshigs su bcad pa 'di gsungs so/ /mi sbyor zhes bya ba smos pa la/ sbyor zhing legs par byed pa yin pas sbyor ba ste legs par spyod pa'o//sbyor ba ma yin pas mi sbyor ba ste/ ngan par spyod pas de la sdig pa khyad du gsod ces bya ba'i don to/ /gzhan dag ni tshul bzhin ma yin pa'i yid la byed pa'am spyod tshul ma yin pa zhes zer ro/ /sbyor ba zhes bya ba ni 'jug par byed pa'o/ /de la gang sbyor ba yin zhe na/smras pa/ sems te yid do/ /sbyor ba nyid la'ang mi 'jug pa'o zhes bya ba ni sbyor ba med pa las bzlog pas nam zhig na sbyor ba la yang mi 'jug pa'o/ /yang gi sgra ni bsdus pa'i don to/ /nyid ces bya ba'i sgra ni nges par gzung ba ste/ de nyid du sems mi sbyor ba'o/ /de dag byas pa'i nyes dmigs bstan pa ni//don btang nas zhes bya ba ste/ bdag la sogs pa'i don ni phan 'dogs pa'i dngos po spangs nas ngan par spyod pa la mngon par brtson pas bslab pa gsum slong ba la mngon par mi brtson pa'i phyir ro/ /su zhig de ltar byed pa yin zhe na/ smras pa/ sdug la lta ba zhes bya ba smos te/ sdug pa yongs su 'dzin pa de mchog tu byed pa'o//de ci zhig 'thob cing gang len pa yin zhe na/ smras pa/ reg par byed pa ste don du gnyer bar byed pa'o/ /dper na me tog dag la reg par byed pa ni reg par 'dod pa ste/ bzhi pa'i sbyor ba bstan to/ /don sbyor ba zhes bya ba ni don la sbyor ba ste/ mngon par 'dod pa'i 'bras bu dang ldan pa'o//de gang la yod pa de ni bslab pa gsum dang ldan pa'i gang zag go/ /'dod chags kyi dbang du 'gro ba'i skyes bus ni sdug pa la chags pas gzung ste/ de'i ched du byed cing de mchog tu 'dzin par byed la/ bag med pa'i rjes su 'gro zhing bslab pa gsum gyi bslab pa la btang snyoms su byed de 'chi ba'i dus su de mchog tu yon tan gyis brgyan pa yin no zhes rtogs te/de las shin tu mi bzad pa'i tshor ba drag pos mya ngan yang dag par skye bar 'gyur zhing reg par 'gyur ro/ /de ltar ngan song la sogs par skye bar 'gyur te/ yid la gcags bzhin du 'chi ba'i dus byed par 'gyur zhing lus zhig nas dmyal bar skye bar 'gyur ro zhes pa'i don to//gzhan dag ni don rig sbyor bar mi 'gyur ba zhes brjod de reg pa ni thob pa'o/ /don ni dngos po'o/ /mi sbyor bar ni mi rigs par 'brel ba ste/ mi rigs par byas zhes bya ba'i don to/ /ngan par spyod pa las bzlog pa'i phyir dang /legs par spyad pa la gzud pa'i phyir 'di gsungs so/ /sdug pa dang 'brel ba ni sdug bsngal thams cad yin no zhes bstan pa'i phyir/ gzugs sdug bsngal bde bas zhes bya ba la sogs pa smos so/ /yul yangs pa can na tshong dpon zhig gi bu skyes nas lo bcu gnyis lon pa zhig gnas so//ji tsam na shing sA la ban dzi ka zhes bya ba'i dga' ston gyi phyir gnyen bshes dang lhan cig grong khyer las phyi rol gyi skyed mos tshal du byung ste shing sA la la 'dzegs nas/ me tog mang po bsdus te nye du rnams la me tog man da ra ba rnams byin no/ /de'i chung mas 'di dag la ni byin te/bdag la ni ma byin no zhes mi bzod pa skyes te shing shin tu mtho ba zhig la 'dzegs pa las yal ga chag ste lhung ngo / /de'i tshe bcom ldan 'das spre'u'i mtsho bran gyi 'gram na bzhugs te chos ston to zhes de lhung bzhin du thos nas yid la byas pa las bar ma dor mya ngan las 'das par gyur to//de'i phyir nye du'i tshogs thams cad 'dus te mya ngan chen po byed par gyur to/ /lha'i 'jig rten du yang man da ra'i shing las lha'i bu zhig lhung ste/ skyes nas yongs su mya ngan las 'das par gyur to/ /de'i ched du lha'i tshogs rnams kyang yongs su mya ngan byed cing 'dug pa las 'dir bcom ldan 'das kyis tshigs su bcad pa gnyis gsungs so//de las dang po'i 'grel pa smras pa/ gzugs sdug ces bya ba smos te/ gzugs kyang yin la sdug pa'ang yin pas gzugs sdug go/ /yang na gzugs sdug pa'i rgyu can no/ /bde ba ni myong ba'o/ /gzugs sdug pa'i bde bas bsdams pa zhes bya ba ni bcings pa ste/de'i ched du so so'i skye bo 'khor ba la chags nas 'dug pa'o/ /de yang gang yin zhe na/ lha'i ris dag tu zhes bya ba smos te/ rgyal chen rigs bzhi la sogs pa'i lha'i tshogs dag tu'o/ /so so ni rnam pa sna tshogs pa nyid kyi lus dang sems yin pa'i phyir ro//ming dang zhes bya ba la/ dang gi sgra ni so so'i skye bo 'dren pa yin te/ de yang rnam pa sna tshogs pa'o/ /gzugs sdug pa'i bde bas bsdams pa dag yod par gyur pa des ci zhig tu 'gyur zhe na/ smras pa/ sdug pa byed cing zhes bya ba smos te/ shin tu gnod par byed pa yin pas sdig pa ste/sdig pa'i las de'i rgyus sems can thams cad la gdung bar byed pa ste/ de dang 'dir rjes su mthun par bsgrub pa'i tshul gang yin pa de ni de nyid de sdig pa byed pa zhes bya ba'i don to/ /bde ba rjes su myong bar byed pa'i phyir sems can rnams 'dod pa la mngon par chags par byed de/ 'dod pa'i ched du yang ngan par spyod pa thams cad spyod do//sdig pa'i 'bras bu smras pa/ yongs nyams nas zhes bya ba yongs su zad pa ste/ 'jig rten 'dir lus yongs su nyams pa dang smad pa la sogs pa'i sdug bsngal gyi gzhi yin pa'i phyir bdag nyid la stobs med pa yin te/ mngon par mi 'dod pa zhes bya ba'i don to//ji skad du bshad pa/ gal te srid pa rtsad bcad nas/ 'byor pa thams cad lag tu rnyed/ /de la skabs ni yod byas na/ /bran bzhin bka' ni spyi bos nod/ /ces so/ /rga dang 'chi ba'i dbang du 'gro/ /zhes bya ba ni/ rga ba dang 'chi ba'i rjes su 'jug pa ste/ yang dang yang du skye ba blangs nas 'chi ba rjes su myong bar 'gyur ro//de la 'dis ni nyon mongs pa dang ngan par spyod pas skye ba la phan par bstan to/ /'dis spang bar 'dod pas sdug pa yongs su spang bar bya'o zhes bsgrub pa'i phyir gsungs so/ /sdug pa yongs su spangs pa'i phan yon gang zhig ces bya ba la sogs pa smos te/gang zhig ni gang dag go/ /nyin dang mtshan mo zhes bya ba ni nyin par dang mtshan mo'o/ /dang gi sgra ni rgyun mi 'chad pa'i sbyor ba bsgrub pa'i phyir ro/ /bag yod ces bya ba ni bag yod par byed pa ste/ gzugs sdug pa spang ba'i phyir gnyen po bsgom pa zhes bya ba'i don to/ /gzugs sdug spong byed pa zhes bya ba ni sdug pa yongs su 'dor ba ste dngos po de la dmigs pa'i nyon mongs pa spang ba'i phyir ro//des zhes bya ba ni de nyid kyis so/ /drungs nas phyung zhes bya ba ni rtsa ba nas phyung ba'o/ /sdig pa'i rtsa ba zhes bya ba ni sdig pa 'phel ba'i phyir bag la nyal zhes bya ba'i don to/ / bdud zas dang zhes bya ba ni 'chi bar byed pa'i 'dren pa dang / zas dang zang zing dang phan 'dogs pa zhes bya ba ni rnam grangs so/ /de'i phyir nyon mongs pa ma spangs pa la ni skye ba dang 'chi ba rnyed sla ba yin no/ /sdig pa'i rtsa ba ni sdig pa thams cad skyed par byed pa yin pa'i phyir ro/ /de bas na bdud kyi zas te ji skad du bstan pa/gang du 'dod pa de na 'chi ba yod/ /gang du zas yod de na bya rgod ltung / /zhes gzhan dag zer ro/ /spang dka' zhes bya ba ni 'da' bar dka' ba'o/ /bdag nyid ma sbyangs pa rnams la ni kun du sbyor ba rnams spang bar dka' ba nyid du bstan pa'i phyir 'di gsungs so/ /byis pa rnams kyi sdug pa'i dngos po ni slu ba nyid du bstan pa'i phyir/legs min legs pa'i tshul dang ni/ /zhes bya ba la sogs pa smos te/ bcom ldan 'das a ma la ka la ba zhes bya ba'i shAkya'i grong rdal na bzhugs te/ de'i tshe su pra be sha kro ta zhes bya ba'i bu mo de las khye'u zhig btsas so/ /de nas yang a ma la ka la ba zhes bya ba na gnas pa'i lha de bcom ldan 'das kyi spyan sngar phyin te gsol ba/btsun pa su pra be+e sha kro ta zhes bya ba'i bu mo de las khye'u zhig btsas so/ /bcom ldan 'das kyis bka' stsal ba/ lha de ni ma legs te shin tu yang ma legs so/ /lha des gsol ba/ 'jig rten na ni bu skyes bde zhes brjod//bu skyes na ni yid kyang shin tu dga'/ /pha ma rgas na gso bar byed yin na/ /ci phyir khyod ni legs pa min zhes gsungs/ /zhes gsol pa dang / bcom ldan 'das kyis/ legs min legs pa'i tshul dang ni/ /zhes bya ba la sogs pa bka' stsal to/ /sdug pa'i dngos po 'di dag thams cad ni legs pa ma yin te gnod pa thams cad kyi rgyur gyur pa dang /skye bo dam pas smad pa'i phyir ro/ /de yang legs pa'i tshul gyis te legs pa'i thabs kyis bag med pa'i sems can mngon par 'joms pa yin te/ slu bar byed pa'i chu'i sha za bzhin no/ /sdug pa'i tshul gyis dang zhes bya ba ni sdug pa lta bu'am yid du 'ong ba'i tshul gyis so//sdug min zhes bya ba ni yid du mi 'ong ba'i tshul gyis so/ /sdug ces bya ba ni yid mi rtag pas ma rung bar byas pa de lta mod kyi kha na ma tho ba med pas slu ba yin no/ /sdug bsngal bde ba'i tshul gyis su/ /zhes bya ba ni 'khor ba'i srid par bsdus pa thams cad sdug bsngal zhing sdug bsngal rnam pa gsum dang ldan pa yin te ci rigs par yin na de lta yang nan gyis bde ba nyid du yongs su 'dzin pa yin no//legs min legs pa zhes bya ba la sogs pa'i tshig rkang gsum gyis ni sdug pa rnams mi gtsang ba dang / mi rtag pa dang bdag med pa dang /sdug bsngal ba'i tshul du yod pa yin yang / de lta mod kyi gtsang ba dang rtag pa dang / bdag dang bde ba nyid du nan gyis phyin ci log par gyur to zhes bya ba ni gzhan dag zer ro/ /yang na lha sbyin gyis bstan pa'i tshigs su bcad pa lugs las bzlog pa ni lan 'dis bstan pa yin no/ / khye'u de cher skyes pa dang pha dang ma gsod par 'gyur zhing rigs rgyud thams cad rlag par byed pa dang / nye du'i rigs thams cad kyang 'jig par 'gyur zhing thams cad sdug bsngal la sbyor bar byed pa yin te/ de ltar don rnam pa gsum/ legs min legs pa'i tshul dang ni/ /zhes bya ba la sogs pa'i tshig rkang gsum gyis bstan to//bag med rnams ni zhes bya ba ni rmongs pa ste/ gang gi phyir rmongs na ni bya ba rnams la bag med par 'gyur ro/ /mngon du 'joms pa ni zil gyis gnon pa ste/ lam bzang po nyams zhes bya ba'i don to/ /slu bas 'jigs pa rnams sdug pa spang ba la gzud pa'i phyir 'di gsungs so//gzhan sdug cing mngon par 'dod pa rnams ni yal bar dor bar nus na bdag la dga' ba ni mi nus pa yin pas bdag la phan par 'dod par mi bya'o/ /ji ltar bdag la dga' bar bya ba de nyid bstan pa'i phyir/ gal te bdag la dga' byed na/ /zhes bya ba la sogs pa smos so/ / yul ko sa la'i rgyal po gsal rgyal gcig pu dben par song ste 'di lta bu'i sems la sems kyi rtog pa skyes so/ /gang bdag la dga' ba 'di dag ni bdag la dga' ba ma yin no zhes rgya cher sbyar te/ bcom ldan 'das de'i gan du gshegs te/ rgyal po chen po gang la lus kyis legs par spyad pa spyod pa dang /ngag dang yid kyis legs par spyad pa spyod pa de ni bdag la dga' ba yin no zhes bya ba'i bar du ste/ de'i dbang du mdzad nas tshigs su bcad pa lnga gsungs so/ /'jigs su rung ba'i nags na gzhon nu byang chub rgyal po bdag la dga' zhing ngan par spyod pa de'i dbang du mdzad pa zhes sde pa gzhan dag zer ro//gal te bdag la dga' byed na/ /zhes bya ba ni re zhig mkhas pas ni bdag mi rtag pa yin pa'i phyir dga' bar mi bya'o/ /gal te gang zhig bdag gi la bdag gi dngos por dga' bar byed par 'dod na ni 'di ni mi bya'o zhes pa ste bdag nyid do//sdig la gzhug par byas pa ni ngan par spyod pa la 'jug pa'o/ /gang yang bdag nyid kyis lus la sogs pa'i ngan par spyod pa de dag las bzlog pa de ni bdag la dga' bar gnas pa yin te/ de sdug bsngal gyi rgyu spong ba'i phyir ro/ /ci'i phyir de ltar byed du gzhug pa yin zhe na/ bde blag kho nar zhes bya ba smos te/ gang gi phyir bdag nyid la phan par 'dod pas bde ba ni bde blag tu mi 'thob cing legs pa mi rnyed do/ /gang dag gis she na/ nyes par byed pas zhes bya ba smos te/ sdig pa byed pa'i sems can rnams ni me'i nang du 'jug pa la grang zhing spu ldang ba la sogs pa mi 'byung ba bzhin no//nag po'i phyogs bstan nas dkar po'i phyogs bstan pa'i phyir/ gal te bdag la dga' byed na/ /zhes bya ba la sogs pa smos te/ bde ba dag ni gang gi phyir bde blag kho nar thob pa yin no/ /legs par byed pas zhes bya ba ni legs par spyod pa ste/ gang dag rgyun mi 'chad par legs par spyad pa spyod pa de dag gis ni 'jig rten dang 'jig rten las 'das pa'i bde ba bde blag tu 'thob pa yin pas legs par spyod pa ni bde ba thams cad kyi rgyur gyur pa yin te/ji skad du gsungs pa/ dge slong dag bsod nams dag las 'jigs par ma byed cig /de ci'i phyir zhe na/'di ni bde ba zhes bya ba'i tshig bla dwags yin no zhes bya ba la sogs pas so/ /'di ni sdig la gzhug mi bya/ /zhes bya ba la/ gzhug pa zhes bya ba'i sgra'i don ni rnam pa gnyis te/ ldog pa dang 'jug pa'i mtshan nyid kyis so/ /de la re zhig ldog pa'i mtshan nyid rnam par dbye ba'i phyir//dper na dgon pa'i zhes bya ba la sogs pa smos so/ /'di ni bsrung bas zhes bya ba ni bdag nyid sdig pa las bzlog pas bsrung bar bya ba yin te/ 'di ni bzlog pa'i sgra la 'jug ste/ dper na nas dag las glang srungs shig ces bya ba ni bzlog pa'i don to/ /ji ltar bsrungs pa yin zhe na/legs par bsrung zhes bya ba smos te/ 'di ni bya ba'i bye brag yin te/ 'di bzang por bsrung ba'i las so/ /shin tu bstan par bya zhes bya ba'i don te/ ji ltar legs par bsrung bar 'gyur ba de ltar bdag bsrung bar bya'o/ /ji lta bur bsrung bar bya zhe na/ dgon pa'i grong khyer lta bur zhes bya ba smos te/shin tu thag ring ba'i phyogs gang yin pa de ni dgon pa ste/ yul phyogs mi mnyam pa thag ring ba'o/ /grong khyer zhes bya ba ni dgra seng ge lta bus bab col du bzar mi 'dod pa'i phyir ro zhes bya ba ni nges pa'i tshig go/ /dgon pa yang yin la grong khyer yang yin zhes bya ba ni las 'dzin pa'i bsdu ba'o//ri la sogs pa'i gnas mi mnyam pa'i phyogs na gnas pa ste/ rdzong zhes bya ba'i don to/ /de'i khyad par ji lta bu zhe na/ 'obs kyis bskor ba ltar zhes bya ba smos te/ brkos pa'i 'obs kyis bskor ba'i grong khyer gang yin pa de nyid de/ 'obs zab pa zhes bya ba'i bar du'o//ji skad du bshad pa/ rgyal po'i dgon pa'i grong khyer du ni 'obs brko bar 'gyur ba yin te/ shin tu zab par brko ba yin no zhes bya ba la sogs pa mdo las gsungs so/ /der sogs pa'i sgra ni bskang bar bya ba yin te/ de yang mdung dang yid ches pa'i mi dag dang / mtshon dang zas la sogs pa yongs su gzung ngo //gang gi tshe dgon pa'i grong khyer la 'obs rnam pa bdun gyis bskor cing zas rnam pa bzhi ci 'dod pa rnyed pa de la ni pha rol gyi phyir rgol ba rnams kyis bgrod par bya ba ma yin no zhes bya ba'i tshig gis so/ /bstan pa zhes bya ba ni de bzhin du skye bo mdza' bshes dang ldan pa'i phyir te/gang gi phyir grong khyer gyi skye bo ni med de/ des ni 'khu zhing 'byed pa'i phyir rdzong bsrung dka' bar 'gyur ro/ /dper na rgyal pos grong khyer de dgra dag las bsrungs pas ci nas kyang phyi rol gyi phyir rgol ba rnams kyis bgrod par bya ba ma yin pa de bzhin du/ bdag la phan par 'dod pa'i skye bos bdag dang bdag gi bsrung bar bya ste/ de ltar ngan par spyod pa dag la ji ltar sdig pa las ma gos shing nyams par mi 'gyur ba de ltar bya ste/ ji skad du gsungs pa/ dad pa'i mtshon dang ldan pa'i 'phags pa'i nyan thos kyis ni mi dge ba spong bar 'gyur zhes rgya cher bshad do//ji ltar rtag tu 'di dag bsrung bar nus she na/ gal te bdag la dga' byed na/ /zhes bya ba la sogs pa smos te/ nyin par ram mtshan mo cha gsum du bgos pa ni thun te/ de'i gsum ni thun gsum mo/ /de las gang yang rung ba cig ni thun gcig ste/de tsam gyi dus la'o/ /mkhas pa ni rtog pa'o/ /mel tse bya ba yis zhes bya ba'i khyad par du dge ba dag la brtson par bya ba ste/ ji skad du bshad pa/ don med pa'i nyi ma mi bya ste/ bsod nams ni chung ba ma yin yang nyung ngu nyung ngus bsten na ni de bsags pa'i phun sum tshogs pas/ grog mkhar lta bur de bsags par 'gyur zhing de dang mthun pa'i dngos po de'i mngon par dga' ba'i phun sum tshogs par 'gyur ro//'jug pa'i mtshan nyid kyi sbyor ba smras pa/ gal te bdag la dga' byed na/ /zhes bya ba'i don ni bstan zin to/ /'di ni sba bas zhes bya ba ni bdag nyid sba ba ste/ gang gi phyir legs par spyod pa la 'jug pas ni bdag bsrung bar 'gyur te/ ji skad du glang po che dregs pa mur 'gram gyi phyogs su rdul 'byung ba'i stobs kyis an dza na'i ri 'joms par byed pa dang / 'phangs glo ba nye ba rnams kyis lag pa na mdung dang mdung thung dang mtshon cha thogs pa rnams kyis kyang g.yul ngor 'jug pa las mi rnams bsrung bar mi nus so//gang g.yul dang 'thab mo dang 'thab mo ma yin pa dag tu yang bsod nams kyi tshogs bsags pas ni srung bar byed do/ /ji ltar sba ba yin zhe na/ legs par sba ba zhes smras te/ legs par sba ba ni 'di lta bu yin te/'dir dpe brjod pa smras pa/ dper na zhes bya ba la sogs pa'o/ /srung bar byed pa ltar zhes bya ba ni legs par skyong ba'o/ /phyi ni phyi rol gyi 'obs kyi i shi ka la sogs pa'i yo byad do/ /nang zhes bya ba ni nang rol gyi sgo srung ba ste/ dper na dgon pa'i grong khyer la rgyal pos phyi nang gi yo byad thams cad kyis legs par bsrungs na/phyir rgol ba rnams kyis de 'phrogs par mi 'gyur ro/ /de bzhin skyes bu dam pa rnams kyis kyang phyi rol gyi srog gcod pa spong ba dang / nang gi bsgom pa la sogs pas bdag legs par bsrung bar 'gyur te/ de legs par bsrungs pas ni/bdud kyis mi 'phrogs par 'gyur ro/ /de ltar na bdag rim gyis bsrung bar 'gyur ro/ /de ltar bsrung bar bya zhes bya ba ni de ltar myur du bdag bsrung bar bya ba'o/ /ji ltar yang / dal 'byor chud ni mi zos par/ /zhes bya ba smos te/ sangs rgyas 'byung ba la sogs pa'i yon tan dang ldan zhing mir skye ba ni dal ba ste/de khyod kyis chud ma zos shing ma 'das pa dang don med par ma byed cig pa'o/ /de las 'das pa'i nyes dmigs smras pa/ dal 'byor thal bas zhes bya ba yin te/ ji skad du bshad pa'i mtshan nyid can gyi dal ba'i dal 'byor las thal zhing 'das pa ste/ nyams pa'i mtshan nyid ces bya ba'i don to//bas zhes bya ba'i sgra ni gang gi phyir zhes pa'o/ /'gyod par 'ong zhes bya ba ni mya ngan byed par 'gyur ba'o/ /gang du zhe na/ smras pa/ sems can dmyal bar zhes bya ba ste/ yang sos la sogs pa dag tu'o/ /skye ba ni 'byung ba'o/ /'di ltar gang dal ba phun sum tshogs pa don med par byas shing 'das pa des dmyal bar 'gyur ro zhes mya ngan byed cing sdug bsngal gyis gdungs bzhin du bdag gis ni ngan par spyad pa byas shing bsags pas 'dir lhung ngo zhes so//de bas na ji ltar dal ba las thal bar mi 'gyur ba de ltar bya'o/ /bsrung ba dang sba ba'i khyad par bstan pa'i phyir smras pa/ 'di gnyis ni tha dad pa ma yin te/ gdul ba nye bar 'ongs pa dag la de'i sgra bsgrub cing phan gdags pa'i phyir gnyi ga gsungs so/ /yang na sdig pa la 'jug pa dag bzlog pa ni bsrung ba'o/ /dge ba la 'jug pa dag ni sba ba'o/ /phyir rol gyi gnod pa dag las bsrung ba dang / nang dag tu sba ba zhes bya ba la sogs pas so//bdag nyid sdug par byed pa mi shes pa de dag la bdag nyid sdug par byed pa'i rang gi ngo bo bstan pas de la gzhug pa'i phyir 'di gsungs so/ /bdag dang gzhan bsrung ba'am sba bar ni su zhig gis nus zhes pa dang / gang mi 'tshe ba zhes smos te/ su zhig mi 'tshe ba la stod par byed ces pa la bstan pa'i phyir/phyogs rnams kun na zhes bya ba la sogs pa smos so/ /gang gi tshe btsun mo phreng ldan mas bcom ldan 'das spyan drangs pa de'i tshe bdag nyid kyi lag btsugs shing tshad mang du g.yos bya ba las rgyal po 'di'i chung ma 'gran zla zhig yod pas 'di'i don byed cing 'di la dga' bo zhes phra ma byas so//de nas rgyal po de 'khrugs nas/ ral gyi rnon po shubs nas phyung ste btsun mo phreng ldan ma la bsdigs nas 'jig rten na khyod la ches sdug pa gang yin smros shig ces byas so/ /de bag tsha ba med par bdag nyid yin no zhes smras so/ / de lta bu'i gnas skabs las bcom ldan 'das kyis tshigs su bcad pa gnyis gsungs so/ /gzhan dag ni drug sdes dge slong rnams la rgyun du rnam par 'tshe ba byas pas de'i dbang du mdzad do zhes zer ro/ /phyogs rnams kun du zhes bya ba ni phyogs kyi dbye ba ma lus pa ste phyogs mtha' dag go/ / yongs brtags kyang zhes bya ba ni brtags shing btsal kyang ngo / /sems zhes bya ba ni blos so/ /kyang gi sgra ni nges par gzung ba dang / rim pa gzhan du sbyar ba'o/ /ma mthong na zhes bya ba ni de nyid ma dmigs pa zhes bya ba'i don to/ /ches sdug ces bya ba ni ches 'dod pa'o/ /ga las she na/ bdag las zhes bya ba smos te/bdag nyid las te/ bdag dang mnyam par sdug pa ni med do zhes bya ba'i tshig gis so/ /de ltar zhes bya ba ni de bzhin no/ /ji ltar sems can gcig bdag nyid la dga' ba ltar ni gzhan la ches dga' ba gang yang cung zad med do/ /de bzhin du bdag dang gzhan dag bdag la so sor sdug pa nyid do//so so zhes bya ba ni rnam pa sna tshogs pa'i 'gro ba ste/ skye ba dang phyogs dang skye gnas so/ /gzhan la zhes bya ba srog chags gzhan dag kyang bdag nyid bzhin du sdug pa yin no zhes shes par bya ste/ ji skad du/ bde la gnas shing sdug bsngal bral ba ni/ sems can mnyam par sems par rtogs byas te//de bas bdag ni 'dod pa gang yin pa/ /de ni gzhan dag la yang spyad mi bya/ /zhes gsungs so/ /de'i phyir gnod mi bya zhes bya ba ni 'tshe ba mi bya ba'o/ /gzhan la zhes bya ba ni sems can gzhan no/ /gang gis she na/ bdag gis zhes bya ba smras te/ bdag la phan par 'dod pa ste/ gang bdag la sdug par byed par 'dod pa des ni gzhan la gnod par mi bya'o zhes ston to/ /tshigs su bcad pa snga ma'i don de gsal bar bstan pa'i phyir smras pa/ thams cad la yang srog 'di sdug /ces bya ba la sogs pa smos te/ thams cad chad pas 'jigs pas na//zhes bya ba ni sems can thams cad 'jigs shing bag tsha bar 'gyur ba'o/ /gang las she na/ chad pas zhes bya ba'i don to/ /gang gi phyir sems dang ldan pa su zhig gnod pas mi 'jigs par 'gyur/ ci'i phyir zhe na/ 'di ltar/ thams cad la yang srog 'di sdug /ces bya ba smos te/ gang gi phyir srog chags thams cad ni tshe 'di 'dod cing yongs su mi gtong ba yin te/de bas na thams cad srog la gnod par byed pa'i chad pa nyid kyis 'jigs pa yin no/ /des na de'i phyir smras pa/ rang gi nyams las dpag byas te/ /zhes bya ba bdag rang nyid las dper bya ba'o/ /brdeg par mi bya zhes bya ba ni bdag dang gzhan gyis gnod cing 'tshe ba mi bya ba'o//gsad mi bya zhes bya ba ni gzhan gyi lag gis kyang / gzhan bsad pa la nan tan mi bya'o/ /yang bshad pa/ ji ltar ha la ha la'i dug /rang ngam yang na gzhan gyis kyang / /byin nas 'chi bar 'gyur ba ni/ /bye brag dag ni med par 'gyur/ /zhes pa'o//chad pas 'jigs pas ni gzhan la gnod par byed pa ste/ srog 'gag par byed cing gsod par byed pa dang / brdeg par mi bya ba chad pa la sogs pas 'tshe bar mi bya ba'o/ /'byung po rnams la gsad par mi bya zhing gtse bar mi bya zhes gzhan dag zer ro/ /bdag la dga' ba rnams 'tshe ba las bzlog pa'i phyir 'di gsungs so//bdag la dga' ba rnams gzhan la gang gis kyang mi 'tshe ba de la bsod nams dpag tu med pa 'byung bar mkhas pa rnams kyis bshad cing / 'tshe ba med pas mi 'tshe ba nyid ni don dam par bsod nams de nyid yin no zhes bstan pa'i phyir/ dge la lha rnams zhes bya ba la sogs pa'i tshigs su bcad pa bzhi smos so//mnyan yod kyi gnas chen po zhig na nor chen po dang ldan pa'i khyim bdag cig shi ba'i dus byas pa las/ rgyal po gsal rgyal gyis nye bar phyin te/ skyes bu dam pa chen po rgyal po chen pos longs spyod rgya chen po thob pa ni/ bdag nyid kyis yang dag par bde bas dga' ba med do zhes rgya cher sngon gyi sbyor ba ta ga ra shi khi zhes bya ba'i rang sangs rgyas la gus par byas te/bsod snyoms cig sbyin pa byas nas/ dmyal ba ngu 'bod chen po'i skye ba'i chos bshad de zhes rgya cher ro/ /ji tsam na rgyal po gsal rgyal mchi ma phyung ste/gos kyi mtha' mas phyi zhing bcom ldan 'das la nor dang 'bru dang sa le sbram la sogs pas ni bgyi ba ci yang ma mchis so zhes zhus so/ /bcom ldan 'das kyis bka' stsal pa/ gnyi gar yang bsod nams zhes bya ba la sogs pa'o/ /gzhan dag ni kun dga' bos ci btsun pa drang srong smra ba dag tu lha la sogs pa cung zad 'jig rten gnyi gar yang phan pa byed pa yin no zhes zhus pa de'i dbang du mdzad pa yin no zhes zer ro//dge ba ni lus la sogs pa'i legs par spyad pa spyod pa'i skyes bus rigs pas 'ongs pa'i phun sum tshogs pa rnams zhes bya ba ni de'i nges pa'i tshig go//lha rnams stod par byed pa ni 'dod pa dang gzugs na spyod pa'i lha rnams dge ba nyid la bsngags pa brjod pa yin te/ ba ri dza ta ka'i mdo las dge slong dag tshes brgyad dang / zla ba phyed ces bya ba la sogs pa 'dir dper brjod par bya'o/ /gang zhig legs spyad spyod byed pa'i/ /zhes bya ba la/gang zhig ni gang zag go/ /legs spyod ces bya ba ni bsod nams kyi tshul lhag par spyod pa ste/ dge ba byed pa de la gzhan yang bsngags pa smra ba yin no/ /de ltar na mi rnams kyi phar 'dzin pa dang / mar 'dzin pa dang / ji srid du lha'i lus mngon par bskyed par bya'o zhes bya ba la sogs pa'i tshig gis so//yang na dge ba ni khyim pa dang rab tu byung ba rnams kyis legs par spyad pa ni thun mong du 'gyur ba'o/ /'dir bsod snyoms kyi 'bras bu legs par spyod par byed pa nyi tshe tsam du ma zad de/ yang 'di na'ang zhes bya ba ni mthong ba'i chos nyid la'o/ /smad par mi 'gyur la zhes bya ba ni dga' zhing rangs pa rgya che ba skye bar 'gyur ba ste/skye bo thams cad dga' bar byed pa'i phyir dang / skye bo dam pa rnams kyis bsngags pa'i phyir dang / 'khor bar mi 'khor ba la sogs pa'i khyad par dang ldan pa'o/ /yang na smad par mi 'gyur ba zhes bya ba ni mi rnams su'o/ /mtho ris su yang dga' ba 'thob/ ces bya ba ni shi nas 'jig rten pha rol te/bde 'gro dag tu yang dga' bar 'gyur ro/ /yang gi sgra ni bsod nams byed pa rnams 'di dang / pha rol gnyi gar yang bde ba dang 'brel ba nyid du ston to/ /ji ltar bsod nams byed pa 'jig rten pha rol du dga' bar 'gyur zhe na/ rgyang thag bcad par spyugs pa'i mi//zhes bya ba la sogs pa smos te/ yun ring po'i dus su bskrad pa'i tshul 'di la yod pa ni rgyang thag chad par spyugs pa ste yul phyogs gzhan dag tu'o/ /mi ni bu la sogs pa'i tshul gyi sems can no/ /ring nas zhes bya ba ni yul thag ring ba nas so/ /nye zho med 'ongs na zhes bya ba ni bde bar bsdogs pa dang bcas par de 'ongs par mthong ba'o//gnyen ni pha dang ma la sogs pa'o/ /bshes ni chung ma dang bu la sogs pa'o/ /mdza' bo ni grogs po la sogs pa'o/ /mngon par dga' zhes bya ba ni lhag par mgu ba'o/ /ji ltar mngon par dga' ba yin zhe na/ a la la zhes bya ba smos te/a la la ni dga' ba'am yang na ngo mtshar to/ /e ma'o bya ba shin tu bzang zhing che ba grub par gyur to zhes bya ba'i don to/ /dpe bstan nas des bsgrub par bya ba'i don smras pa/ de bzhin bsod nams byas pa'i mi/ /zhes bya ba ste/ gang zag gang gis bsod nams kyi tshogs yang dag par bsags shing lhag par stsogs pa'o//de bzhin du 'jig rten 'di nas zhes bya ba 'di ltar ris mthun pa las so/ /pha rol phyin tshe zhes bya ba ni 'jig rten gzhan 'thob pa'o/ /gang zhig ce na/ bsod nams bsags pa de dag ste/ sbyin pa la sogs pa'i legs par spyad pa'o/ /mngon par dga' bar byed ces bya ba ni mngon par dga' ba la sbyor bar byed pa ste/de la phan 'dogs pa'i phyir 'jug par 'gyur ro zhes pa'i don to/ /ji lta bu zhe na/ smras pa/ gnyen bzhin 'ongs nas zhes bya ba ste/ gnyen sdug pa'i skye bo dag 'ongs pa bzhin du ste/ gnyen gzhan dag gis mthong na mngon par dga' bar byed pa de bzhin no//'dir dpe rgya cher sngar bshad mod kyi/ phyis 'ongs pa dang mdor bsdus pa la dga' ba'i gdul bya dag rjes su gzung ba'i phyir mdor bsdus te yang bstan pa'o/ /yang na snga mas ni mngon par dga' ba'i dpe bstan to/ /'dis ni phan 'dogs pa'i bya ba zhes bya ba la sogs par brjod do//gang gi phyir de ltar bsod nams ni khyad par du mthu che ba yin te/ de bas na 'di nyid la gzhug pa'i phyir smras pa/ de bas zhes bya ba la sogs pa'o/ /des na de'i phyir bskyed pa dang bsags pa gyis shig pa'o/ /ci zhig ce na/ bsod nams bsags pa zhes bya ba ste/ legs par spyad pa'i tshogs so/ /'jig rten pha rol gyi zhes bya ba ni 'jig rten pha rol te/ skye ba phyi ma'i ched du'o/ /der 'byung ba ni 'jig rten pha rol gyi ste/ 'jig rten pha rol la phan 'dogs par byed pa'o/ /ci'i phyir 'jig rten pha rol gyi ched du zhe na/ smras pa/ 'di ltar bsod nams 'jig rten pha rol gyi zhes bya ba ste/ gang gi phyir sbyin pa la sogs pa'i legs par spyod pa dag rgyud la yongs su bsags pas 'jig rten pha rol du sems can srog chags rnams kyi gnas dang rten du 'gyur te/ ji skad du bshad pa/ 'khor ba nyam nga ba dag tu skye zhing 'khor ba na 'jig rten pa rnams kyi gnas kyi mchog ni bsod nams yin no zhes bya ba lta bu'o//bde ba 'dod pa rnams bsod nams bya ba la bag med pa dag la de bstan pa'i phyir tshigs su bcad pa 'di gnyis gsungs so/ /gzhan yang bdag nyid bsod nams mchog tu byed pa la yang skye bo thams cad dga' bar 'gyur te/de nyid smras pa/ chos gnas zhes bya ba la sogs pa'o/ /de nas sun da ri ka zhes bya ba'i rgyal po'i bu bcom ldan 'das kyi spyan sngar phyin te/ btsun pa skyes bu dam pa rnams kyis ci zhig byas na skye bo thams cad dga' bar 'gyur zhes zhus pa dang / rigs kyi bu 'di la chos kyis 'tsho ba brtag par bya'i chos ma yin pas ni ma yin no zhes rgya cher 'di gsungs so//chos gnas zhes bya ba la/ chos ni snying rje ste 'tshe ba med pa ni chos kyi mchog yin no zhes bya ba'i tshig gis so/ /'tshe ba med pa yang g.yo la sogs pa gzhan gnod pa byed pa la snying rjes lta bar byed pa'o//de yang gsungs pa/ bdag ni sems can la brtse ba/ /rgyal po chos ni mdor bsdus yin/ /zhes so/ /de la gnas pa ni chos gnas te/ de snying rje dang ldan pa zhes bya ba'i don to/ /tshul khrims phun sum tshogs pa zhes bya ba ni/ tshul khrims kyi legs par spyod pa dang ldan pa ste/rnam pa thams cad du yongs su rdzogs pa'o/ /ji skad du tshul khrims 'chal ba'i de'i rgyu spong ba ni de'i gnyen po bsten pa yin no zhes gsungs te/ de dang ldan pa ni 'di'i phun sum tshogs pa ste/ tshul khrims ma tshang ba med pa dang ldan pa de ni tshul khrims phun sum tshogs pa'o//ngo tsha shes shing zhes bya ba la/ yon tan dang yon tan can dag la gus pa ni ngo tsha'o/ /yang na bdag nyid la mngon par brtags nas nyes pa rnams kyis 'dzem pa ste/ de ni ngo tsha zhes brjod de/ de gang la yod pa de ni ngo tsha shes pa'o/ /bden par smra zhes bya ba ni bdag dang gzhan la gnod pa spangs pas dben par smra ba ste/bzhi po 'di dag ni bde 'gror 'gro ba'i skabs su gyur pa yin no/ /rang gi bya ba byed pa la/ /zhes bya ba ni bdag nyid kyi phan pa byed pa'o/ /dam pa ni dge ba ste gang gi phyir dge ba rnams ni sngar bstan pa'i yon tan dang ldan pas rtag tu bdag la phan pas legs par spyod pa ste/de la ni dgra bo dag kyang dga' zhing yid du 'ong bar byed na/ tha mal pa dang grogs bshes lta smos kyang ci dgos/ de nyid du bshad ma thag pa bstan pa de khyad par du 'phags pa yang dag par bstan pa'i phyir smras pa/ dga' 'gyur zhing zhes bya ste/ gang gi phyir snying rje la sogs pa'i yon tan bzhi bsten pa de ni sdug cing phangs par 'gyur ro//gang dag la zhe na/ smras pa/ gzhan rnams zhes bya ba ste/ lha dang mi rnams so/ /ji skad du gzhung gi dbang du byas pa ste/ de la lha bdun brgya rgya che ba'i tshangs pa'i gzhal med khang nas nye bar phyin to zhes gsungs pa lta bu'o/ /yang na gzhan rnams zhes bya ba ni gzhan sgra rnams kyang zhes bya ba'i don to//rang gi don ni byed pa la/ /zhes bya ba ni thams cad dga' bar 'gyur ba dang / bdag la phan 'dogs pa skyed par byed pa yang yin te/ 'jig rten ni las bdag gir byed ces pa'i tshig gis so/ /mthong ba'i chos la bsngags pa dang / / zhes bya ba ni tshe 'di la thams cad du stod par byed pa'ang yin no/ /pha rol du yang zhes bya ba ni 'jig rten pha rol du yang ngo / /bde 'gror 'gro 'gyur zhes bya ba ni dam par 'gro bar skye ba yongs su 'dzin pa de ni de lta bu'o/ /chos la gnas pa zhes bya ba la sogs pa re res 'dir mthong ba dang / ma mthong ba'i phan yon brjod par bya ste/go rims bzhin no/ /gzhan dag ni yon tan bzhi'i phan yon bzhi ni 'dir brjod par bya'o zhes zer ro/ /dga' ba la sogs pa'i khyad par 'dod pa rnams de'i thabs la gzud pa'i phyir 'di gsungs so/ /'o na bdag nyid legs par spyod pa mchog tu byed par gyur kyang gzhan la yang nas yang du bya ba ma yin pa las zlog par byed pa la dga' bar 'gyur ro zhe na/gtams na gnang ba'i tshig smra dang / /zhes bya ba la sogs pa smos so/ /bcom ldan 'das bya rgod kyi phung po'i ri la bzhugs te/ bco lnga pa'i gso sbyong de cung zad lus pa dang /sdig pa spang ba dang yon tan las brtsams pa'i chos kyi gtam ston to/ /de bzhin du gzhan yang 'di lta ste brtson 'grus brtsams pa dang bag yod pa dang / bka' blo bde ba dang / rgya cher ro/ /gang dge slong 'di dag des yon tan dang ldan pa dang / de yid dga' ba dang mgu bar gyur to//lha sbyin 'khor dang bcas pa sdug bsngal zhing yid mi bde bas stan las langs te/ bcom ldan 'das kyi spyan snga nas song ngo / /de nas de'i tshe bcom ldan 'das kyis tshigs su bcad pa gnyis po 'di gsungs so/ /gtams na zhes bya ba ni rang nyid tshul khrims la sogs pa'i khyad par la gnas shing gzhan dag kyang de nyid la 'dzud pa ni gtams pa ste/'di dag ni bya ba'o/ /'di dag ni bya ba ma yin pa'o zhes rjes su mthun pa'i tshul du ston pa'o/ /gnang ba'i tshig smra dang zhes bya ba ni ting nge 'dzin bskyed pa'i rim pa'i thabs ston cing yid la byed pa bskyed pa'i thabs ston pa ni gnang ba'i tshig smra ba'o//mi rigs spyod las zhes bya ba ni tshogs par rung ba'i tshig ni bsngags pa'o/ /de las bzlog pa tshogs par mi rung ba ste/ mi rigs pas byas pa'i las so/ /ji skad du gang ma brtags pa brten pa de ni bcol kyang nan tan du mi bya'o//de bas na de las bzlog par bya ste grags pa ma yin pa la sogs pa skyed par byed pas/ 'di ni yang skye bar mi 'gyur bar nam yang mi 'bad par mi bya'o zhes bya ba la sogs pa'i tshig gis so/ /de ltar gyur pa ni skyes bu dam pa'o/ / dam pa ma yin dga' mi 'gyur/ /zhes bya ba ni sdig pa byed pa rnams zhe sdang bar 'gyur te/ nye du dag 'chi ltas byung ba lta bu dang / nyi ma'i 'od zer gyis mig la gnod pa lta bu'o/ /dam pa rnams ni dga' bar byed/ /ces bya ba ni gang yang dam pa ni mkhas pa dag ste/ bdag la phan par 'dod pa de rnams ni gtams na gnang ba'i tshig smra ba'i pha rol po la bla ma bzhin du khyad par du dga' bar 'gyur te/ston ka'i zla ba lta bu'am/ lus nad kyis gdung zhing 'dug pa la glo bur du grub pa'i sman pa nye bar 'ongs pa lta bu'o/ /'di ltar gang gi phyir dam pa dang dam pa ma yin pa yang dag par nye bar bstan pas dga' ba dang mi dga' ba yin te/de bas na de'i phan yon dang nyes dmigs bstan pa'i phyir/ de bas mchog dang mchog min la/ /zhes bya ba smras te/ gang gi phyir mchog ma yin pa ni phan pa bstan pa la rmongs pa'i phyir mi dga' ba'o/ /mchog ni khyad par shes pa des dga' bar 'gyur te/rgyu de'i phyir 'di las gnyi ga 'chi ba'i chos la ni bye brag med kyang pha rol tu ni khyad par dang ldan par 'gyur ba yin te/ shi 'phos bral bar gyur pa na/ /zhes bya ba smos te/ shi 'phos pa ni shi ba'o/ /de rtogs pa'i tshul gang la yod pa de nyid ni 'chi bar rjes su 'gro ba zhes bya ba'i don to//gnyi ga yang 'chi ba'i chos la yang bye brag med do zhes sgrub pa'i phyir dang gi sgra'o/ /ji ltar 'di dag 'chi ba la bye brag med pa de bzhin du/ ji ltar skyed par gyur pa na yang yin nam zhe na/ ma yin te smras pa/ 'di ltar/ dam pa ma yin dmyal bar 'gro/ / zhes bya ba yin te/ gang bla ma rnams kyi gdams ngag la rjes su mi 'jug pa de ni dmyal ba la sogs par skye bar 'gyur ro/ /dam pa mtho ris 'gro bar 'gyur/ /zhes bya ba la/ mtho ris ni lha'i gnas te/ der 'gro zhing rab tu gnas pa gang yin pa ste/ dam pa ni bde 'gror 'gro zhing 'byung ba zhes bya ba'i don to//sdug pa'i tshoms kyi rnam par 'grel pa ste lnga pa rdzogs so// //'gro ba sdug pa dang mi sdug pa yongs su spangs na ni/ tshul khrims yongs su dag par 'gyur ro zhes bstan pa'i phyir/ de'i rjes thogs la tshul khrims kyi tshoms bstan pa yin te/ sdug pa dang mi sdug pa dang lhan cig gnas pa rnams ni nam yang tshul khrims rnam par dag par mi 'dod do/ /bshad ma thag pa'i sems can dam pa yang gang zhig dang po dmigs shing gang la gnas pas dam pa rdzogs pa 'thob par 'gyur zhe na/ de'i phyir bsngags par 'gyur dang zhes bya ba la sogs pa'i tshig gi rtsom pa smras te/tshul khrims bsrung bar bya zhes bya ba ni bde ba gsum 'thob par bya ba'i phyir/ mkhas pas tshul khrims bsrung bar bya ste/ bsngags par 'gyur ba bskyed par bya ba ni gzhan dag las chos thams cad kyis don du gnyer bas mkhas pas tshul khrims bsrung ba dang /longs spyod 'byung ba dang / lus dang bral nas bde 'gro mtho ris kyi 'jig rten gyi lha rnams su skye bar bya ba'i phyir/ tshigs su bcad pa gcig gi bar gyis gsungs so/ /tshul khrims zhes bya ba ni legs par spyod pa ste/ lus dang sems tshim par byed pas chu bsil ba dang / tsan dan la sogs pa dang 'dra'o zhes bshad do/ /de yang 'jug pa dang ldog pa'i dbye bas rnam pa gnyis te/ de la 'jug pa'i tshul khrims ni rjes su bsgrub cing spyad par bya ba'i tshul ji skad du bshad pa ste/ nang par langs nas so shing bcas te bla ma'i thad du song nas yongs su dri ba la sogs pa bya'o zhes bya ba la sogs pa'o//ldog pa'i tshul khrims ni gang bya ba ma yin pa las ldog par bya ba ji skad du bshad pa ste/ lham mkhan dang / rigs ngan dang / gdol ba dang / de lta bu las rab tu dbyung bar mi bya ba dang / rkun ma la sogs pa ma yin pa dang /gtses pa dang / ya mtshan can la sogs pa yang ma yin no zhes bya ba la sogs pa'o/ /bsrung bar bya zhes bya ba ni yongs su bskyang bar bya ba ste/ bdag nyid kyis byas pa'i 'bras bu nyid phul du byung bas bdag nyid dang / mngon par 'brel cing bdag nyid gang gis 'di nyid cho ga bzhin du bsrung bar bya zhe na/mkhas pas zhes bya ba smras te/ yongs su rtogs pa'i blo yod pa ste/ rig pa dang ldan pa zhes bya ba'i don to/ /yon tan thams cad nye bar bsdu zhing yongs su bskyang ba'i rtsa ba ni/ ye shes yin la nyes pa thams cad la 'jug pa'i rtsa ba ni mi shes pa yin pas rtogs pa dang ldan pa rnams ni/dgos pa med pa ci yang mi byed de de bas na 'dir dgos pa ni bsngags pa zhes bya ba la sogs pa bstan pa yin te/ de la bsngags par 'gyur ba zhes bya ba ni bstod par 'gyur ba'o/ /nor thob pa ni dbyig dang gser la sogs pa dngos po mchog tu gyur pa 'thob pa'o//sems can dang sems can ma yin pa dag gi grangs su bya ba las 'dod pas 'thob par 'gyur ba bstan pa'i phyir dang gi sgra smos so/ /pha rol zhes bya ba lus dang bral nas 'gro ba'i phyir ro/ /bde 'gro zhes bya ba ni lha'i 'gro ba'am/ mtho ris su 'gro ba ni legs par spyod pa'i 'bras bu yin pa'i phyir bde 'gror skye ba'o//bsngags pa dang nor thob par 'dod pa 'ba' zhig gi phyir/ tshul khrims bsrung ba ma yin gyi bde 'gror skye zhing bde ba rjes su myong bar yang 'gyur ba'i phyir dang zhes bya ba'i sgra smos so/ /dga' bar 'gyur zhes bya ba ni mgu bar 'gyur ba ste/ bde ba gsum po ni bde ba rnam pa gsum gyi rgyur gyur pa zhes bya ba'i don to//bsngags par 'gyur ba dang / nor thob pa dag ni bde ba'i rgyur gyur pa'i phyir bde ba zhes bya ba ste/ sangs rgyas rnams ni 'byung ba bde/ /zhes bya ba lta bu'o/ /cig shos ni 'dir bde ba nyid de/ gang yang bde ba dang / gang yid bde ba de ni bde ba'o zhes bya ba'o//don gnyer bas zhes bya ba ni kun du tshol te/ gang zhig ce na/ bde ba gsum mo/ /sngar smras pa'i tshigs su bcad pa don khyad par dang bcas pas gsal bar bya ba'i phyir 'phags pa dang zhes bya ba la sogs pa smos te/ gnas zhes bya ba ni yid la 'dod pa'i 'bras bu 'byor par 'gyur ba'i dngos por gnas shing mngon par 'dod par bya'o//'di dag mthong ba yis zhes bya ba ni sngar bshad pa'i bsngags pa la sogs pa gsum po 'di dag mthong zhing / yang dag par rtag la nges par bsam pa'i phyir/ tshul khrims yongs su bsrung ba'i phyir 'bras bu ni 'di dag yin par khong du chud pa'i phyir/tshul khrims yongs su bsrung bar bya'o/ /mngon par 'dod par bshad pa'i bde ba'i rgyu nyid do/ /'di nyid khong du chud pa ni mkhas pa ste/ de nyid du gus pas yongs su skyong bar byed do/ /tshul khrims bsrung ba'i phyir mkhas pas zhes bya ba smras te/thos pa dang bsam pa dang bsgom pa'i gnas la rab tu sbyor zhing 'jug pa ste/ rim pa 'dis nges par 'byed pa'i cha thos pas blo gros byang bar 'gyur ba'o/ /tshul khrims yongs su bsrungs pa'i phan yon dam pa 'jig rten las 'das pa bstan pa'i phyir 'phags pa dang zhes bya ba smras te/mchod par bya zhing sdig pa'i sgrib pa mi sogs pas 'phags pa'i gang zag ste/ sdig pa mi spyod cing bya ba ma yin pa sdom pa thob pa'o/ /de yang tshul khrims 'di la gnas shing zhi gnas dang lhag mthong la bsgom pas mthong ba'i lam thob ste/ 'phags par gyur cing /'bras bu de las dang nyon mongs pa'i ngan 'gro'i dogs pa dang bral ba'o/ /mthong ba phun tshogs dang zhes bya ba ni 'phags pa'i bden pa phun sum tshogs shing / yang dag par rjes su myong ba ste/ 'dis ni bden pa mthong ba zhes bya ba'i don to/ /'dis bsgom pa'i lam 'thob par bstan pa'i phyir/'jig rten zhes bya ba smos te/ de de lta bu'i lam gyi tshogs la lam bsgom pa'i rjes su 'jug cing / mthong ba'i chos 'di nyid la gnas pa zhes bya ba'i don to/ /zhi ba rten gyur pa'i zhes bya ba ni khams gsum gyi 'dod chags dang bral ba thob par 'gyur ba ste/ mi slob pa'i lam la mya ngan las 'das par 'gyur zhes bya ba'i don te/lhag ma dang bcas pa dang / lhag ma med pa'i mya ngan las 'das pa de thob pas mi slob pa'i lam la gnas pa'i don te/ nye bar zhi zhing des zhi ba nyid de srid pa zad pa'i bde ba don du gnyer bas kyang / tshul khrims 'di nyid bsrung bar bya'o zhes bya ba ste/sngar bshad pa 'ba' zhig tu ma zad kyi/ 'jig rten dang 'jig rten las 'das pa'i bde ba 'thob par 'dod pas/ de'i las skyed par byed pa'i lam tshul khrims zhes bya ba la nges par sbyar ba'i phyir 'di gsungs pa yin no/ /tshul khrims kyi sgra'i don nyid rnam par dbye ba'i phyir/ / lus la yongs su gdung med par/ /tshul khrims kyis ni bde ba 'thob/ /ces smos te/ de nas bcom ldan 'das kyis rigs kyi bu tshul khrims 'dod pa rnams la bka' stsal pa/ rigs kyi bu tshul khrims ni bde ba'o/ /tshul khrims yang dag par 'dzin pa ni bde ba'o/ /de ci'i phyir zhe na/ rigs kyi bu tshul khrims dang ldan pa rnams bde bar gnyid kyis log cing bde bar sad pa dang / nyal ba na 'di la lha rnams bsrung bar 'gyur ro/ /'di lta ste so ga'i dus su dgon pa'i nang du chud pa'i lam du zhugs pa rnams ni lus shin tu yongs su gdungs shing ngal ba rnams grib ma dang bcas shing chu mig bsil ba dang bcas pa'i shing drung du phyin pa'am/dbul phongs gter chen po rnyed pa'am/ long bas mig gam/ mgon med pa rnams la mgon chen po'i zhes bya ba la sogs pa nas/ bde ba zhes bya ba mngon par 'dod pa'i bde ba ma lus par 'thob par byed pa ni/ tshul khrims yang dag par len pa'o zhes bya ste/legs par spyod pa'i bya ba sngon du 'gro bar khas blangs pa'o/ /bde ba de yang ci'i phyir zhe na/ gang gi phyir 'di na tshul khrims dang ldan par gyur pa ni/ lus la yongs su gdung med par/ /zhes bya ba smos te/ tshul khrims kyis brgyan pa rnams la ni gdung ba'i rgyur gyur pa'i nyes par spyod pa mi srid pas de rgyur gyur pa'i lus kyi gdung ba mi srid de/tshul khrims 'chal ba rnams la ni/ bdag dang gzhan la gnod pa lag pa gcod pa la sogs pa kun du ma bsdams pas/ lus kyis kun nas gdung ba rjes su myong bar 'gyur ro/ /de bas na bsil bar gyur pas na tshul khrims so zhes nges pa'i tshig tu sbyar ba ste/tshim par byed pa zhes bya ba'i don to/ /ji skad du/ gang zhig chun 'phyang tsan dan mchog brlan dang / /chu thigs bsil ba'i char dang bcas pa'i rlung / /zla zer sgra med dgon pa ku mu da/ /gdung ba sel bar gyur pa ma yin te/ /srog 'jig tshe na kun du 'byung ba yi//dus mtha'i me ltar sreg cing 'jig pa dang / /tshul khrims dran na'ang rjes su sel byed de/ /gang phyir de ni tshim byed rnams kyi mchog /ces gsungs pa lta bu'o/ /mtshan mo bde bar nyal dang zhes bya ba ni mtshan mo shin tu bag phab ste/ gnyid kyis log pa ste g.yeng ba med pa'i phyir ro//de bas na tshul khrims yang dag par blangs pa'i khams la yang dag par brten nas tshul khrims kyi sgra'i dgod par bstan pa yin no/ /sad pa na yang dga' bar 'gyur/ /zhes bya ba ni gnyid dang bral bar gyur cing ma nyal ba'i gnas su nye bar 'tshe ba zad cing chos kyi lus la spyod la bar chad med pa'i lam la slob pas yang dag par dga' bar 'gyur zhing mgu bar gyur pa ste/zang zing med par dga' ba nyams su myong bar 'gyur zhes pa'i don to/ /'dis ni goms pa'i don gyis tshul khrims kyi sgra rnam par 'byed pa rtogs par byed de/ gdung ba ma lus par sel bar byed pa'i tshul khrims la nges par sbyar ba'i phyir 'di gsungs pa yin no/ /sbyin pa la sogs lam gyi tshogs gzhan yongs su dag pa yang tshul khrims phun sum tshogs pa nyid yin par bstan pa'i phyir/ sbyin pa zhes bya ba la sogs pa gsungs te/ sbyin pa dang sbyin pa po dang /so sor len pa rnam par dag pa la sogs pa yod do zhes mdo las gsungs so zhes pa ni tshigs su bcad pa 'di yin no zhes sde pa gzhan dag smra ba'o/ /sbyin pa ni zas dang / skom dang / dbyig dang / rta dang / glang po che la sogs pa so sor ster ba'o/ /sbyin par bya ba ji lta bu zhe na/ tshul khrims dang ldan pa dag ces bya ba ste/gang zhig shin tu tshul khrims dang ldan zhing gzhan dag nye bar 'tshe ba med pa dang bcas pa'i sbyin pa rnams ster zhing sbyin par byed pa'i sbyin pa dag sbyin no zhes bya ba'i don to/ /byin pa zhes bya ba ni phun sum tshogs pa'i tshul khrims dang ldan pa nyid kyis na de las gzhan pa'i zag pa med pa'i phun sum tshogs pa ni tshul khrims dang ldan par gyur pas tshul khrims dang ldan pa nyid ni sbyin pa dag byed na/de ni nges par bde ba 'thob par 'gyur ro/ /la la ni thams cad la yang 'di ltar khyad par med par gzung bas so zhes zer te/ ji ltar dung la brten nas rlung de nyid rgyas par 'gyur te/tshul khrims la brten pa'i sbyin pa yang de bzhin no/ /de bas na sbyin pa rnams kyi zhes bya ba tshig mang po par rigs te/ dman pa dang / bar ma dang / khyad par can gyi zhing la so sor sbyin pa de ni tshul khrims kyi dbang gis 'bras bu che bar 'gyur ro/ /bsod nams kyis zhes bya ba ni tshul khrims la sogs pa legs par spyod pa phun sum tshogs pa'o//gang gis 'thob ce na/ mkhas pas zhes bya ba smos te/ rgyu dang 'bras bu yang dag par 'brel pa la sogs pa nges par gyur cing gsung rab la sogs pa la rab tu byung la/ thos pa mang ba dang bcas pas mkhas pa'i stobs kyis sbyin pa dang tshul khrims la sogs pa'i tshogs rnam par sbyong bar byed do//ji skad du/ shes rab kyis ni mun pa ma bsal gang / /de yi tshul khrims dag par ga la 'gyur/ /phal cher tshul khrims bral ba de dag ni/ /bzod pa med pas dri mar byas par 'gyur//zhes gsungs pa'o/ /gzhan dag ni khyim pa dang rab tu byung ba dag gi bsod nams ni tshigs su bcad pa phyed kyis ji skad du bshad pa'o zhes zer ro/ /'di dang zhes bya ba ni yang dag par rnyed par 'gyur ba'o/ /skyes zin pa'i skye ba'o/ /pha rol zhes bya ba ni 'jig rten gzhan dag tu'o//rtag tu zhes bya ba ni rgyun du ste/ ci'i phyir zhe na/ rtag pa ni mya ngan las 'das pa'i bdag nyid can yin pa'i phyir ro/ /bde ba'i zhes bya ba ni phun sum tshogs pa'o/ /'thob par 'gyur ba ni yang dag par rnyed par 'gyur ba'o/ /sbyin pa la sogs pa rnam par dag pa'i 'bras bu'i khyad par 'dod pa rnams la ni thabs bstan par bya ba'i phyir 'di gsungs pa yin no//rgyun du lhag par mdzes pa'i rgyan ni tshul khrims yin no zhes bstan par bya ba'i phyir/ rgan pa'i bar la tshul khrims dge /zhes bya ba la sogs pa gsungs te/ lha zhig 'ongs nas bcom ldan 'das la/ rgan pa'i bar du dge ba gang //legs pa gnas par gang zhig 'gyur/ /mi rnams kyi ni rin chen gang / /chom pos dbrog dka' gang zhig lags/ /zhes zhus pa dang / de nas rgan pa'i bar la tshul khrims dge zhes bya ba 'di gsungs te/ tshul khrims ni byis pa nas brtsams te ji srid rgas par gyur gyi bar du dge zhing bzang la rnam par mdzes pa'o zhes bya ba'i don te/rgyan la la dag ni byis pa'i tshe mdzes kyi/ rgas par gyur pa la ni ma yin no/ /la la ni skyes pa la mdzes kyi bud med la ni ma yin gyi/ tshul khrims ni gnas skabs kun du yang thams cad la yang mdzes pa yin no/ /dad la rab tu gnas na legs//zhes bya ba ni sems rab tu dang ba ni dad pa ste/ legs pa rnams ster ba zhes bya ba ni nges pa'i tshig go/ /ji skad du/ dad pa ma bzhin dge ba skyed pa yin/ /zhes gsungs pa'o/ /rab tu gnas pa ni mi 'bral ba'i tshul gyis gnas pa'i rtsa ba las skyes pa zhes bya ba'i don to//de ni legs pa ste dad pa la rab tu gnas pa ni de kho na nyid du rab tu mdzes pa'o zhes gsungs pa'o/ /mi yi rin chen shes rab ste/ /zhes bya ba la/ shes rab ni de kho na nyid la nges pa ste/ de ni mi rnams kyi rin po che'i mchog ste/ dge slong dag 'di lta ste gser ram dbyig 'di ni cung zad tsam gyi rin po che'o//'di lta ste shes rab kyi rin po che ni rin po che'i mchog go zhes mdo las gsungs pa'i phyir dang / rnyed par dka' ba dang / mngon par 'dod pa'i phun sum tshogs pa'i rgyur gyur pa'i phyir ro/ /rin po che'i cig shos ni rnyed par sla zhing thun mong du gyur pa'i phyir ro//shes rab ni sdug bsngal gyi rgyu ma yin gyi/ phal cher na gcig tu bde ba'i rgyu ni shes rab yin te ji skad du/ rmongs pa rgud pa kun gyi rtsa/ /shes rab phun sum tshogs dang 'brel/ /de bas 'di ltar mi rnams kyis/ /zhes bya ba la sogs pa gsungs pa ste yongs su rtog pa dang ldan pa zhes bya ba'i don to//bsod nams chom pos dbrog par dka'/ /zhes bya ba la/ sbyin pa la sogs pa legs par spyod pa ni bsod nams te/ de rkun po rnams kyis dbrog par mi nus pa ste/ shin tu dka' bas kyang de dbrog par mi nus pa'o/ /ji skad du/ skyes pa'am ni bud med kyi//bsod nams rgyal po rkun po dag /g.yo zhing brtson par gyur bas kyang / /dbrog par nus pa ma yin no/ /zhes gsungs pa'i phyir ro/ /tshigs su bcad pa bsdus pa'i don ni tshul khrims kyi rgyu ni dad pa yin la/ legs par spyod pa'i rgyu ni shes rab ste/ /tshul khrims dang legs par spyod pa dag gis ni bde 'gro'i phun sum tshogs pa 'byor par 'gyur ro//yang na gang la shes rab yod pa de ni dad par 'gyur ro/ /gang zhig dad pa de ni tshul khrims la gnas te/ gang zhig gsum po 'di dag ni legs par spyod pa de ni bsod nams chen po yin no zhes de la nges par sbyar ba'i phyir 'di gsungs pa yin no//'bru thams cad sa la brten pa dang 'dra bar yon tan thams cad ni tshul khrims la gnas pa'o zhes bstan par bya ba'i phyir/ dge slong tshul khrims la gnas shing / /zhes bya ba gsungs te/ btsun pa dge slong ji lta bu yongs su nyams par mi 'gyur zhing /mya ngan las 'das pa dang nye bar blta bar bgyi/ 'di na dge slong tshul khrims dang ldan par gnas pa dang / dbang po'i sgo bsdams pa/ zas kyi tshod rig pa dang / nam gyi cha stod dang cha smad la mi nyal ba'i sbyor ba la brtson pa'o zhes gsungs pa ni tshigs su bcad pa gnyis te/tshul khrims la zhes bya ba ni so so thar pa'i sdom pa la'o/ /gnas shing zhes bya ba ni der rab tu gnas shing yongs su ma nyams pa'i tshul gyis te/ lhag pa'i bsam pas skyong ba'o/ /dge slong pad ma can dper byas pa'i tshig gis tshul khrims kyi sdom pa gsungs nas dbang po bsdams pa bstan pa'i phyir/dbang po rnams kyang bsdams pa zhes gsungs te/ mig la sogs pa'i dbang po'i sgo bsdams shing sbas pa ste/ yul thams cad las bsrung ba'o/ /de ma bsdams pas ni dge ba thams cad nyams par 'gyur te/ ji skad du/ mi rnams kyi ni dbang po lnga/ / dbang po gcig cing bu gar gyur/ /rgyal ba'i rkang las chu bzhin du/ /de nyid las ni shes rab 'dzag /ces bshad pa'o/ /'dir dang zhes bya ba thams cad ni bsdus pa'o/ /kyang zhes bya ba 'di ni sred pa ste/ bdag med pa bstan pa dang 'dra bar bde 'gro la sogs pa srid pa yin pa'i phyir ro/ /yang na kyang dang /dang gnyi ga yang tshig gi phrad du bsdus pa'i don to/ /zas zhes bya ba ni bza' ba dang / btung ba la sogs pa'o/ /tshod rig pa ni tshad shes pa ste/ zas lhag par zos pas ni ma zhu ba la sogs pa'i nad du 'gyur la/ nyung du zos pas ni lus nyam chung zhing spro ba dang stobs med par 'gyur te/de bas na ji tsam na nye bar spyad par rigs pa'i tshod shes pa ste/ 'dis ni tshul khrims dang dbang po bsdoms pa nye bar bstan par 'gyur ba'i rgyu gsungs pa yin no/ /mi nyal ba la 'bad pa ste/ /zhes bya ba ni mi nyal bar byed pas na/ mi nyal ba ste lam gyi tshogs la sogs pa bsgoms pa de la brtson zhing snyoms par 'jug pa la sogs pa la mngon par sbyor ba'o zhes gsungs pa yin no//ji skad du/ tshul khrims tshul khrims la gnas shing / /chos gnyis po la gnas pa'i phyir/ /zhes bya ba la sogs pa rgya cher gsungs pa'o/ /de ltar gnas par zhes bya ba ni sngar bshad pa'i cho gas gnas pa'i tshul gyis gnas pa de ni de ltar gnas pa ste/de ltar kun du spyod pa la 'bad pa'o/ /brtson pa dang zhes bya ba ni brtson 'grus rtsom pa'o/ /dus ji srid cig tu zhe na/ nyin mtshan zhes bya ba smos te/ nyin mo dang mtshan mo ni nyin mtshan no//de ltar 'dis ni rtag tu bya ba'i sbyor ba gsungs nas/ gus par bya ba'i sbyor ba bstan pa'i phyir/ snyom las mi byed pa zhes bya ba gsungs te/ snyom las lhod pa gang yin pa de ni snyom las te/ de rab tu dgag pa ni snyom las mi byed pa'o/ /de yang sprin med pa'i nam mkha' dang 'dra bar le lo'i rnam par rmongs shing brtson 'grus zhum pa de lta bu'i sems can gang gis bcings pa yin zhe na/yongs su nyams par 'gyur zhes bya ba ste/ yongs su nyams pa'i chos can yang yon tan las yongs su nyams pa'i tshul gyis yongs su nyams pas snod ma yin par 'gyur na/yongs su ma nyams pa lta smos kyang ci dgos mya ngan las 'das pa zhes bya ba ni thar pa nyid de/ 'khor ba ma yin par ro/ /de zhes bya ba ni yang dag par 'jug pa'i sbyor ba la spyod pa'o/ /nye ba'i phyir zhes bya ba ni khad nye ba'o/ /gdul bya rnams bya ba nyams su len pa la dmigs pa'i lhag ma med pa'i mya ngan las 'das pa'i dbyings su 'jug par 'gyur zhing mya ngan las 'das pa'i bde ba 'dod pa rnams la de thob pa'i rim pa bstan par bya ba'i phyir 'di gsungs pa yin no//sdug bsngal ma lus pa zad pa don du gnyer bas tshul khrims yongs su bsrung ba la sogs pa bya'o zhes bstan par bya ba'i phyir/mi ni tshul khrims la gnas nas/ /zhes gsungs te/ 'phags pa srung dbang gi bu skyes pa nas brtsams te nad sna tshogs kyis gdungs pa dang / des bcom ldan 'das la btsun pa dge slong ji lta bu sdug bsngal zad pa rjes su thob par 'gyur zhes zhus pa'i don du ji srid tshigs su bcad pa gnyis gsungs so//tshul khrims la gnas nas zhes bya ba ni khyim yongs su spangs nas thar pa'i mchog la dmigs pa'i bsam pas so sor thar pa'i sdom pa dag yongs su 'dzin cing rjes su 'jug par byed kyi/ 'tsho ba med pa'i 'jigs pas ni ma yin te/de'i 'bras bu ni 'khor ba yin pa'i phyir ro/ /mkhas pa zhes bya ba ni shes rab can te 'di nyid tshul khrims yongs su dag pa la gnas pa'i skal ba yod pa'i phyir ro/ /de'i rjes thogs la ci zhig bya zhe na/ sems dang shes rab bsgom pa la/ /zhes pa ste/ ting nge 'dzin dang ye shes la bslab par bya ba ste/thub pa'i dbang po'i gsung sgrub pa snying por byed pa'o zhes gsungs pas na sgrub pa yang lam bsgoms pa las rdo rje lta bu'i ting nge 'dzin gyi ye shes kyis nyon mongs pa gsod do zhes mdo las gsungs pas sems ni 'dir ting nge 'dzin gyi rjes thogs la ting nge 'dzin rjes su srung bar byed pa'o zhes rnam par dbye'o//ji lta bur gnyis po de bsgom par bya zhe na/ brtson zhing zhes bya ba gsungs te/ brtson 'grus brtsams shing yon tan nye bar bsogs pa la ngal bar mi sems pa'o/ /nges gnas zhes bya ba ni 'dul ba'i nyes pa las bdag nyid rtag tu yongs su skyong bar byed pa ste/bag yod pa zhes bya ba'i don to/ /rgyun du bya ba dang gus par bya ba'i sbyor bas zag pa rnams las sems bsrung bas na 'bras bu 'di dag gsungs so/ /dge slong gis zhes bya ba ni nyon mongs pa ma lus par zad pa'i phyir te/ 'dis na lhag ma dang bcas pa'i mya ngan las 'das pa'i dbyings su gsungs pa yin no//sdug bsngal zad pa thob par 'gyur/ /zhes bya ba ni lhag ma med pa'i mya ngan las 'das pa'i dbyings bsgrub pa ste/ de'i tshe nyid na sdug bsngal ma lus pa mthar thug pa yin pa'i phyir ro/ /gang gi phyir tshul khrims la sogs pa'i phan yon de nyid bstan pa ni/ de phyir rtag tu tshul khrims dang //zhes bya ba gsungs te/ rtag tu 'di ni tshul khrims bcos ma ma yin pa dang / dum bu ma yin pa dang / rgyun mi 'chad par tshul khrims bsrungs pa'o/ /ting 'dzin rjes su srung ba dang / /zhes bya ba ni snyoms par 'jug pa yongs su skyong bar byed pa ste/ ting nge 'dzin bsgoms pa la brtson pa'i phyir ro/ /lhag mthong la ni bslab pa dang / /zhes bya ba ni de'i don du bslab cing rab tu 'jug pas shes rab la bslab par bya'o zhes pa'i don to/ /gang zhig ce na/ shes bzhin so sor dran par bya/ /zhes bya ba gsungs te/ yang dag pa'i ye shes mngon du gyur pa la 'jug pa ni dran pa yin pa'i phyir 'dis ni dbang po sdom pa bshad de/shes bzhin dang dran pa'i rgyu las dbang po bsdams par 'gyur ro zhes gsungs pa'i phyir de bsdams pas ting nge 'dzin bsgom par 'gyur ro/ /gang de lta bu dang yang dag par ldan pa de cir 'gyur zhe na/der ni zhes bya ba la sogs pa gsungs te/ yid 'bral zhes bya ba ni dge slong dri ma med pa zhes bya ba sngon dang phyi ma'i mtha' can gyi nye du mang po rnams kyis de'i tshe yongs su mya ngan las 'das pa nye du rnams kyis bcom ldan 'das la btsun pa 'gro ba gang lags zhes zhus pa dang /tshigs su bcad pa 'di gsungs te/ yid 'bral zhes bya ba ni las bdag gir bya ba dang / gang zag la la bdag med pa la sogs pa rtogs pas nga rgyal med cing mthong ba'i lam la sbyor bar gsungs pa'o/ /lhag ma med 'gyur te zhes bya ba ni ma rig pa dang / nga rgyal la sogs pa'i nyon mongs pa dang las dang skye ba'i 'tshe ba dang ldan pas 'dis ni bsgom pa'i lam bshad pa ste/mi slob pa'i lam yang gsungs pa'o/ /gang gis lhag ma med par 'gyur zhe na/ kun sbyor zad byas nas zhes bya ba gsungs te/ gang gis kun du sbyor ba dgu zad par bya ba'am/ gang gis bag chags zad pa de nyid do/ /lus zhig ces bya ba ni skal ba mnyam pa'i sde ba dang bral ba'o/ /shes rab ldan pa zhes bya ba ni lhag ma dang bcas pa'i mya ngan las 'das pa thob pa ste rmongs pa rnams la 'di yod pa ni ma yin no/ /bgrang du med pa zhes bya ba ni 'gro ba rnams su bgrang bar bya ba ma yin pa'o//ci'i phyir zhe na/ gang gi phyir mya ngan las 'das pa zhes bya ba lhag ma med pa'i tshul la zhugs pa ste/ dge slong dag de'i rnam par shes pa ni shar phyogs su 'gro zhes nga mi smra'o zhes bya ba la sogs pa'o/ /'di ni mya ngan las 'das pa'i bde ba 'dod pa rjes su brtags pa'i rim pa nye bar brtag pa'i phyir gsungs so//sa'i gzhi'i rgyas par grags pa'i rgyu ni tshul khrims yin no zhes bstan pa'i phyir tshul khrims las zhes bya ba la sogs pa gsungs te/ bsgom pa rnam pa gsum ste/ tshul khrims bsgom pa dang / ting nge 'dzin bsgom pa dang / shes rab bsgom pa'o zhes gsungs pa ni tshigs su bcad pa gnyis so/ /khyim bdag la la zhig nyi ma la dad par byed pa dang / de nyi ma 'char zhing rnam par snang bar gyur pa mthong nas/ bcom ldan 'das la/ 'jig rten 'di na nyi ma ltar/ /lam mer 'bar ba su zhig mchis/ /zhes zhus pa dang /'di gsungs pa yin no zhes gzhan dag zer ro/ /tshul khrims zhes bya ba ni/ /so sor thar pa'i sdom pa la sogs pa'o/ /ting nge 'dzin ni dge ba la sems rtse gcig pa'o/ /shes rab ni don gyi de kho na nyid nges par shes pa ste/ de dag ji skad du gsungs pa bzhin legs par bsgom pa'o//so so bstan par bya ba'i phyir dang zhes bya ba smos so/ /de bas na 'di gsum zhes bya ba gsungs te/ 'phags pa'i sde tshan la ni 'di dag gi bdag nyid can yin pa'i phyir phung po gsum gyi lam yang dag par bsdus pa yin no zhes gsungs pa'i phyir ro/ /rnal 'byor pa gang gis legs par bsgom pa'i 'bras bu bstan pa'i phyir/shin tu dri med mthar phyin zhes bya ba smos te/ dri ma med pa ni 'dod chags la sogs pa'i dri ma spangs pa'i phyir ro/ /shin tu mthar phyin pa ni srid pa'i rtse mo man chad kyi nyon mongs pa rtsa ba nas 'byin pa'i phyir ro/ /gdung med ces bya ba ni nyon mongs pa spangs pas des bskyed pa'i yid kyi gdung ba dang bral ba'i phyir ro//yang srid zad gyur dang zhes bya ba ni skye ba'i rgyu spangs pa'i phyir yang srid par 'byung mi srid pa'i phyir ro/ /chags pa'i 'ching ba las grol zhing / /zhes bya ba ni sred pa spangs pas chags pa dang bral ba ste/ gang gi phyir srid pa'i rtsa ba ni sred pa yin pas de spangs pas na yang srid pa zad pa'o zhes bya ba'i don to//kar mi zhes bya ba ni nyon mongs pa can gyi tshor ba spangs pa'i phyir te/ tshor ba'i dbang gis 'dod pa rnams mngon par 'phel ba'i phyir ro/ /shes rab dang ldan pa zhes bya ba ni zad pa dang mi skye ba shes pa thob pa'o//ci'i phyir zhe na/ lus spangs zhes bya ba ste/ srid pa gsum gyi sgrib pa las nges par grol ba'o/ /de yang de bskyed pa'i gags su gyur pa'o/ /bdud kyi yul las 'das pa dag /ces bya ba ni bdud kyi yul las 'das nas 'chi bdag gi bdud la sogs pa dang bral ba ste/ ji skad du gang zhig rdzu 'phrul gyi rkang pa bzhi kun du bsgom zhing bsten pa ni bskal pa'am/bskal pa las lhag par gnas par 'gyur ro zhes gsungs so/ /dpe dman pa dag bstan pa ni/ nyi ma bzhin du lam mer 'bar/ /zhes bya ba gsungs te/ sprin dang bral ba'i nam mkha'i nyi ma dang 'dra bar srid pa gsum du khyad par du 'phags shing rnam par mdzes pa'o//gnas ma lus par grags par 'dod pa'i thabs bstan pa'i phyir 'di gsungs so/ /nyi ma la dad pa de nyid mngon par dad par gyur nas 'di snyam du sems te/ gal te 'di ltar tshul khrims la sogs par bsgom pa ni 'bras bu che ste/de la 'dir gang gi ba gegs su gyur pa ni gang zhig yin/ thams cad rdzogs pa ni gang yin snyam pa dang / de'i bsam pa mkhyen nas tshul khrims la sogs pa la yang dag par zhugs shing bsgom pas yongs su rdzogs par 'gyur gyi/ log par zhugs pa ni ma yin no//ji ltar na log par zhugs pa yin/ 'di na gang zhig ni bag med par gyur pa yin zhes gsol ba dang / bcom ldan 'das kyis dge slong zhes bya ba gsungs so/ /dge slong phyi dang nang nyid la/ /zhes bya ba ni gzugs la sogs pa'i yul la sems 'phros pa'o/ /de nyid ni re re zhing bgegs su gyur pa'i phyir ro//bag med ces bya ba ni bag med pa la gnas pa'o/ /rlom par byed ces bya ba ni khengs pa ste/ bdag tu rlom sems pas yon tan rnams kyi rtsa ba nas 'byin par gnas te/ dregs pas bcom pas yon tan ring mi gnas/ /zhes bya ba la sogs pa gsungs pas so//yang na 'dam bu mthon po dang 'dra bar nang na stong zhing mnog chung ba'o zhes bya ba ni nges pa'i tshig go/ /dge slong zhes bya ba ni rab tu byung bar gyur kyang ngo / /phyi dang nang nyid la zhes bya ba ni gzugs la sogs pa'i yul rnams la sems 'phros pa ste/ de re res kyang go rims ji lta ba bzhin du gags su gyur te/tshul khrims la sogs pa yongs su rdzogs par mi 'gyur zhing rab kyi mthar thug par bsgrub par mi 'gyur ro/ /tshul khrims la sogs pa yongs su sbyong zhing de'i bar chad dang bral ba la sbyar ba'i phyir 'di gsungs so/ /tshul khrims gang gis dag pa dang ma dag par 'gyur zhe na/sprin gyis khebs las zhes bya ba la sogs pa gsungs te/ yul kau shAm+bIr tshe dang ldan pa 'dun pa gnas pa na de yang dang yang du ltung ba 'byung ba dang phyir gso bar mi byed do/ /de la dge slong rnams kyis brtsad cing dris pa na/ ngas ltung ba'i rnam pa 'di ma mthong ngo zhes zer ba dang /skabs de dge slong rnams kyis bcom ldan 'das la gsol ba dang / ji srid tshigs su bcad pa gnyis gsungs so/ /sprin gyis khebs las zhes bya ba ni sprin gyis khebs pa bzhin du gang du nyes pa rnams sbed pa de nyid ni 'dir tshul khrims nyams pa'i khyad par yin par shes par bya ste/gzhan dag mi srid pa'i phyir ro/ /de yang dran pa brjed pa las tshul khrims 'chal pa la cung zad la khyad du gsod cing gal te rnyed pa dang bkur sti rnam par gcod pa'i 'jigs pas bkab pa na nye bar spyod pa de mngon par 'bab cing gzhan dag mngon par 'phel bar 'gyur ro//ji ltar nam mkha' la sprin gyis khebs pa las char 'bab par 'gyur zhing / sprin dang bral zhing gnam thang ba las ni char mi 'bab po/ /de bzhin du gang gi tshe/ 'ba' zhig gi drung du so sor 'chags shing smra ba de'i tshe rgyud la 'ching bar mi 'gyur ro/ /de bas khebs pa sol cig dang //zhes bya ba dang / gtan tshigs de bas na gzhan dag gis yongs su mi shes pa'i sgrib pa yang bshags par bya ste/ de ltar na de 'bab par mi 'gyur zhing rnam pa 'dis sdig pa sogs shing 'phel bar mi 'gyur te/ sprin gyis khebs las char 'bab cing / /zhes bya ba mi shes pa'i sgrib pas 'phags pa'i bden pa bzhi khebs shing /nyon mongs pa dang skye ba'i kun nas nyon mongs pa'i char 'bab par 'gyur gyi/ sgrib pa dang bral ba rnams ni 'di ltar mi byed do zhes gzhan dag zer ro/ /'di'i don ni tshul khrims dang 'brel pa med pas na mi rigs so zhe na/ de ni shin tu yang tshul khrims dag par rigs te/de ltar rtag tu mthong ba dang / /zhes bya ba smos te/ yon tan nyes pa 'di dag 'dir rtogs pa'o/ /rtag tu bslab ces bya ba ni dus rtag tu yang tshul khrims la sogs pa la bslab par bya ba ste/ dge slong dag sdig pa gang yin pa dang sgrogs pa dang / dge ba rnams sbas pas gnas shing sdig pas ma bsgribs par gyis shig ces bya ba'o/ /dge slong ni bcom ldan 'das kyis bstan pa la rjes su 'jug pa ste/ de'i mtshan nyid ni tshul khrims sdom pa dang zhes bya ba gsungs te/ 'dul ba'i sde snod las gsungs pa'i spyod pa rnams la yang dag par bsdams shing /tshul khrims dang dbang po sdom pa dag dang yang dag par ldan pas bsdams pa'o/ /de'i khyad par ji lta bu bsgrub ce na/ mya ngan las 'das par 'gro ba'i lam zhes bya ste/ mya ngan las 'das par 'gro ba'i thabs so/ /myur ba kho nar zhes bya ba ni rings pa kho nar ro//rnam par dag ces bya ba ni bsgom pas yongs su rdzogs par bya ba ste/ lam ni bsgom par bya zhes mdo las gsungs pa'i phyir ro/ /lam bsgom pa'i thabs bstan par bya ba'i phyir 'di gsungs so/ /tshul khrims ni dri mchog rgyas pa yin no zhes bstan pa'i phyir/ me tog dri ni rdzi phyogs min mi 'gro/ /zhes bya ba la sogs pa'i tshigs su bcad pa lnga gsungs te/ de nas tshe dang ldan pa kun dga' bo gcig pu dben par song nas yang dag par gzhag pa ste/ 'di lta bu'i sems kyi yongs su rtog pa skyes pa dang / de bsal ba'i phyir dri'i rigs ni rnam pa gsum ste zhes bya ba la sogs pa rgya cher gsungs so//me tog dri ni zhes bya ba ni me tog gi dri yid du 'ong ba'o/ /rdzi phyogs min mi 'gro zhes bya ba ni rlung mngon par mi phyogs par mi 'gro ba'o/ /de lta na ni pa ri dza ta dang / ko bi da ra la sogs pa rnams ni rdzi phyogs ma yin par ni dpag tshad brgyar dris khyab la/rdzi phyogs su ni dpag tshad lnga brgyar khyab bo zhes bshad na/ de ltar shing de dkar ba yin zhe na/ dgongs pa ni mi rnams kyi me tog gi dri'i dbang du mdzad pa yin pas nyes pa med do/ /rtsa ba zhes bya ba ni a ga ru la sogs pa'i dri ni rtsa ba'i dri zhes bya ba'i don to/ /rgya spos zhes bya ba ni dri 'di ni rgya spos kyi yin no zhes bya ba'o//tsan dan rnams kyang min zhes bya ba ni tsan dan gyi dri ste/ 'di dag gis ni dri tha mal pa bshad pa yin no/ /dam pa'i dri zhes bya ba ni tshul khrims dang rlung dang yang grags pa'i rang bzhin gyi dri'o/ /ni zhes bya ba'i sgra ni don gsal bar bya ba'i phyir rdzi phyogs ma ni mi 'gro zhes bya ba smos te/rlung mngon par mi phyogs par yang mi 'gro ba'o/ /ci'i phyir zhe na/ gang gi phyir phyogs rnams kun du zhes bya ba ste phyogs kyi cha ma lus par ro/ /mi mchog ni spyod pa dam pa'i dri dang bcas pa'o/ /dri yis khyab ces bya ba ni tshul khrims kyi rang bzhin gyi grags pa'i dris khyab ces bya ba'i don to//de skad du/ dam pa sa phyogs gang na gnas gyur pa/ /ston zla dri med lta bur grags pa snang / /'jig rten gsum po dag tu'ang snang gyur phyir/ /de bas tshul khrims phyi nang bsrung bar bya/ /ci phyir phyogs rnams kun du khyab pa yi/ /tshul khrims phung po las gzhan dri yod min//zhes gsungs pas so/ /bla na med pa'i don 'di nyid gsal bar bya ba'i phyir/ rgya spos dang ni tsan dan dang / ut+pal dang zhes bya ba dag yin te/ ut+pal la dang bcas pa'o/ /mA li ka ni me tog gi rigs so/ /'di dag pas zhes bya ba ni sngar bshad pa'i dri'i rnam pa las zhes bya ba'i tshig gi lhag ma ste/de rnams ni gcig tu lung du ma bstan pas bla na yod pa dang bcas pa'o/ /tshul khrims dri bsung phul du phyin/ /zhes bya ba ni tshul khrims kyi dri de ni mchog tu gtso bo yin te/ 'bras bu bde ba'i phyir dang / skyes bu dam pas bsngags pa'i phyir dang /gnyis pa med pa'i phyir ro/ /de dag kyang ci'i phyir zhe na/ chung ngu ma zhes bya ba gsungs te/ chung ngu ma tsam du yongs su gyur pa'i dri ni dman pa'o zhes bya ba'i don te/ gang gi phyir 'di nyid na sna tsam gyis nye bar longs spyod pa yin pa'i phyir zhes pa'i don to/ /chung ngu ma tsam du brjod pa'i dri 'di gang yin zhe na/'di ni zhes bya ba gsungs te/ rgya spos dang tsan dan la sogs pa gang yin pa'i dri de ni zhes bya ba'i don to/ /tshul khrims ldan pa'i dri bsung gang / /zhes bya ba ni gang yang dam pa rnams kyi grags pa'i dri de'i rlung gis khyab par gyur pa ni mtho ris khyab ces bya ba ste/ gnas gtsang ma'i gnas su yang khyab na 'di ni mi rnams na lta smos kyang ci dgos/ tshul khrims kyi phan yon gzhan bstan pa'i phyir/ tshul khrims rnam par dag par bya/ /zhes bya ba gsungs te/ tshul khrims rnam par dag pa 'di ni rnyog pa rnams kyi bu ga med pa la sogs pa'i khyad par dang ldan pa'o//tshul khrims rnam par dag pa la sogs pa'i gtso bo'i yan lag bstan par bya ba'i phyir/ bag yod par ni gnas bya zhing / /zhes bya ba gsungs te/ bag med par spyod pa rnams ni 'dis lam gyi tshogs su gyur par bshad pa'o/ /yang dag shes pas rnam grol na//zhes bya ba ni phyin ci ma log cing nges pa ni yang dag pa'i ye shes te/ zag pa med pa'i ye shes so/ /des rnam par grol ba ni khams gsum gyi nyon mongs pa las grol ba'o/ /de rnams ni 'di lta bu'i yon tan la brten pas/ bdud kyi lam ni rnyed mi 'gyur//zhes bya ba ste/ lha'i bu'i bdud kyi bgrod par de mi 'gyur ba'o/ /sngar bshad pa 'di nyid bstan par bya ba'i phyir/ 'di ni bde bar 'gro lam ste/ /zhes bya ba gsungs te/ bshad ma thag pa'i tshigs su bcad pas brjod pa ni rgyu dang 'bras bu rnam par dag pa nyid de/ tshul khrims dang bag yod pa la sogs pa dang ldan pa'i lam 'di ni bde bar 'gro ba ste mya ngan las 'das pa thob pa'i thabs so zhes bya ba'i don to//'di nyid kyang ci'i phyir zhe na/ gang gi phyir/ rnam par dag byed lam 'di la/ /zhes bya ba gsungs te/ khams gsum gyi bag la nyal spang ba ni rnam par dag pa ste/ de'i don gyi tshul khrims la sogs pa'i tshul ni lam ste/ de thob par byed pa yin pa'i phyir ro/ /ji ltar na 'di nyid khong du chud par bya zhe na/ gang gi phyir rab tu zhugs te zhes bya ba gsungs te/ tshul khrims rnam par sbyong ba dang / bag yod pa la gnas pa dang / lam sgom par byed pa'o//bsgoms nas kyang zhes bya ba ni bsgom pa'i ngang tshul can te/ 'di ltar zhi gnas dang lhag mthong bsgom pa la brtson pa'o/ /de yang / shes rab med la bsgom pa med/ /shes rab dag ni bsgoms las 'byung / /zhes lung las gsungs pas so/ /bdud kyi 'ching ba ni bdud kyi zhags pa ste/de yongs su spangs pa ste/ 'chi ba'i chos can nye bar gdung ba'i bag la nyal ni bdud de/ de nyid ni 'ching ba'o/ /de spang ba ni yongs su 'dor ba ste/ bdud kyi 'ching ba dor bar bya/ /zhes bya bar sbyar ro/ /bdud kyi 'ching ba las rnam par grol ba'i thabs bstan pa'i phyir 'di gsungs pa yin par shes par bya'o//tshul khrims kyi tshoms te drug pa'i rnam par 'grel pa rdzogs so// //tshul khrims kyi ngo bo nyid rab tu bstan pa'i phyir ram/ de'i rnam grangs bstan par bya ba'i phyir/ legs par spyod pa'i tshoms bstan par bya ste/ lus kyis nyes par spyod spang zhing //zhes bya ba la sogs pa gsungs pa ste/ mnyan du yod pa na dge slong gsum zhig lhan cig gnas pa las gcig cig lus kyis nyes par spyod pa'i kha na ma tho ba chen po dang bcas par gnas la/ gzhan dag kyang ngag dang yid kyis nyes par spyod pa dag la gnas te/ de'i dbang du mdzad nas tshigs su bcad pa gsum gsungs pa yin no/ /gang gis shin tu nyes par gyur pa ni nyes par spyod pa ste/ dri mar byed pa'i rgyur gyur pa ni nyes par spyod pa'o zhes bya ba'i don to/ /de las gzhan pas ni lus nye bar bcom zhing nyes par spyod pa ma yin no/ /de la nye bar gzung ba'i las kyi lam yang dag par blangs pas nyes par spyod pa yin pa'am/lus kyi bdag nyid can yin nam/ lus rgyur gyur pa'i nyes par spyod pa ni lus kyis nyes par spyod pa'i rnam par rig byed ma yin pa'i gzugs te/ de spang zhing de bzlog pa'i phyir 'bad pas rjes su mnos shig pa'o/ / ldog par byed pa'i tshul gyis legs par spyod pa'i tshul gyi rang bzhin smras nas/ 'jug pa'i bdag nyid bstan pa'i phyir/ lus kyis legs spyad spyad pa'i phyir/ /zhes bya ba gsungs te/ lus kyi sdom pa dang yang dag par ldan par 'gyur ba'o/ /sngar gyi tshigs su bcad pa phyed rnam par dbye ba'i phyir/lus kyi nyes chen las bsrungs na/ /zhes bya ba la sogs pa gsungs te/ de bzhin du ngag dang yid kyi tshigs su bcad pa dag la yang ci rigs par brjod par bya'o/ /lus kyis nyes par spyod spang zhing / /zhes bya ba ni dge slong lhan cig gnas pa gsum po de nyid kyis chos kyi rnam grangs 'di thos pas yang dag pa'i 'du shes skyes te/bcom ldan 'das la 'di skad ces gsol to/ /de bzhin du mdor bsdus nas btsun pa bdag cag gis chos kyi rnam grangs 'di thos pas yun ring po'i don du 'gyur ro zhes bya ba nas ji srid tshigs su bcad pa gsum gsungs so/ /lus kyis nyes par spyod pa zhes bya ba ni srog gcod pa la sogs pa rnam pa gsum po sbyor ba dang mjug dang bcas pa'o//spang ba ni dor ba'o/ /ngag gis nyes par spyod pa zhes bya ba ni brdzun du smra ba la sogs pa ngag gi nyes par spyod pa bzhi'o/ /yid kyis nyes par spyod pa zhes bya ba ni brnab sems la sogs pa rnam pa gsum mo//gang gzhan zhes bya ba ni gang yang las kyi lam gzhan dag gis bsdus pa'i nyes par spyod pa de dag kyang spang bar bya'o/ /ci'i phyir zhe na/ gang gi phyir skyon ldan zhes bya ba ste/ nyon mongs pa dang 'brel cing nyon mongs pa slong ba nyid dang 'bras bu mi sdug pa nyid kyi phyir ro//de dag spangs nas ci zhig bya zhe na/ lus kyis dge ba rnams bya zhing / /zhes bya ba la sogs pa gsungs te/ lus kyis srog gcod pa spangs pa la sogs pa rang bzhin can gyi legs par spyod par bya ba'o/ /ngag gis dge ba phal cher bya/ /zhes bya ba ni ngag gi legs par spyod pa rnam pa bzhi yod pas phal cher ba ste de bya ba'o//yid kyis ji tsam dang ji lta bu'i dge ba bya zhe na/ tshad med bzhi dang bral mi bya/ /zhes bya ba gsungs te/ sems can tshad med pa la dmigs pa'i phyir tshad med pa ste/ lus la sogs pa'i legs par spyod pa ni so sor nges pa'i gang zag la dmigs pas na tshad yod pa'i phyir ro//bzhi dang bral ba ni 'tshe ba dang bral ba ste/ mya ngan las 'das pa'i dbyings su gyur pa'o/ /lhag pa'i bsam pas de ltar spyod pa'i phan yon bstan pa'i phyir/ lus kyis dge ba rnams bya zhing / /zhes bya ba la sogs pa gsungs te/de'i don ni bshad zin to/ /'di dang zhes bya ba ni mthong ba'i chos la myong bar 'gyur ba'o/ /pha rol dag tu yang zhes bya ba ni 'jig rten pha rol du skyes nas myong bar 'gyur ba la sogs pa'i bde ba 'dis 'thob pa'o/ /rtag tu bde ba zhes bya ba ni 'di'i sred pa zad pa'i bde ba ni rtag pa yin pa'i phyir te/gang rgyu rtag pa dang mngon par ldan pa de ni dag pa'i 'bras bu 'thob bo zhes bya ba'i tshul gyis te/ dge slong dag de nas de'i rjes su 'brang bas de khyad par du 'thob par 'gyur ba'o zhes bya ba'o/ /gang zhig lus la sogs pa'i nyes par spyod pa spang bar nus shing legs par spyod pa la rjes su gnas shing 'gyur ba gang yin pa de ni 'tshe ba med pa nyid du bstan pa'i phyir/rtag tu lus ni zhes bya ba la sogs pa gsungs te/ de nas mchod sbyin 'dod ces bya ba'i bram ze zhig bcom ldan 'das gang na ba der song ste/ ji tsam na btsun pa bdag ni 'tshe ba med pa'i mchod sbyin bgyid de/de ci'i slad du zhe na/ gang yang mchod sbyin la ba glang dang / ma he dang ma he mo la sogs pa ji srid 'di dag thams cad bsad pas bde 'gror 'gro'o zhes bya ba de la bdag glo ba mi ches te/ chos ni mi 'tshe ba'i mtshan nyid can zhes bgyi ba lags so zhes gsol pa dang / de nas tshigs su bcad pa bzhi gsungs so//gzhan dag ni dge slong shin tu zin cing des pa bzhi bcu po ni gang la yang 'tshe bar mi byed la/ drug sde 'di ni rtag tu gzhan la 'tshe bar byed pas de la bstan pa yin no zhes zer ro/ /rtag tu lus ni bsdams pa'i phyir/ /zhes bya ba ni rgyun du so sor thar pa dang /bsam gtan dang / zag pa med pa'i sdom pas bsdams pa'i lus dang ldan pa'i phyir ro/ /thub pa zhes bya ba ni 'dod chags dang bral ba rnams so/ /'tshe ba med pa yin zhes bya ba ni mi 'tshe bas na 'tshe ba med pa ste/ dbyig pa dang mtshon cha la sogs pas gzhan la mi 'tshe ba zhes bya ba'i don te/'dis ni phyi rol gyi 'tshe ba dang / de'i rgyu dang bral ba'o/ /de'i 'bras bu ni/ de ni 'chi med gnas 'gro zhing / /zhes bya ba gsungs te/ de 'chi ba med pa'i gnas zhes bya ba mi 'chi ba'i gnas so/ /'gro zhing zhes bya ba ni thob pa ste mya ngan las 'das pa zhes bya ba'i don to//'bras bu de'i phan yon bstan par bya ba'i phyir/ gang du song na mya ngan med/ /ces bya ba gsungs te/ gang du zhes bya ba ni gnas so/ /song ba zhes bya ba ni 'das par gyur pa ste/ yang kun nas gdung ba'i mya ngan rjes su myong bar mi 'gyur te/ 'tshe ba thams cad shin tu spangs pa'i phyir ro//ngag dang yid la yang de bzhin brjod par bya'o/ /legs par spyod pa'i mtshan nyid thub pa 'ba' zhig gi ma yin gyi/ brtan pa rnams kyi mtshan nyid kyang de yin te de nyid bstan pa'i phyir/ brtan pa rnams kyi lus bsdam zhing / /zhes bya ba la sogs pa gsungs te/brtan pa zhes bya ba ni mkhas pa ste/ de nyid ni lus kyis ma chags pa la brten pa'o/ /ngag ces bya ba ni tshig go /kun du bsdam byas na zhes bya ba ni gang yang re re zhig sdom pa de ni brtan pa yin la/ gang gnyis sdom pa de ni shin du brtan pa ni gtsug gi nor bu'o//de dag 'gro bar 'gyur ba ni rim pa ji lta ba bzhin du nyan thos dang rang sangs rgyas su gyur cing dam pa'i thar pa'i grong khyer du 'jug par 'gyur te/ chung ngu dang 'bring dang chen po'i tshogs la gnas pa'i phyir ro/ /gang thub pa dang brtan pa de'i mtshan nyid dang / sdom pa bshad nas de ji lta bu yin zhe na/ lus kyi sdom pa zhes bya ba la sogs pa gsungs te/ yang dag par rdzogs pa'i sangs rgyas shAkya thub pa'i nyan thos rnams nyon mongs pa la 'dun cing sdig pa rnams nye bar stsogs te dge ba'i bya ba rnams la ni shin tu brtson pas mi 'jug ste/ dge ba'i phyogs cung zad tsam gyis mgu bar 'gyur bas na de'i dbang du mdzad de/bcom ldan 'das kyis so sor thar pa'i tshigs su bcad pa gsum gsungs te/ de la/ sdig pa thams cad mi bya ste/ /zhes bya ba'i don de dang 'brel pas sdig pa'i tshoms su bshad de/ gnyis pa ni 'dir bshad do//gzhan dag ni dge slong lnga las brtsams pa yin no zhes zer ro/ /lus kyi sdom pa zhes bya ba ni bsdams pa'o/ /legs pa ste zhes bya ba ni bsngags pa ste/ tshe 'dir grags pa'i 'bras bu nyid dang / pha rol du mngon par 'dod par smin pa'i 'bras bu nyid dang / bral ba'i 'bras bu nyid kyis na legs pa ste/gang 'di lus kyi sdom pa de ni legs pa'i dngos por shes par bya'o zhes pa'o/ /thams cad du ni sdom pa legs/ /zhes bya ba yang ci'i phyir zhe na/ kun du bsdams pa'i dge slong ni/ /zhes bya ba la sogs pa gsungs te/ gang gi phyir gang la la lus la sogs pa kun du bsdams pas gnas pa de ni bar chad med par lam bsgoms pa'i stobs kyis myur du nyon mongs pa zhi bar 'gyur te/de med cing bcom pas na dge slong ste/ lhag ma dang bcas pa'i mya ngan las 'das pa thob nas lhag ma med pa'i mya ngan las 'das pa'i dbyings thob ste/sdug bsngal thams cad las rab tu grol zhing sdug bsngal ma lus pa las bskal ba'i phyir ro/ /sdom pa dang ni lam du 'brel la/ de dang 'brel pas sdug bsngal thams cad grol bar 'gyur ro zhes bstan pa'i phyir/ ngag rnams bsrung zhing zhes bya ba la sogs pa gsungs te/ngag rjes su bsrung ba'i ngang tshul can 'di ni ngag gi sdom pas bsdams pa zhes bya ba'i don te/ ngag rjes su bsrung ba'o/ /de yang bsdam pa'i sgra'i don nam/ nges par brtags te mi dge ba mi bya ba ste/ mi dge ba de las ldog pa'i tshul can ni sdom pa'o/ /ci ldog pa tsam gyis lam la gnas sam ma yin zhe na/las lam gsum po 'di dag rnam sbyangs na/ /zhes bya ba gsungs te/ sngar bshad pa'i lus la sogs pa'i las kyi dge ba la sogs pa'i lam gyi tshogs la bslab pas dri ma med par bya ba ste/ gsum po de las gzhan pa'i las kyi lam mi srid par bstan pa yin no//drang srong gsungs pa'i zhes bya ba ni sangs rgyas kyi bstan pa 'phags pa'i lam zhes bya ba'i don de ni de'i gcig pur gyur pa ste/ de yang dge slong gang dag 'phags pa'i shes rab kyis spang bar bya'o zhes mdo las gsungs pas so/ /lam ni 'thob par 'gyur zhes bya ba nyon mongs pa'i gnyen po kun du bsgrub par gyur pa'o//legs par spyad pa'i tshoms te bdun pa'i rnam par 'grel pa rdzogs so// //tshul khrims kyi tshoms su lus la sogs pa'i nyes par spyod pa las ldog pa'i bsngags pa spyir bstan na de ci thams cad la kun du ldog par bya ba yin nam zhe na/ma yin te smras pa/ de lta mod kyi khyad par du ngag gis nyes par spyod pa yin pas 'di ltar de tsam gyis dge 'dun gyi 'khor lo'i dbyen byas pa las ltung ba thob par 'gyur ba'i phyir te/ des na de nyid smras pa/ gang dag byas bzhin ma byas zhes bya ba la sogs pa'o//mnyan yod na mu stegs can gzhan gyis bskul te/ tsan tsa zhes bya ba'i bram ze'i bu mo shin tu yid du 'ong zhing blta na sdug pa zhig gzhong pa dku'i phyogs su bcings te/ bcom ldan 'das 'khor mang po'i nang du chos ston pa'i thad du 'ongs te smras pa/ skad shin tu chags pa dang yid du 'ong zhing snyan pas bdag sbrum par byas so zhes byas te/da khyod kyis chos shod cig ces smras so/ /bcom ldan 'das kyis/ brdzun du smra ba dmyal bar 'gro bar 'gyur/ /zhes bka' stsal to/ /des gsol ba yang gang zhig byas nas mi smra ba de cir 'gyur zhes pa dang /bcom ldan 'das kyis/ gang dag byas bzhin ma byas zer ba dang / /zhes bya ba la sogs pa bka' stsal to/ /de'i 'og tu brgya byin gyis byi ba zhig tu sprul te/ des gzhong pa bcings pa'i skud pa bcad nas skye bo'i tshogs chen po'i mngon sum du ltung bar byas so//de yang sa gas pa'i nang du zhugs te/ mnar med pa'i dmyal ba'i me rab tu 'bar zhing drag pa'i nang du song ngo / /brdzun zhes bya ba ni ma yin bzhin du smra ba ste/ med pa'i skyon brjod pa zhes bya ba'i don to/ /dmyal bar 'gro bar 'gyur zhes bya ba las kyi zhing gi gnas ji lta ba bzhin du yang sos la sogs par 'grub par 'gyur ro//gang dag byas bzhin ma byas zer ba dang / /zhes bya ba ni gang yang sdig pa byas nas rnam par sbed par byed pa gzhan gyis dris na yang de tshogs kyi nang du shes shing dran par gyur kyang mi brjod de/ bdag gis ni de ltar ma byas so zhes smra ba'o//de yang dmyal bar 'gro bar 'gyur ro zhes bya ba ni dang gi sgra'o/ /ci'i phyir gnyi ga yang dmyal bar 'gro bar 'gyur zhe na/ smras pa/ gnyi ga zhes bya ba ste/ gang dag bdag nyid bzhin la tshig ngan pa brjod pa ste/ gang yang mi rigs pa'i tshig smra ba dang / de ltar bdag ni byed pa ma yin no zhes smra ba 'di gnyi ga ste/'di ltar dman pa'i chos zhes bya ba de 'dir blta bar bya'o/ /song nas zhes bya ba ni 'jig rten 'di nas shi 'phos nas 'jig rten gzhan du 'gro ba'o/ /'dra bar zhes bya ba ni mnyam par dmyal ba la sogs par skye bar 'gyur ba'o/ / ci zhig yin zhe na/ smras pa/ dman pa'i chos zhes bya ba yin te/ gang gi phyir 'di ltar smad par bya ba spyad cing / ngan pa'i las brdzun du smra ba byas pas so zhes dgongs so/ /mi de zhes bya ba ni sems can no/ /gang du de ltar rjes su 'gro ba yin zhe na/ smras pa/ pha rol tu phyin zhes bya ba mkhas pa rnams la ste/de dag ni skye ba thams cad kyi gtso bor gyur pa zhes bya ba'i don to/ /yang na ci mthong ba'i chos nyid la dman pa'i rjes su brjod par bya ba'am zhe na/ ma yin te/ smras pa/ 'on kyang pha rol du zhes bya ba 'jig rten pha rol gyi ched du 'di ltar ngan par spyod pa byas par gyur na yang skye bo'i tshogs chen po'i nang du mi ston pas des legs par spyod pa yin no zhes 'jig rten du bsngags par 'gyur gyi/'jig rten pha rol du ni ma yin te/ spyod pa dang mthun pa nyid du der 'bras bur 'byung ba yin pa'i phyir song nas zhes bya ba dang 'dir sbyar bar bya ste/ 'di nas song nas 'jig rten pha rol du zhes bya ba'i don to//tshig gi rten lce de yang dag gis nyes par spyod pa'i rgyur gyur ba yin pas smad pa yin te/ ci'i phyir zhe na/ skyes bu skyes pa'i kha nas ni/ /zhes bya ba la sogs pa smos so/ /ko ka li ka zhes bya ba'i dge slong lha sbyin gyi tshogs pa yon tan yang dag par blangs pa la sogs pa spong bar byed cing 'od ma'i tshal na gnas te/'od ma'i tshal de'i bram ze dang khyim bdag dad pa rnams ma dad par byed cing 'dug go/ /ji tsam na der shA ri'i bu dang maud gal gyi bu gnyis 'ongs par gyur to/ /de gnyis kyis 'di ltar yi dam bcas te/ nyin re zhing sems can gcig ngan song las ma phyung bar bdag cag gis zan mi bza'o zhes rgya cher te/ des lung phog pa'i mthus gzhan zhig lha'i 'jig rten du skyes te/ de rdzu 'phrul gyis 'od ma'i tshal du 'ongs nas smras pa/ ji ltar nyan thos chen po 'di gnyis la bsnyen bkur mi byed ces dad pa skyed do//de nas de dag khros te/ ko ka li ka la ji ltar khyod kyis don 'di lta bu bdag la ma brjod ces smras so/ /de phrag dog gis rab tu gdungs te de gnyis kyi skyon tshol ba mchog tu byed par gyur pa dang / ji tsam na phug cig tu de gnyis bsam gtan gyi phyir zhugs par gyur to//skyes bu gnyis shig dang bud med gcig kyang ston ka'i char 'bab pas nyen te/ de nyid du zhugs so/ /skyes bu gnyis ni sngar song la bud med ni phyis byung bas skyes bu de gnyis kyis nye bar longs spyod pa'i mtshan ma mthong nas/ ko ka li kas 'phags pa de gnyis la sdig pa byed pa yin no zhes tshig ngan pa smras so//bcom ldan 'das kyis bka' stsal ba/ ko ka li ka shA ri'i bu maud gal gyi bu gnyis la ni mngon par ma dad pa ma bskyed cig /de dag ni nye ba na gnas pa yin la/ de gnyis ni des shing tshangs pa mtshungs par spyod pa yin te/yun ring por gnod par 'gyur ro zhes gsungs so/ /'di ltar yang bcom ldan 'das kyis bdag la dad par byas pa dang / yid ches par byas kyang bcom ldan 'das kyis bdag la sdig pa 'dod pa yin no zhes smras so zhes zer ro/ /de ma thag tu yungs kar tsam dang mon sran sde'u tsam dang /sran ma tsam dang / rgya shug gi tshi gu tsam dang / bil 'bras bu tsam dang ga pid ta tsam gyi 'brum bu rnams kyis lus la khyab par gyur nas ji tsam na dmyal ba pad+ma chen po ltar gas par skyes te/ de'i phyir tshigs su bcad pa gsum gsungs so/ /'dir kha cig ni de ltar dge slong ar gi ka zhes bya ba dus ji lta ba bzhin du 'ongs te/bcom ldan 'das la gnod sems shin tu drag po skyed par gyur to/ /bcom ldan 'das kyis kyang de nyi ma bdun la shi 'phos nas dmyal bar skye bar 'gyur ro zhes lung bstan to/ /rgyal po gsal rgyal gyis kyang thos te rang gi yul nas spyugs so//de ltar grong khyer chen po drug dang / shing drung la sogs par de'i lha rnams dang / wa rnams kyis kyang gnas rnyed pa yin na bdag gis ni 'dzam bu'i gling du skabs ma rnyed do zhes khrag dron por skyugs te mnar med par skyes pa de'i dbang du mdzad nas 'di gsungs so/ /skyes bu'i skyes pa'i zhes bya ba ni sems med pa dang ma skyes pa rnams la ni las kyis 'phags pa la sogs pa mi srid pa'i phyir te/da ltar 'byung ba'i 'bras bu lnga len pa yin no zhes lung las 'byung ba'i phyir ro/ /sta re ni shing la sogs pa gcod pa'i cha byad de/ de dang chos mthun pa yin pa'i phyir lce la de skad ces brjod do//kha nas skyes gyur nas zhes bya ba ni sdig pa byed pa kha las skyes pa yin no/ /ji ltar zhe na/ lce sta re lta bu las gang zhig bdag nyid gcod par byed par 'gyur ba'i tshig ces bya ba tshig gang zhig gi gnas su gyur pa ni lce yin la/ des 'di ltar bdag nyid 'jig par byed pa yin te/shing mkhan gyis shing la sta res bya ba byed pa bzhin no/ /des na de sta re yin no/ /bdag nyid gcod par byed pa de gang yin zhe na/ smras pa/ ngan pa smra byed pa zhes bya ba yin te/ brjod par bya ba ma yin pa smra zhing ngag ma bsdams pa zhes bya ba'i don to/ /de gang yin zhe na/ ngan par smra bar byed pa'i ngo bo nyid smras pa/gang zhig smad 'os skye bo stod byed dang / /zhes bya ba la sogs pa ste/ gang la la zhig smad par rigs pa'i skye bo de ni bstod cing bstod par 'os pa'i skye bo ni rnam par smad par byed pa ste/ yon tan thams cad dang ldan pa'i phyir bstod par 'os pa'i sems can/ 'phags pa shA ri'i bu la sogs pa smod pa'o/ /'di dag ni ngan pa smra bar byed pa ste/ de skad smra ba'i gang zag ni tshig ngan pa smra bar 'gyur ro/ /de ni kha yis 'thab krol kun stsogs shing / /zhes bya ba la/ kha la de gnas pa yin par ston te/ gnas kyis gnas pa ston pa'i phyir grong can 'ongs pa la grong can 'ongs zhes bya ba lta bu'o//gang zhig ngan par smra bar byed pa de ni kha yis 'thab krol te/ ngag gis nyes par spyod pa'i bdag nyid gnod pa kun du bsogs par 'gyur zhing 'thab krol can gang gi rgyu des ni 'di dang phyi ma gnyi gar bde ba'am 'dod pa'i 'bras bu rjes su myong bar mi 'gyur ro/ / gzhan yang 'thab krol ni gnod pa byed pa nyid de/ de la 'di zhes ci'i phyir ma smos she na/ smras pa/ 'thab krol de ni cung zad tsam du zad/ /ces bya ba 'di'o/ /'di ni cung zad tsam du zad de/ 'di ltar 'di'i gnod pa gang yin zhe na/ smras pa/ gang 'dir cho los rang nor pham byed pa/ /zhes bya ba yin te/'thab krol gang zhig 'jig rten 'dir rgyan po la sogs pa 'jab bu'i mis rang gi nor te dbyig la sogs pa las pham pa dang / 'jig pa dang / nyams par byed pa'o/ /yang na gang zhes bya ba ni gang zag ste dngos po gang gis rang gi nor khyad par can 'jig pa'i mtshan nyid ni 'thab krol gyis sgrub par byed kyang 'di ni nyes pa cung zad tsam du zad de/tshe 'di'i 'byor pa phun sum tshogs pa tsam 'jig pa'i phyir ro/ /de 'dir 'thab krol shin tu chen po yin/ /zhes bya ba ni 'di nyid ni tshe 'dir yang 'thab krol shin tu chen po yin te/ su zhig ce na/ gang zhig bde bar gshegs la yid 'khrugs pa//zhes bya ba ste/ skyon med pa'i dam pa rnams la sems rab tu 'khrugs par byed pa ste/ yid tsam 'khrugs pas kyang de lta bu yin no/ ngag gis 'khrugs par byed pa lta smos kyang ci dgos te/ skye ba du ma dag tu bde ba'i khyad par nyams pa'i phyir dang / shin tu mi bzad pa'i sdug bsngal 'thob pa'i phyir ro/ /gang dam pa rnams la yid 'khrugs par byed cing 'phya bar byed pa de ni dmyal ba gang dang gang du dus ji tsam gnas par 'gyur zhe na/ de'i phyir ngag yid 'phags pas zhes bya ba la sogs pa'o/ /dmyal ba 'di dag gi lo dang tshe'i tshad rnam par phye bar bcom ldan 'das kyis kyang dpe tsam du gsungs te/dge slong dag 'di lta ste/ yul ma ga d+hA'i khal nyi shu shong ba'i rdzang til gyis bkang ste kha bcings pa las/ de nas la la zhig gis lo brgya brgya zhing til gyi 'bru re re phyung bas ni dge slong dag myur ba nyid du yul ma ga d+hA'i til gyi rdzang khal nyi shu shong ba de rim gyis yongs su zad cing med par 'gyur gyi/chu bur can du skyes pa'i sems can gyi tshe'i tshad ni de ltar mthar thug par 'gyur ro zhes nga mi smra'o/ /dge slong dag 'di ltar rdzang khal nyi shu'i tshad ni chu bur can gyi yin te/ de gcig tu brtsis pa'i nyi shu 'gyur ni chu bur rdol ba'i yin no//de bzhin du pad ma ltar gas pa'i tshe gcig tu brtsis pa'i nyi shu 'gyur ni pad ma ltar gas pa chen po'i yin no/ /de las rdzang gcig ni chu bur can gyi tshad do/ /rdzang nyi shu ni chu bur rdol ba'i'o/ /rdzang de bzhi brgya ni so thams thams kyi'o/ /rdzang de stong phrag brgyad cu ni a chu zer ba'i'o//rdzang de 'bum phrag drug khri ni kyi hud zer ba'i'o/ /de 'bum phrag drug cu rtsa gnyis ni ut+pal ltar gas pa'i'o/ /rdzang de bye ba phrag drug dang 'bum phrag bzhi bcu ni pad ma ltar gas pa'i'o/ /rdzang de bye ba phrag brgya nyi shu rtsa brgyad ni pad ma ltar gas pa chen po'i yin no zhes bgrang ba'o//tsha ba'i dmyal ba rnams kyi tshe'i tshad kyang de dang mnyam pa yin te/ grang ba'i dmyal ba rnams la skyo ba bskyed pa'i phyir gdul bya rnams la de ltar dper brjod pa yin no zhes gzhan dag zer ro/ /'brum bu phra mos bar mtshams med par lus la khyab pa'i phyir chu bur rdol ba'o//'brum bu phra mo bar bar du skyes pa'i phyir chu bur can no/ /dus dang grangs dang lus rnam par gnas pa la skyes pa'i chu bur can la sogs pa go rims bzhin du gnyis dang gsum dang gsum mo/ /chu bur can dang / chu bur rdol ba ni dus dang grangs kyi khyad par gyis rab tu grags pa'i lo bye ba'i tshe tshad yod pa de ni chu bur can no//gang dag la bye ba phrag bcu yod pa de ni chu bur rdol ba'o/ /de dag las chu bur rdol ba'i stong phrag brgya ste/ 'bum gyi grangs kyi dus kyi bar du ni 'phags pas smad pa'i sdig pa bsten na dmyal ba 'dir 'gro bar 'gyur ro zhes sbyar bar bya'o/ /bye bar chu bur can dang zhes bya ba ni dus de srid kyi bar du pad ma chen po ltar gas pa'i sems can nyid gnas pa yin te/shin tu tshe ring por dus de srid kyi bar du ko ka li ka gnas pas des na de nyid dbye ba yin no/ /gang zhes bya ba ni dmyal ba'o/ /'phags pas smad pa ni dam pa rnams kyis so/ /'gro bar 'gyur zhes bya ba ni 'jug pa'o//ci zhig byas nas 'gro ba yin zhe na/ ngag yid ces bya ba smos te/ sdig pa can gyi tshig dang sdig pa can gyi yid do/ /bsten pa ni 'jug pa'o/ /smad pa bsten pa na ni dmyal bar 'gro bar 'gyur te/ de la 'di tsam du gnas par 'gyur zhes bya ba ni bsdus pa'i don to/ / ngag gis nyes par spyod pa'i mi 'dod pa'i 'bras bu ma shes pa dag la de'i 'bras bu bstan pas de las bzlog par bya ba'i phyir 'di gsungs so/ /dam pa rnams ni bden pa ma yin pas tshig ngan pa brjod kyang mi 'gyur ba yin no zhes bstan pa'i phyir smras pa/ sdig pa'i sems kyis zhes bya ba la sogs pa'o//mdza' bo dang sa las skyes zhes bya ba'i dge slong de gnyis dang tshe dang ldan pa gyad bu nor tshe rabs su khon zhugs par gyur pas de gnyis kyis tshig ngan pa smras te/ 'di lta ste/ gyad bu nor bdag cag gis dge slong ma ut+pa la'i mdog dang mi tshangs par spyod pa mthong ngo zhes bya ba la sogs pa smras te/de'i dbang du mdzad nas/ sdig pa'i sems kyis ma nyes skyon brjod pa/ /zhes bya ba la sogs pa 'di gsungs so/ /ma nyes pa ni mi bden pa'o/ /skyon brjod pa ni tshig ngan pas sun par byed pa'o/ /gang gis she na/ sdig pa'i sems kyis zhes bya ba ste/nyon mongs pa'i yid kyis so/ /sems kyi skyon dang bral zhing skyon spangs pa'i 'phags pa rnams ni skyon brjod par mi rung ngo / /skyon brjod pas ci zhig tu 'gyur zhe na/ bdag nyid gsad phyir dmyal ba spel bar zad/ /ces bya ba smos te/ bdag nyid bcom pa'i phyir dmyal ba'i 'gro bar dor bar byed de/ rnam par smin pa'i 'bras bu nye bar len cing shin tu mi bzad pa'i tshor ba myong ba yin te/ gang dag mthong ba'i chos nyid kyi yul gyi ro la dmigs shing mthong la/ ma 'ongs pa'i sdug bsngal chen po'i rgyun ni ma yin pa'o/ /gang mkhas pa dag ni gzhan gyis gnod pa byas kyang mi 'gyur te/ci'i phyir zhe na/ 'di ltar stobs ldan nyes med ces bya ba ni 'di'i so sor brtags pa'i stobs zhes bya ba'i don to/ /bzod par byed pa ni mi bzod pa med pa'o/ /de la zhes bya ba ni skyon brjod pa de thos kyang ngo / /'di ji ltar shes par bya zhe na/sems kyang 'khrugs par mi byed do/ /zhes bya ba smos te/ sems rnyog par ma byas pa yin no/ /rigs pa ni dam pa rnams kyi gzhung lugs kyi rjes su 'brang ba ste/ dam pa rnams kyi gzhung rjes su bsrungs pas rnyog pa med pa'o/ /ji skad du/ dam pa rnams ni 'ching gyur kyang / / sems ni 'khrugs par mi 'dod de/ /srog gi phyir yang mi 'khrugs pa/ /de bas mkhas pa 'dod mi byed/ /ces bshad do/ /sems kyang 'bad pas 'khrugs par mi byed do zhes kha cig brjod de/ skye bo dam pa rnams ni nam yang 'khrugs pa dang bcas pa mi byed do zhes bya ba ni 'di'i don to//dam pa dang dam pa ma yin pa'i khyad par bstan pa'i phyir 'di gsungs so/ /gang gi phyir 'di la yon tan la smod par byed pa ni mi 'dod pa'i 'bras bu'i khyad par du 'gyur ba yin no zhes bstan pa'i phyir smras pa/ bsam brlag gang zhig ces bya ba la sogs pa'o/ /lha sbyin gyis bcom ldan 'das kyis bstan pa'i lam spangs te/bslab pa'i gzhi lnga po 'di dag ni don dam pa thob par byed pa yin no zhes ston te/ 'di ltar 'o ma btung bar mi bya ste/ gang gi rgyus be'u la gnod pa'i phyir ro/ /sha bza' bar mi bya ste/ sems can la gnod pa'i las 'byung ba'i phyir ro//kha tshar gcad par mi bya ste/ thags mkhan gyi skyes bu byed pa nyams par 'gyur ba'i phyir ro/ lan tshwa bza' bar mi bya ste/ dbang phyug chen po'i khu ba las yang dag par 'byung ba'i phyir ro/ dgon par gnas par mi bya ste/ sbyin pa po rnams kyi sbyin pa'i bsod nams yongs su spyad pa med pa'i phyir ro zhes ston te/des na 'di gsungs so/ /dge slong zhig sngar mu stegs can zhig pas bcom ldan 'das kyis 'phags pa'i bden pa'i gtam mdzad pa ni/ ji tsam na lan gsum gyi bar du yang tshig ngan pas smod par byed pa dang / bcom ldan 'das kyis dam pa'i chos la smod pa 'dis ni dmyal bar skye bar 'gyur te/lo bye ba stong phrag brgyad cur sdug bsngal nyams su myong bar 'gyur zhing / de nas shi 'phos nas kyang 'dir skyes te/ de'i tshig thams cad kyis kyang mnyan par mi 'os par 'gyur ro zhes gsungs pa'o/ /zhes gzhan dag zer ro/ /gang zhig ces bya ba ni gang la la zhig go/ / bstan pa ni ji lta ba nyid bstan pa'o/ 'phags pa ni bden pa mthong ba'o/ /dgra bcom pa ni khams gsum gyi nyon mongs pa spangs pa ste/ nyon mongs pa'i dgra thams cad las nges par mi rgyal ba ni dgra bcom par mi 'gyur ro/ /chos kyis 'tsho ba dang zhes bya ba ni mi slob pa'i lam thob pa des ni dogs pa med par chos kyis 'tsho bar rtag pa yin te/'dir rtsod pa la mngon du phyogs pa'i kun du rgyu ba'i mdo yang brjod par bya'o/ /spong bar byed pa zhes bya ba ni sangs rgyas dang de'i nyan thos rnams kyis bstan pa las phyin ci log tu byed cing yongs su spangs pa yin no/ /'di ltar ni ma yin no zhes brjod pa'o//de gang yin zhe na/ smras pa/ bsam brlag ces bya ba ste/ blo ngan zhing blun po zhes bya ba'i don to/ /ci la brten nas de ltar spong bar byed ce na/ sdig can gyi lta ba la brten nas zhes bya ba yin te/ 'jig tshogs la lta ba ni sdig pa can gyi lta ba ngan pa thams cad kyi rtsa bar gyur ba'i phyir ro/ / yang na sdig pa can gyi lta ba ni lta ba log pa ste/ 'jig tshogs la lta ba la sogs pa'i sdig pa can tshol bar byed pa nyid la brjod de/ dge ba'i rtsa ba thams cad gcod pa'i phyir dang / dam pa'i gzhi nyams par byed pa'i phyir sdig pa can gyi gdol pa lta bu dang / dri nga ba'i mar lta bu'o/ /yang na mu stegs can gzhan gyi lta ba la brten pa ste de la brten pas ni 'di lta bu spong bar byed pa 'byung ba'i phyir ro//de'i nyes dmigs bstan pa/ smyig ma 'bru chags lta bur ni/ /zhes bya ba smos te/ smyig ma la tsher ma dang bcas pa'i 'bras bu yod de/ de ni rang nyid gsod pa'i phyir skye bar 'gyur te/de skyes na de skams par 'gyur ro/ /dper na gang de ltar de rang gi 'bras bus gsod pa bzhin du 'di spong bar byed na rang gi gnas 'jig par byed pa yin te/ rnam par smin pa'i 'bras bu ngan song la sogs par smin cing 'bras bu spangs pa zhes bya ba'i don to/ /dam pa'i chos spong bar dgag pa'i phyir 'di gsungs pa yin no//gang gi phyir man ngag ma rungs pa nyid kyis ni mi 'dod pa'i 'bras bu yin te/ des na smras pa/ tshig bzang kho na smra ba yi/ /zhes bya ba la sogs pa'o/ /mnyan yod na bud med gtum mo kha cig bab col du khro ba dang ldan zhing dmod mo 'debs pa yod de/ de dge sbyong dang bram ze mthong na khyad par du dmod mo 'debs par byed pas skye bo thams cad la mi sdug cing yang dang yang du nyon mongs pas khro bar byed de/ de las brtsams nas tshigs su bcad pa gnyis gsungs so/ /tshig bzang kho na zhes bya ba ni kha na ma tho ba med pa ste/ ngag gi skyon rnam pa bzhi dang bral ba'o//tshig 'byung ba yin te/ skyabs kyis shes pa'i phyir ro/ /de kho na smra bar bya ba ni brjod par bya ba'o/ /sdig pa can dag smra mi bya/ /zhes bya ba nam yang kha na ma tho ba dang bcas pa brdzun la sogs pa'i nyes pa dang bcas pa'i tshig ni smra bar mi bya'o/ /de'i phan yon dang nyes dmigs smra ba/smra ba zhes bya ba ni kha nas brjod cing 'don pa'o/ /tshig bzang zhes bya ba ni ngag dam pa ste/ legs par 'byung bar byed pa yin no zhes bya ba ni tshig gi lhag ma ste/ phun sum tshogs pa'i 'bras bu zhes bya ba'i don to/ /sdig pa can ni sngar bshad pa bzhin no/ /gdung byed ces bya ba ni bdag dang gzhan gdung bar byed pa yin te me bzhin no//byis pa sdig can zhes bya ba la sogs pas ni khyad par du bdag nyid la gdung bar byed pa dang / bdag nyid la gnod par byed par ston te/ gal te gang zhig sdig pa can gyi tshig smra bar byed na de ni nges par gzhan spong ba yin te/ 'jig rten pha rol yongs su spong ba yin no//'dir gzhan zhes bya ba'i sgra ni 'jig rten pha rol gyi rkyen yin pa'i phyir ro/ /gang gi phyir 'jig rten pha rol mchog tu byed pa ni legs kyang mi 'dod pa'i 'bras bu skyed par byed pa'i sdig pa mi byed cing bsod nams nye bar sogs pa yin no/ /de las gzhan pa dag ni the tshom med par sdig pa rtsom par byed do//ji ltar sdig pa byed cing 'jig rten pha rol spong ba yin zhes gzung bar bya zhe na/ smra ba'i tshe na 'ching 'gyur la/ /zhes bya ba smos te/ gang gi phyir gang dag sdig pa can gyi tshig dam pa rnams la smra ba na ngan song gi las kyi zhags pas 'ching bar 'gyur te/de nas der skyes pa na sdug bsngal khyad par can dag myong ba yin no/ /des na de nyid kyi phyir smras pa/ de dag 'phags pa mi gsung ngo / /zhes bya ba ste/ ngag ma rungs pa ni dam pa rnams mi brjod do/ /de lta na gang zhig brjod pa yin zhe na byis pa zhes smos te/ de'i nyes dmigs ma mthong ba'i phyir ro//ngag gis nyes par spyod pa ni skyon ma shes pa rnams la de'i skyon bstan pas de las bzlog pa'i phyir 'di gsungs so/ /gang zhig ngag yang dag par sdom par byed pas chos ston pa de'i tshig ni shin tu yid du 'ong ba yin no zhes bstan pa'i phyir smras pa/ dge slong ngag ni bsdams pa dang //zhes bya ba la sogs pa'o/ /btsun pa dge slong rnams ji tsam gyis na snyan par smra ba zhes brjod pa lags zhes zhus pa dang / ji tsam na 'di gsungs so/ /gzhan dag ni rgyal po gsal rgyal gyis bcom ldan 'das nyan thos kyi dge slong gi dge 'dun dang bcas pa spyan drangs te/zhal zas btung ba gya nom pa dag gis tshim par byas so/ /tshe dang ldan pa lan tshwa bzang po 'di snyam du sems te/ rgyal pos ni bdag cag la nyin par ni zang zing gis tshim par byas so/ /mtshan mo ni bdag gis kyang chos kyis tshim par bya'o zhes bya bas des ji ltar rnam pa sna tshogs pa'i khyad par thob pa de ltar snyan pa'i chos bstan te/de'i dbang du mdzad nas 'di gsungs pa yin no zhes zer ro/ /ngag bsdams pa zhes bya ba ni kha yang dag par sdom pa zhes bya ba'i don te/ ngag gis nyes par spyod pa thams cad spangs pa'i phyir ro/ /dge slong zhes bya ba ni lung slob cing slong ba ste/bcom ldan 'das kyis kyang nyan thos zhes bya ba'i don to/ /gang gi phyir de ni ngag kyal pa spangs pa yang dag par bsdams pa'i tshig yin te/ gzhan mu stegs can gyi tshig dag ni 'brel ba med pa'i tshig tu gyur pa'i phyir ro/ /dal bus smra zhing zhes bya ba ni nyung du smra ba yin te/don dang ldan zhing dgos pa'i tshig tsam brjod pa'i phyir dal bus smra ba'o/ /de lta bu gang yin zhe na/ smras pa/ rlom pa med ces bya ba ste nye bar zhi zhing mi brtan pa spangs pa'i phyir ro/ /gang zhig chos ldan don ston pa/ /zhes bya ba ni gang sngar bstan pa'i yon tan dang ldan pa ste/dus dang mtshams dag tu chos kyi don gyi tshig tshul bzhin du ston pa kha ton la sogs pa'i dus su yang don dang ldan pa'i chos phyin ci ma log par ston pa yin no/ /yang na don ni thar ba ste don thams cad kyi mchog tu gyur pa yin pa'i phyir ro/ /chos ni de thob pa'i lam la sogs pa'o//de ni snyan par smra ba yin/ /zhes bya ba ni de nyid bdag nyid chen pos bshad pa'i tshig yin te/ yid du 'ong ba dang skyon med pas sbrang rtsi bzhin du chags par byed pa yin te/ snyan cing rna ba'i dbang po tshim par byed pa zhes bya ba'i don to/ /de bas na legs par gsungs pa ni rab tu bsngags pa yin pas legs par smra ba mchog ces bya ba la sogs pa smos so//tshig rkang bzhi pa'i chos kyi rnam grangs khyed la bshad par bya bas/ de nyon cig ces pa nas ji srid du 'di gsungs so/ /tha dad pa rnams mtshams sbyar nas smras pa ni legs par smras pa'am legs par gsungs pa ste/gang gis tha dad pa sbyar bar byas pa'o zhes bya ba ni kho na nyid de legs par smras pa de nyid mtshams sbyar ba de bzhin du'o/ /mchog gam gtso bo ni tha dad pa med par byed pa'i tshig ste/ mtshams byed par gyur pa med pa'i phyir ro/ /'phags pas gsungs pa ni ston pa'o//'phags pa ni sangs rgyas dang sangs rgyas kyi nyan thos te/ 'di ni chos kyi tshig dang po'o/ /snyan smra mi snyan ma yin de gnyis pa/ /zhes bya ba ni 'jam par smra zhing dga' ba bskyed pa ste/ mi rtsub pa 'di ni chos kyi tshig gnyis pa yin no/ /bden smra brdzun pa ma yin de gsum pa//zhes bya ba ni phyin ci ma log par smra zhing nam yang brdzun gyi tshig mi smra ba 'di ni gsum pa'o/ /chos smra phal pa ma yin bzhi pa'o/ /zhes bya ba ni 'dir rigs pa'i don bzhin du smra ba'o/ /phal pa ste ma 'brel ba'i tshig ma yin pa zhes bya ba'i don to/ /yang na legs par smra ba ni bsngags pa'i tshig legs par gsungs pa la brjod do//de yang tshul gsum ste/ yid du 'ong ba dang phyin ci ma log pa dang / phan 'dogs pa'o/ /de go rims bzhin du snyan smra mi snyan ma yin zhes bya ba la sogs pas bstan to/ /snyan par smra bas ni mchog tu dga' bar byed do/ /bden par smra bas ni tshul khrims rdzogs par byed do//ci khyod ni tshul khrims nyams sam ma nyams zhes dris pa na bdag gis ji lta ba bzhin du rjod par byed cing ngo tsha bas tshul khrims sam 'chal bar mi byed do/ /'chal par gyur kyang ji lta ba bzhin du sbyangs pas yang yongs su dag par 'gyur ro/ /chos smras pas ni gzhan mi dge ba las bzlog cing dge ba la 'jog par byed pa yin te/de'i phyir snyan par smra ba la ni brdzun pa dang chos ma yin pa med do/ /phal pa dag la ni mi bden par smra ba la sogs pa yod do zhes rjod par byed do/ /'brel ba med pa'i ngag kyal ba la chags pa rnams legs par bshad pa rnams nyan pa la gzud pa'i phyir 'di gsungs so//tshigs su bcad pa de nyid rnam par dbye ba'i phyir smras pa/ tshig de rnams ni smra bya zhing / /zhes bya ba la sogs pa'o/ /gang gi tshe bcom ldan 'das tshig rkang bzhi pa'i chos kyi rnam grangs ston pa de'i tshe tshe dang ldan pa ngag dbang 'di snyam du sems te/gang bdag gis tshig rkang bzhi pa'i chos kyi rnam grangs 'di la mngon par bstod par bgyi'o zhes rgya cher zhus pa dang / gnang ba thob ste des 'di dag smras so/ /tshig de rnams ni smra bya zhing / /zhes bya ba ni tshig de nyid brjod par bya'o/ /gang gis bdag kyang mi gdung la//zhes bya ba ni tshig gis bdag nyid la tshe 'dir grags pa ma yin pa dang / /pha rol du sdug bsngal bas gdung bar mi byed cing mi sreg pa'o/ /pha rol la yang gnod med pa'i/ /zhes bya ba la/ gnod pa ni lus dang ngag gis gzhan la gnod pa mi bya ba ste/ tha dad par mi bya zhing mi dbye bar bya'o//tshig de legs par smra bar bya/ /zhes bya ba ni/ tshe de nyid la legs par smra ba yin no/ /tshig rkang dang po'i bstod pa byas nas/ gnyis pa bstod pa'i phyir/ gang gis mngon par zhes bya ba la sogs pa smos so/ /gang gis snyan par smra bas dga' bar 'gyur ba de ni mngon par dga' bar 'gyur ba ste/snyan par smra ba zhes bya'o/ /des na de nyid smras pa/ gang zhig tshig 'dis dga' 'gyur zhes pa ste/ gang gis thos pas kyang mngon par dga' zhing rangs pa ste/ 'di mnyan pas dga' zhing rangs pa skye bar 'gyur ba'o/ /yang na tshig rkang snga mas ni don snyan par bstan to//'dis ni tshig 'bru snyan par bstan to/ /mngon par dga' 'gyur na zhes bya ba de nyid dbye ba'i phyir gang zhig mkhas pa chags par byed pa yod ces bya ba smos te/ tshig gang gis chags pa med pa'i sbyor ba ste/ rtogs pa dag ni cung zad kyang mi 'khrugs pa yin te/'on kyang dga' bar ni byed do/ /yang na phra rgyas thams cad sil ba yin no/ /de ni snyan tshig dam pa yin/ /zhes bya ba ni de'i tshig de ni 'phags pa rnams bzhed cing spyod pa yin te/ ji skad du 'jam zhing 'jam pa'i tshig gi ngag yang dag par 'byung ba ni bdag la rag las pa yin pa'i phyir snying stobs dang ldan pa'i skyes bu su zhig tshig rtsub po smra bar 'gyur/gsum pa bstod pa ni/ bden pa'i tshig ni bdud rtsi ste/ /zhes bya ba smos te/ phyin ci ma log pa smra ba ni bdud rtsi'i tshig tu bshad de/ de la gnas pas na mya ngan las 'das pa 'thob pa'o/ /yang na bdud rtsi ni lha rnams kyis longs spyod pa yin te/gang gi phyir bden pa nyid ni ro shin tu bsod pa yin no zhes lung las 'byung ste/ des mkhas pa rnams tshim pa'i khyad par dang nyams brtas par 'gyur ba'i phyir lha rnams kyi bdud rtsi bzhin no/ /bden pa'i tshig ni bla med yin/ /zhes bya ba ni thams cad las khyad par du gyur pa yin te/don thams cad las khyad par du gyur pa'i phyir ro/ /yang na tshig ni gtsug gi nor bur gyur pa'i phyir me tog gi phreng ba shin tu yid du 'ong ba rab tu gnas pa yin no zhes bya ba'i tshig gis te/ legs par pha rol tu phyin pa'i skyes pa'i rabs la sogs pa brjod par bya'o//ci'i phyir bla na med pa yin zhe na/ 'dir rgyu smras pa/ bden pa zhes bya ba smos te/ gang gi phyir bden pa'i tshig ni don la rab tu gnas pa yin te/ de las 'byung ba'i phyir ro zhes dam pa rnams brjod de/ 'jig rten 'di'i dgos pa byed pa'i phyir ro/ /chos la yang rab tu gnas pa yin te/'jig rten pha rol gyi dgos pa byed pa'i phyir ro/ /yang na don la gnas pa ni 'jig rten pa'i phan yon no/ /chos la gnas pa ni 'jig rten las 'das pa'i phan yon no zhes bya ba la sogs pa'o/ /dam pa'i dngos po'i de kho na nyid reg pa ste/ thams cad mkhyen pa dang /de'i gzhung la spyod pa'i nyan thos dag go/ /gsungs pa ni 'chad pa'o/ /tshig rkang bzhi pa las brtsams te/ sangs rgyas kyis ni gsungs tshig gang / /zhes bya ba la sogs pa smos te/ thams cad mkhyen pa nyid du thugs rje chen pos gzhan gyi don la brtson pa ste/ tshul khrims kyis mtshon pa sems pa khyad par can sangs rgyas so//gang cung zad sangs rgyas bcom ldan 'das kyis bshad pa ni gsung rab yan lag bcu gnyis so/ /sangs rgyas bcom ldan 'das kyis ji lta bus gsungs she na/ smras pa/ bden pa ste 'jigs pa med pa mngon par mtho ba'i rgyur gyur pa'i phyir ro//mya ngan las 'das par 'gro ba ni thar pa thob par byed pa ste/ nges par legs pa sgrub pa'i phyir ro/ dngos po'i skyon med pas 'dir bsam pa'i skyon yang nam yang med do/ /bsam pa'i skyon med pa'i phyir gzhan gyi don du gang bcom ldan 'das kyis gsungs pa'i tshig de'i don nyid sdug bsngal thams cad spangs pa'i phyir zhes bya ba smos te/sems can thams cad kyi sdug bsngal thams cad nye bar zhi ba'i phyir ro/ /tshig de bla na med pa yin/ /zhes bya ba ni tshig de nyid zla med pa'o/ /tshig gi tshoms te brgyad pa'i rnam par 'grel pa rdzogs so// //tshul khrims la sogs pa'i tshoms gsum bstan pa las phal cher las kyi tshul gsal bar bstan pa'i phyir/de'i 'og tu las kyi tshoms bstan to/ /yang na bstan ma thag pa'i tshoms des ni bden pa la sogs pa'i tshig bstan pa yin la 'dis ni/ brdzun du smra ba la sogs pa'i tshig brjod pa yin no//yang na tshig las ches khyad par du gyur pa'i las nyid bstan pa'i phyir te gang gi phyir sangs rgyas kyi bstan pa'i stobs kyis sems can rnams 'khor ba las 'don pa yin la/ de'i phyir 'di ni las ches khyad par du gyur pa yin pas de'i rnam par 'grel ba brtsam par 'dod nas smras pa/chos gcig ces bya ba la sogs pa'o/ /rgyal po'i khab kyi dka' thub 'byin pa'i kun dga' ra ba na tshe dang ldan pa sgra gcan 'dzin gnas te/ de gdul ba'i don du bcom ldan 'das der gshegs so/ /des kyang thag ring po nas bcom ldan 'das der gshegs pa mthong ste/gdan bshams shing zhabs bkru ba dang zhabs rten yang phyogs gcig tu gzhag ste/ mdun bsu nas chos gos dang lhung bzed khyer ro/ /ji tsam na bcom ldan 'das nyid kyis zhabs bsil te chu snod kyi nang du chu cung zad lhag pa gzhag nas/tshe dang ldan pa sgra gcan 'dzin la chu cung zad tsam 'di mthong ngam zhes bka' stsal to/ /btsun pa de bzhin no zhes gsol to/ /de ltar cung zad tsam de bzhin du ngas sgra gcan 'dzin khyod la skyes bu gti mug can gyi dge sbyong gi chos smra bar bya'o/ /gang la la zhig shes bzhin du brdzun du smra ba dang /ngo tsha med pa dang / 'dzem pa med pa dang / 'gyod pa med pa de yang bor ba nas de bzhin du 'di la g.yon can dge sbyong gi chos so zhes nga smra'o zhes bya ba dang / ha sti shu Na Da t+ya ga'i dper brjod pas tshigs su bcad pa gnyis gsungs so/ /chos gcig ni gtso bor gyur pa'i don te/gcig gi sgra ni mchog gi tshig yin pa'i phyir ro/ /chos kyi sgra ni yang don gyi rnam grangs yin pa'i phyir te/ grong 'di na ni rgyal gyi grogs po gnas so zhes gtso bor shes pa bzhin te/ des na bden pa'i tshig ni 'dir chos so/ /'dzin par byed pa yin pas chen po'o//gcig kyang yin la chos kyang yin pas chos gcig ces bsdu ba byas so/ /de las 'das pa ni thal ba ste/ bden pa zhes bya ba bor ba dang ldan pa'i skyes bu'o/ /'di ji lta bu yin zhe na smras pa/ brdzun du smra ba'i zhes bya ba ste/ brdzun pa ni phyin ci log ste/ smra ba ni tshig go/ /gang zhig rtag tu brdzun smra ba de nyid ni skye bo dam pas ma bsngags pa bden pa'i chos las 'das pa ste/ dper na dug ha la ha la nye bar longs spyod pa des srog 'phrog par byed pa de bzhin du'o/ /lus can ni sems can no/ /'jig rten pha rol bcom pa zhes pa ni bde 'gro yongs su spangs pa ste/'dir pha rol gyi sgra ni bsngags par byas pa'i phyir te/ song nas bde ba sbyin pa ni chos so zhes pa'i tshig gis so/ /de spangs pas ni de'i 'bras bu spong ba'o/ /sdig pa mi bya ci yang med/ /ces bya ba ni des bden pa spangs shing brdzun du smra ba yongs su gzung bas sdig pa bsags te/rim gyis dge ba'i rtsa ba rnams rgyun gcod par byed pa de ni sngar bshad pa'i sems can gyis ni mi bya ba dang / ngan par spyod pa mi byed pa ci yang med pa'o/ /des na yang de nyid kyi phyir/ lcags gong zos pa ches bla yi/ /zhes bya ba smos te/ lcags kyi gar bu'am lcags kyi gong po mid pa ni rung ngo zhes pa'o//ji lta bu zhe na/ bsreg pa ste mes bsregs pa'o/ /me lce 'bar 'dra ba zhes bya ba ni me 'bar ba dang 'dra zhing mtshungs pa gang yin pa ste/ mes sreg cing 'bar ba dang mnyam pa'o/ /bzar mi rung zhes bya ba ni gang zhig zos shing mid pa'o//'di skad ston pa yin te/ gang yang lcags kyi thu lum bsregs shing me lce 'bar ba lta bu za ba dang / gang yang tshul khrims 'chal ba yul 'khor gyi bsod snyoms za bar byed pa 'di gnyis las ni lcags kyi thu lum za ba de ni bla'i/ cig shos ni ma yin no/ /ji skad du rnam par smra bar byed pa las dmigs pa ni chos mchog yin gyi/gang yang mi dmigs pa ni ma yin te/ chos thams cad la bdag med pa'i rnam pa la gang dmigs pa dang / gang yang mi dmigs pa de gnyis las dmigs pa nyid ches mchog yin no zhes pa'i don te/ de bzhin du bstan pa 'di yang shes par bya'o//tshul khrims 'chal ba zhes bya ba ni tshul khrims nyams pa ste/ brdzun smra ba la sogs pa zhes bya ba'i don to/ /yul 'khor bsod snyoms zhes bya ba ni grong la sogs pa las rnyed pa'i bsod snyoms te/ gus pa sngon du btang bas dge slong la byin pa'i zas zhes bya ba'i don to//mi sdom pas zhes bya ba ni dbang po sdom pa dang mi ldan pa'i phyir te/ gang tshul khrims dang ldan yang dbang po ma dul ba des bsod snyoms nye bar longs spyod pa mi rigs so/ /yang na dge ba'i phyogs la mngon par mi brtson pa ste/ le lo can gyis nye bar blangs pa'i 'tsho ba ni bu lon du spyod pa yin no zhes lung las 'byung ba'i phyir ro//'di ni shin tu bsdams pa yin no zhes de la dad pas bsod snyoms la sogs pa 'bul bar 'gyur te/ de ni nang na shin tu ma rungs pa yin na de thams cad ni bu lon du 'gyur ro/ /brdzun du smra ba'i nyes dmigs bstod pas de las bzlog pa'i phyir gsungs so//sdig pas 'jigs pa rnams la 'di lta bu'i sdig pa mi bya'o zhes 'dir bstan pa'i phyir khyod ni sdug bsngal gyis 'jigs shing zhes bya ba la sogs pa smos so/ /bcom ldan 'das ci ra ba t+ya zhes bya ba'i chu klung rgyu zhing gshegs pa las nye ba rgan po zhig gis nya rgyas nya mang po bzung zhing phyung ba gzigs te/ci rigs kyi bu khyod gang la las 'jigs pa yod ces bka' stsal pa dang / kye gau ta ma sdug bsngal las 'jigs pa mchis so zhes gsol to/ /de lta na gzhan dag la sdug bsngal ma bskyed cig /de ci'i phyir zhe na/gang gis sdug bsngal byas na bde bar 'gyur ba ni med do zhes pa nas ji srid du tshigs su bcad pa gnyis gsungs so/ /gzhan dag ni sdug bsngal gyi 'jigs pa kun du rgyu zhig gis 'di skad ces/ kye gau ta ma bdag 'dir sdug bsngal gyis 'jigs par gyur na/ de thabs gang gis bdag gi sdug bsngal med par 'gyur zhes gsol pa dang //de nyid kyi phyir 'di gsungs pa yin no zhes zer ro/ /khyod ni zhes bya ba ni gal te'o/ /'jigs pa ni skrag pa'o/ /sdug bsngal gyis zhes bya ba ni ngan song gi sdug bsngal las zhes bya ba'i tshig gi lhag ma ste/ gsum pa'i gnas su lnga pa gzhag pas na sdug bsngal las zhes bya ba'i don to//khyod la zhes bya ba ni gal te khyod la sdug bsngal mi sdug pa ste/ bde 'gro'i sdug bsngal lam 'du byed kyi sdug bsngal mi 'dod pa yin na ste/ ngan song gi sdug bsngal ni sngar bshad pa'i phyir ro/ /gang gi phyir yang des nye bar gdung ba yin pa'i phyir mngon par mi 'dod pa ste/de bas na de'i 'og tu skye ba la mngon du phyogs pa'i phyir sdug bsngal las 'jigs pa yin te/ bdag sdug bsngal bar nam yang ma gyur cig pa'o/ /der ltung ba yongs su spang ba'i sman bsten pa'i thabs bstan pa'i phyir smras pa/me bya zhes pa ste nam yang ma byed cig pa'o/ /sdig pa can gyi las zhes bya ba ni ngan par spyod pa'o/ /mngon sum ni skye bo thams cad kyis mngon sum du gsal bar ro/ /lkog tu'ang rung zhes bya ba ni yang na skye bos dben pa'i phyogs te/ phag tu zhes bya ba'i don to/ /ji skad du/ ma mthong lkog tu'ang mi bya ste//las de 'phags pas mi bya'o/ /zhes gsungs pa'o/ /gal te sdig pa'i las byas sam/ /byed kyang rung ste zhes bya ba ni gal te yang khyod mi shes pas/ nga yongs su mya ngan las 'das pa'i 'og tu srog gcod pa la sogs pa'i nyes dmigs nyes par spyod dam nga nyid da ltar 'dug bzhin du mdun du khyod kyis byas na des na khyod ni/sdug bsngal las zhes bya ba smos te/ lus dang sems gdung ba las so/ /thar mi 'gyur zhes bya ba ni nges par 'byung ba'o/ /ci zhig byas na thar bar mi 'gyur zhe na/ smras pa/ kog ces langs te bros byas kyang / /zhes bya ba ste/rang gi yul lam rgya mtsho la sogs pa las rgal zhing 'das par byas pa'am/ yul thag shin tu ring por song bar gyur kyang ste ji skad du/ sdig can bdag nyid gar 'gro ba/ /sdug bsngal nyid ni der 'gro ste/ /gang dang gang du me gnas pa/ /de nyid na ni bsreg par 'gyur/ /zhes gsungs pa'i phyir ro//bar snang la sogs par bros na de las thar bar 'gyur ro zhes bden par smra ba gcad pa'i phyir smras pa/ gang du gnas na 'chi bas mi tshugs pa/ /zhes bya ba la sogs pa ste/ 'dir gleng gzhi dang 'brel pa ni mi rtag pa'i tshoms su bshad de/ 'chi ba'i gnas su las nyi tshe brjod pa yin no//las kyis zil gyis non par byed pas de bya bar mi rung ba'i phyir smras pa/ pha rol po la brtags nas gang / /zhes bya ba la sogs pa'o/ /rgyal po ma skyes dgras kAr ShA pa Na'i bzhi cha brkus pa tsam dang / gzhan gyis bsgyur ba tsam gyis kyang gsod bar byed do//de re zhig cig na rkun ma dang byi bo byed pa dang / zhal che la g.yo byed pa mang po dag gsad pa'i phyir gshed ma pa'i lag tu gtad de/ de'i dbang du mdzad nas 'di gsungs so/ /gang zhes bya ba dang / sdig pa can gyi las zhes bya ba 'dir sbyar bar bya'o/ / pha rol po la zhes bya ba ni rkun po dang byi bo byed pa la sogs pa dag la'o/ /brtags nas zhes bya ba ni nye bar brtags pa dang / yongs su btsal ba ste/ skyes bu gang gis sdig pa byas/ /zhes so/ /sdig pa can zhes bya ba ni 'og nas bshad do/ /mthong ba ni 'jig rten nges par byas pa'o//sdig pa can zhes bya ba ni skyes bu dam pa rnams kyis smad pa dang mi 'dod pa'i 'bras bu'o/ /bdag gis zhes bya ba ni rang nyid kyis so/ /de dag mi bya zhes bya ba ni sdig pa can gyi las mi bya ba'o/ /ci'i phyir zhe na/ 'di ltar/ sdig byas las ni rjes su 'brang / /zhes bya ba yin te/ sdig pa byed pa yin no zhes skye bo rnams smod cing sdig pa can gyi skye bo ni tha ma yin no zhes bya ba'i phyir/rang gis byas pa'i sdig pa'i las de ni 'di dang pha rol tu rjes su 'brang ba yin te/ ji ltar bdag gis mig gis thams cad mthong ba bzhin no/ /sdig pa'i las kyi skyon bstan pas de 'gag pa'i phyir 'di gsungs so//gang yang las kyi zhags pas bcings par gyur na ni g.yang sar ltung bar 'gyur ro zhes bstan pa'i phyir smras pa/ las gang shin tu mi bzad dang / /zhes bya ba la sogs pa'o/ /de nas srang la g.yo byed pa'i tshong dpon zhig dang / 'thab mos 'tsho ba'i grong dpon zhig la bcom ldan 'das kyis 'di skad ces bka' stsal to//'di la zol byed pas gzhal blugs gcig tu 'tshos pa dang / log pa'i 'tsho bas 'tsho bar byed pa ste/ 'di lta ste khar ba'i srang la zol byed pa dang / gzhal blugs lag cig tu zol byed pa dang mchog tu gtum zhing mi bzad pa lag pa khrag gis spags pa ni ji srid du dmyal ba rnams su skye bar 'gyur ro zhes bya ba nas tshigs su bcad pa gnyis gsungs so//gang zhes bya ba dang / mi'i zhes bya bar sbyar te sems can no/ /zol byed gzhal blugs 'chos pa dang / /zhes bya ba ni snga na med pa'i bre la sogs pa 'chos pa'o//'dis 'jal ba yin pas gzhal blugs te/ de yang bcos ma de'i sbyor ba byas pa'o/ /de las gab pa las gzhan la 'tshe ba'i thabs bstan nas bsal bar smras pa/ las gang shin tu mi bzad pa/ /zhes bya ba smos te/ srog gcod pa la sogs pa rnam par smad pa'i spyod pa de'o//mi la 'tshe bar byed pa dang / /zhes bya ba ni sems can gzhan la nye bar gdung bar byed pa yin no/ /gzhan la byed du 'jug pa zhes bya ba ni gzhan byed par 'jud pa'am/ gzhan gyi lag gis zhes bya ba'i don to/ /de yis g.yang sar ltung bar byed/ /ces bya ba ni rab tu 'gro ba dang 'jug pa zhes bya ba'i don to//g.yang sa ni ngan song ngo / /de yis zhes bya ba ni 'tshe ba byed pa la sogs pas so/ /ci'i phyir zhe na/ smras pa/ las de mi yi rjes 'brang bas/ /zhes bya ba yin te/ gang gi phyir sems can de sdig pa ngan song gi 'bras bu'i las nag po'i zhags pa nyid kyis bcings pa ste/gzhan gyis dbang du byas pa yin pas de bas na mi 'dod kyang ngan song du 'gro ba nyid do/ /'o na lus kyis las byas pa ni lus nyams pas 'jigs par 'gyur te/ gang gi phyir gnas nyams na gnas pa nyams par snang ngo zhe na/ smras pa/ mi yis gang dang gang byas pa'i//zhes bya ba ste/ gang cung zad kun nas nyon mongs pa sems can 'di spyod pa'o/ /de gang yin zhe na/ smras pa/ dge ba 'am ni sdig pa yi/ /zhes bya ba smos te/ mi dge ba'i las sam dge ba'i las so/ /de lta de ltar zhes bya ba ni dge ba dang mi dge ba rang gis byas pa las so//'bras bur 'gyur zhes bya ba ni bgo skal la spyod pa'o/ /ci'i phyir de ltar 'gyur zhe na/ las rnams chud zar mi 'gyur te/ /zhes bya ba ste gang gi phyir las byas shing bsags pa ni 'bras bu med par mi 'gyur te/ de bas na/ las rnams bskal pa brgyar yang ni/ /chud mi za ba'ang tshogs dang dus//zhes bya ba'i tshig gis so/ /sdug bsngal gyis 'jigs pa rnams la sdig pa'i las spong ba la gzud pa'i phyir 'di gsungs so/ /dus cung zad du nyes par spyod pa byas kyang ji srid ma shi'i bar du bde ba yod do zhes pa la/ de nyid smras pa/ de yi tshogs pa de srid du/ / zhes bya ba la sogs pa yin no/ /rgyal po gsal rgyal dang / rgyal po ma skyes dgra gnyis phan tshun mi mthun par gyur te/ ji tsam na ma skyes dgras rgyal po gsal rgyal gyi glang po che'i tshogs la sogs pa thams cad phrogs par gyur to zhes bya ba la sogs pa rgya cher dge slong rab tu mang po bsod snyoms la 'ongs pa dag las gsan nas bcom ldan 'das kyis dgra las rgyal bar gyur cig ces bya ba la sogs pa bka' stsal pa dang /yang 'thab mo la zhugs te rgyal po gsal rgyal gyis rgyal po ma skyes dgra de gson bzhin du bzung ste/ bcom ldan 'das kyi spyan sngar khyer te 'ongs nas gsol pa/btsun pa 'di ni bdag dang yun ring po nas khon med pa lags na/ 'di nyid kyis dgra bgyis pa nyi tsher zad do zhes pa nas/ grogs po'i bu yin no zhes bya ba'i bar du ji srid du gang gis kyang ma btang ngo zhes pa nas/ rgyal po chen po 'di khyod kyis ma btang ba des ni yun ring por gnod par 'gyur zhing mi phan par 'gyur ro zhes gsungs te/des na ji tsam na 'di gsungs so/ /rung bar byed ces bya ba ni rnam par 'jig pa dang / rnam par 'joms par byed pa'o/ /de srid ces bya ba ni de srid kyi dus so/ /'di ni zhes bya ba ni ma skyes dgra la sogs pa'o//dus ji srid cig tu 'di rung bar byed ce na/ de yi tshogs pa ji srid par/ /zhes bya ba smos te/ dus ji srid kyi bar du de'i dge ba'i las ma zad cing nus pa mngon du phyogs shing gnas pa'am/ sgrub pa'i 'du 'phrod rjes su mthun par gyur pa 'jug pa de srid du'o/ /de nas gzhan yang rung byed de//zhes bya ba la/ de nas zhes bya ba ni de'i phyi nas te/ sngar bshad pa'i tshogs pa dang bral bar gyur pa dang / khyod la sogs pa ci la rag pa med par chas nas rgyal po ma skyes dgra la sogs pa gang yang rung ba zil gyis gnon par byed do/ /gzhan dag ni sngar gyis rung bar byed pa de 'jig pa'i 'og tu de las bzlog pa ste/tshogs pa 'dus pa'i phyir rung bar byed pa gzhan dag gis rung bar byed do/ /bcom ldan 'das dmyal ba'i gnas su rgyu zhing gshegs pa'i tshe/ dmyal ba pa rnams kyis gsol ba btab pa na/ tshe rabs snga ma'i gshin rje'i srung ma dag bstan nas/'di gsungs so zhes zer te/ gang gi phyir de ni ji srid 'tsho'i bar du dmyal ba de dag la gnod pa byed la/ shi nas ni dmyal ba'i srung ma shin tu mi bzad pa gzhan dag kyang der skyes nas gnod par byed do zhes so/ /'byor ba thams cad kyi mtha' ni rgud pa yin te/de'i phyir bag med pa mi bya'o zhes bstan pa'i phyir 'di gsungs so/ /gal te mi 'dod pa'i 'bras bu'i las byed pa'i dus su mi rtogs kyang smin pa'i dus su mi de rtogs pa yin no zhes bstan pa'i phyir/ 'di ni bdag rjes mi 'brang bas/ /zhes bya ba la sogs pa smos so//bcom ldan 'das kyis dge slong rnams la bka' stsal pa/ dge slong dag byin pa so so'i skye bo 'di dag ni nges par dmus long yin te/ don ji lta ba bzhin du mi shes pas lus kyis nyes bar spyad pa spyod cing zhes rgya cher dmyal bar skye bar 'gyur te zhes pa nas ji srid du tshigs su bcad pa lnga po 'di gsungs so//byas pa ni 'byung ba'o/ /ma brtags pa ni mi shes pa'o/ /byis pa ni skye bo rmongs pa ste/ byis pa'i skye bo de ni byas pa'i las kyang dag lus bzhin du skye ba gzhan du 'byung bar mi 'gyur ro zhes 'di ltar nges par rtog go//ji ltar ma brtags pa yin zhe na/ /'di ni bdag rjes mi 'brang bas/ /zhes bya ba ste/ sdig pa'i las 'di ni bdag 'gro ba'i rjes su 'brang ba ma yin te/ dper na lus byed pa po 'di ni 'di nyid du 'jig par 'gyur te/ de bzhin du des byas pas las kyang 'jig par 'gyur ro snyam pa'o//ji ltar gang dang gang du lus 'gro ba de dang der grib ma 'gro bar 'gyur la/ de med na ni de med par 'gyur ba de bzhin du pha rol du ni zhes bya ba ste/ 'jig rten pha rol tu rtog par 'gyur ba'o/ /gang du gnas nas shes par 'gyur zhe na/ sdig pa'i las kyis 'gro ba dag /ces bya ba yin te/ de na gnas par gyur pa na/ /zhes bya ba ni tshig gi lhag ma'o/ /sdig pa'i las gang yin pa de ni sdig pa'i las nyid do/ /sdig pa byed pa gang yin pa dmyal ba la sogs pa'i 'gro ba dag tu gnas shing de dang 'brel pa na sdig pa shes par 'gyur ro//nam zhig ce na smras pa/ nam zhig na 'di nyid kyis tsha bar 'gyur ba ste/ gang gi tshe 'di nyid kyis sdig pa'i las byas pa'i byis pa de nyid kyi rnam par smin pa'i 'bras bu so sor bstan pa na sdug bsngal chen po skye bar 'gyur zhing de'i tshe sdug bsngal gyi 'bras bus nye bar gdungs pas de'i skyon shes nas yid la gcags par 'gyur te/bdag gis ni gang sdig pa spyod pa ni legs par ma byas pa ste/ ji skad du/ rigs pa'am yang na mi rigs pas/ /longs spyod bdag gis gang bsags pa/ /gzhan dag bde bas dga' bar 'gyur/ / bdag ni sdug bsngal skal ba len/ /zhes bshad pa'o/ /ji ltar yang sngon sdig pa byas pa mi shes pa ni nyon mongs pa la 'jug cing phyis kyang kun nas dkris pa dang ma bral ba'am/ yang na mi 'dod pa'i 'bras bu 'byung ba ni yid la gcags par 'gyur ba'i phyir smras pa/ gal te zhes bya ba smos te/ ji ltar yang byis pa'i skye bos sdig pa ste/ lus la sogs pa'i las byas pa na rmongs pas sdig pa nyid du mi shes pa'i phyir ro/ /rang gi las kyis zhes bya ba ni bdag nyid kyis byas pa'i sdig pa'i las de dag gis so/ /de'i 'og tu ni kun nas dkris pa dang ma bral ba'i gnas skabs na/ byis pa de gdung bar 'gyur te/yid la gcags shing tshe 'di dang pha rol tu sdug bsngal gyis gzir bar 'gyur ro/ /me yis bsregs pa bzhin zhes bya ba ni dper na la la zhig mes bsregs par gyur na gdung zhing nyam thag pa de bzhin no/ /mi shes pas bdag nyid kyi don du sdig pa spyod pa'i glen pa de ni dmyal bar ltung bar 'gyur ro zhes bstan pa'i phyir smras pa/byis pa shes rab chung ngu dag /ces bya ba la sogs pa'o/ /gzhan dag ni rgyal byed kyi tshal na legs par rab tu sad pa zhes bya ba'i kun du rgyu mdze can zhig yod de/ des de bzhin gshegs pa la tshig ngan pa brjod pa las brtsams so zhes zer ro//byed pa ni spyod pa'o/ /byis pa'i mtshan nyid smras pa/ shes rab chung ngu zhes bya ba ste/ las dang 'bras bu la sogs pa'i tshul mi shes pa'am/ phyin ci log pa'i blo'o/ /ji ltar byed pa yin zhe na/ smras pa/ bdag la dgra bzhin zhes bya ba ste/ rjes su gnod pa byed cing mi mdza' ba'am/dgra bo dang phyir rgol ba ste/ bdag gi lus la mi bzad pa'i dgrar zhes pa'i don to/ /ci zhig gcod par byed pa yin zhe na/ sdig can las ni spyod par byed/ /ces bya ba yin te/ spyod pa ni lus la sogs pa'i nyes par spyod pa'o/ /de gang yin zhe na/ gang zhig tshar 'gyur ba zhes bya ba smos te/ gang las smin pa'i dus su gdung bar byed pa yin te/ sdig pa de'i 'bras bu ni mi 'dod pa yin pa'i phyir ro/ /las de yang dam pa rnams kyis smad pa dang / mi 'dod pa'i 'bras bu yin no zhes bstan pa'i phyir smras pa/ las de dag ni ma byas legs//zhes bya ba la sogs pa'o/ /las de dag ni byas kyang legs pa ma yin zhing bzang po ma yin te/ dam pa rnams kyis smad pa yang yin la gang dag byas pas gdung bar yang 'gyur zhes bya ba yin te/ las gang bsten pa'i 'og tu yid la gcags pa la sogs pa'i mes gdung bar 'gyur ro//rgyu des na legs pa ma yin no/ /'jig rten 'di'i nyes dmigs bstan nas 'jig rten pha rol gyi nyes dmigs smras pa/ ngu bzhin du zhes bya ba yin te/ nyam thag pas nga ro 'don bzhin du'o/ /mchi mas khyab pa'i gdong gang yin pa de ni mchi mas gdong yog pa ste/rtag tu mchi ma'i rgyun 'bab cing gdong gnag pa'o/ /yang na ngu ba ni mchi ma'i rgyun 'dzag pa ste/ 'dis ni sdug pa la 'jug par byed pa'i gnas skabs bstan to/ /mchi mas gdong yog ces bya ba ni mchi ma 'bab pas gdong gsher bar byas pa ste/ 'dis ni 'gag pa'i gnas skabs bstan to//gang gis las byas shing bsags nas rnam par smin pa so sor bstan pa zhes bya ba smos te/ 'bras bu rjes su myong bar 'gyur ba'o/ /nag po'i phyogs bstan nas dkar po'i phyogs bstan pa'i phyir smras pa/ las de dag ni byas na legs/ /zhes bya ba smos te/de yang las byed pas na dge ba dam pa rnams kyis bsngags pa gang zhig byas na 'jig rten 'dir yang rjes su mi gdung ba dang / pha rol du yang / dga' zhing yid ni bde ba yis/ /zhes bya ba ste/ gang gis las byas shing bsags pas dga' ba yang dag par skyes shing ldan pa'o//phyi rol gyi yo byad phun sum tshogs pa thob pas yid bde ba'o/ /nang gi gzugs mdzes pa la sogs pa'i khyad par gyis ni dga' zhing yid bde ba'o/ /dga' ba'i tshig gis bde ba'o/ /yid bde ba zhes bya ba ni 'dod pa na spyod pa'i yid bde ba ste/ bsam gtan las skyes pa ste go rims bzhin no/ /sdig pa'i las kyi 'bras bu bstan pas sdig pa las bzlog pa'i phyir dang / legs par spyod pa'i 'bras bu bstan pas de nyid la gzud pa'i phyir 'di gsungs so/ /rmongs pas bdag nyid kyis bde ba la dgod bzhin du brkam pas ni 'bras bu mi 'dod pa la spyod pa yin no zhes bstan pa'i phyir smras pa/bdag nyid bde ba 'dod pa'i phyir/ /zhes bya ba la sogs pa'o/ /rgyal po'i khab na gnas brtan shA ri'i bu'i thad du yi dwags shig 'ongs te smras pa/ 'phags pa bdag ni sngon rgyal po'i khab kyi tshong par gyur te/ ser sna dang rigs kyi dregs pa'i dbang dang yi dwags kyi phyogs spyod pa'i dbang gis yi dwags su skyes so//bdag gi nye du rnams la sangs rgyas la sogs pa'i dge slong gi dge 'dun bshos gsol bar byed du gzhug na de ni legs so zhes rgya cher smras te/ de'i dbang du mdzad nas tshigs su bcad pa lnga gsungs so//gzhan dag ni shA ri'i bu dang maud gal gyi bu gnyis mnar med par song ba na lha sbyin gyi lus dpag tshad du ma can mthong ba na smras pa/ bcom ldan 'das kyis khyod la nad med dam zhes kyang gsungs so/ /des kyang mthong nas shin tu ngu bar gyur nas de'i phyir gsungs so zhes zer ro//dgod bzhin zhes bya ba ni bzhin 'dzum pa dang ldan pa'o/ /sdig pa'i las byas pa zhes bya ba ni mi 'dod pa'i 'bras bu'i bya ba kun du spyod pa'o/ /gang yin zhe na/ bdag nyid bde ba 'dod pa'i phyir/ /zhes bya ba smos te/ de dang 'brel ba ni bdag nyid kyi lus la bde ba tshol ba'i byis pa zhes bya ba'i don te/gzhan dag ni de ltar bde ba mi 'dod do/ /ngu bzhin rnam smin dag ces bya ba smos te/ bdag nyid bde ba 'dod pa'i phyir/ /byas pa'i sdig pa'i las des ngan song du skyes te/ ngu bzhin du mi 'dod pa'i 'bras bu nyams su myong ba yin te/ rnam par smin pa de ni gdung ba'i bdag nyid yin pa'i phyir ro//sdig las zhes bya ba ni bsags pas na sdig pa ste/ de'i 'bras bu de yang nye bar bsags pa'am spyod pa'i tshul gang la yod pa de ni de nyid de/ gang gi phyir sdig pa nye bar bsags pa des ni nges par de'i 'bras bu myong bar 'gyur te/ ji skad du gang gis bsams bzhin du las byas shing bsags pas ni rnam par smin pa yang dag par myong bar mi 'gyur ro zhes nga mi smra'o zhes gsungs so//bsams bzhin du sdig pa bsags pa dang / mthar phyin par byas pa gnyis dang 'gyod pa med pa'i nyes dmigs yin no/ /ji ltar de sdig pa'i las dgod bzhin du byed pa yin zhe na smras pa/'di ltar nges par sdig las zhes bya ba ste/ rgyal byed kyi tshal na yi dwags skom pas nyam thag pa zhig las brtsams pa yin no/ /nges par zhes bya ba ni gcig tu sdig pa can gyi las so/ /'phral du zhes bya ba ni dus de nyid du myur du 'gyur zhing rnam par mi 'gyur te/ byas pa'i dus de nyid du mi smin to zhes bya ba'i don to//las thams cad kyi mthong ba'i chos nyid la myong ba'i mi snang ba'i phyir ro/ /mthun pa'i chos kyi dpe bstan pa/ 'o ma lta bur zhes bya ba yin te/ dper na 'o ma ni dus de nyid du zhor mi 'gyur te 'on kyang dus phyi ma zhig na zhor 'gyur ba de bzhin no/ /yang na chos mi mthun pa'i dpe ni 'phral du zhes bya ba ni sad t+ya zhes bya ba'i rtswa'i rigs yod de 'o ma la des btab na bcug pa tsam nyid du zhor 'gyur te/sdig pa'i las ni de lta bu ma yin no/ /des ni byis pa sreg par byed/ /ces bya ba ni sdig pa'i las smin par 'gyur ba'i dus na shin tu gnod par byed pa'i phyir te/sdig pa byed pa'i skye bo'i rjes su 'brang bar 'gyur ro/ /thal bas g.yogs pa'i me lta bur/ /zhes bya ba ni thal bas g.yogs pa'i me la dper na byis pa'i gom pa bag rkyong ste 'gro ba sreg par byed pa de bzhin no/ /'di nyid kyi dngos po rnam pa gzhan gyis ston pa yin te/ sdig las 'phral du nges par ni//zhes bya ba la sogs pas so/ /gcod pas ni gcod cing dum bur byed pa ste/ zad par byed ces bya ba'i don to/ /ji lta bu yin zhe na/ chos mi mthun pa'i dpe mtshon bzhin du zhes bya ba bstan to/ /dper na mtshon shin tu rnon pos ni reg pa tsam gyis gcod par byed do//sdig pa'i las ni de lta bu ma yin no/ /gal te 'phral du mi gcod na phyis kyang de bzhin du yin nam zhe na/ pha rol du ni mngon par 'gyur/ /zhes bya ba smos te/ 'jig rten pha rol du ni gang gis sdig pa byas pas skye ba gang du skye ba der skyes pa na shes par 'gyur te/sdig pa byas pas sdug bsngal ba'o/ /gang gi phyir 'jig rten pha rol der ni 'dir byas pa'i sdig pa'i 'bras bu shin tu tsha ba nyams su myong bar 'gyur zhing yid du mi 'ong ba'i sdug bsngal 'byung ba zhes bya ba'i don to/ /bdag nyid kyi lus las bskyed pa'i sdig pa yin na yang me bzhin du rang gi gnas 'jig par byed pa yin no zhes bstan pa'i phyir smras pa/lcags las g.ya' ni zhes bya ba la sogs pa'o/ /rgyal byed kyi tshal na gnas brtan rgyal dang / a kro sha ka dang / ro sha ka dang / pa ri b+ha sha ka la bstan pa'i phyir gsungs so zhes gzhan dag zer ro/ / lcags ni lcags nyid de 'di ltar g.ya' ni dri ma'o/ /langs par gyur pa ni yang dag par byung ba'o/ /ji ltar lcags las dri ma byung zhing gnas pa'i dri ma de ni de las byung ba'i dang de las skyes pa yin zhing de las langs pa yin yang rang gi gnam lcags sam mtshon de nyid za bar byed cing zad pa dang 'jig par byed ces bya ba'i don to//de ltar na/ de bzhin ma brtags byas pa yi/ /zhes bya ba ni yongs su ma brtags par byed pa'i byis pa'o/ /rang gi las kyi zhes bya ba ni rang gis byas pa'i nyes par spyad pa'o/ /ngan 'gror 'gro zhes bya ba ni ngan song du skye ba thob par 'gyur ba'o/ / de bas na ngan par spyod pas 'jigs par bya'o zhes bstan pa'i phyir 'di gsungs so/ /las kyi tshoms kyi rnam par 'grel pa ste dgu pa rdzogs so// //ji skad du bshad pa'i sdig pa'i las zad pa'i thabs bstan pa'i phyir de'i 'og tu dad pa'i tshoms bstan te/ gang gi phyir de la brten pas ni ma skyes dgra la sogs pa'i sdig pa zad par gyur pa'i phyir ro//'di'i 'grel pa brtsam par bya ste/ dad dang ngo tsha zhes bya ba la sogs pa smos so/ /mnyan yod na tshong dpon gyi bu grogs po bzhi zhig yod de/ gcig ni dad pa med cing ci la yang yid ches pa med do/ /gnyis pa ni ngo tsha med do//gsum pa ni sdig pa la spyod do/ /bzhi pa ni ser sna che ba'o/ /de rnams kyang rtag tu bsam pa 'di lta bu skyes te/ nam zhig na bdag cag mtho ris kyi lam bsgrubs te/ gang gis mtho ris su song nas de'i phun sum tshogs pa yang myong bar bya'o zhes bsams so//de dag kyang ma tshang ba med pa la sogs pa thob pas yongs su dga' zhing de dag bcom ldan 'das kyi spyan sngar phyin pa dang / de'i dbang du mdzad nas 'di gsungs so/ /dad pa ni sems kyi rab tu dang ba ste/ mngon par yid ches pa dang / don du gnyer ba'i mtshan nyid kyi dbye bas rnam pa gnyis so//gang mngon par yid ches pa skyes pa de ni kha cig don du gnyer bar 'gyur ba'i phyir ro/ /gang la mngon par yid ches pa zhes bya ba ni las dang 'bras bu 'brel pa dang dkon mchog gsum la sogs pa la'o/ /mngon par 'dod pas sprul pa'i dngos po la don du gnyer ba yang yin te/des na 'di ni yon tan thams cad skyed pa yang yin pa'i phyir/ yang bshad pa/ dad pa dge ba skyed byed ma lta bu/ /skye bo dge yid dang po de la 'jug /dad bral byang chub phyogs dang dam chos kyi/ /rin chen tshogs 'dzin nus pa ma yin no/ /zhes pas so/ / re re la yang mtho ris kyi lam du bstan pa'i phyir dang gi sgra'o/ /ngo tsha ba ni gang gis sdig pa las 'dzem zhing zhum par byed la/ yon tan dang yon tan can dag la gus par byed pa'o/ /tshul khrims ni tshul khrims 'chal pa spangs pa ste/ ji skad du sngar bshad pa nyid do/ /sbyin pa ni yongs su gtong ba ste/'di la gcig tu sbyin pa ni sbyin pa po yin te/ 'dis sbyin pas sbyin pa'o zhes grub pa'i mtha' las bshad de/ ji skad du/ dge ba'i sems kyis nor dag ni/ /gang tshe bdag gis la ma byin/ /skad cig de la dge ba'i tshogs/ /sbyin pa zhes ni brjod pa yin//zhes so/ /chos 'di rnams ni zhes bya ba ni dngos po'i khyad par gyi yon tan 'di dag ni zhes bya ba'i don te chen po nyid du byed pa'i phyir ro/ /chos ni yon tan dang dge ba byed pa po yin no zhes pa'i tshig gis so/ /des na de nyid smras pa/ skyes bu dam pas bsngags zhes bya ba ste sangs rgyas dang de'i nyan thos kyis bsngags pa yin gyi/skyon dang ldan pa ni bsngags pa ma yin no zhes pa'o/ /'di dag ji ltar bsngags pa yin zhe na/ bde ba'i lam yin pa'i phyir te/ de nyid smras pa/ lam 'di nyid kyis lha yul 'gro bar gsungs/ / zhes bya ba 'di ltar rnam pa bzhi'i khyad par gyis ni mtho ris su 'gro ba'i thabs su mkhas par bstan pa yin te ci'i phyir zhe na/ de nyid smras pa/ 'di yis zhes bya ba ni de bzhi las ma 'das te/ me dang chur 'jug pa dang bral ba'i las mchod pa sogs bsam pa yin no/ /'gro bar 'gyur ba ni 'gro bar byed pa'o//lha'i 'jig rten ni lha dang skal ba mnyam pa'o/ /de la dad pa ni dge ba'i bya ba thams cad kyi sngon du 'gro ba'i phyir dang por ston to/ /dang po yod pa la ni ngo tsha dang ldan par 'gyur ro/ /ngo tsha dang ldan pa la ni tshul khrims dag par 'gyur ro/ /tshul khrims dag pa la ni sbyin pa rnam par dag par 'gyur te/go rims de lta bur 'gyur te/ ngo tsha dang dad pa gnyis kyis ni bsam pa phun sum tshogs pa'o/ /tshul khrims dang sbyin pa gnyis kyis ni spyod pa phun sum tshogs pa'o/ /lhag mas ni de'i phan yon bstan pa ste/ de yang dag par 'dzin du gzhug pa'i phyir 'di gsungs so//'dir sbyin pa ni thams cad kyi mthar bkod cing ches dman pa yin pa'i phyir ji ltar mtho ris kyi lam yin zhe na/ 'jungs rnams lha yi 'jig rten mi 'gro zhing / /zhes bya ba la sogs pa smos so/ /sum cu rtsa gsum gyi gnas stong shing shi ri ka las byas pa'i gzhal med khang na lha'i bu zhig gnas pa/gnas brtan pa ba lang bdag gis mthong nas grogs po khyod 'di nas sngon yun ring por yang gnas pa mthong zhes smras pa dang de ci 'di ma gsan tam/ 'thon par 'byung yang srid ces bya ba rgyal rigs su 'gyur ba de ni bdag yin te/der chad par smra bar 'gyur na/ bdag btsun pa 'phags pa gzhon nur 'od srungs kyis btul ba'i skye ba la sogs pa zhes smras pa bcom ldan 'das kyi lha'i rna ba'i mngon shes kyis gsan te/ ci tsam na tshigs su bcad pa 'di gsungs so/ / 'jungs rnams lha yi 'jig rten mi 'gro zhing / /zhes bya ba ser sna can nyid ni mtho ris kyi 'jig rten du 'gro ba'i las med pa nyid do/ /ci'i phyir zhe na/ de yis byis pa zhes bya ba yin te gang gi phyir gang dag 'jungs shing rmongs pa ste/ las dang 'bras bu 'brel ba ci lta ba bzhin du ma rtogs pa'i phyir ro//des na smras pa/ sbyin pa'i bsngags mi brjod ces bya ba smos so/ /sbyin pa'i bsngags pa mi brjod par ma zad de rmongs pa rnams ni smod pa yang yin pa ji skad du/ 'khor gsum rgyu yi khyad par nor yin pas/ /de nyams ches na gang gis ma nyams 'gyur//zhes 'chad do/ /brtan rnams zhes bya ba ni gang yang mkhas pa rnams te/ de ni sbyin la rjes su yi rang ba/ /zhes nor gtong ba'i phan yon yang dag par bsngags par byed pa'o/ /gang gi phyir sbyin pa'i snga rol du ni yid bde ba yin la/ sbyin pa sbyin pa'i tshe na sems dang ba yin zhing /byin nas kyang yid mgu ba yin te 'gyod pa med pa yin no zhes pa'i tshig gis so/ /des ni zhes bya ba ni sbyin pa la rjes su yi rang ba'i rgyus so/ /de dag ces bya ba ni rjes su yi rang bar byed pa yang bde ba myong bar 'gyur ba yin te/ gang gi phyir pa ya si zhes bya bas sbyin gtong gi khang pa byas nas nor la sogs pa dang ldan par byas te/der sbyin pa byed pa yang gzhag pas bdag nyid kyis ni ma byin mod kyi/ de mtho ris su skyes te brtan pa rnams bde 'gror skyes nas/ lha'i longs spyod ci 'dod pa thob cing bde ba nyams su myong ngo / /gzhan du zhes bya ba ni 'jig rten gzhan no//des ni de dag gzhan du bde ba 'thob/ /ces gzhan dag tu brjod do/ /'o na tshigs su bcad pa 'dir dad pa'i sgra med pa'i phyir 'di ni mi rigs so zhe na/ de'i don dang 'brel pa'i phyir nyes pa med de/ de'i phyir ma dad pa'i rtags ni 'jungs pa'i rtags kyis te/du ba'i rtags kyis me shes pa lta bu'o/ /sbyin pa la rjes su yi rang ba'i phyir na dad pa nyid do/ /de bzhin du gzhan dag la yang ci rigs par dris pa'i lan 'di brjod par bya'o/ /gang gi phyir yang dad pa'i dbang gis brtan pa rnams sbyin pas sems yang dag par tshim zhing rgyas par gyur la/pha rol tu bde bar gyur pa'i phyir smras pa/ 'di na skyes bu'i nor mchog dad pa ste/ /zhes bya ba la sogs pa'o/ /lha zhig gis/ 'di na skyes bu'i nor mchog gang zhig lags/ /legs spyod gang gis bde ba thob par 'gyur/ /ro yi nang na ro yi mchog ni gang //tshong pa'i nang na tshong mchog gang lags gsungs/ /zhes gsol pa dang / de'i phyir 'di gsungs so/ /dad pa'i don ni sngar bshad zin to/ /'di na skyes bu'i nor mchog ces bya ba la/ 'dis bde ba myong bas na nor ro/ /sems can rnams kyi nor gyi mchog ni 'jig rten na blo dang ldan pa'i nor te/ji skad du/ nor 'di dag ni cung zad tsam yin te/ dper na dbyig la sogs pa'i nor rnams kyi nang na ni 'di lta ste/ dad pa'i nor mchog yin no zhes bshad pa dang / phyi rol gyi nor mchog rnams ni gdung bar byed pa'i phyir mchog ma yin te/ ji skad du/ stsogs pas nyon mongs mi dga' la/ /gang tshe srung las 'jigs pa byung / /'jigs na mya ngan 'ba' zhig ste/ /'di la su zhig dga' bar byed/ /ces gsungs pa'i phyir ro/ /chos ni sbyin pa'i bdag nyid kyi legs par spyod pa ste/ tshul khrims kyi bdag nyid la sogs pa ni 'og nas brjod pa'i phyir ro//legs spyod ces bya ba ni tshul bzhin du spyod pa ste/ ji skad du skyes bu dam pa'i sbyin pa lnga'i zhes bya ba la sogs pa gsungs so/ /bde ba 'thob ces bya ba ni phan 'dogs par byed pa ste/ 'khor bar yongs su 'khyams pa na/ /sbyin pa ma gtogs gnyen med do//zhes bya bas shes par bya'o/ /bden pa kho na ro bro rnams kyi phul zhes bya ba ni bden pa mchog tu gzung ba ni tshul khrims yin te 'dis ni tshul khrims bstan to/ /bden pa'i tshig nyid ni mngon par 'dod par bya ba yin pas lha dang mi rnams kyi zas gya nom pa thams cad pas kyang shin tu bsod pa yin te/lha dang mi rnams mgu bar byed pa'i phyir ro/ /kho na ni nges par gzung ba yin no/ /shes rab kyis 'tsho ba zhes bya ba la/ shes rab ni de bzhin nyid shes pa ste/ des 'tsho ba ni 'tsho ba bzhin du gang la yod pa de'o/ /yang na shes rab kyis 'tsho ba'i tshul 'di la yod pa ste/brtags nas byed pa zhes bya ba'i don te/ 'dis ni bsgoms pa las byung ba'i bsod nams bstan to/ /'tsho ba'i zhes bya ba la/ 'tsho bar byed pa de rnams kyi nang nas nges par gzung ba ste drug pa'o/ /mchog tu ces gsungs zhes bya ba ni dam pa zhes 'di nyid kyi nang du 'og nas 'chad par 'gyur te/stsogs dang zad pa ma mthong ba/ /lo brgyar gson pa gang yin pas/ /zhes bya ba dag yin no/ /de la 'dis ni dad pa sngon du 'gro ba'i sbyin pa dang / tshul khrims dang bsgoms pa las byung ba'i bsod nams bya ba'i dngos po bstan to//dad pa ni sbyin pa la sogs pa de dag 'ba' zhig gi sngon du 'gro ba ma yin gyi/ shes rab kyi dbang po la sogs pa'i yon tan gyi yang sngon du 'gro ba nyid du bstan pa'i phyir/ mya ngan 'das par 'gro ba yi/ /zhes bya ba la sogs pa smos so/ /lha zhig gis zhus pa/ 'jig rten skyes bu ji lta bus//nges par byed pa'i shes rab dag /'thob 'gyur yang dag lta ba ni/ /bcom ldan 'das kyis bdag la gsungs/ /zhes pa dang / des na 'di gsungs pa yin no/ /dad pa bskyed de zhes bya ba ni yid ches par bya ba ste/ gang 'di la rigs pa dang lung dag gis yid ches par bya'o//ci zhig la dad pa bskyed pa yin zhe na/ dgra bcom chos la zhes bya ba ste/ sangs rgyas kyis bstan pa'i lam mo/ /mya ngan las 'das 'gro ba yi/ /zhes bya ba ni thar pa thob par byed pa ste/ de'i phyir bstan pa dang sgrub pa'i chos la brten pas 'bras bu'i chos 'thob pa'o/ /de la dad pa bskyed de de'i don la mngon par rtsom pa yod par gyur na ni nges par 'thob pa yin no//'o na ye shes nyid thar pa'i lam la sogs pa thob par byed pa yin na/ de ji ltar 'dir brjod ce na/ 'dir smras pa dad pa yang ye shes kyi rgyu yin pa'i phyir te/ gang 'di ltar dad nor yod pa des ni shes rab 'thob par 'gyur te/gus par byas te dam pa'i chos mnyan pa ni dad pas mngon par 'dod pa'o/ /gus par nyan pa ni nyan par 'dod pa ste/ gang gi phyir dad pa yang nyan par 'dod pa nyid skyed pa yin no/ /shes rab de ga las 'thob ce na/ smras pa/ de dang de yi zhes bya ba yin te/ bden pa dang phung po dang khams dang skye mched la sogs pa la nges par thob par 'gyur ba'o/ /mkhas pas zhes bya ba ni rtogs pa ste/ rigs pas thob pa'i ye shes kyi sbyor ba las so/ /de la brten nas ni thos pa las byung ba la sogs pa'i shes pa 'byung ba'i phyir ro//dad pa'i stobs kyis ni shes rab