CLOSE WINDOW

D4060
བོད་ཡིག

/ /rgya gar skad du/ byA khyA yuk+ti sU tra khaN+Da sha taM/ bod skad du/ rnam par bshad pa rigs pa'i mdo sde'i dum bu brgya/ 'jam dpal gzhon nur gyur pa la phyag 'tshal lo/ /chos gang dag thog mar dge ba/ bar du dge ba/ tha mar dge ba/don bzang po/ /tshig 'bru bzang po/ ma 'dres pa/ yongs su rdzogs pa/ yongs su dag pa/ yongs su byang ba/ tshangs par spyod pa/ mngon par brjod pas mngon par rjod par byed pa ni mang du thos pa dang / thos pa'i gzhi can dang / thos pa bsags pa yin te/de chos de lta bu mang po thos pa dang / bzung ba dang / kha ton byed pa dang / yid kyis brtags pa dang / mthong bas shin tu rtogs pa yin no zhes bya ba dang / 'di ltar yang bcom ldan 'das de ni de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba/ bla na med pa/ lha dang mi rnams kyi ston pa/ sangs rgyas bcom ldan 'das so zhes bya ba dang / de'i tshe nga lha dang bcas pa'i 'jig rten dang / bdud dang bcas pa dang / tshangs pa dang bcas pa dang / dge sbyong dang bram zer bcas pa'i skye dgu dang / lha dang mir bcas pa'i tshogs las grol ba dang / nges par byung ba dang / bral ba dang / rab tu rnam par grol ba dang /sems phyin ci ma log pas lan mang du gnas shing / de'i tshe bdag ni bla na med pa yang dag par rdzogs pa'i byang chub mngon par rdzogs par sangs rgyas par shes so zhes bya ba dang / btsun pa bcom ldan 'das ni ma dul ba rnams dul bar mdzad pa/ma zhi ba rnams zhi bar mdzad pa/ dbugs ma phyin pa rnams dbugs 'byin par mdzad pa/ yongs su mya ngan las ma 'das pa rnams yongs su mya ngan las 'da' bar mdzad pa'o zhes bya ba dang / de bzhin gshegs pa ni lam mkhyen pa/ lam thugs su chud pa/ lam ston pa/ lam gsung ba/ lam yongs su 'dren pa lags so zhes bya ba dang / bcom ldan 'das kyi chos ni legs par gsungs pa/ yang dag par mthong ba/ nad med pa/ dus chad pa med pa/nye bar gtod pa/ 'di mthong ba la don yod pa/ mkhas pa rnams kyi rang gis rig par bya ba'o zhes bya ba dang / bcom ldan 'das kyis legs par gsungs pa'i chos 'dul ba ni legs par bstan pa/ nges par 'byung ba/ rdzogs pa'i byang chub tu 'gro bar byed pa/mi mthun pa med cing 'dus pa dang ldan pa zhes bya/ rten pa yod pa zhes bya/ 'di ston pa de bzhin gshegs pa dgra bcom pa yang dag par rdzogs pa'i sangs rgyas so zhes bya ba dang / dge slong dag nga'i chos ni legs par gsungs pa/ gsal ba/ phye ba/ rgyu ba bcad pa/ lha dang ma'i bar dag la yang dag par shin tu bstan pa'o zhes bya ba dang / bcom ldan 'das kyi nyan thos kyi dge 'dun ni legs par zhugs pa/ rigs par zhugs pa/ drang por zhugs pa/ mthun par zhugs pa/ chos rjes su mthun par spyod pa'o zhes bya ba dang /dge slong gang tshul khrims 'chal ba sdig pa'i chos can/ khong myags pa/ 'dzag pa/ shing rul ba lta bu/ bong bu ltar kun tu spyod pa/ dge sbyong ma yin par dge sbyong du khas 'che ba/ tshangs par spyod pa can ma yin par tshangs par spyod pa can du khas 'che ba de ni/ji ltar rmig pa gcig la rwa ni med pa dang / /rkang pa bzhi la dung gi kha can skad po che/ /rtag tu ba lang rnams kyi nang du rab 'gro de / /'di la khyu mchog sgra ni 'byin par mi byed ltar/ /de bzhin 'dir ni kha cig dran nyer ma bzhag cing //rtag tu bde bar gshegs pa mchog gi bstan pa la/ /gnas par mi byed le lo ldan zhing ma gus pa/ /'dus ma byas pa'i go 'phang de la 'dir mi reg /gzhan yang bong bu de ni ba lang nang song yang / /de ni ba lang rnams las ring par gyur pa yin//gzhan yang de lta bu ni dge 'dun nang 'dug kyang / /'phags pa'i tshogs rnams dang ni ring ba yin zhes brjod/ /ces bya ba dang / gau ta ma dag khyed ni skye dgu nyon mongs pa can/ sdug bsngal can/ mya ngan can/ 'khrug pa can dag yin na/khyed cag la rnyed pa dag ni ci dag yod/ /legs par rnyed pa dag ni ci dag yod/ /ces bya ba dang / dge slong dag dge sbyong ngam bram ze gang la la mig gis ro myong bar byed pa de dag ni dge sbyong ngam bram ze'am bdud nga la sdig 'dod kyi dbang du shas kyis song ba dang /dbang du song ba dang / lag tu song ba dang / bdud nga la sdig 'dod kyi ci 'dod dgur bya ba dang / bdud kyi bcing ba dag gis bcings pa dang / bdud kyi zhags pa dag las yongs su ma grol ba zhes bya'o zhes bya ba dang / mi dge ba'i chos rnams yang dag par blangs pa'i rgyus mthong ba'i chos nyid la sdug bsngal ba dang /sdug bsngal dang bcas pa dang / phongs pa dang bcas pa dang / gnod pa dang bcas pa dang / yongs su gdung ba dang bcas par gnas pa dang / lus zhig nas ngan 'gror 'gyur bar rig par bya'o zhes bya ba dang /srog gcod pa kun tu bstan cing bsgoms la lan mang du byas pas sems can dmyal ba rnams su skye bar 'gyur ro zhes bya ba dang / sgrib pa lnga po sems nye bar nyon mongs par byed pa dag ni 'dod pa la 'dun pa'i sgrib pa dang /gnod sems dang / rmugs pa dang / gnyid dang / rgod pa dang / 'gyod pa dang / the tsom gyi sgrib pa'o zhes bya ba dang / sgyu rtsal shes dag gsum po 'di dag ni sems can rnams kyi las kyi gzhi dang / kun tu 'byung ba dag yin par rig par bya ste/sgyu rtsal shes dag gsum po gang zhe na/ chags pa ni sems can rnams kyi las kyi gzhi dang / kun 'byung ba dag yin par rig par bya ste/ sgyu rtsal shes dag zhe sdang dang / /gti mug ni sems can rnams kyi las kyi gzhi dang / kun 'byung ba dag yin par rig par bya ste zhes bya ba dang / de ltar rnam par rtog pa de dag ni mi dge ba rnams dang / sdug bsngal ba rnams