CLOSE WINDOW

D4085
བོད་ཡིག

rgya gar gyi mkhan po paN+Di ta chen po rat+na kI rti dang / bod kyi lo tsA ba chings yon tan 'bang gyis bsgyur cing zhus te gtan la phab pa'o// //[ ]@##/ /rgya gar skad du/ ma d+h+ya ma a laM kA ra u pa de sha /bod skad du/ dbu ma rgyan gyi man ngag /rje btsun ma sgrol ma la phyag 'tshal lo/ /sku gnyis kyi ni gnas khyab pa'i/ /gang zhig nyi zla gza' skar bzhin/ /bde ba chen po nyid kyi sku/ /rtag par rdo rje 'chang la 'dud/ /byams pa thogs med kyis gsungs shing / /klu sgrub kyis kyang bzhed pa yi/ /tshad ma lung dang ldan pa yis//bden pa gnyis 'dir bshad par bya/ /de la bden pa gnyis ni don dam pa dang kun rdzob bo/ /don dam pa yang rnam pa gsum ste/ /don dam pa ni de bzhin nyid do/ /sgrub pa don dam pa ni yang dag pa'i ye shes so/ /thob par bya ba'i don dam pa ni mya ngan las 'das pa'o//ji skad du/ don dang thob dang sgrub pa dang / /don dam rnam pa gsum du 'dod/ /ces bshad pa lta bu'o/ /kun rdzob kyang rnam pa gsum ste/ brtags pa'i kun rdzob ni chos thams cad kun brtags pa'i rang bzhin no/ / shes pa'i kun rdzob ni log pa'i shes pa thams cad do/ /brjod pa'i kun rdzob ni sgra dang rtog pas don dam pa ston par byed pa'o/ /ji skad du/ brtags pa dang ni shes pa dang / /de bzhin brjod pa rgya che yin/ /zhes bshad pa lta bu'o/ /brjod pa'i kun rdzob ni rnam par rtog pa ma yin zhing rnam par mi rtog pa yang ma yin no//ci'i phyir rnam par rtog pa ma yin zhe na/ rnam par mi rtog pa bskyed pa dang rjes su mthun pa nyid kyi phyir ro/ /ci'i phyir rnam par mi rtog pa ma yin zhe na/ yang dag pa'i don la rnam par rtog pa'i phyir ro/ /rnam par mi rtog pa nyid las kyang rnam par mi rtog pa skye ba ma yin te/byis pa rnams la de med pa'i phyir ro/ /tha mal pa'i rnam par rtog pa las skye ba yang ma yin te/ de ni 'di'i mi mthun pa'i phyogs nyid yin pa'i phyir ro/ /'on kyang mi rtog pa nyid mi skye ba ma yin te/ mnyam par 'jog pa'i yid kyis so sor rtog pa rnams de bsgom pa'i rjes su 'gro bas/'bad rtsol med par chos kyi dbyings spros pa med pa la sems mnyam par gzhag par 'gyur ro/ /spros pa med pa de la rnam par mi rtog pa'i ye shes zhes bya'o/ /de skad du yang / rnam par mi rtog pa'i gzungs las/de yang dag par sbyor bas rjes su 'gro'o/ /bsgom pas rjes su 'gro'o/ /mang du byas pas rjes su 'gro'o/ /yang dag par yid la byed pas rjes su 'gro'o zhes gsungs pa dang / gzhan dag las kyang / bsam pa'i rang bzhin can nyid kyi shes rab goms par byas nas/don dam pa'i ye shes 'khrul pas dben pa dri ma med pa 'jig pa med pa mngon sum du byed par 'gyur ro/ /de bas na yang dag pa la so sor rtog pa nyid rnam par mi rtog pa'i byang chub rtogs par 'dod pa rnams kyis bsten cing bsgom par bya'o zhes bya ba ni grub pa'i mtha' yin no//yang don dam pa'i bden pa gang zhe na/ 'phags pa rnams kyi yul du gyur pa'i phyir ro/ /kun rdzob kyi bden pa gang zhe na/ byis pa rnams kyi yul du gyur pa'i phyir ro/ /ye shes dam pa'i yul yin pa'i phyir dang / ye shes dam pa'i 'bras bu yin pa'i phyir dang /don dam par yod pa'i phyir dang / don dam gsum po go rims bzhin du gzhag go/ /kun brtags dang / gzhan dbang dang / yongs su grub pa ste/ kun rdzob rnam pa gsum gyi mtshan nyid go rims bzhin no/ /de bas na de nyid la rang bzhin gsum gyi dbu ma yin te de yang /gnyis kyi bdag nyid thams cad med/ /gnyis su 'khrul pa'i bdag nyid yod/ /de ni stong pa'i bdag nyid de/ /dbu ma'i lam du de bzhed do/ /de skad kyang / kun brtags dang ni gzhan dbang dang / /yongs su grub pa 'di rnams ni/ /brtags dang rgyu las skye ba dang //mi 'gyur phyir na go rims bzhin/ /zhes gsungs pa'i phyir ro/ /de rnams kyi mtshan nyid kyang 'dir mdor bsdus nas brjod par bya ste/ 'di gnyis kyi mtshan nyid ji lta ba bzhin du med pa'i phyir kun brtags pa'i ngo bo nyid do/ /de yang gzung ba dang 'dzin pa gnyis so//gnyis med kyang bag chags kyi dbang gis gnyis su snang bar skye ba'o/ /de ni rgyu rkyen