CLOSE WINDOW

D4099
བོད་ཡིག

@##/ /rgya gar skad du/ u dAn brga/ bod skad du/ ched du brjod pa'i tshoms/ bam po dang po/ thams cad mkhyen pa la phyag 'tshal lo/ /bkra shis par gyur cig /rgyal bas ched du brjod gsungs pa/ /bdag gis rab tu bshad par bya/ /gnyid dang rmugs pa rnams sol la/ /yid la dga' ba bskyed de nyon/ /thams cad mkhyen pa skyob pa po//thub pa chen po thugs brtse ba/ /sku yi tha ma 'dzin pa'i tshe/ /bcom ldan 'das kyis 'di skad gsungs/ /kye ma 'dus byas rnams mi rtag /skye zhing 'jig pa'i chos can yin//skyes nas 'jig par 'gyur ba ste/ /de dag nye bar zhi ba bde/ /de ltar rab tu 'bar ba la/ /ci zhig dgar yod mgur ci yod/ /mun pa'i nang zhugs gnas pa dag / ci phyir sgron ma tshol mi byed/ /rus pa thi ba'i mdog 'dra ba/ /bor ba gang yin 'di dag ni/ /phyogs dang phyogs su rnam 'thor ba/ /de mthong 'di la ci zhig dga'/ /gang gi nub mo kho na nas//mngal du dang por zhugs pa'i mi/ /de ni sdod med 'gror 'gyur zhing / /song ba las kyang ldog pa med/ /snga dro skye bo mang mthong ba/ /phyi dro kha cig mthong mi 'gyur/ /phyi dro skye bo mang mthong ba//snga dro kha cig mthong mi 'gyur/ /skyes pa bud med mang po dang / /dar la bab pa'ang 'chi 'gyur na/ /de la mi 'di gzhon zhes te/ /gson pa'i gdeng drod ci zhig yod/ /kha cig mngal du 'chi bar 'gyur//de bzhin kha cig btsas pa'i sar/ /de bzhin kha cig gog tsam la/ /de bzhin kha cig yongs rgyug na/ /la la rgan dang la la gzhon/ /la la dar la bab pa'i mi/ /rim gyis rab tu 'gro 'gyur te/ / 'bras bu smin pa ltung 'gyur bzhin/ /dper na 'bras bu smin pa rnams/ /lhung bas rtag tu 'jigs pa ltar/ /de bzhin skyes par gyur pa'i mi/ /rtag tu 'chi bas 'jigs par 'gyur/ /dper na rdza ma'i mkhan po yis//'jim pa las ni snod byas pa/ /thams cad tha mar 'jig pa ltar/ /mi rnams srog kyang de bzhin no/ /dper na thags ni brkyang ba la/ /spun ni gang dang gang bcug pa'i/ /spun gyis rting la gtugs pa ltar//mi rnams srog kyang de bzhin no/ /dper na nges par gsad pa dag /gom pa gang dang gang bor bas/ /bsad sa'i drung du bsnyen pa ltar/ /mi rnams srog kyang de bzhin no/ /chu klung brag tu 'bab pa'i rgyun/ /ldog pa med pa ji lta bar/ /de bzhin mi yi tshe 'gro ba//slar ni ldog par 'gyur ba med/ /dka' ba nyid dang thung ba dang / /de yang sdug bsngal ldan pa dag /myur ba kho nar 'jig 'gyur te/ /chu la dbyu gus bris pa bzhin/ /dper na phyugs rdzi dbyug thogs kyis/ /phyugs rnams gnas su phyin byed ltar/ /de bzhin nad dang rga ba yis//mi rnams 'chi bdag drung du skyel/ /chu bran gyi ni chu lta bur/ /nyin dang mtshan mo 'das pa yis/ /mi rnams tshe yang zad 'gyur zhing / /srog kyang nye bar 'jig par 'gyur/ /mel tshe byed la mtshan mo ring / /lam gyis du ba la rgyang grags ring / / dam chos rnam par mi shes pa'i/ /byis pa rnams la 'khor ba ring / /bdag la bu yod de bzhin du/ /nor yod ces pas byis pa brlag /phyi rol nang na bdag med na/ /su yi bu yin ci zhig nor/ /skyes pa bud med rnams kyi rigs/ /brgya dang stong phrag mang po dang / /longs spyod legs par bsgrubs pa yang //'chi bdag dbang du 'gro bar 'gyur/ /bsags pa kun gyi mtha' zad cing / /bslang ba'i mtha' ni 'gyel bar 'gyur/ /phrad pa'i mtha' ni 'bral ba ste/ /gson pa'i mtha' ni 'chi ba yin/ /gson mtha' 'chi ba yin pas na/ / sems can thams cad 'chi 'gyur zhing / /dge sdig 'bras bur nyer 'gro ba'i/ /ji bzhin las kyi rjes su 'brang / /sdig pa'i las kyis dmyal ba dang / /bsod nams byas pas bde 'gro ste/ /gzhan dag gis ni lam bsgoms pas/ /zag med mya ngan 'das par 'gyur/ / gang yang sangs rgyas rang sangs rgyas/ /sangs rgyas rnams kyi nyan thos kyang / /sku lus 'di ni spong mdzad na/ /skye bo phal pa smos ci dgos/ /gang du gnas kyang 'chi bas mi tshugs pa'i/ /sa phyogs de ni yod pa ma yin te/ /bar snang la med rgya mtsho'i nang na med/ /ri bo rnams kyi gseb tu zhugs na'ang min//byung dang 'byung bar 'gyur ba ji snyed pa/ /kun gyis lus 'di btang nas 'gro ba dang / /de kun 'jig par mkhas pas rtogs gyis te/ /chos la gnas kyis tshangs par spyad pa spyod/ /rga ba mthong zhing nad kyi sdug bsngal dang / / sems dang bral ba'i shi ba mthong nas ni/ /ston pas btson ra 'dra ba'i khyim spangs kyi/ /'jig rten phal pas 'dod spong nus re skan/ /rgyal po'i shing rta shin tu bkra ba'ang 'jig /de bzhin lus kyang nye bar rga bar 'gyur/ /dam pa rnams kyi chos 'di dam pa ste/ /mi mchog gzhan rtogs byed cing rga mi 'gyur//rga ba khyod ni blun zhing ngan/ /khyod ni mi rigs byed pa ste/ /yid du 'ong ba'i gzugs 'di yang / /khyod kyis mngon par bcom par 'gyur/ /gang zhig lo ni brgyar 'tsho ba/ /de yang 'chi bdag nyid kyis khrid/ /'di dag dga' bar 'gyur ba'am//yang na na ba'am 'chi bas 'joms/ /rtag tu ldog pa med par 'gro 'gyur zhing / /nyin dang mtshan du rab tu 'jig pa dang / /skye dang 'chi ba'i 'jigs pa dang ldan pa/ /chu tshan nang du gdungs pa'i nya dang 'dra/ /tshe 'di nyin dang mtshan mo dang / /'gro ba dang ni 'dug pa na//chu klung chen po'i rgyun bzhin du/ /phyir mi ldog par 'gro bar 'gyur/ /chu chung nang gi nya lta bur/ /gang zhig nyin mtshan 'da' ba yis/ /tshe 'di shin tu thung 'gyur na/ /de la dga' bar byar mi yod/ /gson mtha' 'chi ba yin pa'i phyir/ /lus 'di yongs su rga ba dang //nad kyi tshang 'di myur 'jig cing / /rnag gi tshogs kyang 'jig par 'gyur/ /kye ma lus 'di mi thogs par/ /stong zhing rnam shes dang bral na/ /dur khrod bor ba'i mgal dum ltar/ /sa yi steng du 'gyel bar 'gyur/ /rgyun du nad kyis mngon gdungs shing / / rtag tu mi gtsang 'dzag pa dang / /rga dang 'chi bas tsher 'grib pa'i/ /lus 'di dor ba cir mi rung / /myur du 'jig cing na ba dang / /rnag dang ldan pa'i lus 'di yis/ /grub dang bde ba bla med pa/ /zhi mchog don du gnyer bar gyis/ /dgun ka dang ni dpyid ka dang / /dbyar ka 'di dag bya'o zhes//byis pa rnam par sems byed pas/ /bar chad mthong bar ma gyur to/ /bu dang nor phyugs 'byor pa la/ /mi yi yid ni rnam chags pa/ /'chi bdag gis ni blangs nas 'gro/ /nyal grong chu bos bdas pa bzhin/ /'chi ba'i dus la bab pa na/ /bu rnams skyabs su mi 'gyur zhing //pha yang ma yin gnyen 'dun min/ /khyod la skyabs su 'gyur ba med/ /'di ni bya ba byas zin don 'di bya/ /de dag byas nas bdag gis 'di bya zhes/ /de ltar mi 'di yongs su shom pa na/ /rga dang nad bcas 'chi bas mngon du bcom/ / de ltar rtag tu ting 'dzin la dga' mnyam par zhog /brtson pa bskyed la skye dang rga ba'i mtha' ma ltos/ /bdud rnams sde dang bcas pa mngon par zil gnon la/ /dge slong dag go skye shi'i pha rol 'gro bar gyis/ /mi rtag pa'i tshoms te dang po'o// //kun rtog las ni 'dod skyes pas//'dod pa'i rtsa bar shes gyis la/ /khyod ni kun rtog ma byed dang / /des na khyod la 'byung mi 'gyur/ /'dod pa rnams las mya ngan skye/ /'dod pa rnams las 'jigs pa 'byung / /'dod pa dag ni rnam spangs na/ /mya ngan med cing 'jigs pa med//dga' ba rnams las mya ngan skye/ /dga' ba rnams las 'jigs pa 'byung / /dga' ba dag ni rnam spangs na/ /mya ngan med cing 'jigs pa med/ /'dod dga'i rnam smin sdug bsngal de/ /dang po mngar la 'bras bu tsha/ /me sgron lag nas ma bor ba/ /mjug tu byis pa sreg byed bzhin//nor bu'i rna cha bu dang bu mo la/ /yongs su chags sems gang yin la ltos na/ /lcags shing gres ma las byas ching ma gang / /de dag dam po min zhes 'phags pas gsungs/ /'dod pa'i ching ma gang yin de lhod kyang / /rab tu dgrol bar dka' zhes 'phags pas gsungs//brtan rnams 'dod pa'i bde la mi lta bar/ /de dag gtubs nas myur du 'gro bar byed/ /'jig rten sna tshogs gang de 'dod min gyi/ /skyes bu'i kun rtog gang yin 'dod pa yin/ /'jig rten sna tshogs de bzhin gnas kyang ni//'on kyang brtan rnams 'di la 'dun pa 'dul/ /mi rnams la ni rtag pa'i 'dod pa med/ /'dod can gang la chags de mi rtag pas/ /yang srid med phyir sems kyis rab spongs la/ /'chi ba'i gnas mi 'gyur bar byos zhes gsungs/ / 'dun pa skyes shing zad par mi byed dam/ /sems la skyon med pa dang dran pa dang / /'dod pa rnams la so sor ma chags gang / /de ni gong du 'pho ba yin zhes gsungs/ /mgar ba yis ni dngul bzhin du/ /blo gros ldan pas rim pa bzhin/ /skad cig skad cig cung zad tsam/ / rang gi dri ma bsal bar bya/ /lham mkhan gyis ni ko ba dang / /yongs su sbyangs nas lham byed ltar/ /'dod pa gang dang gang spangs pa/ /de de bde ba phun sum ldan/ /gal te bde ba kun 'dod na/ /'dod pa thams cad yongs su spongs/ /'dod pa thams cad yongs spangs pas//mchog tu bde ba thob par 'gyur/ /ji srid 'dod pa'i rjes 'brang ba/ /de srid bar du ngoms mi 'gyur/ /de las gang dag shes rab kyis/ /ldog byed de dag tshim pa thob/ /'dod pas ngoms par mi 'gyur bas/ /shes rab kyis ni ngoms pa bskyed/ / shes rab kyis ni ngoms pa'i mi/ /srid pa'i dbang du mi 'gyur ro/ /'dod la chags pa'i mi gang yin/ /de dag kye ma chos min dga'/ /cung zad gson por 'dug pa na/ /bar chad mthong bar mi 'gyur ro/ /blo ngan longs spyod kyis bcom pa/ /pha rol tshol bar mi byed cing //bsam brlag 'dod la sred pa yis/ /bdag dang gzhan yang phung bar byed/ /kAr ShA pa Na'i char bab kyang / /'dod pa rnams kyis ngoms mi 'gyur/ /'dod pa mnog chung nyes mang bar/ /mkhas pa rnams kyis khong du chud/ /lha yi 'dod pa rnams la yang //lhag par dga' bar mi 'gyur gyi/ /rdzogs sangs rgyas dang nyan thos rnams/ /sred pa zad pas dgyes par 'gyur/ /gangs can dang ni mnyam pa yi/ /gser gyi ri bo yod gyur kyang / /nor des gcig kyang mi tshim par/ /rtogs par gyis la legs par spyod//gang dag sdug bsngal de yi rgyur shes pa/ /de dag nam yang 'dod la dga' mi 'gyur/ /'jig rten dag na zug rngu'i rgyur shes nas/ /de dag gdul phyir bstan pa slob par byed/ /'dod pa'i tshoms te gnyis pa'o// //lus can rnam par rtog pas rab bcom nas//'dod chags mi bzad gtsang bar rjes lta bas/ /'dod chags phyir zhing rab tu 'phel 'gyur te/ /rang gi 'ching ba de yis dam por byed/ /gang dag rnam rtog nye bar zhi dga' zhing / /mi sdug sgom pa rtag tu dran byed de/ /de yi sred pa rab tu spangs pa yis//rang gi 'ching ba de dag 'drul bar byed/ /'dod pa mun nag dra bas g.yogs/ /sred pa'i dgab pas bkab pa dang / /bag med 'ching bas bcings pa dag /tshed mar chud pa'i nya dang 'dra/ /skyes bu bag med rab tu spyod byed pa/ /'khri shing bzhin du sred pa 'phel 'gyur zhing //rga dang 'chi ba'i rjes su 'gro 'gyur te/ /ma drung nu zho 'dod pa'i be'u dang 'dra/ /mi dag dran par byed dang chags byed dang / /yid bde ba la rtog par byed pa dag /de yis yang dang yang du 'khor bar 'khyam/ /tshal nang 'bras bu 'dod pa'i spre'u dang mtshungs//mi gang rtag tu bde bar 'dod byed pa/ /skye dang rga bar nye bar 'gro 'gyur zhing / /skye dgu sred pa rnams kyis mdun du bdar/ /rgya nang ri bong yongs su rgyug pa bzhin/ /sred pa rnams kyis 'dud pa'i sems can dag /srid dang srid min dag la sems chags shing //kun sbyor ro la dga' ba'i byis pa rnams/ /yang dang yang du sdug bsngal thob par 'gyur/ /skye bo grub dang bde ba dang bral zhing / /bdud kyi sbyor ba dag dang ldan pa de/ /rga dang 'chi ba'i rjes su 'gro 'gyur te/ /ma drung nu zho 'dod pa'i be'u dang 'dra/ / 'di na sred pa de 'dra spong byed pa/ /srid dang srid min dag la sred bral zhing / /dge slong srid pa zil gyis gnon byed pa/ /lhag ma med par yongs su mya ngan 'da'/ /gang zhig 'jig rten spang dka' ba'i/ /sred pa'i bud med 'dis bkol ba/ /de yi mya ngan 'phel 'gyur te/ / rtswa la char pa bab pa bzhin/ /gang zhig 'jig rten spang dka' ba'i/ /sred pa'i bud med 'di spong ba/ /de yi mya ngan ldog 'gyur te/ /pad+ma las ni chu thigs bzhin/ /de phyir ji snyed 'dir lhags pa/ /khyed la smra yis khyed bde shog /u shir phyir ni rtswa bzhin du//sred pa rtsar bcas drungs nas phyung / /skyes bu sred pa dang 'grogs na/ /yun rings dus su 'khyam 'gyur bas/ /sred pa drungs nas phyung shig dang / /mya ngan med cing 'jigs pa med/ /yang dang yang du nyer len cing / /yang dang yang du mngal du 'jug /gnas skabs 'gyur dang gzhan 'gyur bas/ /sems can 'ong dang 'gro bar byed/ /'dir ni spang dka'i sred pa de/ /spongs la sa bon chod cig dang / /de la sred pa med 'gyur zhing / /de ni yang du 'khor mi 'gyur/ /dal 'byor chud ni ma gzan par//gang gis lha dang mi rnams su/ /don gnyer bcings nas 'jog byed pa/ /yul la sred pa de las rgol/ /sems can dmyal bar skyes na yang / /dal 'byor thal bas 'gyod par 'ong / /gang tshe srid mtsho'i rgyur 'gyur ba/ /yul la sred pa 'bras kyi gzhi//'khri shing dra bas khebs byed pa/ /gdung bar byed pa ma btul na/ /sdug bsngal 'di ni yang dang yang / /rnam pa kun du ldog mi 'gyur/ /dper na ljon shing rtsad nas ma bton na/ /bcad kyang phyir zhing skye ba kho nar zad/ /de bzhin sred pa'i phra rgyas ma bton na//yang dang yang du sdug bsngal 'di mi ldog /dper na bdag nyid kyis ni byas pa'i mtshon/ /de yis rkun po'i mthu yis bdag gsod ltar/ /de bzhin nang gi sems las byung ba yi/ /sred pas lus can nye bar gsod par byed/ /de ltar sred las sdug bsngal dag /'byung ba'i nyes dmigs shes gyis te/ /sred spongs nye bar len med dang / /dran ldan dge slong kun du rgyus/ /sred pa'i tshoms te gsum pa'o// //bag yod 'chi med gnas yin te/ /bag med pa ni 'chi ba'i gnas/ /bag yod 'chi bar mi 'gyur te//bag med pa ni rtag tu 'chi/ /de yi khyad par de rig pas/ /mkhas pa rnams ni bag dang ldan/ /bag yod pa la rab dga' ba/ /'phags pa'i spyod yul dga' ba yin/ /de la rgyun du sgom pa dang / /rtag tu pha rol gnon brtan pa'i/ /brtan pas grub bde bla med pa'i//mya ngan 'das la reg pa yin/ /gang tshe mkhas pas bag yod pas/ /bag med bcom pa de yi tshe/ /shes rab khang bzangs steng 'dzegs nas/ /mya ngan med pas gdung bcas dang / /brtan rnams ri bo'i spo dag la/ /sa stengs byis pa rnams la lta//brtson 'grus dang ni bag yod dang / /yang dag sdom dang dul ba yis/ /mkhas pas gling du byas nas ni/ /chu bo chen po mngon du bzlog /brtson 'grus ldan zhing dran dang ldan pa dang / /spyod pa gtsang zhing brtags nas byed pa dang / /yang dag sdom dang chos kyis 'tsho ba dang //bag yod rnams kyi grags pa mngon par 'phel/ /lhag pa'i sems la bag bya ste/ /thub pa'i thub gzhi rnams la bslab/ /nyer zhi rtag tu dran ldan pa'i/ /skyob pa mya ngan med pa yin/ /dman pa'i chos la mi rten cing / /bag med pa la brtan mi bya//log par lta la 'dod med dang / /'jig rten 'phel bar mi bya'o/ /'jig rten pa yi yang dag lta/ /chen po su la yod gyur pa/ /de ni tshe rabs stong du yang / /ngan 'gror 'gro bar mi 'gyur ro/ /bag med pa la sbyor byed pa/ /skye bo byis pa bsam brlag yin//tshong dpon nor rnams srung ba ltar/ /mkhas pas bag dang ldan par bya/ /bag med pa la mi sbyor zhing / /'dod la dga' ba mi stsogs dang / /rtag tu bag yod sems byed pa/ /zag pa zad pa thob par 'gyur/ /zag pa zad pa ma thob kyang / /dus 'dir bag med mi bya ste//ri dwags ma yis seng ge ltar/ /bag med pa dag bsad par 'gyur/ /bag med pha rol bud med sten byed pa'i/ /mi gang yin la gnas skabs 'di bzhi 'byung / /bsod nams mi thob bde bar mi nyal dang / /gsum pa smad 'gyur bzhi pa dmyal bar 'gyur/ / bsod nams ma thob sdig pa'i 'gro ba dang / /'jigs dang bag tsha lhan cig bde ba chung / /rgyal po'i chad pa chen pos gcod 'gyur zhing / /lus zhig sems can dmyal ba rnams su 'tshed/ /gang zhig bdag bde lta 'dod pa/ /des ni gong ma bzhin du bya//byis pa'i shing rta bzhin 'gyur bas/ /brtan pas brtson 'grus zhan mi bya/ /dper na byis pa'i shing rta dag /lam chen bzang po bor nas su/ /lam ngan dag tu 'gro byed pas/ /mig chags sems khong chud pa ltar/ /de bzhin chos ni spangs nas kyang / / chos min rjes su 'jug byed pa'i/ /byis pa 'chi bdag dbang 'gro zhing / /mig chags bzhin du bcom pa 'thob/ /gang zhig bya ba rnams spangs nas/ /mi bya ba dag byed pa dang / /bag med pa yis rlom byed pa/ /de dag rnams kyi zag pa 'phel/ /gang gis zag pa 'phel 'gyur ba//de yi zag med rgyang ma na/ /gang zhig lus gtogs dran pa dag /rtag tu legs par brtsams pa dang / /bya ba ma yin mi byed cing / /rgyun du bya ba byed pa dang / /dran dang shes bzhin ldan pa de'i/ /zag pa rnams ni zad par 'gyur/ /gang gi zag pa zad gyur pa//des ni zag med thob par 'gyur/ /ji tsam mang du smra byed pa/ /de dag dam chos 'dzin ma yin/ /gang dag 'di na thos nyung yang / /lus kyis chos dag mngon sum byas/ /gang dag chos la bag byed pa/ /de dag dam chos 'dzin pa yin/ /gal te rigs bcas mang du smras kyang ni//bag med mi dag de ltar byed mi 'gyur/ /dper na phyugs rdzis gzhan gyi phyugs bgrangs ltar/ /de dag dge sbyong skal ba thob ma yin/ /gal te rigs bcas nyung du smra byed kyang / /chos kyi rjes su chos la spyod pa dang / /'dod chags zhe sdang gti mug spong byed pa//de dag dge sbyong skal ba thob pa yin/ /bag yod bsngags pa rjod byed cing / /rtag tu bag med la smod pas/ /bag yod mchod sbyin brgya pa yang / /lha rnams nang na gtso bor gyur/ /bya ba byas rung ma byas rung / /mkhas pa bag yod bsngags pa brjod//bag dang bcas pa'i mkhas pa yis/ /don gnyis rab tu len par byed/ /tshe 'di'i don ni gang yin dang / /phyi ma'i don ni gang yin pa/ /de dag brtan pas rtogs pas na/ /mkhas pa zhes ni brjod pa yin/ /dge slong bag yod la dga' zhing / /bag med pa la 'jigs lta bas//bdag nyid ngan 'gro las 'dren te/ /'dam rdzab las ni glang chen bzhin/ /dge slong bag yod la dga' zhing / /bag med pa la 'jigs lta bas/ /sdig pa'i chos rnams sprul par byed/ /rlung gis ljon shing lo ma bzhin/ /dge slong bag yod la dga' zhing //bag med pa la 'jigs lta bas/ /kun du sbyor ba phra sbom dag /me yis bsregs pa bzhin du 'gro/ /dge slong bag yod la dga' zhing / /bag med pa la 'jigs lta bas/ /kun du sbyor ba kun zad pa/ /rim gyis nyams su myong bar 'gyur/ / dge slong bag yod la dga' zhing / /bag med pa la 'jigs lta bas/ /'du byed nyer zhi zhi ba yi/ /zhi ba'i go 'phang so sor rtogs/ /dge slong bag yod la dga' zhing / /bag med pa la 'jigs lta ba/ /mya ngan 'das dang nye ba'i phyir/ /yongs su nyams 'gyur mi srid do//brtson 'grus ldan zhing bag yod dang / /chos spyod legs par spyod byed pa/ /'jig rten 'di dang pha rol du/ /chos spyad pa yis bde ba thob/ /zhi phyir bslab pa la brten dang / /rtsol ba dang ni brtson 'grus skyed/ /mi dran pa dang bag med dang / / brtson 'grus chung dang kun sdom med/ /gnyid dang snyom dang g.yeng ba ste/ /'di dag bslab pa'i bar chad pas/ /khyed kyis yan lag de rtogs la/ /dran pa chud ni ma gzan cig /dge slong tshul khrims bzang ba dang / /bag yod pa la dga' ba yis/ /kun rtog legs par mnyam zhog ste//rang gi sems ni rjes su srungs/ /brtsam par bya zhing dbyung bar bya/ /sangs rgyas bstan la 'jug par bya/ /'dam bu'i khyim la glang chen bzhin/ /'chi bdag sde ni gzhom par bya/ /gang zhig chos 'dul 'di nyid la/ /bag dang ldan par spyod byed pa//skye ba'i 'khor ba rab spangs nas/ /sdug bsngal tha mar byed par 'gyur/ /bag yod pa'i tshems te bzhi pa'o// //sdug pa rnams las mya ngan skye/ /sdug pa rnams las 'jigs pa skye/ /sdug pa dag ni rnam spangs na/ / mya ngan med cing 'jigs pa med/ /sdug gu ma las mya ngan skye/ /sdug las sdug bsngal sdug las 'jigs/ /sdug gu ma dag gzhan gyur na/ /yi mug 'gyur ba thob par byed/ /'jig rten sdug bsngal rnam pa du ma dang / /mya ngan smre sngags 'don pa ji snyed pa/ /de dag sdug pa dag las rten te 'byung //sdug pa spangs na de dag yod mi 'gyur/ /gang phyir 'jig rten 'ga' na'ang sdug med pa/ /gang yin de dag bde zhing mya ngan med/ /de bas gdung med rdul bral don gnyer bas/ /nam yang sdug par byed pa mi bya'o/ /sdug pa ma mthong sdug bsngal la//mi sdug mthong na'ang de bzhin pas/ /nam yang sdug dang phrad mi bya/ /mi sdug dang yang phrad mi bya/ /sdug pa dang ni bye bral dang / /mi sdug pa dang phrad pa yis/ /gang gis mi dag rgas byed pa'i/ /mya ngan mi bzad skye bar 'gyur/ /sdug pa shi bar gyur pa na/ /gnyen 'dun mdza' bshes mang po dag /yun rings dus su mya ngan dang / /sdug dang bral bas sdug bsngal 'gyur/ /gang la sdug dang sdug min med/ /de la mdud pa yod min pas/ /de ltas sdug nyid sdig can la/ /sdug par byed pa mi bya'o/ /sdug la bltas te don btang nas//bde