CLOSE WINDOW

D4064
བོད་ཡིག

/[ ]@##/ /rgya gar skad du/ triM shi ka b+hA Sh+yaM/ bod skad du/ sum cu pa'i bshad pa/ bam po dang po/ 'jam dpal gzhon nur gyur pa la phyag 'tshal lo/ /gang zag dang chos la bdag med pa ma rtogs pa dang log par rtogs pa rnams la gang zag dang chos la bdag med pa ma log par bstan pa'i phyir/rnam par rig pa'i rab tu byed pa sum cu pa brtsams so/ /de la gang zag dang chos la bdag med par bstan pa'ang nyon mongs pa dang shes bya'i sgrib pa spangs pa'i phyir te/'di ltar 'dod chags la sogs pa nyon mongs pa rnams ni bdag tu lta ba las byung ngo / /gang zag la bdag med par khong du chud pa ni 'jig tshogs la lta ba'i gnyen po yin pas na de spangs na nyon mongs pa thams cad spong bar 'gyur ro/ /chos la bdag med par shes pa yang shes bya'i sgrib pa'i gnyen po yin pas shes bya'i sgrib pa spong bar 'gyur ro//nyon mongs pa dang shes bya'i sgrib pa spang ba yang thar pa dang thams cad mkhyen pa thob par bya ba'i phyir ro/ /nyon mongs pa rnams ni thar pa 'thob pa la bsgribs pas de'i phyir de dag spangs na thar pa 'thob par 'gyur ro//shes bya'i sgrib pa ni shes bya thams cad la ye shes 'jug pa'i bar du gcod par gyur pa nyon mongs pa can ma yin pa'i mi shes pa ste/ de spangs na shes bya'i rnam pa thams cad kun la chags pa med pa dang / thogs pa med pa'i ye shes 'jug ste/ de'i phyir thams cad mkhyen pa thob par 'gyur ro//yang na chos dang gang zag la mngon par zhen pa dag sems tsam du yang dag pa ji lta ba bzhin du rab tu mi shes te/ de'i phyir chos dang gang zag la bdag med par bstan pas rnam par rig pa tsam 'bras bu dang bcas pa la mthar gyis 'jug par bya ba'i phyir rab tu byed pa 'di brtsams so//yang na rnam par shes pa bzhin du shes bya yang rdzas nyid du kha cig sems pa dang / gzhan dag shes bya bzhin du rnam par shes pa yang kun rdzob nyid du yod kyi don dam par ni med do snyam du sems pa mtha' gcig tu smra ba 'di rnam pa gnyis dgag pa'i phyir rab tu byed pa 'di brtsams so//bdag dang chos su nyer 'dogs pa/ /sna tshogs dag ni gang byung ba/ /'jig rten pa dang bstan bcos la'o/ /zhes bya ba ni tshig gi lhag ma'o/ /de ni rnam par shes par gyur/ /bdag dang chos su nyer 'dogs pa//zhes bya ba dang sbyar ro/ /bdag dang chos su nye bar 'dogs pas/ bdag dang chos su nyer 'dogs pa ste/ de yang bdag tu btags pa dang / chos su btags pa'o/ /sna tshogs zhes bya ba ni rnam pa du ma ste/ bdag dang srog dang / skye ba po dang / shed las skyes pa dang / shed bu dang / de dag la sogs pa dag ni bdag tu nye bar 'dogs pa'o/ /phung po dang / khams dang / skye mched rnams dang / gzugs dang / tshor ba dang / 'du shes dang / 'du byed dang / rnam par shes pa dang / de dag la sogs pa dag ni chos su nye bar 'dogs pa'o//nye bar 'dogs pa 'di rnams gnyis ni rnam par shes pa gyur pa nyid de/ bdag gam chos rnams dngos po la nye bar 'dogs pa ni ma yin no zhes bya ba de ji lta bu zhe na chos rnams dang / bdag ni rnam par shes pa gyur pa las phyi rol na med pa'i phyir ro/ /gyur zhes bya ba de gang zhe na/gzhan du gyur pa ste/ rgyu'i skad cig 'gag pa dang / dus mnyam du rgyu'i skad cig dang mi 'bral ba 'bras bu'i bdag nyid thob pa ni gyur pa'o/ /de la bdag la sogs par rnam par rtog pa'i bag chags yongs su brtas shing gzugs la sogs pa rnam par rtog pa'i bag chags yongs su brtas na kun gzhi rnam par shes pa las bdag la sogs par snang ba dang /gzugs la sogs par snang ba'i rnam par rtog pa 'byung ngo / /de la bdag la sogs par snang ba dang / gzugs la sogs par snang ba yang phyi rol gyi bdag dang / chos rnams med par rnam par rtog pa de las phyi rol du gyur pa lta bu rgyur byas nas/ bdag la sogs par nye bar 'dogs pa dang / gzugs la sogs pa chos su nye bar 'dogs pa thog ma med pa'i dus nas 'jug ste/ dper na rab rib can gyis skra shad 'dzings pa la sogs pa mthong ba bzhin no//nye bar 'dogs pa zhes bya ba ni gang la gang med pa de la de nye bar 'dogs te/ dper na mi blun po la ba lang zhes bya ba lta bu'o/ /de ltar na rnam par shes pa'i rang gi ngo bo dang / phyi rol na yang bdag dang chos rnams med pas bdag dang chos rnams kun du brtags pa nyid de/don dam par yod pa ma yin pas shes bya yang rnam par shes pa bzhin du rdzas nyid do zhes mtha' gcig tu smra ba 'di khas mi blang ngo / /nye bar 'dogs pa ni gzhi med par mi srid pas gang la bdag dang chos su nye bar 'dogs pa 'byung ba'i rnam par shes pa gyur pa dngos po yod par nges par khas blang ngo //de bas na rnam par shes pa yang shes bya bzhin du kun rdzob nyid de/ don dam par med do zhes khas len pa des rigs pa mi bzod de/ kun rdzob tu yang dngos po med par 'gyur ba'i phyir ro/ /rten med na kun rdzob du mi rung ba ste/de bas na mtha' gcig tu smra ba rnam pa 'di gnyi ga yang mi rigs pa'i phyir btang ngo zhes slob dpon gyi tshig go/ /de ltar na shes bya thams cad kun brtags pa'i ngo bo nyid yin pas dngos po med do/ /rnam par shes pa ni rten cing 'brel bar 'byung bas rdzas su yod par khas blang ngo //rnam par shes pa rten cing 'brel bar 'byung ba ni gyur ba'i sgras bstan pa'o/ /phyi rol gyi don med par rnam par shes pa nyid don gyi rnam par 'byung ba 'di ji ltar shes par rung zhe na/ phyi rol gyi don ni bdag snang ba'i rnam par shes pa skyed pa'i phyir rnam par shes pa'i dmigs pa'i rkyen du 'dod kyi byed rgyu tsam du 'dod pa ni ma yin te/de ma thag pa'i rkyen la sogs pa dang bye brag med par 'gyur ba'i phyir ro/ /rnam par shes pa'i tshogs lnga po dag ni bstsags pa la dmigs pa ste/ de'i rnam pa dang 'dra ba'i phyir ro/ /bstsags pa ni cha shas 'dus pa tsam las gud na med de/cha shas de dag brtsal na bstsags pa'i rnam pa'i rnam par shes pa med pa'i phyir ro/ /de bas na phyi rol gyi don med par rnam par shes pa bstsags pa'i rnam par 'byung ngo / /rdul phra rab bsags pa dag nyid ni rdul phra rab dag ni de'i rnam pa ma yin pa'i phyir ro//rdul phra rab rnams ma bstsags pa'i dus na yang rang bzhin bye brag tu gyur ba ci yang med de/ de bas na rdul phra rab rnams ma bstsags pa bzhin du bstsags pa yang dmigs par mi rung ngo / /gzhan dag rdul phra rab re re gzhan la mi ltos pa ni dbang pos mi rtogs kyi/dbang po phan tshun ltos pa ni dbang pos bzung ba'o snyam du sems pa de dag gi yang ltos pa dang mi ltos pa'i dus na rang bzhin bye brag tu gyur pa med pas dbang pos gzung ba'am/ dbang pos mi rtogs pa gcig tu 'gyur ro/ /gal te phan tshun ltos pa'i rdul phra rab nyid rnam par shes pa'i yul du gyur du zin na ni/de lta na bum pa dang rtsig pa la sogs pa'i rnam pa tha dad pa gang yin pa de rnam par shes pa la 'byung bar mi 'gyur te/ rdul phra rab dag de'i rnam pa ma yin pa'i phyir ro/ /rnam par shes pa la snang ba yang gzhan la yul yang rnam pa gzhan du ni ha cang thal bar 'gyur bas mi rigs so//rdul phra rab dag kyang tshu rol dang pha rol dang dbus kyi cha yod pas ka ba la sogs pa bzhin du don dam par yod pa ma yin no/ /de ni khas mi len na ni rdul phra rab la shar dang / lho dang / nub dang /byang la sogs pa'i phyogs tha dad pa med par 'gyur ro/ /de'i phyir rnam par shes pa bzhin du rdul phra rab kyang lus pa med pa dang / yul na mi gnas par 'gyur ro/ /de lta na 'o na phyi rol gyi don med pa'i phyir rnam par shes pa nyid don gyis rnam par 'byung ste/ rmi lam gyi rnam par shes pa dang mtshungs par khas blang ngo //tshor ba la sogs pa dag kyang 'das pa dang ma 'ongs pa ni de'i rnam pa'i rnam par shes pa skyed pa ma yin te/ 'gag pa dang ma skyes pa'i phyir ro/ /da ltar gyi dag kyang da ltar gyi rnam par shes pa skyed pa ma yin te/ skye ba'i tshe na ni med pa'i phyir ro//skyes pa'i tshe na ni rnam par shes pa yang de'i rnam par shes pa'i phyir bya ba cung zad kyang med pas yid kyi rnam par shes pa yang dmigs pa med pa nyid du skye'o/ /gzhan dag na re bdag dang chos dmigs su med na nya bar 'dogs par mi rung ste/ nye bar 'dogs pa ni gsum yod na 'gyur gyi/gang yang rung ba zhig med na mi 'gyur te/ don gyi dngos dang / de dang 'dra ba'i yul gzhan dang / de gnyi ga dang 'dra ba ste/ dper na don gyi dngos me dang de dang 'dra ba bram ze'i khye'u dang / de gnyi ga'i thun mong gi chos ser ba nyid dam rno ba nyid yod na bram ze'i khye'u la me nye bar 'dogs par byed pa lta bu'o zhes zer ro//'di la bram ze'i khye'u la me nye bar 'dogs pa ni/ rigs sam rdzas shig nye bar 'dogs grang na nye bar 'dogs pa gnyi ga yang med do/ /de la re zhig thun mong gi chos ser ba nyid dam rno ba nyid ni me'i rigs kyis ma yin no//thun mong gi chos med par bram ze'i khye'u la rigs nye bar gdags su mi rung ste/ ha cang thal bar 'gyur ro/ /rigs chos de gnyis dang ldan pa ma yin yang rno ba nyid dang ser ba nyid rigs med par mi 'byung ba'i phyir bram ze'i khye'u la rigs nye bar 'dogs par 'gyur ro zhe na/rigs med par yang rno ba nyid dang / ser ba nyid bram ze'i khye'u la mthong ba'i phyir med par mi 'byung ba yang rigs pa ma yin no/ /med par mi 'byung ba ni nye bar 'dogs pa la med de/ me bzhin du bram ze'i khye'u la yang rigs yod pa'i phyir ro/ / de bas na bram ze'i khye'u la rigs nye bar gdags su mi rung ngo / /rdzas su nye bar gdags su mi rung ste/ spyi'i chos med pa'i phyir ro/ /me'i yon tan rno ba'am ser ba gang yin pa de nyid ni bram ze'i khye'u la med do/ /ci'i phyir zhe na/ de de las gzhan te/ bye brag ni rang gi gnas dang 'brel ba'i phyir ro//me'i yon tan med par bram ze'i khye'u la me nye bar gdags pa ni mi rigs so/ /gal te me'i yon tan dang 'dra bas rigs so zhe na/ de ltar na yang 'dra ba'i phyir me'i yon tan rno ba nyid dang ser ba nyid bram ze'i khye'u'i yon tan rno ba nyid dang ser ba nyid la nye bar gdags su ni rung gi//yon tan 'dra bas bram ze'i khye'u la me nye bar gdags su ni mi rung ste/ me ni yon tan gyi 'dra ba dang 'brel ba med pa'i phyir ro/ /de lta bas na rdzas nye bar gdags su yang mi rung ngo / /don gyi dngos kyang med de/ de'i rang gi ngo bo ni shes pa dang brjod pa thams cad kyi yul las 'das pa'i phyir ro//gtso bo la shes pa dang brjod pa yon tan gyi tshul gyis 'jug par zad de/ de'i rang rang gi ngo bo la ni mi reg go/ /gzhan du na yon tan don med par 'gyur ro/ /shes pa dang brjod pa ma gtogs par don gyi dngos kyi rang gi ngo bo yongs su gcod pa'i thabs gzhan med pas de'i phyir gtso bo'i rang gi ngo bo'i yul la shes pa dang brjod pa med pas don gyi dngos po med par khong du chud par bya'o//de bzhin du sgra'i bar du 'brel ba med par shes pa dang / brjod pa med pa yang med do/ /de ltar na brjod pa dang brjod par bya ba med pas don gyi dngos po med do//yang 'di dag thams cad ni btags pa nyid de dngos ni med do/ /btags pa zhes bya ba ni gang na gang med pa'i tshul gyis 'jug pa ste/ sgra thams cad kyang gtso bo la med par btags pa'i ngo bos 'jug go/ /de bas na dngos po med pa nyid de/de la bdag dang chos su med na nye bar 'dogs pa mi rigs so zhes smras pa gang yin pa de mi rigs so/ /rnam par shes pa gyur pa rab tu dbye ba yod pa mi shes te/ de bas na de'i dbye ba rab tu bstan pa'i phyir gyur pa de yang rnam gsum ste zhes bya ba smos so/ / gang la bdag nye bar 'dogs pa dang / chos nye bar 'dogs pa de yang rgyu'i dngos po dang 'bras bu'i dngos pos tha dad pa'o/ /de la rgyur 'gyur ba ni kun gzhi rnam par shes pa la rnam par smin pa dang rgyu mthun pa'i bag chags rgyas pa gang yin pa'o/ /'bras bur gyur pa ni sngon gyi las kyis 'phangs pa yongs su rdzogs la/rnam par smin pa'i bag chags 'byung ba rnyed nas ris mthun pa gzhan dag tu kun gzhi rnam par shes pa mngon par 'grub pa gang yin pa dang / rgyu mthun pa'i bag chags 'byung ba rnyed nas 'jug pa'i rnam par shes pa dang nyon mongs pa can gyi yid kun gzhi'i rnam par shes pa las mngon par 'grub pa gang yin pa'o//de la 'jug pa'i rnam par shes pa dge ba dang mi dge ba ni kun gzhi rnam par shes pa la rnam par smin pa'i bag chags dang rgyu mthun pa'i bag chags skyed do/ /lung du ma bstan pa dang / nyon mongs pa can gyi yid ni rgyu mthun pa'i bag chags nyid skyed do//gyur pa rnam pa gsum bshad pa gang yin pa de yang mi shes nas/ de bas na de'i rab tu dbye ba bstan pa'i phyir ro/ /rnam par smin dang ngar sems dang / /yul la rnam par rig pa'o/ /zhes bya ba smos so/ /gyur pa rnam pa gsum po de dag ni rnam par smin pa zhes bya ba dang /ngar sems pa zhes bya ba dang / yul la rnam par rig pa zhes bya'o/ /de la las dge ba dang mi dge ba'i bag chags yongs su smin pa'i dbang gis ji ltar 'phangs pa'i 'bras bu mngon par 'grub pa ni rnam par smin pa'o/ /nyon mongs pa can gyi yid ni rtag tu ngar sems pa'i bdag nyid yin pas ngar sems