la rag las pa'i phyir gzhan gyi dbang gi ngo bo nyid do/ /yang na gzhan zhes bya ba ni rnam pa la bya la/ /yang dag pa'i ye shes ni tshu rol te/gzhan gyi dbang ma yin no/ /gzhan gyi dbang de yang rnam pa gsum ste/ kun gzhi rnam par shes pa dang / nyon mongs pa can gyi yid dang / 'jug pa'i rnam par shes pa'o/ /kun nas nyon mongs pa'i chos thams cad kyi sa bon gyi rten du gyur pas kun gzhi yin la rang gi ngo bo la nye bar dmigs pas rnam par shes pa'o//nyon mongs pa bzhi dang rtag tu mtshungs par ldan pas nyon mongs pa can yin la/ bdag go zhes rtag tu rlom sems pa'i bdag nyid yin pas yid do/ /yul so so la yang dang yang du 'byung bas 'jug pa yin la/yul la nye bar dmigs pas rnam par shes pa'o/ /gzhan dbang de kun brtags pa des dus thams cad du stong pa nyid dang / dben pa nyid dang / bral ba nyid du gyur pa de ni yongs su grub pa'i ngo bo nyid do/ /shes pa gang nam yang gnyis kyis mi stong pa de ni cung zad tsam yang med de/stong pa de yang nam yang 'gyur ba med par thams cad nas thams cad du nam mkha' lta bur ro gcig pa nyid de/ de bas yongs su grub pa'i mtshan nyid du brjod do/ /'phags pa byams pas kyang /gnyis dngos med pa'i dngos med pa/ /dngos po stong pa'i mtshan nyid do/ /zhes gsungs so/ /'o na gnyis kyi stong pa thog ma med pa yin pas de'i tshe na thog ma nyid nas byang chub par 'gyur ro zhe na/ mi 'gyur te nyams su myong ba yod du zin kyang nges pa med pa'i phyir ro//de bas na gzhan dbang la de yongs su grub pa'i rang bzhin du nges nas byang chub par 'gyur ro/ /kun brtags pa'i rang bzhin du nges na 'khor bar 'gyur ro/ /yongs su grub pa'i ngo bo gang yin pa de ni gzhan dbang gi stong pa nyid kyi ngo bo yin no//gang gis stong na gnyis kyis so/ /stong pa nyid phyir dngos po min/ /de dngos yin phyir dngos med min/ /lus dngos yin phyir gzhan ma yin/ mtshan nyid kyis ni gzhan min min/ /zhes gsungs so//gal te de dag gzhan ma yin na 'du byed rnams mthong ba na stong pa nyid kyang nges par 'gyur la/ de ltar na thams cad kyang bden pa mthong ba la sogs par 'gyur ro/ /gzhan yang 'du byed rnams kun nas nyon mongs pa bzhin du stong pa yang kun nas nyon mongs par 'gyur la/stong pa rtag pa bzhin du kun nas nyon mongs pa yang rtag par 'gyur ba'am/ stong pa bems po bzhin du 'du byed rnams kyang bems por 'gyur bas/ de'i phyir de ni de rnams las tha mi dad pa ma yin no/ /tha dad pa yang ma yin te bden pa mthong ba rnams kyis kyang 'du byed rnams kyi mtshan ma zil gyis non par mi 'gyur la/gzhan yang stong pa de mi myong bar 'gyur ro/ /kun nas nyon mongs pa dang rnam par byang ba'i mtshan nyid dag kyang gcig pa dang tha dad par 'gyur ro/ /de bas na 'di ni de dag las tha dad pa ma yin no//de skad kyang / dngos po ma yin dngos med min/ /tha dad gcig gi mtshan nyid min/ /zhes gsungs so/ /yang de'i ming gi rnam grangs ni/ /de bzhin nyid dang yang dag mtha'/ /mtshan ma med dang don dam dang / /chos kyi dbyings dang chos nyid do//zhes gsungs so/ /de rnams kyi rnam grangs kyi don ni/ 'gyur ba med pas na de bzhin nyid do/ /de kho na nyid kyi mtha' yin pas na yang dag pa'i mtha'o/ /'di la dngos po'i mtshan ma med pas na mtshan ma med pa'o/ /'jig rten las 'das pa'i ye shes dam pa yin la don ni de'i yul yin te nges na don dam pa'o//'phags pa'i chos rnams kyi rgyu yin pas chos kyi dbyings so/ /thams cad kyi rang bzhin yin pas chos nyid do/ /yang de sngon gyi gnas skabs su ni kun nas nyon mongs par 'gyur zhing / de'i bdag nyid ma yin pa'i glo bur gyi dri ma can yang yin no//phyis de spangs pas rnam par dag par 'gyur zhing dri ma med pa yin te de yang / de ni dri bcas dri ma med/ /kun nas nyon mongs rnam par dag /chu khams gser dang nam mkha' bzhin/ /dag pa bzhin du dag par 'dod/ / gal te nyon mongs de ma gyur/ /lus can thams cad grol bar 'gyur/ /gal te rnam dag med ma gyur/ /'bad pa 'bras bu med par 'gyur/ /nyon mongs ma yin mi mongs min/ /de ni dag dang