CLOSE WINDOW

D4061
བོད་ཡིག

/[ @#/ /rgya gar skad du/ byakhyAyuka ti/ bod skad du/ rnam par bshad pa'i rigs pa/ bam po dang po/ /'jam dpal gzhon nur gyur pa la phyag 'tshal lo/ /blo ldan rnams kyi spyi la bzhugs//gti mug gnyid gnyis zad phyir dang / /blo rgyas phyir na sangs rgyas pa/ /thub la spyi bos phyag 'tshal te/ /gang dag bdag pas blo chung ba/ /mdo rnams 'chad 'dod de dag la/ /de la phan par bya ba'i phyir/ /man ngag cung zad bstan par bya/ mdo rnam par 'chad par 'dod pas thog ma kho nar thos pa mang ba dang /thos pa'i gzhi can dang / thos pa bsags par bya'o/ /ji ltar na thos pa mang ba dang / thos pa'i gzhi can dang / thos pa bsags pa yin zhe na/ chos gang dag thog mar dge ba zhes bya ba mdo las rgya cher ji skad bstan pa lta bu'o//de la chos ni mdo la sogs pa ste/ rigs pa ston pa'i don dang / don phyin ci ma log par nges par 'dzin pa'i don gyis so/ /tshangs par spyod pa ni mya ngan las 'das pa'i lam yin no/ /mya ngan las 'das pa ni mchog tu gtso bo yin pa'i don gyis tshangs pa yin te/zhi ba dang bsil bar gyur pa dang tshangs par gyur pa zhes gsungs pa'i phyir ro/ /der gang gis spyod par byed pa dang / 'gro bar byed pa dang / thob par byed pa de ni tshangs par spyod pa yin te/ 'dis myos par 'gyur bas chang zhes bya ba bzhin no//de'i thog ma dang bar dang tha ma dag ni tshul khrims dang / ting nge 'dzin dang / shes rab kyi phung po dag yin te/ 'di ltar 'od srung ba'i sde pa dag gi mdo las/ dge slong dag khyed la ngas chos thog mar dge ba/ bar du dge ba/ tha mar dge ba dag bstan pa yin te tshangs par spyod pa'i thog ma gang zhe na/tshul khrims dang ldan par gnas pa dang zhes rgya che ra 'byung ba dang / tshangs par spyod pa'i bar gang zhe na/ 'dod pa dag las dben pa zhes bya ba nas rgyas par bsam gtan bzhi pa'i bar du rdzogs par byas te gnas pa yin no zhes 'byung ba dang /tshangs par spyod pa'i tha ma gang zhe na/ 'di ni sdug bsngal 'phags pa'i bden pa yin no zhes yang dag pa ji lta ba bzhin du rab tu shes pa nas/ rnam par grol ba la rnam par grol lo snyam du ye shes mthong ba 'byung ba yin no zhes bya ba'i bar du rgya cher 'byung ba yin no//dge ba yang yongs su nyams pa med pas mi slu ba'i phyir ro/ /don bzang po tshig 'bru bzang po ni go rims bzhin du phyin ci ma log pa dang go bar byed pa gnyis kyis brjod par bya ba dang / rjod pa phun sum tshogs pa'i phyir ro/ /ma 'dres pa la sogs pa ni thun mong pa ma yin pa'i phyir dang /nyon mongs pa thams cad kyi gnyen po'i phyir dang / ngo bo nyid dang rgyud rnam par grol ba gnyis kyis rnam par grol ba'i phyir te/ go rims bzhin no/ /gzhan yang thog ma dang bar dang / tha mar dge ba ni don bzang po dang tshig 'bru bzang po dang /ma 'dres pa la sogs pa yin pa'i phyir ro/ /gzhan yang phyi rol pa'i chos kyi gnyen por 'di pa'i chos rnams kyi che ba'i bdag nyid yongs su bstan pa yin te/ phyi rol pa dag gi chos rnams ni thog ma dang bar dang tha ma dag tu tshangs par spyod pa rab tu mi ston te/ snga phyi 'gal ba'i phyir ro/ /dge ba yang ma yin te / don dang tshig 'bru skyon dang ldan pa'i phyir ro/ ma 'dres pa yang ma yin te/ gzhan dang thun mong yin pa'i phyir ro/ /yong su rdzogs pa yang ma yin te/ nyi tshe'i gnyen po yin pa'i phyir ro/ /yongs su dag pa yang ma yin te/rang gi sa pa'i nyon mongs pa kun tu spyod pa'i rten du gyur pa'i phyir ro/ /yongs su byang ba yang ma yin te/ sa gzhan pa'i nyon mongs pa'i bag la nyal dang ldan pa'i phyir ro/ /'di pa'i chos rnams ni de las bzlog pa yin no/ /kha cig ni don dang ldan pa dang / tshig 'bru dang ldan pa zhes 'don te/ de las ni don dang bcas pa dang / tshig 'bru dang bcas pa dge ba yin par ston to/ /mngon par brjod pas mngon par rjod par byed pa zhes bya ba ni rtogs par byed pa yin te/ 'di dag gis ni bshad pa'i chos bstan pa yin no//de kun nas slong bar byed pa'i chos rnams ni ngag gi rang bzhin ma yin pa'i phyir rang gis don go bar mi nus kyis brgyud pas go bar byed do/ /gzhan yang gang dag de'i rang bzhin yin pa'i phyir mngon par brjod pas mngon par brjod pa yin gyi yi ge bsgyur te rnam par bshad pas mngon par brjod pas ni ma yin te/ha cang yang thal bar gyur na ni mi rung ba'i phyir ro/ /gang dag mngon par brjod pa na mngon par rjod par byed pa zhes de skad du 'don pa de'i don ni tshig gi don grags pas bdag nyid brjod pa na yin gyi/ yi ge bsgyur te/ rnam par bshad pas mngon par brjod pa na na ma yin te/ ji ltar bdud kyis smras pa'i tshigs su bcad pa las/ mi rnams tshe ni ring ba ste/ /skyes bu dam pa slu mi byed/ /'dir ni 'chi bdag 'ong ba med/ /'phyar ba dang ni bag med spyod/ /ces bya ba/ mi rnams tshe ni mi ring bas//skyes bu dam pa rnams la bslu/ /'dir ni 'chi bdag 'od yod pas/ /'phyir dang bag med spyad mi bya/ /zhes yi ge rnams bsgyur nas rnam pa gzhan du rnam par bshad par nus pa lta bu'o zhes bya ba 'di yin no / /gzhan yang tshangs par spyod pa mngon par brjod pa na mngon par rjod par byed pa zhes bya ba ni gzhan ma yin par brjod pa nyid du bstan pa yin no//thos pa zhes bya ba nas/ mthong bas shin tu rtogs pa yin no zhes bya ba'i bar ni nyan pa dang / 'dzin pa dang / 'jug par byed pa dang / don sems pa dang / de dmigs kyis phyed pa'i sgo nas te go rims bzhin no//de la gnyis kyis ni mang du thos pa dang thos pa'i gzhi can yin no/ /lhag ma rnams kyis ni thos pa bsags pa yin te/ bstan par byed pa'i phyir ro/ /lung las ni bstan par 'dzin pa dang / klog pa dang / 'don pa dang / sems dang ba dang ldan pa dang / gtsug lag nyid du dmigs kyis phyed pa'i sgo nas thob pa nas mthong bas shin tu rtogs pa'i bar yin no zhes 'byung ngo / /bshad pa 'di ni gang las ji ltar na mang du thos pa la sogs pa yin pa de yongs su ston pa yin par rigs par bya'o//de lta bur gyur pa des ji ltar mdo sde rnam par bshad par bya zhe na/ rnam pa lnga dag gis te/ mdo sde'i dgos pa dang / bsdus pa'i don dang / tshig gi don dang / mtshams sbyar ba dang / brgal ba dang / lan gnyis brjod par bya'o//'dir smras pa/ mdo don smra ba dag gis ni/ /dgos pa bsdus pa'i don bcas dang / /tshig don bcas dang mtshams sbyar bcas/ /brgal lan bcas par bsnyad par bya/ /brgal ba dang lan gnyis gcig tu bya ba ni brgal ba'i lan gdab pa'i don gyi phyir ro/ci'i phyir 'di dag brjod par bya zhe na/ mdo sde'i don gyi che ba nyid thos na nyan pa dang 'dzin pa la 'bad par byed pas dgos pa brjod par bya'o/ /dgos pa de'ang mdo sde'i bsdus pa'i don las rtogs par 'gyur ro/ /bsdus pa'i don yang tshig gi don las so/ / tshig gi don gyi go rims mi 'gal ba ni mtshams sbyar ba las so/ /rigs pa dang mi 'gal ba dang / snga phyi mi 'gal ba ni brgal ba dang lan las yin pas na bsdus pa'i don la sogs pa yang brjod par bya'o/ /'dir smras pa/ mdo don che ba nyid thos na/ /nyan pa dang ni 'dzin pa la//nyan pa po ni gus byed pas/ /thog mar dgos pa brjod par bya/ /de 'grub de yi bsdus don las/ /bsdus pa'i don ni tshig don las/ /go rims rigs pa snga phyi dag /mi 'gal ba ni gnyis las so/ /gzhan yang dgos pa brjod pa las ni mdo sde'i 'bras bu phun sum sogs pa shes par 'gyur zhing /bsdus pa'i don brjod pa las ni don gyi dbang du byas pa yin la/ tshig gi don brjod pa las ni bsdus pa'i don dang / chos kyi mtshan nyid dang / dgongs pa'i mtshan yin la/ mtshams sbyar ba brjod pa las ni tshig rnams kyi go rims 'brel pa'o//brgal ba dang lan brjod pa las ni rigs pa dang snga phyi mi 'gal ba'o/ /'dir smras pa/ lnga po bstan pa byas pa las/ /'bras bu phun sum dbang byas dang / /de bzhin bsdus don la sogs gsum/ / 'brel dang mi 'gal shes par 'gyur/ /de la chos kyi mtshan nyid ni ji ltar gzugs ni mi rtag pa'o zhes bya ba lta bu'o/ /tshig 'dis rang dang spyi'i mtshan nyid kyi don bstan pa na dgos pa'i mtshan nyid ni ji ltar mi rtag pa gang yin pa de ni sdug bsngal ba'o zhes bya ba lta bu ste/ zag pa dang bcas pa dang /'du byed kyi sdug bsngal la dgongs pa yin no/ /de bzhin du rnyed pa dang bkur sti ni pags pa nas rkang gi bar du 'chad do zhes bya ba lta bu ni 'dir dbang po lnga po dag tu dgongs pa ste/ dad pa la sogs pa ni pags pa la sogs pa bzhin du 'og ma 'og ma nang du gyur pa'i phyir dang /gces rim yin pa'i phyir ro/ /lung las kyang dad pa tsam ni pags pa lta bu yin te/ srab pa'i phyir ro/ /brtson 'grus ni sha lta bu yin te/ rtag tu rtsom pas sdug pa'i phyir ro/ /dran pa ni rgyus pa lta bu yin te/ thos pa dang bsam pa'i don 'brel bar byed pa'i phyir ro/ /ting nge 'dzin ni rus pa lta bu yin te/rtog pa ngan pas phyed par dka' ba'i phyir ro/ /shes rab ni rkang lta bu yin te/ mnyam par gzhag pa'i sems la gnas pa'i phyir ro zhes 'byung ngo / /de la mdo sde'i dgos pa ni bsdu na rnam pa bzhir rig par bya ste/ kun tu rmongs pa rnams la yang dag par bstan pa dang /bag med pa rnams la yang dag par len du gzhug pa dang / kun tu zhum pa rnams la yang dag par gzengs bstod pa dang / yang dag par zhugs pa rnams la yang dag par dga' bar bya ste/ ji ltar rigs par kha cig tu ni gcig yin pa nas kha cig tu ni bzhi yin pa'i bar du sbyar bar bya'o//de'i phyir de dang de las yang dag par ston par mdzad/ yang dag par len du 'jug par mdzad/ yang dag par gzengs stod par mdzad/ yang dag par dga' bar mdzad ces bya ba smos so/ /gang zag kha cig gcig pu yin yang don kha cig la kun tu rmongs la/kha cig la zhes bya ba nas yang dag par zhugs pa'i bar du yin pas gcig la yang bzhi 'thad do/ /de la kun tu rmongs pa rnams ni mi shes pa dang the tshom dang log par shes pa dang ldan pa'i phyir ro/ /bag med pa rnams ni le lo dang 'dun pa med pa dang g.yen spyor ba dang ldan pa'i phyir ro//kun tu zhum pa rnams ni dman pa la mos pa dang bdag nyid mi nus par sems pa dang 'gyod pa dang bya ba mang pos 'jigs pa dang ldan pa'i phyir ro/ /yang dag par zhugs pa rnams ni phyin ci ma log pa dang mnyam pa dang chog mi shes pa'i brtson 'grus bsgrub pa dang ldan pa'i phyir ro//nag po'i phyogs las 'dun pa bzlog pa yang dgos pa yin no/ /yang na de yang yang dag bar lan du 'jug pa nyid yin te/ de bzlog pa la 'dzud pa'i phyir ro/ /yang dag par bstan pa la sogs pa de dag kyang yon tan gyi khyad par gyi don nam/ yongs su spong bar byed pa'i don nam/rten par byed pa'i don nam/ skyo ba'i don nam/ dad pa'i don nam/ de lta bu la sogs pa yin par ci rigs par bya'o/ /mdo las ma dad pa gnyis ni dad pa phun sum tshogs pa la yang dag par len du 'jug /'dul bar byed/ 'dzud par byed/ rab tu 'jog par byed ces 'byung ba gang yin pa de ci don gcig pa zhig yin nam 'on te don tha dad pa yin/de las cir 'gyur gal te don gcig pa zhig yin na ni don zlos pa nyid kyi skyon du 'gyur ro/ /'on te don tha dad pa zhig yin na ni ji ltar na yang dag par bstan pa la sogs pa kho na mdo sde'i dgos pa dag tu 'gyur zhe na/re zhig don gcig pa zhig yin te mdo don zlos na skyon cir 'gyur/ de ni don med par 'gyur te/ tshig 'jug pa don med pa yin na ni ci'i phyir bzlog par 'gyur la/ ci'i phyir rnam grangs rnams kyis bstan gyi/ de nyid kyis ma yin zhe na/gal te sangs rgyas rnams kyis rnam grangs gsungs pa dgos pa med pa zhig yin na ni skyon der 'gyur ro/ /'dir dgos pa gang yin zhe na/ dgos pa dag ni brgyad de rnam grangs gsungs pa ni 'dul ba tha dad pa'i phyir te/ de'i tshe dang phyi ma'i tshe kha cig la la las khong du chud par bya ba'i phyir dang /de'i tshe rnam par g.yengs pa rnams la brjod pa de nyid kyi ni gzhan dag gis smad par 'gyur bas rnam grangs kyis de'i don bstan par bya ba'i phyir dang / yid mi gzhungs pa rnams la yang dang yang du de'i don yang dag par mtshon pas mi brjed par bya ba'i phyir dang /tshig gcig la don du ma byung bas don gzhan du rtog pa bsal ba'i phyir dang / gzhan du ming de rnams kyis de'i don yang dag par bsgrub pa'i phyir sgra nges par sbyor ba lta bu dang / chos sgrogs pa rnams don gyi bshad sbyar dang go bar byed pa gnyis la thabs mkhas pa nyid du bsgrub pa'i phyir dang /nyid la chos so sor yang dag par rig pa mnga' bar bstan pa'i phyir dang / gzhan dag la de'i sa bon bskyed pa'i phyir te/ rnam par bshad pa byed pa thams cad kyang rnam grangs bshad pa dag gis slob ma rnams la go bar byed pas na de lta bu'i rang bzhin can la zlos pa'i skyon du mi 'gyur ro//yang na don tha dad pa yin du chug ste/ 'di ltar byos shig ces bya ba ni yang dag par len du 'jug pa'o/ /'dul bar byed pa ni gus par byed pa nyid du bsgrub pa'i phyir ro/ /'dzud par byed pa ni sgrub pa la 'jog par byed pa'i phyir ro//rab tu 'jog par byed pa ni mi 'phrogs pa nyid kyis rnam par mi g.yo bar bya ba'i phyir ro/ /rnam grangs gzhan yang 'dul bar byed pa ni bgegs sel ba'i phyir ro/ /ji ltar na mdo sde las dgos pa mang po mi 'byung zhe na/ mi 'byung ste/ 'dul bar byed pa la sogs pa rnams kyi 'bras bu ni nye bar 'dun par byed pa yin pa'i phyir ro//'o na rnam grangs kyis nye bar 'dun par byed pa'am/ 'dun par zlog par byed pa 'di lta ste/ sbyor bar bya ba ni rigs so/ /bag yod par bya ba ni rigs so/ /ston pa'i bstan pa la rnal 'byor du bya ba ni rigs so zhes bya ba dang /kun dga' bo dge slong 'du 'dzi la kun dga' ba dang / 'du 'dzi la dga' ba dang / 'du 'dzi la kun dga' ba'i sbyor ba la mngon par brtson zhing gnas pa ni legs pa ma yin no zhes bya ba gang yin pa ji lta bu zhe na/ de dag kyang 'dul ba bag med pa'i rang bzhin can gyi dbang du mdzad nas ni yang dag par len du 'jug pa yin no//kun tu rmongs pa'i dbang du mdzad nas ni yang dag par bstan pa yin te/ rigs pa dang rigs pa ma yin pa nyid gnyis yang dag par ston pa'i phyir ro/ /de la mdo sde'i dum bu dang po 'di ni gang la brten nas gang bya ba de la nye bar 'dun par byed pa yin te/ci la brten nas she na/ brtson 'grus brtsams pa la'o/ /ci zhig bya zhe na/ mi mthun pa'i phyogs spang ba dang / gnyen po'i phyogs bsten par bya'o/ /gzhan yang 'dul ba le lo can gyi dbang dang /rnyed pa dang bkur sti'i don du thos pa dang / bsam pa la brtson pa dang / ting nge 'dzin tsam gyis chog par 'dzin pa'i rang bzhin can las brtsams nas nye bar 'dun par byed pa 'di yin par rig par bya'o/ /gzhan yang ting nge 'dzin dang de la ro myang ba med pa dang de tsam gyis chog mi shes par nye bar 'dun par byed pa yin no//lung las ni go rims bzhin du bslab pa gsum la brtsams nas zhes 'byung ngo / /a lam zhes bya ba'i sgra 'di ni nus pa la yang mthong ste/ lam 'di yang shes par nus pa ma yin mthong bar nus pa ma yin zhes bya ba ste/ mi phod cing mi nus so zhes bya ba'i tha tshig go/ /bzlog pa'i don la yang mthong ste/ rgyal po chen po re zhig bdag la byas pa ni zhes bya ba nas sems rab tu dang bas ni chog go/ /'du byed thams cad kyis ni chog go zhes bya'o / /rgyan gyi don la yang mthong ste/ rul ba'i lus ni mngon par brgyan byas shing //mig sman bskus pa ji ltar gsar bris bzhin/ /zhes bya ba'o/ /rigs pa'i don la yang mthong ste/ dmag ldan pa khyod som nyi za ba ni rigs pa yin no/ /the tshom za ba ni rigs pa yin no zhes bya ba ste/ the tshom za bar bya ba'i gnas la the tshom skyes pa yin pas so//skyo bar rigs pa yin no/ /'dod chags dang bral bar rigs pa yin no/ /rnam par grol bar bya ba ni rigs pa yin no zhes bya ba ni rung ba zhes bya ba'i tha tshig go/ /'dir yang sbyor bar bya ba ni rigs so zhes bya ba ni rung ba'i don du blta bar bya'o//mdo sde'i dum bu gnyis pa las 'byung ba ni da ltar byung ba dang / 'das pa dang ma 'ongs pa'i 'du 'dzi las brtsams nas tshig gsum po dag rig par bya ste/ de la dga' ba dang ro myong bar byed pa dang mngon par dga' ba'i phyir ro/ /spang ba la kun dga' ba zhes bya ba de la yang de bzhin no//dgos pa bshad zin to/ /bsdus pa'i don ni mdo sde'i lus yin te/ 'di lta ste/ yang dag par ldan pa'i lung las/ dge slong dag gzugs yod pa 'di la zhes bya ba la sogs pa'i mdo sde lta bu ste/ de las ni bsdu na gang zhig ji ltar yongs su shes par bya ba dang /yongs su shes pa gang yin pa dang / yongs su shes pa'i 'bras bu gang yin pa dang / de rjod par byed pa gang yin pa de la bstan pa ni bsdus pa'i don to / /ci zhig yongs su shes par bya zhe na/ gzugs la sogs pa sdug bsngal gyi bden pas bsdus pa'o//ji ltar yongs su shes par bya zhe na/ mi rtag par ro/ /yongs su shes pa gang zhe na/ yang dag pa'i lta ba'o/ /yongs su shes pa'i 'bras bu gang zhe na/ skyo ba la sogs pa'i rim gyis sems shin tu rnam par grol ba nyid do//de rjod par byed pa gang yin zhe na/ bdag gi skye ba zad do zhes bya ba de lta bu la sogs pa'o/ /gzhan yang bsdus pa'i don ni bsdu na 'dir yang dag pa ji lta ba bzhin du mthong ba dang / skyo ba dang / 'dod chags dang bral ba dang / rnam par grol ba dang / rnam par grol ba'i ye shes mthong ba yin par bstan to//de lta bu'i rang bzhin can ni mdo sde rnams kyi bsdus pa'i don du rig par bya'o/ /tshig gi don ni rjod pa gang gi brjod par bya ba gang yin pa ste/ de yang kha cig ni gcig la du ma 'byung ba dang / kha cig ni du ma la gcig 'byung ba ste/ re zhig cig la du ma 'byung ba ni dper na/ma zla ba'i bu mo'i bu'i mdo las/ de'i sems de 'dod chags dang bral ba dang / zhe sdang dang bral ba dang / gti mug dang bral ba yin no zhes bya ba 'byung ba lta bu ni de dag dang mi ldan par shes par bya ste/ kun tu chags pa ma yin pa'i chos can zhes bya ba la sogs pa gsungs pa'i phyir dang /phyir mi ldog pa'i chos can zhes gsungs pa'i phyir te/ yongs su nyams pa med pa dang / phyir ldog pa med pas phyi rol pa'i 'dod chags dang bral ba dang chos mi mthun pa'i phyir ro/ /yan lag lnga ba'i phywa mkhan gyi mdo las/ dge ba'i tshul khrims 'di dag ni sems kyis kun nas bslang ba dag ste/sems de gang zhe na/ 'dod chags dang bral ba dang zhe sdang dang bral ba dang gti mug dang bral ba yin no zhes bya ba ni ma chags pa la sogs pa dag dang mtshungs par ldan par shes par bya'o/ /'dod chags la sogs pa dag dang mi ldan pa yang ma yin la/lung du ma bstan pa yang ma yin te/ so so thar pa'i sdom pa'i dbang du mdzad pa'i phyir ro/ /sems kyi rnam grangs mngon par shes pa bstan pa las/ sems 'dod chags dang bral na sems 'dod chags dang bral lo snyam du yang dag pa ji lta ba bzhin du rab tu shes pa dang /zhe sdang dang bral ba dang gti mug dang bral ba zhes bya ba ni 'dod chags la sogs pa dag dang mtshungs par ldan pa ma yin par shes par bya'o/ mi ldan pa yang ma yin la/ /gdon mi za bar ma chags pa la sogs pa dang mtshungs par ldan pa yang ma yin no//ci'i phyir mi ldan pa ma yin zhe na/ 'dod chags la sogs pa dang bral ba nyid rnam par grol ba nyid du 'gyur bas so/ /cir 'gyur zhe na/ de logs shig tu bstan par mi 'gyur la/ mngon par shes pa spyi bo dag la yang 'dod chags la sogs pa dang bral bar smos par mi 'gyur te/rnam par grol ba bzhin no/ /gal te 'dod chags la sogs pa dang bral ba de dang mi ldan pa yin na/ 'o na ni 'dod chags la sogs pa dang bcas pa yang de dang ldan pa yin gyi de dang mtshungs par ldan pa ni ma yin no/ /cir 'gyur zhe na/tha dad pa smos par mi 'gyur te/ gcig la yang gsum char dang ldan pa'i phyir ro/ /rnam par ma grol ba yang logs shig tu smos par mi 'gyur ro/ /gal te 'dod chags dang bral ba mi ldan pa yin yang 'dod chags dang bcas pa ldan pa tsam la mi brjod par mtshungs par ldan pa la bya'o zhes pa ni gal te nag po'i phyogs dang mthun pa de dang mtshungs par ldan pa yin la/dkar po'i phyogs dang mthun pa ni de dang mi ldan pa yin na cir 'gyur zhe na/ rnam par grol ba logs shig tu smos par mi 'gyur zhing / 'dod chags la sogs pa dang mtshungs par ldan pa yang ma yin mi ldan pa yang ma yin pa'i dge ba zag pa dang bcas pa dang /lung du ma bstan pa gang yin pa de yang smos par mi 'gyur ro/ /re zhig nyon mongs pa gzhan dang nye ba'i nyon mongs pa dang mtshungs par ldan pa'i sems kyang ji ltar smos par 'gyur te/de la yang de bzhin du 'gyur ro zhe na/ tshor ba rnam pa gsum la gnas pa'i sems kyi dbang du byas nas de dang mtshungs par ldan pa'i nyon mongs pa'i rtsa ba gsum po dag smos pa'i phyir/ de la gnas pa'i sems dang mtshungs par ldan pa'i nyon mongs pa dang nye ba'i nyon mongs pa dang /nye ba'i nyon mongs pa de'i phyogs dang mthun pa gzhan rnams kyang smos pa kho na yin pas de dang mtshungs par ldan pa'i sems ma smos pa ma yin no/ /gal te 'o na 'dod chags dang mtshungs par ldan pa ma yin pa 'dod chags dang bral ba yin na/ zhe sdang dang mtshungs par ldan pa yang 'dod chags dang bral ba yin no zhe na/ de la de ltar bzung ba go ba ma yin te/ de la ni zhe sdang dang bcas pa nyid du bzung ste/ ji lta bu dang mtshungs par ldan par bzung ba'i phyir de kho na bzhin du bstan to/ /'dod chags la sogs pa dang bral ba ni tha dad par yang bzung ste/gang dang mtshungs par ldan pa de dang bral ba dang / gzhan dang yang mtshungs par ldan pa ma yin pa las so/ /tha dad pa ma yin par yang yin te/ thams cad dang mtshungs par mi ldan pa'i las so/ /gang zhig 'di skad du/ gal te 'dod chags dang ldan pa 'dod chags dang bcas pa yin na de ni pha rol gyi sems shes pas 'dzin par mi 'thad de/ci'i phyir zhe na/ 'dod chags dang ldan pa ni des dmigs pa'am de'i thob pa'i sgo nas yin grang na/ de gnyis kyang des mi 'dzin te/ pha rol gyi sems shes pas de la dmigs pa can dang /sems dang mi ldan pa la dmigs pa can du gyur na mi rung bas so zhes zer ba de la 'di skad ces re zhig ji ltar na pha rol gyi sems shes pas sems rnam par grol ba 'dzin par 'gyur te/ de la yang de bzhin du 'gyur ro zhes brjod par bya'o/ / de yang ji ltar 'dzin par 'gyur zhe na/ 'di ni bsam gyis mi khyab pa sems pa ste/ bcom ldan 'das kyis bsam gtan pa rnams kyi bsam gtan gyi yul ni bsam gyis mi khyab po zhes gsungs so/ /'on kyang 'dod chags la sogs pa'i bag chags dang bcas pa'i sems khyad par can la 'dzin to//de ltar na tshig gcig la don du ma byung ba yin no/ /yang dper brjod par bya ste/ dper na/ gzugs zhes bya ba gzugs phung dang / /kha dog bsam gtan rnam par 'dren/ /gzugs zhes bya ba gzugs kyi phung po la ni gzugs la bdag tu rjes su lta zhing rnam par shes pa'i bar du zhes 'byung ba lta bu'o//kha dog la ni mig gis gzugs rnams mthong nas zhes 'byung ba lta bu'o/ /bsam gtan rnams la ni gzugs kyi 'dod chags dang / gzugs med pa'i 'dod chags zhes 'byung ba lta bu'o//rnam pa la ni gzugs rnams kyi sdug pa'i gzugs dag la kun tu chags zhes 'byung ba lta bu'o/ /mtha' ni zad dang 'jug cha dang / /nye dang phyogs dang smad pa la'o/ /mtha'i sgra zad pa la ni sdug bsngal gyi mthar 'byin zhes 'byung ba lta bu'o/ /mjug la ni/ 'tsho ba'i mtha' ni 'chi ba yin zhes 'byung ba dang /'dir ni 'gro bas 'jig rten mthar/ /nam yang phyin par mi 'gyur ro zhes 'byung ba lta bu'o/ /cha la ni mtha' gsum ste/ 'jig tshogs kyi mtha' dang / 'jig tshogs kun 'byung ba'i mtha' dang / 'jig tshogs 'gog pa'i mtha'o zhes 'byung ba lta bu'o//nye ba la ni sa blangs nas chu'i mthar 'gro'o zhes 'byung ba lta bu'o/ /phyogs la ni mtha' gang du phyin zhes 'byung ba dang / mtha' gcig tu 'dug go zhes 'byung ba lta bu'o/ /smad pa la ni 'di ni 'tsho ba rnams kyi mtha' ste/ 'di lta ste/ slong mo'i zhes bya ba lta bu ste tha chad do zhes bya bar mngon no/ /mchog gi sgra ni gtso bo dang / /dang po rtse mo mdun don dang / /tshig dang mang po dag dang ni/ /dmigs pa la yang yod par mthong / /gtso bo la ni sems can gang su dag yod pa de rnams kyi mchog ni de bzhin gshegs pa yin par bshad ces 'byung ba lta bu'o//dang po la ni stan gyi thog ma dang / chu'i thog ma dang / bsod snyoms kyi thog ma zhes 'byung ba lta bu'o/ /rtse mo la ni skra'i rtse mos sam/ rtswa'i mchog mas sam zhes 'byung ba lta bu'o//mdun gyi don la ni mdun du 'gro'o zhes 'byung ba lta bu'o/ /tshig la ni tshigs kyi sa bon zhes 'byung ba lta bu'o/ /mang po la ni khrom gyi ru zhes 'byung ba lta bu'o/ /dmigs pa la ni sems rtse gcig pa nyid dang / sems mi 'brel ba zhes 'byung ba lta bu'o/ /nye bar sgyur ba dang bcas pa dang yid bde ba la yang mthong ste/mgu ba nyid du gyur yi rangs pa nyid du gyur zhes 'byung ba lta bu'o/ /blo gcig pa nyid la yang yod de/ nyan thos kyi dge 'dun rnams mthun pa rnams la ltos zhes 'byung ba lta bu'o/ /mtha' dag nyid la yang yod de/ rkyen rnams tshogs pa zhes 'byung ba lta bu'o/ /gzhon pa nyid la yang yod de/ lang tsho gzhon nu dang ldan pa zhes 'byung ba lta bu'o/ /'jig rten zhes bya sems can dang / /snod dang sdug bsngal 'gro 'dod la'o/ /sems can dag la ni chos gsum po 'di dag ni 'jig rten gyi mi 'dod pa dang /mi sdug pa dang / mi dga' ba dang / yid du mi 'ong ba'o zhes 'byung ba lta bu'o/ /snod la ni 'jig rten gyi bar gyi 'jig rten dag yod do zhes 'byung ba lta bu'o/ /sdug bsngal gyi bden pa la ni 'jig rten gang zhe na/ nye bar len pa'i phung po lnga po rnams so zhes 'byung ba lta bu'o//'gro ba la ni lan cig 'jig rten 'dir 'ongs na sdug bsngal gyi mthar 'byin to zhes 'byung ba lta bu'o/ /'dod pa rnams la ni kun tu rgyu dag 'dod pa'i yon tan lnga po 'di dag ni 'phags pa'i chos 'dul ba la ni 'jig rten zhes bya'o 'byung ba lta bu'o//zang zing zhes bya rnyed pa dang / /'dod yon gzugs dang zad la yod/ /rnyed pa la ni dge slong dag nga ni chos kyi bgo skal la spyod cing gnas pa yin gyi/ zang zing gi bgo skal la spyod pa ni ma yin no zhes 'byung ba lta bu'o/ /'dod pa'i yon tan rnams la ni gang la so so'i skye bo rnams chags pa 'di ni 'jig rten gyi zang zing drag po yin no zhes 'byung ba lta bu'o//gzugs la ni zang zing dang bcas pa'i rnam par thar pa gang zhe na/ gzugs dang ldan pa gang yin pa'o zhes 'byung ba lta bu'o/ /zas la ni lag pa zas dang 'bags pas chu snod la mi gzung zhes 'byung ba lta bu'o//'jig rten na zang zing gi sgra ni sha la yang yod do / /sha med pa'i zas dang zhes 'byung ba lta bu'o/ /'byung ba zhes bya skyes bden dang / /sa khams sogs dang 'dus byas dang / /yod dang sems can rnams dang ni/ /mi ma yin pa rnams la yod//skyes pa la ni zas bzhi ni sems can 'byung ba rnams gnas pa'i phyir ro zhes 'byung ba lta bu ste/ skyes pa rnams zhes bya bar shes so/ /bden pa la ni de yang dus bzhin du smra ba dang / yang dag par smra ba yin zhes 'byung ba lta bu'o/ /sa'i khams la sogs pa la ni 'byung ba chen po bzhi dag ces 'byung ba lta bu'o//'dus byas la ni dge slong byung ba la skyo bar bya ba'i phyir dang / 'dod chags dang bral bar bya ba'i phyir dang / 'gog par bya ba'i phyir zhugs pa yin no zhes 'byung ba lta bu'o/ /yod pa la ni bdag nyid la ji ltar yod pa bzhin du smra ba yin zhes 'byung ba lta bu'o//sems can rnams la ni 'byung po thams cad la dbyug pa spangs nas zhes 'byung ba lta bu'o/ /mi ma yin pa rnams la ni/ 'byung po gang dag 'dir ni lhag gyur cing / /sa'am 'on te bar snang 'khod pa dag /ces 'byung ba dang / 'byung pos zin pa dang /'byung po'i sman pa zhes 'byung ba lta bu'o/ /pa da zhes bya mya ngan 'das/ /rkang pa cha dang yud tsam dang / /bzhi dang bden gnyis rkang pa'i phyogs/ /rjes dang tshig la yod pa yin/ /mya ngan las 'das pa la ni zhi ba'i go 'phang bla na med pa zhes 'byung ba lta bu'o/ /rkang pa la ni sems can gang dag rkang pa med pa'am/rkang gnyis sam/ rkang mangs sam zhes 'byung ba lta bu'o/ /cha la ni chos kyi rnam grangs tshig bzhi pa zhes 'byung ba lta bu'o/ /yud tsam la ni sems yud tsam yud tsam la ni yi chad cing rnam par rtog pa rnams kyi dbang du song zhes 'byung ba lta bu'o//gzhi la ni bag yod pa ni mi 'chi ba'i gzhi yin te/ bag med pa ni 'chi ba'i gzhi yin zhes 'byung ba lta bu'o/ /bden pa rnams la ni slob pa'i gzhi mthong ba zhes 'byung ba lta bu'o/ /rkang pa'i phyogs la ni bram ze bre bo dang rus gcig pas bcom ldan 'das kyi gom gnas su zhabs la 'khor lo dag mthong ngo zhes 'byung ba lta bu'o//rjes la ni/ mkha' la bya yi rjes bzhin du/ /de dag rtogs par dka' ba yin/ zhes 'byung ba lta bu'o/ /tshig la ni legs par bshad pa'i tshig gcig gi don kyang shes par byas nas zhes 'byung ba lta bu'o//chos ni shes bya lam dang ni/ /mya ngan 'das dang yid kyi yul/ /bsod nams tshe dang gsung rab dang / /'byung 'gyur nges dang chos lugs la'o/ /chos kyi sgra zhes bya ba la ni chos gang la la 'dus byas sam 'dus ma byas sam de rnams kyi mchog ni 'dod chags dang bral ba yin par bshad do zhes 'byung ba lta bu'o//lam la ni dge slong dag log pa'i lta ba ni chos ma yin la yang dag pa'i lta ba ni chos yin no zhes rgyas par 'byung ba lta bu'o/ /mya ngan las 'das pa la ni chos la skyabs su song ba zhes 'byung ba lta bu'o//yid kyi yul la ni chos kyi skye mched ces 'byung ba lta bu ste/ de ni yid kho na'i yul yin zhing yul kho na yin gyi rten ni ma yin no/ /bsod nams la ni btsun mo'i 'khor dang gzhon nu ma rnams dang lhan cig tu chos spyod ces rgyas par 'byung ba lta bu'o/ / tshe 'di la ni mthong ba'i chos la myong bar 'gyur ba dang / byis pa ni mthong ba'i chos gces par 'dzin pa yin zhes 'byung ba lta bu'o/ /gsung rab la ni 'di la dge slong chos shes pa ni 'di lta ste/ mdo'i sde dang / dbyangs kyis bsnyad pa'i sde dang zhes rgya cher 'byung ba lta bu'o/ / 'byung bar 'gyur ba la ni 'du byed kyi rdzas rnams ni de'i chos so zhes 'byung ba dang / de ltar 'di lta ste/ lus 'di ni rga ba'i chos yin no zhes 'byung ba lta bu'o/ /nges pa la ni dge slong gi chos bzhi rnams zhes 'byung ba lta bu dang / de bzhin du dge slong dag srog gcod pa ni chos ma yin la srog gcod pa spangs pa ni chos yin no zhes rgya cher 'byung ba lta bu'o//chos lugs la ni yul chos dang rigs chos zhes 'byung ba lta bu'o/ /spangs pa zhes bya btang ba dang / /bral dang gnod dang bag la nyal/ /bton pa'o spangs pa la sogs pa'i/ /spangs pa zhes bya gnyis su bzhed//spangs pa zhes bya ba btang ba la ni longs spyod kyi phung po che ba'am/ chung ba yang spangs nas zhes 'byung ba lta bu'o/ /rgyun dang bral ba la ni sdig pa mi dge ba'i chos skyes pa rnams spangs nas zhes 'byung ba lta bu'o/ /'jig rten pa'i lam gyis gnon pa la ni/'dod pa rnams la 'dod pa'i 'dun pa spangs nas des lan mang du gnas shing / tshangs pa'i 'jig rten dang skal ba mnyam par skyes zhes 'byung ba lta bu'o/ /bag la nyal yang dag par bcom pa la ni kun tu sbyor ba gsum spangs pa las/ rgyun tu zhugs pa yin no zhes 'byung ba lta bu'o//de bzhin du spangs par mthong ba dang / sdom pas spong ba dang / rjes su srung bas spong ba dang / bsgom pas spong ba ste/ nyan thos la bshad pa'i mdo sde gnyis las rnam pa gnyis su rnam par phye'o/ /tshul gyi sgra ni bden pa dang / /lam dang 'brel 'byung rig pa dang //nges 'byed cha dang mya ngan 'da'/ /thabs dang rigs pa nyid la yod/ /sdom gyi tshigs su bcad pa/ bden dang yan lag brgyad dang 'byung / /zhes bya ba 'di las/ 'phags pa'i tshul gyi sgra ni bden pa rnams dang / lam dang rten cing 'brel par 'byung ba la yang mthong ngo //rig pa rnams la yang mthong ste/ bram ze nga ni 'phags pa'i chos 'dul ba 'di la 'phags pa'i tshul gyis gsum rig pa yin par smra'o zhes 'byung ba lta bu ste 'di las so/ /nges par 'byed pa'i cha dang mthun pa rnams la yang mthong ste/gang su dag dran pa nye bar gzhag pa bzhi rnams dang mi mthun par byed pa de dag ni 'phags pa'i tshul la de dag gis mi mthun par byas pa yin no zhes 'byung ba lta bu'o/ /tshul gyi sgra ni mya ngan las 'das pa la yang mthong ste/ khyim pa'am rab tu byung ba'am/gang zhig yang dag grub byed pa / /des ni bla med tshul nyid kyi/ /chos ni kun tu thob par 'gyur/ /zhes 'byung ba lta bu'o/ /thabs la yang mthong ste/ tshul gyi brtson 'grus brtsams pa la/ /bya bar dka' ba ci yang med/ /ces 'byung ba lta bu'o/ / rigs pa la ni tshul bzhin byed do zhes 'byung ba lta bu'o/ /las mtha' zhes bya nor tshol dang / /gsum bdun spangs pa rnams la'ang yod/ /las kyi mtha' zhes bya ba nor tshol ba la ni des gal te zhing dang / gal te tshong gi las kyi mtha' de dang de byed do zhes rgyas par 'byung ba lta bu'o//gsum pa spangs pa la yang yod de/ 'jig rten pa'i yang dag pa'i las kyi mtha' gang zhe na zhes rgyas par 'byung ba nas/ srog gcod pa'i bar du spangs nas srog gcod pa las phyir ldog pa yin/ de bzhin du 'dod pa las log par g.yem pa las zhes bya ba'i bar du 'byung ba lta bu'o//bdun spangs pa la yang yod de/ las kyi mtha' phun sum tshogs pa gang zhe na/ srog gcod pa spangs pa nas srog gcod pa las phyir log pa yin zhes bya ba'i bar dang / de bzhin du tshig 'khyal pa smra ba las zhes bya ba'i bar du 'byung ba lta bu'o//las kyi mtha'i sgra ni mtshams med pa la yang yod de/ log pa'i las kyi mtha' med pa nyid ces gsungs pa'i phyir te/ chos 'dul ba 'di las log cing drang du mi rung ba rnams ni gang zag lnga dag ste/ ma gsod pa dang zhes mdo las rgyas par gsungs pa las so//log pa de rnams kyi las kyi mtha' ni log pa'i las kyi mtha' ste/ mtshams med pa lnga po dag go/ /'di la log pa'i las kyi mtha' med pas na log pa'i las kyi mtha' med pa ste/ de dngos po ni log pa'i las kyi mtha' med pa nyid do/ /phung po zhes bya ba spungs pa dang //phrag pa sdong po cha nyid la'o/ /phung po zhes bya ba spungs pa la ni de thams cad gcig tu bsdus nas gzugs kyi phung po zhes bya ba'i grangs su 'gro'o zhes bya ba dang / de bzhin du nor gyi phung po chen po bsgrubs nas gnas so zhes 'byung ba lta bu'o/ /phrag pa la ni dper na mi zhig sa las khri'u'i steng du 'jog nas rta'i steng nas glang po che'i phrag pa la zhon no zhes bya ba'i bar du 'byung ba lta bu'o//sdong po la ni shing ljon pa rtsa ba dang ldan pa dang / sbom pa dang ldan pa chen po'o zhes 'byung ba lta bu'o/ /cha la ni sbyin par bya ba phung po gsum dag tu sbyin no zhes 'byung ba lta bu'o/ / bsdu ba zhes bya rang bzhin dang / /rjes su mthun dang dga' ba dang / /nyams med khong su gtogs pa dang / /'dzin par byed dang don drug go/ /rang bzhin la ni gzugs kyi phung po ni skye mched bcu dang gcig gi phyogs kyis bsdus so zhes 'byung ba lta bu'o/ /rang bzhin dang rjes su mthun pa la ni 'phags pa'i lam yan lag brgyad ni phung po gsum dag gis bsdus so zhes 'byung ba lta bu'o//dga' bal ni bsdu ba'i dngos po bzhi po dag ces 'byung ba lta bu'o/ /yongs su nyams pa med pa la ni 'di ni dbang po lnga po de dag sdud par byed pa yin te/ 'di lta ste/ shes rab kyi dbang po zhes 'byung ba lta bu'o//khongs su gtogs pa la ni 'gro ba dud 'gro'i skyes gnas su song ba'i srog chags gang su yang rung ba de thams cad kyi rjes ni glang po che'i rjes su 'dus shing 'du ba yin no zhes 'byung ba lta bu'o/ /'dzin par byed pa la ni khang pa brtsegs pa'i phyam dgu po gang dag yin pa de dag gi mchog ni spyi rten yin te/'di lta ste/ sdud pa'i phyir ro zhes 'byung ba lta bu ste/ de lta bu ni dper brjod pa tsam du zad do/ /de ltar tshig gcig la don du ma byung ba yin te/ gang la gang rigs pa de la de brjod par bya'o/ /tshig du ma la don gcig pa ni dper na rnam grangs kyi tshig lta bu'o//gzhan yang don rnam pa gsum ste/ so so re re la brjod par bya ba'i don dang / bsdus pa'i don dang / dgos pa'i don no/ /de la so so re re la brjod par bya ba'i don ni rjod pa gang gi brjod par bya ba yang yin te/ dper na ma rig pa'i rkyen gyis 'du byed rnams zhes bya ba lam rig pa gang zhe na/zhes bya ba de lta bu la sogs pa bshad pa gang yin pa'o/ /bsdus pa'i don ni don tha dad pa'i tshig rnams kyi don bsdus pa gang yin pa ste/ ji lta bur srid pa'i yan lag bcu gnyis pa'i tshig rnams kyis mdor kun nas nyon mongs pa gsum po nyon mongs pa dang /las dang / skye ba'i kun nas nyon mongs pa rnams bstan pa lta bu dang / de bzhin du ma dad pa ni dad pa phun sum tshogs pa la yang dag par len du 'jug pa nas/ shes rab 'chal ba ni shes rab phun sum tshogs pa'i bar tshig 'di rnams kyis ni mdor na 'jug pa dang bcas pa'i mngon par mtho ba dang nges par legs pa'i rgyu yang dag par len du 'jug pa yongs su bstan pa yin te/'di ltar dad pas tshul khrims la sogs pa la 'jug la/ tshul khrims dang gtong ba gnyis kyis ni lus dang longs spyod phun sum tshogs pas bsdus pa'i mngon par mtho ba 'thob bo//shes rab kyis ni nges par legs pa 'thob bo zhes bya ba de lta bu la sogs pa'o/ /dgos pa'i don ni rnam grangs gsungs pa rnams kyi don brjod pa gang yin pa ste/ de dag la ni so so re re la brjod par bya ba'i don kyang med la/bsdus pa'i don kyang med de/ brjod par bya ba gcig tu zad pa'i phyir dang / de bzhin du bstan pa'i tshig rnams kyang bshad pa las brjod par bya ba'i don tha dad pa med pa'i phyir ci'i phyir bstan pa byas zhes dgos pa'i don brjod dgos te/ ji ltar dge slong ma'i don mdo sde las kun dga' bo yid phyi rol du bzhag nas yid phyi rol du bzhag go snyam pa dang /de'i 'og tu snga ma bzhin du mngon par bsdus nas bdag gi yid phyi rol du bzhag cing rnam par grol lo snyam du yang dag pa ji lta ba bzhin du rab tu shes so zhes bya ba ni bstan pa'o/ /lhag ma ni bshad pa'o//de bzhin du dge slong dag nga ni shin tu gzhon nur rab tu byung ngo zhes bya ba ni bstan pa'o/ /mchog tu gzhon nu dang rab tu gzhon nu zhes bya ba ni bshad pa yin te/ rang bzhin dang dus kyi khyad par gnyis kyis shin tu gzhon pa nyid rdzogs par bshad pa'i phyir ro/ /lhag ma bde ba phun sum tshogs pa yang dag pa bsngags pa ni rgyas par bshad pa yin te/mchog tu rab tu shin tu gzhon pa de nyid rgyas par bshad pa'i phyir ro/ /de bzhin du rten cing 'brel par 'byung ba gang zhe na/ 'di lta ste/ 'di yod pas 'di 'byung 'di skyes pa'i phyir 'di skye zhes bya ba ni bstan pa'o//'di lta ste/ ma rig pa'i rkyen gyis 'du byed rnams zhes rgyas par 'byung ba ni bshad pa'o/ /de bzhin du tshe dang ldan pa dag bcu gnyis po 'di dag ni khom par gyur pa yin no zhes 'byung ba 'di las bdag dang gzhan phun sum tshogs pa zhes 'byung ba ni bstan pa yin la/ lhag ma ni bshad pa yin te/ bstan pa dang bshad pa gnyis kyis bcu gnyis su 'gyur te/ de lta bu la sogs pa bstan pa'i tshig rnams kyi dgos pa'i don yang brjod dgos so/ /ji skad du phung po lnga rnams dang / nang gi skye mched drug rnams zhes bya ba de lta bu la sogs pa grangs gsungs pa lta bu dag kyang de dag gi brjod par bya ba'i don mi go ba ni ma yin na /ci'i phyir grangs gsungs pa'i dgos pa'i don yang brjod dgos so/ /de bzhin du tshig gzhan gang dag gi brjod par bya ba'i don ni grags na/ de'i don gyi nus pa nyid ma yin pas de dag gi dgos pa'i don yang brjod dgos te/dper na mnyan yod ga la ba der rgyu zhing gshegs so zhes bya ba'i brjod par bya ba'i don ni 'jig rten na grags na/ ci'i phyir sangs rgyas sam nyan thos ljongs rgyu zhing gshegs pa dang / de bzhin du ci'i phyir bcom ldan 'das zla ba phyed dang gsum nang du yang dag par 'jog par mdzad pa dang /ci'i phyir tshe dang ldan pa gsus po che chen po tshe dang ldan pa shA ri'i bu ga la ba der song ngo zhes bya ba de lta bu la sogs pa'i dgos pa yang brjod dgos so zhe na/ /de la rnam grangs gsungs pa dag gi dgos pa'i don ni sngar bshad par zad kyi lhag ma rnams brjod par bya ste/re zhig bstan pa'i tshig ni mdos 'grel pa'i don 'dzin par byed pa bzhin du bstan pa tsam gyis de bshad pa'i don 'dzin par bya ba'i phyir dang / gdul bya mgo smos pas go ba rnams rjes su gzung ba'i phyir dang / de las gzhan pa rnams la phyi ma la mgo smos pas go ba nyid kyis bsags pa'i phyir dang /bsdu ba dang rgyas par bshad pa la mnga' ba dang ldan pa yang dag par bstan pa'i phyir dang / gzhan rnams de lta bu la goms pa las de'i sa bon bskyed pa'i phyir ro/ /lung las bstan pa tsam la ni rnal 'byor pa rnams kyi sems mnyam par gzhag pa yin na/ji ltar na de rgyas pa'i don thams cad la mnyam par gzhag par 'gyur zhig gu/ zhes de'i don du bstan pa dang bshad pa gnyis kyis bstan to zhes 'byung ngo / /grangs gsungs pa ni/ kha cig ni bgrang bar bya ba nges par gzung ba'i phyir te/dper na phung po lnga rnams dang / nang gi skye mched drug rnams zhes 'byung ba lta bu'o/ /grangs smos pas mi brjed pa'i phyir kha cig ni bde blag tu bzung ba'i phyir te/ dper na gang la la'i sems nye ba'i nyon mongs pa nyi shu rtsa gcig gis nye bar nyon mongs pa can yin na zhes 'byung ba dang /bcur bskyed pa las kyang / chos gcig ni gces spras su byed pa yin te zhes bya ba nas sa bcu'i bar du 'byung ba lta bu'o/ /kha cig ni gang dag rgyas par bshad par dgos pas nyan par mi byed pa mang du mnyan pa dang / gzung bas 'jigs pa nyan du gzhug pa'i phyir te/dper na 'di dag ni dbang po gsum po dag ste/ mo'i dbang po dang pho'i dbang po dang srog gi dbang po zhes 'byung ba lta bu'o/ /kha cig ni bya ba mang pos 'jigs pa dag spro ba bskyed pa'i phyir te/ dper na dge slong dag chos gcig spongs shig dang khyed phyir mi 'ong bar 'gyur bar ngas khas len te zhes 'byung ba lta bu'o//kha cig ni gcig gis gcig bsdu ba bstan pa'i phyir te/ dper na 'di dag ni lnga dag tu gyur na gsum dag tu 'gyur la gsum dag tu gyur na lnga dag tu 'gyur ro zhes 'byung ba lta bu'o/ /kha cig ni tshad shes par bya ba'i phyir te/dper na bzang po'i sde pa drug cu dag gi tshogs zhes 'byung ba lta bu'o / /kha cig ni dngos po gcig tu shes par bya ba'i phyir te/ chos gnyis kyi bya ba dang zas dang gnyen po mtshungs pa'i phyir na/ dper na sgrib pa lnga rnams 'byung ba lta bu'o/ /kha cig ni nyid la lnga nas so so yang dag par rig par gyur pa'i don gsung ba nyid du yang dag par bstan pa'i phyir te/ji skad du bshad pa'am gzhan las kyang rung te gar rigs pa'o/ /de lta bu la sogs pa ni grangs gsungs pa'i dgos pa yin no/ /sangs rgyas rnams rgyu zhing gshegs pa ni rgyu bdun dag gis rig par bya ste/yul gzhan na 'khod pa rnams 'dul ba'i phyir dang / de na 'khod pa rnams skom par bya ba'i phyir dang / nyan thos rnams gcig na ha cang yun ring du gnas pa spang ba'i phyir dang / nyid de la chags pa mi mnga' bar yang dag par bstan pa'i phyir dang /yul rnams mchod rten du 'gyur ba'i phyir dang / srog chags mang po rnams de'i drung du blta ba dang 'gro ba la sogs pas bsod nams bskyed pa'i phyir dang / yams kyi nad dang than pa la sogs pa'i skyon rab tu zhi bar bya ba'i phyir ro/ /bsdus pa'i tshigs su bcad pa ni /yul gzhan 'dul bar bya phyir dang / /de na 'khod pa bsgom bya'i phyir/ /nyan thos du ma gnas bya'i phyir/ /chags pa mi mnga' bstan phyir dang / /yul rnams mchod rten 'gyur phyir dang / /lus can rnams kyi bsod nams phyir/ /yams nad la sogs zhi bya'i phyir//sangs rgyas rgyu zhing gshegs par mdzad/ /nyan thos dag ni rgyu bco lnga dag gis rgyu bar rig par bya ste/ ji skad du bcom ldan 'das kyis nyes dmigs lnga dag ste/ ha cang yun ring du gnas na bya ba mang zhing byed pa mang ba yin pa dang / snod spyad mang zhing 'tshog chas mang ba yin pa dang /gnas la ser sna byed cing gnas la zhen pa yin pa dang / khyim la ser sna byed cing khyim la zhen pa yin pa dang / chags pa dang bcas bzhin du gnas de nas 'gro bar byed do zhes 'byung ba'i nyes dmigs lnga bstan pa'i phyir dang / de bzhin du chos gos la sogs pa dang mi ldan pa'i phyir dang /mi dga' bas gnod pa'i phyir dang / nad kyis gzir ba'i phyir dang / 'dod chags kyis gzir ba'i phyir dang / mi dang mi ma yin pas byas pas gzhan gyi lus dang sems la gnod pa byed pa'i phyir dang / rnyed pa la sogs pa 'dod pa'i phyir dang /gzhan la dga' ba'i phyir dang / gzhan la snying brtse ba'i phyir dang / bla ma la zhes bya ba'i phyir dang / yul la sogs pa la ltad mo lta ba'i phyir dang / dge ba'i phyogs khyad par du bya ba'i phyir dang / ltung ba bshags pa'i phyir dang / dkon mchog gsum la bkur sti bya ba'i phyir dang / mchod rten la phyag bya ba'i phyir ro/ /bsdus pa'i tshigs su bcad pa ni/ /nyes dmigs lnga dang mi ldan dang / /mi dga' nad chags gnod pa'i phyir/ /rnyed sogs sred dang dga' ba dang / /snying brtse bla ma zhe sa dang / ltad mo khyad par bya phyir dang //btung ba dkon mchog bkur sti'i phyir/ /mchod rten phyag ni bya ba'i phyir/ /dge slong rgyu zhing 'gro bar byed/ /bcom ldan 'das zla ba phyed dang gsum nang du yang dag par 'jog par mdzad pa ni nyan thos rnams skom par bya ba'i phyir te/ 'dir/ da ltar nga ni snying brtse ba//mi chung chos la'ang ser sna med/ /dpe mkhyud med cing mi nus med/ /nga ni sdug bsngal rang bzhin min/ /nga yi bstan pa ma zad la/ /khyed las re ba'ang yod min te/ /'dul bas nga'i shes mi nus shing / /gus dang bcas pa'ang med pas na/ /des na bstan par mi bya bar//mkhyen cing skom par bya ba'i phyir/ /zla ba phyed dang gsum dag tu/ /bcom ldan nang du yang dag 'jog /ces gsungs pa lta bu'o/ /bsod nams ye shes zang zing skyabs / /dga' dang glan ka btsal ba dang / /shes dang byas gzo yon gnas dang //de dang gzhan dang gnyis brtse dang / /'jigs dang ltad mo gnyis dang ni/ /gzhan gyi rjes su 'brang ba'i phyir/ /rgyu ni bcu dang lnga rnams kyis/ /song ba yin par rab tu 'dod/ /de ni ci rigs par rig par bya'o/ /rnam par bshad pa'i rigs pa las/ le'ur byas pa dang po'o// //bam po gnyis pa/ /'di man chad ni gzhan dag la tshig gi don bshad pa la mkhas pa nyid bskyed pa'i phyir mdo sde'i dum bu kha cig ni tshig gi don bshad pa'i phyir phyogs phal cher bstan par bya ste/ sangs rgyas kyi bsngags pa las brtsams nas ni 'di ltar yang bcom ldan 'das de ni zhes rgyas par 'byung ba dang /de'i tshe lha dang bcas pa dang zhes rgya cher 'byung ba dang / ma dul ba rnams dul bar mdzad pa zhes rgyas par 'byung ba dang / de bzhin gshegs pa ni lam mkhyen pa lam thugs su chud pa zhes rgyas par 'byung ba mdo sde'i dum bu bzhi dag ste/de la mdo sde'i dum bu dang po las 'byung ba'i tshig rnams kyi bsdus pa'i don ni/ bgegs bcom nas ston pa nyid phun sum tshogs pa gang du/ gang gis/ ji ltar gshegs pa dang / ston pa'i phrin las gang yin pa dang /gang dag gis yongs su gzung ba zhes bya ba 'di yongs su bstan to/ /de la bgegs ni bdud sdig can du 'dod de/ de bcom pa dang ldan pa'i phyir bcom ldan 'das zhes bya'o/ /ston pa nyid phun sum tshogs pa ni ji lta ba bzhin du gsung ba nyid dang grub pa nyid de/go rims bzhin du ma nor bar gsung ba'i phyir dang / spangs pa dang mkhyen pa phun sum tshogs pa'i phyir te nyon mongs pa ma lus par spangs pa'i phyir dang / thams cad mkhyen pa nyid kyis yang dag pa ji lta ba bzhin du rdzogs par byang chub pa'i phyir ro/ /gzhan yang ma nor ba dang /nyon mongs pa can ma yin pa dang / ji tsam du gsung bar bya ba gsung ba nyid ston pa nyid phun sum tshogs pa yin te/ de ni de bzhin gshegs pa la sogs pa nyid kyis rnam pa gnyis ka yang yin par bstan to/ /gang gis gshegs pa zhes bya ba ni rig pa dang zhabs su ldan pa nyid kyis te/de la rig pa ni yang dag pa'i lta ba ste/ yang dag pa ji lta ba bzhin du lta ba'i phyir ro / /zhabs ni lam gyi yan lag lhag ma dag ste/ de ltar na 'phags pa'i lam yan lag brgyad kyis gshegs pa yin par bstan pa yin te/ mi mthong ba'am/ rkang pa med pa ni 'gro bar mi nus pas so/ /gzhan yang rig pa ni yang dag pa ji lta ba bzhin gyi shes rab yin la/ de'i zhabs ni tshul khrims dang ting nge 'dzin yin te/ de ltar na bslab pa gsum po dag gis gshegs pa yin par bstan pa yin no/ /shes rab sngar smos pa ni gtso bo nyid yin pa'i phyir te/de'i dbang gis tshul khrims la sogs pa rtsom pa rnam par dag pa'i phyir la/ rig pa mig dang 'dra bas mthong ste/ zhabs rkang pa lta bus gshegs pa'i phyir ro / /gzhan yang mi slob pa'i rig pa gsum dag ni rig pa zhes bya ba la/zhabs ni tshul khrims nas gzung nas/ mngon par shes pa gsum po'i bar dag ste/ de ltar na rig pa gsum tshogs dang bcas pa rnams kyis ston pa nyid phun sum tshogs pa mnyes par bstan pa yin no/ /ji ltar gshegs pa zhes bya ba ni phyir mi ldog pa dang / ji tsam du gshegs par bya bar te/des na bde bar gshegs pa zhes bya ba ste/ phyi rol pa'i 'dod chags dang bral ba dag dang / de las gzhan pa dgra bcom pa dag las khyad par du bya ba'i phyir ro/ /ston pa nyid kyi phrin las ni rnam pa gnyis te/ 'jig rten skal ba dang ldan pa dang skal ba dang mi ldan pa la gzigs par mdzad pa ste/des na 'jig rten mkhyen pa zhes bya'o/ /gdul ba 'dul ba yang yin te/ des na skyes bu 'dul ba'i kha lo sgyur ba bla na med pa zhes bya ste/ skyes bu 'dul ba chu klung 'od srungs dang / dga' bo dang / sor mo'i phreng ba la sogs pa gdul dga' ba rnams kyang thabs sla ba dang kha na ma tho ba med pas 'dul ba'i phyir dang /gtan du don gyi mchog mya ngan las 'das par 'dul ba'i phyir ro/ /gang dag gis yongs su bzung ba zhes bya ba ni lha dang mi rnams kyis bstan pa nyid yongs su bzung ba bstan to //lha dang mi rnams kyi ston pa zhes gsungs pa'i phyir ro/ /de ni zhes gsungs pa de gang yin zhe na/ sangs rgyas bcom ldan 'das so zhes bya ba gsungs te/ gang zhig sangs rgyas so zhes de ltar grags pa ste/ grags pa dang bcom pa ni rnam grangs yin pa'i phyir ro//'dir bshad pa/ dbang phyug dang ni gzugs bzang dang / /grags dang dpal dang ye shes dang / /brtson 'grus phun sum ldan pa yi / /drug po dag la bcom zhes bshad/ /gzhan yang bsdus pa'i don ni de ni rgyas pa dang mdor bstan pa'i yon tan bsngags pa yin te/rgyas pa ni tshig dgu po dag gis ji skad gsungs pa lta bu'o/ /mdor ni sangs rgyas bcom ldan 'das te/ shes bya thams cad thugs su chud pa'i phyir dang / bdud dang phas kyi rgol ba thams cad rab tu 'joms pa'i phyir ro/ /mdo sde'i dum bu gnyis pa las mdor bstan pa dang bshad pa gnyis kyis nyid kyi nyon mongs pa'i sgrib pa dang /shes bya'i sgrib pa las rnam par grol ba'i khyad par ston par mdzad de/ de la lha dang bcas pa'i 'jig rten zhes bya ba ni bstan pa yin no / /de la rnam par grol ba'i khyad par ni lha dang mi'i gtso bo dang / gtso bo ma yin pa rnams la rnam par grol ba la sogs pas ston te/ lha gtso bo rnams ni 'dod pa'i dbang phyug bdud rnams dang / rnal 'byor gyi dbang phyug tshangs pa rnams so/ /mi'i gtso bo rnams ni dge sbyong dang bram ze rnams te/ rgyal pos kyang mchod pa'i phyir ro/ /lha dang mi'i gtso bo ma yin pa rnams ni de las gzhan pa'i lha dang mi rnams dang bcas pa'i skye dgu ste/lha dang bcas pa'i 'jig rten de las so/ /so so'i skye bo 'dod chags dang ma bral ba rnams ni ma grol ba dag yin la/ 'jig rten pa'i lam gyis 'dod chags dang bral ba mthong ba'i chos las yongs su nyams pa'i chos can rnams ni grol ba ni yin na/nges par 'byung ba dag ni ma yin zhing yongs su mi nyams pa'i chos can rnams ni grol ba dang nges par 'byung ba dag ni yin na bral ba dag ni ma yin te/ rus sbal gyi phru gu rnyis zin pa bzhin du bag la nyal rjes su 'brang ba'i phyir ro//rab tu rnam par grol ba dag kyang ma yin te/ slar 'ong ba'i phyir la slar 'ong ba dang bral bar 'gro ba ni rab tu rnam par grol ba dag yin pas so/ /de dag dang chos mi mthun pas bcom ldan 'das kyis nyid kyi rnam par grol ba la sogs pa nyid ston par mdzad do//rnam grangs gzhan yang 'di las phyi rol pa rnams ni tshangs pa dang bcas pa'i 'jig rten gyis sa de'i nyon mongs pa kun nas dkris pa'i 'ching ba chad pa las grol ba yang yin/ sa de'i btson ra nas nges par 'byung ba yang yin mod kyi/ phyi bzhin 'brang ba'i mi lta bu'i kun tu sbyor ba gsum rnams kyis bral ba ma yin pa nyid do//des na sa 'og ma pa'i nyon mongs pa kun nas dkris pa'i 'ching ba dang / skye bo'i btson ra nas rab tu rnam par ma grol ba yang yin te/ yang slar ldog pa'i phyir ro/ /de dag las khyad par du bya ba'i phyir bcom ldan 'das kyis nyid kyi rnam par grol ba rnam pa bzhi ston par mdzad do//rnam grangs gzhan yang 'di las phyi rol pa rnams ni sa 'og ma pa'i nyon mongs pa'i 'ching ba las grol ba dag kyang yin/ sdug bsngal gyi btson ra nas nges par 'byung ba dag kyang yin mod kyi/sa gzhan pa'i nyon mongs pa dang yang ma bral ba yin la/ sdug bsngal las kyang rab tu rnam par ma grol ba dag yin te/ de dag las kyang khyad par du bya ba'i phyir snga ma bzhin no/ /'di ltar yang yin te/ 'di las phyi rol pa dag ni 'di ltar nyon mongs pa'i 'ching ba las grol zhing skye ba'i btson ra nas nges par 'byung ba yin la/de las bral ba ni ma yin te/ pad ma'i rtsa ba bcag pa rtsa rgyus kyis 'brel pa bzhin du bag la nyal dang 'brel pa'i phyir