CLOSE WINDOW

D4053
བོད་ཡིག

@##/ /rgya gar skad du/ a b+hi d+ha r+m+ma sarba duts+tsha ya b+hA ShuM/ bod skad du/ chos mngon pa kun las btus pa'i bshad pa/ bam po dang po/ 'jam dpal gzhon nur gyur pa la phyag 'tshal lo//ci'i phyir bstan bcos 'di brtsams she na/ phung po la sogs pa las brtsams te/ du dang ci'i phyir zhes bya ba la sogs pa bsam pa'i gnas rnams la mkhas par bya ba'i phyir brtsams so//'di ltar mkhas pa 'dis ni phan yon rnam pa gnyis thob ste/ yid la byed pa'i phan yon dang / 'bel ba'i gtam gtan la 'bebs pa'i phan yon no/ / de la yid la byed pa'i phan yon ni zhi gnas kyi rjes su mthun pa dang / lhag mthong 'phel ba'i rjes su mthun par rig par bya'o/ /zhi gnas kyi rjes su mthun pa ni gnas 'di dag la mkhas par byas pas the tshom med pas/ji ltar rang gi dmigs pa la rtse gcig pa'i tshul gyis bde bar sems mnyam par 'jog pa'i phyir zhi gnas kyi rjes su mthun no/ /lhag mthong 'phel ba'i rjes su mthun pa ni rnam pa mang por shes bya yongs su brtags pas shes rab khyad zhugs par 'gro ba'i phyir/lhag mthong gi rjes su mthun no/ /'bel ba'i gtam gtan la 'bebs pa'i phan yon ni gnas 'di dag la mkhas pas 'dri ba thams cad lung ston pa'i mthu dang ldan pas mi 'jigs pa thob par blta'o//bdag gi gzhi rnam pa lnga brjod pa'i phyir te/ zhes bya ba 'di la rnam pa bzhi ni bdag gi gzhi yin pas bdag gi gzhi'o//lnga pa ni bdag gi mtshan nyid kho na ste/ gzhi yin pas bdag gi gzhir rig par bya'o/ /lus yongs su gzung ba dang bcas pa smos pas ni phyi dang nang gi gzugs kyi phung po bsdus so//tshor ba la sogs pa ni longs spyod la sogs pa nyid de/ de dag gi mtshan nyid bstan pa'i skabs su 'chad do/ /de dag gi gnas ni bdag gi gzhi rnam par shes pa ste/ lus yongs su gzung ba dang bcas pa la sogs pa de dag gi gnas ni bdag gi mtshan nyid de/gzhi zhes bya ba'i tha tshig go/ /'di ltar 'jig rten na phal cher rnam par shes pa'i phung po la bdag tu 'dzin lhag ma rnams la ni bdag gir 'dzin to//lus yongs su gzung ba nyid kyis zhes bya ba la/ mig la sogs pa dbang po drug dang / gzugs la sogs pa yul drug gis so/ /'das pa dang da ltar gyi nye bar spyod pa rnam pa drug ni rnam par shes pa drug ste/ de 'dzin pa ni gnas dang dmigs pa'i dang pos 'dzin to//dbang po dang yul bcu gnyis ni de ltar de 'dzin pa'i phyir khams so/ /rnam par shes pa rnams ni nye bar spyod pa'i mtshan nyid 'dzin pas khams nyid du rig par bya'o/ /skye ba'i sgo tsam yin pa'i phyir dbang po dang don tsam smos pas skye mched bcu gnyis kho nar rnam par gzhag pa yin te/nye bar spyod pa'i mtshan nyid rnam par shes pa drug ni rnam par ma gzhag go/ /nye bar len pa ni 'dun pa dang 'dod chags te/ de la 'dun pa ni 'dod pa'o/ /'dod chags ni lhag par chags pa'o/ /'dun pas ni ma 'ongs pa'i lus 'dod pa'i sgo nas len te/ des ma 'ongs pa'i phung po rnams 'grub po/ /'dod chags kyis ni da ltar gyi lus la lhag par chags pa'i sgo nas len te/ des da ltar gyi phung po rnams yongs su mi gtong ngo / /de bas na 'di gnyi ga yang nye bar len pa zhes bya'o/ /de la phung po bzhin du bshad do zhes bya ba ni nye bar len pa dang ldan pa ste/de'i phyir nye bar len pa dang bcas pa'i chos rnams su rig par bya'o/ /reg pas gzugs su yod pas ni gzhan du 'gyur bar rig par bya'o/ /gang yul la zhes bya ba ni mngon du gyur ba'i phyogs la'o/ /'di dang 'di'o zhes bya ba ni keng rus la sogs pa zhes bya ba'i dngos po dang 'dra ba'i gzugs brnyan no//'di lta bu dang 'di lta bu zhes bya ba ni kha dog dang dbyibs kyi bye brag go/ /bkra bar 'dzin pa zhes bya ba ni de ltar 'du shes pa'o/ /las dge ba rnams kyi 'bras bu rnam par smin pa ni bde ba myong ba'o/ /las mi dge ba rnams kyi 'bras bu rnam par smin pa ni sdug bsngal myong ba'o//gnyi ga'i 'bras bu rnam par smin pa ni sdug bsngal yang ma yin bde ba yang ma yin pa myong ba ste/ 'di ltar dge ba dang mi dge ba rnams kyi rnam par smin pa kun gzhi'i rnam par shes pa ni rtag tu btang snyoms nyid dang mtshungs par ldan pa yin te/btang snyoms de nyid rnam par smin pa'o/ /bde ba dang sdug bsngal de ni rnam par smin pa las byung ba'i phyir rnam par smin pa zhes nye bar gdags so/ /mthong ba dang thos pa dang bye brag phyed pa dang rnam par shes pa'i don rnams la zhes bya ba la/ mthong ba ni gang mig gis myong ba'o//thos pa ni gang rna bas myong ba'o/ /bye brag phyed pa ni gang 'di dang 'di lta bur 'gyur ro zhes bya ba ni bdag nyid kyis mngon par brtags pa'o/ /rnam par shes pa ni gang so so rang gis myong ba'o/ /tha snyad 'dogs pa zhes bya ba ni/ mngon par brjod pa rnams kyis go bar byed ces bya ba'i tha tshig go//gnas skabs sna tshogs rnams su zhes bya ba ni bde ba dang sdug bsngal la sogs pa rnams su'o/ /mig gang gis gzugs rnams mthong bar gyur ba zhes bya ba ni 'das pa'i rnam par shes pa nye bar spyod pa 'dzin pa nyid kyis khams nyid du ston to//lta ba zhes bya ba ni da ltar gyi rnam par shes pa nye bar spyod pa 'dzin pa nyid kyis khams nyid du ston to/ /mig de'i sa bon bsags pa'i kun gzhi rnam par shes pa gang yin pa yang khams te/ gang las phyi ma la mig 'grub par 'gyur ba'o/ /rnam par smin pa'ang khams te gang las grub zin pa'o//sa bon rnam pa de gnyi ga yang mig gi rgyu yin pas mig gi khams zhes bya'o/ /mig gi khams ni gzugs la dbang byed pa ste/ dbang po'i dbang gis phyi rol gyi yul 'grub pa'i phyir ro/ /rang gi rten dang dmigs pa'i bye brag can no/ /de ni khams bzhin du blta ste ji ltar mthun mthun du sbyor ro zhes bya ba ni mig gang gis gzugs rnams mthong bar 'gyur ba dang /de'i sa bon bsags pa'i kun gzhi rnam par shes pa gang yin pa ste/ gang las phyi ma la mig 'grub par 'gyur zhes bya ba dang sbyar ro/ /'byung ba chen po bzhi dag rgyur byas pa zhes bya ba la rgyur byas pa'i gzugs ji lta bu zhe na/'byung ba chen po bzhi dag rgyur byas pa ni skyed pa dang / rten pa dang / gnas pa dang / ston pa dang / 'phel bar byed pa'i rgyu yin pa'i phyir ro/ /'byung ba dag rgyur byas pa'i gzugs la rgyu rnam pa lnga'i dbang du byas nas skyed pa la sogs pa'i rgyu nyid yin te/'byung ba'i rgyu nyid ni 'di dag med na de mi 'byung ba'i phyir ro/ 'dug pa'i rgyu nyid ni 'byung ba rnams bsal na rgyur byas pa'i gzugs la logs shig tu yul gnod pa'i mthu med pa'i phyir ro/ /rjes su 'gyur ba'i rgyu nyid ni 'byung ba gyur na de la gnas pa'i rgyur byas pa'i gzugs kyang 'gyur ba'i phyir ro//gnas par byed pa'i rgyu nyid ni mtshungs par 'byung ba'i dus na 'byung ba rnams kyi rgyur byas pa'i gzugs kyi rgyud rgyun mi 'chad pa'i tshul du 'dzin pa'i phyir ro/ /'phel bar byed pa'i rgyu nyid ni 'phel ba'i dus na 'byung ba rnams kyis rgyur byas pa'i gzugs yongs su rgyas par byed pa'i phyir ro//sngon po la sogs pa gzugs rnam pa nyi shu rtsa lnga ni mtshan nyid dang / gnas pa dang / phan gnod dang / byed pa'i rten dang / byed pa'i mtshan nyid dang / rgyan dang / rnam pa drug gis rnam pa gzhag par rig par bya'o//bzhi dang / bcu dang / brgyad dang / gcig dang / gcig go rims bzhin no/ /de la mngon par skabs yod pa zhes bya ba ni de las gzhan pa zlog par byed pa'i reg bya dang bral ba'i phyogs gang yin pa'o/ /nam mkha' zhes bya ba ni/ gang steng na sngon por snang ba'o//sgra ni mtshan nyid dang / phan gnod dang / rgyus rab tu dbye ba dang / bshad pas rab tu dbye ba dang / tha snyad kyis rab tu dbye bas rnam par gzhag go/ /mtshan nyid ni rna ba'i dbang pos gzung ba'i don gang yin pa zhes bya ba'o/ /bstan pas rab tu dbye ba ni 'jig rten gyi grags pa la sogs pa gsum mo//lhag ma ni ji ltar mthun mthun du rig par bya'o/ /de la zin pa'i 'byung ba chen po'i rgyu las byung ba ni 'di lta ste/ ngag gi sgra'o/ /zin pa ma yin pa'i 'byung ba chen po'i rgyu las byung ba ni 'di lta ste/ shing la sogs pa'i sgra'o/ /de gnyi ga ni 'di lta ste/lag pa dang rdza rnga la sogs pa'i sgra'o/ /'jig rten gyi grag pa ni/ 'jig rten pa'i skad kyis bsdus pa'o/ /grub pas bstan pa ni 'phags pa rnams kyis bstan pa'o/ /kun tu brtags pa ni mu stegs pa can rnams kyis bstan pa'o/ /'phags pas tha snyad btags pa dang /'phags pa ma yin pas tha snyad btags pa ni/ mthong ba la sogs pa tha snyad brgyad kyi dbang du byas par rig par bya'o/ /dri ni rang gi mtshan nyid dang / phan gnod dang gnas skabs kyi sgo nas rab tu dbye bas rnam par gzhag go/ /ro yang de bzhin du rnam par gzhag par rig par bya'o//de la lhan cig skyes pa'i dri ni/ tsan dan la sogs pa'i dri'o/ /sbyar ba las byung ba ni bdug spos sbyar ba la sogs pa'i dri'o/ /gyur pa las byung ba'i dri ni shing tog smin pa la sogs pa'i dri'o/ /reg bya'i phyogs gcig ni kun tu mnabs pa dang /kun tu gzhal ba dang / reg pa dang / kun tu btsir ba dang / 'dus pa dang / khams snyoms ma snyoms kyi rnam par gzhag go/ /chu dang rlung 'dus na grang ngo / /chu dang sa 'dus na 'dred do/ /khams snyoms na ngal sos pa dang / nyams yod pa dang /sbungs che bar 'gyur te/ sbungs che ba ni mi 'jigs par rig par bya'o/ /tshim pa ni gnyi ga'o/ /bkres pa la sogs pa lhag ma rnam ni khams ma snyoms par rig par bya'o/ /bsdus pa las gyur pa ni rdul phra rab kyi gzugs so/ /mngon par skabs yod pa ni de nyid de/ de las gzhan pa thogs par byed pa'i reg bya dang bral ba'o//yang dag par blangs pa las byung ba'i rnam par rig byed ma yin pa'i gzugs so/ /kun brtags pa ni gzugs brnyan gyi gzugs so/ /dbang 'byor pa ni rnam par thar pa la bsam gtan pa'i spyod yul gyi gzugs gang yin pa'o//tshor ba'i phung po ni gnas dang / ngo bo nyid dang / gnas sdom pa dang / kun nas nyon mongs pa dang / rnam par byang bas rnam par gzhag go/ /de la gzugs kyi gnas sdom pas ni lus kyi tshor ba rnam par gzhag go/ /gzugs med pa'i gnas sdom pas ni sems kyi tshor ba rnam par gzhag go//kun nas nyon mongs pas ni zang zing dang bcas pa la sogs pa rnam par gzhag par rig par bya'o/ /rnam par byang bas ni zang zing med pa la sogs par rnam par gzhag par rig par bya'o/ /de'i srid pa dang mi ldan pa'o zhes bya ba ni mtshungs par ldan pa ma yin pa dang bral ba'i rjes su mthun par rig par bya'o//tha snyad la mi mkhas pa ni/ skad ma bslabs pas gzugs la 'du shes ni 'byung na gzugs so snyam pa ni mi shes pa ste/ de'i phyir mtshan ma med pa'i 'du shes zhes bya'o/ /mtshan ma med pa'i dbyings la snyoms par zhugs pa'i gzugs la sogs pa'i mtshan ma thams cad dang bral ba mtshan ma med pa'i mya ngan las 'das pa la 'du shes pa ni mtshan ma med pa'i 'du shes so//srid pa'i rtse mo la snyoms par zhugs pa'i 'du shes ni mi gsal bas dmigs pa la mtshan mar mi byed pa'i phyir mtshan ma med pa'i 'du shes so//chung ngu ni 'dod pa'i khams la ste/ ngan pa'i phyir ro/ /rgya chen por gyur pa ni gzugs kyi khams la ste de bas mchog tu gyur ba'i phyir ro/ /tshad med pa ni nam mkha' dang rnam shes mtha' yas skye mched la ste/ mtha' yas pa'i phyir ro/ /de bas na de dag la dmigs pa'i 'du shes ni chung ngu la sogs pa'i 'du shes rnams su rig par bya'o//tshor ba dang 'du shes ma gtogs pa sems las byung ba dang / sems dang ldan pa ma yin pa thams cad ni 'du byed kyi phung po'i mtshan nyid kho na yin na/ de bstan pa la sems pa nyi tshe smos pa ni de gzhan dag gi sngon du 'gro ba'i phyir ro//gtan tshigs bstan pa'i phyir gang gi dge ba'i phyir yang sems par byed ces bya ba la sogs pa smos so/ /de la dge ba ni dad pa la sogs pa 'og nas 'byung ba rnams so/ /kun nas nyon mongs pa ni 'dod chags la sogs pa nyon mongs pa dang nye ba'i nyon mongs pa rnams so//gnas skabs kyi bye brag ni sems pas bskyod pa'i 'du byed kyi gnas skabs rnams la btags pa'i sems dang ldan pa ma yin pa'i 'du byed rnams so/ /sems pa la sogs pa sems las byung ba rnams ni mtshan nyid dang / las kyis bstan par rig par bya'o//de la sems pa ni sems mngon par 'du byed pa yid kyi las te zhes bya ba ni mtshan nyid bstan pa'o/ /dge ba dang mi dge ba dang lung du ma bstan pa rnams la sems 'jug par byed pa'i las can zhes bya ba ni las bstan pa ste/ 'di ltar ji ltar mngon par 'du bya ba dge ba la sogs pa'i chos rnams la sems 'jug pa'i phyir ro//dmigs pa la sems 'dzin pa ni de nyid la yang dang yang du gtod par rig par bya'o/ /de'i phyir yid la byed pa thob pa ni ting nge 'dzin thob pa zhes bya'o/ /rnam par shes pa 'byung ba la/bde ba la sogs pa'i tshor ba 'byung ba dang mthun par dbang po'i 'gyur ba gang yin pa'i rnam pa de ni reg par rig par bya'o/ /de dang de la ldan par byed 'dod pa nyid de zhes bya ba ni lta ba dang mnyan pa la sogs pa byed 'dod pa thams cad bsdu ba'i phyir ro/ /ji ltar nges pa bzhin du 'dzin pa zhes bya ba 'di ni de bzhin te/gzhan du ma yin no zhes smos pa'o/ /de'i phyir de gces su byed pa ni gzhan dag gis 'phrogs par mi nus so/ /'dris pa'i dngos po ni sngon myong bar rig par bya'o/ /rnam par mi g.yeng ba'i las can ni dran pas dmigs pa mngon par brjod par gyur na rnam par g.yeng ba med pa'i phyir ro//sems rtse gcig pa nyid ces bya ba ni rnam par g.yeng ba med pa'o/ /shes pa'i rten byed pa ni sems mnyam par gzhag pa na yang dag par ji lta ba bzhin du shes pa'i phyir ro/ /som nyi zlog pa ni shes rab kyis chos rnams rab tu rnam par dbye na nges pa rnyed pa'i phyir ro//dad pa ni yod pa nyid la mngon par yid ches pa'i rnam pa dang / yon tan can la dad pa'i rnam pa dang / nus pa la bdag gi rnam pa thob par byed dam/ sgrub par byed nus so snyam du 'dod pa'i rnam pa'o/ /ngo tsha shes pa la sogs pa ni go sla bas yang rnam par ma phye'o//skye bas thob pa dang / thos pa dang / bsams pa las byung ba dang / bsgoms pa las byung ba ni go rims bzhin du rnam par smin pa dang / lung dang rtogs pa'i shes par rig par bya'o/ /brtan pa dang bcas pa'i shes rab ni so sor brtags pa'o//dge ba'i chos rnams la mthu dang ldan pa dang / brtson 'grus dang ldan pa dang / spro ba dang ldan pa dang / brtul ba brtan pa dang / brtson pa mi 'dor ba zhes 'byung ba mdo'i tshig 'di rnams ni go cha la sogs pa la mngon par zhen pa spro ba'i dngos po rnams dang go rims bzhin du sbyar ro//yongs su rdzogs par byed pa ni/ ji ltar dngos gzhi la 'jug pa lta bu'o/ /yongs su bsgrub pa ni de nyid legs par yongs su sbyong ba byas pa'o/ /sgrib pa thams cad sel ba ni de'i dbang gis gnas 'gyur bar blta'o/ / dge ba thams cad bsgom pa'i sngon du brtson 'grus la sogs pa bzhi po 'gro bas/ de dag la bag yod par gdags te/ zag pa dang bcas pa'i chos rnams ni 'dir zag pa rnams dang zag pa'i gnas kyi yul rnams su rig par bya'o/ /sems mnyam pa nyid ces bya ba la sogs pas ni btang snyoms kyi thog ma dang tha ma'i gnas skabs bshad de/'di ltar btang snyoms dang ldan pa'i sems la bying ba la sogs pa'i mi mnyam pa med pas thog mar mnyam pa'o/ /de'i 'og tu mngon par 'du bya ba med par rnal du 'dug pa'o/ /de'i 'og tu kun nas nyon mongs pa'i dogs pa med par lhun gyis grub par gnas so//rnam par mi 'tshe ba ni zhe sdang med pa las gud na med pa'i phyir btags pa'i yod par rig par bya'o/ /sdug bsngal bskyed pa'i las can zhes bya ba ni sred pa'i dbang gis nye bar len pa'i phung po lnga grub pa'i phyir ro//reg par mi gnas pa ni kun nas mnar ba'i sems yod pa sdug bsngal bar gnas pa'i phyir ro/ /mi gus pa ni bla ma rnams dang yon tan can rnams la 'gying ba'o/ /sdug bsngal 'byung ba ni yang srid pa 'byung bar rig par bya'o/ /log par nges pa ni phyin ci log tu shes pa'o//the tshom ni som nyi'o/ /kun nas nyon mongs pa 'byung ba ni 'dod chags la sogs pa nyon mongs pa kun tu 'byung ba'o/ /de'i rten byed pa ni rmongs par gyur na nyon mongs pa thams cad 'byung ba'i phyir ro/ /bden pa rnams la yid gnyis za ba ni lam gyi bden pa dang 'gog pa'i bden pa la ji ltar mthun mthun du sbyar ro//des dge ba'i phyogs la mi 'jug ste/ nges pa ma rnyed na ma rtsol ba'i phyir ro/ /dbu ma'i lam zhes bya ba ni/ rtag pa dang chad pa spangs te rten cing 'brel bar 'byung ba shes pa'o/ /tshul khrims dang brtul zhugs ni lta ba ngan pa sngon du 'gro bar rig par bya'o//ngal ba 'bras bu med pa ni des nges par mi 'byung ba'i phyir ro/ /sbyin pa med do/ /mchod sbyin med do/ /sbyin sreg med do/ /legs par spyad pa med do/ /nyes par spyad pa med do zhes bya ba ni 'di rgyu la skur ba 'debs pa ste//legs par spyad pa dang nyes par spyad pa'i las rnams kyi 'bras bu rnam par smin pa med do zhes bya ba ni 'bras bu la skur ba 'debs pa'o/ /'jig rten 'di med do/ /'jig rten pha rol med do/ /pha med do/ /ma med do/ /sems can rdzus te 'byung ba med do zhes bya ba ni byed pa la skur ba 'debs pa ste/'jig rten gzhan du 'gro ba dang 'ong ba'i byed pa dang / sa bon 'debs pa'i byed pa dang / nying mtshams sbyor ba'i byed pa la skur ba 'debs pa'i phyir ro/ /'jig rten na dgra bcom pa med do zhes bya ba la sogs pa ni yod pa'i dngos po 'jig pa'o//de las gzhan phyin ci log tu lta ba gang ci yang rung ste/ de dag thams cad ni log par rnam par rtog par rig par bya'o/ /dge ba'i rtsa ba gcod pa ni log par lta ba khyad par can las 'byung gi thams cad las ni ma yin no/ /phung po lnga'i bdag nyid kyis zhes bya ba la bdag dang bdag gi ngo bo nyid du sgro 'dogs pa ni 'jig tshogs la lta ba'o//bdag rtag go mi rtag go zhes khyad par du sgro 'dogs pa ni mthar 'dzin par lta ba'o/ /lta ba ngan pa la mchog la sogs par sgro 'dogs pa ni lta ba mchog tu 'dzin pa'o/ /de nyid la bdag po la sogs par sgro 'dogs pa ni tshul khrims dang brtul zhugs mchog tu 'dzin pa'o//gcig ni phal cher la zhes bya ba ni log par rnam par rtog pa ni gdon mi za bar skur pa 'debs pa'i phyir ro/ /mtshan nyid la brtags na ni mthar 'dzin pa dang log par lta ba gnyis las 'byung ngo //'khor dang bcas pa la brtags na ni lnga po thams cad las 'byung ngo / /gzugs la sogs pa ni bdag ma yin te/ mtshan nyid dang mi mthun pa'i phyir de dag ni bdag gi mtshan nyid ma yin pa'o/ /de dag la bdag med de/ gnas med na gnas par mi 'gyur bas mi rtag pa nyid kyi nyes par 'gyur ba'i phyir ro//gzugs ni bdag gi ba ma yin te/ de dag la dbang byed pa med pas rang dbang med pa'i nyes par 'gyur ba'i phyir ro/ /de dag las gzhan na yang bdag med de lus med na bdag kun tu brtags par mi dmigs pas lus med pa'i nyes par 'gyur ba'i phyir ro//ci ste la la zhig bdag rnam pa de lta bur yongs su rtog na/ de lta na yang gzugs la sogs pa med pa'i bdag mi 'thad de/ lus la sogs pa'i 'ching ba med na/ rang gi ngang gis grol bar 'gyur bas sgrim mi dgos par thar par 'gyur ba'i nyes par 'gyur ba'i phyir ro//gzugs bdag yin par lta ba dang / tshor ba dang / 'du shes dang / 'du byed rnams dang / rnam par shes pa bdag yin par lta ba de dag lnga ni bdag tu lta ba'o/ /bdag gzugs dang ldan pa zhes bya ba nas bdag rnam par shes pa dang ldan pa zhes bya ba'i bar du lhag ma bco lnga ni bdag gir lta ba'o//'brel bas bdag gir gyur ba ni 'di ltar de de dang 'brel bas de dang ldan par 'gyur ro/ /gzugs bdag gi yin pa zhes bya ba yin pa nas/ rnam par shes pa bdag gi yin pa zhes bya ba'i bar ni dbang sgyur bas bdag gir 'gyur ba'i phyir te/gang zhig sbyin pa'am bsko ba la gang gi dbang du 'gyur ba de ni de'i bdag gi zhes bya'o/ /gzugs la bdag gnas pa zhes bya ba nas/ rnam par shes pa la bdag gnas pa zhes bya ba'i bar ni tha dad du mi 'jug pas bdag gir 'gyur ba ste/bdag 'di ni 'di dag la rjes su zhugs shing rnam par zhugs nas bzhag pa ste/ yan lag can yan lag gi rjes su song bar kun brtags pa'i phyir ro/ /ma dpyad pa'i gzhi can ni gzugs la sogs pa'i mtshan nyid la kun tu dpyad na bdag tu lta ba'i skabs med pa'i phyir te/dper na 'ga' zhig gis ma brtags par thag pa la sbrul du 'dzin pa dang 'dra ste/ thag pa yin par dpyad na de la sbrul du mi 'dzin pa'i phyir ro/ /khro ba la sogs pa ni btags pa'i yod par rig par bya'o/ /khong khro ba la sogs pa las gud na med pa'i phyir ro//de'i 'og tu zhes bya ba ni khros pa'i 'og tu'o/ /mi bzod pa zhes bya ba ni gnod pa byed pa la ji mi snyam par mi byed pa'o/ /'di ni chos nyid do/ /kha na ma tho ba dang bcas na 'gyod par 'gyur te/ de'i phyir reg par mi gnas pa zhes bya'o//tshig rtsub mo brlang zhing drag pa zhes bya ba ni gzhan gyi zher 'debs pa'i tshul gyis ngor lhangs zhes zer ba ni/ yo byad ma bsnyungs pa zhes bya ba ni ser snas yo byad mi mkho ba rnams kyang ba sogs pa las gyur bar rig par bya'o/ /nges pa yang dag par skyong ba zhes bya ba ni/gzhan nas gzhan du sgyur bar rig par bya'o/ /yang dag pa'i gdams ngag rnyed pa'i bar du gcod pa'i las can zhes bya ba ni bdag gi tshul yang dag pa ji lta ba bzhin mi ston na gdams ngag gi 'os ma yin pa'i phyir ro/ /tshe ring ba'i mtshan ma bzung nas de la rnam par rtog pa'i phyir te/mi 'chi bar rnam par rtog pa sngon du btang nas srog la rgyags pa skye'o/ /zag pa dang bcas pa'i phun sum tshogs pa gang yang rung ba zhes bya ba ni rigs dang / stobs dang / gzugs dang / yid gzhungs pa dang / blo dang / longs spyod dang / phyug pa la sogs par rig par bya'o//dga' ba dang yid bde ba zhes bya ba ni nyon mongs pa can gyi dga' ba'i bye brag go/ /sdug pa'i mtshan ma rjes su 'jug pa zhes bya ba ni 'dod chags kyi rjes su mthun pa'o/ /sngon dgod dgod pa dang / rtse rtse ba la sogs pa rjes su dran nas sems rnam par ma zhi bar rig par bya'o//le lo'i rten byed pa'i las can zhes bya ba ni ma dad na sbyor ba la 'dun pa med pa'i phyir ro/ /lus dang ngag dang sems kyi spyod pa la mi shes bzhin du 'jug pa zhes bya ba ni 'gro ba dang ldog pa la sogs pa la legs par ma brtags par rig par bya'o//de ltar na 'di ni bya ba dang bya ba ma yin pa mi shes pas ltung bar 'gyur ro/ /ngo bo nyid kyi g.yeng ba zhes bya ba ni rnam par shes pa'i tshogs lnga rnams te/ rang bzhin gyis nang du mnyam par 'jog mi nus pa'i phyir ro/ /phyi rol du g.yeng ba zhes bya ba ni thos pa la sogs pa'i dge ba la zhugs pa de la dmigs pa la phyi rol du 'dod pa'i yon tan lnga po dag la sems 'gro bar rig par bya'o//nang gi g.yeng ba zhes bya ba ni ting nge 'dzin du zhugs pa nyid kyi tshe de las nyams par byed pa bying ba dang / rgod pa dang ro myong bar byed pa'o/ /mtshan ma'i g.yeng pa zhes bya ba ni gzhan gyis bdag la yon tan dang ldan par yid ches par bya ba'i phyir te/de'i mtshan ma ni de'i phyir ro/ /dge ba la zhugs pa khad kyis de las nyams par rig par bya'o/ /gnas ngan len gyi g.yeng ba zhes bya ba ni ngar 'dzin pa la sogs pa'i gnas ngan len gyi dbang gis bde ba la sogs pa'i tshor ba byung ba rnams la nga zhes nga'i zhe'am nga'o snyam du 'dzin pa'i phyir dge ba'i phyogs yongs su ma dag par rig par bya'o//'dzin pa ni thog ma nyid du de ltar 'dzin pa'o/ /'dres pa ni de'i 'og tu de dang sems kyi rgyud 'dres par gyur ba'o/ / mtshan mar 'dzin pa ni tshor ba de nyid la yang dang yang bkra bar 'dzin par rig par bya'o/ /yid la byed pa'i g.yeng ba zhes bya ba ni/ snyoms par 'jug pa gzhan la snyoms par zhugs pa dang / theg pa gzhan la brten pa snga ma las langs par rig par bya'o/ /'dod chags dang bral ba'i bar du gcod pa'i las can zhes bya ba ni nye ba'i nyon mongs pa'i bdag nyid kyi dbang du byas pa'o//gnyid kyi rgyu zhes bya ba ni 'di lta ste nyam chung ba dang / ngal ba dang lus lci ba dang mun pa'i mtshan ma yid la byed pa dang / rtsom pa thams cad yal bar 'dor ba dang /de'i dus na yang dang yang goms pa dang / gzhan dag sngags kyi stobs kyis gnyid bro bar byed pa dang / de bzhin du lus mnyed pa la sogs pa'o/ /gti mug gi char gtogs pa zhes bya ba ni ting nge 'dzin las bye brag tu dbye ba'i phyir ro/ /dge ba la sogs pa'i dngos po'i tshig ni gdon mi za bar gti mug gi bdag nyid ma yin no//dus zhes bya ba ni nam gyi gung thun no/ /dus ma yin pa ni de las gzhan pa'o/ /rigs pa ni dus su ji ltar gnang ba dang / dus yin na yang na ba dang / las su rung bar bya ba'i phyir ro/ /mi rigs pa ni de las gzhan pa'o//bya ba shor ba'i rten byed pa ni nye ba'i nyon mongs pa'i bdag nyid kyi dbang du byas par rig par bya'o/ /bsams pa zhes bya ba ni legs par spyod pa dang nyes par spyod pa'i byed pa las mngon par dga' ba sngon du btang ba'o/ /ma bsams pa'i bya ba ni gzhan dag gis nan gyis byed du bcug ste byed pa'am/nyon mongs pas zil gyis mnan pa ste/ ji ltar mthun mthun du rig par bya'o/ /gti mug gi char gtogs pa zhes bya ba ni nye ba'i nyon mongs pas bsdus pa'o/ /dus ni ji srid mi spong gi bar du'o/ / dus ma yin pa ni de'i 'og tu'o/ /rigs pa ni gnas pa'o/ /mi rigs pa ni gnas ma yin pa'o/ /sems pa'am shes rab la rten zhes bya ba ni mngon par mi rtogs pa dang / mngon par rtogs pa'i gnas skabs dang go rims bzhin no/ /kun tu tshol ba'i rnam pa yid kyis mngon par brjod pa ni rtog pa'o//so sor rtog pa'i rnam pa ni spyod pa'o/ /sems dang ldan pa ma yin pa'i 'du byed rnams ni/ gnas dang / ngo bo nyid dang btags pas bshad par rig par bya'o/ /de la dge ba dang mi dge ba dang lung du ma bstan pa'i chos rnams zhes bya ba ni/ gnas bstan pa'o//'phel ba dang 'grib pa zhes bya ba ni rang bzhin bstan pa ste/ 'di ltar 'phel ba yod na dad pa chen po dang ldan pa zhes bya'o/ /'grib pa yod na chung ngu dang ldan pa zhes bya'o/ /thob pa dang rnyed pa dang ldan pa zhes gdags so zhes bya ba ni btags pa bstan pa'o/ /de bzhin du gzhan dag la yang ji ltar mthun mthun du sbyar bar bya'o//dge rgyas la 'dod chags dang bral ba zhes bya ba ni bsam gtan gsum pa'i 'dod chags dang bral ba'o/ /steng ma'i 'dod chags dang ma bral ba zhes bya ba ni bsam gtan bzhi pa'i 'dod chags dang bral ba'o/ /'byung ba'i 'du shes sngon du btang ba zhes bya ba ni thar pa'i 'du shes sngon du btang ba'o//brtan pa ma yin pa rnams zhes bya ba ni 'jug pa'i rnam par shes pas bsdus pa rnams so/ /'gog pa zhes bya ba ni snyoms par 'jug pa'i sems kyis byas pa ste/ dus gzhan na sems dang sems las byung ba brtan pa ma yin pa kun tu 'byung ba dang mi mthun pa'i gnas skabs kyi bye brag go//'dis 'gog par 'gyur bas na 'gog pa'o/ /'gog pa'i snyoms par 'jug pa la ni steng ma'i 'dod chags dang ma bral ba zhes mi brjod de/ de la srid pa'i rtse mo'i 'dod chags dang bral ba'i dgra bcom pa yang yod pa'i phyir ro//brtan pa de dag las kyang kha cig ces bya ba ni nyon mongs pa can gyi yid kyis bsdus pa rnams so/ /snyoms par 'jug pa 'di gnyis ni sa dang / yid la byed pa dang / gnas dang / ngo bo nyid dang / btags pas bsten to/ /'du shes med pa ni yid la byed pa ma gtogs par gnas la sogs pa de dag gis lhag ma gsum po dag gis bshad do//ris mthun pa zhes bya ba ni tshe gcig gi phung po'i rgyun no/ /gnas pa'i dus nges par zhes bya ba ni ris mthun par 'dis lo brgya'am/ lo stong ngam/ dus ji srid cig tu gnas par bya ba ste/las kyis byas pa'i nus pa'i bye brag go/ /sems can gyi ris de dang der zhes bya ba ni lha dang mi la sogs pa'i sems can gyi skye ba rnams su'o/ /lus 'dra ba zhes bya ba ni rnam pa gcig pa'o/ /phyi rol gyi gzugs kyang skye ba dang ldan pas ris mthun pa tsam smos te sems