ma dag min/ /sems kyi rang bzhin 'od gsal ba/ /nyon mongs dang ni glo bur phyir//zhes rgya cher gsungs pa'o/ /de ltar na de rnams la kun brtags pa'i gzugs dang / rnam par brtags pa'i gzugs dang / chos nyid kyi gzugs dang / yang btags par yod pa dang rdzas su yod pa dang / don dam par yod pa dang zhes kyang gsungs so/ / de lta bas na rang bzhin gsum dang ldan pa de ni dbu ma'i lam yin no zhes gsungs pa ni/ kun brtags pa'i rang bzhin gyis ni yod pa ma yin zhing / gzhan gyi dbang dang yongs su grub pa'i rang bzhin gyis ni med pa ma yin te/ de bas na mtha' gnyis dang bral ba'o/ /de yang /yang dag ma yin kun rtog yod/ /de la gnyis po yod ma yin/ /stong pa nyid ni de la yod/ /de la yang ni de yod do/ /stong pa ma yin mi stong min/ /de lta bas na thams cad bshad/ /yod pas med pas yod pas na/ /de ni dbu ma'i lam yin no/ /zhes gsungs so//sngon po la sogs pa'i rnam par rtog pa'i lus ni yod pa'o/ /sngon po la sogs pa'i mtshan nyid ni med pa ste/ ji skad du 'chad par 'gyur ba'i gnod pa yod pa'i phyir ro/ /de bas na sngon po la sogs pa'i bag chags kyis bslad pa'i dbang gis 'khrul pa'o/ /de ltar gyur bas de myong ba yang 'khrul pa dang gzhan myong ba lta bur myong ba'o//yang rig pa gsal ba'i ngo bo la gnod par byed pa ni med de/ de las lhag pa'i tshad ma gzhan med pa'i phyir ro/ /de ni rang rig pa'i mngon sum yin pa dang / yang dag tu myong ba'o//de bas na 'di ni tshad mas grub pa ste/ tshad ma ni tshad ma brgyas kyang mi gnod de/ tshad ma ma yin pa pha rol gyi 'dod pa tsam gyis smos kyang ci dgos/ de ltar na tshad ma gnyis kyis sgrub pa dang sun 'byin pa yin no/ /gnyis ltar snang ba'i phyir gnyis kyi mtshan ma zhes kyang bya ste/de 'jig rten las 'das pa'i ye shes la 'gag par 'gyur ba dang / de ni ma 'khrul pa dang yang dag pa'i ye shes yin pas phyin ci ma log par yongs su grub pa'o/ /de'i de bzhin nyid ni mi 'gyur ba yongs su grub pa'i ngo bo nyid do/ / klu sgrub kyi zhal nas kyang / dngos rnams skye ba yod min zhing / /'gag pa'ang gang na yod min pa/ /shes pa 'di nyid kho na ni/ /skye zhing 'gag par 'gyur ba yin/ /'byung ba che la sogs bshad pa/ /rnam par shes su yang dag 'du/ /ye shes la ni de bral na/ / log par rnam brtags cis ma yin/ /zhes bya ba 'dis thams cad gsungs pa yin no/ /de lta bas na rnal 'byor spyod pa pa dang / dbu ma grub pa'i mtha' mtshungs pa yin no/ /de lta bas na don 'di ni shin tu bzlog par dka' ba nyid yin no/ /phyin ci ma log pa'i yongs su grub pa de yang 'jig rten las 'das pa'i ye shes te/de yang snang ba med pa'i sa dang / lhag pa'i bsam pa rnam par dag pa'i sa dang / khyad par gyis dang / rdo rje lta bu'i ting nge 'dzin gyi dus der/ chos thams cad nam mkha'i dkyil dang mtshungs par mthong ngo / / 'jig rten las 'das pa'i ye shes pas ni/ chos thams cad sgyu ma'i dpe brgyad dang 'dra bar mthong ngo zhes gsungs so/ /de la dag pa 'jig rten pa'i ye shes zhes bya ste/ ye shes des de kho na nyid yongs su gcod pa nyid kyis dag pa yin la/ 'khrul ba nyid kyis 'jig rten pa yin no//de bzhin du sangs rgyas kyi sa la dgos pa'i dbang gis rdzogs pa'i byang chub cung zad 'khrul pa yin te/ dag pa 'jig rten pa'i bdag nyid yin pa'i phyir ro/ /sa de rnams su shes pa rnams gnas gyur cing mi 'dra bar smin pa'o/ /de ltar shes pa ni gnyis te/'jig rten pa'i shes pa dang / 'jig rten las 'das pa'i shes pa'o/ /'jig rten pa'i shes pa yang / ma dag pa 'jig rten pa'i shes pa dang / dag pa 'jig rten pa'i shes pa'o/ /lugs 'di ni rnam pa med pa yin te de yang / 'jig rten pa yi ye shes la//rnam pa dag ni nub gyur nas/ /de nyid gnyis med spros pa med/ /khyab bdag snang ba med pa skye/ /'jig rten shes pa rnam bcas kyang / /rnam pa dag ni brdzun pa dang / /bden min rnam par gcod pas na/ /de ni rnam pa med par brjod/ / gzhan dag sangs rgyas pa rnams 'di skad du smra ste/ gang zhig rnam pa med pa'i shes pas sngon po la sogs pa'i don rig par 'dod pa ni bye