ro/ /rab tu rnam par ma grol ba dag kyang yin te/ yang sa der slar 'ong ba'i phyir ro//de dag las kyang khyad par du bya ba'i phyir snga ma bzhin no/ /de dag ni gnas skabs de dag na bdag nyid yang dag pa ji lta ba bzhin rab tu mi shes nas grol ba la sogs par mngon pa'i nga rgyal gyi sems phyin ci log dang ldan pas lan mang du gnas pa yin gyi/ bcom ldan 'das la ni de mi mnga' ba'i phyir sems phyin ci ma log pas so//de ltar nyon mongs pa'i sgrib pa las rnam par grol ba'i khyad par bstan nas/ shes bya'i sgrib pa las rnam par grol ba'i khyad par ni de'i tshe bdag ni bla na med pa yang dag par rdzogs pa'i byang chub mngon par sangs rgyas par shes so zhes bya ba ston te/thugs su chud pas mkhyen pa'i phyir ro/ /mdo sde'i dum bu gsum pa las 'dul bar mdzad pa ni nyon mongs pa spangs pa la rab tu 'jog par mdzad pa'i phyir ro/ /zhi bar mdzad pa ni zhi ba'i snyoms par 'jug pa'i bde bar gnas pa la rab tu 'jog par mdzad pa'i phyir ro//de gnyis dang ldan pa'i phyir mdo sde gzhan las thugs dul ba dang / rnam par zhi ba mchog dang ldan pa zhes gsungs so/ /dbugs 'byin par mdzad pa ni ngan 'gro las yang dag par 'das pa la rab tu 'jog par mdzad pa'i phyir ro / / yongs su mya ngan las 'das par mdzad pa ni yang srid pa las yang dag par 'das pa la rab tu 'jog par mdzad pa'i phyir ro/ /mdor na ni dul ba dang dul ba'i phan yon la rab tu 'jog par mdzad pa nyid du bstan pa yin te/ dul ba ni nyon mongs pa spangs pa'o/ /dul ba'i phan yon ni mthong ba'i chos la zhi ba'i bde bar gnas pa dang tshe phyi ma la ngan song dang yang srid pa mi 'byung ba'o//gzhan yang go rims bzhin du/ nyon mongs pa dang sdug bsngal las/ /gtan dang ma lus grol mdzad phyir/ /phyi rol pa ni gtan du'ang min/ /ma lus las kyang grol byed min//gzhan yang / lus ngag dbang po dul ba dang / /bsam gtan bden mthong zad pa la/ /'jog phyir 'dul mdzad la sogs nyid/ /rig bya n+ya gro d+ha'i mdo bzhin/ /de la bsam gtan ni shes bzhin du gnas pa las gzung nas bsam gtan bzhi dag gi bar dag yin par rig par bya ste/sbyor ba dang bcas bar bzung ba'i phyir ro/ /lung las ni 'dul bar mdzad pa ni dbang po dul bas tshul khrims rnam par dag pa la rab tu 'jog par mdzad pa'i phyir ro/ /zhi bar mdzad pa ni ting nge 'dzin rnam par dag pa la rab tu 'jog par mdzad pa'i phyir ro//dbugs 'byin par mdzad pa ni/ shes rab rnam par dag pas dbugs 'byin pa dang / dbugs mchog tu phyin pa gnyis la rab tu 'jog par mdzad pa'i phyir ro/ /yongs su mya ngan las 'das par mdzad pa ni de nyid kyis bsil bar gyur pa dang / mchog tu bsil bar gyur pa gnyis la rab tu 'jog par mdzad pa'i phyir ro zhes 'byung ngo //'dis ni mdor na rgyu dang bcas pa'i bslab pa gsum yongs su rdzogs pa la rab tu 'jog par mdzad pa nyid du bstan pa yin no/ /mdo sde'i dum bu bzhi pa las ni mdor tshig dang po gnyis dang gsum gyis bcom ldan 'das kyis rang gi don phun sum tshogs pa dang /gzhan gyi don grub pa phun sum tshogs pa yongs su bstan to/ /de la lam mkhyen pa lam thugs su chud pa ni lam dang / lam ma yin pa gnyis mkhyen pa'i phyir ro/ /lam ston pa lam gsung ba ni lam dang lam ma yin pa gnyis yang dag par rab tu ston pa'i phyir ro//gzhan yang 'jig tshogs kun 'byung ba dang / 'gog par 'gyur ba gnyis kyis sgrub pa gnyis yongs su mkhyen pa'i phyir dang / thugs su chud pa'i phyir dang / yang dag par rab tu ston pa'i phyir te/ go rims bzhin no//lam yongs su 'dren pa ni lam mthong ba rnams lam gyi gong nas gong du khyad par du 'gro bas lam gyi mthar thug par 'dren pa'i phyir ro/ /gzhan yang lam mkhyen pas na lam mkhyen pa'o/ /lam nyid thugs su chud pas na lam thugs su chud pa'o/ /bsam pa yongs su smin pa rnams la lam ston par mdzad pas na lam ston pa'o//lam nyid du gsung pa'i dang tshul can yin pas na lam gsung ba'o/ /lam yongs su 'dren pa ni bsam pa yongs su ma smin pa rnams la rnam par grol ba yongs su smin par byed pa'i shes rab yongs su smin par mdzad pa'i phyir ro//gzhan yang lam mkhyen pa ni de mkhyen pa'i phyir ro/ /lam thugs su chud pa ni de brnyes pa'i phyir te/ thugs su chud pa ni rnyed pa'i don yin pa'i phyir ro/ /lam ston pa ni de'i dus na 'gro ba rnams la'o/ /lam gsung ba ni dus gzhan na 'gro ba rnams la'o//lam yongs su 'dren pa ni de nas 'gro ba'i bar du gcod pa sel ba'i phyir ro/ /chos kyi bsngags pa las brtsams na ni bcom ldan 'das kyi chos ni legs par gsungs pa yang dag par mthong ba zhes rgyas par 'byung ba dang / bcom ldan 'das kyis legs par gsungs pa'i chos 'dul ba ni legs par bstan pa zhes rgyas par 'byung ba dang /dge slong dag nga'i chos ni legs par gsungs pa gsal ba che ba zhes rgyas par 'byung ba mdo sde'i dum bu gsum pa dag ste/ de la mdo sde'i dum bu dang po las 'byung ba'i bsdus pa'i don gyi phyi rol pa dag gi chos las sangs rgyas pa'i chos khyad par yod pa yongs su bstan te/de la phyin ci ma log par yang dag par gsungs pa'i phyir legs par gsungs pa'o/ /don mthong ba'i phyir yang dag par mthong ba yin gyi dad pa tsam khong du chud par bya ba ni ma yin te/ji skad du sa ri'i mdo las dge slong dag khyed kyis gang dang gang yang dag pa ji lta ba bzhin du yang dag pa'i shes rab kyis mthong ba ni zhes rgyas par gsungs pa lta bu'o/ /nyon mongs pa'i bag la nyal gyi gnyen por gyur pa'i phyir nad med pa'o/ /yongs su nyams pa med pas dus chad pa med pa ste/dus nges pa med pa'i phyir ro/ /sdug bsngal ma lus pa las nges par 'byung ba la nye bar gtod pa'i phyir nye bar gtod pa'o/ /thun mong ma yin pa'i phyir 'di mthong ba la yod pa ste/ 'di mthong ba rnams la yod pa'i phyir ro/ /brtag mi nus pa'i phyir mkhas pa rnams kyi rang gis rig par bya ba'o //phyi rol pa rnams kyi chos ni de las bzlog pa'i phyir ro/ /gzhan yang dus thams cad du bya sla ba'i phyir dus chad pa med pa ste/ ji skad du sangs rgyas kyi gsung ni 'gro ba na yang bya sla ba yin la zhes bya ba rgyas par gsungs pa lta bu'o/ /slob dpon gyi dpe mkhyud dang bral ba'i phyir tshur shog ltos shig pa yang yin te/tshur shog ltos shig ces bya ba'i skabs dbye ba dang ldan pa'i phyir te/ /ji skad du nga'i nyan thos kyi dge slong tshur shog shig dang zhes bya ba rgyas par gsungs pa lta bu'o/ /lhag ma ni snga ma bzhin no/ /'dir bshad pa/'phags pa'i lam gyi yan lag brgyad po ni/ yang dag don dang don ni mthong ba dang / /gnyen po dang ni gtan dang ma lus dang / /thun mong min dang rtog ge'i yul min dang / /gzhan yang de ni dus chad med pa'i phyir/ /bya sla ba dang tshur shog ltos shig ces/ / slob dpon dpe mkhyud bral ba shes bya zhing / /lhag ma snga ma bzhin du shes par bya/ /lung las ni legs par gsungs pa zhes bya ba ni bstan pa yin la/ lhag ma ni bshad pa yin no/ de la gzhan gyi rkyen gyis kha na ma lus pa'i phyir yang yang dag par mthong ngo / /zag pa med pa yin pa'i phyir nad med pa'o//dus yongs su chad pa med pa'i phyir dus chad pa med pa ste/ yongs su nyams pa mi srid pa'i phyir ro/ /mya ngan las 'das pa la nye bar gtod pa'i phyir nye bar gtod pa'o/ /thun mong ma yin pa'i phyir 'di mthong ba la don yod pa'o//brjod par bya ba ma yin pa'i phyir mkhas pa rnams kyi rang gis rig par bya'o zhes 'byung ba'o/ / mdo sde'i dum bu gnyis pa las ni phyi rol pa dang chos mi mthun pas chos 'dul ba 'di'i yon tan yang dag par bstan pa yin te/ phyi rol pa dag gi chos 'dul ba ni nye bar bstan pa nyid kyis nyes par bshad pa yin no//rdzogs pa'i byang chub tu 'gro bar mi 'gyur ba nyid kyis nges par mi 'byung ba yin no/ /'dus pa dang mi ldan pa nyid kyis mi mthun pa yin te/ 'dus pa dang ldan pa ni tshogs pa yin pa'i phyir ro/ /ston pa de bzhin gshegs pa la sogs pa ma yin pa nyid kyis rten pa med pa yin/mdor na skyon rnam pa 'di bzhi bstan pa yin te/ /bstan pa'i chos la don phyin ci log pa nyid kyi skyon dang / sgrub pa'i chos la mya ngan las 'das par mi 'gro ba nyid kyi skyon dang / nyan pa po rnams la blo du ma dang ldan pa nyid kyi skyon dang /ston pa la the tshom thams cad gcod mi nus pa'i skyon no/ /rnam grangs gzhan yang / tshig 'bru bzang min don bzang min/ /grol dang rigs pa'i thabs ma yin/ /snga ma phyi ma 'gal ba yin/ /de bzhin bsdu ba bzhi dang ni/ /bstan pa bzhi dag spangs pa dang //ston pa'ang ston pa'i mtshan nyid med/ /de ltar gzhan gyi bstan bcos dang / /slob ma bstan pa skyon can yin/ /chos 'dul ba 'di ni de las bzlog pas skyon med pa yin no/ /don phyin ci ma log pa nyid kyis rigs pa yin pa'i phyir chos so/ /nyon mongs pa 'dul ba'i phyir 'dul ba'o//de ltar na sangs rgyas kyi bstan pa ni yang dag pa'i ye shes dang spangs pa 'dren pa nyid yin par bstan pa yin no/ / mdo sde'i dum bu gsum pa las 'byung ba ni rnam pa drug dag gis chos kyi yon tan yongs su bstan pa yin te/ don phyin ci ma log pa nyid dang / bde bar 'jug pa nyid dang / gong na med pa nyid dang / lha dang mis yang dag par bzung ba nyid dang / ji ltar 'os pa'i gdul ba la bstan pa nyid dang / slob dpon gyi dpe mkhyud med par rgyun du bstan pa nyid kyis so/ /de la bde bar 'jug pa nyid ni gsal ba nyid kyis te/ tshig dang yig 'bru gsal ba'i phyir ro/ /phye ba nyid kyis kyang yin te/ don shin tu rnam par phye ba'i phyir ro/ /gong na med pa nyid ni rgyu ba bcad pa nyid kyis te/ ches shin tu mchog tu 'gro ba ni rgyu ba'o/ /de 'dir yang dag par chad pas na rgyu ba bcad pa'o/ /lhag ma gsum ni go rims bzhin du lha dang mi'i bar dag la yang dag par shin tu bstan pa las rig par bya'o//bsdus pa'i tshigs su bcad pa/ de nyid don ni legs gsungs phyir/ /bde bar 'jug phyir bla med phyir/ /rab tu gzung phyir ji ltar 'os/ /ma lus par ni bstan phyir ro//phyi rol pa'i chos ni 'di las bzlog pa'i phyir ro / /bcom ldan 'das kyis nyid kyi chos kyi yon tan thun mong ma yin pa nyid du yongs su bstan pa yin no/ / dge 'dun gyi bsngags pa las brtsams nas ni/ bcom ldan 'das kyi nyan thos kyi dge 'dun ni legs par zhugs pa zhes bya ba'i mdo sde'i dum bu ste 'dis ni nyan thos kyi dge 'dun ni dge sbyong gi tshul gyi don dang /dge sbyong gi tshul dang / dge sbyong dang / dge sbyong gi tshul bstan pa las brtsams nas legs par zhugs pa nyid du ston to/ /dge sbyong gi tshul gyi don ni mya ngan las 'das pa ste/ der zhugs pa ni rigs par zhugs pa ste/de'i rigs pa'i chos ni bla na med pa kun tu 'thob par 'gyur ba nyid yin la zhes bya ba gsungs pa'i phyir ro/ /nges pa'i tshig tu na gnas par bya ba ni gnas te/ rtag tu gnas su gyur pas na rigs pa'o/ /dge sbyong gi tshul ni 'phags pa'i lam yan lag brgyad de/der zhugs pa ni drang por zhugs pa ste/ bdud rtsi'i sgo ni phye mdzad cing / /drang po'i lam ni rab tu bstan/ /zhes gsungs pa'i phyir ro/ /de bzhin du drang po ci zhe na/ 'phags pa'i lam mo/ /gya gyu ba ci zhe na/ lta ba sdig pa can no zhes 'byung ba lta bu'o//dge sbyong rnams la yang dag pa'i rang bzhin du zhugs pa ni mthun par zhugs pa ste/ yang dag pa'i rang bzhin yang byams pa'i lus la sogs pa'i las kyis mthun par gyur pa nyid dang / longs spyod dang / tshul khrims dang lta ba mthun pa nyid kyis so//dge sbyong gi tshul bstan pa ni chos yin te/ de la ji skad bstan pa bzhin du spyod par byed pas na chos dang / rjes su mthun par spyod pa'o/ /rnam grangs gzhan yang don gyi mchog bsgrub pa dang / phyin ci ma log pa sgrub pa dang / tha mi dad pa sgrub pa dang / ji ltar rjes su bstan pa bzhin du bsgrub pa la brtsams nas legs par zhugs pa nyid du ston to//lung las ni mu stegs can gyi 'khor rnams la ni log par bsgrub pa rnam pa bzhi yod de/ chos 'dul ba nyes par bshad pa la zhugs pa nyid do / /tshul 'chos pa nyid dang / bdag gi lta ba mchog tu 'dzin pa nyid dang / rnyed pa dang bkur sti la lhag par chags pa nyid do/ /de med pa'i phyir bcom ldan 'das kyi nyan thos kyi dge 'dun ni rigs par zhugs pa nas / chos dang rjes su mthun par spyod pa'o zhes bya ba'i bar du 'byung ngo / /kun nas nyon mongs pa'i phyogs las brtsams nas ni dge slong gang tshul khrims 'chal pa sdig pa'i chos can zhes bya ba ni mdo sde'i dum bu ste/de la tshul khrims 'chal ba ni rtsa ba'i ltung ba lhag par spyod pa'i phyir ro/ /sdig pa'i chos can ni ngo tsha shes pa dang / khrel yod pa chud gson pa'i phyir ro//khong myags pa ni kha na ma tho ba de 'chab pa'i phyir ro/ /'dzag pa ni kun tu spyod pa mi spong pa nyid kyi phyir ro/ /shing rul pa lta bu ni dam pa'i chos mi skye ba'i phyir ro/ /bong bu ltar kun tu spyod pa ni lung bong ltar kun tu spyod pa'i phyir te/ ji skad du lung bong gi mdo las gsungs pa lta bu ste/ji ltar/ dung gi kha can skad po che/ /zhes tshigs su bcad pa lta bu'o/ /de yang rgyun rnam pa gnyis kyis te/ sdig pa 'dod pa la bstan nas don med pa'i dge sbyong gi tshul khas 'che ba'i phyir ram/ 'khrig pa spong bar khas 'che ba'i phyir ro/ /mdor na dge slong tshul khrims log par bsgrub pa la skyon rnam pa drug yongs su bstan pa yin te/sbyor ba log pa'i skyon dang / bsam pa log pa'i skyon dang / kha na ma tho ba de las mi ldong ba'i skyon dang / thal ba'i skyon dang / rtogs pa'i skal pa med pa nyid kyi skyon dang / log par 'tsho ba'i skyon no/ /gzhan yang khong myags pa ni rtog pa mi bzad pa sbang rgyag la gnas par byed pa'i phyir ro/ /'dzag pa ni dbang po drug gi rma mi sbed pa'i phyir ro/ /rnam grangs 'dis ni log pa rnam pa drug yongs su bstan pa yin te/ sbyor ba log pa dang / bsam pa log pa dang /gnas pa log pa dang / rgyu ba log pa dang / skal ba nyid log pa dang / 'tsho ba log pa'o/ / gau ta ma dag khyed ni skye dgu nyon mongs pa can/ sdug bsngal can/ mya ngan can/ 'khrug pa can yin na/ khyed cag la rnyed pa dag ni ci dag yod/ legs par rnyed pa dag ni ci dag yod ces bya ba 'byung ba ni mdo sde'i dum bu ste/ de la rnyed pa dag ni ci dag yod ces bya ba ni dge ba'i chos dang mi ldan pa nyid du ston to/ /legs par rnyed pa dag ni ci yod ces bya ba ni de dang mi ldan pa nyid kyi phyir sngon gyi dge ba'i 'bras bu mi la sogs pa rnyed pa legs par rnyed pa ma yin pa nyid du ston to//nyon mongs pa la sogs pa can nyid kyis ni sdug bsngal gyi rgyu dang / sdug bsngal rnam pa mang po la skye dgu gnas par ston to/ /de la nyon mongs pa mang ba nyid kyi phyir nyon mongs pa can te/ ji ltar phal cher thams cad chom rkun du gyur to zhes bya ba lta bu'o//skye ba dang / rga ba dang / na ba dang / 'chi ba dang / mi sdug pa dang phrad pa'i sdug bsngal phal che ba nyid kyi phyir sdug bsngal can no/ /sdug pa dang bral bas mya ngan mang ba nyid kyi phyir mya ngan can no/ /yongs su tshor ba na 'dod pa mi rnyed pa mang ba nyid kyi phyir 'khrug pa can no//de ni dus gsum dag tu sdug bsngal la sogs pa can yin te/ mi sdug pa'i dngos po dang phrad pa dang / sdug pa'i dngos po dang bral ba dang / sdug pa'i dngos po dang mi ldan pas tshol ba na'o/ /nyon mongs pa can de dag gsum char la khong khro ba dang /sdug pa'i dngos po dang phrad pa la 'dod chags pas so/ /gzhan yang dbul ba dang / phyug pa dang / 'bring ni sdug bsngal la sogs pa can dang go rims bzhin du rig par bya ste/ 'tsho bas phongs pa dang / rgud pa dang / des dogs pa dang / tshegs chen pos 'tsho ba 'byor pas go rims bzhin no/ /dge sbyong ngam bram ze gang la la mig gi ro myong bar byed pa ni zhes bya ba ni mdo sde'i dum bu'o/ /de la nyon mongs pa kun tu spyod pa'i phyir ni bdud kyi dbang du shas kyis song ba yin par rig par bya ste/ shas zhes bya ba ni cung zad kyi don yin pa'i phyir shas kyis ser skya zhes bya ba bzhin no//de dang du len pa'i phyir ni dbang du song ba'o/ /de'i dbang gis las kun nas slong bar byed pa'i phyir ni lag tu song ba'o/ /des mi 'dzem pa'i phyir ni ci 'dod dgur bya ba'o / /bdud kyi bcing ba dag gis ni gnas skabs de thams cad du bcing ba'o//bdud kyi zhags pa dag las ni mngon sum du ma gyur pa yin yang ma spangs pa dag yin pas rab tu ma grol ba'o/ /thams cad la rnam pa thams cad du 'byung ba ma yin gyi/ ro myong bar byed pa dag la de 'byung ba'i phyir gang la la zhes bya ba gsungs so//dge sbyong dang bram ze smos pa'i thar pa ni de dag gi dbang du byas pa yin pas bcings pa nyid kyis skyo bar bya ba'i phyir ro/ /mdor na 'dir nyon mongs pa'i rten dang / dmigs pa dang / rang bzhin dang / gnas skabs kyi dbye ba las nyes dmigs bstan pa yin te/dge sbyong dang bram ze ni rten yin no/ /dmigs pa la sogs pa ni dmigs pa yin no/ /ro myong bar byed pa ni rang bzhin yin no/ /de yang sred pa yin par rig par bya'o/ /gnas skabs kyi dbye bas ni rnam pa drug ste/ kun tu spyod pa dang / dang du len pa dang /zil gyis gnon pa dang / yon tan du blta ba dang / mngon du gyur pa dang / ma spangs pa'i gnas skabs kyi dbye ba las so/ /mi dge ba'i chos rnams yang dag par blangs pa'i rgyus mthong ba'i chos nyid la sdug bsngal bar gnas pa dang zhes bya ba ni mdo sde'i dum bu'o//de la sdug bsngal ba zhes bya ba ni bstan pa'o/ /lhag ma ni bshad pa'o/ /de la sdug bsngal dang bcas pa ni yongs su tshol ba'i tshe grang ba na lhags pas sbrebs pa dang zhes bya ba rgyas par 'byung bas so/ /phongs pa dang bcas pas ni 'dod pas phongs pa dang ldan pa'i phyir 'byor pa med pa'i tshe na'o//gnod pa dang bcas pa ni rgyal po dang chom rkun la sogs pa'i gnod pa dang ldan pa'i phyir kun tu srung ba'i tshe dbyug pa dang mtshon cha'i gnod pa la sogs pas so/ /yongs su gdung ba dang bcas pa ni mya ngan dang / mi tshim pa dang yid la gcags pa'i yongs su gdung ba dang ldan pa'i phyir te/rgud pa dang / longs spyod pa dang / 'chi ba'i dus dag tu ste go rims bzhin no/ /srog gcod pa kun tu bsten cing bsgoms la lan mang du byas pas zhes bya ba ni mdo sde'i dum bu'o/ /de la kun tu bsten cing zhes bya ba ni byas pa nyid du ston la/bsgoms la lan mang du byas pas zhes bya ba ni bsags pa nyid de brtson pa dang / phyir zhing byed pa gnyis bsam pa dang sbyor bas de brtas par bya ba'i phyir ro/ /'di la bsgom pa byas pa'am/ bsgom pa byung bas sam nges pa'i tshig gis na bsgoms par gyur pas na bsgom pa ste/bsam pa nyid kyis te/ ji skad du/ sdig pa byas par gyur na yang / /de la yang dang yang mi bya/ /sdig pa kun bsags sdug bsngal bas / /'di la 'dun pa mi bya'o/ /zhes gsungs pa lta bu'o/ /'dir 'dun pas ni brtson pa ston to/ /yang dang yang du byed pa dang /'dun par byed pas ni bsags pa yin te/ kun du bsags pa'i rnam grangs kyis yin no/ /bsags pa'i las gang yin pa de ni rnam par smin pa nges par 'gyur ro/ /kha cig la ni byas par yang 'gyur te/ skal pa chung ba'i phyir ram / zhing dang sems pa'i khyad par las so//gal te kun tu bsten pa la sogs pas byas pa dang bsags pa nyid du ston na/ mi sdug pa kun tu bsten cing bsgoms la lan mang du byas pas ni 'bras bu chen por 'gyur ro zhes bya bar ji ltar rung zhe na/ de la yang brtson pa dang / lan mang du bya ba bya dgos so//'di ltar yang yin te/ de la skye ba dang gnas pa dang 'phel ba dang ldan par yang ston to/ /gzhan yang sbyor ba dang / rnyed pa dang / 'grub pa'i gnas skabs so/ /gzhan yang stobs dang skabs dang bcas pa dang / skabs med pa 'byung ba'i yid la byed pa'i gnas skabs te/ting nge 'dzin la ma thob pa dang / thob pa dang / goms pa na'o/ / yang rnal 'byor spyod pa rnam pa gsum gyi gnas skabs yin te/ rnal 'byor spyod pa rnam pa gsum ni las dang po pa dang / yongs su sbyang ba byas pa dang / yid la byed pa las 'das pa'o//rnam grangs gzhan yang mngon sum du byed pa'i phyir dang / sems la de'i sa bon brtas par byed pa'i phyir dang / brtas pa de phyir zhing mngon du gyur pa nyid kyi phyir kun tu bsten pa la sogs pa gsum yin no/ /brjod par bya ba rnam pa du ma yin kyang rjod pa ni gcig yin no zhes bya ba de ni bsgrubs zin to//sgrib pa lnga po zhes bya ba ni mdo sde'i dum bu'o/ /de la lnga kho na'i dgos pa ni ting nge 'dzin la sbyor ba la sgrib pa ni sgrib pa gnyis yin no/ /ting nge 'dzin du zhugs pa'i sgrib pa ni gsum yin te/ sems nang du sdud pa'i phyir dang / phyi rol du rnam par g.yeng ba'i phyir dang / yang dag par sbyor ba la nges pa ni mi rnyed pa'i phyir ro/ /gzhan yang zhi gnas dang lhag mthong la sbyor ba'i sgrib pa ni sgrib pa gnyis yin la/ zhi gnas la zhugs pa'i ni zhum pa'i skyon yod pa'i phyir zhi gnas kyi sgrib pa ni gcig yin zhing /lhag mthong la zhugs pa yin na ni rnam par ma zhi ba dang / ma nges pa'i skyon yod pa'i phyir lhag mthong gi sgrib pa ni gnyis so/ /gzhan yang tshul khrims kyi sgrib pa ni gnyis te/ 'dod chags dang / zhe sdang gnyis kyis 'chal ba'i tshul khrims kun nas slong bar byed pa'i phyir ro//ting nge 'dzin gyi sgrib pa yang gnyis te/ sems nang du sdud pa'i phyir dang / phyi rol du rnam par g.yeng ba'i phyir ro/ /shes rab kyi sgrib pa ni gcig ste/ yang dag par nges pa mi rnyed pa'i phyir ro/ /lung las tshul khrims kyi sgrib pa ni gcig ste/ tshangs par spyod pa las nyams par byed pa'i phyir ro/ /gdams ngag gi sgrib pa yang gcig ste/ des tshig mi bzod pa'i phyir ro/ /zhi gnas dang rab tu 'dzin pa dang btang snyoms kyi dus dag tu ste 'grub pa'i sgrib pa gsum mo zhes 'byung ngo / /sgyu rtsal shes dag gsum po 'di dag ni sems can rnams kyi las kyi gzhi dang kun 'byung ba dag ces bya ba ni mdo sde'i dum bu'o//de la las kyi gzhi dang kun 'byung ba dag ces bya ba ni rab tu 'jug par byed pa dang / rjes su 'jug par byed pa'i rgyu ston pa yin te/ chags pa la sogs pa gang dang du len pa na nyes par spyod pa kun nas slong bar byed pa dang /gang gis mi 'dzem pa na nyes par spyod pa las mi ldog pa yin no/ /de ltar na de byas pa dang bsags pa'i yin no/ /gzhan yang chags pa la sogs pa ni kun tu spyod pa'i gnas skabs dang zil gyis gnon pa'i gnas skabs kyang yin par ston to//de nyid kyi phyir chags pa dang chags pas zil gyis gnon pa zhes bya ba gsungs te/ zil gyis ma non na ni des de las skyes pa'i las slong bar mi byed do/ /gzhan yang sbyor ba'i gnas skabs dang mthar thug pa'i gnas skabs kyang yin no/ / yid kyis nyes par spyod pa la sbyor ba'i gnas skabs gang yin zhe na/ chags pa la sogs pa gang gis gzhan gyi rdzas bdag gir bya ba la sogs pa phyis nges pa rnyed pa'o/ /gzhan yang chags pa la sogs pa ni lus dang ngag dang yid la byed pa dang smra ba dang rtog pa'i gzhi sems kyi kun 'byung ba dag go//de lta na ni dkar po'i phyogs la yang kun 'byung ba smos par 'gyur ro/ /rnam grangs dang po dag tu ni gzhi zad pa zhes 'byung ba nyid kyis kun 'byung ba zad pa yang rab tu grub pa'i phyir na mi 'gyur la/ btsun pa 'od srungs pa'i gzhung las/ gzhi gsum dag ni las kun 'byung bar bya ba'i phyir zhes 'don pa de dag gi ltar na zlos pa'i skyon yang med pa kho na yin no//ma chags pa la sogs pa yang dge ba'i rtsa ba yin pa'i phyir las kyi gzhi dang / kun 'byung ba dag ces ci'i phyir mi smos she na/ chags pa la sogs pa'i gnyen po nyid du yang dag par bstan pa'i phyir te/gzhan du na ni de dag gi gnyen po yang dag par ma bstan par 'gyur ro/ /de ltar na rnam par rtog pa 'di dag ni mi dge ba rnams dang / sdug bsngal ba rnams dang / 'phags pa ma yin pa rnams dang / don med pa dang ldan pa rnams so zhes bya ba ni mdo sde'i dum bu'o//de la mi dge ba rnams ni 'bras bu mi sdug pa'i phyir ro/ /sdug bsngal ba rnams ni mthong ba'i chos la sdug bsngal gyi rgyu yin pa'i phyir ro/ /'phags pa ma yin pa rnams ni dge ba'i chos yongs su nyams par 'gyur ba nyid kyis rnam par byang ba dang 'gal ba can nyid yin pa'i phyir ro//don med pa dang ldan pa rnams ni kun nas nyon mongs pa dang mthun pa'i phyir ro/ /mi dag gi 'dod pa rnams ni mi gtsang ba rnams dang / dri mi zhim pa rnams dang / dri nga ba rnams dang / dri mi mthun pa rnams yin no zhes bya ba ni mdo sde'i dum bu'o//de la 'khrig pa'i gzhi'i 'dod pa rnams ni mi gtsang ba rnams te/ lus dri ma can du 'gyur ba nyid kyis bkru dgos pa'i phyir ro/ /dri mi zhim pa rnams ni gcin dang phyi sa 'dzag pa'i phyir ro/ /dri nga ba rnams ni rang bzhin gyi sha dang khrag la sogs pa'i rang bzhin yin pa'i phyir ro//mi mthun pa rnams ni rdzas re re yang skyug bro ba'i gzhi yin pa'i phyir dang / 'khrig pa bsten pa'i mjug tu mi mthun pa skye ba'i phyir ro/ /de ltar na tshig gcig dang gcig dang gnyis kyis 'dod pa rnams kyi 'brel ba dang / 'dzag pa dang / rang gi mtshan nyid kyi skyon yongs su bstan pa yin no/ /'dir yang / 'di ltar 'dod pa mi gtsang rnams/ /dri mar 'gyur nas bkru bya dang / /chu ser gcin rkyags dri mi zhim/ /dri nga rnams ni rang bzhin gyis/ /mi mthun rnams ni rdzas re yang / /gang phyir de dag smad pa dang //'khrig pa bsten pa'i mjug tu yang / /mi mthun pa ni skye phyir ro/ /zhes bya ba smos so/ /gzhan yang mi gtsang ba nyid rnam pa gnyis te/ rnag mi gtsang ba nyid dang / nyon mongs pa mi gtsang ba nyid de/ ji skad du/ lus 'di nyid mi gtsang ba rnam pa sna tshogs kyis gang bar so sor rtog go zhes gsungs pa lta bu'o//nyon mongs pa mi gtsang ba nyid ni ji skad du/ mi gang cung mi gtsang bar byed pa zhes 'byung ba lta bu'o/ /de'i phyir rnag mi gtsang ba nyid yang dag par bstan pa'i phyir dri mi zhim pa rnams zhes bya ba gsungs so/ /dri mi zhim pa nyid kyi rnam pa'i khyad par bstan pa'i phyir dri nga ba rnams zhes bya ba gsungs so//mi mthun pa rnams ni snga ma bzhin no/ /mi gtsang ba ma brjod na ni rnag mi gtsang ba nyid kyis dri mi zhim pa'i mtshan nyid ma bstan par 'gyur bas so/ /dri mi zhim pa ma brjod na ni dri nga ba smad pa nyid du ma bstan par 'gyur bas so//lung las ni mi gtsang ba rnams ni bstan pa yin la/ /lhag ma ni bshad pa yin no / /de la mdor na 'dod pa dag ni rnam pa gnyis dag ste/ kha zas kyi 'dod pa rnams dang / 'khrig pa'i 'dod pa rnams te/ ji skad du ral pa can gyi mdo sde las/ zas rnams dang ni skom rnams dang yang de bzhin ro rnams dang / /bud med rnams ni 'dod rnams yin zhes 'di na kha cig 'chi/ /zhes gsungs pa lta bu'o/ /de la kha zas kyi 'dod pa rnams ni yongs su 'gyur ba nyid kyis dri mi zhim pa rnams dang / dri nga ba rnams te/ gcin dang phyi sa'i dngos po dang /sha la sogs pa'i dngos por yongs su 'gyur ba'i phyir ro/ /'khrig pa'i 'dod pa rnams ni yongs su 'gyur ba nyid kyis mi mthun pa rnams te/ yongs su gdung ba dang bral na mi mthun pa skye ba'i phyir ro zhes 'byung ngo / /'dod pa'i rgyu dang 'dod pa'i gzhi zhes bya ba ni mdo sde'i dum bu'o//de la nyon mongs pa'i 'dod pa ni rnam pa gnyis su rig par bya ste/ 'dun pa dang 'dod chags so/ /gzhi'i 'dod pa yang rnam pa gnyis te/ thob pa dang / ma thob pa'o/ /de la 'dod pa'i rgyu dang 'dod pa'i gzhi nyon mongs pa'i 'dod pa rnam pa gnyis kyis so//'dod pa'i dbang du bya ba dang / 'dod pa rnams kho na'i rgyus zhes bya ba ni gzhi'i 'dod pa rnam pa gnyis kyi don du ste/ de ltar na rgyu gang gis gang gi don du rtsod pa de yongs su bstan pa yin no/ /chags pa dang / zhen pa dang / 'chums pa dang / mdud pa bor ba dang /brgyal ba dang / lhag par chags pa dang / lhag par zhen par gyur pa zhes bya ba ni mdo sde'i dum bu ste/ 'dod chags kyis kun nas dkris pa skyes pa'i phyir dang / skyes pa dang du len pa'i phyir dang / thob pa dang longs spyod 'dod pa'i phyir dang /de'i thabs la lan mang du rjes su rnam par rtog pa'i phyir dang / nyes dmigs mi mthong ba'i phyir dang / yongs su bzung ba la kun tu 'dzin pa skye ba'i phyir dang / mi tshim pa nyid kyi rgyus de bsten pa la sems gzhol bas lan mang du gnas pa'i phyir go rims bzhin du rig par bya'o//'dod pa la 'dod chags dang / lhag par zhen pa dang / rnam par bcings pa dang / yongs su zhen pa dang / kun tu 'dod chags kyi rgyus zhes bya ba ni mdo sde'i dum bu ste/ kun tu spyod pa dang / dang du len pa dang / zil gyis gnon pa dang / des mi 'dzem pa dang / de la kun tu dga' ba nyid dang go rims bzhin no/ /gzhan yang rang gi 'dod pa la mngon par dga' ba dang / yongs su bzung ba dang / mi 'bral bar 'dod pa dang / gzhan gyi 'dod pa la mngon par dga' bar byed pa dang / kun tu 'dod chags pa gnyis te/ 'dod pa la 'dod chags dang /lhag par zhen pa dang / rnam par bcings pa dang / yongs su zhen pa dang / kun tu 'dod chags dang go rims bzhin no/ /lta ba rnams la yang lta ba la 'dod chags pa dang / lhag par zhen pa dang / rnam par bcings pa ni de bzhin no/ /lta ba ni mi mthun pa rnams yin na ni rang gi lta bar mngon par dga' bar byed pas yongs su zhen pa'o//lta ba mthun pa dag yin na ni de'i lta ba la rjes su chags pas kun tu 'dod chags su rig par bya'o/ /de lta bu'i tshig rnams ni rnam grangs su gsungs pa yin kyang nyes pa med de/ dgos pa dang bcas pa yin pa'i phyir sngar ji skad bshad pa lta bu'o//dge slong dag sems can de dag la ni don spyod pa med/ chos spyod pa med/ bsod nams spyod pa med/ dge ba spyod pa med/ dge legs spyod pa med do zhes bya ba ni mdo sde'i dum bu'o/ /mdo sde'i don tshol ba dang / nyan pa dang /sems pa dang / rab tu ston pa dag ni don spyod pa'o/ /chos tshol ba dang nyan pa dang klog pa dang 'don pa dang ston pa ni chos spyod pa'o/ /de gnyis ka la brten nas mngon par mtho ba las brtsams te/ bsod nams kyi las byed pa ni bsod nams spyod pa'o/ /mi g.yo ba'i las byed pa ni dge ba spyod pa ste mi dge ba spangs pa'i phyir ro//nges par legs pa las brtsams te byang chub kyi phyogs bsgom pa ni dge legs spyod pa ste/ dri ma med pa'i phyir dang / yongs su nyams pa med pa nyid kyis 'gyur ba med pa'i phyir ro/ /gzhan yang sbyin pa ni bsod nams spyod pa'o//tshul khrims ni dge ba spyod pa ste/ bde ba'i don gyis na gzhan la mi gnod pa'i phyir ro/ /sgom pa ni dge legs spyod pa'o/ /dge slong dag de ni chu gter chen po zhes bya ba'i mdo sde'i dum bu'o/ /de la snod che ba nyid kyi phyir chu gter chen po'o/ /ye nas chu che ba nyid kyi phyir chu'i chu bo chen po'o/chu klung sna tshogs nas glo bur du 'bab pa'i phyir chu'i tshogs chen po'o/ /skams par mi 'gyur ba nyid kyi phyir chu'i chu chen po ste/ rtag tu chur 'dug pa'i phyir ro/ /lung las ni chu chen po sdud pa'i don dang / mi skye ba'i don dang / gcig tu 'gyur ba'i don dang / mi zad pa'i don gyis chu gter chen po dang / chu'i chu chen po'i bar dag yin no zhes 'byung ngo / /thags 'khrugs pa lta bu zhes bya ba ni mdo sde'i dum bu'o/ /de la nor dang khyim dang bu dang chung ma la sogs pa la sred pas phan tshun du sems 'phrog pa nyid kyi phyir thags 'khrugs pa lta bu'o//de dang 'brel pa'i rnam par rtog pa mang du byed pa'i phyir rnam par grol ba dka' ba nyid kyis gru bu 'dzings pa lta bu'o/ /de yongs su bzung ba la kun tu 'dzin pas sdug bsngal mang pos gzir ba'i rten du gyur pa nyid kyi phyir rtswa mun dza dang /bal ba dza lta bur gyur pa'o/ / lta bu dang gyur pa'i sgra gnyis ni rnam pa'i don nam / dpe'i don gnyis su rig par bya'o/ /de ltar na 'dun pa dang rnam par rtog pa dang / lhag par zhen pa dang ldan pa'i phyir go rims bzhin du thags 'khrugs pa lta bu la sogs pa yin par rig par bya'o//gzhan yang phrad pa dang mi 'bral ba la sred pa dang / nyes dmigs kyi gnod pa dang ldan pa'i phyir yang go rims bzhin no/ /sdug bsngal ba mi bzad pa zhes bya ba ni mdo sde'i dum bu'o/ /de la sdug bsngal ba ni rang bzhin gyis mi mthun pa nyid kyis so//mi zad pa ni che ba nyid kyis so/ /rtsub pa ni rtag tu rtse mi 'jil ba'i rgyun nyid kyis so/ /tsha ba ni phrad pa'i dus na mi bzod pa nyid kyis so/ /yid du mi 'ong ba ni dran pa'i dus na brjod du mi stong ba nyid kyis so/ /srog 'phrog pa ni srog gi dbang po dang 'gal ba nyid kyis so//mdor na rang bzhin dang / rnam pa dang / gnas pa dang / las kyi khyad par gyis tshor ba'i khyad par ston par byed do/ /de la las kyi khyad par ni lus dang sems dang srog la gnod pa nyid kyis rig par bya'o/ /gang las drag pa sdug bsngal ba zhes 'byung ba der ni rang bzhin la sogs pa'i khyad par gyis drag pa nyid khyad par du byed do//'bral zhing mi skye la zhes bya ba ni 'bral ba'am mi ldan pa 'dri ba yin no/ /de 'bral zhing mi skye bar mngon pa yin nam zhes bya ba ni skabs skabs su de yod par 'dri ba'o//yang na ma lus par bral ba dang mi ldan pa'i skabs 'dri ba'o/ /sdug bsngal nyid gsum ste zhes bya ba ni mdo sde'i dum bu'o/ /de la 'du byed rnams kyi rang gi mtshan nyid mi mthun pa nyid kyis sdug bsngal gyi sdug bsngal nyid do/ / gzhan du 'gyur ba'i mtshan nyid mi mthun pa nyid kyis 'gyur ba'i sdug bsngal nyid yin no//ji skad du/ 'du byed sdug bsngal nyid dang ni/ /'gyur ba nyid du mkhyen nas ni/ /rdzogs sangs rab tu mkhyen pa yis/ /tshor ba sdug bsngal nyid du gsungs/ /zhes bya ba ni gang zhig sdug bsngal nyid dgongs pa can yin pa de'i dgongs pa ston pa yin no//lung las ni rang dang spyi'i mtshan nyid gnyis kyis rang bzhin gyis sdug bsngal nyid kyi dbang du mdzad de/ sdug bsngal dang 'du byed kyi sdug bsngal nyid gnyis gsungs la/ 'gyur ba'i sdug bsngal nyid kyi dbang du mdzad nas ni/'gyur ba'i sdug bsngal nyid gsungs so zhes 'byung ngo / /srog gcod pa dang drag shul can dang lag pa khrag dmar ba dang zhes bya ba ni mdo sde'i dum bu'o/ /de la bsad pa'i bsam pa nyid dang / bsad par sbyor ba nyid dang / de gnyis ka la mngon par dga' ba nyid dang /de'i gzhi nyid dang / de dang rjes su 'brel pa nyid kyis srog gcod pa yongs su bstan to/ /de'i gzhi yang kha na ma tho ba de la ngo tsha ba med pa dang / snying mi brtse ba yang yin te/ srog chags phra mo sdug bsngal ba mi mkho ba rnams la yang ngo / /de dang rjes su 'brel pa nyid ni ji srid du mi spong ba'o//gsod pa ni gsod par byed pa ste 'chi bar byed pa zhes bya'o/ /rab tu gsod pa ni rnam pa nas gsod pa ste/ rnam pa re re nas 'chi bar byed pa'o/ /rnam grangs gzhan yang drag shul can nyid kyis ni shan pa la sogs pa'i srog gcod pa nyid khyad par du byed pa yin no/ / drag shul can nyid kyang lus drag shul can nyid dang / sems drag shul can nyid dang / der gcig tu nges pa nyid dang / der gtan du ba nyid kyis ston par byed do/ /de la ngo tsha ba med pa nyid dang / snying mi brtse ba dang ldan pa nyid kyis ni der gcig tu nges pa nyid yin la/mi spong ba nyid kyis ni der bstan du ba nyid yin par rig par bya'o/ /dge slong dag gson pa rnams las gnyid log pa ni stong pa dang zhes bya ba ni mdo sde'i dum bu'o/ /gson pa rnams las gnyid log par stong pa zhes bya ba ni bstan pa yin la/ lhag ma rnams ni bshad pa yin no//de la gang dag la gnyid mi 'byung ba gson pa'i bya ba dag ni rnam pa bzhi ste/ gson pa dag ni brtson 'grus rtsom/ /de las phyi mar 'bras bu dang / /dge sbyong tshul don rnams gzhan yang / /'di yi longs spyod bde ba 'byung / /de dag phyir gnyid log pa yi/ /srog ni gsog dang 'bras med dang //don med pa dang de bzhin du/ /phan yon med pa nyid du 'dod/ /gzhan yang skyes bu'i rtsal med pa'i phyir gsog yin na / phal cher rnam par smin par mi 'gyur ba'i phyir 'bras bu med pa'o/ /yang dag pa yul du ma gyur pa nyid kyi phyir don med pa'o/ / dus ma yin par gnyid log pa ni lus dang sems las su mi rung ba nyid 'du byed pa'i phyir phan yon med pa'o/ /rnam grangs gzhan yang gnyid kyi gnas skabs sems med pa ni stong pa yin la/ gnyid kyi gnas skabs sems dang bcas pa ni lhag ma ste snga ma bzhin no//byis pa rmongs pa mi gsal ba mi mkhas pa zhes bya ba ni mdo sde'i dum bu'o/ /de la byis pa zhes bya ba ni bstan pa yin la/ lhag ma bshad pa yin te/ mi shes pa dang / the tshom dang / log pa'i shes pa dang ldan pa'i phyir ro/ /tshul bzhin yin pa la mkhas pa ni mi mkhas pa'o//rnam grangs gzhan yang gnyis te/ byis pa ni nyes par bsams pa sems pa la sogs pas so/ /rmongs pa dang mi gsal ba dang mi mkhas pa ni thos pa dang / bsams pa dang / bsgoms pa las byung ba'i shes rab rnams dang mi ldan pa'i phyir go rims bzhin no//lhan cig skyes pa dang / thos pa dang / bsams pa dang / bsgoms pa las byung ba'i shes rab rnams dang mi ldan pa'i phyir yang byis pa nas mi mkhas pa'i bar ro/ /byis pa'i rang bzhin can/ rmongs pa'i rang bzhin can/ shes rab 'chal pa'i rang bzhin can zhes bya ba ni mdo sde'i dum bu ste/de ni go rims bzhin du mi shes pa dang / the tshom dang / log pa'i shes pa dang ldan pa las rig par bya'o/ /gzhan yang shes rab ma byang ba dang / zhan pa dang / log pa rnams dang go rims bzhin no/ /gzhan yang rang gis legs par bshad pa dang /nyes par bshad pa'i chos rnams kyi don shes bar mi nus pa nyid kyi phyir byis pa'i rang bzhin can no/ /thos kyang mi nus pa nyid kyi phyir rmongs pa'i rang bzhin can no/ /phyin ci log tu mngon du zhen pa'i phyir shes rab 'chal ba'i rang bzhin can no/ /gro bzhin skyes dge sbyong ngam bram ze gang la la dag gzugs mi rtag pa zhes bya ba ni mdo sde'i dum bu'o//de la gzugs mi rtag pa nas rnam par shes pa mi rtag pa nyid kyi bar gyis ni lus skye ba dang 'jig pa nyid ston par byed la/ mi brtan pas ni dus yun mi ring bar 'jig pa nyid do/ /yang yid brtan du mi rung ba las ni dus ma nges par 'jig pa nyid do//'gyur ba'i chos can gyis ni gnas skabs mi 'dra ba nyid kyis 'jig pa nyid yin te/ gnas skabs mi 'dod pa nyid du 'gro ba'i phyir ro/ /gcig gis ni 'dus byas kyi mtshan nyid gnyis dang ldan par stan par byed la/gnyis kyis ni gnas pa'i khyad par te/ rgyun ni yun mi ring ba dang / dus ma nges pa nyid kyi phyir ro/ /bzhi pas ni gnas pa de nyid gzhan du 'gyur ba nyid do/ /gzhan yang gcig gis ni lus mi 'jig par 'gog par byed la/ gnyis pas ni yun ring po nas 'jig pa'o//gsum pas ni dus nges par 'jig pa'o/ /bzhi pas ni 'gyur ba med par 'jig pa'o/ /gzhan yang gcig gis ni skad cig mar 'jig pa'i mi rtag pa nyid ston par byed la/ gnyis kyis ni rgyun gyi 'jig pa'i mi rtag pa nyid de ris mthun pa las yun ring du mi gnas pa nyid kyi phyir dang /dus ma yin par 'chi srid pa'i phyir ro/ /bzhi pas ni 'gyur ba'i mi rtag pa nyid do/ /dang po ni rang gi sgras bstan pa yin te/ don dam pa pa yin pa'i phyir ro/ /'dir smras pa/ mi 'jig yun ring 'jig pa dang / /dus dang 'gyur ba med pa bkag /skad cig dang ni tshe dang ni/ /'gyur zad rnam pa gsum yang bstan// //bam po gsum pa/ gzugs gang rtag pa dang / brtan pa dang ther zug pa zhes bya ba ni mdo sde'i dum bu'o/ /de la rtag pa ni mi rtag pa nyid med pa'i phyir ro//brtan pa ni skad cig mar 'jig pa med pa'i phyir te dus gzhan du gnas pa nyid kyis so/ /ther zug ni rgyud 'jig pa med pa'i phyir ro/ /mi 'gyur ba'i chos can ni 'gyur ba med pa'i phyir ro/ /yang dag par de bzhin du gnas par 'gyur ba zhes bya ba ni ji ltar 'dod pa ste/rnam pa snga ma mi srid na phyi ma 'dri ba yin no/ /rnam grangs gzhan yang skad cig mar 'jig pa la sogs pa med pa'i phyir yang brtan pa la sogs par rtag pa nyid 'dri bar byed pa yin no/ /rnam grangs gzhan yang rtag pa ni ther zug gi don gyis yin la/ brtan pa ni mi 'gyur ba'i don gyis yin te/tshig gnyis ni tshig gnyis kyis rnam par bshad pa yin par yang 'og nas bstan par bya'o/ /'phags pa nyan thos shes nas dad pa gzhi dag dang ldan pa ni 'tsho ba dag gis dbul ba ma yin zhes bya ba ni mdo sde'i dum bu'o//de la 'phags pa'i nor bdun dang ldan pa'i phyir 'tsho ba dag gis dbul ba ma yin no/ /'tsho ba med pa'i 'jigs pa spangs pa'i phyir bkren pa ma yin no/ /log pa'i 'tsho ba spangs pa'i phyir phongs pa ma yin no/ /nor dang sems dang 'tsho ba ngan pa dang ldan pa'i phyir ni dbul ba dang /bkren pa dang / phongs pa nyid du rig par bya'o/ /gal te ting nge 'dzin 'du byed pas zin zhing zhes bya ba ni mdo sde'i dum bu'o/ /'du byed pas zin pa ni yun ring po nas mngon du 'gyur ba'i phyir ro/ /chu bzhin du 'tshor ba ni myur bar 'bral ba'i phyir ro//chos nyid kyis zin pa ni rtag tu bag yod pas bsrung bar bya ba nyid kyi phyir ro/ /zhi ba ma yin pa ni de'i mi mthun pa'i phyogs sa 'og ma pa'i nyon mongs pa shin tu ma thul ba'i phyir ro/ /gya nom pa ma yin pa ni rang gi sa pa'i nyon mongs pa dang 'dres pa nyid kyi phyir ro//lam bag yangs su gyur pa thob pa ma yin pa ni shin tu ma goms pa nyid kyi rgyus rang gi ngang gis mi 'byung ba'i phyir ro/ /sems rgyud gcig tu gyur pa rtogs pa ma yin pa ni g.yo ba dang bcas pa nyid kyi phyir ro/ /de la rtag tu bag yod pas bsrung bar bya ba nyid ni ma zhi ba la sogs pa'i rgyus rig par bya'o//dkar po'i phyogs ni de las bzlog par rig par bya'o/ /'dir smras pa/ myur du mngon du 'gyur ba dang / /myur du 'bral bar mi 'gyur dang / /rtag tu bag yod bsrung bya min/ /de yi mi mthun phyogs bcom phyir/ /rang gi nyon mongs ma 'dres phyir//shin tu goms 'bad med 'byung phyir/ /'du byed zin la sogs pa min/ /rgyud gcig yin te mi g.yo'i phyir/ /lung las ni/ myur bar mngon gyur nyid kyi phyir/ /mi nyams phyir dang rtag bsrung phyir/ /nyon mongs min phyir dge nyid phyir/ /ngang gis 'byung phyir yongs rdzogs phyir//go rims bzhin du 'du byed pas ma zin pa nas rgyud gcig tu gyur pa rtogs pa'i bar du yin no zhes 'byung ngo / /de de ltar sems mnyam par gzhag pa yongs su dag pa dang zhes bya ba ni mdo sde'i dum bu'o/ /de la sems yongs su dag pa ni yongs su byang ba'i don gyis te/de'i mi mthun pa'i phyogs sa 'og ma pa'i dri ma spangs pa'i phyir ro/ /nyon mongs pa med pa ni nye ba'i nyon mongs pa dang bral ba'i don gyis te/ rang gi sa pa'i nyon mongs pas nyon mongs pa can ma yin pa'i phyir ro/ /drang por gyur pa ni las su rung ba'i don gyis te/'bad pa med par 'byung ba nyid kyi phyir ro/ /gnas pa ni mi g.yo ba thob pa'i don gyis te/ bsam gtan bzhi pa na g.yo ba med pa'i phyir ro/ /de ltar ting nge 'dzin de ni dge ba nyid dang / ji ltar na de dag dge ba nyid dang dbang du bya ba nyid dang / yongs su grub pa nyid rnam grangs kyi mtshan nyid dang bcas pa yongs su bstan pa yin no/ /res 'ga' tshig gnyis ni gzhan gnyis kyi rnam par 'chad de/ dper na sems mgu ba dang sems nyams bde ba zhes bya ba ni sems dga' ba dang / sems sgrib pa med pa zhes bya ba 'dis so zhes 'byung ba lta bu'o//res 'ga' tshig gcig gzhan gcig gis yin te/ dper na yang dag phul gyi chos bstan pa kun tu shes par skal ba yod cing nus pa yin zhes 'byung ba lta bu ste/ 'di ni dper brjod pa tsam du zad do/ /'dir yang smras pa/ mi mthun phyogs dri grol phyir dang //nyon mongs med sgrib med 'byung phyir/ /g.yo ba med phyir gnyis pos ni/ /yongs dag la sogs rig par bya'o / /gnyis dang gnyis kyi ting 'dzin gyis/ /dge ba nyid dang de ji lta/ /dbang bya nyid dang grub pa nyid/ /mtshan nyid bcas par rab tu bstan//rnam grangs gzhan yang yongs su dag pa ni nyon mongs pa med pa dang / nye ba'i nyon mongs pa dang bral ba nyid kyis te/ go rims bzhin du rnyed pa dang bkur sti dang tshigs su bcad pa dang ldan pa'i 'dod pa rgyu bdag dang / sred pa dang / lta ba dang /nga rgyal dang / the tshom gyi nye ba'i nyon mongs pa dag dang bral ba'i phyir ro/ /yongs su byang ba ni drang por gyur pa la sogs pa nyid kyis te/ de la drang por gyur pa ni 'bad pa med par 'byung ba nyid kyis shin tu thul pa'i phyir ro/ /las su rung ba ni mngon par shes pa bsgrub par rung ba nyid kyi phyir ro//gnas pa ni yongs su nyams par mi 'gyur ba nyid kyi phyir ro/ /mi g.yo ba thob pa ni bsam gtan bzhi pa ni g.yo ba thams cad dang bral ba'i phyir ro/ /'dir yang smras pa/ gnyis kyis yang dag yin la tshig / gzhan dag gis ni yongs byed nyid/ /rnyed 'dod la sogs sred la sogs/ /bral phyir shin tu thul ba'i phyir/ /mngon shes yon tan rang nyid phyir/ /nyams med phyir g.yo zad pa'i phyir/ /don grub dag gis go rims bzhin/ /nyon mongs med sogs nyid shes bya//rnam grangs gzhan yang yongs su dag pa ni de'i mi mthun pa'i phyogs su 'og ma pa spangs pa'i phyir ro/ /yongs su byang ba ni de thag ring du byas pa'i phyir ro/ /nyon mongs pa med pa ni rang gis pa'i phyogs nyon mongs pa dang ma 'dres pa'i phyir ro/ /nye ba'i nyon mongs pa dang bral ba ni de kun tu rgyu ba thag ring du byas pa'i phyir ro//drang por gyur pa ni 'bad pa med pa dang ji ltar 'dod par 'byung ba'i phyir ro/ /las su rung ba ni mngon par shes pa rung ba nyid kyi phyir ro/ /gnas pa ni mi nyams pa'i cha dang mthun pa'i phyir ro/ /mi g.yo ba thob pa ni snga ma bzhin no//ting nge 'dzin dang gnas dang ldang / /zhes bya ba ni sdom gyi tshigs su bcad pa ste/ de la gnas pa ni ji srid 'dod par rjes su 'jug pa yin no/ /ldang ba ni mnyam par ma bzhag pa'i sems mngon du gyur pa 'am sa gzhan pa'o/ /nyams bde ba ni las su rung ba nyid dang nye ba'i nyon mongs pa dang bral ba nyid do//spyod yul ni dmigs pa yin no/ /mngon par sgrub pa ni skyed pa yin no/ /'phrod pa ni rnyed pa dang mthun pa yin no/ /mi 'phrod pa ni de dang mi mthun pa yin no/ /gnyis ka ni de gnyis ka dang bcas pa'o/ /skye ba ni 'phel ba yin no//'bri ba ni 'grib pa yin no/ /thabs ni de gnyis ka'i gzhi yin no/ /sred pa yang srid par 'byung bar byed pa dga' ba'i 'dod chags dang ldan pa zhes bya ba ni mdo sde'i dum bu'o/ /de la ma lus par spang ba zhes bya ba ni bstan pa yin la lhag ma ni bshad pa yin te/ gnas skabs thams cad kyi spong ba kun tu bstan pa'i phyir ro/ /gnas skabs thams cad kyi spong ba ni sel ba'i gnas skabs dang / rnam par gnon pa'i gnas skabs dang / mthong ba'i lam gyi gnas skabs dang / bsgom pa'i lam gyi gnas skabs dang / mi slob pa'i lam gyi gnas skabs dang /kun nas dkris pa dang bral ba'i gnas skabs dang / bag la nyal ba dang bral ba'i gnas skabs so/ /sred pa langs pa ni kun nas dkris pa yin te/ des sems rnam par ma zhi bar 'dug go/ /de'i phyir de dang bral ba ni rnam par zhi ba yin no//sred pa nyal ba ni sa bon gyi gnas skabs bag la nyal ba yin te/ de yang rtag tu rgyud las gnas so/ /de'i phyir de dang bral ba ni nub pa yin no/ /rnam pa gcig kyang ma brjod na srid pa'i gnas skabs thams cad spong ba'i rab tu dbye ba kun tu ma bstan par 'gyur bas so//de lta bu'i tshig rnams ni rnam grangs su brjod pa yin kyang skyon med par sngar ji skad bstan pa lta bu yin no/ /rtog ge pa dang zhes bya ba ni mdo sde'i dum bu'o/ /de la rnam pa gnyis kyis rtog ge pa yin te/ mngon par rtogs pa nyid dang / de'i spyod yul las mi 'da' ba nyid kyis so//des na spyod pa pa dang / rtog ge la zhugs pa'i sa la gnas pa zhes bya ba smos so/ /rtog ge la zhugs pa'i sa gang zhe na/ rang gi spobs pa dang ldan pa rnams dang / so so'i skye bo rnams kyis mngon par rtogs pa dang ldan pa gang yin pa ste/de kho na'i lung dang ldan pa yin no/ /sa ni yul zhes bya ba'i tha tshig go/ /de ltar na tshig gcig ni bstan pa yin la gnyis ni bshad pa yin zhing / tshig gsum ni bstan pa yin la/ gsum pa ni bshad pa yin par rig par bya'o/ /gzhan yang tog ge pa ni rnam grangs nyid dang /mtshan nyid nyid kyis kun tu bstan pa yin no/ /dpyod pa ba zhes bya ba ni rnam grangs yin te/ khyad par du bya ba'i phyir te don du gnyer ba de gang yin pa yang rtog par byed ces bya ba yin pas der thal bar gyur na mi rung bas so/ /rtog ge la zhugs pa'i sa la gnas pa zhes bya ba ni mtshan nyid yin te/de yang tshe rabs snga ma la rtog ge la goms pas bsgoms pa'i rgyu dang / de kho na mthong ba dang bral ba dang / rtog ge la 'dris par byas pa thog ma med pa nas zhugs pa'o/ /gzhan yang lung las ni rtog ge ba sngar rig par bya ste/de'ang phyir brtag rtog phyir dang / /sngon goms phyir mngon ma byas phyir/ /lung la mi brten nyid phyir dang / /brtson phyir yid la byed phyir dang / /sngon phangs phyir dang yongs gzung phyir/ /yongs su bya ba byas pa'i phyir/ /rtog ge phun sum rnam lngar 'dod//de de dang ldan pa ni rtog ge pa yin no zhes 'byung ngo / /de la yid la byed phyir zhes bya ba ni brtag par bya ba'i gnas yid la byed pa'i phyir ro/ /yongs gzung phyir zhes bya ba ni tshad ma'i rig pa rnam pa gsum yongs su gzung ba'i phyir ro/ /de ni so so'i skye bo rnams kyis yin no//'chi ba ni bzang po ma yin zhes bya ba ni mdo sde'i dum bu'o/ /de la sems nyams pa dang rmongs pas 'chi ba'i phyir dang / bsod nams ma byas par 'chi 'pho ba'i phyir dang / 'gro ba mi 'dod par 'gro ba'i phyir go rims bzhin du 'chi ba ni bzang po ma yin/dus byed pa ni bzang po ma yin/ tshe phyi ma ni bzang po ma yin zhes bya bar rig par bya'o/ /bzlog pa'i phyir dgra bcom pa ni bzlog pa ste/ sems ma nyams pa dang / ma rmongs pa 'chi ba'i phyir dang / bsod nams byas nas 'chi 'pho ba'i phyir dang /phung po lhag ma med pa mya ngan las 'das pa'i phyir bzang po gsum yin no/ /tsher ma phyung ba zhes bya ba ni mdo sde'i dum bu'o/ /de la so sor rtog pa'i stobs la brten nas nyon mongs pa'i kun nas dkris pa bsal ba'i phyir tsher ma phyung pa rnams yin no/ / bsgoms pa'i stobs la brten nas 'jig rten pa'i lam gyi nyon mongs pa'i bag la nyal 'joms pa'i phyir tsher ma dkrugs pa rnams yin no/ /mthong ba'i lam gyis bag la nyal gyi phyogs yang dag par bcom pa'i phyir tsher ma dang bral ba rnams yin no/ /bsgom pa'i lam gyis bag la nyal thams cad yang dag par bcom pa'i phyir tsher ma med pa rnams yin no//gzhan yang 'bras bu dang po la mthong bas spang bar bya ba'i bag la nyal yang dag par bcom pa'i phyir tsher ma phyung ba rnams yin no/ /gnyis pa la 'dod pa na spyod pa'i bsgoms pas spang bar bya ba nyung zad cig lus pa'i phyir tsher ma dkrugs pa rnams yin no//gsum pa la de mtha' dag spang ba'i phyir tsher ma dang bral ba rnams yin no/ /bzhi pa la khams gsum pa'i nyon mongs pa thams cad spangs pa'i phyir tsher ma med pa rnams yin no//dad pa skyes nas 'gro bar byed/ /song na chos nyan par byed do zhes bya ba ni mdo sde'i dum bu'o/ /de la nyan par byed do zhes bya ba ni tshig 'bru dang don gyis so / /sems par byed pa ni ji ltar thos pa'i don nges par sems pa'i phyir ro/ /'jal bar byed pa ni rigs pa ste/legs par gsungs pa nyid kyis khyad par dmigs kyis 'byed pa'i phyir ro/ /nye bar rtog par byed pa ni bsgom pa'i rnam pa ste/ ji ltar gzung ba'i don so sor rtog pa'i phyir ro/ /bden pa de yang lus kyis mngon sum du 'du byed pa ni gnas gyur pa'i tshe yang dag pa ji lta ba bzhin du mngon par rtogs pa'i phyir ro//shes rab kyis so sor 'bigs par byed pa ni bdag gis mngon sum du byas so zhes 'jig rten las 'das pa'i ye shes kyi rjes las thob pa 'jig rten pa'i ye shes kyis nges par 'dzin pa'i phyir ro/ /gzhan yang nyan pas ni thos pa las byung ba'i ye shes ston par byed do//sems pas ni bsams pa las byung ba'o/ /'jal ba dang nye bar rtog pa gnyis kyis ni mthong ba dang / bsgom pa'i lam gyi bsgoms pa las byung ba ste/ mthong ba'i lam gyis ni de bzhin nyid so sor rtog pa'i phyir sgro 'dogs pa med pa dang skur pa 'debs pa med pa gnyis kyis mnyam pa la 'jog par byed pa'i phyir 'jal bar byed pa yin no//bsgom pa'i lam gyis ni ji ltar 'jal ba la yang dang yang du rtog par byed pa'i phyir nye bar rtog par byed pa yin no//bden pa de yang zhes bya ba ni gang gi dbang du mdzad nas chos bstan pa'i mya ngan las 'das pa yin no/ /lus kyis mngon sum du byed cing zhes bya ba ni gnas gyur pa nyid kyis te/ rnam par grol ba thob pa'i phyir ro/ /shes rab kyis so sor 'bigs par byed do zhes bya ba ni rnam par grol ba'i ye shes kyis so//de ltar na dad pa la brten nas tshogs dang bcas pa'i lam dang / lam gyi 'bras bu rnam par grol ba dang / rnam par grol ba'i ye shes kun tu ston par byed do/ /gzhi de las sbyin pa po dang sbyin bdag gi bsod nams rgyun rgyas pa zhes bya ba ni mdo sde'i dum bu'o//de la sbyin pa po ni gzhan gyi nor yang bdag gis sbyin par byed pa'o / /sbyin bdag ni gang gis nor sbyin par byed pa'o / /bsod nams kyi las byed pa na rgyud la bag chags rnam pa gnyis gnas te/ 'bras bu rnam par smin pa yid du 'ong ba 'grub par byed pa dang /dad pa la sogs pa dge ba'i chos kyi rgyu mthun pa'i 'bras bu 'grub par byed pa ste/ yon gnas kyi khyad par gyis de'i sbyin par bya ba'i dngos po yongs su spyad pa'i phyir ro/ /de gnyis brtas pa'i khyad par du 'gro ba ni go rims bzhin du bsod nams rgyun rgyas pa dang /dge ba rgyun rgyas pa tshad med pa rig par bya'o/ /de rgyun rgyas pa yang bde ba'i rgyun yin pa'i phyir bde ba 'dren pa zhes bya ba ni phan yon yongs su ston par byed pa yin no/ /gzhan yang sbyin pa las byung ba'i bsod nams gang yin pa dang /de rab tu 'jug par byed pa'i dge ba yang dag pa'i lta ba gang yin pa de gnyis