la sogs pa thob pa gcig pur ma zad kyi nyes pa rnams kyang spong ba yin par bstan pa'i phyir smras pa/ bag can gyis ni rgya mtsho dang / /zhes bya ba la sogs pa'o/ /lha zhig gis gsol pa/ rang gi chu bo gang gis rgal/ /gang gis rgya mtsho rgal bar 'gyur//bdag gi sdug bsngal gang gis spong / /gang gis yongs su dag par 'gyur/ /zhes pa dang 'di gsungs so/ /dad pa rgyur 'gyur bas sgrol ba ni 'das pa'o/ /chu bo ni rnam pa bzhi ste/ nyon mongs pa'i rang bzhin no/ /dad pa'i gzings la brten nas chu bo thams cad las brgal ba'i phyir ro//pas zhes bya ba ni de nyid kyi don te/ dad pa nyid kyis 'phags pa'i lam gyi nyon mongs pa thams cad spong ba'i phyir te/ 'dir dad pa ni 'phags pa'i lam mo/ /bag yod pa'i stobs kyis ngan song gsum gyi rgya mtsho las brgal ba yin te/ 'dir bag yod pa ni mthong ba'i lam mo/ /brtson 'grus kyis ni sdug bsngal spong / /zhes bya ba brtson 'grus kyi sbyor ba rtul phod pa ste/ bsgom pa'i lam gyis khams gsum gyi sdug bsngal spong ba yin no/ /shes rab kyis ni yongs dag 'gyur/ /zhes bya ba ni mi slob pa'i lam bstan te/de yod na ni rgyud la dri ma med par 'gyur bas so/ /yang na dad pas ni khyim gyi gnas kyi chu bo las brgal ba yin te/ rab tu 'byung ba la brten pa'i phyir ro/ /bag yod pas ni 'dod pa'i rnam par rtog pa la sogs pa'i rgya mtsho las brgal ba'i phyir ro/ /brtson 'grus kyis sdug bsngal spong ba ni 'dod pa'i khams kyi sdug bsngal dang bcas pa 'chad pa'i phyir ro//shes rab kyis ni yongs dag 'gyur/ /zhes bya ba ni sa gong ma dag las 'dod chags dang bral ba'i phyir ro/ /dad pas zhes bya ba ni nyan thos dang rang sangs rgyas dang sangs rgyas kyi byang chub gsum gyi spyir bstan to zhes gzhan dag zer ro//bag yod pa'i sgras ni 'dir 'phags pa'i lam gdul bya rnams la mtshon cing bstan pa yin te/ de'i phyir bag yod pa dang / ma dad pa dang / le lo dang rmongs pas ma rungs par byas pa'i gdul bya mtha' dag la dad pa la sogs pa'i man ngag gi gnyen po bstan pa yin no//dad pa la brten pas ni 'ching ba thams cad gcod pa yin no zhes bstan pa'i phyir smras pa/ dge slong dad pa'i zhes bya ba la sogs pa'o/ /lha zhig gis gsol ba/ 'di ltar grogs ni gang zhig lags/ /gdams pa yang ni gang zhig gang / / dge slong gang la dga' ba yis/ /bcings pa thams cad gcod par 'gyur/ /zhes pa dang / 'di gsungs so/ /dad pa'i grogs ni gnyis pa gang la yod pa'o/ /dad pa la brtan nas so sor thar pa'i sdom pa la sogs pa'i khyad par thob par 'gyur te de med na ni de med pa'i phyir ro/ / shes rab kyis ni gtams pa dang / /zhes bya ba ni shes pa'i rang bzhin gyi blos dge slong 'di la ji lta ba bzhin du gtams pa dang / ston pa ste 'dis ni rtag pa nyid du bstan to/ /mya ngan 'das la mngon dga' bas/ /zhes bya ba ni thar pa nyid la yang dag par dga' ba skyes par gyur pa'o/ / 'khor ba la rgyab kyis phyogs par byas pa dang / mya ngan las 'das pa la mkhas par 'gyur te/ des na de thob par byed pa'i lam la goms par byed pa'i dge slong gis 'ching ba thams cad de nyon mongs pa'i zhags pa thams cad gcod par byed do/ /de la dad pa dang shes rab kyis ni sbyor ba phun sum tshogs pa bstan to//mya ngan 'das la mngon dga' bas/ /zhes bya bas ni bsam pa phun sum tshogs pa bstan to/ /lhag mas ni de'i phan yon bstan to/ /dad pa la sogs pa dang ldan pas ni legs pa zhes brjod pa 'thob par 'gyur te/ gang gis dad dang zhes bya ba la sogs pa smos so//bcom ldan 'das kyis dge slong ni legs pa'i ngang tshul can la brjod de/ ji tsam gyis legs pa'i ngang tshul can du brjod ce na zhes bya ba nas 'di gsungs pa yin no/ /gang gis zhes bya ba ni sems can gang la la zhig gis so/ /dad dang zhes bya ba ni snga ma bzhin no//'di dag ni re re dang mtha' dag la legs pa zhes brjod pa'i rgyu bstan pa'i phyir/ dang gi sgra gsum smos so/ /nyid ces bya ba ni nges par gzung ba ste/ rim pa gzhan du sbyar ba'i phyir de nyid legs pa'i ngang tshul can zhes brjod do/ /legs bsgoms shing zhes bya ba ni legs par bsten pa'i phyir bstan par 'gyur te/nyon mongs pa thams cad spang ba'i phyir skyon rnams spangs pa yin te/ spangs pa ni bsal ba ste/ gang gis bag la nyal spangs pa'o/ /mkhas pa zhes bya ba ni 'dir mnyam par gzhag pa la dgongs te/ mnyam par gzhag pa'i sems las ni yang dag pa ji lta ba bzhin du shes pa yin no zhes pa'i tshig gis te rgyu las 'bras bu btags pa'o//des na yang dad pa 'jug pa yin te/ tshul khrims dang ting nge 'dzin dang / shes rab kyi phung po ni de la rag las pa yin te/ nyon mongs pa spangs pa gang la yod pa de'o//legs pa'i ngang tshul can zhes bya ba la/ legs pa'i ngang tshul dang ngo bo gang la yod pa ste skye bo dam pa'i rang bzhin skye bo dam pas bsngags pa'o/ /brjod pa ni bshad pa'o/ /dad pa dang ldan pa ni thams cad du yang mchod pa yin no zhes bstan pa'i phyir smras pa/ dad dang tshul khrims zhes bya ba la sogs pa'o//tshe dang ldan pa shA ri'i bu dang maud gal gyi bu 'khor dang bcas pa gang dang gang du 'gro ba de dang der rgyal po dang rgyal po'i blon po rnams kyis bsnyen bkur byas te/ skabs 'di lta bu gsan nas 'di gsungs so/ /dad pa gang la yod pa de ni dad pa'o/ / dad pa dang ldan pa kho nas tshul khrims dang ldan par 'gyur ba'i phyir tshul khrims phun sum tshogs zhes smos te/ so sor thar pa'i sdom pa dang phrad pa'o/ /tshul khrims dang ldan pa las ni gtong ba phun sum tshogs par 'gyur ba'i phyir smras pa/ gtong ldan zhes bya ba ste/ yongs su gzung ba thams cad yongs su btang ba'i phyir dang /rmongs pas yo byad gzhan yongs su mi 'dzin pa'o/ /gtong ba dang ldan pa'i phan yon smras pa/ 'jungs pa rnam spangs pa zhes bya ba yin te/ ser sna dang bral ba'o/ /ji skad du sbyin pa sems kyi ser sna dang ni chags pa'i skyon gyi rdul rnams 'khru bar byed ces bshad pa yin te/de nyid kyis bdag nyid rnam par dag pas yul gang dang gang du 'gro ba de dang der khyad par shes pa'i lha dang mi rnams kyis mchod par 'gyur ro/ /dad pa dang tshul khrims phun sum tshogs pa gnyis kyis ni lus dang ngag dag pas bdag gi don phun sum tshogs pa'o//gtong ba dang ser sna spangs pa gnyis kyis ni gzhan gyi don phun sum tshogs pa bstan to/ /dad pa dang shes rab kyi nor ni nor gyi mchog yin no zhes bstan pa'i phyir smras pa/ mkhas gang 'tsho ba'i 'jig rten na/ /zhes bya ba la sogs pa'o/ /gter la chags pa'i tshong dpon zhig gis nor gyi mchog ji snyed pa de gter du sbas pa las 'di snyam du bsams te/gang bdag gis gter thams cad phyung la rin po che'i mchog gang yin pa btsong bar bya na/ bdag gis ni mi shes te/ gang du bcom ldan 'das bzhugs pa der bdag song ste zhu'o snyam pa nas ji srid du 'di gsungs so//gang ni gang la la'o/ /'tsho ba'i 'jig rten ni 'gro ba'am/ sems can gyi 'jig rten na'o/ /rten byed pa zhes bya ba ni thob par byed pa'o/ /dad dang shes rab ces bya ba la/ khyad par du 'phags pa'i shes rab ni 'dir shes rab bo/ /gang zhig rten par byed ce na//smras pa/ mkhas pa zhes bya ba ste/ mkhas pa ma yin pa ni de gnyis mi sgrub cing de la brtson par mi byed de/ rigs pa'i shes pa'i sbyor ba bstan pa yin no/ /de dag de yi nor mchog ste/ /zhes bya ba ni gang gi phyir mkhas pa de'i nor ni 'di nyid mchog tu 'dod pa yin te/ phun sum tshogs pa thams cad kyi rgyur gyur pa'i phyir ro/ /de yi nor gzhan phal bar zad/ /ces bya ba ni yongs su rtogs par byed pa de'i ste/ skye bo tha mal pas mngon par bkur ba'i gser la sogs pa'i rin po che'i nor dag ni mngon par mi bsngags te/ gdung ba thams cad kyi rgyur gyur pa'i phyir ro//phal par zad ces bya ba ni nges par dor dgos pa yin pa'i phyir dang ngan song gi 'bras bur gyur pa'i phyir ro/ /gang tshong dpon la bstan pa'i ched du 'di gsungs pa ste/ de ni dad pa med pa dang shes rab 'chal pa yin pas des na gnyi ga 'dir bstan to/ /me'i rtags du ba las shes par byed pa bzhin du dad pa mi mngon pa'i rtags bstan pa'i phyir smras pa/'phags pa lta bar 'dod pa dang / /zhes bya ba la sogs pa'o/ /dge slong dag dad pa gang gi dad pa'i rtags ni gsum po 'di dag go zhes rgya cher te 'di gsungs so/ / 'phags pa ni sdig pa las ring du song ba'i phyir ro/ /yon tan dang ldan pa la lta bar 'dod cing brtson pa ni lta bar 'dod pa ste yang dang yang du de dang phrad pa'i phyir nye bar 'gro bas so/ /gang gi phyir dad pa med par ni gzhan gyis bskul bar gyur kyang ma dad pas 'phags pa'i gan du mi 'gro'o//dam chos nyan par dga' ba dang / /zhes bya ba ni bden pa ston pa la sogs pa legs par bshad pa mnyan pa la zhen pa ste/ srog gi phyir yang legs par bshad pa mnyan par 'dod pa skye ba'o/ /ser sna'i dri ma rnam spangs pa/ /zhes bya ba ni gtong ba la mchog tu 'dzin pa'i phyir ser sna'i tshul chags pa'i dri ma gang gis spangs pa'o//zhe sdang dang gti mug dang chags pa spyod pa rnams dad pa la go rims bzhin du de'i mtshan nyid bstan pa'i rtags gsum bstan to/ /yang na nyan thos dang rang sangs rgyas dang / sangs rgyas kyi rigs can rnams la gcig dang gnyis dang gsum gyi rtags dang ldan pa nyid du go rims bzhin du bstan pa'i phyir ro//'dus pa de dag gis ni dad pa rtog par byed pa yin no zhes gzhag ste/ de nyid dad pa zhes brjod cing dad pa dang ldan pa zhes kyang brjod de/ de'i 'bras bu mthong ba las rjes su dpag pas so//'jig rten la rab tu grags pas dge ba'i mtshams sbyor ba'i dus su dad pa yod pa yin gyi/ thams cad la nye bar mtshon pa ni nges par mi brjod do/ /dad pa gcig pu ni 'jig rten las snying po blangs pa yin no zhes bstan pa'i phyir/ dad pa'i lam brgyags zhes bya ba la sogs pa smos so//lha zhig gis gsol pa/ lam brgyags gang zhig bskur bya zhing / /rkun pos mi 'phrogs gang zhig lags/ /gang gis 'phrogs na bzlog bgyi zhing / /skye bo gang gis 'phrogs na dga'/ /gang zhig 'ongs nas rtag tu ni/ / mkhas pa mngon par dga' bar 'gyur/ /zhes pa la 'di gsungs so/ /dad pa de ni dad pa dang ldan pa'o/ /bskur ba ni nye bar blangs pa'o/ /lam brgyags ni lam gyi 'tsho ba'o/ /sbyin pa la sogs pa'i bsod nams kyi tshogs ni dad pa'i lag pas bskur bar nus pa yin te/ 'jig rten pha rol tu 'gro ba'i yo byad do//ji skad du/ /dper na lam brgyags mang pos ni/ /bde bas 'di na 'gron po 'gro/ /de bzhin 'dir yang dge byas pa'i/ /sems can bde 'gror 'gro ba yin/ /zhes bshad do/ /bsod nams chom pos dbrog mi nus/ /zhes bya ba ni grong 'joms par byed pa'i rkun mas kyang gzhan gyi legs par spyad pa dbrog par mi nus te/bsod nams rgyal po chom rkun dag /g.yo zhing brtson par byed pas kyang / /'phrog par nus pa ma yin no/ /zhes pa'i tshig gis so/ /chom rkun 'phrog par byed pa bzlog /ces pa la/ rkun mas gzhan gyi nor 'phrog par byed pa ni rgyal po la sogs pas gsad pa la sogs pa'i chad pas byas pas bzlog par bya ba yin no//dge sbyong rnams kyis blangs na dga'/ /zhes bya ba ni gzhan gyi bza' ba dang btung ba dang bgo ba dang khang pa la sogs pa 'phrog cing len par byed pa'i sdom brtson dge ba rnams la ni skye bo dad pa dang ldan pa dag shin tu dga' bar byed pa yin te/'phags pas 'phrogs shing blangs na bzang ba bzhin zhes bya ba'i tshig gis so/ /dge sbyong 'ongs pa la zhes bya ba ni nye bar zhi ba'i spyod pa can gyi sdom brtson 'ongs pa la'o/ /rtag tu zhes pa ni rgyun du'o//mngon par dga' ba ni mngon par 'dod pa'o/ /mkhas pa ni bdag la phan par 'dod pa'o/ /dad pa dang rjes su mthun pa'i zhing la sbyin bdag rnams 'bul bar byed pa na/ phrag dog gi dbang gis skye bo ngan pa rnams ting nge 'dzin nyams par 'gyur ba'i nyes dmigs bstan pa'i phyir smras pa/skye bo rnams ni ci rigs par/ /zhes bya ba la sogs pa'o/ /khyim bdag mgon med zas sbyin gyis 'phags pa shA ri'i bu dang maud gal gyi bu la chos gos la sogs pas shin tu yang bsnyen bkur byed par gyur to/ /ko ka li ka la sogs pas ni khyim bdag 'di ni gang zag la mngon par dad do zhes 'phya bar byed de ji tsam na tshigs su bcad pa gnyis gsungs so//sbyin byed ces bya ba ni yon tan can la 'bul bar byed pa'o/ /gcig ni gcig tu ste dad pa'i sems can dag go/ / dad pa ji bzhin zhes bya ba ni dad pa dang rjes su mthun pa ste/ de chung ngu la sogs pa'i dbye ba dang / des byas pa'i sbyin pa la sogs pa'i dbye bas so/ /ci rigs par bya zhes bya ba ni 'byor pa dang rjes su mthun pa ste/ 'byor pa ci bsags pa bzhin du sbyin pa ste/ dad pa ji lta ba bzhin no//'byor pa ma bsags pa dag gis kyang ji ltar 'tshal bar ro/ /de lta zhes bya ba ni zas dang skom sbyin bdag ster ba la'o/ /gang zhig yid ni mi bde ba/ /zhes bya ba ni phrag dog la sogs pa'i dbang gis mi dga' ba'o/ /gzhan zhes bya ba ni len pa po dang 'brel pa zhes bya ba'i tshig gi lhag ma'o//des ni nyin dang mtshan rnams su/ /zhes bya ba ni skye bo ngan pa de ni nyin par dang nub mo rnams su'o/ /ting 'dzin 'thob par mi 'gyur ro/ /zhes bya ba ni sems rtse gcig pa mi rnyed pa ste/ phrag dog gis byas pa'i g.yeng ba dang ldan pa zhes bya ba 'og nas smos te/ rang gi rnyed pa la brnyas par mi bya'o zhes bya ba la sogs pa'o//nag po'i phyogs bstan nas/ dkar po'i phyogs smras pa/ gang gis zhes bya ba la sogs pa smos te/ gang yang skyes bu dam pas so/ /de 'dra kun du spyod byed pa/ /zhes bya ba ni gzhan gyi rnyed pa'i rgyur gyur pa'i yid mi bde ba drungs 'byin pa'o//yang phyis mi skye bar bya ba'i phyir smras pa/ ta la'i mgo bcad ltar zhes bya ba sa bon med par bya ba ste/ ta la'i mgo dang mnyam par 'jug pa ni ta la'i rtse mo ste/ 'di ltar shing ta la'i rtse mo bcad pas yang mi skye ba de bzhin du spang ba'o/ /des ni nyin dang mtshan rnams su//zhes bya ba la sogs pa ni rtag par sla'o/ /dad pa med pa ni dam pa rnams kyis bsten par bya ba ma yin no zhes bstan pa'i phyir smras pa/ khron pa skam po zhes bya ba la sogs pa'o/ /dge slong dag dad pa med pa'i gang zag ni sten par ma byed cig /de ci'i phyir zhe na/dad pa med pa bsten pa ni sdug bsngal ba ste/ gang gi phyir dad pa med pa bsten cing bsten pa las ni lus kyis nyes par spyad pa spyod pa dang / ngag gis nyes par spyod pa nas ji srid du dmyal bar skye bar 'gyur ro zhes bya ba'i bar du'o/ /dkar po'i phyogs kyi tshigs su bcad pa yang ste 'di gnyis gsungs so//dad pa med pa zhes bya ba ni sems dad pa dang bral ba'i skye bo zhes bya ba'i don to/ /bsten mi bya zhes bya ba ni bsnyen par mi bya ba ste/ de dang lhan cig 'brel par mi bya'o/ /khron pa skam po ji lta bar/ /zhes bya ba la/ chu btung bar bya ba'i gnas de ni khron pa ste rdzing bu la sogs pa'o//ji ltar chu med pa'i skam pa de chu don du gnyer ba dag gis mi bsten pa de bzhin no/ /'on kyang khron pa chu med cing skam du zin kyang brkos par gyur na chu sbyin par byed do zhe na/ ji ste zhes bya ba la sogs pa yin te/ gal te rdzing bu la sogs pa chu med cing skam po la chu don du gnyer bas de kun du brkos kyang de ma thag mi 'byung la/gal te byung bar gyur na yang 'dam chu dri nga ba 'byung bar 'gyur zhes bya ba smos te/ 'dam rul pa de lta bu'i dri gang la yod pa de ni 'dam chu dri nga ba ste/ de ni dbyig pa can bzhin no/ /shes rab can gyis dad ldan bsten//zhes bya ba ni gang la yang dag par rtogs pa yod pa des ni dad pa can dang lhan cig bsten par bya'o/ /'dir dpe bstan pa/ mtsho la chu 'dod ji lta bar/ /zhes bya ba smos te/ dper na chu 'dod pa ste/ khrus dang btung ba dang de'i nang du zhugs par 'dod pas ni mtsho chen po la sten par byed do//mtsho ji lta bu zhe na/ smras pa/ chu mang zhes bya ba ste/ chu mang po gang la yod pa de ni chu mang ste/ bya rog gis btung du rung ba zhes bya ba'i don to/ /rnam par dang ba ni rnyog pa dang bral zhing shin tu gtsang ba'o/ /bsil bar gyur cing zhes bya ba ni de yang shing gi grib mas yongs su bskor ba'i phyir/yid tshim par byed do/ /rnyog pa med pa zhes bya ba ni rdul med cing na kra la sogs pa sems can gdug pa can dang 'dam dang chu bal la sogs pas ma rnyog pa'i phyir ro/ /ji ltar khrus dang btung ba la sogs pa 'dod pas ni mtsho 'di lta bu nye bar sten par byed pa de bzhin du khyad par gyi rnam pa mang po don du gnyer bas kyang lhag par g.yo med pa dang bsam pa dag pas gzhan la phan 'dogs shing dga' bar byed pa dang /mi shes pa dang / tshul 'chos pa la sogs pa dang bral bas rnyog pa med pa'i dad pa can bsten na des ni yid la mngon par 'dod pa'i 'bras bu 'grub par 'gyur ro//mkhas pas ni dad pa can bsten par bya'i/ cig shos ni ma yin no zhes bstan pa'i phyir smras pa/ chags sam ma chags zhes bya ba la sogs pa'o/ / tshe dang ldan pa shA ri'i bu dang maud gal gyi bu gnyis dgon pa'i phyogs gcig nas snga dro sham thabs dang chos gos bgos te lhung bzed blangs nas/ bram ze'i grong khyer zhig tu bsod snyoms kyi phyir zhugs pa na/ mu stegs can gzhan dag gis shin tu spyos shing brgyad de lhung bzed kyi nang du yang rdul gyis bkang ngo //bram ze dad pa dag gis ni mchod par yang gyur to/ /de gnyis dmyal ba dang mtho ris dag tu mi dga' zhing dga' ba yin te/ de'i dbang du mdzad nas 'di gsungs so/ /chags pa ni kha cig dad cing blo dang ldan pa'i bram ze dang khyim bdag dam pa rnams la rjes su chags par bstan pa yin no//sam zhes bya ba'i sgra ni ma chags kyang rung zhes bya ba yin te/ skye bo ngan pa kha cig dam pa rnams la rnam par sdang ba bskyed pa'o/ /de yis thub sku mi ngas pas/ /zhes bya ba ni bdag nyid chen po rnams ni chags pa'am ma chags pa ste/ dad pa dang ma dad pa'i sems can gyi rgyur gyur pa zhes sku mi ngas pa ste/'gyur bar mi mdzad do/ /ci'i phyir zhe na/ smras pa/ 'di ltar thub pa de ni khams gsum las 'dod chags dang bral ba'i phyir ro/ /gal te sku mi ngas na des ci zhig bya ba yin zhe na/ smras pa/ ma dad pa dag spang bar bya/ /zhes bya ba ste/ma dad pa'i sems can dor bar bya ste/ chu dang bral ba'i phyir chu 'dod pas khron pa skam po bzhin du sdig pa byed pa de yongs su spang bar bya'o/ /dad pa rnams ni nye bar bsten/ /zhes bya ba ni dad pa can dag dang bsnyen par bya ba nyid de/ chu 'dod pa dag gis mtsho chen po bzhin du ste/ de'i bsod nams kyi tshogs nye bar skyed pa'i phyir ro/ /dad pa'i tshoms te bcu pa'i rnam par 'grel pa rdzogs so// //dad pa'i khyad par gyi 'bras bu bstan pa'i phyir/ de'i 'og tu dge sbyong gi tshoms bstan pa yin te/ dad pa'i stobs kyis ni 'phags pa'i lam skye la/ de'i mthus ni dge sbyong du 'gyur ro//yang na bstan ma thag pa'i tshoms su thub pa zhes bya ba de'i rnam grangs dge sbyong yin no zhes bstan pa'i phyir ro 'grel pa smras pa/ bram zes 'dod pa zhes bya ba la sogs pa'o/ /rab tu dang ba phal che ba zhes bya ba'i bram ze zhig ser skya'i thar pa bsgrub par 'dod pa las de'i thabs mi shes te/sangs rgyas la yid ches pa skyes par gyur nas/ bcom ldan 'das kyi spyan sngar song ste zhus pa las/ de'i phyir tshigs su bcad pa gnyis gsungs te/ de thos pas rab tu byung zhing dgra bcom pa'i 'bras bu thob bo/ /chod cig ces bya ba ni spang zhing dor bar gyis shig ces bya ba'i don to//gang yin zhe na/ rgyun zhes bya ba ste skye ba'i rgyun no/ /gang gi phyir 'di ma spangs na ni gcig tu thob par mi 'gyur ro/ /ci zhig byas nas rgyun bcad par nus she na/ brtson 'grus kyis ni zhes bya ba smos te/ sbyor bas bskyed par bya ba'i khyad par ni brtson 'grus te/dad pas dam pa bsten cing legs par gsungs pa mnyan pa dang / rab tu byung ba yongs su bzung ba dang dge ba la sogs pa'i lam gyi tshogs la 'jug pa zhes bya ba'i don to/ /tshogs 'di la brten nas de'i 'og tu ci zhig bya zhe na/ smras pa/ nyon mongs pa spang bar bya ste/de spang ba'i rim pa bstan pa'i phyir smras pa/ 'dod pa rab spang zhing zhes bya ba ste/ 'dod pa na spyod pa'i mthong ba dang / bsgom pas spang bar bya ba'i nyon mongs pa spong ba yin te/ de nas gzugs dang gzugs med pa na spyod pa yin no zhes ston te/ 'dod pa'i khams kyi yongs su rdzogs par spangs na bram zer 'gyur te/'dod pa'i mi gtsang ba'i nang du 'bying ba las ni bram zer skye bar mi 'gyur ro zhes de nyid bstan pa'i phyir bram ze zhes bya ba smos te/ 'di'i don ni 'dod pa dag las yid rgyab kyis phyogs pa yin no zhes rgyu ci'i phyir 'dod pa la sogs pa spang bar bya ba yin zhe na/rab tu ma spangs par zhes bya ba ste/ ji srid du 'dod pa la spyod pa la sogs pa'i nyon mongs pa spangs par ma gyur pa de srid du ni de thub pa ma yin te/ gcig tu yang thob pa ma yin no/ /thub pa zhes bya ba ni phung po lhag ma dang bcas pa'i mya ngan las 'das pa thob par gyur pa'o//gcig tu zhes bya ba ni phung po lhag ma med pa'i mya ngan las 'das pa ste/ de gnyis kyang nyon mongs pa spangs pas 'thob pa ni rtogs pa'o/ /de ma thob par ni rgyun chod pa ma yin te/ des na 'dod pa la sogs pa nges par spang bar bya ba nyid yin no//'dir dge sbyong gi sgra med kyang bram ze dang thub pa'i sgra ni de'i rnam grangs yin pa'i phyir tshigs su bcad pa 'di dge sbyong gi tshoms su dgod par rigs pa nyid do/ /tshigs su bcad pa gnyis por yang kun du rgyu'i sgra'i ni kun rdzob tu dge sbyong la btags pa'i rgyu yin pa'i phyir rtsod pa med do//rtag tu byed pa dang gus par byed pa'i sbyor bas sngar bstan pa'i bya ba nus pa yin te/ gzhan du ni ma yin no zhes 'dir bstan pa'i phyir/ kun du rgyu zhes bya ba la sogs pa'o/ /bya ba bya ba zhes bya ba la bzlas pa ni gyis shig gyis shig pa'i don to//rtag tu de nyid ces bya ba ni sngar bstan pa'i rgyun gcad par bya ba ste/ rang dang rjes su mthun pa'i gnyen po'i phyogs bsgoms pas rtag tu de nyid du bsgrub par bya ste/ 'dir bag med par ni mi bya'o zhes pa'o/ /gus pa'i sbyor ba la gzud pa'i phyir/ brtson 'grus brtan pa kho na yis//zhes bya ba smos te/ dge ba'i bshes gnyen bsten cing / dam pa'i chos mnyan pa la sogs pa bskyed pa la bar chad med pa nyid du brtson 'grus brtsams pas 'jug par gyis shig pa'o/ /de ltar ga las byed du 'jug pa yin zhe na/ kun du rgyu ba zhan pa dag /ces bya ba ni sbyor ba lhod pa ste/ 'di ltar kun du rgyu gal te brtson pa med pa dang / skyo ba med par gyur te/ nga rgyal dang phrag dog la sogs pa dang ldan pas ni de'i tshe spyir yang shas cher stsogs shing 'phel ba yin no/ /nyon mongs pa ni/ las dang nyon mongs pa dang skye ba'i kun nas nyon mongs pa'i bdag nyid ma spangs pa'o//gang sngar bstan pa'i kun du rgyu ba zhan pas nyes pa 'byung bar yang ma zad de/ mngon par 'dod pa'i 'bras bu yang sbyin par mi nus so zhes bstan pa'i phyir/ zhan pa'i las ni zhes bya ba la sogs pa smos so/ /dge bsnyen ma zhig gi bu yan lag brgyad pa'i bsnyen gnas kyi gso sbyong gi bslab pa dang ldan pa las nyams par gyur te/de gnod sbyin zhig gis bzung bar gyur to/ /de nas de'i mas gnod sbyin de rjes su dran par byas te/ tshigs su bcad pa gnyis smras so/ /ji srid bcu bzhi bco lnga ni//bsnyen gnas yan lag brgyad pa la/ /'di na legs par mnyam gzhag dang / /gang zhig tshul khrims ldan pa la/ /gnod sbyin 'tshe bar mi 'gyur zhes/ /bdag gis thos na rigs yin nam/ /zhes so/ /gnod sbyin gyis smras pa/ thos pa ji snyed pa de dag ni legs te/rigs pa yin no zhes smras so/ /de'i phyir gnod sbyin thong shig ces byas pa dang / gnod sbyin des kyang de btang ste/ sangs rgyas kyis gsungs pa'i tshigs su bcad pa gsum yang brjod do/ /de nas dge bsnyen ma des rang gi bu de dgon pa'i gnas su khrid de song nas rab tu phyung zhing ci nas kyang skyo ba bskyed de dgra bcom pa nyid mngon sum du byas par gyur to//ji snyed ces bya ba ni thams cad do/ /zhan pa'i las byas zhes bya ba ni rnam par spyod pa dag la spro ba nyams pa'o/ /don chen 'gyur snyam mi byed do/ /zhes bya ba dang 'dir sbyar bar bya'o/ / 'jig rten pa rnams kyi las zhing rmod pa dang / ba lang srung ba dang / rgyal po la zha 'bring byed pa la sogs pa yang rtag tu byas pa dang gus pa'i sbyor ba ma gtogs pa 'bras bu chung ba nyid yin na/ 'jig rten las 'das pa'i las kun du mi spyod pa la sogs pa lta smos kyang ci dgos pa'o//kun nas nyon mongs dka' thub dang / /zhes bya ba ni gang yang cung zad dus ma yin pa'i zas la sogs pa las ldog pa'i tshul gal te ma spyad dam/ kun nas nyon mongs pas ji lta ba bzhin du ma spyad pas dri ma can du gyur pa de yang / don chen 'gyur snyam mi byed do//zhes bya ba 'di dang sbyar ro/ /yang na kun nas nyon mongs pa'i dka' thub ni phyi rol gyi me lda bsten pa la sogs pa ste/ de ni gcig tu 'bras bu med pa yin no zhes bstan to/ /tshangs spyod yongs su ma dag de/ /zhes bya ba la/ 'dir lam gyi tshogs tshul khrims ni tshangs par spyod par bshad do//yang na 'khor bar yongs su zad pa'i tshul khrims yon tan gyi khyad par la bsten pa yin gyi/ don chen 'gyur snyam mi byed do/ /zhes bya ba 'di dang sbyar te/ las la sogs pa ni mi rigs pas bskyed pa gang bstan pa ste/ des ni mngon par 'dod pa'i 'bras bu rgya chen po thob par mi 'gyur ro/ /don chen por mi 'gyur bar ma zad de/ ngan song gi rgyur yang 'gyur ba'i phyir te/ ji lta bu zhe na/ ji ltar mda' ni zhes bya ba ste/ dper na mda' gzung nyes pa zhes bya ba lhod par gzung bas so/ /lag pa ni lag pa nyid de byed pa zhes bya ba'i don to//chod par gyur pa zhes bya ba ni dum bu gnyis su bya zhing rma 'byung bar byas pa zhes bya ba'i don to/ /dge sbyong bsrung ba bya nyes dang / /zhes bya ba la/ dge sbyong du btags pa'i rgyu ni 'dir tshul khrims la dge sbyong zhes bshad pa'o/ /yang na de ltar tshul khrims gzung ba legs par ma bsrungs sam/legs par ma blangs pas bsrung nyes pa'o/ /dmyal bar nye bar khrid par byed/ /ces bya ba ni ngan song du 'dren par byed pa'o/ /ji ltar mda' ni gzung legs dang / /zhes bya ba la sogs pa ni rtogs par sla'o/ /ma shes pas ni dge sbyong yongs su bsrung ba ni dka' ba yin no zhes bstan pa'i phyir smras pa/dge sbyong rnam par ma shes dang / /zhes bya ba la sogs pa'o/ /dge slong dag rgal dka' ba ni byis pa thos pa dang mi ldan pa so so'i skye bo la rab tu byung ba ni mchog tu rgal dka' ba yin te/ de ci'i phyir zhe na/dge slong dag gang gi phyir byis pa thos pa dang mi ldan pa so so'i skye bo 'di ni grong ngam grong rdal dag tu nye bar bsten cing gnas te/ ji tsam na der chags par 'gyur ba'i bud med mthong na zhen cing chags par 'gyur ro zhes rgya cher te/ rnam par rtog pas gtses pa na bslab pa gtong zhing 'dor bar 'gyur ro zhes gsungs te/des na tshigs su bcad pa gnyis po 'di gsungs pa yin no/ /sdug bsngal gyis rgal bar bya ba yin pas rgal dka' ste 'da' bar dka' ba'o/ /de thob pa'i thabs ni thob par dka' ba'i phyir ro/ /bzod par dka' ba zhes bya ba ni bzod par sla ba ma yin pa ste/grogs dang gnas kyi khyad la rag las pa'i phyir ro/ /yang na gting dpag dka' ba'i phyir pha rol tu rgal dka' ba'o/ /gang gi phyir dge sbyong gi pha rol tu phyin pa ni dka' bas 'thob pa yin te/ rgya mtsho lta bu'o/ /de'i pha rol ni thar pa'o/ /bzod dka' dang zhes bya ba ni 'di la sdug bsngal gyis theg cing bzod pa yin pas bzod dka' ba ste/bdag nyid ma sbyangs pa dag dus dang gnas skabs rgyun du bsrung ba mi bzod pa'i phyir ro/ /de la gnas pa na yang dga' ba nyi tsher ma zad de mthar thug par rtogs par dka' ba'i phyir dang gi sgra smos so//'dir dge slong ni rab tu byung ba'i tshul khrims so/ /de yang kun rdzob dang don dam pa'i dbye ba rnam pa gnyis so/ /gang gis rgal dka' ba dang / bzod par dka' ba yin zhe na/ rnam par ma shes pas zhes bya ba ste/ dngos po'i de bzhin nyid la kun du rmongs pa ste/ de'i ngo bo dang rnam pa la sogs pa ma rtogs pa zhes bya ba'i don to//ji lta bu yin zhe na/ sdug bsngal mang po de dag 'byung / /zhes bya ba smos te/ rab tu byung ba la gnod pa dpag tu med pa 'byung ste/ nyams pa'i rgyu zhes bya ba'i don to/ /ji skad du/ gzhan gyi ngor bltas bsags shing 'tsho ba dang //ngan pa bzhin du skye bos ma brtsis shing / /gos ngan nye du grogs bshes rab bral bas/ /nags mthar lus bor ba yi du ba bzhin/ /zhes bya ba lta bu'o/ /gang dag ces bya ba ni gang dag la sdug bsngal bzod par dka' ba dag gis zil gyis mnan par gyur pa na'o//zhan pa ni rmongs pa ste/ yon tan dang skyon gnyis la rtog pa pa'i phyir te/ ji skad du/ rab tu byung la skye bo phal cher ni/ /ma goms pas na rab tu skye bar gyur/ /'dod pa'i 'dod chags kyi ni rjes 'brang bas/ /g.yang sa bzhin du rab tu rtog par 'gyur//zhes pa'o/ /'gyod 'gyur ba zhes bya ba ni de nyid las nyams pa zhes bya ba'i don te/ mi dga' ba skye bar 'gyur ba ni bdag ni 'di ltar nyam nga bar gyur to zhes pa'o/ /dge sbyong yongs su bsrung bas ni shes rab gcig pu dag par ma zad de/sems kyang dul ba'i rgyu yin te/ shes rab dang sems dul ba gnyis kyis ni de dag pa phun sum tshogs par 'gyur te/ de nyid bstan pa'i phyir smras pa/ spyod pa ji ltar bya zhes bya ba smos te/ rnam pa gang gis 'jug pa'o/ /gang la zhe na/ dge sbyong gi tshul khrims yongs su bsrung ba la'o//sems ni bzlog pa ma byas par/ /zhes bya ba ni rnam par rtog pa la log pa dang bya ba ma yin pa las zhes bya ba'i tshig gi lhag ma'o/ /ni zhes bya ba'i sgra ni gal te zhes bya ba'i don te/ gal te sems bya ba ma yin pa dang / 'dod pa'i kun du rtog pa la sogs pa'i tshul las ma bzlog pa dang /yang dag pa'i rtog pa la sogs pa la ma sbyar ba de'i tshe ni 'di ji ltar dge sbyong du khas blangs pa yin te/ dge sbyong gi spyod pa la ji ltar tshul khrims rnam par dag pa zhes bya ba'i don to/ /'dis ni rnam par rtog pa la sogs pas nyams par byas na tshul khrims ma dag pa nyid du bstan to//gal te sems dul ba med na ji ltar dge sbyong gi spyod pa nus pa yin zhe na/ yang dang yang du zhes smos te/ brtsam zhing brtsams pa na ste bshags pa la sogs pa'i gnas skabs na zhes bya ba'i don to/ /'gyod pa zhes bya ba ni skyo ba dang mi dga' bar gyur ba 'brel na ji ltar de yang bar spyod pa nus par 'gyur ba'o//ci'i phyir de thams cad du 'gyod par 'gyur zhe na/ 'di ltar/ kun rtog dbang du 'gro ba yi/ /zhes bya ba yin te/ 'dod pa la sogs pa'i kun du rtog pa ste/ 'dod pa'i rjes su 'gro bar gyur pa'o/ /kun du rtog pa gzhan gyi dbang du gyur pa'i phyir nyon mongs pa'i dbang du 'gro ba ste/nyon mongs pas ni tshul khrims nyams par byed do/ /gang gis shes pas dge sbyong gi sems dul bar ma byas pa de'i tshe ni nyes par dga' ba yin no zhes bstan pa'i phyir/ nyes par rab byung nyes dga' ba//zhes bya ba la sogs pa yin no/ /yul ko sa la'i rgyal po gsal rgyal gyi yul na yongs su 'dri ba zhes bya ba'i bram ze zhig ya mtshan gyis brtul zhugs du ma blangs shing rab tu byung bar yang byed pa zhig yod de/ de rang gi chung ma bor te gzhan gyi chung ma dang smad 'tshong ma dag la chags par gyur to//de'i chung ma yang skyes bu gzhan dag la chags pas de'i nor zad par byas so/ /de yang rgyan la sogs pa blangs pa las des ma thob pa dang / de tshig ngan pa smra bar gyur to/ /des kyang de brdungs so/ /ji tsam rgyal po dang lhan cig tu bcom ldan 'das kyi spyan sngar song ste zhus pa/'jig rten na ni nyes dga' gang / /khyim du nyes par 'dug 'dod gang / /sdug bsngal bsten par 'dod pa gang / /sdug bsngal nyer stsogs gang zhig lags/ /'di na gang zhig rab brtags pas/ /'di nas ngan 'gror 'gro ba gang / / zhes zhus pa las/ de'i dbang du mdzad de tshigs su bcad pa gnyis gsungs te/ de thos pas skyo ba skyes nas rab tu byung ste/ dgra bcom par gyur to/ /gzhan dag ni yul yangs pa can gyi nags chen po na ba lang rdzi'i bu zhig rab tu byung ba la mngon par mi dga' ba las brtsams so zhes zer ro//nyes pa rab tu byung ba zhes bya ba ni rab tu byung ba'i phun sum tshogs pa dang bral ba ste/ rang gi yon tan gyis spangs pa'i rab tu byung ba zhes bya ba'i don to/ /de'i yon tan yang tshul bzhin du bzung ba dang bsrung ba dang / mi gtsang ba la sogs pa'i khyad par bskyed pas thar pa 'thob pa yin no//de la 'di ni nyes dga' zhes bya ba ni rab tu bsngags pa la mngon par dga' ba dang bral ba'i phyir dang / dam pa rnams kyi sems rangs par mi byed cing zhes pa'i don te/ rab tu byung ba yongs su bsrungs shing mnyam pas ni khyad par du mngon par dga' ba bskyed pa'i phyir bdag bzhin du'o//nyes rtsom byed pa dag ces bya ba ni brtsam par 'os pa ni brtsam par bya ba ste yongs su bskyed pa'o/ /de yongs su bskyed pas bsgrubs par dka' ba ni nyes rtsom byed pa dag ces bya ba yin no/ /'jug par byed pa yin pas 'dug pa ste/ thams cad dang lhan cig tu yang dag par 'dug pas tshul nyams pa zhes bya ba'i don to//gang yin zhe na/ khyim du zhes bya ba smos te/ chung ma len pa yin no zhes bya ba'o/ /ji skad du skye dgu khyim sten par byed pa ni bu 'thob pa'i phyir chung ma bstan te/ 'dod pa'i phyir ni ma yin no zhes bya ba'i don yin no/ /ngan par spyod pa'i bud med ni lha rnams kyis kyang mgu bar nus pa ma yin no/ /lhag par zhen pa yin pas 'dug pa ste/ pha dang ma dang bu smad la sogs pa de dag dang gang gi phyir rtag tu khyim na 'dug pa yin no/ /yang na sdug bsngal gyis khyim mam gnas gang dag na 'dug kyang de ni de nyid do//nyes dga' ba zhes bya ba yang 'dir sbyar bar bya ste/ nyes pa'am sdug bsngal med pas gzung ba'i khyim ni med do/ /sdug bsngal lhan cig nga rgyal la sten pas dang zhes bya ba la/ nga rgyal dang bcas pa ni nga rgyal dang lhan cig pa ste/ngar 'dzin pa de dang bcas pa'i gnas skabs na ni nga rgyal dang lhan cig bsten pa yin no/ /de dang lhan cig gnas pas ni sdug bsngal bar byed pa yin te/ sdug bsngal ba ni gdung bar byed pa yin no/ /yang srid sdug bsngal stsogs par zad/ /ces bya ba la/srid pa ni skye ba ste/ las bsags pa de'i 'bras bu'o/ /gdung bar byed pa'i phyir sdug bsngal te/ dge slong dag 'khor ba mngon par 'grub pa ni sdug bsngal ba yin no zhes bya ba la sogs pa mdo las gsungs so/ /ngur smrig gyon pa dag zhes bya ba la/ gos ngur smrig ni tshon gyis bsgyur ba'i chos gos te/de gyon pa gang yin pa de ni cha byad tsam 'dzin pa zhes bya ba'i don to/ /tshem bu ni mang po ste/ gang zhig ce na/ ngur smrig gyon pa dag ces bya ba smos te/ 'di ltar sdig pa'i chos can zhes bya ba'o/ /'di dag la sdig pa'i chos yod pa ni sdig pa'i chos te lta ba ngan pa'o//lta ba log pas nyams par byas pa ni bsam pa rgud pa yin te/ chos de ni bcos ma nyid de zhes bya ba'i don to/ /yang dag mi sdom zhing zhes bya ba ni shin tu ma bsdams pa ste/ lus dang ngag dang yid rnams kyi phongs pa zhes bya ba'i don to/ / tshigs bcad kyi phyed kyis bdag gi don rgud par bstan nas/ gzhan gyi don rgud par bstan pa'i phyir/ sdig la dga' zhes bya ba ste/ dga' zhes bya ba'i don ni sdig pa'i chos ston cing brjod pa yin te/ gzhan dag la log par ston cing 'chad pa zhes bya ba'i don to/ /gang 'di ni shin tu yang sdig che ba yin te/bdag nyid rmongs par byas nas/ gzhan rmongs par byed pa'o/ /sdig can zhes bya ba ni bdag nyid kyis byas pa'i sdig pa'i las te/ lus la sogs pas nyes par spyod pa ngan song gi rgyur gyur bas de dag ngan 'gro zhes bya ba'i bstan pa 'di 'am 'jig rten 'di nas der 'gro ste/ngan song du 'gro ba yin no/ /dge sbyong du bstan pa'i rgyu tshul khrims nyams pa las 'jig rten gnyi gar phongs par 'gyur ba'i phyir smras pa/ sA lu'i shing la zhes bya ba la sogs pa'o/ /de nas ngang tshul ngan pa zhes bya ba'i grong dpon zhig gis bcom ldan 'das la 'di skad ces gsol to//kye gau ta ma gang la las lus kyis nyes par spyod pa spyad pas de'i 'gro ba cir 'gyur zhes bya ba la sogs pa gsol to/ /grong dpon 'di la gcig tu tshul khrims nyams pas srog gcod par 'gyur na dmyal bar skye bar 'gyur ro zhes bya ba'i bar du bstan te 'di gsungs so//gang zhig ces bya ba ni gang la la'o/ /shin tu tshul khrims 'chal zhes bya ba ni rab tu sdig pa'i tshul can te/ ltung ba tha ma spyad pas tshul khrims nyams pas kun du gnas zhes bya ba'i don to/ /ji lta bu yin zhe na/sA la'i shing la 'khri shing ltar/ /zhes bya ba lta bu ste/ dper na sA la'i shing la 'khri shing lcug ma dag gis kun nas 'khyud pa de bzhin du lus la sogs pa'i nyes par spyod pa'i bdag nyid dpag tu med pa'i tshul khrims 'chal pas bdag nyid kun du nyams par byas pa'o//de ni de ltar bdag la byed/ /ces bya ba ni shin tu tshul khrims 'chal pa'i gang zag de ni rnam pa de ltar bdag la sgrub par byed de/ dmyal ba la sogs pa'i phung por mngon par 'grub par byed do/ /ji ltar dgra bzhin byed par 'dod/ /ces bya ba ni 'di ni bdag la sdang zhing mi dga' ba ste/mi bde ba dang sdug bsngal la sbyor zhing phrad par byed par 'dod do/ /de bzhin du tshul khrims 'chal pa'i gang zag kyang bdag la ma byed par 'dod do/ /'di ni 'di ltar mtshon pa yin te/ ji ltar yang bdag nyid la bde ba la sogs pa'i khyad par la sbyor ba ni mi 'dod kyi/sdug bsngal la sogs pa'i khyad par la ni sbyor bar 'dod pa yin no/ /de'i phyir dge sbyong gi dam bcas pa'i tshul nyams pa las ni 'jig rten 'dir grags pa ma yin pa dang / pha rol tu bdag nyid sdug bsngal la sbyor ba yin no/ /tshul khrims la sogs pa'i yon tan dang ldan pa nyid la ni rgan rabs zhes bya'i/dge sbyong gang yang rung ba ni rgan rabs ma yin te/ don dam par ni rigs la sogs pa rgan rabs ma yin no zhes bstan pa'i phyir smras pa/ mgo bo skye bor gyur bar du/ /zhes bya ba la sogs pa'o/ /bcom ldan 'das yul be ra t+ya'i bi ra ti na De ra bi tsu man da'i rtsa ba na bzhugs te/de nas yul be ra t+ya'i bram ze lo brgya nyi shu lon pa/ rgas shing 'khogs pas gzir ba zhig gis bcom ldan 'das kyi chos gos kyi grwa las bzung ste gsol ba/ kye gau ta ma khyed shin tu rgan pa dag mthong na ci'i phyir gus par smras pa dang /phyag btsal ba dang / stan las ldang zhing stan bstab pa la sogs pa mi byed ces gsol ba dang / ngas ni lha dang bcas pa'i 'jig rten na bram ze de lta bu yang dag par ma mthong bas so zhes rgya cher ro/ /gau ta ma de ni ro med pa'o/ /gang gis bram ze'i grangs ni yod de/nga ni ro med pa ma yin te/ gzugs dang 'dod pa'i yon tan spangs pa nye bar longs spyod spyod pa med pa dang / de bzhin du mngal du 'jug pa med pa dang / yang srid pa'i phung po spangs pa'i phyir ro/ /'di lta ste dper na bram ze khyim bya'i sgo nga rnams skye bar gyur pa ji snyed pa la ji snyam du sems/bram ze gang khyim bya'i phrug pa de rnams las dang por mchu 'am rkang pa'i sen mo'i sgo nga'i sbubs dral cing thog mar byung ba de la ji skad du brjod par bya/ kye gau ta ma de ni rgan rabs zhes bya'o/ /de bzhin du nga yang de rnams kyi nang na ma rig pa'i sgo nga'i sbubs dral nas byung ba yin te de bas na nga ni lus can thams cad kyi rgan rabs yin no zhes pa nas/ji srid du tshigs su bcad pa gnyis gsungs so/ /gzhan dag ni nye dga' rgan po dag dang lhan cig 'dug cing tshul mnyam la 'phya ba bzhin du ston pa las so zhes zer ro/ /gzhan dag ni rgan rabs ni gsum ste/rigs kyi rgan rabs dang / kun rdzob kyi rgan rabs dang / chos nyid kyi rgan rabs las tha ma nyid las brtsams so zhes zer ro/ /rgan rabs ni rgan par gyur ba'o/ /da dung ma chud pa zhes bya ba ni de tsam gyi rgyus mi 'gyur ba'o/ /gyur bar du zhes bya ba ni de tsam gyi mtshan mas so//mgo bo skya bo ni mgo'i skra dkar ba ste/ gang gi phyir 'di'i skra dkar bas na rgan rabs yin no zhes bya ba de ma yin no zhes bya ba'i don to/ /gal te 'di tsam na rgan rabs ma yin na ci byed byis pa yin nam zhe na/ de ni rgan blun zhes bya'o/ /zhes bya ba yin te/ ci'i phyir de ltar brjod par bya zhe na/de'i rgyu bstan pa'i phyir/ de ni lang tsho gtugs pa ste/ /zhes bya ba dus la ltos pa'i lus kyi gnas skabs kyi na tshod ni lang tsho ste/ 'dir lang tsho 'di nyid yongs su smin cing gyur pa ni gtugs pa ste/ 'di'i las la sogs pa ni nus pa nyams par gyur pa'o//de ni rgan blun zhes bya'o/ /zhes bya ba brjod de/ blun pas rga ba bcom pa yin te/ rgas pas don med par gyur pa'o/ /gang gi phyir yon tan bsgrubs pa des ni don dang bcas pa'i rgan pa'o/ /yang na blun pas bcom pa ste/ bya ba ngan pas nus pa dang bral ba zhes bya ba'i don to//'di nyid kyis ni rigs dang gzugs dang 'byor pa la sogs pa'i khyad par gyis 'jig rten na kun rdzob tu rgan rabs zhes brjod pa yang dgag pa yin no/ /thub pa med pa'i phyir dang / yon tan gyi rang bzhin ma yin pa'i phyir te/ de la 'dis ni gzhan rigs kyi rgan rabs su 'dod pa yang dgag pa yin no//chos nyid kyi rgan rabs bstan pa'i phyir/ gang zhig ces bya ba la sogs pa smos so/ /gang zhig dge dang zhes bya ba ni bde ba'i 'bras bu'i las so/ /sdig pa dag ces bya ba ni don sdig sdug bsngal gyi 'bras bu las so/ /spangs shing zhes bya ba ni rjes su mthun pa rab tu dor ba'o//'dir 'phags pa'i lam nyid ni gnyen po yin no zhes bstan pa'i phyir smras pa/ tshangs par spyod pa dang zhes bya ba ste/ tshangs pa'i 'bras bu'i phyir spyod pa ni mya ngan las 'das pa'i 'bras bu las nan tan du byed pa ste/ 'phags pa'i lam zhes bya ba'i don to//tshangs par spyod pas dga' ba yin no zhes bya ba'i tshig gis te/ de gang la yod pa de ni tshangs par spyod ldan no/ /ci phra rgyas thams cad spangs par byas shing mya ngan las 'das par gyur pa tsam gyis kyang rgan rabs zhes bya ba'i ming du brjod dam zhe na smras pa/ yang gang gi tshe/sde tshogs spangs nas zhes bya ba smos te/ tshogs dang 'brel pa ni sde nyid du byed pa ste/ sde ni phung po dang 'brel pa yin no/ /de spangs pa ni sde tshogs spangs pa ste/ yang srid pa'i phung po dang 'brel pa med pa'i phyir ro/ /der skye ba med pa ni kun du sbyor ba spangs pa'i phyir ro/ /mi slob pa'i lam la gnas par byas nas gzhan gyi don byed pa'i gnas skabs de ni rgan rabs kyi sgrar brjod pa'i phyir/de ni rgan rabs zhes bya'o zhes pa ste/ de nyid don dam par rgan rabs yin te/ bdag dang gzhan gyi rgyud la phan par byed pa'i phyir ro zhes bya'o zhes bya ba ni dam pa rnams kyis bshad do//tshul khrims la sogs pa'i yon tan dang ldan pa nyid ni dge sbyong yin gyi/ cha byad tsam ni ma yin no zhes bstan pa'i phyir/ brtul zhugs med cing zhes bya ba la sogs pa smos so/ /de nas dbyig pa can yul lda len na gnas pa'i rgyas pa dang / ro hi ta ka zhes bya ba'i bram zes bcom ldan 'das la 'di skad ces gsol to//kye gau ta ma khyod la dri ste/ btsun pa ji srid du cha byad blangs pa tsam gyis dge sbyong dang bram zer 'gyur ram/ de'i phyir btsun pa lho phyogs kyi yul lnga len na/ dge slong rab tu mang po dang bram ze rab tu mang po cha byad 'dzin pa mchis shing tshul khrims 'chal la sdig pa spyod pa zhes rgya cher te/de'i ched du tshigs su bcad pa gsum po 'di gsungs so/ /mgo bo bregs tsam dge sbyong min/ /zhes bya ba ni skra dang kha spu bregs pa tsam de ni kun rdzob tu yang dge sbyong du mi 'gyur te rtsig pa la bris pa'i mar me lta bu'o/ /ci'i phyir zhe na/brtul zhugs med cing zhes bya ba smos te/ brtul zhugs yod pa ma yin pa ste/ 'di la so sor thar pa'i tshul khrims thog mar gzung ba la sogs pas de ma bskyed pa'i phyir ro/ /cing zhes bya ba ni gang gi phyir zhes bya ba'i don te/ dge slong ni 'dir tshul khrims dang ldan pa yin no zhes pa'i tshig gis so//ji ltar tshul khrims legs par mi 'dzin par 'gyur ba'i rgyu smras pa/ de gcig pur ma zad de/ de las gzhan pa'i tshul khrims kyis kyang dge sbyong mtshon pa yin te/ bden par smras pa la sogs pas so/ /rab tu byung ba ni bden pa la dgongs pa yin no zhes pa'i tshig gis te/de nyid smras pa/ brdzun smra na zhes bya ba ste/ brdzun pa dang mi bden pa smra ba ste/ gang gis so sor thar pa'i tshul khrims tshul bzhin du blangs pa yang ngag gis yang dag par bsdams pa ma yin pa'o/ /des na de ni kun rdzob tu yang dge sbyong ma yin no//rab tu byung bar gyur nas ji ltar brdzun smra ba yin zhe na/ rmongs pa 'dod la zhugs pa dag /ces bya ba yin te/ srid pa dang ma rig pa gnyis kyis bskul ba'i lta ba de nyid la dmigs pa'o/ /ji ga dge sbyong yin nam kye/ /zhes bya ba ni ma zhi ba de nyid ni nam yang dge sbyong du mi 'gyur ro zhes bya ba'i don to//de nyid bshad pa tshul khrims dang bden pa dang bral ba la ni kun rdzob tu yang dge sbyong zhes bya ba'i gdags pa med par 'gyur te/ de gnyi ga dang ldan na ni dge sbyong du 'gyur ro/ /de lta na don dam pa'i dge sbyong gang yin zhe na/ smras pa/ 'phags pa'i gang zag rnam pa gnyis te/nyon mongs pa'i lhag ma dang bcas pa dang / lhag ma med pa'o/ /de la nyon mongs pa'i lhag ma dang bcas pa'i ni rgyun du zhugs pa la sogs pa bdun las brtsams pa ste tshigs su bcad pa gcig go/ /mgo bo bregs tsam dge sbyong min/ /zhes bya ba ni nges par brtags pa'i don to//gang gi sdig pa zhi gyur te/ /zhes bya ba ni gang gi rgyud la mthong ba'i lam gyi mthus lus la sogs pa'i nyes par spyod pa ngan song gi rgyu dang bral ba'o/ /de ni/ mkhas pas dge sbyong yin par shes/ /zhes bya ba ni gang zag de ni don dam par sangs rgyas kyi dge sbyong yin no zhes shes shing khong du chud par bya'o//nyon mongs pa'i lhag ma med pa las brtsams te/ gang dag sdig pa che phra zhes bya ba la sogs pa smos so/ /sdig pa zhi ba de dag ni/ /zhes bya ba ni bsgom pa'i lam gyis sdig pa spangs shing bor ba'o//de gang zhe na/ che phra dag ces bya ba ste/ khams gsum gyi bsgom pas spang bar bya ba'i phra rgyas so/ /kun la zhes bya ba ni mtha' dag ste/ sa thams cad kyi rnam pa spangs pa'i phyir ro/ /yang na chung ngu la sogs pa'o/ /de'i phyir yang sdig pa brtags nas spangs pa'i phyir zhes bya ba ni nyon mongs pa mtha' dag spangs pa'i rgyus dge sbyong nyid ces brjod par bya zhing de nyid yongs su rdzogs pa'i dge sbyong yin gyi/gzhan ni ma yin no zhes pa'i don to/ /gal te dge sbyong gi rnam grangs bram ze la sogs par ci'i phyir brjod ce na/ sdig pa spangs pa zhes bya ba la sogs pa smos so//bram ze me sbyin gyis bcom ldan 'das la zhus pa/ ji lta bu ni bram ze lags/ /dge sbyong dag ni ji lta bu/ /rab tu byung ba ci zhig lags/ /de ni bdag la bka' stsal gsol/ /zhes pa dang / des na tshigs su bcad pa 'di gsungs so/ /spangs pa ni gang gis spangs pa bcom pa ste/gang gis sdig pa de bcom par gyur pa nyid ni nyon mongs pa thams cad thag ring du spangs pa ste/ sdig pa la dga' ba'am/ 'dod pa la dga' ba'i sems spangs pa ni bram ze yin gyi tshangs pa'i skud pa gdags pa tsam gyis ni ma yin no/ /zhi bar spyod pa zhes bya bas ni nyon mongs pa thams cad nye bar zhi ba de'i phyir spyod pa ste/snying rje gdung ba'i blos sems can gyi don dang bdag gi don gang byed pa de nyid ni don dam pa'i dge sbyong dang zhi bar spyod pa zhes bya'o/ /bdag gi dri ma rab spangs pa/ /zhes bya ba ni gang gi phyir sems kyi nyon mongs pa dang nye ba'i nyon mongs pa la sogs pa'i dri ma bsal cing spangs pa des rab tu byung ba zhes bya'i/khyim gyi gnas yongs su btang ba tsam gyis ni ma yin no zhes bstan to/ /dge sbyong gi tshoms te bcu gcig pa'i rnam par 'grel ba rdzogs so// //don dam pa'i dge sbyong ni 'phags pa'i lam la rag las pa yin pa'i phyir de'i 'og tu lam gyi tshoms rtogs par bya ba'i phyir bstan te/gang tshe 'phags pa'i zhes bya ba la sogs pa smos so/ /'phags pa'i dge sbyong gi 'phags pa'i bden pa ni bzhi'o zhes mdo las gsungs nas tshigs su bcad pa gsum po 'di bka' stsal to//zag pa med pa'i lam 'thob pa'i 'phags pa de'i bden pa ste/ de nyid kyis sdug bsngal la sogs pa ji lta ba bzhin du rtogs pa'i phyir te/ so so'i skye bo phyin ci log la zhugs pas ni ma yin te/ des ni phyin ci log tu gzung ba'i phyir ro/ / bzhi zhes bya ba'i grangs 'di bstan pa ni blang ba dang dor bar bya ba nyid kyi thabs dang bcas pa khong nas rtogs pa'i phyir rnam par grol ba thob pa yin gyi/ srin bu la sogs pa'i grangs kyis ni ma yin no/ /de dag kyang sdug bsngal dang / kun 'byung ba dang 'gog pa dang lam mo/ /de la sdug bsngal ni 'bras bur gyur pa nye bar len pa'i phung po lnga'o//de nyid kyi rgyur gyur pa ni kun du 'byung ba'o/ /'gog pa ni thar pa'o/ /lam ni yan lag brgyad do/ /'di dag ni mngon par rtogs pa'i rim pa ste/ thog mar nad mthong zhing de'i nad gzhi dang / nad med pa dang / sman ston pa bzhin no//mthong ba ni so sor rtogs pa ste/ shes rab kyis zhes bya ba ni mthong ba'i lam gyis de dang po bskyed pa'i phyir ro/ /gang tshe ni dus gang gi tshe ste/ lam la rjes su shes pa'i bzod pa'i gnas skabs na zhes bya ba'i don to/ /mthong ba'i lam gyi 'bras bu bstan pa'i phyir smras pa/lam 'di rab tu shes pa yis/ /zhes bya ba ste/ de'i tshe 'di'i rnal 'byor gyis bsgom pa'i lam thob pa yin te/ sems kyi skad cig ma bcu drug pa ni bsgom pa'i lam yin pa'i phyir des na yang de'i 'og tu rtogs pa'i phyir ro/ /lam gyi khyad par ni/ srid pa'i sred pa rab tu 'dral//zhes bya ba smos te/ srid pa'i sred pa ste sred pa ni rnam pa gsum mo zhes bya ba'i tshig gis so/ /de rab tu 'dral ba ni spangs pa ste/ gang gis bden pa mthong ba la rag las pa yin pas khams gsum las 'dod chags dang bral ba'o/ /bden pa mthong ba la gzud pa'i phyir 'di gsungs so//bden pa mthong ba'i phan yon 'jig rten las 'das pa bstan nas/ 'jig rten pa'i bstan pa'i phyir smras pa/ bslang ba ni gtor ba'o/ /rlung gi zhes bya ba ni rlung mar gyi zhugs kyis so/ /rdul ni sa rdul lo/ /dper na zhes bya ba ni dpes 'jal ba'o//char pa bab pas zhi byed ltar/ /zhes bya ba ni sprin las char gyi rgyun 'og tu 'bab na zhi bar byed pa de bzhin du'o/ /kun rtog zhi bar 'gyur zhes bya ba ni de ltar so so'i skye bo'i sems la ngan song gi sdug bsngal gyi 'bras bu bsags pa'am 'dod pa la sogs pa'i rnam par rtog pa zhi bar 'gyur ro//gang tshe shes rab kyis mthong ba/ /zhes bya ba ni gang gi gnas skabs na mthong ba'i lam gyis bden pa rtogs pa de'i tshe na rags pa dang rtogs pa ngan pa spangs pa'i phyir ro/ /mthong ba'i lam gyi rgyu smras pa/ /shes rab de ni gtso bo yin/ /zhes bya ba ste/gang nges par 'byed par 'gyur ba'i shes rab de nyid 'jig rten pa thams cad kyi gtso bo yin te/ 'phags pa'i lam 'thob par byed pa'i phyir ro/ /de nyid kyi rgyu bstan pa'i phyir ni zhes bya ba'i sgra smras so/ /'jig rten zhes bya ba ni zag pa dang bcas pa'i phung po lnga yin te/ des las ches gtso bor gyur pa yin no//de ni nges 'byed 'gyur ba yin/ /zhes bya ba ni nges par 'byed pa yin pas nges 'byed de/ mthong ba'i lam zhes bya ba'i don to/ /de ni zhes bya ba ni nges par 'byed par 'gyur te/ mthong ba'i lam rtogs par byed pa dang / 'thob par byed pa dang 'dren par byed pa ste/'di lta bu'i tshul ni dro bar gyur pa la sogs pa'i nges par 'byed pa'i cha bzhi'am/ chos kyi mchog ste gang zhe na/ gang gis legs par rtogs pa yis/ /zhes bya ba smos te/ nges par 'byed pa'i shes rab kyi rgyur 'gyur ba gang gis mi rtag pa la sogs pa phyin ci ma log pa nyid du rnal 'byor des rtog pa de ni nges par 'byed par 'gyur bar shes par bya'o//de las ni dro bar gyur pa 'byung ngo / /de las ni bden pa bzhi'i spyod yul bcu drug yin no zhes bya ba la sogs pa'i tshig gis so/ /ci zhig rtog par 'gyur ba yin zhe na/skye shi legs par zad 'gyur zhing / /zhes bya ba ste/ skye ba dang shi ba ni skye shi ste/ sdug bsngal dang kun 'byung gi bden pa gnyi ga ste/ nye bar len pa'i phung po'i bdag nyid yin pa'i phyir de ni skye shi'i rnam grangs yin no/ /zad 'gyur zhing zhes bya ba ni 'gog pa dang lam gnyis bstan pa yin te/zad pa dang kun du zad pa ni 'gog pa'o/ /'dis zad par byed pas na zad par 'gyur ba ste lam mo/ /skye shi dang zad par 'gyur ba ni/ zlas dbye ba gcig tu bsdus pa ste/ des na 'phags pa'i bden pa bzhi zhes bya ba'i don to/ /gang de'i dbang gis bden pa mngon par rtogs par 'gyur ba ni de las gzhan pa'i 'jig rten pa'i shes pa la nus pa med do//des par 'byed pa'i cha nyid ni 'phags pa'i lam dang 'dra zhing mnyam pa'i rnam pa yin pa'i phyir dang / rjes su mthun pa'i rgyu yin pa'i phyir 'bras bu 'byung bar 'dod do/ / de ni skal ba mi mnyam pa'i rgyu las skyes pa yin no zhes gang brjod pa de ni rdzas skal ba mnyam pa ste/ rnam pa mnyam pa med pa'i phyir ro/ /lam gyi tshogs khyad par du gyur pa dang ldan pa'i phyir 'phags pa'i lam ni lam thams cad gtso bo yin no zhes bstan pa'i phyir/ bden pa'i nang na zhes bya ba la sogs pa smos so//bcom ldan 'das rgyal po'i khab na 'tsho byed kyi a mra'i nags na bzhugs so/ /de nas 'tsho byed gzhon nus bskyed bcom ldan 'das kyi spyan sngar song ste tshigs bcad kyis zhus pa/ 'bras bu'i nang na skyu ru mchog /rtsa ba'i nang na tsi tra ka /bska ba'i nang na mngar ba mchog /lan tshwa'i nang na rgyam tsha mchog /ces pa dang / de'i phyir tshigs su bcad pa 'di gsungs so/ /lam nang zhes bya ba ni thar pa thob pa'i thabs kyi nang na ste/ grub pa'i thabs gzhan dag tu bstan pa'i 'don pa dang phyag 'tshal ba dang / bzlas brjod dang /dka' thub dang / me la 'jug pa la sogs pa'i nang na ste/ dmigs kyis dbye ba ni bdun pa'o/ /lam thams cad kyi nang nas yang dag pa'i lta ba la sogs pa yan lag brgyad gang la yod pa de ni 'phags pa'i lam yan lag brgyad pa ste/ dbyug pa can bzhin no/ / gang gi phyir lam ni yan lag bsdus pa'i spyi ste/ yan lag drug pa'i phye ma bzhin no/ /mchog ni rab mchog ste/ rang gi 'bras bu sbyin par byed pa la 'khrul pa med pa'i phyir ro/ /lam gyi spyod yul bstan pa'i phyir/ /bden pa'i nang na bden bzhi dang //zhes bya ba smos te grub pa'i mtha' so so las kyang bden pa zhes brjod de/ 'di lta ste/ sems tsam pa rnams kyi bden pa ni gcig go/ /zad byed pa rnams kyi bden pa ni gnyis te/ kun rdzob dang don dam pa'i bdag nyid dam/ srog dang bcas pa'am srog med pa'i bdag nyid do//bram ze rnams kyi bden pa ni gsum mo/ /'dus byas dang dus gsum 'dod pa rnams kyi ni bzhi'o/ /tshig gi don lnga 'dod pa rnams kyi ni lnga'o/ /bye brag pa rnams kyi ni drug go/ /grangs can pa rnams kyi ni nyi shu rtsa lnga zhes bya ba la sogs pa ste/ de rnams kyi nang na 'phags pa'i bden pa bzhi'o//dang gi sgra ni mchog gi don to/ /de bzhin nyid phyin ci ma log pa'i phyir de'i yul nyid kho na las lam 'byung ba'i phyir ro/ /chos kyi nang na chags bral mchog /ces bya ba ni chags pa med par 'gyur ba ni 'byor ba med par gyur pa ste/ 'dir 'dod chags dang bral bas thob pa'i mya ngan las 'das pa ste/don thams cad kyi nang na thar pa ni gtso bo yin te/ dge ba nyid du rtag pa'i phyir ro/ /gang cung zad 'dus byas kyi chos dang 'dus ma byas kyi chos de rnams kyi nang na ni 'dod chags dang bral ba'i chos mchog go zhes mdo las gsungs pa'i phyir ro//rkang gnyis nang na mig can dang / /zhes bya ba ni lhag par spyan gsum dang ldan pa'i phyir mig can zhes bya ba yin te/ de bzhin gshegs pa'o/ /de ni rkang gnyis thams cad kyi nang na gtso bo yin te/ sems can gang su dag rkang pa med pa dang / rkang pa gnyis dang /rkang mangs zhes bya ba la sogs pa lung las 'byung ba'i phyir ro/ /sogs pa'i sgra ni phyi nas bstan pa'i phyir te/ rkang gnyis la sogs pa'i nang na bde bar gshegs pa nyid kho na mchog yin pas dang gi sgra'o/ /des na 'dis ni sman pa thams cad kyi nang na mchog ni bcom ldan 'das yin la/sman thams cad kyi nang na ni lam mo/ /nad thams cad kyi nang na ni 'khor ba'o/ /nad med pa thams cad kyi nang na ni thar pa ste/ de bas na 'di la khyod kyis 'bad par bya'i/ tshe'i rig byed yongs su shes pa ni sman pa yin no zhes ston pa yin no//de bas na tshul 'dis ston pa'i bden pa 'khrul pa med pa'i lam de'i yul bden pa ni don thams cad zil gyis non pas thar pa'i 'bras bu'i lam la bdag nyid la phan par 'dod pa rnams kyis brtson 'grus brtsam par bya'o zhes 'dis ston pa yin no/ /rgyu gang gis bden pa mthong bar 'gyur ba yin zhe na/smras pa/ 'du byed thams cad ces bya ba la sogs pa'o/ /de nas dge slong grogs po bzhi zhig bcom ldan 'das kyi spyan sngar phyin te/ 'di skad ces btsun pa gang gis bdag cag zag pa zad par 'gyur ba de ltar bdag cag la bsdus te chos bstan du gsol zhes zhus pa dang /ji tsam na de dag las gcig ni lta ba gzhan no/ /lhag ma ni bde ba la sogs pa'i lta ba can te/ go rims bzhin du de dag gi dbang du mdzad nas tshigs su bcad pa bzhi dang bsdus pa bzhi gsungs so/ /'du byed thams cad mi rtag par/ / zhes bya ba la/ 'bras bur gyur pa'i nye bar len pa'i phung po lnga'i bdag nyid thams cad ni skad cig ma yin no/ /dngos po'i don thams cad ni 'dus byas yin no zhes mi rtag pa nyid du yid la byed do/ /'o na kun 'byung dang lam yang 'du byed nyid yin na de gnyis la mi rtag pa'i rnam par ma mthong na de ji ltar 'du byed thams cad ces brjod na bshad pa/thams cad phyogs gcig gi dbang du byas pa ste/ dper na mar thams cad 'thungs zhes bya ba dang / zas thams cad zos zhes bya ba bzhin no/ /gang tshe shes rab kyis mthong ba/ /zhes bya ba ni so sor rtogs shing rig pa ste/mi rtag pa'i rnam pas gang gis gnas skabs la mthong ba'o/ /de nas sdug bsngal las yid 'byung / /zhes bya ba la/ de nas zhes bya ba ni de'i tshe zhes bya ba'i don te/ gang gi tshe mthong ba de'i tshe'o/ /yid 'byung ba ni skyo ba skye bar 'gyur ba ste/ rnal 'byor can de 'khor ba la rgyab kyis phyogs pa'o//gang las she na/ sdug bsngal las zhes bya ba smos te/ 'bras bur gyur pa'i phung po las te/ skyo ba'i gzhi yin pa'i phyir ro/ /ci phyir sdug bsngal las skyo bar 'gyur gyi/ lam las ma yin zhe na/smras pa/ lam 'di rnam par dag par 'gyur/ /zhes bya ba yin te/ khams gsum gyi sdug bsngal las skyo ba skyed pa nyid ni mi rtag pa'i lam 'di yin te/ khams gsum gyi phra rgyas spong bar nus pa'i thabs zhes bya ba'i don to/ /rnam par dag par 'gyur zhes bya ba ni rnam par grol ba'i phyir te/'dod chags dang bral ba thob par byed pa'i phyir 'phags pa'i lam mo/ /ji ltar yid 'byung ba yin zhe na/ de bzhin du 'og nas 'byung ba'i tshigs bcad la yang ci rigs par brjod par bya'o/ /gang mi rtag pa las ni sdug bsngal ba yin no zhes bstan pa'i phyir/'du byed thams cad sdug bsngal bar/ /zhes bya ba smos te/ 'phags pa dang mi mthun pa'i phyir te/ gang gi phyir 'phags pa ni mya ngan las 'das pa las gzhol zhing srid pa la mi gzhol ba yin te/ ji ltar spyod pa bzhin du yang rnam par 'byung ba yin no/ /gang gi phyir phung po dag la rtag par 'dzin pa la/goms pa yin pas de mi rtag pa'i rnam pas mthong ba'i lam la gzud pa yin no/ /gang bde ba las bzlog pa de'i sdug bsngal gyi rnam pas zhes bya ba la sogs pa'o/ /mgon med pa nyid sdug bsngal gyi bdag nyid yin par bstan pa'i phyir smras pa/'du byed thams cad stong pa nyid/ /ces bya ba la/ stong pa nyid zhes bya ba ni sus kyang gnas pa med pa'i phyir te/ dper na grong na rgyal po gnas pa bzhin du 'dus byas 'di dag bdag gang gis kyang gnas pa med do/ /ma bzlog pa'i nad la sogs pa ni dri mas nye bar gdung ba'i phyir ro//'dus byas kyi tshogs 'di dag ni stong pa ste/ 'di la sems can med do/ /zhes bya ba mdo las gsungs so/ /bde ba dang sdug bsngal la sogs pa ni rtag pa'i rgyu'i dngos po las 'byung ba yin pa'i phyir smras pa/ 'du byed thams cad bdag med pa/ / zhes bya ba ste/ dngos po thams cad la bdag med pa'i tshul gyis mthong ba yin te/ de'i phyir chos thams cad ni rang dbang med pas rga ba dang 'chi ba yin te/ 'dod bzhin du byed pa dang bral ba'i phyir ro/ /mthong ba'i lam la yang sdug bsngal gyi bdag nyid chos la bdag med pa nyid du rtog pa yin no//bden pa'i yul ni so sor nges pa yin pa'i phyir te/ mngon par rtogs pa yang sdug bsngal gyi bden pa'i rnam pas yin no/ /lhag ma'i rgyu ni mtshon pa tsam du byas te/ de yang bstan bcos ji lta ba bzhin du shes par bya'o/ /de'i phyir gang la mi rtag pa'i rnam pa la sogs pa'i lam skyes pa de la ni nges par kun 'byung gi bdag nyid rnam pa bcu gnyis gang zag ji lta ba dang /dus ji lta ba bzhin du skye bar 'gyur te/ nges par de las zhes bya ba smos so/ /kun 'byung yang rnam pa bzhir bcad pa ste/ bden pa yin pa'i phyir sdug bsngal gyi bden pa bzhin no zhes bya ba la sogs par brjod par bya'o//ji skad du bshad pa'i lam la gdul bya dag gzud pa'i phyir smras pa/ bstan zhes bya ba ni bshad pa'o/ /khyed cag rnams la zhes bya ba ni khyed cag rnams kyi phyir ro/ /ngas ni zhes bya ba ni bdag gi don thams cad grub cing bya ba byas so//gal te gzhan dag brjod pa ni gzhan du yang brjod de/ nga ni thams cad mkhyen pa ste/ /thugs rje chen po dang ldan pa gang bdag gis bshad pa ni ma nor ba de bzhin nyid du bstan to/ /lam ni phyin ci ma log pa'i thar pa thob pa'i thabs so/ /a raN+Da dra ka zhes bya ba la sogs pas bstan pa'i lam dgag pa'i phyir smras pa/mi shes zug rngu gcod byed ces bya ba ni lam gzhan dag gis ni 'di ltar nus pa yin te/ mi shes pa ni zad la mi skye ba'i ye shes de thob pas kun shes pa dang ldan pa yin no zhes bya ba lung las 'byung bas so/ /de'i zug rngu ni mngon sum du gegs yin te/srid pa'i rtse mo'i nyon mongs pa de gcod pas na gcod pa ste rtsa ba nas bcad pa'o/ /'dis ni ston pa'i lam gyi nyes pa bsal to/ /khyed cag rnams kyis bya dgos so/ /zhes bya ba ni khyed cag nyid kyis bya dgos pa'i phyir te/ lam de rtogs shing goms par bya ba la bag yod par bya ba ste/gang gi phyir gzhan byed pa ni med do/ /gal te de lta yin na ni bcom ldan 'das sems can thams cad kyi don la nan tan du mdzad pa dgyes par 'gyur ro/ /lam bstan pa ji tsam gyis nus pa de la bag yod par bya'o zhes de nyid bstan pa'i phyir smras pa/ston pa ste zhes bya ba ste/ ston pa po kho na ni sangs rgyas bcom ldan 'das te/ rdzu 'phrul dang / mchog sbyin pa la sogs pa'i mthus gzhan gyi rgyud la lam bskyed par mi mdzad do/ /ji srid pa'i rtse mo'i phra rgyas spang pa'i lam nyi tshe ston par zad kyi/sa gzhan gyi gnyen po ma yin nam zhe na/ sred pa'i zug rngu zhes bya ba la sogs pa smos te/ bstan pa zhes bya ba ni rgya cher rnam par phye ba'o/ /sred pa'i zug rngu zhes bya ba ni 'khor ba thams cad kyi rgyu thar pa 'thob pa'i bgegs rjes su chags pa'i kun du sbyor ba yin te/ji ltar mkhris pa yang dag par skyes shing skom pa'i nad la bkru sman thabs yin pa de bzhin du chags pa 'di la yang 'di bstan pa'i phyir sel ba'i lam zhes bya ba smos te/ lam gyis chags pa'i zug rngu drungs 'byin pa zhes bya ba'i don to/ /sel ba ni 'gro ba'i don te/ rgyud las bstsal cing 'gro bar byed pa ste/phral ba dang tha dad par byas pa zhes bya ba'i don to/ /ston pa dang bstan pa ni bsdus pa dang rgya cher bstan pa'i dbye ba yin no/ /yang na ston pa ni cung zad 'chad pa ste/ bsdus nas zhes bya ba'i don to/ /gang gi phyir sngar ni nye bar gnas pa'i gdul bya dag gi ngor srid pa'i rtse mo'i spang ba tsam gsungs la/'og mar ni sa dgu'i 'dod chags spang ba'o/ /ston pa po ni ston par byed pa'o/ /'o na mthong ba'i lam kho na 'di ltar bstan pas ni nyon mongs pa thams cad spong bar byed mi nus na de ji ltar 'di skad bshad ce na/ dang po mthong ba las ni mthong ba'i lam du bstan te/de nyid goms par byas na bsgom pa'i lam nyid yin gyi/ gzhan ma yin no zhes bstan pa'i phyir/ /lta ba rnam par dag byed ces bya ba la sogs pa'o/ /'di zhes bya ba ni de bzhin nyid du ste/ ji skad du bshad pa'i rnam pa 'phags pa'i lam nyid thar pa 'thob pa'i thabs yin gyi gzhan ma yin te/'jig rten pa'i lam gyis ni srid pa'i rtse mo'i nyon mongs pa spang bar mi nus shing 'thob par mi nus so/ /lam de lta bus ci'i phyir zhe na/ lta ba rnam par dag byed pa/ /zhes bya ba ste/ blo dri ma med pa'i phyir phra rgyas thams cad spong ba yin te/blo ngan pa dag la ni spong bar nus pa med do/ /de'i phyir dge slong dag gang gi tshe 'phags pa'i shes rab kyis spangs pa zhes mdo las gsungs so/ /yang na 'jig tshogs la lta ba la sogs pa'i de la lta ba rnam par dag pa ste/ de spang ba'i phyir lam 'di la 'jug pa yin te/'di nyid mthong ba rnam par dag par byed pa yin no/ /ga las shes par bya/ dad pa tsam mam tshig tsam gyis ma yin nam zhe na/ rab tu zhugs zhes bya ba smos te/ sgrub pa la zhugs pa ste/ 'phags pa'i lam bsgoms pa la mchog tu byed pa'o/ /spang bar gyis zhes bya ba ni yongs su spongs shig ce'o//ting nge 'dzin la zhes bya ba ni sems rtse gcig pa la zhugs pa'i zhi gnas te/ yid g.yeng bas ni tshogs 'di bsgrub cing dmigs par mi nus so/ /de lta bus ci zhig spang bar bya zhe na/ bdud kyi 'ching ba zhes bya ba ste/ 'ching ba 'thob par byed pa'i phyir bdud de nyon mongs pa'i 'ching ba 'thob par byed ces bya ba'i don to//lam 'di ji skad bshad pa'i 'bras bu yod pa nyi tsher ma zad de/ 'di lta bur yang yod do zhes brtag pa'i phyir/ 'di ni drang lam zhes bya ba la sogs pa'o/ /'di ni zhes bya ba la bstan ma thag pa ste/ 'phags pa'i lam mo/ /mchog tu ma yo ba ste bdag med pa'i rnam pa la sogs pas mya ngan las 'das pa drang po yin pa'i phyir na phyir mi ldog cing drang ba zhes bya ba'i don to/ /'di ni pha rol gnon pa zhes bya ba'i lam 'di kho na ni nyi ma shar ba bzhin du nyon mongs pa dang mun pa'i tshogs sel ba yin zhing /'dis ni sdug bsngal gyi rgya mtsho las rgal ba'i phyir ro/ /gzhan zil gyis gnon pa ste/ skyes bu byed pa gang rang gi gnyen po bsten par nus pa zhes bya ba'i don to/ /de nyid kyi phyir gnyis kyi khyad par gyi sbyor ba smras pa/ bgrod pa gcig pa zhes bya ba smos te/gcig po 'dis 'gro bar byed pas na bgrod pa gcig pa ste/ thun mong ma yin pa'i thar pa'i lam 'di la thog mar dge sbyong zhes bya ba la sogs pa mdo las gsungs so/ /ji lta bu zhe na/ ngang pa'i srang ltar zhes bya ba yin te/ ngang pa'i lam yin pas ngang pa'i srang ste ngang pa'i 'gro ba zhes bya ba'i don to//dper na ngang pa ni mtsho zhes bya ba ste/ mtsho chen po la bgrod pa gcig pa zhes bya ba ni gcig tu der 'bab pa yin zhing dur khrod kyi sa phyogs su ni ma yin no/ /de bzhin du 'phags pa'i lam yang thar pa la gcig tu 'bab pa yin gyi 'khor bar ni ma yin no//de yang gang yin zhe na/ rtogs nas zhes bya ba smos te/ lam gang rtogs pa dang ldan pa'o/ /shAkya thub pas ni rdo rje'i gdan la bzhugs pa nas lam 'di nyid bshad do/ /da ltar gyi bstan pa'i ston pa ni shAkya thub pa yin te/ des na nye bar gnas pa'i phyir smos pa yin gyi/de ltar de bzhin gshegs pa thams cad kyis kyang lam 'di nyid rtogs pa yin no/ /ji lta bu la gnas nas she na/ mnyam gzhag ces bya ba ste/ g.yeng ba thams cad spangs nas sems rtse gcig tu byas pa yin te/ mnyam par gzhag pa'i sems las ni yang dag pa ji lta ba bzhin du rtogs par 'gyur ro zhes bya ba'i tshig gis so//ci yang med pa'i skye mched las 'dod chags dang bral ba ni byang chub sems dpa' thams cad kyis nges par zil gyis gnon to zhes bya ba ni grub pa'i mtha'o/ /ting nge 'dzin med par ni de med pa yin no zhes bstan to//bshad pa 'di zhes bya ba ni nyid kyis thugs su chud pa'i lam nyid bshad pa yin te/ thugs rje'i dbang gis gzhan dag la ston te/ bdag nyid kyis rtogs pa gcig pur ma zad de/ gzhan dag la yang de nyid ji lta ba bzhin du ston zhes bya ba'i don to/ /tshogs la zhes bya ba ni sems can gyi phung po la ste/'dis ni phyogs su ltung ba med par bstan to/ /yang dang yang zhes bya ba ni skad cig skad cig la ste/ 'dis ni yang 'byung ba med par bstan to/ /sngar bstan pa nyid kyi nus pa bstan pa'i phyir smras pa/ skye shi'i mtha' zhes bya ba la sogs pa'o//dge slong dag 'di la dus gcig na u ru bil ba nang gnas te/ chu bo nai rany+dza na'i ngogs na ji tsam na bdag nyid gcig pu 'dug ste/ ring por mi thogs par mngon par rdzogs par sangs rgyas par 'gyur ro zhes rtog pa skyes so/ /bgrod pa gcig pa'i lam 'di ni sems can rnam par dag pa'i phyir dang /mya ngan gyis gdungs pa rnams las 'das pa'i phyir dang / sdug bsngal dang yid mi bde ba med par bya ba'i phyir dang / rigs pa'i chos rtogs par bya ba'i phyir te/ 'di lta ste dran pa nye bar gzhag pa bzhi gang la las 'di dag tu grub pa'i 'phags pa des ni rigs pa'i chos 'thob pa yin te/gang 'phags pa'i rigs pa'i chos 'thob pa des ni ji srid du 'phags pa'i lam gyi bdud rtsi thob pas de yongs su mi gtang ba yin te/ skye shi zhes bya ba la sogs pa'i tshigs su bcad pa bzhi'o/ /bgrod pa gcig ni mya ngan las 'das pa kho na'i thabs yin gyi/'khor ba'i phyir ni ma yin zhes bya ba'i don to/ /skye shi'i mtha' rtogs zhes bya ba ni de bzhin gshegs pa'o/ /skye shi zhes bya ba'i sgra ni 'khor ba rgyu dang bcas pa la brjod do/ /mtha'i sgra ni thar pa ste/ de gnyi ga mngon sum du gzigs pa ni thams cad mkhyen pa zhes bya ba'i don to//skye ba dang rga ba dang 'chi ba la sogs pa'i gnod pa dag rtogs pa'i phyir phyin ci ma log par rtogs pa dang ston pa ni de nyid do/ /lam ni rab tu bstan mdzad pa/ /zhes bya ba ni thar pa'i thabs gzhan dag la ston pa'o/ /gzhan la ston pa'i rgyu ni thugs rje nyid yin par bstan pa'i phyir/phan mdzad thugs brtse ba zhes bya ba smos te/ phan pas 'bras bu'i rjes su brtse ba gang la yod pa ste/ thugs rje chen po zhes bya ba'i don to/ /gang gi phyir thugs rje chen po ni thugs rje che bar byed pa dang yongs su skyob par byed pa yin no/ /bgrod pa gcig pa 'di yang ga las she na/'di ltar lam 'di zhes bya ba yin te/ 'phags pa'i lam nyid kyis so/ /sngon zhes bya ba ni sngon gyi dus so/ /rgal ba ni rgal ba ste/ nyon mongs pa'i rgya mtsho dang 'khor ba'i rgya mtsho las rgal ba ste/ mar me mdzad la sogs pa'i thub pa dang / de'i nyan thos dang rang sangs rgyas rnams so//de bzhin rgal bar 'gyur zhing zhes bya ba la/ lam 'dis zhes bya ba drang ba'i don ni de bzhin gyi sgra ste/ 'dis ni byams pa la sogs pa ma 'ongs pa na 'byung ba 'khor dang bcas pa rgal bar 'gyur ba'o/ /rgal bar mdzad ces bya ba ni da ltar byung ba'i dus kyi shAkya thub pa 'khor dang bcas pa yang rgal ba yin no//gang las rgal ba yin zhe na/ smras pa/ chu bo rnam pa bzhi ste/ nyon mongs pa'i chu bo'am/ 'khor ba'i rgya mtsho las so/ /'phags pa'i lam bstan pas de'i tshogs dang / 'jig rten pa'i dgos pa smras pa/ shin tu mthar gtugs zhes bya ba la sogs pa ste/gzhan dag ni rje ngar spom po zhes bya ba'i kun du rgyu zhig gis bcom ldan 'das la/ ci'i phyir de bzhin gshegs pas lam bstan zhes gsol pa las/ de'i dbang du mdzad pa yin no zhes zer ro/ /shin tu zhes bya ba ni yang ldog pa med pa'o//mthar thug cing tha mar gyur pa gang la yod pa de ni mya ngan las 'das pa ste/ phung po lhag ma med pa'i ming tsam de la'o/ /de rtogs pa'i phyir bstan pa ste/ lam ma rtogs par ni de thob pa med pa'i phyir ro/ /'phags pa'i lam gyi 'bras bu thun mong du bstan nas/ thun mong ma yin pa bstan pa'i phyir/gdul bya zhes bya ba smos te/ dbang po nye bar zhi ba'i phyir skyes pa ste/ mi slob pa'i lam ni dbang po dul ba la 'khrul pa med pa'i phyir ro/ /phung po lhag ma dang bcas pa'i mya ngan las 'das pa 'dis bstan nas bsgom pa'i lam gyi 'bras bu smras pa/dag bya dang zhes bya ba yin te/ de la brten nas nyon mongs pa'i sgrib pa thams cad dang bral zhing sems dri ma rnam par dag cing rnam par grol ba de'i phyir 'di yang lam gyi 'bras bu yin no/ /'khor ba'i skye shi zad par bya ba dang / /zhes bya ba smos te/ 'dir 'khor ba ni ngan song gi phung po lnga'i bdag nyid mthong ba'i lam gyi 'bras bu'i gnas skabs so//de la gang skye shi ni skye ba dang 'jig pa gnyis so/ /zad pa ni bral ba ste de'i phyir mthong ba'i lam gyi stobs kyis ngan song gi phung po ni so sor ma brtags pa'i 'gog pa thob pa'i phyir ro/ /dang gi sgra ni ting nge 'dzin gyis rnam par rol pa la sogs pa yongs su gzung ba'i phyir ro//'phags pa'i lam gyi tshogs su gyur pa'i lam gyi phan yon smras pa/ khams rnams du ma so sor rtogs bya'i phyir/ /zhes bya ba smos te/ khams du ma ni khams mang po pa zhes bya ba la sogs pa'i mdo las gsungs te/bsam pa dang rang bzhin de rnams so sor yang dag par rig pa'o/ /gnas dang gnas ma yin pa so sor rig cing / gnas rnam pa bdun la mkhas pa la sogs pa de ni 'di'i don to/ /bcom ldan 'das kyis bstan pa'i lam gyi mthu nyid kyis dbang po las 'das pa'i tshig gi don yang yongs su shes par 'byung ba'i phyir ro//spyan ldan zhes bya ba ni thams cad mkhyen pa ste/ sangs rgyas kyi spyan gyis kun du lta ba dang / rnam par lta ba yin no zhes lung las 'byung ba'i phyir ro/ /'dir thams cad rtogs pa ni spyan zhes bya ba ste/de dang ldan pa ni spyan dang ldan pa'o/ /de'i lam ni 'phags pa'i lam dang de'i tshogs te/ 'dir ni 'jig rten 'dir ro/ /rab tu bstan pa ni bshad pa'o/ /'di'i dgos pa'i gtso bo ni thar pa nyid yin te/ de la gzhol ba'i phyir ro zhes de nyid kyi don yang dpe dang bcas par bstan pa'i phyir ro//ji ltar chu klung zhes bya ba la sogs pa smos so/ /'di ltar gang gA zhes bya ba ni chu bo'o/ /chu rgyun ni chu'i rgyud do/ /rgya mtsho ni chu chen no/ /de las gzhan ni de'i snod dang rjes su mthun pa med pa'i phyir ro/ 'bab par 'gyur ba ni 'brub par 'gyur ba'i don to/ /chu klung ni chu bo'o/ / ji ltar zhes bya ba ni nges par gzung ba'i don te/ rgya mtsho nyid gang gA'i chu klung dang mthun pa yin gyi/ chu bo chen po gzhan dag ni ma yin te/ de dag gi rgyun 'di nyid du zad par yang srid pa'i phyir te/ de nyid bstan pa'i phyir shugs zhes bya ba smos te/ shin tu che ba'i phyir rgyun chad par mi 'gyur zhing 'byung ba'i mtshan nyid kyi shugs gang la yod pa de ni gang gA'o//de bzhin ni de ltar te/ sngar bstan pas lam mo/ /shes rab yangs pas zhes bya ba ni shes bya thams cad la khyab pa'i shes rab yod pa des bstan pa ste/ thams cad mkhyen pas bstan pa'o/ /'jug ces bya ba ni de'i spyod par ro//'chi med thob par bya phyir zhes bya ba ni 'chi ba la sogs pas 'jigs pa dang bral ba thob par bya ba'i phyir ro/ /dper na chu bo gang gA ni rgya mtshor bgrod pa gcig pa de bzhin du bcom ldan 'das kyis bstan pa'i lam yang mya ngan las 'das pa 'thob pa'i bgrod ba pa gcig pa'o//shes rab yangs pas bshad pa de gang yin zhe na/ gang zhig 'byung po zhes bya ba la sogs pa yin te/ chos ni 'dir 'phags pa'i lam ste/ de 'khor lo bzhin du rtsibs la sogs pa chos kyis mthun pa'i phyir ro/ /'di'i 'byung ba ni lha zhig gis mngon par brjod de/gnas brtan kauN+Di n+yas bcom ldan 'das la chos kyi 'khor lo bskor bar bskul lo zhes lung las 'byung ngo / /sngon chad ma thos zhes bya ba ni skye ba gzhan dag tu slob dpon brgyud pa las ma 'ongs shing sngon gyi ba ra da la sogs pas mi rnyed pa'i phyir te/ des ni 'jig rten pa'i lam gyi gtam gyi gnas skabs thob pa yin gyi/ 'phags pa'i lam ni ma yin no/ /bskor zhes bya ba ni bskor bar gyur pa ste/ 'di ji ltar bdag gis rtogs pa de bzhin du gzhan gyi rgyud la yang bstan pas bsgrub pa'i phyir ro/ /'byung po kun la thugs brtse bas//zhes bya ba ni/ gang la sems can thams cad la bye brag med par 'jug pa'i thugs rje mnga' ba ste/ rgyu med par gzhan la phan pa mdzad pa'i phyir de bzhin gshegs pas lam bstan pa yin te/ grags pa la sogs pas gos pa'i phyir ni ma yin no zhes shes par bya'o/ / skyob pa ni 'dis skyob par byed pas skyob pa ste/ de nyid ston pa'o/ /de ni 'phags pa'i lam bstan pas gdul ba'i skye bo'i rgyud yongs su srung ba ste/ dper na bu gcig pa la brtse ba'i ma zhes bya ba la sogs pa ji skad du gsungs pa'o/ /yang na bcom ldan 'das chos thams cad la mnga' brnyes pas skyob pa zhes bya ba la sogs pa'i tshig gis so//de bstan pa gsal bar bya ba'i phyir/ lha dang mi rnams 'dul mdzad pa/ /zhes bya ba smos te/ lha dang mi gnyis gdul bar mdzad pa zhes bya ba'i tshig sbyar te/ lha dang mi rnams kyi ston pa sangs rgyas bcom ldan 'das zhes lung las 'byung zhing de gnyis 'ba' zhig bden pa rtog pa'i skal ba dang ldan pa'i phyir ro//'dul mdzad pa ni ston pa mdzad pa'o/ /dam pa de la phyag 'tshal lo/ /zhes bya ba ni sems can khyad par can 'di lta bu ste/ 'phags pa'i khyad par shes pa dang so so'i skye bo gus pa dang bcas pas rgyun du ste/yongs su mya ngan las 'das kyang phyag 'tshal bar 'gyur na bzhugs par gyur na lta smos kyang ci dgos zhes pa'o/ /'gyur ba zhes bya ba ni sgra bstan pa'i phyir sred pa'i mthar phyin zhes bya ba smos te/ 'khor ba'i mthar thug pa phung po lhag ma med pa'i mya ngan las 'das par phyin pas kyang bsnyen bkur bya ba'o//gang gi phyir thub pa ni yon tan dang ldan zhing skyon med pa'i phyir dang / gzhan la phan pa mdzad pa'i phyir skye bo dam pa thams cad kyis mchod pa yin te/ de bas na des bstan pa yang gzung bar bya'o zhes tshigs su bcad pa 'dis bstan to//de nas bstan pa 'di la brten pas de'i 'bras bu thob pa yin gyi/ gzhan sems skyo ba dang ldan pa rnams kyis ni ma yin gyi/ de nyid bstan pa'i phyir smras pa/ rnam rtog dge ba zhes bya ba la sogs pa'o/ /sdig pa rnam par rtog pa ni gsum ste/ 'dod pa'i rnam par rtog pa dang /gnod sems kyi rnam par rtog pa dang / rnam par 'tshe ba'i rnam par rtog pa'o/ /dge ba'i rnam par rtog pa yang gsum ste/ nges par 'byung ba'i rnam par rtog pa la sogs pa'o zhes pa nas ji tsam na 'di gsungs so/ /gsum ni grangs gsum mo/ /de las gzhan pa'i rnam par rtog pa ni 'di'i dbye ba yin pas 'di'i nang du 'dus pa'i phyir ro//rnam par rtog pa ni kun du rtog pa'o/ /dge ba ni 'dod pa'i 'bras bu ste/ nges par 'byung ba la sogs pa'i rnam par rtog pa/ bsam gtan dang po'i sa pa'i brtag bya zhing / /zhes bya ba ni mngon du phyogs pa dang goms par bya ba'o//de la brten nas ji srid na spong ba yin te/ de smras pa/ dge ba ma yin gsum yang rnam par spangs/ /zhes bya ba'i 'dod pa rnam par rtog pa la sogs pa gsum ni 'bras bu'i mi 'dod pa yin pas rnal 'byor can gyi rgyud las thag ring du spang bar bya'o/ /de nas zhes bya ba ni mi dge ba'i rnam par rtog pa gsum spangs shing mnyam par gzhag pas dge ba rnam par rtog pa gsum yongs su blangs nas so//rtog dang zhes bya ba ni 'dod pa na spyod pa dang / bsam gtan dang po'i sa ba'i sems rags pa'i mtshan nyid mtha' dag go//dpyod pa ni sems phra ba'i mtshan nyid de dpyad pa ni bsam gtan khyad par can gyi sa pa yin no/ /zhi bar bya ba zhes bya ba ni bsal ba dang spang bar bya ba ste/ 'di ltar bsam gtan dang po la brten nas/ 'dod pa na spyod pa'i dge ba dang mi dge ba'i rnam par rtog pa dang /rnam par dpyod pa spong ba yin no/ /bsam gtan gnyis pa la brten nas kyang bsam gtan dang po'i spong ba yin te/ 'dir mthun pa'i dpe bstan pa/ kun nas rdul langs char gyis mnan pa ltar/ /zhes bya ba yin te/ dper na char 'bab pas ni rlung chen po langs pas kun nas bslang pa'i rdul nye bar zhi bar byed pa de bzhin du'o//de nas zhes bya ba ni mi dge ba'i rnam par rtog pa dang / dge ba'i rnam par rtog pa dang / dpyod pa gnyis kyang mnyam par gzhag pa'i sa pa dag gis spong zhing / bla med byang chub bde la reg par 'gyur/ /zhes bya ba 'di dang sbyar ro//sems la rnam rtog nyer zhi nas/ /zhes bya ba ni gang la rnam par rtog pa rnams nye bar zhi zhing bral ba'i sems la gcig tu gyur pa bsam gtan gnyis pa la sogs pa nyid la byed pa'i rgyus 'dod pa'i khams spang dka' ba de dang / bsam gtan dang po'i g.yeng ba'i rnam par shes pa 'gog par byed pa ni gong ma'i ste/de'i phyin ci log yin pa'i phyir ro/ /byang chub bde la reg par 'gyur/ /zhes bya ba ni rnal 'byor can des zas la mi skye ba'i ye shes dang 'brel pas sred pa zad pa'i phyir 'thob pa'am/ snyoms par zhugs pa'i khyad par gyi bde ba'o//bla na med ces bya ba'i skyon dang bral ba'i phyir byang chub kyi bde ba ni mchog yin no/ /dben pa las skyed pa nyid kho na'i bsam gtan la sogs pas nyon mongs pa'i mdud pa spong ba yin no zhes bstan pa'i phyir smras pa/ ting nge 'dzin zhes bya ba la sogs pa'o//mdud pa rnam pa bzhi ste brnab sems lus kyi mdud pa zhes bya ba la sogs pa nas 'di gsungs so/ /btsun pa 'dod pa thams cad gang gis spong bar 'gyur zhes su 'dri ba po'i gcer bu ba'i nyan thos zhig las brtsams so zhes gzhan dag zer ro/ /ting nge 'dzin ni gsum ste/stong pa nyid dang mtshan ma med pa dang smon pa med pa ste/ grangs gsum po de rnams la'o/ /yid gtad cing zhes bya ba ni rab tu chags pa dang sems zhen par bya ba zhes bya ba'i don to/ /de'i mthus mdud pa thams cad spong ba'i phyir te/ rdo rje lta bu'i ting nge 'dzin zhes bya ba'i mdo las 'byung bas so//yang na rtog pa dang bcas shing dpyod pa dang bcas pa la sogs pa gsum mo/ /dben pa las skyes tshad med bsgom par bya/ /zhes bya ba ni gang ting nge 'dzin bsgoms pa'i 'bras bu bstan pa ste/ de la yang dag par bsten pas tshad med pa la sogs pa'i khyad par rnams so//sa 'og ma dag las skyo ba skyes nas de byams pa la sogs pa tshad med pa bsgom par bya ste/ ting nge 'dzin gyi mthus thob pa'i phyir ro/ /yang na de bsten par bya'o/ /tshad med pa ni sems can la brten nas 'byung ste/ tshad med pa'i bsod nams 'byung ba'i phyir dang /tshad med pa'i 'dod pa'i 'bras bu yin pa'i phyir ro/ /byams pa dang snying rje dang / dga' ba dang btang snyoms zhes brjod pa ni gnod sems dang / rnam par 'tshe ba la mngon par dga' zhing 'dod pa la 'dod chags dang gnod sems kyi gnyen po yin pa'i phyir tshad med pa bzhi'i sgrar brjod do//'jig rten dang 'jig rten las 'das pa'i lam spyir bstan nas/ 'jig rten las 'das pa'i lam gyi rab tu dbye ba ni gnas gsum zhes bya ba smos te/ khams gsum pa 'di ni sems can rnams kyi gnas te rten yin no/ /gzhan dag ni ngan song gsum du 'dod de/de gang gi phyir de ni so so'i skye bo rnams kyi rang bzhin gyi gnas te/ de yang mthong ba'i lam gyis ring du byas pa yin no/ /gsum po rnams kyis gnas gsum rab tu dral/ /zhes bya ba ni sngar bshad pa'i ting nge 'dzin gsum ste/ de'i gnyen por gyur pas rdo rjes ri chen po phye mar 'joms shing 'thag pa bzhin du spong ba yin no//gsum smos pa ni tshad med pa rnam par bcad pa'i phyir ro/ /de dag ni gzhi yin pa'i phyir dang / mos pa tsam yid la byed pa'i phyir ro/ /de nyid yid la byed pas ni nyon mongs pa spong ba nyid do/ /yang na gsum ni tshul khrims dang /ting nge 'dzin dang / shes rab kyi phung po dang / 'phags pa'i lam gyi phung po gsum yin pa'i phyir ro/ /de ltar yang dag par zhugs pa'i rnal 'byor can gyis ni zhi bya zhing zhes bya ba ste/ rab tu spang ba'o/ /mdud pa ni nyon mongs pa dang nye ba'i nyon mongs pa 'ching bar 'gyur ba ste/bdag nyid 'ching bar byed pa'i phyir mdud pa 'di dag ni phra rgyas te/ 'khor ba'i rtsa ba zhes lung las 'byung ba'i phyir ro/ /'dis bsgom pa'i lam gyi bya ba bstan nas/ mi slob pa'i lam bstan pa/ nges pa srung ba yin pas na rtogs shing mkhas pa ste de nyid kyis bdag dang gzhan yongs su srung bar nus pa'i phyir ro//'dis ni shes bzhin dang ldan par bstan to/ /nges par rtog pa sngon du 'gro bas bag yod pa ste/ nges par rtog par byed pa zhes gzhan dag zer ro/ /dran ldan zhes bya ba ni dran pa 'jug pa dang / dran pa dang ldan par rtag tu nye bar mtshon pa yin te/ji skad du/ drug la rtag tu gnas pa ste/ gang zhe na/ 'di la mig gis gzugs lta ba na yid bde bar mi 'gyur la/ yid mi bde bar yang mi 'gyur zhing btang snyoms la gnas pa ni dran pa shes bzhin zhes bya ba la sogs pa'o/ / khams gsum spangs pa nyid dam mdud pa nye bar zhi ba nyid ni pha rol du phyin pa yin gyi/ rgya mtsho rgal ba ni ma yin no zhes bstan par bya ba'i phyir/ shes rab mtshon cha zhes bya ba la sogs pa'i tshigs su bcad pa gnyis smos so/ /mtshon ni rnam pa gsum ste/ thos pa'i mtshon dang shes rab kyi mtshon dang //zhes bya ba la sogs pa mdo las gsungs so/ /de las shes rab kyi mtshon ni 'dir shes rab kyi tshogs thos pa la shes rab tu gsungs te/ de ni mtshon bzhin du bag la nyal la sogs pa 'joms par byed pa'i phyir ro/ /brtson 'grus stobs zhes bya ba la sogs pas ni dben pa'i mtshon bstan to//'jig rten skye dang zhes bya ba la sogs pas ni shes rab kyi mtshon bstan to/ /kun las rab tu rnam grol zhes bya ba la sogs pas ni de'i 'bras bu ste/ 'di ni bsdus pa'i don to/ /btsun pa pha rol du phyin pas na dge slong zhes brjod na ji tsam gyis pha rol tu phyin par 'gyur zhes pa las de'i dbang du mdzad nas gsungs so zhes gzhan dag zer ro//'dir don rgya cher bshad pa gang la shes rab kyis de bzhin nyid nges par byas pa'i mtshon yod pa de ni shes rab mtshon no/ /dper na 'thab mo'i dus su mtshon gyis dgra'i dpung pham par byed pa de bzhin du len par rab tu zhugs pa'i shes rab kyis nyon mongs pa ste/ye shes kyis ni nyon mongs pa gcod pa yin no zhes mdo las gsungs so/ /brtson 'grus stobs zhes bya ba la/ brtson 'grus ni yang dag par spong ba bzhi ste/ de dag ni dpung gi tshogs yan lag bzhi pa bzhin te/brtson 'grus kyi stobs dang ldan pa'i 'phags pa nyan thos dag gis ni mi dge ba rnams spong bar 'gyur ro zhes pa'i tshig gis so/ /de dang ldan pa ni thob pa ste/ de phun sum tshogs pa zhes bya ba'i don to/ /mnyam par gzhag pa zhes bya ba ni sems rtse gcig pa ste/ g.yeng ba gcod par byed cing nan tan du nus pa'i phyir ro//ting nge 'dzin la dga' bas zhes bya ba ni de la mos pa ste/ yid ches pa skyes shing dad pa thob par gyur na ni de bsgom par 'gyur ro/ /yang na dga' ba ni ro myang ba ste/ de'i phyir de sgom pa mchog tu byed par 'gyur ro/ /dran ldan zhes bya ba ni dran pa dang ldan pa ste/'dis ni 'phags pa'i lam gyi tshogs dbang po lnga'i stobs bstan nas 'phags pa'i lam bshad pa/ 'jig rten skye dang 'jig par rtogs nas ni/ /zhes bya ba ni nye bar len pa'i phung po la zag pa med pa'i ye shes kyis 'byung ba dang 'gag par rtogs pa de ni pha rol du phyin zhes brjod par bya ba dang sbyar ro//ji lta bur shes pa yin zhe na/ de rig yin zhes bya ba smos te/ de shes par byed pa yin te/ gang mthong ba de ni mig dang ldan par de bzhin no/ /'dis ni ye shes phun sum tshogs pa bstan to/ /kun las rab tu rnam grol zhes bya ba ni phra rgyas thams cad dang de'i gzhi dag las yongs su grol ba ste/'dis ni spangs pa phun sum tshogs pa bstan to/ /'jig rten mtha' ma zhes bya ba ni 'khor ba'i mtha' ma'o/ /legs par rtogs gyur nas zhes bya ba ni/ de nyid phyin ci ma log par yongs su rtogs pa ste/'dis ni phung po lhag ma dang bcas pa'i mya ngan las 'das pa bstan to/ /de'i 'og tu de bzhin nyid shes pa kho nas 'jig rten gyi mthar grol bar 'gyur gyi gzhan du ni ma yin no zhes bstan pa'i phyir 'jig rten mthar son pa zhes bya ba smos te/ phung po lhag ma med pa'i mya ngan las 'das par zhugs pa ni pha rol tu phyin pa zhes brjod do/ /'dis ni 'dus byas thams cad kyi rgya mtsho las rgal ba'i phyir ro/ /yang 'jig rten las 'das pa'i lam bstan pa'i phan yon rgya cher bshad pa/ gang gis zhi ba zhes bya ba la sogs pa'o//bde 'dod bde ba 'thob ces bya ba la/ gal te bde ba 'dod na ni bde 'gro'i bde ba dang sred pa zad pa'i bde ba 'thob par 'gyur ro/ /de gang gis she na/ de ltar spyod pas zhes bya ba smos te/ sngar bstan pa'i rnam pas lam bsgom pa'i khyad par la spyod pas so/ /snyan pa thob ces bya ba ni mngon du rab tu bsngags pa 'thob pa'o//grags pa 'phel bar 'gyur zhes bya ba ni lkog na grags pa de'i bsngags pa yang dag par brjod pa ste/ de stsogs shing 'phel bar 'gyur ro/ /gang gi tshe zhe na/ smras pa/ gang zag gang gis lam drang po bsgom pa zhes bya ba dang sbyar ro//'phags pa de ji lta bu zhe na/ zag pa med pa'o/ /lam yan lag brgyad ces bya ba ni yang dag pa'i lta ba la sogs pa 'di la yod pa'o/ /drang po ni ma yo ba ste/ don dam pa'i don yin pa'i phyir ro/ /gang bde ba 'dod pa dag gis bsgom pa zhi ba ni 'khor ba'i gnod pa zhi ba thob par byed pa'i phyir ro//lam bsgom pa zhes bya ba ni thar pa'i thabs la goms par byed pa'o/ /ci'i phyir zhe na/ des ni bdud rtsi rnyed ces bya ba yin te/ 'chi ba med pa'i gnas sgrub pa'i phyir ro/ /gang bde ba 'dod pa dag gis bsgoms na ji srid du bdud rtsi des nges par 'thob pa yin te/slu ba med pa'i phyir ro/ /lam gyi tshoms te bcu gnyis pa'i rnam par 'grel pa rdzogs so// //da ni bkur sti'i tshoms brjod par bya ba ste/ lam bsgoms pa la ni gcig tu bgegs 'jug pa yin pas de spang ba'i phyir ro/ /rnyed pa dang bkur sti la mngon par dga' ba rnams ni khyad par gyis thob pa las nyams pa yin te/gang las she na/ gtsang ba'i thob pa las so/ /dre'u mo rang gi mngal gyis zhes bya ba la sogs pa smos te/ rgyal po'i khab na lha sbyin gyis 'di lta bu'i tshul gyis rnyed pa dang bkur sti bsgrub par 'gyur te/ lus 'phags mo'i bu ma ga d+h+wa'i rgyal po ma skyes dgra shing rta lnga brgya tsam dang lhan cig nang dang nub tu bsnyen bkur byed cing phyir byung ba dang lnga brgya tsam gyi 'di la snod kyi btso ba dag rim gyis 'bral bar byed do/ /lha sbyin yang dge slong lnga brgya tsam dang lhan cig zas kyi gral dang por nye bar 'dug par gyur to//de nas dge slong rab tu mang po snga dro zhes bya ba nas/ ji tsam na dge slong dag khyed cag lha sbyin gyi rnyed pa dang bkur sti la 'dod par ma byed cig /de ci'i phyir zhe na/ dge slong dag lha sbyin gyi rnyed pa dang bkur sti ni gnod par byed pa'i phyir te/ 'di lta ste gsod pa'i phyir chu shing 'bras bu 'byung bar 'gyur ba lta bu'o zhes bya ba nas ji srid du tshigs su bcad pa gnyis gsungs so//chu shing 'bras bus phung ba ltar/ /zhes bya ba ni chu shing gi 'bras bu mo tsa zhes bya ba skyes par gyur na de nyid kyis chu shing phung ba ste skem par byed do/ /ltar zhes bya ba ni de bzhin no//smyig ma 'bras bus zhes bya ba ni gro lta bu zhig skyes par gyur na de nyid kyis smyig ma'am/ 'od ma ste phung ba ni skam pa'o/ /'dam bu 'bras bus zhes bya ba ni gang gi tshe 'dam bu'i 'bras bu skyes pa de'i tshe 'dam bu skam par 'gyur ro/ /de'i 'bras bu sa bon ni me tog phreng ba lta bu zhig yod de/me tog tsam kho na de'i 'bras bu yin no zhes gzhan dag zer ro/ /dre'u mo rang gi mngal gyis dang / /zhes bya ba ni/ gang gi tshe dre'u mo'i mngal chags pa de'i tshe de'i mngal dang bcas par ma nyid 'chi bar 'gyur te/ 'di ltar de nang du mngal chags pa smin par shes nas/de la bslab pa'i skyes bu mtshon gyis dku dral te mngal de blang bar bya'i/ gzhan du na mngal dang bcas par ma nyid 'chi bar 'gyur te/ des dpe bstan nas dpes gzhal bar bya ba smras pa/ pho bshal bkur stis phung bar 'gyur//zhes bya ba yin te smad pa'i mi ni skyes bu ngan pa ste rmongs pa'o/ /bdag la mchod cing gus par byas pa'i bsnyen bkur gyis ni skyes bu glen pa phung bar 'gyur ba yin te/ thob pa'i yon tan dag las nyams shing tshul khrims dang lta ba dang spyod pa dang / kun du 'tsho ba phun sum tshogs pa dang mi mthun pa nyid yin te/dpe rnam pa bzhis bstan pa yin no/ /rnyed pa dang bkur sti thob pa'i yon tan dag nyams par byed pa 'ba' zhig tu ma zad de/ skye ba'am bskyed par 'dod pa'i yon tan dag gi yang bgegs nyid du bstan pa'i phyir/ ji srid blun po zhes bya ba la sogs pa smos so//nges par bzung zhing bcad pa'i phyir 'di ni tshig gi phrad yin te/ 'di la ji tsam gyi tshad ni ji srid de/ ji srid du shas che zhing che ba rnams kyi dbye bas blun po dag la mchod pa byas par 'gyur ba ste/ bkur sti'i 'ching ba zhes bstan pa de srid kyi bar du phung ba ni brlag par 'gyur ba ste/gang yon tan thams cad nyams pa 'thob par 'gyur ba'o/ /ji srid ces bya ba'i sgra'i nus pa ni ma bshad pa rnams kyang bsdu ba ste/ de srid ces pa'i sgra dang 'brel ba yin pa'i phyir ro/ /mchod byas pa zhes bya ba ni bsnyen bkur dang mchod pa zhes bya ba'i don te/'dir shes pa'i sgra ni mchod pa la 'jug pa ste/ ji ltar phar shes pa dang mar shes pa la sogs pa lta bu'o/ /'o na sangs rgyas bcom ldan 'das la bsnyen bkur bya ba dang bla mar bya ba la sogs pa brjod de brlag par 'gyur ram zhe na/smras pa/ byis pa zhes bya ba ste glen pa'o/ /ji ltar 'di nyid brlag par 'gyur ba yin zhe na/ dkar po'i cha 'grib cing zhes bya ba smos te/ dkar po ni thar pa dang de'i lam ste/ dkar po ni mya ngan las 'das pa'i yul ston pa yin no zhes pa'i tshig gis so//de'i cha ni nges par 'byed pa'i cha ste/ de yang rnyed pa dang bkur stis nyams par byed pa yin na/ dge ba gzhan lta smos kyang ci dgos/ dro bar gyur ba nyams par 'gyur ba ni re zhig phar gzhag gi /'on kyang de yi spyi bo'ang nges par nyams/ /zhes bya ba ste/ spyi bo'i ming can de la yang gnod pa yin te/byis pa 'dis nges par 'byed pa'i cha nyams par byed cing yongs su 'jig par byed do/ /lha sbyin las brtsams te 'di bshad pa yin gyi/ rtse mo thob par gyur pa la ni 'di med de/ dge ba'i rtsa ba rgyun chad pa med pa'i phyir/ rtse mo thob pa rtsa mi 'chad/ /ces bya ba yin pas so//ma thob pa nyams pa'i dbang du byas pa yin pas tshig 'di la rtsod pa med do/ /gzhan dag ni 'od ma'i tshal na tshong dpon gzhal ba la g.yo byed pa zhig yod de/ spyi'i srang mda' cha spyad bcos pa las 'di gsungs te/ des na de la yang rtsod pa'i skabs med do/ / byis pa nyid la ni khyad par du bar du gcod par byed pa yin no zhes bstan te/ de ga las she na/ smras pa/ 'di ltar ngan pa zhes bya ba la sogs pa'o/ /rigs khyad par can las rab tu byung ba bum pa bzang po'i rgan po zhig gis grangs stong tsam gyi dge 'dun nye dga' la sogs pa spyan drangs pa las de dag kyang de'i gtsug lag khang du song ste/de dag la cung zad kyang ma byin nas de thams cad de'i gnas su 'dug pa ni nyes pa gcig go/ /de nyid kyis glo bur du 'ongs pa'i shin tu rgan pa dag gi mdun du 'dug cing bdag po byed pa 'di ni gnyis pa'o/ /de bzhin du dge slong gzhan dag gnas na rab tu gnas pa las 'byin pa 'di ni gsum pa'o//bram ze dang khyim bdag gi khyim dag dang gtsug lag khang gzhan dag tu de yang mchod pa 'dod pa 'di ni bzhi pa ste/ de'i dbang du mdzad nas tshigs su bcad pa bzhi gsungs so/ /ngan pa ni byis pa ste pho bshal zhes bya ba'i don to//rnyed pa 'dod pa ni nor la sogs pa thob par mngon par 'dod pa'o/ /gzhan dag tu ni srid pa 'dod pa zhes brjod de srid pa ni yang dag par srid pa ste/ shes par byed pa dang brjod pa ste 'jig rten pa rnams bdag la ma dag pa yin yang dad par shes su 'jug pa zhes bya ba la sogs pa'o//yang na rnyed pa dang bkur sti'i dngos po don du gnyer ba'o/ /gang yang skye bo ngan pa'i mtshan nyid gcig tu gnas pa bstan pa'i phyir/ dge slong 'khor ni 'dod pa dang / /zhes bya ba smos te/ yon tan che ba'i rgan zhing rgan pa'i dge slong rnams las gtso bo dang mchog dang bcas pa dang 'dren pa nyid du 'dod pa ni dang gi sgra'o//yang na 'khor nyid du ste/ kye ma'o dge slong dag nga la 'khor gyi dri ba dris la bsnyen bkur gyis te 'dug shig dang zhes pa'o/ /gnas la ser sna byed pa dag /ces bya ba ni gtsug lag khang dang gnas khang sde la sogs pa las dam pa dag kun du 'dzin pa yin te/'di dag tu ni mi gnas pa ma yin te zhes bya ba la sogs pas gzhan gyis thob par mi 'dod cing bdag nyid kyis yongs su 'dzin pa yin no/ /rigs gzhan dag gis mchod pa dang / / zhes bya ba ni rigs gzhan de dag ni nye du'i rigs ma yin pa ste/ kye ma'o nga la gnyen bzhin du sbyin pa dang mchod pa gyis shig gzhan dag la ni ma yin no zhes so/ /yongs su shes par byed pas chags pa la sogs pa srid pa yin no zhes bstan pa'i phyir/ rab tu byung dang zhes bya ba la sogs pa'o//yang nges par de ltar gyur cig pa ste/ gang khyim pa thams cad dam rab tu byung ba thams cad de gang yang rung bas bdag la gtso bo nyid du 'phrigs par gyur cig ces dam pa ma yin pa yongs su rtogs par byed pa'o/ /khyim pa dag ni khyim na gnas pa'o/ /rab tu byung ba ni khyim spangs pa ste/khyim pa dang rab tu byung ba gang yang rung bas bdag la de ltar 'phrigs par 'gyur gyi/ gzhan dag la ni ma yin par ro/ /bdag dbang gyur na zhes bya ba ni bdag la rag lus pa dang 'brel pa'o/ /re stes zhes bya ba ni gyur cig pa ste/ gang yang rung ba zhes bya ba 'di rjes su 'breng ngo //gang du zhe na/ bya ba byas rung ma byas rung / /zhes bya ba smos te/ gang cung zad bya ba dang mi bya ba thams cad la 'di dag byed pa'am mi byed pa de yang bdag gi lung bzhin du byed par gyur cig pa'i don to/ /yang na bya ba che chung cung zad byas pa dang ma byas pa dag la ste/lha mo sked med bzhin no/ /de ltar byis pa kun rtog na/ /zhes bya ba ni rnam pa 'dis na rnyed pa dang bkur stis zil gyis non pa'i klan pa ni tshul bzhin ma yin pa yid la byed pa'i rnam par rtog pa 'phel ba yin te/ rtswa la char 'bab pa bzhin du/ /sems la 'dod chen 'phel bar 'gyur//zhes bya ba ste/ sred pa dang nga rgyal 'di'i phyir nye bar 'phel bar 'gyur te/ gnyis po 'di dag ni 'khor ba'i rtsa ba yin no/ /rnyed pa dang bkur stis ni 'khor bar yongs su 'khyam pa yin zhing thar pa thob pa ni ma yin te/ ci'i phyir zhe na/ rnyed pa'i thabs ni gzhan yin la/ /zhes bya bas bstan te thabs ni byed pa dang rgyu yin no//de ni gzhan ltar snang ba yin te/ 'di ltar 'khor ba 'thob pa'i thabs ni sred pa la sogs pa ste/ de nyid ni lus la sogs pa 'thob pa'i thabs yin no/ /mya ngan las 'das par 'gro ba dang 'thob par byed pa'i thabs ni gzhan yin te/ de las gzhan pa nyid ni thar par 'gro ba'i thabs yin te/chos shes pa dang / bdag med pa dang / tshul khrims la goms pa'i bdag nyid can no/ /rnyed pa dang bkur sti ni thabs gzhan yin te/ tshul bzhin ma yin pa'i yid la byed pa'i tshul te/ de'i 'bras bu yang 'khor ba'o zhes bya ba ni tshig gi lhag ma'o//lhag ma ni bstan zin to/ /rnyed pa dang bkur sti thar pa'i bgegs byed pa yin te/ de gang gis gang shes par 'gyur zhe na/ shes pa can gyis shes pa yin no zhes de nyid bstan pa'i phyir smras pa/ de ltar ci rigs shes nas su/ /zhes bya ba la sogs pa'o/ /de ltar zhes bya ba ni sngar bstan pa'am/'og nas smos pa ste/ thar pa'i bar du gcod pa'am/ 'khor bar 'jug pa yin pa ji lta ba bzhin du shes nas so/ /su zhig gis ji ltar bya zhe na/ dge slong zhes bya ba smos te/ khyim gyi gnas yongs su spangs pa ste/ rab tu byung ba'o/ /ser skya la sogs pa la yang dge slong yod do zhe na/smras pa/ sangs rgyas nyan thos yin zhes bya bas bstan te/ de bzhin gshegs pa'i bka'i rjes su 'brang ba'o/ /gang gi phyir de nyid kyis thar pa la dmigs shing gzhal bar nus kyi/ gzhan dag ni 'khor ba na 'bab pa'i phyir ro/ /bkur sti dag la mi dga' zhing //zhes bya ba ni don du mi gnyer ba'o/ /log pa'i lta ba mang po la mi rtog pa 'dis ni sems dben par bstan to/ /dge slong gi sgras ni lus dben par bstan pa'i phyir/ dben pa rim gyis 'phel byed pa/ /zhes bya ba ni gang gi dben pa yin pas dben pa ste/nyon mongs pa gang dag las so so bar gyur pa 'phags pa'i lam zhes bya ba'i don to/ /de rim gyis 'phel ba ni bsgom pas sogs par byed pa'o/ /de'i phyir dben pa rnam pa gnyis la brten pa'i ye shes kyis rnyed pa dang bkur sti'i skyon nges par spang bar bya zhing lam bsgom pas snod du gyur pa nyid du bsgom par bya'o//rnyed pa dang bkur sti dang ma bral na ni ting nge 'dzin gyi bar chad yin no zhes bstan pa'i phyir/ thams cad la ni mi rtsol zhing / /zhes bya ba la sogs pa'i tshigs su bcad pa gnyis so/ /dge slong zhig bcom ldan 'das kyi spyan sngar phyin te gsol ba//btsun pa ci tsam du dge slong gis rtsol zhing 'bad pa bgyis na ting nge 'dzin 'thob par 'gyur/ dge slong 'di la gcig tu mi g.yeng bar 'gyur ba dang / thams cad kyis shes par mi 'gyur bar te/ gang la las bdag 'phrigs par 'gyur ro zhes bya ba la sogs pa nas 'di gsungs so//mi rtsol zhing zhes bya ba ni rtsol ba mi bya ba ste thams cad la bya ba dag la rnam par chags par mi 'gyur bar ro/ /'dis ni tshul khrims yongs su bsrung ba la gzud pa yin no/ /ting nge 'dzin ni de la brten pa'i phyir ro/ /mi yis 'phrigs par ma gyur pas//zhes bya ba ni 'phrigs par ma gyur pa'i mi yin pas na/ mi yis 'phrigs par ma gyur pa nyid du ste/ skye bo thams cad la bdag gi yon tan bstan par mi bya'o/ /khyed cag gis sdig pa ni bsgrags par bya zhing dge ba ni mi spyoms par gnas par bya'o zhes mdo las gsungs so//'dis ni tshul khrims rnam par dag pa'i thabs bstan to/ /phal cher 'phrigs pa las ni tshul khrims la sogs pa'i khyad par nyams par 'gyur bar ngas thos shing mthong ste/ dge slong tshul khrims dang ldan zhing dge ba'i chos can kAraShA pa Na brgya stong gi ched du brdzun mi brjod de/de nyid dus gzhan zhig na rnyed pa dang bkur stis zil gyis non pas/ kAr ShA pa Na gcig gi phyir yang brdzun smra ba mthong ngo zhes bya ba la sogs pa gsungs so/ /'tsho ba gzhan la mi rten cing / /zhes bya ba ni rgyal po'am gzhan la yang mi rten cing 'tsho ba gzung bar mi bya'o zhes bya ba'i don to//khyed cag ni bdag nyid kyi gling la gnas shing bdag nyid kyi skyabs la gnas par bya ste/ gzhan ni gling ma yin no zhes mdo las gsungs so/ /chos la tshong pa bzhin mi spyad/ /ces bya ba ni bdag gi tshul khrims la sogs pa'i chos bstan pas tshong pa'i tshul du nye bar sbyar zhing des rnyed pa'i don du gnyer zhing tshong pa bzhin du byas nas gang yang spyad par mi bya ste/bdag ni mang du thos pa'o/ /bdag ni mdo sde 'dzin pa'o/ /bdag ni tshul khrims dang ldan pa'o zhes smra ba ste/ des na bdag la rnyed pa chen po kun du 'byung bar 'gyur zhes bya ba la sogs pa'i tshul du tshong mi bya'o//rang gi rnyed pa blang bya zhing / /zhes bya ba ni rigs pas legs par 'ongs pa'i chung ngu byin pa'am/ chos gos la sogs pa'i rang gi rnyed pa ni 'di ltar shes par mi bya ste/ 'dis ci zhig bya zhes brnyas par mi bya'o//gzhan gyi la ni 'dod mi skyed/ /ces bya ba ni gzhan bsod nams dang ldan pa dag gis shin tu rnyed pa chen po thob pa dag la yang chags par mi bya ste/ nam zhig bdag gis 'di lta bu 'thob par 'gyur zhes so/ /ci'i phyir zhe na/ gzhan gyi zhes bya ba ste/'di ltar dge slong gang dag gzhan gyi rnyed pa la zhen par gyur pa dang rang rnyed pa mi len pa ste/ de gnyis kyi phyir g.yeng bas ting nge 'dzin 'thob par mi 'gyur ro zhes bya ba smos te/ sems rtse gcig pa nyid thob par mi 'gyur ro/ /bgegs de dag spangs shing the tshom med pas ni ting nge 'dzin khyad par can thob par 'gyur ro//rnyed pa dang bkur sti la rgyab kyis phyogs pa nyid ni legs par 'tsho ba yin no zhes gsal bar bstan pa'i phyir/ gal te bde bar 'tsho 'dod ces bya ba la sogs pa'i tshigs su bcad pa gsum smos so/ /'phags pa'i rigs pa bzhi zhes bya ba la sogs pa mdo las gsungs te/de'i phyir 'di sogs so/ /gzhan dag ni nye dga' dge 'dun gyi yo byad kyis chog ma shes pa lhag pa la rtsol bar gyur to/ /ji tsam na khyim bdag cig gis dus de nyid du shin tu blta na sdug pa'i chung ma zhig blangs te shin tu srung bar byed do//nye dga' yang de bzhin du de'i khyim du sgo bas ma mthong ste/ zhugs pa las khyim bdag 'ongs te mthong nas khros te/ de'i lhung bzed bcag cing chos gos dral nas shin tu yang brnyas thabs su byas te khyim nas byung bar gyur pa las/de'i dbang du mdzad nas 'di gsungs so zhes zer ro/ /gal te bde bar 'tsho 'dod cing / /zhes bya ba ni gal te gnod pa med pa dang 'tshe ba med par 'tsho bas spyod par gang zhig 'dod na zhes bya ba'o/ /'dis ni 'di'i khyad par bstan nas pha rol gyi bshad pa/ dge sbyong 'di la lta 'dod na//zhes bya ba smos te/ dge slong nyid du'am 'phags pa'i lam la'o/ /lta ba'i mtshan nyid yin pas lta ba ste/ de gang la yod pa ni dga' ba dang ldan zhing mngon par 'dod pa'o/ /de ltar gyur pa'i bde bar 'tsho ba ni tshul khrims ma ral par gyur pa la lam bsgom pa ste/de ltar 'dod pa'i las gang yin pa de nyid bstan pa/ dge 'dun gyis ni chos gos blang / /zhes bya ba nyid la dge 'dun gyi thun mong gi chos gos la bzang po 'dod pas mi blang bar mi bya ba'o/ /bza' btung byin par gyur na blang / /zhes bya ba ni bza' ba dang btung ba nyon mongs pa med par grub par dka' ba med pa'i gzhi yin pa'i phyir ro//'dis ni chos gos dang bsod snyoms ngan ngon tsam gyis chog shes pa'i 'phags pa'i rigs gnyis bstan to/ /gnas mal ngan ngon tsam gyis chog shes pa'i 'phags pa'i rigs smras pa/ gal te bde bar 'tsho 'dod cing //zhes bya ba la sogs pa ste/ dge 'dun gyi gnas la sogs pa la yang lhag par zhen pa med par gnas par bya ste/ byi ba'i khung la sprul lta bur/ /zhes bya ba smos te/ dper na sprul po che ne'u le la sogs pa'i 'jigs pas byi ba'i khung bu shin tu dog pa'i nang du 'jug ste/shin tu dogs par bsrungs pa'i phyir de la mi dga' ba dang 'byung bar 'dod pas 'jug pa ltar 'phags pa'i nyan thos gtsug lag khang la sogs pa'i gnas mal la yang de bzhin no/ /dge slong dag 'di la gnas mal la rab tu brten pa ni chags pa'i phyir ma yin te ji srid du de dag 'di ltar tha mal pa rnams kyis yongs su zag pa gzhom pa'i phyir nang du yang dag 'jog la mchog tu bya'o zhes mdo las gsungs so//bsten par gyis zhes bya ba ni gnas par gyis shig pa'o/ /gnas mal dag ces bya ba ni gtsug lag khang la sogs pa'i rab tu sbyangs pa'i gnas yin pa'i phyir ro//spong ba dang bsgom pa la dga' ba'i 'phags pa'i rigs smras pa/ gal te bde bar 'tsho 'dod cing / /zhes bya ba la sogs pa ste/ ngan ngon tsam gyis zhes bya ba ni chos gos la sogs pa dman pa byin pa ste/ sngar bshad pa'i 'tsho ba tsam bskyed pas so//chog shes shing zhes bya ba ni chog shes par bya ba'o/ /de ltar chog shes par byas nas las ci zhig bya zhe na smras pa/ chos gcig po yang bsgom par bya/ /zhes bya ba smos te/ gtso bo'i chos te thar pa mchog go/ /bsgom par bya ba ni thob par bya ba'o/ / yang na lus su gtogs pa'i dran pa bsgom pa ste/ chos gcig bsgom par bya ba ste/ /'di ltar lus su gtogs pa'i dran pa'o/ /zhes mdo las 'byung ba'i phyir ro/ /yang na 'phags pa'i lam mo/ /rnyed pa dang bkur sti'i rjes su 'gro bar mi bya ste/ smad pa la sogs pa'i rgyu'i phyir dang /tshul khrims la sogs pa'i rjes su 'brang bar bya ste/ rab tu bsngags pa dang 'brel ba'i phyir ro zhes bstan pa'i phyir/ gal te mang po mi shes shing / /zhes bya ba la sogs pa smos so/ /khyed cag dge ba mi spyoms pa/ /sdig pa mi bcab pas gnas par bya ste/ de ci'i phyir zhe na/gang gi phyir dge ba mi spyoms pa las ni dge ba'i chos 'phel bar 'gyur te/ 'di lta ste/ 'bras sA lu'i zhing la zhing pas yongs su bsrungs pa ltar zhes pa nas ji srid du tshigs su bcad pa gsum gsungs so/ /mang pos sam mang po la yongs su mi shes pa ste/gal te mang pos mi rigs par gyur pa'o/ /'on kyang / tshul khrims legs par mnyam gzhag na/ /zhes gsungs te/ de la mchog tu byed pa ste/ sdom pa bsrung ba las shin tu gus pa dang / kha na ma tho ba phra rab tsam la yang 'jigs par lta ba zhes bya ba'i tshig gis so//tshul khrims dag la zhes bya ba mang po'i tshig ni spong ba bdun yin pa'i phyir dang / so sor thar pa dang / bsam gtan dang zag pa med pa'i dbye bas so/ /de shes pa dag stod byed pa/ /zhes bya ba ni mkhas pa de dag nyid bsngags pa brjod pa yin no/ /ji lta bur zhe na/'tsho dag cing zhes bya ba ste/ kha na ma tho ba med pa'i 'tsho ba ste mang pos mi shes pa la ni log pa'i 'tsho ba med pa'i phyir ro/ /'dis ni mang pos mi shes pa'i 'bras bu bstan to/ /snyom las med ces bya ba ni snyom pa ma skyes pa ste/ tshul khrims dang ting nge 'dzin la sogs pa la le lo med pa'am/tshul khrims yongs su bsrung ba la le lo med cing brtson pa'i phyir ro/ /'tsho ba rnam par dag pa dang / brtson 'grus kyis tshul khrims kyi phung po yongs su rdzogs par bsgrub pa yin no/ /de shes pa dag stod byed ces pa ci'i phyir zhe na/ gal te zhes bya ba la sogs pa smos so//rig pa gsum ldan zhes bya ba ni sngon gyi gnas dang / 'chi 'pho dang / skye ba dang zag pa zad pa'i khyad par dang ldan pas so/ /rig pa gsum dang gal te ldan par gyur pa ste/ rig pa gsum gyi dngos po dang ldan pas rig pa gsum ldan no/ /'dis shes pa phun sum tshogs pa ste/'jig rten dang 'jig rten las 'das pa'i ye shes dang ldan pa'i phyir ro/ /rig pa gsum thob pa'i phan yon smras pa/ 'chi bdag zad byed pa zhes bya ba'o/ /'di la 'chi bdag zad par byed pa'i ngang tshul yod pa ni 'chi bdag nyams byed pa ste/ 'chi ba'i rjes su 'gro ba las 'das pa'o//de nyid ci'i phyir zhe na/ 'di ltar zag pa med ces bya ba smos te/ de ni nyon mongs pas gzhan du dbang du ma byas pa'i phyir 'chi ba thob par mi 'gyur ro/ /'dis ni spangs pa phun sum tshogs pa bstan te de ltar gyur kyang bdag nyid chen po ni bsams nas/ de la zhes bya ba skye bo mang pos de la yongs su mi shes par shes nas so//'phya ba ni brnyas pa dang khyad du gsod pa'i bar du'o/ /blun po zhes bya ba ni khyad par mi shes pa'o/ /gal te bza' dang btung ba yi/ /zhes bya ba ni gal te yang thams cad nas bza' ba dang btung ba shin tu gya nom pa mang po gang zhig gi rnyed pa dag dang ldan par gyur nas zhes bya ba dman pa'i dngos po rnyed pa ma yin par ston to//zas ni tha mar bshang ba dang gci ba la sogs pa'i dri mar 'gyur ba yin pa'i phyir ro/ /sdig pa'i chos can la zhes bya ba ni 'di la sdig pa'i chos yod pa ste ngan par spyod pa'o/ / gal te yang des mtshams med pa la sogs pa'i sdig pa'i nyes pa bsags par gyur pa yin na yang 'on kyang de la blun po de dag ste/ mkhas pa ma yin pa'i nang du ni mchod pa dang bsnyen bkur byed par 'gyur ro/ /rnyed pa dang bkur dang bral ba ni dgra la sogs pa yin no zhes bstan pa'i phyir/mgo bregs ngur smrig ces bya ba la sogs pa'i tshigs su bcad pa gnyis smos so/ /mu stegs can gzhan zhig gis sngon ni bdag cag la bsnyen bkur byed par gyur la/ da ni sangs rgyas bcom ldan 'das nyan thos dang bcas pa la bsnyen bkur bar gyur pas gang bdag gis nges par kun du rgyu mdzes dga' mo bsad la/rgyal byed kyi tshal du 'obs brkos te bcug la de'i ched du ni mi snyan pa bsgrag par bya'o zhes bsams pa nas ji tsam na zhag bdun gyi 'og tu kun la gsal bar gyur nas/ rgyal po gsal rgyal rgyal po dang khyim bdag rnams dang lhan cig 'dus te bcom ldan 'das kyi thad du lhags nas 'di skad ces btsun pa ma d+hu rar skyes pa'i lus ni phyogs mtshams su mi mdzes par gyur to zhes gsol pa dang /bcom ldan 'das kyis bsngags pa ma yin pa 'di gsan nas/ rgyal po chen po 'di ni da ltar byung ba'i las ma yin te/'di ni 'das pa'i las yin no zhes pa nas ji srid du 'di gsungs so/ /dgra byed mang ba kho nar zad/ /ces bya ba ni dgra du ma ste/ phrag dog gi dbang gis mi bzod pas sems can rnams kyis gnod pa thob par 'gyur te/ bdag gir 'dzin pas 'di la rnam par 'tshe ba'i dgrar 'gyur zhing dgra mthong ba yin te/de bas na de nyid 'byung bar bstan pa'i phyir/ mgo bregs zhes bya ba smos te/ skra dang kha spu bregs pa'o/ /lha nyes pa la sogs pa'i ched du yang mgo bregs pa yin no zhe na/ ngur smrig gyon pa zhes bya ba smos te/chos gos tshon gyis kha bsgyur ba'i gos gyon pa ste/ gos bsgyur bas rab tu byung ba nyid de yongs su gzung ba spang bar bstan to/ /ji lta bu zhe na/ bza' ba dang ni zhes bya ba smos te/ lus kyi yo byad ni rnam pa gsum zhes bstan te/ bza' ba dang bgo ba dang gnas khang gi bdag nyid do//de'i yo byad rnyed pa dang bkur sti btang ba'i phan yon gsal bar byed do/ /de ltar/ skyon rnams khong du chud byas nas/ /zhes bya ba sngar bstan pa'i nyes dmigs rtogs par byas nas so/ /gang gis she na bkur sti zhes bya ba smos te/ dngos su rnyed pa dang bkur sti'i'o//skyon gyi khyad par smras pa/ 'jigs chen zhes bya ba ste/ gang la tshul khrims kyis phongs pa la sogs pa chen po'i 'jigs pa yod pa'o/ /de ltar khong du chud par byas nas gang byung zhing gyur pa'i bsgrub pa de smras pa/ 'phrigs nyung zhes bya ba mang pos mi shes pa ste/lus kyis rnam par dben pa'i gnas skabs yin pa'i phyir ro/ /sems khral bskyungs nas su zhes bya ba ni spro ba chung ba ste/ yul dag la chags pa med pa'i phyir de'i rnam par rtog pa med par bstan to/ /dben pa'i 'bras bu bshad pa'i phyir/ /dran ldan zhes bya ba smos te/ dran pa nye bar gzhag pa bzhi la legs par gnas pa ste/ dran pa 'dis ni lam gyi tshogs ston pa yin no/ /dge slong ni nyon mongs pa thams cad bcom pa'i phyir te/ phung po lhag ma dang bcas pa'i mya ngan las 'das pa bstan to/ /phung po lhag ma med pa'i mya ngan las 'das pa bstan pa'i phyir/kun tu rgyus zhes bya ba smos te/ mya ngan las 'das pa nyid do/ /gal te de ltar nyes dmigs yin pa de lta na ni bsod snyoms la sogs pa btsal bar mi bya'am zhe na/ smras pa/ kham gyi zas kyis zhes bya ba la sogs pa'o/ /'di lta ste/ srog chags kha cig g.yan pa'i nad kyis btab ste/bde ba la reg par mi gnas shing dgon par yang dga' ba med la/ dur khrod du yang dga' ba med de/ des mngon par gtses bzhin du dus byas so/ /de bzhin du dge slong gang rnyed pa dang / bkur stis zil gyis non par gyur cing yongs su 'dzin pa'i sems yod pa de ni grong du yang dga' ba med la dgon par yang dga' ba med de/ji srid na nyams par 'gyur zhing dge slong dag 'di ni 'chi ba yin te/ gang 'phags pa'i chos 'di la gcig tu bslab pa gtong zhing nyams par 'gyur ro zhes de skad gsungs pa na dge slong rnams yid byung bar gyur te/yang phyis bsod snyoms la mi 'jug cing zhag gcig kyang kha zas gcod par byed de ji tsam na de dag skya bo bseng bseng por gyur pas de bas na tshigs su bcad pa gnyis gsungs so/ /'tsho ba 'di phyir mi bza' mi bya ste/ /zhes bya ba ni 'dir 'tsho ba'i ched du bza' ba dang btung ba ma spyad na ni srog gnas par mi 'gyur te/'dod pa na spyod pa ni kham gyi zas kyis gnas pa yin te/ de med na ni de 'jig par 'gyur ro/ /gal te de ltar zas dang skom nye bar sbyar ba mchog tu byas pas ji ltar 'gyur zhe na/ smras pa/ kham gyi zas kyis lus zhir mi 'gyur yang zhes bya ba kham gyis bcad cing zos zos pa yin na yang ngo //kham gyis bsnyod pa ni byams pa'i gnas kyi bdag nyid pa zhes bya ba la sogs pa 'dir brjod par bya'o/ /de la yang 'di la lhag par mang du zos par gyur na yang sems zhi bar mi 'gyur zhes bya ba yin te/ lus dang sems nye bar zhi bar mi 'gyur gyi/nad dang dri ma dang nye ba'i nyon mongs pa'i rgyur gyur pa'i phyir ro/ /de ltar na bza' bar mi bya'o zhe na smras pa/ kha zas kyis ni lus dag gnas 'gyur ba/ /zhes bya ba smos te/ kha zas kyis 'jug pa 'di ni lus kyi bdag nyid gnas pa'i dngos po yin te/'gro ba zas kyis gnas pa'o zhes lung las 'byung ba'i phyir ro/ /'dod pa na spyod pa'i ni kham gyi zas ma yin par gnas pa med de/ ji ltar yang tshad dang ldan pa'i kham gyi zas te kha zas kyi bdag nyid rags pa'am phra ba de'i bdag nyid kyis 'dod pa spyod pa'i lus rgyas par 'gyur te de thams cad dang bral na ni 'chi bar 'gyur ba'i phyir ro//de ltar rtogs nas zhes bya ba ni de ltar shes nas so/ /bsod snyoms dag la rgyus zhes bya ba bsod snyoms dag yongs su tshol cig pa ste/ lus 'tsho ba tsam btsal ba'i rgyus ni ma rung pa med pa'i phyir ro//de la rnyed pa dang bkur sti 'di ni mkhas pa rnams la ni phan 'dogs pa yin la blun po rnams la ni ma yin te/ gang gi phyir de ni blun pa'i skyon gyis ltung bar 'gyur zhing yon tan las nyams la zug rngu'i gdung ba skye bar 'gyur ro zhes de nyid bstan pa'i phyir/rigs kyis zhes bya ba la sogs pa smos so/ /'dam zhes bya ba ni mngon par 'bying ba dang chos mthun pa'i phyir 'dam zhes mngon par rtogs par bya ste/ phyag rgyas mchod pa zhes bya ba dang sbyar bar bya'o/ /dper na 'dam de la gnas na ni 'bying bar 'gyur ba de bzhin du rnyed pa dang bkur sti de'i rjes su 'gro na/skyon nam sdug bsngal du ltung ba zhes bya ba'i don to/ /rab tu rtogs pa zhes bya ba ni rab tu bstan pa dang bshad pa zhes bya ba'i don to/ /gyis zhes bya ba ni khyed cag gis zhes bya'o/ /ci gang zhig bdag gis 'dam dang 'dra bar rab tu rtogs par bya zhe na/rigs kyis phyag byas mchod pa gang yin 'di/ /zhes bya ba smos te/ phyag byas pa ni phyag btsal ba'o/ /mchod pa ni ri mor byas pa'o/ /gang yin 'di zhes bya ba ni mngon sum du nyams su myong ba ste/ bram ze la sogs pa'i rigs kyis phyag dang bcas pa'i mchod pas ni bdag la 'dam dang 'dra bar byas pa'o//'di ni yon tan dag las kyang nyams par byed pa yin te/ dper na zug rngus 'tsho ba nyams par byed pa de bzhin no zhes de nyid bstan pa'i phyir zug rngu phra mo zhes bya ba smos te/ rnyed pa dang bkur sti'i zug rngu gang yin pa 'di ni shin tu shes par dka' ste/lus kyi nang du zhugs pa'i mde'u la sogs pa bzhin du blta bar bya'o/ /de nam zhig na rgyud las dka' bas 'byin pa yin no zhes bstan pa'i phyir 'byung bar dka' ba ste zhes bya ba yin te/ 'bad pas dbyung dgos pa'i phyir ro/ /mi yis zhes bya ba ni skyes bu blun pos so//shin tu spang bar dka' ba nyi tsher ma zad de dus de nyid du yang spangs par dka'o zhes bstan pa'i phyir spangs dka' zhes bya ba smos te/ dus de nyid du yang zhes bya ba ni tshig gi lhag ma'o/ /skyes bu dam pa rnams kyis kyang bde bar spong bar mi nus te/don rig pa nyid kyi phyir ro/ /gzhan dag tu ni bzod dka' zhes brjod de/ bzod par dka' ba dang zil gyis gnon pa zhes bya ba'i don to/ /bkur sti'i tshoms te bcu gsum pa'i rnam par 'grel pa rdzogs so// //rnyed pa dang bkur sti la lhag par zhen pa'i dbang gis ni mngon par 'khu ba la sogs pa phung khrol stong phrag bsten par 'gyur ro zhes bsgrub pa'i phyir de'i 'og tu 'khu ba'i tshoms bstan to//yang na rnyed pa dang bkur sti ni 'dam dang zug rngu lta bur blta bar bya'o zhes bstan ma thag pa de ci'i phyir zhe na/ bshad pa 'khu ba la sogs pa'i nyes pa dang 'brel pa'i phyir te/'khu zhes bya ba smos so/ /lha sbyin dmyal ba'i me 'bar bas nyam thag cing nga ro 'don pa de'i dbang du mdzad nas tshigs su bcad pa gnyis gsungs so/ /gzhan dag ni 'phags skyes pos shAkya rnams bsad pa de'i dbang du mdzad pa'o zhes zer ro//phan 'dogs pa dang gnod pa byed pa yang bag 'bebs pa dang tha mal pa la sogs pas te/ gang gnod pa dang 'khu bar bya ba ma yin pa la'o/ /de ltar 'khu bar bya ba ma yin pa gang yin pa de nyid la gang 'khu ba zhes bya ba ni 'khu bar byed cing rnam par 'tshe bar byed ces bya ba'i don to//ji ltar 'khu bar bya ba ma yin zhe na smras pa/ sdig pa'i las ni mi byed pa/ /zhes bya ba ste/ cung zad nyes pa'am gnod pa mi byed pa dang phan 'dogs par ni byed pa'o/ /de nyid byis pa rnams la gos/ /zhes bya ba ni 'khu ba ste/ 'khu bar mi bya ba nyid la 'khu bar byed pa'i skyes bu glen pa de la ni ste/'khu bar byed pa po nyid la gnod par byed cing nye bar gdung bar byed pa yin no/ /gang du zhe na/ 'jig rten 'di dang zhes bya ba smos te/ mthong ba'i chos nyid la grags pa ma yin pa la sogs pa ste/ dred dang ru ru'i skyes pa'i rabs dang / ko ka li ka la sogs pa'i yang 'dir brjod do//pha rol du zhes bya ba ni 'jig rten phyi mar yang ngan song du ltung ba la sogs pa'o/ /gnyi ga la gnod par byed pa yin na yang bdag nyid la gnod pa dang por bstan pa'i phyir/ dang por bdag ni phung byed cing / /zhes bya ba la sogs pa yin no//gang zhig pha rol la 'khu bar brtson pa de ni dang po ste/ sngon du bdag ni rang nyid do/ /phung byed cing zhes bya ba ni gnod par gyur pa ste/ phung ba ni gnod par byed pa'o zhes bstan pa'i phyir te/ ngan par spyod pas grags pa ma yin pa 'phel ba la sogs pa'i nye bar gdung bas so//phyi nas gzhan yang phung bar byed/ /ces bya ba ni dus phyi nas tshogs pa dang ldan pa na sems can gzhan yang phung bar byed pa yin no/ /des na phung zhing gzhan yang phung bar byed ces bya ba ni dang por bdag nyid phung bar byas nas de'i 'og tu gzhan yang phung bar byed pa yin te/ji lta bu zhe na/ khra yis gzan ma'i bya lta bur/ /zhes bya ba ste/ gshog pa'i rtsa ba dang bral ba gang yin pa'i bya ni gzan ma'i bya ste/ gshog pa gcad pa'i bya des bya gzhan rnams gsod par byed pa de bzhin no/ /yang na bya khra shin tu ltogs pas phan tshun bltas pa na/sha ri ka la sogs pa'i bya mthong nas gsad pa'i phyir shugs kyis babs pa na phyogs mi mnyam pas de gnyis shi bar 'gyur ro zhes gzhan dag zer ro/ /gzhan dag ni shi ba'i gzan ma'i bya zhes zer ro/ /yang na bya shi ba zhig gi gzan lcags kyi phur bu brgyus pas btags te gzhag pa na/de la khras mthong ste shugs kyis de la babs pa na gzer bu des phog cing de yang shi bar 'gyur ro zhe'o/ /yang na thub pa'i cha byad can 'jigs su rung ba yin te/ ji skad du ca ra ka las bshad pa/ sman pa'i sgras ni rjod byed cing / /nad kyis btab pas tshol byed ltar//'jigs su rung la brten nas ni/ /nags kyi bram ze bya ba bzhin/ /zhes pa ste/ gang gi phyir bya ba ni a dzi na nag po la sogs par dka' thub can gyi cha byad du bsgyur nas dgon pa'i gnas dag na 'jigs pa med pa'i bya dang ri dwags la sogs pa gsod par byed do/ / de nas ri dwags kyi pags pa la sogs pa yod pa dang ri dwags gzhan yang gsod par byed pa de bzhin no zhes so/ /gzhan dag ni gzeb ces zer te/ bdag nyid srog med pas gzhan srog dang bcas pa gcod par byed do/ /'khu bar bya ba ma yin pa la 'khu bas ni skyon rnam pa sna tshogs 'thob par gsal bar bstan pa'i phyir rdeg par byed la zhes bya ba la sogs pa smos so//rnyed pa dang bkur sti la lhag par zhen pa'i dbang gis ni mngon par 'khu ba la sogs pa phung khrol stong phrag skye bar 'gyur ro zhes bsgrub pa'i phyir de'i 'og tu 'khu ba'i tshoms bstan to/ / yang na rnyed pa dang bkur sti ni 'dam dang zug rngu ste/ lha zhig gis bcom ldan 'das la gsol pa/ 'jig rten na ni gang zag bzhis/ /bzhi po dag ni thob gyur pa/ /skal ba chen po gang lags pa'i/ /zhus pa'i lan de bdag la gsungs/ /zhes pa dang / rdeg par byed pas rdeg pa 'thob//ces bya ba la sogs pa gsungs so/ /lha zhig gis gzhan la rdeg par byed pa ste/ dbyug pa dang mtshon cha la sogs pa rnam pa sna tshogs kyis rdeg par bya bas so/ /brdeg pa des kyang phal cher 'di nyid du bdag nyid la rdeg pa 'thob ste/ longs spyod dang 'tsho ba rnams 'phrogs par byed pa'o//'dir gzugs can snying po dang ma skyes dgra yang phan tshun du brjod par bya'o/ /lus kyi gnod pa'i skyon bstan nas ngag gi gnod pa smras pa/ khon du 'dzin pa ni khon du gzung ba ste zhe sdang dang 'brel pa gang la yod pa ni khon can te/ gzhan la tshig ngan dang mtshang 'dru ba la sogs pas gzhan gyi rgyud la khon skyes pa zhes bya ba'i don to//de khon du 'dzin pa des khon can mthong ste/ nyams su myong ba skyed pa yin no/ /ji ltar de gang dag gi gnas skabs la gzhan la khon du 'dzin pa de bzhin du gzhan de yang nang du khon du 'dzin par 'gyur te drug sde bzhin no//de bzhin gshe bas gshe ba ste/ /zhes bya ba ni tshig rtsub po brjod pa ni gshe ba'o/ /de gang smra ba de ni gshe ba ste/ gshe bar byas pa'i 'og tu bdag la gzhan las gshe ba 'thob par 'gyur te/ gang de gshe ba ni b+ha ra d+h+wa dza la sogs pa bzhin no/ / khro bar byed la khro ba 'byung / /zhes bya ba ni gang la la gzhan dag la khro bar byed pa ste/ khro bar byed pa'i skye bo ngan pas phyir yang 'thob par 'gyur te/ nye dga' la sogs pa bzhin no/ /de la 'dir ni dge sbyong byed pa'i chos bzhi bstan te/ go rims bzhin du brdeg pa la slar brdeg par mi bya ba dang /mtshang 'dru ba la slar mtshang 'dru bar mi bya ba dang / gshe ba la slar gshe bar mi bya ba dang / khro ba la slar khro bar mi bya ba dang / gzhan du na gnod pa 'thob par 'gyur ba'o/ /mi shes pa'i rgyud las ni 'khu ba thams cad 'byung ngo zhes bstan pa'i phyir/'di gzhan dge sbyong zhes bya ba la sogs pa smos so/ /yul kau shAm+bI'i dge slong dag las brtsams pa yin te/ dge slong dag sngon byung ba'i dus na ka shi'i rgyal po tshangs pas byin zhes bya ba dang / ko sa la'i rgyal po dir gi la zhes bya ba phan tshun mi mthun par gyur te/rgya cher dir gi la'i mdo dang lung bar ma las 'byung ste/ de nyid smras pa/ ji ltar yang bcom ldan 'das kyis de skad du gsungs pa de ltar na yang bdag cag gis ni nus so zhes pa nas ji srid du tshigs su bcad pa bcu gnyis gsungs so/ /gang byis pa rnams kyi 'ching ba dang khon de smras pa/'di gzhan zhes bya ba ni thos pa med pa ste/ chos zhes bya ba 'di dang sbyar ro/ /dam pa'i chos ma mnyan pas ni gcig tu dang por khon byed pa dang 'brel pa yin gyi gzhan ma yin no zhes bya ba'i don to/ /'di gzhan zhes bya ba ni gzhan gyi phyir ma yin pa ste/ma thos pa ni mi nyan pa'o/ /mi sems pa dang mi bsgom pa la sogs pa yang srid pa'i phyir 'dir sogs pa'i sgras brjod do/ /gang zhig de ltar khon du byed pa yin zhe na/ byis pa zhes bya ba yin te/ byis pa'i mtshan nyid ni mi mkhas pa zhes bya ba ste rnam par mi shes pa'o//de gang yin zhe na don gyi de nyid cung zad kyang mi rig pa yin te/ dam pa'i chos zhes bya ba 'dir yang rjes su 'brang ngo / /thos pa nyams pa dang ma thos pa yongs su brtag pa yang mi rig pa'i phyir te/ gang gis de ltar dam pa'i chos mi shes pa yin pas de nyid byed pa yin no/ / gang yang de mngon par shes pa de ni nam yang da ltar gyi spyod pa des spyod par mi byed do/ byis pa zhes bya ba yang rig pas thob pa'i shes pa med pa'i phyir smras pa/ yang dag par mngon par shes pa med pas te/ gzhan las shes pa med pa'o/ /gal te shin tu tshe ring ba yin te/ de bas na tshe'i dregs pas rlom par 'gyur te khon du 'dzin par byed do zhe na/ yongs su tshe thung 'di la yang / /zhes bya ba smos te/ 'di la zhes bya ba ni yongs su snang ba'i rnam pa 'dis yun shin tu thung bar gnas pa'i srog yod kyang blun pas khon par byed do/ /gyi na'i phyir zhes bya ba ni sems can gzhan dag lhan cig gyi na tsam la kun du 'khrug pa'i rgyu des bdag la rjes su 'ching bar byed do//'khon pa'i 'bras bu 'thab pa la sogs pa ni ma thos pa dang mi shes pa las 'byung ngo zhes bstan pa'i phyir/ 'di ni mchog ces bya ba la sogs pa smos so/ /so sor smra zhing zhes bya ba ni so so tha dad pa'i rnam pa'i sgra yod pa de ni so sor smra ba nyid de/khyed cag gi nang nas 'di dag kha cig ni phan tshun rnam pa sna tshogs kyis mi mthun pa'i tshig rtsub po la spyod par gyur ces bya ba'i don to/ /mthun par 'jug pa ni mnyam du 'jug pa ste/ gang du 'thab par 'dod pa dang /phyir rgol bar 'dod pa dang / ha cang mi myur ba dang mi mgyogs pas rnam par 'khrug pa la 'jug par 'gyur te/ 'thab mo de dag ni myur du zhi bar 'gyur gyi gzhan ni ma yin no/ /'thab mo 'di dag kyang ji lta bu zhe na/ dge slong dag khyed cag gi nang nas kha cig gis 'di lta bu zhes bya ba smras te/'di ni mchog ces bsams nas su/ /zhes bya ba gal te 'di gzhan gyi phyogs kyis byas pa ni mchog ma yin no zhes ji ste de ltar phan tshun mngon par zhen pas bsam pa ste rtsis pa dang / lhag par grol ba zhes bya ba'i don to/ /'di skad ston te/ gal te khyed cag kho nas ji ltar khyed cag gi phyogs la so sor smra zhing mthun par 'jug par mi 'gyur gang du yang de ltar bsam pa yin zhe na/smras pa/ khyed cag nyid kyis dge 'dun 'byed pa'i tshe/ /zhes bya ba smos so/ /'di zhes bya ba ni gang gi phyir zhes bya ba'i don to/ /gang du de bzhin gshegs pa'i nyan thos kyi dge 'dun 'byed pas rtsol bar byed pa dang /tshogs pa med cing skabs la dmigs par gyur pa de 'on kyang khyed cag ci'i phyir 'di gzhan gyis byas pa mchog ma yin pa dang / bdag gis byas pa yang mchog yin no zhes bsams par byed/e ma'o kyi hud rmongs pa zhes bya ba'i don to/ /'di ni zhes bya ba ni 'di nyid dge 'dun te/ thar pa'i lam bsgom par nus pa yin te/ bdag med pa la lhag par mos pas so/ /mu stegs can la sogs pa ni dge 'dun ma yin no zhes mtshon pa yin te/ 'thab mo zhi bar bya ba mtshon pa'o//ci phyir stobs med sems mi byed/ /ces bya ba ni khyed cag gi nang nas gang la la bdag nyid la yang nyam chung ba ste/ ci'i phyir mi shes pa dang mi dmigs pa'o/ /gal te kha cig bdag nyid la bdag nyid shes pas stobs med pa ni nus pa med pa ste/ mi rtag pa la sogs pa'i skyon gzhan gyi dbang nyid du bran dang dman par shes par byas nas nga rgyal de dang bral bar 'gyur te/des na de dag yan lag ma tshang ba'i phyir smras pa yin te/ phyogs gcig bzhin du phyogs kyis ni rtsod pa 'phel bar 'gyur ro/ /de ltar phyogs dang gzhan nyid kyis bye bar gyur pa ni yang phyis 'dum par 'gyur ba med de sa bon bsregs pa'i myu gu mi 'byung ba bzhin no zhes rtogs pa la/rus pa gcog cing zhes bya ba la sogs pa ste/ rus pa bcag pa yin pas rus pa gcog pa ste dgra de dag yang 'dum par 'gyur te/ dper na ka shi ka dang ko sa la'i rgyal po bzhin no/ /srog gcod la zhes bya ba ni srog la sogs pa 'phrog pa tsam yang 'dum par 'gyur te/'di dag gcig la gcig rnam par 'khrug par byed pa yang phyis dga' ba sgrub par byed do/ /de'i yo byad nyams pa yang sgrub par byed pa'i phyir smras pa/ rta dang phyugs dang / nor 'phrog pa'i ngang tshul gang la yod pa de ni de dag go//rta la sogs pa'i skye ba'i gnas 'jig par bstan pa'i phyir/ yul 'khor 'joms par byed pa yang / /zhes bya ba smos te/ yul yang phan tshun 'jig par byed do/ /phyi nas zhes bya ba ni de'i 'og tu ste/ de dag gyi na tsam gyi rnam pas 'dum par 'gyur te/ mjal dum ni phrad pa dang dga' ba dang byams pa zhes bya ba'i don to/ /khyed cag ci phyir byed mi 'gyur/ /zhes bya ba ni khyim na gnas pa ste/ 'di ltar 'dod pa'i sems kyis khyim kun du bzung ba yang de ltar 'dum par byed na/ khyed cag khyim yongs su spangs par gyur kyang rgyu gang gis 'dum par mi byed ces so//thos pa nyung ba'i phyir ro zhe na/ yang chos 'di rnam par shes na go zhes bya ba smos te/ khyed cag gis yan lag bcu gnyis bstan pa'i chos phyin ci ma log par khong du chud par gyur kyang rgyu gang gis 'dum par mi byed ces so/ /thos pa nyung ba'i phyir ro zhe na/ yang chos 'di rnam par shes na go//zhes bya ba smos te/ khyed cag gis yan lag bcu gnyis bstan pa'i chos phyin ci ma log par khong du chud par gyur na zhes pa'o/ /yul kau shAm+bI'i dge slong mdo sde 'dzin pa dang / 'dul ba 'dzin pa dang / ma mo 'dzin pa mi bzad pa rnam par gnon pa zhes bya ba lung las 'byung ngo //mdo sde la sogs pa thams cad la yang rnam pa thams cad du rtsod pa smad de/ dge slong dag 'thab pa dang mtshang 'dru bar ma byed cig ces bya ba la sogs pa bstan pas so/ /ji lta bu chos rnam par shes pa dang / bstan pa'i chos de yang ji lta bu zhe na/ mkhas pas brtags shing zhes bya ba la sogs pa smos te/brtags shing zhes bya ba ni mchog tu brtags shing brtags pa ste/ rigs pa dang 'brel pa zhes bya ba'i don to/ /mkhas pa zhes bya ba ni blo gsal ba ste/ mkhas pas ni de gsal bar byed pa dang / yang dag par ston par byed pa dang / legs par 'chad par byed do/ /tshig ni ngag ste de nyid shes pa dang ldan pas bshad pa ste/ ji skad du bshad na shes par 'gyur ba ste/ ston par byed na zhi ba'i tshig /ces gsungs pa'o/ /tshig ces bya ba ni bstan pa'i chos te/ de nyid kyi yang khyad par ni/ /spyod yul ston par byed pa yi//zhes bya ba ste/ dran pa nye bar gzhag pa bzhi la gnas pa ni 'phags pa'i chos 'dul ba'i spyod yul zhes brjod de/ de ston pa'i tshul gang la yod pa'i de'o/ /khyad par gyi don dang ldan pa 'dis ston pa yin no/ /gang gi don du yang thub pa mchog gis bstan pa/ de yi don ni rtsol byed pa//zhes bya ba la sogs pa ste/ byed cing 'dug pa'o/ /'dod chags la sogs pa'i gnyen po bstan pa'i bya ba de'i rjes su 'jug pas nyams su myong ba'i phyir ro/ /ci'i phyir 'dod chags la sogs pa 'dis bsal ba yin zhe na/ 'di ltar kha bya yis zhes bya ba shin tu phyin ci log pa nyid de/gcig tu srid pa gsum la rgyab kyis phyogs pa med pa'i phyir ro/ /de yang dag par ma go bas rang gi don med pa yin gyi/ gzhan du ma yin no zhes bstan pa'i phyir/ lus can zhes bya ba smos te/ gang gi tshig kyang bden pa ma yin pas khyed cag nyid 'thab mo'i lus can thob par byas te/gang gi de chad pa'i byed pa po bla ma gang gis byas pa des khyed cag nyid rnam par 'khrug par byas so/ /khyod ni mi mkhas zhes bya ba ni khyed kyi ston pa de yang phyin ci ma log pa'i don mi shes pa yin na/ de la brten pa'i khyed cag lta smos kyang ci dgos zhes ston pa yin no//ci'i phyir de mi shes pa yin zhe na/ phan tshun rab tu 'gal ba yin te/ ji skad du bshad pa ma dad pa'i sems kyis zhes bya ba la sogs pa ste/ de nyid bstan pa'i phyir/ pha rol po dag ces bya ba ni da ltar gyi phyir rgol ba nyid de rab tu zhe sdang bas gnod pa dang sdang ba'i sems yod pa'o//'dir tshig gam gsung rab de'i don la mi shes pa zhes bya ba ni don nam tshig 'bru ji lta ba bzhin du ma rtogs pa'o/ /gang gis ji lta ba bzhin du shes pa yin zhe na/ sangs rgyas bcom ldan 'das dang / 'phags pa'i nyan thos de'i rjes su 'jug pa dag ni ma gtogs so zhes bstan pa'i phyir/bdag ni zhes bya ba smos so/ /bdag nyid gnod sems med pas 'di nyid rtogs pa'am/ 'di nyid sgrub pa la brtson par bya zhing bya ba byed pa'o/ /'di na mkhas pa gang yin pa/ /zhes bya ba ni 'phags pa shA ri'i bu la sogs pa yang ste/ gang gang dag tu nus pa des der bya ba yin te/'dir bdag nyid kyis bya bar nus pa zhes bya ba'i don to/ /'di na mkhas pa gang yin pa/ /de dag bzhams pa'i tshig gis zhi/ /zhes bya ba ste/ phan tshun mtshams sbyor ba'i pho nya dang pho nya'i lan dang / bsgo ba dang phyir bsgos pa'i rgyun gyis ni sel bar 'gyur te/rtsod pa nye bar zhi bar 'gyur ro zhes bya ba'i don to/ /gzhan dag ni 'di na don gzhan du ston te/ de nyid smras pa/ yul kau shAm+bI pa'i dge slong gnyug mar gnas pa gdug cing pha rol gnon pa mdo sde 'dzin pa la sogs pa 'khor dang bcas pa dang / yangs pa can gyi glo bur du 'ongs pa dag kyang de bzhin du der lhags pa dang /de dag mdo'i tshig gi rnam par dbye ba'i ched du rtsod pa byung bar gyur te/ de nas kau shAm+bI pas de'i skyon btsal ba'i nang khrims bcas so/ /de la yangs pa can gyi dge slong dag rjes su mi 'jug ste/ des na de dag lo bcu gnyis su rtsod par gyur to//de la kau shAm+bI pas smras pa/ bdag cag gi mdo'i rnam par 'grel pa ni don dang ldan pa yin zhing de skabs la bab par byas pa yin no zhes yul yangs pa can dag la mtshang brus nas smras pa/ mkhas pas brtags shing zhes bya ba la sogs pa brjod do//brtags pa ni gzhan gyis brtags pa ste/ yongs su mi gsal zhing rigs pa dang 'brel pa med pa'i phyir dang / mngon par 'dod pa'i don dang tshig 'bru dang mi ldan pa'i phyir ro/ /brtags shing gsungs pa'i tshig gcig pur ma zad de mkhas pa ltar snang ba yang yin te/mkhas pa ni blo dang ldan pa ste/ der snang ba gang gi tshig ste mkhas par smos so/ /'on kyang de las gzhan pa'i skye bo dang mnyam pa thob par 'gyur te/ mkhas pa'i gzugs brnyan te 'dis na mkhas pa zhes pas byas pa yin no zhes bya ba'i don to/ /tshig ni ngag go/ / spyod yul ston par byed pa yi/ /zhes bya ba ni gnas su bskyed pa dang skabs dang ldan pa'i phyir ro/ /gal te spyod yul ston par byed pa ma yin na ni/ thams cad kyi thams cad du rigs pa dang ldan pa med par 'gyur te/ de ltar mtshang 'dru bar byed do/ /kau shAm+bI pa la des mtshang brus te smras pa//khyod ni mi mkhas zhes bya ba la sogs pa'o/ /kha bya yis ni rtsol byed pa/ /zhes bya ba ni gti mug gi dbang gis rjes su mthun pa'i mchog nyams pa ni kha bya zhes brjod de/ kha ni kha'i sgo'o/ /rtsol byed pa zhes bya ba de ni rab tu 'bad pa'o/ /khyed cag gis kha'i bya ba gcig pur ma zad de/bstan bcos kyi don yang cung zad rtog pa med de/ nges par khyed cag gzhan gyis bskul ba dang gzhan gyi tshig gi lugs can te gzhan gyi dbang du byas pa'o/ /khyed ni mi mkhas zhes bya ba ni khyed cag gis skul bar byed pa'i bla mas kyang ci yang mi shes te/des kyang rang nyid kyis kyang ci yang mi shes na des khyed cag la ci zhig slob par 'gyur zhes so/ /de dag gis de la yang lan smras pa/ pha rol po dag mi shes pas/ /zhes bya ba yin te/ gang bdag cag dang bdag cag gi 'dren pa la tshig ngan pa brjod pa ni khyed cag ste pha rol po nyid ces bya ba'i don to//'di la zhes bya ba ni mdo'i don gyi dbye ba la'o/ /mi shes pas zhes bya ba ni don gyi de nyid mi shes pa'o/ /des na/ 'di la bdag ni brtson par byed/ /ces bya ba smos te/ bdag nyid 'dir mngon par brtson par byed kyi/ bdag cag ma yin par ni tshangs pa la sogs pas kyang 'di byed par nus pa ma yin no//yangs pa can pa dag gis smras pa/ 'di na zhes bya ba ni gang bya ba 'di la yang gang dag ji lta ba bzhin du rtog pa de dag nyid zhi bar nye bar 'gro ba yin no/ /bzhams pa'i tshig ces bya ba ni mtshams sbyor bar byed pa gang dag bye ba rnams sdum par byed pa yod pa de ste rtsod pa'i rgyu de dag la nye bar sbyor ba nyid de/de med na ni de yang med do/ /bzhams pa'i tshig ces bya ba rtsod pa'i rgyu mtshang 'dru ba la sogs pa zhes gzhan dag zer ro/ /thos pa med pa las ni mi shes pa'o/ /mi shes pa las ni gzhan gyis gnod pa byas pa dran pa'o/ /de las ni khon no//kho na las ni rtsod pa ste/ de ltar brgyud pa de bstan pa'i phyir/ bdag la kha zer zhes bya ba la sogs pa smos so/ /bdag la gshe zhes bya ba ni sngon bdag tshig rtsub pa 'dis smras so zhes gnod pa byed pa dran pas khon du 'dzin pa'o/ /bdag la kha zer zhes bya ba ni smras pa ste/ ci zhe na/ bdag ni 'di gang de'i bran yin pas smras pa lta bu'o/ /bdag pham zhes bya ba ni bdag pham par byas shing bslus pas brnyas pa byas pa'o/ /bdag pham byed pa zhes bya ba ni gzhan gyi lag gis bdag la pham par byas pa ste/ gzhan byed du bcug pa'i tshul gyis zhes bya ba'i don du/'di gang sems la 'dzin byed pa/ /zhes bya ba ni sngar bstan pa'i rnam par 'gyur ba'i mtshan mas gang byis pa rab tu 'dzin pa yin no/ /de yi khon ni zhi mi 'gyur/ /zhes bya ba ni de dag gi rtsod pa'i rgyu zad par mi 'gyur ro/ /de dag bzlog pas dkar po'i phyogs kyi tshigs bcad smras pa/bdag la kha zer bdag la gshe/ /zhes bya ba la sogs pa ste/ rtogs par sla'o/ /ci'i phyir rgyu gang gis khong khro ba dang khon du 'dzin pa de nyid kyis khon du 'dzin pa zhi bar mi 'gyur zhe na/ 'di na khon gyis zhes bya ba la sogs pa smos so/ /gnod sbyin mos bud med cig zin pa'i dbang du byas nas 'di gsungs te/gnod sbyin mo des smras pa/ gal te khon khyod kyis btang na khyod ngas btang ngo zhes pa dang / des mi gtang ngo zhes bya ba la sogs pa ste/ de'i dbang du thub pas 'di gsungs so/ /de thos pas gnod sbyin mo dul bar gyur to/ / med ces bya ba ni dgag pa'o/ /pa zhes bya ba ni gang gi phyir te dri mas dri ma sel ba dang / mun pas mun pa bstsal ba de ni med de/ gcig gi bdag nyid yin pa'i phyir ro/ /de bzhin du 'dir yang khon te gnod pa dran pa las skyes pa des yid 'khrugs par byed pa'i rgyu des te tshul de nyid kyis ni khon can dag zhi bar 'gyur ba dang sel bar 'gyur ba yod pa ni mi srid de/'di na zhes bya ba ni 'dod pa'i khams te/ gong ma dag na ni khon med pa'i phyir ro/ /nam yang zhes bya ba ni dus gang gi tshe na'o/ /de lta na gang gis zhi bar 'gyur zhe na/ bzod pas zhes bya ba smos te/ gzhan gyi gnod pa la bzod pas khon med pa ste/sgron mas mun pa bsal ba bzhin no/ /ci da lta'i sbyor ba nyid kyis bstan pa yin nam/ 'on te sngon gyi spyod pas yin zhe na/ /'di ni chos kyi rang bzhin yin/ /zhes bya ba smos te/ 'dis khon med pa yang khon rab tu zhi ba'i grangs su 'gro ba bstan pa ni dus rtag tu yod do//sngon gyi sangs rgyas kyis ma mdzad de dam pa'i chos kyi rang bzhin gsal bar byed pa'i phyir ro/ /khon gyis byas pa'i nyes dmigs mthong ba'i mkhas pa ni gang du yang khon par mi byed do zhes bstan pa'i phyir smras pa/ khon gyis khon can nam yang zhi mi 'gyur//zhes bya ba la sogs pa smos te/ khon gyis khon ni nam yang sel bar mi 'gyur te/ mi gtsang bas mi gtsang ba bzhin te/ chos nyid de'i rang bzhin gyis de'i rang bzhin ni sel bar mi 'gyur ro/ /de lta na gang gis zhi bar 'gyur zhe na/ khon med rnams kyis te/bzod pa dang byams pa dang / snying rje bskyed pa la sogs pas so/ /khon sel bar mi 'gyur ba'i skyon ni sha khon zhugs pa zhes bya ba smos te/ khon dang 'brel pa'o/ /gnod pa ni sems can rnams la phan pa ma yin pa zhes bya ba'i don te/ grags pa ma yin pa sogs pa byed pa'i phyir dang /sbrul la sogs pa skye gnas ngan pa dang gzugs ngan pa la sogs pa'i rgyu yin pa'i phyir ro/ /de bas na rgyu de nyid kyis nam yang khon par mi bya ste/ mkhas pa ni bdag la phan par 'dod pa dang bde bar 'dod pa'o/ /khon bsten pas ni shin tu mi bzad pa'i ngan song du 'gro ba yin la de bas na rnyed par gyur na ni/rtag tu dam pa de dag dang bsten par bya'o zhes bstan pa'i phyir/ brtan pas legs gnas zhes bya ba la sogs pa smos so/ /rgyal po'i khab na 'tsho byed gzhon nus bskyed la bu gnyis yod de/ de gnyis kyis gnang ba thob ste/ gcig ni drug sde las rab tu byung ngo / /gcig ni ka phi las rab tu byung ngo / /de las gcig ni mi dge ba'i bshes gnyen gyi skyon gyis nyams par gyur to/ /cig shos ni dam pa dag la brten pas de ltar ma yin te/ de de las brtsams nas tshigs su bcad pa gnyis gsungs so/ / gal te rnyed na zhes bya ba ni de ltar de kho na spang bar gal te 'dod na ni dam pa btsal bar bya ste/ gal te thob par gyur na'o/ /grogs po mkhas pa zhes bya ba ni rtag tu byed pa dang / gus pa'i sbyor ba gnyis kyis bdag nyid ngan par spyod pa dag las srung ba yin te/ mkhas pa ni bag yod pa ste/de'i grogs ni chen po yin pa'i phyir dge ba'i bshes gnyen chen po'o/ /lhan cig spyod pa ni gang gis gnas gcig la rtag pa nyid du'o/ /brtan pas zhes bya ba ni mkhas pa ste/ mi 'gyur ba de nyid kyis de'i yon tan rtogs pa'i phyir ro/ /nyon mongs thams cad mngon par zil mnan nas//zhes bya ba la/ kun nas 'dzag pa'i nyon mongs pa ste/ tshad la sogs pa'i yo byad kyis nges par spang bar bya ba ma yin te/ de dag yang mi rtsol bas spang ba ste/ chags pa thams cad las so/ /de yang spyad ces bya ba ni grogs po mkhas pa bsten pa'o/ / ji lta bus she na/ dga' ba'i yid kyis zhes bya ba ste mgu ba'i yid kyis te/ de'i spyod pa khyad par can mthong ba'i phyir ro/ /dran ldan zhes bya ba ni dran pa mngon du byas pa ste/ de'i lung khyad par can ma brjod pa'i phyir ro/ /'di ni dran pa dang shes bzhin dang ldan par bstan to/ /rmongs pa dag la ni ma yin te/dran pa nyams pa yod pa'i phyir dam pa dag la rten par byed pas so/ /brten pas legs gnas zhes bya ba la sogs pa ni rtogs par sla'o/ /yul 'khor yangs pa spangs pa'i rgyal po ltar/ /zhes bya ba ni dper na rgyal po chen po legs mthong shin tu rgyas pa'i 'khor los sgyur ba'i rgyal srid spangs te/chos la dad nas yul 'khor dang yul mi rgya che zhing shin tu yangs pa rgya mtsho chen po bzhi'i mthas gtugs pa spangs nas gcig tu spyod par gyur pa de bzhin du gcig pus spyad pa ni grogs med par yang 'dug par bya ste/ sdig pa dag ni mi bya ba'o/ /sdig can gyi skye bo la brten pas ngan par bstsags par mi bya ba yin te/ ngan par spyod pa thams cad ni mi dge ba'i bshes gnyen la rag las pa'i phyir ro/ /rnam pa thams cad du skyes bu dge ba'i grogs po btsal zhing skye bo ngan pa ma yin no zhes gsal bar bstan pa'i phyir/bdag dang mthun par spyod pa zhes bya ba la sogs pa smos so/ /dge slong zhig gis skyes bu dam pa la brten par bya'o zhes bya ba la sogs pa thos nas rang gi yul dag tu grogs bzang po btsal ba las gang yang ma rnyed nas/ bcom ldan 'das gang na ba der song ste phyin nas don de gsol ba dang /de'i dbang du mdzad nas 'di gsungs so/ /bcom ldan 'das kyang de nyid bsnams te/ dgon par rgyu zhing gshegs pa na/ /glang po che rgan po zhig glang po che gzhon pa'i tshogs dag gis rnam par gtses pa las skyo bar gyur te/ rang gi tshogs bor nas gcig pu zhig gzhan gyis ma zos pa'i rtsi thog za ba dang /shin tu dngas shing gtsang ba'i chu 'thungs la sems khral bskyungs pa gzigs nas tshigs bcad 'og ma gsungs so/ /spyad pa zhes bya ba ni gal te grogs po dam pa thams cad du rgyus shing btsal yang 'on kyang rnyed par ma gyur pa ni thos par ma gyur pa'o//ji lta bu zhe na/ grogs bzang dag dang mthun pa'i zhes bya ba smos te/ bdag dang mnyam pa ni bdag dang yon tan mnyam pa'i grogs po yang yin na khyad par du gyur pa lta ci smos/ bzang po dang mnyam pa ni yin gyi grogs po gzhan ni yongs su spang bar bya ba'i phyir ro//de'i bya ba dang rjes su mthun pa smras pa/ gcig pus spyod pa brtan par bya/ /zhes pa ste/ de lta bu'i gnas skabs na ni mi g.yo bar 'dug par bya'o/ /ci'i phyir zhe na/ byis pa grogs su mi 'gyur bas/ /zhes bya ba smos te/ gang gi phyir skye bo ngan pa las ni phan 'dogs pa med do/ /grogs po'i don ni phan 'dogs pa yin pa'i phyir ro/ /yang dag par na skye bo ngan pa ni thams cad kyi dgra yin te lha sbyin la phyogs shing ma la sogs pa bsten pas ma skyes dgra dang 'phags skyes po la sogs pa sdug bsngal bar gyur pa yang 'dir brjod par bya'o//'o na bya ba la sogs pa la yang grogs po'i gnas skabs med na ci'i phyir mi rnams la ni yin zhes rtog pa la/ gcig pu spyod par byed bla bas/ /zhes bya ba smos so/ /gcig pur 'dug cing gnas pa ni dam pa rnams kyis mchog tu bsngags pa yin no//byis pa grogs su mi 'gyur bas/ /zhes bya ba ni mi dge ba'i bshes gnyen la ni ma yin te/ de la brten na ni dam pa yin yang de'i dbang gis smad pa la sogs pa 'thob pa'i phyir ro/ /des na de nyid smras pa/ sems khral bskyungs te gcig pu spyod/ / ces bya ba yin te/ gang gcig pu skye bo ngan pa spangs shing gnas pa de ni gdung ba med par gnas pa yin no/ /sems khral ni spro ba ste/ nam zhig 'di las grol zhes de lta bu'i sems la gdung ba de dang bral ba'i phyir sems khral bskyungs pa'o/ /yang na bskyungs pa'i sgra ni dgag pa'i don te/ji lta bu zhe na/ ma tang dgon pa'i glang po ltar/ /zhes bya ba ste/ ma tang gi zhes bya ba ni sngon dgon pa de na drang srong ma tang gi zhes bya ba gnas pas so/ /yang na dmod pa'i ser bas skye bo dang yul mang po bsregs pas dgon par gyur pa ste/ de na gnas pa'i glang po ni dgon pa'i glang po ste/des ji ltar rang gi khyu spangs nas gcig pu bag rkyong zhing rang dgar gnas la gdung ba med pa de bzhin no/ /'khu ba'i tshoms te bcu bzhi pa'i rnam par 'grel pa rdzogs so// //sngar bstan pa'i 'khu ba spang ba'i thabs bstan pa'i phyir/ de'i 'og tu dran pa'i tshoms bstan te rngub pa la sogs pa'i dran pa med par blo legs par bsgoms pa med do//sde tshoms kyi 'grel pa smras pa/ sangs rgyas kyis ni zhes bya ba la sogs pa'o/ /dge slong dag dbugs 'byung ba dang rngub pa dran par gyis shig /gang gi phyir ji tsam na rnam par rtog pa rgyun chad par 'gyur ro zhes pa ste/des na tshigs su bcad pa gnyis gsungs so/ /rngub pa yin pas rngub pa ste/ rlung nang du 'jug pa'o/ /'byung ba yin pas 'byung ba ste/ gang phyir 'byin pa'o/ de ltar gsungs pa dge slong dag dbugs rngub pa ni rlung 'thung zhing 'jug pa'o/ / dbugs 'byung ba ni rlung phyir 'byin pa ste/ mngon par 'byin pa yin no zhes so/ /dbugs rngub pa dang 'byung rngub bo/ /de la dran pa ri de la dmigs pa ste/ dbugs 'byung rngub dran pa'o/ /de yang shes rab kyi bdag nyid de dngos po la rtogs pas 'jug pa'i phyir ro/ /de la dran pa'i tshig ni de'i tshogs shas che bar 'jug pa ste/rlung 'jug pa dang 'byung ba la dran pa brjed pa med pa'i phyir ro/ /gang zhig ces bya ba ni khyim pa'am/ rab tu 'byung ba chos 'di pa ste/ phyi rol pa rnams la ni bdag la lhag par mos pa de med pa'i phyir ro/ /yongs su rdzogs par zhes bya ba ni yongs su dag pa'i gnas skabs na 'di ltar 'jug pa yin no//gal te mnyam par gzhag na 'gyur ba yin no zhes bstan pa'i phyir smras pa/ legs bsgoms pas zhes bya ba smos te/ mnyam par gzhag pa'i sa pa yin pa'i phyir/ 'dod pa'i khams na ni bsgom pa med na ji ltar de'i sa na legs par bsgoms par 'gyur zhe na/legs par bsgoms pa ni yang dag par bsten pa'o/ /bsgoms pa yongs su byang ba ni rim pa nyid kyis ston par 'dod pa'i phyir rim gyis zhes bya ba smos te/ grangs la sogs pa'i rim pas lhag par bgrang ba ste/de'i phyir 'di ni rnam pa drug tu bgrang ba yin te/ bgrang ba dang / rjes su 'gro ba dang / 'jog pa dang / mtshan nyid dang / bsgyur ba dang / yongs su dag pa'i dbye bas so/ /'dod pa ni nye ba'i rim pas kyang mngon du bya ba yin no/ /ji lta bur zhe na/ sangs rgyas kyis ni bstan pa bzhin/ /zhes bya ba ni/ bcom ldan 'das kyis rim pa gang gis mdo dang / mngon pa'i chos dag tu gsungs pa ste/ dbugs rngub pa dang 'byung ba gang zhe na/ rnam pa bcu drug po zhes bya ba la sogs pa rgya cher ro/ /bsgoms pa'i 'bras bu ni/ /'jig rten 'di na kun nas gsal//zhes bya ba ste/ gang zag gang gis 'di la legs par bsgoms pa des ni 'gro ba 'di dag thams cad mngon par zil gyis gnon cing kun nas gsal ba yin te/ ji lta bu zhe na smras pa/ bral ba ste/ las dang nyon mongs pa'i 'ching ba spangs pa'i phyir 'dir dpe bstan pa ni/sprin bral zhes bya ba smos te/ dper na dbyar gyi sprin dang bral ba ste/ ston gyi dus su zla ba gang ba ni lhag par mdzes pa yin te/ de bzhin du de yang srid pa gsum na'o/ /ji ltar 'byung rngub dran pa bsgoms pa yin zhe na/ smras pa/ lus ni 'jog byed cing zhes bya ba ste/lus mi 'gul zhing brtan pas yul dag la lhag par mi g.yeng ba yin te/ gang gi phyir g.yeng ba las ni lus 'gul bar 'gyur zhing de las ni blo g.yo bar 'gyur ro/ /de las ni bsgom par mi nus pa yin no/ /lus 'jog nus par gyur na ni lhag par gnas pa'i ngang tshul can yin te dper na grang ba dang tsha ba la sogs pa mdo las 'dir brtag par bya'o//de bzhin sems ni zhes bya ba ni 'jog par byed pa nyid yin te/ sems kyis log pa'i rnam par rtog pa spangs pa las ni yang dag par nges par lus dben pa la gzhog pa zhes bya ba'i don to//dang gi sgra ni gnyi ga 'jog pa yin te/ lus 'jog par byed pa na sems kyang 'jog pa zhes bya ba'i don to/ /ji lta bur byas na de ltar bsgoms par nus pa de bsgrub pa'i phyir/ 'greng dang zhes bya ba la sogs pa smos te/ spyod lam gang gis de ltar bsgoms par nus pa yin pa de nyid smras pa/'greng ba ni langs pa'o/ /'dug pa ni nye bar 'dug pa ste/ skyil mo krung bcas pa la sogs pa'o/ /dang gi sgra ni 'dir gnyi gar yang sbyar te 'dug pa dang 'greng ba'o/ /de bzhin nyal ba na zhes bya ba ni 'dug pa na yang zhes bya ba'i don to/ /'gro ba na ni g.yeng ba yin pa'i phyir dran pa thams cad du med par ston pa yin no//de zhes bya ba ni dbugs 'byung rngub dran pa'o/ /'jog ces