brag tu smra ba'o/ /gang zhig don gyis phan btags pa'i gzugs brnyan gyi rnam pa nyams su myong ba don rig par 'dod pa nyid ni mdo sde pa'o//gzhan dbu ma ltar snang ba'i phyogs gsum dang / rnal 'byor spyod pa'i phyogs bzhi/ tshad ma dang lung dang bstan bcos la mkhas pa rnams kyis sun dbyung bar bya ste/ de la sngon po la sogs pa 'di dag ji ltar rnam par shes pa yin zhe na/ bcom ldan 'das kyis kyang /ji ltar byis pas rnam brtags pa'i/ /phyi rol don ni yod ma yin/ /bag chags kyis ni dkrugs pa'i sems/ /don dang snang bar gyur pa yin/ /zhes gsungs so/ /'o na 'di la rigs pa ci yod ce na/ gang yang rmi lam gyi shes pa nyid don de dang der snang yang sad pa nyid na ma yin pa bzhin no//dpe tsam gyis don grub pa med do zhe na/ 'di la brjod par bya ste/ chos rnams rang nyid gsal bzhin par bdag nyid kyis gsal ba'i ngo bo nyams su myong bas grub pa yin la/ gsal ba de yang rab tu snang ba dang / so sor snang ba dang / gsal bzhin pa zhes bya'o/ /de yang bems po ma yin te/ lkog tu gyur pa ma yin zhing shin tu yongs su gsal ba'i rang bzhin no/ /de grub pa ma yin na ni gang yang snang bar mi 'gyur bas thams cad ma grub par thal bar 'gyur ro/ /grub na ni de nyid shes pa yin pas chos thams cad rnam par shes pa'i rang bzhin du grub par 'gyur ro//'dir tshigs su bcad pa ni/ gsal ba min pa gsal mi 'gyur/ /gzhan gyis kyang ni gsal mi nus/ /sngon po la sogs gsal ba ste/ de phyir gnyis med shes pa yin/ /mdo sde pa ltar na yang /shes pa des 'brel pa gang gis don de myong bar 'gyur/ de las byung ba'i 'brel bas so zhe na/ mig kyang mig gi rnam par shes pas myong bar 'gyur ro/ /yang rmi lam de med kyang der snang ba 'byung ba'i phyir ro/ /'on te 'dra ba'i dbang gis so zhe na/ / de yang kun gyis mtshungs na ni/ shes pa yang bems po nyid du 'gyur ro/ /'ga' zhig gis mtshungs na ni kun gyis thams cad rig par 'gyur ro/ /gzhan yang snam bu dang re lde la sogs par snang ba 'di dag gcig gam du ma zhig/ /gal te gcig na thog ma dang tha ma dang dbus kyi cha tha dad par snang bar mi 'gyur te/tha dad pa dang tha dad pa ma yin pa 'gal ba'i phyir ro/ /ci ste de ltar na cha shas rnams kyang so sor gcig tu mi rung bas cha shas med pa'i rdul phra rab 'ba' zhig gnas 'grangs na ma yin te/ rtag tu stug por snang ba'i phyir dang / rdul phra rab gcig tu mthong ba med pa'i phyir ro//rdul phra rab mang pos sbyar bas yin no zer na/ de yang gal te cha shas kyis sbyor na ni cha shas med pa'i rdul phra rab tu mi 'gyur la cha shas med pas sbyor na ni rdul phra mo rnams gcig la gcig zhugs pas ri la sogs pa yang rdul phra rab kyi tshad tsam du thal bar 'gyur ro//de bas na snam bu la sogs pa 'di dag gcig dang du ma dang bral ba'i phyir ro/ /de yang / drug gis cig car sbyar ba na/ /phra rab rdul cha drug tu 'gyur/ /drug po dag ni go gcig na/ /gong du rdul phran tsam du 'gyur/ /zhes gsungs so/ /ji ltar sngon po la sogs pa phyi rol gyi las thal bar 'gyur ba'i skyon brjod pa 'di dag ni/rnam par shes pa'i bdag nyid kyi sngon po la sogs pa la yang mtshungs te/ thal bar 'gyur ba la bye brag med pa'i phyir ro/ /don dang rnam par shes pa'i bye brag tsam gyis ni cir yang mi 'gyur ro/ /ci ste don gyi rdul phra rab ni phyogs drug nas ni bskor ba yin la/rnam par shes pa'i rdul phra mo ni phyogs bzhi pa'o zhe na/ cha shas dang bcas pa mtshungs pa'i phyir des kyang cir yang mi 'gyur te/ gcig dang du ma las ma gtogs pa'i dngos po phung po gsum pa gzhan dag kyang med pas sngon po la sogs pa dag ni phyi rol gyi dngos po dang nang gi dngos por ma grub pas brdzun pa nyid do//'di yang gsal ba tsam gyi bdag nyid yin yang bag chags kyis dkrugs pa'i dbang gis med du zin kyang / gang zhig gi bdag nyid du gsal ba ste/ bdag nyid de dag ni go rims bzhin du gzhan gyis ma bzhag pa dang /bzhag pas yang dag pa dang / yang dag pa ma yin pa yin gyi/ gsal ba ni gzhan gyis gzhag pa ma yin pa'i phyir/ brdzun par mi rung ngo / /de'i 'jog par byed pa ni med de/ khyad par med pa'i phyir dang / thug pa med par thal bar 'gyur ba'i phyir ro/ /de bas na gsal ba 'di ni rang gi bdag nyid la ma 'khrul ba'i phyir mngon sum gyi tshad ma yin no//gzhan pa ni nam mkha' la skra'i tshogs snang ba bzhin 'khrul pa yin no/ /'di ltar sngon po la sogs pa gsal ba gcig gi bdag nyid yin no zer na/ sngon po dang ser po la sogs pa mtshan nyid phan tshun spangs te snang bas gcig ma yin la/de'i bdag nyid kyis gsal ba gcig dang 'gal ba'i phyir du ma nyid kyang ma yin no/ /ci ste sngon po la sogs pa 'di ni ji ltar nyams su myong ba de ltar gcig yin te/ lhan cig nyams su myong ba'i phyir ro zhe na/ ma yin te tha dad pa nyid tha dad pa ma yin no zhes smras par 'gyur ro/ /ci ste de'i bdag nyid yin pa'i phyir/de dang 'dra bar gsal ba yang tha dad do zhe na/ de dag bdag nyid so sor myong ba'i phyir/ lhan cig tu myong ba med pas gcig gi thams cad myong ba med par thal bar 'gyur ro/ /de bas na sngon po la sogs pas ni gcig dang du ma yin pas na nam mkha'i sgra'i tshogs bzhin no/ /don de yang ji ltar me long la ni gzugs//gcig dang gzhan pa rnam spangs pa/ /snang yang de ni yod ma yin/ /de bzhin dngos rnams ngo bo nyid/ /ces gsungs so/ /rnam par spangs pa zhes bya ba ni gcig dang du ma gnyi ga'i ngo bor med pa'o/ /'di ltar sngon po la sogs pa gsal ba las tha dad dam/'on te tha dad pa ma yin pa zhig yin/ ci ste tha dad pa yin na ni de mi snang bar 'gyur ro/ /gal te tha dad pa ma yin na ni de rnams gsal ba'i bdag nyid yin pas gcig tu 'gyur ba'am/ de yang de rnams dang tha mi dad pas du ma gcig tu mi btub pa yang sngar bshad zin to//ji ltar me long gzugs zhes bya ba la sogs pa ni phyogs 'dir ni gcig dang gzhan pa zhes bya ba ni tha dad pa dang / tha dad pa ma yin pa'o/ /rnal 'byor spyod pa pa dang / dbu ma pa shes pa rnam pa dang bcas par smra ba kha cig na re/ sngon po gsal ba dag brdzun pa dang brdzun pa ma yin par 'gyur na chos 'gal ba nyid kyis na de'i bdag nyid du 'thad par mi 'gyur la/de'i bdag nyid ma yin na/ sngon po la sogs pa gsal bar mi 'gyur na/ sngon po la sogs pa ni gsal ba yin no zhe na/ sgro ma btags pa'am dngos por 'gyur ba'i gsal ba las gzhan ma yin pa'i phyir/ sngon po la sogs pa ni sgro ma btags pa'am/ dngos por 'gyur ba yin no zer te/ de dag gi ltar na gsal ba thams cad phyin ci ma log pa'i rang gi ngo bo myong ba'i phyir 'khrul pa gtan med par 'gyur ro/ /des na sems can thams cad gtan du grol zhing yang dag par rdzogs pa'i sangs rgyas nyid du 'gyur ro//ji ste blo'i rnam pa ni sngon po la sogs pa'i rang gi mtshan nyid la mi rigs pas brdzun pa ma yin la/ phyi rol gyi sngon po la sogs pa ni brdzun pa yin te/ rang gi snang ba don ma yin pa la don du mngon par zhen pas gzhag pa'i phyir ro zhe na/ 'o na ni rang gi snang ba la mngon par zhen pa yin pas de rnam pa thams cad du shes pa nyid du zhen par 'gyur gyi don du ni ma yin te don ma yin pa'i phyir ro//de nyid kyi phyir 'khrul pa yin no zhe na/ 'khrul pa de nyid dpyad par bya ste/ ci ste don la zhe na ni de'i don rnam pa thams cad du yod par 'gyur bas don med bzhin du zhen par mi 'gyur ro/ /de bas na don la yang zhen pa ma yin la/shes pa yang ma yin no/ /de bas na blo'i bslad pa ji ltar grags pa bzhin du rnam par gzhag pa yin gyi yang dag pa ji lta ba bzhin du ni ma yin no/ /gang yang gsal ba las tha mi dad pa'i phyir rnam pa brdzun pa yang dngos por 'gyur ro zhes pa'i gtan tshigs 'di gal te dngos po'i rang bzhin du tha mi dad do zhe na gtan tshigs ma grub par 'gyur ro//'on te tha mi dad pa tsam gtan tshigs yin na ni ma nges par 'gyur te/ gzung ba dang 'dzin pa nyid la sogs pa la de med par gtan tshigs yod pas so/ /rnal 'byor spyod pa pa dang / dbu ma pa rnam pa med par smra ba rnams rnam par rtog pa'i lus rdzas su med par smra ste/de dag gi ltar na yang mngon sum gyi tshad ma ni skad cig ma dang po'i rtog pa dang bral ba