kyis khams brtas pa ni go rims bzhin du bsod nams rgyun rgyas pa dang / dge ba rgyun rgyas pa yin no/ /de gnyis kyi 'bras bu yid du 'ong ba'i sa bon brtas pa ni bde ba 'dren pa yin no/ / gzhan yang sbyin pa las byung ba'i bsod nams rgyun rgyas pa de nyid dge ba rgyun rgyas pa yin te/ dge ba'i rgyu mthun pa'i 'bras bu'i rgyu yin pa'i phyir ro/ /bde ba 'dren pa yang yin te/ 'bras bu rnam par smin pa yid du 'ong ba'i rgyu yin pa'i phyir ro/ /rdzu 'phrul gyi yul rnam pa du ma nyams su myong bar 'gyur ba yin te zhes bya ba ni mdo sde'i dum bu'o//de la rdzu 'phrul gyi yul rnam pa du ma nyams su myong bar 'gyur ba yin no zhes bya ba ni bstan pa yin la/ lhag ma ni bshad pa yin no/ /dbang rnam pa lnga thob pas de nyams su myong bar ston te/ dbang rnam pa lnga ni rdzu 'phrul la dbang ba ni de rgyas par byed pa dang bsdus pa'i phyir ro//ston pa dang mi ston pa la dbang ba ni lus snang bar byed pa dang snang bar mi byed pa'i phyir ro/ /'gro ba la dbang ba ni thad ka dang bla dang 'og thogs pa can la yang 'gro ba'i phyir ro/ /gnas pa la dbang ba ni thogs pa med pa las kyang mi ltung ba'i phyir ro//'gro ba dang khams khyad par du 'phags pa gnyis su rang gi lus 'jug pa la dbang ba'o/ /rtsig pa dang ri dang ra ba smos pa ni gtsug lag khang dang / ri dang / grong na gnas pa na rig par bya'o/ /'jig tshogs 'gog pa mya ngan las 'das pa la sems 'jug par byed ces bya ba ni mdo sde'i dum bu'o//de la/ mi skrag phyir dang mngon dga'i phyir/ /rtse gcig ma chags 'byung ba'i phyir/ /sems ni 'jug par byed pas na/ /grol byed rab tu shes par bya/ /bzlog pa'i phyir ni bzlog pa yin no/ / gzhan dag na re 'jug par byed pa ni thos pa las byung ba'i shes rab kyis so/ /dad par byed pa ni bsams pa las byung bas so/ /kun tu gnas par byed pa ni 'jig rten pa'i bsgoms pa las byung bas so/ /rnam par grol bar byed pa ni 'jig rten las 'das pas so zhes zer ro//de lta na ni rgyu bstan pa yin gyi don ni ma yin no/ /tshe dang ldan pa 'dun pas kyang 'on kyang bdag 'du byed thams cad zhi bar gnas pa dang / stong pa nyid du dmigs pa dang / sred pa zad pa dang / 'dod chags dang bral ba dang / 'gog pa dang / mya ngan las 'das pa la sems 'jug par mi byed/dad par mi byed do zhes smras pa ni de la thos pa las byung ba dang bsams pa las byung ba'i shes rab kyang med pa ni ma yin te/ gnas brtan bdag kyang 'di snyam du 'du byed thams cad ni mi rtag pa/ chos thams cad ni bdag med pa/zhi ba ni mya ngan las 'das pa'o snyam du sems so zhes kyang 'byung ba'i phyir te/ mang du thos pa nyid kyi phyir dang / rgyud yongs su smin pa nyid kyi phyir ro/ /de lta bas na shes rab rnam pa gsum char dang ldan pa dag yin yang / nam yang mya ngan las 'das pa la sems mi 'jug ste/nga'o snyam pa'i nga rgyal rags pa bar chad dang bcas pa dang / bar chad med par kun tu rgyu ba'i phyir ro/ /de nyid kyi phyir 'o na nga dang nga'i bdag gang yin snyam du yongs su yi chad pa'i rgyus yid phyir ldog go/ /gang gi tshe na bsgoms pa las byung ba'i shes rab kyis nga'o snyam pa'i nga rgyal kun tu rgyu ba de gnyen pos bsal ba de'i tshe de la mi skrag pa la sogs pa dang ldan pa'i phyir 'jug par byed pa nas rnam par grol bar byed pa'i bar du yin no//mig gi dbang po bsrung ba'i phyir dang / sba ba'i phyir dang / dul bar gnas par bya'i phyir rab tu zhugs pa yin no zhes bya ba ni mdo sde'i dum bu'o//de la dran pa dang / ting nge 'dzin dang / shes rab la brten nas go rims bzhin du mig gi dbang po bsrung ba'i phyir dang / sba ba'i phyir dang / dul bar gnas par bya ba'i phyir rab tu zhugs pa yin no/ / gzhan yang yul gang la 'jug par bya ba de la bsrung bar bya ba'i phyir te/ dran pas byin gyis brlab pa'i phyir ro/ /gang la 'jug par bya ba ma yin pa de las ni sba ba'i phyir te/ de mi 'jug pa'i phyir ro/ /de'i sgo nas nyon mongs pas kun tu rgyu'i bag la nyal yang dag par gzhom pa'i phyir gnyen po bsgoms pas na dul bar gnas par bya ba'i phyir rab tu zhugs pa yin par rig par bya'o//dbang po drug po 'di dag shin tu dul ba dang / shin tu sbas pa dang zhes bya ba ni mdo sde'i dum bu'o/ /de la nyon mongs pa'i bag la nyal thams cad yang dag par bcom pa'i phyir shin tu dul ba yin no//so sor rtog pa'i stobs la brtan nas dran pa dang shes bzhin gnyis kyis nyon mongs pa'i kun nas dkris pa mi skyed pa'i phyir shin tu sbas pa yin la/ skyes pa dang du mi len pa'i phyir shin tu bsrungs pa yin no//'jig rten pa'i bsgom pa'i stobs la brtan nas shin tu bsdams pa yin no/ /'jig rten las 'das pa la brtan nas shin tu bsgoms pa yin no/ /de ltar na sems dul ba thabs dang bcas pa yongs su brtan pa yin no/ /'dir yang smras pa/ dran pas ma skyes phyir sbas shing //shes bzhin gyis ni skyes las bsrungs/ /gnon dang rtsa ba bcom gnyis kyis/ /bsdams dang bsgoms pa yin par 'dod/ /lung las ni 'jug par bya ba ma yin pa la mi 'jug pa'i phyir shin tu sbas pa yin no/ /'jug par bya ba la dran pa shin tu nye bar gzhag pas 'jug pa'i phyir shin tu bsrungs pa yin no//rang nyid yul la mi rgyug pa'i phyir shin tu bsdams pa yin no/ /rang nyid kun nas nyon mongs par mi 'gyur ba'i phyir shin tu bsgoms pa yin no/ /de ltar na shin tu dul ba yin no zhes 'byung ngo / /de byams pa dang ldan pa'i sems khon med pa 'gran zla med pa zhes bya ba ni mdo sde'i dum bu'o//de la sems can pha rol dag la phan pa dang bde ba'i bsam pa ni byams pa'o/ /de dang mtshungs par ldan pa'i sems ni byams pa dang ldan pa'o/ /de ni nye ba'i nyon mongs pa rnam pa gsum gyi gnyen po yin pa'i phyir khon med pa dang 'gran zla med pa dang /gnod pa med pa'o/ /nye ba'i nyon mongs pa rnam pa gsum ni sems can mnyam pa dang khyad par du 'phags pa gnod pa byed pa dag la khon du 'dzin pa dang / gnod pa mi byed pa dag la phrag dog dang / de gnyis dang ldan pa'i dman pa dag la ni gang gis na de dag la gnod par 'gyur ba'i zhe sdang ngo / /'bras bu che ba nyid yin pa'i phyir yangs pa'o/ /gzugs na spyod pa nyid yin pa'i phyir rgya chen por gyur pa'o/ /sems can dpag tu med pa la dmigs pa nyid yin pa'i phyir tshad med pa'o//mi mthun pa'i phyogs shin tu thul ba'i phyir shin tu bskoms pa'o/ /de ltar na gnyen po nyid dang / 'bras bu nyid dang / sa nyid dang / dmigs pa nyid dang / rnam par dag pa nyid kyi sems de yongs su bstan pa yin no/ /phyogs gcig tu zhes bya ba ni gnas kyi gnas pa po bstan pa yin te/dper na khri dag 'bod do/ /ri dgas tshig go zhes bya ba lta bu'o/ /mos te zhes bya ba ni mos pa yid la byed pa nyid ston pa yin no/ /khyab par byas nas zhes bya ba ni khyab par ston pa yin te/ cig car du mtha' dag la mos pa'i phyir ro//rdzogs par byas te zhes bya ba ni dngos gzhi'i snyoms par 'jug pa mngon du gyur pa yin par de ston pa yin no/ /gnas so zhes bya ba ni dus gzhan du yang rjes su 'jug par ston pa yin no/ /brtson 'grus brtsams shing zhum pa med pa yin/lus shin tu sbyangs shing nyes par brtsams pa med pa yin zhes bya ba ni mdo sde'i du ma bu'o/ /de la tshig phyi mas rnam par bshad pa dang bcas pa'i tshig bzhi po dag ni go rims bzhin du sems rnam pa bzhi'i gnyen por rig par bya'o/ / sems rnam pa bzhi ni ha cang zhum pa dang / ha cang rab tu bzung ba dang / nang du bsdus pa dang / phyi rol du rnam par g.yengs pa ste/ de kho na'i gnyen por spong ba'i 'du byed rnam pa gnyis gnyis yin no/ /gzhan yang zhi gnas dang rab tu 'dzin pa'i nye ba'i nyon mongs pa'i gnyen por tshig gnyis te/zhum pa dang / rgod pa'i gnyen po yin pa'i phyir ro/ /btang snyoms kyi nye ba'i nyon mongs pa'i gnyen po yang tshig gnyis yin no/ /de gnyis kyang gang gis na dran pa kun tu rmongs par 'gyur ba'i ma rig pa dang / gang gis na ro myang ba la sems rnam par g.yengs par 'gyur ba'i sred pa'o//gzhan yang skyon rnam pa bzhi'i gnyen por tshig bzhi dag yin no/ skyon rnam pa bzhi ni brtson 'grus ma brtsams na sems zhum par 'gyur ba dang / ha cang brtsams na lus dub bar 'gyur ba dang / brjed ngas ba dang sems nyams pa ste gang gis na lus nyes par brtsams pa dang /dran pa kun tu rmongs pa dang sems rtse gcig pa ma yin pa ste yul rnam par g.yengs pa'i phyir ro/ /de nyid kyi phyir de'i gnyen po nyid yang dag par bstan pa'i phyir brtson 'grus la sogs pa tshig phyi mas khyad par du byed pa yin par rig par bya'o//tshul bzhin yid la byed pa ni mig skyes shing zhes bya ba ni mdo sde'i dum bu'o/ /de la don mngon sum du gyur pa'i phyir zag pa med pa'i shes rab ni mig go/ /the tshom med pa'i phyir shes pa'o/ /yang dag pa mngon du gyur pa'i phyir rig pa'o//rnam par dag pa'i phyir blo ste/ nges pa'i tshig gi chos nyid kyi rgyus na rnam par dag pa'i phyir blo yin no/ /mig la zhan pa dang / nor ba dang / rnyog pa nyid med par yang dag par bstan pa'i phyir rnam pa gsum gyi khyad par du byed pa yin no/ /gzhan yang phyi rol pa rnams kyi lta ba ni bden pa rnams la ngan par lta ba dang /the tshom dang / ma rig pa rnams kyi gnyen po ma yin pa dang / zag pa dang bcas pa yin pas de las khyad par du bya ba'i phyir mig la sogs pa smos so/ /gzhan yang bzlas pa gsum dag la thog mar mthong ba ni mig go//ji ltar mthong ba la rnam par dpyod pa ni shes pa'o/ /gnyis po de nyid ji snyed yod pa can nyid la brten nas rig pa ste/ ji snyed yod pa la 'dzin pa'i phyir ro/ /ji ltar yod pa can nyid la brten nas blo ste/ yang dag pa ji lta ba bzhin du rtogs pa'i phyir ro//gzhan yang chos ma thos pa rnams la rjes su dpag pa dgag pa'i phyir mig ces bya ba gsungs so/ /mos pa las byung ba'i mthong ba dgag pa'i phyir shes pas so / /mngon pa'i nga rgyal dgag pa'i phyir rig pa'o/ /zag pa dang bcas pa nyid dgag pa'i phyir blo ste/ rnam par dag pa'i don gyis so//kha cig na re bzod pa ni mthong ba nyid yin pa'i phyir mig yin la/ shes pa ni shes pa nyid yin no zhes zer te/ de ni bzlas pa gsum dag la 'thad pa ma yin te/ de dag ni mthong ba dang / bsgom pa dang / mi slob ba'i lam gyis bsdus pa'i phyir ro//dge slong dag 'di ni khyed la phan pa'i phyir dang zhes bya ba ni mdo sde'i dum bu'o/ /phan pa'i phyir ni 'dod pa bsod nyams kyi rjes su sbyor ba'i mtha' yongs su spang pa yin no/ /bde ba'i phyir ni bdag nyid dub par gnas pa'i rjes su sbyor ba'i mtha' yongs su spong ba yin no//phan pa dang bde ba'i phyir ni gnyis ka'i mtha' spangs nas dbu ma pa'i lam bsgom pa yin no/ /gzhan yang phan pa'i phyir ni sdug bsngal dang bcas pa'i nye ba'i nyon mongs pa'i gnyen po bsten pa yin no/ /bde ba'i phyir ni nyon mongs pa rnams med par sdug bsngal gyi gnyen po bsten pa yin no//phan pa dang bde ba'i phyir ni bde ba dang bcas pa'i nyon mongs pa'i gnyen po bsten pa yin no/ /gzhan yang phan pa'i phyir ni lhag pa'i sems mthong ba'i chos la bde bar gnas pa rnams ma rtogs par nyon mongs pa zad pa'i lam mo//bde ba'i phyir ni 'dir nyon mongs pa zad pa'i lam ma gtogs pa'i lhag pa'i sems mthong ba'i chos la bde bar gnas pa'i lam mo/ /phan pa dang bde ba'i phyir ni lhag pa'i sems mthong ba'i chos la bde bar gnas pa rnams dang bcas pa'i nyon mongs pa zad pa'i lam mo//gzhan yang phan pa'i phyir ni slob pa rnams kyi dka' ba'i lam mo/ /bde ba'i phyir ni mi slob pa rnams kyi sla ba'i lam yin no/ /phan pa dang bde ba'i phyir ni slob pa rnams kyi sla ba'i lam yin te go rims bzhin no/ /shing thags btsugs pa ni zhes bya ba ni mdo sde'i dum bu'o//de la zabs ring ba ni zabs ring du btsugs pa yin pa'i phyir ro/ /legs par btsugs pa ni blo nas legs par brtan por byas pa'i phyir ro/ sra ba ni mi 'drul ba'i phyir ro/ /brtan pa ni yun ring du gnas pa'i shing yin pa'i phyir ro//mkhregs pa dang ldan pa ni shun pa med pa dang / khong na lung med pa'i phyir ro/ /mi g.yo ba ni mi 'gul ba'i phyir la/ mi 'chag pa ni mi chogs pa'i phyir te/ zabs ring ba dang legs par btsugs pa'i gzhi'i khyad par gyis ni mi g.yo ba yin la/ sra ba dang brtan pa dang mkhregs pa dang ldan pa'i rang bzhin gyi khyad par gyis mi 'chag pa yin pas gzhi dang rang bzhin gyi khyad par de gnyis dang go rims bzhin no//de ltar na de dag ni rnam pa gnyis dang / gsum dang / gnyis kyi gzhi nyid dang / rang bzhin nyid dang / des byas pa'i phan yon gyi phyir phun sum tshogs pa ni phyi rol pa rnams kyi gnas mi thod pa yin no//longs spyod bskyod pa dang brtson 'grus kyis thob pa zhes bya ba ni mdo sde'i dum bu'o/ /de la bskyod pa dang brtson 'grus kyis thob pa zhes bya ba ni sems kyi rtsal gyis bsgrubs pa nyid du yongs su bstan pa yin te/gnyid kyi bde ba dang / glos 'bebs pa dang / nyal ba'i bde ba gnyis kyi gnyen por go rims bzhin no/ /lag mthus bsgrubs pa zhes bya ba ni lus kyi rtsal gyis bsgrubs pa nyid yin no/ /rdul med med dri ma chags chags su bsgrubs pa zhes bya ba ni ngal bas bsgrubs pa yin no//chos dang ldan zhing chos kyis thob pa zhes bya ba ni rigs pas bsgrubs pa nyid yin te/ yang dag pa'i 'tsho ba dang ma bral ba nyid kyi phyir chos dang ldan zhing ngo / /bsod nams kyis thob pa'i phyir chos kyis thob pa'o/ / gzhan yang sangs rgyas la sogs par gtogs pa nyid ma yin pa'i phyir chos dang ldan zhing ngo / /log pa'i 'tsho bas thob pa ma yin pa'i phyir chos kyis thob pa'o/ /phan yon tshe phyi ma la 'gro ba gang mar 'gyur zhes bya ba ni mdo sde'i dum bu'o/ /de la 'gro ba 'og ma ni ngan song rnams yin no//de'i 'gro ba gong mar gyur pa ni mi rnams te/ der 'gro bar byed pa'i phan yon ni 'gro ba gang mar 'gyur ba'o/ /de las kyang gang zhig mi'i skal ba bzang po'i 'bras bu smin par byed pa de ni skal ba bzang por 'gyur ba'o/ /de las kyang gang zhig lus dang longs spyod yid du 'ong ba'i 'bras bu smin par byed pa de ni rnam par smin pa bde bar 'gyur ba'o//gang zhig lhar skye bar byed pa de ni mtho ris 'grub par byed pa'o/ /gzhan yang 'gro ba gong mar 'gyur ba de nyid lhag mas gsal bar byed pa yin no/ /skyes bu dam pa'i 'gro ba bdun dag gang zhe na zhes bya ba ni mdo sde'i dum bu'o//'dir 'gro ba ci zhe na 'jig rten pha rol du 'gro ba'i skye ba gzhan gyi gnas skabs so/ /bdun nyid ni mya ngan las 'das pa 'thob pa'i dus kyis dbye ba las so/ /'phags pa ma yin pa yang srid pa bdun dag gis sam/lan cig phyir 'ong bas yongs su mya ngan las 'das pa'i phyir la/ bar ma dor yongs su mya ngan las 'da' ba ni ma yin pa nas gong du 'pho ba'i bar du yang mi 'gyur bas 'di dag kho na skyes bu dam pa'i 'gro ba bdun dag yin no/ /mya ngan las 'das pa'i yang 'gro ba kun tu gcod pa yin pa'i phyir 'gro ba ma yin no//'o na tshigs su bcad pa las/ dgra bcom 'gro ba mya ngan 'das/ /zhes gang gsungs pa ji lta bu zhe na/ de las ni rton pa la 'gro ba zhes bya bar bstan pa yin no/ /bdag ma byung yang rung bdag gi yang srid pa ma byung yang rung zhes bya ba rnam pa 'di gnyis kyis ni mya las 'das pa la 'dod pa'i phyir mtshan ma med pa la sbyor ba yin no//bdag mi 'byung bar 'gyur/ bdag gi lus 'di mi 'byung bar 'gyur ro zhes bya ba yin te/ mi rtag pa'i rnam pa gnyis kyis skye ba sun 'byin pa'i phyir smon pa med pa la sbyor ba yin no//rnam grangs gzhan yang smon pa dang nges pa'i dus gnyis su mya ngan las 'das pa la sems rab tu 'jug par byed pa'i phyir gnyis ka yang mtshan ma med pa la sbyor ba kho na yin no/ /de ltar na gang yod pa zhes bya ba ni phung po tsam mo//gang 'byung ba zhes bya ba ni 'dus byas so/ /de spong ngo zhes bya ba ni 'dus byas mi rtag pa tsam 'gog par mthong ba'i phyir btang snyoms 'thob kyi bdag mi 'byung bar 'gyur ro snyam du dngang bar mi 'gyur ro/ /len pa med par mya ngan las 'das pa ni kha cig las ni phung po'i lhag ma med pa yin par 'byung ste/dper na rnam par grol ba'i rgyus len pa med par yongs su mya ngan las 'das pa yin no zhes 'byung ba lta bu'o/ /kha cig las ni phung po'i lhag ma dang bcas pa yin par 'byung ste/ dper na kye ma dge slong nye bar zhi ba zag pa med pa dang ldan pa/'dod chags dang bral ba mi ldan par gyur pa/ len pa med par mya ngan las 'das pa 'di ni legs so zhes 'byung ba lta bu'o/ /'di ni phung po'i lhag ma med pa la bya bar mngon te/ tshe phyi ma'i 'gro ba'i dbang du mdzad pa'i phyir dang / shar phyogs su 'gro bar mi smra zhing zhes bya ba rgyas par gsungs pa'i phyir ro//yod pa la yod pa nyid dang zhes bya ba ni mdo sde'i dum bu'o/ /de la/ stong pa nyid kyis yod pa la/ /yod nyid med la med nyid rig /de nas ji ltar gang yod la/ /gnyis kyis bla bcas bla med rig /gnyis kyis zhes bya ba ni mtshan ma med pa dang smon pa med pa gnyis kyis so/ /stong pa nyid la sogs pa'i ting nge 'dzin rnams kyi go rims kyang de nyid kyi phyir ro/ /yod pa dang med pa'i dngos po shes pa ni yod pa la bla ma dang bcas pa dang bla ma med pa gnyis su shes par nus kyi/gyi na ni ma yin la/ shes na yod pa bla ma dang bcas pa yin na ni yid kyis smon par mi byed la/ bla na med pa yin na ni smon par byed do/ /gzhan yang smras pa/ bdag 'dzin phyir dang srid la srid / /des na sred zad mi 'dod de/ /gsum po de yi gnyen por ni//stong nyid la sogs ting 'dzin rnams/ /gcig gis yod dang med pa dang / gnyis kyis yod la skyon yon rig /de phyir gsum ste de dag gi /rim pa snga mas phyir ma drangs/ /de ltar na yod pa la skyon yon zhes bya ba ni 'dus byas dang 'dus ma byas la ste go rims bzhin no//lung las ni/ med dang de bzhin skyon ldan dang / /de bzhin yon tan ldan dngos la/ /yod 'dzin yon tan ldan 'dzin dang / /yon tan mi ldan 'dzin gzhom phyir/ /go rims bzhin du stong pa nyid la sogs pa'i ting nge 'dzin rnams so zhes 'byung ngo //legs par mthong ba legs par rig pa zhes bya ba ni mdo sde'i dum bu'o/ /de la legs par mthong ba ni bstan pa yin la/ lhag ma ni bshad pa yin no/ /de la legs par rig pa ni thos pa las byung ba'i shes rab kyis so/ /legs par yid la byas pa ni bsams pa las byung bas so//legs par bsten pa ni 'jig rten pa'i bsgoms pa las byung ba ste/ dga' ba dang bcas pa yin pa'i phyir ro/ /legs par rtogs pa ni 'jig rten las 'das pa ste don dam pa la 'jug pa'i phyir ro/ /de ltar na legs par mthong ba yin no//'dun pa skyed par byed rtsol bar byed ces bya ba ni mdo sde'i dum bu'o/ /mnyam par ma bzhag pa'i sbyor ba spang ba la sogs par 'dod pa nyid kyi phyir dang / de'i thabs yongs su bzung ba nyid kyi phyir dang / de lan mang du bya ba dang / brtan por bya ba nyid kyi phyir dang /mnyam par gzhag pa'i sbyor ba zhum pa dang / rgod pa'i gnyen po'i bsgom pa nyid kyi phyir de dag go rims bzhin du rig par bya'o/ /gzhan yang spang ba la sogs par 'dod pa nyid kyi phyir dang / de dag la sbyor ba nyid kyi phyir dang / de la brtson pa'i lus dang sems dub par gyur na brtson 'grus rgyun mi chad pa nyid kyi phyir dang /zhi gnas dang lhag mthong gi nye ba'i nyon mongs pa spangs pa nyid kyi phyir yang go rims bzhin no/ /gzhan yang rtsol bar byed pa ni so sor rtogs pa'i dus na brtson 'grus brtsams pa la brten pa nyid kyi phyir dang /bsgom pa'i dus na ting nge 'dzin la brten pa nyid kyi phyir te/ sems zhum pa rab tu bzung nas nang du rab tu 'jog pa'i phyir na dge slong ma'i mdo sde las 'byung ba bzhin no/ /'dus pa dang ldan pa tshogs dang ldan pa zhes bya ba ni mdo sde'i dum bu'o //'khor dang / blo dang / yid ches pa dang / mchod pa phun sum tshogs pa nyid du ston to/ /'dus pa dang ldan pa tshogs dang ldan pa zhes bya ba ni 'khor phun sum tshogs pa nyid yin te/ nyan pa po'i tshogs 'dus pa dang 'khod pa dang go rims bzhin no/ /tshogs kyi slob dpon zhes bya ba ni blo phun sum tshogs pa nyid yin te/de rnams la rang gi bstan bcos kyi rjes su ston pa'i phyir ro/ /skye bo mang pos dge ba'i rang bzhin du kun tu shes pa zhes bya ba ni yid ches pa phun sum tshogs pa yin te/ mang po rnams kyis rtogs pa la yid ches pa nyid yin pa'i phyir ro//tshogs chen pos mdun gyis bdar ba zhes bya ba ni mchod pa phun sum tshogs pa nyid yin no/ /dmag ldan chos 'di ni zab pa zhes bya ba ni mdo sde'i dum bu'o/ de yang de las bcom ldan 'das kyis chos bdag med pa thugs su chud pa gang yin pa de'i dbang du mdzad pa yin pa'i phyir ro//de ni sngon shes rab ma sbyangs bas rang gis mthong bar dka' ba yin te des na zab pa'o/ /ston pa na khong du chud par dka' ba yin te/ des na zab par snang ba'o/ /rang gi rtag par mi nus pa yin te/ des na mthong bar dka' ba'o//ston pa na rtog ge'i spyod yul ma yin te/ des na khong du chud par dka' ba ste/ de ni rtog ge la ma grags pa nyid yin pa'i phyir ro/ /gzhan yang 'dir bdag med pa ston pa kho na chos yin te/ don dam par mthong bar dka' ba nyid kyi phyir zab pa'o//kun rdzob kyi don du khong du chud par dka' ba nyid kyi phyir zab par snang ba'o/ /don dam par brtag par mi nus pa nyid kyi phyir mthong bar dka' ba'o/ /kun rdzob kyi don du rtog ge spyod pa ma yin pa nyid kyi phyir khong du chud par dka' ba ste/ don dam pa'i dbang du mdzad pas de'i rtog ge la rgyu ba ma yin pa'i phyir ro//de ltar na ji ltar na zab pa zab par snang ba dang / rgyu gang gi yin pa de tshig gnyis dang gnyis kyis yongs su bstan pa yin no/ /da ni de lta bu'i chos de sus rig par nus she na/ zhib mor brtags pa'i mkhas pa dang mdzangs pas rig par zhes bya ba smras te/de la zhib mo ni de kho na'i don la 'jug pa'i phyir la/ brtags pa ni don mtha' dag la 'jug pa'i phyir te/ ji lta ba bzhin dang ji snyed yod pa nyid can gyi rgyus so/ /de gnyis kyang rnam pa gnyis te/ mkhas pa rnams te so so'i skye bo gang dag sngon blo yongs su smin par byas pa skye bas thob pa de gnyi ga'i don la 'jug nus pa'i shes rab dang ldan pa rnams dang /mdzangs pa rnams te bden pa mthong ba rnams so/ /de rnams ni de gnyis ka'i don la zhugs pa'i shes rab can nyid yin pa'i phyir mdzangs pa rnams so//de bzhin gshegs pas phan yon bcu gzigs nas 'dul ba la nyan thos rnams kyi bslab pa'i gzhi 'cha' bar mdzad do zhes bya ba ni mdo sde'i dum bu'o/ /de la bslab pa ni gang yin/ bslab pa'i gzhi ni gang yin zhe na/ yang dag par blang ba dang / rjes su bsrung ba dang / sor zhugs pa rnams ni bslab pa yin no/ /bya ba ma yin pa dang / bya ba yang dag par blang bar bya ba dang / rjes su bsrung bar bya ba dang / sor gzhug par bya ba ni bslab pa'i gzhi yin no/ /gzhan yang spang ba dang /blang ba dang / so sor bshags pa dang / nyin dang mtshan du slob pa ni bslab pa yin te/ /sgra gcan zin gyi mdo sde las 'byung ba bzhin no/ /tshul khrims kyi yan lag rnams ni bslab pa'i gzhi yin no/ /gzhan yang bslab pa nyid gzhi yin te/ bslab pa 'dod pa rnams khyad par du 'gyur ba'i phyir ro//dge 'dun bsdu ba'i phyir ni bslab pa dang mthun pa nyid kyis so/ /dge 'dun legs par bya ba'i phyir ni mdzes pa nyid kyis so/ /dge 'dun bde bar bya ba'i phyir ni yang dag par blang ba sgrub pa mchog tu dga' ba mang ba nyid kyis so//mngon par ma dad pa rnams dad par bya ba'i phyir ni mdzes pa nyid kyis dad pa skyes pas so/ /mngon par dad pa rnams phyir zhing 'byung bar bya ba'i phyir ni de nyid kyis de 'phel bar byed pa nyid kyis so/ /gang zag gnang mi bkur ba rnams tshar gcad pa'i phyir bslab pa las 'da' bas mi mdzes pa rnams te/bslab pa ni 'dod pa rnams gnas nas dbyung ba dang bskrad pa nyid kyis so/ /ngo tsha shes pa rnams bde bar gnas par bya ba'i phyir ni bslab pa 'dod pa rnams tshul khrims mtshungs pa nyid kyis bskyod pa med par 'grogs na bde ba nyid kyis so//mthong ba'i chos kyi zag pa rnams bsdams pa'i phyir ni/ da ltar byung ba'i zag pa rnams bzlog pa'i phyir bslab pa'i gzhi 'cha' ba'o/ /tshe rabs phyi ma'i zag pa rnams bzlog pa'i phyir ni ma 'ongs pa'i gang zag la mi 'jug par bya ba'i phyir bslab pa'i gzhi 'cha' ba'o//tshangs par spyod pa rjes su gzung ba'i phyir dang / tshangs par spyod pa yun ring du gnas par bya ba'i phyir te/ nga'i tshangs par spyod pa yun ring du gnas par 'gyur ba ni tshangs par spyod pa brda can dang don dam pa'i rjes su 'jug pa ste/rab tu byung ba dang rtog par brgyud pa gnyis so/ /de rnams las gcig ni bstan pa mi phyed par bya ba'i dbang du mdzad nas so/ /gcig ni kha na ma tho ba med pa nyid kyi'o/ /gcig ni rgyu phun sum tshogs pa'i'o/ /gnyis ni zang zing gi longs spyod phun sum tshogs pa'i'o/ / gnyis ni chos kyi longs spyod phun sum tshogs pa'i'o/ /gnyis ni mya ngan las 'das pa 'thob pa phun sum tshogs pa'i'o/ /gcig ni bstan pa'i don che ba nyid phun sum tshogs pa'i'o/ /dge slong dgra bcom pa zag pa zad pa'i sdug bsngal gang yin pa de 'gag pa zhes bya ba ni mdo sde'i dum bu'o//de la yang 'byung ba pa'i sdug bsngal gang yin pa de 'gags pa ste/ 'jug pa'i gags su gyur pa'i phyir ro/ /de nye bar zhi ba ni gtan du mi skye ba'i chos nyid yin pa'i phyir ro/ /'jig rten pa'i 'gog pa las khyad par du bya ba'i phyir nye bar zhi ba smos te/bsrabs pa'i dngos por nye bar zhi ba las khyad par du bya ba'i phyir 'gog pa smos so/ /tshe 'di pa'i gang yin pa de ni bsil bar gyur pa ste/ nyon mongs pa'i bag la nyal gyi drod dang bral ba'i phyir na bum pa'i gyo mo tsha ba bsil bar gyur pa bzhin no/ / de nub pa ni phung po'i lhag ma med pa'i mya ngan las 'das par ro/ /gzhan yang 'jig rten pa'i 'dod chags dang bral ba rnams ni sa 'og ma pa'i sdug bsngal 'gag pa yin gyi nye bar zhi ba ni ma yin te/ phyis skye ba'i chos nyid yin pa'i phyir ro/ /bsil bar gyur pa yang ma yin te/bag la nyal lus pa'i phyir ro/ /sa gong ma pa yang ma nub pa yin no/ /dgra bcom pa'i ni de las bzlog nas nye bar zhi ba dang nub pa'i bar du yin no/ /gzhan yang 'jig rten pa rnams kyi 'gog pa ni zhi ba ma yin te/ sa 'og ma'i sdug bsngal gyi sdug bsngal dang bcas pa yin pa'i phyir ro//bag la nyal ma spangs pas gya nom pa yang ma yin no/ /yang 'jug pa nyid kyis nges par 'byung ba yang ma yin no/ /de las bzlog nas 'phags pa rnams kyi sdug bsngal 'gog pa'i zhi ba dang / gya nom pa dang / nges par 'byung ba yin no/ /de'i rnam pa dang mthun par dgra bcom pa'i sdug bsngal 'gags pa dang nub pa zhes bya ba'i bar yin par bstan to/ /bram ze ni 'di lta ste som nyi med cing zhes bya ba ni mdo sde'i dum bu'o / /'di las ni ye shes dang spangs pa phun sum tshogs pas don dam pa'i bram ze'i mtshan nyid bstan to//som nyi med pa nyid kyis ni ye shes phun sum tshogs pa ste/ don dam pa dang rang gis thob pa las som nyi med pa'i phyir ro/ /lhag mas ni spangs pa phun sum tshogs pa ste/ ngan song pa dang yang 'byung ba pa'i kun nas nyon mongs pa spangs pa'i phyir ro//'gyod pa chad pa nyid kyis ni nyon mongs par 'gyur ba'i las spangs pa'i phyir ngan song ba'i kun nas nyon mongs pa spangs par yongs su ston to/ /lhag mas ni yang 'byung ba pa'i kun nas nyon mongs pa spangs pa yin te/ 'dun pa dang 'dod chags spangs par yongs su bstan pa'i phyir ro//'byung ba dang 'jig pa la sred pa ni 'byung bar 'gyur bar bya'o/ /mi 'byung bar 'gyur bar bya'o snyam du 'dun pa'o/ /chags pa ni de nyid la 'dod pa dang gzugs dang gzugs med pa'i 'dod chags rnams so//sred pa thams cad rnam spangs nas/ /'du byed thams cad zad phyir dang / /phung po thams cad yongs shes na/ /yang sred par ni 'dod mi 'gyur/ /zhes bya ba'i tshigs su bcad pa 'di dang / las dang srid dang de bzhin ma rig pa/ /tshe rabs phyi ma'i 'du byed rnams kyi rgyu//zhes bya ba 'di dang yang sbyar bar bya ste/ go rims tha dad pa tsam zhig khyad par yod do/ /gzhan yang som nyi med pa nyid kyis ni shes nas tha dad pa gsum 'thob par ston la/ 'gyod pa chad pa nyid kyis ni 'phags pa dgyes pa'i tshul khrims 'thob par ston te/ de ltar na mthong ba'i lam gyis bram ze'i tshul gyis ni slob pa'i bram ze'i mtshan nyid yongs su bstan to/ /lhag mas ni mi slob pa'i bram ze'i mtshan nyid yongs su bstan te/ 'dun pa dang 'dod chags spangs par yongs su bstan pa'i phyir ro/ /'byung ba dang 'jig pa la sred pa dang bral ba zhes bya ba ni gson pa dang 'chi ba la mngon par mi dga' ba'i phyir 'dun pa spangs pa yin te/ji skad du/ 'chi la mngon par mi dga' la/ /gson la 'ang mngon par mi dga'o/ /zhes tshigs su bcad pa 'di gsungs pa lta bu'o/ /chags pa rgyas par mi 'gyur ba//zhes bya ba ni 'dod pa dang gzugs dang gzugs med pa'i 'dod chags spangs pa yin no/ /rnam grangs gzhan yang mngon pa'i nga rgyal can gyi nye ba'i nyon mongs pa'i gnyen por bram ze nyid la mngon pa'i nga rgyal med pa nyid du yongs su bstan pa yin no //mngon pa'i nga rgyal can ni zab mo stong pa nyid dang ldan pa rten cing 'brel par 'byung ba rkyen 'di pa nyid dang mthun pa'i gtam brjod pa na som nyi zal/ phyis kyang yid la gcags par 'gyur te/ ji skad du lha'i mdo las gsungs pa lta bu yin zhing / lus sam snyoms par 'jug pa la sred pa kun tu rgyu la/'dod chags kyi bag la nyal yang rtag tu rjes su 'brang ba kho na yin no/ /mi rtag pa'i 'du shes zhing pa la sogs pa'i dpe dang bcas pa ni mdo sde'i dum bu'o/ /'dir zhing pa'i dpes ni mi rtag pa'i 'du shes bag la nyal gyi gnyen po nyid du yongs su bstan la/rtsa bal ba dza'i dpes ni kun nas dkris pa'i gnyen po nyid du yongs su bstan pa yin te/ nyon mongs pa ma byung ba dang / byung ba'i dbang du byas pa'i phyir ro/ /a mra'i dog pa'i dpes ni de las gzhan bag la nyal gyi gnyen po smon pa med pa dang /mtshan ma med pa'i 'du shes dag 'dren par byed pa nyid yin no / /spyi rten gyi ni de las gzhan pa kun nas dkris pa'i gnyen po mi sdug pa la sogs pa'i 'du shes dag tu kun tu 'dzin par byed pa nyid yin te/ yongs su mi nyams par 'gyur ba'i phyir ro//glang po che'i rjes kyis ni de dag mi rtag pa'i 'du shes kyis spyod yul gyi nang du chud pa nyid yin te/ mi rtag pa nyid du yongs su rtag par bya ba nyid yin pa'i phyir ro/ /'bab chu rnams kyis ni de las gzhan pa sun 'byin pa'i rnam pa dag der thug pa nyid yin te/'du byed kyi sdug bsngal nyid la 'jug pa nyid yin pa'i phyir ro/ /nyi ma dang khams kyi rgyal pos ni mi slob pa'i gnas skabs na go rims bzhin du mi brjed pa'i chos nyid du byed pa dang / 'jig rten pa'i 'du shes gzhan la dbang sgyur ba nyid yin no/ /de ltar na ji ltar mi rtag pa'i 'du shes ni mtha' dag gi gnyen po yin pa yang yin te/bag la nyal ba dang / kun nas dkris pa'i gnyen po nyid yin pa'i phyir ro/ /ji ltar na gnyen po'i rtsa ba yin pa yang yin te/ gnyen po gzhan 'dren pa'i phyir ro/ /ji ltar na kun nas dkris pa'i gnyen po gzhan las khyad par rnam pa gsum dag gis khyad par du 'phags pa yin pa yang yin no//ji ltar na gnyen po bla na med pa nyid yin pa de yang yongs su bstan pa yang yin te/ ma rig pa dang rig pa gzhan thams cad zil gyis gnon pa'i phyir ro/ / rnam pa nyi shu po 'di dag dang ldan pas gtam bya'o zhes bya ba ni mdo sde'i dum bu'o/ /de la dus su zhes bya ba ni nyan 'dod pa nyid dang bshad pa'i 'os su gyur pa nyid du shes nas te/ /kat+ya'i bu mo smyug ma can bzhin no/ /bsgrim pa zhes bya ba ni brnyas pa med pa ste/ seng ge mchong ba bzhin no//go rims zhes bya ba ni dus sngar bya ba sbyin pa la sogs pa dang / yang dag phul can gyi gtam las brtsams nas so/ /mtshams sbyar ba zhes bya ba ni mdo sde rnam par bshad pa las brtsams nas so/ /rjes su mthun pa zhes bya ba ni dri ba lung bstan pa las brtsams nas te/mgo gcig tu lung bstan pa la sogs pa rnams la de bzhin du lung ston pa'i phyir ro/ /dga' bar bya ba ni dad pa can rnams la'o/ /'dod par bya ba ni sngar gnas pa dang zhe 'gras pa rnams la'o/ / spro ba mi bskyed pa dang mi smad pa ni gang su dag 'di 'dra ba thams cad ni yang dag pa la zhugs pa dag go zhe'am/log pa la zhugs pa dag go zhes bya ba lta bu ste/ ji skad du nyon mongs pa med pa'i mdo las gsungs pa lta bu'o / /gdul ba'i khyad par mngon par mi shes pa de lta bur byed pa ni des gdul ba ma yin pa rnams snying na bar 'gyur ro//rigs pa ni tshad ma dang mi 'gal ba'i phyir ro/ /'brel pa ni snga phyi 'brel ba'i phyir ro/ /ma 'dres pa ni gtam gzhan du 'phro ba spangs pa'i phyir ro/ /chos dang ldan pa ni dge ba dang mthun pa'i phyir ro//'khor ji lta ba bzhin ni gdul ba dang 'tsham pa'i phyir ro/ /byams pa'i sems ni nyan pa po bde bar smon pas so/ /phan pa'i sems ni de la nyon mongs pa med par smon pas so/ /snying brtse ba'i sems ni de la sdug bsngal med par smon pas so/ / gzhan yang dge ba dang mi dge ba la sogs pa dang / tha mal pa dag la byams pa la sogs pa'i sems kyis te go rims bzhin no/ /rnyed pa dang bkur sti dang tshigs su bcad pa la mi brten pa ni de 'dod pa nyid spangs pas so/ /bdag la bstod par mi bya zhing gzhan la smad par mi bya ba ni smra ba po nyid kyis bdag la lhag par yid ches par byed 'dod pa nyid spangs pas so//de ltar na ji lta bur dang / gang gi don du dang / gang 'dra ba dang / gang 'dra bas gtam bya ba de lnga lnga dag gis yongs su bstan to/ /lung las ni skyon bcu gcig gi gnyen por gtam rnam pa nyi shu dang ldan pa'o zhes 'byung ngo //skyon bcu gcig ni snod ma yin pa la brjod pa'i skyon dang / brjod pa yongs su ma rdzogs pa'i skyon dang / brjod pa bar chad pa'i skyon dang / brjod pa go bar mi byed pa'i skyon dang / brjod pa mchod par mi 'gyur ba'i skyon dang /don 'thad pa med par brjod pa'i skyon dang / spyod yul ma yin pa brjod pa'i skyon dang / rnam par g.yengs nas brjod pa'i skyon dang / don med pa dang ldan pa brjod pa'i skyon dang / mi 'tsham par brjod pa'i skyon dang / nyon mongs pa can gyi bsams pas brjod pa'i skyon no//de la snod ma yin pa ni spyod lam mi sdug par 'dug pa'o/ /brjod pa bar chad pa'i skyon gyi gnyen por ni go rims la sogs pa rnam pa gsum po dag yin par rig par bya ste/ bstan pa dang rgol ba'i tshig dang /lan gyi tshig gis dbang du mdzad nas so/ /brjod pa go bar mi byed pa'i skyon gyi gnyen por drug pa dang / bdun pa dang brgyad pa dag ste/ dad pa can dang / zhe 'gras pa dang / bar na gnas pa'i dbang du mdzad nas so/ /brjod pa mchod par mi 'gyur ba'i skyon gyi gnyen por dgu pa dang bcu pa gnyis te/sdig pa'i las can la ni spro ba bskyed par 'os pa ma yin la/ smad na yang mchod par mi 'gyur ba'i skyon du 'gyur bas so/ /spyod yul ma yin pas ni don zab mo ste/ dbang po tha ma la'o/ /nyon mongs pa can gyi bsam pa ni rnam pa gsum ste/yid ches par bya ba'i bsam pa dang / dad nas bkur sti byed pa'i bsam pa dang / phrag dog gi bsam pa'o/ /dang po'i gnyen por byams pa dang / phan pa dang / snying brtse ba'i sems kyi rnam pa dag ste/ mya ngan las 'das pa dang /de'i lam rtogs par bya ba'i bsam pa nyid dang / bshad pa'i don khong du chud par bya ba'i bsam pa nyid kyis so/ /gzhan yang mdor na 'di las gtam gyi sbyor ba dang / gtam gyi las dang / gtam gyi yon tan dang / smra ba po'i yon tan las brtsams nas rnam pa lnga lnga dag tu rig par bya'o// //bam po bzhi pa/ rnam pa bcu drug po 'di dag dang ldan pas chos mnyan par bya'o zhes bya ba ni mdo sde'i dum bu'o/ /de la rnam pa bcu drug po dag ni skyon rnam pa bcu gsum gyi gnyen po yin par rig par bya'o/ /skyon rnam pa bcu gsum ni smra ba po la bdag nyid kyis bskyod pa dang spyod lam gyi skyon dang /'gying ba'i skyon dang / don du mi gnyer ba'i skyon dang / gzhan gyi phyogs byed pas snying na ba'i skyon dang / mchod par mi 'gyur bas smra ba po rab tu mi 'dzin pa'i skyon dang / sun phyin ci log du brgal ba'i bsam pa'i skyon dang /chos dang chos smra ba la yid la mi byed pa'i phyir rim gro mi byed pa'i skyon dang / skyon yid la byed pa'i phyir brnyas pa'i skyon dang / smon pa'i skyon dang / rnyed pa dang bkur sti 'dod pa nyid kyi skyon dang / rnam par g.yengs pa dang bsdus pa gnyis kyis mi nyan pa'i skyon dang /legs par yid la mi byed pa'i skyon dang / rab tu yid la mi byed pa'i skyon dang / de la nang du yang dag 'jog pa'i tshe spyod lam gyi mi sdug pa'i phyir skyon dang po yin no/ /rigs mthon po nyid la sogs par nga rgyal 'byung ba'i phyir 'gying ba'i skyon dang /chos la ni yon tan dang legs par gsungs pa dang 'bras bu chen po nyid du'o/ /chos smra ba la ni dge ba'i bshes gnyen nyid du'o/ /chos la skyon ni tshig dang yig 'bru ma 'brel pa nyid du'o/ /chos smra ba la ni tshul khrims dang / rigs dang / byad gzugs dang /tshig dang / tshig 'byin pa ma tshang ba nyid du'o/ /rnam par g.yengs pa ni sems gzhan du 'phros pa'o/ /bsdus pa ni rmugs pa dang / gnyid kyis sems zhum pa nyid du'o / /legs par yid la mi byed pa ni dgongs pa dang chos nyid la phyin ci log pa nyid kyis so//rab tu yid la mi byed pa ni 'dun pa dang 'jug pa zhan pa nyid kyis so/ /lung las ni skyon rnam pa drug gi gnyen por rnam pa bcu drug dag yin no zhes 'byung ste/ skyon drug ni las kyi skyon dang / mos pa med pa'i skyon dang / mchod par mi 'gyur ba'i skyon dang /bsam pa'i skyon dang / mi mthun pa nyid kyi skyon dang / 'dzin pa'i skyon no/ /de la las kyi skyon ni rnam pa gsum ste/ lus kyi las kyi skyon ni spyod lam mi sdug par 'dug pa'i phyir ro/ /lus dang ngag gi skyon ni de nyid kyis skul bar mi byed pa'i phyir ro//yid kyi las kyi skyon ni nyan par mi 'dod pa nyid kyis so/ /bsam pa'i skyon ni gzhan la klan ka btsal ba dang / 'di lta bu zhig tu rgol ba las thar bar bya ba'i bsam pa nyid kyis so/ /mi mthun pa nyid kyi skyon ni rnam pa lnga dag ste/ de la chos la ni nges par 'byin pa ma yin par go ba nyid kyis gus pa med pa dang /tshig dang yi ge ma 'brel ba nyid kyis brnyas pa'o/ /gang zag la ni tshul khrims dang / tshig dang / tshig 'byin pa'i skyon gyis gus pa med pa dang / rigs kyi skyon gyis brnyas pa'o/ /khong du chud pa dang /sgrub pa'i nus pa mi 'byung snyam pa'i bdag nyid la brnyas pa'o/ /'dzin pa'i skyon yang rnam pa lnga ste/ log par 'dzin pa dang / don mi 'dzin pa dang / tshig 'bru mi 'dzin pa dang / brda ma sprad par 'dzin pa dang / ma lus par mi 'dzin pa'o/ /lhag ma ni go sla ba'i phyir rnam par ma phye'o//gsung grong khyer ba dang zhes bya ba ni mdo sde'i dum bu ste/ 'dis ni yang dag par sdud par byed pa rnams kyis gsung yon tan drug dag dang ldan par yongs su ston pa yin no / /gsung snyan pa nyid dang tshig 'bru bzang po nyid dang / don bzang po nyid dang /zang zing med pa nyid dang / ji ltar 'os pa nyid dang / rgya che ba nyid do/ /de la rnam pa gnyis kyis na gsung snyan pa nyid du rig par bya'o / /gsung rgya che ba nyid kyis te / 'khor la chun par mdzad pa'i phyir dang / gsung 'jam pa nyid kyis so/ /gnyis kyis na tshig 'bru bzang po nyid yin te/tshig 'bru'i nges pa'i tshig legs pa nyid dang / brjod pa go bar mdzad pa nyid kyis so/ /lhag ma rnams ni re res te rigs pa'i don dang ldan pa nyid kyis te/ mnyan par 'os pa'i phyir dang / rnyed pa la sogs pa'i bzhed pa dang mi ldan pa nyid kyis dang /'khor ji lta ba bzhin du sbyor ba nyid kyis dang / spobs pa dpag tu med pa dang ldan pa nyid kyis so/ /lung las ni mya ngan las 'das pa'i grong khyer gyi dbang du mdzad pa nyid dang / gsung 'jam pa nyid dang / tshig 'bru'i nges pa'i tshig legs pa nyid dang /go bar mdzad pa nyid dang / chos dang don dang ldan pa nyid dang / dad nas bkur sti byed pa la mi brten pa nyid dang / ran par gsung ba nyid dang / rgya che zhing thabs mkhas pa nyid kyi rgyus na gsung grong khyer gsal ba nas yongs su gtugs pa med pa'i bar yin par 'byung ste/gsung rnam pa brgyad dang ldan pa 'di ni mdor na yon tan gsum dang ldan par rig par bya ste/ dbang du mdzad pa nyid ni rnam pa gcig gis so/ /rang bzhin nyid ni gnyis kyis so/ /sbyor ba nyid ni lhag ma rnams kyis so zhes 'byung ngo //de nas tshe dang ldan pa sa ga dge slong rab tu mang po dag rim gro'i gnas su tshogs shing 'dus par gyur pa dag la zhes bya ba ni mdo sde'i dum bu'o/ /de la bkur sti byas zhes bya ba ni bstan pa'o/ /bla mar byas pa nas sems thams cad kyis bsams nas zhes bya ba'i bar ni bshad pa'o//'dis ni bkur sti byas nas nyan pa skyon drug dang bral bar bstan pa yin no/ /skyon drug ni nga rgyal gyi skyon dang / ma dad pa'i skyon dang / ma mos pa'i skyon dang / phyi rol du rnam par g.yengs pa'i skyon dang / nang du bsdus pa'i skyon dang /skyo ba'i skyon no/ /'dir yang smras pa/ nga rgyal dang ni ma dad dang / /don du gnyer ba med nyid dang / /phyi rol rnam g.yengs nang bsdus dang / /skyo ba nyan pa'i dri ma yin/ /chos mngon pa dang 'dul ba dri ba dris pa yang shes shing tshig dang yig 'bru rigs pa dang 'brel pa dang zhes bya ba ni mdo sde'i dum bu'o //'di las ni 'dri ba rnam pa gsum la lan gdab pa yon tan brgyad dang ldan par yongs su bstan pa yin no/ /don dang mtshams sbyar ba'i dbang du byas nas mi shes nas 'dri ba la ni don phyin ci ma log pa nyid kyis dang /mtshams sbyar ba 'brel par bya ba nyid kyis so/ /chos nyid dang snga phyi'i dbang du byas nas 'gal ba'i 'dri ba la chos nyid kyi rjes su mthun pa nyid kyis dang / dgongs pa bstan pa nyid kyis so/ /'dri ba gnyis ka la yang go bar byed pa nyid kyis dang / gdul ba ji lta ba bzhin du 'chad pa nyid kyis so//rtogs pa'i dbang du byas nas gdams ngag 'dri ba la ni 'jig rten pa'i yon tan mngon par bsgrub pa dang rjes su mthun pa nyid kyis dang / 'jig rten las 'das pa'i yon tan mngon par bsgrub pa dang rjes su mthun pa nyid kyis te/rtag 'grus skyong gi 'phags pa'i lam gyi yan lag gi tshogs yin pa'i phyir ro/ /rtag pa dang 'grus par skyong ba ni rtag 'grus skyong ste/ rtag tu dang bsgribs pas zag pa rnams las sems srung ba'i phyir ro/ /gzhan yang rigs pa nyid ni 'brel pa nyid kyis gsal bar byed pa yin te/snga phyi ma 'brel ba med pa nyid kyis so/ /rjes su mthun pa nyid ni sbyor ba nyid kyis te/ chos nyid dang mi mthun pa med pa nyid kyis so/ /thabs dang ldan pa nyid ni 'tsham pa nyid kyis te/ gdul ba dang rjes su mthun par 'chad pa nyid kyis so//mthun pa nyid ni rtag 'grus skyong gi yan lag gi tshogs nyid kyis te/ tshangs par spyod pa'i rjes su mthun pa nyid kyis so/ /ji ltar gsung dbyangs yan lag lnga dang ldan pa bshad pa las 'byung ba lta bu ste/ tshig snga ma phyi mas gsal bar byed pa yin no//tshig phyi ma rnam par bshad pa dang bcas pa bzhi po 'di rnams kyis ni 'dri ba thams cad la lan gdab pa yon tan bzhi dang ldan par bstan pa yin te/ snga phyi mi 'gal ba dang / chos nyid dang mthun pa dang / gdul ba dang mthun pa dang /don gyi mchog dang mthun pa'o/ /lung las ni tshig brgyad po dag gis lan gdab pa yon tan brgyad dang ldan par yongs su bstan pa yin no zhes 'byung ngo / /yon tan brgyad dag ni don la 'jug pa nges par 'dzin pa nyid dang / 'jig rten la grags pa'i tshig dang yig 'bru dang 'brel pa nyid dang rgol ba 'gal ba'i rjes su mthun pa nyid dang /tshig zab mo'i don nges par byas pa nyid dang / nyan pa po la phan 'dogs pa'i tshig dang yig 'bru rnam par g.yeng ba med pa'i gzhir gnas pa nyid dang / gdul ba'i bsam pa dang mos pa ji lta ba bzhin du rab tu rnam par phye ba nyid dang /lung 'bogs pa dang / kha don byed pa dang / mos pa dang sems pa dang bsgom pa dang mthun pa nyid dang / sgra ji lta ba bzhin du mngon par mi zhen par gtan la dbab par bstan pa nyid do/ dge slong dag gtam la 'jug par bya ba na 'dun pa dang zhe sdang dang zhes bya ba ni mdo sde'i dum bu ste//'di las ni nyon mongs pa can gyi gtam gzhi dang bcas pa spangs nas gtam gang bya ba dang / gang gi don du bya ba de yongs su bstan to/ /de la kun nas nyon mongs pa can gyi gtam gyi gzhi ni rnam pa dgu ste/rang gi phyogs rgyal bar 'dod pa dang / rang pham na phyir rgol ba la khong khro ba nyid dang / rang gi phyogs grub na sems khengs pa nyid dang / phyir rgol bas skyon byung ba glengs na de bcas par 'dod pa nyid dang / skyon ma byung ba glengs na khro ba dang /khros nas sha glan pa'i phyir khon du 'dzin pa dang / pham na yid mi bde ba'i mtshan nyid sems mi gsal ba nyid do/ /'di thams cad kyi rtsod pa'i rtsa ba'i sngon du 'gro ba ni gnyis yin te/ rab tu byung ba'i yang sems kyi tha ba dang / 'chab pa'i gzhi ni zag pa'i gnas dang mthun pa rnyed pa dang bkur sti dang ldan pa'i yul rnams yin te/de la ltos pa dang bcas pa ni de'i dgra bor gyur pa dag la zhe sdang skyed pa'i phyir dang / bdag nyid kyi skyon 'chab par byed pa'i phyir ro/ /de la mi ltos pa nyid kyis ni de spangs pas na rtsod pa'i rtsa ba dang po yongs su spangs pa yin no//gnyis pa ni lta ba'i yongs su gdung ba bsal ba'i phyir ro/ /lta ba ngan pa'i sems yongs su gdung ba yin te/ rab tu ma zhi ba'i mtshan nyid yin pa'i phyir ro/ /'dir yang smras pa/ rgyal dang pham byed 'dod grub dang //byung dang ma byung glengs pa dang / /ma byung glengs na khro ba las/ /khon du 'dzin pa 'byung ba dang / /pham na gdug pa la sogs pa/ /bdun ni spangs nas gtam gtan bya/ /rtsod pa'i gzhi gnyis snga ma ste/ /gang las skyon 'di 'byung ba'o//de la kun nas nyon mongs pa can gyi gtam ni rnam pa gsum dag gis yongs su bstan pa yin te/ ma zhi zhing tshod mi 'dzin par smra ba nyid kyi phyir dang / grub pa'i mtha' las 'das par byed pa nyid kyi phyir dang / gzhan la smod pa nyid kyi phyir ro/ /gtam rgyu dang bcas pa 'di lta bu spangs nas gtam ci zhig smra bar bya zhe na/don dang chos te gang zhig gang don du gnyer ba 'am/ chos dang don gang gi yul la 'bab pa'o/ /ci'i phyir gtam smra bar bya zhe na/ gzhan dag la shes rab rnam pa gsum nye bar bsgrubs pas bzod pa chung ngu dang 'bring dang chen po bskyed pa'i phyir dang /bdag dang gzhan gnyis dad pa bskyed pa'i phyir ro/ /'phags pa rnams ni de ltar brjod cing zhes bya ba ni gzhan dag ma yin pa'o/ /'phags pa rnams kyi brjod pa ni de lta bu yin no zhes bya ba ni rnam pa gzhan du ma yin no//'di ni gang zag nges par bzung ba dang / gtam nges par bzung ba yin par rig par bya'o/ /gzhan yang 'dod chags dang ma bral ba rnams ni so sor brtags nas de ltar brjod la/ 'dod chags dang bral ba rnams kyi rang bzhin brjod pa ni de lta bu yin no//'dis ni gang zag so sor rtog pa dang / bsgom pa'i stobs can gnyis nges par bzung ba yin no/ /gzhan yang da ltar byung ba dang lkog tu gyur pa 'das pa dang / ma 'ongs pa'i dus la'o/ /gzhan yang de dag ji ltar brjod pa dang / 'bras bu brjod pa de ji lta bu yin pa yongs su bstan pa yin te/gang zag dang 'bras bu khyad par can dang ldan pas gtam rab tu bsngags par bya ba'i phyir ro/ /lung las ni gtam la 'jug pa rnam pa gsum dang bcas pa yin te/ phyir rgol ba dang / bar na gnas pa dang /chos mthun pa dang ngo zhes 'byung ste/ de las ni mdo sde'i dum bu 'dis dge slong gi sems yongs su dag pa dang / ngag yongs su dag pa yongs su ston pa yin no/ /phyir rgol ba ni rgol ba la sbyor ba rnam pa gsum gyis nye bar gnas pa yin te/ phyir rgol ba'i sbyor ba dang /bkur sti ma yin pa'i sbyor ba dang / tshig rtsub po'i sbyor bas so/ /de la dge slong gis ni phyir rgol ba'i sbyor ba byung na/ de pham par 'dun pa spangs shing phyir rgol ba de nyid la yang zhe sdang spangs la gtam bya'o/ /ma byung ba dang byung ba'i skur pa gnyis kyis bkur sti ma yin pa'i sbyor ba byung na nga rgyal dang 'chab ba spangs nas so//tshig rtsub po'i sbyor ba byung na kun nas mnar sems te sems 'khrugs pa dang / mi bzod pa ste slar gshe ba dang / khro ba la sogs pa 'dod pa nyid dang / yid mi ches pa ste rang gi sems kyi yang dag par sdom pa ma nges pa yang spangs pa'o//bar na gnas pa dang lhan gcig gtam la 'jug pa na sems kyi tha ba dang 'chab pa'i gzhi ste/ 'di lta ste/ slob dpon gyi dpe mkhyud las byung ba bar chad dang bcas par bstan pa'i bsam pa dang / dad pa nas bkur sti byed 'dod pa la yang bor te'o/ /lta ba'i yongs su gdung ba ste rang gi lta ba mchog tu 'dzin pa yang bsal nas so/ /'di ni de'i sems yongs su dag pa yin no/ /ha cang brjod pa yang mi bya zhing 'gal bar yang mi bya la/ tshig rtsub po smra bar yang mi bya ste zhes bya ba ni phyir rgol ba dang lhan cig gtam la zhugs pa na nyes rtsom gyi tshig dang /mi rigs pa dang ldan pa'i tshig dang / kha na ma tho ba dang bcas pa'i tshig las zlog par byed pa'o/ /bar na gnas pa dang lhan cig gtam la 'jug pa na the tshom can dang / bye brag mi phyed pa las brtsams nas don dang chos bstan par bya'o/ /bye brag phyed pa la ni kun du shes par bya ba nas yongs su mgu bar bya ba'i bar du drug bya'o/ /'di ni de'i ngag yongs su dag pa yin no/ /de la bsam gyis mi khyab pa'i gnas la sems pa la ni kun du shes par bya/bsam gyis mi khyab pa'i gnas la the tshom zos pa la ni yang dag par shes par bya/ rtogs par bya ba'i phyir bsgom pa la ni nges par sems su gzhug par bya'o/ /de dag kho nas mchog tu dga' ba rnam pa gsum bskyed pa'i phyir na mgu bar bya/ yang dag par mgu bar bya/yongs su mgu bar bya ba yin no/ /mchog tu dga' ba rnam pa gsum ni sems g.yengs pa spong ba'i mchog tu dga' ba dang / the tshom gcod pa'i mchog tu dga' ba dang / 'bras bu yongs su 'dzin pa'i mchog tu dga' ba'o/ /chos mthun pa dang lhan cig gtam la 'jug pa na dad par bya ba ni sems yongs su dag pa ste legs par yongs su 'dri ba'i phyir ro//dad pa bskyed par bya ba ni ngag yongs su dag pa yin te/ legs par lung ston pa'i phyir ro/ dge sbyong dag bdag nyid gling du gyur pa dang zhes bya ba ni mdo sde'i dum bu'o//ji ltar na bdag nyid gling du 'gyur ba dang / bdag nyid skyabs su 'gyur bar gnas she na/ nang gi sems kyi zhi gnas la brtson pa'i phyir ro/ /ji ltar na chos gling dang chos skyabs su 'gyur ba yin zhe na/ lhag pa'i shes rab chos kyi lhag mthong la brtson ba'i phyir ro//ji ltar na gling gzhan ma yin pa dang / skyabs gzhan ma yin pa yin zhe na / de'i mi mthun pa'i phyogs 'dod pa'i bsod snyoms dang bdag nyid dub par gnas pa la brtson pa gnyis yongs su spangs pa'i phyir ro//de ltar na sred pa dang ma rig pa'i gnyen po zhi gnas dang lhag mthong gnyis so sor bsten pa'i phyir dang / de'i mi mthun pa'i phyogs mtha' gnyis yongs su spangs pa'i phyir bdag nyid la sogs pa gling dang skyabs su gyur pa nyid du yongs su ston pa yin no/ /gzhan yang rang gi skyes bu'i rtsa ba dpung gnyen nyid yin pa'i phyir ni bdag nyid gling du 'gyur ba yin te/'dis ni brtson 'grus brtsams pa nyid la sbyor bar mdzad pa yin no/ /lung dang rtogs pa'i chos dpung gnyen nyid yin pa'i phyir ni chos gling du 'gyur ba yin te/ 'dis ni thabs shes par bya ba la sbyor bar mdzad pa yin no//de dag la gcig tu nges pa nyid kyi phyir ni gling gzhan ma yin pa ste/ 'dis ni gnyis la skyon mi 'byung ba nyid du sbyor bar mdzad pa yin no/ /dran pa nye bar gzhag pa bsgoms pas de ltar gnas par 'gyur ro zhes yang dag par ston pa yin te/'di la dge slong nang gi lus la lus kyi rjes su lta zhing zhes rgyas par gsungs pa'i phyir ro/ /sdud pa'i tshigs su bcad pa ni/ brtson 'grus ldan dang thabs shes dang / /rtag tu de la dga' ba gang / /de ni bdag la sogs pa gsum//gling 'gyur go rims bzhin shes bya/ rnam grangs gzhan yang / rang gi tshul bzhin yid byed dang / /gzhan gyi sgra la brtan pa dang / /bsgom la gcig tu nges pa 'di/ /bdag sogs gling 'gyur shes par bya/ /'di gsum don gang gis na gling du 'gyur/don gang gis na skyabs su 'gyur zhe na/ chu bo bzhis ded pa las yongs su skyob pa'i don gyis na gling du 'gyur ba yin la/ skye ba la sogs pa'i sdug bsngal las yongs su skyob pa'i don gyis na skyabs su 'gyur ba yin no/ /gzhan yang go rims bzhin du nyon mongs pa skyes pa dang /ma skyes pa'i gnyen po nyid yin pa'i phyir ro/ /bsdus pa'i tshigs su bcad pa ni/ de dag chu dang thang 'dra ba'i/ /nyon mongs sdug bsngal skyob phyir dang / /nyon mongs skyes dang ma skyes dang / /'di yi gnyen po yin phyir ro//yang gzhan dag na re/ bdag nyid skyabs min 'dod pa rnams la brten/ /chos skyabs 'gyur min sdug bsngal rnams la ste/ /bdag la rag las mkhas dang de gnyi ga /skyabs su 'gyur byed pa ni zhi bar 'gyur/ /zhes 'chad de/ de dag ni mtha' gnyis kyi gnyen po la brten pa'i phyir dang /srid pa gzhan nye bar mi len pa'i phyir bdag nyid la sogs pa gling du 'gyur ba nyid du yongs su ston pa yin no/ /lung las ni grogs la sred pa dang / rnyed pa la sred pa dang / yang srid pa la srid pa'i gnyen por go rims bzhin du bdag nyid dang chos dang gling gzhan ma yin pa nyid du bstan to/dge slong dag log par lta ba spongs shig ces bya ba ni mdo sde'i dum bu'o/ de la log par lta ba spongs shig ces bya ba ni bka' yin no/ lhag mas ni bka' bzhin du bsgrub pa'i rgyu rnam pa