sbyor rnams la mi 'jug cing / /bdag nyid mi bde'i sbyor ldan dag /bde sbyor don ldan rnams la smon/ /gzugs sdug bde bas bsdams pa dag /lha mi so so'i ris dag tu/ /sdig pa byed cing yongs nyams nas/ /rga dang 'chi ba'i dbang du 'gro/ /gang zhig nyin dang mtshan rnams su//bag yod gzugs sdug spong byed pa/ /des ni spang dka' bdud zas dang / /sdig pa'i rtsa ba'ang drungs nas phyung / /legs min legs pa'i tshul dang ni/ /sdug min sdug pa'i tshul gyis dang / /sdug bsngal bde ba'i tshul gyis su/ /bag med rnams ni mngon du 'joms//gal te bdag la dga' byed na/ /nyes par byed pas bde ba dag /bde blag kho nar mi 'thob pas/ /'di ni sdig la gzhug mi bya/ /gal te bdag la dga' byed na/ /legs par byed pas bde ba dag /bde blag kho nar thob 'gyur bas/ / 'di ni sdig la gzhug mi bya/ /dper na dgon pa'i grong khyer dag /brtan pa'i 'obs kyis bskor ba dag /gal te bdag la dga' byed na/ /'di ni bsrung bas legs par bsrung / /gal te bdag la dga' byed na/ /thun gsum gang yang rung ba la/ /mkhas pas mel tshe bya ba yis//'di ni sba bas legs par sba/ /dper na dgon pa'i grong khyer dag /phyi nang srung bar byed pa ltar/ /dal 'byor chud ni mi zos pa/ /de ltar bdag ni bsrung bar bya/ /sems can dmyal bar skyes na yang / /dal 'byor thal bas 'gyod par 'ong //phyogs rnams kun du sems kyis yongs brtags kyang / /bdag las ches sdug 'ga' yang ma mthong ba/ /de ltar so sor gzhan la'ang rang sdug pas/ /de phyir bdag dgas gzhan la gnod mi bya/ /thams cad la yang srog ni sdug /thams cad chad pas 'jigs pa na//rang gi nyams las dpag gyis te/ /brdeg par mi bya gsad mi bya/ /rgyang thag bcad par spyugs pa'i mi/ /ring nas nye zho med 'ongs nas/ /gnyen bshes mdza' bo lhags nas su/ /a la la zhes mngon par dga'/ /de bzhin bsod nams byas pa'i mi//'jig rten 'di nas pha rol du/ /phyin tshe gnyen bzhin bsod nams dag /'ongs nas mngon par dga' bar byed/ /de bas 'jig rten pha rol gyi/ /ched du bsod nams bsags par gyis/ /bsod nams 'jig rten pha rol du/ /lus can rnams kyi gnas su 'gyur//gang zhig legs spyad spyod byed pa'i/ /dge la lha rnams stod par byed/ /'di na'ang smad par mi 'gyur la/ /mtho ris su yang dga' ba 'thob/ /chos gnas tshul khrims phun sum tshogs/ /ngo tsha shes shing bden par smra/ /rang gi bya ba byed pa la//skye bo gzhan rnams dga' bar byed/ /rang gi don ni byed pa la/ /'di ltar gzhan rnams dga' 'gyur zhing / /mthong ba'i chos la bsngags pa dang / /pha rol du yang bde 'gror 'gyur/ /gtam na gnang ba'i tshig smra dang / /mi rigs spyod las bzlog pa la//dam pa rnams ni dga' bar byed/ /dam pa ma yin dga' mi 'gyur/ /de bas mchog dang mchog min pa/ /shi 'phos bral bar gyur pa na/ /dam pa ma yin dmyal bar 'gro/ /dam pa mtho ris 'gro bar 'gyur/ /sdug pa'i tshoms te lnga ba'o// // bsngags par 'gyur dang nor 'thob dang / /pha rol bde 'gror dga' 'gyur ba'i/ /bde ba gsum po don gnyer ba'i/ /mkhas pas tshul khrims bsrung bar bya/ /'phags dang mthong ba phun tshogs dang / /'jig rten zhi ba rten 'gyur ba'i/ /gnas gzhan 'di dag mthong ba yi//mkhas pas tshul khrims bsrung bar bya/ /lus la yongs su gdung med par/ /tshul khrims kyis ni bde ba 'thob/ /mtshan mo bde bar nyal ba dang / /sad pa na yang dga' bar 'gyur/ /sbyin pa tshul khrims ldan pa dag /mkhas pas byas pa'i bsod nams kyis//'di dang pha rol dag tu yang / /rtag tu bde ba 'thob par 'gyur/ /rgan pa'i bar la tshul khrims dge/ /dad la rab tu gnas na legs/ /mi yi rin chen shes rab ste/ /bsod nams chom pos dbrog par dka'/ /dge slong tshul khrims la gnas shing //dbang po rnams kyang bsdams pa dang / /zas kyi tshod ni rig pa dang / /mi nyal ba la 'bad pa ste/ /de ltar gnas par brtson pa dang / /nyin mtshan snyom las mi byed pa/ /mya ngan 'das dang nye ba'i phyir/ /yongs su nyams 'gyur mi srid do/ /mi ni tshul khrims la gnas nas//sems dang shes rab sgom pa la/ /brtson zhing nges gnas dge slong gis/ /sdug bsngal zad pa thob par 'gyur/ /de phyir rtag tu tshul khrims dang / /ting 'dzin rjes su bsrung ba dang / /lhag mthong la ni bslab pa dang / /shes bzhin so sor dran par bya//des ni kun sbyor zad byas nas/ /yid bral lhag ma med 'gyur te/ /lus zhig shes rab ldan pa yis/ /bgrang du med pa'i mya ngan 'das/ /gang zhig tshul khrims ting 'dzin dang / /shes rab 'di gsum legs bsgoms te/ /shin tu dri med mthar phyin cing / / gdung med yang srid zad 'gyur dang / /chags pa'i 'ching las rnam grol zhing / /lus spangs shes rab ldan pa dang / /bdud kyi yul las 'das pa dag /nyi ma bzhin du lam mer 'bar/ /dge slong phyi dang nang nyid la/ /bag med rlom par byed pa yi/ /tshul khrims ting 'dzin shes rab rnams//yongs su rdzogs par mi 'gyur ro/ /sprin gyis khebs las char 'bab cing / /nam thang ba las char mi 'bab/ /de bas khebs pa sol cig dang / /'di ltar char pa 'bab mi 'gyur/ /de ltar rtag tu mthong ba dang / /dge slong tshul khrims sdom pa yis//mya ngan 'das par 'gro ba'i lam/ /myur ba kho nar rnam par 'dag /me tog dri ni rdzi phyogs min mi 'gro/ /rtsa ba rgya spos tsan+dan rnams kyang min/ /dam pa'i dri ni rdzi phyogs mi 'gro ste/ /phyogs rnams kun du mi mchog dri yis khyab/ / rgya spos dang ni tsan+dan dang / /ut+pa la dang ma li ka / spos kyi rigs ni 'di dag pas/ /tshul khrims dri bsung phul du phyin/ /rgya spos tsan+dan gang yin pa'i/ /dri bsung 'di ni chung ngu na/ /tshul khrims ldan pa'i dri bsung gang / /des ni 'di dang mtho ris khyab/ / de ltar bag yod gnas bya zhing / /tshul khrims rnam par dag par bya/ /yang dag shes pas rnam grol na/ /bdud kyi lam ni rnyed mi 'gyur/ /'di ni bde bar 'gro lam ste/ /rnam par dag byed lam 'di la/ /rab tu zhugs te bsgoms nas kyang / /bdud kyi 'ching ba spang bar gyis//tshul khrims kyi tshoms te drug pa'o// //lus kyis nyes par spyod spang zhing / /lus kyis legs spyad spyad pa'i phyir/ /lus kyi nyes chen las bsrungs na/ /lus ni bsdam pa byas par 'gyur/ /ngag gis nyes par spyod spang zhing / / ngag gis legs spyad spyad pa'i phyir/ /ngag gi nyes chen las bsrungs na/ /ngag ni bsdam pa byas par 'gyur/ /yid kyis nyes par spyod spang zhing / /yid kyis legs spyad spyod pa'i phyir/ /yid kyi nyes chen las bsrungs na/ /yid ni bsdams pa byas par 'gyur//lus kyis nyes par spyod spang zhing / /ngag gis nyes par spyod pa spang / /yid kyis nyes par spyod spang zhing / /skyon gzhan ldan pa gang yin spang / /lus kyis dge ba rnams bya zhing / /ngag gis dge ba phal chen bya/ /yid kyis dge ba rnams bya zhing / / tshad med bzhi dang ldan par bya/ /lus kyis dge ba rnams bya zhing / /ngag dang yid kyis byas na ni/ /'di dang pha rol dag tu yang / /rtag tu bde ba thob par 'gyur/ /rtag tu lus ni bsdams pa'i phyir/ /thub pa 'tshe ba med pa yin/ /de ni 'chi med gnas 'gro zhing / / gang du song na'ang mya ngan med/ /rtag tu ngag ni bsdams pa'i phyir/ /thub pa 'tshe ba med pa yin/ /de ni 'chi med gnas 'gro zhing / /gang du song na'ang mya ngan med/ /rtag tu yid ni bsdams pa'i phyir/ /thub pa 'tshe ba med pa yin/ /de ni 'chi med gnas 'gro zhing //gang du song na'ang mya ngan med/ /brtan pa rnams kyis lus bsdam zhing / /brtan pa rnams kyis ngag kyang bsdam/ /brtan pa rnams kyis yid bsdam zhing / /brtan pas kun du bsdams byas na/ /de dag 'chi med gnas 'gro zhing / /gang du song na'ang mya ngan med//lus kyi sdom pa legs pa ste/ /ngag gi sdom pa legs pa yin/ /yid kyi sdom pa'ang legs pa ste/ /thams cad du ni sdom pa legs/ /kun du bsdams pa'i dge slong ni/ /sdug bsngal kun las rnam par 'grol/ /ngag rnams bsrung zhing yid rnams legs bsdams te//lus kyis mi dge ba dag spyad mi bya/ /las lam gsum po 'di dag rnam sbyangs na/ /drang srong gsungs pa'i lam ni thob par 'gyur/ /legs par spyad pa'i tshoms te bdun pa'o// //gang dag byas bzhin ma byas zer ba dang //brdzun du smra ba dmyal bar 'gro bar 'gyur/ /mi de gnyis ka 'dra ba pha rol du/ /song nas dman pa'i chos dang ldan par 'gyur/ /skyes bu skyes pa'i kha nas ni/ /tshig ngan smra bar byed pa yi/ /tshig gi sta re skyes gyur nas/ /bdag nyid gcod par byed par 'gyur/ / gang zhig smad 'os skye bo stod byed dang / /bstod 'os skye bo rnam par smod byed pa/ /de ni kha yis 'thab krol kun stsogs shing / /'thab krol can gang des ni bde mi 'thob/ /gang 'dir cho los rang nor 'pham byed pa/ /'thab krol de ni chung zad tsam du zad/ /gang zhig bde bar gshegs la yid 'khrug pa//de 'dir 'thab krol shin tu chen po yin/ /ngag yid 'phags pas smad pa'i sdig bsten na/ /bye bar chu bur can dang stong phrag ni/ /bzhi bcu gcig tu chu bur rdol ba yi/ /sems can dmyal ba rnams su 'gro bar 'gyur/ /sdig pa'i sems kyis ma nyes skyon brjod pa//bdag nyid gsad phyir dmyal ba spel bar zad/ /stobs ldan nyes pa dag ni bzod byed cing / /de la sems kyang 'khrug par mi byed do/ /bsam brlag gang zhig sdig can gyi/ /lta la brten nas 'phags pa ni/ /dgra bcom chos kyis 'tsho ba dang //bstan pa spong bar byed pa dag /smyig ma 'bru chags lta bur ni/ /de ni rang gi 'bras bus gsod/ /tshig bzang kho na smra bya yi/ /sdig pa can dag smra mi bya/ /sdig can gdung byed smra ba bas/ /tshig bzang smra bar byed pa rung / / byis pa sdig can smra byed pa/ /smra ba'i tshe na 'ching 'gyur la/ /gal te smra na gzhan spong ba/ /de dag 'phags pa mi gsung ngo / /dge slong dag ni bsdams pa dang / /dal bus smra zhing rlom pa med/ /gang zhig chos ldan don ston pa/ /de ni snyan par smra ba yin/ / legs par smra ba mchog ces 'phags pa gsungs/ /snyan smra mi snyan ma yin de gnyis pa/ /bden smra ba rdzun pa ma yin de gsum pa/ /chos smra phal pa ma yin bzhi pa de'o/ /tshig de rnams ni smra bya zhing / /gang gis bdag kyang mi gdung la/ /pha rol la yang gnod med pa'i//tshig de legs par smra bar bya/ /gang gis mngon par dga' 'gyur zhing / /gang gis sdig pa mi skyed dang / /smras pas pha rol dga' 'gyur ba'i/ /snyan tshig kho na smra bar bya/ /bden pa'i tshig ni bdud rtsi ste/ /bden pa'i tshig ni bla med yin//don dang chos la rab gnas pa/ /bden pa yin zhes dam pa gsungs/ /sdug bsngal thams cad spang ba'i phyir/ /sangs rgyas kyi sa ni gsungs tshig gang / /bden pa mya ngan 'das 'gro ba'i/ /tshig de bla na med pa yin/ /tshig gi tshoms te brgyad pa'o// //chos gcig las ni rab 'das shing / /'jig rten pha rol bcom pa yi/ /lus can brdzun du smra ba yis/ /sdig pa mi bya ci yang med/ /lcags sgong me lce 'bar 'dra ba/ /zos par gyur pa ches bla yi/ /tshul 'chal legs par mi sdom pas//yul 'khor bsod snyoms bzar mi rung / /khyod ni sdug bsngal gyis 'jigs shing / /khyod la sdug bsngal mi sdug na/ /mngon sum dag gam lkog tu'ang rung / /sdig pa can gyi las mi bya/ /gal te sdig pa'i las byas sam/ /byed kyang rung ste khyod kyis ni//kog ces langs te bros byas kyang / /sdug bsngal las ni thar mi 'gyur/ /gang du gnas na las kyis mi tshugs pa'i/ /sa phyogs de ni yod pa ma yin te/ /bar snang la med rgya mtsho'i nang na med/ /ri bo rnams kyi gseb tu zhugs kyang min/ /pha rol po la brtags nas gang //sdig pa can gyi las mthong ba/ /de dag bdag gis mi bya ste/ /sdig byas las ni rjes su 'brang / /las gang shin tu mi bzad dang / /zol byed gzhal lugs 'chos pa dang / /mi la 'tshe bar byed pa dang / /gzhan la byed du 'jug pa yi/ / las de mi yi rjes 'brang bas/ /de yis g.yang sar ltung bar byed/ /mi yis dge ba'am sdig pa yi/ /las ni gang dang gang byas pa'i/ /las rnams chud zar mi 'gyur te/ /de lta de ltar 'bras bur 'gyur/ /de yi tshogs pa ji srid par/ /de srid 'di ni gdung bar byed/ / de la gzhan dag gdung byed de/ /gdung byed de ni rtag par 'gyur/ /'di ni bdag rjes mi 'brang zhes/ /byis pas ma brtags byas pa yi/ /sdig pa'i las kyis 'gro ba dag /pha rol du ni shes par 'gyur/ /gal te byis pas mi shes par/ /sdig pa'i las ni byas pa dag /nam zhig na ni de nyid kyis/ /rnam smin tsha ba so sor bsten/ /rang gi las kyis de 'og tu/ /me yis bsregs pa bzhin du gdungs/ /byis pa shes rab chung ngu dag /bdag la dgra bzhin byed pa yis/ /gang zhig 'bras bu cher 'gyur ba'i/ /sdig can las ni spyod par byed//gang zhig byas pas gdung 'gyur zhing / /mchi mas gdong g.yogs ngu bzhin du/ /rnam smin so sor bsten pa yis/ /las de dag ni ma byas legs/ /gang zhig byas na mi gdung zhing / /dga' zhing yid ni bde ba yis/ /rnam smin so sor bsten pa yin//las de dag ni byas na legs/ /bdag nyid bde ba 'dod pa'i phyir/ /rgod bzhin sdig pa'i las byas pa'i/ /sdig pa'i las de'i rnam smin dag /ngu bzhin nyams su myong bar 'gyur/ /nges par sdig las 'phral du ni/ /'o ma lta bur 'gyur mi byed/ /thal bas g.yogs pa'i me lta bu//des ni byis pa sreg par byed/ /sdig las 'phral du nges par ni/ /mtshon bzhin gcod par mi byed kyang / /sdig pa'i las kyis 'gro ba dag /pha rol du ni mngon par 'gyur/ /gang du de dag rnam smin ni/ /tsha ba so sor bsten pa yi/ /sdig pa'i las kyis 'gro ba dag /pha rol du ni shes par 'gyur/ /lcags las g.ya' ni langs gyur pa/ /langs pa des ni de nyid za/ /de bzhin ma brtags byas pa yi/ /rang gi las kyis ngan 'gror 'gro/ /las kyi tshoms te dgu pa'o// //dad dang ngo tsha tshul khrims sbyin pa ste//chos 'di rnams ni skyes bu dam pas bsngags/ /'di yis lha yi 'jig rten 'gro 'gyur zhing / /lam 'di nyid kyis lha yul 'gro zhes gsungs/ /'jungs rnams lha yi 'jig rten mi 'gro zhing / /de yis byis pa sbyin pa'i bsngags mi brjod/ /brtan rnams sbyin la rjes su yi rang ba//des ni de dag gzhan du bde ba myong / /'di na skyes bu'i nor mchog dad pa ste/ /'di na chos la legs spyod bde ba 'thob/ /bden pa kho na ro bro rnams kyi phul/ /shes rab kyis 'tsho 'tsho ba'i mchog ces gsungs/ / mya ngan 'das par 'gro ba yi/ /dgra bcom chos la dad bskyed de/ /mkhas pas gus par mnyan na ni/ /de dang de yi shes rab 'thob/ /bag can gyis ni rgya mtsho dang / /dad pas chu bo rnams las sgrol/ /brtson 'grus kyis ni sdug bsngal spong / /shes rab kyis ni yang dag 'gyur//dge slong dad pa'i grogs ldan zhing / /shes rab kyis ni gtams pa dang / /mya ngan 'das la mngon dga' bas/ /'ching ba thams cad gcod par 'gyur/ /gang gis dad dang tshul khrims dang / /shes rab nyid ni legs bsgoms shing / /mkhas pas skyon rnams spong ba de'i//legs pa'i ngang tshul can zhes brjod/ /dad dang tshul khrims phun sum tshogs/ /gtong ldan 'jungs pa rnam spangs pa/ /de ni gang dang gar song ba/ /de dang de ni mchod par 'gyur/ /mkhas gang 'tsho ba'i 'jig rten na/ /dad dang shes rab sten byed pa/ /de dag de yi nor mchog ste//de yi nor gzhan phal par zad/ /'phags pa lta bar 'dod pa dang / /dam chos nyan par dga' ba dang / /ser sna'i dri ma rnam spangs pa/ /de ni dad pa can zhes bya/ /dad pa'i lam brgyags bskur bar bya/ /bsod nams chom pos dbrog mi nus/ / chom rkun 'phrog par byed pa bzlog /dge sbyong rnams kyis blangs na dga'/ /mkhas pas dge sbyong 'ongs pa la/ /mngon par dga' bar byed 'gyur zhing / /skye bo rnams ni ci rigs par/ /dad pa ji bzhin sbyin byed cing / /gzhan gyi zas dang skom de la/ /gang zhig yid ni mi bde ba//des ni nyin dang mtshan rnams su/ /ting 'dzin thob par mi 'gyur ro/ /gang gis ta la'i mgo bcad ltar/ /de 'dra kun du gcod byed pa/ /des ni nyin dang mtshan rnams su/ /ting nge 'dzin dag thob par 'gyur/ /khron pa skam po ji lta bar/ /dad pa med pa bsten mi bya//ji ste de la yongs brkos kyang / /'dam chu dri nga 'byung bar zad/ /chu mang rnam par dang ba dang / /bsil bar gyur cing rnyog med pa'i/ /mtsho la chu 'dong ji lta bar/ /shes rab can gyis dad ldan bsten/ /chags sam ma chags kyang rung ste/ /de yis thub sku mi ngas pas//ma dad pa dag spang bar bya/ /dad pa rnams ni nye bar bsten/ /dad pa'i tshoms te bcu pa'o/ /sdom la/ mi rtag 'dod dang sred pa dang / /bag yod de bzhin dga' ba dang / /tshul khrims legs spyod tshig dag dang / /las dang dad pa de dag bcu// // bram zes 'dod pa rab spang zhing / /brtson 'grus kyis ni rgyun chod cig /'dod pa rab tu ma spangs par/ /thub pa gcig gis ma thob bo/ /kun du rgyu ba zhan pa dag /nyon mongs phyir yang kun stsogs pas/ /brtson 'grus brtan po kho na yis/ /bya ba de nyid byed la rag /zhan pa'i las ni ji snyed dang / /kun nas nyon mongs dka' thub dang / /tshangs spyod yongs su ma dag de/ /don chen 'gyur snyam mi byed do/ /ji ltar mda' ni bzung nyes pas/ /lag pa chod par gyur pa ltar/ /dge sbyong bsrung ba bya nyes pas/ /dmyal bar nye bar khrid par byed//ji ltar mda' ni bzung legs pas/ /lag pa chod par mi 'gyur ltar/ /dge sbyong bsrung ba bya legs na/ /mya ngan 'das par nye bar 'dren/ /dge sbyong rnam par ma shes dang / /rgal bar dka' dang bzod dka' dang / /gang dag zhan pa 'gyod 'gyur ba'i/ /sdug bsngal mang po de dag 'byung //yang dang yang du 'gyod pa yi/ /kun rtog dbang du 'gro ba yi/ /sems ni bzlog par ma byas par/ /dge sbyong spyod pa ji ltar bya/ /nyes par rab byung nyes dga' ba/ /khyim 'dug nyes rtsom byed pa dag /sdug bsngal mnyam med bsten pa dang / / yang srid sdug bsngal stsogs par zad/ /tshem bu ngur smrig gyon pa dang / /phal cher yang dag mi sdom zhing / /sdig pa'i chos can sdig la dga'/ /sdig can de dag ngan 'gror 'gro/ /sA la'i shing la 'khri shing ltar/ /gang zhig shin tu khrims 'chal te/ /ji ltar rang la dgra bzhin du//de ni de ltar byed par 'dod/ /mgo bo skya bor gyur bar du/ /da dung rgan rabs ma chud pa/ /de ni lang tsho gtugs pa ste/ /de ni rgan blun zhes bya'o/ /gang zhig dge dang sdig pa dag /spangs shing tshangs par spyod pa dang / /sde tshogs spangs nas spyod byed pa//de ni rgan rabs zhes bya'o/ /brtul zhugs med cing brdzun smra na/ /mgo bo bregs tsam dge sbyong min/ /rmongs pa 'dod la zhugs pa dag /ji ga dge sbyong yin nam kye/ /brtul zhugs med cing brdzun smra na/ /mgo bo bregs tsam dge sbyong min/ /gang zhig sdig pa zhi gyur te//mkhas pas dge sbyong yin par shes/ /brtul zhugs med cing brdzun smra na/ /mgo bo bregs tsam dge sbyong min/ /gang dag sdig pa che phra dag /kun la brtags nas byed pa dang / /sdig pa zhi ba de dag ni/ /dge sbyong nyid ces brjod par bya/ /sdig pa spangs pa bram ze ste//zhi bar spyod pa dge sbyong yin/ /bdag gi dri ma rab spangs pa/ /des na rab tu byung zhes brjod/ /dge sbyong gi tshoms te bcu gcig pa'o// //gang tshe 'phags pa'i bden pa bzhi/ /shes rab kyis ni mthong ba dang / /lam 'dir rab tu shes pa yis//srid pa'i sred pa rab tu 'dral/ /dper na rlung gis rdul bslang ba/ /char pa 'bab pas zhi byed ltar/ /gang tshe shes rab kyis mthong ba/ /de tshe kun rtog zhi bar 'gyur/ /gang zhig legs par rtogs pa yis/ /skye shi legs par zad 'gyur zhing / /'jig rten nges 'byed 'gyur ba yi//shes rab de ni gtso bo yin/ /bden pa'i nang na bden bzhi dang / /lam nang yan lag brgyad pa mchog /rkang gnyis nang na mig can dang / /chos kyi nang na chags bral mchog /'du byed thams cad mi rtag par/ /gang tshe shes rab kyis mthong ba/ /de tshe sdug bsngal las yid 'byung //lam 'di rnam par dag par 'gyur/ /'du byed thams cad sdug bsngal bar/ /gang tshe shes rab kyis mthong ba/ /de tshe sdug bsngal las yid 'byung / /lam 'di rnam par dag par 'gyur/ /'du byed thams cad stong nyid du/ /gang tshe shes rab kyis mthong ba//de tshe sdug bsngal las yid 'byung / /lam 'di rnam par dag par 'gyur/ /'du byed thams cad bdag med par/ /gang tshe shes rab kyis mthong ba/ /de tshe sdug bsngal las yid 'byung / /lam 'di rnam par dag par 'gyur/ /sred pa'i zug rngu gcod byed lam//ngas ni khyed cag rnams la bstan/ /de bzhin gshegs pa ston pa ste/ /khyed cag rnams kyis bya dgos so/ /sred pa'i zug rngu sel ba'i lam/ /ngas ni khyed cag rnams la bstan/ /de bzhin gshegs pa ston pa ste/ /khyed cag rnams kyis bya dgos so//lta ba rnam par dag byed pa/ /lam 'di ma gtogs gzhan med pas/ /ting nge 'dzin la rab gnas te/ /bdud kyi 'ching ba spang bar gyis/ /'di ni drang lam 'di ni pha rol gnon/ /mtsho la ngang pa'i srang ltar bgrod pa gcig /shAkya thub pas mnyam bzhag gang rtogs nas//tshogs la yang dang yang du bshad pa 'di/ /skye shi'i mtha' rtogs phan mdzad thugs brtse bas/ /bgrod pa gcig lam rab tu bstan mdzad pa'i/ /lam 'dis chu bo rnams las sngon rgal zhing / /de bzhin