CLOSE WINDOW

D4062
བོད་ཡིག

rgya gar gyi mkhan po bi shud+d+ha siM ha dang / shAkya siM ha dang / zhu chen gyi lo tsA ba ban+de gtsang de ben+d+ra rak+Shi tas bsgyur cing zhus te gtan la phab pa'o// // @##/ /rgya gar skad du/ karma sid+d+hi pra kar Na/ bod skad du/ las grub pa'i rab tu byed pa/'phags pa 'jam dpal gzhon nur gyur pa la phyag 'tshal lo/ /mdo las/ las rnams ni gsum ste/ lus kyi las dang / ngag gi las dang / yid kyi las so zhes 'byung ba de la kha cig na re lus kyis byas pa'i las ni lus kyi las yin la/ ngag nyid ni ngag gi las yin te/so sor gnyis ka yang rnam par rig byed dang / rnam par rig byed ma yin pa yin no/ /yid dang mtshungs par ldan pa'i las ni yid kyi las te sems pa yin no zhes zer ro/ /de la 'dir 'di dpyad par bya ste/ rnam par rig byed ces bya ba'i chos de gang yin/ re zhig lus kyi rnam par rig byed ni dbyibs yin te/ de la dmigs pa'i sems las skyes pa yin no/ /gang gi dbyibs yin/ lus kyi yin no/ /gal te lus kyi yin na ji ltar na de lus kyis byas pa'i las zhes bya / de ni lus zhes bya ba spyi'i yan lag tu gyur pa'i phyir lus kyi zhes bya la/lus kyi 'byung ba chen po la brten nas 'byung ba'i phyir ni lus kyis byas pa'i las zhes bya'o/ /spyi dag la yod pa'i sgra rnams ni yan lag dag la yod de/ dper na grong na gnas so nags tshal na gnas so zhes bya ba lta bu'o/ /de la dmigs pa'i sems las skyes pa zhes bya ba ci dgos she na /smra ba na mchu la sogs pa'i dbyibs kyang gyur na mi rung ba ste/ de ni de la dmigs pa'i sems las skyes pa ma yin te/ tshig la dmigs pa'i sems las skyes pa yin pa'i phyir ro/ /sngon gyi smon lam gyi sems las skyes pa yang gyur na mi rung ba ste/de ni de la dmigs pa'i sems las skyes pa yang ma yin te/ rnam par smin pa'i rgyu'i sems gzhan las kyang skyes pa'i phyir ro/ /ci'i phyir de rnam par rig byed ces bya zhe na/ gzhan dag la de 'jug par byed pa'i sems rnam par rig par byed pa'i phyir te/phyi rol bskyod pa'i 'gyur ba dag gis ni/ /skyes bu'i snying la gnas pa'i bsam pa ston/ /mtsho na gnas pa'i nya ni rab gab kyang / /chu yi rlabs kyis 'gyur ba rnams kyis ston/ /'o na dbyibs zhes bya ba 'di ci yin/ 'di lta ste ring po la sogs pa'o/ / ring po la sogs pa 'di ci yin/ gang las ring po'am thung ngu'o snyam pa'i 'du shes skye ba'o/ /skye mched gang yin/ gzugs kyi skye mched do/ /ci de kha dog bzhin du rdul phra rab tu 'dod dam/ 'on te rdul phra rab kyi bye brag 'dus pa zhig yin nam/ 'on te kha dog la sogs pa 'dus pa la khyab pa'i rdzas gzhan gcig pu zhig yin na /gal te rdul phra rab kyi bye brag zhig yin na ni/ des na 'dus pa'i cha shas re re la ring po nyid dam thung ngu nyid la sogs pa gzung bar 'gyur te/ dper na kha dog bzhin no/ /'on te rdul phra rab kyi bye brag 'dus pa zhig yin na ni/de kha dog gi rdul phra rab kyi bye brag 'dus pa las khyad par ci yod de/ de dag kho na 'dus pa'i khyad par las ring po'am/ thung ngu la sogs par 'gyur ro/ /'on te kha dog la sogs pa 'dus pa la khyab pa'i rdzas gcig pu zhig yin na ni/de gcig pu nyid yin pa'i phyir dang / khyab pa yin pa'i phyir cha shas re re la gzung bar 'gyur te/ thams cad la de yod pa'i phyir ro/ /yang na de gcig pu ma yin te/ cha dang char rnam par gnas pa'i phyir ro/ /skye mched bcu ni rdul phra rab bstsags pa dag yin no zhes bya ba'i grub pa'i mtha' dang yang 'gal bar 'gyur ro//gzegs zan pa'i gzhung gis yan lag can gyi rdzas su smra ba yang spel bar 'gyur ro/ /phyogs gcig gi sgor 'dus pa mang por snang ba la ni ring po'i blo 'byung / thung ngu la thung ngu'i blo 'byung /thams cad nas mnyam par snang ba la ni lham pa'i blo 'byung / khor yug nas mnyam pa la ni zlum po'i blo 'byung / dbus na mang po la ni mthon po'i blo 'byung / nyung ba la ni dma' ba'i blo 'byung / phyogs gcig gi sgor snang ba la ni phya le ba'i blo 'byung / phyogs sna tshogs kyi sgo la ni phya le ma yin pa'i blo 'byung ngo / /ri mo bkram pa de dang de lta bur snang ba la yang dbyibs kyi blo de dang de 'byung mod kyi/ dbyibs rigs tha dad pa dag ni yul gcig par rigs pa yang ma yin te/ dper na kha dog dag bzhin no/ /'on kyang 'gyur na ni phyogs thams cad du dbyibs thams cad kyi blo 'byung bar 'gyur ba zhig na de lta yang ma yin no//de lta bas na dbyibs zhes bya ba'i rdzas gzhan ni med kyi/ kha dog kho na yul gyi khyad par gnas pa la ring po la sogs pa'i blo dag 'byung ste/ dper na shing dang bya dang / grog ma la sogs pa'i dngar ka dag la 'byung ba lta bu ste/ kha na ma tho ba med pa yin no/ /gal te de lta na thag ring po nas kha dog 'dus pa dmigs kyis mi phyed bzhin du dbyibs dmigs kyis phyed pa ji lta bu/ re zhig dbyibs dag dmigs kyis mi phyed bzhin du de'i dngar ka dang tshogs dag gi dbyibs dmigs kyis byed pa ji lta bu/de na rdzas gzhan ni med do/ /mun khung ngam thag ring po'i 'dus pa gang yin pa de la ni gnyi gar yang dmigs kyis mi phyed la/ de ci zhig yin no zhes mi gsal ba zhig ni 'dzin na de na ci snang / de lta bas na de'i tshe kha dog mi gsal bas 'dzin pa yin par rig par bya'o//de'i phyir dbyibs kyi rnam par rig byed mi 'grub bo/ /gzhan dag na re de la dmigs pa'i sems las skyes pa'i 'gro ba ni rnam par rig byed yin no zhes zer ro/ /de la dmigs pa'i sems las skyes pa zhes bya ba ci dgos