can gyi rgyud la mtshan nyid gdags par bstan pa'i phyir ro//phyi rol gyi gzugs ni 'jig pa dang 'chags pas rab tu phye ba'o/ /nang gi 'du byed rnams ni skye ba dang rga ba la sogs pas rab tu phye ba'o/ /rgyun 'jig pa ni 'chi bar rig par bya'o/ /skye ba la sogs pa 'di dag ni skad cig re re la rig par bya ba ma yin gyi/rgyun gyi gnas skabs la bya'o/ /ngo bo nyid kyi tshig bla dgas zhes bya ba ni mig dang rna ba dang lha dang mi zhes bya ba la sogs pa'o/ /khyad par gyi tshig bla dgas zhes bya ba ni 'du byed thams cad mi rtag pa'o/ /sems can thams cad 'chi bar 'gyur ro zhes bya ba la sogs pa'o//de gnyi ga'i gnas yi ge rnams la zhes bya ba ni ngo bo nyid dang / khyad par gyi tshig bla dgas kyi gnas yi ge a i u zhes bya ba la sogs pa'o/ /thams cad ni 'di dag tsam du zad de/ 'di ltar ngo bo nyid dang / khyad par dang /de gnyi gar tha snyad gdags pa'o/ /de thams cad ni 'di dag gis tha snyad 'dogs te/ de'i phyir ming dang tshig dang / yi ge'i tshogs 'di dag rnam par gzhag go/ /rnam grangs su gtogs pa gzhan du mi 'gyur bar byed pa'i phyir zhes bya ba ni dper na mig ni mig ces bya ba'i rnam grangs de la gzhan pa 'dren byed dang /gsal byed dang khrid byed dang / lta ba la sogs pa rnam grangs su gtogs pa gzhan dag tu'ang 'gyur te/ de dag gis kyang de shes par 'gyur ba'i phyir ro/ /de bzhin du a I zhes bya ba'i yi ge 'di ni a I zhes bya ba'i rnam grangs 'di ma gtogs par rnam grangs gzhan gyis bstan par mi nus te/de'i phyir rnam grangs gzhan du mi 'gyur bas yi ge rnams so/ /'gyur ba ni 'gro bar rig par bya'o/ /rgyun ma chad pa la 'jug par rnam par gzhag ste/ skad cig gcig gam rgyun chad pa la de nye bar 'dogs pa med pa'i phyir ro//rgyu dang 'bras bu tha dad pa zhes bya ba la 'dod pa'i 'bras bu'i rgyu ni legs par spyod pa'o/ /mi 'dod pa'i 'bras bu'i rgyu ni nyes par spyod pa'o zhes bya ba la sogs pa ste/ 'bras bu rnams ni so sor rgyu gzhan dang gzhan las 'byung ba'o/ /rgyu dang 'bras bu mthun pa ni gzhan yin du zin kyang /gang gi 'bras bu gang 'os pa ste/ 'di ltar sbyin pa'i 'bras bu ni longs spyod phun sum tshogs pa zhes bya ba la sogs pa'o/ /re re nas 'byung ba zhes bya ba ni cig car mi 'byung bar rig par bya'o/ /rgyu dang 'bras bu rgyun tu 'byung bar gyur pa de la rgyu dang 'bras bu byung zin pa dang 'gags zin pa gang yin pa de ni 'das pa'i dus zhes gdags so//gang ma byung ba de ni ma 'ongs pa'i dus zhes gdags so/ /gang byung ba la ma 'gags pa de ni da ltar byung ba'i dus zhes gdags so/ /rgyu dang 'bras bus phyogs la khyab pa la yul nye bar gdags ste/gzugs can ma yin pa ni phyogs la khyab par byed pa'i mthu med pas rgyu dang 'bras bu ni 'dir gzugs su bsdus par rig par bya'o/ /so so tha dad pa la grangs zhes bya ba ni tha dad pa ma yin pa'i bdag nyid gcig pa la gnyis gsum zhes bya ba'i grangs la sogs pa mi 'thad pa'i phyir ro//rgyu dang 'bras bu'i rkyen rnams 'dus pa ni 'di lta ste/ rnam par shes pa zhes bya ba'i rgyu'i 'bras bu'i rkyen ni dbang po ma nyams pa dang / yul snang bar gyur ba dang / de skyed pa'i yid la byed pa nye bar gnas pa ste/ de bzhin du gzhan la yang sbyar bar rig par bya'o//de ltar na sems dang ldan pa ma yin pa'i 'du byed kyi chos 'di rnams ni gnas skabs dag la gdags pa'i phyir/ thams cad kyang btags pa'i yod par rig par bya'o/ /de la dge ba la sogs pa 'phel ba dang / sgrib pa'i gnas skabs la ni gcig go/ / sems dang sems las byung ba mi 'byung ba'i gnas skabs la ni gsum mo/ /gnas pa'i gnas skabs la ni gcig go/ /'dra ba'i gnas skabs la ni gcig go/ /mtshan nyid kyi gnas skabs la ni bzhi'o/ /tha snyad kyi gnas skabs la ni gsum mo/ /ma thob pa'i gnas skabs la ni gcig go//rgyu dang 'bras bu'i gnas skabs la ni lhag ma rnams so/ /rgyu dang 'bras bu ni 'dus byas thams cad du rig par bya ste/ de las gzhan 'byung bas rgyu'o/ /gzhan las de 'byung bas 'bras bu'o/ /phung po la sogs pa kun tu 'byung ba la de'i sa bon yongs su rgyas pa ni bag chags zhes bya'o//sa bon thams cad ces bya ba ni phung po la sogs pa de dag nyid 'byung ba'i sa bon dang ldan pa'i phyir ro/ /der chos rnams sa bon du 'du ba'am/ bdag tu 'dzin pas sems can du 'du ba'i phyir kun gzhi rnam par shes pa'o/ /sngon gyi las las nges par byung ba'i phyir rnam par smin pa'i rnam par shes pa'o//yang dang yang nying mtshams sbyor bar byed pas len pa'i rnam par shes pa'o/ /de ni sa zhes kyang bya ste/ chos rnams kyi bag chags bsags pa'i phyir ro/ /kun gzhi rnam par shes pa de yod par ji ltar shes she na/ 'di ltar de med na/len dang bzod dang gsal ba dang / /sa bon dang ni las rnams dang / /lus kyis myong dang sems med pa'i/ /snyoms 'jug de bzhin 'chi mi rung / /sdom pa'i tshigs su bcad pa 'di'i rnam par dbye ba ni 'di lta ste rnam par nges par bsdu ba'i nang du byas so/ /rnam pa brgyad kyis kun gzhi rnam par shes pa yod pa nyid du rtogs par bya ste/'di ltar kun gzhi rnam par shes pa med na lus nye bar len pa mi srid pa dang / gzod ma nas byung ba mi srid pa dang / /gsal bar byung ba mi srid pa dang / sa bon mi srid pa dang / las mi srid pa dang /lus kyis myong ba mi srid pa dang / sems med pa'i snyoms par 'jug pa mi srid pa dang / rnam par shes pa 'chi 'pho ba mi srid pa'i phyir ro/ /ci'i phyir lus nye bar len pa mi rung zhe na/ smras pa/ rnam pa lngas ste d+hi/ 'di ltar kun gzhi rnam par shes pa ni sngon gyi 'du byed kyi rgyu las byung ba'o//mig la sogs pa 'jug pa'i rnam par shes pa ni da ltar gyi rkyen gyi rgyu las byung ba ste/ ji skad du/ dbang po dang yul dang yid la byed pa'i dbang gis rnam par shes pa rnams 'byung bar 'gyur ro zhes rgya cher gsungs pa lta bu ste/ 'di ni gtan tshigs dang po'o//yang rnam par shes pa'i tshogs drug ni dge ba dang mi dge bar dmigs pa ste/ 'di ni gtan tshigs gnyis pa'o/ /yang rnam par shes pa'i tshogs drug po dag la lung du ma bstan par rnam par smin pas bsdus par gyur pa gang yin pa'i rnam pa mi dmigs pa ste/ 'di ni gtan tshigs gsum pa'o//yang rnam par shes pa'i tshogs drug 'byung ba ni gnas so sor nges pa ste/ gnas gang dang gang las rnam par shes pa gang dang gang 'byung ba de dang de ni des zin par 'gyur gyi lhag ma ni ma zin par 'gyur te mi rung ngo / /zin par yang mi rung ste/ rnam par shes pa med pa'i phyir ro//'di ni gtan tshigs bzhi pa'o/ /yang dang yang lus 'dzin pa'i nyes par yang 'gyur te/ 'di ltar mig gi rnam par shes pa res 'ga' ni 'byung / res 'ga' ni mi 'byung ngo / /lhag ma rnams kyang de bzhin te/ 'di ni gtan tshigs lnga pa'o/ /'di ltar sngon gyi las dang da ltar gyi 'du byed kyi rgyu las byung ba dang /dge ba dang mi dge ba yin pa dang / de'i rnam pa mi dmigs pa dang / gnas so sor nges pa dang / yang dang yang lus nye bar len pas kyang mi rung ngo / /ci'i phyir gzod ma'i 'jug pa 'byung bar mi 'gyur zha na/ gal te la la zhig 'di skad du/ci ste kun gzhi rnam par shes pa yod na de'i phyir rnam par shes pa gnyis cig car 'byung bar 'gyur ro zhes zer na de la 'di skad du brjod par bya ste/ nyes pa med pa nyid la khyod nyes par 'du shes par zad kyi/ 'di ltar rnam par shes pa gnyis cig car 'byung ba nyid do//de ci'i phyir zhe na/ 'di ltar kha cig cig car mthong bar 'dod pa nas/ rnam par shes pa'i bar du 'dod pa la/ thog mar rnam par shes pa gang yang rung ba zhig 'byung du mi rung ste/ 'di ltar de na yid la byed pa dang dbang po dang yul yang yod par bye brag med pa'i phyir ro//rnam par shes pa cig car 'byung ba med na ci'i phyir mig la sogs pa'i rnam par shes pa dang lhan cig rjes su 'jug pa yid kyi rnam par shes pa gsal bar mi 'gyur zhe na/ 'di ltar gang gi tshe 'das pa'i yul myong ba rjes su dran pa de'i tshe yid kyi rnam par shes pa rgyu ba ni gsal ba ma yin la/da ltar gyi yul la rgyu ba'i yid ni de ltar mi gsal ba ma yin te/ de'i phyir yang cig car 'byung ba dang / yid kyi rnam par shes pa mi gsal bar yang rung ngo / /ci'i phyir rnam par shes pa'i tshogs drug pa dag phan tshun gyi sa bon nyid ma yin zhe na/ 'di ltar dge ba'i 'og tu mi dge ba 'byung la/mi dge ba'i 'og tu dge ba dang / de gnyi ga'i 'og tu lung du ma bstan pa dang / khams ngan pa'i 'og tu khams bar ma dang / khams bar ma'i 'og tu khams bzang po dang / de bzhin du khams bzang po'i 'og tu khams ngan pa dang / zag pa dang bcas pa'i 'og tu zag pa med pa dang /zag pa med pa'i 'og tu zag pa dang bcas pa dang / 'jig rten pa'i 'og tu 'jig rten las 'das pa dang / /'jig rten las 'das pa'i 'og tu 'jig rten pa 'byung ste/ de dag ni de ltar sa bon nyid du mi rung ngo / /rgyud kyi rgyun chad nas yun ring du lon pa yang yun ring zhig na 'byung bas de'i phyir yang mi rung ngo //rnam par shes pa cig car 'byung ba med na ci'i phyir las mi srid ce na/ 'di ltar mdor bsdus na las rnam pa bzhi ste/ snod kyi rnam par rig pa dang / gnas kyi rnam par rig pa dang / nga'o snyam pa'i rnam par rig pa dang /yul gyi rnam par rig pa'o/ /rnam par rig pa 'di dag ni skad cig gcig la cig car 'byung bar dmigs te/ rnam par shes pa gcig gis skad cig gcig la ni ngo bo tha dad pa'i las 'di lta bu 'di mi rung ngo / /kun gzhi rnam par shes pa med na ci'i phyir lus kyi myong ba mi rung zhe na/'di ltar 'ga' zhig tshul bzhin nam/ tshul bzhin ma yin pa'i sems sam/ rjes su rnam par rtog gam/ sems mnyam par bzhag gam/ sems mnyam par ma bzhag kyang rung ba ste/ lus kyis myong ba gang dag 'byung ba rnam pa du ma rnam pa sna tshogs mang po de dag 'byung ba dang dmigs par yang mi rung ste/de'i phyir kun gzhi rnam par shes pa yod do/ /kun gzhi rnam par shes pa med na ci'i phyir sems med pa'i snyoms par 'jug pa mi srid pa dang / 'di ltar 'du shes med pa la snyoms par zhugs pa'i rnam par shes pa nyid lus las 'da' bar 'gyur ba'i rigs na ma 'das te/de'i phyir 'chi ba'i dus byed pa nyid du 'gyur ro/ /ji skad du/ bcom ldan 'das kyis kyang de'i rnam par shes pa lus dang ma bral ba yin no zhes gsungs pa lta bu'o/ /kun gzhi rnam par shes pa med na/ ci'i phyir 'chi 'pho ba yang mi rung zhe na/'di ltar 'chi ba'i rnam par shes pa lus kyi stod dam smad du drod yal bar byed cing 'dor na yid kyi rnam par shes pa ni nam yang mi 'byung ba ma yin te/ de'i phyir yang kun gzhi rnam par shes pa lus 'dzin pa nyid dang bral ba'i phyir lus drod yal ba dang / lus tshor ba med par yang dmigs kyi/yid kyi rnam par shes pa dang bral bas ni ma yin te/ de'i phyir yang mi rigs so/ /yid ni nges pa'i tshig dang dmigs pa dang mtshung par ldan pa dang 'byung ba'i dus kyis bstan par rig par bya'o/ /las mngon du gyur pa na de med pa ni don dam pa shes pa dang / / bdag tu lta ba kun tu 'byung ba dang / shin tu mi mthun pa'i phyir ro/ /slob pas ni ma spangs pa'i phyir de'i 'og tu yang kun gzhi rnam par shes pa las byung ngo / /'du shes med pa'i snyoms par 'jug pa bas 'gog pa'i snyoms par 'jug pa ches zhi ba'i phyir de kun tu 'byung ba dang mi mthun par rig par bya'o//'gags ma thag pa yang yid du 'dod pas 'gags ma thag pa'i yid ces bya ba'i tha tshig go/ /rnam par shes pa ni gnas dang dmigs pa dang ngo bo nyid kyis rnam par gzhag par rig par bya'o/ /khams dang skye mched rnams kyi mtshan nyid ni logs shig du rnam par gzhag tu med de/phung po bstan pa'i skabs su mig la sogs pa nye bar mtshon pa'i phyir te/ de bas na phung po rnams las dmigs kyis bton te/ /khams rnams rnam par gzhag go/ /khams rnams las dmigs kyis bton te skye mched rnams rnam par gzhag go//phung po rnams kyis gang ma bsdus pa 'dus ma byas pa de ni rnam pa brgyad du rnam par gzhag go/ /de bzhin nyid rnam pa gsum ni gnas kyi rnam pas tha dad kyi ngo bo nyid kyis tha dad pa ni ma yin par rig par bya'o/ /gzhan du mi 'gyur ba nyid ces bya ba ni rtag tu dngos po rnams kyi bdag med pa nyid du blta bar bya'o//kun nas nyon mongs pa mi rgyu ba'i phyir ro zhes bya ba ni de la dmigs pas kun nas nyon mongs pa'i dngos po kun nas nyon mongs pas stongs par byed pa'i phyir ro/ /gang gi tshe kun nas nyon mongs pa can zhes bya ba de'i tshe yang de la glo bur gyi nye ba'i nyon mongs par rig par bya ste/chos rnams kyi chos nyid ni rang bzhin gyis 'od gsal ba'o/ /mtshan ma rnams ni gzugs dang tshor ba nas byang chub ces bya ba'i bar du spros pa rnams te/ de la de dag nye bar zhi ba'i phyir mtshan ma med pa'o/ /yang dag pa ni gang phyin ci ma log pa'o/ de'i mtha' ni mur thug pa ste/bdag med pa las pha rol tu de kho na btsal du med pa'i phyir ro/ /nam mkha' ni gzugs med ces bya ba ni gzugs nyid las bzlog pa gzugs med pa'i mtshan nyid kyi chos yid kyi rnam par shes pa'i yul gang yin pa de ni nam mkha'o/ yid kyi rnam par shes pa'i yul ni chos kyi khams kyi skabs yin par rig par bya'o//gzugs nyid ces bya ba ni rnam pa'i phyir te/ tshor ba la sogs pa dang thun mong ba'i de bzhin nyid dang / so sor brtags pa ma yin pa dang / so sor brtags pa'i 'gog pa dang / mi rtag pa nyid sel to/ /ri bong gi rwa la sogs pa ni gtan med pa ste/de dag las bzlog par ni mi shes so/ /de ltar de dag ni gtan nas med pa'i phyir ro/ /ri bong gi rwa la sogs pa de dag ni gzugs yod pa 'di las bzlog pa ma yin te/ tshor ba la sogs pa dang thun mong ba'i phyir ro/ /de bas na gzugs nyid las bzlog pa zhes bya'o//gang gzugs ma yin pa zhes brjod par bya ste/ med pa'i mtshan nyid kyi tshig gis tshor ba la sogs pa gzugs can ma yin pa rnams gsal te/ de dag ni med pa'i mtshan nyid ni ma yin no/ /gang 'gog la bral ba ma yin pa'o zhes bya ba ni bag la nyal ma bcom pa'o//bzlog pa ni bral ba'o/ /spang bar bya ba de ni gnyis te/ nyon mongs pa rnams dang / de'i gnas su gyur pa tshor ba'o/ tshor ba de yang rnam pa gnyis te/ 'gyur bar byed pa dang / 'gyur bar mi byed pa ste/ bde ba dang / sdug bsngal dang / bde ba yang ma yin sdug bsngal yang ma yin pa dang /go rims bzhin no/ /de la nyon mongs pa spong bas so sor brtags pa'i 'gog pa rnam par gzhag go/ /tshor ba rnam pa gnyis spong bas mi g.yo ba dang / 'du shes dang tshor ba 'gog pa dang go rims bzhin du rnam par gzhag go/ /de la nyon mongs pa spong bas na de'i phyogs dang mthun pa'i gnas ngan len dang bral ba'i phyir gnas gyur ba'o//tshor ba spong ba ni de'i gnyen por gyur pa snyoms par 'jug pa'i sgrib pa dang bral ba'i phyir gnas gyur ba'o/ /de'i phyir bsam gtan gnyis par sdug bsngal 'gog pa la 'dus ma byas rnam par mi gzhag ste/ 'gyur bar byed pa'i tshor ba ma lus par ma spangs pa'i phyir ro/ /gzugs kyi phung pos ni khams gzugs can bcu bsdus so/ /chos kyi khams kyis ni de nyid bsdus so/ /yid kyi skye mched kyis ni rnam par shes pa'i khams bdun bsdus te/ de ltar na chos thams cad ni gsum du 'gyur ro// //bam po gnyis pa/ phung po dang khams dang / skye mched de ltar rnam par gzhag pa la zhar las 'byung ba de bstan par bya'o/ /mig dang rna ba dang sna rnams so so la yang gnyis gnyis yod na khams nyi shu rtsa gcig tu ji ltar mi 'gyur zhe na/ de dag gnyis gnyis yod du zin kyang /gnyi ga yang mig gi mtshan nyid yin pas mtshan nyid 'dra ba dang / gnyi ga'i bya ba mig gi rnam par shes pa yin par gcig pa'i phyir bya ba mthun pas khams gzhan ma yin no/ /rna ba dang sna la'ang de bzhin du sbyar bar bya'o/ /gnyis su grub pa ni gnas mdzes pa'i phyir ro//'di ltar ngos gnyis shin tu rnam par 'byed na gnas mdzes kyi gzhan du ni ma yin no/ /ci mig re re la brten te mig gi rnam par shes pa rtag tu 'byung ngam 'on te gnyi ga la yang brten/ smras pa gsal bar 'dzin pa'i phyir/ gnyi ga la brten nas 'byung ste/ dper na mig gnyi ga phye na gzugs 'dzin pa la gsal bar 'gyur gyi/gcig gis ni de lta ma yin no/ /dper na khang pa gcig tu mar me gnyis bus na/ mar me gnyis la brten nas 'od rgyas pa cig gis shin tu gsal bar 'gyur ro/ /de bzhin du 'dir yang tshul de ltar blta bar bya'o/ /de'i yul sna tshogs nye bar gnas par gyur na de'i rnam pa rnams la dbang po re re'i sgo nas rnam par shes pa rnams rim gyis 'byung ngam//'on te gcig gis cig car 'dzin zhe na/ rnam par shes pa gcig kho nas cig car 'dzin te/ rnam pa ni sna tshogs su rig par bya'o/ /lce la kham gyi zas reg na lca dang lus kyi rnam par shes pa rtag tu cig car 'byung bar rig par bya'o//sgra ni rgyun chad pa'i phyir yul gzhan dag tu gcig nas gcig tu brgyud de 'byung ba'i rgyun gyis yul gzhan du 'gro ba med kyi 'di lta ste rang gi yul na 'dug cing thang cig 'byung ste/ mar me'i 'od rgyas pa bzhin du sgra rgyas pa 'byung ba yang de ltar blta'o//nye yang bar du bcad pa'i sgra gsal bar mi thos pa'i sgra de thogs pa yod pa'i phyir rtsig pa'i gseb nas chung ngu 'byung bar rig par bya'o/ rnam par shes pa drug po dag las rnam par rtog pa dang bcas pa na du zhig/ rnam par mi rtog pa ni du zhig ce na/rnam par rtog pa gsum gyis yid kyi rnam par shes pa gcig pu rnam par rtog pa dang bcas pa ste/ rnam par rtog pa gsum ni rang bzhin gyi rnam par rtog pa dang / rjes su dran pa'i rnam par rtog pa dang / mngon par spyod pa'i rnam par rtog pa'o/ /de la rang bzhin gyi rnam par rtog pa ni de ltar 'byung ba'i 'du byed myong ba na gang rang gi mtshan nyid kyi rnam pa'i rnam par rtog pa'o//rjes su dran pa'i rnam par rtog pa ni/ gang sngon myong ba'i 'du byed kyi rnam par rtog pa'o/ /mngon par spyod pa'i rnam par rtog pa ni gang 'das pa dang / ma 'ongs pa dang /da ltar gyi lkog tu gyur pa rnams la mngon par rtogs pa'i rnam par rtog pa'o/ /yang rnam par rtog pa bdun te/ dmigs pa la rang gi ngang gis 'jug pa'i rnam par rtog pa dang / mtshan ma dang bcas pa dang / mtshan ma med pa dang / kun tu tshol bar byed pa dang / so sor rtog pa dang /nyon mongs pa can dang nyon mongs pa can ma yin pa'i rnam pa'i rnam par rtog pa'o/ /de la rnam par rtog pa dang po ni rnam par shes pa'i tshogs drug ste/ dmigs pa la bkra bar ma bzung bar rang gi yul ji lta ba bzhin du rang gi ngang gis 'jug pa'i phyir ro/ /mtshan ma dang bcas pa ni rang bzhin dang rjes su dran pa'i rnam par rtog pa ste/da ltar dang 'das pa'i yul la bkra bar 'dzin pa'i phyir ro/ /mtshan ma med pa ni ma 'ongs pa'i yul yid la brnags pa'i rnam par rtog pa gang yin pa'o/ /lhag ma rnams ni mngon par spyod pa'i rnam par rtog pa'i ngo bo nyid du rig par bya ste/'di ltar res 'ga' ni mngon par rtog cing kun tu tshol lo/ /res 'ga' ni so sor rtog go/ /res 'ga' ni nyon mongs pa can du 'gyur ro/ /res 'ga' ni nyon mongs pa can ma yin no/ /gang gi tshe gzugs la sogs pa'i so sor rnam par rig pa'i rnam par shes pa de ci'i phyir mig la sogs pa'i rnam par shes pa zhes bya'i gzugs la sogs pa'i rnam par shes pa zhes mi bya zhe na/tshig rnam par sbyar ba rnam pa lnga 'thad pa dang / gzugs la sogs pa'i tshig mi 'thad pa'i phyir ro/ /ji lta zhe na/ mig la rnam par shes pa ni mig gi rnam par shes pa ste/ gnas kyi yul la rnam par shes pa 'byung ba'i phyir ro//de yod na de'ang yod pa'i phyir te/ 'di ltar mig yod na long ba ma yin pa rnams kyi mig gi rnam par shes pa 'byung ste/ tha na mun pa na yang mthong ba'i phyir ro/ /gzugs yod du zin kyang gdon mi za bar 'byung ba ma yin te/ long ba rnams kyis mi mthong ba'i phyir ro//mig gi rnam par shes pa ni mig gi rnam par shes pa ste/ gzugs ma gyur kyang de'i dbang gis rnam par shes pa 'gyur ba'i phyir ro/ /dper na mig ser gyi nad kyis btab na gzugs sngon po la sogs pa la yang mig gis ser po nyid du mthong ba lta bu'o/ /mig las rnam par shes pa ni mig gi rnam par shes pa ste//mig ni mig gi rnam par shes pa'i sa bon dang 'brel ba ste/ de las 'grub pa'i phyir ro/ /mig gi phyir rnam par shes pa ni mig gi rnam par shes pa ste de la phan pa'i phyir ro/ /'di ltar rnam par shes pa dang mtshungs par ldan pa'i myong bas dbang po la phan gnod du 'gyur gyi yul la ni ma yin no//mig dang mtshungs pa'i rnam par shes pa ni mig gi rnam par shes pa ste/ gnyi ga yang sems can gyi grangs su gtogs pa'i phyir ro/ /gzugs ni gdon mi za bar sems can gyi grangs su gtogs pa ma yin no/ /ci mig gis gzugs rnams mthong ngam/'on te rnam par shes pas mthong zhe na/ chos rnams ni byed pa med pa'i phyir gcig gis kyang mi mthong la/ cig shos kyis kyang mi mthong bar rig par bya ste/ tshogs par gyur pa las mthong bar gdags so/ yang rnam pa drug gis ni mig gis gzugs mthong ngo zhes gtso bor rig par bya'o//rnam par shes pas ni ma yin no/ /rnam pa drug gang zhe na/ 'byung ba'i rgyu'i phyir mig las de 'byung ba'i phyir ro/ /de'i gnas kyi phyir mthong ba'i rten mig yin pa'i phyir ro/ /mi g.yo bar 'jug pa'i phyir mig ni rtag tu rigs gcig pa'i phyir ro/ / rang dbang du 'jug pa'i phyir skad cig re re la 'byung ba rkyen tshogs pa la mi ltos pa'i phyir ro/ /mdzes par 'jug pa'i phyir des gnas mdzes pa'i phyir ro/ /lung gi phyir mig gis gzugs rnams mthong ngo zhes gsungs pa'i phyir te/ ji skad du bshad pa de thams cad ni rnam par shes pa la mi srid pa'i phyir ro//'di ni rnam pa mang por 'byung bas g.yo bar 'jug pa nyid du rig par bya'o/ /ji ltar khams rnams dang skye mched rnams la 'dus ma byas rnam par gzhag pa de bzhin du phung po rnams la ci'i phyir rnam par ma bzhag ce na/ phung po'i don med pa'i phyir ro/ /gzugs la sogs pa ni 'das pa la sogs pa'i rnam pa dag gis bsdus te/spungs pa'i don ni phung po'i don du bstan la/ de ni rtag tu yod pa ma yin pas phung po rnams la 'dus ma byas rnam par mi gzhag go/ /ci'i phyir chos 'di rnams phung po dang khams 'di rnams skye mched kyi sgo nas logs shig tu bshad ce na/gdul bya rnams bsdus pa dang / rgyas par bstan pa la mkhas pa bskyed pa'i phyir te/ 'di ltar phung po bstan pa la gzugs dang rnam par shes pa gang dag mdor bstan pa de dag khams dang skye mched rnams la rnam pa bcu gcig dang / rnam pa bdun du phye nas rgyas par bstan te ji ltar mthun mthun du sbyar ro//der tshor ba la sogs pa gang dag rgyas par bstan pa de dag ni khams dang skye mched rnams su chos kyi khams dang skye mched du bsdus te bstan to/ /yang mtshan nyid tsam rnam par gzhag pas phung po bstan to/ /'dzin pa dang gzung ba dang 'dzin par byed pa rnam par gzhag pas khams bstan to//'dzin par byed pa skye ba'i sgor gyur pa gzung ba dang / 'dzin pa tsam rnam par gzhag pas skye mched bstan par rig par bya'o/ /zhar las byung ba rdzogs s+ho// //'di man chad du ni rtsa ba'i gzhung nyid kyi don bshad par blta'o/ /dgra bcom pa tha ma'i mig go zhes bya ba ni yongs su mya ngan las 'das pa'i dus tha ma ste/de ni mig gzhan gyi rgyu yin pas khams ma yin no/ /gzugs med par skyes pa'i so so'i skye bo'i mig gi rgyu'o zhes bya ba ni de nas shi 'phos te/ gzugs can gyi khams su skye ba'i mig gi sa bon kun gzhi'i rnam par shes pa la gnas pa las 'di ltar yang mig mngon par 'grub par 'gyur ba ste/yang phyir mi 'ong bas na 'phags pa rnams kyis ni ma yin no/ /lus kyi khams yin la lus ma yin pa la yang gzugs med par skyes pa'i so so'i skye bo'i rgyu'o zhes bya ba 'dir brjod par bya ste/ sgo nga'i nang na 'dug pa la sogs pa la ni lus yod pa'i phyir ro//lus zhig pa ni mi 'tsho ba'i phyir ro/ /yid kyi khams yid la yid ma yin pa'ang yod ces bya ba la/ 'dir 'du shes med pa la snyoms par zhugs pa ma smos pa ni nyon mongs pa can gyi yid yod pa'i phyir ro/ /byung zhing skyes par gyur zhes bya ba ni 'grub pa dang rgyas par 'gyur ba'i dbang du byas pa ste go rims bzhin no/gzugs med pa na spyod pa'i yid kyis gzugs med pa na spyod pa rang gi sa pa rnams dang / zag pa med pa'i chos rnams kyang shes so zhes bya ba ni 'phags pa nyan thos kyi dbang du byas pa ste/ phyi rol gyi so so'i skye bo ni rang gi sa pa rnams nyid rnam par shes kyi chos 'di pa ni la la sngon thos pas yongs su bsgoms pa'i dbang gis sa gong ma la yang dmigs te bskyed pa'i phyir ro//gzugs ji lta ba de bzhin du myong ngo zhes bya ba ni bde ba la sogs pa myong bar 'gyur ba'i dbang po dang / yul gnyis las bde ba la sogs pa'i tshor ba 'byung ba'i phyir ro//tshor bar byed pa ji lta ba de bzhin du 'du shes su byed do zhes bya ba ni ji ltar myong ba de bzhin du mtshan mar 'dzin pa'i phyir ro/ /ji ltar 'du shes su byed pa de bzhin du sems par byed do zhes bya ba ni 'du shes ji lta ba de bzhin du mngon par 'du byed pa'i phyir ro//sems par byed pa ji lta ba de bzhin du rnam par shes par byed de/ de dang der nye bar 'gro bar 'gyur ro zhes bya ba ni ji ltar mngon par 'dus byas pa'i yul rnams la 'gro ba gzhan rnams su rnam par shes par 'gyur ba'i phyir ro/ /gang ba kun nas nyon mongs pa dang /rnam par byang ba zhes bya ba ni dbang po dang bcas pa'i lus la'o/ /myong ba gang gis zhes bya ba ni zang zing dang bcas pa dang / zang zing med pa la sogs pa dang go rims bzhin no/ /mtshan mar 'dzin pa dang mngon par 'du byed pa gang gis zhes bya ba ni tshul bzhin ma yin pa dang tshul bzhin du 'jug pas so//gang kun nas nyon mongs pa dang rnam par byang ba zhes bya ba ni sems gnas ngan len dang bcas pa dang gnas ngan len med par 'byung ba'i phyir ro/ /srid pa rnam pa bcu gcig gi skabs kyi gzugs la sogs pa 'das pa la sogs pa'i rnam pas rnam par gzhag par rig par bya'o//de yang bltas pa'i sred pa dang / mngon par dga' ba'i sred pa dang / lhag par chags pa'i sred pa dang / bdag la sred pa dang / yul la sred pa dang / 'dod pa la sred pa dang / snyoms par 'jug pa la sred pa dang / nyes par spyad pa'i sdug bsngal la sred pa dang / legs par spyad pa'i bde ba la sred pa dang / ring ba la sred pa dang / nye ba la sred pa ste/ sred pa 'di dag gi dmigs pa nyid kyis go rims bzhin du 'das pa la sogs pa'i rnam par sbyor bar bya'o/ /yang rnam grangs gzhan du na byung ba dang ma byung ba'i bye brag dang / 'dzin pa dang gzung ba'i bye brag dang / phyi rol du bltas pa dang / nang du bltas pa'i bye brag dang / nyon mongs pa can dang / nyon mongs pa can ma yin pa'i bye brag dang / ring ba dang nye ba'i bye brag dang / 'das pa la sogs pa ji ltar mthun mthun du rig par bya'o/ /de la byung ba ni 'das pa dang da ltar ro//ma byung ba ni ma 'ongs pa'o/ /'dzin pa ni nang gi'o/ /gzung ba ni phyi'o/ /phyi rol du bltas pa ni mnyam par ma bzhag pa'i sa pa'i'o/ /nang du bltas pa ni mnyam par bzhag pa'i sa pa'i'o/ /lhag ma ni go sla bas ma bshad do/ /sdug bsngal ni shin tu rgyas pa'i mtshan nyid kho na'i phyir te zhes bya ba ni gzugs la sogs pa la brten nas skye ba la sogs pa'i sdug bsngal rgyas par 'gyur ba'i phyir ro//kun nas nyon mongs pa khur khyer ba nyid kyi phyir te zhes bya ba ni nyon mongs pa la sogs pa'i kun nas nyon mongs pa/ gzugs la sogs pa la brten pa'i phyir te/dper na 'jig rten na phrag pas khur khyer ba'i phyir lus kyi phyogs gang gis khur khyer ba de la phrag pa zhes 'dogs pa mthong ste de dang mtshungs so/ /chos thams cad kyi sa bon gyi don to zhes bya ba ni kun gzhi rnam par shes pa la rgyu'i dbang du byas pa dang / rang gi mtshan nyid 'dzin pa'i don to//'bras bu dang