བོད་ཡིག

e-texts based on the ACIP/ALL Input

/[ ]@##/ /rgya gar skad du/ bo d+hi satwa sam+ba ra biM shi ka pany+tsi kA/ bod skad du/ /byang chub sems dpa'i sdom pa nyi shu pa'i dka' 'grel/ byang chub sems dpa' 'jam dpal gzhon nur gyur pa la phyag 'tshal lo/ /sangs rgyas dang chos dang dge 'dun rnams la phyag 'tshal lo/ /gang zhig sdug bsngal ldan rnams sdug bsngal zhi phyir thugs rjes sman pa'i blo/ /bdag nyid mthar ni rtswa yi zil pa lta bur ma nyams gzigs gnas pas/ /tshogs rdzogs don du brtson 'grus khyad par can gyis yun ring dka' spyad mdzad/ /skye dgu rnams kyi dpal bsgrub ched du sa stengs mgon gcig byung bar gyur/ /gang zhig skur gnas gyur kyang rang bzhin gyis dag log par sgro btags pa'i/ /sa bon las byung kun nas nyon mongs rnam pa du mas nam yang ma gos shing / /'khrul pa'i tshogs kyi dra ba ma lus de nyid 'byed pas 'joms par mdzad/ /des na spros pa med cing zab pa'i chos ni nyid kyis shin tu thugs chud gyur/ /ngo bo nyid kyis bdag nyid cher gyur gang dag la ni ma lus gsungs/ /de rtogs pa las lhag par gyur pa'i snying rjes ston pa'i bka' yi tshig rnams ni/ /byang chub don du ltos pa med pas spyi bor 'dzin mdzad blo bzang gang / /zhi ba'i spyod ldan thub mchog las 'khrungs gcig tu sems can don mdzad pa/ /de rnams yul dang yul can dag la zhen pa'i btson ra nyid du ni/ /sna tshogs bcings gyur skyabs med 'dod pa'i khams kyi dbang phyug rnams/ /gang zhig dran pa'i rjes su zhugs pas rig pa med rnams sgrol mdzad cing / /kun du drangs nas 'dod pa las rgyal go cha dag gis 'ching mdzad pa/ /de rnams phyag 'tshal nas ni gzhan don khur/ /bskur zhing mi shes mun pa gzhom pa'i phyir/ /bdag nyid chen po sdom pa nyi shu pa'i/ /rnam bshad tshig gsal ba ni brtsam par bya/ /'dir dkon mchog gsum la gcig tu skyabs su song ba/ tshul khrims dang ldan pa/ dad pa dang ldan pa/ snying rje dang ldan pa/ byang chub tu sems bskyed pa/ byang chub sems dpa'i sdom pa yongs su bzung zhing nan tan du byed pa'i bdag nyid can sdom pa 'phel ba la rab tu sbyor ba ni ring po mi thogs par tshogs yongs su rdzogs par 'gyur ba'i phyir/ slob dpon tsan+d+ra go mi zhes bya ba gzhan gyi don la gcig tu sems pa/ mchog tu 'jigs pa med pa/ sa chen po la zhugs pa des sdom pa yang dag par blang ba sngon du 'gro ba can gyi bslab pa ni legs par nan tan du bya ba yin par yang dag par mthong nas/ byang chub sems dpa'i 'dul ba yang dag par bsdu bar 'dod pas byang chub sems dpa'i tha snyad kyi rgyur gyur pa'i sdom pa yang dag par blang ba'i cho ga mngon par gzung ba bstan pa'i phyir re zhig 'di ltar/ sangs rgyas rnams zhes bya ba la sogs pa smos pa yin te/ sangs rgyas rnams ni zhes bya ba ni yang dag par rdzogs pa'i sangs rgyas te/ 'di rnams nyid ye shes dang / thugs rje'i sbyor bas gzhan gyi don la 'jug pa la dbang du gyur pa'i phyir ro/ /mang po'i tshig tu bstan pa ni dus gsum gyi sangs rgyas rnams yongs su bsdu ba'i phyir te/ de la 'das pa ni sangs rgyas bcom ldan 'das gang dag gi bstan pa yang nub par 'gyur ba'o/ /ma 'ongs pa ni gang zhig sangs rgyas pa'i ched du tshogs yongs su rdzogs pa 'dul ba'i dus la gzhes pa 'ba' zhig tsam ste/ mngon par rdzogs par 'tshang rgya bar 'gyur ba'o/ /de ltar gyi ni gang dag gi bstan pa 'di yang nub par ma gyur pa'o/ /sras dang bcas la zhes bya ba ni sras dang bcas pa ste/ sangs rgyas rnams 'ba' zhig kho na ma yin gyi 'on kyang sa chen po la zhugs pa'i byang chub sems dpa' chen po'i sras rnams dang bcas pa yang ngo / /de rnams kyang 'dir rdzogs pa'i sangs rgyas dang mnyam pa'i phyir ro/ /de rnams la gus pa ste/ de'i yon tan rnams la dga' ba'i sems kyis phyag 'tshal 'dud ces brjod cing lus shin tu 'dud pas phyag 'tshal ba byas nas/ ci nus zhes bya ba ni 'byor pa dang rjes su mthun pas so/ / mchod nas byang chub sems dpa' rnams kyi khrims gang de blang bar bya zhes bya bar sbyor ro/ /bdag dang gzhan rjes su bzung ba la rab tu 'jug pa dang / 'gyod pa med cing rab tu dga' ba'i sbyor bas bsil ba'i phyir tshul khrims so/ /byang chub sems dpa' rnams kyi zhes bya ba la/ byang chub ni rnam pa thams cad du zag pa thams cad zad pa'i ye shes so/ /sems dpa' ni bsam pa ste/ 'gro ba thams cad yongs su sbyong ba'i don gyi bsam pa gang la yod pa de la de skad ces bya'o/ /de rnams kyi ni/ phyogs dus kun na bzhugs pa'i zhes bya ba ste/ shar la sogs pa'i phyogs bcu po thams cad dang / dus gsum po thams cad du'o/ /bzhugs pa ni kun du 'byung ba ste/ gcig tu phyogs gcig gi kha cig tu 'ba' zhig ma yin gyi/ 'on kyang thams cad du dus thams cad kyi thams cad du zhes bya ba'i don to/ /gang zhes bya ba ni spyir bstan pas tshul khrims rnam pa dgu po nyid yongs su gzung ba'i phyir ro/ /byang chub sems dpa' rnams kyi tshul khrims ni rnam pa dgur bstan te/ ngo bo nyid kyi tshul khrims dang / tshul khrims thams cad dang / dka' ba spyod pa'i tshul khrims dang / thams cad kyi sgo'i tshul khrims dang / skyes bu dam pa'i tshul khrims dang / rnam pa thams cad kyi tshul khrims dang / phongs pa 'ded pa'i tshul khrims dang / 'di dang gzhan du bde bar 'gyur ba'i tshul khrims dang / rnam par dag pa'i tshul khrims so/ /de la ngo bo nyid kyi tshul khrims zhes bya ba la/ ngo bo nyid kyi tshul khrims ni ngo bo nyid kyi tshul khrims te/ tshul khrims nyid kyi rang bzhin no/ /de yang ngo bo nyid ni yongs su 'dzin pa dang / rjes su slob pa'o/ /de yang rnam pa bzhi dang ldan par rig par bya ste/ pha rol las yang dag par blangs pa dang / lhag pa'i bsam pa rnam par dag pa dang / nyams par gyur na phyir gso bar byed pa dang / mi nyams par bya ba'i phyir gus pa bskyed nas dran pa nye bar gnas pa'o/ /de la yang dag par blangs pa dang / bsam pa rnam par dag pa gnyis kyis ni byang chub sems dpa' bslab pa las rnam par nyams par gyur na/ pha rol dang bdag la brten nas/ khrel yod pa dang ngo tsha shes pa dag skye bar 'gyur ro/ /ltung ba las phyir gso bar byed pa dang / rnam par nyams par ma gyur pa ste/ phyi ma gnyis kyis ni 'di'i tshul khrims rnam par dag pas 'gyod pa med par 'gyur ro/ /de bzhin du pha rol las yang dag par blangs pa dang / rnam par nyams par gyur na slar gso bas ni nga rgyal spangs pa dang / nyams par mi 'gyur ba'i nan tan gyis ni bsam pa rnam par dag pa'o/ /de nyid kyis na 'di pha rol dang bdag nyid las kyang khrel yod pa dang ngo tsha bar gyur pas tshul khrims kun du srung bar 'gyur ro/ /bsrungs pas na 'gyod pa med par 'gyur ro/ /de la chos gsum po de rnams kyis ni ltung ba mi 'byung ba yin la/ gsum pas ni tshul khrims nyams pa las ldang bar rig par bya'o/ /sems las byung ba thams cad kyis yongs su 'dzin pa dang / nan tan dag bstan pa yin no/ /de ltar 'di ni byang chub sems dpa' rnams kyi ngo bo nyid kyi tshul khrims te/ yang dag par blangs pa dang / rjes su slob pas bdag dang gzhan gyi don dang / phan pa dang bde bar 'gyur ba'i phyir dge ba'o/ /byang chub sems dpa'i bslab pa dpag tu med pa yongs su bsdus pa'i phyir dpag tu med pa'o/ /sems can thams cad la phan pa dang bde bar mngon par gnas pa'i phyir sems can thams cad la phan 'dogs pa'o/ /bla na med pa yang dag par rdzogs pa'i byang chub kyi 'bras bu len par byed pa'i phyir 'bras bu dang phan yon che bar rig par bya'o/ /tshul khrims thams cad ces bya ba la/ thams cad kyi tshul khrims ni tshul khrims thams cad de/ khyim pa dang rab tu byung ba'i phyogs dag la brten pa'i phyir ro/ / de yang rnam pa gsum ste/ sdom pa'i tshul khrims dang / dge ba'i chos sdud pa'i tshul khrims dang / sems can gyi don byed pa'i tshul khrims so/ /de la sdom pa'i tshul khrims ni so sor thar pa'i sdom pa ris bdun blangs pa'o/ /de la dge slong dang / dge slong ma dang / dge slob ma dang / dge tshul dang / dge tshul ma'i dbye bas rnam pa lnga yin pa'i phyir/ rab tu byung ba'i phyogs rnam pa lnga'o/ /khyim pa'i phyogs ni rnam pa gnyis te/ dge bsnyen dang dge bsnyen ma'i dbye bas rnam pa gnyis ni khyim pa'i phyogs rnam pa gnyis so/ /nyin zhag gcig pa'i yang dag par blangs pa ni dka' ba spyod pa dang 'dod pa las dben pa ma yin pa'i phyir dang / yun ring por rjes su 'brel ba med pa'i phyir 'di la 'os pa ma yin pas ma bstan to/ /'di ltar bstan par 'gyur te/ so sor thar pa'i sdom pa ni byang chub sems dpa'i sdom pa'i yan lag tu gyur pa yin te/ phyogs gcig nyid du rig par bya'o/ /de'i phyir so sor thar pa'i sdom pa gzhan dang ldan pa 'dis byang chub sems dpa'i sdom pa yang dag par len pa'i snod du gyur pa la bslab pa'i tshig 'di yang sbyin par bya zhes bya ba'i don to/ /'di la srog gcod pa la sogs pa las ldog pa'i cho ga gzhan pa nyid ni ma yin zhing / de rnams las kyang ldog pa ma yin pa la ni byang chub sems dpa'i sdom pa la yang dag par len pa'i snod du gyur pa yang yod pa ma yin no/ /bsam pa rnam par dag pas ni rnam par 'joms par 'gyur ro zhes bya ba 'di nyid la dgongs nas tshul khrims dang ldan pa zhes dang por bstan to/ /de ltar na byang chub sems dpa'i sdom pa 'di ni tshul khrims thams cad ces bstan to/ /de lta bu'i sdom pa'i tshul khrims 'di la gnas na tshul khrims kyi phung po yongs su rdzogs par 'gyur ro/ /gang gi tshe 'di ni 'khor los sgyur ba'i rgyal srid kyang bor nas rab tu byung ba de la 'khor los sgyur ba'i rgyal srid la rtswa dang mi gtsang ba lta bur mi blta bar 'gyur ba ni bsam pa rnam par dag pas yin gyi gzhan ni de lta ma yin te/ dman pa dag ni 'dod pa dang 'tsho ba'i don du rab tu 'byung ba'i phyir ro/ /ma 'ongs pa'i dus yang sdom pa la dbang du gyur par yongs su 'thob pa'i 'dod pa rnams la yang mngon par dga' bar 'gyur ba ma yin zhing / de'i don du smon pas tshangs par spyad pa spyod par mi byed de/ 'dod pa rnams la 'jigs pa chen po sna tshogs pa dang bcas pa'i nags tshal du 'jug pa lta bur yang dag pa'i shes rab kyis kun du mthong nas mi 'jug go/ /da ltar gyi dus kyi 'dod pa chen po dang ldan pa thams cad kyi rnyed pa dang bkur sti rgya chen po dag la yang skyugs pa'i zas bzhin du ro myong bar mi byed na/ dman pa rnams kyis dman pa la lta smos kyang ci dgos/ gcig pu rab tu dben pa la mngon par dga' ba yin la/ tshogs kyi nang du yang rung sems dben pas gnas par 'gyur te/ tshul khrims tsam gyis chog par mi 'dzin gyi/ 'on kyang tshul khrims la brten nas byang chub sems dpa'i ting nge 'dzin dpag tu med pa gang yin pa de dag mngon par bsgrub pa dang / dbang du gyur par bya ba'i phyir 'bad par byed do/ /'du 'dzi'i nang du 'dug kyang gtam ngan pa dang / tshig ngan pa cung zad kyang dang du len par mi byed la/ dben pa na 'dug kyang rtog pa ngan pa cung zad kyang mi sems so/ /brjed ngas pas kun du spyod par gyur na yang dus dus su shin tu 'gyod pa dang / nyes pa mthong ba yang skyed par byed de/ gang gi tshe gtam ngan pa dang / rtog pa ngan pa yang skyes ma thag tu myur ba nyid du dran pa skyed par byed cing mi bya ba'i sems kyang thob par 'gyur te/ des na spong bar 'gyur ro/ /spong ba la goms pa las ni rim gyis sngon ji ltar de kun du spyod pa la dga' bar 'gyur ba de ltar de kun du mi spyod pa la dga' ba dang / kun du spyod pa dang rjes su mi mthun par yang gnas so/ /sa chen por zhugs pa'i byang chub sems dpa' rnams kyi bslab pa'i gzhi rgya che ba rnams dang / dpag tu med pa rnams dang / bsam gyis mi khyab pa rnams dang / yun ring ba rnams dang / shin tu bya dka' ba rnams de thos nas skrag pa'am zhum par mi 'gyur gyi/ gzhan du na 'di ltar de dag kyang mir gyur pa las rim gyis bslabs nas dpag tu med cing bsam gyis mi khyab pa'i lus dang ngag gi sdom pa dang ldan par 'gyur la/ bdag nyid kyang mir gyur pas rim gyis bslabs na/ gdon mi za bar lus dang / ngag gi sdom pa phun sum tshogs pa dag thob par 'gyur ro snyam du sems so/ /des na bdag nyid kyi nyes pa dang 'khrul pa la rtog par byed kyi gzhan gyi lam ma yin no/ /sems can gzhan dag gtum zhing tshul khrims 'chal pa rnams nye bar gnas pa la kun nas mnar sems dang / khong khro bar mi 'gyur gyi/ de dag la lhag par rjes su brtse ba'i sems dang / byed par 'dod pa'i sems la nye bar gnas par 'gyur ro/ /pha rol po dag gi lag pa dang / bong ba dang / dbyug pa dang / mtshon chas bsnun kyang sems kyis kyang 'khrug par mi byed na/ sdig pa can gyis tshig 'byin pa'am slar 'tshog pa lta ga la byed/ de bzhin du gshe ba dang / khro ba la sogs pa'i sdug bsngal gyi reg pa las byung ba cung zad tsam gyis kyang gnod par mi byed do/ /yan lag lnga dang ldan pa'i bag yod pa ste/ sngon gyi mtha' dang ldan pa'i bag yod pa ni gang 'das pa'i dus su nye bar blangs pa las ltung ba 'byung bar gyur pa de des chos bzhin du phyir bcos par 'gyur ba'o/ /phyi ma'i mtha' dang ldan pa ni ma 'ongs pa'i dus na ltung ba gang 'byung bar 'gyur ba de dag kyang chos bzhin du phyir 'chos par 'gyur ba'o/ /dbus kyi mtha' dang ldan pa ni da ltar gyi dus su ltung ba gang byung ba de dag kyang chos bzhin du phyir 'chos par byed pa'o/ /dus snga nas bya ba ni gang 'di ltung ba'i sngon rol nyid nas ltung ba mi 'byung bar shin tu nan tan byed pa'o/ /kha cig ni 'di la nam yang ltung ba 'byung bar mi 'gyur ro zhes zer ro/ /lhan cig rjes su spyod pa ni gang dus snga mar bya ba'i bag yod par 'di nyid la gnas nas ci nas kyang 'di la ltung ba 'byung bar mi 'gyur ba'o/ /dge ba mi spyoms pa dang / sdig pa mi 'chab pa dang 'dod pa chung ba dang / chog shes pa dang / sdug bsngal bzod pa dang / skyo ba med pa'i ngang tshul can dang / rgod pa med pa dang / mi g.yeng ba dang / spyod lam rab tu zhi ba dang / kha gsag la sogs pa log pas 'tsho bar byed pa'i chos thams cad rnam par spang ba ste/ de ltar na yan lag bcu po de rnams dang ldan pa'i sdom pa'i tshul khrims la gnas pa'i byang chub sems dpa' ni tshul khrims legs par sdom pa'i tshul khrims su 'gyur te/ 'di lta ste snga ma 'das pa'i 'dod pa rnams la mi lta ba dang / ma 'ongs pa rnams la mngon par dga' bar mi byed pa dang / da ltar gyi rnams la mi chags pa dang / rab tu dben pa la mngon par dga' ba dang / ngag dang rnam par rtog pa yongs su dag par byed pa dang / bdag nyid la khyad du mi gsod pa dang / des pa dang / bzod pa dang / bag yod pa dang / cho ga dang 'tsho ba rnam par dag pa zhes bya ba'o/ /dge ba'i chos sdud pa'i tshul khrims ni sdom pa yang dag par blangs pa'i 'og tu yang gang cung zad lus dang / ngag dang yid dag gis byang chub kyi phyir dge ba gang ci yang rung ba bsags pa ste/ de yang khyad par du thos pa dang / bsam pa dang / zhi gnas dang lhag mthong bsgom pa rnams la gcig tu dga' bas mngon par sbyor ba'o/ /de bzhin du dus dus su bla ma rnams la gsong por smra ba dang / phyag bya ba dang / mngon par ldang ba dang / thal mo sbyor ba dang / zhe sa dang bcas pas kun du spyod pa dang / bsnyen bkur byed pa dang / na ba rnams la brtse bas rim gro byed pa dang / legs par smra ba la legs so zhes bya ba byin pa dang / yon tan dang ldan pa la ji lta ba nyid kyi bsngags pa brjod pa dang / thams cad kyi bsod nams thams cad la dga' ba'i sems kyis tshig gis rjes su yi rang ba dang / gzhan rnams kyis nyes pa byas pa thams cad la so sor brtags te bzod pa byed pa dang / dge ba thams cad bla na med pa yang dag par rdzogs pa'i byang chub tu yongs su bsngo ba dang / dus dus su yang dag pa'i smon lam sna tshogs gdab pa dang / mchod pa'i rnam pa rgya chen po thams cad kyis dkon mchog gsum la mchod pa byed pa dang dge ba'i phyogs la brtson 'grus brtsam pa'i phyir rtag tu bag med pa spong ba dang / dran pa dang shes bzhin dang ldan pas bslab pa'i bzhi rnams kun du bsrung ba dang / dbang po'i sgo bsdam pa dang / zas kyi tshod rig pa dang / nam gyi cha stod dang cha smad la mi nyal bar rjes su brtson pa dang skyes bu dam pa la brten pa dang / dge ba'i bshes gnyen la brten pa dang / nyes pa yongs su shes shing mthong nas kyang nyes pa rnams yongs su spong ba dang / nyes pa rnams chos bzhin du 'chags pa dang / de lta bu'i phyogs dang mthun pa'i dge ba'i chos rnams sgrub pa dang / srung ba dang / spel bar byed pa ste/ de ltar na dge ba'i chos sdud pa'i tshul khrims 'di la rnam par gnas na/ dge ba'i chos kyi tshul shin tu bsdus par 'gyur te/ gang 'di 'dod pa'i longs spyod la lta ba cung zad tsam skyes pa dang du len par mi byed na/ mang po lta smos kyang ci dgos/ tshul khrims 'chal ba'i rgyur gyur pa'i nyon mongs pa dang nye ba'i mongs pa chags pa dang zhe sdang la sogs pa dang / ser sna dang / phrag dog dang / khong khro ba dang / khon du 'dzin pa la sogs pa byung ba