yin la/ rjes su dpag pa ni med pa'i phyir rnam pa 'di ni thams cad du dgag par nus pa ma yin no/ /gang yang dbu ma pa kha cig na re 'jig rten las grags pa ni kun rdzob yin te/phyi rol gyi don yang 'jig rten la grags pa yin pas/ sems dang sems las byung ba bzhin du de yang kun rdzob tu yod pa yin no/ /sems dang sems las byung ba ni 'khrul pa yin te/ rang gi rig pa 'gal ba'i phyir ral gri'i sos rang mi gcod pa bzhin no/ /gzhan rig pa yang bslad pa tsam du 'u bu cag gnyi ga 'dod do//de bas na 'khrul pa zad pas don dam pa rtogs pa'i phyir ro/ /sangs rgyas pa rnams ni sems dang sems las byung ba zad pa nyid do/ /gang gi tshe de rnams kyi skye ba de'i tshe chos thams cad skye ba med pa'i don dam par rjes su byed pa thob pas myong bar gzhag go//mi gnas pa'i mya ngan las 'das pa ni sems can sna tshogs pa'i don bya ba'i phyir gzugs byin gyis brlabs te gzhag nas/ yang dag pa'i byang chub mngon du byed do zer ba dag ni smad pa las kyang smad par 'gyur ba yin te/ gang gi phyir 'di ltar sems dang sems las byung ba 'di dag med pa'i phyir rtog pa nyid kyang med na/don dam par yang dag par rdzogs pa'i byang chub lta ga la yod/ ci ste yang 'di ni rtogs pa kho na yin no zhe na/ de nyid sems yin pas sems dang sems las byung ba med pa ma yin no/ /gzhan yang don dam pa de bzhin du gyur pa myong na ni 'khrul bar 'gyur la/tha mi dad na ni rang rig par 'gyur ro/ /gzhan yang sems dang sems las byung ba 'khrul pa yin na de'i tshe/ de rnams kyi gnyen po gang yin/ 'khrul pa de nyid rags pa'i cig shos ni mi mthun pa'i phyogs yin la/ phra ba ni gnyen po yin no zhe na/ de ltar na ni shes pa tha ma la ni gnyen po med pas sems dang sems las byung ba zad par mi 'gyur ro//de bas na 'di ltar rnam par rig pa tsam gyi gnyug ma rang gi ngo bo myong ba ni mngon sum gyi tshad ma yin te ma 'khrul pa'i phyir ro/ /sgro btags pa rang gi ngo bo myong bas na 'khrul pa yang yin no/ / de bas na 'khrul pa'i mtshan ma de thams cad rim gyis dor te/ nam mkha' gcig tu dri ma med cing mtha' med pa lta bur chos thams cad kyis gsal ba'i lus gnyis kyis stong pa myong ba gang yin pa de nyid don dam pa yang dag par rtogs pa yin gyi/ sems las byung ba 'gags pa ni rig pa ma yin no//yang zag pa dang bcas pa ni chos thams cad kyi sa bon ma zad pa de nyid du ni kun gzhi zhes brjod do/ /de yang dgra bcom pa gsum la ldog par 'gyur/ ldog pa ji lta bu zhe na gnas gyur pa ste de yang gang zag pa med pa'i dbyings dang / rnam par grol ba'i sku ste shel dag pa lta bu'o//chos kyi sku ni de dag las khyad par 'phags pa ste sangs rgyas kyi chos thams cad kyi rten byed pas so/ /'di lta ste nyi ma dang zla ba dang me shel dang chu shel ni dag pa tsam du khyad par med mod kyi/ 'od zer gyis khyad ches 'phags pa yin no/ /ci ste sangs rgyas dang byang chub sems dpa' rnams kyi 'jig rten las 'das pa'i ye shes la chos thams cad ji ltar zhe na/nam mkha' dri ma med pa 'ba' zhig mtha' med pa dang 'dra bar de bzhin nyid ro gcig tu snang ngo / /ci'i phyir zhe na mtshan ma de rnams nub pa'i phyir ro/ /'jig rten las 'das pa'i ye shes rnam pa gcig tu snang bas 'khrul pa nyid kyi yang dag pa'i ye shes ma yin par 'gyur ro zhe na/de'i phyir 'di dag thams cad brdzun pa nyid yin te yang dag pa ma yin pa'i kun du rtog pas ming dang mtshan mar btags par zad do/ /de'i phyir sems dang sems las byung ba 'gags pa ni yang dag pa'i byang chub tu mi rigs pa yin no//gzhan yang dbu ma pa chos thams cad sgyu ma lta bu nyid dbu ma'i lam yin no zhes zer te/ 'di ltar gal te 'di dag tshad mas med par grub na de'i phyir 'gas kyang yod pa bsgrub par mi nus so/ /tshad ma ma yin pa la snang ba tsam gyis lta smos kyang ci dgos/ thams cad med pa nyid yin na ci zhig nye bar blangs nas ci zhig gdags/yang thams cad yod pa yang ma yin med pa yang ma yin pa dbu ma'i lam yin no zhes smra na/ de yang mi rigs te yod pa dang med pa phan tshun gzhan sel