pa'o//gzugs la sogs pa yul so sor snang bas mig la sogs pa'i rnam par shes pa rnam pa drug ni yul la rnam par rig par bya'o/ /de'i rang gi ngo bo bshad pa med par de mi rtogs pas de bas na rang gi ngo bo gang yin pa de rim pa bzhin du rab tu bstan pa'i phyir/de la kun gzhi rnam shes ni/ /rnam smin sa bon thams cad pa/ /zhes bya ba smos so/ /de la zhes bya ba ni gang gyur pa rnam pa gsum bshad ma thag pa la bya'o/ /kun gzhi zhes bya ba ni kun gzhi rnam par shes pa la bya'o/ /rnam par shes pa gang yin pa de rnam par smin par gyur pa'o//de kun nas nyon mongs pa'i chos thams cad kyi sa bon gyi gnas yin pas kun gzhi ste/ kun gzhi dang rten zhes bya ba ni rnam grangs su gtogs pa'o/ /yang na de la chos thams cad 'bras bu'i dngos por 'jug cing 'brel ba'am de chos thams cad la rgyu'i dngos por 'jug cing 'brel bas kun gzhi'o//rnam par shes par byed pas rnam par shes pa'o/ /khams dang / 'gro ba dang / skye gnas dang / rigs thams cad du las dge ba dang mi dge ba'i rnam par smin pas rnam par smin pa'o/ /chos thams cad kyi sa bon gyi gnas yin pas sa bon thams cad pa'o//gal te 'jug pa'i rnam par shes pa las gud na kun gzhi rnam par shes pa yod na go ba de'i phyir dmigs pa dang rnam pa yang brjod dgos te/ dmigs pa med pa dang / rnam pa med pa'i rnam par shes pa ni mi rung ngo //de dmigs pa med pa dang rnam pa med par ni mi 'dod mod kyi/ 'on kyang dmigs pa dang rnam pa yongs su ma chad pa'o/ /ci'i phyir zhe na/ 'di ltar kun gzhi rnam par shes pa ni nang gi nye bar len pa'i rnam par rig pa dang / phyi rol gyi rnam pa yongs su ma chad pa snod kyi rnam par rig pa dang rnam pa gnyis su 'byung ste/de la nang gi nye bar len pa ni kun brtags pa'i ngo bo nyid la mngon par zhen pa'i bag chags dang / gnas dang bcas pa'i dbang po'i gzugs dang ming ste/ de'i dmigs pa shin tu phra ba'i phyir ro/ /de ni len pa dag dang gnas/ /rnam par rig pa mi rig ste//gang la len pa mi rig pa dang / gnas kyi rnam par rig pa mi rig pa yod pa'i phyir kun gzhi rnam par shes pa de len pa dang gnas kyi rnam par mi rig pa'o/ /de la len pa ni len par byed pa'o/ /de yang bdag la sogs par rnam par rtog ba'i bag chags dang / gzugs la sogs pa'i chos su rnam par rtog pa'i bag chags so//de la yod pa'i phyir kun gzhi rnam par shes pas bdag la sogs pa rnam par rtog pa dang / gzugs la sogs par rtog pa 'bras bur len pas bdag la sogs pa rnam par rtog pa dang / gzugs la sogs par rnam par rtog pa'i bag chags de ni len pa zhes bya ste/de ni 'di la 'di'o zhes tshor ba'i rnam par mi rig pas de'i phyir de ni len pa mi rig pa zhes bya'o/ /yang na gnas nye bar len pas len pa'o/ /gnas ni lus so/ /de yang gnas dang bcas pa'i dbang po'i gzugs dang ming ngo / /de'i nye bar len pa gang yin pa de ni nye bar 'gro ba ste/de grub pa dang bde ba gcig pas len pa'o/ /de la 'dod pa dang / gzugs kyi khams na ni gnyi ga len to/ /gzugs kyi 'dod chags dang bral bas gzugs med pa'i khams na ni/ gzugs su rnam par smin pa mi 'grub pas ming bzhi len pa nyid de/ 'on kyang de na gzugs bag chags kyi dus nyid de/rnam par smin pa'i dus ni ma yin no/ /len pa de la 'di'o zhes rig par mi nus pas de'i phyir mi rig pa zhes bya'o/ /gnas kyi rnam par rig pa snod kyi 'jig rten gnas par rnam par rig pa ste/ de yang dmigs pa dang rnam pa yongs su ma chad par 'byung bas mi rig pa zhes bya'o//ji ltar rnam par shes pa dmigs pa dang rnam par yongs su ma chad par 'gyur zhing / 'di ni rnam par shes par smra ba ngag gi 'gog pa'i snyoms par 'jug pa la sogs pa'i dus dang mtshungs so/ /'gog pa la sogs pa'i dus na rnam par shes pa med par rtog par yang mi nus te/rigs pa dang 'gal ba dang mdo dang 'gal ba'i phyir ro/ /de la kun gzhi rnam shes ni zhes smos pas rnam par shes pa ni nges par sems las byung ba rnams dang mtshungs par ldan pa de'i phyir sems las byung ba gang dag yin pa dang / du zhig dang mtshungs par ldan pa yang bshad dgos la/de bzhin du ci sems las byung ba de dag dang rtag tu mtshungs bar ldan nam/ 'on te ma yin zhe na/ de'i phyir/ rtag tu reg dang yid byed dang / /reg dang 'du shes sems par ldan/ /zhes bya ba smos so/ /rtag tu zhes bya ba ni kun gzhi rnam par shes pa ji srid pa de srid du reg pa dang /yid la byed pa dang / tshor ba dang / 'du shes dang / sems pa zhes bya ba kun du 'gro ba'i chos lnga po 'di dag dang ldan no/ /reg pa ni tshor ba'o/ /de la reg pa ni gsum 'dus nas dbang po'i 'gyur ba yongs su gcod pa ste/ tshor ba'i rten byed pa'i las can no//dbang po dang / yul dang / rnam par shes pa gsum nyid gsum mo/ /de rgyu dang 'bras bu'i dngos por dus mnyam du gnas pa ni gsum 'dus pa'o/ /de yod na de dang dus mnyam pa nyid na bde ba la sogs pa'i tshor ba dang mthun pa dbang po'i 'gyur ba gang yin pa de dang 'dra ba bde ba la sogs pa myong bar 'gyur ba'i yul gyi rnam pa yongs su gcod pa gang yin pa de reg pa'o//dbang po dang bye brag gang gis bde ba dang sdug bsngal la sogs pa'i rgyu nyid du 'gyur ba de ni de'i 'gyur ba'o/ /reg pa yang dbang po'i 'gyur ba dang 'dra bas dbang po'i reg pa'am/dbang bos reg pas reg pa zhes bya'o/ /de'i phyir yul gyi 'gyur ba yongs su gcod pa'i bdag nyid yin du zin kyang dbang po'i 'gyur ba yongs su gcod pa zhes bya ba bshad do/ /'di'i las ni tshor ba'i rten te/ de skad du mdo las kyang / bde ba myong bar 'gyur ba'i reg pa la brten nas/bde ba'i tshor ba 'byung ngo zhes rgya cher gsungs so/ /yid la byed pa ni sems kyi 'jug pa'o/ /'jug par byed pas 'jug pa ste/ dmigs pa la gang gis sems mngon du phyogs par byed pa'o/ /de ni dmigs pa la sems 'dzin pa'i las can te/sems 'dzin ba ni dmigs pa de nyid la sems yang dang yang du gtod pa'o/ /las de yang sems kyi rgyun gyi dmigs pa nges par yid la byed par bye brag can gyi dbang du byas nas bshad kyi/ de sems kyi skad cig re re la ni ma yin no/ /de ni skad cig re re nyid la las byed pa yin gyi/skad cig gzhan la ni ma yin no/ /tshor ba ni myong ba'i rang bzhin no/ /de yang yul sim par byed pa dang / gdung bar byed pa dang / de gnyi ga'i rnam pa las dben pa'i rang gi ngo bo mngon du byed pa'i bye brag gis rnam pa gsum du 'gyur te/ bde ba dang / sdug bsngal ba dang sdug bsngal ba yang ma yin bde ba yang ma yin pa'o//'di snyam du sems te/ las dge ba dang / mi dge ba rnams kyi 'bras bu rnam par smin pa 'dir myong bar byed pas myong ba ste/ de la bde ba myong ba ni las dge ba rnams kyi 'bras bu rnam par smin pa'o/ /sdug bsngal myong ba ni las mi dge ba rnams kyi 'bras bu rnam par smin pa'o//sdug bsngal yang ma yin bde ba yang ma yin pa myong ba ni las dge mi dge gnyi ga'i 'bras bu rnam par smin pa'o snyam du sems so/ /'dir kun gzhi rnam par shes pa nyid las dge ba dang / mi dge ba'i rnam par smin pa dang / don dam par na de dang mtshungs par ldan pa'i btang snyoms nyid las dge ba dang /mi dge ba rnams kyi 'bras bu rnam par smin pa'o/ /bde ba dang sdug bsngal ni las dge ba dang / mi dge ba'i rnam par smin pa las byung ba'i phyir rnam par smin pa zhes nye bar 'dogs so/ /de la bde ba myong ba ni gang byung na 'bral bar mi 'dod pa dang /'gags na slar phrad par 'dod pa skye'o/ /sdug bsngal myong ba ni gang byung na bral bar 'dod pa dang / 'gags na slar phrad par mi 'dod pa'o/ /sdug bsngal yang ma yin bde ba yang ma yin pa myong ba ni gang byung ngam 'gags kyang rung gnyi ga mi skye ba'o//'du shes ni yul la mtshan mar 'dzin pa'o/ /yul ni dmigs pa'o/ /mtshan ma ni de'i bye brag sngon po dang / ser po la sogs pa dmigs pa rnam par gzhag pa'i rgyu'o/ /de la 'dzin pa ni 'di sngon po nyid yin gyi ser po ni ma yin no zhes rtog pa'o/ /sems pa ni sems mngon par 'du byed pa yid g.yo bar byed pa ste/gang yod na khab long gi dbang gis lcags g.yo ba bzhin du dmigs pa la sems g.yo bar byed pa'o/ /tshor ba ni rnam pa gsum ste/ bde ba dang / sdug bsngal ba dang / sdug bsngal ba yang ma yin pa de ba yang ma yin pa'o//chos kyang rnam pa bzhi ste/ dge ba dang / mi dge ba dang / bsgribs pa'i lung du ma bstan pa dang / ma bsgribs pa'i lung du ma bstan pa yin no/ /de la kun gzhi rnam par shes pa la tshor ba spyir bshad pas tshor ba rnam pa gsum las tshor ba gang yin pa mi shes la/de bzhin du de yang ci dge ba'am/ mi dge ba'am/ bsgribs la lung du ma bstan pa'am/ ma bsgribs la lung du ma bstan pa gang yin gtol med pas de'i phyir/ de la tshor ba btang snyoms te/ de ni ma bsgribs lung ma bstan/ /zhes bya ba smos so/ /de la zhes bya ba ni kun gzhi rnam par shes pa nyid kyi skabs yin pas der bsnyegs so//kun gzhi rnam par shes pa la tshor ba btang snyoms nyid yin gyi/ bde ba yang ma yin sdug bsngal ba yang ma yin te/ de gnyis kyi dmigs ba dang / rnam pa yongs su chad pa'i phyir ro/ /de ni ma bsgribs lung ma bstan//zhes bya ba yang kun gzhi rnam par shes pa la bsnyegs so/ /de la ma bsgribs pa smos pa ni bsgribs pa'i lung du ma bstan pa rnam par gcad pa'i phyir ro/ /lung du ma bstan pa smos pa ni dge ba dang / mi dge ba rnam par bcad pa'i phyir ro/ /yid kyis pa'i nye ba'i nyon mongs pa glo bur ba rnams kyis ma bsgribs pa'i phyir ma bsgribs pa'o//rnam par smin pa yin pas rnam par smin par gyur pa ni dge ba dang mi dge bar lung bstan du med pas lung du ma bstan pa'o/ /reg la sogs pa yang de bzhin no/ /ji ltar kun gzhi rnam par shes pa gcig tu rnam par smin pa dang /dmigs pa dang rnam pa yongs su ma chad pa dang / rtag tu reg pa la sogs pa dang ldan pa dang / de la tshor ba btang snyoms nyid dang / ma bsgribs la lung du ma bstan pa de bzhin du reg pa la sogs pa yang gcig tu rnam par smin pa nyid dang / dmigs pa dang rnam pa yongs su ma chad pa dang /bdag ma gtogs par gzhan bzhi dang / kun gzhi rnam par shes pa dang rtag tu ldan no/ /de dag las tshor ba btang snyoms nyid dang / ma bsgribs la lung du ma bstan pa yang kun gzhi rnam par shes pa bzhin te/ rnam par smin pa dang mtshungs par ldan pa rnams rnam par smin pa ma yin pa dang /dmigs pa dang rnam pa yongs su ma chad pa yang dmigs pa dang / rnam pa yongs su chad mi srid de/ gzhan du yang de bzhin du brjod par bya'o/ /ci kun gzhi rnam par shes pa de ji srid 'khor gyi nang du tha dad pa med par 'jug pa zhig gam/'on te rgyun gyis 'jug ce na/ de gcig pu tha dad pa med par 'jug pa ma yin te skad cig pa'i phyir ro/ /'on kyang de ni rgyun 'bab chu bo bzhin/ /de ni zhes bya ba ni kun gzhi rnam par shes pa nyid dang sbyar ro/ /de la rgyun ni rgyu dang 'bras bu bar chad med par rgyun du 'byung ba'o//chu'i tshogs kyi snga phyi'i chu rgyun mi 'chad par 'bab pa ni chu bo zhes bya'o/ /ji ltar chu bo rtswa dang shing dang lci ba la sogs pa de ded cing 'bab pa de bzhin du kun gzhi rnam par shes pa bsod nams dang bsod nams ma yin pa dang / mi g.yo ba'i las kyi bag chags dang ldan pa yang reg pa dang yid la byed pa la sogs pa bsdus nas ji srid 'khor gyi bar du rgyun mi 'chad par rgyun du 'byung ngo //de ltar rgyun du 'byung ba de gang gi tshe na ldog par 'gyur snyam pa la/ dgra bcom nyid na de ldog go/ /zhes bya ba smos so/ /dgra bcom pa nyid ces bya ba ci zhe na gang dang ldan na 'di dgra bcom pa zhes bya'o//ci dang ldan na dgra bcom pa zhes bya zhe na/ zad pa shes pa dang / mi skye ba shes pa thob pa'i phyir ro/ /de'i tshe kun gzhi rnam par shes pa la gnas ngan len ma lus par spangs pa'i phyir/ kun gzhi rnam par shes pa ldog par 'gyur te/ de nyid kyi dus na dgra bcom pa'o//rnam par smin par gyur pa rnam par dbye ba dang bcas pa bshad zin to/ /da ni ngar sems pa zhes bya ba gyur pa gnyis pa ste/ de la gnas te rab 'byung zhes rgya cher smos pa'o/ /de la ji ltar mig la sogs pa'i rnam par shes pa rnams kyi gnas mig la sogs pa dang /gzugs la sogs pa ni dmigs par grags pa de bzhin du nyon mongs pa can gyi yid kyi gnas dang dmigs par ma grags te/ rnam par shes pa gnas dang dmigs pa la mi ltos pa ni mi rung bas de'i phyir nyon mongs pa can gyi yid kyi gnas dang dmigs pa bstan pa dang /nges pa'i tshig bstan pa'i phyir/ de la gnas te rab 'byung zhing / /de la dmigs pa yid ces bya/ /rnam shes par sems bdag nyid can/ /zhes bya ba smos so/ /de la gnas te rab tu 'byung zhes bya ba la/ de la zhes bya ba'i sgra ni kun gzhi rnam par shes pa nyid la sbyar ro//kun gzhi rnam par shes pa ni de'i bag chags kyi gnas yin te/ de bas na de la gnas bcas nas 'byung ste/ rgyun gyis skye zhes bya ba'i tha tshig go/ /yang na khams sam sa gang du kun gzhi rnam par shes pa rnam par smin pa thob par nyon mongs pa can gyi yid de yang khams de dang sa de'i yin te/de kun gzhi de la rag lus pas 'jug pa'i phyir de la gnas te 'byung