dang du len par mi byed do/ /pha rol po dag nye bar gnas pa na khong khro ba dang / kun nas mnar sems dang / shar gnyer ba'i sems byung ba dang du len par mi byed do/ /le lo dang snyom las skyes pa yang dang du len par mi byed do/ /snyoms par zhugs pa'i ro myang ba dang / snyoms par 'jug pa'i nyon mongs pa byung ba yang dang du len par mi byed do/ /gnas lnga la yang dag pa ji lta ba bzhin du rab tu shes te/ dge ba'i 'bras bu'i phan yon dang / dge ba'i rgyu dang / dge ba'i 'bras bu la phyin ci log pa dang / dge ba'i 'bras bu la phyin ci ma log pa dang / dge ba bsdu ba la bar du gcod pa yang dag pa ji lta ba bzhin du rab tu shes te/ de la dge ba'i 'bras bu la yon tan du mthong ba'i byang chub sems dpa' ni dge ba bsdu ba'i phyir dge ba'i rgyu yongs su tshol bar byed do/ /phyin ci log dang / phyin ci log pa yang dag pa ji lta ba bzhin du rab tu shes te/ dge ba'i 'bras bu thob nas mi rtag pa la rtag par lta bar mi 'gyur ba nas/ bdag med pa la yang bdag tu lta bar mi 'gyur ba'i bar du'o/ /bar chad du gyur pa yang rab tu shes nas yongs su spong bar byed do/ /de ltar go rims bzhin du sbyin pa la sogs pa'i pha rol tu phyin pa drug la nan tan du byed pa rnam pa bcu po de dag nyid kyis myur ba nyid du rnam pa thams cad du dge ba sdud pa yin no/ /yang sems can gyi don byed pa'i tshul khrims ni rnam pa bcu gcig ste/ byang chub sems dpa' sems can gyi don bya ba'i tshul khrims rnam pa thams cad gnas pa ni re re yang rnam pa thams cad kyi rnam pa dang ldan pa yin te/ 'di la sems can gyi don gyi bya ba nye bar gyur pa ste/ nad la sogs pa'i sdug bsngal byung zhing skyes par gyur pa rnams la nad g.yog la sogs pa'i grogs byed pa yin te/ de 'dir de la sems pas grogs byed pa'i ched du 'gro bar byed/ de'i ched du lam du 'gro zhing 'ong ba dang yang dag pa'i las kyi mtha' la sbyor ba dang / longs spyod pa rnams kun du bsrung ba dang / bye ba rnams sdum pa dang / dga' ston dang / bsod nams byed pa dag gi grogs su 'gro bar byed do/ /nad kyis btab pa rnams kyi nad g.yog dang / long ba rnams ni khrid cing lam ston par byed pa dang / 'on pa rnams ni go bar bya ba'i phyir lag brda'i mtshan ma nye bar bstan pas don go bar byed/ rkang lag med pa rnams ni mgo'am bzhon pas 'khyer bar byed/ 'dod pa'i 'dun pa la sogs pas kun nas dkris pa rnams kyi 'dod pa la sogs par rnam par rtog pa'i sdug bsngal sel bar byed/ gzhan gyis sma phab cing pham par byas pa rnams kyi ni sma phab pa dang pham par byas pa'i sdug bsngal sel bar byed/ lam gyis ngal bar gyur pa rnams la gnas dang bza' ba sbyin pa la sogs pa dang / lus mnye bas kyang lam gyis ngal ba dang dub pa'i sdug bsngal sel bar byed do/ /'di ni rnam pa thams cad du grogs byed pa'o/ /'jig rten pa dang 'jig rten las 'das pa'i don rnams la chos bstan pa sngon du 'gro ba can gyi thabs nye bar bstan pa sngon du 'gro ba'i rigs pa ston par byed de/ de 'di ltar gzhan rnams la rigs pa ston par byed pa ni nyes par spyad pa spyod pa rnams kyi nyes par spyod pa spang ba'i phyir chos ston par byed pa'am/ thabs mkhas pas kyang ston par byed pa de bzhin du ser sna can rnams kyi ser sna spong bar byed pa dang / tshe 'di la yang yang dag pa dang / tshegs chung ngus longs spyod rnams bsgrub pa dang / bsrung ba dang / bstan pa 'di la sdang ba rnams dad pa thob par bya ba dang / mthong ba thob par bya ba dang / lta ba rnam par dag pas ngan song las yang dag par 'da' bar bya ba dang / kun du sbyor ba thams cad mthar thug pas sdug bsngal ba thams cad las yang dag par 'da' bar bya ba'i phyir chos ston pa'am thabs mkhas pas kyang ston par byed do/ /'di ni rigs pa'i rnam pa thams cad ston pa'o/ /phan 'dogs pa'i sems can rnams la byas pa gzo ba rjes su 'dzin par byed cing rjes su mthun pa'i lan du phan 'dogs pas bsnyen bkur byed de/ de 'di ltar byas pa gzo ba la dga' ba dang ldan pas lan du phan 'dogs pa mthong nas gus par bya ste/ tshur spyon legs par byon to zhes brjod pas smra zhing kun du smra la yang dag par dga' bar byed/ gnas dang stan bstabs pas kyang bsdu bar byed de/ rnyed pa dang bkur sti'i lan de dang mnyam pa'am lhag pas nye bar gnas par byed do/ /gzhan yang de'i bya ba rnams la ma bcol bar yang grogs byed du 'gro na bcol ba la lta ci smos/ de bzhin du 'dir rnam pa gzhan yang bya ba yin no/ /de ltar na 'di ni rnam pa thams cad du byas pa gzo ba'o/ / sems can 'jigs pa rnams 'jigs pa'i gnas dag las srung bar byed do/ /sems can rnams gcan gzan gyi gnod pa'i 'jigs pa las kyang bsrung zhing / chu'i glong dang chu srin 'dzin khri'i 'jigs pa dang / rgyal po'i 'jigs pa dang / chom rkun gyi 'jigs pa dang / phyi rol pa'i 'jigs pa dang / rje bo dang bdag po'i 'jigs pa dang / 'tsho ba med pa'i 'jigs pa dang / mi snyan pa'i 'jigs pa dang / 'khor gyi nang du bag tsha ba'i 'jigs pa dang / mi ma yin pa dang ro langs kyi 'jigs pa la sogs pa las kyang yongs su srung bar byed do/ /de rnams ni 'jigs pa'i gnas kyi rnam pa thams cad las kun du srung ba'o/ /yang gnyen bshes dang longs spyod kyis phongs pa rnams kyi mya ngan sel bar byed de/ de yang 'di ltar sdug bsngal gyi gnas rnams kyi mya ngan sel bar byed pa ste/ gnyen bshes kyi sdug bsngal las brtsams nas ma dang pha dang / bu dang / chung ma dang / spun zla dang / sring mo dang / bran pho dang / bran mo dang / las byed pa dang / zho shas 'tsho ba dang / mdza' bshes dang / nye du dang / snag gi gnyen mtshams shi ba dang / slob dpon dang mkhan po dang / bla ma lta bu shi na yang mya ngan sel bar byed do/ /longs spyod kyi sdug bsngal las brtsams te gzhan dag gi longs spyod rgyal po dang / chom rkun la sogs pas tshul ma yin par phrogs pa rnams rgyu des mya ngan du gyur pa sel bar byed do/ /'di ni rnam pa thams cad kyis mya ngan sel ba'o/ /phongs pa rnams la tshul bzhin du phan gdags pas nye bar 'dzin pa ste/ 'di ltar phongs pa rnams la phan gdags pas nye bar 'dzin pa ni zas 'dod pa la zas sbyin pa dang / bzhon pa 'dod pa la bzhon pa nas ci srid gang don byed pa de ni de'i phyir rigs pa'i rjes su 'gro bar sbyin pa'i bar 'di ni phan gdags pa'i rnam pa thams cad kyis nye bar 'dzin pa'o/ /gnas yang dag par sbyin pa dang / chos kyi tshogs yongs su sdud par byed de/ kun du smra ba dang / legs par smra ba dang / yang dag par dga' bar byed pa dag gis dus 'da' ba dang / gzhan dag bza' ba dang btung ba sbyin pa la sogs pas yongs su bsdus pa las 'jig rten pa'i don gyi rjes su rgyun 'jug cing don du gnyer ba rnams la 'gro ba dang 'ong ba bdag gir byed do/ /de 'di ltar sems can gyi tshogs rnams yongs su bsdu ba'i sbyor bas yongs su sdud par byed de/ zang zing med pa'i snying brtse ba'i sems nye bar bzung nas/ re zhig thog mar gnas sbyin par byed do/ /de nas phongs pa de dag gi don gyi phyir bram ze dang khyim bdag dad pa can rnams las chos bzhin du chos gos dang zas la sogs pa tshol bar byed do/ /rang nyid kyi gos dang zas la sogs pa chos dang mthun zhing chos bzhin du rnyed pa rnams kyang thun mong du longs spyod par byed do/ /sred cing spyod pa ma yin no/ /dus dus su mthun pa'i gdams ngag rnam pa brgyad kyang sbyin par byed la/ rjes su bstan pa rnam pa lnga yang dag par ston par byed do/ /de la gang dag la gdams pa 'dod par gyur na/ ting nge 'dzin la brten nas sam/ 'grogs pa'i rgyus thog ma nyid du de rnams kyi sems 'dod chags dang bcas pa'am/ gzhan yin pa btsal nas mkhyen to/ /de nas dbang po rtul ba la sogs pa dang / de nas kha ton la sogs pa gang la dga' ba'i bsam pa dang / de nas 'dod chags la spyod pa la sogs pa'i bag la nyal ba yongs su btsal nas mkhyen to/ /de nas ci rigs ci 'os su 'jug pa'i sgo sna tshogs pa rnams su ste/ mi sdug pa'am/ byams pa'am/ rten cing 'brel bar 'byung ba'am/ khams kyi dbye ba'am/ dbugs dbyung ba'am/ rngub pa dran pa bdag gis 'jug par mdzad do/ /de bzhin du rtag pa dang chad pa dag tu lta ba'i gnyen por dbu ma'i lam ston pa dang / ma byas pa la byas so snyam pa'i mngon pa'i nga rgyal 'dor du 'jug pa dang / de bzhin du ma thob pa dang ma reg pa dang mngon sum du ma byas pa la mngon du byas so snyam pa'i mngon pa'i nga rgyal 'dor du 'jug pa dag gis kyang 'jug par mdzad do/ /gdams ngag rnam pa brgyad po de dag kyang gnas gsum gyis bsdus par rig par bya'o/ /gnas gsum po dag gang zhe na/ sems kyi gnas pa slar gnas par bya ba'i phyir thog mar dmigs pa legs par gtod pa ste/ sems dang dbang po la sogs pa shes pas 'jug pa'i sgor 'jug pa dang / sems gnas pa la rang gi don thob par bya ba'i phyir yang dag pa'i thabs kyis lam ston pa ni ston pa'i dbu ma'i lam dang / rang gi don mthar ma phyin pa la bar ma do'i gnas 'dor du 'jug pa ste/ ma byas pa la sogs pa la byas pa la sogs par mngon pa'i nga rgyal byed pa 'dor du 'jug par rig par bya ste/ gnas pa dang / rnam par sgyur ba dang / sbyor ba 'dor ba zhes bya ba'i don to/ /de la rjes su bstan pa rnam pa lnga yang dag par rjes su ston te/ kha na ma tho ba dang bcas pa'i kun du spyod pa dgag pa dang / kha na ma tho ba med pa'i kun du spyod pa gnang ba dang / dgag pa dang gnang ba'i chos rnams la 'khrul par kun du spyod pa dag la bskul ba dang / yang dang yang du ma gus par gyur pas 'khrul pa la phan pa'i bsam pas sma dbab pa dran par byed du gzhug pa dang / yang dag par zhugs pa la dgag pa dang gnang ba'i chos rnams las yon tan yang dag pa dang dga' ba bsnyad pas yang dag par dga' bar bya'o/ /rnam pa 'di dag thams cad kyis ni tshogs yongs su sdud pa ste/ don ma yin pa thams cad nye bar spong ba dang / yid du mi 'ong ba'i kun du spyod pa yongs su spangs pas so/ /gzhan gyi sems dang rjes su mthun par bya ste/ de 'di ltar gzhan dag gi sems dang mthun par byed par 'dod pa na thog ma kho nar de rnams kyi ngo bo dang rang bzhin shes par bya ba nas/ gang dag dang ji ltar lhan cig gnas par bya ba de ltar de dag dang gnas so/ /gang dag la ji ltar bsgrub par bya ba de ltar de dag la sgrub par byed do/ /gang gi sems dang mthun par byed 'dod par gyur pa de la de dang mthun pa'i lus dang ngag gi kun du spyod pas de'i sdug bsngal dang / yid mi bde ba skyes pa la sdug bsngal ba dang / yid mi bde ba des kyang mi dge ba'i gnas las bslang ste/ dge ba'i gnas su 'jog par mi 'gyur na ni byang chub sems dpa' so sor brtags te/ de bsgrims te yongs su spong zhing kun du spyod par mi byed do/ /gal te sdug bsngal dang / yid mi bde ba des mi dge ba'i gnas bslang ste dge ba'i gnas su 'jog pa mthong na ni de kun du spyod par byed kyi/ de nyid la snying brtse bas nye bar bzung nas gzhan gyi sems dang mthun par ni mi byed do/ /phyogs gcig pa'i lus dang ngag gi kun du spyod pa gang gis gzhan dag gi sdug bsngal ba dang / yid mi bde ba skyes par 'gyur la/ de dag dang de las gzhan pa rnams mi dge ba'i gnas nas zhes bya ba la sogs pa nas/ snga ma bzhin du de las gzhan pa rnams kyi sems dang mthun par bya ba'i phyir kun du spyod par mi byed do zhes bya ba'i bar du'o/ /gal te gzhan pa de las gzhan pa rnams kyang mi dge ba'i gnas nas zhes bya ba la sogs pas snga ma bzhin du kun du spyod par byed de/ de dag las snying brtse ba'i sems nye bar bzung nas de dag gi sems dang mthun par mi byed do/ /bdag nyid la lus dang ngag gi kun du spyod pa gang gis pha rol dag la sdug bsngal ba dang / yid mi bde ba skye bar mthong la kun du spyod pa de yang bslab pa'i gzhir gtogs pa yang ma yin zhing / bla na med pa'i bsod nams dang ye shes kyi tshogs kyang ma yin la/ sdug bsngal ba dang yid mi bde ba des kyang gzhan dag mi dge ba'i gnas nas zhes bya ba la sogs pa snga ma bzhin du ste/ gzhan gyi sems dang mthun par bya ba'i phyir kun du spyod par ni mi byed do/ /gal te kun du spyod pa 'di bslab pa'i gzhir gtogs pa yin zhing sdom par gtogs pa yang yin la/ sdug bsngal ba dang yid mi bde ba des kyang gzhan dag mi dge ba'i gnas nas zhes bya ba la sogs pa ni snga ma bzhin du ste/ gzhan dag la snying brtse ba nye bar bzung nas kun tu spyod par ni mi byed de/ de bzhin du bde ba dang yid bde ba yang de dang 'dra ste/ rgyas par ni ci rigs par rig par bya'o/ /'di gzhan gyi sems dang mthun par byed pa na pha rol po khro ba'i kun nas dkris pa zhi bar ma gyur gyi bar du mngon sum du bsngags pa yang mi brjod la/ shad kyis sbyangs pa yang mi byed na bsngags pa yang ma yin pa lta ci smos/ gzhan mi smra ba la yang smra zhing yang dag par dga' bar byed na/ smra bar byed pa la yang dag par dga' bar byed pa lta ci smos/ gzhan dag la nam yang 'khrul par mi byed kyi/ gzhan du na de dag la snying brtse ba'i phyir sma dbab par 'dod par zad de/ dbang po rnams rab tu zhi bas de dag sma 'bebs par byed do/ /gzhan dag la 'phya bar yang mi byed/ bsting bar yang mi byed la bag 'khums par yang mi byed do/ /bde ba la reg par mi gnas pa'i phyir 'gyod pa skyed par yang mi byed do/ /chad pas bcad cing sma phab zin pa la yang chad pa'i gnas kyis gleng bar mi byed do/ /dga' ba'i shas chung ba la yang bdag nyid mthong bar mi ston to/ /gzhan dag la mi bsten par yang mi byed/ ha cang bsten par yang mi byed/ dus ma yin par bsten par yang mi byed/ de dag gi mdun du mdza' bo la smod pa yang mi byed/ mi mdza' ba'i bsngags pa yang mi brjod/ /ma 'dris pa la yid rton par yang mi byed/ rgyun du slong bar yang mi byed/ len pa la tshod shes par yang byed/ zas dang skom la sogs pa mgron du bos na yang spong bar yang mi byed do/ /yang na chos dang mthun par shad kyis sbyong bar byed do/ /'di ni rnam pa thams cad du gzhan gyi sems dang mthun par byed pa'o/ /yang dag pa'i yon tan gyi dbye ba nye bar bzung na gzhan dag tu gsal bar ston pas yang dag par dga' bar byed de/ de 'di ltar yang dag pa'i yon tan gyis gzhan kun du dga' bar byed pa na/ dad pa dang tshul khrims dang thos pa dang gtong ba dang shes rab la sogs pa yon tan gang dang gang ldan pa rnams la de dang 'brel pa'i gtam gyis yang dag par dga' bar byed do/ /'di ni rnam pa thams cad du yang dag par dga' bar byed pa'o/ /gzhan dag mi dge ba'i gnas nas bslang ste dge ba'i gnas la dgod pa'i phyir 'jam pa dang phan pa'i bsam pas sma dbab pa dang / chad pas bcad pa'am bskrad par bya ba dag gis tshar bcad pa'i las byed do/ /de yang nyes pa chung ngu la ni sma dbab pa chung ngus sma 'bebs par byed do/ /nyes pa 'bring la ni 'bring gis so/ /nyes pa chen po la ni chen pos so/ /chad pa'i las kyang de bzhin du rig par bya'o/ /bskrad pa'i las la nyes pa chung ngu dang 'bring dag la ni dus re zhig tu bskrad nas slar dgug pa'i tshul gyis skrod par byed do/ /nyes pa chen po la ni de dag la snying brtse bas/ de dag la bsod nams ma yin pa ches mang po yongs su 'dzin par mi 'gyur bar bya ba'i phyir dang / gzhan dag la yang phan par 'dod pas rjes su bstan pa'i phyir ji srid 'tsho'i bar du yang phyir mi dgug pa'i tshul gyis skrod par byed cing longs spyod par mi byed do/ /'di dag ni rnam pa thams cad du tshar gcod pa'o/ /rdzu 'phrul gyi stobs kyis gzhan dag skrag par byed 'dod pa na/ sems can nyes par spyad pa spyod par 'dod pa rnams la nyes par spyod pa'i rnam par smin pa'i 'bras bu sems can dmyal ba rnams dang / sems can dmyal ba chen po rnams dang / grang ba'i dmyal ba dang / nyi tshe ba'i dmyal ba la sogs pa ngan song gi 'gro ba de dag bsten cing bsnyen la ston par byed cing mir gyur pa dag gis nyes par spyod pa byas shing bsags pa mi sdug pa'i 'bras bu rnam par smin pa mi bzad cing mchog tu tsha ba so sor nyams su myong ba 'di lta bu 'di la khyod ltos shig ces bsgo nas/ de dag gis kyang de lta bu mthong ste/ skrag cing skyo bar gyur nas mi dge ba las bzlog cing / bstan pa la btsud nas 'dun par byed/ mgu bar byed/ yang dag par dga' bar byed do/ /yang na rdzu 'phrul mngon par 'du byed pa rnam pa sna tshogs pa 'di lta ste/ 'gro ba du ma'i lus kyi dbang byed pa'i bar gyis 'dun par byas/ mgu bar byas/ yang dag par dga' bar byas nas ma dad pa rnams ni dad pa phun sum tshogs pa la dgod par byed/ tshul khrims 'chal ba ni tshul khrims phun sum tshogs pa la/ thos pa nyung ba ni thos pa phun sum tshogs pa la/ ser sna can ni gtong ba phun sum tshogs pa la/ shes rab 'chal ba ni shes rab phun sum tshogs pa la dgod par byed do/ /'di ni rnam pa thams cad du skrag par byed pa la sogs pa'o/ /de ltar na 'di ni rnam pa thams cad kyis sems can gyi don bya ba'i tshul khrims dang ldan pa yin no/ /'di ni tshul khrims thams cad do/ /dka' ba spyod pa'i tshul khrims la sogs pa ni 'di nyid