she na/smra ba ni mchu la sogs pa 'gul ba yang 'gyur du 'ongs pas so/ /'o na 'gro ba zhes bya ba 'di ci yin/ yul gzhan du 'pho ba'o/ /skye mched gang yin/ gzugs kyi skye mched do/ /de nyid yul gzhan du 'phos pa 'di yin no zhes bya ba 'di ga las she na/khyad par nges par zin pa'i phyir ro/ /me dang / nyi ma dang / chab brom dang / rtswa la sogs pa tshos byed las skye ba'i rkyen phrad ma thag tu bral bar gyur pa la yang tshos byed las skyes pa'i khyad par nges par mi zin la/ de dag gzhan ma yin pa yang ma yin no//bsreg bya cha shas 'dra ba can rtswa ring po dang 'brel ba'i me 'bar ba gzhan rnams kyi khyad par yang nges par mi zin la/ de dag gzhan ma yin pa yang ma yin no/ /'on te phrad ma thag tu tshos byed las skye ba mi 'byung na ni phyis kyang mi 'byung ste/ rkyen la khyad par med pa'i phyir ro//gal te bsreg bya'i cha shas gzhan la yang ni me 'bar ba gzhan yang mi 'byung na/ de'i khyad par las me 'bar ba'i tshad dang gsal ba dang / tsha ba'i khyad par med par 'gyur ro/ /de'i phyir khyad par nges par mi zin pa'i phyir de nyid 'di yin no zhes nges par gzung ba rigs pa ma yin no//'o na 'jig pa'i rgyu med pa'i phyir ro zhe na/ sems dang sems las byung ba rnams dang / sgra la sogs pa dang / me lce dag gis 'jig pa'i rgyu yang gang yin te/ de bzhin du gzhan la yang med par 'gyur ro/ /de dag gi 'jig pa'i rgyu ni rang nyid kyi mi rtag pa nyid yin no zhe na/de bzhin du gzhan dag la yang ci'i phyir mi 'dod/ ji ltar gzhan ni de dag la med pa de bzhin du gzhan rnams la yang med par 'gyur ro/ /gal te med na me la sogs pa dang phrad pa'i sngon rol du yang ji ltar de'i 'og rol bzhin du shing la sogs pa'i gzugs la sogs pa gzung bar mi 'gyur/yang na ni sngar ji lta ba bzhin du phyis kyang de lta bur 'gyur ro zhe na/ re zhig ji ltar na mar me dang / dril bu'i sgra gnyis rlung dang / lag pa dang phrad pa'i sngon rol du gzung bar 'gyur la phyis ni ma yin/ de gnyis kyis de gnyis 'jig par byed pa ni ma yin no//gal te me la sogs pas shing la sogs pa'i gzugs bshig pa'i phyir gzung bar mi 'gyur na ni phrad pa tsam gyis bral ma thag pa na yang 'gyur ro/ /tshos byed pa las skye ba'i phyi rol gyi rkyen khyad par med na yang phyi ma phyi ma'i rgyu nyid kyis khyad par can dang /ches khyad par can dang / ches shin tu khyad par can 'byung ba la snga ma dag gi 'jig pa gang las 'byung / /gang kho na las gang yod pa de kho na las de med pa ni rigs pa ma yin te/ 'gal ba gnyis kyi rgyu gcig par ni ma grags so/ /de bas na 'jig pa'i rgyu med par 'jig go//snga ma bzhin du bzung ba dang / mi bzung ba ni rmad kyi khyad par med pa'i rgyu 'jug pa dang / log pa'i sgo nas rig par bya'o/ /gal te 'jig pa rgyu dang ldan par gyur na ni sems dang sems las byung ba la sogs pa 'ga' yang rgyu med par mi 'gyur te/ dper na skye ba bzhin no/ /mi rtag pa nyid ni de dag las gzhan par cung zad kyang ma grub bo/ /rgyu'i khyad par las kyang de'i khyad par yod par 'gyur te/ me dang / nyi ma dang / chab brom dang / rtswa la sogs pa las tshos byed skye ba bzhin no/ /'jig pa dang ldan par yang 'gyur te/gzugs la sogs pa bzhin no/ /de lta bas na 'jig pa'i rgyu ni 'ga' yang med do/ /'o na de gzhan du skye ba'i rgyu med pa'i phyir de nyid yin par nges par bzung ngo zhe na/ snga ma ni phyi ma skye ba'i rgyu yin pas yod pa nyid de/ dper na sems sems gzhan gyi dang /tshos byed las skye ba tshos byed las skye ba khyad par can gyi dang / 'o ma zho'i dang / rgun 'bru'i khu ba rgun chang gi dang / rgun chang tsha'i lta bu'o/ /de bas na 'pho ba'i mtshan nyid kyi 'gro ba zhes bya ba 'ga' yang med do/ /'di ltar yang / dngos po gnas na 'gro ba med/ / 'gro ba med dang rtag tu gnas/ /gal te de lta nyid yin na/ /gzhan na snang ba de ci yin/ /de nyid snang ba ni ma yin no/ /'o na ci zhe na / yul dang yul du gsar dang gsar/ /rtswa me lta bu'am grib ma lta bu'o/ /grib ma de nyid yul gzhan du snang ba ni ma yin te/ de dang ldan pa 'dug bzhin du/nyi ma ring ba dang / nye ba dang 'gyur ba dag gis de skye ba dang / 'grib pa dang / 'gyur bar snang ba'i phyir dang / snang ba'i phyogs gzhan du bsgribs na 'byung ba'i phyir ro/ /gang zhig 'di skad du de nyid yul gzhan du 'phos pa 'di yin no zhes bya ba 'di ga las shes brtsad pa la de ni de nyid ma yin no zhes bya ba 'di ga las shes /phyir rgol bar 'gyur ba de la yang 'di ltar/ dngos po gnas na 'gro ba med/ /ces bya ba la sogs pa de nyid khungs yin no/ /'di ltar tshos byed las skye ba rnams kyi phyi rol gyi rkyen tha dad pa med kyang / phyi ma'i khyad par bzung ba 'di nyid skad cig re re la gzhan du 'gyur ba'i khungs yin no/ /gal te yang gzhan du 'gyur ba'i khungs med pas de'i dngos por rtog par byed na/ de'i dngos po yin pa'i khungs kyang med na gzhan du 'gyur bar ci'i phyir mi 'dod/ de lta bas na gnyi gar nges par mi gzung par thal bar 'gyur bas 'pho ba ni ma grub pa kho na yin no//nyi ma 'char ka ba dag na re 'du byed rnams ni rang bzhin gyis 'jig pa'i phyir 'pho ba med pa ni bden na/ yul gzhan du 'byung ba'i rgyu chos gzhan sems kyi khyad par rig rgyu can zhig lag pa la sogs pa la 'byung ste/de ni 'gro ba zhes kyang bya/ rnam par rig byed ces kyang bya'o zhe na/ skye mched gang yin/ gzugs