gsum ston pa yin te/nus pa nyid dang / skyon med pa nyid dang / yon tan mang ba nyid do/ /skyon med pa nyid ni don med pa la sogs pa mi 'grub pa yin pa'i phyir ro/ /yon tan mang ba nyid ni don la sogs pa 'grub pa'i phyir ro/ /mi sgrub na yang skyon mang ba nyid kyi rgyu rnam pa bzhi pa glengs pa yin te/ma spangs na don med pa la sogs pa 'grub par glengs pa'i phyir ro/ /de la don ni dge ba'i chos 'byung ba ste/ ji ltar yang dag par spang ba phyi ma gnyis lta bu ste/ rgyan can gyi bu'i mdo sde las gsungs pa lta bu'o//phan pa ni mi dge ba'i chos dang 'bral ba ste/ ji ltar yang dag par spong ba snga ma gnyis lta bus so/ /bde ba ni mthong ba'i chos la bde bar gnas pa yin te/ lus dang sems shin tu sbyang ba'i khyad par dang ldan pa'i phyir ram/ rnam par grol ba'i dga' ba dang bde ba myong ba'i phyir ro//don ni dge sbyong gi don ni tshul gyi don te/ gang gi don du rab tu byung ba rnams yin no/ /phan pa ni de 'dren par byed pa dge sbyong gi tshul yin no/ /bde ba ni snga ma bzhin no/ /gzhan yang don ni bstan pa yin la/ phan pa dang bde ba zhes bya ba ni bshad pa yin te de la dge ba'i don gyis de la phan pa yin la/ rjes su 'dzin pa'i don gyis na bde ba yin te/ de dag la ni sems can thams cad kyi don du gnyer bar byed pa yin pas de'i phyir 'di gnyis kho na don yin no/ /rnam grangs gnyis ka yang lung yin no//dge slong dag gang zag gis gang zag la tshod ma bzung shig ces bya ba ni mdo sde'i dum bu'o/ /de la yon tan yod pa dang / med pa nyid kyi gang zag la tshod 'dzin pa yin la/ yon tan gyi tshad 'dzin pas ni gang zag la tshad 'dzin pa yin no//gzhan yang 'di ni 'di ji lta ba de lta bu yin no zhes gzhan la brten nas gang zag la tshod 'dzin pa yin la/ gzhan la mi brten par 'di la yon tan 'di snyed cig yod do zhes gang zag la tshod 'dzin pa'o/ / de 'di snyam du kye ma bdag gi 'di lta ste/ lus dang ngag dang /yid kyis sdig pa byas shing zhes bya ba ni mdo sde'i dum bu'o/ /de la sdig pa ni tha chad kyi don gyis na nyes par spyad pa yin te/ ji skad du/ lus kyis nyes bar spyad pa'i rnam par smin pa sdig pa zhes bya ba dang / che ge mo nga ni khyed la mi 'jigs kyi gnyis na khyod dang reg sdig par 'gyur ro zhes gsungs pa lta bu yin pas tha chad yin par mngon no//nyes par spyad pa de nyid drag shul yin te/ gzhan la gnod pa byed pa'i don gyis so/ /de nyid gdug pa yin te/ tshe phyi ma la rang gi lus la gnod pa byed pa'i don gyis so/ /bsod nams ni bkra shis pa'i don gyis na legs par spyad pa yin te/ji skad du dri ni bsod pa yin no zhes bya ba lta bu'o/ /de nyid ni dge ba yin te/ tshe phyi ma la 'bras bu yid du 'ong ba'i don gyis so/ /de nyid 'jigs pas bag tsha ba rnams las skyob pa yin te ngan 'gro 'jigs pas bag tsha ba las yongs su skyob pa'i don gyis so//'di ni don tha dad pas de skad gsungs pa yin gyi/ gzhi tha dad pas ni ma yin no/ /'di ji ltar shes she na/ kye ma bdag gis 'di lta ste/ lus dang / ngag dang / yid kyis sdig pa byas shing / kye ma bdag gi 'di lta ste/lus dang ngag dang yid kyis bsod nams ma byas pas zhes thog mar sdig pa dang bsod nams gnyis kho na smos pa'i phyir ro/ /'thab mo dang mtshang 'dru ba dang rtsod pa dang 'gyed pa zhes bya ba ni mdo sde'i dum bu'o/ /de la nyes par rtsom pa rnams kyis smra ba dang /slar smra ba tsam ni 'thab mo yin no/ /gcig la gcig skyon smra ba ni mtshang 'dru ba yin no/ /de mi bzod pa ni rtsod pa yin no/ /rtsod pa rnams phal cher grar phan tshun mi mthun par smra ba ni 'gyed pa yin no/ /gshe yang slar mi gshe zhes bya ba ni mdo sde'i dum bu'o//de la khros pas tshogs par mi dbyung ba'i skur pa gleng ba ni 'dir gshe ba yin no/ /khro ba bskyed pa'i bsam pas ngag dang byed pa yid du mi 'ong ba ni khro ba yin no/ /sdug bsngal bar bya ba'i bsam pas snur bar byed pa ni rdeg pa yin no/ /mtshang 'dru ba ni snga ma bzhin no//tshul khrims 'di dag ni ma nyams pa skyon med pa zhes bya ba ni mdo sde'i dum bu'o/ /de la ma nyams pa ni bslab pa las mi 'da' ba'i phyir ro/ /skyon med pa ni bar bar du yang yongs su mi gtang ba'i phyir ro/ /'dren mar ma gyur pa ni 'chab pa'i tshul khrims dang ma 'dres pa nyid kyi phyir ro//thun tshags ma yin pa ni de'i rgyu rnam par rtog pa dang ma 'dres pa nyid kyi phyir ro/ /rang dbang can ni de'i gnyen po yongs su bzung bas bdag gis dbang nyid du gyur pa'i phyir te/ rkyen gyis mi 'phrogs pa nyid kyi rgyus so//nog nog por ma gyur pa ni lta ba ngan pa dang smon lam gnyis kyis te/ nges par 'byin pa nyid kyi rgyus so/ /'dis ni tshul khrims yon tan bzhi dang ldan par ston te/ tshul khrims de'i rgyus mi thub dang / de'i gnyen po la brten pa ste/ tshig gsum dag gis dang lhag ma rnams kyis ni re re dang go rims bzhin du sbyar ro//rnam pa dang po gsum po dag gis ni legs par chub pa yin te/ yongs su rdzogs pa nyid kyi phyir ro/ /gsum po gzhan dag gis ni legs par brtsams pa yin te/ legs par yongs su dag pa nyid kyi phyir ro//mkhas pa rnams kyis bsngags pa ni 'phags pa rnams kyis bsngags pa nyid kyi phyir te/ dge ba nyid kyi rgyus so/ /mkhas pa rnams kyis ma smad pa ni rnam grangs kyis kyang ma smad pa nyid kyi phyir te/ zag pa med pa nyid kyi rgyus so/ / gang zag bden pa mthong ba 'bras bu thob pa mngon par rtogs pa dang ldan pa zhes bya ba ni mdo sde'i dum bu ste/ 'di las ni dmigs pa dang / las dang rang bzhin gyis lta ba phun sum tshogs par yongs su brtan pa yin te/ bden pa la dmigs pa dang / 'bras bu thob par byed pa dang mngon par rtogs pa'i mtshan nyid kyi lta ba phun sum tshogs pa ni lta ba phun sum tshogs pa'o//de la mngon par rtogs pa ni bdag nyid kyis yang dag pa ji lta ba bzhin du rtogs pa yin par rig par bya'o/ yid ches pa las ni/ mngon sum nyid kyis don gyis su//shes bya shes par byed pa ste/ /des na mngon par rtogs par 'dod/ /ces 'byung ste/ de yang 'jig rten las 'das pa'i shes rab yin no/ /dge slong dag gsum po 'di dag ni nang gi dri ma yin/ nang gi 'gran zla dang bcas pa yin zhes bya ba ni mdo sde'i dum bu'o//'dod chags dang zhe sdang dang gti mug rnams ni nang gi sems skye ba na skyon rnam pa bzhi dag byed de/ sems dri ma can du byed pa ste kun nas nyon mongs par byed pa'i phyir dang / dge ba'i chos ma skyes pa rnams skye ba'i gegs byed pa dang /dge ba'i chos skyed pa rnams las yongs su nyams par byed pa dang / gang gis ngan song rnams su yun ring por 'gro bar gyur pa de 'dra ba'i mi dge ba'i las kun nas slong bar byed pa'o/ /de'i phyir nang gi dri ma yin/ nang gi 'gran zla dang bcas pa yin/nang gi phyir rgol ba yin/ nang gi dgra bo yin no zhes bya ba ste/ go rims bzhin no/ de ni mig gi rgya mtsho dba' rlabs dang bcas pa glong dang bcas pa 'dzin khri dang bcas pa srin po dang bcas pa las brgal ba yin no zhes bya ba ni mdo sde'i dum bu'o//de la dba' rlabs zhes bya ba ni rnam par rtog pa nyon mongs pa can yin te/ sems kun tu 'khrugs par byed pa'i phyir ro/ /glong ni nyon mongs pa gang gis bslabs pa btang nas nyams par bya ba'i phyir gnas pa'o/ /'dzin khri ni nyon mongs pa gang gis rnyed pa dang bkur sti la bying bar byed pa'o//srin po ni gang gis 'chal pa'i tshul khrims bskyed nas ngan song rnams su skye bar 'gyur ba'o/ /de ltar na bstan pa 'di la rab tu byung ba'i mig gis bdag po byas na chud za ba gzhi dang bcas pa rnam pa gnyis yang dag par bstan pa yin te/bslab pa gtang ba dang nyams par byed pa yin no/ /shes rab myur ba shes rab mgyogs pa zhes bya ba ni mdo sde'i dum bu'o/ /de la de bzhin gshegs pas gsungs pa'i chos 'dul ba la don myur ba dang / mang po dang / phra ba la 'jug pa'i phyir shes rab myur ba dang mgyogs pa dang rno ba yin te go rims bzhin no//mang po dag tu 'gro ba la ni mgyogs pa zhes bya'o/ /'di la shes rab 'khor ba las nges par 'byung ba dang de kho na nges par 'byed pa yod pas nges par 'byung ba'i shes shes rab can yin no//'di la shes rab chen po yod de/ 'dri ba dang lan gdab pa dag la phugs thug par mi 'gyur ba'i phyir ro/ /yangs pa yang yin te/ mngon par shes pa lnga rgya che ba dang yongs su rdzogs pa'i phyir ro/ /zab pa yang yin te/gzhan dag gis rtogs par dka' ba'i phyir ro/ /mnyam pa med pa yang yin te/ 'jig rten pa thams cad las khyad par du 'phags pa'i phyir ro/ /rin po che lta bu yang yin te/ rnyed par dka' ba'i phyir dang / don chen po yang dag par sgrub pa'i phyir dang /dga' bar byed pa'i phyir te/ rang dang gzhan gyi rgyud dag la rnam par grol ba dang dga' ba skyed par byed pa'i phyir ro/ /de'i phyir shes rab che ba/ shes rab yangs pa/ shes rab zab pa/ shes rab mnyam pa med pa/ shes rab rin po che dang ldan pa yin te go rims bzhin no//'dir gnyi ga'i don gyi dbang du mdzad pa'i chos kyi don la brtsams nas shes rab kyi yon tan gsum dag tu rig par bya'o/ /gnyis ni rang gi don ste / 'jig rten las 'das pa yin pa'i phyir ro/ /lhag ma rnams ni gzhan gyi don yin te/the tshom gcod pa'i phyir dang / 'dud pa'i phyir dang / ri mo'i khyad par skyed pa'i phyir dang / don gyi mchog thob par byed pa'i phyir ro/ /zab pa dang mnyam pa med pa gnyis kyi ni ri mo'i khyad par skyed pa yin par rig par bya'o/ /gzhan yang 'phags pa shA ri'i bu'i dbang du mdzad nas tshig 'di dag gsungs pa yin te/de la shes rab myur ba ni tshe dang ldan pa rta thul las lan cig tshigs su bcad pa thos pas don la zhugs pa'i phyir ro/ /shes rab mgyogs pa ni de thos pa na don mang po la zhugs pa'i phyir ro/ / shes rab rno ba ni don phra ba la zhugs pa'i phyir ro/ /nges par 'byung ba'i shes rab can nges par 'byed pa'i shes rab can ni de nyid las 'jig rten las 'das pa'i shes rab thob pa'i phyir te/ nyon nyon mongs pa spangs pa dang de kho na rtogs pa'i phyir ro/ /shes rab che ba ni ji skad du bdag ni dri ba dris na don 'di kho na yang nyin mtshan bdun du tshig gzhan dang yig 'bru gzhan dag gis lan 'debs so zhes gsungs pa lta bu yin no//shes rab yangs pa ni rnam par thar pa brgyad la bsam gtan byed pa'i phyir te/ ji skad du skyes bu 'dul ba'i kha lo sgyur ba bla na med pas skyes bu gdul ba thul ba na phyogs thams cad du rnam par rgyug par byed do zhes gsungs pa lta bu'o//'o na mdo sde las 'di la dge slong 'dod pa dag las dben pa nas/ bsam gtan bzhi pa'i bar la snyoms par zhugs te gnas na 'di tsam gyis/dge slong mkhas pa yid gzhungs pa shes rab yangs pa zhes bya'o zhes gang gsungs pa ji lta bu yin zhe na/ de yang bsam gtan rnams la mngon par shes pa dang rnam par thar pa rten pa nyid kyi phyir rig par bya'o/ /shes rab zab pa ni ji skad du/khyod ni ci la gnas te bsam gtan pa/ /khyod la mngon par rtogs par mi 'gyur bas/ /skyes bu cang shes khyod la phyag 'tshal lo/ /skyes bu dam pa khyod la phyag 'tshal lo/ /zhes gsungs pa lta bu'o/ /shes rab mnyam pa med pa ni ji skad du/ de bzhin gshegs pa ma gtogs pa//'jig rten kun gyi shes rab gang / /shA ri'i bu yi shes rab kyi/ /bcu drug char yang mi phod do/ /zhes gsungs pa lta bu'o/ /shes rab rin po che dang ldan pa ni de'i shes rab rin po che lta bu yin pa'i phyir te snga ma bzhin du sbyar ro/ / 'di la 'phags pa nyan thos thos pa dang ldan pa ni bdag ni skye dgu ser sna'i dri mas kun nas dkris pa rnams las sems dri ma'i ser sna dang bral bas lhug par gtong ba dang lag pa brkyang ba dang zhes bya ba ni mdo sde'i dum bu'o/ /de la dri ma gang las ser sna 'byung ba de'i rgyu de ni ser sna'i dri ma zhes bya ste/sbyin pa dang 'gal ba chags pa'i rnam pa yin pas 'bras bu'i shing lta bu dang ser ba'i sprin lta bu'o/ /de nyid kyi phyir sems dri ma'i ser sna dang bral ba zhes bzlog nas gsungs pa yin te/ ser sna'i rgyu chags pa dang sdar bral ba'i phyir ro//de ltar na ser sna sngar dang phyi nas smos pa ni khyad par du bya ba'i phyir dang / ldog pa'i go rims yang dag par bstan pa'i phyir ro/ /lhug par gtong ba dang / lag pa brkyang ba dang / rnam par gtong ba la dga' ba dang / sbyin pa rgyun mi 'chad pa dang /gtong ba phun sum tshogs pa dang / sbyin pa la 'ged par dga' ba dang zhes bya ba 'dis ni mi gnas par sbyin pa byed pa nyid dang / rgya cher sbyin pa byed pa nyid dang / dga' bas sbyin pa byed pa nyid dang / yang dang yang du sbyin pa byed pa nyid dang / log par 'tsho ba med par sbyin pa byed pa nyid dang /phyogs med par sbyin pa byed pa nyid ston to/ /mi gnas par sbyin pa nyid ni lan dang rnam par smin pa mi 'dod pa nyid yin par rig par bya'o/ /phyogs med par byed pa nyid ni dge sbyong rnams las slong mo pa rnams kyi bar dag la kun tu 'ged pa'i phyir ro//de la rigs kyi bu dga' bo'i zas la tshod zin pa ni 'di yin te zhes bya ba ni mdo sde'i dum bu'o/ /so sor brtags nas zas za'o zhes bya ba ni bstan pa yin la/ lhag ma ni bshad pa yin no/ /de la kha cig na re da ni longs pa'i phyir ma yin pa ni gzhon nu rnams lta bu ste/de rnams ni dgod pa dang rtsed mo'i bsam pa nyid kyis longs pa'i phyir za'o/ /rgyags pa'i phyir ma yin pa ni gyad rnams lta bu ste/ de rnams ni lus kyi stobs brtas par bya ba dang / yeng yeng por bya ba'i bsam pa nyid kyis rgyags pa'i phyir za'o//cha ba'i phyir ma yin/ brgyan pa'i phyir ma yin pa ni 'dod pa la longs spyod pa rnams lta bu ste/ de rnams ni mdzes par bya ba'i bsam pa nyid kyis cha ba'i phyir dang / brgyan pa'i phyir za'o/ /de la khrus dang byi dor byed pa dang nyug pa ni cha ba'o/ /gos dang phreng ba dang rin po ches klubs pa ni brgyan pa'o zhes kyang zer te/'di thams cad ni 'dod pa la longs spyod pa kho na dag la 'byung bas de lta bu'i bsam pas zas kyi bya ba 'gog par byed do/ /lus 'di kho na gnas par bya ba'i phyir dang / gso ba'i phyir zhes bya ba ni 'ba' zhig srog yod par bya ba'i phyir dang /stobs yod par bya ba'i phyir te / shing rta'i srog shing bsku ba bzhin no/ /bkres pa dang bral bar bya ba'i phyir zhes bya ba ni za 'dod pa'i sdug bsngal bzlog pa'i phyir te/ rma bsku ba bzhin no/ /tshangs par spyod pa rjes su gzung ba'i phyir zhes bya ba ni lus gnas pa dang /lus kyi stobs dang lus kyi nyon mongs pa med pa de dag la brten nas 'phags pa'i lam bsgrub pa'i phyir te/ tshangs par spyod pa gang zhe na/ 'phags pa'i lam yan lag brgyad pa'o zhes mdo sde gzhan dag las 'byung ba'i phyir ro/ /de lta bu'i tshor ba rnying ni gzhil bar bya la zhes bya ba ni bkres pas kun nas bslang ba gang yin pa'o//tshor ba gsar ni mi skye bar byas nas zhes bya ba ni ha cang bza' drags pa las skye ba gang yin pa'o/ /'dis ni zas chung ngu dang lhag par za ba yongs su spong bar byed do/ /de lta bus zhes bya ba ni tshod yang dag par bstan pa'i phyir ro//tshor ba rnying bcil bas cir 'gyur snyam pa la/ bdag 'tsho ba dang / stobs dang bde bar 'gyur ro snyam du so sor rtog ste/ de dag kyang lus gnas pa la sogs pa sngar bstan pa gang yin pa'o/ /tshor ba gsar mi bskyed na cir 'gyur snyam pa la/kha na ma tho ba med pa dang / reg par gnas par 'gyur ro snyam du so sor rtog ste/ de dag kyang tshangs par spyod pa rjes su bzung ba ltar sngar bstan pa gang yin pa'o/ /de la ha cang bza' drags pa'i skyon med pa'i phyir kha na ma tho ba med pa nyid yin par rig par bya'o//de la skyon ni lnga dag ste/ snyom pa dang / mi dga' ba dang / glal ba dang / zas kyis gsung pa dang / sems zhum pa nyid do/ /lus zo mdog bde bas shin tu sbyangs pa dang mthun pa nyid kyis bde bar gnas pa'i phyir reg par gnas pa nyid yin par rig par bya'o//de ltar na bsam pa gang gis mi bza' ba dang bsam pa gang gis dang / tshod ci tsam du bza' ba dang / zas la tshod zin pa'i phan yon gang yin de la so sor brtags nas zas za ba'i phyir so sor brtags nas zas za ba yin no//gzhan dag na re so sor brtags pa bzhi dag gis so sor brtags nas yin zhes zer te / so sor brtags pa bzhi la spang bar bya ba so sor brtags pa ni tshig bzhi dag gis so/ /tshod so sor brtags pa yang bzhi dag gis so/ /tshod bzung ba so sor brtags pa ni gnyis kyis so//tshod zin pa'i phan yon so sor brtags pa ni lhag ma rnams kyis so/ /yang ni tshig bzhi dag gis ni 'dod pa'i bsod nyams la rjes su sbyor ba'i mtha' yongs su spong ba yin la gsum dag gis ni bdag nyid dub par gnas pa la rjes su sbyor ba'i mtha' spong ba yin no//gcig gis ni dbu ma'i lam sgrub pa yin no/ /lnga dag gis ni mtha' gnyis yongs su spangs pa'i phan yon rtogs par byed pa yin la/ gnyis kyis ni dbu ma'i lam sgrub pa'i phan yon yin no/ /shing rta'i srog shing dang rma'i dpe gnyis ni sngar sbyar ba kho na'o//de la rigs kyi bu dga' bo dran pa dang shes bzhin mchog dang ldan pa ni 'di yin te zhes bya ba ni mdo sde'i dum bu'o/ /de la sems thams cad kyis bsams nas rnam par lta ba ni rgyu ba na yin par rig par bya'o/ /tshor ba dang 'du shes shes bzhin pa ni bsam gtan pa dang gzugs med pa'i mnyam par gzhag pa la gnas pa na ste/go rims bzhin no/ /rnam par rtog pa shes bzhin pa ni langs shing mnyam par ma bzhag pa la gnas pa yin no/ /gzhan yang sems thams cad kyis bsams nas rnam par lta ba ni gsum 'dus pa las reg pa 'byung ba'i rkyen gyis tshor ba dang /'du shes dang / sems pa 'byung ba gang yin pa de dag shes bzhin du skye ba nas gtugs pa'i bar du 'gyur ro/ /sems pa'i mtshan nyid ni 'dir rnam par rtog pa yin par rig par bya'o/ /gzhan yang sems thams cad kyis bsams nas rnam par lta ba kun nas nyon mongs pa med pa'i phyir gzugs dang shes bzhin du tshor ba la sogs pa skye ba la sogs pa nyid kyis tshor ba dang 'du shes dang 'du byed rnams la dran pa dang shes bzhin mchog dang ldan pa nyid yin par yongs su bstan to/de ltar na rnam par shes pa gnas pa bzhi dag la dran pa dang shes bzhin mchog dang ldan pa nyid yin par yongs su bstan pa yin no//de la tshor ba la sogs pa skad cig pa yin yang rgyun dran pa dus gzhan du yang rjes su 'jug pas gnas par rig par bya'o/ /thub pa ni dal gyis ma yin par rkyen gyi dbang gis 'phral 'gag pa'i phyir ro//zad pa dang gtugs par 'gyur ba ni phyi nas dal gyis ma lus par rgyun 'dra ba 'gag pa'i phyir ro/ /dge slong dag rgyal po legs mthong chen po ni ha cang mi grang zhing ha cang mi dro ba dang / dus tshigs bde ba dang / gnod pa med pa dang /gang gis na de zos pa dang 'thungs pa dang / 'chos pa dang / myangs pa rnams legs par bde bar 'ju ste/ pho ba'i drod snyoms shing 'ju bar byed pa dang ldan pas gnod pa nyung ba dang / nad med pa'i rang bzhin can du gyur to zhes bya ba ni mdo sde'i dum bu'o/ / de la gnod pa nyung ba ni zas dang / gnas 'phrod pa la sbyor ba dang mngon par brtson pa'i phyir yin la/ rang bzhin gyis nad med pa'i rang bzhin can ma yin pa yang yod/ nad med pa'i rang bzhin can yin la/ rang bzhin gyis gnod pa nyung ba ma yin pa yang yod de/ zas dang gnas mi 'phrod pa mang ba nyid kyi phyir ro/ /de'i phyir gnyis ka brjod pa ni gcig gis gcig khyad par du bya ba'i phyir ro/ /de la yang rgyu ni pho ba'i drod snyoms shing 'ju bar byed pa dang ldan pa zhes bya bas yang dag par snyon te/ lus dang bcas pa'i snyoms pa nyid du ston to//snyoms pa de yang ha cang mi grang zhing ha cang mi dro ba nyid dang dus tshigs bde ba dang / gnod pa med pa dang zhes bya bas ston to/ /'dis ni ma snyoms pa nyid rnam pa gsum med pa'i phyir pho ba'i drod snyoms pa nyid du yang dag par ston to/ /ma snyoms pa nyid rnam pa gsum la me ma snyoms pa nyid kyis ni des me'i drod chung bas ha cang grang ba'am/me'i drod ches pas ha cang drod che bar 'gyur ro/ /dus tshigs ma snyoms pa nyid kyis ni des dus tshigs rnams 'pho ba na skyon rnams rab tu 'khrug par byed pa'i phyir mi bde bar 'gyur ba'o/ / zas ma snyoms pa nyid kyis ni des zas mi 'phrod pa'i skyon las gnod pa skyed pa'o / /snyoms pa nyid bshad nas/ 'ju bar byed pa nyid ni gang gis na des zos pa dang 'thungs pa dang 'chos pa dang / myangs pa rnams legs par bde bar 'ju zhes bya bas 'chad de/'dis ni zas kyi rnam pa thams cad dus su ngal ba med par 'ju bar byed pa ston to/ /de la zos pa dang / 'thungs pa dang 'chos pa dang myangs pa ni bza' ba dang btung ba dang bca' ba dang bldag pa dang gzhib pa'i dbye bas rig par bya'o/ /ci 'dod pa bzhin thob pa tshegs med par thob pa ngan ngon ma yin par thob pa zhes bya ba ni mdo sde'i dum bu'o //ji srid 'dod pa dang nam 'dod pa dang / ji lta bu 'dod pa mngon sum du bya ba la dbang ba nyid kyi phyir rig par bya ste/ yun ring po dang / ring por mi thogs pa dang mchog tu byung ba rnams mngon sum du bya ba la dbang ba nyid kyi phyir zhes bya ba'i tha tshig ste/tha chad ni ngan ngon zhes bya ba'i phyir ro/ /gzhan dag na re tshegs dang nyams pa med pa nyid ngan ngon ma yin pa yin no zhes zer ro/ /yid ches pa'i lung las ni/ /gang zhig rdzogs snyoms zhugs dang myur//bstan nyid de ni ci 'dod bzhin/ /stsogs thob yin par bzhed 'dir ni/ /chung zad tsam gyis gtong bas na/ /de phyir ngan don zhes 'byung ngo / /dper na me tog ut+pa la'i phreng ba zhes bya ba rgyas par 'byung ba nas/ zegs pa nyid du 'gyur/ rnyings pa nyid du 'gyur/skams pa nyid du 'gyur zhes bya ba'i bar ni mdo sde'i dum bu'o/ /de la zegs pa nyid du 'gyur ba ni rnam par 'gyur ba'i phyir ro/ /rnyings pa nyid du 'gyur ba ni sa'i khams zhum pa'i phyir ro/ /skams pa nyid du 'gyur ba ni chu'i khams zad pa'i phyir ro//tshig gcig ni bstan pa yin la/ tshig gnyis ni bshad pa yin par rig par bya'o/ /ji srid du rnyings pa'am skams par ma gyur pa de srid du me tog gi 'od dang / dri bsung chung bar 'gyur ba'i phyir ni rnam par 'gyur ba yin par rig par bya'o/ 'dod pa la rnam par rtog pa byung ba dang du mi len zhes bya ba ni mdo sde'i dum bu'o//de la dang du mi len pa ni ro myong bar mi byed pa'i phyir ro/ /spong bar byed pa ni de'i dmigs pa'i mtshan ma sel ba'i phyir ro/ /bzlog tu zin yang rgyu bsags pa las byung ba'i rnam par rtog pa rnam pa kun tu rgyu ba nyid yin pas sel bar byed de/so sor brtags pa'i stobs kyi rgyun gcod pa'i phyir ro/ /bsal du zin kyang brtson pa lhod pas yang skye ba'i phyir byang bar byed de/ bsgom pa'i stobs kyis rnam par gnon pa'i phyir ram/ sa bon yang dag par 'joms pa'i phyir ro//'dir yang smras pa/ 'di dag bzhi ni rnam rtog la/ /mi mthun nyid dang de yi rgyu/ /rnam spong phyir dang rgyun dang ni/ /rjes su 'chi ba gcod phyir ro/ /rnam grangs gzhan yang skyon nyid du 'dzin pa'i phyir na dang du mi len pa yin no/ /byung ba'i shugs dang bral ba'i phyir na spong bar byed pa yin no//yang dang yang du kun tu rgyu ba dang bral ba'i phyir na sel bar byed pa yin no/ /dge ba'i phyogs kyi rgyud brtan pa nyid kyis kun tu mi rgyu ba'i phyir na byang bar byed pa yin no/ /bram ze'i khye'u sems can rnams ni las bdag gir bya ba/las kyi bgo skal la spyod pa/ las kyi skye gnas pa/ las la brten pa zhes bya ba ni mdo sde'i dum bu'o/ /mi dag ni phal cher nor dang khyim dang bu dang chung ma la sogs pa dag la bdag gir bya bar 'du shes byas na sred pa skyed par byed de/ de'i phyir myos nas bsod nams kyi las ni mi byed bsod nams ma yin pa'i las ni byed do//phal cher lha rnams las bgo skal te longs spyod dang bdag gi skye ba'i khyad par don du gnyer bar byed cing rgud par gyur na lha rnams la ston pa yin par rten par byed do/ /de ltar byed pa na rgyu ma yin pa la rgyur lta bas bslus par 'gyur ro//bcom ldan 'das kyis de'i gnyen por sems can rnams kyi las kho na bdag gir bya ba yin zhing sems can rnams ni sngon gyi las kho na la bgo skal spyod pa yin la de rnams ni las kho na'i skye gnas las byung ba yin zhing rgud par gyur pa las kho na ston pa yin gyi lha rnams ni ma yin no zhes bya ba gsungs so//'di la rigs pa ci yod ce na/ las ni rgyal po la sogs pa rnams dang thun mong ma yin pa'i phyir dang / shi ba'i tshe yang mi gtong ba'i phyir ro/ /lha la gus pa dang ma gus pa rnams la longs spyod rgud pa dang phun sum tshogs par dmigs pa'i phyir dang /skye ba dman pa dang khyad par du 'phags pa dmigs pa'i phyir dang / yams kyi nad dang gnod pa nye bar ma zhi ba dang nye bar zhi ba dmigs pa'i phyir ro/ /'dod pa rnams la yid byung bar bya ba'i phyir dang /'dod chags dang bral bar bya ba'i phyir dang / 'gog par 'gyur bar bya ba'i phyir sgrub pa yin no zhes bya ba ni mdo sde'i dum bu'o/ /de la 'dod pa rnams la zhes bya ba ni 'dod pa'i khams la'o/ /gzugs rnams la zhes bya ba ni gzugs kyi khams la'o/ /rnam pa gcig tu na sdug bsngal gyi phung po can gyi mdo dang po las 'dod pa rnams dang gzugs rnams gsungs pa bzhin no//yid byung bar bya ba'i phyir dang / 'dod chags dang bral bar bya ba'i phyir dang / 'gog par 'gyur bar bya ba'i phyir zhes bya ba ni sdug bsngal nyid yongs su shes par bya ba'i phyir dang /kun 'byung ba spang bar bya ba'i phyir dang / 'gog pa mngon sum du bya ba'i phyir te go rims bzhin no/ /sgrub pa yin no zhes bya ba la bsgrubs pas ni lam bsgom pa yongs su ston to/ /gzhan yang dga' ba'i 'dod chags kyi rgyu las byung ba'i tshe phyi ma la sdug bsngal skye ba de'i gnyen por go rims bzhin du gsum gsungs pa yin no//chags pa zad par bya ba'i phyir dang / srid pa zad par bya ba'i phyir dang / sdug bsngal zad par bya ba'i phyir dang / phung po zad par bya ba'i phyir sgrub pa yin no zhes bya ba ni mdo sde'i dum bu'o/ /'dis ni ngan song gi sdug bsngal yang srid pa rgyu dang bcas pa zad par bya ba'i phyir zhes bya ba yongs su bstan pa yin te/chags pa'i rgyu yin no/ /sdug bsngal ni ngan song ba'i sdug bsngal yin te ji skad du bcom ldan 'das kyis 'jig rten 'di dang pha rol na ngan 'gro gang ji snyed pa de dag thams cad ni ma rig pa'i rtsa ba las byung ba 'dod pa dang chags pa las kun tu byung ba yin no zhes gsungs pa lta bu'o//'dir ni mi dge ba'i rtsa bas bsdus pa'i chags pa yin par rig par bya'o/ /de smos pa yang 'phrog par byed pa'i phyir ro/ /yang srid pa la sred pa ni rgyu yin no/ /phung po ni yang srid pas bsdus pa'i nye bar len pa'i phung po lnga rnams te/de ni sred pas spungs pa'i phyir ro/ /gzhan yang chags pa dang sred pa gnyis ni 'dod pa dang srid pa'i 'dod chags gnyis yin te go rims bzhin no/ /sdug bsngal ni 'dod pa'i khams yin te/ sdug bsngal gyi sdug bsngal dang ldan pa'i phyir ro/ /phung po ni gzugs dang gzugs med pa'i khams gnyis yin no//gro zhin skyes de bas na mnyam pa nyid du rtogs par byas la de la yang mtshan mar zung shig /des rlom sems kyang ma byed la/ de la bag med par yang ma byed cig ces bya ba ni mdo sde'i dum bu'o/ /'dis ni mnyam pa nyid du yongs su shes par bya ba dang /mi brjed pa'i rgyu dang / kun nas nyon mongs pa med pa'i rgyu la sbyor bar mdzad do/ /de la yongs su shes pa ni rtogs pa'o/ /mi brjed pa'i rgyu ni mtshan mar 'dzin pa'o/ /kun nas nyon mongs pa med pa'i rgyu ni nga rgyal med pa ste/ mnyam pa nyid des khengs par mi 'gyur ba'i phyir dang /bag yod pa ste ro myang bar mi byed pa'i phyir dang / nga rgyal dang sred pa shas che ba'i bsam gtan pa'i gnyen por go rims bzhin no/ /'phags pa gro zhin skyes kyis de'i tshe bden pa gzigs pa'i phyir lta ba dang the tshom shas che ba'i bsam gtan pa ni ma yin te de gnyis spangs pa nyid kyi phyir ro//bcom ldan 'das kyis rgyang ring po nas shing gi sdong po chen po zhig 'bar zhing rab tu 'bar la kun tu rab tu mched cing me lce gcig tu gyur te lam mer 'bar ba gzigs so zhes bya ba ni mdo sde'i dum bu'o/ / 'dis ni shing gi sdong po la mes reg pa nyid dang me'i mdog dang / kun tu 'bar ba nyid dang / dril te 'bar ba nyid dang / mi g.yo bar 'bar ba nyid du yang dag par sdud par byed pa ston te go rims bzhin no/ /dge slong dag byis pa so so'i skye bo thos pa dang mi ldan pa rnams ni phung po lnga po 'di dag la rtag pa nyid dang brtan pa nyid du yang dag par rjes su lta/bde ba nyid dang / nad med pa nyid dang / bdag dang bdag gi nyid du yang dag bar rjes su lta'o zhes bya ba ni mdo sde'i dum bu'o/ /de la nye bar len pa'i phung po lnga rnams ni 'dus byas kyi mtshan nyid skye ba dang 'jig pa gnyis dang yang ldan pa yin la/rgyun gyis 'byung ba na gnas skabs gzhan du 'gyur ba'i phyir 'dus byas kyi mtshan nyid gnas pa las gzhan du 'gyur ba dang yang ldan pa yin no/ /de dag mtshan nyid de ltar gnas pa yin pa na sems las byung ba'i sdug bsngal gyi gzhi dang /lus kyi sdug bsngal gyi gzhi dang / rang bdag ma yin la bdag gzhan gyis kyang stong pa yin na/ de la kun tu rmongs pa ni go rims bzhin du rtag pa la sogs pa nyid du zhes bya ba yin par rig par bya'o/ /gzhan yang phyi rol gyi gnod pa'i sdug bsngal gyi gzhi nyid dang rang gi khams ma snyoms pa'i sdug bsngal gyi gzhi nyid du ma mthong na bde ba nyid dang nad med pa nyid du lta zhes bya ba yin par rig par bya'o//de dag ni mdor na nye bar len pa'i phung po lnga rnams kyi mi rtag pa la sogs pa rnam pa bzhi'i mi mthun pa'i phyogs su rtag pa dang /bde ba dang / bdag tu phyin ci log pa rnams te/ lta ba gnyis dang gnyis kyis yongs su bstan pa yin par rig par bya'o/ /de nyid kyi phyir 'dir gtsang bar phyin ci log par ma smos so/ /tshul 'chos pa dang / kha gsag dang / gzhogs slong dang / thob kyis 'jal ba nyid dang / rnyed pas rnyed par byed 'dod pa zhes bya ba ni mdo sde'i dum bu'o/ /de la tshul 'chos pa ni rnam pa gsum du rig par bya ste/ rnyed pa dang bkur sti 'dod pa nyid kyis gzhan la yon tan yid ches par bya ba'i bsam pas spyod lam legs par gnas pa dang /yul dben par gnas pa dang / rnyed pa khyad par can mi len pa nyid kyis dang / ngan pa dang / gya nom pa bsten pa dang mi bsten pa nyid kyis yo byad bsnyungs pa kun tu ston pa'o/ /kha gsag kyang rnam pa gsum ste/ rnyed pa dang bkur sti'i bsam pas rjes su mthun par snyan par smra ba dang /rang gi yon tan smra ba dang / chos smra ba'o/ /gzhogs slong kyang rnam pa gsum ste/ rnyed pa'i bsam pas lus kyis gnod pa'i gzhi kun tu ston pa dang / phongs pa'i gzhi kun tu ston pa dang / tshig gis bsam pa'i gzhi bsngags par byed pa nyid do//thob kyis 'jal ba yang rnam pa gsum ste/ rnyed pa'i bsam pas de la sbyin par mi byed pa la smod pa dang / gzhan la sbyin par byed pa la smod pa dang / ha cang phyi bzhin 'brang zhing smod pa'o / /rnyed pas rnyed par byed 'dod pa yang rnam pa gsum ste/rnyed pa'i bsam pas gzhan las rnyed pa rgya che bar kun tu ston pa dang / sbyin par byed pa rgya che bar bsngags par byed pa dang / zang zing gi rnyed pa bsngags par byed pa'o/ /'di ni dge slong gi 'tsho ba log pa rnam pa lnga yin te/ gcig ni lus kyis yin te/ gnyis pa ni ngag gis yin zhing / lhag ma rnams ni lus dang ngag gis yin no/ /tshig gang yin pa de dag ji ltar kha gsag ma yin zhe na/ gzhan mgu bar bya ba'i phyir smra ba 'dir kha gsag yin par dgongs kyi thams cad ni ma yin no/ /ji mi'i 'jig rten na mar 'dzin pa dang /phar 'dzin pa dang / dge sbyong du 'dzin pa dang / bram zer 'dzin pa dang / rigs kyi nang na rgan rabs la ri mo byed pa dang / don byed pa dang / bya ba byed pa dang / bsod nams byed pa dang / 'jig rten 'di dang 'jig rten pha rol gyi kha na ma tho ba rnams la 'jigs par lta ba dang /sbyin pa byed pa dang / bsod nams byed pa dang / bsnyen gnas la nye bar gnas pa dang / tshul khrims yang dag par blangs nas gnas pa'i mi dag mang ngam zhes bya ba ni mdo sde'i dum bu'o/ /de la ji ltar shes par bya ba lta bus mar shes pa ni mar 'dzin pa ste/de la gus par bya ba nyid kyi phyir ro/ /mar 'dzin pa ji lta ba bzhin du phar 'dzin pa yang de bzhin no/ /dge sbyong rnams la ldang ba dang / thal mo sbyar ba dang / phyag bya ba dang / chos gos dang / bsod snyoms la sogs pas ri mo dang / sbyin par bya ba'i phyir legs par byed pa ni dge slong du 'dzin pa'o//dge sbyong du 'dzin ba ji lta ba bzhin du bram zer 'dzin pa yang de bzhin no/ /rigs kyi nang na rgan rabs phu nu bo dang / sring mo dang nye du rnams la bkur sti byed pa ni rgan rabs la ri mo byed pa ste/ ldang ba dang snyan par smra ba la sogs pa bya ba'i phyir ro/ /rgud pa rnams la rgud pa las yongs su bskyab pa dang / dgos pa bsgrub pa'i phyir don byed pa'o/ /rang gi las la 'tsho ba log par ma yin pas legs par sbyor ba'i phyir bya ba byed pa'o/ /sbyin pa dang tshul khrims las byung ba'i bsod nams bsgrub pa'i phyir bsod nams byed pa'o//'di man chad ni rgyu gang gis de dag de ltar gyur pa dang ji ltar bsod nams byed pa rnams kyi rgyud dang rnam pa de 'chad do/ /rgyu gang gis de de ltar gyur zhe na/ 'di ltar 'jig rten 'di dang 'jig rten pha rol gyi kha na ma tho ba rnams la 'jigs par lta bas so//de la kha na ma tho ba ni 'phags pas smad pa gang yin pa'o/ /'jigs pa ni nyes dmigs yin par rig par bya'o / /de las 'jigs par 'gyur ba'i phyir ro/ /ji ltar na bsod nams byed pa dag yin zhe na/ zas dang skom dang bza' ba dang bca' ba dang bzhon pa dang gos la sogs pa sbyin par byed pa gang yin pa ste/de ni sbyin par bya bas na sbyin pa yin pa'i phyir ro/ /bsod nams byed pa ni kun dga' ra ba dang / nags tshal dang / stegs dang / rdzing dang / chu mig dang / bsod nams kyi khang pa la sogs pa bya ba la sogs pas 'jig rten rjes su 'dzin pa'i phyir ro//'di gnyis ka yang sbyin pa las byung ba'i bsod nams bya ba'i gzhi yin mod kyi/ tha dad par smos pa ni khyad par dang khyad par med par sbyin pa'i dbye bas yang dag par bstan pa'i phyir ro/ /khyad par du sbyin pa ni len pa po dga' zhig kho na la rang gir bya ba'i phyir sgrub pa gang yin pa'o//khyad par med par sbyin pa ni sems can rnams la yongs su longs spyod du gzhug pa'i phyir dbye ba med par gtong ba gang yin pa'o/ /bsnyen gnas la nye bar gnas pa dang / tshul khrims yang dag par blangs nas gnas pa ni nyin zhag gcig pa dang / ji srid 'tsho ba'i tshul khrims yang dag par len pa'i phyir ro/ /mdor na mdo sde'i dum bu 'di ni mi rnams bla ma dang / yon gnas dang / rgan po rnams dang / rgud pa rnams dang / rang gi las dang /bsod nams byed pa la go rims bzhin du tshig gnyis dang gnyis dang bzhi rnams kyis ni re res yang dag par bsgrub par bstan pa yin no/ /lhag ma rnams kyis ni yang dag par bsgrub ba de nyid kyi rgyu dang / bsod nams bya ba'i rnam pa'i dbye ba yang dag par bstan pa yin no//'jig rten na chos smra ba ni su dag yin/ legs par zhugs pa ni su dag yin/ bde bar gshegs pa ni su dag yin zhes bya ba rgyas par 'byung ba nas/ 'di ni 'jig rten na bde bar gshegs pa zhes bya ba'i bar ni mdo sde'i dum bu'o/ /'dir ni nges par legs pa las brtsams nas yang dag par smra ba dang /byed pa po gnyis dris pa dang / dris lan btab pa yin no/ /byed pa po yang rnam pa gnyis te/ brtson pa rnams ni gang dag yang dag par rab tu brtson pa rnams so/ /grol ba rnams ni gang dag mthar phyin pa rnams so/ / 'dod chags dang zhe sdang dang gti mug rnams kho na smos pa ni de rnams kyi go rims bzhin du tshor ba gsum la bcings pa'i phyir te/ 'di ltar bcom ldan 'das kyis bde ba'i tshor ba la ni 'dod chags rgyas par 'gyur la/ sdug bsngal la ni khong khro ba dang / bde ba yang ma yin sdug bsngal ba yang ma yin pa la ni ma rig pa'o zhes gsungs so//gdul ba'i phyir zhes bya ba ni bral bar bya ba'i phyir te/ ma lus par spang bar bya ba'i phyir ro/ /gang su dag 'dod chags ma lus par spangs pa zhes bya ba ni sa las dang sa bon las dang / rnam pa las ma lus par spangs pa yin par rig par bya'o//sa las ji ltar zhe na srid pa'i rtse mo'i bar du ji ltar rigs par spangs pa'i phyir ro/ /sa bon las ji ltar zhe na/ thog pa bag la nyal gyi mtshan nyid spangs pa'i phyir ro/ /rnam pa las ji lta bu zhe na/ mthong ba dang bsgoms pas spang bar bya ba rnams spangs pa'i phyir dang /chung ngu'i chung ngu la sogs pa'i rnam pa spangs pa'i phyir ro/ /yongs su shes pa zhes bya ba la ji ltar yongs su shes she na/ bdag gis 'dod chags nas gti mug gi bar du spangs so zhes bya bar ro//spangs pas ni rnam par grol ba ston la/ yongs su shes pas ni rnam par grol ba'i ye shes mthong ba'o/ /de ltar na ma lus par spangs pa ni so so rang gis rig par bya ba nyid du bstan pa yin te/ gzhan la rag las pa dang / som nyi dang ldan pa rnams bsal ba'i phyir ro//'di ni 'jig rten na bde bar gshegs pa dag ces bya'o/ /zhes bya ba'i bde bar zhes bya ba 'di ni ma lus pa'i don la yang mthong ste/ dper na zas bde bar zhu'o/ /bum pa legs par gang ba'o zhes bya ba lta bu'o/ /bsngags pa'i don la yang mthong ste/dper na gzugs bzang po cha lugs bzang po zhes bya ba lta bu'o/ /phyir mi ldog pa'i don la yang mthong ste/ dper na gcin nad las bde bar thar ro / /'byung po'i gdon las bde bar thar ro zhes bya ba lta bu'o/ /don rnam pa 'di gsum gyis bde bar gshegs pa dag yin te/'jig rten pa'i snyoms par 'jug pa dag las bzlog nas ji srid du bgrod par bya bar gshegs pa'i phyir dang / 'gro ba bzang por gshegs pa'i phyir dang / phyir mi ldog par gshegs pa'i phyir te/ mya ngan las 'das par gshegs pa dag ni de ltar du gshegs pa dag yin no//de ltar na mya ngan las 'das pa ni bla na med pa nyid dang / rtag pa nyid du bstan pa yin te go rims bzhin no// //bam po lnga pa/ 'di ltar las kyang yod la nyon mongs pa rnams dang sred pa dang lta ba dang nga rgyal dang ma rig pa yang yod na de lta bu ni tshe phyi ma la 'du byed rnams 'byung bar 'gyur ro zhes bya ba ni mdo sde'i dum bu'o //'dir ni skye ba'i rgyu grogs dang bcas pa yongs su bstan pa yin no/ /las la nyon mongs pa rnams grogs su gyur pas skye ba skyed par byed de/ nyon mongs pa zad na mi skye ba'i phyir dang /nyon mongs pa ma zad na las ji lta ba bzhin du skye ba'i phyir ro/ /nyon mongs pa de dag kyang sred pa la sogs pa'o/ /de la sred pa ni mngon par 'grub pa'i rgyu yin no/ /mdo sde gzhan las ni skye ba'i rgyu yin la/ sred pa ni mngon par 'grub pa'i rgyu yin no zhes gsungs pa'i phyir ro//ji ltar na sred pa mngon par 'grub pa'i rgyu yin zhe na/ lus thams cad kyi thun mong gi rgyur gyur pa nyid kyis mngon par 'grub pa'i rgyu yin pa'i phyir ro/ /lta ba dang nga rgyal dang ma rig pa ni de 'dren par byed pa dag yin te/ bdag tu lta ba dang nga'o snyam pa'i nga rgyal gyi sgo nas bdag med pa nyid la kun tu rmongs na de kun tu rgyu ba dang mi spangs pa'i phyir ro//de'i phyir 'di dag kho na smos kyi/ khong khro ba dang the tshom gnyis ni ma yin no/ /gzhan yang 'dod pa'i khams kyi las kyi grogs ni nyon mongs pa thams cad yin la/gzugs dang gzugs med pa'i khams gnyis kyi ni sred pa la sogs pa grogs yin te / sred pa dang lta ba dang nga rgyal dang the tshom shas che ba'i bsam gtan gyi bag la nyal yod pa'i phyir ro/ /the tshom ni ma rig pas rab tu phye ba nyid kyi phyir te / gti mug shas che ba la shes pa nges pa mi 'byung bas so//dge slong dag dge slong gsar bu 'di dag ni dge sbyong gi gnod pas gtses pa/ tshangs par spyod pa'i 'dam gyis zil gyis non pa/ sdig pa mi dge ba'i chos kun nas nyon mongs pa can yang srid pa pa rims nad dang bcas pa sdug bsngal gyi rnam par smin pa can tshe phyi ma la skye ba dang rga ba dang 'chi bar 'gyur ba rnams kyis zil gyis non pa zhes bya ba'o zhes bya ba ni mdo sde'i dum bu'o//de la dge sbyong gi gnod pa ni rnyed pa dang bkur sti gang gis zil gyis non na dge sbyong gi dngos po las nyams par 'gyur ba ste/bcom ldan 'das kyis dge slong dag 'di ltar 'di na kha cig bslab pa btang nas nyams te gnas pa 'di ni 'phags pa'i chos 'dul ba las nyams pa yin no zhes gsungs pas so/ /tshangs par spyod pa'i 'dam ni rnyed pa dang bkur sti gang la chags na 'phags pa'i mya ngan las 'das pa'i lam yan lag brgyad par mi 'dong ba ste/de ni bcom ldan 'das kyis tshangs par spyod pa'i 'dam yin par gsungs so/ /sdig pa mi dge ba'i chos rnams ni kun nas nyon mongs pa can la sogs pa ste/ gang dag gis zil gyis non na tshul khrims nyams par byas nas ngan song du 'dong ba rnyed pa dang bkur sti'i rgyu brnab sems can nyid la sogs pa gang dag yin pa'o//'dis ni dge slong gsar bu rnyed pa dang bkur sti lhur len 'dzin pa rnams la mthong ba'i chos la bslab pa gtong ba dang /mya ngan las 'das par mi 'gro ba dang / tshe phyi ma la ngan 'gror 'gro ba'i nyes dmigs rnam pa gsum yod par ston to/ /de la sdig pa ni 'phags pa'i skye bos smod pa'i don gyis so/ /mi dge ba ni mi bde ba'i don gyis so/ /de ltar na de rnams ni gzhan gyis dang /rang nyid kyis skyon yin par bstan pa yin no/ /ji ltar smad pa dang mi bde ba de ni kun nas nyon mongs pa can yang srid pa pa nyid pa nyes dmigs dang bcas pas yang dag par ston to/ /de ni mthong ba'i chos la yang dang yang du kun nas nyon mongs par byed pa'i phyir kun nas nyon mongs pa can no//tshe phyi ma la yang srid pa mngon par 'grub pa'i phyir yang srid pa pa'o/ /kun nas nyon mongs pa can dag yin pa la rims nad dang bcas pa dang / sdug bsngal gyi rnam par smin pa can gyi nyes dmigs yod de/ mthong ba'i chos nyid la nyon mongs pa yongs su gdung ba rnams kyis lus dang sems yongs su gdung bar byed pa'i phyir dang /tshe phyi ma la ngan 'gror 'gro ba'i phyir ro/ /yang srid pa par gyur pa la tshe phyi ma la skye ba dang rga ba dang 'chi bar 'gyur ba zhes bya ba'i nyes dmigs yod de yun ring por skye ba dang rga ba dang 'chi ba 'dren pa'i phyir ro//'di ni ston pa'i bstan pa bzhin byed pa dang / mi gtong bar bsgom pa dang / lhag mthong dang ldan pa khyim stong pa rnams rgyas par byed pa/ rang gi don gyi sbyor ba la rjes su brtson pa/ tshangs pa mtshungs par spyod pa mkhas pa rnams kyis ma smad pa/yul 'khor gyi bsod snyoms 'bras bu yod par za ba zhes bya ba ni mdo sde'i dum bu'o/ /de la bstan pa bzhin du bsgrub pa'i phyir ston pa'i bstan pa bzhin byed pa'o/ /yang dang yang du bsgoms pas mi gtong bar sgom pa ste/ 'di ltar cung zad cung zad ces bya ba gsungs pa bzhin no//ji ltar thos pa bzhin du chos rab tu rnam par dbye ba'i phyir lhag mthong dang ldan pa'o/ /sems rtse gcig tu bya ba'i don du khyim stong pa rnams la mngon par dga' ba'i phyir khyim stong pa rnams rgyas par byed pa'o/ / mya ngan las 'das pa ni legs par rab tu byung ba'i rang gi don yin te/ de'i don du rab tu byung ba'i phyir ro/ /de'i sbyor ba ni thabs yin te/ de thob bar byed pa'i lam gang yin pa'o/ /de la rjes su brtson pa ni ji ltar de la brtson par bya ba de ltar brtson 'grus mi gtong ba nyid kyis brtson pa'i phyir te/de ltar na rang gi don gyi sbyor ba la rjes su brtson pa'o/ /mngon par 'dod pa nyid yin pa'i phyir tshangs pa mtshungs par spyod pa mkhas pa rnams kyis ma smad pa'o/ /de'i 'bras bu dang bcas pa nyid du byed pa'i phyir yul 'khor gyi bsod snyoms 'bras bu yod par za ba'o//mdor na tshig bdun po 'di rnams kyis ni ston pa dang / bstan pa dang / tshangs pa mtshungs par spyod pa rnams dang / sbyin par byed pa rnams la yang dag par sgrub pa yongs su bstan pa yin no/ /ston pa la ni de'i bstan pa bzhin du sgrub ba'i phyir ro//bstan pa la ni rtag tu las khyad par du 'phags pa la sbyor ba'i phyir dang / phyin ci ma log par sbyor ba'i phyir dang / rnam par ma g.yengs par sbyor ba'i phyir dang / chog mi shes par sbyor ba'i phyir ro/ /dge slong gi las khyad par du 'phags pa ni bsam gtan yin par rig par bya'o//gzhan yang rtag tu bsgom pa'i phyir dang / kun nas nyon mongs pa can ma yin par bsgom pa'i phyir dang / bar chad med par bsgom pa'i phyir dang / chog mi shes par bsgom pa'i phyir ro/ /tshangs pa mtshungs par spyod pa rnams la ni don mthun pa nyid du sbyor ba'i phyir ro//sbyin par byed pa rnams la ni de'i sbyin pa 'bras bu chen po nyid du sbyor ba'i phyir ro/ /da ltar mi rnams ni chos ma yin par chags pas chags pa dang / mi rigs par chags pas zil gyis non pa dang /chos log pas dkris pa yin no zhes bya ba ni mdo sde'i dum bu'o/ /de la chos ma yin pas yul yongs su spyad pa la chags pa ni chos ma yin par chags pas chags pa ste/ dper na 'dod pas log par g.yem pa'am lings 'debs pa lta bu'o/ / mi rigs pas chags pa ni mi rigs par chags pa ste/ chom rkun dang / mthu stobs dang / brid pa la sogs pas pha rol gyi nor don du gnyer ba gang yin pa'o/ /log pas byas pa'i chos ni log pa'i chos te/ 'di chos ma yin par byas pa pha rol la 'tshe ba dang ldan pa rgyal po'i chos sam bram ze'i chos gang yin pa'o//des ni yul yongs su spyad pa dang / longs spyod yongs su tshol ba dang / bde 'gro yongs su tshol ba la brtsams nas mi rnams la log par sgrub pa rnam pa gsum yod par bstan pa yin no/ /sangs rgyas bcom ldan 'das rnams kyi gtam dus sngar bya ba gang yin pa de ni 'di lta ste/sbyin pa'i gtam dang zhes bya ba rgyas par 'byung ba ni mdo sde'i dum bu'o/ /de la dus sngar bya ba ni rgyud yang dag phul can gyi gtam gyi snod du bya ba'i phyir ro/ /de ni mdor na longs spyod phun sum tshogs pa'i rgyu dang /lus phun sum tshogs pa'i rgyu dang / phun sum tshogs pa de gnyis ka'i khyad par dang / de las phyir phyogs par byed pa'i gzhi dang / de las nges par 'byung ba'i thabs las brtsams nas rig par bya'o/ /de las phyir phyogs par byed pa'i gzhi ni 'dod pa rnams ro chung ba nyid dang /nyes dmigs mang ba nyid yin no/ /de gnyis kyis kyang 'di ltar kun nas nyon mongs pa dang rnam par byang bar byed do/ /de las nges par 'byung ba'i thabs ni rab tu 'byung ba'i mtshan nyid nges par 'byung ba nyid dang / rab tu byung nas lus dang sems thag ring ba'i mtshan nyid rab tu dben pa nyid dang /rab tu dben par gyur nas kyang mya ngan las 'das pa'i tshogs kyi mtshan nyid rnam par byang ba'i phyogs dang mthun pa'i chos dran pa nye bar gzhag pa la sogs pa rnams so/ /sbyin pa la sogs pa'i gtam rnams kyi go rims ni mi rnams kyi bde ba ni longs spyod la rag las pa yin la/longs spyod chen po yang sbyin pa'i 'bras bu yin te/ de'i phyir de rnams ni sbyin pa'i gtam kho na la dga' ba yin pas thog ma kho nar sbyin pa'i gtam mo/ /sbyin pa de yang tshul khrims med na ngan 'gror 'bras bu smin par 'gyur te/gro zhin skyes kyi mdo las/ glang po cher gyur kyang glang po che rgyan dang ldan pa thob pa yin no zhes gsungs pa lta bu yin pas de'i 'og tu tshul khrims kyi gtam mo/ /de'i 'og tu bde 'gror gyur du zin gyis kyang mi rnams kyis 'dod par bya ba dag ni mi gtsang ba dang /dri nga ba dang / dri bshung ba dang / mi mthun pa dag yin la/ lha rnams kyi 'dod par bya ba dag ni 'phags par ches lhag pa dang ches gya nom pa yin no zhes mtho ris kyi gtam mo/ /de'i 'og tu de rnams la ro chung ba dang / nyes dmigs ches mang ba yin no zhes 'dod pa rnams la ro myang ba dang /nyes dmigs yang dag par rab tu bstan pa yin no/ /de'i 'og tu ro myang ba las gyur pa ni kun nas nyon mongs pa yin la/ nyes dmigs las gyur pa ni rnam par byang ba yin no zhes kun nas nyon mongs pa dang /rnam par byang ba yang dag par rab tu bstan pa yin no/ /de'i 'og tu nyes dmigs kyis yid byung na de las nges par 'byung ba la mngon du phyogs par byed pa yin no zhes nges par 'byung ba dang / rab tu dben pa'i phan yon la sogs pa rab tu bstan pa yin no/ / gang gi tshe sems rangs pa dang sems nyams bde ba zhes bya ba ni gtam 'di'i phan yon yongs su bstan pa yin no/ /sems dga' ba dang sems sgrib pa med pa zhes bya ba ni sems rangs pa dang / nyams bde ba'i bshad pa yin par go rims bzhin te/ mchog tu dga' ba nyid dang ldan pa'i phyir dang /sgrib pa lnga dang mi ldan pa'i phyir te/ skyon med par ni nyams bde ba zhes bya bas so/ /yang dag phul can gyi chos bstan pa kun tu shes par bya bar skal ba dang ldan pa dang nus pa zhes bya ba ni sems de'i phan yon yongs su ston pa yin no//de la sems dga' ba nyid kyis ni skal ba dang ldan pa yin te/ dga' ba la sogs pa'i rgyu'i rim pas so/ /sems sgrib pa med pa nyid kyis ni nus pa kho na yin te/ sgrib pa nyon mongs pa'i gnyen po'i ting nge 'dzin thob pa'i phyir ro/ /gzhan yang skal ba dang ldan pa dang /nus pa gnyis kyis ni rigs dang / yongs su smin pa phun sum tshogs pa yongs su bstan par rig par bya'o / /de'i tshe na de la gnyis ka phun sum tshogs pa yin no/ /rigs ni snga nas yod pa nyid yin no/ /rigs ma smos na sangs rgyas rnams kyis yang dag phul can gyi chos bstan pa ni gnyis ka la ltos pa'o zhes bstan par mi 'gyur ro//'phags pa'i bden pa'i gtam ni yang dag phul can te/ /mthong ba dang bsgom pa'i lam gnyis kyis ngan 'gro dang 'khor ba las yang dag phul du byed pa'i phyir ro/ / mya ngan las 'das pa yang chos thams cad las mchog tu 'phags pa nyid kyis yang dag phul can yin no/ /'bras bu de dang ldan pa'i phyir yang dag phul can te/ yang 'byung ba'i sred pa bzhin no/ /'phags pa nyan thos thos pa dang ldan pas de ltar mthong na gzugs la yid 'byung bar 'gyur zhing tshor ba dang /'du shes dang / 'du byed rnams dang rnam par shes pa la yid 'byung bar 'gyur ro/ /yid byung na 'dod chags dang bral bar 'gyur ro/ /'dod chags dang bral na rnam par grol bar 'gyur ro zhes bya ba ni mdo sde'i dum bu'o/ / 'dir yid byung ba dang / 'dod chags dang bral ba dang / rnam par grol ba rnams kyi rgyur 'gyur ba ni go rims bzhin du yongs su bstan pa yin no/ /de la yid byung ba ni mi mthun pa nyid du 'dzin pa'o/ /'dod chags dang bral bar gyur pa ni/ 'dod chags dang bral ba ste/de'i thob pa 'chad pa'o/ /de'i thob pa la sogs pa dang de dang mi ldan par gnas gyur pa ni rnam par grol ba'o/ /rnam grangs gzhan yang dga' ba sngon du song ba'i 'dod chags dang / gzugs la sogs pa dag la 'dod chags sngon du song ba'i sems rang dbang med par 'jug pa nyid kyi 'ching ba yod pas de'i phyir go rims bzhin du de'i gnyen po yid byung ba la sogs pa rnams dus tha dad pa nyid ma yin yang mi mthun pa'i phyogs kyi go rims kyis bshad pa yin te/dper na ma rig pa 'gags pas 'du byed 'gag ces bya ba lta bu'o//gzhan yang kha cig na re bcom ldan 'das kyis chos de dag la nad nyid dang / 'bras nyid dang / zug rngu nyid dang / sdig pa nyid dang / mi rtag pa nyid dang / sdug bsngal ba nyid dang / stong pa nyid dang / bdag med pa nyid du yid la byed do zhes gang gsungs pa 'di ni yang dag pa ji lta ba bzhin du lta ba yin la/de chos de dag la nad nyid nas bdag med pa nyid kyi bar du yid la byas nas chos de dag la sems skyo bar byed skrag par byed phyir zlog par byed do zhes gang gsungs pa 'di ni yid byung ba'o/ /des chos de dag la skyo zhing skrag la phyir ldog nas 'di ni zhes bya ba 'di ni gya nom pa yin te/'di lta ste/ phung po kun spangs pa dang / sred pa zad pa dang / 'dod chags dang bral ba dang / 'gog pa dang / mya ngan las 'das pa'o zhes 'chi ba med pa'i dbyings la sems nye bar sbyor ba zhes gang gsungs pa 'di ni 'dod chags dang bral ba'o//des de ltar shes shing de ltar mthong ba na 'dod pa'i zag pa las sems rnam par grol bar 'gyur ro/ /srid pa'i zag pa dang / ma rig pa'i zag pa las sems rnam par grol bar 'gyur ro zhes gang gsungs pa 'di ni rnam par grol ba'o zhes zer te/'dir ji ltar mya ngan las 'das pa yid la byed pa las 'dod chags dang bral bar 'gyur la/ phyis rnam par grol bar 'gyur ro zhes bya ba'i bsam pas brjod dgos so/ /byis pa so so'i skye bo thos pa dang mi ldan pas yun ring po nas byi dor byas shing zhes bya ba nas bzung ba yin no zhes bya ba'i bar ni mdo sde'i dum bu'o//de la byi dor byas pa ni phan pa'i dngos po nye bar sgrub pa nyid kyis so/ /sbas pa ni gnod pa'i dngos po spong ba nyid kyis so/ /ci'i phyir zhe na/ bshad pa bdag gir byas pas so/ /ji ltar bdag gir byas pa yin zhe na/bshad pa 'di ni bdag gir yin/ 'di ni nga bdag yin/ 'di ni bdag yin zhes khas blangs la bzung ba yin no/ /de la khas blangs pa ni lta ba ste/ rnam pa gnyis kyis khas blangs pa'i phyir ro/ /bzung ba dang srid pa ste/ de'i rjes su 'brang bas chags pa'i phyir ro//'di ni bdag gi yin zhes bya ba bdag gi ba'i rnam pa dang / 'di ni nga bdag yin/ 'di ni bdag gi bdag yin no zhes bya ba bdag gi rnam pa ni bdag tu lta ba rnam pa gnyis po lhan cig skyes pa dang / kun tu brtags pa dang / gzhan yang gzhi tha mi dad pa dang / gzhi tha dad pa dang go rims bzhin yin pa dang / de'i rjes su mthun pa'i sred pa gnyis kyis so/ /rnam grangs gzhan yang nga'o snyam pa'i nga rgyal dang / bdag tu lta ba gnyis kyis dang / de'i rjes su 'brang ba'i sred pa gnyis so/ / 'di thams cad ni de'i rnam pa dang / de'i rgyu nyid kyis bdag gir byas pa zhes bya'o/ /mdor na 'dis ni byis