ba'o/ /de la dmigs pa zhes bya ba ni kun gzhi rnam par shes pa nyid la dmigs pa ste/ 'jig tshogs la lta ba la sogs pa dang mtshungs par ldan bas kun gzhi rnam par shes pa lang dang nga yir dmigs pa'i phyir ro//ji ltar na sems gang las byung ba de nyid de'i dmigs par 'gyur zhe na/ ji ltar kha cig de mi 'dod kyang dus la lar sems gang las yid kyi rnam par shes pa 'byung ba de nyid dmigs pa yin zhing de 'byung ba lta bu'o/ /yid ces bya ba'i rnam par shes pa ni yid ces bya ba'i rnam par shes pa kun gzhi rnam par shes pa gang yin pa de la brten te 'byung ba'o//de la dmigs pa yid ces bya/ /zhes bya ba 'dis ni kun gzhi rnam par shes pa dang / 'jug pa'i rnam par shes pa las rnam par 'byed do//yang de'i rang bzhin gang yin snyam pa la/ ngar sems bdag nyid can zhes bya ba smos te/ de ltar ngar sems pa'i bdag nyid yin pas nges pa'i tshig gi tshul gyis yid ces bya'o/ /rnam par shes pa'i rang gi ngo bo yin pas de nges par sems las byung ba rnams dang mtshungs par ldan par gyur na sems las byung ba ni gang dag dang ji snyed dus ni/ji srid du mtshungs par ldan par 'gyur ba de mi shes te/ de'i phyir/ bsgribs la lung du ma bstan pa'i/ /nyon mongs bzhi dang rtag tu 'grogs/ /zhes bya ba smos so/ /sems las byung ba dag ni rnam pa gnyis te/nyon mongs pa dang de las gzhan pa'o/ /de las gzhan pa dag las rnam par dbye ba'i phyir/ nyon mongs pa zhes bya ba smos so/ /nyon mongs pa'ang drug ste/ de dag thams cad dang mtshungs par ldan pa ma yin pas de'i phyir bzhi zhes bya ba smos so/ /'grogs zhes bya ba ni mtshungs par ldan pa'o//nyon mongs pa yang rnam pa gnyis te mi dge ba dang / bsgribs la lung du ma bstan pa'o/ /mi dge ba dag las bye brag tu dbye ba'i phyir bsgribs la lung du ma bstan zhes bya ba smos so/ /bsgribs pa'i rnam par shes pa ni mi dge ba rnams dang mtshungs par ldan pa mi srid de/bsgribs ba ni nyon mongs pa can gyi phyir ro/ /lung du ma bstan pa ni dge ba dang mi dge ba nyid du lung bstan du med pa'i phyir ro/ /rtag tu zhes bya ba ni dus thams cad du ste/ ji srid du de yod pa de srid du de dag dang mtshungs par ldan no/ /spyir bstan pas khyad par mi shes nas khyad par ston to//bdag tu lta dang bdag tu rmongs/ /bdag rgyal bdag chags zhes bya ba ste/ nye bar len pa'i phung po rnams la bdag tu mthong ba ni bdag tu lta ba ste/ 'jig tshogs la lta ba zhes bya ba'i tha tshig go/ /rmongs pa ni mi shes pa ste/ bdag mi shes pa ni bdag tu rmongs pa'o//bdag tu nga rgyal ni bdag gi yul la ngar sems pa ste/ nga'o snyam pa'i nga rgyal zhes bya ba'i tha tshig go/ /bdag chags ni bdag la chags pa ste/ bdag la dga' zhes bya ba'i tha tshig go/ /de la kun gzhi rnam par shes pa'i rang gi ngo bo la rmongs par gyur na kun gzhi rnam par shes pa la bdag tu lta ba 'byung ngo //bdag tu mthong bas sems khengs pa gang yin pa de ni nga'o snyam pa'i nga rgyal lo/ /de gsum yod na bdag tu bsams pa'i dngos po la mngon par chags pa gang yin pa de ni bdag la chags pa'o/ /yang smras pa/ma rig pa dang bdag lta dang / /nga'o nga rgyal srid 'di bzhis/ /kun gzhi nyon mongs can 'gyur yid/ /ngar sems pa yi mtshan nyid de/ /phyin ci log gi rgyu byed pa'ang / /yid de de dag nyon mongs can/ /sems dge lung du ma bstan tshe/ /rtag tu ngar 'dzin rgyu yin no//bdag tu rmongs pa la sogs pa nyon mongs pa de dag kyang yid bzhin dus dgu pa ste/ 'dir spyir brjod pa ci rang gis pa nyid dang mtshungs par ldan nam/ 'on te gzhan gyis pa dag dang mtshungs par ldan pa mi shes nas/ de'i phyir gang du skyes pa de'i'o zhes bya ba smos so/ /gang du skyes pa ni gang du byung ba'o//de'i'o zhes bya ba ni khams dang sa gang du skyes pa khams de dang sa de nyid kyi dang mtshungs par ldan te/ khams gzhan dag kyang sa gzhan dag gi dang ni ma yin no/ /ci de nyon mongs pa bzhi nyid dang mtshungs par ldan nam/ smras pa ma yin no/ /'on kyang gzhan reg sogs kyang mtshungs par ldan no zhes bya bar sbyar ro//kyang zhes bya ba'i sgra ni bsdu ba'i don to/ /reg sogs zhes bya ba ni reg pa dang / yid la byed pa dang / tshor ba dang / 'du shes dang / sems pa ste/ chos lnga po de dag ni kun du 'gro bas rnam par shes pa thams cad dang mtshungs par ldan te/de dag kyang gang du skyes pa de nyid dang mtshungs par ldan gyi/ khams dang sa gzhan gyi dang ni ma yin no/ /yang na gzhan zhes bya ba ni rtsa ba'i rnam par shes pa dang mtshungs par ldan pa dag las rnam par dbye ba'i phyir te/ rtsa ba'i rnam par shes pa'i reg pa la sogs pa ni ma bsgribs la lung du ma bstan pa'o//nyon mongs pa can gyi yid ni yid bzhin du bsgribs la lung du ma bstan pa'o/ /gal te nyon mongs pa can gyi yid de dge ba dang / nyon mongs pa can dang / lung du ma bstan pa'i dus na yang bye brag med par 'byung na ni de'i ldog pa med par 'gyur ro//mi ldog na ni de la thar pa ga la yod de thar pa med par ji ltar mi 'gyur zhe na/ mi 'gyur te/ /'di ltar de la dgra bcom med/ /'gog pa'i snyoms par 'jug la med/ /'jig rten 'das pa'i lam na'ang med/ /dgra bcom pa ni nyon mongs pa ma lus par spangs pas nyon mongs pa can gyi yid med de/de ni srid pa'i rtse mo'i nyon mongs pa bsgoms pas spang bar bya ba bzhin du dgra bcom pa nyid thob pa na bar chad med pa'i lam nyid kyis spongs te/ de na dgra bcom pa nyid kyi tshe na nyon mongs pa gzhan bzhin du med do/ /phyir mi 'ang ba ci yang med pa'i skye mched kyi 'dod chags dang bral ba 'gog pa'i snyoms par 'jug pa thob pa yang lam gyi stobs kyis 'gog pa'i snyoms par 'jug pa thob pas 'gog pa'i snyoms par 'jug pa'i dus na yang lam bzhin du 'gag par 'gyur ro//'gog pa las langs nas yang kun gzhi rnam par shes pa nyid las 'byung ngo //'jig rten 'das pa'i lam na'ang med/ /'jig rten las 'das pa smos pa ni 'jig rten pa rnam par gcad pa'i phyir ro/ /'jig rten pa'i lam na ni nyon mongs pa can gyi yid 'byung ba nyid do/ /bdag med par mthong ba ni bdag la sogs par lta ba'i gnyen po yin pas 'jig rten las 'das pa'i lam na de 'byung bar mi nus te/gnyen po dang mi mthun pa'i phyogs gnyis cig car du med pas 'jig rten las 'das pa'i lam na de 'gag go/ /de las langs nas yang kun gzhi rnam par shes pa nyid las 'byung ngo //'di ni gyur pa nyid pa'o/ /zhes bstan pa bshad zin to/ /zhes mjug sdud pa'o/ /gyur pa gnyis pa'i 'og tu gyur pa gsum pa brjod dgos pas/ gsum pa yul rnam drug po la/ /dmigs pa gang yin de dag ste/ /zhes bya ba smos so/ /gsum pa ni rnam par shes pa gyur pa zhes bya ba'i tshig gi lhag ma'o//rnam drug ces bya ba ni rnam pa drug ste/ gzugs dang / sgra dang / dri dang / ro dang / reg bya dang / chos kyi bdag nyid kyi yul lo/ /yul la dmigs pa gang yin pa ni 'dzin pa dang rtog pa zhes bya ba'i tha tshig go/ / de yang ci dge ba'am mi dge ba'am lung du ma bstan pa zhig ce na/ de'i phyir/ dge dang mi dge gnyi ga min/ /zhes bya ba smos so/ /dge ba dang mi dge ba dang / gnyi ga min zhes bya ba lung du ma bstan pa'ang ma yin te/ ma chags pa dang zhe sdang med pa dang gti mug med pa dang mtshungs par ldan pa ni dge ba'o//chags pa dang zhe sdang dang gti mug dang mtshungs par ldan pa ni mi dge ba'o/ /dge ba dang mi dge ba dang mtshungs par ldan pa ma yin pa ni gnyi ga ma yin pa ste/ dge ba'ang ma yin mi dge ba'ang ma yin zhes bya ba'i tha tshig go/ /de yang sems las byung ba ci 'dra ba dag dang mtshungs par ldan pa de dang mtshungs par ldan pa'i sems las byung ba ni ci snyed cig yod ce na/de'i phyir/ kun du 'gro ba bye brag nges/ /sems las byung ba dge ba dang / /de bzhin nyon mongs nye nyon mongs/ /tshor ba gsum dang de mtshungs ldan/ /zhes bya ba smos so//kun du 'gro ba la sogs pa gang bstan pa de dag mi shes te/ de bas na de rab tu bstan pa'i phyir/ dang po'i reg la sogs pa dang zhes bya ba smos so/ /thog mar bshad pas dang po ste/ /'di ltar kun du 'gro ba dang / /rtag tu reg dang yid byed dang / /reg dang 'du shes sems par ldan//zhes bya ba thog ma nyid du bshad pa'o/ /de dag gi dang po ni reg pa yin pas reg pa la sogs pa'o/ /reg pa dang yid la byed pa la sogs pa chos lnga po de dag ni sems thams cad kyi rjes su 'gro bas kun du 'gro ba dag go/ /'di ltar de dag ni kun gzhi rnam par shes pa dang /nyon mongs pa can gyi yid dang / 'jug pa'i rnam par shes pa rnams la bye brag med par 'byung ngo / /bye brag tu nges pa'i dbang du byas nas/ 'dun mos dran dang bcas pa dang / /ting nge 'dzin blo bye brag nges/ /zhes bya ba smos so/ /bye brag can la nges pas bye brag tu nges pa ste/ de dag gi yul ni bye brag can nyid yin gyi thams cad ni ma yin no/ /de la 'dun pa ni bsams pa'i dngos po la 'dod pa ste/ ma bsams pa la 'dun pa med pa'i phyir yul so sor nges pa nyid du bstan pa yin no/ /blta ba dang mnyan par bya ba la sogs pa'i yul bsams pa'i dngos po gang yin pa de ni bsams pa'o//de la mthong ba dang thos ba la sogs par smon pa ni 'dun pa ste/ da ni brtson 'grus rtsom pa'i rten byed pa'i las can no/ /mos pa ni nges pa'i dngos po la de bzhin du nges par 'dzin pa'o/ /nges par smos pa ni nges pa ma yin pa dgag pa'i phyir te/rigs pa'am yid ches pa'i lung gi dngos po la the tshom med pa gang yin pa de nges pa ste/ mi rtag pa dang sdug bsngal ba la sogs pa'i rnam pa gang gis rnam par nges pa'i rnam pa de nyid kyis dngos po de la sems 'jog pa ste/ 'di ni de bzhin nyid kyi gzhan du ni ma yin no zhes nges par 'dzin pa ni mos pa'o//de ni mi 'phrogs pa nyid kyi las can te/ mos pa gces su byed pa ni phas kyi rgol ba rnams kyis rang gi grub pa'i mtha' las 'phrog par mi nus so/ /dran pa ni 'dris pa'i dngos po ma brjed pa ste/ sems kyi mngon par brjod pa nyid do//'dris pa'i dngos po ni sngon gyi myong ba'o/ /ma brjed pa ni dmigs pa la 'dzin pa chud mi za bar byed pa'i rgyu'o/ /sngon bzung ba'i dngos po la dmigs pa'i rnam pa yang dang yang dran pa ni mngon par brjod pa ste mngon par brjod pa kho na mngon par brjod pa nyid do//de ni rnam par mi g.yeng ba'i las can te/ dmigs pa mngon par brjod pa yod na dmigs pa gzhan nam/ rnam pa gzhan la sems rnam par g.yeng ba med pas rnam par g.yeng ba med pa'i las can no/ /ting nge 'dzin ni brtag pa'i dngos po la sems rtse gcig pa nyid do/ /brtag pa'i dngos po ni yon tan du'am/nges par brtag par bya'o/ /rtse gcig pa nyid ni dmigs pa gcig pa nyid do/ /sems mnyam par gzhag na yang dag pa ji lta ba bzhin du rab tu shes pa'i phyir shes pa'i rten byed pa'i las can no/ /blo ni shes rab bo/ /de yang brtag pa'i dngos po nyid rab tu rnam par 'byed pa ste/rigs pa dang / rigs pa ma yin pas bskyed pa dang / gzhan pa'o/ /rnam par 'byed par byed pas rab tu rnam par 'byed pa ste/ rang dang spyi'i mtshan nyid 'dres pa lta bu'i chos rnams la yang dag pa'am log par so sor rtogs pa'o/ / rigs pa ni gsha' ba ste/ de yang yid ches pa'i lung dang / rjes su dpag pa dang mngon sum mo/ /rigs pa rnam pa de gsum gyis bskyed pa gang yin pa de ni rigs pas bskyed pa'o/ /de yang thos pa las byung ba dang / bsams pa las byung ba dang / bsgoms pa las byung ba ste/de la yid ches pa'i gsung rab tshad ma nyid kyis rtogs pa gang yin pa de ni thos pa las byung ba'o/ /rigs pa nges par sems pa las skyes pa ni bsams pa las byung ba'o/ /ting nge 'dzin las skyes pa ni bsgoms pa las byung ba'o/ /rigs pa ma yin pa ni yid ches pa ma yin pa'i lung dang /rjes su dpag par snang ba dang / log par bsams pa'i ting nge 'dzin te/ rigs pa ma yin pa des bskyed pa ni rigs pa ma yin pas bskyed pa'o/ /skye ba thob pa dang 'jig rten pa'i tha snyad shes pa ni rigs pas bskyed pa'ang ma yin/ mi rigs pas bskyed pa'ang ma yin no//'di ni som nyi zlog pa'i las can te/ som nyi zlog pa ni shes rab kyis chos rnams rab tu rnam par phye nas nges pa 'thob pa'i phyir ro/ /chos lnga po de dag ni phan tshun tha dad du gyur nas 'byung ba'o/ /de ltar na gang du mos pa der gzhan dag gdon mi za bar mi 'byung ste/ thams cad la yang de bzhin du brjod par bya'o/ /bye brag tu nges pa rnams bshad zin to// //da ni de'i 'og tu bstan pa dge ba dag brjod dgos pas de'i phyir/ dad dang ngo tsha khrel yod dang / /ma chags la sogs gsum brtson 'grus/ /shin tu sbyangs dang bag yod bcas//rnam mi 'tshe dge zhes bya ba smos te/ de dag ni chos bcu gcig go zhes bya ba ni tshig gi lhag ma'o/ /de la dad pa ni las dang / 'bras bu dang ldan pa dang / dkon mchog yod pa dang / yon tan can dang nus pa dag la mngon par yid ches pa dang / sems dang ba dang /'dod pa'o/ /dad pa ni rnam pa gsum du 'gyur te/ dngos po yod pa yon tan can nam/ yon tan can ma yin pa la yid ches pa'i rnam pa dang / yod pa yon tan can la dang ba'i rnam pa dang / yod pa yon tan thob bar byed dam