kyi skye mched do/ /'o na de kho na bzhin du ci'i phyir mig gis mi mthong / 'on te mi mthong na ni gang gis gzhan la rnam par rig par byed pa'i rnam par rig byed ji lta bu yin/de yod par yang ji ltar khong du chud/ de lta ma yin na yul gzhan du lus 'byung bar ji ltar 'gyur zhe na/ sems kyi khyad par las skyes pa rlung gi khams las te 'di lta ste/ yul gzhan du 'byung ba'i rgyu gang yin pa de nyid rlung gi khams kyi g.yo ba nyid do/ /rtswa dang /lo ma la sogs pa'i ji ltar 'gyur zhe na/ g.yo bar byed pa dang / 'phen par byed pa dang phrad pa'i rlung gi khams las so/ /yang na gang las 'gro bar 'byung bar 'dod pa de nyid las yul gzhan du 'byung ba yin du chug na/ nus pa dmigs kyis ma phye ba can gyi 'gro ba brtags te ci zhig bya/'o na yul gzhan du lus 'byung ba'i rgyu sems kyi khyad par las skyes pa'i rlung gi khyad par de nyid rnam par rig byed yin mod ce na/ ji ltar na rnam par rig par mi byed pa rnam par rig byed du 'gyur/ reg bya'i skye mched dge ba dang / mi dge bar 'dod pa 'di ni shAkya'i sras po'i ma yin no//'o na sems kyi khyad par las skyes pa'i lus yul gzhan du 'byung ba de nyid rnam par rig byed yin mod ce na/ rnam par rig byed brtags pa can yin gyi rdzas su yod pa ma yin te/ lus ni rdzas du ma'i bdag nyid yin pa'i phyir ro/ /rnam par rig byed ni rnam par rig par byed pa ma yin par yang 'gyur te/dri la sogs pas gzhan dag la rnam par rig par mi byed pa'i phyir ro/ /dri la sogs pa'i skye mched dge ba dang mi dge bar 'dod pa 'di yang shAkya'i sras po'i ma yin no/ /'o na yang sems kyi khyad par las skyes pa'i kha dog nyid rnam par rig byed yin mod ce na/de ni sems kyi khyad par las skyes pa ma yin no/ /'o na ci zhe na/ rang gi sa bon dang / rlung gi khams kyi khyad par las skyes pa yin no/ /kha dog dge ba dang / mi dge bar 'dod pa 'di yang shAkya'i sras po'i ma yin no//kha dog lta ba ma yin yang rung / de yul gzhan du 'byung ba rnam par rig byed yin mod ce na/ lha rnams dga' ba rang gi nus pas 'bad par byed la ni rag na/ 'bad pas bsgrub par bya ba ma yin pa de la 'bad pas ci zhig bya/ gzugs la sogs pa bzhin du yang ma mthong la/mig la sogs pa bzhin du nus pa yang ma mthong ba'i 'byung ba'i don gang yin pa bzhin su zhig bsgrub par nus/ mi mthong na ni ji ltar rnam par rig byed yin no zhes de ni bshad zin to/ /kha dog dge ba dang / mi dge ba yin na ni de 'byung ba yang de ltar 'gyur ba zhig na/kha dog ni de lta ma yin no zhes de ni bshad zin to/ /de bas na rnam par rig byed ni lus kyi las ma yin no/ /'o na rnam par rig byed ma yin pa tsam zhig lus kyi las yin mod ce na/ rnam par rig byed ma yin pa zhes bya ba 'di ci zhig yin/ sdom pa la sogs pa'i gzugs chos kyi skye mched pa yin no//ji ltar na 'dod pa na spyod pa'i rnam par rig byed ma yin pa/ rnam par rig byed med par 'byung bar 'gyur/ gal te yin na cir 'gyur zhe na/ sems kyi rjes su 'brang bar 'gyur te/ dper na gzugs na spyod pa lta bu'o/ /des na sems gzhan dang /sems med pa ba dag la sdom pa dang / sdom pa ma yin pa gnyis med par 'gyur ro/ /dus yongs su bzung bas 'phangs pa'i phyir de ltar mi 'gyur la/ so sor thar pa'i mdo bstan pa dang / cang mi smra bar gyur pa la ji ltar brdzun du smra bar yang 'gyur/'o na ni rnam par rig byed ma yin pa rnam pa gnyis yin pa'i phyir lung du bstan pa dang / rnam par rig byed ma yin pa ni/ rjes su 'brang ba yin pa'i phyir de'i skad cig ma'i dge ba dang mi dge ba yang lus kyi las su mi 'gyur ro/ /lus dang ngag gi las gzugs can ni ji ltar brtags kyang rung /dge ba dang / mi dge ba nyid du mi 'grub bo/ /ci'i phyir zhe na/ lus bor na gang las tshe phyi ma la 'bras bu yid du 'ong ba'am/ mi 'ong ba 'grub par 'gyur ba de 'chad pa'i phyir ro/ /kha cig na re gang las tshe phyi ma'i 'bras bu yid du 'ong ba'am mi 'ong ba 'grub par 'gyur ba'i las 'das pa de yang yod na ci ste 'grub par mi 'gyur zhes zer te/las 'das pa yod do zhes bya ba 'di ni 'bras kyi steng du 'brum bu byung ba yin te/ 'das pa zhes bya ba ni gang zhig sngon byung la phyis med pa yin no//'o na bcom ldan 'das kyis/ bskal pa brgya dag snyed du yang / /las rnams chud zar mi 'gyur te/ /tshogs shing dus dang ldan pa na/ /lus can rnams la 'bras bur smin/ /zhes gsungs pa gang yin pa ji lta bu/ chud zar mi 'gyur te zhes bya ba'i don ci zhe na/'bras bu med par mi 'gyur zhes bya ba'i tha tshig go/ /de ltar yang phyed 'og mas bstan pa yin no/ /las rnams yun ring por yang 'bras bu dang bcas par lta su zhig mi 'dod/ de dag nyid ji ltar 'bras bu 'byin par 'gyur/ 'bras sA lu la sogs pa'i sa bon bzhin du rgyud yongs su 'gyur ba'i khyad par las sam/rang gi mtshan nyid kyi gnas skabs las zhes bya ba dpyad par bya'o/ /gal te rang gi mtshan nyid kyi gnas skabs pa dag kho na 'bras bu 'byin par 'gyur na ni ma zhig pas na 'bras bu 'byin par bstan par 'gyur ro//de dag rang gi mtshan nyid du med pas de'i phyir zhig pa zhes bya ba ni ma yin no/ /'o na ci zhe na/ gang las bya ba mi byed pa'o/ /mi byed pa ji lta bu/ yang 'bras bu mi 'phen pa'o/ /ci'i phyir mi 'phan 'phangs zin pa'i phyir 'phen par mi nus te/ ji ltar skyes pa yang mi skyed pa bzhin no zhe na/de dang 'dra ba'i 'bras bu gzhan ci'i phyir mi 'phan/ re zhig ji ltar 'bras bu 