pa rnams kyis rnam par shes pa la bdag tu lta ba dang / sred pa la log par sgrub pa las dang bcas pa'am/ bdag tu lta ba dang / nga rgyal du lta ba dang / sred pa las log par bsgrub pa yin par yongs su bstan pa yin no//mdag me'i rlung dper brjod pa mdzad nas/ de de las bsring ba sems pa dang / bsring ba don du gnyer ba dang / bsring ba la brtags nas 'jog par byed do zhes bya ba ni mdo sde'i dum bu'o/ /de la bsring ba zhes bya ba ni thag bsring ba'o//yon tan nyid du sems mngon par 'du byed pa ni sems pa'o/ /'dod pa ni rang bzhin gyi don du gnyer ba'o/ /so sor brtags nas sems 'jog pa ni yid la byed pa'o/ /yon tan nyid du gang bsam pa de la ni rang gi ngang gis don du gnyer ba'am/so sor brtags nas de la sems 'jog par byed de/ dper na sman ro zhim pa'am tsha ba la byed pa bzhin no/ /dge slong dag dge slong chos shes pa yang yin no/ /ji lta bu yin zhe na/ 'di la dge slong gis chos shes pa ni 'di lta ste/ mdo'i sde dang dbyangs kyis bsnyad pa'i sde dang zhes bya ba ni mdo sde'i dum bu'o//de la sangs rgyas kyis sam/ sangs rgyas kyis gnang ste nyan thos kyis bshad pa gang yin pa de'i don mdor gleng ba'i don gyis na mdo sde'o/ /de nyid tshigs su bcad pas phyis dbyangs su bsnyad pa dang bkri ba'i don gang yin pa ste dbyangs kyis bsnyad pa'i sde'o//lung du bstan pa'i sde ni gang las bcom ldan 'das kyis 'das pa dang ma 'ongs pa'i nyan thos la sogs pa rnams lung ston par mdzad pa dang / nges pa'i don gang yin pa'o/ /tshigs su bcad pa'i sde ni tshig gnyis dang gsum dang bzhi dang lnga dang drug tu tshigs su sbyar bas bshad pa gang yin pa'o//ched du brjod pa'i sde ni gang zag gi ched du gsungs pa ma yin gyi bstan pa gnas par bya ba 'ba' zhig gi phyir gang yin pa ste/ gang las bcom ldan 'das kyis ched du brjod pa ched du brjod par mdzad do zhes bya'o//gleng gzhi'i sde ni 'dul ba dang 'brel ba ste/ 'dul ba ni byung bas rab tu phye ba nyid kyi phyir te/ gang las bcom ldan 'das kyis gleng gzhi 'di dang skabs 'di dang don byung ba las bcom ldan 'das kyis 'di skad bshad pa ni 'di skad ces bya'o zhes 'byung ba yin no//rtogs pa brjod pa'i sde ni ring po len gyi rtogs pa brjod pa la sogs pa ste/ gang las rtogs par bya ba'i phyir dpe gzhan rgyas par brjod pa 'byung ba yin no/ /de lta bu byung ba'i sde ni sngon gyi rgyud dang 'brel ba'o/ /skyes pa'i rabs kyi sde ni gang las bcom ldan 'das kyi sngon gyi byang chub sems dpa'i skyes pa'i rabs bstan pa 'byung ba yin no//shin tu rgyas pa'i sde ni theg pa chen po yin te/ lung phog pa gang gis byang chub sems dpa' rnams pha rol tu phyin pa bcu dag gis sa bcu dag tu yang dag par 'grub pa na stobs bcu'i rten sangs rgyas nyid 'thob pa'o//rmad du byung ba'i chos kyi sde ni gang las sangs rgyas rnams dang / byang chub sems dpa' rnams dang / nyan thos rnams kyi phul du byung ba bstan pa'o/ /gtan la dbab par bstan pa'i sde ni gang dag las de kho na mthong ba rnams dang /gzhan rnams kyis mdo sde'i don chos kyi rjes su mthun par gtan la dbab par bstan pa'o/ /de nyid de'i don rnam par 'chad pas ma mo zhes bya ste/ de las gzhan pa'i mdo sde'i don bshad pa'i rten yin pa'i phyir ro//chos mngon pa zhes kyang bya ste/ mtshan nyid phyin ci ma log par ston pa nyid kyis chos kyi mtshan nyid la mngon du phyogs par byed pa'i phyir ro/ /de ltar na sangs rgyas kyi gsung rab yan lag bcu gnyis po 'di ni sde snod gsum du bsdus pa yin no/ /ci'i phyir theg pa chen po la shin tu rgyas pa'i sde zhes bya zhe na tshig gi don gyis dang ming du chags pas so//ji ltar na tshig gi don gyis she na/ nges pa'i tshig gi tshul gyis na theg pa rgyas pa ni shin tu rgyas pa'i sde yin no/ /theg pa rgyas pa yang theg pa chen po yin te/ chen po nyid rnam pa bdun dang ldan pa'i phyir ro//chen po nyid rnam pa bdun la chos chen po nyid ni stong phrag brgya pa la sogs pa'i mdo sde tshad med pa dang ldan pa'i phyir ro/ /sems bskyed pa chen po nyid ni sems can thams cad kyi don bya ba'i phyir yon tan dang skyon skye ba dang 'grib pa thams cad kyi mthar thug pa'i gnas bla na med pa yang dag par rdzogs pa'i byang chub tu sems bskyed pa'i phyir ro//mos pa chen po nyid ni chos shin tu zab pa dang / rgya che ba la mos pa'i phyir ro/ /bsam pa rgya chen po nyid ni lhag pa'i bsam pa dag pa'i sa la sems can thams cad la bdag dang gzhan du mnyam pa nyid kyi bsam pa thob pa'i phyir ro//tshogs chen po nyid ni sar chud pa na skad cig re re la bsod nams dang ye shes kyi tshogs dpag tu med pa la sogs pa'i phyir ro/ /dus chen po nyid ni bskal pa grangs med pa gsum du yang dang yang du brtson pa'i phyir ro//yang dag par 'grub pa chen po nyid ni sems can thams cad dang mi mnyam pa'i sangs rgyas kyi sku yang dag par 'grub pa'i phyir ro/ /de lta bu ni tshig gi don gyis so/ /ji ltar na ming du chags pas she na/ theg pa chen po de nyid la shin tu rgyas pa'i sde zhes bya ba'i ming 'di chags so//mtshungs pa med pa'i sde zhes kyang bya ste/ mtshungs pa dang bral ba'i phyir ro/ /sde pa gzhan dag las ni rnam par 'joms pa'i gtsug phud kyi sde dang / rnam par 'joms pa chen po'i sde ste/ de ni bag chags dang bcas pa'i nyon mongs pa rnam par 'joms pa'i phyir ro//yang 'dir/ rgyas pa'i phyir na shin tu rgyas pa'i sde/ /mtshungs bral de phyir mtshungs med sde yang yin/ /lta ba thams cad rnam par 'joms pa'i phyir/ /rnam par 'joms pa'i sder yang shes par bya/ /de ltar mdo sde'i dum bu brgya'i tshig rnams kyi don bshad pa ni tshig gi don bshad pa'i phyogs shig bstan pa'i phyir ro//phyogs 'dis ni blo dang ldan pa rnams kyis tshig gzhan rnams kyi don yang dag par bya'o/ /rnam par bshad pa'i rigs pa las le'ur bcad pa gnyis pa'o// //gzhan yang rnam pa bzhi dag gis tshig gi don rig par bya ste/rnam grangs kyis dang mtshan nyid kyis dang / nges pa'i tshig gis dang / rab tu dbye bas so/ /de la rnam grangs ni ming gzhan no/ /mtshan nyid ni don gang la ming de yod pa'i'o/ /nges pa'i tshig ni ming gi rgyu mtshan brjod pa'o//rab tu dbye ba ni brjod par bya ba de gzugs can dang / gzugs can ma yin pa dang / bstan du yod pa dang / bstan du med pa la sogs pa'i rnam par rab tu dbye bas so/ /de ltar na tshig gi don rnam pa thams cad dang ldan pa yongs su bstan pa yin la/so so yang dag par rig pa'i sa yang byas pa yin no/ /gdul ba'i khyad par la ltos nas lan 'ga' ni kha cig bshad par bya ste/ bcom ldan 'das kyis kyang lan 'ga' ni rnam grangs tsam zhig bshad de/ dper na rten cing 'brel bar 'byung ba'i mdo las/de dang de la yang dag pa ji lta ba bzhin du mi shes pa dang / mi mthong ba dang / mngon par ma rtogs pa dang / mun khung dang / kun tu rmongs pa dang / ma rig pa dang / mun pa gang yin pa 'di ni ma rig pa zhes bya'o zhes 'byung ba lta bu'o//kha cig las ni mtshan nyid tsam zhig ste/ dper na de nyid las rnam par shes pa'i rkyen gyis ming dang gzugs zhes bya ba la/ ming gang zhe na/ gzugs can ma yin pa'i phung po bzhi ste/ tshor ba'i phung po nas rnam par shes pa'i phung po'i bar du'o/ /gzugs gang zhe na/gang ci yang rung ste/ de thams cad 'byung ba chen po bzhi dag rgyur byas pa ste zhes 'byung ba lta bu'o/ /kha cig las ni nges pa'i tshig tsam zhig ste/ dper na bza' ba lta bu las gzugs shing gzugs su rung bas na de'i phyir gzugs nye bar len pa'i phung po zhes bya'o zhes 'byung ba lta bu'o//kha cig las ni rab tu dbye ba tsam zhig ste/ dper na ma rig pa'i rkyen gyis 'du byed rnams zhes bya ba la/ 'du byed rnams gang zhe na/ 'du byed rnams ni gsum ste/ lus kyi 'du byed dang / ngag gi 'du byed dang / yid kyi 'du byed rnams so//'du byed kyi rkyen gyis rnam par shes pa zhes bya ba la/ rnam par shes pa gang zhe na/ rnam par shes pa'i tshogs drug rnams te zhes 'byung ba lta bu'o/ /tshig gi don bshad zin to/ /da ni mtshams sbyar ba bshad par bya'o/ /de la mtshams sbyar ba ni rnam pa gnyis te/don snga phyi 'brel ba'i mtshams sbyar ba ni dper na dge slong dag 'phags pa'i chos kyi phyag rgya rtogs pa dang / mthong ba shin tu rnam par dag pa bshad par bya'o zhes gsungs nas/ dge slong dag gang zhig 'di skad du/ bdag gis ni stong pa nyid dang / mtshan ma med pa can dang / cung zad med pa nyid ma thob par zhes 'byung ba'i mtshams sbyar ba yang gang yin/ de bzhin du de las sa chen po 'di tshig par 'gyur ba dang / med par 'gyur ba dang / mi 'byung bar 'gyur ba gang yin pa ni gzhi mthong ba ma rtogs par su zhig dad par 'gyur/su zhig yid ches par 'gyur zhes gsungs nas dge slong dag sngon byung ba na ston pa spyan legs zhes bya ba zhig byung bar gyur to zhes 'byung ba'i mtshams sbyar ba yang gang yin zhes bya ba de la sogs pa'o/ /snga phyi nyid kyi go rims kyi mtshams sbyar ba ni dper na 'phags pa'i bden pa rnams las ci'i phyir 'bras bu'i 'og tu rgyu bstan la/de bzhin du bslab pa gsum rnams las kyang ci'i phyir tshul khrims dang ting nge 'dzin gyi 'og tu ting nge 'dzin dang shes rab bstan zhes bya ba lta bu'o/ /dper brjod pa'i mdo sde'i dum bu 'di rnams kyi mtshams sbyar ba ni ji ltar rig par bya zhe na/'phags pa'i chos kyi phyag rgya rtogs pa bshad par bya'o zhes gsungs nas/ dge slong dag gang zhig 'di skad du zhes bya ba ni re zhig gang zhig rtogs pa brjod par bzhed pa'i 'phags pa'i chos kyi phyag rgya de 'chad pa yin te/'di ni de'i mtshams sbyar ba yin no/ /gzhi mthong ba ma gtogs par su zhig dad par 'gyur/ su zhig yid ches par 'gyur zhes gsungs nas spyan legs kyi skyes pa'i rabs bstan pa ni bdag nyid la dad pa nyid du 'gyur bar yid ches par bya ba'i phyir ro/ /don 'di ston te/de'i tshe na yang ngas nyan thos rnams la ma bslus na da lta smos kyang ci dgos zhes bya ba'o/ /mi rtag pa nyid bstan pa de yang don che ba nyid dang / rnyed par dka' ba nyid du yongs su bstan pa'i phyir te/ 'di ni de'i mtshams sbyar ba yin no/ /'phags pa'i bden pa rnams kyi bshad pa'i mtshams sbyar ba ni ji ltar mngon par rtogs pa bzhin du yin te/sdug bsngal la sdug bsngal nyid du mthong nas 'di ga las byung zhes rgyu kun tu tshol bar byed do/ /de nas de 'gog pa la'o/ /de nas 'gog pa'i thabs la ste/ de ltar na nad dang /de'i gzhi dang / nad med pa nyid dang / sman tshol ba'i tshul gyis snga ma snga ma la rnam par dpyod pa'i phyir 'phags pa'i bden pa rnams ji ltar mngon par rtogs pa de ltar bshad pa yin te/ 'di ni de'i mtshams sbyar ba yin no/ /bslab pa gsum rnams zhes bya ba ni 'dir tshul khrims dang ldan na sems mnyam par 'jog go//sems mnyam par gzhag na yang dag pa ji lta ba bzhin du shes so zhes 'byung bas 'di ni de'i mtshams sbyar ba yin no/ /gzhan yang rgyu rnam pa bcu dag gis bslab pa rnam pa gsum dag brjod par bya'o//yang ni go rims de gnyis bzang po yin no/ /sdom brtson rnam pa gsum gyi rgyu nyid kyis yin te/ sdom brtson rnam pa gsum ni 'chal pa'i tshul khrims yang dag par sdom pa'i phyir dang / yul la yang dag par sdom pa'i phyir dang / nyon mongs pa yang dag par sdom pa'i phyir ro//tshangs par spyod pa rnam pa gsum gyi rgyu nyid kyis kyang yin te/ tshangs par spyod pa rnam pa gsum ni spong ba yang dag par len pa dang / de bar skabs su spong ba dang / de gtan du spong ba'o/ /kun nas nyon mongs pa rnam pa gsum gyi gnyen pos kyang yin te/kun nas nyon mongs pa rnam pa gsum ni sdig pa byed pa rnams kyi nyes par spyod pa'i kun nas nyon mongs pa dang / de las gzhan pa'i 'dod pa can rnams kyi sred pa'i kun nas nyon mongs pa dang / mu stegs can rnams kyi lta ba'i kun nas nyon mongs pa'o//ngan 'gro dang bde 'gro gnod pa dang bcas pa dang / gnod pa med pa'i gnyen pos kyang yin no/ /de la ngan 'gro ni ngan song rnams yin no/ /bde 'gro gnod pa dang bcas pa ni 'dod pa na spyod pa'i lha dang mi rnams so/ /gnod pa med pa ni gzugs dang gzugs med pa na spyod pa'i lha rnams so//las nag po dang / 'dren ma dang dkar po'i gnyen pos kyang yin te nag po ni sems can dmyal bar smin par byed pa yin no/ /'dren ma ni de las gzhan pa'i 'dod khams su rnam par smin par byed pa yin no/ /dkar po ni gzugs dang gzugs med par rnam par smin par byed pa yin no//nyon mongs pa'i gnas skabs gsum gyis gnyen pos kyang yin te/ nyon mongs pa'i gnas skabs gsum ni zil gyis gnon pa'i gnas skabs dang / kun nas rgyu ba'i gnas skabs dang / bag la nyal gyi gnas skabs so//de'i gnyen po nyid ni dug gi ljon shing ra bas bskor ba dang bcad pa dang dbyung ba'i tshul gyis yin no/ /sdig pa dang 'dod pa dang drag po spyod pa'i gnyen pos kyang yin te/ rab tu byung bas mtha' gnyis la bsnyen par mi bya zhes bya ba la sogs pa 'byung ba yin no/ /bde 'gro dang 'jig rten pa dang 'jig rten las 'das pa'i rnam par dag pa'i rgyu nyid kyis kyang yin no//ting nge 'dzin dang / shes rab dang / rnam par grol ba'i rten nyid kyis kyang yin no/ /gnyis 'byung ba'i rgyu nyid dang mnyam par 'jog pa dang / rnam par grol bar byed pas kyang yin te/gcig gis ni gnyis skye ba'i rgyu nyid yin la/ gnyis pas ni sems mnyam par ma bzhag pa mnyam par 'jog par byed pa yin zhing gsum pas ni sems mnyam par bzhag pa rnam par grol bar byed pa yin no/ /bsdus pa'i tshigs su bcad pa ni/sdom brtson tshangs spyod kun nyon mongs/ /'gro dang las rnam gsum phyir dang / /nyon mongs skabs dang spyod dang dag /rten dang byed rnam gsum phyir ro/ /mtshams sbyar ba bshad zin to// // brgal ba ni rnam pa gnyis te/ sgra la brgal pa dang /don la brgal ba'o/ /'di lta ste/ tshe dang ldan pa shA ri'i bu bzhugs zin kyang / shA ri'i bu khyod da gzod dang gang nas 'ong 'ong / btsun pa da gzod thibs po'i tshal nas gdugs la mchis pa las mchi mchi'o zhes bya ba'i sbyor ba 'di ni da ltar byung ba bzhin du 'das pa'i dus la bya ba rigs pa ma yin no//de bzhin du tshe dang ldan pa gsus po che chen po rab tu shes par byed cing rab tu shes par byed pas na de'i phyir shes rab ces bya'o/ /rnam par shes par byed cing rnam par shes par byed pas na rnam par shes pa zhes bya'o zhes bya ba 'di yang dngos po tsam la las dang bcas pa'i byed pa por bshad pa ni rigs pa ma yin te/dper na 'gro ba grong du 'gro bar byed ces bya ba lta bu'o/ /'di ltar shes rab dang rnam par shes pa gnyis las gzhan pa gang la ltos nas de gnyis la byed pa por bshad pa'i bya ba ni 'ga' yang med do//de bzhin du mig dang gzugs la brten nas mig gi rnam par shes pa skye'o zhes bya ba'i sbyor ba 'di yang rigs pa ma yin te/ byed pa po gcig pu dag la bya ba gnyis shig yod na ni dus snga ma shos kyi bya ba la de lta bu'i sbyor ba yang 'byung ste/dper na 'khar ba la 'jus nas ldang ba lta bu'am/ gzhan dang gzhan phrad pa la ni dper na chu brgal nas ri yod do zhes bya ba lta bu yin na/ rnam par shes pa ni gang zhig gis brten nas phyis skye bar 'gyur ba'i skye ba snga rol na yang med cing 'di la gzhan dang gzhan phrad pa yang med par bsams so//de bzhin du gzugs gang yin pa ci yang rung ste/ de thams cad 'byung ba chen po bzhi dag dang 'byung ba chen po bzhi dag rgyur byas pa'o zhes ni gsungs shing / tshor ba gang ci yang rung ste/ de thams cad ni tshor ba'i tshogs drug go zhes ni ma gsung la/de bzhin du skye mched bcu gnyis rnams las bcu char dang bcu gcig pa'i phyogs kyang gzugs yin bzhin du gcig pu zhig gzugs kyi skye mched du gsungs pa yang mtshan nyid 'dra ba la dgos pa med par bye brag tu bshad pa ni rigs pa ma yin no//sgra la brgal ba ni rnam pa de lta bu yin no/ /don la brgal ba yang rnam pa gnyis te/ snga phyi 'gal bar brgal ba dang / rigs pa dang 'gal bar brgal ba'o/ /de la snga phyi 'gal bar brgal ba ni dper na kha cig las 'di skad du sems zhes bya ba'am/yid ces bya ba'am/ rnam par shes pa zhes bya ba 'byung ba gang yin pa de ni mtshan mo dang nyin mo de dang de dag 'das shing skad cig dang / thang cig dang / yud tsam de dang de dag 'das pas rnam pa du ma dang / rnam pa sna tshogs mang po gzhan skye zhing skye la/ gzhan 'gag cing 'gag go zhes bya ba gsungs pa dang /kha cig las yang 'di skad du sems zhes bya ba'am/ yid ces bya ba'am/ rnam par shes pa zhes bya ba 'byung ba gang yin pa de ni yun ring po nas dad pas yongs su bsgos/ tshul khrims dang / gtong ba dang / shes rab kyis yongs su bsgos pas/ tshe rabs phyi ma la gong du 'gro zhing khyad par du 'gro ba dang / mtho ris su nye bar 'gro ba yin no zhes gsungs pa la ji ltar na sems skad cig pa tshe phyi ma la gong du 'gro bar 'gyur/ de bzhin du kha cig las 'phags pa'i bden pa bzhi dag ces gsungs pa dang /kha cig las bram ze'i bden pa gsum dag ces gsungs pa dang / kha cig las bden pa ni gnyis te/ kun rdzob kyi bden pa dang don dam pa'i bden pa'o zhes gsungs pa dang / kha cig las bden pa ni gcig kho na ste gnyis pa med do zhes gsungs pa dang /de bzhin du kha cig las mi rnams kyis ni 'di na bsod nams dang / sdig pa gang yin gnyis ka byed pa de / /de'i bdag gir bya ba yin zhing des de yang khyer te 'gro bar byed pa yin zhes gsungs pa dang / kha cig las las kyang yod rnam par smin pa yang yod la byed pa po ni mi dmigs so zhes gsungs pa de lta bu'i rang bzhin ni snga phyi 'gal bar brgal ba yin no//rigs pa dang 'gal bar brgal ba ni dper na gzugs gang yin pa ci yang rung ba de thams cad 'byung ba chen po bzhi dag dang 'byung ba chen po bzhi dag rgyur byas pa'o zhes bya ba la ci 'di rdzas kyi dbang du mdzad de gsungs sam 'on te gong bu'am 'on te rigs las she na/de las cir 'gyur/ gal te rdzas las yin na ni 'byung ba dang / 'byung ba las gyur pa rnams kyi so so'i mtshan nyid med par thal bar 'gyur te/ thams cad kyang mtshan nyid thams cad du 'gyur ba'i phyir dang /dbang po thams cad kyis 'dzin par thal bar 'gyur ro/ /'on te gong bu las yin na gzugs 'dus pa thams cad la 'byung ba bzhi char dmigs par thal bar 'gyur na 'od dag la yang sra ba mi dmigs la chu la yang ma yin no//nyi ma'i 'od la yang gsher ba med la zla ba'i 'od la yang tsha ba med do/ /nor bu'i 'od la gnyis ka med cing rdo ba la sogs pa dag la yang med do/ /brtan pa dag la yang zhing g.yo ba med do/ /de rnams dmigs pa la bgegs byed pa ni 'ga' yang med do/ / ji ltar med de/ 'byung ba gzhan shas che bas 'byung ba gzhan zil gyis non na mi dmigs te/ dper na skyur ba'i ros chu lta bu dang / nyi ma'i 'od kyis zla ba'i 'od lta bu'o zhe na yod par rab tu grub na ni 'di shes par yang nus na yod par rab tu grub pa ma yin te/thams cad la kha dog la sogs pa'i bye brag thams cad yod par thal bar gyur na mi rung bas so/ /'od la sogs pa gang la yang sra ba la sogs pa nyid yod par rab tu grub pa ma yin no / /de dag mi dmigs pa ni med pa'i phyir ma yin gyi zil gyis non pa'i phyir ro zhes bya ba 'di ji ltar shes par bya/chu skyur ba btab kyang de'i ro ni dmigs pa kho na yin te/ 'dzin pa tha dad pa'i phyir ro/ /'o na ni chu dang rdo ba la sogs pa rnams la yang rkyen gyi khyad par dang phrad pas mtshan nyid brtas pa'i phyir sra ba nyid dang / gsher ba nyid dang / tsha ba nyid dag dmigs pa yin te/sa'i dri dag bzhin no zhe na/ mtshan nyid brtas pa'i phyir yin gyi/ skyes pa'i phyir ma yin pa 'di ji ltar shes par bya/ de lta na ni ha cang thal ches par 'gyur te/ reg bya gzhan bzhin du gzugs dang dri dang ro gzhan rnams dang / sgra yang rkyen rnyed pas dmigs pa'i snga rol nas yod pa nyid du thal ba'i phyir ro//mdo sde gzhan las kyang dge slong bsam gtan byed pa yin zhing rdzu 'phrul dang ldan pa yin la/ sems la dbang thob pa yin na ni shing gi sdong po 'di la khams gang dang gang du mos pa de yang de bzhin du 'gyur te gzhan du ni ma yin no//de ci'i phyir zhe na/ shing gi sdong po 'di la khams sna tshogs yod pas so zhes gsungs so / /de ltar na rkyen gyi khyad par dang phrad na sra ba nyid la sogs pa dag rang rang gi khams las 'byung bar 'gyur ro/ /khams dag dum bu dag kyang ma yin te//cha shas gcig la yang ji ltar mos pa bzhin du yongs su 'gyur ba'i phyir dang / de la yang dum bu mtha' yas pa mi srid pa'i phyir ro/ /sa'i dri ni snga nas kyang dmigs pa nyid yin na de chus gtor na brtas bar 'gyur bar shes par bya nus so/ /gang zhig rkyen dang phrad pas brtas par gyur par shes par rung ba sra ba la sogs pa rnams ni rkyen med na chu la sogs pa rnams la de ltar yod par mi dmigs so//de bas na gong bur bshad pa la skyon gyi gnas skabs de nyid yod do / /'on te rigs las so zhe na/ rgyur byas pa'i gzugs thams cad 'byung ba chen po bzhi dag rgyur byas pa ma yin par 'gyur te/'dus pa kha cig las 'byung ba chen po kha cig yod par khas ma blangs pa'i phyir ro/ /de lta na ni mdo sde dang 'gal te skye mched so so ba'i mdo sde las skye mched dgu po rnams ni re re yang 'byung ba chen po bzhi dag rgyur byas pa'o zhes bshad pa'i phyir dang /lag pa rdob pa lta bu las kyang mig gi sha'i gong bu la 'byung ba chen po bzhi dag yod par bshad pa'i phyir ro/ /mdor na rigs pa ni 'dir tshad ma rnam pa gsum po mngon sum dang rjes su dpag pa dang yid ches pa'i gsung ngo / / de dag las gang yang rung ba zhig dang 'gal bar brgal ba yang rigs pa dang 'gal par brgal ba yin par rig par bya'o/ /dper na dge slong dag gzugs 'das pa yod do/ /gzugs ma 'ongs pa yod do/ /'das pa dang zad pa dang 'gags pa dang bral ba dang yongs su gyur pa gang yin pa de yod do zhes bya ba ni mngon sum dang 'gal ba yin no//'di ltar 'das pa dang ma 'ongs pa ni med pa nyid yin par mngon sum yin te/ dper na rus sbal gyi spu bzhin no/ /'das pa'ang yin la yod pa'ang yin zhes bya ba 'di snga phyi 'gal ba yang yin te/ gal te yod na de ji ltar 'das pa yin/ ma 'ongs pa yang de dang 'dra'o/ /mdo sde gzhan las mig skye ba na gang nas kyang mi 'ong la/ 'gag pa na gang du yang stsogs par mi 'gro'o/ /dge slong dag de ltar na mig ni ma skyes pa las skye zhing skyes nas kyang 'jig go zhes gsungs pas de dang 'dir 'gal ba yin no//gzugs rnams kyi nges par 'byung ba ni gzugs med pa'o zhes bya ba ni rjes su dpag pa dang 'gal ba yin te/ tshor ba la sogs pa rnams ni gzugs la rag las te skye bar mthong ba'i phyir ro/ /de bzhin du sbyin pa las byung ba'i bsod nams bya ba'i gzhi kun tu bsten cing bsgoms te lan mang du byas na longs spyod chen po nyid 'grub par 'gyur ro zhes bya ba yang rjes su dpag pa dang 'gal ba yin te/ser sna can la phyug pa dang / gtong ba la dbul po yang snang ste/ ser sna can yang phyug po nyid yin pa'i phyir dang /gtong ba yang dbul po nyid yin pa'i phyir ro/ /sbyin pa la goms na yang ser sna can du 'gyur bar mi 'os la sbyin pa la ma goms na yang gtong ba dang ldan pa ma yin no/ /de bzhin du gang zhig skye ba'i kun tu sbyor ba ni spangs la mngon par 'grub pa'i kun tu sbyor ba ni ma spangs pa'i gang zag yod do zhes bya ba yang rjes su dpag pa dang 'gal ba yin te/gang zhigs gang du skye ba'i srid pa las 'dod chags dang bral ba de ni srid pa bar ma do las kyang gdon mi za bar 'dod chags dang bral ba yin no/ /dge bsnyen gyi bslab pa'i gzhi lnga zhes bya ba so so'i tshig gi don rab tu dbye ba bshad pa de las chang 'thung ba bcas pa'i kha na ma tho ba dang bcas pa yin no zhes bya ba ni lung dang 'gal ba yin te/lus kyi nyes par spyad pa rnam pa bzhi ste/ srog gcod pa nas myos par 'gyur ba'i khu ba chang 'thung ba yin no zhes bya ba'i bar du 'byung bas bcas pa'i kha na ma tho ba dang bcas pa la ni nyes par spyod pa yin no zhes mi brjod do//de bzhin du shin tu rgyas pa'i sde ni theg pa chen po yin no zhes gang bshad pa yang lung dang 'gal ba yin no / /kha cig na re mdo sde'i le'u grangs rgyas pa rnams ni shin tu rgyas pa'i sde yin gyi theg pa chen po ni ma yin no zhes zer te/ci'i phyir zhe na/ de ni sangs rgyas kyi gsung ma yin no/ /ji ltar sangs rgyas kyi gsung ma yin zhe na/ 'gal ba'i phyir te/ de ni sde pa thams cad la grags pa'i sangs rgyas kyi gsung dang 'gal ba yin no//'di ltar de las ni chos thams cad ni rang bzhin med pa/ ma skyes pa ma 'gags pa/ chos thams cad ni gzod ma nas zhi ba/ rang bzhin gyis yongs su mya ngan las 'das pa zhes bya ba dang / de bzhin du rab 'byor gzugs ni dngos po med do//rab 'byor byang chub kyi bar du yang dngos po med do zhes 'byung la/ sde pa thams cad la grags pa'i sangs rgyas kyi gsung las ni bcom ldan 'das kyis ma rig pa gang zhe na/ gang de dang sngon gyi mtha' mi shes pa zhes bya ba rgyas par 'byung ba nas/ rga shi'i bar du chos rnams kyi rang bzhin yang bstan/'di yod pas 'di 'byung / 'di skyes pa'i phyir 'di skye/ mig dang gzugs la brten nas mig gi rnam par shes pa skye/ 'du byed 'di dag thams cad ni 'das pa zad pa 'gags pa bral ba yongs su gyur pa'o/ /kye ma 'du byed rnams mi rtag /skye zhing 'jig pa'i chos can yin/ /skyes nas 'jig par 'gyur bas na/ /de dag nye bar zhi ba bde/ /dge slong dag 'di lta ste/ 'du byed rnams ni sdug bsngal ba'o/ /mya ngan las 'das pa ni zhi ba'o zhes bya ba dang / rgyu kun 'byung ba las sdug bsngal kun 'byung ba yin la/rgyu 'gags pa las sdug bsngal 'gog pa yin no/ /rgyu dang bcas pas bde 'gror 'gro/ /rgyur bcas nyid kyis ngan 'gror te/ /rgyu dang bcas pas mya ngan 'da'/ /'di kun rgyu dang bcas las byung / /zhes bya ba dang / de bzhin du gzugs ni mi rtag pa sdug bsngal ba 'gyur ba'i chos can no zhes bya ba dang /'jig rten na mkhas pa rnams kyis yod par 'dod pa gang yin pa de ni nga yang yod par smra'o zhes bya ba de lta bu la sogs pa 'byung bas skye ba la sogs pa yang bstan to/ /de'i phyir rab tu grags pa'i sangs rgyas kyi gsung dang 'gal bas theg pa chen po ni sangs rgyas kyi gsung ma yin no//de bas na shin tu rgyas pa'i sde ni theg pa chen po yin no zhes bya ba ni lung dang 'gal ba yin no/ /brgal ba'i tshul ni de yin no/ /de la re zhig sbyor ba 'di ni da ltar byung ba bzhin du 'das pa'i dus la bya ba rigs pa ma yin no zhes gang smras pa de la lan ni 'di yin te/sbyor ba ni da ltar byung ba bzhin du don mang po zhig la 'byung ste/ ma zin nyid dang nye ba nyid/ /nus dang rgyun mi 'chad nyid dang / /de dang chos nyid yang dang yang / /srid dang 'dod rdzogs rnams la 'byung / / ma zin pa nyid la ni re lde byed do zhes bya ba lta bu'o/ /da ltar byung ba dang nye ba nyid la ni gang nas 'ongs zhes bya ba lta bu'o/ /nus pa nyid la ni lan cig smras pas 'dzin to zhes bya ba lta bu'o/ /rgyun mi 'chad pa nyid la ni de ni sha za'o zhes bya ba lta bu'o/ / de'i ngang can nyid la ni rta mi srun pa ni sos za'o zhes bya ba lta bu'o/ /de'i chos nyid la ni skyes pa thams cad ni 'chi'o zhes bya ba lta bu'o/ /yang dang yang nyid la ni mtshan mo zhing lud pa lu'o zhes bya ba lta bu'o/ /srid pa la ni rwa las 'dam bu skye zhing zhes bya ba lta bu'o/ /'dod pa la ni su skom 'thung zhing zhes bya ba lta bu'o//rdzogs pa la bram ze 'di ni rig byed bzhi 'don to zhes bya ba lta bu'o/ /de bas na 'das pa yin yang mdo sde las 'byung ba'i sbyor ba ni da ltar byung ba dang nye ba nyid yin pa'i phyir da ltar byung ba bzhin rig par bya'o/ /dngos po tsam la byed pa por bshad pa ni mi rung ste/bya ba gzhan mi srid pa'i phyir ro zhes smras pa gang yin pa de yang dngos po zhes bya ba 'di ni ci zhig yin/ byed pa po ni gang zhig yin/ ji ltar na byed pa po nyid du bshad pa yin/ dngos po zhes bya ba ni bya ba yin la de la rang dbang yod pa gang yin pa de ni byed pa po yin te dper na 'gro ba ni bya ba yin la de la rang dbang yod pa lhas byin de ni byed pa po yin no//de byed pa po nyid du bshad pa ni 'gro bar byed ces bya ba de lta bu yin no zhe na/ 'o na sa bon las myu gu 'byung bar byed do zhes bya ba gang yin pa'i dngos po de la ji ltar byed pa po nyid du bshad/byed do zhes bya ba gal te/ rang 'od gsal byed yin na de nyid dngos/ /yod de'ang bdog go zhe na ji skad bya/ /ji ltar rang la gsal byed 'byung ba las bcas 'gyur/ /las dang byed po ma nges rang 'dzin skyon der 'gyur/ /byed do zhes bya ba ni mi 'jig yin bar min//yul gzhan du yang grib ma 'gro bar byed do/ /me 'bar zhing 'gro bar byed do zhes bya ba gang yin pa 'di la ci de gnyis la bya ba 'am/ rang dbang yod pa 'ga' zhig yod dam/ ci ste med ce na/ grib ma ni yul gzhan du 'pho ba med de/ de'i rgyu 'dug bzhin du yang nyi ma 'khor ba dang rgyang ring ba dang nye ba las de 'khor ba dang che ba dang chung bar 'gyur ba'i phyir ro/ /de nyid kyi phyir rang dbang yod pa ni med do/ /grib ma yang ci zhig yin par brjod par bya zhe na/ gang gi yul nyi ma dang bar du chod pa na gzugs yod pa rnams gsal bar byed pa'o//me 'bar yang mi 'pho ste/ bud shing gi rang gi phyogs bsregs nas de nyid du 'chi ba'i phyir la/ bud shing gi phyogs tha dad pa las mched pa dang / 'bri ba dang / rno ba dang / zhen pa dag gis de tha dad pa'i phyir ro/ /de'i phyir rang dbang yod pa ni med do//rnam par shes pa la yang gang gi rnam par shes pa'i bya bar brtag pa gang zhig gis rang dbang yod de/ 'di lta ste/ dbang po dang yul snang bar gyur pa dang yid la byed pa'i khyad par gsum las gzhan rnam par shes pa skyed par nus pa ni ma grub la/ de rnams ni gcig la gcig ltos pa'i phyir de la rang dbang yod pa nyid dag la yod de /de'i phyir rnam par shes pa ni gang gi bya ba yang ma yin no/ /rkyen gsum las rnam par shes pa zhes bya ba'i rdzas skye la/ bya ba med par yang yul gang la skye ba de'i rnam par skyes pas na de rnam par shes par byed do zhes bya ste/dper na grib ma 'gro bar byed do/ /me 'bar zhing 'gro bar byed do zhes bya ba bzhin no/ /gal te de gnyis la bya ba med kyang bya ba ni yul re re de skye bar khong du chud pa rnams kyis bsams nas grib ma 'gro bar byed do/ /me 'bar zhing 'gro bar byed do zhes rjod par byed kyi//rnam par shes pa la ni bsam pa'i bya ba 'ga' yang med do/ /de bas na 'di ni mi 'dra'o zhe na/ khong du chud pa rnams kyis kyang de 'gro bar byed do zhes zer bas/ de bas na bsam pa'i bya ba med par yang dper na grib ma dang me 'bar zhing 'gro bar byed do zhes bya ba de bzhin du rnam par shes pas rnam par shes par byed do zhes bshad pa 'di yang mi rigs pa ma yin no//gal te de lta yin du zin nas kyang smra ba'i tshul de ni mtshan nyid med pa yin no zhe na/ mtshan nyid ji lta bur byA ka ra Na las 'byung ba'i mtshan nyid bzhin te/ dngos po dang byed pa dang gzhi la rnam par shes pa zhes bya ba 'di 'byung ngo zhe na/byA ka ra Na'i nang du brjod pa dang / brjod par bya ba ril gyis ma shes par sgra rnams kyi mtshan nyid byas pa 'byung ba gang yin pa de sus nyes/ byA ka ra Na zhes bya ba yang rig byed kyi yan lag yin la/rig byed nyid kyang nyes par bshad pa yin na/ byA ka ra Na lta ci smos/ de las sgra rnams kyi skad kyi mtshan nyid smras pa de la 'phags pa'am/ 'jig rten gyis kyang rjes su bsnyag par ci ga nus re skan/ 'jig rten na yang tshig gi tshul de yod do// // bam po drug pa/ gang gi yon tan dang ni skyon dag rtogs par mi byed pa de blo zhes ji skad bya/ rmongs pa med par gang gi yid la bde bar mi byed pa de bde zhes ji skad bya/ /gang gi de nyid shes pa'i shes rab kyis ni 'gro ba'i skye dang 'jig thob nyung thos kyang / /yul mi nyung la 'jug pa'i blo can de ni 'jig rten dag na shes rab can du 'dod//gang gi blo ni mang du thos kyang skye ba shes par mi byed 'jig pa mi byed de/ /sna tshogs gtam dag byas kyang 'khor ba 'jigs pa mang po dag las grol bar mi 'gyur ro/ /gang gis tshig gi snying ni sdud nus dang //blos phra'i don mthong spyod pa thabs ldan pa/ /de ni skyes bu'o de las gzhan pa phyugs/ /byA ka ra Na las kyang 'di ma nges par smras pa yin te/ mang du 'dren pa yin no zhes bshad pa'i phyir de ni mtshan nyid med pa yang ma yin no/ /gzhan yang byA ka ra Na las byed pa po ni rang dbang yod pa'o zhes gang smras pa'i rang dbang yod pa zhes bya ba de ci zhig yin/ci re zhig rang dgar 'jug pa yin nam/ 'on te gzhan la mi ltos par 'jug pa zhig yin/ des cir 'gyur zhe na/ rang dgar 'jug pa rang dbang yod yin na/ /sems pa med pa byed por mi 'gyur ro//de'i phyir mes sreg par byed do/ /shing gis 'tshed par byed do zhes byed pa por tha snyad gdags par mi rung ste/ de gnyis la 'dod pa med pa'i phyir ro/ /gang zhig gnyid log dbugs ni 'byin pa dang / /mi 'dod bzhin du sdug bsngal myong byed pa/ /de yang byed pa por mi 'gyur te/'dod pa med par dbugs dbyung ba'i phyir dang / mi 'dod bzhin du sdug bsngal myong ba'i phyir ro/ /gal te gzhan la mi ltos 'jug yin na/ /gru 'gro ba dang ljon shing 'gul ba dang / /me 'byung ba dang bum pa dag dang ni/ /chu gnas zhes bya rigs pa ma yin no//'di ltar 'phul bar byed pa la ma ltos par ni gru 'gro ba yang med la ljon shing 'gul ba yang med do/ /skye ba'i rgyu la ma ltos par me 'byung ba yang med la/ gzhi la mi ltos par chu gnas pa yang med do/ /gal te de lta yin du zin kyang gru ni rten du gyur pa nyid kyis rang gi bya ba dag la ltos pa med par 'jug go//de lta bas na de ni de la rang dbang yod pa yin no/ /lhag ma rnams la yang de bzhin du sbyar ro zhe na/ de la byung ba'i phyir na rten gyur pa'i/ /de yang de dang gzhan du 'brel phyir ro/ /'di ltar de la 'byung ba gang yin pa'i gru de bya ba dag la rten du gyur par brtags grang na/de yang de dang rgyu gzhan dang 'brel pa las 'byung ba'i phyir ji ltar de la rang dbang yod pa nyid du 'gyur/ bya ba gang byung ba ni de la gnas pa'i phyir de la gnas pa na gru dang rang dbang yod pa nyid yin no zhe na/ gang la de rang dbang yod pas de'i tshe de la ci zhig byar yod/skye ba yang skye ba po'i bdag nyid du gyur pa yin na de de'i rten du ji ltar rigs/ bdag nyid du ma gyur ba yang de la 'byung re skan/ skye ba la yang skye ba thug pa med par gyur pas ha cang thal ches par yang 'gyur ro/ /'o na brjod par 'dod pa las byed pa po rnams kyi sbyor bar 'gyur te/gang gi tshe gru 'gro ba la rang dbang yod pa nyid du brjod par 'dod pa de'i tshe gru 'gro'o zhes bya ba'i sbyor bar 'gyur ro/ /gang gi tshe bdag nyid thob pa la rang dbang yod pa nyid du brjod par 'dod pa de'i tshe 'byung ngo zhes bya ba'i sbyor bar 'gyur ro zhe na/ gal te brjod par 'dod pa las yin na gru 'dren pa na 'gro'o zhes zer ba ni gzhan gyi dbang nyid dam/rang dbang yod pa nyid dam/ ci zhig tu brjod par 'dod/ de bzhin du 'byin par byed pa na me 'byung ngo zhes bya ba yang ci zhig brjod par 'dod pa yin/ smras pa/ gnyi ga yin no zhe na/ mtshan nyid med bzhin du yang mkhas pas ci dgar byed pa po rnams sbyar bar rung ngam/smras pa rung ste/ 'di ltar nges pa'i tshig gi chos nyid kyis rang gi mtshan nyid 'dzin pas na chos zhes bya'o zhes bya ba de la byed pa po dang las dang bya ba'i dbye ba yang med la/ brjod par 'dod pa las ni de'i sbyor bar 'gyur ro zhe na/gal te rung na byed pa po dang bya ba'i dbye ba med kyang rnam par shes par byed pas na rnam par shes pa'o zhes bya ba 'di yang ci'i phyir mi rung / ci'i phyir na 'di la byed pa po med bzhin du brjod par 'dod ce na/ rnam par shes pa tsam la byed pa po nyid du tha snyad 'dogs kyi bdag tu lta bas kun tu brtags pa'i byed pa po ni 'ga' yang yod pa ma yin no zhes bstan pa'i phyir ro//ji ltar rnam par shes par byed pas na rnam par shes pa'o zhes bya ba de bzhin du rab tu shes par byed pas na shes rab po zhes bya ba yang rigs par bshad pa yin no//'jig rten na khyim gyi grwa zhum mo/ /grwa rlos so/ /sgo 'di yul bcom brlag tu 'byung ngo / /lam 'di yul bcom brlag tu 'gro'o zhes gang ji skad du zer ba yang de dag la brjod par 'dod pa byed pa po 'ga' yang ci zhig yod de/ de lta bas na brjod par 'dod pa byed pa po med par yang byed pa po nyid du bshad pa ni legs pa yin no//mig dang gzugs la brten nas mig gi rnam par shes pa skye'o zhes bya ba de lta bu'i sbyor ba ni byed pa po gcig la bya ba gnyis yod pa'i dus snga ma shos kyi bya ba la 'byung ba yin no zhes gang smras pa de ci khyod 'dod pa yin nam/'on te 'jig rten na de ltar mthong ba yin/ smras pa/ 'jig rten na de ltar mthong ba yin no zhe na/ 'jig rten na ni gzhan du yang mthong ste/ 'di ltar de lta bu'i sbyor ba ni byed pa po tha dad pa la yang mthong ste/ dper na mar 'thungs nas stobs 'byung ngo / / seng ge mthong nas 'jigs pa 'byung ngo zhes bya ba lta bu yin no/ /de bzhin du skar rgyal skyes sam/ rgyal la skyes gang yin pa de'i mig de la brten nas rnam par shes pa skye'o zhes bya bar 'gyur ro/ /dus snga ma shos ma yin pa la yang mthong ste/ dper na kha gdangs nas nyal zhes bya ba'am/mig btsums nas nyal zhes bya ba lta bu'o/ /ci kha gdangs nas sam/ mig btsums nas dus phyi ma la nyal ba ma yin nam zhe na/ mi rung ste/ ji ltar sngar khrus byas nas phyis za ba lta bur sngar kha gdangs pa'am/ mig 'dzums par byed la/ phyis nyal ba'i don 'dir ni khong du chud par mi 'gyur ro//'on kyang kha gdangs pa'am / mig btsums pa ni nyal ba dang dus mnyam du 'byung ba yin par mngon te/ 'di ltar kha gdangs nas phyis nyal bar byed pa gal te kha ma gdangs na kha gdangs nas nyal bar byed ces bya bar mi 'gyur ba'i phyir ro//de bzhin du/ 'od ldan rnams ni 'od dag gis/ /'jig rten bkang nas der shar to/ /gang gis cha shas zhugs nas kyang / /nang na yod pa'i mun pa bsal/ /zhes bya ba lta bu ste/ de ni sngar 'gengs pa 'am 'jug par byed la phyis 'char ba'am/ sel ba yang ma yin no//de bzhin du khar ba khral zhes zer nas lhung zhes bya ba lta bu ste/ de yang sngar khrol zhes zer la phyis lhung ba yang ma yin te/ khar ba lhung ba na sgra khral zhes zer te/ brgyab pa'i phyir ro/ /de lta bu'i sbyor ba ni rgyu'i don la yang mthong ste/ dper na bud shing la brten nas me 'byung /til la brten nas til mar 'byung / sprin la brten nas char pa 'bab ces bya ba lta bu ste/ mes sngar bud shing la'am/ til mar gyi til la brten cing phyis 'byung ba yang ma yin la/ char pas kyang sngar sprin la brten te phyis 'byung ba yang ma yin te/ rgyu de nyid kyis ji skad smos pa bzhin du 'byung bar mngon no//gzhan yang gang la snga phyi bya ba dag dmigs pa de kha cig la de lta bu'i sbyor ba'i rgyu'i don nyid du mthong ste/ dper na mar 'thungs nas stobs dang ldan par 'gyur ro zhes bya ba lta bu ste/ 'di ltar mar 'thungs pa dang stobs dang ldan pa dag ni ji ltar khrus bya ba dang /zas za ba dag ltar snga phyi tsam du rtogs par bya ba ma yin gyi / mar 'thungs pa'i rgyu las stobs dang ldan pa nyid 'byung bar shes par bya'o/ /de bzhin du mig dang gzugs kyi rkyen gyis mig gi rnam par shes pa skye ba na mig dang gzugs la brten nas skye'o zhes bya'o//bcom ldan 'das kyis don de nyid gsal bar mdzad pa ni 'di skad ces bka' stsal te/ rten cing 'brel bar 'byung ba gang zhe na/ 'di lta ste/ 'di yod pas 'di 'byung / 'di skyes pa'i phyir 'di skye ste/ 'di lta ste/ ma rig pa'i rkyen gyis 'du byed rnams zhes bya ba de lta bu la sogs pa bka' stsal pa/sbyor ba 'di ci nas kyang rgyu'i don kho na yin par shes par bya'i/ dus snga ma shos kyi bya ba'i don du ni ma yin no/ /re zhig 'di yang dpyad par bya ste/ gang gi tshe rnam par shes pa skye ba de'i tshe ci rnam par shes pa yod dam 'on te med/des cir 'gyur zhe na/ gal te yod na de'i tshe de skyes pa nyid yin pas yang ji ltar skye/ byung ba ni skyes pa yin gyis yod pa ma yin no zhe na/ gang gi tshe de zhig pa'i tshe skyes pa yin par 'gyur ro/ /nges pa'i tshig las kyang yod pa zhes bya ba ni sems can skyes pa nges par gzung ba la bya'o zhes bshad pas de yang 'gal lo//gal te yang yod pa ma skyes pa zhig yin na skye ba'i snga rol na yod pa zhes bya bar 'gyur ro/ /de'i phyir brten nas zhes bya ba yang grub bo/ /yang skye ba'i tshe yang ma skyes pa yin te/ skye ba'i 'og tu rnam par shes pa skyes pa yin no//de'i tshe yang de zhig pa kho na yin pas gang gi tshe zhig pa de'i tshe skyes pa yin par 'gyur ro/ /'on te med pa zhig yin na ji ltar de med kyang skye ba de bzhin du skye ba'i snga rol nas med kyang brten nas zhes bya bar 'gyur bar yang ci'i phyir mi 'dod na yang yod pa dang med pa zhes bya ba thal ches pa'i tshig mang po bor te/ci de'i tshe rnam par shes pa rnam par shes pa'i bdag nyid kyis bdag tu bcas pa yin nam/ bdag min pa yin zhes dpyad par bya'o/ /gal te bdag tu bcas pa yin na de'i tshe de skyes pa nyid yin pas yang skye bas ci zhig bya/'on te bdag med pa yin na ji ltar de bdag med bar skye ba dag la byed pa po yin pa de bzhin du brten nas zhes bya ba yang grub pa yin no/ /re zhig skye zhes bya ba'i don 'di ci yin/ 'byung bar byed ces bya ba'i tha tshig go zhe na/ 'byung bar byed ces bya ba gang yin pa des ci zhig byed na 'di ltar byed pa por brjod/skye bar byed do zhe na/ gal te skye ba bskyed par bya ba'i bdag tu gyur pa yin na ji ltar rang la byed/ 'on te bdag tu gyur pa ma yin na ni de de las logs shig na mi dmigs so/ /yang na don gang gis na de byed ces bya/ byed pa la rang gi don ni 'ga' yang med do //'di ltar bde ba byed ces bya ba ni skyed ces bya bar rtogs so/ /kha spu byed ces bya ba ni 'dreg par byed ces bya bar rtogs so/ /rkyal pa la byed ces bya ba nyed par byed ces bya bar rtogs so/ /gla byed ces bya ba ni gla byin nas 'chol bar byed ces bya bar rtogs so//sbyang du 'bras byed ces bya ba ni 'jog par byed ces bya bar rtogs so/ /pha'i tshig bzhin byed ces bya ba ni des smras pa bzhin du sgrub par byed ces bya bar rtogs so/ /skabs byed ces bya ba ni sgrib pa sel bar byed ces bya bar rtogs so/ /de lta bas na skye ba'i byed pa po'i byed ces bya ba'i don brjod par bya dgos so//gal te skyed par byed pa'i don yin no zhe na/ skye ba yang skye bar 'gyur bas de la yang skye ba gzhan yod de/ thug pa med pas ha cang thal ches par 'gyur ro/ /yang na de la skye ba'i rag lus pa ci zhig yod na gang gi phyir skye bar byed ces bya/de lta bas na bya ba med par yang bdag nyid thob pa tsam la byed pa po bzhin du rnam par shes pa skye'o zhes bya ba rkyen rnyed pa tsam la brten nas zhes bya ba bshad pa yin te/ 'di la bya ba 'ga' yang med la byed pa po yang med na / byed pa po gcig po nyid lta ga la yod de / de lta bas na brten nas skye zhes bya ba'i sbyor ba 'di ni rigs pa kho na yin no/ /mtshan nyid 'dra ba la dgos pa med par bye brag tu bshad pa ni rigs pa ma yin no zhes gang smras pa de ni dgos pa med pa ma yin te/ 'di ltar gzugs de la gang ci yang rung ba zhes bshad pa ni gzugs kyi don du mar rab tu bstan pa'i phyir ro//'di ltar gzugs kyi don ni rnam pa gsum ste yul brtag tu rung ba'i don dang / lag pa la sogs pa'i 'dus te reg pa dag gis 'gyur ba skyed par gzugs su rung ba'i don dang / gzugs kyi de gdags pa gzugs su rung ba'i don yin te/ 'di ltar bstan du yod pa'i gzugs 'di na'o pha bi na'o zhes yul brtag tu rung ba'i phyir gzugs yin pa dang /thogs pa dang bcas pa'i gzugs lag pa la sogs pa'i 'dus te reg pa dag gis 'gyur ba bskyed pa gzugs su rung ba'i phyir gzugs yin pa dang / bstan du med cing thogs pa med pa'i gzugs lus dang ngag gi rnam par rig byed ma yin pa zhes bya ba gzugs kyi de gdags pa gzugs su rung ba'i phyir gzugs yin no//'di ltar de ni lus dang ngag gnyis med na gdags su med pa yin te/ gzugs med pa na de gdags pa med pa'i phyir ro//rnam par rig byed ma yin pa'i gzugs yod pa nyid du ji ltar shes par bya zhe na/ gang gi phyir skye mched so so ba'i mdo las chos kyi skye mched bstan du med cing thogs pa med pa zhes ni gsungs kyi gzugs can ma yin pa zhes ni ma gsungs pa yin la/ yang 'di ltar glang po che'i lta bas lta bu las chos kyi skye mched bstan nas/de la chos gzugs can gang dag yin pa 'di ni gzugs kyi phung po yin no zhes gsungs pa yin te/ rnam par rig byed ma yin pa bor na chos kyi skye mched du gyur pa chos gzugs can gzhan gang dag yod/ gzugs can 'das pa dang ma 'ongs pa gang yin pa dag chos yin pa de ltar ci'i phyir mi 'dod ce na/skye mched so so ba'i mdo dang 'gal te/ chos kyi skye mched ni skye mched bcu gcig gis ma bsdus pa bstan du med cing thogs pa med pa'o zhes 'byung la/ mig la sogs pa 'das pa dang ma 'ongs pa dag ni ji ltar rigs par bstan du yod cing thogs pa dang bcas pa'i phyir ro//yang na gzugs nyid du yang 'dod par mi bya ste/ 'di ltar de dag ni de'i tshe gzugs su med pas so/ /skye mched bcu po dag kyang dus gsum po nyid du mi 'gyur te/ mig la sogs pa 'das pa dang ma 'ongs pa dag ni chos kyi skye mched yin pa'i phyir ro//de bzhin du gzugs kyi skye mched mang po dag las gcig gzugs kyi skye mched du gsungs pa yang skye mched rnams bcu gnyis kho nar rnam par gzhag pa'i phyir ro/ /de rnam par gzhag pa yang yul can dang yul nyid du gnyis gnyis 'brel bar rab tu bstan pa'i phyir ro//yid kyi skye mched dang chos kyi skye mched kyi phyogs gcig gi yul ni thams cad yin pas gnyis su med pa nyams pa ma yin nam zhe na/ 'o na de lta na ni dbang po drug gi dbang du mdzad nas 'brel bar rab tu bstan pa'i phyir te/ dbang po 'di'i yul ni 'di kho na yin gyi gzhan ni ma yin no zhes gnyis tshan lnga dag dang / dbang po 'di kho na'i yul ni 'di yin gyi gzhan ni ma yin no zhes gnyis tshan drug pa yin no/ /dbang po lnga po dag kyang dbang po drug po kho na'i yul yin pas gnyis tshan drug par nges pa yang nyams pa ma yin nam zhe na/'o na ni dbang po gang kho na'i yul kho na gang yin pa'o zhes gnyis tshan drug pa yin no/ /de ltar na dbang po lnga po dag ni chos kyi skye mched nyid yongs su spangs pa yin no/ /'di ltar de dag ni yid kyi yul 'ba' zhig ma yin gyi rten yang yin te/yid ni rnam par shes pa'i tshogs drug gi mtshan nyid yin pa'i phyir ro/ /bsdus pa'i tshigs su bcad pa ni / dbang po gang gi don gang nyid yin pa gnyis tshan lnga dag go/ /gang nyid kyi ni don nyid gang / /gnyis tshan skye mched drug pa yin/ /gal te mig la sogs pa lnga po dag chos kyi skye mched nyid du gyur na cir 'gyur zhe na/skye mched so so ba'i mdo las dge slong dag chos phyi'i skye mched ni skye mched bcu gcig dag gis ma bsdus pa bstan du med cing thogs pa med pa'o zhes nges par mdzad pa mi mdzad par 'gyur ro/ /sems ni skad cig ma zhes bya ba yin la/gong du 'gro ba yang yin no zhes gang gsungs pa yang de'i rgyun la dgongs nas gsungs pa'i phyir 'gal ba med do/ /grib ma dang me 'bar ba 'gro ba bzhin no/ /bden pa rnam bzhi dang / gsum dang / gnyis dang / gcig ces grangs tha dad par gsungs pa gang yin pa der yang dgongs pa tha dad pa'i phyir 'gal ba med do //kun nas nyon mongs pa dang rnam par byang ba'i phyogs gnyis mdor bsdus na rgyu dang 'bras bu phyin ci ma log pa nyid yin par dgongs te bden pa bzhi dag tu gsungs pa yin no/ /ming gi bram ze rnams mngon par mtho ba'i rgyu'i skabs su las dang las kyi 'bras bu dang bdag ni de'i bdag po yin pa'i dbang du byas nas go rims bzhin du mchod sbyin rnams la sems can de dang de dag ni gsad par bya ba yin no zhes bya ba dang /'jig rten rtag pa dag 'thob bo zhes bya ba dang /de'i 'bras bu bdag la 'byung bas bdag ni de'i 'bras bu la za ba yin no zhes bram ze'i bden pa gsum dag tu rnam par 'jog par byed do/ /de yang don yang dag pa'i bram ze'i rnams la brdzun pa yin no/ /bzlog na ni bden pa yin pa'i phyir de la dgongs nas bram ze'i bden pa gsum du gsungs so//'jig rten pa'i shes pa ma 'khrul ba'i yul dang / 'jig rten las 'das pa'i shes pa'i yul la dgongs nas bden pa gnyis po kun rdzob kyi bden pa dang / don dam pa'i bden par gsungs so/ /brjod pa ni kun rdzob yin pas des khong du chud par bya ba'i bden pa ni kun rdzob kyi bden pa yin te/gang la brjod par 'jug pa ste/ dper na rkang pa gnyis kyis brgal bar bya ba'i 'bab stegs la rkang pa'i 'bab stegs zhes bya ba dang / ko grus brgal bar bya ba'i 'bab stegs la ko gru'i 'bab stegs zhes bya ba lta bu'o//'jig rten las 'das pa ni ye shes dam pa yin no/ /de'i don yin pas don dam pa ste/ de'i yul gang yin pa'o/ /ston pa rnams kyi lugs tha dad pa la dgongs nas bden pa ni gcig kho na ste/ gnyis pa med do zhes gsungs pa yin te/ 'di ltar gnyis phan tshun 'gal ba dag ni bden par bya bar mi nus so//de lta bas na dgongs pa tha dad pa'i phyir bden pa rnams la grangs tha dad par bstan pa la snga phyi 'gal ba med do/ /kha cig las/ mi rnams kyis ni 'di na bsod nams dang / /sdig pa gang yin gnyis ka byed pa de/ /zhes gsungs pa dang /kha cig las byed pa po mi dmigs so zhes gang gsungs pa gang yin pa der yang dgongs pa tha dad pa'i phyir 'gal ba med de/ 'di ltar phung po'i rgyud gang la mi rnams zhes bya ba de la de gnyis kyi rgyud yod cing de kho na la de gnyis kyi 'bras bu 'byung bas 'di las dgongs nas/mi rnams kyis ni 'di na bsod nams dang / /sdig pa gang yin gnyis ka byed pa de/ /de yi bdag gir bya ba yin zhing nges/ /de yang khyer te 'gro bar byed pa yin/ /zhes gsungs pa yin no/ /bdag tu lta bas kun tu brtags pa'i byed pa po rang dbang yod pa la dgongs nas ni byed pa po mi dmigs so zhes gsungs pa yin gyi rgyu tshogs pa'i mtshan nyid las ni ma yin te/'di ltar gang zhig phung po 'di dag 'dor zhing phung po gzhan dag tu mtshams sbyor bar byed pa'i zhes khyad par du mdzad pa yin no/ /de bas na dgongs pa tha dad pa'i phyir snga phyi 'gal ba med do//'dir yang bshad pa/ ras bal gyi ni sa bon dang / /ma tu lung ga'i me tog la/ /rgya skyegs kyis ni kha bsgyur na/ /tshon de nub par gyur kyang ni/ /rgyud la bsgos pa'i rim pa las/ /ras bal ze ba dmar skye ltar/ /las rnams nub kyang de'i 'bras bu//skye la de yi chos nyid do/ /gzugs gang yin pa ci yang rung ste/ de thams cad 'byung ba chen po bzhi dag dang 'byung ba chen po bzhi dag rgyur byas pa'o zhes bya ba la ci 'di rdzas kyi dbang du mdzad de gsungs sam/ 'on te gong bu'am/ rigs las sha na zhes smras pa gang yin pa yang rigs kyi dbang du mdzad nas gsungs pas 'di la ji skad smras pa'i nyes pa med de/de kho na bzhin du khas blangs pa'i phyir ro/ /de lta na ni mdo sde dang yang mi 'gal te/ skye mched so so ba'i mdo sde las skye mched dgu po rnams ni re re yang rigs smos pas ji ltar srid pa 'byung ba chen po bzhi dag rgyur byas pa'o zhes bshad pa'i phyir 'dus pa re re ni ma yin no//lag pa rdob pa lta bu las ji skad gsungs pa de kho na bzhin du khas blangs pa'i phyir te/ 'di ltar mig gi sha'i gong bu la 'byung ba thams cad kyi rgyu las byas pa dmigs pa'i phyir ro/ / de lta bas na ji skad smras pa'i rigs pa dang 'gal ba med do/ /gzugs 'das pa yod do/ /gzugs ma 'ongs pa yod do zhes gsungs pa gang yin pa yang 'di lta ste/ de 'das pa'am ma 'ongs pa de lta bur ni yod ces bya ba'i gzugs kyi bdag nyid kyis ni ma yin no/ /ji ltar na de 'das pa yin zhe na/sngon byung ba nyid kyis so/ /ji ltar na ma 'ongs pa yin zhe na/ 'byung bar 'gyur ba nyid kyis te/ sa bon yod pa'i phyir ro/ /de ltar na de yod pa zhes bya ste/ de ltar snang ba'i phyir ro/ /gzhan yang gzugs gang zhig med par yang de yod do zhes bya ba de rigs sam zhe na/ji ltar gzhan du brjod par bya bar 'gyur/ /gzugs 'das pa med do/ /gzugs ma 'ongs pa med do zhes brjod par bya'o zhe na/ de ltar brjod na gzugs sngon byung ba nyid dang 'byung bar 'gyur ba nyid la skur par 'gyur ro/ /'o na de ltar na ni gzugs 'das pa sngon byung ba dang /gzugs ma 'ongs pa 'byung bar 'gyur ba zhes brjod par bya'o zhe na/ de ltar brjod na sngon byung ba na de 'das pa yin gyi/ da ltar ni 'das pa ma yin pas 'das pa nyid las rab tu nyams pa yin par bstan par 'gyur la/ 'byung bar 'gyur ba ni de ma 'ongs pa yin gyi/da ltar ni ma 'ongs par mi 'gyur la/ ma 'ongs pa nyid kyang ma phyin pa zhes bya bar bstan par 'gyur ro/ /'das pa dang ma 'ongs pa zhes brjod pa nyid kyis kyang byung ba dang 'byung bar 'gyur ba'i don smos pa'i phyir zlos bur bstan par 'gyur ro//gal te de ltar bstan pa la dga' na ni yod pa zhes bya ba'i sgra de nyid tshig gi phrad yin pa'i phyir ji ltar rigs par dus gsum gyi yul yin par rig par bya'o/ /de lta bas na ji ltar bkod pa nyid rigs pa yin no/ /gal te gzugs kyi mtshan nyid thal ba'am/ ma grub pa yin na de ji ltar gzugs zhes bya zhe na/sngon byung ba dang 'byung bar 'gyur ba'i tha snyad kyis te/ dper na sa bon nyams pa zhes bya ba dang / phye btag go zhes bya ba lta bu'o/ /las zad pa dang / 'das pa dang / 'gags pa dang / bral ba dang / yongs su gyur pa gang yin pa de yod do zhes gsungs pa gang yin pa de