kyi rab tu dbye ba yin par rig par bya'o/ /de la dka' ba spyod pa'i tshul khrims gang yin pa ni tshegs chen pos bya ba'o/ /de la yang dag par len pa dang / srung ba dang / 'khrul pa med pa las rnam pa gsum du 'gyur te/ gang 'di longs spyod chen po dang / dbang phyug chen po la dbang byed cing 'dug pa las longs spyod chen po dngos dbang phyug chen po la dbang byed pa de rtsa ba dang 'dra bar spangs nas tshul khrims kyi sdom pa yang dag par len pa dang / gang yang tshul khrims thams cad blangs nas nyam thag ste srog la thugs kyang tshul khrims de nyams par mi byed na slar yang med par lta ga la byed/ gang yang ji srid 'tsho'i bar du ji nas kyang nyes pa phra rab kyang mi 'byung zhing 'khrul pa yang mi 'byung na lci ba lta bu 'byung bar ga la 'gyur zhes bya'o/ /thams cad kyi sgo'i tshul khrims ni khyab pa'i phyir thams cad kyi sgo'o/ /de ni rnam pa bzhi ste/ yang dag par blangs pa dang / goms pa dang rang bzhin dang / thabs dang ldan pa'o/ /de la yang dag par blangs pa ni byang chub sems dpa'i tshul khrims yang dag par blang ba'i phyir ro/ /goms pa ni sngon gyi tshe rabs gzhan dag tu yang dag par blangs pa la goms pa'i dbang gis ci nas kyang sdig pa la mngon par mi dga' zhing dge ba nyid la mngon par dga' ba'o/ /rang bzhin ni gang zhig rang bzhin gyis kun du skrag par gnas pas rgyun du yang rang bzhin gyis dge ba kho na yin pa'i phyir/ lus dang ngag gi las yongs su dag par 'jug pa'o/ /thabs dang ldan pa ni bsdu ba'i dngos po bzhi la brten nas sems can rnams la lus dang ngag gi las dge ba la 'jug pa gang yin pa'o/ /skyes bu dam pa'i tshul khrims ni dam pa kho na'i spyod pa yin pa'i phyir ro/ /de ni rnam pa lnga ste/ bdag nyid kyang tshul khrims dang ldan pa dang / gzhan dag kyang tshul khrims yang dag par len du gzhug pa dang / tshul khrims kyi bsngags pa yang brjod pa dang / chos dang mthun pa'i gang zag mthong na yid dga' bar 'gyur ba dang / nyes pa byung na myur ba nyid du chos bzhin du 'chos pa'o/ /rnam pa thams cad kyi tshul khrims ni don chen po yin pa'i phyir ro/ /de ni rnam pa bcu gsum ste/ byang chub chen por yongs su bsngos pa'i phyir bla na med pa dang / bslab pa'i gzhi rgya chen po yongs su bzung ba'i phyir gsal ba dang / 'dod pa'i bsod nams dang bdag dub par byed pa'i mtha' gnyis spangs pa'i phyir kha na ma tho ba med pa dang / rab tu dga' ba'i gnas dang mthun pa dang / ji srid 'tsho'i bar du bslab pa 'bul bar mi byed pa'i phyir rtag tu byed pa dang / rnyed pa dang bkur sti dang phas kyi rgol ba dang / nyon mongs pa dang / nye ba'i nyon mongs pa rnams zil gyis mi non cing mi 'phrogs pa'i phyir brtan pa dang / dregs pa'i rang bzhin gyi rgyan dang ldan pa ma yin pa'i phyir dang / gnas skabs thams cad du tshul khrims kyi rgyan gyis brgyan pa'i phyir tshul khrims kyi rgyan dang ldan pa srog gcod pa la sogs pa spangs pa'i phyir ldog pa'i tshul khrims dang / dge ba sdud pa dang / sems can gyi don bya ba la sbyor ba'i phyir 'jug pa'i tshul khrims dang rjes su srung ba'i phyir kun nas srung ba'i tshul khrims dang / skyes bu chen po'i mtshan rnam par smin par byed pa dang / lhag pa'i sems rnam par smin par byed pa dang / sdug pa'i 'gro ba rnam par smin par byed pa dang / sems can gyi don rnam par smin par byed pa'o/ /phongs pa 'dor ba'i tshul khrims ni phongs pa sel ba'i don yin pa'i phyir ro/ /'di la byang chub sems dpa' 'di snyam du sems te/ 'di ltar bdag la su yang srog 'phrog pa dang / ma byin par len pa dang / 'dod pa rnams la log par g.yem pa dang / brdzun pa'i tshig smra ba dang / phra ma dang / ngag rtsub po dang / tshig kyal pa smra ba dang / lag pa dang bong ba la sogs pas bsnun cing rnam par 'tshe ba'i reg pa mi 'dod pa dag kun du spyod par ma gyur cig snyam du 'dod la/ bdag de lta bu 'dod bzhin du gal te gzhan gyis log par kun du spyod par gyur na/ des bdag gi yid du mi 'ong bar 'gyur bas na/ gzhan yang de ltar 'dod bzhin du bdag gis log par kun du spyad par gyur na des de dag gi yid du mi 'ong bar 'gyur ba'i phyir/ gang bdag dang gzhan dag gi yang yid du mi 'ong bar 'gyur ba de dag gis gzhan dag la ci'i phyir kun du spyod par bya snyam pa de ltar so sor brtags nas srog gi phyir yang gzhan dag la yid du mi 'ong ba rnam pa brgyad po kun du spyod par mi byed pa'o/ /tshe 'di dang pha rol du bde bar 'gyur ba'i tshul khrims ni bdag dang gzhan dag skye ba 'di dang skye ba gzhan dag tu bde ba'i rgyur 'gyur ba'i phyir ro/ /de yang rnam pa dgu ste/ gang 'di sems can dgag par bya ba rnams ni 'gog par byed/ gnang bar bya ba rnams ni gnang bar byed/ sems can bsdu ba rnams ni sdud par byed/ tshar gcad par bya ba rnams ni tshar gcod par byed cing lus dang ngag gi las yongs su dag par 'gyur te/ gang yang sbyin pa dang / tshul khrims dang / bzod pa dang / brtson 'grus dang / bsam gtan dang / shes rab dang ldan pa 'di dag nyid dang / gzhan dag la tshe 'di dang phyi ma la bde bar 'gyur ba'o/ /rnam par dag pa'i tshul khrims ni thams cad bkrus pas rnam par dag pa'i phyir ro/ /de ni rnam pa bcu ste/ dge sbyong gi tshul dang / rdzogs pa'i byang chub 'dod pa'i phyir yin gyi/ 'tsho ba 'dod pa'i phyir ma yin gyi dang po nyid nas legs par blangs pa dang 'gal ba byas pa chung ngu la 'gyod pa med pa'i phyir ha cang zhum pa ma yin pa dang / gnas ma yin par 'gyod pa med pa'i phyir ha cang yang thal ba ma yin pa dang / gnyid kyi bde ba dang / glos 'bebs pa'i bde ba dang / nyal ba'i bde ba nyams su mi len pa dang / nyin mtshan du dge ba'i phyogs la mngon par brtson pa'i phyir le lo dang mi ldan pa dang / sngar bstan pa'i yan lag lnga'i bag yod pa la brten pa'i phyir bag yod pas yongs su zin pa dang / rnyed pa dang bkur sti la zhen pa med pa dang / lha nyid du smon pas tshangs par spyod pa la gnas par khas blangs pa ma yin pa'i phyir smon lam legs par btab pa dang / spyod lam dang 'phral gyi bya ba dang / dge ba'i phyogs la sbyor ba rnams la lus dang ngag gi spyod pa shin tu phun sum tshogs shing 'tsham pa'i phyir cho ga phun sum tshogs pas yongs su zin pa dang / tshul 'chos pa la sogs pa log pas 'tsho bar byed pa'i nyes pa thams cad rnam par spangs pa'i phyir 'tsho ba phun sum tshogs pas yongs su zin pa dang 'dod pa'i bsod nams dang / bdag nyid dub par byed pa'i sbyor ba rnam par spangs pa'i phyir mtha' gnyis rnam par spangs pa dang / mu stegs thams cad kyi lta ba rnam par spangs pa'i phyir nges par 'byin pa dang / nyams par mi byed cing med par mi byed pa'i phyir yang dag par blangs pa ma nyams pa'o/ /de ltar rnam pa dgu po 'di ni byang chub sems dpa'i tshul khrims kyi phung po chen po ste/ byang chub chen po'i 'bras bu skyed pa'o/ /'di la brten nas byang chub sems dpa'i tshul khrims kyi pha rol tu phyin pa yongs su rdzogs nas/ bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro/ /ji srid du mngon par rdzogs par 'tshang mi rgya ba de srid du 'di byang chub sems dpa'i tshul khrims kyi phung po dpag tu med pa 'di la slob bzhin pa na/ phan yon rnam pa lnga 'thob par 'gyur te/ sangs rgyas rnams kyis dgongs par 'gyur ba dang / mchog tu dga' ba chen po la gnas bzhin du 'chi ba'i dus byed par 'gyur ba dang / lus zhig nas kyang gang na de dang tshul khrims mtshungs pa'am/ lhag pa'i byang chub sems dpa' skal ba 'dra zhing chos mthun pa'i dge ba'i bshes gnyen du 'gyur ba der skye bar 'gyur ba dang tshe 'di la tshul khrims kyi pha rol tu phyin pa yongs su rdzogs par byed pa'i bsod nams kyi phung po tshad med pa dang ldan par 'gyur ba dang / tshe phyi ma la yang rang 'khrungs kyi tshul khrims nyid de/ tshul khrims de'i bdag nyid 'thob par 'gyur ba zhes bya'o/ /de ltar na 'di ni de'i mod la ngan song du 'gro ba rnam par bcad cing skye bar 'gyur ba ma yin no/ /gzhan du na ji ltar 'di la 'di 'dra ba'i phan yon ji ltar 'byung bar 'gyur/ sems bskyed pa yin snyam na/ 'di ni ngan song rnam par gcad par 'dod pa ma yin no/ /de lta na yang 'di ngan song rnams su skye bar ni mi 'gyur te/ gang gi phyir yang ngan song rnams rnam par ma bcad kyang 'di der skye bar mi 'dod do/ /de nyid kyi phyir 'di lta bu'i sems bskyed pa'i phan yon yin par rigs so/ /gzhan du na sdig pa dang mi ldan pa nyid der mi skye na ni gang zhig gang gi phan yon du 'gyur/ gang gis de'i mod la ngan song rnam par gcad par 'dod pa yang 'di thams cad du ngan song du skye bar mi 'dod pa nyid kyang ma yin te/ ring mo zhig nas brgya lam na skye bar 'gyur na yang myur ba nyid du de las thar bar 'gyur zhing gnas pa na yang dman pa dag lta bur mi bzad pa'i tshor ba myong bar mi 'gyur la/ shin tu skyo bar 'gyur bas snga rol du der skyes pa'i sems can rnams nus pa ji lta bas dge ba'i chos rnams la yongs su smin par byed do/ /de skad du yang / ring mo zhig na ngan song du/ /'gro zhing myur du thar ba dang / /der yang sdug bsngal chung ngu myong / /skyo bcas sems can smin par byed/ /ces gsungs pa lta bu'o/ /gzhan yang 'di lta bu ngan song du skye bar smra ba ni rigs pa ma yin te/ gnod par byed pa dang / gzhan gyi dbang la sogs pa mi srid pas mi khom pa'i mtshan nyid dang 'brel pa med pa'i phyir ro/ /de der skyes kyang nyams su myong bar mi 'gyur te/ bdag dang gzhan gyi don grub pa'i tshogs bsags par 'gyur ba'i phyir ro/ /byang chub sems dpa' ni bsams bzhin du gzhan gyi don du der skye bar 'gyur gyi/ bde 'gror yang bdag nyid 'di lta bu'i srog 'phrog par byed par 'dod de/ de lta bu dmyal ba rnams su yang nye bar dmigs par mi 'gyur ro/ /gzhan gyi don du mi 'gyur ba 'byor pa phun sum tshogs pa'am/ /bdag gi dngos po'i phun sum tshogs pa'am/ rnam par thar pa 'dod pa ni ma yin no/ /de skad du/ sems can ched du dmyal ba'i sred par gnas pa yis/ /sdug bsngal mi bzad cis kyang rgyal sras gnod byed min/ /ji srid yon tan skyon gyis theg dman zhugs pa yi/ /rnam rtog dge ba sna tshogs blo ldan gnod byed yin/ / blo dang ldan pa dmyal bar gnas pa dus kun du/ /byang chub dri med spangs pa'i bar du gcod byed min/ /theg pa gzhan la rab brtson rnam rtog bdag phan pa/ /rab tu bde bar gnas kyang bar du gcod par byed/ /ces gsungs pa lta bu'o/ /tshul khrims rnam pa dgu po de dag thams cad ni sdom pa'i tshul khrims dang / dge ba chos sdud pa'i tshul khrims dang / sems can gyi don bya ba'i tshul khrims te/ tshul khrims rnam pa gsum gyis bsdus par rig par bya'o/ /yang tshul khrims rnam pa gsum po de dag nyid yang dag par blangs pas byang chub sems dpa'i bya ba rnam pa gsum byed de/ sdom pa'i tshul khrims ni sems gnas par byed do/ /dge ba'i chos sdud pa'i tshul khrims ni bdag gis sangs rgyas kyi chos yongs su smin par byed do/ /sems can gyi don bya ba'i tshul khrims ni sems can yongs su smin par byed do/ /byang chub sems dpa'i bya ba thams cad ni 'di dag tu zad de/ 'di lta ste tshe 'di la bde bar gnas pa'i phyir sems gnas pa dang / lus dang sems dub pa med par sangs rgyas kyi chos yongs su smin par bya ba dang / sems can yongs su smin par bya ba yin te/ byang chub sems dpa'i tshul khrims ni de dag tu zad do/ /byang chub sems dpa'i tshul khrims kyi phan yon yang de dag tu zad do/ /byang chub sems dpa'i tshul khrims kyi bya ba yang de dag tu zad de/ de la ni 'das pa'i byang chub sems dpa' byang chub chen po 'dod pa rnams kyis kyang bslabs so/ /ma 'ongs pa rnams kyang slob par 'gyur ro/ /da ltar phyogs bcu'i 'jig rten gyi khams mtha' yas mu med pa dag na gnas pa dag kyang slob po/ /de ltar na 'di ni byang chub sems dpa' rnams kyi tshul khrims so/ /tshul khrims 'di la gzhan las khyad par du gyur pa ci zhig yod/ gang gis ni 'di mnod par bya zhe na/ bsod nams kun gyi gter gyur gang / /zhes bya ba smos te/ 'di bsod nams kyi sgras ni 'di las gzhan pa'i tshul khrims kyi sdom pa rnams yang dag par blang bar mngon par ston to/ / gter gyur zhes bya ba ni mchog ste/ ji ltar thams cad las shin tu khyad par du gyur pa'i nor cung zad nyid dgos pa'i rnam pa thams cad la yang zad pa med pa dang / don che ba yin pa'i phyir gter zhes smra'o/ /de bzhin du byang chub sems dpa'i tshul khrims kyi sdom pa yang dag par blangs pa 'di ni rtog pa dam pa'i bsam pas kun nas blang ba dang / bdag dang gzhan la phan pa la nan tan du bya ba'i thabs su gyur pa dang / rnam pa thams cad du nyes par spyod pa thams cad kyi gnyen por gyur pa'i phyir so sor thar pa'i sdom pa gzhan thams cad yang dag par blangs pa las shin du khyad par du gyur pa nyid kyi gter dang 'dra bas na gter du gyur pa'o/ /de'i phyir thams cad khas blangs pa ni byang chub kyi mthar thug gi bar du mi zad pa dang / sangs rgyas nyid 'thob pa'i yon tan la sbyor bas na don che ba dang / sems can gyi khams ma lus pa'i dgos pa la 'jug pas don che ba'i phyir ro/ /ji skad du/ byang chub sems dpa'i tshul khrims kyi sdom pa yang dag par blangs pa 'di ni tshul khrims kyi sdom pa yang dag par blangs pa thams cad las khyad par du 'phags pa yin te/ bla na med pa dang zhes bya ba nas/ so sor thar pa'i sdom pa yang dag par blangs pa thams cad ni 'di'i brgya'i char yang nye bar mi 'gro'o zhes bya ba la sogs pa'i bar du rgyas par bstan to/ /de ji ltar mnod par bya zhe na/ de ni bsam pa dam pa yis/ /zhes bya ba smos te/ bsam pa dam pa ni 'gro ba thams cad yongs su bskyab pa'i bsam pa ste/ snying rjer ro gcig pa'i dang ba chen po dang ldan pa dang / sangs rgyas dang byang chub sems dpa'i yon tan la reg par 'dod pa'i bsam pas zhes bya ba'i don to/ /de su zhig las blang bar bya zhe na/ bla ma sdom pa la gnas zhes bya ba la sogs pa smos te/ byang chub sems dpa'i tshul khrims kyi sdom pa dang ldan pa chos mthun pa las te/ sdom pa de gtong ba'am/ tshul khrims 'chal pa'am/ dbang du gyur pa ma yin pa'i phyir chos mthun pa ma yin pa gzhan las ni ma yin no/ /sdom pa la gnas nas kyang thams cad las ma yin pas mkhas zhes bya ba smos te/ gang zhig byang chub sems dpa'i tshul khrims kyi sdom pa de yang dag par blang ba'i cho ga la mkhas pa nyid las 'di mnod par bya zhes bya'o/ /de nyid kyi phyir mkhas pa ma yin pa las ni cho ga nyams pas sdom pa 'thob par mi 'gyur ro/ /de ltar na yang thams cad las ma yin pas/ nus dang ldan la zhes bya ba smos te/ nus pa ni stobs te/ 'bogs par 'os shing 'tsham pa zhes bya ba'i don to/ /de nyid kyis ni yon tan dang ldan pa ma yin pa dang / blang bar 'os pa ma yin pa'i phyir gzhan las ni ma yin no/ /de la bsam pa dang / sbyor ba phun sum tshogs pa ni 'os pa yin par rig par bya'o/ /de la bsam pa phun sum tshogs pa ni dad pa nyid dang / bsam pa thag pas byed pa nyid dang / ma chags pa dang / snying rje dang ldan pa nyid de/ gang gis re zhig byang chub sems dpa'i tshul khrims kyi sdom pa yang dag par mnod pa lhag par mos pa byang chub sems dpa'i sde snod kyi ma mo la sogs pa la skur pa mi 'debs shing dad pa dang ldan pa dang / bslab pa rnams la gus shing 'jug pa la rtog pa dang rang bzhin gyis 'dod pa chung ba dang / chog shes pa dang / zang zing ltar len pa ma yin pa dang / snying rje dang ldan par gyur pa dang / skyo ba med pa dang / pha rol gyi nyes pa bzod pa dang / khro ba med pa dang / khon du 'dzin pa med pa zhes bya'o/ /sbyor ba phun sum tshogs pa ni dge ba'i chos rnams kyi phyir rab tu spel ba dang / gus shing rab du 'jug pa dang / ci nas kyang 'di la bslab pa'i gzhi gang yang rung ba rnams rtogs par bya ba la yang rmongs par mi 'gyur ba dang / spro ba dang bcas pa yin zhing snyom las mi byed pa dang / 'dod pa'i bde ba dang / 'du 'dzi la mngon par mi dga' ba dang / sems rnam par ma g.yengs pa'o/ /nus pa dang ldan pa yin yang / thams cad las mnod par bya ba ma yin pas/ bla ma zhes bya ba smos te/ bla mar bya ba'i gnas su gyur pa nyid las mnod par bya'i gzhan las ni ma yin te/ mnyam pa nyid kyis bla mar mi 'dzin pas 'di de'i rjes su slob pa'i tshul can du mi 'gyur te/ des byas pa rnams la gus pa chen por mi byed pa'i phyir ro/ /de la sdom la gnas zhes bya ba 'dis ni 'di'i tshul khrims phun sum tshogs pa bstan te/ mkhas zhes bya bas ni mkhas shing byang ba'o/ /nus dang ldan zhes bya bas ni yon tan phun sum tshogs pa ste/ gsum po de dag gi khyad par rtogs par byed pa nyid do/ /bla ma zhes bya ba ni rten 'dzin pa nyid do/ /'di gnyis la rjes su bslabs pa nyid gang yin pa de'i rjes su slob pa ni dge ba'i chos rnams kun du 'phel bar 'gyur ro zhes bya ba ni 'dir 'di'i bsdus pa'i don to/ /de la byang chub sems dpa' khyim pa'am/ rab tu byung ba byang