bya ba ni gang de ltar bcom ldan 'das kyi nyan thos legs par 'jog pa ste/ lhag par bsgoms shing yongs su len na'o/ /thob par 'gyur ba ni rnyed par 'gyur ba'o//ci zhig ce na/ snga phyi'i khyad par rnams bya ba smos te/ snga ma'i dang phyi ma'i khyad par ni snga phyi ste/ rlung 'jug pa ni snga ma'o/ /'byung ba ni phyi ma ste/ de'i khyad par ni phan yon te/ skye ba dang 'jig pa yongs su brtags na mi rtag pa'i 'du shes la sogs pa'i tshal 'thob par 'gyur ro//khyad par 'di thob pas cir 'gyur zhe na/ 'chi bdag rgyal pos bltar yang med par 'gro/ /zhes bya ba ste/ 'chi bdag gi ming can de'i dbang dang yul du mi snang ba ste/ 'chi ba med pa'i go 'phang du 'gro ba'o/ /gang gi tshe dngos po rnams kyi skye ba dang 'jig pa'i chos 'phags pa'i lam gyis rtogs par gyur na ni phra rgyas spangs shing der 'gro ste/gang du 'chi ba'i bdud kyis mthong zhing bgegs su 'gyur ba thams cad du 'jug pa'i 'chi bdag gi rgyal pos mthong ba las grol ba ste thar pa la gnas pa yin no zhes so/ /ji ltar khyad par 'thob pa yin zhe na/lus gtogs zhes bya ba la sogs pa ste/ dgon pa na gnas pa'i dge slong rab tu mang po zhig gi dpyod pa skyes te/ bcom ldan 'das kyi spyan sngar song nas btsun pa mya ngan las 'das pa ji lta bu lags zhes gsol ba dang / bcom ldan 'das kyis bka' stsal pa/de ni brjod par mi rung ste/ dge slong dag dper na 'ga' zhig gis dmus long la gzugs rnam pa sna tshogs pa yid du 'ong zhing yid 'phrog pa bstan na ci des shes par 'gyur ram/ btsun pa de ni ma lags so/ /de dag ni rang gis rig pa yin te/ci'i phyir zhe na/ gzhan gyi tshig gis ni ji ltar yang rtogs par mi 'gyur ro/ /'on kyang de ji ltar rtogs pa de ltar legs par rab tu nyon cig dang zhes bya ba'i bar du ste/ 'di na gcig pu nyam nga ba ni khyim na gnas pa ste/ dran pa nye bar gzhag pa bzhi bsgom par bya'o zhes pa nas ji tsam du tshigs su bcad pa 'di gsungs so//lus kyi rnam pa yin pas lus su gtogs pa ste/ lus la dmigs pa'i dran pa nye bar gzhag pa bzhi'o/ /lus su gtogs pa'i dran pa gang zhe na/ dge slong dag 'di la nang gi lus la lus kyi rjes su lta zhing zhes bya ba la sogs pa mdo las gsungs pa'o//nye bar gzhag pa ni nye bar gnas pa dang / nye bar skyes pa dang / mngon du gyur pa'o/ /'di'i mtshan ma ni tshul khrims dang dbang po sdom pa yin no zhes bstan pa'i phyir smras pa/ reg pa'i skye mched drug ces bya ba smos te/ yul dang dbang po dang rnam pa 'dus pa la skyes pa'i sems yul la reg pa ni reg pa zhes bya'o//de'i skye mched ni skyed par byed pa dang rgyu nyid de mig la sogs pa drug ste/ grangs drug po de dag la'o/ /bsdams pa ni dul ba ste/ dge slong dag 'di la mig gi dbang po sdom pas bsdam par bya'o zhes mdo las gsungs so//dbang po sdom pas ni tshul khrims kyi sdom pa ma bstan kyang rtogs pa yin te/ tshul khrims ma gtogs par ni dbang po sdom pa med do/ /gang gi phyir de 'di nyid la 'jug pa'i spyod pa de dag gis ni lus su gtogs pa'i dran pa bsgom par nus kyi gzhan gyis ni ma yin no/ / 'dis ni dran pa'i 'bras bu bstan te/ de'i mthus dbang po dul ba'i phyir ro/ /gang zhig ces bya ba ni gang zag tshul khrims dang dbang po sgom pa la gnas pa la ni lus su gtogs pa'i dran pa bsgom pa yod de/ /rtag tu mnyam gzhag 'jog byed de/ /zhes bya ba sngar bstan pa'i rnal 'byor pa'i yon tan bstan pa yin te/rtag tu mnyam par 'jog byed pa/ /zhes bya ba ni rgyun du ting nge 'dzin la bsgom pa mchog tu byed pa'o/ /yang na rtag pa'i sgra ni mya ngan las 'das pa'i bye brag go/ /mnyam par gzhag pa de ni rtag tu mya ngan las 'das pa bdag nyid kyis rtogs par 'gyur te/mnyam par gzhag pa'i sems las ni ji lta ba bzhin du shes par 'gyur ro zhes pa'i tshig gis so/ /gang gis mya ngan las 'das pa rnam par gnas par thob ce na/ bdag nyid kyis zhes bya ba ste/ sems can so so'i bdag nyid kyis mya ngan las 'das pa rtogs par 'gyur te/phyi rol la yang de med pa'i phyir ro/ /dran pa'i stobs nyid kyis ni srid pa'i rgya mtsho las rgal bar 'gyur ro zhes bstan pa'i phyir smras pa/ gang zhig ces bya ba la sogs pa'o/ /tshe dang ldan pa shA ri'i bu spyod lam rnam pa bzhis mdzes pa dang shin tu chog shes pa lags so zhes dge slong dag gis bcom ldan 'das kyi spyan sngar bsngags pa brjod do//bcom ldan 'das kyis bka' stsal ba/ de ni ngo mtshar mi che ste/ de ci'i phyir zhe na/ gang la la zhig dran pa nye bar gzhag pa bzhi la gnas shing bsgom pa zhes bya ba la sogs pa ste/ dge slong gang gis yongs su 'dzin pa spangs pa la ni yod pa yin no zhes bya ba 'di gsungs so//rnam pa thams cad du zhes bya ba ni rnam pa kun nas te lus la sogs pa'i yul la dran par byed pa ston pa bzhin no/ /dran pa ni dran pa nyams pa med pa'i tshul lo/ /rtag tu zhes bya ba ni rgyun du'o/ /lus su gtogs pa dran pa nye bar gzhag pa nyi tsher ma zad de thar pa 'dod pa yang yin no zhes bstan pa'i phyir smras pa/bdag nyid med cing zhes bya ba smos te/ de ltar gyur kyang 'di la ngar 'dzin pa'i dngos po spangs par gyur pa'o/ /'dis ni da ltar byung ba'i bdag ni dngos po spong bar 'dod pa bstan to/ /bdag gir 'dzin pa med ces bya ba ni da ltar byung ba'i dngos po spang bar bstan to//gnyi ga rnam par spang bar bya ba'i phyir yang gi sgra gnyis kyis bstan to/ /'dis ni phung po lhag ma dang bcas pa'i mya ngan las 'das pa bstan nas/ phung po lhag ma med pa'i mya ngan las 'das pa 'dod pa'i phyir/bdag tu mi 'gyur zhes bya ba smos te/ ma 'ongs pa'i bdag dang bdag gir bya ba'i dngos po spang bar 'dun par gsal bar byed pa yin no/ /de ltar dge slong mnyam 'jog ces bya ba la/ rnam pa des de bzhin gshegs pa'i nyan thos kyis dran pa nye bar gzhag cing thar pa'i bsam pa khyad par can skyes par gyur na ni rtse gcig pa'i sems kyis bsgom pa bsgrub par 'gyur te/rtse gcig tu gyur pa'i yid kyis ni myur du/ yul la sred pa dag las rgal bar 'gyur/ /zhes bya ba yin te/ sred pa rnam pa gsum yul rnam pa sna tshogs las skyes pa spang ba nyid do//'khor ba'i rtsa ba ni 'di yin pa'i phyir 'khor ba'i zag pa thams cad skems pa yin no/ /de ltar yul la sred pa dag las rgal bar byas nas skye ba dang rga ba las kyang rgal bar 'gyur ba bstan pa'i phyir/ gang zhig dran par zhes bya ba la sogs pa'o/ / dge slong dag gang la la zhig dad pa phun sum tshogs par 'gyur ba nas/ ting nge 'dzin phun sum tshogs pa'i bar du yin no/ /de ni ring por mi thogs par skye ba dang rga ba'i mtha' ma thob par 'gyur ro zhes bya ba nas tshigs su bcad pa bzhi gsungs so/ /gang zhig ces bya ba ni 'og nas smos pa la nan tan byed pa ste/yang dag par rab tu zhugs pa zhes bya ba'i don to/ /mel tse byed pa zhes bya ba ni 'bad pas brtson 'grus brtsams pa'o/ /mel tse byed pa ni brtson 'grus te/ khyad par thams cad ni brtson 'grus kyis 'dren pa'i phyir ro/ /dran ldan ni lus su gtogs pa'i dran pa dang ldan pa'i phyir ro//shes bzhin ni phyin ci ma log par nges par rtog pa ste/ shes pa khyad par can dang ldan pa nyid do/ /dga' ba ni tshul khrims phun sum tshogs pa de dang ldan pas 'gyod pa med cing rtag tu dga' ba yin pa'i phyir ro/ /rab tu dang ba zhes bya ba ni dad pa'i dbang gis rnyog pa rnams bsal ba yin te/ston gyi dus su mtsho chen po rab tu dang bar 'gyur ba bzhin no/ /de bzhin du kun rdzob kyi tshogs te dad pa la sogs pa'i dbang po la sogs pa phun sum tshogs pa'i phyir ro/ /dus dus su zhes bya ba ni mthar gyis mngon par rtogs par 'byung ba'i phyir ro//chos ni 'phags pa'i bden pa la sogs pa'o/ /dpyod pa ni mthong ba'i lam la sogs pas yongs su brtag pa ste/ de'i stobs kyis nyon mongs pa thams cad spong zhing / de las mi slob pa'i lam la gnas pa yin no/ /gdul ba'i bya ba la nan tan du gang byed pa de nyid smras pa/rgal bar 'gyur zhes bya ba smos te/ rab tu spangs pa'i phyir ro/ /skye ba dang rga ba ni 'khor ba'i phung po ste/ lhag ma med pa'i mya ngan las 'das pa 'thob par 'gyur bas so/ /gsungs pa ni 'jigs pa med pas nga nyid smras te/ phyin ci ma log pa'i shes pa thob pa'i phyir ro//gzhan dag gi bshad pa ni phyin ci log dang ldan pa'i phyir ro/ /gang gi phyir yang brtson 'grus dang ldan pas de nyid la gzud pa'i phyir/ de ltas rtag tu mel tse byed ston cing / /zhes bya ba smos te/ dus rtag tu brtson 'grus brtsams par gyis shig pa ste/ gang gi phyir mel tse ni brtson 'grus yin la/le lo ni gnyid kyi rang bzhin yin pa'i phyir ro/ /brtson pa yis zhes bya ba ni brtun pas spyod cing gus pa ste/ de gang la yod pa de ni brtson pa can te/ dbyug pa can bzhin no/ /sdod pa med par rtag tu sbyor bas nyin mo 'chag pa dang / 'dug pa gnyis kyis sems sgrib pa dag las sbyang bar bya'o zhes bya ba la sogs pa mdo las gsungs so//snga mar rtag tu sbyor ba bstan nas/ 'dis ni gus par sbyor ba bstan te/ dge slong zhes bya ba ni dad pa dang / tshul khrims phun sum tshogs pa tsam gyis gang zag snga ma'i gnas skabs yin pa'i phyir 'di byas pa yin te/de dang ldan pa ni dge slong zhes bya bar brjod par rigs so/ /mkhas pas ni rtogs pa ste/ shes bzhin dang ldan pa'i phyir ro/ /dran ldan zhes bya ba ni dran pa yod pa ste/ de nyid dbang po'i stobs kyis nye bar bkag pa'i rnal 'byor can no/ /kun du sbyor ba spangs nas su//zhes bya ba ni rjes su chags pa dang khong khro ba la sogs pa ste/ rnam pa dgu bye brag med par bstan to/ /skye rga'i zhes bya ba 'dis ni srid pa'i kun du sbyor ba'i dngos po thams cad spangs par bstan to/ /des ni 'di la mya ngan 'das pa thob/ /ces bya ba ni mthong ba'i chos nyid la des nges par thar pa sgrub pa yin te/legs par gsungs pa mnyan pa dang 'brel pa'i brtson 'grus la sogs pas so/ /bstan pas nyan du gzhug pa'i phyir smras pa/ gnyid log ces bya ba la sogs pa smos so/ /mel tse bdag las khyod nyon cig /ces bya ba ni mel tse byed par gyur pas shin tu gus pa dang zhes bya ba ngas khyed la bstan gyis nyon cig pa ste/ tshad med pa'i bde ba'i thabs bstan pa'i phyir ro/ /gus par mi nyan pa'i dbang du byas nas/ gnyid log de dag sad par byed pa yi/ /zhes bya ba rab tu sad par gyis shig pa ste/gang de dag bag med pa la sogs pa'i gnyid kyis zil gyis non pa de dag sad par gyis shig pa'o/ /gzhan du na sangs rgyas 'byung ba med par ni 'gro ba dag tu chos kyi phun sum tshogs pa med pa'i phyir ro/ /gang dag bdag dang gzhan gyi don bya ba la brtson 'grus 'thob pa de dag ni gnyid ma log pa bzhin du 'thob par byas pa ste/de dang rjes su mthun par bstan pas nyan pa'i snod du 'gyur ba nyid du 'dis sbyor ba yin no/ /ci'i phyir de ltar sbyor ba yin zhe na/ 'di ltar/ nyal bas mel tse byed bla ste/ /zhes bya ba yin te/ le lo la sogs pa'i dngos po nyal ba las ni brtson 'grus la sogs pa'i tshul mel tse byed pa mchog yin te/mngon par 'dod pa'i don sgrub pa'i phyir ro/ /rgyu gzhan yang bstan pa'i phyir smras pa/ mel tse byed la 'jigs pa med/ /ces bya ba smros te/ la zhes bya ba ni rgyu bstan pa'i don to//gang gi phyir dge ba bya ba dag la mel tse byed par gyur na ni dmyal ba la sogs pa'i 'jigs pa med de/ dge slong bsod nams dag gis 'jigs par mi 'gyur ro zhes lung las 'byung ngo / /mel tse byed pas 'jigs pa med pa de ci'i phyir zhe na/ 'di ltar/ mel tse byed par brtson pa dang //zhes bya ba smos te/ gnyid mi log pa yin pas mel tse'o/ /mel tse byed pa nyid kyi dngos po yin pas mel tse byed pa nyid do/ /brtson 'grus la rjes su 'jug pa'i rnal 'byor pa rnams kyis gus pa'i sbyor ba bstan nas rtag tu byed pa'i sbyor ba/ nyin mtshan rjes su slob byed cing //zhes bya ba smos te/ mtshan mo ni mun pa ste/ gang gi phyir bslab pa gsum po dag la rjes su mthun par bslab pa dag mya ngan las 'das par phyin pa'o/ /brtson 'grus kyis lhag pa'i 'bras bu 'di bstan pa'i phyir/ 'chi ba med la lhag mos pa'i/ /zhes bya ba mya ngan las 'das pa la 'dod pa ste/thar pa'i bsam pa 'phel bar 'gyur zhing zag pa med pa'i lam skye bar 'gyur ro/ /'phags pa'i lam skyes pas kyang gang du 'gyur zhe na/ de smras pa/ zag pa rnams ni zad par 'gyur/ /zhes bya ba ste/ nyon mongs pa thams cad mi snang bar 'gyur du thob pa bcad pa'i phyir ro//'jigs pa spang bar bya ba'i rgyu 'di dag spyad pa'i phyir/ 'jigs pa thams cad dang bral bar 'gyur ba yin no/ /sangs rgyas la sogs pa'i rjes su dran pa'i phan yon bstan pa'i phyir/ gang zhig nyin dang mtshan rnams su/ /zhes bya ba la sogs pa smos so//yul be ra t+ya na skyes bu zhig sangs rgyas kyi sgra thos nas dkon mchog gsum la skyabs su song ngo / /gzhan zhig ni sangs rgyas rjes su dran pa bsgoms par gyur to/ /gzhan dag ni chos rjes su dran pa'o/ /gzhan dag ni dge 'dun rjes su dran pa'o//de nas rgyal po chen po rnam thos kyi bu de dag la dang ba skyes te/ nor sbyin par byed do/ /de dag gis kyang shin tu yun ring por bde ba nyams su myong ste rab tu byung nas dgra bcom pa'i 'bras bu 'thob par gyur pa las/ de'i dbang du mdzad nas tshigs su bcad pa gsum gsungs so//gzhan dag ni lha'i bu zhig rgyal po'i khab tu pag mo'i mngal du skye ba de'i dbang du mdzad pa'o zhes zer ro/ /rnyed pa ni 'dir mngon par 'dod pa'i dngos po khyad par can thob pa la bya'o/ /de yang rnam pa bzhi ste/ bsod nams dang / rgya cher mchog tu dga' ba dang /ting nge 'dzin dang / rnam par dag pa'i ngo bo nyid do/ /de la bsod nams rnyed pa ni pha rol du bdag la phan 'dogs pa ste/ g.yog 'khor phun sum tshogs pa 'byung ngo / /rgya cher mchog tu dga' ba dang / ting nge 'dzin rnyed pa gnyis ni mthong ba'i chos nyid la bde bar gnas pa phun sum tshogs pa'o//rnam par dag pa rnyed pas ni sdug bsngal thams cad gtan du zad pa'o/ /de dag mi yi zhes bya ba ni sems can de rnams kyi'o/ /rgyu'i stobs dang rkyen gyi stobs te ji skad du gsungs pa/ rgyu gnyis dang rkyen gnyis kyis ni yang dag pa'i lta ba skye bar 'gyur te/dngos po ma lus par pha rol gyis bstan pa dang / nang du yang tshul bzhin yid la byed pa'o zhes so/ /de gang zhe na/ gang dag sangs rgyas zhes bya ba smos te/ gang dag ces bya ba ni mi gang dag go/ /sangs rgyas ni sangs rgyas bcom ldan 'das te/dngos po ma lus pa rtogs pa'i phyir sangs rgyas so/ /skyabs su song ba zhes bya ba ni yongs su skyob pa la brten na/ de dag mi yi rnyed pa zhes bya ba dang sbyar ro/ /gang gi rgyud la rnam pa bzhi'i dngos po mnga' ba de ni sangs rgyas te/ rnam pa thams cad dang / / 'jig rten dang 'jig rten las 'das pa mngon par rdzogs par sangs rgyas pa dang / bag la nyal bag chags dang bcas pa spangs pa dang / thams cad la thun mong du phan 'dogs par spyod pa'o/ /rgyu rnam pa bzhis skyabs su 'gro bar nges pa yin te/ yon tan shes pa nyid dang /khyad par shes pa nyid dang / khas len pa dang / ston pa gzhan gyis bstan pa ma yin pa nyid do/ /rnyed pa chen po 'di yang de dag gi thob pa nyid du bstan pa'i phyir/ gang zhig nyin dang mtshan rnams su/ /zhes bya ba ni sems te/ gang zhig ces bya ba ni sems can no/ / nyin mtshan nyi nyin dang mtshan mo'o/ /rtag tu zhes bya ba ni rgyun mi 'chad par ram/ ji srid 'tsho'i bar du sangs rgyas rjes su dran pa yod pa de la de dag gi rnyed pa yin gyi/ skyabs su 'gro ba 'ba' zhig tsam gyis ni ma yin no/ /sangs rgyas rjes su dran pa na sangs rgyas la dmigs pa'i dran pa'o//de yang rnam pa bzhi ste/ dge ba'i rtsa ba'i phyogs la mngon par brtson pa dang / de la mchod pa'i bya ba dang / de la rjes su dran pa dang / phan 'dogs pa rjes su dran pa'o/ /de ltar bsgom pa 'di la ni yon tan rnam pa bdun re bar bya ste/ skye ba dran par 'gyur ba dang /dad pa shas cher 'gyur ba dang / dman pa'i chos la dga' ba med par 'gyur ba dang / gzhan la rnam par 'tshe ba byed par mi 'gyur ba dang / gzhan las 'tshe ba thob par mi 'gyur ba dang / 'gyod pa med pas dus byed par 'gyur ba dang / bde 'gror skye bar 'gyur ba'o//chos rnams zhes bya ba la ni chos ni rnam pa gsum ste/ bstan pa dang / sgrub pa dang / 'bras bu'i dbye bas so/ /de bstan pa'i chos ni gsung rab yan lag bcu gnyis te/ ji lta ba bzhin du rig pas bshad pa'i bdag nyid yin pa'i phyir ro/ /sgrub pa'i chos ni bsam pa phun sum tshogs pa dang /sbyor ba phun sum tshogs pa dang / de la snga ma ni 'bad pa mthar thug pas lam rnam pa gnyis te/ 'jig rten pa dang 'jig rten las 'das pa'i dbye bas so/ /de gal te sangs rgyas kyi rgyud kyi rnam pa yin na ni/ sangs rgyas zhes brjod do//'phags pa'i gang zag bzhi'i rgyud kyis ni dge 'dun no/ /de la sbyor ba phun sum tshogs pa yang tshul khrims la sogs pa dam pa'i spyod pa la rjes su 'jug pa ste/ de bzhin du shes par bya'o/ /gang yang thar pa'i cha lhag ma lus pa de yang 'dir sgrub pa'i chos su gnas pa yin no//'bras bu'i chos ni thar pa ste/ 'bras bu mthar thug pa'i ngo bo yin pa'i phyir ro/ /gsum po de dag kyang rim pa bzhin du chung ngu dang bar ma dang chen po nyid kyis skyabs so/ /bcom ldan 'das kyis bstan pa ni dgag pa nyid la ston par gsungs so/ /chos ni 'dod chags dang bral ba'i mchog tu bshad do//gling dang skyob pa dang skyabs zhes bya ba la sogs pa bstan pas skyabs so/ /dam pa'i chos nyid mnyan pa dang / de'i don nyid bsgom pa dang bsgrub pas de'i 'bras bu nyid sgrub pa yin te/ 'di ni bdag gir byed pa'o/ /chos rnams rjes su dran byed cing //zhes bya ba ni chos rnam pa gsum ste/ rnam pa dang ngo bo nyid dang 'bras bu'i phan yon la sogs pa mthong bas so/ /lhag ma ni snga ma bzhin no/ /gang dag dge 'dun zhes bya ba ni bkur ba'i phyir dge 'dun te/ slob pa dang mi slob pa'i lam de las skyes pa yin gyi gzhan ni ma yin pa'i phyir ro//de dang 'brel ba'i gang zag gi dge 'dun yin te/ de yang rnam pa lnga las ngo tsha mi shes pa'i dge 'dun te/ tshul nyams pa'i phyir ro/ /lug ltar lkugs pa'i dge 'dun te/gsung rab mi shes pa'i phyir ro/ /skyabs kyi dge 'dun te mi mthun pa'i las byed pa'i phyir ro/ /des na 'di gsum gyi rnam pa thob pa ni chos ma yin pa'i las byed pa'o/ /nyan thos dang lam ste nyan pa'i don ston pa'i phyir dang / 'bras bu mchog yin pa'i phyir dang /dge ba phyin ci ma log pa'i thabs kyi 'bras bu'i phyir/ dge 'dun gyi rnam pa 'di dag gis yang dang yang du mngon du byed pa ste/ 'khor ba spong zhing thar pa thob pa dang / thar pa'i lam de'i tshul yin pa'i phyir te/ lam 'di lta bu rnam par dag pa ni 'di lta ba gzhan dag la med pa'i phyir ro//gang zhig de ltar sangs rgyas la sogs pa rjes su dran zhing sgom par byed pa de nyid ni don dam par mel tse byed pa nyid yin gyi/ gzhan ni bag chags med pas gnyid log pa yin no zhes bstan pa'i phyir/ gang zhig nyin dang mtshan rnams su//zhes bya ba la sogs pa smos so/ /de nas bcom ldan 'das kyis drang srong drug cu rtsa gsum la cho 'phrul gsum gyis bstan to/ /ji tsam na rdzu 'phrul gyis rab tu byung ba'i dge slong gcig dang / lhan cig tu sangs rgyas rjes su dran pa bsgom par 'gyur ro zhes rgya cher bstan to//de nas de ltar bsgoms pas mya ngan las 'das pa la yid mngon par mos pas nang par tho ras kyi dus su de dag thams cad la brda phrad par lung bstan te/ de'i dbang du mdzad nas 'di gsungs so/ /gzhan dag ni shing rtas shing thu ba'i bu rang gi las la mchog tu byed pa las brtsams so zhes zer ro//rab tu sad pa yin pas sad par gyur pa'o/ /legs par rab tu sad pa'i bya ba la/ legs par sad pa ni bya ba'i khyad par yin pa'i phyir ro/ /sad par gyur pa zhes bya ba ni legs par rab tu sad pa'i don te/ de bzhin nyid du khong du chud pa'i legs par mel tse byed pa zhes bya ba'i don to/ /de nyid gang zhe na/ smras pa/ gau ta ma'i nyan thos te zhes bya ba yin te/ drang srong chen po gau ta ma'i rgyud du 'byung ba'i phyir gau ta ma ste/ bcom ldan 'das shAkya thub pa'o/ /'dis ni bcom ldan 'das cho rigs phun sum tshogs par bstan te/rigs khyad par can du skye bar gyur ba dag ni rta cang shes bzhin du bag med pa nyid mchog tu byed pa ma yin no zhes ston pa yin no/ /de'i nyan thos de ni bka'i rjes su 'jug pa ste/ gang gi phyir bcom ldan 'das kyi gsung bdag med pa'i de bzhin nyid bstan pa'i rjes su 'gro ba ste/de bas na de'i phyir de dag ni legs par sad pas rab tu sad pa yin te/ 'jug pa'i sgo de dag ni 'phags pa'i lam dang mi gtsang ba dang dbugs 'byung rngub dran pa rtog par bya ba'o/ /de gang yin zhe na/ gang dag /sangs rgyas rjes su dran byed pa//zhes bya ba ste/ sangs rgyas rjes su dran par byed pa ni sangs rgyas kyi yon tan la dmigs pa dang / khong du chud pa'o/ /yon tan yang rnam pa gnyis te/ sku dang thugs yin pa'i phyir ro/ /'bras bu ni rnam pa gsum ste/ gzhan la phan pa phan tshun tshogs pa yin pa'i phyir ro zhes bya ba'o//chos dang dge 'dun rjes su dran pa yang de bzhin no/ /yon tan thams cad kyi rtsa ba ni dkon mchog gsum yin la/ de la brten pas ni so sor thar pa'i tshul khrims la sogs pa'i khyad par byung ba yin te/ de nyid bstan pa'i phyir/tshul khrims rjes su dran byed pa/ /zhes bya ba yin te/ de la tshul khrims ni dam pa rnams kyi spyod pa yin pa'i phyir gcig go/ /'jug pa dang ldog pa'i tshul gyis ni rnam pa gnyis so/ /lus la sogs pa'i legs par spyod pa'i bdag nyid kyi 'brel bas ni rnam par dag pa gsum mo//'di la 'tsho ba'i rnam par dag pas ni rnam pa bzhi'o/ /'di la chang 'thung ba las ldog pas ni bcas pa'i kha na ma tho ba dag pa las ni rnam pa drug go/ /rnam pa brgyad du yang mngon par brtag par bya ste/ rgyu dang 'bras bu dang rang bzhin zhes bya ba la sogs pa las rjes su dran pa'o//tshul khrims dang ldan na ni sbyin pa dag par 'gyur ro zhes bstan pa'i phyir/ gtong ba rjes su dran byed pa/ /zhes bya ba smos te/ skyes bu dam pa rnams kyis sbyin pa rnam pa lnga dang yan lag rnam pa drug dang ldan pa dang / sbyin pa yan lag dgu dang ldan pa dus su sbyin pa'i rdzas la sogs pa ste/ de la dmigs pa zhes bya ba'i don to/ /sngar bshad pa'i yon tan rnams bsten na/ lha'i 'gro ba rnyed pa sla'o zhes bstan pa'i phyir/ lha ni rjes su dran byed pa/ /zhes bya ba smos te/ lha ni 'dod pa na spyod pa dang /de las gzhan pa ste rnam pa gnyis so/ /dang po ni rnam pa drug go/ /de las gzhan pa ni rnam pa gnyis te/ gzugs can dang gzugs med pa'o/ /gzugs can ni gnas bcu drug go/ /gzugs can ma yin pa ni bzhi'o/ /der skyes pa yang sbyin pa dang tshul khrims dang bsgoms pa dag gis ci rigs par sbyar ro//'dod pa'i khams las 'dod chags dang bral ba'i thabs bstan pa'i phyir/ lus rtogs dran byed pa zhes bya ba smos te/ sa bon dang zhing dang bsam pa dang rgyu mthun pa dang / rang gi mtshan nyid dang 'jig pa ste/ lus kyi rnam par rtog pa rnam pa drug tu 'dod do zhes rgya cher bshad do/ /'dod pa na spyod pa'i lus gcig las 'dod chags dang bral ba ni 'dod pa'i khams thams cad las 'dod chags dang bral ba yin no/ /'di'i 'bras bu bstan pa'i phyir/ ting 'dzin bzhi dran pa zhes bya ba smos te/de yang rnam pa gnyis te/ bsam gtan dang snyoms par 'jug par skye ba'i dbye bas so/ /snyoms par 'jug pa ni dge ba la rtse gcig pa'o/ /rnam pa lnga la sogs pa rtog pa dang dpyod pa zhes bya ba la sogs par brjod par bya'o/ /bsam gtan gyi ro myang ba'i phan yon bstan pa'i phyir/bsgom pa la ni yid dga' ba/ /zhes bya ba smos te/ yang dang yang du bsgoms shing mngon sum du byas te/ de'i khyad par rjes su myong bas mngon par 'dod pa'i sems skye ba thob par 'gyur ro/ /yang na bsgoms pa las byung ba'i dge ba'i rtsa ba'o//rigs pas thob pa dang thos pa las byung ba gnyis ni mchog tu khyad par can yin pa'i phyir 'di nyid ni rnal 'byor pa'i sems las brtsams pa yin no/ /bsgom pa la dga' ba'i 'bras bu bstan pa'i phyir/ 'tshe ba med la yid dga' ba/ /zhes bya ba yin te/gzhan gyi gnod pa las ldog pa ni 'tshe ba med pa'o/ /de la mngon par dga' ba ni khyad par can gyi dge ba'i phyogs la yang dag par bsten pa'i phyir ro/ /zhi gnas kyi rgyus mnyen par byas nas de ji ltar gzhan la gnod par 'gyur ro/ /gnod sems med la yid dga' ba//zhes bya ba ni bsam gtan dang bsgom pa la yang dag par bsten pa'i khyad par yang dag par ston pa yin te/ de snyoms par 'jug pa'i stobs kyis byams pa la sogs pa 'thob par 'gyur ba'i phyir/ gnod sems med pa ni zhe sdang med pa'i dge ba'i rtsa ba'i ngo bo ste/byams pa dang snying rje'o/ /tshad med pa rnams dang / so so yang dag par rig pa'i nor tshang bar rnyed pa'o zhes gzhan dag zer ro/ /yang gsungs pa dag kyang rig par bya ste/ de ltar zil gyis non pa'i skye mched la sogs pa brjod par bya'o/ / gzugs med pa'i khams las 'dod chags dang ba'i lam gyi thabs bstan pa'i phyir/ stong pa nyid la yid dga' ba/ /zhes bya ba smos te/ stong pa nyid kyi rnam par thar pa'i sgo ste/ bdag med pa dang stong pa'i rnam pa la 'jug pa'o/ /mtshan ma med la yid dga' ba//zhes bya ba ni 'dus byas rnam pa bcu'i rtags su gyur pa'i mtshan ma dang bral ba ni mya ngan las 'das pa ste/ mtshan ma med pa'o/ /de dag kyang gang zhe na/ skyes pa dang bud med dang / gzugs dang / sgra dang / dri dang / ro dang / reg bya dang / skye ba dang / rga ba dang / mi rtag pa zhes brjod pa dag go/ /yang na rgyu med pa'i phyir mtshan ma med pa ste/ 'dus ma byas ni med pa'o zhes bya ba'i tshig gis te/ de la dmigs pa'i ting nge 'dzin ni mtshan ma med pa yin te/ mtshan ma med pa ni zhi ba'i rnam pa'o zhes bya ba'i tshig gis so/ /ci yang med la yid dga' ba//zhes bya ba ni ci yang med par rab tu rtogs pa ste/ 'dus byas dag rnam par 'gyur ba'i phyir ro/ /de la dmigs pa'i ting nge 'dzin ci yang med la dgongs pa yin te/ smon pa med pa zhes bya ba'i don to/ /gang gi phyir 'di ni gang la yang smon par mi byed cing gnas par mi byed la/de mngon par dga' ba med de/ lam yang 'jig rten pa lta bur spang par bya ba yin pa'i phyir ro zhes bya ba la sogs pa'o/ /de yang rnam pa bcu po 'di lta ste/ smon pa med pa dang / bden pa'i rnam pa dang / de las gzhan gyis zhes gsungs pa/de dag nyid zag pa med pa'i rnam par thar pa'i sgo zhes brjod de zag pa dang bcas pa la ni thar par 'jug pa'i thabs med pa'i phyir ro/ /rnam par thar pa'i sgo de dag nyid kyis phan yon go rims bzhin du bstan pa'i phyir smras pa/ nges par 'byung ba la mngon par dga' ba dang /dben pa la mngon par dga' ba dang / de'i phyir dus rtag tu bdag nyid lus dang srog dang ldan pa yin no zhes yid ches pas lan du mar 'di 'khor bar 'khyams pa yin gyi/ gang gi tshe yang stong pa nyid rnam par thar pa'i sgo stong pa nyid du 'gyur ba de'i tshe ni 'khor ba la rgyab kyis phyogs shing mya ngan las 'das pa dang /don dam pa dang nges par 'byung bar mngon par dga' ba skye'o/ /sngar yang 'di mi shes pas yul dag ro myang bar gyur to/ /mtshan ma med pas thob pa ni rnam pa de bzhin te don gyi nom pa dag gang mthong na der dga' ba ste/de lta bu 'gog pa'i rnal 'byor pa la ni med pa yin te/ rgyab kyis phyogs pa yin zhes grub pa'i mtha'o/ /sngon med pa'i mthus 'dus byas gang la yang smon par mi byed pa yin te/ phung po lhag ma med pa'i mya ngan las 'das pa la gzhol ba dang mos pa'i phyir ro/ /de'i bdag nyid du gyur pa la ni spro ba thams cad nye bar zhi ba yin no/ /dran pa'i tshoms te bco lnga pa'i rnam par 'grel pa rdzogs so// // @##/ /de nas sil bu'i tshoms dgod par bya ste/ dran pa nyams pa'i rgyu bstan pa de las bzlog pa'i phyir sil bu rnam par bstan pa ste/ dran pa nyams par byas pa las ni dran pa bsgom pa la mchog tu mi byed pas sil bu rnam par bstan pa 'dis nyams pa'i rgyu 'jig par 'gyur ro//yang na sangs rgyas la sogs pa dran pa'i bsgom pas rgyud la gsos btab pa la ni sil bu rnam par bstan pa la sogs par gnod par mi 'gyur ro zhes bstan pa'i phyir ro//yang na dran pa bsgom pa'i dus nye bar bstan pa'i phyir te/ thams cad kyi dang por ni 'di nyid bya ba yin pa'i phyir des na de nyid bstan pa/bdag gi bya ba bya ba'i zhes bya ba la sogs pa smos so/ /khyim bdag cig gi bu zhig shin tu na tshod gzhon zhing 'byor pa dang ldan par gyur pa las 'dod pa mchog tu byed par gyur to//de'i phu bo zhig gis ni chos nyams par byed pa yin no zhes bskul zhing da ni chos bya ba'i dus yin na zhes bya ba nas rgya cher ro/ /de shi ste glang zhig tu skyes so/ /ji tsam na phu bos glang de 'brog cig na khur gyis non cing shugs nar zhes 'byin la kha nas dbugs 'byin pa mthong nas/ci dus yin nam zhes smras pa las/ ji tsam na yang de lhar skyes te/ de'i dbang du mdzad nas bcom ldan 'das kyis tshigs su bcad pa gnyis gsungs so//dang po kho nar zhes bya ba ni thog ma nyid du 'bad par bya'o zhes bya ba'i don to/ /bya ba'i mel tse gyis zhes bya ba ni dran pa bsgom pa la sogs pa legs par spyad pa'i bdag nyid kyi bya ba dang las de la mel tse gyis shig pa ste 'bad par gyis shig pa'o//dang po nyid du gang nges par bya ba yin te/ phyis 'byung ba la mi bsdad ces bya ba'i don to/ /bsam pa gang gis she na/ bdag gi bya ba bya ba'i dus g.yo bas//zhes bya ba smos te/ bdag gis gang bya ba ste/ legs par spyad pa der ni nam yang mi 'gyur ro/ /'jig rten gyi rab tu grags pa rgan pa'i gnas skabs kyi tshul legs par spyad pa spyod pa'i dus su yang der ni mi mthun pa nyid kyi phyir ro//g.yo bas zhes bya ba ni 'das pas ngan song du 'gro ba ste/ de'i phyir 'jig rten pa rnams brjod pa'i lang tsho la gnas na ni 'dod pa spang bar dka' ba yin no/ /bar ma la ni de'i ro myang bas de'i dgos pa 'di yin no//rgas pa'i dus su ni nor bsags par bya'o/ /de'i 'og tu ni chos spyad par bya'o zhes so/ /de ni srog nges pa med cing yid brtan pa ma yin la/ bde ba thams cad kyi rtsa ba yin pa'i phyir chos ni dang po nyid du bya'o zhes 'di bstan to/ /na tshod tha ma la gang bsam par bya ba de'i dus su yang tshogs pa mi 'thob cing bya ba rnams yongs su nyams par 'gyur ba'i phyir ro//g.yo ba dang / 'jig pa dang gnod pa zhes bya bas rang gi las g.yo zhing 'jig pa zhes bya ba'i don to/ /bdag gis dang po de ltar byas na ni/ /zhes bya ba de nyid kyi tshul gyis gang zag gis dang po kho nar bya ba byas na ni bya ba ma byas pa ma yin no//bya ba ma byas pa ni bya ba nyams pa ste/ bya ba de ma byas pa'o/ /snga ma nyid du bya ba dag bskyed cing byas pas skyes bu dam pa rnams nyid ni zad 'dod cing zhes bya ba g.yo bar mi 'gyur zhing gdung bar mi 'gyur te/ gang byas pa de ni legs par ma byas so zhes rtog nas/ yang na bya ba ma yin pa de ma byas pa'i phyir te/ ngan par spyod pa ni bya ba ma yin pa'o/ /des na dang po nye bar bsags pa'i rgyur gyur pa'o/ /bya ba'i dus zhes bya ba ni sngar bstan pa'i mi khom pa brgyad spangs pa'i mi'i lus so/ /zad 'dod cing zhes bya ba ni zil gyis gnon pa dang 'das par byas pa'i phyir te skad kyi dbyings ni sna tshogs pa yin pa'i phyir ro//de nyid la gzud pa'i phyir ji ltar zhes bya ba la sogs pa smos so/ /de srid bar du mi yis bsgrim par gyis/ /zhes bya ba ni mkhas pas de srid du 'bad par bya ste/ ji srid don ni phun sum tshogs 'gyur ba/ /zhes bya ba'i bar du ste/bdag dang gzhan gyi don phun sum tshogs par 'gyur ba'am/ yid la 'dod pa'i 'bras bu thob par ji srid pa de srid kyi bar du de'i ched du'o/ /ci'i phyir zhe na/ de yi rang bzhin nga yis mthong bas na/ /zhes bya ba ste/ de lta bu'i rang bzhin ni de'i bdag nyid de/ /de 'dra ba zhes bya ba'i don to//'bad pa'i sems kyis bya ba byas nas mthong bas na zhes bya ba yin te/ /de bzhin nyid shes pas mthong ngo zhes pa'o/ ji ltar mthong ba yin zhe na/ ji ltar 'dod pa de bzhin 'byor 'gyur bar/ /zhes bya ba smos te/ gang gi rnam pa dang gang gi dngos pos bdag la phan pa'am gzhan la phan pa de 'dod pa de nyid kyi rnam pas de the tshom med par 'thob ste/'di la don gang tshol byed pa/ /de don rtsol bar byed pa na/ /de ni nges par 'thob 'gyur te/ /chad pas ldog par mi 'gyur ro/ /zhes so/ /gang gi phyir bsgrim pa 'di nyid kyis mi mngon par 'dod pa'i 'bras bu 'thob par 'gyur ba yin no zhes bstan pa'i phyir/bsgrim zhing zhes bya ba la sogs pa smos so/ /yul ko sa la'i bram ze dang khyim bdag rab tu mang po dag ltad mo sa'i khang pa na 'dus shing 'khod par gyur pa las de dag nyid bar skabs su 'di lta bu'i gtam brjod par gyur te/ mi rnams skye ba dang /rga ba las 'da' bar gang gis 'gyur zhes so/ de na kha cig gis smras pa/ dka' thub drag pos zhes zer ro/ /gzhan dag ni stegs la gnas so zhes so/ /la la dag ni mchod sbyin dang sbyin sreg byas pas so zhes zer ro/ /ji tsam na bcom ldan 'das kyis bka' stsal pa/bram ze dang khyim bdag dag 'di ji snyam du sems/ nags stug po 'am/ rtswa stug po dag mes bsregs par gyur la char gyis kun tu brlan par 'gyur na yang skye bar 'gyur ram/ /btsun pa de de bzhin no/ /de ci'i slad du zhe na/ /rtswa rtsa ba ma bcad pa'i phyir ro/ /de bzhin du gang la la zhig sems dka' thub spyod pa'am/stegs la gnas pa zhes bya ba'i bar du ste/ de ci'i phyir zhe na/ kun du sbyor ba rnams ma spangs pa'i phyir ro zhes te/ de la tshigs su bcad pa 'di gsungs so/ /bsgrim zhing zhes bya ba ni lam gyi tshogs bskyed pa la sogs pa la bsgrim pa'o/ / brtson par bya ba yis zhes bya ba ni brtsal bar bya ba ste/ /mthong ba'i lam mngon sum du bya ba la brtson 'grus rtsoms shig pa'o/ /yang na 'jig rten dang 'jig rten las 'das pa'i lam bsgom pa go rims bzhin du sbyar ro/ /bdag nyid gling du 'gyur bar bya/ /zhes bya ba ni bdag nyid la brten cing gnas pas bsgrub par bya ste mya ngan las 'das pa zhes bya ba'i don to//de lta na ni bsgom pas spang bar bya ba'i nyon mongs pa'i ris ji ltar bdag nyid gling du byed pa yin zhe na/ de spangs pa'i rim pa'i dpe brjod pa'i phyir/ mgar ba yis ni dngul bzhin du/ /rang gi dri ma sbyang bar gyis//zhes bya ba smos te/ /dper na dngul mgar gyis mthar gyis dngul gyi dri ma sbyong bar byed pa de bzhin du bsgom pas spang bar bya ba'i rang gi sems kyi dri ma khyed kyis sbyang ba dang bsal bar gyis shig pa ste/ /ji skad du chung ngu dang / bar ma dang / chen po rnams dang de yang chung ngu la sogs pa'i dbye bas so zhes bshad do//dri ma bsal ba'i phan yon bstan pa'i phyir/ /dri ma sbyangs pas zhes bya ba ste/ sbyangs pa ni bstsal ba'o/ /dri ma ni nyon mongs pa gang yin pa de nyid ni dri ma'o/ /'khor sa med ces bya ba ni skabs med pa ste/ /'dis ni yang srid pa'i las spangs par ston pa yin no//ji ltar 'khor sa gnas dang gzhi'i phyogs yin pa de bzhin du 'khor ba'i 'bras bu'i las dag kyang ji ltar byed pa po'i phyogs de ltar 'khor zhing ji ltar byed pa po'i dbang gis 'gro ba de bzhin du nyon mongs pa de yang spangs na ni 'phen par byed pa med pa'i phyir srid pa'i rgyal po'i 'khor sar mi 'jug go//gzhan dag ni sems kyi gnas dang bral ba zhes zer ro/ /sems kyi gnas kyang lnga ste/ gnas par 'dod pa dang chos dang dge 'dun dang bslab pa dang / rjes su bstan pa zhes bya ba la sogs pa mdo las gsungs so/ skyon mi 'byung zhes gzhan dag tu brjod de sred pa dang bral ba zhes bya ba'i don to/ /dri ma sbyangs pa zhes bya ba 'di bstan pas yang brjod pa ni 'di gtso bo nyid du bstan pa'i phyir ro/ /phyi nas skye dang rga mi 'thob/ /ces bya ba ni yang srid pa mi 'dzin cing de rnam par 'gyur ba yang thob par mi 'gyur te/'dis bsgom pa'i lam gyi 'bras bu bstan to/ yang dag pa'i bsgrub pa'i tshul gyis brtson 'grus ma gtogs par ni 'di la khyad par mi 'thob pa yin te/ /de nyid bstan pa'i phyir ngo tsha min la zhes bya ba la sogs pa smos so/ /gos med pa'i gcer bu ba mang po lus dri ma mang ba dang /dri nga ba dag bcom ldan 'das kyi thad du nye bar phyin te gsol pa/ bdag cag gis thos pa ni dge sbyong gau ta ma khyod rigs bzhi'i nang na dag pa yin no zhes brtags nas/ dmangs rigs kyang rjes su 'dzin par byed dam zhes pa dang / ji tsam na 'di gsungs so/ /gzhan dag ni ma sngon du shi ba'am/yi dags shig gi dbang du mdzad pa'o zhes zer ro/ gang la ngo tsha bar bya ba ma yin pa de ni ngo tsha ba ma yin pa'i dngos po ste/ /gang kha na ma tho ba med pa des thob pa'i dge slong gi zas sam/ gang gis sdig pa med pa'i zas la sogs pas lus 'tsho bar byed pa dang /skye bo dman pa dag kyang rjes su gzung ba'i phyir bya ba ste/ /de la ngo tsha ba dang zhum pas 'jug par mi bya'o/ /ngo tsha ba la ngo mi tsha/ /zhes bya ba ni gang du ngo tsha bar bya ba ni gcer bur 'gro ba la sogs pa ste/ /de la ngo tsha dang bral zhing zhum par mi byed de/ ji ltar khyed cag lta bu zhes ston pa yin no/ /gang la ngo tsha med pa yod pa de ni ngo mi tsha ba'o/ /mi 'jigs pa la 'jigs lta dang / /zhes bya ba 'jigs pa dang / mi 'dod pa'i 'bras bu med pa de ni mi 'jigs pa'o/ /yang na legs par myong ba ni mngon par 'dod pa'i 'bras bu yin pa'i phyir de la 'jigs par lta ba ste/khyed cag gis mi 'dod pa'i 'bras bur mthong ba'o/ /'jigs la mi 'jigs lta ba yi/ /zhes bya ba ni gang la 'jigs pa yod pa ste/ /shin tu dka' ba yod pa der ni khyed cag gis cung zad kyang 'jigs par mthong ba med de 'dir srid pa la brkam pa dang ba lang gi brtul zhugs can gyi gtam dag kyang brjod par bya ste/gang gi phyir de ni drang srong gi mchog gis dmyal ba'i gnas su dang khyi dang ba glang gi mngal du skyes par gyur to zhes gsungs so/ /yang na mi 'jigs pa la zhes bya ba ni mya ngan las 'das pa ste/ 'jigs pa thams cad dang bral ba'i phyir ro//de la 'jigs par lta ba ni chad par lta bas so/ /'jigs la zhes bya ba ni 'khor ba ni sdug bsngal gyi ngo bo yin pa'i phyir ro/ /mi 'jigs lta ba zhes bya ba ni rgyun mi 'chad par de don du gnyer ba'i phyir ro/ /log par lta ba blangs pa yis/ /zhes bya ba ni phyin ci log la mngon par zhen cing yongs su gzud pa'i phyir ro//sems can ni so so'i skye bo'o/ ngan 'gror 'gro bar 'gyur ba ni ngan song ngam 'khor ba rjes su myong bar 'gyur ba'o/ /mkhas pas yang dag pa'i lta ba blangs pa las ni bde 'gro dang mya ngan las 'das par 'gro bar 'gyur ro//yang dag pa'i lam la mngon par zhugs pas ni bde 'gro yin la/ log pa la mngon par zhugs pas ni ngan 'gro ba yin no zhes bstan ma thag pa de gnyis blangs pa dang / gsal bar bya ba'i phyir go rims bzhin du ste bag yod pa kho na blang bar bya ba yin no zhes bstan pa/'di na gang sngon zhes bya ba la sogs pa smos so/ /ri brags pa'i bram ze gsum rig pa zhig gi chung ma la bu chags pa las de skom par gyur nas mtshon thams cad bkrus pa'i chu 'thungs par gyur to/ /btsas pa'i dus su yang de'i khyim du khrag gi char bab pas mi dge ba'i mtshan ma rab tu byung bar gyur te/de'i gnyen po'i phyogs kyis 'di la 'tshe med ces bya bar ming btags so zhes rgya cher ro/ /de'i mkhan po chung ma ma rungs pa zhig gis zin pas rtsod de smras pa/ nga las rig byed thams cad ni khyod kyis bslabs te/ da ni rang gi lus kyis mtho ris thob par bya'o zhes des de la ral gyi rnon po dang phub byin te/dra ba can zhes bya ba'i nags tshal ni grub pa'i zhing yin te/ der mi stong rnyed sod la re re bsad pa'i sor mo re re las sor mo bcu bcu sbrengs pa'i phreng ba mgo la btags na des ni khyod kyi mtho ris kyi them skas su rab tu 'gyur ba yin no zhes bya ba nas/ma gsad pa'i phyir zhugs par gyur to/ /bdag ni zhes bya ba la sogs pa'i tshig gis gzugs phun tshogs pas yongs su chog shes pa dang / rab tu byung nas dgra bcom pa'i 'bras bu thob par gyur to zhes bya ba'i bar du ste tshigs su bcad pa smras pa/gang zhig 'tshe ba med pa ni/ /lus dang ngag dang yid kyis kyang / /'tshe bar ma byed de yin te/ /gang gis gzhan la mi 'tshe ba'o/ /zhes pa dang / ji ltar bcom ldan 'das kyis sdig pa byed pa dang rab tu 'byung bar bya zhes de skad zhus pa las/ rgyal po gsal rgyal la rtogs par bya ba'i phyir tshigs su bcad pa gnyis gsungs so//gang zhes bya ba ni sems can gyi 'jig rten spyir bstan pa'o/ /mi dge pa'i bshes gnyen dang phrad pa la sogs pa'i bag med pa'i rgyus sngon zhes bya ba ni snga ma ste thog ma'o/ /bag med las zhes bya ba ni bag med par byas nas so//'di na gang zhes bya ba ni gang bcom ldan 'das kyis bstan pa'i chos 'dul ba la'o/ /yang na bden pa yin yang gti mug gi dbang gis yid mi ches pa'o/ /yang na gang la la ngan par spyod pa gcig tu byed pas chos la sngon bag med pa yin no//phyi nas zhes bya ba ni dus gzhan na ste/ de nyid skyes bu dam pa bsten pa la sogs pa'i rgyus bag dang ldan par 'gyur ba ste/ dge ba byed pa de la mchog tu brtson pa'i phyir mthong ba'i lam mngon sum du gyur pas de'i phra rgyas spang bar ston pa yin te/ 'jig rten 'di na kun nas gsal//zhes bya ba de ni lha dang bcas pa'i 'jig rten 'di na'o/ /ji lta bu zhe na/ sprin bral nyi ma zla ba ltar/ /zhes bya ba ni dper na sprin gyi tshogs dang bral ba'i zla ba dang / nyi ma mdzes pa de bzhin du bag med pa mthong bas spangs pa yin no/ /de zhes bya ba ni rnal 'byor pa'o//kun nas gsal zhes bya ba ni thams cad mkhyen pa'i ye shes kyi yul du gyur pa'i phyir/ skyu ru ra lag mthil du gzhag pa bzhin no/ /'jig rten 'di na sred ba las/ /zhes bya ba ni 'khor ba'i rgyur gyur pa zhes bya ba'i don to/ 'dis ni bsgom pas spang par bya ba'i nyon mongs pa'i ris bstan pa yin te/de ni sred pa gtso bo yin pa'i phyir ro/ /lta ba dang the tshom ni mthong bas spang bar bya ba'i ris kyi gtso bo yin par bshad pa'i phyir ro/ /yul la sred pa las 'da' ba'i thabs bstan pa'i phyir/ dran pas zhes bya ba smos te/ 'dir dran pa'i lam gyi rjes su mthun par spangs pa bstan te/dran pas bsgom pa srung bar gyur na mi dge ba rnams rab tu spong bar 'gyur ro zhes bshad pa ste/ dran pa de dang ldan pas zhes bya ba'i don to/ /de'i mthus de yongs su gtong ba'i phyir legs par 'da' bar 'gyur zhes bya ba smos te/yang dag par 'da' bar 'gyur ba ni rab tu spangs pa'o/ /gal te 'di la gzhon nu'i gnas skabs na yang bag yod par byas na des ni mang po byed pa nyid yin gyi gcig pu 'ba' zhig ni ma yin no zhes brtag par bya ba de nyid smras pa/ gang zhig gzhon nur zhes bya ba la sogs pa'o/rgyal po gsal rgyal ni mgo skya ba dag la dad pa yin gyi/ gzhon nu dag la ni dad pa med do/ /ji tsam na bcu bdun sde glo bur du 'ongs nas de'i rgyab na chu bum pa gang ba thogs shing dngar ba mthong bas rgyal po de dad pa thob ste/ dga' zhing tshim pa skyes la bcom ldan 'das kyi spyan sngar phyin nas btsun pa bcom ldan 'das ngo mtshar te/gzhon par gyur kyang sems stobs dang ldan na khyad par gyi go 'phang 'thob pa lags so zhes gsol pa dang / de'i phyir tshigs su bcad pa gnyis gsungs so/ /gang zhig gzhon nur zhes bya ba de ni gal te gzhon zhing gzhon pa'i dregs pas dregs par gyur kyang de dge ba la brtson par byed cing 'jig rten 'di na khyad par thob pas gsal zhing gsal ba yin na/rgan por gyur pa gsal bar lta smos kyang ci dgos/ su ru pa dang tsi ri ka la sogs pa yang 'dir brjod par bya'o//rab tu byung nas zhes bya ba 'dis ni brtul zhugs dben pa blangs shing tshul khrims dang ldan par bstan to/ /tshul khrims la gnas nas gang bya ba de smras pa/ sangs rgyas bstan la 'jug pa de/ /zhes bya ba smos te/ 'dir sangs rgyas kyis bstan pa'i sgra ni mthong ba'i lam la bstan to//tshigs bcad gnyis pas kyang bsgom pa'i lam bstan te/ de gnyis gcig tu bstan pas ni spyod pa ma yin pa thams cad spong ba'i phyir ro/ /sangs rgyas kyis bstan pa'i lam bsgom pa ni bag yod pa la 'bad pas thob par 'gyur gyi/de ma gtogs par ni spang bar bya ba dang blang bar bya ba gnyis kyi spang ba dang blang ba med de/ des nyon mongs pa mtha' dag spangs pas thams cad du mdzes pa yin no/ /yan lag spangs pas kyang sprin dang bral ba 'am/ sprin srab pa'i ston gyi [(]namakha' [,]nam mkha' [)]la zla ba gang ba bzhin no//lhag ma ni go sla'o/ /gang gis dge ba bsags pa de yang thams cad du mdzes pa yin no zhes bstan pa'i phyir/ gang zhig sdig pa'i zhes bya ba la sogs pa smos so/ /lus 'phags kyi yul na mtshams med pa zhes bya ba'i rab tu byung ba zhig sde snod gsum par gyur te/rigs pa dang grol ba'i spobs pas gang ri brags na gnas pa der skye bo'i tshogs de dag mngon par dad par byed de/ de'i slob ma mang por gyur to/ /ji tsam na ris grang bas nyam thag ste/ /de bsal ba'i phyir dzen ta ka zhes bya ba'i dge 'dun la bshos gsol bar gyur to//de shi ste mnar med par skyes nas 'di ni dzen ta ka shin tu cha'o zhes so/ /de nas gshin rje'i skyes bus tho bas bsnun pas de las shi 'phos te/ grang ba dag tu skyes so zhes bya ba la sogs pa ste/ de las brtsams nas tshigs su bcad pa gnyis gnyis gsungs so//gang zhig ces bya ba ni sems can gyi rgyud do/ /sdig pa'i las byas pa zhes bya ba ni sngon bsags pa ste/ lus la sogs pa'i nyes par spyod pa'o/ /dge bas 'gebs par byed pa de/ /zhes bya ba ni dus gzhan na byas pa'i legs par spyod pas mun pa la sgron ma bzhin du sel zhing gsal ba zhes bya ba'i don to//lhag ma ni snga ma bzhin no/ /gang yul gyis gtses par gyur kyang de mya ngan med par bstan pa'i phyir/ /gang zhig gson la zhes bya ba la sogs pa smos so/ /shAkya rnams bsad kyang bcom ldan 'das ni mya ngan mi mdzad do//de nas ser skya'i gnas na gnas pa'i bram ze chen po dag bcom ldan 'das kyi thad du lhags te gsol pa/ ci bcom ldan 'das shin tu yang mya ngan mdzad dam zhes gsol pa dang / ji tsam du tshigs su bcad pa gsum po 'di gsungs so/ /gang la la zhig gtso bo la lhag par zhen pa'i dngos po bstan te/gson na zhes bya ba ni srog gi dbang po la ste/ rgyu mtshan gyi bdun pa'o/ /mi dga' ba ni mi gsal ba dang mi mdzes pa dang / de la yid mi 'jug pa ste/ shin tu sdug bsngal gyi dngos po yin pa'i phyir/ ji skad du/ tshangs spyod legs par spyod pa dang //de bzhin lam ni legs bsgom pa/ /tshe zad dga' bar 'gyur ba ste/ /dug snod spangs pa ji bzhin no/ /zhes gsungs so/ /shi na'ang zhes bya ba ni 'chi ba'i dus na mya ngan mi byed cing gdung ba dang mi 'brel te/ gang gi phyir gang la ma chags pa des ni bral bas dogs pa'i mya ngan med de/'dir ci lta bu zhe na/ smras pa/ shi na yang zhes bya ba ste/ tha mar shi na yang ngo / /gang mkhas pa ni dga' ba'am rangs pa nyid mi 'dod de/ /de 'chi zhing 'di zhig par gyur kyang dam pa rnams ni mya ngan mi byed de/ dga' ba'i mtha' mya ngan yin pa'i phyir rgyu med pas 'bras bu med pa ston to//de zhes bya bas de nyid de/ /mya ngan dbus na zhes bya ba ni mya ngan la sogs pa'i rnam pa gses pa ste/ 'khor ba'i nang na gnas kyang mya ngan mi byed de/ /ji lta bu zhe na/ go 'phang mthong ba de ni bden pa mthong ba ste/mi rtag pa la sogs pa'i rnam par rtog pa'i phyir ro/ /'dus byas thams cad la ya nga ba med de/ 'jig cing 'tshe bar 'dod pa la ni mya ngan 'byung gi/ 'dod pa la 'dod chags dang bral ba nyid kyis ni mya ngan med par bstan pa'i phyir/ brtan pa zhes smos te/ nyon mongs pa thams cad spangs pa'i phyir ri rab bzhin du mi g.yo ba ste/dgra bcom pa zhes bya ba'i don to/ /mya ngan gyi dbus na yang gdung bar mi 'gyur ba ni mya ngan la sogs pa skyon nye bar mtshon pa des ni 'dod pa'i khams kyi mi'i nang ngam/ de'i bdag nyid de na gnas kyang / rgyud gdung ba nyams su myong bar mi 'gyur ro/ /yang na mya ngan dbus zhes bya ba ni 'khor ba'i nang na gnas pa ste/ srid pa thams cad mya ngan gyi rang bzhin yin pa'i phyir ro/ /gnyen 'dun dbus na zhes bya ba ni mya ngan gyis nye bar gdung ba'i nye du'i dbus na gnas kyang skyo ba med pa'o/ / gal te de mya ngan med pa de lta na ni nye du'i nang na mi mdzes so zhe na smras pa/ lam mer 'dug ces bya ba yin te/ dper na ston gyi zla ba skar ma'i nang na rnam par mdzes pa de bzhin no/ /ci yang med pa'i phyir te/ de mya ngan mi byed cing nye du'i dbus na lam mer 'dug pa yin te/kye ma'o shin tu bde bas bde/ /gang gis nga la ci yang med/ /ces bya ba'i tshigs bcad kyis bstan te/ de nyid bstan pa'i phyir smras pa/ dge slong dkar po zhes bya ba la sogs pa'o/ /de nas bram ze de nyid kyis bcom ldan 'das la gsol pa/ ci'i phyir bcom ldan 'das mya ngan mi mdzad ces gsol pa dang /bram ze nga la ni ci yang med de gang ci yang med pa la ni mya ngan la sogs pa ci yang med do/ /kye gau ta ma ji ltar ci yang mi mnga' ba lags zhes zhus pa dang / des na 'di gsungs so/ /nag po'i chos zhes bya ba la/nag po ni lus kyi las nag po la sogs pa'o/ /rnam par spong zhes bya ba ni bsal ba dang / ring du byos zhes pa ste/ gzhan gyi dbang du gyur pas ni dge ba'i chos bsgom par mi nus pa'i phyir ro/ des na ji zhig bya zhe na/ dkar po bsgom gyis la zhes bya ba ste/khyed kyi dge ba'i chos rnams la goms par gyis shig pa'o/ /nag po'i chos thams cad spangs shing / bsam gtan la sogs pa dge ba'i chos thams cad yongs su gzung ba'i phan yon bstan pa'i phyir smras pa/ dge slong zhes bya ba smos te/ nyon mongs pa thams cad bcom pa zhes bya ba ni tshig gi lhag ma'o//khams gsum las 'dod chags dang bral ba'i phyir don dam par ci yang med par 'gyur ro zhes bstan pa yin no/ /byang chub rnam pa gsum bstan pa'i phyir dge slong dag ces bya ba mang po'i tshig smos so/ /gang yang 'dod pa'i khams la 'dod chags dang bral ba de yang ci yang med pa nyid do//'dod pa las rgal pa'i rim pa bstan pa'i phyir/ khyim nas khyim med rab byung ba/ /zhes bya ba smos te/ khyim nas khyim med pa dang gnas nas gnas med par rab tu byung ba'i 'gro ba ste/ khyim nas khyim med par rab tu byung ba zhes lung las gsungs pa'i phyir ro//ji ltar khyim med par song ba yin zhe na/ spyod yul dben pa gang yin pa/ /zhes bya ba smos te/ gang la khyim med pa de la lus dang sems gnyis dben pa'i ngo bos 'jug pa'i gnas skabs yod de/ de'i phyir rab tu byung ba yongs su 'dzin pa yin te/de nyid yongs su rdzogs par rab tu byung ba'i tshul yin no zhes bstan to/ /khyim na gnas pa ni g.yeng ba dag gi bdag nyid yin pa'i phyir ro/ /bslab cing zhes bya ba ni byed cing ngo / /de la mngon par dga' ba ni rab tu byung ba la mngon par dga' ba'o//nyes par rab tu byung ba la ni dga' ba zhes bya ba'i tshig gis yongs su dag pa'i tshul khrims bstan te/ de la brten pas ting nge 'dzin gyi ro myang ba'i phyir rab tu byung ba la shin tu dga' ba skye bar 'gyur ro/ /de ltar tshul khrims la gnas shing ting nge 'dzin gyi ro myang bas gang spong bar bsgrub pa de smras pa/'dod pa spongs zhes bya ba 'dod pa las 'dod chags dang bral bar sgrub pa ste/ 'dod pa rnams ni ngan ngon dang ci yang med pa'i phyir dang / mchog ma yin pa'i dngos po yin pa'i phyir ro/ /de spangs pas ni ci yang med par 'gyur te/ci yang med pa ni dngos po ngan pa'o/ /ci yang med pa nyid dag pa yin par bstan pa'i phyir/ rtag tu snying po zhes bya ba la sogs pa'o/ /b+ha ra d+h+wa dza sun da ri ka zhes bya ba'i bram ze zhig gis bcom ldan 'das la zhus pa/ dge sbyong gau ta ma bdag ni chu bo sun da ri ka la khrus byed du 'gro ba yin no//bcom ldan 'das kyis bka' stsal pa/ bram ze chu bo sun da ri ka la khrus byas pas ci zhig tu gyur/ kye dge sbyong gau ta ma stegs ni bsngags pa yin te/ chu bo sun da ri ka ni bkra shis shing bsngags te/ gang zhig chu bo sun da ri ka la khrus byed pa de ni sdig pa thams cad sel bar 'gyur ro zhes pa dang /ji tsam na 'di gsungs so/ /dag pa zhes bya ba ni dag pa'i tshul khrims kyi chus ni sems can gyi rgyud bkrus pa nyid de lus dang ngag gi nyes par spyod pa ci yang med par spangs pa'i phyir ro/ /chu bos ni phyi rol gyi dag par zad de/cung zad kyang spangs pa med do/ /rtag tu zhes bya ba ni dus thams cad du'o/ /snying po ni dus tshigs te/ khrus dang dga' ston la sogs pa'i nyi ma zhes bya ba'i don to/ /stegs su khrus byas pa ni brgya la dri ma nag po nyid sel zhing phyi rol gyi dri ma dang bral bar byed pa yin gyi/ngan par spyod pa thams cad dang cung zad kyang bral ba ni med pas gzhan dag ni snying po ma yin pa ste/ gces pa ma yin pa zhes bya ba'i don to/ /a phal gu zhes bya ba ni snying po ma yin pa'i rnam grangs yin pa'i phyir te/ de'i gnyen po ni snying po ste/a phal gu'i'o/ /sdig pa spangs pa nyid snying po yin gyi stegs la khrus byas pas ni sdig pa dang bral bar mi 'gyur ro/ /legs par spyod pa bsags pa nyid kyis nang dul ba dang dag par byed pa yin gyi/ stegs la khrus byas pas ni ma yin no zhes bstan pa'i phyir/rtag tu gso sbyong dag pa dang / /zhes bya ba smos te/ dag pa ni so sor thar pa'i sdom pa la sogs pa nyin re zhing gso ba ste/ ji skad du bram ze ka byin nas ci bdag dang gso sbyong bya'am mi bya zhes zhus pa dang / de'i phyir bcom ldan 'das kyis rtag tu gso sbyong dag pa zhes bya ba gsungs te/de nyid kyi phyir dus tshigs bco lnga pa la sogs pa la brjod de gso sbyong ni so sor thar pa'i mdo bstan pa des tshul khrims gso ba skyes pa'o/ /lam bsgom pas ni yid gdul ba dang yon tan nye bar sogs pa'i phyir ro/ /ci'i phyir zhe na/gtsang ma'i las ni zhes bya ba smos te/ gang gi phyir kha na ma tho ba med par spyod pa'i gang zag ni tshul khrims phun sum tshogs par spyod pa'i phyir ro/ /dag pa zhes bya ba ni lam gyi stobs kyis nang gi dri ma rnams bsal bas so/ /de yi brtul zhugs phun sum tshogs par 'gyur//zhes bya ba ni de kho na rang rang gi phun sum tshogs pas 'grub par 'gyur zhing mngon par 'dod pa'i 'bras bu dang 'brel bar 'gyur ro/ /lam gyi khyad par 'dren par byed pa'i phyir dang / 'bras bu khyad par 'dren pa'i phyir yin gyi gzhan ni ma yin no/ /gang yongs su dag pa de zhing nyid du bstan pa'i phyir/zhing gi skyon ni zhes bya ba la sogs pa smos so/ /mi bkren pa zhig gis rab 'byor la phye byin pas gter thob par gyur nas bcom ldan 'das nyan thos kyi dge 'dun dang bcas pa la bshos gsol te/ skyes bu de chos mnyan pa'i phyir mdun du 'dug pa dang /de'i dbang du mdzad de tshigs su bcad pa bzhi gsungs so/ /gzhan dag ni rgyal po gsal rgyal gyis bcom ldan 'das la gsol pa/ gang la sbyin pa stsal bar bgyi/ /zhes zhus pa dang / rgyal po chen po gang la sems dang ba'o zhes so/ / gzhan dag ni sde pa gzhan dag gis gsol pa/ btsun pa gang la stsal na 'bras bu chen por 'gyur/ /zhes zhus pa lags so zhes zer ro/ /zhing zhes bya ba ni lo tog 'grub pa'i gzhi dag go/ /rtswa'i skyon zhes bya ba ni gang la rtswa'i nyes pa yod pa de ni rtswa'i skyon te/ rtswa dang tsher ma dang ro drod la sogs pas nyams par byas pa'i phyir 'bras bu chung ba'am 'bras bu med par 'gyur ba'o//skye dgu 'di la 'dod chags skyon/ /zhes bya ba ni gang yang skye dgu rnams sred pa dang bcas pa'i skyon gyis nyams par 'gyur ba nyid yin no/ /la zhes bya ba'i sgra ni de bzhin zhes bya ba'i don te/ji ltar zhing la rtswa la sogs bas ma rung bar byas na ni lo tog phun sum tshogs pa'i gnas su mi 'gyur ro/ /de bzhin du 'dod chags kyis sems can gyi rgyud la mi 'dod pa'i 'bras bu dang ldan par byed pa yin te/ de'i rgyus sdig pa lhag par spyod pa'i phyir ro//gang gi phyir de lta bas na bral ba ni spangs shing med par byas pa ste/ 'dod chags kyi rjes su chags pa'i kun du sbyor ba gang yin pa de nyid do/ /de dag la byin pas 'bras bu chen por 'gyur zhes bya ba ni kha zas la sogs pa phul bas 'bras bu mtha' yas pa skye bar 'gyur te zan dron chang ba sbyin par byas pa la sogs pa 'dir dper brjod par bya'o//skyon ni ma rung bar byed pas skyon te/ khong khro ba de'i skyon dang nyes pa gang la yod bas ni bdag shin tu ma rung bar phyed pa'i phyir 'dir zhe sdang skyon du bstan to/ /yang na zhe sdang skyed par byed pa'i phyir te/ji skad du lus kyi skyon zhes bya ba la sogs pa ste/ rgyu la 'bras bur btags pa'i phyir zhe sdang skye ba'i lus la sogs pa 'dren pas na skyon zhes bya ba yin no/ /gti mug bral rnams la zhes bya ba la ni ma rig pa spangs pas te/ mi shis pa thams cad spangs pa'i phyir ro/ gsum po 'di dag ni 'ching ba yin te/ nga'o snyam pa'i nga rgyal gyis ni rab tu bstan par 'gyur ro/ /rkang pa'i 'ching ba las grol ba lta bu yin no zhes bstan pa'i phyir/ de bas nga rgyal bral rnams la/ /zhes bya ba smos te/ bdag dang gzhan la nye bar btags pa las skyes pa'i sems mthon po ni nga rgyal te/las de'i ngo bo nyid yid la byed pas ni zil gyis gnon pa yin te/ de kho na nyid shes pas spangs pa'o/ /'dod chags spangs pa'i 'ching ba ste/ kun 'byung gi bden pa nyid yin pa'i phyir des na de nyid kyi dbye ba 'dir smras pa//chags pa'i skyon dang sred pa'i skyon dang bral ba yin te/ gang gi phyir 'dod pa'i 'dod chags ni chags pa'i skyon yin no/ /gong ma'i 'dod chags ni sred pa nyid de phyi rol du 'gror med pa'i phyir ro/ /de'i 'og tu nga rgyal gyi dbye ba bstan pa ni nyon mongs pa'i rang gi ngo bo rgod pa'i tha ma yin pa'i phyir ro//nyon mongs pa yang rnam pa gnyis te/ lus kyi rnam par shes pa drug gi 'dod chags la sogs pa dang / yid kyis pa'i nga rgyal te/ de gnyis ka'i dbye ba bstan pa'i skabs bya ba yin te/ nyon mongs pa spangs na yang zhing nyid du 'gyur ro//ji ltar 'dod chags dang ldan pa dang 'dod chags dang bral ba zhes brjod par bya zhe na/ 'dir mtshan nyid bstan pa'i phyir drug pa zhes bya ba la sogs pa smos so/ /rgyal po chen po rnam thos sras dga' ldan du song nas gzhal yas khang gi rtse mo na tshigs bcad gcig bris pa mthong ste/de'i don ma rtogs nas 'dab ma la bris te/ gnod sbyin hi ra zhes bya ba la byin nas/ 'di'i don tshol cig ces byas so/ /des kyang cha byad sna tshogs kyis de dang der song zhing btsal ba las de'i don ma rnyed do/ /de'i don shes par bya ba'i phyir byang bu de klu'i rgyal po e la'i 'dab la phyin no//ci tsam na cha byad mthun pas rgyal po'i khab tu bcom ldan 'das kyi spyan sngar phyin nas/ don gyi de nyid rnyed par gyur te 'di yang gsungs so/ /gzhan dag ni sems kun nas nyon mongs pas sems can rnams kun nas nyon mongs par 'gyur la/sems rnam par byang ba'i rgyus ni rnam par dag par 'gyur ro zhes bya ba la sogs pa mdo las 'byung ba de las so zhes zer ro/ /drug pa zhes bya ba ni yid kyi rnam par shes pa ste/ drug par tshang ba nyid kyi phyir ro/ /drug pa de la bdag po zhes bya ba ni mthu che ba yin te/ rnam par rtog pa gsum dang ldan pa'i phyir dang /zag pa med pa la sogs pa'i khyad par dang ldan pa'i phyir dang / khams gsum du khyab pa'i phyir ro/ /rgyal po ni dbang bsgyur bas te/ des 'phangs pa'i phyir rnam par shes pa gzhan yin te/ rlung gis ljon shing bsgul ba'am de la gnas pa'i phyir shing gi sdong po la yal ga la sogs pa bzhin no//chags par gyur na zhes bya ba ni 'dod chags la sogs pa'i skyon la 'jug par gyur na chags can yin par 'gyur ro zhes bya ba ni tshig gi lhag ma ste/ 'dod chags dang ma bral ba dang / zhe sdang dang ma bral ba zhes bya ba la sogs pa'o//chags pa'i nyon mongs pa gang la yod pa de ni chags can te/ dri ma can zhes bya ba'i don to/ /'dir chags pa ni 'dod chags yin no zhes lung las 'byung ba'i phyir ro/ /ma chags gyur na chags ma yin/ /zhes bya ba ni 'dod chags la sogs pa'i ming can chags pa gang la med pa de ni drug pa de nyid de/de la de ltar gyur na ni des bdag nyid chags pa ma yin te/ 'dod chags la sogs pa dang bral ba zhes bya ba'i don to/ /sems can gyi rgyud la chags pa can du gyur na nyes pa ci yod ce na/ chags pa byis pa zhes brjod do zhes bya ba yin te/'dod chags la sogs pa'i drug pas rgyud la dri ma can du byas pa'i sems can de ni byis pa zhes brjod do/ /ngan ngon dang gzhan gyi dbang du byas pa dang / 'khol ba zhes bya ba'i don te/ nyon mongs pa'i dbang du gyur pa'i phyir ro/ / chags bral mkhas par shes par bya/ /zhes bya ba ni shugs kyis rtogs pa'i phyir ma bshad de/ de bas na 'dod chags dang bral zhing snying rje bas sems kho na dul bar bya ste/ de ltar byas na skyon med par 'gyur zhing bsod nams kyi zhing du 'gyur ro zhes ston pa yin no/ drug pa des phal cher gang la gnas nas shin tu chags par 'gyur zhe na/ gzugs can dang lus can gyi dbang du byas pa'i phyir te/ khams gnyis na gzugs la brten te 'jug pa'i sems dang sems las byung ba yin no zhes grub pa'i mtha'o/ /lus can de nyid nges par brtag pa'i phyir//'dod chags zhe sdang zhes bya ba la sogs pa smos so/ /gzhan dag ni gnas brtan dga' bo yul mi'i bud med gzugs bzang ba mthong nas kun du chags par gyur pa las brtsams so zhes zer ro/ /gzhan dag gi bcom ldan 'das nags tshal na bzhugs pa las nyan thos dag la shi ba'i ro dag ston cing lus dran pa nye bar gzhag pa ston par mdzad pa na lha zhig nye bar 'ongs te gsol pa/lus ni ji ltar 'tshal bar bgyi/ /ra ba zhal zhal ji lta bu/ /bcom ldan 'dir ni gang zhig gi /rtag pa'i 'ching ba'i gnas gang lags/ /zhes zhus pa las 'di gsungs so zhes zer ro/ /grong khyer zhes bya ba ni chos la mngon par dga' bar mi rtogs pa'i phyir grong khyer nyid de/ sdang ba'i gzhi'i lus zhes bya ba'i don te/ /de dang 'dra ba'i phyir dang //skabs yin pa'i phyir dang / 'og nas khyad par brjod pa'i phyir te/ du ba dang ldan pa mthong ba las me rtogs par byed pa de bzhin no/ /khyad par ji lta bu zhe na/ rus pa'i ra ba can zhes bya ba la sogs pa'o/ /'di la rus pa ni ra ba lta bu ste/ rus pa'i rang bzhin gyi rtsig pa zhes bya ba'i don to//'di la sha dang khrag gis zhal zhal byas pa ni dper na shing dang so phag la sogs pa bkod la glegs bu la gzer bu dang thag pa la sogs pas bcings nas 'dag pa la sogs pas byugs pa ni grong khyer gyi grangs su 'gro ba de bzhin du nang gi rus pa sum brgya drug cus bkod la/rgyus pa la sogs pas bcings nas/ sha dang khrag gis byugs nas lus su 'gyur ro/ /'dir grong khyer du gang zhig dpyad par bya ste/ de smras pa/ gang du 'dod chags zhes bya ba la sogs pa ste/ lus gang la rjes su chags pa'i kun du sbyor ba gnas pa'o/ /dang gi sgra ni ngo tsha med pa la sogs pa de'i 'khor yongs su bzung ba ste/ 'dod chags kyi dri ma yin pa'i phyir ro/ zhe sdang dang zhes bya ba ni khong khro ba'i kun du sbyor ba'o/ /dang gi sgra ni de'i dri ma khro ba la sogs pa bzung ba yin no//nga rgyal dang zhes bya ba ni nga rgyal gyi kun tu sbyor ba ste/ dang gi sgra ni de dang rgyu mthun pa yang brjod pa yin no/ /'chab pa zhes bya ba ni nye ba'i nyon mongs pa'i dper brjod pa'o/ /sdig pa sbed pa dang phyi rol nas kun du byug par byed pa de ni 'chab pa ste/ sred pa dang ma rig pa las byung ba ni 'chab pa'i mtshan nyid do/ /tshigs bcad snga ma'i rnam par shes pa yang 'dir sbyor bar bya ste/ de la brten pa'i dngos po brjod pa'i phyir te/ gnas med pa'i ni gnas pa med pa'o/ /dper na grong la rgyal po dang / blon po dang / bya pri ta ka dang /mdun na 'don dang / thub pa rnams kyis gnas par bya ba de bzhin du 'dir rnam par shes pa dang / 'dod chags dang / zhe sdang dang / nga rgyal dang / 'chab pa la sogs pa brjod par bya'o/ /gnas pa ni 'jug pa'o/ /lus kyi grong khyer 'di ga las byung ba dang / ji ltar 'dir gang gi 'ching bar 'gyur ba dang / gang gis 'di spang ba yin zhes bstan pa'i phyir/ rgyu yi kun nas bslang ba zhes bya ba la sogs pa smos so/ /ut+pa la'i mdog can gzugs shin tu mdzes pa las 'dod chags kyis gzhan gyi dbang du byas pa'i grong khyer chen po drug tu smad 'tshong ma byas so//de nas rab tu byung zhing dgra bcom pa'i 'bras bu thob par gyur te/ de'i dbang du mdzad nas 'di gsungs so/ /rgyu yi rab tu byung zhes bya ba ni skyed pa dang rgyu dang byed pa ste/ de dag las rab tu byung ba yin pas rab byung ste kun 'byung gi tshogs pa ste/de skyed par byed pa yod pa dang de las 'bras bu 'byung ste/ gang gi phyir rkyen gcig las skyes pa ni gang yang med do/ /de bas na kun 'byung gi bden par gyur pas so/ kun nas bslang ba zhes bya ba ni kun nas skyes pa'o/ /lus kyi gnas skabs yin pa'i phyir te/sdug bsngal gyi bden pa zhes bya ba'i don to/ /de ma mthong na zhes bya ba ni lus de ji lta ba bzhin ma shes pa ste/ 'jig rten 'di na skye ba dang 'jig pa'o/ /gang la las 'di ma shes pa ni ma rig pa des so/ /de zhes bya ba ni mi gtsang bar gyur pa'i lus de'o//'ching bar 'gyur zhes bya ba ni lhag par zhen pas gzhan gyi dbang du byas pa'i phyir mi gtsang ba la phag bzhin te/ 'jig rten pa dag ni mi shes pas bsgribs pa yin no zhes pa'i tshig gis so/ /de dag rtogs na chu bo rnams ni rab tu spong //zhes bya ba la/ de dag la ni lus de dag ste zag pa med pa'i shes pas ji lta ba bzhin du mthong na chu bo rnam pa bzhi yongs su spong ba yin no/ /'dis ni lam dang 'gog pa'i bden pa bstan te/ rtogs pa dang rab tu spangs pa zhes bstan pas so/ /rtogs pa kho nas chu bo rnams spangs pa yin no zhes bstan pa ga las she na/phyi rol pa la chags pa de dag spong ba med/ /ces bya ba yin te/ mu stegs can rnams la ni thar pa'i gegs su gyur pa chu bo'i ming can chags pa spong ba med de/ 'jig rten las 'das pa'i ye shes med pa'i phyir ro//chos 'di pa dag ni 'phags pa'i bden pa bzhi rtogs pas phra rgyas thams cad spangs pa yin no/ /ji ltar nges par bya zhing ga las she na/ phyi rol pa las chags pa de dag spong ba med/ /ces bya ba smos te/ 'khor ba la lhag par zhen cing bdag med pa la mos pas chad pas 'jigs pa yin pa'i phyir spong bar byed pa yin na thar pa lta ga la yod/sil bu'i tshoms te bcu drug pa'i rnam par 'grel pa rdzogs so// //sil bu bstan pa las byung ba'i g.yeng bas kun nas bslang ba'i rdul la chu dang 'dra ba'i brtson 'grus dang ldan pa'i dbang po la sogs pa'i khyad par yongs su bzung zhing rjes su mthun pas zhi ba'i thabs bstan pa'i phyir/de'i 'og tu chu'i tshoms brjod par bya ste/ de nyid bstan pa'i phyir/ de dag khyim la zhes bya ba smos so/ /yang na rab tu 'byung ba ni g.yeng ba thams cad spong bar byed pa yin te//des na de nyid bstan pa'i phyir de dag khyim spangs pa zhes bya ba yin no/ /yang na phyi rol pa la chags pa de dag spong ba med de/ rtogs pa med pa'i phyir ro zhes bstan pa la/ ci'i phyir de dag mngon par rtogs pa med ce na/ smras pa rab tu 'byung ba med pa'i phyir te/de la ma zhugs par ni spong ba ma yin te/ rab tu byung ba ni 'khor ba la zhen pa med pa'i phyir dang / yongs su gtong ba'i bsam pa'i rang bzhin yin pa'i phyir ro/ /des na nyon mongs pa spangs pa ni rab tu byung ba la rag las pa yin no zhes bstan pa'i phyir/de dag khyim spangs zhes bya ba la sogs pa smos so/ /rgyal po'i khab u dum bA ri ka na bram ze n+ya gro d+ha zhes bya ba pad+ma chen po'i mchod sbyin byed pa chos kyi nang na grong bcu drug dang / bran gyi grong sum cu dang glang dor stong du gcig gis ma tshang ba dang / dbyig bye ba drug cu dang /nas dang gser bang chung brgyad cu yod pa de'i bu 'od srungs chen po chung ma blang ba la 'dzud par byed do/ /des kyang pha'i ngag gcog par ma nus te/ smras pa/ gal te 'dzam bu chu bo'i gser gyi gzugs zil gyis gnon pa mtshan phun sum tshogs pa'i bu mo yod na ni blang ngo zhes byas so/ji tsam na yul ma ga d+hA nas ser skya bzang mo zhes bya ba blangs na/ de spangs nas rab tu byung nas dgra bcom pa'i 'bras bu thob po/ de'i dbang du mdzad nas tshigs su bcad pa gnyis gsungs so/ /'bad pa yis zhes bya ba ni dge ba bya ba dag la mngon par brtson par byed pa'o//sbyor ba phun sum tshogs pa bstan nas/ bsam pa phun sum tshogs pa bstan pa'i phyir/ dran ldan zhes bya ba smos te/ gal te gang gi phyir dran pa nyams na ni bag med pas dran pa nyams par 'gyur la/ dran pa nye bar gzhag pa la ni ma yin te/dran pas sgo bsrungs par gyur na mi dge ba rnams spong bar 'gyur ro zhes mdo las gsungs so/ /de dag khyim la mi dga' bar/ /zhes bya ba la khyim ni 'jug par bya ba'i khang pa ste/ de la mngon par mi dga' ba rnyed pa ni dran pa dang brtson 'grus khyad par can dang ldan pa'i phyir te/khyim na ni g.yeng ba dang bya ba ngan pas g.yeng bar byed pa'i phyir ro/ /gang yang de ltar gyur na ni de dag rab tu byung ba yongs su bzung bas khyim gyi gnas yongs su spong ngo / /de spangs pas dus gzhan zhig na dran pa dang brtson 'grus dang ldan par gyur pas lam bsgoms te/khams gsum gyi nyon mongs pa'i rang bzhin gyi chu bo spong ba yin te/ 'dir dper brjod pa ni ngang pa ltar zhes bya ba ste/ dper na ngang pas mtsho ngan pa spangs pa zhes bya ba smos pa la char chus rnyog pa'i chu spong bar byed pa de bzhin du'o//yang na mtsho ngan zhes bya ba ni chu chung ba ste/ mtshe'u dang / rdzing bu dang / chu bran thams cad la 'dod do/ /de ltar chu bo spang ba la 'bad pas ni don dam par mya ngan las 'das pa'i grong khyer du 'jug pa yin no zhes bstan pa'i phyir/brtan pa 'jig rten zhes bya ba la sogs pa smos te/ nyi ma'i lam nas ngang pa ltar/ /zhes bya ba la gang gi phyir nyi ma ni [(]namakha'i [,]nam mkha'i [)]ngos kyi lam la 'gro ba'i phyir ro/ /de la 'dis ni lha rnams kyi rab tu rgyu ba'i gnas bstan nas 'og dang thad kar rab tu rgyu ba yang bstan pa'i phyir/rdzu 'phrul gyis ni mkha' la 'gro/ /zhes bya ba yin te/ dper na ngang pa ni [(]namakha' [,]nam mkha' [)]la rang gi gshog pa'i mthus 'phur bar byed pa de bzhin du/ bdag nyid chen po rnams kyang zang zing la yid chags shing dga' ba med par chu bo las rgal ba yin te/ gang du nam mkha' la nyi ma'i dkyil 'khor 'gro ba de ltar yang gzhan gyi don bskyed pa'i phyir kun du 'gro ba yin no/ /de yang ji ltar ngan song la sogs par zhes bya ba'i don te/ gdul bya'i skye bo la phan pa bskyed pa'i phyir ro/ /des na gdul bya'i don byas nas dug gi snod bzhin du lus spong ba yin no//'jig rten nges byung nas zhes bya ba ni 'khor bar ldog pa med par 'gro ba'o/ /brtan pa ni bdag med pa rtogs pas chad pas mi 'jigs pa'i phyir ro/ /so so'i skye bo thos pa dang ldan pa la yongs su rtogs pa kha cig kyang chad pas mi 'jigs pa yod na/ci de yang nges par 'byung ba yin nam zhe na/ bdud kyi sde rnams rab bcom ste/ /zhes bya ba smos te/ nyon mongs pa'i tshogs de bzhin nyid ji lta ba bzhin du shes pas spangs pa yin no/ /nyon mongs pa'i stobs bcom pas brtan pa nyid nges par 'byung ba yin gyi gzhan ma yin no//gang yang khyim la bag med par 'dug pa de dag gi nyes dmigs bstan pa'i phyir smras pa/ tshangs par spyod pa ma spyad cing / /zhes bya ba la sogs pa'o/ /bcom ldan 'das mnyan yod du bsod snyoms la rgyu zhing gshegs pa dang / phyi bzhin 'brang ba'i dge sbyong tshe dang ldan pa kun dga' bos khyo shug cig rgas shing 'khogs pa nas gzer ba ba lang gi sna ltar yo ba zhig mthong ngo //gzhan zhig na phyag dar gyi phung po na 'dug cing chu skyar rgan po khyo shug bzhin du sems khong du chud pa de lta bu dag kyang gzigs te/ kun dga' bo la bka' stsal pa/gal te khyo shug 'dis na tshod dang po la longs spyod phun sum tshogs pa bsdus shing bstsags par byas na ni dga' ba 'thob pa 'di ni gnas yin te/ gang gi phyir 'dis ni khyim gyi mchog nyid byed par 'gyur ro/ /gal te rab tu byung na ni dgra bcom pa'i 'bras bu mngon sum du byed par 'gyur ro//de bzhin du khyim gnyis pas ni phyir mi 'ong ba'i 'bras bu'o/ /khyim gsum pas ni rgyun du zhugs pa'i 'bras bu'o zhes pa ste/ des na tshigs su bcad pa gnyis gsungs so/ /tshangs par spyod pa ma spyad cing //zhes bya ba ni lam gyi tshogs ma bsrungs pa'am/ rab tu byung zhing lam ma bsgoms pa'o/ /gzhon nur nor ni ma rnyed pa/ /zhes bya ba ni dbyig la sogs pa'i nor ma bstsags pa ste/ na tshod dang po la ni bya ba thams cad la nan tan bya bar bzod pa yin no/ / de'i phyir lang tsho la gnas pa ni thams cad la nus pa nyid de/ de bas na 'jug pa dang ldog pa'i bya ba rnams la rab tu 'bad par bya ba nyid do/ /de ma byas na ni rgan sems bzhin du 'gyur zhes bya ba smos te sems mya ngan dang yid mi bde bas gdung bar byed pa ste/ sems kyi gdung ba nyams su myong bar 'gyur ro zhes bya ba'i don to//chu skyar rgan po zhes bya ba ni rga bas 'khogs par byas pa'i bya gar chu skyar lta bu ste/ krung krung zhes zer ba'i phyir khrung khrung zhes bya ba ni nges pa'i tshig go/ /gang du sems par byed ce na/ nya nyung ngogs dag na zhes bya ba smos te/gang na nya nyung ba'i mtsho ngan pa nyid na ste/ shin tu chung ba'i mtsho dang rdzing bu la sogs pa na 'dam dang chu ba la sogs pas rnyog pa'i phyir dang / chu yang skam du nye zhing zad pa'i phyir ngan pa'o/ /nyal bar 'gyur zhes bya ba ni gnyid log pa lta bur rmongs pas 'dug pa ste/rkang lag rnams zhigs shing lhod par gyur pa'i phyir ro/ /lus bskums nas ni zhes bya ba ni rtsa ba bad ces bya ba'i sgras gzhu drangs pa bzhin du 'khums pa'i lus gang la yod pa de ni de nyid do/ /nas ni zhes bya ba'i sgra ni yang gi don te/sems khong du chud pa gcig pur yang ma zad de/ lus kyang bskums te brang gi thad kar pus mo'i lha nga bkug cing yan lag rnams bsdus nas nyal bar byed do/ /sngon chad byas pa zhes dran zhing zhes bya ba ni sngon rtse ba dang dgod pa la sogs pa dang / gzugs bzang ba la sogs pa rgyun du myong ba dang bral bas de dag thams cad la re ba med pa'o//sdig pa chung dus ni gnod par mi byed de/ dper na rdul phra mo'i yul gcig la ni dbang po'i bye brag shes pa skye bar mi nus te/ de bas na tshangs par spyod pas ci zhig bya zhes pa la/ de'i phyir smras pa/sdig pa chung byas bdag nyid kyi/ /zhes bya ba la sogs pa yin no/ /rgyal po'i khab na khyim bdag cig nyes par spyod pa cung zad cung zad tsam byed de/ chung ngu spyad pa tsam gyis ni gnod par mi 'gyur ro snyam sems par byed do/ /gzhan zhig ni cung zad cung zad legs par spyod pa nus kyang mi byed de/gang gi phyir skar khung gi bu ga las 'byung ba'i rdul dag gis ni ra ba byed par mi rung ngo zhes sems pa las de gnyis las brtsams te tshigs su bcad pa gnyis gsungs so/ /chung byas ma sems shig ces bya ba ni cung zad cung zad du ma rtog shig pa'o//sdig pa ni ngan par spyod pa'o/ /nges par gzung ba ni drug pa ste/ sdig pa'i nang nas cung zad kyang me bzhin du gdung bar byed pa dang / kha zas dug dang 'dra ba bzhin du gsod par byed pa'i phyir ro/ /cung zad kyang sdig pa ma yin no zhes brtag par mi bya'o zhes bstan pa'i phyir/phyi bzhin mi 'ong ma sems shig /ces bya ba yin te/ sdig pa spyad pa 'di ni chung ba yin pas bdag 'jig rten pha rol du 'gro ba na rjes su 'ong ba ma yin zhing gdung bar byed pa ma yin no zhes gang zhig rtog na de ltar shes par mi bya'o//ci'i phyir zhe na/ 'di la nyung ngu'i dngos po rgyun mi 'chad par bstsags pa ste/ dpe bstan pa'i phyir/ chu yi thigs pa lhung ba yis/ /zhes bya ba smos te/ dper na rgyun du chu'i thigs pa 'bab pa de ni bum pa chen po yang khengs par 'gyur ba de bzhin du ste/bum pa chen po'i tshad shin tu che ba'i chu'i snod do/ /sdig pas byis pa gang bar 'gyur/ /zhes bya ba ni ngan par spyod pa spyad pas byis pas nye bar bstsags pa ste/ bum pa chus yongs su gang ba bzhin no/ /ji ltar nyung ngus byis pa yongs su gang bar 'gyur zhe na/cung zad cung zad ces bya ba ste byis pas cung zad cung zad nye bar bstsags pas yongs su 'phel bar 'gyur te/ grog mkhar gyi phung po bzhin no/ /dge ba ni legs par spyod pa ste/ bde ba'i rgyu zhes bya ba'i don to/ /brtan pa ni mkhas pa'o/ sdig pa dang bsod nams spang ba dang len pa la sred pa spang ba'i rgyu nyid du bstan pa'i phyir smras pa/'di ltar kun na chu yod pas/ /zhes bya ba la sogs pa'o/ /kun dga' bos bcom ldan 'das la btsun pa bcom ldan 'das gzigs su gsol/ /yul be+e ra t+ya na bram ze zhig khron pa nas chu 'byin cing kun dga' ra ba na chu blugs par 'dod do zhes gsol to//des kyang bcom ldan 'das gshegs pa mthong ste/ bsams pa gal te kun dga' ra ba 'dir byon na ni lan du mar chu 'thungs te 'di zad par 'gyur ro snyam nas des sgo bcad cing zo chun yang sbas te 'dug pa dang /bcom ldan 'das kyis rdzu 'phrul gyis kun dga' ra ba de'i nang du gshegs te/ khron pa de la ltos pa med pa'i tshul du kun dga' ra ba chus bkang ba dang / bram ze de mngon par dad de bcom ldan 'das 'dir gshegs su gsol//zo ba dang chun po 'di bzhes la ci bder chab la longs spyad du gsol zhes zhus pa dang / de'i dbang du mdzad nas tshigs su bcad pa 'di gsungs te/ de yang rab tu byung nas dgra bcom par gyur to/ /khron pa'i chu lta ci zhig dgos/ /zhes bya ba ni khron pas bya ba ma yin pa nyid kyis so//gang gi phyir chu btung bar bya ba de ni khron pa ste/ mtsho dang rdzing bu la sogs pa'o/ /nam zhig ce na/ 'di ltar kun na chu yod pas/ /zhes bya ba yin te/ gal te kun nas chu nyon mongs pa med par rnyed pa yod na dka' bas gdon dgos pas khron pa'i chu des ni skom par gyur kyang dgos pa med na/skom pa dang bral ba la sogs pa lta smos kyang ci dgos/ brjod pa ni 'di yin te/ dper na thams cad na chu yod cing sus kyang dgag pa med la/ rnyed sla bar gyur pa la ni khron pa'i chus skom yang mi dgos pa nyid yin na/sred pa rtsa nas bcad pa lta smos kyang ci dgos te/ gang gi don du ci zhig tshol bar byed ces pa'o/ /gang gi phyir skom pa yod na ni chu tshol bar byed kyi/ de med na ni de yang med pa'i phyir te/ gang rnal 'byor pa 'jig rten las 'das pa'i lam bsgoms pas sred pa'i 'dod chags kyi rtsa ba ma rig pa'am tshor ba 'thob pa/'jig rten 'dir drungs nas phyung zhing spangs la gzhi yongs su spangs shing bsal bas nga lta bu ni thams cad kyi don du chu la sogs pa tshol bas rjes su gnas pa yin gyi gzhan du ma yin no/ /khyed sred pa dang bcas pa ni khron pa dang /kun dga' ra ba la sogs pa dgos pa yin gyi/ sred pa dang bral ba dang mi 'dra'o zhes bya ba'i don to/ /srid pa la spyod pa ni bya ba ma yin pa thams cad la 'jug pa ste/ de bas na de las bzlog par bya ba'i phyir 'di gsungs so/ / sred pa spangs pas ni chu bo bzhi las rgal te/ srid pa'i rgya mtsho las rgal ba yin no zhes bstan pa'i phyir/ gang zhig rags brtsigs zhes bya ba la sogs pa smos so/ /grong khyer pa tra le pu tra na bar sha ka ra zhes bya ba ma ga d+hA'i blon po zhig gis sangs rgyas bcom ldan 'das 'khor dang bcas pa spyan drangs nas bshos nye bar longs spyad nas yon phul lo//bcom ldan 'das dge slong gi tshogs kyis yongs su bskor zhing grong khyer gyi lho phyogs kyi sgo nas slar gshegs te/ dus der byas pa'i rags brtsigs pas mtsho ngan pa las rgal zhing gang gA'i yang tshu rol gyi ngogs nas rdzu 'phrul gyis pha rol du gshegs te bzhugs par gyur to//dge slong dag las kha cig ni gru dang gzings dang shing shal ma li'i spang leb la sogs pa la brten nas rgal bar gyur te/ ci tsam na tshigs su bcad pa gnyis gsungs so//gang zhig rgal 'dod ces bya ba ni de'i tshe rgal bar chas pa'i skye bo'o/ /gang zhig ce na/ rgya mtsho zhes bya ba ste/ chu chen no/ /rgya mtshor 'gro ba'i 'bab chu ste/ gang gA zhes bya ba'i don to/ /rags brtsigs zhes bya ba ni chu lon la sogs pa'i tshul gyis zam pa la brten nas mtsho ngan spangs pa ni rgal ba ste/rdzing bu dang ke d+ha ra la sogs pa chus khyab pa'i phyogs so/ /de nas ci zhig byed pa yin zhe na/ gzings ni bcas nas kyang zhes bya ba smos te/ rtswa dang yal ga dang lo ma la sogs pa'i tshogs chu'i gzings 'god pa'am/gru la sogs pa la brten pa'o/ /skye bo zhes bya ba ni gang gA rgal bar 'dod pa'o/ /des gru la sogs pa yongs su blangs te/ kha cig rgal bar byed ces bya ba nye bar rgal ba ste/ chu bo'i pha rol gyi 'gram du phyin pa'o//de gang dag yin zhe na/ skye bo mkhas pa zhes bya ba yin te/ mkhas shing rtogs pa'o/ /sdod pa med par byed pa'i phyir dang po rgal ba ste/ skye bo mkhas pa rnams kyis 'dren pa ni bcom ldan 'das yin no zhes bstan pa'i phyir/ rgal nas sangs rgyas bcom ldan 'das/ /zhes bya ba smos te/ 'dis ni go rims bzhin du spangs pa dang / ye shes phun sum tshogs pa bstan te/ bag chags dang bcas pa'i nyon mongs pa spangs pa'i phyir dang / chos thams cad las rnam pa thams cad du sangs rgyas pa'i phyir te/de yang thams cad kyi dang por rgal ba'o/ /bram ze zhes bya ba ni rgyun du yid phyi rol du byas pa ste/ don dam par ni thub pa mchog la brjod do/ /skam sar gnas par mdzad ces bya ba ni gang gA'i 'gram du bzhugs pa'o//de la dge slong khrus byed cing / /zhes bya ba ni dge slong dag pha rol gyi 'gram du lus la chus yongs su 'khru ba'o/ /nyan thos rnams kyis gzings kyang bcas/ /zhes bya ba ni gang dag da dung ma rgal ba ste/ phyis 'ongs pa'i dge slong dag gzings yongs su 'dzin par byed do//de ltar re zhig tshigs bcad kyi sgra ji bzhin gyi don bstan nas/ de bzhin du 'dir yang don bshad par bya ste/ gang zhig rgal 'dod pa zhes bya ba ni spong par 'dod pa'o/ /rgya mtsho'i chu bo ni 'khor ba'i skye ba 'grub pa'i nyon mongs pa'i chu bo'o/ / spong bar 'dod pa 'dis ni thar pa'i cha la sogs pa'i tshogs bstan te/ gang gi phyir 'di ma yin par ni de bzhin nyid shes pa skye bar mi 'gyur ro/ /rags brtsigs zhes bya ba ni mthong ba'i lam mngon du byas pas so/ /spangs pa ni bstsal ba ste/ mthong bas spang bar bya ba'i nyon mongs pa'o//skye bos gzings ni bcas nas kyang / /zhes bya ba ni gang de ltar mthong ba'i lam mngon du byas pa de nyid kyis bsgom pa'i lam la rab tu 'jog par byed pa yin te/ des phra rgyas spong bar byed pa'i phyir ro/ /lam gnyis kyis kyang kun du sbyor ba rim gnyis spangs pa'i phyir rgal bar byed pa yin no//mkhas pa ni 'phags pa'i gang zag go/ /ma rgal ba rnams kyis 'dren par bstan pa'i phyir brgal nas sangs rgyas bcom ldan 'das zhes bya ba smos te/ rang nyid byung bar bstan to/ /skam sar gnas par mdzad ces bya ba ni phung po lhag ma dang bcas pa'i mya ngan las 'das pa bstan te/pha rol gyi 'gram na phung po lhag ma dang bcas pa'i mya ngan las 'das pa'i dbyings de'i tshig bla dgas so zhes mdo las gsungs pa'i phyir ro/ /gnas par mdzad ces bya ba ni thugs rje chen po mtshon pa yin te/gang gi phyir de med par ni bcom ldan 'das skad cig kyang srid pa na gnas par mi mdzad do/ /de la dge slong khrus byed cing / /zhes bya ba la sogs pas ni khams gsum las 'dod chags dang bral ba rnams sems can gyi don du bzhugs shing mthong ba'i chos la bde bar gnas pa bstan to//gzings kyang bcas zhes bya ba ni nges par 'byed pa'i cha dang mthun pa la gnas pas mthong ba'i lam la sogs pa mngon sum du byed pa ste/ de la 'dis ni zhugs pa rnams kyi mtshon pa yin no/ /des na yang zhugs pa bzhi dang 'bras bu bzhi la gnas pa'i dge slong 'di ni sbyin gnas yin te/rig pa dang rkang par ldan pa yin pas bar sha ka ra pa tra le pu tra na na gnas pa'i bram ze dang / khyim bdag rnams khyad par gyi zhing la phul ba 'dis ni bsod nams dpag tu med pa skyed par 'gyur ro zhes so//slob pa dang mi slob pa thob pa dag ji skad bstan pas bdag nyid gdul bar bya'o zhes bstan pa'i phyir ro/ /btso blag mkhan dag ces bya ba la sogs pa smos so/ /tshe dang ldan pa shA ri'i bu'i sbyin bdag khyim bdag dpa' bo zhes bya ba de'i bu skyes ma thag rkang pa'i phyogs su lha'i pad+ma rab tu byung bar gyur te/de der 'dug nas tshigs bcad smras pa/ sangs rgyas lta bu'i zhing med cing / /sbyin pa lta bu'i grogs med de/ /gang phyir bdag 'dra'i dbul ba yang / /'di ltar phyug por byas gyur to//zhes so/ /mtshan ma brgya dang / me tog gi char yang byung ngo / /de'i pha la gtam snyan skyel ba'i mi byung ste/ de la lan gsum gyi bar du kha rin po ches bkang ngo / /khye'u de yang mkhas pa zhes bya bar ming du btags te/ rgyal pos kyang grong gi rnam pa bgo bsha' byas so//mu ge byung ste/ bcom ldan 'das kyis de bos nas der 'gro bar zhugs pa dang / lam gyi bar du slong mo pa dag gis bslangs so/ /des kyang klu dag las nor bslangs te de dag la byin no/ /de nas bram ze'i khye'u de dag mngon par dang nas de dang lhan cig bcom ldan 'das kyi spyan sngar phyin te/de dag gis dgra bcom pa'i 'bras bu thob par gyur to/ /'di ltar ji tsam na de 'phags pa shA ri'i bus rab tu phyung ste/ sems gdul par bya'o zhes kyang bstan to/ / de yang mkhan po dang lhan cig bsod snyoms su 'gro ba'i lam gyi bar na chu chun zhig mthong ste/ mkhan po la 'di gang dag lags zhes smras pa dang / 'di dag ni chu blangs nas rang nyid kyi zhing la khyer te ji ltar 'dod pa bzhin du las byed do/ /ci chu la sems med pa yang gzhan gyis khyer ba yin nam/de bzhin te/ sems med kyang khyer nas las byed pa yin/ gang gi phyir bdag cag sems dang bcas pas bdag nyid kyi sems gdul bar mi bya zhes so/ /yang mda' mkhan dag mthong ba mda' me la sro bar byed cing mig gi zur gyis rtse mor bltas te drang por byed do//mda' sems med pa yang drang por byed na/ bdag cag sems dang bcas pa ci'i phyir bdag gi sems dbang du mi byed ces so/ /yang mthon po ni 'jog pa la sogs pas shing sbyong bar byed pa mthong ste 'di dag ni shing la sogs pa bzhogs nas srog shing la sogs pas 'khor lo byed pa yin no//des bsams pa sems med pa'i shing las kyang 'khor lo byed pa yin na/ bdag cag sems dang bcas pa ci'i phyir bdag gi chos kyi 'khor lo mi byed ces nas/ ji tsam na mkhan po'i lhung bzed blangs te/slar log nas gnas su song ste/ sems dul bar bya ba de bsgrubs pas dgra bcom par gyur te/ bcom ldan 'das kyis de las bsams nas tshigs su bcad pa 'di gsungs so/ /chus 'khru zhing zhes bya ba ni chus zhing 'jam par byed cing skyed pa ste/ni dzir zhes bya ba'i sgra las gtsang ba dang / skyed pa yin no/ /'dir btso blag mkhan zhes mi bya ste/ chu chun zhes zer bas chu chun ni chu 'dren pa ste zhing pa'o/ /gzhan dag ni btso blag mkhan zhes zer te/ bul tog gi chu la sogs pas gos la sogs pa 'khru zhing dag pa dang dri ma med par byed pa'o//mda' mkhan zhes bya ba ni gang la 'dam bu la sogs pa'i mda'i bzo byed pa'o/ /mes ni srong ba dang zhes bya ba ni mda' bsros nas drang por byed pa'o/ /shing mkhan shing la 'jog sbyong ltar/ /zhes bya ba ni shing kun du 'jog par byed pa'o//mkhas pas bdag nyid gdul bar bya/ /zhes bya ba ni bdag la phan par 'dod pas rang nyid kyi sems gdul bar bya'o/ /bdag nyid gdul ba la ni dam pa'i chos mnyan pa thabs yin no zhes bstan pa'i phyir/ ji ltar mtsho chen zhes bya ba la sogs pa smos so//bcom ldan 'das u dum bA ra'i nags na bzhugs te/ de na mtsho chen po ma dros pa la gzigs nas gtsug phud lnga pa'i bdag po las brtsams te 'di gsungs so/ /gzhan dag ni ka ni ma tri ka zhes bya ba dam pa'i chos mnyan pa la rgyab kyis phyogs pa las brtsams so zhes zer ro//mtsho zhes bya ba ni tshim par byed pa ste/ tshad pas gdungs pa'i skom pa la sogs pa'i dbang du byas pa ste/ mtsho chen po'o/ /ji ltar zhes bya ba ni gang ltar ro/ /mtsho chen po de ji lta bu yin zhe na/ / zab mo dag ces bya ba la sogs pa smos te/ gting dpag dka' ba'o/ /rab tu rnam dang ni shin du gtsang ba'o/ /rnyog pa med pa'i ni 'dam dang chu bal la sogs pa'i skyon dang bral ba'o/ /ltar zhes bya ba ni de bzhin no/ /'di na chos ni nyan par byed/ ces bya ba ni bstan pa'i chos kun du nyan par byed cing khong du chud par byed de/ de'i phyir 'di la chos ni rtogs par dka' ba yin te/ shA ri'i bu la sogs pas kyang de'i de bzhin nyid mi rtogs pa'i phyir ro/ /rab tu rnam par dang bas ni tsi ri ka la sogs pas ma byang yang de rtogs pa'i phyir ro//rnyog pa med pa ni 'dod pa la sogs pa'i chu bal dang 'dam gyi dri ma dang bral ba'i phyir ro/ /rab dang zhes bya ba ni dam pa'i chos mnyan pa la sems dang ba chen pos bsgrub par bya ba yin te/ dad pa tshang ba la ni yongs su rdzogs par brjod par bya'o zhes bya ba'i tshig gis te/des kyang sems dul ba'i phyir ro/ /mkhas pa ni khyad par shes pa'o/ /ji skad du yon tan gyi mtsho chen po la bltas na sems yongs su gdung ba dad pa dang rab tu dang ba skyed par byed de de bzhin du chos thos na sems dul bas mkhas pa dang bar 'gyur zhing zang zing med pa thob par 'gyur ro/chos mnyan pas sems dul bar byas pa'i phan yon bstan pa'i phyir smras pa/ nam mkha' lta bur chags med cing / /zhes bya ba la sogs pa'o//lha sbyin gyis 'bad pa chen pos dge slong mang po dbang du byas shing tshe dang ldan pa shA ri'i bu ni ma yin te/ de las brtsams nas tshigs su bcad pa 'di gsungs so/ /gzhan dag ni 'od srungs chen po 'dod pa chung ba la sogs pa'i yon tan brjod pa ste/ nam mkha' dang sgo them dang mtshe'u la sogs pa'i dpe ste/de la 'di gsungs so zhes zer ro/ /nam mkha' dang mnyam zhing mtshungs pa ste/ rjes su chags pa dang khong khro ba spangs pa'i phyir ro/ /chags med cing zhes bya ba ni rjes su zhen pa med pa dang / shin tu ma gos pa ste/ 'jig rten gyi chos brgyad kyis zhes bya ba'i don to/ /dper na nam mkha' ni mi gtsang ba dang gtsang bas kyang mi gos pa de bzhin du nyon mongs pa dang bral ba rnams kyang phan 'dogs pa dang gnod pa byed pa gnyis kyis ste'u dang tsan+dan gyi brtag pa lta bu'i phyir ro/ / gzhan dgra bo dag la yang bdag dul ba dag ni khon du 'dzin par mi byed do zhes bstan nas dus der 'gyur ba med par bstan pa/ sgo them lta bur g.yo ba med/ /ces bya ba yin te/ grong gi sgo'i nang du gzhug pa'i 'khor gtan gang la brten pas ni sgo sran thub pa yin te/de khye'u la sogs pa dag gis bong ba la sogs pa bsnun na yang g.yo ba med cing rang gi bya ba yang mi 'dod do/ /de bzhin du bdag gzhan la brnyas pa thob kyang bdag dang gzhan gyi don gtong bar mi byed pa'o/ /sgo them lta bur zhes bya ba ni 'dra ba gang yin pa de ni de'o//g.yo ba med pa ni 'gyur ba med pa'o/ /mkhas pa 'khor ba la mi dga'/ /zhes bya ba la 'dir dper bstan pa mtsho lta bur zhes bya ba ste/ mtshe'u lta bur ro/ /ji lta bu zhe na/ rnyog pa can zhes bya ba smos te/ 'dam dang chu bal la sogs pa'i dri ma yang dag par skyes pa'o//yang na chu skam pa la ni ngang pa yang dga' ba ma yin la/ lus tsha bas gdungs pa dag kyang khrus bya ba'i phyir de la 'jug par mi byed pa de bzhin du 'khor ba la mkhas pa de yang dga' ba ma yin te/ gnod pa du mas ma rung bar byas pa'i phyir blo dang ldan pa dag ni 'khor ba la dga' ba mi skyed do//chu'i tshoms te bcu bdun pa'i rnam par 'grel pa rdzogs so// //me tog la sogs pa'i bcud thams cad ni chu las skyes shing gnas pa de bzhin du rab tu byung ba la yang slob pa'i lam la sogs pa mtha' dag skye bar 'gyur ro zhes bya ba bstan pa'i phyir 'di'i 'og tu me tog gi tshoms bkod pa yin no//yang na 'khor ba la mkhas pa mi dga' ba yin no zhes bstan pa de la 'khor ba la mi dga' ba la ni nges par thar pa 'dod pa'i mthong ba'i lam la sogs pa'i thabs bstan pa'i phyir 'di nyid bstan pa yin te/lhar bcas zhes bya ba la sogs pa smos so/ /'dod pa'i lha yi bu zhig gis bcom ldan 'das la tshigs su bcad pa dang pos zhus pa/ de la thub pa mchog gis tshigs bcad gnyis pas lan bka' stsal to/ /gang zhig lags zhes bya ba ni gang zag gang ngo //'dis sa steng las zhes bya ba ni mi'i 'gro la 'di las so/ /rgyal ba ni zil gyis gnon pa dang / rnam par pham par bya ba dang / dbang du bya ba ste/ 'di ltar 'dod pa'i lha ni nye dbang gi dbang du byas pa'o/ /lha dang lha ma yin 'thab par gyur pa de ni srid pa gsum las rgyal bar 'dod nas/bcom ldan 'das kyi spyan sngar song ste/ ci 'di bsgrub par nus sam mi nus zhes pa'o/ /gzhan dag tu ni tshor bar 'gyur/ /zhes brjod de/ shes par 'gyur zhes bya ba'i don to//gshin rje'i 'jig rten zhes bya ba ni ngan song gi gnas te/ /gang gi phyir 'di nas dpag tshad lnga brgya 'das pa na gshin rje'i rgyal po'i pho brang yod de/ der dmyal ba'i srung mas skye ba khyer bar byed do/ /las kyi nyes pa dang ji ltar ldan pa bzhin du sgrub par byed cing de yang yang sos la sogs par lhung bar 'gyur te/lha'i pho nya'i mdo 'dir dper brjod par bya'o/ /de bzhin du zhes bya ni rnam pa des gshin rje'i 'jig rten las rgyal ba zhes bya ba'i don to/ /lhar bcas zhes bya ba ni lha dang bcas pa'i gshin rje'i 'jig rten te/lha'i 'jig rten zhes bya ba'i don to/ /de la 'dis ni rab tu grags pa'i 'jig rten gsum bstan te/ lha dang mi dang gshin rje'i 'jig rten gyi bdag nyid do/ /de srid pa gsum las rgyal te/ seng ge'i stan la 'dug nas chos kyi rgyal pos chos ston par gyis shig pa ste/de bas na chos las rgyal bar 'dod pa'i tshul bstan pa'i phyir/ chos gzhi gang zhes bya ba smos te/ gang gis chos kyi rnam par gnas par 'gyur pa de ni chos kyi gzhi ste/ chos bstan pa zhes bya ba'i don to/ /de nyid bstan pa ni ston mkhas zhes bya ba yin te/legs par gsungs pa ste sdig pa mi bya ba dang / sdig pa byed pa dang lhan cig mi gnas pa dang / legs par spyod pa la 'bad cing dbang po dul bar bya ba ste/ de bas na de lta bu'i tshig ces bya ba'i don to/ /de lta bus 'khor lo bskor ba'i chos te/de lta bur gyur pa'i chos kyi gzhi gang zhig rab tu 'dod pa'i zhes bya ba sbyar bar bya'o/ /dpe ni gang ji lta bu zhe na/ /me tog lta bur zhes bya ba ste/ dper na me tog phreng rgyud mkhan rang gi las la mkhas pas skyed mos tshal las me tog blangs te/ me tog gi phreng ba rnam pa sna tshogs su legs par bkod cing gzhan dag la sbyin par byed pa de bzhin du dam pa des kyang gya nom pa'i bstan bcos las chos kyi gzhi blangs te/rjes su mthun pa'i rim pas 'brel bar byas nas/ 'khor dag la ston par byed do/ /rab tu 'dod pa zhes bya ba ni rab tu 'god par byed pa'o//'di'i lan gsungs pa/ slob pa zhes bya ba ni bslab pa gsum la slob pa'i phyir slob pa ste/ 'di ltar zhi bar 'dod pa de bas ni slob pa'o zhes mdo las gsungs so/ /lus dang ngag dul ba dang / sems dul ba de'i thabs kyi ye shes dang ldan pa'i skyes bu dam pa dul ba'i khyad par gyi don te de yang thar pa thob pa'i phyir bdag gir byed pa dang //rjes su mthun pa'i thabs so/ /de zhes bya ba ni de nyid do/ /nyon mongs pa spong ba'i lam bsgom pa med par ni srid pa gsum po mtha' dag zil gyis gnon pa'i nus pa ni su la yang skye bar mi 'gyur ro//gang gi phyir yon tan ni skyon 'jig pa yin te/ skyon rnam par spangs pas ni thams cad las rgyal ba nyid do/ /chos gzhi zhes bya ba ni yan lag bcu gnyis dang ldan pa'i rnam pa yin te/ legs par spyod pa thams cad kyi gzhi yin pa'i phyir ro//legs par ston mkhas zhes bya ba'i don dang tshig 'bru'i khyad par dang ldan pa'i phyir ro/ /gzhan dag ni 'phags pa'i bden pa bzhi la chos kyi gzhi zhes zer ro/ /gzhan dag ni byang chub kyi phyogs kyi chos sum cu rtsa bdun zhes zer ro/ /lhag ma ni gong ma bzhin no//khams gsum las 'dod chags dang bral ba'i gnyen po bstan pa'i phyir/ nags tshal las ni zhes bya ba la sogs pa smos so/ /yang na me tog ni nags tshal las skyes pa yin te/ bstan ma thag pa'i tshigs bcad dang nags 'brel pa'i phyir ro//rgyal po'i khab na la da'i grong zhig na na la da dang u pa na la da zhes bya ba'i bram ze gnyis gnas so/ /de las bram ze u pa na la da la khye'u gzugs bzang ba zhig btsas so/ /de yang mtshan ltas mngon par shes pa zhig pas de tshe thung bar mthong nas sems mi dga' bar gyur te/bu'i don du ltas bsang gi mchod sbyin la sogs pas tshangs pa mnyes par byas so/ /des de la ci 'dod mchog slongs shig ces byas pa dang / nga'i bu tshe ring bar 'dod do zhes smras so/ /des smras pa/ de ni ngas nus pa ma yin te/drang srong chen pos shes so zhes smras nas tshangs pa mi snang bar gyur to/ /de thos pas ri kha ba can na me tog can zhes bya ba'i dka' thub kyi gnas na rdzu 'phrul chen po dang ldan pa'i drang srong chen po yod pa de dag la des bstan pa bzhin du mnyes pa'i mchod sbyin brtsams so//de dag kyang 'ongs so/ /de nas de dag la bu byin te/ khyer nas dka' thub kyi gnas su song ste/ des kyang mngon par shes pa thob par gyur cing khyad par du mchod pa'i gnas su gyur to/ /ji tsam na 'khor rnams la chos ston pa gshin rjes mthong ste/zhag bdun nas 'chi bar 'gyur ro zhes nas bskul bar gyur to/ /des smras pa/ bdag ni dbang du gyur to zhes so/ /gshin rjes smras pa/ da dung khyod 'phags pa'i dbang nyid du gyur pa ni ma yin te/ sangs rgyas bcom ldan 'das de la brten par gyis shig dang /de ni da ltar yul bA rA Na sI na bzhugs te/ 'phags pa'i dbang thob pa ni de la rag las pa yin no zhes byas so/ /de nas de nyi ma'i tsha ba bskyab pa'i phyir ke sa ra zhes bya ba'i shing chen po gnyis phyung ste/ drang srong lnga brgya'i 'khor dang bcas pa nam mkha' la 'phur te song nas nam mkha' la gnas pa nyid kyis chos nyan par byed do//bcom ldan 'das kyis bka' stsal pa/ drang srong gzhon nu sngon nas kyi thong zhes bka' stsal pa dang / shing gcig bor ro/ /rgyab kyi thong zhes bka' stsal pa dang / shing gnyis pa bor ro/ /bar gyi thong zhes bka' stsal pa dang / bdag nyid 'khor dang bcas pa sa la lhags par gyur to//mdun dang rgyab kyi thong zhes bya ba de dag las brtsams te/ tshigs su bcad pa gsungs pa nas/ ji srid du rab tu byung ste/ de'i dbang du mdzad nas 'di gsungs so/ /tshigs bcad 'di'i don ni rnam pa gnyis te/re zhig sgra ji bzhin pa bshad do/ /nags tshal zhes bya ba ni shing dang ldum bu dang rtswa la sogs pa'i nags stug po'o/ /bcad kyi zhes bya ba ni phyung ba dang nyams par byas pa'o/ /shing ma yin zhes bya bas shing gcig pu 'greng ba ni ma yin no/ /ci'i phyir zhe na/nags tshal las ni 'jigs skyes phyir/ /zhes bya ba smos te/ nags tshal nyid las ni 'di ltar seng ge dang rkun ma la sogs pa'i 'jigs pa 'byung ba yin te/ shing gcig las ni ma yin no/ /nags bcad pa'i phan yon bstan pa'i phyir/ nags dang nags sbyor chod cig dang //zhes bya ba smos te/ nags dang nags kyi rtsa ba stug po 'jig par gyis shig pa'o/ /gang la brten nas nags skye bar 'gyur ba de bsrungs pas/ 'byung mi 'gyur zhes bya ba ni 'jigs pa med par 'gyur ba ste/ rgyu khyed kyis med par byas pas zhes bya ba'i don to//kye dge slong dag nga'i tshig gi rjes su 'brang bar gyis/ don dam par ni nags tshal zhes bya ba ni nyon mongs pa'i rgyun ma chad pa la bstan pa ste/ nyon mongs pa'i sgrib pa yin pa'i phyir 'di ltar nags ni sgrib pa'o/ /shing ni shin tu drag pa'i nyon mongs pa nyid do//ci'i phyir nags nyid gcad par bya ba yin zhe na/ nags tshal las ni zhes bya ba smos te/ de ni rtag tu 'jug pas gnod pa dang pha rol gnon pa'i dus med cing de ltar de la gnyen po bsgom pa'i skabs med de/ de las 'jigs par bya'o/ /gang nyon mongs pa drag po ni res 'ga' kun du 'byung yang de'i gnyen po bsgom pa'i skabs yang dag par yod cing gnon par 'gyur ba'i skabs yod de/des na 'di ni nyon mongs pa'i sgrib pa ma yin par bstan to/ /skyes pa ni 'byung ba'o/ /'jig pa ni skye ba la sogs pa'o/ / nags chod cig dang zhes bya ba ni gnyen po'i stobs kyis de spang ba'i phyir ro/ /nags sbyor zhes bya ba ni sred pa'am/ skal ba mnyam pa'i rgyu la 'jug pa bcad pa ste/ so sor brtags pa'i 'gog pa thob pas gsal ba'i phyir ro/ /mya ngan las 'da' bar 'gyur zhes bya ba ni khyed cag 'jigs pa'i rgyu dang bral bar 'gyur ba ste/nyon mongs pa dang las las skye ba med pa zhes bya ba'i don to/ /'di ltar dge slong dag ces bya ba ni khyim gyi gnas yongs su spangs pa'o/ /nyon mongs pa spangs pa'i phyir yang rab tu byung zhes bya bar 'dod do//nyon mongs pa mang po de dag la 'dis de kun du spyod par ldog pas bstan to/ /de thos pas lam bsgom pa la mngon par brtson par gyur te/ thams cad kyang dgra bcom par gyur to/ /nags sbyor ma bcad pa'i nyes dmigs bstan pa'i phyir/gal te nags sbyor zhes bya ba la sogs pa smos so/ /yul aM ga da na ud ta ra pa ra shar+ya'i nyan thos u ta ra zhes bya ba der nor dang 'bru la sogs pa gang cung zad ci yod pa de thams cad bu la byin te/ bdag ni yongs su gzung ba med pas grol bar 'gyur ro zhes bsams so//ji tsam na bu shi zhing khyim mes tshig la nye du'i tshogs mang du rnam par nyams pa las de'i ched du lhag par mya ngan byed do/ /bcom ldan 'das kyis bka' stsal pa/ ud ta ra pa ra shar+ya'i nyan thos de dag ni dbang po bsgom pa yin no zhes ston to/ bcom ldan 'das kyis bstan pa ni 'di la mig gis gzugs la mi lta ba dang / rna bas sgra mi nyan pa la sogs pa'o/ /de lta na nga'i tshig gis ni long ba yang dbang po bsgom par 'gyur la/ 'on pa yang zhes bya ba la sogs pa bcom ldan 'das kyis rgya cher gsungs so/ / btsun pa ji ltar dbang po bsgom par btags pa lags/ de dge slong dag gang gis 'dun pa'i 'dod chags spangs te/ de spangs pa nyid kyis ni khyed cag gi mig yongs su spangs pa ste/ des na 'di gsungs so/ /ji srid ces bya ba ni dus rnam par gcad pa'i don te/ dus ji srid du'o/ /nags sbyor zhes bya ba ni srid pa'i nags stug po'i rgyu sred pa'o/ /ma bcad na zhes bya ba ni ma spangs na'o/ /phra rab kyis kyang zhes bya ba ni chung ma'i rnam pa yang ste/ srid pa'i rtse mo'i yang rdo rje lta bus spang bar bya ba yin na/ gzhan lta ci smos/ mi rnams ni sems can no//skye ba ni srid pa dag tu'o/ /'dis ni srid pa'i yul nyid sred pa zhes ston pa yin no/ /yang na sa dgu dag tu ste dus de tsam gyi bar du'o/ /yid ni rab tu 'ching zhes bya ba ni gzhan gyi dbang du byas pa'i sems dang ldan pa zhes bya ba'i don to/ /sngar spangs pa'i rnam pas lhag ma ni de'i yul gyis dri ma zhes bya ba'i tshig gis so//de yis zhes bya ba ni srid pa ma bcad pa'o/ /de nyid du zhes bya ba ni skye ba dang skye ba dag tu'o/ /ji lta bu zhe na/ ma drung nu zho 'dod be'u ltar/ /zhes bya ba yin te/ dper na nu zho 'dod pa'i be+e'u ni nu zho 'thung ba'i be'u ste/ma'i drung du yid 'ching ba de bzhin du'o/ /ji ltar sred pa spang bar bya zhe na/ lag pas ston ka'i zhes bya ba la sogs pa smos so/ /skyed mos tshal zhig tu bcom ldan 'das nyan thos kyi dge 'dun dang bcas pa gshegs te/ der yang skyes bu zhig mtsho chen po de la zhugs nas pad+ma rnams rtsa ba nas 'byin par byed do//ji tsam bcom ldan 'das bla gos bzhi bltab kyi gdan la bzhugs te/ gnas brtan shA ri'i bu dang lhan cig tu gnas pa'i sa can la bka' stsal pa/ sa can sred pa ni dra ba dang yul la chags pa yin no zhes bka' stsal te/ji tsam na 'di gsungs so/ /bcad nas su zhes bya ba ni rang gi gnyen po ji lta bas phyung ba dang spangs pa ste/ zhi ba'i lam ni bskyed par gyis/ /zhes bya ba dang sbyar ro/ /'jig rten pa'i gnyen pos bkag nas lam gyis drungs 'byin par byed do/ dga' ba ni sred pa ste/bdag dang 'brel pa'i zhes bya ba ni tshig gi lhag ma'o/ /bdag la zhes bya ba ni gnas kyi rgyud la gnas pa'i sred pa spang bar ni gang gis kyang nus pa med pa'i phyir ro/ /thub pa'i dbang po ni bdag grol bar mdzad nas gzhan mtha' dag grol bar spyod pa'o/ /yang na bdag la zhes bya ba ni bdag gi sems la'o/ji ltar zhe na/ lag pas ston ka'i pad+ma ltar/ /zhes bya ba ste/ dper na 'ga' zhig pad+ma'i nags las ston gyi dus su byung ba'i pad+ma 'byin par byed pa de bzhin du sems las 'dod chags dang sred pa spang bar bya'o/ /lam nyid gnyen po yin te/de bas na de bsgom pa la gzud pa'i phyir/ zhi ba'i lam ni skyed par gyis/ /zhes bya ba smos te/ mthong ba dang bsgom pa'i lam gnyis kyis ni khams gsum gyi nyon mongs pa mtha' dag spong ba'i phyir slob pa'i lam bsgom par gyis shig ces bya ba'i don to//bskyed par gyis zhes bya ba ni chung ngu dang bar ma dang chen po'i rim pas 'phel bar gyis shig pa'o/ /ci'i phyir lam bskyed par bya zhe na/ smras pa mya ngan las 'das pa'i phyir zhes bya ba ste/ sdug bsngal las ldog pa'i phyir dang / thar pa thob par bya ba'i phyir ro//gang gis bstan pa'i lam gyis mya ngan las 'das pa'i phyir bskyed par bya zhe na/ rgyal bas gsungs pa zhes bya ba smos te/ sangs rgyas kyis gsungs pa'o/ /des bstan pa ni 'khrul pa med pa'i phyir gcig tu bsgom par bya'o zhes bstan to//gang bcom ldan 'das kyis bstan pa'i lam de la ni bdag kyang gnas pa yin la/ phyin ci ma log par bstan pa'i dngos po ni sgrub pa dang 'bras bu yin pa'i phyir/ gzhan du na 'jug pa ma yin no zhes bstan pa'i phyir smras pa/ ji ltar me tog yid 'ong ba/ /zhes bya ba la sogs pa'o/ / yang bcom ldan 'das dgon par rgyu zhing gshegs pa dang / shing ko sha ta ki dang / dngo ka'i shing gi me tog la sogs pa mdog shin tu bzang po yod la/ dri shin tu mi zhim pa dang dri nga ba gzigs so/ /gzhan dag ni mdog dang dri dang ldan pa ste/ sri shing gi me tog la sogs pa gzigs nas/de'i phyir tshigs su bcad pa gnyis po 'di gsungs so/ /ji ltar zhes bya ba ni ji lta bu'o/ /me tog yid du 'ong ba ni yid 'phrog cing mdzes la sim par byed pa'i me tog go/ /gang gis tshim par byed pa bstan pa'i phyir/ kha dog bzang po zhes bya ba smos te/ gang gi phyir mdog phun sum tshogs par bstan pa'o/ /de las blang bar mi bya ba'i rgyu bstan pa'i phyir smras pa/ dri med ces bya ba yin te dri bzang po med pa ste/ dri smad pa dang dri nga ba de gang la yod pa'i dri nga ba zhes bya ba'i don to/ /de bzhin legs par gsungs pa'i tshig /ces bya ba ni de bzhin du dngos po gsal bar byed pa'i tshig 'bras bu med par ma byed cig pa ste/de ltar phan yon med pa'i phyir de dang mthun par spyad par mi bya'o/ /legs par bshad pa la ni gang zag gi sgrub pa snying por bya ba yin no/ /ji ltar me tog yid 'ong ba/ /zhes bya ba kha dog gis ni thag ring po nas yid 'phrog par byed do//dri zhim po nyid kyis ni nye ba nas yid 'phrog par byed do/ /de bzhin legs par gsungs pa'i tshig thos nas zhes bya ba ste lhag ma dag ni shes par sla'o/ /gang 'tshe ba med pa de kho na ni legs par gsungs pa'i don sgrub pa yin no zhes bstan pa'i phyir/ji ltar bung ba me tog gi/ /zhes bya ba la sogs pa smos so/ /yang dag par rdzogs pa'i sangs rgyas log par dad sel gyi nyan thos rnyed pa dang bkur sti 'dod pa dag yod do/ /de'i phyir dang por so sor thar pa 'di bstan par gyur to/ /gzhan dag ni rgyal byed kyi tshal na ser sna can shin tu brkam pa ko shi ka zhes bya ba'i tshong dpon grong dang grong dag las kyang nor dag len par byed do/de las brtsams so zhes zer ro/ /ji ltar bung ba zhes bya ba ni/ dper na sbrang rtsi byed kyis me tog pad+ma la sogs pa'i bcud blangs pa ste/ khu ba gzhibs nas 'phur ba ltar//zhes pa dang sbyar ro/ ci de la gnod par byed pa yin nam zhe na/ kha dog dri la mi gnod par/ /zhes bya ba smos te/ kha dog dang dri ni kha dog dri ste de gnyis nyams par ma byas pa'o/ /'phur ba zhes bya ba ni nam mkha' la 'gro ba'o/ /khu ba gzhibs nas zhes bya ba ni ma ka raN+Da zhes bya ba me tog gi rdul blangs pa'o//dpe sgrub pa bya ba'i don bstan pa'i phyir/ de bzhin zhes bya ba ste de ltar ro/ /thub pa grong du rgyu zhes bya ba ni grong du rab tu byung ba bsod snyoms kyi phyir 'gro ba'o/ /dper na bung bas me tog gi bcud blangs nas 'phur gyi/kha dog dang dri ni 'jig par mi byed pa de bzhin du khyim dag tu dad pa la sogs pa skyes par byas nas bsod snyoms blang bar bya'i/ 'di la gnod pas rnam par 'jig pa dang / dad pa nyams pa ni ji ltar yang mi bya'o/ /gzhi gzhan la brten nas brjod par bya ste thub pa ni gzhan la 'tshe ba spangs par byas nas grong la sogs pa dag tu spyod pa yin gyi/drag pas ni ma yin no zhes so/ /gzhan dag ni skyon gyis nye bar spyod pa la/ nyes pa ma yin no zhes sems pa de'i dbang du mdzad nas gzhan gyi skyon la zhes bya ba la sogs pa smos so/ / sangs rgyas bcom ldan 'das gser thub kyi nyan thos dag skyes bu dam pa ma yin pa'i chos kyi rjes su 'brang bar gyur te/ gang gi phyir de dag ni bdag la stod par byed cing gzhan la brnyas par byed de/ gzhan gyi chos nges par byas nas sun 'byin par byed pas des na de'i gnyen po'i don du dang por so sor thar pa 'di bstan to//gzhan dag ni rgyal po ma skyes dgra ma rungs pa'i skye bo dag chad pa gcod pa mchog tu byed pa las brtsams so zhes zer ro/ /gzhan gyi skyon la mi brtag cing / /zhes bya ba ni gzhan dag gi spyod pa nyams pa dang / ngan par spyod pa dag la ni nges par mi brtag ste/de gzhan gyi nyes pa la lta ba ni dam pa ma yin pa'i skyes bu'i chos so/ /gzhan gyis byas dang ma byas min/ /zhes bya ba ni gzhan gyis byas pa 'di dag ni legs par ma byas so zhe'am/ yang na rigs pa dang mi rigs pa'o/ /de tshol na ni khyad du gsod pa la sogs pa byed pa'i chos dang ldan par 'gyur ba'am/grags pa ma yin pa la sogs pas yongs su spong ba'i phyir ro/ /bdag nyid la ni brtag par bya/ /zhes bya ba ni rang gi bdag nyid la ni brtag pa dang / nges par brtag pa dang btsal bar bya'o/ /ci zhig ce na/ rigs pa dang mi rigs pa ste/ legs par spyod pa dang / nyes par spyod pa'o/ /sngar bstan pa'i tshig rkang pa gnyis kyi rnam par dbye ba ni 'di yin te/ thog mar bdag nyid dul bar byas te/ gang gi phyir bdag nyid dul bar byas na ni dka' ba med par gzhan 'dul ba ni gnas yin no//bdag nyid ma dul bar gzhan 'dul ba ni go skabs med do zhes gsungs so/ /gang dag 'di ltar kha na ma tho ba med par bstan pa de dag gang du skye bar 'gyur zhe na/ mtho ba'i dpe sngon du 'gro bas bstan pa'i phyir/ /ji ltar phyag dar phung po dag /ces bya ba la sogs pa smos so//rgyal byed kyi tshal du smad pa zhes bya ba'i khyim bdag gis 'di lta bu'i dngos po dris pa las brtsams pa ste/ 'di lta ste khyim bdag mi gtsang ba'i 'dam las gtsang zhing yid du 'ong ba'i pad+ma skye bar 'gyur ro/ /de bzhin du so so'i skye bo dag las kyang de bzhin gshegs pa dang /de bzhin gshegs pa'i nyan thos zhes bya ba nas brtsams te/ ji srid du tshigs su bcad pa gnyis gsungs so/ /ji ltar zhes bya ba ni ji lta bur ro/ /phyag dar phung po dag ces bya ba ni rab tu grags pa'i rdul gyi tshogs so/ /'di las zhes bya ba ni 'jig rten 'di las so//mi gtsang ba ni gtsang ba med pa yin te/ dri nga ba'i rang bzhin gyi rdzas des smad par bya ba'i phyir ro/ /chu ni med ces bya ba ni gang 'di la chu med pa ste/ chu spangs zhes bya ba'i don to/ /der snod bkrus pa la sogs pa'i chus blugs na ni pad+ma bye ba skye bar 'gyur zhes bya ba ste/ mi gtsang ba'i phung po gang chu med pa de las pad+ma skye bar 'gyur ro//ji lta bur zhe na/ gtsang zhing dri zhim yid 'ong zhes bya ba smos te/ gtsang zhing mngon par 'dod pa'i dri 'di la yod pa ni gtsang zhing dri zhim mo/ /yid du 'ong ba'i dri yod pa'i phyir yid sim par byed pa yin te/ de'i phyir dri zhim pa dang /gtsang ba dang dbyibs phun sum tshogs pas yid du 'ong zhing mdzes pa zhes bya ba'i don to/ /de ltar na ni de bzhin no/ /dpes bsgrub par bya ba'i don bshad pa ni phyag dar phung po zhes bya ba ste rdul gyi tshogs dang 'dra ba'o/ /'di la zhes bya ba ni 'dod pa'i khams su gtogs pa'i so so'i skye bo ste/nang dang phyi rol dang bcas pa'i rdzas de las mngon par grub pa'i phyir ro/ /ji lta bur zhe na/ mdongs gyur zhes bya ba smos te/ sems med pa dang 'dra ba'i phyir te/ zag pa med pa'i ye shes kyi mig med pas mdongs pa dang 'dra ba ste/de lta bu'i so so'i skye bo'i nang nas zhes bya ba'i don to/ /shes rab kyis ni gsal ba 'byung / /zhes bya ba ni de lta mod kyi dngos po'i don thams cad kyi yul la shes pa ste/ zag pa med pa'i shes rab kyis lha dang bcas pa'i 'jig rten las 'das shing zil gyis gnon te/rab tu gsal bar 'byung ba'o/ /rdzogs sangs rgyas kyi nyan thos zhes bya ba ni yang dag par rdzogs pa'i sangs rgyas dang de'i bka'i rjes su 'brang ba'i 'dod chags dang bral ba gzhan dag ste/ go rims bzhin du thams cad mkhyen pa dang / srid pa'i rtse mo las 'dod chags dang bral ba'i phyir ro//ji ltar phyag dar gyi phung po de lta bu'i ni 'dod pa na spyod pa'i so so'i skye bo'o/ ji ltar chu med pa de lta bur ni sred pa'o/ /ji ltar pad+ma de lta bur ni sangs rgyas la sogs pa'i bdag nyid do/ /gtsang ba dang dri zhim pas che bar grags pa nyid do//srid pa gsum la grags pas khyab pa yin no/ /yid du 'ong bas ni mtshan dang dpe byad phun sum tshogs pa'o/ /shes rab kyis ni zhes bya ba la/ bsod nams dang ye shes kyi tshogs 'bras bu dang bcas pa'i khyad par thams cad sgrub pa ni shes rab la rag lus pa'i phyir ro//'di ltar yang shes rab kyis legs par spyod pa la goms pa'i mthus ni byang chub la sogs pa 'byung ba yin te/ des na de nyid la gzud pa'i phyir/ ji ltar me tog phung po las/ /zhes bya ba la sogs pa smos so/ /rgyal po gsal rgyal skyed mos tshal gyi sar byung ste/rtse ba dang bde ba nyams su myong ba byas nas 'di ni bsod nams kyi 'bras bu yin te/ gang bdag gis bcom ldan 'das nyan thos kyi dge 'dun dang bcas pa 'di nyid du spyan drangs la btsun mo'i 'khor dang bcas pa 'di las bshos gsol bar bya'o zhes rgya cher te/kye skyes bu khyod song la bcom ldan 'das skyed mos tshal 'di nyid du bshos la spyan drongs shig ces bsgo'o/ /ji tsam na nyi ma gnyis pa la bkur sti chen pos bcom ldan 'das la mchod de/ me tog gi phung po chen po byas nas gang gi phyir btsun mo'i 'khor gyis me tog gi phreng ba rnam pa sna tshogs bcom ldan 'das kyi ched du sbyar cing bkod pa na/de las brtsams te 'di gsungs so/ /gzhan dag ni ri dgas 'dzin gyi ma'i khang pa na dge bsnyen ma sa ga las brtsams so zhes zer ro/ /ji ltar zhes bya ba ni ji lta bur ro//me tog phung po las zhes bya ba ni me tog dri zhim po mang po'o/ /me tog phreng rgyud mang byed ltar/ /zhes bya ba ni me tog gi phreng ba sbrel zhing brgyus pa ste/ rna rgyan la sogs pa'i rnam pa'o/ /de bzhin ni de ltar ro/ /mir ni skyes pa yin zhes bya ba ni sangs rgyas 'byung ba'i da ltar gyi skye ba la'o//skye ba rnams ni 'chi ba'i chos can yin pas mi'o/ /bya zhes bya ba ni bya ba'o/ /dge ba ni shes pa dang de'i 'bras bu ste/ gzhan dag gi legs par spyod pa'o/ /phal cher zhes bya ba ni rnam pa du ma ste/ mngon par 'dod pa'i 'bras bu thams cad 'byung ba ni de dang 'brel pa'i phyir ro//blo dang ldan pa'i tshul la goms pa'i phan yon ni phra rgyas spangs pa yin pa'am/ nyon mongs pa spangs pa nyid kyis ni kha na ma tho ba med pa'i legs par spyod pa thams cad 'byung ba yin no zhes bstan pa'i phyir/ ji ltar dbyar ka zhes bya ba la sogs pa smos so//dbyar gyi dus su shing ba ku la me tog rgyas par gzigs nas dgon pa pa zhes bya ba'i dge slong 'khor dang bcas pa las brtsams nas 'di gsungs so/ /ji ltar dbyar ka me tog ces bya ba ni ji ltar dbyar gyi dus su nye bar gnas pa na ba ku la zhes bya ba'i shing gi me tog gi rigs rnam par 'brul ba dang gtong ba yin te/'di ltar de ni dbyar gyi dus su me tog 'byung ste/ shin tu 'jam pa yin pa'i phyir rlung dang char la sogs pas reg par gyur na/ de'i me tog phal cher sa la lhung bar 'gyur ro/ 'dod chags zhe sdang de bzhin gti mug ces bya ba ni ji ltar 'dod chags dang zhe sdang spang bar bya ba de bzhin du spang bar bya ste/de bzhin du gcig tu gti mug go zhes bstan pa'i phyir de bzhin nyid kyi sgra brjod do/ de bzhin du 'dod chags la sogs pa'i 'ching ba rnam gsum yang rnam par phrul ba ltar yongs su dor bar gyis shig pa ste/dgag pa dang rtsa ba nas dbyung ba gnyis kyis rgyud las bsal ba'o/ /bya ba 'di ni khyim yongs su spangs pa yin no zhes bstan pa'i phyir/ dge slong zhes bya ba bod pa ste/ dus de'i gdul bya rna gtod pa la gzud pa'o/ /des ni de dag spong bar nus pa'i phyir ro//nyon mongs spong bar byed pa de nyid ming ji skad du bya zhe na/ dge slong zhes bya ba yin te/ nyon mongs pa bcom pa dang rgal ba zhes bya ba'i don to/ /'dod chags la sogs pa spong ba na yul la sogs pa la g.yeng ba med cing bgegs med na/ legs par spyod pa 'phel ba yin gyi/ gzhan du ma yin no zhes bstan pa'i phyir smras pa/ mi yi yid la rnam chags dag /ces bya ba la sogs pa'o/ /ma hen dra zhes bya ba'i rgyal po yul la mngon par chags pa dpyid kyi dus su gang gA'i 'gram gyi skyed mos tshal du rtse ba'i phyir btsun mo'i 'khor dang bcas te byung ngo //nyi ma cung zad cig gi bar du 'dug ste/ mtshan mo bag phab ste rab tu nyal ba las/ btsun mo'i 'khor dang bcas pa gang gA'i 'bab chus khyer ro/ /de bas na gnas skabs 'di la tshigs su bcad pa 'di gsungs so//me tog bzhin du zhes bya ba ni dper na me tog phreng rgyud mkhan mkhas pas me tog gi kun dga' ra bar zhugs te/ me tog rab tu bstsags pa 'am/ yang na me tog gi shing thams cad las de yid kyis bskul nas de dag bltas te sogs par byed do/ de bstsags shing nye bar bstsags pa ji lta ba bzhin du yid la rnam chags dag ces bya ba ste/ gzugs la sogs pa'i yul rnam pa sna tshogs la sems kun tu chags pa'o/ /mi zhes bya ba ni 'dod chags can gyi sems can te/ 'chi bdag gis ni blangs nas 'gro//zhes bya ba dang sbyar ro/ /'dir dpe bstan pa'i phyir/ /nyal grong chu bos bdas pa bzhin/ /zhes bya ba smos te/ dper na chu mang po'i chu bo'i tshogs kyis bag phab ste nyal ba'i grong can dang grong bdas nas khyer ba bzhin du bag med pa bya ba ma byas [(]ba [,]pa [)]nyid du g.yengs nas 'chi bdag gis blangs te/de'i 'tsho ba phrogs nas 'gro ba'i tha mar phyin par byed de/ 'chi bdag ni gnas skabs thams cad du khyad par med par 'jug pa yin no zhes bya ba'i tshig gis so/ /yid la bsam pa rdzogs pa thob par gyur nas mi rnams 'chi bdag gis khyer ram/gzhan du 'on te ma yin zhes rtog pa la/ mi yi yid la rnam chags dag /ces bya ba la sogs pa smos so/ /gzhan dag ni shin tu bsngags pa'i na tshod dang po la bud med cig shi ste/ de'i dbang du byas pa yin no zhes zer ro/ /ma ngoms shing zhes bya ba ni 'dod pa yongs su ma rdzogs pa nyid du'o//ngoms pa'i sgra ni drug pa 'brel ba yin no zhes bya ba bstan pa'i phyir/ 'dod pa rnams kyis zhes bya ba smos te/ gzugs la sogs pa'i yul rnams kyi 'dod pas skom pa zhi bar ma gyur pa'i sems can no/ /'chi bdag ni mthar byed pa'o//dbang du byed ces bya ba ni rag lus par byed pa ste/ rang gi drung du khyer bar byed ces bya ba'i don to/ thob pa'i nye bar longs spyod pa cung zad tsam gyis kyang ma ngoms shing 'chi ba yin no/ /'dod pa'i longs spyod la re ba lta smos kyang ci dgos te/ de'i don du brtson par byed pa des kyang mi 'gyur ro zhes bstan par bya ba'i phyir/longs spyod skye bar mi 'gyur zhing / /zhes bya ba smos te/ yul dag la re ba ni 'dod pa'i yo byad ma skyes pa dang / ma byung ba dag la lhag par zhen par ston to/ /bya ba mthar ni ma phyin par/ /zhes bya ba ni yid la re ba'i 'bras bu mtha' dag ma rdzogs par ro/gang gi phyir 'chi bdag ni ldog pa med par 'jug pa yin te/ des na de las 'di ltar 'da' bar bya ba la 'bad par bya'o zhes bstan pa'i phyir/ lus 'di bum pa 'dra bar rtogs byas shing / /zhes bya ba la sogs pa smos so/ /lus 'di ni bum pa lta bur khong stong pa dang /smig rgyu dang 'dra bar snying po med pa dang / dbu ba'i gong bu dang 'dra bar yun ring por mi gnas pa yin no zhes bstan nas tshigs su bcad pa bzhi gsungs so/ bum pa ni sa'i snod kyi rnam pa'o/ /'dra ba ni lus dang 'dra ba'o/ /lus kyang de dang 'dra bar rtogs byas shing //zhes bya ba ni 'jig rten pa'i shes pas shes pa ste/ 'jig rten las 'das pa ni 'di lta bu med pa'i phyir ro/ /dper na chu la sogs pa'i rdzas kyi snod ni bum pa yin pa bzhin du mi gtsang ba'i rdzas sum cu rtsa drug gi snod kyang lus yin no zhes ston to/ /de bzhin chos rnams smig rgyu 'drar shes nas//zhes bya ba la smig rgyu ni ri dgas skom pa la sogs pa'o/ /chos kyi rang bzhin ni lus 'di ste/ yun shin tu thung bar gnas pa'i phyir re zhig pa dang / slu ba yin pa'i phyir ro/ yang na bum pa lta bu'i dpes ni mthar 'jig par bstan pa ste/ 'dis ni myur du 'jig pa'o//mi rtag pa yang rnam pa gnyis te/ rgyun gyis mi rtag pa dang / skad cig gis mi rtag pa ste/ 'dod pa na spyod pa'i lus nye bar bstan pa'i phyir ro/ /gnyis su shes nas zhes bya ba ni rtogs pa'o/ /lam gyi tshogs kyi dbang las skyes pa'i lam gyi mtshon gyis bcad pa ni spangs pa'o//'di na zhes bya ba ni 'gro ba 'dir ro/ /ci zhig gcod pa yin zhe na/ /bdud kyi me tog mchog ces bya ba smos te/ nyon mongs pa'i bdud kyi yo byad du gyur pa ni me tog sar pa lta bu ste/ byis pa'i gzugs la sogs pa ste/ de la dmigs nas nyon mongs pa spong ba'i phyir ro/yang na mthong bas spang bar bya ba'i kun du sbyor ba ni dang po spang bar bya ba yin pa'i phyir me tog mchog go/ /de spangs pas ni nges par ring por mi thogs par mya ngan las 'das pa 'thob par 'gyur te/ de nyid bstan pa'i phyir/ 'chi bdag rgyal pos bltar yang med par 'gro//zhes bya ba ste/ 'chi bdag gi ming can de'i dbang phyug gis bltar mi snang ba ste/ phung po lhag ma med pa'i mya ngan las 'das pa nyid du 'gro ba'o/ /dbu ba 'dra bar zhes bya ba ni blo sngon du byas pa'i las kyis byas pa ni lus 'di yin te/ bum pa'i dpes bsgrubs nas 'dir yang rkyen las skyes pa nyid do zhes bstan to/ /rlung dang 'dres pa'i rlung gi yan lag can ni dbu ba ste/ ji ltar dbu ba de ltar lus kyang rlung gis gnas pa yin te/ de med na lus kyang 'jig par 'gyur ro/ /dbu ba'i gong bu dang 'dra bar snying po med pa'i phyir brtag mi bzod pa nyid do//lus 'ba' zhig de lta bu yin par ma zad de/ phung po lnga yang bstan pa'i phyir/ dbu ba 'dra bar 'jig rten zhes bya ba ste/ nye bar len pa'i phung po lnga ni 'jig rten te/ sdug bsngal kun 'byung 'jig rten dang / /lta gnas srid pa'ang de dag yin//zhes 'byung ba'i phyir ro/ de ltar dbu ba dang 'dra ba'i phyir lus dang 'jig rten gnyis bzung bas 'jug pa gnyis bstan pa yin te/ de'i phyir phung po'i phyogs gcig yongs su brtag pa'i tshul gyis ni 'phags pa'i lam la mi gtsang ba la sogs pas 'jug pa yin no//'jig rten ni phung po thams cad yongs su brtags pas 'jug pa yin no/ /gang gi phyir lus dang 'jig rten gnyis ka snying po med pas des na de nyid bstan pa'i phyir smras pa/ srid pa u dum bA ra zhes bya ba la sogs pa'o/ /bcom ldan 'das mtsho chen po ma dros pa na pad+ma'i gdan la bzhugs te/de dang nye ba na u dum bA ra'i nags la gzigs nas dge slong rnams la bka' stsal pa/ 'di lta ste u dum bA ra'i me tog ni rnyed par dka' ste/ de bzhin du 'khor ba dag la snying po med par mthong ba de ni skye ba dang rga ba las grol bar 'gyur ro zhes pa la sogs pa ste/tshigs su bcad pa 'di gsungs so/ gang snying po med pa zhes bya ba la gang zag mkhas pa ste/ des kyang rtogs pa ma yin te/ gang du zhe na srid pa la snying po'o/ /'gro ba rnams ni 'jig pa yin te/ mngon par 'dod cing nye bar len pa'i dngos po btsal bar gyur cing mi dmigs pa'i phyir ro//ji ltar long bas ci yang mi mthong ba lta bu yin nam zhe na smras pa/ u dum bA ra'i me tog ltar sems pa/ /zhes bya ba ste/ dper na u dum bA ra'i me tog ltar ni sangs rgyas dang / 'khor los sgyur ba byung ba ma gtogs par nyon mongs pa chen pos btsal bar gyur kyang me tog de mi rnyed pa bzhin du rnam par bsams shing btsal bar gyur kyang rtogs par mi 'gyur ro zhes sbyar bar bya'o//dge slong de ni spong ste zhes bya ba ni g.yeng ba la sogs pa spangs pa'i rab tu byung ba de nyid kyis 'khor ba mtha' dag la snying po med par mthong bar byas nas lam gyi tshogs la 'jug pas yongs su spong ba yin no//gang yin zhe na/ pha rol min pa'i pha rol po/ /zhes bya ba tshu rol gyi 'gram ste/ nye bar len pa'i phung po lnga zhes bya ba'i don to/ /lam zhes bya bas bskang bar bya ste/gang gi phyir lam med par srid pa spong ba'i thabs med do/ /'dir dpe bstan pa'i phyir/ sbrul rgas lpags rnying brje ba bzhin/ /zhes bya bas bstan te/ dper na sbrul ni dpyid kyi dus su pags pa rnying par gyur cing bu ga du ma skye ba dang yun ring por nye bar longs spyod pas snying po med pa'i phyir pags pa yongs su 'dor bar byed pa de bzhin du rnal 'byor pa rnam par 'gyur ba la sogs pa'i gnod pas gtses pa'i phyir dang /pha rol ma yin pa'i pha rol po thog ma med pas rnying zhing rgas pa'i phyir 'dor ba yin no//'khor bar snying po med par yongs su brtag pa sngon du btang nas 'jig rten thams cad la mngon par mi dga' ba'i 'du shes skyes na des ni nyon mongs pa thams cad spong bar 'gyur ro zhes bstan pa'i phyir smras pa/ chu skyes rtsa ba'i zhes bya ba la sogs pa smos so/ gan da ka zhes bya ba'i kun dga' rab pa 'dam du zhugs nas myur du pad+ma dag 'byin par byed pa gzigs nas bcom ldan 'das kyis dus de'i gdul bya rnams kyi dbang du mdzad de tshigs su bcad pa drug gsungs so//gang zhes bya ba ni dge slong gi bye brag go/ /'dod chags ma lus gcod byed ces bya ba ni sred pa yang dag par 'byin par byed pa yin te/khams gsum gyi rnam pa bco lnga'o/ ji ltar zhe na/ rtsa ba'i me tog lta'i zhes bya ba pad+ma'i rtsa ba las byung ba ni pad+ma ste/ dper na me tog phreng rgyud mkhan gyis phyung ba'o/ /thang la yang 'di ltar 'byung ngam zhe na/chu skyes zhes bya ba smos te/ chu las skyes pa yin pas chu skyes te/ de ni thang las skyes pa las khyad par du byed do/ /chu gnas zhes bya ba ni pad+ma'i mtsho la 'jug pa ste/ gnas skabs kyis grub pa yin no/ /dper na gang zhig pad+ma'i nags su zhugs te yid du 'ong zhing mngon par 'dod pa'i pad+ma 'don par byed pa de bzhin du/'phags pa'i lam gyis rang gi rgyud la zhugs te rmongs pa dang nye ba'i nyon mongs pa la mngon par 'dod pa bzhin du byed cing 'dod chags la sogs pa dang / de'i thob pa bcad pa dang / rtsa nas 'don pa yin te/de nyid kyis 'khor ba drungs 'byin cing srid pa thams cad spong ba yin gyi/ gzhan gyis ni ma yin no/ /zhe sdang ni gzhan la gnod sems kyi rgyu dang khong khro ba ste/ stag ces bya ba'i sgras bstan pa'i phyir ro/ /rnam pa lnga po mtha' dag ni sdug bsngal la sogs pa mthong ba dang bsgom pas spang bar bya ba yin pa'i phyir dang /'dod pa na spyod pa yin pa'i phyir ro/ /lhag ma ni rtogs bar sla'o/ me tog gi tshoms te bco brgyad pa'i rnam par 'grel pa rdzogs sto// //pad+ma'i nags nas pad+ma bzhin du yang gang dag gis 'dod chags la sogs pa ma lus pa de dag spong bar nus she na/smras pa/ dper na gang zhig gis pad+ma'i nags su zhugs pa ste/ yid du 'ong zhing mngon par 'dod pa'i pad+ma 'byin par byed pa de bzhin du 'phags pa'i lam gyis rgyud la zhugs te rmongs pa dang / nye ba'i nyon mongs pa la mngon par 'dod pa bzhin du byed cing 'dod chags la sogs pa de'i thob pa bcad de rtsa nas 'byin par byed pa ni de nyid kyis 'khor ba'i rtsa ba mtha' dag drungs nas 'byin par byed kyi/gzhan gyis ni ma yin no/ /gang dag 'khor bas skyo ba dang / gang yang dad pa la sogs pa'i yon tan gyis yid dag par byas pa ni rta bzang po bzhin du bzang ba'i rang bzhin can dul ba'i bdag nyid du 'di nyid kyis bstan pa'i phyir de'i 'og tu rta'i tshoms las brtsams nas rta bzang zhes bya ba la sogs pa smos so//yang na sems kyi yo byad ni rnam pa gnyis te/ sems can ma yin pa dang sems can no/ /de la sems can ma yin pa ni me tog la sogs pa'o/ /cig shos ni rta la sogs pa'o/ /me tog lta bur rjes su chags pa med pa'i sde tshoms bstan nas/ de'i 'og tu rta dang 'dra bar chags pa med pa'i sde tshoms dgod pa yin pa'i phyir/rta bzang zhes bya ba la sogs pa smos so/ /yul shos na zhes bya ba'i pha rol gyi 'gram na dge slong dag rtsod pa byung nas de nyid na gnas so/ /der yang gang po la sogs pa'i bdag nyid chen po dag ni bdag nyid rtsod par mi byed la/ gzhan dag kyang de las zlog par byed do//skabs de dge slong rnams kyis bcom ldan 'das la gsol to/ /de'i tshe rgyal po gsal rgyal gyis rta 'dul bar byed pa rta'i mchog la zhon te/ phyogs der 'ongs pa dang / bcom ldan 'das kyis de nyid kyi dpes tshigs su bcad pa gnyis bka' stsal to//bzang ba ni bya ba shes la rigs kyis legs par dul ba yin gyi/ rta phyi lang can ngan pa ni dul bar 'gyur ba'am/ bzang po'i ming 'thob par mi 'gyur ro/ /zhag gcig gis dul ba'i gnas su 'gyur ba yin no zhes rta rin po che las bshad de/[ (]mgyos [,]mgyogs [)]par 'gro ba'i phyir rta'o/ lcag gis gzhus pa na zhes bya ba ni gzugs pa'i shing la sogs pas bsnun pa'o/ /shugs drag ces bya ba ni brtun pa yang dag par skye ba dang spro ba yang dag par skye ba ste/ me tog kha 'bus shing 'phros pa'i shing bzhin no/ /bzang ba'i phyir lcag la sogs pas bsdigs pa tsam gyis cir 'gyur zhe na/skrag cing zhes bya ba ste skyo ba yang dag par skye zhing bsngags te/ yang bag med pas lcag gis gzhus pa thob par mi bya'o zhes rna ba gnyis 'degs par byed do/ /dpe bstan nas des bsgrub par bya ba bstan pa'i phyir/dad dang zhes bya ba smos te/ dad pa'i dbang po dang ldan pa'o/ /ji bzhin du zhes bya ba de bzhin du 'dis brtson 'grus dang ldan par ston te/ de'i phyir dad pa dam pa rnams kyis bstan dag gi lcag gis bskul te sdig pa las 'jigs pas dge ba'i bya ba dag la myur du 'jug par 'gyur ro//tshul khrims ting 'dzin ldan pa dang / /zhes bya ba ni dam pa rnams kyi spyod pa dang zhi gnas gnyis dang ldan pa'o/ /chos rnams rnam par gtan la 'bebs ldan zhing / /zhes bya ba ni rigs pas shes par bya ba'i de bzhin nyid rtogs pas so/ de zhes bya ba ni de lta bu'i sems can no//bzod pa dang 'grogs na bde ba gnyis kyis mnyam par gzhag cing ldan pa dang / dbang po dul ba gang yin pa'i bzod pa dang 'grogs na bde ba ni de nyid do/ /bzod pa ni gzhan gyis gnod pa byas pa la bzod pa la sogs pa'o/ /'grogs na bde ba ni des pa ste/gzhan dang mi mthun pa chen po yod kyang bdag dang gzhan la gnod pa mi byed pa zhes bya ba'i don to/ /yang na gzhan la gnod pa byed pa las ldog pa dang / gzhan mngon par dga' ba bskyed pa'o/ /srid pa ma lus spong zhes bya ba ni khams gsum po spong zhing yongs su 'dor ba ste/de'i rtsa ba nyon mongs pa drungs nas 'byin pa'i tshul gyis so/ /'di na zhes bya ba ni mthong ba'i chos 'di nyid dam yang na sangs rgyas kyi bstan pa 'di la'o/ /skyob pa ni chos kyi dbang phyug bcom ldan 'das nyag gcig ni chos rnams la skyob pa yin no zhes bye brag tu smra ba'i tshig gis so/yang na phyin ci ma log par ston cing gzhan la phan 'dogs pa yin pas skyob pa ste/ phung po lhag ma dang bcas par bzhugs shing gzhan gyi don mdzad pa zhes bya ba'i don to/ /srid pa ma lus spong zhes bya bas ni phung po lhag ma med pa'i mya ngan las 'das par zhugs pa ste/sdug bsngal gyi lhag ma spong bar 'dod pa rnams kyi thabs su bstan no/ /rig dang rkang par ldan zhing zhes bya ba la/ rig pa ni sngon gyi gnas shes pa la sogs pa gsum mo/ /rkang par ldan pa ni tshul khrims so/ /de ni so sor thar pa'i sdom pa la sogs pa de yon tan thams cad kyi gzhi yin pa'i phyir ro//ldan pa ni rig pa dang rkang pa ma nyams pa gang yin pa'o/ /dran ldan pa'i zhes bya ba ni lus la sogs pa'i dran pa mngon du byas pa ste/ de'i dbang gis rig pa dang rkang par ldan pa'o/ des ni zag pa med pa la dmigs pas 'khor ba spong bar byed de/sdug bsngal ma lus pa ni 'dus byas thams cad ces bya ba'i don to/ /dbang po dul ba sngon du 'gro bas ni phra rgyas thams cad spong ba yin la/ de'i sngon du 'gro ba'i 'jig rten dang 'jig rten las 'das pa'i phan yon bstan pa'i phyir/ 'dul sbyong byed pa'i zhes bya ba la sogs pa smos so//mnyan yod du dgra bcom pa zhig bsod snyoms kyi phyir zhugs par gyur to/ /bram ze ma dad pa zhig kyang grong du chas pa las/ de mthong nas 'khrugs te khu tshur gyis de la bsnun to/ de 'dod chags dang bral ba'i phyir khro ba'i sems ni ma skyes so/ ji tsam na de dad nas dad pa de'i dbang du mdzad de 'di gsungs so/ /gang zhig ni bdag nyid chen po'o/ /dbang po ni mig la sogs pa'o/ /legs par sdom pa ni mi snyoms pa spangs pas legs par zhugs pa ste dul ba zhes bya ba'i don to/ /'dul sbyong byed pas legs btul rta lta bur//zhes bya ba ni ji ltar 'dul sbyong mkhas pas byas pa'i rgyus ji ltar dul ba de bzhin du khong khro ba dang rjes su chags pa spangs pas dbang po dul bar 'gyur gyi gzhan du ni ma yin no/ /'di gnyi ga brjod pa'i phyir/ khro ba spong ba zag med dang / /zhes bya ba smos te/khong khro ba thams cad spangs pa dang / rjes su chags pa la sogs pa'i phra rgyas thams cad spangs pa ste/ mnyam par ma bzhag pa dang mnyam par bzhag pa'i khams yin pa'i phyir ro/ /de nyid ni lha dang bcas pa'i 'jig rten gyis mchod pa yin no zhes bstan pa'i phyir/ lha yi bar du zhes bya ba smos te/ gang yang bde ba la longs spyod pas blo g.yengs pa'i lha des kyang mchod pa yin na/ blo gsal bar gnas pa'i mi rnams kyis lta smos kyang ci dgos zhes bya ba'i don to/ /de rnams kyis zhes bya ba ni de ltar byas pa ste/ dbang po dul ba la'o/mi zhes bya ba ni nam zhig bdag gis 'di mthong zhing mchod par 'gyur zhes bya ba dang / nam zhig bdag gis 'di ltar thob par 'gyur zhes mngon par 'dod pa skye bar 'gyur ro/ de ji lta bu zhe na/ thub pa zhes bya ba smos pa la 'dir skyob pa zhes zer te/ chos bstan pa la sogs pa gzhan la phan pa 'jug pa'i yid dang ldan pa ste/dbang po nye bar ma dul bas ni gzhan la phan par byed par mi nus te/ gang gi phyir bdag ma dul bar gzhan gdul bar byed pa ni gnas ma yin no zhes bya ba mdo las gsungs so/ /dbang po dul ba na ni bag yod pa dang /brtson 'grus dang shes pa dang ldan par 'gyur ro zhes bstan pa'i phyir smras pa/ 'di lta ste rta bzang po dang rta rgod stobs chung ba gnyis 'brog dgon pa chen por zhugs na des stobs chung ba bor te myur du 'brog dgon pa de las rgal bar byed pa de bzhin du bag yod pas bag med pa 'di nyid du bor nas 'khor ba las rgal bar byed do zhes pa nas des na tshigs su bcad pa 'di gsungs so//bag yod pa ni dge ba'i bya ba dag la 'bad pa dang ldan pa'i phyir ro/ /bag med pa zhes bya ba ni sems can bag med pa dag yod na mkhas pa de las 'das par 'gro ba yin no//gnyid log ces bya ba ni la lo dang gnyid kyi dbang du song ba'i sems can te/ brtson pa mi byed pa'o/ /mi nyal mang po zhes bya ba ni brtson 'grus dang ldan pa ste/ rnam pa du mas mi nyal zhing rtul phod pa ni mi nyal mang po ste/ legs par spyod pa'i rtsom pa las brtson 'grus zhes mtshon pa yin no//dge ba mi rtsom pa dag rnam par gcad pa ste/ bden pa yin yang mi mthun pa'i rkyen yin no/ de lta bas na bag yod pa dang brtson 'grus ni sna tshogs pa nyid du brjod do/ /'dir dper brjod pa'i phyir rta bzang zhes bya ba smos te/bzang ba ni rigs bzang ba gang yin pa de nyid de/ rigs mtho ba'i rta zhon pas so/ /rta rgod ni nyam chung zhing stobs med pa'i rta ste/ de ni rta ngan pa zhon pa'o/ /spangs pa ni dgon par spangs pa ste/ dper na rta bzang pos rta rgod stobs dang mi ldan pa dgon pa'i nang du spangs nas/bde bar mngon par 'dod pa'i gnas su 'gro bar byed pa de bzhin du shes rab dang bag yod pa dang brtson 'grus kyi theg pa la zhon nas/ bag yod pa la sogs pas 'khor ba spangs te mya ngan las 'das pa thob par byed pa'o/ 'gro ba ni zhugs pa'o/ shin tu mkhas pa zhes bya ba ni yongs su rtogs par gyur pa'o/ /de'i phyir thos pa mnyan yod na ce spyang zugs pa'i sgra zhig gsan te/ 'di ni sngon nga nyid kyi grogs por gyur pa ste/ sangs rgyas nyid kyis 'jigs pa yin la/ nga ni bag yod pas sangs rgyas su gyur te/ 'di ni da dung yang log par ltung ba yin no zhes bya ba lta bu'o//bag yod pa dang brtson 'grus dang dbang po dul ba la sogs pa gcig tu ma zad de/ ngo tsha yang sgrub pa yin no zhes bstan pa'i phyir/ rta bzang zhes bya ba la sogs pa smos so/ /rgyal po gsal rgyal gyis legs spyod ces bya ba'i rta 'dul par byed pa de bcom ldan 'das kyi spyan sngar phyin te/btsun pa ji lta bus sdig pa sel bar 'gyur zhes zhus pa dang / des na gsungs te/ gang zhig ngo tsha sten byed mi/ /mi yi nang du skyes gyur te/ /gang dag sdig pa sel ba ni/ /rta bzang lcag gis gzhus pa bzhin//zhes so/ /gzhan dag ni lha zhig gis zhus pa yin zhes zer ro/ /kha cig ni gnas brtan po ti ka zhes bya ba las brtsams so zhes zer ro/ /gang zhig ngo tsha shes bsten cing / /zhes bya ba la/ bsten pa ni goms par byed pa de'o/ /ngo tsha shes pa ni 'dzem pa dang ldan pa ste/ngo tsha can zhes bya ba'i don to/ /gang zhig ces bya ba ni mi gang zhig ngo tsha dang ldan pa de nyid sdig pa sel bar 'gyur te/ 'dis ni tshul khrims kyi phung po bstan to/ /ngo tsha dang ldan pa nyid las ni tshul khrims dang ldan par 'gyur te/ de skad du 'di na gcig tu ngo tsha ba med pa ni sdig pa rnam pa sna tshogs kyi las skye bar 'gyur ro zhes gsungs pa'i phyir ro//shes rab legs par mnyam gzhag pa/ /zhes bya ba ni shes rab dang ting nge 'dzin gyi phung po ste/ gsum po 'dis ni 'phags pa'i lam bstan te/ 'di ni phung po gsum gyi bdag nyid yin pa'i phyir ro//de bsgoms pas phan pa ma yin pa'i dbang po dul bar 'gyur na'o/ /sel bar byed pa ni spong bar byed pa ste/ mi des sdig pa'am ngan pa spyod pa'o/ /rta bzang la ni lcag bzhin du/ /zhes bya ba ni dper na rta dul ba ni rta de lcag gis gzhu mi dgos pa de bzhin du'o//ni zhes bya ba ni nyid de rta bzang po nyid yin gyi/ rta ngan pa ni ma yin no zhes so/ /dul ba'i phan yon bstan pa'i phyir/ dul ba 'dun sar zhes bya ba la sogs pa smos so/ /rgyal po gtum po rab snang gi dbang du mdzad pa ste/ 'di lta ste/ gang rgyal po chen po ni dul zhing cang shes pa'i rta la lhag par zhon zhing g.yul du 'gro ba yin gyi/rta ngan pa la ni ma yin no zhes pa nas 'di gsungs so/ /dul ba ni dul zhing mi srun pa spangs pa nyid do/ /'dun sa ni rtas rtse zhing tshogs pa'i sa'o/ /yang na 'dun sa ni g.yul bkye ba'i sa'o/ /'gro byed cing zhes bya ba ni 'jug par byed pa'o//dul la rgyal po lhag par zhon/ /zhes bya ba ni/ yang dag par na phan zhing dul ba'i rta la na/ rgyal po dogs pa med par lhag par zhon pa/ ji lta ba de bzhin du/ dul ba mi yi nang na mchog /ces bya ba smos te/ mi thams cad du yongs su brtags pa'i nang na ni dul ba nyid mi rnams kyi mchog yin te/bsngags pa'i gzhi yin pa'i phyir ro/ /de nyid ni tshig gi phra rgyas kyis 'thab mo'i sar spangs nas 'gro ba la dam pa rnams dmigs shing sten par byed pa ni dul ba'o/ /ji ltar de dang de'i mtshan nyid shes par bya zhe na/ gang zhig tshig ngan bzod byed pa//zhes bya ba smos te/ tshig ngan ni brjod par bya ba las bzlog pa ste/ brdzun dang tshig rtsub po la sogs pa gzhan las thos kyang bzod par byed cing mi 'gyur ba de ni dul ba'o/ /yang na tshig ngan pa ni lhag par bstod pa'am smad pa ste/ de smras pas ni rjes su chags pa dang zhe sdang skyed pa'i don to//'dir tshig ni mtshon pa tsam du zad de/ brdig pa la sogs pa yang bzod pa'o/ /'di ltar 'dir tshig nyi tshe smos pa yang thams cad du phal cher tshig 'byung ba'i phyir ro/ /gang zhig bdag nyid dul ba ni thams cad 'dul ba las mchog yin no zhes bstan pa'i phyir/glang po'i nang na zhes bya ba la sogs pa smos so/ /dur khrod bsil ba'i tshal na shro na ko ni zhes bya ba'i mi nyi shu tsam zhig bdag nyid dul ba'i gnas la rjes su brtson par ldan zhing gnas par gyur to/ /bcom ldan 'das dge slong rab tu mang po dang /thabs cig tu bzhugs pas lha'i spyan gyis de gzigs te/ ji tsam na der gshegs so/ /de'i tshe phyogs de na rgyal po'i dre'u dang glang po che 'dul bar byed de/ de dper mdzad nas tshigs su bcad pa bcu bzhi gsungs so/ gang yin pa zhes bya ba ni gang yang rung ba la ste/'jig rten 'di la'o/ /dre'u 'dul bar byed pa ni dre'u slob par byed pa ste/ bzhon pa la sogs pa rung bar byed pa'i phyir cang shes rta dang ni zhes bya ba ni yon tan dang ldan zhing rigs mtho ba mchog tu bsngags pa'o/ /sin du'i zhes bya ba ni yul sin du nas skyes pa'am/yul bzang po las skyes pa'i rta zhes bya ba'i don to/ /glang po'i nang na glang chen dang / /zhes bya ba ni mtshan dang ldan pa'i glang po'i nang na glang po chen po'o/ /de bas bdag nyid dul ba mchog/ /ces bya ba ni bdag dul ba gang yin pa de ni bdag nyid dul ba ste/ gang bdag dul bar byas pa des ni dre'u la sogs pa dul bar byas pa de dag pas mchog ste/gtso bo yin no/ /ci'i phyir zhe na/ bzhon pa de dag rnams kyis ni/ /zhes bya ba smos te/ gang gi phyir dre'u la sogs pa dul bar byed pa de dag gi rgyur gyur pa'i dul ba de dag gis ni/sa de mngon par 'thob mi srid/ /ces bya ba yin te/ de ni phyogs de dang de'i bye brag phyin par byed pa yin no/ /bdag nyid legs 'dul gang yin pa'i/ /zhes bya ba ni sa gang la legs par yongs su sbyangs pa'i yid kyis ni mkhas pa des thob 'gyur zhes bya ba ste/ mkhas pas rtogs par 'gyur ba'o/ /sa'i rang bzhin bstan pa'i phyir/ /zhi ba zhes bya ba smos te/ sdig pa dang bral zhing nye bar zhi ba ste/ gang gi phyir dbang po dul bar gyur na ni bya ba ma yin pa'i ngan par spyod pa nye bar zhi bar yin no/ /sdug bsngal gyi rtsa ba ni sdig pa yin te de med na sdug bsngal med do zhes bsgrub pa'i phyir/sdug bsngal mthar phyin zhes bya ba smos te/ rnam par smin pa mi 'dod pa'i 'bras bu la sogs pa med pas mthar 'gro bar 'gyur ro/ /gdung bas zil gyis non par ma gyur na ni lus la sogs pa dran pa bsgom pa la nan tan du byed par nus kyi/sdug bsngal gyis mngon par gtses pa'i bdag nyid la ni ma yin no zhes bsgrub par 'dod pa'i phyir/ dran ldan zhes bya ba yin te/ lus su gtogs pa'i dran pa dang ldan pa'i phyir/ dran pa nyams pa las ni 'di ltar ngan song gi 'gro ba yin te/ dran pa ma bsgoms pas so/ /ji skad du bshad pa/ 'jig rten pa yi yang dag lta/ /chen po gang la yod gyur pa/ /zhes bya ba la sogs pa gsungs so/ /de nyid bstan pa'i phyir/ spong 'gyur gyi zhes bya ba smos te/ rab tu spangs pa'o/ /gang yin zhe na/ 'gro ba ste ngan 'gro gsum zhes bya ba'i don to//de nas bde 'gror skye zhing dran pa bskoms pas snod du gyur nas/ mthong ba'i lam mngon du byas pas mthong bas spong bar bya ba'i nyon mongs pa'i 'ching ba spong bar 'gyur ro zhes bstan par bya ba'i phyir/ 'ching ba bcad nas zhes bya ba smos te/de'i 'ching ba bcad nas so so'i skye bo 'di nas 'das te 'phags pa dang skal pa mnyam pa'i 'bras bu 'thob par 'gyur ro zhes bya ba'i don to/ de nas 'dod pa na spyod pa'i bsgom pas spang bar bya ba'i nyon mongs pa spangs pas sdug bsngal ba dang yid mi bde ba thams cad las 'das par 'gyur ro zhes bstan pa'i phyir/sdug bsngal kun las rab grol gyi/ /zhes bya ba smos te/ thams cad kyang yin la sdug bsngal yang yin te/ las 'dzin pa'i bsdu ba'o/ /de las nges par grol bar 'gyur te/ de nas mnyam par bzhag pa'i sa pa'i kun du sbyor ba spangs nas phung po lhag ma dang bcas pa'i mya ngan las 'das pa 'thob par 'gyur ro zhes bstan pa'i phyir/kun sbyor ma lus spong 'gyur gyi/ /zhes bya ba smos te/ kun du sbyor ba dgu'i thob pa bcad pas so/ /de nas dus cung zad gdul bya ji lta ba bzhin du phan 'dogs shing gnas te/dus gzhan zhig tu phung po lhag ma med pa'i mya ngan las 'das pa'i tshul nyid thob par byed do zhes bstan pa'i phyir/ mya ngan 'das nyid ces bya ba smos te/ skye ba'i sgrib g.yogs las 'das pa ni mya ngan las 'das pa'o/ de nyid ni sdug bsngal thams cad dang bral ba'i mtshan nyid do//nang gnas pa zhes bya ba ni dkyil te/ de'i bdag nyid du gnas ba zhes bya ba'i don to/ /de zhes bya ba ni 'dul ba la brjod do/ /gdul ba'i bsam pa'i mtshan nyid ni rnam pa mang ste/ der 'dus pa'i gdul bya de dag las kha cig ni zhi ba don du gnyer ro/ /kha cig ni sdug bsngal dang bral ba don du gnyer ro//kha cig ni 'gro ba gtong ba don du gnyer ro/ /kha cig ni 'ching ba las grol ba don du gnyer ba la sogs pa ste/ nye bar ma zhi ba la sogs pas kun du gtses pa'i phyir nye bar zhi ba la sogs pa'i khyad par 'dod pa yin no/de bas na de dag la thugs brtse ba'i phyir 'di gsungs so/ /sdug bsngal gyi mthar phyin pa ni bdag nyid dul ba la rag las pa yin no zhes bstan pa'i phyir smras pa/ 'dul sbyong zhes bya ba la sogs pa'o/ /gcer bu pa'i lta ba can zhig gis btsun pa ji ltar sdug bsngal thams cad kyi pha rol tu phyin par 'gyur zhes zhus pa dang 'di gsungs so//bdag nyid kho na gdul bar bya/ /zhes bya ba ni rang gi sems nyid bya ba dang las ngag la dbang du gyis shig pa'o/ /'dul sbyong byed pas rta bzang ltar/ /zhes bya ba ni dper na/rigs bzang po'i rta 'dul sbyong mkhan gyis 'dul bar byed pa ltar ro/ /ci'i phyir zhe na/ phan yon bstan pa'i phyir/ bdag nyid legs par dul ba yis/ /sdug bsngal rnams kyi pha mthar phyin/ /zhes bya ba sdug bsngal gyi tha mar 'gro ba ste/ thar pa thob par 'gyur ba'o/ bdag nyid dul ba'i phan yon bstan pa'i phyir//bdag nyid kho na zhes bya ba la sogs pa smos so/ /yul be+e ra t+ya na tshong dpon rgan po zhig bu la sogs pas brnyas par gyur te/ mgon su la bya zhes zhus pa las brtsams te/ bdag nyid kyi mgon dang bdag nyid kyi skyabs la gnas par bya'i/ gzhan ni gling dang skyabs ma yin no zhes bka' stsal te 'di gsungs so/bdag nyid kho na zhes bya ba ni sems kho na'o/ /bdag gi zhes bya ba ni bdag gi dngos po thams cad de/ gang gi phyir bdag gi dngos po 'di la ni rang gi sems nyid dul bar bya ba'o/ /mgon ni sems 'di dbang sgyur bar byed cing 'jig rten gzhan du 'dren par byed pa yin no zhes lung las 'byung ba ste/'dren par zhes bya ba'i don to/ /gang gi phyir dul na ni bdag nyid bde 'gro dag tu 'dren par byed de/ 'dis ni khyad par du len pa'i rgyu rtogs par byed do/ /bdag nyid bdag gi skyabs yin pas/ /zhes bya ba ni skyabs kyi don dang skyob pa'i phyir te/rang gi sems nyid dul bas ni bdag gi skyabs te/ de'i mthus nye bar spyod pa thams cad 'jig par byed pa'i phyir ro/ /yang na mgon ni mngon par mtho ba'i bde ba skyed pa'i phyir ro/ /skyabs ni nges par legs pa'i bde ba thob par byed pa ste/ des na de nyid kyi phyir/ bdag nyid gdul bar bya zhes bya ba la sogs pa'i dpe dang bcas pa ni rtogs par sla'o/ /rta'i tshoms te bcu dgu pa'i rnam par 'grel pa rdzogs so// //bdag gi sems dul bar byas na ni khro ba la sogs pa sel bar 'gyur te/ dper na byi la'i rkyal pa legs par mnyes na sil krol gyi sgra 'byin pa yin no/ /de bzhin du bsgrub pa'i phyir de'i 'og tu khro ba'i tshoms bstan to/ /gang gi phyir ma dul bar ni khro ba la sogs pa sel bar nus pa med do/ des na de nyid bstan pa dang bdag nyid dul bar byas nas khro ba spangs shing zhes bya ba la sogs pa smos so//chags pa med la dga' ba'i gcer bu ba zhig gis bcom ldan 'das la gsol pa/ cis ni spangs dang ci yis rnam spangs 'gyur/ /gang gis thams cad las ni 'da' 'gyur zhing / /gang la ma chags par ni byas pa dag / chags pa'i rjes su ltung bar mi 'gyur lags/ /zhes pa dang des na 'di gsungs so/ /gzhan dag ni n+ya gro d+ha'i kun dga' ra ba na rgyal rigs kyi bu mo snar ma zhes bya ba las brtsams pa'o zhes zer ro/ /khro ba ni bdag gis mdza' bshes dang dgra bo rnams la gnod pa dang don byed pa las byung ba'i khong khro ba sngon du 'gro ba'i sems kun du 'khrugs pa ni khro ba'o//gzhan dag ni gnas dang gnas ma yin pa la rjes su mi mthun pa las skyes pa'i rigs pa yongs su spangs pa ste/ bu la sogs pa la yang sems rab tu 'khrugs pa ni khro ba la'o zhes zer ro/ / gzhan dag ni 'dir khong khro ba nyid la 'jig rten gyi rab tu grags pas khro ba zhes brjod do/ /spangs zhes bya ba ni khro bo yongs su dor ba ste/ gzhan la gnod pa'i rgyur gyur pa'i phyir ro/ /nga rgyal rnam spangs zhes bya ba ni gnyen po bsgom pa'i khyad par du yang nga rgyal rgyud la spang bar bya ba'o//'dir nga rgyal ni nga'o snyam pa la dgongs te/ phra rgyas thams cad kyi gtso bo'i rgyu yin pa'i phyir dang / yon tan la sogs pa'i bgegs su gyur pa'i phyir ro/ /kun sbyor kun las shin tu 'da' 'gyur zhing / /zhes bya ba ni rang dbang med par skyed par byed pa'i phyir kun du sbyor ba rnam pa dgu po 'di yang rnam par spong ba ste/'dis ni khams gsum gyi 'dod chags dang bral bar sbyor ba yin no/ /sngar bstan pa'i bya ba'i phan yon bstan pa'i phyir/ ming dang gzugs la chags pa med de dag /ces bya ba smos te/ de dag ni gang zag go/ /ming dang gzugs zhes bya ba la/ming ni tshor ba la sogs pa phung po bzhi'o/ /gzugs ni gzugs kyi phung po'o/ /chags pa med pa ni yid de la chags par mi byed pa ste/ /de la sred pa dang bral ba'i phyir ro/ /ci yang med pas zhes bya ba ni mngon par 'dod pa'i dngos po med pa ste/yang sred pa'i las dang nyon mongs pa spangs pa'i phyir spros pa dang bral ba'o/ /rjes su mi ltung zhes bya ba ni rjes su mi 'gro ba dang / rjes su mi 'ching ba dang / gdung bar mi 'gyur ba zhes bya ba'i don to/ /chags pa ni 'du 'dzi ste des byas pa'i g.yeng ba'o/ /yang na skye ba la sogs pa srid pa'i skyon no//khro ba la sogs pa spangs pa ni bde ba 'thob pa yin no zhes bstan pa'i phyir/ skyes ma thag tu zhes bya ba la sogs pa smos so/ /lha zhig gis gsol pa/ skyes ma thag tu ci zhig spang / /ci zhig skyes nas bzlog par bgyi/ /bstan pas ci zhig rab tu spong / gang zhig rtogs na bde par 'gyur/ /zhes pa dang / de la 'di gsungs so/ /skyes ma thag tu zhes bya ba ni yid la skyes pa tsam nyid la'o/ /spangs zhes bya ba ni yongs su dor ba'o/ /gang gi phyir khro ba byung nas yal bar 'dor na ni phung khrol stong byed de/ phyugs lhas su spyang ki zhugs pa bzhin no//skyes nas 'dod chags spang par gyis/ /zhes bya ba ni rjes su chags pa'i kun du sbyor ba yang skyes ma thag nyid du rang gi gnyen pos bzlog par bya ste thag ring por spang zhing rgyun gcad pas rtsa ba dang bcas par dbyung ste/ kha nas 'jam por smra zhing nang du 'khon byed pa lta bu'o/brtan pas ma rig rab tu spang / /zhes bya ba ni mkhas pas gti mug yongs su spangs pa ste/ shes pa dang ldan pa'i phyir skyon spong ba ni brtan pa'o/ /sdug bsngal mthong bas zhes bya ba ni sdug bsngal la sogs pa'i 'phags pa'i bden pa ji lta ba bzhin du mthong bas ma rig pa spong ba'i rgyu bstan to//bde ba ni srin po gsum spangs pa bzhin du 'jigs pa med pas bde bar 'gyur ba ste/ sred pa zad na bde ba 'thob par 'gyur ro/ /gzhan dag tu ni bden pa rtogs na zhes brjod do/ /'phags pa'i bden pa bzhi mthong na zhes bya ba'i don to/ /khro ba spangs pas 'jig rten dang 'jig rten las 'das pa'i phan yon gzhan yang bstan pa'i phyir/khro ba spangs na zhes bya ba la sogs pa smos so/ /gang zhig spangs na bde bar nyal/ /gang zhig spangs na mya ngan med/ /gang gis 'dir ni chos gcig nyid/ /bcom na gau ta ma bsngags pa mdzad//ces brgya byin gyis zhus pa dang 'di gsungs so/ /khro ba spangs pa ni dor ba'o/ /bde bar nyal zhes bya ba ni gdung ba med par gnyid log par 'gyur ba'o/ /yang na 'tshe ba med par gnas pa ste/ bde bar nyal zhing bde bar sad pa dang / /nyal ba na yang lha rnams bsrung 'gyur ro//zhes byams pa thob pa dag la bshad pas so/ /khro ba spangs na gdung mi 'gyur/ /zhes bya ba ni gdung bar mi 'gyur ba ste/ nang du gdung ba med cing mya ngan