ni des sems kyi rgyud la 'bras bu 'byin pa'i nus pa skyed pa la dgongs nas gsungs pa yin pa'i don rtogs pas gzhan du mi 'thad pa'i phyir ro//de las skyes pa la de gdags pa ni grong la spyod do/ /pa na za'o zhes bya ba yin zhing ji skad du reg pa'i skye mched drug po de sngon mngon par 'dus byas pa la mngon par bsams pa 'di dag ni sngon gyi las yin par rig par bya'o zhes 'byung ba lta bu yang yin no//dgongs pa 'dis 'das pa dang ma 'ongs pa yod pa nyid du gsungs pa de dang / mig ni ma skyes pa las skye zhing skyes nas kyang 'jig go zhes bya ba yang rigs pa yin no//de lta bas na 'dir yang mngon sum dang 'gal ba med cing snga phyi 'gal ba yang med do/ /gzugs rnams kyi nges par 'byung ba ni gzugs med pa'o zhes bya ba'i rjes su dpag pa yang 'gal ba yin te/ tshor ba la sogs pa rnams ni gzugs la rag las te skye bar mthong ba'i phyir ro zhes smras pa gang yin pa de yang de yin te/da ltar gzugs las 'dod chags dang ma bral ba rnams gzugs dang lhan cig tu lus mngon par 'grub pa ni mthong ngo / /gzugs las 'dod chags dang bral ba rnams ni gzugs med bzhin du lus mngon par 'grub pa yin pas rjes su dpag pa de mi 'thad do//yang na gzugs las 'dod chags dang bral ba yin no zhes bya bar khas blang bar mi bya'am/ yang na gzugs las 'dod chags dang bral ba de la yang phyis gzugs mngon par 'grub pa kho na yin no zhes bya ba khas blang bar bya grang na/de yang mi rigs te/ gzugs med pa'i snyoms par 'jug pa rnams ni 'di nyid du rab tu grags pa'i phyir ro / /'dod pa rnams la rnam par sun 'byin par byed pa na 'dod pa rnams las 'dod chags dang bral ba yin la/ gzugs rnams la rnam par sun 'byin par byed pa na gzugs rnams las ma yin no zhes bya ba'i rigs pa med pa'i phyir ro//'phags pa la yang phung po mngon par 'grub pa spangs su zin kyang thar pa med par thal bar 'gyur ba'i phyir ro/ /sbyin pa las byung ba'i bsod nams bya ba'i gzhi kun tu bsten na longs spyod chen po nyid 'grub par 'gyur ro zhes bya ba yang rjes su dpag pa dang 'gal ba yin te/ser sna can yang phyug po nyid yin pa'i phyir dang / gtong ba yang dbul bo nyid yin pa'i phyir ro zhes smras pa gang yin pa de yang 'dir 'gal ba ci yod / ser sna can yang kha cig gis sngon lan cig snod khyad par can la phul ba'i phyir 'di la phyug po nyid thob pa gang yin pa thob pa yin no//gtong ba yang kha cig gis gzhan dag longs spyod dang bral bas 'di la phyug po ma thob pa yin pas 'bras bu 'byin pa la ni de rnams kyi las stobs dang stobs med pa yin par brtag par bya'o//gang zhig skye ba'i kun tu sbyor ba ni spangs la mngon par 'grub pa'i kun tu sbyor ba ni ma spangs pa'i gang zag yod do zhes bya ba yang rjes su dpag pa dang 'gal ba yin te zhes smras pa gang yin pa de yang 'dir lha rnams dga' bas ni spangs pa'i don mi shes te/'dir don ni skye ba'i srid pa las 'dod chags dang bral ba srid pa bar ma do las ni ma yin pa'i gang zag med do zhes bya ba 'di yin no/ /de ltar yang yin te/ 'dir don ni gang zhig srid pa bar ma do kho na'i zag pa zad pa mngon sum du byed pa'i phyir mi 'ong ba kha cig rgyud yongs su smin cing mngon par shes pa myur ba yin pa de la skye ba'i srid par nying mtshams sbyor bar byed pa'i nyon mongs pa ni mi skye ba kho na yin la srid pa bar ma dor nying mtshams sbyor bar byed pa ni skye ba yin te/de ni mi skye ba'i chos nyid du gnas pa'i phyir skye ba'i srid pa ni spangs pa zhes bya la/mngon par 'grub pa'i kun tu sbyor ba ni ma yin no zhes bya ba 'di yin no/ /de ltar na mi 'gal ba yin no/ /gzhan dag na re/ spangs pa zhes bya ba ni so sor brtags pa ma yin pa'i 'gog pa thob pa la dgongs nas gsungs pa yin no zhes zer ro//yang 'dir bshad pa/ bar ma dor ni zad pa yi/ /kun nas sbyor ba gang dag gis/ /skye ba'i srid par mtshams sbyor te/ /de yi so sor brtags min pa'i/ /'gog pas 'gags te des na de'i/ /de spangs pa zhes bya bar brjod/ /gnyis po'i so sor brtags pa yi / / 'gog pa cig car yin par 'dod/ /chang 'thung ba bcas pa'i kha na ma tho ba dang bcas pa yin no zhes bya ba ni lung dang 'gal ba yin te/ lus kyi nyes par spyad pa'o zhes 'byung ba'i phyir ro zhes smras pa gang yin pa de la yang re zhig 'di dpyad par bya ste / ji tsam gyis na rang bzhin gyi kha na ma tho ba dang bcas pa'am/bcas pa'i kha na ma tho ba dang bcas pa yin/ gang nyon mongs pa can gyi sems kho nas spyod pa de ni rang bzhin gyi kha na ma tho ba dang bcas pa yin no/ /gang nyon mongs pa can ma yin pa'i sems kyis kyang spyad par nus bzhin du nyes pa gzhan spang ba'i phyir bcom ldan 'das kyis bcas pa de ni bcas pa'i kha na ma tho ba dang bcas pa yin no//da ni 'di dpyad par bya ste ci chang gang zhig mi 'dod bzhin du yang nyon mongs pa can ma yin pa'i sems kyis sman pa'i lung las so sor brtags nas 'thung bar srid pa yod dam/ 'on te med/ des cir 'gyur zhe na/ gal te yod na nyon mongs pa can ma yin pa'i sems ji ltar nyes par spyad par 'thad/ 'on te med na de ltar 'thung ba la ji ltar nyon mongs pa can gyi sems su 'thad ce na/ des gang la chang ngo snyam du rig nas ngo tsha med pa nyid kyis kha na ma tho ba dang bcas pas 'thung ngam/yang na kha na ma tho ba dang bcas pa'i chang la kha na ma tho ba med pa'o snyam du sems na'o/ /gang zhig tshod zin pas 'thung ba ni myos par mi nus la/ de ltar yang shes nas 'thung ba gang yin pa de gang gis na kha na ma tho ba dang bcas par 'gyur te/ dper na dug tshod zin par zos pa ni dug gi nyes pa'i bya ba mi nus pas kha na ma tho ba dang bcas pa mi 'byung ba lta bu'o//de lta bas na chang 'thung ba thams cad nyes par spyod pa ma yin no/ /chang 'thung ba rnams ni phal cher rgyags par bya ba'i phyir ji ltar na dga' bar 'gyur snyam pa'am/ bdag myos par 'gyur ro snyam du sems bzhin du chang 'thung ste/ de dag gi de ni lus kyi nyes par spyad par rnam par gzhag ste/ nyon mongs pa can gyi sems yin pa'i phyir ro/ /de la dgongs pa ni de yin par rig par bya'o/ /de yang rang bzhin gyi kha na ma tho ba dang bcas pa yin te/dgag pa bcas pa med kyang kha na ma tho ba dang bcas pa nyid yin pa'i phyir ro/ /rnam par bshad pa'i rigs pa las le'ur bcad pa gsum pa'o// // grags pa'i sangs rgyas kyi gsung dang 'gal ba'i phyir theg pa chen po ni sangs rgyas kyi gsung ma yin no//de lta bas na shin tu rgyas pa'i sde ni theg pa chen po yin no zhes bya ba de lung dang 'gal ba yin no zhes smras pa gang yin pa yang gal te de lta bu'i rang bzhin dang 'gal ba'i phyir theg pa chen po ni sangs rgyas kyi gsung ma yin na/khyed la grags pa'i sangs rgyas kyi gsung gang yin pa gzhan yang de bzhin du sangs rgyas kyi gsung du mi 'gyur ro/ /ci'i phyir zhe na/ 'gal ba'i phyir ro/ /de las ni kha cig tu tshor ba ni gsum ste/ bde ba dang sdug bsngal ba dang / bde ba yang ma yin sdug bsngal ba yang ma yin no zhes bya ba dang /de bzhin du bde ba'i tshor ba tshor ba na bde ba'i tshor ba tshor ro snyam du yang dag pa ji lta ba bzhin du rab tu shes so zhes gsungs la/ yang gang ci tshor yang rung ste/ de ni 'di ltar sdug bsngal lo zhes bya ba dang / de bzhin du bde ba'i tshor ba ni sdug bsngal nyid du blta bar bya'o zhes bya ba dang /de bzhin du sdug bsngal la bde bar 'du shes pa ni phyin ci log yin no zhes gsungs pa dang / kha cig tu chos thams cad ni bdag med pa'o zhes bya ba dang / de bzhin du/ 'di na bdag gam sems can med / / chos 'di rgyu dang bcas las 'byung / /zhes bya ba dang / srid pa'i yan lag bcu gnyis dang / /phung po dang ni skye mched khams/ /de dag thams cad rnam phye na/ /gang zag dmigs pa ma yin no/ /zhes gsungs la/ yang / bdag nyid bdag gi mgon yin gyi/ / gzhan lta su zhig mgon du 'gyur/ /bdag nyid legs par dul bas ni/ /mkhas pa mtho ris thob par 'gyur/ /zhes bya ba dang / de bzhin du/ sor phreng nga ni kun tu sems can thams cad la/ /dbyug pa dag ni spang bar byas nas 'dug pa yin/ /zhes bya ba dang / de bzhin du 'jig rten du skye ba na gang zag gcig skye'o zhes gsungs pa dang / kha cig tu 'di na kha cig mtshams med pa lnga'i las byas shing bsags pas lus zhig ma thag tu sems can dmyal ba rnams su skye bar 'gyur ro zhes gsungs pa la yang / pha dang ma ni bsad byas shing //rgyal po bram ze gtsang sbra can/ /yul 'khor 'khor dang bcas bsad na/ /bram ze sdig pa med par 'gyur/ /zhes gsungs pa yin te/ de ltar phan tshun 'gal ba'i phyir dang / sngar brgal ba bstan pa gang yin pa'i 'gal ba de'i phyir de la ni kha cig sangs rgyas kyi gsung du mi 'gyur ro//de la ni 'gal ba med de/ 'di ltar de ni nges pa'i don yin te/ kun dga' bo ngas 'du byed mi rtag pa nyid dang / 'du byed 'gyur ba nyid la dgongs nas gang ci tshor yang rung ste/ de ni 'di ltar sdug bsngal lo zhes gsungs pa yin no/ /de bzhin du de ltar na gzugs can ma yin pa'i phung po bzhi po 'di dag dang /mig gi dbang po'i gzugs dang / 'di snyed cig la mi nyid ces bya'o/ /'di la sems can dang / ming dang / shed las skyes dang / shed bu dang / gso ba dang / skyes bu dang / gang zag dang / srog dang / skye ba po zhes de skad ces bya'o zhes 'byung ba dang / de bzhin du/ 'di dag yod na sems can mi'am shed las skyes/ /shed bu shes par de skad dag tu kun tu 'dogs/ /de dag dang ni de bzhin gzhan yang mi mang po/ /phung po'i gzhi dang rgyu las 'byung bar 'gyur ba yin//zhes 'byung ba yin no/ /tshigs su bcad pa las 'byung ba/ yang sred pa ni ma/ las kyi srid pa ni pha zhes byas nas bshad de/ skyed pa po yin pa'i phyir ro/ /gzhan dag na re/ nga'o snyam pa'i nga rgyal yin no zhes zer ro/ /gzhan du na ni mdo sde snga ma don med par 'gyur ro//de lta bas na mdo sde 'di dag dang gzhan rnams ni dgongs pa can gyi don yin pa'i phyir 'gal ba med do/ /theg pa chen po la ni gang gis na 'gal ba med par nges par bzung ba'i nges pa'i don cung zad kyang med do zhe na/ ci lha rnams dga' bas theg pa chen po mtha' dag shes sam/smras pa/ ma yin no zhe na/ mtha' dag mi shes pas nges pa'i don med pa nyid du ji ltar shes/ da lta mi snang bas de'i phyir spang bar byar mi rung ngo / /de bzhin du nyan thos kyi theg pa la yang da ltar sangs rgyas kyi gsung mtha' dag ni mi snang ngo / /mtha' dag ma yin par 'di ji ltar zhe na/bla ma kun dga' 'od sel dang / /sdug bsngal phung ston sa ston dang / /'char ka stong nyid chu las skyes/ /gang po sa 'tsho chu shing dang / /mya ngan 'das dang yul 'khor skyong / /'gro ba'i mdo dang de bzhin gzhan/ / yang dag bsdus pa'i gzhi nyams phyir/ /mtha' dag min par rtogs pa yin/ /bla ma'i mdo las lha rnams kyi dbang po brgya byin gyis smras pa / btsun pa bla ma bcom ldan 'das kyi nyan thos 'dzam bu'i gling na ji snyed 'khod pa de dag thams cad bdag gis sems kyis khyab par byas te brtags na/btsun pa bla ma ma gtogs par dge slong gcig kyang chos kyi rnam grangs 'di 'dzin pa med de / btsun pa bla ma khyod kyis chos kyi rnam grangs 'di zung shig /chos kyi rnam grangs 'di ni bcom ldan 'das kyis gsungs pa yin no zhes bya ba 'byung ste/rjes su dpag pa 'dis na de'i tshe gzhan yang med par 'gyur ba mngon no/ /yang na sangs rgyas bcom ldan 'das mya ngan las 'das nas ring po ma lon zhing 'phags pa kun dga' bo yang bzhugs bzhin du sangs rgyas kyi gsung mtha' dag mi snang na/ deng sang na lta smos kyang ci dgos/kun dga' bo'i mdo las bcom ldan 'das bgres pa'i gnas skabs na nga'i bstan pa yang 'dzin par 'gyur ro snyam nas 'phags pa kun dga' bo rim gro par bskos zhes bya ba dang / des kyang smras pa/ bdag gi lo nyi shu lhag cig btsun pa la rim gro bgyid do zhes bya ba dang /de nyid las yang smras pa/ bdag gis chos kyi phung po brgyad khri lhag ni bcom ldan 'das las bzung / gnyis ni dge slong dag las so zhes 'byung bas de'i phyir sngar bcom ldan 'das kyis bshad pa gang yin pa de ni des ma bzung bar shes par bya'o/ / de ni dge slong rnams las bzung ba gang yin pa de kho nar zad do zhes bya bar rigs pa ni ma yin te/ dus de srid du bzhi bcu cha bas kyang nyung ba'i chos bshad pa ni mi rung bas so/ /gal te 'phags pa kun dga' bos thams cad rtogs par gyur na ni bla ma'i mdo las lha rnams kyi dbang po brgya byin gyis dge slong gcig kyang chos kyi rnam grangs 'di 'dzin pa med do zhes de skad smos par yang mi 'gyur ro//de lta bas na de thams cad bzung ba ma yin la/ des smras pa gang yin pa de yang dag par sdud par byed pa rnams kyis yang dag par bsdus pa yin no/ / de lta bas na deng sang sangs rgyas kyi gsung mtha' dag mi snang ngo / /'od sel gyi mdo las/ bcom ldan 'das kyis bka' stsal pa/ 'od sel gang gi tshe ngas dge slong gi dge 'dun la rta cang shes bzhon bzangs kyis chos kyi rnam grangs bshad pa de'i tshe khyed rnams nyung ba yin no zhes bya ba'i mdo sde de mi snang ngo //sdug bsngal gyi phung po ston pa las bcom ldan 'das kyis shAkya ming can las brtsams nas bka' stsal pa/ dus de gcig na rgyal po'i khab ri bgrod bya la 'dug pa las/ nga ri ngos yangs pa ga la ba der phyin pa dang de na ngas gcer bu lag pa bsgreng ba dag mthong ba nas de dag la 'di skad ces smras so zhes bya ba'i bar du rgya cher 'byung ba'i mdo sde ni mi snang ngo //sa ston gyi mdo las/ bcom ldan 'das kyis bka' stsal pa/ dus de gcig gi tshe rgyal po'i khab ri bgrod bya la 'dug go/ /de nas gzhan mu stegs can kun tu rgyu ba rab tu mang po dag nga ga la ba der lhags so//lhags nas nga la don 'di zhes bya ba rgya cher 'byung ba'i mdo sde de ni mi snang ngo / /'char ka'i mdo las/ ngas tshor ba bzhi bshad pa'i rnam grangs yod do zhes bya ba'i mdo sde de mi snang ngo / /stong pa nyid kyi mdo las/'phags pa kun dga' bos smras pa/ dus de gcig na bcom ldan 'das shAkya rnams kyi nang na shAkya rnams kyi grong rdal grong khyer zhes bya ba na bzhugs te de nas bdag gis kun dga' bo nga ni da ltar stong pa nyid kyis lan mang du gnas so zhes bya ba de lta bu'i bcom ldan 'das kyis bshad pa bdag gis shes so zhes bya ba'i mdo sde de mi snang ngo //chu las skyes pa'i mdo las/ rgyal po chen po bdag gis ni dge slong ngam bram ze gang la las lan cig shes par 'gyur ba'am mthong bar 'gyur ba gang ma byung zhing mi 'byung la/ da ltar yang med de/gnas de yod pa ma yin pa de lta bu smras pa dran no zhes bya ba'i mdo sde de mi snang ngo / /gang bo'i mdo las/ gnas brtan kun dga' bos smras pa/ tshe dang ldan pa dag dge slong gnas brtan byams ma'i bu gang po zhes bya ba 'byung ba gang gis sngon bdag gsar bur gyur pa na zhes bya ba nas/zab cing zab pa'i chos dang ldan pa'i gtam 'di lta bu 'di bshad do zhes rgya cher 'byung ba'i mdo sde de mi snang ngo / /sa 'tsho'i mdo las/ dbyar tshul gyis smras pa/ dus de gcig na dge slong gau ta ma sgra sgrogs na 'ol ma se can gyi nang na bzhugs so zhes bya ba nas/de na bcom ldan 'das gau ta ma des bdag la bsam gtan thams cad bsngags so zhes bya ba'i bar du rgya cher 'byung ba de lta bu la sogs pa'i mdo sde de mi snang ngo / /chu shing gi mdo las/ bcom ldan 'das kyis bka' stsal pa/ de na ngas dge slong rten lnga rnams la bka' stsal pa/rten lnga dag nga sngon rab tu 'byung bar rab tu ma byung ba na 'di ltar slob ste/ khyim ni nyam nga'o zhes rgya cher 'byung ba'i mdo sde de mi snang ngo / /yongs su mya ngan las 'das pa chen po'i mdo las/ gnas brtan kun dga' bos smras pa/ tshe dang ldan pa ma 'gags pa bdag gis bcom ldan 'das las sangs rgyas bcom ldan 'das spyan dang ldan pa dag bsam gtan bzhi ba la snyoms par zhugs shing mi g.yo ba'i zhi ba la brten nas yongs su mya ngan las 'das so zhes mngon sum du bzung ngo zhes bya ba'i mdo sde de mi snang ngo //'phags pa yul 'khor skyong gis smras pa/rgyal po chen po 'di dag ni bcom ldan 'das de bzhin gshegs pa dgra bcom pa yang dag par rdzogs pa'i sangs rgyas mkhyen pa gzigs pas lam bstan pa bshad pa yin no zhes bya ba nas/ rgyal po chen po 'jig rten 'di ni rang gir bya ba med pa ngoms mi shes pa sred pas 'khol ba yin no zhes bya ba'i mdo sde de mi snang ngo //'gro ba'i mdo las/ mgon med zas sbyin gyis smras pa/ bdag gis bcom ldan 'das la kun dga' ra ba phul ba'i rgyus lus zhig nas bde 'gro mtho ris kyi 'jig rten lha rnams su skye bar 'gyur ba'i sems can yod do zhes bya ba nas/yon bsngo ba byas pa'i rgyus zhes bya ba'i bar du rgya cher 'byung ba'i mdo sde de mi snang ngo / /de bzhin du mdo sde gzhan dag gis kyang mngon te/ dper na cang mi smra ba'i mdo las/ mo+od gal gyi bus sangs rgyas kyi gsung sngon gsungs pa bstan pa la maung gal gyi bu 'di ni 'phags pa'i cang mi smra ba yin pas de la bag med par ma byed cig ces bya ba dang /gnas pa'i mdo las/ ting nge 'dzin 'di ni 'phags pa'i gnas pa yin pas 'di la bag med par ma byed cig ces bya ba'i mdo sde de mi snang ngo //yongs su mya ngan las 'das pa chen po la sogs pa'i mdo gzhan dag gi nang nas 'byung ba'i mdo sde mang po rnams ni 'don pa tha dad par snang ngo / / de lta bas na 'di dag dang mdo sde'i shes par byed pa gzhan mang po dag gis nyan thos kyi theg pa la yang da ltar sangs rgyas kyi gsung mtha' dag ni mi snang bar mngon no//yang dag par bsdus pa'i gzhi bo 'od srungs chen po la sogs pa dgra bcom pa rnams kyis mdzad pa gang yin pa de yang da ltar nyams te/ sde pa gzhan dag las lung dang / le'u dang / mdo rnam par gzhag pa tha dad pa'i phyir dang /lung dang le'u gzhan yang dag par bsdus pa'i mdo rnams kyang yang sde pa de nyid las yang dag par bsdus pa'i phyir dang / mngal du 'jug pa dang / dga' byed dang tshe'i mtha' la sogs pa zhes bya ba dag gis mdo sil bu mi 'gal bar snang ba'i phyir ro/ / de ltar na yang dag par bsdus pa nyams na da ltar sangs rgyas kyi gsung mtha' dag yod do zhes bya ba 'di ji ltar shes par nus/ thos pa brgyud pa las ni gcig las 'phros pa de yang brgya la thug pa dag cig yod par gyur zhes thos so/ /de lta bas na theg pa chen po la yang da ltar nges pa'i don gyi mdo sde mi snang ba'i phyir nges pa'i don nyid med par nges par gzung bar mi bya'o// //bam po bdun pa/ ci 'di bkri ba'i don nam/ 'on te sgra ji bzhin gyi don yin zhes dpyad par bya ste/ nges pa'i don bshad pa mi snang bar yang 'di sgra ji bzhin gyi don ma yin no zhes shes par ni mi nus so//'on kyang dgongs pa can yin no/ /ci'i phyir zhe na/ 'gal ba'i phyir ro/ /shes rab kyi pha rol tu phyin pa las chos thams cad ni ngo bo nyid med pa zhes bya ba de lta bu la sogs pa 'di lan mang du bstan la/ yang de nyid las bshad pa/byang chub sems dpa'i skyon med pa la 'jug par 'dod pa dang / nyan thos dang / rang sangs rgyas kyi sa las 'da' bar 'dod pa dang / phyir mi ldog pa'i sa la gnas par 'dod pa dang / mngon par shes pa drug thob par 'dod pa dang / sems can thams cad kyi spyod pa dang /rnam par g.yo ba shes par 'dod pa dang / nyan thos dang / rang sangs rgyas kyi shes pa thams cad zil gyis mnan par 'dod pa dang / gzungs dang / ting nge 'dzin gyi sgo thob par 'dod pa dang / nyan thos dang / rang sangs rgyas thams cad la sbyin pa sbyin par byed pa na/rjes su yi rang ba dang ldan pa'i sems gcig gis zil gyis mnan par 'dod pa'i byang chub sems dpa' sems dpa' chen pos shes rab kyi pha rol tu phyin pa la bslab par bya'o zhes 'byung ba dang / de bzhin du sangs rgyas kyi sku mngon par bsgrub par 'dod pas shes rab kyi pha rol tu phyin pa la bslab par bya'o//dpe byad bzang po brgyad cu dang / skyes bu chen po'i mtshan sum cu rtsa gnyis bsgrub par 'dod pas shes rab kyi pha rol tu phyin pa la bslab par bya'o zhes 'byung ba dang / de bzhin du byang chub sems dpa' sems dpa' chen po shes rab kyi pha rol tu phyin pa la spyod pa na sbyin pa 'di ltar byin na ni longs spyod chen po nyid kyi 'bras bu 'byung ngo //de bzhin du sbyin pa 'di ltar byin na ni rgyal rigs shing sA la chen po lta bu'i rigs su skye'o de bzhin du gzhan 'phrul dbang byed kyi lha rnams kyi nang du skye'o zhes bya ba'i bar du 'byung ba dang /de bzhin du ser sna'i sems tshar bcad par 'dod pas shes rab kyi pha rol tu phyin pa la bslab par bya'o/ /'chal ba'i tshul khrims kyi sems 'dor bar 'dod pa dang / gnod sems kyi sems 'dor bar 'dod pa dang / le lo'i sems 'dor bar 'dod pa dang /rnam par g.yeng ba'i sems 'dor bar 'dod pa dang / 'chal ba'i shes rab kyi sems mi spro bar 'dod pas shes rab kyi pha rol tu phyin pa la bslab par bya'o/ /de bzhin du spyan lnga bskyed par 'dod pas shes rab kyi pha rol tu phyin pa la bslab par bya'o/ /lnga gang zhe na/sha'i spyan dang / lha'i spyan dang / 'phags pa'i shes rab kyi spyan dang / chos kyi spyan dang / sangs rgyas kyi spyan no/ /de bzhin du shar phyogs na sems can long ba gang dag bdag gi mthus mig gis gzugs mthong bar bya na shes rab kyi pha rol tu phyin pa la bslab par bya'o//'on pa rnams rna bas sgra thos par bya ba dang / smyon pas dran pa thob par bya ba dang / gcer bu rnams gos thob par bya ba dang / sems can bkres pa rnams 'grangs par bya ba dang / skom pa rnams ngom par bya ba dang / ngan song du skyes pa rnams ngan song dag nas thar bar bya zhing mi'i lus thob par bya ba dang /tshul khrims 'chal ba rnams tshul khrims kyi phung po la dgod par bya ba dang / mnyam par ma bzhag pa rnams ting nge 'dzin gyi phung po dang / rnam par grol ba'i phung po dang / rnam par grol ba'i ye shes mthong ba'i phung po la dgod pa dang /bden pa ma mthong ba rnams rgyun du zhugs pa'i 'bras bu la dgod pa dang / lan cig phyir 'ong ba'i 'bras bu dang / phyir mi 'ong ba'i 'bras bu dang / dgra bcom pa nyid dang / rang sangs rgyas kyi byang chub dang / bla na med pa yang dag par rdzogs pa'i byang chub la dgod par bya na/byang chub sems dpa' sems dpa' chen pos shes rab kyi pha rol tu phyin pa la bslab par bya'o zhes bya ba 'byung ba de la sogs pa dang / sdig pa thams cad so sor bshags pa la sogs pa yang bstan te / gal te ngo bo nyid med pa la sogs pa'i tshig rnams sgra ji bzhin kho na'i don yin na/'di thams cad dang 'gal bar 'gyur te/ blang bar bya ba rnams ci yang med pa'i phyir rgyu 'di las 'di lta bur 'gyur ro zhes yang de ltar blang ba ni rung ba ma yin no/ /yang na de ltar blang bar bya ba ni ci zhig blang bar bya bar sems/de lta bas na tshig de rnams kyi sgra ji bzhin gyi don du nges par gzung bar mi bya ste / mdo sde gzhan dang 'gal ba'i phyir ro/ / 'o na ci zhe na/ dgongs pa can yin no/ /dper na/ pha dang ma ni bsad byas shing / /zhes bya ba'i tshigs su bcad pa 'di dang /ma dang byas pa mi shes dang / /zhes bya ba'i tshigs su bcad pa 'di la nges pa'i don bshad pa med par yang sgra ji bzhin gyi don du nges par gzung bar mi bya ste/ mdo sde gzhan dang 'gal ba'i phyir ro/ /'o na ci zhe na/ dgongs pa can yin no/ /yang 'di 'gal du zin yang 'ga' zhig gis de ltar bslus pa med par lta ba de la brten par 'gyur ram snyam nas blo zhan pa rnams chud gsan pa'i phyir gzhung du byas pa yin par de ltar ci ste mi 'dod/'di ltar de ltar smras pa yang de thams cad med par lta ba de la mngon par zhen pa kha cig snang ba kho na yin no zhe na/de ni de dag gi shes rab kyi nyes pa yin pa'am/ sngon chos kyis phongs par 'gyur ba'i las stsogs pa de dag de ltar nyams pa yin gyi/ 'di ni nyams par byed pa ma yin no/ /'di ji ltar shes she na/ gong du 'gal ba'i phyir ro zhes smos pa nyid dang sbyar ro/ /mdo gzhan las gang dag de bzhin gshegs pas gsungs pa'i don dang /tshig dang yi ge zab mo dag rtogs par khong du chud par byed/ dgongs pa rtogs par byed/ rjes su mthun par byed/ mi mthun par mi byed/ sbyor bar byed/ gnod par mi byed/ don rtogs par khong du chud par byed kyi/tshig 'bru'i rjes su rgyug par mi byed pa de dag la yon tan 'di dag dang bde bas lhag pa dag 'byung bar rig par bya'o zhes gsungs pa yang yin te/ gang zhig sgra ji bzhin gyi don du 'dzin par byed pa nyid kyis sems can chud gsan par zhugs pa de la ni 'di 'gal ba yin te/ji ltar na sgra ji bzhin gyi don du yang gzung bar bya zhing dgongs pa yang rtogs par bya ba dang / snga phyi sbyor bar bya ba nyid du yang bstan par 'gyur/ de nyid las kyang tshangs pa gzhan yang de bzhin gshegs pa ni dgongs pa'i rnam grangs kyis rtag pa gsungs pa yin par nyid zhal gyis 'che bar mdzad/kun nas nyon mongs pa gsung ba dang / chad pa gsung ba dang / mi bya ba gsung ba dang / log par lta ba can dang / ma dad pa dang / bya ba mi shes pa dang / khyim 'bugs pa dang / skyug pa za ba dang / go skabs bcom pa yin pa nyid zhal gyis 'che bar mdzad kyang de bzhin gshegs pa ni bstan pa de dag la med cing mi snang ste/de ni de bzhin gshegs pas dgongs nas gsungs pa yin no/ /de bzhin gshegs pa ni dgongs pa gang gis sems can mngon pa'i nga rgyal gtong ba'i dgongs pa de dag ston par mdzad pa yin no//tshangs pa de ltar na de bzhin gshegs pa ni dgongs nas chos ston par mdzad pa yin pas de la byang chub sems dpas sgra thams cad la skrag par mi bya'o zhes gsungs pa 'di yang gal te bstan pa la sgra ji bzhin gyi don ma yin pa nyid du mi 'dod na 'gal ba yin no/ / yang na 'dod na ni ji ltar na chud gsan par bya ba'i phyir theg pa chen po gzhung du byas pa yin no / /gzhan yang byang chub sems dpa' chos bzhi dang ldan pa rnams ni mgo gcig tu smra ba yin zhing gdung ba med par smra ba yin no/ /bzhi bo gang dag gang zhe na/ byang chub sems dpa' rnams ni mgo gcig tu chos thams cad gang zag med par smra ba yin no //byang chub sems dpa' rnams ni mgo gcig tu skye ba thams cad kyi skye mched rnams la mngon par dga' ba med par smra ba yin/ byang chub sems dpa' rnams ni mgo gcig tu theg pa chen po'i bsngags pa smra ba yin/byang chub sems dpa' rnams ni mgo gcig tu dge ba dang / mi dge ba'i las rnams chud mi za bar smra ba yin no zhes gsungs pa'i gsung 'di yang med par lta ba 'dzin du 'jug pa la 'gal ba yin no/ /'phags pa dri ma med par grags pas bstan pa las/yod pa'ang ma yin med pa'ang min te chos 'di kun/ /rgyu la brten nas 'byung yin 'di la bdag med cing / /byed pa po'am tshor ba po med dge dang mi dge yi/ /las ni ci yang chud mi za bar gsungs pa lags/ /zhes bcom ldan 'das la byang chub sems dpa' sems dpa' chen po dkon mchog 'byung gnas kyis bstod pa sbyar ba 'di yang 'gal bar 'gyur ro//kun tu snang ba'i mdo sde las kyang / sgra ji bzhin gyi don du 'dzin na nyes pa lnga yod do / /lnga gang zhe na/ mi mos pa'i gnas su 'gyur ba'i nyes pa dang /btsal ba nyams pa'i nyes pa dang / gzhan la slu bar byed pa'i nyes pa dang / ston pa la skur pa 'debs pa'i nyes pa dang / chos spong bar byed pa'i nyes pa'o zhes rang gi sgras bstan pa yin no/ /byang chub sems dpa' legs par rnam par byang ba rtogs pas kyang / sgra bzhin don ni kun tu brtags pa na/ /rang dga' dag gis blo ni nyams 'gyur la/ /legs par gsungs la skur cing smad par 'gyur/ /chos la khong khro sgrib par 'gyur ba yin/ /zhes gsungs pa de dang yang 'gal bar 'gyur ro/ /theg pa chen po'i mdo dad pa chen po skye ba las kyang /bcom ldan 'das kyis rigs kyi bu sgra ji bzhin du tshul bzhin ma yin pas chos rnams la rab tu rnam par 'byed na theg pa chen po la dad pa'i 'byung gnas su mi 'gyur ro/ /dgongs pa can gyi don ni sgra ji bzhin ma yin par tshul bzhin yid la byed na theg pa chen po la dad pa'i 'byung gnas su 'gyur ro//rigs kyi bu 'di ltar byang chub sems dpa' sgra ji bzhin du tshul bzhin ma yin pas chos rnams la rab tu rnam par 'byed na/ lta ba bzang po ma yin pa nyi shu rtsa brgyad skye ste/ 'di lta ste/ mtshan mar lta ba dang / lta ba la lta ba ma yin par lta ba dang /tha snyad la skur pa 'debs pa'i lta ba dang / kun nas nyon mongs pa la skur pa 'debs pa'i lta ba dang / de kho na nyid la skur pa 'debs pa'i lta ba dang / sbyor ba gtong ba'i lta ba dang / yongs su 'dzin pa'i lta ba dang / bsgyur ba'i lta ba dang / nges par 'byin pa ma yin pa'i lta ba dang /kha na ma tho ba med pa nyid du lta ba dang / nges par 'byung bar lta ba dang / sgrib pa la sogs pa'i lta ba dang / brnyas pa'i lta ba dang / 'khrug pa'i lta ba dang / bsod nams ma yin pa skyed pa'i lta ba dang / phyin ci log gi lta ba dang / ngal ba 'bras bu med pa'i lta ba dang /skyed pa'i lta ba dang / slu ba'i lta ba dang / khas mi len pa'i lta ba dang / ngan g.yo'i lta ba dang / tshar gcod pa'i lta ba dang / bkur stir lta ba dang / skur pa'i lta ba dang / rmongs pa nyid tshabs che ba'i lta ba dang / kha na ma tho ba nyid kyi lta ba dang /lta ba chen po dang / mngon ba'i nga rgyal gyi lta ba'o/ /rigs kyi bu de la mtshan mar lta ba gang zhe na/ ngas kun tu sbyor ba las byung ba'i ngo bo nyid la dgongs nas chos rnams kyi med ba nyid bstan pa gang yin pa de la sgra ji bzhin gyi don du mngon par zhen cing kun nas nyon mongs pa'i chos rnams dang /rnam par byang ba'i chos rnams la yang med pa nyid du mngon par zhen pa na med pa nyid du mtshan mar bzung nas med par lta ba 'byung ba ste/ de lta bas na mtshan mar lta ba zhes bya'o/ /de la lta ba la lta ba ma yin par lta ba ni byang chub sems dpa' med par lta ba de la mngon par zhen pa ni lta ba ma yin pa'i 'du shes 'byung ba yin no//med par lta ba gang yin pa de ni de'i lta ba chen po yin te/ de lta bas na lta ba la lta ba ma yin par lta ba zhes bya'o/ /de la tha snyad la skur pa 'debs pa'i lta ba dang / kun nas nyon mongs pa la skur ba 'debs pa'i lta ba dang /de kho na nyid la skur pa 'debs pa'i lta ba ni mtshan mar lta ba des thams cad la skur pa 'debs pa na tha snyad la skur pa 'debs par lta ba la yang mngon par zhen par byed/ kun nas nyon mongs pa la skur pa 'debs pa'i lta ba la yang mngon par zhen par byed/de kho na nyid la skur pa 'debs pa'i lta ba la yang mngon par zhen par byed do / /de lta bas na tha snyad la skur pa 'debs pa'i lta ba zhes kyang bya'o/ /kun nas nyon mongs pa la skur pa 'debs pa'i lta ba zhes kyang bya'o/ /de kho na nyid la skur pa 'debs pa'i lta ba zhes kyang bya'o//de la sbyor ba gtong ba'i lta ba ni skur pa 'debs pa'i lta ba can de nyid phyis gang gis khyad par du 'gro ba las yongs su nyams par 'gyur ba rab tu rnam par 'byed pa'i sbyor ba gtong ba'o/ /de la yongs su 'dzin pa'i lta ba ni lta ba la lta ba ma yin par lta ba dang /skur pa 'debs pa'i lta ba dang / sbyor ba gtong ba'i lta ba can de nyid gzhan dag dang lhan cig tu chos kyi mtshan nyid rnam par gtan la dbab par byed pa na med pa'i phyogs kho nar yongs su 'dzin pas na de lta bas na yongs su 'dzin pa'i lta ba zhes bya'o//de la sgyur ba'i lta ba ni gal te theg pa chen po'i mdo sde'i don gyi bsngags pa brjod pa na 'di dag thams cad ni med pa'i don ston pa yin no zhes don de dag lta ba de kho nar sgyur bar byed pa yin te/ de lta bas na sgyur ba'i lta ba zhes bya'o/ /rigs kyi bu de la nges par 'byin pa ma yin pa'i lta ba ni yongs su 'dzin pa'i lta ba gang yin pa dang /sgyur ba'i lta ba gang yin pa de ni bdag gam gzhan gyi phyir re zhig theg pa dman pas rdzogs pa'i byang chub tu nges par 'byin pa ma yin na bla na med pa yang dag par rdzogs pa'i byang chub tu lta ci smos pa ste/ de lta bas na nges par 'byin pa ma yin pa'i lta ba zhes bya'o//de la kha na ma tho ba med pa nyid du lta ba ni/ de med pa'i mtshan ma nyid du lta bar gyur nas 'di lta ste/ byang chub sems dpa' gang zhig lta ba 'di dang ldan na 'khrul ba'i nyes byas cung zad spyad kyang de la thams cad du kha na ma tho bar mi 'gyur bar lta ba 'byung ba ste/de bas na kha na ma tho ba med pa nyid du lta ba zhes bya'o/ /de la nges par 'byung bar lta ba ni byang chub sems dpa' med pa'i mtshan mar lta ba can de nyid 'di snyam du med pa'i mtshan mar lta ba 'di ni nyes byas kyi kha na ma tho ba thams cad las nges par 'byung ba yin no snyam du sems pa gang yin pa ste/de nges par 'byung ba ni ma yin no/ /de lta bas na nges par 'byung bar lta ba zhes bya'o/ /kha na ma tho ba nyid dang / nges par 'byung bar lta ba dag nyid sgrib pa la sogs pa'i lta ba yin te/ sgrib pa'i rgyu de la de'i gnyen po yin par blo 'byung ba'i phyir ro//de la brnyas pa'i lta ba ni byang chub sems dpa' med pa'i mtshan mar lta ba can de nyid nyan thos kyi theg pa la chos 'di dag ni byang chub sems dpas goms par mi bya'o/ /chos 'di dag ni dman pa yin pas 'di dag la byang chub sems dpas mkhas pa nyid du mi bya'o//chos 'di dag ni byang chub sems dpas thag ring du spang bar bya'o zhes brnyas pa'i sems skye ba gang yin pa ste/ de lta bas na brnyas pa'i lta ba zhes bya'o/ /de la 'khrug pa'i lta ba ni byang chub sems dpa' med pa'i mtshan mar lta ba can de nyid gang zag nyan thos kyi theg pa pa de dag la 'di dag dang lhan cig gnas par mi bya/gleng ba dang / kun tu gleng ba dang / smra ba dang / gos la sogs pa kun tu spyad pa dang / longs spyad par mi bya'o zhes khong khro ba'i sems ston pa gang yin pa de/de lta bas na 'khrug pa'i lta ba zhes bya'o/ /de la bsod nams ma yin pa skyed pa'i lta ba ni de nyid brnyas pa'i lta ba dang / 'khrug pa'i lta ba can du gyur na bsod nams ma yin pa mang du bskyed pa yin te/ de lta bas na bsod nams ma yin pa skyed pa'i lta ba zhes bya'o/ / de la phyin ci log gi lta ba ni byang chub sems dpa' med pa'i mtshan mar lta ba can de nyid gang gis na de'i ting nge 'dzin rnam pa gsum bsgom pa de mi 'grub pa stong pa nyid la stong pa nyid du mi rtog pa dang / mtshan ma med pa la mtshan ma med pa nyid du mi rtog pa dang / smon pa med pa la smon pa med pa nyid du mi rtog pa gang yin pa ste/de lta bas na phyin ci log gi lta ba zhes bya'o/ /de la ngal ba 'bras bu med pa'i lta ba ni byang chub sems dpa' phyin ci log gi lta ba can de'i ting nge 'dzin bsgom pa ngal ba 'bras bu med pa gang yin pa ste/ de lta bas na ngal ba 'bras bu med pa'i lta ba zhes bya'o//de la skyed pa'i lta ba ni byang chub sems dpa' med pa'i mtshan mar lta ba can de nyid 'di ltar byang chub sems dpa' gang lta ba de la skye bo'i tshogs chen po yang dag par len du 'jug cing skye bo'i tshogs chen po dad par byed pa de ni bsod nams mang po skyed pa yin no zhes lta ba 'byung ba gang yin pa ste/de lta bas na skyed pa'i lta ba zhes bya'o/ /de la slu ba'i lta ba ni byang chub sems dpa' skyes pa'i lta ba can bsod nams kyi bsam pa can de bdag gam gzhan las bsod nams slu ba 'byung ba gang yin pa ste/ de lta bas na slu ba'i lta ba zhes bya'o//de la khas mi len pa'i lta ba ni byang chub sems dpa' med pa'i mtshan mar lta ba can de nyid 'di snyam du bdag gis chos thams cad med pa nyid 'di la gzhan dag dang rtsod par byed pa na yang phyogs 'ga' yang khas blangs bar mi bya zhing /bdag gis sun ci phyin pa 'ba' zhig bya'o snyam du sems pa gang yin pa ste/ de lta bas na khas mi len pa'i lta ba zhes bya'o/ /de la ngan g.yo'i lta ba ni byang chub sems dpa' med pa mtshan mar lta ba can phyogs khas mi len cing sgra ji bzhin gyi med pa nyid de rnam par 'jog pa de nyid tshig dor ba dang /ltag chod smra ba'i sbyor ba byed do/ /tshig dor ba dang ltag chod smra ba'i sbyor ba ni ngan g.yo smra ba zhes bya ba ste / de lta bas na ngan g.yo'i lta ba zhes bya'o/ /de la tshar gcad pa'i lta ba ni byang chub sems dpa' khas mi len pa'i lta ba dang /ngan g.yo'i lta ba can de nyid smra ba snying po med pa'i phyir mkhas pa rnams kyis dus thams cad du tshar gcad pa yin te/ de lta bas na tshar gcad pa'i lta ba zhes bya'o/ /de la bkur sti'i lta ba ni byang chub sems dpa' med pa'i mtshan mar lta ba can de nyid 'di ltar gang zhig de bzhin gshegs pas gsungs pa'i lta ba 'di la brten pa ni ston pa la bkur sti byed pa yin/bla mar byed pa yin/ ri mor byed pa yin/ mchod par byed pa yin no zhes bya bar lta ba 'byung ste/ bkur sti byed pa ni ma yin no/ /de lta bas na bkur sti'i lta ba zhes bya'o//de la skur pa'i lta ba ni byang chub sems dpa' bkur sti'i lta ba can de nyid de bzhin gshegs pa la skur pa 'debs par byed pa gang yin pa ste/ bkur sti mi byed pa 'ba' zhig ni ma yin no/ /de lta bas na skur pa'i lta ba zhes bya'o/ /de la rmongs pa nyid tshabs che ba'i lta ba ni byang chub sems dpa' med pa'i mtshan mar lta ba can de nyid byang chub sems dpa' sgra ji bzhin du mngon par ma zhen pa lta ba phyin ci ma log pa gzhan rnams kyi rigs pa yang dag par bstan pa yang byas/rnam pa du mar bzlog pa yang byas bzhin du lta ba de las bzlog par mi nus pa gang yin pa ste/de lta bas na rmongs pa nyid tshabs che ba'i lta ba zhes bya'o/ /de la kha na ma tho ba nyid kyi lta ba ni byang chub sems dpa' rmongs pa nyid tshabs che ba'i lta ba de nyid kha na ma tho ba nyid kyi lta ba zhes bya'o/ /de la lta ba chen po ni lta ba nyi shu rtsa drug po 'di thams cad lta ba chen po zhes bya'o//de ci'i phyir zhe na/ lta ba 'di ji lta bu yin pa ltar 'jig tshogs kyi lta ba'i gzhi can lta ba'i rnam pa drug cu rtsa gnyis po dag ni de ltar kha na ma tho ba chen po dang bcas ba ma yin no/ /de lta bas na lta ba chen po zhes bya ste/ ji ltar byang chub sems dpa' chos ma yin pa la chos su 'du shes pa don ma yin pa la don du 'du shes nas 'di ltar lta ba can med par lta ba ston par byed pa na/ chos kyis phongs par 'gyur ba'i las dus tshad med par sgrib pa yongs su 'dzin par byed pa dang / 'jig rten kun tu sbyor bar byed pa de ltar 'jig tshogs la lta ba'i rtsa ba can gyi lta ba'i rnam pa dag ni chos kyis phongs par 'gyur ba'i las dang 'jig rten kun tu sbyor bar mi byed do//de la mngon pa'i nga rgyal gyi lta ba ni lta ba chen po de nyid la mngon pa'i nga rgyal gyi lta ba can zhes bya ste/ theg pa chen po'i chos rnams la sgra ji bzhin gyi don du mngon pa'i nga rgyal byed pa na log pa'i lta ba 'di 'byung bas so//de lta bas na mngon pa'i nga rgyal zhes bya'o zhes gsungs so/ /de lta bas na theg pa chen po ni dgongs pa can gyi don yin pa'i phyir nyams par byed pa'i gzhung du byas pa ma yin no//yang ci'i phyir zhe na/ lta ba mi bzang ba bkag pa'i phyir ro/ /ji ltar bkag pa'i phyir zhe na/ shes rab kyi pha rol tu phyin pa brgyad stong pa las/ rab 'byor gzhan yang byang chub sems dpa' sems dpa' chen po'i drung du bdud sdig can dge slong gi cha byad du 'ongs nas 'di skad du/chos de ni nam mkha' dang 'dra ste/ 'di lta ste/ thams cad mkhyen pa nyid do/ /chos de ni med pa ste/ 'di lta ste/ thams cad mkhyen pa nyid do/ /chos de ni yod pa ma yin pa ste/ 'di lta ste/ thams cad mkhyen pa nyid yin pa 'di la su zhig shes par 'gyur/'di la su zhig mngon par rdzogs par 'tshang rgya bar 'gyur/ des su yang nges par 'byin par mi byed de/ gang zhig mngon par rdzogs par 'tshang rgya bar byed pa dang / gang gis mngon par rdzogs par 'tshang rgya bar bya ba'i chos de thams cad ni nam mkha' dang 'dra ba yin pas khyod don med pas rnam par nyams so//'di lta ste/ bla na med pa yang dag par rdzogs ba'i byang chub tu mngon par rdzogs par 'tshang rgya bar bya'o zhes bya ba 'di ni bdud kyis bstan pa yin gyi/ de ni sangs rgyas kyis gsungs pa ma yin no zhes 'dun pa zlog par byed na/rigs kyi bu'am/ rigs kyi bu mo des 'di ni bdud kyi las yin no zhes de ltar shes par bya zhing de ltar rig par bya'o zhes 'byung ba yin no/ /gal te theg pa chen po med par lta ba 'dzin du 'jug pa'i phyir gzhung du byas pa yin na 'di ni bdud kyi las yin no zhes med par lta ba de bkag par mi 'gyur ba zhig go//ci'i phyir gzhan du don dam pa zhes bya ba gang yin pa de nyid gzhan du bdud kyi las zhes bstan zhe na/ dgongs pa can gyi don la dgongs nas don dam pa zhes gsungs la/sgra ji bzhin gyi don la dgongs nas bdud kyi las zhes gsungs pa yin no/ /gzhan yang mi dge ba'i las kyi lam dgag par yang 'byin pa ni med do zhes bya ba de lta bu la sogs pa log par lta ba lan mang du bkag pa yin te des na / gang zhig thams cad med do zhes bya ba 'dzin du gzhug par zhugs pa de ji ltar na byin pa ni med do zhes bya ba de lta bu la sogs pa 'gog par byed de/de'i phyir na yang 'di lta ba bzang po ma yin pa 'dzin du gzhug pa'i phyir nyams par byed pa'i gzhung du byas pa ma yin no/ /yang ci'i phyir zhe na/ phan pa'i thabs bstan pa'i phyir ro//bsod nams thams cad bsags pa'i mdo las/ rigs kyi bu gzhan yang byang chub sems dpa' chos bzhi dang ldan na myur du mi skye ba'i chos la bzod pa 'thob bo/ /bzhi po gang dag ce na / lta ba spangs pas bdog pa thams cad yongs su gtong ba nyid dang /nyon mongs pa thams cad rab tu zhi bas tshul khrims yongs su dag pa nyid dang / chos la 'jug pa'i bzod pa'i stobs dang ldan pa nyid dang / dben pa'i chos la mos pas brtson 'grus brtsams pa nyid dang ngo / /bzhi po gzhan dag gis kyang yin te/sems can thams cad yongs su skyob pa nyid kyis byams pa chen po dang / 'khor ba la yongs su mi skyo ba nyid kyis snying rje chen po dang / chos la dga' ba dang / rab tu dga' ba nyid kyis dga' ba chen po dang / rjes su chags pa dang khong khro ba spangs pas btang snyoms nyid dang ngo zhes gsungs pa yin na gang zhig sems can chud gsan par zhugs pa de ji ltar na med pa can gyi lta ba thob par bya ba'i phyir sems can rnams la phan pa nyid kyi thabs ston par byed/yang dag par sgrub pa de med par yang med pa'i lta ba 'thob par 'gyur ba ma yin nam/ de lta bas na theg pa chen po sems can rnams med par lta ba 'dzin du 'jug pa'i phyir nyams par byed pa'i gzhung du byas pa yin no zhes bya ba de rigs pa ma yin no//de'i phyir yang theg pa chen po ni sangs rgyas kyi gsung ma yin no zhes bya ba ma grub bo/ /bsdus pa'i tshigs su bcad pa dag ni/ji ltar sangs rgyas gsung ma yin/ /'gal ba'i phyir ro gzhan de bzhin/ /de nges don yin ril mi shes/ /nges don med par ji ltar shes/ /de sgra ji bzhin don ma yin / /'gal ba'i phyir ro nyams byed min / /lta ba mi bzad bkag phyir ro/ /phan pa'i thabs kyang bstan phyir ro//de ni nges pa'i don yin gyi/ /theg pa chen po la ni nges pa'i don med do zhes smras pa gang yin pa de yang thos pa nyung ba'i phyir de skad smras pa yin te/ dgongs pa nges par 'grel pa'i mdo las/ chos thams cad ni ngo bo nyid med pa zhes bya ba de lta bu la sogs pa de thams cad nges pa'i don ma yin par 'byung la/mdo sde gzhan gyi khyad par gzhan mang po dag las kyang don de nyid yongs su bstan to/ /mdo sde'i dum bu de dag ni gzhung mangs pa yongs su spang ba'i phyir ma bkod do/ /de dag las tshigs su bcad pa tsam ni shas shig brjod par bya'o//re zhig dgongs pa nges par 'grel ba las/ chos rnams ngo bo nyid med chos rnams ma skyes dang / /chos rnams ma 'gags chos rnams gzod nas zhi ba dang / /chos rnams thams cad rang bzhin mya ngan 'das par ni/ / dgongs pa med par mkhas pa su zhig smra bar byed/ /mtshan nyid ngo bo nyid med skye ba ngo bo med/ /don dam ngo bo nyid med do zhes ngas bshad de/ /mkhas pa gang zhig dgongs pas 'di dag shes pa ni/ /rab tu nyams par 'gyur ba'i lam du de mi 'gro/ /zhes gsungs pa yin no//gzhan las kyang / phung po dag la bdag med do / /phung po dag ni bdag ma yin/ /de dag brtags pa bzhin du med/ /de dag med pa'ang ma yin no/ /ji ltar byis pas brtags pa bzhin/ /dngos po thams cad yod pa ste/ /ji ltar mthong bzhin de yin na//thams cad yang dag mthong bar 'gyur/ /dngos po thams cad med pa'i phyir/ /kun nas nyon mongs dag pa med/ /ji ltar mthong bzhin de med do/ /de dag med pa'ang ma yin no/ /yang gsungs pa/ kun du brtags pa'i rang bzhin gyis/ /chos rnams thams cad ma skyes pa//gzhan gyi dbang la gnas nas ni / /mi yi rnam rtog 'khyams pa yin/ /nam zhig gzhan gyi dbang dag ste/ /rnam par rtog dang bral ba na / /shin tu gyur pa de bzhin nyid/ /rtog pa spangs par gnas pa'o/ /rnam brtags bden par yod min gyis//rnam par rtog pas bsam rtog shig /gzung dang 'dzin pa'i mtshan nyid du/ /nor bar de dag rnam rtog na/ /phyi rol don mthong brtags na ni/ /kun du brtags pa'i rang bzhin no/ /rtog pa gang gis rtog byed pa/ /rkyen las skyes pa'i rang bzhin no/ /phyi rol don mthong log pa ste//don med sems ni 'ba' zhig go/ /rigs pas rnam par gzhigs na ni/ /gzung ba dang ni 'dzin pa 'gag /ji ltar byis pas brtags pa ltar/ /phyi rol gyi ni don med do/ /bag chags kyis ni dkrug pa'i sems/ /don du snang ba shin tu 'byung / de lta bu la sogs pa nges pa'i don bshad pa la don dam tshig gi khong du chud par ma byas par theg pa chen po la nges pa'i don bshad pa med do zhes zer ba ni gya tshom tsam 'ba' zhig go/ /de de lta bas na 'gal ba'i phyir theg pa chen po ni sangs rgyas kyi gsung ma yin no zhes bya ba de ma grub bo//gzhan yang theg pa chen po sangs rgyas kyi gsung ma yin no zhes zer na/ sangs rgyas kyi gsung gi mtshan nyid ci yin zhes brgal zhing brtag par bya'o/ /smras pa/ sangs rgyas kyi gsung nyid du sde pa bco brgyad dag gis yongs su bzung ba gang yin pa'o zhe na/'o na don dam pa stong pa nyid la sogs pa'i mdo sde bdag med pa dang ldan pa 'phags pa kun gyis bkur ba'i sde pa dag gis khas mi len pa dag dang / srid pa bar mdo dang ldan pa srid pa bdun zhes bya ba de lta bu la sogs pa ston pa'i sde la sogs pa rnams kyis khas mi len pa gang yin pa de dag sangs rgyas kyi gsung du mi 'gyur ro//sde pa phan tshun tha dad pa'i mdo sde gang dag yin pa de dag kyang sde pa bco brgyad po dag gis yongs su bsdu bar ji ltar nus pas de dag sangs rgyas kyi gsung du mi 'gyur ro/ /'dul ba dang chos mngon pa dag kyang sde pa thams cad la tshig dang /don gyis tha dad pas de gnyis sangs rgyas kyi gsung nyid du ji ltar rtogs par bya/ 'o na slob dpon gyi rigs 'ga' zhig gis yongs su bzung ba gang yin pa de sangs rgyas kyi gsung yin no zhe na/ ji re zhig gang smras pa de legs par smras pas sam 'on te rigs pa 'ga' zhig yod/'di la mi rigs pa ci yod ce na/ ji ltar na phan tshun 'gal ba thams cad sangs rgyas kyi gsung du 'gyur la/ sangs rgyas kyi gsung mtha' dag ni deng sang mi snang ngo zhes de skad kyang bstan zin to/ /de lta bas na de ni mtshan nyid dang bral ba yin no/ /'o na mdo sde la 'jug /'dul ba la snang / chos nyid dang mi mthun pa med pa gang yin pa de sangs rgyas kyi gsung yin te/ chen po bstan pa tshad ma nyid yin pa'i phyir ro zhe na/ mdo sde'am 'dul ba ni gang la chos nyid gang yin/ yang dag par sdud par byed ba rnams kyis mdo sde'am/'dul ba yang dag par bsdus pa gang yin pa dang / de gnyis la grags pa'i chos rnams kyi mtshan nyid kyi chos nyid gang yin pa'o zhe na/ yang dag par bsdus pa'i gzhi po deng sang nyams so zhes ma bstan tam/ 'o na sde pa gang la yang dag par bsdus pa gang yin pa de rab tu grub pa'i chos nyid gang yin pa'o zhe na/ji ltar na phan tshun 'gal ba thams cad sangs rgyas kyi gsung du 'gyur zhes ma bkag gam/ 'o na 'phags pa'i bden pa'i mdo sde la 'jug /nyon mongs pa 'dul ba la snang / rten cing 'brel bar 'byung ba'i chos nyid dang mi mthun pa ma yin pa gang yin pa'o zhe na/ji ltar gang zhig 'phags pa'i bden pa'i mdo sde la 'jug /ci re zhig tshig gis sam/ 'on te don gyis yin/ gal te tshig gis so zhe na/ de las gzhan pa'i mdo sde thams cad mi 'jug go//'on te don gyis so zhe na/ ji ltar theg pa chen po de la don gyis mi 'jug /nyon mongs pa 'dul ba la mi snang / rten cing 'brel bar 'byung ba'i chos nyid dang mi mthun pa yin/ gal te 'gal ba'i phyir ro zhe na/ nyes pa de ni sngar bstsal zin to/ /de lta bu'i tshig rnams ni sgra ji bzhin gyi don ma yin pa'i phyir ro//de lta bas na gang gis na theg pa chen po sangs rgyas kyi gsung ma yin par 'grub par 'gyur ba'i mtshan nyid de med do/ /ci'i phyir gang dag sgra ji bzhin gyi don ma yin no zhes de skad bstan dgos pa'i tshig de dag bstan zhe na/ re zhig tshigs su bcad pa las/pha dang ma ni bsad byas shing / /zhes bya ba de lta bu la sogs pa bstan pa ji lta bu yin/ de ni gdon mi za bar bshad par bya ste/ srid pa la sogs pa ni ma la stsogs ba dang 'dra ba'i chos nyid yin par bstan pa'i phyir ro zhe na/ chos thams cad ni ngo bo nyid med pa/ma skyes pa ma 'gags pa zhes bya ba de lta bu la sogs pa 'di yang bshad par bya'o/ /ci'i phyir zhe na/ byis pas kun du brtags pa'i ngo bo nyid yod pa nyid du 'dzin pa bsal ba'i phyir ro/ /rang bzhin gyis mig skyon can du gyur pa dag la kun tu brtags pa'i rang bzhin de yod pa nyid du 'dzin pa bsal ba'i phyir de med pa nyid yin pa dang 'dra bar de sgra ji bzhin gyi don ma yin no zhes 'di skad kyang gdon mi za bar bshad par bya'o// ci'i phyir zhe na/ mgo smos pa mi shes pa rnams brjod du med pa'i ngo bo'i chos med par 'dzin pa bsal ba'i phyir ro/ /de ltar na kha cig ni sgro 'dogs pa'i mtha' dang /kha cig ni skur ba 'debs pa'i mtha' spangs pa yin no/ /gzhan yang lung 'di yang yod de/ rgyu lnga dag gis de bzhin gshegs pa rnams kyis smos pa'i rnam pa bstan pa mdor bsdus pa yin par rig par bya ste/ legs par tha snyad gdags pa'i rjes su mthun pa nyid dang /dgongs pa sna tshogs kyi thabs dang mthun pa nyid dang sgrim pa drag pos de kho na nyid rtogs pa dang mthun pa nyid dang / de'i don khong du chud pa las dga' ba'i khyad par gyis bde bar gnas pa dang mthun pa nyid dang / 'brel pa'i gtam nyid rnam par gtan la dbab pas shes rab kyis dpyod pa'i thabs dang mthun pa nyid kyis so//gal te de skad gdon mi za bar bstan par bya ba yin na/ ci'i phyir nyan thos rnams la yang nyan thos kyi theg par de skad ma bstan zhe na/ /de dag la ni de skad bstan par mi bya'o/ / ci'i phyir zhe na/de dag ni chos la bdag med pa nyid la mos pa la gzud par mi bya ste/ skyo bar bya ba yin pa'i phyir ro/ /'di ltar de dag ni rang bzhin gyis sdug bsngal la 'jigs pa dang snying rje chung ba yin no/ /gang zag la bdag med pa nyid la ni gzud par bya ste/ de la bdag tu 'dzin pa'i dbang gis lus la sred pas sdug bsngal las rnam par mi grol ba'i phyir ro//de lta bas na de dag la gang zag med pa kho na bstan gyi chos med pa ni ma yin no/ /bcom ldan 'das kyis nyan thos rnams la phyed ni bden pa bstan/ phyed ni brdzun pa ste/gang zag med do zhes bya ba ni bden pa'o/ /chos rnams yod do zhes bya ba ni brdzun pa ste/ ji skad du/ 'di na bdag gam sems can med/ /chos 'di rgyu dang bcas las 'byung / /las yod rnam par smin pa yod/ /byed pa po ni mi dmigs so/ /zhes gsungs pa lta bu'o zhe na/bcom ldan 'das kyis sems can brdzus te byung ba yod do zhes gang bshad pa de ci brdzun nam / bcom ldan 'das kyis dgongs pa gang gis bshad pa de ltar mi brdzun no zhe na/ bcom ldan 'das kyis dgongs pa gang gis chos rnams yod do zhes bshad pa 'di yang de ltar mi brdzun no//ci dgongs pa de nyan thos rnams kyis rtogs sam zhe na/ bden pa ma mthong ba rnams kyis mi rtogs so/ /ji ltar na de dag gis ji ltar kun tu brtags pa bzhin du 'dzin na bslus par mi 'gyur zhe na/ bcom ldan 'das kyis dgongs pa gang gis 'jig rten pa'i yang dag pa'i lta ba la gzud par bya ba'i 'dul ba rnams kyi dbang du mdzad nas rdzus te byung ba'i sems can yod do zhes bshad pa 'di yang ji de dag gis dgongs pa de rtogs sam/smras pa/ ma yin no zhe na/ ji ltar na ji ltar kun tu brtags pa bzhin du 'dzin na bslus par mi 'gyur/de rnams kyi lhan cig skyes pa'i sems can du lta ba de ni bde 'gror 'gro ba'i bar du gcod par mi byed pas de'i phyir de bshad pa yin no zhe na/ de rnams kyi lhan cig skyes pa'i chos su lta ba de yang mya ngan las 'das pa'i bar du gcod par mi byed pas de'i phyir yang de bshad pa yin no//gal te 'khor ba la ni sdug bsngal ba nyid dam mya ngan las 'das pa la ni zhi ba nyid du yang dag pa ji lta ba bzhin du ma yin par kun du rtog na ji ltar mi byed ce na/ /nga dag pa ji lta ba bzhin ma yin par kun tu rtog pa yang /gang 'phags pa'i ye shes kyi rgyu mthun pa bstan pa'i rten can kha cig rnam par byang ba dang mthun pa yin te/ de'i gzhi ni brjod du med pa'i mtshan nyid du yod pa'i phyir ro/ /dper na mi dag 'dod pa dang / gzugs dang gzugs med pa na spyod pa rnams kyi lus dang gnas dang /ting nge 'dzin dang / snyoms par 'jug pa'am/ 'jig rten las 'das pa'i rnam par grol ba gang yin pa dag thos nas rtog par byed na/ ci de dag yang dag pa ji lta ba bzhin du kun du rtog pa yin nam/ 'on kyang rtog pa de de la brtson pa rnams kyis de thob par bya ba'i phyir mthun pa ma yin nam/de bzhin du so so'i skye bo rnams mi rtog pa la sogs pa'i rnam pa dag gis chos rnams la kun du rtog pa na/ yang dag pa ji