'phangs pa yin/ skye bar 'jog par rung bar byed pa'i phyir ro zhe na/ 'o na ni zag pa zad pa rnams kyi tha ma 'bras bu mi 'phen pa dang / so sor brtags pa ma yin pas 'gog pas gang gi 'bras bu 'gags pa zhes bya ba/thog ma nyid nas bya ba mi byed pa'i phyir de ji ltar phyis 'jig par 'gyur/ de bas na de lta bu'i rang bzhin can gyi 'bras bu 'phen par mi 'grub bo/ /'o na ji ltar zhe na/ gang gis 'bras bu'i sa bon gso bar byed pa des 'bras bu 'phangs pa yin no//gang gi ltar na 'das pa yod pa de'i ltar na ma 'ongs pa yang rdzas su yod pa yin na ci'i phyir 'bras bu mi 'phan/ rtag tu dngos po thams cad yod pa nyid yin na ci zhig /nam zhig na med na 'di ltar tshogs pa rnyed na 'bras bu smin par 'gyur zhes bya/'dir gang las de'i 'bras bu 'di yin no zhes rnam par gzhag pa 'grub par 'gyur ba 'di la gang zhig ni nus pa yang ci zhig yin/ de bas na gang la tshe phyi ma la 'bras bu 'byung ba'i las 'das pa yod pa nyid ni mi 'grub bo/ /'o na ni dge ba dang / mi dge ba'i lus dang /ngag gi las kyi phung po'i rgyud la sems dang mi ldan pa'i chos gzhan zhig skyed de/ kha cig na re bstsags pa zhes zer ba dang / gzhan dag na re chud mi za ba zhes zer ba gang las tshe phyi ma la 'bras bu yid du 'ong ba'am mi 'ong ba mngon par 'grub pa gang yin pa de yin no//gal te sems kyi rgyud la chos gzhan zhig mi skyed na sems gzhan du skyes na log pa'i yid kyi las kyang ji ltar tshe phyi ma la 'bras bu mngon par 'grub par 'gyur te/ gdon mi za bar de 'dod par bya'o zhe na/ 'o na gzhung la goms pa na yun ring mo zhig lon na yang dran pa skye ba dang /mthong ba la sogs pa'i don la dran pa skye ba gang yin pa de la goms pa de'am mthong ba la sogs pa de gang gis na phyis dran pa skye bar 'gyur ba'i chos ci zhig gam/ skad cig ma gang la skyed par byed/ 'gog pa'i snyoms par 'jug pa la sogs pa'i sems kyis kyang gang gis na phyis ldang ba'i sems 'byung bar 'gyur ba dang /ma du lung ga'i me tog la rgya skyegs kyi khu ba dmar pos bsgos pa de dang lhan cig tu 'gags pas kyang de'i 'bras bu la gang gis na phyis nang gi sha dmar po skye bar 'gyur ba'i chos ci zhig skyed par byed/de bas na ji ltar kun du brtags pa'i chos gzhan skyed pa med par yang sems pas sems kyi rgyud la nus pa'i khyad par bskyed pa'i phyir des bsgos pa yongs su 'gyur ba'i khyad par las tshe phyi ma la 'bras bu 'byung bar rig par bya ste/ dper na ma du lung ga'i me tog rgya skyegs kyi khu bas bsgos pa'i rgyud las 'bras bu'i nang gi sha dmar por 'byung ba lta bu'o//'o na lus dang / ngag gi las kyis kyang sems kyi rgyud la ci'i phyir bsgo bar mi 'dod ce na/ 'di ltar de ni sems la ltos nas dge ba dang mi dge ba nyid du 'gyur ro/ /gang zhig gang gis dge ba dang mi dge ba nyid du byas pa de nyid kyis de'i rgyud la 'bras bu yid du 'ong ba dang mi 'ong ba 'byin par nus par rung gis/de'i rgyud ni ma yin no/ /'o na ni gal te las nub kyang des bsgos pa'i sems kyi rgyud las tshe phyi ma la 'bras bu 'byung na/ sems med pa'i snyoms par 'jug pa gnyis dang /'du shes med pa pa sems kyi rgyud chad pa dag gi las snga ma'i 'bras bu tshe phyi ma la ji ltar 'byung bar 'gyur/ kha cig na re tshe 'di nyid la des bsgos pa'i sems kyi rgyud mtshams 'byor ba las so zhe na/ de yang ci'i phyir mtshams 'byor/ / snyoms par 'jug pa'i sems ni de'i de ma thag pa'i rkyen yin pas de las mtshams 'byor ro zhe na/ 'gags nas ring mo zhig lon pa de de ma thag pa'i rkyen du ji ltar 'gyur te/ de ni 'das pa las/ 'bras bu mi 'byung ngo zhes lan btab zin na/ gang las sems gzhan de 'byung /kha cig na re de'i sa bon mang po gzugs can la gnas pa las te/ sems dang sems las byung ba dag gi sa bon ni sems kyi rgyud dang / dbang po gzugs can gyi rgyud gnyis la gnas pa yin te/ ci rigs su sbyar ro zhe na/ 'o na yid dang chos la brten nas yid kyi rnam par shes pa 'byung ngo zhes bya ba ma yin nam/yid med par de ji ltar skye/ de kha cig tu yid kyi sa bon la yang yid ces bya bar rgyu la 'bras bu btags pa yin par rig par bya ste/ dper na reg bya'i khyad par la bkres pa dang / skom pa zhes bya ba lta bu'o/ / ji ltar na sems dang sems las byung ba rnams kyi so so'i sa bon gyi rgyud gnyis su 'gyur/ myu gu la sogs pa sa bon dang ldan pa dag la ni chos 'di ma mthong ngo / /rkyen ni gcig la du ma yin gyi/ sa bon ni ma yin no/ /'on kyang sems med pa'i snyoms par 'jug pa gnyis dang /'du shes med pa pa sems kyi rgyud chad pa dag gi las snga ma'i 'bras bu tshe phyi ma la ji ltar 'byung bar 'gyur zhes bya ba'i skyon de so na 'dug pa kho na yin no/ /skyon de ni phyogs la yod pa yin no zhe na/ phyogs gang la yod/ gang dag gi ltar na gnas skabs de sems med pa yin pa dag la'o//kha cig ni sems dang bcas pa'i gnas skabs su 'dod de/ dper na btsun pa dbyig bshes kyis yongs su dris pa las/ gang gi ltar na 'gog pa'i snyoms par 'jug pa sems med pa yin pa de la skyon de yod kyi/ kho bo'i ltar na 'gog pa'i snyoms par 'jug pa sems dang bcas pa nyid yin pas zhes smras pa lta bu'o//'dir mdo'i khungs kyang 'gog pa'i snyoms par zhugs pa'i lus kyi 'du byed dag 'gags pa nas/ dbang po dag ma gyur pa yin zhing rnam par shes pa lus dang ma bral ba'i bar yin no zhes bya ba khyer te 'ong bar byed do//de dag de'i tshe rnam par shes