dang / 'phags pa ma yin pa rnams dang / don med pa dang ldan pa rnams so zhes bya ba dang / mi dag gi 'dod pa rnams ni mi gtsang ba rnams dang /dri mi zhim pa rnams dang / dri nga ba rnams dang / mi mthun pa rnams yin no zhes bya ba dang / zas rnams dang ni skom rnams dang yang de bzhin ro rnams dang / /bud med rnams ni 'dod rnams yin zhes 'di na kha cig 'chi//phung po 'di dag dri ma lags par yang dag rab mthong ste/ /de slad bdag ni sbyin dang sbyin sreg la ni dga' ma mchis/ /zhes bya ba dang / 'dod pa'i rgyu dang / 'dod pa'i gzhi dang / 'dod pa'i dbang du byas pa dang / 'dod pa rnams kho na'i rgyus ma dang bu dang nas rtsod par byed na zhes bya ba dang /chags pa dang / zhen pa dang / 'chums pa dang / mdud pa bor ba dang / brgyal ba dang / lhag par chags pa dang / lhag par zhen pa'o zhes bya ba dang / 'dod pa la 'dod chags dang / lhag par zhen pa dang / rnam par bcings pa dang /yongs su zhen pa dang / kun tu 'dod chags kyi rgyus khyim pa rnams dang khyim pa rnams su rtsod par byed do/ /lta ba la 'dod chags dang / lhag par zhen pa dang / rnam par bcings pa dang / yongs su zhen pa dang / kun tu 'dod chags kyi rgyus rab tu byung ba rnams dang /rab tu byung ba rnams su rtsod par byed do zhes bya ba dang / dge slong dag sems can de dag la ni don spyod pa med/ chos spyod pa med/ bsod nams spyod pa med/ dge ba spyod pa med/ dge legs spyod pa med ces bya ba dang / /dge slong dag de ni chu gter chen po dang /chu'i chu bo chen po dang / chu'i tshogs chen po dang / chu'i chu chen po ma yin gyi zhes bya ba dang / thags 'khrugs pa lta bu dang / gru bu 'dzings pa lta bu dang / rtswa mun dza dang / bal ba dza lta bur 'ong ba dang 'gro bar gyur cing / 'jig rten 'di nas 'jig rten pha rol dang /'jig rten pha rol nas 'jig rten 'dir kun tu rgyug par byed/ 'khor bar byed/ 'khor ba las mi 'da' bar byed pa zhes bya ba dang / sdug bsngal ba mi bzad ba rtsub pa tsha ba yid du mi 'ong ba srog 'phrog pa dag gis zhes bya ba dang /ci khyod la tshor ba sdug bsngal ba mi bzad pa rtsub pa tsha ba yid du mi 'ong ba srog 'phrog pa skyes pa lus las bral zhing mi skye la/ de bral zhing mi skye bar mngon pa yin nam zhes bya ba dang / sdug bsngal nyid gsum ste/ sdug bsngal gyi sdug bsngal nyid dang / 'du byed kyi sdug bsngal nyid dang /'gyur ba'i sdug bsngal nyid do zhes bya ba dang / ji skad du/ 'du byed sdug bsngal nyid dang ni/ /'gyur ba nyid du mkhyen nas ni/ /rdzogs sangs rab tu mkhyen pa yis/ /tshor ba sdug bsngal nyid du gsungs/ /zhes gsungs pa lta bu dang / srog gcod pa dang / drag shul can dang / lag pa khrag dmar ba dang / gsod pa dang / rab tu gsod pa la gnas pa dang / sems can srog chags su gyur pa la ngo tsha med cing snying mi brtse ba la zhugs pa yin la/ tha na srog chags srin bu phre'u dang / / grog sbur yan chad kyi srog gcod pa mi spang ba yin no zhes bya ba dang / dge slong dag gson pa rnams las gnyid log pa ni stong pa dang / gsog dang / 'bras bu med pa dang / don med pa dang / phan yon med pa yin no zhes bya ba dang / byis pa rmongs pa mi gsal ba mi mkhas pa zhes bya ba dang /byis pa'i rang bzhin can rmongs pa'i rang bzhin can/ shes rab 'chal pa'i rang bzhin can zhes bya ba dang / gro bzhin skyes dge sbyong ngam bram ze gang la la dag gzugs mi rtag pa mi brtan pa yid brtan du mi rung ba/ 'gyur ba'i chos can gyis che ba yin no snyam du rlom par byed/khyad par du 'phags so snyam du rlom par byed/ dman pa ma yin no snyam du rlom par byed/ gro bzhin skyes dge sbyong ngam bram ze de dag thams cad ni de ltar yang dag pa ji lta ba bzhin du ma mthong ba'i phyir ro/ / gzugs ji lta ba bzhin du rnam par shes pa'i bar du'ang de bzhin no zhes bya ba dang / gzugs gang rtag pa dang / brtan pa dang / ther zug pa dang / mi 'gyur ba'i chos can dang / yang dag par de bzhin du gnas par 'gyur ba'i gzugs de lta bu 'ga' yod dam zhes bya ba dang /'phags pa nyan thos shes nas dad pa bzhi dag dang ldan pa ni 'tsho ba dag gis dbul ba ma yin/ bkren pa ma yin/ phongs pa ma yin par 'tsho zhing zhes bya ba dang / gal te ting nge 'dzin 'du byed pas zin cing chu bzhin du bzung ba yin la/chos nyid kyis zin cing zhi ba ma yin pa dang / gya nom pa ma yin pa dang / lam shin tu sbyangs pa thob pa ma yin pa dang / sems rgyud gcig tu gyur pa rtogs pa ma yin pa zhes bya ba dang / de de ltar sems mnyam par gzhag pa yongs su dag pa dang /yongs su byang ba dang / nyon mongs pa med pa dang / nye ba'i nyon mongs pa dang bral ba dang / drang por gyur pa dang / las su rung ba dang / gnas pa dang / mi g.yo ba thob na zhes bya ba dang / ting nge 'dzin dang gnas dang ldang / /nyams bde ba dang spyod yul dang //mngon par bsgrub dang sprod pa dang / /mi sprod de bzhin gnyis ka dang / /skye dang 'bri dang de bzhin thabs/ /zhi gnas rab 'dzin btang snyoms so/ /zhes bya ba dang / sred pa yang srid pa 'byung bar byed pa dga' ba'i 'dod chags dang ldan pa de dang de la mngon par dga' ba de ma lus par spangs pa dang /bor ba dang / bsal ba dang / zad pa dang / 'dod chags dang bral ba dang / 'gog pa dang / rnam par zhi ba dang / nub pa gang yin pa zhes bya ba dang / rtog ge ba yin/ dpyod pa pa dang /rtog ge la zhugs pa dang / rang gi spobs pa dang ldan pa dang / so so'i skye bo dang ldan pa dang / dpyod pa dang 'brel pa'i sa la gnas pa yin zhes bya ba