rgyu'i dngos po 'dzin pa zhes bya ba ni khams bco brgyad po dag la rnam par shes pa'i khams drug dang / dbang po dang don gyi khams rnams go rims bzhin no/ /chos kyi rnam pa thams cad bsdus nas 'dzin pa zhes bya ba ni mdo sde gzhan dag las sa'i khams la sogs pa dang /khams gzhan dag bstan pa dag kyang khams bco brgyad po 'di dag gi nang du ji ltar mthun mthun du bsdu bar rig par bya'o/ /sa bon gyi don dang chos kyi rnam pa thams cad bsdus pa'i don ni skye mched kyi don du yang rig par bya'o/ /gzugs la sogs pa ni dbu ba rdos pa la sogs pa lta bu nyid de/med pa dang / gsob dang / gsog dang / snying po med par snang bar rig par bya'o/ /mdo'i tshig 'di rnams kyi don ni bdag dang gtsang ba dang / bde ba dang rtag par phyin ci log pa'i gnyen po ste/ bdag med pa nyid kyi phyir zhes bya ba la sogs pa'i tshig rnams go rims bzhin du sbyar bar bya'o//ji ltar du zhig ci'i phyir zhes 'dri ba gsum rnam par 'jog pa ni mtshan nyid dang / dngos po la rmongs pa dang / sgro 'dogs pa spong ba'i phyir ro/ /de la ji ltar rdzas su yod ces bya ba ni rdzas su yod pa'i mtshan nyid bstan pas de la rmongs pa spong ngo / / thams cad kyang rdzas su yod pa'o zhes bya ba 'dis ni dngos po la rmongs pa spong ba dag la rdzas su mngon par zhen pa spong ba'i phyir ro zhes bya ba 'dis ni sgro 'dogs pa spong ngo / /de bzhin du gzhan rnams la'ang sbyor bar bya'o/ /dbang po'i spyod yul brjod pa la mi ltos pa ni 'di lta ste gzugs dang tshor ba zhes bya ba la sogs pa'i ming bkra bar mi 'dzin par don gang yin pa 'dzin pa yin no//de las gzhan pa la mi ltos pa ni 'di lta ste/ don gzhan la mi ltos pa de'i blo 'byung ba ste/ ji ltar gzugs la sogs pa la ltos nas bum pa la sogs pa la bum pa la sogs pa'i blo 'byung ba lta bu ni ma yin no//kun nas nyon mongs par 'gyur ba'i dmigs pa ni kun rdzob tu yod pa'o zhes bya ba ni kun nas nyon mongs pa 'phel ba'i phyir ro/ /bdag ni kun nas nyon mongs pa'i rgyu'o snyam du mngon par zhen pa spang ba'i phyir ro/ /rnam par dag par 'gyur ba'i dmigs pa ni don dam par yod pa ste/ye shes dam pa'i spyod yul yin pa'i phyir ro/ /thams cad kyang don dam par yod pa'o zhes bya ba ni chos thams cad kyang de bzhin nyid las gzhan ma yin pa'i phyir ro/ /gang gis kun nas nyon mongs pa dang rnam par byang ba'o zhes bya ba ni sems las byung ba 'dod chags la sogs pa dang /dad pa la sogs par rig par bya'o/ /de'i gnas skabs gang yin pa zhes bya ba ni gzugs dang sems dang sems las byung ba'i gnas skabs dag la btags pa sems dang ldan pa ma yin pa'i 'du byed rnams so/ /rnam par byang ba gang yin pa zhes bya ba ni 'dus ma byas te/de ni ci rigs su sbyar ro/ /yang shes pa rnam pa bcu gsum gyi yul gang yin pa de ni shes bya ste/ de dag ni thos pa las byung ba'i shes pa dang / bsams pa las byung ba'i shes pa dang / 'jig rten pa'i bsgoms pa las byung ba'i shes pa dang /don dam pa shes pa dang / gzhan gyi sems shes pa dang / chos shes pa dang / rjes su rtogs pa'i shes pa dang / sdug bsngal shes pa dang / kun 'byung shes pa dang / 'gog pa shes pa dang / lam shes pa dang / zad pa dang / mi skye ba shes pa dang / theg pa chen po shes pa ste/de dag ni go rims bzhin du mos pa'i shes pa la sogs par rig par bya'o/ de la gzhan gyi sems shes pa ni gzhan gyi bdag nyid shes pa ste/ gzhan gyi bdag nyid kyi sems yul yin pa'i phyir ro/ /chos shes pa ni 'og ma shes pa ste/ bden pa rnams la thog mar 'byung ba'i phyir ro/ / rjes su rtogs pa'i shes pa ni gong ma shes pa ste/ chos shes pa'i 'og tu 'byung ba'i phyir ro/ /rnam par sun 'byin pa'i phyir/ kun nas mi ldang bar bya ba'i phyir/ mi skye ba shes pa la mthar thug pa don chen po la shes pa gang yin pa de ni rnam par sun 'byin pa'i shes pa nas don chen po'i shes pa zhes bya ba'i bar du sbyar bar bya'o//don chen po ni bdag dang gzhan gyi don gyi phyir ro/ /rnam par mi rtog pas zhes bya ba ni rnam par shes pa'i tshogs lnga po dag gis so/ /rnam par rtog pas zhes bya ba ni yid kyi rnam par shes pas so/ /rgyus zhes bya ba ni kun gzhi rnam par shes pas so/ /'jug pa ni de las gzhan pa'i rnam par shes pa'o//rgyu mtshan ni dbang po dang don rnams so/ /rgyu mtshan las byung ba'i rnam par shes pa rnams so/ /mi mthun pa dang gnyen po ni 'dod chags dang bcas pa dang / 'dod chags dang bral ba dang / zhe sdang dang bcas pa dang / zhe sdang dang bral ba zhes bya ba la sogs pa'o//phra ba'i rab tu phye bas zhes bya ba ni rnam par shes par dka' ba'i rnam par rig pa rnam pa bdun gyi bye brag gis te/ rnam par shes par dka' ba'i rnam par rig pa bdun ni 'di lta ste/ ma rig pa'i rnam par rig pa ni snod kyi rnam par rig pa phra ba ste/ dus thams cad du rnam pa yongs su ma chad pa'i phyir ro//sna tshogs kyi rnam pa'i rnam par rig pa ni gcig gi rnam pa ni gcig dang sna tshogs te/ rnam par gzhag par dka' ba'i phyir 'di ni phra ba nyid do/ /lhan cig 'byung ba'i rnam par rig pa ni dus gcig tu 'byung ba'i rnam par shes pa rnams ji ltar so sor rang gi yul ji lta ba bzhin du yongs su gcod pa rnam par gzhag par dka' ba'i phyir ro//phra ba nyid ces bya ba ni thams cad du sbyar bar rig par bya'o/ /mi mthun pa'i phyogs las gnyen po myur du 'byung ba'i rnam par rig pa ni ji ltar 'dod chags la sogs pa'i 'ching ba thams cad dang ldan pa'i sems te/ yud tsam nyid la thang cig tu 'dod chags la sogs pa dang bral bar 'gyur ba'o//bag chags kyi rnam par rig pa ni ji ltar las kun tu 'byung ba rnams kyis sems la bag chags bsgo bar 'gyur ba ste/ de las bag chags gzhan pa'ang ma yin la de tsam nyid kyang ma yin te/ 'bras bu 'byin pa'ang rim gyis 'byung ba rnyed pa'o//nying mtshams sbyor ba'i rnam par rig pa ni ji ltar lus rnam pa du mar 'grub pa'i las kyis yongs su bsgos pa'i rnam par shes pa yod pa dang / de bzhin du 'chi ba'i dus na shin tu mi gsal ba'i tshe 'phral la las kyi bag chags gang yang rung ba zhig sad cing rgyas nas 'gro ba gang yang rung ba zhig tu nying mtshams sbyor bar 'gyur ro//grol ba'i rnam par rig pa ni dgra bcom pa'i sems mchog tu spros pa med pa'i chos nyid thob pa 'khor ba na 'dris pa zag pa dang bcas pa'i spyod pa'i rnam pa thams cad la yang dag par shin tu 'das pa ste/ rnam pa 'dis rnam par gzhag par dka' ba'i phyir 'di phra ba nyid du rig par bya'o//mthong ba po la sogs pa smos pas ni mthong ba po dang / nyan pa po dang / smon pa po dang / myong ba po dang / reg pa po dang / rnam par shes pa po zhes bya ba 'di dag bsdu bar rig par bya'o/ /mngon par shes par bya ba ni mngon par shes pa drug gi yul lo//'gro ba'i bye brag gis rab tu phye ba'i phyir rdzu 'phrul gyi mngon par shes pa ste/ de'i yul ni kun tu 'gro ba'i phyir mngon par shes par bya ba nyid do/ rna ba'i mngon par shes pas 'gro ba sna tshogs kyi sgra yang yongs su shes pas na rjes su thos pa'o/ / spyod pa la 'jug pa'i phyir zhes bya ba ni 'dod chags la sogs pa dang bcas pa'i sems shes pa'i phyir ro/ /'ongs pa'i phyir zhes bya ba ni 'das pa'i tshe rabs gcig nas gcig tu brgyud de 'ongs pa zhes pa'i phyir ro/ /'gro ba'i phyir zhes bya ba ni ma 'ongs pa'i skye bar 'gro ba shes pa'i phyir ro//nges par 'byung ba'i phyir ro zhes bya ba ni khams gsum las nges par thar ba dang / thabs shes pa'i phyir ro/ /thams cad kyang mngon par shes par bya ba dag go zhes bya ba ni thams cad kyang tha ma gsum gyi yul yin pa'i phyir ro/ /gzugs ni chos de'i bdag nyid dang ngo bo nyid yin te/de'i phyir de gzugs can yin gyi gzugs gzhan dang ldan pa'i phyir ni ma yin te/ gzugs kyi ngo bo nyid ces bya ba'i bar du brjod par 'gyur ro/ /'byung ba rten du gyur pa zhes bya ba ni gzugs gzhan dang ldan pa'i phyir yang gzugs can nyid du ston te/ rgyur byas pa'i gzugs ni 'byung ba'i gzugs dang ldan pa dang /'byung ba'i gzugs rnams kyang nang phan tshun ldan pa'i phyir ro/ /dga' ba'i kun 'byung ba zhes bya ba ni dga' ba nyid gang gi kun 'byung ba yin pa de gzugs can yin gyi/ ji ltar tshor ba la sogs pa'i kun 'byung ba ni sngon gyi dga' ba dang / da ltar byung ba'i reg pa la sogs pa yang yin pa lta bu ni ma yin no//phyogs dang bcas pa zhes bya ba ni cha shas dang bcas pa'i phyir ro/ /yul la khyab pa'i phyir zhes bya ba ni phyogs rnams su lus kyis rgyas pa'i phyir ro/ /yul nye bar bstan du rung ba'i phyir zhes bya ba ni phyogs che ge mo zhig na'o zhes bstan par nus pa'i phyir ro//yul spyod yul du gyur pa'i phyir zhes bya ba ni phyogs 'ga' zhig na 'dug par dmigs par 'gyur ba'i phyir ro/ /gnyis spyod yul du 'dzin pa mtshungs pa'i phyir zhes bya ba ni sems can gnyis mtshungs par dmigs par 'gyur ba'i phyir ro/ /gzugs can ma yin pa ni de lta ma yin te/ji ltar bdag gis myong ba bzhin du gzhan dag gis shes par mi nus pa'i phyir ro/ /'brel pa'i phyir zhes bya ba ni/ mig gi rnam par shes pa la sogs pa yang brgyud pas gzugs can nyid de/ dbang po gzugs can dang 'brel pa'i phyir ro/ /rjes su 'brel pa'i phyir zhes bya ba ni gzugs med par skyes pa'i so so'i skye bo rnams la gzugs kyi sa bon rjes su 'brel ba'i phyir ro//rab tu rtogs pa'i phyir zhes bya ba ni rtogs pa rnams dmigs pa la rab tu rtog pa'i phyir ro/ /gnod par bya ba yin pa'i phyir zhes bya ba ni phung po lnga po dag la lag pa la sogs pas kun tu reg pa dang /mya ngan la sogs pas ji ltar mthun mthun du gnod par byar rung ba'i phyir te gnod par bya ba yin zhes bya ba'i tha tshig go/ /go bar byed pa'i phyir zhes bya ba ni bstan pas don la rtog pa'i phyir ro/ /bsags pa rnam par gzhag pa'i phyir zhes bya ba ni rdul phra mo las gong ma'i gzugs cha shas dang bcas par rnam par gzhag pa'i phyir ro//phyi rol du bltas pa'i phyir zhes bya ba ni 'dod pa na spyod pa'i gzugs 'dod pa'i yon tan la sred pa las byung ba'i phyir ro/ /nang du bltas pa'i phyir zhes bya ba ni gzugs na spyod pa'i gzugs de snyoms par 'jug pa'i sems la sred pa las byung ba'i phyir te/de'i phyir 'di yid las byung ba nyid du rig par bya'o/ /yun ring ba'i phyir zhes bya ba ni so so'i skye bo'i gzugs sngon gyi mtha' dang phyi ma'i mtha'i mu rnam par gnas pa med pa'i phyir ro/ /yongs su chad pa'i phyir zhes bya ba ni slob pa'i gzugs 'khor ba'i mthar phyin par byed pa'i phyir ro//de'i dus kyi phyir zhes bya ba ni mi slob pa'i gzugs da ltar byung ba'i srid pa tsam zhig las pa'i phyir ro/ /nges par ston pa'i phyir zhes bya ba ni sangs rgyas la sogs pa'i gzugs ni kun tu ston pa tsam du zad kyi grub pa med pa'i phyir ro/ /thams cad kyang gzugs can dag go zhes bya ba ni gnod par bya ba'i gzugs can yin pa'i phyir ro//lhag ma rnams ni ci rigs su rig par bya'o/ /phyi rol du bltas pa la sogs pa gzugs can gyi rab tu dbye ba drug ni tshor ba la sogs pa dang thun mong bar rig par bya'o/ /lhag ma'i rab tu dbye ba ni gzugs can bzhin no zhes bya ba ni gzugs de'i bdag nyid kyi phyir zhes bya ba rnam pa thams cad do//thams cad kyang bstan du yod pa dag go zhes bya ba ni bstan du yod pa dang 'brel ba la sogs pas gzugs can ma yin pa rnams kyang bstan du yod pa'i phyir ro/ /sgrib par byed pa dang bsgrib par bya ba zhes bya ba la/'gro ba'i gegs byed pa'i phyir sgrib par byed pa zhes de tsam du bstan pas bsgrib par bya ba zhes bya ba'i tshig gis 'od la sogs pa'i gzugs thogs pa dang bcas par rnam par 'jog ste/ de ni bsgrib par bya ba nyid yin gyi/ sgrib par byed pa ni ma yin no//'di ni de'i rigs te/ 'di ni ngo bo nyid ces bya ba'i tha tshig go/ /rdul phra rab las gong ma zhes bya ba ni rdul phra rab gcig thogs pa med pa'i phyir ro/ /gang ting nge 'dzin gyi dbang gis ma bsgyur ba'i gzugs zhes bya ba ni ting nge 'dzin gyi dbang bsgyur ba'i gzugs ni thogs pa med pa'i phyir te/sems mnyam pa'i lha bzhin no/ /rab tu 'khrug pa'i gzhi'i gnas ni gnas sam dmigs pa gang la zhe sdang skye ba ste/ thogs pa dang bcas pa'i don 'dis ni thams cad kyang thogs pa dang bcas pa dag go/ /yang na ci rigs su sbyar ro zhes bya ba ni lhag ma rnams so//zag pa de'i bdag nyid kyi phyir zhes bya ba ni zag pa rnams zag pa dang bcas pa nyid de/ zag pa'i ngo bo nyid dang ldan pa'i phyir ro/ /zag pa dang 'brel ba'i phyir zhes bya ba ni de dang lhan cig 'byung ba'i sems dang sems las byung ba rnams dang / mig la sogs pa zag pa dang ldan pa dang /gnas yin pa'i phyir te go rims bzhin no/ /zag pas bcings pa'i phyir zhes bya ba ni de'i dbang gis dge ba zag pa dang bcas pa rnams kyang yang srid pa 'grub par byed pa'i phyir ro/ /zag pa'i rjes su 'brel ba'i phyir zhes bya ba ni sa pa gzhan rnams kyang sa pa gzhan gyi zag pa'i gnas ngan len dang ldan pa'i phyir ro//zag pa'i rjes su mthun pa'i phyir zhes bya ba ni nges par 'byed pa'i cha dang mthun pa rnams nyon mongs pa'i gnas ngan len dang ldan du zin kyang zag pa med pa nyid du rnam par gzhag pa'i phyir te/ srid pa thams cad la rgyab kyis bltas pa'i phyir dang / de'i gnyen po la bstan pa'i phyir ro/ /zag pa'i rgyu las byung ba'i phyir zhes bya ba ni dgra bcom pa rnams kyi phung po rnams tshe rabs snga ma'i nyon mongs pa las byung ba'i phyir ro/ /khams bco lnga ni tha ma gsum ma gtogs pa'o/ /skye mched bcu ni tha ma gnyis ma gtogs pa'o/ /khams gsum dang skye mched gnyis kyi phyogs ni 'phags pa'i lam 'khor dang bcas pa dang 'dus ma byas ma gtogs pa'o//mtshon cha len pa la sogs pa ni 'thab pa ste/ 'dod chags la sogs pa ni rgyu yin pas 'thab pa'o/ /zag pa dang bcas pa ji snyed pa 'thab pa dang bcas pa'ang de snyed do zhes bya ba la sogs pa ni de'i rjes su 'brel par rig par bya'o//yang srid pa la lhag par chags pa'i rgyu nyid de/ rnam par byang ba'i chos la zhe sdang bas srid pa la lhag par chags pa'i phyir ro/ 'dod pa'i yon tan lnga la lhag par chags pa'i rgyu yin pas zhen pa'o/ /zhe sdang ci 'dra ba zhig gis de la lhag par chags she na/mngon par 'byung ba la zhe sdang bas so/ /'dod pa bzhin du byed pas mngon du phyogs pa dang rgyab kyis lta ba ni 'dus ma byas la mi srid de/ rtag pa'i phyir ro/ /'dus byas kyang ma yin 'dus ma byas kyang ma yin pa ni 'di gnyis las gud na med pa'i phyir ro/ /'dus byas dang 'dus ma byas zhes bya ba ni 'di gnyis so zhes gang gsungs pa de ji ltar gnyis kho nar 'gyur zhe na/'dod pa bzhin du byed pas mngon du phyogs pa dang rgyab kyis lta ba'i phyir 'dus byas zhes bya'o/ /las dang nyon mongs pas mngon par 'dus ma byas pa'i phyir 'dus ma byas zhes bya ste/ gnyis las gud na med do//de ltar snang ba zhes bya ba ni khams gsum par gtogs pa'i rnam pa'o/ /de bzhin nyid la sogs par snang ba ni gcig tu ma 'dris pa'i phyir 'jig rten las 'das pa'o/ /phung po rnams kyi phyogs gcig ces bya ba ni yang dag pa'i lam gyis bsdus pa dang / rjes las thob pa 'jig rten las 'das par snang ba ma gtogs pa'o//de dag dang 'dus ma byas ma gtogs pa'o/ /de dag dang 'dus ma byas ma gtogs pa ni khams gsum dang skye mched gnyis kyi phyogs su blta bar bya'o/ /khams gsum pa'i gnyen po zhes bya ba ni 'phags pa'i lam mo/ /de yang nyan thos dang rang sangs rgyas rnams kyis ni rtag pa la sogs pa'i phyin ci log bzhi'i gnyen po yin pas 'jig rten las 'das pa'o//phyin ci log tu rnam par mi rtog pas rnam par mi rtog pa'o/ /byang chub sems dpa' rnams kyis ni/ gzugs la sogs pa spros pa'i chos thams cad kyi gnyen po yin pas 'jig rten las 'das pa'o//spros pa'i rnam par rtog pa med pas rnam par mi rtog pa'o/ /'dus ma byas ni rtog pa thams cad kyi gzhi'i gnas ma yin pas rnam par mi rtog pa'o/ /dang po byung ba ni nying mtshams sbyor ba'i dus na'o/ /rgyun byung ba ni de'i phyin chad do//rgyas pa las byung ba ni nyal ba dang / zas dang / tshangs par spyod pa dang / snyoms par 'jug pa dang / rgyas pa rnam pa bzhi'i rgyu las byung ba'o/ /rten byung ba ni nang gi dbang po'o/ /'gyur ba byung ba ni bde ba la sogs pa'i tshor ba byung ba na de dang mthun par dbang po 'gyur ba'o/ / yongs su smin par byung ba ni rgas pa'i gnas skabs so/ /nyams par byung ba ni bde 'gro nas shi 'phos te ngan 'gror skye ba'o/ /khyad par du byung ba ni de las bzlog pa'o/ /'od gsal bar byung ba ni rtse bas rab tu slu ba rnams dang / yid rab tu sun 'byin pa rnams dang / 'phrul dga' ba rnams dang //gzhan 'phrul dbang byed pa rnams dang / gzugs dang gzugs med pa na spyod pa'i lha rnams dga' ba mang ba dang / longs spyod pa dang gnas la rang gis dbang bsgyur ba'i phyir te ci rigs su sbyor ro/ /'od gsal ba ma yin par byung ba ni de las gzhan pa'o/ /kun tu 'gro bar byung ba ni 'gro ba'i dus na'o//sa bon dang bcas par byung ba ni dgra bcom pa'i tha ma'i phung po ma gtogs pa'o/ /sa bon ma yin par byung ba ni phung po tha ma pa rnams so/ /gzugs brnyan dang dbang 'byor ba dang / nges par bstan pa'i phyir byung ba ni shes bya'i dngos po dang mthun pa dang / rnam par thar pa las gyur ba dang /de bzhin gshegs pa'i gzugs te go rims bzhin no/ /gcig nas gcig tu byung ba ni tshe rabs kyi rgyun no/ /skad cig gcig nas byung ba ni 'du byed rnams kyi mtshan nyid skad cig so so'i'o/ /phrad pa dang bral nas byung ba ni sdug pa dang mi sdug pa dang phrad pa dang bral ba'i dus dang /sems 'dod chags dang bcas pa dang / 'dod chags dang bral ba'i dus na'o/ /gnas skabs gzhan du byung ba ni mer mer po la sogs pa'i gnas skabs rnams dang / nad la sogs pa'i gnas skabs rnams su'o/ /'chi 'pho ba dang skye bar byung ba ni sems can gyi 'jig rten no/ / 'jig pa dang chags par byung ba ni snod kyi 'jig rten no/ /sngon gyi dus na byung ba ni sngon gyi dus kyi srid pa'o/ /'chi ba'i dus na byung ba ni 'chi ba'i srid pa'o/ /bar du byung ba ni bar ma do'i srid pa'o/ /nying mtshams sbyor ba'i dus na byung ba ni skye ba'i srid pa'o/ /gzugs dang 'du byed kyi phung po'i phyogs gcig ces bya ba ni dbang po'i mtshan nyid dang mtshungs par ldan pa'i mtshan nyid de go rims bzhin no//chos kyi khams dang skye mched kyi phyogs gcig go zhes bya ba ni mtshungs par ldan pa'i ngo bo nyid do/ /za ba po ni bdag ste 'dod pa dang mi 'dod pa'i yul rnams la dmigs par rig par bya'o/ /ma phrad par 'dzin pa ni mig dang rna ba dang yid do//phrad nas 'dzin pa ni de las gzhan pa'i dbang po'o/ /da ltar gyi rang gi mtshan nyid so so ba yul so sor nges pa 'dzin pa ni dbang po lnga las byung ba'o/ /rang dang spyi'i mtshan nyid dus thams cad pa'i yul thams cad 'dzin pa ni dbang po drug las byung ba'o//rkyen tshogs nas rnam par shes pa las byung ba'i dbang du byas te btags nas 'dzin pa'i nye bar 'dogs par rig par bya ba'i yang dag pa'i don du na chos rnams byed pa med pa'i phyir ro/ /'dzin pa gang yin pa gzung ba yang de yin no zhes bya ba ni mig la sogs pa yang yid kyi rnam par shes pas gzung ba'i phyir ro//'dzin pa'i spyod yul nyid ces bsnan pa ni sems dang sems las byung ba bsal ba'i phyir ro/ /thos pa las byung ba dang / bsam pa las byung ba dang / de'i rjes su mthun pa'i chos sgrub pas yongs su bsdus pa ni phyi rol tu bltas pa ma yin pa nyid de/ rgyu mthun pa'i chos kyi rgyu las byung ba'i phyir ro//de'i dbang gis mya ngan las 'das pa la sogs pa la dmigs par blta'o/ /rgyu mthun pa'i rgyu las byung ba'i chos ni sangs rgyas la sogs pas thugs su chud pa'i rgyu las byung ba'i brtan par rig par bya'o/ /khams bzhi ni sna'i rnam par shes pa'i khams dang / lce'i rnam par shes pa'i khams dang / dri'i khams dang / ro'i khams so/ /skye mched gnyis ni dri dang ro'i skye mched do/ /de las gzhan pa dag gi phyogs gcig ni gang 'dod pa'i khams su bsdus pa'o/ /khams bcu zhes bya ba ni rnam par shes pa'i khams bdun dang / gzugs dang sgra dang chos kyi khams so//skye mched bzhi ni gzugs dang sgra dang yid dang chos kyi skye mched do/ /rgyu dang 'bras bu spyad zin pa dang zhes bya ba ni skyes zin pa dang / 'gags zin pa'i phyir te go rims bzhin no/ /kun nas nyon mongs pa dang / rnam par byang bar byed pa yang dag pa shin tu 'das pa zhes bya ba ni da ltar byung ba'i 'dod chags la sogs pa dang /dad pa la sogs pa bzhin du sems kun nas nyon mongs pa dang / rnam par byang bar byed pa'i mthu med pa'i phyir ro/ /rgyu yongs su bzung nas zhig pa zhes bya ba ni bag chags gzhan nas zhig pa'i phyir ro/ / 'bras bu dang rang gi mtshan nyid yod pa dang med pa zhes bya ba ni da ltar gyi dus na des bskyed pa'i bag chags yod pa dang / de 'jog par byed pa'i rdzas med pa'i phyir ro/ /dran pa'i kun tu rtog pa'i mtshan ma la sogs pa ni mtshan ma ni dmigs pa tsam du yod par rig par bya'o/ /thams cad kyi phyogs gcig ces bya ba ni ma 'ongs pa dang /da ltar byung ba dang / 'dus ma byas ma gtogs pa'o/ /rgyu yod kyang ma byung ba zhes bya ba ni 'dus ma byas las bye brag tu dbye ba'i phyir te/ de ni ma byung la rgyu dang ldan pa yang ma yin no/ /rang gi mtshan nyid ma thob pa ni/ rang bzhin gyis ma grub pa'i phyir ro/ /rgyu dang 'bras bu ma spyad pa ni de'i sa bon gyi bya ba ma byas pa dang /de'ang ma skyes pa'i phyir ro/ /rgyu dang 'bras bu spyad zin pa dang spyad ma zin pa zhes bya ba ni yang mi 'grub pa dang yod pa'i phyir ro/ /'das pa dang ma 'ongs pa rab tu gzhag pa'i rgyu zhes bya ba ni da ltar byung ba la brten te/ 'das pa dang ma 'ongs par btags pa'i phyir te/gang de'i gnas skabs thob par 'gyur ba de ni ma 'ongs pa'o/ /gang thob zin pa de ni 'das pa'o/ /byed pa nye bar gnas pas kyang zhes bya ba ni mig la sogs pa ni rnam par shes pa'i gnas la sogs par yod pa'i phyir ro/ /'das pa la sogs pa bshad pa'i skabs kyis 'di'ang ston te/ci'i phyir bcom ldan 'das kyis 'das pa la sogs pa gsum po nyid gtam gyi gzhir rnam par gzhag gi mya ngan las 'das pa ni ma yin zhe na/ mya ngan las 'da' ba ni so so rang gi rig par bya ba dang / brjod du med pa nyid kyi phyir te/ brjod par mi nus zhes bya ba'i tha tshig go/ / byung ba dang 'byung ba dang da ltar ni mthong ba dang thos pa dang bye brag phyed pa dang / rnam par shes pa'i tha snyad rnams kyi gnas ma yin pa'i phyir ro/ /khams bcu zhes bya ba ni rnam par shes pa'i khams dang / gzugs dang sgra dang chos kyi khams so/ /skye mched bzhi zhes bya ba ni gzugs dang sgra dang yid dang chos kyi skye mched do//de dag nyid la zhes bya ba ni dad pa la sogs pa'o/ /rang bzhin gyis so sor ma brtags par zhes bya ba ni rang gi ngang gis te/ dge ba'i bshes gnyen la sogs pa'i stobs kyis ma yin zhes bya ba'i tha tshig go/ /'dod pa kun tu gnas pa'o zhes bya ba ni skye bas thob pa'i 'dod pa 'ba' zhig ma yin gyi/dad pa la sogs pa dang lhan cig tu'o/ /dge ba sgom pa'o zhes bya ba ni thos pa las byung ba la sogs pa thams cad dge ba'i chos rnams su rig par bya'o/ /mtho ris dang phyug po'i rigs su skye ba yongs su 'dzin pa gnyis kyis ni mngon par mtho ba'i rgyu ston to/ /rnam par byang ba'i rjes su mthun pa yongs su 'dzin pas ni mya ngan las 'das pa thob pa'i rgyu ston to//rnam par sun 'byin pa'i gnyen po zhes bya ba la sogs pa ni 'og nas 'chad do/ /de dag kyang gang zhe na/ de la rnam par sun 'byin pa'i gnyen po ni zag pa dang bcas pa'i 'dus byas rnams la nyes dmigs su lta ba ste/des nad dang 'bras la sogs pa'i rnam pas nye bar len pa'i phung po sun 'byin pa'i phyir ro/ /spong ba'i gnyen po zhes bya ba ni sbyor ba dang de ma thag pa'i lam ste/ de dag gis nyon mongs pa spong ba'i phyir ro/ /gzhi'i gnyen po ni rnam par grol ba'i lam rnams te/ de dag gis spong ba'i thob pa kun tu 'dzin pa'i phyir ro//thag bsring ba'i gnyen po zhes bya ba ni de'i gong ma'i lam ste/ de sngar spangs pa'i nyon mongs pa thag bsring ba'i phyir ro/ /de las gzhan pa'i nyon mongs pa dang / nye ba'i nyon mongs pa dang / nyes par spyod pa kun nas slong ba'o zhes bya ba ni 'dod pa na spyod pa'i rang 'khrungs ma yin pa gang yin pa dang /rang 'khrungs las ni nyes par spyod pa kun nas slong ba gang yin pa de mi dge ba'o/ /de las gzhan pa ni bsgribs pa'i lung du ma bstan par rig par bya'o/ /'tshe ba sngon du btang nas gang du lug dang ma he la sogs pa gsod pa dang / lta ba ngan pa sngon du btang nas bsod nams 'dod pa dang /mchog 'dod pa'i phyir gang du zas mi za ba la sogs pas nyon mongs pa der lha rten byed pa'o/ /'phen pa'am yongs su rdzogs par byed pa zhes bya ba ni ngan 'gro'i dbang du byas pa'o/ /bde 'gror ni yongs su rdzogs par byed pa nyid de/ gang gis 'dir skyes nas dbul ba la sogs pa'i sdug bsngal ba'o//dge ba'i bar chad byed pa'i chos zhes bya ba ni rgyun mi 'chad par tshogs kyi nang du 'du ba la sogs pa'o/ /khams brgyad ces bya ba ni mig dang / rna ba dang / sna dang / lce dang / lus dang / dri dang / ro dang reg bya'i khams so/ /skye mched brgyad ces bya ba ni de dag nyid do//sdang ba yang ma yin dang ba yang ma yin pa'i sems su gyur pa zhes bya bas ni dge ba dang mi dge ba las bzlog pa ston to/ /de dag nyid kyis yongs su zin pa zhes bya ba ni de'i rnam pa yid la brjod pa'i sgo nas 'jug pa'i phyir ro/ /de dag nyid brjod pa'i bag chags so/ / zhes bya ba ni ming gi tshogs la sogs pas phyi ma la mngon par brjod pa 'byung bar bya ba'i phyir/ sems la bag chags bsgos pa'o/ /de dag gis yongs su zin pa'i sems dang sems las byung ba'i chos rnams kyis gang kun nas slong ba'o zhes bya ba ni sdang ba yang ma yin/ dang ba yang ma yin pa'i sems su gyur pa'i ming la sogs pa mngon par brjod pa'i rnam pa rnams kyis kun nas slong ba'o//nyon mongs pa can yang ma yin dge ba yang ma yin pa'i sems dang ldan pa zhes bya ba ni/ gal te nyon mongs pa can yang ma yin la/ dge ba yang ma yin pa'i sems su gyur na/ de'i phyir spyod lam la sogs pa lung du ma bstan par 'gyur ro//gzhan du na dge ba'am mi dge bar 'gyur te ci rigs su sbyar ro/ /'di lta ste so sor brtags pa ma yin pa la zhes bya bas ni dge ba las bye brag tu 'byed do/ /nyon mongs pa can ma yin pa'i sems kyis zhes bya bas ni/ mi dge ba las bye brag tu 'byed do//yongs su 'dzin pas lung du ma bstan pa zhes bya ba ni bzo'i gnas la goms pa'i bag chags kyis de lta bu'i lus yongs su 'dzin pa'i phyir ro/ /so sor ma brtags pas sman bsten pa zhes bya bas ni nad kyi gnyen pos nad med par bya ba'i phyir ro/ /rgyu mthun pas lung du ma bstan pa gang zhe na sprul pa'i sems dang lhan cig skyes pa'o zhes bya ba ni sems dang sems las byung ba gang gis rtse ba'i phyir sprul pa sprul pa ste/sems can la phan pa'i phyir na ni dge bar rig par bya'o/ /bstan pas kyang dge ba zhes bya ba la sogs pas ni/ gang sangs rgyas la sogs pas 'dul ba'i don gyi dbang gi phyir kun tu ston pa'o//mi dge bar ji ltar kun tu ston ce na/ chom rkun la sogs par sprul nas de las gzhan pa'i sems can 'jigs par bya ba'i phyir lag pa dang / rkang pa dang / mgo gcod pa la sogs pa kun tu ston pa'i phyir ro/ /'dod chags dang ma 'brel ba zhes bya ba ni/'dod chags dang bral ba nyid kyi phyogs tsam dang yang mi ldan pa ste/ ting nge 'dzin ma thob pa zhes bya ba'i tha tshig go/ /gzhan du na ni mi lcogs pa med pa yang 'dod pa dang rab tu ldan par 'gyur ro/ /ting nge 'dzin thob ma thag tu spong ba la mngon par dga' ba'i mi mthun pa'i phyogs su gyur ba'i gnas ngan len spangs ba'i phyir 'dod chags dang bral ba nyid kyi phyogs yod par rig par bya'o/phyi rol gyi gzugs la sogs pa ni 'dir 'dod chags dang ma bral ba'i las kyi dbang gis grub pa'i phyir 'dod pa dang rab tu ldan pa'o/ /sems can thams cad kyi thun mong gi las kyi dbang gis 'byung ba zhes bya ba ni gzugs dang gzugs med pa na spyod pa rnams na yang 'dod chags dang ma bral ba'i las kyi sa bon yod pa'i phyir ro//khams bzhi zhes bya ba ni dri dang ro dang / sna dang lce'i rnam par shes pa'i khams so/ /skye mched gnyis zhes bya ba ni dri dang ro'i skye mched do//de las gzhan pa'i phung po dang khams dang skye mched rnams kyi phyogs gcig go zhes bya ba ni gzugs dang gzugs med pa na spyod pa dang zag pa med pa ma gtogs pa'o/ /khams bzhi dang skye mched gnyis ma gtogs pa zhes bya ba ni bshad ma thag pa'o/ / de las gzhan pa'i phung po dang khams dang skye mched rnams kyi phyogs gcig go zhes bya ba ni 'dod pa dang gzugs med pa na spyod pa dang zag pa med pa ma gtogs pa'o/ /phung po bzhi zhes bya ba ni tshor ba la sogs pa'o/ /khams gsum zhes bya ba ni yid dang chos dang yid kyi rnam par shes pa'i khams so//skye mched gnyis zhes bya ba ni yid dang chos kyi skye mched de/ de dag gi phyogs gcig ni 'dod pa dang gzugs na spyod pa dang zag pa med pa ma gtogs pa'o/ /phyogs gcig las 'dod chags dang bral ba nyid ces bya ba ni sa'i dbang du byas pa ste/ sa brgyad pa'i bar du nyon mongs pa'i rnam pa spangs pa'i phyir ro/ /mtha' dag las 'dod chags dang bral ba nyid ces bya ba ni dgu pa spangs pa'i phyir ro/ /yang 'jig tshogs las 'dod chags dang bral ba nyid kyi dbang du byas nas slob pa ni phyogs gcig las 'dod chags dang bral ba nyid do/ /mi slob pa ni mtha' dag las 'dod chags dang bral ba nyid du rig par bya'o//rtog pas 'dod chags dang bral ba nyid ces bya ba ni mthong ba'i lam gyis so/ /gnod pa'i 'dod chags dang bral ba nyid ces bya ba ni 'jig rten pa'i lam gyis so/ /legs par gnon pa'i 'dod chags dang bral ba nyid ces bya ba ni 'jig rten las 'das pa'i phyir nyid kyis 'dod chags dang bral ba nyid du rig par bya'o//'dod chags dang bral ba nyid bcu zhes bya ba 'di la mi 'phrod par 'dzin pa'i don ni 'dod chags dang bral ba nyid kyi don du rig par bya'o/ /gdon mi za bar spong ba'i don du ni ma yin no//thabs shin tu chen po thob pa thabs dma' ba la zhes bya ba ni grong khyer gyi gtso bo la sogs pa dang grong dpon la sogs pa lta bur rig par bya'o/ /byis pa rnams mya ngan las 'das pa la zhes bya ba ni de la zhi ba nyid du mi shes pa dang / 'jig tshogs la mngon par chags pa'i phyir ro/ / mthong ba'i lam thob pa khams gsum pa la zhes bya ba ni 'du byed sdug bsngal ba nyid du yongs su shes pa dang ldan pa zag pa dang bcas pa'i dngos po thams cad la yid 'byung ba'i phyir ro/ /thar pa la brtson pa'i dge ba ni bslab par blta'o zhes bya ba ni tshogs bsags pa'i gnas skabs nas bzung ste/thar par bya ba'i phyir brtson par rig par bya'o/ /tshogs bsags pa'i gnas skabs ni mngon par 'gro ba thar pa'i cha dang mthun par rig par bya'o/ /khams bcu zhes bya ba ni rnam par shes pa'i khams bdun dang / gzugs dang sgra dang chos kyi khams rnams so/ / skye mched bzhi zhes bya ba ni gzugs dang sgra dang yid dang chos kyi skye mched rnams so/ /bslabs pa'i mthar phyin pa zhes bya ba ni lhag pa'i tshul khrims dang / lhag pa'i sems dang / lhag pa'i shes rab ni bslab pa'o/ /mthar phyin pa ni dgra bcom pa zhes bya ba'i tha tshig go/ /so so'i skye bo'i dge ba la sogs pa ni thar pa la brtson pa ma gtogs pa'o//de ni bslab pa la slob pas slob pa zhes bya'o/ /slob pa'i nyon mongs pa can dang lung du ma bstan pa zhes bya ba 'di la nyon mongs pa can ni mi dge ba'o/ /lung du ma bstan pa ni bsgribs pa'i lung du ma bstan pa ste/ ji ltar mthun mthun du sbyor ro//mi slob pa'i lung du ma bstan pa zhes bya ba ni ma bsgribs pa'i lung du ma bstan par rig par bya'o/ /nyon mongs pa can gyi lta ba kun tu brtags pa rnams zhes bya ba ni dam pa'i chos ma yin pa nyan pa la sogs pa sngon du 'gro ba'i lta ba lnga po dag go/ /kun tu brtags pa smos pas ni lhan cig skyes pa'i 'jig tshogs dang /mthar 'dzin par lta ba bsal ba'i phyir ro/ /mthar 'dzin par lta ba lhan cig skyes pa ji lta bu zhe na/ mngon par rtogs pa la zhugs pa can nga'i bdag gang yin zhes skrag pa gang las byung ba'o/ /lta ba'i gnas zhes bya ba ni lta ba dang lhan cig 'byung ba'i chos rnams dang de'i sa bon no//the tshom gyi gnas kyang de bzhin du rig par bya'o/ /lta ba log par zhugs pa'i nyon mongs pa dang / nye ba'i nyon mongs pa gang yin pa dag ces bya ba ni lta ba'i sgo nas zhugs pa dang / de la dmigs pa'i 'dod chags pa gang yin pa'o/ /thams cad kyi phyogs gcig go zhes bya ba ni bsgoms pas spang bar bya ba dang /zag pa med pa ma gtogs pa'o/ /mthong bas spang bar bya ba las bzlog pa zag pa dang bcas pa'i chos rnams zhes bya ba ni nyon mongs pa can gyi lta ba kun tu brtags pa las gzhan pa'i zag pa dang bcas pa'i chos rnams zhes bya ba'i tha tshig go//'dir zag pa dang bcas pa smos pas ni/ nges par 'byed pa'i cha dang mthun pa rnams kyang bsdu bar rig par bya ste/ gnas ngan len gyi rjes su 'brel pa yod pa'i phyir ro/ /thams cad kyi phyogs gcig go zhes bya ba ni mthong bas spang bar bya ba ni zag pa med pa ma gtogs pa'o//phung po rnams kyi phyogs gcig spang bar bya ba ma yin pa ni 'jig rten las 'das pa'i lam dang / de'i rjes la thob pa'o/ /khams bcu dang skye mched bzhi zhes bya ba ni de dang 'dus ma byas so/ /ci 'dra ba'i gzugs dang / sgra'i khams spang bar bya ba ma yin zhe na/mi slob pa'i lus dang / ngag gi las kyi rang bzhin no/ /chos kyi khams dang skye mched kyi phyogs gcig ma gtogs par zhes bya ba ni 'dus ma byas kyi mtshan nyid do// //bam po gsum pa/ bdag dang chos rgyu med pa dang / dbang phyug la sogs pa'i rgyu las byung bar mngon par zhen pa spang ba'i phyir ro//bcom ldan 'das kyis rten cing 'brel bar 'byung ba'i mtshan nyid gang gsungs pa ni 'di yod pas/ 'di 'byung / 'di skyes pa'i phyir 'di skye ba ste/ 'di ltar ma rig pa'i rkyen gyis 'du byed rnams zhes bya ba la sogs pa gsungs so//de la 'di yod pas 'di 'byung zhes bya ba ni g.yo ba med pa'i rkyen las byung ba'i phyir te/ /rkyen yod na 'bras bu 'byung bar zad kyi 'bras bu 'byung bar bya ba'i phyir rkyen la g.yo ba ni ci yang med ces bya ba'i tha tshig go/ /'di skyes pa'i phyir 'di skye ste zhes bya ba ni mi rtag pa'i rkyen las byung ba'i phyir te/ma byung ba'i rgyu las 'bras bu 'byung ba ma grub pa'i phyir ro/ /ma rig pa'i rkyen gyis 'du byed rnams zhes bya ba la sogs pa ni nus pa'i rkyen las byung ba'i phyir ro/ g.yo ba med cing mi rtag pa yin du zin kyang rkyen gang yang rung ba las 'bras bu thams cad mi 'byung gi nus pa'i rkyen las 'byung ste 'di ltar ma rig pa'i rkyen gyis 'du byed rnams 'byung ba nas skye ba las rga shi 'byung ba'i bar du'o//ma rig pa la sogs pa yan lag bcu gnyis rnam par phye ba gang yin pa de dag ni mdor bsdu na yan lag bzhir 'gyur te/ 'phen pa'i yan lag la sogs pa'o/ /'byung ba bstan pa la ni 'di dag tsam zhig bstan par bya ste/'di ltar rgyu'i dus na gang gis 'phen pa dang / gang 'phen pa dang / 'bras bu'i dus na gang gis mngon par 'grub pa dang / gang mngon par 'grub pa ste/ de dag thams cad ni yan lag 'di rnams kyis bstan par rig par bya'o/ / de la 'phen pa'i yan lag ni ma rig pa dang / 'du byed dang rnam par shes pa ste/ ma 'ongs pa'i skye ba mngon par 'grub par 'gyur bar bden pa rnams mi shes pa sngon du 'gro ba'i las kyi bag chags sems la bsgo ba'i phyir ro/ /'phangs pa'i yan lag ni ming dang gzugs dang / skye mched drug dang / reg pa dang / tshor ba ste/ sems kyi bag chags kyi ming dang gzugs la sogs pa snga ma la phyi ma brten nas rim gyis mngon par 'grub par bya ba'i ched du sems kyi bag chags de dag gi sa bon brtas pa'i phyir ro/ /mngon par 'grub par byed pa'i yan lag gi sred pa dang /len pa dang / srid pa ste/ 'dod chags la sogs pa'i srid pa ma spangs pa'i dbang gis 'dod pa la sogs par legs par spyod pa dang / nyes par spyod pa'i rnam pa la goms par dga' ba sngon du 'gro ba'i 'dun pa dang / 'dod chags kyis nye bar len pa dang bcas pa'i rnam par shes pa yod par gyur na 'chi ba'i dus na 'bras bu 'byin par bya ba la 'dun pa dang /'dod chags kyi rjes su mthun pa'i las gang yang rung ba'i bag chags mngon du 'gyur ba'i phyir ro/ /mngon par grub pa'i yan lag ni skye ba dang rga shi ste/ rnam pa des de las gzhan gyi bag chags mngon du gyur na ji ltar 'phangs pa bzhin du 'gro ba dang skye gnas la sogs pa'i bye brag tha dad pa'i ris mthun pa gang yang rung bar ming dang gzugs la sogs pa mngon par 'grub pa'i phyir ro//skye ba dang rga shi smos pa ni 'dus byas kyi mtshan nyid gsum gyi skabs kyis skyo bar bya ba'i phyir ro//rga ba dang 'chi ba yan lag gcig tu bya ba ni rga ba med par yang 'chi ba srid pa'i phyir ro/ /mngal nas skye ba'i skye gnas su ming dang gzugs la sogs pa med par skye mched drug la sogs pa 'byung ba ni de lta ma yin te/ de'i phyir de dag yan lag so sor bya bar rig par bya'o//yan lag rkyen nyid du rnam par gzhag pa ni rkyen bzhi'i dbang du byas pa ste/ de la ma rig pa ni 'du byed rnams kyi rkyen te/ snga logs su byung ba'i bag chags kyis rgyu'i rkyen to/ /des yongs su bsgos pa'i rgyu las byung ba'i las rnams yang srid par mngon par 'du byed par nus pa'i phyir te/de'i tshe kun tu 'byung ba'i tshul can no/ /shugs kyis zhes bya ba ni de ma thag pa'i rkyen te/ de'i tshe 'phen pa'i bye brag gis 'du byed kyi rgyun gyi rgyun chags par 'byung ba'i phyir ro/ /yid la byed pas zhes bya ba ni dmigs pa'i rkyen te/rmongs pa'i dus na mchog la sogs par tshul bzhin ma yin pa yid la byed pas dmigs pa'i phyir ro/ /lhan cig byung bas zhes bya ba ni bdag po'i rkyen te/ de'i dbang gis de dang mtshungs par ldan pa'i sems las byung ba rnams dmigs pa la phyin ci log tu mngon par 'du byed pa'i phyir ro//ma rig pa ni srid pa la sems can rnams rmongs par byed ces bya ba ni des bsgribs pa rnams sngon gyi mtha' dang phyi ma'i mtha' dang bar gyi mtha' yang dag pa ji lta ba bzhin du yongs su mi shes pa'i phyir te/ 'di ltar ci bdag 'das pa'i dus na byung ba zhig gam/ 'on te ma byung ba zhig snyam pa la sogs pa de ltar the tshom za ba'o//'du byed rnams kyi rkyen kyang yin no zhes bya ba ni de'i dbang gis yang srid pa'i las la sogs pa'i phyir ro/ /'du byed rnams ni yang 'gro ba rnams su sems can dag rnam par 'byed ces bya ba ni las kyi dbang gis sems can rnams 'gro ba gzhan du 'gro ba sna tshogs pa'i phyir ro//rnam par shes pa'i bag chags kyi rkyen kyang yin zhes bya ba ni phyi ma la ming dang gzugs la sogs pa 'grub par 'gyur bar sa bon gso bar byed pa'i phyir ro/ /rnam par shes pa ni sems can rnams kyi las kyi 'ching ba 'dzin pa zhes bya ba ni 'du byed kyis bskyed pa'i bag chags dang lhan cig 'byung ba'i phyir ro//ming dang gzugs kyi rkyen kyang yin zhes bya ba ni rnam par shes pa ma'i mngal du zhugs na ming dang gzugs kyi lus 'phel bar 'gyur ba'i phyir ro/ /ming dang gzugs ni sems can rnams lus len du 'jug ces bya ba ni de grub na sems can rnams ris mthun par gzhan la brten pa'i phyir ro//ming dang gzugs la sogs pa skye mched drug la sogs pa'i rkyen du 'gyur ba ni yan lag snga ma la brten nas yan lag phyi ma 'grub par blta'o/ /skye mched drug ni sems can rnams lus rdzogs par len du 'jug pa zhes bya ba ni de 'grub na dbang po gzhan ma tshang ba med pa'i phyir ro//reg pa ni yul gyi longs spyod la sems can rnams 'dzud pa zhes bya ba ni de'i sgo nas bde ba myong bar 'gyur ba la sogs pa'i yul rnam pa gsum la longs spyod pa'i phyir ro/ /tshor ba ni skye ba'i longs spyod la sems can rnams 'dzud pa zhes bya ba ni de la brten nas 'dod pa la sogs pa'i las kyi rnam par smin pa la nye bar spyod pa'i phyir ro//srid pa'i rkyen kyang yin no zhes bya ba ni de dang phrad pa la sogs par 'dod pa'i sgo nas sred pa 'byung ba'i phyir ro/ /sred pa ni sems can rnams kyi skye ba 'dren pa zhes bya ba ni de'i dbang gis tshe gzhan du brgyud pa rgyun mi 'chad pa'i phyir ro//len pa'i rkyen kyang yin no zhes bya ba ni ro myang bar 'dod pa'i sgo nas 'dod pa la sogs pa la 'dun pa dang 'dod chags 'byung ba'i phyir ro/ /len pa ni yang srid pa len pa'i phyir sems can rnams kyi rnam par shes pa nye bar len pa dang bcas par byed ces bya ba ni sems can dmyal ba la sogs pa'i 'gro ba bye brag can du yang srid pa'i nying mtshams sbyor bar 'gyur ba'i las kyi bag chags nges par byed pa'i phyir ro//srid pa'i rkyen kyang yin no zhes bya ba ni de'i dbang gis 'du byed kyi bag chags 'byung ba rnyed pa'i phyir ro//srid pa ni yang srid par sems can rnams mngon du phyogs par byed ces bya ba ni de ma thag tu 'gro ba gzhan 'dren pa'i phyir ro/ /skye ba'i rkyen kyang yin no zhes bya ba ni de las ris mthun pa gzhan 'byung ba'i phyir ro/ /skye ba ni ming dang gzugs la sogs pa'i rim gyis sems can mngon par 'grub par byed pa ni phyi ma phyi ma'i gnas skabs gzhan 'dren pa'i phyir ro//rga shi'i rkyen kyang yin no zhes bya ba ni skye ba yod na de'i rgyus gzhan du 'gyur ba dang / 'jig pa srid pa'i phyir ro/ /rga shi ni yang dang yang na tshod 'gyur ba dang /srog 'gyur ba la sems can rnams sbyor ba'o zhes bya ba ni dar la bab pa dang / tshe rnam par 'jig pa la sbyor ba'o/ /rnam par shes pa las kyi kun nas nyon mongs par bsdu ba ni rnam par shes pa'i yan lag 'du byed kyi bag chags kyis rab tu phye ba'i phyir ro/ /byed pa po med pa'i don zhes bya ba ni dbang phyug la sogs pa'i byed pa po dang bral ba'i phyir ro//rgyu dang bcas pa las byung ba'i don zhes ba ba ni ma rig pa'i rgyu las byung ba'i phyir ro/ /sems can med pa'i don zhes bya ba ni rang bzhin gyis bdag med pa'i phyir ro/ /gzhan gyi dbang gis don zhes bya ba ni skyen la rag las pa'i phyir ro//g.yo ba med pa'i don zhes bya ba ni rkyen rnams byed pa med pa'i phyir ro/ /mi rtag pa'i don zhes bya ba ni ther zug ma yin pa'i phyir ro/ /skad cig ma'i don zhes bya ba ni skyes pa'i dus las pha rol tu mi gnas pa'i phyir ro/ /rgyu dang 'bras bu'i rgyud rgyun mi 'chad pa'i don zhes bya ba ni rgyu'i skad cig 'gag pa dus mnyam du 'bras bu'i skad cig 'byung ba'i phyir ro//rgyu dang 'bras bu mthun pa'i don zhes bya ba ni thams cad las thams cad mi 'byung ba'i phyir ro/ /rgyu dang 'bras bu sna tshogs kyi don zhes bya ba ni rgyu du ma dang gcig gi rnam pa las 'bras bu'i rnam pa gcig dang du ma 'byung ba'i phyir ro//rgyu dang 'bras bu so sor nges pa'i don zhes bya ba ni rgyu gzhan las 'bras bu gzhan mi 'byung ba'i phyir ro/ /yang don 'di dag gis rten cing 'brel bar 'byung ba rnam pa lngas zab par rig par bya ste/ rgyus zab pa ni mi mthun pa'i rgyu dang / rgyu med par smra ba'i gnyen por don gnyis kyis zab bo/ /mtshan nyid kyis zab pa ni bdag med pa nyid kyis te don gcig gis so/ /skye pas zab pa ni rkyen rnams las 'bras bu 'byung ba yang des ma byas pa'i phyir te/ don gnyis kyis so/ /gnas pas zab pa ni gnas med kyang gnas par snang ba'i phyir te/don gnyis kyis so/ /'byung bas zab pa ni rgyu las 'bras bu 'byung ba rnam par shes par dka' ba'i phyir te/ don bzhis zab pa'o/ /byed pa po med kyang las dang byed pa dang / de'i 'bras bu la spyod pa yod de/ 'di ni 'dir las dang 'bras bu chud mi za bar rig par bya'o/ /chos ni bdag nyid kyis ma byas pa ste/gang gis byed pa de ma skyes te med pa'i phyir ro/ /gzhan gyis kyang ma byas te rkyen rnams byed pa po ma yin pa'i phyir ro/ /gnyis kas kyang ma byas te/ rgyu de gnyis kyis ma byas pa'i phyir ro/ /rang gis byed pa dang / gzhan gyis byed pa dang / rgyu med pa las byung ba yang ma yin no zhes bya ba ni rkyen rnams 'bras bu skyed nus pa'i phyir ro//rnam grangs gzhan du na bdag nyid kyis ma byas pa ni rkyen la ltos pa'i phyir ro/ /gzhan gyis ma byas pa ni rkyen yod du zin kyang sa bon med pa ni mi skye ba'i phyir ro/ /gnyi gas ma byas pa ni de gnyi ga la g.yo ba med pa'i phyir ro/ /rgyu med pa las byung ba yang ma yin pa ni sa bon dang rkyen rnams la nus pa yod pa'i phyir ro//gzhan yang / rang gi sa bon las te gzhan las min/ /de la ltos phyir bdag gis byas ma yin/ /g.yo ba med phyir gnyis kyis ma byas la/ /de ni nus pas rgyu med byung ma yin/ /bdag las ma yin gzhan las ma yin zhes bya bas/mu rnam pa gnyis spong yang rten cing 'brel bar 'byung ba zab par 'gyur na/ gang du mu bzhi char spong ba lta smos kyang ci dgos/ de lta bas na 'di mchog tu zab par rig par bya'o/ /rnam par shes pa 'byung ba'i rab tu dbye ba zhes bya ba ni mig dang gzugs la brten nas mig gi rnam par shes pa 'byung ba zhes bya ba la sogs pa'o//'chi 'pho ba dang skye ba'i rab tu dbye ba zhes bya ba ni sems can gyi 'jig rten gyi dbang du byas pa ste/ ma rig pa'i rkyen gyis 'du byed rnams zhes bya ba la sogs pa'o/ /phyi'i lo tog 'byung ba'i rab tu dbye ba zhes bya ba ni sa bon la brten nas myu gu/myu gu la brten nas sdong bu ste/ de bzhin du sbu gu dang 'dab ma dang / /me tog dang 'bras bu rnams kyang sbyar bar rig par bya'o/ /'jig pa dang chags pa'i rab tu dbye ba zhes bya ba ni sems can thams cad kyi thun mong gi las kyi dbang la brten nas sa chen po la sogs pa 'byung ba'i phyir ro/ / zas kyis brten pa'i rab tu dbye ba zhes bya ba ni zas bzhi la brten nas sems can rnams khams gsum na gnas pa'i phyir ro/ /'dod dang mi 'dod pa'i 'gro ba rnam par 'byed pa'i rab tu dbye ba zhes bya ba ni legs par spyad pa dang nyes par spyad pa la brten nas bde 'gro dang ngan 'gror 'gro ba'i phyir ro/ /rnam par dag pa'i rab tu dbye ba zhes bya ba ni thar pa'i cha dang mthun pa la brten nas nges par 'byed pa'i cha dang mthun pa 'byung ba nas mthong ba dang bsgom pa'i lam gyi rim gyis dgra bcom pa thob pa'i bar dang /gzhan gyi sgra la brten nas nang du tshul bzhin yid la byed pa dang / yang dag pa'i lta ba dang gang zag pa thams cad zad pa'i bar du'o//mthu stobs kyis rab tu dbye ba zhes bya ba ni thob pa la brten nas mngon par shes pa la sogs pa yon tan khyad par can rnams 'byung ba'i phyir ro/ /de ltar rab tu dbye ba 'di dag gis 'du byed rnams rten cing 'brel bar 'byung ba rgya cher rtogs par bya'o//kun nas nyon mongs pa'i lugs dang mthun pa dang lugs dang mi mthun pa zhes bya ba ni 'byung ba'i rim pa'i dbang du byas pa ste/ ma rig pa'i rkyen gyis 'du byed rnams zhes bya ba la sogs pa ni lugs dang mthun par ston to/ /rga shi dang rga shi kun 'byung ba dang / rga shi 'gog pa dang /rga shi 'gog par 'gro ba'i lam zhes bya ba ni/ bden pa rnam par gzhag pa'i dbang du byas pa ste/ lugs dang mi mthun pa bstan par rig par bya'o/ /de bzhin du ma rig pa 'gags pas 'du byed 'gag ces bya ba la sogs pa ni rnam par byang ba'i lugs dang mthun pa ston to/ /gang med na rga shi mi 'byung ba dang /gang 'gags na rga shi 'gags pa zhes bya ba ni lugs dang mi mthun pa ston to/ /rgyu'i rkyen gang zhe na/ kun gzhi rnam par shes pa dang / dge ba'i bag chags so zhes bya ba ni zag pa dang bcas pa dang / zag pa med pa'i 'du byed rnams dang go rims bzhin no/ /kun gzhi rnam par shes pa ni rnam pa gnyis te/rnam par smin pa dang / mngon par 'du byed pa las byung ba'o/ /de la rnam par smin pa ni skye bas 'thob pa rnams kyi rgyu'i rkyan to/ /mngon par 'du byed pa las byung ba ni sbyor ba las byung ba rnams kyi ste/ phyi ma la kun gzhi rnam par shes pa gzhan gyi rgyu'i rkyen du blta bar bya'o//mngon par 'du byed pa las byung ba'i kun gzhi rnam par shes pa ni/ tshe de'i 'jug pa'i rnam par shes pa dang lhan cig 'byung ba'i bag chags bsgos par rig par bya'o/ /dge ba'i bag chags ni thar pa'i cha dang mthun pa rnams kyi bag chags su blta bar bya ste/ de dag ni 'jig rten las 'das pa thob pa'i rgyu mthun pa'i chos kyi rgyu las byung ba'i phyir de'i bag chags ni 'jig rten las 'das pa'i chos kyi rgyu nyid du rig par bya'o//yang ngo bo nyid ces bya ba la sogs pas ni rgyu drug po dag rgyu'i rkyen du ston to/ /de la ngo bo nyid dang rab tu dbye ba ni byed pa'i rgyur rnam par gzhag go//tshig lhag ma rnams ni go rims bzhin du lhan cig 'byung ba dang / mtshungs par ldan pa dang / skal ba mnyam pa dang / kun tu 'gro ba dang / rnam par smin pa'i rgyu rnams su rnam par gzhag par rig par bya'o/ /rgyu'i ngo bo nyid kyi dbang du byas nas byed pa'i rgyu rnam par gzhag pa'i phyir rgyu thams cad ni byed pa'i rgyu'i nang du 'dus par rig par bya'o//grogs la sogs pa ni bye brag bstan pa'i phyir so sor rnam par gzhag go/ /byed pa'i rgyu'i rab tu dbye ba la/ rnam par shes pa'i tshogs la sogs gang bstan pa de ni dpe tsam du blta bar bya'o/ /phyogs 'dis ni de lta bu'i rang bzhin can gzhan la yang mngon par brtag par bya ba'i phyir ro//de la 'byung ba'i byed rgyu ni de las 'bras bu ma byung ba 'byung ba'i phyir ro/ /gnas pa'i byed rgyu ni skyes pa'i rgyud rgyun mi 'chad par byed pa'i phyir ro/ /rten pa'i byed rgyu ni ltung ba'i gegs byed pa'i phyir ro/ /gsal ba'i byed rgyu ni sgrib pa bsal bar byed pa'i phyir ro//'gyur ba'i byed rgyu ni rgyud gzhan du 'gyur bar byed pa'i phyir ro/ /'bral ba'i byed rgyu ni 'brel ba gnyis su gcod pa'i phyir ro/ /bsgyur ba'i byed rgyu ni de'i cha shas yul gzhan du 'pho bar byed pa'i phyir ro/ /yid ches pa'i byed rgyu ni des lkog tu gyur pa rjes su dpag pa'i phyir ro//yid ches par byed pa'i byed rgyu ni des yang dag par nges par byed pa'i phyir ro/ /thob pa'i byed rgyu ni des thob par byed pa'i rgyu'i phyir ro/ /tha snyad kyi byed rgyu ni ming ji lta ba bzhin du mtshan mar 'dzin pas mngon par zhen nas rjes su tha snyad 'dogs pa'i phyir ro//ltos pa'i byed rgyu ni gzhan du 'dod pa 'byung ba'i rgyu yin pa'i phyir ro/ /'phen pa'i byed rgyu ni de'i rgyu las byung ba gnas skabs gzhan du gcig nas gcig tu brgyud de 'byung bas 'phen pa'i phyir ro/ /mngon par 'grub pa'i byed rgyu ni de ma thag tu 'byung ba bskyed pa yin pa'i phyir ro/ / yongs su 'dzin pa'i byed rgyu ni rang gi sa bon las byung ba stobs bskyed pa'i phyir ro/ /chud par byed pa'i byed rgyu ni de'i rjes su mthun pas 'grub pa'i phyir ro/ /so sor nges pa'i byed rgyu ni rang bzhin tha dad pas 'bras bu gzhan dang gzhan 'byung ba'i phyir ro/ /lhan cig byed pa'i byed rgyu ni rang gi 'bras bu 'grub par byed pa la rgyu gzhan la ltos pa'i phyir ro//mi mthun pa'i byed rgyu ni gegs byed pa'i phyir ro/ /mi mthun pa ma yin pa'i byed rgyu ni de las bzlog par rig par bya'o/ /'di lta ste 'byung ba rnams dang / 'byung ba las gyur pa'o zhes bya ba ni ji ltar mthun mthun du sbyar gyi tshogs pa thams cad dang /gzugs la sogs pa 'byung ba las gyur pa la 'byung ba chen po bzhi po dag gdon mi za bar 'byung ba ni ma yin no/ /de'i phyir gang na gang yod pa de ni de dang lhan cig 'byung ste/ gang yang rung ba zhig med na ni ma yin no/ /de ltar na grogs su nges pas lhan cig 'byung ba'i rgyur rnam par gzhag go//'byung ba dag dang 'byung ba las gyur pa zhes bya bas de ni dper brjod pa tsam du zad par rig par bya'o/ /sems dang sems las byung ba rnams ni gang yang rung ba zhig med na mi 'byung bar nges pa'i phyir ro/ /gal te de ltar na mtshungs par ldan pa'i rgyu logs shig tu gzhag tu med par 'gyur te/sems dang sems las byung ba rnams lhan cig 'byung ba'i rgyu'i nang du 'dus pa'i phyir ro/ /de ltar yin du zin kyang don gzhan gyis mtshungs par ldan pa'i rgyur 'gyur te/ chos gang dag lhan cig 'byung bas dmigs pa mthun par rtogs kyi gang yang rung ba zhig ma tshang na ma yin pa ste/'di lta ste sems dang sems las byung ba rnams so/ /sngon dge ba dang mi dge ba dang lung du ma bstan pa'i chos bsgoms pa rnams zhes bya ba ni sngon goms par byas pa rnams te/ sngon kun tu spyad ces bya ba'i tha tshig go/ /phyi ma'i mtha' gong nas gong du shin tu rgyas pa dang mchog tu rgyas par 'byung ba gang yin pa'o zhes bya ba ni de dag gi sa bon yongs su gsos pa rnams te/de'i rgyu las byung ba rnams ma 'ongs pa'i dus na khyad par can du 'byung bar blta'o/ /de ltar na skal ba mnyam pa'i rgyu 'di ni 'dra ba rnams kyi rgyas par byed pa'i rgyur rnam par gzhag go/ /kun tu 'gro ba'i rgyu ni 'dra ba rgyas par byed pa 'ba' zhig tu ma zad kyi/'dod chags la sogs pa nyon mongs pa gang yang rung ba goms par byas pas zhe sdang la sogs pa'i rgyun rgyas par bstan par byed par 'gyur te/ de'i phyir dam du 'ching bar byed pas na thar pa thob pa'i bar du gcod pa'i phyir rnam par gzhag par rig par bya'o//rnam par smin pa'i rgyu ni phyi ma la gcig tu mi 'dra ba ma bsgribs la lung du mi ston pa'i lus su bsdus pa ste/ rnam par smin pa 'phen pa'i phyir yongs su 'dzin pa'i don gyis rnam par gzhag go/ /dge ba zag pa dang bcas pa smos pa ni zag pa med pa rnams kyi skye ba dang mi mthun pas 'phen pa ma yin pa'i phyir ro//rgyun mi 'chad par bar chad med pa zhes bya ba ni gdon mi za bar skad cig gi bar chad med pa ma yin gyi sems gzhan gyi bar chad med pa yang 'dir bar chad med par blta bar bya ste/ gzhan du na snyoms par 'jug pa'i sems ni sems med pa la snyoms par 'jug pa las langs pa'i sems kyi de ma thag pa'i rkyen du ni mi 'gyur ba'i rigs na 'gyur bas de'i phyir rgyud gcig la phyi ma'i sems dang /snga ma'i sems kyi bar du sems gzhan gyis bar du ma chod pa ni de ma thag pa'i rkyen to/ /sems la ji lta bar sems las byung ba rnams kyang de bzhin du rig par bya'o//mthun pa dang mi mthun pa las sems dang sems las byung ba 'byung ba'i de ma thag pas kyang zhes bya ba la/ sems dang sems las byung ba'i dge ba rnams ni mthun pa dge ba rnams dang / mi mthun pa mi dge ba dang / lung du ma bstan pa de ma thag tu 'byung ba rnams kyi de ma thag pa'i rkyen to//de bzhin tu mi dge ba dang lung du ma bstan pa rnams kyang rang dang gzhan gyi rnam pa rnams dang sbyar bar bya'o/ /de bzhin du 'dod pa na spyod pa rnams ni 'dod pa na spyod pa rnams dang / gzugs dang gzugs med pa na spyod pa dang / zag pa med pa de ma thag tu 'byung ba rnams kyi de ma thag pa'i rkyen to//de bzhin du gzugs na spyod pa la sogs pa yang so sor gzugs na spyod pa la sogs pa dang / 'dod pa na spyod pa la sogs pa de ma thag tu 'byung ba rnams kyi de ma thag pa'i rkyen to zhes sbyar bar bya'o/ /ci sems can thams cad kyi de ma thag tu sems thams cad 'byung ngam/'on te nges pa yod ce na/ nges pa yod ces bya ste sems 'di'i 'og tu sems 'di dang 'di 'byung ngo zhes brjod na ni brjod pa mang bar 'gyur ro/ /de lta bas na spyir sems 'byung ba'i mtshan nyid tsam rnam par gzhag go/ /'di ltar stobs bcus sems 'byung bar rig par bya ste/ 'dris pa'i stobs dang /'dun pa'i stobs dang / sbyor ba'i stobs dang / snyoms par 'jug pa'i