chub sems dpa'i tshul khrims kyi sdom pa yang dag par blang bar 'dod cing / ji skad bstan pa'i tshul khrims kyi phung po rnam pa gsum po la slob par 'dod pas thog mar re zhig 'di lta bu'i gang zag dam pa nges par brtags te/ rkang pa gnyis la phyag byas nas 'di skad ces gsol ba gdab par bya ste/ bdag rigs kyi bu khyod las byang chub sems dpa'i tshul khrims kyi sdom pa yang dag par blang ba mnod par 'tshal lo zhes lan gsum brjod par bya'o/ /de ltar gsol ba btab nas 'di snod du 'gyur ba brtag pa'i phyir 'di la byang chub sems dpa'i bslab pa'i gzhi nyan du gzhug par bya zhing khyod 'di la bslab par spro 'am zhes brjod par bya'o/ /de skad ces smra ba na gal te rab tu spro'o zhes bya ba'i tshig smra zhing gdong dang mig 'gyur ba dag gis nyin zhag dag 'da' bar byed na/ de ltar na gang gis 'di don du gnyer ba yin gyi/ pha rol gyis yang dag par 'dzin du bcug pa'i phyir yang ma yin pha rol dang 'gran pa'i phyir yang ma yin na/ lhag par gnas par bya'o/ /de nas cho ga 'dis nus pa ci yod pas mchod pa byas la/ bla gos phrag pa gcig la gzar te/ sangs rgyas bcom ldan 'das rnams dang / byang chub sems dpa' sa chen po la zhugs pa rnams la lhag pa'i bsam pas phyag btsal ba byas nas de dag gi yon tan rnams mngon sum du byas la/ de bzhin gshegs pa'i sku gzugs kyang legs par mchod par byas nas/ des yang 'di skad du byang chub sems dpa'i tshul khrims kyi sdom pa bdag la stsal du gsol zhes bya bas blang bar bya'o/ /de'i 'og tu 'dis khyod byang chub tu smon lam btab bam/ kho bo las byang chub sems dpa'i tshul khrims kyi bslab pa'i gzhi mnod par 'dod dam zhes bya bas khas len pa lan gsum du bcug nas/ sdig pa bshags pa dang / gsum la skyabs su 'gro ba dang / byang chub tu sems bskyed pa dang / bsod nams kyi tshogs yongs su bsngo ba rnams sngon du 'gro bas/ 'gro ba thams cad yongs su bzung zhing yongs su bskyab pa'i phyir/ tshogs bsags pa dang / theg pa chen po dang mthun par rjes su 'jug pa dag byed du bcug nas/ de bzhin gshegs pa'i sku gzugs de nyid kyi spyan sngar sangs rgyas dang byang chub sems dpa' rnams la phyag byas nas/ 'dis bdag las byang chub sems dpa'i tshul khrims kyi sdom pa yang dag par blangs par bgyis lags so zhes mkhyen par gsol bar bya'o/ /phyag 'tshal yang dag gsol gdab dang / /smon lam dag dang blangs pa ni/ /bdag gir bya dang sdig bshags pa/ /byas nas gsum la skyabs 'gro dang / /byang chub sems ni yang dag bskyod/ /dge ba de yi yongs bsngo dang / sangs rgyas sras dang bcas rnams la/ /gus pas mkhyen par gsol ba'o/ /zhes bya ba ni bsdu ba'i tshigs su bcad pa'o/ /yang dag par blangs pa de yang ma dad pa dang / sdang ba rnams la khrom du bsgrag par mi bya ste/ gang gi phyir mi shes pa'i sgrib pa chen po thams cad dang / phyogs gcig gis bsgribs pas mi mos par 'gyur ro/ /phyi rol las yang dag par blang bar bstan pa bzhin du bdag nyid kyis yang dag par blang bar yang gsungs te/ gal te yon tan de dag dang ldan pa'i gang zag med par gyur na de'i tshe byang chub sems dpas de bzhin gshegs pa'i sku gzugs kyi spyan sngar rang nyid kyis kyang byang chub sems dpa' tshul khrims kyi sdom pa yang dag par blang bar bya ba yin gyi/ sdom pa gzhan zhig tu pha rol kho na las yang dag par blang pa ni ma yin no/ /de ltar so sor thar pa'i sdom pa gzhan dang gzhan dag la gnas pa las lhag par 'dod cing / dang du len pa la 'jug pa byang chub sems dpa'i tshul khrims kyi sdom pa yang dag par blang ba'i cho ga la mkhas pas rang nyid kyis byang chub sems dpa'i tshul khrims kyi sdom pa yang dag par blang bar bya ba'o/ /de las gzhan pa nyams par 'gyur ba las slar gso bar byed pa dang / ma gus pas sdom pa len pa dag ni snod ma yin pa'i phyir de lta ma yin te/ sngar ji skad bshad pa bzhin du'o/ /tshul khrims 'di dang ldan 'gyur na/ /rnam dag rnam par dben gnas pa/ /des ni bla ma med gyur na/ /rang nyid kyis kyang blang ba yin/ /zhes bya ba ni bsdu ba'i tshigs su bcad pa'o/ /sdom pa yang dag par blang ba'i las yongs su rdzogs pa 'di la sangs rgyas dang byang chub sems dpa' rnams kyi dge ba'i thugs kyis bsod nams mngon par spel ba'i phyir rtag par 'di la dgongs par mdzad do/ /gang yang 'di'i dge ba'i chos rnams 'phel ba nyid yin te nyams par mi 'gyur ba mthong nas de'i tshe zhes bya ba la sogs pa smos te/ de tshe ste yang dag par blang ba rdzogs pa'i dus su dus de las brtsams te/ dge ba'i thugs rnams kyis dge bar 'gyur ba kho na'i phyir 'di la dgongs par mdzad ces bya bar sbyar ro/ /rtag par zhes bya ba ni nus pa dang ldan zhing dge ba mtshungs pa rnams kyis byang chub la thug gi bar du rgyun mi 'chad par zhes bya ba'i don to/ /dus de'i tshe bdag dang gzhan la phan pa la gus pa dang ldan pa yin pa'i phyir de lta bu'i bya ba de ni deng du bdag cag gi bya ba 'bras bu dang bcas pa'o zhes rab tu dga' ba'i sems rnams kyis 'di nyid la dge ba'i phyir te dge ba'i chos rnams mngon par 'phel ba'i phyir dgongs par mdzad pa ste/ de ni rjes su gzung bar bya ba yin pa'i phyir slar yang de lta bu'i nyam thag par lhung bar ma gyur cig ces pas bu sdug pa dang 'dra bar spyan ras kyis 'tsho bar mdzad pa'o/ /dper na pha ma'i bsam pa dang mthun par spyod cing yid du 'ong ba'i bu la 'di la gang du yang yid du mi 'ong ba 'byung bar ma gyur cig ces phan pa dang bde ba'i ched du rtag tu 'tsho bar byed pa bzhin du byams pa'i thugs kyis gzigs par mdzad pa'i yul tsam du mngon par dgongs pa'o/ /des na 'di la bu sdug nyid du ston pa ni cung zad kyang med do/ /gang de ltar snying rjes 'gro ba thams cad yongs su bskyab par dam bca' ba byas pas bdag dang gzhan dag la ji ltar bsgrub par bya zhe na/ phan pa dang zhes bya ba la sogs pa smos te/ phan pa ni nyon mongs pa can ma yin pa dang / kha na ma tho ba med pa'i phyir phyi ma la rnam par smin pa bde ba'o/ /bde ba ni phan 'dogs par byed pa nyid du rig par bya'o/ /gnyis po 'di dag bdag nyid dang gzhan rnams la yang bya ba ste/ 'di gnyis kyis thams cad bsdus pa'i phyir ro/ /sdug bsngal ni nye bar 'joms par byed par rig par bya'o/ /de nyid kyang phan pa ste/ phyi mar bde bar 'gyur ba yin na bya dgos te/ sman tsha ba bzhin du mi phan pa ma yin no/ /gang zhig gang la phan par byed pa de ni 'di la don dam pa nyid kyis bde ba nyid du byed pa yin te/ phan pa ni bde ba'i rgyu yin pa'i phyir ro/ /gang mi phan pa ste phyi ma la rnam par smin pa sdug bsngal bar 'gyur ba ni sman ma yin pa bzhin du nyon mongs pa can yin pa dang / kha na ma tho ba dang bcas pa'i phyir mi phan pa yin pas bde ba yin yang mi bya ste/ de ni phan pa dang bde ba cung zad kyang yod pa ma yin no/ /sdug bsngal ba yin yang rang bzhin gyis rjes su mthun pa ste/ bza' ba dang btung ba mi zhim pa lta bur phan pa yang yin no/ /bde ba yin yang cung zad mi phan pa yin la phan pa yang yin te/ sman ma yin pa dang / rang bzhin gyis mthun pa'i bza' ba dang btung ba bzhin no/ /de'i phyir bdag dang gzhan la phan par 'dod pas 'dod pa rnams sdug bsngal ba yin yang so sor brtags nas phan pa nyid yin na bya'o/ /bde ba yin zhing mi phan pa yang ma yin na yang ngo / /yang gang zhig phan pa yang yin zhing bde ba dang sdug bsngal ba yang yin la mi phan pa yang ma yin pa de la ni brjod du yang ci yod/ 'di ni re zhig 'di mdor bsdus pa'i bya ba'o/ /yang 'di'i ltung ba dang nyams pa gang yin zhe na/ ltung ba'i lus ni gnyis te/ pham pa'i gnas lta bu'i chos gang kun du spyad pa las 'di sdom pa gtong zhing byang chub sems dpa' ma yin par 'gyur ba dang / nyes par spyad pa'i ltung ba byung ba ste/ gang gis ltung ba dang bcas par gyur pa'o/ /'dir yang ltung ba kha cig gzhan la bshags par bya ba ste/ zag pa 'bring ni gsum la bshags/ /gcig gi mdun du lhag ma rnams/ /zhes 'chad par 'gyur ba'o/ /kha cig ni rang nyid legs par sdom pa ste/ /nyon mongs mi spong bdag sems bzhin/ / zhes 'chad par 'gyur ba'o/ /ltung ba de rnams ni byang chub sems dpa'i sde snod kyi ma mo rnams su ji ltar nyams par 'gyur ba rgyu dang bcas par bca' ba mdzad pa rnams so/ /de la pham pa'i gnas lta bu'i las bstan par 'dod nas/ ming dang des pa'i tshig dang ldang ba rnams bstan pa'i phyir/ nyon mongs drag las zhes bya ba la sogs pa smos te/ byang chub sems dpa'i sdom pa thob par gyur pa 'di nyid kyi nyes pa bzhi po nyid ni pham pa 'dra bar dgongs pa yin te/ gang de rnams ni sdom pa 'jig par byed pa'o/ /pha rol rgyal nas 'di dag gis sdom pa las yongs su nyams par 'gyur ba'i phyir phas pham pa'o zhes bya ba ni nges pa'i tshig go/ /sdom pa nyams pa'i rgyu tsam du mtshungs par phas pham pa dang 'dra ba yin gyi/ thams cad du dge slong gi bzhin du ni ma yin te/ 'di ltar dge slong la phas pham pa'i ltung ba byung ba ni dge slong ma yin par 'gyur zhing dge sbyong ma yin la/ tshe 'di la slar yang dge slong gi dngos por 'gyur ba'i skal ba med do/ /byang chub sems dpa' ni de lta bu ma yin te/ 'di ni sdom pa gtong ba 'ba' zhig tsam mo/ /tshe 'di nyid la slar yang sdom pa yang dag par len pa'i skal ba dang ldan pa yin te/ sdom pa slar yang blang bar bya/ /zhes 'chad par 'gyur ba'o/ /yang sdom pa 'jig par byed par 'gyur ba de rnams ji lta bu zhe na/ nyon mongs drag las byung ba zhes bya ba la sogs pa smos te/ nyon mongs pa drag po las byung ba yin zhing skyes pa gang dag yin pa de rnams ni de lta bu ste/ gang nyon mongs pa shas chen po mngon du rgyu ba'i gnas las de rnams 'byung bar gyur pa de'i tshe sdom pa nyams par 'gyur zhing phas pham pa nyid byung bar gyur pa yin gyi gzhan du ma yin no/ /byang chub sems dpa' la 'di dag las gang yang rung ba zhig byung na yang tshe 'di nyid la slar yang byang chub sems dpa'i tshogs rgya chen po stsogs pa dang / yongs su 'dzin pa'i skal ba med par 'gyur na thams cad byas na lta smos kyang ci dgos/ tshe 'di nyid la bsam pa rnam par dag pa'i skal ba med de/ 'di ni byang chub sems dpa' ltar bcos pa yin gyi yang dag pa'i byang chub sems dpa' ni ma yin no/ /nyon mongs drag po ni zag pa rnams phyir zhing rgyun mi chad par kun du spyod kyang gang 'di ngo tsha shes pa dang / khrel yod pa chung ngu tsam yang mi skyed pa dang / de mgu bar byed cing de la dga' ba dang / de nyid la yon tan du lta ba can du gyur pa dang / gsol ba btab kyang mi ldog cing bsam pas mi gtong ba'o/ /gang gi tshe slar ngo tsha dang khrel yod pa chung ngu tsam skye ba dang / pha rol gyis gsol ba btab pas ldog pa de ni 'bring la gnas pa'o/ /gang gi tshe yang myur ba nyid du ngo tsha bar byed cing rang nyid kyang rung ste/ skad cig gis ldog pa de ni chung ngu la gnas par rig par bya'o/ /de la kun nas dkris pa chen pos spyad pa nyid kyis ni sdom pa yang dag par blangs pa'i byang chub sems dpa' nyid pham pa byung bar gyur pa yin te/ nyes pa'i gnas su gyur pa yin pas dbyung bar bya zhes bya ba'i don to/ /gang yang sdom pa ma blangs pa dang / sdom pa phul ba de ni byang chub sems dpa' ma yin pa'i phyir de la ni cho ga 'di med do/ /sdom pa phul ba yang dge slong gis bslab pa phul ba lta bur rig par bya'o/ /gang gis byang chub kyi sems ma btang zhing pham pa'i gnas lta bu'i chos rnams kyang ma byung la brjed ngas par yang ma gyur pa de ni 'dul bar yongs su ma btang bar sdom pa dran pas tshe brjes kyang sdom pa de ni rjes su 'brang bar rig par bya'o/ /de nyid kyi phyir 'di la ji srid 'tsho ba'i bar du zhes dus yongs su gcod par byed pa ni ma yin no/ /dran pa brjed kyang sngon goms pa'i dbang dang / dge ba'i bshes gnyen dam pa dang phrad pa'am/ byang chub sems pa'i yon tan thos pas mos pa yang dag par skyed par 'gyur gyi/ mi len par bde bar 'dug pa ni ma yin gyi/ gzhan du na yang dag par blangs pa la mngon par phyogs pa yin yang rung / ma yin yang rung / gang gis sdom pa'i rgyun gyis rjes su bcings pa'i phyir tshul khrims rnam par dag pa'i ched du 'bad pas yang dag par len par byed do/ / 'o na 'dir ni gang de ltar pham par 'gyur ba'i ltung ba bzhi kho nar bstan la/ 'phags pa nam mkha'i snying po'i mdo las ni pham par 'gyur ba'i ltung ba gzhan mang du yang gsungs pa ji ltar yin zhe na/ smras pa/ bden mod kyi de ni sdom pa blangs pa sdom pa 'jig pa'i rgyu ni ma yin no/ /de lta mod kyi sdom pa ma blangs pa'i sngon bskrun pa'i dge ba'i rtsa ba lha dang mi'i bde ba phun sum tshogs pa rnam par gcod pa'i rgyu yin te/ gang de nyid las rigs kyi bu rgyal rigs spyi bo nas dbang bskur ba'i rtsa ba'i ltung ba ni lnga ste/ rtsa ba'i ltung ba de dang ldan na rgyal rigs spyi bo nas dbang bskur ba'i sngon bskrun pa'i dge ba'i rtsa ba thams cad 'jig par byed cing lha dang mi'i bde ba rnams las 'pham par 'gyur/ ngan song du 'gro bar 'gyur ro zhes rgya cher gsungs so/ /de la rtsa ba'i ltung ba ches lci ba rnams ni 'jig par byed/ 'tshe bar byed/ med par byed ces bya ba'i bar du'o/ /thal bar brlag nas zhes bya ba ni rnam par 'tshe bar byas nas zhes bya ba'i tha tshig go/ /pham par 'gyur ba ni yongs su nyams pa'o/ /gal te sdom pa blangs pa 'di la ltung ba 'di rnams sdom pa 'jig pa'i rgyu nyid yin pas yang pham pa yin no zhes dgongs pa yin na ni/ de'i tshe sdom pa la gnas pa'i rigs kyi bu byang chub sems dpa' 'di la yang pham par 'gyur ba'i ltung ba gang yin pa 'di rnams las gang yang rung ba'i ltung ba gcig byung bas sdom pa gtong bar 'gyur ba yin na/ thams cad kyis lta ci smos zhes bya ba rgyu dang bcas par byang chub sems dpa'i sde snod las gsungs par 'gyur ba zhig na/ ma gsungs pa dang gang gi phyir rgyal rigs la sogs pa'i sdom pa blangs pa nyid kyis gang du ma nyid yod pa'i dbye bas ltung ba ston par byed pa yin na ni de legs na/ rgyal rigs la sogs pa'i dbye bas ltung ba bstan pa cung zad kyang med pas 'di la 'gal ba ci zhig yod/ yang pham par 'gyur ba'i ltung ba de rnams gang yin zhe na/ rnyed dang zhes bya ba la sogs pa smos pa la/ rnyed par byed pas na rnyed pa ste/ gos dang zas la sogs pa'o/ / bkur sti ni legs par rim gro byed pa ste/ de dag la chags pa ni de la lhag par zhen pa'o/ /bdag ni rang nyid do/ /bstod pa ni yang dag pa dang / yang dag pa ma yin pa'i yon tan gyis stod par byed pa ste/ log par bstod cing gzhan yon tan dang ldan pa dang / yon tan dang ldan par grags pa rnams la yang smod pa ste/ skyon rnams brjod cing smod pa'o/ /'di skad du yon tan dang ldan par grags pa ni bdag ste/ 'gro ba rnams bdag la rjed par byed bkur sti byed do/ /gtong ba dang yongs su gtong ba dag gis mchod par byed ces bya ba'i bar du'o/ /bdag la stod par byed cing gzhan la smod par yang byed pas bdag la bstod cing gzhan la smod par byed pa ni sdom pa'i tshul khrims las da ltar ba'i rnyed pa dang bkur sti la ma chags pa las nyams pa'i phyir byang chub sems dpa'i pham pa'i gnas lta bu'i chos so/ /byang chub sems dpa' rnyed pa dang bkur sti dag la shin tu chags pas bdag la stod par byed cing gzhan la smod par byed pa ni pham par 'gyur ba'i ltung ba 'byung ba yin no/ /byang chub sems dpar gyur pa ni bdag nyid kyis thob pa'i rnyed pa yang gzhan rnams la sbyin par byed cing / gsang ba'i chos rnams kyang gzhan la ston par byed pa yin na/ de ji ltar chags pa skye bar 'gyur/ des na rgyu des bdag la bstod pa dang gzhan la smod pa zhes bya ba ni byang chub sems dpa'i chos ma yin pa lta smos kyang ci dgos/ bstan pa gnas par 'dod pa'i phyir mu stegs can rnams zil gyis mnan par 'dod pa dang / thabs des 'dul bar byed 'dod cing mi dge ba'i gnas nas bslang ste dge ba'i gnas su 'jog par 'dod pa dang / ma dad pa rnams dad par bya ba dang / dad pa rnams phyir zhing 'byung bar bya ba'i phyir byed na nyes pa med do/ /don 'di nyid la dgongs nas/ snying rjer ldan zhing byams phyir dang / /sems dge ba la nyes pa med/ /ces mthar 'chad par 'gyur ro/ /sdug bsngal mgon med ces bya ba la sogs pa la sdug bsngal ba dang / phongs pa dang / mgon med pa dang / skyabs med pa la nor 'dod pa dang / chos 'dod pas legs par slong zhing 'ongs pa rnams la sbyin par bya ba'i dngos po yod cing bdog bzhin pa dang / chos la nges pa thob kyang rang bzhin gyis ser sna dang ldan pas gzhan nye bar 'byor pa la mi bzod pa nyid kyis non te zang zing dang chos kyi sbyin pa la sogs pa sbyin par 'os pa rnams la mi ster ba ste/ mi gtong ba ni dge ba'i chos sdud pa dang / sems can gyi don bya ba'i tshul khrims dag gis sbyin pa'i pha rol tu phyin pa sgrub pa las nyams pa'i phyir pham pa'i gnas lta bu'i chos gnyis pa'o/ /byang chub sems dpa'i sbyin par bya ba'i dngos po yod pa dang / chos rnams nges pa yin yang legs