rjes su myong bar mi 'gyur ba ste/ de spangs pas ni bsam pa grub la bye ma la sogs pa mthong ba dang bral ba'i phyir ro/ / khro ba zhes bya ba dang choms shig ces bya ba 'dir sbyar ro/ /ci'i phyir zhe na/ khyad par gyi tshul gyi rgyu bstan pa'i phyir/ dug gi rtsa ba zhes smos te/ phung khrol gyi rgyu yin pas myur du 'dod chags dang bral bar byas te kha na ma tho ba chen po yin no zhes mdo las gsungs so/ /bde 'joms zhes bya ba la/bde ba ni yid du 'ong ba ste/ legs par spyod pa dang yid dang 'thad pa la sogs pa des 'jig pa ni bde ba 'joms pa ste/ de ni legs par spyod pa dang yid du 'ong ba gcod par byed pa yin no/ /dge slong zhes bya ba ni bod pa ste/ de'i phyir bde ba 'joms pa ni bag chags yin no zhes bstan nas tho rangs dang mtshan mo nyid la yang gdul ba'i dge slong dag la bstan zhing yang brjod pa yin te/khro ba ni khyim na gnas kyang yongs su spang bar bya ba yin la/ khyad par du ni khyim spangs pas spang par bya'o zhes ston pa yin no/ /choms shig dang / / 'phags pa rnams kyis bsngags 'gyur zhing / /zhes bya ba ni 'di spangs pas ni sangs rgyas dang / de'i nyan thos dgyes pa yin te/ de'i ngo bo nyid thugs su chud pa'i phyir ro/ /ci'i phyir zhe na/ de bcom pa yis mya ngan med/ /ces bya ba yin te/ gang gi phyir khro ba spangs na ni gang gis ji ltar yang yid lhag par gdung ba nyams su myong bar mi 'gyur ro//gang zhig de'i rjes su 'jug pa de ni dus ring por mya ngan byed par 'gyur ro zhes bstan pa'i phyir/ gang khros bdag gis zhes bya ba la sogs pa yin no/ /dge slong dag sngon byung ba'i dus na lha dang lha ma yin g.yul 'gyed par nye bar gnas par gyur pa na/lha'i dbang po brgya byin gyis sum cu rtsa gsum pa'i lha rnams la smras pa/ grogs po dag lha dang lha ma yin g.yul 'gyed pa rtsom pa'i dus su gal te lha rnams rgyal bar 'gyur zhing lha ma yin rnams pham par 'gyur na ni/grogs po dag de la ngas kyang lha ma yin gyi dbang po thags bzangs ris gson bzhin du bzung la mgul pa bcing ba lngas bcings te/ lha'i grong khyer du gzhug par bya'o zhes smras so/ /lha ma yin gyi dbang po thags bzangs ris kyis kyang lha ma yin rnams la de ltar smras so/ji tsam na thags bzangs ris lha'i grong khyer du bcug ste/ lha'i 'dun sa chos bzang gi sgo drung du mgul pa bcing ba lngas bcings pa dang / lha'i dbang po brgya byin de phyir 'byung ba dang nang du 'jug pa na des sdig pa can gyi tshig tshogs par mi dbyung bas gshe bar byed do//ma ta lis smras pa/ /brgya byin lha dbang 'jigs pa 'am/ /yang na stobs med bzod par byed/ /thags bzangs ris kyi tshig gtum dag /mngon sum thos bzhin 'dug byed dam/ /zhes so/ /brgya byin gyis smras pa/ 'di ni de ltar mthong mod kyi/ /byis pa yi ni dgag pa yin//pha rol gang zhig khros shes na/ /rang nyid de la zhi bar bya/ /zhes smras te/ de las kyang sangs rgyas bcom ldan 'das kyis tshigs su bcad pa bcu gnyis bka' stsal to/ rab smra zhes bya ba ni yang dag par rtogs pa dang yang dag par shes pa ste/ med pa la yod par yongs su gcod pa zhes bya ba'i don to//de gang yin zhe na/ gang khros zhes bya ba smos te/ 'khrugs pa'o/ /ji ltar smras pa yin zhe na/ bdag gis legs byas kyi/ ma legs min zhes bya ba ste/ legs par byas pa nyid yin gyi/ /de nyid kyis nyes par byas pa ni ma yin no zhes mngon par sems pa yin no//khro ba ni phyin ci log gi rgyu yin pa'i phyir ro/ /'og tu zhes bya ba ni yang dus gzhan na'o/ /'di nyid gsal bar ston pa yin te/ khro ba zhi ba zhes bya ba ni khong khro ba'i kun nas dkris pa dang bral bar gyur na'o/ /me yis bsregs bzhin gdung bar 'gyur//zhes bya ba la/ bsregs pas nye bar gdung ba bzhin du de khro bas gdung ba myong bar 'gyur te/ ji ltar bdag gis 'di ltar ma rabs dang mthun par byas zhes yid la gcags pa skye ba'i phyir ro/ /gang khro ba dang ldan pa de ni ngo tsha med cing khrel med par 'gyur ba ste/ ngo tsha dang khrel med pa dang bral bar gyur na ni khro ba med par 'gyur ba'o/ /ngo tsha gang la yod pa de ni ngo tsha dang ldan pa'o/ /ngo tsha dang mi ldan pa ni ngo tsha med pa'o/ /khrel yod pa'i tshul gang la yod pa de ni khrel yod pa ste/ khrel yod pa ma yin pa de ni khrel med pa'o/ /de la yon tan dang yon tan can dag la gus pa ni ngo tsha shes pa'o//nyes par spyod pa la 'jigs par lta ba ni khrel yod pa'o/ /bdag nyid la ni mngon brtags nas/ /'dzem pa gang yin ngo tshar brjod/ gzhan brten 'phya ba la 'dzem pa/ /khrel yod pa zhes brjod par bya/ /zhes bya ba 'di gnyis kyi mtshan nyid la gzhan dag de skad zer ro//yang na gang khro ba'i ngang tshul can de ni ngo tsha med par 'gyur ro zhes bya ba la sogs pa brjod par bya'o/ /'khrugs pa yin pas khro ba can no/ /brtul zhugs med pa ni tshul khrims dang brtul zhugs kyang yod pa ma yin te/ de'i dbang gis de'i tshul nyams pa'i phyir ro/ /khro bas mngon par zil gnon pa/ /zhes bya ba ni 'khrugs pas gzhan gyi dbang du byas pa'i skyes bu'o/ de la su yang rten mi byed/ /ces bya ba ni pha dang ma la sogs pa gang yang rung ba'am/ yang na skye bo dam pa khro ba can la gnas dang gling dang rten mi byed do//gdon zhugs nas gzhan gyi dbang du byas pa la ni su zhig bdag la phan par 'dod pas yid brtan pa'i bsam pas nye bar 'gro bar 'gyur/ gang nyid la skrag pa de nyid la ni yid brtan pa med pa nyid de/ 'di ltar sbrul nag po dug mi bzad pa yod pa la ni gang yang yid brtan pas len par mi byed pa de bzhin du rten dang gnas su mi byed de/de las skrag pas yid brtan pa thams cad 'jig pa'i phyir ro/ /khro ba'i nyes dmigs nyid bstan pa'i phyir/ gang zhig byis pa'i mthu stobs zhes bya ba la sogs pa smos so//'dir gleng gzhi ni gzhan dag 'di skad zer te/ mnyan yod na gi ri ya gro zhes bya ba bram ze'i rigs shing sA la chen po rgyal po gsal rgyal gyi mdun na 'don zhig bcom ldan 'das kyi thad du song ste/ phyin nas btsun pa bdag la ni skyes bu byed pa'i stobs mchis so zhes gsol pa dang /ji tsam na 'di gsungs so zhes so/ de yi stobs ni stobs med yin/ /zhes bya ba la stobs med pa nyid ni nyam chung ba ste/ sems can de'i stobs su 'dod pa'o/ /ni zhes bya ba ni kho na'i don to/ /de gang zhe na/ gang zhig byis pa'i mthu stobs can//zhes bya ba ste/ gang zhig ni gang la la'o/ /byis pa ni glen pa ste/ de khro ba dang mi bzod pa las byis pa stod par byed pas so/ gzhan brnyas par bya ba'i thabs des bzung ba'i phyir de ni mthu stobs med pa nyid la mthu nyid du bzung bar shes par bya'o/ /ci'i phyir zhe na/ / byis pa zhes bya ba ste glen pa'o/ /byis pa'i mtshan nyid bstan par bya ba'i phyir/ /chos dang bral ba la zhes bya ba smos te/ shin tu 'tshe ba la goms pa ste/ byis pa ni ngan par spyod pa sems pa'o zhes mdo las gsungs te/ legs par spyod pa spangs zhes bya ba'i don to/ bsgrub bar bya ba yod re skan//zhes bya ba ni tshul khrims dang tshul khrims la brten pa'i 'phags pa'i lam bsgrub cing de thob par byed pa ni byis pa'i stobs kyis nus pa ma yin te/ blo dang mi ldan pas so/ /gang gi phyir blo'i stobs ni mkhas pa'i stobs su 'dod de/ so sor brtags pa'i stobs dang mang du thos pa zhes bya ba'i tshig gis so//mkhas pa rnams kyang bzod pa'i stobs la gnas pa zhes bya ba'i don to/ /de yang 'di ltar bsgrub pa'i stobs med de/ de bas na blo dang ldan pa las sngar bshad pa nyid do/ /byis pa'i stobs ni bzod pa med pa nyid yin no zhes bstan la mkhas pa rnams kyi stobs ni bzod pa yin te/'di lta bur gyur pa la bzod pa nyid stobs kyi mchog yin te/ de nyid bstan pa'i phyir/ stobs ldan zhes bya ba smos te/ 'di na shas che ba'i stobs yod pa di ni stobs dang ldan pa'o/ /gang la la zhig tshe 'di la lus kyi stobs dang gzugs bzang ba la sogs pas nga rgyal yod pa dang /bstan bcos la sogs pa yongs su shes pa'i tshul gyis ldan pa'o/ /stobs chung rnams kyi bzod byed pa/ /zhes bya ba ni stobs dman pa dag gis tshig ngan mang du smras kyang bzod pa zhes 'dod de/ 'di ltar bdag la 'jigs pa nyam nga ba la sogs pa'i 'jigs pa ni gang du yang med de tshogs yod pa'o/ /ma he'i skyes pa'i rabs la sogs pa yang 'dir dper brjod par bya'o/ /de ni bzod pa'i mchog ces gsungs/ /zhes bya ba ni de nyid ni sangs rgyas kyis bzod pa dam pa zhes gsungs so//ci'i phyir zhe na/ 'di ltar nyam chung ba lta rtag tu sgur/ /zhes bya ba yin te/ gang stobs dman pa de ni gnas med pa'i phyir dus thams cad du thams cad kyi brnyas pa bzod pa yin no/ /stobs ldan zhes brjod pa la/ stobs dang ldan pa ni rnam pa gsum ste/ dbang phyug dang sgrub pa dang tshig gis so/ /de la dbang phyug bstan pa'i phyir/ /de las gzhan gyi dpon gyur kyang / /zhes smos te/ gzhan g.yog dang bran la sogs pa'i dpon por gyur pa ste/ mthu yod pa dang dbang phyug dang mnga' bdag tu gyur pa'o/ /dper na rgyal por gyur la zong gis nyos pa'i bran khro zhing ngan du smra yang dang du len pa'i bzod pa ni rab tu bsngags pa yin no//sgrub pa'i stobs dang ldan pa'i dbang du byas nas/ gzhan gyis zhes bya ba ni dgra dag gis gnod pa byas pa'o/ /smad byas kyang zhes bya ba ni rten med pa la sbyor ba ste/ gnas med pa dang 'da' bar byed pa dang /zil gyis gnon par byed pa zhes bya ba ni rnam grangs so/ gang zhig gis zhes bya ba ni gang nyid de'i rigs rgyud ngan par skyes pa ston pa yin no/ /stobs ldan zhes bya ba ni dpung gi tshogs bzhi dang ldan pa'o/ /bzod pa ni mi 'khrugs pa'o/ /thams cad sbyin pa'i skyes pa'i rabs 'dir dper brjod par bya'o/tshig gi stobs kyi dbang du byas nas/ gzhan gyis lhag par brgyad bkag kyang / /zhes bya ba la sogs pa smos so/ /lhag par brgyad bkag ces bya ba ni shin tu brgal ba dang / tshig ngan pa dang / gshe ba la sogs pa ni lhag par brgyad bkag pa ste/ des sbyor ba ni lhag par brgyad bkag pa'i skyes bu'o/ /gzhan gyis zhes bya ba ni skye bo ngan pa gnod par byed bas de ltar tshig ngan pas gshe bar gyur na stobs dang ldan pa ni de bas stong 'gyur du smra bar nus kyang bzod pa yin no/ gnyi ga'i phongs pa sel ba ni bzod pa dang ldan pa yin no zhes bstan pa'i phyir gang zhig pha rol zhes bya ba la sogs pa smos so/ /skyob pa ni 'don par byed pa'o/ /gang zhig ce na bdag dang gzhan gyi sems can skyob pa yin no/ /'jigs pa zhes bya ba ni 'di las 'jigs pa yin pas 'jigs pa ste/sdig pa'i chos dang mi 'dod pa'i rnam par smin pa de las so/ /ji lta bu zhe na/ chen po dag las zhes bya ba ste/ ngan song ngam mnar med pa dag las so/ /khros pa zhes bya ba ni shin tu 'khrugs pa'o/ /rig nas zhes bya ba ni khros pa 'di la nges par byas nas bdag nyid de rang kho na gzhan gyis bstan pa la sogs pa med par ro//de la zhes bya ba ni de'i tshe'o/ /nye bar zhi byed pa zhes bya ba ni nye par zhi ba la dmigs shing bzod pas zhes bya ba'i don to/ legs par spyod pa nye bar bstsags pas ni gnyi ga las phan 'dogs pa yin no zhes bstan pa'i phyir/gnyi ga'i don ni spyod pa yin/ /zhes bya ba smos so/ /gang zag bzod pa byed pa ni gnyi ga'i don byed pa yin no/ /gnyi ga'i don yang gang zhe na/ bdag dang gzhan dag gi zhes bya bas bstan te/ bdag gi don byed pa ni bzod pa smra ba'i skyes pa'i rabs kyis brjod bar bya'o/gzhan gyi don byed pa ni byams pa'i stobs skyed pa'i skyes pa'i rabs la sogs pa brjod par bya'o/ /gang de ltar bzod pa byed pa de la skye bo blun po de dag khros pa'i mig gis lta bar byed pa dang / tshig ngan pa byed pa yin no zhes bstan par bya ba'i phyir/ / bdag nyid dang ni zhes bya ba la sogs pa smos so/ /spyod de la zhes bya ba ni byed pa de la'o/ /gang pha rol bzod pa byed pa la byis pa yin no zhes brnyas pa la bzod pa nyid do/ sems kyang sla zhes bya ba ni shes kyang sla ba ste/ /de ltar brnyas par byed pa dang / tshig ngan smra bar byed pas so//skye bo de ltar sems par byed pa gang zhe na/ chos la mi mkhas rnams zhes bya ba smos te/ yon tan dang skyon mngon par brtag pa mi shes pa zhes bya ba'i don to/ gang dag chos la mkhas pa de dag ni mkhas pas shes par 'gyur ro zhes 'di nyid kyis bstan pa'i phyir//gtso bo'i tshig ni zhes bya ba la sogs pa smos pa'o/ /gtso bo zhes bya ba ni stobs dang ldan zhing mthu che ba pa ste/ rigs dang gzugs la sogs pa khyad par du gyur pa zhes bya ba'i don to/ /tshig ces bya ba ni tshig rtsub po'i bdag nyid dam phra mo la sogs pa'i rang bzhin yang rung ngo /'jigs phyir bzod ces bya ba ni gal te bdag gis 'di ma bzod na ni bdag la des dbang byed pa yin pa'i phyir gnod pa chen po byed par 'gyur ro zhes so/ /'thab zla'i tshig ni 'thab gcugs rgyu bzod pas/ /zhes bya ba ni kun nas 'khrug pa'i bdag nyid kyi rgyu yin pa'i phyir/ 'thab zla ni stobs mnyam pa ste/ de'i tshig bzod pa'o/ /gal te 'di'i rtsub pa la sogs pa'i tshig bdag gis ma bzod na ni des na bdag gi tshig kyang 'dis bzod par mi 'gyur te/ de ltar yun ring por rab tu 'khrug pa chen por 'gyur ba yin no zhes te/ des 'jigs pa'i las bzod par byed do//dman pa'i tshig la zhes bya ba ni gang yang ngan don nam shin tu dman pa'i sems can gyi tshig rtsub pa bzod pa ni bzod pa mchog ces bya ba yin te/ bzod pa mchog de la brten nas de dam par gyur pa yin te/ sems can gyi snying por gyur pa zhes bya ba'i don to//de'i phyir sangs rgyas dang de'i nyan thos ni rigs dang / rus dang bzo la sogs pas ni mchog yin no zhes mi ston gyi/ bzod pa la sogs pa'i yon tan dang ldan pa zhes ston to/ /bzod pa yang yin la mchog kyang yin pa ste/ khyad par dang khyad par can gyi tshul gyis phal cher zhes bya ba'i tshig gis so//'o na gang gzhan la bsdigs par byed pa de nyid kyis bdag rgyal po yin no zhes sems te bsdigs par mi bya ba ma yin no zhe na/ bstan pa'i phyir smras pa/ byis pa khros nas zhes bya ba la sogs pa smos te/ 'dir yang gleng gzhi gzhan du brjod de/rgyal byed kyi tshal na a si lib ba ka zhes bya ba'i bram ze'i bus bcom ldan 'das la 'di skad ces khyod ni rgyal po rgyal po zhes gsol pa dang / des ni 'di gsungs so/ /byis pa rgyal bar 'gyur snyam sems/ /zhes bya ba ni byis pa nyid pham pa'i gnas la yang rgyal ba yin no zhes rtogs pa ste ci zhig byas nas she na/khros nas tshig rtsub dag smras na/ /zhes bya ba smos te/ zhe sdang gi dbang gis brtsam pa med pa'i tshig smras pas/ 'jig rten gyi kun rdzob nyid du'o/ /don dam par de ni rtag tu rgyal bar byed pa yin zhes bya ba ste/ gang gzhan gyis brjod par bya ba ma yin pa thos par gyur na bzod par byed pa de nyid ni rtag tu rgyal ba ste/ rgyun du mtho ba zhes bya ba'i don to/ /dam pa rnams kyis bsngags pa'i phyir dang / bsod nams kyi tshogs bsags shing de'i 'bras bu khyad par can thob pa'i phyir ro/ /khro ba la sogs pa'i skyon spangs pa de nyid kyi phan yon bstan pa'i phyir/bden par smra zhes bya ba la sogs pa smos so/ /mnyan yod na rgan po rab tu byung ba zhig ser sna che zhing g.yon can zhig yod de/ dbyar gos 'tshed pa'i dus su btso blag gi las la nye bar gnas par gyur pa las gal te 'di nyid du 'di byas na ni tshangs pa mtshungs par spyod pa dag gis mthong nas slong bar 'gyur ro zhes des bsams te/de nas de'i dgon pa'i gnas su song nas de bya bar brtsams so/ /de nas tshe dang ldan pa maud gal gyi bu chen pos de'i ser sna brtag pa'i phyir rdzu 'phrul gyis nam mkha' las 'ongs te bslangs so//des smras pa/ lhung bzed chung ngu gang khyod la sbyin no zhes byas pa dang / ji tsam na tshon thams cad lhung bzed chung ngur bcug kyang ma gang ngo / /de nas lhung bzed bkang bar khas blangs pa yin pas byin cig ces smras pa dang /rgan po khros nas bcom ldan 'das kyi spyan sngar song ste/ de'i dbang du mdzad nas tshigs su bcad pa gsum gsungs so/ /gzhan dag ni maud gal gyi bu chen pos zhus pa las de'i dbang du mdzad do zhes zer ro/ /bden par smra bya zhes bya ba ni phyin ci ma log par brjod par bya ba ste/'dis ni gzhan slu ba la sogs pa las ldog par bstan to/ yang na de las gzud pa de tshig btsun pa'i rgyur gyur pa'i phyir ro/ /khro mi bya zhes bya ba ni zhe sdang ba ste/ zhe sdang gi kun nas dkris pa las gnas par ma byed cig ces bya ba'i don to/ /khro ba med pa'i g.yog 'khor rgyu yin pa'i phyir ro//slong la chung yang sbyin par bya/ /zhes bya ba ni phongs pa dag la ci nus par zas la sogs pa chung bar gyur kyang sbyin par bya'o/ kha zas la sogs pa ni gzhan gyis ma bslangs par gyur kyang de'i bsam pa shes par byas nas sbyin par bya ste/longs spyod chen po'i rgyur gyur pa'i phyir ro/ /rnam pa 'di gsum gnas kyis ni/ /zhes bya ba ni bstan ma thag pa'i bden pa'i tshig la sogs pa'i khyad par gyis gnas sam dngos po dang ldan pa'i gang zag gis so/ /gsum po nyid kyis ni me la sogs pa 'jug pas ma yin no zhes nges par gzung ba yin no//'dis ni phyin ci ma log pa'i rgyu dang des kun nas nyon mongs pa ma yin pa'i rgyu bstan to/ /tshig rkang gsum po 'dis ni tshul khrims dang bsgoms pa dang / sbyin pa las byung pa'i bsod nams bya ba'i dngos po bstan te/ 'di ltar tshul khrims ni bden pa gtso zhing zhe sdang med pa ni gtso bo ma yin no//bsgom pa ni de tsam gzung ba byas pa'o/ /lha rnams kyi ni drung du 'gro/ /zhes bya ba'i rgyal bo chen po bzhi'i ris la sogs pa'i lha rnams kyi drung du 'gro ba'o/ /gnas su 'gro ba zhes gzhan dag tu brjod de/ tshogs dang tshogs kyi nang du 'gro//zhes bya ba'i don to/ /de la lha yang rnam pa gnyis kyi dang po ni mnyam par ma bzhag pa'i sa pa ste/ de yang rnam pa gnyis te/ sa la gnas pa dang / gzhal med khang la gnas pa'ang / de la sbyin pas ni sa la gnas pa'i lha rnams su nye bar 'gro ba yin no/ /bden pas na gzhal med khang na gnas pa'i lha rnams su nye bar 'gro ba'o//bsgom pas mnyam par bzhag pa'i lha rnams su nye bar 'gro ba nyid do/ /de la 'dir mdor bsdu na rnam pa bzhi yongs su dag par brjod pa yin te/ ngag dang yid dang lus kyi las dang / de'i 'bras bu yongs su dag pa ste/go rims bzhin du sbyar ro/ /gnas la gzud pa'i phyir/ khro ba'i zil gyis zhes bya ba la sogs pa smos so/ /khro ba med pa'i tshig smros shig /ces bya ba ni bden pa'i tshig dang / nyon mongs pa med pa'i tshig go/ /'khor gyi nang du bag rkyong la/ /zhes bya ba ni tshogs pa'i nang du 'jigs pa dang bral bar gyis shig pa ste/rgya che ba mchog tu byed pa'i phyir ro/ /khro ba med pas tshig smra bar bya'o zhes pa ci'i phyir zhe na/ 'di ltar/ khro bas zil gyis non pa'i mi/ /zhes bya ba smos te/ zhe sdang gi kun nas dkris pas yongs su bzung ba'i mis/bdag gi don yang mi rtogs pas/ /zhes bya ba bdag nyid la phan 'dogs pa yang mi shes pa yin no/ /ci'i phyir zhe na tshogs pa'i nang du don dam par ma tshang ba med pa bstan pa dang / phyin ci ma log par ston pa dang sbyin pa la sogs pa'am/ gzhan la phan 'dogs pa sbyin pa'o//gang bdag nyid la phan pa byed cing khro ba la gzhol ba de nyid gnod pa dang bcas pa yin no zhes bstan pa'i phyir/ gang zhig ces bya ba la sogs pa smos so/ gang zhig khros la slar khro ba/ /de ni sdig pa can du 'gyur/ /zhes bya ba ni gang zhig zhe sdang gis kun nas dkris pa'i sems can la phyir zhe sdang bar byed na ni/de phyir gnod par byed pa'i phyir de la slar khro ba'i sdig pa des phung khrol skyed par 'gyur te/ nyes par spyod par bstsags pa'i phyir ro/ /de bzhin du 'dis nges pa med pa ni ma yin pa'i phyir te/ de slar yang gnod pa byed pa yin no/ /khros la slar ni mi khro dang / /zhes bya ba ni gang yang bdag dang gzhan la gdung bar byed pa'i khro ba mthong na/ 'di la bzod par gnas shing mi khro bar gyur na ni de yang khro ba med par 'gyur ro/ /g.yul las rgyal zhes bya ba ni kun du 'khrug cing rtsod pa sel bar byed pa'am/nyes par spyod pa'i kun nas 'khrug pa ring du byed pa'o/ /g.yul ji lta bu zhe na/ smras pa/ thub par dka' ba zhes bya ba yin te/ zil gyis mnan par dka' ba dang / bzod par dka' ba ste/ shin tu chen po zhes bya ba'i don to/ /ji ltar byang chub sems dpa' byams pa la brten nas bdud kyi stobs zil gyis mnan pa zhes bya ba la sogs pa brjod par bya'o//khro ba la sogs pa spang ba'i thabs bstan pa'i phyir/ khro ba med pas khro ba thub/ /ces bya ba la sogs pa smos so/ /a su ra ya na zhes bya ba'i bram zes bcom ldan 'das la tshogs par mi dbyung ba'i tshig gis gshe ste/des na 'di gsungs so/ /gzhan dag ni u da ra zhes bya ba'i dge bsnyen ma'i khyim du bcom ldan 'das nyan thos kyi tshogs dang bcas pa bshos gsol ba byas nas dge bsnyen ma u da ra las brtsams te 'di gsungs so zhes zer ro//khro ba med pas khro ba thub/ /ces bya ba ni khong khro ba skyes pa bstsal ba dang / /ma skyes pa mi skyed par byed pa ste/ des zil gyis gnon pa zhes bya ba'i don to/ /legs pas legs pa ma yin thub/ /ces bya ba ni gzhan la rnam par 'tshe bar byed pa'i glen pa ni/ 'dir legs pa ma yin pa ste/de legs pa dang phan 'dogs pa'i bya ba dang / ye shes kyis zil gyis gnon pa zhes bya ba'i don to/ /sbyin pa yis ni 'jungs pa thub/ /ces bya ba ni ser sna can dang shin tu 'jungs pa las ni nor gyi phung po btang bas bstsal par bya'o/ /bden pas bden pa ma yin thub//ces bya ba ni bden pa dang drang ba med pa 'di la yod pa de ni brdzun te/ bden pa ma yin pa smra ba zhes bya ba'i don to/ /de ni phyin ci ma log pa'i tshig gis thub par bya'o/ /bram ze de ni khro ba la sogs pas skyon shin tu che ba yod pas ji ltar skyon dang bcas pa ni skyon med pa'i tshig la sogs pa thub par ni mi rigs te/ji skad du/ gal te gzhan gyi yon tan mi bzod rang gi yon tan sogs la 'bad/ /gzhan gyi grags pa smad pa tsam gyis de dag gzhom par yong mi nus/ /gal te zhe sdang la 'jug yid la 'dod cing spong bar mi byed na//nyi ma'i 'od zer lag pa'i gdugs kyis skyob par mi nus ngal bar 'gyur/ /zhes gsungs pa lta bu'o/ /khro ba spangs pa'i phan yon bstan pa'i phyir/ dul zhing rigs pas zhes bya ba la sogs pa smos so/ /bcom ldan 'das la beng gi ka zhes bya ba'i bram ze'i khye'us tshogs par mi dbyung ba'i tshig smra zhing gshes so//bram ze'i khye'u khyod skyes pa'i rgyu skar nye bar gnas par gyur pa de'i tshe na khyod kyi nye du dag la skyes kyi bza' bca' skur cig ces bka' stsal pa dang / kye gau ta ma bskur bar bya'o zhes zer ro//bram ze'i khye'u khyod kyi nye du dag gal te de mi len na de lta na su yir 'gyur/ bdag nyid kyi'o/ de bzhin du de bzhin gshegs pa dgra bcom pa yang dag par rdzogs pa'i sangs rgyas la sdig pa can gyi tshig tshogs par mi dbyung ba smras na yang / de de bzhin gshegs pa len par mi mdzad do//dge sbyong gau ta ma bdag gis ni ji tsam na bram ze rgan po dag las de bzhin gshegs pa dgra bcom pa yang dag par rdzogs pa'i sangs rgyas khyed kyi drung du song ste/ sngon du sdig pa can tshogs par mi dbyung ba'i tshig gis gshes par gyur kyang khro bar mi 'gyur ro zhes thos na/'di ni gau ta ma khyod 'khrugs par gyur to zhes gsol pa dang / de la bcom ldan 'das kyis tshigs su bcad pa gsum gsungs so/ /khro ba med pa ga la khro/ /zhes bya ba ni khong khro ba bag chags dang bcas pa spangs pa yin na khro ba'i kun nas dkris pa lta ga la 'byung zhes ston pa yin no//khro ba dang ldan pa ni khro ba'o/ /khro ba yod pa ma yin pa ni khro ba med cing khro ba spangs pa ste/ khro ba la sogs pa so sor ma brtags pa'i 'gog pa thob pa'i phyir ro/ /sbrul nag po yod pa'am 'ong ba med na/ des zin pa lta ga la yod/de ltar khro ba med na ji ltar de mngon sum du 'byung bar 'gyur/ rim pa gang gis khro ba spangs par bshad pa rig par 'gyur ba'i phyir/ dul zhing zhes bya ba smos te/ dbang po drug dul ba ste/ gang gi phyir dbang po dul na ni bzod pa sten pa'i phyir khro ba 'gag pa yin te/'dis ni dbang po sdom pa bstan to/ /de ni tshul khrims kyi sdom pa bstan pa'i phyir rigs pas 'tsho ba dang zhes bya ba smos te/ snyoms pas 'tsho ba ni rigs pas 'tsho ba ste/ de ni yang dag pa'i 'tsho ba dang ldan pa yin pas 'dis ni tshul khrims kyi sdom pa dag par ston par byed de/ log pa'i 'tsho bas ni de yongs su dag pa med pa'i phyir ro/ /de gnyi ga'i 'bras bu bstan pa'i phyir/ yang dag shes pas rnam grol ba/ /zhes bya ba ste/ 'dis ni khro ba gtan du spangs par ston te/ shin tu mthar thug par 'jug pa zag pa med pa'i shes pas nyon mongs pa thob pa dang /shes bya'i sgrib pa las rnam par grol ba'i de bzhin gshegs pas ni yang dag pa nyid du nges pa'i phung po la gnas par mdzad pas yang dag pa'i shes bas ni kun du shes shing 'phags pa'i lam gyis spangs pa'i phyir khro ba med de/ des na de nyid kyis na zhe sdang kun du 'byung ba med do//'dis ni spangs pa phun sum tshogs pa bstan nas ye shes phun sum tshogs pa bstan pa'i phyir/ mkhas pa rnams la zhes bya ba smos te/ de bzhin nyid kyi don mtha' dag shes pa'i phyir mkhas pa ste/ thams cad mkhyen pa nyid kyi rgyud la gnas pa la ni khro ba la sogs pa'i nyon mongs pa'i bag chags kyi go skabs bdag nyid kyis sel ba yin pa'i phyir 'di bstan pa yin no//yang na mkhas pa ni 'phags pa'i bden pa bzhi la ste mthong ba dang bsgom pas slob pa'i lam la ni 'di lta bur mkhas pa yin pa'i phyir phra rgyas 'byung ba mi srid do/ /ci'i phyir de ltar sma ba la sogs pa'i khyad bar dang ldan pa la khro ba 'di lta bu med ce na bshad pa/dge ba'i phyir te/ skye bo dge ba la ni khro ba gnas pa ma yin no/ /dper na dpag bsam gyi shing la ni bya rgod la sogs ba dur khrod kyi bya rnams brten pa ma yin gyi/ shang shang de'u la sogs pa mngon par 'dod pa'i bya rnams ni yang dag par brten pa yin te/'di nyid gsal bar bstan pa'i phyir/ khro ba med dang 'tshe med la/ /zhes bya ba la sogs pa smos so/ /khro ba med dang 'tshe med ces bya ba las/ zhe sdang med pa'i dge ba'i rtsa ba dang / snying rje ste 'di gnyis la'o/ /'phags pa'i skye pos rtag bsten kyang //zhes bya ba ni skye bo dam pa rgyun du gnas pa ste/ 'phags pa nyid ni des nye bar mtshon pa yin pa'i phyir ro/ /de med na ni dam pa nyid du gsal ba med do/ /bdag dang gzhan gyi don sgrub pa ni dam pa rnams yin la/ bdag dang gzhan gyi don sgrub pa'i rgyu yang bzod pa dang snying rje la sogs pa'o//gang gi phyir bzod pa ni bdag nyid la gnod par mi byed pa yin la/ snying rjes ni gzhan la gnod par byed pa ma yin no/ /'dis ni sgo rnam pa gnyis nas yon tan bstan pa yin te/ bzod pas ni gzhan gyis gnod pa byas pa bzod pa yin la/'tshe ba med pas ni gzhan la gnod pa mi byed pa'o/ /khro ba med pa la sogs pa tshig rkang gnyis kyis bstan to zhes gzhan dag zer ro/ /de lta bas na skye bo sdig pa can ji ltar skur bar byed ce na/ skye bo sdig can khro ba dag /ces smos te/ sdig pa byed pa la mkhas pa'i sems can te/skye bo ngan pa zhes bya ba'i don to/ /khro ba dag ces brjod pas ni rnam par 'tshe ba yang sgrub pa yin te/ gang zhig bdag nyid la yang gnod pa byed pa yin na/ gzhan la lta smos kyang byed ces bya ba'i don to/ /rnam par 'tshe ba yang skye bo ngan pa'i rgyud nyid la gnas pa yin no//gang ji lta bu zhe na/ ri bo bzhin du zhes bya ba smos te/ dper na brag chen po'am ri ni sa la gnas par byed pa de bzhin du'o/ /gang khro ba spangs pa de las mi skye ba de ni ngo mtshar med kyi/ khro ba ma spangs pa de la ni rmad du byung ba yin te/ gang zhig ces bya ba la sogs pa smos so//a gra Ta ba ka zhes bya ba'i yul na dge slong zhig khro ba byung yang tshig rtsub po mi brjod pa de las brtsams so zhes gzhan dag zer ro/ /gang zhig 'jig rten 'di na'o/ /byung ba ni skyes pa mngon du phyogs pa'o/ /khro ba ni zhe sdang ngo / /'dzin par byed pa ni 'byung ba 'gog par byed pa'o//ma dul bzhon pa 'khyams zhes bya ba ni ma dul ba'i rte'u dang rta la sogs pa bzhin no/ /dper na a na pa se ka zhes bya ba'i 'dul sbyong mkhan shin tu mgyogs par rgyug pa dang / ma dul zhing 'gros myur ba'i rta la sogs pa lam ma yin pa las ji ltar 'dod pa gzhan du bzlog pa dang zhon par byed pa ji lta ba de nyid ni 'dul sbyong mkhan gyi mchog yin pa de bzhin du de/'dul sbyong mkhan du ngas gsungs kyi/ /zhes pa ni de nyid 'dir 'dul sbyong mkhan gyi mchog yin par rtogs so/ /zhags 'debs skye bo phal pa yin/ /zhes bya bya ni phal pa'i bzhon pa dul ba la zhon par byed pa ste/gang des ni de ltar nus pa ma yin no zhes so/ /zhags pa ni 'dir yang dag par 'dul bar byed pa'i thag pa de la bzung ste/ gang de ni zhags pa nyi tshes bzung ba ste/ srab la sogs pa rta la lar khrid cing khyer te mi bzhon pa yang yod pas so//de ni rab tu grags pa'i phal pa'i 'dul sbyong mkhan yin no/ /gang yang bzhon pa 'khyams par gyur kyang lam las zlog par byed pa de nyid ni kha lo sgyur ba'i mchog ces brjod de/ de bzhin du gang zhig yul la khro ba 'jug pa de las zlog par byed pa de nyid ni sems 'dul bar byed pa'i 'dul sbyong mkhan mchog yin no//khro ba'i tshoms te nyi shu pa'i rnam par 'grel pa rdzogs so// //bag chags dang bcas pa'i khro ba'i dri ma thams cad spangs pas de bzhin gshegs pa nyid ni 'dul sbyong mkhan gyi mchog yin no zhes bstan pa'i phyir 'di'i 'og tu de bzhin gshegs pa'i tshoms bstan to//yang na khro ba bkag cing pha rol tu phyin pa drug bstsags te snying rje bskyed nas nges de drungs phyung bas/ de bzhin gshegs pa'i go 'phang 'thob pa yin no zhes bstan pa'i phyir tshoms 'di bkod de/de nyid bstan pa'i phyir/ 'jig rten 'di na kun rig ces bya ba la sogs pa smos so/ /yang dag par rdzogs pa'i byang chub thob pa'i 'og tu mi mjed kyi bdag po tshangs pas chos bstan pa'i phyir gus pa dang bcas pas gsol ba btab po/ thub pa mchog gis 'di snyam du dgongs te/ thog mar bdag gis chos 'di su la bstan par bya zhes dgongs pa las/ ji tsam na rangs byed kyi bu lhag spyod ni zhag bdun gyi sngon du dus las 'das so/ /sgyu rtsal shes kyi bu ring 'phur yang dus las 'das te/ de bas na lnga sde rnams kyi phyir bstan to zhes dgongs nas/bcom ldan 'das bA rA Na sIr gshegs te bcom ldan 'das mthong ba dang / kun du 'tsho nyer 'gros smras pa/ tshe dang ldan pa gau ta ma dbang po rnams ni rnam par dang / bzhin gyi mdog ni yongs su dag pags pa'i mdog ni dkar na tshe dang ldan pa khyod kyi ston pa ni gang yin/gang gi bstan pa la ni rab tu byung / gang gi chos la ni dga' zhes smras pa dang / ji tsam na 'di dag gsungs te/ bdud rnams zil gnon rgyal bang / /zhes bya ba'i bar du'o/ /rgyal ba zhes tshe dang ldan pa gau ta ma khyod zer ram zhes pa dang /rgyal ba ni nga 'dra ba'o zhes bya ba dag go/ /tshe dang ldan pa khyod gang du 'gro zhes pa dang / nga ni bA rA Na sIr 'gro zhes bya ba nas/ 'jig rten yul sred rgal ba'i zhes bya ba'i bar du gsungs so/ /thams cad zil gyis gnon par byed pas na kun zil gnon te/ thams cad las 'das pa zhes bya ba'i don to/ /sems can gang su dag rkang pa med pa'am/ rkang gnyis pa la sogs pa ji snyed pa'i sems can de thams cad kyi nang na ni/ de bzhin gshegs pa mchog yin no zhes mdo las gsungs so/ /yon tan gang gis thams cad zil gyis gnon pa yin no zhe na/yon tan thams cad kyi khyad par du gyur pa ni thams cad mkhyen pa nyid de/ des na de nyid bstan pa'i phyir/ 'jig rten 'di na kun rig ces bya ba smos te/ dge slong dag srid pa gsum na ni nga nyid thams cad mkhyen pa ste/ thams cad shes pa dang thams cad gzigs pa zhes bya ba'i tshig gis dang /don thams cad phyin ci ma log par ston pa'i phyir thams cad mkhyen pa yin pas kun rig go/ /'di na zhes bya ba ni nga nyid do/ /'jig rten ni srid pa gsum na'o/ /gcig ni de bzhin gshegs pa nyid gcig 'byung ba yin te/'gro ba thams cad nyid na gcig pu yin no zhes ston pa yin pa'i phyir gcig gi tshig bstan to/ /ji lta bur gnas pa yin zhe na/ gang 'jig rten gyi khams gzhan dag tu yang sangs rgyas gnyis cig car mi 'byung ba yin te/ de'i phyir lung dang rigs pas bshad pa/de la lung ni sangs rgyas gcig 'jig rten du 'byung ba yin gyi/ de bzhin gshegs pa gnyis 'jig rten gyi khams gcig tu 'byung ba ni gnas med cing skabs med pa yin te/ 'jig rten 'dir gal te mtshams sbyor ba yin no zhe na/ gang yang bud med gnas ma yin zhing skabs med pa sangs rgyas su 'gyur ba la sogs par yang thal bar 'gyur ro//gal te de las 'ga' zhig shA ri'i bu'i thad du 'ongs nas 'di skad du dris te/ dge sbyong ngam bram ze gang zhig bcom ldan 'das dang mnyam pa yod dam/ 'di lta ste yang dag par rdzogs pa'i byang chub ces bya ba nas/ji tsam na des nga la dris pa dang / de bzhin no zhes smras te/ de bzhin du ma 'ongs pa na yang de ltar 'dri na ma yin no zhes bya ba gsungs pa nas/ de bzhin du mngon par rdzogs par sangs rgyas nas/ lha dang bcas pa'i 'jig rten 'di na ston pa nga las med de/nga nyid las gzhan chos ston pa med do/ /gzhan du na gal te de bzhin gshegs pa gzhan yod par gyur na ji ltar 'di la shin tu gtso bor phyag byed par 'gyur zhes pa'o/ /rigs pa ni thams cad du thogs pa med pa'i ye shes kyis rtogs pas ni ma byung ba'i las kyang kun du skyed pa dang bstan pa nub ba la sogs pa snang ba zhes bya ba la sogs pa'o//yang smras pa/ 'khor ba yi ni 'jig rten na/ /gang tshe bdag nyid sangs rgyas pa/ /mi phyed nus pa ldan pa'i phyir/ /gdul bya gdul bar nus pa yin/ /zhes so/ /'dzam bu'i gling 'di nyid du sangs rgyas 'byung ba ga las she na/'di nyid du rdo rje gdan la sogs pa dang mya ngan las 'das pa ste/ da dung mchod rten la sogs pa'i phyogs der phyag 'tshal bar 'gro ba dang / sangs rgyas kyi zhing yin pa'i phyir gsung rab kyang 'di nyid na yod de/ 'di nyid du sangs rgyas shing byung ba dang 'byung bar 'gyur ba ston to//lta ba'i rjes su 'brang bas yid ches pa 'byung ba yin te/ mi shes pa mtha' dag spangs pa'i phyir/ gtsang ba yin yang dri ma can gyi dngos po dang phrad pas ni mi gtsang par 'gyur ro zhes rtog pa las de bstan pa'i phyir/ 'di na chos rnams kun gyis ma gos shing //zhes bya ba yin te/ rnyed pa la sogs pa 'jig rten gyi chos rnams kyis 'jig rten 'di na gnas kyang dri ma can du ma byas pa ste/ 'dam gyi pad+ma lta bu'o/ /ci'i phyir zhe na/ 'di ltar kun spangs zhes bya ba spang bar bya ba thams cad spangs pas na kun spangs te/'dis ni spangs pa phun sum tshogs pa bstan to/ /spang ba'i bya ba spangs pa bstan pa'i phyir/ sred zad ces bya ba smos te/ khams gsum gyi rjes su chags pa'i kun du sbyor ba thams cad dang bral ba'i phyir ro/ /de spangs pas ni de la dmigs pa spong bar 'gyur ro zhes bstan pa'i phyir/rab tu rnam grol ba zhes bya ba smos te/ nyon mongs pa la sogs pa'i sgrib pa spangs pa'i phyir dang / mi slob pa'i lam thob pa'i phyir ro/ /nyid kyis mngon par mkhyen pa zhes bya ba ni bdag nyid gzhan gyis bstan pa la ltos pa med par zag pa med pa'i shes pas bden pa'i dngos po mtha' dag dang /rgya cher 'jig rten pa'i dngos po nyid kyang yang dag par rtogs pa yin te/ gang gi phyir dngos po'i de nyid rnam par ma shes par ni nyon mongs pa zad pa med de/ chos gcig kyang mngon par shes pa med par ni sdug bsngal gyi mthar byed par 'gyur ro zhes ba mi smra'o//zhes bya ba la sogs pa mdo las gsungs so/ /su yis bstan zhes bya ba ni gzhan su zhig gis bstan pa ste/ ston pa dang 'chad pa po 'di las gzhan med de snga ma bzhin no/ /sngar ma thos pa'i chos rnams la zhes mdo las gsungs pa'i phyir te/ston pa gzhan med par bstan pa'i phyir/ su yis bstan zhes bya ba ni su zhig gzhan ston pa por brjod par bya/ ci'i phyir zhe na/ mtshungs med ces bya ba ste/ gang gi phyir nga dang 'dra ba med do/ /ston pa po yang khyad par du gyur pa'am mnyam pa yang med pas dman pa ma yin te/nga dang mnyam pa nyid kyang med na/ khyad par du gyur pa lta ga la yod par 'gyur/ mtshungs pa med par gang gis shes par bya zhe na/ 'di ltar mnyam med ces bya ba smos te/ gzhal bar mi nus pa yin te/ gang gi phyir nga ni tshangs pa dang bcas pa'i 'jig rten gyis kyang dpag par mi nus pa yin no//gal te nus pa yin na ni/ nga la mtshungs pa med pa yang ma yin te/ de lta na bcom ldan 'das thams cad mkhyen pa zhes gang gis brjod par bya/ nyid kyis rab bstan pa zhes bya ba ni bdag nyid kyis 'di dag gi don ston par byed pa yin te/rgya mtsho chen po'i tshong pas rin po che la sogs pa bzhin no/ /mi shes par yang ston pa yod do zhe na/ de nyid bstan pa'i phyir/ byang chub brnyes nas zhes bya ba smos te/ yul gyi dngos po thams cad la shes pa thob pa'o/ /de bzhin gshegs pa zhes bya ba ni gdul bya'i bsam pa dang rjes su mthun pas de'i don du der gshegs pa yin te/'dis ni gzhan gyi don las brtson par bstan te/ /gzhan gyi don nyid rtogs shing bskyed par mi nus so zhe na/ skal ba dang ldan pa'i skye bo bstan pa'i phyir/ lha mi'i ston pa zhes bya ba smos te/ ston pa pos bstan pa ni de gnyis kyis mngon par rtogs pa'i skal ba yod pa'i phyir ro//ngan song ni ma yin te/ sdug bsngal mi bzad pas gdungs pa'i phyir/ blun pa'i phyir dang / g.yo shas che ba'i phyir te go rims ji lta ba bzhin du sbyar ro/ /'dis ni gzhan gyi don byed pa'i thabs gsal bar bstan to//bstan pa nyid kyis sgrub pa yin gyi/ rdzu 'phrul dang mthus ni ma yin no/ /thams cad la thogs pa med pa'i ye shes med pa'i phyir ston pa mi rigs so zhe na/ stobs rnams kun ldan thams cad mkhyen pa nga / /zhes bya ba yin te/ gnas dang gnas ma yin pa mkhyen pa la sogs pa rnam pa bcu dang de bzhin gshegs pa ldan pa ste/gang gi phyir yon tan de dag dang ldan pas des na/ nga ni 'jig rten dgra bcom ste/ /zhes bya ba nga nyid 'gro ba thams cad kyis mchod par bya ba yin te/ sangs rgyas ni thams cad kyis mchod par bya ba yin no zhes tshig gis so//yon tan gyi khyad par thams cad dang ldan pas yon tan thams cad dang ldan pa'i mtshan ma bstan pa'i phyir/ 'jig rten dag na bla med nga / /zhes bya ba smos te/ 'di la bla na yod pa'am/ mchog yod pa ma yin pa ni bla na med pa'o zhes tshig sbyar ro/ /sems can mtha' dag nyid las ni//nga nyid mchog dang dam par brjod par bya'o zhes mdo las gsungs so/ /gzhan gyi don byed pa la sogs pa'i khyad par dang ldan pa dang / /skyon spangs pa dang ldan pa'i phyir/ /lha dang bcas pa'i 'jig rten na/ /bdud rnams zil gnon rgyal ba nga / / zhes bya ba ste/ dmigs kyis dbye ba ni bdun pa'o/ /lha dang bcas pa zhes bya ba ni brgya byin dang / tshangs pa la sogs pa dang bcas pa mi'i 'jig rten thams cad kyi nang na/ nga nyid bdud bzhi las rnam par rgyal ba yin gyi gzhan dag ni bdud las rgyal ba med de/ des dbang du byas pa'i phyir ro//de nyid kyi phyir rgyal ba nga / /zhes bya ba yin te/ rnam par rgyal ba'i dpal thams cad thob pa'i phyir ro/ /des na yang nga nyid thams cad las nges par rgyal ba'i phyir rgyal ba ste/ de nyid kyi phyir/ nga la slob dpon su yang med/ /ces bya ba nga la slob dpon ni gang yang med do zhes bya ba ste/nga la ston pa ni gang yang med de/ gzhan rgyal ba ni slob dpon du mi 'thad do/ /nyi mas zil gyis mnan na ni zla ba'i dkyil 'khor gyis gsal bar byed mi nus pa de bzhin dang / bran nyid rje bo la sogs pa ma yin par brjod par bya'o/ /ci'i phyir zhe na/'dra ba zhes bya ba smos te/ gang gi phyir mnyam pa yang med na khyad par du gyur pa lta smos kyang ci dgos de lta na 'jig rten gyi khams gzhan dag na yod de/ de 'ongs nas slob dpon gyi go 'phang la gzhol bar 'gyur ro zhe na/ gcig pu zhes bya ba smos te/ 'khor ba thams cad na gzhan med do zhes dgongs so//rdzogs pa'i byang chub ces bya ba ni yang dag par thugs su chud pa'o/ /ji zhig thob pa yin zhe na/ smras pa/ bla med byang chub brnyes zhes bya ba ste/ sangs rgyas kyi rgyud la zad la mi skye ba'i ye shes sam/ thams cad mkhyen pa thob pa ni rdzogs pa'i sangs rgyas kyis yin gyi gzhan ni ma yin no//rdzogs pa'i sangs rgyas nyid rgyal ba yin gyi/ gzhan ni ma yin no zhes bstan pa'i phyir smras pa/ /rgyal ba nga 'drar shes par bya/ /zhes bya ba yin te/ da lta bu nyid ni rdzogs pa'i sangs rgyas rgyal ba yin no zhes rtogs par bya ste/rgyal ba thob cing thams cad zil gyis non pa'i phyir ro/ /de ji lta bu zhe na/ gang zhig zag pa zad shes pa/ /zhes bya ba smos te/ gang khyad par can gyi shes pa la brten nas bag chags dang bcas pa'i nyon mongs pa spangs pa thob pa'o/ /nyon mongs pa'i bdud kyis mi brdzi bar bstan nas/de las gzhan pa'i bdud kyis zil gyis mi non par bstan pa'i phyir smras pa/ sdig pa'i chos las nga rgyal bas/ /zhes bya ba phung po dang / 'chi bdag dang lha'i bu'i bdud ces brjod pas zil gyis mi non pa ste/ sdig pa bstsags pa'i rgyus zil gyis gnon pa'i phyir te/de las nga nyid rgyal ba'i phyir ro/ /yang na nyon mongs pa las skyes pa dang / srid pa'i 'bras bu'i las dang kun du sbyor ba'i 'bras bu spangs pa'o/ /de bas zhes bya ba ni rgyu des na'o/ /kye nyer 'gro nga rgyal ba zhes bya ba ni the tshom med par nga nyid rgyal ba'o/ yang na bdud bzhi las rgyal bas nye bar 'gro zhing nye bar 'gro bar thob pa ste/ de bas na nye bar 'gro ba ni rgyal ba yin no/ /bya ba byas nas gzhan gyi don mdzad pa yin te/ de bas na de'i phyir bA rA Na sIr zhes bya ba smos te/ chu bo bA rA Na sI dang mi ring ba na yod pa'i grong khyer ro/ /song nas zhes bya ba ni bgrod nas so//ci'i phyir zhe na smras pa/ ngas ni chos kyi rnga brdung zhing / /zhes bya ba 'phags pa'i bden pa bzhi bstan pa'i rnga brdung zhing nyan du gzhug pa ste/ bstan pa'i sgra zhes bya ba'i don to/ /ci'i phyir zhe na/ chos kyi 'khor lo bskor bar bya ba ste/ gzhan gyi rgyud la 'phags pa'i lam bskyed par bya'o//gang gi phyir bden pa bstan pa med par ni de mi 'byung ba yin no/ /chos kyi 'khor lo ni chos kyi rang bzhin gyi mtshon gyi bye brag ste/ des phra rgyas kyi dgra zad par byed pas so/ /gang gi phyir phra rgyas ni sdug bsngal gyi rtsa ba yin no/ /'jig rten sus kyang ma bskor ba//zhes bya bas ni chos kyi 'khor lo khyad par du byed de/ gang srid pa gsum na yang dag par rdzogs pa'i sangs rgyas 'od srungs kyi bstan pa nub nas brtsams te/ ji srid de'i dus kyi bar du sus kyang ma bskor ba'i phyir ro/ /ji srid gzhan gyi rgyud la chos kyi 'khor lo rjes su mi 'jug pa de srid dam/ma dad pa de srid du de dag gi nang du yang dag par rdzogs pa'i sangs rgyas gsal bar mi mdzad de/ mi 'thob pa yang dag par 'byung ba'i phyir ro/ /de nyid gsal bar bstan pa'i phyir gsungs pa/ 'jig rten pa la ma bstan par/ /zhes bya ba smos te/ dam pa rnams ston par mi byed na/ 'jig rten na rang gi yon tan grags par mi 'gyur te/ 'jig rten pa'i dbang po las 'das shing dngos po mi rtogs pa'i phyir ro/ /ci zhig byas nas she na/ kun nas 'byung ba mi shes pas/ /zhes bya ba smos te/ ma bstan pa dang ma bskor ba dang / chos kyi 'khor lo ma yin pas so/ /kun nas zhes bya ba ni yongs su ste/ 'jig rten mi shes pa'o/ /rnam grangs gang gis zag pa med pa'i lam 'jig rten pa'i rnam grangs yin no zhes bsdus pa ste/ 'jig rten pa nges par 'byung ba'i thabs zhes bya ba'i don to/ /de ma bstan pa dang 'phags pa'i bden pa bzhi ma bstan pa ste/yod par gyur kyang ma bstan par ro/ /dam pa rnams kyi rtags ni legs par gsungs pa yin no/ /dam pa rnams kyi ngo bo nyid bstan pa'i phyir/ kun mkhyen mya ngan 'das zhes bya ba la sogs pa smos so/ /zag pa med pa'i shes pas bden pa bzhi rtogs te/khams gsum gyi nyon mongs pa'i me yid kyi gdung ba thams cad bsal ba'o/ /sangs rgyas ni dngos po thams cad phyin ci ma log par rtogs pas so/ /mya ngan las 'das pa dang sangs rgyas pa'i rgyu bstan pa'i phyir/ 'jig rten yun las brgal ba zhes smos te/nye bar len pa'i phung po las 'das shing de'i rgyu sred pa spangs pa dang / phra rgyas me dang 'dra ba spangs te/ byang chub thob par byas pa'o/ /de bzhin gshegs pa ni chos bstan pa nyid kyis sems can rnams 'dul bar mdzad kyi/ sngags la sogs pa'i sbyor bas ni ma yin yin no zhes bstan pa'i phyir/dpa' bo zhes bya ba la sogs pa smos so/ /nye rgyal dang pang nas skyes gnyis 'khor dang bcas pa rab tu byung ba las/ rgyal po'i khab kyi mu stegs can gyi rab tu byung ba la sogs pas de gnyis bsod snyoms kyi phyir 'jug pa mthong nas 'di skad ces/thams cad khyer nas da yang ci zhig khyer bar byed/ /ces smras pa dang / ji tsam na bcom ldan 'das kyis bka' stsal ba/ gal te yang de dag de ltar smra bar gyur na/ tshe dang ldan pa rnams kyis tshigs su bcad pa 'di brjod par bya'o zhes gsungs so/ /'dul bar mdzad pa ni bdag nyid bzang por byed de/lam log pa nas bzlog cing lam la 'jog par byed pa ste/ rab tu byung ba 'thob par byed ces bya ba'i don to/ /'di na ni zhes bya ba ni rgyal po'i khab ma bstan pa'o/ /dpa' bo chen po zhes bya ba ni gzhan gyi don bya ba la brtson 'grus khyad par can sbyor ba'o//'dir 'khrul pa med pa'i thabs bstan pa'i phyir/ chos kyis zhes bya ba smos te/ phyin ci ma log pa'i thabs bstan pas yin gyi mchog sbyin la sogs pas ni ma yin no/ /de bzhin gshegs pa rnams zhes bya ba ni sangs rgyas bcom ldan 'das te/ ye shes dang spangs pa phun sum tshogs pa'i phyir ro//de dag chos kyis btul ba la/ /zhes bya ba ni rigs pa dang 'tshe ba med pa'i tshul gyis bstan pa la sogs pas bdag nyid legs par byed cing de dang de slob ma nyid du sgrub par mdzad do/ /de dag de bzhin gshegs pa la su yang smod mi byed ces bya ba ni yon tan yin yang skyon du bsgrags pa ni smod pa ste/su zhig skyon med pa la 'phya bar byed pa zhes bya ba'i don to/ /mkhas pa ni rtogs pa ste/ de'i yon tan rig pa'o/ /gang gzhan gyi don byed cing smad du med pa la mchod par 'os pas dga' bar bya ba yin no zhes bstan pa'i phyir/ brtan gang ting 'dzin la zhugs shing //zhes bya ba ste/ bcom ldan 'das bya rgod kyi phung po la me'i khams la snyoms par zhugs pa mthong ste/ lha la sogs pa shin tu tshim pa dang mgu bar byed de/ nam zhig na bdag cag gis de bzhin gshegs pa'i bdag nyid chen po 'di lta bu thob par 'gyur zhes so//ting nge 'dzin la zhugs zhes bya ba ni ting nge 'dzin bsgom pa la shin tu brtson pa'o/ /brtan pa ni brtan pa'i sbyor ba ste/ ming brtan pa la ni rtag tu sbyor ba dang gus par sbyor ba med pa'i phyir ro/ /nges 'byung zhi la dga' ba dang / /zhes bya ba ni nges par 'byung ba dang zhi ba de la dga' ba ste/lam dang lam gyi 'bras bu 'thob pa la 'dun pa zhes bya ba'i don to/ /snga mas sbyor ba phun sum tshogs pa bstan nas 'dis ni bsam pa phun sum tshogs pa bstan no/ /su zhig dga' ba yin zhe na/ lha dang mi rnams te/ de dag nyid la de bzhin nyid brtag pa yod pa'i phyir ro//ci'i phyir de dag la dga' ba yin zhe na/ 'di ltar rdzogs pa'i sangs rgyas zhes bya ba yin te/ de nyid bstan pa'i phyir rdzogs pa'i sangs rgyas zhes bya ba de rnams ni thams cad mkhyen pa nyid yin pa'i phyir te/ gang gi phyir thams cad mkhyen pa nyid ni 'jig rten thams cad kyis dga' bar bya ba yin no//de nyid bstan pa'i phyir gsungs pa/ grags ldan zhes bya ba ste/ grags pa shin tu shas che bar gyur pa ste/ srid pa gsum du snyan pas khyab pa'i phyir ro/ /dga' bar byed pa ni don du gnyer bar byed pa'o/ /de nyid kyi khyad par bstan pa'i phyir smras pa/shes rab myur ba zhes bya ba thugs rje chen po'i brtson 'grus khyad par can dang ldan pa'i phyir myur ba ste grims shing le lo med pa'i blo gang la yod pa de zhes tshig rnam par sbyar ro/ /sems can gyi don yongs su bya ba brtag pa la rgyun du 'jug pa'i blo ste/ su zhig ni nyams su zhig ni 'phel zhes bya ba'i tshig gis so//stobs snga mas 'jig rten las 'das pa'i shes pa bstan nas/ 'dis ni 'jig rten pa'i thams cad mkhyen pa nyid de/ ye shes 'jig rten pa yin pa'i phyir ro/ /sku yi tha ma 'dzin pa'i zhes bya ba ni tha ma'i sku 'dzin pa'o//'dis ni ye shes phun sum tshogs pa bstan te/ 'khor ba'i tha ma ni ye shes kyi 'bras bu yin pa'i phyir ro/ /ye shes kyis ni thar pa thob par 'gyur ro zhes mdo las gsungs so/ /ting nge 'dzin la sogs pa'i khyad par gyi rtsa ba'i rgyu bstan par 'dod pa'i phyir/ gang dag 'das pa zhes bya ba la sogs pa smos so//khyim bdag bzang sbyin bcom ldan 'das la chos nyan cing 'dug pa na/ ko sa la'i rgyal po gsal rgyal bcom ldan 'das kyi spyan sngar 'ongs te/ mdun bsu ba ma byas pas de 'khrugs par gyur to/ /des chos nyan pa'i phyir gsol ba btab pa las ji tsam na tshigs su bcad pa gsum po 'di gsungs so//gang dag 'das pa'i rdzogs sangs rgyas/ /zhes bya ba ni gang dag 'das pa'i 'od srungs la sogs pa'o/ /gang dag ma byon sangs rgyas dang / /zhes bya ba ni byams pa la sogs pa 'byung bar 'gyur ba ste/lo bye ba phrag brgya lnga bcu rtsa lnga dang / stong phrag drug cu na/ de bzhin gshegs pa byams pa 'byung bar 'gyur ba'o/ /gang dag da ltar rdzogs sangs rgyas/ /zhes bya ba ni da ltar byung ba'i dus kyi bcom ldan 'das shAkya thub pa nyid bstan pa yin no/ /de nyid kyi khyad par bstan pa/ mang po'i mya ngan sel mdzad pa/ /zhes bya ba gdul bya gzhal du med pa'i mya ngan rnam pa sna tshogs pa rtsa nas 'byin pa'o/ /sngar bstan pa de dag kyang / mang po'i mya ngan sel mdzad pa/ /zhes bya ba 'di dang sbyar ro/ /kun gyi dam chos bla mar mdzad pa bzhugs gyur cing / /zhes bya ba ni thams cad kyis kyang 'di nyid de 'das pa'i sangs rgyas kyis kyang dam pa'i chos bstan pa bsgrub pa dang /gus pa khyad par can gyis gnas shing bzhugs par gyur to/ /bzhugs pa dang zhes bya ba ni da ltar gyi de bzhin gshegs pa yang dam pa'i chos la bla mar mdzad cing bzhugs pa yin no/ /de bzhin du bzhugs par 'gyur zhes bya ba ni ma 'ongs pa'i sangs rgyas rnams kyang dam pa'i chos la bla mar mdzad cing bzhugs par 'gyur ro//ci'i phyir zhe na/ 'di ltar de nyid bstan pa'i phyir 'dir/ rdzogs sangs rgyas kyi chos nyid yin/ /zhes bya ba smos te/ gang gi phyir dam pa'i chos la bla mar byed pa yang dag par bskyed pa ni sangs rgyas thams cad kyi rang bzhin yin te/de'i khyad par mkhyen pa'i phyir ro/ /rang bzhin gyis rnam par 'gyur ba 'byung ba ni gang zhig su la'ang med do/ /des na de nyid bstan pa'i phyir smras pa/ 'di na bdag dga' zhing zhes bya ba ste/ rgyu de nyid kyi phyir ro//'di ni 'jig rten 'di na'o/ /bdag dga' zhing zhes bya ba ni bdag la phan par 'dod pa'i gang zag ste/ rab tu byung ba 'am khyim na gnas pa'o/ /tshig 'di nyid kyi don gyi bya ba bstan pa'i phyir/ bdag nyid chen po zhes bya ba smos te/ bdag nyid chen po'i rgyu'i yon tan 'dod chags dang bral ba la sogs ba'i yon tan la lhag par 'dod [(]ba [,]pa [)]ste/gang gi phyir yon tan du byas na ni bdag la phan par 'gyur ro/ /de ci zhig bya zhe na/ dam pa'i chos la bla mar bya/ /zhes bya ba ste/ gus par byas nas mnyan pa dang / mchod pa la sogs pa byas te/bla ma bzhin du phan 'dogs par byed pa'i phyir dang / de bzhin gshegs pa rnams kyis kyang mchod pa'i phyir ro/ /ji ltar bdag la dga' ba yin zhe na/ sangs rgyas bstan pa dran par gyis/ /zhes bya ba smos te/ bdag gis 'jig rten na su zhig la bsnyen bkur bya ba dang /bla mar bya ba dang / ri mor bya ba zhes bya ba la sogs pa mdo las gsungs pa yang dag par dran zhing de'i yul la blo shin tu ma nyams par byas te/ gal te sangs rgyas kyang dam pa'i chos la bla mar mdzad na bdag gis bla mar ci'i phyir mi bya zhes yang dag par dran par byas te//de la mngon par brtson par bya'o/ /de bzhin gshegs pa'i bstan pa la yid ches pa'i dad pa kun du ma skyes pa ni blo shin tu nyams te/ phongs pa chen po dang phrad bar 'gyur ro zhes bstan pa'i phyir/ mi gang sangs rgyas zhes bya ba la sogs pa smos so/ /sing ha la'i mdo las/ded dpon sing ha las gzhan dag la 'di skad ces smras so/ /'di na ni srin mo rnams yod de ring bo mi thogs par bdag cag kyang zos par 'gyur bas rta'i rgyal po ba la ha'i rgyab tu zhon la phyi nas rjes su 'ongs par gyur kyang bltas na ni nyams par 'gyur ro zhes smras so/ de las gang dag de'i tshig dang rjes su mthun par spyod pa de dag ni 'dzam bu'i gling du phyin par 'gyur ro/ /de las gzhan pa rnams ni zos par gyur pa las brtsams te tshigs su bcad pa gnyis gsungs so/ /dad pa ma bskyed ces bya ba ni yid ches par yang dag par ma skyes ba'o/ /dang med ces bya bar gzhan dag tu brjod do//byis ba ni rmongs pa ste/ mun khung na gnas pa des ni rigs pa dang mi rigs pa mi mthong ngo / /de bzhin du kun du rmongs pa'i mun pas mngon par gtses pa'i yid kyis ni legs par spyod pa la sogs pa sgrub par mi 'gyur ro/ /mi gang zhes bya ba ni sems can no//gang la la zhe na/ /sangs rgyas kyi bstan pa la ste/ sangs rgyas kyis bstan cing bshad pa la bslab pa ste/ 'di ni bcom ldan 'das kyis bstan pa zhes bya'o/ /rgud pa'i gnas su 'gro 'gyur te/ /zhes bya ba ni mthar sdug bsngal 'thob par 'gyur te/ ji lta bur zhe na/ srin mo rnams kyis tshong pa bzhin/ /zhes bya ba yin no/ /dper na ded dpon sing ha las smras pa'i tshig dang rjes su mi mthun pa'i glen pa ni srin mos 'tsho ba'i srog nyams par byas pa de bzhin du sems can thams cad la phan 'dogs par mdzad pa'i thub pa mchog gis bstan pa ltar mi byed ba'i lus can dag ni sdug bsngal la bstan par 'gyur ro//gang zhig dad pa skyed pa ste/ yang dag par dad pas so/ /dad par byed pa zhes gzhan dag tu brjod do/ /shes rab can gyi mi zhes bya ba ni shes rab kyis de nyid rtog pa gang la yod pa'i mkhas pa ste/ sems can zhes bya ba'i don to/ /de ni bde bar pha rol 'gro/ /zhes bya ba ni 'tshe ba dang sdug bsngal thams cad med pa'i pha rol tu phyin par 'gyur ro/ /sprin shugs ldan pas tshong pa bzhin/ /zhes bya ba ni sprin gyi shugs can zhes bya ba sum cu rtsa gsum pa'i lha'i rta'i rgyal po mthu stobs che ba'o//gang ded dpon gyi tshig rjes su 'jug pa de dag ni rta'i rgyal po sprin gyi shugs can la brten nas/ 'dzam bu'i gling du phyin par 'gyur ba de bzhin du bde bar gshegs pa'i bka' la yid ches pa skyes par gyur pa ni rab tu zhugs pa dang de'i bsgrub pa la brten nas mya ngan las 'das pa'i ngogs su phyin par 'gyur ro//dad pas chos mnyan pa dang / /dad pa sngon du 'gro bas yang dag pa'i kun du rtog pa spyad par bya'o zhes bstan pa'i phyir/ de bzhin gshegs pa mnyam med ces bya ba la sogs pa smos so/ /dge slong dag nga sngon yang dag par rdzogs pa'i byang chub tu mngon par rdzogs par sangs ma rgyas pa na ji tsam na gcig pu dben par song ste rnam par rtog pa bskyed do//ngas ni chos gnyis bsten cing bsgoms la mang du byas bas gnas te/ /dge ba'i chos kyis mi ngoms pa dang / de dag mi mthun pa dag yongs su spangs pa las ji tsam na bla na med pa yang dag par rdzogs pa'i byang chub mngon par rdzogs par sangs rgyas par 'gyur ro zhes rnam par bsams so//khyed cag gis kyang chos gnyis la brten cing mang du byas pas gnas par gyis shig /dman pas chog par ma byed la yang gong nas gong du gya nom zhing ches gya nom pa'i gnas dag la mngon par 'dod pa'i tshul gyis gnas na ni da ring por mi thogs par sems rnam par grol bar 'gyur ro zhes bya ba nas/ji srid du tshigs su bcad pa gnyis gsungs so/ /de bzhin gshegs pa zhes bya ba ni rjes su mthun pa'i tshogs kyis 'thob pa'i phyir ro//sangs rgyas zhes bya ba ni 'byung bar 'gyur ba'i ming gi dbang du byas pa ste/ don gyis dngos po mtha' dag rtogs su rung ba'i phyir ro/ /'dis ni 'bras bu'i gnas skabs bstan nas/ gzhan la phan pa'i gnas skabs ston par byed pa yin no//mnyam med ces bya ba ni bsnyen par dka' ba ste/ lha'i 'jig rten gyis kyang zil gyis mnan cing bsnyen par mi nus pas khyad par du 'phags pa'i gzi brjid dang ldan pa'i phyir ro/ /mnyam pa med pa'i rgyu bstan pa'i phyir/ mtshungs pa med ces bya ba smos te gzhan dag gis gzhal ba dang brtag par mi nus pa'i phyir ro//rnam rtog gnyis po spyod pa zhes bya ba ni rnam par rtog pa rnams kyi nang nas rnam par rtog pa gnyis kho na bcom ldan 'das spyod cing mngon du mdzad pa dang thob par mdzad pa'i phyir ro/ /gnyis po de rnam par 'grel pa ni bde bar rnam rtog de bzhin rab dben pa'i//zhes bya ba smos te/ rnam par mi 'tshe ba'i rnam par rtog pa ni bde bar rnam par rtog pa ste/ 'tshe ba med pa'i bdag nyid kyis mi 'jigs pa sbyin pa'i rgyur gyur pa'i phyir ro/ /de bzhin zhes bya ba'i don ni rab tu dben pa yang zhes bya ba'i don te/rab tu dben pa'i 'bras bu la rnam par rtog pa ni dben pa ste/ nges par 'byung ba la rtog pa zhes bya ba'i don to/ /gnyis po 'di nyid mang du spyod pa yin gyi/ gzhan du 'dod pa la sogs par rnam par rtog pa ni ma yin no/ /'o na mdo las ni dge ba dag la chog mi shes pa dang mi mthun pa rnams spang bar bya'o zhes bstan gyi/bde ba la sogs pa ni ma yin no zhe na/ de ni bden mod kyi de nyid kyi rnam grangs nyid yin pas de ltar bstan te/ dge ba'i rtsa ba thams cad stsogs pa la 'tshe ba med pa'i bsam pa'i rgyus yin pa'i phyir dang /bgegs med pa'i phyir dang / nges par 'byung ba'i tshul yin pa'i phyir dang / spang bar bya ba spangs pa'i phyir ro/ rnam par rtog pa gnyis po kun du spyod pa'i 'bras bu bstan pa'i phyir/ mun bsal zhes bya ba ste/ mun pa bsal zhing spong ba ni ma rig pa'i mun pa thams cad rtsa nas phyung bas so//pha rol gshegs zhes bya ba ni phung po lhag ma dang bcas pa'i mya ngan las 'das pa'i dbyings thob pa'o/ /grags dang ldan zhes bya ba ni snyan pa dri ma med pa dang ldan pa ste/ lha dang mi rnams su grags pa rnam par 'phro ba'i phyir ro//'di dag thams cad kyi khyad par yang 'byung bar 'gyur ba'i ming gi dbang du byas pa ste/ de'i tshe ni 'di med pa'i phyir ro/ /bde ba zhes smos pas ni rnam par mi 'tshe ba'i rnam par rtog pa bstan to/ /tha dad par brjod pa ci'i phyir zhe na/ 'dir rnam par rtog pa'i khyad par las yang dag par rdzogs pa'i byang chub skye bar bstan te/bshad pa nang gi bya ba dang 'brel ba'i phyir phyi rol gyi bya ba 'byung ba yin te/ de grub pas ni de yang 'grub pa nyid de des na bsod nams dang ye shes kyi tshogs ni de'i kun du rtog pa las skyes pa yin no zhes bstan pa'i phyir bcom ldan 'das kyis 'di skad gsungs so zhes mtshon pa yin no//yang na sangs rgyas nyid kyi gnas skabs kho na snga ma'i gnas skabs nyid du gyur pa ste/ rnam par rtog pa gnyis po mngon du byas par gyur pa'o/ /lhag ma ni snga ma bzhin no//rnam par rtog pa gnyis po ji ltar spyod pa yin zhe na/ de nyid bstan pa'i phyir/ des ni brnyes bya brnyes shing yid dbang gyur/ /ces bya ba la sogs pa smos so/ /des zhes bya ba ni de bzhin gshegs pa'o/ /yang dag par rdzogs pa'i byang chub thob par bya ba thob ste/sems la dbang ba nyid kyi dbang phyug des sems la dbang bar gyur pa'o/ /kun sgrol zhes bya ba ni thams cad sgrol ba ste/ thams cad zil gyis gnon pa zhes bya ba'i don to/ /'jig rten gsum gyi ston pa gcig pus ni bgegs rnam pa bzhi ste/sred pa dang / gti mug dang / zhe sdang dang / nga rgyal rnam pa bzhi spangs pa'i phyir thams cad zil gyis mnan te gnas pa'o/ /de'i rim pas bstan pa ni/ zag zad ces bya ba sogs pa ste/ rjes su chags pa'i kun du sbyor ba spangs pa'i rgyus ni rnam pa sna tshogs pa'i chags pa las shin tu grol ba'o//gang gi phyir sred pa ni dra bar bshad na de ltar spangs pa de ci'i phyir zhe na/ 'di ltar ma rig pa las rnam par grol ba'i thugs dang ldan pa zhes bya ba smos so/ /gang gi phyir rten cing 'brel par 'byung ba rab tu brtags pa las mi shes pa las grol ba'i sems gang la yod pa ste/mi shes pa dang ldan pa nyid la ni srid pa 'byung ngo / /de med pa kho nas ni de dang bral bar bstan to/ /zhe sdang gi rtsa ba ni sred pa dang mi shes pa yin no/ /sred pa dang mi shes pa spangs pas ni zhe sdang 'jig pa yin no zhes bstan pa'i phyir smras pa/tha ba zhes bya ba smos pa la khro ba dang bral ba'o/ /dregs pa ni smad pa nyid pas gzhan dag bsal bar mi nus so zhes bstan pa'i phyir/ zag med rnams zhes bya ba smos te/ nga rgyal dang phrag dog la sogs pa'i dri ma spangs pa zhes bya ba'i don to//bdag gi don mdzad nas gzhan gyi don mdzad par bstan pa'i phyir/ rnam par gzigs zhes bya ba smos te/ sangs rgyas kyi spyan gyis kun du gzigs pa'o/ /ci'i phyir zhe na/ 'jig rten rnams la phan pa'i phyir zhes bya ba yin te/ 'khor ba las gdon ba dang sdug bsngal las bskyab pa'i phyir su ni rgud su ni dar zhes bya ba la sogs pa'i tshig gis so//su zhig la gzigs she na/ lus can zhes bya ba la sems can gdul bya la zhes bya ba'i don to/ /'di nyid la don gyi bya ba 'byung ba'i phyir ro/ /gzhan gyi don mdzad pa'i thabs bstan pa'i phyir/'ga' zhig ri bo'i zhes bya ba la sogs pa smos so/ /chos bstan pa'i phyir tshangs pa chen pos bcom ldan 'das la gsol pa las tshigs su bcad pa 'di gnyis bka' stsal to/ /ri bo ni brag go/ /spo ni rtse mo la'o/ /la ni nges par gzung ba ste/ ri bo'i spo nyid la 'dug na ni thag ring por gyur pa yang kun du mthong ba yin gyi gzhan du ni ma yin te/ ri'i spo nyid la gnas pas ni bgegs med par thams cad mthong ba yin no/ /'ga' zhig 'dug nas su zhes bya ba ni mig dang ldan pa'i skyes bu 'dug cing gnas pa'o/ /'gro ba rnams la kun du lta ba ltar//zhes bya ba ni ji ltar bltas par gyur pa'o/ /'gro ba rnams ni skye bo'i tshogs so/ /kun du zhes bya ba ni thams cad du'o/ /de bzhin chos las byung ba'i zhes bya ba ni dpe de dang 'dra ba ni de bzhin no/ /ri chen po'i spo dang 'dra ba'i yon tan gyi tshogs kyi ngo bo'i khang bzangs mtho ba gzhal med khang dang 'dra bar 'dzegs nas so//blo bzang ni mkhas pa'o/ /de nyid kyi khyad par bstan pa'i phyir/ kun du spyan gzigs nas zhes bya ba smos te/ thams cad du 'gro ba'i ye shes kyi spyan te/ de bzhin nyid mkhyen pa dang brtson 'grus gnyis kyi thugs rjes gzhan gyi don mdzad pa yin no//snying rje nyid bstan pa'i phyir smras pa/ mya ngan gyis gdungs pa rnams la zhes bya ba ni mya ngan gyis nye bar gdungs pa'o/ /skyo bo ni skye bo'i tshogs so/ /skye ba dang rga bas zil gyis gnon pa zhes bya ba 'di ni 'di gnyis kyis nye bar gtses pa'i phyir te/gang gi phyir skye ba dang de rnam par 'gyur bas gtses pa'o/ /de las gzhan na ni de'i nang du 'dus pa'i phyir ro/ /de mya ngan dag med par gyur pa ni mya ngan dang bral ba kun du gzigs pa ni rnam par gzigs pa ste/ snying rje chen po skyed pas bcom ldan 'das kyis tshangs pa chen po mdun du pus mo btsugs pa la 'di skad gdams so//'byed mdzad kyis zhes bya ba ni dbye bar bya ba'o zhes so/ /'chi ba med pa'i sgo mo ni thar par 'jug pa'i thabs te/ 'phags pa'i lam bstan cing gsal bar bya'o zhes pa'o//gang dag nyan 'dod ces bya ba ni gang dag mnyam pa la kun du rtsol zhing 'dod pa'o/ /ji lta bur de mnyan pas dus mtha' yas pa nas bsags pa'i the tshom ni yid gnyis te/ bden ba'i yul la yid mi ches pa ni thams cad du bsal bar gyis shig pa ste/yongs su spongs shig pa'o/ /'chi ba med pa'i lam ni the tshom spangs pa yin pa'i phyir ro/ /de bzhin gshegs pa'i tshoms te nyi shu gcig pa'i rnam par 'grel pa rdzogs so// //thugs rje chen po rnams ni de bzhin gshegs pa'i go 'phang thob par mdzad nas gzhan gyi don du chos ston pa la brten par mdzad de/de bas na dam pa'i chos bstan pa mnyan pa la gzud par bzhed pas thos pa'i phan yon bstan pa'i phyir smras pa/ legs par thos dang zhes bya ba la sogs pa'o/ /yang na de bzhin gshegs pa'i go 'phang 'thob pas gzhan la bstan pa ma gtogs par ni gdul bya khyad par go 'phang 'thob par mi nus pa yin te/de bas na bstan pa'i phan yon bstan pa'i phyir ro/ /mnyan yod na gnas pa'i bram ze dang khyim bdag rab tu mang po dag 'du khang dag tu 'dus te/ gtam brjod par bya'o/ /ci khyed cag legs par bstsags pa gang yin zhes pa dang /kha cig gis smras pa/ longs spyod bzang po nye bar longs spyod pa'o zhes zer ro/ /gzhan dag ni longs spyod pa dang bu la sogs pa yin no zhes zer te/ ji tsam na bcom ldan 'das kyis de'i dbang du mdzad de tshigs su bcad pa gnyis gsungs so//legs par thos dang zhes bya ba ni 'di la dam pa'i chos nyan pa ni rab tu bsngags te/ yon tan thams cad kyi gzhi yin pa'i phyir ji skad du/ thos pa gti mug mun sel sgrol ma yin/ /zhes gsungs pas so/ /legs spyod dang zhes bya ba ni de'i 'og tu lus la sogs pa legs par spyod pa kun du spyod pa ni rab tu bsngags pa ste/ngag gi phyir thos pa tsam gyi sman gyis ni nad zhi bar byed mi nus te/ mngon par 'dod pa'i bstan pa ni sgrub pa snying por byed pa yin pa'i phyir ro/ /dang gi sgra ni legs pa'i sgra 'og ma yang 'dren pa'i phyir ro/ /dang 'og ma'i sgra ni srid pa'i tshul lo//khyim nas legs par byung ba ni khyim yod pa ma yin pa ni khyim nas legs par byung ba ste 'jug pa'i khyim gyi gnas med pa gang yin pa de ni de nyid do/ /de legs par byung ba nyid ni rab tu byung ba ste/ de yang legs pa'o/ 'di ltar g.yeng ba med cing dam pa'i tshul bsrung ba'i thabs yin pa'i phyir ro//spong bar byed pas rab bskor cing / /zhes bya ba la/ rab bskor zhes bya ba ni rjes su mthun par 'jug pa ste/ de spangs pa ni thar pa'o/ /de yang rnam par smin pa legs par 'thob pa ste/ thar pa'i cha dang ldan pa zhes bya ba'i don to//dge sbyong gi ni rjes mthun legs/ /zhes bya ba lugs su 'byung ba'i dngos po yin pas rjes su mthun pa ste/ 'phags pa'i lam 'thob par byed pa'i phyir nges par 'byed pa'i cha la sogs pa ste/ de yang legs pa nyid de 'og ma bzhin du bsngags pa'i phyir ro/ /gang dag kha cig rnam pa lnga po 'di mi shes pas mi 'jug ste/de nyid bstan pa'i phyir/ byis pa mi mkhas pa dag ni zhes bya ba la sogs pa smos so/ /gang gi phyir mi shes pa la yid gnas pa de'i phyir thar pa'i bde ba 'di ma rtogs pa yin no/ /'khor ba la sogs pa la bdag nyid skyo bar mi byed pa ni byis pa ste/des na yang de dag 'chi ba med pa lta bur spyod ces bya ba srid pa shin tu 'jigs su rung ba yin na/ yang dogs pa med par lta bzhin du bag med pas mi 'chi ba'i khang pa dang skyed mos tshal la sogs pa la spyod pa yin gyi mya ngan las 'das pa la ni ma yin no//mkhas pa dam pa'i chos dag la/ /zhes bya ba ni gang yang gsung rab yan lag bcu gnyis thob pa las byung ba'i shes rab kyis shes pa yin te/ de ni 'khor ba'i gnas skabs cung zad kyang nye bar gdung bar byed cing skyo bar byed pa'o/ /yang na chos ni 'phags pa'i bden pa bzhi la 'jig rten las 'das pa'i shes pas rtogs pa'o//'dir dper brjod pa bstan pa'i phyir/ mtshan mo'i nad pa bzhin du byed/ /ces bya ba smos te/ dper na nad kyis btab pa dag ni mtshan mo dang mi mthun pa yin te/ gzhan skyo bsang ba dag med pa'i phyir dang /nad lhag par 'byung ba yin pas nad pa rnams shin tu gdung bar byed pa yin te/ de bzhin du mkhas pa dag kyang skye ba la'o/ /chos thos pa ma gtogs par ni de bzhin nyid shes pa byis pa las 'byung ba med do zhes bstan pa'i phyir/ ji ltar khyim ni zhes bya ba la sogs pa smos so/ /dge slong dag byis pas ni 'phags pa'i bden pa bzhi 'di lta ste/ sdug bsngal nas lam gyi bar du mi shes te/ ji ltar yang ma rig pa'i sgrib pas bsgribs pa'i phyir te/ dper na skyes bu kun nas g.yogs pa'i khyim gyi nang du zhugs na der gzugs la sogs yod bzhin du mi mthong ngo zhes pa nas ji srid du tshigs su bcad pa gsum gsungs so//ji ltar ni dper na'o/ /khyim ni khang pa ste gnod pa med par byed cing der zhugs na grang ba la sogs pas mi nyen pa zhes bya ba'i don to/ legs par g.yogs pa'i kun nas g.yogs pa'o//nang gzugs zhes bya ba ni de'i nang du gnas pa'o/ /khyim de ji lta bu zhe na/ mun pas khebs pa'i zhes bya ba ste mun nag gis khyab pa'o/ /gzugs rnams yod par gyur kyang ni/ /zhes bya ba ni de na bum pa dang snam bu la sogs pa'i dngos po rnam par gnas par gyur kyang ngo //mig dang ldan bzhin mi mthong ba/ /zhes bya ba ni mig la skyon med par gyur na yang mi mthong ngo / /de bzhin 'di na zhes bya ba ni 'di ltar 'jig rten 'di na sems can la la'o/ /rigs ldan yang zhes bya ba ni gang la bsngags pa'i rigs yod pa'o//rigs ldan la sogs zhes bya ba brjod par bya ste/ sogs pa'i sgra ni byis pa yin te/ kha dog dang gzugs khyad par can dang ldan pa yin yang ngo / /ma thos bar du shes mi 'gyur/ /zhes bya ba ni mnyan cing ma brtags par ni rtogs par mi 'gyur ro/ gang zhig ce na/ chos zhes bya ba yin te/ dngos po'i don gyi ngo bo'o/ /dge ba dang ni sdig pa zhes bya ba ni rab tu bsngags pa dang ma bsngags pa'o/ mig ldan mar me yod pa yis/ /gzugs rnams mthong ba ji lta bar/ /zhes bya bas ni yang dper na mig dang ldan pas khang pa legs par g.yogs pa'i nang du zhugs pa na gzugs la sogs pa me sgron gyi thabs kyis mthong bar byed do//de bzhin du rigs la sogs pa dman pa'i skyes bu yang chos mnyan pas de bzhin nyid kyi dngos po la yid ches par 'gyur ro/ /khyad par gyi chos thams cad ni thos pa la rag las pa yin no zhes bstan pa'i phyir/thos pas chos rnams rnam par shes/ /zhes bya ba la sogs pa smos so/ /lha zhig gis gsol pa/ /chos rnams gang gis shes 'gyur zhing / /sdig las gang gis ldog par 'gyur/ /don med gang gis spong ba dang / gang gis mya ngan 'das thob 'gyur//zhes zhus pa dang / des na 'di gsungs so/ /thos pa zhes bya ba ni rna ba'i rnam par shes pa gtad pas des drangs pa'i yid kyi rnam par shes pas so/ /chos rnams zhes bya ba ni phyin ci ma log pa'i bstan pa'o/ 'di thos nas ci zhig rnam par shes par 'gyur zhing nges par byed ce na/dngos po'i de bzhin nyid de/ de bas na gnas skabs kyis bsgrub pa yin te/ de bzhin gshegs pas bstan pa'i chos kyi dngos po'i de bzhin nyid la brjod do/ /ji ltar yang 'di na gcig tu de bzhin gshegs pas bstan pa'i chos 'dul ba thos nas rnam par shes par 'gyur te/'di lta ste chos 'di nyid ni gang tshul khrims dang ting nge 'dzin dang shes rab yongs su ston pa yin gyi/ phyi rol mu stegs pa'i me dang chu la 'jug pa dang / zas gcod pa la sogs pa ston pa ni ma yin no/ /thos pas sdig las ldog par 'gyur//zhes bya ba ni ngan par spyod pa las ldog pa ste/ ji ltar yang gcig tu de bzhin gshegs pas bstan pa'i chos 'dul ba lhag pa'i tshul khrims kyi bslab pa thos shing de bsgrubs pas ngan par spyod pa rnam pa bcu las ldog pa yin no/ /thos pas don med spong bar byed//ces bya ba ni ji ltar gcig tu de bzhin gshegs pas bstan pa'i lhag pa'i tshul khrims kyi bslab pa thos nas de la brten nas don med par gyur pa'i 'dod pa spong ba yin no/ /gang byis pa dag ni don yod pa'i 'du shes byed do/ /thos pas mya ngan 'das pa 'thob/ /ces bya ba ni ji ltar yang 'di na gcig tu de bzhin gshegs pas bstan pa'i lhag pa'i shes rab kyi bstan pa thos shing de la brten pas nyon mongs pa 'gog pa thob pa yin no//yang na chos thos pas ni go rims bzhin du las dang nyon mongs pa dang skye ba'i kun nas nyon mongs pa spangs pa thob par 'gyur ba'o//yang na/ thos pas chos rnams rnam par shes/ /zhes bya ba ni dge bar byed pa'o/ /thos pas sdig las ldog par 'gyur/ /zhes bya ba ni ngan par spyod pa mi byed pa'o/ /thos pas don med spong bar 'gyur/ /zhes bya ba ni sdig pa can gyi skye bo mi bsten pa'o//gsum po 'di la brten cing lam bsgoms pas ni mya ngan las 'das pa 'thob par 'gyur ro/ /yang na dge ba dang mi dge ba'i chos kyi dngos po rtogs par 'gyur zhing de nas sdig pa las ldog par 'gyur ro/ /dge ba lhag par spyod pas mi 'dod pa'i 'gro ba spong bar byed do zhes bya ba la sogs par brjod par bya'o//thos pa dang tshul khrims kyis ni mdzes par 'gyur ro zhes bstan pa'i phyir smras pa/ gal te thos pa mang gyur pa/ /zhes bya ba la sogs pa'i tshigs su bcad pa lnga'o/ /gang zag bzhi yod de de la gang zag thos pa mang ba gang zhe na/thos pa dang ldan par brjod pa ni 'di ni thos pa mang ba ma yin te/ /thos pa ni gzhi yin te/ thos pas bsags shing zhes de la chos kyi don mi shes pa dang chos mi shes pas chos la chos kyi rjes su zhugs pa dang mthun par zhes bya ba nas ji srid mu bzhi'i bar du ste/des na 'di dag gsungs so/ /'di la mang du thos pa de nyid ni mang po thos pa dang / lan mang du thos pa dang mang du mnyan pas mang du thos pa zhes brjod pa yin no/ /gal te zhes bya ba ni ji ste des bye brag tu smras pa la sogs pa'i rtogs pa ste/ sde snod gsum gyi don dang tshig 'bru ji lta ba bzhin du shes pa'o//tshul khrims legs par mi sdom pa/ /zhes bya ba ni bdun las ldog pa dang chang 'thung ba sdong ba dang / yang dag pa'i 'tsho ba ste/ bslab pa rnam pa dgu la gus par mi byed pa'o/ /legs par sdom pa ni legs par mnyam par bzhag pa'o//de las bzlog pa ni legs par mi sdom pa'o/ /chos mi sgrub pa yin te/ chos kyi rjes su zhes bya ba'i don to/ /de ni tshul khrims phyir smad cing / /zhes bya ba ni bslab pa yongs su mi srung ba'i sgo nas de mang du thos shing khong du chud kyang khyad par du smad pa yin te/'jig rten na lam mnyam po na mig dang ldan pa'i skyes bu yang nas yang du 'gyel ba bzhin no/ /ci'i phyir zhe na/ 'di ltar/ de yi thos pa phun sum min/ /zhes bya ba ste/ gang zag 'di ni tshul bzang po dang bral ba yin pa'i phyir thos pa tsam gyis ni rang gi phun sum tshogs pa med do//thos pa'i rgyan ni sgrub pa yin la bzhin gyi rgyan ni mig yin no zhes bya ba'i tshig gis te/ gal te thos pa mang bar gyur kyang 'bras bu dang bcas pa ma yin na zhes bya ba'i don to/ /gal te thos pa nyung gyur kyang / /zhes bya ba ni gang gi phyir thos pa ji ltar chung bar gyur kyang thos pa bsgrub par byas na dam pa rnams kyis bsngags pa yin zhing de'i thos pa don chen por 'gyur te/sha ra dwa ti'i bu la sogs pa 'dir dper brjod par bya'o/ /gang zhig thos pa nyung ba dang / /zhes bya ba ni gang zhig thos pa yang nyung la bslab pa la yang ma gus na de nyid gnyis kyi phyir dam pa rnams kyis smad pa yin te/thos pa nyung ba dang tshul khrims 'chal pa gnyis kyis so/ /ci'i phyir zhe na/ de yi brtul zhugs phun sum min/ /zhes bya ba de'i rab tu byung ba ni 'bras bu dang bcas pa ma yin te/ yan lag ma tshang ba'i phyir ro/ /thos pa mang ba dang tshul khrims dang ldan pas ni rab tu byung ba rdzogs par 'gyur zhing ngang tshul bzang po phun sum tshogs par 'gyur gyi gzhan du ni ma yin no//thos pa mang bar 'gyur ba yang dper na mig g.yas pa dang ldan par gyur kyang cig shos med na bzhin mdzes pa ma yin no/ /de bzhin du cig shos kyang brjod par bya'o//gang zhig gi mig gnyi ga skyon med pa de ni shin tu mdzes pa'i mig yin te/ de yang 'jig rten na shin tu bsngags pa yin pa de bzhin du thos pa dang tshul khrims dang ldan pa ni rab tu mdzes pa yin no/ /lhag ma ni rtogs par sla'o/ /de nyid nyid gsal bar byed de thos pa mang ba ni gsung rab thams cad kyi don dang tshig 'bru rtogs pa'i phyir ro//chos 'dzin pa dang zhes bya ba ni dran pa'i khyad par dang ldan pa'i phyir te/ de yongs su nyams pa med par bstan pa'o/ /shes rab ldan zhing zhes bya ba ni de la brten pas thos pa las byung ba'i shes rab la sogs pa 'thob pa'i phyir ro//mnyam par gzhag pa ni bslab pa la gus pa ste/ mdo las de'i gnas skabs yin pa'i phyir ro/ /de dag sus kyang smad 'os min/ /zhes bya ba ni lha dang mi dang de las gzhan pa dag gis kyang de dag la nam yang smod pa la 'jug par mi 'gyur te/gang zhe na/ 'dzam bu'i klung gi gser rgyan bzhin/ /zhes bya ba smos te/ rgyan ni dge ba'i mgar bas byas pa'i rgyan no/ 'dzam bu'i klung gi gser zhes bya ba ni gser shin tu bzang po rnam par bsgyur ba'o/ /rnam pa gnyis ni smad pa yin te/bzo ma byas pa dang / rdzas ngan pa ste/ de la ni gnyi ga med do/ /shing 'dzam bu nang nye bar gnas pa gang yin pa de ni 'dzam bu chu bo'i gser te 'dzam bu chu bo'i gser ni shin tu bzang po zhes bya ba'i don to/ /thos pa mang po la sogs pa med pa dang yod pa'i nyes dmigs dang / phan yon bstan pa'i phyir/ gang zhig gzugs kyis rjes dpog cing / /zhes bya ba la sogs pa smos so/ /'phags pa lan tshwa bzang po'i sgras rgyal po gsal rgyal yongs su dga' ste/ de mchod pa'i phyir kun dga' bo dang lhan cig tu de'i drung du 'ongs pa dang / de gzugs shin tu mi sdug pa mthong nas shin tu skyo ba skyes te/mchod pa'i yo byad mdun du bzhag nas slar log go/ /de nas des sngon sangs rgyas kyis gsungs pa'i tshigs su bcad pa lnga po 'di smras so/ /gang zhig ces bya ba ni sems can te gsal rgyal la sogs pa'o/ /thos pa mang po med cing sems ma bsgoms pa'i phyir dang ye shes kyi me ma sbar ba'i phyir ro//gzugs kyi rjes dpog cing zhes bya ba ni pha rol mthong bas kha dog dang dbyibs tsam gyis yongs su gcod cing gzhan gyis tshad len par byed de gzugs sdug pa dang gzugs mi sdug pa gnyis kyis yon tan dang skyon nyid du rtogs par byed do//nga zhes bya ba na 'phags pa lan tshwa bzang po bdag nyid bstan to/ /gang zhig nga'i gzugs shes pas ni phyi rol gyi shes pa yin gyi nang gi sems ni ma yin no zhes bya ba'i don to/ /sgra yis 'jal bar byed pa zhes bya ba ni sgra snyan pa'i rjes su 'jug cing skad snyan pas yon tan du shes par byed de/mdog ngan pas ni skyon dang ldan par yang rtogs par byed do zhes bya ba'i don to/ /log par rtogs pa ni nyon mongs pa'i rgyu yin no zhes bstan pa'i phyir/ 'dun pa'i 'dod chags ldan pa yi/ zhes bya ba smos so//ting nge 'dzin gyi sgrib pa ni gzugs kyi 'dod chags kyi sgrib par gyur pa ste 'dod pa la 'dod chags zhes bya ba'i don to/ /'dod pa'i 'dod chags ni 'dod pa byed pa la 'jug pa ste/ gang gi phyir des dbang du byas pas gzugs sdug pa la sogs pas ni 'dod par byed la/gzugs mi sdug pa la ni zhe sdang bar byed do/ /skye bo de yis nga mi shes/ /zhes bya ba ni mnyam par gzhag pa'i shes pa med pa'i phyir mi shes pa ste/ mnyam par gzhag na ni ji lta ba bzhin du mthong bar 'gyur ro zhes bya ba'i tshig gis so/ /'dod pa'i dbang du song bas ni yon tan khyad par can mthong ba'i mthu med de/de bas na ji ltar des yon tan can shes par 'gyur zhes pa'o/ /gzhan dag brjod pa ni sangs rgyas mthong bas a gar mi ta zhes bya ba'i kun du rgyus dpe med ma blangs te nags su song nas bcom ldan 'das la mchod pa byas te/de'i dbang du mdzad nas 'di gsungs so zhes zer ro/ /'di skad ston pa yin te/ 'di ltar yang 'di na gcig tu so so'i skye bo 'dun pa'i 'dod chags spangs pa skyes bu chen po'i mtshan sum cu rtsa gnyis dang ldan pa'i de bzhin gshegs pa la 'di ltar rtog pa byed de/'di ni nges par 'khor los sgyur ba'i rgyal por 'gyur ro/ /yang sgra shin du snyan pas ni nges par gling bzhi la rjes su ston par byed de/ de'i khyad par gyis gzhan dag la yang de 'dul bar byed cing 'dren par byed pa yin no zhes so/ /gzhan dag ni kun du rgyu zhig thams cad mkhyen pa 'dod cing rgyal byed kyi chal du zhugs pa na bcom ldan 'das chos ston cing bzhugs pa mthong nas mngon par dad de/bcom ldan 'das thams cad mkhyen pa'i chos 'di ni legs par gsungs pa/ nyan thos kyi dge 'dun ni legs par zhugs pa yin no zhes lta ba bzang po rnyed do//bcom ldan 'das la dga' nas de'i 'og tu mnyan yod na gnas pa'i kun du rgyu'i skye bo la smod par byed do zhes pa dang / skabs 'di la 'di gsungs so/ /de'i phyir gang su dag gis gzugs phun sum tshogs par bcom ldan 'das la bltas te dad pa skyes par gyur pa'am/skyes bu dam pa la brten pa'am/ dam pa'i chos mnyan pa la sogs pa la yang zhe sdang bar 'gyur te/ chos kyi sku ma rtogs pa ste shes nas dad pa med pa'i phyir ro/ /tshigs su bcad pa snga ma'i/ gang zhig gzugs kyis zhes bya ba dang /nga la sgra yis zhes bya ba gnyis kyis gzugs dang / chos kyi sku'i phyi rol dang nang gi gzugs bstan te/ de gnyis las gzhan pa yongs su mi shes pa'am thams cad ma shes pas ni ci rigs par drang du rung ngo zhes bstan pa'i phyir/ gal te nang ni rnam shes shing / /zhes bya ba la sogs pa smos so/ /nang zhes bya ba ni bdag nyid de bdag gi nang du gnas pa'i yon tan no/ /gal te zhes bya ba ni brgya la'o/ /thams cad kyis kyang gzhan gyi rgyud la gnas pa'i yon tan ni 'ga' zhig kyang gcad par mi nus te/'on kyang gang gi tshe rnam par shes shing yongs su gcod par nus na zhes bya ba'i don to/ /dper na gcig pu yongs su mya ngan las 'das pa'i bcom ldan 'das dang / de'i nyan thos kyi tshogs des bstan pa'i lam la zhugs te/ gsung rab la goms pas bskyed pa de'i lhag par mos pas thos pa dang /bsams pa las byung ba'i shes rab dag gis sgrub par 'gyur ba de ni de bzhin gshegs pa'i chos kyi sku nyid do/ /de'i gzhi gzugs kyi sku lhag par mthong ba ni ma yin te/ yongs su mya ngan las 'das pa'i rgyu nyid kyi phyir ro//dper na glang po che chen po'i rjes kyis ni glang po che nges par shes par 'gyur ro/ /de bzhin du gzugs kyi sku shin tu mdzes pas chos kyi sku yin no zhe na/ gang gi tshe yon tan khyad par can gyi rten du zad de/ de'i gzhi ni de lta bu ma yin te/ / nam mkha'i me tog dri dang kha dog phun sum tshogs pas yid ches pa bzhin du 'di ni brdzun pa yin no zhes gzhan gyi tshig gis ni bsgyur zhing drang du rung ste de'i phyir bdag la dbang bas ni med pa'i dngos po yang yod par byed la/ yod pa yang med par ston te/ skyon yang yon tan byed pa ste//yon tan yang skyon byed par/ /tshig dbang nus kyi de min te/ /skyon yang skyon nyid yon tan yang / /zhes bya ba yin no/ /phyi rol zhes bya ba ni gzugs so/ /mthong bar ma gyur pa ni mngon sum du ma dmigs pa'o/ /nang gi 'bras bu mthong ba gang / /zhes bya ba ni nang gi 'bras bu lung gi khyad par thos shing bsams pa'i tshul gyis 'bras bu thos pa dang bsams pa las byung ba'i shes rab ces bya ba'i don to//des mthong ba'i tshul 'di la yod pa ni nang gi 'bras bu mthong ba ste/ 'jig rten pa'i shes pas gzhan gyi rgyud la 'gro ba'i khyad par gang yongs su gcod pa zhes bya ba'i don to//de ni zhes bya ba ni de nyid kyis so/ /sgra yis zhes bya ba ni gzhan gyi tshig gis so/ /drang du rung ba zhes bya ba ni phyin ci log tu bzung ba ste/ lam log par 'jug pa zhes bya ba'i don to/ /nang gi shes par ma gyur pa/ / zhes bya ba ni lung dang 'brel pa'i thos pa dang bsams pa'i shes pa med pa'i phyir ro/ /gal te phyi rol zhes bya ba ni gzugs kyi sku 'ba' zhig mthong ba'o/ /gang gi phyir rdzogs byed la sogs pas bcom ldan 'das kyi sku skyes bu chen po mtshan sum cu rtsa gnyis kyis brgyan pa dang /dpe byad bzang po brgyad cus rnam par mdzes pa rgyun du mthong ba yin yang thams cad mkhyen pa nyid la sogs pa nang gi byed pa'i yon tan la yid ches pa skyed pa ni ma yin no/ /phyi rol 'bras bu mthong ba gang / /zhes bya ba ni gzugs kyi lus de mthong ba ni 'bras bu yang dag par mthong ba ni ma yin no zhes bya ba'i don te/des mthong ba'i tshul gang la yod pa de ni de nyid de/ de'i phyir gang gi mig gis mthong ba na bcom ldan 'das kyi sku mdzes pa thams cad mkhyen pa nyid yin no zhes yid ches te/ de ni shing ko sha ta gi dong ka'i shing dang /pa la sha'i shing gi me tog gzugs mdzes pa tsam kho nar zad pa de bzhin du 'di yang yon tan dang bral ba ste/ zla ba gnyis mthong ba la sogs pa bzhin du gzhan lam ma yin pa la 'jug par byed do/ /gang gi tshe yang ji skad du bshad pa gnyis ka med de gsung rab nub pa'i phyir dang /thub pa mchog kyang yongs su mya ngan las 'das na ni go rims bzhin du de bstan pa'i phyir/ kun nas bsgribs pa dag ces bya ba smos te/ 'di la kun nas bsgribs pa yod pa ste/ phyi dang nang ma rtogs pa'i phyir ro/ /gang gi tshe gnyi ga yod pa ste/zag pa med pa'i shes pa yod pa'i phyir dang / de bzhin gshegs pa rnams 'tsho zhing bzhugs pa'i phyir te/ de nyid bstan pa'i phyir/ /gal te nang ni rnam shes shing / /zhes bya ba la sogs pa smos so/ /brtan pa ni lhag pa'i bsam pa brtan pa dang ldan pa'i phyir ro/de nyid kyi phyir gzhan gyis bkrir mi rung ba yin te/ dper na ri rab la dbugs kyis mi sgul ba bzhin no/ /ci'i phyir zhe na/ 'di nyid ni ye shes la shas che ba'i phyir te/ de nyid bstan pa'i phyir/ nges 'byung shes rab can zhes bya ba mya ngan las 'das pa'i 'bras bu rtogs par nus pa zhes bya ba'i don te/'phags pa'i lam gyi stobs kyis dad pa mi byed pas bkrir mi nus pa nyid du bstan to/ /gang gi phyir gzhan gyi dring la 'jog pa ni bkrir rung ste/ zag pa med pa'i shes rab dang ldan pa ni gzhan la rag ma las shing bkrir mi tshugs pa nyid do//de bas na de'i phyir yid du 'ong ba dang mi 'ong ba thams cad mthong ba de bzhin du bsgrub par bya ba dang thos pa thams cad ni 'khrul pa yin no zhes bstan pa'i phyir/ rna bas phal cher thos pa dang / /zhes bya ba la sogs pa smos so/ /kun du rgyus mdzes dga' mo bsad de lan lnga'i bar du smras nas kun du rgyu dag gis mnyan yod kyi srang du bstan pa las skye bo thams cad 'khrugs par gyur to//skabs de bcom ldan 'das kyis gsan nas 'di gsungs so/ /thos pa ni dmigs pa'o/ /phal cher zhes bya ba ni de bden pa dang brdzun pa'i tshig dang snyan pa dang mi snyan pa la sogs pa du ma'o//rna bas zhes bya ba ni rna ba'i dbang po'am de'i rnam par shes pas te/ thos pa ni 'di la rag las pa'i phyir ro/ /mig gis mang po mthong na yang / /zhes pa ni rnam pa mang po mthong ba ste/ sdug pa dang mi sdug pa la sogs pa'i gzugs kyi yul gyis byas pa'o//brtan pa mthong thos de kun gyis/ /yid ches bya ba'i mi rigs so/ /zhes bya ba ni gang cung zad mthong ba dang thos pa de thams cad ni mkhas pas de bzhin du yid ches pas 'jug par mi bya ste/ rmongs pa dang slu ba'i dngos po yin te/ smig rgyu dang sgra brnyan la sogs pa bzhin no//thos pa'i 'bras bu ni don rtogs pa dang de'i rjes su mthun pa las yin no zhes bstan pa'i phyir/ legs gsungs thos pa snying por shes pa dang / /zhes bya ba la sogs pa smos so/ /nye dga' sde snod gsum pa yin yang brkam zhing ser sna che bas khyim bdag gi khyim la sogs pa dag tu bab col du byed de/de'i dbang du mdzad nas tshigs su bcad pa gnyis gsungs so/ /shes pa ni rtogs pa'i don legs par gsungs pa'i snying po gang yin pa de nyid do/ /'dir don gyi sgra ni phyi nas bstan pa yin par shes par bya'o//yang na shes pa ni de nyid kyi don de kho na nyid rtogs pa gang yin pa'i snying po'o/ /gang dag las de kho na nyid kyi blo ma skyes pa de ni snying po dang ldan zhing legs par gsungs pa 'bras bu dang bcas pa ma yin no zhes bya ba'i don to/ /rang nyid legs par gsungs pa'i don ma rtogs shing mi dran pa dang des bstan pa'i thos pa ni dgos pa med de bram ze kau shi ka'i khyim du bram ze ba ra dwa dza mgron du gyur pas 'ongs te rten cing 'brel par 'byung ba glegs bam las bklags pa tsam gyis khyad par thos par ma gyur pa 'dir dper brjod par bya'o// thos ba dang zhes bya ba la dang gi sgra ni snying po'o/ /shes pa dang zhes bya ba 'dren pa'i don to/ /gzhan las 'ongs pa ni thos pa ste de bas kyang don shes pa snying po nyid do/ /sngar bshad pa nyi tsher ma zad de legs par gsungs pa rang nyid kyis rtogs par bya ba de gal te ma rtogs pa'o//yang na gzhan las thos na ni de'i tshe bya'i skad bzhin du don med par blta bar bya'o/ /ting nge 'dzin dag snying por shes gyur kyang / /zhes bya ba ni shes pa dben pa'i khyad par can 'jig rten pa'i shes pa 'phags pa'i lam gyi tshogs su gyur pa dang / 'jig rten las 'das pa zhes bya ba'i don to/ /ting nge 'dzin dag ces bya ba ni dge ba la sems rtse gcig pa la sogs pa'o/ /snying po dang 'bras bu gang yin pa de ni de nyid do/ /de gang zhe na/ gzhan las ma thos pa dang / 'di thos pa dang / ldan pa de gnyis ka yang 'dir sbyar bar bya ste/'di lta ste/ rang nyid kyis legs par bshad pa mthong ba'am gzhan las so/ /ji ltar rang gis legs par bshad pa'i don rtogs pa'am/ gzhan las thos pas don rtogs pa thos pa las byung ba la sogs pa'i shes rab khyad par can skyes pa yin pas zhi gnas kyang de'i tshe legs par bshad pa'i don rtogs pa'i 'bras bu yongs su rdzogs par 'thob pa yin gyi gzhan du ni ma yin no//de nyid 'dir bstan pa'i phyir/ gang zhig bag med brlang por byed pa de'i/ /thos dang shes pa don chen mi 'gyur ro/ / zhes bya ba ste gang zhig brlang por byed pa zhes bya ba ni gti mug gis bab col du byed pa ste/ nges par brtag pa med cing bya ba dang bya ba ma yin pa dag la ma brtags par zhes bya ba'i don to/ /bag med pa zhes bya ba ni ting nge 'dzin sgom pa la sbyor ba lhod pa'o/ de dag ni go rims bzhin du shes pa khyad par can du gyur pa dang /ting nge 'dzin gyi khyad par ma tshang ba ste bdag nyid legs par gsungs pa yongs su ma shes pa'am mi bzod pas phan yon la rab tu mi spyod do/ /de grub na ni sngar bstan pa'i mngon par 'dod pa'i 'bras bu 'grub po/ /dkar po'i phyogs bsten pa'i phyir smras pa/gang zhig 'phags pas bstan pa zhes bya ba la sogs pa ste/ chos zhes bya ba ni gsung rab kyi chos te/ /legs par gsungs so pa zhes bya ba'i don to/ gang gis bstan pa yin zhe na/ gang zhig 'phags pas bstan pa zhes bya ba yin te/ 'phags pa ni khams gsum gyi 'dod chags dang bral ba'i skye ba'i gnas spangs shing 'das pa'i phyir te/sangs rgyas dang sangs rgyas kyi nyan thos rnams kyis de bstan cing bshad pa zhes bya ba'i don to/ /gang zhig la sems can dga' ba zhes bya ba ni chos nyid la mngon par dga' ba tsam gyis legs par spyod pa ma yin no zhes bstan pa'i phyir de bzhin gyi sgra'o//dga' ba thob pa ni mngon par dga' ba'i mtshan nyid dad pa zhes bya ba'i don to/ /de'i phyir dad pas ni chos la dga' bar 'gyur la/ chos kyis kyang dad pa ste chos mnyan pa yongs su rdzogs na ni dad pa yongs su rdzogs par 'gyur ro zhes mdo las bstan pa'i phyir ro//dad pa'i rtags ni dam pa'i chos mnyan pa la dga' ba zhes bya ba'i tshig gis so/ /de'i 'og tu/ ngag gis spyod byed pa zhes bya ba ni klog pa dang 'don pa dang bstan pa dang 'chad pa la sogs pas de la 'jug pa'o/ /lus dang zhes bya ba ni des byas pa'i bya ba dang /rjes su mthun pa ste chos la chos kyi rjes su 'jug pa nyid do zhes bya ba'i tshig gis so/ /'di gnyis kyis ni tshul khrims kyi sdom pa bstan to/ /de dag bzod ldan 'grogs dga' dbang po bsdams/ /zhes bya ba ni gang thos pa dang dad pa la brten nas tshul khrims kyi sdom pa la bcug pas sdug bsngal la ji mi snyam pa'i bzod pa'i tshul lam nges par 'byed pa'i cha'i tshul gyis so//'grogs dga' zhes bya ba ni 'dod pa chung zhing chog shes pa'i bdag nyid kyi sems mthong ba'i lam gyi bdag nyid kyis so/ /dbang po bsdams pa ni mnyam par gzhag cing mig la sogs pa'i dbang po dul ba gang yin pa'o//de ltar gyur pa la ni thos pa zhes bya ba legs par mnyan pa dang shes pa zhes bya ba'i don rtogs pa'o/ /pha rol tu phyin pa thob ces bya ba ni shin tu pha mthar gyur cing mya ngan las 'das pa thob pa ste/'di lta ste sangs rgyas dang sangs rgyas kyi nyan thos so/ /thos pa'i tshoms te nyi shu gnyis pa'i rnam par 'grel pa rdzogs so// //don dam par thos pa'i 'bras bu ni bdag nyid gdul ba yin no zhes bstan pa'i phyir de'i 'og tu bdag gi tshoms bstan te/legs par gsungs la bslab bya zhing / /zhes bya ba la sogs pa yin no/ /rang bzhin gyis bzang ba'i rang bzhin can gyis rigs kyi bu de ni dge ba'i gshes gnyen nye bar sten par byed cing dge slong mang po sdud par byed pa'i bdag nyid can yin te/des de dag la chos 'di lta ste/ mdo'i sde dang dbyangs kyis bsnyad pa'i sde la sogs pa ji snyed pa de legs par shin tu nyan par byed cing khyim du bdag nyid gcig pus bsams shing bsgoms te de nyid kyi tshul gyis sems dul ba thob par byas nas sems dang mnyam du sems nye bar zhi bar gyur te/des na tshigs su bcad pa gnyis gsungs so/ /rang gi don du gsungs pa ni legs par gsungs pa'o/ /legs par gsungs pa la bslab par bya ba ni mnyan par gyis shig ces bya ba'i don to/ /yang na legs par gsungs pa de dang 'brel pa ste/yod pa dang med pa'i shes pa chos la chos kyi rjes su 'jug pas de la bslab cing brten pa dang rjes su 'jug par bya'o zhes pa'o/ /legs par gsungs pa ni phal cher bde bar gshegs pa dang / bde bar gshegs pa'i sras dag las mnyan pa yin te des na de nyid bstan pa'i phyir te smras pa//dge sbyong la ni bsnyen bkur dang / /zhes bya ba dge ba'i bshes gnyen bsten par bya'o/ /yang na 'phags pa'i gang zag la brten pas 'brel cing bslab par bya ste/ gus pas yongs su bslab pa dang / bsod snyoms la sogs pa sbyin pa'i ched du dge ba bstsags pa dang / yon tan la gus par bya ba'o/ tshig rkang snga mas ye shes kyi tshogs bstan nas/ 'dis ni bsod nams kyi tshogs bstan to/ /de'i 'bras bu bstan pa'i phyir smras pa/ dben pa dang ni stan gcig dang //zhes bya ba gcig pu'i gnas skabs kyis dgon pa la sogs pa la de dang 'brel bar bslab pa ste/ 'di lta ste/ g.yeng ba med pas phra rgyas dgag pa yin no/ /'dis ni lus dang sems dben par bstan to/ /sems ni nye bar zhi bar bya/ /zhes bya ba ni khams gsum gyi nyon mongs pa 'khrugs pa spangs pas sems mngon par 'byung ba ni nye bar zhi ba ste de la g.yeng ba dang rgod par byed pa thams cad dang bral bas so//de dang der 'brel pa'i gzhan gyi don byed par gyur na gdul bya yongs su mya ngan las 'das par 'gyur ro/ / dam pa'i chos nyan pa dang skyes bu dam pa la brten pa dang / /tshul bzhin yid la byed pa dang / /chos la chos kyi rjes su zhugs pas rim gyis 'dir bstan pa yin no/ /yang na dang po'i phyed kyis gzhan gyi sgra bstan to/ /tshig rkang gsum pas ni tshul bzhin yid la byed pa'o/ lhag mas ni de'i 'bras bu bstan to/ /gang gi phyir dben pa'i gnas nyid ni mngon pa 'dod pa ste/ /de nyid la gzud pa'i phyir/ stan gcig pa dang gcig spyod dang / /zhes bya ba la sogs pa smos so/ /gcig pu grogs med pa'i gnas skabs de gdug pa'i gnas na spyod lam rnam pa gnyis 'dis bstan te/gnyis pa'i cig shos ni 'og nas ston pa'i phyir ro/ /de la dga' bar bya ba ni de la rjes su bsam pa'o/ /mal stan gcig ces bya ba ni bdag nyid gcig pu gnas pa'i mal bstan la dga' bar bya ba'o/ /gang du 'dug nas ngal ba zhi bar byed pa ni mal stan no//gcig pu spyod pa ni gcig pu gnas na bsod snyoms la sogs par rgyu ba ste/ spyod pa rnam pa bzhi la gos pa med pa'o/ /de dag la spyo ba med cing brtson 'grus kyi rgyu bstan pa'i phyir/ snyom las med cing zhes bya ba smos te/ le lo mi skyed cing brtson 'grus phun sum tshogs pas so/ /dga' bar bya zhes bya ba ni stan gcig la sogs pas mngon par dga' bar bya ba ste/ /de'i rjes su 'jug cing bsam par bya ba'o/ /dang ni bsdu ba'i don te bdag nyid gcig pu yang dga' bar bya ba'o/ / 'dod chags la sogs pa'i nyon mongs pa spang ba'i phyir grogs med pa'i sems su bya'o zhes bya ba'i don to/ /ji skad du bshad pa bdag nyid chen po rnams ni grong gi nang du yang bdag nyid gcig pur 'gyur ram zhes de ltar rtog pa la/ nags tshal gnas pa dang zhes bya ba smos te/grogs dam pa med par gyur na ni nags su bdag nyid gcig pu gnas par bya ste/ skye bo dam pa ma yin pa dang bsten pa ni ngan par spyod pa thams cad kyi rtsa ba yin pa'i phyir dang / nags na gnas pa'i dben pa la sogs pa'i khyad par thob par byed pa'i phyir ro//bdag nyid las rgyal ba ni 'bras bu chen po yin no zhes bstan pa'i phyir/ /gang zhig stong phrag stong dag gi /zhes bya ba la sogs pa tshigs su bcad pa gsum mo/ /rgyal po gsal rgyal gyi rnam par rgyal ba zhes bya ba 'thab mos 'tsho ba yod pa de brgya dang sprad kyang g.yul las rgyal byed de/ji tsam na bcom ldan 'das kyis gsan nas 'di gsungs so/ /'thab mos 'tsho ba thos te 'di bsam pa las ji ltar bdag nyid gdul bar mi bya zhing 'di las rgyal ba la mi sbyor zhes bsams te rgyal po la zhus nas rtag tu sdom pa spyod pa zhes bya ba la sogs pa tshigs su bcad pa gnyis kyi don rtogs te dgra bcom pa'i 'bras bu thob par gyur to//gang la la zhig grangs stong phrag stong dag gi mi dang 'thab pa ste stong phrag stong dang 'thab pa'i 'thab mo'i sar ro/ /rgyal ba ni gzhan pham bar byas pa ste 'bum phrag bcu las rgyal ba zhes bya ba'i don to//gang zhig bdag las rgyal byed pa/ /zhes bya ba ni gang bdag gi sems gcig pu dul bar byed pa'o/ /de ni de nyid de bdag nyid dul ba nyid do/ g.yul de gnyis las bdag nyid dul ba ni rgyal ba'i mchog yin no//gzhan gyi stobs mchog tu 'joms par byed pa'i g.yul te/ gzhan gyi stobs las rgyal bar byed cing sel ba ni g.yul las rgyal ba'o/ /de gnyis las kyang khyad par du g.yul las rgyal ba ni spang bar dka' ba'i nyon mongs pa'i dgra sel bar byed pa'i phyir bdag nyid las rgyal ba nyid mchog yin te/de nyid bstan pa'i phyir/ /bdag nyid ces bya ba smos te/ /bdag gi sems las so/ /gang gi phyir 'bum phrag bcu dang 'thab pa'i skyes bu las kyang bdag nyid dul ba g.yul las rgyal pa'i mchog yin te/ de bas na bdag nyid rgyal ba dang dul par byas pa ni mchog tu bsngags pa yin no//gzhan ni zhes bya ba ni skye dgu gzhan ni ma yin te/ sems can rnams ni nyon mongs pa'i dbang du gyur pa'i phyir dang / skye dgu ni nga rgyal yod pa'i phyir ro/ /phal pa zhes bya ba la phal pa'i sgra ni ngan pa'i rnam grangs yin pa'i phyir te/nyon mongs pas rgyud gzhan gyi dbang du byas pa zhes bya ba'i don to/ /gang yang seng ge zil gyis gnon pa ni mchog yin gyi gang ba ni ma yin pa de bzhin du ston pa yin no/ /ci'i phyir zhe na/ de nyid bstan pa'i phyir/ mi yis bdag gdul gcig pu yis/ / zhes bya ba la/ gdul ba ni 'di ltar sems can gyi rang gi sems so/ /lha yis ma yin te/ gzhan gyis pham par mi nus zhes bya ba 'di dang sbyar ro/ /bdag gdul ba ni so sor thar pa'i sdom pa sngon du 'gro ba yin pa'i phyir bshad pa/ rtag tu sdom pa spyod pa zhes bya ba rtag tu yang dag par sdom pas nye bar mtshon cing spyod la rab tu 'jug pa'o//rnam pa gnyis ni tshul khrims kyi sdom pa la rtag tu 'jug pa yin te/ snga mas ni dbang po sdom par bstan la/ 'dis ni lus dang ngag gi sdom pa bstan te/ rnam pa gsum gyis tshogs kyi sbyor ba bstan pa yin no//lha yis ma yin zhes bya ba ni de las 'das pa ste/ 'dod pa na spyod pa'i lha'i'o/ /dri zas min zhes bya ba ni legs dga' zhes bya ba la sogs pa'i rol mo byed pa'i dbang du byas pa'o/ /bdud ces bya ba ni 'dod pa'i khams kyi dbang phyug go/ /tshangs par bcas pa zhes bya ba ni stong spyi phud kyi 'jig rten gyi khams kyi bdag po ste//de dang bcas pas so/ /pham mi nus zhes bya ba ni gang zad cing sel bar mi nus pa'o/ /dbang po dang tshul khrims ji lta bu dang ldan pa la pham par mi nus she na/ /dge slong zhes bya ba ste/ /nyon mongs pa bcom pa'i phyir ro/ /shes rab kyi stobs kyis nyon mongs pa bcom par ston pa'i phyir/shes rab kyis gnas zhes bya ba smos te/ shes rab ni zag pa med pa'i shes pas so/ /gnas pa ni 'jug pa ste des tshul dam pa la gnas pa'o/ /zag pa med pa'i shes rab kyi dbang gis phra rgyas spangs pa yin te/gang yang mi zad par byed nus pa ni ma yin te/ de'i phyir dge slong dag gang gi tshe 'phags pa'i shes rab kyis spangs par gyur pa'o zhes mdo las gsungs so/ /nga 'jig pa'i bskal pas bsreg par bya ba gang yin pa de gzhan gang gis kyang mi nus pa bzhin du 'di ltar 'bum phrag bcu las gang rgyal ba de nyid kyis ni 'di pham par mi nus te//de ltar bdag nyid las rgyal bar nus pa ni des thub pa ma yin pa'i phyir bdag nyid las rgyal ba ni mchog yin no/ /gang gi phyir de ltar bdag nyid sbyang ba byas pa des ni gzhan la phan pa byed par yang nus so zhes bstan pa'i phyir//bdag nyid dang por rigs par gnas byas nas/ /zhes bya ba la sogs pa smos so/ /rgan po zhig mnyan yod na gnas pa'i bram ze dang khyim bdag 'ongs pa dang 'gro ba dag la g.yeng zhing rgod la mu cor smra ba dang spyi brtol che bas chos ston par byed pa las bram ze dang khyim bdag 'phya bar byed do//ji tsam na bcom ldan 'das kyis tshigs su bcad pa gsum gsungs so/ /bdag nyid dang por zhes bya ba ni bdag nyid kyi sems kyi bdag nyid thog mar ro/ /rigs par byas nas zhes bya bas ni skye bo dam pa dang rjes su mthun par phan 'dogs par byed pa ste/rnam pa bzhi'i bdag nyid kyis dbang po la sogs pa dul ba'i bdag nyid du nges par gzhag par bya'o/ /phyi nas gzhan ni gdul bar bya/ /zhes bya ba ni de nas dus gzhan na gzhan bslab cing de nyid la gnas bar bya'o//ji ltar zhe na bdag bzhin zhes bya bas bstan te/ bdag nyid zhi bar byas pas de bzhin du khyod kyis gyis shig pa ste/ /ji ltar bdag bzhin no/ /gzhan du na gzhan dul bar byed pa ni nges par dmigs pa med pa'i phyir ro/ /dper na gnas dam pa la go skabs med pa ste/ gang bdag ma dul na ni gzhan gdul bar mi nus so//bdag nyid dul ba sngon du 'gro bas ni gzhan dul ba las kun du nyon mongs pa'i rgyu ma yin par bstan pa'i phyir/ bdag nyid dang por zhes bya ba la sogs pa smos so/ /gang gi phyir bdag nyid dul ba'i rim pa'i tshul du gnas na kun du nyon mongs par mi 'gyur ro zhes bya ba'i don to/bdag nyid mkhas pa lam bzang po la gnas par byas nas dus gzhan na sems can gzhan la 'doms shing 'dul bar byed pa yin te/ /lam bzang po de la 'dzud par byed do/ /nyon mi mongs zhes bya ba ni gdung bar mi 'gyur bas te/ bdag dang gzhan mi nyams pa'o/ /gzhan dag tu ni kun nas nyon mi mongs/ /zhes brjod de/ gdung ba srel bar mi byed ces bya ba'i don to/ /ji ltar nyon mongs par mi 'gyur zhe na/ /bdag la zhes bya ba ni rang nyid do/ /de bas na 'di ltar gang dang gang gzhan gdul bar 'dod na ni de dang der dang por bdag nyid bsgrub par bya'o zhes pa'i don to//de ltar bya zhes bya ba ni de lta bu'i las la 'bad pa dang yon tan de lta bu bsags par bya ba'o/ /ji ltar byas bzhin gzhan dag la/ /zhes bya ba ni rnam pa gang gis las gang gzhan la slob pa de yang bdag nyid dang por byed pa nyid kyis so//'dir rgyu bstan pa'i phyir/ ji ltar nye bar zhi ba zhes bya ba ni dbang po rnams dul ba'i phyir te/ bdag nyid ma dul ba'i sems 'dul ba'i phyir ro/ /snga mas ni nyon mongs pa dgag pa'i thabs bstan pa'o/ /'dis ni rtsa ba nas spong ba'i thabs bstan to/ / gdul bar bya zhes bya ba ni sems can dag bstan pa la gzud pa gzhan dag bde bar zhes bya ba ni nyon mongs pa med pa ste/ tshig gzung bar 'os pa yin no zhes dgongs so/ /gang la dbang po dul ba dang sems dul ba dang yod pa de ni lha rnams kyis kyang gzung bas 'os pa'i tshig tu 'gyur na gzhan gyis lta smos kyang ci dgos/ji ltar bde bar dul ba yin zhe na/ bdag la zhes bya ba smos te/ ji ltar bdag gis myong ba bsten cing byas pa'i sgras so/ /gang gis gzhan bde bar 'gyur zhe na/ /kye ma bdag rang legs dul ba/ /zhes bya ba ji ltar bdag gis gnyen po'i khyad par la bsgoms pas bdag nyid dul bar gyur nas/kye ma'o khyed cag gis kyang de bzhin du gnyen po bsgoms na ni ring po mi thogs par legs par dul bar 'gyur ba'i phyir ro/ /nges par bdag dul bar bya ba/ ci'i phyir zhe na/ bdag nyid dul bas mkhas par 'gyur/ /zhes bya ba smos te/ gang gi phyir mkhas pa ni bdag nyid dul ba yin te/ de ma yin na ni mkhas pa don med par 'gyur ro/ /gal te gzhan mang po la yang phan gdags par bya ba yang yin la bdag la yang phan gdags par bya dgos pa yin na/de'i tshe mkhas pas dang por gang zhig la 'bad par bya ba yin zhe na smras pa/ bdag gi don phyir gzhan don ni/ /zhes bya ba la sogs pa smos so/ /mnyan yod na dge slong zhig 'ga' zhig las chos kyi tshig nyung zad thos te/ grong du 'jug cing nyung ngu nyung ngus bram ze dang khyim bdag rnams la ston par byed de/bya ba gzhan mi byed pa de'i dbang du mdzad nas 'di gsungs so/ /gzhan gyi don spangs nas bdag nyid kyi don bya ste/ de'i don du dbang po dul ba la sogs pa'i mtshan nyid phan par byed pa ni gtang bar mi bya zhing dor bar mi bya'o zhes bya ba'i don to//gang gi zhe na/ gzhan don ni/ mang po dag kyang zhes bya ba gzhan gyi dgos pa ni dpag tu med pa yod kyang ngo / /'o na bcom ldan 'das ni gzhan gyi don mchog tu mdzad de/ nyid kyi don yal bar 'dor ba yin na 'di ji ltar bstan pa yin zhe na/ bdag don ched cher shes gyur na/ /zhes bya bas bstan te/ bdag gi don ni thams cad bas gtso bo yin par shes par bya ste/ de sngon du 'gro bas gzhan gyi don thams cad bya ba yin no/ /bdag nyid yongs su ma sbyangs par ni gzhan gyi don byid par mi nus pa yin te/ bdag nyid kyis lam ma mthong bar gzhan la lam ston pa bzhin no/ /da ltar sems can gyi don dus phyi nas bya bar bstan nas/ rang gi don gyi mchog tu 'gyur/ /zhes bya ba bdag gi don ni gzhan gyi don yin no zhes bya ba'i don te bdag gi don grub na de'i rjes su gzhan gyi don grub par rigs pa'i phyir ro//dam pa dag dul ba nyid kyis ni bdag nyid kyi rten yin te/ chu bos khyer ba dag la gling lta bu yin no zhes bstan pa'i phyir/ bdag nyid bdag gi zhes bya ba la sogs pa tshigs su bcad pa bcu bzhi'o/ /bcom ldan 'das gtsug lag khang gshegs pa na dge slong nad pa nad g.yog sus kyang ma byas shing zhag bdun gyi bar du zas chad la bshang gci'i nang du nub pa zhig gzigs so//de yang shin tu khro ba'i rang bzhin can zhig yod pas mngon sum du tshig rtsub po smra zhing tshangs pa mtshungs par spyod pa rnams la mi gus pa zhig ste/des na dge slong rnams kyis spangs pa de'i gan du gshegs te bka' stsal pa/ dge slong khyod la mkhan po nad g.yog mi byed dam/ slob dpon dang lhan cig slob pa dag nad g.yog mi byed dam/ gzhan yang mkhan po gcig pa zhes bya ba nas/ji srid du khyod la med dam zhes bka' stsal pa dang / bdag la ni mgon ma mchis so zhes gsol te/ des na 'di dag gsungs so/ bdag nyid de rang gi sems nyid dul ba ni dgos pa yin gyi/ /ma dul ba ni dgos pa nyid du mi 'thad pa yin no zhes sgrub pa'i phyir nyid kyi sgra'o//bdag gi mgon yin gyi zhes bya ba ni bdag nyid ni rang gi dngos po ste/ phung po lnga'i bdag nyid rten dang dgos pa dang srung bar byed pa zhes bya ba'i don to/ /gang gi phyir sems gcig btul bas ni dbang po'i tshogs mtha' dag bsrungs bar 'gyur ro//gzhan lta su zhig mgon du 'gyur/ /zhes bya ba ni sems dul ba las gzhan pa gang zhig ste/ gzugs la sogs pa dang / mu stegs byed la sogs pas yongs su brtags pa'i nang gi skyes bu byed pa po la mgon zhes bya bar ni ji ltar yang 'thad pa ma yin te/rigs pa dang lung dang 'gal ba'i phyir ro/ gzhan khyod kyi mkhan po la sogs pa su zhig ji ltar mgon du 'gyur te/ 'jig rten ni rang gi las la spyod pa'o zhes bstan pa'i phyir ro/ /bdag nyid dul ba ni mgon du 'gyur ro zhes bya ba ci'i phyir de ltar nges par bya zhe na//de'i 'bras bu mthong ba las te/ du bas me nges par shes pa bzhin du ste/ smras pa/ thob par 'gyur ba ni rnyed par 'gyur ba'o/ /mkhas pa ni shes rab kyis bdag nyid dul ba la mngon par brtson pa'i phyir ro//don rnams zhes bya ba ni dbyig la sogs pa'i nor te/ bdag nyid gso ba'i 'tshog chas zhes bya ba'i don to/ /thabs gcig gis thob pa nyid de/ de nyid smras pa/ bdag gi mgon yin gyi zhes bya ba ste/ sems dul bar gyur pa ni 'dren pa ste/ bdag nyid kyi yo byad tsam yang bsags par mi nus na/ gzhan lta ga la 'gyur bdag nyid ni rang nyid de sems can gyi rgyud do/ /de'i phyir nad pa de la ni 'di lta bu'i rnam par rtog pa byung bar gyur te/ gang bdag da ltar nyams shing 'di ltar 'byor pa zad pa ni sngon bsod nams ma bstsags pa'i phyir ro//grags pa la sogs pa yang med de/ gang gi phyir de ni nor gyi chos dang grags pa dang bde ba dang mtho ris te/ de dag bdag la med do/ /yun ring du gnas pa dang / /'khor gyi nang na mdzes pa dang / /nye bar mi gdung bar gyur pa dang / 'ching ba thams cad bcad pa dang /ngan 'gro thams cad spong bar gyur pa dang / sdug bsngal thams cad las thar bar 'gyur ba dang / sgrib pa med pa'i lam thob pa dang / phung po lhag ma med pa'i mya ngan las 'das par nye bar 'gro bar gyur pa dag kyang bdag la med do zhes bsams so/ / de yang sems ma dul ba yin no zhes thub pa mchog gis de mkhyen te/ de dang mthun par de la chos bstan to/ /gal te nor la sogs pa 'dod pa yin na/ des na bdag nyid dul bar gyis shig dang mngon par 'dod pa'i don des 'thob par 'gyur ro snyam mo zhes so/ / gzhan dag ni bcu bzhi sde zhes bya ba'i kun du rgyu dag nor la sogs pa 'dod nas de sgrub pa'i thabs 'khrul pa med pa ma shes te ya mtshan can mtha' dag la dri ba gtan la dbab pa'i phyir song ba dang / ji tsam na bcom ldan 'das kyi thad du song ste/ re re'i dbang du mdzad nas tshigs su bcad pa re re gsungs so zhes zer ro//chos rnams zhes bya ba ni srog gcod pa la sogs pa las slar ldog pa'i mtshan nyid legs par spyod pa'o/ /dge slong dag khyed la chos bstan par bya ste/ chos de dag gang zhe na/ srog gcod pa spang ba'o zhes bya ba la sogs pa mdo las gsungs so//yang na gang las mngon par mtho ba dang / nges par legs par 'grub pa ni dam pa'i chos te/ chos de thos pa'o/ /chos kyi tshe 'di'i phan yon bstan pa'i phyir/ grags pa zhes bya ba smos te/ snyan pa dang yon tan gyi gtam mo/ / bde ba ni myong ba'i bde ba'o/ /de yang rnam pa gnyis te/ 'jig rten 'di dang pha rol gyi'o/ /de la 'jig rten 'di'i bde ba ni bshad pa la sogs pa dang bral ba'i mtshan nyid la 'dir dgongs so/ /gzhan ni 'og nas brjod do/ /yang na mi rnams kyi bde ba'o/ /pha rol gyi phan yon bstan pa'i dbang du byas nas mtho ris su skye ba'i bde ba de bstan pa'i phyir bde 'gro zhes bya ba smos te/'dod pa'i khams kyi 'dod pa'i khyad par gyi bde ba nyams su myong ba'i gnas ni bde ba zhes 'dir bshad do/ /yun ring mtho ris dga' bar 'gyur/ /zhes bya ba ni gzugs na spyod pa'i lha rnams kyi gnas su bdag nyid dga' ba dang bde ba gnyis kyis ci rigs par dul ba'i bdag nyid yun ring por bdag nyid sim par 'gyur ba'o//yun ring mtho ris gnas par 'gyur/ /zhes bya ba ni gzugs med pa'i bdag nyid kyi mtho ris dag tu yang bdag nyid chen po shin tu yun ring por gnas par 'gyur te/de'i phyir nam mkha' mtha' yas skye mched kyi tshe'i tshad ni bskal pa chen po stong phrag nyi shu'o/ /rnam shes mtha' yas skye mched kyi tshe'i tshad ni bskal pa stong phrag bzhi bcu'o/ /ci yang med pa'i skye mched kyi tshe'i tshad ni bskal pa chen po stong phrag drug cu'o//srid pa'i rtse mo'i tshe'i tshad ni bskal pa chen po stong phrag brgyad cu'o/ /des na de ltar gzugs med pa nang gi yid dag pa'i phung po'i 'jig rten mtho ba rnam pa bzhi po de yang thar pa ma yin te/ 'jig rten pa zhes bshad do//gnyen gyi nang na lam mer 'bar/ /zhes bya ba ni nye du rnams kyi nang na dngos po thams cad phun sum tshogs pas shin tu mdzes pa'o/ /mnyam par gzhag pa'i khams las shi 'phos nas 'dir skyes pa ni khyad par du bdag nyid dul ba yin no zhes 'dis bstan te/'phags pa 'od srungs chen po'i spyod pa dag kyang 'dir brjod do/ /mya ngan nang du gdung mi 'gyur/ /zhes bya ba ni/ gdung ba'i bdag nyid 'dod pa'i khams kyi nang na'am dbus na gnas pa nags stug po'i nang na gnas pa dang 'dra ba ste/ gdung bar byed pa'i bdag nyid do/ /ma dul ba nyid ni gdung ba la sogs pa'i gnod pa dang ldan te/ ma dul ba'i bdag nyid can ni yongs su brtags pas rkyen ji lta ba bzhin du bde ba dang sdug bsngal 'byung bar mi shes te/ mtshan mo dang nyin par bzhin no/ /'ching ba thams cad gcod par 'gyur//zhes bya ba ni mthong bas spang bar bya ba'i rjes su chags pa'i zhags pa thams cad bcad pa dang spangs pa zhes bya ba'i don to/ /'di nyid du de'i 'bras bu 'byung bas 'dir srid la de mthar thug pa yin no zhes lung las 'byung ba'i phyir ro//ngan 'gro thams cad spong bar 'gyur/ /zhes bya bas ni mthong ba'i lam gyi phan yon bstan te/ de thob pas ni ngan song thams cad sel bar byed de des so sor brtags pa'i 'gog pa thob pa'i phyir ro/ /sdug bsngal kun las rab tu thar/ /zhes bya ba ni khams gsum gyi bsgoms pas spang bar bya ba'i sdug bsngal la dmigs pa ste/kun du sbyor ba thams cad spangs pa'i phyir ro/ /mkhas pa mgon du 'gyur ba 'thob/ /ces bya ba ni mi slob pa'i lam bstan pa yin te/ mthong ba'i chos la bde bar gnas pa'i rgyus phan 'dogs par byed pa'i phyir te/phan 'dogs par byed pa ni mgon yin no/ /yang na de kho na nyid ston par byed pa ste/ de yang sangs rgyas bcom ldan 'das las gzhan mthong ba'i lam la sogs pa ston pa med pa'i phyir te/ de ni dul ba'i bdag nyid kyis mkhas pa sgrub par byed pa yin gyi/gzhan ni ma yin no/ /dak+Shin zhes bya ba'i dge slong gnyis kyang 'dir dper brjod par bya'o/ /mya ngan 'das nyid nye bar 'gyur/ /zhes bya ba ni de nyid dang nye ba yin gyi/ 'khor ba dang ni ma yin no zhes bya ba'i don te/ phung po lhag ma med pa'i mya ngan las 'das pa'i dbyings kyi nang du gnas shing de'i bdag nyid du zhugs par blta bar bya ste/de la gzhol ba'i phyir ro/ /bdag gi tshoms te nyi shu rtsa gsum pa'i rnam par 'grel pa rdzogs sto// //dul ba'i bdag nyid kho na legs par gsungs pa bshad pa la nan tan du byed cing yon tan can la mchod par byed la dkon mchog la rjes su 'brang ba la sogs pa dam pa'i tshul gyis ngoms pa med de skom pas gdungs ba nyid chu bzang po 'thung ba yin gyi/gzhan ni ma yin no zhes bstan pa'i phyir de'i 'og tu bsgre ba'i tshoms bstan to/ /yang na dul ba'i bdag nyid can kho nas bsgo bar gsungs pa rtogs par nus kyi/'khrul pa'i blo can gyis ni ma yin no zhes bstan pa'i phyir 'di nyid bstan pa yin te/ gang dag don dang mi ldan zhes bya ba la sogs pa smos so/ /bram ze zhig bcom ldan 'das skye bo'i tshogs chen pos yongs su bskor cing bzhugs pa na mdun du 'dug ste/bcom ldan 'das mnyes par bya'o zhes skye bo'i tshogs chen po'i mngon du nges brjod kyi rig byed mang du smras par gyur pa las de'i dbang du mdzad nas tshigs bcad 'di la sogs pa gsungs so//bram ze de yang 'jig rten pa'i chos kyi tshig gi don 'dod cing ngang tshul ngan pa yin no/ /gang dag /tshigs bcad brgya dag smra ba pas/ /zhes bya ba ni gang tshigs su bcad pa brgya'i tshig gi don gang zhig smra zhing tshig sna tshogs dang ldan pa brjod pa'o/ /ji lta bu zhe na/don dad mi ldan tshig ces bya ba smos te/ dam pas gsungs pa'i dngos po'i tshig gam ngag dang mngon par 'grel pa ste/ 'khor ba dang rjes su mthun pa'i sgra'am/ 'khor ba dang rjes su 'brel cing mthun pa'i don dang sgra'o/ yang na bdag dang gzhan gyi don gyis stong pa'o//yang na dgos pa dang mi ldan pa'o/ /gang tshigs bcad brgya smras pa dang / gang tshigs bcad gcig ces bya ba bsdu ba'i don du dang gi sgra'o/ /don ldan tshig gcig thos pa rung / /zhes bya ba ni gcig nyid don dang 'brel pa ni nye bar zhi ba dang 'brel pa'i tshig 'dir mchog yin te/gang la la zhig don med pa'i tshig brgya bton pa bas gang zhig don dang ldan pa'i tshig gcig ston pa nyid rung gi tshigs bcad brgya stong 'don pa ni ma yin no/ /ji lta bu zhe na/ don dang ldan pa'i mtshan nyid bstan pa'i phyir/thos nas nye bar zhi 'gyur ba/ /zhes bya ba smos te/ tshig gang smos pas nyon mongs pa spangs shing nye bar zhi ba thob par byed pa ste/ dper na lam phran bstan gyis rdul bstsal lo/ /dri ma bstsal lo zhes bya ba thos pas dgra bcom pa'i 'bras bu thob par byas pa lta bu'o//gang dag don dang mi ldan tshig /ces bya ba ni sdig pa'i don yongs su ston pa dang 'brel ba'am/ rigs pas stong pa'o/ /yang na chos ma yin pa rtogs par byed pa dang ldan pa'o/ /yang na thar pa dang rjes su mi mthun pa'o//bram ze dag 'di skad smra ste/ mchod sbyin gyi don du phyugs rnams bskyed pa yin te/ de der bsad pa ni bsod nams chen po 'thob par byed pa yin no/ /nor 'di dag thams cad ni bram ze'i yin te/ de stobs chung bas sdig pa can dag yongs su spyod do zhes bya ba dang /bud med ni me tog dang 'bras bu dang 'dra bar thams cad kyis longs spyad par bya ba yin no zhes pa dang / bzhad gad kyi dus na ni brdzun la nyes pa med do zhes bya ba dang / mchod sbyin gyi dus su chang 'thung ba la nyes pa med do zhes bya ba ste/don med pa dang chos ma yin pa'o/ /chos dang ldan pa'i tshig gis te/ yon tan gyis khyed kyi de ni sdig pa can du smad pa yin te/ /'jig rten 'di dang pha rol dang / 'jig rten dang 'jig rten las 'das pa dang / bdag dang gzhan gyi don dang / 'jig rten pa'i gtsug lag gi sbyor ba'i 'bras bu la gnod pa yin te/ bstan pa tha dad pa'i don nyid do/ /don med pa dang chos ma yin pa'i tshig dang 'brel pa'i tshul khrims 'chal pa dang / don bzang po dang chos dang rjes su 'brel pa yin no zhes bya ba dag bstan pa'i phyir/tshul 'chal mnyam par ma bzhag pa/ /zhes bya ba la sogs pa smos so/ /lo brgyar gson pa gang yin pas/ /zhes bya ba ni gang la la zhig dus tshigs brgyar ris mthun par 'dzin par byed pa'o/ /tshul 'tshal zhes bya ba ni ngang tshul ngan pa nyid do/ / mnyam par ma bzhag pa ni yul dag la rnam par g.yengs pa'i sems so/ /nyin zhag 'ga' zhig gson pa rung / /zhes bya ba ni nyin zhag gcig 'tsho ba'i dbang po 'dzin pa ni ches mchog yin no/ /gang gis she na/ tshul khrims ldan zhing zhes bya ba ste ngang tshul bzang po dang ldan pa'o//mnyam bzhag pa zhes bya ba ni yul dag las sems kun du bsdus pa'o/ /brtson med ces bya ba ni ngan par spyod pa la mngon par brtson pa ste/ ngan pa'i dngos po la gnas pa'i phyir ro/ /le lo ldan pa dag ces bya ba ni dge ba dag la brtson pa lhod pa'o//tshul khrims dang ldan pa ni brtson 'grus rnam par dag pa yin no zhes bstan pa'i phyir/ brtson 'grus brtsams pa dag ces bya ba smos te/ dge ba'i rtsa ba dag la mngon par brtson par byas pa'o/ brtan pa ni g.yo ba med pa ste 'dis ni ngan par spyod pa las gcig tu ldog par bstan to//brtson 'grus dang ldan pa nyid ni tshul khrims dang ting nge 'dzin thob par 'gyur ro zhes bstan to/ /shes rab 'chal pa zhes bya ba ni blo ngan pa ste/ rmongs pas blo bslad pa'i phyir ro/ /shes rab 'chal bas ni sems g.yeng bar 'gyur ro zhes bstan pa'i phyir gang gi phyir gyi sgra'o//mnyam par ma bzhag pa zhes bya ba ni gang du bsam gtan med pa ni shes rab med do zhes bya ba'i tshig gis so/ /shes rab chen po zhes bya ba la shes rab ni blo shin tu gsal ba'o/ /'dir bsngags pa'i don ni chen po'i sgra'o//mnyam bzhag pa zhes bya ba ni ting nge 'dzin du byas pa'o/ /'dis ni dran pa nye bar gzhag pa la gnas pa la sogs pas tshogs kyi lam bstan nas mthong ba'i lam bstan pa'i phyir/ skye dang 'jig pa zhes bya ba smos te/ 'ongs pa dang bral ba ste 'dus byas kyi rnam pa nyid ni skye ba dang 'jig pa yin no zhes bsgrub pa'i phyir gang gi phyir gyi sgra'o//tshor ba zad pa zhes bya ba ni gzugs can gyi khams gnyis las 'dod chags dang bral bar ston te/ de'i phyir 'dod pa las 'dod chags dang bral na ni sdug bsngal dang yid mi bde ba spangs par 'gyur ro//gzugs las 'dod chags dang bral na ni bde ba dang yid bde ba spangs te/ rjes su bstan pa mang ba nyid yin pas spyir tshor ba zad pa zhes 'dir bstan to/ /zag pa zad pa zhes bya ba ni gzugs med pa'i khams las 'dod chags dang bral ba bstan pa ste/khams gsum gyi nyon mongs pa spangs pa'i phyir ro/ /'dis ni phung po lhag ma dang bcas pa bstan nas/ phung po lhag ma med pa bstan pa'i phyir go 'phang mi g.yo ba zhes bya ba smos te/ rtag pa'i dngos po ni mya ngan las 'das pa'o//blta dka' zhes bya ba ni dka' bas blta bar nus pa ste/ dbang po las 'das shing rnal 'byor pas rtogs par bya ba yin pa'i phyir ro/ /mthon po ni dma' ba ma yin zhing mtho ba ma yin te/ dge ba'i rtsa ba rtag pa'i phyir ro/ /ma byas zhes bya ba ni rgyu dang rkyen las ma grub pa'o//dam pa ni 'phags pa'i skye bo thams cad kyis don du gnyer bar chos thams cad kyi mchog yin pa'i phyir ro/ /'chi med ces bya ba ni de las nyams pa med pa'i phyir ro/ /bdud rtsi ni mi 'chi ba ste 'jig pa med pa'i phyir ro/ / rdul med ces bya ba ma rig pa dang nga rgyal la 'dod chags la sogs pa'i nyon mongs pa'i dri ma dang bral ba ste/ rdul ni 'dod chags rdul gyi sa rdul min/ /zhes mdo las gsungs so/ /rdul bral zhes bya ba ni nyon mongs pa dang rjes su mthun pa'i yul gyi rdul dang bral ba ste/de skyed par byed pa la sogs pa'i rdul dang bral ba'o/ /tshor ba zad pa la sogs pa ni mya ngan las 'das pa nyid la brjod pa yin no/ /de lta na ni gcig brjod pa mchog ste/ gzhan dgos pa med do zhe na bshad pa/ de ni bden mod kyi rgol ba dag la rigs pas bshad pa yin te/de'i phyir kha cig ni mya ngan las 'das pa la tshor ba bde ba yin no zhes de la dmigs pa dag snang ste/ bde ba ni chags pa la gnas pa yin no/ /de bas na zag pa nyid do/ /de ltar kha cig ni rgyun rtag pa yin te/ skad cig ma ni ma yin no zhes pa ste/dbang po las skyes pa'i mngon sum gyis rtogs pa'i phyir ro/ /dbang po zhan pas dmigs pa'i tshul yin pa'i phyir te/ ji skad du tshangs pas byas shing bskyed pa'i phyir te/ 'byung dang rab rgyas 'jig dang rab zhum pa/ /yang dang yang du nyer 'gro skyo gyur pas//tshangs pas thar pa'i grong du bstan pa ste/ /der 'gro lam ni 'jig pas rab grol yin/ /zhes so/ /thar pa la ni 'khor ba mi 'dod pa yin te/ 'dod pa'i bde bas rgyas pa yin pa'i phyir de las kyang yongs su nyams pa yin te/ thams cad de dang lhan cig yongs su 'jig pa srid pa yin pa'i phyir ro/ /'chi ba dang bcas pa'i mya ngan las 'das pa'i dgra bcom pa zhes bya ba'i tshig gis te/ 'gro ba med pa bzhin no/ /de nyid kyi phyir 'dir rdul ni yod de/ nyon mongs pas dmigs pa yin pa'i phyir zag pa dang bcas pas na gzugs lta bu yin te/de bas na rgol ba de bstsal bar bya ba'i phyir 'di dag brjod pa yin no/ /bdag nyid dul ba las skyes pa ni yon tan dang ldan pa'i skye bo nyid yin no zhes bstan pa'i phyir/ mi ni lo brgyar zhes bya ba la sogs pa smos so//lo brgyar zhes bya ba ni dus tshigs kyi tshad brgya'o/ /mi ni zhes bya ba ni skye ba'i rgyu dang 'brel pa'i rgyun te/ 'khor ba'i sems can zhes bya ba'i don to/ /nags tshal zhes bya ba ni dgon pa ste g.yeng ba med pa'i phyir ro/ /me la yongs brten zhes bya ba ni sreg blugs kyis tshul bzhin du sbyin sreg byed cing tshim par byed pa zhes bya ba'i don to//de'i phyir gar ha pa ti dang / A ha ba ni dang / dak+Sha Na ste me rnam pa gsum la go rims bzhin du b+hu dang / b+hu b+ho dang / swas gnyen shi ba dag tshim par byed pa yin no//snga ma las ni gzhan gnyis po 'byung ba yin no zhes pa mchod sbyin pa'i grub pa'i mtha'o/ /me gsum 'di na tshul bzhin bsreg byas pas/ tshangs pa'i 'jig rten du ni 'gro bar 'gyur/ /zhes so/ /bdag nyid bsgoms la yud tsam zhig /mchod pa byed pa gang yin pa//zhes bya ba ni gang la la zhig yon tan gyis yid legs par stobs dang ldan zhing rgyud yongs su sbyangs pa'i yon tan can gyi zhing la bsod snyoms dbul ba la sogs pas bsnyen bkur byas pa yang ngo / /chu tshod gnyis nye bar mtshon pa'am/ dus de tsam ni yud tsam mo//mchod byed de nyid ches rung gi/ zhes bya ba ni gang bdag nyid bsgoms pa la lan gcig mchod pa de nyid ches mchog tu bya ba yin no/ /gzhal du med pa'i 'dod pa'i 'bras bu yin pa'i phyir/ steng nas rdzu 'phrul gyis gshegs pa'i rang sangs rgyas dang mchod rten mchod pa dang 'phags pa yid bzang zhes bya ba 'dir dper brjod par bya'o//gang lo brgyar sbyin sreg byed pa ni ma yin te/ me la sbyin sreg gis tshim par byas shing sreg blugs la sogs pas de la blugs pa ni 'bras bu med pa'i phyir ram/ me dang chu la brten cing spyad pas ni yon tan gang zhig yod de/sangs rgyas kun nas nyon mongs pa spangs pa la ni 'di na sems yongs su dul bar byed do zhes bya ba'i tshig gis so/ /dkon mchog gsum la dad pas byang grol gyi lam la sogs pa'i khyad par dang 'brel pa yin no zhes bstan pa'i phyir/zla ba re re zhes bya ba la sogs pa smos te/ zla ba re re zhes bya ba ni zla ba gcig cing zhes bya ba'i don to/ /ku sha'i rtse zhes bya ba la/ ku sha ni dar b+ha ste/ de ni bkra shis par smos pa'i rtswa'i rnam pa'o/ /de'i rtse mo ni mchog ma ste shin tu phra ba khab kyi rtse mo lta bu des so//de ltar lo tshigs gcig gi dus su zla ba re re zhing nyi ma nyi shur sbyin sreg byas la sbyin sreg byas nas ku sha'i rtse mos 'bras chan tshos pa'i 'bru nyi shu rtsa gcig phyung nas za ba dang / de bzhin du chu'i thigs pa 'thung ba'i dka' thub can de'i rgyus ni rno zhing 'bar ba skye bar 'gyur ro zhes grag go//des mi phod do zhes bya ba ni ku sha'i rtses kha zas za ba'o/ /sangs rgyas la ni dad pa yi/ /zhes bya ba ni sangs rgyas kyi yul la yid ches pa'i dad pa'o/ /char yang zhes bya ba ni cha shas su mi 'gro ba'o/ /gang zhe na/ bcu drug ces bya ba smos te/thams cad kyi cha phra ba'i dngos por 'jig rten na grags pa'o/ /sangs rgyas la dad pa mi g.yo ba ni 'bras bu mtha' yas pa'am yid du 'ong ba'i 'bras bu yin no/ /ji ltar ku sha'i rtse mos zas za ba dang mnyam par 'gyur/ dam pa'i chos la dad pa yi//zhes bya ba ni thar pa dang de'i lam legs par gsungs pa'o/ /dge 'dun la ni dad pa yi/ zhes bya ba ni dam pa'i tshogs te dam pa'i rgyu'am/ nyan thos kyi rgyud la gnas pa'i slob pa dang mi slob pa'i lam mo/ /dkon mchog la dad pa dang ldan pas brten pa yin no zhes bstan pa'i phyir/sems can rnams la snying rje ba/ /zhes bya ba smos te/ sems can la rjes su brtse ba ni de'i sdug bsngal las 'don pa'i bsam pa'i tshul yin te/ de ni 'khor ba'i rgyud la brjod do/ /de nyid kyi sgra spyi'i tshul gnas par byas nas de'i khyad par bstan pa'i phyir/srog chags rnams la snying brtse ba/ /zhes bya ba smos te/ srog chags ni srog dang ldan pa'o/ /'dod pa'i sems can dang bsam gtan gsum du skyes pa de rnams nyid la ni dbugs 'byung ba dang rngub pa yod pa'i phyir ro//'byung po rnams la snying brtse ba/ /zhes bya ba ni/ dbugs 'byung ba dang rngub pa yod pa'i phyir/ khams lhag ma dag gis bstan pa'i phyir/ sems can srog chags su gyur pa 'dod pa la sogs pa'i khams gsum na gnas pa la sems can zhes bstan to//'dir bstan pa ni snying rje'i dbye ba yin te/ byams pa ma yin pa ci'i phyir zhe na/ bshad pa/ gtso bo yin pa'i phyir te/ gang gi phyir de ni sdug bsngal las 'don par byed pa yin la/ byams pa ni ma yin no/ /byams pa zhes bya ba ni gzhan la phan pa'i sems te/des yongs su bzung ba'i sems ni byams pa'o/ /'di lta ste/ skyes bu zhig nyin re bzhin dong tse sum brgya sbyin pa sbyin par byed do zhes bya ba la sogs pa'i mdo 'di las blta bar bya'o/ /tshad med pa rnams kyi nang nas gnyi ga kho na bzung ste/gzhan gyi don bya ba'i thabs kyi gtso bo yin pa'i phyir ro/ /gang gi phyir byams pa ni gzhan gyi don sems pa'o/ /snying rje ni de byed pa'o/ /de gnyis kyi rtsa ba ni yang dag pa'i shes pa yin no zhes bstan pa'i phyir/ grangs kyi dam chos zhes smos te/ grangs ni bsdus pa yongs su bcad pa'o/ /zag pa med pa'i shes pas chos bsgom pa'i sems gang yin pa'i sems des zhes bya ba ni tshigs bcad snga ma 'dir rjes su 'brangs te/ ji skad du mi rtag par rjes su mthong bar gyur pa ni 'dod chags dang bral bar mthong ste/de bas na de ni bsod nams ches mang po zhes gsungs so/ /ku sha'i rtse mos za ba sangs rgyas la dad pa la sogs pa las don med pa 'ba' zhig tu ma zad de/ mchod sbyin dang rjes su mthun pa yang yin no zhes bstan pa'i phyir zla ba re rer zhes bya ba la sogs pa smos so//rgyal po gsal rgyal gyis 'di lta bu'i tshul gyis mchod sbyin chen po brtsams te mchod sbyin stong phrag bcu'i mchod sdong mchod sbyin gyi ched du btsugs te/ bza' ba mang po dang bca' ba mang po dang sbyin pa'i rdzas mang po yang spungs shing gzhag go//de nas dge slong rab tu mang po snga dro'i dus su 'ongs pa dang / ji tsam na tshigs su bcad pa dgu gsungs so/ /stong zhes bya ba ni ri sha ba zhes bya ba'i mdo las bstan pa yin no/ /gzhan dag ni kAr ShA pa Na zhes zer ro/ /kha cig ni lan stong zhes zer ro//lo brgya ni dus tshigs brgya'o/ /mchod sbyin ni mchod sbyin dang mchod pa byed pa ste/ 'di'i tshul bzhin du byas na lha'i tshogs kyi nang du skye zhing gnas par 'gyur ro zhes so/ /lhag ma ni snga ma bzhin no/ /gang cung zad ces bya ba ni dus thams cad dang thams cad du dang thams cad kyis gang ci yod pa de thams cad ces bya ba'i don to//mchod sbyin zhes bya ba ni 'dod pa'i yul las byas pa ste/ de nyid ni mchod pa sngon du 'gro ba'am mngon par 'dod pa'i bsnyen bkur sngon du 'gro bas bram ze dang dge sbyong la sogs pa gang sbyin pa'i zhing la sbyin pa ste/'dis ni mchod sbyin dang sbyin sreg gnyis bstan to/ /me la sbyin pa sngon du 'gro ba'i sbyin sreg go/ /'jig rten du zhes bya ba ni 'gro ba ste 'khor ba pa'i bde ba sgrub pa zhes bya ba'i don te/ rgyu mtshan nyid bdun pa'o/ / lo brgyar zhes bya ba ni dus tshigs brgya'o/ /gang zhe na/ bsod nams 'dod pa yin pa'i mi/ /zhes bya ba ste/ bsod nams 'dod pa yin pas bsod nams te/ gang dag bsod nams sogs par byed pa'i sems can no/ /snga mas ni zhing dang bsam pa bstan nas 'dis ni byed pa po brjod do//des ni mi phod do zhes bya ba ni sbyin sreg dang mchod sbyin la sogs pas so/ /bzhi char yang zhes bya ba ni cha shas bzhi pa'i cha dang mnyam pa thob par mi byed do zhes bya ba'i don to/ /gang gi zhe na/ phyag 'tshal de'i zhes bya ba ste yon tan la mngon du phyogs par byed pas dad pa sngon du 'gro bas phyag 'tshal zhing mchod pa la sogs pa ni phyag 'tshal ba'o//yang na dkon mchog gsum la gus pa byed pa'o/ /gang zhig gis phyag 'tshal ba yin zhe na/ drang po'i sems dang ldan par 'gyur//zhes bya ba smos te/ g.yo la sogs pa ni sems kyi skyon mi drang ba ste/ de med pa ni drang po thob pa'o/ /de dang ldan pa ni gnas pa'o/ /ji srid sems kyi skyon dang g.yo thams cad dang bral ba ni drang po'i rang bzhin can te skye bo dge ba'am/ dkon mchog gsum la ste sangs rgyas la dge ba'i rtsa ba bskyed pa ni 'khor bar zad par mi 'gyur ro zhes bya ba'i tshig gis so//mdo gzhan dag las kyang bshad pa/ dge slong gang tshul khrims dang ldan pa dge ba'i rtsa ba'i chos can bsod snyoms yongs su spyod pa tshad med pa'i sems kyi ting nge 'dzin lus kyis mngon sum du byas shing rdzogs par byas te gnas pa de la sbyin pa byin pa ni sbyin bdag gi bsod nams tshad med pa 'byung bar 'gyur ro zhes bya ba la sogs pas so//bsgre ba'i tshoms te nyi shu rtsa bzhi pa'i rnam par 'grel pa rdzogs so// //dam pa'i chos mnyan cing bstan pa la nan tan du bya ba la sogs pa la ni skye bo dam pa ma yin pa spang ba dang / skyes bu dam pa la brten pas mngon par 'dod pa'i don mtha' dag 'grub par 'gyur ro zhes bstan pa'i phyir/ de'i 'og tu mdza' bshes kyi tshoms bstan to//de la sdig pa can gyi skye bo spangs shing skye bo dam pa bsten pas ni 'bras bu dang bcas par 'gyur ro zhes bstan pa'i phyir/ dad pa med cing zhes bya ba la sogs pa smos so/ /mnyan yod na bcom ldan 'das kyi phyogs gcig tu lha sbyin ka Da mor ka ti Sh+ya la sogs pas yongs su bskor cing 'dug go//phyogs gcig na ni 'phags pa shA ri'i bu 'dod chags dang bral ba'i skye bos yongs su bskor cing 'dug pa de gnyis de ltar mthong nas bram ze dang khyim bdag dad pa can dag gis lha sbyin la ni brnyas par byed pa/'phags pa shA ri'i bu la ni bsnyen bkur byed pa las tshigs su bcad pa gsum po 'di gsungs so/ /gang la dad pa yod pa ma yin pa de ni dad pa med pa ste de dang bshes par mi bya'o/ /ji ltar 'di dad pa yod pa ma yin par rig par bya zhe na/rtags kyis ji ltar mi dad pa ste/ dad pa med pa'i rtags bstan pa'i phyir/ 'jungs pa zhes bya ba bkren pa dang / ser sna can te mi gtong ba'i ngang tshul can zhes bya ba'i don to/ /phra ma can zhes bya ba ni gzhan 'byed par byed pa'i tshig gi phra ma de la sbyor ba'o//'dis ni dam pa'i chos mnyan par 'dod pa dang bral bar bstan te/ phra ma can ni smad pa yin pa'i phyir de la 'di nyan par mi 'dod pa'o/ /dbyen byed pa zhes bya ba ni skye bo khyad par can 'byed pa ste/ dam pa rnams kyi grogs po dang 'byed par byed pa'i tshig gang la yod pa de ni dbyen byed pa can te/dam pa rnams 'grogs par mi 'dod pa zhes bya ba'i don to/ /gzhan dag ni 'jungs pa ni sems kyi dri ma'o/ /phra ma ni ngag gi dri ma'o/ /'di ni lus kyi dri ma'o zhes zer te/ gzhan gyi srog dang nor dang chung ma 'byed pas so//bshes par mi bya zhing zhes bya ba ni grogs po'i dngos po yin pas bshes pa ste/ de de dang lhan cig 'brel par mi bya'o/ /mkhas pa ni de'i nyes dmigs shes pa ste/ 'di ltar/ sdig can mi dang 'grogs mi bya/ /zhes bya ba smos te/ skye bo ngan pa bsten pa ni smad pa yin te/sdig pa las ni ngan song gi rgyu yin pa'i phyir ro/ /dper na mi gtsang bas sbags pa'i sbrul la rkang pa gnyis kyis brdzis par gyur na ci yang mi gtsang bas sbags shing des zin par mi 'gyur ram zhes bya ba la sogs pa mdo las gsungs so//dad ldan zhes bya ba ni dad pa phun sum tshogs pa'i phyir ro/ /des pa zhes bya ba ni rgyud mnyen pa ste ngo tsha shes shing khrel yod pa dang ldan pa'am/ rnam par mi 'tshe ba'i phyir te 'grogs na bde ba zhes bya ba'i don to/ /tshul khrims ldan pa zhes ba ni tshul rnam par dag pa la gnas pa'o//thos pa mang ba zhes bya ba ni sde snod gsum mngon par shes pa'i phyir te/ de med pa ni tshul khrims rnam par dag pa med pa'i phyir ro/ /dang gi sgra ni 'dir thams cad du phan tshun ltos pa'i don to/ /yon tan rnam pa bzhi kho nas ni dge ba'i bshes gnyen gyi yan lag tshang ba yin no//gzhan dag ni snga ma'i tshigs bcad kyi gnyen po 'dir go rims bzhin du tshig rkang bzhis 'grel pa yin no zhes zer ro/ /'di nyid dang 'grogs par bya ba'o zhes pa ci'i phyir zhe na/ 'di ltar/ mi mchog dag dang 'grogs par bya//zhes bya ba yin te/ mngon par 'dod pa'i dngos po 'thob pa'i rgyu yin pa'i phyir te/ rgyal po gsal rgyal gyis spos kyi glang po che gnas pa khrus dang 'brel pa la 'tshe ba mi byed cing gdug pa med pa la gnas par gyur to zhes brjod par bya'o//de nyid kyi phyir smras pa/ skye bo dam pa yon tan shin tu dag pa yi/ /zhabs la spyi bos gtugs te rdul gyis gos kyang bla/ /zhes bya ba yin no/ /skye bo ngan pa dang rtag tu 'grogs pa dang mthun par spyod pa yang ma zad de/dus cung zad cig kyang bsten par mi bya'o zhes bstan pa'i phyir/ sdig pa'i grogs po mi bsten cing / /zhes bya ba smos te/ sdig pa byed pa'i grogs po ni yun thung dur yang mi bsten te/ dad pa med pa la sogs pa'i skyon yod pa'i phyir bstan pa la zhugs pa rnams kyang mi bsten na gzhan lta ci smos/skyes bu ngan pa zhes bya ba ni sems can tha ma ste/ log pa'i lam ston pa'i phyir rdzogs byed la sogs pa bzhin no/ /yang na go rims bzhin du gang sdig pa'i chos dang ldan pa dang / gang sdig pa'i sgra dang ldan pa de yang bsten par mi bya'o zhes tshig rkang gnyis kyis ston to//dge ba'i gshes gnyen bsten bya zhing / zhes bya ba ni yon tan dpag tu med pa'i chu'i rgyun gyis dri ma'i skyon rnams 'khru bar byed pa'i phyir dge ba'i gshes gnyen ni gser bzang po bzhin du bsten par bya ste/ 'dir khyim bdag mgon med zas sbyin dang nye bar gnas pa'i su tsi ka zhes bya ba dper brjod par bya'o/ /rang nyid kyi yon tan de bstan nas/ gzhan la bstan pa sbyin pa'i phyir smras pa/ skyes bu dam pa bsten par bya/ /zhes bya ba smos te/ de bzhin gshegs pa 'am gzhan 'dod chags dang bral ba'o//yang na go rims bzhin du mngon par 'dod pa'i yon tan dang grags pa dang ldan pas so/ /ci'i phyir zhe na/ de lta bu dag bsten byas na/ /zhes bya ba smos te/ de lta bu'i dge ba'i gshes gnyen skyes bu dam pa gang gis bsten pa'i skyes bu de la legs par 'gyur zhes bya ba phun sum tshogs par 'gyur ba'o//sdig pa chen pos zil gyis gnon par gyur kyang 'di ltar ma skyes dgra yon tan dang ldan par gyur to zhes bya ba brjod par bya'o/ /sdig par mi 'gyur zhes bya ba ni dge pa'i bshes gnyen bsten par byas na legs par 'gyur zhes bya bar 'dir rjes su 'brang ngo //yang na dam pa bsten pas ni ngan par mi spyod pa'am/ de'i 'bras bu rgud par mi 'gyur ro/ /dam pa rnams la bsten pa nyid la gzud pa'i phyir smras pa/ gang dag thos mang zhes bya ba la sogs pa'o//sna tshogs bsten pa zhes bya ba'i bram ze gang dang gang du bsten pa de dang der gdung ba thob par gyur pas bcom ldan 'das kyi thad du song nas bsten par bya ba zhus so/ /bka' stsal pa/ bram ze'am dge sbyong gang su dag dad pa phun sum tshogs par gyur pa dang /tshul khrims phun sum tshogs par gyur pa dang / shes rab phun sum tshogs par gyur pa dang / thos pa phun sum tshogs par gyur pa de la sten cig/ /'di lta ste ri'i rgyal po kha ba can la brten nas sa la lnga 'phel bas rgyas par gyur to zhes bya ba gsungs nas tshigs su bcad pa gsum bka' stsal to//dad dang zhes bya ba 'dis ni mngon par mtho ba'i rgyu dang ldan par bstan te/ dad pa'i lam brgyags bskur nas ni/ /zhes bya ba'i tshig gis so/ /shes rab dang ldan des zhes bya ba ni shes rab khyad par can yod cing rtogs pa dang ldan pa ste/nges par legs pa'i rgyu dang ldan par bstan to/ /yang na nyes pa rnams dgag pa dang gtan du spangs pa ste/ bstan pa nyid kyis bsal bas so/ /mi yis bstan bya zhes bya bas ni de bsten pas dpag tu med pa'i khyad par 'byung ba'i phyir ro//'di gnyis dang rjes su mthun pa'i rgyu bstan pa'i phyir thos mang zhes bya ba gsung rab kyi don rtogs pa ste/ ji skad du chos nyan pa yongs su rdzogs na ni dad pa yongs su rdzogs pa yin la/ tshig gi don zab mo ni shes rab kyis yongs su rtogs par 'gyur ro zhes bshad do//'di gnyis kho na'i bsgom pa'i thabs bstan pa'i phyir/ gnas mang sems pa dang zhes bya ba yin te/ dngos po mang po la yongs su rtogs par byed pa dang / dran pa nye bar gzhag pa la sogs pa la mngon par brtson pa'i phyir ro//yang na rnam pa mang po ste/ ji skad du/ ji ltar yang gnas bdun la mkhas par 'gyur te/ gzugs shes par gyur pa dang / gzugs kun 'byung ba zhes bya ba la sogs pa'o/ /gang 'di ltar yongs su rtogs par byed pa de nyid kyis ni zag pa med pa'i lam thob pas dad pa dang shes rab bsgom par 'gyur ro//gang dag ces bya ba ni yon tan bstan pa ste/ legs par smras pa mnyan byas zhes pa dang sbyar ro/ /'dir ni zhes bya ba ni 'jig rten 'dir sangs rgyas 'byung bas brgyan pa'o/mnyan byas zhes bya ba ni brtags pa'o/ /ring po nas kyang de yis zhes bya ba ni dad pa dang ldan na yul bskal par gyur kyang khyad par thob par 'gyur zhes bya ba ni yon tan gyi tshogs dang phan yon 'grub par 'gyur ba ste/ sangs rgyas thag ring po na bzhugs kyang shes rab kyi mig gis rnam par sbyangs pa yin te/u tra ya na'i rtogs pa brjod pa 'dir bshad par bya'o/ /ci nas kyang dam pa bsten pa la 'jug par bya ba de ltar sbyar ba'i phyir/ dman pa bsten pas mi dag nyams 'gyur zhing / /zhes bya ba nyin re zhing yon tan nyams pa 'thob par 'gyur te/dam pa gang yin pas bsten kyang yon tan nyams par 'gyur ro/ /de bas na 'di la bsten par mi bya'o zhes ston to/ /thad kar bab pa bsten pas so na gnas/ /zhes pa la/ 'di la mnyam par 'tsho ba'i tshul yod pa de ni de'o/ / gang yang skye bo mnyam pa dang lhan cig 'grogs pa des ni thob pa'i 'bras bu'i khyad par las nyams pa yang med la/ khyad par thob pa yang med do/ /gtso bo bsten pas zhes bya ba ni yon tan khyad par can 'dren par byed pa ste/ ches khyad par du 'phags pa'i gan du lhags nas de la brten cing mchog tu de dang nye bar gnas par byas na dam pa thob par 'gyur ba ni rnyed pa'o//dam pa thob ces bya ba ni yon tan gyi khyad par du gyur cing yon tan bsngags pa zhes bya ba'i don to/ /ji skad du 'di ltar sems med pa'i til la me tog gi dri chen pos bsgos par gyur na lhan cig bsten pa'i dri thob par 'gyur zhing de'i dri nye bar 'go bar 'gyur na ji ltar yang skye bo dam pa dang bsten na dam par mi 'gyur/de phyir bdag pas gtsor gyur bsten par bya/ /zhes bya ba ste/ de bas na 'di ltar bdag nyid pas ches khyad par du gyur pa dag bsten par bya'o zhes bstan to//de nyid gtso bo gang bsten na/ /gtso bo bas kyang ches gtsor 'gyur/ /zhes bya ba ni mchog pas kyang mchog tu ste/ gang bdag nyid pas ches khyad par du gyur pa bsten pas so/ /gang gis ches gtso bor 'gyur zhe na/ shes rab ches mchog ldan pa yis//zhes bya ba smos to/ /chos rnam par gtan la dbab pas de khyad par gyi sbyor ba thob pa'i phyir ro/ /tshul khrims ni so sor thar pa'i sdom pa la sogs pas so/ /nye bar zhi ba zhes bya ba ni ting nge 'dzin gyis so/ /des na yang phung po gsum gyi bdag nyid 'phags pa'i lam bstan pa yin no//mi dge ba'i bshes gnyen bsten pa'i skye bo ni nyams par 'gyur ro zhes bshad pa la ji ltar de grags pa la sogs pa nyams par 'gyur zhe na/ de nyid kyi smad pa bstan pa'i phyir/ mi yis 'di na nya rul la/ / zhes pa smos so/ /mnyan yod na rgyal po gsal rgyal gyi mdun na 'don gyi bram ze mchod sbyin gyi sbyin sreg byed par brtsams te/ de'i don du mi zhig gis dgon pa nas rtswa khur gcig blangs te grong khyer du 'jug 'dod pa'i lam gyi bar na nya mang po mthong ngo / /des khur gyi nang du bcug ste rang gi khyim du khyer nas khur de yang rang gi rje bo dang mdun na 'don la phul lo//des kyang nya shin tu rul ba'i dri bro bas phyi rol du bor ro/ /gzhan zhig gis kyang de la bsgos pa'i shing pa la sha'i lo ma blangs te/ gzhig nas rgya spos sar pa zhig kyang rnyed de lo ma de'i nang du kha sbyar te gzhag go//de dang 'byar pas lo ma yang dri zhim zhing bsten pa'i 'os su gyur to/ /ji tsam na mdun na 'don bcom ldan 'das ga la ba der song ste/ bdag gi mchod sbyin ni gang gis kyang yan lag tshogs par ma gyur to zhes gsol pa dang /mchod sbyin ni de lta bur don chen po yin no zhes bstan nas de'i dbang du mdzad de tshigs su bcad pa gnyis gsungs so/ /nya rul pa zhes bya ba ni rnam par gsher zhing rul pa'o/ /bcings pa ni nye bar bsdams pa'o/ /gang ku sha dang dar b+ha dag byed du gyur pa/ku sha nyid kyang rul 'gyur ba/ /zhes bya ba yin te/ dag byed kyi gzugs su gyur pa'i ku sha yang rul cing dri nga bar gyur te spang bar bya bar 'gyur ro zhes bya ba'i don to/ /sdig pa bsten pa'ang de bzhin 'gyur/ /zhes pa ni de bzhin du skye bo ngan pa la brten par 'dod pa'i dam pa rnams kyang tshig ngan pa la sogs pa'i dri nga ba la sbyor bar byed do//rgya spos zhes bya ba ni shin tu bsngags shing dri zhim pa'i sman no/ /mi gang gis pa la sha'i shing gi lo ma rnams su phur mar byas pa ni kha sbyar ba'o/ /dang gi sgra ni yang gi don te de dang 'brel pa'i phyir ro//lo ma nyid kyang dri zhim pa zhes bya ba ni dri bzang po thob par 'gyur zhing dri yid du 'ong ba rnyed pa ste/ yongs su gzung bar 'os pa de rnyed pa zhes bya ba'i don to/ /de bzhin du/ dam pa bsten pa'ang de bzhin 'gyur/ /zhes bya ba ni de bzhin du dge ba'i bshes gnyen la bsten na ni yon tan med kyang grags pa la sogs pa'i yon tan la sbyor bar byed pa yin no//ma rul pa yang sdig pa bsten pa de bzhin du 'gyur ro zhes bstan pa la/ sdig pa bstan pas ji ltar rul bar 'gyur ba dang / sdig pa byed par dogs pa dang /tshig ngan pa 'byung bar 'gyur ro zhes bstan pa'i phyir/ gal te zhes bya ba la sogs pa smos so/ /sdig pa mi byed pas zhes bya ba ni rgyal po ma skyes dgra mi dge ba'i gshes gnyen la brten par bshad cing bstan pas 'gyod pa chen po skyes te/rgyal po chen po lus kyis nyes par spyod pa byas te/ de bas na rgyal po chen po dge ba'i bshes gnyen la brten par gyis shig /des na khyod la yun ring po'i don du 'gyur ro/ /rgyal po chen po sdig pa mi byed kyang sdig pa'i skye bo la brten pa ni 'jig rten pa rnams kyis dogs pa'i gnas su 'gyur ro zhes bstan cing ji srid du tshigs su bcad pa bzhi gsungs so//ji ltar gang zhig bdag nyid ngan par spyod pa mi byed pa yang yin na/ bdag nyid byed pa lta smos kyang ci dgos zhes bya ba ni gang gi sgra'o/ /byed pa dag la brten na zhes bya ba ni sdig pa la brten pa'o//dogs skye zhing zhes bya ba ni 'jig rten pa rnams dogs pa skye bar 'gyur te/ dogs pa skyed pa dang dogs pa'i gzhi zhes bya ba'i don to/ /gang du zhe na/ sdig pa byed par zhes bya ba ste/ nang du ngan par spyod pa zhes bya ba'i don to//gal te 'di ni dben par ngan par byed pa spyod de/ gzhan du na ji ltar 'di rgyun mi 'chad par sdig pa byed pa'i nang du gnas par 'gyur zhes skye bo dam pa rnams dogs par 'gyur gyi/ mi snyan pa ni mi brjod do/ /skye bo ngan pa ni tshig ngan pa yang smra'o zhes bstan pa'i phyir/mi snyan pa yang 'phel bar 'gyur/ /zhes bya ba tshig ngan pa yang rgyas par 'gyur zhing 'phel lo/ /gzhan dag tu ni skye bar 'gyur/ /zhes bya ba brjod de/ rab tu 'byung ba la bya bar bstan te/ snga ma byung ba rab tu 'byung ba ni skye ba'o//skye bo ngan pa bsten pas skyon 'go ba nyi tshe bstan par yang ma zad de/ skye bo dam pa yang skye bo ngan par 'gyur ba yin te/ gser bzang po la yang ra gan gyis bsres na nyams par 'gyur ba lta bu'o zhes bstan par bya ba'i phyir smras pa/ bsten bya ma yin zhes bya ba la sogs pa'o/ /bsten pa ni rgyun du 'brel cing lhan cig gnas par byed pas so/ /bsten par bya ba ma yin zhes bya ba ni bsten par mi 'os pa'i phyir te/ ngan par spyod pa 'phel ba'i rgyur 'gyur bas so/ /de yi skyon gyis skyon can 'gyur//zhes bya ba ni bsten par bya ba ma yin pa la bsten pa ni kun nas nyon mongs shing gdung bar 'gyur la dri ma can du byed pa'o/ /yang na ngan par spyod pa la sogs pa'i tshig ngan pas kun nas nyon mongs pa ste/ /gang skye bo ngan pa de'i skyon gyis de la gos pa zhes bya ba'i don to//gzhan dag tu ni kun nas nyon mongs pa zhes brjod de/ nyon mongs pas bslad pa'i ngan par spyod pa'am/ de'i dri ma'i don to/ /'dir dpe bstan pa'i phyir/ dong par dug bskus mda' bcug bzhin/ /zhes bya ba smos te/ bzhin zhes bya ba ni ji lta ba'o//mda' ni mda' nyid do/ /bskus pa ni sbags pa ste dug la sogs pas so/ /dong pa ni mda' 'dzin pa'i snod do/ /yang na ka pa la zhes bya ba mda'i tshogs te mda'i phung po'i nang du gnas pa ni zhes bya ba'i don to/ /dug ma bskus pa'ang gos pa zhes bya ba ni mda' dug la sogs pas ma gos pa'ang nye bar sbags shing bslad par 'gyur ro zhes bya ba'i don to//skyon gos 'jigs pa dag ces bya ba ni tshig ngan pas bslad pas skrag pa'o/ /brtan pa ni shes rab can no/ /sdig pa can dang bshes mi bya/ zhes bya ba ni sdig pa can gyi grogs po yin pas sdig pa can gyi bshes te/ nam yang skye bo ngan pa dang 'grogs par mi bya'o/ /skye bo dam pa ni skye bo dam pa ma yin pa la brten pas skyes bu dam pa ma yin par 'gyur ro zhes bstan gyi/ skye bo dam pa ma yin pas dam pa la brten pa ni skyes bu dam par 'gyur ro//zhes bya ba ni mi rigs te/ dper na sA la ni me tog gi dris bsgos pa 'dzin gyi sa'i dri ni me tog gis 'dzin pa ma yin no zhe na/ bshad pa/ ji ltar grogs po bsten pa dang / /zhes bya ba smos te/ de lta bu dge ba'i bshes gnyen dang sdig pa'i grogs po rnams ni dus dang dus su nye bar 'go bar 'gyur ro//bsten bya de ni ci 'dra bar/ zhes bya ba ni des de la nye bar 'go zhing gnas pa yin no/ /ring po mi thogs de 'dra 'gyur/ /zhes bya ba ni myur ba nyid du de lta bur 'gyur te/ de'i rnam par 'grub ba'o/ /ci'i phyir zhe na/ bsten bya de ni ci 'dra bar zhes bya ba smos te/ bsten par bya ba dang gnas par bya ba ste/ 'di ltar skyes bu de lta bu dper dri nga ba dang dri mi zhim pa'i sman dang bsten pa'i rlung dag bzhin no/ /dam pa dang bsten pa dang sdig pa can dang 'bral ba la gzud pa'i phyir de bas zhes bya ba smos te/dam pa dang dam pa ma yin pa bsten pa nyid kyi yon tan dang skyon shes par bya ste/ dam pa ma yin mi bsten cing / /zhes bya ba ste/ 'di dang sbyor ro/ /de gang yin zhe na/ shes pa yin zhes bya ba ste/ rnam par shes shing de nyid rtogs pa'o/ / gang yin zhe na bsten pa zhes bya ba smos te/ dam pa dang dam pa ma yin pa'i yon tan dang skyon zhes bya ba'i don to/ /dam pa dang dam pa ma yin pa bsten pa ni gnas skabs kyis sgrub pa'o/ /gang gis she na/ bdag gis zhes bya ba rang nyid kyi'o/ /'dir dpe bstan pa'i phyir 'bras bu'i snod bzhin du zhes bya ba smos te/'bras bus gang ba'i snod de la ji ltar gang zhig gis yon tan dang skyon gzhan gyi rdzas dang 'brel pa las byung ba rtogs par byed de/ de'i phyir gal te shing pa la sha dang 'khri shing la sogs pa'i lo ma'i rang bzhin gyi snod la dri zhim pa'i a mra'i 'bras bu'am/sri shing gi me tog bcug ste bzhag na de'i dri bzang po 'go bar 'gyur ro/ /sman dring ba shing ko sha ta ka'i me tog la sogs pa gzhag par gyur na ni dri mi zhim pa yin te/ de bas na gzhan gyis byas pa de'i yon tan dang skyon de bzhin du bdag gis so//des na de'i phyir/ dam pa ma yin mi bsten cing / /zhes bya ba skye bo ngan pa dang ji ltar yang bsten par mi bya'o/ /dam pa bsten byas la zhes bya ba ni skyes bu dam pa dang 'grogs pa'o/ /de gnyi ga sgrub nus pa bstan pa'i phyir smras/mkhas pa zhes bya ba shes nyen yod pa ste/ ci'i phyir bsten pa shes pa yin zhe na/ de'i rgyu ni mkhas pa yin pa'i phyir ro/ /dam pa bsten pa ni gtso bo yin no zhes phan yon bstan pa'i phyir/ de'i lam rjes su 'brangs na zhes bya ba yin te/ gang zhig gang bsten pa ni nges par de'i lam gyis 'gro ba ste/dam pa rnams kyis tshul bzang po la sogs pa'i lam la rjes su 'gro ba ste/ gang chos kyi rjes su 'brang ba'o/ /de'i lam gyi 'gro ba'i 'bras bu bstan pa'i phyir dge slong zhes bya ba smos te/ nyon mongs pa spangs pa'i phyir ro/ /nyon mongs pa spangs pa'i khyad par bstan pa'i phyir/ sdug bsngal zad pa thob par 'gyur/ /zhes bya ba yin te/ sdug bsngal gang du zad pa thob pa de ni thar pa thob pa zhes bya ba'i don to/ /yang na dam pa ma yin pa'i lam gyi rjes su 'gro ba'i dge slong ni rab tu byung ba yin yang sdug bsngal gyi gnas 'khor ba thob pa yin no//zad pa dang gnas dang kun gzhi zhes bya ba ni rnam grangs yin te/ sdug bsngal zad pa zhes bya ba ni ngan song gsum mo/ /mkhas pa nyid ni lam bzang po la gzhol ba yin te/yongs su rtogs par byed pa'i phyir ro/ /gzhan ni ma yin no zhes bstan te/ byis pa ji srid ces bya ba la sogs pa tshigs su bcad pa brgyad do/ /kun du rgyal ba'i slob ma rab tu byung ba dag la bdud mi dga' bar gyur te/ slob ma gcig dang mgon po gcig gis kyang 'di snyed btul na mang pos nga 'dul bar mi 'gyur ba lta smos kyang ci dgos zhes te/de bas na lo drug gi bar du bcom ldan 'das la glags btsal zhing rjes su 'gro ba las glags ma rnyed de/ mnyan yod la sogs grong khyer chen po drug tu gshegs pa'i dus su bsam pa ma rungs pas nam mkha' la song ste/kye dge sbyong gau ta ma sdig pa byed pa yon tan gyi ro mi shes pa'o zhes tshig ngan pa brjod pa byas so/ /'phags pa rta thul la brten pas nye rgyal khyad par thob par gyur to zhes bya ba la sogs pa'i gtam dge slong dag brjod pa las de'i dbang du mdzad pa'o//ji srid gson bar du zhes bya ba ni ji srid 'tsho'i bar du ste/ lo