stobs dang / 'phen pa'i stobs dang / rgyu'i stobs dang / yul gyi stobs dang / dran pa'i stobs dang / yid la byed pa'i stobs dang / nying mtshams sbyor ba'i stobs kyis so//'dris pa'i stobs ni rnam pa gsum ste/ chung ngu dang 'bring dang / chen po'o/ /snyoms par 'jug pa dang gnas pa dang / ldang ba'i rgyu rnams mi mngon pa'i phyir chung ngo / /mngon par legs par ma 'dris pa'i phyir 'bring ngo / /legs par 'dris pa'i phyir chen po'o/ /de la 'dris pa chung ngu'i stobs kyis ni bsam gtan dang gzugs med pa rnams la mthar gyis snyoms par 'jug par rig par bya'o//'bring gis ni gcig gis bar du gcod pa'i tshul gyis thod rgal du snyoms par 'jug go/ /chen pos ni ji ltar 'dod pa'am thams cad la thod rgal du zhugs nas lugs dang mthun pa dang lugs dang mi mthun par snyoms par 'jug par rig par bya'o//'dun pa'i stobs kyis ni bsam gtan gnyis pa thob pa bsam gtan dang po la snyoms par zhugs la/ gal te 'dod na bsam gtan gnyis pa'i sa pa las ldang ba'i sems mngon du byed do/ / gzhan du 'dod na yang 'dod pa na spyod pa dge ba'am ma bsgribs pa'i lung du ma bstan pa mngon du byed do/ /de bzhin du gzhan la'ang rgya cher sbyar bar bya'o/ /sbyor ba'i stobs kyis ni 'dod pa na spyod pa'i dge ba nyid kyi mjug thogs su thog ma kho nar gzugs na spyod pa'i sems 'byung ngo / /mi lcogs pa med pa'i dge ba'i mjug thogs su dngos gzhi'o//dngos gzhi'i mjug thogs su bsam gtan gnyis pa'i nyer bsdogs zhes bya ba la sogs pa nas rgya cher srid pa'i rtse mo'i bar du rig par bya'o/ /snyoms par 'jug pa'i stobs kyis ni dag pa la snyoms par 'jug pa'i sems res 'ga' ni dag pa pa gnyis skye'o//res 'ga' ni nyon mongs pa can no/ /'phen pa'i stobs kyis ni ting nge 'dzin las langs nas rgyu ba na ji srid du de dang mi mthun pa nyon mongs pa kun tu 'byung bas yongs su nyams par ma gyur pa de srid du mnyam par gzhag pa'i sa pa'i sems dang / mnyam par ma bzhag pa'i skad cig 'dren mar rjes su 'jug go//de dang mi mthun pa nyon mongs pa dang mtshungs par ldan pa'i sems ni rgyu la sogs pa'i stobs bzhis kun tu 'byung bar rig par bya'o/ /de la rgyu'i stobs kyis ni gal te gdon mi za bar yongs su nyams par 'gyur ba'i sgrib pa sngon bsags par gyur pa'o//yul gyi stobs kyis ni gal te 'dod chags la sogs pa 'byung ba dang mthun pa/ sdug pa la sogs pa'i mtshan ma'i stobs shas che ba'i yul snang bar 'gyur ba'o/ /dran pa'i stobs kyis ni gal te dran pa'i kun tu rtog pa dag gis 'das pa'i yul la 'pho bar byed pa'o/ /yid la byed pa'i stobs kyis ni gal te spyod pa'i yid la byed pas sdug pa'i mtshan ma gang yang rung ba yid la byed pa'o//nying mtshams sbyor ba'i stobs kyis ni/ 'chi ba'i sems rnam pa dgu ste lus la sred pa dang mtshungs par ldan pa khams gsum du so sor 'dod pa dang gzugs dang / gzugs med pa na spyod pa dag go//de la 'dod pa'i khams nas shi 'phos nas 'dod pa'i khams de nyid du nying mtshams sbyor ba'i 'dod pa na spyod pa'i lus la sred pa dang mtshungs par ldan pa ni 'chi 'pho ba'i sems su rig par bya'o/ /gzugs dang gzugs med pa'i khams su nying mtshams sbyor ba'i sems ni gzugs dang gzugs med pa na spyod pa'i 'chi ba'i sems su rig par bya'o//de bzhin du gzugs dang gzugs med pa'i khams nas shi 'phos nas de nyid dang / gzhan du skyes pa'i sems kyang drug tu sbyar bar bya'o/ /lus la sred pa de ni lhan cig skyes pa dang / dmigs pa la mi spyod pa dang / bsgribs pa'i lung du ma bstan pa'o//lus dang lhan cig skyes pa 'di ni dmigs pa ni rnam pa yongs su mi gcod par rig par bya ste/ de'i dbang gis de ma thag tu so so'i skye bo rnams ni bar ma do'i srid par nying mtshams sbyor ro/ /'phags pa 'dod chags dang ma bral ba rnams ni 'chi ba'i dus na ji tsam du 'du shes mi gsal ba'i gnas skabs su ma gyur pa de srid du sred pa de kun tu 'byung ngo //de dag ni yongs su rtogs nas gnyen pos tshar gcod do/ /'phags pa 'dod chags dang bral ba rnams ni ma spongs su zin kyang gnyen po'i stobs che bas de kun tu mi 'byung ngo / /de'i bag la nyal gyi dbang gis ni de dag nying mtshams sbyor ro//bar ma do'i srid pa'i nying mtshams sbyor ba'i skad cig ni rtag tu ma bsgribs pa'i lung du ma bstan pa nyid de/ rnam par smin pa'i phyir ro/ /de'i 'og tu ni dge ba dang mi dge ba dang lung du ma bstan pa ji ltar mthun mthun du sbyar te/ 'chi 'pho ba'i sems ma gtogs so/ / bar mdo'i srid pa'i 'chi 'pho ba'i sems ni rtag tu nyon mongs pa can te/ 'chi 'pho ba'i srid pa bzhin no/ /skye ba'i nying mtshams sbyor ba ni rtag tu ma bsgribs pa'i lung du ma bstan pa nyid du rig par bya'o/ /byang chub sems dpa' smon lam gyi stobs kyis skye ba rnams kyi 'chi ba'i sems la sogs pa ni thams cad kyang gcig tu dge bar rig par bya'o//de ma thag pa'i rkyen gyi skabs rdzogs so// //yul yongs su chad pa'i dmigs pa zhes bya ba ni/ rnam par shes pa tshogs lnga po dag gi dmigs pa ste/ rnam par shes pa'i tshogs lnga po dag gi yul so sor nges pa'i phyir ro/ / yul yongs su ma chad pa'i dmigs pa zhes bya ba ni yid kyi rnam par shes pa'i dmigs pa ste/ chos thams cad yid kyi rnam par shes pa'i yul yin pa'i phyir ro/ /yul la bkra bar 'dzin pa med pa'i dmigs pa zhes bya ba ni ming la ma byang ba rnams kyi yid kyi rnam par shes pa'i dmigs pa ste/ ming dang yi ger byed mi nus pa'i phyir ro//yul la bkra bar 'dzin pa'i dmigs pa zhes bya ba ni/ de las bzlog par rig par bya'o/ /dngos po dang bcas pa'i yul gyi dmigs pa zhes bya ba ni lta ba dang / nga rgyal dang de dang mtshungs par ldan pa'i chos rnams ma gtogs par de las gzhan pa dag gi dmigs pa'o//dngos po med pa'i yul gyi dmigs pa zhes bya ba ni ma gtogs pa rnams kyi dmigs pa ste/ bdag gzhi yin pa'i phyir ro/ /dngos po'i dmigs pa zhes bya ba ni/ zag pa med pa la dmigs pa dang / skal ba mi mnyam pa'i khams dang / sa'i kun tu 'gro ba rnams dang /ma 'ongs pa'i dmigs pa gzhi gtan la phebs pa med pa ma gtogs par de las gzhan pa dag gi dmigs pa'o/ /kun tu brtags pa'i dmigs pa zhes bya ba ni ma gtogs pa rnams kyi dmigs pa ste/ rang gi kun brtags pa tsam la dmigs pa'i phyir ro/ /phyin ci log gi dmigs pa zhes bya ba ni rtag pa la sogs pa'i rnam par byung ba rnams kyi dmigs pa'o//phyin ci ma log pa'i dmigs pa zhes bya ba ni mi rtag pa la sogs pa'i rnam par 'byung ba rnams kyi dmigs pa'o/ /thogs pa dang bcas pa'i dmigs pa zhes bya ba ni shes bya'i sgrib pa ma spangs pa rnams kyi dmigs pa'o//thogs pa med pa'i dmigs pa zhes bya ba ni shes bya'i sgrib pa spong ba rnams kyi dmigs pa'o/ /dmigs pa'i rkyen gyi rnam par nges pa ni mtshan nyid dang / rab tu dbye ba dang / bzhag pa dang / yongs su shes pa dang spangs pas kyang dmigs pa rnam par gzhag par rig par bya'o//mtshan nyid kyis ji lta bu zhe na/ don gang der snang ba'i sems dang sems las byung ba'i chos rnams 'byung ba'i rgyu dang / de dag byung nas kyang don de la mngon par zhen pa dang / tha snyad 'dogs pa dang / so so rang gis rig par 'gyur ba ni dmigs pa'i mtshan nyid do//rab tu dbye bas ji lta bu zhe na/ med pa'i dmigs pa ni 'di lta ste/ sems dang sems las byung ba phyin ci log pa rnams kyi dmigs pa dang / 'das pa dang / ma 'ongs pa dang / rmi lam dang / gzugs brnyan dang / sgyu ma la sogs pa'i dmigs pa'o/ /yod pa'i dmigs pa ni de las gzhan pa dag gi dmigs pa'o//dmigs pa med pa'i dmigs pa ni gzugs dang / sems dang ldan pa ma yin pa dang / 'dus ma byas so/ /dmigs pa dang bcas pa'i dmigs pa ni 'di lta ste/ sems dang sems las byung ba'i chos rnams so/ /yang dag pa nyid kyi dmigs pa ni 'di lta ste dge ba'o//log pa nyid kyi dmigs pa ni 'di lta ste nyon mongs pa can no/ /yang dag pa nyid kyang ma yin la log pa nyid kyang ma yin pa'i dmigs pa ni 'di lta ste ma bsgribs pa'i lung du ma bstan pa'o/ /tshul bzhin gyi dmigs pa ni 'di lta ste/ sems dang sems las byung ba'i dge ba rnams kyi dmigs pa'o//tshul bzhin ma yin pa'i dmigs pa ni 'di lta ste/ nyon mongs pa can rnams kyi dmigs pa'o/ /tshul bzhin yang ma yin la tshul bzhin ma yin pa yang ma yin pa'i dmigs pa ni de dag ma gtogs pa rnams kyi dmigs pa'o/ /'dra ba'i dmigs pa ni 'di lta ste/dge ba la sogs pa rnams kyi dge ba la sogs pa dang / rang gis pa rnams kyi rang gis pa dang / zag pa dang bcas pa rnams kyi zag pa dang bcas pa dang / zag pa med pa rnams kyi zag pa med pa'o/ /mi mthun pa'i dmigs pa ni 'di lta ste/ dge ba la sogs pa rnams kyi mi dge ba la sogs pa dang /sa gzhan pa rnams kyi sa gzhan pa dang / zag pa dang bcas pa dang / zag pa med pa rnams kyi zag pa med pa dang / zag pa dang bcas pa'o/ /sna tshogs kyi dmigs pa ni 'di lta ste/ sems dang sems las byung ba rtog pa dang bcas dpyod pa dang bcas pa rnams kyi dmigs pa'o//gcig pu'i dmigs pa ni 'di lta ste/ sems dang sems las byung ba mi rtog mi dpyod pa rnams kyi dmigs pa'o/ /'bral ba'i dmigs pa ni 'di lta ste/ 'du shes med pa la sogs pa'i sems dang sems las byung ba rnams dang / nam mkha' dang rnam shes mtha' yas skye mched kyi dmigs pa'o//'bral ba ni med par 'gyur ba'o/ /gzhan du na 'bral ba chen po nyid la bya'o/ /bsdus pa phra ba'i dmigs pa ni 'di lta ste/ ci yang med pa'i skye mched pa rnams kyi dmigs pa'o/ /mthar phyin pa'i phra ba'i dmigs pa ni 'di lta ste/ 'du shes med 'du shes med min skye mched pa rnams kyi dmigs pa'o//nyon mongs pa'i dmigs pa ni des dmigs par byed pa'i phyir dmigs pa zhes bya'o/ /mdo sde'i tshig la yod pa'i chos kyi dmigs pa ni 'di lta ste/ gtsug lag rnams kyi ming gi tshogs dang / tshig gi tshogs dang / yi ge'i tshogs rnams so/don gyi dmigs pa ni de la brten pa brjod par bya ba'i don gang yin pa'o/ /chung ngu'i dmigs pa ni 'di lta ste/ nyan thos kyi theg pa'o/ /rgya chen po'i dmigs pa ni 'di lta ste/ theg pa chen po'o/ /mtshan ma'i dmigs pa ni 'di lta ste/ zhi gnas dang / rab tu 'dzin pa dang /btang snyoms kyi mtshan ma rnams so/ /mtshan ma med pa'i dmigs pa ni 'di lta ste/ mya ngan las 'das pa dang / srid pa'i rtse mo'o/ /de kho na'i dmigs pa ni 'di lta ste/ /de bzhin nyid dang / rnam pa bcu drug po dag gi dmigs pa'i bden pa rnams so/ /gnas par bya ba'i dmigs pa ni 'di lta ste/'gog pa'i snyoms par 'jug pa la sbyor ba sems dang sems las byung ba rnams kyi dmigs pa'o/ /dbang bsgyur ba'i dmigs pa ni 'di lta ste/ rnam par thar pa la sogs pa rnam pa thams cad mkhyen pa nyid kyi mthar thug pa'i yon tan rnams kyi dmigs pa'o/ / skad cig pa'i dmigs pa ni 'di lta ste/ mi slob pa rnams kyi tshe de nyid do/ /rjes su 'brang ba rnams kyi dmigs pa ni 'di lta ste/ sangs rgyas dang byang chub sems dpa' rnams kyi dmigs pa'o/ /gzhan pa ji lta bu zhe na/ de bzhin du rnam par gzhag pa'i phyir dmigs pa yongs su ma grub pas so//rnam pa bzhis yongs su ma grub pa'i dmigs par rig par bya ste/ rnam par shes pa mi mthun pa'i rgyu dang / dmigs pa med pa'i rnam par shes pa dmigs pa dang / bsgribs pa med par yang phyin ci log med par 'gyur ba dang / shes pa gsum gyi rjes su mthun par 'gyur bas so//de'i phyir 'dzin pa yang yongs su ma grub pa'o/ /shes pa rnam pa gsum ni dbang gi shes pa dang / lhag mthong gi shes pa dang / rnam par mi rtog pa'i shes pa'o/ /de la rnam pa bzhi'i dper brjod pa ni/ /yi dags dud 'gro mi rnams dang / /lha rnams ji ltar rigs rigs su/ / dngos gcig yid ni tha dad phyir/ /don ma grub par 'dod pa yin/ /'das sogs de bzhin rmi lam dang / /gzugs brnyan rnam pa gnyis po yang / /med phyir dmigs pa med pa'i phyir/ /de ni dmigs par rung ma yin/ don ni don du grub gyur na/ /mi rtog ye shes med par 'gyur//shes pa rtog pa med mi 'gyur/ /de med pas na sangs rgyas nyid/ /thob par 'thad pa ma yin no/ /byang chub sems dpa' dbang thob dang / /rnal 'byor pa la 'di ltar yang / /mos pa'i dbang gis sa la sogs/ /dngos po de ltar dmigs par 'gyur/ /'di la rnam par 'byed grub dang //blo ldan zhi ba thob pa yi/ /chos kun yid la byed pa la/ /de ltar don ni snang ba'i phyir/ /mi rtog ye shes rgyu ba la/ /don kun snang ba med phyir yang / /don med khong du chud par bya/ /de med pas na rnam rig med/ /yongs su shes pas ji lta bu zhe na/ mtshan nyid dang /rab tu dbye ba dang / gzhag pa rnams yang dag pa ji lta ba bzhin du rab tu shes pa'i phyir ro/ /spong bas ji lta bu zhe na/ nyan thos dang theg pa chen pos gnas gyur pa ste/ nyan thos kyi theg pas gnas gyur pas ni/ phung po dang khams dang skye mched kyi dmigs pa dag las rnam par thar gyi/de dag la dbang 'byor pa thob pa ni ma yin no/ /theg pa chen pos gnas gyur pa ni gnyis pa'o/ /dmigs pa'i rkyen gzhung ji lta ba bzhin du rnam par nges pa rdzogs so// //rten la dbang byed pa zhes bya ba la rlung gi dkyil 'khor la sogs pa ni chu'i dkyil 'khor la sogs pa la rten la dbang byed pas bdag po'i rkyen to//snod kyi 'jig rten ni sems can gyi 'jig rten gyi'o/ /'byung ba rnams ni 'byung ba las gyur pa rnams kyi'o/ /dbang po rnams ni rnam par shes pa rnams kyi'o zhes bya ba la sogs pa'o/ /'phen pa la dbang byed pa zhes bya ba la sems can thams cad kyi thun mong gi las ni snod kyi 'jig rten 'phen pa la dbang byed pas bdag po'i rkyen to//sngon gyi zag pa dang bcas pa'i las rnams ni rnam par smin pa'i'o zhes bya ba la sogs pa'o/ /lhan cig 'byung ba la dbang byed pa zhes bya ba la/ sems ni sems las byung ba rnams kyi lhan cig 'byung ba la dbang byed pas bdag po'i rkyen to//yid la byed pa ni sems kyi'o/ /reg pa ni tshor ba'o zhes bya ba la sogs pa'o/ /'di man chad ni dbang po nyi shu rtsa gnyis kyi dbang du byas te/ bdag por rnam par gzhag par rig par bya'o/ /de la yul la dbang byed pa zhes bya ba ni mig dang rna ba dang sna dang lce dang lus dang yid kyi dbang po rnams te/de'i dbang gis gzugs la sogs pa mngon par 'grub ba'i phyir ro/ /skye bar dbang byed pa zhes bya ba ni pho dang mo'i dbang po ste/ de'i dbang gis mngal du 'jug pa'i phyir ro/ /gnas par dbang byed pa zhes bya ba ni srog gi dbang po ste/de'i dbang gis ris mthun par gnas pa'i phyir ro/ /'bras bu la nye bar spyod par dbang byed pa zhes bya ba ni bde ba dang / sdug bsngal dang / yid bde ba dang / yid mi bde ba dang / btang snyoms kyi dbang po rnams te/ de'i dbang gis sdug pa dang mi sdug pa'i rnam par smin pa so sor nyams su myong ba'i phyir ro//'jig rten pa'i rnam par dag pa la dbang byed pa zhes bya ba ni dad pa dang / brtson 'grus dang / dran pa dang / ting nge 'dzin dang / shes rab kyi dbang po rnams te/ de dag gis nyon mongs pa rnam par gnon pa'i phyir ro//'jig rten las 'das pa'i rnam par dag pa la dbang byed pa zhes bya ba ni mi shes pa kun shes par byed pa'i dbang po dang / kun shes pa'i dbang po dang / kun shes pa dang ldan pa'i dbang po la rnam par gzhag par rig par bya ste/ de dag gis bag la nyal legs par bcom pa'i phyir ro//rnam par shes pa dang ma bral zhing de dang 'dra ba'i dbang po yul la rgyun du 'byung ba zhes bya ba ni brten pa mtshungs par rig par bya ste/ rnam par shes pa dang ldan zhing rnam par shes pa dang 'dri ba'i dbang po yul rnams la rgyun du 'byung zhing rnam par shes pa 'byung ba dang 'dra ba'i phyir dbang po de ni brten pa dang mtshungs pa zhes bya'o//rnam par shes pa dang bral zhing rang dang 'dra ba rgyun du 'byung bas zhes bya ba ni de dag dang mtshungs pa ste/ rnam par shes pa dang mi ldan pa'i dbang po bdag nyid dang 'dra ba ni rgyun du 'byung zhing dbang po'i mtshan nyid dang 'dra ba'i phyir de dang mtshungs par rig par bya'o//gzugs kyi phung po'i phyogs gcig ces bya ba ni mig la sogs pa dbang po lnga'i mtshan nyid do/ /gzugs can gyi khams dang skye mched lnga'o zhes bya ba ni mig la sogs pa nyid do/ /tshor ba 'byung ba'i gnas kyi gzugs kyi zhes bya ba ni gzugs gang la brten nas tshor ba 'byung ba de zin pa zhes bya'o//gzugs kyi phung po'i phyogs gcig ces bya ba ni gnas dang bcas pa'i dbang pos bsdus pa'o/ /khams dang skye mched gzugs can lnga/ /zhes bya ba ni mig la sogs pa'o/ /bzhi'i phyogs gcig go zhes bya ba ni gzugs dang / dri dang / ro dang / reg bya dbang po las gzhan du ma gyur pa'o/ /yul la 'dzin par dbang byed pa zhes bya ba ni mig la sogs pa drug ste/ de'i dbang gis gzugs la sogs pa'i dmigs pa la sems dang sems las byung ba rnams 'byung ba'i phyir ro/ /rigs kyi rgyud la dbang byed pa zhes bya ba ni pho dang mo'i dbang po ste/de las bu dang tsha bo la sogs pa'i rigs 'byung ba'i phyir ro/ /lhag ma ni bdag po'i rkyen ji skad bstan pa de bzhin du khong du chud par bya'o/ /gzugs kyi phung po'i phyogs gcig ces bya ba ni/ mig dang / rna ba dang / sna dang / lce dang / lus dang / yid dang / pho dang mo'i dbang po'i mtshan nyid do/ /'du byed kyi phung po'i phyogs gcig ces bya ba ni srog dang / dad pa dang / brtson 'grus dang / dran pa dang ting nge 'dzin dang / shes rab kyi dbang po'i mtshan nyid do/ /khams bcu gnyis zhes bya ba ni dbang po dang / rnam par shes pa'i khams rnams so//skye mched drug ces bya ba ni nang gi rnams so/ /chos kyi khams dang / skye mched kyi phyogs gcig go zhes bya ba ni srog gi dbang po dang / bde ba la sogs pa dang dad pa la sogs pa lnga lnga'o/ /sdug bsngal gyi tshor ba ni sdug bsngal gyi bdag nyid yin te/ rang gi mtshan nyid kho nas sdug bsngal gyi sdug bsngal nyid do//de las 'byung ba'i rgyur gyur pa dbang po dang / don rnams dang de dang mtshungs par ldan pa rnams ni sdug bsngal myong bar byed pa'i phyir sdug bsngal gyi sdug bsngal nyid du blta'o/ /bde ba'i tshor ba dang / de myong bar byed pa'i chos rnams 'gyur bas yid mi bde ba 'byung ba'i phyir de 'gyur ba ni 'gyur ba'i sdug bsngal nyid do//de la yang rjes su chags pas sems 'gyur ba ni 'gyur ba'i sdug bsngal nyid du rig par bya ste/ ji skad du zhen nas gyur pa'i sems kyis zhes gsungs pa lta bu'o/ /sdug bsngal yang ma yin bde ba yang ma yin pa'i tshor ba kun gzhi rnam par shes pa dang mtshungs par ldan pa dang /de myong bar byed pa'i 'du byed rnams dang / sdug bsngal dang / 'gyur ba'i sdug bsngal nyid kyi gnas ngan len dang ldan pa dang / sdug bsngal de gnyis las rnam par ma grol bas res 'ga' ni bde ba'i gnas skabs la brten/ res 'ga' ni sdug bsngal gyi gnas skabs la brten te/rtag tu khor mor sdug bsngal yang ma yin bde ba yang ma yin pa'i gnas skabs su 'gyur ba ni ma yin no/ /de lta bas na mi rtag pa rjes su bcings pas grub pa dang / bde ba ma yin pa'i phyir 'du byed kyi sdug bsngal nyid du rig par bya'o/ /phung po rnams dang khams gsum ni yid dang chos dang yid kyi rnam par shes pa'i khams rnams so//skye mched gnyis ni yid dang chos kyi skye mched do/ /phyogs gcig ma gtogs pa ni zag pa med pa'i mtshan nyid do/ /thams cad do zhes bya ba ni de las gzhan pa dag go/ /mi dge ba dang dge ba zag pa dang bcas pa'i rnam par smin pa'i kun gzhi rnam par shes pa mtshungs par ldan pa dang bcas pa ni phyi ma la yod de/de'i phyir rnam par smin pa des na de gnyis rnam par smin pa dang bcas pa zhes bya'o/ /kun gzhi rnam par shes pa las gzhan pa mig la sogs pa dang / bde ba dang sdug bsngal la sogs pa ni rnam par smin pa de las byung ba zhes brjod pa 'thob ste/de las skyes pa'i phyir ro/ /phung po rnams dang khams bcu zhes bya ba ni rnam par shes pa bdun dang / gzugs dang sgra dang / chos kyi khams rnams so/ /skye mched bzhi zhes bya ba ni gzugs dang sgra dang / yid dang / chos kyi skye mched rnams so//phyogs gcig go zhes bya ba ni lung du ma bstan pa dang / zag pa med pa ma rtogs pa'o/ /'ju bas kyang 'ju ba las gyur pa zhes bya ba ni kham gyi zas 'ju ba'i dus na dbang po'i 'byung ba chen po brtas par byed pa'i phyir ro/ /yul gyis kyang yul las gyur pa zhes bya ba ni reg pa'i zas te/yid du 'ong ba'i yul gyi gnas kyis reg pas lus la phan 'dogs pa'i phyir ro/ /re bas kyang re ba las gyur pa zhes bya ba ni yid la sems pa'i zas te/ 'dod pa'i dngos po dang 'brel ba'i re ba'i dbang gis lus la phan 'dogs pa'i phyir ro/ /len pas kyang len pa las gyur pa zhes bya ba ni rnam par shes pa'i zas te/kun gzhi rnam par shes pa nye bar len pa'i dbang gis lus gnas pa'i phyir te/ 'di ltar de dang bral na lus rul bar 'gyur ba'i phyir ro/ yang zas rnam pa bzhi po dag ni bsdus nas rnam pa bzhis rnam par gzhag go/ /'di lta ste/ma dag pa'i lus gnas par byed pa ni 'dod pa na spyod pa'i so so'i skye bo rnams kyi ste/ mtha' dag ni 'ching ba dang ldan pa'i phyir ma dag pa'i gnas so/ /dag pa dang ma dag pa'i lus gnas par byed pa ni slob pa rnams dang / gzugs dang gzugs med pa na spyod pa'i so so'i skye bo rnams kyi ste/'ching ba'i lhag ma las pa'i phyir ro/ /dag pa'i lus gnas par byed pa ni dgra bcom pa rnams kyi ste/ 'ching ba thams cad las rnam par grol ba'i phyir ro/ /gnas par kun tu ston pa ni sangs rgyas rnams dang / byang chub sems dpa' mthu chen po thob pa rnams kyi ste/zas kyi dbang gis gnas par kun tu ston pa tsam gyi phyir ro/ /'dus ma byas kyi phyogs gcig gis kyang gong ma dang bcas pa zhes bya ba ni mya ngan las 'das pa ma gtogs pa ste/ de'i mtshan nyid ni rnam par dag pa'i de bzhin nyid yin pas de ni chos thams cad kyi mchog yin pa'i phyir ro//bsdus pa'i rab tu dbye ba ni rnam pa gsum ste/ gang zag la bdag med pa'i tshul gyis ngo bo nyid gsum gyi dbang du byas par rig par bya'o/ /de la kun tu brtags pa'i ngo bo nyid ni phung po la sogs pa la brten nas med par yang bdag la sogs pa'i ngo bo nyid du gang kun tu rtog pa'o//gzhan gyi dbang gi ngo bo nyid ni phung po la sogs pa de dag ni gang du yang dag pa ma yin pa bdag la sogs pa'i rnam par rtog pa de 'byung ba'o/ /yongs su grub pa'i ngo bo nyid ni dngos po dang dngos po med pa dang mi ldan pa'i mtshan nyid de/ phung po la sogs pa la bdag la sogs pa med pa pa dang bdag med pa la sogs pa yod pa nyid kyi mtshan nyid kyi phyir ro//mtshan nyid kyis rab tu dbye ba ni chos rnams kyi rang bzhin gyi dbang du byas te/ gzugs dang tshor ba la sogs pa'o/ /rnam pa'i rab tu dbye ba ni khyad par gyi dbang du byas nas rdzas su yod pa dang / btags pa'i yod pa zhes bya ba la sogs pa'o//lus kyi rab tu dbye ba ni so so'i lus te/ phung po la sogs pa tha dad pa'i dbang du byas pa'o/ /rgyun gyis rab tu dbye ba ni lus gcig la yang phung po la sogs pa'i skad cig so so gzhan gyi dbang du byas pa'o/ /phyi rol tu bltas pas rab tu dbye ba gang zhe na/ phal cher 'dod pa'i khams na spyod pa zhes bya ba ni rgyu mthun pa'i chos kyi rgyu las byung ba'i thos pa dang / sems pa las byung ba ma rtogs pa ston pa'i phyir ro// //bam po bzhi pa/ mtshan nyid kyis bsdus pa ni gzugs kyi phung po nyid kyis gzugs kyi phung po bsdus pa nas/ rgya cher chos kyi skye mched kyis chos kyi skye mched bsdus pa'i bar du'o//khams kyis bsdus pa gang zhe na/ phung po dang khams dang skye mched thams cad kun gzhi rnam par shes pas bsdus pa ste/ de la de dag thams cad kyi sa bon yod pa'i phyir ro/ /rigs kyis bsdus pa ni phung po rnams kyis spungs pa la sogs pa'i don dang ldan pa gzugs la sogs pa'o//rang gi mtshan nyid kyis phan tshun mtshan nyid mi 'dra yang rigs gcig pa'i phyir thams cad bsdus so/ /de bzhin du khams rnams dang / skye mched rnams kyis kyang nye bar spyod pa 'dzin pa'i don dang ldan pa dang / skye ba'i sgo'i don dang ldan pa mig la sogs pa bsdus par rig par bya'o//gnas skabs kyis bsdus pa ni phung po rnams rigs gcig tu zin kyang bde ba la sogs pa'i gnas skabs nges par byas nas bde ba'i gnas skabs ni bde ba'i gnas skabs nyid kyis bsdus kyi/ sdug bsngal gyi gnas skabs kyis ni ma yin no//de bzhin du sdug bsngal gyi gnas skabs kyang de nyid kyi gnas skabs kyis bsdus so/ /phung po rnams ji lta bar khams rnams dang / skye mched rnams kyang de bzhin no/ /grogs kyis bsdus pa zhes bya ba la/ gzugs kyi phung po ni sdud pa na de la brten pa tshor ba la sogs pa grogs rnams dang lhan cig tu phung po lnga po dag gis bsdus so//de bzhin du tshor ba la sogs pa 'khor dang bcas pa rnams kyang sdud pa na so sor phung po lnga po dag gis bsdus par 'gyur ro/ /de bzhin du khams rnams dang / skye mched 'khor dang bcas pa rnams kyang so sor khams dang skye mched thams cad kyis bsdus par rig par bya'o//phyogs gcig gis bsdus pa zhes bya ba la/ tshul khrims kyi phung po ni gzugs kyi phung po'i phyogs gcig gis bsdus so/ /ting nge 'dzin dang shes rab kyi phung po ni 'du byed kyi phung po'i phyogs gcig gis bsdus so//'dod pa dang / gnod sems dang / rnam par 'tshe ba'i khams ni chos kyi khams kyi phyogs gcig gis bsdus so/ /nam mkha' mtha' yas skye mched la sogs pa ni yid dang chos kyi skye mched kyi phyogs gcig gis bsdus so/ /de ltar byas na mdo sde gzhan dag tu phung po dang khams dang skye mched kyis bsdus pa'i chos ji snyed pa de dag gang yang rung bas bsdus pa ni phyogs gcig gis bsdus par rig par bya'o//mtha' dag gis bsdus pa zhes bya ba la/ sdug bsngal gyi phung po lnga po nye bar len pa'i phung po lnga po dag gis bsdus so/ / 'dod pa'i khams ni bco brgyad po dag gis bsdus so/ /'du shes med pa'i sems can gyi skye mched ni dri dang ro'i skye mched ma gtogs pa skye mched bcu po dag gis bsdus pa'o/ /de ltar byas na mdo sde gzhan dag tu phung po dang khams dang skye mched rnams kyis bsdus pa'i chos ji snyed pa de dag ni mtha' dag gis bsdus par rig par bya'o//gcig gis gcig bsdus pa zhes bya ba la/ phung po rnams ni so sor khams dang skye mched rnams kyis bsdus te/ ji ltar mthun mthun du sbyar ro/ /de bzhin du khams rnams kyang phung po dang skye mched rnams kyis bsdus shing / skye mched rnams kyang phung po dang khams kyis bsdus par rgya cher khong du chud par bya'o//yang bsdus pa'i mtshan nyid ni 'jig rten gyi grags pas bsdus pa dang mthun par rnam pa drug tu blta ste/ de yang gang zhe na/ gzhi'i gnas kyis bsdus pa ni dper na mi 'dzam bu'i gling gis bsdus so/ /ri dgas rnams ni dgon pas bsdus so zhes 'jig rten na brjod pa de bzhin du 'dir yang mig la sogs pas mig gi rnam par shes pa la sogs pa bsdus par rig par bya'o//'ching bas bsdus pa ni dper na thag pa la sogs pas shing khur ba la sogs pa bcings pa de bzhin du lus kyis mig la sogs pa'i dbang po rnams bcings so//don mthun pas bsdus pa ni dper na dgos pa thams cad mthun pa'i mi yid gcugs pa rnams phan tshun brten pa de bzhin du dmigs pa gcig la 'byung ba mtshungs par ldan pa rnams kyang gcig gis gcig bsdus so/ nye bar 'dzin pas bsdus pa ni/ dper na jo bos bran la sogs pa bdag gir yongs su bzung ba de bzhin du kun gzhi rnam par shes pas kyang lus bzung ngo / /rnam par mi 'phro bas bsdus pa ni dper na bum pas chu bzung ba de bzhin du ting nge 'dzin gyis de las gzhan pa'i sems dang sems las byung ba rnams bzung ngo / / mngon par sdud pas bsdus pa ni/ dper na rgya mtshos 'bab chu rnams bsdus pa de bzhin du gzugs kyi phung pos mig la sogs pa bsdus so/ /'dir mngon par sdud pas bsdus pa'i dbang du byas nas bsdus pa rnam pa bcu gcig tu rig par bya'o/ rdul phra rab kyi phyogs la