par don du gnyer zhing 'ongs pa rnams la ser sna chen pos zil gyis non pas nor dang chos mi ster ba ni pham par 'gyur ba'i ltung ba byung ba'o/ /byang chub sems dpar gyur pa ni gang gis gzhan bongs shing mngon par 'dod pa dag nye bar rig nas slong bar mi byed kyang bdag nyid kyis pha rol dag nor len du gzhug par byed cing kun du bskul bas kyang chos nyan du gzhug par byed pa yin no/ /de ci ltar dgos pa yod cing chos kyi nges pa yod kyang ser snas kun du bcings pas legs par don du gnyer zhing 'ongs pa rnams la slong bar byed na mi ster ba 'di ni byang chub sems dpa'i chos ma yin no/ /longs spyod de dag med pas ma byin pa dang / dge 'dun gyi nang khrims srung bar 'dod pa dang / thabs nges 'dul bar byed 'dod cing / mi dge ba'i gnas nas bslang ste dge ba'i gnas su 'jog par byed pa dang / mi phan zhing ma brtags pa dang / mi phan zhing ma bslang ba dang / de rgyal po la gnod pa yin na nyes pa med do/ /mu stegs can glags tshol ba dang / ma gus shing zhes med pa dang spyod lam ngan pas gnod pa dang / chos mi len pa dang / dbang po rtul po chos rgya chen po bstan na skrag cing log par lta ba dang / log par mngon par zhen pa dang / de'i 'og tu song na gzhan snod du ma gyur pa rnams la chos 'phel ba nyams pa dang / gnod par 'gyur du dogs pa dang / bdag nyid smra mi nus par gyur cing stobs dang mi ldan pa dang / de yang chos 'di la mi 'jug pa la thabs des 'dul bar 'gyur 'dod na lhung ba med do/ /gzhan gyis zhes bya ba la sogs pa la khong khro ba'i kun nas dkris pas srog chags gzhan la 'tshog pa ste/ lag pa'am/ bong ba'am/ dbyig pa dag gis rdeg par byed/ rnam par 'tshe bar byed rnam par tho 'tshams par byed la/ khro ba'i bsam pa kho na zhe la bzung ste/ gzhan gnod par byed pa rnams kyis bshags kyang ste shad kyis sbyangs kyang mi nyan cing bzod par mi byed la bsam pas mi gtong ba ni sdom pa'i tshul khrims dang / dge ba'i chos sdud pa'i tshul khrims dag la gzhan gyis nyes pa bzod par byed pa las nyams pa'i phyir pham pa'i gnas lta bu'i chos gsum pa'o/ /byang chub sems dpa' khro ba drag pos zil gyis non pas pha rol gyis legs par bshags shing shad kyis sbyangs kyang mi nyan cing mi bzod la rdeg par byed pa ni pham par 'gyur ba'i ltung ba 'byung ba'o/ /byang chub sems dpar gyur pa ni gang gis pha rol gyi nyes par spyad pa shin tu drag cing mched par 'gyur la/ mang du bya ba la yang bzod par bya zhing / rnyed pa'i gnas dang bral bar ri mor bya ba'i sems kyis rab tu dga' ba bskyed par bya ba yin na/ 'di na de tsam gyis nyes par spyod pa la yang ci'i phyir de lta bu khro ba yang ji ltar dang du len par byed/ gang gi phyir tshig rtsub mo mngon par brjod cing rdeg par byed la ngo tsha med pa'i sems kyis rang nyid ldog par yang mi byed do/ /shad kyis sbyang ba byas kyang bag la nyal lam 'ching bar bzod par mi byed pa 'di ni byang chub sems dpa'i chos ma yin no/ /thabs des 'dul bar 'dod na zhes bya ba la sogs pa rnams ni snga ma bzhin du nyes pa med pa yin no/ /theg pa chen po zhes bya ba la sogs pa la theg pa chen po ni byang chub sems dpa'i sde snod kyi ma mo la sogs pa'o/ /spong byed ni skur ba 'debs pa'o/ /dam chos 'drar snang ni de'i gzugs brnyan gyi chos la gzhan gyi g.yam la yang rung ste/ ston pa dang 'jog pa ni dge ba'i chos sdud pa'i tshul khrims kyis bsdus pa'i rnam par dag pa'i tshul khrims kyi lta ba ngan pa spong ba la sogs pa'i phyir pham pa'i gnas lta bu'i chos bzhi pa'o/ /byang chub sems dpa' ni dbang po rnon po'i lta ba drag po la kun du gnas pas theg po chen po spong zhing skur pa btab nas ni de'i gzugs brnyan gyi chos ston par byed pa ni pham par 'gyur ba'i ltung ba 'byung ba'o/ /byang chub sems dpar gyur ba ni gang gi nus pa ji lta bas theg pa chen po 'di nyid sems can gyi tshogs rgya chen po la phan pa dang bde ba'i thabs yin pa'i phyir nus pa ji lta bas bsten par bya zhing rab tu bstan par bya ba yin la/ 'di ji ltar rmongs pa'i lo ma gcod pa bzhin du skur ba 'debs pa la 'jug par byed ces bya ba 'di ni byang chub sems dpa'i chos ma yin no/ /gang yang byang chub sems dpa' 'di bslang ba'i gzhi rnams la ma byang ba'am/ dran pa med pa dang / 'khrul pa'am/ gus pa med pas pham pa'i gnas lta bu'i chos gang yang rung ba zhig byung na yang byang chub sems dpa' ma yin par 'gyur bas/ gal te slar yang len par 'dod pa na des ji ltar bsgrub par bya zhe na/ sdom pa zhes bya ba la sogs pa smos pa la pham pa byung ba zhes bya ba lhag ma ste/ gzhan gyi dbang du byas nas bstan pa ma yin pa'i phyir ro/ /pham pa byung ba'i byang chub sems dpas tshe 'di nyid la slar yang sdom pa blang bar bya ste/ bcas pa tshad mar gyur pas snod du rung ba'i phyir ro/ /dge slong bzhin du yang blang bar bya ba ni ma yin no/ /ji skad du de yang kun nas dkris pa chen pos pham pa'i gnas lta bu'i chos byung bar gyur na des btang ba'i sdom pa slar yang blang bar bya zhes gsungs pa lta bu'o/ /'o na gang kun nas dkris pa chen pos blang ba'i chos dag gis ni sdom pa gtong ba yin na/ gal te chos 'di dag kun nas dkris pa nus la 'bring gis bskyed pa yin na/ de gsol ba la 'dis ji ltar bsgrub par bya zhe na/ zag pa 'bring ni zhes bya ba la stsogs pa smos te/ zag pa 'bring ni bdag la bstod pa la sogs pa'i rgyur gyur pa gang yin pa'i nyon mongs pa nyid de/ kun nas dkris pa 'bring gis bskyed pa zhes bya ba'i don to/ /bshags pa ni bshags par bya ba ste/ nyes byas su kun du bsdus pa nyid yin gyi/ stobs chung ba'i phyir nyams par byed pa ni ma yin no/ /ltung ba de dag ni gsum ste/ gang zag gsum/ nyan thos kyi theg pa'am/ theg pa chen po'am/ longs spyod pa'i gang zag gsum po rnams te/ gang zag tshig de brda phrad cing 'dzin nus pa rnams la bshags par bya ba yin gyi/ bcas pa tshad ma yin pa'i phyir gnyis sam gcig gi mdun du ni ma yin no/ /de yang de rnams la thal mo sbyar te bya ba/ byas la dma' ba'i phyogs su tsog tsog por 'dug ste thal mo sbyar nas thog mar dngos po brjod de/ 'di skad ces/ tshe dang ldan pa rnams dgongs su gsol/ bdag ming 'di zhes bya ba la ji skad yongs su brjod pa'i gzhi las byang chub sems dpa'i 'dul ba dang 'gol ba'i nyes byas kyi nongs pa byung ste/ de dag tshe dang ldan pa rnams kyi mdun du bdag mthol lo 'chags so/ /mi 'chab bo/ /mthol zhing bshags na bdag bde ba la reg par gnas par 'gyur gyi/ ma mthol ma bshags na ni bde ba la reg par gnas par mi 'gyur ro/ /de rnams kyis de la 'di skad du tshe dang ldan pa khyed kyis ltung ba 'di la ltung bar mthong ngam zhes smra na/ des mthong ngo zhes smra bar bya'o/ /de rnams kyis kyang phyin chad sdom par byed dam zhes smra bar bya'o/ /des kyang shes shing mthong la dran na chos bzhin 'dul ba bzhin du shin tu legs par spyi bos nad par bgyi'o zhes smra bar bya'o/ /de ltar lan gsum du bya'o/ /kun nas dkris pa chung ngus bskyed pa'i ltung ba de rnams yang ji ltar bsgrub par bya zhe na/ gcig gi mdun du lhag ma rnams zhes bya ba smos so/ /lhag ma ni zag pa 'bring gis bskyed pa'i ltung ba dag las gzhan pa de rnams nyid de/ zag pa chung ngu'i ltung ba rnams ji skad du bshad pa'i gang zag gcig gi mdun du ste/ gan du bshags par bya ba yin te/ gsum po kho na la bshags pa yang ma yin la/ bdag nyid kyis bsdam par bya ba yang ma yin no/ / 'o na nyes byas kyi ltung ba las gzhan gang yin pa de rnams ji ltar bsgrub par bya zhe na/ nyon mongs zhes bya ba la sogs pa smos te/ 'dir bdag sems la zhes bya ba'i tshig tu yang blta bar bya ste/ 'chad par 'gyur ba'i nyon mongs pa can dang nyon mongs pa ma yin pa'i nyes byas kyi ltung ba de rnams nyid bdag gi sems kyi mdun du yang bshags par bya ste/ 'di ni 'dir sdig pa can ma yin pa'i sgra'i don to/ /de ltar bsgrub pa'i gang zag med na nyon mongs pa can dang / nyon mongs pa can ma yin pa nyid kyi chos byung ba na bsham pa thag pa nas phyis yang kun du mi spyod pa'i sems bskyed par bya zhing / phyis yang 'di lta bu bdag gis mi bya'o zhes phyin chad sdom par yang byed do/ /don ni 'di yin te/ zag pa 'bring gi ltung ba rnams gang zag gsum nyid kyi mdun du bshags pas ldang bar 'gyur te/ gnyis dang gcig gi mdun ni ma yin no/ /zag pa chung ngu ni gcig gi mdun du yang bshags par bya'o/ /de bzhin du nyon mongs pa can dang / nyon mongs pa can ma yin pa nyid ni rang rang gi sems la bshags pa dang legs par bsdams pas kyang ldang bar 'gyur te/ 'di rnams bshags pa'i phyir ji ltar zag pa chung ngu dang / 'bring gi ltung ba rnams bzhin du gcig gam gsum nges par tshol ba ni ma yin no/ /yang gang zhig bdag sems bzhin zhes 'don pa ni byang chub sems dpa'i sde snod las ma gsungs pa'i phyir dang / bzhin zhes bya ba ni mi rigs pa'i phyir log par brjod pa nyid yin no/ /bzhin zhes bya ba yang mnyam pa'i don du rab tu grags shing brjod pa ma nges par bsgrub pa'i don sbyor ba'o/ /de la re zhig bdag gi sems la ltung ba las ldang ba'i cho ga ni rab tu nges pa ma yin te/ ji skad bstan pa'i gang zag nye ba na med na de'i 'og tu cho ga 'di bya ba'i phyir ro/ /de nyid kyi phyir pha rol la brten nas ltung ba las ldang ba'i cho ga ni rab tu ma nges pa ma yin no/ /gang gis ji ltar rang gi sems kyi mdun du bshags par bya ba de bzhin du gang zag gcig nyid kyi mdun du bshags par bya zhes bstan pa yin na ni legs na/ de'i cho ga ni sngar bstan to/ /de yang bdag sems bzhin zhes brjod pa 'di ni bcos mas log par bkod pa ste/ ltung ba las ldang ba'i cho ga gzhan bstan pa la zhugs pas yul nye bar spangs pas cho ga ma yin pa'i phyir ro/ /de nyid kyi phyir de ni pha rol la bshags pa nyid kyis ltung ba las ldang ba'i phyir zag pa 'bring dang chung ngu'i ltung ba rnams dang 'di tshul dang mthun pa ma yin no/ /byang chub sems dpa'i sde snod las kyang bzhin zhes bya ba ni ma gsungs te/ de las ni 'di skad du de yang kun nas dkris pa 'bring gis pham pa'i gnas lta bu'i chos 'byung bar gyur pas nges gang zag gsum mam de las lhag par yang rung ba'i mdun du bshags par bya'o/ /kun nas dkris pa chung ngus byas pa'i pham pa'i gnas lta bu'i chos ni gcig gi mdun du bshags par rig par bya'o/ /ltung ba gzhan rnams kyang gang gi mdun du bshags par bya ba'i rjes su mthun pa'i gang zag med na/ byang chub sems dpas bsam pa thag pa nas phyin chad mi byed pa'i sems bskyed par bya zhing phyis sdom par byed pa 'di ni de'i ltung ba rnams las ldang bar bstan par bya'o zhes gsungs so/ /de la gsum la zhes bstan pa ni nges par gzung ba dang bcas par blta bar bya ste/ gsum kho na yin gyi gnyis sam gcig gi mdun du ni ma yin te/ nyung ba nyid kyis tha mal ba la sogs pa bzhin du ltung ba las ldang ba'i las byas su zin kyang ma byas par 'gyur ro/ /de las lhag par yang rung ste zhes bya ba ni gsum las lhag pa ste bzhi la sogs pa'i mdun du ste/ lhag pa nyid kyis legs par byas pa'i phyir ro/ /gcig gi mdun du zhes bya ba 'di la yang gi sgreng blta bar bya ste/ bshags par bya zhes 'dir nges par gzung bar bya'o/ /'di'i don ni gcig gi mdun du yang ste/ gnyis la sogs pa 'ba' zhig la bshags par bya ba ni ma yin no/ /rang gi sems kyi sdom pa yang ltung ba gzhan rnams kyang zhes gsungs pa'i kyang gi sgra ni gcig gi mdun du bshags par rig par bya'o zhes bya ba 'di 'dren pa yin te/ thub pa'i bka' ni rim pa dang bral ba ma yin par blta bar bya'o/ /'o na bshags par rig par bya'o zhes bya ba yang zag pa chung ngu'i ltung ba dag las gzhan pa'i nyes byas kyi ltung ba rnams gcig gi mdun du bshags par rig par bya'o zhes bya ba ma yin nam zhe na ci 'di rnams bshags pa kho nar rig par bya ba ma yin par bstan pa'i phyir med na zhes bya ba la sogs pa gsungs te/ don ni 'di yin te/ ltung ba gzhan rnams ni bshags par yang bya zhes bya bar rig par bya la/ bshags pa'i gnas kyi gang zag med na phyis kyang lhag par mi spyod pa'i sems bskyed par rig par bya'o/ /gzhan du na gang zag gi grangs kyis kyang so sor bstan pa las don ci zhig yod/ gal te yang zag pa chung ngu'i ltung ba rnams kyang legs par sdom par 'gyur ba nyid du dgongs pa yin na ni de'i tshe kun nas dkris pa chung ngus byas pa'i pham pa'i gnas lta bu'i chos zhes logs shig tu bstan pa la don med do/ /de ltar yang zag pa 'bring gi ltung ba rnams ni bshags par bya ba nyid du bstan la/ gzhan rnams kyang khyad par med pa yin pas bshags pa dang / legs par sdom pa zhes bstan pa yang mi rigs par 'gyur ro/ /gal te zag pa 'bring yang bsdams par gyur na de'i tshe gsum mam/ de las lhag pa'i gang zag gi grangs dgos pa med par 'gyur ro/ /de'i phyir bshags par bstan pa nyid du grub bo/ /gang zag med na yid kyis bsdam par bya dgos pa yin pa'i phyir 'dir gcig la bshags pa'am/ du ma la bshags pa'ang rung ste/ 'di la nges pa med par 'gyur ro/ /de ltar na gang zag gi grangs ni rigs pa yin no/ /gal te de las nyung ba'i bshags par bya ba'i ltung ba rnams kyang ma byung ba de ltar na rang gi sems kyis bsdams pa'i go skabs yod par ga la 'gyur/ de'i phyir ji skad bstan pa nyid ni rigs pa yin no/ /de lta bu nyid du mthong nas mdo mdzad pas/ zag pa 'bring ni gsum la bshags/ /gcig gi mdun du lhag ma rnams/ /nyon mongs mi mongs bdag sems la/ /zhes mdo gsum po so sor bstan pa yin no/ /gzhan du na bdag nyid chen po thugs rje chen po dang ldan pa blo gros rnam par dag pas de ji srid kun du rmongs pa'am/ tshig la mi mkhas pas de lta bu'i don bstan pa yin te/ shin tu spros pas chog go/ /des na nyon mongs pa can dang nyon mongs pa can ma yin pa zhes bya ba'i ltung ba 'di gang yin zhe na/ chags pa dang / kun nas mnar sems dang / khong khro ba dang / phrag dog dang / nga rgyal dang ma dad pa dang / ma gus pa la sogs pa rnams kyi nyon mongs pa can gyi sems pas kun nas bslang ba'i ltung ba ni nyon mongs pa yin no/ /le lo dang / snyom las dang / bag med pa dang / brjed ngas pa la sogs pas byung ba ni nyon mongs pa can ma yin pa ste/ dkon mchog gsum la mchod pa las gzhan pa la ni nyon mongs pa can ma yin pa yin la/ 'di la snyom las dang le lo la sogs pa byed pa ni nyon mongs pa can du dgongs pa'o/ /de la kun nas mnar sems ni 'khrug pa'o/ /khong khro ba ni zhe sdang ngo / /le lo ni dge ba la mi spro ba'o/ /snyom las ni byed par mi 'dod pas lus dang sems snyom pa'o/ /chags pa khong khro nga rgyal sogs/ /nyon mongs ltung bar 'dir bstan te/ /le lo brjed ngas la sogs pa/ /mchod las gzhan du nyon mongs min/ /zhes bya ba ni bsdu ba'i tshigs su bcad pa'o/ /yang de las gzhan pa'i ldang ba'i cho ga rnam pa gnyis bstan pa'i ltung ba de rnams gang yin zhes 'dri ba la/ nyes byas kyi ltung ba bzhi bcu rtsa drug rgyu ji lta ba'i rim pas bstan par 'dod nas/ dkon mchog gsum zhes bya ba la sogs pa smos te/ dkon mchog gsum la zhes bya ba ni sangs rgyas dang / chos dang / dge 'dun te/ dkon mchog gsum po rnams la gsum ste/ lus dang ngag dang yid dag gis mchod par mi byed pa ni dge ba'i chos sdud pa'i tshul khrims kyis dus dus su rgya che ba'i rnam pa thams cad kyis dkon mchog gsum la mchod pa byed pa las nyams pa'i phyir byang chub sems dpa'i nyes byas kyi gnas lta bu'i chos so/ /byang chub sems dpa' ni sangs rgyas bcom ldan 'das kyi mchod rten dang / sku gzugs dang / don dam pa'i chos dang / byang chub sems dpa'i sde snod la sogs pa'i glegs bam dang / phyogs bcu'i phyir mi ldog pa'i byang chub sems dpa'i tshogs kyi dge 'dun gang yin pa la ci 'byor ba'i me tog la sogs pas mchod par bya ste/ tha na lus kyis phyag gcig tsam 'tshal ba dang / ngag gis de rnams kyi yon tan rnams las brtsams te tshig bzhi pa'i tshigs su bcad pa gcig tsam 'don pa dang / sems kyi yon tan rjes su dran pa sngon du 'gro ba'i dad pa gcig tsam yang ma byas par ma gus pa dang / snyom las dang le los nyin mtshan 'da' bar byed na nyon mongs pa can gyi nyes par 'gyur ro/ /bsam pa rnam par dag pa'i sar chud pas mchod pa'i mchog gis mchod par byed na nyes pa med do/ /'dod pa'i zhes bya ba la sogs pa la/ 'dod pa'i sems ni rnyed pa dang / bkur sti la 'chums pa dang / ma thob pa la chags pa'o/ /de'i rjes su 'jug pa ni rjes su 'brang ba ste/ sdom pa'i tshul khrims kyis shin du bsdams pa'i tshul khrims las rnyed pa dang bkur sti dang du mi len cing 'dod pa chung ba dang / chog shes pa las nyams pa'i phyir nyes byas kyi gnas lta bu'i chos so/ /byang chub sems dpa'i 'dod pa'i sems bskyed pa dang du len par byed na nyon mongs pa can gyi nyes par 'gyur ro/ /rang bzhin gyis nyon mongs pa can yin pa'i phyir 'dod pa'i sems la nyon mongs pa can ma yin pa'i nyes pa med do/ /spang bar 'dod kyang nyon