dang / 'chi ba ni bzang po ma yin/ dus byas pa ni bzang po ma yin/ tshe phyi ma ni bzang po ma yin no zhes bya ba dang /tsher ma phyung ba rnams dang / tsher ma dkrugs pa rnams dang / tsher ma dang bral ba rnams dang / tsher ma med pa rnams gang yin zhes bya ba dang / dad pa skyes na 'gro bar byed/ song nas chos nyan par byed do/ /des na chos de thos nas sems par byed do//bsams nas 'jal bar byed cing / nye bar rtog par byed la/ bden pa de yang lus kyis mngon sum du byed cing shes bar kyis so sor 'bigs par byed do zhes bya ba dang / gzhi de las sbyin pa po dang / sbyin pa dag gi bsod nams rgyun rgyas pa dang /dge ba rgyun rgyas pa dang / bde ba 'dren pa tshad med pa yod par zhes bya ba dang / rdzu 'phrul gyi yul rnam pa mang po nyams su myong bar byed de/ gcig tu gyur nas mang por 'gyur/ /mang por gyur nas gcig tu 'gyur la/ snang bar gyur cing mi snang bar 'gyur ba yang shes pa dang / mthong bas nyams su myong bar byed pa dang / rtsig pa la yang thad kar 'gro/ ri la yang thad kar 'gro/ ra ba la yang thad kar 'gro ste/ lus kyis thogs par 'gro la/ sa la yang steng du 'byung ba dang /bye'u zul byed de/ dper na chu la bya ba bzhin no/ /chu la yang mi nub pa'i rgyun gyis 'gro ste/ dper na sa chen po la bya ba bzhin no/ /nam mkha' la yang skyil mo krung gis 'gro ste/ dper na 'dab chags bya bzhin no/ /nyi ma dang zla ba 'di gnyis 'di ltar rdzu 'phrul che ba/'di ltar mthu che ba/ 'di ltar gzi brjid che ba la yang lag pas 'dzin cing nyug par byed kun tu nyug par byed do/ /tshangs pa'i 'jig rten gyi bar du sems can rnams la lus kyis dbang bsgyur ro zhes bya ba dang / 'jig tshogs 'gog pa mya ngan las 'das pa la sems 'jug par byed/dad par byed/ kun tu gnas par byed/ rnam par grol bar byed ces bya ba dang / dge slong dag 'di la mig gi dbang po bsrung ba'i phyir dang / sba ba'i phyir dang / dul bar gnas par bya ba'i phyir rab tu zhugs pa yin no zhes bya ba dang /dge slong dag dbang po drug po 'di dag shin tu dul ba dang / shin tu sbas pa dang / shin tu bsrungs ba dang / shin tu bsdams pa dang / shin tu bsgoms pa ni zhes bya ba dang / de byams pa dang ldan pa'i sems kho na med pa/'gran zla med pa/ gnod pa med pa/ yangs pa/ rgya chen por gyur pa/ tshad med pa/ shin tu bsgoms pas phyogs gcig tu mos te khyab par byas nas rdzogs par byas te gnas so/ /de bzhin du gnyis pa dang / de bzhin du gsum pa dang / de bzhin du bzhi pa dang /bla dang 'og dang thad kar rnam pa thams cad du thams cad dang ldan pa'i 'jig rten 'di byams pa dang ldan pa'i sems kho na med pa/ 'gran zla med pa/ gnod pa med pa/ yangs pa/ rgya chen por gyur pa/ tshad med pa/ shin tu bsgoms pas mos te khyab par byas nas rdzogs par byas te gnas so zhes bya ba dang /brtson 'grus brtsams shing zhum pa med pa yin/ lus shin tu sbyangs shing nyes par brtsams pa med pa yin/ dran pa nye bar gzhag cing kun tu rmongs pa med pa yin/ sems mnyam par gzhag cing rtse gcig pa yin zhes bya ba dang /dge slong dag 'di ni sdug bsngal 'phags pa'i bden pa'o zhes sngar ma thos pa'i chos rnams la tshul bzhin yid la byed pa na mig skyes shing / shes pa dang / rig pa dang / blo skyes pa yin no zhes bya ba dang / dge slong dag 'di ni khyed la phan pa'i phyir dang / 'di ni bde ba'i phyir dang / 'di ni phan pa dang / bde ba'i phyir zhes bya ba dang / shing thags btsugs pa ni zab ring / legs par btsugs pa/ sra ba/ brtan pa/ mkhregs pa dang ldan pa/ mi g.yo ba/ mi chags pa yin no zhes bya ba dang /des longs spyod skyed pa dang / brtson 'grus kyis thob pa/ lag mthus bsgrubs pa/ rdul med med dri ma chags chags su bsgrubs pa/ chos dang ldan pa'i chos kyis rnyed pa zhes bya ba dang / yon dbul bar byed pa ni tshe phyi ma la 'gro ba gong mar 'gyur ba dang /skal ba bzang por 'gyur ba dang / rnam par smin pa bde bar 'gyur ba dang / mtho ris 'grub par byed par 'gyur ba'o zhes bya ba dang / dge slong ngas khyed la skyes bu dam pa rnams kyi 'gro ba bdun dang / len pa med par mya ngan las 'das pa bshad par bya'o//skyes bu dam pa rnams kyi 'gro ba bdun gang zhe na/ dge slong dag 'di la dge slong ni 'di ltar bdag ma byung yang rung / bdag gi ma byung yang rung / bdag mi 'byung bar 'gyur ro/ /bdag gi mi 'byung bar 'gyur ro snyam du zhugs pa yin no//de ltar na gang yod pa dang / gang byung ba de spang ngo snyam du btang snyoms thob la/ de la chags par mi byed cing / de'i 'og tu zhi ba'i go 'phang gong ma la shes rab kyis so sor rtog par byed do zhes bya ba dang / yod pa la yang yod pa nyid dang / med pa la yang med pa nyid dang /bla ma dang bcas pa la yang bla ma dang bcas pa nyid dang / bla na med pa la yang bla na med pa nyid du shes par 'gyur zhes bya ba dang / legs par mthong ba dang / legs par rig pa dang / legs par yid la byas pa dang / legs par brtan pa dang / legs par rtogs pa zhes bya ba dang / 'dun pa skyed par byed/ rtsol bar byed/ brtson 'grus rtsom par byed/ sems rab tu 'dzin par byed/ rab tu 'jog par byed do zhes bya ba dang / 'dus pa dang ldan pa/ tshogs dang ldan pa/ tshogs kyi slob dpon skye bo mong pos zhi ba'i rang bzhin du kun tu shes pa/tshogs chen pos mdun gyis bdar ba zhes bya ba dang / dmag ldan chos 'di ni zab pa/ zab par snang ba/ mthong bar dka' ba/ khong du chud par dka' ba/ brtag mi nus pa/ rtog ge'i spyod yul ma yin pa/zhib mos brtags pa'i mkhas pa dang / mdzangs pas rig par bya ba yin no zhes bya ba dang / de bzhin gshegs pas phan yon bcu gzigs nas 'dul ba la nyan thos rnams kyi bslab pa'i gzhi 'cha' bar mdzad do/ /bcu gang zhe na/ 'di lta ste/ dge 'dun bsdu ba'i phyir dang / dge 'dun legs par bya ba'i phyir dang / dge 'dun bde bar bya ba'i phyir dang / mngon par ma dad pa rnams dad par bya ba'i phyir dang / mngon par dad pa rnams phyir zhing 'byung bar bya ba'i phyir dang / gang zag gnong mi bkur ba rnams tshar bcad pa'i phyir dang /ngo tsha shes pa rnams bde bar gnas par bya ba'i phyir dang / mthong ba'i chos kyi zag pa rnams bsdam pa'i phyir dang / tshe rabs phyi ma'i zag pa rnams bzlog pa'i phyir dang / tshangs par spyod pa rjes su gzung ba'i phyir dang / tshangs par spyod pa yun ring du gnas par bya ba'i phyir ste nga'i tshangs par spyad pa spyod pa yun ring du gnas par 'gyur ba dang / skye bo mang po la phan pa dang / rgyas pa dang / lha dang mi rnams kyi bar dag la yang dag par legs par rab tu bstan pa'o zhes bya ba dang / dge slong dgra bcom pa zag pa zad pa sdug bsngal gang yin pa de 'gags pa dang / de nye bar zhi ba dang / de bsil bar gyur pa dang / de nub pa zhes bya ba dang / bram ze de som nyi med cing 'gyod pa chad pa dang / 'byung ba dang / 'jig pa la sred pa dang bral ba dang /chags pa rgyas par mi 'gyur ba yin zhes bya ba dang / dge slong dag mi rtag pa'i 'du shes sgoms shig /dge slong dag mi rtag pa'i 'du shes kun tu bsten cing bsgoms la lan mang du byas pa dang / bgrod par byas/ rten du byas/ nan tan du byas shing shin tu rdzogs par byas la legs par brtsams pa ni 'dod pa'i 'dod chags thams cad yang dag par 'joms shing /gzugs kyi 'dod chags thams cad dang / gzugs med pa'i 'dod chags thams cad dang / rgod pa dang / nga rgyal dang / ma rig pa thams cad yang dag par 'joms te/dper na khyim bdag zhing pa dbyar 'das nas ston gyi dus kyi tshe gshol chen pos zhing rnams rmed cing rmed pa na ram pa'i rtsa rgyus thams cad gcod par byed/ kun tu gcod par byed/ mngon du gcod par byed pa de bzhin du/ dge slong dag mi rtag pa'i 'du shes kun tu bsten cing snga ma bzhin du nga rgyal dang ma rig pa'i bar du yang dag par 'joms so//dge slong dag dper na mi rtswa bal ba dza brnga ba zhig gis rtswa bal ba dza chung zhing nyung la mi mang ba shas shig mchog ma nas bzung ste/ sprug cing bar bur thams cad sel bar byed pa de bzhin du mi rtag pa'i 'du shes kun tu bsten cing zhes bya ba nas/nga rgyal dang / ma rig pa'i bar du yang dag par 'joms so/ /dper na shing thog a mra'i dog pa la a mra gang ci yod pa de thams cad ni rtsa rgyus dang ldan pa/ rtsa rgyus la/ brtan pa/ rtsa rgyus dang 'brel pa/ rtsa rgyus su 'du ba/ rtsa rgyus dang ma bral ba dag yin zhing de dag las 'byung ba yin pa de bzhin du mi rtag pa'i 'du shes kun tu bsten cing ste snga ma bzhin no/ /dper na gtsang khang phyur bu'i phyam dgu po gang ji snyed pa de dag thams cad ni spyi rten la gnas/spyi rten la brten/ spyi rten la rag las/ spyi rten la gzhol bas spyi rten ni de rnams kyi mchog yin par bstan te/ 'di lta ste kun tu 'dzin pa'i phyir ro/ /de bzhin du mi rtag pa'i 'du shes kyang snga ma bzhin no/ /dper na srog chags dud 'gro'i skye gnas su gtogs pa'i 'gro ba rnams kyi rjes gang ji snyed pa de dag thams cad glang po che'i rjes su 'dus shing khongs su chud pas glang po che'i rjes ni de rnams kyi mchog tu bstan te/'di lta ste/ che ba nyid kyi phyir ro/ /de bzhin du mi rtag pa'i 'du shes kyang snga ma bzhin no//dper na 'dzam bu'i gling du 'bab chu gang ji snyed pa de dag thams cad ni rgya mtshor gzhol ba/ rgya mtshor 'bab pa yin/ rgya mtshor bab pa yin pas rgya mtsho ni de rnams kyi mchog yin par bstan te/ 'di lta ste/ kun tu sdud pa'i phyir ro/ /de bzhin du mi rtag pa'i 'du shes kyang snga ma bzhin no//dper na gnam las nyi ma shar ba ni gnam la yogs pa'i mun pa thams cad 'od kyi zil gyis mnan nas lham me lhan ne lhang nge'o/ /de bzhin du mi rtag pa'i 'du shes kyang snga ma bzhin no/ /dper na 'khor los sgyur ba'i rgyal po ni khams kyi rgyal po gang ji snyed pa de rnams kyi mchog yin te/'di lta ste/ dbang byed pa nyid kyis so/ /de bzhin du mi rtag pa'i 'du shes kun tu bstan cing bsgoms la lan mang du byas pa dang / bgrod par byas/ rten du byas/nan tan du byas shing shin tu rdzogs par byas la/ legs par brtsams pa ni 'dod pa'i 'dod chags thams cad yang dag par 'joms shing / gzugs kyi 'dod chags thams cad dang / gzugs med pa'i 'dod chags thams cad dang / rgod pa dang / nga rgyal dang / ma rig pa thams cad yang dag par 'joms so/ /sdom ni/ zhing pa dang ni gres ma brda/ dog pa dang ni spyi rten dang / /rjes dang 'bab chu nyi ma dang / /brgyad pa rgyal po yin par 'dod/ /ces bya ba dang / tshe dang ldan pa dag dge slong chos smra ba pos chos kyi gtam byed pa na rnam pa nyi shu po 'di dag dang ldan pas gtam bya ste/dus su dang / gus pa dang / go rims dang / 'tshams sbyar ba dang / rjes su mthun pa dang / dga' bar bya ba dang / 'dod par bya ba dang / mgu bar bya ba dang /spro ba skyed pa dang / mi smad pa dang / rigs pa dang / 'brel pa dang / ma 'dres pa dang / chos dang ldan pa dang / 'khor ji lta ba bzhin dang / byams pa'i sems dang / phan pa'i sems dang / snying brtse ba'i sems dang / rnyed pa dang /bkur sti dang tshigs su bcad pa la mi rten pa dang / gtam de dag brjod pa