phyogs can thams cad ces bya ba ni rdul phra rab gcig tu gtogs pa'i gzugs la sogs pa ni phyogs mthun pas tha dad pa med par rig par bya'o/rdul phra rab las gong ma phyogs can rnams 'dres par gyur pa ni 'di lta ste/ chu rnyog ma can gyi nang na chu dang sa'i rdul phra rab rnams phan tshun du 'dres pa lta bu'o//phyogs can 'dus pa rnams phan tshun du phrad pa ni 'di lta ste/ rtsig pa la 'jim gong dang 'jim gong gzhan phrad pa lta bu'o/ /lhan cig 'byung bas mtshungs par ldan pa ni lus gcig la phung po la sogs pa skad cig pa rnams so/ /bya ba grub pas mtshungs par ldan pa ni dgos pa cig la zhugs pa rnams phan tshun du'o//mthun par rtogs pas mtshungs par ldan pa ni gzhan gyi dngos po dang yin gyi rang gi dngos po dang ni ma yin pa ste/ 'di ltar sems ni sems gzhan dang mtshungs par ldan pa ma yin zhing tshor ba yang tshor ba gzhan dang mtshungs par ldan pa ma yin pa la sogs pa'o//mi mthun pa gnyis ma yin pa ni dper na 'dod chags dang zhe sdang gnyis dang / dge ba dang mi dge ba gnyis la sogs pa'o/ /dus mi 'dra ba gnyis ma yin pa ni 'di lta ste/ da ltar dang ma 'ongs pa gnyis dang / 'das pa dang da ltar gnyis so/ /mi mthun pa'i khams dang sa pa gnyis ma yin pa ni 'di lta ste/'dod pa dang gzugs na spyod pa gnyis dang / bsam gtan dang po dang / gnyis pa'i sa pa gnyis la sogs pa'o/ /mthun par gtogs pas mtshungs par ldan pa tshor ba la sogs pa drug pa 'di dag ni kun tu 'gro ba ste/ gnas skabs thams cad du 'di dag las gang yang rung ba gcig med na med pa'i phyir ro/ /'dris pa ni slob pa dang mi slob pa dag las kyang kha cig go zhes bya ba ni gcig tu 'jig rten pa'i dge ba rnams dang / mi dge ba rnams dang / lung du ma bstan pa rnams kyis te/ ji ltar mthun mthun du sbyar ro//dang po de dang de'i 'og ma rnams zhes bya ba ni 'jig rten las 'das pa skad cig dang po las byung ba rnams dang / skad cig gnyis pa la sogs pa las byung ba rnams kyang sngon gyi rang bzhin ma yin pas ma 'dris pa nyid du bstan pa'i phyir ro/ /ldan pa gang zhe na/mtshan nyid kyis ni snga ma bzhin no zhes bya ba ni 'di lta ste/ dge ba la sogs pa'i chos rnams kyi 'phel ba dang 'grib pa la 'thob pa dang rnyed pa dang ldan pa gdags so zhes bya'o/ /sa bon dang ldan pa gang zhe na/ 'dod pa'i khams su skyes par gyur ba ni khams gsum pa'i nyon mongs pa dang /nye ba'i nyon mongs pa dang ldan te/ de ni so so'i skye bo 'dod chags dang ma bral ba'i dbang du byas par rig par bya'o/ /'dod chags dang bral ba ni de'am/ gong mar skyes kyang rung ste/ sa gong gis 'dod chags dang bral bar sa de pa rnams dang / de dag dang mi ldan pa dang /ldan pa yang yin te/ gnyen pos gnod par byas pa dang / bag la nyal legs par ma bcom pa'i phyir go rims bzhin no/ /skye bas thob pa'i dge ba rnams zhes bya ba ni gong du skyes pa'i sa pa de'i sa pa rnams nyid dang ldan no/ /khams gsum pa'i gnyen po thob pa zhes bya ba ni 'jig rten las 'das pa'i lam thob pa'o//rnam pa gang dang gang gi gnyen po byung ba zhes bya ba ni bsgoms pas spong bar bya ba'i nyon mongs pa chen po la sogs pa'o/ /de dang de'i sa bon dang mi ldan pas ldan pa ma yin zhes bya ba ni/ bag la nyal legs par bcom pa'i phyir ro/ /dbang dang ldan pa gang zhe na/sbyor ba las byung ba dge ba'i chos 'jig rten pa rnams zhes bya ba ni thos pa las byung ba la sogs pa'i sa bon yod du zin kyang de goms par ma byas pas tshe de'i sa bon brtas pa med pas mngon du byed mi nus pa'i phyir ro/ /de dag las kyang lung du ma bstan pa kha cig ces bya ba ni bzo'i gzas nas sprul pa'i sems la sogs pa'o//thar pa'i rgyu dang mi ldan pa'i phyir/ de dag gtan du rgyu dang mi ldan te/ 'jig rten las 'das pa rnams dang / thar pa thob pa'i rgyu dang mi ldan pa zhes bya ba'i tha tshig go/ /thar pa thob pa'i rgyu gang yin zhe na/ de bzhin nyid la nyon mongs pa'i gnas ngan len gnas pa yin te/rgyu gang gnyen po'i rjes su mthun pa'i rkyen rnyed na legs par 'joms nus pa de skal ba dang ldan pa'i phyir rgya zhes bya'o/ /bzlog pa ni rgyu dang mi ldan par rig par bya'o/ /de ni sems can gyi skye ba dang skye ba'i gnas kyis kyang zhes bya ba ni sems can gyi 'jig rten gang skye ba dang snod kyi 'jig rten gang du skye ba de gnyi ga sdug bsngal gyi bden pa zhes bstan pa yin no//sems can gyi 'jig rten gang yin pa dang / snod kyi 'jig rten gang yin pa de las dang nyon mongs pas skyed pa dang / las dang nyon mongs pa'i dbang gis byung ba zhes bya ba ni go rims bzhin te/de gnyis kyis ni sdug bsngal nyid kyi rgyu ston to/ /yang skye ba ni sdug bsngal lo zhes bya ba la sogs pa ni sngar mdor bsdus te sdug bsngal gyi bden pa'i mtshan nyid bstan nas/ da ni sdug bsngal gyi bden pa las brtsams te/ mdo sde las byung ba bstan pa'i don rnam par dbye bar brtsams te/skye ba'i sdug bsngal ni dog pa'i sdug bsngal nyid dang / de las gzhan pa'i sdug bsngal gyi gnas yin pa'i phyir ro zhes bya ba ni ma'i mngal na zhu ba dang ma zhu ba gnyis kyi bar na 'dug pa las 'byung ba dang / mngal na mi gtsang ba'i rdzas sna tshogs kyis gzir te/ lus kyi yan lag kun tu btsir ba la sogs pa'i sdug bsngal myong ba'i phyir ro/ /btsas nas kyang rga ba la sogs pa'i sdug bsngal zhar la 'byung ba'i phyir te/ go rims bzhin no/ /brgyad yin yang drug tu 'gyur zhes bya ba ni gsum 'gyur ba'i sdug bsngal du byas pa'i phyir ro/ /skye ba la sogs pas sdug bsngal gyi sdug bsngal nyid yongs su bstan to zhes bya ba ni sdug bsngal myong bar 'gyur ba'i chos kyi rang gi mtshan nyid yin pa'i phyir ro//sdug pa dang bral ba'i dngos po la sogs pas 'gyur ba'i sdug bsngal nyid yongs su bstan to zhes bya ba'i tshig ni phrad pa dang ma phrad pas bde ba myong bar 'gyur ba'i chos 'gyur ba'i rang gi mtshan nyid yin pa'i phyir ro//nye bar len pa'i phung po lnga sdug bsngal lo zhes bya ba 'dis ni 'du byed kyi sdug bsngal nyid yongs su bstan to zhes bya ba'i tshig 'di gnyis las rnam par ma grol zhing mi rtag pa nyid rjes su 'brel te grub pa dang bde ba ma yin pa'i phyir ro//skye ba ni sdug bsngal lo zhes bya ba la sogs pa ni kun rdzob kyi bden par sdug bsngal ba ste/ 'jig rten pa'i shes pa'i yul yin pa'i phyir ro/ /nye bar len pa'i phung po lnga sdug bsngal lo zhes bya ba ni gnas pa'i de bzhin nyid kyi sgo nas don dam pa'i bden par sdug bsngal ba ste/'jig rten las 'das pa'i shes pa'i yul yin pa'i phyir ro/ /sdug bsngal gyi spyi'i mtshan nyid ni rnal 'byor pas rnam pa gang dag gis sdug bsngal gyi bden par spyad pa ste/ 'di lta ste mi rtag pa nyid dang / sdug bsngal ba nyid dang /stong pa nyid dang / bdag med pa nyid kyis so/ /de la mtshan nyid rnam pa bcu gnyis kyis mi rtag pa sdug bsngal gyi bden par rig par bya ste/ de yang med pa'i mtshan nyid ni 'di lta ste/ bdag dang bdag gi ba'i ngo bo nyid kyi sdug bsngal ba'i bden pa rtag tu med pa'i don gang yin pa'i don de ni mi rtag pa sdug bsngal gyi bden pa'o//mi zhes bya ba ni dgag pa'i don yin pa'i phyir ro/ /rtag ces bya ba'i sgra ni dus thams cad pa'i don yin pa'i phyir ro/ /rnam par 'jig pa'i mtshan nyid ni 'du byed rnams byung nas med par 'gyur ba'o/ /'gyur ba'i mtshan nyid ni rgyu mi 'dra ba nyid du 'byung ba'o//'bral ba'i mtshan nyid ni dngos po'i gnas skabs de dag nyid la rang bzhin gyi dbang nyams pa dang / kha cig tu ni gzhan dag gis bdag gir byas par yang rig par bya'o/ /nye ba'i mtshan nyid kyi tshe na mi rtag pa nyid myong ba gang yin pa'o/ /chos kyi mtshan nyid ni gang gdon mi za bar myong bar 'gyur ba'o//skad cig gi mtshan nyid ni bdag nyid rnyed nas de ma thag tu gdon mi za bar rnam par 'jig pa nyid do/ /rgyun gyi mtshan nyid ni thog ma med pa can gyi 'khor ba nas 'ong ba dang / 'gro bar 'gyur bas 'byung ba'o/ /na ba dang rga ba dang 'chi ba'i mtshan nyid ni khams ma snyoms pa dang /spyi cer du gyur pa dang / gnas pa'i dus kyi 'phen pa zad pa'o/ /sems sna tshogs kyi rnam par 'gyur ba'i mtshan nyid ni mi mthun pa'i phyogs dang gnyen po'i gnas la gnas pa'o/ /longs spyod 'byor pa rgud pa'i mtshan nyid ni 'jig rten pa'i 'byor ba thams cad gtan du 'dug pa ma yin pas mthar nyes pa nyid do//snod 'jig pa dang chags pa'i mtshan nyid ni sa chen po la sogs pa me la sogs pas yang dang yang 'jig pa dang 'byung ba ste/ me dang chu dang rlung 'tshig par byed pa dang rul bar byed pa dang skam par byed pa'i bdag nyid kyi 'jig pa rnams dang go rims bzhin du bsam gtan dang po dang /gnyis pa dang gsum pa'i gnas kyi mthar thug par 'jig rten gnas pa 'jig go/ /de'i gong ma lhag ma lus pa bsam gtan gnyis pa dang / gsum pa dang / bzhi pa'i gnas gzhan gang yin pa de dag ni de dag gis bsdus bar rig par bya'o//bsam gtan bzhi pa rnams kyi gzhal med khang rnams gang gis 'jig cing chags she na/ phyi rol gang gis kyang ma yin gyi gzhal med khang de dag ni sems can de dag nyid skye ba dang lhan cig tu 'grub cing 'chi ba dang lhan cig tu 'gag ste/ de nyid de dag gi 'jig pa dang chags par rig par bya'o//de dag gis bskal ba tshar phyin par 'gyur ro zhes bya ba ni yongs su rdzogs par 'gyur zhes bya ba'i tha tshig go/ /chags pa'i dus na mar 'bri ba bar gyi bskal pa gcig dang / yar 'phel ba dang mar 'bri ba bco brgyad de bcu dgu'o/ /de'i 'og tu tha mar yang skye ba gcig go//tshe zad ces bya ba ni 'chi ba ste/ tshe'i 'phen pa ji tsam yongs su rdzogs pa'i phyir dus su 'chi ba'i dbang du byas pa'o/ /bsod nams zad ces bya ba ni dus ma yin par 'chi ba'i dbang du byas pa ste/ snyoms par 'jug pa'i ro myong bar byed pas de'i tshe 'phen par byed pa'i las bsgos pa las gnod pa'i phyir ro//las kyang zad nas zhes bya ba ni rgyun chad nas 'chi ba'i dbang du byas pa ste/ gnas der skyes nas myong bar 'gyur ba dang / lan grangs gzhan la myong bar 'gyur ba'i las spyad zin pa'i phyir ram/ med pa'i phyir der yang mi skye bar rig par bya'o//sdug bsngal rnam pa brgyad ces bya ba ni dog pa'i sdug bsngal nyid la sogs pa'o/ /skye ba'i char gtogs pa'i mi rtag pa nyid ni ma byung ba las 'byung ba ste/ de ni sdug bsngal gyi phyogs kyi 'du byed rnams la gnod pa'i bdag nyid do/ /mi rtag pa nyid de la brten nas sdug bsngal gyi sdug bsngal nyid rab tu shes so//'jig pa'i char gtogs pa na byung nas med par 'gyur ba ste/ de ni bde ba'i phyogs kyi 'du byed rnams kyi mi 'dod pa'o/ /de la brten nas 'gyur ba'i sdug bsngal nyid rab tu shes so/ /gnas ngan len dang bcas pa'i 'du byed rnams kyi rgyun du 'byung ba dang /'jig pa yang 'dod pa ma yin te/ de gnyi ga'i char gtogs pa'i mi rtag pa nyid la brten nas 'du byed kyi sdug bsngal nyid rab tu shes so/ /ngas 'du byed mi rtag pa nyid dang / 'du byed 'gyur ba nyid la dgongs nas gang ci tshor yang rung 'di ni 'dir sdug bsngal du gsungs so zhes bya ba ni 'dir sdug bsngal yang ma yin bde ba yang ma yin pa dang /bde ba myong ba ni sdug bsngal nyid kyi tshig tu dgongs par rig par bya'o/ /sdug bsngal myong ba ni sdug bsngal nyid du 'jig rten na grags pa'i phyir der yang dgongs pa brjod mi dgos so/ /'du byed mi rtag pa gang dag la skye ba la sogs par snang ba de dag ni mi rtag pa nyid kyi phyir sdug bsngal du dgongs par rig par bya'o//gzhan du na ni lam yang mi rtag pa'i phyir sdug bsngal du 'gyur ro/ /stong ba'i mtshan nyid ni rtag pa la sogs pa'i mtshan nyid kyi bdag 'du byed rnams las don gzhan du gyur ba ste/de dag la med pa'o/ 'du byed de dag ni rtag tu de dang bral ba'i rang bzhin gyi mtshan nyid kyi bdag med pa'i ngo bo nyid yin te/ 'di gnyi ga yang stong pa nyid ces bya'o/ /ngo bo nyid kyis stong pa nyid ni kun brtags pa'i ngo bo nyid nye bar bzung ba ste/ /rang gi mtshan nyid kho nas med pa'i phyir ro//de bzhin du yod pa ma yin pa'i stong pa nyid ni gzhan gyi dbang gi ngo bo nyid nye bar bzung ba ste/ de ni rnam pa gang dang gang kun tu brtag par bya ba'i rnam pa de dang de med pa'i phyir ro/ /rang bzhin gyis stong pa nyid ni yongs su grub pa'i ngo bo nyid nye bar bzung ba ste/ de ni stong pa nyid kyi rang bzhin yin pa'i phyir ro//bdag med pa'i mtshan nyid ni 'du byed de dag nyid bdag tu smra ba rnams kyis kun tu brtags pa'i bdag gi mtshan nyid ma yin pa nyid do/ /'du byed thams cad 'jig pa la sogs pa'i mtshan nyid mi rtag pa nyid du ni grags la/ skad cig pa'i mtshan nyid du ni ma grags te/de'i phyir de bsgrub par bya'o/ /de la sems dang sems las byung ba rnams la ni skad cig pa nyid du 'jig rten du grags te/ de'i phyir des ma grub pa'i gzugs kyi skad cig pa nyid bsgrub bo/ /ji ltar zhe na/ sems kyis zin pa zhes bya ba ni sems skad cig pas lus zin pa'o/ ci'i phyir zhe na/ grub pa dang bde ba gcig pa'i phyir te/ 'di ltar rnam par shes pa dang bcas pa nyid kyi lus ni yang dag par 'grub kyi/ rnam par shes pa dang bral ba ni rul bar 'gyur ro/ /de lta bas na sems dang grub pa dang bde ba gcig pa'i phyir de bzhin du 'di yang skad cig pa nyid du rig par bya'o//sems gyur na de 'gyur ba'i phyir zhes bya ba ni bde ba dang sdug bsngal dang / 'dod chags dang zhe sdang la sogs pa'i gnas skabs na sems 'gyur bas lus 'gyur bar snang ste/ de'i phyir skad cig re re la 'gyur ba'i sems kyi rjes su 'gyur bas lus skad cig pa nyid du grub bo//sems kyi gnas yin pa'i phyir zhes bya ba la/ dbang po dang bcas pa'i lus ni sems kyi gnas su rab tu grub pa ste/ gang zhig gang gi skye ba'i gnas yin pa de bdag 'jig pa med par de'i gnas su 'gyur bar mi snang ste/ dper na me dang myu gu la sogs pa'i shing dang sa bon la sogs pa bzhin no//de bas na skad cig re re la sems kyi gnas su gyur pas skad cig re re kho na la rnam par 'jig pa grub bo/ /sems kyi dbang gis 'byung ba'i phyir zhes bya ba la nang dang phyi'i gzugs thams cad ni sems kyi dbang gis byung ba ste/ de bas na rgyu skad cig pa yin pa'i phyir/'bras bu yang skad cig pa nyid du rig par bya ste/ gzugs 'byung ba'i rgyu gang dag yin pa dang / rkyen gang dag yin pa de dag ni mi rtag pa yin na/ rgyu rkyen mi rtag pa la brten nas 'byung ba'i gzugs rtag par ga las 'gyur zhes mdo las byung ba'i tshig gi tshul du rig par bya'o//sems dbang bsgyur ba'i phyir ro zhes bya ba ni mthu khyad par du 'phags pa'i sems gzugs la dbang bsgyur ba ste/ de ji ltar 'dod pa bzhin du bsgyur ba'i phyir ro/ /de'i phyir skad cig re re la rnam pa gzhan du mos na rnam pa gzhan 'byung bas skad cig pa nyid du grub po/ /yang mthar 'gyur bar dmigs pa'i phyir zhes bya ba ni/skad cig re re la rang bzhin gyis 'gyur ba med par glo bur du gzugs kyi tha mar 'gyur ba'i mi rigs na zhes dpe gzhan las 'byung ngo / /mtha' mi 'gyur ba'i rigs na/ de yang dmigs pa de bas na mtha' ma'i gzugs kyi 'gyur ba'i rang gi rgyud kyi skad cig re re 'gyur ba 'phel ba'i rgyu las byung ba'i phyir gzugs skad cig par grub bo//skyes nas kyang rkyen la mi ltos par rang gi ngang gis rnam par 'jig pa'i phyir zhes bya ba ni skyes pa thams cad ni rkyen la mi ltos par rang gi ngang nyid kyis 'jig par 'gyur ro//de'i phyir rkyen gzhan la mi ltos par gdon mi za bar 'jig ste/ dngos po skyes pa tsam nyid kyis 'jig pa ma yin la/ phyis 'jig go zhes bya bar ni bye brag cung zad kyang med do/ /de lta bas na rnam par 'jig pa'i tshul can thams cad ni skyes pa tsam gyis 'jig par 'gyur bas skad cig pa nyid du grub bo//phyogs gcig la brten pa'i dngos po'i don ni rgyur byas pa'i don to zhes bya ba ni 'byung ba'i phyogs la mi ltos par 'byung bar gyur pa logs shig tu rang dbang du 'byung ba'i mthu med pa'i phyir ro/ /'byung ba gcig las gyur ba'i 'dus pa yang yod de/'di lta ste sa rdog skam po lta bu'o/ /'byung ba gnyis las gyur pa yang yod de/ de nyid gsher ba'o/ /'byung ba gsum las gyur pa yang yod de de nyid dro ba'o/ /'byung ba thams cad las gyur pa yang yod de/ sa rdog de nyid gsher ba dang dro ba dang 'dril zhing 'gro ba'i tshe'o//'dus pa rgyur byas pa'i gzugs gcig pa yang yod de/ 'di lta ste 'od lta bu'o/ /rgyur byas pa'i gzugs gnyis dang ldan pa yang yod de 'di lta ste sgra dang / dri dang bcas pa'i rlung lta bu'o/ /rgyur byas pa'i gzugs gsum dang ldan pa yang yod de/ 'di lta ste/du ba lta bu'o/ /de ni gzugs dang dri dang reg bya'i bye brag gis rab tu phye ba'i phyir te/ reg bya'i bye brag ni 'dir yang ba nyid du rig par bya'o/ /yang rgyur byas pa'i gzugs gsum dang ldan pa yang yod de/ dri rnam pa med pa'i nor bu'i snod kyi nang na yod pa'i chu la gzugs dang ro dang reg bya yod pa'o//rgyur byas pa'i gzugs bzhi dang ldan pa yang yod de/ 'di lta ste/ bu ram gyi ling lta bu'o/ /rgyur byas pa'i gzugs lnga dang ldan pa yang yod de/ 'di lta ste/ de nyid sgra dang bcas pa'o/ /de ltar gzhan la yang 'byung ba'am 'byung ba las gyur ba gang na gang dmigs pa de na yod par rig par bya ste/gzhan du na ni ma yin no/ /rdul phra rab lus med pa zhes bya ba ni rang gi ngo bo nyid med pa ste/ rnam par gzhag pa tsam du zad do zhes bya ba'i tha tshig go/ /bshig na mu thug pa med pa'i phyir ro/ /blos mthar rab tu phye nas rdul phra rab tu rnam par gzhag ces bya ba ni blos ji tsam du cha shas kyis bshig pa'i mthar rab tu dbye bar nus pa de tsam du rdul phra rab tu rnam par 'jog par byed pa'o//ci'i phyir de ltar lus med kyang rdul phra rab tu rnam par 'jog ce na/ ril po'i 'du shes rnam par bshig pa'i phyir te/ gzugs la blos cha shas kyis bshig na 'di thams cad ni gzugs gcig go zhes ril por 'du shes pa dang bral bar 'gyur te/'di ltar gang zag la bdag med par 'jug pa'i rjes su mthun par 'gyur ro/ /gzugs la rdzas su yongs su grub pa med par 'jug par bya ba'i phyir ro zhes bya ba ni/ de ltar blos rab tu phye na gzugs ci yang med par rtogs nas gzugs la rdzas su yongs su grub pa med par 'jug ste/ 'di ltar rnam par rig pa tsam du 'jug pas chos la bdag med pa la 'jug pa'i rjes su mthun par 'gyur ro/ /blo'i dbye ba dang rdzas kyi dbye bas rdul phra rab rnam par gzhag par shes par bya ste/tshig gnyis dang go rims bzhin no/ /sdug bsngal shin tu rgyas la ma bsrabs pa ni 'dod pa'i khams na spyod pa'i dge ba'i rtsa ba ma bsags pa rnams kyi ste/ 'dod pa'i khams ni sdug bsngal nyid thams cad dang / 'gro ba dang skye gnas kyis rab tu phye ba dang /dge ba'i rtsa ba ma bsags pas na/ thogs pa med par 'gro ba thams cad du 'gro ba'i phyir te/ go rims bzhin du de ni shin tu rgyas la ma bsrabs par rig par bya'o/ /bsrabs pa ni de nyid thar pa'i cha dang mthun pa skyes pa rnams kyi ste/ gdon mi za bar yongs su mya ngan las 'das par nges par bya ba'i phyir ro//bsrabs pa'ang ma yin la ma bsrabs pa'ang ma yin pa ni 'dod pa na spyod pa'i sdug bsngal de nyid 'jig rten pas 'dod chags dang bral bar bya ba'i phyir dge ba'i rtsa ba bskyed pa rnams kyi ste/ sdug bsngal gyi sdug bsngal nyid la sogs pa las yang dag par shin tu 'da' bar nges par byas pa dang /gtan du ma yin pa'i phyir te/ go rims bzhin no/ /bar ma bsrabs pa la sogs pa yang de bzhin du ji ltar mthun mthun du sbyar bar bya'o/ /bsrabs pa chen pos nye bar gnas pa zhes bya ba ni sems can du ma'i rgyud la yod pa'i sdug bsngal bsal bar nye bar gnas pa'i phyir ro//dge ba la sogs pa'i sems yod pa la 'chi ba zhes bya ba ni bdag la chags pa dang mtshungs par ldan pa'i 'chi 'pho ba'i sems kyi snga rol gyi gnas skabs kyi dbang du byas par rig par bya'o/ /yid las byung ba zhes bya ba ni rdzus te skye ba nyid de/sems tsam gyi rgyu las byung ba'i phyir ro/ /dri za zhes bya ba ni dris 'gro ba'i phyir te/ dri dang mthun par skye ba'i yul du 'gro ba'i phyir zhes bya ba'i tha tshig go/ /de ltar thogs na zhag bdun gnas te/ de tshun chad kyis 'chi 'pho'o zhes bya ba ni gal te skye ba'i rkyen rnyed na'o//ci ste ma rnyed na zhag bdun gyi 'og tu shi 'phos nas yang bar do'i srid pa nyid 'grub bo/ /de ltar lan bdun gyi bar du byas nas ci ste na ldog go zhes bya ba ni gal te gnas skabs de na gzhan du skye ba'i rkyen stobs dang ldan pa zhig mngon du gyur na ste/ bsam gtan bzhi pa thob pa'i dge slong dgra bcom pa'o snyam pa'i mngon pa'i nga rgyal can sa de pa'i bar mdo'i srid pa mngon par grub pa na thar pa la skur ba 'debs pa log par lta ba rnyed nas sems can dmyal ba'i bar mdo'i srid pa mngon par 'grub pa bzhin no//de na gnas pa yang las bsogs so zhes pa ni sngon gyi 'phen pa'i dbang gis dge ba la sogs pa'i sems kun tu 'byung ba'i phyir ro//skal ba mnyam pa'i sems can rnams kyang mthong zhes bya ba ni gang dag dang lhan cig tu sngon dge ba'am/ mi dge ba kun tu spyod par gyur pa de dag dang bdag lhan cig tu 'dug par rmi lam tsam gyi tshod du shes so//gang du skye bar 'gyur ba de'i sngon logs kyi srid pa'i byad gzugs grub bo/ /de'i 'og tu dbang po rnams mngon par 'grub ste/ rten cing 'brel bar 'byung ba las ji skad du 'byung ba de bzhin zhes bya ba ni ming dang gzugs la sogs pa'i rim pas so/ /ji skad du/thog ma nyid du nur nur 'gyur/ /nur nur po las mer mer 'gyur/ /mer mer po las nar nar 'gyur/ /nar nar po las gor gor 'gyur/ /gor gor po las rkang lag 'gyus/ /skra spu sen mo la sogs 'byung / /dbang po gzugs can rnams dang ni/ /mtshan rnams mthar gyis 'byung bar 'gyur//zhes gsungs pa lta bu'o/ /kun 'byung gi bden pa ni gang las sdug bsngal kun 'byung ba ste/ de yang gang zhe na/ nyon mongs pa dang nyon mongs pa'i dbang gis 'byung ba'i las te/ zag pa dang bcas pa'i zhes bya ba'i tha tshig go/ /gal te de lta ma yin na kun 'byung ba zhes bstan pa la ci'i phyir bcom ldan 'das kyis sred pa nyid bstan ce na/thams cad du 'gro bas gtso bor gyur ba'i phyir te/ ji ltar sred pa dngos po thams cad du 'gro ba ni thob pa dang ma thob pa'i yul dang yul gyi dngos po thams cad la khyab pa'i phyir ro/ /de la lus thob pa ni sred pa'o//ma thob pa ni yang 'byung ba'o/ /thob pa'i yul rnams ni dga' ba'i 'dod chags dang ldan pa'o/ /ma thob pa'i yul rnams ni/ de dang de la mngon par dga' bar rig par bya'o/ /gnas skabs thams cad du 'gro ba ni/ 'du byed rnams kyi sdug bsngal la sogs pa gnas skabs gsum po dag dang ldan pa'i phyir ro//de la sdug bsngal gyi sdug bsngal nyid kyi gnas skabs thob pa la ni 'bral bar srid do/ /ma thob pa la ni mi phrad par srid do/ /'gyur ba'i sdug bsngal nyid kyi gnas skabs la ni thob pa dang ma thob pa'i bye brag gis mi 'bral ba'i srid pa dang phrad pa'i sred pa'o//'du byed kyi sdug bsngal nyid kyi gnas skabs la ni gti mug gi sred pa ste/ nyon mongs pa'i gnas ngan len gyis rab tu phye ba dang / /sdug bsngal yang ma yin bde ba yang ma yin pa'i tshor bas rab tu phye ba'i phyir ro/ /bye brag tu ni kun gzhi rnam par shes pa ni 'du byed kyi sdug bsngal nyid kyi gnas skabs te/de la bdag tu rmongs pa'i sgo nas srid pa 'byung bar rig par bya'o/ /dus thams cad du 'gro ba ni dus gsum po dag ni rjes su 'gro ba'i phyir ro/ /'das pa'i dus la ni bltas pa'i rnam pas rjes su 'gro'o/ /ma 'ongs pa la ni mngon par dga' ba'i rnam pas rjes su 'gro'o//da ltar byung ba la ni lhag par chags pas rjes su 'gro'o/ /khams thams cad du 'gro ba ni 'dod pa dang / gzugs dang gzugs med pa dag gi sred pa dag gis khams gsum khyab pa'i phyir ro/ /tshor ba thams cad du 'gro ba ni des 'dod pa dang sred pa dang log pas tshangs par spyod pa tshol ba'i phyir ro//'dod pa'i tshol bas ni 'dod pa'i khams las yongs su ma grol ba de nyid du sdug bsngal 'grub par byed do/ /de bzhin du srid pa tshol bas ni gzugs dang gzugs med pa'i khams su sdug bsngal 'grub par byed do//log pas tshangs par spyod pa tshol bas ni 'khor ba las yongs su ma grol bar der 'khor ro/ /rnam pa thams cad du 'gro ba ni 'byung ba dang 'jig pa'i sred pas rtag pa dang chad pa'i rnam pa dang ldan pa'i phyir ro/ /lta ba rnam pa lnga'i bye brag ni 'jig tshogs la lta ba dang /mthar 'dzin par lta ba dang / log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa'o/ /rab tu ma zhi ba'i mtshan nyid ni nyon mongs pa rnams kyi spyi'i mtshan nyid du rig par bya'o/ /de la rnam pa drug ste/ 'di ltar g.yeng bas rab tu ma zhi ba dang /phyin ci log gis rab tu ma zhi ba dang / rgod pas rab tu ma zhi ba dang / rmugs pas rab tu ma zhi ba dang / bag med pas rab tu ma zhi ba dang / 'dzem pa med pas rab tu ma zhi ba'o/ /nyon mongs pa'i bag la nyal ma spangs par gyur pa zhes bya ba ni de'i phyogs dang mthun pa'i gnas ngan len legs par ma bcom pa'i phyir ro//nyon mongs pa'i gnas kyi chos snang bar gyur pa zhes bya ba ni chags par 'gyur ba la sogs pa'o/ /de la yang tshul bzhin ma yin pa yid la byed pa nye bar gnas pa yin zhes bya ba ni yul de la sdug pa'i mtshan ma la sogs pa 'dzin pa ste/'dod chags la sogs pa 'byung ba dang mthun pa'o/ /ma rig pa dang lta ba dang the tshom sa gong ma pa la dmigs pa yang yod mod kyi/ de dag ni ji ltar rang gi sa pa la dmigs pa bzhin du sa de mngon sum du dmigs pa ni ma yin par rig par bya ste/ de la kun tu brtags pa'i sgo nas zhugs pa'i phyir/de la dmigs par rnam par gzhag par rig par bya'o/ /de la ma rig pa sa gong ma pa la dmigs pa ni gang lta ba dang mtshungs par ldan pa'o/ /lta ba ni 'jig tshogs la lta ba ma gtogs te/ gzhan gyi sa pa'i 'du byed la nga'o snyam du mngon par zhen pa ni ma mthong ngo //sa gong ma'i nyon mongs pa ni sa 'og ma la dmigs pa ma yin no zhes bya ba ni de las 'dod chags dang bral ba'i phyir ro/ /'gog pa dang lam la dmigs pa ni de gnyis la dmigs pa ma yin te/ 'jig rten las 'das pa'i ye shes dang / de'i rjes la thob pa so so rang rang gis rig par bya ba yin pa'i phyir ro//de'i dmigs pa ni des yongs su rtogs pa'o zhes bya ba ni de'i dmigs pa ni des yongs su brtags pa'o zhes brjod par bya ste/ de'i dmigs pa ni des yongs su rtogs pa zhes bya ba'i tshig de las yongs su brtags pa gud na med do/ /'dod chags ni khong khro dang mtshungs par ldan pa ma yin no zhes bya ba ni shin tu mi mthun pa gnyis gcig tu 'byung ba mi rigs pa'i phyir ro//the tshom dang yang mtshungs par ldan pa ma yin pa ni/ the tshom du gyur na blo gnas pa med pas chags par 'gyur ba med pa'i phyir ro/ /lhag ma ni de dang zhes bya ba ni nga rgyal la sogs pa dang mi mthun pa med pa'i phyir mtshungs par ldan par rig par bya'o//khong khro ba yang nga rgyal dang lta ba dang mtshungs par ldan pa ma yin no zhes bya ba ni su zhig dngos po gang la zhe 'gras par gyur pa des de khengs par mi 'gyur ro/ /der yang rtog par mi nus so//de bzhin du gzhan la yang sbyar bar bya'o/ /khong khro ba la sogs pa phan tshun mtshungs par ldan pa ma yin pa zhes bya ba ni mi mthun pa dang mtshungs par ldan pa ma yin te/ dper na 'dod chags kyi char gtogs pa rnams zhe sdang gi char gtogs pa dag dang ma yin pa bzhin no/ /mi mthun pa med pa dag ni nyon mongs pa bzhin du mtshungs par ldan par rig par bya'o//ngo tsha med pa dang / khrel med pa ni mi dge ba thams cad dang mtshungs par ldan no zhes bya ba ni bdag dang gzhan la mi lta ba med par kun tu 'byung ba med pa'i phyir ro/ /de bzhin du rmugs pa la sogs pa yang