rgal bar 'gyur zhing rgal bar mdzad/ /shin tu mthar thug gdul bya dag bya dang //'khor ba'i skye shi zad par bya ba dang / /khams rnams du ma so sor rtogs bya'i phyir/ /spyan dang ldan pas lam 'di rab tu bstan/ /ji ltar chu klung gang gA'i chu rgyun zhugs/ /rgya mtsho'i nang du 'bab par 'gyur ba ltar/ /de bzhin shes rab yangs pas bstan pa'i lam//'di ni 'chi med thob par bya phyir 'jug /gang zhig 'byung po kun la thugs brtse bas/ /sngon chad ma thos chos kyi 'khor lo bskor/ /skyob pa lha dang mi rnams 'dul mdzad pa/ /srid pa'i mthar phyin de la phyag 'tshal lo/ /rnam rtog dge ba gsum ni brtag bya zhing //dge ba ma yin gsum yang rnam par spangs/ /kun nas rdul langs char gyis mnan pa ltar/ /de nas rtog dang dpyod pa zhi bar bya/ /de nas sems la rnam rtog nyer zhi nas/ /bla med byang chub bde la reg par 'gyur/ /ting 'dzin gsum po rnams la yid gtad cing //bden pa las skyes tshad med bsgom par bya/ /dran ldan mkhas pas mdud pa zhi bya zhing / /gsum pa rnams kyis gnas gsum rab tu dral/ /shes rab mtshon dang brtson 'grus stobs dang ldan/ /dran ldan mnyam bzhag ting 'dzin la dga' bas//'jig rten skye dang 'jig par rtogs nas ni/ /kun las rab tu rnam grol de rig yin/ /'jig rten mtha' ma legs par rtogs gyur nas/ /'jig rten mthar son pha rol phyin zhes brjod/ /gang gis zhi ba 'phags lam yan lag brgyad/ /lam drang bsgoms pa des ni bdud rtsi rnyed//de ltar spyod pas bde 'dod bde ba 'thob/ /snyan pa 'thob cing grags pa 'phel bar 'gyur/ /lam gyi tshoms te bcu gnyis pa'o// //ched du brjod pa'i tshoms/ bam po gnyis pa/ dre'u mo rang gi mngal gyis dang / / 'dam bu smyig ma 'bras bus dang / /chu shing 'bras bus bung ba ltar/ /pho bshal bkur stis phung bar 'gyur/ /ji srid blun po mchod byas pa/ /de srid rab tu brlag par 'gyur/ /byis pa'i dkar po'i cha 'grib cing / /de yi spyi bo'ang nges par nyams/ /ngan pa rnyed pa 'dod pa dang //dge slong 'khor ni 'dod pa dang / /gnas la ser sna byed pa dang / /rigs gzhan dag gis mchod pa dang / /rab tu byung dang khyim pa dag /gang yang rung bas bdag 'phrigs te/ /bya ba byas rung ma byas rung / /bdag dbang gyur na re stes zhes/ /de ltar byis pa kun rtog na//sems la 'dod chen 'phel bar 'gyur/ /rnyed pa'i thabs ni gzhan yin la/ /mya ngan 'das 'gro'i gzhan yin zhes/ /de ltar ci rigs shes nas su/ /bkur sti dag la mi dga' zhing / /dben pa rim gyis 'phel byed pa'i/ /dge slong sangs rgyas nyan thos yin//thams cad la ni mi rtsol zhing / /mi yis 'phrigs par ma gyur dang / /'tsho ba gzhan la mi rten cing / /chos la tshong ba bzhin mi spyad/ /rang gi rnyed pa blang bya zhing / /gzhan gyi la ni 'dod mi skyed/ /dge slong gzhan gyi 'dod byed pas/ /ting 'dzin thob par mi 'gyur ro//gal te bde bar 'tsho 'dod cing / /dge sbyong 'di la lta 'dod na/ /dge 'dun gyis ni chos gos dang / /bza' btung byin par gyur na blang / /gal te bde bar 'tsho 'dod cing / /dge sbyong 'di la lta 'dod na/ /byi ba'i khung nas sbrul lta bur/ / gnas mal dag la bsten par gyis/ /gal te bde bar 'tsho 'dod cing / /dge sbyong 'di la lta 'dod na/ /ngan ngon tsam gyis chog shes shing / /chos gcig po yang bsgom par bya/ /gal te mang po mi shes shing / /tshul khrims legs par mnyam bzhag na/ /de shes pa dag 'tsho dag cing //snyom las med ces stod par byed/ /gal te 'chi bdag nyams byed pa'i/ /zag med rig pa gsum ldan na/ /blun pos ci yang mi shes zhes/ /bsams nas de la 'phya yang sla/ /gang zag sdig pa'i chos can la/ /gal te bza' dang btung ba yi//rnyed pa dag dang ldan gyur na/ /de la de dag mchod pa byed/ /mgo bregs ngur smrig byis pa yi/ /bza' ba dang ni btung ba dang / /gos dang mal cha rnyed pa ste/ /dgra byed mang ba kho nar zad/ /de ltar bkur sti 'jigs chen gyi/ /skyon rnams khong du chud byas nas/ / 'phrigs nyung sems khral bskyungs nas su/ /dran ldan dge slong kun du rgyus/ /kham gyi zas kyis sems zhir mi 'gyur yang / /'tsho ba 'di phyir mi bza' mi bya ste/ /kha zas kyis ni lus dag gnas 'gyur ba/ /de ltar rtogs la bsod snyoms dag la rgyus/ /rigs kyis phyag byas mchod pa gang yin 'di//zug rngu phra ma dbyung bar dka' ba ste/ /mi yis bzod dka' bkur sti gang yin 'di/ /'dam dang 'dra bar rab tu rtogs par gyis/ /bkur sti'i tshoms te bcu gsum pa'o// //sdig pa'i las ni mi byed pa/ /'khu bya min la gang 'khu ba//'jig rten 'di dang pha rol tu/ /de nyid sdig pa rnams kyis gos/ /dang par bdag ni phung byed cing / /phyi nas gzhan yang phung byed pa/ /khra yi gzan ma'i bya lta bur/ /phung zhing gzhan yang phung bar byed/ /rdeg par byed pas rdeg pa 'thob/ /'khon du 'dzin pas 'khon can mthong //de bzhin gshe bas gshe ba ste/ /khro bar byed la khro ba 'byung / /'di gzhan dge sbyong byis pa ste/ /dam pa'i chos la mi mkhas pa/ /yongs su tshe thung 'di la yang / /gyi na'i phyir ni 'khon par byed/ /'di ni mchog ces bsams nas su//so sor smra zhing mthun 'jug pas/ /'di na dge 'dun 'byed pa'i tshe/ /ci phyir stobs med sems mi byed/ /rus pa gcog cing srog gcod la/ /rta phyugs nor ni 'phrog pa dang / /yul 'khor 'joms par byed pa yang / /phyi nas 'jal dum byed pa ltar//mkhas pas brtags shing gsungs pa'i tshig /spyod yul ston par byed pa yi/ /chos 'di rnam par shes na go/ /khyed cag ci phyir byed mi 'gyur/ /khyod ni mi mkhas lugs can te/ /kha bya yis ni rtsol byed pa/ /pha rol po dag mi shes pas/ / bdag ni 'di la brtson par byed/ /'di na mkhas pa gang yin pa/ /de dag bzhams pa'i tshig gis zhi/ /bdag la kha zer bdag la gshe/ /bdag pham bdag pham byed pa'o zhes/ /'di gang sems la 'dzin byed pa/ /de yi 'khon ni zhi mi 'gyur/ /bdag la kha zer bdag la gshe//bdag pham bdag pham byed pa'o zhes/ /'di gang sems la mi 'dzin pa/ /de yi 'khon ni zhi bar 'gyur/ /'di na 'khon gyis 'khon can dag /nam yang zhi bar 'gyur ba med/ /bzod pas 'khon ni zhi 'gyur ba/ /'di ni chos kyi rang bzhin yin//'khon gyis 'khon can nam yang zhi mi 'gyur/ /'khon med rnams kyis 'khon ni zhi bar byed/ /sha khon zhugs pa lus can la gnod pas/ /de phyir mkhas pas 'khon par mi bya'o/ /brtan pa legs gnas lhan cig spyad pa yi/ /grogs po mkhas pa gal te rnyed na ni//nyon mongs thams cad mngon par zil mnan nas/ /dran ldan dga' ba'i yid kyis de dang spyad/ /brtan pa legs gnas lhan cig spyad pa yi/ /grogs po mkhas pa gal te ma rnyed na/ /yul 'khor yangs pa spangs pa'i rgyal po ltar/ / gcig pus spyad bya sdig pa mi bya'o/ /bdag dang mthun par spyod pa yi/ /grogs bzang rnyed par ma gyur na/ /byis pa grogs su mi 'gyur bas/ /gcig pus spyod pa brtan par bya/ /byis pa grogs su mi 'gyur bas/ /gcig pu spyod par byed sla bas/ /ma tang dgon pa'i glang po ltar//sems khral bskyungs te gcig pu spyad/ /'khu ba'i tshoms te bcu bzhi pa'o// //sangs rgyas kyis ni bstan pa bzhin/ /gang gi dbugs dbyung rngub dran pa/ /yongs su rdzogs par legs bsgoms pas/ /rim gyis yongs su byang gyur te//sprin bral nyi ma zla ba ltar/ /'jig rten 'di na kun nas gsal/ /'greng dang 'dug dang de bzhin nyal ba dang / /lus dang de bzhin sems ni 'jog byed cing / /dge slong dran pa de legs 'jog pa na/ /snga phyi'i khyad par rnams ni 'thob par 'gyur/ / snga phyi'i khyad par rnams ni thob gyur na/ /'chi bdag rgyal pos bltar yang med par 'gro/ /lus rtogs dran pa nye bar bzhag nas su/ /reg pa'i skye mched drug ni bsdams byas te/ /gang zhig rtag tu mnyam par 'jog byed pa/ /de bdag nyid kyis mya ngan 'das pa rtogs/ / gang zhig rtag tu rnam pa thams cad du/ /lus rtogs dran pa nye bar 'jog byed pa/ /bdag nyid med cing bdag gir 'dzin pa med/ /bdag tu mi 'gyur bdag gir 'dzin mi 'gyur/ /de ltar dge slong mnyam 'jog myur du ni/ /yul la sred pa dag las rgal bar 'gyur/ / gang zhig dran dang shes bzhin mnyam 'jog dang / /dga' dang rab tu dang bas dus dus su/ /chos 'di la spyod mel tse byed pa de/ /skye rga rnams las rgal bar 'gyur zhes gsung / /de ltas rtag tu mel tse byed sten cing / /dge slong mkhas pa dran ldan brtson pa yis/ / skye ba kun du sbyor ba spangs nas su/ /des ni 'di la mya ngan 'das pa 'thob/ /gnyid log de dag sad par byed pa yi/ /mel tse bdag las khyod nyon cig /nyal bas mel tse byed sla ste/ /mel tse byed la 'jigs pa med/ /mel tse byed par brtson pa dang / /nyin mtshan rjes su slob byed cing //'chi ba med la lhag mos pa'i/ /zag pa rnams ni zad par 'gyur/ /gang zhig nyin dang mtshan rnams su/ /sangs rgyas rjes su dran byed cing / /gang dag sangs rgyas skyabs song ba/ /de dag mi yi rnyed pa yin/ /gang zhig nyin dang mtshan rnams su//chos rnams rjes su dran byed cing / /gang dag chos la skyabs song ba/ /de dag mi yi rnyed pa yin/ /gang zhig nyin dang mtshan rnams su/ /dge 'dun rjes su dran byed cing / /gang dag dge 'dun skyabs song ba/ /de dag mi yi rnyed pa yin/ / gang zhig nyin dang mtshan rnams su/ /sangs rgyas rjes su dran byed pa/ /gau ta ma yi nyan thos de/ /legs par sad pas sad par 'gyur/ /gang zhig nyin dang mtshan rnams su/ /chos rnams rjes su dran byed pa/ /gau ta ma yi nyan thos de/ /legs par sad pas sad par 'gyur//gang zhig nyin dang mtshan rnams su/ /dge 'dun rjes su dran byed pa/ /gau ta ma yi nyan thos de/ /legs par sad pas sad par 'gyur/ /gang zhig nyin dang mtshan rnams su/ /tshul khrims rjes su dran byed pa/ /gau ta ma yi nyan thos de/ /legs par sad pas sad par 'gyur//gang zhig nyin dang mtshan rnams su/ /gtong ba rjes su dran byed pa/ /gau ta ma yi nyan thos de/ /legs par sad pas sad par 'gyur/ /gang zhig nyin dang mtshan rnams su/ /lha ni rjes su dran byed pa/ /gau ta ma yi nyan thos de/ / legs par sad pas sad par 'gyur/ /gang zhig nyin dang mtshan rnams su/ /rtag tu lus rtogs dran byed pa/ /gau ta ma yi nyan thos de/ /legs par sad pas sad par 'gyur/ /gang zhig nyin dang mtshan rnams su/ /rtag tu ting 'dzin bzhi dran pa/ /gau ta ma yi nyan thos de//legs par sad pas sad par 'gyur/ /gang zhig nyin dang mtshan rnams su/ /'tshe ba med la yid dga' ba/ /gau ta ma yi nyan thos de/ /legs par sad pas sad par 'gyur/ /gang zhig nyin dang mtshan rnams su/ /gnod sems med la yid dga' ba//gau ta ma yi nyan thos de/ /legs par sad pas sad par 'gyur/ /gang zhig nyin dang mtshan rnams su/ /bsgom pa la ni yid dga' ba/ /gau ta ma yi nyan thos de/ /legs par sad pas sad par 'gyur/ /gang zhig nyin dang mtshan rnams su/ /stong pa nyid la yid dga' ba//gau ta ma yi nyan thos de/ /legs par sad pas sad par 'gyur/ /gang zhig nyin dang mtshan rnams su/ /mtshan ma med la yid dga' ba/ /gau ta ma yi nyan thos de/ /legs par sad pas sad par 'gyur/ /gang zhig nyin dang mtshan rnams su//dben pa la ni yid dga' ba/ /gau ta ma yi nyan thos de/ /legs par sad pas sad par 'gyur/ /gang zhig nyin dang mtshan rnams su/ /nges par 'byung la yid dga' ba/ /gau ta ma yi nyan thos de/ /legs par sad pas sad par 'gyur/ / gang zhig nyin dang mtshan rnams su/ /ci yang med la yid dga' ba/ /gau ta ma yi nyan thos de/ /legs par sad pas sad par 'gyur/ /gang zhig nyin dang mtshan rnams su/ /mya ngan 'das la yid dga' ba/ /gau ta ma yi nyan thos de/ /legs par sad pas sad par 'gyur//dran pa'i tshoms te bcwa lnga pa'o// //bdag gi bya ba bya ba'i dus g.yo bas/ /dang po kho nar bya ba'i mel tse gyis/ /bdag gis dang po de ltar byas na ni/ /bya ba bya ba'i dus ltar zad 'dod cing / /ji ltar 'dod pa de bzhin 'byor 'gyur bar//de yi rang bzhin nga yis mthong bas na/ /ji srid don ni phun sum tshogs 'gyur ba/ /de srid bar du mi yis bsgrim par gyis/ /bsgrim zhing brtson par bya ba yis/ /bdag nyid gling du 'gyur bar bya/ /mgar ba yis ni dngul bzhin du/ /rang gi dri ma sbyang bar gyis//dri ma sbyangs pa skyon mi 'byung / /phyi nas skye dang rga mi 'thob/ /ngo tsha min la ngo tsha zhing / /ngo tsha ba la ngo mi tsha/ /mi 'jigs pa la 'jigs lta dang / /'jigs la mi 'jigs lta ba yi/ /log par lta ba blangs pa yis/ /sems can ngan 'gror 'gro bar 'gyur/ / 'di na gang sngon bag med las/ /phyi nas bag dang ldan gyur te/ /sprin bral nyi ma zla ba ltar/ /'jig rten 'di na kun nas gsal/ /'di na gang sngon bag med las/ /phyi nas bag dang ldan gyur te/ /'jig rten 'di na sred pa las/ /dran pa legs par 'da' bar 'gyur//gang zhig gzhon nur rab byung nas/ /sangs rgyas bstan la 'jug pa de/ /sprin bral nyi ma zla ba ltar/ /'jig rten 'di na kun nas gsal/ /gang zhig gzhon nur rab byung nas/ /sangs rgyas bstan la 'jug pa de/ /'jig rten 'di na sred pa las//dran pas legs par 'da' bar 'gyur/ /gang zhig sdig pa'i las byas pa/ /dge bas 'gebs par byed pa de/ /sprin bral nyi ma zla ba ltar/ /'jig rten 'di na kun nas gsal/ /gang zhig sdig pa'i las byas pa/ /dge bas 'gebs par byed pa de/ / 'jig rten 'di na sred pa las/ /dran pas legs par 'da' bar 'gyur/ /gang zhig gson la mi dga' ba/ /de ni shi na'ang mya ngan med/ /brtan pa go 'phang mthong ba de/ /mya ngan dbus na'ang gdung mi 'gyur/ /gang zhig gson la mi dga' ba/ /de ni shi na'ang mya ngan med//brtan pa go 'phang mthong ba de/ /gnyen 'dun dbus na lam mer 'dug /dge slong dkar po bsgom gyis la/ /nag po'i chos ni rnam par spongs/ /khyim nas khyim med song nas su/ /spyod yul dben pa gang yin pa/ /de la mngon par dga' bslab cing //'dod pa ci yang med par spongs/ /rtag tu snying po dag pa dang / /rtag tu gso sbyong dag pa dang / /gtsang ma'i las ni dag pa de'i/ /brtul zhugs phun sum tshogs par 'gyur/ /zhing gi skyon ni rtswa yin ltar/ /skye dgu 'di la 'dod chags skyon/ /de bas 'dod chags bral rnams la//byin na 'bras bu chen por 'gyur/ /zhing gi skyon ni rtswa yin ltar/ /skye dgu 'di la zhe sdang skyon/ /de bas zhe sdang bral rnams la/ /byin na 'bras bu chen por 'gyur/ /zhing gi skyon ni rtswa yin ltar/ /skye dgu 'di la gti mug skyon/ /de bas gti mug bral rnams la//byin na 'bras bu chen por 'gyur/ /zhing gi skyon ni rtswa yin ltar/ /skye dgu 'di la nga rgyal skyon/ /de bas nga rgyal bral rnams la/ /byin na 'bras bu chen por 'gyur/ /zhing gi skyon ni rtswa yin ltar/ /skye dgu 'di la chags pa skyon/ / de bas chags dang bral rnams la/ /byin na 'bras bu chen por 'gyur/ /zhing gi skyon ni rtswa yin ltar/ /skye dgu 'di la sred pa skyon/ /de bas sred dang bral rnams la/ /byin na 'bras bu chen por 'gyur/ /drug pa bdag po rgyal po ste/ /chags par gyur na chags can yin//ma chags gyur na ma chags yin/ /chags pa byis pa zhes brjod do/ /'dod chags zhe sdang nga rgyal dang / /'chab pa gang du gnas pa yi/ /grong khyer rus pa'i ra ba can/ /sha dang khrag gis zhal zhal byas/ /rgyu yis kun nas bslang ba las byung sdug bsngal can//de ma mthong na der ni de dag 'ching 'gyur zhing / /de dag rtogs na chu bo rnams ni rab tu spong / /phyi rol pa la chags pa de dag spong ba med/ /sil bu'i tshoms te bcu drug pa'o// //de dag khyim la mi dga' bar/ /dran dang ldan pa 'bad pa yis//ngang pas mtsho ngan spong ba ltar/ /de dag khyim spangs chu bo rgal/ /brtan pa 'jig rten nges byung nas/ /bdud kyi sde rnams rab bcom ste/ /nyi ma'i lam nas ngang pa ltar/ /rdzu 'phrul gyis ni mkha' la 'gro/ /tshangs par spyod pa ma spyad cing / / gzhon nur nor ni ma rnyed pa/ /mtsho ngan nya nyung ngogs dag na/ /chu skyar rgan sems bzhin du 'gyur/ /tshangs par spyod pa ma spyad cing / /gzhon nur nor ni ma rnyed pa/ /sngon chad byas pa rjes dran zhing / /lus bskums nas ni nyal bar 'gyur/ /sdig pa chung byas bdag nyid kyi//phyi bzhin mi 'ong ma sems shig /chu yi thigs pa lhung ba yis/ /bum chen gang ba ji bzhin du/ /chung zad chung zad bsags pa yi/ /sdig pas byis pa gang bar 'gyur/ /dge ba chung byas bdag nyid kyi/ /phyi bzhin mi 'ang ma sems shig / chu yi thigs pa lhung ba yis/ /bum chen gang ba ji bzhin du/ /chung zad chung zad bsags pa yi/ /dge bas brtan pa gang bar 'gyur/ /gang zhig rags brtsigs mtsho ngan spangs/ /rgya mtsho'i chu bo rgal 'dod pa/ /skye bos gzings ni bcas nas kyang //skye bo mkhas pa rgal bar byed/ /rgal nas sangs rgyas bcom ldan 'das/ /bram ze skam sar gnas par mdzad/ /de la dge slong khrus byed cing / /nyan thos rnams kyis gzings kyang bcas/ /ji ltar mtsho chen zab mo dag /rab tu mnam dang rnyog med ltar//de bzhin mkhas pa rab dang pas/ /'di ni chos ni nyan par byed/ /'di ltar kun na chu yod pas/ /su zhig tshol zhing rgyu byed de/ /khron pa'i chu lta ci zhig dgos/ /sred pa rtsa nas gcad par gyis/ /btso blag mkhan dag chus 'khru zhing / /mda' mkhan mes ni srong ba dang //shing mkhan shing la 'jog sbyong ltar/ /mkhas pas bdag nyid gdul bar bya/ /nam mkha' lta bur chags med cing / /sgo them lta bur g.yo ba med/ /rnyog pa can gyi mtsho lta bur/ /mkhas pa 'khor ba la mi dga'/ /chu'i tshoms te bcu bdun pa'o// //lhar bcas gshin rje'i 'jig rten 'di/ /sa stengs las rgyal gang zhing lags/ /me tog lta bur rab 'dod pa'i/ /chos bzhi legs par ston mkhas gang / /lhar bcas gshin rje'i 'jig rten 'di/ /sa stengs las rgyal slob pa yi/ /me tog lta bur rab 'dod pa'i//chos bzhi legs par ston mkhas te/ /nags tshal las ni 'jigs skyes phyir/ /nags tshal gcad kyi shing ma yin/ /nags dang nags sbyor chod cig dang / /dge sbyong mya ngan 'da' bar 'gyur/ /gal te nags sbyor ma bcad na/ / phra rab kyis kyang mi rnams skye/ /ma drung nu zho 'dod be+e'u ltar/ /de yis yid ni rab tu 'ching / /lag pas ston ka'i pad+ma ltar/ /bdag la dga' ba bcad nas su/ /rgyal gsungs mya ngan 'das pa'i phyir/ /zhi ba'i lam nyid bskyed par gyis/ /ji ltar me tog yid 'ong ba/ / kha dog bzang yang dri med ltar/ /de bzhin legs par gsungs pa'i tshig /'bras bu med par ma byed cig /ji ltar bung ba me tog gi /kha dog dri la mi gnod par/ /khu ba gzhibs nas 'phur ba ltar/ /de bzhin thub pa grong du rgyu/ /gzhan gyi skyon la mi brtag cing / / gzhan gyis byas dang ma byas min/ /bdag nyid kyis ni rigs pa dang / /mi rigs bya la brtag par bya/ /ji ltar phyag dar phung po dag /mi gtsang chu ni med 'di las/ /pad+ma kha bye gtsang ba dang / /dri zhim yid 'ong rab skyes ltar/ /de bzhin so so skye bo dag /ldongs gyur phyag dar phung 'di las/ /rdzogs sangs rgyas kyi nyan thos dag /shes rab kyis ni gsal ba 'byung / /ji ltar me tog phung po las/ /me tog phreng rgyud mang byed ltar/ /de bzhin mir ni skyes pa yis/ /dge ba phal chen rnams kyang bya//ji ltar dbyar ka ba ku la'i/ /me tog rab tu rnam 'brul ltar/ /de bzhin dge slong 'dod chags dang / /zhe sdang gti mug spang bar gyis/ /mi yi yid la rnam chags dang / /me tog bzhin du rab bsags pa/ /'chi bdag gis ni blangs nas 'gro/ / nyal grong chu bos bdas pa bzhin/ /mi yi yid la rnam chags dag /me tog bzhin du rab bsags pa/ /'dod pa rnams kyis mi ngoms shing / /'chi bdag gis ni dbang du byed/ /mi yi yid la rnam chags dag /me tog bzhin du rab bsags pa/ /longs spyod skye bar mi 'gyur zhing //'chi bdag gis ni dbang du byed/ /mi yi yid la rnam chags dag /me tog bzhin du rab bsags pa/ /bya ba mthar ni ma phyin par/ /'chi bdag gis ni dbang du byed/ /lus 'di bum pa 'dra bar rtogs byas shing / /de bzhin chos rnams smig rgyu 'drar shes nas//bdud kyi me tog mchog ni 'dir gcod pa/ /'chi bdag rgyal pos bltar yang med par 'gro/ /'jig rten 'di dag bum pa 'drar rtogs shing / /de bzhin chos rnams smig rgyu 'drar shes nas/ /bdud kyi me tog mchog ni 'dir gcod pa/ / 'chi bdag rgyal pos bltar yang med par 'gro/ /lus 'di dbu ba 'dra bar rtogs byas shing / /de bzhin chos rnams smig rgyu 'drar shes nas/ /bdud kyi me tog mchog ni 'dir gcod pa/ /'chi bdag rgyal pos bltar yang med par 'gro/ / 'jig rten 'di dag dbu ba 'drar rtogs shing / /de bzhin chos rnams smig rgyu 'drar shes nas/ /bdud kyi me tog mchog ni 'dir gcod pa/ /'chi bdag rgyal pos bltar yang med par 'gro/ /srid pa u dum bA ra'i me tog ltar/ /snying po med par sems pa'i dge slong gang //de ni pha rol min pa'i pha rol po/ /spong ste sbrul rgas lpags rnying rje ba bzhin/ /chu skyes rtsa ba'i me tog chu gnas lta'i/ /'dod chags ma lus gcod byed dge slong gang / /de ni pha rol min pa'i pha rol po/ /spong ste sbrul rgas lpags rnying rje ba bzhin/ /chu skyes rtsa ba'i me tog chu gnas lta'i//zhe sdang ma lus gcod byed dge slong gang / /de ni pha rol min