skyes pa nus pa la 'dod pa'i rnam pa'o//sems dang ba zhes bya ba la/ dad pa ni sems kyi rnyog pa dang mi mthun pas de'i phyir de dang mtshungs par ldan pa nyon mongs pa dang / nye ba'i nyon mongs pa'i dri ma'i rnyog pa med pas sems dang ba la brten te dang bar 'gyur bas dang ba zhes bya'o/ /de ni 'dun pa'i rten byed pa'i las can no//ngo tsha shes pa ni bdag gam chos kyi dbang du byas te/ kha na ma tho bas 'dzem pa'o/ /dam pa rnams kyis smad pa dang / rnam par smin pa mi 'dod pa yin pas/ sdig pa nyid kha na ma tho ba ste/ byas kyang rung ma byas kyang rung /kha na ma tho ba des/ sems bag 'khums pa'i 'dzem pa gang yin pa de ni ngo tsha shes pa'o/ /'di ni nyes par spyod pa legs par sdom pa'i rten byed pa'i las can no/ /khrel yod pa ni 'jig rten gyi dbang du byas te kha na ma tho bas 'dzem pa'o/ / 'jig rten na 'di ni smad pa ste/ bdag la las 'di lta bu rig na smod par 'gyur ro zhes tshigs su bcad pa ma yin pa la sogs pa'i 'jigs pas kha na ma tho ba la 'dzem pa ste/ 'di yang nyes par spyod pa legs par sdom pa'i rten byed pa'i las can no/ /ma chags pa ni chags pa'i gnyen po'o//chags pa zhes bya ba ni srid pa dang srid pa'i yo byad rnams la kun du chags pa dang smon pa gang yin pa'o/ /de'i gnyen po ni ma chags pa ste/ srid pa dang srid pa'i yo byad rnams la ma chags pa dang mi phyogs pa'o/ /'di ni nyes bar spyod pa la mi 'jug pa'i rten byed pa'i las can no//zhe sdang med pa ni zhe sdang gi gnyen po ste/ zhe sdang ni sems can rnams dang / sdug bsngal dang sdug bsngal gyi gnas kyi chos rnams la kun nas mnar sems pa'o/ /zhe sdang med pa ni zhe sdang gi gnyen po yin pas sems can rnams dang / sdug bsngal ba dang sdug bsngal gyi gnas kyi chos rnams la kun nas mnar sems med pa'o//'di yang nyes par spyod pa la mi 'jug pa'i rten byed pa'i las can no/ /gti mug med pa ni gti mug gi gnyen po ste/ yang dag pa ji lta ba bzhin du yang dag par rtogs pa'o/ /gti mug ni las dang 'bras bu dang /bden pa dang / dkon mchog rnams mi shes pa'o/ /gti mug gi gnyen po yin pas gti mug med pa ni las dang 'bras bu dang / bden pa dang / dkon mchog de dag yang dag par rtogs pa ste/ 'di yang nyes par spyod pa la mi 'jug pa'i rten byed pa'i las can no//brtson 'grus ni le lo'i gnyen po ste/ dge ba la sems mngon par spro ba yin gyi/ nyon mongs pa can la ni ma yin no/ /nyon mongs pa can la spro ba ni le lo yin pas le lo nyid do/ /'di ni dge ba'i phyogs yongs su rdzogs par byed pa dang / yongs su sgrub pa'i las can no//shin tu sbyangs pa ni gnas ngan len gyi gnyen po ste/ lus dang sems las su rung ba nyid do/ /gnas ngan len gyi lus dang sems las su mi rung ba nyid dang / kun nas nyon mongs pa'i chos kyi sa bon rnams te/ de med na shin tu sbyangs pa yod pa'i phyir ro//de la lus las su rung ba ni lus rang gi dgos pa rnams la ldang ba yang ba gang las 'byung ba'o/ /sems las su rung ba ni yang dag pa yid la byed pa la zhugs pa'i sems kyi sim pa dang / yang ba'i rgyu sems las byung ba chos gzhan du gyur pa gang yin pa ste/ de dang ldan na dmigs pa la sems thogs pa med par 'jug pas de'i phyir sems las su rung ba zhes bya'o//lus kyi reg bya'i khyad par dga' bas zin pa la lus shin tu sbyangs par rig par bya ste/ yid dga' na lus shin tu sbyangs par 'gyur ro zhes mdo las 'byung ba'i phyir ro/ /'di ni de'i dbang gis gnas gyur pas nyon mongs pa'i sgrib pa ma lus par sel ba'i las can no//bag yod bcas ni bag yod pa dang bcas pas bag yod bcas pa ste/ de yang gang zhe na/ btang snyoms so/ /de ci'i phyir zhe na/ gcig tu dge ba dang 'dir dge ba thams cad bshad pa'i skabs yin pa dang /dad pa la sogs pa bzhin du mngon du ma smos pa dang / dge ba lhag pa gzhan med pa'i phyir/ btang snyoms nyid la bya bar mngon no/ /de la bag yod pa ni bag med pa'i gnyen po'o/ /ma chags pa nas brtson 'grus kyi bar ni bag yod pa ste/ gang ma chags pa la sogs pa la gnas nas mi dge ba'i chos rnams spong zhing de'i gnyen po dge ba'i chos rnams kyang sgom pa ma chags pa la sogs pa de dag ni bag yod pa'o/ /de bas na bag med pa'i gnyen po nyid de/ bag med pa ni 'di las zlog pa'i phyir ro/ /de ni 'jig rten pa dang /'jig rten las 'das pa'i phun sum tshogs pa thams cad yongs su rdzogs par byed pa'i las can no/ /btang snyoms ni sems mnyam pa nyid dang / sems rnal du 'jug pa nyid dang / sems lhun gyis grub pa nyid de/ tshig 'di gsum gyis btang snyoms kyi thog ma dang /bar dang / tha ma'i dus bstan to/ /'di la bying ba dang / rgod pa ni sems mi mnyam ba ste/ de med pas thog mar sems mnyam pa nyid do/ /de'i 'og tu mngon par 'du bya ba med cing bsgrim mi dgos par mnyam par gzhag pa'i sems ci rigs par mnyam pa nyid du 'jug pa ni rnal du 'dug pa nyid do//de'i dus na bsgoms nas ring por ma lon pa'i phyir bying ba dang rgod pa 'byung bar dogs pa dang ldan no/ /de'i 'og tu bsgom ba khyad zhugs par gyur pas de'i mi mthun pa'i phyogs thag ring du gyur pa'i phyir dgos pa med de/ bying ba dang rgod pa ni gnyen po'i rgyu rnams la rtsol ba mi byed par lhun gyis grub pa'i dus na sems lhun gyis grub pa nyid de/'di ni nyon mongs pa dang / nye ba'i nyon mongs pa thams cad kyi skabs mi 'byed pa'i rten byed pa'i las can no/ /rnam par mi 'tshe ba ni rnam par 'tshe ba'i gnyen po ste/ gsod pa dang 'ching ba la sogs pas sems can rnams la rnam par tho mi 'tshams bas mi 'tshe ba ste/sems can rnams la snying rje ba/ /bsod nyams sel bas snying rje ba'o/ /bsod nyams zhes bya ba ni bde ba ste/ bde ba sel zhes bya ba'i tha tshig go/ /snying rje can ni pha rol sdug bsngal na sdug bsngal bar 'gyur ba'i phyir ro//'di ni rnam par tho mi 'tshams pa'i las can no/ /dge ba bcu gcig bshad zin to// //de'i 'og tu nyon mongs pa rnams bstan pas de'i phyir de dag gi dbang du byas te/ nyon mongs ni/ 'dod chags khong khro gti mug dang //nga rgyal lta ba the tshom mo/ /zhes bya ba smos so/ /'dod chags dang khong khro ba dang gti mug ni 'dod chags khong khro gti mug go/ /de la 'dod chags ni srid pa dang longs spyod la lhag par chags pa dang smon pa ste/ de ni sdug bsngal kun bskyed pa'i las can no/ / sdug bsngal ni 'dir nye bar len pa'i phung po rnams te/ de dag ni 'dod pa dang / gzugs dang / gzugs med pa'i srid pa'i dbang gis mngon par 'grub pas de'i phyir 'dod chags kyi las ni sdug bsngal kun skyed par bshad do/ /khong khro ba ni sems can rnams la kun nas mnar sems pa ste/sems can rnams la sems rtsub pa'o/ /des non na sems can rnams la gsod pa dang 'ching ba la sogs pa'i gnod pa bya bar sems so/ /de ni reg par mi gnas pa dang nyes par spyod pa'i rten byed pa'i las can no/ /reg pa ni bde ba ste/ de dang lhan cig gnas pa ni reg par gnas pa'o//reg pa dang gnas ma yin pa ni reg par mi gnas pa ste/ sdug bsngal lhan cig ces bya ba'i tha tshig go/ /kun nas mnar sems kyi sems yod na gdon mi za bar yid mi bde ba kun du 'byung ba'i phyir sems la gdung bar 'gyur ro/ / sems kyi rjes su 'gyur bas lus la yang gdung bar yang 'gyur ba nyid de'i spyod lam thams cad du sdug bsngal dang bcas shing phongs ba dang bcas par gnas par 'gyur ro/ /zhe 'gras pa'i sems dang ldan pa ni nyes par spyod pa gang dang yang rigs pa ma yin pas khong khro ba ni reg par mi gnas pa dang /nyes par spyod pa'i rten byed pa'i las can du bshad do/ /gti mug ni ngan song rnams dang bde 'gro dang mya ngan las 'das pa dang de thob par byed pa'i rgyu dang de dag gi rgyu dang 'bras bur 'brel pa phyin ci ma log pa la gang mi shes pa'o/ /'di ni kun nas nyon mongs pa 'byung ba'i rten byed pa'i las can no//de la nyon mongs pa ste las dang / skye ba'i bdag nyid ni kun nas nyon mongs pa rnam pa gsum mo/ /de 'byung ba ni kun nas nyon mongs pa'i snga ma snga ma rgyur gyur pa las kun nas nyon mongs pa phyi ma phyi ma'i bdag nyid rnyed pa'o/ / 'byung ba'i rten byed pa ni rmongs par gyur la log par shes pa dang the tshom dang 'dod chags la sogs pa nyon mongs pa las yang srid pa'i las dang skye ba rnams 'byung gi rmongs par ma gyur na ni ma yin no/ /nga rgyal ni nga rgyal zhes bya ba thams cad kyang 'jig tshogs la lta ba la brten nas 'byung ba'o//de ni sems khengs pa'i mtshan nyid de/ 'di ltar phung po rnams la bdag gam bdag gi dngos por sgro btags nas/ 'di ni bdag go/ /'di ni bdag gi'o zhes de dang de'i khyad par gyis bdag khengs shing gzhan dag las lhag par rlom sems pa'o/ /de ni mi gus pa dang sdug bsngal 'byung ba'i rten byed pa'i las can no//mi gus pa ni bla ma rnams dang / gang zag yon tan can rnams la 'gying zhing lus dang ngag gi sri zhu med pa'o/ /sdug bsngal 'byung ba ni 'dir yang srid pa 'byung ba'o/ /de ni sems nges pa'i rang gi ngo bor bye brag med kyang sems khengs pa'i rgyu'i bye brag gis rnam pa bdun du tha dad de/nga rgyal dang che ba'i nga rgyal zhes bya ba la sogs pa'o/ /rigs dang shes rgya dang nor la sogs pas dma' babs kyang rigs dang shes rgya dang nor rnams kyis bdag che'o snyam du sems khengs pa gang yin pa'am/ rigs la sogs pas mtshungs pa nyid la bdag dang mtshungs so snyam du sems khengs pa gang yin pa de ni nga rgyal lo//che ba'i nga rgyal ni rigs dang shes rgya dang nor la sogs pa mtshungs pa bas gtong ba dang tshul khrims dang nyams rtsal la sogs pas bdag che'o snyam pa'am/ rigs dang nor dang rigs pa la sogs pas che ba la shes rgya dang nor la sogs pas bdag mtshungs so snyam pa ste/'di ni che ba'i nga rgyal lo/ /rigs dang shes rgya dang nor rnams kyi che ba bas kyang rigs dang shes rgya dang nor la sogs pas bdag che'o snyam du sems khengs pa gang yin pa 'di ni nga rgyal las kyang nga rgyal lo/ /nga'o snyam pa'i nga rgyal ni nye bar len pa'i phung po lnga po bdag dang bdag gi med pa rnams la bdag dang bdag gir mngon par zhen nas sems khengs pa gang yin pa ste/'di ni nga'o snyam pa'i nga rgyal lo/ /mngon pa'i nga rgyal ni gong ma'i khyad par thob par bya bar thob par bdag gis thob bo snyam du sems khengs pa gang yin pa ste/'di ni mngon pa'i nga rgyal lo/ /cung zad snyam pa'i nga rgyal ni rigs dang rigs pa la sogs pas khyed che bar 'phags pa bas rigs dang rigs pa la sogs pas cung zad cig gis bdag chung ngo snyam du sems khengs pa gang yin pa ste/ 'di ni cung zad snyam pa'i nga rgyal lo/ /log pa'i nga rgyal ni yon tan ma yin pa dang ldan la bdag yon tan dang ldan no snyam du sems khengs pa gang yin pa ste/ 'di ni log pa'i nga rgyal lo/ /yon tan ma yin pa ni 'chal ba'i tshul khrims la sogs pa ste/ de dag su la yod pa de yon tan ma yin pa dang ldan pa'o//de bas na bdag yon tan dang ldan no snyam pa des sbyin ba dang tshul khrims la sogs pa med bar yon tan de dang ldan pa nyid du khas blangs pa yin no/ /de'i phyir dngos po med bas na log pa'i nga rgyal zhes bya'o/ /lta ba zhes bya ba ni spyir bshad du zin kyang nyon mongs par gtogs pas nyon mongs pa'i bdag nyid lnga kho na ste/'jig tshogs la lta ba la sogs pa'i lta ba dang sbyar gyi 'jig rten gyi yang dag par lta ba dang / zag pa med ba'i lta ba ni ma yin no/ /de dag ni nyon mongs pa can dang / rtog pa'i tshul du bye brag med kyang dmigs pa dang rnam pa'i bye brag gis phan tshun tha dad do//de la 'jig tshogs la lta ba ni nye bar len pa'i phung po lnga po rnams la gang bdag dang bdag gir lta ba'o/ /mthar 'dzin par lta ba ni nye bar len pa'i phung po lnga po la bdag tu bzung ba de dag nyid la gang chad pa'am/ rtag par lta ba'o//log par lta ba ni lta ba gang gi rgyu'am 'bras bu'am/ byed pa la skur pa 'debs pa'am/ dngos po yod pa 'jig par byed pa ste/ 'di ni lta ba thams cad kyi nang na sdig pa yin pas log par lta ba zhes bya'o/ /lta ba mchog tu 'dzin pa ni nye bar len pa'i phung po lnga po rnams la mchog dang khyad par du 'phags pa dang gtso bo dang dam par lta ba gang yin pa'o//tshul khrims dang brtul zhugs mchog tu 'dzin pa ni nye bar len pa'i phung po lnga rnams la dag pa dang grol ba dang nges par 'byin par lta ba'o/ /the tshom ni las dang 'bras bu dang /bden pa dang dkon mchog rnams la yid gnyis za ba ste/ yod dam med snyam du blo sna tshogs byed pa ni yid gnyis so/ /'di ni shes rab las rang bzhin gzhan nyid do/ /nyon mongs pa drug bshad zin to// //bam po gnyis pa ste tha ma'o/ / de'i 'og tu bstan pa nye ba'i nyon mongs pa rnams bshad pa'i phyir/ khro dang khon du 'dzin pa dang / /'chab dang 'tshig dang phrag dog dang / /ser sna dang ni sgyur bcas dang / /g.yo rgyags rnam 'tshe ngo tsha med/ /khrel med rmugs dang rgod pa dang / /ma dad pa dang le lo dang / /bag med pa dang brjed ngas dang //rnam g.yengs shes bzhin ma yin dang / /'gyod dang gnyid kyang de bzhin te/ /rtog pa dang