pa gang yin par 'dod/ kha cig na re yid kyi rnam par shes pa yin no zhes zer ro/ /'o na bcom ldan 'das kyis yid dang chos la brten nas yid kyi rnam par shes pa dang / gsum yang dag par 'dul ba'i rig pa dang /lhan cig skyes pa'i tshor ba dang / 'du shes dang / sems pa skye'o zhes ma gsungs sam/ ji ltar na de'i tshe yid kyi rnam par shes pa yod kyang gsum yang dag 'dus pa ma yin/ gsum yang dag 'dus pa yin na yang reg pa med/reg pa yod na yang gang gi na 'du shes dang / tshor ba 'gog pa zhes bya ba tshor ba dang / 'du shes med pa yin zhes bya/ kha cig na re re zhig bcom ldan 'das kyis tshor ba'i rkyen gyis sred pa zhes gsungs pa ji lta bu/ tshor ba thams cad ni sred pa'i rkyen kyang ma yin no//de bzhin du reg pa yang tshor ba thams cad kyi rkyen du mi 'gyur ro zhe na/ de ni bcom ldan 'das kyis mdo gzhan las khyad par du mdzad de/ ma rig pa'i 'dus te reg pa las byung ba'i tshor ba la brten nas sred pa 'byung ngo zhes gsungs pa'i phyir ro/ / reg pa ni gang du yang khyad par du ma mdzad do/ /de bas na khyad par med pa'i phyir de ni lan ma yin no/ /gzhan dag na re 'dus pa nus pa can ni yang dag 'dus pa yin na de'i tshe gsum 'dus pa ni tshor ba dang / 'du shes bskyed pa na nus pa med pa can yin te/ de sun 'byin pas de la snyoms par 'jug pa'i phyir ro//de'i phyir de'i tshe reg pa yang med na 'du shes dang / tshor ba ga la yod de/ yid kyi rnam par shes pa 'ba' zhig lus pa yin no zhe na/ 'o na de dge ba'am/ nyon mongs pa can nam/ ma bsgribs la lung du ma bstan pa'am ci 'dra ba zhig /de las cir 'gyur zhe na/ gal te dge ba yin na ma chags pa la sogs pa'i dge ba'i rtsa ba rnams dang mtshungs par ldan pa ma yin pa'i dge ba ji lta bu yin/ ma chags pa la sogs pa yod na yang reg pa med par ji ltar yod/ gal te de ma thag pa'i rkyen dge bas 'phangs pa'i phyir dge ba nyid yin no zhe na ma yin te/dge ba'i mjug thogs su sems rnam pa gsum 'byung ba'i phyir dang / dge ba'i rtsa ba'i stobs kyis dge ba nyid can gyi sems 'phangs pa yin na/ de ldog pa'i rgyu mi rung ba'i phyir la/ de ni mi dge ba la yang thal bar 'gyur ro//'gog pa'i snyoms par 'jug pa ni 'gog pa bzhin du dge ba yin no/ /gal te nyon mongs pa can zhig yin na nyon mongs pa dang mtshungs par ldan pa ma yin pa'i nyon mongs pa can ji lta bu yin/ nyon mongs pa yang yod na yang reg pa med par ji ltar yod de/ji skad du zhu ba bcu pa'i mdo las bcom ldan 'das kyis/ tshor ba'i phung po dang / 'du shes kyi phung po dang / 'du byed kyi phung po gang ci yang rung ba de thams cad reg pa la brten nas 'byung ngo zhes gsungs pa lta bu'o/ /'du shes med pa'i snyoms par 'jug pa yang nyon mongs pa can du mi 'dod na/'gog pa'i snyoms par 'jug pa lta ga la zhig /'on te ma bsgribs la lung du ma bstan pa zhig yin no zhe na/ ci ste rnam par smin pa las skyes pa zhig yin nam/ 'on te spyod lam pa zhig gam/ bzo'i gnas pa zhig gam/ sprul pa zhig yin/ de las cir 'gyur zhe na/ gal te rnam par smin pa las skyes pa yin na/ ji ltar na srid pa'i rtse mo'i snyoms par 'jug pa'i sems kyi mjug thogs su 'og ma gzhan brgyad kyis chod pa 'dod pa na spyod pa'i rnam par smin pa'i sems mngon du 'gyur/ snyoms par 'jug pa de yang 'dod pa na spyod pa par ji ltar thal bar mi 'gyur/ de'i mjug thogs su yang mi g.yo ba la sogs pa'i sems ji ltar mngon du 'gyur te/ ji skad du gsus po che chen po'i mdo las/ 'gog pa las langs pa reg pa du zhig la reg lags/ gsus po che chen po gsum la ste/ mi g.yo ba dang / ci yang med pa dang / mtshan ma med pa la'o zhes gsungs pa lta bu'o/ /sngon gyi las kyis 'phangs pa'i rnam par smin pa 'gog pa la snyoms par 'jug par byed pa rnams kyis ldang ba'i dus tshigs sngar bsams pa las mi 'da' bar byed do zhes bya ba 'di la yang rigs pa ci zhig yod/re zhig ji ltar na 'gog pa la dmigs pa srid pa'i rtse mo'i snyoms par 'jug pa'i sems kyi mthar phyin pa na 'dod pa na spyod pa'i sngon gyi bag chags rnam par smin pa'i sems 'grub par bya ba'i phyir 'jug pa 'thob kyi/ches snga bar ni ma yin/ re zhig ci'i phyir rnam par smin pa'i gzugs ni 'dir chad na yang mtshams mi 'byor la rnam par smin pa'i sems ni mtshams 'byor/ 'on te spyod lam pa la sogs pa zhig yin no zhe na/ de'i tshe spyod lam pa la sogs pa la dmigs pa'i sems sam/reg pa med par de mngon par 'du byed pa lta ga la yod de / mthar gyis gnas pa'i snyoms par 'jug pa dgu dang / rnam par thar pa brgyad dag ni dge ba yin pas 'dod pa'i phyir yang de'i tshe nyon mongs pa can dang / lung du ma bstan pa'i sems mngon du 'gyur bar rigs pa ma yin no/ /srid pa'i rtse mo'i snyoms par 'jug pa la brten nas 'gog pa la zhi bar yid la byed pa na 'du shes dang / tshor ba'i 'gog pa la snyoms par 'jug pa yin te/ ji skad du gsus po che chen po'i mdo las 'gog pa'i snyoms par 'jug pa'i dbang du mdzad de/mtshan ma med pa'i dbyings la snyoms par 'jug pa'i rgyu ni du lags/ rkyen ni du lags te / gsus po che chen po gnyis te/ mtshan ma thams cad yid la mi byed pa dang / mtshan ma med pa'i dbyings yid la byed pa'o zhes gsungs pa lta bu yin na/gal te 'gog pa'i snyoms par zhugs pa rnams las yid kyi rnam par shes pa de yod na de'i dmigs pa dang rnam pa ci zhig yin/ gal te 'gog pa la dmigs pa dang / zhi ba'i rnam pa zhig yin no