pa'i pha rol po/ /spong ste sbrul rgas lpags rnying rje ba bzhin/ /chu skyes rtsa ba'i me tog chu gnas lta'i/ /gti mug ma lus gcod byed dge slong gang / /de ni pha rol min pa'i pha rol po//spong ste sbrul rgas lpags rnying rje ba bzhin/ /chu skyes rtsa ba'i me tog chu gnas lta'i/ /nga rgyal ma lus gcod byed dge slong gang / /de ni pha rol min pa'i pha rol po/ /spong ste sbrul rgas lpags rnying rje ba bzhin/ /chu skyes rtsa ba'i me tog chu gnas lta'i/ /chags pa ma lus gcod byed dge slong gang //de ni pha rol min pa'i pha rol po/ /spong ste sbrul rgas lpags rnying rje ba bzhin/ /chu skyes rtsa ba'i me tog chu gnas lta'i/ /sred pa ma lus gcod byed dge slong gang / /de ni pha rol min pa'i pha rol po/ /spong ste sbrul rgas lpags rnying rje ba bzhin//me tog gi tshoms te bco brgyad pa'o// //ji ltar rta bzangs lcag gis gzhus pa na/ /skrag cing shugs drag 'gro byed ji bzhin du/ /dad pa tshul khrims ting 'dzin ldan pa dang / /chos rnams rnam par gtan la 'bebs ldan zhing / /dbang po mnyam gzhag bzod ldan 'grogs bde ba//skyob pa de rnams srid pa ma lus spong / /ji ltar rta bzangs lcag gis gzhus pa na/ /skrag cing shugs drag 'gro byed ji bzhin du/ /dad pa tshul khrims ting 'dzin ldan pa dang / /chos rnams rnam par gtan la 'bebs ldan zhing / /rig dang rkang par ldan zhing dran ldan pa'i//skyob rnams sdug bsngal ma lus spong bar mdzad/ /'dul sbyong byed pas legs btul rta lta bur/ /gang zhig dbang po legs par sdom pa yis/ /khro ba spong zhing zag pa zad byed pa/ /thub de rnams kyis lha yi bar du myong / /bag yod pa yis bag med dang //mi nyal mang pos gnyid log dang / /rta bzangs kyis ni rta rgod ltar/ /shin tu mkhas pas spangs nas 'gro/ /rta bzangs la ni lcag bzhin du/ /gang zhig ngo tsha shes sten cing / /shes rab legs par mnyam gzhag pa/ /des ni sdig pa sel bar byed//dul ba 'dun sar 'gro byed cing / /dul ba rgyal po lhag par zhon/ /gang zhig tshig ngan bzod byed pa/ /dul ba mi yi nang na mchog /glang po'i nang na glang chen dang / /sin du'i cang shes rta dang ni/ /dre'u 'dul byed pa gang yin pa/ /de bas bdag nyid 'dul ba mchog / bdag nyid legs 'dul gang yin pa'i/ /mkhas des zhi ba thob 'gyur gyi/ /bzhon pa de dag rnams kyis ni/ /sa de mngon par 'thob mi srid/ /glang po'i nang na glang chen dang / /sin du'i cang shes rta dang ni/ /dre'u 'dul byed pa gang yin pa/ /de bas bdag nyid 'dul ba mchog /bdag nyid legs 'dul dran ldan gang / /des ni sdug bsngal mthar phyin gyi/ /bzhon pa de dag rnams kyis ni/ /sa de mngon par 'thob mi srid/ /glang po'i nang na glang chen dang / /sin du'i cang shes rta dang ni/ /dre'u 'dul byed pa gang yin pa/ /de bas bdag nyid 'dul ba mchog /bdag nyid legs 'dul dran ldan gang / /des ni 'gro rnams spong 'gyur gyi/ /bzhon pa de dag rnams kyis ni/ /sa de mngon par 'thob mi srid/ /glang po'i nang na glang chen dang / /sin du'i cang shes rta dang ni/ /dre'u 'dul byed pa gang yin pa/ /de bas bdag nyid 'dul ba mchog /bdag nyid legs 'dul gang yin des/ /'ching ba bcad nas 'gro 'gyur gyi/ /bzhon pa de dag rnams kyis ni/ /sa de mngon par 'thob mi srid/ /'dul sbyong byed pas rta bzangs ltar/ /bdag nyid kho na gdul bar bya//bdag nyid legs par 'dul ba yis/ /sdug bsngal rnams kyi pha mthar phyin/ /bdag nyid kho na bdag gi mgon/ /bdag nyid bdag gi skyabs yin pas/ /'dul sbyong byed pas rta bzangs ltar/ /de bas bdag nyid gdul bar bya/ /rta'i tshoms te bcu dgu pa'o// //khro ba spangs shing nga rgyal rnam spangs na/ /kun sbyor kun las shin tu 'da' 'gyur zhing / /ming dang gzugs la chags pa med de dag /ci yang med pas chags pa'i rjes mi ltung / /skyes ma thag tu khro ba spongs/ /skyes nas 'dod chags spang bar gyis/ / brtan pas ma rig rab tu spang / /bden pa mthong na bde bar 'gyur/ /khro ba spangs na bde bar nyal/ /khro ba spangs na gdung mi 'gyur/ /dge slong khro ba bde 'joms pa'i/ /dug gi rtsa ba chom shig dang / /'phags pa rnams kyis bsngags 'gyur zhing / /de bcom pa yis mya ngan med//gang khros bdag gis legs byas kyi/ /ma legs min zhes rab smra ba/ /de ni khro ba zhi 'og tu/ /me yis bsregs bzhin gdung bar 'gyur/ /ngo tsha med cing khrel med pa/ /khro ba can la brtul zhugs med/ /khro bas mngon par zil gnon pa/ /de la su yang rten mi byed//gang zhig byis pa'i mthu stobs can/ /de yi stobs ni stobs med yin/ /byis pa chos dang bral ba la/ /bsgrub par bya ba yod re skan/ /gang zhig stobs dang ldan gyur yang / /stobs chung rnams kyi bzod byed pa/ /de ni bzod pa'i mchog ces gsungs/ /nyam chung ba lta rtag tu sgur//gang zhig gzhan gyi dpon gyur kyang / /stobs chung rnams kyi bzod byed pa/ /de ni bzod pa'i mchog ces gsungs/ /nyam chung ba lta rtag tu sgur/ /gzhan gyis lhag par brgyad bkag kyang / /stobs ldan gang zhig bzod byed pa/ /de ni bzod pa'i mchog ces gsungs//nyam chung ba lta rtag tu sgur/ /gzhan gyis lhag par smad byas kyang / /stobs ldan gang zhig bzod byed pa/ /de ni bzod pa'i mchog ces gsungs/ /nyam chung ba lta rtag tu sgur/ /gang zhig pha rol khros rig nas/ /bdag nyid nye bar zhi byed pa//de ni bdag dang gzhan dag gi /'jigs chen dag las skyob pa yin/ /gang zhig pha rol khros rig nas/ /bdag nyid nye bar zhi byed pa/ /de ni bdag dang gzhan dag gi/ /gnyi ga'i don ni spyod pa yin/ /bdag nyid dang ni gzhan dag dang / /gnyi ga'i don ni spyod de la/ / skye bo chos la mi mkhas rnams/ /byis pa yin zhes sems kyang sla/ /gtso bo'i tshig ni 'jigs phyir bzod byed dang / /thab zla'i tshig ni 'thab gcugs rgyu bzod pas/ /gang zhig dman pa'i tshig la bzod byed de/ /bzod pa'i mchog ces dam pas rab tu gsungs/ /byis pa khros nas tshig rtsub dag /smras na rgyal bar 'gyur snyam sems/ /gang zhig tshig dag bzod byed pa/ /de ni rtag tu rgyal ba yin/ /bden par smra bya khro mi bya/ /slong la chung yang sbyin par bya/ /rnam pa 'di gsum gnas kyis ni/ /lha yi gnas su 'gro bar 'gyur/ /khro ba'i zil gyis non pa'i mis//rang gi don kyang mi rtogs pas/ /'khor gyi nang du bag rkyong la/ /khro ba med pa'i tshig smros shig /gang zhig khros la slar khro ba/ /de ni sdig pa can 'gyur bas/ /khros la slar ni ma khro dang / /thub par dka' ba'i g.yul las rgyal/ /khro ba med pas khro ba thub//legs pas legs pa ma yin thub/ /sbyin pa yis ni 'jungs pa thub/ /bden pas bden pa ma yin thub/ /dul zhing rigs pas 'tsho ba dang / /khro ba med pa ga la khro/ /yang dag shes pas rnam grol ba'i/ /mkhas pa rnams la khro ba med/ / khro ba med la 'tshe med la/ /'phags pa'i skye bos rtag bsten kyang / /skye bo sdig can khro ba dag /ri bo bzhin du sgur bar byed/ /gang zhig khro ba byung ba dang / /shing rta 'khyams las 'dzin byed de/ /'dul sbyong mkhan du ngas gsungs kyi/ /zhags 'degs skye bo phal ba yin//khro ba'i tshoms te nyi shu pa'o/ /sdom la/ dge sbyong lam dang bkur sti dang / /'khu dang lnga pa dran pa ste/ /sil bu chu dang me tog dang / /rta dang khro ba bcu pa'o// //'jig rten 'di na kun rig kun zil gnon/ / 'di na chos rnams kun gyis ma gos shing / /kun spangs sred zad rab tu rnam grol ba/ /nyid kyis mngon mkhyen pa la su yis bstan/ /de bzhin gshegs pa lha mi'i ston pa ste/ /stobs rnams kun ldan thams cad mkhyen pa nga / /byang chub brnyes nas nyid kyis rab ston pa//mtshungs med mnyam med nga la su yis bstan/ /nga ni 'jig rten dgra bcom ste/ /'jig rten dag na bla med nga / /lha dang bcas pa'i 'jig rten na/ /bdud rnams zil gnon rgyal ba nga / /nga dang 'dra ba med pas na/ /nga la slob dpon su yang med/ /'jig rten 'di na gcig pu yis//rdzogs pa'i byang chub bla med brnyes/ /gang zhig zag pa zad brnyes pa/ /rgyal ba nga 'drar shes par gyis/ /sdig pa'i chos las nga rgyal bas/ /de bas nyi 'gro nga rgyal ba/ /'jig rten yul sred rgal ba yi/ /kun mkhyen sangs rgyas mya ngan 'das//'jig rten pa la ma bstan par/ /kun nas 'byung ba mi shes pas/ /bA rA Na sIr song nas su/ /ngas ni chos kyi rnga brdung zhing / /'jig rten sus kyang ma bskor ba'i/ /chos kyi 'khor lo bskor bar byas/ /dpa' bo de bzhin gshegs pa rnams/ /'di na chos kyis 'dul bar mdzad//de dag chos kyis btul ba la/ /mkhas pa su yang smod mi byed/ /brtan gang ting 'dzin la zhugs shing / /nges 'byung zhi la dga' ba dang / /sku yi tha ma 'dzin pa yi/ /rdzogs pa'i sangs rgyas grags ldan pa/ /shes rab myur ba de dag la//lha dang mi rnams dga' bar byed/ /gang dag 'das pa'i sangs rgyas dang / /gang dag ma byon sangs rgyas dang / /gang dag da ltar rdzogs sangs rgyas/ /mang po'i mya ngan sel mdzad pa/ /bzhugs par gyur cing bzhugs pa dang / /de bzhin bzhugs par 'gyur kun gyis//dam chos bla mar mdzad pa 'di/ /rdzogs sangs rgyas kyi chos nyid yin/ /de bas 'di na bdag dga' zhing / /bdag nyid chen po [(]mdon [,]mngon [)]'dod pas/ /sangs rgyas bstan pa dran byas te/ /dam pa'i chos la bla mar bya/ /mi gang sangs rgyas bstan pa la//dad pa ma bskyed byis pa de/ /rgud pa'i gnas su 'gro 'gyur te/ /srin mo rnams kyis tshong pa bzhin/ /mi gang sangs rgyas bstan pa la/ /dad pa bskyed pa shes rab can/ /de ni bde bar pha rol 'gro/ /sprin shugs ldan pas tshong pa bzhin/ / de bzhin gshegs pa mnyam med mtshungs pa med/ /bde bar rnam rtog de bzhin rab dben pa'i/ /rnam rtog gnyis po spyod pa'i sangs rgyas rnams/ /mun bsal pha rol gshegs shing grags dang ldan/ /des ni brnyes bya brnyes shing yid dbang gyur/ /kun grol zag zad rab tu rnam par grol//rnam grol thugs ldan tha ba zag med rnams/ /lus can 'jig rten rnams la phan phyir gzigs/ /'ga' zhig ri bo'i spo la 'dug nas su/ /'gro ba rnams la kun du lta ba ltar/ /de bzhin blo bzang mya ngan bral ba dag /chos las byung ba'i khang bzangs steng gshegs nas//skye bo skye rgas zil gnon mya ngan gyis/ /gdungs pa rnams la kun du spyan gzigs nas/ /'chi ba med pa'i sgo mo 'byed mdzad kyis/ /gang dag nyan 'dod the tsom bsal bar gyis/ /de bzhin gshegs pa'i tshoms te nyi shu gcig pa'o// // legs par thos dang legs spyod dang / /khyim nas legs par byung ba dang / /spong bar byed pas rab bskor cing / /dge sbyong gi ni rjes mthun legs/ /byis pa mi mkhas pa dag ni/ /'chi ba med pa lta bur spyod/ /mkhas pa dam pa'i chos dag la/ /mtshan mo'i nad pa bzhin du byed//ji ltar khyim ni legs g.yogs pa/ /mun pas khebs pa'i nang zhugs na/ /gzugs rnams yod par gyur kyang ni/ /mig ldan bzhin du mi mthong ba/ /de bzhin 'di na rigs skyes pa'i/ /mi ni blo gros ldan gyur kyang / /sdig pa dang ni dge ba'i chos/ /ma thos bar du shes mi 'gyur//mig ldan mar me yod pa yis/ /gzugs rnams mthong ba ji lta bar/ /de bzhin dge dang sdig pa'i chos/ /thos pas rnam par shes par 'gyur/ /thos pas chos rnams rnam par shes/ /thos pas sdig las ldog par 'gyur//thos pas don med spong bar byed/ /thos pas mya ngan 'das pa 'thob/ /gal te thos pa mang gyur kyang / /tshul khrims legs par mi sdom na/ /de ni tshul khrims phyir smad cing / /de yi thos pa phun sum min/ /gal te thos pa nyung gyur kyang / /tshul khrims legs par sdom byed na//de ni tshul khrims phyir bsngags shing / /de yi thos pa phun sum 'gyur/ /gang zhig thos pa nyung ba dang / /tshul khrims legs par mi sdom pa/ /de ni gnyi ga'i phyir smad cing / /de yis brtul zhugs phun sum min/ /gang zhig mang du thos pa dang //tshul khrims legs par sdom byed pa/ /de ni gnyi ga'i phyir bsngags shing / /de yis brtul zhugs phun sum 'gyur/ /thos pa mang zhing chos 'dzin dang / /shes rab ldan zhing mnyam gzhag pa/ /de dag sus kyang smad 'os min/ /'dzam bu'i gling gi gser rgyan bzhin//gang zhig gzugs kyis rjes dpog cing / /nga la sgra yis 'jal byed pa/ /'dun pa'i 'dod chags ldan pa yi/ /skye bo de yis nga mi shes/ /gal te nang ni rnam shes shing / /phyi rol mthong bar ma gyur na/ /nang gi 'bras bu mthong ba gang / /de ni sgra yis drang du rung //gal te phyi rol mthong gyur cing / /nang ni shes par ma gyur na/ /phyi rol 'bras bu mthong ba gang / /de ni sgra yis drang du rung / /gal te nang yang mi shes shing / /phyi rol mthong bar ma gyur na/ /byis pa kun nas bsgribs pa dag /de ni sgra yis drang du rung / / gal te nang ni rnam shes shing / /phyi rol dag kyang mthong gyur pa/ /bstan pa nges 'byung shes rab can/ /de ni sgra yis drang du rung / /rna bas phal chen thos pa dang / /mig gis mang po mthong na yang / /bstan pa mthong thos de kun gyis/ /yid ches bya ba'i mi rigs so/ / legs gsungs thos pa snying por shes pa dang / /ting nge 'dzin dag snying por shes gyur kyang / /gang zhig bag med rlang por byed pa de'i/ /thos dang shes pa don chen mi 'gyur ro/ /gang zhig 'phags pas bstan pa'i chos dga' zhing / /de bzhin lus dang ngag gis spyod byed pa/ / de dag bzod ldan 'grogs dga' dbang po bsdams/ /thos dang shes pa'i pha rol phyin pa 'thob/ /thos pa'i tshoms te nyi shu gnyis pa'o// //legs par gsungs la bslab bya zhing / /dge sbyong la ni bsnyen bkur dang / /dben pa dang ni stan gcig dang / / sems ni nye bar zhi bar bya/ /stan gcig mal stan gcig pa dang / /gcig pu snyom las med spyod cing / /gcig pu nags tshal gnas pa dang / /gcig pus bdag nyid gdul bar bya/ /gang zhig stong phrag stong dag gi /mi yi g.yul las rgyal ba bas/ /gang zhig bdag las rgyal byed pa//de ni mi yi g.yul las rgyal/ /rtag tu sdom pa spyod pa yi/ /mi yis bdag brtul gcig pu yis/ /bdag nyid las rgyal mchog yin gyi/ /skye dgu gzhan lta phal bar zad/ /shes rab kyis gnas dge slong gis/ /rgyal bar byas la bdud dang ni//tshangs par bcas pas pham mi nus/ /lha yis ma yin dri zas min/ /bdag nyid dang por rigs par gnas byas nas/ /phyi nas gzhan dag bdag bzhin gdul bar bya/ /bdag nyid dang por rigs par gnas byas nas/ /phyi dus 'dul tshe mkhas pa nyon mi mongs//bdag la ji ltar byas pa bzhin/ /gzhan dag la yang de ltar bya/ /bdag nyid dul zhing zhi ba yis/ /gzhan dag bde bar gdul bar bya/ /bdag la ji ltar byas pa bzhin/ /gzhan dag la yang de ltar bya/ /kye ma bdag rang legs dul ba/ /bdag nyid dul bas dga' bar 'gyur//bdag gi don phyir gzhan don ni/ /mang po dag kyang gtang bar bya/ /bdag don ched cher shes gyur na/ /rang gi don gyi mchog tu 'gyur/ /bdag nyid bdag gi mgon yin gyi/ /gzhan lta su zhig mgon du 'gyur/ /bdag nyid bdag gi mgon gyur pa'i//mkhas pas don rnams 'thob par 'gyur/ /bdag nyid bdag gi mgon yin gyi/ /gzhan lta su zhig mgon du 'gyur/ /bdag nyid bdag gi mgon gyur ba'i/ /mkhas pas chos rnams 'thob par 'gyur/ /bdag nyid bdag gi mgon yin gyi//gzhan lta su zhig mgon du 'gyur/ /bdag nyid bdag gi mgon gyur pa'i/ /mkhas pas grags pa 'thob par 'gyur/ /bdag nyid bdag gi mgon yin gyi/ /gzhan lta su zhig mgon du 'gyur/ /bdag nyid bdag gi mgon gyur pa'i/ /mkhas pas bde ba 'thob par 'gyur//bdag nyid bdag gi mgon yin gyi/ /gzhan lta su zhig mgon du 'gyur/ /bdag nyid bdag gi mgon gyur pa'i/ /mkhas pas bde 'gro 'thob par 'gyur/ /bdag nyid bdag gi mgon yin gyi/ /gzhan lta su zhig mgon du 'gyur/ /bdag nyid bdag gi mgon gyur pas//yun ring mtho ris dga' bar 'gyur/ /bdag nyid bdag gi mgon yin gyi/ /gzhan lta su zhig mgon du 'gyur/ /bdag nyid bdag gi mgon gyur pa/ /gnyen gyi nang na lam mer 'bar/ /bdag nyid bdag gi mgon yin gyi/ /gzhan lta su zhig mgon du 'gyur//bdag nyid bdag gi mgon gyur pa/ /mya ngan nang na gdung mi 'gyur/ /bdag nyid bdag gi mgon yin gyi/ /gzhan lta su zhig mgon du 'gyur/ /bdag nyid bdag gi mgon gyur pas/ /'ching ba thams cad gcod par 'gyur/ /bdag nyid bdag gi mgon yin gyi//gzhan lta su zhig mgon du 'gyur/ /bdag nyid bdag gi mgon gyur pas/ /ngan 'gro thams cad spong bar 'gyur/ /bdag nyid bdag gi mgon yin gyi/ /gzhan lta su zhig mgon du 'gyur/ /bdag nyid bdag gi mgon gyur pas/ / sdug bsngal kun las rab tu thar/ /bdag nyid bdag gi mgon yin gyi/ /gzhan lta su zhig mgon du 'gyur/ /bdag nyid bdag gi mgon gyur pas/ /bdag nyid mgon du 'gyur ba 'thob/ /bdag nyid bdag gi mgon yin gyi/ /gzhan lta su zhig mgon du 'gyur/ / bdag nyid bdag gi mgon yin gyi/ /mya ngan 'das nyid nye bar 'gyur/ /bdag gi tshoms te nyi shu gsum pa'o// //gang dag don dang mi ldan tshig /tshigs bcad brgya dag smra ba bas/ /gang dag nye bar zhi 'gyur ba'i/ /don ldan tshig gcig thos pa rung / / gang dag chos dang mi ldan tshig /tshigs bcad brgya dag smra ba bas/ /gang dag nye bar zhi 'gyur ba'i/ /chos ldan tshig gcig thos pa rung / /tshul 'chal mnyam par ma bzhag pa/ /lo brgyar gson pa gang yin pas/ /tshul khrims ldan zhing mnyam bzhag pa/ /nyin zhag 'ga' zhig gson pa rung //brtson med le lo ldan pa dag /lo brgyar gson pa gang yin pas/ /brtson 'grus brtan pa brtsams pa dag /nyin zhag 'ga' zhig gson pa rung / /shes 'chal mnyam par ma bzhag pa/ /lo brgyar gson pa gang yin pas/ /shes rab chen po mnyam bzhag pa//nyin zhag 'ga' zhig gson pa rung / /skye dang 'jig pa ma mthong ba/ /lo brgyar gson pa gang yin pas/ /skye dang 'jig pa mthong ba dag /nyin zhag 'ga' zhig gson pa rung / /tshor ba zad pa ma mthong ba/ /lo brgyar gson pa gang yin pas//tshor ba zad pa mthong ba dag /nyin zhag 'ga' zhig gson pa rung / /zag pa zad pa ma mthong ba/ /lo brgyar gson pa gang yin pas/ /zag pa zad pa mthong ba dag /nyin zhag 'ga' zhig gson pa rung / /go 'phang mi g.yo ma mthong ba/ /lo brgyar gson pa gang yin pas//go 'phang mi g.yo mthong ba dag /nyin zhag 'ga' zhig gson pa rung / /go 'phang blta dka' ma mthong ba/ /lo brgyar gson pa gang yin pas/ /go 'phang blta dka' mthong ba dag /nyin zhag 'ga' zhig gson pa rung / /go 'phang mthon po ma mthong ba//lo brgyar gson pa gang yin pas/ /go 'phang mthon po mthong ba dag /nyin zhag 'ga' zhig gson pa rung / /go 'phang dam pa ma mthong ba/ /lo brgyar gson pa gang yin pas/ /go 'phang dam pa mthong ba dag /nyin zhag 'ga' zhig gson pa rung / / 'chi med go 'phang ma mthong ba/ /lo brgyar gson pa gang yin pas/ /'chi med go 'phang mthong ba dag /nyin zhag 'ga' zhig gson pa rung / /bdud rtsi'i go 'phang ma mthong ba/ /lo brgyar gson pa gang yin pas/ /bdud rtsi'i go 'phang mthong ba dag /nyin zhag 'ga' zhig gson pa rung / /rdul med go 'phang ma mthong ba/ /lo brgyar gson pa gang yin pas/ /rdul med go 'phang mthong ba dag /nyin zhag 'ga' zhig gson pa rung / /rdul bral go 'phang ma mthong ba/ /lo brgyar gson pa gang yin pas/ /rdul bral go 'phang mthong ba dag /nyin zhag 'ga' zhig gson pa rung / /mi ni lo brgyar nags tshal na/ /me la yongs sten gang yin dang / /bdag nyid bsgom la yud tsam zhig /mchod pa byed pa gang yin pa/ /mchod byed de nyid ches rung gi /lo brgyar sbyin sreg byed mi rung / /zla ba re rer ku sha'i rtses//kha zas za ba gang yin des/ /sangs rgyas la ni dad pa yi/ /bcu drug char yang mi phod do/ /zla ba re rer ku sha'i rtses/ /kha zas za ba gang yin des/ /dam pa'i chos la dad pa yi/ /bcu drug char yang mi phod do/ /zla ba re rer ku sha'i rtses/ /kha zas za ba gang yin des//dge 'dun la ni dad pa yi/ /bcu drug char yang mi phod do/ /zla ba re rer ku sha'i rtses/ /kha zas za ba gang yin des/ /sems can rnams la snying brtse ba'i/ /bcu drug char yang mi phod do/ /zla ba re rer ku sha'i rtses/ /kha zas za ba gang yin des/ / srog chags rnams la snying brtse ba'i/ /bcu drug char yang mi phod do/ /zla ba re rer ku sha'i rtses/ /kha zas za ba gang yin des/ /'byung po rnams la snying brtse ba'i/ /bcu drug char yang mi phod do/ /zla ba re rer ku sha'i rtses/ /kha zas za ba gang yin des/ /byams par sems par byed pa yi//bcu drug char yang mi phod do/ /zla ba re rer ku sha'i rtses/ /kha zas za ba gang yin des/ /legs par gsungs pa'i dam chos kyi/ /bcu drug char yang mi phod do/ /zla ba re rer mchod sbyin stong / /lo brgyar byed pa gang yin des/ /sangs rgyas la ni dad pa yi//bcu drug char yang mi phod do/ /zla ba re rer mchod sbyin stong / /lo brgyar byed pa gang yin des/ /dam pa'i chos la dad pa yi/ /bcu drug char yang mi phod do/ /zla ba re rer mchod sbyin stong / /lo brgyar byed pa gang yin des/ /dge 'dun la ni dad pa yi/ /bcu drug char yang mi phod do//zla ba re rer mchod sbyin stong / /lo brgyar byed pa gang yin des/ /sems can rnams la snying brtse ba'i/ /bcu drug char yang mi phod do/ /zla ba re