ni dpyod pa dang / /nye ba'i nyon mongs gnyis rnam gnyis/ /zhes bya ba smos so/ /de la khro ba ni 'phral du gnod pa byed pa gnas te/ sems kyi kun nas mnar sems pa gang yin pa'o//'di yang kun nas mnar sems kyi rang bzhin yin bas khong khro ba dang tha dad pa ma yin mod kyi 'di ni khong khro ba'i dus skabs kyi bye brag la btags pa'i phyir khong khro ba'i char gtogs pa ste/ 'phral du gnod par byed pa la gnas nas sems can dang sems can ma yin pa'i yul la sems kyi kun nas mnar sems pa ste/chad pas gcod pa la sogs pa'i rten byed pa'i las can gang yin pa de khro ba zhes gdags so/ /khon du 'dzin pa ni mdud par 'dzin pa ste/ khros pa'i 'og tu 'dis bdag la gnod pa 'di byas so zhes mdud par 'dzin ba'i bdag nyid shar gnyer ba de mi gtong bar rgyun du 'byung ba ni khon du 'dzin pa'o//'di ni mi bzod pa'i rten byed pa'i las can no/ /mi bzod pa ni gnod pa byed pa la ji mi snyam par mi byed kyi lan du gnod pa byed 'dod ces bya ba'i tha tshig ste/ 'di yang khro ba bzhin du zhe sdang gi dus skabs kyi bye brag la gdags pa yin pas de'i phyir btags pa'i yod par rig par bya'o//'chab pa ni bdag gi kha na ma tho ba mkhyud pa ste/ 'dun pa dang zhe sdang dang 'jigs pa la sogs pa bstsal te/ de la phan par 'dod ba'i gleng bar byed pas dus su khyod 'di lta bu byed pa'o zhes bstan na gti mug gi char gtogs pas kha na ma tho ba mkhyud pa ni 'chab pa'o//'chab pa ni gti mug gi char gtogs pa nyid de/ mkhyud pa'i rnam pa yin pa'i phyir ro/ /'di ni 'gyod pa dang reg par mi gnas pa'i rten byed pa'i las can no/ /'di ni chos nyid yin te/de kha na ma tho ba mkhyud pa na 'gyod par 'gyur ro/ /'gyod na gdon mi za bar yid mi bde ba dang mtshungs par ldan par 'gyur bas reg par mi gnas so/ /'tshig pa ni tshig brlang pos zher 'debs pa nyid do/ /'tshig brlang po ni mtshang 'dru ba'i tshul gyis zhe gcod pa dang /tshig rtsub pa'o/ /zher 'debs par byed pa'i ngang tshul ni zher 'debs pa ste/ de'i dngos po ni zher 'debs pa nyid do/ /tshig brlang pos za ba dang 'dra bar zher 'debs pas tshig brlang pos zher 'debs pa nyid do/ /'di yang khro ba dang khon du 'dzin pa sngon du 'gro ba sems kyi kun nas mnar sems pa'i rang bzhin yin pas khong khro ba'i char gtogs pa nyid do//rdzas su yod pa ma yin no/ /'di ni ngag gi nyes par spyod pa skyed pa'i las can dang / reg par mi gnas pa'i las can te/ de dag dang ldan pa'i gang zag dang 'grogs par dka' ba'i phyir ro//phrag dog ni gzhan gyi phun sum tshogs bal sems khong nas 'khrug pa ste/ 'thob pa dang bkur sti la lhag par chags pas gzhan gyi rnyed pa dang / bkur sti dang / rigs dang / tshul khrims dang / thos pa la sogs pa yon tan gyi khyad bar mthong nas zhe sdang gi char gtogs pa mi bzod par bya ba'i sems khong nas 'khrug pa ni phrag dog go//rang gi gnas la khyab par 'khrug pas khong nas 'khrug pa ste/ yid mi bde ba dang mtshungs par ldan pa dang / de sngon du 'gro ba'i phyir reg par mi gnas pa ste/ yid mi bde ba dang reg par mi gnas pa'i las can zhes bya'o//ser sna ni sbyin pa dang mi mthun pa sems kyi kun du 'dzin pa'o/ /zin pa'i dngos po chos dang zang zing dang mkhas pa'i bdag nyid rnams gang gis mchod pa dang phan gdags par 'dod pas 'dod pa'am/ mi 'dod pa la'ang rung ste/ sbyin par byed pa de ni sbyin pa'o/ /de yod na sbyin pa med par 'gyur ba'i phyir de dang mi mthun pa zhes bya'o/ /rnyed pa dang bkur sti la lhag par chags pas 'tsho ba'i yo byad rnams la 'dod chags kyi char gtogs pa'i sems kyi kun du 'dzin pa dang yongs su mi gtong ba'i/ 'dod pa ni ser sna'o/ /de ni yo byad ma bsnyungs pa'i rten byed pa'i las can te/ yo byad ma bsnyungs pa ni ser snas yo byad mi mkho ba rnams kyang stsogs par rig par bya'o/ /sgyu ni gzhan la bslu ba'i yang dag pa ma yin pa'i don ston pa ste/ rnyed pa dang bkur sti la lhag par chags pas gzhan la bslu ba'i bsam pas tshul khrims la sogs pa'i don gzhan du gnas la gzhan du ston pa ste/'di ni 'dod chags dang gti mug 'dus pas yang dag pa ma yin pa'i yon tan ston pas na de gnyis 'dus pa la gdags te/ khro ba la sogs pa bzhin du gdags pa nyid yin gyi rdzas su ni med de/log pas 'tsho ba'i rten byed pa'i las can no/ /g.yo ni rang gi nyes pa bcab pa'i thabs bzung ba ste/ sems gya gyu ba'o/ /rang gi nyes pa bcab pa'i thabs ni gzhan mgo rmongs par byed pa ste/ de yang gzhan nas gzhan du bsgyur ba dang /gtam rlung la skur ba dang / gsal bar mi byed pa'o/ /de'i phyir g.yo dang 'chab pa gnyis tha dad de/ de ni gsal por mkhyud kyi zur gyis ni ma yin no/ /de ni rnyed pa dang bkur sti la lhag par chags nas 'dod chags dang gti mug de gnyis kyis bdag gi nyes pa bcab pa'i phyir gzhan mgo rmongs par byed pas de gnyis 'dus pa las de gdags so//'di ni yang dag pa'i gdams ngag rnyed pa'i bar du gcod pa'i las can no/ /yang dag pa'i gdams ngag ni gang rnyed na tshul bzhin yid la byed pa ste/ de'i bar chad byed pa'o//rgyags pa ni bdag gi phun sum tshogs pa la chags pa'i rab tu dga' ba ste/ sems yongs su 'dzin pa'o/ /rigs dang nad med pa dang lang tsho dang stobs dang gzugs dang / phyug pa dang blo dang yid gzhungs pa la sogs pa mchog tu gyur pa ni rang gi phun sum tshogs pa'o//rab tu dga' ba ni dga' ba'i bye brag ste/ dga' ba'i bye brag gang gis sems rang dbang med par byed ba des de dag gi dbang du byed pas yongs su 'dzin par 'gyur te/ de'i phyir sems yongs su 'dzin pa zhes bshad do/ /'di ni nyon mongs pa dang nye ba'i nyon mongs pa thams cad kyi rten byed pa'i las can no//rnam par 'tshe ba ni sems can rnams la rnam par tho 'tshams pa ste/ bsad pa dang bcing ba dang brdeg pa dang / sdig pa la sogs pa sna tshogs kyis sems can rnams la 'tshe ba ni rnam par 'tshe ba'o/ / 'dis bsad pa dang bcing ba la sogs pas sems can rnams la rnam par tho 'tshams pas sdug bsngal dang yid mi bde ba skyed pa'i phyir sems can rnams la rnam par tho 'tshams pa'o/ /de ni khong khro ba'i char gtogs pa ste/ sems can rnams la snying rje med cing sems rtsub pa'o//sems can rnams la rnam par tho 'tshams pa'i las can ni rnam par 'tshe ba zhes bya'o/ /ngo tsha med pa ni kha na ma tho bas bdag la mi 'dzem pa'o/ /las de dag gi cha ma yin par shes bzhin du yang gang kha na ma tho bas mi 'dzem pa de ni ngo tsha med pa ste/ ngo tsha shes pa'i mi mthun pa'i phyogs su gyur pa'o//khrel med pa ni kha na ma tho ba gzhan la mi 'dzem pa ste/ 'jig rten dang bstan bcos dang mi mthun pa'i 'di bdag byed par de ltar khong du chud kyang gang sdig pa byed pa des mi 'dzem pa de ni khrel yod pa'i mi mthun pa'i phyogs su gyur pa ste khrel med pa'o//de gnyis ni nyon mongs pa dang nye ba'i nyon mongs pa thams cad kyi grogs byed pa'i las can no/ /'dod chags dang zhe sdang dang gti mug gi rnam pa bya ba ngan pa thams cad 'byung ba'i rgyu la ji ltar mthun mthun du gdags te/ 'dod chags dang zhe sdang ni cig car mi 'byung ba'i phyir ro//rang gi rgyud ni med do/ /rmugs pa ni sems las su mi rung ba ste slong ba nyid do/ /slong ba'i dngos po ni slong ba nyid de/ de dang ldan na sems blun par gyur nas slong bar gyur te/ dmigs pa rtogs par mi nus pa'o/ /'di ni nyon mongs pa dang nye ba'i nyon mongs pa thams cad kyi grogs byed pa'i las can te/gti mug gi cha la btags pas gti mug gi char gtogs pa nyid yin gyi gud na med do/ /rgod pa ni sems rnam par ma zhi ba'o/ /rnam par zhi ba ni zhi gnas te/ de dang mi mthun pa ni rnam par ma zhi ba'o//de ni 'dod chags dang mthun pa sngon dgod dgod pa dang dga' dga' ba dang / rtse rtse ba rjes su dran nas sems rnam par ma zhi ba'i rgyu ste/ zhi gnas kyi bar du gcod pa'i las can no/ /ma dad pa ni las dang 'bras bu dang / bden pa dang dkon mchog rnams la mngon par yid ma ches pa ste/dad pa'i mi mthun pa'i phyogs so/ /dad pa ni yod pa dang yon tan can dang nus pa rnams la mngon par yid ches pa dang / dang pa dang 'dod pa ste/ go rims bzhin no/ /ma dad pa ni de las bzlog pa ste/ yod pa dang yon tan can dang nus pa rnams la mngon par yid mi ches pa dang ma dad pa dang mi 'dod pa ste/le lo'i rten byed pa'i las can no/ /ma dad pa ni sbyor ba la 'dun pa med pa'i phyir le lo'i rten byed pa'i las can nyid do/ /le lo ni dge ba la sems mngon par mi spro ba ste/ brtson 'grus kyi mi mthun pa'i phyogs so/ /nyal ba dang snyes pa dang 'phres pa'i bde ba la brten nas gti mug gi char gtogs pas lus dang ngag dang yid kyi las dge ba la sems mngon par spro ba med pa gang yin pa'o//'di ni dge ba'i phyogs la sbyor ba'i bar du gcod pa'i las can no/ /bag med pa ni chags pa dang zhe sdang dang gti mug dang le lo gang yin pa dag gis 'dod chags dang zhe sdang dang gti mug la sogs pa las sems mi srung ba dang /de'i gnyen por gyur pa dge ba la mi sgom pa ste/ chags pa dang zhe sdang dang gti mug dang le lo dag la bag med pa gdags so/ /'di ni mi dge ba 'phel ba dang / dge ba 'grib pa'i rten byed pa'i las can no//brjed ngas pa ni dran pa nyon mongs pa can yin no/ /nyon mongs pa can zhes bya ba ni nyon mongs pa dang mtshungs par ldan ba'o/ /'di ni rnam par g.yeng ba'i rten byed pa'i las can no/ /rnam par g.yeng ba ni 'dod chags dang zhe sdang dang gti mug gi char gtogs pa sems rnam par 'phro ba'o//'dis sems sna tshogs su g.yeng bar byed pas rnam par g.yeng ba'o/ /'dod chags dang zhe sdang dang gti mug gang dag gis ting nge 'dzin gyi dmigs pa las phyi rol du g.yeng bar byed pa de dag la ji ltar mthun mthun du rnam par g.yeng ba gdags so//'di ni 'dod chags dang bral ba'i bar du gcod pa'i las can no/ /shes bzhin ma yin pa ni nyon mongs pa dang mtshungs par ldan pa'i shes rab ste/ des 'gro ba dang ldog pa la sogs pa la lus dang ngag dang sems kyi spyod pa mi shes bzhin du 'jug ste/ bya ba dang bya ba ma yin pa mi shes pas ltung ba'i rten byed pa'i las can no//'gyod pa ni yid la gcags pa'o/ /smad pa byas pas 'gyod do/ /de'i dngos po ni 'gyod pa'o/ /'dir ni ngan pa byas pa'i yul la sems mi dga' ba ste/ sems las byung ba'i skabs yin pas 'gyod pa zhes bya'o/ / 'di ni sems gnas pa'i bar du gcod pa'i las can no/ /gnyid ni 'jug pa rang dbang med par sems sdud pa'o/ /'jug pa ni dmigs pa la 'jug pa'o/ /de yang sems kyi rang dbang med pa gang las byung ba de gnyid do/ /yang na lus 'dzin mi nus pa'i sems kyi 'jug pa rang dbang med pa de gang las byung ba de gnyid do//sems sdud pa ni mig la sogs pa'i dbang po'i sgo nas mi 'jug pa'o/ /de ni gti mug gi cha la gdags pas gti mug gi char gtogs pa ste/ bya ba shor ba'i rten byed pa'i las can no/ /rtog pa ni kun du tshol ba'i yid kyi brjod pa ste/ shes rab dang sems pa'i bye brag go//kun du tshol ba ni 'di ci yin zhes rtog pa'i rnam par zhugs pa'o/ /yid la brjod pa ni yid kyi brjod pa ste/ brjod pa dang 'dra ba'o/ /brjod pa ni don brjod pa'o/ /sems pa dang shes rab kyi bye brag ces bya ba la sems pa ni gang sems kun du g.yo bar byed pa'i bdag nyid yin la/shes rab ni yon tan dang nyes pa 'byed pa'i rnam pa yin te/ de'i dbang gis sems 'jug pas ni bar 'ga' ni sems dang sems la rtog pa gdags so/ /bar 'ga' ni shes rab dang sems la gdags te/ mngon bar mi rtogs pa dang /mngon par rtogs pa'i dus dang go rims bzhin no/ /yang na sems pa dang shes rab gnyis kho na la rtogs pa gdags te/ de'i dbang gis sems de ltar 'jug pa'i phyir ro/ /de nyid sems rtsing ba'o/ /rtsing ba zhes bya ba ni che long ste/ dngos po tsam kun du tshol ba'i rnam pa yin pa'i phyir ro//tshul 'di ni dpyod pa la yang blta bar bya'o/ /dpyod pa yang sems pa dang shes rab kyi bye brag gi bdag nyid do/ /so sor rtog pa'i yid kyi brjod pa nyid de sngar khong du chud pa la 'di'o zhes brjod pa'i phyir ro/ /de'i phyir sems zhi ba zhes bya'o//de gnyis ni reg par gnas pa dang mi gnas pa'i rten byed pa'i las can no/ /'di gnyis ni rtsing ba dang zhib par rnam par gnas pas tha dad du dbye ba'o/ /gnyis rnam gnyis zhes bya ba ni gnyis gnyis pa gnyis te/ de dag ni 'gyod pa dang gnyid gnyis dang / rtog pa dang dpyod pa gnyis so/ /chos de bzhi ni rnam pa gnyis te/ nyon mongs pa dang nyon mongs pa can ma yin pa'o/ /de la mi dge ba ma byas te dge ba byas pas sems mi dge ba gang yin pa de ni 'gyod pa nyon mongs pa can no/ /gang dge ba ma byas te mi dge ba byas pas 'gyod pa de ni nyon mongs pa can ma yin pa'o//gnyid kyang nyon mongs pa can gyi sems kyis 'phangs pa dang / nyon mongs pa can gyi sems dang mtshungs par ldan pa ni nyon mongs pa can no nyon mongs pa can ma yin pa'i sems kyis 'phangs pa dang / nyon mongs pa can ma yin pa'i sems dang mtshungs par ldan pa ni nyon mongs pa can ma yin pa'o//'dod pa dang gnod sems dang rnam par 'tshe ba'i rtog pa'i nyon