nyon mongs pa can thams cad dang sbyar bar bya ste/las su mi rung ba nyid la sogs pa med par nyon mongs pa can mi srid pa'i phyir ro/ /gang zhig rnam pa gang gi dngos po gang la kun tu sbyor ba de bstan pas kun tu sbyor ba bstan par rig par bya'o/ /kun tu sbyor ba ci zhe na/ rjes su chags pa'i kun tu sbyor ba ni khams gsum pa'i 'dod chags kyi ngo bo nyid de kun tu sbyor bar byed do//rnam pa gang gis kun tu sbyor zhe na/ de dang ldan pa khams gsum pa la yid mi 'byung ba ni mi dge ba kun tu spyod cing dge ba mi spyod pas so/ /gang kun tu sbyor zhe na/ phyi ma la sdug bsngal mngon par 'grub par ro//de bzhin du khong khro'i kun tu sbyor ba la yang sbyar bar bya'o/ /mi rig pa'i kun tu spyod pa dang ldan pa ni sdug bsngal gyi chos rnams dang / kun 'byung ba'i chos rnams la lhag par chags te 'bras bu dang rgyur gyur pa zag pa dang bcas pa'i 'du byed rnams dang de'i nyes dmigs yongs su mi shes pa'i phyir ro//lta ba'i kun tu sbyor ba dang ldan pa ni log pas nges par 'byung ba kun tu tshol te bdag grol bar 'gyur ro/ /bdag grol lo/ /grol nas kyang rtag par 'gyur ro snyam pa dang chad par 'gyur te/ sangs rgyas pa la thar pa med do snyam pa'o//mchog tu 'dzin pa'i kun tu sbyor ba dang ldan pa ni log pas nges par 'byung ba'i thabs la rtog ste/ 'phags pa'i lam yan lag brgyad pa bor nas 'jig tshogs la lta ba la sogs pa dang / de sngon du 'gro ba'i tshul khrims dang brtul zhugs kyis lhag par yid ches pa'i phyir ro//'dod chags la sogs pa'i 'ching bas 'gyur ba'i sdug bsngal nyid la sogs pa la 'ching bar bstan pa ni 'dod chags la sogs pa ni bde ba la sogs pa'i tshor ba la phra rgyas su 'gyur ba'i phyir ro/ /phyi rol gyi 'ching bas bcings pa ni gnyis mi 'thob ste/ 'gro ba mi thob pa dang /'dug kyang ji ltar 'dod pa dang / bsam pa dang / spyod pa dang 'dod pa bzhin du byed pa mi thob pa'o/ /nang gi 'dod chags la sogs pa'i 'ching ba yang de dang 'dra bar rig par bya'o/ /'dod pa 'tshol ba ma spangs pa'i 'dod pa la 'dod chags dang / khong khro ba'i bag la nyal phra rgyas su 'gyur te/de'i sgo nas de gnyis rgyas par 'gyur ba'i phyir ro/ /log par thar pa dang / thar pa'i thabs la rtog par byed do zhes bya ba ni kun tu sbyor ba'i nang du lta ba gsum dang mchog tu 'dzin pa gnyis ji skad du bshad pa dang go rims bzhin no/ /gang 'dod chags la sogs pa nyon mongs pa rnams ma gtogs par de las gzhan pa sems las byung ba'i 'du byed kyi phung po nyon mongs pa can no zhes bya ba ni khro ba la sogs par rig par bya'o//rnal 'byor pa rnams kyi dge ba'i phyogs kyi bar chad bya ba'i phyir yang dang yang shas cher sems la kun nas 'khril bar byed pas kun nas dkris pa dag go//dge ba'i phyogs ni zhi gnas dang / rab tu 'dzin pa dang / btang snyoms kyi rgyu mtshan bsgom pa ste/ dus ji lta ba bzhin no/ /de dag gi gzhi ni tshangs par spyod pa la sogs pa dag pas bsdus pa'i tshul khrims so/ /de la zhi gnas kyi dus ni rmugs pa dang gnyid bar chad byed de/nang du zhum par byed pa'i phyir ro/ /rab tu 'dzin pa'i dus na ni rgod pa dang 'gyod pa ste/ phyi rol du rnam par g.yeng bar byed pa'i phyir ro/ /btang snyoms kyi dus na ni/ phrag dog dang ser sna ste/ de dang ldan na gzhan dang bdag gi phun sum tshogs pa la mi bzod pa dang /kun tu 'dzin pa'i sgo nas yang dang yang sems g.yo ba'i phyir ro/ /tshul khrims rnam par dag pa'i dus na ni/ ngo tsha med pa dang khrel med pa ste/ de gnyi ga dang ldan na rnam pa thams cad du ltung ba'i gnas kyis mi 'dzem pa'i phyir ro/ /kun nas nyon mongs pa dang rnam par byang ba'i rjes su mthun pa dang /mi mthun pa'i phyir chu bo dang sbyor ba go rims bzhin du rnam par gzhag par rig par bya'o/ /gnas pa dang gnas 'brel ba'i tshul gyis so zhes bya ba la/ lta ba'i chu bo ni gnas pa'o/ /ma rig pa'i chu bo ni gnas te/ rmongs par gyur na thar pa dang de'i thabs la log par rtog pa'i phyir ro/ /lta ba dang tshul khrims dang brtul zhugs kyi nye bar len pa gnyis kyis mu stegs can rnams nang rtsod de/ de la blo du mar gyur pa'i phyir ro/ /bdag tu smra ba'i nye bar len pas ni nang mi rtsod de/thams cad kyang bdag yod pa nyid du blo mthun pa'i phyir ro/ /chos 'di pa rnams dang ni rtsod de/ bdag med par smra ba'i phyir ro/ /brnab sems la sogs pa lus kyi mdud pa zhes bya ba ni de dag gzugs kyi lus kyi mdud pa ma yin par rig par bya ste/ mnyam par gzhag pa'i sems kyi rang bzhin gyi lus kyi bar du bcod pas mdud pa dag go//so so'i lta ba la brten nas 'di nyid bden gyi gzhan ni don med pa'o zhes mngon par zhen nas shes bya la kun tu rtog pas tshul bzhin ma yin par shes bya la log par rtog pa'i rgyus sems rnam par g.yeng bar byed do/ / gang las rnam par g.yeng bar byed ce na/ mnyam par gzhag pa'i sems yang dag pa ji lta ba bzhin du shes pa mthong ba la sogs/ dge ba'i phyogs mi rtogs par 'gyur bar sems la sgrib par byed pas sgrib pa rnams te/ dge ba la 'jug pa'i bar chad byed ces bya ba'i tha tshig go//de la 'dod pa la 'dun pa ni rab tu 'byung ba la mngon par dga' ba'i bar chad byed de/ yul la nye bar spyod par 'dod pa'i sgo nas/ de la mngon par mi dga' ba'i phyir ro/ /gnod sems ni bskul ba'i dus na ste/ tshangs pa mtshungs par spyod pa rnams kyis yang dag par bsgrub pa'i bslab pa'i gnas la bskul nas gnod sems kyi sems kyis yang dag par mi slob pa'i phyir ro//rmugs pa dang gnyid dang / rgod pa dang 'gyod pa ni zhi gnas dang rab tu 'dzin pa gnyis snga ma bzhin du zhum pa dang / rnam par g.yeng bar byed pa'i phyir ro/ /the tshom ni btang snyoms kyi dus na ste/gtan la phebs pa med par btang snyoms su byed mi nus pa'i phyir ro/ /gnyen po thong gshol gyis rlog par dka' ba'i phyir tha bar rnam par gzhag par rig par bya ste/ tshe rabs gzhan na goms par byas pas spyod pas tha bar gyur pa'i phyir ro/ /'chal ba'i tshul khrims mi gtsang bar yid ches pa'i rgyu yin pas dri ma rnams so//yang dang yang 'khor bar skye ba dang 'chi ba'i tshul gyis gnod par byed pas sdig pa rnams so/ /srid pa dang srid pa'i yo byad rnams dang / dkon mchog rnams la sred pa dang / the tshom gyi sgo nas zhugs pas gnod pa'i phyir zug rngu rnams so//yo byad mang po yongs su 'dzin pas lci yang dang bcas par byas nas 'jig pa la sogs pa dang sbyor ba'i phyir lci yang rnams so/ /srog gcod pa la sogs pa'i mi dge ba spyod pa 'dres pas nyes par spyod pa rnams so/ /chags pa dang zhe sdang dang gti mug nyid mi dge ba'i rtsa bar rnam par gzhag ste/de dag gi sgo nas sems can rnams nyes par spyad pa spyod pa'i phyir ro/ /de la zang zing cung zad tsam gyi rgyus sems can longs spyod don du gnyer ba rnams chags pas nyes par spyad pa spyod do/ /gnod par byas pa'i rgyu la yongs su rtog pa'i rgyus gzhan gyi nyes pa mi bzod pa rnams zhe sdang gis nyes par spyad pa spyod do//chos log pa la mngon par zhen pa'i rgyus phyin ci log tu lta ba la mchod sbyin la sogs pa dag gti mug gis nyes par spyad pa spyod do/ /sems rnam par 'phro bar zag par byed pa'i phyir zag pa rnams so/ / lus dang sems la phongs par byed pas phongs pa rnams so/ /tshul bzhin ma yin pa'i mtshan ma dang mngon rtags 'dzin du bcug nas lus dang sems la yongs su gdung bar byed pas yongs su gdung ba rnams so/ /gzugs la sogs pa'i dngos po la dga' ba'am lhag par chags par byed du bcug nas de rnam par gyur na mya ngan la sogs pas sems can rnams nyon mongs par byed pa'i phyir 'khrug ba rnams so//mtshon cha len pa la sogs pas 'thab par byed pas 'thab pa rnams so/ /chos ma yin pa la 'dod chags la sogs pa ni yongs su gdung ba chen po byed pas rims nad dang 'dra bas na rims nad rnams su rig par bya'o//de la chos ma yin pa la 'dod chags ni gang mi dge ba'i las kyi lam rnams la rjes su chags pa'o/ /mi mthun pas chags pa ni mi rigs pa'i chos ma yin pas yul kun tu 'tshol ba'o/ /chos log pa ni nyes par bshad pa'i chos 'dul bar rig par bya'o//skye ba'i rtsa ba 'du byed kyi shing gi nags tshal la chags par byed pas nags sbyor rnams so/ /lus la lta ba la sogs pa dang bcas pas dge ba la sbyor ba'i gegs byed pas gegs rnams so/ /lus la lta ba la sogs pa dang bcas pa ni sems kyi gegs lnga'i dbang du byas pa'o//'dod chags ni yul dang lta ba la sogs par rtog pa'o zhes bya ba ni bsgoms pas spang bar bya ba dang / mthong bas spang bar bya ba dang go rims bzhin te/ 'dod chags ni sdug pa tsam du dmigs pa'i phyir ro/ /gang yang sems can la 'dod chags pa de ni yul gyi sgo nyid nas log par rtog par rig par bya'o//de bzhin du khong khro ba ni mi mthun pa'i rgyu tsam du dmigs pa'i phyir ro/ /sems can rnams la 'byung ba ni yul gyi sgo nyid nas log par rtog par rig par bya'o/ /nga rgyal ni sems can rnams dang lta ba log par rtog pa'o zhes bya ba ni chung ngu bas bdag che'o zhes bya ba la sogs pa'i rnam par 'byung ba'i phyir sems can rnams la log par rtog par rig par bya'o//'jig tshogs la lta ba dang / mthar 'dzin par lta ba dang / log par lta ba ni shes bya la log par rtog pa'o zhes bya ba ni sgro 'dogs pa dang /skur ba'i sgo nas ji ltar mthun mthun du sbyar ro/ /tshul khrims dang brtul zhugs mchog tu 'dzin pa ni lta ba la log par rtog pa'o zhes bya ba ni lta ba'i nyes pa nyid kyis tshul khrims dang brtul zhugs la lhag par mchog tu 'dzin pa'i phyir ro/ /the tshom ni gnyen po la log par rtog pa'o zhes bya ba ni bden pa rnams la blo rnam pa gnyis su 'jug pa'i phyir ro//nyon mongs pa bcu char yang sdug bsngal dang kun 'byung ba'i rgyu yin la/ de gnyis kyang de dag gi gzhi'i gnas yin no/ /de'i phyir de'i rgyu dang gzhi'i gnas kyis log par rtog pa rnams zhes bya'o//'gog pa dang lam la yang skrag pa skyes pas log par zhugs pa'o zhes bya ba ni nyon mongs pa'i dbang gis 'khor ba la mngon par dga' ba dang / rnam par byang ba la g.yeng bar 'du shes nas skrag pa dang / phyin ci log tu rtog pas 'gog pa dang lam la log par rtog par blta bar bya'o//mu stegs can rnams kyis ni rnam pa gzhan du kun du brtags nas de la log par rtog pa'i phyir ro/ /'dod pa na spyod pa'i 'dod chags rnam par shes pa'i tshogs lnga dang ldan pa ni bde ba dang mtshungs par ldan no/ /yid kyi rnam par shes pa'i tshogs dang ldan pa ni yid bde ba dang mtshungs par ldan no//'dod chags thams cad ni rgyun chad pa'i dus na btang snyoms dang mtshungs par ldan no/ /sdug bsngal dang yid mi bde ba gnyis dang mi mtshungs par ldan pa ma yin te/ dga' ba'i rnam par 'byung ba'i phyir ro/ /rnam par shes pa'i tshogs lnga dang ldan pa'i khong khro ba ni sdug bsngal dang mtshungs par ldan no//drug pa yid kyi sa pa ni yid bde ba dang mtshungs par ldan no/ /thams cad ni btang snyoms dang mtshungs par ldan te snga ma bzhin no/ /bde ba dang yid bde ba dang mtshungs par ldan pa ni ma yin te/ dman pa'i rnam par 'byung ba'i phyir ro//nga rgyal ni 'dod pa'i khams na bde ba dang mtshungs par ldan pa ma yin te/ rnam par shes pa'i tshogs lnga dang mtshungs par ldan pa med pa'i phyir ro/ /bsam gtan dang po dang gnyis par bde ba dang ji ltar ldan zhe na/ yid kyi sa pa'i bde ba dang mtshungs par ldan no/ /de ni yid kyi sa pa'i bde ba ji lta bu zhe na/dga' ba dang bde ba zhes gang 'byung ba ste/ ji skad du dga' ba gang zhe na/ gang gnas gyur pa'i 'jug pa'i rnam par shes pa la brten pa'i sems tshim pa dang sems shin tu dga' ba dang / sems rangs pa dang / sems dga' ba dang / bde ba myong ba ste/tshor bar gtogs pa'o/ /bde ba gang zhe na gang gnas gyur pa'i kun gzhi rnam par shes pa la brten pa'i gnas la phan pa dang / gnas kyi tshim pa dang / bde ba myong ba ste/ tshor bar gtogs pa'o zhes bshad pa lta bu'o/ /de ni 'di skad du bstan to/ /'jug pa'i rnam par shes pa la brten pa zhes bya ba ni yid kyi rnam par shes pa la brten pa yin te/gzhan la mnyam par gzhag pa med pa'i phyir ro/ /bde ba'i tshor ba bsam gtan dang po dang / gnyis pa la 'byung ba na/ sems dang sems las byung ba'i tshogs gang yang mtshungs par ldan pa de dga' ba'i rnam pas tshim par byed pa dang /gnas kun gzhi rnam par shes pa'i ngo bo nyid shin tu sbyongs pa'i bde bas tshim par byed pa ste/ de lta bas na de gnyis ka'i bya ba byed pa'i phyir 'di ni dga' ba dang bde ba zhes bya ba rnam pa gnyi gar rnam par gzhag par rig par bya'o zhes bstan par 'gyur ro//de bas na de dang mtshungs par ldan pa'i nga rgyal ni bde ba dang yid bde ba dang mtshungs par ldan pa zhes bya'o/ /log par lta ba ni 'dod pa'i khams na yid bde ba dang yid mi bde ba dang mtshungs par ldan pa zhes bya ste/ legs par bya ba dang nyes par bya ba byed pa rnams kyi de'i 'bras bu med par mthong nas mi mos pa dang dga' ba skye ba'i phyir ro//bde ba dang sdug bsngal ba dang mtshungs par ldan pa ni ma yin te/ /lta ba thams cad ni yid kyi sa pa yin pa'i phyir ro/ /the tshom ni 'dod pa'i khams na yid bde ba dang mtshungs par ldan pa ma yin te/sems gtan la phab pa med pa ni mos pa med pas yid bde ba med pa'i phyir ro/ /gzugs kyi khams na ni the tshom gyi shas che ba'i bsam gtan pa rnams kyi dga' ba dang / bde ba ni ting nge 'dzin gyi stobs bskyed pa'i rjes su 'gro ba nyid de/ de na bde ba dang yid bde ba dang yang mtshungs par ldan no//ma rig pa ma 'dres pa yang bde ba dang yid bde ba dang mtshungs par ldan pa dang / mtshungs par ldan pa ma yin pa las brtsams te tshul 'di 'dra bar blta bar bya'o/ /ci'i phyir nyon mongs pa thams cad btang snyoms dang mtshungs par ldan zhe na/tha mal par 'dug pa la brten nas nub par 'gyur ba'i phyir ro zhes bya ba ni nyon mongs pa'i rgyun je chung je chung du 'gro bas rgyun chad pa'i shugs kyis rgyun chad pa'i phyir tha mar gdon mi za bar tha mal par 'jug pa'i sgo nas btang snyoms dang mtshungs par ldan par rig par bya'o//gzugs kyi khams na ni rnam par shes pa'i tshogs bzhi dang mtshungs par ldan te/ de na sna dang lce'i rnam par shes pa med pa'i phyir ro/ /nga rgyal la sogs pa ni yid kyi rnam par shes pa'i tshogs dang ldan pa nyid de/ yongs su 'jal ba'i sgo nas 'byung ba'i phyir ro/ / nga rgyal ni phyogs gcig la 'jug pa nyid de/ gang yang rung ba'i yan lag gis khengs par 'gyur ba'i phyir ro/ /'dod pa'i khams na sdug bsngal mthong bas spang bar bya ba dag ni bcu'o zhes bya ba ni de na gang dag de'i rgyu dang / gzhi'i gnas kyis kyang log par rtog pa dag go/ / de bzhin du kun 'byung ba la sogs pa yang ji ltar mthun mthun du log par rtog pa dag ste/ de ni mthong bas spang bar bya bar rig par bya'o/ /ci'i phyir gang dag gang gi tshe dmigs pa de dag de la ci log par rtog par rig par bya zhe na/ zag pa med pa'i dmigs pa dag ni zag pa dang bcas pa'i dngos po nyid gdon mi za bar phra rgyas su byed pa ma yin no//gzugs kyi khams na ni khong khro ba med pas sdug bsngal la sogs pa mthong bas spang bar bya ba dag ni dgu'o/ /gzugs med pa'i khams na'ang de bzhin no/ /'jig tshogs la lta ba lhan cig skyes pa ni bsgoms pas spang bar bya ba ste/mthong ba'i lam skyes su zin yang gang la brten nas 'phags pa nyan thos la nga'o snyam pa'i nga rgyal kun tu 'byung ba'o/ /ji skad du tshe dang ldan pa bran can kho bos ni nye bar len pa'i phung po lnga po 'di dag la bdag gam bdag gir rjes su mi mthong mod kyi/ 'on kyang nye bar len pa'i phung po lnga po 'di dag la nga'o snyam pa'i nga rgyal dang /nga'o snyam pa'i 'dun pa dang / nga'o snyam pa'i bag la nyal ma spangs pa'o/ /yongs su ma shes so/ /ma bkag go/ /mtha' med par ma byas so zhes gsungs pa lta bu'o/ /dper na ma ma'i gos dri ma can du gyur pa bul tog la sogs pas legs par bkrus te dri ma med par gyur kyang de zhen par gos pas dri ma nam pa'i bag yod de/de spos dri zhim po bsgo bas yang bsal bar bya dgos pa de bzhin du mthong ba'i lam gyis 'jig tshogs la lta ba kun tu brtags pa'i dri ma spangs pa'i 'phags pa nyan thos la yang sngon mngon par zhen te goms par byas pa dngos po ma gtogs pa'i bdag tu lta ba rjes su 'brang ste/de ni lam bsgoms pas spang bar bya dgos pa yin no/ /mthar 'dzin par lta ba lhan cig skyes pa ni chad par lta bas bsdus par rig par bya ste/ des bdag gi bdag gang yin zhes yongs su mi chad pa'i phyir mya ngan las 'das pa la yid phyir ldog par byed do//lta ba'i phyogs dang mthun pa ma gtogs par 'dod chags la sogs pa ni bsgoms pas spang bar bya ba dag go/ /de'i gzhi'i dngos po yongs su shes pa zhes bya ba ni nyon mongs pa'i bag la nyal ma spangs pa yin te zhes bya ba la sogs pa snga ma bzhin no//ngo bo nyid yongs su shes pa zhes bya ba ni sems kun nas nyon mongs par byed pa'i bdag nyid kyi nyon mongs pa ni 'byung po zhes bya'o/ /nyes dmigs yongs su shes pa zhes bya ba ni bdag la gnod pa dang gzhan la gnod pa dang //gnyi ga la gnod par 'gyur ba dang / /mthong ba'i chos kyi kha na ma tho ba bskyed pa rnams dang / tshe phyi ma'i kha na ma tho ba bskyed pa dang / de las byung ba'i sems las byung ba sdug bsngal dang yid mi bde ba myong bar byed pa'o/ /de ltar rnam pa gsum gyis yongs su shes nas nyon mongs pa 'byung bar 'gyur ba dbang du mi len pa'i tshul gyis yongs su spang ngo //ma skyes pa mi bskyed pa'i phyir lam bsgom mo/ /'dres pa la dmigs pas yid la byed pas zhes bya ba ni tha dad pa la dmigs pa ste/ chos thams cad kyi spyi'i mtshan nyid kyi rnam par zhes bya ba'i tha tshig go/ / gal te chos thams cad bdag med do zhes bdag med par shes pa nyid kyis nyon mongs pa spong bar 'gyur na/ mi rtag pa la sogs pa'i rnam pa ci'i phyir bstan zhe na/ de dag ni nyon mongs pa spong ba ma yin gyi bdag med pa'i rnam par yongs su sbyang bar bya ba'i phyir te/ mi rtag pa'i rnam pa la brten nas sdug bsngal gyi rnam pa 'thob bo//sdug bsngal gyi rnam pa la brten nas bdag med pa'i rnam pa 'thob ste/ ji skad du gang mi rtag pa de sdug bsngal ba'o/ /de bdag med pa'o zhes gsungs pa lta bu'o/ /de bas na bdag med pa'i rnam pa ni bla na med pa nyid du rnam par gzhag go//bla na med pa nyid las brtsams nas bla na med pa nyid gsum ste/ shes pa bla na med pa nyid dang / lam bla na med pa nyid dang / rnam par grol ba bla na med pa nyid do/ /de la shes pa bla na med pa nyid ni bdag med pa'i shes pa nyid de/ de'i pha rol du shes pa gzhan btsal du med pa'i phyir ro//lam bla na med pa nyid ni sla la mngon par shes pa myur ba ste/ de ni lam thams cad kyi mchog yin pa'i phyir ro/ /rnam par grol ba bla na med pa nyid ni mi slob pa mi 'khrugs pa'i rnam par grol ba ste/ rnam par grol ba thams cad las khyad par du 'phags pa'i phyir ro/ /bla na med pa nyid rnam pa gsum po 'di dag ni go rims bzhin du mthong ba dang /bsgoms pa dang mthar phyin pa'i lam gyi dbang du byas par rig par bya'o// //bam po lnga pa/ dmigs pa'i las zhes bya ba ni mig la sogs pa'i ste/ gzugs la lta ba la sogs pa'o/ / byed pa'i las ni sa la sogs pa'i ste/ rten pa la sogs pa'o/ /yang na gang gi mtshan nyid kyi byed pa gang yin pa ste/ 'di lta ste gzugs kyi ni gzugs su yod pa'o zhes bya ba la sogs pa lta bu'o/ /rtsol ba'i las ni bsam pa sngon du btang ba'i lus la sogs pa'i las so/ / bsgyur ba'i las ni gser mgar la sogs pa'i ste/ rgyan la sogs pa'o/ /'thob pa'i las ni 'phags pa'i lam la sogs pa ste/ mya ngan las 'das pa 'thob pa la sogs pa'o/ /skabs 'dir ni phal cher rtsol ba'i las su 'dod do zhes bya ba ni 'thob par byed pa'i las kyang yod pa'i phyir ro//lus la sogs pa'i las la las kyi lam zhes bya ba ni mdo sde dang mthun par ji ltar gtso bo bstan par rig par bya ste/ de la sbyor ba la sogs pa yang lus la sogs pa'i las kyi nang du 'dus pa'i phyir ro/ /las kyi lam gsum dang bzhi dang gsum ni go rims bzhin du lus dang ngag dang yid kyi las kyi mtshan nyid du rig par bya'o//srog gcod pa la sogs pa'i gzhi ni sems can gyi grangs su gtogs pa dang / /sems can gyi grangs su ma gtogs pa ji ltar mthun mthun du sbyar te/ /gang la brten nas srog gcod pa la sogs pa 'byung ba'o/ /bsam pa ni gzhi de la der 'du shes pa'i bsam pa dang /las kyi lam de byed par 'dod pa'i bsam pa'o/ /sbyor ba ni de bya ba'i phyir bdag gam gzhan gyi lus dang ngag dang yid kyi rtsom pa'o/ /nyon mongs pa ni 'dod chags dang / zhe sdang dang gti mug 'dus pa dang so so ba ji ltar mthun mthun du sbyar ro//zin par byas pa ni sbyor ba de dang de'i dus sam/ phyis las de dang des yongs su rdzogs pa'o/ /de la srog gcod pa'i gzhi ni sems can no/ /bsam pa ni de la der 'du shes shing bsad pa'i bsam pa'o/ /sbyor ba ni bsad par bsams pa'i mtshon cha la sogs pa'o//nyon mongs pa ni 'dod chags la sogs pa'o/ /zin par byas pa ni sbyor ba des de ma thag tu'am phyis shi ba'o/ /ma byin par len pa la sogs pa'i gzhi dang zin par byas pa bshad par bya'o/ /lhag ma ni ji ltar mthun mthun du sbyar bar bya'o/ /ma byin par len pa'i gzhi ni gzhan gyis yongs su gzung ba sems can gyi grangs su gtogs pa'am sems can gyi grangs su ma gtogs pa'o//zin par byas pa ni bdag gir byas pa'o/ /'dod pas log par g.yem pa'i gzhi ni spyod yul ma yin pa'i bud med dang / spyod yul yin yang yan lag ma yin pa dang /yul ma yin pa dang / dus ma yin pa dang / tshod ma zin pa dang / rigs ma yin pa dang / pho dang ma ning thams cad do/ /zin par byas pa ni gnyis kyis gnyis sprad pa'o/ /brdzun du smra ba'i gzhi ni mthong ba dang / thos pa dang / bye brag phyed pa dang /rnam par shes pa dang / ma mthong ba dang / ma thos pa dang / bye brag mi phyed pa dang / rnam par ma shes pa'o/ /bsam pa ni gzhan du 'du shes la gzhan du smra bar 'dod pa'o/ /zin par byas pa ni 'khor dang phyir rgol bas go bar byed pa'o/ /phra ma'i gzhi ni sems can 'dum pa dang /mi 'dum pa dag go/ /bsam pa ni dbye ba dang sdum mi byed par sems pa'o/ /zin par byas pa ni phye bar shes par byed pa'o/ /ngag rtsub po'i gzhi ni kun nas mnar sems kyi gzhir gyur pa'i sems can rnams so/ /zin par byas pa ni ngag rtsub po smras pa'o/ / tshig kyal pa'i gzhi ni don med pa dang ldan pa'i don no/ /zin par byas pa ni de smras pa'o/ /brnab sems kyi gzhi ni gzhan gyi nor dang yo byad do/ /bsam pa ni de la der 'du shes shing de bzhin du 'dod pa'o/ /sbyor ba ni de bdag gir bya bar sems pa'o/ /zin par byas pa ni bdag gir bya bar nges pa'o//gnod sems kyi gzhi ni kun nas mnar sems kyi rgyur gyur pa'i sems can rnams so/ /zin par byas pa ni bsad pa la sogs par nges pa'o/ /log par lta ba'i gzhi ni don yod pa'o/ /bsam pa ni yod pa la med par 'du shes shing de bzhin du 'dod pa'o/ /zin par byas pa ni skur ba 'debs par nges pa'o//gzhan gyis bsgo ba sems pa las gyur pa ni 'di la ste/ 'ga' zhig mi 'dod bzhin du gzhan dag gis nan gyis bsgos nas bsams te/ mi dge ba spyod pa'o/ /gzhan gyis gsol ba btab pa sems pa las gyur pa ni 'di lta ste/ 'ga' zhig mi 'dod bzhin du gzhan dag gis gsol ba btab nas 'di ni phan pa'o zhes yang dag par 'dzin du bcug cing len du bcug nas bsams te mi dge ba spyod pa'o//mi shes pa'i sems pa las gyur pa ni 'di lta ste/ kha cig yon tan dang nyes pa mngon par mi shes shing / /mngon par zhen pa med la/'dod dgar bsams nas mi dge ba spyod pa'o/ /rtsa ba la mngon par zhen pa'i sems pa las gyur pa ni 'di lta ste/ 'ga' zhig mi dge ba'i rtsa ba la chags pa la sogs pas zil gyis non cing sems non nas mngon par zhen pa drag pos bsams te mi dge ba la spyod pa'o//phyin ci log gi sems pa las gyur pa ni 'di lta ste/ 'ga' zhig chos 'dod kyang mi mthun pa'i rgyu la lta ste/ phyi ma la yid du 'ong ba'i 'bras bu'i don du bsams nas mi dge ba spyod pa'o/ /de la sems pa las gyur pa dang po gsum ni las byas su zin kyang stsogs pa nyid du mi 'gyur te/de'i phyir 'di'i rnam par smin pa gdon mi za bar myong bar 'gyur ba ma yin no/ /sems pa las gyur ba tha ma gnyis ni gal te byas par gyur na bsags pa yin te/ de'i rnam par smin pa gdon mi za bar myong bar 'gyur ro/ /stsogs pa ni bag chags 'phel ba'o zhes bya ba ni kun gzhi rnam par shes pa la rnam par smin pa'i sa bon yongs su gsos par rig par bya'o//las byed par nges pa ni sngon gyi las rnams kyis rnam par smin pa'i rgyud nges par byas nas 'phangs par gyur pa ste/ gang gi tshe de la 'dis las 'di byed par nges pa de dang mi 'gal bar las de byed/ de'i rgyu'i nges pa ji lta ba bzhin du 'bras bu'i rgyur gyur pa'i phyir de mi bya bar bzlog pa ni sangs rgyas bcom ldan 'das rnams kyis kyang mdzad mi spyod do//rnam par smin pa myong bar nges pa ni/ sems pa las gyur pa'i las kyi ste snga ma bzhin no/ /dus nges pa ni mthong ba'i chos la myong bar 'gyur ba la sogs pa'i las rnams kyi dus kyang nges par byas pa yin te/ji ltar rnam par smin pa 'dis ni mthong ba'i chos la rnam par smin par byed do/ /'dis ni skyes nas so/ /'dis ni lan grangs gzhan la'o zhes bya'o/ /mi dge ba bcu'i las kyi lam rnams kyi rnam par smin pa'i 'bras bu ni dud 'gro dang yi dags dang sems can dmyal ba rnams su rig par bya'o//rgyu mthun pa'i 'bras bu ni ngan song rnams nas shi 'phos nas mir skyes pa rnams kyi srog gcod pa dang ma byin par len pa la sogs pa so so dang mthun pa'i lus dang yongs su gzung ba mi 'byor ba ste/ 'di ltar tshe thung ba dang dbul ba la sogs pa ji ltar mthun mthun du sbyar ro//bdag po'i 'bras bu ni so so dang mthun pa nyid du phyi'i dngos po lo tog la sogs pa mi 'byor ba ste/ 'di ltar srog gcod pa'i dbang gis ni byin chung bar 'gyur zhes bya ba la sogs pa'o/ /de bzhin du dge ba bcu'i las kyi lam zag pa dang bcas pa rnams kyi 'bras bu dag kyang lha dang mi rnams kyi nang du gsum gsum du 'gyur bar ji ltar mthun mthun du sbyar bar bya'o//las gcig gis lus gcig 'phen pa ni las kyi skad cig gcig gis tshe gcig kho na'i rnam par smin pa'i sa bon gsos pa'i phyir ro/ /gcig gis du ma 'phen pa ni/de nyid kyis tshe rabs du ma'i rnam par smin pa'i sa bon gsos pa'i phyir ro/ /du mas gcig 'phen pa ni las kyi skad cig mang pos gcig po de nyid kyi sa bon yang dang yang gsos pa'i phyir ro/ /du mas du ma 'phen pa ni mang po dag phan tshun ltos nas tshe rabs gcig nas gcig tu brgyud pa'i sa bon gsos pa'i phyir ro//ci'i phyir gzugs dang gzugs med pa dang rab tu ldan pa'i dge ba la mi g.yo ba zhes bya zhe na/ ji ltar 'dod pa na spyod pa'i 'gro ba gzhan gyi yongs su rdzogs par byed pa'i dge ba ni gzhan du rnam par smin pa 'byin par byed pa de bzhin du/ gzugs dang gzugs med pa na spyod pa ni de lta ma yin te/sa'i nges pas 'bras bu 'byin pa'i phyir ro/ /de bas na rnam par smin pa 'byin par g.yo ba med pa dang / mnyam par gzhag pa'i sa pa yin pas mi g.yo ba'i phyir mi g.yo ba zhes bshad do/ /'bras bu rnam par smin pa la rmongs pa ni mi dge ba'i 'du byed rnams 'byung ngo zhes bya ba ni de dag gi ni gcig tu nyon mongs pa can yin pas ma rig pa yod par gyur na 'bras bu rnam par smin pa la mngon par yid ches pa'i rnam pa'i yang dag pa'i lta ba'i skabs med pa'i phyir ro//de kho na'i don la rmongs pa ni bsod nams dang ye shes mi g.yo ba rnams so zhes bya ba la de kho na'i don zhes bya ba ni 'phags pa'i bden pa bzhi po dag go//de