rer mchod sbyin stong / /lo brgyar byed pa gang yin des/ /srog chags rnams la snying brtse ba'i/ /bcu drug char yang mi phod do//zla ba re rer mchod sbyin stong / /lo brgyar byed pa gang yin des/ /'byung po rnams la snying brtse ba'i/ /bcu drug char yang mi phod do/ /zla ba re rer mchod sbyin stong / /lo brgyar byed pa gang yin des/ /byams par sems par byed pa yi/ /bcu drug char yang mi phod do//zla ba re rer mchod sbyin stong / /lo brgyar byed pa gang yin des/ /legs par gsungs pa'i dam chos kyi/ /bcu drug char yang mi phod do/ /bsod nams 'dod pa'i mi yis 'jig rten du/ /sbyin sreg mchod sbyin chung zad ci byas des/ /gang zhig drang po'i sems kyis phyag 'tshal ba//de yi bzhi char yang ni mi phod do/ /bsgre ba'i tshoms te nyi shu rtsa bzhi pa'o// //ched du brjod pa'i tshoms/ bam po gsum pa/ dad pa med cing 'jungs pa dang / /dbyen byed phra ma can dag dang / /mkhas pas bshes par mi bya zhing //sdig can mi dang 'grogs mi bya/ /dad ldan snyan par smra ba dang / /thos mang tshul khrims ldan pa dang / /mkhas pa yis ni mdza' bya zhing / /mi mchog dag dang 'grogs par bya/ /sdig pa'i grogs po mi bsten cing / /skyes bu ngan pa bsten mi bya/ /dge ba'i bshes gnyen bsten bya zhing //skyes bu dam pa bsten par bya/ /de lta bu dag bsten byas na/ /sdig par mi 'gyur legs par 'gyur/ /gang dag thos mang gnas mang sems pa dang / /dad dang shes rab ldan de mi yis bsten/ /'dir ni de yis legs smras mnyan byas na/ /ring po nas kyang khyad par thob par 'gyur//dman pa bsten pas mi dag nyams 'gyur zhing / /thad kar bab pa bsten pas so na gnas/ /gtso bo bsten pas dam pa 'thob 'gyur bas/ /de phyir bdag pas gtsor gyur bsten par bya/ /tshul khrims nye bar zhi ba dang //shes rab ches mchog ldan pa yi/ /gtso bo gang yin de bsten na/ /gtso bo bas kyang ches gtsor 'gyur/ /mi yis 'di na nya rul la/ /ku sha'i gtsang byed bcings pa gang / /ku sha nyid kyang rul 'gyur ba/ /sdig pa bsten pa'ang de bzhin 'gyur/ /mi yis rgya spos pa la sha'i//lo mar phur ma byas pa gang / /lo ma nyid kyang dri zhim pa/ /dam pa bsten pa'ang de bzhin 'gyur/ /gal te sdig pa byed pa dag /sdig mi byed pas bsten na yang / /sdig pa byed par dogs skye zhing / /mi snyan pa yang 'phel bar 'gyur/ /bsten bya ma yin bsten pa'i mi//de yi skyon gyis skyon can 'gyur/ /dong par dug bskus mda' bcug pas/ /dug ma bskus pa'ang gos pa bzhin/ /brten pa skyon gos 'jigs pa dag /sdig pa can dang bshes mi bya/ /ji ltar grogs po bsten pa dang / /ji ltar nye bar bsten byas pa//bsten bya de ni ci 'dra bar/ /ring po mi thogs de 'drar 'gyur/ /de bas 'bras bu'i snod bzhin du/ /bdag gis bsten pa shes pa yis/ /dam pa ma yin mi bsten cing / /mkhas pas dam pa bsten byas la/ /dge slong de'i lam rjes 'brang na/ /sdug bsngal zad pa thob par 'gyur//byis pas ji srid gson par du/ /gal te mkhas pa bsten byas kyang / /de yis chos shes mi 'gyur te/ /gzar bus tshod ma'i ro bzhin no/ /shes rab ldan pas yud tsam zhig /mkhas pa nye bar bsten pas kyang / /de yis chos rnams shes 'gyur te//lce yis tshod ma'i ro bzhin no/ /byis pas ji srid gson par du/ /gal te mkhas pa bsten byas kyang / /de la mig ni med pa'i phyir/ /chos rnams shes par mi 'gyur ro/ /shes rab ldan pas yud tsam zhig /mkhas pa nye bar bsten pas kyang / /de la mig ni yod pa'i phyir//chos rnams rab tu shes par 'gyur/ /byis pas ji srid gson bar du/ /gal te mkhas pa bsten byas kyang / /rdzogs sangs rgyas kyis bstan pa yi/ /chos rnams de yis shes mi 'gyur/ /shes rab ldan pas yud tsam zhig /mkhas pa nye bar bsten pas kyang //rdzogs sangs rgyas kyis bstan pa yi/ /chos rnams de yis shes par 'gyur/ /don ldan tshig ni gcig gis kyang / /mkhas pa yi ni bya ba byed/ /sangs rgyas kun gyi gsung gis kyang / /byis pa'i bya ba byed mi 'gyur/ /blo dang ldan pa tshig gcig gis//tshig brgya dag ni shes par 'gyur/ /byis pa la ni tshig stong gis/ /tshig gcig shes par mi 'gyur ro/ /nyis na mkhas dang mi mdza' sla'i/ /byis pa rnams dang mdza' mi rung / /byis pa rnams dang mdza' byed pa/ /sems can dmyal bar khrid par byed/ /byis pa gang zhig byis pa'o zhes//shes pa de 'dir mkhas pa yin/ /byis pa gang zhig mkhas sems pa/ /de ni byis pa zhes brjod do/ /byis pas bstod pa gang yin dang / /mkhas pas smad pa gang yin las/ /mkhas pas smad pa ches rung gis/ /byis pas bstod pa mi rung ngo //byis pa bsten pa sdug bsngal zhing / /rnam pa kun du dgra 'dra bas/ /byis pa mi thos mi mthong zhing / /ma bsten gyur pa nyid rung ngo / /gnyen dang phrad pa ji lta bar/ /brtan pa bsten na bde bar 'gyur/ /de bas rgyu skar lam du zla ba ltar/ /brtan zhing thos mang mchog 'dren byed pa dang //tshul khrims ldan dang 'phags pa'i brtul zhugs can/ /mi mchog brtse ldan blo bzangs bsten par gyis/ /mdza' bshes kyi tshoms te nyi shu rtsa lnga pa'o// //rus sbal rang gi khog par yan lag ltar/ /dge slong yid kyi rnam rtog nang bsdus nas//rten pa med cing gzhan la 'tshe med par/ /mya ngan 'das la su yang smod mi byed/ /bzod pa dka' thub mchog ste bzod pa ni/ /mya ngan 'das pa mchog ces sangs rgyas gsung / /rab tu byung ba gzhan la 'tshe ba dang / /gzhan la gnod pas dge sbyong ma yin no//tshig rtsub ci yang smra mi bya/ /smras na slar yang smra bar byed/ /'thab gcugs tshig gis sdug bsngal zhing / /de la phyir yang chad pas gcod/ /gal te bdag gis phar byas na/ /'khar ba'i snod la brdungs pa bzhin/ /'khor bar skye dang rga ba dag / yun ring nyams su myong bar 'gyur/ /bdag gis phar ni ma byas dang / /'khar ba'i snod la ma brdungs ltar/ /'di ltar 'thab mo mi 'byung zhing / /mya ngan 'das pa thob par 'gyur/ /nad med rnyed pa'i dam pa ste/ /chog shes pa ni nor gyi dbyig /yid gcugs bshes pa'i mchog yin te//mya ngan 'das pa bde ba'i phul/ /'du byed sdug bsngal ma rungs pa/ /nad kyi nang na bkres mi bzad/ /de ltar ji bzhin shes na ni/ /mya ngan 'das pa mchog tu 'gyur/ /bde 'gror 'gro ba nyung zad de/ /ngan 'gror 'gro ba bsam yas shig /de lta'i nyes dmigs rtogs gyur na//myur du mya ngan 'das pa 'thob/ /bde 'gror 'gro ba rgyu dang bcas/ /ngan 'gror 'gro ba rgyu dang ldan/ /mya ngan 'das 'gro rgyu can te/ /de dag thams cad rgyu dang bcas/ /nags tshal mchog tu ri dwags 'gro/ /mkha' la bya rnams 'gro bar byed/ / chos la rnam par bsgoms 'gro ste/ /dgra bcom mya ngan 'das par 'gro/ /'di na brtson 'grus zhan pa dang / /blo chung shes pa med pa yis/ /mdud pa thams cad rab gtubs pa'i/ /mya ngan 'das pa thob mi 'gyur/ /khyod kyis gru 'di'i chu phyags dang / /'di ni yang bar 'gyur ba ltar//de bzhin zhe sdang 'dod chags spongs/ /de nas mya ngan 'das pa 'thob/ /sngon chad byung ba mi 'byung zhing / /ma byung ba dag 'byung bar 'gyur/ /ma byung 'byung bar mi 'gyur la/ /da ltar byung ba'ang yod ma yin/ /blta dka' mtha' med der mi mthong / /bden pa rab rtogs shes pa dang //sred dang dga' ba med mthong ba/ /'di 'dra 'di ni sdug bsngal mtha'/ /sred pa rnams ni bcad pa dang / /'dod chags rab tu spangs pa dang / /mtsho bskams nas ni mi 'bab pa/ /'di 'dra 'di ni sdug bsngal mtha'/ /lus zhig tshor ba bsil bar gyur//'du shes 'gags shing 'du byed zhi/ /rnam par shes pa nub gyur pa/ /'di 'dra 'di ni sdug bsngal mtha'/ /lta bas mthong bar gyur tsam dang / /nyan pas thos par gyur pa tsam/ /rtogs par byed pas rtogs tsam dang / /rnam par shes pas rnam shes tsam/ /'di 'dra 'di ni sdug bsngal mtha'//'di dang ma dang gdungs rab gdungs/ /'di 'dra 'di ni sdug bsngal mtha'/ /ma re ma dga' rab zhi dang / /kun du 'dod chags bral gyur pa/ /'di 'dra 'di ni sdug bsngal mtha'/ /rten pa yod pas spyod par 'gyur ro/ /spyod pa yod pas gzhol bar 'gyur ro//gzhol ba yod pas shin tu ma sbyangs par 'gyur ro/ /shin tu ma sbyangs pa yod pas 'gro ba dang 'ong bar 'gyur ro/ /'gro ba dang 'ong ba yod pas gzhan du shi 'pho len par 'gyur ro/ /gzhan du shi 'pho blangs pas 'di ltar gzhan du skye ba dang / rga ba dang / na ba dang / 'chi ba dang / mya ngan dang smre sngags 'don pa dang / sdug bsngal ba dang / yid mi bde ba dang / 'khrug pa 'byung zhing 'di ltar sdug bsngal gyi phung po chen po 'ba' zhig po 'di 'byung bar 'gyur ro/ /rten pa med pas spyod pa med par 'gyur ro/ /spyod pa med pas gzhol bar mi 'gyur ro//gzhol bar ma gyur pas shin tu sbyangs par 'gyur ro/ /shin tu sbyangs pas 'gro ba dang 'ong bar mi 'gyur ro/ /'gro ba dang 'ong ba med pas gzhan du 'chi 'pho len pa med par 'gyur ro/ /gzhan du 'chi 'pho len pa med pas 'di ltar gzhan du skye ba dang /rga ba dang / na ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'gag par 'gyur zhing / 'di ltar sdug bsngal gyi phung po chen po 'ba' zhig po 'di 'gag par 'gyur ro/ /dge slong dag ma skyes pa dang /ma byung ba dang / ma bcos pa dang / 'dus ma byas pa dang / mi 'byung ba yod do/ /skye ba dang / 'byung ba dang / bcos ma dang / sems pas byas pa dang / 'dus byas dang / rten cing 'brel bar 'byung ba yod do/ /dge slong dag gal te ma skyes pa dang / ma byung ba dang /ma bcos pa dang / 'dus ma byas pa dang / mi 'byung ba med du zin na/ skye ba dang / 'byung ba dang / bcos ma dang / 'dus byas dang / sems pas byas pa dang / rten cing 'brel bar 'byung ba'i nges par 'byung ba yod do zhes nga mi smra'o/ /dge slong dag gang gi phyir 'di na ma skyes pa dang /ma byung ba dang / ma bcos pa dang / 'dus ma byas pa dang / mi 'byung ba yod pa de'i phyir/ skye ba dang / 'byung ba dang / bcos ma dang / 'dus byas dang / sems pas byas pa dang / rten cing 'brel par 'byung ba'i nges par 'byung ba yod do zhes nga smra'o//skyes dang byung dang 'byung ba dang / /bcos dang 'dus byas mi brtan zhing / /rga dang 'chi dang rmongs pa yi/ /chos can rab tu 'jig 'gyur ba/ /zas kyi rgyud las byung ba yi/ /'jig 'gyur 'di la dga' mi bya/ /de yi nges par 'byung ba'i gzhi//rtog dang dpyod dang zhi ba dang / /sdug bsngal chos rnams 'gags pa ste/ /'du byed nye bar zhi ba bde/ /dge slong dag de ni gang du yang gnas par mi 'gyur te/ sa la gnas par mi 'gyur/ chu la ma yin/ me la ma yin/ rlung la ma yin/ nam mkha' mtha' yas skye mched la ma yin/rnam shes mtha' yas skye mched la ma yin/ ci yang med pa'i skye mched la ma yin/ 'du shes yod min med min skye mched la ma yin/ 'jig rten 'di la ma yin/ 'jig rten pha rol la ma yin/ nyi ma dang zla ba gnyis la gnas pa ma yin te/'di la dmigs pa med par ngas mngon par shes so/ /dge slong dag de la 'gro ba dang 'ong ba yod par nga mi smra ste/ gnas par ma yin no/ /'chi 'pho yod par nga mi smra ste/ skye bar ma yin/ 'di lta bu 'di ni sdug bsngal gyi mtha' yin no/ /sa dang chu dang me dang rlung //gang la'ang gnas pa ma yin pa/ /de la dkar pos gsal mi byed/ /de la mun pa'ang yod ma yin/ /de la zla bas snang mi byed/ /de la nyi mas mngon mi byed/ /thub pa bram ze gang yin pa/ /des ni rang gis rig pa yin/ /de ni gzugs dang gzugs med dang / / sdug bsngal kun las rab tu grol/ /mthar phyin 'jigs pa med pa ste/ /rlom med 'gyod pa med pa yin/ /srid pa'i zug rngu gtubs pa ste/ /lus kyi tha mar gyur pa yin/ /'di ni mthar phyin rnams kyi mchog /zhi ba'i go 'phang bla med pa/ /mtshan ma thams cad zad pa ste//byang grol go 'phang 'chi med yin/ /mtshungs dang mi mtshungs 'byung ba yi/ /'du byed thub pas rab tu spangs/ /nang du mnyam bzhag dga' ba yis/ /sgo nga'i sbubs ni dral nas byung / /sbyin kun chos kyi sbyin pas thub/ /dga' kun chos kyi dga' bas thub/ / stobs kun bzod pa'i stobs kyis thub/ /bde kun sred pa zad pas thub/ /mya ngan las 'das pa'i tshoms te nyi shu rtsa drug pa'o// //bdag las gzhan pa'i skyon dag ni/ /phub ma gtor ba ji bzhin du/ /gzhan gyi skyon mthong sla ba ste/ /rang gi skyon ni mthong bar dka'//g.yo can cho lo 'jo ba ltar/ /rang gi de ni sbed pa dang / /gzhan gyi skyon la lta byed cing / /rtag tu 'phyas lang 'du shes can/ /de yis ring du chos mi mthong / /g.yon phyogs chos ni rab tu 'phel/ /spyi rdol byed cing 'phrog rlom can/ /mi gtsang las ldan khA lta bur//shin tu nyon mongs 'tsho ba can/ /ngo tsha med pa'i 'tsho ba sla/ /rtag tu gtsang ma tshol ba dang / /thub chod mi byed 'dzem bag can/ /'tsho ba dag pa lta ba yi/ /ngo tsha shes pa'i 'tsho ba dka'/ /'jig rten mun par gyur 'di ste/ /de las lhag mthong ldan pa nyung //rgya las shor ba'i bya lta bur/ /mtho ris la dga' shas tsam zhig /byis pa lus kyis bcings gyur pa/ /mun pa'i 'khor gyis bskor ba yin/ /'jig rten nor la chags pa dag /gzhan rdzas lta bur lta bar byed/ /bdag gis skye dgu 'di phyung zhing //gzhan gyis byas so snyam sems pa/ /bden pa min la bden lta bas/ /ci yang mthong bar mi 'gyur ro/ /de ni 'gas kyang mi mthong zhing / /zug rngu mthong bar mi 'gyur ro/ /yul sred gang la skye bo chags pa yi/ /zug rngu de dag sngon chad mthong ba dang / / de ni bdag gis byas snyam mi 'dzin cing / /de ni gzhan gyis byas snyam mi 'dzin to/ /skye dgu 'di dag nga rgyal ldan/ /nga rgyal la chags nga rgyal bcings/ /rtsod par gyur pa'i lta ba can/ /'khor ba ldog par mi 'gyur ro/ /thob par gyur pa gang yin dang / / thob par bya ba gang yin pa/ /de dag gnyi ga rdul gyis yog /rjes su nad pa slob par byed/ /gang zhig tshul khrims dang / bslab pa dang / brtul zhugs dang / tshangs par spyod pa dang / dka' thub dang / nye bar gnas pa snying por byed pa de ni mtha' gcig go/ /gang zhig de ltar lta zhing 'di skad ces 'dod pa ni gtsang ba'o//'dod pa ni bsod nyams can no/ /'dod pa ni longs spyod par bya ba'o/ /'dod pa ni skyon med pa yin no zhes smra zhing de dag lhag par 'dod pa rnams su lhung bar byed pa'i brtul zhugs len pa 'di yang mtha' gcig go/ /mtha' gnyis po 'di dag ni dur khrod 'phel bar byed pa ste/'di dag gis dur khrod 'phel bar byas so/ /mtha' gnyis po 'di dag ma mthong ba kha cig zhen par byed cing / kha cig mngon par rgyug par byed la/ de dag lhag par zhen par byed cing lhag par rgyug par byed pa dag mig dang ldan pas mthong ngo //mtha' gnyis po 'di dag mthong ba na zhen par mi byed rgyug par mi byed la/ de dag lhag par zhen par mi byed cing lhag par rgyug par mi byed pa yang mig dang ldan pas mthong ngo / /de dag de ltar mi byed cing de dag de ltar mi sems na/ de dag gi lam du mi gdags pa 'di lta ste 'di ni sdug bsngal gyi mtha' yin no//ji ltar chu bur mthong ba dang / /ji ltar smig rgyu mthong ba ltar/ /de bzhin 'jig rten lta byed pa/ /'chi bdag rgyal pos mthong mi 'gyur/ /ji ltar chu bur mthong ba dang / /ji ltar smig rgyu mthong ba ltar/ /de bzhin lus la lta byed pa//'chi bdag rgyal pos mthong mi 'gyur/ /gang la byis pa mngon chags pa/ /de la mkhas pa chags mi 'gyur/ /rgyal po'i shing rta bkra ba ltar/ /lus 'di rtag tu blta bar gyis/ /gang la byis pa rmongs 'gyur ba/ /de la mkhas pa rmongs mi 'gyur/ / rgyal po'i shing rta bkra ba ltar/ /lus 'di rtag tu blta bar gyis/ /gang du byis pa nyams gyur pa/ /glang rgan rdzab tu chud pa bzhin/ /rgyal po'i shing rta bkra ba ltar/ /lus 'di rtag tu blta bar gyis/ /nad pa lta bur 'jig chos can/ /rma byung ba dang 'dra ba ste/ /gang yang brtan par mi gnas pa//lus 'di rtag tu blta bar gyis/ /nad pa 'jig pa'i chos can ltar/ /gang yang brtan par mi gnas par/ /nor bu'i rna cha gdub 'khor gyis/ /brgyan pa'i lus la blta bar gyis/ /skra ni lan bu brgyad byas shing / /mig sman gyis ni bskus pa'i mig /byis pa lhag par rmongs byed kyang / /pha rol tshol bar mi byed do/ /mig sman gyis ni gsar bris shing / /rnag can lus ni brgyan pa yis/ /byis pa lhag par rmongs byed kyang / /pha rol tshol bar mi byed do/ /lus ni dri zhim gyis bskus nas/ /rkang pa btsag gis byugs pa dag /byis pa lhag par rmongs byed kyang / /pha rol tshol bar mi byed do/ /gang zhig 'dod par kun sbyor 'brel chags shing / /kun du sbyor ba'i skyon rnams ma mthong ba/ /'dod par 'brel la chags pa'i mi de yis/ /chu bo mtha' yas yangs pa rgal mi 'gyur//chags bral mchog dang tha ma thams cad dag /'di la bdag dang bdag gir mi lta zhing / /de ltar rnam grol sngon chad ma rgal ba'i/ /chu bo rab rgal yang srid med par 'gyur/ /gang zhig tshal spangs tshal med pa/ /nags tshal spangs nas nags su rgyug /grol ba 'ching bar gcen pa yin//gang zag 'di la ltos shig tshur/ /shing rta mthun pa'i rtsibs ldan pa/ /yan lag yid 'ong gos dkar g.yogs/ /sdig med 'gro ba la ltos la/ /ching ma'i rgyun rnams bcad par gyis/ /'jigs pas skrag pa'i mi dag ni/ /phal cher ri dang nags tshal dang //skyed mos tshal dang mchod gnas dang / /ljon shing rnams la skyabs su 'gro/ /skyabs de gtso bo ma yin zhing / /skyabs de mchog tu gyur pa min/ /de la skyabs su song ba yis/ /sdug bsngal kun las grol mi 'gyur/ /gang zhig sangs rgyas chos dang ni/ / dge 'dun la ni skyabs song zhing / /sdug bsngal sdug bsngal kun 'byung dang / /sdug bsngal yang dag 'das pa dang / /bde ba mya ngan 'das 'gro ba'i/ /'phags lam yan lag brgyad pa ste/ /'phags pa'i bden pa bzhi po dag /gang tshe shes rab kyis mthong ba//de ni skyabs kyi mchog yin zhing / /de ni skyabs kyi dam pa yin/ /de la skyabs su song ba yis/ /sdug bsngal kun las grol bar 'gyur/ /mthong bas mthong zhing mthong bas ma mthong mthong / /ma mthong mi mthong mthong bya mthong mi 'gyur/ /'dra mthong lhag mthong tha dad dngos por brjod//nyin mtshan nam yang lhan cig mi gnas bzhin/ /'dra ba mthong bas mthong mi 'gyur/ /gal te mthong na 'dra mi mthong / /mthong 'dis 'dra ba mi mthong ste/ /'dra mthong mi yis mthong ba med/ /mi yis ci ma mthong na 'dra ba mthong //ci zhig mthong na 'dra ba mthong mi 'gyur/ /ji ltar 'di na 'dra ba mthong ba dag /gang zhig med na 'dra bar mthong dang bral/ /gang tshe 'di yis sdug bsngal ma mthong ba/ /de yi tshe na bdag tu mthong bar 'gyur/ /ji lta ji ltar sdug bsngal rtogs gyur pa/ / des ni bdag 'di 'dra ba mthong mi 'gyur/ /gang gis so so'i skye bsgribs na/ /'du byed sdug bsngal ma mthong ba/ /de phyir 'di na 'dra mthong ste/ /de med 'dra ba mi mthong ngo / /mthong ba'i tshoms te nyi shu rtsa bdun pa'o// //sdig pa thams cad mi bya ste/ /dge ba phun sum tshogs par bya//rang gi sems ni yongs su gdul/ /'di ni sangs rgyas bstan pa yin/ /sbyin pas bsod nams rab tu 'phel/ /legs bsdams dgra sogs mi 'gyur ro/ /dge dang ldan pas sdig pa spong / /nyon mongs zad pas mya ngan 'da'/ /mkhas dang 'dre dang byis pa'i skye bo dang //lhan cig spyod dang gcig pu gnas kyang rung / /ngang pas chu la 'o ma 'thung ba ltar/ /mkhas pas sdig pa can rnams rab tu spang / /'jig rten nyes dmigs mthong ba dang / /'gog par 'gyur pa'i chos mthong bas/ /'phags pa sdig la dga' mi byed/ / sdig can dge la dga' mi 'gyur/ /legs par nyer zhi'i ro dang ni/ /rab tu dben pa'i ro shes pa/ /rims nad med cing sdig med la/ /chos la dga' ba'i ro dag 'thung / /sems kyi zag pa med pa dang / /sems ni 'ching bas ma bcom la/ /dge dang sdig pa rab spangs pa/ / ngan 'gro rnams kyis 'jigs pa med/ /gnas min zlog dang legs smra dang / /nyes dmigs ston par byed pa dang / /mkhas pas tshar gcod smra byed pa/ /de lta'i skye dgu bsten par bya/ /de lta bu dag bsten byas na/ /sdig par mi 'gyur legs par 'gyur/ /nye bar zhi zhing rab zhi la//dal bus smra zhing khengs med pa/ /sdig pa'i chos rnams sprug byed de/ /rlung gis ljon shing lo ma bzhin/ /gang zhig skyes bu dag cing nyon mongs med/ /rab tu sdang med mi la khro byed pa'i/ /byis pa de la sdig pa phyir 'gog ste/ /rdzi phyogs su ni rdul rnams gtor ba bzhin//dge ba byed pas dge ba dang / /sdig pa byed pas sdig pa ste/ /mi yis gang dang gang byas pa/ /de de rang gis mthong bar 'gyur/ /bdag gis sdig pa byas na ni/ /de bdag kho na kun nyon mongs/ /bdag gis sdig pa ma byas na/ /bdag nyid kho na rnam par dag / gzhan gyis gzhan spyod mi byed kyi/ /dag dang ma dag rang rang byed/ /bdag nyid kyis ni sdig pa dag /byas shing nye bar bsags pa yis/ /bsam brlag mngon du 'joms par byed/ /rdo rjes nor bu 'bigs pa bzhin/ /mig ldan 'gro bar byed pa yis/ /nyam nga'i lam dag ji lta bar//mkhas pas 'tsho ba'i 'jig rten 'dir/ /sdig pa dag ni yongs su spang / /nor chen gyis ni grogs nyung dang / /tshong pas 'jigs bcas