mongs pa'i shas che ba'i phyir zil gyis mnan nas 'jug pa la nyes pa med do/ /rgan pa rnams la zhes bya ba la sogs pa la/ ches rgan pa la gus par mi byed pa ni sdom pa'i tshul khrims kyis shin du bsdams pa'i tshul khrims las spyod pa dag las nyams pa'i phyir nyes byas kyi gnas lta bu'i chos so/ /byang chub sems dpa'i ches rgan zhing yon tan dang ldan pa la bkur sti bya bar 'os pa'i chos dang mthun pa'i chos gang zag mthong na nga rgyal gyis sam/ khong khro ba la sogs pas gus par mi byed cing stan las mi ldang la stan mi stobs na nyon mongs pa can gyi nyes par 'gyur ro/ /le lo la sogs pa ni nyon mongs pa can ma yin pa'o/ /nad tshabs che bas nus pa chung ba dang / tha mal pa ma yin pa dang sems 'khrugs pa la nyes pa med do/ /dris pa zhes bya ba la sogs pa la/ /dris pa zhes bya ba ni nye bar mtshon pa ste/ kun du smra ba dang yang dag par dga' bar byed pa la blta bar bya'o/ /lan 'debs pa ni rjes su mthun pa'i lan mi 'debs pa'o/ /'di yang nye bar mtshon pa ste/ kun du smra bar mi byed pa dang / slar yang dag par dga' bar mi byed pa la yang blta bar bya ste/ sems can gyi don bya ba'i tshul khrims kyis gzhan gyi sems srung ba las nyams pa'i phyir lan mi 'debs pa la sogs pa'i nyes byas kyi gnas lta bu'i chos so/ /byang chub sems dpa' pha rol po dag 'dri ba dang / kun du smra ba dang / yang dag par dga' bar byed pa la nga rgyal la sogs pas yang dag par lan mi 'debs pa dang / kun du mi smra ba dang / yang dag par dga' bar mi byed pa ni nyon mongs pa can gyi nyes par 'gyur ro/ /le lo la sogs pa ni nyon mongs pa can ma yin pa'o/ /de gnyid kyis log pa las gzhan dag gis 'di sad par 'gyur ba'i 'du shes kyis 'dri ba dang / kun du smra ba dang / yang dag par dga' bar byed pa dang / chos ston pa dang / gzhan chos dang 'brel ba'i gtam ston pa la nyan pa dang / chos kyi gtam la mi dga' bar 'gyur ba dang / dge 'dun gyi nang khrims srung ba dang / gzhan ches mang ba rnams kyi sems rjes su srung ba dang / thabs des 'dul bar 'dod pa la ni nyes pa med do/ /mgron du bos zhes bya ba la sogs pa la mgron du bos pa bdag gir mi byed pa ni 'das ma thag pa'i lta bu'i yin pa'i phyir nyes byas kyi gnas lta bu'i chos so/ /byang chub sems dpa' gzhan gyi khyim dang gtsug lag khang ngam/ khyim dang gtsug lag khang gzhan du zas dang skom dang / gos la sogs pa rnams la nye bar bos pa las nga rgyal la sogs pas bdag gir mi byed pa ni nyon mongs pa can gyi nyes par 'gyur ro/ /le lo la sogs pa ni nyon mongs pa can ma yin pa'o/ /na ste mi nus pa dang / thabs des 'dul bar 'dod pa dang bsod snyoms pa yin pa dang / sngar gzhan la khas blangs pa dang / tho 'tshams pa'i bsam pas ma bos pa dang / yul thag ring ba dang / lam na 'jigs pa dang bcas pa dang / byang chub sems dpa' de don du gnyer ba ma yin te brdzun pa dang / rgyun ma chad par dge ba'i phyogs la brtson pa la rgyu des bar chad du 'gyur ba dang / sngon ma thos pa'i don dang ldan pa'i chos kyi don la sogs pa mnyan pa las nyams par 'gyur bar mthong ba dang / dge 'dun gyi nang khrims srung ba dang / gzhan gyi sems srung ba rnams la ni nyes pa med do/ /gser la sogs pa zhes bya ba la/ gser la sogs pa stobs pa na/ len par mi byed pa ni sems can gyi don bya ba'i tshul khrims kyi bsod nams kyi grogs su 'gro ba las nyams pa'i phyir nyes byas kyi gnas lta bu'i chos te/ yang dag par len pa ni grogs khyad par can yin pa'i phyir ro/ /byang chub sems dpa' pha rol gyi gser la sogs pa bstabs pa na nga rgyal la sogs pas len par mi byed na sems can yal bar 'dor ba'i phyir nyon mongs pa can gyi nyes par 'gyur ro/ /le lo la sogs pas ni nyon mongs pa can ma yin pa'o/ /de blangs pas bdag nyid chags par 'gyur bar mthong ba dang / sbyin pa 'khrul du dogs pa dang / 'gyod par 'gyur bar dogs pa dang / de dbul zhing phongs par 'gyur bar dogs pa dang / sbyin pa'i dngos po de dge 'dun nam mchod rten gyi yin du dogs pa dang / gzhan la mi rigs par 'phrog pa yin du dogs pa dang / rgyu des de la gnod par 'gyur ba zhig na nyes pa med do/ /chos 'dod pa la zhes bya ba la sogs pa la/ chos don du gnyer ba la sbyin par mi byed pa ni dge ba'i chos sdud pa dang / sems can gyi don bya ba dag gis sbyin pa'i pha rol tu phyin pa las nyams pa'i phyir nyes byas kyi gnas lta bu'i chos so/ /byang chub sems dpa' chos don du gnyer bas yang dag par nye bar gnas pa la khong khro ba dang / phrag dog la sogs pas ni chos sbyin par mi byed na nyon mongs pa can gyi nyes par 'gyur ro/ /le lo la sogs pas ni nyon mongs pa can ma yin pa'o/ /nyes pa med pa ni pham par 'gyur ba dang 'dra'o/ /gang yang pham par 'gyur ba'i phyogs de las nyes byas kyi ltung ba 'di dbye ste/ de ser snas kun nas bslang ba yin pa'i phyir ro/ /de bzhin du 'og ma rnams la yang nyon mongs pa de dang des dbye ba byas pas pham par 'gyur ba'i ltung ba'i phyogs rnams rjes su dran par bya'o/ /pham par 'gyur ba'i sgo nas mi 'dra bar bshad pa yin te/ rang bzhin shes par mi 'gyur ba dang / gzhan ma yin pa dang / ltung ba gsum pa mi 'grub pa'i phyir nyes byas kyi chos kyis bsdus par grub po/ /tshul khrims 'chal ba rnams zhes bya ba la sogs pa la tshul khrims 'chal ba rnams yal bar 'dor ba ni sdom pa'i tshul khrims kyi nges pa las nyams pa'i phyir nyes byas kyi gnas lta bu'i chos so/ /byang chub sems dpa' sems can tshul khrims 'chal zhing log par spyod pa rnams la kun nas mnar sems la sogs pas yal bar 'dor zhing tshul khrims 'chal ba nyid kyi rkyen gyis de rnams la khyad du gsod cing de rnams la phan pa dang bde ba la gnod par mi byed na/ nyon mongs pa can gyi nyes par 'gyur te/ snyom las la sogs pa ni nyon mongs pa can ma yin pa ste/ de rnams nyid la rjes su brtse bar 'gyur ba'i phyir ro/ /de rnams 'dul bar 'dod pa dang / dge 'dun gyi nang khrims srung ba dang / gzhan mang po dag gi sems bsrungs na nyes pa med do/ /pha rol zhes bya ba la sogs pa la nyan thos la sogs pa gzhan dag dad par bya ba'i phyir bslab pa bcas pa rnams la slob par mi byed pa ni dge ba chos sdud pa'i tshul khrims kyi pha rol tu phyin pa las nyams pa'i phyir nyes byas kyi gnas lta bu'i chos so/ /rab tu byung ba'i byang chub sems dpas gzhan ma dad pa rnams dad par bya ba dang / dad pa rnams phyir zhing dbyung bar bya ba'i phyir bcom ldan 'das kyis so sor thar pa'i 'dul ba las bcas pa'i kha na ma tho ba spang bar bya ba'i phyir bslab pa'i gzhi bcas pa de rnams la/ ma dad pa dang ma gus pas mi slob pa ni nyon mongs pa can gyi nyes par 'gyur ro/ /le lo la sogs pas ni nyon mongs pa can ma yin pa'o/ /de la chos gang dang gang la kun du spyod par byed pa de ni nyes par 'gyur te/ byang chub sems dpas ni gzhan rnams kyi las la ches lhag par bya ba yin pa dang / rab tu byung bar gyur pas ni rang gi bslab pa rnams nges par bsrung dgos pa'i phyir ro/ /gal te byang chub sems dpas ni nyan thos kyi bslab pa rnams la yang bslab par bya ba nyid yin pa de ltar na byang chub sems dpas ni don nyung ba dang bya ba nyung ba la goms par bya ba nyid du 'gyur ro zhe na/ bdag gi don lhur len pas ni goms par bya ba yin gyi/ gzhan gyi don lhur len pa'i phyir 'di ni de lta ma yin no zhes bstan pa'i phyir/ sems can don la zhes bya ba la sogs pa smos te/ gzhan gyi don lhur blang ba la bya ba chung ba ni sems can gyi don bya ba'i tshul khrims las nyams pa'i phyir nyes byas kyi gnas lta bu'i chos so/ /byang chub sems dpas sems can gyi don lhur len pa la khong khro ba la sogs pas don nyung zhing bya ba nyung la spro ba chung bas gnas par gyur na nyon mongs pa can gyi nyes par 'gyur ro/ /le lo la sogs pas ni nyon mongs pa can ma yin pa'o/ /de ltar na yang byang chub sems dpas gzhan gyi don du nye du ma yin pa'i bram ze dang khyim bdag rnams las gos brgya stong rnyed kyang btsal bar bya ste/ des kyang brtags nas ji tsam dgos pa blang bar bya'o/ /de bzhin du gzhan dag la yang bsgrub par bya'o/ /nyes par mi 'gyur ba ni yal bar dor ba dang mthun no/ /snying brtser bcas na zhes bya ba la sogs pa ni/ pha rol dang phyir slob mi byed/ /ces bya ba las dmigs kyis bsal ba'o/ /snying brtser bcas zhes bya ba ni snying rje dang ldan zhing rjes su brtse ba dang ldan pa ste/ de lta bu'i rang bzhin can gyi thabs la mkhas pas mi'i srog gcod pa dang / gzhan gyis bdag gir bye ba mkhyen par len pa dang / 'dod pa la spyod pa dang / brdzun du smra ba dang / mdza' bo dbye ba dang / tshig rtsub pas gshe ba dang / ngag 'khyal ba smra ba dang / de lta bu'i rang bzhin gyi kha na ma tho ba dang bcas pa'i las rnams kyang byang chub sems dpa' thabs la mkhas pa de la bu kun du spyad na nyes pa byas par mi 'gyur la nyes pa med par 'gyur zhing / bsod nams mang po yang 'phel bar 'gyur ba yin na/ bcas pa'i kha na ma tho ba dang bcas pa rnams lta ci smos/ de lta bas na rdzu 'phrul chen po dang ldan pa'i byang chub sems dpa' chen po rnams ni byis pa rnams rjes su bsrung ba'i phyir 'khrig pa'i chos kyang rab tu bsten par bya ba yin na gzhan rnams lta smos kyang ci dgos/ gang gi phyir byis pa rnams ni re zhig rang nyid kyi bag la nyal ba ma spangs shing / rgyun du tshul bzhin ma yin pa yid la byed pa dang ldan pas ji ltar 'dod pa'i yul yang len par byed de/ dman pa la ring mo zhes shin tu zhen pa'o/ /las 'di yang shin tu ring mo nas goms pa'i phyir rang gi ngang gis 'dod par 'gyur ba dang / shin tu yid la 'dod pa dang / myur du rkyen nye bar gnas pa la yang pha rol la snying brtse bas 'jug kyang nyes pa med do zhes bya'o/ /rtog pa las nye bar gnas pa'i sems su byas nas 'khrig pa kun du spyod pa ni ltung bar 'gyur zhing bar ma chod par dmyal bar 'gro bar 'gyur ba dang / 'dul bar 'os pa mang po yang bstan pa la mi dad par 'gyur ba dang / 'jig rten pa rnams kyang de'i gnas skabs kho na la gnas par 'gyur ba'i phyir rjes su 'jug par gzigs nas bdag nyid chen po yang 'khrig pa la brten pas sbyor bar mi mdzad do/ /de bzhin du mi'i srog gcod pa la sogs pa yang de rnams byed pa ma yin te/ de lta bu'i rtogs pa las nye bar gnas pas 'jug par 'gyur ba ma yin pa'i phyir ro/ /de lta mod kyi byang chub sems dpa' chom rkun pa/ /rkun pos srog chags che ba'i bdag nyid can dgra bcom pa dang / rang sangs rgyas dang / byang chub sems dpa' mang po dag zang zing cung zad tsam gyi phyir gsod par bya ste/ mtshams med pa'i las mang po byed pa la zhugs pa byang chub sems dpas mthong la/ mthong nas kyang 'di snyam du sems kyis mngon par 'du byed de/ gal te yang bdag gis srog chags de bsad na bdag sems can dmyal ba rnams su skye bar 'gyur mod kyi/ bdag sems can dmyal bar skye ba ni bla'i/ sems can 'dis mi mang po'i srog bcad cing mtshams med pa'i las kyang byas nas dmyal bar 'gro ba ni mi rung ngo snyam pa'i bsam pas 'dzem bzhin du snying brtse ba'i sems kho nas srog dang bral bar byas na nyes par yang mi 'gyur la/ bsod nams mang po yang 'phel bar 'gyur ro/ /rkun po gzhan gyi nor 'phrog pa gang dag gis dge 'dun dang mchod rten gyi dkor 'phrogs nas bdag gir byas te longs spyod par 'dod pa de dag las nor de byang chub sems dpas phyir phrogs te/ nor longs spyod pa des de dag la yun ring por don ma yin pa dang / phan pa ma yin pa dang / bde ba ma yin par 'gyur na mi rung ngo snyam nas slar phrogs te/ dge 'dun gyi ni dge 'dun la 'bul bar byed la/ mchod rten gyi ni mchod rten la 'bul bar byed do/ /de lta bus ni ma byin par len bzhin du nyes par yang mi 'gyur la/ bsod nams kyang mang du 'phel bar 'gyur ro/ /de bzhin du rgyal po'am rgyal po'i blon po drag shul chen pos gzhan la 'tshe bar byed pa rnams sam/ dge 'dun dang mchod rten gyi zhal ta byed pa'am/ kun dga' ra ba srung ba gang dag gis dge 'dun nam/ mchod rten gyi dkor mi rigs par chud gzon par byed pa dag ni rgyal srid kyi dbang phyug la sogs pa las 'byin par byed par yang rig par bya'o/ /byang chub sems dpa' de yang bdag gi srog gi phyir yang shes bzhin gyi brdzun gyi tshig mi smra na yang / gzhan rnams kyi srog thar bar bya ba dang / chad pas gcod pa las bskyab pa'i phyir zang zing med pa'i sems dang / snying brtse ba'i sems kho nas brdzun du smra bar byed la/ de lta smra bzhin du nyes par yang mi 'gyur zhing / bsod nams mang po 'phel bar yang 'gyur ro/ /sems can gang dag mi dge ba'i bshes gnyen gyis yongs su zin pa de dag la snying brtse ba'i sems kho nas 'di dag sdig pa'i grogs po dang bsten pas yun ring por gnod pa dang don med par gyur na mi rung ngo snyam nas/ de dag dang dbye ba'i phyir ci nus kyis ci nas kyang de dag dang dbye bar 'gyur zhing mi mthun par byed pa'i tshig smra bar byed de/ de lta bus mdza' bo'i dbyen byas kyang nyes par mi 'gyur la/ bsod nams mang po yang 'phel bar 'gyur ro/ /yang sems can gang lam log par zhugs shing mi rigs par byed pa dag la de dag de las slar bzlog pa'i phyir ci nas kyang 'di rim gyis nyes pa las ldog par gyur gyi bar du rtag tu tshig rtsub pos sma 'bebs par byed do/ /de ltar byang chub sems dpas tshig rtsub po smras kyang nyes par mi 'gyur la/ bsod nams kyang mang du 'phel bar 'gyur ro/ /yang sems can gang gar dang glu dang / rol mo'i sgra dang / rgyal po dang chom rkun dang / zas dang / skom dang / smad 'tshong ma dang / lam srang gi gtam la sogs pa la mos pa rnams la de dag gi gtam rnams kyis ci nas kyang de mgu bar byas shing 'dun par byas te dbang du byas shing nyan du bcug nas/ mi dge ba'i gnas nas bslang ste dge ba'i gnas la 'god par byed do/ / de ltar sna tshogs pa'i tshig kyal pa smra yang nyes par mi 'gyur la/ bsod nams kyang mang du 'phel bar 'gyur ro/ /byang chub sems dpa' la rtog pa dang bcas pas srog gcod pa la sogs pa ni cung zad kyang yod pa ma yin no/ /'khrig pa ni yod pa yin te/ legs par bsams nas rkyen gzhan yang nye bar mthong ba yod pa'i phyir ro/ /yang byang chub sems dpa' khyim pas gzhan gyi bud med mi tshangs par spyod pas gzir ba'i sems kyis bcings pa 'khrig pa 'dod pa 'di skad du bdag la ji ltar 'dod pa bzhin du byed pa yin na khyed kyi dbang du 'gyur gyi/ gzhan du na nges par bdag srog kyang yongs su 'dor bar byed do zhes zer na/ 'di snyam du 'di kho bo la kun nas mnar sems skye bar gyur nas bsod nams ma yin pa mang du 'phel bar gyur na mi rung la/ 'dod pa thob par gyur pa las ni ji ltar 'dod pa bzhin du dge ba la yang dag par sbyar ba dang / mi dge ba yongs su 'dor ba la dbang du 'gyur ro snyam ste/ snying brtse ba'i sems kho nas de log par g.yem pa bsten kyang nyes par mi 'gyur la/ bsod nams kyang mang du 'phel bar 'gyur ba lta bu'o/ /'di lta bu nyid las dgongs nas bcom ldan 'das kyis byang chub sems dpas zhe sdang gis kun nas bslang ba'i ltung ba spang bar bya'i/ chags pas kun nas bslang ba ni de lta ma yin no zhes rnam grangs du mar gsungs so/ /de la chags pa las byung ba'i ltung ba bstan pa'i phyir chags pa'i sgra ni 'dir byams pa'i don te/ byams pa de yang gang 'di gcig tu 'di rnams la phan pa nyid kyis 'jug pas rjes su zhugs pa ste/ gang yang 'di nyid brtse ba dang bcas pa yin pa'i phyir rnam par sdang ba ni ma yin no/ /ji skad du/ byang chub sems dpa' sems can la/ bu gcig pa la bya ba bzhin/ /rkang gi khong nas byams pa che/ /de ltar rtag phan byed par 'dod/ /sems can rnams la phan byed phyir/ /de ltar chags skyes ltung mi 'gyur/ /'di ni zhe sdang rnam kun du/ /sems can kun dang 'gal bar 'gyur/ /ji ltar phug ron rang gi bu mchog byams/ / rang gi bu de nye bar 'khyud nas 'dug /de 'dra ba la khong khro 'gal ba ltar/ /brtser bcas lus can bu la'ang de dang 'dra/ /zhes gsungs pa lta bu'o/ /snying brtse las gzhan pa ni gzhan dang 'dra bar rig par bya'o/ /'tsho ba log par zhes bya ba la sogs pa la/ 'tsho ba ni 'tsho bar 'gyur ba'i thabs spel bar byed pa zhes bye ba'i don to/ /log pa'i sgras ni log par spyod pa yin pa'i phyir smad pa'i tshig go/ /dman pas kun du 'tsho ba ni log par 'tsho ba ste/ 'tsho ba log par byed pa'i chos ni 'tsho ba log pa'o zhes bya bar nye bar btags nas bstan pa'o/ /de yang chags pa las byung ba'i lus dang ngag gi las so/ /de yang tshul 'chos pa dang / kha gsag dang / gzhogs slong dang / thob kyis 'jal ba dang / rnyed pas rnyed par byed 'dod pa dang / chang dang mtshon cha dang dug dang / srog chags dang / rgya skyegs dang 'bru mar la sogs pa 'tshong ba dang / ma brtags pa'i til dang nyungs kar 'tshir ba'o/ /gang yang zhing la sogs pa ni smos kyang ci dgos te/ de lta bu'i log par 'tsho ba dang du len par byed pa ni sdom pa'i tshul khrims kyi 'tsho ba