mongs pa can no/ /mngon par 'byung ba la sogs pa la rtog pa ni nyon mongs pa can ma yin no/ /de bzhin du gzhan la gnod pa bya ba'i thabs dpyod pa ni nyon mongs pa can no//gzhan la phan gdags pa'i thabs dpyod pa ni nyon mongs pa can ma yin pa'o/ /de la 'gyod pa dang gnyid dang rtog pa dang dpyod pa nyon mongs pa can de dag nyid nyon mongs pa ste/ cig shos ni ma yin no/ /de la ji ltar gzugs dang sgra la sogs pa la dmigs pa rnam pa drug po dag kun du 'gro ba rnams dang /bye brag tu nges pa rnams dang / dge ba rnams dang / nyon mongs pa rnams dang / nye ba'i nyon mongs pa rnams dang sems las byung ba thams cad kyi nang nas ci rigs pa dang mtshungs par ldan pa de bzhin du/ tshor ba gsum ste/ bde ba'i tshor ba dang /sdug bsngal gyi tshor ba dang / sdug bsngal yang ma yin bde ba yang ma yin pa'i tshor ba ste/ tshor ba rnam pa gsum dang mtshungs par ldan te/ yid bde ba dang yid mi bde ba dang btang snyoms kyi gnas kyi gzugs la sogs pa las de 'byung ba'i phyir ro/ /dge ba dang mi dge ba dang lung du ma bstan pa dang yang ldan no//kun gzhi rnam par shes pa ni kun du 'gro ba lnga po kho na dang mtshungs par ldan te/ gzhan dag dang ni ma yin no/ /de la tshor ba btang snyoms nyid de/ ma bsgribs la lung du ma bstan pa'o/ /nyon mongs pa can gyi yid ni kun du 'gro ba lnga dang /bdag tu rmongs pa la sogs pa nyon mongs pa bzhi dang rtag tu mtshungs par ldan no/ /de la yang tshor ba ni btang snyoms nyid de/ bsgribs la lung du ma bstan pa'o/ /de ni 'di bsam par bya ste ci mig gi rnam par shes pa la sogs pa lnga po dag cig car dmigs pa'i rkyen dang phrad kyang kun gzhi rnam par shes pa las gcig 'byung gi /gnyis dang mang po mi 'byung ste/ ji ltar kha cig sems pa cig car gnyis dang mang po ma yin te/ de ma thag pa'i rkyen med pas rnam par shes pa gcig kho na 'byung bar 'gyur te/ rnam par shes pa gcig gis mang po'i de ma thag pa'i rkyen byed par mi nus so snyam pa lta bu'am/'on te nges pa med de gal te gcig gi rkyen dang phrad na gcig 'byung bar 'gyur la/ de bzhin du gnyis dang mang po'i rkyen dang phrad na gnyis dang mang po yang 'byung bar 'gyur ram snyam pa la/ de'i phyir lnga rnams rtsa ba'i rnam shes las//ji lta'i rkyen las byung ba ni/ /rnam shes lhan cig gam ma yin/ /chu las rlabs rnams ji bzhin no/ /zhes bya ba smos so/ /lnga rnams zhes bya ba ni mig la sogs pa rnams par shes pa rnams te/ de'i rjes su rgyu ba yid kyi rnam par shes pa dang bcas pa rnams so//lnga po rnams kyi sa bon gyi gnas yin pas de las byung ba dang / 'gro ba rnams su skye ba nye bar len pa'i phyir kun gzhi rnam par shes pa ni rtsa ba'i rnam par shes pa zhes bya'o/ /ji lta'i rkyen las zhes bya ba ni gang dang gang gi rkyen dang phrad pa de dang de nges par 'byung ste/'byung ba ni bdag thob pa'o/ /lhan cig gam ma yin zhes bya ba ni cig car ram rim gyis so/ /chu la rlabs rnams ji bzhin zhes bya ba ni kun gzhi rnam par shes pa las 'jug pa'i rnam par shes pa cig car ram cig car ma yin par 'gyur ba'i dpe ste/ji skad du blo gros yangs pa dper na chu bo'i chu rgyun du 'bab pa la gal te rlabs gcig 'byung ba'i rkyen nye bar gnas par gyur na rlabs gcig 'byung ngo / /gal te gnyis sam gsum mam/ rlabs mang po 'byung ba'i rkyen nye bar gnas par gyur na yang rlabs mang po 'byung ste/chu bo'i chu rgyun yang chad par mi 'gyur la/ yongs su zad par yang mi mngon pa de bzhin du blo gros yangs pa chu bo de'i gnas lta bu'i kun gzhi rnam par shes pa la kun du brten cing rab tu gnas nas gal te mig gi rnam par shes pa la gcig pu 'byung ba'i rkyen nye bar gnas par gyur na mig gi rnam par shes pa gcig pu 'byung ngo //gal te rnam par shes pa gnyis sam gsum mam lnga 'byung ba'i rkyen nye bar gnas par gyur na yang gnyis sam gsum mam lnga'i bar du 'byung bar 'gyur ro zhes gsungs pa lta bu'o/ /'di la tshigs su bcad pa/len pa'i rnam par shes pa zab cing phra/ /sa bon thams cad chu bo bzhin du 'bab/ /bdag tu rtog par gyur na mi rung zhes/ /'di ni byis pa rnams la ngas ma bstan/ /zhe'o/ /rnam par shes pa'i dmigs pa'i rkyen so sor nges pa bzhin du de ma thag pa'i rkyen ni mi 'dod de/rnam par shes pa thams cad 'byung ba de rnam par shes pa thams cad kyi de ma thag pa'i rkyen du khas len pas/ dmigs pa'i rkyen dang phrad na de ma thag pa'i rkyen gcig pu de las kyang rnam par shes pa gnyis sam mang po 'byung ste/ 'gal bar mi 'gyur ro/ /gang de ma thag pa'i rkyen so sor nges pa med pa la lnga po rnams cig car dmigs pa'i rkyen dang phrad kyang gcig kho na la 'byung bar 'gyur gyi/lnga char ma yin no zhes bya ba 'di la gtan tshigs ci zhig yod/ de lta bas na dmigs pa yod na lnga char 'byung ba'am/ yang na mi 'byung bar khas blangs dgos so//da ni 'di brjod par bya ste/ ci yid kyi rnam par shes pa mig la sogs pa'i rnam par shes pa dag dang lhan cig 'byung ngam/ 'on te de dag med kyang 'byung snyam pa la de'i phyir/ yid kyi rnam shes 'byung ba ni/ /rtag tu'o 'du shes med pa dang / /snyoms par 'jug pa rnam gnyis dang //sems med gnyid dang brgyal ma gtogs/ /zhes bya ba smos so/ /rtag tu zhes bya ba ni dus thams cad de/ mig la sogs pa'i rnam par shes pa dang lhan cig pa dang de ma yin pa zhes bya ba'i tha tshig go/ /phyir btang ba 'di'i dmigs kyis bsal ba rtsom ste/'du shes med pa dang / snyoms par 'jug pa rnam pa gnyis dang / sems med gnyid dang brgyal ma gtogs/ /de la 'du shes med pa pa ni 'du shes med pa'i sems can lha rnams kyi nang du skyes pa'i sems dang sems las byung ba'i chos rnams gang 'gog pa'o//snyoms par 'jug pa rnam pa gnyis ni/ 'du shes med pa'i snyoms par 'jug pa dang / 'gog pa'i snyoms par 'jug pa'o/ /de la 'du shes med pa'i snyoms par 'jug pa ni bsam gtan gsum pa'i 'dod chags dang bral la gong ma'i 'dod chags dang ma bral ba 'byung ba'i 'du shes sngon du btang ba'i yid la byed pas yid kyi rnam par shes pa dang de dang mtshungs par ldan pa'i sems las byung ba rnams gang 'gog pa ste/de ni 'dir 'du shes med pa'i snyoms par 'jug pa zhes bya'o/ /'dis 'gog par 'gyur bas 'gog pa'o/ /de yang yid kyi rnam par shes pa mtshungs par ldan pa dang bcas pa'i mi 'byung bar 'gog pa ste/gnas kyi gnas skabs kyi bye brag go/ /snyoms par 'jug pa de yang sems kyi 'og tu sems gzhan 'byung ba dang / mi mthun pa'i gnas thob par byed pas snyoms par 'jug pa zhes bya'o//'gog pa'i snyoms par 'jug pa ni ci yang med pa'i skye mched kyi 'dod chags dang bral ba zhi bar gnas pa'i 'du shes sngon du btang ba'i yid la byed pas yid kyi rnam par shes pa dang / nyon mongs pa can gyi yid mtshungs par ldan pa dang bcas pa gang 'gog pa ste/'di yang 'du shes med pa'i snyoms par 'jug pa bzhin du gnas kyi gnas skabs kyi bye brag la gdags so/ /sems med pa'i gnyid ni gnas pa nyid stug pos non pa'i phyir dus de srid cig tu yid kyi rnam par shes pa mi 'byung bas sems med pa zhes bya'o/ /sems med pa'i brgyal ba ni glo bur du snang ba dang /rlung dang mkhris pa dang bad kan ma mnyam pa ste/ gnas ma mnyam pas yid kyi rnam par shes pa 'byung ba dang mi mthun pa gang yin pa de la sems med pa'i brgyal ba zhes nye bar 'dogs so/ /gnas skabs lnga po de dag las ma gtogs pa de ma yin pa'i dus thams cad du yid kyi rnam par shes pa 'byung bar rig par bya'o//de ltar 'du shes med pa la sogs pa rnam par shes pa 'gags te med par gyur pa de phyis ci las 'byung na gang gi phyir de dag 'chi ba'i dus byed par mi 'gyur zhe na/ de ni kun gzhi rnam par shes pa nyid las 'byung ste/de yang rnam par shes pa thams cad kyi sa bon can no/ /rnam par shes pa gyur pa gang la bdag dang chos nye bar 'dogs pa de rnam pa gsum du bstan brgya cher rnam pa gsum du bshad zin to// //da ni bdag dang chos su nye bar 'dogs pa 'byung ba gang yin pa de rnam par shes pa gyur pa nyid de/rnam par shes pa gyur ba las gud na bdag dang chos med do zhes gang dam bcas pa de rab tu bsgrub pa'i phyir/ rnam par shes pa gyur pa 'di/ /rnam rtog yin te de yis gang / /rnam brtags de med des na 'dis//thams cad rnam par rig pa tsam/ /zhes bya ba smos so/ /rnam par shes pa gyur pa rnam gsum bshad ma thag pa gang yin pa de ni rnam par rtog pa'o/ /sgro btags pa'i don gyi rnam pa khams gsum pa'i sems dang sems las byung ba ni rnam par rtog pa zhes bya ste/ ji skad du/yang dag ma yin kun rtog ni/ /sems dang sems byung khams gsum pa/ /zhes bshad pa lta bu'o/ /rnam par rtog pa rnam pa gsum po kun gzhi rnam par shes pa dang nyon mongs pa can gyi yid dang / 'jug pa'i rnam par shes pa'i rang bzhin mtshungs par ldan pa dang bcas pa des gang rnam par brtags pa snod dang /bdag dang / phung po dang / khams dang skye mched dang / gzugs dang sgra la sogs pa'i dngos po de dag med pas/ de'i phyir rnam par shes pa gyur pa rnam par rtog pa zhes bya ste/ dmigs pa med pa'i phyir ro/ /de'i dmigs pa de med par ji ltar shes she na/gang gi rgyu gang yin pa de tshogs pa dang 'gal ba yang med na de 'byung bar 'gyur te/ gzhan du ni ma yin no/ /rnam par shes pa ni sgyu ma dang dri za'i grong khyer dang / rmi lam dang rab rib la sogs pa dmigs pa med pa la yang 'byung ngo / /rnam par shes pa 'byung ba gal te dmigs pa'i khar las na ni de lta na go sgyu ma la sogs pa dag la don med pas rnam par shes pa 'byung bar mi 'gyur ro//de bas na snga ma 'gags pa de dang rigs gcig pa'i rnam par shes pa las rnam par shes pa 'byung ste/ de med kyang phyi rol gyi don las ni ma yin no//don tha dad pa ma yin pa las rtog par byed pa rnams phan tshun mi mthun par shes par mthong ste/ gcig ni phan tshun mi mthun pa du ma'i bdag nyid du mi rung ngo / /de bas na sgro btags pa'i ngo bo yin pa'i phyir rnam par rtog pa'i dmigs pa med par shes par bya'o/ / 'dis ni re zhig sgro btags pa'i mtha' spangs nas/ skur ba'i mtha' spang bar 'dod pas/ des na 'di thams cad rnam par rig pa tsam zhes bya ba smos so/ /des na zhes bya ba ni de bas na'o/ /'di ltar gyur pa'i bdag nyid rnam par rtog pas gang rnam par rtog pa de med de/ de bas na yul med pas thams cad rnam par rig pa tsam mo//thams cad ces bya ba ni khams gsum pa dang / 'dus ma byas so/ /tsam gyi sgra ni de las lhag pa'i yul gcad pa'i tha tshig go/ /pa ni rtsa ba bskang ba'o/ /gal te thams cad rnam par rig pa tsam kho na ste/de las gzhan byed pa po dang / byed pa med na rtsa ba'i rnam par shes par byin gyis brlabs pa las byed pa med par rnam par rtog pa rnams ji ltar 'byung snyam pa la/ de'i phyir/ rnam shes sa bon thams cad pa/ /phan tshun dag gi dbang gis ni/ /de lta de ltar 'gyur bar 'gro/ / des na rnam rtog de de skye/ /zhes bya ba smos so/ /de la chos thams cad skye nus pa dang ldan pas sa bon thams cad pa'o/ /rnam par shes pa ni kun gzhi rnam par shes pa'o/ /rnam par shes pa sa bon thams cad pa ma yin pa'ang yod pas sa bon thams cad pa zhes bya ba smos so/ /rnam par shes pa ma yin pa la yang kha cig sa bon thams cad par rtog pas rnam par shes pa zhes bya ba smos so//yang na tshig gcig la 'khrul pa yod pa'i phyir bye brag dang / bye brag gi gzhi bstan te/ de la nyes pa med do/ /phan tshun dag gi dbang gis na/ /de lta de ltar 'gyur bar 'gro//zhes bya ba la kun gzhi snga ma'i gnas skabs las gzhan du 'gyur ba ni 'gyur ba'o/ /de lta de ltar zhes bya ba ni rnam par rtog pa de dang de'i 'og ma skyed nus pa'i gnas skabs 'thob ces bya ba'i tha tshig go/ /phan tshun dbang zhes bya ba la/ 'di ltar mig la sogs pa'i rnam par shes pa rang gi nus pa yongs su gso ba'i phyir 'jug pa'i tshe kun gzhi rnam par shes pa nus pa khyad par can 'gyur ba'i rgyu'o//kun gzhi rnam par shes pa 'gyur ba de yang mig la sogs pa'i rnam par shes pa'i rgyur 'gyur te/ de ltar phan tshun gyi dbang gis so/ /gang gi phyir gnyi ga 'byung ba de'i phyir/kun gzhi rnam par shes pa gzhan gyis byin gyis ma brlabs pa las rnam par rtog pa rnam pa du ma dang de skye'o/ /'di ni da ltar gyi tshe la kun gzhi rnam par shes pa las 'jug pa'i rnam par shes pa ji ltar 'byung ba de bstan to/ /da ni rnam par rig pa tsam la da ltar gyi tshe 'gags nas ma 'ongs pa'i tshe ji ltar mtshams sbyar ba de bstan pa'i phyir/las kyi bag chags 'dzin gnyis kyi/ /bag chags bcas pa snga ma yi/ /rnam par smin pa zad nas kyang / /rnam smin skyed pa de yin no/ /zhes bya ba smos so/ /bsod nams dang bsod nams ma yin pa dang / mi g.yo ba'i sems pa ni las te/las des ma 'ongs pa'i lus mngon par 'grub par kun gzhi rnam par shes pa la nus pa skyed pa'i gang yin pa de ni las kyi bag chags so/ /'dzin pa gnyis ni gzung bar 'dzin pa dang / 'dzin par 'dzin pa'o/ /de la rnam par shes pa las gud na rang yod pas gnas pa'i gzung ba yod