brgya'am lo stong zhes bya ba'i don to/ /gal te de ni de lta na yang ngo / /byis pa ni blun pa ste/ rmongs pas blo nyams par byas pa zhes bya ba'i don to//mkhas pa bsten byas zhes bya ba ni shes rab dang dul ba dang nye bar zhi ba la sogs pa'i khyad par dang ldan pa dang 'grogs pa'o/ /'on kyang byis pa des ni chos shes par mi 'gyur te/ yon tan rten cing 'brel bar 'byung ba la sogs pa'i don rtogs par mi 'gyur ro/ /gzar bus tshod ma'i ro bzhin no//zhes bya ba ni byan pos gzar bu dang skya ba la sogs pa gang gis tshod ma yang dang yang du dkrug cing srub par byad de/ gzur bu de ni phal cher tshod ma'i nang du gnas kyang mngar ba dang skyur ba la sogs pa'i tshul gyis ro ji ltar mi tshor ba de bzhin du byis pas dam pa stong gi nang du yun ring por bsten kyang chos mi rtogs pa yin no//shes rab ldan pas yud tsam zhig /ces bya ba ni gang la shes rab khyad par can yod pa de ni yun shin tu thung ba'am/ chu tshod gnyis mtshon pa'o/ /mkhas pa nye bar bsten pas kyang / / zhes bya ba ni des chos ji skad bstan pa de bzhin du shes so/ /lce yis tshod ma'i ro bzhin no/ /zhes bya ba ni dper na lce'i dbang po ma nyams pas ni nye bar reg pa tsam gyis tshod ma'i ro ji lta ba bzhin du rtogs par 'gyur ro/ /byis pa ji srid gson gyi bar du dam pa stan par byed kyang chos shes par mi 'gyur te/ci'i phyir zhe na/ 'di la shes rab med pa'i phyir ro zhes bya ba ste/ shes rab bya ba rtogs pa'i blo ni byis pa la med de/ 'di ltar dmus long gis gzugs la sogs pa mi mthong ba'i phyir ro/ /'dis ni 'jig rten pa'i shes rab dran pa nye bar gzhag pa la sogs pa yongs su 'dzin pa bstan to//shes rab ldan pa zhes bya ba ni myur du rtogs pa'o/ /de la shes rab ces bya ba ni mkhas pa de la yod pa ste/ mgon med zas sbyin la sogs pa brjod par bya'o/ /de la mig ni med pa'i phyir//zhes bya ba ni mig lta bu yin pas mig ste/ mngon sum gyis yul dag mthong bar byed pa'i phyir zag pa med pa'i shes rab ces bya ba'i don to/ /bsgrub pa'i chos byis pas ma shes pas gcig pur ma zad de/ bstan pa'i chos kyi tshul gyis 'jig rten dang 'jig rten las 'das pa yang mi shes pa'i rgyu bstan pa'i phyir/rdzogs pa'i sangs rgyas kyis bstan pa/ /zhes bya ba smos te/ sangs rgyas kyis bstan pa'i chos so/ /shes rab dang ldan pas ni gzhan gyis bstan pa gcig pur yang ma zad de/ yang dag par rdzogs pa'i sangs rgyas kyis gsungs pa yang ma lus par rtogs pa yin no/ /mkhas pa ni tshig gcig gis kyang bya ba dang mi bya ba thams cad bsgrub pa yin gyi/ byis pa ni ma yin no zhes bstan pa'i phyir snod la brten te bstan pa gcig gis kyang don byed pa dang don nyams pa yin no zhes bstan pa ste/'di ltar don ldan tshig ni zhes bya ba la sogs pa smos so/ /dge slong dag 'di lta ste nam mkha' las char 'bab pa ni tshwa sgo can dang / dgon dung dang / sa 'jam zhing 'jam pa de dang de dag dang phrad pa ni de dang de'i yon tan du 'gyur ro//de bzhin du de bzhin gshegs pa'am de bzhin gshegs pa'i nyan thos kyis bstan pa'i chos thos pa yang dman pa la mos pa rnams kyis ni don chung du rtogs par 'gyur la/ rgya che ba la mos pa rnams kyis ni zab par zhes bya ba la sogs pa mdo'i tshig 'di gsungs so//tshig gcig gis kyang zhes bya ba la kyang gi sgra ni gnyis pa dang yang bral ba yin na/ tshig mang po lta smos kyang ci dgos zhes bya ba yin no/ /yang na tshig ces bya ba ni tshigs bcad kyi bzhi cha la brjod de/ 'di ltar yang gsungs pa/ sdig pa thams cad mi bya ste//zhes bya ba tshig rkang gcig gis don ston zhing 'di'i don gzhan la ltos pa med pa ste/ 'dis ni tshig gi don rdzogs par rtogs pa zhes bya ba'i don to/ /chos rnams gang dag ces bya ba la sogs pa tshigs bcad mtha' dag gam/ tshig rkang gcig gis 'phags pa'i bden pa bzhi rtogs pa'i phyir ro//don ldan zhes bya ba ni khyad par gyi 'dod pa'i 'bras bu skyed pa'i don dang 'brel pa ste/ don la rton par bya'i/ tshig 'bru la ni ma yin no zhes mdo la sogs pa nyid las gzung bar bya'o/ /mkhas pa yi ni bya ba byed//ces bya ba ni shes rab can nye rgyal la sogs pa'i bya ba skyed pa yin te/ mngon par 'grub pa'i phyir ro/ /byis pa'i bya ba byed mi 'gyur/ /zhes bya ba ni glen pa ste/ tsaN+Da gi ri ka la sogs pa la ni gnod par byed de sdig pa byed pa'i rgyu yin pa'i phyir ro/ / sangs rgyas kun gyi gsung gis kyang / /zhes bya ba ni sangs rgyas thams cad de/ gang gA'i klung gi bye ma snyed kyi thub pas gang khyad par med pa'i tshul dang / khyad par med pa'i yi ge dang / tshig gi don gcig gis tshul yin yang nyan pa po'i khyad par gyis don dang don med pa byed pa yin no//rgyal ba gcig gis gsung ngam gzhan gyi tshig gis lta smos kyang ci dgos/ sangs rgyas thams cad ni mnyam par yi ge dang tshig gcig nges par mi ston te/ 'od srungs kyi gsung rab la phung po nyid yod par ston to/ /brtag pa ni mkhas pa dag la yod kyi byis pa la ni ma yin no zhes bstan pa'i phyir/blo dang ldan pa tshig gcig ces bya ba la sogs pa smos so/ /kye ma 'du byed rnams mi rtag /ces bya ba'i tshig gcig thos pa tsam gyis rgyal po ni bden pa mthong bar gyur la/ lha sbyin ni rab tu byung zhing sde snod gsum 'don yang dmyal bar skye bar gyur te 'di gsungs so/ /tshig gcig gis zhes bya ba ni zla med pa'i tshig rkang cig thos pas so/ /blo dang ldan pa ni shes rab can no/ /tshig brgya dag ni shes par 'gyur/ /zhes bya ba ni/ rig par 'gyur ba'o/ /tshig brgya zhes bya ba'i sgra ni dpag tu med pa'i tshig ste/ dper na dug ni lus kyi rma cung zad cig la brten nas lus thams cad la khyab par 'gyur ba de bzhin du blo dang ldan pa yang tshig gcig thos pa la brten nas/ dngos po thams cad rtogs par 'gyur ro//byis pa dag ni tshig stong gis/ /zhes bya ba ni tshig stong ste/ chos kyi phung po stong phrag brgyad cu thos par gyur kyang de las tshig gcig kyang go bar mi 'gyur na mang po lta ci smos/ shes rab dang ldan pa ni dgrar gyur kyang phan 'dogs pa yin la byis pa dang ni bshes par bya ba ma yin no zhes bstan pa'i phyir/nyis na mkhas dang mi mdza' bla'i/ /zhes bya ba la sogs pa smos so/ /tshong dpon chen po zhig gi bu mi dge ba'i bshes la brten pas gzhan gyi chung ma la zhugs te/rgyal po ma skyes dgras bsad nas dmyal bar skyes te/ de'i dbang du mdzad nas/ dge slong dag dge ba'i grogs po dang gnas par gyis la dge ba dang bsten par gyis shig ces bya ba nas ji tsam na 'di gsungs so/ /mi mdza' ba ni dgra'o/ /nyis na mkhas dang mi mdza' bla'i//zhes bya ba ni shes rab dang ldan pa dgra nyid du gyur kyang mchog yin no zhes bya ba'i don to/ /ji ltar 'ga' zhig mi mdza' ba 'dod par gyur pas mi mdza' ba'i khyim du skyes par gyur pa'i phyir te/ 'on kyang blo dang ldan par gyur pa ni bya ba dang bya ba ma yin pa la mkhas pas 'phya bas 'jigs te bab col du mi byed do//de bas na gsal rgyal dang ka pi na chen po'i gtam dang / rung tra khan la sogs pa yang 'dir brjod par bya'o/ /byis pa rnams dang mdza' mi rung / /zhes bya ba ni grogs po ni phan par 'dod pa'i phyir ro/ /'dir btso blag mkhan gyi bus tho ba brgyab ste/pha bsad pa dper brjod par bya'o/ /ci byis pa la mdza' ba yang smad dam zhe na/ byis pa rnams dang mdza' byed pa/ /zhes bya ba gang gi phyir byis pa ni grogs po'i phyogs bor zhing gnas pa ste/ mchog tu phan 'dogs par 'dod pa yin na yang rmongs pas dmyal bar khrid cing 'dren par byed do//tshig ngan pa mi snyan pa la sogs pa'i skyon nyi tsher ma zad de/ 'di la phan pa byed pa yin no zhes bya bas yid rton yang 'di la shin tu nyam nga zhing gnod pa'i g.yang sar ltung bar byed pa yin te/ lha sbyin dang ma skyes dgra'i gtam 'dir brjod par bya'o//byis pa'i mtshan nyid kyis bya ba de bstan pa'i phyir/ byis pa gang zhig ces bya ba la sogs pa smos so/ /dge slong zhig la ltung ba byung ba las bcom ldan 'das kyi zhabs gnyis la yan lag thams cad kyis phyag 'tshal te gsol ba/btsun pa bsams bzhin du ltung ba byung ste/ ji ltar byis pa dang / ji ltar glen pa la sogs so zhes gsol pa dang / ji tsam na 'di gsungs so/ /byis pa gang zhig byis pa'o zhes/ shes pa'o zhes bya ba la rnam pa gnyis kyis ni byis pa rdzogs pa yin te/chos ma shes pa dang / bdag nyid ma shes pa'o/ /de la gal te/ de chos mi shes te/ bdag shes kyang de ni gcig tu byis pa zhes mi brjod de/ mkhas pa'i rnam grangs yin pa'i phyir ro/ /gang la la zhig mi shes shing blun yang bdag nyid kyi bya ba shes pa de ni 'dir mkhas pa yin zhes bya ba ste/des na bdag nyid shes pa la 'jug pa des 'dir bdag nyid mkhas pa zhes brjod do/ /bdag nyid shes dang ji ltar mkhas pa zhes mi brjod de/ bdag nyid shes pa de dang mnyam pa'i yon tan ni gang yang med do zhes bya ba'i tshig gis te/de ni shes rab dang ldan pa'o/ /byis pa gang zhig mkhas sems pa/ /zhes bya ba ni gang yang chos rnams mngon par mi shes kyang mkhas par sems pa 'di la yod pa ste bdag ni mkhas pa'o zhes sems shing mkhas pa bstan bcos du ma rtogs shing bsten pa dag dang mnyam par sems pa'o//de ni byis pa zhes brjod do/ /zhes bya ba ni de nyid ni byis pa ste shin tu rmongs pa zhes brjod do/ /dam pa rnams kyis smad pa ni bla'i/ dam pa ma yin pa sems med pa 'dra ba'i glen pas ni bstod kyang de lta ma yin no zhes bstan pa'i phyir/ byis bas bstod pa gang yin dang //zhes bya ba la sogs pa smos so/ /bcom ldan 'das kyis lha sbyin la skyes bu glen pa zhes bya ba la sogs pa'i tshig gis bsdigs pa dang / gcig pu dben par song ste 'gyod pa skyes nas 'di snyam du bcom ldan 'das ni legs par gsungs te/bdag gis ni sdig pa byas shing gang bdag gis dge 'dun gyi dbyen la sogs pa ngan par spyod pa dag byas te de ji ltar bya zhes bsam pa las/ ji tsam na rdzogs byed de'i thad du 'ongs te/ rdza ma'i bum pa chag pa bzhin du shi nas ni yang skye ba med do zhes smras pa dang /ji tsam na lha sbyin lta ba log par skyes par gyur te/ de'i dbang du mdzad nas 'di gsungs so/ /byis pas bstod pa gang yin pa/ /zhes bya ba ni gang rdzogs byed la sogs pa'i glen pas bsngags pa brjod pa'o/ /mkhas pas smad gang yin zhes bya ba ni blo dang ldan pa ste/de bzhin gshegs pa la sogs pas gsungs shing smad pa'o/ /de gnyis las gang mchog yin zhe na/ mkhas pas smad pa ches rung gis/ /zhes bya ba yin te/ mkhas pa dag gis smad pa ni ches rung ste/ khyad par rnam pa sna tshogs pa'i rgyu yin pa'i phyir ro//byis pas bstod pa mi rung ngo / /zhes bya ba ni skye bo glen pa las rnam pa sna tshogs pa'i bsngags pa'i tshig brjod pa thos pa ni ma yin te/ skyon rnam pa sna tshogs dang 'brel pa'i phyir ro/ /des na de'i phyir rnam pa thams cad du byis pa dang bsten pa las bzlog pa'i phyir/byis pa bsten pa zhes bya ba la sogs pa smos so/ /byis pa mi thos shing zhes bya ba ni ji ltar rna bas thos pa'i yul du yang mi 'gyur ba de ltar 'bad par bya ste/ thos par gyur na yang 'dod chags dang zhe sdang dang nyes par spyod pa la sogs pa'i rkyen gyis ngan song gi rgyu nyid yin pa'i phyir ro//nam yang mthong ba'i gnas su gnas par mi bya ste/ re zhig yang snga ma gnyis spang bar 'dod pas brtag par bya'o/ /gal te re zhig na byis pa de las gzhan med de thos par gyur na ci nas mi mthong ba de ltar 'bad par bya'o/ /de la de mthong bas kyang shin du sdig pa la goms shing spyod pa srid pa'i phyir ro//'gro ba la sogs pa'i spyod yul gyi lam du yang gdung bar byed rab tu gdung ba skyed par byed pa nyid yin no/ /ma bsten gyur pa nyid rung ngo / /zhes bya ba ni byis pa dang gnas gcig tu nams kyang gnas par mi bya ste/gal te snga ma gnyis spangs par ma nus na lhan cig gnas pa ni gcig tu spang bar bya'o/ /ci'i phyir zhe na/ /byis pa bsten pa sdug bsngal zhing / /zhes bya ba 'di ltar byis pa dang lhan cig gnas pa ni sdug bsngal ba ste bsod nams 'dod pa dang sdig pa ni phan tshun 'gal ba'i dngos po ste/de skyed pas mngon par mi 'dod pa'i 'bras bu yin pa'i phyir ro/ /dgra 'dra bas zhes bya ba ni dper na dgra ral gri brdeg par gzo ba dang lhan cig gnas pa ni sdug bsngal ba'o/ /rnam pa kun du zhes bya ba rnam pa thams cad du de bzhin no/de ltar na gong dang lhan cig bsten na sdug bsngal ma yin zhe na/ brtan pa zhes bya ba ste mkhas pa'o/ /bsten na bde bar 'gyur zhes bya ba ni gang la brten na bde bar 'gyur ba dag ni bde bar gnas pa zhes bya ba'i don to/ /gnyen dang phrad pa ji lta bar/ / zhes bya ba ni pha dang ma la sogs pa'i gnyen dang rang ci dga' ba ste/ rang bzhin pa'i yon tan dang ldan pa'i bu la sogs pa dang phrad na bde zhing ji ltar yid tshim par byed pa de bzhin du des na de'i phyir/ de bas zhes bya ba smos te/ gang gi phyir byis pa bsten pa ni bde ba ma yin pa'i rgyur gyur ba de bas na'o//brtan pa zhes bya ba ni blo dang ldan pa zhes bya ba'i don to/ /yang na de brtan pa dang ldan pas blo'i 'bras bu des blo yod par rtogs pa ste/ du bas me bzhin no/ /'dis ni rigs pas thob pa'i shes pa bstan to/ /thos mang zhes bya ba ni sde snod gsum thos la rtogs pa'i blo yod pa'i phyir ro//'dis ni thos pa dang bsams pa las byung ba'i shes rab bstan te/ bsams pa med par ni thos pa'i 'bras bu med pa'i phyir ro/ /mchog 'dren byed pa dang zhes bya ba la mchog ni khyad par can bsgoms pa las byung ba ste/ nges par 'byed pa'i cha yongs su blangs nas mchog 'dren pa'i phyir ro/ /khyad par gyi shes pa skye ba'i gnas bstan pa'i phyir/ tshul khrims ldan dang brtul zhugs can/ /zhes bya ba smos te/ tshul khrims ni rang bzhin gyi kha na ma tho ba las ldog pa'o/ /brtul zhugs ni bcas pa'i kha na tho ba las ldog pa ste/de gnyis ka dang ldan pa'o/ /yang na 'jug pa dang ldog pa'i tshul khrims sam so sor thar pa'i sdom pa dang dbang po sdom pa go rims bzhin no/ /de ltar tshogs yongs su rdzogs pa'i dbang gis 'phags pa'i lam mngon sum du 'gyur ba'i phyir 'phags pa zhes bya ba smos te/mthong ba la sogs pa'i lam skyes pa'i phyir te sdig pa las ring du gyur pa'i phyir 'phags pa zhes bya'o zhes mdo las bshad do/ /gtsor 'phags pa zhes bstan pa ni khams gsum gyi 'dod chags dang bral ba'i dgra bcom pa la brjod do//rang gi bya ba mtha' dag gi bya ba byas pa'i phyir gzhan dag la brtse ldan zhes bya ba smos te/ gzhan dag la phan 'dogs pa zhes bya ba'i don to/ /de nyid kyi phyir mi mchog ces bya ba bdag dang gzhan gyi don phun sum tshogs pa dang ldan pa'i phyir de la brten par gyis shig ces bya ba ste/gnas par gyis shig pa'o/ /gang yin zhe na smras pa/ blo bzang zhes bya ba phyin ci ma log par rtogs pa yin te/ mkhas pa zhes bya ba'i don to/ /rgyu skar lam du zla ba ltar/ / zhes bya ba ni rgyu skar rnams kyi lam nam mkha' la zla ba ji lta bar brten gyi/ sa'i steng du ma yin pa de bzhin du blo dang ldan pa dam pa bsten pa ste/ byis pa ni ma yin no/ /dper na ston gyi dus su nam mkha' sgrib pas ma gos pa'i yar gyi ngo la zla ba brten cing 'jug pa ni nyin re zhing phun sum tshogs pa 'phel bar 'gyur te/de bzhin du skyes bu dam pa mkhas pa bsten pa yang nyin re zhing spro ba dang yid tshim pa dang dad pa la sogs pa mngon par 'phel lo zhes bya ba'i don to/ /mdza' bshes kyi tshoms te nyi shu rtsa lnga pa'i rnam par 'grel pa rdzogs s+ho// //sdig pa spangs pa dang dge ba'i bshes gnyen bsten pas 'khor ba na phun sum tshogs par yang ma zad de don thams cad kyi bla na med par gyur pa mya ngan las 'das pa yang 'thob par 'gyur te/ de bsgrub pa'i phyir tshoms 'di'i 'og tu de bshad do/ / rus sbal zhes bya ba la sogs pa smos te/ mnyan yod na bcom ldan 'das chu klung rgyu zhing gshegs pa na chu bo'i phyogs nas srog chags rus sbal byung ste spyod yul du song ngo / /wa zhig gis de mthong ste bza' ba'i phyir rjes su 'brangs so/ /des kyang de mthong ste rang nyid yan lag rnams khog pa'i nang du bsdus pa gzigs nas dge slong dag srog chags rus sbal was 'jigs nas rang gi yan lag rnams khog pa'i nang du bsdus pa de bzhin du khyed cag gis kyang zhes bya ba'i bar du ste de'i dbang du mdzad nas 'di gsungs so//rus sbal ltar zhes bya ba ni ji ltar srog chags rus sbal lta bur ro//yan lag ni lag pa dang rkang pa dang mgo'i tshul te lus kyi yan lag lnga yin pa'i phyir ro/ /rang gi khog par zhes bya ba ni bdag nyid kyi kham bor kha sbyar ba lta bu la lus bcug pa ste/ lus bsdus pa ni bcug pa dang sbas pa zhes bya ba'i don to//gang gi phyir de ni spyod yul du 'gro ba na yan lag lnga sbubs nas phyung ste/ ci 'dod par rgyu ba las wa la sogs pa gnod par byed pa dag mthong na yan lag sbed par byed pa de bzhin du/ dge slong yid kyi rnam rtog nang bsdus nas//zhes bya ba smos te/ mya ngan las 'das pa'i bsam pas rab tu byung ba ni 'dir dge slong ngo / /bsdus pa ni bzlog pa ste/ yul dag las 'byung ba las bzung zhing nang du sba ba nyid de/ yid kyi sgo dang 'brel ba'i phyi rol gyi 'dod pa la sogs pa'i rnam par rtog pa'o//sems dben pa bstan nas/ lus dben pa bstan pa'i phyir/ rten pa med cing zhes bya ba smos te/ pha dang ma dang bu dang chung ma la sogs pa la mi rten pa ste mi gnas pa'o/ /'tshe med par zhes bya ba ni gzhan la 'jug pa ste/ gzhan la chos gos la sogs pa slong bas gnod par mi bya ste/'dod pa chung ba dang chog shes pa'i sbyor bas so/ /'dis ni 'phags pa'i rigs la gnas pa bstan nas 'di'i 'bras bu bstan pa'i phyir/ mya ngan 'das la zhes bya ba smos te/ de rim gyis zag pa med pa'i lam gyi sbyor bas mthong ba dang bsgom pas spang bar bya ba'i nyon mongs pa spangs nas mya ngan las 'das par 'gyur te/phung po lhag ma dang bcas pa'i mya ngan las 'das pa thob pa'i phyir ro/ /zag pa med pa'i lam gyis yongs su mya ngan las 'das pa yin gyi/gzhan gyis ni ma yin no zhes bstan ba'i phyir/ su yang smod mi byed ces bya ba gang gi phyir smod par mi byed pas ni 'dir lam gyi 'bras bu'i rgyu bstan te/ des na lhag ma dang bcas pa med pa'i de kho na nyid rtogs pas yang sdug bsngal la sogs pa 'thob par mi 'gyur ro//de mthong ba la ni de dag ji ltar smod par byed/ gzhan dag ni bsam gtan dang po la brten nas 'dod pa la sogs pa'i rnam par rtog pa gcig tu mi dge ba rnams spong ngo / /de nas bsam gtan gnyis pa la sogs pa lam brten pa ste/bsam gtan dang po la sogs pa la brten nas bsam gtan dang po'i sa'i rnam par rtog pa spong ngo / /de'i ting nge 'dzin la brten nas ro myong bar mi byed do/ /de las langs nas kyang gzhan la rnam par 'tshe bar mi byed do/ /de las lam thob par zag pa med pa rnyed de mya ngan las 'das pa'i lam la ni smod pa med do//de la 'dir kun nas 'khrug pa rnam pa bzhi bstan te/ rnam pa bzhi po gang zhe na/ nyon mongs pa'i rnam par rtog pa'i kun du 'khrug pa dang / nyon mongs pa med pa'i rnam par rtog pa'i kun du 'khrug pa dang /ting nge 'dzin gyi ro myang ba'i kun du 'khrug pa dang / lam la smod pa'i kun du 'khrug pa ste/ kun du 'khrug pa ni rnam pa bzhi po dag go/ /'khrug pa rnam pa bzhi po spangs nas ni mchog tu zhi bar gyur pa'i mya ngan las 'das pa thob cing yongs su mya ngan las 'das par 'gyur ro//gzhan la 'tshe med par zhes bya ba bstan pa la/ de ji ltar gsung rab thams cad du gzhan la gnod pa med pa rab tu bsngags pa yin zhe na/ 'di ltar bzod pa dka' thub mchog /ces bya ba la sogs pa smos te/ yang dag par rdzogs pa'i sangs rgyas rnam par gzigs kyi nyan thos shin tu dka' thub la mos pa tshig la mi bzod pa ste/ de'i gnyen por so sor thar pa 'di yang dang po bstan par gyur to/ /gzhan dag ni rgyal gyi rus kyi tsha bo rtsod pa dag byed cing mi bzod pa pa zhig yod de/de'i dbang du mdzad nas 'di gsungs so zhes zer ro/ /bzod pa ni rnam pa gsum ste/ gzhan gyis gnod pa byas pa la bzod pa dang / sdug bsngal la gnas pa dang / chos la nges par sems pa'i bzod pa'i dbye bas so/ /de la dang po ni gzhan dag gis rnam pa du mar gshe ba dang brdeg pa la sogs pa byas pa la bzod pa'o//gnyis pa ni grang ba dang tsha ba la sogs pa dang rtsod pa bzod pa'o/ gsum pas ni bdag med pa'i chos la bzod pa'o/ /de la gzhan gyis gnod pa byas pa la bzod pa dang / sdug bsngal la gnas pa'i bzod pa'i dbang du byas pa ste/ bzod pa dka' thub mchog ces sangs rgyas gsung / /zhes bya ba ni dka' thub mchog ces bya ba nyon mongs par gdung bar byed pas dka' thub po/ /'dir dka' thub kyi sgra ni rab tu byung ba la brjod do/ / gtsor smos pa yin te rab tu byung ba ni 'di'i rtsa ba yin pa'i phyir ro/ /ji skad du dge slong dag 'di la bzod pa la gnas pa'i rang bzhin can ni grang ba dang tsha ba la sogs pa'i bzod pa yin no zhes rgya cher bshad do/ /de'i 'bras bu chos la nges par sems pa'i bzod pa'i dbang du byas nas/bzod pa ni mya ngan las 'das pa mchog ces bya ba ste/ gang chos la brtags nas 'gyur ba med cing gnas pa de ni bzod pa'o/ /des ni gang mya ngan las 'das pa yang 'thob ste/ zag pa med pa la bzod pa sngon du 'gro bas thob pa 'di ni bde bar gshegs pas mchog tu bshad do//dge slong dag 'phags pa'i shes rab kyis spangs pa ni nyams pa med pa'i phyir ro zhes mdo las gsungs so/ /'di ni dka' thub gtsor 'dzin pa bzlog pa yin no/ /bzod pas ni mya ngan las 'das pa thob pa yin te 'di don du gnyer ba'i phyir ro//dka' thub mchog tu byed pa des ni sgrub pa ma yin te/ 'khor ba'i rgyu yin pa'i phyir ro/ /bzod pa ni dka' thub kyi mchog yin no zhes bya ba de ci'i phyir zhe na/ thar pa'i bsam pas rab tu byung ba ni gzhan la gnod pa med pa yin te/'di ltar gang khyim gyi gnas yongs su spangs shing rnam pa sna tshogs pa'i bde bar gshegs pa'i bslab pa blangs nas ni gzhan gnod par byed pa la yang slar gnod pa mi byed pa yin na gzhan du lta smos kyang ci dgos gang yang gzhan la gnod pa mchog tu byed pa ni rab tu byung yang dge sbyong gi ming thob pa ma yin te/dge sbyong du byed pa'i chos bzhi dang mi mthun pa'i phyir ro/ /dam pa'i spyod pa la gzhol bar byas pas kyang dam pa ma yin pa dag mi dga' ste/ de bas na gzhan la gnod par 'gyur ro zhe na/smras pa/ gzhan la 'tshe ba zhes bya ba smos te/ lus dang ngag gis gzhan la gnod pa byed pa'o/ /dge sbyong ni gzhan la gnod pa mi byed pa yin yang gnod pa byed na'o/ /ngag gi 'tshe ba ni spong bar dka' ba yin te/ de bzlog pa'i phyir/ tshig rtsub ci yang zhes bya ba la sogs pa smos te/rgyal rigs rus kyi tsha bo de nyid 'thab krol byed cing tshig mi bzod pa nyid la bstan pas tshigs su bcad pa gsum gsungs so/ /tshig rtsub ci yang smra mi bya/ /zhes bya ba ni tshig ci la yang brtsam pa med cing rtsub pa khyed kyis brjod par mi bya'o/ / ci'i phyir zhe na/ smras na slar yang smra bar byed/ /ces bya ba ni gang gi phyir gzhan la tshig rtsub pa brjod par gyur na ni lan du tshig rtsub pa mang du rjod par byed de/ ji skad du gang zhig gzhan mang po la gcig gis smod par byed na gzhan mang pos kyang gcig la smod par byed do//de bas na phan tshun tshig rtsub pas smod cing 'jug par byed do zhes bstan pa'i phyir smras pa/ gal te/ 'thab gcugs tshig gis sdug bsngal zhing / /zhes bya ba la/ 'thab gcugs ni 'khrug long ngo / /de 'dren par byed pa'i tshig ni tshig rtsub ces bya ba'i don to//de ni phal cher sdug bsngal gyi rgyu yin pa'i phyir sdug bsngal te/ rtsub pas ni phal cher mdog ngan pa dang dbyibs ngan par skye bar 'gyur ro/ /rang nyid kyi nye du rnams kyang smad cing rigs ngan pa la sogs pa'o/ /'jig rten pha rol gyi sdug bsngal ni re zhig bzhag gi /tshe 'dir/ de la phyir yang chad pas gcod/ /ces bya ba ni 'tshe ba byed pa la slar yang nye bar gnod par byed par 'gyur ro/ /gal te yang gshes pa dang brdeg par gyur kyang slar mi gshe zhing mi brdeg kyang yid gdung bar gyur te bdag nyid gshe ba dang rdeg par byed pa de yang smad pa yin te/de nyid bstan pa'i phyir/ gal te bdag gis phar byas na/ /zhes bya ba smos te/ gal te gzhan la tshig rtsub po la sogs pas bsgrubs te bdag gis sems sam bdag nyid kyis phar byas na de gdung bar byed pa yin te/de yang ji ltar zhe na/ 'khar ba'i snod bzhin zhes bya ba mthug cing che ba'i 'khar ba'i snod ni 'khar ba'o/ /de la shing dang sor mo la sogs pas brdungs na bdag nyid kyi sgra rtsub pa 'byin cing kun du 'khrug par 'gyur te/ mi 'dod pa'i rdzas kyi tshul gsal bar byad de/gser la sogs pa'i snod la brdungs na ni de ltar 'gyur bar mi byed do/ /de bzhin du byis pa yang yid du mi 'ong ba la brtan nas bdag dang gzhan gdung bar byed de 'phags pa ni ma yin no/ /bdag gis phar byas pas mi 'dod pa'i 'bras bu bstan pa'i phyir smras pa/'khor bar skye dang rga ba dag /ces bya ba ste/ skye ba dang 'jig pa gnyis kyis mtshon pa ni srid pa'o/ /yun ring po ni dus ring po'o/ /nyams su myong bar 'gyur zhes bya ba ni nye bar longs spyod pa'o/ /dkar po'i phyogs bstan pa'i phyir/bdag gis phar ni ma byas dang / /zhes bya ba smos te 'di ni sngar bshad zin to/ /de byas pa'i phan yon bstan pa'i phyir smras pa/ mya ngan 'das pa 'thob par 'gyur/ /zhes bya ba ste/ sems can thar pa thob par 'gyur te ring bor mi thogs par mya ngan las 'das par 'gyur ro zhes bya ba'i don to//'di ltar 'thab mo mi 'byung zhing / /zhes bya ba ni yid 'khrugs pa la sogs pa dang bral ba'i phyir ro/ /'thab mo spangs pa sngon du 'gro bas ni nye bar zhi ste/ des na bdag nyid mya ngan las 'das par 'gyur ro/ /bde ba thams cad kyi gtso bo ni mya ngan las 'das pa yin no zhes bstan pa'i phyir/nad med rnyed pa'i dam pa ste/ /zhes bya ba la sogs pa smos so/ /lho phyogs kyi bdag po rgyal po shin tu bstsags shing 'byor pa che la ser sna che ba zhig yod pa las nad kyis btab bo//de sman gyi ched du yang nor gtong bar mi byed de sman bas bsams pa/ gal te bdag gis nor mang po rnyed na ni 'di'i gso ba legs par bya'i/ gzhan du ni ma yin no zhes bsams so/ /rgyal po'i btsun mos kyang bsams pa/ gal te na tshod shin tu rgas pa 'di shi bar gyur na 'di'i 'gran zla gnyis 'dis 'jigs nas rab tu byung ba de dang bdag dga' mgur 'dod pa'i bde ba nyams su myong bar bya'o snyam du bsams so//'gran zla rab tu byung ba des kyang gtam de thos nas 'ongs te/ gal te 'di shi bar gyur na bdag gis rab tu byung ba de spangs la rgyal srid kyi bde ba myong bar bya'o zhes bsams so//bcom ldan 'das kyis de gdul ba'i dus la bab par mkhyen nas der rdzu 'phrul gyis gshegs te/ go rims bzhin du de dag gi dbang du mdzad nas 'di gsungs so//de dag gis tshig rkang re re thos pas rgyun du zhugs pa'i 'bras bu thob par gyur to/ /gzhan dag ni mgon med zas sbyin yan lag brgyad pa'i gso sbyong gi dus su zas [(]'drim [,]'brim [)]pas brel te dus yol nas zas chad pa las nad kyis btab par gyur te/ dka' ba chen pos nad sos par gyur to/de nyid kyi nyi ma la de'i yid gcugs pa'i tshong ba zhig rgya mtsho las ni rin po che du ma khyer te 'ongs so/ /des 'di snyam du bsams te/ bdag ni nad chen po las sos la/ yid gcugs pa'i tshod pa 'di yang nor mang po mtha' yas pa rnyed de 'ongs pas 'di yang bdag gi longs spyod yin pas gang gis bdag dga' bar 'gyur ba ste/gang bdag gis bcom ldan 'das nyan thos kyi dge 'dun dang bcas pa zla ba gsum gyi bar du bshos la spyan drangs te 'di nyid kyis thar pa'i bde ba 'thob par bya'o zhes bsams nas/ ji tsam na de las kyang nor blangs te bzhes pa gsol nas 'di gsungs so zhes zer ro/ /nad med ces bya ba ni mi mnyam pa med pa ste/ nad med pa nyid kyis nad med pa'o/ /nad ni nad gzhi cha ma mnyam pa yin la nad med pa ni nad gzhi cha mnyam pa'o zhes bya ba'i tshig gis so//de ni rnyed pa'i dam pa yin te de las khyad par du gyur pa'i rnyed pa med pa'i phyir te/ de'i don du yang nor thams cad yongs gtong bar snang bas so/ /mdzes shing gsal ba gang du yod pa de ni rnyed pa'i nges pa'i tshig go/ /chog shes pa ni nor gyi dbyig /ces bya ba ni chos gos ngan ngon tsam la sogs pas yongs su chog shes pa ste/gzhan 'dod cing re ba'i sems kyis ni nor ches mchog 'dod pa'i phyir te/ chog med phyug po yin yang rtag tu phongs/ /chog shes dbul po yin yang rtag tu 'byor/ /zhes bya ba'i tshig gis so/ rnyed pa dang nor la tha dad du bya ba ci yod ce na/ sogs pa lta bu thob pa ni rnyed pa yin la/ de gzhug tu rung ba ni nor yin no zhes bya ba la sogs pa'o/ /yid gcugs bshes pa'i mchog yin te/ /zhes bya ba ni yid ches pa'i blos 'khu ba'i dogs pa med cing bag rkyong ba zhes bya ba ni 'dir tshig gi lhag ma'o//de bas na yid brtan pa'i gnas su gyur pa ni bshes kyi mchog gam grogs po khyad par can yin no/ /mya ngan 'das pa bde ba'i phul/ /zhes bya ba ni skye ba'i sgrib g.yogs dang bral ba ste/ mya ngan las 'das pa thar pa zhes bya ba'i don to//de yang bla na med pa'i bde ba ste sdug bsngal rnam pa gsum dang bral ba'i phyir dang / gang yang 'dod pa'i bde ba ni 'jig rten gyi yin no zhes gsungs so/ /'di ltar nad med pa rnyed pa la sogs pa thams cad las ni mya ngan las 'das pa mchog yin te/yang bshad pa/ 'jig rten pa yi bde ba ni/ /'bad pas bsgrubs kyang mnog chung zhing / /bde ba med la 'jigs pa dang / /'phags pas de spangs byang grol 'dod/ /ces so/ sdug bsngal rtogs pas ni thar pa 'thob par 'gyur ro zhes bstan pa'i phyir/'du byed ces bya ba la sogs pa smos so/ /bcom ldan 'das phyi bzhin 'brang ba tshe dang ldan pa kun dga' bo dang mnyan yod du bsod snyoms kyi phyir gshegs pa na rkun po lnga brgya lag pa dang rkang pa bcad de grong gi 'obs su bcug pa gzigs so//de dag gis kyang bcom ldan 'das mthong ste/ nyam thag pa'i nga ros bdag cag ni ltogs shing skom par gyur to zhes bos pa dang / ji tsam na tshigs su bcad pa gnyis gsungs te/ bcom ldan 'das kyis bka' stsal nas mgon med zas sbyin gyis bza' ba dang btung bas tshim par byas so//de dag bcom ldan 'das la sems rab tu dang bar gyur nas shi 'phos te sum cu rtsa gsum du skyes nas 'dir 'ongs te rgyun du zhugs pa'i 'bras bu thob par gyur to/ /'du byed ces bya ba ni 'dus byas thams cad do/ / sdug bsngal ma rungs pa zhes bya ba ni don dam par gdung bar byed pa dang / 'phags pa rnams dang mi mthun pas so/ /'dis ni 'dus byas thams cad la khyab pa'i sdug bsngal du bshad do/ /phyogs gcig la khyab pa'i sdug bsngal bstan pa'i phyir smras pa/ nad kyi nang na bkres mi bzad//ces bya ba ste/ sdug bsngal gyi tshor ba skyed pa lus kyi gnas skabs kyi nad de/ de'i nang na mi bzad pa'i nad ni bkres pa ste bru ba tsha ba'o/ /rtag tu rjes su 'brel pa'i phyir dang / legs par gsor mi rung ba dang / khyab pa'i phyir bkres pa dang mnyam pa'i lus kyi tshor ba ni gang yang med do zhes bya ba'i tshig gis so//de ltar ji bzhin shes na ni/ /zhes bya ba ni sdug bsngal ba'i tshor ba'i gnas skabs dang / de las gzhan pa'i gnas skabs 'di nyid ji lta ba bzhin du de nyid shes pas rtog par byas na'o/ /mya ngan 'das pa mchog tu 'gyur//zhes bya ba ni thar pa thob pa des mchog tu 'gyur ro/ /'du byed yod par gyur na ni ngan song du 'gro ba'i sdug bsngal du gzhol ba dang / de yang nges par grol bar mi 'gyur te/ de bas na mya ngan las 'das pa mchog tu bsgom par bya'o zhes bstan pa'i phyir/bde 'gror 'gro ba nyung zad de/ /zhes bya ba yin te/ sems can gang su dag cung zad bde 'gror 'gro ba ni 'thob pa ste/ legs par spyad pa spyod pa ni shin tu nyung ba'i phyir ro/ /ngan 'gror 'gro ba bsam yas zhig /ces bya ba ni rnam pa du mas ngan 'gror 'gro pa ste/ngan par spyod pa byed pa dpag tu med pa'i phyir te/ ji skad du 'phags pa ma 'gags pa bdag gis lha'i mig gis dpag tu med pa ni gsum mthong ste/ sangs rgyas kyi sprul pa dang / srid pa bar ma do dang / ngan song du 'gro ba'o zhes bshad pas so/ /de lta'i nyes dmigs rtogs gyur na//zhes bya ba ni sngar bstan pa'i gnod pa'o/ /myur du mya ngan 'das pa 'thob/ /ces bya ba ni shin tu myur bar mya ngan las 'das pa 'thob pas te/ 'phags pa'i lam bsgoms pas mngon sum du byas na/ nyes dmigs de dag thams cad dang bral bar 'gyur ro//ci mya ngan las 'das pa yang rgyu med pas 'thob pa yin nam zhe na/ bde 'gror 'gro ba rgyu dang bcas/ /zhes bya ba la sogs pa'o/ /kun du rgyu smra ba chen po pa/ /zhes bya ba chad par smra ba de'i dbang du mdzad nas tshigs su bcad pa 'di gsungs pa la de nas de mngon par dad de rab tu byung nas dgra bcom pa'i 'bras bu thob po//gnyis po 'di ni rgyu dang bcas pa yin te/ 'jug pa dang bzlog pa'o/ /de las dang po pa'i dbang du byas nas smras pa/ bde 'gror 'gro ba rgyu dang bcas/ /zhes bya ba yin te/ gang la rgyu yang dag par yod pa de ni ste bya ba'i khyad par ro//gang dag bde 'gror skye ba de dag ni legs par spyod pa'i rgyu med par 'bras bu 'di med pa yin no/ /ngan 'gror 'gro ba rgyu dang ldan/ /zhes bya ba dang gi sgra ni 'di las nyes par spyad pa dang 'brel pa'i phyir ro/ / ldog pa'i dbang du byas nas/ mya ngan 'das 'gro rgyu can te/ /zhes bya ba yin te/ gang dag mya ngan las 'das pa/ 'jigs pa med pa'i grong du 'gro ba de yang rgyu med par ma yin te/ de'i phyir dge ba'i bsam pas dge ba'i bshes gnyen bsten cing legs par gsungs pa las mngon par dga' ba dang /cho ga las gnas pa dang thos pa dang bsams pa dang bsgoms pa la 'jug cing tshogs chen pos mya ngan las 'das pa thob ste/ srid pa ldog pa yin no/ /de dag thams cad rgyu dang bcas/ /zhes bya ba ni dor ba dang blang ba'i bdag nyid kyi dngos po 'di dag thams cad ni rgyu dang bcas pa yin te/ji skad du/ bstan dang 'gro bar gyur pa 'di dag ni/ /rten cing 'brel 'byung de dang de yin te/ /'jig rten gang na'ang rgyu med med mod kyi/ /'jig rten gyis ni rgyur bcas yod mi rig /ces bshad do/ /de bzhin nyid kyi rgyu gang shes pas mya ngan las 'das par 'gro ba de bstan pa'i phyir/ nags tshal mchog tu zhes bya ba la sogs pa smos so/ /mnyan yod na shar phyogs kyi kun dga' ra ba ri dgas 'dzin gyi ma'i khang pa na bzhugs te/de na bcom ldan 'das nub mo mthongs shig na 'chag cing bzhugs pa na/ rgyu skar rnam par rgyu ba 'gyur ba dag gzigs te/ sbal mgo la yun ji srid na char 'bab par 'gyur zhes bka' stsal pa dang / des kyang de la bltas te 'jig rten 'di dag ni nyams te lo bcu gnyis kyi bar du char 'bab par mi 'gyur ro zhes gsol pa dang /zhag lnga dang drug dang ji srid zhag bdun pa na bcom ldan 'das kyis dge slong rnams la bka' stsal pa/ gnas mal dag bkab la sbos shig dang / di ring nyid cha ga pa'i tshogs 'dus pa lta bu'i char 'bab par 'gyur te/de la gang gis khrus byas pa de ni 'bras dang 'brum bu la sogs pa skyes pa med par 'gyur ro zhes gsungs te/ de lta bas na sbal mgo rgyu skar rnams ni mi brtan pa yin te/ srog kyang g.yo zhing mi gnas pa yin no zhes bka' stsal te/ji tsam na sbal mgo dgra bcom pa'i 'bras bu thob par gyur te/ 'di gsungs so/ /sems can rnam pa bzhi ste nags na spyod pa dang / nam mkha' la spyod pa dang / yongs su rtog par byed pa'i so so'i skye bo dang / dgra bcom pa ste/de dag gi 'gro ba yang rnam pa bzhi ste rten no/ /de la ri dgas 'gro zhes bya ba ni ri bong dang sha ra ba dang pri tha ta la sogs pa'o/ /'gro ba ni gnas pa'o/ /grong las bskal zhing ring ba'i gnas ni nags tshal mi chog go/ /de bas na de dag ni mi rnams las khyad par du 'jigs pa rnams kyi rten dang gnas dang yid brtan pa'i gnas yin pa'i phyir ro//mkha' la bya rnams 'gro bar byed/ /ces bya ba ni khra dang / khrung khrung dang / ne tso dang sha ri ka la sogs pa nam mkha' la 'gro par byed pa ste/ gang zhig las skrag par gyur na de la brten pa'i phyir ro//chos la rnam par 'byed pa 'gro/ /zhes bya ba ni 'dis rnam par 'byed pa yin pas 'byed 'gro ste/ rnam pa sna tshogs pa gcig tu rnam par gtan la 'bebs pa gang la yod pa de ste/ shes rab can zhes bya ba'i don to/ de dag gi chos kyi 'gro ba ni rang dang spyi'i mtshan nyid yongs su rtag pa la brten pas lhan cig tu bcas pa'i phyir dang / gsung rab rtogs pa la mngon par dga' ba nyid kyi phyir ro/ /'phags pa rnams kyis ni 'phags pa'i bden pa bzhi'i chos la mchog tu lta ba ste/'dis ni mya ngan las 'das pa'i rgyu bstan nas gang gi phan yon bstan pa'i phyir/ dgra bcom mya ngan 'das par 'gro/ /zhes bya ba ni gang gis nyon mongs pa'i dgra bcom pa gang yin pa de dag ni phung po lhag ma med pa'i mya ngan las 'das par ro//'gro zhes bya ba ni de la gzhol ba'i phyir te/ de thob pa rnams la ni yongs su nyams pa med par ston to/ /gang zag gis mya ngan las 'das pa rtogs par nus she na/ smras pa/ brtson 'grus brtsams pa dang blo dang ldan pas so/ /ci'i phyir zhe na/ 'di na brtson 'grus zhes bya ba la sogs pa smos so/ /mnyan yod na bsti gnas kyi khang par dge slong rab tu mang po 'dus shing 'khod par gyur te/ 'di lta ste chos gos kyi las la'o/ /dge slong gzhan zhig ni bsti gnas kyi khang par 'jug tu mi 'dod de/ bya ba dang brel bas dge slong rnams 'di ni le lo can no zhes 'phya bar byed do//ji tsam na bcom ldan 'das kyis bka' stsal pa/ dge slong dag dge slong 'dis ci yang ma smra shig /de ci'i phyir zhe na/ 'dis ni sems lhag pa bzhi thob ste/ gang gi don du 'di rab tu byung ba de'i don yang 'dis thob po zhes nas 'di gsungs so/ /'di na zhes bya ba ni gang gi phyir mya ngan las 'das pa 'di ni brtson 'grus zhan pa'i gang zag gis rtogs par mi nus te/ 'di ni le lo can gyis kyang rtogs par mi nus so/ / brtson 'grus zhan pa ni 'di la le lo can zhes bya ba'i don to/ /des na bya ba dag las te rtag tu bya ba'i dge ba'i bya ba dag la brtson 'grus kyis drangs pa'i sbyor ba med pa'i phyir ro/ /blo chung zhes bya ba ni blo zhan pa dang ldan pa ste/ shin tu blun pas rigs pas 'thob pa'i shes rab dang bral ba'i phyir ro//shes pa med pa'i zhes bya ba ni de bzhin gshegs pa'i gsung rab yang dag par thos pa la sogs pa'i stobs kyis byung ba'i khyad par gyi shes pa gang la med pa de ni shes rab med pa ste/ des ni thos pa las byung ba la sogs pa'i shes rab med par bstan to//yang na 'jig rten dang 'jig rten las 'das pa'i shes pa go rims bzhin du bstan to/ /gang de 'dis ji lta bur rtogs par mi nus she na/ mdud pa thams cad rab gtubs pa/ /zhes bya ba ni 'ching ba ma lus par bcad pa gang la yod pa'o//mi 'thob pa ni nyon mongs pa thams cad spangs pa 'thob pa zhes bya ba'i don te/ de ni shin du bya bar dka' ba yin na/ phal gyis shes par ga la 'gyur/ mdud pa thams cad rab gtubs pa/ /zhes bstan pa la/ rnam pa thams cad du zhi ba'i rnam pa bstan pa'i phyir/khyod kyis gru 'di zhes bya ba la sogs pa smos so/ /bcom ldan 'das dbyar bA rA Na sIr bzhugs nas gang gA'i ngogs su gshegs pa na de nas gru bas bcom ldan 'das span drangs te bcom ldan 'das gru 'di la gshegs su gsol zhes zhus pa dang /de nas bcom ldan 'das nyan thos kyi tshogs dang bcas pa gru'i steng du gshegs pa dang / gru chus khengs par gyur pa las gru pa rgan pos gru pa gzhan la smras pa/ gru 'dis ci nas kyang mi nub pa de ltar phyogs shig ces smras pa las ji tsam na bcom ldan 'das kyis 'di gsungs so//'di zhes bya ba ni chus khengs pa'i gru'o/ /phyogs zhes bya ba ni gtor zhing por ba ste gang chu 'di phyi rol du bor ba nyid do/ /'di ni yang bar 'gyur ba ltar/ /zhes bya ba ni rnam pa 'dis ni gru 'jig par mi 'gyur te/ bde bar pha rol du 'gro bar 'gyur ba de bzhin du khyod kyis/de bzhin zhe sdang 'dod chags spongs/ /zhes bya ba 'dod chags kyis ni khams thams cad kyi tshig tu ston pa yin no/ /zhe sdang gis 'dod pa'i khams dang 'brel pa'o/ /sred pa spyod pa la zhugs pa'i sems can de'i dbang du mdzad nas 'dod chags spangs pa bstan to//gzhan gyi dbang du byas pa ni zhe sdang spangs pa'o/ /yang na chags pa dang khong khro ba de ni rtag tu gnod pa byed pa'i phyir ro/ /de thos pas rgyun du zhugs pa thob bar gyur to/ /mya ngan 'das pa thob par 'gyur//zhes bstan pa la/ ci 'dis dus su gtogs pa ste/ gang gis ma 'ongs pa'i tshig gi sgrar yang brjod dam zhe na/ de thos pa la brten nas gzhan bstan pa'i phyir te/ gang de mya ngan las 'das pa de'i nang du ni dus gsum chud pa yin no zhes bstan pa'i phyir smras pa/sngon chad byung ba mi 'byung zhing / /zhes bya ba la sogs pa'o/ /bcom ldan 'das u ru bil ba na mngon par rdzogs par sangs rgyas nas ring po ma lon par 'di snyam du dgongs te/ gang sngon bdag gis byung ba de dang ni bral la/gang gis de ltar gnas pa 'dis ni skyes pa'o/ /gang mngon par 'dus ma byas pa ni rnam par grol ba ste/ de ni skye ba med pa dang mi skye ba dang / skye bar mi 'gyur te zhes bya ba nas ji srid du 'di gsungs so/ /sngon chad byung ba zhes bya ba ni sngon gyi skye ba rnam par gnas pa dag tu yang 'dus byas byung bar gyur te/skye ba'i chos can yin pa'i phyir ro/ /des na mi 'byung zhes bya ba ni de'i 'og tu bral bar 'gyur ba ste/ 'jig pa'i chos can yin pa'i phyir ro/ /'di lta ste/'dod chags la sogs pa'i nyon mongs pa mi 'byung zhes bya ba ni dngos po gang dag 'du 'phrod med pa'i phyir sngon grub pa dag phyis mi skye bar gyur pa ste/ dper na sangs rgyas nyid kyi'o/ /'di nyid bstan pa'i phyir/ de nas 'di ltar 'byung bar 'gyur/ zhes bya ba ste/ de nas de'i 'og tu 'byung bar 'gyur ba ste rjes su mthun pa tshogs pa'i dbang gis zhes bya ba ni 'di ltar gyi sgra'o/ /nga ni'ang mya ngan las 'das pas/ /ma byung 'byung bar mi 'gyur la/ /da ltar 'byung ba'ang yod ma yin/ /zhes bya ba ni dus gsum dang bral ba'i phyir dang /rtag pa yin pa'i phyir ro/ /da ltar ni da ltar te da ltar byung ba nyid na yang med pa'i phyir ro/ /gang dus gsum dran pa med pa de nyid ni sdug bsngal gyi mthar gyur pa'i bdag nyid yin no zhes bstan pa'i phyir blta dka' zhes bya ba smos te/ de nas 'phags pa'i bden pa bzhi bstan pa'i phyir 'di gsungs so/ /mthong ba yin pas blta ba'o/ /'phags pa'i bden pa 'di dka' bas mthong ba yin pas blta dka' ste/ de nyid rtogs par dka' ba zhes bya ba'i don to/ /yang na dka' bas mthong ba yin pas blta dka' ste/dbugs 'byung rngub la sogs pa chen po'i rim pas sdug bsngal gyi bden pa mthong ba'o/ /kun 'byung la sogs pa yang dka' bas mthong ba yin pa'i phyir ro/ /'dis ni sdug bsngal gyi bden pa bstan to/ /mtha' med ces bya ba ni med pa la nges pa ste/'dir mtha'i sgra ni nges pa'i tshig go/ /ci bdag 'das pa'i dus na yod par gyur tam zhes kun du rmongs pa'i phyir te/ 'dis ni kun 'byung gi bden pa bstan to/ /yang na thams cad kyang 'dir rgol te/ /kha cig ni 'di mtha' med ces bya ba du mar 'dod do//gzhan dag ni dbang phyug dang tshangs pa la sogs pa 'jig rten gyi rgyur 'dod pa'o/ /bder mi mthong zhes bya ba ni bdag nyid ma sbyangs pa rnams kyis bde blag tu mi mthong ba'i phyir te/ mig yod bzhin du rmongs pas bsgribs te dag byed du 'dod pa de ma mthong ngo //'dis ni 'gog pa'i bden pa bstan to/ /bden pa ni 'phags pa rnams la phyin ci ma log pa'i phyir ro/ /rab rtogs zhes bya ba ni so sor rtogs pa ste zag pa med pas gtan la phab cing des nges pa'o/ /'dis ni lam gyi bden pa bstan to//des nges par byas pa'i phyir shes pa'o/ /sred dang dga' ba med mthong ba/ /zhes bya ba ni da ltar byung ba dang 'das pa'i yul gyi sred pa bstan te/ yang srid pa 'dod pa ni sred pa'i dga' pa'o/ /de nyid ni bden pas shes pa ste/ bsgom pa'i lam gyis so//mthong ba ni mthong pa'i lam gyis dga' ba med par ro/ /shes pa dang mthong bas rab tu dbye ba yin pa'i phyir lam 'di gnyis go rims bzhin du'o/ /yang na 'jig rten pa dang 'jig rten las 'das pa'i lam mo/ /yang na bden pa'i sgras ni bden pa rnam bzhi bstan no//de blta dka' ni thos pa las byung pa'i shes rab kyis mi mthong ba'i phyir ro/ /mtha' med ni bsams pa las byung ba'i shes rab kyis so/ /bder mi mthong zhes bya ba ni 'jig rten pa'i bsgoms pa las byung bas so/ /rab rtogs zhes bya ba ni zag pa med pas so//'di 'dra 'di ni sdug bsngal mtha'/ /zhes bya ba ni phung po lnga'i bdag nyid ni mthar 'di ltar sdug bsngal ba nyid do/ /'di lta ste 'phags pa'i bden pa bzhi'i dgag pas ni dus gsum du 'khor ba'i rgyu 'dod chags zad pas de'i 'og tu 'jigs pa med pa'i grong khyer du 'jug ste/pha rol sdug bsngal gyi mthar gnas pa yin no/ /sdug bsngal gyi rgyu sred pa yang dang yang du gzhig par bya ba'i phyir/ sred pa rnams ni zhes bya ba la sogs pa smos so/ /de nas bcom ldan 'das sangs rgyas nas ring po ma lon par/u ru bil ba na lha rab tu mang pos bsnyen bkur byas shing bzhugs so/ /de nas kha cig ni 'di mngon par rdzogs par sangs rgyas so zhes zer ro/ /kha cig ni sangs ma rgyas so zhes zer ro/ /kha cig ni the tshom du gyur to//de nas bcom 'das kyis de dag gi sems mkhyen nas ta la bdun srid tsam du nam mkha' la mngon par 'phags nas ched du brjod pa ched du brjod de/ sred pa rnams ni bcad pa dang / /zhes bya ba la sogs pa gsungs so/ /ngas sdug bsngal mthar byas shing ji lta ba bzhin du rtogs pa yin te/shes nas dad pa thob par ston to/ /de la 'phags pa'i lam gyis yang 'khor ba don du gnyer bar byed pa'i ma 'ongs pa'i yul gyi sred pa rtsa nas bcad pa yin no/ /'dod chags rab tu spangs pa dang / /zhes bya ba ni da ltar byung ba'i yul la lhag par zhen pa'o//mtsho skams nas zhes bya ba ni skams pa thob pa ste/ 'das pa dang 'das pa'i yul sred pa'i chu bo ste phal cher rjes su myong ba'i yul la 'jug pa'i phyir ro/ /mi 'bab pa zhes bya ba ni mi 'byung ba ste/ rgyud las bstsal ba'i phyir ro//yang na sred pas ni 'dod pa la 'dod chags pa bstan te/ skom par gyur pa'i phyir ro/ 'dod chags kyis ni gzugs na spyod pa bstan te/ de'i bde ba la lhag par zhen ba'i phyir ro/ /mtshos ni gzugs med pa'i 'dod chags bstan te/ de'i 'bras bu yun ring bas chu klung ring por gyur pa'i phyir ro//des na yang khams gsum gyi sred pa spangs par bstan pa nyid do/ /bden pa mthong ba nyid kyis sred pa thams cad spong ba yin gyi/ gzhan gyis ni ma yin no zhes bstan pa'i phyir smras pa/ lus zhig ces bya ba la sogs pa'o//bcom ldan 'das yul a du ma zhes bya ba na bzhugs te/ de'i tshe ke ne ya zhes bya ba'i drang srong yang yul a du ma na gnas bcas par gyur to/ /dal gyis 'bab pa'i mtshe'u'i ngogs na bcom ldan 'das gdugs la bzhugs te/ 'di snyam du gang du ngas 'jig rten skyong ba bzhi po la chos bstan pa dang /tshegs chung ngus drang srong ke ni ya dul bar 'gyur ro zhes dgongs so/ /yang bcom ldan 'das 'di ltar dgongs te/ gang yang ngas dal gyis 'bab pa'i mtshe'u'i ngogs su de dag la chos bstan na de yang dul bar 'gyur ro zhes gsungs so//ji tsam na 'jig rten pa'i thugs bskyed pas rgyal po chen po bzhis bcom ldan 'das kyis dgongs pa shes te/ bcom ldan 'das kyi spyan sngar lhags nas yul 'khor srung dri za'i 'khor dang bcas pa ni shar phyogs na 'khod do/ /'phags skyes po grul bum gyi 'khor dang bcas pa ni lho phyogs na 'khod do//mig mi bzang klu'i 'khor dang bcas pa ni nub phyogs na 'khod do/ /rnam thos sras gnod sbyin 'khor dang bcas pa ni byang phyogs na 'khod do/ /de las gnyis ni 'phags pa'i rang bzhin can te/ yul 'khor srung dang /'phags skyes po'o/ /gnyis ni ngan pa'i rang bzhin can te/ mig mi bzang dang / rnam thos sras so/ /ji srid na yul 'khor srung la bka' stsal pa/ /rgyal po chen po de lta bas na/ lus zhig tshor ba bsil gyur pa/ /zhes bya ba la sogs pa'o/ /'phags skyes po'i dbang du mdzad nas/lta bas mthong bar gyur tsam dang / /zhes bya ba la sogs pa rgya cher gsungs so/ /mig mi bzang gi dbang du mdzad nas/ ma re mi dga' zhes bya ba la sogs pa gsungs so/ /rnam thos sras kyi dbang du mdzad nas/ 'di dang ma dang zhes bya ba la sogs pa gsungs so//de la gnas ji lta ba bzhin du brjod de lugs las bzlog pa dang / lugs su 'byung ba gnyis kyis bstan pa dang / mthong ba yin te/ de las bzlog pa gtso bor bstan pas ni lugs las bzlog pa brtsams te/ ji ltar rjes su mthun par 'brel pa bkod pas ni 'di dang ma dang zhes bya ba la sogs pa'i tshig bzhis go rims bzhin du bden pa bzhi bstan to/ /de las saMskr-i ta'i tshul gyis ni e las 'di zhes bya ba ste 'go ba'i nad la bya'o/ /de gnod sbyin gyi skad du ni e ne zhes bya ba ste 'di'o//de mngon par rtogs pa ni mthong ba'o/ /dang zhes bya ba ni 'di de ltar yod dang sdug bsngal gyi mthar byed par 'gyur ro zhes de ltar te/ de las sdug bsngal gyi bden pa rtogs pa'i sngon du 'gro ba'i phyir ro/ /ma dang zhes bya ba la/ me ne zhes bya ba ni ma'i sgra las skyed par byed pa'i mi'i lus yin te/ rgyur gyur pa nyid sdug bsngal kun 'byung ba yin no zhes grub pa'i mtha'o/ /de las zhes bya ba la sogs pa yang brjod par bya'o/ /gdungs zhes bya ba la/ dab pha' zhes bya ba las gdung ba nye bar zhi ba ste/sdug bsngal nye bar zhi ba zhes bya ba'i don to/ /gang gi 'bras bu dang bcas pa gdungs pa ni 'gog pa shes pa zhes bya ba'i don to/ /de la zhes bya ba la sogs pa yang brjod par bya'o/ /rab gdungs zhes bya ba dab pha' zhes bya ba la gdung ba nye bar zhi bar byed pa'i thabs te/rab gdungs zhes bya ba'i sgras brjod de/ 'di ni 'bras bu dang bcas pa'i lam shes pa zhes bya ba'i don to/ /'di 'dra 'di ni zhes bya ba la sogs pa ni 'di nyid sdug bsngal tha ma dang mthar thug pa yin te/ sdug bsngal la sogs pa shes pa thob pa'i phyir mya ngan las 'das pa'o//yang na ngan song gi sdug bsngal yongs su zad pa ste/ mthong ba'i lam gyi 'bras bu 'di la yod pa'i phyir ro/ /ji skad du/ khyod kyi mthus ni shin tu mi bzad ltung 'gyur te/ /gang phyir ngan 'gro'i lam ni nyes mang ldan pa yin/ /zhes bshad do/ /ci'i phyir gnod sbyin gyi skad kyi skabs la 'phags pa'i skad du gsungs she na/bshad pa/ de ni so sor nges par kun du dga' bar bya ba'i phyir te/ rgyal po chen po rnam thos sras 'khor dang bcas pa'i dbang du mdzad nas thub pa mchog gis gang gsungs pa yin te/ rgyal po chen po nyid kyis gang bstan pa'i 'bras bu rtogs par bya ba'i dbang du mdzad pas 'di la 'gal ba med do//de bzhin du gzhan dag la yang ci rigs par brjod par bya'o/ /mtha' 'khob pa'i skad kyi don ni ldog pa gtso bos de'i 'og tu ma re mi dga' zhes bya ba la sogs pa smos so/ /yang na tshig rkang bzhi po des 'phags pa'i bden pa bzhi bstan nas yang de'i rnam par bstan pa'i phyir ro//ma re zhes bya ba ni re bar bya ba ma yin no/ /de yang sdug bsngal gyi bden pa la ste dug gi kha zas bzhin du sdug bsngal du gyur pa'i bdag nyid kyi dngos po la sred pa bskyed par mi bya'o//mi dga' zhes bya ba ni 'dir gang gis kun 'byung gi bden pa la dga' bar mi bya'o/ /de yang 'dir bden pa mngon par rtogs pa ste/ bde 'gro 'dren pa'o/ /rab zhi dang zhes bya ba ni 'dus byas nye bar zhi ba 'gog pa mngon sum du byas pa ste/ 'di la sdug bsngal nye bar zhi ba'i phyir ro//kun du 'dod chags bral gyur pa/ /zhes bya ba ni 'khor ba'i dngos po thams cad las 'dod chags dang bral ba bskyed pa ste/ lam bsgom par bya ba'o/ /yang na ma re zhes bya ba ni mnyam par ma bzhag pa'i khams ni gnod pa bcas pa'i phyir ro//mi dga' ba ni mnyam par bzhag pa gnyis te/ 'dod chags dang bral ba'i sa yin pa'i phyir ro/ /rab zhes bya ba ni 'jig rten dang 'jig rten las 'das pa'i lam gyi mthus 'dod chags la sogs pa spangs pa'o/ /kun du 'dod chags bral gyur pa/ /zhes bya ba ni thams cad las 'dod chags dang bral ba ste khams gsum pa las 'dod chags dang bral ba'i phyir kun nas grol ba zhes bya ba'i don to//yang na ma re zhes bya ba khams gsum la'o/ /dga' ba ni sangs rgyas bcom ldan 'das yang dag par rtogs pa de'i chos ni legs par gsungs pa/dge 'dun ni legs par zhugs pa/ sdug bsngal rig par byed pa dang lam rig par byed pa zhes bya ba'i bar du'o/ /rab zhi ni 'dod chags skyes pa rnams zhi bar byed pa zhes bya ba la sogs pa ste/ lhag ma ni snga ma bzhin no/ /gang yang bstan pa de thabs gang gis byed par nus she na/smras pa/ kun du rtog pa shas che chung gi bye brag gis yin te/ de nyid bstan pa'i phyir/ lta bas mthong bar gyur tsam dang / /zhes bya ba la sogs pa smos so/ /'phags skyes po 'khor dang bcas pa yul dag la lhag par chags par gyur te/de las skyo bar bya ba'i phyir dang / phyin ci log dgag pa'i thabs bstan pa'i phyir gsungs pa yin no/ /mig gis dmigs pa ni mthong ba'o/ /lta ba ni de las gzugs mthong ba tsam dang lta ba tsam nyi tshe yid la bya'i/gzhan yang dag pa ma yin pa'i kun du rtog pa la rjes su 'brang bar mi bya ste/ rjes su chags pa la sogs pa'i rgyur gyur pa'i phyir ro/ /nyan pas thos par gyur pa tsam/ /zhes bya ba ni rna ba'i dbang pos dmigs pa ni thos pa'o/ /de la thos pa nyi tshe tsam bya ba ste/thos pa tsam yid la bya'i gzhan ni ma yin no/ /rna ba dang lce dang lus kyi dbang pos rtogs pa ni rtogs par byed pa ste/ long ba bzhin du 'thob pa 'dzin par byed pa'i phyir ro/ /de la rtogs par byed pas rtogs pa tsam nyid ces brjod bar bya'o/ /yid kyi rnam par shes pas yongs su bcad pa ni rnam par shes pa ste/ji skad du/ mig rna yid kyi rnam shes dang / /gsum gyis nyams su myong gang de/ /mthong thos rnam par shes pa dang / /rtogs pa yin te go rims bzhin/ /zhes gsungs pa lta bu'o/ /de lta bu la ma gus pa'i sbyor bas ni nyon mongs pa thams cad zad par 'gyur ro zhes bstan pa'i phyir/'di 'dra 'di ni sdug bsngal mtha'/ /zhes bya ba la sogs pa'o/ /gzhan dag ni 'dis bden pa bzhi bstan to zhes zer te/ sdug bsngal ni mngon sum bzhin du mthong bar bya ba nyid kyis so/ /kun 'byung ni phal cher thos pas rtogs pa yin pa'i phyir ro//rtogs pas yongs su dpyod pa'i phyir dang / rtogs pa'i 'bras bu yin pa'i phyir rtogs pa ni thar pa'o/ /khyad par gyi shes pas 'thob pa yin pa'i phyir rnam par shes pa ni lam ste/ de mngon par rtogs pa dang bsgoms pas sdug bsngal gyi mthar byed par 'gyur ro//skye mched yongs su brtag pa'i sgo nas tshogs kyi lam bstan nas/ phung po yongs su brtag pa'i sgo nas bstan pa'i phyir/ lus zhig ces bya ba la sogs pa smos so/ /yul 'khor srung 'khor dang bcas pa bdag la lhag par chags pa de las 'dun pa bzlog pa'i phyir 'di gsungs so//lus zhig ces bya ba ni gnad zhig cing nyams pa ste/ lus de'i bdag nyid yin pa'i phyir ro/ /tshor ba bsil bar gyur ces bya ba ni bems por gyur pa ste/ shi ba'i lus la ni nyams su myong ba med pa'i phyir ro//'du shes 'gags zhes bya ba ni 'dus shes dang bral ba ste/ de la mtshan mar 'dzin pa med pa'i phyir ro/ /'du byed zhi zhes bya ba ni sems pa la sogs pa mtshungs par ldan pa dang / mi ldan pa med cing zad pa ste der de dag sdug pa dang bral pa'i phyir ro//rnam par shes pa nub gyur pa/ /zhes bya ba ni snang ba med par gyur pa'o/ /'di dag shes shing 'bral ba dang bcas par gyur na ni sdug bsngal las ldog cing nying mtshams sbyor ba med pa nyid du bstan pa'i phyir/ 'di 'dra 'di ni zhes bya ba la sogs pa yin te/'dis kyang 'phags pa'i bden pa bzhi bstan te/ snga ma'i phung po lngas ni sdug bsngal dang kun 'byung 'di'i tshul yin pa'i phyir 'di gnyis so/ /'di sdug bsngal mthar byed pa yin pas lam mo/ /yang na mthar byed pa ni mthar gnas pa ste 'gog pas byas pa'o//gang gi rim pas mya ngan las 'das pa de 'thob pa yin pa'am/ /ji lta bu zhes bya ba de'i 'og tu brjod par bya'o/ /de la 'dir 'jug pa sngon du 'gro bas ldog pa yin te/ de la 'jug pa'i rim pa dang po bstan pa'i dbang du byas nas bstan pa ni uta ka Targa zhes bya ba'i bram ze'i rig byed gsum pha rol tu phyin pa shes rab me dang 'dra bas grub pa'i mtha' thams cad mthong ba de bcom ldan 'das kyi thad du lhags nas gsol pa/kye dge sbyong gau ta ma gzhan mu stegs can kha cig ni 'di skad du smra ste/ 'jig rten pa ni ther zug pa ste/de ltar thar pa med do zhes so/ /gzhan dag ni pha rol du 'chi bar mi 'gyur te/ de ltar rig byed kyi sbyor bas 'khor bar mi 'gyur ro zhes brjod na/ 'di la gau ta ma khyod ji skad du gsungs zhes gsol pa dang / de la bcom ldan 'das kyis 'jug pa'i rim pa 'di skad du gsungs so//'di yongs su 'dzin par byed pa yin pas brten pa'o/ /yod pas zhes bya ba ni nyon mongs pa dang las so/ /rten ni ma rig pa ste srid pa'i rtsa ba ni ma rig pa yin pa'i phyir ro/ /srid pa 'byung ba ni gnyis la brten pa yin te/lta ba dang sred pa ste ji srid du gang na bdag tu lta ba de ni bdag tu sred pa yang yod do/ /gang na bdag tu lta ba dang sred pa gnyis yongs su bzung ba der ni gzhan phra rgyas kyi bag chags kyang sogs pa yin te/ dbang po'i ras rlon pa la ni rdul kun du gnas pa yin no//de ltar yod na ni gang 'byung ba de nyid bstan pa'i phyir spyod par 'gyur zhes bya ba yin te/ rnam pa sna tshogs pa'i sred pa g.yo ba skye bar 'gyur te/ /bdag ni dbang po ste lha'i rgyal po zhes bya ba la sogs pa bshad pa snga ma la yang de las gzhan pa'i nyon mongs pa dang /nye ba'i nyon mongs pa 'byung ba yin te/ spre'u bzhin du mi gnas zhing mngon par 'gyur ba yin no/ /ji skad du gzhan dag tu ni g.yo zhing 'jug pa'o/ /gzhan dag tu ni g.yo zhing 'khor ba ldog pa'o/ /spyod pa yod pas gzhol bar 'gyur/ /zhes bya ba ni 'dis 'dren par byed pa yin pas gzhol ba'o//las kyi srid pas 'phangs shing yongs su rdzogs par byas la/ las yongs su bstsags pa'i rgyus yang srid par gzhol ba'i phyir ro/ /gzhol ba yod pas shin tu ma sbyangs par 'gyur ro zhes bya ba ni las kyi srin pos sems can gyi yid dkrugs pa'am/las kyi zhags pas bcings shing drangs par gyur na thar pa ga la yod pa'o/ /yang na de'i tshe sems las su mi rung ba'i tshul gyis shin tu ma sbyangs na 'khor bar 'bab pa'i phyir te/ 'dis ni 'dir skye ba'i rgyu skye ba gzhan dag tu yongs su 'dzin par 'os par 'gyur ro zhes bstan to//shin tu ma sbyangs pa yod pas 'gro ba dang 'ong bar 'gyur ro zhes bya ba la tshur 'ong ba ni 'ong ba'o/ /phar 'gro ba ni 'gro ba'o/ /'gro ba dang 'ong ba yod pas gzhan du shi 'pho len par 'gyur ro zhes bya ba ni/skye ba gzhan dag tu nyams shing shi 'phos pa ste/ de'i mtha' ni skye zhing skye bar 'gyur te/ de yang skye zhing 'jig par 'gyur ba zhes bya ba'i don to/ /'di ltar zhes bya ba ni sngar bshad pa'i rim pa bstan to/ /bar ma do'i srid pa'i rim pas skye ba sngon du 'gro bas 'thob par bstan pa'i phyir gzhan du zhes bya ba smos te/'jig rten pha rol gyi skye ba ste nying mtshams sbyor ba'o/ /mngal nas byung ba ni 'jig rten la rab tu grags pa'i skye ba'o/ /rga ba ni rnam par 'gyur ba'i dngos po'o/ /na ba ni rims la sogs pa'o/ / 'chi ba ni tshe dang drod dang rnam par shes pa 'gag pa'i mtshan nyid de ris mthun pa dang bral ba zhes bya ba'i don to/ /skad cig mas spyod par bstan pa'i phyir ro/ /mya ngan ni sdug pa dang bral ba las byung ba'i yang dag par gdung ba'o/ /smre sngags 'don pa ni gdung ba dang ldan pa'i tshig brjod pa'o//sdug bsngal ba ni rnam par shes pa'i tshogs lnga dang ldan pa'i tshor ba'o/ /yid mi bde ba ni yid kyi gdung ba'o/ /'khrug pa zhes bya ba ni grang ba dang tsha ba dang / sbrang bu dang / sha sbrang dang / rlung la sogs pas zil gyis mnan cing gnod pa'o//skye ba dang rga ba la sogs pa ni zlas dbye ba'i bsdu ba'o/ /'byung ba ni yang dag par skye ba'o/ /des na yang 'di ltar rnam pa 'dis dbang phyug la sogs pas bskyed pa'am/ rgyu med pa ni ma yin no/ /'dis zhes bya ba ni sdug bsngal gyi phung po'o/ /'ba' zhig ces bya ba ni gcig tu bdag med pa'i phyir ram thams cad do//chen po zhes bya ba ni thog ma med pa'i phyir dang dpag tu med pa'i phyir ro/ /sdug bsngal gyi phung po zhes bya ba ni sdug bsngal gyi tshogs dang / sdug bsngal gyi 'dus pa 'khor ba zhes bya ba'i don to/ / 'byung bar 'gyur ro zhes bya ba ni mngon par 'grub pa'o/ /ldog pa'i dbang du byas nas bstan pa'i phyir smras pa/ brten pa med pa zhes bya ba la sogs pa'o/ /'gag cing bral ba med par gyur pa ste/ sdug bsngal ldog pa'i mtshan nyid mya ngan las 'das pa'o/ /lhag ma'i don ni sngar bshad zin to//'jug pa dang ldog pa'i mtshan nyid gzhan bstan pa'i phyir smras pa/ dge slong dag ces bya ba la sogs pa'o/ /dge slong rab tu mang po bsti gnas kyi khang pa dag tu 'dus shing 'khod la/ gang phal cher mya ngan las 'das pa dang 'brel ba'i chos gtan la 'bebs par byed de/de yang mya ngan las 'das pa 'dod kyang the tshom skyes par gyur to/ /ji tsam na bcom ldan 'das kyis gsan nas de'i dbang du mdzad de 'di gsungs so/ /yod do zhes bya ba ni rdzas kyi dngos por yod do zhes bya ba'i don to//dge slong dag ces bya ba ni g.yeng ba rnam par spang ba'i phyir bod pa ste/ gzhan du na shin tu phra ba'i don te rtogs par mi nus pa'i phyir ro/ /gang yin zhe na/ ma skyes pa dang zhes bya ba'i ming can de'i 'dus byas dang bral pa'i phyir ro//ma byung ba dang zhes bya ba ni gnas pa las gzhan du gyur pa med pa'i phyir ro/ /ma bcos pa zhes bya ba ni byas pa med pa'i phyir ro/ /'dus ma byas zhes bya ba ni sems pa med pa'i phyir ro/ /mi 'byung ba zhes bya ba ni nye bar len pa'i mtshan ma dang rgyu med pa'i phyir ro//rnam par 'gyur bar byed pa lnga dang 'dus byas kyi mtshan nyid gsum mam/ yang na phyi rol gyi sems pa med pa de dag 'di ltar bstan to/ /yang na rgol ba rnam pa lnga dang / sngon ma byung ba'i mya ngan las 'das pa sngon ma byung ba zhes pa ste/ ji skad du/ skyed byed rab sad 'jig dang zhum pa dang / /yang yang skyo bas nyer 'gro tshangs pa ste/ des na thar pa'i grong khyer ston byed pa/ /skyed pa 'jig pas rnam 'jig rab tu grol/ /zhes so/ /gang 'dis ni thar pa'i cha yongs su 'dzin pa yin te/ lam bsgom pa la sogs pa'i mthu ste sa bon gyi mthus myu gu bzhin du de bstsal ba yin te/tshig lnga po 'di dag go rims bzhin rtogs par bya'o/ yang na 'og ma'i cha dang mthun pa lnga dang / gong ma'i cha dang mthun pa'i kun du sbyor ba rnams dang bral bar bya pa'i phyir 'di gsungs so/yang na ma skyes pa ni skye ba ma thob pa'o/ /ma byung ba ni sems can gyi tha snyad mi g.yo ba'i phyir ro/ /ma bcos pa ni bcos ma'i nor bur ma gyur ba'i phyir ro/ /'dus ma byas ni nye bar len pa'i rgyu med pa'i phyir ro/ /mi 'byung ba ni phyi rol gyi rkyen med pa'i phyir ro//yang na 'gro ba lnga bstsal ba'i phyir te/ go rims bzhin zhes bya ba la sogs pa ni ci rigs par brjod par bya'o/ /'dus byas kyi dngos po ni rdzas su yod par bstan pa'i phyir skye ba yod do zhes bya ba la sogs pa smos so/ /'dus byas dang 'dus ma byas pa'i dngos po yang yod de de lta bas na tshul bzhin du bskyed cing ldog pa yang bsgrub pa'i phyir/dge slong dag gal te zhes bya ba la sogs pa'o/ /gal te med par gyur na zhes bya ba ni ji skad du bshad pa'i mya ngan las 'das pa yang med par gyur na'o//nga ni skyes pa dang zhes bya ba ni nga thams cad mkhyen par gyur nas 'dus byas kyi nges pa 'byung ba yod de zhes mi smra ba'i phyir ro/ /gang gi phyir zhes bya ba ni rgyu gang gis so/ /'di na zhes bya ba ni gcig tu nges par smra ba'o zhes bya ba'i don to/ /gang gi phyir nges par 'dus ma byas yod cing nges par 'byung ba yod pa de pas na nga nyid smra'o//gang gi phyir kun du mi shes pa med de ngan pa la dmigs pa'i blo med pa'i phyir ro/ /med pa'i dngos po yang yod pa nyid du 'jog par sangs rgyas mi mdzad de phyin ci ma log par ston pa'i phyir dang thams cad mkhyen pa yin pa'i phyir/bskyed pa de yang 'di ltar yod pa yin no/ /nges par 'byung ba zhes bya ba ni nges par 'byung ba ste/ phyi rol gyi dngos po med na ni nad nas 'byung ba mi rigs so/ /dngos po thams cad ni gnyen po dang bcas pa ma yin pa mi snang ste/ dper na mun pa la snang ba dang / grang ba la dro ba dang / dro ba la grang ba dang / dri ma la lan tshwa'i chu dang / nad la sman la sogs pa ste/ 'khor ba rjes su myong zhing sdug bsngal du ltung ba yang gnyen pos rdzas kyi bdag nyid bsgom par bya'o/ /gal te 'di don dam par yod dam med ce na bshad pa/yod do zhes bya ba'i don gyis bstan to/ /da 'di nyid nges par brtag par bya ste/ ji lta bu las mya ngan las 'das pa zhes bya zhe na/ sdug bsngal mtha' dang nges 'byung dang / /dus dang zad pa med pa yi/ /blo ldan mya ngan 'das skyob ces//thub pas yang dag gsungs pa yin/ /rnam par shes pa'i mtsho la gang zhig rtag pa'i bdag nyid kyi rdzas yod cing dbang byed pa'i don ni mya ngan las 'das pa ste/ ji skad du gsungs pa/ dge slong dag de la rnam par shes pa ni shar phyogs su 'gro'o zhes nga mi smra'o//de bzhin du rnam par shes pa ni nang nas bstan du med pa/ yangs shing rgya che bas zil gyis mi non pa ni 'dir mya ngan las 'das pa ste/ rnam par shes pa'i sgra'o zhes bye brag tu smra ba'i 'o/ /sems kyi rgyud 'gag pa'i phyir sems kyi rgyud kyi rnam pa yin te/ sems can re re la yang mya ngan las 'das pa'i rdzas yod do/ /gang spangs pa'i khams dang 'dod chags dang bral ba'i khams kyang yod do zhes ye shes la 'jug pa las brjod pa'i phyir dang / skal ba mi mnyam pa ni 'gog pa yin no zhes mdo las gsungs pa'i phyir ro/ / kun du sbyor ba'i rdzas dag ni 'gog pa ma yin no/ /mya ngan las 'das pa'i sgrib par gyur pa nyon mongs pa rnams kyang gnyen po du mas sgrub pa'i phyir te/ nyon mongs pa mang ba'i phyir gnyen po bsgom pa mang pos mya ngan las 'das pa mang ba'i phyir/ sha sh+thi dza na sa ra ka zhes bya ba 'dir brjod par bya'o//mya ngan las 'das pa rdzas su yod de/ mngon sum gyi yul yin pa'i phyir gzugs bzhin no/ /yod pa'i phyir btags pa bzhin no/ /skye ba yod ces bya ba dang / mya ngan las 'das par 'gro ba'i lam yod ces bya ba la sogs pa ste/ chos can 'jig pa med pa'i khyad par gyis so//khyim bdag gzugs ni 'jig pa'i chos can yin la 'gog pa dang mya ngan las 'das pa ni 'jig pa'i chos can ma yin no zhes mdo las gsungs so/ /blo khyad par can gyi gzhis de'i don bya bar yang snang ste/ yid bzhin gyi nor bu bzhin no//mchog tu bcas pa'i chos bstan pa ni 'bras bu bstan pa'i phyir zhes bya ba la sogs pa'o/ /'di ltar sems ni nyon mongs las kyi zhags pa dam pos bcings/ /de dang bral zhing grol bas grol ba'ang de nyid de/ /lus can btson ra dag las thag ring gyur na ni//'jig rten thar pa 'dod de btson ra lta bur mis/ /'dod dang mi 'dod de ltar mkhas pas shes bya ste/ /grags dang ma grags spang na mya ngan 'das pa 'thob/ /ces so/ /re zhig so so'i skye bo'i tshogs ni 'khor ba la dga' bar 'gyur ba'i bar du yin zhing mi mthong ba yin te/'gog pa ni skyon dang bral ba'o/ /de bzhin nyid rtogs pa'i mig gis ni lha'i bu mo la bltas na yang blo dga' ba med par 'gyur ro/ /bshang gci dang ni rga dang nad/ /dug gis brgyal ba'i 'bras bu ngan/ /gzhan zas lang tsho nad med dang / / phun sum tshogs pa'i dngos po dag /dka' yang mkhas pa dag gis ni/ /snga phyi yongs su brtag bya ste/ /dga' bar mi bya rigs btsun rta/ /mtshan dang bral ba ji bzhin no/ /rigs dang mi rtag grol ba ste/ /de bzhin lung gi bya bas kyang / /blo ldan the tshom bral ba yis//rdzas ni yang dag nges shes bya/ /dngos po thams cad rtogs pa yi/ /blo ni rang bzhin gyis spel zhing / /blo dang ldan pas blo gros ni/ /'bad pas yongs su bskyed par bya/ /zhes smos so/ /'dir gzhung mangs kyis dogs nas yang ma bris so/ / ji skad du bshad pa'i 'jug pa dang ldog pa gnyis blang ba dang spang ba nyid du sgrub pa'i phyir/ skyes dang zhes bya ba la sogs pa smos te/ lnga po 'di'i rnam par 'grel pa ni bshad zin to/ /mi brtan pa zhes bya ba ni mi rtag pa'i gnas skabs yin pa'i phyir ro/ / gnas skabs mi rtag pa bstan nas ris mthun pa'i mi rtag pa bstan pa'i phyir/ rga dang 'chi ba zhes bya ba smos te/ rga ba dang 'chi ba gnyis kyis ni kun du bcom zhing gnod pa byed de/ dga' ba dang 'chi bas kun du bcom pa'i phyir ro/ /rmongs pa'i chos can zhes bya ba ni sdug pa dang bral ba'i chos yin pa'i phyir ro//yang na gzhan las rtogs pa yin pa'i phyir ro/ /mi sdug pa dang phrad pa bstan pa'i phyir/ rab tu 'jig 'gyur ba zhes bya ba smos te/ rab tu dga' bas 'jig par 'gyur ba ste/ dga' ba rnam par nyams pa'i rgyur gyur pa'i phyir ro//zas kyi rgyu las byung ba yi/ /zhes bya ba ni zas kyi rgyur gyur pas mkhas pa rab tu 'byung zhing gnas pa 'di la yod pa ste/ gzhan la rag lus pas 'jug pa zhes bya ba'i don to/ /'gro ba zas kyis gnas pa zhes bya ba'i tshig gis zas med par gnas pa med pa'i phyir ro//zas de yang sdug bsngal gyi rkyen dang sdug bsngal gyi rgyu nyid yin zhing sdug bsngal nyid skye ba yin te/ ji skad du mi rtag pa'i rgyu dang rkyen la brten na ji ltar rtag par 'gyur zhes mdo las so/ /skyes dang zhes bya ba la sogs pa'i tshig drug gis gang bstan pa'i 'dus byas kyi dngos po de la ji ltar zhe na/'jig 'gyur 'di la dga' mi bya/ /zhes bya ba smos te/ de la go rims bzhin du rgyu drug bstan pa'i phyir/ rga dang 'chi ba zhes bya ba la sogs pa yin te/ 'dir nus pa nyams pa ste rga ba'o/ /nad kyang nus pa 'grib par byed pa ste/'dir rga ba'i sgrar gzung ngo / /rga ba dang 'chi ba ni rga shi ste/ des kun du bcom pa ni skye ba'i dngos po ste/ de yang yongs su spang bar bya'o/ /'o na tsam pa ka la sogs pa'i me tog de yongs su thu bar byed kyi spang bar mi byed na de ji ltar zhe na/rga ba'i chos can yin pa'i phyir te skyes nas rnying par mi 'gyur ba med do zhes pas spang bar bya ba yin no/ /gang byung bar gyur pa de yang spang bar bya ba yin no/ /'o na nad med par gyur pa yang yang dag par yongs su bsrung ba de ci'i phyir zhe na/ na ba'i chos can yin pa'i phyir te/nad med pa thams cad kyi mtha' yang nad yin no zhes bya ba'i tshig gis so/ /gang yang 'byung ba de yang spang bar bya'o/ /'o na skyes bu'i bu de ni gang gis kyang bor ba med do zhe na/ 'chi ba'i chos can yin pa'i phyir te/ gal te skyes nas 'chi bar mi rigs na de lta ma yin pas so//bcos pa gang yin pa yang spang bar bya ba nyid do/ /'o na bum pa la sogs pa byas nas kyang len pa yin no zhe na/ rmongs pa'i chos can yin pa'i phyir gang gzhan gyis bskyed pa de ni nges par 'jig pa yin te/ bcos ma'i nor bu bzhin no/ / gang 'dus byas de dang de ni spang bar bya ba yin no/ /'o na dgos par gnas pa de ni spang bar mi rigs te/ sems la sten par byed pa ma dang 'dra bas de yang rab tu 'jig par 'gyur ba'i phyir te bsal ba'o/ /gang rab tu dga' bar 'gyur ba de ni mi 'dor ba yin na de ni lugs las bzlog pa ma yin no//gang mi brtan pa de yang spang bar bya ba ma yin te/ ci'i phyir zhe na/ zas tsam gyis rab tu 'byung ba'i phyir ro/ /dper na spre'u ni me rno ba yod pas zas kyi don du phal cher kun du g.yo zhing mi brtan pa lta bu mkhas pas spang bar bya'o//de bzhin du 'dus byas kyang zas yod na gnas par 'gyur gyi/ gzhan du ni ma yin no/ /'jig 'gyur 'di la dga' mi bya/ /zhes bya ba ni de ltar 'dus byas kyi dngos po la don du gnyer ba dang nye bar len pa ni mi rigs so/ /gang gi phyir khyad par gsum gyis ni don du gnyer bar bya ste/rtag pa'i phyir dang / rga ba dang 'chi ba med pa'i phyir dang / gzhan la rag lus pa med pa'i phyir ro/ /de la yang 'dir mi 'byung ba ni snga ma phyed kyis so/ /rga ba dang 'chi bas kun du bcom pas ni lhag ma bstan to/ / de'i nges par 'byung ba zhes bya ba ni mtshan nyid gsum gyi rgyu rtogs pa ste/ des mi dpyod pa dang mi rtog pa ste rang rig pa'i phyir ro/ /yang na 'jig rten pa'i yongs su rtag pa de 'dod pa na spyod pa la 'jug pa ste/ gang du de 'dod pa na spyod pa de yang 'di lta bu ma yin te/rtog pa med pa ni rtog pa dang dpyod pa ma yin no zhes mdo las ston to/ /'di ri bong gi rwa bzhin du ma yin nam zhe na/ gzhi zhes bya ba smos te/ dngos po yod pa'i phyir ro/ /sdug bsngal chos rnams 'gags pa'i phyir/ /zhes bya ba ni nye bar len pa'i phung po lnga de thob na 'gags pa'i phyir ro//zag pa med pa'i 'dus byas kyang der 'gags pa yin te/ nye bar len pa'i phung po nyi tsher ma zad do zhes bstan pa'i phyir/ 'du byed nye bar zhi ba yin no/ /de nyid kyi phyir bde ba zhes smos pas de'i sdug bsngal dang bral ba'i tshul yin pa'i phyir te/mya ngan 'das pa bde ba'i mchog /ces bya ba'i tshig gis so/ /'jig 'gyur 'di la dga' mi bya/ /zhes bya ba 'dir rjes su 'brang ngo / /yon tan bsgrags pas yul drug la 'dod pa bskyed pa'i phyir dang / de bsgrub cing bya ba'i phyir ro//yang bshad pa/ bden pa yin zhing mnyam yang mi gtsang ba la sogs pa spang bar bya ba yin gyi/ rin po che la sogs pa ni de ltar shes par mi bya ste/ srid pa dang mya ngan las 'das pa gnyis kyi tshul yang de yin no/ /sdug bsngal gyi rkyen ni srid pa yin gyi/bde ba nyid ni ma yin no zhes bstan pa'i phyir/ /dge slong dag ces bya ba la sogs pa'o/ /bcom ldan 'das dgon pa na bzhugs te/ dge slong rnams mya ngan las 'das pa dang rab tu ldan pa'i gtam ston cing bzhugs so/ /de nas dge slong de dag 'di snyam du sems te/de ji lta bu zhig ces bsams pa dang / de dag gi bsam pa mkhyen nas 'di gsungs te/ sdug bsngal kun las rab tu grol/ /zhes bya ba'i bar du'o/ /dngos po thams cad ni mngon sum du gnas shing skyu ru ra lag mthil du bzhag pa bzhin du mkhyen te/'gog pa la sogs pa shes pa dang ldan pa'i phyir ro/ /de ltar gang zhig gis yid ches pas bstan pa yin zhe na/ ngas zhes bya ba ste bdag nyid ston pa yin no/ /kye dge slong dag khyed kyis kyang khyim gyi gnas spangs pa mngon par shes pa ston pa yin no/de'i gnas zhes bya ba de'i gzhi 'am rten no/ /gang du yang zhes bya ba ni gnas gang du yang zhes pa'o/ /sa la gnas par mi 'gyur zhes bya ba ni de nas sa dang 'brel pa med de gzhi la mi gnas pa ste/ de ni 'dus ma byas yin pa'i phyir ro/ /chu la ma yin zhes bya ba ni chu la med pa'o//me la ma yin zhes bya ba ni me nyid la yang ngo / /rlung la ma yin zhes bya ba yang rlung la ste/ 'dis ni 'dod pa dang gzugs kyi khams kyi nang du gtogs pa ma yin par bstan te/ 'di na phan 'dogs pa dang gnod par byed par gyur pa/me tog gi phreng ba dang tsan+dan la sogs pa dang / dug dang tsher ma la sogs pa'i tshul gyis gnas pa'i phyir te/ de dag kyang khams gnyis po nyid na yod pa'i phyir ro/ /de ltar na gzugs med pa'i khams su gtogs pa yin no zhe na/ nam mkha' mtha' yas skye mched la ma yin zhes bya ba la sogs pa smos so//phyi rol pa dag lus med pa la sogs pa dag la thar ba'i 'du shes su byed pas so/ /de lta na 'jig rten gnyis kyi nang du 'dus pa yin no zhe na/ 'jig rten 'di la ma yin 'jig rten pha rol la ma yin zhes bya ba la sogs pa smos te/'di gnyis ni 'og nas smos pa'i khams gsum gyi ngo bo yin pa'i phyir de bkag pas 'di yang bkag par grub po/ /nyi ma dang zla ba gnyis la gnas pa ma yin te/ zhes bya ba ni/ de'i nang du 'dus pa'ang ma yin te/ de'i phyir rdul shas che ba 'dod chags dang bral ba ni/nyi ma'i dkyil 'khor la 'jug par 'gyur la/ mun pa shas che ba las ni zla ba'i dkyil 'khor la 'jug par 'gyur ro zhes pa ni mu stegs pa rnam par bzlog pa'i phyir ro/ /gnas par mi 'gyur te zhes bya ba ni phyogs gang du yang gnas pa med pa ste/'das pa dang ma 'ongs pa la rnam par rig par mi 'gyur te/ gzugs med pa'i chos ni yul na mi gnas phyogs na mi gnas pa yin no zhes bya ba'i tshig gis so/ /sems dang sems las byung ba yang gcig tu dmigs pa dang bcas pa yin nam zhe na/'di la dmigs pa med pa zhes bya ba smos te/ 'di la dmigs pa yod pa ma yin zhes tshig sbyar ro/ /'di yang 'di'i dbang du byas pa ma yin pa ste/ yang na skye bo phal pa gzugs la sogs pa la dmigs pa de bzhin du de zhes byas nas so//dge slong dag de la 'ong ba yod par nga mi smra ste zhes bya ba ni mya ngan las 'das pa der zhugs na mi smra'o zhes bya ba yin te/ de la 'das pa dang rab tu 'brel pa'i phyir te/ mya ngan las 'das pa la yang ldog pa med pa'i phyir ro/ /de nyid bstan pa'i phyir/'gro ba med ces bya ba smos te/ 'das pas zhes bya ba'i don to/ /de la 'dis ni 'jug pa sngon du 'gro ba'i phyir yang med do/ /'dis ni srid pa bar mdo sngon gyi dus kyi srid pa med pa bstan to/ /gnas par ma yin pa ni gnas pa'i gnas skabs so/ /'chi 'pho yod par nga mi smra//zhes bya ba ni 'chi ba nyid do/ /skye bar ma yin pa ni 'byung ba med pa'o/ /'di lta bu zhes bya ba yang rnam pa de lta bu 'dus byas kyi mtshan nyid yin pa'i phyir khams gsum gyi nang du gtogs pa nyid do/ /'di ni sdug bsngal gyi mtha' yin no zhes bya ba ni 'di nyid mya ngan las 'das pa tha ma ste/gnod pa thams cad zhi ba'i phyir ro/ /'di nyid yang bsdu ba'i phyir sa dang chu zhes bya ba la sogs pa smos so/ /gnas gang du 'byung ba rnam pa bzhi gnas pa ma yin zhing 'jug pa ma yin no/ /'byung ba med pas 'byung ba las gyur pa med par bstan pa'i phyir/de la dkar pos gsal mi byed/ /ces bya ba dkar ba la sogs pa'i kha dog de ni mi snang ste/ 'dus ma byas yin pa'i phyir ro/ /de la mun ba'ang yod ma yin/ /zhes bya ba ni/ mun pa la sogs pa 'di'i dbye ba de ni med do/ / de nyid kyi phyir dkar ba'i sgra ni yang na 'dir snang ba bstan to/ /mun pa ni mun nag ste nyin mtshan zhes bya ba'i don to/ /gling dag tu snang ba'i gnas skabs ni nyin mo yin la/ mun pa'i gnas skabs ni mtshan mo yin no/ /zhes grub pa'i mtha' yin no/ /de na de gnyi ga med pa ci'i phyir zhe na/'di ltar/ de la zla bas snang mi byed/ /ces bya ba yin te/ zla bas ni mtshan mo mtshon pa yin la de na zla bas gsal ba yang med pa'i phyir ro/ /de la nyi mas mngon mi byed/ /ces bya ba ni nyi mas gsal bar mi byed de/ des nye bar mtshon pa ni nyin par ro//de'i phyir mya ngan las ma 'das pa ni gdung ba'i dngos po yin te/ gdung bar byed pa ni 'byung ba chen po rnams des mngon par 'dod pa yang nye bar gdung bar snang ba'i phyir ro/ /nub pa yang kha cig gnod par snang la de bzhin du nyin par yang snang ngo / / dper na rna ba bye ba ris mthong ba yi dags kha cig dang / zla ba dang nyi ma gnyi ga la bya rog dang bya rgod dang / 'ug pa la sogs pa bzhin du ci rigs par sbyar ro/ /gang gis 'di thob pa dang gang grol ba'i gang zag la ji skad brjod ce na/ des ni zhes bya ba ni gang nas gzung nas so//rang gis zhes bya ba ni rang nyid kyis so so rang gis rig pa'i phyir ro/ /rig pa ni 'gog pa shes pas rig pa dang rtogs pa dang mngon sum du byas pa'o/ /mi slob pa'i gnas skabs na de gang yin zhe na/ thub pa zhes bya ba ste/ mya ngan las 'das pa'i thub pa 'di lta bu ni dgra bcom pa la yin gyi/gzhan la med pas so/ /yang na thub par 'gyur ba yin pas thub pa ste/ gang gis thub par 'gyur ba'i mya ngan las 'das pa mthong bas so/ /de gang yin zhe na/ bram ze thub pa zhes bya ba smos te/ lus dang sems kyis spangs pa go rims bzhin du'o//yang na 'dod pa'i khams dang / srid pa'i rtse mo las 'dod chags dang bral ba'i phyir ro/ /de ni gzugs dang gzugs med dang / /zhes bya ba ni gang gi tshe mya ngan las 'das pa de nyid rtogs shing sgrib pa thams cad spangs pa de'i tshe/de ma thag nyid du gzugs nye bar mtshon pa dang / gzugs med pa nye bar mtshon pa'i sdug bsngal kun las rab grol zhes bya ba nges par 'byung ba'o/ /yang na gzugs dang gzugs med pa'i bdag nyid de'i nyon mongs pa las kun du grol bas bstan te/btson ra'i khang pa nas byung zhing grol lo zhes bstan pa bzhin no/ /ji ltar mya ngan las 'das pa thob nas sdug bsngal thams cad las grol ba yin zhe na/ thar pa 'jigs med ces bya ba la sogs pa tshigs su bcad pa gnyis so//de nas tshe dang ldan pa k+She pa ka zhes bya ba dgon pa'i nags tshal gyi mchog shin tu dben pa na 'dug cing bag yod pas ji srid na dgra bcom pa'i 'bras bu thob par gyur te/ rnam par grol ba'i bde ba so sor myong bas tshigs su bcad pa gnyis po 'di gsungs so//mthar phyin pa ni rnam par byang ba thob par gyur pas yang srid pa'i phung po spangs pa'i phyir te/ 'di ltar dgon pa chen po'i nang na gnas na ni bdag nyid sdug bsngal bar shes pa yin no/ /de bzhin du 'khor ba'i 'dam gyi nang du 'bying ba de'i mtha' ni phung po lhag ma dang bcas pa'i mya ngan las 'das pa'i dbyings de thob pa ste sdug bsngal las grol ba'o//'jigs pa med pa ste zhes bya ba ni phung po thams cad chod pa las byung ba'i skrag pa de ni 'jigs pa ste/ de gang la yod pa de ni 'jigs pa'o/ /de med pa ni 'jigs pa med pa'o//de las so so'i skye bo ni kun du 'jigs pa yin te/ mthong ba'i phra rgyas ma spangs pa'i phyir ro/ /ji skad du byis pa so so'i skye bo thos pa dang mi ldan pa ni de med par 'gyur ro zhe na skrag par 'gyur ro zhes bya ba la sogs pa bshad do/ /rlom med ces bya ba ni bdag gi yon tan brjod cing rlom par byed pa'i ngang tshul 'di la yod pa de ni de nyid de/de'i ched du chags pa la sogs pa med pa'i phyir ro/ /'gyod pa med pa zhes bya ba ni ngan pa byas pa ni nyes par spyad pa ste/ de ni 'gyod pa'o/ /de gang la med pa ste 'dis ni bdag la smod par byed pa ma yin te/bdag las bstod pa dang smod pa gnyi ga yang 'dod pa nyid ma yin pa'i phyir ro/ /sngar bstan pa'i nyes pa de med pa yin no zhes bya ba de ga las she na/ 'di ltar/ srid pa'i zug rngu gtubs pa ste/ /zhes bya ba smos te/ srid pa ni nye bar len pa'i phung po lnga'o/ /de thob par byed pa'i nyon mongs pa ni zug rngu ste/ ji skad du zug rngu ni gsum ste/ 'dod chags kyi zug rngu zhes bya ba la sogs pa'o/ /de dag gtubs pa ni rtsa ba dang bcas par drungs phyung ba'o/ /des na de nyid kyi phyir lus kyi tha mar gyur ba'i zhes bya ba tha ma'i dngos po yin pas tha ma ste/phyi nas yang bdag gi sbyor ba med pa nyid kyis de las gzhan pa'i bdag thob par byed pa'i rgyu med pa'i phyir ro/ /mthar phyin zhes bya ba'i sgra'i dbye ba bstan pa'i phyir 'di ni mthar phyin zhes bya bas bstan te/ bya ba'i mthar thug pa'o//de thob pa'i lam gyi rgyu bstan pa'i phyir 'di ni zhes bya ba'i sgra ste/ rtogs pa'i mthar thug pa thob pa zhes bya ba'i don to/ /nges pa thob par byed pa'i shes pa ni mthar thug par gnas pa ste/ zag pa med pa'i lam gyi 'bras bu mthar thug pa ste/ de yang mya ngan las 'das pa thams cad kyi mthar thug pa'o//mchog ces bya ba ni khyad par du gyur pa ste/ mthar thug pa'i gnas so/ /de'i rang gi ngo bo bstan pa'i phyir zhi ba zhes bya ba smos te/ nyon mongs pa'i me 'bar ba dang bral ba'i phyir ro/ /go 'phang ni gzhi'i 'o/ /de nyid la gnas pa ni go 'phang la gnas pa ste/gnas gzhan dag ni nyams pa nyid du shes par bya'o/ /yang na rjes su 'brang bas so/ /bla med pa zhes bya ba ni rtag tu dge ba'i phyir ro/ /mtshan ma thams cad zad pa ste/ /zhes bya ba ni go 'phang gi mchog dam pa 'dus ma byas der ni/rgyu dang 'bras bu thams cad med do zhes bstan to/ /yang na mtshan ma bcu dang bral ba'o/ /byang grol go 'phang zhes bya ba ni gang 'dis byang bar byed pa yin pas byang grol te/ 'phags pa'i lam des dri ma med pa thob pa'i phyir ro/ /de'i go 'phang ni 'di'i 'bras bu ste de'i mthus ni 'di 'thob pa'i phyir ro//gang lam gyis bskyed pa de ni 'jig pa'i chos can te/ 'di lta ste grong la sogs pa de rnam par bcad pa'i phyir bstan pa/ 'chi med ces bya bas ni yang mi skye ba'i phyir ro/ /de nyid kyi phyir bdag gi dngos po ni gnod pa dang bcas pa'i phyir yongs su spang bar bya ste/dam pa rnams ni de la dmigs pa yin no zhes bstan pa'i phyir/ mtshungs dang zhes bya ba la sogs pa smos so/ /ji tsam na bcom ldan 'das kun dga' bo dang lhan cig yangs pa can pa las bsod snyoms blangs nas tsa pa li tse ta zhes bya ba'i shing zhig gi drung du bzhugs te/tshe dang ldan pa kun dga' bo la bka' stsal pa/ kun dga' bo yangs pa can gyi tsa pa li tse ta'i sa ngan cing spyad par bya'o/ /'dzam bu gling pa'i mi rnams kyi tshe ni shin tu thung ste/kun dga' bo gang la la zhig rdzu 'phrul gyi rkang pa bzhi kun tu bsgrubs pas zhes pa nas/ ji srid du nga mya ngan las 'das te/ bde bar gshegs pa mya ngan las 'das pa'i dus su khyod ni spro ba chung ba yin te/ srid pa gsum gyi tha ma zad pa med par de bzhin gshegs pa yongs su mya ngan las 'da' bar 'gyur te/des na tshe'i 'du byed yongs su 'dor zhing srog gi 'du byed byin gyis brlabs te/ ting nge 'dzin las bzhengs nas tshigs su bcad pa 'di gsungs so/ /mtshungs pa ni gzhal bas mnyam pa ste/ 'byung ba zhes bya ba dang 'dir sbyor ro//bral zhes bya ba 'dir byed pa'i tshig dang sbyar bar bya'o/ /mi mtshungs pa ni bzlog pa ste/ mi mnyam pa'o/ /dang ni bsdu ba'i don te/ mtshungs pa yang rung mi mtshungs pa yang rung dral nas byung ba'o/ /yang na 'byung ba'i 'du byed spangs pa nyi tsher ma zad de//mtshungs pa dang mi mtshungs pa yang dral nas byung na yin no zhes bya ba'i don to/ /'byung ba ni bdag gi dngos po 'byung ba yin te/ tshogs par yod par gyur na 'byung ba yin no zhes pa'o/ /de yang rnam pa gnyis te/ gzugs dang ming gi tshogs kyi bdag nyid do/ / de la gzugs kyi lus ni mtshungs pa ste/ snga phyi khyad par med pa'i phyir ming gi tshogs ni mtshungs pa med pa ste/ dus gzhan na rdzogs pa'i byang chub 'thob pa'i phyir ro/ /sngar ji ltar byas nas she na/ srid pa'i 'du byed ces bya ba smos te/ de la 'du byed yod pa dang rgyud la 'jug pa yod pa'i phyir te/gang la 'du byed yod pas zhes bya'o/ /rab tu spangs pa ni bor zhing bsal ba'o/ /thub pa ni bcom ldan 'das te bdag dang gzhan gyi don mdzad pa'i spyod pa med par bzhugs pa zhes bya ba'i don to/ /thub pa'i khyad par gyi tshul gyi sku tshe btang ba dang /byin gyis brlabs pa'i rgyu bstan pa'i phyir/ nang dga' ba zhes bya ba smos te/ bdag nyid la dga' bas brtag pa mchog tu byed pa'i phyir 'dis ni ye shes la dbang ba bstan to/ /mnyam gzhag ces bya ba ni ting nge 'dzin la dbang thob par bstan to/ /yis ces bya ba ni dbang rnam pa gnyis dang 'brel bas mngon par 'dod pa'i 'bras bu 'grub pa yin no zhes bstan pa'i phyir ro//dral ba ni bshig pa'o/ /sngar srid pa'i 'du byed spangs pas mtshungs pa dang / mi mtshungs pa'i srid pa dral ba de nyid kyi phyir sngar dang gi sgra bshad do/ /gang dral zhe na/smras pa/ sgo nga'i sbubs las byung ba bzhin zhes bya ba sgo nga las 'di kun du byung ba yin pas kun du byung ba ste/ bya zhes bya ba'i don to/ /sgo nga'i sbubs ni sgo nga'i shun phrags so/ /dper na khyim bya'i sgo nga mngon par smin pa'i lus dang / mchus sbubs dral zhing gtubs nas 'gro ba de bzhin du/bcom ldan 'das zag pa dang bcas pa dang zag pa med pa'i bdag gi dngos po yang shes pa khyad par can gyis dral nas mya ngan las 'das so/ /mya ngan las 'das pa'i bde bas ni bde ba thams cad zil gyis gnon pa yin no zhes bstan pa'i phyir smras pa/sbyin kun zhes bya ba la sogs pa'o/ /lha zhig gis gsol pa/ sbyin pa thams cad gang gis thub/ /dga' ba thams cad cis thub lags/ /stobs rnams gang gis thub par 'gyur/ /bde ba thams cad thob gang lags/ /zhes zhus pa dang 'di gsungs so//bza' ba dang / btung ba dang / bgo ba byin pa thams cad las rgyal zhing zil gyis gnon par byed pa de gang yin zhe na/ chos kyi sbyin pa zhes bya ba smos te/ chags pa med pa'i sems kyis phyin ci ma log par sangs rgyas kyi gsung bstan pa yin te/ de ni don dam par bde ba'i rgyu yin pa'i phyir ro//ji skad du bshad pa/ 'di ni sbyin pa chung ngu ste zang zing gi sbyin pa'o/ /'di ni sbyin pa mchog ste/ 'di lta ste chos kyi sbyin pa'o/ /ji skad du gsungs pa gal te 'ga' zhig gis ni sa chen po 'dir rin po chen sna bdun gyis rab tu bkang ste/sbyin pa byin pa bas gang bde bar gshegs pas gsungs pa'i tshigs su bcad pa byin na ches mchog tu 'grub par 'gyur ro zhes so/ /dga' kun zhes bya ba ni 'dod pa la nye bar longs spyod pa las skyes pa thub pa ste/ /de ni zang zing dang bcas pa yin pa'i phyir ro//chos kyi dga' ba zhes bya ba ni legs par gsungs pa mnyan pa las byung ba'i sems kyis thub pa yin te/ zang zing med pa'i phyir ro/ /ji skad du bshad pa/ bstan bcos mi rtog sdug bsngal dang / /de la rtog pa'i bde ba gang / dmyal ba'i tshangs pa'i 'jig rten du/ /de ni bde min sdug bsngal min/ /yang na thar pa la dga' bas ni 'khor ba la dga' ba zil gyis gnon pa yin te/ gnas dam pa dang gnas dam pa ma yin pa'i yul gyi khyad par gyis so/ /stobs kun bzod pa'i stobs kyis thub/ / ces bya ba ni glang po che la sogs pa'i stobs sam/ rta'i tshogs la sogs pa'i stobs ni bzod pa'i stobs kyis zil gyis mnan pa yin te/ yang bshad pa/ bzod pa'i 'jig rten gnyis kyis ni/ /stobs ni stobs kyis rnam par gnon/ /thar pa'ang sgrub byed de bas na//bzod pa'i stobs ni chen por bshad/ /ces so/ /sred pa zad pa zhes bya ba ni thar pa ste/ des ni bde ba thams cad zil gyis gnon pa yin te/ de las gzhan bde ba ni sdug bsngal dang 'brel pa yin la de ni sdug bsngal dang bral ba'i phyir te/ ji skad du gang yang 'jig rten 'dod pa'i longs spyod dang //gang yang lha'i bde ba'i longs spyod dag ces bya ba la sogs pa'i tshigs su bcad pa bstan to/ /mya ngan las 'das pa'i tshoms te nyi shu rtsa drug pa'i rnam par 'grel pa rdzogs so// //thar pa thob par 'gyur ba de'i don du brtson 'grus rtsom pa ni lta ba dag pa dang ldan pas 'gyur gyi/gzhan du ni dri ma dang bcas pa ni phyin ci log tu mthong ba yin no zhes bstan pa'i phyir de'i 'og tu mthong ba'i tshoms bkod pa yin no/ /yang na/ bde kun sred pa zad pa 'thob/ /ces bstan pa la de gang gis thob 'gyur zhe na/yang dag pa'i lta ba ste gzhan dag ni de med pas gzhan gyi skyon la lta ba la sogs pa'i dri mas bsgos pa yin no zhes bstan pa'i phyir/ bdag las gzhan pa'i zhes bya ba la sogs pa smos so/ /drug sde rtag tu gzhan la rtsod par byed cing dran par byed la gzhan gyi skyon nas rjod par byed de/bdag nyid ni tshul bzhin ma yin pa'i sbyor ba spyod pa de la bstan pa'i phyir tshigs su bcad pa gnyis gsungs so/ /mthong bar sla ba yin pas mthong bla ba ste rtogs par sla ba'o/ /kun du rmongs pa'i dbang gis bsgribs te/shes pa med pa'i phyir 'di 'byung ba yin no zhes bstan pa'i phyir te zhes bya ba'i sgra smos so/ /gzhan gyi skyon zhes bya ba ni gzhan gyi 'khrul pa ste/ ji skad du/ mig gis rang gi skyon mi mthong / /zla ba'i ra ri rtog par byed/ /ces bshad pa'o//rang gi skyon ni mthong bar dka'/ /zhes bya ba bdag gi 'khrul pa ni dka' bas mthong ba yin te/ rang gi gdong la blta ba bzhin no/ /gzhan gyi skyon mthong bar sla ba zhes bstan pa la/ ci'i phyir zhe na/ 'di ltar bdag las gzhan pa'i skyon dag ni/ phub ma gtor ba ji bzhin du//zhes bya ba ste/ 'dis bya ba rjes su dpag pa zhes bya ba'i don to/ /dper na 'ga' zhig gi rtswa'i phye ma gyen du gtor zhing bor bar byas pa de bzhin du ma rig pas de nyid ma mthong ste/ gcig la gcig skyon rjes su sgrogs par byed do/ /rang gi skyon ni mthong bar dka'//zhes bya ba ji ltar shes par bya zhe na/ rang gi de ni sbed pa dang / /zhes bya ba ste/ bdag nyid dang 'brel pa'i skyon 'gebs par byed de/ bkab pa'i dngos po ni mthong bar dka'o/ /ji lta bur sbed pa yin zhe na/ g.yon can cho lo 'jo ba ltar/ /zhes bya ba smos te/dper na 'ga' zhig 'jo ba ni rgyan po byed pa'o/ /g.yon can ni sgyu dang ldan pa ste/ cho lo la gzhan bslu ba'i phyir sbed pa ltar ro/ /yang na 'jo ba ni grags pa thob par 'dod pas g.yon can te/ g.yos gzhan dga' ba'i ched du rang gi sdig pa sbed par byed la/gzhan gyi skyon sgrogs par byed pa ltar gzhan gyi skyon tshol bar byed pa'i nyes dmigs bstan pa'i phyir smras pa/ gzhan gyi skyon la lta byed cing / /zhes bya ba ste/ gzhan gyi skyon la lta bar byed cing tshol bar byed pa'i ngang tshul 'di la yod do/ / rtag tu 'phyas long 'du shes can/ /zhes bya ba 'dis ni skyes bu dam pa la skyes bu dam pa ma yin par khyad par du byed de/ skye bo dam pa ni bsrung ba'i phyir skyon yongs su tshol bar byed do/ /skye bo ngan pa ni skyon brjod pa'i phyir byed de/ ji skad du bshad pa/ skye bo dam pa rab bsgrims te/gzhan gyi skyon sbed smad rim bzhin/ /'on kyang 'di gnyis khyad yod de/ /dam pa srung gi smad rim smra/ /zhes bya ba lta bu'o/ /'phyas long dang tshig ngan pa brjod pa'i 'du shes gang la yod pa de'o/ /g.yon phyogs chos ni rab tu 'phel/ /zhes bya ba g.yon phyogs ni smad pa'o//chos rab tu 'phel ba ni ngan par spyod pa la sogs par 'gyur ba ste/ ma skyes pa ni skye bar 'gyur la/ skyes pa ni 'phel bar 'gyur zhes mdo las bstan to/ /de yis ring du chos mi mthong / /zhes bya ba ni des de ltar ngan par spyod pa 'phel bar byed na ni bden pa mthong ba thag ring ba'i phyir ro//gang yang chos kyi de bzhin nyid mthong bar mi 'gyur ba de'i skyon ni ngo tsha ba med pa la sogs pa'i skyon las 'byung ba yin no zhes bstan pa'i phyir/ spyi brtol byed cing zhes bya ba la sogs pa smos so/ /dge slong gnyis shig yod de/gcig ni shin tu khwa lta bur mu cor smra ba dang spyi brtol che zhing khyim dag tu nye bar 'gro bar byed de/ des bde bar 'tsho la/ gnyis pa ni ngo tsha shes shing 'gyod pa byed de de ni des 'tsho ba shin tu dga' bar 'gyur te/ de gnyis kyi phyir tshigs su bcad pa gnyis gsungs so//gang la ngo tsha yod pa ma yin pa de ni ngo tsha med pa ste/ des ni bde bar 'tsho bar 'gyur ba'am/ gnod pa med par 'tsho bar nus pa ste/ shin tu ma sbyangs par 'tsho ba'i thabs kyis zhes bya ba'i don to/ /ngo tsha med pa yang rnam pa bzhis blta bar bya ste/de yang rim bzhin du bstan pa'i phyir/ khwa lta bu zhes bya ba ni ma brtags shing bab col du byed pa'o/ /mi gtsang ba'i las zhes bya ba ni mi gtsang zhing gtsang ba ma yin pa dang 'dra ba'i las 'di la yod pa'o/ /'phrog rlom can zhes bya ba ni/ 'phrog rlom byed pas 'jug pa'i tshul 'di la yod pa ste/des na bla ma'i skye bo la yang 'phrog pa zhes bya ba'i don to/ /spyi brtol byed pa ni mu cor smra ba ste/ thams cad la smras pa'o/ /shin tu nyon mongs 'tsho ba can/ /zhes bya ba ni ji ltar yang des dus nyung zad du bde bar 'tsho ba yin mod kyi/dri ma dang bcas par 'tsho ba ste/ ngan song gi rgyu dpag tu med pa bsags pa'i phyir dang / grags pa ma yin pa dang bsnyen bkur la sogs pa'i nyes dmigs las skyes pa'i phyir ro/ /ngo tsha shes pa'i 'tsho ba dka'/ /zhes bya ba la/ ngo tsha dang ldan pa ni rtsod pa'i dus 'dir shin tu mi bde bar 'tsho ba yin no//ngo tsha shes pa yang rnam pa lngas yongs su shes par bya ba yin te/ de la 'dir khyad par gyi tshul gyis bstan pa'o/ /de yang ji lta bu zhe na smras pa/ rtag tu gtsang ma tshol ba dang / /zhes bya ba ste/ rgyun du kha na ma tho ba med pa'i dngos po tshol ba yin no/ /'dzem bag can zhes bya ba ni dben pa'i gnas la dga' ba dang / tshogs kyis 'jigs pa ni 'dzem bag can te/ khwa lta bu ma yin pa zhes bya ba'i don to/ /thub chod mi byed pa zhes bya ba ni mu cor mi byed pa'o//'tsho ba dag pa zhes bya ba ni kha na ma tho ba med pas lus gnas par byed pa ste/ rnyed pa dang bkur sti'i ched du bla ma'i skye bo la sogs pa spong bar byed pa ma yin pa'i phyir ro/ /'di dag thams cad kyang de kho na nyid mthong ba la gegs med pa yin no zhes bstan pa'i phyir/lta ba zhes bya ba ste/ 'dis ni khyad par du gong ma dang sbyar bar bya'o/ /shin tu nyon mongs 'tsho bar byed/ /ces pa 'dir ci dang sbyar zhe na/ thub chod mi byed pas mthong ba zhes bya ba yin te/ nyon mongs par 'tsho ba can shes rab kyis de kho na nyid mthong bas so//ngo tsha med pa las ni skyon mtha' yas pa 'byung ba yin la ngo tsha dang ldan pas ni yon tan mang po 'byung ba yin no/ /ci'i phyir 'di gnyis dmigs pa yin zhe na/ 'jig rten long gyur 'di lta ste/ /zhes bya ba la sogs pa bstan te/mnyan yod na dmus long zhig kun du rgyu ba na g.yang du lhung bar gyur to/ /de dge slong rnams las gsan nas dge slong dag byis pa so so'i skye bo 'di dag ni long ba yin te/ lus kyis nye bar spyad pa spyod cing lus zhig nas shi ba'i 'og tu ngan song ngan 'gro log par ltung ba sems can dmyal ba rnams su skye bar 'gyur ro zhes bya ba nas/ji srid du 'di gsungs so/ /mun par gyur pa ni mun pa dang 'dra ba ste phar gyur pa bzhin no/ /dper na long bas ni yid du 'ong ba dang mi 'ong ba ci yang mi mthong ngo //de bzhin du byis pas bya ba dang bya ba ma yin pa'o/ /ste zhes bya ba ni gang gi phyir ro/ /'jig rten 'di long bar gyur pa de bas na mtho ris la dga' shas tsam zhig ces bya ba'i don to/ /'jig rten 'di ni so so'i skye bo'o/ /de las lhag mthong ldan pa nyung //zhes bya ba ni shin tu chung zhing nyung ste 'gro ba 'di na'o/ /lhag mthong ni mkhas shing rtogs pa ste/ phan pa dang phan pa ma yin pa rtogs pa'i phyir legs par spyad pa spyod pa'o/ /gang gi phyir long bar gyur pas de'i phyir phal cher ngan song du 'gro ba yin no//phal cher lhag mthong nyung ba'i phyir shas tsam zhes bya ba smos te/ shas tsam ni 'jig rten nyung zad mtho ris la dga' ba ste/ bde 'gror skye zhing bde ba myong bar 'gyur ba'o/ /rgya las shor ba'i bya lta bur/ /zhes bya ba la/ rgya las grol ba ni rgya las shor ba'o//bya ni bya nyid de nyung ngu mtshon pa ste/ phal cher ni bya'i rgyar tshud pa las 'chi bar 'gyur ba de bzhin du 'jig rten 'di dag kyang ngan song gi rgya la long bar gyur pa yin no/ /ci long bas ci yang mi mthong ba de bzhin du byis pa yang de ltar gyur pa yin nam zhe na/'dir bshad pa/ mi mthong ba ni ma yin mod kyi/ phyin ci log gi sbyor ba dang ldan pa'i phyir te/ de gnyis kyi rgyus ngan par spyad pa spyod cing ngan song du 'gro ba yin no zhes bstan pa'i phyir byis pa lus kyi zhes bya ba la sogs pa smos so/ /bcom ldan 'das yul kau shAm+bI'i gdangs can gyi kun dga' ra ba na bzhugs te/de'i tshe bad sa'i rgyal po 'char byed kyi btsun mo'i 'khor yul gyi mis bsregs te/ gang du sngo bsangs can la sogs pa bud med lnga brgya bsregs so/ /de nas dge slong rab tu mang po snga dro zhes bya ba ji srid du btsun pa de dag gi 'gro ba ni cir 'gyur gar skye bar 'gyur zhes pa dang /dge slong dag skyes bu glen pa de dag gis ni bsod nams ma yin pa mang po bstsags so/ /gang gis btsun mo'i 'khor bsregs pa de'i nang nas bud med gang gis 'og ma'i cha dang mthun pa'i kun du sbyor ba lnga spangs pa'i phyir skyes nas der yongs su mya ngan las 'da' bar 'gyur ba zhes bya ba nas/nga la sems mngon par dad nas lha rnams kyi nang du skyes par gyur to zhes bya ba'i bar du ste/ de lta bas na 'di ltar bslab bar bya ste/gang sdong dum tshig pa la yang gnod sems bskyed par mi bya na zhes bya ba nas ji srid du 'di gsungs so/ /'phrog par byed pa'i rdzas yin pas nor te/ rkun mas 'phrog par nus pa zhes bya ba'i don to/ /nor lta bur chags shing 'brel pa gang yin pa de ni de nyid de bral ba'i rkun mas 'phrog pa dang phrad pa zhes bya ba'i don to//phrad par gyur na ni mthar 'bral ba yin no/ /'jig rten zhes bya ba ni sdug bsngal ba'i skye bo ste/ 'di ltar sngo bsangs can la sogs pa'i bud med kyi 'jig rten te/ rgyal po 'char byed kyi shin tu sdug pa ste/de ni 'di ltar bsregs pa'o/ /gzhan rdzas lta bur zhes bya ba ni bsgom par rung ba 'dod chags ma yin pa'i don to/ gzhan mi 'jig pa rdzas de gzugs dang phrad cing mi 'jig pa'i mdza' ba dang phrad pa zhes bya ba'i don to/ /lta bar byed ces bya ba ni mtshon par byed pa'o//ji ltar yang 'dir thams cad du sdug pa dang phrad pa rnam par 'jig pa ni mngon sum du grub pa yin mod kyi/ mi 'jig cing phrad pa lta bur 'dod chags can dag lta bar byed de/ 'dod pa la 'dun pa la sogs pas yid phyin ci log pa'i phyir te/'di nyid bstan pa/ byis pa lus kyis bcings gyur pa/ /zhes bya ba smos te/ des spungs pa'i phyir phung po'am lus te skye ba dang / las kyi kun nas nyon mongs pas bstsags pa'i ngan song zhes bya ba'i don te/ gang dag la des bcings pa'i byis pa de ni de nyid do//de gang zhe na/ byis pa ste blun pa so so'i skye bo zhes bya ba'i don to/ /so so'i skye bo nyid ni mi shes pas mtshon pa yin no zhes bstan pa'i phyir/ mun pa zhes bya ba ni mi shes pas yongs su bskor ba ste/ 'jig rten ni gti mug gis dbang du byas shing mi shes pas bsgribs pa'o zhes mdo las gsungs so//de la 'dis ni go rims bzhin du mthong ba dang bsgom pas spang bar bya ba'i ma rig pa'i kun du sbyor ba bstan to/ /yang na nor ni don med pa la chags pa'i rnam pa'i 'gro ba gzhan dag gis kun du chags shing bskyed pa'i 'jig rten gang yin pa de ni de nyid do//'di la ngan par spyod pa la mchog tu byed pa'i phyir rnam par smin pa ni mi rnams kyi skye ba 'bras bu med par bsgrub ces bya ba'i don to/ /yang na 'dis chags pa yin pas chags pa ste/'dod pa'i yon tan dag la lhag par chags pa nyid de 'dod pa las 'dod chags pa'o/ /de'i nor ni slu ba'i bdag nyid dam sgyu ma'i bdag nyid do/ /gang 'jig rten de'i dbang gis yon tan thams cad rnam par 'jig par 'gyur ba'i phyir te/'jig rten zhes bya ba ni mi rtag pas rnam par 'jig pa yin pa'i phyir ro/ /gzhan rdzas lta bur lta bar byed pa zhes bya ba ni nyes pa thams cad kyi gzhi yin yang bde 'gror skyes pa yin pa'i phyir yon tan gyi snod lta bur blta bar bya ste/ phyugs dang / sha za dang / gcan gzan khro bo dang / spyang ki 'dra ba yin yang mi'i cha byad can zhes bya ba'i don to/ /gal te de ltar gyur na ji ltar 'di'i bya ba ma yin pa byed la/ 'di lta bur mi'i 'jig rten du skyed kyang ji ltar nyes par spyod pa kun du stsogs par byed ce na/ lus kyis bcings gyur pa zhes bya bas bstan te/'dir lus ni 'dod pa la 'dun pa la sogs pa'i sgrib pa rnams te/ nye bar sogs shing ngan song du skye ba yin no/ /de'i 'ching ba'i zhags pa gang gis byis pa bcings te/ rang dbang med par byas pa'i phyir ro/ / byis pa zhes bya ba ni bden pa ma mthong ba'i so so'i skye bo 'dod chags dang ma bral ba ste/ don med pa thams cad byed pa'i phyir yang so so'i skye bo nyid du bstan to/ /de yang khyad par du rmongs pa'i mtshon pa yin no zhes bstan pa'i phyir/ mun pa'i 'khor gyis bskor ba yin//zhes bya bar bstan to/ /mi shes pa'i 'bras bu phyin ci log yin no zhes bstan pa'i phyir smras pa/ bdag gis zhes bya ba la sogs pa'o/ /bden pa min la bden lta bas/ /zhes bya ba ni mngon par mi 'dod pa'i mi gtsang ba la sogs pa'i ngo bo la gtsang bar mngon par rtogs pa'o//mthong ba zhes bya ba ni gang yang shes pa'i mthus mthong ba ste/ de lta bu'i mkhas pa ni yang med do zhes bya ba de la med de/ 'jig rten pa'i dngos bo cung zad 'dod pa yang zhes bya ba ni tshig gi lhag ma'o/ /log par lta ba la 'jug pa nyi tsher ma zad de/gti mug gis 'jug pa yang yin no zhes bstan pa'i phyir/ nga rgyal la sogs pa'i skyon yang bstan pa yin no/ /bdag gis byas so snyam sems pa/ /zhes bya ba ni tshangs pa chen po tshangs pa'i 'jig rten na gnas pas bcom ldan 'das la gsol pa/kye gau ta ma gnas 'di ni rtag pa brtan pa ste/ 'di lta ste/ tshangs pa'i 'jig rten 'di nyid du bzhugs su gsol zhes pa dang / 'di dang tshigs su bcad pa 'og ma gsungs so/ /bdag gis byas so snyam pa'i nga rgyal te des phyung ba ni des bskyed pa'o//skye dgu ni sems can te tshangs pa la sogs pa'o/ /gzhan gyis byas sems pa zhes bya ba la gzhan gyis bskyed pa ni gzhan gyis byas pa ste/ tshangs pa dbang phyug la sogs pas 'jig rten 'di phyung ba'o/ /zhes mngon par zhen cing sems par 'dir sbyar ro//skye dgu tshangs par spyod pa gnas pa'o/ /de ni 'gas kyang ji lta ba bzhin du mi mthong ngo zhes bya bas bstan te/ de ni bdag gir byed pa dang gzhan du byed pa'i bdag gi dngos po phyin ci log pa yin no/ /de bas na ji lta ba bzhin du mi mthong ba ste/phyin ci ma log par ston pa dang mnyan pa lam goms pa'i phyir ro/ /'gas kyang zhes bya ba gcig gis kyang de ltar rtogs pa'o/ /'di ltar bdag gis byed pa dang gzhan gyis byed pas ji ltar yang gtses pa yin no/ /des na yang mi shes shing lta ba log pa yin te/ phyin ci log pa nyid do/ /gang yang mi mthong ba zhe na zug rngu ste sdug bsngal gyi rgyur gyur pa 'jig tshogs la lta ba la sogs pa'i lta ba'i zug rngu nyid de sdug bsngal thams cad 'dren par byed pa'i phyir ro/ /zug rngu de dag sngon chad mthong ba dang / /zhes bya ba ni gang yang bdag dang gzhan gyis byed pa gnyis zug rngu dang 'dra ba sngar nyid yang dag par mthong ba yin te/de mthong bas bdag gis byed pa la sogs pa yang med par 'gyur ro/ /gnyis po yang ji lta bu zhe na/ gang la zhes bya ba smos te/ gang du gnyis po 'di la'o//skye bo ni so so'i skye bo'o/ /chags pa ni mngon par zhen pa ste/ 'di nyid bden no zhes smos pas mngon par zhen cing rtogs par byed pa'o/ /yul la sred pa ni bdag nyid la sred cing zhen pa ste/ 'di nyid zug rngur mthong ba yin no zhes bsgom par bya'o//de ltar gyur pas/ de ni bdag gis byas snyam mi 'dzin cing / /zhes bya ba ste/ rgyud la mi spyod pa'o/ /de bzhin du gzhan gyis byas snyam mi 'dzin to/ /zhes bya bar yang sbyar ro/ /gang la 'di lta bu dang ldan pa ni bdag gir 'dzin pas yid bcom zhing sdug bsngal ma spangs pa yin no zhes bstan pa'i phyir/skye dgu 'di dag nga rgyal ldan/ /zhes bya ba smos te/ snga ma nyid kyi don gyi dbye bas bstan pa yin no/ /rgyal ba ni bdag dang bdag gir byed pa ste/ de ni bdag dang gzhan gyi sgo nas spyod pa yin te/ de dang 'di dag ldan pa'o/ /skye dgu ni so so'i skye bo ste/ de la gzugs med pa ni nga rgyal dang ldan pa ste phal cher bsam gtan gyi khyad par thob pas zil gyis mi non pa'i phyir ro/ /nga rgyal la chags pa ni gzugs can te/ tshangs pa la sogs pa'i rnam par 'gyur ba thos pa'i phyir ro//nga rgyal bcings zhes bya ba ni 'dod pa dag lhag par spyod pa'i phyir ro/ /nga'o snyam pa'i nga rgyal gyi rgyu bstan pa'i phyir rtsod par gyur pa'i lta ba can zhes bya ba ni lta ba drug cu rtsa gnyis la chags shing mngon par zhen pa'am/ yang na de'i ched du 'khrug par 'gyur zhing phan tshul zil gyis gnon pas sdig pa lhag par spyod pa'i phyir ro//'khor ba ldog par mi 'gyur ro/ /zhes bya ba ni srid pa'i nga rgyal zil gyis gnon par mi 'gyur ro/ /nyes pa dang ldan pas gcig tu 'khor ba zil gyis gnon par mi 'gyur ro zhes bstan pa'i phyir/thob par gyur pa gang yin dang / /zhes bya ba la sogs pa smos so/ /dge slong zhig dbyar gnas pa bcom ldan 'das dang nye bar gnas pa las thub pas bka' stsal pa/ dge slong dbyar gang du gnas par gyur zhes pa dang /des gsol pa/ bdag ni ri kha ba can du gnas pa lags so/ /zhes zhus pa dang / dge slong khyod kyis der ngo mtshar 'ga' zhig mthong ngam ci mthong zhes pa dang / bcom ldan 'das khums te phyi rol pa'i drang srong dag nam mkha' las 'ong ba dang 'gro bar bgyid pa gda' bas bdag dga' ba skyes te/nam zhig na bdag kyang 'di ltar 'gyur zhes dgongs so zhes zhus pa dang / des de dag ni gcig tu sdug bsngal ba yin te/ drang srong de rnams kyis gang mi'i skye ba thob pa dang / gang thob par bya ba tshangs pa'i 'jig rten la sogs pa thams cad du yang skye ba dang /dga' ba la sogs pas nye bar bcom pa yin pas de la khyod kyis dga' bar mi bya'o zhes gsungs so/ /yang na gang thob pa ni 'das pa dang da ltar byung ba'i skye ba'o/ /gang thob par bya ba ni ma 'ongs pa'i skye ba'o//de dag gnyis ka yang rdul gyis yog ces bya ba ste/ gnod pa stong phrag gis gtses pa'i phyir ro/ /dge slong dag gang gzugs skyes par gyur pa 'di ni nad kyi sdug bsngal bskyed pa yin te/ gnas pa dang / rga ba dang / 'chi ba rab tu 'byung ba yin no zhes bya ba la sogs pa mdo las gsungs so/ /'di nyid gang gis yin zhe na/ nad med pa zhes bya ba smos te/ nyon mongs pa gzir zhing bcom pa ste/ so so'i skye bo zhes bya ba'i don to/ /rjes su slob par byed ces bya ba ni 'dir yang gi sgra phyis pa bstan te/nyon mongs pa spangs pa'i phyir bslab pa gsum la 'phags pa dag 'jug par gyur na yang ngo / /de gnyis ka yang rdul 'dis yog par 'dod pa yin no/ /rngon pa'i rtogs pa yang 'dir brjod par bya'o/ /gang de lta na ni lta ba log pa la zhen pa yin te/de bstan pa'i phyir/ gang zhig ces bya ba ni sems can no/ /bslab pa ni glang po'i lag pa la sogs pa gdul ba'i thabs te/ 'khor ba'i nang gi sdug bsngal dang 'brel pa gang yin pa dag go/ /tshul khrims ni tshangs par spyod pa dang 'gal ba'i tshul khrims 'chal pa spong ba'o//brtul zhugs ni khyi la sogs pa'i spyod pa la dmigs pa'o/ /tshangs par spyod pa ni 'khrig pa la spyod pa spong ba'o/ /dka' thub ni tsher ma brten pa la sogs pa'o/ /nye bar gnas pa ni lha dang / mi la bsnyen bkur byed pa la sogs pa'o//gang dag la de snying por byed pa ni thar pa'i rgyu 'dod pa ste/ de tsam gyis thar pa'i bde ba la mngon par zhen pa'i phyir ro/ /'di ni mtha' gcig go/ /zhes bya ba ni tha mar sdug bsngal gyi rgyu ste/ la la'i lta ba'o/ /gang zhig de ltar lta zhing 'di skad du smra ba zhes bya ba ni mngon par zhen pa'i phyir dang de ltar sgrub pa'i phyir ro//'dod pa ni gtsang ba'o zhes bya ba ni/ 'khrig pa nye bar longs spyod pa ste/ lha rnams kyis kyang de longs spyod pa'i phyir ro/ /bsod nams can zhes bya ba ni yid dang rjes su mthun pa'i phyir ro//longs spyod par bya ba ni sngar bstan pa'i rgyu gnyis kyi phyir ro/ /yang na bdag po'i 'bras bu yin pa'i phyir ro/ /'dod pa ni skyon med pa yin no zhes bya ba ni 'jig rten thams cad de'i don la mngon par brtson pa'i phyir ro/ /bdag dang gzhan gyi rgyud tshim pa'i thabs yin pa'i phyir ro//de dag ces bya ba ni de ltar shes pa'i sems can no/ /lhag par ni shin tu zhes bya ba'i don to/ /'dod pa rnams zhes bya ba ni 'dod pa'i yul dag la'o/ /ltung bar byed pa'i brtul zhugs len pa zhes bya ba ni de la mchog tu dmigs par byed pa ste/sbrang ma bzhin du zho la bdag nyid ltung bar byed pa yin no/ /'di yang mtha' gcig go zhes bya ba ni sdug bsngal gyi mtha'i rgyur 'dod pa'o/ /mtha' ni rnam pa gnyis te/ ji nas bdag nyid ngal ba'i sbyor ba dang / dman pas grong gi tha mal pa ste/ gang la 'dod pa la bsod nyams kyi sbyor ba zhes mdo las gsungs pa'i phyir ro/ /mtha' gnyis po 'di dag ni zhes bya ba ni thar pa thob par byed pa ni ma yin gyi/ dur khrod 'phel bar byed pa zhes smos te/ 'di gnyis kyis ni zhes bya bar tshig rnam par sbyor ro//yang na bdag nyid dur khrod bzhin du gnas pa'i bdag nyid yin pa'i phyir ro/ /ci'i phyir zhe na/ de dag gis ni dur khrod 'phel bar byas/ /zhes bya ba yin te/ mngon sum du grub pa'i phyir des de dang de nyid ma mthong bas gnyi ga'i mtha' la dmigs pa ste/dur khrod rgyas par 'gyur ba'o/ /de ltar zhes bya ba ni rnam pa 'dis so/ /'di dag ni gong du bstan pa'i mtha' gnyis te/ dur khrod 'phel ba byis pa'i sems kyis ma mthong zhing ma rtogs pa'o/ /kha cig zhen par byed cing zhes bya ba ni ling sle sha ne zhes bya bas 'dod pa dag la lhag par chags pa ste/'dod pa la bsod nyams su sbyor ba'i phyir ro/ /kha cig mngon par rgyug par byed/ /ces bya ba ni 'dod pa dag la 'gro zhing shin tu ring na gnas kyang 'gro ba ste/gzugs la sogs pa'i yul yang rjes su myong bar mi 'gyur zhing bdag nyid dal ba'i rjes su sbyor ba'i phyir ro/ /mig dang ldan pas de dag mthong ba na des de dag lhag par zhen par mi byed do zhes bya ba la sogs pa'o/ /de dag de ltar mi byed ces bya ba ni de ltar gnyis kyi nang du mi 'jug pa'o//de dag de ltar mi sems zhes bya ba ni nang gi gnyis kyis bdag gir byed pa mi skyed pa dang lam ma yin pa gzhan dag la mi ston pa'o/ /de dag gis chos rjes su mi gdags pa 'di lta bu zhes bya ba ni de dag bdag nyid chen po de dag gis kun du sbyor ba thams cad yang dag par spangs pa'i phyir bag chags dang /las kyi bdag nyid chos kyi rnam pa thob par byed pa'i lam med de/ gang gi 'gro bas 'di dag tu gdags shing rnam par gzhag pa yin pa'i phyir te/ lha'am mi ma yin pa yang rung ngo / /'di lta bu 'di ni zhes bya ba ni 'gro ba thams cad las rnam par 'das pa skad cig ma nang gi gnyis yongs su spangs pa bar ma'i lam rab tu bsgrub pas so//des mthong bar byed pa ste mig gis ni ji lta ba bzhin du mthong ba yin no zhes bstan pa'i phyir/ ji ltar chu bur mthong ba dang //zhes bya ba la sogs pa smos so/ /rgyal rigs su btsas zhes bya ba ni 'chi bdag gis 'jigs nas bcom ldan 'das la zhus pa btsun pa thabs gang gis bdag 'chi bdag gi rgyal pos mthong bar mi 'gyur zhes zhus pa dang / des na tshigs su bcad pa gnyis gsungs so//gzhan dag ni rgyal byed kyi tshal na dge slong lnga brgya lta ba log pa de'i dbang du mdzad do zhe'o/ /chu bur mthong ba ni ji ltar mtsho chen po la char gyi thigs pa shin tu sbom pa 'bab pa las rlung gis bskyod na chu'i 'brum bu gzhan skye bar 'gyur zhing 'gag par 'gyur ba de mig dang ldan pa'i skyes bus mthong ba lta bu'o//ji ltar smig rgyu mthong ba ltar/ /zhes bya ba ni dper na 'ga' zhig 'brog dgon par skom pas gdungs shing tsha bas nyam thag la rab tu gdungs shing tsha bas chu ltar snang ba'i smig rgyu ri dgas skom pa skye ba dang 'jig pa yang mthong ba de ltar/de bzhin 'jig rten lta byed pa/ /zhes bya ba yang sems can dang snod kyi 'jig rten la bye brag med par bstan pa'o/ /dpe gnyi ga blang ba yin yang de'i phyir sems can gyi dbang du byas nas dper bstan pa yin te/phal cher dbugs 'byung rngub la brten pas 'di la 'chi ba'i chos yod pa'i phyir ro/ /gzhan dag ni snod kyi 'jig rten gyi dbang du byas so zhes zer te/ shin tu nyams dga' bar snang ba 'jig pa'i phyir ro/ /yang na ming gi 'jig rten dang gzugs kyi 'jig rten zhes brjod de/'di la ming gi 'jig rten ni gzugs med pa'i phung po bzhi'i bdag nyid de/ de yang ming gi bdag nyid yin pa'i phyir ro/ /khams lhag ma ni gzugs kyi 'jig rten te/ gzugs kyis mtshon pa'i phyir dang / bdag gi dngos po mnyam par ma bzhag pa'i sa yin pa'i phyir ro//'di na lta byed pa zhes bya ba ni 'jig rten las 'das pa'i de bzhin nyid shes pas rtogs shing mthong ba'o/ /'chi bdag rgyal po zhes bya ba ni 'chi bdag gi rgyal po nyid kyis srid pa gsum na khyab pa'i phyir ro//des mthong bar mi 'gyur ba ni zil gyis gnon par mi 'gyur ba'o/ /khams gsum yongs su rtogs pas 'brel pa med de/ dgra bcom par gyur na ni 'chi ba las 'das par 'gyur ro/ /yang na bskal pa'am bskal pa las lhag par 'khor ba na gnas pa'o//yang na bya ba med pa'i phyir bar ma dor yongs su mya ngan las 'das pa zhes bya ba ni 'di'i don to/ /dngos po thams cad yongs su brtag pa dang / dngos po'i phyogs gcig yongs su brtag pa dang 'brel pa yin no zhes bsgrub pa'i phyir/de bzhin lus la lta byed pa/ /zhes bya ba la sogs pa'o/ /lus ni nang gi gzugs te/ de'i phyir dran pa nye bar gzhag pa bsgom pa la 'jug pa'i sbyor bas dang por nang gi lus dang phyi rol gyi lus la 'di ltar yongs su lta bar byed de de'i 'og tu don gzhan yang bstan pa yin no//lhag ma ni rtogs par sla'o/ /lus dang 'brel pa de'i yongs su brtag pa gzhan yang bstan pa'i phyir/ gang la byis pa mngon phyogs pa/ /zhes bya ba la sogs pa smos so/ /tshe dang ldan pa yul 'khor skyong rab tu 'byung ba'i brtul zhugs grub par gyur pa las pha ma la phan gdags pa'i phyir s+thu la ko sh+tha zhes bya ba der song ngo //de'i sems gzung ba'i phyir de'i mas bsgo ste/ rgyan gyis brgyan pa'i sngon gyi gnyis pa de'i gan du btang ste/ bud med de'i g.yo bstan pa las/de nas slar log pa dang des de la sangs rgyas bcom ldan 'das kyis tshigs su bcad pa brgyad gsungs so/ /blta bar gyis zhes bya ba ni khyod kyis nges par brtag par gyis shig pa'o/ /lus 'dis zhes bya ba ni gzugs kyi bdag nyid do/ /rtag tu zhes bya ba ni rgyun du'o//ji lta bu zhe na/ smras pa/ bkra ba zhes bya ba ste gos dang rgyan la sogs pas brgyan cing mdog khyad du gyur pa'i phyir ro/ rgyal po'i shing rta ltar zhes bya ba ni rgyal po'i shing rta shin tu bkra ba ste/ phyi rol gser la sogs pas yongs su brgyan pa'i phyir ro//nang ni shing gi rang bzhin yin no/ /dpe de dang 'dra bar lus 'di yang phyi rol ni shin tu mdzes pa'i phyir dang / nang ni mi gtsang ba'i rang bzhin yin pa'i phyir ro/ /gang la byis pa mngon chags pa/ /zhes bya ba yongs su rtog par mi byed pa ni/ lus gang la lhag par 'dod chags skyed par byed de/phyi rol tsam la lta ba'i phyir ro/ /de la mkhas pa chags mi byed/ /ces bya ba ni 'di la 'dod chags dang bral ba skyed par byed de/ nang gi de nyid mthong ba'i phyir ro/ /byis pa dang mkhas pa'i rjes su chags pa dang /'dod chags dang bral ba'i rgyu bstan pa ni gang la byis pa la sogs pa ste/ rab tu rmongs pa ni shin tu mi shes pas zil gyis non cing / 'khrul pa'am phyin ci log bzhis skyes pa'i phyir ro/ /de la 'dir gti mug gis ni mngon par chags par 'gyur la shes pas ni chags pa med par 'gyur ro zhes bya ba'i don to//'dod chags ni gti mug gis byas pa'i nyes dmigs te smras pa/ nyams gyur pa zhes bya ba smos te/ khyad par du nyams par ma gyur pa'am yul dag la chags pas de'i ched du nyams par gyur pa ste/ shin tu nyam nga bar ltung bar gyur to zhes bya ba'i don to/ /gang ji lta bu zhe na/ glang rgan rdzab tu chud pa bzhin/ /zhes bya bas bstan te/ ji ltar rgas shing 'khogs pa'i glang 'byung bar mi nus pa'i 'dam gyi nang du zhugs par gyur na de las ni rang gis kyang thar par mi nus la gzhan gyis kyang dbyung du mi rung zhing ma yin pa de bzhin du'o//gang rjes su chags pa de ni shin tu ma rungs pa nyid du bstan la/ rma byung ba dang 'dra ba ste/ /zhes bya ba yin te/ rma ni rma ral ba dang 'dra bar rtag tu 'jig pa'i phyir dang / 'bad pa byas kyang gso dka' ba'i phyir ro//byung ba ni rgyu dang rkyen las skyes pa'i phyir te/ 'dis ni gzhan gyi dbang du bstan te/ rtag tu nye bar gdung ba'i rgyur gyur pa'i rnam pa bstan pa/ nad pa zhes bya ba smos te/ rgyun du bkres pa dang skom pa la sogs pa'i nad kyis mngon par gdungs pa'i phyir te/lus 'di gang du 'gro ba'i sa/ /der ni sdug bsngal 'gro bar 'gyur/ /zhes bya ba'i tshig gis so/ /'jig chos can zhes bya ba ni nyams par gyur na gsor mi rung ba'am/ /slu ba'i bdag nyid yin pa'i phyir ro/ /bstan ma thag pa'i nyes dmigs thams cad 'byung ba ni lus las byung ba yin te/'di ltar/ gang yang brtan par mi gnas pa/ /zhes bya ba 'jig pa'am med pa'i gnas skabs te/ gang mi rtag pa de ni sdug bsngal ba yin no zhes mdo las gsungs so/ / lus kyi phyi rol ni yin gyi/ nang ni ma yin no zhes bya ba'i phyir/ nad pa 'jig pa'i chos can zhes bya ba la sogs pa smos so/ /brgyan pa blta bar gyis zhes bya ba la/ blta bar gyis zhes bya ba ni nye ba na gnas pa'i phyir bod pa'o/ /yang na thams cad bdag gis bya ba la brtag par bya'i/gzhan gyis byas pa ni ma yin te/ 'di'i rnam pa bstan pa'i phyir ro/ /ri mor ma byas pa ri mor ma byas shing bskyed la brgyan par byas te mdzes par byas pa zhes bya ba'i don to/ /lus ni mi gtsang ba'i lus nyid do/ /gang gis brgyan par byas she na/nor bu'i rna cha gdub 'khor gyis/ /zhes bya ba smos te/ nor bu dang rna ba'i rgyan no/ /gos dang phreng ba dang sen rtsi la sogs pa bsdu ba'i phyir yang gi sgra'o/ /ma brdungs pa dang brdungs pa'i rgyan bsdu ba'i phyir gnyis smos so/ /lus de ji lta bu zhe na/smras pa/ nad pa zhes bya ba'o/ /rang gi yan lag brgyan pas mdzes pa yin no zhes bstan pa'i phyir/ lan bus brgyan byas shing zhes bya ba smos te/ mig mangs ris lta bu mig brgyad pa byas pa'i sgra ste/ de'i phyir cha ba'i chas kyis brgyan pa byas pa/skra rnam pa brgyad du bgos shing lan bur byas pa la chu rlabs kyis 'god par byed pa yin no/ /mig sman gyis ni bskus pa'i mig /ces bya ba ni mig mdzes par bya ba'i phyir/ mthing shun gyi mdog 'dra ba'i phye ma'i bye brag gis mig sman gyi mdog bsgyur bar gyur na mig sman gyi mdog tu 'gyur zhing tshon gyis mdzes pa'i phyir ro//de thams cad kyang / byis pa lhag par rmongs byed kyang / /zhes bya ba rtog par mi nus te/ phyin ci log gis bskyed pa'i phyir ro/ /pha rol tshol bar mi byed do/ /zhes bya ba ni/gang dag bya ba byas pa'i phyir 'dir phung po lhag ma med pa'i mya ngan las 'das pa tshol bar byed pa ni/ de lta bu khams gsum las 'dod chags dang bral ba 'dus byas thams cad kyi rgya mtsho'i pha rol du phyin par byed pa yin gyi/ lhag par rmongs par gyur ba 'di lta bu dag ni ma yin no zhes pa'i don to//de gnyis kyis mdzes par byed pa bstan pa'i phyir/ mig sman gyis ni zhes bya ba la sogs pa smos te/ gang la mig sman yod pa ste/ lus rnag can dri nga ba'i rdzas bstsags pa'i phung po mig gnyis la mig sman gyis bskus pa zhes bya ba'i don to//gsar bris shing zhes bya ba bkra bar byas pas bris pa ste/ ri mo'i las byas pa zhes bya ba'i tha tshig go/ /gsar zhes bya ba ni dus de nyid du byas pa ste/ dper na ri mo mkhan mkhas pas rtsig pa yongs su sbyangs pa la tshon sna tshogs kyis ri mo gsar du byas pa ni shin tu mdzes pa yin la/nang gi sa dang rdo la sogs pa'i rang bzhin yin pa de bzhin du/ lus 'di mig sman gyis mdzes par byas pa dang / mgo la gser gyi phreng ba dang / mgul par mu tig gi phreng ba dang / lag ngar du gdu bu dang /rkang par rkang gdub la sogs pas phyi rol la brgyan pa byas kyang nang dri nga ba'i rdzas kyi bdag nyid yin no/ /brgyan pa byas kyang dge ba ma yin no/ /zhes bstan pa'i phyir smras pa/ lus ni dri zhim zhes bya ba la sogs pa ste/ dus ji lta ba bzhin du ga pur dang / tsan dan la sogs pas lus bskus pa ni lus la bsgos pa'o/ /btsag gis byugs pa ni li khri dang sen rtsi la sogs pa las byung ba shin tu yid du 'ong zhing mdog dmar bar byas pa'i rkang pa'o/ /blo phyin ci log pas lus la sogs pa la yongs su brtags pa med pas ni chu bo las brgal bar mi 'gyur ro zhes bstan pa'i phyir/gang zhig 'dod pa zhes bya ba la sogs pa smos so/ /bcom ldan 'das yul ko sa lar rgyu zhing gshegs nas rim gyis 'od ma'i tshal du byon pa dang / 'od ma'i tshal na gnas pa'i bram ze dang khyim bdag gis 'di skad ces gsol to//btsun pa bdag cag gis ni 'di ltar 'tshal zhing rtogs te/ 'dod pa la longs spyad par bgyis kyang / nongs pa ma mchis te/ de ci'i slad du zhe na/ 'dis na 'dod pa dag la 'jol nyog tu spyod cing lus dang sems tshim par byed kyang /lus zhig nas lha rnams kyi nang du skye ba gda'o zhes gsol pa dang / bcom ldan 'das kyis bka' stsal pa/ 'di ltar de ni 'dod pa spangs pas thob pa yin gyi/ 'dod pa longs spyod pas ni ma yin no zhes bya ba nas/ ji srid du tshigs su bcad pa gnyis gsungs so//'dod par zhes bya ba ni 'dod pa'i yon tan lnga'i phyir ram de'i lus la'o/ /gang kun du sbyor bas byas pa'i kun du 'brel pa ni rab tu chags pa dang / g.yeng ba dang / 'du 'dzi 'o/ /de la chags pa ni rab tu zhen pa ste/ yongs su 'dzin pa dang / bsags pa dang srung ba la sogs pa'i 'jug pa zhes bya ba'i don to//yang na kun du sbyor ba'i bdag nyid de chags pa dang / sred pa'o/ /snying rje yang chags pa dang tshul 'dra ba yin no zhe na/ kun du sbyor ba zhes smos pa'i phyir chags pa ni/ sems can gyi 'ching ba yin par bstan te/ mi shes pa sngon du 'gro ba'i g.yeng ba dang /chags pa zhes bya ba'i don to/ /kun du sbyor ba zhes bya ba ni rgyal po gshegs zhes bya ba bzhin du kun du sbyor ba 'dir brjod pa yang kun du sbyor ba'i rang bzhin chags pa dang sred pa'i bdag nyid du shes par bya'o/ /gang kun du sbyor ba dag la skyon dang nyes par ma rtogs pa de nyid mi shes pas gnas shing chags pa'i phyir ro//gang yang de ltar 'dod pa'i kun du sbyor bas 'dod pa la sred cing chags par gyur na ni nam du yang 'dod pa'i chu bo dang 'dod pa'i zag pa las mi rgal cing spong ba ma yin na/ gzhan lta ci smos/ mngon par mi 'dod pa'i gnas su khyer bar byed pa'i phyir chu bo'o/ /chu bo ji lta bu zhe na/ yangs pa zhes bya ba ste/ 'gro ba'i bdag nyid thams cad la brten cing khyab pa'i phyir ro/ /mtha' yas pa zhes bya ba ni thog ma med pa'i srid pa nas bsten pa'i phyir dang /shes pa zag pa med pa'i snying pos spangs pa'i phyir ro/ /de lta na yang chu bo rnam pa bzhi po thams cad kyang brgal bar 'gyur ro zhes bstan pa'i phyir/ chags bral mchog dang tha ma zhes bya ba la sogs pa smos te/ chags bral mchog ces bya ba ni gong ma'i kun du sbyor ba spangs pa'i phyir ro//chags bral tha ma zhes bya ba ni 'og ma'i cha'i kun du sbyor ba spangs pa'i phyir ro/ /thams cad las 'dod chags dang bral ba ni kun du sbyor ba mtha' dag spangs pa'i phyir ro/ /mthong bas spang bar bya ba dang / bsgoms pas spang bar bya ba sngon du 'gro ba yin no zhes bstan pa'i phyir/'di la zhes bya ba smos te/ 'di la bdag dang bdag gis zhes bya ba ni 'di lta bur bdag gir byed pa/ go rims bzhin du gzugs la sogs pa dag la bdag tu mngon par zhen pa'o/ /yang na gzugs zhes bya ba la sogs pa'i bdag nyid kyi mngon par 'dod pa'i 'jig tshogs la lta ba'i ri'i rtse mo nyi shu bstan te/de yang med pa ma yin pa'i phyir ro/ /mi lta zhing zhes bya ba ni rjes su mi 'brang zhing mngon bar mi zhen pa ste/ blta ba dang kun du sbyor ba thams cad spangs pa'i phyir ro/ /de ltar rnam grol zhes bya ba ni rnam pa 'dis ris gnyis kyi phra rgyas spangs pa'i phyir gang rnam par grol ba'o//de nyid gang chu bo las de ltar rnam par grol ba ste/ rgal ba ni rgal bar 'gyur ba'o/ /sngon chad ma brgal ba zhes bya ba ni sngon nam yang ma spangs pa ste srid pa gsum gyi chu bo ma spangs pa'i phyir ro/ /ci'i phyir chu bo rgal bar byed ce na/yang srid pa med pa'i phyir zhes bstan pa ste yang mi skye bar bya ba'i phyir dang / sdug bsngal las ldog pa'i phyir zhes bya ba'i don to/ /'phags pa'i lam bsgoms pa nyid kyis rgal bar 'gyur gyi/ khyim gyi gnas yongs su spangs pa tsam gyis ni ma yin no zhes bstan pa'i phyir/gang zhig tshal spangs zhes bya ba la sogs pa'o/ /khyim gyi gnas kyis yongs su skyo ba'i tshong dpon rgan po zhig /dgon par song ste rab tu byung nas phyir ldog cing nyams par gyur la/ de nas yang rab tu byung ba de'i dbang du mdzad nas dge slong rnams la bka' stsal pa'o//gzhan dag ni 'od ma'i tshal na rab tu byung ba rnam par 'phrul pa ming med pa zhig gnas te/ gnas la lhag par chags pa de'i dbang du mdzad do zhes zer ro/ /de la re zhig 'di ji bzhin pa'i don brjod par bya ste/tshal ni dgon pa'o/ /de la gang gnas pa ni nags tshal na gnas pa ste/ dgon pa na gnas shing khyim la sred pa med pa gang yin pa de'o/ /nags tshal spangs pa ni rab tu byung ba la mngon par mi dga' bar gyur nas nyams par gyur pa ste/yang na nags tshal spangs nas khyim na gnas par gyur pa'o/ /yang skyo bar gyur pas khyim la mngon par mi dga' ba skye bar gyur nas/ nags su rgyug ces bya ba ni dgon pa nyid du phyogs pa ste/ rab tu byung ba de'i phan yon mthong ba'i phyir ro//'di lta bu'i 'dod chags la sogs pa'i nyon mongs pa'i dbang du byas pa'i glen pa la khyed cag ltos shig pa'i don to/ /tshur zhes bya ba ni tshur shog la ltos shig pa'o/ /gang gi rnam par blta bar bya zhe na/ grol bar 'ching bar rgyug pa'i zhes bya ba ste/rab tu byung ba yongs su gzung ba med pa khyim nas nges par byung ste/ yang de nyid du mi gtsang ba la sogs pa dang 'dra ba'i btson ra'i 'ching ba la mngon par phyogs pa ste/ de bas na 'dis ni mngon par smad pa bstan pa yin no/ /don nyid bshad pa tshal ni 'dir nags stug po ste tsher ma la sogs pas gang ba'i phyir ro//de ni khyim ste bya ba ngan pa la sogs pas kun du gnod pa dang bcas pa'i phyir ro/ /de ni khyim ste bya ba ngan pa la sogs pa de ni khyim gyi gnas la mngon par chags pa ste/ 'dod pa la sred pa zhes bya ba'i don to//gang la tshal med pa de ni tshal spangs zhes bya ba yin te/ khyim dang de'i yo byad la chags pa med pa zhes bya ba'i don to/ /khyim rjes su myong ba las rgan pa'i gnas skabs kyis skyo ba skyes pa dang / 'chi bas 'jigs pa'i phyir/ de la ma chags par byed cing rab tu byung ba ste/ de'i skyon dang bral bar 'dod pas so/ /des tshal med pa zhes bya ba smos te/ tshal dang bral ba ni tshal spangs pa ste/ khyim gyi gnas nas byung zhing rab tu byung ba zhes bya ba'i don to/ /lus kyi dben pa 'dis bstan nas sems kyi dben pa bstan pa'i phyir/nags tshal spangs nas zhes bya ba smos te/ 'dir nags tshal ni 'dod pa la sogs pa la rnam par rtog pa ste/ de ni khyim gyi nags stug por 'jug pa yin no/ /de spangs pa ni 'du 'dzi dang rnam par rtog pa spangs pa'i phyir ro//nags su rgyug ces bya ba ni 'du 'dzi dang rnam par rtog pa mngon du byed pa ste/ khyim gyi btson ra la yang phyogs pa'o/ /yang na gtsug lag khang la lhag par zhen pa'o/ /'di la ltos shig ces bya ba ni nyon mongs pas 'khrul par byas shing / mi rtag pa'i bden pas kun du 'phyan pa'i sems can la ltos shig pa'o/ /tshur zhes bya ba ni khyed cag tshur shog shig dang / bdag med pa la dmigs shing sangs rgyas kyi bstan pa bsgrub par gyis shig pa ste/ chos 'di rtogs pa'i phyir de kho na nyid brtag cing bde 'gro blta ba ni/de bzhin nyid kyis yin gyi/ gzhan gyis ni ma yin no zhes bya ba ni 'di'i don to/ /gzhan ni snga ma bzhin no/ /gang gis sred pa'i 'ching ba las grol bar 'gyur zhe na/ 'phags pa'i lam nyid kyis yin te/ de nyid bstan pa'i phyir/ shing rta mthun pa'i zhes bya ba la sogs pa smos so/ /de nas rgyal po'i bu mo k+She ma zhes bya ba shing rta la zhon te bcom ldan 'das lta ba'i phyir chas pa las thag ring po nas 'ong ba gzigs te/ tshigs su bcad pa 'di gsungs so/ /yid 'ong ba zhes bya ba ni yid du 'thad pa ste/kun du shes par bya ba zhes bstan pa'i phyir ro/ /shing rta gang gis yan lag yid du 'ong la blta na sdug pa ste/ rin po che sna tshogs kyis 'bar bar byas pa'i phyir ro/ /dkar ba ni kha dog dkar ba nyid do/ /g.yogs pa ni shing rta de la gdugs ltar bkab cing bres pa'o//yang na gos dkar pos g.yogs pa'o/ /gang yang bud med shing rta la zhon par gyur pa ni phal cher gos dkar pos g.yogs par byed do/ /mthun pa'i rtsibs zhes bya ba ni gcig tu bsngags shing gtso bor gyur pa'i shing rta'i 'khor lo'i yan lag gang yin pa ste/shing rta khyad par can 'khor lo zung ngo / /ldan pa ni bsten par byas pa'o/ /sdig med 'gro ba la ltos la/ /zhes bya ba ni bcom ldan 'das kyi gsung rab kyis 'gro zhing phan pa nyid rtogs par gyis shig pa ste/'di na dang por nyan pa zhes bya ba la sogs pas 'gro ba la ltos shig pa yin te/ sdig med ni rnam pa gsum po 'dod chags med pa'i sdig pa med pa dang zhes bya ba la sogs pa mdo las gsungs pa'o/ /nges par nyams pa'i nyon mongs pa dag ni shing rta la zhon zhing 'gro ba nges par bsags shing bsgos pa'i phyir te/lha sbyin dmyal bar skyes pa bstan pa yin no/ /rgyun rnams gcad par gyis zhes bya ba ni las kyi rgyun spangs pa ste/ nyon mongs pa ni ri bo mthon po las 'bab pa'i chu rgyun 'dra ba de'o//las dang nyon mongs pa'i rgyu med pa dang las de'i 'bras bu yang med do/ /chings ma zhes bya ba ni yang nying mtshams sbyor ba'i 'ching ba med na de'i phyir las dang nyon mongs pa yang med pa'i phyir ro/ /sgra ji bzhin du bshad nas/ gzhan la bstan nas bshad pa/yan lag yid 'ong zhes bya ba ni tshul khrims kyi tshig bla dgas te/ de ni lam gyi gzhi dang them skas su gyur pa nyid de/ yang dag pa'i ngag dang / las kyi mtha' dang 'tsho ba zhes bya ba'i yan lag ni tshul khrims kyi rang bzhin no/ /gos dkar g.yogs zhes bya ba ni yang dag par grol ba dang yang dag pa'i shes pa zhes bya ba 'di'i tshig bla dgas yin te/khams gsum las 'dod chags dang bral ba dang / zad la mi skye ba'i shes pa thob pas gcig tu dkar ba yin pa'i phyir ro/ /mthun pa'i rtsibs zhes bya ba ni yang dag pa'i dran pa dang /yang dag pa'i rtog pa dang / ting nge 'dzin gyi tshig bla dgas so/ /ldan pa ni yang dag pa'i rtsol ba ste/ brtson 'grus rtsom pa'i mthus skyo ba dang bral bar 'jug pa'o/ /shing rta ni yang dag pa'i lta ba ste/de yang lam dang lam gyi yan lag go/ /yid la mngon par 'dod pa'i 'bras bu yin pa'i phyir shing rta'i sgrar brjod do/ /de lta na lam yan lag brgyad 'bras bu dang bcas pa bstan pa yin te/ yang dag pa'i rnam par grol ba dang / yang dag pa'i shes pa ni 'phags pa'i lam bsgoms pa'i 'bras bu yin no zhes pas so//sems can gang la 'di lta bu'i shing rta yod pa de ni sdig pa med par 'gro ba la sogs par shes par bya'o/ /'phags pa'i lam gyi rtsa ba them skas su gyur pa'i tshul khrims thob pa ni skyabs nyid kyis 'gyur gyi/brten pa tsam gyis ni skyabs ma yin no zhes bya ba'i tshig tu bstan pa'i phyir/ 'jigs pa zhes bya ba la sogs pa tshigs su bcad pa lnga smos so/ /cho 'phrul chen po bstan pa las nges par rgyal te/ mu stegs pa kha cig ni ri la brten to//gzhan dag ni nags tshal dang kun dga' ra ba dang gtsug lag khang dang shing dag la brten pa gzigs nas 'di gsungs so/ /gzhan dag ni sdig pa bkru bar bya'o zhes bsams te bye ma'i phung po la 'dug pa'i me sbyin zhes bya ba ko sa la'i rgyal po'i mdun na 'don sdig pa byed pa zhig gi dbang du mdzad nas 'di gsungs so zhes zer ro//phal cher zhes bya ba ni du ma'o/ /skyabs su 'gro zhes bya ba ni sdig pa 'jig pa'i phyir rten cing len pa'o/ /ri ni kha ba can la sogs pa'i ri'o/ /ri dang 'dra ba'i bye ma'i phung po dang phug la sogs pa bsdu ba'i phyir dang gi sgra'o//nags tshal zhes bya ba ni tshal la sogs pa nags stug po'o/ /dang gi sgra ni nags tshal du gyur pa'i sa phyogs dang rdzing bu la sogs pa'o/ /skyed mos tshal zhes bya ba ni grong dang nye ba'i tshal la sogs pa'am/lha khang ngam/ mchod rten dang ljon shing zhes bya ba la/ dang gi sgra ni bsdu ba'i don to/ /de la mchod rten ni lha khang la sogs pa ste/ so phag la sogs pas brtsigs pa'i phyir ro/ /ljon shing ni shing gi dbyibs dang / gnas la sogs pa brgyan pa'o//gang zhig skyabs su 'gro ba yin zhe na/ 'jigs pas skrag pa'i mi dag ni/ /zhes bya ba smos te/ brnyas shing ma bkur ba la sogs pas 'jigs pa'i mu stegs pa la sogs pa'o/ /ri la sogs pa skyabs su gyur pa yin no zhes rtog pa bsal pa'i phyir/skyabs de gtso bo ma yin zhing / /zhes bya ba bstan te/ brag la sogs pa la sdug bsngal las skyob pa'i rten du 'dod pa de ni gtso bo ma yin te/ gang gi phyir brten pa tsam gyis ni yongs su skyob par mi nus pa'i phyir ro/ /skyabs de mchog tu gyur pa min//zhes bya ba ni skyabs su 'gro ba de yang khyad par du gyur pa dang mchog ni ma yin te/ 'di la brten pas ni 'khor ba yongs su spang bar mi nus pa'i phyir ro/ /ci'i phyir zhe na/ bzung ba tsam gyis ni skyabs su 'gro ba mchog tu gyur pa ma yin no zhes bstan to/ /de la skyabs su song ba yis//sdug bsngal kun las grol mi 'gyur/ /zhes bya ba ni ngan song gi sdug bsngal lam 'khor ba'i sdug bsngal las zhes bya ba'i don to/ /don dam pa'i skyabs bstan pa'i phyir smras pa/ gang zhig sangs rgyas zhes bya ba la sogs pa'o/ / yang sems can gang zhig dkon mchog gsum la brten pa de nyid ni skyabs su 'gro bar 'gyur ba yin no/ /sangs rgyas ni thams cad mkhyen pa de'i dbye ba yin pa'i phyir ma 'dres pa'i chos bco brgyad la sogs pa'i yon tan gyi phung po'o/ /chos ni don dam pa'i chos yin pa'i phyir dang mya ngan las 'das pa'i 'bras bu mthar thug pa'i bdag nyid kyis dgos pa thams cad kyi mchog yin pa'i phyir ro//dge 'dun ni nyan thos kyi rgyud la gnas pa'i 'phags pa'i lam dang / sangs rgyas dang rang sangs rgyas dang nyan thos kyi lam gyi tshogs so//dgongs pa dang rjes su mthun pa'i tshul gyis gang yang rung ba cig la skyabs su 'gro ba ni ma yin no zhes sgrub pa'i phyir dang gi sgra gsum smos te/ de dag kyang phan tshul gyi dbye ba yin pa'i phyir ro/ /skyabs su 'gro ba tsam gyis ni ngan song las ldog pa ma yin te/yang shes nas dad pa thob ba yin pa'i phyir ro/ /de yang bden pa mthong bas 'gyur ba yin te/ 'phags pa'i bden pa bzhi po dag /ces bya ba de ni ma mthong ba rtogs pa'o/ /shes rab kyis zhes bya ba ni gang gi tshe zag pa med pa'i shes rab thob pa de'i tshe skyabs su 'gro ba rdzogs pa yin no zhes bya ba'i tshig gi lhag ma'o//bden pa mthong ba rnams yang dag bar bstan pa'i phyir/ sdug bsngal zhes bya ba la sogs pa smos te/ gang tshe shes rab kyis mthong ba/ /zhes bya ba 'dir rjes su 'brang ngo / / lam yan lag brgyad pa zhes bya ba ni gang la yan lag brgyad yod pa cha shas 'dus pa ste/ yan lag dang cha shas ni yan lag drug pa'i phyi ma bzhin no/ /ji lta bu'i lam shes rab kyis mthong ba yin zhe na/ bde ba zhes bya ba yin te/ 'jig pa ni 'khor ba'i tshig bla dgas yin pa'i phyir te/'phags pa'i lam ni 'khor ba'i 'bras bu ma yin no zhes bya ba'i tshig gis so/ /'on kyang bral ba'i 'bras bu ni ma yin no/ /de nyid bstan pa'i phyir smras pa/ mya ngan 'das 'gro zhes bya ba ste/ mya ngan las 'das par bgrod par byed pa dang mya ngan las 'das pa 'thob par byed pa zhes bya ba'i don to//de ni zhes bya ba ni 'di nyid do/ /sngar bstan pa'i khas blangs pa'i bdag nyid kun rdzob kyi skyabs te/ lam mngon sum du byed ba'i phyir dang / rgyu yin pa'i phyir dang / shes nas dad pa thob pa las skyes pa'i don dam pa ni gtan du ba yin pa'i phyir ro//de nyid ni gtso bo dang ches mchog gi skyabs yin te 'di la brten pas ni sdug bsngal thams cad sel bar byed pa'i phyir ro/ /gang la lam thob pa de nyid kyis yang dag par thob pa yin gyi/gzhan gyis ni ma yin no zhes bstan pa'i phyir/ mthong bas mthong zhing zhes bya ba la sogs pa tshigs su bcad pa drug go/ /dge slong dag rnam par blta zhing bsgom par bya ste/ rnam par blta ba kun du bsten pas ni de mthong ngo zhes bya ba'i tshig gi lhag ma dag go//de la brten nas mthong ba rnam par gnas pa yin te/ de yang 'dra ba dang mi 'dra ba'i dbye bas rnam pa gnyis so/ /'dra ba bstan pa'i phyir/ mthong ba zhes bya ba smos te/ bya ba byas pa'i phyir gzhan gyi don la lta ba ste/ de nyid slob pa'i lam la gnas pa'i gzhan yang mthong ngo zhes rjes su 'brang ste/ dper na mig dang ldan pas bdag dang gzhan mthong bar gyur pa de bzhin no/ /mi 'dra ba bstan pa'i phyir ma mthong zhes bya ba smos te/ bya ba ma byas pa'i phyir ram/ bden pa ma mthong ba'i phyir te/so so'i skye bos ni cung zad kyang mi mthong zhing 'dis 'jig rten thams cad la mi lta ba yin no/ /nye bar zhi zhing mi slob pa'i gnas skabs thob na ni sems gzhan gdul ba la yongs su rtog pa yin no/ /rnam par mthong ba'i khyad par bstan nas mi shes pa'i skyon bstan pa'i phyir/ma mthong zhes bya ba ste/ gang sgrib pa yod cing shes pa med pa'i phyir bdag nyid kyang mthong ba med par byas nas gzhan yang ma mthong bar byed pa yin no/ /'dra ba'i mthong ba med pa'i phyir mi 'dra ba'i khyad par mthong ba yang grub pa yin no zhes bstan pa'i phyir/mthong bya mthong mi 'gyur zhes bya ba ste/ dper na mig gis bdag nyid la rnam par blta zhing mthong ba ma yin la gzhan la mthong ba de bzhin no/ /'o na bstan bcos las bshad pa'i mthong ba ni gang bdag gi sdug bsngal la sogs pa ma mthong ba de nyid ni rang nyid mthong ba yin la/gzhan yang de bzhin du'o/ /mthong bya mthong bar mi 'gyur zhing / /zhes bya ba gang yang bdag nyid so so'i skye bo yin pa'i phyir sdug bsngal la sogs pa mi mthong la/ des na gzhan gyi de nyid kyang mi mthong ste/ mthong bya mthong bar mi 'gyur ba'o//de yang ji ltar zhe na bshad pa/ 'dis ni gtsug lag gi rnam par 'grel pa shes par bya ste/ gzhan du na rgyun du zhugs pas bden pa mthong bar mi 'gyur te/ des na gang ji zhig gzhan du bden pa mthong ba dang bden pa ma mthong ba mthong bar 'gyur/ des na yang tshad ma dang 'gal bar 'gyur te/ bcom ldan 'das ni tshad ma dang 'gal ba mi gsung ngo / /de bas na bden pa bzhi mthong ba ni mi slob pa'i mthong bas yin no zhes tshig gi lhag ma'o/ /mthong ba ni rnam pa gnyis te sgrib pa dang bcas pa dang sgrib pa med pa'o/ / de gnyis kyi rang gi ngo bo'i dbye ba rab tu brtag pa'i phyir 'dra mthong zhes bya bas bstan te/ med bzhin du 'brel pas mthong ba ni rjes su mthong ba ste/ med pa la sgro btags pa dang / yod pa la 'jig par byed pa'i lta ba zhes bya ba'i don to/ /rjes su zhes bya ba ni 'dra ba'i sgra'o//mthong ba ni 'dra bar mthong ba ltar snang ba ste gzugs brnyan bzhin no/ /lhag mthong ni sgrib pa med cing nyon mongs pa med pa'i mthong ba ste/ nyon mongs pas bcom pa'i phyir ro/ /tha dad dngos po zhes bya ba ni so so bar gyur pa ste/ bral ba thob pa 'am tha dad pa'i ngo bo ste/gang mthong ba de dang 'dra bar mthong ba tha dad par gyur pa zhes bya ba'i don to/ /'di na zhes bya ba ni gsung rab 'di nyid la yod kyi/ gzhan la ni ma yin te/ rnam par rmongs pa'i bdag nyid yin pa'i phyir ro/ /'dir dper bstan pa nyin mtshan zhes bya ba ste/dper na nyin par dang mtshan mo lhan cig dus nam yang phyogs gcig tu mi gnas shing mi 'dug ste/ mun pa dang snang ba ni lhan cig gnas par 'gal ba'i phyir ro/ /de bzhin du 'dra ba mthong ba'i mthong ba ni nyon mongs pa'i mthong ba ste mun pa bzhin du'o//sems can dag yang dag pa'i lta ba la 'bad par bya'o zhes bstan pa'i phyir 'di bshad pa yin no/ /gang gis 'dra ba mthong zhing thos par 'gyur zhe na/ 'dra ba mthong bas mthong mi 'gyur/ /zhes bya ba smos te/ mthong bar snang ba des nges par mi 'gyur te/gang sdug bsngal la sogs pa zag pa med pa'i mthong ba ma mthong ba'o/ /gal te mthong na 'dra mi mthong / /zhes bya ba ni gal te yang zag pa med pa mthong bas sdug bsngal la sogs pa mthong na ni de'i tshe mthong ba ltar snang ba'i bdag nyid mi mthong ba yin no//ci'i phyir zhe na/ 'dir chos nyid kyi rigs pa bstan pa'i phyir/ mthong 'dis 'dra ba mi mthong ste/ /zhes bya ba ste/ 'dis ni gang de bzhin nyid mthong bas mthong ba ma yin pa mi mthong ste/ nges par don reg cing thob pa yin gyi/ gzhan du ni ma yin no zhes bya ba'i don to/ /gang zag 'dis ni de bzhin nyid/ /'dra mthong mthong ba med ces bya ba smos te/ bdag la sgro btags pas nges par byed pa ma yin no/ /'dra mthong mi yis mthong ba med/ /ces bya ba ni 'jig rten pa'i gnas skabs kyis kyang mi mthong ba ste/mis de bzhin nyid mi mthong ba/ /zhes bya ba'i don to/ /'jig rten pa'i lta ba ni shin tu rags la bden pa ni shin tu phra ba'i phyir ro/ /lha zhig gis tshigs su bcad pa las brtsams te gsol pa/ mi yis ci ma mthong na 'dra ba mthong //zhes bya ba la/ dngos po gang zhig ma mthong na/ /zhes bya ba ni de bzhin nyid ma mthong ba'o/ /mi ni mi nyid de sems can dang bdag la sogs par mthong ngo / /ci zhig mthong na 'dra ba mthong mi 'gyur/ /zhes bya ba yang dngos po gang zhig khong du chud na mthong ba ltar snang ba mi mthong ba'o//ji ltar 'di na 'dra ba mthong ba dag /ces bya ba ni ji ltar bden pa'i dngos po'i gzugs brnyan ltar gyur pa mthong ba ste/ 'jig tshogs la lta ba la sogs pa'i bdag nyid 'dra ba ma mthong bar 'gyur ba'o/ /gang zhig med na 'dra ba mthong dang bral//zhes bya ba ni gang zhig yod par gyur pa las 'dra ba spangs par gyur pa'o/ /'dir bcom ldan 'das kyis lan du bka' stsal pa/ gang tshe 'di yis sdug bsngal mthong / /zhes bya ba ni gang gi tshe rnal 'byor pa sdug bsngal gyi bden pa mngon par ma rtogs pa'o//de yi tshe na mthong bar 'gyur/ /zhes bya ba ni sdug bsngal gyi bden pa so sor mi rig pa'o/ /bdag tu mthong zhes bya ba ni nyon mongs pa'i rjes su 'gyur ba ste/ bdag la sogs par sgro btags pa'i phyir ro/ /ji lta ji ltar sdug bsngal rtogs gyur pa//zhes bya ba ni sdug bsngal gyi bden pa yang dag pa ji lta ba bzhin du mngon par rig pa'o/ /des ni bdag 'di 'dra ba mthong mi 'gyur/ /zhes bya ba ni rnal 'byor pa 'dis med pa la sgro 'dogs pa dang / yod pa 'jig par byed pa ma yin no/ /gang gis so so'i skye bsgribs nas/'du byed sdug bsngal ma mthong ba/ /zhes bya ba ni gang ma rig pa la sogs pa'i sgrib pas so/ /bsgribs pa ni g.yogs pa'o/ /so so'i skye bo ni byis pa'i skye bo'o/ 'du byed dag ni shin tu sdug bsngal la sogs pa'i don yin yang sdug bsngal nyid du mi rtogs pa'o//de'i phyir 'di ni 'dra mthong ste/ /zhes bya ba ni de ltar gyur pa nyid kyis 'jig tshogs la sogs pa'i lta ba la spyod do/ /de med na zhes bya ba ni ma rig pa'i sgrib pa spangs na ni lta ba ngan pa thams cad dang bral bar 'gyur ro/ /mthong ba'i tshoms te nyi shu rtsa bdun pa'i rnam par 'grel pa rdzogs so// //lta ba dag pa sngon du 'gro ba las sdig pa las ldog pa dang / legs par spyod pa la 'jug pa bstan pa'i phyir/ de'i 'og tu sdig pa'i tshoms bshad de/ de med 'dra ba mi mthong ngo / /zhes bstan ma thag pa'i tshoms la bdag tu sgro 'dogs pa dang /sdug bsngal la sogs pa skyon brjod pa'i tshig can gyi lta ba spangs nas ji lta ji ltar yang dag par lta bas dngos po yang dag par sgrub pa'i phyir sdig pa thams cad ces bya ba la sogs pa smos so/ /lo bcu gnyis kyi bar du bcom ldan 'das shAkya thub pa'i bstan pa la skyon med de/thog mar nyan thos la so sor thar pa'i tshigs su bcad pa gsum gsungs so/ /de la gnyis ni rjes su mthun pa'i skabs yin pas legs par spyad pa'i tshoms su bshad zin to/ /yang na bcom ldan 'das kyis bslab pa'i gzhi nyis brgya lnga bcu bcas pa 'di ni shin tu yang mang ba'i phyir de su zhig gis srung bar nus zhes sems rnam par g.yeng ba spangs shing bzung ba dang 'jug par 'gyur ba'i dge slong dag gi dbang du mdzad pa'o zhes zer ro//tshul khrims ni rnam pa gnyis te 'jug pa dang ldog pa'i dbye bas so//de la ldog pa'i tshul khrims kyi dbang du byas nas/ sdig pa thams cad mi bya ste/ /zhes bya ba yin te/ yul thams cad dang dus thams cad du ngan par spyod pa thams cad kyi bya ba dgag pa'i phyir ro/ /de'i phyir gcer bu pas ni dpag tshad brgya'i pha rol nas sdig pa spyad par mi bya'o zhes zer ro//phyugs gsod pa dang rtas bsang gi mchod pa la sogs pa ni nyes pa med do zhes bram ze dag smra'o/ /de bzhin du shAkya'i yongs su spangs pa ni sdig pa lnga yongs su mi bya ba ste/ cig shos la 'bad par bya'o//de yang ji ltar dge bsnyen gyis 'dod pas log par g.yem pa mi bya ba bzhin no/ /des na bcom ldan 'das kyis nyes par spyod pa thams cad mi bya bar gsungs te/ 'di'i 'bras bu mngon par mi 'dod pa yin pa'i phyir ro/ /sdig pa thams cad mi bya ste//zhes bya ba ni bdag po dang 'brel pa'i drug pa ste spang pa'i phyir ro/ /'jug pa'i tshul khrims kyi dbang du byas te/ dge ba phun sum tshogs par bya/ /zhes pa snga ma'i thams cad ces bya ba'i dbang du byas pa ste 'dir ma smos kyang shes par bya'o//yang na sngar bshad pa'i thams cad kyi sgras ni sdig pa mtha' dag yongs su gzung la lhag mas ni de'i gnyen por gyur pa'i dge ba mtha' dag ston pa yin te/ yang thams cad kyi sgra ni mi gzung ngo / /de la lus la sogs pa thams cad kyi dbye bas mtshon par byed pa ni phun sum tshogs pa dang ldan pa bskyed par bya'o zhes bya ba'i tshig gi lhag ma'o//yang na phun sum tshogs pa ni nye bar sgrub par byed pa nyid do/ /de yang nges par bya ba yin te/ 'bras bu yid du 'ong bar bya ba yin pa'i phyir ro/ /tshul khrims kyi 'bras bu bstan pa'i phyir/rang gi sems ni yongs su gdul/ /zhes bya ba ste/ rang gi sems gdul ba med par ni tshul khrims kyi 'bras bu med par 'gyur ro/ /tshul khrims ni sems zhi ba ma gtogs par gzhan ni ma yin no zhes bstan pa'i phyir ro/ /yang na 'dis ni tshul khrims dag pa'i rgyu bstan te/sems dul ba sngon du 'gro bas ni tshul khrims rnam par dag par 'gyur ro/ /'dis ni sangs rgyas bstan pa yin/ /zhes bya ba ni sngar bstan pa'i gsum po ste/ sangs rgyas thams cad kyang rim pa 'dis ston pa yin te/ gang gi phyir ngan 'gro yongs su spang bar bya ba ste/de'i thabs sdig pa thams cad mi bya'o/ /bde 'gro dang mya ngan las 'das pa blang bar bya ba yin te/ de'i thabs dge ba bya ba dang / sems gdul ba ste go rims bzhin du spang ba dang / blang ba de'i thabs bstan pa'i phyir ro/ /yang na 'dul ba dang mdo sde dang mngon pa'i chos mdor bsdus pa bstan pa'i phyir gsungs pa yin no//dge ba phun sum tshogs par bya ba'i thabs kyi rnam pa bstan pa'i phyir sbyin pas zhes bya ba la sogs pa yin no/ /tsun da zhes bya ba'i mgar ba'i bu lcags mgar zhig gi gdu bu mchan khung bcug pa'i dge slong sdig pa can mthong nas de la bstan pa/dge sbyong ni rnam pa bzhi ste/ lnga pa ni med do zhes bya ba nas ji srid du sbyin pa zhes bya ba la sogs pa gsungs so/ /sbyin pas zhes bya ba zhing bzang po la zas la sogs pa'i sbyin pa btang bas sbyin pa'i gang zag gi bsod nams ni rab tu 'phel zhes bya ba yin te/legs par spyod pa la sogs par 'gyur zhing rgyun 'phel te/ ji srid 'tsho'i bar du sdom pa dang sdom pa ma yin pa 'phel bar 'gyur ro zhes pa'i don to/ /rtag tu mngon par 'phel ba ni bsod nams yin no zhes mdo las gsungs so//'di ltar khyed cag gis phul ba'i bsod snyoms yongs su longs spyod pa'i de bzhin gshegs pa mya ngan las 'das pa yin yang khyed kyi bsod nams ni 'phel ba nyid de sdig pa ni ma yin no zhes bstan to//sdig pa can gyi dge slong gi dbang du byas nas/ legs bsdams dgra sogs mi 'gyur ro/ /zhes bya ba smos te/ tshul khrims kyis ni gang gi dgra yang sogs par mi 'gyur te/ gzhan la gnod pa dang gdung ba mi byed cing dge sbyong du byed pa dang ldan pa'i phyir ro//yang na legs bsdams ni bzod pa ste/ bzod pa dka' thub dam pa zhes bstan pa'i phyir ro/ /des na dgra de khon du 'dzin par mi 'gyur ro/ /bdag nyid kyi dbang du byas nas dge ba zhes bya ba smos te/ bcom ldan 'das bsod nams khyad par can dang ldan pas dge ba ste/de yang sdig pa'i yo byad 'khor ba spong ba'o/ /nyon mongs pa zad kyang mya ngan las 'das par 'gyur te/ gung thun la mya ngan las 'das par ston to/ /yang na snga ma gnyis kyis ni sbyin ba dang tshul khrims las byung ba'i bsod nams bya ba'i dngos po bstan to//'dis ni bsgoms pa las byung ba yin te/ tshad med pa'i bsod nams kyi rgyu yin pa dang / tshad med pa'i bsod nams 'thob pa yin te/ de ltar gyur pa'i phyir sdig pa can gyi 'dod pa'i khams yongs su gtong ba yin no//nyon mongs pa zad pas ni khams gsum las 'dod chags dang bral ba'i mya ngan las 'das pa 'thob pa yin no/ /yang na mthong ba'i lam mngon du byas pa'i dge ba'o/ /sdig pa ni ngan song gi bdag nyid yin pa'i phyir ro/ /srid pa'i 'bras bu'i legs par spyod pa bstan nas mya ngan las 'das pa'i 'bras bu bstan pa'i phyir/nyon mongs zad pas mya ngan 'da'/ /zhes bya ste thar pa yang nyon mongs pa spangs pas 'thob pa yin no/ /yang na 'dis ni bsgom pa'i lam bstan to/ /gang zag rnam pa bzhi phan yon dang 'bras bu la bzhag pa'i phyir bstan pa ni khyim pa rnams kyi ni sbyin pa'o//rab tu byung ba rnams kyi ni tshul khrims so/ /so so'i skye bo ni nges par 'byed pa'i cha bzod pa 'thob pa'o/ /slob pa ni nyon mongs pa spong ba'o/ /grogs dang lhan cig ma yin par ni sbyin pa la sogs pa 'di dag bsgrub par mi nus te/des na de nyid la gzud pa'i phyir mkhas dang 'dre dang zhes