dag las nyams pa'i phyir nyes byas kyi gnas lta bu'i chos so/ / byang chub sems dpa' log pas 'tsho bar byed pa'i chos byung ba rnams dang du len cing mi 'dzem la sel bar mi byed na nyon mongs pa can gyi nyes par 'gyur ro/ /de bsal ba'i phyir 'dun pa bskyed kyang des slar zil gyis mnan pas kun du spyad pa la ni nyes pa med do/ /'phyar gnas zhes bya ba la sogs pa la/ 'phyar ba ni kun du rgod pa'o/ /stsogs pa'i sgras ni kun du rtse ba dang kun du ca co 'don pa dag bsdu'o/ /rgod pa ste rnam par ma zhi ba'i sems kyis rab tu rgod pa la sogs pa ni sdom pa'i tshul khrims kyi rgod pa ma yin pa las nyams pa'i phyir nyes byas kyi gnas lta bu'i chos so/ /byang chub sems dpa' rgod pas gzhan dag rgod du gzhug par 'dod cing / ches rgod par byed rtse bar byed ca co 'don par byed du gzhug par 'dod cing / rnam pa sna tshogs pas smra bar byed 'dod na nyon mongs pa can gyi ltung bar 'gyur ro/ /brjed ngas pas nyon mongs pa can ma yin pa'o/ /de bsal bar 'dod kyang zil gyis non pas kun du spyod pa ni nyes pa med do/ /gzhan dag gis kun nas mnar sems sam mya ngan skyes pa bsal bar 'dod pa dang / rtsed mo la dga' ba'i rang bzhin can rnams bsdu ba dang / 'dun par byed pa rnams kyi sems bsrung ba dang / rjes su 'brang ba rnams mi dga' ba dang / kun nas mnar sems pa dang / rgyab kyis phyogs par 'gyur du dogs pa rnams bdag nyid la mngon du phyogs pa dang / bsam pa dag pas kun du smra ba la nyes pa med do/ /'khor ba zhes bya ba la sogs pa la/ /'khor ba la sems mngon par dga' ba nyid ni sdom pa'i tshul khrims kyi gcig tu rab tu dben par gnas pa la mngon par dga' ba las nyams pa'i phyir nyes byas kyi gnas lta bu'i chos so/ /byang chub sems dpa' gang zhig byang chub sems dpa' ni mya ngan las 'das par mngon par dga' bas gnas par mi bya'i/ mya ngan las 'das pa la rgyab kyis phyogs te gnas par bya'o/ /nyon mongs pa dang nye ba'i nyon mongs pa rnams kyis kyang 'jigs par mi bya'o/ /de dag la sems kyang shin tu dben par mi bya ste/ 'di ltar byang chub sems dpas ni bskal pa grangs med pa gsum du 'khor ba na 'khor zhing byang chub yang dag par bsgrub par bya dgos so snyam du de ltar lta zhing de skad smra na nyon mongs pa can gyi nyes par 'gyur ro/ /nyan thos kyang re zhig bdag gcig pu'i don du mya ngan las 'das pa la gcig tu mngon par dga' bar kun tu ston par byed cing / nyon mongs pa dang nye ba'i nyon mongs pa rnams las kyang skyo bar byed pa yin na/ gang byang chub sems dpa' sems can thams cad kyi don gyi phyir byung ba 'di lta smos kyang ci dgos/ 'dis de lta bu'i sems kun nas nyon mongs pa med pa la goms par bya ba yang dag par bsgrub dgos te/ de ni 'di ltar dgra bcom pa ma yin du zin kyang de las khyad par du kun nas nyon mongs pa med pa dang ldan pas zag pa dang bcas pa'i dngos po gcod pa'i phyir ro/ /ji skad du/ mgo la sems can khur chen khyer ba yi/ /sems can mchog ni dal gyis 'gro mi mdzes/ /bdag gzhan sna tshogs 'ching bas rab bcings pa/ /brtson pa brgya 'gyur du ni bya ba'i rigs/ /zhes gsungs pa lta bu'o/ /grags pa ma yin zhes bya ba la sogs pa la/ grags pa ma yin pa ni bsngags pa ma yin bsgrogs pa'o/ /de mi spong ba ste/ rjes su 'dzin pa ni dge ba'i chos sdud pa'i tshul khrims kyi dran pa dang shes bzhin du spyod pa las nyams pa dang / bdag gi 'khrul pa rnams yongs su shes shing nges par mthong ba dang / nges par mthong nas kyang spong ba las nyams pa'i phyir nyes byas kyi gnas lta bu'i chos so/ /byang chub sems dpa' bdag gi tshig mi btsun par 'gyur ba'i gtam ngan pa bden pa'i dngos po sel bar mi byed na nyon mongs pa can gyi nyes par 'gyur ro/ /bden pa'i dngos po ma yin pa sel bar mi byed na nyon mongs pa can ma yin pa'o/ /rab tu byung ba dang / slong mo spyod pa'i rgyus mi snyan par brjod pa dang / gzhan mu stegs can mngon par zhen pa'am/ khro bas zil gyis non cing sems phyin ci log tu gyur pas mi snyan par brjod na nyes pa med do/ /nyon mongs pa bcas kyang zhes bya ba la sogs pa la/ nyon mongs pa dang bcas pa ni drag po'i sbyor ba'o/ /de 'ba' zhig gis ma yin gyi 'jam pa'i sbyor bas kyang zhes bya ba ni kyang gi sgra'i don to/ /'chos par mi byed pa ni nyes par snang bar bya ba'i don to/ /rigs pas ston par mi byed cing sma 'bebs par mi byed na sems can gyi don bya ba'i tshul khrims kyi rjes su bstan pa rnam pa lnga las yang dang yang du ma gus par gyur pas 'khrul pa la phan pa'i bsam pas sma dbab pas dran par byed du gzhug pa las nyams pa'i phyir nyes byas kyi gnas lta bu'i chos so/ /byang chub sems dpa' gzhan dag yid mi bde bar 'gyur ba bsrung ba'i phyir 'jam pa dang drag pa'i thabs dag gis ston par mi byed cing yal bar dor na nyon mongs pa can gyi nyes par 'gyur ro/ /thabs drag po dag gis kyang gzhan dag la bstan par bya'o/ /gal te de ltar don 'di dag bstan pas na 'di rnams yid mi bde ba nyid du gyur kyang rung ma gyur kyang rung nyes par mi 'gyur ro/ /bstan pa'i don zab pa'i rgyus yid mi bde ba chen por gyur na yang nyes pa med do/ /gshe la lan du zhes bya ba la sogs pa la/ gshe bar byed pa la slar gshe ba ni lan du gshe ba'o/ /stsogs pa'i sgra ni slar khro ba dang slar brdeg pa dang slar mtshang 'dru ba dang rnam pa drug ste/ slar gshe ba bzhin du slar khro ba la sogs pa la yang rig par bya'o/ /gang slar khro ba la sogs pa de rnams ni sdom pa'i tshul khrims dang / dge ba chos sdud pa'i tshul khrims dag gis gzhan la phan pa don du gnyer ba las nyams pa'i phyir nyes byas kyi gnas lta bu'i chos so/ /byang chub sems dpa' la gzhan dag gshe ba dang / khro ba dang / brdegs pa dang / mtshang 'dru bar byed pa dag la khro bas zil gyis non pas slar brnyas par 'dod pas slar gshe bar byed/ slar khro bar byed/ slar rdeg par byed/ slar mtshang 'dru bar byed na/ nyon mongs pa can gyi nyes par 'gyur ro/ /khros pa rnams ni zhes bya ba la sogs pa la/ gzhan dag khros shing 'khrugs pa rnams kyang yal bar 'jog cing bzod pa gsol bar mi byed la/ shad kyis sbyong bar mi byed pa ni dge ba chos sdud pa'i tshul khrims kyi tshul khrims 'chal ba'i gzhir gyur pa'i nyon mongs pa dang / nye ba'i nyon mongs pa dang du mi len pa las nyams pa'i phyir/ nyes byas kyi gnas lta bu'i chos so/ /byang chub sems dpa' gzhan dag la nyes pa byas sam/ nyes pa byas su dogs kyang rung / kun nas mnar sems kyis sam nga rgyal gyis non pas mthun par shad kyis sbyong bar mi byed de yal bar 'dor na nyon mongs pa can gyi nyes par 'gyur ro/ /le lo la sogs pas ni nyon mongs pa can ma yin pa'o/ /thabs des 'dul bar bya bar 'dod pa dang / gzhan mu stegs can yin pa dang / rang bzhin gyis 'thab krol can yin pa dang / rung ba ma yin pa kha na ma tho ba dang bcas pa kun du spyod pas shad kyis sbyong bar byed du 'jug par 'dod pa dang / shad kyis sbyang bar byas na shas cher 'khrugs te shed skye bar 'gyur ba dang / pha rol bzod pa'i ngang tshul can yin zhing kun nas mnar sems med pa'i ngang tshul can yin du re la/ gzhan shad kyis sbyong bar byed pas shin du ngo tsha bar byed pa zhig na nyes pa med do/ /pha rol shad kyis zhes bya ba la sogs pa la/ 'ga' zhig la yid du mi 'ong ba'i rgyus gzhan dag gis sbyong bar byed pa spong ba ni nyes byas kyi gnas lta bu'i chos so/ / byang chub sems dpa' rtsod pa byung ba 'ga' zhig las gzhan dag la 'khrugs pas de rnams dus su chos bzhin du shad kyis sbyong bar byed kyang kun nas mnar sems sam/ tho 'tshams pa'i bsam pas shad kyis sbyong ba mi nyan na nyon mongs pa can gyi nyes par 'gyur ro/ /mi bzod pa'i ngang tshul can yin zhing nyon mongs pa can ma yin pa'o/ /thabs des 'dul bar 'dod pa dang / gzhan mu stegs can yin pa dang / rang bzhin gyis 'thab krol can yin pa dang / chos bzhin ma yin pa dang / dus ma yin par shad kyis sbyong bar byed na nyes pa med do/ /khro ba zhes bya ba la sogs pa la/ khro ba'i sems kyis rjes su 'jug pa ste/ kun du 'dzin na 'das ma thag pa bzhin du nyes byas kyi gnas lta bu'i chos so/ /byang chub sems dpa' gzhan dag la khro ba'i bsam pa byung ba dang du len par byed/ 'dzin par byed rjes su 'jug par byed na nyon mongs pa can gyi nyes par 'gyur ro/ /de spang bar 'dod kyang zil gyis non pas mngon du rgyu ba la ni nyes pa med do/ /bsnyen bkur 'dod phyir zhes bya ba la sogs pa la/ bsnyen bkur gyi ched du 'khor rnams sdud pa ste/ tshogs sdud par byed pa ni sems can gyi don bya ba'i tshul khrims kyi chos bzhin du tshogs yongs su sdud pa las nyams pa'i phyir nyes byas kyi gnas lta bu'i chos so/ /byang chub sems dpa' rim gro dang / bsnyen bkur la yongs su zhen pas zang zing dang bcas pa'i sems kyis 'khor sdud par byed na nyon mongs pa can gyi nyes par 'gyur ro/ /snying brtse bas sdud par byed pa dang / rigs pa dang ldan pa'i rim gro dang bsnyen bkur bdag gir byed pa la ni nyes pa med do/ /le lo la sogs zhes bya ba la sogs pa la/ le lo ni lus dang sems kyi snyom pa'o/ /stsogs pa'i sgras ni snyom las dang gnyid kyi bde ba dang / nyal ba'i bde ba dang / glos 'bebs pa'i bde ba rnams bsdu ste/ de dag sel bar mi byed pa ni dge ba'i chos sdud pa'i tshul khrims kyi pha rol tu phyin pa las nyams pa'i phyir nyes byas kyi gnas lta bu'i chos so/ /byang chub sems dpa' le lo dang snyom las skyes te/ gnyid kyi bde ba'am/ nyal ba'i bde ba'am/ glos 'bebs pa'i bde ba dag dus ma yin pa dang / tshod mi 'dzin par nyams su myong bar byed na nyon mongs pa can gyi nyes par 'gyur ro/ /na ste mi nus pa dang / lam gyis dub pa dang / dus su dang tshod zin pas nyams su myong bar byed pa dang / de spang bar 'dod kyang zil gyis non pas kun du spyod pa la ni nyes pa med do/ /chags pas zhes bya ba la sogs pa la/ 'du 'dzi'i gtam gyis dus 'da' bar byed pa ni sdom pa'i tshul khrims kyis 'du 'dzi'i nang na gnas kyang gtam ngan pa dang du mi len pa las nyams pa'i phyir nyes byas kyi gnas lta bu'i chos so/ /byang chub sems dpa' kun du chags pas bre mo'i gtam la brten pas dus 'da' bar byed na nyon mongs pa can gyi nyes par 'gyur ro/ /brjed ngas pas ni nyon mongs pa can ma yin pa'o/ /pha rol po'i ngor skad cig tsam nyan pa dang / ya mtshan du 'dzin te 'dri ba dang / dris pa'i lan 'debs pa tsam la ni nyes pa med do/ /ting nge 'dzin gyi zhes bya ba la sogs pa la/ gdams ngag ces bya ba lhag ma'o/ /ting nge 'dzin gyi don mi tshol ba ni sdom pa'i tshul khrims kyi ting nge 'dzin mngon par bsgrub pa la brtson pa las nyams pa'i phyir nyes byas kyi gnas lta bu'i chos so/ /byang chub sems dpa' ting nge 'dzin gyi don la sems gnas par 'dod la/ khong khro ba dang nga rgyal gyis non pas dge ba'i bshes gnyen gyi thad du gdams ngag tshol du mi 'gro na nyon mongs pa can gyi nyes par 'gyur ro/ /le lo la sogs pa ni nyon mongs pa can ma yin pa'o/ /na ste mi nus pa dang / gdams ngag log par byung du dogs pa dang / bdag nyid mang du thos pa yin te sems mnyam par 'jog nus sam/ gdams ngag gis gdams par bya ba byas zin na nyes pa med do/ /bsam gtan sgrib pa zhes bya ba la sogs pa la/ ting nge 'dzin la sbyor ba'i sgrib pa dang du len pa ni sdom pa'i tshul khrims kyi rtog pa ngan pa dang du mi len pa las nyams pa dang / dge ba chos sdud pa'i tshul khrims kyi snyoms par 'jug pa'i nyon mongs pa dang du len par mi byed pa las nyams pa'i phyir nyes byas kyi gnas lta bu'i chos so/ /byang chub sems dpa' bsam gtan la sbyor bas bsam gtan gyi sgrib pa ste bar du gcod par 'gyur ba'i chos 'dod pa la 'dun pa dang / gnod sems dang / rmugs pa dang / gnyid dang / rgod pa dang / 'gyod pa dang / the tshom ste/ de rnams byung ba nyams su myong bar byed na nyon mongs pa can gyi nyes par 'gyur ro/ /de spang bar 'dod kyang nyon mongs pa drag pos zil gyis non te kun du spyod na nyes pa med do/ /bsam gtan ro la zhes bya ba la sogs pa la/ bsam gtan gyi bde ba nyams su myong bar byed cing de la yon tan du lta ba ni dge ba chos sdud pa'i tshul khrims kyi snyoms par 'jug pa'i ro myang ba dang du mi len pa las nyams pa'i phyir nyes byas kyi gnas lta bu'i chos so/ /byang chub sems dpa' bsam gtan gyi bde ba'i ro myong bar byed cing / de la yon tan du lta bar byed na nyon mongs pa can gyi nyes par 'gyur ro/ /nyes pa med pa ni 'das ma thag pa bzhin no/ /nyan thos theg pa zhes bya ba la sogs pa la/ nyan thos kyi theg pa lhag par spong bar byed pa ni dge ba'i chos sdud pa'i tshul khrims kyis bsdus pa'i rnam par dag pa'i tshul khrims kyi log par lta ba rnam par spangs pa las nyams pa'i phyir nyes byas kyi gnas lta bu'i chos so/ /byang chub sems dpa' gang byang chub sems dpas nyan thos dang ldan pa'i chos mnyan par mi bya/ gzung bar mi bya/ de la bslab par yang mi bya'o/ /byang chub sems dpas nyan thos kyi theg pa dang ldan pa'i chos mnyan pa dang / 'dzin pa dang / de la bslab pas ci zhig bya ste dgos pa med do zhes de ltar lta zhing de skad smra na nyon mongs pa can gyi nyes par 'gyur ro/ /'di ltar byang chub sems dpas ni mu stegs can gyi bstan bcos rnams la yang re zhig brtson par bya dgos na sangs rgyas kyi bka' lta ci smos/ gcig tu de la 'dun pa bzlog pa'i phyir na nyes pa med do/ /rang tshul yod bzhin zhes bya ba la sogs pa la/ de la brtson pa zhes bya ba ni nyan thos kyi theg pa la zhes bya bar sbyor ro/ /byang chub sems dpa'i sde snod la mi slob par nyan thos kyi theg pa la brtson pa ni dge ba chos sdud pa'i tshul khrims kyis thos pa dang bsam pa la mngon par sbyor ba las nyams pa'i phyir nyes byas kyi gnas lta bu'i chos so/ /byang chub sems dpa' rang gi theg pa byang chub sems dpa'i sde snod yod bzhin du de la brtson par mi byed par de thams cad du yal bar bor nas nyan thos kyi sde snod nyid la brtson par sbyor zhing goms par byed na nyon mongs pa can gyi nyes par 'gyur ro/ /byang chub sems dpa'i sde snod med pa dang / de la goms pa nyid du byas pa dang / rgyun du byang chub sems dpa'i sde snod bzung ba yin na nyes pa med do/ /brtson min zhes bya ba la sogs pa la/ brtson par byed pa zhes bya ba rjes su 'jug pa'o/ /brtson pa ni goms pa'o/ /brtson min zhes bya ba ni brtson par bya ba ma yin pa ste/ de'i gzhung mngon par shes par bya ba ma yin pa'i phyi rol gyi bstan bcos dag la brtson par byed pa ni 'das ma thag pa lta bu yin pa'i phyir nyes byas kyi gnas lta bu'i chos so/ /byang chub sems dpa' byang chub sems dpa'i sde snod nyid med kyang sangs rgyas kyi bka' bzhin yod bzhin du phyi rol gyi bstan bcos te mu stegs can gyi bstan bcos la brtson par byed na nyon mongs pa can gyi nyes par 'gyur ro/ /shin tu yid gzhungs pa dang ldob skyen pa dang / yun ring por yang mi brjed pa dang / don sems pa dang rtog par byed nus pa dang / sangs rgyas kyi gsung rab la rigs pas nye bar rtogs pa dang ldan pas blo mi 'gyur ba dang ldan zhing nyin gcig bzhin du ches lhag par sangs rgyas kyi gsung rab la brtson par byed pa yin na nyes pa med do/ /brtson pa byas kyang zhes bya ba la sogs pa la/ brtson par bya ba la goms pa des kyang phyi rol gyi bstan bcos dag la mkhas par byed pa na de la mngon par dga' ba'i tshul gyis pha rol gyi bstan bcos dag la mkhas par byed cing des dga' bar 'dzin des rangs par byed de/ sman tsha ba la brten pa bzhin du nyes par mi 'dzin la/ bdag nyid 'dor bar byed na nyon mongs pa can gyi nyes par 'gyur ro/ /theg pa chen po zhes bya ba la sogs pa la/ theg pa chen po'i phyogs 'ba' zhig la 'jug pa ni 'dir theg pa chen po'i sgra'o/ /theg pa chen po dang ldan pa gang la la zhig zab pa'i gnas dag spong ba ni 'das ma thag pa lta bu dang / lta ba ngan pa spong ba las nyams pa'i phyir nyes byas kyi gnas lta bu'i chos so/ /byang chub sems dpa' gang la la zhig byang chub sems dpa'i sde snod las de kho na'i don nam/ byang chub sems dpa'i mthu las brtsams te zab pa mchog tu zab pa'i gnas dag thos nas bdag nyid ma mos shing gzhan gyi rjes su 'brang nas skur ba 'debs te/ 'di dag ni don dang ldan pa ma yin/ chos dang ldan pa ma yin/ de bzhin gshegs pas gsungs pa ma yin/ sems can rnams la phan pa dang bde bar 'gyur pa ma yin no zhes zer zhing spong bar byed na nyon mongs pa can gyi nyes par 'gyur ro/ /gang yang las dang po pa la la zhig zab pa'i gnas dag la sems mos par ma gyur pa de lta na yang de la dad pa gtso bor gyur pa nyid kyis 'di ni bdag dang mi mthun pa ma yin no zhes bslab par bya ste/ 'di ltar bdag ni long bar gyur pa ste/ mig med pas chos yongs su spong ba ni bdag gi cha ma yin no zhes yang dag par brtag par bya'o/ /bdag la zhes bya ba la sogs pa la bdag la stod par byed cing gzhan la smod par byed pa ni dge