par lhag par chags pa ni gzung ba'i 'dzin pa'o//de yang rnam par shes pas rtogs shing rnam par shes te/ 'dzin par nges pa gang yin pa de 'dzin pa'i 'dzin pa'o/ /sngon byung ba'i 'dzin pa dang / gzung ba'i 'dzin pas brtags pa'i ma 'ongs pa'i de'i rigs kyi gzung ba dang /'dzin pa'i 'dzin pa 'byung ba'i sa bon ni 'dzin pa gnyis kyi bag chags so/ /de la las kyi bag chags kyi bye brag gis 'gro ba tha dad pas lus mi 'dra bar gyur pa ni sa bon tha dad pa myu gu tha dad pa bzhin no/ /'dzin pa gnyis kyi bag chags ni las kyi bag chags thams cad ji ltar rang gis 'phangs pa lus skyed pa la zhugs pa rnams kyi lhan cig byed pa nyid du 'gyur te/dper na sa bon gyis myu gu skye ba na chu la sogs pa bzhin no/ /de lta na las kyi bag chags 'ba' zhig ma yin gyi/ 'dzin pa gnyis kyi bag chags kyis zin pas rnam par smin pa skyed do zhes bstan par 'gyur ro//de'i phyir 'dzin pa gnyis kyi bag chags dang bcas pas zhes bya ba smos so/ /snga ma'i/ rnam par smin pa zad nas gzhan/ /rnam smin skyed pa de yin no/ /zhes bya ba ni tshe snga ma la bsags pa'i las kyis 'dir rnam par smin pa mngon par bsgrubs pa gang yin pa de zad ces bya ba 'phangs pa'i dus kyi mtha' la gnas pa la las kyi bag chags kyi stobs ji lta ba bzhin du de 'dzin pa gnyis kyi bag chags dang bcas pas rnam par smin pa spyad zin pa las rnam par smin pa gzhan kun gzhi rnam par shes pa de nyid skyed de/kun gzhi rnam par shes pa ma gtogs par rnam par smin pa gzhan med pa'i phyir ro/ /snga ma'i rnam par smin pa zad nas zhes bya ba 'dis ni rtag pa'i mtha' spong ngo / /rnam par smin pa gzhan skyed do zhes bya bas ni chad pa'i mtha' spong ngo / / mig la sogs pa'i rnam par shes pa ma gtogs par kun gzhi rnam par shes pa yod de/ de nyid sa bon thams cad pa ste/ mig la sogs pa'i rnam par shes pa ma yin no zhes bya ba de ji lta bu zhe na/ lung dang rigs pas yod par mngon te/ bcom ldan 'das kyis chos mngon pa las/thog ma med pa'i dus kyi dbyings/ /chos rnams kun gyi gnas yin te/ /de yod pas na 'gro kun dang / /mya ngan 'das pa'ang thob par 'gyur/ /zhes gsungs so/ /kun gzhi rnam par shes pa med na 'khor bar 'jug pa dang / ldog pa yang mi rung ngo / /de la 'khor bar 'jug pa ni ris mthun pa gzhan dag tu nying mtshams sbyor bar byed do//ldog pa ni phung po lhag ma dang bcas pa dang / phung po lhag ma med pa'i mya ngan las 'das pa'i dbyings so/ /de la kun gzhi rnam par shes pa las gzhan 'du byed kyi rkyen gyis rnam par shes par mi rung ste/'du byed kyi rkyen gyis rnam par shes pa med na 'jug pa'ang med par 'gyur ro/ /kun gzhi rnam par shes pa khas mi len na nying mtshams sbyor ba'i rnam par shes pa'am/ 'du byed kyis yongs su bsgos pa'i rnam par shes pa'i tshogs drug po de dag 'du byed kyi rkyen las 'byung bar brtag grang na/de la 'du byed gang yin pa dag ni nying mtshams sbyor ba'i rnam par shes pa'i rkyen du mi 'dod de/ de dag ni 'gags nas ring du lon pa'i phyir ro/ /'gags pa ni med pa'i phyir ro/ /med pa ni rkyen du mi rung bas 'du byed ni nying mtshams sbyor ba'i rnam par shes pa'i rkyen du mi rung ngo //nying mtshams sbyor ba'i tshe na ming dang gzugs kyang yod de/ rnam par shes pa 'ba' zhig ni ma yin na de la rnam par shes pa nyid 'du byed kyi rkyen gyis 'byung gi /ming dang gzugs ni ma yin no zhes bya ba 'di la rigs pa ci yod/ de lta bas na 'du byed kyi rkyen gyis ming dang gzugs yin gyi/rnam par shes pa ni ma yin no zhes brjod par bya'o/ /rnam par shes pa'i rkyen gyis ming dang gzugs zhes bya ba gang yin/ gal te dus phyi ma pa gang yin pa'i rkyen no zhe na/ de nying mtshams sbyor ba'i ming dang gzugs las rang bzhin bye brag tu 'gyur ba ci yod na/'di ltar de nyid rnam par shes pa'i rkyen gyis 'byung ba yin la snga ma ni ma yin/ snga ma ni 'du byed kyi rkyen gyis byung ba yin la phyi ma ni ma yin/ de'i phyir 'du byed kyi rkyen gyis ming dang gzugs nyid du 'gyur gyi/ nying mtshams sbyor ba'i rnam par shes pa yan lag gzhan kun du brtags pas ci zhig bya/de lta bas na nying mtshams sbyor ba'i rnam par shes pa ni 'du byed kyi rkyen gyis 'byung bar mi rung ngo / /rnam par shes pa'i tshogs drug po 'du byed kyis yongs su bsgos pa dag kyang 'du byed kyi rkyen gyis rnam par shes par mi rung ngo //de ci'i phyir zhe na/ rnam par shes pa ni rnam par smin pa'i bag chags dang / rgyu mthun pa'i bag chags bdag la skye mi nus te/ bdag nyid la byed pa 'gal ba'i phyir ro/ /mjug thogs su 'byung ba la yang ma yin te/ de'i tshe de ma byung ba'i phyir ro/ /ma byung ba ni med pa'i phyir ro//byung ba na yang ma yin te/ de ni de'i tshe sngar 'gags pa'i phyir ro/ /sems med pa'i 'gog pa'i snyoms par 'jug pa'i dus na ni 'du byed kyis yongs su bsgos pa'i sems 'byung mi srid pa'i phyir/ rnam par shes pa'i rkyen gyis ming dang gzugs med par 'gyur ro//de med pa skye mched drug kyang med par 'gyur ro/ /de bzhin du skye ba'i rkyen gyis rga shi'i bar du yang med par 'gyur te/ de'i phyir 'khor bar 'jug pa med par 'gyur ro/ /de lta bas na ma rig pa'i rkyen gyis 'du byed rnams so/ /des bsgos pa'i kun gzhi rnam par shes pa'i 'du byed kyi rkyen gyis rnam par shes pa'o//de'i rkyen gyis nying mtshams sbyor ba'i tshe ming dang gzugs de tshul 'di la ni nyes pa med do/ /'khor ba ldog pa yang kun gzhi rnam par shes pa med na mi rung ste/ 'khor ba'i rgyu ni las dang nyon mongs pa rnams so/ /de gnyis las kyang nyon mongs pa ni gtso bo ste/'di ltar nyon mongs pa'i dbang gis na las kyis yang sred pa 'phen nus par 'gyur gyi gzhan du ni ma yin no/ /de ltar 'phangs pa'i srid pa yang las dang nyon mongs pa'i dbang gis yang srid par 'gyur te/ gzhan du ni ma yin no//de ltar na gtso bo yin pa'i phyir nyon mongs pa nyid 'khor bar 'jug pa'i rtsa ba ste/ de'i phyir de dag spangs nas 'khor ba yang ldog par 'gyur gyi gzhan du ni ma yin no/ /kun gzhi rnam par shes pa med par de dag spang du mi rung ngo / /ji ltar mi rung zhe na/ nyon mongs pa mngon du gyur pa'am/sa bon gyi tshe spong grang na/ de mngon du gyur pa spong ngo zhe na ni 'di ni mi 'dod pa nyid do/ /de spong ba'i lam la gnas pa'i phyir sa bon gyi tshe spang du yang mi rung ste/ gang la nyon mongs pa'i sa bon gnas pa de dag gnyen pos spong na de'i tshe na ni gnyen po las gzhan ci yang rung ba ma blangs pa'i phyir ro//ji ste gnyen po'i sems nyid nyon mongs pa'i sa bon dang ldan par 'dod na ni de nyon mongs pa'i sa bon dang ldan pa nyid pas de'i gnyen por 'gyur ba ni mi rigs te/ nyon mongs pa'i sa bon ma spangs pa rnams kyi 'khor ba ldog pa mi srid do//de lta bas na gdon mi za bar kun gzhi rnam par shes pa la de las gzhan pa'i rnam par shes pa dang lhan cig 'byung ba'i nyon mongs pa dang / nye ba'i nyon mongs pa rnams kyis rang gi sa bon gso bar bya ba'i phyir bag chags bsgo bar khas blang ngo / /bag chags rnams stobs ji lta ba bzhin du 'jug pa rnyed na rgyur gyur pa'i bye brag thob pa'i sems nyid las nyon mongs pa dang /nye ba'i nyon mongs pa gang dag 'byung ba de dag gi sa bon kun gzhi rnam par shes pa la gnas pa ni de dang lhan cig 'byung ba'i nyon mongs pa'i gnyen po lam gyis sel to/ /de bas na gnas de la yang nyon mongs pa rnams mi 'byung bas phung po'i lhag ma dang bcas pa'i mya ngan las 'das pa'i dbyings 'thob bo//sngon gyi las kyis 'phangs pa'i tshe ni 'gags la de las gzhan pa'i tshe dang ni nying mtshams mi sbyor bas phung po lhag ma med pa'i mya ngan las 'das pa'i dbyings 'thob ste/las yod du zin kyang nyon mongs pa rnams spangs nas lhan cig byed pa'i rgyu med pa'i phyir yang srid pa mngon par 'grub par byed mi nus so/ /de ltar na kun gzhi rnam par shes pa yod na 'khor bar 'jug pa dang ldog par 'gyur gyi/ gzhan du ni ma yin te/ mig la sogs pa'i rnam par shes pa las gud na kun gzhi rnam par shes pa yod la de nyid chos thams cad kyi sa bon dang ldan pa ste/mig la sogs pa'i rnam par shes pa ni ma yin par gdon mi za bar khas blang bar bya'o/ /rgya cher dpyad pa ni phung po lnga po'i bshad sbyar las rig par bya'o//gal te 'di dag rnam par rig pa tsam yin na ji ltar mdo dang mi 'gal te/ mdo sde dag las ni kun brtags pa dang / gzhan gyi dbang dang / yongs su grub pa dang ngo bo nyid gsum gsungs so zhe na/ rnam par rig pa tsam nyid la ngo bo nyid gsum rnam par gzhag par 'gal ba med do//ji ltar zhe na de'i phyir/ /rnam par rtog pa gang gang gis/ /dngos po gang gang rnam brtags pa/ /de nyid kun du brtags pa yi/ /ngo bo nyid de de med de/ /zhes bya ba smos so/ /nang dang phyi'i dngos po rnam par brtags pa'i bye brag gi rnam par rtog pa mtha' yas pa bstan pa'i phyir/rnam par rtog pa gang gang gis/ /zhes bya ba smos so/ /dngos po gang gang rnam brtags pa/ /zhes bya ba ni nang dang phyi'i dngos po ste/ tha na sangs rgyas kyi chos kyi bar du yang de nyid kun du brtags pa'i ngo bo nyid de 'dir gtan tshigs smos pa ni/ de med do zhes bya ba'o/ / rnam par brtags pa'i yul gyi dngos po gang yin pa de 'di ltar rang bzhin med pas med pa'o/ /de lta bas na dngos po de ni kun brtags pa'i ngo bo nyid kho na ste/ rgyu dang rkyen la rag las pa'i ngo bo nyid ma yin no/ /'di ltar dngos po gcig dang de med pa la phan tshun mi mthun pa'i rnam par rtog pa du ma 'jug pa ma mthong ste/dngos po gcig pa'am/ de med pa la phan tshun mi mthun pa du ma'i rang bzhin mi rung ngo / /de bas na 'di dag thams cad rnam par rtog pa tsam nyid de/ don de kun du brtags pa'i ngo bo nyid yin pa'i phyir ro/ /mdo sde las kyang rab 'byor ji ltar byis pa so so'i skye bo rnams mngon par zhen pa de bzhin du chos rnams med do zhes gsungs so//kun brtags pa'i 'og tu gzhan gyi dbang gi ngo bo nyid bshad par bya ste/ de'i phyir/ gzhan gyi dbang gi ngo bo nyid/ /rnam rtog yin te rkyen las byung / /zhes bya ba smos so//rnam par rtog pa zhes bya ba ni 'dir gzhan gyi dbang gi ngo bo bstan to/ /rkyen las byung zhes bya ba des ni gzhan gyi dbang zhes brjod pa'i 'byung ba'i rgyu bstan to/ /de la kun du rtog pa ni dge ba dang mi dge ba dang / lung du ma bstan pa'i bye brag tha dad pa khams gsum pa'i sems dang sems las byung ba rnams te/ji skad du/ yang dag ma yin kun rtog ni/ /sems dang sems byung khams gsum pa/ /zhes bshad pa lta bu'o/ /rgyu dang rkyen gzhan gyi dbang bya bas gzhan gyi dbang ste/ skyed ces bya ba'i tha tshig ste/ bdag las gzhan pa'i rgyu rkyen rnams la rag las shing skye ba bya bar bstan par 'gyur ro//gzhan gyi dbang bshad zin to// //yongs su grub pa ji lta bu zhe na/ de'i phyir/ grub ni de la snga ma po/ /rtag tu med par gyur pa gang / /zhes bya ba smos so/ /mi 'gyur bas yongs su grub pa'o/ /de la zhes bya ba ni gzhan gyi dbang ngo //snga ma po zhes bya ba ni kun brtags pa nyid do/ /rnam par rtog pa de la gzung ba dang 'dzin pa'i dngos por kun brtags pa ste/ 'di ltar de la gzung ba dang 'dzin pa med pa bzhin du kun brtags pas kun brtags zhes bya'o/ /gzung ba dang 'dzin pa de dang gzhan gyi dbang de rtag tu dus thams cad du gtan du bral ba de ni yongs su grub pa'i ngo bo nyid do//de'i phyir de nyid gzhan dbang las/ /gzhan min gzhan pa min pa min/ /de'i phyir de nyid ces bya ba 'di ltar kun brtags pa'i ngo bo nyid gzhan gyi dbang dang rtag tu bral ba ni yongs su grub pa ste/ bral ba nyid ni chos nyid do//chos nyid chos las gzhan dang gzhan ma yin par mi rung ngo / /yongs su grub pa ni gzhan gyi dbang gi chos nyid de de'i phyir gzhan gyi dbang las yongs su grub pa gzhan pa yang ma yin la gzhan ma yin pa yang ma yin par khong du chud par bya'o/ /gal te yongs su grub pa gzhan gyi dbang las gzhan yin na ni de lta na go kun brtags pas gzhan gyi dbang stong par mi 'gyur ro//ji lta gzhan ma yin na/ de lta na yang yongs su grub pa rnam par dag pa'i dmigs par mi 'gyur te/ gzhan gyi dbang bzhin du kun nas nyon mongs pa'i bdag nyid kyi phyir ro//de bzhin du gzhan gyi dbang yang kun nas nyon mongs pa'i bdag nyid du 'gyur te/ yongs su grub pa las gzhan ma yin pa'i phyir yongs su grub pa dang 'dra'o/ /mi rtag la sogs bzhin du brjod/ /gzhan dang ma yin no zhes bya ba ni tshig gi lhag ma'o/ /dper na mi rtag pa nyid sdug bsngal ba nyid dang /bdag med pa nyid mi rtag pa la sogs pa las gzhan pa yang ma yin la gzhan ma yin pa yang ma yin no/ /gal te 'du byed rnams las mi rtag pa nyid gzhan yin na/ de lta na go 'du byed rnams mi rtag par mi 'gyur ro/ /ji ste gzhan ma yin na/de lta na yang 'du byed rnams zhig nas med pa nyid du 'gyur te mi rtag pa nyid bzhin no/ /de bzhin du sdug bsngal nyid la sogs pa la'ang brjod par bya'o/ /gal te gzhan gyi dbang la gzung ba dang 'dzin pa med na de ji ltar 'dzin mi 'dzin