zhe na/ ji ltar dge ba ma yin/ dge ba yin na yang ma chags pa la sogs pa dang mtshungs par ldan pa ma yin /mtshungs par ldan na yang de dag reg pa'i rkyen gyis ma yin/ 'on te dmigs pa dang / rnam pa gzhan zhig yin no zhe na/ ji ltar 'gog pa'i snyoms par 'jug pa la 'jug pa'i sems kyi mjug thogs su sems g.yeng bar rung /gnyis po de de nyid kyi phyir rang gis kun du brtags pa lung du ma bstan pa gzhan yang mi 'thad do/ /de bas na rtog ge ba khyed rnams kyis lung gi don ji lta ba bzhin ma rtogs pas 'gog pa'i snyoms par 'jug pa la sogs pa'i gnas skabs na yid kyi rnam par shes pa sems dang bcas par rtogs pa ni gzu lums su sems pa yin no//'o na sems dang bcas par ji ltar 'dod par bya zhe na/ ji ltar mdo sde pa kha cig 'dod pa lta bur ro/ /mdo sde pa kha cig ji ltar 'dod ce na/ rnam par smin pa'i rnam par shes pa sa bon thams cad pa nying mtshams sbyor ba nas bzung ste skye ba de dang der bar chad med par rnam par smin pa'i rgyu tha dad pas tha dad par gyur pa mya ngan las 'das pa la thug gi bar du rgyun gyis 'jug pa de de'i tshe mi 'chad de/des na gnas skabs de sems dang bcas pa zhes bya'o/ / rnam par shes pa'i tshogs drug po gzhan dag ni mi 'jug ste/ 'gog pa'i snyoms par 'jug pa la sogs pa la 'jug pa'i sems kyi dbang gis dus re zhig rnam par shes pa de dag gi sa bon nyams pa'i phyir des na sems med pa zhes bya'o/ /sems ni rnam pa gnyis te/ de la gcig ni de'i sa bon rnams bsags pa yin no/ /gnyis pa ni de'i dmigs pa dang / rnam pa dang / bye brag tha dad pa dag gis sna tshogs pa yin no/ /sems gnyis pa ma tshang ba'i phyir sems med pa yin te/ dper na khri rkang pa gcig pa la rkang pa gzhan ma tshang ba'i phyir/rkang pa med pa zhes bya ba lta bu'o/ /sa bon nyams pa'i gnas skabs de zhan pa dang / ches zhen pa dang / shin tu ches zhan pa'i rim pas chu tshan dang mda' 'phangs pa'i shugs 'bri ba'i tshul du des ldang ba'i dus 'phangs pa'i mthar thug pa na/ rnam par smin pa'i rnam par shes pa la skad cig re re la 'gyur ba'i khyad par las sa bon 'jug pa rnyed pa'i yid la rnam par shes pa dang /phyis gzhan dag kyang rkyen ji lta ba bzhin du 'byung ngo / /rnam par smin pa'i rnam par shes pa sa bon rnam pa sna tshogs khong na yod pa de nyid la/ de las gzhan pa'i rnam par shes pa dang lhan cig 'byung ba'i chos gzhan dge ba dang mi dge ba de dang de dag gis sa bon rtas par byed pa'i sgo nas ji ltar rigs par sgo bar byed do//rgyud 'gyur ba'i khyad par de las stobs ji lta ba bzhin du bag chags 'jug pa rnyed na tshe phyi ma la 'bras bu 'dod pa dang /mi 'dod pa mngon par 'grub bo/ /de nyid kyi dbang du byas nas/ gnas brtan rta skad kyis / sems 'di sa bon mtha' yas pa dang ldan pa rgyun gyis 'jug 'gyur zhing / /sems la rang rkyen byung na de dang de yi sa bon brtas par 'gyur//de ltas rim gyis 'jug pa rnyed na dus su 'bras bu 'byin pa 'grub/ /ma du lung ga'i me tog la bsgos tshon ni de yi sha dmar bzhin/ /zhes bshad do/ /de nyid bcom ldan 'das kyis dgongs pa nges par 'grel ba zhes bya ba theg pa chen po'i mdo las/ len pa'i rnam par shes pa zab cing phra//sa bon thams cad chu bo bzhin du 'bab/ /bdag tu rtog par gyur na mi rung zhes/ /byis pa rnams la ngas ni de ma bstan/ /zhes gsungs so/ /de yang yang srid par nying mtshams sbyor bar byed pa dag na lus nye bar len pa'i phyir len pa'i rnam par shes pa zhes bya'o//chos thams cad kyi sa bon gyi gzhir gyur pa'i phyir kun gzhi'i rnam par shes pa zhes bya'o/ /tshe rabs snga ma'i las kyi rnam par smin pa yin pa'i phyir rnam par smin pa'i rnam par shes pa zhes bya'o/ /gal te de yang mi 'dod na gzhan gang zhig gis lus zin par 'gyur/de las gzhan pa'i rnam par shes pa ni ji srid 'chi ba'i bar du lus mi gtong ba 'am khyab par 'dug pa ni med do nyon mongs pa'i bag la nyal gang la gnas pa de'i gnyen pos sel bar byed/ gal te gnyen po'i sems nyid la'o zhe na/ ji ltar na nyon mongs pa'i bag la nyal dang 'brel ba de nyid de'i gnyen por rung /gzugs med pa'i khams su skyes pa nyon mongs pa can dang dge ba dang / zag pa med pa'i sems kyi rgyud can dag la de'i 'gro bas bsdus pa rnam par smin pa'i rdzas gang zhig lus de 'gro ba rnam par smin pa ma yin pa dang /ldan pa ma yin par yang 'gyur ro/ /srid pa'i rtse mo'i phyir mi 'ong ba zag pa zad par byed pa rnams ci yang med pa'i skye mched kyi zag pa med pa'i sems mngon du gyur pa na/ gang gis na de dag de nas shi ma 'phos so zhes bya bar 'gyur ba srid pa'i rtse mo pa'i lus kyi rdzas gzhan gang zhig lus ris mthun pa'am/srog gi dbang po'i rdzas gzhan ni ci yang med do/ /rnam par smin pa'i phung po'i 'dra ba dang 'phen pa tsam la de 'dogs pa'i phyir ro/ /'dra ba'am/ 'phen pa'i rdzas gzhan yang med de 'bras sA lu la sogs pa'i ljang bu 'dra ba dang /'phen pa bzhin no/ /de bas na gdon mi za bar ji skad bshad pa'i rnam par shes pa gzhan 'dod par bya'o/ /de nyid btsun pa gos dmar sde pa rnams ni srid pa'i yan lag gi rnam par shes pa zhes 'jog par byed do/ /gzhan dag ni rtsa ba'i rnam par shes pa zhes zer ro//'o na de'i dmigs pa dang / rnam pa ci yin zhe na/ dmigs pa dang / rnam pa ma chad pa yin no/ /ji ltar na rnam par shes pa yang yin la/ de dang 'dra ba yang yin zhe na/ de ni 'gog pa'i snyoms par 'jug pa la