lam dang ni/ /gson par 'dod pas dug lta bur/ /mkhas pas sdig can yongs su spang / /gal te lag mthil rma med na/ / lag pas dug ni bzung byas kyang / /rma med dug ni mi 'jen ltar/ /ma byas pa la sdig pa med/ /bdag la mi phan bya ba dang / /legs pa ma yin bya bar sla/ /gang dag phan zhing bder 'gyur ba/ /de ni mchog tu bya bar dka'/ /dam pas legs pa bya sla yi/ /dam pas sdig pa bya bar dka'//ngan pas sdig pa bya sla yi/ /'phags pas sdig pa bya bar dka'/ /ji srid sdig pa ma smin pa/ /de srid byis pa mngar bar sems/ /gang tshe sdig pa smin gyur pa/ /de tshe de ni tsha bar sems/ /ji srid sdig pa ma smin pa/ /de srid sdig pa rung bar lta//gang tshe sdig pa smin gyur pa/ /de tshe sdig pa mthong bar 'gyur/ /ji srid bzang po ma smin pa/ /de srid bzang po sdig par mthong / /gang tshe bzang po smin gyur pa/ /de tshe bzang por mthong bar 'gyur/ /sdig pa sdug bsngal sogs pas na/ /de la dga' bar mi bya'o//brgya la sdig pa byas na yang / /yang dang yang du de mi bya/ /bsod nams bde ba sogs pas na/ /de nyid la ni dga' bar bya/ /gal te bsod nams byas na yang / /de ni yang dang yang du bya/ /sdig la yid ni mngon dga' ba/ /bsod nams dal bus byed 'gyur bas/ / sdig pa las ni sems bzlog cing / /bsod nams mngon par smyur te bya/ /sdig pa chung ngu byas pas kyang / /'jig rten pha rol 'jig chen dang / /phung khrol chen po byed 'gyur te/ /khong par song ba'i dug bzhin no/ /bsod nams chung ngu byas pas kyang / /'jig rten pha rol bde bar 'dren//don chen dag kyang byed 'gyur te/ /'bru rnams phun sum 'byor pa bzhin/ /gang zhig nyes med chad pas gcod/ /sngar ba min la rab sdang ba/ /gnas gzhan gang yang rung ba bcu/ /myur du thob pa kho nar 'gyur/ /tshor ba mi bzad pa dag gam/ /yang na lus ni 'dral ba'am//gnod pa'i tshor ba tsha ba'ang rung / /yang na sems 'khrugs thob par 'gyur/ /gnyen 'dun rnams dang bral ba'am/ /longs spyod zad par 'gyur ba'am/ /rgyal po'i gnod pa 'byung ba'am/ /mi snyan shin tu mi bzad dam/ /yang na khyim ni me chen pos//nges par sreg par byed par 'gyur/ /shes rab 'chal ba lus zhig nas/ /bcu pa ngan 'gror 'gro bar 'gyur/ /sdig pa byas pas bag dbab mi bya ste/ /ring byas rgyang mar byas kyang bag mi dbab/ /dben par byas kyang bag dbab mi bya ste/ /de yi rnam smin yod pas bag mi dbab//bsod nams byas pas bag ni dbab bya ste/ /ring byas rgyang ring byas kyang bag dbab cing / /dben par byas kyang bag ni dbab par bya/ /de yi rnam smin yod pas bag dbab po/ /bdag gis sdig pa byas pas mya ngan byed/ /ring dang rgyang ring byas pas mya ngan byed//bdag gis dben par byas pas mya ngan byed/ /de yi rnam smin yod pas mya ngan byed/ /bdag nyid nag po'i las dang ldan mthong nas/ /'dir yang mya ngan gzhan du'ang mya ngan byed/ /sdig pa byas pas gnyi gar mya ngan byed/ /de ni mya ngan de rab mya ngan byed//bdag gis bsod nams byas pas dga' bar 'gyur/ /ring dang rgyang ring byas pas dga' bar 'gyur/ /bdag gis dben par byas pas dga' bar 'gyur/ /de yi rnam smin yod pas dga' bar 'gyur/ /bdag nyid rnam dag las dang ldan mthong nas/ /'di na dga' 'gyur gzhan du'ang dga' bar 'gyur//bsod nams byas pas gnyi gar dga' 'gyur zhing / /de ni dga' 'gyur de rab dga' bar 'gyur/ /bdag gis sdig pa byas pas gdung 'gyur zhing / /ring byas rgyang ring byas pas gdung bar 'gyur/ /bdag gis dben par byas pas gdung 'gyur zhing //de yi rnam smin yod pas gdung bar 'gyur/ /bdag nyid nag po'i las dang ldan mthong nas/ /'di na gdung 'gyur pha rol gdung bar 'gyur/ /sdig pa byas pas gnyi gar gdung 'gyur zhing / /de ni gdung 'gyur de rab gdung bar 'gyur/ / bdag gis bsod nams byas pas dga' 'gyur zhing / /ring byas rgyang ring byas pas dga' bar 'gyur/ /bdag gis dben par byas pas dga' 'gyur zhing / /de yi rnam smin yod pas dga' bar 'gyur/ /bdag nyid dkar po'i las dang ldan mthong nas/ /'di na dga' 'gyur pha rol dga' bar 'gyur//bsod nams byas pas gnyi gar 'ga' 'gyur zhing / /de ni dga' 'gyur de rab dga' bar 'gyur/ /sdig pa byas shing bsod nams ma byas la/ /chos dang gol zhing chos min thob pa'i mi/ /sdig pa'i las can 'chi bas 'jigs 'gyur te//chu chen nang du gru ngan zhig pa bzhin/ /bsod nams byas shing sdig pa ma byas la/ /dam pa rnams kyi sngon gyi chos spyod pas/ /da ni nams kyang 'chi bas 'jigs med de/ /brtan pa'i gru yis pha rol 'gro ba bzhin/ /sdig pa'i tshoms te nyi shu rtsa brgyad pa'o// //ji srid nyi ma ma shar ba/ /de srid srin bu me khyer snang / /nyi ma shar bar gyur pa na/ /snang ba med cing sngon por 'gyur/ /ji srid de bzhin gshegs ma shar/ /de srid rtog ge pa rnams snang / /'jig rten rdzogs sangs rgyas shar ba/ /rtog can nyan thos bcas mi snang //gces min gces par blos 'dzin cing / /gces la gces pa min rtog pa/ /log par kun rtog spyod yul can/ /des ni gces pa thob mi 'gyur/ /gces pa min la gces min dang / /gces la gces par 'du shes pa/ /legs par kun rtog spyod yul can//des ni gces pa 'thob par 'gyur/ /'di na lta dang nyan la mngon zhen pa'i/ /chings ma gsar dang gsar du 'phel ba dag /'khor bar rgyug cing 'gro dang sdod 'gyur te/ /me nang lhung ba'i phye ma leb dang 'dra/ /'di la myong 'gyur gzhan la myong 'gyur ba'am//'di na the tshom tha dad ji snyed pa/ /de dag tshangs par spyad spyod 'bad pa dang / /sems par byed pas rab tu rnam par spong / /gang zhig snyigs ma yod bzhin du/ /ngur smrig gos ni gyon byed pa/ /dul dang des pa med pa de/ /ngur smrig gyon pa'i 'os ma yin/ /gang zhig snyigs ma rnams spangs nas//tshul khrims legs par mnyam bzhag pa/ /dul dang des par ldan pa de/ /ngur smrig gyon pa'i 'os yin no/ /g.yo sgyu 'jungs dang ldan pa'i mi/ /kha dog dang ni gzugs ldan pa'am/ /yang na smra bar byed tsam gyis/ /pho mchog yin par mi chud do//gang zhig chos gsum de dag rnams/ /ta la'i mgo bo bzhin bcad nas/ /blo ldan skyon ni bsal ba de/ /pho mchog yin par brjod par bya/ /'jig rten 'di na legs par ma bsdams pa/ /phal cher legs bsdams rtags kyis sgyu byed pas/ / legs par ma brtags bar du mi dag gi/ /mdog gzugs lan 'ga' mthong bas yid ma rton/ /ra gan kha bsgyur lta bur mi 'tsham zhing / /lcags phyed gser gyis g.yogs pa ji lta bur/ /khong pa rab gdug phyi rol 'phags tshul gyis/ /'jig rten 'di na 'khor dang bcas par rgyu//gang zhig rde 'gengs gnyid ni log pa dang / /nyin dang mtshan du 'gre ldog nyal byed pa/ /rdzab nang phag chen lus rgyas ji lta bar/ /yang dang yang du smad pa'i mngal du 'jug /mi ni rtag tu dran pa ldan pa dang / /rtag tu kha zas kyi ni tshod shes pa/ / de yi sdug bsngal chung bar 'gyur ba dang / /dal bus 'ju bas tshe yang ring bar byed/ /gang zhig dbang po ma bsdams shing / /zas kyi tshod ni mi shes la/ /dran pa nyams dang le lo can/ /gtsang bar lta zhing gnas byed pa/ /de ni 'dod chags rnams kyis bcom/ /rlung gis mi brtan ljon shing bzhin//gang zhig dbang po legs bsdams shing / /zas kyi tshod ni shes pa dang / /so sor dran zhing brtson 'grus ldan/ /mi gtsang lta bas gnas byed pa/ /de ni 'dod chags kyis mi choms/ /rlung gis ri bo mi g.yos bzhin/ /dgon pa dga' bar bya 'os pa//de la skye bo mi dga' yang / /de la 'dod chags bral ba dga'/ /'dod pa tshol bar byed rnams min/ /dgon pa'am yang na grong dag gam/ /gshang ngam thang bu dag kyang rung / /gang na 'phags pa bzhugs pa yi/ /sa de yid du 'ong ba yin/ /dam pa ring nas snang gyur te//gangs can gyi ni ri bo bzhin/ /ngan pa nye yang mi snang ste/ /mun khrod mda' ni 'phangs pa bzhin/ /mkhas pa don sems byed pa yi/ /dam pa nyid dang 'grogs na ni/ /don chen 'gyur zhing zab mo yi/ /shes rab so sor rtogs par 'gyur/ /gzhu yis mda' 'phangs bsnun pa yi//g.yul ngo'i glang chen ji bzhin du/ /tshul 'chal skye bo mang po yi/ /mi snyan smras pa bzod par bya/ /mi gang khyim 'bigs byed pa dang / /dad pa med cing byas mi gzo/ /go skabs bcom dang skyugs pa za/ /de ni skyes bu dam pa yin/ / pha ma dag ni bsad byas shing / /rgyal po gtsang sbra can gnyis dang / /yul 'khor 'khor dang bcas bcom na/ /mi ni dag par 'gyur zhes bya/ /gang dag kun du sogs med cing / /gang dag kha zas yongs shes pa/ /stong dang mtshan ma med pa dang //dben pa nyid kyi spyod yul can/ /de dag 'gro ba rtogs dka' ste/ /nam mkha' la ni bya rjes bzhin/ /gang dag kun du sogs med cing / /gang dag kha zas yongs shes pa/ /stong dang mtshan ma med pa dang / /dben pa nyid kyi spyod yul can/ /de dag rjes ni rtogs dka' ste//nam mkha' la ni bya rjes bzhin/ /gang dag kun du sogs med cing / /gang dag kha zas yongs shes pa/ /stong dang mtshan ma med pa dang / /rtag tu bsam gtan spyod yul can/ /de dag 'gro ba rtogs dka' ste/ /nam mkha' la ni bya rjes bzhin/ / gang dag kun du sogs med cing / /gang dag kha zas yongs shes pa/ /stong dang mtshan ma med pa dang / /rtag tu bsam gtan spyod yul can/ /de dag rjes ni rtogs dka' ste/ /nam mkha' la ni bya rjes bzhin/ /gang dag kun du sogs med cing / /gang dag kha zas yongs shes pa//stong dang mtshan ma med pa dang / /dben pa nyid kyi spyod yul can/ /de dag 'gro ba rtogs dka' ste/ /nam mkha' la ni bya rjes bzhin/ /gang dag kun du sogs med cing / /gang dag kha zas yongs shes pa/ /stong dang mtshan ma med pa dang //dben pa nyid kyi spyod yul can/ /de dag rjes ni rtogs dka' ste/ /nam mkha' la ni bya rjes bzhin/ /gang dag pha mthar rten med cing / /gang gis zag zad yongs shes pa/ /stong dang mtshan ma med pa dang / /dben pa nyid kyi spyod yul can/ /de dag 'gro ba rtogs dka' ste//nam mkha' la ni bya rjes bzhin/ /gang dag pha mthar rten med cing / /gang gis zag zad yongs shes pa/ /stong dang mtshan ma med pa dang / /dben pa nyid kyi spyod yul can/ /de dag rjes ni rtogs dka' ste/ /nam mkha' la ni bya rjes bzhin//gang dag pha mthar rten med cing / /gang gis zag zad yongs shes pa/ /spong dang mtshan ma med pa dang / /rtag tu bsam gtan spyod yul can/ /de dag 'gro ba rtogs dka' ste/ /nam mkha' la ni bya rjes bzhin/ /gang dag pha mthar rten med cing / /gang gis zag zad yongs shes pa//stong dang mtshan ma med pa dang / /rtag tu bsam gtan spyod yul can/ /de dag rjes ni rtogs dka' ste/ /nam mkha' la ni bya rjes bzhin/ /gang dag pha mthar rten med cing / /gang gis zag zad yongs shes pa/ /stong dang mtshan ma med pa dang //rtag tu bsam gtan spyod yul can/ /de dag 'gro ba rtogs dka' ste/ /nam mkha' la ni bya rjes bzhin/ /gang dag pha mthar rten med cing / /gang gis zag zad yongs shes pa/ /stong dang mtshan ma med pa dang / /rtag tu bsam gtan spyod yul can/ / de dag rjes ni rtogs dka' ste/ /nam mkha' la ni bya rjes bzhin/ /skye dgu phal pa 'di dag ni/ /pha mtha' nyid du rgyug byed pas/ /gang dag pha rol 'gro byed pa'i/ /mi yi skye bo de dag nyung / /gang dag legs par gsungs pa yi/ /chos la chos kyi rjes lta bas/ / skye bo de dag skye shi yi/ /mtsho chen rgal dka'i pha rol 'gro/ /skyob pa rab tu rnam grol zhing / /dus 'das mya ngan bral ba dang / /mdud pa thams cad spangs pa la/ /yongs su gdung ba yod mi 'gyur/ /'jigs dang bcas pa'i lam rgal cing / /g.yang sa yongs su spongs pa dang //sbyor dang mdud pa las grol bas/ /'dod chags kyi ni dug kun bcom/ /'dod pa lta bu'i 'dam rdzab med/ /zhe sdang lta bu'i gnod med do/ /gti mug lta bu'i rgya med de/ /sred pa lta bu'i chu klung med/ /nam mkha' la ni rjes lta bur/ /phyi rol pa la dge sbyong med//byis pa spros la mngon par dga'/ /de bzhin gshegs la spros mi mnga'/ /sbyor bas byis pa khrid pa'i phyir/ /mkhas pa sbyor ba 'joms par byed/ /mkhas pa lha dang mi dag gi/ /sbyor ba gang yin 'joms byed pa/ /sbyor ba kun dang bral ba'i phyir/ / sdug bsngal kun las grol bar 'gyur/ /sbyor ba las ni srid pa 'byung / /sbyor ba med pas srid pa zad/ /srid pa dang ni srid med pa'i/ /lam 'di gnyis ni shes gyis la/ /sbyor las rab tu 'da' bya'i phyir/ /mkhas pas de la bslab par gyis/ /nyes par spyad pa byas pas gdung 'gyur zhing //ngan 'gror song ba'i 'og tu'ang gdung bar 'gyur/ /legs par spyad pa byas pas dga' 'gyur zhing / /bde 'gror song ba'i 'og tu'ang dga' bar 'gyur/ /phyi nas gdung 'gyur de byed pas/ /gnyis na nyes spyad ma byas bla/ /gdung bar mi 'gyur de bya ste//legs par spyad pa byas na rung / /mkhas dang byis pa 'dres pa las/ /ma smras shes par mi 'gyur bas/ /zhi ba'i go 'phang smros shig dang / /smras pa yis ni shes par 'gyur/ /legs bshad drang srong rgyal mtshan te/ /drang srong rgyal mtshan chos yin pas//chos ni bshad pas gsal bya zhing / /drang srong rgyal mtshan bsgreng bar gyis/ /ma smras na yang smod byed cing / /mang du smras na smod par byed/ /dal bus smras kyang smod byed de/ /'jig rten na ni mi smad med/ /gcig tu smad par bya ba dang / /gcig tu bstod par bya ba'i mi//da ltar yod pa ma yin te/ /byung bar ma gyur 'byung mi 'gyur/ /gang dag la ni gnas pa'i spros med cing / /gang dag kun sbyor gdung las rab log pa/ /thub pa sred bral de dag rgyu mdzad kyang / /lhar bcas 'jig rten rnams kyis mi shes so/ /gang gis dad dang tshul khrims dang //blo la phan ni ma byung bar/ /ji lta ji ltar rtogs gyur pa'i/ /shes pa can dag stod byed de/ /de dag sus kyang smad 'os min/ /'dzam bu'i gling gi gser rgyan bzhin/ /ji ltar ri dang brag dag ni/ /rlung gis g.yos par mi 'gyur ltar/ /de bzhin bstod dang smad pa yis//mkhas pa rab tu g.yo ba med/ /sa la gang gi rtswa med pa/ /lo med lcug phran ga la yod/ /'ching ba las grol brtan pa de'i/ /jig sus kyang smad 'os min/ /gang zhig rgyal las mi nyams shing / /'jig rten ma rgyal chung zad med/ /sangs rgyas spyod yul mtha' yas de//'gro med gom pa gang gis bkri/ /gang zhig rgyal las mi nyams shing / /'jig rten ma rgyal chung zad med/ /sangs rgyas mthu rtsal mtha' yas de/ /'gro med gom pa gang gis bkri/ /gang la 'khrid byed srid pa ni/ /yul sred 'dra ba 'ga' med pa//sangs rgyas spyod yul mtha' yas de/ /'gro med gom pa gang gis bkri/ /gang la 'khrid byed srid pa ni/ /yul sred 'dra ba 'ga' med pa/ /sangs rgyas mthu rtsal mtha' yas de/ /'gro med gom pa gang gis bkri/ /gang zhig rnam par rtog pa rnam bsal cing //nang gi kun la rnam par rtog med pa/ /kun du sbyor dang gzugs dang 'du shes 'das/ /rnal 'byor bzhi dang bral la skye ba med/ /sngon bral phyi ma dang bral zhing / /dbus bral srid pa'i pha rol phyin/ /rnam pa kun las sems grol ba/ /skye rga phyi ma 'dren mi 'gyur/ /phrugs kyi tshoms te nyi shu dgu pa'o// //rgyal ba las ni 'khon 'byung zhing / /pha rol pham pa sdug bsngal 'thob/ /rgyal dang pha rol pham spangs na/ /nye bar zhi ba'i bde ba 'thob/ /gzhan la sdug bsngal bskyed pa yis/ /gang zhig bdag ni bde 'dod pa/ /dgra dang mi 'bral 'grogs pa dang //de ni sdug bsngal las mi 'grol/ /bde ba 'dod phyir 'byung po la/ /gang zhig 'tshe zhing chad pas gcod/ /bdag gi bde ba 'dod pa de/ /pha rol du ni bde mi 'gyur/ /gang zhig bde ba 'dod pa dag /'byung po la ni mi 'tshe zhing / /chad pas mi gcod bde 'dod pa//de dag pha rol bde ba 'thob/ /chos spyod legs par spyad bya zhing / /nyes par spyad pa de mi spyad/ /'jig rten 'di dang pha rol du/ /chos spyad pas ni bde ba 'thob/ /chos la legs spyad bde skyed pas/ /chos spyod chos kyis bsrung bar bya//chos spyod ngan 'gror mi 'gro ba/ /chos la legs spyod phan yon de'o/ /yangs pa'i gdugs kyis dbyar ka ltar/ /chos spyod chos kyis bsrung bar bya/ /chos spyod ngan 'gror mi 'gro ba/ /chos la legs spyod phan yon de'o/ /bag med mi yis chos min spyad na ni//'gro ba gang yang rung ba ngan 'gror 'gro/ /'di na sbrul nag rked nas bzung ba ltar/ /chos min spyod pa de dag rlag par 'gyur/ /chos dang chos min gnyi ga yi/ /rnam smin 'dra bar mi 'gyur te/ /chos ma yin pas dmyal bar 'gro//chos kyis bde 'gro thob par byed/ /sbyin pa byed pa'i dus dang g.yul 'gyed dus/ /rgyu yis yongs su bzung bar 'dra bas na/ /sbyin pa byed dang g.yul 'gyed 'dra zhes gsungs/ /yon tan de gnyis mi ngan rten mi byed/ /shin tu legs par chas pa gcig pus kyang //legs par ma chas 'phyis las rgyal byed ltar/ /gal te dad bskyed chung ngu byin pas kyang / /des ni de dag gzhan du bde bar 'gyur/ /'di na lan brgyar g.yul zlog dpa' bo bas/ /ser sna dgrar gyur zil gyis mnan nas su/ /gang zhig chags med sems kyis sbyin byed pa//de dag ches dpa' yin par ngas gsungs so/ /bsod nams rnam smin bde ba ste/ /mngon par bsams pa 'byor bar byed/ /myur du zhi ba dam pa yi/ /mya ngan 'das pa thob par 'gyur/ /bsod nams byed pa rnams la ni/ /gzhan las byung ba'i gnod pa dang //lha dang bdud kyi ris rnams kyis/ /bar chad bya bar mi nus so/ /gal te sdug bsngal zad bya'i phyir/ /'phags dang shes rab gtong ldan la/ /de yis 'bad rtsol byas na ni/ /lhag mthong gis ni reg par 'gyur/ /sems ni rab tu rnam dang bas//chos la dga' byed bde ba 'thob/ /'phags pas gsungs pa'i chos dag la/ /mkhas pa rtag tu dga' bar byed/ /gang dag sems ni bsam gtan dga'/ /gang zhig skye med dga' ba dang / /dran pa nye bar gzhag bzhi dang / /byang chub yan lag bdun dag dang //rdzu 'phrul rkang pa bzhi rnams dang / /yan lag brgyad lam gang dga' ba/ /de dag chos gos 'chang ba dang / /bsod snyoms bde bar za bar byed/ /de dag ri dang nags tshal na/ /bde bar 'chag par byed pa dang / /de dag bde 'thob bde bar ni//mthong ba'i chos la mya ngan 'da'/ /'khon dang 'jigs pa kun 'das shing / /'jig rten yul gyi sred las rgal/ /chos thos pa dang mthong ba dang / /dben par dga' ba bde ba ste/ /'jig rten srog chags 'byung po la/ /'tshe med yang dag sdom pa bde//'dod pa rnams las rab 'das shing / /'jig rten 'dod chags bral ba bde/ /nga'o snyam pa'i nga rgyal dag /btul ba de dag mchog tu bde/ /rgas khar tshul khrims ldan pa bde/ /dad la rab tu gnas pa bde/ /don ldan tshig la dga' ba bde//sdig pa mi byed pa dag bde/ /'jig rten na ni phar 'dzin bde/ /de bzhin mar yang 'dzin pa bde/ /'jig rten dge sbyong 'dzin pa bde/ /de bzhin bram zer 'dzin pa bde/ /sangs rgyas rnams ni 'byung ba bde/ /de bzhin chos rnams bstan pa bde/ /dge 'dun rnams ni mthun pa bde//mthun pa rnams kyi dka' thub bde/ /tshul khrims ldan pa mthong ba bde/ /mang du thos pa mthong ba bde/ /yang srid rnam par grol ba yi/ /dgra bcom pa dag mthong ba bde/ /'jug ngogs bde ba'i chu klung bde/ /chos kyis rgyal ba'i skye bo bde//shes rab thob par gyur pa bde/ /nga'o nga rgyal zad pa bde/ /'phags pa rnams ni mthong ba bde/ /dam pa dag dang 'grogs pa bde/ /byis pa rnams ni ma mthong na/ /rtag tu bde ba nyid du 'gyur/ /rnam pa kun du dgra 'dra ba'i/ /byis dang 'grogs pa sdug bsngal zhing //byis pa dag dang 'grogs byed pa/ /yun ring rjes su 'gyod par 'gyur/ /skyes bu cang shes dkon pa ste/ /de dag kun du 'byung ma yin/ /brtan pa rnams dang 'grogs pa dag /gnyen dang phrad pa lta bur bde/ /gang du brtan pa de skyes pa//de yi rigs kyis bde ba 'thob/ /bram ze mya ngan 'das pa dag /rnam pa kun du bde bar 'jug /gang zhig 'dod pas ma gos shing / /zag med rab tu rnam grol ba/ /sred pa thams cad gtubs pa dag /snying las rims nad rnam par bsal/ / sems kyis zhi ba thob pa rnams/ /nye bar zhi zhing bde bar 'jug/ /gang zhig bde ba yangs 'dod cing / /bde ba chung du gtong 'dod pa'i/ /brtan pas bde chung spang byas na/ /bde ba yangs pa legs par mthong / /'jig rten 'dod bde gang yin dang //lha yul bde ba gang yin pas/ /sred pa zad pa'i bde ba de'i/ /bcu drug char yang mi phod do/ /khur gyis sdug bsngal blangs pas na/ /khur bor na ni bde bar 'gyur/ /lci ba'i khur dag nges bor na/ /phyi nas gzhan dag len mi 'gyur/ / kun sbyor thams cad zad bya'i phyir/ /sred pa thams cad rab tu spongs/ /phung po thams cad yongs shes na/ /srid pa phyi mar 'gro ba med/ /don rnams bkrun pa la ni grogs ldan bde/ /srog dag rab tu gtugs la bsod nams bde/ /ngan ngon tsam gyis legs par chog shes bde//sdug bsngal thams cad nges par nub pa bde/ /'di na me ni 'bar ba la/ /lcags kyi tho bas brgyab pa yis/ /rim gyis nye bar zhi 'gyur te/ /ji ltar song ba mi shes ltar/ /'dod pa'i 'dam rdzab chu rgal cing / /go 'phang mi g.yo thob pa dang //legs par rnam par grol rnams kyi/ /'gro ba gdags su med pa yin/ /gang zhig khong na 'khrug pa med pa dang / /gang zhig sred dang sred