na bdag la bstod par mi bya zhing gzhan la smad par mi bya la gtam yang bya ba ste/ rnam pa nyi shu po 'di dag dang ldan pas gtam bya'o zhes bya ba dang / tshe dang ldan pa dag chos mnyan par 'dod pas ni rnam pa bcu drug dang ldan pas chos mnyan par bya ste/dus su chos mnyan par bya ba dang / gus pa dang / nyan par gus pa dang / ma rangs pa med pa dang / bsgo ba bzhin byed pa dang / klan ka mi tshol ba dang / chos la gus pa nye bar gzhag pa dang /gang zag chos smra ba la gus pa nye bar gzhag pa dang / chos la brnyas pa med pa nyid dang / gang zag chos smra ba la brnyas pa med pa nyid dang / bdag nyid la brnyas pa med pa nyid dang / kun tu shes par bya ba'i sems dang / sems rtse gcig tu bya ba dang /rna blags pa dang / sems kun tu btud pa dang / sems thams cad kyis bsams nas chos mnyan par bya ste/ tshe dang ldan pa rnam pa bcu drug po 'di dag dang ldan pas chos mnyan par bya'o zhes bya ba dang / gsung gsal ba dang / snyan cing 'jebs pa dang / rnam par gsal ba dang / rnam par shes par bya ba dang / mnyan par 'os pa dang / mi rten pa dang / mi mthun pa med pa dang / yongs su gtugs pa med pas chos ston par mdzad do zhes bya ba dang / de nas tshe dang ldan pa sa ga dge slong rab tu mang po dag rim gro'i gnas su tshogs shing 'dus par gyur pa dag la skad gsal ba dang /snyan cing 'jebs pa dang / rnam par gsal ba dang / rnam par shes par bya ba dang / mnyan par 'os pa dang / mi rten pa dang / mi mthun pa med pa dang /yongs su gtugs pa med par chos ston par byed pa dang / de la dge slong de dag gis bkur stir byas/ bla mar byas/ yod par byas/ yid la byas/ sems rtse gcig tu byas te/ rna blags shing sems thams cad kyis bsams nas chos mnyan par byed do zhes bya ba dang /chos mngon pa dang 'dul ba mngon pa las dri ba dris pas yang shes shing / tshig dang yig 'bru rigs pa dang / 'brel pa dang / rjes su mthun pa dang / 'byor pa dang / thabs dang ldan pa dang / 'tsham pa dang / mthun pa dang / rtag 'grus skyong gi yan lag gi tshogs rnams kyis lan ldon par byed do zhes bya ba dang / dge slong dag gtam la 'jug par bya na / 'dun pa dang / zhe sdang dang / nga rgyal dang / 'chab pa dang / kun nas mnar sems dang /mi bzod pa dang / yid mi ches pa dang / spangs la sems kyi tha ba dang / 'chab pa'i gzhi yang bor te lta ba'i yongs su gdung ba yang bsal nas ha cang smra bar yang mi bya zhing / 'gal tshabs can du yang mi bya la/ tshig rtsub po smra bar yang mi bya ste/don dang chos bstan par bya/ kun shes par bya/ yang dag par shes par bya/ nges par shes par bya/ nges par sems su zhugs par bya zhing mgu bar bya/ yang dag par mgu bar bya/ yongs su mgu bar bya la/ dad par bya zhing dad pa bskyed par bya ste/'phags pa rnams ni de ltar brjod cing / 'phags pa rnams kyi brjod pa ni de lta bu yin no zhes bya ba dang / dge slong dag bdag nyid gling du 'gyur ba dang / bdag nyid skyabs su 'gyur ba dang / chos gling du 'gyur ba dang / chos skyabs su 'gyur ba dang /gling gzhan ma yin pa dang / skyabs gzhan ma yin par gnas par gyis shig ces bya ba dang / dge slong dag log par lta ba spongs shig /de ci'i phyir zhe na/ dge slong dag log par lta ba ni spang bar rung bas so/ /dge slong dag gal te log par lta ba spang bar mi rung na ni log par lta ba spongs shig ces nga mi zer ba zhig na/gang gi phyir log par lta ba spang du rung ba de'i phyir dge slong dag log par lta ba spongs shig ces nga de skad zer ro/ /dge slong dag gal te log par lta ba spongs pas dus ring por don med pa dang /mi phan pa dang / sdug bsngal ba 'grub par 'gyur ba ni log par lta ba spongs shig ces nga de skad mi zer ba zhig na/ gang gi phyir log par lta ba spangs pas don dang phan pa dang / bde ba 'grub par 'gyur ba de'i phyir dge slong dag log par lta ba spongs shig ces nga de skad zer ro zhes bya ba dang /dge slong dag gang zag gis gang zag la tshod ma bzung shig gang zag la tshad kyang ma 'dzin cig /de ci'i phyir zhe na/ gang zag gis gang zag la tshod 'dzin pa dang / gang zag la tshad 'dzin pa ni gnod par 'gyur te/nga'am nga 'dra ba gang yin pas gang zag tshod bzung ba'am tshad 'dzin pa yin no zhes bya ba dang / de 'di snyam du kye ma bdag gis 'di lta ste/ lus dang ngag dang yid kyis sdig pa byas shing / kye ma bdag gis 'di lta ste/ lus dang ngag dang yid kyis bsod nams ma byas pas sdig pa byed byed pa rnams dang /drag shul byed byed pa rnams dang / /gdug pa byed byed pa rnams dang / bsod nams ma byas pa rnams dang / /dge ba ma byas pa rnams dang / 'jigs pas bag tsha ba rnams la skyob pa ma byas pa rnams kyi 'gro ba gang yin pa'i 'gro ba de dag tu 'gro bar 'gyur ro snyam du sems nas yid la gcags pa 'byung ste/dge slong dag gang zag yid la gcags pa'i 'chi ba ni bzang po ma yin la/ dus byed pa ni bzang po ma yin zhing tshe phyi mar 'gro ba yang bzang po ma yin no zhes bya ba dang /dge slong dag gson po rnams las gnyid log pa ni brdzun pa dang / shin te ma dang / 'bras bu med pa dang / don med pa dang / phan yon med pa ma yin gyis kyang / dge slong dag gnyid log pa ni bla'i / 'thab mo dang / mtshang 'dru ba dang / rtsod pa dang / 'gyed pa gang dag skye bo mang po la mi phan pa dang / don med par 'gyur ba dang / lha dang mi rnams la mi phan pa dang / sdug bsngal bar 'gyur ba'i rnam par rtog pa gang la brten nas chags pa dang / 'thab mo dang / mtshang 