sogs pa'i gnas skabs na rnam par shes pa yod par smra ba gzhan dag dang yang mtshungs so//'o na de nye bar len pa'i phung po gang du gtogs she na/ don gyis na rnam par shes pa'i nye bar len pa'i phung por ro/ /'o na rnam par shes pa'i nye bar len pa'i phung po gang zhe na/ rnam par shes pa'i tshogs drug dag go zhes bya ba dang /de bzhin du rnam par shes pa'i rkyen gyis ming dang gzugs zhes bya ba la/ rnam par shes pa'i tshogs drug dag go zhes bya ba'i mdo'i tshig 'di ltar bya zhe na/ dgongs pa can yin par khong du chud par bya ste/ ji ltar 'du shes kyi phung po gang zhe na/ sems pa'i tshogs drug po zhes 'byung ba lta bu ste/der chos gzhan dag kyang ma 'dus pa ni ma yin no/ /'di la dgongs pa gang yin zhe na/ re zhig bcom ldan 'das kyis dgongs pa nges par 'grel pa las/ bdag tu rtog par gyur na mi rung zhes/ /byis pa rnams la ngas ni de ma bstan//zhes gsungs pa yin no/ /ci'i phyir de ltar rtog par 'gyur zhe na/ de'i rnam pa ni 'khor ba ji srid par 'gyur ba med pa'i phyir ro/ /gang zhig rten dang / dmigs pa dang / rnam pa dang / bye brag yongs su chud pa'i phyir rags pa dang / gang zhig la nyon mongs pa dang de'i gnyen po dang mtshungs par ldan pa'i phyir kun nas nyon mongs pa dang /rnam par byang ba rnam par gzhag pa dang / 'bras bu gang gis de'i sa bon gyi rnam par shes pa rjes su dpog pa de kho na 'dir rnam par shes par bstan gyi/ rgyu'i rnam par shes pa ni ma yin gyi/de las bzlog pa'i phyir ro zhes bya ba 'di ni 'dir dgongs pa yin no/ /'dis ni srid pa'i yan lag gi rnam par shes pa'i tshogs drug bstan pa yang ji ltar rigs par lan btab pa yin no/ /rnam par bshad pa'i rigs pa las kyang / deng sang mdo sde thams cad ni mi snang ngo zhes bsgrubs te/de lta bas na mdo sde dag las ldangs por ma gsungs zhes te/ kun gzhi rnam par shes pa 'dod par mi bya ba ni ma yin no/ /'o na de lta na ni rnam par shes pa'i rgyud rnam par smin pa'i rnam par shes pa dang / gzhan dang gnyis cig car 'byung bar 'gyur ro zhe na/de lta yin na ci nyes/ rnam par shes pa'i rgyud gnyis pa'i lus re re la sems can gnyis cig car du gdags par 'gyur te/ dper na lus gzhan gyi rnam par shes pa'i rgyud gnyis pa'i lta bu'o zhe na/ de ltar mi 'gyur te/ de gnyis ni rgyu dang 'bras bu'i dngos po dang tha dad pa ma yin par 'jug pa nyid kyi phyir dang /rnam par smin pa'i rnam par shes pa'i rgyud la cig shos kyis kyang yongs su bsgo bar byed pa'i phyir ro/ /lus gzhan gyi rnam par shes pa'i rgyud gnyis la ni chos nyid de yang med de de bas na de ni nyes pa med do/ /'ga' zhig la sa bon dang /sa bon can gyi rgyud tha dad pa mthong ngam zhe na/ ut+pala'i rtsa ba dang / ut+pal la sogs pa rtsa ba dang / rtsa ba can dag mthong ste/ gal te mthong yang rung / gal te ma mthong yang rung / de ltar mi 'dod na/ ji skad du bshad pa'i skyon rnams su thal bar 'gyur bas gdon mi za bar 'dod par bya'o//'o na ci'i phyir bdag gi rdzas nyid rnam par shes pa drug gi rten du mi 'dod ce na/ ci 'dra bar 'dod par bya/ gal te de kun gzhi rnam par shes pa bzhin du/ rgyun gyi rjes su 'jug pa rkyen gyis 'gyur ba zhig yin na ni/ de dang de khyad par ci zhig yod/'on te gcig pa dang / gtan du mi 'gyur ba yin no zhe na/ ji ltar na de la rnam par shes pa la sogs pas bag chags bsgo ba'ang 'grub par 'gyur/ bag chags ni nus pa'i khyad par skyed pa yin te/ ma du lung ga'i me tog rgya skyegs kyi khu bas bsgos pa bzhin no/ /yongs su 'gyur ba'i khyad par med na/ji ltar de'i bag chags med par sngon myong ba dang / shes pa dang / 'dod chags la sogs pa dag la goms pa'i khyad par las dus su dran pa dang / shes pa dang / 'dod chags la sogs pa'i khyad par 'byung bar 'gyur/ bdag sems med pa'i gnas skabs su gyur pa na/bdag la ni khyad par med na/ phyis gang las yid kyi rnam par shes pa 'byung / rnam par shes pa rnams ci zhig de la rag lus na/ gang gis na bdag de'i rten du rtog /gal te skye ba yin no zhe na/ bdag la ni khyad par du 'gyur ba med na/ ci'i phyir rim gyis 'byung / gal te lhan cig phyed pa'i rgyu gzhan la ltos pa'i phyir ro zhe na/ de dag las gzhan pa la de skyed pa'i nus pa yod par ji ltar khong du chud/ 'on te 'dug pa zhig de la rag las pa yin no zhe na/ skyes nas mi gnas pa dag dang / ltung ba ma yin pa dag la 'dug pa ci zhig yod/de bas na rten de 'dra ba'i rdzas ni mi 'dod do/ /de ltar na chos thams cad ni bdag med pa yin no zhes 'byung ba'i lung la yang gnod pa byas par 'gyur ro/ /de bas na rang dbang can dang / rtag pa'i bdag gi rdzas yod par rtog pa de ni gyi na'o/ /des na sems pa'i khyad par gyis yongs su bsgos pa'i kun gzhi rnam par shes pa las tshe phyi ma la 'bras bu 'byung gi//ji skad du bstan pa'i mtshan nyid can gyi lus dang / ngag gi las las ni ma yin par grub bo/ /de ltar lus dang / ngag gi las mi 'dod na/ las dag ni gsum ste zhes bya ba mdo'i tshig 'di ci/da gsal bar nus sam zhe na/ mi nus te ji ltar skyon med pa de ltar bstan par mi nus so/ /ji ltar skyon med ce na/ 'dir las dag ni gsum ste zhes bstan pa 'di ci'i phyir yin pa dang / lus gang yin pa dang / las ci yin pa dang / don gang gi lus dang / las zhes bya ba dang /lus kyi las zhes bya ba 'di yang bstan dgos la/ de bzhin du ngag dang yid kyi las la'ang brjod dgos so/ /ci'i phyir lus la sogs pa'i las kho na zhes bya'i / mig la sogs pa'i las rnams ni ma yin/ re zhig bstan pa 'di ci'i phyir yin zhe na/bya ba mang pos 'jigs pa rnams la las kyi lam bcu po dag las gsum dag gis bsdus pa bstan pa'i phyir te/ 'bri rdzi'i bu la bslab pa gsum bstan pa bzhin no/ /kha cig na re lus kho nas byas pa yin gyi/ ngag dang yid gnyis ni ma yin te/ rnam par rtog pa tsam yin pa'i phyir ro zhes zer ro//de dag la de gnyis kyang las nyid du bstan pa'i yang phyir ro/ /lus 'di dbang po dang bcas pa'i khog pa 'byung ba dang / 'byung ba las gyur pa 'dus pa'i khyad par yin no/ /las ni sems pa'i khyad par can no/ /bstsags pa'i don gyis lus yin te/'byung ba dang 'byung ba las gyur pa'i rdul phra rab bstsags pa'i phyir ro/ /kha cig na re ngan pa ni bstsags pa'i don gyis te/ mi gtsang ba'i rdzas kyi 'byung khungs yin pa'i phyir ro zhes zer te/ de dag gi lhar na lta'i ni lus su mi 'gyur ro/ /byed pa po'i yid mngon par 'du byed pa ni las so//lus g.yo bar byed pa'i las ni lus kyi las so/ /sems pa ni rnam pa gsum ste/ 'gro ba dang / nges pa dang / g.yo bar byed pa'o/ /gang gis de dang ldan pa'i rgyud yul gzhan du 'byung ba'i rgyu'i rlung bsgrubs pas/ lus g.yo bar byed pa de ni lus kyi las zhes bya ste/bar gyi tshig mi mngon par byas pa'i phyir/ sman pa la'i 'bru mar lta bu dang / rdul gyi rlung zhes bya ba bzhin no/ /las kyi lam rnams las srog gcod pa dang / ma byin par len pa dang / 'dod pas log par g.yem pa rnam pa gsum lus kyi las su 'dod na/ji ltar na sems pa la de skad ces bya bar 'gyur zhe na/ des de gsod pa dang / len pa dang / log par g.yem par byed pa'i phyir ro/ /des bskyed pa'i lus kyi rgyud kyis byas pa ni des byas zhes bya ste/ ji ltar chom rkun rnams kyis grong bsregs pa dang /rtswas 'bras chan chos zhes bya ba lta bu'o/ /ji ltar na sems pa las kyi lam yin zhe na/ de ni las kyang yin la bde 'gro dang / ngan 'gro gnyis kyi lam yang yin pas na las kyi lam mo/ /yang na lus g.yo ba las kyi lam ste/ sems pa zhes bya ba'i las rnam pa gsum ni de la brten nas 'jug pa'i phyir ro//des kyang srog gcod pa dang / len pa dang / log par g.yem pa'i phyir ro/ /'jig rten dag gi rjes su mthun pa de ni lus kyi las zhes bya bar yang ston to/ /de la dge ba dang / mi dge ba ni med mod kyi/ 'dogs par ni byed de / de'i sgo nas sems pa de la 'jig rten 'jug pa dang /log par gzud pa'i phyir ro/ /gal te sems pa kho na las dge ba dang / mi dge ba yin na/ las mi dge ba sdug bsngal 'byung ba sdug bsngal gyi rnam par smin pa can rnam pa gsum ni lus kyis ched du bsams nas byas shing bsags pa yin zhes 'byung ba'i mdo ji lta bu zhe na/sgo dang rten dang dmigs pa nges/ /zhes bya bar dgongs pa'o/ /de las gzhan pa'i sems pa ni/ yid kyi las zhes bya ste/ yid dang mtshungs par ldan pa'i phyir dang / lus dang / ngag rab tu 'jug par mi byed pa'i phyir ro//'o na ci ste bcom ldan 'das kyis sems pa dang / bsam pa'i las zhes gsungs she na/ sngar sems pa rnam pa gsum bshad pa gang yin pa de las gnyis kyis ni bsams la/ gsum pas ni rab tu 'jug par byed pas de ni bsams pa'i las zhes bya'o/ /ngag gi tshig ste/dbyangs kyi khyad par gang gis don go bar byed pa'o/ /las ni de slong bar byed pa'i sems pa'o/ /yi ge'i rnam pa yin pa'i phyir ram/ 'dod pa'i don rjod par byed pas na yang dag go/ /las ni snga ma bzhin du ngag kun nas slong bar byed pa ni las te/ snga ma bzhin du bar gyi tshig mi mngon par byas pa'i phyir ro//rnam par shes pa ni yid de/ nga yir byas pa'i phyir ram/ skye ba gzhan dang / yul la gzhol bar byed pa'i phyir yid do/ /lhag ma ni sngar ji skad bstan pa bzhin no/ /gal te sems pa kho na lus kyi las su 'gyur na/ sems rnam par g.yengs pa dag dang /sems med pa dag la sems pa de med na/ sdom pa dang sdom pa ma yin pa gnyis ji ltar yod ce na/ sems pa'i khyad par gyi bag chags ma bcom pa'i phyir sdom pa dang sdom pa ma yin pa gnyis yid do/ /khyad par smos pa ni gang las sdom pa dang sdom pa ma yin pa'i rnam par rig byed ma yin pa kun nas ldang bar brtags pa'i sems pa khyad par du bya ba'i phyir ro//de'i bag chags bcom pa ci zhe na/ ji ltar khas blangs pa bzhin spong ba dang spong ba ma yin pa'i sems pa'i rgyu ma yin pa nyid do/ / gang gis de bcom zhe na/ sdom pa dang sdom pa ma yin pa gtong ba'i rgyu rnam par rig byed kun nas slong bar byed par brtags pa'i sems pa gang yin pa dang / de las gzhan pa'i gtong ba'i rgyus so/ /mig la sogs pa'i las ma gsungs pa ni/ 'dir rtsol ba can gyi las kho na brjod par bzhed pa'i phyir byed pa'i las ni ma yin no//rtsol ba can gyi las ci yin zhe na/ byed pa po'i yid mngon par 'du byed pa gang yin pa'o/ /byed pa ci yin zhe na/ gang la mig la sogs pa so so'i nus pa yod pa'o/ /las gsum bcom ldan 'das kyis gsungs gang tshul gang gis//rab tu 'grub 'gyur ma bshad de kun bka' stsal pa'i/ /las grub 'di bdag gis bshad bsod nams gang yin des/ /'gro 'di sangs rgyas pa yi rnam dag thob par shog /las grub pa'i rab tu byed pa slob dpon dbyig gnyen gyis mdzad pa rdzogs so// //rgya gar gyi mkhan po bi shud+d+ha sid+ha dang / lo tsA ba dge slong gtsang ban de de ben+d+ra rak+Shi tas bsgyur cing / zhu chen gyi lo tsA ba ban de dpal brtsegs kyis zhus te gtan la phab pa// //