bya ba la sogs pa smos so/ /mnyan yod na khyim bdag cig las bu skyes te de skyes ma thag tu ngu bar gyur la/ dge slong mthong na ni ngu bar mi byed do/ /de bcom ldan 'das kyis gsan te bka' stsal pa/de ni srid pa tha ma pa yin te/ skye bo ngan pa dang lhan cig mi dga'o zhes bya ba nas tshigs su bcad pa gsum gsungs so/ /lhan cig spyod dang zhes bya ba ni lhan cig gnas pa'o/ /dge ba'i grogs po ni tshangs par spyod pa ril po yin no zhes mdo las gsungs pa'i phyir dang /dam pa dang gnas par gyur pa ni dam pa dang ldan par 'gyur ro zhes gsungs pa'i phyir ro/ /yon tan rdzogs par yod gyur kyang / /sdig pa can dang gnas mi bya/ /gcig pur 'dug pa ches rung gi /sdig pa can dang 'grogs mi bya//zhes pa'i tshig gis so/ /yon tan 'dren ma dang ldan pa'i gang zag dang sgrub pa ni phyis de dang mthun pa'i dpes bstan to/ /gcig pu gnas kyang rung zhes bya ba ni dam pa med na kha cig tu gcig pu gnas par bya ste/ lci thun gyi gtam rgyud kyang 'dir brjod par bya'o//gcig tu chos rnam par dag pa'i grogs ma rnyed na yon tan dang 'dres pa dang lhan cig gnas pa la mkhas pas khyad par nyid bskyed par bya'o zhes bstan pa'i phyir smras pa/ 'dre dang byis pa'i skye bo dang / /zhes bya ba ste/ gang gi phyir byis pa ni nyes par spyod pa la gcig tu sems pa'o//'dres pa'i bya ba yod pa'i byis pa ni blo bar ma yin pa'i phyir te/ ji skad du bshad pa/ sdig pa spyod na brtse med skye bo tha ma yin/ /phongs par gyur na'ang brtse bcas blo gros 'bring / /srog bral dam pa'i skye bo spyod mi 'dor//rgya mtsho'i dus rlabs yol bar mi 'gyur bzhin/ /zhes so/ /'dres pa'i gang zag dang 'brel pas ni yon tan dang skyon gnyis dang ldan par 'gyur ro/ /gang zag ji lta bu dang lhan cig bsten na khyad par thob par 'gyur zhe na/ mkhas dang zhes bya ba ste/dam pa'i chos bstan pa dang mnyan pa'i don gyi de bzhin nyid rig pa'o/ mkhas pa zhes bya ba ni rjes su mthun par yang dag par 'bad pas mtshon pa yin te/ 'di ltar mkhas pa ni legs par spyod pas 'byed pa yin no/ /yang na sbyor ba las byung ba dang rigs pas 'thob pa'i shes pa dang ldan pa'i phyir ci rigs pa bzhin no//yang na yon tan la sogs pa nyes pa spong ba'i thabs shes pa'i phyir ro/ /ji lta bur 'dres pa'i tshul dang lhan cig sten pa na sdig pa spong la yon tan len pa yin zhe na/dang bas zhes bya ba ste/ ji ltar de 'o ma 'thung bar byed pa bzhin no/ /de 'o ma 'thung ba ni 'o ma dang 'dres pa'i chu las 'o ma len cing chu spong ngo / /de bzhin du mkhas pa yang sdig pa spong pa yin no/ /khyim bdag gi bu de cher skyes pa dang rang gi khyim mthong ba las mngon par dga' ba ma skyes te/shin tu dka' ba chen pos rab tu byung ba las brtsams te bshad pa/ 'jig rten nyes dmigs mthong ba dang / /zhes bya ba yin te/ 'khor ba'i skyon na ba dang rga ba dang sdig pa sogs pa mthong ba'i phyir ro/ /'dis tshogs kyi lam bstan nas mthong ba'i lam bstan pa'i phyir/'gog par 'gyur ba'i chos mthong ba/ /zhes bya ba smos te/ des skyo bar gyur pa'i phyir/ dge ba'i bshes gnyen bsten pa la sogs pa la brten nas/ zag pa med pa'i lam rtogs pa'i phyir te/ 'gog pa ni zag pa med pa'i rnam grangs yin pa'i phyir ro/ /mthong bas zhes bya ba ni bden pa mthong ba skyes so zhes bya ba tshig gi lhag ma'o/ /de bzhin du de bsgom pa'i lam la gnas nas ni/ 'phags pa sdig la dga' mi byed/ /ces bya ba nyon mongs pa'i sa la ni mkhas pa dga' bas ni mi 'jug go//yang na 'phags pa'i bden pa mthong bas ni 'phags pa nyid du 'gyur la/ de ni nyes pa spyod pa la mi dga' ste/ mi byed pa'i sdom pa thob pa'i phyir ro/ /'dis ni bsgom pa'i lam bstan to/ /sdig can dge la dga' mi 'gyur/ / zhes bya ba ni skye bo ngan pa ni gti mug cing rmongs pa'i phyir lam bsgom pa la mi dga' ste/ thar pas 'jigs pa'i phyir/ yang na legs par spyod pa la mi dga' ba'o/ /de gcig pu dben pa dang bag yod par byas pas ji tsam na dgra bcom par gyur te/ rnam par grol ba'i bde ba so sor myong ba las brtsams nas/rab tu dben pa'i ro shes pa/ /zhes bya ba smos te/ khyad par du dben pa yin pas rab tu dben pa ste/ de bzhin nyid kyis shes pa zhes bya ba'i don te/ /de'i ro'i khyad par ni phan 'dogs pa nyid du shes pa'i phyir ro/ /de'i phyir 'jig rten pa'i shes pa'i mthus ni ngan song las ldog pa yin te/bzod stobs ngan song yong mi 'gro/ /zhes bya ba'i tshig gis so/ /mthong ba'i lam gyi mthus kyang ji skad du bshad pa/ dge slong 'di'i dmyal ba zad do/ /zhes bya ba la sogs pa'o/ /bsgom pa'i lam gyi mthus ni sdug bsngal thams cad las ldog pa yin te/de dang ldan na khams gsum las 'dod chags dang bral ba thob pa'i phyir ro/ /yang na rab tu dben pa ni lus dang sems dben pas de ni zhi gnas thob pa ste/ mdo las rdo rje lta bu'i ting nge 'dzin ces bya ba bstan pas so//gang gi phyir rdo rjes ni brag kyang 'bigs par byed pa yin la/ ting nge 'dzin gyis kyang nyon mongs la 'joms par byed pa yin pas chos mthun no/ /legs par nyer zhi zhes pa ni kun du 'khrugs pa nye bar zhi ba ni legs par nyer zhi ste zhi gnas so//de'i ro shes pa ni de'i ro ste de bzhin nyid shes pa'o/ /ji skad du bshad pa/ bsam gtan med par ni shes rab med la/ shes rab med par ni ting nge 'dzin med do zhes so/ /gang gi tshe de gnyis kyi ro'i khyad par mthong ba de'i tshe'i phan yon bstan pa'i phyir smras pa/rims nad med cing zhes bya ba smos te/ gtan du gdung ba dang bral ba'i phyir ro/ /nyon mongs pa spangs pas na de thob pa nyid do/ /sdig byed ces bya ba ni nyon mongs pas byas pa'i yang srid pa'i las mi len pa ste/ 'dis ni mthong ba dang bsgom pa'i lam gyi 'bras bu bsten to//de ltar khams gsum las 'dod chags dang bral bas gdul bya'i don du dus ji srid gnas pa dang / ci zhig byed nas sdod pa yin zhe na/ chos la dga' ba'i ro dag 'thung / /zhes bya ba ste/ rnam par grol ba'i chos las skyes pa'i dga' ba'i bde ba nyams su myong ba'o//yang na mthong ba'i chos la bde bar gnas par gyur pa zhes bya ba'i don to/ /de la 'di ltar spyod pas ni ngan song gi 'jigs pa med do zhes bstan pa'i phyir/ sems kyi zag pa med pa dang / /zhes bya ba la sogs pa smos so//yul yangs pa can na dbang po ma dul ba ngan song gi 'jigs pa'i dge slong zhig las brtsams so/ /zag pa ni zag pa dang ldan pa'i sems 'di la yod pa ste/ dbang po'i sgo rnam par ma bsdams pa zhes bya ba'i don to/ /ji ltar yang dge slong zag pa dang ldan par 'gyur zhe na/dbang po'i sgo ma bsdams pa'o zhes mdo las gsungs te/ yul thams cad la sems kyi zag pa 'byung ba'o/ /de las gzhan zag pa med pa'i sems la ni ngan song gi 'jigs pa med de/ ngan song du 'gro ba de ni dbang po'i sgo ma bsdams pa'i 'bras bu yin pa'i phyir ro//dbang po dul ba rnams ni ngan song las grol ba yin no/ /sems kyi 'ching bas ma bcom la/ /zhes bya bas ni gang la 'ching bas bcom pa'i sems med pa de ni de nyid de gang zag gang gi sems 'ching bas ma bcom pa ni kun du 'byar ba'i sems bkag pa ste dgag par byas pa'o//'ching bas bcom pas ni 'dod pa la sogs par rnam par rtog pa ste/ rnam par rtog pa shas che ba rnams la ni dbang po rnam par rmongs pa 'byung ba'i phyir ro/ /'dod pa la sogs pa'i rnam par rtog pa spangs pa ni nges par 'byung ba la sogs pa la rnam par rtog pa yin pa'i phyir te/rtog pa ni g.yeng bar brtag pa'o/ /yang na 'ching ba'am sgrib pa'o/ /dge dang sdig pa rab spangs pa/ /zhes bya ba de nyid de/ sdig pa zhes bya ba ni 'dod pa de'i tshig bla dgas te/sdig pa rab tu spangs pa ni 'dod pa la 'dod chags dang bral ba zhes bya ba'i don to/ /dge ba ni 'dir mnyam par gzhag pa'i khams kyi ste/ gzugs dang gzugs med pa las 'dod chags dang bral bas dge ba rab tu spangs pa'o/ /sdig pa spangs pas ni ngan song du 'gro ba'i 'jigs pa med la bsod nams spangs pa'i phyir ni bde 'gror skye ba'i 'jigs pa med do//bde 'gror 'gro ba yang rung ba nyid ma yin pa'i phyir ngan 'gro bzhin du spang bar bya'o/ /de las gzhan yang phan pa'i dam pa'i skye bo bsten pa las byung ba yin te/ de bas na khyad par 'dod pas ni tshig rtsub po smra na yang phan pa ston pa'i bla ma'i rjes su 'brang bar bya na/tshig snyan pas smra na lta smos kyang ci dgos zhes bstan pa'i phyir smras pa/ gnas min bzlog dang zhes bya ba la sogs pa smos so/ /bram ze zhig slong bas skyo nas rab tu byung bar gyur pa las gang gis nye bar gnas pa des bya ba ma yin pa dang nyes pa las zlog cing bskul la 'doms par byed pa las ji tsam na yongs su skyo bar gyur nas yang nyams pa las 'jug par bya ba de'i dbang du mdzad nas 'di gsungs so//de thos pas rim gyis dgra bcom pa'i 'bras bu thob po//gnas min zlog ces bya ba ni sdig pa las zlog par byed pa ste/ 'dis ni snying rje bstan to/ /legs smra dang zhes bya ba ni gsung rab ston par byed pa ste/ 'dis ni lung dang rjes su mthun par ston pa bstan to/ /nyes dmigs ston par byed pa dang //zhes bya ba 'dis ni rigs pa ston par byed pa bstan to/ lung dang rigs pa gnyis kyis gang bsgrubs pa de ni shin tu brtan par 'gyur ba yin no/ /yang na phongs pa las bskul ba yin te/ 'dis ni dge sbyong ma yin no/ /'dis ni rang bzhin gyis kha na ma tho ba'o//'di ni bcas pa'i kha na ma tho ba spyod pa zhes bya ba yin te/ bslab pa 'di las yongs su 'da' bar ma byed cig pa'o/ /yang na nyin dang de'i mtshan du de'i spyod pa la rnam par lta ba'o/ /tshar gcod smra byed pa zhes bya ba ni gus pa dang bsgrims pas gdams shing rjes su ston par byed pa'o//'di la smra bar byed pa'i ngang tshul yod pa de ni smra byed pa'o/ /gdams par byed pa dang rjes su sten par byed pa la phyag 'tshal zhing yang dag par spyod pa bstan pa ni 'dir gdams pa dang rjes su bstan pa zhes bya ba'i don to/ / yang na sdig pas ston par byed cing gnas pas 'dul bar byed pa yin pa'i phyir ro/ /snod kyi khyad par yongs su mi shes pa'i phyir dang / dus ma yin pa dang rjes su mthun par byed pa yin no zhes rtogs pa la/ mkhas pa zhes bya ba smos te/ dus dang snod la sogs pa'i khyad par shes pa zhes bya ba'i don to//yang na yon tan dang skyon gyi khyad par shes pa'i phyir/ yongs su bzung ba dang chad ba'i dus la sogs pa yang dag par shes pa'i phyir ro/ /de lta bu ni sems can de lta bu'o/ /rjes su 'brang bar bya ba dang gnas par bya ba'o//ci'i phyir zhe na/ de lta bu dag ces bya ba smos te/ skye bo dam pa'o/ /bsten byas na zhes bya ba ni gang zag bsten pas so/ /legs par 'gyur zhes bya ba ni yon tan sogs par 'gyur ba'o/ /sdig mi 'gyur zhes bya ba ni nyes par mi 'gyur ba'o/ / yon tan la bsten pa nyid kyis ni sdig pa sel bar 'gyur gyi/ dka' thub la sogs pas ni ma yin no zhes bstan pa'i phyir/ nye bar zhi zhing zhes bya ba la sogs pa'o/ /ri gangs can na dka' thub mchog tu byed cing sdig pa zad par bya ba'i phyir drang srong rgan po dag dka' thub byed pa gzigs nas bcom ldan 'das kyis bka' stsal pa/'dis ni sdig pa zad pa ma yin no zhes nas 'di gsungs so/ /zhi ba zhes bya ba ni sems dben ba'i phyir ro/ /rab tu zhi ba ni lus dben pa'i phyir ro/ /dal bus smra ba zhes bya ba ni ngag legs par bsdams pa yin pa'i phyir ro//khengs med pa zhes bya ba ni smra bas khyad par du yid yongs su 'phyar ba med pa'i phyir ro/ /yang na nye bar zhi ba ni yid kyis nyes bar spyod pa spangs pa'i phyir ro/ /rab zhi zhes bya ba ni lus kyis nyes par spyod pa spangs pas so//de'i rtsa ba ni bstan pa yin te/ g.yo ba med pas dge ba yin no zhes bstan pa'i phyir khengs pa med pa'o/ /yang na ting nge 'dzin dang ldan pa'i phyir nye bar zhi ba dang ldan pa'o/ /sdig pa'i chos rnams sprug byed de/ /zhes bya ba ni mngon par mi 'dod pa'i dngos po spong ba'am/'khor ba pa'i nyes par spyod pa spong ba'o/ /'dir dpe bstan pa'i phyir/ rlung gis ljon shing lo ma bzhin/ /zhes bya ba yin te/ dper na shing gi 'dab ma rlung gi shugs drag pos kun du sprugs pa bzhin du'o/ /sdig pa thams cad dang bral ba'i gang zag la ni gang skyon brjod pa de dang de bdag nyid la mi 'dod pa'i 'bras bur 'gyur ro zhes bstan pa'i phyir/gang zhig skyes bu zhes bya ba la sogs pa smos so/ /ba ra d+h+wa dza dmod pa pas bcom ldan 'das la mngon sum du sdig pa can gyi tshig gis gshe ste/ snyim pa gang gis sa bcom ldan 'das la gtor ba dang /rdzi phyogs kyi rlung gis de nyid la babs te/ des na 'di gsungs so/ /gzhan dag ni ko ka zhes bya ba'i rngon pa las brtsams so zhes zer ro/ /gang zhig ces bya ba ni khyim pa'am rab tu byung ba gang dag go/ /rab tu sdang med mi zhes bya ba ni zhe sdang gis ma nyams pa'i yid yod pa ste sems can la byams pa'i sems yod pa'o//khro byed pa zhes bya ba ni zhe sdang gis gnod pa zhes pa la 'jug pa'o/ /dag pa ni gtsang sbra dang ldan pa'i phyir ro/ /dag pa yang rnam pa thams cad du legs par spyod pa ste/de yang lus la sogs pa'i legs par spyod pa gsum dang ldan pa'i phyir ro/ /skyes bu ni lam bsgom pas rgyud skyed pa'o/ /lam gyi 'bras bu bstan pa'i phyir/ nyon mongs med ces bya ba ste/ nyon mongs pa dang bral ba'o/ /yang na ang ga zhes bya ba ni dgos pa dang lam dang lam gyi tshogs te/de gang du nyams pa yod pa de ni yan lag ste/ 'dod chags la sogs pa'o/ /gang la yan lag de med pa de ni yan lag med pa'o/ /yang na khyim du 'jug pa'i 'khor sa ni 'jig rten na rab tu grags pa ste/ 'gro ba lnga'i khyim du 'jug pa'i ngan song yang nyon mongs pa yin te/nyon mongs pa'i rnam grangs ni ang ga na zhes bya ba'i sgra yin pa'i phyir ro/ /phyir zhes bya ba ni slar 'ong ba'o/ /sdig pa ni tshig ngan pa la sogs pa'i tshul gyis nyes par spyod pa ste/ mi sdug pa'i 'bras bu yin pa'i phyir ro/ /gang gi phyir zhing khyad par can la gnod pa chen po byed pas 'di bstan pa yin no//sdig pa zhes bya ba bstan pa la byis pa de la zhes bya ba yin te/ tshig ngan pa smra bar byed pa'o/ /chos mthun pa'i dpe bstan pa'i phyir/ rdul rnams zhes bya ba smos te/ sems can du ma'i rkang pas bcer zhing phye mar byas pa'i shin tu phra ba'i rdul rnams so/ /rdzi phyogs zhes bya ba ni rlung mngon du phyogs pa'o/ /gtor ba bzhin zhes bya ba ni gtor bar byed pa nyid la slar 'bab pa de bzhin du'o/ /ci'i phyir byed pa po nyid la sdig pa 'go bar 'gyur zhe na/smras pa/ 'di ltar dge ba byed pa zhes bya ba la sogs pa smos te/ 'dis ni chos nyid kyi rigs pa bstan pa yin no/ /tshe dang ldan pa kun dga' bo dang lha sbyin gnyis shAkya'i rigs las byung ngo / /de las bdag nyid chen po kun dga' bo ni chos 'dzin cing bcom ldan 'das kyi nye gnas su gyur to//bdag nyid chen po lha sbyin ni sdig pa byas pas mnar med par skyes te/ de'i lus la shar phyogs nas mda' bo che stong phrag brgyad cu dang / mtshon byin Di pa la stong phrag brgyad cu dang / tho ba stong phrag brgyad cu dang / mda' stong phrag brgyad cu de'i lus la 'bab cing 'ong ste/de bzhin du phyogs gzhan dag nas kyang 'bab par gyur te/ de nas tshigs su bcad pa gsum po 'di gsungs so/ gang dang gang zhes bzlas pa ni dge ba'am sdig pa las rab tu sgrub pa ste/ 'og nas 'byung ba ma yin par rtogs pa'o//yang na legs par spyod pa'o/ /mi yis gang dang gang byas pa/ /zhes bya ba ni byed pa ste/ de rang gis myong bar 'gyur zhes bya ba rang gi rgyud la 'dod pa dang mi 'dod pa'i 'bras bu sbyin la mthong zhing nyams su myong ba zhes bya ba'i don to/ /gang gi tshe ji ltar zhe na/dge ba byed pas dge ba dang / /zhes bya ba la legs par spyad pa spyod pas ni yid du 'ong ba'i 'bras bu mthong bar 'gyur ro/ /sdig pa byed pas ni mi 'dod pa'i 'bras bu myong bar 'gyur ba'o/ /gzhan gyis byas pa'i dge ba dang sdig pas ni bdag la dge ba dang sdig par mi 'gyur ro zhes bstan pa'i phyir smras pa/bdag gis sdig pa zhes bya ba la sogs pa'o/ /gzhan dag ni cuN Da ka la zhes bya ba'i dge bsnyen gzhan gyi bud med la rab tu chags pa las chad pa byas pa dang / de'i grogs po shin tu bslab pa 'dod cing bsngags pa zhig las brtsams so zhes zer ro//bdag nyid kyis byas shing bsags pa'i nyes par spyod pa byas par gyur pa'am/ de'i phyir ro/ /de bdag kho na kun nyon mongs/ /zhes bya ba ni sdig pa'i 'bras bu gdung bar byed pa bdag gis nyams su myong bar gyur pa ste/'di ltar 'jig rten la ni rang gi las kyi 'bras bu nyams su myong ngo zhes bya ba'i rigs pa'i tshig gis so/ /bdag gis sdig pa ma byas na/ /zhes bya ba ni gang yang bdag nyid kyis ngan par spyod pa ma byas par gyur pa'o/ /de ltar gyur na de yi phyir/ /bdag nyid kho na rnam par dag /ces bya ba smos te/ rab tu dag par byed cing bdag nyid dri ma med pa skyed do/ /bdag nyid kyis byas pa thams cad ni rjes su myong ba yin gyi/ 'jig rten ni gzhan gyis byas pa yin no zhes bya ba de nyid gsal bar bya ba'i phyir smras pa/ gzhan gyis gzhan sbyong zhes bya ba la sogs pa ste/gzhan dag ni rgyun du zhugs pa zhig gi grogs po dge bsnyen zhig gis gser brkus te/ chad pa byas pa las brtsams so zhes so/ /dag pa dang ma dag pa ni dri ma dang bcas pa dang dri ma med pa zhes bya ba'i don to/ / rang rang byed ces bya ba ni bdag nyid dang 'brel pa dang / bdag nyid kyis byas pa'o zhes bya ba'i bar du'o/ /bdag nyid kyis byas pa'i ngan par spyod pas ni kun nas nyon mongs par 'gyur la legs par spyod pas ni rnam par dag par 'gyur ro/ /de lta bu ci'i phyir zhe na/'di ltar gzhan gyis gzhan sbyong mi byed kyi/ /zhes bya ba smos te/ gang gi phyir gzhan gyis ni dri ma med par byed pa'am sbyong bar mi byed pa ste/ chos rnams ni 'pho ba med pa'i phyir ro/ /gang gzhan gyis gzhan sbyong bar byed mi nus na ci dri ma can du'ang mi nus sam zhe na/bdag nyid kyis ni sdig pa dag /ces bya ba 'di ste rang gi rgyud kyis sdig pa byas pa ni bdag nyid kyis sdig pa byas pa ste rang gis bsags pa'o/ /bsams bzhin du byas pa la sogs pas ni nye bar bsags pa'i mtshan nyid du gnas pa yin no//mngon du 'joms par byed ces bya ba ni mngon du 'jig pa dang / zad pa dang / gdung bar byed pa'o/ /bsam brlag ces bya ba ni blo ngan pa ste glen pa'o/ /ji lta bu zhe na/ rdo rjes nor bu 'bigs pa bzhin/ /zhes bya ba la/ dper na rdo rje ni rdo'i rang bzhin dang rdo las byung ba yin yang nor bu mkhan gyis rdo'i rang bzhin de nyid nor bu la 'bigs pa dang 'joms pa dang phye mar byed pa bzhin du bdag nyid sdig pas 'joms so//des na de nyid kyi phyir sdig pa spang bar bya'o zhes bstan te/ mig ldan zhes bya ba la sogs pa 'di dag go//yang dag par rdzogs pa'i sangs rgyas gtsug tor can gyi nyan thos ni phal cher bde 'gro 'dod pa'i phyir tshangs par spyad pa spyod de/ de'i gnyen por dang por gsungs pa 'dir yang gsungs so/ /gzhan dag ni dge slong rab tu mang po bcom ldan 'das kyi thad du lhags te/btsun pa bdag cag gis ci zhig yongs su spang bar bgyi zhes zhus pa dang / de las brtsams so zhes gzhan dag zer ro/ /mig ldan zhes bya ba ni gang la mig nyams pa med pa yod pa'o/ /nyam nga zhes bya ba ni bdag nyid kyi phongs pa'i dngos po'o//de la ni sgron ma la sogs pas mthong ba yongs su gsal byed de/ mig ldan yang snang ba med na ji ltar nyam nga ba dag spong bar nus/ des na lam du 'gro bar byed pa yin te/ snang ba la sogs pa yod par byas pa'i rgyus 'du 'phrod yod par gyur na zhes bya ba'i don to//dper na mig dang ldan pas g.yang sa dang tsher ma la sogs pa nyam nga ba'i gnod pa mthong ba yin no/ /dpe bstan nas dpe can bstan pa la mkhas pa zhes bya ba ni blo dang ldan pa'o/ /'tsho ba'i 'jig rten ni mi'i skye ba pa ste/lha rnams ni rgyags pa'i skyon dang / ngan song dag tu sdug bsngal gyi skyon gyis 'di'i sems med par gyur pa'i phyir ro/ /ji lta bu zhe na 'dir zhes bya ba smos te/ sangs rgyas 'byung ba dang / /yang dag pa'i lta ba dang / dbang po ma tshang ba med pa la sogs pa'i yon tan gyis brgyan pa zhes bya ba'i don to//dper na mig dang ldan pas g.yang sa dang tsher ma la sogs pa gnod par byed pa mthong ba yin te/ de ltar ya nga ba mthong ba'i lam de yongs su spong ba yin no/ /de bzhin du mkhas pas kyang sangs rgyas 'byung ba la sogs pas brgyan pa'i phyir skyes pa na sdig pa ste ngan song gi 'bras bur 'gyur ba'o//yongs su spang ba ni yongs su dor ba'o/ /sdig pa can dang 'grogs pa ni spang bar bya'o zhes bstan pa ni/ nor can gyis ni zhes bya ba la sogs pa smos so/ /lam sgugs pa'i chom rkun pa dag las brtsams te/rigs kyi bu sdig pa yongs su spang bar gyis shig /'di lta ste/ tshong pas 'jigs bcas lam dang ni/ /zhes bya ba la sogs pa gsungs so/ /gzhan dag ni lhas zhus pa las gsungs pa'i tshigs su bcad pa yin no zhes zer ro//tshong pa'am mkhas pa dag 'di ltar yongs su 'dor ba yin te/ dper na tshong pa ni seng ge dang rkun pa la sogs pas bsten pa dang / 'jigs pa dang bcas pa'i lam spong ngo / /dper na nor dpag tu med pa yod pa'i gang zag ni grogs po nyung ba'am 'khor nyung ba yongs su spong bar byed de//'di ltar nyung bas ni nor gyi phung po chen po bskyang bar mi nus so/ /dper na 'tsho bar 'dod pas ni dug dang dbyig dug la sogs pa spong bar byed do/ /de bzhin du mtho ris dang thar pa 'dod pas kyang sdig pa can spang ngo //dpe rnam pa gsum gyis ni ldog pa bstan pa'i phyir ram/ byang chub rnam pa gsum gyi bgegs spong ba'i phyir ro/ /yang ngan song dang mi dang lha rnams kyi las dang 'bras bu spang ba bstan pa'i phyir ro/ /ma byas pa ni sdig pa yin no zhes bstan pa'i phyir/ gal te lag mthil zhes bya ba la sogs pa smos so//rgyal po'i khab na ka ku Ta mi tra zhes bya ba zhig yod de/ de shin tu rgas par gyur nas sdig pa las log pa de las brtsams so/ /gal te med na zhes bya ba ni gal te med par gyur na'o/ / lag mthil rma zhes bya ba ni lag pa'i mthil du smras pa'o/ /lag pas dug ni gzung byas kyang / /zhes bya ba ni gang lag pas bad sa na ba dang / shring gi dang / ha la ha la sogs pa'i dug 'jigs pa med par blangs kyang gnod par mi 'gyur ro/ /ci'i phyir zhe na/'di ltar/ rma med dug ni mi 'jen pa/ /zhes bya bas bstan te/ rma med na ni 'jug cing 'byung bar mi 'gyur te/ /smad pa'i sdig pa la brten na ni khyab par 'gyur ro/ /de bzhin du/ ma byas pa la sdig pa med/ /ces bya ba yin te/ gang gis sdig pa ma byas pa la sdig pa med do//byis pa la ni sdig pa nyid bya bar sla ba yin te/ thur bub bzhin no zhes bstan pa'i phyir/ /bdag la mi phan zhes bya ba la sogs pa smos so/ /yul ber d+ya na slu bar byed pa zhes bya ba dang / /dge ba zhes bya ba'i tshong dpon gnyis bcom ldan 'das kyi thad du lhags te/btsun pa ci zhig ni bya sla bar 'gyur/ ci zhig ni bya dka' bar 'gyur zhes zhus pa las de la tshigs su bcad pa gnyis gsungs so/ /bde zhing nyon mongs pa med pas bya ba yin pas bya bar sla ba ste/ ri la sogs pa las babs pa bzhin du bsgrub par sla ba'o//legs pa ma yin zhes bya ba ni ngan par spyod pa dang gzhan la gnod par byed pa'i bdag nyid do/ /bdag la mi phan bya ba dang / /zhes bya ba ni bdag la gnod pa lhag pa'i bsam pa nyams par byed pa la sogs pa ste/'di ni dge ba'i rtsa ba'am 'phags pa'i lam gyi gegs su gyur ba'o/ /phan 'gyur zhing zhes bya ba yang bdag nyid la phan pa ste bag yod pa la sogs pa'o/ /bde 'gyur zhes bya ba ni rjes su mthun pa ste/ gzhan dag la sbyin pa la sogs pa legs par spyod pa'o//de zhes bya ba ni de nyid do/ /mchog tu bya bar dka' zhes bya ba ni shin tu bsgrub par dka' ba ste rir 'dzeg pa bzhin no/ /gang gis sla ba dang gang gis dka' ba nyid bstan pa/ dam pas legs par bya sla yi/ /zhes bya ba ste/ legs par spyod pa sla ba ni skyes bu dam pa rnams sdod pa med par legs par spyod pa la mos shing de la goms pa'i phyir ro//dam pas sdig pa bya bar dka'/ /zhes bya ba ni legs par spyod pa la skyes bu dam pa ma yin pas bsgrub par dka' ba yin te/ de bas bzlog pa yin pa'i phyir ro//ngan pas sdig pa bya bar sla/ /zhes bya ba la sogs pa'i don ni gsal lo/ /gang gis sdig pa bya bar sla ba'i rgyu bstan pa'i phyir/ /ji srid sdig pa zhes bya ba la sogs pa smos so/ /khyim bdag mgon med zas sbyin gyis bcom ldan 'das la gsol pa/btsun pa ci'i slad du sdig pa byed pa la mngon par dga' zhing sdig pa'i las bgyid pa lags zhes zhus pa dang / ji tsam na tshigs su bcad pa bzhi gsungs so/ /byis pa mngar bar sems zhes bya ba ni yid du 'ong bar lta ba'o//byis pa ni blun pa ste de ci'i phyir de ltar lta zhe na/ de'i dus la reg pa'i rgyur gyur pas so/ /ji tsam gyi bar du zhe na/ smras pa/ ji srid sdig pa ma smin pa/ /zhes bya ba ste/ ngan par spyod pa byas shing bsags par gyur kyang dus ji srid rnam par smin pa 'byung bar ma gyur pa ste mthong ba'i chos sam 'jig rten pha rol du'o//gang tshe sdig pa smin gyur pa/ /zhes bya ba ni gang gi tshe yang sdig pa smin cing 'byung ba ste/ /de tshe zhes bya ba de'i dus na byis pa de tshar bar sems pa ni kha ba dang yid du mi 'ong bar rtogs te nyam thag pa'i nga ro 'byin cing da ni bdag nyams shing zhig go zhes nyam thag pa'i nga ro 'byin to//rmongs pa nyi tsher yang ma zad de sdig pa yang bsags pa yin no zhes bstan pa'i phyir/ de srid sdig la rung bar lta/ /zhes pa smos te/ rgyun du sdig pa'i chos dang ldan pas sdig pa med pa zhes bya ba'i don to//yang gi sgras ni dge ba lta smos kyang ci dgos zhes bstan to/ /lta ba ni mthong ba'o/ /de yang sngon gyi legs par spyad pa'i mthus byung ba'i bde ba nyams su myong ba'o ste/ rung ba zhes bya ba ni yid la bsam pa grub pa'i tshul te 'dod pa'i 'bras bu nyams su myong ba'o//gang nas ji srid du mthong zhe na/ ji srid sdig pa ma smin pa/ /zhes bya ba la sogs pa ste/ shes bar sla'o/ /de srid sdig pa bzang por mthong / /zhes bya ba de las skyes pa mi 'dod pa'i 'bras bu ste/ bzang po ni yon tan brgya stong bsags pa'i bdag nyid kyi skyes bu dam pa yin yang sngon gyi dus su ngan pa bsags pa'i mthu las skyes pa'i sdug bsngal ba chen po myong bar mngon par mi 'dod pa ma yin par mthong ngo //gang nas ji srid kyi bar du zhe na/ ji srid bzang po ma smin pa/ / zhes bya ba yin te/ dus ji srid kyi bar du byas shing bsags pa ste/ da ltar gyi dge ba'i las kyi rnam par smin pa rjes su smin pa srid du'o/ /bzang po zhes bya ba ni bde ba ste b+ha di zhes bya ba dge ba dang bde ba zhes zer bas so/ /sdig pa la mchog tu byed pa ni bde ba 'dod pas goms par mi bya'o//zhes bstan pa'i phyir/ sdig pa sdug bsngal zhes bya ba la sogs pa smos so/ /legs pa zhes bya ba ni rgan po sdig pa las ldog pa med pa'i dbang du mdzad de 'di gsungs so/ /ji ltar yang brgya la mi dge ba'i bshes gnyen la brten pas sdig pa'i las cung zad ma byas nas so//des na 'di ni gzhon pa nas goms pa yin pas 'di bdag gis bya'o zhes log pa'i rnam par rtog pa las skyes pa'i blo de yang dang yang du mi bya'o zhes bya ba yin te/ gzhon pa nas lan cig ma yin par byas kyang lan du mar yang mi bya'o//de la dga' bar mi bya'o/ /zhes bya ba ni de la mngon par dga' ba dang 'dod pa bskyed par mi bya'o/ /'dis sbyor ba rgud par bstan nas/ bsam pa nyams pa bstan pa/ ji skad du/ gang zhig dri mar bcas kyang dri ma med nyid ni//sems ni rab tu dang bar gyur pa'o/ /gang zhig dri ma med par gyur kyang ni/ /sems ni ma dang gyur pa dri ma'o/ /zhes so/ /ci'i phyir zhe na/ 'di ltar sdug bsngal zhes bya ba ste/ sdig pa bsags pa ni mi 'dod pa'i 'bras bu yin pa'i phyir ro/ / sdig pa bsags pa zhes bya ba ni sdig pa'i tshogs blangs shing kun du spyad pas zhes bya ba'i don to/ /mkhas pas ni bsod nams la mchog tu bya'o zhes bstan pa'i phyir/ bsod nams zhes bya ba la sogs pa yin no/ /lha'i rgyal po zhes bya ba'i bu mo ji srid 'tsho'i bar du bsod nams shin tu mang po bsags pa las brtsams pa yin te/gal te mkhas pa dge ba'i bshes gnyen la brten pa'i dbang gis bsod nams shin tu mang po sngar byas par gyur kyang 'di ltar bsam par mi bya ste/ bdag gis bsod nams mang po byas pas chog ste/yang dang yang du ji zhig bya/ /zhes pa'o/ /de yang bsod nams de nyid la lan du mar bya zhing chog par mi bya'o/ /lhag ma ni go sla'o/ /bsod nams dang sdig pa'i phan yon dang nyes dmigs bstan pas bskul ba dang bzlog pa'i phyir/sdig la yid ni zhes bya ba la sogs pa smos so/ /bram ze gtsug phud ras gcig pa zhes bya ba bskal pa dgu bcu rtsa gcig gi bar du sbyin pa'i sems ma skyes pa de'i dbang du mdzad nas 'di gsungs so/ /mngon par myur te bya zhes bya ba ni mngon par khyab pa ste gus pa dang rtag tu sbyor ba gnyis kyis myur du 'jug pa'o//bsod nams ni sbyin pa la sogs pa bsod nams bya ba'i dngos po dri ma med pa'i phyir dang yid la bsam pa rdzogs pa'i rgyu yin pa'i phyir ro/ /sdig pa las ni sems ldog cing / / zhes bya ba ni ngan par spyod pa'i bdag nyid las bzlog pas te gdung bar byed pa'i phyir ro/ /ga las she na/ bsod nams dal bus byed na ni/ /zhes bya ba ste/ lhod pa dang mi brtson pa dang / yun ring du sdod pa dang skabs dang bcas par legs par spyod pa byed pa'i gang zag go//sdig la yid ni mngon dga' ba/ /zhes bya ba ni sdig pa dang ngan par spyod pa la mngon par dga' ba ni lhag par chags pa ste/ mngon par dga' zhing de la 'jug pa so so skye bo'i tshogs so/ /dper na khyim gyi sgo ma bgag cing dang bar bzhag na ni khyi la sogs pa dogs pa med par 'jug par byed do//de bzhin du dge ba'i bya ba la mngon par brtson pa med par gyur na ni sdig pa'i bya ba la ma dul ba'i sems 'jug par 'gyur ro/ /ji ltar goms pa bzhin du 'jug par 'gyur te/ de skad du bshad pa/dang po brtse bcas sems kyis cung zad dge ba byed/ /gnyis par dogs bcas rtog cing sdig pa byed par 'gyur/ /gsum par dogs med 'jigs bral ci 'dod sdig byed de/ /des na sdig goms rtag tu mi dge dag la dga'/ / zhes bya ba'o/ /'di ltar yang gzhan du brjod par bya ste/ bsod nams mngon par myur te bya/ /chos ma yin las sems bzlog bya/ /sdig pa dal las byed 'gyur te/ /dge ba la ni yid mngon dga'/ /zhes so/ /bsod nams mngon par smyur te bya/ / zhes bstan pa la/ khyad par med par bstan nas/ cung zad tsam gyis kyang 'byor pa dang sdug bsngal chen po thob par 'gyur ro zhes bstan pa'i phyir/ sdig pa chung ngu zhes bya ba la sogs pa smos te/ de nas yul tsam pa na gnas pa'i tshong dpon rgan po zhig bcom ldan 'das kyi thad du lhags te/ci btsun pa 'jig rten pha rol du sdig pa sdug bsngal 'thob bam bde ba 'thob ces gsol ba dang / tshigs su bcad pa gnyis gsungs so/ /'jig rten pha rol zhes bya ba 'dir yang gi sgra ni phyis par blta bar bya ste/ skye ba 'di las yang ngo //de'i tshe 'bras bu yongs su ma rdzogs pa ster ba'i phyir ro/ /chung ngus kyang zhes bya ba la kyang gis sgra ni sdig pa chen po lta smos kyang ci dgos zhes bstan pa'o/ /bya ba cung zad tsam byas na yang sdug bsngal 'dren zhes bya ba smos te/'dis sdug bsngal gyi 'bras bu mngon par mi 'dod pa'i dngos po 'dren pa'i phyir ro/ /gang gis she na/ sdig pa byas pas zhes bya ba ste nye bar bsags pa'o/ /'dir dper bstan pa/ phung khrol chen po byed 'gyur te/ /khong par song ba'i dug bzhin no//zhes bya ba ni skyes bu'i ltor chud pa'i dug gis ni che zhing drag po'i gnod pa byed pa'i phyir te/ yid du 'ong ba'i srog gcod par 'gyur ba de bzhin du'o/ /bsod nams chung ngu byas pas kyang / /zhes bya ba ni gang yang dge ba cung zad byas kyang des ni 'jig rten pha rol du bde ba 'dren zhes bya ba yin te/skye ba 'dir ma zad de skye ba gzhan du yang zhes bya ba yang gi sgra mi mngon par byas pa yin no/ /don chen dag kyang byed 'gyur te/ /de ltar 'bru rnams zhes bya ba ste 'bru rnams zhes bya ba ni 'bras sA lu la sogs pa phun sum tshogs pas mu ge la sogs pa'i skyon sel bar byed cing 'jig rten la phan 'dogs pa chen po byed de/'tsho ba'i yo byad phun sum tshogs par 'gyur ba de bzhin no/ /sdig pas ni mthong ba'i chos nyid la gcig tu phung khrol chen po byed pa yin no zhes bstan pa'i phyir/gang zhig nyes med ces bya ba la sogs pa smos so/ /'phags pa maud gal gyi bu chen po dbyig pa'i rtse mos lus 'dam bu bzhin du btsir ba las de'i rgyus de [(]sbyugs [,]spyugs [)]pa la sogs pa'i gnod pa chen por gyur te/de las tshigs su bcad pa bzhi po 'di gsungs so/ /gzhan dag ni shi khan di n+ya zhes bya bas rang gi pha gsad pa las/ bdag nyid kyi btsun mo'i 'khor gyi nang du bye ma'i char bab pas khengs pa dang / de las shin tu mi bde ba dang / dmyal ba la sogs pa nyon mongs pa thob pa las de'i dbang du mdzad do zhes zer ro//chad pas gcod ces bya ba ni gzhan la 'tshe ba dang / gnod pa byed pa ste/ gang zhig rab sdang ba zhes bya ba dang sbyar ro/ /gang zhig ces bya ba ni gang dag go/ /gang la sdang ba yin zhe na/ nyes med ces bya ba 'di la ste gang la nyes pa med pa de ni skyon med pa ste/de'i lus zag pa zad pa'i bdag nyid la dbyig pa la sogs pas brdeg pa'o/ /sbyor ba phun sum tshogs pa bstan pa'i phyir smras pa/ sdang ba min la zhes bya ba smos te/gzhan thams cad la phan 'dogs pa'i bsam pas rgyud la snying rje dang ldan pa'i phyir dang / sdang ba'am khong khro bas rgyud ma bsad pa ni sdang ba ma yin no/ /yang khong khro la sogs pa'i nyon mongs pa'i gnyen po byams pa dang / snying rje la sogs pa'i khyad par rgyud la gnas pa'o//de la rab tu sdang ba ni zhe sdang skyed pa ste nyes pa med pa la gnod pa byed par 'jug pa ste/ shAkya rnams la 'phags skyes po bzhin no/ /sdig pa'i bdag nyid can de ni gdon mi za bar/ gnas gzhan gang yang rung ba bcu//myur du 'thob pa kho nar 'gyur/ /zhes bya ba ste/ dmigs kyis dbye ba bdun pa mngon par mi 'dod pa'i gnas rnam pa bcu po'i nang nas gang yang rung ba myur du 'thob pa'i phyir ro/ /sdug bsngal des 'dug pa'o zhes byas nas te/ gnas las nyams pa zhes bya ba'i don to//gnas yang dag par bstan pa'i phyir/ tshor ba mi bzad pa dag gam/ /zhes bya ba la sogs pa smos te/ klad pa na ba la sogs pa lus kyi phyogs gcig la khyab pa'i tshor ba'o/ /lha sbyin gyis bcom ldan 'das la rdo 'phangs ma thag tu klad pa'i nad kyis btab pa 'dir brjod par bya'o//yang na zhes bya ba ni 'am gyi sgra'i don no/ /lus ni 'dral ba zhes bya ba ni lus kyi yan lag ste/ lag pa dang rkang pa la sogs pa bcad pas de shi ba ste/ 'dir bzod pa smra ba la sogs pa'i skyes pa'i rabs brjod par bya'o//gnod pa'i tshor ba lci ba'ang rung / /zhes bya ba ni yun ring por lus thams cad la khyab cing mi bzod pa'o/ gzhogs gcig skams pa dang / lag pa dang rkang pa la sogs pa chad pa ste/ mdze dang mtshan par rdol ba la sogs pa'i nad de 'dir spre'u'i skyes pa'i rabs la sogs pa brjod par bya'o//gzhan dag tu tsha ba zhes brjod de yang dag par gdung bar byed pa zhes bya ba'i don to/ /yang na sems 'khrugs 'thob par 'gyur/ /zhes bya ba ni 'byung po la sogs pas sems rmongs par byas shing spyod pa la sogs pa 'thob pa ste bum pa bzhin no//gnyen 'dun rnams dang 'bral ba 'am/ /zhes bya ba ni pha dang ma la sogs pa dang 'bral ba'am zhig pa ste/ gtsug tor can bzhin no/ /longs spyod zad par 'gyur ba 'am/ /zhes bya ba ni 'dod pa'i yon tan nam shes pa la sogs pa dang /glo bur du nyams shing 'bral ba'i phyir rdo tshan la chu'i thigs pa bzhin te drod kyi skyes pa'i rabs bzhin no/ /rgyal po'i gnod pa 'byung ba 'am/ /zhes bya ba ni sa bdag las grags pa nyams pa dang / gnas las nyams pa dang /zas chad pa la sogs pa shin tu gnod pa chen po thob par gyur pa ste/ ji ltar rgyal po la 'khu ba lta bu'o/ /mi snyan shin tu mi bzad dam/ /zhes bya ba ni tshig ngan pa shin tu mi bzad pa 'thob pa ste/ ngan par spyod pa chen po byas pas tshig ngan pas brjod pa/ang ga da na zhes bya ba'i tshong dpon gyi bu bzhin no/ /yang na khyim ni me chen pos/ /nges par sreg par byed 'gyur te/ /zhes bya ba ni yang na 'di'i khyim dag tu bzlog par mi nus pa'i thog babs te thal ba nyid du byed do/ /ser ba rdo rje la 'dir sreg par byed pa zhes dgongs te/dngos po 'jig par byed pa'i phyir ro/ /rdo rje'i ser bas rgyal po'i bu 'khor dang bcas pa bcom pa yang 'dir brjod par bya'o/ /su zhig de ltar 'gyur zhe na/ gang de la 'gyod pa dang 'chos pa la sogs pa mi byed pa nyid de ltar 'gyur ba yin no zhes bstan pa'i phyir/shes rab 'chal pa'i byis pa zhes bya ba'o/ /lus zhig nas zhes bya ba ni ris mthun spangs shing 'chi ba'i dus byas nas gnas skabs bcu pa 'thob pa yin te de nyid bstan pa'i phyir/ ngan 'gror 'gro bar 'gyur zhes bya ba ngan song du 'gro bar 'gyur te ko ka li ka bzhin no//mthong ba'i chos kyi nyes dmigs ni sngar bstan pa'i phyir 'dis ni 'jig rten pha rol gyi nyes dmigs bstan to/ /des na de'i phyir sdig pa la yid brtan par mi bya'o zhes bstan pa ni/sdig pa byas pas zhes bya ba la sogs pa yin te/ mnyan yod na tshong dpon gyi bu ne'u ldangs gnyis shig yod de/ gcig ni dkon mchog gsum la dad pa ste sangs rgyas dang chos dang dge 'dun la dge ba'i rtsa ba dpag tu med pa skyed par byed do/ / gnyis pa ni dad pa med cing ser sna can zhig ste/ ji tsam na de gnyis ka shi bar gyur nas/ snga ma ni dga' ldan du skyes so/ /gnyis pa ni dmyal ba ngu 'bod du skyes so/ /de gnyis kyi nye du rnams bcom ldan 'das kyi thad du song te/ de gnyis gang du skyes zhes bya ba la sogs pa zhus pa las de nas tshigs su bcad pa bcu gsungs so//sdig pa zhes bya ba ni ngan par spyod pa nyid do/ /byas pa ni kun du skyed pa'o/ /bag dbab mi bya zhes bya ba ni yid brtan pa dang / 'jigs pa med pa dang / bag yangs dang / dogs pa med par mi bya'o//gzhan dag ni yid rton pa zhes bya bar brjod de/ bdag ni sdug bsngal las thar te bde ba 'thob po zhes kun du sems pa ni yid rton pa ste/ tshim pa'i bye brag de la dmigs pa'o/ /dgra 'di rtsa ba dang bcas par bdag gis phyung ngo zhes bag dbab par mi bya'o//srog gcod pa la sogs pa ni gcig tu mi 'dod pa'i 'bras bu yin pa'i phyir sdig pa'i bya ba'i ched du bag dbab pa'am yid brtan par mi bya ste/ 'di ni rgyu mtshan gyis bdun pa yin no/ /spyir bstan nas ring por byas pa la sogs pa ni ma yin no//zhe na bstan pa/ ring byas rgyang mar byas kyang zhes bya ba la sogs pa ste/ sa bon de dus du mas chod pas dran pa ma yin du zin kyang sa bon 'jig cing med par mi 'gyur la sdig pa'i 'bras bu de bzhin no/ /de ni yul thag ring por byas pa'i me bzhin du gnod pa byed pa ma yin no zhe na/'dir bstan pa rgyang mar byas kyang zhes bya ba smos te/ ring du byas pa dang rgyang mar byas pa bsdu bar byas te/ ring du byas pa dang rgyang mar byas kyang sdig pa'i 'bras bu mi sdug pa ma yin no zhes re ba'i bsam pa de mi bya ste/ ji skad du/ las rnams chud zar mi 'gyur te//zhes bya ba la sogs pa dang / de bzhin du/ las ni ring nas 'dren byed de/ /zhes bya ba la sogs pa'o/ /dben par byas kyang zhes bya ba ni skye bo dang lhan cig 'dug pa'i phyogs dang bral ba ni dben pa ste/ der byas pa nyid kyang yin na snang ba lta smos kyang ci dgos zhes bya ba ni yang gi sgra'o//dug za ba dang me la reg pa ni thams cad du yang bye brag med pa'i phyir ro/ /bya ba'i dus kho nar bag dbab par bya ba ma yin par ma zad de/ 'bras bu'i dus na yang yin no zhes bstan pa'i phyir/ de'i rnam smin yod pas zhes bya ba la sogs pa smos te/'jig rten 'dir ni 'phya ba la sogs pa'i nyes pa'i rgyur gyur pa dang / pha rol du ni ngan song gi rgyur gyur pa'i phyir ro/ /mi 'dra bar smin pa yin pas rnam par smin pa ste/ yid du mi 'ong ba 'bras bu zhes bya ba'i don to/ /gzhan du 'dod pa'i 'bras bu yang yod do zhes rtog pa la de yang ma yin te/ga las she na/ lung las dge slong dag gang la bsams bzhin du las byas shing bsags pas ni rnam par smin pa so sor myong bar mi 'gyur ro zhes nga mi smra ste/ sdig pa'i las kyis dmyal ba'o zhes pa la sogs pa'i tshig gis so//mthong ba'i chos nyid la yang mi 'dod pa'i 'bras bu snang ste/ des na yang 'di ltar gnas pa yin no/ /de bas na dang po 'di la 'dod pa'i 'bras bu ni med de de spyad par mi bya'o zhes bstan to/ /bsod nams byas pas zhes bya ba la sogs pa smos pa la/bsod nams byas pas de'i phyir kun du yid brtan par bya ste/ ji skad du khyed cag bsod nams kyis 'jigs par ma byed cig /de ci'i phyir zhe na/ 'di ni bden pa'i tshig bla dgas yin no zhes rgya cher gsungs pa ste/ bsod nams kyis ni bde ba thams cad 'dren par byed pa yin pa'i phyir ro//ci'i phyir sdig pa la yid brtan par bya ba ma yin par bstan ce na/ nang gi gdung bar byed pa'i phyir ro zhes bstan par bya ste/ bdag gis sdig pa byas pas zhes bya ba la sogs pa smos so//sun da zhes bya ba'i phag gsod pa 'chi ba'i dus su yid du mi 'ong ba'i rtags kyis nye bar gdungs te shi nas dmyal bar skyes pa 'phags pa shA ri'i bus mthong nas shin tu mya ngan byed pa de'i dbang du mdzad pa'o zhes gzhan dag zer ro/ /pas zhes bya ba'i sgra ni rgyu'i don te/sdig pa byas pa'i rgyus zhes bya bar sbyor te char gyi rgyus zhes bya ba'i don to/ /mya ngan byed ces bya ba ni shin tu gdung ba nyams su myong ba ste/ 'di ltar dper na sdig pa byed pas de'i 'bras bu nyams su myong ba na ji ltar blun pa bdag gis bya ba ma yin pa 'di lta bu la 'jug par byas zhes 'gyod pa'i bdag nyid gdung bar byed do//tshig ngan pa la sogs pa'i sdug bsngal dang phung khrol 'byung ba'i phyir gnas skabs thams cad du sdig pa 'di kho nas nye bar byed pa yin no zhes bstan par bya ste/ 'dir yang zhes bya ba ni mthong ba'i chos nyid de 'di nyid du 'bras bu 'byung ba'i phyir ro//gzhan du zhes bya ba ni skyes nas skye ba gzhan du myong bar 'gyur ro/ /gnyis kar zhes bya ba ni gnyis kar myong ba yin pa'i phyir te/ rang gi las las byung bas kha cig ni 'di dang pha rol du yang shin tu mya ngan byed do//'phags pa sor phreng dang ma skyes dgra dang / lha sbyin dang bum pa la sogs pa yang 'dir dper brjod par bya'o/ /de ltar su zhig mya ngan byed pa yin zhe na/ sdig pa byas pa zhes bya ba ste/ 'dis ni sdig pa bsags pa dang ngan par spyod pa rnam pa du ma nye bar sogs pa ste/sdig pa byas pa nyid kyi don ni pas zhes bya ba'i sgra'o/ /ci'i phyir zhe na/ de ni zhes bya bas bstan te/ gang byed pa de kho na nyid ni mi 'dod pa'i 'bras bu nyams su myong ba yin no/ /rgyu dang 'bras bu 'brel par bstan pa'i phyir ni zhes bya ba'i sgra smos so//gang gis mi 'dod pa'i 'bras bu bdag dang 'brel pa mthong ba des ni sngar nyams su myong ba'i sdig pa mthong ste yid gdung bar byed pa yin no/ /rab tu mya ngan byed ces bya ba la bar du rab tu zhes bya ba'i sgra phyis pa yin no/ /yang na mya ngan byed ces bya ba 'di nyid du mya ngan byed cing pha rol du nye du'i nang dang dgra'i nang dang dben pa dang mi dben pa la sogs pa brjod par bya'o//bdag gis bsod nams zhes bya ba ni mnyan yod na chos can zhes bya ba 'jig rten pa rnams kyis bkur ba zhig yod de/ de shi 'phos nas lha'i 'jig rten du skyes te yid dga' ba las brtsams nas tshigs su bcad pa gnyis gsungs so zhes gzhan dag zer ro//bdag gis bsod nams byas so zhes de ltar shes nas dga' zhing mgu bar gyur pa'o/ /gzhan dag ni/ bdag gi las rnam dag mthong nas/ /zhes brjod de/ 'bras bu yid du 'ong ba yin pa'i phyir rnam par dag pa 'di dge ba la rnam par dag pa zhes bshad do//'phags skyes pos gzhon nu rgyal byed nyes pa med pa bsad de/ de'i btsun mo'i 'khor du yang rol mo la sogs pa'i sgras dga' bar byed cing ji srid lha'i rol mo la sogs pa'i sgra byung nas de las brtsams te bstan pa'o//'di na dga' 'gyur zhes bya ba ni 'di nyid du 'phags pas so/ /gzhan du zhes bya ba ni dpal dang ldan par 'gyur bas so/ /gnyi ga ni mgon med zas sbyin dang rgyal byed la sogs pa bzhin no/ /bdag gis sdig pa byas bas gdung bar 'gyur//zhes bya ba ni 'phags skyes po 'khor dang bcas pa mes tshig pa las 'o dod 'bod cing shi ste dmyal bar skyes pa las brtsams pa'i tshigs su bcad pa gnyis gsungs pa'o zhes gzhan dag zer ro/ /gzhan dag ni lha sbyin las brtsams pa'o zhe'o//gdung bar byed pa dang mya ngan la khyad par ci yod ce na/ yid kyi gdung ba ni mya ngan no/ /lus kyi rnam par shes pa lnga'i gdung ba'o/ /yang na sdug bsngal ni rnam pa gnyis te/ bde 'gro'i sdug bsngal dang ngan 'gro'i sdug bsngal te/go rims bzhin du 'dir bstan to/ /yang na bdag dang gzhan las skyes pa'i gdung ba'o/ /yang na yon tan nyams pa dang sdig pa la sogs shing 'grub pa'o/ /yang na skye bo dam pa dang bral ba dang / skye bo ngan pa dang phrad pa zhes bya ba la sogs pa brjod par bya'o//'di gnyis kyis dga' ba dang rab tu dga' ba'i sgra gnyis kyi rgyu yang rab tu bstan pa yin no/ /bdag gis bsod nams byas pas zhes bya ba ni so ma nA sa zhes bya ba'i btsun mo legs par spyod pa'i bya ba la mchog tu byed cing bde bar gyur te/lha'i 'jig rten du skyes pa las brtsams so zhes zer ro/ /sdig pa byas pa las ni 'chi ba na ni 'jigs par 'gyur la bsod nams byas pas ni ma yin no zhes bstan pa'i phyir/ sdig pa byas shing zhes bya ba la sogs pa smos so/ / gang gi tshe byang chub sems dpa' rdo rje'i gdan la bzhugs pa de'i tshe bdud bye ba phrag sum cu rtsa drug gis yongs su bskor nas mtshon rnam pa sna tshogs dang chas pa las/ de nas gang byang chub kyi shing la gnas pa'i lha de rings pa rings par byang chub sems dpa'i drung du lhags nas thal mo sbyar te gsol ba bdud dang bdud kyi dpung mang po dag las khyed 'jigs par bya ba ma yin nam zhes pa dang /byang chub sems dpas sngon gyi de bzhin gshegs pas gsungs pa'i tshigs su bcad pa gnyis gsungs so//byas pa ni bsgrubs pa'o/ /sdig pa ni nyes par spyod pa'o/ /bsod nams ma byas la zhes bya ba ni legs par spyod pa ma bskyed pa ste/ mi ni 'chi bas 'jigs par 'gyur/ /zhes bya ba dang sbyar ro/ /'dir chos kyi sgra ni shes rab dang snying rje la brjod de/ de las gang zhig gol ba de la sogs pa nan tan du mi byed pa des ni gnyis po de ma bsgrubs pas bsod nams spyod par mi 'gyur ba ste/bsod nams mtha' dag ni de dang 'brel pa'i phyir ro/ /chos ma yin pa'i sgra yang 'dir mi shes pa dang snying rje med pa la brjod do/ /de gnyis la brten nas ni nyes par spyod de/sdig pa mtha' dag ni de la rag lus pa'i phyir ro/ /sdig pa'i las can 'chi bas 'jigs par 'gyur/ /zhes bya ba ni sdig pa byed pa'i sems can 'chi bas shin tu skrag pa yin te/ ngan song du 'gro ba dang sdug bsngal thob par dogs pa'i phyir ro//ji lta bu zhig ce na/ gru zhig ces bya ba smos te/ bzhon pa'i snod zhig pa'o/ /nyam chung zhes bya ba ni lus kyi rus pa dang bral ba'o/ /yang na rgal ba ma bslabs pa'o/ /chu chen ni rgya mtsho chen po'i nang ste/ de na gnas na ni ji ltar 'chi bas 'jigs par bya ba ma yin pa de bzhin no//ngas ni bya ba lus pa med pa dag byas te/ des na nga la 'jigs pa med do zhes bstan pa'i phyir/ bsod nams byas shing zhes bya ba ste gang ngas ni legs par spyod pa bsags pa zhes bya ba ni tshig gi lhag ma'o/ /sdig pa ma byas la zhes bya ba ni ngan par spyod pa cung zad kyang ma byas pa'o//bsod nams dang ye shes kyi tshogs yongs su rdzogs par bstan nas/ tshogs kyi lam bstan pa'i phyir/ dam pa rnams kyis sngon gyi chos spyad pas/ /zhes bya ba la sogs pa ste/ dam pa ni skyes bu dam pa rnams te/ gang gA'i klung gi bye ma snyed kyi de bzhin gshegs pa rnams so/ /gang chos ni 'phags pa'i lam ste/ de bdag gis spyad pa ni bsgoms pa ste 'byung bar 'gyur ba'i dbang du byas pa/ bsgom pa mngon du byed pa zhes bya ba'i don to/ /sngon gyi zhes bya ba ni yang dag par rdzogs pa'i sangs rgyas 'od srungs la sogs pas bsten pa ste/sngon 'gro ba de'i rjes su 'gro ba zhes bya ba'i tshig gis so/ /nga ni zhes bya ba ni de ltar bya ba byas pa'i phyir nams kyang 'chi bas skrag pa ma yin no zhes pa'o/ /brtan pa'i gru yis pha rol 'gro ba bzhin/ /zhes bya ba ni dper na 'ga' zhig pha rol du 'gro bar zhugs pa las brtan pa'i gru'i bzhon pa mi 'gyur bas ni rgal bar 'gyur te/bkra shis pa dang mngon par 'dod pa'i bzhon pa stobs dang ldan zhing rgal ba la mkhas pa de ni rgya mtsho chen po'i dbus na gnas kyang 'chi bas mi 'jigs pa de bzhin no//sdig pa'i tshoms te nyi shu rtsa brgyad pa'i rnam par 'grel pa rdzogs so// //sdig pa mtha' dag spangs shing legs par spyod pa'i khyad par la brten pa'i skyes bus ni ngang gis 'jig rten pa thams cad zil gyis gnon pa yin no zhes bstan pa'i phyir/ji srid nyi ma ma shar ba/ /zhes bya ba la sogs pa'i tshigs su bcad pa gnyis gsungs so/ /bstan ma thag pa'i sdig pa dang bsod nams ni zung gi skabs yin pas da yang de nyid phal cher tshigs su bcad pas phrugs su sbyar te bstan to//thub pa chen po'i cho 'phrul chen pos rdzogs byed la sogs pa zil gyis mnan pa las brtsams pa'o/ /de srid snang zhes bya ba ni dus de'i bar du phyogs 'ga' zhig tu gsal bar byed de bdag dang bdag gi gzhi'i phyogs tsam gsal bar nus pa yin no//gang yin zhe na/ srin bu me khyer zhes bya ba ste/ mkha' la gsal bar byed pa'o/ /ji srid nyi ma ma shar ba/ /zhes bya ba ni dus ji srid kyi bar du nyi ma shar cing 'od zer stong ldan ma byung ba'o/ /nyi ma shar bar gyur pa na/ /zhes bya ba ni nam mkha' la nyi ma sprin la sogs pa'i sgrib pa med par gyur nas shar bar gyur pa ste/de byung zhing gsal bar byed pa na srin bu me khyer sngon por 'gyur ro zhes sbyar bar bya'o/ /rnam par snang bar byed pa yin pas na nyi ma ste/ mnyam pa dang mi mnyam pa dag gsal bar byed ces pa'i don to//yang na snang ba thams cad mngon par zil gyis gnon par byed pa'o/ /sngon por 'gyur zhes bya ba ni 'od zer stong ldan 'byung bar gyur na srin bu me khyer 'od med par 'gyur te/ chen pos chung ngu zil gyis gnon pa'i phyir ro/ /ji ltar sngon por gyur ce na/'di ltar snang ba med ces bya ba smos te/ dang gi sgra ni gang gi phyir/ /zhes bya ba'i don to/ /'di ni mngon sum yin te/ gang phyir de ni sngon bzhin du snang ba med par 'gyur ro/ /dpe bstan nas de bsgrub par bya ba'i don smras pa/ snang zhes bya ba ste snang bar byed pa yin pas snang ba'o//rang gi grub pa'i mtha' gsal bar byed pa yin par gyur pa zhes bya ba'i don to/ /gang snang zhing gsal bar byed pa yin zhe na/ rtog ge pa rnams zhes bya ba smos te/ rdzogs byad la sogs pa 'jig rten pa rnams kyis brjod pa'i mkhas pa'o/ / rtog pas gnas pa ni rtog ge pa ste/ don mngon sum du ma byas pa'i phyir rang gi lung la sogs pa tsam la rjes su 'jug pa'o/ /gang ji tsam gyi bar du zhe na/ ji srid de bzhin gshegs ma shar/ /zhes bya ba yin te/ dus ji srid sangs rgyas bcom ldan 'das ma byung gi bar du'o//de bzhin nyid kyi don thams cad thugs su chud pa'i phyir de bzhin gshegs pa'o/ /'jig rten rdzogs sangs rgyas shar ba/ /zhes bya ba ni mtha' dag thugs su chud pa'i phyir rdzogs pa'i sangs rgyas te/ gang gi phyir sangs rgyas bcom ldan 'das 'jig rten du byung ba de'i bstan pa'i 'od kyis gsal bar byed pa las rab tu rtogs pas yang dag gdul bya'i 'jig rten dri ma med par gyur pa'o//rtog can mi snang zhes bya ba ni mang po'i nang na gcig kyang mdzes pa ma yin no/ /nyan thos mi snang zhes bya ba ni rtog pa can de'i tshig gi rjes su 'brang ba yang mi snang ba'o//yang dag par rtogs pa dang log par rtogs pas yang dag pa dang log pa la mngon par zhen par 'gyur ro zhes bstan pa'i phyir/ gces min zhes bya ba la sogs pa tshigs su bcad pa gnyis so/ /gces pa ni bzhi ste/ gtam dang / lta ba dang / ting nge 'dzin dang / rnam par grol ba'o/ /gtam snying por byed pa ni 'di la dge slong 'du byed thams cad mi rtag pa dang / zag pa dang bcas pa thams cad sdug bsngal ba dang / chos thams cad bdag med pa dang / mya ngan las 'das pa ni zhi ba'o zhes gtam brjod pa'o//'di nyid kyis lta ba thob par 'gyur ba dang / 'di nyid kyis ting nge 'dzin thob par 'gyur ba dang / 'di nyid yid la byas na sems rnam par grol bar 'gyur ro zhes bstan pa'o/ /gces min zhes bya ba ni mi brtan zhing mi rtag pa dang bdag med pa la sogs pa'i tshul gyi dngos po ste 'khor ba zhes bya ba'i don to//gces par blos 'dzin cing zhes bya ba ni gang 'di la snying po yod bar blos 'dzin pa de ni de ste/ nges par 'byung ba la sogs pa la phyin ci log skyed pa'i phyir ro/ / gces la gces par mi rtog pa/ /zhes bya ba la/ 'dir mya ngan las 'das pa ni gces pa ste/ dge zhing rtag pa'i phyir dang / mchog yin pa'i phyir/ de na 'dod pa'i longs spyod la sogs pa'i 'byor pa med pa'i phyir snying po ma yin par 'du shes pa'o/ /'di la snying por 'du shes gang la yod pa de ni gces par rtog pa'o//gces pa ma yin par rtog pa ni gces min rtog pa'o/ /de thob par byed pa'i lam gyi thabs kyang med de/ de lta bu'i blo dang ldan pa ni gces pa las gces pa ma yin par rtog pa nyid do/ /des ni gces pa thob mi 'gyur//zhes bya ba ni mya ngan las 'das pa'am de'i lam mi 'thob pa ste/ de la grol ba med pa'i phyir ro/ /gang las she na/ 'di ltar/ log par kun rtog spyod yul can/ /zhes bya ba smos te/ log par nges par rtog pa'i spyod yul dang dmigs pa gang la yod pa de nyid do//yang na tshul bzhin ma yin pa yid la byed pa shas che ba'o/ /gces la gces par 'du shes pa/ /zhes bya ba ni gang yang mya ngan la sogs pa'i don snying po dang mchog dang thabs su shes pa'o/ /gces pa ma yin pa la yang gces pa min pa zhes bya bar shes pa'o//legs par kun rtog spyod yul can/ /zhes bya ba ni phyin ci ma log pa'i yul can te/ dran pa nye bar gzhag pa bzhi la gnas pa'i spyod yul can yin pa'i phyir ro/ /log pa la mngon par zhen pas ni gces pa mi 'thob cing phung khrol skyes pa yin no zhes bstan pa'i phyir/'di na lta dang zhes bya ba la sogs pa smos so/ /mnyan yod na zla ba bzhi pa'i ku mu da'i dga' ston la bab pa na rgyal byed kyi tshal nas mnyan yod kyi bar du mtshan mo mar me gsal bar gyur to/ /de na skye bo'i tshogs 'ong ba dang 'gro ba dag gi mu stegs can gyi mar me dang /lha bshos dag la phye ma leb ltung ba mthong nas ltung ngo ltung ngo zhes smras pa las de las brtsams pa'o/ /'khor ba ni nye bar len pas nye bar gzung ba ste/ 'dod pa la sogs pa nye bar len cing 'dzin pa zhes bya ba'i don to//rgyug pa zhes bya ba ni las des byas shing bskul ba'i dbang gis 'jig rten 'di nas pha rol du rgyun mi 'chad par 'khor ba'o/ /snying por 'gro bar mi 'gyur te/ thar pa'am de'i lam thob par mi 'gyur ba'i don to/ /gzhan dag tu ni pha rol phyin par mi 'gyur ro zhes brjod do/ / chings ma gsar dang gsar du 'phel ba dag/ /ces bya ba la 'dir las dang nyon mongs pa ni 'ching bar bshad de/ skye bo de dag ni las kyi 'ching ba gsum gyis bcings so zhes bya ba'i tshig gis so/ /nyon mongs pa dang las kyi 'ching ba ni sngon ma byung zhing ma byung ba rjes su 'ong bas chung ngu dang 'bring dang chen po 'phel zhing sogs pa'o//me nang zhes bya ba ni pad t+li ga to zhes bya ba 'gro ba la zer te/ me zhes bya ba dang 'dir sbyar ro/ /khyad par du gdung bar byed pa ni 'dir me ste/ dmyal ba zhes bya ba'i don to/ /yang na ngan song gsum mam 'khor ba'o/ / der 'gro ba ni phyin pa'o/ /'dir dpe bstan pa/ phye ma leb dang 'dra zhes bya ba dper na phye ma leb ji ltar 'gro ba'o/ /gang du zhe na/ me nang zhes bya ba ste/ sgron ma la sogs pa'i mer zhes bya ba'i don to/ /de ltar 'khor bar 'khyam pa'i rgyu gang yin zhe na/ de nyid bstan pa/lta dang nyan dang zhes bya ba la lta ba ni mthong ba ste/ 'jig tshogs la lta ba la gnas pa'o/ /de la mngon par zhen pa ni lhag par chags pa ste/ gang de 'khor ba'o/ /thos pa ni log pa'i grub pa'i mtha' ste/ de dang phyin ci log gi blos grub cing rjes su gnas te 'khor bar 'khor ba'o//yang na lta ba ni da ltar byung ba la'o/ /thos pa ni 'das pa dang ma 'ongs pa la'o/ /yang na lta ba ni yid du 'ong ba'i gzugs la sogs pa rjes su myong ba na mi rtag pa la sogs pa'i skyon ma rtogs shing lhag par chags pa'o/ /mngon par 'dod pa'i yul la chags pas gang la yang mi shes par 'gyur te/gzhan las thos pa'i brag las mchod pa dang me la 'jug pa dang zas gcod pa la sogs pa las 'byor par 'dod cing byed par 'dod pa ni thob pa la lhag par chags pa yin no/ / yang na 'dod pa bsod nams dang bdag nyid la ngal ba la sogs pa'i sbyor bar brjod par bya'o/ /mngon par zhen pa ni phyin ci log pa la mngon par zhen pa'o/ /'jig rten 'di ni zhes bya ba ni gcig tu de ltar yang dag par zhugs pa rnams kyang yang dag par yod pa'i phyir ro//yang dag pa'i yid la byed pas ni the tshom dang bral zhing g.yang sar lhung ba las ldog pa yin no zhes bstan pa'i phyir 'di la myong 'gyur zhes bya ba la sogs pa smos so/ /tshe dang ldan pa nam gru la the tshom dang 'gyod pa gang ci yang yod pa de thams cad 'phags pa shA ri'i bus bsal zhing ji tsam na dgra bcom par gyur te/de'i tshe yang the tshom med par gyur nas de la bstan pa'o/ /the tshom zhes bya ba ni yid gnyis so/ /ji snyed pa zhes bya ba ni sdug bsngal mthong bas spang bar bya ba la sogs pa mtha' dag go/ /'di na zhes bya ba ni 'jig rten 'di na'o//tha dad pa ni so so ba ste 'jig rten gzhan dag tu yang 'di'i bden pa'i yul yin pa'i phyir ro/ /yang na nang dang phyi rol gyi gnas la'o/ /yang na bdag nyid dam gzhan la'o/ /'di la myong 'gyur zhes bya ba myong bar byed pa yin pas myong ba ste/ gang tshe 'di nyid la smin pa'o/ /gzhan du myong bar byed pa yin pas gzhan du myong bar 'gyur ro/ /rang gi rgyud la rnam par smin pa'i 'bras bu ster ba dang / gzhan gyi rgyud la bdag po'i 'bras bu ster ba'o/ /yang na 'dzin par byed pa'i rim pas so/ /'di la myong byed pa zhes bya bar gzhan dag tu brjod de/mthong ba'i chos la myong bar 'gyur ba'o/ /gzhan la myong 'gyur ba zhes bya ba ni skyes nas myong bar 'gyur ba'o/ /de dag sems par byed pas rab tu spong zhes bya bas ni the tshom mtha' dag go/ /sems par byed pa ni rnal 'byor te yang dag pa yid la byed pas 'jug pa'o//rab tu rnam par spong ba zhes bya ba ni gnyen po'i khyad par gyi mthus yongs su 'dor ba'o/ /re zhig dgag pa'i gnyen po bstan pa'i phyir 'bad pa zhes bya ba smos te/ yang dag par spong ba bzhi bsgoms pas so/ / gtan nas 'byin pa'i gnyen po bstan pa'i phyir/ /tshangs spyod spyod pa dang zhes bya ba smos te/ 'phags pa'i lam bsgoms pas so/ /gang dag de ltar 'jug pa nyid ni drang srong chen po'i cha byad rigs pa yin no zhes bstan pa'i phyir/ gang zhig snyigs ma yod bzhin du//zhes bya ba la sogs pa dag go/ /lhas bskul nas 'od ma'i tshal na gnas pa'i bram ze dang khyim bdag dag gis ko ka li ka'i thad du lhags te smras pa/ khyod la 'di ni rigs pa ma yin te/ nyan thos chen po dag dang 'gal bar byed pas nged cag kyang dga' ba ma yin no zhes pa dang /de phrag dog gis sdig pa 'dod cing tshig mi snyan pas bya bar byed do/ /ji tsam na tshe dang ldan pa kun dga' bo la khyod song la 'od ma'i tshal gyi lam srang dang bzhi mdo dag tu tshigs su bcad pa gnyis po 'di thon cig ces gsungs so/ /'dod chags kyis kun nas bslang ba'i lus la sogs pa'i las ni snyigs ma ste/gnod par byed pa'i gnas su gyur pa'i phyir dang / zil gyis gnon par byed pa'i mtshan mar gyur pa zhes bya ba'i don to/ /de gang la yod pa de ni snyigs ma yod bzhin du zhes bya ba yin te/ snyigs ma dang bcas pa'o//sogs pa zhes bya ba'i sogs pa'i sgras phyis pa yin te snyigs ma dang bcas pa ni nyes pa dang ldan pa zhes bya ba'i don to/ /snyigs mas bslad pa'i phyir te gsum pa'o/ /ngur smrig gos zhes bya ba ni shing gi rtsa ba lta bu ste/ nog po la sogs pa bskol ba las byung ba'i tshon gyis bsgyur ba'i gos de ni gos tshon can te ngur smrig gi gos so//des 'gebs shing bkab pa ni gyon pa'o/ /dul dang des pa med pa zhes bya ba la dul ba ni dbang po sdom pa'o/ /des pa ni sems dul ba ste dge ba la mngon par dga' ba bskyed pa'i phyir ro/ /yang na nges pa ni bzod pa'o//dul ba dang des pa dang bral ba gang yin pa de ni de'o/ /de nyid kyis ni drang srong chen po'i rgyal mtshan nam ngur smrig gi gos yongs su bgo bar rigs pa ma yin no/ /gang zhig snyigs ma rnams spangs nas zhes bya ba ni gang yang snyigs ma yongs su spangs par gyur pa'o//tshul khrims la brten pa nyid kyis ni yin no zhes bstan pa'i phyir/ tshul khrims legs par mnyam gzhag pa/ /zhes bya ba ste/ so sor thar ba'i sdom pa la shin tu gus pas 'jug pa'o/ /yang na snyigs ma spangs pa nyid kyis ni tshul khrims la sogs pa spong ba ma yin no zhes bstan pa'i phyir/tshul khrims zhes bya ba smos so/ /dul dang nges par sdom pa zhes bya ba ni dbang po dang yid dam/ de bzhin du bzod pa dang ldan pas so/ /de ni de nyid de sngar bstan pa'i skyon dang bral zhing yon tan dang ldan pa nyid kyis ni skye bo dge ba'i tshul du 'gyur gyi gzhan du ni ma yin no/g.yo sgyu 'jungs dang ldan pa'i mi/ /zhes bya ba la sogs pa smos te/ dge slong zhig mchog tu mdzes la kha dog bzang zhing sha rgyas pa dang ldan pa thos pa mang zhing snyan par smra ba/ g.yo sgyu che zhing ser sna dang ldan pa zhig rung ba dang gzhan 'dod pa chung ba las dgra bcom par gyur cing dgon pa la gnas pa ste/de las tshigs su bcad pa gnyis gsungs so/ /smra bar byed pa ni snyan pa'i tshig brjod pa'o/ /tsam gyis zhes bya ba ni de las gzhan pa'i yon tan med pa ste/de tsam gyis ni dge ba'i tshul du mi 'gyur te/ mi dge ba dag la yang de yod pa'i phyir ro/ /kha dog dang ni gzugs ldan pa/ /zhes bya ba ni yang na kha dog dang dbyibs shin tu mdzes pas sdig pa byed na yang de dang ldan pa yin te/ gzugs dang ldan pa ni 'dir bsngags pa'i gzugs so//pho mchog ces bya ba ni rang bzhin gyis dge ba ste dge ba smos pa'o/ /ci'i phyir de pho mchog ces bya bar mi chud ce na pho mchog ma yin pa la de yod pa'i phyir ro/ /g.yo sgyu 'jungs dang ldan pa zhes bya ba la sgyu ni gzhan slu ba'i bdag nyid kyi sgyu gang la yod pa'o/nor dag la kun du 'dzin pa gang la yod pa de ni 'jungs pa'o/ /sems gya gyu ba'i mtshan nyid de gzhan dang gzhan du ma yin pa'i mtshan nyid ston pa'i bdag nyid kyi g.yo dang ldan pa ni g.yo'o/ /ngan pa'i mtshan nyid gsum po 'di dang ldan pa ni ngan pa'i rtags so//gang zhig de dag rnams zhes bya ba ni gang yang bdag nyid chen po smra bar byed pa dang / kha dog dang gzugs mdzes pa dang mi ldan pa yin na yang sgyu dang 'jungs pa dang g.yo'i bdag nyid chos gsum po 'di dag rtsa nas phyung zhing thob pa bcad pa yin te/ ji lta bu zhe na/ ta la'i mgo bo bzhin bcad nas/ /zhes bya ba smos te/ dper na ta la'i rtse mo bcad na shing ta la rtsa ba nas skam par 'gyur ba de bzhin du/ skyon ni bstsal pa de'i zhes bya ba de g.yo dang sgyu dang 'jungs pa yongs su spangs pa'i phyir ro/ /blo ldan zhes bya ba ni shes pa khyad par can la brten pas ni skyon spong ba yod pa'i phyir ro//pho mchog yin par brjod par bya/ /zhes bya ba ni skyes bu dam pa yin no zhes bshad do/ /kha dog dang gzugs bzang ba la sogs pas dam pa rnams kyi rtags su nges par mi bya'o zhes bstan pa'i phyir/'jig rten 'di na zhes bya ba la sogs pa smos so/ /de'i tshe gos med bdun dang skra'i la ba can bdun dang / ras gcig pa bdun dang / lus tsho zhing sbom pa 'khor dang bcas pa rgyal byed kyi tshal gyi sgo dag tu spyod cing gnas pa de dag gsal rgyal gyis mthong nas stan las langs te/bla gos phrag pa gcig tu gzar nas thal mo sbyar te lan gsum gyi bar du bdag gi ming nas nyan par byed do/ /ji tsam na bcom ldan 'das kyis ci'i phyir khyed de ltar byed ces bka' stsal pa dang / btsun pa bdag gis ni 'jig rten na 'di dag dgra bcom pa lags so zhes dgongs nas/rgyal po chen po khyed kyis shes par gyis shig /khyod kyis legs par dgra bcom pa yin nam ma yin pa ma rtogs te yang de'i sems ji lta ba bzhin du ma shes so/ /rgyal po chen po lhan cig bsten pas ni tshul shes par bya ba yin te/de yang dus shin tu ring po nas shes pa yin gyis gzhan du ma yin no/ /de yang yid la byed cing yid la mi byed pas ma yin pa dang / de yang shes rab 'chal bas ni ma yin no/ /phongs pa'i dus su brtan pa dang / spyod pa gtsang ba dang /gtam dang 'brel ba'i gtam rab tu shes pa ste/ des na tshigs su bcad pa gnyis gsungs so/ /mdog gzugs kyis ni legs par mi brtag ste/ /zhes bya ba ni mdog dang gzugs bzang ba tsam gyis ni skyes bu dam pa zhes mtshon par rung ba ma yin te/ ji skad du/ zhi ba yi ni gzugs can las/ /'jigs pa mi 'byung nges med de/ /mar me'i rtse mo dkar ba las/ /dud pa nag po'ang cis mi 'byung / /zhes bshad pa lta bu'o/ /lhan cig 'dug kyang dus cung zad kyang rtogs pa dang yid ches par bya ba ma yin no zhes bstan pa'i phyir/legs par ma brtags par du zhes bya ba smos te/ yun thung ngur legs par spyod pa mthong ba las ni yid brtan par mi bya ste/ ci'i phyir zhe na/ 'jig rten 'di na legs par ma bsdams pa/ /phal cher legs bsdams rtags kyis sgyu byed pas/ / zhes bya ba smos te/ sdig pa las gtan du ldog par legs par spyod pa de dag gi rtags ni cha byad de gang dag ma bsdams shing tshul ngan pa dang / 'tsho ba med pas 'jigs shing skrag par gyur pas phal cher mi'i 'jig rten du gzhan slu ba'i phyir sgyu byed de/ phub dang mdung dang ldan pa la sogs pa 'dir dper brjod par bya'o/ /'di nyid kyi don mthun pa'i dpes bstan pa'i phyir/ ra gan kha bsgyur zhes bya ba'o/ /nang na khong pa rab gdug ces bya ba ni nang gi yid la byed pa ni nyon mongs pa dang sdig pa rnams kyis shin tu bslang pa yin te/phyi rol gyi lus la ni 'phags pa'i tshul bzhin du gang gi cha byad zhi bar byas pas zhes bya ba'i don to/ /rgyu ba zhes bya ba ni grong nas grong dang / khyim nas khyim du nye bar 'gro ba ste/ rmongs pas 'di ni bde ba cung zad tsam la brkam zhing gzhan gyi dbang du bdag nyid byas pa yin no zhes rgyu bsgrub pa'i phyir 'di ltar gyi sgra'o//'di na gcig pu 'khor dang bcas par zhes bya ba ni slob ma nye gnas dang 'khor gyi tshogs kyis yongs su bskor ba'o/ /'jig rten du de ji ltar rgyu ba yin zhe na/ 'dir dper bstan pa kha bsgyur zhes bya ba smos te/gzugs brnyan dang bcos ma ste 'di ltar skye bo dam pa'i cha byad tsam de 'dzin pa'o/ /dam pa'i skye bo bzhin du snang la don dam pa ni ma yin te/ skye bo ngan pa nyid do/ /de ji ltar dam pa rnams ltar kha bsgyur ba yin zhe na/ khong pa rab gdug ces bya ba la sogs pa'o/ ji lta bu yin zhe na/ ra gan lta bur mi 'tsham zhing / /zhes bya ba ni zangs ma la sogs pa gser gyi chu dang leb ma la sogs pas phyi rol gyi phyogs mdzes par byas pa'o/ /rnam brgyan phyi rol nas ra gan gyi dud pas bdugs pa lar gan lta bur zhes brjod do/ /yang na zangs ma la sogs pa'i rang bzhin byas la/dud pa'i bye brag gis gser gyi mdog nyid du byed de/ gzhan slu ba'i phyir ro/ /lcags phyed ma sha bzhin du zhes bya ba ni lcags dang zangs ma la sogs pa'i rang bzhin 'di ni lcags phyed do/ /lcags kyi phyed kyang yin la ma sha yang yin pas lcags phyed ma sha'o//ma sha'i sgra ni 'dir ba na la brjod de/ phyed zangs ma la sogs pa las byas nas phyed ni gser la sogs pas phyi rol nas bzo byas te/ des 'jig rten slu bar byed do/ /gser gyis g.yogs pa yin pas g.yogs pa ste nang gzer bu la sogs pas sbrel zhing lcags las byas la phyi rol gser las byas pa ni pa na zhes pa'i don te//dper na 'di ltar rna rgyan dang kAr ShA pa Na bcos mas 'jig rten na slu bar byed pa de bzhin no/ /nang du khong pa gdug pa'i nyes dmigs bstan pa'i phyir/ gang zhig rde 'gengs zhes bya ba la sogs pa smos so//gnas gzhan zhig na dge slong rab tu mang po gnas te/ gnyid che zhing le lo che ba dang / 'phyar ba dang bza' btung sogs la longs spyod mchog tu byed pa dag ji tsam na bcom ldan 'das kyis lha'i spyan gyis gzigs te/ de las brtsams nas 'di gsungs so//gnyid ni ldog pa dang zhes bya ba ni gang la gnyid shas che ba yod pa ni gnyid ldog pa ste gnyid shas che ba zhes bya ba'i don to/ /kha zas shas cher zos pa las gnyid sogs par 'gyur ro zhes bstan pa'i phyir/ / rde 'gengs zhes bya ba ste/ shas cher za zhing spyod pa nyid de kha zas mang du za ba zhes bya ba'i don to/ /gang bza' ba dang btung ba shas cher spyod pa de ni gnyid kyis non par 'gyur ro/ /de nyid kyis ni spyod lam nyams pa bstan te/ nyin dang mtshan zhes bya ba nub mo dang nyin par ro//'gre ldog nyal byed pa zhes bya ba ni 'brel pa ste yongs su 'gyur zhing 'pho ba'o/ /spyod lam gcig gi nang du nges pa med par rim pa gzhan spyod pa'o/ /yang na kun du rmongs shing yongs su 'khor ba ste/ des nyal ba'i gnas skabs kyi tshul gang la yod pa'o/ /nang gi skyon gnyid bstan nas phyi rol gyi bstan pa'i phyir/phag chen ji ltar zhes bya ba smos te/ dper na phag chen po lus rgyas zhes bya ba rtag tu 'gre ba dang mthun pas gnas pa'o/ /gang du phag la sogs pa de ni bag yangs su gnas pa'i phyogs zhes bya ba'i don to/ der ni rgyas pa ste bshang gci 'byung ba'i bdag nyid kyi phyis khung du rgyas te/ der nye bar 'phel zhing de nyid la 'gre ba dang ldog pa mngon par dga'i/ gzhan du ma yin te ji ltar de phyi sa khung gi nang du rgyun du 'gre zhing ldog la nyal ba de bzhin no/ /gnyid log pa'i skyon dang bral na ni khyad par 'thob pa yin no zhes bstan pa'i phyir/mi ni zhes bya ba la sogs pa smos so/ /rgyal po gsal rgyal lus shin tu tsho zhing zhi bas lus rngul bar gyur nas bcom ldan 'das ga la ba der song nas 'di skad du/ btsun pa bdag gi lus shin tu sbom la lci bas shin tu nyon mongs shing g.yar ngo tsha bar gyur to zhes gsol pa dang /de las tshigs su bcad pa 'di gsungs so/ /de yang dang yang du mi 'og ma las thos te/ mnyan nas rang gi lus la bris shing rgyal pos de bzhin gshegs pa la phyag 'tshal lo phyag 'tshal lo zhes rgya cher de bzhin gshegs pa la phyag 'tshal bar byed do//mi ni zhes bya ba ni mi nyid yon tan dang skyon sogs pa'i zhing yin te/ gang gi phyir mi ni las kyi zhing yin pa'i phyir ro/ /lha ni ma yin te bag med pa'i phyir ro/ /yi dags la sogs pa'i 'gro ba ma yin te/sdug bsngal gyis gtses pa'i phyir ro/ /rtag tu zhes bya ba ni rgyun du'o/ /dran pa dang ldan pa zhes bya ba la/ dran pa'i sgra ni nyams su myong ba dang dran pa dang de kho na nyid yongs su brtags pa la brjod de dran pa'i las yin pa'i phyir ro/ /de yang lus kyi rjes su song ba'i dran pa ste/de'i chung bar 'gyur zhes bya ba la sogs pa dang sbyar ro/ /ji skad du dran pas sgo bsrungs bar gyur pa dang / shes rab kyi ra ba dang ldan par gyur na ni mi dge ba spong zhing dge ba bsgom par 'gyur ro zhes so/ /'dis ni nang gi gdung bar byed pa spong bar byed pa'i rgyu bstan to//da ni lus la gnod pa bstsal ba'i rgyu bstan te/ tshod dang shes pa zhes bya ba ni tshod rig pa'o/ /zas ni nyams su myong bas nye bar longs spyod pa'o/ /gang yang de ji lta ba bzhin du shes pa ste/ 'di ni mthun pa'o 'di ni mi mthun pa'o zhes shes nas phan pa ni za la mi phan pa ni spangs pas chung ba'am srab pa 'thob par 'gyur ro//'di nyid bstan pa'i phyir/ de yi sdug bsngal chung bar 'gyur/ /zhes pa ste/ de la rlung la sogs pa'i nad 'byung bar mi 'gyur la/ gal te las kyi dbang gis 'byung na yang chung ba dang nyung ngu rgyud la 'byung ste/gang gi phyir 'du 'phrod tshogs na ni 'di ltar yan lag thams cad tshang ba yin par 'dod/ dal bus 'ju bas zhes bya ba ni yun ring bas 'ju zhing rim gyis rim gyis 'ju zhing nyams su myong bas de'i mthus 'byung ba chen po rnams 'phel zhing na tshod yun ring du gnas pa yin no//yang gi sgra ni dang gi don nam yang na rim pa gzhan du sbyar ba ste/ tshe yang zhes bya ba dang 'dir sbyar ro/ /'ju bas nad bsal zhing des 'jigs pa med pa 'ba' zhig tu ma zad kyi sngar bstan pa'i dam pa'i spyod pas 'chi bas kyang 'jigs pa med par bstan pa'i phyir/tshe yang srung bar byed ces bya ba smos te/ des 'byung ba rnams sogs pas yun ring du 'tsho bar byed do/ /zas kyi tshod shes pa la sogs pa med pa'i nyes dmigs bstan pa'i phyir/ gang zhig dbang po zhes bya ba la sogs pa smos so//dge slong zhig gnyid dang rmugs pa la sogs pas non pas dge ba'i mtshan ma yid la mi byed de/ de tshangs par spyod pa la mi dga' bas de'i mkhan pos don 'di smras te/ de dang bcas par bcom ldan 'das kyi thad du khrid pa las ji tsam na de la chos bstan te/dge slong so sor thar pa'i sdom pa la sogs pas bsdam par bya'o zhes bya ba la sogs pa nas/ tshigs su bcad pa gnyis gsungs so/ /bdag gi zhes bya ba ni rjes su lta ba dang mthong ba zhes bya ba'i don to/ /gang la gtsang mar rjes su lta ba gang yin pa de ni gtsang mar lta ba ste/gtsang mar lta ba yang bud med kyi gzugs mthong na yid du 'ong bar yid la byed do/ /yang na gtsang bas rjes su lta ba ste/ phyin ci log dang 'brel pa'i phyir ro/ /'dod pa la sogs pa'i rnam par rtog pa la lhag par zhen pa bstan nas de las byung ba'i spyod pa bsal bar bstan pa'i phyir/gnas byed pa zhes smos te/ gzugs la sogs pa'i yul la nye bar longs spyod pa la 'jug pa'i phyir lan tshwa'i chu dang 'dra bar sred pa 'phel bar 'gyur te/ de nyid la gnas pa'o/ /gang zhig dbang po ma bsdams shing zhes bya ba la/dbang po dul ba dag ni 'dod pa'i longs spyod spong ba yin te/ dbang po rnams yul dag las sdom zhing yang dag par bsdams pa dang ldan pa dang shin tu bsdams pa'o/ /mig la sogs pa gzugs la sogs pa la mngon par bsdams pa ste/gzugs la sogs pa'i yul dag las ma bzlog cing shin tu 'byung ba'i phyir ro/ /'dir rgyu bstan pa/ zas kyi tshod kyang mi shes la/ /zhes bya ba la mang du zos pas ni dri ma la sogs dang dbang po rnams 'khrul bar 'gyur ba'i phyir te/de nyid kyi phyir/ dran pa nyams dang le lo can/ /zhes bya ba le lo ni bya ba ngan pa la sems g.yengs pas dge ba'i bya ba dag la spro ba med pa ste/ bya ba ngan pa la gnas pas byas pa'o/ /dran pa nyams pa ni lus su gtogs pa'i dran pa dang bral ba'i phyir ro//de ni 'dod chags rnams kyis bcom/ /zhes bya ba ni de nyid ni nyes pas bcom zhing zil gyis gnon pa yin te/ rjes su chags pa'i kun du sbyor bas zil gyis gnon pa zhes bya ba'i don to/ /ji lta bu zhe na/ /rlung gis mi brtan ljon shing bzhin/ /zhes bya ba ste/ dper na rlung gi shugs drag po'i mthus ni shing rtsa ba ma zug cing chung ba zil gyis gnon pa de bzhin no/ /brtson 'grus ldan pa zhes bya ba ni brtson 'grus brtsams pa ste/ mngon par brtson pa gang la yod pa de ni de nyid do/ /so sor dran pa zhes bya ba ni lus su gtogs pa'i dran pa dang ldan pa'o//mi tshoms pa ni gnod par mi 'gyur ba'o/ /rlung gis ri bo mi g.yos bzhin/ /zhes bya ba ni brag tshogs pa ni ri ste/ dper na brag gi rang bzhin mi 'gyur ba'i ri ni rlung gi shugs chen pos kyang mi bsgul ba bzhin no/ /lhag ma ni snga ma las bzlog par shes par bya'o/ / phal cher dben pa'i gnas la ni zhe sdang bar byed de/ 'dod pa'i bde ba tshol ba nyid ni 'dod chags la sogs pas zil gyis gnon pa'i phyir ro zhes bstan pa ni/ dgon pa dga' bar bya 'os pas/ /zhes bya ba la sogs pa'o/ /mnyan yod na gnas pa'i skye bo'i tshogs rgyal byed kyi tshal dang nye bar mtshan thog thag dga' ston byed de/de la dge slong kha cig rol mo'i sgra la sogs pa thos nas 'dod pa la sogs pa'i rnam par rtog pas rnam par rtog par byed do/ /kha cig ni mi rtag pa yid la byed pas nges par 'byung ba la sogs par rnam par rtog par byed de/de la bstan pa'i tshigs su bcad pa gnyis po 'di gsungs so/ /gzhan dag ni gnas brtan seng ldeng nags pa las brtsams so zhes zer ro/ /skyes bu dam pa rnams ni dgon par shin tu dga' bar bya dgos pa ste/ dga' ba'i gnas yin pas so/ /gzhan du ni g.yeng ba'i rgyu yin pa'i phyir ro//yang na shing dang me tog dang rtsa ba dang mtsho la sogs pa rnam pa sna tshogs pas mdzes par byas pa'i phyir ro/ /dgon pa ni grong las dpag tshad gcig gi mtha'i phyogs te/ yongs su bzung ba med pa des de'i ched du rtsod pa med pas so//ra n+ya ni g.yul 'gyed pa ste/ de dang rjes su mthun pa ni/ ra n+ya ste grong ngo / /de med pa gang yin pa de ni ar n+ya ste dgon pa'o/ /de la skye bo mi dga' yang / /zhes bya ba ni so so'i skye bo mngon par dga' ba mi 'thob pa yin te/ de'i khyad par mi mthong ba'i phyir ro/ /de ltar na gang zhig dga' ba yin zhe na/de la 'dod chags bral ba dga'/ /zhes bya ba ste/ yongs su 'dzin pa med cing chags pa med pa'i phyir dang / dgon pa la goms pa'i phyir mngon par dga' ba yin te/ ji skad du/ dam pa rnams ni nges par 'byung la legs bslabs phyir//der dga' khyim gyi gnas la spyugs pa bzhin du sems/ /ri dgas mo yis btogs pa'i lo ma'i nags tshal ni/ /de yi khyim gyi khang pa mchog nyid yin rig bya/ /zhes bshad pa'o/ /'dod pa tshol bar byed rnams min/ /zhes bya ba ni gang yang gzhan 'dod pa'i bde ba tshol bar byed pa de dag ni yul med pas dgon pa la mngon par mi dga'o//yang smras pa/ mi yi rus pas khyab pa yi/ /'khor ba dag la rab dga' ste/ /'dod pa'i yon tan lngas khyab pa'i/ /grong la byis pa dga' ba yin/ /zhes so/ /'o na dam pas bsten pa'i gnas de nyid ni dga' ba'o zhes bstan zhe na/grong zhes bya ba ste rtsig pa dang bcas pa dang / gnas dang bcas pa dang / skye bo mang pos bsten pa'i phyogs ni grong ngo / /de na dam pa gnas na ni brgyan par byed pa yin no/ /gal te dgon pa zhes bya ba ni skye bo rgyu ba med pa ste nags kyi mtha'o//nags kyi gnas cung zad dma' ba ni chu klung dang sman ljongs la sogs pa'o/ /cung zad mtho ba ni ri'i rtse mo dang thang dang zhol la sogs pa'o/ /de yang yin pas gnyi ga bstan pa'i phyir/ gshong ngam thang zhes bya ba smos so/ /gang na 'phags pa bzhugs pa'i zhes bya ba ni gang dang gang nyid du ste grong dang sa'i phyogs dag tu dam pa'i spyod pa dang dam pa gnas pa'o//sa de yid du 'ong ba yin/ /zhes bya ba ni sa yang yin pas sa de'o/ /dga' bar bya ba'i dngos po yin pas yid du 'ong ba'o/ /gang dang gang du dam pa gnas pa de dang de'i sa ni de las 'byung ba'i gzi brjid kyis de las mngon par dga' ba'i lha dag gnas pa'i phyir yang mngon par dga' ba yin te/ji skad du/ gang du dam pa gnas pa de/ /yon tan gyis ni brgyan pa ste/ /de ni bkra shis yid 'ong dang / /de nyid stegs dang dka' thub nags//zhes bshad pa'i phyir ro/ /gang du ngang tshul ngan pa can gnas pa der ni des par de'i tshogs thams cad rnyog pa yin no/ /gang du dam pa'i tshul gnas pa der ni snod kyi 'jig rten gyi yang rgyan du gyur pa yin na/ sems can gyi 'jig rten gyi lta smos kyang ci dgos/de bas na skye bo dam pa la brten pa ni spang bar mi bya'o zhes bstan to/ /grong gang dag ji snyed par skye bo ngan pa gnas pa'i sa der ni yid du mi 'ong bar nges pa yin no zhes shes par bya'o/ /dam pa rnams kyi phan yon bstan pa'i phyir/ dam pa ring na zhes bya ba la sogs pa'o//pur+Na bar d+ha na ga ma na zhes bya ba'i grong khyer du dgra bcom pa zhig nam mkha' la thag ring po nyid nas 'gro ba mgon med zas sbyin gyi bu mo ma ga d+hA bzang mos mthong nas sngon gyi sangs rgyas kyis gsungs pa'i tshigs su bcad pa 'di smras so/ /de nas bcom ldan 'das kyis kyang dge slong dag sngon gyi sangs rgyas bcom ldan 'das kyis gsungs pa'i tshigs su bcad pa 'di zung shig ces nas bka' stsal to//ring nas zhes bya ba ni ring ba nyid nas te/ sa'i steng nas nam mkha' dpag tshad du mar gnas pa de yang nye bar dmigs pa ste/nyi ma'i dkyil 'khor la sogs pa bzhin no/ /yang na dpag tshad du ma las gzhan pa'i phyogs na gnas kyang yon tan khyad par can dang ldan pa'i grags pas gsal bar byas pa ni ri kha ba can la sogs pa lta bu ste/ khyad par du chu dang sman dang khams sna tshogs 'byung ba yin no//de gang yin zhe na smras pa/ dam pa'i zhes bya ba ni skyes bu dam pa ste bdag gzhan gyi don mchog tu byed pa de bzhin gshegs pa la sogs pa'o/ /snang gyur te zhes bya ba ni rnam par gsal ba'o/ /ji lta bu zhe na/ gangs can gyi ri bo bzhin zhes bya bas bstan te/dper na ri'i mchog kha ba can ni mthong ba'i phyir dang / gangs kyi phung po yod pa dang / gang gA la sogs pa 'byung ba'i phyir thag ring po nas kyang gsal bar byed pa de bzhin du dri ma med pa'i grags pas mthong ba'i phyir dang / khyad par du dka' ba'i phyir dang /gzhan gyi don la gzhol ba'i phyir rgyang ring po nas snang ba yin no/ /ngan pa nye yang mi snang ste/ /zhes bya ba ni nye ba gnas par gyur kyang tshul ngan pa'i khyad par dang ldan zhing sngar bstan pa'i yon tan med pa'i phyir/ skye bo ngan pa ni phyogs nye ba na gnas su zin kyang bsnyen bkur gyi gnas ma yin pa'i phyir mi snang zhing rnam par mi mdzes so//mun khrod mda' ni 'phangs pa bzhin/ /zhes bya ba ni zla ba nub cing sprin dang bcas pa'i mtshan mo mda' 'phangs kyang nam mkha' yang mi mthong zhing / mda' 'gro ba yang mi mthong ba dang /sa'i phyogs gang du babs pa yang mi mthong zhing mi snang ba de bzhin no/ /dam pa rnams dang 'grogs na ni/ /de bzhin nyid rtogs par 'gyur ro/ /zhes bstan pa'i phyir smras pa/ mkhas pa zhes bya ba la sogs pa'o/ /kun du rgyu zhig thar pa 'dod la rang gi grub pa'i mtha' la mngon par mi dga' ste/bcom ldan 'das kyis bstan pa la rab tu byung nas dgra bcom par gyur te/ de las brtsams pa'o/ /dam pa nyid dang zhes bya ba ni dam pa'i spyod pa ste 'dis ni tshul khrims phun sum tshogs pa bstan to/ /mkhas pa zhes bya ba ni sde snod gsum shes shing rtogs pa ste/gsung rab rtogs pa'i blo dang ldan pa'i phyir ro/ /don sems byed pa zhes bya ba ni dngos po de nyid yongs su brtag pas rtogs pa dang ldan pa'i phyir ro/ /don zhes bya ba ni sdug bsngal la sogs pa'i bden pa'i bdag nyid do//chen po ni spangs pa ste khams gsum dang ldan pa'i phyir ro/ /zab mo zhes bya ba ni rtogs par dka' ba ste/ 'jig rten las 'das pa'i yul yin pa'i phyir ro/ /shes rab so sor rtogs par 'gyur/ /zhes bya ba ni zag pa med pa mngon par rtogs pa'o/ / gang yang zag pa med pa'i shes rab kyis so sor rtogs pa de ni 'gyur ba'i rgyus kyang 'gyur bar mi byed do zhes nges par bstan pa'i phyir/ gzhu yis mda' 'phangs zhes bya ba la sogs pa smos so/ /mdzes dga' mo shi ba srang la sogs pa dag tu khyer ba na bcom ldan 'das kyis kun du rgyu dag la rnam par smad de/gang zhig bud med dang gcig tu lhan cig lan 'ga' gnas na yang dam pa rnams ni srog gi phyir yang 'tshe bar mi byed na chung ma dang 'dra ba'i nyon mongs 'di la lta smos kyang ci dgos zhes pa dge slong dag la gsan nas 'di gsungs so//g.yul ni thar pa'i sa'o/ /glang chen bzhin du zhes bya ba ni dper na lha dang lha ma yin gyi g.yul du gnas pa'i glang pos srungs dang / me tog gi so dang / mig la sogs pa'i glang po che thags zangs ris la sogs pa'i lha ma yin gyi dpung gi tshogs kyis shin tu rno ba'i mda' dang mdung dang pin di pa la sogs pa'i mtshon gyis kun du gnad du bsnun te/shin tu tshor ba drag po nyams su myong ba yang bzod cing rnam par rmongs par mi 'gyur ba de bzhin du bdag gis tshig ngan par smras pa dag la bzod cing yal bar dor bar bya'o//gzhu yis mda' 'phangs bsnun pa yi/ /zhes bya ba ni dgras gzhu dang mda' 'phangs pa'o/ /mi snyan smra ba zhes bya ba la tshig brjod par bya ba bden pa ni snyan pa'i tshig go/ /de las 'das par byas pa la 'jug pa ni tshig mi snyan pa ste/ tshig lhag pa de la bdag gis bzod par bya'o//de ci'i phyir zhe na/ tshul 'chal skye bo mang po yis/ /zhes bya ba rtsod pa'i dus kyi skye bo mang po ste/ 'di ltar snyigs ma lnga dang nye ba'i phyir ngang tshul ngan pa yin no/ /'di skad ston te/ rtsod pa'i dus su bde ba dang sdug bsngal du ma byung yang bzod par bya zhing des bskyod par mi bya ste/'di ltar skye bo ngan ba ni rtsod pa'i dus su 'phral la ngan pa'i rang bzhin de bzlog par mi nus te/ des na de nyid kyi phyir dam pa rnams ni de la bzod pa'i go cha mi phyed pa gyon par byed do/ /srid pa 'di ni rang bzhin ngan pa ste/gang yongs su dag pa'i rgyud can bdag nyid chen po yang tshig ngan pa'i snod du 'gyur te/ de bas na de las su yang 'khor ba 'dod bar mi bya'o zhes bstan pa'i phyir/ 'khor ba zhes bya ba la sogs pa yin no/ /ci'i phyir bcom ldan 'das kyis nga ni 'khor ba cung zad 'grub pa la yang bsngags pa mi smra'o zhes bya ba la sogs pas 'khor ba ni smad la/mya ngan las 'das pa ni mchog tu bde ba yin no zhes bya ba la sogs pas mya ngan las 'das pa bsngags pa zhes 'khor ba la dga' ba'i rgyal rigs kyis zhus pa las 'di gsungs so//'khor ba ni 'khor ba na 'jug pa ste khams gsum gyi phung po'i 'khor ba de la'o/ /'jigs pa ni sdug bsngal gyis skrag pa'o/ /mthong ba ni rjes su myong ba ste/ de kho na nyid kyi shes pas mngon sum du dmigs pa zhes bya ba'i don to/ /log pa'i lta ba yang srid do//zhes rtogs pa la/ ngas zhes bya ba smos te/ thams cad mkhyen pa yin pa'i phyir phyin ci ma log pa nyid du bstan par ston to/ /'dir yang dang gi sgra ni 'jigs pa yod pa yin no zhes bsgrub pa'o/ /yang zhes bya ba ni phyis kyang ngo / /yang na phal cher ro/ /'byor pa ni rab tu bsngags pa ste 'jigs pa dang bcas pa'i 'byor pa'o//de yang ji skad du 'byor pa zhes bya ba/ gang 'di'i chos nyid ni khams gsum gyi mi rtag pa yin te/ gang 'khor ba'i skye ba la sogs pa yang 'jigs pa mi 'byung ba med la/ ma 'ongs pa'i skye ba yang 'jigs pa med pa ma yin te/thams cad du yang 'jigs pa'i rgyu yin pa'i phyir 'khrul pa med de/ rgyu yod pa dang 'bras bu nges par 'byung ba yin no/ /des na de nyid kyi phyir de bas zhes bya ba la sogs pa smos te/ rgyu des na'o/ /smras pa/ bdag gis zin pa ni srid pa'o/ /mngon par mi dga' ba ni mngon par dga' ba med pa dang ldan pa ste/bdag mngon par zhen pa med pa zhes bya ba'i don to/ /dga' ba ni ma 'ongs pa'i srid pa don du gnyer ba'i srid pa'o/ /lhag par rtogs pa med pa ni 'thob pa med pa dang bskyed par ma byas pa zhes bya ba'i don to/ /gang la zhe na/ srid pa la zhes bya bas bstan te/ma 'ongs pa'i skye ba'o/ /yang na 'byor pa la ste/ tshig gi phyogs gcig smos pas 'byung ba'i phyir na lha sbyin gyis byin zhes bya ba la sogs pa bzhin no/ /gang yang srid pa la mngon par mi dga' ba de nyid ni skyes bu dam pa yin te/ ji lta bu zhe na/ mi gang khyim zhes bya ba la sogs pa smos so/ /yul ka tsang ga la na nor/ /zhes bya ba'i dge slong mngon par shes pa drug dang ldan zhing nyam chung la rkang lag dag tu yang 'brum bu skyes shing lus khyi rngos btab pa zhig ste/ des na mchod rten la sogs pa la phyag 'tshal bar mi byed cing /bdag mthong na ma dad par gyur na mi rung ngo zhes nas mkhan po dang / slob dpon dang bla ma'i gnas dag la yang phyag mi byed pa las de la dge slong gzhan dag dad pa med pa dang / byas pa mi gzo ba'o zhes brjod par gyur to/ /de nags nas nags dang / khang stong nas khang stong dag tu rgyu zhing bab col du mi snang ba las 'di ni nges par khyim 'bigs par byed de/'di'i gnas kyang mi snang la gang grong du nges par bsod snyoms kyi phyir yang mi 'jug ste/ des na nges par 'ga' zhig la 'tshe ba byed do zhes pa dang / skabs de gsan nas 'di gsungs so//dad pa med pa zhes bya ba la sogs pa'i sgra gang yin de ni dge slong nor zhes bya ba la bya ste/ de nyid ni dgra bcom pa'i phyir skyes bu mchog yin par lta'o/ /'dir ni dgongs pa'i tshig yin te/ gzhan gyi tshig gis mngon par yid mi ches zhing mi 'jug pa ni dad pa med pa'o//dad pa yod pa ma yin pas dad pa med pa ste gzhan gyis bkri bar mi rung zhing rang nyid kyis chos rtogs pa'i phyir ro/ /yang na dad pa ni sred pa ste/ bdag gis dad nas zos so zhes bya ba lta bu'o/ /dad pa med pa ni srid pa la mngon par mi dga' ba ste/'khor bas yid byung ba zhes bya ba'i don to/ /ma byas pa ni rnam par grol pa'i thar pa ste/ rtag pa'i phyir dang rgyu dang 'brel pa ma yin pa'i phyir ro/ /de shes pa ni gzo ba ste/ byas pa mi gzo ba ni 'gog pa shes pa'i sbyor bas mya ngan las 'das pa mngon sum du byas zhes pa'i don to//mi zhes bya ba ni smad pa'i dngos po la ma chags par byas pa ste/ skye bo dam pa zhes bya ba'i don to/ /khyim ni skyes pa gzhan du sbyor bar byed pa ste/ gang gis yang srid par byed pa'i las dang nyon mongs pa ni khyim ste/de gcod pa ni spong bar byed pa dang spangs par byas pa'o/ /go skabs bcom dang zhes bya ba ni 'gro ba spangs pa ste/ rgyu med pas 'bras bu mi 'byung bar bstan pa nyid de/ 'gro ba lnga las 'das shing so sor brtags pa'i 'gog pa 'thob pa'i phyir mi gnas pa'i don to//skyugs pa za zhes bya ba ni srid pa med pa ste/ chags pa dang bral ba'i phyir ro/ /'dis ni rgyu'i gtso bo spangs pa'i phyir 'bras bu spangs par bstan to/ /de ni skyes bu dam pa yin/ /zhes bya ba ni de nyid sems can gyi gtso bo yin te/ bya ba byas pa'i phyir ro//de nyid ni dag pa zhes brjod de ci zhig byas pas she na/ pha dang ma ni zhes bya ba la sogs pa smos so/ /ri khrod kyi phyogs gcig na skyes bu dpa' ba zhig rgyal po 'dod de mi mdza' ba zhig pas pha dang ma dang rgyal po dang / bram ze gtsang spra can gnyis dang yul mi rab tu mang po bsad de rang nyid rgyal po byas so//des bsams pa gang bdag gis bcom ldan 'das kyi spyan sngar song la 'di zhus te/ gal te ji lta ba bzhin du ston na ni des na bdag kyang dga' zhing dge 'dun dang kun dga' ra ba la sogs pa yang gzhig par mi bya zhing gzhan yang legs par spyod pa mang du bya'o zhes pa nas ji srid du 'di gsungs so//de thos pa dang mngon pa dang de khyim bdag chen por gyur to/ /ma ni 'byung ba'i rtsa ba nyid du bstan pa'i phyir ma rig pa ste ma rig pa'i rkyen gyis 'du byed ces mdo las gsungs pas so//yang bshad pa/ ma rig 'khor ba skyed pa ste/ /bu yi ma ltar rab tu gnas/ /gal te sred pa de med par/ /bskyed par rung ba ma yin no/ /zhes so/ /pha ni 'du byed kyi yan lag ste/ 'jig rten ni las las skyes pa'i phyir ro/ /rgyal po ni rnam par shes pa ste/'du byed kyi rkyen gyis rnam par shes pa zhes bya ba'i tshig gis so/ /rA dza zhes bya bas rgyal po ni chags pa ste/ gzugs la sogs pa'i yul las zhen pa nyid kyis so/ /gtsang sbra can gnyis ni ming dang gzugs kyi yan lag ste/ phan tshun mtshan nyid tha dad pa'i phyir ro//yul 'khor ni skye mched drug ste/ rnam par shes pa'i yul du gyur pa'i phyir ro/ /'khor dang bcas pa zhes bya ba ni reg pa dang tshor ba ste/ dbang po drug gi sems las byung ba gtso bo dang 'khor gyi mchog tu gyur pa'i phyir ro/ /de dag bkag pas ni srid pa'i rgyu dang 'bras bu mtha' dag dang bral bar 'gyur ba'i phyir/mi ni dag par 'gyur zhes brjod do/ /da ni 'phags pa kA t+yA ya na'i bus mdor bstan pa bshad de/ skyed pa'i don gyis na sred pa ni ma ste skyes bu rnams ni sred pas skyed do zhes bya ba'i tshig gis so/ / de bcom pa ni gnyen pos spangs pa'i phyir ro/ /pha ni zag pa dang bcas pa'i las dang srid pa ste/ 'di ni byas pa'i las dge ba zag pa dang bcas pas der skye la rnam par smin pa so sor myong bar 'gyur ro zhes mdo las gsungs so/ /rgyal po ni nye bar len pa dang bcas pa'i yid kyi rnam par shes pa ste drug pa bdag po grong gi bdag /ces lung las gsungs pa'i phyir ro/ /gtsang sbra can gnyis ni lta ba dang / tshul khrims dang brtul zhugs mchog tu 'dzin pa'o/ /yul ni nyon mongs pa'i yul lo/ /'khor dang bcas pa ni nye ba'i nyon mongs pa dang bcas pa'o//'di dag thams cad rjes su mthun pa'i gnyen pos spangs pa ni dag pa ste de ltar yul thams cad spangs pa'i phyir ro/ /dri ma med pa'i phyir 'khor ba 'di na gnas pa'i skabs med do/ /de nyid bstan pa'i phyir/ gang dag kun sogs zhes bya ba la sogs pa smos so//bcom ldan 'das 'brog dgon pa na bzhugs te de'i tshe tshe dang ldan pa kun shes kauN+Di n+ya ba lang gi lam ljon shing gi rtsa na glang po che'i lci ba la mgo gtad de yongs su mya ngan las 'das so/ /ba lang rdzi gu le ka zhes bya ba dang ki ta ba ni ka zhes bya ba'i ba lang rdzi mo gnyis rdza ma gang gi 'o ma thogs te 'brog gi nang du zhugs pas mthong nas de gnyis kyis 'phags pa 'di ni bdag cag gi yul du yang dang yang bsod snyoms kyi phyir byon pas 'di'i lus la mchod pa bya'o zhes bsams te de gnyis kyis rdza ma gnyis phyogs gcig tu bzhag nas shing dag btus te lhung bzed dang chos gos gzhan du gzhag cing de'i lus shing la bskyon nas me btang ngo //ji tsam na bya gser gyi mdog can bzhi 'ongs te gnam nas bskor ba byas te song ngo zhes bya ba la sogs pa rgya cher ro//de nas ba lang rdzi mo des de'i lhung bzed dang chos gos blangs te dge slong gzhan zhig la gtad do/ /dge slong gis smras pa/ ci khyed cag gnyis kyis gnas brtan gyi lus kyi gnas skabs las ngo mtshar dag mthong ngam zhes smras pa dang /de gnyis kyis ji ltar gyur pa smras so/ /dge slong gis smras pa bzhi po de dag ni bdud gzhon nu dag ste/ gnas brtan kauN+Di n+ya'i rnam par shes pa tshol ba yin no zhes bya ba nas byung ba 'di dang gleng gzhi 'di las bcom ldan 'das kyis tshigs su bcad pa bcu gnyis gsungs so//gang dag ces bya ba ni sems can chen po dag go/ /kun du sogs med cing zhes bya ba ni mtshams sbyor ba la sogs pa ni kun du sogs pa ste/ mtshams sbyor ba de med pa gang yin pa ni skyes nas myong ba dang lan grangs gzhan la myong bar 'gyur ba'i las [(]gsags [,]bsags [)]pa spangs pa'i phyir ro//gang dag kha zas yongs shes pa/ /zhes bya ba yongs su shes pa dang / spangs pa yongs su shes pa gnyis so/ /kha zas ni gang dag zas rnam pa bzhi ste/ khams gsum las 'dod chags dang bral ba'i don to/ /las dang nyon mongs pa spong ba dang rjes su mthun pa'i thabs bstan te stong dang zhes bya ba la gang dag ces bya ba 'dir rjes su 'brangs te gang dag stong pa nyid kyi ting nge 'dzin gyi spyod yul la mngon par dga' ba dang /mtshan ma ma med pa dang / smon pa med de gsum po 'di nyid la mngon par dga' zhing gnas la rtog pa yin gyi gzhan gyis ni ma yin no zhes bya ba ni nyid kyi sgra'o//gsum po 'di nyid 'dus pa las 'phags pa'i lam yin gyi re re la ni ma yin pa'i phyir 'di bshad do/ /nam mkha' la ni bya rjes bzhin/ /de dag 'gro ba rtogs dka' ste//zhes bya ba ni dka' bas brtag cing rtogs pa gang yin pa de ni de'o/ /'dis 'gro ba yin pas rjes te 'gro ba dang 'thob ba'i rgyu zhes bya ba'i don to/ /dper na nam mkha' la bya bzhi po de dag gam gzhan dag kyang rung ste spyir ro/ /rjes ni rkang pa'i bkod pa ste de'i mtshan ma rtogs par dka' ba de bzhin du dgra bcom pa'i skye ba'i gnas kyang de lta bu'o//'gro'o zhes bya ba ni 'gro ba lnga ste 'gro zhing rgyu ba'i rnam par smin pa med de rgyu med pa'i phyir 'bras bu med par ston to/ /ci'i phyir de dag gi rjes dang 'gro ba rtogs par dka' ba yin zhe na/'di ltar med de zhes bya ba smos te/ dngos por med pa'i phyir mi rtogs/ /zhes bya ba'i don to/ /de bzhin du de dag gi 'gro ba yang med de/ tshe dang ldan pa kauN+Di n+ya ki la'i zas kyi yul du 'jug pas lam bskyed pa yin te/ de bas na 'dir kha zas yongs shes zhes bya ba gang dag dran pa nye bar gzhag pas zag pa zad pa'i sgo nas lam skyed pa yin te/ de'i dbang du mdzad nas/ gang dag spyod yul yongs shes pa/ /zhes bya ba smras te/ dran pa nye bar gzhag pa bzhi bsgoms pa ste/ dran pa nye bar gzhag pa bzhi ni chos 'dul ba la spyod yul yin no zhes mdo las gsungs so//ting nge 'dzin zhes bya ba ni re zhig 'dir tshigs su bcad pa bzhi po tha dad pa ma yin no/ /ting nge 'dzin gyis ni smon pa med pa nyid bstan to/ /yang na snga ma gnyis kyis ni ye shes bstan te/ 'dis ni bsam gtan med par shes rab med la shes rab med par bsam gtan med do zhes bya ba'i don to/ /zag pa ni zhes bya ba ni zag pa rnam pa gsum ste/ gang 'phags pa kauN+Di n+ya la sogs pas yongs su shes shing shes pas spang bar bya ba spangs shing spang ba yongs su shes pa'o/gang dag pha mthar rten med cing / /zhes bya ba ni ma 'ongs pa'i skye ba la mi gnas pa ste/ dga' ba'i 'dod chags spangs pa'i phyir ro/ /mi gnas pa zhes bya ba ni gang sred pas chags pa med pa ste/ de la gnas par bya'o zhes bya ba ni grub pa'i mtha'o//'o na ci'i phyir/ bcom ldan 'das kyis de ltar bsgre ba bstan pa mdzad ce na/ bshad pa gdul bya de lta bu'i bstan pa'i khyad par la rag las pa dag la phan gdags pa'i phyir te/ de'i phyir gang su dag rigs gcig pa bsten pa la rag las pa'i gdul bya dus dang yul tha dad pa dag tu bstan pa ste/de rnams kyi ched du lan du mar de ltar bstan pa brjod par bya'o/ /dper na yul dang dus tha dad pa la sman rigs gcig pas nad pa dag la bsgrub par bya ba la/ sman pa'i bdag pos lan du mar sman de nyid bstan na yang zlos pa'i skyon du mi 'gyur ba de bzhin du/bcom ldan 'das kyis bstan pa yang de lta bu'o/ /yang na phyis 'ongs pa dag dang don ma thos pa la shes par bya ba'i phyir ro/ /yang bshad pa/ yul dus bdag po sems can dang / /grogs dang bsam pa'i rgyud dag la/ bsdus na thub pa thugs rje yi//bdag nyid chos ni ston par mdzad/ /de lta bu'i bdag nyid chen po de ni shin tu nyung bar sgrub pa'i phyir/ skye dgu phal pa zhes bya ba la sogs pa smras te/ ji ltar 'di na shing sha pa'i lo ma ni cung zad dang nyung ngu nyung ngu'i tshul gyis len gyi/ de las mang po ni mi len pa de bzhin du sems can mang po de dag ni sdig pa'i las la 'jug ste/bsod nams kyi las ni shin tu nyung bar byed do zhes pa ni/ tshigs su bcad pa gnyis kyi bar du gsungs so/ /nyung ba ni shin tu yang nyung ba'o/ /mi zhes bya ba ni bden pa mthong ba'i snod du bstan te/lha dang mi gnyis kyang de'i snod yin par gzhan dag tu bstan pa'i phyir 'dir yang gnyi ga bzung ngo / /dmigs kyis dbye ba ni bdun pa yin pas lha dang mi'i nang nas so/ /gang dag pha rol 'gro byed pa/ /zhes bya ba ni phung po lhag ma med pa'i mya ngan las 'das pa thob par byed pa'o/skye bo phal pa 'di dag ni/ /zhes bya ba ni de ltar yang 'di ni 'khor bar ldog pa ste/ skye bo nyon mongs pa 'jig tshogs la lta ba'i 'gram ste/ skye ba yongs su len pa nyid do/ /nyid du rgyug byed pas zhes bya ba ni rjes su 'brang ba dang 'jug pa'o//gang de pha rol du 'gro bar byed pa'i rgyu nyung bar byed pa gang yin zhe na/ gang dag ces bya ba ste/ thar pa'i cha dang mthun pa dang rigs pas 'thob pa'i shes pa dang / dge ba'i bshes gnyen la sogs pa'i khyad par gyis sgrub pa'i phyir te/ de ma yin par ni pha rol du 'gro ba'i thabs med pa'i phyir ro//gang de ltar de nyid ni pha rol 'gro zhes bya ba 'di dang sbyar ro/ /nam zhig na pha rol tu phyin par 'gyur zhe na/ legs par gsungs pa'i chos la zhes bya ba ste/ bcom ldan 'das kyis phyin ci ma log par bstan pa'i 'phags pa'i lam yang dag pa yod par bstan pa las byung ba ni de ma thag tu phan pa'i phyir te/de'i dbang gis 'khor ba la nges par 'byung ba yod pa'i phyir ro/ /bden pa yang 'dir ji lta bu zhe na/ pha rol 'gro zhes bya bas bstan to/ /chos kyi rjes su lta ba zhes bya ba ni bstan pa'i chos dang rjes su mthun par sgrub pa'i chos des tshogs kyi lam bsgoms pas mthong ba dang /rjes su bsgoms pa dang / mngon du bya ba dang / rjes su 'jug pa'i tshul gang dag la yod pa de dag ni de nyid do/ /de'i phyir bsam pa bzang po byas la skyes bu dam pa la brten cing dam pa'i chos mnyan te phyin ci ma log par bsam pa dang /mi gtsang ba la sogs pa bsgoms pa'i rim gyis 'phags pa'i lam mngon sum du byed pa'i skye bo de dag ni pha rol du 'gro ba yin no zhes bya ba mya ngan las 'das pas mngon sum du byed pa yin no/ / ci zhig las she na/ skye shi'i mtsho chen rgal dka' ba'i/ /zhes bya ba smos te/ zil gyis gnon pa zhes bya ba ni tshig gi lhag ma'o/ /yang na gang gis pha rol zhe na/ skye shi'i mtsho chen po gang rgal dka' ba de'i zhes bya ba'i don to/ /skye shi'i mtsho chen po gang nges par nyams su myong ba gang la ste/skye ba zhes bya ba'i don to/ /gang gi phyir 'chi ba las ma 'das pa de ni skye ba las shin tu dka' bas rgal ba yin pas rgal dka' ste/ 'phags pa'i lam kho nas spang bar bya ba yin pa'i phyir 'da' bar dka' ba'o/ / pha rol tu phyin pa'i phan yon bstan te/ dus 'das pa zhes bya ba mgon med zas sbyin rims drag pos bzung ste/ de bcom ldan 'das zhal mthong ba las tsha ba las thar nas/ bcom ldan 'das la zhus pa/ btsun pa yongs su gdung ba gang gis med par 'gyur zhes zhus pa dang des na 'di gsungs so//gang dus 'das pa ni nye bar len pa spangs pa ste/ skye ba spangs pa'i phyir ro/ /mya ngan dang bral ba zhes bya ba ni gdung ba dang bral ba ste/ skye ba spangs pa nyid la ni nges par gdung ba med pa'i phyir ro/ /dus las 'das pa'i rim pa bstan pa yin te/rab tu rnam grol zhing zhes bya ba ni gzugs la sogs pa'i yul la 'jug pa'i nyon mongs pa 'dod pa na spyod pa dag las grol ba'o/ /skyob pa zhes bya ba ni gzugs la 'dod chags dang bral ba ste/ de'i sa pa la chags pas mi gnas pa'i phyir bdag gi bde ba las yongs su srung ba nyid de/ta yi zhes bya ba ni 'gro ba'i rgyud dang bsrung ba'o zhes skad kyi dbyings las bstan pa'i phyir ro/ /mdud pa thams cad spangs pa la/ /zhes bya ba ni gzugs med pa'i khams las 'dod chags dang bral ba ste/ de ltar na sdug bsngal thams cad dang bral ba las ni/yongs su gdung ba yod mi 'gyur/ /zhes bya'o/ /yang na gang de ltar dus las 'das pa ni de nyid do/ /mya ngan dang bral ba ni yid mi bde ba med pa'i phyir ro/ /rab tu rnam par grol ba ni nyon mongs pa'i 'ching ba rnam pa sna tshogs dang bral ba'i phyir ro/ /skyob pa ni don dam par phyin ci ma log par ston par mdzad pa'i phyir ro//mdud pa thams cad spangs pa ni lan du phan 'dogs pa la re ba med pa la sogs pa yin no/ /gdung ba thams cad yongs su spangs pa dang / bya ba thams cad byas pa dang ldan pas ni 'di ltar bya ba mthar phyin to zhes bstan par 'gyur ba'i phyir/'jigs dang bcas pa zhes bya ba la sogs pa smos so/ /nags tshal gyi phyogs shig na dge slong brtson 'grus brtsams pa zhig gnas te/ ji tsam na dgra bcom pa'i 'bras bu thob bar byas nas rnam par grol ba'i bde ba so sor myong ste tshigs su bcad pa 'di bshad do//rgal ba zhes bya ba ni nye bar rgal ba ste/ yongs su spangs pa zhes bya ba'i don to/ /'jigs pa dang bcas pa'i lam ni gnod pa dang bcas shing mi 'dod pa'i 'bras bu'i lam nyes par spyod pa'o/ /g.yang sa yongs su spangs pa dang //zhes bya ba ni de'i 'bras bu ngan song dag spangs pa'i phyir ro/ /tshigs su bcad pa phyed po de ni ngan song du 'gro ba rgyu dang bcas pa spangs par bstan pa'o/ /da ni bde 'gro'i rgyu spangs pas de'i 'bras bu spangs par bstan pa'i phyir grol ba zhes bya ba smras te spangs pa'o//sbyor dang mdud pa zhes bya ba ni mthong ba dang bsgoms pas spang bar bya ba'i rigs bstan te/ srid pa'i rgyu'i gtso bo bstan pas ni/ /'dod chags kyis ni dug kun bcom/ /zhes bya ba skyo ba'i rgyur gyur pa'i phyir rjes su chags pa'i kun du sbyor ba ni dug dang 'dra bar brtag go//yang na 'dis ni khams gsum gyi nyon mongs pa spang ba go rims bzhin du bstan to/ /nyon mongs pa spangs pa'i rgyu bstan pa'i phyir/ 'dod pa lta bu'i zhes bya ba la sogs pa smos so/ /grong khyer 'phags rgyal na rgyal po gtum po rab snang g.yul gyi 'byor pa mthong nas skyo ba skyes te/bcom ldan 'das la zhus pa/ 'jig rten 'dam rdzab chen po gang / /'jig rten gdon chen gang zhig lags/ /'jig rten dra ba chen po ci/ /'jig rten chu bo chen po gang / /zhes gsol pa las des na 'di gsungs so/ /med pa ni yod pa ma yin no//'dod pa lta bu'i zhes bya ba ni yul dang bcas pa'i 'dod pa la 'dod chags pa ni 'dir 'dod pa'o/ /mnyam pa ni de dang 'dra ba'o/ /'dam rdzab ces bya ba ni bang gu zhes bya ba zha bo bzhin du ste/ gang du rkang pa dang ldan pa yin yang 'gro ba'i nus pa med do zhes bya ba ni nges pa'i tshig go//de bzhin du blo dang ldan pa yang 'dod pa dag la 'gal bar byed pa rnam par sgrub pa yin no/ /nyi ma la sogs pas skam par 'gyur zhing 'dam rdzab ni thams cad kyis kyang bsal bar nus kyi 'dod pa'i 'dam ni ma yin te/de bas na 'di ni mi bzad pa yin no/ /de la zhes pas byas pa rgyal po gtum po rab snang de g.yul la 'jungs pa las skyes pa ni shin tu sdig pa che ba yin no/ /zhe sdang lta bu zhes bya ba ni khong khro ba dang 'dra ba'o/ /gdon ni 'byung po zhugs pa'o/ /gang gi phyir de ni sngags la sogs pas gso bar nus shing skye bo thams cad kyis kyang rtogs par nus kyi/zhe sdang ni ma yin te/ rgyud khyad par can la gnas pa'i 'phags pa'i lam gyis bsal bar bya ba yin pa'i phyir ro/ /gti mug lta bu zhes bya ba ni bdag la sogs pa log par rtog cing don med pa'i phyir log par lta ba'o//yang na gti mug ni mi shes pa ste/ des byas pa'i phyir log pa'i lta ba ni 'dir gti mug gi sgrar brjod do/ /de dang 'dra ba'i dra ba med de/ gzhan gyi dbang du byas shing bgegs su gyur pa zhes bya ba'i don to/ /rab tu grags pa rgya'i dra ba ni bsal bar nus te/lta ba'i dra ba ni ma yin no/ /sred pa lta bu zhes bya ba ni sred pa dang 'dra ba'o/ /chu klung ni cis kyang brgal bar nus kyi/ /cig shos sred pa ni ma yin te/ mchod sbyin dang pu ha la dang gnas 'jog la sogs pa'i thub pas kyang ma yin no/ / yang na rab tu byung ba'i dbang du byas pa 'di'i don gzhan du bshad de/ bzhi po 'di dag ni rang dbang med par 'gyur ba'i chos yin te/ gang gis sems can rnams rang dbang med par dbang du gyur pa ste/ 'di lta ste/ 'dam du zhugs pa dang / 'byung po'i gdon zhugs pa dang / rgyar chud pa dang / chu rgyun drag tu 'bab pa'i chu rgyun gyis rgyun phyogs su khyer ba'o/ /de dag kyang gang zhe na/ 'di lta ste/ 'di na gcig pu 'dod pa'i khams su skyes pa ni mi gtsang zhing dri nga ba 'dod pa dag la chags pa'i phyir dge ba bsags pa'i ched du 'bad pa mi byed de/ des na bshad pa 'dod pa lta bu'i gnas pa'i bdag nyid kyi 'dam rdzab med do//zhe sdang lta bu'i gdon med de/ /zhes bya ba ni ji ltar 'di na yang gcig pu 'dod pa spangs kyang legs par gsungs pa'i chos 'dul ba la rab tu byung na yang khro ba'i bsam bas tshig ngan pa'i sgo nas mkhas pa dang tshangs pa mtshungs par spyod pa dag la ngag gis 'tshe bar byed pa yin te/de bas na zhe sdang dang mnyam pa'i gdon med do/ /sman dang sngags la sogs pas gtso bor mi nus pa'i phyir ro/ /gti mug lta bu'i dra ba med/ /ces bya ba ni yang de ltar de rab tu byung yang bdud sdig can dang gti mug chen po'i rjes su zhugs pa yin zhing lta ba'i dra ba la zhugs pa yin te/dper na ri dgas rgyar chud pa ni thabs gang zhig gis rgya mngon par dral te byung ba yin gyi/ gti mug gi dra ba ni ma yin no/ /sred pa lta bu'i chu klung med/ / ces bya ba ni chags pa'i bdag nyid dang khyer bar byed pa'i phyir ro/ /de gnyis las thabs gang gis chu klung las ni thar bar nus kyi/ cig shos las ni ma yin no/ /bzhi po 'di dag ni sangs rgyas la med do zhes bstan pa'i phyir/ nam mkha' la ni zhes bya ba smos so//lhas gsol pa/ nam mkha' la ni rjes mchis gang / /phyi rol dge sbyong gang zhig lags/ /spros la dga' ba gang zhig dang / /spros pa med pa gang zhig 'tshal/ /zhes gsol pa dang / 'di gsungs so/ /gzhan dag ni kun du rgyu rab bzangs las brtsams so zhes zer ro//nam mkha' la ni zhes bya ba ni bar snang la bya la sogs pa rgyu yang de'i rjes dang mtshan ma ni med do/ /lta bu zhes bya ba ni nam mkha' la rjes med pa de bzhin no/ /phyi rol pa la dge sbyong med/ /ces bya ba ni phyi rol gyi dngos po yin pas phyi rol pa ste/ 'khor ba'i lam du zhugs pa zhes bya ba'i don to/ /dge sbyong dang ldan pa yin pas dge sbyong ste/ 'phags pa'i gang zag go/ /mu stegs pa 'di la ni snga ma'i dge sbyong de lta bu med do zhes bya ba la sogs pa mdo las bstan pa ste/ bdag tu lta ba la sogs pas bslad pa'i phyir ro//byis pa rnams ni spros la dga'/ /zhes bya ba ni spros pa'i gzhi'i dngos po ni spros pa ste/ /'khor ba zhes bya ba'i don to/ /de la mngon par dga' ba ni de'i don la lhag par zhen pa'o/ /ci'i phyir de dag la 'di ltar chags she na/ 'di ltar byis pa zhes smos te/ 'khor ba dang mya ngan las 'das pa'i khyad par ma shes pa ste/ byis pa nyid ces bya ba'i don to/ /spros mi mnga' zhes bya ba ni srid pa las nges par 'byung ba ste/ 'khor ba de la snying po med par rtogs nas yongs su spangs par mngon par dga' ba'o//de nyid smras pa/ de bzhin gshegs pa zhes bya ba ste/ phyin ci ma log pa'i de bzhin nyid shes pa ni de bzhin gshegs pa ste/ /de bzhin nyid rtogs pas na de bzhin gshegs pa'o/ /byis pa spros la mngon par dga'/ /zhes bya ba 'di ci'i phyir zhe na/ 'di ltar sbyor bas zhes bya ba smos te/sbyor ba ni rnam pa bzhi ste 'dod pa'i sbyor ba dang / srid pa'i sbyor ba dang / lta ba'i sbyor ba dang / ma rig pa'i sbyor ba'o/ /zhes mdo las bstan ma thag pa ste/ des na 'di gsungs so/ /sbyor ba zhes bya ba ni khams gsum gyi nyon mongs pa ste/ 'di ltar khrid pa'i phyir zhes bya ba ni gzhan gyi dbang du byas pa'o//byis pa ni so so'i skye bo ste/ de bas na spros pa thams cad la mngon par dga' ba'o/ /sems can rnams sdug bsngal rnam pa sna tshogs pa la sbyor bar byed pas sbyor ba'o/ /mkhas pa sbyor ba 'joms par byed/ /ces bya ba ni gang zhig nyon mongs pa dang de spong ba'i thabs khyad par shes pa ni mkhas pa'o//de la sbyor ba ma lus pa thams cad spong ba ni sbyor ba 'joms par byed pa'o/ /de bas na/ sdug bsngal kun las grol bar 'gyur/ /zhes bya ba dang sbyar te/ nyon mongs pa spangs pa'i phyir ro/ /de ltar byed par sus nus she na/mkhas pas zhes bya ba smos te/ blo dang ldan pa'o/ /dper na pha rol gnon pa dag gis 'thab pa na dgra'i dpung 'joms par nus pa de bzhin du shes pa'i khyad par gyis bskyed pa'i blos ni nyon mongs pa spong bar nus so/ /snga ma'i mkhas pa zhes bstan pa ni 'jig rten pa'i nyon mongs pa dgag pa'i thabs su gyur pa shes rab khyad par can dang ldan par bstan to//'dis ni zag pa med pa'i shes pa'i sbyor ba bstan to/ /'di gang gi sbyor ba yin zhe na/ smras pa/ lha dang zhes bya ba smos te/ lha'i dngos po yin pas lha ste/ gang dag sbyor ba dang mnyam par gzhag pa'i sa pa'o/ /mi ni 'dod pa na spyod pa'o/ /de spangs pas cir 'gyur zhe na/ sbyor ba kun dang bral ba'i phyir/ /zhes bya ba yin te/ sbyor ba thams cad spangs pa'o/ /sbyor ba thams cad dang bral ba nyid kyis ni sdug bsngal kun las grol bar 'gyur zhes bya bar sbyar te/'khor ba ni sdug bsngal mi bzad pa'o zhes bya ba'i tshig gis na 'khor ba las zhes bya ba'i don to/ /ji ltar na sbyor ba kun dang bral ba'i phyir sdug bsngal thams cad las thar pa yin zhe na/ 'di ltar/ sbyor ba las ni srid pa byung / /zhes bya ba smos te/nyon mongs pa dang srid pa 'brel pa'i phyir te/ srid pa'i rtsa ba ste phra rgyas so zhes bya ba'i tshig gis so/ /sbyor ba med pas srid pa zad/ /ces bya ba ni sbyor ba dang bral bas sdug bsngal thams cad kyi mthar byed par 'gyur te/ sa bon spangs nas myu gu dang bral ba bzhin no//lam 'di gnyis ni zhes bya ba ni sngar bstan pa'i lam rnam pa gnyis te/ gcig tu bsdu ba rnam pa gnyis kyi lam zhes bya ba'i don to/ /shes kyis la zhes bya ba ni rtogs par bya ba ste/ 'jig rten dang 'jig rten las 'das pa'i shes pas so/ /ci'i phyir lam 'di gnyis she na/srid pa dang srid pa med pa'i zhes bya bas bstan te/ lam gcig pa ni srid pa mngon par grub pa'o/ /gnyis pa ni srid pa zad pa'o/ /de la 'dir mkhas pas gang la gnas par bya zhe na/ mkhas pas de la bslab par gyis/ /zhes bya ba smos te/ blo dang ldan pas lam de la 'jug par gyis shig pa'o/ /sbyor las rab tu 'da' bya'i phyir/ /zhes bya ba ni gang la 'jug cing spyad pas sbyor ba rnam pa bzhi las 'da' bar byed pa ste/ spang ba'i phyir ro/ /kha na ma tho ba med pa'i bden pa 'thob pa ni de dang 'brel pa'i phyir ro//thar pa'i lam bsgom pa'i sbyor ba nus par ma gyur kyang srid pa'i 'bras bu'i legs par spyod pa la nan tan du bya'i/ nyes par spyad pa la ni ma yin no zhes bstan pa'i phyir smras pa/ nyes par spyad pas zhes bya ba la sogs pa'o/ / lha zhig gis 'di skad du/ gang des byas pas 'dir ni gdung bar gyur/ /ngan 'gror song ba'i 'og tu'ang gdung bar 'gyur/ /gang de byas pas der ni dga' 'gyur zhing / /bde 'gror song ba'i 'og tu'ang dga' bar 'gyur/ /zhes zhus pa dang / 'di gsungs so/ nyes par spyad pas zhes bya ba ni sdug bsngal gyi 'bras bu'i las ngan par spyad pa'o/ /byas pa zhes bya ba ni bsgrubs shing bskyed pa ste/ nye bar bsags pa'i phyir ro/ /pas zhes bya ba de bas na ste/ de las byung ba'i yid la gcags pa'i tshul gyis gang la la gsad pa dang / bcing ba dang / lag pa gcod pa la sogs pas tshe 'di nyid du gdung bar 'gyur ba nyid de/ lus dang sems kyi gdung ba chen po nyams su myong bar 'gyur ro/ /mthong ba'i chos kyi nyes dmigs bstan nas/ 'jig rten pha rol gyi nyes dmigs smras pa/ ngan 'gror song ba'i 'og tu'ang gdung bar 'gyur//zhes bya ba smos te/ ngan song du skyes nas kyang gdung ba shin tu drag po thob par 'gyur ro/ /legs par spyad pa byas pas dga' 'gyur zhing / /zhes bya ba ni bde ba'i 'bras bu'i las dge ba bsags pas bdag gis ni de ltar bsags so//zhes dran pas tshim par 'gyur te/ mchod pa dang / zhes dang / bsnyen bkur yang 'di nyid du 'thob par 'gyur ba'o/ /bde 'gror song ba'i 'og tu'ang dga' bar 'gyur/ /zhes bya ba ni bde 'gror song nas kyang tshim par 'gyur ba'o/ /de nyid kyi phyir legs par spyod pa dang nyes par spyod pa gnyis kyis ni 'di ltar 'dod pa dang mi 'dod pa'i 'bras bu yin pa des na smras pa/phyi nas zhes bya ba la sogs pa smos so/ /mnyan yod na chen chun gnyis phrag dog gis zil gyis gnon pa'i phyir byad stems kyi sbyor ba don du gnyer te/ lha mnyes pa la sogs pa legs par spyod pa la 'jug cing mchog tu mchod pa rtsom pa'i bud med las brtsams so//lus can sdug bsngal gyis 'jigs pas/ /ma byas ci zhig byas pa bla/ /mi ni bde ba 'dod pa yis/ /ci zhig byas nas byas pa rung / /zhes lhas gsol pa las gsungs so zhes kha cig zer ro//nyes spyad ma byas zhes bya ba ni ngan par spyod pa ma byas pa nyid mchog yin te/ ci'i phyir zhe na/ phyi nas gdung 'gyur de byed pas/ /zhes smos te/ 'di ltar ngan par spyod pa de byas par gyur pa dang / dus mnyam du rnam par smin pa dang ldan pa yin pas phyi nas zhes bya ba ste/dus gzhan na'o/ /de byed pa'i sems can ni tshe 'dir yang kha na ma tho bas yid la gcags pa la sogs par 'gyur la/ 'jig rten pha rol yang ngan song du 'gro ba la sogs pas nye bar gdung bar 'gyur ba yin te/de bas na de ma byas pa ni rab tu bsngags pa yin no/ /legs par spyod pa byas na rung / /zhes bya ba ni yang legs par spyod pa nyid la nan tan du byed pa nyid mchog yin te/ 'di ltar/ gdung bar mi 'gyur de bya ste/ /zhes bya ba 'di dang / gzhan du de byas pas gdung ba med pa'i phyir ro//legs par spyod pa bya ba dang nyes par spyod pa mi bya'o zhes nges par bya ba ni tshig mthong zhing chos mnyan pa las 'gyur ro/ /dam pa'i chos ston pa yang mkhas pa kho nas rtogs shing shes pa khyad par can gyis nus pa yin te/de yang ji lta ba bzhin du sems can la ston pa las shes par 'gyur ro zhes bstan pa'i phyir/ mkhas dang zhes bya ba la sogs pa smos so/ /tshe dang ldan pa byi sha ka pany+tsa la'i bu dge slong rab tu mang po bsti gnas kyi khang pa dag tu 'khod pa la chos ston par byed de/pho brang 'khor gyi tshig dang / snyan pa dang / rnam par gsal ba dang / yid du 'ong ba yin pas de dag gis kyang gus pas mnyan par gyur to/ /ji tsam na bcom ldan 'das kyis gsan te byi sha ka legs so legs so zhes pa nas tshigs su bcad pa gnyis gsungs so//ma smras zhes bya ba ni tshig cung zad mi brjod cing mi ston na ni mkhas pa'am blo dang ldan par mi rtogs te/ mkhas pa ni tshig gi khyad par gyis mtshon pa'i phyir ro/ /ci'i phyir shes par mi 'gyur zhe na/ mkhas dang byis pa 'dres pa las//zhes bya ba smos te/ 'dres pa ni rkang pa dang lag pa dang mig dang gdong dag ni tshul 'dra ba ste/ byis pa dang cha byad mtshungs shing 'di ltar chu dang 'o ma bzhin du tha dad par rtogs par mi nus so/ /smras pa yis ni shes par 'gyur/ / zhes bya ba ni tshig gi khyad par las 'di ni dam pa'o/ /'di ni mkhas pa'o zhes rtogs pa yin no/ /ji zhig smra ba yin zhe na/ smros shig dang zhes bya ba ste/ rigs pa dang lung gi de bzhin nyid ston par byed pa'o/ /zhi ba'i go 'phang zhes bya ba ni 'tshe ba med pa'i don mya ngan las 'das pa dang /de thob par byed pa'i lam zhes bya ba'i don to/ /'di ltar 'khor ba las rab tu gzhol ba'i tshig ni dam pa'i chos bstan pa zhes mi brjod do/ /de nyid kyi phyir 'di yang tshig gi lhag mar brtag par bya'o/ /mkhas dang byis pa 'dres pa las/ /ma smras shes par mi 'gyur bas//zhi ba'i go 'phang smros shig dang / /smras pa yis ni shes par 'gyur/ /zhes bya ba yin te/ ma zhi ba zhes bya ba ni srid pa de la phan 'dogs par byed pa'i phyir ro/ /dge slong dag srid pa mngon par 'grub pa ni sdug bsngal ba yin no zhes tshig gis so//rjes su myong ba'i phyir yang sdug bsngal 'byung ba'o/ /mkhas pa ni de bzhin nyid ston cing sbyor ba yin no/ /bshad pas zhes bya ba ni smras pa ste mkhas pa'o/ /gsal ba zhes bya ba ni rnam par 'byed pa ste rigs pa dang lung gnyis kyis 'di'i don bstan par byed pa'i phyir ro//gang bshad ce na/ chos zhes smos te/ bsten pa'i tshul gyis so/ /yang na bshad pa ni brjod pa'o/ /gsal bar bya ba ni don la dpyod pa'o/ /drang srong ni de bzhin gshegs pa'o/ /bsgreng bar gyis zhes bya ba ni gzugs par gyis shig pa ste/steng du bzhag pa dang / yang dag par bsngags pa'o/ /rgyal mtshan ni rtags te/ dper na rgyal mtshan gyis rgyal po dang sman pa la sogs pa'i gnas su skye bo rnams kyis shes pa yin te/ tshul de bzhin du chos ston pa'o/ /ci'i phyir de ltar zhe na/legs bshad ces bya ba ste/ bde blag tu rtogs pa'i thabs ston cing gang brjod pa de ni legs par bshad pa'o/ /de'i rgyal mtshan gyi tog gis rang gi ngo bo ston pa yin zhes rtogs pa gang yin pa de ni thub pa yin no/ /ci'i phyir legs par bshad pa drang srong rnams kyi rgyal mtshan yin zhe na/chos yin pas zhes smos te/ gang de khyad par can gyi don dang ldan la gzhan la phan pa ston pa de ni 'dir bstan pa'i chos la dgongs so/ /de nyid ni dgra bcom pa 'dod chags dang bral ba bya ba byas pa rnams kyi yin gyi gzhan gyi ni ma yin no//de ni bdag nyid la bstod pa'i tshig mi brjod de de las gzhan pa'i sems ni zhi ba la 'jug pa'ang ma yin la thams cad gzhan gyis rtogs par nus pa kho na yin no/ /'on kyang gzhan gyi don du phyin ci ma log par ston pa yang yin la/ rnyed pa dang bkur sti la ltos pa med pa'ang yin te/de nyid ni de dag gi rgyal mtshan yin no/ /des na de mtshon pa yin te/ gdugs dkar po la sogs pa nyid dang / rna cha gdub 'khor la sogs pas rgyal po'i yan lag bzhin te/ gdugs dkar po ni mtshon pa yin par rab tu grub po/ / ci gang su dag dam pa'i chos ston pa'i mkhas pa bdag nyid brjod pa de thams cad du bsngags pa yin nam zhe na/ 'di ni gcig tu ma yin te/ 'di ltar khyad par du/ rtsod pa'i dus kyi 'gro ba 'di na'o zhes bshad do/ /ma smras zhes bya ba la sogs pa smos te/ mdzes dga' mo'i gtam rgyud khyim bdag mgon med zas sbyin gyis thos pas yid mi dga' bar gyur te/nad kyis btab pa'o/ /de nas bcom ldan 'das kyi spyan sngar spyan 'dren pa'i skyes bu btang ste/ gshegs pa las btsun pa bdag ni khyod kyis bshad pas dga' ba skyes par gyur to zhes gsol pa dang /de nas bcom ldan 'das kyis tshigs su bcad pa gsum gsungs so/ /smod byed cing zhes bya ba ni bshung ba ste/ tshig gi rgyu gang gis kyang ngo / /tshig cung zad kyang ma smras shing mi brjod na ni 'di ni rtag tu lkugs pa bzhin du 'dug go zhes smod par byed do//mang du smras na yang zhes bya ba ni mang du smra ba'i tshul gang la yod pa ste/ shin tu snyan pa'i tshig mang po brjod pa de la yang 'di ni rlung gi rang bzhin can no zhes mi snyan pa rjod par byed do/ /dal bus smras kyang zhes bya ba ni gang la dal bus smra ba'i tshul yod pa ste/nyung ngu smra ba de la yang 'di ni tshig gcig kyang gser la sogs pa 'tshong ba ltar byed do zhes smod par byed do/ /des na 'jig rten na ni mi smod med/ /ces bya ba yin te/ bstod pa ni thams cad du med do/ /brgya la byung ba'am 'byung bar 'gyur ba la smad pa'am bstod par bya ba yod dam zhe na ma yin te/gcig tu smad par bya ba dang / /zhes bya ba ste/ skye bo thams cad la rnam grangs thams cad kyis kyang ste/ lha sbyin la sogs pa la yang smod par byed pa med do/ /mi zhes bya ba ni sems can te skyes bu'o//gcig tu bstod pa zhes bya ba ni rnam pa thams cad kyi thams cad du bde ba'i bdag nyid kyis stod par byed pa 'di yang med do/ /byung bar ma gyur zhes bya ba ni sngar ma byung ba ste/ skyes bu gnyis po ni sngon ma byung ba'i phyir ro/ /'byung mi 'gyur zhes bya ba ni ma 'ongs pa'i dus na'o//de ltar na da ltar byung ba la yang yod do zhe na/ da ltar yod pa ma yin te/ /zhes bya ba smos te/ da ltar byung ba'i dus na yang gang na yang 'di yang med do/ /ci don dam par sems can gang la smad par bya bar mi 'os pa yod dam zhe na/ /gang gis zhes bya ba smos te/sems can gyi khyad par ro/ /shes rab can dag stod byed de/ /zhes bya ba ni rnam pa sna tshogs shes pa ste/ thams cad mkhyen pa de bzhin gshegs pa la ni gzhan yang bsngags pa rjod par byed pa'o/ /ci zhig byas pas she na/ ji lta ji ltar rtogs gyur pa/ /zhes bya ba ni 'dis rjes su sbyor ba yin pas rtogs par gyur pa ste/lta zhing rtogs pa'i blo sngon du 'gro ba'i phyir dam pa rnams kyi bya ba ji lta ba bzhin du rtogs shing brjod de/ yongs su brtags pa yang ji skad du gsungs pa/ de nas bcom ldan 'das kyis de'i ched du phan tshun gyi skye ba brgyud pa las gzigs nas lung bstan pa yin no zhes bya ba la sogs pa'o//de ji lta bu zhe na/ 'phan ni ma byung zhes bya ba smos te/ gzhan gyi 'khrul pa dang 'phan byung ba'i tshul gang la yod pa de ni de'o/ /gzhan gyi tshig ngan pa la gang mi 'jug pa de ni 'phan ma byung ba'o//yang na 'phan ma byung ba de ni dpyod pa med pa gzhan gyis gus pa dang rtag tu sbyor ba gnyis kyis 'jug pa'i tshul te/ 'dis ni brtson 'grus dang bag yod pa bstan pa ste/ rgyun du dge ba'i bya ba 'jug pa'o/ /'dis tshogs kyi lam bstan nas/'phags pa'i lam bstan pa/ dad dang tshul khrims blo dang ldan pa dang / /zhes bya ba'o/ /dad pa'i sgra ni 'dir de mang du byed cing de sgrub pa la legs pa'i bya ba la ting nge 'dzin du 'dis bstan te/ /des na yang 'dis ni tshul khrims dang ting nge 'dzin dang shes rab kyi phung po'i 'phags pa'i lam bstan to//de lta bur blo la sogs pa dang ldan pa ni nyon mongs pa dang dri ma thams cad spangs pa yin zhing khyad par thams cad 'thob pa yin te/ smad 'os min zhes bya ba dang sbyar ro/ /ji lta bu zhe na/ 'dzam bu'i gling gi gser rgyan bzhin/ /zhes bya bas bstan te/'dzam bu'i chu bo'i gser bzang po legs par bsgyur te/ bzo sna tshogs byas pa'i rgyan ni gang gis kyang smad par 'os pa ma yin te/ gnyis ka las skyon dang bral ba de bzhin du yon tan dang ldan pa'i bdag nyid chen po yang lha'am mi rnams kyis smad par 'os pa ma yin no//smad pa dang bstod pa byas kyang 'gyur ba ma yin no zhes bstan pa'i phyir/ ji ltar ri dang zhes bya ba la sogs pa smos so/ /gyad bu nor la mdza' bo dang sa can la sogs pa ni smod par byed la/ lha la sogs pa ni stod par byed kyang de'i lus sems la gzhan du 'gyur ba med de/des na tshigs su bcad pa gnyis gsungs so/ /ji ltar zhes bya ba ni dper na'o/ /ri dang brag ni sa 'dzin te rdo'i bdag nyid do/ /rlung gis g.yos par mi 'gyur ltar/ /zhes bya ba ni rlung gi shugs kyis rnam par bsgul bar mi nus so//de bzhin ni de ltar ro/ /bstod pa dang smad pa byas kyang mkhas pa'am dam pa ni mi g.yos shing 'gul ba med de/ rnam par 'khrug par yang mi byed la dga' bar yang mi byed do/ /de ltar 'gyur ba med pa la ji ltar smad pa'i gnas su 'gyur te/de bas na mi srid do zhes bstan pa'i phyir gang gi zhes bya ba smos te/ sems can gyi khyad par gyi'o/ /rtsa ba ni sa bon te/ nye bar len pa dang bcas pa'i rnam par shes pa zhes bya ba'i don to/ /sa la med pa zhes bya ba ni zhing la ste/ rnam par shes pa gnas pa bzhi la med pa'o//lo ma med ces bya ba ni nga'o snyam pa'i nga rgyal te/ dge slong dag gis lo ma bcom par 'gyur zhe na nga'o snyam pa'i nga rgyal 'dir spangs shing shes pa'o zhes mdo las bstan to/ /dper na lo mas ni shing stug po ltar snang ba bzhin du nga'o snyam pa'i nga rgyal gyis kyang skyes bu de ltar snang ngo //lcug phran ga la yod ces bya ba ni gang la rtsa ba nyid med pa de la sdong po yang med na lo ma dang lcug ma lta yod par ga la 'gyur zhes pa'o/ /lcug phran ni sred pa la bya ste/ ji skad du/ ka ba lnga pa'i khang pa la/ /lcug phran gyis 'bigs skye 'gyur te//sred pa'i lcug ma skyes pa la/ /thug pa'i shes rab kyis bcad do/ /zhes gsungs pas so/ /de zhes bya ba ni de lta bu'i sems can no/ /bstan pa ni 'phags pa'i lam gyi sbyor bas bkrir med pa'i nye bar len pa'o/ /'ching ba las grol ba zhes bya ba ni 'dis 'ching ba yin pas 'ching ba ste/nyon mongs pa'am nyon mongs pa dang rjes su mthun pa zag pa dang bcas pa'i dngos po'o/ /nyon mongs pa spangs pa ni sngar bstan pa la 'dis ni lhag ma spangs par bstan te/ 'khor ba spangs pa zhes bya ba'i don to//de la sus kyang smad par 'os pa ma yin te kha na ma tho ba med pa'i phyir ro/ /'di lta bur rtogs pa'i bdag nyid chen po ni gzhan gyi blos rtogs pa ma yin no zhes bstan pa'i phyir/ gang dag la ni zhes bya ba la sogs pa'o/ /tshe dang ldan pa go ti ka lan bdun pa byas te/dus kyis sems rnam par grol nas yongs su zad la ston pa mnyes par byas te/ de la 'di gsungs so/ /spros pa ni rab tu rnam par 'jig pa'i rkyen te/ 'dod pa'i yon tan lnga zhes bya ba ste 'dod pa spangs shing rab tu byung ba'i phyir ro/ /de yul gyi 'dod pa spangs par bstan nas 'dis nyon mongs pa'i 'dod pa spang bar bstan pa'i phyir dang /gnas pa zhes bya ba smos te/ 'dis gnas par byed pas zhes byas nas so/ /'dod pa na spyod pa'i nyon mongs pa de spangs nas/ 'di na gnas shing rab tu gnas pa ste go skabs yod pa'o//med pa ni yod pa ma yin pa'o/ /'dod pa la 'dod chags pa zhe sdang gnyis khyad par du shas cher bstan pa'i phyir/ kun sbyor gdung la zhes bya ba ste/ 'dis sbyor bar byed pa yin pas sbyor zhing 'byar ba ste/ 'dod pa'i sred pa zhes bya ba'i don to/ /'dis gnod par byed pa yin pas gdung ba ste/khong khro ba zhes bya ba'o/ /de gnyis las rab tu log pa ni rab tu 'das pa'o/ /'dod pa la 'dod chags dang bral ba bstan nas khams gong ma'i sa pa las 'dod chags dang bral bar bstan te/ sred bral zhes bya ba ni 'tshe ba med pa'i phyir gong ma'i sred pa las dmigs pa de spangs nas sred bral zhes brjod do//de nyid kyis na khams gsum mtha' dag las 'dod chags dang bral bar bstan pa'i phyir thub pa zhes smos te/ mi slob pa'o/ /de dag rgyu mdzad ces bya ba ni phung po lhag ma med pa'i mya ngan las 'das pa las gzhol bzhin du bsod snyoms la sogs pa dag la rgyur mdzad pa'o//mi shes pa zhes bya ba ni rang gi ngo bo mi rtogs pa'o/ /lhar bcas 'jig rten zhes bya ba ni lha dang bcas pa'i mi'i 'jig rten gyis kyang mi shes na/ ngan song gi 'gro ba lta smos kyang ci dgos/gang gis dri ma thams cad ma lus par spangs pa de nyid ni nam yang gang gis kyang bkrir mi rung ba yin no zhes bstan pa'i phyir gang zhig ces bya ba la sogs pa smos so/ /rgyal po zas gtsang ma bcom ldan 'das kyi zhal mthong bar dga' ste/'char ka pho nyar btang nas de bcom ldan 'das kyi thad du song ste yi ge phul nas zhus pa/ gal te bcom ldan 'das rang nyid mi gshegs na stobs kyis dgug par bya'o zhes pa nas/ tshigs su bcad pa bzhi'i bar du gsungs so/ /gzhan dag ni byang chub snying por bdud kyi bu mo dag gi dbang du mdzad pa'o zhes zer ro//de nas kun du rgyu dra ba can mu stegs can gyis bskul te/ bcom ldan 'das dbang du bya zhing khyer bar bya'o zhes pa dang / de las brtsams pa ste/ de thos pas mngon par dad de de bzhin gshegs pa'i zhabs la mgo bos phyag 'tshal te/gang bstan pas ji tsam na dgra bcom par gyur to zhes gzhan dag zer ro/ /gang zhig ces bya ba ni thub ba mchog go/ /rgyal zhes bya ba ni nyon mongs pa la sogs pa spangs pa'o/ /mi nyams pa zhes bya ba ni yongs su mi nyams pa dang yongs su mi shigs pa ste/de bzhin gshegs pa ni yongs su mi 'jigs pa'i chos can yin te/ gang rgyal ba ni rgyal ba nyid do/ /ci ste spang bar bya ba'am ma rgyal ba cung zad yod dam zhe na/ 'di la rgyal zhes bya ba smos te/ 'jig rten 'di na spang bar bya ba ma spangs pa cung zad kyang med de/nyon mongs pa dang shes bya'i thos pa'i sgrib pa spangs pa'i phyir ro/ /de ni sangs rgyas zhes bya ba ni mtha' dag thugs su chud pa'i phyir ro/ /spyod yul mtha' yas zhes bya ba ni gzhan gyis don rtogs su mi rung ba'i phyir ro/ /yang na mtha' yas pa ni dpag tu med pa'i spyod yul gang la yod pa'o//yang na dran pa nye bar gzhag pa bzhi'i spyod yul lo/ /'gro med ces bya ba ni nyon mongs pa dang las spangs pa'i phyir ro/ /de gnyis ni bkri ba dang 'brel ba yin te/ de med pa'i phyir ro/ /go 'phang gang gis bkri zhes bya ba ni thabs gang gis sam mthu gang gis khyer bar byed ces bya'o//mthu rtsal mtha' yas de zhes bya ba ni mtha' yas pa'i mthu rtsal gyi brtson 'grus gang la yod pa ste/ yang dag par spong ba bzhi dang ldan pa'i phyir ro/ /mthu rtsal khyad par can dang ldan pa ni gzhan gyis bkri zhing khrid par nus pa ma yin no//mthu rtsal khyad par can ma gtogs pa ni mngon par 'dod pa'i dngos po 'thob pa ma yin no zhes 'dis bstan te/ de bas na yang dag par zhugs shing 'bad pa kho nas ni bya ba 'grub pa yin no/ /gang la dra ba zhes bya ba'i sred pa ji lta bur med ce na/dra ba smos te ma 'ongs pa'i yul ni yongs su gsal ba med pa des dra ba dang 'dra ba'i phyir ro/ /yul sred ces bya ba ni da ltar byung ba'i yul la chags pa'o/ /de gnyis ni rkang pa gnyis dang 'dra bar 'gro zhing 'gro ba gzhan dag tu kun du 'gro bar byed do//'ga' med pa zhes bya ba ni 'gro ba dang 'gro ba dag tu'o/ /khrid byed pa zhes bya ba ni 'dren pa ste/ sred pas ni skye dgu rnams 'dren par byed do zhes bya ba'i tshig gis so/ /lhag ma ni rtogs par sla'o/ /rnam par rtog pa spangs pas ni sred pa spangs pa yin no zhes bstan pa'i phyir smras pa/gang zhig ces bya ba la sogs pa'o/ /yul ber rgya na tshong dpon zhig 'byor pa che zhing phun sum tshogs pa'i khyim la mi dga' ste/ rab tu byung nas gtsug lag khang du chos mang po bstan par byas pa las 'di gsungs so//gang zhig rnam par rtog pa rnam bsal zhing / /zhes bya ba ni 'dod pa'i rnam par rtog pa la sogs pa gang rnal 'byor du spyod pas bsal zhing rnam par sbyangs pa ste/ phyi rol du lta ba'i rnam par rtog pa thams cad spangs pa'i phyir ro/ /nang gi kun la rnam par rtog med pa//zhes bya ba ni gang gis lta ba'i 'jug pa ste/ sems dang sems las byung ba thams cad kyis rnam par rtog pa med cing rnam par rtog pa dang rnam par dpyod pa spangs pa'i phyir te/ bsam gtan gnyis pa la brten nas rnam par rtog pa dang dpyod pa bsal ba'i phyir ro//kun zhes bya ba ni nyer bsdogs dang / /dngos gzhi la ltos pa'i phyir ro/ /'dis ni 'dod pa dang / bsam gtan dang po las 'dod chags dang bral bar bstan te/ bsam gtan gnyis pa dang gsum pa las 'dod chags dang bral bar bstan pa'i phyir/kun du sbyor 'das zhes bya ba ste/ bsam gtan gsum pa la brten nas bsam gtan gnyis pa'i sa pa'i dga' ba'i sred pa spong ba yin no/ /bzhi pa la brten nas ni bsam gtan gsum pa'i sa pa'i bde ba'i sred pa spong ba yin no//dga' ba dang bde ba ni 'dis kun du sbyor ba'i sgrar brjod do/ /gzugs dang 'du shes 'das zhes bya ba ni gzugs la chags pa dang bral bar bstan to/ /gzugs med pa las 'dod chags dang bral bar bstan pa/ rnal 'byor bzhi dang bral ba zhes bya ba ste/ bzhi ni nam mkha' mtha' yas skye mched la sogs pa las skyes pa'i skye mched la gang sbyor ba las nyon mongs pa dang bral ba de ni de nyid de nam mkha' mtha' yas skye mched la sogs pa'i sa pa dag las nyon mongs pa dang bral ba zhes bya ba'i don to/ /yang na sbyor ba rnam pa bzhi las so//skye ba med ces bya ba ni gang du yang skye ba yongs su mi len pas te/ /de'i rgyu spangs pa'i phyir ro/ /ji ltar skye ba len par mi 'gyur zhe na/ thams cad las grol ba'i phyir te/ de nyid bstan pa/ sngon bral zhes bya ba smos te/ 'di'i gleng gzhi ni/nags ni chod dang shing med do/ /zhes bya ba der bstan to/ /bral ba ni spangs pa'o/ /sngon zhes bya ba ni sngon du 'dug pa ste/ ma 'ongs pa'i spang bar bya ba yang spangs pa'o/ /phyi ma dang bral zhing zhes bya ba ni 'das pa'o/ /dbus bral zhes bya ba ni gang da ltar byung ba'i dus kyi gnas pa de yang spangs pa ste/de'i yul la chags pa med pas spangs pa'i phyir ro/ de yongs su spangs na 'di ji ltar 'gyur zhe na/ sred pa'i pha rol phyin ces bya ba smos te/ yang srid pa'i las kyi mthar phyin pa'i phyir ro/ /des na bshad pa/ rnam pa kun las sems grol ba//zhes bya ba smos te/ nyon mongs pa dang las las rnam par grol ba zhes bya ba'i don to/ /skye rga yang ni 'dren mi 'gyur/ /zhes bya ba ni yang skye ba dang rga ba 'thob par mi 'gyur te/ 'thob pa'i rgyu spangs pa'i phyir ro/ /phrugs kyi tshoms te nyi shu dgu pa'i rnam par 'grel ba rdzogs so// //phrugs su bstan pa las rjes su 'bad pa'i 'bras bu bstan pa'i phyir de'i 'og tu bde ba'i tshoms bstan to/ /de'i phyir 'dir ni phal cher nag po dang dkar bo'i phyogs rab tu 'byung ba dang ldan pa'i tshigs su bcad pa bshad de/nag po'i phyogs su spang ba dang dkar po'i phyogs la nan tan du bya ba bstan pas de la nan tan du byas pa'i bde ba yang bstan pa ni/ rgyal ba las ni zhes bya ba la sogs pa smos so/ /'di'i gleng gzhi ni las kyi tshoms su blta bar bya ste/ re zhig 'dir de'i bar du bshad de/rgyal po'i khab na phas kyi dgra'i grogs po zhes bya ba'i bram ze 'jig rten rgyang phan pa las gzhan mi shes pa zhig ste/ ji tsam na bcom ldan 'das kyi thad du song nas bab col du kye gau ta ma khyod ni rgyal po rgyal lo zhes smras te/ de nas tshigs su bcad pa gnyis gsungs te/de thos pas dgra bcom par gyur to zhes gzhan dag zer ro/ /rgyal ba zhes bya ba ni gzhan zil gyis mnan cing bdag nyid mtho bar gyur pa ni rgyal ba'o/ /de las khon byung ba na khong khro ba dang rjes su 'brel cing rab tu skye ba'o//de'i phyir bdag gis 'di las rgyal bar bya ste/ yang 'di la bdag gis bag dbab par mi bya zhing 'di'i rtsa ba lhag ma med par dbyung bar bya'o zhes pa ste/ dgra'i lhag ma ni mi gzhag go zhes bya ba la sogs pa'i tshig gis so/ /khon ni gzhan la gnod par byas pa las bag chags dang rjes su 'brel pa'o//'byung ba zhes bya ba ni bdag gis yang chung ngu dang bar ma la sogs pa'i rim pas 'phel ba'o/ /pha rol pham pas sdug bsngal 'thob/ /ces bya ba ni gang yang gzhan zil gyis gnon cing spa bkod bar byed pa de ni sdug bsngal bar gnas te/lus sgrub pa la sogs pa la nyam chung zhing dga' ba'i gnas skabs thob la/ nang gi yid shin tu gdung bar byas pa nyams su myong zhing 'dug pa'o/ /gnyi ga yang gnyi ga la 'byung mod kyi phal cher re re la brjod do//de ltar na gang zhig gi bde ba 'thob ce na/ nye bar zhi ba'i bde ba 'thob/ /ces bya ba ste/ nye bar zhi ba la gnas par byas na bdag dang gzhan la 'tshe ba spangs pa ni dbang po rnams tshim bzhin du 'dug pa'o/ /ci zhig byas nas nye bar zhi bar 'gyur zhe na/rgyal dang pha rol pham spangs na/ /zhes bya ba smos te/ gzhan bzhin du don dang 'brel pa yin te/ rgyal ba ni bdag nyid mtho ba ste/ gzhan zil gyis gnon pa yang spang zhing yongs su spang bar bya ba yin te/ gdung ba'i rgyur gyur pa'i phyir/pha rol pham pa bzhin no/ /gang bde ba sbyin par 'gyur zhing 'tshe ba las ldog pa de nyid ni/ bde ba dang grol bar 'gyur gyis/ gzhan ni ma yin no zhes bstan pa'i phyir/ gzhan la sdug bsngal bskyed pa yis/ /zhes bya ba yin te/ gzhan gyi rgyud la sdug bsngal sgrub pa'o//gang zhig bdag gis bde 'dod pa/ /zhes byas pa ni gang la la bdag nyid dang 'brel ba'i bde ba mngon par 'dod cing sems pa'o/ /dgra dang mi 'bral 'grogs pa dang / /zhes bya ba ni dgra'i dpe bstan te/ /mi 'bral zhes bya ba ni gnod pa dang 'tshe ba la sogs pa'i gdung ba ji snyed pa bstan pa yin te/sdug bsngal gyi gnas skabs de gnyis dang 'grogs pa ni ldan pas nye bar gtses pa'o/ /ji skad du bshad pa/ rgyal ba las ni khon la sogs pas gzhan pham pa'i sdug bsngal gyi gnas skabs yin no zhes bya ba bstan te/blo phyin ci log pas bde ba 'dod pa la sdug bsngal gyi rgyu la spyod pa'o/ /de ni sdug bsngal las mi 'grol/ /zhes bya ba sdug bsngal ni lus dang sems kyi ste/ sdug bsngal gyi yongs su spyod pa dang 'khor ba las nges par mi 'byung ba'o//tshigs bcad snga ma de nyid dbye ba bstan pa/ bde ba 'dod phyir zhes bya ba la sogs pa'o/ /bcom ldan 'das mnyan yod du bsod snyoms kyi phyir gshegs pa dang / de'i tshe mnyan yod dang rgyal byed kyi tshal gyi bar na ba lang gi khyu gnas te/ ba lang rdzi gcer bu nyam chung zhing rke ba zhig khyim bdag dang zhing pa dag gis bdag la gnod pa byed na mi rung ngo zhes nas/nas kyi zhing la zhugs pa'i ba lang dag khros te/ dbyug pa ring pos lan du mar brgyab pa dang / bcom ldan 'das kyis tshigs su bcad pa gnyis gsungs so//bde ba 'dod pa yin pas bde ba 'dod pa ste/ bde ba la 'chums pa'i phyir ro/ /'byung po ni srog chags so/ /gang zhig ces bya ba ni gtum pa'i sems can no/ chad pas zhes bya ba ni dbyug pa la sogs pas gnod pa byed pas so/ /'tshe zhing zhes bya ba ni rdeg par byed pa'o//ci'i phyir zhe na/ bdag gi bde ba 'dod pa'i phyir/ /zhes bya ba ni bdag dang 'brel pa'i bde ba myong bar 'dod pa'i phyir te/ byis pa ni gzhan gyi sdug bsngal gyis bdag gi bde ba 'dod par byed do/ /de las bzlog pa ni dam pa ste/ ji skad du/bu ram shing bzhin gzhan btsir te/ /bdag gi bde ba 'dod par byed/ /rtsod pa'i dus su khyad par du/ /rang bzhin me ltar bsreg pa'o/ /sdug bsngal ba ni snying rje yis/ /bde ba ma bskyed gang gis 'gyur/ /snying rje can rnams gzhan gyis ni/ /bde ba skyed de des bde byed//ces so/ /de yang 'di ltar phyin ci log pas 'jug pa ni byis pa te/ 'di 'am pha rol du bde ba 'thob pa ma yin no zhes bstan pa'i phyir/ pha rol du ni bde mi 'thob/ /ces bya ba'o/ /gnyis pas ni dkar po'i phyogs bstan te/ rtogs par bla'o/bde ba dang sdug bsngal gnyis kyi rgyu ni don dam par chos dang chos ma yin pa nyid yin gyi/ gzhan ma yin no zhes bstan pa'i phyir/ chos spyod legs par zhes bya ba la sogs pa smos so/ /rgyal po'i khab na 'tsho byed gzhon nus bskyed kyi bu gnyis rab tu byung ste/gcig ni dgra bcom par gyur te/ gnyis pa ni tshul nyams te/ des bcom ldan 'das la gsol ba/ bdag rab tu byung bas gnas te/ de yang bcom ldan 'das 'di nyid na bzhugs bzhin du bdag 'dod pa la longs mi spyod cing sdig pa mi bgyid de/bdag 'di nyid kyis dmyal bar 'gro bar mi 'gyur ro zhes pa nas mtho ris su skyes te/ de las brtsams nas tshigs su bcad pa lnga gsungs so/ /yang na byang chub sems dpa' gtsug na nor bu zhes bya ba'i mthus des gzhung tshogs kyi nang du seng ge'i khri la 'dzegs nas chos 'di bstan to zhes so//chos spyod ces bya ba ni snying rje bsten pa ste/ gzhan gyi sdug bsngal bsal ba dang bde ba bskyed par bya'o zhes bya ba'i don to/ /chos zhes bya ba ni nges pa'i tshig ni chen po 'dzin par byed pa'o/ /'tshe ba la sogs pa yang kha cig chos su 'dod de/de las khyad par du bya ba'i phyir/ legs par spyad bya zhing zhes bya ba smos te/ bdag dang gzhan gyi bde ba'i 'bras bu spyod pa la 'bad pa ni bde ba'i chos so/ /de'i phyir srog gcod pa la sogs pa las ldog pa dang / srog sbyin pa la sogs pa la 'jug pa ni legs par spyod pa'o//zhes thub pa rnams kyis bstan to/ /yang chos spyod pa zhes bya ba ni bya ba rnams byed pa'o/ /de mi spyod ces bya ba ni chos ma yin pa la chos su 'du shes pa ste/ 'jig rten pa'i rig byed kyi 'gro ba la rnam par 'tshe ba la sogs pas de spyad par mi bya'o//ji lta bu zhe na/ nyes par spyod pa zhes bya ba smos te/ bdag dang gzhan la sdug bsngal gyi 'bras bu'i spyod pa la 'bad pa gang yin pa de chos la chos kyi 'du shes de la snga ma las bzlog ste brjod par bya'o/ /ci'i phyir zhe na/ chos spyad pas ni bde ba 'thob//ces bya ba ste/ gang legs par spyod pa'i tshul chos spyod pa de ni bde ba la gnas pa yin te/ 'dir ni grags pa la sogs pas so/ /pha rol du mngon par 'dod pa'i 'bras bu 'thob po/ /nyes par spyod pas bde mi 'thob/ /ces bya ba ni bzlog ste tshig gis kha bskang bar bya'o//chos spyad pas ni bde ba 'thob/ /ces bya ba ci'i phyir zhe na/ chos spyod chos kyis zhes bya ba smos te/ snying rje'i rtsa ba legs par spyod pa'i bdag nyid chos yin te/ kyis zhes bya ba ni nyid kyi don to/ /gang gi phyir chos nyid spyod pa'i gang zag srung bar 'khrul pa med de/gzhan lus la sogs pa'i stobs kyis ni ma yin te/ ji skad du/ myos pa'i glang chen gangs ri lta bu g.yo zhing 'gram pa rngul gyis gsher ba dang / /bran g.yog kyang ni snying nye go bgos mdung dang mdung thung ral gri mtshon thogs pas//mi rnams kyis ni g.yul ngor 'jug pa dga' bas de yis bsrung bar mi nus te/ /rang gi bsod nams bsags pa gang gis g.yul dang g.yul min dag tu srung bar byed/ /ces so/ /thob pa'i longs spyod dang bcas pa'i bde ba ni chos kyi mthus yongs su nyams pa med pa 'di dang gzhan du 'di sa bstan nas 'di'i ma thob pa'i phyir bstan pa/chos la legs spyod ces bya ba smos te/ tshul bzhin du bskyed pa ni legs par spyod pa ste/ dad pa dang gus pa thog mar 'gro bas dus su nye bar spyod pa skal ba dang ldan pa'i sbyin pa rgya chen po dang /tshul khrims dang ldan pa'i skye bo dam pa dang 'grogs pa ni des pa yin no zhes so/ /bde skyed pa zhes bya ba ni 'dren dang grub par byed pa'o/ /phan yon de'o zhes bya ba ni phan 'dogs pa ni sngar bstan pa'i chos la legs par spyod pa byas na 'gyur ro//gzhan yang / chos spyod ngan 'gror mi 'gro ste/ /zhes bya ba smos te/ des ngan song gi sgo bkag pa'i phyir ro/ /'dis ni pha rol gyi phan yon bstan to/ /snga ma des gang bstan zhe na/ 'di nyid kyi don dpe dang bcas pa rnam par spros te bstan pa'i dbang du byas nas/yangs pa'i gdugs kyis zhes bya ba la sogs pa smos te/ chos kyis ji ltar bsrungs she na/ gdugs kyis ltar zhes bya ba ste/ dper na yangs shing che la sdug pa'i gdugs kyis ni dbyar gyi dus su gang zag de nyid la char gyis byas pa'i gnod pa de las zlog par byed cing srung bar byed do//de bzhin du bsod nams nye bar bsags pa 'di yang gnod pa du ma dag las te chos spyod pa'o/ /dbyar ka zhes bya ba ni char 'bab pa'i dus so/ /chos min spyod pa bde mi thob/ /ces bya ba ci'i phyir zhe na/ chos min spyad ces bya ba smos te/yang gang zag gang gis nyes par spyod pa'i tshul chos ma yin pa spyod pa'i bag med pa des na/ 'gro ba gang yang rung ba zhes bya ba lha'i 'gro ba dang / mi'i 'gro ba'am/ ngan 'gro'i 'gro ba dag 'dzin pa'am/ skye bar 'gyur zhing 'thob pa'o/ /chos min spyod pa de dag brlag par 'gyur//zhes bya ba ni des chos ma yin pa nyes par spyod pa'i bdag nyid byas shing bsags pas ni chos ma yin pa spyod pa 'di de dang de'i 'gro ba dag tu gzhol zhing 'gro bar 'gyur ba'am brlag pa ste gdung bar 'gyur ba zhes bya ba'i don to/ /dper dpe bstan pa/'di na sbrul nag rked nas bzung ba ltar/ /zhes bya ba ni dper na dbyig pa can la la zhig lam ring pos dub ste mtshan mo gnyid log pa las dbyig pa stor te/ sbrul nag po dbyig pa'i blos rked pa nas bzung ste/ sad pa nas yongs su 'khyud de 'dzin par byed pa nyid la slar rgol bar byed pa de bzhin du blun zhing ma rig pa'i dbang gis blo phyin ci log pa'i gang zag bag med pas chos ma yin pa spyad de/byed pa po nyid la gdung zhing nye bar gnod par byed pa yin no/ /ci'i phyir chos dang chos ma yin pa gnyis 'dod pa dang mi 'dod pa'i 'bras bur 'gyur zhe na/chos dang chos min gnyi ga yi/ /zhes bya ba smos te/ 'di ltar gnod par byed pa dang / phan 'dogs pas 'dra ba ma yin zhing mi 'dra ba'i 'bras bu yang 'dod pa dang mi 'dod pa'i 'bras bu yin pa'i phyir te/ bdud rtsi dang dug bzhin no//'dra bar mi 'gyur ba dang rnam par smin pa zhes bya bar tshig sbyar te/ rang bzhin tha dad pa'i phyir bu ram shing dang nim ba'i sa bon bzhin no/ /rnam par smin pa yang yin la 'dra ba yang yin pas rnam par smin pa 'dra ba'o/ /de yod pa ma yin pa gang yin pa de ni rnam smin 'dra bar mi 'gyur ba'o//rnam par smin pa mi 'dra ba de ga las she na/ 'di ltar/ chos ma yin pas dmyal bar 'gro/ /zhes bya ba ni/ ngan par spyod pa bsags pa'i rgyus ngan song 'thob pa'o/ /chos kyis bde 'gro 'thob par 'gyur/ /zhes bya ba ni rgyu legs par spyod pa yin pa'i phyir bde 'gro 'thob pa'o//gal te de ltar na ci'i phyir thams cad legs par spyod pa la mi 'bad ce na/ bshad pa/ dka' ba'i phyir te/ sbyin pa de re zhig chung ba yin na yang legs par spyod pa shin tu sgrub dka' ba yin na/ de las gzhan pa lta smos kyang ci dgos zhes bstan pa'i phyir/sbyin pa byed pa zhes bya ba la sogs pa smos so/ /khyim bdag dpa' bos sbyin pa chen po lnga thob nas bcom ldan 'das la mngon par dad de ras zung gcig dbul zhes bsams nas gos kyi mdzod du zhugs te/ brtag pa la zhugs pa dang / gos thams cad bzang por mthong ba nas mngon par g.yengs par gyur te/ de las brtsams nas tshigs su bcad pa gnyis gsungs so/ /sbyin pa byed pa zhes bya ba ni rdzas yongs su gtong ba zhes bya ba'i don to/ /g.yul 'gyed ces bya ba ni g.yul ngor dgra rnams kyis gzas pa ste/gos dang go cha bgos nas phan tshun rtsod cing brdeg pa'i mtshan nyid do/ /dang gi sgra ni gnyis po 'di mnyam pa yin no zhes bstan pa'o/ /de nyid ci phyir 'dra zhes gsungs te mkhas pa rnams mnyam pa nyid du ston to/ /de ni dam pa rnams phan 'dogs pa dang gnod pa byed pa gnyis ci'i phyir 'dra zhes bstan te/g.yul 'gyed pa'i bdag nyid ni yon tan ma yin la/ sbyin pa ni yon tan gyi bdag nyid de phan 'dogs par byed pa'i phyir yon tan yang don dam pa'i bya ba'i ngo bo yin na/ ji ltar g.yul 'gyed pa yon tan du bshad ce na/ 'ga' zhig dang g.yul byas kyang sems can dpag tu med pa la phan 'dogs pa ste/ 'di ltar dpa' bo chen po ded dpon du gyur pa'i byang chub sems dpa' 'di rga rom na zhes bya ba'i gnod sbyin chen po ltar 'dir nyes pa ni chung ba yin la/ don che bas te tshong pa yongs su bskyabs pas yon tan yin no//gzhan dag na re/ yon tan thab mo yin gyur na/ /nyes spyod thams cad yon tan phyir/ /thub pas yon tan 'jig rten du/ /rab grags thab mo nyid du bstan/ /de ni 'jig rten gyis bstod pa'i/ /khyad par de la gang zhig gnas par 'gyur//zhe na/ ming ngan zhes smos te/ skye bo tha mal pa dang / sems can dman pas zhes bya ba'i don to/ /de ni yon tan gyi khyad par de gnyis la skye bo ngan pa mi bstan cing mi gnas pa zhes bya ba'i don to/ /bdag nyid chen po nyid ni sbyin par byed cing g.yul 'gyed do zhes bya bar sbyar ro//'di gnyis gnas las yang dag par bstan nas dus las kyang bstan pa'i phyir bshad pa/ sbyin pa byed pa'i dus dang g.yul 'gyed dus/ /zhes bya ba smos te/ g.yul 'gyed pa'i dus bzhin du sbyin pa byed pa'i dus blta bar bya ste/gang gi phyir 'di gnyis ni dus mnyam pa'i rgyu sgrub pa'i phyir ro/ /dper na g.yul 'gyed pa'i dus su stong phrag dang 'thab cing thub kyang rnam par g.yengs pa yin te/ ji ltar dgra bcom par bya ba dang mtshon gang gis dang / gang gi tshe 'am gang du dang / bdag nyid bsrung ba ji ltar 'gyur ba dang / ji ltar rgyal bar 'gyur zhes sems pa de bzhin du ji ltar sbyin pa'i dus na yang kun du g.yengs pa yin te/ sbyin pa chen po bya ba dang / nam zhig sbyin pa dang / ji ltar sbyin pa dang / ji tsam sbyin pa dang /gang la sbyin pa dang / 'di las cir 'gyur zhes bya ba la sogs pa la sems pa yin no/ /ci gnas dang dus kho na mnyam pa nyid du bstan tam zhe na/ rgyu yis yongs su bzung ba zhes bya ba yin te/ rgyu mdor bsdus pa las ni de lta na 'bras bu la sogs pa yang mnyam par 'gyur ro//sbyin pa dang / g.yul 'gyed pa'i phun sum tshogs pa'i khyad par 'byung ba ni/ grags pa yang dag par 'byung ba/ /zhes bya ba la sogs pa'o/ /yang na rgyu yis yongs su bzung ba ni de gnyis kun nas bslang ba'i rgyus kyang 'byung ba yin te/gnas dang dus mnyam pa nyi tsher yang ma zad do zhes bya ba'i don yin te/ de'i rgyu blo dang snying rje dang brtan pa dang pha rol gnod pa'i bdag nyid de/ de dang ldan pas ni byang chub sems dpa' rnams kyang thab mo mdzad par 'gyur te/ ji skad du gsungs pa/ chos kyis bdag nyid yin yang de ni gzhan gyis brnyas pa dang / /rol pa'i bgegs dang dga' med 'jigs pa'i skye bo'ang rab 'bad pas/ /gzi brjid che ba'i tshul gyis ji bzhin rim pas g.yul 'gyed de/ /gnyis la mngon par phyogs pa'i sems kyis de ni rab tu byed//ces so/ /sbyin pa ni bdag nyid chen po de la rab tu grags pa yin no/ /yang na rgyu yis yongs su bzung ba zhes bya ba ni gnas dang dus nyi tsher yang ma zad de/ rgyu yis yongs su bzung ba zhes bya ba'i don to/ /'dir rgyus yongs su bzung ba gang yin zhe na/ gcig pus kyang zhes bya ba cung zad de 'khor ma bsags shing nyung la bdag nyid gcig pus so/ /dam pa zhes bya ba ni dpa' bo ste g.yul 'gyed pa'o/ /'phyes las rgyal byed de zhes bya ba ni dgra bo dpag tu med pa zil gyis gnon pa'o/ /gal te sgrub pa dang mtshon la sogs pa'i khyad par dang ldan pa yin nam zhe na/legs par ma chas pa zhes bya ba smos so/ /med pas kyang sgrub pa ste go cha dang mtshon la sogs pa'i yo byad g.yul du dgos par gyur pa'o/ /ji lta bus dgra las rgyal ba yin zhe na/ shin tu legs par chas pa zhes bya ba smos te/thab mo'i 'tshog chas yod cing tshang ba mang po dang ldan pa'o/ /ji skad ston pa yin zhe na/ dper na g.yul du dpa' ba la sogs pa'i khyad par dang ldan pas sgrub pa dang mtshon la sogs pa'i sgo nas gcig pus kyang zil gyis gnon par byed cing g.yul gyi mi las rgyal bar byas te/bde ba dang bde ba'i yo byad 'thob par byed pa de bzhin du sbyin pa po dad pa la sogs pa'i yon tan ldan pas ni chung ba yin yang zhing bzang po la nor rdzas yongs su btang bas pha rol du mtho ris kyi bde ba la sogs pa 'dzin pa yin no//dad pa ni sbyin pa po dad pa phun sum tshogs pa ste/ des snod gang la byin pa'o/ /ji lta bu zhe na/ chung ngu byin pas kyang zhes bya ba smos te/ cung zad byin yang ste gang zan dron chang gcig la sogs