'dru dang /rtsod pa dang / 'gyed pa 'byung ba'i rnam par rtog pa'i rnam par brtag pa ni de lta bu ma yin no zhes bya ba dang / dge sbyong du byed pa'i chos bzhi ni gshe yang slar mi gshe/ khros kyang slar mi khro/ /brdegs kyang slar mi brdeg /mtshang brus kyang slar mtshang mi 'bru pa'o zhes bya ba dang /'di la 'phags pa nyan thos ni bdag nyid kyi tshul khrims dag la tshul khrims 'di dag ni ma nyams pa dang / skyon med pa dang / 'dren mar ma gyur pa dang / thun tshags ma yin pa/ rang dbang can/ nog nog por ma gyur pa/ legs par chub pa/legs par brtsams pa/ mkhas pa rnams kyis bsngags pa/ mkhas pa rnams kyis ma smad pa yin no zhes bya bar rnam pa yang dag par rjes su dran no zhes bya ba dang / dge slong dag gang zag bden pa mthong ba/ 'bras bu thob pa/mngon par rtogs pa dang ldan pa'i sdug bsngal ni rdzing bu la brten pa'i chu ji tsam yod pa de snyed tsam zhig yod de spangs pa dang yongs su shes pa ste zhes bya ba dang / dge slong dag gsum po 'di dag ni nang gi dri ma yin/ nang gi 'gran zla dang bcas pa yin/ nang gi phyir rgol ba yin/ nang gi dgra bo yin no/ /gsum gang dag ce na/ dge slong dag 'dod chags ni nang gi dri ma yin/ nang gi 'gran zla dang bcas pa yin/ nang gi phyir rgol ba yin/ nang gi dgra bo yin no/ 'dod chags ji lta ba de bzhin du/ zhe sdang dang gti mug kyang de bzhin no zhes bya ba dang /dge slong dag mig ni skyes bu'i rgya mtsho yin te/ de las gzugs las byung ba'i shugs dag las 'byung ngo / /gang zhig gzugs las byung ba'i shugs de bzod pa de ni mig gi rgya mtsho dba' rlabs dang bcas pa/ glog dang bcas pa/'dzin khri dang bcas pa/ srin po dang bcas pa las brgal ba yin no zhes bya ba dang / shes rab myur ba/ shes rab mgyogs pa/ shes rab rno ba/ nges par 'byung ba'i shes rab can/ nges par 'byed pa'i shes rab can/ shes rab che ba/ shes rab yangs pa/shes rab zab pa/ shes rab mnyam pa med pa/ shes rab rin po che dang ldan pa zhes bya ba dang / 'di la 'phags pa nyan thos thos pa dang ldan pa ni bdag ni skye dgu ser sna'i dri mas kun nas dkris pa rnams las sems ser sna'i dri ma dang bral bas lhug bar gtong ba dang /lag brkyang ba dang / rnam par gtong ba la dga' ba dang / sbyin pa la rgyun mi 'chad pa dang / gtong ba phun sum tshogs pa dang / sbyin pa la 'ged par dga' bas khyim na gnas pa ni bdag gi rnyed pa legs par rnyed do zhes sbyin par bya ba'i chos kyi rnam pa yang dag par rjes su dran no zhes bya ba dang /de la rigs kyi bu dga' bo'i zas la tshod zin pa ni 'di yin te/ dge slong dag rigs kyi bu dga' bo ni longs pa'i phyir ma yin/ rgyags pa'i phyir ma yin/ cha ba'i phyir ma yin/ brgyan pa'i phyir ma yin gyi/ lus 'di kho na gnas par bya ba'i phyir dang /gso ba'i phyir dang / bkres pa dang bral bar bya ba'i phyir dang / tshangs par spyod pa rjes su gzung ba'i phyir te/ de lta bus tshor ba rnying ni gzhil bar bya la/ tshor ba gsar ni mi skye bar byas na/ bdag 'tsho ba dang / stobs dang / bde ba dang / kha na ma tho ba med pa dang / reg par gnas par 'gyur ro zhes so sor brtags nas zas za'o/ /dper na skyes bu shing rta bas mar ram 'bru mar gyis shing rta'i srog shing la skud par byed na/ longs pa'i phyir ma yin/ rgyags pa'i phyir ma yin/ cha ba'i phyir ma yin/ brgyan pa'i phyir ma yin gyi/ khal kho na theg pa'i phyir yin no/ /skyes bu rmas gzir ba yang mar ram 'bru mar gyis rma la skud pa na/ longs pa'i phyir ma yin / rgyags pa'i phyir ma yin/ cha ba'i phyir ma yin/ brgyan pa'i phyir ma yin gyi/rma kho na gso ba'i phyir yin no/ /de bzhin du rigs kyi bu dga' bo yang longs pa'i phyir ma yin/ rgyags pa'i phyir ma yin/ cha ba'i phyir ma yin/ brgyan pa'i phyir ma yin gyi/ lus 'di kho na gnas par bya ba'i phyir dang / gso ba'i phyir dang / bkres ba dang bral bar bya'i phyir dang /tshangs par spyod pa rjes su gzung ba'i phyir te/ de lta bus/ tshor ba rnying ni gzhil bar bya la/ tshor ba gsar ni mi skye bar byas na/ bdag 'tsho ba dang / stobs dang / bde ba dang / kha na ma tho ba med pa dang / reg par gnas par 'gyur ro zhes so sor brtags nas zas za'o zhes bya ba dang /de la rigs kyi bu dga' bo dran pa dang / shes bzhin mchog dang ldan pa ni 'di yin te/ dge slong dag rigs kyi bu dga' bo ni gal te shar phyogs su rnam par lta na sems thams cad kyi bsams nas rnam par lta'o//de de ltar rnam par lta ba na brnab sems dang / yid mi bde ba dang / sdig pa mi dge ba'i chos rnams sems la rjes su mi 'dzag par 'gyur la/ gal te lho dang nub dang byang phyogs su rnam par lta na yang sems thams cad kyis bsams te rnam par lta'o //de de ltar rnam par lta ba na snga ma bzhin du sems la rjes su mi 'dzag pa'i bar du 'gyur te/ dge slong dag rigs kyi bu dga' bo'i tshor ba yang shes bzhin du skye/ shes bzhin du gnas shes bzhin du nub pa dang / zad pa dang gtugs par 'gyur la/'du shes kyang shes bzhin du skye/ shes bzhin du gnas/ shes bzhin du nub pa dang / zad pa dang gtugs par 'gyur ro zhes bya ba dang / dge slong dag rgyal po lags mthong chen po ni ha cang mi dro ba dang / dus tshigs bde ba dang / gnod pa med pa dang / gang gis na des zos shing 'thungs pa dang /'chos pa dang / myangs pa rnams legs par bde bar 'ju ste/ pho ba'i drod snyoms shing 'ju ba dang ldan pas gnod pa nyung ba dang / nad med pa'i rang bzhin can du gyur to zhes bya ba dang / dge slong dag dge slong 'di la brnyas pa'i sems ma skyed cig /de ci'i phyir zhe na/ dge slong dag dge slong 'di ni lhag pa'i sems mthong ba'i chos la bde bar gnas pa dang ldan pa bzhi rnams ci 'dod pa bzhin thob pa/ tshegs med par thob pa/ ngan ngon ma yin par thob pa yin no zhes bya ba dang / dge slong dag dper na me tog ut+pa la'i phreng ba'am/tsam pa ka'i phreng ba'am/ bar shi ka'i phreng ba'am/ a ti mug ta ka'i phreng ba phrag pa la thogs pa'am/ snod du bzhag pa'i mtshan mo dang nyin mo de dang / de dag 'das/ skad cig dang / thang cig dang / yud tsam de dang de dag las 'das pa dang zegs pa nyid du 'gyur/rnyings pa nyid du 'gyur/ bskams pa nyid du 'gyur ro/ /dge slong dag me tog ut+pa la'i phreng ba'am/ tsam pa ka'i phreng ba'am/ bar shi ka'i phreng ba'am/ a ti mug ta ka'i phreng ba gang yin pa de zegs pa dang / rnyings pa dang /bskams pa dang / phyag dar gyi phung po la thug par 'gyur ba de ni dus la bab pa yin no/ /dge slong dag de bzhin du lus gzugs can rags pa 'byung ba chen po bzhi las gyur pa/ pha dang ma'i khu chu nur nur po las byung ba/ chan dang nam bus gso gso ba/ rtag tu bsku ba dang /bkru ba dang / mnye ba byas pa/ 'gyes pa dang 'jig pa'i chos can 'di yang rga ba nyid du 'gyur/ 'chi ba nyid du 'gyur ro/ /dge slong dag lus gzugs can rags pa 'byung ba chen po bzhi las gyur pa/ pha dang ma'i khu chu nur nur po las byung ba/ chan dang nom bus gso gso ba/rtag tu bsku ba dang / bkru ba dang mnye ba byas pa/ 'gyed pa dang 'jig pa'i chos can gang yin pa 'di mtshan mo dang nyin mo de dang de dag 'das/ skad cig dang / thang cig dang / yud tsam de dang de dag 'das na rgas pa dang nad bu can dang shi ba dang dur khrod du thug par 'gyur ba de ni dus la bab pa yin no zhes bya ba dang /'dod pa la rnam par rtog pa byung ba dang du mi len cing spong bar byed la sel bar byed cing byang bar byed do/ /gnod sems la rnam par rtog pa byung ba dang / rnam par 'tshe ba la rnam par rtog pa byung ba dang du mi len cing spong bar byed la sel bar byed cing byad bar byed do zhes bya ba dang /bram ze'i khye'u sems can rnams ni las bdag gir bya ba/ las kyi bgo skal spyod pa dang / las kyi skye gnas pa/ las la ston pa/ las kyis sems can rnams la mthon po dang / dma' ba dang / ngan pa dang / gya nom pa 'ged par byed pa dag yin no zhes bya ba dang / 'dod pa rnams la yid 'byung bar bya ba'i phyir dang / 'dod chags dang bral bar bya ba'i phyir dang / 'gog par bya ba'i phyir bsgrub pa yin no zhes bya ba dang / gzugs rnams la yid 'byung bar bya ba'i phyir dang /'dod chags dang bral bar bya ba'i phyir dang / 'gog par 'gyur bar bya ba'i phyir bsgrub pa yin no zhes bya ba dang / chags pa zad par bya ba'i phyir dang / sred pa zad par bya ba'i phyir dang / sdug bsngal zad par bya ba'i phyir dang / bsags pa zad par bya ba'i phyir bsgrub pa yin no zhes bya ba dang /gro bzhin skyes de ltar na ha cang brtson 'grus brtsam drags na ni rgod pa nyid du 'gyur la/ ha cang zhum ches na ni le lor 'gyur ro/ /gro bzhin skyes de bas na mnyam pa nyid du rtogs par byas la de la yang mtshan mar zung shig /des rlom sems kyang ma byed la/de la bag med par yang ma byed cig ces bya ba dang / bcom ldan 'das kyis rgyang ring po nas shing gi phung po chen po zhig 'bar rab tu 'bar/ kun tu rab tu mched cing me lce gcig tu gyur te/ lham mer 'bar ba gzigs so zhes bya ba dang / dge slong dag byis pa so so'i skye bo thos pa dang mi ldan pa rnams ni phung po lnga po 'di dag la rtag pa nyid dang /brtan pa nyid du yang dag par rjes su blta / bde ba nyid dang / nad med pa nyid dang / bdag dang bdag gi nyid du yang dag par rjes su blta'o zhes bya ba dang / tshul 'chos pa dang / kha gsag dang / gzhogs slong dang / thob kyis 'jal ba dang / rnyed pas rnyed par byed 'dod pa zhes bya ba dang / zla ba phyed phyed cing tshes bco lnga la rgyal po chen po bzhi dag rang nyid ci mi'i 'jig rten na/ mar 'dzin pa dang / phar 'dzin pa dang / dge sbyong du 'dzin pa dang /bram zer 'dzin pa dang / rigs kyi nang nas rgan rabs la ri mo byed pa dang / don byed pa dang / bya ba byed pa dang / bsod nams byed pa dang / 'jig rten 'di dang / 'jig rten pha rol gyi kha na ma tho ba rnams la 'jig par lta ba dang / sbyin par byed pa dang /bsod nams byed pa dang / bsnyen gnas la nye bar gnas pa dang / tshul khrims yang dag par blangs nas gnas pa'i mi dag mang ngam zhes 'jig rten rnam par lta bar byed do zhes bya ba dang / kye shA ri'i bu 'jig rten na chos smra ba ni su dag yin/ legs par zhugs pa ni su dag yin/bde bar gshegs pa ni su dag yin/ 'dzam bu'i grib ma can gang su dag 'dod chags gdul ba'i phyir dang / zhe sdang gdul ba'i phyir dang / gti mug gdul ba'i phyir chos ston pa 'di ni 'jig rten na chos smra ba dag ces bya'o/ /gang su dag 'dod chags gdul ba'i phyir zhugs pa dang /zhe sdang gdul ba'i phyir dang / gti mug gdul ba'i phyir zhugs pa 'di ni legs par zhugs pa dag ces bya'o/ /gang su dag 'dod chags ma lus par spangs pa dang / yongs su shes pa dang / zhe sdang dang gti mug ma lus par spangs pa dang /yongs su shes pa 'di ni 'jig rten na bde bar gshegs pa dag ces bya'o zhes bya ba dang / dge slong dag 'di ltar sa bon kyang yod la/ ma grugs pa dang / ma rul ba dang / rlung dang nyi mas ma gdungs pa dang / gsar pa dang / snying po dang ldan pa dang /legs par gnas pa yang yin la/ sa'i snag dang chu yang yod na de lta bu'i sa