min las log pa/ /de dag 'jigs bral bde zhing mya ngan med/ /lhas kyang blta zhing bsam du med par 'gyur//'di na gang dag chos mang thos pa dang / /rtogs shing ci yang med pa kye re bde/ /skye bo skye bo'i lus la rab chags shing / /chung zad yod pa brlag par gyur la ltos/ /'di na gang dag chos mang thos pa dang / /rtogs shing ci yang med pa kye re bde//skye bo skye bo'i lus la rab chags shing / /chung zad yod pa brlag par gyur la ltos/ /skye bo ci med yon tan rtogs pa dang / /skye bo ci yang med par gyur pa bde/ /skye bo skye bo'i sems la rab chags shing / /chung zad yod pa brlag par gyur la ltos/ /skye bo ci med yon tan rtogs pa dang //skye bo ci yang med par gyur pa bde/ /skye bo skye bo'i lus la rab chags shing / /chung zad yod pa brlag par gyur la ltos/ /gzhan gyi dbang gyur kun sdug ste/ /rang dbang yod pa thams cad bde/ /sbyor ba shin tu spang dka' ba/ / thun mong gyur pas brlag par zad/ /zhen par gyur pa'i mi nang na/ /zhen pa med par gnas pa dang / /zhen pa'i nang na ma zhen pa/ /kye ma'o shin tu bde bar 'tsho/ /nad kyis thebs pa'i mi nang na/ /nad med par ni gnas pa dang / /nad pa'i nang na nad med pa/ / kye ma'o shin tu bde bar 'tsho/ /'tshe ba can gyi mi nang na/ /'tshe ba med par gnas pa dang / /'tshe ba'i nang na 'tshe med pa/ /kye ma'o shin tu bde bar 'tsho/ /gnod sems can gyi mi nang na/ /gnod sems med par gnas pa dang / /gnod sems can nang gnod med pa//kye ma'o shin tu bde bar 'tsho/ /sha khon can gyi mi nang na/ /sha khon med par gnas pa dang / /sha khon can nang 'khon med pa/ /kye ma'o shin tu bde bar 'tsho/ /mi thi la dag rab bsregs kyang / /nga la ci yang tshig pa med/ /nga la gang dag ci med pas//kye ma'o shin tu bde bar 'tsho/ /nga la ci yang med mod kyi/ /dga' ba za bar byed pas na/ /'od gsal gyi ni lha bzhin du/ /kye ma'o shin tu bde bar 'tsho/ /'jig tshogs la ni mi rten pas/ /nga la ci yang med mod kyi/ /dga' ba za bar byed pas na//kye ma'o shin tu bde bar 'tsho/ /len pa'i rkyen gyis phrad cing reg 'gyur gyi/ /len med ci dang phrad cing reg med pas/ /bdag dang gzhan gyis bskyed pa'i bde sdug gis/ /dgon pa'am 'grong du reg par mi 'gyur ro/ /'jig rten 'di na bde dang sdug bsngal gyis//skyes bu dam pa mtho dman mi 'gyur zhing / /brtan rnams 'dod pa'i rgyu yis mi 'khyal bar/ /skyes bu dam pa kun du 'gro bar byed/ /bde ba'i tshoms te sum cu pa'o// //ched du brjod pa'i tshoms/ bam po bzhi pa ste tha ma/ gzung bar dka' zhing yang ba dang / /gang du dga' bar 'gro ba yi/ /sems dul ba ni legs pa ste/ /sems dul ba yis bde ba 'dren/ /bdud kyi gzhi dag spong ba na/ /chu bo'i gnas nas rab bton te/ / thang la bor ba'i nya lta bur/ /bdag gi sems ni yongs su g.yo/ /nyi ma las ni 'od zer ltar/ /bdag gi sems ni so sor rgyug /de dag mkhas pas nges bzlog ste/ /lcags kyu yis ni glang chen bzhin/ /nga la don med spyod pa dang / /bltar med snying po med pa de//rtag tu gdul bar bya ba'i phyir/ /sems de la ni nga smra'o/ /sems 'di sngon chad ji ltar 'dod pa dang / /dga' dgur spyod cing rgyu bar byed pa dag /glang chen myos la mi yis lcags kyu ltar/ /de ni tshul bzhin bya bas de bzung ngo / /khang khyim byed pa 'di yis ni//yang yang skye ba'i sdug bsngal can/ /skye ba'i 'khor ba du ma zhig /da ltar phan cad khyod kyis phyung / /khang khyim byed pa khyod mthong bas/ /khyim gyi gdung chen rnam bcom la/ /phyam rnams thams cad bcag nas su/ /phyin cad khyim byed mi gzhug go//sems ni 'du byed dang phral nas/ /'di nyid la ni zad par 'dod/ /sems ni g.yo zhing brdzun pa ste/ /ring du 'gro zhing bzlog dka' ba/ /mda' mkhan me yis srong ba ltar/ /yid gzhungs pa yis bsrang bar bya/ /gang zhig lus med phug na gnas//gcig pu rgyu zhing ring 'gro ba'i/ /sems de 'dul bar byed pa ni/ /'jigs pa che las thar bar 'gyur/ /log pa'i smon ldan sems gang gis/ /bdag nyid sdug bsngal byed 'gyur pa'i/ /de ltar 'khon gyis 'khon can dang //dgra bos dgra la'ang byed mi 'gyur/ /yang dag smon ldan sems gang gis/ /bdag nyid bde bar byed 'gyur ba/ /de ltar pha dang ma dag dang / /gnyen gzhan gyis kyang byed mi 'gyur/ /ji ltar khong steng g.yogs nyes na/ /char pa yongs su 'dzag pa ltar//de bzhin sems ni ma bsgoms pa/ /'dod chags rnams kyis yongs su bcom/ /ji ltar khang steng g.yogs legs na/ /char pa rnam par mi 'dzag pa/ /de bzhin legs par bsgoms pa'i sems/ /'dod chags rnams kyis yong mi choms/ / ji ltar khang steng g.yogs nyes na/ /char pa yongs su 'dzag pa ltar/ /de bzhin sems ni ma bsgoms pa/ /zhe sdang rnams kyis yongs su bcom/ /ji ltar khang steng g.yogs legs na/ /char pa rnam par mi 'dzag pa/ /de bzhin legs par bsgoms pa'i sems//zhe sdang rnams kyis yong mi choms/ /ji ltar khang steng g.yogs nyes na/ /char pa yongs su 'dzag pa ltar/ /de bzhin sems ni ma bsgoms pa/ /gti mug rnams kyis yongs su bcom/ /ji ltar khang steng g.yogs legs na/ /char pa rnam par mi 'dzag pa//de bzhin legs par bsgoms pa'i sems/ /gti mug rnams kyis yong mi choms/ /ji ltar khang steng g.yogs nyes na/ /char pa yongs su 'dzag pa ltar/ /de bzhin sems ni ma bsgoms pa/ /nga rgyal rnams kyis yongs su bcom/ /ji ltar khang steng g.yogs legs na//char pa rnam par mi 'dzag pa/ /de bzhin legs par bsgoms pa'i sems/ /nga rgyal rnams kyis yong mi choms/ /ji ltar khang steng g.yogs nyes na/ /char pa yongs su 'dzag pa ltar/ /de bzhin sems ni ma bsgoms pa/ /chags pa rnams kyis yongs su bcom//ji ltar khang steng g.yogs legs na/ /char pa rnam par mi 'dzag pa/ /de bzhin legs par bsgoms pa'i sems/ /chags pa rnams kyis yong mi choms/ /ji ltar khang steng g.yogs nyes na/ /char pa yongs su 'dzag pa ltar//de bzhin sems ni ma bsgoms pa/ /sred pa rnams kyis yongs su bcom/ /ji ltar khang steng g.yogs legs na/ /char pa rnam par mi 'dzag pa/ /de bzhin legs par bsgoms pa'i sems/ /sred pa rnams kyis yong mi choms/ /chos kyi sngon du yid 'gro ste//yid mgyogs yid ni gtso bo yin/ /gal te yid rab gdug pa yis/ /smras sam yang na byas kyang rung / /de yis de ni sdug bsngal 'thob/ /'khor los mgo bo bcad pa bzhin/ /chos kyi sngon du yid 'gro ste/ /yid mgyogs yid ni gtso bo yin//gal te yid rab dang ba yis/ /smras sam yang na byas kyang rung / /de yis de ni bde ba 'thob/ /grib ma rjes su 'brang ba bzhin/ /brtsad pa ched cher 'dzin pa dang / /sems ni nyon mongs gyur pa yis/ /glags skabs tshol bar byed pa yis//legs bshad legs par mi shes so/ /sdang ba'am yang na 'khrug pa'am/ /dad pa med pa'i sems dag gis/ /rdzogs sangs rgyas kyis bstan pa yi/ /dam chos kun shes mi nus so/ /gang gis bag med sems dang ni/ /khro ba rnam par btul ba dang //'di na gnod sems rab spangs pa/ /des ni legs par bshad pa shes/ /sems kyi brtan pa med pa yis/ /dam chos rnam par shes mi 'gyur/ /dad pa 'gyur ldog byed pa yi/ /shes rab yongs su rdzogs mi 'gyur/ /kun rtog la chums rten pa yi//lta ngan sum cu rtsa drug gi/ /chu bo'i rgyun ni gang yin pa/ /yid kyi rgyun las rab tu 'bab/ /dga' sems dbang po phal pa dang / /sems kyi rjes 'brang zhan pa yi/ /mi de'i grags 'grib 'bras lhags pa'i/ /ljon shing la ni bya bzhin no/ /sems khyod phung khrol 'dod la dga' ma byed//brtson sems bag yod pa la gnas par gyis/ /bag med byas pas dmyal bar btsos pa dang / /lcags gong mid pas khyod ni ma ngu shig /ldang ba'i dus tshe 'dug par byed pa dang / /lang tsho stobs ldan mi 'bad khyim 'dug dang //bsam pa rdzogs tshe le lo byed pa yi/ /mi yis shes rab lam rtogs mi 'gyur ro/ /phran tshegs rnam rtogs zhib mor rnam rtog pas/ /nang na gnas pa'i yid ni g.yen yang spyo/ /yid kyi rnam rtog de dag ma shes na/ /'khrul sems yang dang yang du rgyug par byed//gang zhig dran ldan rnam 'byed brtson pa dang / /rnam par rtog la mkhas pas de shes na/ /nang na gnas pa'i yid ni g.yan spyo ba/ /thams cad ma lus blo yis rab tu spong / /lus 'di bum pa 'dra bar rtogs byas shing / /grong khyer 'dra ba'i sems kyis sran btsugs nas//shes rab mtshon gyis bdud dang g.yul sprad de/ /btul nas gnas med par ni bsrung bar bya/ /'jig rten 'di dag bum pa 'drar rtogs shing / /de bzhin chos rnams smig rgyu 'drar shes nas/ /shes rab mtshon gyis bdud dang g.yul sprad de//btul nas gnas med par ni bsrung bar bya/ /lus 'di dbu ba 'dra bar rtogs byas shing / /grong khyer 'dra ba'i sems kyis sran btsugs nas/ /shes rab mtshon gyis bdud dang g.yul sprad de/ /btul nas gnas med par ni bsrung bar bya/ /'jig rten 'di dag dbu ba 'drar rtogs shing //grong khyer 'dra ba'i sems kyis sran btsugs nas/ /shes rab mtshon gyis bdud dang g.yul sprad de/ /btul nas gnas med par ni bsrung bar bya/ /gang gis byang chub yan lag bdun/ /sems kyis legs par bsgoms pa dang //gang zhig len la mi dga' zhing / /len pa rab tu spangs pa dang / /zag zad skyon rnams bsal ba de/ /'jig rten dag na mya ngan 'das/ /gang zhig g.yag rnga'i rtse mo ltar/ /rang gi sems ni rjes srung zhing / /'byung po rnams la brtser ldan pa//de yi bde ba yong mi nyams/ /gang phyir glang po'i glang po che/ /mche ba bzang po'i glang chen dang / /sems dang sems ni mnyam pas na/ /de phyir gcig pu nags su dgyes/ /gang gi yid la gnod med cing / /'byung po kun la brtse ba dang / / 'byung po rnams la byams byed pa/ /de la nams kyang 'khon mi 'byung / /gang la gnod pa'i sems med cing / /'byung po kun la brtse ba dang / /srog chags kun la byams byed pa/ /de la nams kyang 'khon mi 'byung / /gang la gnod pa'i sems med cing //'byung po rnams la brtse ba dang / /sems can kun la byams byed pa/ /de la nams kyang 'khon mi 'gyur/ /mdza' bshes kun dang grogs kun dang / /'byung po kun la brtse ba dang / /byams pa'i sems ni bsgoms byas na/ / bde ba shin tu 'phel bar 'gyur/ /gal te gang zhig srog chags 'ga' la'ang sdang med sems/ /byams par byed na de yis de ni dge ba yin/ /sems can thams cad la ni yid kyis brtse byas na/ /bsod nams phal chen 'phags pas rab tu bsgrub par 'gyur//mi gang dga' ba'i sems dang ni/ /zhum pa med pa'i yid kyis su/ /dge ba'i chos la sgom byed pa/ /grub pa dang ni bde ba 'thob/ /yang dag shes pas rnam grol zhing / /skyo ba nye bar zhi gyur pa/ /de yis yid ni zhi gyur cing / /lus dang ngag gi las kyang zhi//ji ltar rtse gcig sems kyis ni/ /chos rnams legs par mthong ba ltar/ /sil snyan yan lag lnga pas kyang / /de ltar dga' bar byed mi 'gyur/ /gang yid ting 'dzin la dga' ba/ /de dag 'dod pas rtse mi byed/ /gang zhig cung zad gdung med pa'i//skyob pa bde bar nyal bar 'gyur/ /gang yid ting 'dzin la dga' ba/ /de dag 'dod pas rtsen mi byed/ /gang zhig cung zad gdung med pa'i/ /thub pa kye ma'o dga' bar 'gyur/ /gang gi sems ni brag lta bur/ /rab tu g.yo ba med 'dug pa//chags pa'i gnas la mi chags te/ /khro ba'i gnas la 'khrug med par/ /gang yid de ltar gyur pa de/ /sdug bsngal thob par ga la 'gyur/ /skur pa mi gdab gnod mi bya/ /so sor thar pas bsdam par bya/ /zas kyi tshod kyang shes par bya//bas mtha' dgon par gnas bya zhing / /lhag pa'i sems la rnal 'byor bya/ /'di ni sangs rgyas bstan pa yin/ /sems kyi rtags la mkhas pa dang / /rab tu dben pa'i ro rnyed dang / /rab drang sems pa'i 'grus skyong can/ / zang zing med pa'i dga' ba myong / /gang zhig yid gzhungs dben dga' dben gnas pas/ /rtag tu rang gi lus kyis spyod lam dang / /smra dang yid ni srung bar byed pa de/ /mya ngan spong zhing sdug bsngal 'thob mi 'gyur/ /ma bsrungs pa yi sems dag ni/ / log par lta bas bcom pa dang / /gnyid dang rmugs pas zil non pa/ /bdud kyi dbang du 'gro bar 'gyur/ /de bas sems ni bsrung byas te/ /yang dag lta bas mdun bdar cing / /yang dag kun rtog spyod yul can/ /yang dag skye dang 'jig pa shes/ / gnyid dang rmugs pa zil gnon pa'i/ /dge slong sdug bsngal zad pa 'thob/ /bag yod sems ni bsrung ba dang / /sems dul yang dag sdom pa bde/ /skye dgu sems kyis bslus pa dag /gcig tu sems can dmyal bar 'tshed/ /bag yod sems ni bsrung ba dang //sems dul yang dag sdom pa bde/ /skye dgu sems kyis bslus pa dag /gcig tu dud 'gro rnams su 'tshed/ /bag yod sems ni bsrung ba dang / /sems dul yang dag sdom pa bde/ /skye dgu sems kyis bslus pa dag /gcig tu yi dwags rnams su 'tshed//bag yod sems ni bsrung ba dang / /sems dul yang dag sdom pa bde/ /skye dgu sems ni bsrung ba dag /gcig tu mi yi nang du dga'/ /bag yod sems ni bsrung ba dang / /sems dul yang dag sdom pa bde/ /skye dgu sems ni bsrung ba dag /gcig tu mtho ris rnams su dga'/ /bag yod sems ni bsrung ba dang / /sems dul yang dag sdom pa bde/ /skye dgu sems ni bsrung ba dag /gcig tu mya ngan 'das pa 'thob/ /sems kyi tshoms te sum cu rtsa gcig pa'o// // dge slong bsod snyoms byed pa bdag rang tsam/ /'grangs par byed kyi gzhan dag mi gso ba/ /rtag tu nyer zhi dran dang ldan pa yi/ /skyob pa de la lha rnams dga' bar byed/ /dge slong bsod snyoms byed pa bdag rang tsam/ /'grangs par byed kyi gzhan dag mi gso ba/ / skyob pa de la lha rnams dga' byed kyi/ /bkur sti nor dang grags 'dod rnams la min/ /dge slong 'dod pa kun spangs shing / /mdun na gnas pa'i rdul bsal ba/ /bdag med thub pa brten pa yis/ /gzhan la smra bar bya mi dgos/ /skye bo ma bsdams tshig gis gnod byed pa//mi bzad rjod pa'i tshig de thos gyur kyang / /dge slong sdang sems bral la ci mi snyam/ /g.yul ngor glang chen mda' yis bsnun pa bzhin/ /skye bo ma bsdams tshig gis gnod byed pa/ /mi bzad rjod pa'i tshig de thos gyur kyang / / dge slong yid legs bzhag la ji mi snyam/ /g.yul ngor glang chen mda' yis bsnun pa bzhin/ /bzo yis mi 'tsho yang zhing bdag la dga'/ /dbang po dul zhing kun las rnam grol zhing / /khyim la ma chags bag med 'dod sred spangs/ /gcig pu spyod byed de ni dge slong yin//'tsho gtsang snyom las med pa yi/ /grogs po mthun pa bsten bya zhing / /so sor bgo bsha' bya ba dang / /spyod yul cho ga mkhas par bya/ /lag pa legs bsdams rkang pa legs bsdams dang / /tshig rnams legs bsdams dbang po legs bsdams shing //gcig pu nang du mnyam par 'jog la dga'/ /chog shes de ni dge slong yin zhes gsung / /dge slong chos la kun dga' zhing / /chos dga' chos la sems pa dang / /chos la rjes su dran pa dang / /chos las yongs su nyams mi 'gyur/ / dge slong khang stong zhugs nas su/ /nang la lta bar byed pa dang / /chos rnams legs par mthong ba dag /lha yi dga' dang ldan par 'gyur/ /ji lta ji ltar phung po la/ /skye dang 'jig par legs rtogs pa/ /de lta de ltar de yis ni/ /dga' dang mgu ba nyid kyang 'thob//dge slong dga' ba mang po yis/ /sdug bsngal zad pa thob par 'gyur/ /ji ltar brag gi ri bo dag /rlung gis rab tu mi g.yos ltar/ /de bzhin dge slong 'dod chags dag /zad pa kun du rab mi g.yo/ /ji ltar brag gi ri bo dag /rlung gis rab tu mi g.yos ltar//de bzhin dge slong zhe sdang dag /zad pa kun du rab mi g.yo/ /ji ltar brag gi ri bo dag /rlung gis rab tu mi g.yos ltar/ /de bzhin dge slong gti mug dag /zad pa kun du rab mi g.yo/ /ji ltar brag gi ri bo dag /rlung gis rab tu mi g.yos ltar//de bzhin dge slong nga rgyal dag /zad pa kun du rab mi g.yo/ /ji ltar brag gi ri bo dag /rlung gis rab tu mi g.yos ltar/ /de bzhin dge slong chags pa dang / /zad pa kun du rab mi g.yo/ /ji ltar brag gi ri bo dag /rlung gis rab tu mi g.yos ltar/ / de bzhin dge slong sred pa dag /zad pa kun du rab mi g.yo/ /gang la kun du sogs med cing / /gang la bdag gir byed med pa/ /gang dag med na'ang mi gdung ba/ /de ni dge slong zhes brjod do/ /re zhig gzhan la slong ba tsam/ /ji ga dge slong min pa snyam/ /grong ba'i chos ni 'dzin byed pa//ji ga dge slong min pa snyam/ /gang zhig dge dang sdig pa dag /rab spangs tshangs par spyod ldan zhing / /sde tshogs spangs nas spyod byed pa/ /de ni dge slong zhes brjod do/ /dge slong gang zhig byams gnas shing / /sangs rgyas bstan la rang dang ba//des ni blta bas mi ngoms pa'i/ /zhi ba'i go 'phang thob par 'gyur/ /dge slong gang zhig byams gnas shing / /sangs rgyas bstan la rab dang des/ /'du byed nyer zhi zhi ba yi/ /zhi ba'i go 'phang thob par 'gyur/ /dge slong gang zhig byams gnas shing / /sangs rgyas bstan la rab dang ba//des ni kun sbyor kun zad pa/ /rim gyis mngon sum byed par 'gyur/ /dge slong gang zhig byams gnas shing / /sangs rgyas bstan la rab dang bas/ /bdag nyid ngan 'gro las 'dren te/ /'dam rdzab las ni glang chen bzhin/ /dge slong gang zhig byams gnas shing //sangs rgyas bstan la rab dang bas/ /sdig pa'i chos rnams sprug byed de/ /rlung gis ljon shing lo ma bzhin/ /dge slong gang zhig byams gnas shing / /sangs rgyas bstan la rab dang bas/ /mya ngan 'das dang nye ba'i phyir/ /yongs su nyams 'gyur mi srid do//sems dga' yid ni bzang ba dang / /dga' dang mi dga' zil gnon pa'i/ /dge slong dga' ba mang po yis/ /sdug bsngal zad pa thob par 'gyur/ /lus zhi ngag ni zhi ba dang / /sems zhi legs par mnyam bzhag cing / /'jig rten zang zing spangs pa yi//dge slong nyer zhi yin zhes brjod/ /ting 'dzin med la shes rab med/ /shes rab med la ting 'dzin med/ /shes rab ting 'dzin ldan pa de/ /dge slong yin zhes brjod par bya/ /de bas ting 'dzin shes rab la/ /mkhas pa rnams kyis 'jug bya ste//de bzhin shes rab dge slong de'i/ /dang por bya ba 'di yin no/ /chog shes dbang po bsdam bya zhing / /so sor thar pas bsdam par bya/ /zas kyi tshod kyang shes par bya/ /bas mtha' dgon par gnas bya zhing / /lhag pa'i sems la rnal 'byor bya/ /'di ni sangs rgyas bstan pa yin//gang gi lus dang ngag dang ni/ /yid la nyes byas med gyur pa/ /de ni dge ba'i tshul khrims can/ /ngo tsha'i yid ldan dge slong yin/ /gang gis rdzogs pa'i byang chub kyi/ /phyogs kyi chos bdun legs bsgoms pa/ /de ni dge ba'i chos can de//mnyam bzhag dge slong yin zhes gsung / /'di na gang zhig bdag nyid kyi/ /sdug bsngal zad pa rab shes la/ /dge zhing shes rab ldan pa de/ /zag med dge slong yin zhes gsung / /zag pa zad pa ma thob na/ /tshul khrims brtul zhugs tsam dag gam//yang na thos pa mang po'am/ /dben pa dag tu gnas kyang rung / /ting 'dzin thob par gyur kyang ngal/ /rded drod chod pa'i dge slong min/ /phung po la ni bdag zer ba'i/ /'jig rten 'di dag gdung ba skye/ /rdzogs pa'i byang chub bde ba ni//'phags pas bstan pa mngon du bya/ /ji lta ji ltar bsam byas pa/ /de lta de ltar gzhan du 'gyur/ /gzhan du 'gyur ba'i 'jig rten 'di/ /srid pa la chags srid la dga'/ /srid la mngon chags srid la dga'/ /srid pa nyid la mngon par dga'//dga' bya gang yin de sdug bsngal/ /skyi g.ya' gang yin de bde bas/ /srid pa rab tu spang ba'i phyir/ /'di na tshangs par spyod pa ste/ /dge sbyong bram ze ji snyed pa/ /srid pas srid las nges 'byung zer/ /de dag thams cad srid pa las/ /nges 'byung min zhes brjod par bya//dge sbyong bram ze ji snyed pa/ /srid pas srid las nges 'byung zer/ /de dag thams cad srid pa las/ /rnam grol min zhes brjod par bya/ /len pa'i rgyan las sdug bsngal byung / /sdug bsngal las ni len pa byung / /len pa thams cad yongs zad na//sdug bsngal rab tu 'byung ba med/ /len pa thams cad na srid pa'i rnam pa ji snyed yod pa de dag thams cad ni mi rtag pa/ sdug bsngal ba/ yongs su 'gyur ba'i chos can yin no zhes de ltar de dag la yang dge ba'i shes rab kyis ji lta ba bzhin du mthong na/ srid pa'i sred pa rab tu spong bar 'gyur zhing //srid pa med pas mngon par mi dga' bar 'gyur ro/ /de ltar mya ngan las 'das pa'i dge slong skyob pa ni gzhan du len pa med cing yang srid med par 'gyur te/ bdud zil gyis non pa dang / g.yul las rgyal ba dang / srid pa thams cad las rab tu 'das pa 'di lta bu 'di ni sdug bsngal gyi mtha' yin no//dge slong dngos po bcad pa dang / /nye bar zhi zhing sems zhi ba/ /de ni yang srid med par 'gyur/ /skye ba'i 'khor ba rnam par spangs/ /dge slong dngos po bcad pa dang / /nye bar zhi zhing sems zhi ba//de ni bdud kyi 'ching las grol/ /skye ba'i 'khor ba rnam par spangs/ /dge slong dngos po bcad pa dang / /sems ni zag pa med gyur pa/ /de ni yang srid med pa ste/ /skye ba'i 'khor ba rnam par spangs/ /dge slong dngos po bcad pa dang / /sems ni zag pa med gyur pa//de ni bdud kyi 'ching las grol/ /skye ba'i 'khor ba rnam par spangs/ /dge