pa yin no//yang gi sgra ni mang po lta ci smos zhes bya ba yin te/ ji skad du bshad pa/ zhing khyad par can la sems dang bas phul ba ni chung zhes bya ba gang yang med do zhes bstan pa'o/ /des ni de dag ces bya ba ni chung ba'i sbyin pa des kyang sbyin pa po de dag bde bar 'gyur ba ste/gzhan du zhes bya ba ni 'jig rten pha rol du skye ba du mar 'bras bu 'byung bar 'gyur ro/ /mthong ba'i chos la yang 'di'i 'bras bu 'byung ba nyid de/ 'phral la 'byung ba la sogs pa bzhin no/ /rnam pa thams cad du g.yul 'gyed pa dang sbyin pa po gnyis mnyam mam/gang gtso bo yin zhe na/ 'di na zhes bya ba la sogs pa smos so/ /ni zhes bya ba'i sgra ni dang gi sgra yin te/ ji ltar 'di na g.yul 'gyed pa dang sbyin pa byin pa zhes bya ba'i don to/ /ci zhig byas nas g.yul 'gyed pa dang sbyin pa po zhes brjod ce na/lan brgyar g.yul 'gyed pa dang zhes bya ba smos te/ rtsod pa lan brgya'am/ /g.yul sprod pa brgya zhes bya ba'i don to/ /mi mthun pa'i phyogs dang bcas pa'i thab mo de dag ni g.yul lo/ /bzlog ces bya ba ni zil gyis mnan pa ste/dgrar gyur pa dang / gnod par byed pa'i gang zag zil gyis mnan pa dang spa bkong pa ni g.yul las bzlog pa zhes brjod do/ /gang zhig ser sna ste/ sbyin pa dang mi mthun pa'i sems las byung ba'i chos dgrar gyur cing dgra dang 'dra bar gnod pa byed pa gnyen po brgya phrag mngon du byas pas rgyab tu bor zhing kun du mi spyod pa'i sbyor ba pos zil gyis gnon par 'gyur ba'o//'di gnyis las gtso bo bstan pa'i phyir/ dpa' bo bas zhes bya ba smos te/ g.yul dpag tu med pa las rgyal ba'i dpa' bo thab mo byed pa las te/shin tu rags par mtshon pa dang re zhig pa'i dgra yin pa'i phyir ro/ /de dag ces bya ba ni sbyin pa po nyid do/ /ches dpa' yin par zhes bya ba ni ches pha rol gnon pa yin te/ /nang gi phra ba dang rtogs par dka' ba dang / rgyun gyi dgra rtsa ba nas bcad pa'i phyir ro/ /de gang yin zhe na/ gang zhig chags med sems kyis sbyin byed pa/ /zhes bya ba smos te/ phan 'dogs pa'i bsam pa yod pa'i phyir ro/ /sbyin pa bya ba dka' bar gyur na ni tshul khrims la sogs pa dka' bar ma bshad kyang grub pa yin no//dge ba shin tu dka' ba yin yang 'bras bu 'dod pa nyid yin pas gcig tu bya ba yin no zhes bstan pa'i phyir/ bsod nams rnam smin zhes bya ba la sogs pa smos so/ /bcom ldan 'das mngon par rdzogs par sangs rgyas pa na tshong pa ga gon dang bzang po gnyis kyi bsod snyoms bzhes te/gnyis kyi sbyin pa rjes su yi rang bar mdzad nas tshigs su bcad pa gsum gsungs so/ /bde ba rnam par smin pa bde ba'i bdag nyid de/ /bdag nyid tshim par byed pa'i phyir dang / bde ba'i mtshog chas thob par byed pa'i phyir ro//de gang yin zhe na/ bsod nams zhes bya ba smos te/ sbyin pa la sogs pa'i legs par spyod pa'o/ /'di nyid ga las she na bshad pa/ 'di ltar de dang ldan na ni mngon par bsams pa thams cad 'byor par byed do zhes bya ba ste/ gang gi phyir bsod nams dang ldan na ni yid la bsams pa mtha' dag rdzogs par 'gyur te/ de'i 'dod pa 'byung ba tsam gyis khang pa dang bgo ba dang skyed mos tshal la sogs pa'i dngos po 'byung ba yin no/ /'jig rten pa'i mngon par 'dod pa'i bsod nams kyi 'bras bu bstan nas 'jig rten las 'das pa'i bshad pa/myur du zhes bya ba ste myur ba nyid du'o/ /zhi ba dam pa ni zhi ba'i mchog tu gyur pa ste/ dus de tsam ni ma yin no/ /sdug bsngal las 'das par gyur pa ni/ mya ngan las 'das par gyur pa ste/mya ngan las 'das pa thob pa'o/ /dang gi sgra ni mngon par mtho ba'i 'byor pa gcig pur ma zad do zhes pa'o/ /yang na bsod nams bya ba'i dngos po gsum bstan pa'i don ni 'di ste/ bsod nams kyi sgras ni sbyin pa ston pa yin no/ / mngon par bsams pa 'byor bar byed/ /ces bya ba ni tshul khrims te/ tshul khrims dang ldan pas ni bsams pa 'byor bar 'gyur ro zhes mdo las gsungs so/ /lhag mas ni bsgoms pa bstan to/ /rgyu med pa dang rnam par smin pa med pa dang / rang bzhin dang dbang phyug la sogs pa mi mthun pa rgyur smra ba ni ma yin te/bshad pa/ 'jig rten pa dag ni ngo bo nyid kyis 'byung zhing ngo bo nyid kyis 'jig rten bdag gis byas pa ni med do/ /de bas na 'byung po rnams la gang gis mthong ba de ni mthong ba'o/ /spyod pa 'di dag ni rang bzhin yin te/yon tan 'di dag la mun pas bsgribs pa'i phyir phyin ci log tu 'dzin cing bdag gis byas so zhes mkhas pa ma yin pa dag sems te/ rtsa yang dgug par bya ba la dbang byed de/ skye ba po 'di shes pa yod min te/ rang gi bde sdug bdag la rang dbang med//chos don 'dod dang thar pa rnams/ /skyes bu'i rgyus ni shes par bya/ /dbang phyug gis btang yang na g.yang sa'am/ /mtho ris dag tu 'gro ba kho nar zad/ /ces bya ba la sogs pa'o/ /bsod nams las byung ba'i 'bras bu rnam par smin pa ni nges par bgegs med do zhes bstan pa'i phyir/gzhan las byung ba zhes bya ba la sogs pa smos so/ /gzhan las 'ongs pa ste/ gzhan gyi rgyu can dang phyi rol las zhes bya ba'i don to/ /des kyang bgegs byed par mi nus na rgyu med pa rnams kyis lta smos kyang ci dgos zhes pa'o//gnod pa ni nye bar 'tshe ba ste/ yams kyi nad la sogs pa'o/ /gnod pa byed pa bstan pa'i phyir/ lha dang bdud kyi rigs rnams zhes bya ba la sogs pa smos te/ bdud kyi 'khor dang / bdud kyi gnas dang / nye bar spyod pa zhes bya ba'i don te gzhan 'di dag gang gis kyang gnod pa byed pa las 'jug pa ma yin zhing bar chad bya bar mi nus so zhes bya ba ste/mngon par 'dod pa'i 'bras bu 'thob pa la bgegs byed pa'i mthu med pa yin no/ /de'i phyir byang chub sems dpas bsod nams kyi tshogs khyad par can bsags pas rdo rje gdan la bzhugs pa na bar du gcod pa'i phyir bdud kyis bskul ba'i 'byung po'i rigs bye ba phrag sum cu rtsa drug snyed dang /lha de dag tsham tshom med par 'ongs na yang byang chub la bar du gcod par mi nus la de dag gis rdo rje la sogs pa'i mtshon yang 'phen par mi nus so//'jig rten pa'i bsod nams kyi bde ba 'thob pas bgegs bya bar ma nus pa nyi tsher ma zad de/ 'jig rten las 'das pa'i bde bas kyang mi nus par bstan pa'i phyir gal te zhes bya ba ste 'on te'o//de yis zhes bya ba ni de nyid kyis so/ /bsod nams 'bad brtsal byas na ni/ /zhes bya ba ni brtsal zhing yang dag pa ji lta ba bzhin du byed pa'i brtson 'grus rtsom pa'o/ /'phags pa ni sdig pa'i las ldog pa ste/ 'dis ni tshul khrims dang ldan par bstan to//shes rab ces bya ba ni 'gro ba dang sbyor ba spangs pa zhes bya ba'i don to/ /'dis ni blo sngon du 'gro bas bsgom par bstan to/ /gtong ldan la zhes bya ba ni sbyin pa mchog tu byed cing brtson 'grus la 'jug pa'o/ /de'i bsod nams rnam pa gsum gyi phan yon gyi khyad par bstan pa'i phyir/sdug bsngal zhes bya ba smos te/ gang de ltar gus pas legs par spyod pa na rnam pa gsum la mchog tu byed pa de ni 'khor ba'o/ /zad bya'i phyir zhes bya ba ni mthar phyin pa thob pa'o/ /reg par 'gyur zhes bya ba ni rjes su mthun pa'i snod thob pa zhes bya ba'i don to//ji lta bu thob par 'gyur zhe na/ lhag mthong zhes bya ba smos te/ sdug bsngal la sogs pa bden pa bzhi gang mthong ba tsam gyis lhag mthong ste/ bden pa yang dag par mthong bar 'gyur ba zhes bya ba'i don to//gang gi phyir mthong ba'i lam mngon sum du ma byas pas ni gong ma'i lam bsgom pa las bzlog cing bcad par mi nus so/ /gang de lta bu nyid ni bde ba 'thob pa yin no zhes bstan pa'i phyir sems ni rab dang zhes bya ba la sogs pa smos so//ka pi na chen po dag la rtag tu snying po med pas rtag tu snying po med pa la gso sbyong byed pa ste/ de bas na gso sbyong la mngon par mi phyogs la mi 'ong zhing lam bsgom pa la mngon par mi dga' ba las brtsams so/ /gzhan dag ni bram ze ma thag res 'di skad du/ sems ni rab tu dang ba yis/ /'jig rten bde ba gang gis 'thob/ /'phags pas bstan pa'i lam dag la/ /gang zhig rtag tu dga' bar 'gyur/ /zhes zhus pas/ des 'di gsungs so zhes zer ro/ /chos mngon par rtogs pa las skyes pa'i dga' ba ni chos la gnas pa'i dga' ba ste/des de bde bar gnas pa'o/ /'dir chos ni sdug bsngal gyi bden pa rnam pa bzhi'o/ /gang gis de la dga' ba nyams su myong ba yin zhe na/ sems ni rab tu rnam dang bas/ /zhes bya ba yin te/ shes nas dad pa dang ldan pa'i phyir yid kyis chad pa med pa'o//'phags pas gsungs pa'i lam dag la/ /zhes bya ba ni de bzhin gshegs pas gsungs pa'i thar pa thob pa'i lam la'o/ /mkhas pa ni rtogs pa ste/ lam dang lam ma yin pa'i khyad par shes pa'o/ / de las gzhan pa'i thar pa'i lam ma dmigs pas de nyid la rgyun du dga' bar byed pa ste/ ngogs nas mthong ba'i bya gru la mngon par dga' ba bzhin no/ /gang de la mngon par dga' ba'i blo dang ldan pa ni bde ba'i bsod snyoms la spyod pa yin no zhes bstan pa'i phyir//gang dag ces bya ba la sogs pa smos so/ /de nas dgon pa ba'i bsod snyoms pa dge slong rab tu mang pos bcom ldan 'das la 'di skad ces gsol to/ /btsun pa gang dag gis yul 'khor gyi bsod snyoms don yod par spyod cing chos gos 'chad pa lags zhes pa dang /ji tsam na de las brtsams te tshigs su bcad pa gsungs so/ /gang dag ces bya ba ni bdag nyid chen po dag go/ /sems ni bsam gtan dga' zhes bya ba ni ting nge 'dzin dang sgom pa la 'dod pa thob pa ste/ de las mngon par brtson pas ni thar pa'i lam 'byung ba'i phyir ro//gang zhig skye med dga' ba dang / /zhes bya ba la/ skye ba med pa'i sgra ni thar pa'i rnam grangs yin te/ gang du phung po len pa med pa de ni mya ngan las 'das pa'i gnas yin pas gang der lhag par 'dod cing dga' ba'o/ / gang gi rim pas bsam gtan dang sgom pa la shin tu dga' ba yin zhe na/ dran pa nye bar gzhag pa bzhi dang zhes bya ba ste/ dga' ba zhes bya ba thams cad la sbyar ro/ /lus la sogs pa la brtag pas yongs su 'jug cing mngon par dga' bas 'jug pa'o//lus dang sems kyi chos ni tha dad pa nyid du brtag par bya'o zhes lung las bshad do/ /de sgom pa yongs su rdzogs na ni zag pa med pa'i lam bsgom pa la yang sems mngon par dga' bar 'gyur ro zhes bstan pa'i phyir/ byang chub yan lag bdun dag dang / / zhes bya ba ste/ dran pa yang dag byang chub kyi yan lag la sogs pa zad la mi skye ba'i tshul gyi byang chub kyi yan lag ste/ 'thob par byed pa'i rgyu yin no/ /zhes byas nas so/ /gcig tu zag pa med pa'i phyir byang chub kyi yan lag ni 'dir mthong ba'i lam du bstan to//dran pa nye bar gzhag pa bsgom pa'i shas che ba'i mthus ni 'di 'byung ba yin no/ /rdzu 'phrul 'thob pa'i mtshan ma yin pa'i phyir de ni bsgom pa'i lam bstan te/ rdzu 'phrul rkang pa bzhi rnams dang / /zhes bya ba 'dun pa dang / brtson 'grus dang /dpyod pa dang / ting nge 'dzin zhes bya ba'i ming can dag go/ /lam yan lag brgyad ces bya ba ni 'phags pa'i lam dag go/ /mthong ba'i chos la bde bar gnas pa'i phyir mi slob pa'i lam dang zag pa med pa'i lam mo/ /gang dga' ba zhes bya ba ni mngon par dga' ba skyes pa'o//de dag bsod snyoms bde bar za bar byed/ /ces bya ba ni kha na ma tho ba med pa'i bza' ba dang btung ba bu lon med par longs su longs spyod ba'o/ /chos gos 'chang ba dang zhes bya ba ni sdom brtson dag gyon zhing 'chang ba'i gos dag go//de dag bde bar 'chag par byed pa dang / /zhes bya ba ni de dag gi 'chag cing rgyu ba yang bde ba dang kha na ma tho ba med par 'chag pa'o/ /gang du zhe na/ ri dang nags tshal na zhes bya ba smos te/ ri ni ri bo dag tu'o/ /nags tshal ni dgon pa dag tu'o//de dag bde 'thob ces bya ba ni mngon par 'dod pa'i lam 'thob la skyong zhing zhugs pa'o/ /bde bar na zhes bya ba ni bde ba yang dag par skyes pa ste/ mthong ba'i chos la dga' ba dang ldan pa'o/ /mthong ba'i chos la mya ngan 'das/ /zhes bya ba ni mthong ba'i chos nyid la rang gi lus yod bzhin du mngon par 'dod pa'i mya ngan las 'das pa'i bde ba nyams su myong bar 'gyur ba'o//'di nyid ga las she na/ 'di ltar/ khon dang 'jigs pa kun 'das shing / /zhes bya ba ni nye ba'i nyon mongs pa thams cad spangs pa'i phyir ro//ji ltar byas pas de ltar 'gyur zhe na/ /'jig rten yul gyi sred las rgal/ /zhes bya ba nyon mongs pa dang nye ba'i nyon mongs pa'i rtsa ba sred pa drungs phyung ba'i phyir ro/ /srid pa spangs bas yon tan 'thob cing dga' ba la sogs pa'i khyad par dang ldan pa yin te/des na yang chos thos pa dang zhes bya ba la sogs pa smos so/ /dus ma yin pa'i sprin zhag bdun gyi bar du byung nas klu'i rgyal po btang bzung gis bcom ldan 'das kyi sku la gdengs ka chen po byas te lan bdun du 'khyud nas gnas so/ /zhag bdun 'das pa dang bcom ldan 'das kyi sku la 'khyud pa btang nas thal mo sbyar nas 'di skad ces gsol to//btsun pa khyed zhag bdun po 'di la grang bar ma gyur tam/ tsha bar ma gyur tam/ sbrang bu dang / sha sbrang dang / sdig sbrul gyis reg par ma gyur tam/ lus yongs su gdung bar ma gyur tam zhes zhus pa dang / tshigs su bcad pa gnyis po 'di gsungs so/ /bde ba ni kha na ma tho ba med pa'i bde ba'i rgyu'o/ /dben pa ni rnam pa gnyis te/ de'i bde ba'i rgyu yin pa'i phyir ro/ /'di gang gi bde ba yin zhe na/ dga' bas zhes bya ba smos te/chos gos ngan don tsam dag gis yongs su chog shes pa ste/ dben pa na chog mi shes pa med pa'i phyir ro/ /chen po 'dod pa la chog mi shes pa med pa'o zhes so/ /chos thos pa dang zhes bya ba ni thos pa'i chos te/ gang sngon thub pas bstan pa'i chos so//mang du thos pa dang dben pa'i bde ba ni rgyun du chos du ma yongs su rtogs pa las 'jug pa'i phyir thos pa las byung ba'i shes rab dang ldan pa'o/ /mthong ba ni zhes bya ba ni shes par byed pa ste/ yongs su rtogs par byed pa nyid de bsams pa las byung ba'i shes pa dang ldan pa'i phyir ro//'jig rten 'tshe med bde ba yin/ /zhes bya ba ni rnam par 'tshe ba gzhan la gnod pa byed pa'o/ /de dgag pa ni 'tshe ba med pa'o/ /gang la zhe na/ 'jig rten zhes bya ba sems can la ste/ sems can thams cad la byams pa zhes bya ba'i tshig gis so//de ni gzhal du med pa'i bde ba'i rgyur gyur pa'i phyir te/ bde ba'i sman bsten pas bde ba ji lta ba bzhin no/ /'dis ni bsgoms pa las byung ba'i shes pa bstan to/ /srog chags 'byung po la yang dag par sdom pa zhes bya ba la 'dis ni tshul khrims kyi sdom pa phun sum tshogs par bstan te/thos pa las byung ba la sogs pa'i shes pa yang de la gnas pa'i phyir ro/ /ji skad du/ tshul khrims la gnas na ni thos pa dang bsams pa dang ldan zhing bsgom pa la sbyor bar 'gyur ro zhes gsungs pa'i phyir ro//yang na dben pa ni rnam pa gnyis te/ /'dir ni sems dben pa bstan to/ /dga' ba yang rnam pa gnyis te/ 'dir ni 'dus ma byas pa las dga' ba bstan to/ /chos thos pa yang rnam pa gnyis te/ rna ba'i rnam par shes pas thos pa dang //sdig pa la mi gnas pa'o/ /'dir ni 'og ma la dgongs pa'o/ /'tshe ba med pa yang gnyis te/ /tshul khrims kyi rang bzhin dang / bsgom pa'i rang bzhin no/ /'dir yang phyi mas bstan to/ /bde ba yang rnam pa gnyis te/ lus dang sems kyi dbye bas so/ /'dir ni sems kyi'o/ /'jig rten yang rnam pa gnyis te/ sems can dang snod kyi dbye bas so/ /'dir ni sems can la bstan to/ /srog chags 'byung po ni rnam pa gsum ste/ 'das pa dang ma 'ongs pa dang da ltar byung ba'o//'dir ni da ltar byung ba nyid bstan to/ /yang dag par sdom pa ni rnam pa gnyis te/ /lus dang ngag legs par sdom pa dang / nyon mongs pa kun du sdom pa'o/ /'dir ni tha ma la dgongs so/ /'jig rten 'dod chags bral ba bde/ /zhes bya ba ni gang 'dod pa'i khams de'i yul la chags pa med pas rab tu byung ba ste/de ni bde ba rnam pa du ma dang 'brel pa'i rgyur gyur pa'i phyir ro/ /'dod pa rnams las rab 'das shing / /zhes bya ba ni 'dod pa'i khams kyi nyon mongs pa las 'dod chags dang bral bar yang bde ba dang 'brel pa'i phyir ro//nga'o snyam pa'i nga rgyal dag /btul ba zhes bya ba ni 'jig tshogs la lta ba'i rjes su 'jug pa'i nga rgyal btul ba ste spangs pa'o/ /'dis ni khams gong ma gnyis las 'dod chags dang bral bar bstan te/ de'i sa pa ni nga'o snyam pa'i nga rgyal khyad par can yod pas rjes su dpag par bstan to//de dag mchog tu bde zhes bya ba ni nga'o snyam pa'i nga rgyal 'di nyid btul ba ni bde ba'i gtso bo yin no/ /yang na 'dod chags dang bral ba yang rnam pa gnyis te/ yongs su bzung ba med pa gtso bo dang dngos po gtso bo'o/ /'dir ni 'og ma nyid bstan to//'dod pa las rab tu 'das pa yang rnam pa gnyis te/ skyes pa dang nyon mongs pa spangs pa'o/ /'dir yang 'og ma nyid bstan to/ /nga'o snyam pa'i nga rgyal zhes bya ba 'dis ni nyon mongs pa thams cad spangs par bstan te/ rnam par grol ba'i bde ba'o/ / nga'o snyam pa'i nga rgyal spangs pas ni tshul khrims la sogs pa 'thob par 'gyur ro zhes bstan pa'i phyir smras pa/ rgas khar zhes bya ba la sogs pa smos so/ /rgas pa'i bar du ci zhig bde/ /gang la rab gnas legs pa dang / /tshig ni gang zhig bder shes bya/ gang zhig mir byed bder 'gyur lags//zhes lhas gsol pa las 'di gsungs so/ /rgas khar tshul khrims ldan pa bde/ /zhes bya ba ni byis pa nas bzung ste rgas pa'i gnas skabs kyi bar du tshul khrims dang ldan pa ni bde ba'i rgyur gyur pa ste/ tshim par byed pa'i phyir ro//dad la rab tu gnas pa bde/ /zhes bya ba ni brtan par rab tu gnas pa'i phyir te/ yid bzhin gyi nor bu'i dngos po'i lta bu'o/ /don ldan tshig la dga' ba bde/ /zhes bya ba ni khyad par gyi don dang ldan pa ste/ thams cad kyi dga' ba bskyed pas don khyad par can dang 'brel pa'i don la dga' ba'o//sdig pa mi byed pa dag bde/ /zhes bya ba ni nyes par spyod pa mi sgrub pa'o/ /gang tshul khrims la sogs pa'i dbang gis ni bdag gir byed pa bstsal zhing de'i khyad par thob par bstan pa'i phyir/ 'jig rten na ni zhes bya ba la sogs pa smos so//gang zhig phar 'dzin pa dang de bzhin mar 'dzin bde/ /gang zhig dge sbyong shes dang bram zer 'dzin pa bde/ /zhes lhas zhus pa las 'di gsungs so/ /phar 'dzin bde zhes bya ba ni phar shes pa de ni phar 'dzin pa ste/ de'i dngos po nyid yin pas phar 'dzin pa ste/pha'i rjes su mthun par 'jug pa ni shin tu bsod nams kyi rgyu yin pa'i phyir dang / yang dag par bsngags pa'i phyir bde ba'o/ /gang du bde ba yin zhe na/ bshad pa/ 'jig rten na zhes bya ba ste/ khyad par du mi'i 'jig rten 'dir 'dod de/de nyid bstan pa dang nye ba'i phyir ro/ /de bzhin du mar 'dzin pa yang shes par bya'o/ /dge ba ni dge sbyong du 'dzin pa ste/ yang dag par sdom pa la brtson pa'i skye bo mchod pa mchog tu byed pa ste/ de'i rgyu ni dad pa dang brtson 'grus dang ldan pa dang /sbyin pa'i chos la mngon par dga' ba la sogs pa yon tan gsum la brjod do/ /de bzhin du bram zer shes pa yang brjod par bya'o/ /tshigs bcad snga ma phyed kyis ni phan 'dogs pa'i zhing bstan to/ /'og ma phyed po 'dis ni yon tan gyi zhing bstan to//yon tan gyi zhing yang rnam pa gnyis te/ rab tu byung ba dang khyim na gnas pa ste/ dge sbyong dang bram zer go rims bzhin du bstan par shes par bya'o/ /gang de ltar yon tan sgrub pa mchog tu byed cing khyad par shes pa de nyid ni dkon mchog gsum la ji lta ba bzhin du sgrub par 'gyur ro zhes bstan pa'i phyir/sangs rgyas rnams ni zhes bya ba la sogs pa smos so/ /sangs rgyas 'byung na cir 'gyur lags/ /chos bstan pas ni ji zhig 'gyur/ /dge 'dun mthun pas cir 'gyur zhing / mthun pa rnams kyi ji zhig bde//zhes gsol pa dang / 'di gsungs so/ /gzhan dag ni dge slong rab tu mang po'i gtam las brtsams so zhes zer ro/ /sangs rgyas 'jig rten du 'byung ba ni bde ba ste/ 'jig rten dang 'jig rten las 'das pa'i bde ba'i rgyur gyur pa'i phyir ro//de bzhin chos rnams bstan pa bde/ /zhes bya ba ni gsung rab yan lag bcu gnyis nye bar bstan pa'o/ /dge 'dun mthun pa ni tshogs dge ba phan tshun rjes su mthun pa ste/ dam pa'i chos ston pa la rjes su mthun pa'i tshul gyis 'phags pa'i lam la 'jug pa'o//mthun pa rnams kyi dka' thub bde/ /zhes bya ba ni mthun pa rnams kyis yongs su bzung ba de nyid nyon mongs pa dang las gdung bar byed pa bzhin du tshul khrims dang ting nge 'dzin dang rjes su mthun pa de ni dka' thub ste/ de ni bde ba chen po'o/ / dka' thub can du gyur pa de ji lta bu yin par bstan pa'i phyir/ tshul khrims ldan pa zhes bya ba sogs pa smos so/ /mthong na gang zhig bder shes bya/ /gang zhig mthong bas bde ba 'thob/ /gang mthong bde ba khyad par can/ /'byung ba bdag la bka' stsal gsol//zhes zhus pa las 'di gsungs so/ /tshul khrims phun sum tshogs pa dang ldan na ni mang du thos pa yin no zhes bstan te/ mang du thos pa zhes smos so/ /mang du thos pa dang tshul khrims kyi 'bras bu bstan pa'i phyir/ dgra bcom pa dag ces bya ba smos te/sdug bsngal gyi rgyu dag bcom pa zhes bya ba'i don to/ /drang srong ri sha ba dang / bar rnga ma nal sogs pa skar ma'i gtsug lag byed pa dag kyang 'jig rten na dgra bcom bar brjod do zhes bshad pa ste/ de las khyad par du dbye ba'i dgra bcom pa'i tshul bstan pa/yang srid rnam par grol ba yi/ /zhes bya ba yin no/ /tshul khrims dang ldan pa la sogs pa'i tshul ni nang dang phyi rol gyi dri ma spangs pa yin te/ phyi rol gyi dri ma spangs pa'i thabs ni chu klung ngo / /nang gi dri ma spangs pa'i thabs ni skyes bu dam pa la brten pa la sogs pa ste/de nyid bstan pa/ 'jug ngogs bde ba'i chu klung bde/ /zhes bya ba la sogs pa'o/ /chu klung gang zhig bder shes bya/ /skye bo gang zhig bde bar 'dod/ /gang zhig dmigs na bde bar 'gyur/ /gang zhig zad na bde bar 'dod//ces zhus pa las 'di gsungs so/ /'jug ngogs bde zhes bya ba ni 'di nas rgal cing 'jug pa gang yin pa de ni 'jug ngogs te/ chu bo'i ngogs nye bar 'gro ba'i thabs dang rab tu bsngags pa la sogs pa mi mnyam pa med cing 'jug ngogs bde ba'i chu klung gang yin pa de ni bde ba'i rgyu ste/der ni 'jig rten pa dag bkru ba dang btung ba dang 'jug pa dang / gos 'khru ba la sogs pa ci bder spyod do/ /chos kyis rgyal ba'i zhes bya ba la/ 'dir chos ni 'jig rten dang 'jig rten las 'das pa'i lam de las rgyal ba ste/yongs su rgyal ba ni gang gis tshangs par spyod pa la gnas pa'i sems can chen po zhes bya ba'i don to/ /de yang dpag bsam gyi shing dang 'dra bar sems can la phan 'dogs pa'am/ yang na chos kyis phan 'dogs pa'o/ /rgyal ba ni zil gyis gnon pa ste/chos ma yin pa gcig tu mi byed pa'i skyes bu dam pa zhes bya ba'i don to/ /shes rab thob par gyur pa bde/ /zhes bya ba ni khyad par can gyi rtogs pa de kho na nyid shes pa des thob pa ste/ de rtogs pa'i phyir bdag gi lhag ma khyad par can des rtogs pa'o//de'i rtogs pa'i thabs smras pa/ nga 'o nga rgyal zad pa bde/ /zhes bya ba smos te/ bdag gir 'dzin pa spangs pas na dregs pa dang nga rgyal bcom pa nyid yin te/ blo rnam par dag par gyur pa'i phyir ro/ /de ltar na phyi rol yongs su dag pa ni mthong ba la sogs pas phan 'dogs pa yin gyi/gzhan ni ma yin no zhes bstan pa'i phyir/ 'phags pa rnams kyis cis na bde/ /gang de 'grogs na bder shes bya/ /gang dag ma mthong bde bar ni/ /shes bya de ni bdag la gsungs/ /zhes brgya byin gyis zhus pa las tshigs su bcad pa gnyis gsungs so//'phags pa ni dri ma gnyis ka dang bral ba'o/ /ci'i phyir zhe na/ dam pa bdag dang zhes bya ba ste 'di ltar dam pa de ni phyin ci log las blo nyams pa med pa ste/ dngos po yod pa dag la rgya cher byed pa zhes pas so//'grogs pa zhes bya ba ni lhan cig gnas pa'o/ /de lta na gang zhig mthong na bde ba ma yin zhe na/ byis pa rnams ni ma mthong na/ /zhes bya ba la lus la sogs pa'i nyes par spyod pa mchog tu byed pa'i glen pa'am byis pa'i tshul can nyid do/ /rtag tu bde ba nyid du 'gyur//zhes bya ba ni 'phags pa la sogs pa mthong ba'i stobs dang / byis pa dag ma mthong ba'i stobs kyis ni sred pa zad cing bde ba 'thob pa'i phyir ro/ /yang na rtag tu ni rgyun du ste/ yang dang yang du 'brel pa zhes bya ba'i don to/ /byis pa rnams ni ma mthong na//zhes bya ba dang / rtag tu bde ba nyid du 'gyur/ /zhes bya ba ga las she na/ byis pa dag dang 'grogs byed pa/ /zhes bya ba smos te/ byis pa dang lhan cig 'grogs shing spyod pa'i tshul 'di la yod pa ste/ skye bo glen pa dang lhan cig bsten cing gnas pa zhes bya ba'i don to//yun ring zhes bya ba ni dus shin tu ring ba nyid do/ /rjes su 'gyod par 'gyur zhes bya ba ni nang dang phyi rol gyi gdung ba sel bar byed do/ /ga las she na/ byis pa dag dang 'grogs byed pa/ /zhes bya ba sdug bsngal bar byed pa yin te/gang me'i nang du 'jug pa de ji ltar sreg par mi byed pa bzhin du tshul ngan pa'i skye bo dang 'grogs par gyur na yang ji ltar 'gyod par mi 'gyur/ 'dir chos mthun pa'i dpes smras pa/ dgra 'dra ba zhes bya ba smos te/ mi mdza' ba bzhin no/ / rnam pa kun du zhes bya ba ni nang dang phyi rol dang bcas pa'i rnam pa ste/ dgra dpag tu med pas nyin dang mtshan du dus rtag tu yongs su bskor ba de ni rgyun du 'jigs pa nyams su myong ba yin no/ /de lta na 'phags pa rnams dang 'grogs pa ji ltar bde ba yin zhe na/ brtan pa rnams zhes bya ba ste/ brtan pa dang ldan pa'i phyir 'phags pa zhes bya ba'i don te/ dang gi sgra ni rgyu'i don to/ /'grogs pas bde ba gang yin pa de ni tshim par byed pa dang 'brel pa'i don te/ dper na gnyen sdug pa pha dang ma dang bu la sogs pa skye bo dag dang 'grogs pa dang lhan cig bsten pa zhes bya ba'i don te/dga' bar byed pa ltar dam pa dang yang de bzhin no/ /gal te de ltar na ci'i phyir dus rtag tu 'jig rten pa dag 'phags pa dang 'grogs par mi byed ce na/ skyes bu cang shes zhes bya ba la sogs pas bstan te/'phags pa shA ri'i bus grong khyer na la da nas nye du'i tshogs mang po 'phags pa'i lam la bkod do zhes bya ba'i skabs de gsan nas 'di gsungs so/ /dka' bas 'thob pa yin pas dkon pa ste rnyed par dka' ba'o/ /skyes bu cang shes ni skyes bu dam pa'o//ci'i phyir dkon pa yin zhe na/ de dag kun du 'byung ma yin/ /zhes bya ba smos te/ gang gi phyir de ni rta dang glang po cang shes la sogs pa dang yid bzhin gyi nor bu la sogs pa bzhin du kun du skye ba ma yin no//gang du brtan pa de skyes pa/ /zhes bya ba ni rigs gang du yang brtan pa de skyes pa ste/ blo la sogs pa'i yon tan rin po che dang ldan par bstan to/ /de yi rigs kyis bde ba 'thob/ /ces bya ba ni de ltar thams cad du snga ma dang phyi ma dag tu yang mkhas pas ni rigs 'phel ba nyid de/nyin re zhing rgyas par 'gyur ba dang bde ba skyon med pa 'thob pa'o/ /brtan pas ni bdag rigs brgyan par byed pa gcig pur ma zad de/ bdag nyid kyang bde ba la gnas pa yin no zhes bstan te/ bram ze zhes bya ba la sogs pa smos so//khyim bdag mgon med zas sbyin gyis bcom ldan 'das la gang gis bde bar gnas par 'gyur zhes zhus pa las tshigs su bcad pa gnyis gsungs so/ /rnam pa kun du zhes bya ba ni rnam pa thams cad du'o/ /bde bar 'dug ces bya ba ni 'tshe ba med par gnyid log pa'am 'dug pa'o//bde ba nyid 'thob kyi sdug bsngal dang mi bde ba ni ma yin no zhes bstan te/ bram ze zhes bya ba ni sdig pa phyi rol du spangs pa'i phyir te/ sdig pa las phyi rol du gyur pa ni bram ze'o zhes bya ba'i tshig gis so/ /phyi rol du yid 'byung ba spangs pas na yongs su bzung ba thams cad spangs pa zhes bya ba'i don to//yongs su bzung ba rtsa ba nas spangs pas yongs su bzung ba spangs pa yin gyi gzhan du ni ma yin no zhes bstan pa'i phyir/ mya ngan 'das pa zhes bya ba smos te/ 'dod pa'i 'dod chags la sogs pa'i me nye bar zhi ba zhes bya ba'i don to//rtags gang gis 'di ltar nges par bya zhe na/ gang zhig 'dod pas mgos shing / /zhes bya ba smos te/ gang gi phyir nyon mongs pa dang yul gyi 'dod pas zil gyis ma mnan pa'o/ /gang 'dod pa las 'dod chags dang bral ba de yang bde bar gnas pa yin na/gzugs la sogs pa las 'dod chags dang bral ba lta smos kyang ci dgos zhes bstan pa'i phyir/ rab tu rnam grol zag pa med/ /ces bya ba smos te/ go rims bzhin du gzugs dang gzugs med pa las 'dod chags dang bral ba'am nyon mongs pa spangs pa'o//yang na mthong ba dang bsgom pa'i lam mngon du byed pa'am/ yang na nyon mongs pa dang bag chags spangs pa'i phyir ro/ /nyon mongs pa gzhan spangs pas ni de ltar bde bar gnas pa ma yin te/ 'dod pa'i 'dod chags dang zhe sdang ngo zhes bstan pa'i phyir/sred pa thams cad spangs pa dang / /zhes bya ba la sogs pa dag ste/ sred pa thams cad de rnam par g.yo bar 'dod pas yongs su gdung ba'i yid dang ldan pa ni bde bar mi gnas so/ /de bzhin du phrag dog dang khon du 'dzin pa dang khro bas yongs su gdungs pa yang de bzhin no//gtubs pa ni spangs pa'o/ /snying las rims nad rnam par bsal/ /zhes bya ba ni gdung bar byed pa'i khro ba la sogs pa me dang 'dra ba rnam par spangs pa ste/ de yang bshad pa/ sred pa shin tu sdug bsngal te/ sred pa med pa bde ba'i mchog /chags pa rnam spangs chos shes na/ /dpal ni yang dag len par 'gyur/ /zhes pa'o/ /ji ltar khro bas rgyud yongs su gdung zhing nyen pa ltar so ga'i nyi ma'i 'od zer rab tu drags pas ni de ltar sa la gdung bar mi byed de de zhi ba'i phyir ro//gnyis pa zhi bar gyur pa ni dper na rlung drag pos yid bzhin gyi mtsho la chu srin na kra la sogs pa phan tshun rgyu bar mi byed cing nye bar zhi ba bzhin no/ /de nyid ni bde bar 'dug ste/ gang gis she na/ sems kyis zhi ba 'thob ces bya ba yin te/ 'dis ni ye shes phun sum tshogs pa bstan to//yang bshad pa/ shes pa med par sems zhi bar/ /gang na'ang yod par mi rigs te/ /ma rig yongs su med par yang / /g.yo ba dag ni nges med yin/ /zhes so/ /mgon med zas sbyin ye shes dang spangs pa phun sum tshogs pa las the tshom du gyur pa las de bsal ba'i phyir 'di gsungs so//ye shes dang spangs pa phun sum tshogs pa las byung ba nyid ni shin tu khyad par can 'thob pa yin te/ de dman pa'i bde ba la chags pa med par gyur na'o zhes bstan pa'i phyir/gang zhig bde ba zhes bya ba la sogs pa smos so/ /yul ba reSh+Ta na gnas brtan seng ge zhes bya ba dus las 'das te/ de'i slob mas dge slong dag la chur spyon bdag gi mkhan po len pa med par mya ngan las 'das te/ mchod pa gyis shig ces smras pa dang de dag gis smras pa/de ni phung po lhag ma dang bcas par dus las 'das so zhes byas pa dang / des bcom ldan 'das kyi thad du song ste don 'di gsol pa las/ de las khyod kyi mkhan po ni bsam gtan gsum pa'i sa pa'i bde ba rgya cher myong zhing der skyes so zhes pa nas 'di gsungs so//bde ba chung ngu ni chung ba'i bde ba ste/ bde ba cung zad tsam pa 'khor ba'i bde ba zhes bya ba'i don to/ /de yongs su gtong ba ni gang gis yongs su spangs pa de'am yongs su gtong ba'i tshul 'di la yod pa zhes tshig gi lhag ma'o//gang zhe na/ gang zhig bde ba spangs 'dod cing / /zhes bya ba smos te/ gang la la bde ba las kyang bde ba ste/ ngan song med pa mya ngan las 'das pa'i bde ba gang zhig 'dod pa de ni bde ba spangs 'dod pa ste/ bde ba nyung ngu btang bar gyur pas so/ /'di lta bu byas shing bstan pas ci zhig bya zhe na/ spang byas na zhes bya ba ni rab tu dor zhing skyed par mi byed pa'o/ /bde ba chung ngu ni bde ba cung zad tsam ste dman pa'o/ /brtan pas zhes bya ba ni shes rab can no/ /de'i mtshan nyid bstan pa/legs par mthong zhes bya ba ste/ bdag nyid yongs su rtog cing mthong bar byed pa'o/ /bde ba spangs pa ni nges par legs pa ste/ zang zing med pa'i bde ba'o/ /spangs pa'i bde ba nyid bstan pa/ 'jig rten 'dod pa de zhes bya ba la sogs pa smos so//rdo rje'i gdan nyid du mtshan mo mngon par rdzogs par sangs rgyas te/ ting nge 'dzin de las bzhengs nas rnam par grol ba'i bde ba so sor nyams su myong ste tshigs su bcad pa gsum po 'di gsungs so/ /gzhan dag ni bcom ldan 'das nyan thos kyi tshogs dang bcas pa mnyan yod du bsod snyoms kyi phyir gshegs te/de'i tshe rgyal po gsal rgyal skyes pa med par sil snyan gyis rtse zhing 'dug pa dang / de la dge slong dag 'dod pa skyes par gyur nas skabs de la dge slong dag de la 'dod pa skyes par ma byed cig /de ci'i phyir zhe na/ 'dod pa rnams ni mi rtag pa dang mi brtan pa yin no zhes pa nas 'di'i bar du gsungs so zhes zer ro/ /'jig rten 'dod bde gang yin dang / /zhes bya ba ni gang cung zad 'dod pa'i khams kyi 'dod pa las skyes pa'i bde ba'o/ / gang yin ba zhes bya ba ni bsam gtan dang gzugs med pa na spyod pa'i snyoms par 'jug pa'o/ /lha yul na skyes pa'i bde ba ni lha yul bde ba'o/ /sred pa zad pa'i bde ba de'i/ /bcu drug char yang zhes bya ba ni bcu drug gi cha shas der spang ste/ sngar bstan pa'i 'jig rten pa'i bde ba thams cad ni bcu drug gi char yang mi phod par 'gyur zhing 'di lta bu ni 'thob par mi 'gyur te/mi rtag pa'i phyir ro/ /gang mi rtag pa de ni sdug bsngal ba yin no zhes mdo las gsungs so/ /bde ba dang sdug bsngal gnyis 'dra ba ma yin te/ snang ba dang mun pa bzhin du gnas pa yin no//ci'i phyir zhe na/ 'di ltar sred pa spangs par gyur na ni sdug bsngal 'dren par byed pa'i khur rtsa ba nas spangs pas med par 'gyur ro zhes bstan pa'i phyir/ khur gyis zhes bya ba la sogs pa smos so/ /dge slong dag khyed la khur bshad par bya'o zhes rgya cher gsungs te/tshigs su bcad pa gnyis gsungs so/ /nges bor zhes bya ba ni nges par bsal ba ste/ lci ba'i khur nges par spangs shing rgyab tu bor ba'o/ /lci ba'i khur dag ces bya ba ni rtag tu 'brel pa'i phyir dang / gnod pa chen po yang dag par 'byung ba'i phyir phung po'i khur blangs pa ni shin tu 'degs par dka' ba nyid do//len par mi 'gyur zhes bya ba ni nye bar mi len pas so/ /phyi nas gzhan dag ces bya ba ni skye ba gzhan dag tu yang phung po'i khur ro/ / ga las she na/ khur gyis sdug bsngal blangs pas na/ /zhes bya ba ste/ phung po yongs su bzung ba ste gnod pa thams cad kyis gnod pa yin pa'i phyir ram/ der gyur na sdug bsngal ba'i phyir ro/ /khur bor na ni bde bar 'gyur/ /zhes bya ba'i phung po'i khur yongs su spangs pa'i phyir te/phung po med pa bde ba'i mchog /ces bya ba'i tshig gis so/ /ji ltar phyi nas srid pa yongs su mi 'dzin par 'gyur zhe na/ sred pa thams cad rab tu spongs/ /zhes bya ba smos te/ khams gsum gyi rjes su chags pa'i kun du sbyor ba rtsa nas bcad pa'o//ci'i phyir sred pa rab tu spang zhe na/ srid pa phyi mar 'gro ba med/ /ces bya ba smos te/ kun du sbyor ba thams cad zad par bya ba'i phyir ro/ /sred pa thams cad ma spangs na ni de las gzhan pa'i sred pa'i rtsa ba 'og ma'i cha dang mthun pa dang /gong ma'i cha dang mthun pa'i kun du sbyor ba yod pas 'khor bar skye bar 'gyur ro/ /sa bon med par myu gu bzhin te/ sred pa'i rtsa bas ni kun du sbyor ba yin no/ /de'i rtsa bas ni srid pa yongs su bzung ba ste/ zag pa dang bcas pa'i dngos po'i rtsa ba nas sred pa'o//zag pa dang bcas pa'i dngos po spangs pa ma yin pa yang smras pa/ phung po thams cad yongs shes na/ /zhes bya ba smos te/ zag pa dang bcas pa'i dngos po thams cad ye shes kyis yongs su shes par byas nas chos gcig kyang mi shes pa med pas sdug bsngal gyis mthar byed pa yin pa'i phyir/'gro ba med ces bya ba ni len pa med cing yongs su 'dzin par mi 'gyur ba'o/ /srid pa phyi mar zhes bya ba ni skye ba gzhan du ste/ sred pa dang bral ba las ni sa bon tshig pa bzhin du skye ba med pa'i chos yin pa'i phyir ro//srid pa phyi ma med pa'i bde ba bstan pa'i don rnams zhes bya ba la sogs pa smos so/ /tshe dang ldan pa kun dga' bo'i sngon gyi grogs po tshogs can zhes bya ba'i khyim bdag de'i khyim 'khor dang bcas pa mes tshig go/ /de'i byis pa gnyis shig lus pa las 'phags pa kun dga' bos rab tu phyung nas ji tsam na dgra bcom par gyur pa de'i nye du dang shin tu thag ring bar gyur pa dang /khyim bdag gcig gi bu 'chi ba'i dus su bsod nams bsags pa'i phyir sems shin tu dga' bar gyur pa dang / dgon pa'i dge slong chos gos ngan don tsam gyis chog shes par gyur pa dang / dgra bcom pa shig yongs su mya ngan las 'das par gyur pa de dag las brtsams te/ tshigs su bcad pa 'di gsungs so/ /don rnams bskrun pa la ni zhes bya ba gang gi tshe skyes bu'i nor dang 'byor pa bskyed pa dang bde ba nyams pa de la ste/nyon mongs pa med pa'i grogs po las g.yog 'khor dang nor gzhan nas rnyed pa yin par re bar bya'o/ /srog dag rab tu gtugs la bsod nams bde/ /zhes bya ba ni srog zad cing 'chi ba nye bar gnas pa la ni bsod nams nyid yid tshim par byed pa'i phyir bde ba yin te/gzhan ni ma yin no/ /ngan ngon tsam gyis legs par chog shes bde/ /zhes bya ba ni dman pa dang gya nom pa'i chos gos la sogs pas chog shes pa de ni bde ba dpag tu med pa bsal bas yid tshim par byed pa'i phyir ro//sdug bsngal thams cad nges par nub pa bde/ /zhes bya ba ni khams gsum gyi srid pa'i skyon thams cad spangs pa'o/ /phung po nying mtshams sbyor ba med cing spangs pa de ni bde ba ste/ sdug bsngal thams cad spangs pa'i phyir ro/ /de ltar yongs su mya ngan las 'das pa'i 'gro ba gdags su med par bstan pa'i phyir/ 'di na me ni zhes bya ba la sogs pa smos so/ /drang srong zhig gis khrus byas pa las sa bon zags te/ ri dgas zhig gis 'thungs pa las sems can dang ldan par gyur nas ri dgas kyi mgo can zhig btsas so//de phas bskyed pa las ji tsam na pha shi bar gyur to/ /de thod pa brdung ba'i rig pa bslabs te/ thod pa brdungs na 'gro ba thams cad du skye bar 'gyur bar lung bstan to//'phags pa kun dga' bos rgyun du zhugs pa la sogs pa'i thod pa bstan nas brdungs par lung bstan to/ /dgra bcom pa ni ma shes te/ de 'di snyam du bdag gi rnam par shes pa ni nyams so zhes bcom ldan 'das kyi thad du lhags te zhus pa dang /de nas tshigs su bcad pa gnyis gsungs so/ /lcags ni lcags nyid do/ /brgyab pa ni bsnun pa ste gang lcags kyi cha spyad des brdungs par med ces bya ba dang sbyar ro/ /'bar ba las zhes bya ba ni kun nas rab tu khyab par 'bar ba ste/me ni me nyid do/ /rim gyis rab tu zhi 'gyur te/ /zhes bya ba ni rim pas me'i 'od rab tu 'jig pa'o/ /ji ltar song ba mi shes ltar/ /zhes bya ba ni shar phyogs la sogs pa'i phyogs su 'gro ba mi dmigs pa bzhin no/ /dpe bstan nas/dpes gzhal bar bya ba bshad pa/ legs par rnam par grol rnams kyis/ /zhes bya ba la legs pa ni mthong ba'i lam gyi mthus de'i spang bar bya ba'i nyon mongs pa spangs pa'i phyir ngan song gsum las gtan du grol ba'o/ /'dod pa'i 'dam rdzab chu rgal zhing //zhes bya ba la 'dod pa'i 'dam gang yin pa de ni 'dod pa'i 'dam rdzab bo/ /chu bo de las rgal ba'i ngang tshul 'di la yod pa ste/ khams gsum gyi mthong ba dang bsgom pas spang bar bya ba'i nyon mongs pa spangs pa'i phyir ro/ /gong ma'i sa pa'i nyon mongs pa ni nam mkha' bzhin du lung du ma bstan pa yin ba'i phyir ro//'dod pa na spyod pa'i dge ba yang 'dam rdzab dang 'dra ba'o/ /'gro ba gdags su med pa yin/ /zhes bya ba ni de dag gi 'gro ba lngar 'gro ba yang lung bstan par mi nus shing med de/'gro ba lnga'i nyon mongs pa spangs pa'i phyir ro/ /ci'i phyir de dag gi 'gro ba gdags pa med ce na/ go 'phang mi g.yo 'thob ces bya bas bstan te/ phung po lhag ma med pa'i mya ngan las 'das pa'i dbyings su zhugs pa ni mi g.yo ba'i go 'phang ste/rtag pa'i gnas skabs der 'jug pa'o/ /de yang ji ltar gdags pa tha dad pa'i chu bo bzhin te/ 'di ltar phyogs mthon po dang / dma' ba la 'jug pa'i chu klung chen po ni gang gA la sogs par 'dus par 'gyur ro/ /de las rgya mtsho chen po bab pa na sngon gyi tha snyad thams cad 'gags par 'gyur ba bzhin no//ji srid na yang de khams gsum las 'dod chags dang bral bas gdul ba la phan gdags pa'i ched du re zhig 'di nyid du gnas na yang dbang po la sogs pa'i lha rnams kyis de lan du mar bltas kyang bsam du med pa yin na/gzhan lta smos kyang ci dgos/ de ji lta bu zhe na/ gang zhig khong na zhes bya ba la sogs pa smos so/ /de nas lha'i dbang po brgya byin 'di snyam du sems te/ nam zhig na bdag gis tshe dang ldan pa 'od srungs chen po mthong zhing de la bsod snyoms dbul bar 'gyur zhes bsams pa dang /de'i dbang du mdzad de tshigs su bcad pa 'di gsungs so/ /gang zhig ni sems can chen po'o/ /khong na zhes bya ba ni nang gi byed pa ste sems zhes bya ba'i don to/ /'khrug pa dag ces bya ba ni 'khrug par byed pa dang bdag nyid chen po rnam par 'joms pa ni 'di'i nges pa'i tshig go//khong khro ba dang / phrag dog dang / khro ba dang / khon du 'dzin pa dag bsgrub pa'i phyir/ 'dir mang po'i tshig tu bsgrub pa yin te/ rgyud la byams pa la sogs pas yongs su bsgos pa yin na khro ba'i skabs lta ga la zhig yod par 'gyur ba'o//'dis ni 'dod pa las 'dod chags dang bral bar bstan to/ /gang zhig srid dang srid min las ldog pa/ /zhes bya ba ni rnam pa 'dis srid pa ni gang zhig srid pa ste/lha'am lha las gzhan gang yang rung ba zhes bya ba la sogs pa'o/ /de nyid ni srid pa nyid de sred pa las ldog pa dang / 'das pa ste/ srid pa sred pa zhes bya ba'i don to/ /srid pa ma yin pa ni srid pa dang bral ba ste/ sred pa las 'das pa'i phyir 'dis ni sa gong ma'i 'dod chags dang bral bar bstan to//de ni 'jigs bral zhes bya ba ni skrag pa dang bral ba ste/ 'dod pa las 'dod chags dang bral ba'i phyir ro/ /bde ba ni bde ba yang dag par skyes pa'o/ /snying por gyur pa'i bde ba 'di yongs su spangs kyang 'di mi zhan cing khyad par gyi bde ba yod pas yongs su thar ba'i phyir te/gzugs las 'dod chags dang bral zhing khyad par can gyi mchog tu dga' ba 'thob pa'i phyir ro/ /mya ngan med ces bya ba ni gzugs med pa las 'dod chags dang bral ba ste/de ni rgyud kyi gdung ba thams cad yang dag par zad pa'i phyir ro/ /lhas kyang blta zhing bsam du med par 'gyur/ /zhes bya ba ni bsam du med pa ni ngoms pa med pa ste/ skad kyi byings kyi don ni sna tshogs pa'i don yin pas bsam du med pa ni ngoms pa med pa'o//yang na bsam pa ni nges pa yin la bsam du med pa ni nges pa med pa ste/ de dag gi gzugs las 'dir bltas pas nang gi de nyid ji lta ba bzhin du rtogs pa'am shes par nus pa ni med do/ /lhas kyang zil gyis non mi 'gyur/ / zhes gzhan dag tu brjod do/ /'di'i don ni bdud kyi ris kyi lha des kyang bar du gcod par mi nus so zhes bya ba'o/ /ji ltar/ dge slong 'jigs pa dang bral bar 'gyur zhes bya ba la sogs pa la bshad pa/ 'dod pa'i dngos po spangs pa'i phyir te/ 'di nyid gsal bar bstan pa ni 'di na gang dag ces bya ba la sogs pa'o/ /rgyal po gsal rgyal gyis zhun mar dang til mar gyi sbyin gtong gi khang par gtan pa med pa bzhag cing khyim du mi khyer bar de nyid du bdag nyid ci 'dod pa 'thung du 'jug pa las kun du rgyu zhig gis rang gi chung ma bu btsas nas der snum dgos pas de der song ste/zhun mar mang po 'thungs nas khyim du song la chung ma tshim par bya'o zhes bsams nas zhun mar mang po 'thungs pa las ma zhu ste srang du 'gyel ba/ bcom ldan 'das nyan thos kyi dge 'dun dang bcas pa bsod snyoms kyi phyir gshegs pas gzigs te/'phags pa kun dga' bos de'i gtam zhus pa dang / bcom ldan 'das kyis tshigs su bcad pa gnyis gsungs so/ /de gsung nas de nyid du dus byas pa las de'i slob mas de bslang bar 'dod kyang bslang bar ma nus so//bcom ldan 'das 'khor dang bcas pas de la gzigs nas 'di snyam du dgongs te/ 'dir gang gis gang la so sor rig cing chags pa med pa'i thub pa de ni bde ste/ des byas pa nas brtsams te/ skye bo ci yang med ces bya ba la sogs pa'i tshigs su bcad pa gnyis so/ /gang dag ces bya ba ni bdag nyid chen po'o/ /ci yang med pa zhes bya ba ni chung ma la sogs pa yongs su bzung ba'i dngos po ci yang med pa'o/ /kye re bde zhes bya ba ni bde ba chen po zhes bya ba'i don to//'di na zhes bya ba ni 'dod pa'i khams dang 'dod pa'i khams su 'jug pa'o/ /ci yang med pa ma yin pa ni shin tu bde ba chen po yang dag par 'byung ba ma yin no/ /gzhan ji lta bu zhe na/ chos mang mthong zhing rtogs pa zhes bya ba 'di ste yongs su bzung ba gnyis med pa sred pa rtsa ba nas spangs pa dang dgag pa'o//de las dang po'i dbang du byas pa ni/ yang dag pa'i shes pas nges par byas pa ni rtogs pa'i chos sdug bsngal la sogs pa 'phags pa'i bden pa gang yin pa de nyid de/ mthong ba dang bsgom pa'i lam gnyis kyis gnas pa'i tshangs par spyod pa ni khams gsum las 'dod chags dang bral ba'i phyir ro//gnyis pa'i dbang du byas nas/ mang thos zhes bya ba smos te/ lung mang po rtogs par bya ba phyin ci ma log par ma rtogs pa'i phyir te/ gsung rab yan lag bcu gnyis kyi don mang po phyin ci ma log par nyan cing thos pa gang gis ma bsgoms pa de'o//thos pa dang bsams pa las byung ba'i shes pa gnyis kyis ni nyon mongs pa 'gog par 'byung ba'i phyir ro/ /ci'i phyir ci yang med pa bde ba chen po yin zhe na/cung zad yod pa brlag par gyur la ltos/ /zhes bya ba ste yongs su bzung ba dang bcas pa la ltos zhes bya ba ni lta bar gyis shig pa'o/ /brlag par zhes bya ba ni phongs par gyur pa dang / shi bar gyur pa dang / nyam thag pa dang / gnod par gyur pa'o//skye bo ni kun du rgyu ba'o/ /skye bo la zhes bya ba ni chung ma la sogs pa'o/ /skye bo ji lta bu zhe na/ sems la rab chags shing zhes bya ba yid lhag par zhen pa ste/ 'dod pa'i 'dod chags kyi rjes su zhen pa zhes bya ba'i don to/ /gang yul la sems chags pa de nyid dbang po ma dul ba yin no zhes bstan pa'i phyir/lus la rab chags shing zhes bya ba ste/ gzugs dag la rab tu chags pa'i dbang po gang yin pa ste/ dbang po ma dul ba zhes bya ba'i don to/ /chags pa yang zhun mar shas cher 'thung ba'i lus ni gzugs so//sems ma dul ba la ni le lo la sogs pa 'byung zhing lus la gnod pa yin no zhes bstan pa yin te dben pa med pa'i phyir rtogs pa yang med do/ /de la ma dul ba la gnas pa ni sdug bsngal ba la gnas pa yin no zhes bstan pa'i phyir/ smras pa/ skye bo ci yang med par gyur pa bde/ /zhes bya ba ste yongs su bzung ba med pa'i skye bo nyid ni bde ba la spyod pa yin te 'dod chags dang bral ba'i phyir ro/ /yon tan rtogs pa'i khyad par gyis ci yang med pa nyid kyi khyad par gyi shes pa dang ldan pa'i phyir yon tan rtogs par 'gyur ba yin no//lhag ma ni bstan zin to/ /dben pa'i shes pa la brten nas ci yang spangs pas ni rang dbang gi bde ba 'thob par 'gyur gyi gzhan du ni ma yin no zhes bstan pa'i phyir/ gzhan gyi dbang gyur kun sdug ste/ /zhes bya ba la sogs pa'o/ /rgyal po gsal rgyal gyis ri dgas 'dzin gyi ma sa ga la rdzas thams cad la sho gam med pa dang gru btsas med par gnang ngo //de shar phyogs nas sho gam bya ba'i rdzas khyer te 'ongs nas de'i phyir rgyal po la lan gsum gyi bar du zhu ba bya ba'i phyir chas pa las skabs ma rnyed de/yid byung nas bcom ldan 'das kyi thad du lhags te skabs 'di rgya cher gsol pa dang tshigs su bcad pa 'di gsungs so/ /kun zhes bya ba ni ma lus pa'o/ /gzhan gyi dbang zhes bya ba ni gang gzhan la rag lus pa zhes bsdu ba byas te/ / gzhan la rag lus pa dang gzhan dang 'brel pa'i dngos po ni sdug bsngal ba yin te/ nye bar gdung bar byed pa'i phyir ro/ /rang dbang yod pa thams cad bde/ /zhes bya ba ni gang cung zad bdag nyid 'dod pa bzhin du byed pa de ni mngon sum du mngon par 'dod pa sgrub pa'i phyir ro//gal te de ltar na des ji zhig ce na/ thun mong gyur pa zhes bya ba smos te 'di skad ston to/ /gang gzhan gyi dbang de ni los kyang sdug bsngal ba yin te/ 'khor ba pa'i dngos po 'di dag thams cad ni rgyu dang rkyen gzhan gyi dbang yin pa'i phyir sdug bsngal ba nyid de 'di ltar rgyu dang rkyen ni thams cad du yod pa'i phyir thun mong ste/spyi'i yin pas khyed cag 'khor ba'i nang na gnas pa'i sems can dus ji lta bar brlag pa dang / gnod par 'gyur bar zad de/ des byas pa'i lus dang sems kyi gdung ba nyams su myong ba'i phyir ro//ji skad du bshad pa/ gal te de lta na gnod par byed pa'i rgyu yin pas de ma thag yongs su spang bar mi nus pa yin pas sbyor ba zhes smos te/ 'dis 'gro ba la sogs pa dag tu sbyor ba yin no zhes byas so/ /yang na 'dod pa'i sbyor ba rnam pa bzhi dag las so//shin tu zhes bya ba ni gang gi phyir gyi don to/ /ci'i phyir de dag brlag ce na/ de'i rtsa bar gyur pa'i sbyor ba ni spang bar dka' ba zhes bya ba'i don te/ spang bar dka' ba ni 'da' bar dka' ba'o/ /'di sdug bsngal cig pur ma zad de/gang rgyal po la lan gsum du mthong yang nyon mongs pa dang las yod pas nam yang sdug bsngal las grol bar mi 'gyur te nye bar len pa'i phung po ni sdug bsngal gyi bdag nyid do zhes bstan to/ /rnam par 'byed pa las bshad pa'i don ni gnas skabs gzhan du brjod de/khyim bdag yongs su 'brim pa na dge ba'i bshes gnyen nye dga' ma rnyed pas ma brims te/ dge 'dun gyi dus yol ba las bcom ldan 'das kyis 'di gsungs so/ /de la 'di'i don ni gzhan gyi dbang thams cad sdug bsngal ba yin te/gang gi phyir thun mong du gyur pa yin yang gang dge 'dun gyis bstan cing nye bar btags pa'i bza' ba dang btung bas dge slong gi dge 'dun dag brlag par zad de ma thob pa las so/ /de la rgyu gang gis sbyor ba yin zhe na//yun ring por yongs su bsags pa'i gzugs dang 'brel pa'o/ /de yang dka' bas btsal ba yin pa'i phyir shin tu spang dka' ba'o/ /sred pa la sogs pa'i nyon mongs pa'i tshogs nyid spangs na rang dbang du 'gyur gyi gzhan du ma yin no zhes bstan pa'i phyir/zhen par 'gyur ba'i mi nang na/ /zhes bya ba la sogs pa'o/ /rgyal po'i khab na tshe dang ldan pa bzang ldan bya ba byas shing mtshan mo tho rangs kyi dus su lan gsum ched du brjod pa ched du brjod de/ bdag ni bde'o zhes smras pa dang / de la dge slong rnams kyis dris pa/ci sngon gyi 'dod pa dag dran nam zhes pa dang / des tshigs su bcad pa lnga bshad de/ sngon gyi sangs rgyas kyis gsungs pa 'di gzung bar bya'o zhes gsungs so/ /bde ba ni bya ba'i khyad par du byed pa yin te/ bsngags pa'i bde ba 'dis 'tsho ba'i khyad par yin no//kye ma'o zhes bya ba ni dga' ba ste 'tsho ba 'dzin pa yin no zhes dga' ba dang ldan pas 'di smra'o zhes bya ba'i don to/ /ji lta bu zhe na/ zhen pa'i nang na zhen pa med pa zhes bya ba'o/ /dga' ba dag la zhes bya ba ni dmigs kyis dbye ba bdun po ste/ / yul la dga' ba dag gi nang nas bdag ni de la dga' ba med pa'o/ /ci'i phyir zhe na 'di ltar zhen pa'i nang na zhes bya ba ste/ gang dgon pa mu ge la sogs pa dag dang bkres pa dang / skom pa la sogs pa'i sdug bsngal gyis gtsos pa'i nang du bza' ba dang btung ba'i longs spyod yongs su bsags pa de nyid bde bar gnas pa yin no//de bzhin du sred pa'i kun du sbyor ba yongs su ma bcom pa'i nang du de bcom pa gnas pa ni ji ltar bde bar mi 'tsho ba yin te/ de bas na 'dis ni khams gsum gyi 'dod chags dang bral bar bstan to//zhe sdang spang ba'i phyir smras pa/ nad kyis thebs pa zhes bya ba la sogs pa'o/ /nyam thag pas gnod par gyur pa ni nad kyis thebs pa ste gnod pas nyam thag cing gdung bar byed pa'i phyir nad do/ /byams pa la sogs pa'i mthus khro ba bsal ba ni nad med pa zhes brjod do//'dod chags dang zhe sdang gnyis kyis ni phal cher gzhan la gnod pa byed pa yin no zhes bstan pa'i phyir/ 'tshe ba can gyi mi nang na/ /zhes bya bas rnam par tho 'tshams pa ste tshig gis gzhan la 'tshe ba dang lus kyis khyad par du 'tshe ba yin pas 'tshe bar byed pa ste tho 'tshams shing 'tshe bar byed pa'o//drang srong rnams kyi yid kyi khro bas ni khyad par du yul mi la sogs pa 'joms par byed pas de lta bu las kyang bzlog par bstan pa'i phyir/ sha khon can gyi mi nang na/ /zhes bya ba smos te/ khong khro ba dang rjes su 'brel pa'i sha khon te gang la yod pa ni sha khon can te dbyug pa can bzhin no//rgyal po ni phal cher nyon mongs pa bzhi po de spyod pa yin pas de tsam zhig tshigs su bcad pa des bstan to/ /cung zad kyang lhag ma ma lus par spangs par gyur na ni khyad par can gyi bde ba yod do zhes bstan pa'i phyir/mi thil dag ces bya ba la sogs pa'o/ /mi thi la'i bdag po rgyal po'i drang srong du gyur pa 'dod pa las 'dod chags dang bral ba ri zhig na gnas so/ /ci tsam na mi thi la me chen pos tshig pa mthong nas sangs rgyas kyis gsungs pa'i tshigs su bcad pa gcig smras so//nga la gang dag ces bya ba ni rang nyid la'o/ /ci med pas zhes bya ba ni 'dod pa'i khams la lhag par zhen pa'i dngos po med pa ste/ sdug bsngal 'byung ba thams cad ni de dang 'brel pa'i phyir ro/ / ci'i phyir zhe na/ 'di ltar mi thi la dag ces bya bas bstan te 'dod pa las 'dod chags dang bral ba ni de la lhag par zhen pa zad pa'i phyir ro/ /gang la ci yang med pa de nyid ni zag pa med cing bsam gtan gyi dga' ba'i bdud rtsi'i ro la longs spyod pa yin gyi gzhan ni ma yin no zhes bstan pa'i phyir/nga la ci yang med mod kyi/ /zhes bya ba la sogs pa smos so/ /nges par myong bar 'gyur ba'i las byas shing bsags pa de nas/ de bzhin gshegs pa'i rgyud la gnas pa yang nges par 'bras bu 'byung ba yin no zhes bstan pa yin te/bcom ldan 'das bram ze'i grong sA la can du bsod snyoms la gshegs pa las de la bsod snyoms ma brnyes te slar gshegs pa dang / bdud kyis ji zhig mang du brnyes zhes gsol pa dang / bcom ldan 'das kyis bka' stsal pa/sdig can ji sangs rgyas kyis rnyed par dka' 'o zhes sems sam/ de bzhin gshegs pas ni bsod nams mang po spel bas brnyes so zhes bya ba dang / de'i phyir yang zhugs te ji ltar thob pa de ltar ngas bya'o zhes pa nas tshigs su bcad pa gnyis gsungs so//dga' ba za bar byed pas ni/ /zhes bya ba ni dga' ba nyid longs spyod cing za ba ste/ 'dir ting nge 'dzin las skyes pa'i dga' ba dang bde ba la longs spyod pa'i phyir ro/ /ji lta bu zhe na/ 'od gsal gyi lha zhes bya bas bstan te/ bsam gtan gnyis pa'i lha ni dga' ba khyad par can dang ldan pa'i phyir ro//zang zing med pa'i dga' ba dang bcas pa la bcom ldan 'das nye bar longs spyod pa yin no zhes bya ba 'di ga las she na/ 'di ltar/ 'jig tshogs la ni mi brten pas/ /zhes bya ba smos te/ 'khor ba'i dngos po la lhag par zhen pa med pa'i phyir ro/ /zang zing med pa'i dga' ba ston pa 'tshe ba med pa yin no zhes bstan pa'i phyir/ len pa'i rkyen gyis zhes bya ba la sogs pa smos so/ /mdzes dga' mo bsad pa dang / dge slong grong du song ba'am/ dgon par song ba yang rung ste de dag gis mthong nas khyed cag gi dge sbyong ji lta bu zhes bshes par gyur pa dang 'di gsungs so/ /grong ni skye bo mang po 'jug pa'i phyogs te skye bo dang ldan pa'i phyogs so/ /dgon pa zhes bya ba ni nags kyi gnas so/ /bde sdug gis reg par mi 'gyur ro zhes bya ba las bde ba ni tshim par byed pa'o//sdug bsngal ni nye bar gdung ba'o/ /reg pa ni don sna tshogs pa yin no/ /bdag dang gzhan gyis bskyed pa'i zhes bya ba ni bdag gis bsgoms pas byed pa des byas pa med pa'i phyir gzhan gyis byas pa'i bde ba dang sdug bsngal ni nges par byed pas ma byas te/rgyu dang rkyen dang 'brel pa'i phyir ro/ /bskyed pa ni 'dzin pa dang 'chang ba zhes bya ba'i don to/ /'di'i rkyen dang 'brel pa'i phyir bshad pa/ reg 'gyur zhes bya bas te gdung bar byed pa'o/ /phrad pa ni grang ba la sogs pa phrad pa ste/g.yeng ba zhes bya ba yin no/ /len pa'i rkyen gyis zhes bya ba ni nyon mongs pa la sogs pa len pa'i rgyu la brten pa'o/ /len med ces bya ba ni nyon mong pa la sogs pa'i skyon dang bral ba ste ji zhig phrad cing reg par 'gyur te/ mi 'gyur ro zhes bya ba'i don to//gang gis ji ltar bdag nyid nyams pa med par rtogs pa'o zhes bya ba ni gang gis ji ltar nges par bya zhe na/ 'di ltar/ de dag ni kun du 'gro bar byed/ ces bya ba ste/ 'phags pa shA ri'i bu dang maud gal gyi bu la mu stegs can gyis bkur sti ma yin pa byas kyang zhe sdang bar ma gyur cing spangs pa'o//phan gdags pa'i phyir thams cad du 'gro bas na kun du 'gro ba ste/ 'di ni phan 'dogs pa dang gnod pa byed pa yin no zhes mi lta ba'o/ /de ltar yang ci'i phyir zhe na/ skyes bu dam pa zhes bya bas bstan te/ bsam pa dang sbyor ba phun sum tshogs pa'o//skyes bu dam par nges par byed pa'i rtags bstan pa'i phyir bshad pa/ 'dod pa'i rgyu zhes bya ba ste rnyed pa dang bkur sti'i ched du'o/ /mi 'khyal ba zhes bya ba ni mi'i chos bla ma med bzhin du gzhan la smra ba med pa'o/ /ci'i phyir zhe na/brtan pa'i phyir te/ des na brtan rnams zhes bya ba yin no/ /ci'i phyir de dag brtan par nges she na de'i phyir brtan pa'i 'bras bu bshad pa/ 'jig rten 'di na bde bas reg pa ni/ /zhes bya ba smos te/ grong dang 'brel pa'am dgon pa dang 'brel pa'i bde ba dang sdug bsngal dang ldan pa des dam pa brtan pa dag mtho dman dang /sro shi ba dang gzengs mtho bar mi 'gyur te/ dga' ba'am nga rgyal dang skyo zhing zhum pa med pa zhes bya ba'i don to/ /bde ba'i tshoms te sum cu pa'i rnam par 'grel pa rdzogs so// // bde ba ni sems la gnas pa yin gyi bdag la sogs pa la gnas pa ni ma yin no zhes bstan pa'i phyir/ de'i 'og tu sems kyi tshoms bstan te/ gzung bar dka' ba zhes bya ba la sogs pa smos so/ /dgon pa nas log par 'dod pa'i rab tu byung ba zhig bcom ldan 'das kyi spyan sngar 'ongs pa dang 'di skad ces bka' stsal to//dge slong khyod sems kyi dbang du ma 'gro bar sems legs par rab tu btul bar bya ste/ gang gi phyir sems rab tu btul bar byas te/ bsrungs na ni bde ba 'dren par byed pa'o zhes byas nas 'di gsungs so//dka' bas bzung zhing gdul ba 'di la yang ba ste shin tu phra bar yod pas 'phags pa kun dga' bo la sogs pas kyang de rtogs par dka'o zhes thos so/ /yang ba zhes bya ba ni spre'u bzhin du myur du 'gyur bar byed pa'i phyir te/ ji skad du/ sems ltar yang bar 'jug pa ni 'dod pa na chos gcig kyang yang dag par mthong ngo zhes bya ba la sogs pa gsungs te g.yo ba zhes bya ba'i don to//gang du dga' bar 'gro ba zhes bya ba ni ji ltar 'dod pa bzhin du yongs su ma brtags pas spyod pa'i phyir te gang du dga' bar 'gro ba'i tshul du 'di la yod pa de ni de nyid do//yang na gzung bar dka' bas ni gzugs med pa na spyod pa'i sems bstan te de na gnas pa'i byis pa ni sems dul ba med pa'i phyir ro/ /yang ba ni gzugs na spyod pa ste dga' ba'i bde ba la ltos pas btang ba'i phyir ro/ / gang du dga' bar 'gro ba yin/ /zhes bya ba ni 'dod pa na spyod pa ste/ gzugs la sogs pa'i yul dang ldan pa'i phyir ro/ /yang na ngan song gsum dang mi dang lha'i sems go rims bzhin du sbyar ro/ /sems dul ba ni legs pa ste/ /zhes bya ba ni yang dag pa'i lam la zhugs pa dang /log pa'i lam las bzlog pas nye bar zhi ba ni rab tu bsngags pa'o/ /ga las she na/ 'di ltar/ sems dul ba yis bde ba 'dren/ /ces bya ba ni sems dul ba kho nas ni 'jig rten dang 'jig rten las 'das pa'i bde ba thams cad skyed pa'i phyir ro//sems ma dul ba'i phyir srid pa spangs pa la mngon par dga' ba med par bstan pa/ bdud kyi gzhi dag ces bya ba la sogs pa'o/ /chu bo e ra ba t+ya'i 'gram du nya dag rgyas phyung ste bye ma'i phung po la bor ba de shin tu g.yo zhing 'gul bar gyur to//phyogs de na yang dge slong rnal 'byor can zhig gnas te de'i sems g.yo bar gyur cing ji tsam na nya de mthong nas rang gi sems la spyo ba byas so/ /chu las skyes pa yin pas chu skyes te nya'o/ /lta bu ni ji lta ba bzhin no/ /thang la bor ba ni so ga'i dus kyi tsha bas gdungs pa'i bye ma'i thang la bor ba'o//ci'i phyir der bor zhe na/ chu bo'i gnas nas rab bton te/ /zhes bya ba yin te/ chu'i gnas kyi tshogs chen po'i rang bzhin las mchil pa la sogs pas drangs pas so/ /yongs su g.yo zhes bya ba ni yongs su 'gul zhing rnam par 'phar ba ste 'du zhing 'phro ba zhes bya ba'i don to//bdag gi sems ni zhes bya ba ni bdag yid yongs su g.yo ba ni rab tu mi 'jug pa'o zhes bstan to/ /bdud kyi gzhi zhes bya ba ni phongs pa thams cad kyi rtsa ba nyon mongs pa'i bdud de nye bar dul ba la zhugs pa'i bdag gi sems ni de ltar mi 'jug ste/ji ltar 'khor ba yongs su bzung ba'o/ /bdud nyid bdud kyi gzhi ste ming gi gzhi bzhin no/ /spang ba dang zhes bya ba ni yongs su spang ba nyid la g.yo ba yin gyi 'khor ba dang 'khor ba bsten pa'i phyir ni ma yin no//gal te de ltar bstan pas ni gdul bar mi nus so zhes bshad pa/ mkhas pas mi nus pa ni med de ji skad du dug 'byin pa dang / sbrul len pa dang / thog 'bab pa dag nye bar zhi bar byed la/ phyogs kyi glang po yang dul bar byed de mkhas pa rnams la ni mi 'grub pa zhes bya ba cung zad kyang med do/ /des na yul dag la sems rab tu bsdu ba'i thabs ni mkhas pa nyid kyis nus pa yin no zhes bstan pa'i phyir/ nyi ma las ni zhes bya ba la sogs pa smos so/ / ri'i rtse mo'i phyogs gcig na dge slong dgon pa pa zhig yod de nyon mongs pa spangs pa'i phyir zhugs pa na de'i sems yul dag la rgyug par gyur to/ /de'i tshe nyi ma shar la de dang nye ba na rgyal po'i glang po che 'dul bar byed pa de mthong nas 'di bshad do/ /so so ni rnam pa sna tshogs pa'i yul gyi las dag la'o//rgyug pa ni 'jug pa'o/ /gang ji lta bu zhe na/ nyi ma las ni 'od zer ltar/ /zhes bya ba dper na sprin dang du ba dang rdul la sogs pa dang bral ba'i nam mkha' la gnas pa'i nyi ma'i 'od zer ni kun du gegs med par khyab par 'gyur ba de bzhin te/gsal ba'i phyir dang / thun mong gi las las gyur pa'i phyir zhes bstan to/ /des bzlog ste zhes bya ba ni yul dag las nges par len pa yin no/ /de dag ces bya ba ni sems so/ /mkhas pa ni thabs kyi khyad par shes pa'o//'dir dpe bstan pa/ lcags kyu yis ni glang chen bzhin/ /zhes bya ba dper na glang po che zhon nas lcags kyus glang po che smyon pa yang lam ma yin pa las zlog par byed pa bzhin no/ /rnal 'byor can de nyid yang sems la yongs su spyo bar byed cing ngo //smra'o zhes bya ba ni brjod do zhes bya'o/ /de la zhes bya ba ni sems la'o/ /nga ni bdag nyid do/ /sems de ji lta bu zhe na snying po med pa zhes smos te skad cig ma yin pa'i phyir ro/ /bltar med pa ni mig gi yul du ma gyur pa'i phyir mi shes par spyod pa ste rkun ma bzhin no//de spang ba'i thabs la 'jug pas bdag nyid la bstan pa'i phyir/ rtag tu gdul bar bya ba'i phyir/ /zhes bya ba sems 'di la ston pa ste/ bdag nyid la dran pa nye bar gzhag pa la sogs pa spyod yul dang rjes su mthun pa dus thams cad du mtshungs pa med pa ste gzugs la sogs pa lnga'o//yang na yul ma yin pa dag las bzlog pa'o/ /ci'i phyir zhe na/ nga la don med ces bya ba smos te/ bdag la gnod pa'i phyir 'di dang gzhan du'o/ /spyod pa dang zhes bya ba ni 'jug pa'o/ /yang bya ba yin pa la ngas 'di nyid yongs su gtang bar mi bya ste/de bas na de nyid bshad pa/ sems 'di zhes bya ba la sogs pa smos so/ /'di zhes bya ba ni sems so/ /sngon chad ni gzhan du ste blun pa'i gnas skabs so/ /spyod cing zhes bya ba ni spyad par byas pa ste rab tu 'jug par gyur pa'o/ /rgyu bar byed pa dag ces bya ba ni 'gro zhing 'jug pa ste gzugs dang spyod yul dag la'o//ji lta bur zhe na/ ji ltar 'dod par zhes bya ba yin te/ gang gis 'dod pa bzhin du 'jug pa chos dang chos ma yin pa de bzhin du spyod pa'o/ /'di ni bya ba'i khyad par ro/ /gang du 'dod par zhes bya ba ni gang gzugs la sogs pa'i yul dag la 'dod cing mngon par dga' ba ste lhag par zhen cing spyod pa de ni bya ba'o//ji ltar 'dod pa zhes bya ba ni rnam pa gang gis gus pa dang mgus pa'am rnam pa thams cad gang gis sam/ 'dod chags dang zhe sdang dang gti mug gis btang ba'am/go rims bzhin du gzugs med pa dang gzugs dang 'dod pa na spyod pa'i phra rgyas kyi dbang gis so/ /da ni zhes bya ba ni da ltar ro/ /de gzung ngo zhes bya ba ni sems so/ /tshul bzhin byas pas zhes bya ba ni rjes su mthun pa'i gnyen po bsgoms pa'i stobs kyis zhes bya ba'i don te/ji skad du bshad pa/ 'dod chags dang zhe sdang la sogs pa la mi gtsang ba la sogs pa la 'dris par bya'o zhes bya ba lta bu'o/ /tshul ni thabs te/ de yang rab tu bsngags shing rjes su mthun pa ni tshul bzhin zhes brjod de/'di ltar gang ji lta bu zhe na/ glang chen myos ltar zhes bya ba smos te glang po che myos pa ji ltar 'ga' zhig gis lcags kyus lam log pa las bzlog cing lam du 'dzud pa de bzhin no/ /sems kyi rang gi ngo bo ji lta ba bzhin du yongs su gcod pas ni de 'dul ba yin gyi gzhan gyis ni ma yin te/de lta bas na rab tu brtag pa'i phyir khang khyim zhes bya ba la sogs pa smos so/ /khyim yongs su spangs pa'i rab tu byung ba zhig sngon goms pa'i dbang gis dgon par khyim byed pa la brtson zhing 'bad par gyur te ji tsam na yid byung nas bcom ldan 'das kyis bskul bas rang gi sems la tshigs su bcad pa gnyis kyis bsdigs par byed pa'o//gzhan dag ni byang chub kyi shing drung na bzhugs pa na bdud kyi pho nya la sogs pas sems rnam par dkrugs pa'i phyir 'ongs pa na byang chub sems dpas gsungs so zhes zer ro//du ma zhes bya ba ni dpag tu med pa'o/ /skye ba'i 'khor ba zhes bya ba ni 'gro ba dag tu 'khor ba'i skye ba'i rgyun no/ /khyod kyis phyung zhes bya ba ni yang dag pa thob par byas pa ste/ yang dang yang du 'gro ba zhes bya ba'i don to//yang na don sna tshogs par mngon par sbyar bar bya'o/ /gang gi tshe zhe na/ da ltar phan chad zhes bya ba smos te/ skye ba tha ma 'di las sngon gyi skye ba dag tu'o/ /de ci lta bu zhe na/ khang khyim byed pas zhes bya ba ni khang khyim byed pa ste/ gnas sgrub par byed pa'am lus sgrub par byed pa'o//ji sems kyi bdag nyid kyis de ltar yin nam zhe na/ tshol ba zhes smos te sred pas bskul nas rjes su tshol ba'o/ /gang yin zhe na/ yang yang skye ba'i sdug sngal can/ /zhes bya ba yin te/ bdag rgyal po dang / dbang po dang / tshangs pa dang / gzugs bzang ba la sogs pa thob par gyur cig ces don du gnyer ba'i sdug bsngal gyi ngo bo skye ba lan du mar chol ba yin no//khang khyim byed pa khyod mthong bas/ /zhes bya ba ni ngas khyod de kho na nyid kyi shes pas ji lta ba bzhin du dmigs te/ phyis kyang 'di ltar ngas khyod mthong zhing rtogs pas phyin chad khyim byed du mi gzhug go zhes bya ba so sor ma brtags pa'i 'gog pas yang skye ba spangs pa yin te/yang lus kyi khang khyim byed du mi gzhug pa'o/ /ci'i rgyus khyim phyin chad byed du mi gzhug ce na/ de skyed par byed pa'i chu'i byed pa med pa'i phyir ro/ /de nyid smras pa/phyam rnams thams cad bcag nas su/ /zhes bya ba smos te/ dper na 'ga' zhig khyim byed par 'dod pa'i shing la sogs pa ste phyam dang rtsig pa la sogs pa bshig ste byed du mi gzhug pa de bzhin du bdag gis sems kyi ngo bo'i khyim byed par 'dod pa'i las kyi phyam rnams dang nyon mongs pa'i so phag gi phung po mi byed cing bdag gis kyang phyam thams cad bcag nas yang srid pa'i 'bras bu'i las spangs pa'o//khyim gyi gdung chen rnam bcom la/ /zhes bya ba ni rnam par byas pa rgud pa ste/ nyon mongs pa thams cad spangs pa'i phyir ro/ /gzhan dag ni sred pa la sogs pa'i nyon mongs pa ni phyam yin la/ma rig pa la sogs pa ni khyim gyi gdung chen po yin no zhes zer ro/ /'du byed dang bral nas zhes bya ba ni 'dir 'du byed kyi rnam pa dang bral ba ste/ thar pa mya ngan las 'das pa la gzhol ba'i phyir ro/ /'di nyid la ni zhes bya ba ni skye ba'o//zag par 'dod ces bya ba ni 'gro bar yongs su 'khor ba'i tha ma sgrub par 'dod pa yin no/ /mkhas pa nyid kyis sems dul ba yin no zhes bstan pa'i phyir/ sems ni g.yo zhing 'gul ba ste/ /zhes bya ba la sogs pa smos te/ 'dod pa la sogs pa'i rnam par rtog pas sems g.yen spyo bas brtsams so//g.yo ba ni lan du mar g.yo bar byed pa na gzhan dag skyed pa'i phyir ro/ /yang na g.yo bar byed pa yin pas g.yo ba ste/ las skyed pa'i phyir ro/ /'gul ba zhes bya ba ni gnas skabs gcig tu mi gnas pa'i phyir te/spre'u bzhin du rtag tu g.yeng ba nyid do/ /sems ni yid do/ /ring du 'gro ba ni bsrungs dka' ba ste/ dge ba'i bya ba dag la dka' bas 'jug pa'i phyir ro/ /bzlog dka' ba zhes bya ba ni lam log pa la dka' bas bzlog pa'i phyir ro/ / yang na 'di la g.yo ba la sogs pa gsum gyis zhe sdang dang 'dod chags dang gti mug gsum dang mtshungs par ldan pa ste/ go rims bzhin du 'dis yul dag la 'jug pa las bzlog par mi nus par bstan to/ /bsrang bar bya zhes bya ba ni drang ba dang yo ba med pa'i sems su bsgrub par bya'o//'o na dngos po'i rang gi rang bzhin de ni rtag tu de'i ngo bo nyid yin te/ dper na me tsha ba'i mtshan nyid bzhin na ji ltar yod pa'i sems de bsrang bar nus she na/ mda' mkhan me yis srong ba ltar/ /zhes bya ba smos te/ mda' zhes bya ba ni lhag ma'o//dper na mda' mkhan gyis yo ba yin na yang me'i byed pas mda' drang por byed pa de bzhin du/ rang gi sems kyang lam bsgoms pa'i shes rab kyis so/ /sems dul ba'i phan yon smras pa/ gang zhig lus med ces bya ba la sogs pa'o/ /yul zhig gi dgon pa'i gnas na mig bzangs zhes bya ba'i gnod sbyin rdzu 'phrul che ba zhig gnas te/des bcom ldan 'das shing zhig gi rtsa na bzhugs pa mthong ste gan du lhags nas/ mngon par mchod de thal mo sbyar nas gsol pa/ gcig pu rgyu zhing ring du 'gro/ lus med phug na gnas byed pa/ /gang dag btul bar gyur na ni/ /'jigs pa che las thar 'gyur ba/ /zhes pa dang / des na 'di gsungs so/ /ring du 'gro bar byed pa yin pas ring du 'gro ba ste/ sems 'di 'gro zhing 'jug pa yin te ring du 'gro ba de ni yid kyi rnam par shes pas bstan to//'jug pa'i rnam par shes pa thams cad ni/ /ring du 'gro ba med pa'i phyir ro/ /de nyid kyang rnam pa gsum du brtag pa'i phyir te dngos po mtha' dag gi spyod yul ba des ring du 'gro ba yin no/ /gcig pu rgyu ba ni gcig pu nyid rgyu bar byed pa ste/cig car rnam par shes pa gnyis 'byung ba med cing / sems can rnams kyi sems kyi rgyud ni re re 'byung ba yin no zhes lung las 'byung ba'i phyir ro/ /lus med pa ni gzugs med pa'o/ /phug na gnas pa ni ming dang gzugs la brten pa'i phyir ro/ /gang yang gnas gcig pa de ni rtogs par sla ba yin gyi gnas du ma pa ni ma yin no//phug gi gnas dang gzhi gang yin pa de ni de nyid do/ /de bzhin du gzhan dang 'gro ba ni 'phral la gdul bar nus kyi gang 'phyan pa'i bdag nyid de ni 'phral gdul bar mi nus so/ /gang yang grong gi nang na 'dug pa gsal ba ni gzung bar nus la/nags tshang tshing dang phug na gnas pa ni ma yin no/ /de bzhin du bcom ldan 'das kyis bstan pa'i tshul gyis ni gdul bar nus pa nyid du bstan pa'i phyir/ gang de lta bu'i tshul gyis sems dul bar byed pa ni dul bar 'gyur ro/ /thar bar 'gyur zhes bya ba ni nges par grol bar 'gyur ba'o//'jigs pa che las zhes bya ba ni gang du 'jigs pa chen po las te 'khor ba las zhes bya ba'i don to/ /sems ma dul ba'i skyon bstan pa/ log pa'i smon lam zhes bya ba la sogs pa smos so/ /rgyal po'i khab na nad pa zhig la sman pa gso ba byed do//ci tsam na de'i chung ma gzhon nu ma zhig blangs pa de bros te song ngo / /nad pas gtam de thos nas langs te shin tu mgyogs par brgyugs nas sman pa de bdag gis ma 'tshal lam zhes byas nas rgyal po la phul lo/ /gnas skabs 'di las tshigs su bcad pa gnyis gsungs so//gzhan dag ni yul yangs pa can gyi lits+tsha bI rnams kyis rin po che'i lhung bzed phun sum tshogs pa de la rin po che la sogs pas kha brgyan pa byas te/ a ka ru la sogs pa'i phye ma dri zhim po rnams kyis bkang nas bcom ldan 'das la phul ba dang /bcom ldan 'das ni len pa mi mdzad de/ sangs rgyas ni rin po che'i lhung bzed du mi bzhes so zhes pa dang / des gzhan gcer bu pa dag la byin pa dang / ci 'di gzhan la sngar byin nam zhes pa dang / de dag gis ji lta ba bzhin du smras so//ji ltar nga la stong par byin te de nyid bkang na ni blang bar bya'i gzhan du ni ma yin no zhes pa dang / lits+tsha bI dag khros te de la ma dad par gyur pa las des na 'di'o zhes zer ro/ /zhe 'gras pa'i ngang tshul ni 'dir dgra'o/ /yang na gang la zhe sdang yod pa ni mi mthun pa ste/dgra zhes bya ba'i don to/ /dgra la zhes bya ba ni rnam par sdang ba'i phas kyi dgra ste/ phyir rgol ba'i dgra la zhes bya ba'i don to/ /de ltar byed mi 'gyur zhes bya ba ni de lta bu'i sdug bsngal mi byed pa'i phyir ro/ /mngon sum du gnod pa byed pa bstan nas brgyud pas gnod pa byed pa ste/pha dang ma la sogs pa la gnod pa byed pa thos pa'i dbang gis te bshad pa/ khon gyis khon can zhes bya ba la sogs pa'o/ /log pa'i smon lam zhes bya ba ni tshul bzhin ma yin pa yid la byed pa dang mtshungs par ldan pa zhes bya ba'i don to//gang gis bdag nyid sdug bsngal byed 'gyur ba/ /zhes bya ba ni gang bdag nyid kyis sdug bsngal skyed pa'o/ /dgra bos ni 'di tsam zhig byed par 'gyur te/ 'di lta ste/ longs spyod las nyams par byed pa'am thams cad kyi thams cad du srog tsam zhig 'phrog par zad do zhes bya ba la sogs pa mdo las gsungs so//ma dul ba'i sems kyis ni ngan song dag tu yang ltung bar byed do/ /des na 'di ltar 'di la ni 'jigs pa chen por bya'i dgra la ni ma yin no/ /sems dul ba'i phan yon bstan pa'i phyir/ yang dag smon lam zhes bya ba la sogs pa'o//pha dang ma la sogs pas kyang de ltar bde bar byed par mi nus la/ de las gzhan pa zhang po la sogs pa'i nye dus kyang mi nus so/ /gang yang dag par sems dul bas ni bdag nyid bde ba yin te sred pa zad pas bdag nyid bde ba phun sum tshogs par byed do//sems legs par ma bsgoms pas lus la nye bar gnod pa'i skyon bstan nas/ yid kyi skyon gzhan yang bstan pa'i phyir/ ji ltar khang steng zhes bya ba la sogs pa smos so/ /mnyan yod na tshong dpon zhig la bu gnyis yod de nag po dang /gtsug phud nag po zhes bya ba'o/ /tshe dang ldan pa kun dga' bos de gnyis rab tu phyung ngo / /de la nag po ni rkyen gyi stobs can yin pas mu ge la sogs pas sdug bsngal ba'i yul dag mthong nas nyams par gyur to/ /gtsug phud nag po ni rgyu'i stobs can yin pas dgra bcom par gyur to//des na tshigs su bcad pa bcu gnyis gsungs te/ nag po dang gzhan yang mang po dag khyad par thob par gyur to/ /ji ltar khang steng zhes bya ba ni ji ltar khyim rlung la sogs pas 'dir gnod par gyur to/ /g.yogs nyes na zhes bya ba ni g.yogs ma rtsing zhing bar mtshams yod pa'i phyir ro//char pa ni sprin las byung ba'i chu'i rgyun no/ /yongs su 'dzag pa zhes bya ba ni/ g.yogs ma thams cad las 'das shing 'bigs pa dang / bug rdol du gyur pas rab tu 'jug pa'o/ /de bzhin sems ni ma bsgoms pa//zhes bya ba ni mi gtsang ba la sogs pa'i lam la gnas pa'i phyir dang de bzhin du ma dul ba'o/ /'dod chags rnams kyis yongs su bcom/ /zhes bya ba ni rjes su chags pa'i kun du sbyor bas sems zil gyis gnon cing dmigs pa'o/ /g.yogs legs na las bya ba ni mthun cing bar mtshams med par g.yogs pa'o//'dod chags la sogs pas kyang de'i rgyud dang sems la 'khor ba'i sdug bsngal med pa yin no zhes de bstan to/ /rjes su chags pa'i kun du sbyor ba bstan pa yang kun 'byung gi bden pas gtso bo yin pa'i phyir/mnyam par bzhag pa dang mnyam par ma gzhag pa'i sa pa'i dbye bas rnam pa gnyis su byed pa yin te lhag ma ni rtogs par sla'o/ /dul ba dang ma dul ba gnyis kyis ni gang cung zad dge ba dang mi dge ba byed pa de thams cad nges par 'dod pa dang mi 'dod pa'i 'bras bur 'gyur ro zhes bstan pa/chos kyi sngon du yid 'gro ste/ /zhes bya ba la sogs pa smos so/ /ko Ta ma la ka'i dge slong gis bsod snyoms sngon du gzhan la byin te/ phyi nas rang nyid za bar byed pa la bram ze dang khyim bdag dag 'phya bar byed pa las bcom ldan 'das kyis bka' stsal pa bdag nyid dang po bza' bar bya ste lhag ma gzhan la sbyin par bya'o zhes bka' stsal pa dang /rgyal rigs kyi khye'u zhig dang bram ze rigs kyi khye'u gnyis zhig shin tu ltogs pas zas kyi bkad sar zhugs te/gnas pa las de las dus shes par byas nas bram ze'i khye'u des thog mar bslangs pa dang / des ci yang ma thob pas khros te gal te nga la dbang yod na ni 'di dag gi mgo drungs nas bcad de sa'i steng du bor bar bya na zhes smras so/ /rgyal rigs kyi khye'us ni phyis bslangs pas zas mang po thob ste smras pa/de skad ma smra shig /gal te bdag la dbang yod na ni bdag gis nyin re zhing sangs rgyas la sogs pa dge slong gi dge 'dun 'di dag la kha zas ro brgya dang ldan pas tshim par bya'o zhes smras so/ /ci tsam na bram ze'i khye'u shing zhig gi drung du nyal ba las/shing rta lam 'drul ba'i 'khor los ske bcad de de las brtsams so/ /gzhan dag ni yang de'i tshe tshong dpon chen po zhig gi bu dus las 'das so/ /des bsod nams che bar grags pa'i sems can zhig tshong dpon du dbang bskur bar bya'o zhes 'bad pas mnyan yod kyi khyim bdag la sogs pa las rjes su btsal ba las rgyal rigs kyi khye'u shing zhig gi drung na nyal ba mthong ste/shing gzhan zhig gi grib ma ni shar phyogs su gzhol la/ shing de'i grib ma ni de'i lus yongs su mi 'dor ba mthong nas de dag gis de bslangs te tshong dpon du dbang bskur ba las de las brtsams so zhes zer ro//sngon du yid 'gro ba zhes bya ba la/ sngon du 'gro ba ni sngon du 'dren pa'i gtso bo gang yin pa ste/ chos rnams kyi dge ba dang mi dge ba sgom pa de nyid kyis so//lhan cig tu 'byung bar gyur pa'i phyir tshor ba la sogs pa yang sngon du 'gro ba zhes brjod par bya'o zhe na/ bshad pa/ yid ni gtso bo zhes smos te 'di ni yid nyid kyi gtso bo la brten nas so/ /gal te de lta na yang sems pas bsams nas byas pas 'khor gyis byas pa bzhin du rgyal po sems pas byas shing yid kyis spyod pa yin no zhe na/bshad pa/ yid mgyogs zhes smos pas yid ni mgyogs par 'gro ba ste 'di dag de la brten nas las kyi 'bras bu 'dzin pa yin no zhes bya ba la sogs par sbyar ro/ /khong khro dang ldan pa'i yid kyis gal te smras pa'am byed pa zhes smos te smra ba dang byed pa de ni tshig ngan pa smra ba dang nyes par spyod pa'i gang zag go//sdug bsngal 'thob ces bya ba ni yid kyi gdung ba drag po'i gnod pa rjes su 'thob pa'o/ /ji lta bu zhe na/ 'khor los mgo bo bcad pa bzhin//zhes smos te/ dper na shing rta'i 'khor lo nub mo rjes su rgyu bas bram ze'i khye'u bzhin no/ /ji lta bu zhe na/ bcad pa zhes bya ba yin no/ /de yang tshig gis mtshon cha rnam par 'khyal ba'am tshig rtsub po smras pa ste ngag gis nyes par spyod pas bcom pa zhes bya ba'i don to//grib ma bzhin zhes bya ba ni dper na shing gi grib ma rgyal rigs kyi khye'u'i lus dang 'brel pa de bzhin du rjes su 'brang ba ni rjes su 'gro ba'o/ /phun sum tshogs pa thams cad kyi rtsa ba ni legs par bshad pa yin la/ ma dul ba'i sems kyis ni thos par mi nus so zhes bstan pa'i phyir rtsod pa ched cher zhes bya ba la sogs pa smos so//mnyan yod na bram ze pi pra li ka pA ri zhes bya ba bram ze thams cad kyi smras pa las phyin ci log tu byed de/ de bcom ldan 'das kyi thad du lhags nas kye gau ta ma bdag la chos shod cig dang bdag gis mnyan par bgyi'o zhes gsol pa las/de nas tshigs su bcad pa gsum gsungs te/ de thos pas mngon par dad de rab tu byung nas dgra bcom par gyur to zhe'o/ /gzhan dag ni tsaN+Da shri zhes bya ba ma skyes dgra'i blon po gsod cing rab tu gsod pa la 'jug pa snying rje med pa zhig yod do//ji tsam na de lha sbyin gyis don du gnyer te gal te shAkya thub pa srog dang phral bar nus na khyod la grong sum brgya sbyin par bya'o zhes smras pa dang / des kyang de ltar mnyan to/ /de nas de go bgos te mtshon rnon po blangs nas bya rgod phung po'i ri la 'dzegs pa las ji tsam na 'khor du ma'i nang du bcom ldan 'das la chos ston cig ces gsol pa dang /bcom ldan 'das cang mi gsung bar bzhugs so/ /lan gnyis lan gsum gyi bar du gsol pa dang /bcom ldan 'das kyis bka' stsal pa/ dad pa med pa dang zhes bya ba la sogs pa gsungs so/ /de bcom ldan 'das kyi gsung yan lag lnga dang ldan pa thos pa dang gzugs phun sum tshogs pa mthong nas mngon par dad de/ mtshon dang go cha rnams bor nas rab tu byung nas dgra bcom pa'i 'bras bu thob ste/de gdul ba las brtsams so zhes zer ro/ /gzhan gyi tshig phyin ci log tu byed pa ni brtsad pa'o/ /de nyid ched cher 'dzin cing snying por byed pa gang yin pa de ni mchog tu byed pa'o/ /gang zag des ni legs bshad legs par mi shes te glags tshol ba la 'jug pa'i blo yod pa'i phyir ro//yang na brtsad pa ni dgra ste mchog dang gtso bor byed pa'i dgra zhes bya ba'i don to/ /ji lta bu'i sems kyis legs par mi shes she na/ sems ni nyon mongs gyur pa'i zhes bya ba smos te/nyon mongs pa dang nye ba'i nyon mongs pas yid bslad pa ste nyon mongs pa dang nye ba'i nyon mongs pa'i dbang du 'gro zhing ma dul ba zhes bya ba'i don to/ /de'i rtags smras pa/ glags skabs tshol bar byed pa zhes bya ba ste/ gzhan gyi skyon gyis glags gsal bar byed cing tshol ba'i ngang tshul gyi sems 'di la yod pa'o//'dis ni sems nyon mongs par rjes su dpag pa yin no/ /ci de nyon mongs pa dang nye ba'i nyon mongs pas nyon mongs par gyur pa'i sems de gang yin zhe na/ dad pa med pa'i zhes smos te/ ma dad pas yongs su bzung bas so//sdang ba zhes bya ba ni zhe sdang dang mtshungs par ldan pa'o/ /'khrugs pa zhes bya ba ni de las gzhan pa'i phra rgyas rnam par 'khrugs par byed pas g.yeng ba rnam pa sna tshogs dang ldan pa'i phyir ro/ /yang na dam pa'i chos la gus pa ma bskyed pas so//dam chos kun shes mi nus so/ /zhes bya ba ni chos bstan pa shes par mi nus pa'o/ /dam pa'i chos de ji lta bu zhe na/ rdzogs sangs rgyas kyis bstan pa yin/ /zhes bya ba smos te/ de bzhin gshegs pas gsungs pa'o/ /khro ba rnam par btul ba dang //zhes bya ba ni nyan pa pos phrag dog la sogs pa'i nye ba'i nyon mongs pas byas pa'i yid kun du 'khrug pa rnam par spangs pa'o/ /gang gis ma dad sems dang ni/ /zhes bya ba ni sems dang 'brel pa'i ma dad pa dang / /ma dad pa rnam par spangs pa'o//gnod sems rab spangs pa zhes bya ba ni gang zhe sdang dang rjes su 'brel pa spangs pa'o/ /des ni legs par bshad pa shes/ /zhes bya ba ni de nyid legs par bshad pa thos par rigs pa yin te/ snod yin pa'i phyir ro/ /gang de nyid ni shes rab yongs su rdzogs pa yin zhing de nyid dul ba'i sems yin no//de ltar na gang shes rab yongs su rdzogs par mi 'gyur zhe na/ sems kyi brtan pa med pa yis/ /zhes bya ba la sogs pa'o/ /btsun pa sems pa'am brtan pa gang gis shes rab yongs su rdzogs par 'gyur zhes zhus pa las brtsams so//brtan pa med pa ni gnas pa med pa'i sems 'di la yod pa'o/ /dam chos rnam par shes mi nus/ /zhes bya ba ni gsung rab yan lag bcu gnyis kyi tshig dang don la mkhas par ro/ /dad pa 'gyur ldog byed pa'i zhes bya ba ni kun nas 'gyur zhing ldog pa ste myur du 'gro zhing 'khor ba'i chu bo ltar de la 'gyur zhing ldog pa'o//de'i dad pa ni gus pa mi brtan pa'o/ /shes rab yongs su rdzogs mi 'gyur/ /zhes bya ba ni zag pa med pa'i shes pa skye ba med pa'i phyir ro/ /rgyu gsum gyis shes rab yongs su rdzogs par 'dod de/dam pa'i chos nyan pa la zhugs pa dang / brtan pa dang skye mched kyi rnam pa dang bas so/ /de med na ni ji ltar de yongs su rdzogs par 'gyur/ de yang bshad pa/ shes pa mi g.yo spun zla ste/ dam chos nyan pa bla ma yin//dad pa dri med mdza' bshes te/ /gang de yis ni rnam 'phel 'gyur/ /zhes so/ /yang na ma dul bas ni legs par gsungs pa mnyan pa yang med na shes rab yongs su rdzogs par lta ga la yod ces bstan pa'i phyir/ sems kyi brtan pa med pa zhes bya ba la sogs pa smos te/ma dul ba de la ni dam pa'i chos mi mnyan pa'i phyir dang / de med pa'i phyir skye mched kyi rnam pas dad pa yang med pa yin no zhes bya ba ni bsdus pa'i don to/ /yid ma dul ba las ni ston gyi zla ba dri ma med pa lta bu'i grags pa yang nyams pa yin no zhes bstan pa'i phyir/kun rtog la chums zhes bya ba la sogs pa smos te/ rgyal po'i bu su mu kha zhes bya bas bcom ldan 'das la btsun pa gang gis grags pa nyams par 'gyur zhes zhus pa las de nas tshigs su bcad pa gnyis gsungs so//gang zag gang gis sum cu rtsa drug gi chu bo'i rgyun 'jug pa gang yin pa ste de ni zhes bya ba ni nyid kyi don te de nyid grags pa nyams par 'gyur ba'o/ /yang na dang gi sgras ni rim pa gzhan du sbyar ro/ /lta ngan kun rtog ces bya ba 'di ltar shes par bya ste/ 'dis sred pa sum cu rtsa drug la spyod par bstan to//de yang ji skad du bcom ldan 'das kyis gsungs pa gzhan ni 'dod pa na spyod pa'i nyon mongs pa chu bo'i rgyun sum cu rtsa drug go zhes zer ro/ /yid kyi rgyun zhes bya ba ni rab tu 'dzag pa yin pas rgyun te gang la rgyun rab tu 'bab pa zhes bya ba'i don to//yid ni sems te de'i rgyun ni gang dag rab tu 'dzag pa ste/ sems la gnas pa'i phyir ro/ /brgya la 'di nyid rab tu 'bab pa yin nam ma yin zhes rtog pa las rab tu 'bab ces bya ba smos te/ shin tu 'bab cing rgyun mi 'chad pas so/ / yang na rab tu ni shin tu ste/ rgyun gyi shugs yang dang yang du 'jug pa zhes bya ba'i don to/ /lta ngan kun rtog ces bya ba ni 'jig tshogs la lta ba la sogs pa ste lta ba ngan pa la 'jug pa/ rnam par rtog pa sna tshogs pa rab tu skye zhing lta ba ngan pa la 'jug pa'i kun du rtog pa ni lta ngan kun rtog ces bya ba ste/bar gyi tshig mi mngon par byas pa pi ling btung ba bzhin no/ /yang na dang gi sgra ni 'dir lhag ma yin te chu bo'i rgyun byed pa'i rnam par rtog pa gcig pur ma zad de ji lta bu zhe na/ chums la rten pa'i zhes bya ba ste/ sred pa la brten pa'i zang zing dang bcas pa'i 'dod pa la sogs pa'i rnam par rtog pa zhes bya ba'i don to/ /de ni skyes bu'i grags pa nyams par byed do zhes bya ba dang sbyar bar bya'o/ /de ji lta bu zhe na/ dga' sems zhes smos te sred pa'i rjes su 'gro ba'i 'dod chags dang yang dag par ldan pa ste/yid bde ba 'dod cing 'dod pa'i ro myang bas rjes su chags pa'i sems so/ /dbang po phal pa dang zhes bya ba ni dbang po zhan pa'am dbang po ma dul ba'o/ /'dis ni dga' ba'i sems kyi rgyu bstan te blo zhan pa yin na ni dga' ba nyams par 'gyur te/ ma dul ba'i dbang po la ni dbang po tha mal par 'gyur ro zhes bstan to//sems kyi rjes 'brang zhes bya ba ni sems kyi dbang ste 'dod pa'i rgyu la spyod pa gang ma dul ba'i sems zhes bya ba'i don to/ /'grib pa ni yongs su nyams pa'o/ /grags pa ni snyan pa'o/ /gzhan yang 'dir skyes bu'i khyad par smras pa/zhan pa'i mthus zhes bya ba smos te mthu dang smra ba dman par gyur pa'o/ /mthun pa'i chos kyi dpe bstan pa/ ljon shing zhes bya ba ste de nyid do/ /'bras bu lhags pa yin zhes bya ba ni 'bras bu thams cad lhung ba yin pa'i phyir mngon par mi bsngags pa'o/bya bzhin no zhes bya ba ni 'dab chags ji lta ba bzhin te/ de ni 'bras bu la brkam pas shing la rgyu ste de med par gyur na ni yongs su spong ba yin no/ /de bzhin du ma 'ongs pa'i yon tan dang skyon gyi gnas pa'i rgyud kyi sems can gyi grags pa med pa'o/ / sems ma dul ba nyid kyis 'dis nyes dmigs bstan nas/ 'jig rten phyi ma'i smras pa/ sems khyod ces bya ba la sogs pa'o/ /nags dgon pa zhig na le lo che zhing bag med la 'dod pa'i rnam par rtog pas rnam par gtses pa'i dge slong zhig las brtsams so/ / brtson la gnas pa zhes bya ba ni brtson 'grus khyad par can dang ldan pa'i phyir ro/ /ma bsags pa'i dge ba bsags pa'i rgyu bstan nas bsags pa'i dge ba bsrung ba'i thabs bstan pa/ bag yod sems zhes bya ba smos te/ bag yod pa'i khyad par gyi yon tan dang ldan pa'o//yon tan nyams pa dang skyon skye ba'i rgyu las bzlog pa'i phyir/ sems khyod phung khrol 'dod la dga' ma byed/ /ces bya ba smos te/ yid khyod 'dod pa'i sred pa dang phung khrol ma byed cig pa'o/ /de ni mi 'dod pa'i 'bras bu bstan pas bzlog pa yin te/bag med lcags gong mid pas zhes bya ba bag med pa'i rgyus lcags kyi thu lum rab tu 'bar ba za bar ma byed cig pa'o/ /dmyal bar btsos pa na zhes bya ba ni dmyal bar skyes nas dmyal ba'i mes bsregs par gyur pa na/ khyod ma ngu zhig pa ni khyod cho nges ma 'debs shig ces pa'o//brtson 'grus la sogs pa ma yin par ni sems dul ba'i thabs mi rnyed do zhes bstan pa'i phyir/ ldang ba'i dus tshe zhes bya ba la sogs pa smos so/ /rgyal byed kyi tshal na rgyal zhes bya ba/ las tha mal pa gzhan la mngon par brtson pa zhig las brtsams so//ldang ba ni spro ba ste de sgrub pa'i dus su nye bar gnas pa/ sangs rgyas 'byung ba dang mi'i nus pa la sogs pa'i khyad par dang yang dag par ldan pa'i phyir ro/ /'dug par byed pa dang zhes bya ba ni nye bar mi sbyor ba ste/ sbyor ba mi byed pas dge ba'i bya ba dag la mi 'jug pa'o//ldang ba'i dus nyid smras pa/ lang tsho zhes bya ba smos te bya ba thams cad bya bar bzod pa'i dus su nye bar gnas pa ni lang tsho yin no/ /stobs ldan zhes bya ba ni bla mas bstan pa dang / grogs dang / rkyen dang / nad med pa dang / stobs lnga dang ldan pa ste/sangs rgyas 'byung ba dang / bstan pa gnas pa dang / de'i lam la zhugs pa'i skye bo yod pa'i phyir dang / chos gos la sogs pas gnod pa med pa'i phyir dang / nad kyi gnod pa med pa'i phyir stobs dang ldan pa'o/ /de ltar yod kyang su zhig sbyor bar byed pa ma yin zhe na/mi 'bad ces smos te le lo can nyid ni dge ba'i bya ba dag la ro myong bar mi byed cing 'dun pa med pa'i phyir te/ mdo las chos thams cad kyi rtsa ba ni 'dun pa'o zhes gsungs pa'i phyir ro/ /'dis ni sems mi dben par bstan nas lus mi dben par bstan pa/ khyim 'dug ces bya ba khyim dang nye ba na 'dug pa ste/'di la khyim ni yongs su gzung ba dang bcas pa'i phyir ro/ /gnyi ga'i nyes dmigs smras pa/ rdzogs tshe zhes bya ba rdzogs pa thob pa ste/ yid kun du rtog pa'i yul gzugs la sogs pa gang yin pa la'o/ /rdzogs pa ni thob pa la 'jug ste bdag gi slong mo ni rdzogs te thob po zhes bya ba lta bu'o//sems dben pa med na ni 'dod pa la sogs pa las kun du rtog cing dpyod par 'gyur ro/ /dben pa med pas ni le lo byed par 'gyur ste/ bya ba ngan pa byed pa'i phyir sdig pa la mngon par dga' ba zhes bya ba'i don to//mi yis shes rab lam zhes bya ba ni zag pa med pa'i shes rab kyi tshogs kyi lam gyis sems dul ba'o/ /rtogs par mi 'gyur ro zhes bya ba ni nam yang 'thob par mi 'gyur ba'o/ /rang bzhin gyis rnam par rtog pa zhi na ni sems yongs su rdzogs par dul bar 'gyur ro zhes bstan pa/ phran tshegs zhes bya ba la sogs pa yin no/ /rnam par rtog pa mang ba'i tshong dpon zhig skyo nas de spang ba'i gnyen po btsal ba las ma rnyed de/ bcom ldan 'das kyi thad du lhags nas ci tsam na tshigs su bcad pa gnyis gsungs so/ /phran tshegs ni mi 'dod pa'i 'bras bu yin pa'i phyir mngon par mi 'dod pa ste/'dod pa na spyod pa'o/ /rnam par rtog pa ni 'dod pa na spyod pa'i rnam par rtog pa'o/ /yang na zhib mo ni rags pa ma yin pa ste/ mnyam par gzhag pa'i sa pa yin pa'i phyir ro/ /g.yen yang spyo zhes bya ba ni rnam par g.yeng ba 'dren pa'i phyir te/sems rnam par g.yengs pa'i phyir ro/ /nang na gnas pa'i yid ni zhes bya ba ni sems dang lhan cig mtshungs par ldan pa'i rnam par gnas pa'o/ /de dag ces bya ba ni de'i sa pa'i rnam par rtog pa'o/ /ma shes na zhes bya ba ni ma rig pa'o/ /gang gi ma rig pa yin zhe na/ yid kyi zhes bya ba smos te/ de bzhin nyid shes pas so/ /'di ni gnas kyis gnas pa bstan te/ grong thams cad 'ongs so zhes bya ba lta bu'o/ /rnam rtog ni rnam pa sna tshogs pa'i sgo nas dpyod pa rnam par rtog pa ste/ de ni nges pa'i tshig go/ /de yongs su ma shes pa'i skyon bstan pa/yang dang yang du rgyug par byed/ /ces smos te 'khor bar lan du mar 'khor ba'o/ /gang zhe na/ 'khrul sems zhes bya ba blo phyin ci log pa'i phyir te/ ma dul ba'i sems zhes bya ba'i don to/ /de zhes bya ba ni gang yang rnam par rtog pa 'di shes pa'o//ji ltar shes pa zhes brjod ce na/ mkhas pas zhes smos te/ gsung rab kyi don gyi de kho na nyid la brten nas rang dang spyi'i mtshan nyid la mkhas pa'i phyir ro/ /brtson pa ni brtun pa dang ldan pa nyid do/ /rnam 'byed ces bya ba ni yang dag par g.yogs pa dang bkab par gyur pa'o//dran ldan zhes bya ba ni dran pa nye bar gzhag pa bzhi bsgom pa la mngon par brtson pa ste/ de las dran pa dang / shes bzhin gnyis gtso bo yin pa'i phyir ro/ /lha dran pa dang shes bzhin gyis bkab par bya'o zhes mdo las gsungs so/ / thams cad ces bya ba ni sa ji snyed pa'o/ /ma lus zhes bya ba ni bag chags dang bcas pa'o/ /ji thams cad nyid rnam par 'byed dam zhe na ma yin te/ smras pa/ blo yis zhes bya ba'o/ /sems dul ba la ni mya ngan las 'das pa yang rag las pa yin no zhes bstan pa ni lus 'dis bum pa zhes bya ba la sogs pa yin no//dge slong zhig bdag nyid blta na sdug pa'i khyad par dang dbyibs dang gzugs kyis dregs te sred pa las spyod cing gang 'di lta bu'i lus ni su zhig gis ma rung bar byed nus zhes mi gtsang ba sgom par mi byed de/ de yang rdza mkhan gyi khyim dang nye ba zhig na gnas shing spyod pa zhig las de'i dbang du mdzad nas 'di lta ste/dge slong rdza ma so ma btang ba ni snying po med pa yin zhing yun ring du mi gnas te gnod pa mi bzod la char yang mi bzod pa bzhin du lus 'di yang de lta bu'o/ /dper na grong na gnas pas ni rgyal po spyod do//de bzhin du lus la brten nas kyang sems te 'jig rten na ni de lta bu'o zhes bya ba nas tshigs su bcad pa gnyis gsungs so/ /lus ni bum pa dang 'dra ba ste dper na rdza ma ni skye ba'i chos can dang / mthar 'jig pa yin zhing chu'i snod yin pa de bzhin du/lus 'di yang mi gtsang ba rnam pa sna tshogs pa'i snod dang mi rtag pa'i phyir ro/ /'di ni zin pa'o/ /rtogs byas shing zhes bya ba ni de bzhin nyid kyi shes pas nges par byas pa'o/ /grong khyer 'dra ba zhes bya ba ni grong khyer dang 'dra bar rigs mi 'dra ba'i rdzas rnam pa sna tshogs pa'i phyir ro//sran btsugs nas zhes bya ba ni lus de nyid la brten nas sems legs par gnas pa dang / de yang rtogs par byas pa'o/ /grong khyer dang 'dra ba 'di ni grong khyer rus pa'i ra ba can zhes bya bas gnas pa yin no/ /lus dang sems yongs su brtags pa'i go bgos te/bdud dang g.yul sprad de zhes bya ba spangs par bya zhing nyon mongs pa'i bdud dkrug par bya zhes bya ba'i don to/ /gang gis she na/ shes rab mtshon gyis zhes bya ba yin te/ 'phags pa nyan thos kyis ni shes rab mtshon gyis kun du sbyor ba gcod par 'gyur ro zhes mdo las bstan to//btul nas bsrung bar bya zhes bya ba nyon mongs pa'i bdud spangs nas de bzhin du yang mi skye bar bya ba'i phyir bsrung bar bya ba ste ma btul ba ni btul bar bya la btul ba ni bsrung bar bya ste/ phyi nas yang nyams pa med par bya ba'i phyir zhes bya ba'i don to//gnas med par ni zhes bya ba ni yang 'jug pa med cing 'khor bar yang srid pa med pa ste/ yongs su mya ngan las 'das pa/ /zhes bya ba'i don to/ /'jig rten 'di zhes bya ba ni sems can gyi rgyud thams cad de 'jig rten ni nye bar len pa'i phung po lnga zhes bya ba'i tshig gis so//de'i phyir nam zhig la phyogs gcig bltas nas 'jug pa yin te nam zhig na 'jig rten thams cad la bltas nas so/ /dbyibs kyi 'dod chags la 'jug pa bstan nas kha dog gi 'dod chags smras pa/ lus 'di dbu ba 'dra bar zhes smras te/dge slong kha dog gi 'dod chags can zhig gang gA'i ngogs na gnas la pha rol du rgal bar mi byed pa de las brtsams te/ 'di lta ste dge slong dbu ba'i gong bu ni cher zin kyang snying po med pa yin te/ reg par mi bzod pa bzhin du lus 'di yang de lta bu'o zhes bya ba nas tshigs su bcad pa gnyis kyi bar du gsungs so//chu'i yan lag 'dres te rlung gis grub pa ni dbu ba ste/ nges pa'i tshig las skye ba'o/ /zhes bya ba'i don to/ /gang de ji ltar gnas med par 'dod pa yin zhe na/ gnyis kyis rnam par 'brel pa smras pa/gang gis byang chub ces bya ba la sogs pa yin no/ /tshe dang ldan pa shA ri'i bu la mya ngan las 'das pa ni gang yin ji ltar mya ngan las 'das pa zhes bya zhes smras pa dang / des de khyer te bcom ldan 'das ga la ba der phyin nas de la 'di gsungs so/ / gang gis zhes bya ba ni bsam pa bzang po gang gis te/ thar pa'i sa bon dang ldan pa'i bdag nyid chen po'o/ /sems kyis legs par bsgoms pa dang / /zhes bya ba ni mi gtsang ba la sogs pa legs par bsten pa'o/ /des na dus phyi nas byang chub yan lag bdun zhes bya ba legs par bsgoms pa zhes 'dir rjes su 'brang ngo //gang gis byang chub kyi yan lag bdun legs par bsgoms par 'gyur zhe na/ bshad pa/ gang 'khor ba las bdag gir mi byed pa dang / thar pa 'dod pa'o/ /de gnyi ga smras pa/ len pa rab tu spangs pa dang / zhes bya ba smos te/ skye ba gzhan dag yongs su 'dzin par 'dod pa spangs pa'i phyir ro/ /gang zhig len la mi dga' zhing / /zhes bya ba ni mya ngan las 'das pa la dga' ba'i phyir te/ des na bsam pa dang sbyor ba gnyis kyi khyad par dang ldan pa'i phyir khyad par bstan pa/ zag zad ces bya ba nyon mongs pa thams cad spangs pa'i phyir te/skyon bsal zhing ngan par spyod pa spangs pas mya ngan las 'das pa ste/ las dang nyon mongs pa'i rgyud bstsal ba gang yin pa'o/ /'jig rten dag na zhes bya ba ni mthong ba'i chos nyid la yongs su mya ngan las 'das pa zhes bya bar brjod de mya ngan las 'das pa 'thob pa zhes bya ba'i don to//de nyid gang mi nyams zhes bya bar brjod ce na/ /dul ba'i sems nyid de/ de bshad pa/ gang zhig g.yag rnga'i zhes bya ba la sogs pa'o/ /bsti gnas kyi khang pa dag tu dge slong rab tu mang po dag gtam brjod par gyur te/tshe dang ldan pa dag 'phags pa'i nyan thos kyis gang zhig bsrung bar bya zhes smras pa na/ kha cig ni lus dang ngag go zhes bya ba la sogs pa brjod pa dang / de'i tshe bcom ldan 'das der gshegs nas dge slong dag srog chags g.yag rnga'i rtse mo bzhin du sems yongs su bsrungs pa la srungs shig ces bya ba nas ji srid du 'di gsungs so//rang gi sems ni bdag nyid kyi rnam par shes pa'o/ /rjes su bsrung zhing zhes bya ba ni yul dag las bzlog cing gdul bar bya'o/ /g.yag rnga'i rtse mo ltar zhes bya ba ni dper na ri dgas g.yag ni rnga ma'i rtse mo gtsor srung ste/bdag nyid shi bar gyur kyang de srung ba bzhin no/ /sems yul las bzlog par 'dis bstan nas/ yul gyi khyad par la gzud par bstan pa/ 'byung po rnams la brtser ldan pa/ /zhes bya ba ni brtse ba la 'jug cing 'thob pa zhes bya ba'i don to/ /sems can la 'tshe ba med pa'i bsam pa yod pa'i phyir ro//de yi bde ba yong mi nyams/ /zhes bya ba ni 'jig rten pa dang mthar thug pa'i bde ba mi nyams pa'o/ /sems kyis ni dud 'gro dang thub pa mchog gi mnyan pa yin no zhes bstan pa'i phyir/ gang phyir glang po zhes bya ba la sogs pa'o//yul yangs pa can na 'thab khrol byed pa'i dge slong dag spangs te/ rdzu 'phrul gyis nam mkha' la gshegs pa na/ nags tshal zhig tu glang po che bzang po zhig gis rtsod pa can gyi khyu spangs te/ mngon par dga' zhing gnas pa gzigs pa dang / bcom ldan 'das kyis 'di gsungs so//gang phyir ni sems so/ /glang po che zhes bya ba ni de bzhin gshegs pa ste bdag nyid chen po yin pa'i phyir ro zhes gsus po che'i mdo las bshad do/ /yang na gnod pa med pa'i phyir bcom ldan 'das ni glang po ste skyon thams cad dang bral ba'i phyir ro//de'i sems ji lta bus she na/ glang po che ste/ dga' ba chen po thob pa'i phyir dang / skyon med pa de'i dbang gis 'di ltar glang po che zhes bstan to/ /glang chen ni glang po che'i sems so/ /mnyam pas na zhes bya ba ni cha 'dra bar bsgrub pa yin no/ / glang po che ji lta bu yin zhe na/ mche ba bzang ba zhes smos te/ 'obs dang 'dra ba'i so'am/ ka ba lta bu'i ste/ rigs bsngags par skyes pa'i phyir na/ mche ba bzang po ni glang po che'o zhes bya ba'i tshig gis so/ /yang na mche ba bzang ba'i glang po che dang / glang po'i glang po che 'di ste/de bzhin gshegs pa'i thugs ni cha 'dra ba yin no/ /ji lta bu zhe na glang po che zhes bya ba 'di ste/ yongs su ma nyams pa'i bdag nyid rtsod pa la sogs pas yongs su nyams pa med cing skyo ba med pa zhes bya ba'i don to/ /ci'i phyir zhe na/ de phyir gcig pu nags su dgyes//zhes bya ba yin te/ 'di ltar 'di gcig pus rtsod cing ma rungs pa'i glang po che dag rnam par spangs te rnam par dben pa'i nags su mngon par dga' ba bzhin du/ nga yang 'thab khrol can dag rnam par spangs te nags su mngon par dga'o zhes pa'o/ /dga'o zhes de ma thag tu bstan na ji ltar nags su dgyes pa yin zhe na/bshad pa/ byams pa la sogs pa bsgoms pas te/ 'di nyid kyi yon tan dang bcas par smras pa/ /gang gis yid la gnod med cing / /zhes bya ba la sogs pa'o/ /dge slong dag byams pa bsgom pa byas shing byams pa kun du bsten pa byas na phan yon mang po 'dod par bya'o//snying rje yang de bzhin no zhes byas nas tshigs su bcad pa lnga'i bar du gsungs so/ /la zhes bya ba ni gang la gnod pa dang 'tshe ba med pa'o/ /gang gi zhes bya ba ni bdag nyid chen po ste rnal 'byor pa'o/ /yid ches zhes bya ba ni yid dga' ba dang ldan pa'i phyir ro//dga' ba la sogs pas ni gzhan bde ba mthong na dga' bar 'gyur zhing gnod pa mi byed do/ /'byung po kun la brtse ba dang / /zhes bya ba ni 'byung po thams cad la rjes su brtse ba ste/ gang la snying rje yod pa'o/ / 'byung po kun la byams byed pa/ /zhes bya ba ni gzhan gyi bde ba bskyed pa mchog tu sems pa'i phyir ro/ /thog ma ni byams pa/ de'i 'og tu ni snying rje/ de'i 'og tu ni dga' ba yin no zhe na/ 'di ni bzlog pa la brten nas bstan to/ /gzhan la phan 'dogs pa dang / 'brel bar bstan pa'i phyir tshad med pa 'di dag nyid 'dir bstan gyi btang snyoms ni ma yin no//'di nyid kyi phan yon bstan pa/ khon mi 'byung zhes bya ba smos te/ khon ni khon du 'dzin pa'o/ /de la nams kyang mi 'byung zhing / /zhes bya ba ni gang zag dang lhan cig 'byung ba med pa nyid do//yang na 'dis ni btang snyoms bstan te/ des na tshad med pa bzhi'o/ /gang zag gang nags tshal la dga' ba'o zhes bstan pa/ srog chags kun la zhes bya ba ni gdul bya'i dbang gis 'di ltar brjod de 'byung po dang / srog chags dang / sems can zhes bya ba ni rnam grangs yin pa'i phyir ro//nams kyang zhes bya ba ni gang zhig sgrub pa yin no/ /yang na dgra bo dang / tha mal pa dang / mdza' bo'i phyogs la 'byung po la sogs pa'i sgra 'jug par sbyar ro/ /gang byams pa la sogs pa bsgom pa de ni khyad par du bde ba 'thob pa yin no zhes bstan pa ni mdza' bshes kun dang zhes bya ba smos te/gang la thams cad mdza' ba yod pa'o/ /byams pa'i stobs kyis tha mal pa dang / dgra bo'i phyogs spangs te thams cad mdza' bo'i phyogs la bzhag pa'i phyir ro/ /grogs kun dang zhes bya ba ni thams cad kyi grogs yin pas grogs kun te/de yang thams cad kyi grogs su gyur cing mdza' bor gyur pa nyid de/ bshad pa/ byams pa la gnas na ni 'byung po thams cad la mngon par dga' ba skyed cing phan pa la zhugs pa yin pas lha dang bcas pas kyang mchod par bya ba yin na/ dga' ba'i gnyen gzhan gyis lta smos kyang ci dgos/'byung po kun la brtse ba dang / /zhes bya ba ni 'byung po thams cad la rjes su brtse ba ste de'i sdug bsngal mthong bas de'i rjes su mya ngan byed cing ci rigs par phan 'dogs pa dang rjes su brtse ba'o/ /byams pa bsgoms pas ni snying rje yang 'dren pa yin no//ji zhig byas nas de ltar gyur pa yin zhe na/ byams pa zhes bya bas bstan te byams pa yongs su bzung ba'o/ /sems ni bsgom byas na zhes bya ba ni goms par byas pa'o/ /'di'i phan yon bstan nas/ gzhan gyi phan yon bstan pa/ bde ba shin tu 'phel bar 'gyur/ /zhes bya ba la tshangs pa'i 'jig rten la sogs par skyes shing gnod pa med pa'i bde ba'am/ mthar thug pa'i bde ba'o/ /ci'i phyir byams pa'i sems kyis de ltar bde bar 'gyur zhe na/ bshad pa/ dpag tu med pa'i bsod nams bsags pa de dang 'brel pas thams cad la bde bar byed pa'i phyir ro zhes bstan to//gal te 'ga' la yang zhes bya ba ni sems can gcig la yang byams par byed na zhes bya ba 'di sbyar bar bya'o/ /sdang med sems zhes bya ba ni byams pa ste/ byams pa ni sdang ba med pa'i ngo bo yin pa'i phyir ro//byams byed na zhes bya ba ni byams pas yongs su bzung zhing dmigs pa'o/ /de ni zhes bya ba ni byams pa la gnas pa'i rnal 'byor pa'o/ /dge ba yin zhes bya ba ni gang gis khyad par du dge bar gyur pa ste/ dpag tu med pa'i bsod nams kyi tshogs bsags pa'i phyir ro//gang gis dge ba yin zhe na/ de yis zhes bya ba ste/ sems can gcig la byams par dmigs pas so/ /ji skad du bshad pa/ dge slong dag 'di lta ste dper na skyes bu zhig nyin re zhing bang ba sum brgya byin par byed pa pas zhes bya ba la sogs pa rgya cher ro//sems can thams cad la zhes bya ba ni srog chags thams cad do/ /ni'i sgra ni khyad par gyi don te/ gang sems can gcig la byams par byed pa de yang bsod nams kyi tshogs dpag tu med pa bsags par gyur na/ gang yang sems can thams cad la yid kyis brtse ba byas shing byams pas 'jug la snying rje bar byed pa lta ci smos zhes bya ba yin no//phal chen zhes bya ba ni bsod nams dpag tu med pa zhes bya ba dang sbyar ro/ /'phags pa ni skye bo dam pa zhes bya ba'i don to/ /bsgrub par 'gyur zhes bya ba ni spel bar 'gyur ba dang thob par 'gyur ba'o//bsod nams ni legs par spyad pa'i tshogs te/ chos chen po de ltar byed na ji ltar bde ba khyad par can mi 'thob/ /bsod nams de las byung ba nyid kyis ni zang zing med pa'i dga' ba skye bar 'gyur ro zhes bstan pa'i phyir/ mi gang dga' ba'i zhes bya ba la sogs pa smos so//rgyal po ma skyes dgras btsun mo'i 'khor dang shin tu brtse ba de rgyal po'i khab na gnas pa'i mi rnams kyis mthong nas kye ma'o bde'o kye ma'o dga'o zhes rjod par byed de/ de ltar dge slong dag las gsan nas tshigs su bcad pa gsum gsungs so//gzhan dag ni gnas brtan dge sbyong rgyal sems shin tu g.yeng ba che ba las brtsams so zhes zer ro/ /gang zhes bya ba ni sems can no/ /dga' ba'i sems dang ni zhes bya ba ni byams pa la sogs pa bsgoms pas yid dga' zhing dge ba 'byung bar bstan to//mi ni rnal 'byor pa'o/ /zhum pa med pa'i yid kyis su/ /zhes bya ba ni zhum pa med cing ma bsdus la dge ba'i bya ba dag la mi dman zhing sdig pa dag la mi sems pa dang / brtson 'grus khyad par can dang ldan pa'i phyir ro/ /dge ba'i chos la sgom byed pa/ / zhes bya ba ni 'dod pa'i 'bras bu la goms par bya ba ste/ tshul khrims dang ting nge 'dzin la sogs pa la'o/ /ci'i phyir zhe na/ grub dang bde ba thob bya'i phyir/ /zhes bya ba smos te/ zhi gnas dang lhag mthong gi bdag nyid zung ni grub pa'o/ /des thob pa ni bde ba ste/ /mi 'jigs pa'i go 'phang thar pa 'thob pa'i phyir ro//gang de ltar dge ba la 'dun cing bsam pa dang sbyor ba phun sum tshogs pa de ni khyad par chen po 'thob po zhes bstan pa'i phyir/ yid ni zhir gyur cing zhes bya ba smos te/ rgod pa la sogs pa dang bral pa'i phyir ro/ /lus dang ngag gi las kyang zhi//zhes bya ba ni zhi zhing yang dag par sdom pa zhes bya ba'i don te sems nye bar zhi bas so/ /lam gyi tshogs bstan nas de'i 'bras bu bshad pa/ yang dag shes pas rnam grol zhing / /zhes bya ba ni phyin ci ma log pa'i shes pa gang gis rnam par grol ba ste/ rang dbang du gyur cing 'phags pa'i lam bsgoms pas 'dod chags la sogs pa'i 'ching ba dang bral ba'i phyir ro//mthong ba'i chos la bde bar gnas pa bstan pa ni nye bar zhi 'gyur ba zhes bya ba yin te/ de nyid nye bar zhi ba las gyur pa'i dga' ba zhes sbyar bar bya'o/ / nye bar zhi ba ni nyon mongs pas byas pa'i kun du 'khrug pa skyes pa dang bral ba'i phyir ro/ /skyo ba skyes zhes bya ba ni gzhan gyi don du byed pa kho na nyid ston par byed pa'i ngang tshul can te bstan pa'i sgo nas gzhan gyi don la brtson pa zhes bya ba'i don to/ /de la ji lta bu'i dga' ba yod pa yin zhe na/yan lag lnga pas kyang zhes bya ba smos te/ dkrol ba dang / rgyud mangs dang / khong stong la sogs pa gang ji snyed pa'i sil snyan dang rol mo'i khyad par ro/ /yang na rnga dang / pu ra ba dang / gling bu la sogs pa'i rol mo 'dus pa la'o/ /de ltar dga' bar byed mi 'gyur/ / zhes bya ba ni de lta bur 'dod pa can dbang po la sogs pa'i dga' ba ni med pa nyid do/ /ji ltar zhes bya ba ni zang zing med pa'i dga' ba dang rnam par ldan par gyur pa'o/ /khyad par gyi tshul gyis 'dir rgyu bstan pa/ rtse gcig sems kyis ni zhes bya ba ni rnam par g.yeng ba dang bral ba'o//chos rnams legs par mthong ba dang / /zhes bya ba ni shes pa khyad par can dang ldan pa'i phyir ro/ /sems rtse gcig pas ni dga' ba khyad par can dang ldan par ma zad de/ 'dir 'jig rten pa'i sems bde ba yang 'thob pa yin no zhes bstan te/ gang yid ting 'dzin zhes bya ba la sogs pa smos so//dga' bo sun da ri ka dang bral bas sdug bsngal zhing mtshan mo shin tu ngu bar byed la/ de bzhin du mya ngan dang yongs su mi bde bar yang byed do/ /de nyid kyi dgon pa na spong ba pa mang du gnas te de dag gis de mthong nas sangs rgyas kyis gsungs pa'i tshigs su bcad pa gnyis bshad do//bde bar nyal bar 'gyur zhes bya ba ni mtshan mo gnyid kyi bde ba nyams su myong bar 'gyur ba ste/ gdung ba med pa'i phyir ro/ /'dod pa can dag ni rmi lam na yang sdug pa dang bral bas yongs su gdung bar byed pa nyid do/ /brtan pa ni 'di lta bur skyob pa zhes bya ba ste yid brtan par gnas pa'o//yang na mkhas pas so/ /de yang gang yin zhe na/ gang zhig cung zad gdung med pa'i/ /zhes smos te/ 'khor ba'i dngos po la brten nas cung zad kyang nyams su myong bar mi byed do/ /de dag 'dod pas rtsen mi byed/ / ces bya ba la gang dag mi brtan pa'i sems can de dag ni dran pas dga' bar byed cing de nyid la gnas pas ni mya ngan byed do/ /brtan pa ni 'dod pa'i 'dod chags kyis chags pa'am nyams par mi byed do/ /de'i skyon de yang mi dben pa bzhin du skyon dang ldan pa'o/ /yang na brtan pa de dang lhan cig mi gnas pa'o//brtan pa bskyed pa'i rgyu smras pa/ gang yid ting nge 'dzin la dga' ba zhes smos te/ gang dag ting nge 'dzin rnam pa bzhi la mngon par dga' ba'i sems so/ /'dod pa ni mi brtan pa skyed par byed do/ /yang na gnyid ma log pa'i gnas skabs na yang de dag dga' ba'o zhes bstan pa'i phyir smras pa/dga' bar 'gyur zhes bya ba ste/ rab tu mgu ba'o/ /kye ma'o zhes bya ba ni mgu ba'o/ /gang yin zhe na/ thub pa zhes smos te mi slob pa'o/ /de gang yin zhe na/ gang zhig cung zad gdung med pa'i//zhes bya ba yin no/ /gang gi phyir de yang sdug bsngal bar nyal bar mi byed cing skyo bar mi byed ce na/ gang gis zhes bya ba la sogs pa smos so/ /bum pa dang nye ba'i bum pa zhes bya ba'i gnod sbyin gnyis g.yul sprad pa las tshe dang ldan pa shA ri'i bu 'gog pa'i snyoms par 'jug pa las langs nas yun mi ring bar bya rgod kyi phung po'i mngon par skabs yod pa zhig na 'dug par gyur to//'di la khu tshur gyis ma brgyab cig ces bzlog pa dang / gnod sbyin bum pa des de'i mgo la mtshon bsnun par gyur to zhes pa nas ji tsam na rang gi lus kyis dmyal ba chen por skyes te/tshe dang ldan pa shA ri'i bu re zhig de'i phyir mi dga' bar gyur te de las brtsams nas 'di gsungs so/ /gang gi sems ni brag lta bur/ /zhes bya ba ni ri dang 'dra ba'i sems so/ /gang zhig ri dang 'dra ba yin zhe na/ rab tu g.yo ba med pa'i phyir te/gang de dang de'i rnam par 'gyur ba'i rgyus so/ /de nyid smras pa/ 'dug pa zhes bya ba yin te rnam par g.yengs pa med pas so/ /rab tu g.yo ba med pa zhes bya ba ni 'gyur ba med cing bab col du mi g.yos pa'o/ /ci'i phyir zhe na/ 'di ltar chags pa'i gnas la mi chags te zhes bya ba smos te/'dod pa'i longs spyod dang rjes su mthun pa'i don rgyab kyis bltas pa'o/ /khro ba'i gnas la zhes bya ba ni zhe sdang skye ba'i yul la'o/ /'khrug med par zhes bya ba ni rab tu khro ba med pa ste/ 'dis ni 'dod pa las 'dod chags dang bral bar bstan te/de sngon du 'gro bas khams gong ma las 'dod chags dang bral ba'o/ /gang yid de ltar gyur pa de/ /zhes bya ba ni sngar bstan par 'gyur ba ste/ mi srid pa'i phyir ro/ /sems gdul ba'i rim pa bstan pa'i phyir smras pa/ skur pa mi gdab gnod mi bya/ /zhes bya ba la sogs pa smos so//yang dag par rdzogs pa'i sangs rgyas thams cad skyob kyi nyan thos tshul khrims tsam gyis chog par 'dzin cing rab tu zhugs pa spangs pa dang / rtag tu yid kyis skur pa 'debs shing de dag la gnod par gyur te de'i phyir so sor thar pa thog mar 'di bstan to//gzhan dag ni mnyan yod na dge slong rab tu mang po'i 'khor dag gis khyi zhig shi ba mthong ste/ des sna'i sgos dri mi zhim pa tshor te/ kha cig ni tshig ngan pa smra bar byed de/ su zhig gis rgyal po'i lam srang chen po 'dir por zhes zer ro/ /tshe dang ldan pa kun dga' bo ni bsngags pa brjod de/'di'i so ni dung ltar dkar ro zhes pa dang 'di gsan nas gsungs so zhes zer ro/ /skur pa ni 'phya ba ste gzhan gyi skyon sgrogs pa'o/ /de dgag pa ni skur pa mi gdab pa'o/ /gnod mi bya zhes bya ba ni gang sems kyis kyang gzhan la 'tshe ba mi bya zhing mi bsam na lus kyis lta ga la byed pa'o//legs par spyod pa gzhan bstan nas yang dag par blangs pa'i bdag nyid kyi sdom pa dang 'brel pa smras pa/ so sor thar pas bsdam par bya/ /zhes bya ba smos te/ sdom pa ma yin pa ni so sor thar pa'i mtshan ma med pa'o//sdom pa ni nges par 'dod pa ni spyod pa ste spong ba bdun gyi ngo bo'o/ /tshod kyang shes par bya zhes bya ba ni tshad shes pa'o/ /zas ni bza' ba dang btung ba ste ji skad du bshad pa de'i phyir rang gi nus pa la rjes su blta zhing bza' bar bya ste/ ha cang mi che ba dang mi chung ba 'di'i tshad bzhin du'o//de bzhin du gang las ji tsam blangs pa dang / gang tsam pa len pas so/ /'di zhes bya ba ni kham gyi zas kyi bdag nyid de 'dis ni 'tsho ba kun du dag par bstan to/ /bas mtha' zhes bya ba ni yul las thag ring ba'i phyogs su gyur pa ni bas mtha' ste/ dgon pa zhes bya ba'i don to//gnas bya zhing zhes bya ba ni gnas mal bya ba'o/ /'dir yid kyi mtshon par byas nas gnas mal zhes bya bar bstan to/ /la la ngal bso bas ni gnas tsam ni gzung ngo / /lus kyi dben pa bstan nas/ sems dben pa smras pa/ lhag pa'i sems la rnal 'byor bya//zhes bya ba smos te/ bsam gtan bzhi bsgom pa dang mi 'bral ba'i phyir ro/ /'di ni sangs rgyas bstan pa yin/ /zhes bya ba ni sangs rgyas kyis gsungs te/ /gang yang ji skad gsungs pa'i sangs rgyas kyi bstan pa la 'jug par gyur na ni zang zing med pa'i bde ba'ang 'thob par 'gyur te/de ji lta bu zhe na/ sems kyi rtags la zhes bya ba la sogs pa smos te/ sems ni mig gi rnam par shes pa la sogs pa'i rtags kyi rnam pa ste/ gtsang ma'i mtshan ma yid la byed cing shin tu yid du 'ong ba'i rnam pa zhes bya ba'i don to//chung ba la sogs pa'i rnam pa yod pa'i phyir sems 'di ni nyon mongs pa yin la yid kyi rnam par shes pas 'di ni nyon mongs pa ma yin no zhes mig la sogs pa'i rnam par shes pa yongs su gcod pa de ni rtags la mkhas pa zhes brjod do/ / yang na sems kyi rtags sam 'brel pa ste/ ji skad du bshad pa/ mig dang gzugs la brten nas mig gi rnam par shes pa skye'o zhes bya ba rgya cher ro/ /de la mkhas pa ni rtogs pa ste/ khong du chud pa'o/ /'dis ni gsung rab kyi don la mkhas shing mang du thos par bstan to//de bas na gnyen po dang gnyen po ma yin pa la mkhas pa yin no/ /mang du thos kyang g.yeng bar gyur na ni ji lta ba bzhin du nus par mi 'gyur te/ des na rab tu dben pa ni rnam pa gnyis su bshad de lus dang sems so/ /rab tu dben pa'i ro ni mi gtsang ba la sogs pa yid la byed cing mngon du byed pa'o//de rnyed pa ni rtogs pa'o/ /mi gtsang ba la sogs pa grub na ni zhi gnas grub pa yin no zhes bstan pa'i phyir sems pa zhes smos te/ sems pa ni bsgom pa'o/ /yang na sgom pa'i ngang tshul 'di la yod pa de ni sems pa'o//'grus skyong can zhes bya ba ni nges par yongs su skyong bar byed pa ste skye bo dam pa'i yon tan sdug bsngal zhes bya ba ni nges pa'i tshig ste/ bag yod pa zhes bya ba'i don to/ /de bas na bag yod pa grub nas ni zhi gnas su byed do/ /dran pa nye bar gzhag pa bsgom pa yin no zhes bstan pa'i phyir rab dran zhes bya ba smos te lus la sogs pa'i yul re re'i rnam par dran pas yongs su bzung zhing rgyud mngon du byas pa ste/lus la sogs pa dran pa nye bar gzhag pa zhes bya ba'i don to/ /tshogs kyi lam du gyur pa dran pa nye bar gzhag pa la brten nas mthong ba'i lam gyi bdag nyid 'thob par 'gyur gyi gzhan la brten pas ni ma yin te de la brten nas ni rdo rje lta bu'i ting nge 'dzin kyang 'thob pa yin no//'thob pa ni zag pa med pa'i bde ba sred pa zad pa'o/ /sems dul bas ni bde ba 'thob pa yin gyi sdug bsngal ni ma yin no zhes bstan pa'i phyir/gang zhig yid gzhungs zhes bya ba la sogs pa smos so/ /'di ltar 'phags pa kun dga' bos rigs kyi bu gnyis rab tu byung ba las snga mas ni dge ba'i phyogs la brtsom par byas pas dgra bcom pa'i 'bras bu thob par gyur te/de las brtsams nas bcom ldan 'das kyis 'di gsungs so/ /cig shos ni mang du za zhing nyal la sdig pa can gyi lta ba skyed par byed de de gnyis las brtsams nas tshigs su bcad pa gnyis gsungs so/ /yid srung bar byed pa ni brnab sems dang gnod sems la sogs pa nye ba'i nyon mongs pa'am yul las zlog par byed cing dge ba la 'jug par byed pa zhes bya ba'i don to//smra dang zhes bya ba ni brjod pa ste/ brdzun la sogs pa dag las srung zhing phan pa dang bde ba dang gnod pa med pa'i tshig brjod pa la sbyor bar byed pa zhes bya ba'i don to/ / rang gis zhes bya ba ni bdag nyid kyi'o/ /lus kyis zhes bya ba ni gzugs phung gi'o/ /dang gi sgras ni gsum 'dus pa nyid la lam gyi tshogs su 'gyur ba yin te gcig gis ni ma yin no zhes bstan to/ /rtag tu zhes bya ba ni rgyun du ste/ srung ba zhes bya ba dang sbyar ro/ / nyes par spyod pa bcu spangs pa'i phyir 'di'i phan yon bshad pa/ spong ba ni yongs su 'dor ba'o/ /mya ngan ni yid la gcags pa la sogs pa'i ngo bo nang gi gdung ba'o/ /sdug bsngal 'thob mi 'gyur zhes bya ba ni kun nas nyon mongs pas ngan song gi sdug bsngal 'thob par mi 'gyur ro//nyon mongs pa med na yang srid pa'i sdug bsngal lta ga la 'thob ces bstan te/ 'di ltar bden gnas pas zhes bya ba 'phags pa'i bden pa bzhi mngon par rtogs pa'i phyir ro/ /bden dga' zhes bya ba ni bden pa la lta zhing gus par byed pa'i phyir te 'dis ni bsgom pa'i lam bstan to//yid gzhungs zhes bya ba ni skyon med pa'i shes pa thob pa ste/ mi slob pa'i lam bstan to/ /ma bsrungs pa'i sems dang ni zhes bya ba ni bya ba thams cad la bag yangs su 'jug pa'i phyir ro/ /de la sgrib pa ni mthong ba dang bsgom pas spang bar bya ba'i nyon mongs pa'i dngos po ste/de la mthong bas spang bar bya ba bstan pa'i phyir/ log par lta bas bcom pa dang / /zhes bya ba smos te chad par lta ba la sogs pa nyid nye bar bcom pa'o/ /bsgom pas spang bar bya ba smras pa/ gnyid dang rmugs pa zil non pa/ / zhes bya ba smos te gnyid dang rmugs pa gnyis kyis rtag tu bsgribs pa'i phyir ro/ /bdud kyi dbang du 'gro bar 'gyur/ /zhes bya ba ni nyon mongs pa'i bdud kyis 'khol ba'o/ /de bas na 'dir bstan pa/ de bas sems ni bsrung bya ste/ /zhes bya ba smos te/ rgyu des na sems nyes par spyod pa dag las bzlog par bya'o//yang dag kun rtog spyod yul can/ /zhes bya ba ni nges par 'byung ba la sogs pa'i kun du rtog pa la gnas pa ste/ gang gi phyir yang dag pa'i kun du rtog pa ni nges par 'byung ba la sogs pa'i tshul gyi spyod yul la 'di mngon par dga' ba'i gnas yin no//'di'i stobs kyis ni sems yongs su bsrung bar 'gyur ba'i phyir ro/ /yang dag pa'i kun du rtog pa'i rgyu ni/ yang dag lta bas mdun bdar cing / /zhes bya ba 'di ste de kho na nyid kyi lta bas mdun du bdar cing sngon du btang ba gang yin pa'o//de'i dbang gis 'jug pa'i 'bras bu bstan pa/ yang dag skye dang 'jig pa shes/ /zhes bya ba ste/ kun du 'gro ba dang rnam par 'jig pa zag pa med pa'i shes pas rtogs par byed do/ /de dag thams cad ni sgrib pa yongs su spong ba la gzud pa yin no zhes bstan te/gnyid dang rmugs pa zil gyis gnon pa ni spong ba'o/ /gnyid dang rmugs pa zil gyis gnon pa'i dge slong ni sgrib pa bcom pa'i phyir phung po lhag ma dang bcas pa'i mya ngan las 'das par bstan to/ /sdug bsngal zad pa 'thob ces bya ba ni phung po lhag ma med pa'i mya ngan las 'das pa 'thob pas so//yang na sems dul bas ni gnod pa mang po dag zhi ba'o ste sems dul ba'i phan yon bstan pa/ sems dul yang dag sdom pa bde/ /zhes bya ba la sogs pa smos so/ /'phags skyes pos shAkya rab tu mang po bsad de/ gsod pa po ni dmyal ba la sogs pa dag tu skyes la/bsad pa'i shAkya de dag ni bde 'gro dang yongs su mya ngan las 'das par gyur nas tshigs su bcad pa drug gsungs so/ /sems dul ba ni nye bar zhi ba'i lam khyad par can gyis de'i skyon dang bral ba'i phyir ro/ /sems yang dag par sdom pa ni so sor thar pa'i sdom pa'i bdag nyid de/des na de'i dus kyis sems dul ba'i bdag nyid 'thob pa yin la/ ting nge 'dzin las skyes pa dang ting nge 'dzin shes pa de gnyis kyis ni don dam pa'i sems dul ba yin no/ /bde ba zhes bya ba ni bde ba'i rnam pa gnyis te bde ba'i rgyu yin pa'i phyir ro//gang gi phyir de bas na sems ni bsrung ba dang zhes bya ba yin te/ sems nyes par spyod pa dag las khyed cag gis bzlog pa dang legs par spyod pa la gzud par gyis shig pa'o/ /bag yod ces bya ba ni chos las nyams par mi byed pa dang / nyes par spyod pa'i bya ba la mi 'jug pa'o//ci'i phyir de ltar brjod ce na/ sems kyis zhes bya ba smos te yid bag yod pas bsrungs pa las/ bslus zhes bya ba rnam par rmongs pa dang dge ba rnam par 'jig pa zhes bya ba'i don to/ /skye dgu ni srog chags so/ /gcig tu zhes bya ba ni byis pa tha mal pa'i rang bzhin can no//sems can dmyal bar 'tshed ces bya ba ni yang sos la sogs pa'i rnam par smin pa'i 'bras bu mi 'dod pa dang sbyor ro/ /bag med pa shas che bas ni dmyal bar skye bar 'gyur la/ 'bring gis ni dud 'gro dang chung ngus ni yid dgas su skye bar 'gyur ro zhes bstan to//dud 'gro'i skye gnas dag tu ni sgo nga las skyes pa la sogs pa rnam pa bzhi yin pa'i phyir ro/ /yi dags su skyes pa ni cha ga pa dang / phye ma leb dang / bsreg blugs dang gtor ma za ba la sogs pa yi dags kyi rigs grangs drug cu dag tu'o/ /da ni chung ngu la sogs pa'i rim pas bag yod pa'i sems kyi 'bras bu bstan pa'i phyir/bag yod sems ni zhes bya ba la sogs pa smos so/ /sems ni bsrungs pa dag ces bya ba ni legs par spyad pa dang nyes par spyod pa dag la 'jug pa dang ldog pa'i sems te gang las legs par bsrungs par gyur na ni dga' ba ste tshim par 'gyur ro//mi'i nang du zhes bya ba ni 'dzam bu'i gling la sogs pa dag pa'o/ /mtho ris ni rgyal po chen po bzhi la sogs pa dag tu'o/ /mya ngan las 'das pa ni sdug bsngal las thar pa 'thob pa'o/ /sems kyi tshoms te sum cu rtsa gcig pa'i rnam par 'grel pa rdzogs so// //dul ba'i sems ni don dam par dge slong nyid do zhes bstan pa'i phyir 'di'i 'og tu dge slong gi tshoms bstan to/ /gcig pu mya ngan 'das zhes de ma thag tu bstan pa la de gang yin zhe na/ gang dge slong zhes bya ba ste de'i 'og tu 'di bstan to//dge slong bsod snyoms byed pa zhes bya ba la sogs pa smos pa la/ rgyal po'i khab na tshe dang ldan pa 'od srungs chen po nyin zhag bdun 'gog pa'i snyoms par 'jug pa la zhugs pa de las langs te/ bsod snyoms kyi phyir grong khyer du zhugs so//de nas lha'i dbang po brgya byin khyim bdag gi gzugs su bdag nyid sprul te de la smras pa/ 'phags pa legs par byon to bdag gi khyim du bzhud ces byas pa dang / des smras pa/ bdag ni phongs pa dag gi nang du rgyu ba yin no zhes byas so/ / de yang thag pa'i gzugs su bdag nyid sprul te gnas pa dang / bdag nyid chen po de yang zhugs so/ /des rang gi chung ma la rab tu byung ba 'di la slong mo byin cig ces smras so/ /de nas bde sogs kyis lhung bzed bkang nas byin no/ /des mnyam par gzhag ste sring mo phyin chad 'di ltar mi bya'o zhes smras so//de nas lha'i dbang po brgya byin lha'i bu'i 'khor brgya phrag du ma dang bcas pas ched du brjod pa ched du brjod de/ kye ma'o sbyin pa sbyin pa che/ /'od srungs la ni sbyin pa byas/ /'di 'dra ba yi sbyin pas ni/ /longs spyod chen po'i 'bras bur 'gyur/ / zhes so/ /bcom ldan 'das kyis skabs 'di gsan nas 'di gsungs so/ /zas ni gzhan gyi khyim dag las/ dman pa dang / gya nom pa dang / grang ba dang / dro ba dang / zhag lon pa dang / zhag ma lon pa'i bza' ba dang / btung ba gcig tu gyur pa rnyed pa ste de gang la yod pa de len pa ni bsod snyoms byed pa ste/dbyug pa can bzhin no/ /yang na yang dag par skyo ba las byung ba'i gzhan gyis byin pa'i rdzas ni bsod snyoms kyi sgrar brjod do/ /dper na dbang po ni zag pa zad par byed pa'i sgra ste/ lhung ba na khron pa la sa'i gong bu bzhin te dgos pa zhes bya ba'i don to//de gang la yod pa ni snga ma bzhin te des bslangs pa tsam gyi thabs kyis so/ /'dis ni log pa'i 'tsho ba spangs par bstan no/ /dge slong zhes bya ba ni bcom ldan 'das kyi nyan thos dben pa rnam pa gnyis pa dang ldan pa'i phyir g.yeng ba thams cad bcom pa yin te/de bas na 'dis ni g.yeng ba rnam pa gnyis med par bstan to/ /bdag rang 'grangs par byed kyis zhes bya ba ni bdag nyid gso bar byed pa yin pas bdag nyid 'grangs pa'o/ /re zhig gzhan yang gso bar byed pa yin nam zhe na/ gzhan dag mi gso ba zhes smos te/'di la gzhan gso ba'i ngang tshul yod pa de dgag par bstan te/ /gzhan dag mi gso ba ni gzhan dag mi skyed pa zhes bya ba'i don to/ /yang na bdag gcig pu gso ba yin gyis bu dang chung ma la sogs pa ni ma yin te/ de bas na lus la sogs pa'i dben pa yod pa nyid do//gzhan dag mi gso ba zhes bya ba ni gzhan ni pha rol te/ dgra bo dag go/ /de yang don dam par ni 'dod chags la sogs pa'i nyon mongs pa'o/ /de chu la sogs pa'i rim pas 'phel bar byed pa ste/ de la lhag par zhen pas so/ /gzhan dag mi gso ba ni mi gtsang ba la sogs pa gnyen po'i phyogs bsgom pa la brtson pa zhes bya ba'i don to//yang na gzhan dag mi gso ba ni/ phung bo gzhan mi 'dzin pa'i phyir ro/ /yang na bsod snyoms byed pa zhes bya bas ni 'phags pa'i rigs bstan te/ 'dis ni spong ba la dga' ba bstan to//lha rnams dga' bar 'gyur zhes bya ba ni brgya byin lhag par dga' ba ste/ dga' ba ni dga' bar byed pa dang / 'dod par byed pa ste ci nas kyang bdag gis 'di mthong bar bya zhing mchod pa dang / nam zhig na bdag kyang 'di lta bur 'gyur zhes bya ba la sogs pa'o//bdag gi don byas nas gzhan gyi don gyi thabs bstan par bya ste skyob pa ni de kho na nyid ston pas 'ong ba dang 'gro ba ni nges pa'i tshig ste/ des sdug bsngal la sogs pa'i bden pa bstan pa zhes bya ba'i don to/ /nye bar zhi ba zhes bya ba ni phung po lhag ma med pa'i mya ngan las 'das pa dang 'dra ba 'gog pa'i snyoms par 'jug pa dang ldan pa ste/de'i tshe ni nye bar zhi ba rdzogs pa 'thob par 'gyur ro/ /'dis ni mthong ba'i chos la bde bar gnas pa bstan to/ /rtag tu dran pa zhes bya ba ni drug la rtag tu gnas pa'i sbyor ba ste/mig gis gzugs mthong na yid bde bar yang mi 'gyur zhing yid mi bde bar yang mi 'gyur te btang snyoms su gnas pa ni dran pa dang shes bzhin no zhes rgya cher ro/ /yang na bsod snyoms byed pa zhes bya ba 'dis ni bsod snyoms la sogs pa ngan ngon tsam gyis chog shes pa bstan to//dge slong zhes bya ba 'dis ni phyin ci ma log par gnas pa'i rab tu byung ba'o/ /bdag rang tsam 'grangs par byed kyi zhes bya ba ni thams cad yongs su btang ba'o/ /gzhan dag mi gso ba zhes bya ba ni nyon mongs pa kun du mi spyod pa'o//lha rnams dga' bar byed pa zhes bya ba ni yon tan gyi phan yon yin no/ /lhag ma ni bshad zin to/ /sngar bshad pa kho na dag la dga' bar 'gyur gyis skyon dang ldan pa dag la ni ma yin no zhes bstan pa'i phyir/ dge slong bsod snyoms zhes bya ba la sogs pa smos so//'od srungs chen po la brgya byin gyis mchod pa byas so zhes dge slong rnams kyis thos nas dge slong lnga brgya tsam bsod snyoms byed par zhugs pa dang / de'i dbang du mdzad nas 'di gsungs so/ /bkur sti nor dang grags 'dod rnams la min//zhes bya ba la bkur sti ni mchod pa'o/ /grags pa ni snyan pa'o/ /nor ni don te de dag 'dod cing don du gnyer ba'i tshul 'di la yod pa'o/ /de la ni mi yang dga' bar mi byed na gzhan lta ci smos te lha sbyin la sogs pa 'dir dper brjod par bya'o//don dam pa'i dge slong gi gnas ni yang dag pa'i 'tsho bas yin gyi log pa'i 'tsho bas ni ma yin no zhes bstan pa'i phyir/ dge slong 'dod pa kun spangs shing / /zhes bya ba la sogs pa yin no/ /tshe dang ldan pa shA ri'i bu nye du'i khyim du song ste/chos bstan pas phan 'dogs par byed do/ /bram ze ma rungs pa zhig gis de ma bzod de smras pa/ bdag nyid bslus nas gzhan yang slu bar byed dam zhes byas pa dang / des ni 'di gsungs so/ /'dod pa thams cad kyi yul du gyur pa gang spangs pa ni 'dod pa kun spangs pa ste/rab tu byung ba yongs su bzung ba'i phyir ro/ /dge slong ni nang gi kun du 'khrugs pa bcom pa ste/ sems rnam par dben pa dang ldan pa'i phyir ro/ /dben par gyur na ni srid pa'i rtsa ba rtsa nas 'byin par nus te/ srid pa'i rtsa ba phra rgyas drug ces pa'i tshig gis so//brtsal ba ni 'jig par byas pa ste yongs su spangs pa'o/ /gang zhe na mdun na gnas pa'i rdul zhes smos te/ mdun na gnas pa ni rang gi rgyud la gnas pa'i phyir ro/ /yang na 'jig rten thams cad kyi mngon par 'dod pa ste/de med na ni rjes su chags pa 'di la med cing gzi brjid kyang med do zhes 'phya bar snang ba'i phyir ro/ /'dod chags la sogs pa ni rdul yin te/ rdul 'dir 'dod chags yin gyis zhes bya ba la sogs pa'i mdo'i tshig gis so/ /rim pa gang gis rdul brtsal ba yin zhe na/bdag med ces bya ba dang gzhan la mi smra zhes bya ba ste/ rnyed pa la sogs pa'i ched du kha gsag gis gzhan dga' bar byed pa ni smra ba ste gzhan gzud pa dang bslu ba'i ched du bya mi dgos pa yin te/ gang nyon mongs pa dang bcas pa de ni rnyed pa la sogs pa'i ched du gzhan bslu ba la sogs pa dgos pa yin gyi nyon mongs pa med pa ni ma yin te/dri ma dang bcas pa'i gser ni me la sogs pas dag par mi 'gyur ba ma yin pa bzhin no/ /bag chags spangs pa ni rnam par 'gyur ba'i rgyu yod par gyur kyang rtogs pas mi 'gyur ba yin no zhes bstan pa'i phyir skye bo ma bsdams zhes bya ba la sogs pa smos so//ri dgas 'dzin gyi ma sa gas don 'di dag thos te des de la smras pa khyed cag bcom ldan 'das la de skad ma zer cig 'di lta bu'i tshul gyis bsngags pa ma yin pa khyed cag ma smra shig /yun ring po'i gnod pa dang phan pa ma yin pa dang sdug bsngal bar 'gyur ro zhes pa nas bcom ldan 'das kyi spyan sngar song ste zhus pa/ btsun pa gzhan yang ma du ra ka'i rigs kyi lus kyi phyogs la bdag mi dga'o zhes pa dang / bcom ldan 'das kyis bsngags pa ma yin pa de gsan nas tshigs su bcad pa gnyis gsungs so//des kyang zhag bdun bcom ldan 'das nyan thos kyi dge slong gi dge 'dun dang bcas pa spyan drangs so/ /gnod byed pa zhes bya ba ni gzhan la sgul bar byed pa dang 'chi bar byed pa'o//tshig gis ni ngag gis so/ /skye bo ma bsdams zhes bya ba ni tshul ngan pa ste ma dul ba'i rta srab dang bral ba bzhin no/ /gang la gnod par byed ce na yang dag par sdom pa la zhes bya ba'i tshig gi lhag ma'o/ /ji lta bu zhe na/ g.yul ngor glang chen mda' yis bsnun pa bzhin//zhes bya ba smos te/ dper na glang po'i mchog sa srung la sogs pa mtshan phun sum tshogs pa yang lha dang lha ma yin gyi g.yul ngo'i sar lha ma yin gyis mda' la sogs pa'i mtshon gyis rgyun du 'bigs shing snun par byed pa bzhin du yon tan brgya stong phrag dpag tu med pas brgyan pa'i sems dpa' chen po yang skye bo dam pa ma yin pas rtsod pa'i dus su tshig rtsub po la sogs pa'i mda'i tshogs kyis gnod par byed de gang ma bsdams pa'i tshig gis gnod par byed do//des na de dag ji ltar byed pa yin zhe na/ thos gyur kyang zhes bya ba ni rab tu thos gyur pa'o//tshig ces bya ba ni gnod par byed pa'o/ /brjod pa ni smra ba'o/ /mi bzad pa ni tshig rtsub po ste gnad la 'bebs pa'o/ /ji mi snyam zhes bya ba ni bzod pa'o/ /dge slong zhes bya ba ni gsol ba dang bzhi'i las kyis bsnyen par rdzogs pa ste/ 'dod chags dang ma bral bar gyur kyang dge sbyong byed pa la rjes su 'jug pa'o//de yang phyi rol la ji mi snyam pa ni ma yin gyi dge sbyong byed pa la gnas shing 'on kyang nang la bzod pa tsam ni yin te de yang mi 'khrugs pa'i mtshan nyid do/ /de nyid kyang sdang sems bral la zhes bya ba 'di smos te/ 'tshe ba'i bsam pa med pa'o//yang dag par yongs su brtags pas 'di nyid kyis bzod par nus kyi gzhan gyis ni ma yin no zhes bstan pa'i phyir/ skye bo ma bsdams zhes bya ba la sogs pa smos so/ /legs gzhag la zhes bya ba ni shes rab sngon du 'gro zhing snying rje gzung ba byas la nges par gzhag pa yin no//gang zhe na yid ces bya ba ni sems te yang dag pa nyid du gzhag pa'i rnam par shes pa'o/ /gang legs par gzhag pa'i yid de gang yin zhe na/ bzo yis mi 'tsho zhes bya ba la sogs pa'o/ /dge slong dag dkyil 'khor bzhin du gnas shing 'khod nas gtam rjod par byed de btsun pa dag bzo'i gnas ni legs par gzhag pa yin no zhes pa nas ji tsam na bcom ldan 'das gshegs te 'di gsungs so//bzo ni dbyig dang gser la sogs pa yang brdung ba dang / yi ge la sogs pa mkhas par byas pa des 'tsho ba'i ngang tshul 'di la yod pa ste/de las gzhan pa'i bzo byas kyang mi 'tsho ba'o/ /ji ltar na dge slong de ni bzo la brten nas 'tsho ba gnas par byed pa ma yin te/ tshul 'di ni khyim pa'i skye bo yin no zhes byas nas so/ /spang ba ni yo byad bsnyungs pa bstan te yo byad mang po mi bya ba dang / 'tshog chas mang po ma yin pa dang / legs par bkod pa'i tshul dang / ma smin pa'i 'bru len pa spang bar bya'o zhes bya ba la sogs pa'o/ /bdag la dga' zhes bya ba ni bdag nyid la 'dod par byed cing bdag la dga' ba gang yin pa des ni legs par spyod pa la rtag tu mngon par dga' ba'o//ji ltar yang dge slong bdag la dga' ba yin zhe na/ 'di ni gcig tu dge sbyong du 'dzin pa dang / dge sbyong la dga' ba dang / bslab pa 'dod pa'o zhes bya ba la sogs pa'o/ /'dis dge ba'i chos la 'dun pa bstan nas dbang po'i sdom pa smras pa/ dbang po dul ba zhes smos te/dbang po dul ba'i phyir ro/ /'dis ni tshul khrims kyi sdom pa bstan to/ /kun las rnam grol zhing zhes bya ba ni sdig pa'i yan lag thams cad dang / sdig pa'i rgyu thams cad las te sdig pa las ldog pa'i phyir ro/ /de ltar khyim pas ni byed par mi nus kyi rab tu byung bas nus pa'i phyir bshad pa/khyim la ma chags zhes bya ba ste khyim snying por byed pa gang yin pa de ni khyim snying por byed pa ste khyim len cing chags pa gang yin pa'o/ /de las gzhan pa ni rab tu byung ba zhes bya ba'i don to/ /de nas tshul khrims la brten nas lam bsgom pa'i khyad par smras pa/ bdag med ces bya ba ste 'jig tshogs la lta ba med pa'i phyir mthong pa'i lam bstan to//sred pa spangs pa zhes bya ba ni sred pa spangs pa'i phyir bsgom pa'i lam bstan to/ /gang gi tshe lam gnyis kyis dang po spang bar bya ba yongs su shes pa de'i tshe bshad pa 'dod spangs zhes bya ba ste dang po 'dod pa'i khams spangs pa'o//gcig tu spyod pa ni mnyam par gzhag pa'i sa pa'i nyon mongs pas dben pa'i phyir te/ de nyid don dam pa'i dge slong yin no/ /dge slong de nyid ni sdug bsngal zad pa thob par 'gyur ro zhes bstan to/ /'tsho gtsang zhes zhes bya ba la sogs pa smos so//kun du rgyu nag po rgyun shes zhes bya bas bcom ldan 'das la btsun pa ci tsam gyis na dge slong sdug bsngal zad pa 'thob par 'gyur zhes gsol pa dang / 'di gsungs so/ /grogs po mthun pa bsten bya zhing / /zhes bya ba la mnyam pa 'am khyad par du gyur pa'i dge ba'i grogs po phan 'dogs par byed pa ni bsten par bya ste/gang la brten nas sdig pa mi dge ba'i chos rnams 'grib pa dang / dge ba'i chos rnams 'phel ba de ni mthun pa'i grogs po'o/ /'tsho gtsang zhes bya ba ni yongs su dag pa'i kun du 'tsho ba'i yo byad gang yin pa ste log pa'i 'tsho ba spangs pa'i phyir ro//bslab ba bsrung ba'i rim pa bstan pa/ snyom las med pa zhes bya ba ste yongs su gzung ba med pa'i phyir ro/ /gang gi phyir yongs su gzung ba yod pa ni snyom las skye bar 'gyur te gang dag myu gu mang por 'phros pa'i shing bzhin no//de bkag pas ni snyom las med pa ste/ yang bshad pa/ gzung bya mi 'dzin dge slong dang / /thibs po'i nang du g.yag gnas dang / /dgon du ma he gnas pa ste/ gsum po 'di dag 'chi bar phyogs/ /zhes pa'o/ /yongs su gzung ba med kyang de ci nus par gzhan la phan par byed de/'di ltar so sor bgo bsha' bya ba dang zhes bya ba so sor bgo bsha'i sgo nas kyang de ltar khyad par du phan 'dogs pa de la 'jug cing 'di ltar rab tu 'jug par byed pa'o/ /bgo bsha' yang rnam pa gnyis te chos kyis so sor bgo bsha' bya ba dang / zang zing gis so sor bgo bsha' bya ba'o zhes pa'i tshig gis so//skyes bu dam pa la brten pas 'tsho ba kun du dag pa dang / yongs su gzung ba med cing gtong bar gyur na ni rnam pa thams cad du gzhan la phan 'dogs par byed par 'gyur te/ bdag nyid dam pa'i tshul mchog tu byed pas gzhan la phan 'dogs par nus kyi gzhan du ni ma yin no zhes bstan pa'i phyir/spyod yul cho ga mkhas par bya/ /zhes bya ba bstan te/ bslab pa dang nye ba'i bslab pa bsrung ba la mkhas par 'gyur bas so/ /ci'i phyir spyod yul gyi cho ga mkhas pa la sbyor ba yin zhe na/ 'di ltar spyod yul cho ga mkhas pa yis/ /zhes bya ba smos te/ dam pa'i spyod pa la dga' bas 'dul ba bzhin du sde snod gsum du bstan pa'i cho ga dang rjes su mthun pas tshul khrims yongs su shes pa la rjes su 'jug pa'i phyir ro//de lta bu'i dge slong des 'bras bu ji zhig 'thob pa yin zhe na/ sdug bsngal zad pa zhes bya ba 'khor ba las thar pa 'thob par byed pa'o/ /ji ltar yang dge slong spyod yul gyi cho ga la mkhas pa yin zhe na/bstan pa'i phyir rkang pa legs bsdams zhes bya ba la sogs pa smos so/ /dge slong zhig bsod snyoms kyi phyir zhugs pa las legs par ma bsdams shing spyod yul du shin tu ma bsdams pa zhig ste ji tsam na rab tu dben pa'i nags su song nas shing zhig gi drung du 'dug ste ting nge 'dzin sgom par byed do//bcom ldan 'das nyan thos kyi tshogs dang bcas te nags su rgyu zhing gshegs pa dang de las brtsams so/ /gzhan dag ni rgyal byed kyi tshal du chu skyar gyi sgra cig grag ste/ steng du bltas pa dang so phag gcig lhung ste song bas ngang pa zhig gsad pa'i dge slong las brtsams so zhes zer ro//lag pa gnyis legs par bsdams pa ni lag pa legs par bsdams pa ste/ lag pa yang dag par sdom zhing brtse bas rdeg par byed pa dang / gzhan gyi nor len pa la sogs pa de'i sgrub pa mi byed pa'i phyir ro/ /rkang pa legs bsdams zhes bya ba ni de dang 'brel pa'i srog gcod pa la sogs pa'i don te/'gro ba na 'chi ba la sogs pa mi byed pa'i phyir ro/ /lus kyi sdom pa bstan nas ngag gi sdom pa smras pa/ tshig rnams legs bsdams zhes bya ba ngag gi nyes par spyod pa bzhi spangs pa'i phyir ro/ /dbang po'i sdom pa bstan pa/ dbang po legs bsdams zhes bya ba ste dbang po'i dul ba'i phyir ro//nang du dga' ba zhes bya ba ni bdag nyid la lhag pa ni nang ngo / /de la dga' ba ni yul dag las sems rab tu bsdus pa ste 'dis tshogs kyi lam bstan nas lam 'thob pa bstan pa/ mnyam par 'jog ces bya ba ni zag pa med pa'i ting nge 'dzin gyi khyad par dang ldan pa'i phyir ro//gcig tu zhes bya ba ni rang dbang zhes bya ba'i don to/ /yang na las dang nyon mongs pa'i grogs med pa'i phyir ro/ /chog shes zhes bya ba ni yang dag par dga' ba skye ba ste mthong ba'i chos bde bar gnas pas so/ /de ni dge slong yin zhes gsungs/ /zhes bya ba ni de nyid bcom ldan 'das kyis don dam pa'i dge slong du bstan te/gzhan ni ming tsam yin pa'i phyir ro/ /rgyu gang gis cho ga 'di lta bu la dmigs pa yin zhe na/ dge slong chos la kun dga' zhes bya ba la sogs pa smos so/ /dge slong gzhan zhig rtag tu chos nyan cing sems pa dang sgom par byed la/ de nyid la mngon par dga' bas ji tsam na dgra bcom par gyur te/de la 'di gsungs so/ /gzhan dag ni rgyal byed kyi tshal na chos kyi kun dga' ra ba zhes bya ba'i gnas brtan gyi dbang du mdzad do zhes zer ro/ /kun dga' bar byed pa yin pas mngon par dga' ba ste/ don dam pa'i chos thar pa dang de'i lam la kun tu dga' ba'o/ / yang na zhi gnas dang lhag mthong gi chos la kun tu dga' zhing mngon par dga' ba'i gnas 'di la yod pa'o/ /chos dga' zhes bya ba ni bstan pa'i chos la rtag tu mnyam par mngon par dga' ba'i phyir ro/ /'dis ni thos pa las byung ba'i shes rab bstan to/ /chos la rjes su sems pa dang / zhes bya ba ni ji ltar thos pa'i tshig gi don bsams pa las byung ba'i shes rab kyis kun tu dpyod pa'o/ /chos la rjes su dran pa dag /ces bya ba ni/ thos pa dang bsams pa'i chos la bsgoms pa las byung ba'i shes pas lan du mar mngon du byas pa'i phyir ro/ /dge slong chos las yongs su nyams mi 'gyur//zhes bya ba ni 'di lta bu'i dge slong ni lung dang rtogs pa'i bdag nyid kyi chos las yongs su nyams par mi 'gyur ro/ /chos las yongs su mnyams pas ni khyad par gyi bde ba 'thob par 'gyur ro zhes bstan pa'i phyir/ dge slong khang stong zhes bya ba la sogs pa'i tshigs su bcad pa gnyis gsungs so//dur khrod bsil ba'i tshal na 'phags pa'i mgon phyag dar khrod 'tshem pa las tshangs ris bdun brgya zad pa dang dben pa la dga' bas de las brtsams so/ /khang stong zhugs nas su zhes bya ba ni ming dang bral ba'i khang stong ste der zhugs pa ni rab tu dben pa'i phyogs la gnas pa zhes bya ba'i don to//'gro bas ni bya ba 'grub pa yin no zhes rig byed pa dag smra ste de dgag pa bstan pa'o/ /dge slong ni yongs su bzung ba spangs pa'i phyir ro/ /nang la lta bar byed pa dang / /zhes bya ba ni bdag la lhag pa ni nang ste nang du lta zhing phyi rol gyi yul la chags pa las bsdus te nang du lta ba la 'jug pa zhes bya ba'i don to//nang la lta ba'i tshul 'di la yod pa ni 'phags pa'i lam bsgom pa la brtson pa'i phyir te/ de ni dben pa gnyis dang ldan pa nyid do/ /lha yi dga' dang ldan par 'gyur/ /zhes bya ba ni lhag par gsal bar byed pa'i phyir te lha rnams la yang de med pa'i phyir ro//chos rnams legs par mthong ba dag /ces bya ba ni yang dag par snyoms par zhugs pa'i zag pa med pa'i shes pas bden pa bzhi bsgrubs pa ste/ des khyad par gyi rtogs pa dang ldan pa'i phyir ro/ /ji ltar chos nges par bstsags pas dga' ba yin zhe na/ ji lta ji ltar zhes bzlas pa ste/ji srid ji srid do/ /yang na 'dod pa'i khams la sogs pa'o/ /legs rtogs pa zhes bya ba ni yang dag par dga' ba'o/ /phung po la zhes bya ba ni gzugs la sogs pa'o/ /skye dang 'jig pa zhes bya ba ni 'byung ba dang 'gog pa'o/ /de lta de ltar zhes bya ba ni de srid de srid do/ /yang na de las de las so//de yis dga' ba nyid kyang 'thob/ /ces bya ba ni rnal 'byor pa des 'thob pa ste/ yid bde ba dang bya ba mthar thug pa'o/ /btsal ba'i mthar thug pa bshad pa/ dga' ba zhes smos te 'khor ba spang ba'i gnyen po rjes su tshol ba des rtogs pa'i gang yongs su dga' ba de ni rab tu dga' ba'o/ / mgu ba la gnas pa yang ma 'ongs pa dag tu yod pa'i phyir ro/ /de yang rnal 'byor pa de nyid kyis 'thob pa yin no/ /gal te des dga' ba dang mgu ba nyid 'thob pa des cir 'gyur zhe na/ dga' ba mang po yis zhes bya ba smos te dga' ba yang mang zhing shas che ba 'di la yod pa ste/ gong nas gong du gnyen po yod pa'i phyir ro sdug bsngal zad pa ni thar pa'o//sdug bsngal zad pa thob pas mthong ba'i chos kyi phan yon bstan pa ji ltar zhes bya ba la sogs pa smos so/ /ji ltar maud gal gyi bu chen po gu Ta shi khi ya kas lus shin tu brdungs pa las/ de'i tshe bram ze dang khyim bdag dad pa can dag 'ongs nas khyod kyi yid de la g.yos par ma gyur tam zhes dris pa dang /btsun pa ma lags so zhes pa nas/ de'i don du tshigs su bcad pa drug gi bar du gsungs so/ /ji ltar ri bo dag ces bya ba ni sa 'dzin pa'o gal te sa las de grub pa yin nam zhe na/ brag gi zhes smos te rdo'i rang bzhin no//rlung gis zhes bya ba ni rlung dmar gyi rgyus so/ /mi g.yo ltar zhes bya ba ni mi 'gul ba'o/ /de bzhin ni de ltar ro/ /'dod chags zad pa'i rgyus ni dge slong khrid pa ma yin zhing rnam par 'gyur bar mi byed de/ ri bo dag gam ri bo bzhin/ /zhes bya ba ni tshigs su bcad pas gong du dpe bstan zin na/ji ltar 'dir yang brjod ce na bshad pa/ rgya cher bstan pa nyid dang / bstan ma thag pa nyid ni bsdus te bstan pa'i sbyor ba dang ldan pa'i phyir te/ dper na shing rta pa la lam zhes bya ba la sogs pa bstan pa bzhin no/ /yang na phyis 'ongs pa'i gdul bya dag la dpe dang bcas pa bstan pas phan gdags pa'i phyir ro//yang na dge slong gi khyad par de ji lta bu zhe na/ dge slong rnam par 'gyur ba'i rgyu yod kyang mi 'gyur ba'o zhes bstan to/ /yang na ri ni ri gangs can dang 'dra'o zhes bya ba yin te dper na ri gangs can ni mtho ba las rab tu 'bab cing 'jug pa'i chu bo'i rgyun mngon par 'phel ba dang /mngon par 'dod pa'i me tog dang 'bras bu dang ldan pa'i nags can dang / ri dgas dang bya'i tshogs dpag tu med pa rnam pa sna tshogs nye bar gnas pa dang / sman rnam pa sna tshogs kyi gzhir gyur pa de bzhin du/ gang thar pa'i lhag pa'i bsam pas mtho ba nas 'bad pa'i byams pa la sogs pa'i bsgom pa'i rgyun kun tu bsags pa dang /ting nge 'dzin gyis rnam par rol pa'i tshogs kyis skye bo phongs pa rnams kyi yid la re ba rdzogs pa'i gnas dang / rnam pa sna tshogs pa'i rim pas gzhan la phan 'dogs par byed pa'i blo skye bar 'gyur ba'o/ /nga'o snyam pa'i nga rgyal spangs pa yin no zhes bstan pa'i phyir/gang la kun du zhes bya ba la sogs pa smos so/ /tshe dang ldan pa u pa marda zhes bya ba lhag par sogs par byed pas dge slong dag 'phya bar byed pa la/ /'phags pa ba ku la ni gtong ba mchog tu byed pas nyod par byed de/ de'i dbang du mdzad pa'o/ / gang la zhes bya ba ni sems can no/ /kun du sogs med cing zhes bya ba ni nor dang 'bru la sogs pa med de/ nor dang 'bru la sogs pa nye bar sogs pa med pas yongs su bzung ba med pa'i phyir ro/ /gang la bdag gir byed med pa/ /zhes bya ba ni bdag gir byed pa sngon du 'gro ba'i lhag par zhen pa med de/mthong bas spang bar bya ba med pa'i phyir ro/ /gang dag med na mi gdung ba/ /zhes bya ba ni phung po med pas mya ngan 'thob par mi 'gyur te de la gang 'di med par 'gyur ba dang / bdag la yang med par 'gyur ba dang zhes bya ba'i tshig gis so/ /mngon par 'dod pa'i dngos po dang bral ba dang / zhig pa la sogs pas de med cing ma thob par gyur na yang gang de gdung bar mi 'gyur zhing yongs su mya ngan byed par mi 'gyur te//bsgom pas spang bar bya ba spangs pa'i phyir ro/ /de ni dge slong zhes bya ba ni de nyid dge slong gi ming du 'os pa yin no/ /yang na dge slong ni gsum ste/ so so'i skye bo dge ba dang / khro ba spangs pa dang /srid pa las grol ba ste tshig rkang gsum po 'dis bstan to/ /gzhan ni dge slong du ma'i 'dod kyi 'jig rten ba'i dge slong ngo zhes byas nas so/ /de ji ltar bzhi pa ma brjod ce na/ 'dir smras pa/ re zhig gzhan la slong ba tsam/ /zhes bya bas bstan te/ dge slong ni slong ba'i phyir sgo na 'dug go zhes 'jig rten na tha snyad du 'dogs pa de ji dge slong zhes bya ba yin nam zhe na/dge slong ni rab tu rnam par zhugs pa ste de dang / khyim bdag mgon med zas sbyin las brtsams nas tshigs su bcad pa gnyis gsungs so/ /re zhig min snyam zhes bya ba ni de tsam gyis te ci tsam gzhan la slong ba tsam gyis te chos gos la sogs pa gzhan dag las slong ba de tsam gyis so//grong pa'i chos zhes bya ba ni grong ba nyid yin pas grong ba'o/ /chos ni dngos po dag ste yongs su bzung ba dang mi bzung ba'i dngos po yin pas so/ /'dzin byed pa zhes bya ba ni dge slong dag gis yongs su 'dzin pa zhes bya ba dang sbyar ro//gang gi chos gos la sogs pa shas cher 'dzin pa'i gnas skabs su gyur pa de'i tshe bcom ldan 'das kyis chos gos kyi rnam par rig pa bstan te/ bslab pa bcas pa rjes su bsrung ba'i phyir ro/ /gal te yang grong ba'i chos 'dzin par byed na ni ma yin te/ slong ba tsam nyid ces dge slong gi cha byad 'dzin cing slong ba la nye bar gnas te/'dod pa'i yon tan thams cad la nye bar longs spyod pa de'i bde bas ni ji ga de'i tshe dge slong du 'gyur ram zhes bya ba yin no/ /cha byad yongs su bzung ba tsam gyis kyang / /zhes bya ba ste/ yang gi sgra 'dir phyis pa'i phyir ro/ /de bas na grong pa'i chos yongs su btang na des ni dge slong du 'gyur ro zhes bstan pa'i phyir/gang zhig ces bya ba la sogs pa'o/ /gang zhig ni gang la la'o/ /dge ba ni srid pa'i 'bras bu'o/ /sdig pa ni 'bras bu mi 'dod pa'o/ /dang gi sgra ni gnyi ga gcig tu spang bar bya ba bsgrub pa'o/ /rab spangs zhes bya ba ni yongs su dor ba'o//'dis ni lam gyi tshogs bstan nas/ lam bstan pa/ tshangs par spyod ldan zhing zhes bya ba ni tshangs pa'i phyir spyod pa ste/ /gang gis mya ngan las 'das pa 'thob pa'i 'phags pa'i lam de khyad par du byed pa gang yin pa ni de nyid do/ /lam gyi skyon thams cad spangs pa ni lam bsgom pa la rag las pa yin no zhes bstan pa'i phyir/sde tshogs spangs nas zhes bya ba smos te/ sde byed pa dang sde dang tshogs yin pa'o/ /de spangs pa ni dor ba la kun tu sbyor ba zhes bya ba'i don to/ /de spangs nas ci zhig bya zhe na/ spyod byed pa zhes bya ba smos te/ gdul bya la phan gdags pa'i phyir 'di nyid du/dus ji srid 'dug cing rang gi don byas nas gzhan gyi don la dmigs pa zhes bya ba'i don to/ /de ni dge slong zhes bya ba ni de nyid dge slong gi ming 'thob par 'gyur ro/ /tshig gi don gang lhag par spyod par 'gyur zhe na/ bshad pa/ byams pa la sogs pa dang rnam par ldan pa ste/ 'di nyid bstan pa'i phyir/dge slong gang zhig byams gnas shing / /zhes bya ba la sogs pa smos so/ /mnyan yod na phan tshun gnod pa la 'jug pa'i dge slong dag las brtsams nas tshigs su bcad pa drug gsungs so/ /gzhan dag ni gang gA'i dogs na gnas pa'i grub dag thag ring po nas shin du khro zhing gshe bar byed la/ji tsam na thag nye bar gyur pa dang / bcom ldan 'das kyi sku dang shin tu zhi ba'i nyan thos kyi tshogs mthong bas mngon par dad cing bcom ldan 'das spyan drangs te/ gru 'di la gshegs su gsol zhes zhus nas de las brtsams so zhes zer ro/ /byams gnas pa zhes bya ba la/ lus can dag la brtse ba ni byams pa ste/gzhan la phan pa dang phan pa'i sems ni byams pa'o/ /de bas na de'i mtshan nyid bstan pa/ de las 'dis gnas pa'i ngang tshul yod pa ste/ byams pa mngon du byas shing lan mang du gnas pa'i phyir ro/ /'dis nyon