ba'i mtshan nyid yin pa'i phyir gcig bkag pa nyid kyis gnyis pa'i mtshan nyid yin pa'i phyir/ gnyi ga dgag par mi rigs pa yin no//yang thams cad brdzun pa'i tshul gyis shes pa thams cad kyang brdzun pas mngon sum cung zad kyang ma grub pa'o/ /de'i phyir tshul gsum nges pa med pas gtan tshigs thams cad kyang gtan tshigs ltar snang bar 'gyur ro/ /gzhan yang rang dang gzhan la dgag pa dang sgrub pa thams cad ma grub ste/ de dag thams cad ni tshad ma la rag lus pa'i phyir dang / tshad ma yang khas mi len pa'i phyir ro/ /tshig tsam gyis 'gog na ni khyod nyid ba lang rnams las mu stegs rgyang pan gyi lta ba can no zhes gzhan gyis smras pa na mi dang dbu ma bkag par 'gyur ro/ /chos thams cad ngo bo nyid med pa la sogs par gsungs pa'i dgongs pa yang mdo sde dgongs 'grel du gsungs pas nges te/de nyid byams pa dang thogs med dang klu sgrub kyis kyang ngo / /tshad mar khas len na ni rang bzhin gsum gyi tshul du grub pas thams cad brdzun du smra ba thong shig /gal te bdag cag ni tshad ma mi 'dod pa'i phyir ro zhe na/ tshad ma med pa'i phyir rtsod par smra ba ni bzhad gad pa nyid yin no//'di dag bdag cag ni yang dag pa ma yin pa'i kun du rtog pa yod pas de nye bar blangs te phung po la sogs par 'dogs so/ /dgag pa dang sgrub pa thams cad kyang tshad mas byed pa'i phyir ro/ /de yang gang zhig rten cing 'brel par 'byung / /de ni stong pa nyid du bshad/ /de ni rgyur byas btags pa ste//de ni dbu ma'i lam yin no/ /zhes gsungs so/ /yang sngon po la sogs pa de bsal ba'i rang bzhin yang gnod pa yod pa'i phyir brdzun pa'o/ /yang bsal ba de rig pa'i 'khrul pa dang bral ba nyid du mngon sum yin pa'i phyir dngos po nyid du grub pa yin no/ /gsal ba ni gsal ba sbyin pa nyid kyis gnyug ma'i rang bzhin te/gang gis myong ba 'di 'khrul par 'jog pa'i bslad pas bzhag pa med pa'i phyir ro/ /rgyun gyis gzhan du gyur pas ni bdag med pa'i phyir 'dod pa ste de'i cha dang bcas pas ni rtag pa'i dngos po khegs mod kyi chos gang mi rtag pa'i mtshan nyid can rgyun mi 'chad par gnas pa ni dgag par mi nus te tshad mas grub pa'i phyir ro//g.yo can blun po chos gang dang gang spyi la khyab pa dang ma khyab pa'i bye brag ba lang rdzis kyang mthong ba la'ang bsnyon cing kho nyid 'jug ldog gi khyad par mi 'dor ba sgyu thabs la spyod pa dag me lce las mun pa skye bar 'gyur ro zhes zer ba ni rlung nad can la chang sman yin par smras pas mkhris nad can la yang chang sman du sems pa dang mtshungs te ci de lta na de nyid kyang thal bar 'gyur ba yin pas rang skye 'gog byed du 'gyur te rang skye 'gog pa de yang de ste thal 'gyur yin no//khyab pa ma grub ce na ni mtshungs pas slan chad de'i rigs can la btsan thabs su bsnyon pa mthong la rang sma 'bebs de skad kyang ma zer cig /yang sngon po la sogs pa ni tshul gzhan yin pa'i phyir/ bslad pas byas par yang 'gyur la/ de ltar gyur pas de'i myong ba yang 'khrul par 'gyur ro/ /de bas na sngon po la sogs pa la ni gnod pa 'jug pa'i skabs yod kyi gsal ba la ni ma yin no/ / chos chen po me long lta bu'i theg pa chen po'i mdo las kyang / yang dag pa ma yin pa'i lta ba nyi shu rtsa brgyad kyang snang ste/ 'di ltar med pa'i mtshan ma'i lta ba dang / brtags pa la skur ba 'debs pa'i lta ba dang / kun tu rtog pa la skur ba 'debs pa'i lta ba dang / de kho na nyid la skur ba 'debs pa'i lta ba dang /yongs su 'dzin pa'i lta ba dang / yongs su bsgyur ba'i lta ba dang / kha na ma tho ba med pa'i lta ba dang / nges par 'byung ba'i lta ba dang / brnyas pa'i lta ba dang / rab tu khro ba'i lta ba dang / phyin ci log gi lta ba dang / bskyed pa'i lta ba dang / khas mi len pa'i lta ba dang / ngan g.yo'i lta ba dang / bkur sti byed pa'i lta ba dang /rmongs pa bstan pa'i lta ba dang / rtsa ba'i lta ba dang / lta ba med pa'i lta ba dang / rab tu sbyor ba 'gegs pa'i lta ba dang / nges par 'byung ba med pa'i lta ba dang / sgrib pa sogs pa'i lta ba dang / bsod nams ma