lta ba bzhin du rtog pa ma yin te/ sgyu ma'i dra ba'i mdo las bcom ldan 'das kyis 'phags pa 'jig rten las 'das pa ni bden pa yin par gsungs so zhes 'byung ba'i phyir ro//rtog pa de yang yang dag pa ji lta ba bzhin gyi chos rtogs pa thob par bya ba'i phyir mi mthun pa ma yin no/ /gzhan yang theg pa chen po las/ /yang dag min rtog yang dag min/ /yang dag min pa min mi rtog /rtog min mi rtog ma yin par/ /shes bya thams cad yin par bstan/ /zhes tshigs su bcad pa bstan pa yang yin no/ /de la yang dag min rtog ni gang zhig thar pa dang mi mthun pa'o/ /yang dag min yang dag min pa min ni zag pa dang bcas pa'i thar pa dang mthun pa ste/brjod du med pa'i mtshan nyid mi rtog pa'i phyir dang / de rtog pa dang mthun pa'i phyir ro/ /mi rtog ni 'jig rten las 'das pa'i lam dang / chos rnams kyi de bzhin nyid de gang zag dang chos la bdag med pa nyid ni rnam par rtog pa'i mtshan nyid med pa'i phyir ro//rtog min mi rtog ma yin pa ni 'phags pa rnams kyi 'jig rten las 'das pa'i rjes las thob pa dag pa 'jig rten pa'i ye shes yin te/ yang dag pa ji lta ba yul yin pa'i phyir dang / chos kyi mtshan nyid rnam par 'jog pa'i phyir ro/ /gal te chos la bdag med pa nyid bstan pa med par yang nyon mongs pa rnams spongs na/ci'i phyir byang chub sems dpa' rnams la chos la bdag med pa nyid bstan zhe na/ 'khor ba las yongs su mi skyo zhing kun nas nyon mongs pa med par bya ba'i phyir dang / shes bya'i sgrib pa thams cad spangs pa'i phyir ro//de dag ni chos la bdag med pa nyid la mos pa'i sbyor ba la goms pas yang dag par sgrub pa na ci nas dus ring por 'khor ba la yang mi skyo zhing kun nas nyon mongs par mi 'gyur ba de lta bu ni sems kyi ting nge 'dzin zhi ba mtshan ma thams cad dang bral ba 'thob bo/ /bsod nams dang ye shes kyi tshogs chen po yang bsags nas thos ba mtha' yas pa yongs su bsgom pa'i gzungs dang /ting nge 'dzin gyi sgo stong phrag zad mi shes pa'i snying po can thams cad la mngon par 'du byed pa med pa rnam par mi rtog pa'i ye shes ro gcig pa zhi ba'i ting nge 'dzin rab kyi mthar phyin pa bsgrubs te/rdo rje lta bu'i ting nge 'dzin gyi mjug thogs su nyon mongs pa dang / shes bya'i sgrib pa thams cad spangs pas chos thams cad la rnam pa thams cad mkhyen pa nyid 'thob bo/ /gzhan du na ni nyan thos dag dang 'dra bar gang mi rtag pa de ni sdug bsngal lo//gang sdug bsngal ba de ni bdag med pa'o zhes gang zag la bdag med pa'i rnam pa 'ba' zhig yid la byed pa'i sbyor ba la goms pa las/ 'khor ba la yid byung ba mang ba'i shas che ba'i rgyud kyis mya ngan las 'das pa kho na la zhi bar lta zhing / sems can rnams la snying rje btang ste/myur ba kho nar gang zag pa zad pa mngon sum du byed par 'gyur gyi/ rgyud chos kyi mtshan ma la 'du shes pas gzir bas dus ring por 'jug kyang gang gi mthar phyin pas shes bya thams cad la ye shes dbang ba thob pa de lta bu'i de bzhin gshegs pa'i ting nge 'dzin gyi rigs zhi ba sems kyi ting nge 'dzin ni 'thob par mi 'gyur ro//'dir yang bshad pa/ brtags pa'i chos kyi rnam rtog ni/ /shes bya kun la ma spangs par/ /thams cad mkhyen nyid yod min pas/ /de phyir chos la bdag med bstan/ /gang gi tshe byang chub sems dpa' rnams rnam par grol ba na ci de dag chos la bdag med pa shes pas rnam par grol lam/'on te gang zag la bdag med par shes pas she na/ bshad pa chos la bdag med par shes pas so/ /ci'i phyir nyan thos kyi theg par khams mang po pa dang /dgra bcom pa'i mdo la sogs pa dag las sangs rgyas rnams dang / nyan thos rnams su rnam par grol ba'i thabs mtshungs pa nyid du bstan zhe na/ rnam par grol ba mtshungs pa nyid du bstan na de'i thabs mtshungs pa nyid kyang bstan par bya ba yin no/ /sangs rgyas rnams kyis rnam par grol ba ni khyad par yod de/nyon mongs pa'i sgrib pa las ni nyon mongs pa bag chags dang bcas pa spangs pa'i phyir ro/ /shes bya'i sgrib pa spangs pa las kyang yin te/ shes bya thams cad kyi rnam pa thams cad mngon par rdzogs par byang chub pa'i phyir ro//thabs kyi khyad par yang yod de/ dran pa nye bar gzhag pa la sogs pa la khyad par yod pa'i phyir ro/ /'o na sangs rgyas rnams kyis ma yin bzhin du de mtshungs pa nyid du nyid kyis ston pa mdzad pa na nyan thos rnams la slu bar mdzad mod ce na/ sangs rgyas rnams kyis ni mtshungs pa nyid kyang yang yod la/khyad par du 'phags pa nyid kyang yod pas 'di la slu ba ga la yod/ sangs rgyas rnams kyi skal ba mnyam pa nyid du gshegs pas sems can gang dag 'dul bar mdzad pa ste/ ji ltar rmad du byung ba dang po'i mdo las gsungs pa lta bu yin na/ci de dag bslus pa yin nam/ bcom ldan 'das kyis don dam pa stong pa nyid las/ las kyang yod rnam par smin pa yang yod la byed pa po ni mi dmigs so zhes gsungs pa gang yin pa de ci don dam pa nyid du'am / 'on te kun rdzob nyid du yin zhe na/de las cir 'gyur/ gal te don dam pa nyid du yin na/ ji ltar na chos thams cad ngo bo nyid med pa yin/ gal te kun rdzob tu yin na byed pa po yang kun rdzob tu yod pas byed pa po ni mi dmigs so zhes brjod par mi bya'o zhe na/ re zhig kun rdzob ces bya ba 'di ni ci yin/don dam pa ni gang zhig yin/ de las ci kun rdzob tu yod dam/ ci don dam par yod par shes par bya'o/ /ming dang / brjod pa dang / gdags pa dang / tha snyad ni kun rdzob yin la chos rnams kyi rang gi mtshan nyid ni don dam pa ma yin no zhe na/ 'o na de lta na las dang rnam par smin pa gnyis ming du yang yod/ rang gi mtshan nyid du yang yod pas de gnyis ji ltar 'dod par yod pa nyid du rtogs la rag go/ /nged ni gang zag kun rdzob tu yod kyi rdzas su ni ma yin te/ phung po rnams la de'i ming gdags pa'i phyir ro/ /las dang rnam par smin pa dag ni kun rdzob tu rdzas su yod/don dam par ni med de/ 'jig rten pa'i shes pa'i yul yin pa'i phyir ro / /dam pa ni ye shes 'jig rten las 'das pa yin te/ de'i don yin pas don dam pa'o/ /de gnyis kyi rang gi mtshan nyid ni de'i yul ma yin te/de'i yul ni brjod du med pa'i phyi'i mtshan nyid yin pa'i phyir ro/ /'dir 'jig rten pa'i shes pa'am/ 'jig rten las 'das pa tshad ma yin zhe na/ gcig kho nar ni 'jig rten las 'das pa yin no/ /'jig rten pa ni dbye ba yod de/ 'jig rten las 'das pa'i rjes las thob pa gang yin pa de ni tshad ma yin no//gzhan ni tshad ma ma yin no/ /de ltar na dge 'dun phal chen sde pa rnams kyi tshigs su bcad pa/ mig dang rna ba sna yang tshad ma min/ /lce dang lus dang sems kyang tshad ma min/ /gal te dbang po de dag tshad yin na//'phags pa'i lam gyi bya ba med par 'gyur/ /zhes bya ba 'di dang yang mthun par byas pa yin no/ /yang theg pa chen po ba kha cig thams cad rang gi mtshan nyid du ni med pa kho na yin la/ kun rdzob tu ni bcom ldan 'das kyis chos rnams yod pa nyid du bstan to zhes sgra ji bzhin pa nyid kyi don yin par brjod pa gang yin pa de dag la ji skad bstan pa'i brtsad pa 'di yang 'byung bar 'gyur ro // //bam po brgyad pa/ kun rdzob ces bya ba yang brjod pa yin la/ de yang kun nas nyon mongs pa dang mthun pa nyes par bshad pa zhes bya ba la/rnam par byang ba dang mthun pa ni legs par bshad pa zhes bya ba yin no zhe na/ brjod pa tsam du zad na ji ltar na legs par bshad pa'am/ nyes par bshad par 'gyur/ kun rdzob kyang kha cig gdon mi za bar dngos su khas blang bar bya bar 'gyur ro/ /yang na de yang med na ni ji ltar kun rdzob tu yod pa nyid du gsungs pa yin/kun nas nyon mongs pa dang / rnam par byang ba thams cad la skur ba btab pas gnas dang gnas ma yin pa gnyis la mi gnas pa'i phyir dang / rang gis rang smra ba bkag pa'i phyir brjod du med par 'gyur ro/ / dgongs pa can yin par smra ba na ni nyes pa 'di dag tu mi 'gyur ro/ /'o na kun rdzob sgra tsam du mi 'dod na theg pa chen po las 'byung ba'i tshigs su bcad pa/ 'di dag thams cad ming tsam ste/ /'du shes tsam la gnas pa yin/ /brjod pa las ni logs shig na/ /brjod par bya ba yod ma yin//zhes bya ba ni 'di ji ltar 'grub ce na/ 'dir brjod pa las logs shig na brjod par bya ba med par bkag pa yin gyi brjod du med pa'i mtshan nyid kyi dngos po ni ma yin te/ de ltar na de ni 'di kho na ltar yin te/ 'du shes tsam la gnas pa yin/ /zhes gsungs pa yang 'dir sems las byung ba'i 'du shes la 'du shes zhes gsungs te/mdo las ji ltar 'du shes 'byung ba de ltar rjes su tha snyad 'dogs so zhes 'byung ba'i phyir ro/ /ming nyid ming la gnas par ni mi rung ngo / /'di ltar mjug thogs su yang / ming ni gang dang gang gis su/ / chos ni gang dang gang brjod pa/ /de la yod pa ma yin te/ /de ni chos rnams chos nyid do/ /zhes gsungs pa yang yin no/ /gal te brjod du med pa'i mtshan nyid kyi chos med na de la zhes mi gsung gis / yod pa ma yin no zhes bya ba nyi tshe gsung bar 'gyur ro/ /byis pa rnams kyis kun du brtags pa bzhin du chos brjod par bya ba de yang kun du brtags pa'i mtshan nyid de la med do//de la med na ming la med pas de'i phyir de la yod pa ma yin te zhes gsungs so/ /'di skad du/ de ni chos rnams chos nyid do zhes gsungs pa gang yin pa yang 'dir brjod du med pa nyid kyi chos nyid la dgongs so//brjod pa tsam du zad na ni chos gang dag gi chos nyid gang yin par 'gyur yang / ming gis kyang ni ming nyid stong / /zhes gang gis gsungs pa de yang 'di thams cad ming tsam mo zhes dam bcas nas ming yang med do zhes bya ba 'di ji ltar rigs pa yin zhe na/ kun du brtags pa'i ngo bo nyid dgag pa yin na ni brjod pa'i bdag nyid du kun du brtags pa'i brjod pa gang yang bkag pa yin pas rigs pa'i ngo bor 'gyur ro/ /de ltar yang mi 'dod na ni/ chos rnams thams cad ming med cing / /ming gis yongs su brjod pa yin/ /zhes gang gsungs pa yang gal te med pa kho na yin na/chos ming med pa de dag gang yin/ brjod du med pa'i mtshan nyid dag chos rnams thams cad yin na ni/ byis pa rnams kyis kun du brtags pa bzhin du brjod pas/ rjod par byed pa de'i rjes su 'brangs nas 'phags pa rnams kyis kyang ming med pa rnams ming gis yongs su brjod pa yin par rung ngo //de ltar na dgongs pa nges par 'grel pa'i mdo las/ rigs kyi bu 'dus byas zhes bya ba de ni ston pas btags pa'i tshig yin te/ ston pas btags pa'i tshig gang yin pa de ni kun du rtog pa las byung ba tha snyad du brjod pa yin la/kun du rtog pa las byung ba tha snyad du brjod pa gang yin pa de ni kun du rtog pa sna tshogs kyi tha snyad du brjod pa gtan yongs su ma grub pa'i phyir 'dus byas ma yin no/ /'dus byas ji lta ba bzhin du 'dus ma byas kyang de bzhin no zhes de bzhin du sbyar ro/ /'dus byas dang 'dus ma byas su ma gtogs pa gang ci brjod kyang de yang de dang 'dra ba nyid du 'gyur ro//de yang brjod pa ni dngos po med pa can yang ma yin te/ dngos po de yang gang zhe na/ 'phags pa rnams kyis 'phags pa'i shes pa dang 'phags pa'i mthong bas brjod du med par mngon par rdzogs par sangs rgyas pa gang yin pa ste/zhes 'byung ba'i mdo sde'i dum bu dang yang sbyar ba yin no/ /re zhig chos thams cad ni ngo bo nyid med pa ma skyes pa/ ma 'gags pa zhes bya ba de lta bu la sogs pa dang / tshigs su bcad pa de dgongs pa can yin du chug na/ yang theg pa chen po las/ bram ze'i khye'u bla ma nas bzung ste yongs su mya ngan las 'das pa chen po'i bar du sprul pa tsam zhig yin par bstan pa de la dgongs pa ci yod ce na/ 'di la nyes pa ci yod/ sangs rgyas kyi gsung grags pa dang 'gal te/ nyan thos kyi theg par sde pa thams cad las zas gtsang ma'i sras shAkya thub ba gang yin pa de ni sangs rgyas dang byang chub sems dpa' yang de zhes bya'o zhes 'byung ngo zhe na/ci nyan thos kyi theg pa la sangs rgyas kyi sprul pa mi 'dod dam/ gal te mi 'dod na 'dul ba las 'phags ba ma 'gags pas lha'i mig gis bar do'i srid pa mang po thams cad dang /sangs rgyas kyi sprul pa rnams mthong ngo zhes gsungs pa dang 'gal bar 'gyur la/ dus gcig tu phyogs dang yul sna tshogs la sangs rgyas kyis 'dul ba 'khod pa rnams 'dul bar mdzad pa mi 'grub par 'gyur ro/ /ci sangs rgyas kyi sprul pa de gdul ba rnams la 'di skad du/nga ni sangs rgyas kyi sprul pa yin gyi sangs rgyas sam byang chub sems dpa' ni ma yin no zhes gsung ngam / smras pa/ ma yin no zhe na/ nyid sangs rgyas yin par ston mod/ smras pa de bzhin no zhe na/ ci'i phyir yin/ sangs rgyas kyi mtshan la gdul ba rnams dga' ba dang / rab tu dga' ba dang / gus pa dang / zhes dang / dad pa la sogs pa'i khyad par bskyed pa'i phyir ro zhe na/ de bzhin du sangs rgyas kyi sprul pa shAkya thub pa 'di yang gal te nyid sangs rgyas yin par yang gsungs la/ nyan thos rnams kyis kyang de bzhin du bzung na de la 'gal ba ci yod/ sprul pa de gang gi yin pa'i ngo bo nyid kyi sangs rgyas de gang yin zhe na/ byang chub sems dpa'i sa bcu pa las sangs rgyas kyi dbang bskur ba thob pa gang yin pa ste/ sa de yongs su sbyangs pa'i phyir bsod nams dang ye shes kyi tshogs yongs su rdzogs pa dang / nyon mongs pa dang shes bya'i sgrib pa thams cad spangs pa'i phyir gnas gyur pa bsam gyis mi khyab pa brnyes pa dang /sems can thams cad kyi shes pa'i yul las 'das pa'i bdag nyid de ni ngo bo nyid kyi sangs rgyas yin te/ sprul pa de ni de'i yin no/ /de'i phyir/ gzhal yas grangs ni med pa ste/ /bsam yas bstan du med pas na//khyod ni nyid kyi rang nyid kyi/ /nyid ni mkhyen pa kho nar 'os/ /zhes bstod pa yin no/ /mi'i skye ba med par sangs rgyas nyid med na/ ji ltar mi rnams su ma skyes pa mngon par rdzogs par sangs rgyas she na med do zhes bya ba de gang du gsungs/ nyan thos kyi theg par ro zhe na/gang du mir sprul pa kho nas mngon par rdzogs par byang chub pa ston pa der ji ltar gzhan du brjod par bya/ gal te sprul pa de mi 'dod na cir 'gyur zhe na/ ci zhig tu 'gyur te/ theg pa chen po skyon med pa la yang gnod pa byas par 'gyur mod/ gzhan yang mi rigs pa mang por 'gyur te/byang chub sems dpa' thams cad mkhyen pa'i ye shes dang / nyon mongs pa bag chags dang bcas pa spangs pa dang nye bar gyur cing gang gis na yum gyi lhums su 'jug pa dang / 'byung ba na de las 'jig rten thams cad snang ba rgya chen pos khyab par gyur pa de lta bu'i mthu phun sum tshogs pa yin la/thos pa dang ting nge 'dzin gyi snyoms par 'jug pa mtha' yas pa'i dbang thob pa yang ma yin zhing / nyon mongs pa'i kun du rgyu ba thams cad rnam par ma bsal ba yin no zhes 'byung ba mi rigs pa yin no/ /yang na de ltar gyur na yang nyon mongs pa'i dbang gis 'dod pa'i khams su skye zhing mngal gyi gzims mal du gzims so zhes 'byung ba mi rigs so//byang chub sems dpa' bltams pa'i mod la sus kyang ma bzung bar gom pa bdun 'dor ba dang / phyogs bzhir gzigs pa dang / 'di ni nga'i srid pa dag tu skye ba tha ma yin no zhes tshig tu gsung la/phyis bgres pa'i rgyus dbang po yongs su smin na 'dod pa'i dga' ba'i longs spyod bag med pa la zhugs so zhes 'byung ba mi rigs so/ /rang bzhin gyis skye ba du ma'i tshe rabs dgongs pa yang yin/ bcom ldan 'das 'od srungs la tshangs par spyod pa spyad nas/byang chub kyi lam la goms par yang mdzad la/ dga' ldan nas kyang lha'i ris drug la bka' stsal nas gshegs pa bdag nyid dang / gzhan dag gi rga ba dang / na ba dang 'chi ba'i chos nyid mi mkhyen par gyur pa dang / gzhan mu stegs can rnams las byang chub kyi lam tshol bar zhugs pa dang /bdag nyid dub par gnas pa la rjes su sbyor ba'i mtha' la lam yin par 'du shes mdzad nas dka' thub drag po dag gis bdag nyid nyon mongs par gyur to zhes 'byung ba mi rigs so/ /yang na tshe rabs mi dgongs na ni de lta na yang bskal pa mi nyung bar bsod nams dang ye shes kyi tshogs bskyed pas/sku yang dag par grub pa dran pa dang blo gros chen po'i stobs bskyed pa thob pa/ mngal na yang bsnyel ba mi mnga' ba bltams ma thag tu tshig de lta bu gsungs so zhes bya ba mi rigs so/ /byang chub sems dpa' srid pa tha ma pa bsam gtan dang /gzugs med pa'i snyoms par 'jug pa bskyed nas/ yongs su nyams so zhes bya ba mi rigs so/ /yang na yongs su ma nyams par gyur na ni dka' ba spyad pas dag par thugs su chud pa'i phyir 'dod pa na spyod pa'i tshul khrims dang / brtul zhugs mchog tu 'dzin pa'i lta ba la mchog tu 'dzin par gyur to zhes 'byung ba mi rigs so//'on kyang rung ste/ byang chub sems dpas ji skad bstan pa de thams cad zhal gyis bzhes pa ni sems can 'dul ba'i thabs kyi rnam pa yongs su 'dzin du gzhug pa'i phyir / blo sngon du btang ba yin no zhe na/ de thams cad ni sprul pas kyang mdzad par spyod pas rgyu med par skye ba len pa dang / 'dod pa'i bsod nams kyi rjes su sbyor ba'i mtha' dang / bdag nyid dub par gnas pa la rjes su sbyor ba'i mtha' la brten par mi rigs so/ /gal te de thams cad sprul pa yin na ci'i phyir dka' ba spyad pa na/nga bram ze'i khye'u bla ma'i gnas skabs na yang dag par rdzogs pa'i sangs rgyas 'od srungs la dge sbyong mgo reg de la byang chub ga la yod/ byang chub ni mchog tu dka' ba yin no zhes kha byas pa'i las de'i rnam par smin pa ni nga lo drug tu dka' ba spyad pa gang yin pa 'di yin no zhes las kyi rgyu ba bshad ce na/de ni da ltar rigs 'di gsal bar bya'o snyam na shin tu mun pa byas pa yin no/ /ji ltar na khyim bdag mgon med zas sbyin gyis ni sangs rgyas zhes bya ba sngon ma thos pa'i sgra thos nas ba spu thams cad zing zhes byed cing / shin tu blta ba la spro bar gyur pa gang yin pa dang /bram ze'i khye'u bla ma tshe rabs gsum na sangs rgyas su 'gyur ba gang yin pas ni sangs rgyas nyid la skur pa btab pa 'di dgongs pa can ma yin par khyed yid ches par spro/ sprul pa'i dngos po ni mi ston kyang las kyi rgyu ba ni gdon mi za bar bstan par bya ste/sems can rnams las kyi 'jigs pa nyid yongs su bskyed pa'i phyir ro/ /sangs rgyas rnams sprul pa dag gis brdzun gsungs pa yin par 'gyur ro zhe na/ kye ma nyes par 'dzin pa rnams gdul dka' ba nyid yin no/ /sangs rgyas rnams ni sems can rnams la ji lta ji ltar phan pa de ltar de ltar sprul pa mdzad pa'am gsung ba yin na/'di la ci zhig mi rangs par bya/ gzhan du ji ltar gdul ba dang / skal ba mnyam pa'i sprul pa rnams kyis de dang skal ba mnyam pa'i rigs la sogs pa dam bcas pa 'gal bar mi 'gyur/ re zhig 'di yang dpyad par bya'o//ci de bzhin gshegs pa rnams tshig rtsub po'am mdza' bo dang dbye bar byed pa gsung ngam/ smras pa/ sems can rnams la phan par bya ba'i phyir gsungs te/ gzhan du na 'char ka dang ci zhig gsung ba'i mdo la sogs pa dag dang 'gal bar 'gyur ro zhe na/ci ngag gi las kha na ma tho ba dang bcas par brjod par bya ba'am/ smras pa ma yin / de ci'i phyir zhe na/ dge ba'i sems las byung ba'i phyir ro zhe na/ brdzun yang de kho na bzhin du ci'i phyir mi 'dod/ 'o na bla ma la sogs pa sprul pa yin par bstan pa la dgos pa ci zhig yod ce na/thabs la mkhas pa'i mdo sde dang / 'jig rten las 'das pa'i le'u la sogs pa dag ji ltar 'os par nges par gzung bar bya'o/ /thabs la mkhas pa'i mdo sde tshad ma nyid yin na ni ha cang thal bar 'gyur te/ de la thabs la mkhas pa nyid kyis srog gcod pa ni kha na ma tho ba med do zhes gsungs so//de lta yin na ni gang dag phan par 'dod pas de rnams mtho ris thob par bya ba'i phyir dang / 'khor ba las thar bar bya ba'i phyir/ phyugs dang dud 'gro sna tshogs gsod par byed pa/ mchod sbyin pa rnams 'khor ba las thar bar bya ba rnams la ci'i phyir kha na ma tho ba med par mi 'gyur zhe na/ci 'o thug dang khwaM ra 'dra ba nyid yin nam/ de rnams kyi srog gcod pa de ni gti mug las skyes pa dang / chags pa las skyes pa yin no/ /phyugs dang srog chags gzhan dag la mchod sbyin can gyi sdug bsngal gyis 'chi bar byed pa'am/bsad pas mtho ris sam thar pa 'thob bo snyam pa ni gti mug ste/ las dang 'bras bu phyin ci log pa la mngon par zhen pa'i phyir ro/ /bdag las 'dis mtho ris su 'gro bar 'gyur ro snyam pa ni gti mug dang chags pa'o/ /bcom ldan 'das kyis dge slong dag srog gcod pa ni rnam pa gsum ste/chags pa las skyes pa dang / zhe sdang las skyes pa dang / gti mug las skyes pa'o/ /log par lta ba'i bar la yang de bzhin no zhes mi dge ba'i las kyi lam rnams kyi mtshan nyid spyi rnam par gzhag pas/ de'i phyir ji ltar na de kha na ma tho ba med par 'grub/thabs la mkhas pa'i mdo sde las ni ma chags pa la sogs pa las byung ba'i srog gcod pa kha na ma tho ba med pa'o zhes yongs su bstan pas de dang der ji ltar na 'dra ba nyid yin/ ji ltar ma chags pa la sogs pa las 'byung zhe na/ gal te gzhan mtshams med pa'i las byed pa la mngon du phyogs pa mthong na/las de ni yun ring por rnam par smin pa drag por 'gyur bar rig nas/ snying rje byed pa na de bsad pas bdag nyid sems can dmyal bar skye ba yang khas blangs nas/ de yongs su bskyab pa'i phyir dge ba'am lung du ma bstan pa'i sems kyi gnas skabs byas te/bdag sems can dmyal ba rnams su skyes pa ni sla'i sdug bsngal gyi phung po chen po dang 'brel bar gyur na mi rung ngo snyam nas gsod par byed pa ste/ de lta bu ni dge ba'i sems las byung ba'i phyir ro/ /'di ltar dge ba'i sems kyang ma chags pa la sogs pa dang mtshungs par ldan pa yin no//'on te ma chags pa la sogs pa las byung yang srog gcod pa'i skyon du 'gyur na ni tshig rtsub po dang / mdza' bo 'byed pa dang / ji skad du gsungs pa'i mdo sde yang skyon du 'gyur ro/ /de yongs su gtong ba'i sems nyid gang yin pa de nyid 'dir zhe sdang ma yin nam zhe na/'di sdug bsngal gyi chu bo chen po las yongs su bskyab par 'dod pas bdag la byams pa bas kyang lhag par byams pas/ der de nges par myong bar 'gyur ba'i las byed pa la mngon du phyogs pa'i lus pas phul du byung ba'i lus gang thob par byed pa na/da yongs su btang ba gang yin/ gzhan yang snying brtse ba'i bdag nyid dag gis sbyor ba gang gis/ phan phyir gzhan gsod de ni skyon can na/ /gang gis dge sbyong drug cu la sogs shing / /mdo gnyis thub pas bstan pa de ci'i phyir//mdo gnyis kyang gang las chos kyi rnam grangs 'di bshad pa na/ dge sbyong drug cu kha nas khrag dron mo byung ste/ gnod pa de nyid kyis dus byas so zhes 'byung ba ljon shing gi phung po lta bu dang / gang las de na bcom ldan 'das kyis dge slong rnams la dge slong dag mi sdug pa sgoms shig /mi sdug pa bsten cing zhes bya ba nas phan yon che'o zhes bya ba'i bar du mi sdug pa bsten cing / mi sdug pa bsgom pa'i bsngags pa bshad pa dang / de'i tshe dge slong dag mi sdug pa bsgoms shing / mi sdug pa bsgoms pa na/ rnag gi lus 'dis 'dzem zhing zhes bya ba nas mtshon 'debs par byed cing / dge slong gis dge slong gsod pa'i bar 'byung ba ri dwags bzlog gi mdo yin no/ /ci'i phyir theg pa chen po las sprul pa shAkya thub pa sangs rgyas kyi sprul pa yin par bstan la/ theg pa chen po ma yin pa la ma yin zhe na/byang chub sems dpa' rnams ni rgya chen po la mos pa yin pas/ de rnams la sangs rgyas kyi ngo bo nyid dang / mthu'i bdag nyid chen po'i khyad par bstan pa'i phyir de bzhin gshegs pa skye ba bstan pa'i mdo bzhin du de ltar bstan par bya'o/ /gzhan du na ni de rnams de ltar sems mngon par 'du byed par mi 'gyur la/mi rigs par 'gyur ba ji skad du bstan pa de'i lan yang ji ltar btab par 'gyur/ nyan thos gang dag de lta bu la mos pa'i skal ba can de dag ni de nyid las thos par 'gyur ro/ /gang dag skal ba med pa de rnams la ni de bstan pa nyid skyon du 'gyur ro//de bas na theg pa chen po sangs rgyas kyi gsung yin no zhes bya ba de ni mi 'gal lo/ /de'i phyir shin tu rgyas pa'i sde theg pa chen po yin no zhes bya ba 'gal ba med do/ /rnam par bshad pa'i rigs pa las le'ur bcad pa bzhi pa'o// // brgal ba dang lan gyi rnam pa yang bstan/ ji ltar mdo sde bshad par bya ba'i rigs pa yang bstan to/ /gzhan yang chos smra ba pos thog ma kho nar mdo sde bkod nas brgal zhing brtag par bya ste/ 'khor lan rnams la sred pa bskyed pa'i phyir ro/ /'on kyang sred pa chung ba yin pa rnams la yang rna blag tu gzhug pa'i phyir gus par mnyan pa dang ldan pa bshad par bya'o//gus par mnyan pa dang ldan pa 'di ci zhig ce na/ gtam gang las gus par mnyan pa bstan pa'o/ /rna blags na dgos pa la sogs pa'i rim bas mdo sde bshad par bya'o/ /brgal zhing brtag pa byas na yang brgal ba ci'i phyir smos she na/brgal ba'i mjug thogs su lan rnams bde bar khong du chud par bya ba'i phyir ro/ /sngar/ mdo sde'i che ba nyid thos na/ /mnyan pa dang ni gzung ba la/ /nyan pa po ni gus byed 'gyur/ /de phyir thog mar dgos pa brjod/ /ces bstan pa yin na/de ci'i phyir thog mar gus par mnyan pa dang ldan pa bshad par bya zhe na/ dgos pa bstan pa la yang gus par mnyan par bya ba'i phyir ro/ /kha cig mdo sde'i don khong du chud par mi nus pa dag 'byung bas de dag la chos tsam la yang gus bar mnyan pas bsod nams bskyed par bya ba'i phyir dang /don khong du chud pa la smos bas shes rab kyi khams bskyed par bya ba'i phyir/ gdon mi za bar thog mar gus par mnyan pa dang ldan pa bshad par bya'o/ /ji ltar bshad par bya zhe na/ rnam pa gsum dag gis te/ yang dag par 'dzin du gzhug pa nyid dang /dgos pa yang dag par bstan pa nyid dang / rmugs pa dang / gnyid dang log pa'i rnam par rtog pa rnams kyis zhum pa dang / sems rnam par g.yengs pa rnams la yang mtshan dang / rab tu dga' ba dang / skyo ba'i gtam nye bar bsgrub pa nyid kyis so/ /ji ltar na yang dag par 'dzin du gzhug pa nyid kyis she na/gus par chos mnyan par bya'o zhes bya bas yang dag par 'dzud pa'i phyir ro/ /'dir yang dag par 'dzud pa ni yang dag par 'dzin du gzhug pa yin par rig par bya'o/ /sangs rgyas bcom ldan 'das ni 'khor la chos ston par mdzad pa na dbyangs yan lag lnga dang ldan pa zhal nas 'byung ngo //re zhig de yang de lta bu'i yon tan dang ldan pa'i gsung gis chos ston pa na/ dge slong dag khyed la chos bstan gyi de'i phyir nyon la legs par rab tu yid la byos shig ces de ltar yang dag par 'dzin du gzhug par mdzad pa yin na bdag cag la lta smos kyang ci dgos pas so//dbyangs kyi yan lag lnga ni 'brug sgra ltar zab pa dang / snyan cing 'jebs la rnar snyan pa dang / yid du 'ong zhing dga' bar byed pa dang / rnam par gsal zhing rnam par rig par bya ba dang / mnyan par 'os shing mi mthun pa med pa ste/'dis de bzhin gshegs pa'i dbyangs kyi yon tan lnga po rgya che ba nyid dang / rigs pa'i don dang ldan pa nyid dang / gzung sla ba nyid dang / sna tshogs ci 'dod pa nyid yongs su bstan to/ /yon tan lnga po 'di dag ni mnyan pa dang / rnam par mi g.yeng ba dang / rnam par grol ba dang / khong du chud par byed pa dang / yongs su smin par byed pa'i yan lag tu go rims bzhin du 'gyur ro/ /bsdus pa'i tshigs su bcad pa dag ni/ yon tan lnga ni rgya chen dang / /snyan dang rigs don ldan nyid dang / /gzung sla sna tshogs ci 'dod nyid/ /'di dag lnga yi yan lag ste//mnyan dang rnam par mi g.yeng dang / /rnam grol khong du chud pa dang / /smin par byed pa yin te des/ /thub chen gsung ni yan lag lnga/ /'phags pa shA ri'i bus tshe dang ldan pa dag dge slong chos smra ba pos gzhan dag la chos dang ldan pa'i gtam smra ba na/rnam pa nyi shu dag dang ldan pas gtam bya ste/ dus su gtam bya ba dang / gus pa dang / go rims dang zhes bya ba de lta bu la sogs pa dang tshe dang ldan pa dag chos mnyan par 'dod pas rnam pa bcu drug dang ldan pas chos mnyan par bya ste/ dus su chos mnyan par bya ba dang /gus pa dang / sri zhu dang zhes bya ba de lta bu la sogs pa gsungs pa yin no/ /nged dam khyed kyi de ni bsgrub par dka' bas de'i phyir rnam pa nyi shu 'am bcu drug lta zhog gi re zhig rnam pa gcig tsam yang byas la/ ngas kyang gus par chos bshad par bya/ khyod kyis kyang gus par chos nyon cig /ji ltar theg pa chen po'i mdo sde bsdus pa las 'byung ba de ltar yang yang dag par 'dzin du gzhug pa nyid kyis so/ /de las ji skad gsungs she na de'i phyir shes ldan rgyal ba'i sras dag ma chags pa'i sems dang / zhe sdang med pa'i sems dang / las su rung ba'i sems dang /rnam par ma rmongs pa'i sems dang / zhi ba'i sems dang / rtsub pa med pa'i sems dang / rgyud gcig tu gyur pa'i sems dang / dge ba'i sems dang / bye brag phyed pa'i sems dang / gus pa'i sems dang / mos pa'i sems dang / legs par rnam par gnas pa'i sems dang /le lo med pa'i sems dang / gzung ba'i sems dang / phan 'dogs pa'i sems dang / rab tu 'dzin pa'i sems dang / sgrub pa'i sems dang / don la lta ba'i sems dang / skyon yid la mi byed pa'i sems dang / don la rton pa'i sems dang /ri mor bya ba'i sems dang / zhum pa med pa'i sems dang / khengs pa med pa'i sems dang / mnyam par gzhag pa'i sems dang / tshig 'bru la mi 'phro ba'i sems dang / don mi gtong ba'i sems dang / yid la byed pa drag po'i sems byos shig ces 'byung ba yin no//yang dag par 'dzin du gzhug pa 'dis gang la yang dag par 'dzin du bcug ce na/ tshig bdun dag gis ni sgrib pa lnga yongs su spong ba la ste/ rmugs pa dang / gnyid dang / rgod pa dang / 'gyod pa rnam pa gnyis su byas te'o/ /tshig bzhi dag gis ni bcom ldan 'das kyis khye'u lta bu'i gang zag bzhi bstan pa gang yin pa dag ste/gsum ni nag po'i phyogs dang mthun pa yin no/ /gcig ni dkar po'i phyogs dang mthun pa yin te/ de lta bu nyid yongs su spang ba dang / de lta bu nyid la'o/ /tshig lhag ma bcu drug po dag gis ni don rgyas pa las 'phags pa shA ri'i bus rnam pa bcu drug po gang dag gis chos mnyan par bya bar gsungs pa'i rnam pa bcu drug po dag la yang dag par 'dzin du bcug pa yin no//de la chos mnyan pa dang mthun pa'i spyod lam la rnam par gnas pa'i phyir legs par rnam par gnas pa'i sems so/ / rab tu 'dzin pa'i phyir le lo spangs te nyan pa'i phyir/ le lo med pa'i sems dang / gzung ba'i bsam pa ni gzung ba'i sems so/ /chos smra ba la gus pa dang bcas pa'i phyir phan 'dogs pa'i sems so/ /de nyid kyis sems kyi rjes su 'jug pas lus dang / ngag dag gis sems yang dag par rab tu 'dzin pa'i phyir rab tu 'dzin pa'i sems so//chos 'di ni don chen po'o snyam pa ni don la lta ba'i sems so/ /tshul khrims dang / rigs dang / rus kyi skyon yid la mi byed pa'i phyir/ skyon yid la mi byed pa'i sems so//gzhung gi tshig 'bru nyams pa la don la rton pa'i sems dang / ngag gi las phun sum tshogs pa la sangs rgyas dang 'dra ba nyid kyis ri mo bya ba'i sems so/ /lhag ma ni go sla ba'i phyir ma bshad do/ /de lta bu ni yang dag par 'dzin du 'jug pa nyid kyis so//ji ltar na dgos pa yang dag par bstan pa nyid kyis yin/ ci'i phyir gus par chos mnyan par bya zhe na/ snod gsum dag tu ni lhas char phab kyang chu'i bya ba mi byed de/ kha gzhan tu phyogs pa'am bcad pa gang du mi 'bab pa nyid dang / mi gtsang ba gang du bab kyang skyon can du 'gyur ba dang /bu ga dang bcas pa gang du mi gnas pa'o/ /de bzhin du skye bo nyan pa po'i yid kyi/ snod gsum dag tu chos smra bas chos kyi char phab kyang / chos kyi chu'i bya ba mi byed de/ rnam par g.yeng ba dang / rmugs pa dang / gnyid dag gis mi nyan pa'i phyir/gang du mi 'bab pa dang / tshul bzhin yid la mi byed pa'i phyir/ gang du bab kyang skyon can du 'gyur ba dang / dran pa brjed ngas pa'i phyir gang du mi gnas pa'o/ /de lta bas na de'i skyon yongs su spang ba'i phyir bcom ldan 'das kyis de'i phyir nyon la legs par rab tu yid la byos shig ces gsungs pa yin pas na mnyan pa'i skyon de bdag cag la 'byung na mi rung ba'i phyir/gus par chos mnyan par bya'o/ /nad pa gcig gis ni sman pa'i lung ma shes la/ gnyis pas ni nyes par bzung ste/ dper na 'khrus pa la 'bras khu lud cig ces bsgo ba las/zho ga chu blud pa dang / drod chung ba la phye ma sbyar ba las phyung ste/ pho sum re re 'goms shig ces bsgo ba las rgyun mi 'chad par thams cad 'gams pa dang / 'di ltar snum thong la 'di ltar bkru sman 'thungs shig /'thungs nas kyang 'di ltar 'bras khu dang /thug pa la sogs pa rim gyis longs spyod cig ces bsgo ba las/ nyi ma gcig nyid la thams cad byas so/ /gsum pas ni legs par bzung nas chud gzan pa lta bu ste/ de rnams las bar ma ni thams cad pas tha chad yin no/ /bstan pa 'di la yang gang zag de lta bu gsum yod pas de'i gnyen por bcom ldan 'das kyis nyon la legs par dang /rab tu yid la bya bas mnyan pa la yang dag par gzung ba mdzad do/ /de lta bas na nad pa lta bur gyur na mi rung bas gus par chos mnyan par bya'o/ /nad pa gsum po dag ni pha la gnod de/zas mi za ba gang yin pa dang / mi 'phrod pa za ba gang yin pa dang / 'phrod pa zos pa skyugs pa gang yin pa'o/ /de bzhin du nyon mongs pa'i nad pa rnams kyang chos kyi yab sangs rgyas la gnod de/ dam pa'i chos mi nyan pa gang yin pa dang / tshul bzhin yid la mi byed pa gang yin pa dang /legs par yid la med pa'i phyir brjed pa gang yin pa'o/ /de lta bas na chos kyi yab sangs rgyas la gnod par gyur na mi rung bas/ gus par mnyan par bya'o/ /bcom ldan 'das kyis chos mnyan pa la phan yon lnga gsungs te/ ma thos pa thos par 'gyur ba dang /thos pa yongs su byang bar 'gyur ba dang / som nyi spong ba dang / lta ba drang por byed pa dang / shes rab kyis don dang / tshig zab mo rtogs par 'gyur ba'o/ /de la ji ltar na ma thos pa thos par 'gyur ba yin zhe na/ thog ma med pa can gyi 'khor ba nas bstan bcos gzhan thams cad las ma thos pa phung po dang /skye mched dang / khams dang / rten cing 'brel bar 'byung ba dang / 'phags pa'i bden pa dang / dran pa nye bar gzhag pa dang / yang dag par spong ba dang / rdzu 'phrul gyi rkang pa dang / dbang po dang / stobs dang /byang chub kyi yan lag dang / dbugs rngubs pa dang / 'byung ba dran pa dang / bslab pa dang / shes nas dad pa rnam par gzhag pa dang / kun nas nyon mongs pa dang / rnam par byang ba'i chos rnams kyi bar dang spyi dang rgyu dang 'bras bu'i mtshan nyid phyin ci ma log pa ston pa dang /bdag tu lta ba'i nye bar len pa spong ba yongs su ston pa dang / gang zag slob pa dang / mi slob pa'i bar du dbye ba dang / che ba'i bdag nyid dang / dge sbyong gi 'bras bu dang / rnam par thar pa dang / zil gyis gnon pa'i skye mched dang / zad par gyi skye mched dang /nyon mongs pa med pa dang / smon nas shes pa la sogs pa dang / de bzhin gshegs pa'i stobs dang / mi 'jigs pa dang / sangs rgyas kyi chos ma 'dres pa dang / che ba'i bdag nyid la sogs pa gang yin pa de thos par 'gyur ro/ /de ltar na ma thos pa thos par 'gyur ro/ /ji ltar na thos pa yongs su byang bar 'gyur zhe na/sangs rgyas 'byung ba gzhan dag las sam/ 'dir thos pa brjod dam/ dri ma can du gyur pa gang yin pa de mnyan pas gsal bar byed cing dri ma med par byed do/ /de ltar na thos pa yongs su byang bar 'gyur ro/ /ji ltar na som nyi spong bar 'gyur zhe na/de sems pa na the tshom 'byung ba gang yin pa de/ chos mnyan pas nges pa 'thob bo/ /ji ltar na lta ba drang por byed ce na/ 'dis sems pa na log par rtog pa 'byung ba gang yin pa de yang dag par rtog go/ /ji ltar na shes rab kyis don dang tshig zab mo rtogs par 'gyur zhe na/rten cing 'brel bar 'byung ba'i chos nyid gang thos nas/ chos nyid rtogs par 'gyur zhing / 'phags pa'i bden pa mngon par rtogs par byed do/ /phan yon lnga po 'di dag gis shes rab gsum yongs su dag par bstan pa yin te/ ma thos pa thos par 'gyur ba dang /thos pa yongs su byang bar 'gyur ba gang yin pa des ni thos pa las byung ba'i shes rab yongs su dag par 'gyur ro/ /som nyi spong ba dang / lta ba drang por byed pa gang yin pa des ni bsams pa las byung ba'o/ /shes rab kyis don dang / tshig zab mo rtogs par 'gyur ba gang yin pa des ni bsgoms pa las byung ba'i shes rab yongs su dag par 'gyur ro//phan yon 'di dag yang dag par mthong bas dam pa'i chos mnyan pa las gus par mnyan par bya'o/ /yang ci'i phyir zhe na/ bcom ldan 'das kyis/ thos pas chos rnams shes par 'gyur//thos pas sdig las ldog par 'gyur/ /thos pas don med spong bar 'gyur/ /thos pas mya ngan 'das pa 'thob/ /ces gsungs pas so/ /de la ji ltar na thos pas chos rnams shes par 'gyur zhe na/ 'di lta ste/ 'di na kha cig de bzhin gshegs pas gsungs pa'i chos 'dul ba thos na yang dag pa'i tshul khrims dang /ting nge 'dzin dang / shes rab yongs su ston pa gang yin pa 'di de kho na chos yin gyi/ gzhan mu stegs can gyis smras pa me dang chur 'jug pa dang / zas mi za ba dang / brtul zhugs drag po dang /'tshe ba dang / mchod sbyin la sogs pa yongs su ston pa ni ma yin no zhes rnam par shes so/ /ji ltar na thos pas sdig pa las ldog par 'gyur zhe na/ 'di lta ste/ 'di na kha cig de bzhin gshegs pas gsungs pa'i chos 'dul ba las lhag pa'i tshul khrims kyi bslab pa thos na/de la brten pas nyes par spyod pa las ldog go/ /ji ltar na thos pas don med pa spong bar 'gyur zhe na/ 'di lta ste/ 'di na kha cig de bzhin gshegs pas gsungs pa'i chos 'dul ba las lhag pa'i sems kyi bslab pa thos na/ de la brten pas gang dag la byis pa rnams don du 'du shes pa 'dod pa don med par gyur pa rnams spong bar 'gyur ro//ji ltar na thos pas mya ngan las 'das pa 'thob ce na/ 'di lta ste/ 'di na kha cig de bzhin gshegs pas gsungs pa'i chos 'dul ba las lhag pa'i shes rab kyi bslab pa thos na/ de la brten pas zag pa zad pa mngon sum du byed do//'dis ni dam pa'i chos mnyan pa la phan yon rnam pa bzhi po yang dag pa'i lta ba rnyed pa dang / bslab pa gsum la yang dag par brten pas/ sdig pa las yang dag par rgal ba dang / 'dod pa las yang dag par rgal ba dang /yang srid pa las yang dag par rgal ba yod par go rims bzhin du yongs su bstan to/ /yang nyon mongs pa'i gnod pa'i rgyus phan yon rnam pa bzhi po yang dag pa'i lta ba rnyed pa dang / las kyi kun nas nyon mongs pa las rgal ba dang / nyon mongs pa'i kun nas nyon mongs pa las rgal ba dang /skye ba'i kun nas nyon mongs pa las rgal ba yod par yongs su bstan to/ /yang rnam pa bzhi ste/ de bzhin gshegs pas gsungs pa'i chos 'dul ba la dad pa rnyed pa dang / rab tu 'byung ba dang / dbang po'i sgo bsrungs pa nyid kyi rim pas bsam gtan bzhi pa'i bar du ste/de ni 'dod pa'i khams las 'dod chags dang bral ba'i phyir/ gnod pa spong ba dang / 'phags pa'i bden pa yang dag pa ji lta ba bzhin du rab tu shes pa'i rim pas zag pa zad pa'i bar du ste/ n+ya gro d+ha la sogs pa'i mdo sde rnams kyis bsgrub par bya'o//de ltar phan yon rnam pa mang po yang dag par mthong ba nyid kyis gus par chos mnyan par bya'o/ /yang ci'i phyir zhe na/ 'di ltar bcom ldan 'das kyi chos 'dul ba ni legs par gsungs pa yin pas so/ /yang ji ltar na legs par gsungs pa yin zhe na/rnam pa bcu dag gis te/ yang dag par bslang ba nyid kyis dang / dbang du mdzad pa nyid kyis dang / 'jug pa nyid kyis dang / rab tu bstan pa nyid kyis dang / rab tu dbye ba nyid kyis dang / rten nyid kyis dang / go bar mdzad pa nyid kyis dang / gdags pa nyid kyis dang /dus nyid kyis dang / yon tan yongs su 'dzin pa nyid kyis so/ /ji ltar na yang dag par bslang ba nyid kyis she na/ yang dag par mngon par rdzogs par sangs rgyas nas gsungs pa'i phyir ro/ /ji ltar na dbang du mdzad pa nyid kyis she na/ sems can thams cad kyi dbang du mdzad nas gsungs pa'i phyir ro//ji ltar na 'jug pa nyid kyis she na/ res 'ga' ma yin gyi / yang dang yang du rgyun du gsungs pa'i phyir ro / /ji ltar na rab tu bstan pa nyid kyis she na/ slob dpon gyis dpe mkhyud kyis 'ga' la yang bar chad ma byas par bar chad med par yang dag par gsungs pa'i phyir ro//ji ltar na rab tu dbye ba nyid kyis she na/ sems can gyi bsam pa ji lta ba bzhin du yang dag par gsungs pa'i phyir ro/ /ji ltar na rten nyid kyis she na/ dbyangs yan lag lnga dang ldan pa can yang dag par gsungs pa'i phyir ro/ / ji ltar na go bar mdzad pa nyid kyis she na/ dbyangs gcig gis 'jig rten gyi khams mtha' yas par go bar mdzad pa yang dag par gsungs pa'i phyir dang / 'khor gyi dkyil 'khor ji snyed pa la thug par go bar mdzad pa yang dag par gsungs pa'i phyir ro/ /ji ltar na gdags pa nyid kyis she na/mtha' gnyis spangs pa'i lam gsungs pa'i phyir ro/ /ji ltar na dus nyid kyis she na/ 'dul ba yongs su smin pa rnams la gsungs pa'i phyir ro/ /ji ltar na yon tan yongs su 'dzin pa nyid kyis she na/ gsung yon tan rnam pa drug cu dang ldan pa yang dag par gsungs pa'i phyir te/ji skad du theg pa chen po'i mdo sde de bzhin gshegs pa'i gsang ba las/ zhi ba'i blo gros gzhan yang de bzhin gshegs pa'i gsung ni rnam pa drug cu dang ldan par 'byung ste/ mnyen pa dang / 'jam pa dang / yid du 'ong ba dang / yid du 'thad pa dang /dag pa dang / dri ma med pa dang / gsal ba dang / snyan cing 'jebs pa dang / mnyan par 'os pa dang / mi tshugs pa dang / snyan pa dang / 'dul ba dang / mi rtsub pa dang / mi brlang ba dang / rab tu dul ba dang / rnar snyan pa dang / lus tshim par byed pa dang / sems tshim par byed pa dang /snying dga' bar byed pa dang / dga' ba dang / bde ba bskyed pa dang / yongs su gdung ba med pa dang / kun du shes par bya ba dang / rnam par rig par bya ba dang / rnam par gsal ba dang / dga' bar byed pa dang / mngon par dga' bar byed pa dang / kun du shes par byed pa dang /rnam par rig par byed pa dang / rigs pa dang / 'brel bar byed pa dang / zlos pa'i skyon med pa dang / seng ge'i sgra'i shugs dang / glang po che'i sgra skad dang / 'brug gi sgra skad dang / klu'i dbang po'i sgra dbyangs dang / dri za'i glu dbyangs dang / ka la piM ka'i sgra dbyangs dang /tshangs pa'i sgra dbyangs bsgrags pa dang / shang shang te'u'i sgra dbyangs su grags pa dang / lha'i dbang po'i sgra dbyangs ltar snyan pa dang / rnga'i sgra dang / ma khengs pa dang / mi dma' ba dang sgra thams cad kyi rjes su zhugs pa dang / tshig zur chag med pa dang /ma tshang ba med pa dang / ma zhum pa dang / ma zhan pa dang / rab tu dga' ba dang / khyab pa dang / chub pa dang / rgyun chags pa dang / 'bel ba dang / sgra thams cad rdzogs par byed pa dang / dbang po thams cad tshim par byed pa dang / ma smad pa dang /mi 'gyur ba dang / ma rtabs pa dang / 'khor kun du grags pa dang / rnam pa thams cad kyi mchog dang ldan pa'o/ /de la mnyen pa ni sems can gyi khams kyi dge ba'i rtsa ba ston pa'i phyir ro/ /'jam pa ni mthong ba'i chos kho na la reg na bde ba'i phyir ro/ / yid du 'ong ba ni don bzang ba'i phyir ro/ /yid du 'thad pa ni yi ge bzang ba'i phyir ro/ /dag pa ni 'jig rten las 'das pa gong na med pa'i rjes su thob pa'i phyir ro/ /dri ma med pa ni nyon mongs pa'i bag la nyal dang / bag chags thams cad dang bral ba'i phyir ro/ /gsal ba ni tshig dang yi ger rab tu grags pa'i phyir ro//snyan cing 'jebs pa ni mu stegs can blo gros ngan pa thams cad kyi lta ba 'joms pa'i stobs kyi yon tan dang ldan pa'i phyir ro/ /mnyan par 'os pa ni bsgrubs pas nges par 'byin pa'i phyir ro/ /mi tshugs pa ni phas kyi rgol ba thams cad kyis mi brdzi ba'i phyir ro//snyan pa ni dga' bar byed pa'i phyir ro// //bam po dgu pa/ 'dul ba ni 'dod chags kyi gnyen po yin pa'i phyir ro/ /mi rtsub pa ni bslab pa bca' ba'i thabs bde ba'i phyir ro/ /mi brlang ba ni de las 'das na nges par 'byung ba'i thabs yang dag par ston pa'i phyir ro//rab tu dul ba ni theg pa gsum char gyis 'dul ba ston pa'i phyir ro/ /rnar snyan pa ni rnam par g.yeng ba'i gnyen po yin pa'i phyir ro/ /lus tshim par byed pa ni ting nge 'dzin skyed pa'i phyir ro/ /sems tshim par byed pa ni lhag mthong gis rab tu dga' ba skyed pa'i phyir ro//snying dga' bar byed pa ni the tshom gcod par byed pa'i phyir ro/ /dga' ba dang bde ba skyed pa ni log par nges par sel ba'i phyir ro/ /yongs su gdung ba med pa ni bsgrub pa la 'gyod pa med pa'i phyir ro/ / kun du shes par bya ba ni thos pa las byung ba'i shes rab phun sum tshogs pa'i rten yin pa'i phyir ro/ /rnam par rig par bya ba ni bsam pa las byung ba'i shes rab phun sum tshogs pa'i rten yin pa'i phyir ro/ /rnam par gsal ba ni slob dpon gyis dpe mkhyud med par chos ston pa'i phyir ro//dga' bar byed pa ni rang gi don rjes su thob pa rnams dga' bar byed pa'i phyir ro/ /mngon par dga' bar byed pa ni rang gi don rjes su ma thob pa rnams kyis dga' bar bya ba yin pa'i phyir ro/ /kun shes par byed pa ni bsam gyis mi khyab pa'i chos yang dag par ston pa'i phyir ro//rnam par rig par byed pa ni bsam gyis mi khyab pa'i chos yang dag par ston pa'i phyir ro/ /rigs pa ni tshad ma dang mi 'gal ba'i phyir ro/ /'brel ba ni 'dul ba la ji ltar rigs par ston pa'i phyir ro/ /zlos pa'i skyon med pa ni don med pa ma yin pa'i phyir ro/ /seng ge'i sgra'i shugs ni mu stegs can gyi tshogs thams cad skrag par byed pa'i phyir ro//glang po che'i sgra skad ni rgya che ba'i phyir ro/ /'brug gi sgra dbyangs ni zab pa'i phyir ro/ /klu'i dbang po'i sgra ni gzung bar 'os pa'i phyir ro/ /dri za'i glu dbyangs ni snyan pa'i phyir ro/ /ka la pi ka'i sgra dbyangs ni rgyun mi 'chad pa dang 'jigs pa'i phyir ro//tshangs pa'i sgra dbyangs bsgrags pa ni thag ring por grags pa'i phyir ro/ /shang shang te'u'i sgra dbyangs su grags pa ni sgrub pa thams cad kyi sngon du 'gro ba'i bkra shis yin pa'i phyir ro/ /lha'i dbang po'i sgra dbyangs ltar snyan pa ni mi 'da' bar bya ba yin pa'i phyir ro//rnga'i sgra ni bdud dang phyir rgol ba thams cad las rnam par rgyal ba'i sngon du 'gro ba yin pa'i phyir ro/ /ma khengs pa ni bstod kyang kun nas nyon mongs pa med pa'i phyir ro/ /mi dma' ba ni smad kyang kun nas nyon mongs pa med pa'i phyir ro//sgra thams cad kyi rjes su zhugs pa ni/ brda sprod pa thams cad kyi mtshan nyid kyi rnam pa thams cad kyi rjes su zhugs pa'i phyir ro/ /tshig zur chag pa med pa ni bsnyel te mi gsung ba'i phyir ro/ /ma tshang ba med pa ni gdul ba'i bya ba la dus thams cad du nye bar gnas pa'i phyir ro//ma zhum pa ni rnyed pa dang bkur sti la mi brten pa'i phyir ro/ /mi zhan pa ni bsnyengs pa dang bral ba'i phyir ro/ /rab tu dga' ba ni mi skyo ba'i phyir ro/ /khyab pa ni rig pa'i gnas thams cad la mkhas pa dang ldan pa'i phyir ro/ /chub pa ni sems can rnams kyi de dag gi don thams cad sgrub par byed pa'i phyir ro//rgyun chags pa ni rgyun ma chad pa'i phyir ro/ /'bel ba ni rnam pa sna tshogs su nye bar gnas pa'i phyir ro/ /sgra thams cad rdzogs par byed pa ni/ gsung gcig las sgra'i rnam par rig pa rnam pa du ma nye bar gnas pa'i phyir ro//dbang po thams cad tshim par byed pa ni gcig las don du ma'i rnam par rig pa nye bar gnas pa'i phyir ro/ /ma smad pa ni dam bcas pa ji lta ba bzhin pa'i phyir ro/ /mi 'gyur ba ni dus la bab bar rab tu sbyor ba'i phyir ro/ /ma rtabs pa ni rtab rtab por mi gsung ba'i phyir ro/ / 'khor kun tu grags pa ni/ 'khor nye ba dang / ring bas mtshungs par thos pa'i phyir ro/ /rnam pa thams cad kyi mchog dang ldan pa ni 'jig rten pa'i don thams cad dpe'i chos su sgyur ba'i phyir ro/ /yang ci'i phyir zhe na/ 'khor lo legs par sbyar ba yang 'phul bar byed pa dang / sa dang gnyis kyi yon tan gyis 'dril te/gal te 'phul bar byed pas kyang legs par 'phul ba la/ gang du dbul bar bya ba'i sa yang mi mnyam pa med pa yin na'o/ /de bzhin du de bzhin gshegs pa'i chos kyi 'khor lo legs par bshad pa yang ston pa po dang / nyan pa po dang / gnyis kyi yon tan gyis bskor te/gal te ston pa pos yang dag par ston pa gang la bstan par bya ba'i nyan pa po yang dag par nyan na'o/ /de nyid kyi phyir bcom ldan 'das kyi gang zag gnyis ni/ de bzhin gshegs pa'i chos dang ldan pa'i chos kyi 'khor lo bskor ba'i rjes su skor bar byed pa yin te/ gang zhig gus par chos 'chad pa dang /gang zhig de gus par nyan pa'o/ /chos dang ldan pa chos kyi 'khor lo zhes bya ba 'di ci zhig yin zhe na/ don dam pa'i chos dang ma bral ba ni/ chos dang ldan pa yin la kun rdzob kyi chos kyi ngo bo bstan pa'i rang bzhin gyi 'khor lo ni chos kyi 'khor lo yin no/ /gzhan yang bstan pa yang chos zhes bya ste/ji skad du/ ji ltar na dge slong chos shes pa yang yin zhe na/ 'di la dge slong chos shes pa ni 'di lta ste mdo sde dang / dbyangs kyis bsnyad pa'i sde dang zhes rgya cher gsungs pa lta bu'o/ /rigs pa yang yin te/ ji skad du chos kyis chos tshol bar byed de/ chos ma yin pas ma yin no zhes 'byung ba lta bu'o/ /de lta bas na rigs pa'i chos dang ma bral ba'i bstan pa ni chos kyi 'khor lo zhes pa yin no/ /'khor lo dang chos mthun pas 'khor lo ste / 'dul ba'i rgyud gzhan dag la bskor ba'i phyir ro/ /gzhan mu stegs can dag la yang chos kyi 'khor lo yod mod kyi/chos dang ldan pa ni ma yin te/ rigs pa'i chos dang bral ba'i phyir ro/ /de lta bas na de bzhin gshegs pa'i chos kyi 'khor lo kho na chos dang ldan pa zhes bya bar nges par gzung bar bya'o/ /de lta bas na ji ltar sangs rgyas bcom ldan 'das kyis chos kyi 'khor lo rjes su skor bar byed par 'gyur snyam nas/gus par chos mnyan par bya'o/ /'phags pa shA ri'i bus/ de ltar 'phags pa nyan thos chos yang dag par nyan na 'chad pa po la mtho mi 'tsham pa dang / gtam gyi bcud rtogs pa dang / chos nyid kyis ston pa la bsnyen bkur byed pa dang / bdag gi don rjes su 'thob pa dang /mya ngan las 'das pa yang 'thob bo zhes gsungs pa 'dis ci zhig bstan pa yin zhe na/ chos yang dag par mnyan na dus gsum dag tu phan yon gsum yod par bstan pa yin te/ nyan pa'i dus na 'chad pa po'i bsam pa gang yin pa rdzogs par byed cing / bdag nyid kyis kyang chos kyi don gyi bcud 'thob pas gzhan dang /bdag rjes su 'dzin pa dang / bsgrub pa'i dus su ston pa'i dgongs pa gang yin pa rdzogs par byed cing bdag nyid kyis kyang zag pa zad pas rjes su 'thob pas/ bdag dang gzhan rjes su 'dzin pa dang / tha ma'i dus su sdug bsngal thams cad kyi mthar phyin pa phung po'i lhag ma med pa'i mya ngan las 'das pa 'thob bo//gal te dus gsum dag tu yin na ci'i phyir nyan na zhes gsungs she na/ ji ltar smra zhing 'gro bar byed ces bya ba'i bya ba gnyis dus gcig pa nyid du bsam pa de lta bur ni nyan na ji skad smos pa bzhin du byed pa ni ma yin no //'on kyang nyan pa'i rgyu nyid la dgongs pa yin te/ dper na mar zos na brta par byed do zhes bya ba lta bu'o/ /de ltar na phan yon rnam pa lnga 'dod pas gus par chos mnyan par bya'o/ /ji ltar long ba dang mig btsums pa la mar me sbar ba mtshungs pa ltar skal ba med pa lta ba log par zhugs pa dang /rna ba blags pa yang de lta bu yin pas/ de lta bas na long ba dang 'dra bar gyur na mi rung ngo snyam nas gus par chos mnyan par bya'o/ /brda mi phrad pas kyang sangs rgyas kyi gsung gus par mnyan par bya ste/ 'di ltar dad pa tsam gyis kyang nyan na bsod nams chen po nyid dang ldan pa dang /shes rab kyis khams brtas par 'gyur na don rtogs pa la lta smos kyang ci dgos te/ ba lang rdzi dga' bos sbal ba khar bas mnan pa'i rtogs pa brjod pa yang brjod par bya'o/ /'dir yang bshad pa/ dad pas mnyan pas gang gis na/ / mtho ris dga' ba'i bsod nams dang / /gang gis mya ngan 'das thob pa'i/ /shes rab sa bon brtas par 'gyur/ /'dzin pa pos snod gzung ba ni bla'i ldugs pa pos bcud kyis len blugs par ni dka' bas khyed kyis ni sems gtad par bya bas rna ba'i snod bzung ba 'ba' zhig bya zhing / bdag cag gis ni dam pa'i chos kyi bcud kyis len blugs par bya ste/ khyed kyi bya ba ni sla ba yin/ nged kyi bya ba ni dka' ba yin no/ /sla ba rigs pa dang ldan pa mi byed pa ni smad par bya ba yin pas de lta bas na gus par chos mnyan par bya'o/ /sangs rgyas kyi gsung 'di ni chu dang 'dra'o//chu ni phan pa rnam pa lnga byed de/ /'bras thug po che la sogs pa bangs par bya ba rnams bangs par byed pa dang / lus dang gos dang / snod dag gi dri ma sel ba dang / sos ka'i lus kyi yongs su gdung ba sel ba dang / skom dad che ba zhi bar byed pa dang / rtswa dang 'bru dang / nags tshal skyed cing 'phel bar byed pa yin no/ /de bzhin du sangs rgyas kyi gsung la dad pa bskyed pas gdul bya'i rgyud bangs par byed pa dang / 'chal ba'i tshul khrims kyi dri ma sel ba dang / 'dod pa'i yongs su gdung ba sel ba dang / yang 'byung ba pa'i sred pa zhi bar byed pa dang / byang chub kyi phyogs dang mthun pa'i yon tan gyi rtswa dang / 'bru dang / nags tshal skyed cing 'phel bar byed pa yin no/ /phan pa rnam pa lnga po de yang dad pa rnyed pa dang / las dang bcas pa'i bslab pa gsum las brtsams par rig par bya'o/ /de lta bas na phan pa rnam pa lnga po de 'dod pas gus par sangs rgyas kyi gsung mnyan par bya'o/mes bya ba bzhi byed de/ sreg par byed pa dang / tshos par