na ni yod par ji ltar shes she na de'i phyir de ma mthong bar de mi mthong zhes bya ba smos so//de ma mthong ba zhes bya ba ni yongs su grub pa'i ngo bo nyid do/ /de mi mthong zhes bya ba ni gzhan gyi dbang gi ngo bo nyid do/ /'jig rten las 'das pa'i ye shes rnam par mi rtog pas mthong bar bya ba yongs su grub pa'i ngo bo nyid ma mthong ba ni ma rtogs pa dang /mngon sum du ma byas pa'o/ /de'i rjes la thob pa dag la 'jig rten pa dang 'jig rten las 'das pa'i ye shes kyi spyod yul yin pas shes pa gzhan gyis gzhan gyi dang mi 'dzin to/ /de'i phyir yongs su grub pa ma mthong bar gzhan gyi dbang mi mthong ste/'jig rten las 'das pa'i ye shes kyi rjes la thob pa'i ye shes kyis ni mi mthong ba ma yin no/ /rnam par mi rtog par 'jug pa'i gzungs las ji skad du/ de'i rjes la thob pa'i ye shes kyis ni chos thams cad sgyu ma dang smig rgyu dang rmi lam dang mig yor dang brag ca dang / chu zla dang sprul pa dang mtshungs par mthong ngo zhes gsungs pa lta bu'o//chos ni 'dir gzhan gyi dbang du bsdus pa rnams su bzhed do/ /yongs su grub pa ni nam mkha' lta bu ste/ ye shes ro gcig pa'o/ /ji skad du rnam par mi rtog pa'i ye shes kyis ni chos thams cad nam mkha'i dkyil dang mtshungs par mthong ngo zhes gsungs pa lta bu ste gzhan gyi dbang gis chos rnams kyi de bzhin nyid tsam mthong ba'i phyir ro//gal te gzhan gyi dbang rdzas nyid ni yin na ji ltar mdo sde las chos thams cad ni ngo bo nyid med pa ma skyes pa ma 'gags pa zhes bstan zhe na 'gal ba med de 'di ltar/ngo bo nyid ni rnam gsum gyi/ /ngo bo nyid med rnam gsum la/ /dgongs nas chos rnams thams cad ni/ /ngo bo nyid med bstan pa yin/ /ngo bo nyid gsum kho na ste/ /bzhir med par bstan pa'i phyir grangs bstan to/ /rang rang gi mtshan nyid kyi yod pa ltar 'gyur bas ngo bo nyid do//ngo bo nyid med pa rnam pa gsum ni mtshan nyid ngo bo nyid med pa dang / skye ba ngo bo nyid med pa dang / don dam pa ngo bo nyid med pa'o/ /chos thams cad ni kun brtags pa dang / gzhan gyi dbang dang / yongs su grub pa'i bdag nyid do/ /da ni ngo bo nyid gsum gyi gang gi ngo bo nyid med pa gang yin pa de bstan pa'i phyir/dang po ni mtshan nyid kyis/ /ngo bo nyid med gzhan pa yang / /de ni rang nyid mi 'byung bas/ /ngo bo nyid med gzhan yin no/ /chos kyi don gyi dam pa'ang de/ /'di ltar de bzhin nyid kyang de/ /zhes bya ba smos so/ /dang po pa ni kun du brtags pa'i ngo bo nyid de/de ni mtshan nyid kyis ngo bo nyid med pa ste/ de'i mtshan nyid ni brtags pa'i phyir ro/ /gzugs kyi mtshan nyid ni gzugs su yod pa'o/ /tshor ba'i mtshan nyid ni myong ba'o zhes bya ba la sogs pa ste/ de dag rang gi ngo bo med pas nam mkha'i me tog bzhin du rang gi ngo bo med pa'o//gzhan pa yang zhes bya ba ni gzhan gyi dbang gi ngo bo nyid do/ /de ni sgyu ma bzhin du rkyen gzhan gyis skyes pa'i phyir rang gi dngos po med do/ /'di ltar yang ji ltar snang ba de bzhin du de la skye ba med de/ de'i phyir skye ba ngo bo nyid med pa zhes bya'o/ /chos kyi don gyi dam pa'ang de//'di ltar de bzhin nyid kyang de/ /zhes bya ba la/ dam pa ni 'jig rten las 'das pa'i ye shes te/ bla na med pa'i phyir ro/ /de'i don ni dam pa'o/ /yang na nam mkha' ltar thams cad du ro gcig pa dang / dri ma med pa dang mi 'gyur ba'i chos yongs su grub pa ste/ don dam pa zhes bya'o//'di ltar yongs su grub pa'i ngo bo nyid de ni gzhan gyi dbang gi bdag nyid chos thams cad kyi don dam pa ste/ de'i chos nyid yin pas de'i phyir yongs su grub pa'i ngo bo nyid ni don dam pa ngo bo nyid med pa ste/ yongs su grub pa ni dngos po med pa'i ngo bo nyid kyi phyir ro/ /ci don dam pa 'ba' zhig gis yongs su grub pa brjod dam/smras pa/ ma yin te/ de bzhin nyid kyang de'o/ /kyang gi sgra ni de bzhin nyid kyi sgrar brjod pa 'ba' zhig ma yin gyi chos kyi dbyings kyi rnam grangs su gtogs pa ji snyed pa de thams cad du brjod par bya ba'o/ /dus rnams kun na de bzhin yod pas de bzhin nyid de 'di ltar so so'i skye bo dang /slob pa dang / mi slob pa'i dus dag na dus thams cad du de bzhin te/ gzhan du ma yin pas de bzhin nyid ces bya'o/ /ci de bzhin nyid bzhin du rnam par rig pa tsam yang yongs su grub pa nyid dam/ 'on te rnam par rig pa tsam gzhan zhig snyam pa la/de'i phyir/ de nyid rnam par rig pa tsam/ /zhes bya ba smos te/ shin tu rnam par dag pa'i mtshan nyid khong du chud pa'i phyir ro/ /ji skad du/ de tshe de tsam mthong ba'i phyir/ /ming la sems de gnas pa yin/ /ming la gnas pas rnam rig la/ /dmigs pa rab tu spong bar 'gyur//bsgom pa'i rgyu yis de yi tshe/ /dmigs pa med pa'i dbyings la reg /sgrib pa kun las rnam grol zhing / /de tshe dbang 'byor thob par 'gyur/ /zhes bshad pa lta bu ste/ de nyid rnam par rig pa tsam/ /zhes bya ba'i tshig 'dis ni mngon par rtogs par bstan to//gal te 'di dag rnam par rig pa tsam yang yin na/ mig dang / rna ba dang / sna dang / lce dang / lus kyis gzugs dang / sgra dang / dri dang / ro dang / reg bya la gzung ngo snyam du de'i sems pa ci las byung snyam pa la de'i phyir/ ji srid rnam rig tsam nyid la/ /rnam par shes pa mi gnas pa//de srid 'dzin pa rnam gnyis kyi/ /bag la nyal ba mi ldog go/ /zhes bya ba smos so/ /yang na gang / las kyi bag chags 'dzin gnyis kyi/ /bag chags bcas pas snga ma yin/ /rnam par rig pa zad nas gzhan/ /rnam smin skyed pa de yin no//zhes smos pa de smod pa dang / mi spong ba ji lta bu zhes bya ba ste/ de'i phyir/ ji srid rnam reg tsam nyid la/ /rnam par shes pa mi gnas pa/ /zhes rgya cher smos so/ /ji srid du sems kyi chos nyid rnam par rig pa tsam nyid ces bya ba la/ rnam par shes pa mi gnas pa//gzung ba dang 'dzin par dmigs pa la dpyod pa'i bar du'o/ /'dzin pa gnyis ni gzung ba'i 'dzin pa dang / 'dzin pa'i 'dzin pa ste/ de'i bag la nyal ni ma 'ongs pa'i 'dzin pa gnyis skye bar bya ba'i phyir de dag gi kun gzhi rnam par shes pa la sa bon btab pa'o/ /ji srid du gnyis med pa'i mtshan nyid rnam par rig pa tsam nyid la rnal 'byor pa'i sems gnas par ma gyur pa de srid du 'dzin pa gnyis kyi bag la nyal mi ldog ste/mi spong zhes bya ba'i tha tshig go/ /'dir ni phyi rol gyi dmigs pa ma spangs na nang gi dmigs pa'ang ma spangs par bstan pa/ de'i phyir de 'di snyam du bdag ni mig la sogs pas gzugs la sogs pa 'dzin to snyam du sems so/ /da ni 'di brjod par bya ste/ don dang bral ba'i sems tsam dmigs pas/ ci sems kyi chos nyid la gnas pa yin nam smras pa/ ma yin te/ 'di dag rnam rig tsam nyid ces/ / de 'di snyam du dmigs nas su/ /ci yang rung ste mdun 'jog na/ /de ni tsam la mi gnas so/ /yang na mngon pa'i nga rgyal can gang thos pa tsam gyis bdag rnam par rig pa tsam rnam par dag pa la gnas so snyam du sems pa'i 'dzin pa des bsal ba'i phyir/ 'di dag rnam rig tsam nyid ces//de snyam du ni dmigs nas su/ /zhes bya ba la sogs pa smos so/ /'di dag rnam par rig tsam nyid/ /ces bya ba ni don dang bral ba ste/ phyi rol gyi don med do zhes de ltar dmigs pa ni 'dzin pa dang mtshan mar byed ces bya ba'i tha tshig go/ /mdun du zhes bya ba ni mngon sum du'o//'jog na zhes bya ba ni ji ltar thob pa bzhin du yid kyis 'jog pa'o/ /rnal 'byor spyod pa'i dmigs pa rnam pa mang bas ci yang rung zhes bya ba smos te/ keng rus sam rnam par bsngos pa'am rnam par rul ba'am/ rnam par 'bu zhugs pa'am/ rnam par bam pa la sogs pa'o//de ni tsam la mi gnas pa ni rnam par shes pa'i dmigs pa ma spangs pa'i phyir ro/ /nam zhig rnam par shes pa'i 'dzin pa spangs shing sems kyi chos nyid la rab tu gnas par 'gyur zhe na/ de'i phyir/ nam zhig shes pas dmigs pa rnams/ /mi dmigs de yi tshe na ni//rnam par rig pa tsam la gnas/ /gzung ba med pas de 'dzin med/ /ces bya ba smos so/ /gang gi tshe bstan pa la dmigs pa dang / gdams ngag la dmigs pa dang / gzugs dang sgra la sogs pa tha mal dmigs pa yang rung ste/ shes pas sems las phyi rol du mi dmigs te/mi mthong mi 'dzin la mngon par zhen pa med cing don yang dag pa ji lta ba bzhin du mthong la/ dmus long lta bu ni ma yin pa de'i tshe rnam par shes pa'i 'dzin pa yang spangs shing rang gi sems kyi chos nyid la yang gnas pa yin te/ 'di nyid du gtan tshigs smos pa/gzung ba med pas de 'dzin med/ /ces bya'o/ /gzung ba yod na 'dzin par 'gyur te/ gzung ba med na ma yin no/ /gzung ba med na 'dzin pa med par yang rtogs par 'gyur gyi/ gzung ba med pa 'ba' zhig ni ma yin no/ /de ltar na dmigs par bya ba dang / dmigs par byed pa la rnam par mi rtog pas mnyam pa 'jig rten las 'das pa'i ye shes 'byung ste/gzung ba dang 'dzin par mngon par zhen pa'i bag la nyal spong zhing rang gi sems kyi chos nyid la yang sems gnas par 'gyur ro/ /gal te de ltar rnam par rig pa tsam nyid la sems gnas par gyur pa de'i tshe/ji skad bya zhe na/ de'i phyir/ de ni sems med mi dmigs pa/ /'jig rten 'das pa'i ye shes de/ /gnas kyang gzhan du gyur pa ste/ /gnas ngan len gnyis spangs pas so/ /de nyid zag pa med dang dbyings/ /bsam mi khyab dang dge dang bstan/ /de ni bde ba rnam grol sku//thub pa chen po'i chos zhes bya/ /tshigs su bcad pa 'di gnyis kyis rnam par rig pa tsam nyid la zhugs pa'i rnal 'byor pa'i mthong ba'i lam la brten te/ gong nas gong du bye brag tu 'gro bas 'bras bu phun sum tshogs pa bstan to/ /de la 'dzin pa'i sems med pa dang /gzung ba'i don mi dmigs pa'i phyir/ de ni sems med mi dmigs pa/ /zhes bya'o/ /'jig rten na 'dris par ma byas pa dang kun du 'byung ba med pa dang / rnam par mi rtog pa dang / 'jig rten las rgal ba'i phyir/ 'jig rten 'das pa'i ye shes de//zhes bya'o/ /ye shes de'i 'og tu gnas gyur pa bstan pa'i phyir/ gnas kyang gzhan du gyur pa ste/ /zhes bya ba smos so/ /gnas ni 'dir kun gzhi rnam par shes pa sa bon thams cad pa'o/ /de gyur pa ni gang gnas ngan len dang / rnam par smin pa dang / gnyis kyi bag chags kyi dngos po log na las su rung ba dang /chos kyi sku dang / mi gnyis pa'i ye shes kyi dngos por gyur pa'o/ /gnas gyur pa de yang gang spangs pas thob par 'gyur zhe na/ de'i phyir/ gnas ngan len gnyis spangs pas so/ /zhes bya ba smos so/ gnyis zhes bya ba ni nyon mongs pa'i sgrib pa'i gnas ngan len dang /shes bya'i sgrib pa'i gnas ngan len no/ /gnas ngan len ni gnas las su mi rung ba nyid de/ de yang nyon mongs pa dang / shes bya'i sgrib pa'i sa bon no/ /gnas gyur pa de yang nyan thos la sogs pa la yod pa'i gnas ngan len spangs pas thob par 'gyur ba ni gang /rnam grol sku zhes bya ba smos so/ /byang chub sems dpa' la yod pa'i gnas ngan len spangs pas thob par 'gyur ba ni gang / thub pa chen po'i chos zhes bya/ /zhes bya ba smos te/ sgrib pa rnam pa gnyis spangs pa'i bye brag gis gnas gyur ba bla na yod pa dang /bla na med par bstan to/ /'dir tshigs su bcad pa/ len pa'i rnam shes sgrib gnyis kyi/ /mtshan nyid yin par shes par bya/ /nyon mongs sa bon kun sa bon/ /der ni gnyis la gnyis 'ching ngo / /gnyis zhes bya ba ni nyan thos dang byang chub sems dpa'o//snga ma la ni nyon mongs pa'i sa bon no/ /cig shos la ni sgrib pa gnyis kyi sa bon te/ de dag bcom pas thams cad mkhyen pa nyid thob par 'gyur ro/ /de nyid zag pa med dang dbyings/ /zhes bya ba ni gnas gyur pa'i rang bzhin de nyid zag pa med pa dang dbyings zhes bya ste/gnas ngan len med pa'i phyir ro/ /zag pa thams cad dang bral bas zag pa med pa'o/ /'phags pa'i chos kyi rgyu yin pas dbyings so/ /dbyings kyi sgra ni 'dir rgyu'i don to/ /bsam gyis mi khyab pa ni rtog ge'i spyod yul ma yin pa dang / so so rang gis rig pa dang /dpe med pa'i phyir ro/ /dge ba ni rnam par dag pa'i dmigs pa'i bde ba dang / zag pa med pa'i chos kyi rang bzhin yin pa'i phyir ro/ /bstan pa ni rtag pa dang mi zad pa'i phyir ro/ /bde ba ni rtag pa nyid kyi phyir te/ gang mi rtag pa de ni sdug bsngal ba'o/ /'di ni rtag pa ste/de'i phyir bde ba'o/ /nyon mongs pa'i sgrib pa spangs pas nyan thos rnams kyi rnam par grol ba'i sku'o/ /gnas gyur pa'i mtshan nyid de ni thub pa chen po'i chos kyi sku zhes bya ste/ sa dang pha rol tu phyin pa bsgoms nas nyon mongs pa dang shes bya'i sgrib pa spangs bas gnas gyur pa yang dag par grub pa'i phyir thub pa chen po chos kyi sku zhes bya'o//'khor ba yongs su mi gtong zhing des nyon mongs pa med pa dang / chos thams cad la dbang 'byor ba thob pa'i phyir byang chub sems dpa'i chos kyi sku zhes bya'o/ /thub pa chen po zhes bya ba ni thub pa'i mchog dang ldan pas sangs rgyas bcom ldan 'das ni thub pa chen po'o//sum cu pa'i bshad pa slob dpon blo brtan gyis mdzad pa rdzogs so// //rgya gar gyi mkhan po dzi na mi tra dang / shI len+d+ra bo d+hi dang / zhu chen gyi lo tsA ba ban+de ye shes sdes zhus te gtan la phab pa// //