mongs pa kun tu mi spyod pa'i thabs bstan nas gtan du spangs pa'i thabs bstan pa/rab dang ba zhes bya ba ste/ shes nas dad pa thob pa'i phyir ro/ /byams pa bsgoms pa'i mthus bde bar mthong ba'i lam la zhugs te/ de las shes nas dad pa thob pa'o/ /gang la rab tu dang ba yin zhe na/ sangs rgyas bstan la zhes smos te/ sangs rgyas kyis bstan pa'i lam dkon mchog gsum zhes bya ba'i don to//'di ni thar pa'i lam gyi ngo bo yin pa'i phyir ro/ /bdag nyid ngan 'gro las 'dren te/ /zhes bya ba ni bdag nyid ngan song gsum las 'dzin pa yin no/ /'dir dpe bstan pa/ 'dam rdzab las ni zhes bya ba yin te/ dper na spos kyi glang po che myos pa bag med pas 'dam rdzab tu chud pa de las 'dab nye ba na yod pa'i shing chen po la lag pas yongs su bzung ba la sogs pa la brten nas bdag nyid 'don par byed pa de bzhin no//byams pa'i stobs kyis ngan song dag las 'byin pa bstan nas/ da ni 'dod pa'i khams las 'byung ba bstan pa'i phyir/dge slong gang zhig byams gnas pa/ /zhes bya ba la sogs pa smos so/ /sprug par byed ces bya ba la sprug pa ni spong ba'o/ /sdig pa ni mi 'dod pa'i 'bras bu can mi dge ba'o/ /chos rnams ni dngos po gzugs la sogs pa'o/ /ljon shing lo ma bzhin zhes bya ba ni shing gi 'dab ma bzhin no//rlung gis zhes bya ba ni shugs dang ldan pa'i rlung ngo / /des ji ltar shing gi lo ma lhung bar byed pa ltar 'dod pa'i khams kyang de bzhin no/ /de'i 'og tu gzugs dang gzugs med pa'i khams bstan te/ thob par 'gyur zhes bya ba ni rtogs par 'gyur zhes bya ba'i don to/ /go 'phang ni bzhi'o/ / zhi ba ni sdug bsngal dang yid mi bde ba la sogs pa'i skyon spangs pa'o/ /'du byed nyer zhi zhes bya ba ni gzugs na spyod pa'i phung po spangs pa'i tshul yin pa'i phyir ro/ /zhi ba ni gzugs dang 'du shes las skyes pa'i kun tu 'khrug pa med pa'i phyir ro/ /lta bas mi ngoms pa zhes bya ba ni ngoms par byed pa yin pas ngoms pa ste/gzhan de nyid 'dzin par byed pa'i phyir ro/ /ngoms pa nyid yin pas ngoms pa'o/ /de dgag pa ni mi ngoms pa ste/ yongs su bzung bas chog mi shes pa'i phyir lta bas chog mi shes pa gang yin pa de ni zhes bya bas bsdu ba bya'o/ /sgrib pa thams cad dang bral ba'i phyir shin tu gsal ba de'i tshe ni mya ngan las 'das par shes pa ste/de bas na gzugs med pa'i khams las 'dod chags dang bral bar gyur na ni phung po lhag ma dang bcas pa'i mya ngan las 'das pa 'thob pa yin no zhes bstan te/ mngon sum byed par 'gyur zhes bya ba yang dag par 'thob pa'o/ / kun sbyor zad pa zhes bya ba ni rjes su 'brel pa ste/ kun du sbyor ba mtha' dag spangs pa'i don to/ /ji ltar de ltar 'gyur zhe na/ rim gyis zhes smos te/ 'di ni rim gyis spangs par 'dod kyi cig car ni ma yin no zhes ston to/ /des na phung bo lhag ma dang bcas pa'i mya ngan las 'das pa'i dbyings su gzhol ba bstan to//mi srid do zhes bya ba ni mi rung ba'o/ /gang mi rung ba zhe na/ yongs su nyams par 'gyur ba zhes bya ba ste rnam par ldog pa zhes bya ba'i don to/ /ga las she na/ 'di ltar mya ngan 'das dang nye ba'i phyir zhes bya ba ni ting nge 'dzin gyi rnam pas kun du sbyor ba thams cad spangs pa'i rnal 'byor pa ni thar pa kho na dang nye ba ste/drung na gnas par gyur pa de'i bdag nyid du grub pa yin gyi 'khor ba la sogs pa'i ni ma yin no zhes bya ba'i don to/ /rim pa gang gis kun tu sbyor ba thams cad spangs pa 'thob cing yongs su nyams par 'gyur ba mi srid pa yin zhe na/ sems dga' zhes bya ba la sogs pa smos so/ / pur+Na brda na zhes bya ba'i grong khyer na gnas pa'i ma ga d+ha bzang pos bcom ldan 'das spyan drangs pa las/ drang srong chen po shing shun zhes bya bas gzugs khyad par can mthong bas mngon par dad de bdag nyid dad pa'i shugs kyis ri las babs nas de'i dbang du mdzad de 'di gsungs so/ /dga' ba dang mgu ba'i sems 'di la yod pa de ni de nyid de/ji skad du bshad pa/ 'di na re zhig dang po nyid du lhag pa'i bsam pa bzang par gyur la 'tshe ba med pa'i lhag pa'i bsam pas de khyad par 'dod pa zhes bya ba'i don to/ /yid ni bzang ba dang zhes bya ba ni 'dir bzang ba ni bsngags pa'i don to/ /skye bo dam pa mngon par dga' ba'i phyir mi gtsang ba la sogs pa'i dngos po la 'jug pa'i yid de/bsngags pa'i dngos po gang la yid yod pa zhes byas nas so/ /ngan song gsum gyi bgegs su gyur pa ni mthong ba'i lam nyid la gnas pa'i sems yin no/ /de la 'dis ni tshogs dang mthong ba'i lam bstan nas bsgom pa'i lam bshad pa/zil gnon pa zhes bya ba spangs pa'o/ /dga' dang mi dga' zhes bya ba ni rjes su chags pa'i kun du sbyor ba ste 'dis ni 'dod pa las 'dod chags dang bral bar bstan to/ /dga' ba mang po yis zhes bya ba ni dga' ba phal che ba ste/ gong nas gong du khyad par gyi gnyen po rnyed pas dga' ba lhag par nyams su myong ba'i phyir ro//de'i 'bras bu smras pa/ dge slong zhes bya ba ni nyon mongs pa bcom pa'i phyir te/ 'dis ni khams gsum las 'dod chags dang bral ba bstan to/ /da ni phung po lhag ma med pa'i mya ngan las 'das pa bshad de/ sdug bsngal zad pa zhes smos so/ /'dod chags dang bral ba nyid nye bar zhi ba yin no zhes bstan te/lus zhi zhes bya ba la sogs pa'o/ /dge slong zhig gis bcom ldan 'das la 'di skad ces/ btsun pa nye bar zhi ba la dge slong zhes brjod na ci tsam gyis dge slong nye bar zhi bar 'gyur zhes gsol pa dang / de las brtsams nas 'di gsungs so/ / rim pa gang gis nye bar zhi bar 'gyur zhe na/ lus zhi zhes bya ba ste/ lus kyi nyes par spyod pa spangs pa'i phyir ro/ /zhi ba dang ldan pas zhi ba'o/ /sems zhi bas ni 'di ltar 'gyur ro zhes bstan pa ste sems zhi zhes bya ba'o/ /de gnyis ka dang 'brel pa ni ngag zhi ba yin no zhes bstan pa'i phyir smras pa/ ngag ni zhi ba dang zhes bya ba yin te/tshul khrims la brten nas g.yeng ba med pa'i phyir ro/ /bsgom pa'i gnas skabs bstan pa/ legs par mnyam gzhag ces bya ba ste/ legs pa'i ting nge 'dzin gyis rgyud yongs su gzung ba zhes bya ba'i don to/ /ting nge 'dzin gyi 'bras bu bshad pa/ 'jig rten zang zing spangs pa zhes bya ba ni 'jig rten dang zang zing ni 'jig rten zang zing ngo //zang zing zhes bya ba 'di ni 'dod pa'i tshig bla dgas so/ /'jig rten ni nye bar len pa'i phung po lnga'o/ /spangs pa ni yongs su bor ba ste/ gang 'jig rten gyi zang zing gang yin pa'o zhes bsdu ba bya'o/ /de la zang zing spangs pa ni 'dod pa las 'dod chags dang bral ba'o//yang na 'jig rten na zang zing ni 'jig rten zang zing ste/ de gang gis spangs pa ni 'dod pa las 'dod chags dang bral ba zhes bya ba'i don to/ /dge slong ni khams gsum las 'dod chags dang bral ba'o/ /nye bar zhi ba ni nyon mongs pas byas pa'i kun du 'khrugs pa dang bral ba'i phyir ro//yin zhes brjod ces bya ba ni sangs rgyas dang de'i nyan thos kyis gsungs pa'o/ /nye bar zhi ba de'i gtso bo'i rgyu smras pa/ ting 'dzin med la zhes bya ba la sogs pa'o/ /a yod ces bya ba gang gA'i dogs ash+tha bad kan drang srong mang po bsgom zhing 'dug pa dge slong dag gis mthong nas de la shin tu dga' bar gyur pa'i skabs de gsan nas tshigs su bcad pa gsum gsungs so//ting 'dzin med la shes rab med/ /ces bya ba ni bdag med pa mthong ba'i shes rab dang bral ba ste/ ting nge 'dzin bsgoms pas ni yongs su dag par nus so/ /shes rab med la ting 'dzin med/ / ces bya ba ni de bzhin du ste ting nge 'dzin khyad par can no/ /spyir ni sems g.yeng bar gyur na shes rab khyad par can mi 'byung ngo / /shes rab ting 'dzin ldan pa de/ /zhes bya ba gang gnyis po 'di yod pa de nyid ni don dam par dge slong zhes brjod do/ /gnyis po'i 'bras bu bstan pa/ mya ngan 'das pa zhes bya ba ste/phung po'i lhag ma med pa'o/ /yang dag par bstan pa smras nas/ yang dag par 'dzin du 'jug pa smras pa/ de bas zhes bya ba smos te/ gnyis po la 'dzud pa'o/ /'jug pa ste zhes bya ba ni rab tu sbyor ba'o/ /de gang gis nus she na mkhas pa rnams kyis zhes bya ba smos te/ rigs pas 'thob pa'i shes rab dang ldan pa dang /gsung rab la mkhas pa la brjod do/ /de'i dang por bya ba 'di yin no zhes bya ba ni thabs so/ /dang por byed pa yin pa dang por bya ba'o/ /gang gis she na/ mya ngan las 'das pa 'thob pa zhes de ma thag tu bstan pa bsgrub pa'o/ /gang gi phyir ting nge 'dzin dang / shes rab kyi bdag nyid ni lhag ma med pa'i mya ngan las 'das pa 'thob pa'i thabs yin no//gang gis dang por bya ba yin zhe na/ dge slong gis so/ /yang dag sdom spyod pa zhes bya ba ni legs par sdom zhing dam pa'i spyod pa bzang po dang ldan pa'i phyir te/ de nyid ni legs par sdom pa'i spyod pa'o/ /yang na legs par sdom pa spyod pa'i ngang tshul 'di la yod pa ste/tshul khrims la brten nas chos gnyis bsgom par bya'o zhes mdo las bstan pa'i phyir ro/ /legs par sdom pa de gang yin zhe na/ gang gi yang dag par spyod pa drag po yin no zhes bstan te/ chog shes dbang po bsdam bya zhing / /zhes bya ba la sogs pa'o//de nas rgyal rigs spangs pa zhes bya bas bcom ldan 'das la 'di skad ces gsol to/ /bcom ldan 'das kyis gsungs pa mang zhing rgya cher ni thos lags na nyung ngu bsdus pa nyan par 'tshal bas legs par bcom ldan 'das kyis bsdus te bdag la bstan du gsol zhes zhus pa las 'di gsungs so//dbang po rnams bsdams pa gang yin pa de ni de nyid de dbang po bsrungs pa zhes bya ba'i don to/ /chog shes par gyur na ni dbang po dul bar 'gyur bas chog shes pa zhes bya ba smos te/ chos gos ngan ngon tsam la sogs pas chog shes pa'i phyir ro/ /de gnyi ga dang ldan par gyur na ni gong ma'i khyad par gyi snod yin no zhes bstan te/so sor thar pa zhes bya'o/ /thar pa'i ched du 'di sgom pa zhes bya ba'i don te/ mya ngan las 'das pa shin tu 'dir gyur pa'i phyir ro/ /yon tan dam pa dang sdom pa ni rnam par mdzes pa yin no zhes bstan pa ni/ zas 'di'i tshod kyang zhes bya ba la sogs pa'o//'di la kham gyi zas kyi tshad ni me'i stobs la ltos te/ de dang sbyor ba'i phyir ro/ /de yang lus gnas par bya ba dang bkres pa zhi bar bya ba tsam zhes bya ba la sogs pa gsungs pas so/ /bas mtha' zhes bya ba ni dgon pa'i gnas la gnas pa'i phyir ro/ /lam gyi tshogs bstan nas lam gyi lhag pa'i sbyor ba smras pa/lhag pa'i sems zhes bya ba zag pa med pa'i bsam gtan bzhi bsgom pa la yang dag par brtson pa'o/ /'di ni zhes bya ba 'di tsam zhig sangs rgyas bcom ldan 'das kyis bstan pa dang rjes su mthun pa zhes bya ba'i don to/ / gang sgrub pa dang ldan pa de ni sangs rgyas kyi bstan pa la rjes su 'brang ba yin no zhes bstan pa'i phyir/ gang gi lus zhes bya ba la sogs pa smos so/ /rgyal po'i khab na khri dang lhag pa'i khri can zhes bya ba'i kun du rgyu ma ga d+ha bzang po'i rdzing gi 'gram na 'dug ste mtshan mo mchil pas nya phyung zhing za bar byed la/tho rangs khri'i steng du 'dug pa las tshigs su bcad pa 'di gsungs so/ /dge slong du gyur nas/ chos la chos kyis 'tsho bar bya'i/ srog chags gang la yang 'tshe bar mi bya zhing spong ba la spyod pas yid zhi ba dang / brtul zhugs 'di ni yid zhi ba dang dul ba dang rjes su mthun pa yin no zhes dgongs nas de dag gdul ba'i dus la bab par mkhyen te/'di skad du/ tshigs bcad 'di bzhin spyod na ni/ /des na khyod ni de 'drar 'gyur/ /bdag nyid dam par sems byed khyod/ /dge slong de 'dra ma yin no/ /zhes bka' stsal to/ / gang gi lus zhes bya ba la sogs pa la gang gis ni gang zag go/ /lus ni lus la sogs pa'i nyes par spyod pa'i sdig pa med pa'o/ /ldog pa'i tshul khrims bstan nas/ 'jug pa'i tshul khrims bstan pa/ de ni dge ba'i tshul khrims can/ /zhes bya ba yin te/ de nyid yongs su dag pa'i ngang tshul can no//ngo tsha ba zhes bya ba la ngo tsha ba'i yid gang la yod pa de ni yid ngo tsha ba la gnas pa ste/ de nyid yod pas ni sdig pa med cing yon tan dang ldan pa'i phyir ngo tsha dang bcas pa de ni dge slong la yod kyi gzhan la ni ma yin no/ /gang de lta bu de nyid kyis ni 'phags pa'i lam 'thob pa yin no zhes bstan pa/gang gis zhes bya ba la sogs pa'o/ /btsun pa mnyam par gzhag pa ni dge slong yin zhes brjod na ji tsam gyis dge slong mnyam par gzhag pa lags zhes gsol pa dang dge slong gis 'di la byang chub kyi yan lag bdun bsgom par bya'o zhes bya ba nas rgya cher 'di gsungs so//legs bsgoms zhes bya ba ni legs par bsten pa'o/ /gang gis ni dge slong ngo / /chos ni yon tan te/ de nyid smras pa/ rdzogs pa'i byang chub kyi chos bdun zhes bya ba ste/ rdzogs pa'i byang chub ni zad la mi skye ba'i ye shes kyi mtshan nyid do/ /gang gi phyogs dang rjes su mthun pa de gang la yod pa de ni de nyid do//rdzogs pa'i byang chub kyi phyogs ni zad la mi skye ba'i ye shes 'thob par byed pa zhes bya ba'i don to/ /mngon sum du 'thob par byed pa de bstan pa'i phyir/ bdun zhes smos te/ de yang dran pa yang dag byang chub kyi yan lag dang / chos rnam par 'byed pa la sogs pa'o//de ni zhes bya ba ni sems can de nyid do/ /ji lta bur zhe na dge ba'i chos can zhes bya ste/ dri ma med pa'i khyad par te/ rgyud zag pa med pa'i shes pas bsgom pa'i phyir ro/ /yin zhes gsungs zhes bya ba ni dge slong mnyam par gzhag pa las skyes pa'i ting nge 'dzin du sangs rgyas kyis gsungs so zhes bshad do//de nyid dge ba'i shes rab yin te/ /ting 'dzin med la shes rab med/ /ces bya ba'i tshig gis bstan te/ 'di ni zhes bya ba la sogs pa smos so/ /shing khan di zhes bya ba'i dka' thub can yongs su bzung ba dang bcas pas dgon pa na gnas shing bdag nyid ni zag pa med pa'i dge slong yin no zhes bsams nas/gau ta ma ci tsam gyis na dge slong zag pa med pa med par gnas pas gdags pas gdags par mdzad ces zhus pa las brtsams so/ /'di na zhes bya ba ni mthong ba'i chos nyid la'o/ /shes rab la zhes bya ba ni khyad par du gyur pa'i shes pas yongs su gcod pa'o//ci zhe na sdug bsngal zhes bya ba la sogs pa yin te/ /rgyud gang la bdag tu 'dzin pa yod pa de ni de ste bdag de dang 'brel pa gang yin pa'i sdug bsngal de'i bdag nyid do/ /'dis sdug bsngal dang kun 'byung gi bden pa bstan te/ don dam par 'di gnyis ni ngo bo gcig yin pa'i phyir ro/ /zad pa zhes bya ba ni 'dis zad par byed pas zad pa'am zad pas na zad pa'o/ /'dis ni lam dang 'gog pa'i bden pa bstan te bden pa bzhi'i bdag nyid do/ /mthong ba dang bsgom pa'i lam 'dis bstan nas/ mi slob ba'i lam bstan pa/dge zhing shes rab ldan pa de/ /zhes bya ba smos te dge zhing sgrib pa med pa'i shes rab gang gis khams gsum gyi sgrib pa spangs pa'i phyir ro/ /gsungs pa ni bshad pa ste thams cad mkhyen pa'i sangs rgyas kyis so/ /zag pa med pa ni 'dod pa la sogs pa'i nyon mongs pa dang bral ba'i phyir ro//'o na gang tshul khrims la sogs pa'i yon tan dang ldan pa de yang zag pa med pa nyid yin nam zhe na/ de ni ma yin te de la gnas pa yang yongs su nyams pa yin no zhes thos te 'di nyid bstan pa'i phyir/ zag zad ces bya ba la sogs pa smos so/ / yul ko sa lan dge slong zhig nags tshal zhig na nye bar brten cing gnas te tshul khrims tsam gyis chog par 'dzin cing ma thob pa thob par bya ba'i phyir gong du rtsol bar mi byed do/ /de nas nags tshal de nyid na gnas pa'i lha zhig gis 'di snyam du bsams te/ kye ma'o dge slong 'di ni 'di tsam gyis chog par 'dzin pas mi rigs te gang bdag gis 'di nyid bskul bar bya'o zhes nas/de nas lha des de'i tshe sngon gyi sangs rgyas kyis gsungs pa'i tshigs su bcad pa gnyis bshad do/ /tshul khrims ni srog gcod pa la sogs pa las ldog pa'o/ /brtul zhugs ni dus ma yin pa'i zas la sogs pa las ldog pa'o//yang na tshul khrims ni bcas pa'i kha na ma tho ba dang bcas pa las ldog pa'o/ /brtul zhugs ni yon tan gyi khyad par ting nge 'dzin to/ /tshul khrims dang brtul zhugs nyi tshe tsam gyis dge slong de yid brtan par mi bya'o/ /yang na thos pa mang po 'am//zhes bya ba ni de 'dul ba la sogs pa sde snod gsum mang du thos shing bsod nams thob pa ste/ de'i don dang tshig ji lta bu bzhin du rtogs pa des bdag gis ni bstan bcos thams cad rtogs pa yin no zhes de'i ched du yid brtan par mi bya'o/ /ting 'dzin thob par gyur kyang ngal/ / zhes bya ba'i ting nge 'dzin gyi khyad par rnyed par gyur kyang zhes bya ba'i don te/ rangs byed kyi bu lhag spyod ting nge 'dzin gyis lus brtas shing srid pa'i rtse mor skyes par gyur te/ de las nyams nas byi la'i skye gnas su skyes te skam dang thang la gnas pa'i srog chags bsad cing gnod pa byas nas mnar med pa'i dmyal bar skyes so zhes thos so//dben pa dag tu gnas kyang rung / /zhes bya ba ni dgon par gnas shing de na gnas pa las yid brtan par mi bya ste/ thams cad bshes gnyen la sogs pa dka' thub las nyams par thos so/ /gdeng drod chod pa min zhes bya ba ni yid brtan par bya ba ma yin pas so//zag pa zad pa ma thob na/ /zhes bya ba ni ji srid nyon mongs pa zad pa ma thob pa ste/ 'phags pa'i lam gyis zag pa spangs par ma byas pa'o/ /de thob nas ni yid brtan par byas kyang nyams par mi 'gyur ro/ /des na de'i phyir de la gzhug pa smras pa/ rdzogs pa'i byang chub kyi bde ba mngon du bya'o zhes bya ba ni srid pa zad pa'i bde ba thob par bya'o//ji lta bu zhe na/ 'phags pas bsten pa zhes smos te/ so so'i skye bos ma bsten pa dang sngon chad rjes su ma myong ba zhes bya ba'i don to/ /rdzogs pa'i byang chub kyi bde ba la ma bsten pa'i skyon smras pa/ bcom ldan 'das u ru bil ba'i nai rany+dza na'i 'gram na bzhugs te/ sangs rgyas nas ring po ma lon pa na de nas bcom ldan 'das kyis 'jig rten thams cad la sangs rgyas kyi spyan gyis gzigs par mdzad nas bcom ldan 'das kyis 'dod chags dang zhe sdang dang gti mug las skyes pa'i gnod pa sna tshogs kyis 'jig rten gtses par gzigs te ting nge 'dzin de las bzhengs nas 'di gsungs so//'jig rten ni sems can gyi rgyud dang sbyar bar bya'o/ /gdung ba ni yang dag par gdung ba'o/ /gdung ba las skyes pa ni gdung ba las byung ba sdug bsngal shin tu dka' ba las zhugs pa nyid de sdug bsngal gsum dang ldan pa'i phyir ro//'jig tshogs la lta ba las gdung ba 'byung bar bstan pa'i phyir/ phung po la ni bdag zer ba/ /zhes bya ba ste bdag tu phyin ci log pa de'i mthus bdag gir 'dzin pa skyed par byed de ji skad du/ gang su dag bdag tu mngon par brjod pa de thams cad ni nye bar len pa'i phung po la yin no zhes bshad pa'o//de yang de ltar ma yin te gang gi phyir 'di ltar ji lta ji ltar gzugs la sogs pa bdag tu mngon par 'dod pa la bsam par byas pa ste/ bdag gi blo bskyed pa'i phyir ro/ /de lta de ltar gzhan du 'gyur/ /zhes bya ba ni gzugs la sogs pa de dang de la 'di ltar sems na ni gzhan du 'gyur ba ste snga ma'i rnam pa dang bral bas 'gyur zhing 'jig pa ste/mi rtag pas bdag tu rigs pa ma yin no/ /gang mi rtag pa de ni sdug bsngal ba ste de yang bdag med pa'o zhes mdo las gsungs so/ /gang las 'jig rten 'di gzhan du gyur pa yin zhe na/'di ltar ngo bo nyid las te gzhan du 'gyur ba'i phyir zhes bya ba la sogs pa smos so/ /mnyan yod na bram ze zhig 'byor pa nye bar bsags shing 'khor ba la chags te mngon du phyogs la/ mya ngan las 'das pa la rgyab kyis phyogs shing rtag tu 'dod pa'i bde ba la brten pa de las brtsams te tshigs su bcad pa gnyis gsungs so//'di la gzhan du 'gyur ba'i tshul yod pa ste/ 'jig rten 'di ni gzhan du 'gyur ba'i rgyu can te gzhan dbang yin pa'i phyir ro/ /'di ltar gang byas pa de ni mi rtag pa'o/ /'jig rten 'di zhes bya ba ni 'khor bar ltung ba'i so so'i skye bo'i 'jig rten no//srid pa 'chags pa ni de lta yang gti mug gi dbang gis nang gi phung po la lhag par zhen pa'o/ /srid pa la dga' ba zhes bya ba ni phyi rol gyi yid bde ba'i yul gyis srid pa la yang dag par dga' ba skyes pa zhes bya ba'i don to/ / srid la mngon chags zhes bya ba ni de dag nyid mngon par longs spyod pa'i dus su shin tu 'chums pa'o/ /yang na 'dis go rims bzhin du 'dod pa dang gzugs dang gzugs med pa na spyod pa'i zin pa'i phung po la sred pa bstan to/ /bdag tu lta ba dang 'brel pa'i srid par lta bar bstan pa'i phyir/srid la lta zhes bya ba yin te/ srid par lta ba ni bdag tu 'dzin pa la mngon par zhen pa ste gang du bdag tu lta ba der ni bdag tu sred pa zhes bya ba'i tshig gis so/ /bdag tu lta ba dang sred pa da ltar 'jug pa 'ba' zhig tu ma zad de ma 'ongs pa'i srid pa yang don du gnyer ba yin no zhes bstan pa'i phyir/srid pa nyid la mngon par dga'/ /zhes bya ba ste yang srid pa 'dod par byed pa yin no/ /'o na la la dag gzugs med pa la sogs pa la yang thar par 'dod pa ma yin nam zhe na/ dga' bya gang yin zhes bya bas bstan te dngos po gang la so so'i skye bo dga' bar 'gyur ba de ni sdug bsngal ba yin no zhes bya ba'i don de nam mkha' mtha' yas skye mched la sogs pa gzugs med pa'i dngos po nyid do//skyi g.ya' gang yin zhes bya ba ni gang las phung po med pa'i ngo bo thar pa las so so'i skye bo 'jigs shing skrag par 'gyur ba ste/ don dam pa'i bden pa la'o//'dir nA ra ya Na dang / skya bseng dang / tro pa ti'i 'dod pa'i lam gyi gtam dper brjod par bya'o/ /des na de nyid kyi phyir smras pa/ srid pa zhes bya ba la sogs pa'o/ /gang byis pa mngon par 'dod pa des te/ srid pa'i ngo bo'i sdug bsngal lo/ /rab tu spangs pa'i phyir zhes bya ba ni bral ba'i phyir te/srid pa dang mi 'dra ba'i thar pa thob par zhes bya ba'i don to/ /tshangs par spyod pa ni 'phags pa'i lam mo/ /'di na zhes bya ba ni sangs rgyas kyi bstan pa la'o/ /bsten pa ni gnas te/ de ma gtogs par srid pa spang ba'i thabs med pa'i phyir ro/ /'o na mu stegs can yang sdug bsngal las thar bar 'dod cing rnal 'byor la goms par byed pa yod do zhe na/dge sbyong bram ze zhes bya ba la sogs pa smos te/ de nas bcom ldan 'das dge slong gi tshogs kyis yongs su bskor te dgon par rgyu zhing drang srong gang na yod pa der gshegs nas/ phyogs gcig tu rtswa'i gdan bting ba la bzhugs te de dag gi bsam pa dang bag la nyal mkhyen pas bstan pa 'di brtsams so//ci tsam na dge slong de dag gis khyad par mngon par rtogs par gyur to/ /ji snyed pa zhes bya ba ni lus pa med pa'i tshig go/ /dge sbyong zhes bya ba ni yongs su gzung ba spangs pa'o//bram ze zhes bya ba ni 'jig rten pas bsngags pa'i dam pa dag go/ /'am zhes bya ba'i sgra ni nges pa med par bsgrub pa'o/ /srid pas srid las zhes bya ba ni 'khor bas 'khor ba las so/ /nges par 'byung ba ni mthar thug pa'o/ /zer ba ni ston pa'o/ /de dag thams cad srid pa las//nges 'byung min zhes brjod par bya/ /zhes bya ba ni gang gi phyir bdag nyid nges par 'byung ba des ni ji lta ba bzhin du lam phyin ci ma log par gzhan dag la ston pa yin gyi gang yang 'khor ba las nges par ma byung ba des ni ji ltar nges par 'byung ba'i lam bstan par bya ba 'dir ni nges par 'byung ba ma yin pa'i phyir zhes brjod par bya'o//dge slong bram ze ji snyed pa la sogs pa'i don ni bshad zin to/ /'dis ni phung po lhag ma med pa'i mya ngan las 'das pa bstan la/ snga mas ni phung po lhag ma dang bcas pa'i mya ngan las 'das pa bstan to//rnam par grol ba zhes bya ba ni 'dus byas thams cad kyi 'ching ba dang bral ba'i phyir phung po lhag ma med pa'i mya ngan las 'das pa'o/ /de ci'i phyir zhe na/ gang sngar bshad pa'i srid pa thams cad las nges par 'byung ba ma yin zhing rnam par grol ba'i phyir ro//de rgyu gang gis dbang du byas pa ste tshig tsam gyis ni thar pa ma yin gyi tshad ma gang yin zhes pa'i don to/ /'dir rgyu smras pa/ len pa zhes bya ba ste gang gis nye bar len pa yin pas len pa ste/ thabs dang rgyu dang mtshan ma zhes bya ba ni rnam grangs so/ /nyon mongs pa dang las kyi bdag nyid len pa 'khrug pa med pa'i rgyu la brten nas phung po'i bdag nyid 'byung zhing rab tu skye ba'o//ga las she na/ 'di ltar/ sdug bsngal las ni len pa 'byung / /zhes bya ba las kyi nyon mongs pa dang / nyon mongs pa'i kun nas nyon mongs pa las rab tu skyes pa'i skye ba'i kun nas nyon mongs pa ste/len pa 'byung bar byed pa gang yin pa yod na ni nyon mongs pa dang las las skyes pa'i sdug bsngal 'byung ba yin no/ /gang gis spangs pa de las ni sdug bsngal mi 'byung ngo zhes bstan pa'i phyir/ len pa thams cad yongs zad na/ /sdug bsngal rab tu 'byung ba med/ / ces smos te/ rgyu med pas 'bras bu med par bstan to/ thabs gang gis len pa thams cad zad par 'gyur ba'i thabs bstan pa'i phyir sred pa'i rnam pa ji snyed yod pa zhes bya ba la sogs pa yin te/ gang la la nye bar len pa'i phung po lngas 'jug pa zhes bya ba'i don to/ /thams cad na zhes bya ba ni rnam pa thams cad de dman pa dang gya nom pa dang /gong ma dang 'og ma'i dbye ba yongs su bzung ba'o/ /de dag thams cad ni khams thams cad de khams gsum yongs su gzung ba'i phyir ro/ /de ji lta bu zhe na/ mi rtag pa zhes bya ba ste/ rgyu dang rkyen las skyes pa'i phyir ro//'di'i lam nyid smras pa/ sdug bsngal ba zhes bya ba ste/ 'phags pa rnams dang mi mthun pa'i phyir ro/ /ji ltar sdug bsngal ba yin zhe na/ yongs su 'gyur ba'i chos can zhes bya ba smos te phyin ci log gi dbang gis yongs su 'gyur zhing 'jug pa zhes bya ba'i don to/ /yang na tshogs pa mi 'dra ba 'dus pas gzhan du 'gyur ba'i tshul can yin no zhes so//de ltar zhes bya ba ni nyams pa'i dbye bas yongs su gzung ba'i phyir ro/ /de dag la zhes bya ba ni gzugs mngon par 'dus byas pa'am sdug bsngal la sogs pa'i bden ba'o/ /ji lta ba bzhin du zhes bya ba ni de kho na nyid ji lta ba bzhin du zhes bya ba'i don to//yang dag pa'i shes rab kyis zhes bya ba ni yang dag pa nyid du zhugs pa'i zag pa med pa'i blos so/ /mthong na zhes bya ba ni rab tu shes shing nges par rtogs pas so/ /srid pa'i sred pa rab tu spong bar 'gyur/ /zhes bya ba ni khams gsum gyi rjes su chags pa'i kun du sbyor ba yongs su spangs pa'i phyir ro/srid pa med pas mngon par mi dga' bar 'gyur ro zhes bya ba ni khams gsum gyi mi rtag pa de mngon par mi 'dod de sred pa ni gnyis te/ srid pa'i sred pa dang 'byor pa'i sred pa zhes mdo las gsungs so/ /srid pa spangs pa ni phung po lhag ma dang bcas pa'i mya ngan las 'das pa 'thob par 'gyur ro zhes bstan te/de ltar mya ngan las 'das pa zhes smos so/ /len pa med ces bya ba ni rgyu med pa'i phyir yang srid pa mi 'byung ngo zhes bya ba'i don to/ /gang gi phyir sred pa ni yang 'khor ba'i rgyu yin te/ de yang spangs pas gzhan du zhes bya ba ni 'chi bar gyur na dus gzhan du zhes bya ba'i don to//ji ltar len pa med pa yin zhe na/ 'di ltar bdud zil gyis gnon pa dang zhes bya ba smos te/ nyon mongs pa'i bdud spangs pa'o/ /g.yul las rgyal ba dang zhes bya ba ni yang srid pa'i las kyi kun du 'khrugs pa spangs pa'o//rab tu 'das pa zhes bya ba ni thal ba dang nye bar 'das pa'o/ /gang de lta bu de ni bdag nyid chen po srid pa thams cad las rab tu 'das pa zhes bya ba'i don to/ /de yang ji srid du gzhan gyi don du 'dug pa de srid du ni skyob pa ste/ skyob pa ni 'gro ba'i rgyud skyong bar byed cing de bzhin nyid rtogs pa dang de bzhin nyid ston pa zhes bya ba'i don to//'di lta bu 'di ni sdug bsngal gyi mtha' yin no zhes bya ba ni 'di nyid nye bar len pa'i phung po'i mthar thug pa ste/ ji skad du 'di ni shin tu mthar thug pa'o zhes bya ba la sogs pa bshad do/ /gang de lta bu'i sdug bsngal gyi mthar phyin pa de ni yang srid pa med do zhes bstan pa'i phyir/dge slong dngos po zhes bya ba la sogs pa smos so/ /yul kau shAm+bI na dge slong dag mu ge chen po byung bas slong mos g.yengs shing lus dang sems ma zhi bar gyur te/ ji thob pa yang 'dzin par byed do//mu ge de 'das nas dus gzhan na yang de bzhin byed de de dag de las bzlog pa'i phyir tshigs su bcad pa drug gsungs so/ /nye bar zhi bar byed pas nye bar zhi ba'o/ /tshul khrims kyi sdom pa dang rab tu dben pa dang chog shes pa la sogs pa'i nye bar zhi ba de dang ldan zhing 'brel pa ni 'di'i sems zhi ba'o//yang na nye bar zhi ba ni lus dang ngag dang sems zhi ba ste/ dge slong de nyid gnyen po khyad par can sngon du byed pa'o/ /bya ba de nyid kyi sgo nas bstan pa'i phyir dngos po bcad pa dang zhes bya ba las dang nyon mongs pa'i bdag nyid kyi dngos po'i rgyu gang gis bcad pa de ni srid pa'i rgyu spangs pa zhes bya ba'i don to//rgyu spangs pas 'bras bu spangs par bstan to/ /skye ba'i 'khor ba rnam par spangs/ /zhes bya ba ni srid pas nye bar mtshon pa'i skye ba yongs su spangs pa'o/ /ci'i phyir zhe na/ 'di ltar/ de ni yang srid med par 'gyur/ /zhes bya ba'o/ /gal te ma spangs na cir 'gyur zhe na/gang yang de ltar gyur pas lhag ma dang bcas kyang bdud las thar pa yin no zhes bstan te/ de ni bdud kyi 'ching las grol/ /zhes bya ba ste/ tshul khrims kyi sdom pa sngon du 'gro bas 'jug pa'o/ /gang yang bsgrub par bya ba'i dbang po sdom par bshad pa/ sems ni zag pa med gyur pa//zhes bya ba yul dag las dbang po sdom pa ste/ 'di la 'byung ba'i yid chags pa'i dbang gis kyang 'di ltar dbang bo 'khrul pa'o/ /de bas de spangs pa'i phan yon smras pa/ srid pa'i sred pa gtubs gyur pa/ /zhes bya ba srid pa gsum gyis srid pa gang gis drungs phyung ba ste/sred pa spangs pas ni 'dod pa'i phan yon spangs par bstan to/ /gang zhig ces bya ba la sogs pa bstan pa las dga' bo gzhan zhig gis dgra bcom pa'i 'bras bu thob ste/ rab tu dga' bas ched du brjod pa ched du brjod de bdag ni 'dod pa'i 'dam rdzab las rgal to zhes smras pa dang /de'i dbang du mdzad de tshigs su bcad pa bdun gsungs so/ /gang zhig ces bya ba ni dge slong ngo / /'dam rdzab ni 'dod pa ste/ 'bying ba dang chos mthun pas so/ /mdo las kyang dge slong dag 'dam ni 'dod pa'i tshig bla dgas so zhes gsungs pa'i phyir ro/ / legs rgal cing zhes bya ba ni kun du byung ba ste 'das pa'o/ /dkrugs pa ni bcom zhing spangs pa'o/ /grong gi tsher ma zhes bya ba ni rnyed pa dang / bkur sti la sogs pa 'jig rten gyi chos te/ chos kyi sku la gnod pa byed pas tsher ma dang chos mthun pa nyid do/ /'dod pa las 'dod chags dang bral bar bstan nas/khams gong ma las 'dod chags dang bral bar bstan pa/ 'dod chags zad pa rjes thob pa/ /zhes bya ba ste/ 'dod chags la sogs pa spangs pas gzhan la gdul bar byed pa ma yin no zhes bstan to/ /gang zhig thul ba dang zhes bya ba ni zil gyis mnan cing grong gi tsher ma rab tu spangs pa ste/gzhan gyis byas pa'i rnyed pa la sogs pas kyang 'gyur ba med la bdag nyid kyang gnod pa mi byed de/ byams pa'i bsam pa dang ldan pa'i phyir ro zhes bstan pa'i phyir/ gshe ba dang ni zhes bya ba smos te bsdigs pa'i tshig go/ /gsod pa dang 'ching ba zhes bya ba ni gsod pa dang rnam par 'tshe ba la sogs pa ste/thul ba dang zhes bya ba dang sbyar ro/ /'dis ni dge sbyong byed pa la gnas pa nyid du bstan to/ /gang zhig ri bo bzhin gnas zhes bya ba 'dis ni tshogs kyi lam la gnas pa nyid du bstan to/ /mi bkri zhing zhes bya ba ni lam thob pa'i tshig gi tshul gyis bab col du kha drang bar mi nus pa'o//'dis ni mi slob pa'i lam la gnas pa bstan to/ /sdug bde zhes bya ba ni tsan dan dang ste 'ur mnyam pa'i phyir ro/ /mi g.yos zhes bya ba ni mi 'gul zhing mi 'gyur ba'o/ /gang de ltar mi 'gyur ba de nyid ni pha rol ma yin pa'i pha rol spong bar 'gyur gyi gzhan ni ma yin no zhes bstan pa/skur pa mi 'debs zhes bya ba la sogs pa smos so/ /pha rol ma yin pa'i 'gram ni rtog pa dang bcas par mi 'dod pa ste/ 'jig tshogs de'i tshig bla dgas so/ /pha rol gyi 'gram ni bde zhing zhi ba ste/ phung po lhag ma dang bcas pa'i mya ngan las 'das pa de'i tshig bla dgas so zhes bya ba la sogs pa dge slong zhig gis thos nas 'jigs pa skyes te stan las langs nas bcom ldan 'das la 'di skad ces gsol to/ /btsun pa pha rol ma yin pa ni gang gis spong bar 'gyur/ pha rol ni gang gis thob par 'gyur/ zhes gsol pa dang 'di gsungs so/ /gang skur ba mi 'debs shing zhes bya ba ni gang la gzhan la mi 'jug cing mi 'byung ba ste/ yod pa'i dngos po la skur pa 'debs pa sdug bsngal med do zhes bya ba la sogs pa smras pa lta bu ste/ 'di la skur pa mi 'debs pa'i ngang tshul yod pa gang yin pa nyid de de bzhin gshegs pa'i bstan pa la zhugs pa'i phyir ro//skur pa mi 'debs pa zhes bya ba ni chos thams cad rang gi ngo bo med pa'o zhes mthong ba med pa'i phyir ro/ /nal pas ri zhes bya ba ni bdag tu mthong ba yod pa'i phyir ro/ /yang na gzhan rtsom pa dang dman pa'i brtson 'grus spangs pa yin par 'di gnyis kyis ston pa yin no//yang na lhag pa'i bsam pas brtson 'grus kyi 'bras bu mchog gi shes pa bstan to/ /'jig rten 'di kun rdzob rtogs pa dge slong gang zhes bya ba ni phyin ci ma log pa'i blos 'gro ba lnga pa'i so so'i skye bo'i 'jig rten rtogs nas so//yang na brdzun ni ji lta ba bzhin no/ /'jig rten kun ni srid pa gsum ste/ bsam pa bzang po'i brtson 'grus rtsom pa'i shes pa khyad par can dang ldan pa'i phyir ro/ /dge slong de nyid kyis ni spong ste zhes bya ba ni 'dor ba'o/ /pha rol min pa ni tshu rol gyi 'gram ste/'khor ba zhes bya ba'i don to/ /'dir dpe bstan pa/ sbrul rgas zhes bya ba yin te/ dper na sbrul rgas pa'i dgun gyi lpags rnying ngam shun pa dpyid 'dor bar byed pa de bzhin no/ /gang zhig gis pha rol spong bar nus she na/ sbrul gyis dug btang ba la zhes bya ba la sogs pa smos so//ri kha ba can na rab tu byung ba'i dge slong nam mkha' la 'gro ba dag gis bcom ldan 'das mthong nas chos mnyan pa'i phyir lhags te/ bsgrubs pas bden pa mthong ba dag las brtsams te tshigs su bcad pa drug go/ /gang zhes bya ba ni gang la la'o/ /'di na zhes bya ba ni 'jig rten nam yul lo//langs pa ni glo bur du byung ba ste/ 'dod chags kyis gos pa med pa'o zhes bya ba'i tshig gis so/ /spong ba ni 'dor ba'o/ /'dod chags zhes bya ba ni rjes su chags pa'i kun du sbyor ba'o/ /ji ltar byung ba rjes su mthun pa'i gnyen pos spong ba yin zhe na/btang ba ste sems bzhin du lus thams cad la khyab par byed pa'o/ /'dir chos mthun pa'i dpe bstan pa sbrul gyis dug ces bya ba ste so gdug pa'i sbrul gyi dug lus thams cad la khyab pa yin yang / sman bzhin du zhes bya ba shin tu phan pa'i stobs dang ldan pa'i sman gyis sbrul so'i dug zhi bar byed pa bzhin no//lhag ma ni rtogs par sla'o/ /da ltar byung ba'i yul gyi 'dod chags la sogs pa spang zhing 'das pa dang ma 'ongs pa'i de dag kyang spang pa'i phyir smras pa mthu chung 'dam bu'i rags la zhes bya ba la sogs pa smos so//mnyan yod na bsod snyoms kyi phyir 'jug par 'dod pa'i dge slong dag par du chu bo chen po yod par rags zhig par gyur te chu bo de las rgal bar ma nus nas de las log ste/ zan bcad par gyur to/ /de dang 'brel pa'i mgon med zas sbyin la sogs pa la yang skabs 'dir tshigs su bcad pa drug gsungs so//drungs 'byin zhes bya ba ni bcad cing drungs phyung ba dang rtsa nas bcad de bor ba'o/ /ma lus pa zhes bya ba ni 'dod chags mtha' dag go/ /ji lta bu zhe na/ 'dam bu'i rags la zhes bya ba smos te/ 'dam bu'i rang bzhin gyis rags dang zam pa'o//ji lta bu zhe na/ mthu chung zhes bya ba ste/ shin tu bzod par mi nus shing reg par mi nus pa ji ltar chu bo chen po 'ongs nas de ma thag khyer bar byed pa bzhin no/ /'dod pa'i yon tan yongs su gtong ba sngon du 'gro bas 'dod chags la sogs pa spong bar ston to/yul ber t+ya na grogs po bdun zhig bcom ldan 'das kyi yon tan thos nas rab tu byung ba la mngon par dad de bcom ldan 'das kyi thad du lhags nas de dag la gcig ni 'dod pa la mos pa'o/ /gnyis pa ni rtag tu sgrib pa thams cad la 'jug pa'o/ /gsum pa ni rnam par rtog pa mang ba'o//bzhi pa ni bya ba mchog tu byed pa'o/ /lnga pa ni sred pa spyod pa'o/ /drug pa ni zhe sdang spyod pa'o/ /bdun pa ni 'dres par spyod pa ste/ de las brtsams nas tshigs su bcad pa bdun no/ /dge slong dag 'dod pa'i yon tan zhes bya ba la/'dod pa'i yon tan ni 'dod pa'i 'dod chags kyi yul lo/ /thams cad ni ma lus par spong ba'o/ /ji zhig byas nas she na/ 'dod sbyor ba zhes bya ba gang dag gi nyon mongs pa'i bdag nyid 'ching ba ste/ 'dod pa'i ming can no/ /'ching ba ni 'dod pa na spyod pa'i kun du sbyor ba'o//bstsal ba ni spangs pa'i don te/ de'i rnam pa'i kun du sbyor ba spangs nas ni kun du sbyor ba spangs pa yin gyi gzhan du ni ma yin no zhes bstan to/ /sgrib pa thams cad spangs shing zhes bya ba ni 'dod pa la 'dun pa la sogs pa sgrib pa thams cad spangs pa'o/ /thams cad ces bya ba ni rnam pa mang po yongs su gzung ba'i phyir ro//de spangs pa'i phan yon smras pa/ sdig pa med ces bya ba smos te/ gang la sdig pa med pa de ni sdig med do/ /yang na nye bar gnod par byed pa de'i rgyu'o/ /ji skad du mdo las sdig pa ni gsum ste/ 'dod chags dang zhes bya ba la sogs pa rgya cher ro//yang na ngan song gsum du ltung zhing nyams pa'i phyir sdig pa ni ngan song ba'i nyes par spyod pa'o/ /'di ni khyad par du mthong bas spang bar bya ba yin no zhes bstan pa'i phyir smras pa/ yid gnyis zug rngu bcad pa yi/ /zhes bya ba ste/ bcad pa ni spangs pa'o//yid gnyis ni the tshom gang yin pa'o/ /lta ba'i zug rngu dang bral ba gang yin pa de ni dge slong ngo / /gang ni dge slong ngo / /rtog pa rnam bstsal zhes bya ba ni bral ba ste/ rtog pa dang dpyod pa dang bral ba'o/ 'dod pa na spyod pa'i ni bsam gtan dang po la brtan nas so//bsam gtan dang po'i sa pa'i de dag dang bral ba ni gnyis pa'i stobs so/ /nang gi rnam par rtog pa med pa zhes bya ba rang gi rnam par rtog pa med de rtog pa dang dpyod pa med pa'i phyir de yang nang gi rnam par rtog pa med pa'i sa'o/ /ma lus pa ni thams cad de bsam gtan gnyis pa nas bzung nas srid pa'i rtse mo gang yin pa'i bar du rnam par bstsal pa'o zhes rjes su sbyar ro//phung po lhag ma dang bcas pa bstan nas phung po lhag ma med pa smras pa dge slong de zhes bya ba dag go/ /gang zhig 'di la kun gzhi 'ga' med de/ / zhes bya ba la/ 'di na zhes bya ba 'dod pa'i khams sam 'khor ba'o/ /gang zhig ces bya ba ni gang la lus kyang skye ba'i skabs med de ngan par spyod pa thams cad spangs shing yang srid pa'i rgyu spangs pa'i phyir ro/ /'dis ni srid pa gsum las 'dod chags dang bral bar bstan te 'dod pa'i khams kyi gnas spangs pa sngon du 'gro bas ni srid pa'i gnas thams cad spangs pa yin no zhes bstan pa'i phyir rtsa ba zhes bstan te/gang gi rtsa ba zhe na/ mi dge ba zhes smos te mi dge ba ni chags pa la sogs pa ste dge ba dang mi dge ba'i rtsa ba'o/ /'dod pa las 'das pas ni rtsa nas 'don cing drungs nas 'byin pa yin no//yang na zad pa shes pa'i dus su bsdus nas spong ba'i phyir ro/ /nags sbyor zhes bya ba ni nags bzhin du sbyor ba yin te/ byis pa zhes bya bas so/ /nags sbyor dang / nags bskyed dang / sred pa zhes bya ba ni rnam grangs so/ /'dir rtsa ba ni zhe sdang du bstan to//rims nad bcas pa zhes bya ba ni khong khro ba ste/ rgyu dang 'bras bu'i dus na gdung bar byed pa'i phyir ro/ /bag la nyal zhes bya ba ni khams gsum gyi nyon mongs pa ste srid pa'i 'dod chags dang / lta ba dang / nga rgyal dang / the tshom dang / ma rig pa dang / 'dod pa'i 'dod chags dang / khong khro ba'o/ /yang na ma rig pa'i rnam pa ste mi dge ba smos pas gzung ba'i phyir ro/ dge slong la sogs pa'i sgra ni 'dir bstan pa rnams mdor bsdus pa'i don de nyid bshad pa/ khrims ldan gang yin zhes bya ba la sogs pa'o/ / lha zhig gis/ dge slong zhes ni brjod gang lags/ /bsam gtan pa zhes gang la brjod/ /gang la rnal 'byor 'dod pa yin/ 'di na gang bde bdag la gsungs/ /zhes zhus pa la brtsams pa'o/ /gang tshul khrims dag yod pa de nyid ni dge slong zhes brjod par 'os pa yin gyi gzhan ni ma yin no//tshul khrims rnam par dag pa yang bsams bzhin du bslab pa las mi 'da' ba'i phyir dang nyon mongs pa 'gog pa'i phyir dang / dran pa nye bar gzhag pa la sogs pa sgom pa la nye bar brtson pa'i phyir dang / mya ngan las 'das par yongs su bsngo ba las shes par bya'o//tshul khrims kyi yan lag rgyu zhes bya ba bsgrub pa'i phyir tshul khrims dag ces bya bar bstan to/ /yang na so sor thar pa dang bsam gtan dang zag pa med pa'i sdom pa yongs su gzung ba'i phyir ro/ /de dang ldan pas ni tha ma dang bar ma dang dam pa'i dge slong du 'gyur ro//stong nyid ldan gang bsam gtan de/ /zhes bya ba ni gang du gang zag gis stong pa'i ting nge 'dzin yod pa de ni yongs su rdzogs pa'i bsam gtan du 'gyur te/ stong pa ni bdag gis stong pa la 'jug pa'o zhes bya ba'i tshig gis te/ dngos po'i don thams cad ji lta ba bzhin du bdag med par rtogs pa'i phyir ro//'dis bsam gtan byed pa yin pas bsam gtan te/ mnyam par gzhag pa'i sems kyis ni ji lta ba bzhin du mthong ngo zhes bya ba'i tshig gis so/ /de mngon du byed pa'i tshul 'di la yod pa ni bsam gtan no/ /gzhan gyis yongs su btags pa'i bdag mi gnas pa nyid dang /bdag nyid kyang bdag med pa'i tshul ni mnyam pa nyid do/ /gang du bdag la sogs par lta ba de ni bsam gtan pa ma yin te bsam gtan de log pa'i rtog pas bskyed pa'i phyir ro/ /rtag tu byed gang rnal 'byor de/ /zhes bya ba la bstan zin pa'i bsam gtan la rtag tu zhes bya ba'i sgra yang dag par drang ba'i phyir ro//mya ngan las 'das gang bde zhes bya ba ni gang du sdug bsngal thams cad zhi ba thob pa de ni don dam pa'i bde ba mya ngan 'das pa zhes bya ba'i don to/ /g.yeng ba phal cher dang bral ba'i mkhas pas kyang 'di na bde ba chen po nyams su myong ba yin na g.yeng ba'i dngos po thams cad dang bral bar gyur pa lta smos kyang ci dgos//dge slong gi rang gi ngo bo sgo mang po nas bstan nas da ni de'i yon tan bsags pa la gzud pa'i phyir/ dge slong dga' dang mi dgas zhes bya ba la sogs pa yin te/ dge slong dag 'di na gcig tu phung po la gnod pa chung ngu dang mang po yang rung ste spangs pa dang /de bzhin du nye du'i tshogs spangs te/ de rab tu byung nas lus la gyon pa'i chos gos kyis chog shes par 'gyur ba dang / lto 'grangs pa tsam gyi bsod snyoms kyis chog shes pa des bzod cing gnas pa'i rang bzhin can te grang ba dang dro ba la yang ngo zhes pa nas 'di'i bar du gsungs so//mi dga' ba ni yid mi bde ba ste/ 'dir ni de dang mtshungs par ldan pa'i khong khro ba la dgongs so/ /dga' ba ni yid bde ba ste/ 'dir ni de dang mtshungs par ldan pa'i 'dod chags so/ /mi dga' ba dang dga' ba yin pas dga' mi dga'o/ / mi 'byed pa ni bstsal pa dang / zil gyis gnon pa nyid de khong khro ba dang rjes su chags pa bstsal ba'i phyir 'dis ni bzod pa khyad par can bstan/ bzod pa dka' thub dam pa zhes bya ba'i tshig gis so/ /dben pa'i mthus ni bzod pa la 'jug par nus so zhes bstan te/ bas mtha'i gnas mal rtag tu bsten pa dang //zhes bya bar ni shin tu dben pa'i phyogs su gnas shing bsten pa ste/ 'dis ni lus dben pa bstan te/ sems dben pa smras pa/ de yang bag yod pas ni rtag tu gnas/ /zhes bya ba ste/ bas mtha'i gnas mal der mi gtsang ba yid la byed cing bsgom pa mchog tu byed pas gnas pa'o//bya ba'i sgo nas gzhug pa bstan pa'i phyir/ srid pa'i 'dod chags legs par 'byin par byed/ /ces bya ba smos te/ srid pa gsum 'grub par byed pa 'dod pa'i 'dod chags la sogs pa'i phra rgyas mi skye bar gnyen pos rtsa nas 'byin par byed cing de na gnas pa'o//srid pa'i 'dod chags spangs pa'i phra rgyas bsdu ba bya ste/ spang ba'i tshig phyis pa'o/ /yang na tshigs bcad 'dis ni 'phags pa'i rigs bzhi bstan te/ dge slong dga' dang mi dgas zhes bya ba la sogs pas ni chos gos dang bsod snyoms ngan ngon tsam gyis chog shes pa bstan to//bas mtha'i gnas mal zhes bya ba la sogs pas ni gnas mal ngan ngon tsam gyis chog shes pa bstan to/ /lhag mas ni spong ba la dga' ba bstan to/ /dge slong gi tshoms te sum cu rtsa gnyis pa'i rnam par 'grel pa rdzogs so// //'di'i 'og tu sde tshoms gzhan med pas bram ze'i tshoms dgod do//yang na don dam pa'i dge slong ni bram ze kho na yin no zhes bstan phyir 'di'i 'og tu bram ze'i tshoms bstan te/ gang zhig brgyan kyang zhes bya ba la sogs pa smos so/ /gang gi tshe rigs mthon po'i bu ya sha zhes bya ba btsun mo'i 'khor la mtshan mo dur khrod kyi 'du shes skyes te bdag ni mngon par gtses so zhes bya ba la sogs pa smras nas khyim nas byung ste/ko mi tra zhes bya ba'i chu bo'i tshul rol gyi 'gram nas rgal te/ bcom ldan 'das la chos mnyan pas dgra bcom pa'i 'bras bu thob pa las bdag nyid khyim pa'i cha lugs kyi spud pa mthong nas ngo tsha bar gyur to//de las brtsams pa'o/ /gang zhig ni gang la la rigs dang rus la sogs pa la ltos pa med par khyad par thob pa'o/ /brgyan pa ni rgyan dang ldan pa ste khyim pa'i cha lugs sna tshogs spud pa dang 'brel ba'o/ /yang gi sgra ni srid pa'i don te/de lta na yang dam pa'i chos spyod pa srid pa'i phyir ro/ /chos spyod ces bya ba ni dge ba byed pa'o/ /ji lta bu'i sems can gyis ji ltar byas nas chos spyod par nus pa yin zhe na/ dul ba zhes bya ba la sogs pa smos so/ /dbang po dul ba dang ldan pa ni dul ba'o/ /zhi ba ni rnam par rtog pa 'bar ba nye bar zhi ba'i phyir ro//yang dag par sdom pa ni tshul khrims khyad par can dang ldan pa'i phyir ro/ /tshangs par spyod pa ni ye shes la brten pa'i phyir te ye shes spyad pas ni tshangs pa ste/ thar pa thob pa yin no zhes byas nas so/ /de la snga ma gsum gyis ni bsod nams kyi tshogs bstan to//'dis ni ye shes kyi tshogs bstan to/ /de ltar gyur pas ni chos spyod pa rdzogs par 'gyur gyis gzhan du ni ma yin no/ /'byung po kun la zhes bya ba ni dgra dang mdza' bo dang bar ma'i phyogs med par sems can de dag la'o/ /yang na srog dang bcas pa'am srog med pa'i sems can la'o//mi gcod pa ni spangs pa'am bor ba'o/ /chad pa ni 'tshe ba dang de'i cha byad do/ /gzhan la 'tshe ba spangs pa sngon du 'gro bas bsod nams dang ye shes kyi tshogs nye bar len pa 'dis bstan to/ /yang na zhi ba dang ting nge 'dzin gyi dbang du byas pa'i phyir de dang rjes su mthun pa zhes 'di'i don gyis bshad do//yang na 'tshe ba med pa'i gnas tshol bzhin du bcom ldan 'das kyi spyan sngar phyin te/ des na yang bstan pa/ chos 'dis bskyed par byas te thar pa 'dod pa de ni legs pa thams cad kyi rtsa bar gyur pa yin gyi gzhan ni ma yin no zhe'o/ /dul ba la sogs pa'i rim pas ni dbang po dang tshul khrims dang yid yang dag par sdom pa dang ldan par bstan to//tshangs par spyod pa ni lam gyi sbyor ba ste kun la zhes bya ba la sogs pas khyim pa'i cha lugs spangs nas gzhan la gnod pa byed pa mtha' dag spangs pa des nye bar mtshon pa'i phyir ro//yang na chos 'di nyid ni dge ba'i chos spyod pa la brjod do/ /de yang bdag gi yon tan skyed pa dang gzhan gyi yon tan skyed pa rab tu 'god par byed pa'o/ /de la dul ba la sogs pa'i bdag gi yon tan bskyed pa rnam pa bzhi bsgom pa rtogs nas 'dod pa bsgom pa la brten te dbang po'i sgo bsrungs pas zhi ba ste/tshul khrims bsgom pa kha na ma tho ba med pas lus dang ngag dang yid kyi las kyis zhi ba dang / sems bsgom zhing nyon mongs pa kun du rgyu ba bkag pas kun du sdom pa'o/ /shes rab bsgom pa kun du rtogs par byas nas 'phags pa'i lam la sbyor ba'o/ / tshangs pa spyod pas ni gzhan gyi yon tan skyed pa'o/ /'byung ba kun las zhes bya bas ni 'dis bstan pa de yang / /'dod pa la sogs pa rnam pa bzhi bsgom pa med pas yongs su 'tshe ba med pa'i phyir ro/ /bram ze de yin zhes bya ba ni sdig pa spangs pa'i phyir te/ yang smras pa/ yon tan sogs par byed pa dang //'dod pas yid ni mi nyams pa/ /bram ze la ni mchog tu byed/ /lam gnas pa ni bram zer 'dod/ /ces so/ /dge sbyong de yin zhes bya ba ni sdig pa zhi ba'am dge sbyong dang ldan pa'i phyir ro/ /dge slong de zhes bya ba ni nyon mongs pa bcom pa'i phyir ram so sor thar pa'i sdom pa yod pa'i phyir ro//yon tan gyis byas pa ni bram ze la sogs pa yin gyi rigs la sogs pa rtags kyis byas pa ni ma yin no zhes bstan te/ tshig rkang gsum gyis go rims bzhin du bram ze la sogs pa'i mtshan nyid bstan to/ /'o na gcer bur spyod pa la sogs pa yang bram ze la sogs par 'jig rten du grags pa yin no zhe na de dgag pa'i phyir smras pa/gcer bur spyod pas ma yin zhes bya ba la sogs pa smos so/ /ri gangs can gyi dka' thub kyi gnas dben pa zhig na dka' thub spyod pa la mngon par brtson pa'i dka' thub can mang po gnas te/ kha cig ni gcer bu pa'o//kha cig ni sgra'i ral pa can no/ /kha cig ni bregs pa'o/ /ci tsam na de dag gis lha rnams nam mkha' la spyod pa dag la sangs rgyas 'byung ba'i gtam thos nas yid yongs su dga' bar gyur te yul bA rA Na sIr bcom ldan 'das kyi thad du song ba las de las brtsams te tshigs su bcad pa drug gsungs so//gcer bu spyod pa zhes bya ba ni sdig pa sbyong bar byed ces bya ba dang sbyar ro/ /gcer bur spyod pa ni gos med par spyod pa ste/ lus kyi sgrib pa dang bral bar byas pas sems kyi sgrib pa dang bral bar byed do zhes mu stegs kyi gzhung ston par byed pas/ kha cig gcer bu dmigs par byed do//bcom ldan 'das kyis ni 'di bkag ste/ ngo tsha med pa zhes smad pa'i phyir te gang lus la sgrib cing g.yogs pa'i gos med pa de la ni sems la yang ngo tsha'i gos med pa yin te ngo tsha med pa ni phyugs dang 'dra ba'o zhes bstan pa'i phyir ro/ /ral pas ma yin zhes bya ba ni ral pa'i skra'i tshogs kyis ma yin te/skra yang rkang pa'i bar du nar zhing sbrul lta bur ring por 'jog par byed do/ /skra rab tu bsgrubs pas ni nad 'byung ste/ /de bsrings pas ni 'dod chags dang bral bar zhugs pa dang / rtogs par byed pa ma yin no zhes bstan to/ / bregs pas ma yin pa ni skra dang kha spu bregs pa'am skra dang kha spu 'bal bas kyang ma yin te/ phyi rol gyi thibs po bstsal bar gyur na yang nang gi 'dod chags la sogs pa'i thibs po dang bral ba ma yin te/ 'gal bas de dang bral ba'i phyir 'di'o/ /kha zas mi za ba yis ma yin zhes bya ba ni kha zas rnam pa sna tshogs yongs su longs spyod par mi byed pas ma yin te/dper na bza' ba dang btung ba yongs su longs spyod pas bkres pa dang skom pa sel bar byed pa de bzhin du/ phra rgyas sel bar byed pa yang bzlog pa yin pa'i phyir ro/ /yang na cung zad ni zas te cung zad kha zas te cung zad ser skya bzhin no//de med pas ni kha zas mi za bas te bza' ba dang btung ba cung zad kyang yongs su longs mi spyod pa ste gang grib ma dang nyi ma la sogs pas rjes su 'dzin par byed pa de yang mi spyod na gzhan lta smos kyang ci dgos/ thang la nyal ba'am zhes bya ba ni yid dam sngon du 'gro bas mthong ba'i thang skam po dag la nyal ba'o//yang na stan med pa'i sa skam po'i steng du nyal ba'o/ /'am zhes bya ba ni ma yin par drang ba'i don to/ /mal stan ngan pa la gnas pa ni phra rgyas 'phel bar mi 'gyur ro zhes byas nas so/ /rdul dang dri mas ma yin zhes bya ba la rdul ni thal ba'i phye ma'o//dri ma ni rdul la sogs pa dang 'brel pa'i lus kyi 'dam mo/ /dri ma yang rnam pa gnyis te dri ma de zhi ba ni lus kyi dri ma sems kyis 'dren pa'o/ /lus kyi dri ma 'dren pa yang srang gi mtho dman bzhin du'o/ /tsog pur 'dug la 'bad pa yis/ /zhes bya ba ni tsog tsog por 'dug pa gang yin pa de ni tsog pur 'dug pa ste//tsog pu la mchog tu gnas pa'o/ /ji ltar bdag gis sa la 'dug par byed pa de bzhin du dam pa'i rgyud la 'dod chags la sogs pa yang de lta'o zhes rtogs pas so/ /yang na 'bad pa ni brtson 'grus te tsog pur 'dug pa'i gnas skabs de la sran thub pa'o//dag par mi 'gyur ro zhes bya ba ni gcer bur spyod pa la sogs pas dag par mi 'gyur zhing sdig pa la sogs pa'i dri ma gang gis kyang sel bar mi 'gyur ro/ /gang dag par mi 'gyur ba yin zhe na/ byis pa zhes bya ba smos te so so'i skye bo'o/ /byis pa'i mtshan nyid ni/ som nyi rnams las rgal mi 'gyur//zhes bya ba yin te/ mthong ba'i lam ma skyes pa'i phyir som nyi ma spangs pa'o/ /de bas na som nyi ma spangs pa nyid kyis so so'i skye bo 'phags pa'i chos ma thob pa zhes ston to/ /de ltar 'di lta bus de kho na nyid kyi shes pa med pa'i nyes dmigs smras pa de dag nyid la zhes bya ba la sogs pa smos te/bstan ma thag pa'i gcer bus spyod pa la sogs pa'o/ /nyid kyi sgra ni bdag med pa mthong ba la sogs pa yongs su spangs pa'i don to/ /chags byed pa zhes bya ba ni zhen par byed cing 'di nyid ni sdig pa dag par byed pa yin no zhes ma rig pas mngon par zhen pa'i don to//gang yang rung zhes bya ba ni kha cig ste/ gang zhig 'di ltar yang dag pa'i mthong ba med pas so/ /dge sbyong dang bram ze zhes bya ba ni kun rdzob dang don dam pa dang / mthun par yongs su bzung ba spangs pa'o/ /dam pa'i spyod pa ni dge sbyong ngo / / yongs su bzung ba dang bcas pa ni bram ze'o zhes gzhan dag zer ro/ /log pa la mngon par zhen pa'i 'bras bu smras pa/ bar ma dor ni zhes bya ba ste/ 'khor ba'i nang du'o/ /nye bar zhes bya ba ni tshig gi lhag ma'o/ /ri'i sgra ni 'khor ba'i bar ma do nyid du'o zhes pa'o/ /rnam par nyams pa zhes bya ba ni khyad par du nyams shing chags par byed pas ltung ba zhes bya ba'i don to//gang du ji ltar zhe na/ zag pa zad pa ma thob par/ /zhes bya ba smos te/ nyon mongs pa spangs pa'o/ /gcer bur spyod pa la sogs pa'i brtul zhugs dang ldan pa ni rdzogs byed mnar med par skyes par 'dir brjod par bya'o//zag pa zad pas ni tshor ba spangs par 'gyur la/ tshor ba 'gags pas ni sred pa 'gag go zhes pa'i tshig gis tshor ba zad pa zhes smos so/ /srid pa'i rtse mo las 'dod chags dang bral ba nyid de srid pa'i rgyu tshor ba spangs pa ni lta ba spangs pa sngon du 'gro bas tshor ba thams cad spangs pa yin no zhes bstan pa'i phyir/mtha' gcig la lta ba zhes bya ba smos so/ /sdig pa dag par 'dod pas nye bar longs spyod cing mngon par zhen to/ /de yang lam gyis ni ma yin gyi log pa la mngon par zhen pa ni mi shes pa yin no zhes bstan te/ blo ngan rnams zhes bya ba ni srid pas srid pa las nges par 'byung bar rtog pa'i blo ngan pa gang dag la yod pa'o//zag pa ma spangs na ni khyad par las nyams par bstan te/ go 'phang dam pa ma thob par/ /zhes bya ba mya ngan las 'das pa ma thob par ro/ /zag pa zad pa la sogs pa ma byas par ni ral pa la sogs pas dgos pa med do zhes bstan pa'i phyir/blo ngan khyod kyi ral pa ci/ /zhes bya ba la sogs pa smos so/ /khang pa brtsegs pa'i gnas chu bo bal gu ma ti'i 'gram na gnas pa'i bram ze gzhon nu zhig gis skra la ba lta bur blta ba ste ras kyis dkris nas skye bo slu bar byed do/ / de gdul ba'i phyir bcom ldan 'das phyogs der gshegs te des mthong nas bcom ldan 'das kyi thad du lhags te de las brtsams so/ /khyod ci zhes bya ba ni khyod kyi skra'i tshogs kyi gzugs te sbrul ltar ring ba'i ral pa ni dgos pa ci zhig yod de/ des byas pa'i phan btags pa ma mthong ba'i phyir dang / nye bar gdung bar byed pa thob par byed pa'i phyir ro/ /blo ngan zhes bya ba ni blo phyin ci log pa ste/ mi shes pas 'di byas so zhes ston pa yin no/ /khyod kyi g.yang gzhi gyon pa ci/ /zhes bya ba ni ri dgas kyi pags pa las byas pa'i gos kyis khyod la ci zhig dgos pa ste dgos pa med pas so/ /'dis ni phyi rol mdzes la khyod kyi nang ni shin tu ma rungs pa'o zhes bstan te/khyod nang thibs por 'dug bzhin du/ /zhes bya ba khyod kyi sems shin tu dri ma can du gnas te/ 'dod chags la sogs pa'i nyon mongs pas nye bar gos pa'i phyir ro/ /phyi rol legs par byi dor byed/ /ces bya ba ni lus sbyong ba'am brgyan par byed pa de thub pa'i cha byad kyis so//'o na bram ze de dag ral pa la sogs pa'i rtags kyis dag par 'gyur zhes 'dod na ci ral pa la sogs pa dang ldan pas yin nam zhe na/ de'i phyir rigs kyi bram ze zhes bya ba la sogs pa smos so/ /bcom ldan 'das kyi thad du ral pa can zhig chu bo dza ya rgal te 'ongs nas mdun du 'dug ste/kye gau ta ma ral pa can ni rigs kyi bram ze lags so zhes gsol ba dang / des na tshigs su bcad pa 'di gnyis gsungs te thos pas mngon par dad cing rab tu byung nas dgra bcom pa'i 'bras bu thob po/ /bram ze ni yon tan bsags pa nyid kyis yang dag par 'gyur gyi la ba 'chang ba la sogs pa ni ma yin no zhes bya ba ni 'dir bsdus pa'i don no//rus kyis zhes bya ba ni bu dang tsha bo la sogs pa'i rgyud kyi tshul gyi rigs rgyud kyis so/ /rigs kyis zhes bya ba ni gtso bo'i rigs dang ldan pa'i phyir ro/ /rigs dang rus la sogs pa 'di dag ni kun rdzob tu yin gyi don dam par ni ma yin no zhes rab tu bstan cing gzhan gyi gnas mthong ba'i phyir tshul 'dis ni bram ze ma yin te/ji skad du rgyas par bshad pa/ rigs kyis ma yin rus kyis ma yin zhing / /nor dang gzi brjid kyis kyang yod ma yin/ / tshul la gnas pa gdol pa yin gyur kyang / /g.yul ngor brtan pa de ni bram ze yin/ /bzod pa dul sogs sbyin pa dang / /bden gtsang dran ldan snying rje can/ /yod lta bar ni shes mkhas pa/ /de 'dra bram ze'i mtshan nyid yin/ /bram ze'i las ni ma yin pa/ /gzhan la 'jug pa ltung ba yin//tshul 'chos phal cher ngan spyod ni/ /dmangs rigs gang zhig chos dul dang / /bden dang rtag tu brtson 'grus can/ /de ni bram zer nga 'dod kyi/ /tshul min bram ze ma yin no/ /zhes bya ba la sogs pa'o/ /de lta na gang zhig bram ze yin zhe na/ gang zhig bden dang chos ldan pa//zhes bya ba smos te/ bden pa ni phyin ci ma log pa'i tshig brjod pa'o/ /chos ni mi 'tshe ba'i bdag nyid de srog chags la sogs pa gzhan la gnod pa spangs pa'i phyir ro/ /ji skad du/ rta bsad mchod sbyin stong phrag dang / /bden pa de ni mtshungs tshul te/ /gang phyir rta bsad stong dag pas//bden pa nyid ni khyad par 'phags/ /'tshe med mtshan nyid chos yin te/ /mchod sbyin srog chags gsod pa'o/ /de bas chos ni don gnyer des/ /srog chags dag la snying rje bya/ /rig byed mchod sbyin thams cad dang / /stegs rnams kun du khrus byed dang / de kun thams cad mi bya ste/rgyas pa srog chags brtse smra bya/ /zhes gsungs pa lta bu'o/ /yang na bden pa ni 'phags pa'i bden pa bzhi rtogs pa'o/ /chos de'i 'bras bu ni thar pa ste/ /de nyid ni gtsang ba zhes bya ba ngan par spyod pa'i dri ma spangs pa dang / legs pa spyod pa gsum dang ldan pa'i phyir te/khrus rnam pa gsum mo zhes bya ba'i tshig gis so/ /bden gtsang dul ba gtsang ba dang / /dbang po tshar gcod gtsang ba dang / /'byung po rnams brtse gtsang ba ste/ /chu yis bkrus pa lnga pa yin/ /phyi yi dri ma 'khru ba dang / /skom pa sel ba yin gyur kyang / chu yis nang gi dri ma ni//spong bar byed pa mi srid do/ /'dod pa'i 'dod pas dregs myos shing / /bud med kyi ni dbang 'gro bas/ /stegs la brgyar ni khrus byas kyang / /de yis de ni dag mi 'gyur/ /bram ze de zhes bya ba ni sdig pa spangs pa'i phyir ro/ /de la re zhig rigs pa ni gang de ji ltar gtsang bar 'gyur ba yin zhe na//ral pas ma yin zhes bya ba la sogs pa'o/ /gang zhig spong bar byed pa zhes bya ba ni/ /gang gis phyi rol du byas shing spangs pa'o/ /sdig pa ni nyes par spyod pa'o/ /che chung ni phra rags so/ /thams cad ni mthong bas spang bar bya ba la sogs pa'i rnam pa'o/ /sdig pa rnams ni spangs phyir de//zhes bya ba ni yongs su spangs pa ste/ ji skad du bshad pa/ nyid kyi tshul gyis ni dge sbyong dang bram zer gdags pa ni rigs kyi gzhan du ni ma yin no zhes bstan te/ mgo bregs zhes bya ba la sogs pa'o/ /gzhan zhig skra dang kha spu bregs nas bdag ni dge sbyong ngo zhes kun la shes par byed pa dang gzhan zhig ni rig byed 'don par byed cing bdag ni bram ze'o zhes shes par byed de/bcom ldan 'das kyi spyan sngar lho phyogs kyi lam zhes 'ongs pa dang de gnyis kyi dbang du mdzad de 'di gsungs so/ /mgo bregs tsam zhes bya ba ni lus kyi yan lag mgo bregs pa tsam gyis ni dge sbyong du 'gyur ba ma yin te//'dod chags dang mya ngan la sogs pa ma spyad pa'i khyim pa dag kyang yod pa'i phyir ro/ /oM zhes bya ba ni oM b+hur b+hu baHswaH zhes bya ba la sogs pa sdeb sbyor 'don pa tsam gyis ni bram ze ma yin te sha ri ka la sogs pa la yang de 'don pa yod pa'i phyir ro//de lta na bram ze dang dge sbyong du gdags pa'i rgyu gang yin zhe na/ gang zhig ces bya ba la sogs pa smos so/ /rab tu byung ba ni bden pa la dgongs pa yin te/ de dang ldan pa ni dge sbyong du gdags par 'os pa yin no/ /gang la mi 'tshe ba'i bdag nyid kyi chos yod pa de ni bram ze zhes brjod do//gnyis ka'i ming ni gnyis ka'i rgyus so/ /gang zhig ces bya ba la sogs pa ni bshad zin to/ /sdig pa spangs pa dang yon tan bsags pa nyid kyis bram zer 'gyur gyi stegs la khrus bya ba la sogs pas ni ma yin no zhes bstan pa'i phyir/ skye bo phal cher zhes bya ba la sogs pa smos so//bcom ldan 'das ga ya mgo'i mchod rten na bzhugs te/ de'i tshe ga ya na dpyid zla ra ba'i dga' ston gyi tshe srog chags brgya stong phrag mang po sdig pa sbyang ba'i phyir khrus byed de des na 'dis gsungs so zhes gzhan dag zer ro/ /chu yis mi 'gyur te zhes bya ba ni chus dri ma dag pa dang /sdig pa med par mi 'gyur ro/ /ci'i phyir zhe na/ 'di ltar skye bo phal cher 'dir 'khru ba zhes smos te/ gdong pa la sogs pa'o/ /de dag ni ma dag pa yin te/ der 'khru ba de dag ni bye brag med par snang bas so/ /gal te stegs kyi chus sdig pa sel bar 'gyur na ni bsod nams kyang sel bar 'gyur la/sdig pa sel bas ni de'i 'bras bu dang yang bral bar 'gyur te/ rtsa ba nas chad pas shing gi lhag ma zhes bya ba la sogs pa lta bu'o/ /de bas na rigs pas ni sdig pa dag par mi 'gyur te/ khrus la sogs pas de'i gzhi ma 'gags pa'i phyir ro/ /de ltar na gang gis dag par 'gyur zhe na/ lam khyad par can bsgoms pas de'i sdig pa spangs par 'gyur te/ mun nag sgron mes sel bar 'gyur ba de bzhin du dag par 'gyur ro zhes bstan pa'i phyir/ gang zhig ces bya ba la sogs pa smos so//yang gi sgra ni tshul 'di nyid kyis 'gyur zhing gzhan gyis ma yin par bstan pa'o/ /lhag ma'i don ni bshad pa nyid do/ /de la don dam pa'i dge sbyong la sogs pa de dag gang yin zhe na/ gang zhig sdig chos zhes bya ba la sogs pa smos so/ /pus ka rA sA ri zhes bya ba'i bram zes bcom ldan 'das la btsun pa glang po che rnams kyi nang na glang po che cang shes dang /rta rnams kyi nang na rta cang shes dang / shing rnams kyi nang na dpag bsam gyi shing dang / nor rnams kyi nang na rin po che la sogs pa bzhin du/ btsun pa dge sbyong dang bram ze rnams kyi nang na mchog dang gtso bo gang lags zhes bya ba la sogs pa zhus pa las 'di gsungs so//rab spangs zhes bya ba ni rjes su mthun pa'i gnyen pos spangs pa zhes bya ba'i don to/ /gang yin zhe na/ sdig pa zhes bya ba ste mi 'dod pa'i 'bras bu dang mi 'dod pa'i rang gi ngo bo zhes bya ba'i don to//chos ni dngos po ste/ gzhan la gnod pa byed pa la sogs pa'o/ /spangs nas ji zhig byed pa yin zhe na/ gang zhig spyod byed pa zhes bya ba smos te/ gzhan la phan 'dogs par mdzad la gnas shing bzhugs pa'o/ /ji lta bu dang ldan pas she na/rtag tu dran ldan zhes bya ba smos te/ rgyun du yang dag pa'i dran pa mngon du byed pa ste/ thugs rje chen po'i dbang gis gzhan gyi don du dgongs pa zhes bya ba'i don to/ /gang yin zhe na de nyid smras pa/ kun sbyor zad pa zhes bya ba yin te/ bag chags dang bcas pa'i phra rgyas spangs pa ste/phun sum tshogs par bstan to/ /sangs rgyas ni thams cad mkhyen pa ste/ lhag par rtogs pa'i phyir ro/ /gang gi phyir des ni dngos po thams cad thugs su chud pa ste/ des sngon 'jig rten pa'i lam gyi nyes par spyod pa bkag nas gzhan gyi don mdzad pas bsod nams dang ye shes kyi tshogs la brten te spangs pa dang ye shes phun sum tshogs pa thob pa'o//de zhes bya ba ni de nyid do/ /'jig rten dag na zhes bya ba ni srid pa gsum na'o/ /bram ze yin zhes bya ba ni bram ze dang dge sbyong thams cad kyi nang na gtso bo zhes bya ba'i don to/ /gang bram ze'i mtshan nyid dang yang dag par ldan pa ni tshogs kyi nang du nga ni bram ze'o zhes smra bar rigs kyi gzhan ni ma yin zhes bstan pa'i phyir/bram ze gang zhig ces bya ba la sogs pa smos so/ /dro na zhes bya ba'i bram zes bcom ldan 'das bram ze'am dge slong gang bdag nyid shes shing yang dag par rab tu shes pa lags/rigs kyi bram ze ni bram ze lags so zhes bram ze dag de ltar smra bas smra bar bgyid na bram zes gang zhig la blta bar bgyi zhes gsol pa dang / sdig pa'i chos spangs shing zhes bya ba la sogs pa gsungs pa ste/ spangs pa ni bor pa ste sdig pa'i chos ngan pa'i ngo bo gang yin pa de nyid do//ji ltar 'di ltar 'gyur zhe na/ tshul 'chos med ces bya ba ste/ tshul 'chos ni ngo mtshar skyed pa zhes bya ba'i don to/ /gang gis ngo mtshar skyed cing des kyang rnyed pa dang bkur sti sgrub par byed de rig byed kyi yan lag khyim pa brtag pa la sogs pa'o//gang gis tshul 'chos pa yod pa ma yin pa de ni ma yin pa ste nor 'thob pa'i phyir log pa'i thabs la dmigs pa'i tshul 'chos med pa'i phyir ro/ /rnyog med ces bya ba ni 'dod chags dang 'brel ba'i lus la sogs pa'i las kyi bgegs bskyed par 'gyur ba'i phyir te/ gang de ni 'khrig pa nyams su myong ba med pa'i phyir ro/ /tshig gnyis po 'dis ni 'dod pa'i khams las 'dod chags dang bral bar bstan to/ /bdag gnas zhes bya ba la gnas pa ni mi g.yo ba'i bdag gi sems gang yin de nyid do/ /gzugs kyi khams na ni dga' ba la sogs pa tshor ba'i dbang gis sems g.yo ba yin te/de las 'dod chags dang bral na ni sems brtan pa thob par 'gyur ro zhes ston to/ /rig byed mthar phyin zhes bya ba ni tshor ba zad pa ni rig byed kyi mtha' ste/ der 'gro ba ni rig byed kyi mthar phyin pa'o/ /tshor ba zad pa 'thob pa ni srid pa'i rtse mo las 'dod chags dang bral ba'i phyir ro//sngar bstan pa mtha' dag kyang 'phags pa'i lam nyid kyis byed pa yin no zhes bstan pa'i phyir/ /tshangs par spyod pa spyad ces bya ba la/ spyod pa ni gsos par bya ba ste/ tshangs par spyod pa ni gang thar pa'i lam de nyid la spyod pa'o//de nyid bdag gi don yongs su rdzogs pa yin yang bram ze bdag nyid du ston pa ni mi mdzes pa ste/ 'on kyang don dam par byed pa 'di nyid bstan pa yin te/ dus su zhes bya ba smos pa la don dam par sgrub pa ste/ dus gzhan na zhes bya ba'i don to/ /de ni zhes bya ba ni bdag dang gzhan gyi don phun sum tshogs pa'o//tshangs pa smra ba zhes bya ba ni bdag ni tshangs pa'o zhes brjod cing ston pa'o/ /smra byed ces bya ba ni ci 'dod cing bag yongs su smra ba'o/ /gzhan yang rnam pa gzhan gyis dge sbyong la sogs par smra ba'i rgyu bshad pa/ gang zhig ces bya ba la sogs pa'o//yul bA rA Na sIr chos kyi 'khor lo bskor nas ring po ma lon par dge slong lnga pos bcom ldan 'das la btsun pa don dam dge slong zhes gang la bgyi zhes bya ba la sogs pa gsol pa dang 'di gsungs so/ /gang zhig ni sems can no/ /sgyu la mi gnas zhes bya ba ni gzhan slu ba la mi gnas pa ste/sgyu dang ldan pa ma yin zhes bya ba'i don to/ /nga rgyal med pa zhes bya ba ni mtho ba'i dregs pa med pa'o/ /ci'i phyir de ltar med pa yin zhe na/ gang zhig chags med ces bya ba la sogs pa smos so/ /chags pa dang bral ba ni 'di ltar bdag med pa'i phyir ro/ / chags pa dang bral ba'i phyir sgyu la mi gnas pa'o/ /gang gi phyir gyi sgra ni 'jig tshogs la lta ba med pa'i phyir bdag med pa'o/ /bdag dang bdag gir 'dzin pa'i dbang gis ni nga rgyal 'byung ba'i phyir ro/ /tshe 'di'i sred pa dang bral bar gyur na sred pa gzhan gyi sred pa yang bcad pa yin no zhes bstan pa'i phyir/re ba med ces bya ba smos te yang srid pa 'dren par byed pa'i gang gi sred pa med pa zhes bya ba'i don to/ /'khrug bcom zhes bya ba ni zhe sdang spangs pa'o/ /de tsam gyis dge sbyong gi ming du mi 'gyur ro zhes bsgrub pa'i phyir yang gi sgra de dge sbyong byed pa'i chos bzhi zhes bstan pa'i phyir ro//mya ngan 'das phyogs zhes bya ba ni mngon par 'dod pa'i lam gyis mya ngan las 'das shing bdag nyid gdung ba med pa gang yin pa ste/ khams gsum las 'dod chags dang bral ba'i phyir/ de nyid bram ze zhes bya ba la sogs pa'o/ /'o na ni gang zhig mngal nas ma skyes pa yang bram zer brjod pa nyid do zhes bstan to/gang zhig ma'i mngal zhes bya ba la sogs pa'o/ /mnyan yod na bil ba ra ma'i rigs kyi bram ze bcom ldan 'das kyi spyan sngar phyin te 'di skad ces gsol to/ /kye gau ta ma bdag ni ma'i mngal nas bram ze dang ldan pa yin no zhes pa dang /tshigs su bcad pa gsungs so/ /mngal nas skyes pa'am mngal gyi skye gnas pa ni mngal nas skyes pa ste/ rum du gnas nas mngal nas skyes pa zhes bya ba'i don to/ /gzhan thams cad kyang de ltar bram ze ma yin te/ lus 'byung bar ni mtshungs pa'i phyir ji skad du bshad pa/sa bon khrag dang khu ba ltor mi gtsang ba'i gnas su gnas pa ste mngal gyi dri mas yongs su bsgos pa'i lam gang dang ldan pa nas byung zhing de la nad dang rga ba dang phongs pas nyams pa'i nyon mongs pa'i gzhi ye shes kyi mes bsregs pa ma gtogs par lus kyis ni ji zhig dag par 'gyur smros shig dang zhes so//mngal nas skyes pa de ni bram ze'i yin par mi smra ste/ smad 'tshong ma la sogs pa bzhin no/ /mngal nas skyes pa yin par ga las nges par bya zhe na/ ma las skyes pa'i phyir ro zhes bstan pa'i phyir te/ 'di nyid bstan pa/ ma las byung ba zhes bya ba ma las yang dag par byung ba ni kun du skyes pa'o//gang ma dang pha las skyes pa de ni mngal nas nges par skyes pa yin no/ /gang yang mngal nas skyes pa de ji ltar dag par 'gyur/ gang ma dag pa de bram zer ji ltar 'gyur/ 'o na de yang rig byed 'don pas bram ze yin no zhe na bshad pa/gal te 'dzin pa dang bcas nas/ /zhes bya ba yongs su 'dzin pa gal te yod par gyur na'o/ /de ming lta bu zhes smra bar bstan zhes bya ba ni b+hur b+hu ba zhes bya ba la sogs pa smra ba'i tshul gang la yod pa de nyid ni ming du brjod pa ste de bram ze ma yin no/ /de lta na gang zhig bram ze yin zhing bram zer brjod par bya zhe na/yongs su 'dzin med ces smos te ci yang 'dzin pa med pa'o/ /len med ces bya ba ni len pa spangs pa ste/ nyon mongs pa dang / las mtha' dag spangs pa'i phyir ro/ /gang legs par spyod pa mchog tu byed pa de ni bram ze yin no zhes bstan pa'i phyir/gang zhig ces bya ba la sogs pa smos so/ /lus la sogs pa'i nyes par spyod pa med pa ste/ sdom pas bsdams pa'i legs par spyod pa dang ldan par bstan to/ /legs bsdams zhes bya ba ni sdom pa dang ldan pa'o/ /gnas gsum zhes bya ba ni lus la sogs pa'i rnam pa'o//yang na so sor thar pa dang bsam gtan dang zag pa med pa'i sdom pa'o/ /gang tshig tsam gyis legs par sdom pa de yang bram ze yin no zhes bstan pa'i phyir/ go byed ces bya ba smos te gang gis de bzhin nyid go bar byed pa bden pa zhes bya ba'i don to/ /mi rtsub pa ni yid tshim par byed pa ste/yid 'phrog par byed pa'o/ /tshig ni ngag dag go/ /yid du 'ong ba ni snyan par yang dag par sbyor bar byed pa gang yin pa de ste/ yid du 'ong ba ni mtshams sbyor bar byed pa dang phra ma med pa zhes bya ba'i don to/ /smra ba ni brjod pa dang ston pa'o/ /gang gis nyon mongs mi skyed de//zhes bya ba ni mngon par chags pa dang / zhe sdang gis sbyor bar mi byed pa'o/ /gang gis she na/ mkhas pas te rtogs pa po don dang ldan pa'i tshig tu ston pa yin te/ /'brel pa med pa'i tshig gis ni mkhas pa dag gzhan 'khrug par mi byed do/ /yid kyi legs par spyod pa gcig gis kyang bram zer 'gyur ba yin no zhes ston te/gang zhig 'ching ba zhes bya ba la sogs pa'o/ /gshe ba'i ba ra d+h+wa dzas bcom ldan 'das thag ring po nas mthong ba las gshe bar gyur te 'di gsungs so/ /de nas de mngon par dad pa skyes te/ khro med ces bya ba la la sogs pa'i tshigs su bcad pa gsungs so//mngon du 'ongs te tshig rtsub po brjod cing gshe ba la gang dag bzod pa byed pa de ni bram ze yin par ngas gsungs so/ /gsod dang 'ching zhes bya ba la/ gsod pa ni gsod pa nyid do/ /'ching ba ni lcags sgrog la sogs pas gzhan gyi dbang du byed pa'o//de la bzod pa byed pa ni bzod pa ste/ 'dis ni gzhan gyis gnod pa byas pa las ji mi snyam par bzod pa bstan to/ /ji lta bur gyur pa las bzod par bya zhe na/ sdang ba min pas zhes bya ba smos te khong khro ba la sogs pas yid nyams par ma byas pas yid dang du len cing bzod pa'o//des zil gyis mi gnon pa ni bram ze zhes brjod de/ de nyid smras pa bzod pa zhes bya ba la sogs pa smos te/ bzod pa nyid brtul zhugs te/ yon tan 'phel bar byed pa'i gnas yin pa'i phyir/ bzod pa dka' thub dam pa zhes bshad do/ /de nyid dpung gi tshogs te/stobs dang ldan zhing sgrub pa 'di la yod pa de nyid do/ /dper na rgyal po dpung gi tshogs yan lag bzhi dang ldan pa ni gzhan gyis zil gyis mi gnon cing gzhan rnam par gnon par byed pa de bzhin du bzod pa'i brtul zhugs dang ldan zhing 'byor par gyur pas ni sdig pas zil gyis mi non cing 'jig rten gsum las rgyal bar yang byed do//khro ba med cing zhes bya ba ni khro ba ma yin pas khro ba med pa ste/ bzod pa'i khyad par dang ldan pas so/ /tshul khrims can zhes bya bas ni so sor thar pa'i sdom pa dang yang dag par ldan pa ste/ 'dis ni khro ba'am 'gyur ba med pa'i thabs bstan to//brtul zhugs ldan zhing zhes bya ba ni yang dag par blang ba dang ldan pa'i phyir ro/ /'dis ni tshul khrims dag par bstan to/ /sems khral med ces bya ba ni yul dag la chags pa dang bral bas dga' ba med ces bya ba'i don to/ /'dis ni rab tu dben pa bstan to//dul ba ni dbang po dul ba'i phyir ro/ /lus mthar gnas zhes bya ba ni gang 'di lta bu de nyid ni srid pa tha mal rnam par gnas pa yin te/ 'dis ni khams gsum las 'dod chags dang bral bar bstan to/ /khro ba la sogs pa spangs par gyur na ni dben pa yin no zhes bstan pa'i phyir/gang zhig rab byung zhes bya ba la sogs pa yin no/ /dge slong zhig bya rgod kyi phung po'i pi pa la'i phrag phug na tshogs kyis 'jigs shing gnas te de las brtsams so/ /'dres pa dang ldan pa ni 'dre ba'o/ /de dgag pa ni mi 'dre bar gnas pa ste/mi 'dre zhing gcig pu spyod pa zhes bya ba'i don to/ /gang dang 'dre ba yongs su spong ba yin zhe na/ rab byung khyim pa dang zhes bya ba ste/ khyim pa ni khyim gcig pa'o/ /rab tu byung ba ni khyim med pa'o/ /de bzhin gnyi ga zhes bya ba ni khyim pa dang rab tu byung ba gnyis so/ / 'di ltar la la ni khyim la mngon par dga' ste 'di lta ste mad tsha rA nan da zhes bya ba la sogs pa'o/ /la la ni gnyi ga la ste mgon med zas sbyin la sogs pa'o/ /dgon pa la yang gnas shing gtsug lag khang la sogs pa la yongs su 'dzin pa mchog tu byed pa yin no zhes bstan pa'i phyir/ khyim nas ma byung zhes bya ba smos te/ khyim nas byung ba'i ngang tshul 'di la yod pa ni khyim nas byung ba ste gnas nas nye bar 'gro ba mchog tu byed pa'o/ /gang de lta bu ma yin pa ni khyim nas ma byung ba ste gnas la mngon par mi dga' ba'i rnam pas lus dben pa bstan nas/ sems dben pa bshad pa/'dod chung zhes smos te/ chos gos ngan don tsam la sogs pas chog shes pa'i phyir ro/ /de ni tshogs na gnas kyang bram ze yin no zhes bstan no/ /gang sred pa dang de'i tshogs chas spangs pa de nyid kyis ni dben pa thob par nus so zhes bstan pa'i phyir/ ma 'ongs pa zhes bya ba la sogs pa smos so/ /mnyan yod na tshe dang ldan pa g.yul las rgyal ba zhes bya ba'i chung mas bu khye'u blangs te/ de'i thad du 'ongs nas/ des de la ci yang ma smras pas de yang mi smra ste/ khye'u de 'chags las mgo gtad de bzhag go/ /des smras pa/ kho bo rab tu byung ste chags pa dang bral lo zhes bya ba dang khye'u de blangs te song ba las de las brtsams nas tshigs su bcad pa gnyis gsungs so//ma 'ongs pa la zhes bya ba ni drung du 'ongs pa'i sngon gyi grogs po ste/ de nye bar gyur cing sgrub pa'o/ /mngon par mi dga' ba zhes bya ba ni mngon par mi 'dod pa dang yid tshim par mi 'gyur ba ste/'dod chags las skyes pa'i dga' ba nyams su myong bar mi byed ces bya ba'i don to/ /'das pa rnams la gdung med pa/ /zhes bya ba ni yid mi gdung zhing nang gi mya ngan sel bar mi byed pa'o/ /ci'i phyir zhe na/ 'di nyid smras pa/ 'khrig pa ste 'dod pa'i 'dod chags dang bral bas khyad par du g.yul las rgyal zhes bya ba yin te/rgyal po gzugs can snying po rgyal po ma skyes dgra las rgyal bar gyur pa na de skyes pas de ltar byas so/ /yang na nyon mongs pa'i dgra'i g.yul las rgyal ba dang bcom pa'i phyir te/ khams gsum las 'dod chags dang bral ba'i phyir ro/ /yang na gang gi kun du 'ong ba ste lhag par ngan song gi ched du'o/ /de ni 'dir khyad par du sred pa yin par dgongs so zhes bya ba'i don to/ /der 'ongs pa ni skyes pa'o/ /mngon par mi dga' ba ni lhag par mi zhen cing spong bar byed la sel bar byed de/bdag la phan par 'dod pas ni shin tu bkres par gyur kyang kha zas shin tu dug dang bcas pa bzhin du rtogs par bya'o/ /'das la zhes bya ba ni rgyud las kyang byung ba ste/ 'gag pa'am 'gag par 'gyur ba'o/ /gdung med ces bya ba ni de sdug bsngal du 'du shes pa'i phyir sdug bsngal gyi dngos po dang bral bas yang dag par dga' ba 'byung ba'i phyir ro//de gang yin zhe na/ grol zhes smos te/ ga las she na/ 'khrig pa las so/ /'dis chags par byed pas na chags pa ste/ thob par byed pa zhes bya ba'i don to/ /de spangs pa ni de'i spangs pas so//ji ltar de gdung ba med pa yin zhe na/ 'di ltar de ni mya ngan med/ /ces smos te/ de nyid nang gi gdung ba med pas de las ji ltar rjes su myong bar 'gyur/ gang gi phyir me med par gyur na ni tsha ba'ang med par 'gyur ba ltar mya ngan 'di lta ga la yod pa'o/ /de'i rgyur gyur pa rdul dang bral ba yin te/'di nyid bstan pa rdul bral zhes te 'dod chags la sogs pa'i nyon mongs pa'i rdul ni gdung ba 'dren par byed pa yin la/ de spangs ba ni de dang bral ba yin no/ /rdul thams cad bral bas ni 'khrug pa mtha' dag dang bral ba'i phyir mya ngan las 'das pa 'thob par 'gyur ro zhes bstan te/zhi ba zhes bya ba ni phung po lhag ma dang bcas pa'i ngo bo yin pa'i phyir ro/ /ji skad du bshad pa'i sred pa la sogs pa spang bar gang gis nus zhes gang zhig 'dod pa chung zhes bya ba la sogs pa smos so/ /dge slong bsam gtan pa dgon pa na gnas pa'i shing drung pa zhig las brtsams so//gang gzhan mi gso ba nyid kyis de tshul khrims la brtson pa nyid kyis yongs su gzung ba spangs pa'i phyir ro/ /'dod chung zhes bya ba ni sems dben pa'i phyir ro/ /dul ba ni dbang bo dul ba'i phyir gang gi phyir dben ba'i 'bras bu ni dul ba'o//snying por rab gnas la zhes bya ba ni mya ngan las 'das pa bstan pas lhag par grol ba'i phyir ro/ /de nyid tshogs la gnas pa ste lam bsgom pa yin no/ /zag zad ces bya ba ni nyon mongs pa spangs pas so/ /skyon rnams bsal ba zhes bya ba ni yang srid pa'i 'bras bu'i lam spangs pa'i phyir ro//gang zag pa zad pa dang skyon rnams bsal ba nyid kho na pha rol dang tshu rol med par 'gyur ro zhes bstan pa'i phyir/ gang zhig tshu rol zhes bya ba la sogs pa smos so/ /bram ze rab tu mang po dang de las gzhan pa'i srog chags s+thu la ko sh+ta'i tshu rol nas pha rol du rgal bar byed la/slar yang 'ong bar byed do/ /de'i tshe dge bsnyen rab tu mang po de'i drung du lhags te/ 'dug nas de dag gis gtam brjod par gyur te/ bram ze dag kyang rgal bar byed cing phyir yang rgal la/ de bzhin du gzhan dag kyang ngo / /de las kha cig gis ji tsam gyis bram ze zhes nye bar gdags par bya zhes pa dang /de na kha cig gis ji ltar na ma las byung ba nas so zhes bya ba nas rgya cher smras pa dang / de dag bcom ldan 'das kyi spyan sngar song nas de dag las brtsams pa'i tshigs su bcad pa gnyis so/ /gzhan dag ni rgyal byed kyi tshal na gang bram ze ni pha rol du 'gro ba de nyid yin no zhes smra ba'i bdud las brtsams so zhes zer ro//gang zhig pha rol zhes bya ba ni ring ba na gnas pa ste/ pha rol na yang de med pa ni gang phyi rol gyi skye mched drug spangs pa'i phyir ro/ /tshu rol dang zhes bya ba ni nang gi yang spangs pa'i phyir ro//pha rol tshu rol gnyis med pa/ /zhes bya ba ni gnyi ga med pa'o/ /gang gi phyir kha cig ni phyi rol la lhag par zhe na la kha cig ni nang la'o/ /kha cig ni gnyi ga la ste/ de bas na 'dir gsum smos so/ /mthar phyin zhes bya ba ni gang la pha rol la sogs pa med pa de nyid ni pha rol du song ba ste/mthar thug pa zhes bya ba'i don to/ /gang dag gi zhe na/ chos rnams kun gyi zhes bya ba ste/ skye mched bcu gnyis kyi pha rol du phyin pa'i phyir te/ thams cad thams cad ces bya ba ni 'di lta ste/ skye mched bcu gnyis so zhes mdo las bstan pa'i phyir ro//yang na gang zhig pha rol med pa ste phung po lnga lhag ma med pa'o/ /tshu rol ni nyon mongs pa dang bcas pa'o zhes bya ba la sogs pa brjod par bya'o/ /ji ltar pha rol dang pha rol ma yin pa la sogs pa med pa yin zhe na/ 'dir rgyu bstan pa/ gnas gsum la zhes smos te/ rnam pa gsum ni nang dang phyir rol dang de gnyi ga'i bdag nyid kyi skye mched la'o/ /yang na sems can gyi gnas gsum ste/ khams gsum la'o/ /yang na dus gsum la'o/ /ma chags zhes bya ba ni lhag par zhen pa med pa ste/ de la dmigs pa'i 'dod chags spangs pa'i phyir ro/ / gang mig gi 'dun pa'i 'dod chags de spangs pas ni 'dun pa'i 'dod chags spangs pa nyid de/ mig de yang spangs par 'gyur ro zhes bya ba mdo las gsungs te/ de ltar na pha rol la sogs pa med pa yin no zhes brjod do/ /ma chags pa zhes bya bas sred pa spangs par bstan nas de'i 'bras bu len pa spangs pa bstan pa/gang zhig ring dang thung ba dang / /zhes bya ba la sogs pa smos so/ /de nas dan Da ka'i dgon pa na gnas pa'i ring pa dang thung ba'i dka' thub can gyi bram ze gnyis ring ba dang thung ba'i gos dag 'chang zhing 'khor dang bcas pa bdag nyid bram ze yin no zhes sems bzhin du/bcom ldan 'das kyi spyan sngar song ste/ gau ta ma khyod ji ltar bram zer 'dogs par mdzad ces gsol pa'o/ /des na de gnyis la tshigs su bcad pa bzhi gsungs te/ de gnyis kyis thung ba dang ring ba'i gos spangs te/ / phra ba dang rags pa dang mdzes pa la sogs pa yang spangs nas rab tu byung ste/ 'dod chags dang bral bar gyur to/ /thung ba zhes bya ba dag ni de gnyis kyis sngon gyi gos la sogs pa spangs pa ste/ bcom ldan 'das las zhes rtogs nas de yongs su spangs pa dang / phyis tshigs su bcad pa'i don dam pa rtogs par gyur to//gang zhig ni gang nyid do/ /thung ba ni yun thung bar dge ba dang mi dge ba bsags pas mi len to zhes bya ba dang sbyar ro/ /ring ba ni yun ring du bsags pa'o/ /phra sbom zhes bya ba ni phra ba dang / rags pa ste/ gsal ba dang mi gsal bar byas pa yid dang lus kyis byas pa'i go rims bzhin no//yang na mnyam par bzhag pa dang / mnyam par ma bzhag pa'i sa pa'i 'o/ /yang na dbang po las 'das pa dang dbang bos gzung ba'i yul du gyur pa'o/ /'jig rten ni 'gro ba'o/ /dge ba dang mi dge ba ni bsod nams dang bsod nams ma yin pa'am/yang na nyon mongs pa dang nyon mongs pa ma yin pa'o/ /'o na bsod nams blang bar bya ba yin nam zhe na/ cung zad ces smos te/ 'dod pa med pa'o/ /bsod nams te/ 'khor ba'i 'bras bu yang sdig pa bzhin du spang bar bya'o zhes byas nas so/ /mi len te zhes bya ba ni len pa med cing mi 'dzin pa med ces bya ba'i don to//gang la sred pa'i dbang gis ni nye bar len pa yin gyi/ sred pa med pa de la ni de yang med pa nyid do/ /nye bar len pa spangs pas khyad par du 'gyur ro/ /'di nyid ces bya ba ni mthong ba'i chos la'o/ /gang zhig ces bya ba ni nye bar len pa spangs pa'o//rab shes shing zhes bya ba ni zag pa med pa'i shes pas mngon par rtogs pa'o/ /rang gi sdug bsngal zad pa dang / /zhes bya ba ni bdag gi rgyud la gnas pa'i sdug bsngal spangs pa'o/ /yang na 'phags pa'i bden pa bzhis yongs su bcad pa'o//sdug bsngal zad par byas nas ji lta bur 'gyur zhe na/ 'dod chags bral ba zhes smos te/ khams gsum gyi sred pa spangs pa'o/ /mi ldan zhes bya ba ni nyon mongs pa'i gzhi spangs pas so/ /gang gis 'dod chags dang bral ba thob cing dri ma sel bar byed pa yin zhe na/ 'di nyid smras pa/'di nyid ces bya ba la sogs pa ste/ gzhan dag ni shar phyogs kyi kun dga' ra ba na gnas pa'i gnas brtan yongs su dag pa las brtsams so zhes zer ro/ /dge zhes bya ba ni srid pa'i 'bras bu can no/ /sdig pa can zhes bya ba ni ngan song gi 'bras bu can no/ /gnyi ga yis kyang zhes bya ba ni ji skad bshad pa'i dge ba dang sdig pa'o//mi gos pa zhes bya ba ni nye bar mi sogs pa'o/ /de'i phyir bsod nams kyis gos pa ni 'khor los sgyur ba la sogs pa'o/ /sdig pas nye bar gos pa nyid ni tsan da gi ri ka la sogs pa'o/ /gnyi gas gos pa ni ma skyes dgra la sogs pa'o//gos med ces bya ba ni dri ma med cing las zad pa dang zag pa zad par 'dis bstan to/ /rdul bral zhes bya ba ni de'i phan yon bstan pa'o/ /zhi ba ni nye bar zhi ba thob pa'i phyir ro/ /bsod nams la sogs pas nye bar gos pas ni de la nye bar chags par 'gyur la de spangs pas ni des byas pa'i sbags pa dang yang bral ba yin no zhes bstan te gang zhig dge ba dang zhes bya ba la sogs pa smos so//gang chags pa de nye bar spang ba la sogs pa dang rjes su mthun pa'i gnyen po bskyed nas lhag par chags pa de las 'das par byed cing zil gyis gnon par byed do//sred pa spangs pa des ni chags pa de las 'das shing zil gyis mnan te chags pa spangs pa'o/ /rnam bral zhes bya ba ni sred pa spangs pa'i phyir de dang rjes su mthun pa'i dngos po spangs pa ste khams gsum las grol ba'i phyir ro/ /rnam par bral ba'i ngo bo bshad pa/gang zhig sngon dang zhes bya ba la sogs pa'o/ /ri kha ba can na gnas pa'i lnga mngon par shes pa dang ldan pa'i drang srong mang po shing n+ya gro d+ha'i rgyal po'i rtsar nyin par nye bar gnas par gyur to/ /tshe dang ldan pa maud gal gyi bu chen po yang de nyid na 'dug ste/ de dag tshe dang ldan pa maud gal gyi bu chen po'i thad du song nas 'di skad ces smras so/ /btsun pa ji tsam gyis de bzhin gshegs pa bram zer gdags pas gdags par mdzad ces smras pa dang / des de dag bcom ldan 'das kyi thad du khrid pa las ji tsam na 'di gsungs so//gang zhig ni sems can no/ phyi ma dang zhes bya ba ni chung ma blangs nas bu bskyed par bya la bu la chung ma bzhag nas nags su 'gro bar bya'o zhes chos khrims kyi gzhung la brten nas chung ma dor ba ste gang zhig gang du sems rgyug pa med pa'i phyir ro/ /sngon dang zhes bya ba ni lo bzhi bcu lon pa'i bar du gnas la nags su song nas bu skyed la chung ma blang ba'i phyir khyim du 'ong ba gang yin pa de ltar 'dod pa yang med pa'o//dbus kyang zhes bya ba ni bdag nyid gang yin pa la chags pa med pa ste dngos po thams cad la rgyab kyis phyogs pa'i phyir ro/ / yang na 'dis ni 'das pa dang ma 'ongs pa dang da ltar byung ba dag la lhag par chags pa dang / khong khro ba la sogs pa med par bstan to/ /yod pa ma yin pa ni med pa'o/ /gang sngar bstan pa'i med pa de nyid smras pa/ rdul bral zhes bya ba'o/ /'di nyid smras pa/ 'ching ba las grol zhes bya ba ste bdud kyi 'ching ba dang bral bas so//'ching ba de gang yin pa dang / sdig pa las grol ba gang yin pa de bstan pa'i phyir/ pad+ma'i 'dab ma zhes bya ba la sogs pa smos so/ /bram ze'i rigs su skyes pa gzhon yang sdig pa dang bza' ba ma yin pa spong ba zhig ji tsam na de dgon par gnas nas dgra bcom pa thob pa la bcom ldan 'das kyis tshigs su bcad pa gsum gsungs so//chu ni gzhol 'gro'o/ /pad+ma'i 'dab ma ltar zhes bya ba ni dper na chu ni pad+ma'i 'dab ma la gnas pa de bzhin du gang zhig sdig pa la mi spyod de 'dod chags spangs pa'i phyir ro//smyung bu'i rtse la yungs kar ltar/ /zhes bya ba ni dper na/ smyung bu ste 'bigs par byed pa'i rtse mo la yungs kar mi gnas pa de bzhin du sdig pa dag khong khro ba spangs pa'i phyir mi spyod pa'o/ /bkur sti bsal ba dang mi 'gyur ba bstan pa'i phyir/dpe rnam pa gnyis sam yang na phun sum tshogs pa'am rgud pa'i gnas skabs la mi 'gyur bar bstan pa'o/ /sdig pa la mi 'jug pas ni 'dod pa spong bar 'gyur ro zhes bstan pa'i phyir/ 'dod la mi gnas zhes bya ba la sogs pa smos te/ lhag par zhen par mi byed pa'o//'dod pa spangs pas ni sred pa spangs pa yin no zhes bstan pa'i phyir/ srid la dga' ba yongs spangs te/ /zhes bya ba yin te dga' ba ni srid pa don du gnyer ba ste/ de las skyes pa ni skye ba dang srid pa ste de gnyis spangs pa gang yin pa de'o/ /yang na srid pa las dga' ba ni sred pa skyed pa'o//sdig pa la sogs pa gsum dang 'brel pa ni tshigs su bcad pa gzhan gsum gyis bstan te/ zla ba dag cing zhes bya ba la sogs pa'o/ /bcom ldan 'das ri spos kyi ngad ldang na lha la sogs pa'i tshogs kyis yongs su bskor zhing bzhugs te khang steng nas zla ba yongs su rdzogs shing dri ma med pa la gzigs te/de bstan pas 'dul ba dag gis mang du mdzad nas tshigs su bcad pa gsum gsungs so/ /zla ba ltar zhes bya ba ni zla ba bzhin du'o/ /dri med ces bya ba ni sgra gcan dang sprin gyi sgrib g.yogs dang bral ba'i phyir ro//dag pa ni dkyil 'khor yongs su ma rdzogs pa med pa'i phyir ro/ /rab tu dang ba ni ston nye bar gnas na shin tu mdzes pa'i phyir ro/ /skyon bral ni du ba dang rdul la sogs pa med pa'i phyir ro/ /de bzhin du gang la la zhig sdig pa dang ngan par spyod pa la sogs pas mi gos pa'o/ / ji ltar byas nas dri ma med pa yin zhe na ser sna'i dri ma dang bral ba'i phyir ro/ /dag pa ni lus la sogs pa'i legs par spyod pa nyams pa med pa dang ldan pa'i phyir ro/ /rab tu dang ba ni dge ba'i bshes gnyen bsten pa mchog tu byed pas so/ /skyon bral zhes bya ba ni legs par gsungs pa mnyan pa la sems pa la sogs pa dang ldan pa'i phyir ro//yang na kun du rmongs pa'i lta ba ngan pa dang bral ba'i phyir te dngos po'i de bzhin nyid gzung bas ma nges pa'i 'khrug pa med pa'i phyir ro/ /gang de lta bu de ni sdig pas mi gos pa yin te/ des na sdig pa mi spyod pas bram ze'o//'dod pas zhes bya ba ni 'dod pa'i 'dod chags kyis so/ /yang dngos po gsum po nyid kyi dbang du byas nas/ 'dam rdzab kyis ni zhes bya ba la sogs pa smros so/ /'od srungs chen po'i yon tan las brtsams nas 'di gsungs te/ 'di dge slong dag 'di lta ste nam mkha' ni gtsang bas kyang mi gos so/ /de bzhin du 'od srungs chen po yang 'jig rten gyi chos brgyad kyis ma gos so zhes pa nas tshigs su bcad pa gsum gsungs so/ /'dam rdzab kyis ni zhes bya ba ni dper na nam mkha' ni 'dam dang mi gtsang ba la sogs pas mi gos pa yin no zhes sbyar bar bya'o//rdul gyis zla ba ji lta bar/ /zhes bya ba ni dper na zla ba'i dkyil 'khor la rdul dang rdul phran la sogs pa gang gis kyang mi gos pa ste mi sbags shing dri ma can du mi byed do/ /sdig pa'am ngan par spyod pas kyang de bzhin du gang zhig mi gos pa yin te de ni bram ze'o//gang yang sdig pas mi gos pa yin no zhes bstan pa la/ gang zhig 'dug nas zhes bya ba la sogs pa smos te tshe dang ldan pa nam grus mtshan ma med pa'i ting nge 'dzin mngon du byas nas gnas so/ /de nas tshangs pa chen po tshangs ris kyi lha sum brgyas yongs su bskor zhing tshe dang ldan pa nam gru ga la ba der phyin te/ji srid du btsun pa 'di'i nye bar zhi bas bdag cag ni dga'o zhes bya ba nas 'di gsungs so/ /'dug nas zhes bya ba ni dben pa'i gnas su 'dug pas so/ /rdul bral ni mi gtsang ba la sogs pas 'dod chags la sogs pa bkag pas so//dben pa gnyis kyi 'bras bu smras pa/ sems shing zhes bya ba ni nges par 'byed pa'i cha bzhi mngon du byed pa'i phyir te/ de dag bsam gtan pa'i sa pa yin pa'i phyir ro/ /bya ba byas pa ni mthong lam bskyed pas ngan song gsum bsal ba'o//zag pa zad pa ni bsgoms pas spang bar bya ba spangs pa'i phyir ro/ /dul ba ni mi slob pa'i lam thob pas thams cad du 'khrul pa spangs pa'i phyir ro/ /lus mthar gnas pa ni de las gzhan pa'i skye ba yongs su 'dzin pa med pa'i phyir ro/ / shes pa dben pas ni khyad par la sogs pa 'thob pa yin no zhes bstan te/ shes rab zab cing zhes bya ba la sogs pa smos so/ /de nas kun du rgyu mkhas pa zhig thar pa 'dod de de'i bslab pa blangs pa las der thar pa ma thob nas bcom ldan 'das kyi spyan sngar song ste ji tsam na de las brtsams so//gzhan dag ni bya rgod kyi phung po'i ri la dge bsnyen ma bde ma las brtsams so zhes zer ro/ /shes rab zab pa zhes bya ba la zab pa ni don gting dpag dka' ba ste nges par 'byed pa'i shes rab gang gis bdag med pa la sogs pa rtogs pa'i phyir ro/ /yid gzhungs pa ni sangs rgyas kyi gsung mnyan pa la sogs pa'i rim pa la brten nas mthong ba'i lam skyed pa'i phyir ro//lam dang lam min rnams la mkhas/ /zhes bya ba ni bsgom pa'i lam thob pa ste gang gi phyir de ni khyad par du 'dir lam la mkhas pa yin no/ /gang zhig don mchog rjes thob de//zhes bya ba ni 'phags pa'i lam gyi phung po lhag ma dang bcas pa'i mya ngan las 'das pa 'thob pa'i phyir ro/ /'phags pa'i lam las skyes pa'i tshogs bstan pa/ mi ni gang yang rung ba zhes bya ba la sogs pa'o/ /dgra bcom pa ka phyin chen po bsod snyoms kyis lus 'tsho bar byed pa las brtsams so//gang yang rung ba dag ces bya ba'i yang gi sgra ni bdag nyid ces nges par gzung ba'am srid pa'o/ /mi ni zhes bya ba ni mi'i 'jig rten na zhes bya ba nges par gzung ba bdun pa ste mi'i nang nas zhes bya ba yin no/ /'tsho ba dang zhes bya ba ni srog gnas par byed pa'o//slong mo spyad pas zhes bya ba slong ba'i tshogs ni slong mo'o/ /de'i phyir spyod pa ni 'jug pa ste/ slong pa des yongs su 'dzin pa zhes bya ba'i don to/ /'dis ni dben pa dang chog shes pa ston par byed do/ /bdag med ces bya ba ni bdag gir byed pa dang bral bas mthong bas spang bar bya ba spangs par bstan to//su la'ang gnod pa mi byed ces bya ba ni 'gro ba dang gnas pa gang la yang 'tshe ba mi byed de gnod pa dang bcas pa'i khams las 'dod chags dang bral ba'i phyir ro/ /brtan ldan zhes bya ba ni sa gong ma las 'dod chags dang bral ba'i phyir ri bo bzhin du mi g.yo ba'o//tshangs par spyod pa can zhes bya ba ni mi slob pa'i lam thob pa ste bdag dang gzhan gyi don byas pa'o/ /chos ston te zhes bya ba ni yan lag bcu gnyis kyi tshig gi rnam pa'o/ /ci'i phyir zhe na/ kun shes spyad phyir zhes bya ba ste zag pa med pa'i rtogs pa bsgrub pa'i phyir ro//lam bsgoms pas dang por 'dod pa las 'dod chags dang bral ba yin no zhes bstan te/ gang zhig 'dod pa zhes bya ba la sogs pa smos so/ /tshong dpon su ta zhes bya ba'i khye'u gzugs bzang ba lhag par 'dod pa dag la sems zhugs par gyur to//ji tsam na khyim bdag mgon med zas sbyin der song ste/ /'o bu cag phyi rol du 'dod zhes byas nas phyi rol du khyer zhes bya ba la sogs pa rgya cher te bcom ldan 'das kyi zhal mthong nas chos thos pas rgyun du zhugs pa'i 'bras bu 'thob ste de las brtsams nas 'di gsungs so//spangs shing zhes bya ba ni rab tu bor ba'o/ /'dod pa ni gzugs la sogs pa'i yul lo/ /legs pa ni phyin ci ma log pa'i gnyen pos so/ /de'i gnyen po ni khyim med par ni rab tu byung ste zhes bya ba ste/ rab tu byung ba yongs su 'dzin pa 'gro ba'i don dang 'thob pa'i don to//de ma gtogs par ni yul gyis byas pa'i g.yeng ba dang bral ba med pa'i phyir ro/ /'dod pa'i zag pa yongs zad de/ /zhes bya ba ni tshul khrims la brten te zhi gnas dang lhag mthong gi mthus 'dod pa'i nyon mongs pa mtha' dag spangs pa'i phyir ro//'dir ni phyir mi 'ong ba nyid ston to/ /'dod pa las 'dod chags dang bral bar gyur na ni 'tshe ba med par 'gyur ro zhes bstan te/ /'gro ba dang ni zhes bya ba la sogs pa smos so/ /rgyal po gsal rgyal gyi blon po'i mchog pa ma ka zhes bya ba gtum la tsham tshom med pa de bcom ldan 'das kyi spyan sngar song ngo //de gdul ba'i don du bcom ldan 'das kyis kyang rdzu 'phrul gyis nyi tshe ba'i sems can dmyal bar skyes pa sprul te de yang kha dang ku ra ra la sogs pas lag pa nas nye bar gtses pa dang / nyam thag pa'i nga ro 'don par byed do//des de mthong nas yid byung ngo / /ci tsam na bcom ldan 'das kyis khyod kyis las ci zhig byas zhes bka' stsal pa dang / bdag gis ni rgyal po'i chad pa gcod pa'i las bgyis so zhes gsol pa dang / des kyang de skad ces gsol pa nas de 'jigs pas rab tu byung ste de las brtsams nas 'di'o//mi gcod pa ni spangs pa dang bor pa'o/ /chad pa ni 'tshe ba'o/ /gang la zhe na 'byung bo rnams la ste 'jig rten la'o/ /gang la zhe na 'gro ba dang zhes bya ba smos te srog dang bcas pa dag la'o/ /gnas pa'i zhes bya ba ni sems med pa'o/ / ji skad du/ sdong dum tshig pa la yang sems kyis gnod par mi bya na rnam par shes pa dang ldan pa'i lus can la lta smos kyang ci dgos zhes gsungs pa lta bu'o/ /gnas pa'i dug kyang 'gro ba'i dug bzhin du nye bar spyod par gyur na gsod par byed pa bzhin du 'gro ba gnyis po dag la 'tshe ba byas na byed pa po la gnod bar 'gyur te de yang bshad pa//'gro ba dang ni gnas pa'i dug /spyod byed nges par 'ching 'gyur te/ de bzhin 'tshe bar byed pa yin/ /'tshe byed nyid la nges par gnod/ /ces so/ /chad pas gcod du mi 'jug pa de gang yin zhe na/ gsod byed gsod du mi 'jug de//zhes bya ba yin te/ bdag dang gzhan gyi lag gis gzhan la gsod par mi byed pa'i phyir te/ gzhan gsod du yang mi 'jug la bdag nyid kyang gsod par mi byed pa'o/ /mi 'tshe ba'i bsam pa'i ngo bo nyid smras pa/ /gang zhig mi mthun zhes bya ba la sogs pa smos so//cho 'phrul chen pos mu stegs can dag tshar bcad pa las mtha' khob la brten par byed do/ /yang de'i tshe tshe dang ldan pa bde byed de na gnas te/ de snga dro sham thabs bgos pa nas ci tsam na bram ze phrag dog gi rang bzhin can mi mthun pa dag gis rnam par gyur kyang khro bar ma gyur to//gzhan dag ni nye bar zhi ba'i dge sbyong zhig las brtsams so zhes zer ro/ /gzhan dag ni gzhan gyis shin tu gtses kyang 'gyur ba med pa zhig las brtsams so zhes zer ro/ /mthun byed pa zhes bya ba la mi mthun pa ni zhe 'gras pa'o/ /de med pa ni rgyud mnyen pa zhes bya ba'i don to//gang la mi mthun par byed pa yin zhe na/ mi mthun zhes smos te zhe 'gras pa dag la'o/ /chad pas gcod pa zhes bya ba ni chad pas gcod pa gang yin pa de nyid de lus dang ngag gis sems can gzhan la gnod pa byed pa'o//dang du len zhes bya ba ni sems can la chad pa so sor mi byed par 'jog pa ste 'dir ma he'i skyes pa'i rabs dper brjod par bya'o/ /'dir gnyi ga'i rgyu bstan pa'i phyir/ 'byung po rnams la brtse phan zhes bya bas bstan te mngon par mtho ba dang nges par legs par sgrub pa ni phan pa'o//brtse ba ni snying rje'i sems gang la yod pa ste/ sems can tshad med pa la 'gro ba'o/ /mthun par byed pa gang yin zhe na 'dir smras pa/ smyung bu'i rtse la zhes bya ba ste dge slong zhig dgon pa la dga' zhing yul gyi 'dod chags dang zhe sdang la sogs pa dang rnyed pa dang bkur sti la mngon par chags pa gang la yang gnas par mi byed pa de las brtsams so//'joms pa spangs pa ste/ rgyud las bsal ba'i phyir ro/ /'dir dpe bstan pa/ smyung bu'i rtse la yungs kar ltar/ /zhes bya ba'o/ /gang zhig ces bya ba la sogs pa la kun da na'i nags tshal na gnas brtan shes pa la zhes bya ba las brtsams so//sred pa ni yongs su bsgos pa ste 'dam lta bur mi 'dod pa'o/ /ji skad du bshad pa/ 'jig rten 'di na yongs su dag pa la 'jug pa ste bsgos pa'i rang bzhin 'gog par byed cing 'das pa ni dge slong zhes brjod do//rdzong ni spang bar dka' ba ste 'phags pa'i lam ma gtogs par des thams cad spang bar mi nus pa'i phyir ro/ /gzhan dag ni bsgos pa zhes bya ba ma rig pa yin no zhes zer ro/ /gzhan dag kyang 'obs zhes brjod de de'i don ni sngar bshad zin to//'khor ba'i klung las zhes bya ba ni 'khor ba'i chu bor ltung ba las so/ /rab rgal cing zhes bya ba ni 'phags pa'i lam dang ldan pas rgal bar gyur pa'o/ /rgal nas zhes bya ba ni 'das par gyur pa ste sred pa'i rgya mtsho las rgal ba'i tshul yod pa'i phyir ro/ /de nyid kyi phyir/pha rol 'gro ba zhes bya ba ste/ mya ngan las 'das pa 'thob pa'i phyir ro/ /sems pa ni mthong ba'i chos la bde bar gnas pa'i phyir ro/ /mi bkri ba zhes bya ba ni skye ba gzhan du las dang nyon mongs pas khrid par mi nus pa'i phyir ro/ /sngar bstan pa'i mthong ba nyams pa yin no zhes bstan pa/yid gnyis kyis ni zhes bya ba khams gsum gyi the tshom spangs pa'i phyir ro/ /log pa zhes bya ba ni lus dang sems mngon par zhi ba dang ldan pa'i phyir ro/ /len pa med pa ni las dang nyon mongs pa rtsa nas drungs phyung ba yang skye ba'i 'khrug pa med pa'i phyir ro//sred pa ni rnam grangs bstan pa'i phyir/ gang zhig 'jig rten 'di dang zhes bya ba la sogs pa smos so/ /dge slong dag 'jig rten 'di dag ni sred pas 'khol cing sred pa'i dbang du 'gro ba'o zhes pa nas 'di gsungs so/ /gang 'jig rten 'di la lhag par zhen pa'i mtshan nyid sred pa yang med la/'jig rten pha rol don du gnyer ba'i mtshan nyid kyang med de/ sred pa mtha' dag yongs su zad pa de nyid ni don dam pa'i bram ze'o/ /sred pa'i rnam grangs yang smras pa/ gang zhig 'jig rten 'di dang ni/ /zhes bya ba la sogs pa'o//yang na sred pa ni rnam pa gsum ste ngan par spyod pa la sred pa dang / legs par spyod pa la sred pa dang / srid pa'i sred pa ste go rims bzhin du gos par bstan pa yin no/ /gang zhig 'jig rten 'di zhes bya ba la sogs pa smos pa la/ gar mkhan gyi bu mo gzugs shin tu bzang po la tshong dpon gyi bu zhig chags te de'i bzo la 'jug pa las rgyal pos sod cig ces bsgos te 'tshe ba'i re ba btang ba las 'phags pa shA ri'i bus skyabs byas te sred pa spangs pa de'i dbang du mdzad nas bcom ldan 'das kyis 'di gsungs so//mngon par 'dod pa'i dngos po ma thob pa thob par 'dod pa ni chags pa zhes bya ba'i don to/ /gang la 'di'am gzhan du de med pa ni chags med de sred pa med pa'o/ /rnam par bral ba zhes bya ba ni 'ching ba lhag ma spangs pa'o/ /sred pa dang des byas pa'i gdung ba spangs pa'i phan yon smras pa/dga' dang mi dga' zhes bya ba la sogs pa'o/ /gang zhig gi bu zhig dmyal bar skyes pa las shi 'phos te skye ba dran par gyur pa yang dang yang du tsha bas rngul 'byin cing yang dang yang du chu bo'i nang du 'jug par byed do/ / ji tsam na rgyun du zhugs pa'i 'bras bu thob par gyur nas de'i dbang du byas pa'o/ /spangs pa ni rab tu btang ba'o/ /dga' ba dang zhes bya ba ni 'dod pa la dga' ba ste de ni skye ba gzhan du gzhan gyi chung ma la byi byed par gyur pa'o/ /mi dga' ba zhes bya ba ni rnam par sdang ba ste yid mi bde ba la sogs pa skyed pas 'dod pa las 'dod chags dang bral bar byed du 'jug pa'o//bsil bar gyur pa ni tshim pa thob pa ste nyon mongs pa dang des byas pa'i gdung ba med pa'i khyad par bstan to/ /dben pa'i dga' ba dang ldan pa'i phyir gzugs kyi khams spangs par bstan te/zag pa med pa zhes bstan to/ /'jig rten kun zil gnon zhes bya ba ni gzugs med pa'i khams spangs pa ste so so'i skye bo thams cad zil gyis gnon pa'o/ /ji skad du/ 'dod chags dang bcas pa 'dod chags dang bral bas so zhes bshad pa'o/ /brtan pa ni g.yo ba'i rgyu med pas don dam pa'i gnas skabs nyid na ni ri rab bzhin du mi g.yo'o//thams cad zil gyis gnon pas ni sbyor ba thams cad med pa yin no zhes bstan pa'i phyir/ mi'i sbyor ba zhes bya ba la sogs pa'o/ /rig pa 'dzin pa zhig gis rig pa'i stobs kyis lha gzhon nu bzhi shing rta zung la bcings te skyed mos tshal gyi nang du zhugs par byas so//de dag 'od srungs chen pos btang ste rang gi khyim du song ngo / /ji tsam na 'od srungs chen pos rig pa pa'i rdzas dag byin te rig pa 'dzin pa ste dgra bcom pa thob par gyur pa de'i dbang du mdzad do/ / gzhan dag ni gang ga tat+ta zhes bya ba'i rnal 'byor pa rtag tu g.yeng bar byed cing khyim pa'i skye bo sten par byed pa de las brtsams so zhes zer ro/ /mi ni 'dod pa na spyod pa'o/ /sbyor ba ni nyon mongs pa ste sdug bsngal gyi khyad par de dang de dag la sbyor bar byed pa'o zhes byas nas so/ / lha'i sbyor ba rab 'das shing / /zhes bya ba ni gzugs dang gzugs med pa na spyod pa'i nyon mongs pa dang rjes su mthun pa gang gis 'das pa'o/ /sbyor ba kun dang rnam bral te/ /zhes bya ba ni sbyor ba bzhi dang bral ba'o/ /sbyor ba spangs pas ni 'gro ba med pa yin no zhes bstan te/ gang zhig lha dang zhes bya ba la sogs pa'o/ /bcom ldan 'das 'gro ba lnga'i rnam par dbye ba mdzad pa ni dge slong gzhan zhig stan las langs te 'di skad ces gsol to/ /btsun pa che ge mor dge slong shig dus las 'das te/ de'i 'gro ba cir 'gyur zhes zhus pa dang 'di gsungs so/ / gang zhig gi 'gro ba mi shes pa ni yongs su mya ngan las 'das pa'i phyir te/ mya ngan las 'das pa'i 'gro ba ni dgra bcom pa zhes bya ba'i tshig gis so/ /gang mi shes pa yin zhe na/ lha dang dri za mi zhes bya ba ste de la lha ni brgya byin la sogs pa'o/ /dri za ni su pri ya zhes bya ba la sogs pa lha'i rol mo pa'o//mi ni 'khor los sgyur ba la sogs pa'o/ /'gro ba mi shes pa zhes bya ba ni 'di'i 'gro ba shes par mi nus pa'i phyir ro/ /de ga las she na/ 'di ltar zhi ba zhes smos te/ mya ngan las 'das pa'i phyir zhi ba ste/ phung po lhag ma med pa'i mya ngan las 'das pa'o/ /gang gis 'gro ba mi shes pa dang zhi ba yin zhe na/gang gis chos rnams zhes bya ba la sogs pa smos so/ /bram ze zhig 'di ltar lta zhing 'di skad du smra ste shes pas ni su la yang dgos pa med de/ de ci'i phyir zhe na/ shes pas ni mang po sdug bsngal bar snang ngo zhes pa nas ji srid du de'i dbang du mdzad pa'o//ngas ni chos gcig ma shes shing mngon par mi shes pas yongs su shes par mi 'gyur ro zhes rgya cher te 'di lta ste bram ze gang yin pa de ni khyim nas brgyags blangs te za bar byed do/ /de bzhin du gang 'di na yang dag par myong ba'i bde ba'am sdug bsngal de yang rang gi las las byung ba yin no zhes te des na tshigs bcad 'di gsungs so//mi shes pa zhes bya ba ni ma rtogs shing yang dag par khong du ma chud pa ste/ gang gis chos rnams med gyur pa/ /zhes bya ba dang sbyar ro/ /ma mthong ba na zhes bya ba ni mngon sum du ma byas pa ste/ / 'jig rten dang 'jig rten las 'das pa'i shes pa dang spangs pa yongs su shes pas sam mnyam par ma bzhag pa'am/ mnyam par bzhag pas sam zhes bya ba la sogs par brjod par bya'o/ /'di skad ston te/ ji srid du skyes bus ma shes pa de srid du de la bde ba dang bde ba'i rgyu med de/kun du rmongs pa'i mun pa'i nang du gnas pa ni sdug bsngal kho na nyams su myong ba yin te dmus long bzhin no/ /gang shes pa ni sdug bsngal 'dren par byed pa ma yin te/ ji skad du/ bde dang rjes mthun ma yin brten ci bya/ 'bras bu dge min bya bas ci zhig bya//legs la mi 'dzud mdza' bo'ang ji zhig rung / sdug bsngal mi spong shes pas ci zhig phan/ /shes pa'i ma ni shing chen dang / /mig dang yid bzhin nor bu ltar/ /des na de phyir 'di las ni/ /bsod nams bu la sogs pa 'byung / /gang zhig 'jig rten bya mi 'jug /de ni 'jig rten 'khrul zhes bya/ /gang zhig mthong ba'i gags byed pa/ /de ni sgron ma zhes mi brjod/ /ces bshad pa lta bu'o/ /ci shes pa gcig gis shes shing mthong ba gcig gis mthong ngam zhe na/ shes bya mtha' yas lta ba de/ /zhes bya ba ste mtha' yas shing dpag tu med pa'i shes pa dang shes par bya ba la lta ba'i ngang tshul 'di la yod pa ste/ji skad du/ dri med bzod rnams shes pa min/ /zad dang mi skye'i blo lta min/ /zhes pa ste/ gang zag dang dbang po'i dbye bas shes bya mtha' yas pa la shes pa ni rnam pa bcu'o/ /shes pa mtha' yas pa de dag kyang gang zhe na/sngon gyi gnas zhes bya ba la sogs pa'o/ /bram ze zhig gis bcom ldan 'das la sogs pa/ tshul gang kun du spyod pa gang / /yon tan gang dang las gang gis/ /chos gang 'phel zhing ldan gyur pas/ /dgra bcom bram zer shes par bya/ /zhes pa dang de las brtsams pa'o//gzhan dag ni mi slob pa gsum dang / rig pa gsum zhes bya ba la sogs pa mdor bsdus nas tshigs bcad gsum mo zhes zer ro/ /sngon gyi skye ba la gnas pa'i skabs ni sngon gyi gnas so/ /de rtogs pa ni ji lta ba bzhin du shes pa'o/ /'das pa'i shes pa bstan nas ma 'ongs pa'i shes ba bshad pa/mtho ris sar song zhes bya ba smos te/ 'byung bar 'gyur zhes bya ba ni tshig gi lhag ma ste bde 'gro dang ngan 'gro yang ngo / /mthong ba dang zhes bya ba ni lha'i mig gis mthong ba'o/ /de nas skye ba zad thob pa'i/ /zhes bya ba ni skye ba zad pa thob pa ste skye ba'i rgyu thams cad spangs pas so//gang gi phyir thub pa mngon shes la brtson pa/ /zhes bya ba la mngon par shes pa ni drug go/ /brtson pa ni gang gis rtogs pa'o/ /yang na mngon par shes pa ni zag pa med pa'i shes rab ste brtson pa ni lhag par zhen pa'o/ /gang mngon par shes pa la brtson pa de ni nams kyang skye ba zad pa thob pa yin no//dper na sgron ma yod pa des ni snang ba yod par 'gyur ro/ /thub pa ni thub pa gang dang ldan pas so/ /sdug bsngal tha mar shes pa zhes bya ba ni 'khor ba'i tha ma'o/ /sems kyi rnam grangs shes pa'i mngon par shes pa bstan pa'i phyir/sems kyis zhes bya ba ste/ gzhan gyi rnam par shes pa zhes bya ba ni tshig gi lhag ma'o/ /bdag nyid kyis ngo mtshar med pas so/ /sems de ji lta bu zhe na/ rnam grol zhes smos te 'dod chags la sogs dang bral ba'o/ /rgyu gang gis nyon mongs pa dag la mngon du ma gyur pa'i sems rnam par grol ba las 'dir dgongs te gtan du spangs pa ni 'og nas brjod pa'i phyir ro//yang na nyams su myong ba'i chos kyi dbang du byas pa ste de las ma nyams pa'i chos kyi sems ni 'og nas brjod pa'i phyir ro/ /shes pa ni rtogs pa'o/ / grol ba dang zhes bya ba ni spangs pa zhes bya ba'i don to/ /gang zhe na/ 'dod chags zhes bya ba ste 'dod chags la sogs pa'o/ /ji lta zhe na/ kun la zhes bya ba ni gtan du'o/ /rig pa ni khyad par gyi shes pa'o/ /gsum ni sngon gyi gnas rjes su dran pa la sogs pa'o/ /ldan pa ni bcas pa'o//gzhan gyi sems shes pa la sogs pa'i mngon par shes pa la sogs pa dang ldan pas ni bram zer 'gyur ro zhes bya ba'i don to/ /yang na mthong ba dang bsgom pa dang mi slob pa'i lam gyis rnam grol zhes bya ba la sogs pa'i tshig rkang dag dang go rims bzhin du sbyar ro//bstan ma thag pa'i khyad par dang ldan pa'i rnam pa smras pa/ gang gis 'chi 'pho rtogs gyur pa/ /zhes bya ba ni ris mthun pa chad do/ /skye ba ni nying mtshams sbyor ba'o/ /thams cad ni rnam pa thams cad do/ /thogs med spyan ldan zhes bya ba ni sgrib pa med pa'i ye shes kyis so//de nyid kyi phyir sangs rgyas ni rnam pa thams cad thugs su chud pa'o/ /gang zhig kun sbyor kun 'das shing / /zhes bya ba la sogs pa smos pa la/ rgyal po'i khab na tshong dpon gyi bu sde drag ces bya ba 'phags pa'i bden pa rtogs pa las mi 'gyur ba de las brtsams so//kun du sbyor ba thams cad las 'das pa ni kun du sbyor ba dgu spangs pa'i phyir ro/ /gang zhig ni gang nyid do/ /yongs su gdung ba med pa ni nyon mongs pas byas pa'i gdung ba nyams su myong ba med pa'o/ /dga' med ni rgod pa dang 'phyar ba la sogs pa med la zag pa dang bcas pa'i dngos po la don du mi gnyer ba ste/sred pa spangs pa'i phyir ro/ /dran ldan zhes bya ba ni yid dran pas gnas pa'i phyir ro/ /ston pa ni bdag nyid kyis de kho na rtogs shing snying rje'i dbang gis gzhan la ston pa'o/ /ji skad du bshad pa/gang zhig ji snyed shes pa sgrub pa'i snod gyur pa/ /blo ldan 'dzin par nus par byed pa'ang rung / /gdul bya'i bag la nyal dang bsam mkhyen nas/ /des ni de sred don ston ston pa yin/ /zhes so/ /gang zhig bdag dang gzhan gyi don phun sum tshogs pa de nyid yang brjod par bya ste/thub pa rnam rgyal zhes bya ba la sogs pa smos so/ /bi ban da ka zhes bya ba'i bram ze zhig rigs dang rig pas shin tu bdag bstod de de bas na/ pha ma phun sum tshogs pa dang / /ji snyed kyi rig byed gsum gyi pha rol tu phyin pa yin no zhes nas de bcom ldan 'das kyi spyan sngar song ste/'di skad du gsungs pa de thos pas rab tu byung zhing dgra bcom pa'i 'bras bu thob po/ /khyu mchog ni de las gzhan pa'i khyu mchog dag las gtso bor gyur pa'i phyir khyu mchog rab mchog go/ /rnam par 'dren pa yin pas mchod pa'i yang mchod pa ste bla mar gyur pa'i don to//ci'i phyir zhe na/ 'di ltar glang po che zhes smos te bdag nyid chen po'i yon tan khyad par can dang ldan pa'i phyir dang / tshul nyams pa med pa'i phyir ro/ /'dis ni chogs chen po bstan to/ /drang srong chen po ni 'dod chags dang bral ba chen po ste shes bya'i sgrib pa spangs pa'i phyir ro//rnam par rgyal ba zhes bya ba ni rnam par rgyal ba gang yin pa de rnam rgyal te lha'i bu'i bdud bcom pa'i phyir ro/ /thub pa ni thub pa dang ldan pa nyid do/ /bkrir med ces bya ba ni nang dang phyi rol gyi 'tshe ba gang gis kyang khrid par mi rung ba'i phyir ro//gtsang sbra'i sbyor ba smras pa/ khrus byas zhes smos te/ legs par spyod pa bcu'i chu rgyun blugs pas sdig pa'i dri ma mtha' dag 'khru bar byed do/ /gang de lta bu nyid ni/ gang zhig srid 'das zhes bya ba la sogs pa yin no/ /gnas brtan 'phags pa pa lan da'i bu/gzhan dag gis ngan pa tha chad ces bya ba la sogs pas spyos te/ de las brtsams pa'o/ /thams cad zil gyis gnon pa yin te/ ji lta zhe na/ 'di ltar srid 'das zhes smos te/ srid pa gsum las rgal ba ni srid pa las 'das pa ste 'di'i 'ching ba spangs pa'o//chu bo las rgal zhes bya ba ni chu bo rnam pa bzhi las rgal ba ste srid pa gsum rtsa nas 'byin par ston to/ /rnam par 'dren pa ni gdul bya'i skye bo rnam par 'dren pa'i phyir ro/ /pha rol phyin pa zhes bya ba ni gnyi ga'i don bsgrubs pas so/ /rnam bral ni de las gzhan pa'i skye bar nying mtshams mi sbyor ba'i phyir ro//nyon mongs pa dang rnam par bral ba'i sbyor bas bskyed pa'i bsam gtan gyi thabs smras pa/ sdig chen rnam par mi sems shing / /zhes bya ba la sogs pas smos so/ /dgon pa pa'i dge slong zhig sbyor bsam bskyed pa'i ting nge 'dzin bsgom pa las ting nge 'dzin gyi mtshan ma las nyams te skyo nas bcom ldan 'das ga la ba der phyin to//ji tsam na de skal ba dang ldan par mkhyen nas/ gzugs dag la nges par sems pa dang / lhag par mngon par brjod pa ni ting nge 'dzin 'jug pa ma yin no zhes bstan nas 'di gsungs so//ting nge 'dzin la gnod pa ni gsum ste gang de las nyams par 'gyur ba'o/ /'di lta ste nges par sems pa dang / lhag par mngon par brjod pa dang / 'dod pa la sogs pa'i rnam par rtog pa ste/ gang gi tshe rnal 'byor gyis gzugs la sogs pa gsal zhing snang ba ste/de la de dag nges par sems pas rab rib bzhin du sems nye bar sbyang ba byas nas nyams par 'gyur ro/ /de bas na bshad pa mi bsgom pa ni de mchog tu byed pa ma yin par brtag par bya'o/ /smra bar mi byed pa ni gang gi tshe rnal 'byor can de nyid sbyor ba goms par byed pas mi gtsang ba sgom pa la gzhol zhing yid la byed pa'i lus la sogs pa'i dran pa nye bar gzhag pa sgom pa la 'bad par mi byed do//brkam par gyur pas don du gnyer ba'i bdag nyid yin gyi brjod pas ni de'i tshe khyad par thob pa yang nyams par byed na sngar ma bsgrubs pa lta smos kyang ci dgos//des na myur ba'i theg pa thob par byed do/ /yang na gnyi ga dang 'gal pa'i yid la byed pa'i bstan pa nyan pa'i bstan pa nyan pa med pa'i phyir ro/ /sdig can rnam par mi sems shing / /zhes bya ba ni 'dod pa la sogs pa'i rnam par rtog pa yid la mi byed pa'o//sprin chen de'i sbyor bas ting nge 'dzin ma yin pa 'dir dper brjod par bya'o/ /sems dben pa bstan nas lus dben pa bshad pa/ 'dug nas smos te shing drung la sogs pa dben par 'dug pa'o/ /de'i 'bras bu ni rdul bral zhes bya ba ste 'dod chags dang bral ba'o//mthong ba'i chos la bde bar gnas pa bstan pa ni sems pa'o/ /'phags pa'i rigs thob pas yid dben pa nyid du bstan pa'i phyir/ /gang zhig phyag dar khrod ces bya ba la sogs pa smos so/ /de nas rgyal rigs shig bdag nyid dmyal bar skyes pa rmi lam gyi nang du mthong ste mi rigs par spyad pa gang gis 'dir skyes par gyur ces dang /btson ra'i mchog bum pa'i nang na gnas pa ni mi rigs pas so/ /gzhan gyi nor nyams par byas pas ni zangs zhun gyi zhu ba'i gos kyis lus la bskon par 'gyur ro/ / tshig ngan pas ni de gtun gyis phye mar byed cing 'joms la brdungs pas gnod par byed do/ /dbyen gyis ni sog les 'dra ba la sogs pa mthong nas skyo ba skyes te/ bcom ldan 'das kyi spyan sngar song zhing rab tu byung nas dgon par song ste phyag dar khrod 'chang zhing rtswa'i stan la 'dug nas ji tsam na khams gsum las 'dod chags dang bral te de'i dbang du mdzad nas 'di gsungs so//byi bas zos pa la sogs pa'i gos gang phyag dar gyi phung po la sogs par bor nas phyag dar khrod du lhung ba ni phyag dar khrod de/ de blangs nas bkru ba dang btsem pa dang btso ba la sogs pas yongs su sbyor zhing 'dzin pa ni phyag dar khrod 'chang ba ste 'dis ni chos gos ngan ngon tsam gyis chog shes pa bstan to//ngo tsha shes pa ni 'dzem pa dang ldan pa ste bsod snyoms ngan ngon tsam gyis chog shes pa bstan to/ /ngo tsha dang bcas pas ni gos la sogs pa gzhan las slong gi kha zas ni ma yin te de don du gnyer ba ni smad pa'i dngos po yin pas mi 'dzem pa yin la/'dir don du gnyer bar yang mi byed de 'dis ni gya nom pa slong ba med par ston to/ /'dod mi lta zhes bya ba ni 'dod pa thams cad la lhag par zhen pa spangs pa ste 'dis ni spong ba bsgom pa la dga' ba bstan to//shing drung dag tu gnas pa zhes bya bas ni gnas mal ngan ngon tsam gyis chog shes pa bstan to/ /yang na phyag dar khrod 'chang zhing / /zhes bya ba la sogs pas ni go rims bzhin du lus dang sems gdul ba dang / lus dang sems dben pa bstan to//'phags pa'i rigs bsgom pa ji lta ba de bshad pa/ gang zhig sdug bsngal zhes bya ba la sogs pa'o/ /gzhan dka' thub can zhig dka' thub drag pos rnam par grol bar 'dod cing phyogs bzhi nas tsher ma rnam pa bzhi la yongs su 'gre zhing 'dug pa gzigs nas 'phags pa'i bden pa bzhi bstan cing de'i 'og tu 'di gsungs so//lam ni thar pa'i thabs so/ /legs par sgom par byed pa ni gang zhig legs par bsten pa ste gang zhe na/ 'phags pa'i lam yan lag brgyad de zag pa med pa'i yan lag brgyad dang ldan pa'o//de ci lta bu zhe na/ drang po zhes bya ba bde ba la sogs pa'i phyogs yin pa'i phyir dang / bgrod pa gcig pa yin pa'i phyir ro/ /zhi ba ni me nye bar zhi bar byed pa'i thabs yin pa'i phyir te/ lta ba bzhin no/ /yang na ci'i phyir 'phags pa zhes bya zhe na/ drang po ste zag pa med pa'i phyir ro//ci'i phyir yan lag brgyad ce na 'di ltar zhi ba ste bkra shis pa yin pa'i phyir ro/ /yang dag pa'i lta ba la sogs pa yan lag brgyad do/ /gang gi don du 'di sgom par byed ce na/ sdug bsngal kun spangs phyir zhes bya ba yin no/ /'phags pa'i lam gyi 'bras bu ni 'gro ba'i go skabs med pa yin no zhes bstan pa'i phyir gang la cung zad ces bya ba la sogs pa'o//de nas bram ze rab tu mang po gcig tu 'dus shing tshogs pa las bcom ldan 'das la bzhugs nas bstabs so zhes rgya cher te bzhugs pa las tshe dang ldan pa maud gal gyi bu rgyang ring po nas gzigs te de'i dbang du mdzad nas tshigs su bcad pa 'di'o//gang la zhes bya ba ni sems can no/ /gnas pa ni kun du 'dzin cing yongs su bzung ba'o/ /cung zad med ces bya ba ni gang na yang ngo / /yang na gnas ni 'gro ba'i gnas skabs te/ de ni cung zad kyang gang na yang med pa'o//yang na gang gis kun du 'dzin par byed pa'i gnas gang la yod pa de sred pa'o/ /kun shes ni zad la mi skye ba'i ye shes thob pa'i phyir te de ni gnas med do/ /rim pa gang gis kun shes pa dang ldan pa yin zhe na bshad pa/ yid gnyis zhes bya ba ste mthong ba'i lam gyi the tshom spangs pa'i phyir ro//zug rngu med pa ni bsgom pas nyon mongs pa thams cad dang bral ba'i phyir ro/ /'chi med go 'phang thob pa de/ /zhes bya ba ni phung po lhag ma dang bcas pa'i mya ngan las 'das pa 'thob pa'i phyir ro/ /lam kho na sems dul bar 'gyur ro zhes bstan pa'i phyir/ gang zhig lus med ces bya ba la sogs pa smos so/ /gang zhig btul bas thams cad thul bar 'gyur/ /zhes kha lo sgyur bas zhus pa las 'di gsungs so/ /ring du 'gro ba ni 'dzin par byed pa ma thob pa ste yul ring ba gnas dum dag 'dzin pa'i phyir ro/ /gcig pu rgyu zhes bya ba ni re re 'jug pa ste 'dir sems kyi rgyud ni gcig go zhes bya ba'i tshig gis so//lus med pa ni gzugs med pas so/ /phug na gnas pa ni ming dang gzugs bsten pa ste gang gi phyir khams gnyis na ni gzugs la brten la/ gzugs med pa'i khams na ni sems ris mthun pa dang srog la brten pas so//gdul dka' ba ni dka' bas gdul bar bya ba yin te/ ring du 'gro ba la sogs pa'i phyir ro/ /sems dul ba thob na ni mya ngan las 'das pa 'thob pa yin no zhes bstan pa'i phyir gang zhig gzugs med ces bya ba la sogs pa smos pas so/ /de nas tshangs pa'i tshe zhes bya ba'i bram ze bcom ldan 'das kyi spyan sngar 'ongs te 'di skad ces gsol te/btsun pa go 'phang gang zhig rtogs na don dam pa'i bram zer 'gyur zhes gsol pa dang / tshigs su bcad pa 'di gsungs so/ /gang la gzugs med pa de ni gzugs med de gzhi rnam pa bcu gcig gis gzugs med pa'i phyir ro//bltar med ni 'di ni 'di'o zhes nges par bstan par mi rung ba ste de lta bu'i dper brjod pa gzhan med cing mi snang bas so/ /mtha' yas pa ni mthar thug pa ste/ thams cad la khyab pa'i phyir nam mkha' bzhin no/ /shin tu bltar med ces bya ni rtogs par dka' bas so//phra ba ni dbang po la sogs pa las 'das pa'o/ /skye ba la sogs pa'i gnod pas mi gnod pa'i gzhi ni mya ngan las 'das pa zhes pa'i gnas so/ /mngon rtogs ni 'gog pa shes pas ji lta ba bzhin du mngon par rtogs pa'o//spyod pa ni 'jig rten gzhan la phan pa'i phyir spyod pa'o/ /yongs su nyams pa med pa'i chos nyid bshad pa/ rtag dran zhes bya ba ste rgyun mi nyams pa'i dran pa la rgyun mi 'chad par gnas pas so/ /kun sbyor zad pa zhes bya ba ni nyon mongs pa bag chags dang bcas pa spangs pa'i phyir ro//'dis spangs pa phun sum tshogs pa bstan nas/ ye shes phun sum tshogs pa ni sangs rgyas zhes pas bstan to/ /gang bcad nas dul bar 'gyur ba de smras pa/ gang zhig sog mig ces bya ba la sogs pa smos so/ /rig byed 'don pa'i bram ze gnyis shig rigs kyis bsnyems shing dregs la/shin du brkam zhing phongs pa de gnyis 'khor gyi dkyil 'khor stong phrag du ma'i nang du zhugs te/ bcom ldan 'das kyi thad du nye bar 'ongs nas/ kye gau ta ma 'jig rten na ni bram ze mchod pa yin no zhes zhus pa dang zhu ba po gnyis las brtsams te tshigs su bcad pa gnyis so//gtubs pa ni bcad pa'o/ /'ching ba ni 'dis 'dzin par byed pa yin pas zhes byas nas te nga'o snyam pa'i nga rgyal 'jig tshogs la lta bar byed cing sems 'dzin par byed pas so/ /gzhan dag ni zhe sdang ngo zhes zer ro/ /sog mig zhes bya ba ni pags pa'i rang bzhin gyi thag pa ste 'dir ni sred pa'o//dper na shing rta'i 'og nas thams cad du shing yongs su bcings nas sog mig dang chings ma byas na khur 'degs pa'i nus pa yod pa de bzhin du/ 'jig rten 'di na yang 'dis bstan te sred pas bcings nas 'khor ba'i sdug bsngal 'degs nus par 'gyur ro//chings ma ni myur du skyed par byed pa'i rang bzhin shing glegs kyi gzer bu la sogs pa 'ching ba yin te 'dir ni gti mug bsal ba'i lhag ma nyon mongs pa dang nye ba'i nyon mongs pa'o/ /rgyang thag bcad nas su zhes bya bas ni dka' bas spangs pa'o/ /thams cad du yang 'di sbyar bar bya ste/rgyang thag bcad pa ni 'ching ba dang sog mig ces sbyar bar bya'o/ /gsum po 'di ni khyim gyi sgo glegs kyi gtan pa bzhin du 'da' bar dka' ba gang yin pa ste ma rig pa'i gdung bas so/ /brtan pa de nyid smras pa/ yongs su gdung spangs zhes bya ba gdung ba yongs su spangs pa ste/'khor gtan bzang po'o/ /gzhan dag tu ni 'obs rgal ba/ /zhes 'byung bas rgal ba ni 'das pa ste ma rig pa'i 'obs lags so/ /rnyed 'dod ces bya ba la 'di ni rnyed pa'i dbye ba ste de la spyir sog mig ces bya bas bstan pa'i phyir ro/ /de la yo byad ma thob pa la lhag par zhen pa ni rnyed pa'o//mnyam par gzhag pa'i khams kyi yo byad ni sred pa'i 'dod pa'o/ /'dod pa'i khams kyi yo byad ni sred pa'i rnyed pa'o/ /de nyid kyi phyir gtan du mi 'dod pa smras pa/ /sdig can zhes smos te sdig pa'i las thams cad 'dren pa'i phyir dang / ser sna la sogs pa de'i mthus gshin rje'i 'jig rten la sogs par skye ba'i phyir te de yang 'dod pa zhes bya ba 'dir 'brang ngo //rtsar bcas zhes bya ba ni rgyu dang bcas pa ste tshor ba'i rkyen gyis sred pa dang ma rig pa'i rgyus kun du 'dod chags pa'i bdag nyid dang / tshul bzhin yid la mi byed pa/ /zhes bya ba la sogs pa'i tshig gis so//tshor ba ni dang po'i rtsa bar gyur par shes par bya'o/ /drungs phyung ba ni rtsa nas bcad pa'o/ /sred pa ni 'di lta ste 'dod pa na ni 'khrig ba'i sred pa'o/ /gzugs na ni bsam gtan gyi sred pa'o/ /gzugs med pa na ni snyoms par 'jug pa'i sred pa'o/ /gsum po 'di ni sog mig ces bya ba'i sgras bstan to//don dam pa'i bram ze ni de yin no zhes nga smra'o zhe'o/ /rnam pa gzhan gyis sems gdul ba smras pa/ brtson pas chu bo zhes bya ba la sogs pa'o/ /shing rta lnga brgya tsam 'brog dgon par ngal so ba na de dag thams cad chu bos khyer te rdzas thams cad khyer zhing tshong pa dag dka' bas srog rnyed de nyam thag pa de'i dbang du mdzad nas btsun pa chu bo 'di ni chung ba lags te 'on kyang chu bo bzhi ni chen po lags so zhes gsol pa dang /'di gsungs so/ /rgyun bcad ces bya ba ni chu bo bzhi las rgal ba ste khyim gyi gnas yongs su dor ba yin no zhes byed pa'i tshig yin no//rgyun bcad pa ni brtson 'grus rtsom pa la rag las pa yin no zhes bstan pa'i phyir/ brtson bas zhes smos so/ /'dod pa thams cad rab bcom zhes bya ba ni 'dod pa'i 'dod chags dang nyon mongs pa'i 'dod chags te lus dang sems dben pa brten pa'am mi gtsang ba la sogs pas 'dod pa na spyod pa'i nyon mongs pa bkag pa'o//'phags lam gyis ni rtsa ba dang bcas par spong ba yin no/ /'du byed rnams kyi zad shes pa/ /zhes bya ba ni gzugs dang gzugs med pa na spyod pa'i spangs pa mngon sum du byas pa'o/ /'dod chags dang bral bar byas nas gzhan gyi don 'tshe ba med par byed do zhes bstan te/sdig med gang yin zhes bstan to/ /'dod chags la sogs 'tshe ba'i rgyu dang bral zhing mi spyod de nges par sdig pa med pa ni 'di'i nges pa'i tshig go/ /pha dang ma ni zhes bya ba la sogs pa la/ /gleng gzhi dang bcas pa'i don dge slong gi tshoms su bstan zin to//stag ces bya ba ni gnod sems kyis kun nas dkris pa dang ldan pa'i sems can bstan te/ dper na stag ni gtum zhing drag la tsham tshom med par sha dang khrag la spyod do/ /de bzhin du gnod sems kyi kun nas dkris pa dang ldan pa yang gdug la dge ba'i rtsa ba thams cad kun du za bar byed pa'i phyir ro//lnga pa ni pha la sogs pa rnam pa bzhi'i phyogs bstan nas 'di ni lnga par gyur ba'o/ /yang na sgrib pa lnga las lnga pa yin pa'i phyir ro/ /de lta bur gyur ba de ni gcig tu mchod pa dang bsnyen bkur byas pa yin no zhes bstan pa'i phyir/gang zhig bram ze zhes bya ba la sogs pa smos so/ /rgyal po'i khab na bram ze skra dang kha spu bregs nas ring por ma lon par dgra bcom pa zhig yod de grong khyer du bsod snyoms kyi phyir zhugs so/ /bram ze'i rigs shing sA la chen po zhig dang sngon nas khon dang rjes su 'brel ba yin te des mgo la lag lcag brgyab po//des smras pa/ sngon ni gzhan bram ze ltar snang la da ltar ni gzhan ltar snang ngo zhes byas pa dang / de khros te yang brgyab po/ /des smras pa bdag la sngon ni nyes pa med na phyis ni nyes pa yod de 'di ltar thob nas cang mi smra bar bdag ci'i phyir ma song zhes pa dang /de mngon par dad nas de las brtsams so/ /bram ze rnams la brdeg mi bya/ /zhes bya ba ni ji skad du bshad pa'i tshul gyis bram ze dgra bcom pa mchod pa'i gnas kyi rgyud la lag pa dang bong ba la sogs pas brdeg bar mi bya ba'o/ / de la ni yid kyis gnod par bsam pa yang mi rigs na brdeg par bya ba lta smos kyang ci dgos te brdeg pa ni nyes par spyod pa 'phel ba'i rgyur gyur pa'i phyir ro/ /bram ze bskrad par mi bya'o/ /zhes bya ba ni nam zhig nas rnyed pa la mchod pa ma byas par ni gtang bar mi bya ba ste/ chos gos dang bsod snyoms la sogs pa de la ma phul bar gtang bar mi bya'o zhes pa'i don to//ji skad du bshad pas/ mi byed na ni smad pa yin no zhes bstan pa'i phyir/ bram ze brdeg pa blun zhes bya ba ste yon tan can la rdeg par byed pa ni smad par bya ba'i 'bras bur nye bar 'gro ba yin no/ / blun zhes bya ba ni smad pa'i don to/ /ji skad du bshad pa/ gang zhig dam pa rdeg byed ngan pa de/ /dam pa rnams kyis shin tu smad pa yin/ /sdig pa mi bzad pa dang 'brel ba'i phyir/ /ngan song du yang de ni 'gro ba yin/ /zhes so/ /skrod par byed pa de ngan pas zhes bya ba ni gang gis de la brten nas bsnyen bkur rnam pa sna tshogs pa ma byas par gtang ba ni de'i phyir bsod nams khyad par can yongs su stsogs pa med pa'i phyir ro//gang bla ma la ma gus pa dang legs par spyod pa la dga' ba de ni smod pa la spyod pa ma yin no zhes bstan pa'i phyir ro/ /gang zhig ces bya ba la sogs pa smos so/ / rgyal po'i khab na kun du rgyu nye rgyal dang pang nas skyes gnas so/ /de la nye rgyal gyis ni rta thul las/ ji ltar 'jig rten zhes bya ba'i tshigs su bcad pa thos pas rgyun du zhugs pa'i 'bras bu thob po/ /de la pang nas skyes kyis lan gnyis thos pas de yang de bzhin du gyur to/ /de nas de gnyis 'khor nyis brgya lnga bcu dang bcom ldan 'das blta ba'i phyir song ngo //thag ring po nas 'phags pa rta thul mthong nas gang dang nye ba las chos thos pa de mchod par bya'o zhes de'i gan du de gnyis lhags pa dang / bram ze khrus byas pa me la bsnyen bkur byed pa yang de'i drung na yod do//de nas 'khor dang bcas par de gnyis thag ring po nas 'ong ba gzigs nas bcom ldan 'das kyis tshigs su bcad pa bzhi gsungs so/ /gang zhig ces bya ba ni gang zag las so/ /chos rnams rnam shes na zhes bya ba ni bshad pa la sogs pa'i chos thos pas rtogs pa la sogs par gyur pa'o//rgan nam zhes bya ba ni na tshod brgyad cu la sogs pa lon par gyur pa'o/ /yang na nor la sogs pa bsags par gyur pa'o/ /gzhon yang rung zhes bya ba ni lo bdun gyis nye bar mtshon pa'i na tshod du gyur pa yin no/ /yang na nor la sogs pa la 'grib pa'o/ / de la bkur zhing zhes bya ba ni mchod pa sngon du 'gro ba dang zhes pas drangs te/ de nyid bla mar shes par byed pa'o/ /phyag byas te zhes bya ba ni 'dud par bya ba ste thams cad du de'i ngag dang mthun par byed pas so/ /'dir dpe bstan pa/ me bzhin no zhes bya ba ni dper na/ me rnam pa gsum la bram ze mchod par byed pa de bzhin no//gtsang mas zhes bya ba ni lus kyi dri ma khrus la sogs pas sel ba yin te gang gi phyir bram ze ni khrus byas nas bsgom pa la sogs pa'i bya ba rtsom par byed do/ /bsnyen bkur te zhes bya ba ni/ nye bar gnas pas tshim par byed pa ste/chos gos dang bsod snyoms dang sman la sogs pa ste ji ltar bram ze me la brten pas zhun mar dang nas la sogs pa bzhin no/ /don dam pa'i chos de gang yin zhe na 'di nyid dbye ba'i phyir/ rdzogs pa'i sangs rgyas kyis bstan pa/ /zhes bya ba smos te/ yang dag par rdzogs pa'i sangs rgyas kyis bshad cing bstan pa'o//lhag ma ni bshad zin to/ /bstan pa'i chos dang rjes su mthun par 'bad pas ni gnod pa thams cad las 'das pa yin no zhes bstan pa'i phyir/ gang tshe bram ze zhes bya ba la sogs pa'o/ /bcom ldan 'das yul ma ko la'i rin gnod sbyin ba ku la'i khang pa na bsnyen bkur ba tshe dang ldan pa ba lang skyong dang thabs cig tu bzhugs so//de nas bcom ldan 'das mtshan mo'i mun pa mun nag gi nang du dal bus rim gyis rim gyis char 'bab la glog 'gyu ba na gtsug lag gi phyi rol mngon par mthangs yod pa nas rgyu zhing 'chag par mdzad do//de nas lha'i dbang po brgya byin gyis 'di snyam du bdag gis 'di bai DU r+ya'i rang bzhin gyi khang par mngon par sprul par bya'o snyam ste de ltar mngon par sprul nas bcom ldan 'das ga la ba der song ste 'chag pa'i rjes su 'chag par byed do/ / de'i tshe ma ga d+h+wa na gnas pa'i mi rnams kyi khye'u dang bu mo ngu bar byed de/ de ni gnod sbyin ba ku la las 'jigs par byed do zhes bsams so/ /chos nyid ni nges par sangs rgyas bcom ldan 'das ji srid bzhugs pa dang / bsnyen bkur ba'i dge slong dag yod pa de srid du med do/ /de nas tshe dang ldan pa ba lang skyong 'di snyam du sems te/sangs rgyas bcom ldan 'das ni yun ring du 'chag par mdzad de/ gang bdag gis phyi rol spu can gyi gos mgo la gon par byas nas 'chag par bya ste/ gnod sbyin ba ku las 'di dag 'jigs par bya'o zhes nas/ /ba ku la ste bdag ni dge sbyong gnod sbyin ba ku la yin no zhes rgya cher te/btsun pa gang zag de lta bu yang chos 'dul ba 'di la mchis so zhes pa nas 'di ltar rgya cher te/ kau shi ka rtogs par gyis shig /gau ta ma'i rigs 'di ltar rtsol ba yang yun ring po nas chos rnam par dag par 'gyur ro zhes pa nas tshigs su bcad pa drug gsungs so//gang gi tshe zhes bya ba ni gang gi dus na'o/ /chos rnams zhes bya ba ni bstan pa dang bsgrub pa'i chos rnams so/ /pha rol du phyin par gyur pa ni mthar phyin pa ste thams cad mkhyen pa thob pa'i phyir ro/ /yang na chos rnams ni zag pa dang bcas pa'i dngos po thams cad do//bram ze pha rol phyin par gyur/ /zhes bya ba la pha rol du byon pa ni de bzhin gshegs pa'o/ /de tshe zhes bya ba ni de nyid kyi tshe na'o/ /sha za gcig pu las kyang zhes bya ba ni sha za ba gtso bo ste chen po las kyang zhes bya ba'i don to/ /zas su sha za bas sha za ste kyang gi sgra ni de'am gzhan bdud kyi ris la sogs pa phyi rol gyi 'jigs pa skyed pa dag bsdu ba'i don to//ba ku la zhes bya ba ni ming ba ku la zhes btags pa'o/ /shin tu 'das zhes bya ba ni lhag par rgal bar gyur pa ste 'di la des 'jigs pa bskyed par mi nus so zhes bya ba'i don to//bcom ldan 'das zad pa shes pa brnyes pas sha za la sogs pa'i 'jigs pa dang bral ba nyi tsher ma zad de 'khor ba'i rgyu dang mtshungs par ldan pa tshor ba yang zad pa yin no zhes bstan pa'i phyir/ de tshe zhes bya ba smos te de'i dus na'o/ /des zhes bya ba ni thams cad las 'das pa gang yin pas so//mthong ba ni 'jig rten las 'das pa'i ye shes kyis dngos po ji lta ba bzhin du gzigs pa'o/ /tshor ba thams cad ces bya ba ni srid pa la brten pa'i tshor ba mtha' dag ste khams gsum gyi'o/ /nub pa nyid du gyur zhes bya ba ni gsal ba sgrub par mi byed de/ bag chags dang bcas pa de la dmigs pa'i nyon mongs pa spangs pa'i phyir ro//gnas spangs pas gnas pa spong bar bstan te/ de tshe des ni zag pa rnams/ zhes smos te/ ji skad du bshad pa/ bde bar tshor bas ni 'dod chags kyis nyal bar byed do zhes bya ba la sogs pa rgya cher ro/ /nyon mongs pa spangs nas des byas pa'i las kyang spangs pa yin no zhes bstan pa'i phyir/de tshe de yis rkyen rnams zhes bya ba ste zag pa las skyes pa'i las yang srid par smin pa ni rkyen gyi sgrar brjod do/ /yang na rgyu la sogs pa bzhi ste rkyen tshogs pa med pa'i phyir bstsal ba yin no/ /rgyu med pas 'bras bu med par bstan pa/kun sbyor thams cad ces bya ba yang dag par sbyor ba yin pas kun sbyor te/ skye ba'i rgyu nying mtshams sbyor ba zhes bya ba'i don to/ /skye ba dang rga ba dang 'chi ba rnams las shin tu 'das zhes bya ba la nying mtshams sbyar nas mngal gyi gnas skabs dang / de las byung ba la sogs pa'i mtshan nyid ni skye ba'o//gnas skabs yongs su 'gyur bar gyur pa ni rga ba'o/ /ris mthun pa chad par gyur ba ni 'chi ba'o/ /shin tu 'das zhes bya ba ni rgal ba ste nges par spangs pa'i phyir ro/ /dang gi sgras ni mya ngan dang smre sngags 'don pa la sogs pa bsdu'o/ /chos rnams yongs su rtogs pas ni 'chi ba la sogs pa las yongs su 'das pa dpe dang bcas pa'i 'bras bu bshad pa/nyin mo nyi ma zhes bya ba la sogs pa'o/ /rgyal po'i khab na bcom ldan 'das bco lnga pa'i gso sbyong mdzad de mtshan mo gso sbyong gi sgo la mngon du phyogs par gyur pa dang nan di mu kha zhes bya ba mtshan mo me'i khams la snyoms par zhugs te de mthong ba dang nam gru dang /ka phyi na dang / gsus po che la sogs pa yang snyoms par zhugs te/ de dag gi gzi brjid kyis rgyal po'i khab mtha' dag nyi ma 'char ba bzhin du gsal bar gyur to/ /ci tsam na rgyal po gzugs can snying po de mtshan mo nyid du langs nas ri brags la la zhig gdul ba'i phyir dpung gi tshogs bshams pa las 'di snyam du mi rnams kyi tshe ni shin tu yang thung ba yin la rgyal bar 'gyur ba yang gang sus shes te/de bas na dang po nyid du bcom ldan 'das zhal mthong bar bya'o zhes bsams nas phyir byung ba dang /shin tu gsal zhing snang bas khyab pa de lta bu mthong nas mngon par dad de/ /de dregs pa med pas go bgos pa'i 'khor dang bcas bcom ldan 'das ga la bder song ngo / /de nas bcom ldan 'das kyis ci tsam na tshigs su bcad pa gnyis gsungs so/ / nyin mo ni nyin par te nam mkha' la sprin la sogs pa dang bral ba'i gsal ba'o zhes bya ba'i tshig gis so/ /gzhan du na mdzes par mi 'gyur ba nyid do/ /gsal bar byed ces bya ba ni rnam par mdzes pa dang rnam par snang bar byed pa'o/ /mtshan mo zla ba snang bar byed/ /ces bya ba ni nub mo ste ston gyi sprin med pa la zla ba shin tu mdzes pa'o//rgyal rigs go chas chas pa gsal/ /zhes bya ba ni go cha legs par bgos pa'i dpung gi tshogs yan lag bzhis yongs su bskor ba'i rgyal po yang mdzes pa de bzhin du/ bram ze sems par byed na gsal/ /zhes bya ba dben pa'i gnas na gnas pa'i bsam gtan dang bsgom pa la mngon par brtson pa'i yid can me'i khams kyi ting nge 'dzin la snyoms par zhugs pa yang shin tu mdzes shing gsal ba yin no//de'i phyir 'dod chags dang bral ba'i ye shes kyi snang bas ni nyin mor nyi ma bzhin du gsal bar byed la/ snying rjes ni mtshan mo zla ba gang ba bzhin du yang dag par tshim par byed ba'o//bzod pa dang ldan pas ni rgyal rigs go chas chas pa bzhin du ste mda'i tshogs kyis gnod pa byas kyang 'gyur ba med par sel bar byed do/ /yang na gnas skabs bzhis lhag par mdzes par ston pa yin no/ /gang sems can lha dang bcas pa'i nang na gnas skabs thams cad du rnam par mdzes par gyur pa yod dam zhe na/nyin mo nyi ma gsal bar byed/ /ces bya ba la sogs pa smos so/ /rtag tu zhes bya ba ni rgyu'i gnas skabs dang / 'bras bu'i gnas skabs sam/ yongs su ma ngan las 'das pa'am yongs su mya ngan las ma 'das pa'i gnas skabs na de bzhin gshegs pa ni rnam par mdzes pa'o//nyin par dang mtshan mo zhes bya ba ni snang ba dang mun pa'i gnas skabs so/ /yang na zhe 'gras pa dang dad par byed pa'o/ /sangs rgyas ni thams cad mkhyen pa nyid la yid gnas pa'i phyir ro/ /gsal bar byed pa ni lus 'od 'dom gang ba la sogs pas so//sems ni snying rje chen po la sogs pas so/ /gzi brjid ni 'od kyis gsal bar byed pa'o/ /bcom ldan 'das ni sku'i 'od kyis rtag tu mdzes pa yin no zhes bsgrubs pas mdzes shing gsal ba yin par bstan pa'i phyir/ ji ltar mi sdug pa las zhes bya ba la sogs pa smos so//rgyal po'i khab 'tsho byed kyi a mra'i nags na bcom ldan 'das bzhugs pa der ma skyes dgra 'ongs te/ btsun pa khyod dang pha la bdag gis gnod pa dang ldan par bgyis te mi dge ba'i bshes gnyen gang la brten pas sdig pa mang po bgyis pa'i phyir/bdag sdig pa bgyis pa la thugs rjes mdzad du gsol zhes bya ba'i bar du ste de las brtsams so/ /bram ze rnams la med ces bya ba ni khams gsum las 'dod chags dang bral ba'i de bzhin gshegs pa la sogs pa'o/ /de 'dra zhes bya ba ni sems can 'di lta bu nyon mongs pa las skyes pa cung zad kyang ngo //ji ltar zhes bya ba ni rgyu gang yang rung ba ste gnod sems dang phrag dog la sogs pas so/ /mi sdug pa las zhes bya ba ni dgra las gnas pa dag las so/ /sangs rgyas bcom ldan 'das ni dgrar rtog pa ci yang mi mnga' ste bag chags dang bcas pa'i phra rgyas spangs pa dang /thugs rje chen po dang ldan pa'i phyir te/ ji skad du bshad pa/ gzhan dag ni sgrub pa gang gis de 'gro ba gsum du byed do/ /khyod ni mdza' bo dang dgra'i nang na yang mdza' bshes bzhin du brtse bas so zhes so/ /yid ldog pa zhes bya ba ni sems ldog pa med pa ste bdag gis de nyid phan gdags par mi bya'o zhes bya ba'o//'o na gang las kyang 'di gnyis 'chi ba la sogs pa ste bcom ldan 'das mya ngan 'das pa las sems ldog par 'gyur ro/ /'phags pa g.yul las rgyal bu dang chung ma la ltos pa med par song ngo zhes bya ba de ji ltar zhe na smras pa/ ji lta ji ltar zhes bya ba ste tshig gi phrad ni sna tshogs pa yin pas so//ji lta ji ltar zhes bya ba ni gang gang las zhes bya ba'i don to/ /de'i zhes bya ba de bzhin gshegs pa'am de'i nyan thos kyi'o/ /yid ldog pa zhes bya ba ni sems chags pa las rnam par ldog pa'o/ /de lta de ltar zhes bya ba ni de las de las zhes bya ba ste dang po nyid du de nyid rtogs pa med pa'i phyir ro//zad pa ni mthong ba'o/ /bden pa ni yod pa'o/ /de khyad par du byed pa ni kun rdzob ces smos te/ las dang nyon mongs pa dang rnam par smin pa'i sgrib pa de'i bdag nyid ces bya ba'i don to/ /gal te de snod ma yin par gyur na ni yul dang dus la gzigs te bcom ldan 'das de las ldog pa yin no//yang na ji lta ji ltar zhes bya ba ni 'di nyid las te de lta de ltar khro ba las yid ldog pa yin no/ /yang na sems can bden pa rtogs pa'i snod du ma gyur par thub pa mchog gis thugs su chud nas bstan pa nyid las ldog pa yin no/ /'dis ni kun rdzob kyi bden pa bstan to/ / chags par khye'u bzhag par gyur kyang de la ltos pa med par 'gro ba'i skye ba la ni 'jig rten pa smod par byed do/ /tshe dang ldan pa g.yul las rgyal gyis de las 'das par byas nas kyang rnam par ldang bar mi byed do zhes bya ba la sogs pa'o/ /'di ltar 'dod chags dang bral ba rnams ni sdug pa dang mi sdug pa med de/'jig rten gyi rjes su 'jug pas ni gang nas kyang 'jug par mi byed cing 'jig rten gyi bag med par mi 'gro bas so/ /yang na ji lta ji ltar ni ji srid ji srid kyi don te/ gang gi phyi ji srid ji srid gdul bya'i sgrib pa nyid yod pa de srid de srid du yid ldog par 'gyur gyi gzhan nyon mongs pa'i rgyus ni ma yin no zhes so//skal ba dang ldan pa dag ni bcom ldan 'das kyi bstan pa la brten nas dngos po'i de bzhin nyid ji lta ba bzhin du rtogs te/ mngon par 'dod pa'i 'bras bu thob pa yin no zhes bstan pa'i phyir/ gang tshe bram ze zhes bya ba la sogs pa smos so/ /de nas bcom ldan 'das mngon par dga' ba'i klu'i rgyal po btang bzung gi khang pa na bzhugs pa las byang chub kyi shing drung ga la ba der gshegs te rtswa'i gdan bshams pa la skyil mo krung bcas te bzhugs nas zhag bdun skyil mo krung la ma g.yos pa nyid du rten cing 'brel bar 'byung ba'i yan lag bcu gnyis lugs su 'byung ba dang lugs las bzlog pa 'di nyid la rnam par gzigs te ting nge 'dzin de las bzhengs nas tshigs su bcad pa bdun gsungs so//gang tshe ni dus gang na'o/ /'di zhes bya ba ni chos gang sngar zhag bdun du gzigs pa de rten cing 'brel bar 'byung ba'i mtshan nyid 'byung ba'o/ / rab tu 'byung 'gyur te zhes bya ba ni rab tu gsal zhing snang bar 'gyur te de kho na nyid kyi shes pas yongs su bzung ba dang nges par byas pa zhes bya ba'i don to/ /de skye ba ni ma yin te skye ba med pas so/ /de bzhin gshegs pa rnams ni skye ba med pa'i chos la gnas pa'o zhes bya ba'i tshig gis so/ /yang na chos ni de bzhin gshegs pa'i rgyud la gnas pa'i yon tan te mthong ba'i lam la brtsams nas zad pa shes pa'i ye shes thob pa dang /sangs rgyas kyi chos ma 'dres pa bco brgyad la sogs pa'o/ /rab tu 'byung bar 'gyur zhes bya ba ni rgyud la spyod pa ste mngon du gyur cing thob pa'o//gang la 'dis dang por 'byung bar 'gyur zhe na/ bram ze zhes bya ba dang sbyar bar bya'o/ /de ji lta bu zhe na/ khyad par gyi tshul gyis bla na med pa'i yon tan rab tu 'byung ba'i rgyu bsod nams dang ye shes kyi tshogs bstan pa'i phyir/ brtson pas zhes bya ba la sogs pa smos te/ rtag tu byed pa dang gus pa'i sbyor ba gnyis kyis myur du byed pa las lhag par spro zhing brtun pa gang la yod pa ni/brtson pa can te de'o/ /'dis ni bsod nams kyi tshogs bstan te brtson 'grus 'di las rgyal ba'i phyir ro/ /bram ze zhes bya ba ni bdag nyid ston pa'i phyir 'dis bstan pa ste bstan ma thag pa'i tshigs bcad la yang bram ze'i sgo nas de bzhin gshegs pa'i skabs su shes par bya'o//bshad pa/ brtson 'grus kyis ni dka' ba gang yang med de/ de bas na brtson 'grus brtsams pa mi 'dor bar bya'o/ /ye shes kyi tshogs smras pa/ sems pa dang zhes bya ba ste ting nge 'dzin bsgom pa 'dis ni shes rab kyi pha rol du phyin pa yongs su rdzogs pa yin te/shes rab med na ting nge 'dzin med do zhes bya ba'i tshig gis so/ /de tshe zhes bya ba la tshig gi phrad ni sna tshogs pa yin pa'i phyir de'i tshe'am/ yang na de ma thag pa'i don te bsod nams dang ye shes kyi tshogs kyi tha ma de ma thag ces bya ba'i don to//de'i zhes bya ba ni bram ze thub pa mchog gis so/ /som nyi ma lus spong zhes bya ba ni yan lag bcu gnyis kyi the tshom thams cad rgyud la gsal ba yin no/ /gang gi tshe zhe na/ gang gis rab shes pa zhes bya ba ste/ gang gis blang bar bya ba mngon par rtogs pa'o/ /ci zhig ce na/ chos rnams rgyur bcas zhes bya ba smos te/rgyu dang bcas pa'i chos ni rgyur bcas so/ /chos ni 'dir 'bras bu ste de yang 'jig rten dang 'jig rten las 'das pa'i dbye ba rnam pa gnyis so/ /'jig rten pa'i ni sdug bsngal gyi bden pa'o/ /'jig rten las 'das pa ni 'gog pa'i bden pa'o/ /rgyu ni kun 'byung dang lam ste go rims bzhin no//yang na chos ni dor ba dang blang bar bya ba'i bdag nyid do/ /rgyu ni nye bar blang ba ste bden pa rnam pa bzhir 'gyur ro/ /de la 'dis ni mthong ba'i lam bstan to/ /rim pa gang gis mthong ba'i lam la 'jug pa de bstan pa ni/ sdug bsngal rgyur bcas zhes bya ba yin te/ sngon du sdug bsngal gyi bden pa rtogs nas phyis ni kun 'byung gi bden pa'o//de bzhin du sngar sdug bsngal las thar ba'i 'gog pa dang / de nas de'i rgyu lam mo/ /yang na gang gis bsgrub pa dang / gang gis thar ba don du gnyen ba des kyang dang por sdug bsngal gyi bden pa yongs su rtogs la de nas de'i rgyu'o/ /nad pa mthong nas de'i nad gzhi dang / nad med pa dang / sman tshol bar byed ba la sogs pa brjod par bya'o//de ltar tshigs su bcad pa gnyis kyis mthong ba'i lam bsgrubs nas tshigs su bcad ba gsum gyis bsgom pa'i lam bsgrub pa'i phyir/ gang tshe zhes bya ba la sogs pa smos so/ /'o na bsgom pas spang bar bya ba la ni the tshom med na de ji ltar dang por som nyi zhes brjod ce na/ thag ring po'i dbang du byas pa'i phyir 'di la nyes pa med do//mthong ba'i lam ni nges par sdug bsngal sngon du rtogs pa yin no zhes brjod la/ sdug bsngal de la yang rnam pa gsum du brjod pa las sdug bsngal shin tu drag cing rags pa spang pa'i phyir ro/ /'dis ni tshor ba thams cad spangs pa nyid du rnal 'byor pa dag 'dod de/ de bas na 'di nyid bstan pa'i phyir/gang gis tshor ba zad pa thob 'gyur ba/ /zhes bya ba yin te/ gang gi phyir 'dod pa las 'dod chags dang bral ba ni mi 'dod pa'i tshor ba thams cad zad pa yin te/ 'dod pa na ni gsum char yang yod ba'i phyir ro/ /gang gi tshe tshor ba zad pa yin zhe na/ gang gis rkyen rnams zad pa thob 'gyur ba/ /zhes bya ba 'di ste tshor ba'i rkyen ni reg pa la sogs pa ste reg pa'i rkyen gyis tshor ba zhes mdo las gsungs pa'i phyir ro//'dis ni rtsa nas 'byin par 'gyur ba yin te gcig tu drungs 'byin pa'o zhes bstan to/ /mnyam par gzhag pa'i sa las 'dod chags dang bral ba bstan pas ni rkyen dang tshor ba thams cad zad pa yin te/ de nyid bshad pa/ gang gis zag pa zad pa thob 'gyur ba//zhes bya ba bsgoms pas phra rgyas thams cad spangs par 'gyur ba'i phyir ro/ /'di man chad mi slob pa'i lam bstan te/ gang tshe zhes bya ba la sogs pa'o/ /zag pa thams cad zad pa'i gnas skabs ni sgrib pa thams cad dang bral ba yin te/ mun pa la ni nyi mas rnam par snang bar byed pa lta bu'o/ de nyid bstan pa'i phyir/snang byed ces smos te chos bstan pa'i snang bas so/ /dug 'gyur ba zhes bya ba ni gdul bya'i don du zhugs pa'o/ /ji zhig snang bar byed pa yin zhe na/ 'jig rten thams cad ces bya ba grogs po dang mdza' ba dang mi mdza' ba dag la ltos pa med par srid pa gsum po thams cad du'o/ /'dir dpe bstan pa/ji ltar nyi ma ltar zhes bya ba yin te dper na nyi ma nam mkha' bar snang sgrib pa med pa la shar cing gnas bas 'jig rten thams cad snang bar byed pa de bzhin no/ /gang zhig de ltar snang bar byed pa yin zhe na/ sangs rgyas bcom ldan 'das de nyid de bag chags dang bcas pa spangs pa thob pas thams cad mkhyen pa'i ye shes dang thugs rje chen po dang ldan pa de nyid bstan pa'i phyir/bdud kyi sde rnams bcom nas gnas 'gyur pa/ /zhes smos te/ bdud kyi sde dang tshogs las nges par rgyal ba ni bdud kyi sde bye ba phrag sum cu rtsa drug bcom pa'i phyir te/ /'jig rten las yang dag pa nyid du nges par rgyal nas gnas pa'o/ /de ltar ga las nges par bya zhe na/ blo yang kun skyed ces bya bas bstan te/gang gi phyir sgrib pa thams cad dang bral ba'i sangs rgyas bcom ldan 'das ni ye shes khyad par can dang ldan pa'i phyir te/ dam pa rnams ni blo'i khyad par gyis rgyal bar byed pa yin no zhes bya ba'i tshig gis so/ /ji skad du bshad pa/ rwa rtse sen mo so yis dgra dag la/ /phyugs rnams dag kyang 'thab mos rtsod par byed/ 'di ni sems kyi rtogs pa'i khyad par gyis/ /gzhu bdung med par yang ni dgra las rgyal bar byed/ /ces so/ /ye shes phun sum tshogs pa bstan nas/ spangs pa phun sum tshogs pa bstan pa'i phyir/ bcings las rnam grol zhing zhes bya ba yin te/ sangs rgyas bcom ldan 'das kyis kun du sbyor ba dgu bag chags dang bcas pa gnyen po khyad par can gyi sbyor bas gtan du spangs shing nyams pa med pa'i chos dang ldan pa nyid kyi phyir ro//bram ze'i tshoms te sum cu rtsa gsum pa'i rnam par 'grel pa rdzogs so// //ched du brjod pa'i tshoms kyi rnam par 'grel pa yul ka ba d+h+yar skyes pa thos pa mang pa'i slob dpon bo d+hi warma'i slob ma yul b+haM ga lar skye ba bzhes pa thams cad yod par smra ba'i slob dpon pra dz+nyA warmas mdzad ba rdzogs so// //'grel pa 'di la sh+lo ka stong phrag bcu gnyis dang lnga brgya yod do zhes rgya gar gyi yi ge las smos/ rgya gar gyi mkhan po sgra'i gtsug lag la 'byam par mkhas pa paN+Di ta dza nar d+ha na dang / zhu chen gyi lo tsA ba ban de shAkya blo gros kyis bsgyur ba'o// //