slong dngos po bcad pa dag /srid pa'i sred pa btubs gyur pa/ /de ni yang srid med par 'gyur/ /skye ba'i 'khor ba rnam par spangs/ /dge slong dngos po bcad pa dang / / srid pa'i sred pa bcad gyur pa/ /de ni bdud kyi 'ching las grol/ /skye ba'i 'khor ba rnam par spangs/ /gang zhig 'dam rdzab legs rgal cing / /grong gi tsher ma dkrugs pa dang / /'dod chags zad pa rjes thob pa/ /de ni dge slong yin zhes brjod/ / gang zhig 'dam rdzab legs rgal cing / /grong gi tsher ma dkrugs pa dang / /zhe sdang zad pa rjes thob pa/ /de ni dge slong yin zhes brjod/ /gang zhig 'dam rdzab legs rgal cing / /grong gi tsher ma dkrugs pa dang / /gti mug zad pa rjes thob pa/ /de ni dge slong yin zhes brjod//gang zhig 'dam rdzab legs rgal cing / /grong gi tsher ma dkrugs pa dang / /nga rgyal zad pa rjes thob pa/ /de ni dge slong yin zhes brjod/ /gang zhig 'dam rdzab legs rgal cing / /grong gi tsher ma dkrugs pa dang / / chags pa zad pa rjes thob pa/ /de ni dge slong yin zhes brjod/ /gang zhig 'dam rdzab legs rgal cing / /grong gi tsher ma dkrugs pa dang / /sred pa zad pa rjes thob pa/ /de ni dge slong yin zhes brjod/ /gang zhig gshe ba dang ni gsod pa dang / /'ching dang grong gi tsher ma thul ba dang //gang zhig ri bo bzhin gnas mi bkri zhing / /sdug bdes mi g.yo de ni dge slong yin/ /skur pa mi 'debs sgro 'dogs mi byed cing / /'jig rten 'di kun brdzun rtogs dge slong gang / /de ni pha rol min pa'i pha rol po/ / spong ste sbrul rgas lpags rnying rje ba bzhin/ /sbrul gyis dug btang ba la sman bzhin du/ /'dod chags langs pa 'dul ba'i dge slong gang / /de ni pha rol min pa'i pha rol po/ /spong ste sbrul rgas lpags rnying rje ba bzhin/ /sbrul gyis dug btang ba la sman bzhin du//zhe sdang langs pa 'dul ba'i dge slong gang / /de ni pha rol min pa'i pha rol po/ /spong ste sbrul rgas lpags rnying rje ba bzhin/ /sbrul gyis dug btang ba la sman bzhin du/ /gti mug langs pa 'dul ba'i dge slong gang / /de ni pha rol min pa'i pha rol po//spong ste sbrul rgas lpags rnying rje ba bzhin/ /sbrul gyis dug btang ba la sman bzhin du/ /nga rgyal langs pa 'dul ba'i dge slong gang / /de ni pha rol min pa'i pha rol po/ /spong ste sbrul rgas lpags rnying rje ba bzhin/ /sbrul gyis dug btang ba la sman bzhin du//chags pa langs pa 'dul ba'i dge slong gang / /de ni pha rol min pa'i pha rol po/ /spong ste sbrul rgas lpags rnying rje ba bzhin/ /sbrul gyis dug btang ba la sman bzhin du/ /khro ba langs pa 'dul ba'i dge slong gang / / de ni pha rol min pa'i pha rol po/ /spong ste sbrul rgas lpags rnying rje ba bzhin/ /sbrul gyis dug btang ba la sman bzhin du/ /sred pa langs pa 'dul ba'i dge slong gang / /de ni pha rol min pa'i pha rol po/ /spong ste sbrul rgas lpags rnying rje ba bzhin/ /mthu chung 'dam bu'i rags la klung chen ltar//'dod chags ma lus drungs 'byin dge slong gang / /de ni pha rol min pa'i pha rol po/ /spong ste sbrul la rgas lpags rnying rje ba bzhin/ /mthu chung 'dam bu'i rags la klung chen ltar/ /zhe sdang ma lus drungs 'byin dge slong gang //de ni pha rol min pa'i pha rol po/ /spong ste sbrul rgas lpags rnying rje ba bzhin/ /mthu chung 'dam bu'i rags la klung chen ltar/ /gti mug ma lus drungs 'byin dge slong gang / /de ni pha rol min pa'i pha rol po/ /spong ste sprul rgas lpags rnying rje ba bzhin//mthu chung 'dam bu'i rags la klung chen ltar/ /nga rgyal ma lus drungs 'byin dge slong gang / /de ni pha rol min pa'i pha rol po/ /spong ste sbrul rgas lpags rnying rje ba bzhin/ /mthu chung 'dam bu'i rags la klung chen ltar//chags pa ma lus drungs 'byin dge slong gang / /de ni pha rol min pa'i pha rol po/ /spong ste sbrul rgas lpags rnying rje ba bzhin/ /mthu chung 'dam bu'i rags la klung chen ltar/ /sred pa ma lus drungs 'byin dge slong gang / /de ni pha rol min pa'i pha rol po//spong ste sbrul rgas lpags rnying rje ba bzhin/ /'dod pa'i yon tan thams cad spong byed cing / /'dod sbyor 'ching ba rnam bsal dge slong gang / /de ni pha rol min pa'i pha rol po/ /spong ste sbrul rgas lpags rnying rje ba bzhin//sgrib pa thams cad spangs shing sdig med pa/ /yid gnyis zug rngu bcad pa'i dge slong gang / /de ni pha rol min pa'i pha rol po/ /spong ste sbrul rgas lpags rnying rje ba bzhin/ /rtog pa rnam bsal nang gi ma lus la/ /rnam par rtog pa med pa'i dge slong gang //de ni pha rol min pa'i pha rol po/ /spong ste sbrul rgas lpags rnying rje ba bzhin/ /nags sbyor byed pa 'ga' med mi dge ba'i/ /rtsa ba legs par drungs phyung dge slong gang / /de ni pha rol min pa'i pha rol po/ /spong ste sbrul rgas lpags rnying rje ba bzhin//rims nad bcas pa 'ga' med mi dge ba'i/ /rtsa ba legs par drungs phyung dge slong gang / /de ni pha rol min pa'i pha rol po/ /spong ste sbrul rgas lpags rnying rje ba bzhin/ /bag la nyal ba 'ga' med mi dge ba'i/ /rtsa ba legs par drungs phyung dge slong gang //de ni pha rol min pa'i pha rol spong / /spong ste sbrul rgas lpags rnying rje ba bzhin/ /khrims ldan gang yin dge slong de/ /stong nyid gang ldan bsam gtan de/ /rtag tu byed gang rnal 'byor de/ /mya ngan 'das gang bde ba de//dge slong dga' dang mi dgas mi brjod cing / /bas mtha'i gnas mal dag tu sten pa dang / /de ni bag yod gnas shing sred pa yi/ /'dod chags phra rgyas legs par 'byin par byed/ /dge slong gi tshoms te sum cu rtsa gnyis pa'o// // gang zhig brgyan kyang chos spyod dul ba dang / /zhi zhing yang dag sdom la tshangs par spyod/ /'byung po kun la chad pas mi gcod de/ /bram ze dge sbyong de yin dge slong de/ /gcer bur spyod pas ma yin ral pas ma yin rdzab kyis min/ /kha zas mi za ba yis ma yin thang la nyal ba'am//rdul dang dri mas ma yin cog pur 'dug la 'bad pa yis/ /mi rnams dag par mi 'gyur som nyi rnams las rgal mi 'gyur/ /dge sbyong bram ze gang yang rung / /de dag nyid la chags byed pa/ /zag pa zad pa ma thob par//bar ma dor ni rnam par nyams/ /dge sbyong bram ze gang yang rung / /de dag nyid la chags byed pa/ /tshor ba zad pa ma thob par/ /bar ma dor ni rnam par nyams/ /dge sbyong bram ze gang yang rung / /de dag nyid la chags byed cing / / byis pa mtha' gcig la lta ba/ /bar ma dor ni rnam par nyams/ /dge sbyong bram ze gang yang rung / /de dag nyid la chags byed pa/ /byis pa'i skye bo blo ngan rnams/ /bar ma dor ni rnam par nyams/ /dge sbyong bram ze gang yang rung / /de dag nyid la chags byed pa//go 'phang dam pa ma thob par/ /bar ma dor ni rnam par nyams/ /blo ngan khyod kyi ral pa ci/ /khyod kyi g.yang gzhi gyon pa ci/ /khyod nang thibs por 'dug bzhin du/ /phyi rol legs par byi dor byed/ /blo ngan khyod kyi ral pa ci/ / khyod kyi g.yang gzhi gyon pa ci/ /khyod nang dri ma ldan bzhin du/ /phyi rol legs par byi dor byed/ /rigs kyis bram zer 'gyur ma yin/ /ral pas ma yin rus kyis min/ /gang zhig bden pa'i chos ldan pa/ /gtsang ma de yin bram ze yin//rigs kyis bram zer 'gyur ma yin/ /ral pas ma yin rus kyis min/ /gang zhig sdig pa che chung rnams/ /thams cad spong bar byed pa dag /sdig pa rnams ni spangs phyir de/ /bram ze yin zhes nges par brjod/ /mgo bo bregs tsam dge sbyong min//oM zhes zer ba bram ze min/ /gang zhig dge ba'i chos ldan pa/ /gtsang ma de yin bram ze de/ /mgo bo bregs tsam dge sbyong min/ /oM zhes zer ba bram ze min/ /gang zhig sdig pa che chung rnams/ /thams cad spong bar byed pa dag /sdig pa rnams ni spangs phyir de/ /dge sbyong bram ze de yin no/ /skye bo phal cher 'dir 'khru ba/ /chu yis dag par mi 'gyur te/ /gang zhig sdig pa che chung rnams/ /thams cad spong bar byed pa dag /sdig pa rnams ni spangs phyir de//dge sbyong bram ze de yin no/ /gang zhig sdig chos rab spangs shing / /rtag tu dran ldan spyod byed pa/ /kun sbyor zad pa'i sangs rgyas de/ /'jig rten dag na bram ze yin/ /bram ze gang zhig sdig pa'i chos spangs shing / /bdag nyid tshul 'chos med cing rnyog med gnas//rig byed mthar phyin tshangs par spyod pa spyad/ /dus su smra byed de ni tshangs pa smra/ /gang zhig sgyu la mi gnas nga rgyal med/ /gang zhig chags med bdag med re ba med/ /'khrug bcom bdag nyid mya ngan 'das phyogs de//bram ze dge sbyong de yin dge slong de/ /gang zhig ma yi mngal skyes nas/ /gal te 'dzin pa dang bcas na/ /de ming bu zhes smra bar bstan/ /bram ze yin par nga mi smra/ /yongs su 'dzin med len med de/ /bram ze yin par ngas gsungs so//gang zhig lus dang ngag dang ni/ /yid kyis nyes byas mi byed cing / /gang zhig gnas gsum legs bsdams te/ /bram ze yin par ngas gsungs so/ /gang gi tshig ngag mi rtsub cing / /go byed yid 'ong smra ba dang / /gang gis nyon mongs mi skyed de//bram ze yin par ngas gsungs so/ /gang zhig gsod 'ching gshe ba dang / /sdang ba'i mi la bzod byed de/ /bzod pa'i brtul zhugs stobs tshogs can/ /bram ze yin par ngas gsungs so/ /khro ba med cing tshul khrims can/ /brtul zhugs ldan zhing sems khral med//dul zhing lus mthar gnas pa de/ /bram ze yin par ngas gsungs so/ /gang zhig rab byung khyim pa dang / /de bzhin gnyis kar mi 'dre zhing / /'dod chung khyim nas ma byung de/ /bram ze yin par ngas gsungs so/ / ma 'ongs pa la mngon mi dga'/ /'das pa rnams la gdung med pa/ /'khrig pa'i sbyor bral g.yul rgyal de/ /bram ze yin par ngas gsungs so/ /ma 'ongs pa la mngon mi dga'/ /'das la gdung med rdul bral zhing / /zhi ba mya ngan med pa de/ /bram ze yin par ngas gsungs so//gang zhig 'dod chung gzhan mi gso/ /dul zhing snying por rab gnas la/ /zag zad skyon rnams bsal ba de/ /bram ze yin par ngas gsungs so/ /gang zhig pha rol tshu rol dang / /pha rol tshu rol gnyis med cing / / chos rnams kun gyi mthar phyin te/ /bram ze yin par ngas gsungs so/ /gang zhig pha rol tshu rol dang / /pha rol tshu rol gnyis med cing / /gang zhig gnas gsum ma chags de/ /bram ze yin par ngas gsungs so/ /gang zhig thung dang ring ba dang / / phra sbom dge dang mi dge dang / /'jig rten cung zad mi len de/ /bram ze yin par ngas gsungs so/ /gang zhig 'di nyid rab shes shing / /rang gi sdug bsngal zad pa dang / /'dod chags bral zhing mi ldan de/ /bram ze yin par ngas gsungs so/ /gang zhig dge dang sdig pa dang //gnyi ga yis kyang mi gos pa/ /gos med rdul bral zhi ba de/ /bram ze yin par ngas gsungs so/ /gang zhig dge dang sdig pa'i las/ /chags gang yin de rab 'das shing / /chags las rab 'das rnam grol de/ /bram ze yin par ngas gsungs so//gang zhig sngon dang phyi ma dang / /dbus kyang yod pa ma yin pa/ /rdul bral 'ching ba las grol de/ /bram ze yin par ngas gsungs so/ /pad ma'i 'dab la chu ltar dang / /smyung bu'i rtse la yungs kar ltar/ /gang zhig sdig la mi gnas de//bram ze yin par ngas gsungs so/ /pad ma'i 'dab la chu ltar dang / /smyung bu'i rtse la yungs kar ltar/ /gang zhig 'dod la mi gnas de/ /bram ze yin par ngas gsungs so/ /pad ma'i 'dab la chu ltar dang / /smyung bu'i rtse la yungs kar ltar//srid la dga' ba yongs spangs de/ /bram ze yin par ngas gsungs so/ /zla ba dag cing dri med la/ /skyon bral rab tu dang ba ltar/ /gang zhig sdig pas mi gos de/ /bram ze yin par ngas gsungs so/ /zla ba dag cing dri med la/ / skyon bral rab tu dang ba ltar/ /gang zhig 'dod pas mi gos de/ /bram ze yin par ngas gsungs so/ /zla ba dag cing dri med la/ /skyon bral rab tu dang ba ltar/ /srid la dga' ba yongs spangs de/ /bram ze yin par ngas gsungs so/ /'dam rdzab kyis ni mkha' ltar dang //rdul gyis zla ba ji lta bar/ /gang zhig sdig pas mi gos de/ /bram ze yin par ngas gsungs so/ /'dam rdzab kyis ni mkha' ltar dang / /rdul gyis zla ba ji lta bar/ /gang zhig 'dod pas mi gos de/ /bram ze yin par ngas gsungs so/ /'dam rdzab kyis ni mkha' ltar dang //rdul gyis zla ba ji lta bar/ /srid la dga' ba yongs spangs de/ /bram ze yin par ngas gsungs so/ /gang zhig 'dug nas rdul bral ba/ /sems shing zag zad bya ba byas/ /dul zhing lus mthar gnas pa de/ /bram ze yin par ngas gsungs so/ /shes rab zab cing yid gzhungs la//lam dang lam min rnams la mkhas/ /gang zhig don mchog rjes thob de/ /bram ze yin par ngas gsungs so/ /mi ni gang yang rung ba dag /slong mo tsam gyis 'tsho ba dang / /bdag med su la'ang gnod mi byed/ /brtan ldan tshangs par spyod pa can//kun shes spyad phyir chos ston de/ /bram ze yin par ngas gsungs so/ /gang zhig 'dod pa legs spangs shing / /khyim med par ni rab byung ste/ /'dod pa'i zag pa yongs zad de/ /bram ze yin par ngas gsungs so/ /'gro ba dang ni gnas pa yi/ /'byung po chad pas mi gcod cing //gsod med gsod du mi 'jug de/ /bram ze yin par ngas gsungs so/ /gang zhig mi mthun mthun byed cing / /chad pas gcod pa dang du len/ /'byung po rnams la brtse phan de/ /bram ze yin par ngas gsungs so/ /smyung bu'i rtse la yungs kar ltar/ / gang zhig 'dod chags zhe sdang dang / /nga rgyal 'chab pa 'joms pa de/ /bram ze yin par ngas gsungs so/ /gang zhig sred pa'i rdzong 'di dang / /'khor ba'i klung las rab rgal cing / /brgal nas pha rol 'gro bar sems/ /yid nyid kyis ni mi bkri zhing / /gang zhig len pa las log de//bram ze yin par ngas gsungs so/ /gang zhig 'jig rten 'di dang ni/ /pha rol na yang sred med cing / /srid pa'i sred pa yongs zad de/ /bram ze yin par ngas gsungs so/ /gang zhig 'jig rten 'di dang ni/ /pha rol la yang chags med cing / / chags med rnam par bral ba de/ /bram ze yin par ngas gsungs so/ /dga' dang mi dga' spangs pa dang / /bsil bar gyur cing zag pa med/ /'jig rten kun zil gnon brtan de/ /bram ze yin par ngas gsungs so/ /mi yi sbyor ba spangs nas su/ /lha yi sbyor ba rab 'das shing //sbyor ba kun dang rnam bral de/ /bram ze yin par ngas gsungs so/ /gang zhig lha dang dri za dang / /mi yi 'gro ba mi shes shing / /zhi ba 'gro ba mi shes de/ /bram ze yin par ngas gsungs so/ /gang gis chos rnams mi shes pa'am/ /ma mthong ba ni med gyur la//shes bya mtha' yas lta ba de/ /bram ze yin par ngas gsungs so/ /gang gis sngon gyi gnas rtogs shing / /mtho ris ngan song mthong ba dang / /de nas skye ba zad thob pa'i/ /thub pa mngon shes la brtson pa/ /sdug bsngal tha mar rab shes de/ / bram ze yin par ngas gsungs so/ /sems kyi rnam grol shes pa dang / /'dod chags kun las grol ba dang / /rig pa gsum dang ldan pa de/ /bram ze yin par ngas gsungs so/ /gang gis sems can 'chi 'pho dang / /skye ba thams cad rtogs gyur pa/ /thogs med spyan ldan sangs rgyas de//bram ze yin par ngas gsungs so/ /gang zhig kun sbyor kun 'das shing / /yongs su gdung ba med pa dang / /dga' med dran ldan ston pa de/ /bram ze yin par ngas gsungs so/ /thub pa rnam rgyal drang srong che/ /khyu mchog rab mchog glang po che//bkrir med khrus byas sangs rgyas de/ /bram ze yin par ngas gsungs so/ /gang zhig srid 'das kun zil gnon/ /chu bo las rgal rnam par 'dren/ /rnam grol pha rol phyin pa de/ /bram ze yin par ngas gsungs so/ /sdig can rnam par mi sems shing //mi sgom smra bar mi byed par/ /'dug nas rdul bral sems pa de/ /bram ze yin par ngas gsungs so/ /gang zhig phyag dar khrod 'chang zhing / /ngo tsha shes shing 'dod mi lta/ /shing drung dag tu gnas pa de/ /bram ze yin par ngas gsungs so/ / gang zhig sdug bsngal kun spangs phyir/ /zhi ba 'phags lam yan lag brgyad/ /drang po sgom par byed pa de/ /bram ze yin par ngas gsungs so/ /gang la chung zad gnas med cing / /'du shes yid gnyis zug rngu med/ /'chi med go 'phang thob pa de/ /bram ze yin par ngas gsungs so//gang zhig lus med phug na gnas/ /gcig pu rgyu zhing ring du 'gro/ /gdul bar dga' ba'i sems 'dul de/ /bram ze yin par ngas gsungs so/ /gang zhig gzugs med bltar med mtha' yas la/ /shin tu bltar med phra zhing gzhi mngon rtogs//rtag dran kun sbyor zad rgyu sangs rgyas pa/ /'jig rten 'di na de ni bram ze yin/ /gang gis sog mig 'ching gtubs te/ /chings ma rgyang thag bcad nas su/ /yongs su gdung spangs sangs rgyas de/ /bram ze yin par ngas gsungs so/ /gang gis rnyed 'dod sdig can dang //sog mig chings ma gtubs gyur cing / /sred pa rtsar bcas drungs phyung de/ /bram ze yin par ngas gsungs so/ /brtson pas chu bo'i rgyun bcad cing / /'dod pa thams cad rab bcom dang / /'du byed rnams kyi zad shes pa/ /sdig med gang yin bram ze yin//pha dang ma ni bsad byas shing / /rgyal po gtsang sbra byed gnyis dang / /yul 'khor 'khor dang bcas bcom pa/ /sdig med gang yin bram ze yin/ /pha dang ma ni bsad byas shing / /rgyal po gtsang sbra can gnyis dang / /mi bzad pa yi stag bsad pa/ /sdig med gang yin bram ze yin//gang zhig bram ze rdeg pa blun/ /skrod par byed pa de ngan pas/ /bram ze rnams la brdeg mi bya/ /bram ze bskrad par mi bya'o/ /gang zhig chos rnams rnam shes na/ /rgan nam yang na gzhon yang rung / /de la bkur zhing phyag bya ste/ /bram ze gtsang mas me bzhin no//gang zhig chos rnams rnam shes na/ /rgan nam yang na gzhon yang rung / /de la bkur zhing bsnyen bkur te/ /bram ze gtsang mas me bzhin no/ /gang zhig rdzogs pa'i sangs rgyas kyis/ /bstan pa'i chos rnams rnam shes na/ / de la bkur zhing phyag bya ste/ /bram ze gtsang mas me bzhin no/ /gang zhig rdzogs pa'i sangs rgyas kyis/ /bstan pa'i chos rnams rnam shes na/ /de la bkur zhing bsnyen bkur te/ /bram ze gtsang mas me bzhin no/ /gang tshe bram ze chos rnams kyi/ / pha rol phyin par gyur pa na/ /de tshe sha za ba ku la/ /gcig po las kyang shin tu 'das/ /gang tshe bram ze chos rnams kyi/ /pha rol phyin par gyur pa na/ /de tshe des mthong tshor ba rnams/ /thams cad nub pa nyid du 'gyur/ /gang tshe bram ze chos rnams kyi//pha rol phyin par gyur pa na/ /de tshe de yis mthong bas na/ /rkyen rnams thams cad nub par gyur/ /gang tshe bram ze chos rnams kyi/ /pha rol phyin par gyur pa na/ /de tshe de yis mthong bas na/ /kun sbyor thams cad nub par gyur/ /gang tshe bram ze chos rnams kyi//pha rol phyin par gyur pa na/ /de tshe skye dang rga ba dang / /'chi ba rnams las shin tu 'das/ /nyin mo nyi ma gsal bar byed/ /mtshan mo zla ba snang ba ltar/ /rgyal rigs go chas chas pa gsal/ /bram ze sems par byed na gsal//nyin mo nyi ma gsal bar byed/ /mtshan mo zla ba snang byed ltar/ /rtag tu sangs rgyas gzi brjid can/ /nyin dang mtshan du gsal bar byed/ /ji ltar mi sdug pa las yid ldog pa/ /de 'dra bram ze rnams la cung zad med/ / ji lta ji ltar de yi yid ldog pa/ /de lta de ltar kun rdzob bden par zad/ /gang tshe bram ze brtson pas sems pa na/ /gang gis chos rnams rgyur bcas rab shes pa/ /chos 'di rnams las rab tu 'byung 'gyur te/ /de tshe de yi som nyi ma lus spong //gang tshe bram ze brtson pas sems pa na/ /gang gis sdug bsngal rgyur bcas rab shes pa/ /chas 'di rnams las rab tu 'byung 'gyur te/ /de tshe de yi som nyi ma lus spong / /gang tshe bram ze brtson pas sems pa na/ /gang gis tshor ba zad pa 'thob 'gyur ba//chos 'di rnams las rab tu 'byung 'gyur te/ /de tshe de yi som nyi ma lus spong / /gang tshe bram ze brtson pas 'bad pa na/ /gang gis rkyen rnams zad pa 'thob 'gyur ba/ /chos 'di rnams las rab tu 'byung 'gyur te/ /de tshe de yi som nyi ma lus spong //gang tshe bram ze brtson pas sems pa na/ /gang gis zag pa zad pa 'thob 'gyur ba/ /chos 'di rnams las rab tu 'byung 'gyur te/ /de tshe de yi som nyi ma lus spong / /gang tshe bram ze brtson pas sems pa na/ /ji ltar mkha' la nyi ma shar ba ltar/ /'jig rten thams cad snang byed 'dug 'gyur pa//chos 'di rnams las rab tu 'byung bar 'gyur/ /gang tshe bram ze brtson pas sems pa na/ /blo yis kun sbyor rnams las rab grol te/ /bdud sde rnam par bsal nas 'dug 'gyur ba/ /chos 'di rnams las rab tu 'byung bar 'gyur/ / bram ze'i tshoms te sum cu rtsa gsum pa'o// //sdom la/ de bzhin gshegs dang thos dang bdag /bsgre dang mdza' bshes lnga pa'o/ /mya ngan 'das dang mthong ba dang / /sdig dang phrugs dang bde ba dang / /sems dang dge slong tshoms dag dang / /bram ze yang ni tha ma yin/ / ched du brjod pa'i tshoms dgra bcom pa chos skyob kyis bsdus pa rdzogs so// //rgya gar gyi mkhan po bid+yA ka ra pra b+ha dang / lo tsA ba ban+de rin chen mchog gis bsgyur/ zhu chen gyi lo tsA ba ban+de dpal brtsegs kyis zhus nas gtan la phab pa// //