byed pa dang / dro bar byed pa dang / gsal bar byed pa'o/ /de bzhin du sangs rgyas kyi gsung gi mes kyang / rgyud smin pa rnams la nyon mongs pa rnams sreg pa dang / rgyud ma smin pa rnams la dge ba'i rtsa ba rnams smin par byed pa dang / srid pa la mngon par dga' ba rnams skyo bar byed pa'i phyir gdung bar byed pa dang / skyo bar gyur pa rnams dang / the tshom zos pa dang / lam ngan par zhugs pa rnams la lam dang lam ma yin pa yang dag pa rab tu ston pa'i phyir gsal bar byed pa yin no//de lta bas na gus par chos mnyan par bya'o/ /gzhi lnga dag gis 'jug ngogs bde ba la brten par bya ste/ dri ma med par bya ba'i phyir dang / tsha ba rab tu zhi bar bya ba'i phyir dang / skom pa rab tu zhi bar bya ba'i phyir dang / dga' ba'i rtsed mo nyams su myong bar bya ba'i phyir dang /tshu rol gyi 'gram nas pha rol gyi 'gram du phyin par bya ba'i phyir ro/ /sangs rgyas kyi gsung 'jug ngogs bde ba la yang de bzhin te/ 'chal ba'i tshul khrims kyi dri ma med par bya ba'i phyir dang / 'dod pa'i yongs su gdung ba rab tu zhi bar bya ba'i phyir dang / yang 'byung ba'i sred pa zhi bar bya ba'i phyir dang /bsam gtan dang / mngon par shes pa dang / tshad med pa dang / rnam par thar pa la sogs pa yon tan khyad par can gyi dga' ba'i rtsed mo nyams su myong bar bya ba'i phyir dang / tshu rol gyi 'gram 'jig tshogs nas pha rol gyi 'gram mya ngan las 'das par 'gro bar bya ba'i phyir ro//de lta bas na 'jug ngogs bde ba la brten pa'i yon tan 'dod pa rnams kyis gus par sangs rgyas kyi gsung mnyan par bya'o / /rgyu gsum dag gis ras la gzugs su mi bri ba 'grub ste/ ras 'gul ba dang / dri ma can dang / thag thug nyid kyi skyon gyi phyir dang / tshon mi bzang pa'i phyir dang /ri mo mkhan mi mkhas pa'i phyir ro/ /nyan pa po'i skye bo'i yid kyi ras la yang dag pa'i ye shes kyi gzugs su bri ba yang de bzhin te/ rnam par g.yeng ba dang / sgrib pa dang / sngon gyi sgrib pas de g.yo ba dang / dri ma can dang / mi mnyam pa nyid kyi skyon gyi phyir dang /nyes par bshad pa'i chos kyi tshon mi bzang ba'i phyir dang / chos smra ba'i ri mo mkhan mi mkhas pa'i phyir ro / /de lta bas na tshon gyi skyon ni med de/ chos ni legs par gsungs pa yin pa'i phyir ro/ /khyed dang bdag cag la skyon 'byung ste/de yongs su spang ba'i phyir khyed kyis kyang gus par sangs rgyas kyi gsung mnyan par bya zhing / bdag cag gis kyang gus par bshad par bya'o/ /dam pa'i chos mnyan pa la yon tan lnga yod de/ rnam par mi shes pa rnam par shes par byed pa dang / nyes par bzung ba 'dor ba dang /the tshom zos pa nges par byed pa dang / nges par byas pa snying por byed pa dang / 'phags pa'i shes rab kyi mig sbyong bar byed pa'o/ /de lta bas na gus par dam pa'i chos mnyan par bya'o/ /long ba ni ston pa po'i yon tan gyi lam rnyed pa yang srid kyi/ blun po ni log par lhung na ma yin no//de lta bas na long ba ni bla'i/ blun po nyid ni ma yin te/ blun po'i rgyu ni mi nyan pa yin no/ /de lta bas na/ ji ltar na blun por mi 'gyur bar bya snyam nas/ gus par chos mnyan par bya'o/ /sems spre'u 'dra bar g.yo ba ni gnyis te/ rnam par g.yeng ba dang / gnyid log pa'o/ /de tshar gcad pa'i phyir 'di skad ces gus par sangs rgyas kyi gsung mnyan par bya'o zhes brjod par bya'o/ /'ga' zhig lam log par ni zhugs na yang / /rim gyis bsgrub pa byas na sman du 'gyur/ /dge dang mi dge gnyis ka dpyad byas na//gang 'dod de nas rtog byed 'gro bar gyis/ /'ga' la 'khrul pa byung na bdag nyid ni/ /dag 'gyur 'di yin shes nas 'dod pa'ang srid/ /yon tan de gsum brtags nas thub dbang gi /gsung ni gus par nyon ces brjod par bya/ /de yang gang zag gsum po dag la dgongs nas gsungs pa yin te/gang zag gsum dag ni nges par legs pa la log par zhugs pa dang / bsgrub par 'dod pa mngon par mi shes pa dang / bsgrub par mi 'dod pa gcig tu bag med par gyur pa dri ma can gyi las can yin no//nyi ma gnam la 'char ba na bya ba lnga byed de/ mi la sogs pa dag gi lta ba skyed pa dang / 'ug pa la sogs pa dag gi lta ba zlog pa dang / 'bru la sogs pa smin par bya ba smin par byed pa dang / 'dam la sogs pa bskam par bya ba skems pa dang / lus dang chu la sogs pa dro bar bya ba dro bar byed pa'o//de bzhin du sangs rgyas kyi gsung gi nyi mas kyang yang dag pa'i lta ba skyed pa dang / log par lta ba ldog pa dang / gdul ba'i zhing rnams la dge ba'i rtsa ba'i 'bru la sogs pa smin par byed pa dang / sred pa'i 'dam skems par byed pa dang / bdud rnams 'dod pas phongs par byed pa dang /gdul bya bag med pa rnams skyo bar byed pas gdung bar byed pa yin no/ /de lta bas na gus par sangs rgyas kyi gsung mnyan par bya'o/ /rdo thal gyi rdo mes bsregs pa chus 'jig par byed pa dang 'dra bar nyon mongs pa'i bag la nyal gyi rdo shes rab kyi mes yongs su bsregs pa ting nge 'dzin gyi chus sbangs nas 'jig go//shes rab de yang dam pa'i chos mnyan pa med par ni ma yin pas/ de lta bas na gus par chos mnyan par bya'o/ /tshig gi khur thogs kyang don mngon par mi shes na/ de'i don mi 'thob ste/khye'u'i mgul du gter gyi kha chems kyi yi ge btags pa dang 'dra'o/ /de lta bas na mang du thos pas kyang don shes pa nyid du bya ba'i phyir mdo sde'i don mnyan pa la 'bad pa dang ldan par bya'o/ /mel tshe ba so sor mi rtog pa ni ma nyal zhes zer ba bzhin du chom po rnams kyis bcom mo//de bzhin du sgra tsam la brtson pa'i mang du thos pa so sor mi rtog pa yang nyon mongs pa'i dgra rnams kyis 'joms so/ /so sor rtog pa de yang don shes pa nyid med na med pas de lta bas na don gzung pa la 'bad pa dang ldan par bya'o/ /de bzhin du rol mo mkhan rkun pos 'jigs nas mi nyal bar bya ba'i phyir glu len bzhin du bcom mo zhes bya ba yang dper brjod par bya'o//ji ltar long ba me mar 'dzin pa ni gzhan dag la phan par 'gyur ba dang 'dra bar don mngon par mi shes pa'i thos pa 'dzin pa yang de lta bu yin pas de lta bas na don shes pa nyid du bya ba'i phyir don mnyan pa la 'bad par bya'o//sangs rgyas kyi gsung bstan bcos kyi mtshan nyid du 'thad pa'i phyir ro/ /nges pa'i tshig tu 'chos pa dang / skyob par byed pas/ de'i phyir bstan bcos so/ /nyon mongs dgra rnams ma lus 'chos pa dang //ngan 'gro srid las skyob pa gang yin te / /'chos skyob yon tan phyir na bstan bcos te/ /gnyis po 'di dag gzhan gyi lugs la med/ /de lta bas na sangs rgyas kyi gsung kho na don dam par bstan bcos yin pas 'chos pa dang skyob pa'i yon tan gyi phyir yang don gzung pa la 'bad pa dang ldan par bya'o//legs par ston pa la brten na phan yon lnga yod de/ lam ngan pa yongs su spong ba dang / lam bzang po la yang dag par gnas par byed pa dang / /'brog dgon pa las rgal ba'i dbugs 'byin pa dang /bde bar 'gro ba dang / 'dod pa'i yul du yang dag par phyin par byed pa yin no/ /de bzhin du dam pa'i chos ston pa la brten na log par lta ba la sogs pa lam ngan pa yongs su spong ba dang / yang dag pa'i lta ba la sogs pa lam bzang po la yang dag par gnas par byed pa dang /'khor ba'i 'brog dgon pa las rgal ba'i dbugs 'byin pa dang ngan song las mchongs te bde bar 'gro ba dang / 'dod pa mya ngan las 'das pa'i yul du yang dag par phyin par byed pa yin no/ /de dag kyang mnyan pa las 'byung ba'i / ma mnyan pa las ma yin pas gus par mnyan par bya'o//rgyu bsags pa rnams ni cung zad mnyan pas bsod nams chen po dang ldan par 'gyur te/ dper na 'phags pa shA ri'i bus bsnyen par rdzogs par bya ba la rjes su bstan pa bram ze zhig gis thos nas gab ste 'dug nas/ rab tu byung ba dang tshul khrims nyams pa la sdug bsngal rnam pa bcu gnyis 'byung ngo zhes thos nas/'chal pa'i tshul khrims bya ba la mngon du phyogs pa las log pa lta bu'o/ /sdug bsngal rnam pa bcu gnyis ni/ nyon mongs pas yongs su gdungs pa'i sdug bsngal dang / kun du tshol ba'i sdug bsngal dang /gnod pa'i sdug bsngal dang / 'dod pas phongs pa'i sdug bsngal dang / dogs pa'i sdug bsngal dang / gleng ba'i sdug bsngal dang / kun du spong ba'i sdug bsngal dang / bkur sti med pa'i sdug bsngal dang / rnam par smad pa'i sdug bsngal dang /yid la gcags pa'i sdug bsngal dang / tshe phyi ma la ngan song rnams su rnam par smin pa'i sdug bsngal dang / bde 'gro dag tu yang nyon mongs pa mang ba nyid kyi phyir tshangs par spyod pa dka' ba nyid kyi rgyu mthun pa'i sdug bsngal lo/ /'bab par 'dod pa yang da nur me rab tu 'bab pa'i bu gar sbal pa 'jug par mngon par phyogs pa ltos shig /khyod me rab tu 'bar bar 'jug par 'dod dam zhes spyo ba thos nas log pa yin no/ /chos dga' chu srin du gyur pa na/ sangs rgyas kyi sgra tsam zhig thos pa las sngon phyag 'tshal ba tsam la goms pa'i phyir kha btsums te 'dug pa yin no//de lta bas na cung zad cig thos pas kyang rgyu bsags pa rnams kyis dge ba rab tu rgyas pa'i phyir sangs rgyas kyi gsung mnyan pa la 'bad pa dang ldan par bya'o/ /byad stems mkhan gyis bong bur byas pa'i mis de shes pa'i bud med kyi ngag mnyan nas/de'i sman 'dod pas ldam ldum thams cad zos pa dang / rdul 'khru ba rnams kyis gser gyi phyir 'byung khungs thams cad sbyong bar byed do/ /de bzhin du bdag nyid thar pa'i chos 'dod pas/ chos gang thar par 'gyur ba la chos de ni dam pa'i chos thams cad mnyan pa las 'byung ngo snyam nas mnyan par bya'o//sdug bsngal myong dang khyab pa dang / /rtag pa dang ni thabs med dang / /gnod pa mang dang 'joms byed pa'i/ /lus dang 'dra ba'i nad med do/ /'dis ni lus kyi nad 'di la skyon drug po na ba dang 'brel ba nyid dang /lus thams cad la khyab pa nyid dang / bar chad med par 'jug pa nyid dang / gsor mi rung ba nyid dang / gnod pa mang ba nyid dang / srog 'phrog pa nyid yod par yongs su bstan to/ /sman pa'i phul gyis nad 'di dag / gtan du 'byin par byed pa yi/ /sman ni yan lag brgyad ldan pa/ /rdzas kyi tshogs yin gsungs pa yod/ /'di ni lhag pa'i rnyed pa ste/ /rin med par yang rnyed pa yin/ /bdag nyid 'bad pa med par ni/ /nam yang bsgrub par mi nus so/ /ji ltar skyon rnams ma bsal na//bcud kyis len ni mi 'grub bzhin/ /de bzhin rnam par ma zhi ba'i/ /sems la lam ni mi gnas so/ /de yang rin med par dam pa'i chos mnyan pa las rnyed kyi gzhan las ni ma yin no/ /de lta bas na gus par sangs rgyas kyi gsung mnyan par bya'o/ / rgyu gsum dag gis phyi rol gyi dngos po rnams mnyan pa'i dngos por 'gyur te/ spangs pas ni bong ba dang pags pa skam po la sogs pa dag go/ /tsha bar bya bas ni lcags dang zangs la sogs pa dag go/ /brdung bas ni rtswa mun dza dang bal ba dza la sogs pa dag go/ / de bzhin du/ sdang dang bag med rmongs rnams ni/ /dad dang skyo dang rtogs pa ste/ /mnyan pa'i dngos po'i rgyu gsum du 'gyur ro/ /de yang gang las 'byung zhe na/ skal ldan rnams kyis mnyan byas na/ /yon tan skyon don nges las 'byung / /gang gis yon tan nam gang gi skyon thos pas she na/dkon mchog gsum gyi yon tan te/ /skyon ni sdig 'dod srid rten can/ /de sdig pa dang 'dod pa rnams dang srid pa'i yin no/ /don gang gis nges pa thob pas she na/ mtshan nyid rnam gnyis de rgyu dang / /'bras bur nges pa 'brel pa yin/ /mtshan nyid rnam pa gnyis ni phung po la sogs pa dag gi rang gi mtshan nyid dang spyi'i mtshan nyid do//rgyu dang 'bras bur 'brel ba'i mtshan nyid ni ma rig pa dang 'du byed la sogs pa dag gi dang / sdug bsngal dang kun 'byung ba la sogs pa dag gi'o/ /de lta bas na yon tan 'di dag ni dam pa'i chos mnyan na yod par rig par bya ste/de la gus par bya'o/ /nyan pa'i skye bo dag ni phal cher phyir phyogs dang / /yongs su 'dzin par byed pa phal cher 'das pa dang / /nyes par rnam par bshad pa dag gis mthu bcom pas/ /deng sang legs par bshad pa mthar gyur to//tshigs su bcad pa 'dis ni deng sang phyogs gnyis la sangs rgyas kyi bstan pa yongs su nyams pa rnam pa bzhi dang / nub la thug pa nyid du ston pa yin no/ /nyan pa'i skye bo dag ni phal cher phyir phyogs dang / /zhes bya bas ni khyim pa'i phyogs la nyan pa yongs su nyams par ston pa yin te/de dag ni phal cher nyan pa po yin pas so/ /yongs su 'dzin par byed pa phal cher 'das pa dang / /zhes bya bas ni rab tu byung ba'i phyogs la 'don pa yongs su nyams par ston pa yin te/ de dag ni phal cher yongs su 'dzin par byed pa yin te/thos pa 'dzin pa'i phyir ro/ /nyes par rnam par bshad pa dag gis zhes bya bas ni de nyid la don bshad pa yongs su nyams par ston pa yin te/ don log par 'chad pa'i phyir ro/ /mthu bcom pas zhes bya bas ni rtogs pa nyams par ston pa yin te/ gang gi don du ste/dge slong gi tshul gyi 'bras bu rtogs pa'i don du bshad pa ste/ de nus par mi byed pa'i phyir ro/ /'di ni mdor bsdus nas yongs su nyams pa rnam pa gnyis su 'gyur te/ tshig dang don gnyis kyi lung yongs su nyams pa dang / rtogs pa yongs su nyams pa'o//gzhan yang nyan pa'i skye bo phyir phyogs pa nyid dang / yongs su 'dzin par byed pa phal cher 'das pa nyid kyis ni thos pa yongs su nyams pa yin la/ nyes par bshad pa nyid kyis ni yang dag par bsam pa yongs su nyams pa yin no/ /mthu bcom pa nyid kyis ni yang dag par bsgom pa yongs su nyams pa yin no//deng sang legs par bshad pa mthar gyur to/ /zhes bya ba ni nub la thug pa nyid du ston pa yin no/ /de ltar sangs rgyas kyi gsung ni yongs su nyams pa dang yun ring du mi gnas par rig par byas nas ji srid du cung zad lus pa de srid du 'di mnyan pa dang gzung ba dang don mthun par bsgrub pa la dad pa can rnams kyis rab tu 'bad par bya'o//deng sang thub pa'i gsung ni smra bar byed pa'ang nyung / /dngul dang gser du 'byed par 'gyur ba'ang nyung bar gyur / /de ltar lung dang rtogs pa dag la 'bad zhan pas//sangs rgyas nyi ma mthar phyin dri ma med 'di nub/ /de lta bas na ji srid thams cad ma nub pa/ /de srid ji bzhin don rnams dbye la 'bad par gyis / /thub pa'i gsung gi snang ba nub par gyur na ni/ /'gro ba kun du mun pa gcig pu'i thibs por 'gyur//de lta bas na ji srid du mun pa gcig pu'i thibs po mi 'byung ba de srid du yang dag pa ji lta ba bzhin gyi don rab tu rnam par dbye ba'i phyir sangs rgyas kyi gsung mnyan pa la dad pa can rnams kyis shin tu rigs par bya'o/ /ston pa'i zhal nas byung ba skye ba'i mig gi rab rib zhi bar mdzad pa bkra shis kyi//'byung gnas sems la zhog shig gang phyir 'di ni lus can rnams kyi rna ba'i bdud rtsi dang / /nyon mongs pa yi dug kun sel bar mdzad pa yin pas don yang dag par bsam par gyis/ /rgyu 'di rnams kyis rtag tu gus par sangs rgyas kyi ni gsung dag mnyan par bya ba'i rigs//rgyu gang gis she na/ gang gi phyir 'di ni de lta bu'i zhal nas byung ba dang / mig zhi bar mdzad pa'i phyir dang / bkra shis kyi 'byung khungs yin pa'i phyir dang / gang gi phyir tshig 'bru bzang po nyid kyis lus can rnams kyi rna ba'i bdud rtsi yin pa dang /gang gi phyir 'di don bzang po nyid kyis nyon mongs pa'i dug thams cad sel bar mdzad pa'i don gyis te/ rgyu 'di rnams kyis so/ /de ltar na gsung ba po dang / gsung dang don phun sum tshogs pa bstan pa yin no/ /sangs rgyas kyi gsung 'di ni mnyan na sim par byed pa dang /bsams na rtogs par byed pa dang / rtogs na grol bar byed pa dang / brjod na bzang ba dang / 'phags pa'i nor bdun sgrub pa'i phyir nor dang ldan pa dang / skyon bdun 'khru ba'i phyir bsod nams dang / yon tan thams cad kyi sngon du 'gro ba'i phyir bkra shis pa nyid dang /gtan gyi tshangs par spyod pa'i dbang du mdzad pa'i phyir tshe la phan pa dang / rang bzhin gyis rnam par dag pa dang / dgongs pa 'jam pa dang / don dang mthun pa dang / 'dul ba dang mthun pa dang / dus la bab pa dang / ran bar bshad pa dang / bsod nams 'dren pa dang /ye shes 'dren pa dang / dga' ba 'dren pa dang / skrag pa sel ba dang / mya ngan sel ba dang / nyon mongs pa sel ba ste/ mdor na sangs rgyas kyi gsung ni yon tan mtha' yas pa yin la skyon ni chen po gnyis te/ shin tu rnyed par dka' ba dang / yun ring du mi gnas pa'o/ /de lta bas na shin tu rings par gus par mnyan par bya'o/ /rgyu gsum dag gis pags pa las su rung bar 'gyur te/ snum bsku ba dang / mnye ba dang / bsro ba rnams kyis so/ /de bzhin du sems kyang thos pa dang / bsams pa dang / bsgoms pa rnams kyis so/ /de lta bas na sems las su rung ba nyid du bya ba'i phyir thos pa la sogs pa dag la brtson 'grus bya'o/ /gsum po dag gi stobs kyis lam du 'gro ba rnams 'brog dgon pa'i lam las bde bar rgal bar 'gyur te/ lam brgyags kyi stobs dang / bzhon pa'i stobs dang / ston pa po'i stobs kyis so/ /de bzhin du 'khor ba'i 'brog dgon pa'i lam las de'i lam du 'gro ba rnams sbyin pa dang / tshul khrims dang / ye shes kyi stobs kyis so/ /'di gsum char yang thos pa la rag lus so/ /sangs rgyas kyi gsung la dad pa tsam gyis kyang sdig pa chen po dag zil gyis gnon te/'di ltar mi dge ba las dge ba stobs dang ldan pas so/ /'di ji ltar shes par bya zhe na/ khyad par rnam pa bcu dag gis te/ 'du byed pa'i khyad par gyis ni dge ba dang / mi dge ba gnyis 'bad pa dang ma 'bad par mngon par 'dus byas pa'i phyir ro//rnam pa'i khyad par gyis ni yang dag pa ji lta ba bzhin dang phyin ci log gi rnam pa yin pa'i phyir ro/ /mtshungs par ldan pa'i khyad par gyis ni dge ba'i rtsa ba gsum dag dang / mi dge ba'i rtsa ba gnyis sam gcig gis kyang mtshungs par ldan pa'i phyir ro//sa'i khyad par gyis ni sa thams cad dang sa gcig pa nyid yin pa'i phyir ro/ /'bras bu'i grangs kyi khyad par gyis ni 'bras bu rnam pa lnga dang bzhi yin pa'i phyir ro/ 'bras bu'i mthar phyin pa'i khyad par gyis ni dus khyad par du 'phags pa dang ngan pa yin pa'i phyir ro//'di ltar dge ba'i 'bras bu ni bskal pa chen po brgyad khri'i bar du 'byung la/ mi dge ba'i ni bar gyi bskal pa'i bar du yin pas so/ /yang dag par 'chad pa'i khyad par gyis ni 'di ltar dge ba ni mi dge bas dus re zhig tu yang dag par 'chad pa yin gyi mi dge ba ni dge bas gtan du yin pas so//chung ngus mang po yang dag par 'joms pa'i khyad par gyis ni 'di ltar spong ba'i lam skad cig ma gcig gis thog ma med pa'i dus nas zhugs pa'i mi mthun pa'i phyogs rnam pa mang po yang dag par 'joms pas so/ /spong ba'i khyad par gyis ni 'di ltar gnyen po skyes pas mi dge ba spong gi dge ba ni ma yin pas so//phyogs kyi khyad par gyis ni 'di ltar dge ba dang mi dge ba'i chos yongs su 'dzin pa la sangs rgyas 'khor dang bcas pa'i phyogs dang bdud yin te go rims bzhin no/ /dpe rnams ni snang ba dang / mun pa dang / bkru sman dang / skyon dang / rdo rje dang / ri dang / seng ge dang / ri dgas kyi khyu zhes bya ba de lta bu la sogs pa dag yin no/ /dge ba de dang sa gcig pa yin yang dang po'i khyad par rnam pa gsum po rnams kyis mi dge bas stobs dang ldan par rig par bya'o/ mi dge ba zil gyis mnan nas de'i gnyen po dge ba gzhan 'dren pa'i yang phyir ro//bsdus pa'i tshigs su bcad pa ni/ 'du byed rnam pa mtshungs par ldan/ /sa nyid 'bras bu rnam gnyis nyid/ /'chad dang chung ngus yang dag 'joms/ /spong dang phyogs kyi khyad par nyid/ / sangs rgyas kyi ni gsung 'di ni/ /sman dang grub dang gtan du dang / /nad kun 'joms dang gnyis med dang / /legs 'thob legs brten bsgrub dka' na/ /nad drag yun rings su mi sten/ /mi shes pa ni bstan nus kyi/ /gang zhig de mi 'dod pa ni/ /gnyen po bya ba'i dgra yin pas//de bcos mi rung rig par bya/ /de lta bas na bcos su mi rung bar gyur na mi rung ngo snyam nas sangs rgyas kyi gsung la brten pa la 'bad pa dang ldan pa dag tu bya'o/ /dam pa rnams las gang zag gnyis smad par bya ba yin te/ gang zhig dam pa'i chos mi nyan pa dang / gang zhig phan yon gang yin pa de mi 'thob pa de lta bur nyan pa'o/ /de la/ don du mi gnyer rgyud g.yeng dang / /rmugs dang gnyid log mi nyan pa'o/ /phan yon la ni shes rab 'chal/ /rnyed sogs 'dod sdang bcas mi brten/ /de lta bas na mi nyan par gyur na mi rung ba dang / phan yon la mi brten par gyur na mi rung ngo snyam nas ji skad du bstan pa'i skyon bsal ba la 'bad pa dang ldan pa dag tu bya'o//gsung dang rna ba nyid dang ni/ /'dod dang shes rab bgegs med pa/ /lnga ni gang phyir rnyed dka' bas/ /de phyir thub pa'i gsung mnyan bya/ /dam pa'i chos ni rnyed gyur cing //dad dang ldan yang blo chung dag /yi dags mgrin pa khab 'dra bar/ /de ni btung bar mi nus so/ /de lta bas na ji srid du lnga po rnyed pa dang / de btung bar nus pa de srid du dam pa'i chos mnyan pa la 'bad par bya'o/ /zab mo goms par ma byas pas/ /thub pa'i gsung ni rnyed dka' ste//de med par ni thar pa med/ /thar pa 'dod pa rnams kyis ni/ /de phyir gus par mnyan par bya / /'di ltar 'di la brten nas myur sdug kha na ma tho med/ /phul byung nges par 'bras bu mi zad 'thob pa bder nus kyi / /thabs gzhan med la sgrub pa po yang med cing gang zhig la//ma byas na yang bde ba med pas de bya mod/ /thub pa'i gsung ni 'bras bu dang / /don dang tshig 'bru ldan pa ni/ /thos pa'i dus dang bsam pa dang / /bsgom pa dag na'ang rjes su 'dzin/ /go 'byed nges tshig bzang po yi/ /yon tan gnyis ldan thub pa'i gsung //don dang ldan zhing ji 'os dang / /phan dang gtan gyi 'bras bur ldan/ /gang phyir 'di don kun 'grub 'byung gnas yin/ /thabs bde ba dang shin tu rnyed dka' bas/ /de phyir 'grub pa don gnyer srog 'gyur ba/ /dad dang ldan pas 'di la brtun par bya/ /mi shes pa dang the tshom shes//log pa'i shes pa ldog pa dang / /bden pa rnams ni rtogs 'gyur ba/ /dam chos mnyan pa'i yon tan no/ /dam pa'i chos mnyan pa la phan yon lnga gsungs pa gang dag yin pa ni bzhi po 'di dag tu 'dus te gnyis kyis mi shes pa bzlog pa'i phyir ro //sems ni srog chags pad+ma 'dra/ /stobs kyis dam pa'i chos la glan / /de phyir don gyi ro rnyed na/ /de la g.yo ba med par gnas/ / de lta bas na stobs kyis kyang dam pa'i chos mnyan pa la glan par bya'o/ /ci'i phyir zhe na/ dam pa'i chos ni gtan du phan pa dang bde ba'i phyir dang /shin tu rnyed par dka' ba'i phyir dang / dka' ba med par bsgrub par bya ba'i phyir dang / chos dang tshe g.yo ba'i phyir dang / yang dang yang du bsgrub par bya ba dang / sbyor ba gcig pa'i phyir ro/ /mdor na sbyor ba sems dpa' yis/ /chags zad chags pa 'phel bya ste/ / des ni bdag la chags zad bya/ /gzhan la chags pa 'phel bar bya/ /nyon mongs mya ngan 'das pa spang phyir te/ /de dag gnyis kyis byang chub mi 'thob bo/ /shes rab snying brtse de zad 'phel rgyu yin/ /de phyir byang chub rtsa ba gnyis su gsungs/ /de 'phel rgyu ni de bzhin gshegs pa'i chos//'di ma gtogs par gzhan ni 'ga' yang med/ /de phyir ci nas khyod la chos 'di ni/ /'bras bur bcas 'gyur de ltar 'bad par gyis/ /ji ltar sbrang bu kha chu'i zar bus bcings pa gang dag 'ching ba der bcings pa'i/ /rgyu ni stobs ma yin gyi de dag nyam chung yin ltar de bzhin dman pa dag /yongs su gzung la 'dzin dang ldan pa'i 'ching ba rang gi nyam chung nyid las skyes/ /de phyir sbrang bu 'dra bar blo ldan rang lus bcings pas 'chi bar 'os ma yin/ /de lta bas na sbrang bu dang 'dra bar lus kyis bcings pas 'chi bar mi bya'o snyam nas//rang gi blo'i stobs bskyed pa'i phyir gus par chos mnyan par bya'o/ /skye dgu g.yang sar 'bab pa dang / /long ba bcings dang dbul po dang / /nad btab dpung gnyen med pa dang / /'brog dgon yun ring lam zhugs dang / /dgra rnams mang po rnam mang dang / / mang po dag gis gzhom bya ba/ /de la sangs rgyas ma gtogs par/ /skyob pa med pas de'i gsung mnyan de la g.yang sar 'bab pa ni ngan song du skye bar mngon du phyogs pa'i phyir ro/ /long ba ni ma rig pas mdongs pa nyid kyis so/ /bcings pa ni srid pa'i 'ching bas so/ /dbul ba ni 'phags pa'i nor bdun dang bral ba'i phyir ro// //bam po bcu pa ste tha ma'o/ /nad kyis btab pa ni nad 'bras dang 'dra ba'i nye bar len pa'i phung po rnams kyis so/ /dpung gnyen med pa ni mgon med pa'i phyir ro/ /'brog dgon par yun ring du lam du zhugs pa ni yun ring du 'khor ba'i lam du zhugs pa'i phyir ro//dgra rnams mang po ni nyon mongs pa dang / nye ba'i nyon mongs pa rnams dang / de las byung ba'i las rnams so/ /rnam mang ni sdug bsngal gsum po dag dang / mya ngan la sogs pa dag dang / grang ba dang / tsha ba dang / bkres pa dang /skom pa dang / gnod pa dang / 'ching ba dang / rdeg pa dang / na ba dang / rga shi dag la sogs pa dag go/ /mang po dag gis gzhom bya ba ni dus ring por ro/ /de lta bas na sangs rgyas kyi gsung mnyan pa dang / 'jog pa ni skye dgu de lta bur gyur pa rnams kyi skyabs yin pas de'i phyir sangs rgyas kyi gsung mnyan pa la gus par brtson par bya'o//gus par brtson pa ni dge ba stobs dang ldan par 'gyur ro/ /de ltar na rgyu bcu dag gis dge ba'i stobs dang ldan par 'gyur ro zhes 'chad do/ /bcu po gang gis she na/ rten nyid kyis ni rten la tshul khrims dang / thos pa dang 'dod pa chung ba la sogs pa'i yon tan gyis yongs su bsgos pa'i phyir ro/ /dang po kun nas bslang ba nyid kyis ni rgyus kun nas bslang bas byed par 'dod pa nyid kyis sems chen po dang ldan pa yin pa'i phyir ro/ /brtson pa drag po nyid kyis ni byed pa'i tshe gus par brtson pa'i phyir dang /yang dang yang du brtson phyir te/ rtag tu brtson pa'i phyir ro/ /zhing nyid kyis ni zhing rnam pa bzhi ste/ 'gro ba dang sdug bsngal ba dang / phan 'dogs pa dang / yon tan khyad par du 'phags pas so/ /gzhi nyid kyis ni dngos po mang po dang gya nom pa'i khyad par gyi phyir dang / srog gcod pa dang / ma byin par len pa la sogs pa spong ba'i khyad par gyi phyir dang / sbyin pa dang / tshul khrims dang / sgom pa'i khyad par gyi phyir ro/ /bya ba nyid kyis ni phan pa byed pa'i khyad par gyi phyir ro/ /mjug nyid kyis ni byas nas rab tu dga' ba yid la byed pa'i kun du rtog pas rgyas pa'i phyir ro//'khor nyid kyis ni gzhan de la yang dag par 'dzin du 'jug cing bsngags pa brjod pa dang / chos mthun pa po mthong na shin tu yid dga' ba nyid dag gis so/ /yongs su bsngo ba nyid kyis ni mya ngan las 'das pa dang / bla na med pa yang dag par rdzogs pa'i byang chub tu yongs su bsngo ba'i phyir ro//bsdus pa'i tshigs su bcad pa ni/ rten dang dang po kun nas bslang / /drag dang yang dang yang brtson nyid/ /zhing dang gzhi dang bya ba dang / /mjug nyid dang ni 'khor nyid dang / /yongs su bsngo ba nyid kyis ni/ / dge ba stobs dang ldan par 'dod/ /mi dge ba la yang de bzhin du ci rigs pa rigs par bya'o/ /drang srong chen po gnas ma mthong ba yis ni sngon/ /legs gsungs 'di thos nas ni drang srong nor nyos pa/ /ba lang rdzis ni gos kyi tha mar pa med cig /bcings ltar zong med dgos la brtags te sems la 'dzin//thub pa yis ni legs par gsungs pa tshigs bcad kyi/ /phyed tsam dag kyang rang gi sku yi rin gyis bsgrubs/ /rin thang chen pos brnyes na 'on kyang mi shes pa/ /de dag rin med par yang sten par mi byed do/ /legs ldan 'di ni tshul bzang chu bo tshol ba can//mchog dang mchog tshol mchog dang mchog min shes pa'i yin/ /de yi snying po nyid ni rab tu rnam phye nas/ /rang gi srog gi rin gyis legs gsungs nyo ba mdzad/ /srid pa yod na gdon mi za bar tshe 'thob na / /de yang phal cher don med par ni zad par 'gyur/ / legs par gsungs pas stengs 'ga' na lan 'ga' zhig /u dum+WA ra'i me tog bzhin du snang ba yi / /ji ltar nyi ma dag ni shar ba na/ /pad+ma yongs su smin pa kha 'byed ltar/ /de bzhin gshegs pa dag kyang shar ba na/ /bsam pa yongs su smin pa dag par 'gyur/ /bsam pa yongs su smin pa da'i rgyu'i rtsa ba yang dam pa'i chos nyan pa yin no//de lta bas na bsam pa yongs su ma smin pa'i phyir sangs rgyas mang po 'byung ba dag mi mnyes par mi bya'o snyam nas rgyud yongs su smin par bya ba'i phyir dam pa'i chos nyan pa la 'bad par bya'o/ /sbyangs pa'i yan lag rnams 'gyur da ltar ni//dge slong tshogs kyang byams las phyir phyogs shing / /sdom brtson skye bo dge 'dun nang dag tu/ /dogs med rtags mtshan can dang bya thogs rgyu/ /sngon gyi bsam gtan sa ni gang yin pa/ /kye ma ji ltar 'bras kyi sa dag byed/ /'dir ni thub pa'i bstan pa dus ring du//gnas par mi 'gyur bar ni dogs par 'gyur/ /'dis ni bstan pa 'di la dge slong rnams kyis yongs su nyams pa rnam pa bzhir yongs su bstan te/ yo byad rnams la zang zing lhur byed pa nyid kyis yo byad bsnyungs pa yongs su nyams pa dang / tshangs pa mtshungs par spyod pa rnams la byams pa yongs su nyams pa dang zhes yongs su nyams pa dang / rang gi don thob par bya ba la mngon par brtson pa yongs su nyams pa'o/ /de ltar na bstan pa yun thung du gnas par shes par bya ste/ dad pa can rnams kyis de la mnyan pa dang / gzung ba dang / bcang ba dang / don dang mthun par sgrub pa dag gis 'bad par bya'o/ /'gro ba 'di yi don du ni/ /sdug bsngal mang po gang bstan pa/ /de dag dran nas khyod nyid kyis / /bstan pa ngan la'ang gnas bgyi na/ /phan par gsungs dang phan mdzad pa'i/ /khyod kyis bstan pa ci smos te//mgo la me ni 'bar gyur kyang / /ji lta bur na mi bgyi lags/ /de ltar so sor brtags nas kyang sangs rgyas bcom ldan 'das kyi bstan pa la gnas par bya'o/ /lus can 'di nas shi nas kyang / /dam chos dkon mchog 'phrad 'gyur ram/ /mi 'gyur rna ba 'thob pa dang //su zhig dam chos 'chad 'gyur ba/ /de ni sus kyang mi shes pas/ /de phyir khyed kyis 'bad pa yis/ /ston pa'i gsung ni mnyan par bya/ /gnas skabs 'gyur zhing gnas par mi mngon la/ /song zhing song ba mi 'ong gsar du skye/ /'on kyang bdag dang bdag gir 'dzin 'jug pa//'gro ba 'di ni ma rig pa yis mid/ /tshigs su bcad pa 'dis ji zhig bstan zhe na/ 'du byed rnams ni rnam 'jig cing / /rang gi ngang gis skad cig yin/ /gtan dang chad min de dag la/ /mi shes bdag dang bdag gir 'dzin/ / gzhan yang / mi 'jig lta dang yun ring 'jig pa lta/ /zhig na mya ngan byed dang zhig lta gang / /de yi ched du 'dus byas dag la ni/ /de'i rtsa bzhi yis mi rtag nyid 'di bstan/ /de la rtsa ba gnyis kyis ni 'dus byas rnams la bdag med pa dang / bdag gi med pa nyid du yongs su bstan to//gcig gis ni de dag la bdag dang bdag gir lta ba'o/ /gcig gis ni de'i rgyu ma rig pas zin pa nyid do/ /de ltar na tshigs su bcad pa 'di las mdor na bdag tu phyin ci log pa'i gzhi dang / rang bzhin dang / rgyu yongs su bstan pa yin no/ /de'i rgyu ma rig pa de yang dam pa'i chos mnyan pa las ma gtogs par spangs par mi nus so//de lta bas na bdag ni ma rig pas mid par gyur na mi rung ngo snyam nas gus par chos mnyan par bya'o/ /de ltar na dam pa'i chos mnyan pa'i dgos pa rnams kyi mtha' med de/ 'di ni phyogs tsam zhig go/ /phyogs 'dis dgos pa yang dag par bstan pa nyid kyis gus par mnyan pa dang ldan par brjod par bya'o//ji ltar na ya mtshan dang rab tu dga' ba dang skyo ba'i gtam nye bar bsgrub pa nyid kyis na/ rmugs pa dang gnyid dang ldan pa dag la sems gsal bar bya ba'i phyir ya mtshan skye ba'am/ rab tu dga' ba'i gtam bya'o//sems rnam par g.yeng ba rnams la skyo bar bya ste/ skyo bar 'gyur ba rnams la sems rtse gcig pa nyid du bya ba'i phyir ro/ /ji skad du bya zhe na/ re zhig ya mtshan skye ba ni/ /sangs rgyas rnams kyi bstan pa la/ /khyod kyis byas pa kun mi bya/ /de phyir rab dga' bskyed par bya//byas pa byas yin nyams par 'gyur/ /'di'i don ci yin zhe na/ sangs rgyas kyi bstan pa la byang chub gsum las brtsams nas thos pa las byung ba'am/ bsams pa las byung ba'am/ bsgoms pa las byung bas rgyud yongs su smin par gang byas pa de thams cad kyang mi bya ba yin te/dge ba'i rtsa ba de las nyams pa yang dus ring du lon na yang gang gi tshe brtson par byed pa de'i tshe khyad par kho na 'thob bo/ /de lta bas na bdag la yongs su smin par byas pa las nyams pa med do snyam du sems rab tu dga' ba bskyed par bya'o/ /gang zhig gis byas pa yang bya ba yin pa de ni nyams par 'gyur te/ji ltar phyi rol pa'i snyoms par 'jug par byed pa dag lta bu'o/ /gang byas pa ni mi bya des/ /yun ring na yang zhi ba 'thob/ /gang byas bya yin de yis ni/ /shin tu yun ring zhi mi 'thob/ /gang byas pa ni mi bya des/ /sangs rgyas nyid du srid pa yod/ /gang byas bya yin de yis ni//thar pa'ang srid par mi 'gyur ro/ /tshigs su bcad pa 'di gnyis kyi don yang snga ma dang mthun par brjod par bya'o/ /rab tu dga' ba'i gtam ji ltar brjod par bya zhe na/ gnyid sangs par bya ba'i phyir rab tu dga' ba'i gtam brjod pa las so/ /re zhig gtam nyon cig /bong bu khur gyis dub pa zhig la rte'us bro brdung ngo zhes smras pa dang /de na re khyod kyis ni bro rdungs shig ngas ni rna ba bsgul lo zhes smras nas/ de bro rdung ba dang / rte'u dang mthun par bya ba'i phyir des rna ba bsgul lo zhes grag go/ /khyed kyis ni nga chos ston na/ rna ba gnyis kyang bsgul bar mi spro'am zhes bya ba dang /wa seng ge'i god kyi sha 'dod pa zhig /seng ge'i phyi bzhin 'brangs la seng ge lan cig 'drangs te/ phag rgod chen po zhig bsad nas des wa de la 'di khyer cig ces smras pa dang / de stobs chung ba'i phyir khur de bteg par yang mi spro la/ bdag la khros te bsad na mi rung ngo snyam nas de'i tshig bzlog par ma nus nas/'di ni blun pa dang nga rgyal can yin par shes te/ de na re bdag gis khur 'di bskur na bya ba gnyis bya dgos te/ khur yang bskur dgos/ skad kyang dbyung dgos pas de'i phyir bdag gis cig car las gnyis bya bar mi nus pas gcig khyod kyis byos shig ces smras pa dang /seng ge ni nga rgyal can yin pa'i phyir skad 'byung bar yang mi 'dod nas/ 'o na khyod kyis skad phyung shig ngas bskur ro zhes smras te/ seng ge ni khur thogs seng ge dang mthun par bya ba'i phyir wa skad 'byin par byed do zhes grag go/ /de bzhin dungs ni chos bshad pa'i phyir khur bskur ro//nga dang rjes su mthun par bya ba'i phyir khyed kyis ni re zhig de lags tsam yang byos shig dang dge bar 'gyur ro zhes bya ba dang / rgan zhugs shig thabs ma yin pa byed pas bud med don du gnyer ba las des de la ma btub pa dang /de na re bcom ldan 'das kyis bud med kyi bsam pa ni skyes pas so zhes gsungs la 'di ni mi btub pas mdo sde dang 'gal lo zhes smras so zhes grag go/ /de bzhin du khyed dad pa can yin la dam pa'i chos nyan mi 'dod pas dad pa'i rtags rnams las dam pa'i chos mnyan par 'dod pa yin zhes gsungs pa'i mdo sde dang 'gal lo zhes bya ba dang /bud med rgan mo dbul mo sngon gyi khyim phyug po na 'dug 'dug pa zhig yod la der rkun po zhig re bas mtshan mo khyim phug ste zhugs nas mun khung na lag pa gnyis kyis rdzas btsal ba las lam snod dag gcig la thug ste sgra byung ba dang /bud med de na re bu re zhig ngas nyi ma'i gung la btsal na yang ci yang mi rnyed na/ khyod kyis mun khung na ga la rnyed ces smras so zhes grag go/ /de bzhin du blo rnam par gsal ba snang ba dang bcas pas kyang re zhig sangs rgyas kyi gsung gi dgongs pa can gyi don rnyed par dka' na/gnyid kyi mun pas non pa'i yid kyis lta ga la zhig ces bya ba dang / b+har ta'i gzhung klog pa na lus skyes ngus pa dang / legs ldan ci ste bshums smras pa rol rnyed mas ji snyed kyi sdug bsngal nyams su myong ba la ltos zhes smras pa dang / 'di ni b+har ta'i gzhung yin gyi/'di dga' byed 'gro ba'i gzhung ni ma yin no zhes smras pa dang / bdag gis ngus pa don med par ngus pa yin no zhes smras so zhes grag go/ /de bzhin du gal te nga chos 'chad par byed na khyed gnyid log pa ni ngas bshad pa'i don med pa yin no zhes bya ba dang / de bzhin du rgan zhugs bsnyen par rdzogs su gzhug par ma nus so zhes bya ba dang / de lta bu dang mthun pa mo rtul po'i gtam dag kyang ci rigs par bsgrub par bya zhing khyod nyan du gzhug ma nus so zhes bya ste/ gnyid sangs par bya ba'i phyir rnam pa de lta bu'i rab tu dga' ba'i gtam bya'o//skye bo'i gtam ji ltar bya zhe na/ mi rnams tshe ni lo brgya la/ /mtshan mo nyal bas phyed du byas/ /de ni nyin par yang nyal bas/ /de yi phyed kyang dum bur byas/ /srog ni gshin rje'i 'khor lo sog ler ldan na gson 'drar gang phyir nyal byed pa/ /ci zhig rnyed pa las ni dbugs phyin ci zhig rtogs shing bgegs ni ci dag spangs//ngan 'gro rnams las rgal gtam ci yin mi bya ba yi nges pa'i las ni gang zhig thob/ /phra rgyas me rnams kyis bsregs srid rnams kyis ni gang zhig 'das pa smos/ /'dis ci zhig bstan pa yin zhe na/ rgyu gnyis dag gis srog dbugs ma phyin pa las dbugs phyin pa thob pa gson pa dang 'dra bar nyal bar rung gi gzhan du ni ma yin no//gnyis po gang dag gis she na/ lung bstan pa thob pa nyid kyis ni rtogs pa med par yang dper na kha cig la bskal pa 'di snyed du log par ltung bar mi 'gyur zhing yongs su mya ngan las 'das par 'gyur ro zhes lung bstan pa lta bu'o//'bras bu thob pa nyid kyis ni gang zhig thob pas/ ngan song ba'i nyon mongs pa dang / skye ba dang / las kyi kun nas nyon mongs pa mthong bas spang bar bya ba rnams dang / yang 'byung ba pa'i nyon mongs pa dang /skye ba'i kun nas nyon mongs pa gnyis zad pa yin no/ /ngan song ba'i las spangs pa la ni yang 'byung ba pa'i las kyi kun nas nyon mongs pa rnam par mi gzhag ste/ yang 'byung ba ni dge ba'i 'bras bu yin pa'i phyir ro/ /de la gshin rje'i 'khor lo dang sog le dang ldan pa nyid kyis ni srog dbugs ma phyin pa nyid du ston pa yin no//ci zhig rnyed pa las ni dbugs phyin zhes bya bas ni lung bstan pa ma 'thob pa nyid du ston pa yin no/ /ci zhig rtogs zhes bya ba ni 'bras bu ma thob pa'i phyir ro/ /bgegs ni ci dag spangs/ ngan 'gro rnams las rgal gtam ci yin mi bya'i nges pa'i las ni gang zhig thob//ces bya ba ni 'bras bu thob pa las ngan song ba'i nyon mongs pa dang / skye ba dang las kyi kun nas nyon mongs pa gang dag zad pa yin pa de dag ma zad pa nyid du yongs su ston pa yin no/ /nyon mongs pa mthong bas spang bar bya ba rnams ni mngon par rtogs pa'i bgegs yin pa'i phyir bgegs zhes bstan to//nyon mongs pa la yang skye ba'i kun nas nyon mongs pa de'i nus pa yod par bstan pa'i phyir bar du de smos pa yin no/ /ngan song gi skye ba dang las kyi kun nas nyon mongs pa gnyis bdag dang gzhan la gnod pa'i dbang du mdzad pa'i phyir yang yin no//rgyu phra rgyas me rnams kyis bsregs/ srid pa rnams kyi sa ni gang zhig 'das pa smos zhes bya ba ni yang 'byung ba ba'i nyon mongs pa dang / skye ba'i kun nas nyon mongs pa gnyis ma zad pa nyid du ston pa yin no//bsdus pa'i tshigs su bcad pa ni/ ji lta bzhin pa'i yid ni dbugs phyin pa'i/ /lung bstan pa ni thob pa med pa dang / /ngan song dang ni yang 'byung 'gyur ba gang / /nyon mongs yan lag gsum gnyis zad bya phyir/ /de kho na nyid rtogs pa med pa'o//yang rgyu gnyis dag gis dbugs phyin pa thob pa zhes bya ba snga ma bzhin te/ yongs su nyams pa med par sbyor ba'i lam thob pa nyid kyis ni nges par 'byed pa'i cha dang mthun pa'i bzod pa thob pa'i phyir ro/ /'bras bu thob pa nyid kyis ni gang zhig thob pas te snga ma bzhin no//yang rgyu gsum dag gis dbugs 'byin pa thob pa zhes bya ba snga ma bzhin no/ /gsum po gang dag gis she na/ lung bstan pa thob pa nyid kyis dang / ye shes kyi khyad par thob pa nyid kyis dang / spangs pa'i khyad par nyid kyis so/ /spangs pa'i khyad par yang ngan song ba'i kun nas nyon mongs pa rnam pa gsum spangs pa ji skad bstan pa dang /yang 'byung ba pa'i kun nas nyon mongs pa rnam pa gnyis spangs pa ji skad bstan pa lta bu'o/ /yul la rnam par rtog pa rnam par g.yengs pa rnams la yul gyi skyon brjod pa dang ldan pa'i kun du skyo ba'i gtam brjod par bya'o//'jig rten dag na 'dod pa rnams mi rtag /dge ba'i don 'phrog gsog dang sgyu ma 'dra/ /smon pa na yang mi rnams kyi ni sems/ /rmongs na bdag nyid phrad na smos ci dgos/ /de la 'dod pa rnams mi rtog pa nyid kyis ni mthong ba'i chos nyid la mya ngan la sogs pa'i rgyu nyid yin par ston to//dge ba'i don 'phrog pa nyid kyis ni tshe phyi ma la ngan 'gro'i rgyu nyid yin par ro/ /gsog nyid kyis ni dge ba dang bral ba nyid du'o/ /sgyu ma dang 'dra ba nyid kyis ni bde ba ltar snang ba nyid du ste bde bar 'du shes phyin ci log gi gzhi nyid yin pa'i phyir ro/ /phyi ma'i phyed kyis ni 'di ltar de rnams ni ma phrad kyang sred pa dang bcas pa rnams kyi sems bde bar 'du shes pas rmongs par byed na phrad na lta smos kyang ci dgos zhes bya bar ston to//bsdus pa'i tshigs su bcad pa gnyis ni/ 'dod pa rnams ni sdug bsngal rgyu/ /de dag la ni bde ba med/ /bde bar 'du shes log pa yi//gzhi yin par ni rab tu bstan/ /mdze bzhin yongs su gdung bas na/ /mya ngan ngan 'gro'i rgyu yi phyir/ /ma phrad phrad pa'i gnas skabs su/ /rgyu bzhin log par ston phyir ro/ /shes dka' bzlog dka' dpung thub dka' ba can rgyu ba/ /rtogs dka' 'dod chags rang dga'i dbang po can rnams kyi//bzang po'i lam rnams 'joms dang rdul ni bsags rnams kyi/ /chos dang blo yi dgra yin yid 'khrul rnams kyi ni/ /tshul khrims zad byed yin zhing 'byung po rnams kyi rdzas/ /lta bu'i dge ba 'joms pa mi dge'i yul rnams yin/ /de lta bas na khyed ni dam pa'i chos mnyan pa'i tshe bdag la gzhom par bya ba ni mi rigs so//de la ji ltar na shes par dka' ba yin zhe na/ 'dod pa 'di dag ni mnog chung zhing sdug bsngal mang ba yin no zhes bya ba de lta bu la sogs par shes dka' ba nyid kyis so/ /ji ltar na bzlog par dka' ba dang / dpung thub par dka' ba dang /rgyu ba rnams rtogs par dka' ba yin zhe na/ brtsal ba dang rnam par mnan pa dang / bag la nyal yang dag par gzhom pa'i spong ba dka' ba nyid kyis yin te go rims bzhin no/ /ji ltar bzang po rnams kyi lam 'joms pa yin zhe na/ khyim pa'i phyogs la 'dod chags dang rang dga'i dbang po can rnams kyi dge ba bcu'i las kyi lam gyi khrims la sogs pa las 'da' bar byed pa nyid kyis so//ji ltar na mos pa dang blo gros kyi dgra rnams dang / tshul khrims zad par byed pa yin zhe na/ rab tu byung ba'i phyogs la sngon rdul bsags pa dang 'dir yid 'khrul pa rnams kyis ting nge 'dzin dang shes rab dang tshul khrims kyi bar du gcod pa'i phyir te go rims bzhin no//mos pa ni sems gnas pa yin pas ting nge 'dzin to/ /ji ltar na 'byung po rnams kyi rdzas dang 'dra ba'i dge ba yin zhe na/ 'di dang phyi mar bde ba dang sdug bsngal gyi rgyu dang yongs su skyob pa nyid kyi nor dang 'dra ba'i phyir ro//ji ltar na mi dge ba'i yul rnams kyis 'joms pa yin zhe na/ tshul bzhin ma yin pa'i yid la byed pa na/ de'i mi mthun pa'i phyogs nyid kyi dge ba'i chos rnams las thob pa dang / ma thob pa yongs su nyams pa yid kyis yongs su nyams par byed pa'i phyir ro//yang mdor bsdu na 'dis ni 'dod pa rnams yongs su shes par dka' ba nyid dang / yang dag par dka' ba nyid dang / yongs su ma shes shing ma spangs pa dang / ji ltar gang dang gang dag la gnod par byed pa de yongs su bstan te/ tshig gcig dang gsum dang gsum lhag ma ste go rims bzhin no/ /rnam grangs gzhan yang 'dod pa rnams ni chom rkun dang chos mthun par yongs su bstan pa yin no/ /chom rkun gyi rgyu bdun dag gis rkun po'i bya ba mthar phyin pa yin te/ mi 'phrigs pa'i rang bzhin yin/ 'phrigs na yang mi ldog pas bstan pa yin/'gro ba dang 'ong ba dang pha rol mnan pa dag la ngal ba med pas stobs dang ldan pa yin no / /mi mngon pa dang bgrod dka' ba'i gnas su thag ring zhing thibs por rgyu ba yin/ ma lus par 'phrog pas snying brtse ba med pa yin/ gnyid log cing ra ro ba na 'joms pas dus shes pa yin/mi mthun zhing sha khon can yin no/ /dngos po'i 'dod pa nyon mongs pa'i 'dod pa dang bcas pa rnams kyang de dang chos mthun pa yin te/ de la mi 'phrogs pa'i rang bzhin nyid ni shes par dka' ba nyid kyis ston te/ nyes dmigs yongs su mi shes pa'i phyir ro//brtan pa nyid ni bzlog par dka' ba nyid kyis te/ bsal bar dka' ba'i phyir ro/ /stobs dang ldan pa nyid kyis ni dpung thub par dka' ba nyid kyis te/ kun du rgyu ba rnam par gnas par dka' ba'i phyir ro/ /thag ring zhing thibs por rgyu ba nyid ni rgyu ba rtogs par dka' ba nyid kyis te/bag la nyal ba ni thag ring du zhugs shing mi mngon par song ba'i phyir ro/ /snying brtse ba med pa nyid ni bzang po'i lam 'joms pa la sogs pa nyid kyis te/ dge ba ma lus par med par byed pa'i phyir ro/ /dus shes pa nyid ni gnyid log pa dang ra ro zhing myos pa lta bu'i 'dod chags dang /dga' ba'i dbang po can rnams la 'joms pa'i phyir ro/ /mi mthun pa nyid ni mi dge ba nyid kyis dge ba dang 'gal ba'i phyir ro/ nang par mar me rlung gis bskyod pa 'dra ba dang / /chu bo'i 'gram gyi ljon shing rtsa ba 'gul 'dra dang / /snod chag yod pa'i chu ni 'dzag par byed pa ltar/ / 'gro ba 'di ni dbang med 'jig pa'i chos can yin/ /de ltar 'gro ba rab tu 'jig pa'i chos can yin na/ khyed dam pa'i chos mnyan par g.yeng ba'i mi rigs so/ /ci'i phyir tshigs su bcad pa 'di las dpe gsum dag gis bstan zhe na/ 'di lta ste/ 'gro ba zhes bya 'di ni tshe yi dbang gis ming dang gzugs//'jug yin gsum po de phyir ji lta bur/ /mi brtan pa de 'chi ba 'gyel zad la/ /phyogs pa'i mar me ljon shing chu yis bstan/ /gzhan yang rgyu brgyad dag gis chos 'di la shin tu brtsal bar mi bya bar 'gyur te/ gal te thar pa don du mi gnyer ba yin pa dang / nad med pa ma yin pa'i phyir ram/ rang dbang med pa nyid kyi phyir gnyer na yang mi nus pa yin pa dang / gal te nus na yang brtsal ba ma byas par yang 'bras bu yod pa ma yin pa dang / gzhan gyi byed pa po gzhan yin pa dang / brtsal ba byas kyang nges par 'grub par mi 'gyur ba dang / 'dis grub bo snyam du yid ches par mi byed pa yin pa dang /bdag gis ji ltar brtson par bya zhes thabs mi mkhas pa yin pa dang / ngan song las yang dag par rgal ba'i dbugs phyin pa thob pa yin no/ /'on te yang / don gnyer nus dang ma byas par/ /'bras med po gzhan med pa dang / nges par 'grub dang yid ches dang / /thabs shes log par ltung ba yi/ /mtha' la gnas pa'i skye bo gang / /shin tu rtsol bar mi byed pa/ /de ni nges par sdig las kyis/ /bsgribs shing sdug bsngal mang bstan yin/ /ngan song thos la yid ches shing / /de yi gnyen tho mi byed la/ 'jigs shing nus dang ldan pa dag /tshe thung de yang ma nges dang / /mi bya bar ni bya min dang / /byed po gzhan med ma byas par/ /bde las med cing byas pa yang / /mi 'jigs de byed mi shes min/ /gal te so so'i skye bo dag /'dod pa yis ni zang zing gi /phub ma la ni yongs 'jus nas//kye ma 'di ni rab myong ba'i / /glang chen nyal ba byed dam ci/ /byis pa kun ni rten yod kyang / /kye ma mi bzad kye ma dka'/ /kye ma sdug bsngal kye ma 'jigs/ /kye ma'o brlag la phyogs pa yin/ /sangs rgyas gsung zhes bya ba gang / /dkon mchog 'dod don sgrub mdzad pa//skye bo ser sna med 'dug pas/ /gaN+DI brdungs te sgrogs byed na/ /gti mug nga rgyal mdongs pa yi/ /byis pa 'di dag bdag nyid la/ /dgra bo bzhin du brlag pa'i rgyu/ /grong ba'i dgra la mngon par dga'/ /bdag la phan par brtson rnams kyis ni dgra yin na yang legs bshad gzung //ngan pa yin kyang skye bos phan 'dogs skye bo'i ngor ni dpyad bya na/ /dgra bcom pa nyid 'gro ba phan pa dpung gnyen phan pa gsung ba yi/ /gsung ni gal te mi 'dzin kyi hud kyi hud tshig ni 'dir byas legs/ /tshigs su bcad pa 'di rnams kyis ni ji ltar byis pa rnams la mya ngan du bya ba de yongs su bstan to//ji ltar na byis pa rnams mya ngan du bya ba yin zhe na/ log par bsgrub pa skyon lnga dang ldan pa la gnas pa'i phyir ro/ /log par bsgrub pa de yang tshigs su bcad pa gzhan gsum dag gis bstan pa yin no/ /de yang mdor bsdu na sangs rgyas kyi gsung mi nyan pa dang /mi 'dzin pa las brtsams nas rig par bya'o/ /sangs rgyas kyi gsung gang rnyed par dka' ba dang / don che ba dang / 'bad pa med par 'thob pa bzhin du gti mug gis ldongs pa nyid kyis bag med pa'i rgyu 'khrig pa dang ldan pa'i sgra dag la chags nas nyan du mi 'dod pa dang /thos na yang phan pa bzhed pa dang / phan pa'i bla mas gsungs pa la mi bsgrub pas mi 'dzin pa'o/ /skyon lnga gang dag ce na/ mi bzad pa nyid dang / dka' ba nyid dang / sdug bsngal ba nyid dang / 'jigs pa nyid dang / brlag pa la phyogs pa nyid do/ /gnyen po srid pa yod kyang log par bsgrub pa gang la skyon lnga yod pa de yang mi bzad pa la sogs pa'i sgrar bstan to//ci mi bzad pa ni de phyis gdung ba'i rgyu yin pa'i phyir te/ 'di ltar gang gis gdungs par 'gyur ba de byas nas mi bzad pa byas so zhes zer ro/ /dka' ba ni mang po kun du tshol bas dub pa'i rgyu yin pa'i phyir ro//sdug bsngal ba ni lus dang sems la gnod pa'i rgyu yin pa'i phyir te/ gsod pa dang / 'ching ba dang / rdeg pa la sogs pa gzhan gyi gnod pa dang mya ngan gyi gnas yin pa nyid kyis so/ /'jigs pa ni ngan 'gror 'gro ba'i rgyu yin pa'i phyir ro/ /brlag pa la phyogs pa nyid ni mya ngan las 'das pa'i lam dang thag ring bar 'gyur ba'i rgyu nyid yin pa'i phyir ro//kye ma'o zhes bya ba'i tshig gi phrad 'di ni ya mtshan gyi don la yang mthong ste/ dper na bad sa'i bus mngon par dang nas kye ma'o sangs rgyas kye ma'o chos ni legs par gsungs pa zhes smras pa lta bu'o//mya ngan byed pa'i don la yang sa'i bcud nub pa dang kye ma'o sa'i bcud kye ma'o sa'i bcud ces mya ngan byas pa lta bu'o/ /smon pa'i don la yang ma la kye ma'o/ /bdag mi skal ba bzang po rnams dang skal ba mnyam pa nyid du skye bar shog shig ces bya ba lta bu'o/ smad pa'i don la yang dper na rkun po byed pa na kye ma bram ze'i legs pa yin no zhes bya ba lta bu ste/ de ni 'dir mya ngan byed pa'i don du blta bar bya'o/ /rkun po zhig gis rab brgyad phug ste/ rgyal po'i mdzod du zhugs nas skom pas chang zhim po 'thungs te ra ro nas nyal ba dang nang par bzung nas sdug bsngal bar byas zhes grag go//de bzhin du khyed kyis mi khom pa'i rab brgyad phug ste/ dal bar skyes pa'i rgyal po'i mdzod du zhugs nas 'dod pa la dga' ba'i chang 'thungs te ra ro ba nyid kyis srog gi mtshan mo'i nam nang na bdag nyid la sdug bsngal bskyed pa ni mi rigs so//phag mo thi ba'i phreng ldan ma'i sngon gyi tshul yang brjod par bya ste/ de bzhin du dam pa'i chos ma mnyan pas sems can rnams mngon par mtho ba'i 'gro bar skyes nas shugs zad pas mda' gnam du 'phangs pa slar sa la ltung ba bzhin du yang ngan 'gror 'gro bar 'gyur ro/ /de lta bas na rnam pa de lta bu'i tshigs su bcad pa dang /gtam dang / sngon gyi sbyor ba la sogs pa dag gis skyo ba'i gtam nye bar bsgrub par bya'o/ /de lta bu'i ya mtshan dang / rab tu dga' ba dang / skyo ba'i gtam nye bar sgrub pa nyid kyis gus par nyan pa dang ldan pa brjod par bya'o//mdo sde'i rgyan las kyang mdo sde rnam par bshad pa'i tshul bstan to/ /gces pa dang ni dgongs pa can gyi gsung dag rnam pa mang du brjod/ /tshig gi don dang mtshams sbyar sdeb dang 'dra bar mang du brjod par bya/ /'gal ba dag dang lan gdab thabs kyang mang du brjod cing shes par bya//yon tan 'di dag rnams dang ldan pas gal te smra na legs smra yin/ /tshigs su bcad pa 'dis ni sangs rgyas kyi gsung yon tan lnga dag tu bstan par grag ste/ dgos pa dang bcas pa nyid dang / dgongs pa zab pa nyid dang / mtshan nyid zab pa nyid dang / snga phyi'i 'brel ba nyid dang /rigs pa dang 'brel ba nyid do/ /gzhan yang bstan pa/ gang zhig gzhan gyis brgal na snyan par smra byed rtsub pa ma yin dang / /bstod dam grub par gyur kyang gang gi yid ni rgyags par mi byed dang / /gang zhig don rgyas pa dang sna tshogs 'brel dang go byed smra ba dang //gang zhig snying la dge rtsa bskyed pa de ni smra byed mkhas pa yin/ /tshigs su bcad pa 'dis ni smra ba po rnam pa gnyis kyi yon tan rnam pa gnyis bstan par grag ste/ smra ba po rnam pa gnyis ni rang gi phyogs 'dzugs pa dang / chos ston pa'o/ /yon tan rnam pa gnyis ni ngag yongs su dag pa dang /sems yongs su dag pa'o/ /de la dang po'i ngag yongs su dag pa ni gzhan gyis brgal ba na snyan par smra ba nyid dang / mi snyan pa mi smra ba nyid kyis so/ /sems yongs su dag pa ni bsngags pa dang / rgyal ba thob kyang de'i nye ba'i nyon mongs pa mi skye bas so/ /gnyis pa'i ngag yongs su dag pa ni yongs su rdzogs pa dang /mi zlos pa dang / tshad ma dang mi 'gal ba'i don dang / gsal ba'i tshig brjod pa nyid kyis so/ /sems yongs su dag pa ni bdag dang gzhan gyi rgyud la dge ba'i rtsa ba bskyed pa'i bsam pa'i sems zang zing med pa nyid kyis so/ /ji ltar mi'i sgo bud shing yin//ji ltar chu'i lam gtod pa ltar/ /de bzhin blo dang ldan rnams la/ /mdo sde bshad pa'i shan 'di bstan/ /rnam par bshad pa'i rigs pa las le'ur bcad pa lnga pa ste/ rnam par bshad pa'i rigs pa slob dpon dbyig gnyen gyis mdzad pa rdzogs so// //