bon de dag ni 'phel zhing rgyas la yangs par 'gyur ro/ /dge slong dag de bzhin du 'di ltar las kyang yod/ /nyon mongs pa rnams dang / sred pa dang / lta ba dang / nga rgyal dang /ma rig pa yang yod na de lta bu ni tshe phyi ma la 'du byed rnams 'byung bar 'gyur ro zhes bya ba dang / dge slong dag dge slong gsar bu 'di dag ni dge sbyong gi gnod pa gces pa/ tshangs par spyod pa'i 'dam gyis zil gyis non pa/ sdig pa mi dge ba'i chos kun nas nyon mongs pa can/yang srid pa pa/ rims nad dang bcas pa/ sdug bsngal gyi rnam par smin pa can/ tshe phyi ma la skye ba dang / rga ba dang / 'chi bar 'gyur ba rnams kyis zil gyis non pa zhes bya'o zhes bya ba dang / dge slong ngam dge slong ma gang la la chung zad chung zad dang /yud tsam yud tsam dang / tha na se gol gtogs pa tsam yang sems can srog chags su gyur pa thams cad la byams pa'i sems sgom par byed pa'i dge ba'i dge slong ngam/ dge slong ma 'di ni ston pa'i bstan pa bzhin byed pa/ mi gtong bar bsgom pa/lhag mthong dang ldan pa/ khyim stong pa rnams rgyas par byed pa dang / rang gi don gyi sbyor ba la rjes su brtson pa/ tshangs pa mtshungs par spyod pa mkhas pa rnams kyis ma smad pa/ yul 'khor gyi bsod snyoms la 'bras bu yod par za ba zhes bya ba dang / kye gau ta ma gang gis na da ltar mi rnams stobs chung ba dang / gnod pa mang ba dang / mthu chung ba dang / tshe thung ba'i rgyu ni gang lags/ de skad ces gsol ba dang / bcom ldan 'das kyis bram ze gro bzhin skyes la 'di skad ces bka' stsal to/ / bram ze da ltar mi rnams ni chos ma yin par chags pas chags pa dang / mi rigs par chags pas zil gyis non pa dang / log pa'i chos kyis dkris pa yin no zhes bya ba dang / sangs rgyas bcom ldan 'das rnams kyi gtam dus sngar bya ba de ni 'di lta ste/ sbyin pa'i gtam dang /tshul khrims kyi gtam dang / mtho ris kyi gtam dang / 'dod pa rnams la ro myang ba dang / nyes dmigs dang / nges par 'byung ba dang / rab tu dben pa dang / phan yon dang / rnam par byang ba'i phyogs kyi chos rnams rgya cher yang dag par rab tu ston par mdzad pa yin no//gang gi tshe de sems rangs pa dang / sems nyams bde ba dang / sems dga' ba dang / sems sgrib pa med pa dang / yang dag phul can gyi chos bstan pa la kun shes par bya bar skal ba dang ldan pa dang / nus pa kun tu mkhyen par 'gyur ba de'i tshe sangs rgyas bcom ldan 'das rnams kyis yang dag phul can gyi chos bstan pa gang yin pa de ni 'di lta ste/sdug bsngal dang / kun 'byung ba dang / 'gog pa dang / lam mo zhes bcom ldan 'das kyis de la 'phags pa'i bden pa bzhi po dag yang dag par rab tu ston par mdzad pa yin no zhes bya ba dang /dge slong dag gzugs mi rtag pa ste/ gang mi rtag pa de ni sdug bsngal ba'o/ /gang sdug bsngal ba de ni bdag med pa'o/ /gang bdag med pa de thams cad ni bdag ma yin/ de ni nga bdag ma yin/ de ni bdag gi bdag ma yin no zhes des de ltar yang dag pa ji lta ba bzhin gyi legs pa'i shes rab kyis blta bar bya'o//gzugs la ji lta ba bzhin du rnam par shes pa'i bar la yang legs pa'i shes rab kyis blta bar bya'o/ /'phags pa nyan thos thos pa dang ldan pas de ltar mthong na gzugs la yid 'byung bar 'gyur zhing /tshor ba dang / 'du shes dang / 'du byed rnams dang / rnam par shes pa la yid 'byung bar 'gyur ro/ /yid byung na 'dod chags dang bral bar 'gyur ro/ /'dod chags dang bral na rnam par grol bar 'gyur ro zhes bya ba dang / sems zhes bya ba 'am/yid ces bya ba'am/ rnam par shes pa zhes bya ba yang rung ste/ gang 'di skad ces bya ba 'di ni byis pa so so'i skye bo thos pa dang mi ldan pas yun ring po nas byi dor byas shing sbas la/ bdag gis byas pa dang / 'di ni bdag gi yin/ 'di ni nga bdag yin/ 'di ni bdag gi bdag yin no zhes khas blangs la bzung ba yin no zhes bya ba dang / bcom ldan 'das kyis dper na grong ngam grong rdal dang ha cang mi ring ba zhig na/ mdag ma me lce med pa du ba med pa'i mdag mas gang ba'i klung zhig yod la/ de nas mi byis pa'i rang bzhin can ma yin pa/rmongs pa'i rang bzhin can ma yin pa/ shes rab kyi rang bzhin can/ bde ba 'dod pa/ sdug bsngal la mi dga' ba/ gson par 'dod pa/ 'chi bar mi 'dod pa/ 'chi ba la mi dga' ba zhig 'ongs pa dang / de 'di snyam du mdag ma me lce med pa du ba med pa'i mdag mes gang ba'i klung 'dir bdag lhung na bdag 'chi ba'am/'chi ba la thug ba tsam gyis sdug bsngal bar 'gyur ro snyam du bsams nas/ de de las bsring bar sems dang / bsring ba don du gnyer bar byed cing bsring ba yid la byed do/ / mdag me'i klung dang 'dra bar 'dod pa rnams kyang de bzhin no zhes gsungs pa zhes bya ba dang / dge slong dag dge slong chos shes pa'ang yin no/ /ji lta bu yin zhe na/ 'di la dge slong gis chos shes pa ni 'di lta ste/ mdo'i sde dang / dbyangs kyis bsnyad pa'i sde dang / lung du bstan pa'i sde dang / tshigs su bcad pa'i sde dang / ched du brjod pa'i sde dang / gleng gzhi'i sde dang / rtogs pa brjod pa'i sde dang / de lta bu byung ba'i sde dang / skyes pa'i rabs kyi sde dang / shin tu rgyas pa'i sde dang / rmad du byung ba'i chos kyi sde dang / gtan la dbab par bstan pa'i sde'o zhes bya ba'o// rnam par bshad pa'i rigs pa'i mdo sde'i dum bu brgya rdzogs so// //rgya gar gyi mkhan po bi shud+d+ha sid+ha dang / sarba dz+nyA de wa dang / lo tsA ba ban de rtsangs de ban+d+ra rak+Shi tas bsgyur cing / zhu chen gyi lo tsA ba ban de many+dzu shrI warmas zhus te gtan la phab pa/