ba'i chos sdud pa'i tshul khrims kyi tshul khrims 'chal ba'i rgyu'i nyon mongs pa dang nye ba'i nyon mongs pa dang du mi len pa las nyams pa'i phyir nyes byas kyi gnas lta bu'i chos so/ /byang chub sems dpa' rang bzhin gyis dam pa yin pa'i rlom sems kyis bdag la chags pa dang / gzhan la khong khro bas brnyas pa dang bcas pa dang / gshe ba dang bcas pas bdag la stod par byed cing gzhan la smod par byed na nyon mongs pa can gyi nyes par 'gyur ro/ /nyes pa med pa ni pham par 'gyur ba bzhin no/ /chos kyi don du zhes bya ba la sogs pa la/ chos nyan pa'i don 'gro bar mi byed pa ni dge ba chos sdud pa'i tshul khrims kyi thos pa la mngon par sbyor ba las nyams pa'i phyir nyes byas kyi gnas lta bu'i chos so/ /byang chub sems dpa' chos sgrogs pa dang / chos dang 'brel ba'i gtam rnam par gtan la 'bebs pa na nga rgyal lam khong khro ba'i sems kyis mi 'gro na nyon mongs pa can gyi nyes par 'gyur ro/ /le lo la sogs pa ni nyon mongs pa can ma yin pa'o/ /ma tshor ba dang log par ston du dogs pa dang / chos smra ba'i sems srung bar 'dod pa dang / na ste mi nus pa dang / yang dang yang du thos shing bzung la shes zin pa'i don gyi gtam yin par shes pa dang / mang du thos pa dang / thos pa 'dzin pa dang / thos pa bsags pa yin pa dang / byang chub sems dpa'i ting nge 'dzin mngon par bsgrub pa la brtson pa dang shin tu shes rab rtul te len pa la zhan/ 'dzin pa la zhan cing dmigs pa la sems rnam par 'jog pa la zhan pa zhig na nyes pa med do/ /de la smod pa zhes bya ba la sogs pa la/ de la ni chos ston pa'i gang zag la'o/ /smad pa ni brnyas pa'o/ /yi ge dang tshig 'bru la brten nas tshig 'bru la rton pa nyid do zhes de la smod pa'i don du yi ge la brten pa ni de la smod pa dang yi ge rten no/ /yang dag pa ji lta ba'i don ni bzung la chos smra ba la khyad du gsod pa'i ched du tshig 'bru la kun du bzung nas zhes bya ba'i don te/ chos smra ba la khyad du gsad pa'i ched du tshig 'bru la brten pa nyid ni dge ba chos sdud pa'i tshul khrims kyis bla ma la rim gro byed pa las nyams pa'i phyir nyes byas kyi gnas lta bu'i chos so/ /byang chub sems dpa' chos smra ba'i gang zag la bsams bzhin du khyad du gsod cing bkur sti mi byed la 'phya bar byed cing tshig 'bru la rton gyi don la rton par mi byed na nyon mongs pa can gyi nyes par 'gyur ro/ /de ltar re zhig tshul khrims rnam pa gsum gyi dbang du byas te/ bslab pa'i gzhi rnams bstan nas/ de'i 'og tu yongs su rdzogs rdzogs kyi bar du sems can gyi don bya ba'i tshul khrims kyi dbang du byas par rig par bya'o/ /dgos pa'i grogs su 'gro ba zhes bya ba la sogs pa la/ dgos pa'i grogs ni grogs byed pa ste/ der 'gro bar mi byed pa'o/ /ji skad smras pa'i bya bar nye bar gnas pa la gzhan gyi grogs mi byed pa ni sems can gyi don bya ba rnams kyi grogs byed pa las nyams pa'i phyir nyes byas kyi gnas lta bu'i chos so/ /byang chub sems dpa' sems can gyi don bya ba'i don gnyer bar gnas shing bcol ba la khong khro ba'am/ nga rgyal gyi grogs byed du mi 'gro na/ nyon mongs pa can gyi nyes par 'gyur ro/ / le lo la sogs pas ni nyon mongs pa can ma yin pa'o/ /na ste mi nus pa dang gzhan la sngar khas blangs zin pa dang / rgyun mi 'chad par dge ba'i phyogs la brtson pa dang / yid rtul po zhig ste mi mkhas pa yin pa dang / thabs des 'dul bar 'dod pa dang / dge 'dun gyi nang khrims srung bar 'dod pa dang / gzhan mang po dag gis sems srung bar 'dod pa dang ma bcol ba dang / bcol bar gyur kyang gzhan zhig la yang bcol ba dang / gnod pa dang ldan pa'am/ chos dang ldan pa ma yin pa'i bya ba yin pa dang / pha rol po rang nyid byed nus pa dang / rten yod pa nyid yin na nyes pa med do/ /nad pa'i zhes bya ba la sogs pa la/ nad pa'i rim gro mi byed pa ni nad pa'i rim gro byed pa las nyams pa'i phyir nyes byas kyi gnas lta bu'i chos so/ /byang chub sems dpa' nad kyis thebs pa'i sems can dang phrad pa na khong khro ba'am/ nga rgyal gyis rim gro dang bsnyen bkur mi byed na nyon mongs pa can gyi nyes par 'gyur ro/ /le lo la sogs pas ni nyon mongs pa can ma yin pa'o/ /nad yun rings kyis thebs te so tsam du 'dug pa ni nyes pa med do/ /lhag ma rnams kyang grogs su 'gro ba bzhin du ci rigs su sbyar ro/ / sdug bsngal zhes bya ba la sogs pa la/ sdug bsngal bar gyur pa rnams kyi zhes lhag ma'o/ /gzhan sdug bsngal rnams ji skad bstan pas sdug bsngal sel bar mi byed pa ni gzhan gyi sdug bsngal sel bar byed pa las nyams pa'i phyir nyes byas kyi gnas lta bu'i chos so/ /byang chub sems dpa' sdug bsngal bar gyur pa'i sems can dang phrad na nga rgyal gyis sam khong khro bas sdug bsngal de sel bar mi byed cing yal bar 'jog la rgyab kyis phyogs par byed na nyon mongs pa can gyi nyes par 'gyur ro/ /le lo la sogs pa ni nyon mongs pa can ma yin pa'o/ /nyes pa med pa ni 'das ma thag pa bzhin no/ /bag med ces bya ba la sogs pa la/ bag med pa rnams la ji skad bstan pa'i rigs pa mi ston pa ni rigs pa ston pa las nyams pa'i phyir nyes byas kyi gnas lta bu'i chos so/ /byang chub sems dpa' tshe 'di dang tshe phyi ma'i don la tshul bzhin ma yin par zhugs pa'i sems can dag mthong na kun nas mnar sems kyis rig pa ston par mi byed na nyon mongs pa can gyi nyes par 'gyur ro/ /le lo la sogs pas ni nyon mongs pa can ma yin pa'o/ /bdag nyid mi shes pa dang gzhan dag la bcol na nyes pa med do/ /byas zhes bya ba la sogs pa la/ byas pa ni pha rol gyis phan gdags pa'o/ /de'i phyir de la phan gdags pas slar phan 'dogs par byed pa nyid ni lan du phan 'dogs pa nyid do/ /gzhan phan 'dogs par byed pa la rjes su mthun pas slar phan 'dogs par mi byed pa ni byas pa gzo ba rjes su srung ba las nyams pa'i phyir nyes byas kyi gnas lta bu'i chos so/ /byang chub sems dpa' de rang nyid nus pa dang ldan nam mi ldan yang rung / kun nas mnar sems dang ldan pa dang / snying brtse ba dang zhes dang bral bas yon tan len par mi byed pa dang / dmu rgod kyi rang bzhin can dang / dge ba'i bshes gnyen gzhan gyis yongs su zin pa dang / gzhan gyis phan btags pa byas pa'ang rung / sems can phan 'dogs pa de mthong na byas pa mi gzo ste/ nga rgyal dang khong khro bas mnyam pa'am de bas lhag pa'i mthun pa'i phan gdags pas lan du phan mi 'dogs na nyon mongs pa can gyi nyes par 'gyur ro/ /le lo la sogs pas nyon mongs pa can ma yin pa'o/ /lan du phan gdags pa'i phyir 'bad kyang ma nus pa dang / de nyid lan du phan gdags par mi 'dod pa dang / thabs des 'dul bar 'dod pa la ni nyes pa med do/ /gzhan gyi zhes bya ba la sogs pa la/ gzhan rnams kyi mya ngan bsang bar mi byed pa ni mya ngan bsang bar byed pa las nyams pa'i phyir nyes byas kyi gnas lta bu'i chos so/ /byang chub sems dpa' nye du dang longs spyod las gyur pa'i sdug bsngal gyis nyam thag cing mya ngan byung ba rnams la kun nas mnar sems kyi sems kyis mya ngan bsang bar mi byed na nyon mongs pa can gyi nyes par 'gyur ro/ /le lo la sogs pas ni nyon mongs pa can ma yin pa'o/ /nyes pa med pa ni grogs su 'gro ba bzhin no/ /nor 'dod pa la zhes bya ba la sogs pa la/ nor 'dod pa rnams la nor sbyin par mi byed pa ni phan 'dogs pa sbyin pa las nyams pa'i phyir nyes byas kyi gnas lta bu'i chos so/ /byang chub sems dpa' sems can phongs pa rnams zas dang skom la sogs pa yo byad 'dod pa rnams yang dag par slong ba la kun nas mnar sems kyi sems kyis zas dang skom la sogs pa sbyin par mi byed na nyon mongs pa can gyi nyes par 'gyur ro/ /le lo la sogs pas ni nyon mongs pa can ma yin pa'o/ /nyes pa med pa ni pham par 'gyur ba bzhin no/ /'khor rnams kyi ni zhes bya ba la sogs pa la/ 'khor rnams kyi don mi byed pa ni chos dang zang zing gis bsdus pa'i bya ba las nyams pa'i phyir nyes byas kyi gnas lta bu'i chos so/ /byang chub sems dpa' 'khor 'dus pa la kun nas mnar sems kyi sems kyis chos kyi dus dus su legs par mi 'doms shing legs par rjes su mi ston pa dang / zang zing gi sgo nas phongs pa rnams la gos dang zas la sogs pa yongs su brtsal ba don gyi mi byed na nyon mongs pa can gyi nyes par 'gyur ro/ /le lo la sogs pas ni nyon mongs pa can ma yin pa'o/ /na ste mi nus pa dang / thabs des 'dul bar 'dod pa nyid dang / dge 'dun gyi nang khrims srung ba dang / gzhan gang yang rung ba la bcol ba dang / 'khor yang bsod nams chen po dang ldan par shes pa dang / rang nyid gos la sogs pa tshol ba'i nus pa bstan pa dang / gdams ngag dang rjes su bstan pa'i bya ba dag rang nyid kyis byas zin pa dang / mu stegs can yin pa las chos rkur 'ongs la de yang 'dul ba'i skal ba med pa zhig yin na nyes pa med do/ /gzhan gyi zhes bya ba la sogs pa la/ gzhan gyi blo dang mthun par mi 'jug pa ni gzhan gyi blo dang mthun par 'jug pa las nyams pa'i phyir nyes byas kyi gnas lta bu'i chos so/ /byang chub sems dpa' kun nas mnar sems kyi sems kyis gzhan gyi sems dang mthun par mi byed na nyon mongs pa can gyi nyes par 'gyur ro/ /le lo la sogs pas ni nyon mongs pa can ma yin pa'o/ /na ste ma nus pa dang / 'dul bar 'dod pa dang / bya ba de gnod pa dang ldan pa yin pa dang / dge 'dun gyi nang khrims srung ba dang / gzhan mang po dag gi sems srung bar 'dod pa dang / mu stegs can tshar gcad pa'i phyir ni nyes pa med do/ /yon tan zhes bya ba la sogs pa la/ gzhan dag gi yon tan gyi bsngags pa smra bar mi byed pa ni yon tan gyi bsngags pa smra ba las nyams pa'i phyir nyes byas kyi gnas lta bu'i chos so/ /byang chub sems dpa' kun nas mnar sems kyi sems kyis yang dag pa'i tshul khrims dang / thos pa dang / gtong ba la sogs pa yang dag pa'i yon tan rjod par mi byed cing yang dag pa'i bsngags pa mi brjod pa dang / legs par smras pa la legs so zhes bya ba ma byin na nyon mongs pa can gyi nyes par 'gyur ro/ /le lo la sogs pas ni nyon mongs pa can ma yin no/ /pha rol po rang bzhin gyis 'dod pa chung ngu yin par dpag ste/ yon tan gyi bsngags pa brjod pa'i rgyu des 'di kun nas nyon mongs par 'gyur du dogs pa dang / gtam rdzogs rdzogs su sdong ba dang / de'i yon tan rnams yon tan ltar bcos pa yin te yang dag pa ma yin pa dang / legs par smra ba yang legs par smra ba ltar bcos pa yin te/ yang dag pa ma yin pa dang / 'dul bar 'dod pa dang / gzhan gyi sems srung par byed pa la ni nyes pa med do/ /rkyen du 'tsham pa zhes bya ba la sogs pa la/ gzhan nyes pa dang bcas shing 'gal ba dang bcas pa dag la ji ltar 'tsham par tshar mi gcod pa ni tshar gcod pa'i bya ba las nyams pa'i phyir nyes byas kyi gnas lta bu'i chos so/ /byang chub sems dpa' sems can smra dbab par rigs pa dang / chad pas gcad par rigs pa dang / bskrad par rigs pa rnams nyon mongs pa can gyi sems kyis smra 'bebs par mi byed dam/ chad pas gcod pas phyir 'chos par mi byed dam/ skrod par mi byed na nyon mongs pa can gyi nyes par 'gyur ro/ /le lo la sogs pas ni nyon mongs pa can ma yin pa'o/ /bcos su mi rung ba'i rang bzhin can zhig ste/ gtam byar mi rung la bka' blo mi bde zhing mnar sems kyi shas che ba yal bar bor ba dang / dus la gzhes pa dang / gzhi de las 'thab pa dang / mtshang 'dru ba dang / 'gyed pa dang / rtsod par 'gyur ba mthong ba dang / dge 'dun bye bar dogs pas yal bar bor ba dang / sems can de dag rang bzhin gyis ngo tsha shes pa dang / khrel yod pa dang ldan pas myur ba nyid du rang nyid phyir 'chos pa zhig yin na ni nyes pa med do/ /rdzu 'phrul zhes bya ba la sogs pa la/ rdzu 'phrul sna tshogs pa dang ldan zhing bsdigs par 'os pa rnams la bsdigs pa la sogs pa mi byed pa ni bsdigs pa la sogs pa'i bya ba las nyams pa'i phyir nyes byas kyi gnas lta bu'i chos so/ /byang chub sems dpa' rdzu 'phrul rnam pa mang po'i nus mthu dang ldan la/ sems can skrag par bya bar rigs pa rnams rdzu 'phrul rnam pa du mas skrag par mi byed pa dang / sems can 'dun par bya ba'i rigs pa rnams 'dun par mi byed na nyon mongs pa can gyi nyes par 'gyur ro/ /sems can rnams gang du shas cher mngon par zhen par gyur pa mu stegs can 'phags pa rnams la skur ba 'debs pa dang / log par lta ba dang ldan pa zhig na ma bstan kyang nyes pa med do/ /de ltar re zhig nyes byas kyi rab tu dbye ba bstan nas yang nyes par mi 'gyur ba ji ltar rig par bya zhe na/ snying rjer ldan zhing zhes bya ba la sogs pa gsungs te/ 'dir bsgrub pa'i sgo dang / dgag pa'i sgo nas byang chub sems dpa'i bya ba gang cung zad bstan pa de las mi 'da' bas ltung bar mi 'gyur ro zhes bya ba 'di ni ltung bar mi 'gyur ba gsal bar bstan pa'o/ /'das pa'i rang bzhin yin na yang nyes pa med pa nyid ni 'di ltar sems dge ba ste/ dge ba'i bsam pa dang / bsam pa ma nyams pa dang / 'bras bu gcig pa'i dbang gis rjes su mthun pa'i 'bras bu las de dang 'dir ji skad du bstan pa las ma nyams par brtse ba dang ldan pa snying rje dang ldan pa sems can rnams la byams pa ste/ phan par 'dod pa dang / dul bar 'dod pa dang gdul bar bya bar 'dod pas 'da' bar byas pa ni nyes par mi 'gyur ro zhes bya ba'i don to/ /dang gi sgras ni sems shin tu 'khrugs pa dang / tshor ba drag pos nyen pa dang / gnyid log pa dang / tha mal pa ma yin pa dang / spong bar 'dod kyang nyon mongs pa drag pos kun nas dkris pa la sogs pa dag gis slar yang 'jug pa dag gis 'das pa las ni nyes pa med do zhes bya ba ni bsdus pa'i don to/ /sems ni shin tu nyon mongs dang / /sdug bsngal tshor bas nyen pa dang / /gnyid dang smyos pa dag la ni/ /byung ba la yang nyes pa med/ /ces bya ba ni tshigs su bcad pa gzhan no/ /don ni 'di ltar bstan par 'gyur te/ chags pa dang / khong khro ba dang / phrag dog dang / khro ba dang / khon du 'dzin pa dang / nga rgyal dang / rgyags pa la sogs pas 'das par gyur pa ni nyes par 'gyur ro zhes bya ba'i don te/ des na 'di ltar byang chub sems dpa' rnams kyi bslab pa'i gzhi rnams dngos su byung ba 'di dag ni mdor bsdus pa ste/ gzhan byang chub sems dpa' dag gi spyod pa rnams ni dpag tu med cing mthar thug pa med pa'i phyir te/ de rnams su bstan pa'i rjes su 'brangs nas nyes par 'gyur ba dang nyes par mi 'gyur ba dag rig par bya'o/ /de ltar na rang gi 'dul ba'i bslab pa la 'jug pa'i byang chub sems dpa' 'di ni phun sum tshogs pa rnam pa gsum gyis bde ba la reg par gnas par 'gyur te/ sbyor ba phun sum tshogs pa dang / bsam pa phun sum tshogs pa dang / sngon gyi rgyu phun sum tshogs pa'o/ /de la sbyor ba phun sum tshogs pa ni gang byang chub sems dpa'i tshul khrims dag bral bar mi byed cing / lus dang ngag dang yid kyi kun du spyod pa yongs su dag pa dang / nyes pa rgyun du mi byed pa dang / sdig pa 'chags pa'o/ /bsam pa phun sum tshogs pa ni gang yang 'di ni chos kyi bsam pas rab tu byung ba yin gyi 'tsho ba'i bsam pas ma yin byang chub chen po don du gnyer ba yin gyi don du ma gnyer ba ma yin/ dge sbyong gi tshul dang mya ngan las 'das pa don du gnyer ba yin gyi don du mi gnyer ba ma yin pa dang / de de ltar don du gnyer bas le los gnas pa ma yin/ brtson 'grus mi zhen pa dang / kun nas nyon mongs pa dang / yang 'byung ba dang / rims nad dang bcas pa dang / rnam par smin pa sdug bsngal ba dang / phyi ma la skye ba dang rgya shir 'gyur ba'i sdig pa mi dge ba'i chos rnams dang ma 'dres pa'o/ /sngon gyi rgyu phun sum tshogs pa ni 'di ltar byang chub sems dpa' sngon gyi tshe rabs gzhan dag tu bsod nams byas shing dge ba byas te/ des da ltar bdag nyid gos dang zas dang mal cha dang stan dang na ba'i gsos sman dang yo byad rnams kyis phongs par mi 'gyur la/ gzhan dag la yang bgo bsha' byed nus pa ste/ phun sum tshogs pa gsum po 'di dag dang ldan pa'i byang chub sems dpa' ni bde ba la reg par gnas par 'gyur ro/ /rdzogs sangs sras mchog rnams kyi sdom pa nyi shu pa/ /bshad pa'i bsod nams rdo rjes sgrib pa'i ri bo'i tshogs/ /phug nas bsal te rgyal dang lhan cig rnam dag cing / /dri med mig gis dngos po'i de nyid mthong bar shog /'di ltar 'dis ni byis pa'i sems nyid rang bzhin g.yo ba 'di/ /rnam 'phrul nyon mongs sna tshogs las brgal byang chub mchog bzung nas/ /gcad par dka' ba gnyis su kun spyod gnyis 'dzin gcad mkhas shing / /'jig rten 'di yi phongs pa zhi byed byang chub bzang por bdag gyur cig /byang chub sems dpa'i sdom pa nyi shu pa'i dka' 'grel/ slob dpon byang chub bzang po'i zhal snga nas mdzad pa rdzogs so// //rgya gar gyi mkhan po paN+Di ta k+She ma ga ga na dang / lo tsA ba mang 'or dge slong byang chub shes rab kyis bsgyur cing zhus te gtan la phab pa'o//[ ]@##/ /rgya gar skad du/ d+harma bi ni sh+tsa ya nA ma pra ka ra Na/ bod skad du/ chos rnam par nges pa zhes bya ba'i rab tu byed pa/

CLOSE WINDOW