yin pa skyed pa'i lta ba dang / 'bras bu med pa'i lta ba dang / nges par 'dzin pa'i lta ba dang /mi bden pa'i lta ba dang / mi smra ba'i lta ba dang / lta ba chen po dang / mngon pa'i nga rgyal can gyi lta ba'o zhes rgya cher gsungs so/ /de dag bsnyen gnas yang dag la so sor rtog pa nyid rnam par mi rtog pa'i byang chub rtogs par 'dod pa rnams kyis bsten cing bsgom par bya'o//bsgom pa 'di'i rab tu sbyor ba ni gnyis te/ gus par sbyor ba dang / rgyun du sbyor ba'o/ /de yang zhi gnas dang lhag mthong zung du 'brel bar 'jug pa ni bsgom pa'o/ /de la ji snyed yod pa dang / ji lta ba bzhin du gyur pa la rnam par mi rtog pa'i gzugs brnyan du gyur pa ni zhi gnas kyi dmigs pa'o//de la rtog pa dang bcas pa'i gzugs brnyan du gyur pa ni lhag mthong gi dmigs pa'o/ /bar ma chad par gnyi ga yang nyams su myong ba de'i tshe zhi gnas dang lhag mthong zung du 'brel ba'i lam zhes bya'o/ / de ni rnal 'byor gyi thun mong gi dbye ba'o/ /rnal 'byor gyi khyad par gyi sa bzhi ni/ dngos po'i mtha' gnyis yod pa la dmigs pa dang / sems tsam la dmigs pa dang / de bzhin nyid la dmigs pa dang / dmigs pa med pa'o/ /de yang ji snyed yod pa la dmigs pa ni rnal 'byor gyi sa dang po'o//ji lta bar gyur pa'i sems tsam la dmigs par gyur pa ni rnal 'byor gyi sa gnyis pa'o/ /ji lta ba bzhin du gyur pa'i chos thams cad kyi de bzhin nyid la dmigs pa ni rnal 'byor gyi sa gsum pa'o/ /theg pa chen po mthong ba ste/snang ba med pa ni rnal 'byor gyi sa bzhi pa'o/ /de ltar yang lang kar gshegs pa las/ /sems tsam la ni brten nas su/ /phyi rol don la brtag mi bya/ /de bzhin nyid du dmigs nas ni/ /sems tsam las kyang 'da' bar bya//sems tsam las kyang 'das nas kyang / /snang ba med la 'da' bar bya/ /snang med gnas pa'i rnal 'byor pa/ /de yis theg pa chen po mthong / /zhes gsungs pa yin no/ /tshad ma'i tshul la yang dag brten pa dang / sangs rgyas theg pa'i rim par phye ba dag /mkhas pa dga' ba bskyed par bya ba'i phyir/ /rin chen 'byung gnas zhi bas sbyar ba yin/ /'di la dge ba ci yod kun/ /sems can kun la bsngo bar bya'o// //dbu ma rgyan gyi man ngag /slob dpon rin chen 'byung gnas zhi ba zhes bya ba dus de'i tshe paN+Di ta rnams las mchog tu gyur par kun gyis bsngags shing 'gran zla med pa/ye shes kyi mkha' 'gro mas au D+yan du spyan drangs te/ rtogs pa brjod pa'i grub pa brnyes pa bzhi bcu'i nang nas kyang mdo sde dang rgyud sde la 'grel pa mdzad pa'i mchog tu grags pa/ dus mtshungs pa'i sgo srung chen po bzhi las kyang gtso bor gyur pa/'phags pa thogs med dang klu sgrub snying po'i thugs kyi dgongs pa ma nor bar rtogs shing bstan pa'i gsal byed mchog tu gyur pa'i phyir dang / btsun pa zla grags la sogs pa klu sgrub kyi dgongs pa las 'chal bar gyur na rang slad kyis tshe smad la med par smra ba dor nas rgyud zab mo'i 'grel pa byed par 'gyur la/'on kyang des log par bris pa de'i rjes su 'jug cing g.yo sgyus spyod pa yang 'ga' 'byung bar mdo sde dad pa cher 'byung dang / dgongs pa nges par 'grel pa sogs par bcom ldan 'das nyid kyis gsungs nas/yang de dang de dag gis ni nga'i dgongs pa ma rtogs pa'o zhes kyang gsungs nas/ slad kyis de dag nor bar shes te slad kyis dgongs pa ma nor bar 'chad pa yang 'byung la/ dang po nas ngas bshad pa'i rjes su 'jug pa ni mang du 'byung ngo zhes lung bstan pa'i nang nas khyad par du slob dpon 'di ni 'jam dpal rtsa ba'i rgyud las/rin chen 'byung zhes bya ming gang / /ston pa'i bstan pa gsal byed 'byung / /zhes kyang lung bstan pa des mdzad pa'o/ /rdzogs so// //rgya gar gyi mkhan po shAn ti b+ha dra dang / lo tsA ba dge slong shAkya 'od kyis bsgyur ba/ g.yo sgyus spyod pa tshar gcod bsnyon 'debs gnad la 'bebs/rtog ge'i srog shing kun mkhyen ye shes rgyal mtshan can/ /theg chen rnam rig dbu ma'i rgyan gyi man ngag bcas/ /legs mdzad gang de zla grags 'joms pa'i rtog ge yin/ /slad nas kha che a mo g+ha dang 'o ru lo tsA bas zhus te gtan la phab pa'o// //