la rmongs na dge ba'i sems yod du zin kyang bden pa ma mthong ba rnams la bag la nyal gyi rjes su 'brel par 'gyur ro/ /de'i dbang gis de dag khams gsum pa sdug bsngal nyid du yang dag pa ji lta ba bzhin du yongs su ma shes pa'i phyir yang srid pa'i rgyur gyur pa'i bsod nams dang mi g.yo ba'i 'du byed rnams slong bar byed do//bden pa mthong ba rnams ni de lta ma yin te/ de kho na'i don la rmongs pa med pa'i phyir ro/ /de bas na de dag ni de'i rgyu las byung ba rnams zhes bya'o/ /srog gcod pa la yang sha la sogs pa 'dod pa rnams ni chags pas sbyor ro//sha glon par 'dod pa rnams ni zhe sdang gis sbyor ro/ /mchod sbyin la sogs pa gti mug gis sbyor ro/ /zhe sdang nyid kyis ni mthar phyin par byed de/ snying rje med pa ma yin par sems can gsod mi srid pa'i phyir ro/ /ngag rtsub po la sogs pa la yang ji ltar mthun mthun du sbyar bar bya'o//brnab sems la sogs pa la ji ltar chags pa la sogs pas sbyor zhe na/ de la brnab sems kyi las kyi lam ni gal te gzhan gyi nor dang yo byad bdag gir byed par nges pa'o zhes bstan pa de la gal te gzhan gyi nor dang yo byad de nyid 'dod par gyur na/de bdag gir bya ba'i phyir mngon par 'du byed de/ de'i phyir chags pas sbyor bar rnam par gzhag go/ /ci ste 'di yir ma gyur cig ce na/ de ltar na ni zhe sdang gis sbyor ro/ /ci ste gzhan gyis bdag gir byas kyang nyes pa ci yang med do snyam na gti mug gis sbyor bar rig par bya'o//gzhan la yang de bzhin du sbyar bar bya'o/ /phan tshun gyi dbang gis byung ba yang thun mong ba'i las su rig par bya ste/ de'i dbang gis sems can rnams phan tshun du sems dang sems las byung ba 'byung ba'i rgyur 'gyur ro/ /mi mthun pa'i phyogs kyi las ni gnyen po'i las stobs dang ldan par blta ste/mi mthun pa'i phyogs kyis 'bras bu 'phangs su zin kyang gnyen po'i stobs kyis gzhan du bsgyur ba'i phyir ro/ /gnyen po'i stobs can gyi dge ba'i las sems pa las gyur pa ni/ mi dge bas stobs dang ldan par blta'o/ / gnyen po'i mthu chung ba'i mi dge ba ni dge ba bas stobs dang ldan no/ /dge ba dang mi dge ba rnam par smin par nges pa 'phags pa'i lam gyis ma spangs ba thams cad ni bye brag med par stobs dang ldan pa zhes bya'o/ /'dod pa dang rab tu ldan pa'i mi dge ba ni rang bzhin gyis stobs dang ldan pa ste/ nyon mongs pa dang nye ba'i nyon mongs pa la sogs pa'i 'khor mang ba'i phyir ro//gang sngon gyi goms par byas pa de yang stobs dang ldan pa ste/ des rgyud la bsgos pa'i phyir ro/ /gang gnas la gnas pa ni nar son pa rnams kyi ste/ mngon par zhen pa dang dad pa drag pos byed pa'i phyir ro/ /yongs su mya ngan las mi 'da' ba'i chos can rnams kyi lam sgrub tu med pa gang yin pa de ni gnyen pos byung du med pa'i phyir ro//zhing ni ma gsod pa la sogs pa'o/ /sems kyi mngon par 'du byed pa ni byang chub chen por smon lam btab pa la sogs pa ste/ stobs dang ldan pa'i las su rig par bya'o/ /yang rnam pa dgus stobs dang ldan pa'i las su rig par bya ste 'di lta ste/zhing ni gal te yon tan dang ldan pa'i sbyin gnas zhing du gyur pa'o/ /dngos po ni gal te sbyin pa'i dngos po gya nom zhing mang por gyur pa'o/ /ngo bo nyid ni sbyin pa bas tshul khrims stobs dang ldan no/ /tshul khrims pas bsgom pa'o zhes bya ba la sogs pa'o//gzhi ni bsod nams byed pa gal te 'dod chags dang bral bar gyur pa'o/ /yid la byed pa ni gal te yid la byed pa dang ba drag po dang ldan par 'gyur ba'o/ /bsam pa ni mya ngan las 'das pa'i bsam pa dang ldan par gyur pa'o/ /grogs ni de las gzhan pa'i bsod nams bya ba'i dngos pos yongs su zin par gyur pa'o//lan mang du byed pa ni yang dang yang du byas par gyur pa'am/ rjes su rnam par brtags pa'o/ /skye bo mang pos kyang zhes bya ba ni bdag gis kyang byas par gyur la gzhan dang / kyang byed du bcug pa'o/ /su zhig 'di skad du skyes bu gang zag 'di ji ltar ji ltar las byed cing stsogs pa de lta de ltar rnam par smin pa myong bar gyur na/de ltar na tshangs par spyod pas gnas par mi 'gyur zhing yang dag par sdug bsngal zad pa dang / sdug bsngal mthar dbyung ba'i skabs kyang mi snang ngo zhes zer zhes bya ba la/ ji ltar byas na tshangs par spyod pas gnas par mi 'gyur zhe na/nyon mongs pa drag po dang ldan pas so sor brtags na sdug bsngal dang bcas par tshul khrims yongs su bsrung ba'i phyir gal te de'i rnam par smin pa yang de bzhin du sdug bsngal dang bcas shing yid mi bde ba dang bcas pa myong na ni de yongs su srung ba don med par 'gyur ro/ /gzhan gyi chung ma la sogs pa la bde ba dang bcas shing yid bde ba dang bcas par tshul khrims 'chal bar byas pa'i phyir gal te de'i rnam par smin pa de bzhin du myong na ni de spong ba don med par 'gyur te/de ltar byas na tshangs par spyod pas gnas par mi 'gyur ro/ /ji ltar na yang dag par sdug bsngal zad pa dang / sdug bsngal mthar dbyung ba'i skabs kyang mi snang zhe na/ de'i phyir de'i rgyur gyur pa tshangs par spyod pas gnas pa'i rnam par smin pa sdug bsngal ba'i phyir ro/ /de ltar byas na bde ba dang bcas pa'i las kyi rnam par smin pa ni bde ba dang bcas pa nyid du 'gyur/ sdug bsngal dang bcas pa'i rnam par smin pa ni sdug bsngal nyid du 'gyur/sdug bsngal yang ma yin bde ba yang ma yin pa dang bcas pa'i ni/ sdug bsngal yang ma yin bde ba yang ma yin pa dang bcas pa nyid du 'gyur ro zhes bya ba'i nges pa ni 'dir bcom ldan 'das kyis bkag go/ /yongs su zhig 'di skad du/ skyes bu gang zag 'di ji ltar myong bar 'gyur ba ji ltar myang bar 'gyur zhes bya ba la sogs pas ni bde ba dang ldan pa'i dge ba dang mi dge ba phyi ma la ji ltar mthun mthun du bde ba dang /sdug bsngal dang / sdug bsngal yang ma yin bde ba yang ma yin par myong bar 'gyur ba'i bde ba la sogs pa'i rnam par smin pa ni gnang ngo //rab tu byung ba'i sdom pa ni rnam pa lnga ste/ dge slong gi sdom pa nas dge tshul ma'i sdom pa'i bar du'o/ /nyes par spyod pa las dben par spyod pa dang / 'dod pa las dben par spyod pa zhes bya ba ni gang zag gi dbang du byas nas rnam par gzhag pa ste/ 'di ltar de 'dra ba de ni ji srid 'tsho'i bar du srog gcad pa la sogs pa nyes par spyod pa dang /mi tshangs par spyod pa spang bar nus so/ /dge bsnyen dang dge bsnyen ma'i sdom pa ni nyes par spyod pa las dben par spyod pa'i dbang du byas pa ste/ 'dod pa las dben par spyod pa ni ma yin no/ /de bas na 'di'i sdom pa ni ji srid 'tsho'i bar du 'dod pa la log par g.yem pa spong bar rnam par gzhag gi/mi tshangs par spyod pa spong ba ni ma yin no/ /bsnyen gnas pa'i sdom pa ni nyes par spyod pa las dben par spyod pa yang ma yin 'dod pa las dben par spyod pa yang ma yin pa ste/ de'i phyir de'i sdom pa na nyin zhag gcig pa la bsnyen gnas pa'i sdom par brtags te/rim gyis de gnyi ga goms par bya ba'i phyir ro/ /ji ltar tha ma dang ma ning rnams la ni dge slong dang dge slong ma'i phyogs gnyis la bsnyen bkur bya ba'i 'os ma yin pa'i phyir dge bsnyen nyid ni bkag pa bzhin du mtshan gnyis pa rnams kyang de bzhin du ste/skyes pa dang bud med kyi nyon mongs pa kun tu spyod pas phyogs gnyi ga la bsnyen bkur bya ba'i 'os ma yin pa'i phyir de dag logs shig tu ma bshad do/ /bsam gtan gyi sdom pa ni 'chal ba'i tshul khrims kun nas slong ba dag gi chags pa la sogs pa 'dod pa na spyod pa'i nyon mongs pa dang /nye ba'i nyon mongs pa rnams rnam par gnon pa'i gnyen pos sa bon bcom pas phyogs gcig pa las 'dod chags dang bral ba nyid du zad de 'dod pa dag las 'dod chags dang bral ba'i 'chal ba'i tshul khrims te/ spong ba gang yin pa'o/ /bsam gtan gsum pa'i bar las 'dod chags dang bral ba'i ring du byed pa'i gnyen pos 'chal ba'i tshul khrims kyi kun nas slong ba de dag nyid kyi sa bon shin tu 'joms par rig par bya'o//bsam gtan bzhi pa la 'dod chags dang bral ba ni gzugs med pa rnams ni gzugs med pa'i phyir tshul khrims kyi sdom pa rnam par gzhag pa med par rig par bya'o//shan pa ni gang dag phyugs rnams bsad nas de 'tshong bas 'tsho bar byed pa rnams so/ /bya gag gsod pa la sogs pa la yang de bzhin du ji ltar mthun mthun du sbyor bar bya'o/ /glang po che 'dzin pa ni gang dag nags nas glang po che bzung nas 'dul bar byed pa rnams so//sbrul gyis 'tsho ba ni gang dag sbrul bzung nas rtse bas 'tsho bar byed pa rnams so/ /nyan rna ba ni gang dag gzhan dag la phra mas gnod par byas nas 'tsho bar byed pa rnams so/ /de dag gi las skyes pas sam yang dag par blangs pa ste zhes bya ba ni de'i rigs sam/ gzhan gyi rigs kyi go rims bzhin no//de dag gi las spyad par nges par byas pa ni lus dang ngag gi sbyor ba sngon du btang ba ste/ sdom pa ma yin pa zhes bya'o/ /ji skad bshad pa'i sdom pa dang sdom pa ma yin pa dang mi ldan pa'i sbyin pa dang / ngag snyan pa la sogs pa dang / khu tshur dang thal lcag la sogs pa'i las ni sdom pa yang ma yin/sdom pa ma yin pa yang ma yin pa zhes bya'o/ /mthong ba'i chos la myong bar 'gyur ba'i las ni tshe gang la byas pa de nyid la gang rnam par smin par 'gyur ba'o/ /skyes nas myong bar 'gyur ba'i las ni gang de ma thag tu 'byung ba'i tshe la myong bar 'gyur ba ste/ 'di ltar mtshams med pa lnga'i las rnams so/ /gang gi mtshams med pa gcig nyid ni de'i rnam par smin pa de de ma thag par rigs na/ de gang gi mang po gang yin pa de'i de dag gi rnam par smin pa ji ltar myong bar 'gyur zhe na/ thams cad kyi rnam par smin pa gcig car myong bar 'gyur te/ 'di ltar mtshams med pa du ma byed pa'i lus shin tu rab tu gzhon par mngon par 'grub la/chad pa yang mang zhing mi zad pa sna tshogs pa 'byung ste/ de'i dbang gis tshor ba shin tu mang po 'byung bar 'gyur ro/ /rtsom pa'i dbang du byas nas mthong ba'i chos la myong bar 'gyur ba la sogs pa 'di dag rnam par gzhag gi/de tsam la myong bar 'gyur ba'i dbang du byas pa ni ma yin no/ /tshe de nyid la gang gis rnam par smin pa rnam par smin par rtsom pa de ni mthong ba'i chos la myong bar 'gyur ba'o/ /gang de ma thag pa'i tshe la rtsom pa de ni skyes nas myong bar 'gyur ba'o/ /gang de ma thag tu 'byung ba'i tshe thal nas rtsom pa de ni lan grangs gzhan la myong bar 'gyur ba ste/de ltar byas na kyi hud sems zhes bya ba'i rtogs pa brjod pa las mtshams med pa'i las kyi rnam par smin pas sems can dmyal bar yang dang yang 'chi 'pho zhing skye bas rnam par smin pas myong ngo zhes 'byung ba dang mthun par byas pa yin no//gnag la rnam par smin pa gnag pa'i las ni mi dge ba ste/ nyon mongs pa can dang / rnam par smin pa mi 'dod pa yin pa'i phyir ro/ /bzlog pa ni dkar la rnam par smin pa dkar ba ste/ khams gsum pa'i dge ba'o/ /dkar gnag tu gyur la rnam par smin pa dkar gnag tu gyur pa ni gang 'dod pa dang rab tu ldan pa'i 'dres ma ste/dge mi dge zhes bya ba'i tha tshig go/ /gcig na ci ltar dge bar yang 'gyur la mi dge bar 'gyur zhe na/ 'di la 'jug pa'i skad cig nges pas de gnyi ga brjod pa ni ma yin gyi/ bsam pa dang lhan cig pa'i sbyor ba las gcig ces bya ste/'di ni 'dir dgongs pa yin par rig par bya'o/ /de gnyis nag po dang dkar po nyid du phan tshun 'dra bar gyur pas nag po dang dkar po las gcig tu rnam par gzhag go/ /de la bsam pa gnag la sbyor ba dkar ba ni dper na 'ga' zhig gzhan dag la slu bar 'dod nas de dag yid ches par bya ba'i mtshan mar bsams pas sbyin pa rnams sbyin pa nas rab tu 'byung ba'i bar du'o//sbyor ba gnag la bsam pa dkar ba ni dper na 'ga' zhig bu'am slob ma la mi phan pa bzlog par 'dod cing phan pa la sbyor bar 'dod nas/ snying brtse ba'i sems kyis lus dang ngag gis drag tu byed pa de'i tshe/kun nas nyon mongs par 'gyur ro/ /mi gnag cing dkar la rnam par smin par mi 'gyur zhing las zad par 'gyur ba'i las gang zhe na/ sbyor ba dang bar chad med pa'i lam rnams la zag pa med pa'i las zhes bya ba la/ sbyor ba dang bar chad med pa'i lam rnams ni spong ba'i gnyen po yin pa'i phyir ro//de la mi gnag pa ni nyon mongs pa'i dri ma med pa'i phyir ro/ /dkar ba ni gcig tu rnam par byang ba'i phyir ro/ /rnam par smin par mi 'gyur ba ni/ 'khor ba dang mi mthun pa'i phyir ro/ /las zad par 'gyur ba ni nag po la sogs pa zag pa dang bcas pa'i las rnam pa gsum po 'di nyid zag pa med pa'i lam des rnam par smin pa 'byin pa'i bag chags legs par bcom pa'i phyir ro//bye brag med par zag pa med pa'i las 'di thams cad kyi bar du gcod pa dang rjes su mthun pa dang / ngo bo nyid kyi dbang du byas nas yon po dang /nyes pa dang / rnyog pa dang / btsang ba dang / thub pa rnams go rims bzhin du rnam par gzhag par rig par bya'o/ /de la yon po ni lus dang ngag dang yid kyi las drang po'i lam 'phags pa'i lam yan lag brgyad pa 'byung ba'i sgrib par gyur pa'o/ /nyes pa ni lus la sogs pa'i las gang gis rnam par sun phyung ba'i sems kyi rgyud la de dang 'dra ba'i sgrib par gyur pa'i las 'byung ngo //rnyog pa ni mu stegs can gyi lta ba la brten pa'i lus la sogs pa'i las gang yin pa ste/ sangs rgyas kyi bstan pa la dad pa'i mi mthun pa'i phyogs ma dad pa'i rnyog pas yongs su zin pa'i phyir ro//rnam grangs gzhan du na/ rtag pa dang chad pa'i mthar lhung ba ste/ dbu ma'i lam dang mi mthun pa'i phyir yon po'o/ /skur ba'i lta bas yongs su bzung ste rnam par byang ba rnam par gzhag pa la rab tu zhe sdang ba'i phyir nyes pa'o/ /'jig tshogs la lta bas yongs su bzung ste/bdag med pa'i de kho na la lta ba'i bar du gcod pa'i phyir rnyog pa zhes bya'o/ /gtsang ba ni shin tu rnam par dag pa'i tshul khrims kyis yongs su zin pa dang / lta ba drang pos yongs su zin pa'i lus dang ngag dang yid kyi las gang yin pa ste/ tshul khrims dang lta ba la log par zhugs pa'i dri ma spangs pa'i phyir ro//thub pa pa ni gang slob pa dang mi slob pa rnams kyi lus dang ngag dang yid kyi las zag pa med pa ste/ de thub pa rnams kyi las yin pa'i phyir ro/ /sbyin pa phun sum tshogs pa'i dbang du byas nas sbyin pa por 'gyur ro zhes bya ba 'dis ni phyir zhing sbyin pa ston te/de'i ngang tshul can du gyur pas yang dang yang sbyin pa'i phyir ro/ /dge sbyong rnams dang bram ze rnams la zhes bya ba la sogs pas ni phyogs mi 'byed par sbyin pa ston te/ 'dod pa thams cad la bye brag med par sbyin pa'i phyir ro/ /bza' ba dang btung ba zhes bya ba la sogs pas ni/ 'dod pa yongs su rdzogs par sbyin pa ston te/ bsam pa ji lta ba bzhin du yo byad kyi dngos po thams cad yongs su gtong ba'i phyir ro/ /lhug par gtong ba dang / lag brkyang ba dang / gtong ba la dga' ba dang mchod sbyin byed pa'i ngang tshul can dang / gtong ba phun sum tshogs pa dang /sbyin pa legs par 'ged pa la dga' ba zhes bya'i tshig 'di dag ni mi gnas par sbyin pa la sogs pa dang go rims bzhin du rig par bya'o/ /mi gnas pa'i sbyin pa ni srid pa dang longs spyod kyi phyir yongs su mi bsngo ba nyid du rig par bya'o/ /sbyin par bya ba phun sum tshogs pa'i dbang du byas nas ldang ba'i brtson 'grus kyis thob pa zhes bya ba 'dis ni sbyin par bya ba'i dngos po gnod pas grub pa ma yin pa ston te/gnod pas grub pa ni ldang ba'i brtson 'grus kyis thob pa ma yin te/ rang gi gnas na 'dug cing gzhan gyis bcol ba bsnyon pas thob pa'i phyir ro//lag dar ba'i mthus bsgrubs pa zhes bya ba 'dis ni sbyin par bya ba'i dngos po gzhan las phrogs pa ma yin pa ston to/ /gzhan las phrogs pa ni lag dar ba'i mthus bsgrubs pa ma yin te/ de dag gi sha thang bar thabs sna tshogs kyis bsgrubs pa phrogs pa'i phyir ro/ /rdul dang dri mas ma phog pa zhes bya ba 'dis ni sbyin par bya ba'i dngos pa ma rul cing dri ma med pa ston te/rdul dang dri mas mas ma phog pa zhes bya ba ni spangs zhes bya ba'i tha tshig go/ /chos dang mthun pa zhes bya ba 'dis ni sbyin par bya ba'i dngos po rung ba ston te/ mtshon dang dug dang chang la sogs pa rung ba ma yin pa'i dngos po yongs su spangs pa'i phyir//chos kyis thob pa zhes bya ba 'dis ni sbyin par bya ba'i dngos po chos kyis bsgrubs pa ston te/ gzhal bal g.yo 'jug pa la sogs pa dang log pas 'tsho ba la sogs pa yongs su spangs nas bsgrubs pa'i phyir ro/ /tshul khrims yang dag par blangs nas ma nyams pas de dang ldan pa'i phyir tshul khrims dang ldan pa yin no//thar pa'i phyir sdom pa gang yin pa de ni so sor thar pa'i sdom pa ste/ de ni 'khor ba las 'byung bar 'gyur ba yin no/ /cho ga phun sum tshogs pa ni spyod lam la sogs pa dam pa rnams kyis ma smad pa'i phyir ro/ /spyod yul phun sum tshogs pa ni spyod yul ma yin pa lnga spangs pa'i phyir te/dge slong gi spyod yul ma yin pa lnga ni gsod pa'i sa dang / smad 'tshong gi gnas dang / chang 'tshong gi khyim dang / rgyal po'i pho brang dang / gdol ba'i khyim ste lnga pa'o/ /bcas pa'i kha na ma tho ba rnams dang rang bzhin gyi kha na ma tho ba rnams la yang bsam pha drag pos bslab pas kha na ma tho ba chung ngu tsam rnams la yang 'jigs par lta ba yin no//kun nas yongs su rdzogs par bslab pa rnams blangs nas slob pa'i phyir yang dag par blangs te bslab pa'i gzhi rnams la slob ces bya'o/ /'di man chad du ni tshul khrims las brtsams nas/bcom ldan 'das kyis mdo sde gzhan dag las lus dang ngag bsdams pa yin no zhes bya ba la sogs pa gang bstan pa de'i don brjod par bya'o/ /de la lus dang ngag gi bsdams pa yin pa ni shes bzhin gyis yongs su zin pa'i yin pa'i phyir te/ ji ltar bka' stsal pa bzhin du 'gro ba dang /ldog pa la sogs pa la blo sngon du btang nas legs par bsgrubs pa'i phyir ro/ /lus dang ngag phun sum tshogs pas phun sum tshogs pa ni ltung ba mi byed pa'i phyir te/ tshul khrims chud mi gson pa'i phyir ro/ /lus dang ngag gi kun tu spyod pa yongs su dag pa ni ting nge 'dzin la gnas pa'i phyir te/ting nge 'dzin gyi stobs kyis 'tshal ba'i tshul khrims kyi dri ma thag bsring ba'i phyir te/ lus dang ngag gi kun tu spyod pa dge ba ni nyon mongs pa can gyi rtog pa dang ma 'dres pa'i phyir te/ gcig tu dge ba'i phyir ro/ /lus dang ngag gi kun tu spyod pa kha na ma tho ba med pa ni srid pa dang longs spyod kyi phyir yongs su mi bsngo bas dam pa rnams kyis bsngags pa'i phyir ro//lus dang ngag gi kun tu spyod pa gnod pa med pa ni bdag la bstod pa la sogs pas gzhan dag khyad du gsod cing 'grogs na mi bde bas zher 'debs pa med pa'i phyir ro/ /lus dang ngag gi kun tu spyod pa rjes su mthun pa ni mya ngan las 'das pa thob par byed pa dang mthun pa'i phyir te/'phags pa'i lam 'dren pa'i phyir ro/ /lus dang ngag gi kun tu spyod pa rjes su 'byor ba ni rang gi nyes pa dang yon tan sgrogs pa dang / mi spyoms pa'i phyir ro/ /lus dang ngag gi kun tu spyod pa thabs dang ldan pa ni tshangs pa mtshungs par spyod pa nye bar sdud pa'i tshul khrims yin pa'i phyir te/nye bar 'gro bar bya ba'i 'os yin pa'i phyir ro/ /lus dang ngag gi kun tu spyod pa 'tsham pa ni bla ma rnams dang bla ma dang 'dra ba rnams la nga rgyal bcag pa'i phyir te/ ci rigs su bsnyen bkur byed pa'i phyir ro//lus dang ngag gi kun tu spyod pa mthun pa ni gdams ngag la mthun par 'dzin pa'i phyir te/ rang gi lta ba la mchog tu 'dzin pa med pa'i phyir ro/ /lus dang ngag gi kun tu spyod pa gdung ba med pa ni dka' thub drag po dang ngan don la mos pa spangs pa'i phyir te/ bdag la gdung bar mi byed pa'i phyir ro/ /lus dang ngag gi kun tu spyod pa phyis 'gyod pa med pa ni longs spyod pa rnams dang las kyi mtha' rnams spangs pa la brtsams nas 'gyod pa med pa'i phyir te/ phyis 'gyod pa med pa'i phyir ro/ /lus dang ngag gi kun tu spyod pa yid la gcags pa med pa ni dge ba'i phyogs la brtsams nas cung zad tsam gyis chog par mi 'dzin pa'i yid la gcags pa med pa'i phyir te/bsgrub nus pa'i bar du'o/ /'di dag gi las ni bdag gir bya ba yin pas 'di dag ni las bdag gir bya ba dag go/ /de dag gi las bdag gir bya ba ji lta bu yin zhe na/ rang gis byas pa'i las kyi rnam par smin pa myong ba'i phyir te/gang gzhan dag dang thun mong ma yin pa de ni bdag gi zhes bya'o/ /'di dag ni las kyi bgo skal la spyod pa yin pas 'di dag ni las kyi bgo skal la spyod pa dag go/ /ji ltar na las kyi bgo skal la spyod pa nyid yin zhe na/ rang gis byas pa'i las kyi rnams par smin pa myong ba de la dge ba dang mi dge ba so so'i bgo skal la spyod pa'i phyir te/'di lta ste/ rang rang gi 'bras bu 'dod pa dang mi 'dod pa 'ged pa'i phyir ro/ /rang gis byas pa'i las la 'dod pa dang mi 'dod pa dag gi rnam par smin pa myong ba'i sems can de dag thog ma ga las byung /ci rgyu med pa las byung ba zhig gam/ 'on te rang bzhin dang dbang phyug la sogs pa'i rgyu las byung ba zhig ce na/ smras pa/ las kyi skye gnas pa dag go/ /'di dag gi las nyid rgyu med pa dang mi mthun pa'i rgyu rnam par spangs pa'i skye gnas te/ sems can rnams 'byung ba'i phyir zhes bya ba'i tha tshig go//de ltar 'jug pa las kyang brtsams ldog pa las kyang brtsams nas las bstan par bya ba dag ste/ zag pa dang bcas pa'i las spang ba'i phyir zag pa med pa'i las rten yin pas/ 'di dag gi brten par bya ba ni las nyid yin no/ /sems can rnams kyi las kyi rnam par smin pa bsam gyis mi khyab pa'o zhes gang gsungs pa de ni rnam pa thams cad du bsam gyis mi khyab pa yin par rig par bya'o//bsam gyis mi khyab pa ni ji lta bu zhe na/ dge ba dang mi dge ba'i rnam par smin pa bde 'gro dang ngan 'gror 'dod pa dang mi 'dod pa zhes bya ba ni bsam gyis mi khyab pa ste/ nus pa dang yang dag pa'i lta ba la sogs pa'i yon tan khyad par can 'dren pa'i phyir ro/ /las 'dis sems can rnams kyi lus kyi kha dog dang dbyibs la sogs pa rnam pa tha dad pa sna tshogs zhes bya ba ni bsam gyis mi khyab pa ste/ mi nus pa dang / thams cad mkhyen pa nyid las gzhan pa mgo rmongs pa la sogs pa'i nyes pa 'dren pa'i phyir ro//dge ba la sogs pa'i las de nyid gnas la sogs pa'i rab tu dbye bas ni bsam gyis mi khyab bo/ /de la gnas ni grong ngam grong khyer gyi phyogs gang du gnas nas las de byas zhes bya ba la sogs pa'o/ /dngos po ni sems can gyi grangs su gtogs pa'am/sems can ma yin pa'i grongs su gtogs pa gang la brten te byas pa'o/ /rgyu ni dge ba dang mi dge ba'i rtsa ba rnams te/ ji ltar mthun mthun sbyar ro/ /rnam par smin pa ni lus sna tshogs pa de nyid do/ /sna tshogs mngon par 'grub par byed pa'i las bsam gyis mi khyab pa ni las ci 'dra bas tsher ma la sogs pa'i rno ba la sogs pa byas pa ste/'jig rten gyis bsam par gtogs pa'i phyir ro/ /nor bu dang sngags dang sman dang mkhyud spyad dang ldan pa'i las bsam gyis mi khyab ste/ de la nor bu dang ldan pa ni chu shel la sogs pa las chu 'byung ba la sogs pa'o//sngags dang ldan pa ni sngags de dag gis btab na mi 'tshig pa la sogs pa'o/ /sman dang ldan pa ni des zin na mi snang bar 'gyur ba la sogs pa'o/ /mkhyud spyad dang ldan pa ni mkhyud spyad de dang des rims nad dang 'bral bar 'gyur ba la sogs pa'o/ / rnal 'byor pa thams cad kyi mthu'i las bsam gyis mi khyab pa ji lta bu zhe na/ de dag gi sems kyi mthus sa chen po g.yo bar byed pa'am/ nam mkha' la 'phur ba la sogs pa'o/ /byang chub sems dpa' rnams kyi dbang gi las la sogs pas las gang byed pa de bsam gyis mi khyab pa ni 'di lta ste/tshe la dbang bas ni byang chub sems dpa' rnams tshe'i 'du byed byin gyis brlabs nas ji srid 'dod pa de srid du gnas so/ /sems la dbang bas ni ji ltar 'dod pa bzhin du ting nge 'dzin la snyoms par 'jug go/ /yo byad la dbang bas ni sems can thams cad la yo byad rin che ba dang dpag tu med pa'i char 'bebs so//las la dbang bas ni khams dang sa dang 'gro ba dang skye gnas dang gnas skabs gzhan na myang bar 'gyur ba'i las rnams gzhan du bsgyur ro/ /skye ba la dbang bas ni bsam gtan la gnas shing yongs su ma nyams bzhin du 'dod pa'i khams su skye'o//mos pa la dbang bas ni sa la sogs par chu la sogs par mos so/ /smon lam la dbang bas ni ji ltar 'dod pa bzhin du bdag dang gzhan gyi don phun sum tshogs par byed pa'i smon lam rgya chen po grangs med pa mngon par sgrub bo/ /rdzu 'phrul la dbang bas ni sems can rnams 'dun par bya ba'i phyir rdzu 'phrul gyi cho 'phrul dpag tu med pa kun tu ston to//ye shes la dbang bas ni chos dang don dang nges pa'i tshig dang spobs pa rnams kyis rab kyi mthar phyin par 'gro'o/ /chos la dbang bas ni ci rigs par ji tsam du sems can thams cad la ming dang tshig dang yi ge'i tshogs gzhan dang gzhan dag gis mdo la sogs pa'i chos rnam par bzhag nas cig car du sems yongs su tshim par byed nus par 'gyur ro//sangs rgyas thams cad kyi sangs rgyas kyi mdzad pa sgrub pa'i phrin las bsam gyis mi khyab pa ji lta bu zhe na/ sangs rgyas bcom ldan 'das thams cad lhun gyis grub par gtogs par thugs su chud cing chos kyi dbyings ro gcig pa nyid du gyur nas sems can rnams la gang gi tshe dang ji lta bu dang /ji srid du mdzad pa bsgrub par bya ba de thams cad rjes su gnas te/ de ltar sangs rgyas rnams kyi yul bsam gyis mi khyab bo//yang srid pa'i bag chags 'jog pa'i byed rgyu zhes bya ba ni rgyu'o/ /sems can bag chags bsags pa rnam pa lha la sogs pa'i sems can gyi ris su de'i cha byad dang rang bzhin dang 'dra bar mthun par 'byung ba'i byed rgyu zhes bya ba ni kun 'byung ba'o/ /so so rang gi rgyud nges pa dang /'gro ba dang skye gnas la sogs pa rnams dang mchog tu 'byung bas srid pa'i rtse mo'i 'gro ba'i bar du 'byung ba'i byed rgyu zhes bya ba ni rab tu skye ba'o/ /sngon ma byung ba'i lus gzhan dang gzhan 'thob pa dang / sngon 'thob pa'i lus 'da' ba'i byed rgyu zhes bya ba ni rkyen to/ /'du byed de dag gi 'jig pa las 'gog pa de dag gzhan zhig yin na ni 'brel ba med de don gzhan du 'gyur ro//ji ste gzhan ma yin na ni kun nas nyon mongs pa'i mtshan nyid du 'gyur te/ de'i phyir gnyi ga yang ma yin/ gnyi ga ma yin pa yang ma yin no/ /spros pa ni skabs 'dir tshul bzhin ma yin par sems pa yin te zhes bya ba ni lam ma yin pa dang //rigs ma yin pa dang / thabs ma yin par sems pa zhes bya ba'i tha tshig go/ /sems pa yang gzhan la sems par bya ba yang gzhan yin pa'i phyir ro/ /sems pa ji lta bu zhe na/ zhi ba dang gya nom pa'o zhes bya ba la sogs pa'i rnam pa rnams kyis so//rgyan med pa ni shes rab kyi cha las rnam par grol ba rnams kyi yon tan khyad par can rigs pa la sogs pa'i rgyan med pa'i phyir ro/ /rnam grangs kyi sa ni ma lus par spangs pa zhes bya ba ni bstan pa'o/ /lhag ma ni bshad pa'o/ /de'i phyir de'i tshig lhag ma rnams kyi phyir ro zhes brjod de/de dag gi de bshad pa'i phyir ro/ /ji ltar byas na ma lus par spangs she na/ kun nas dkris pa dang bag la nyal spangs pa'i phyir ro/ /de la nges par spangs pa ni kun nas dkris pa'i dbang du byas pa ste/ 'byung ba yongs su spangs pa'i phyir ro/ /byang bar gyur pa ni bag la nyal spangs pa ste/rtsa ba med na gtan mi skye ba'i phyir ro/ /de ni gnyen po mthong ba dang / bsgom pa'i lam gyi bye brag gis rnam pa gnyis su rnam par gzhag ste/ zad pa dang 'dod chags dang bral ba zhes bya ba'o/ /de la zad pa ni mthong ba'i lam gyis bral ba nyid kyi dbang du byas pa ste/ nyon mongs pa'i tshogs cung zad tsam zhig lus pa'i phyir ro/ /'dod chags dang bral ba ni bsgom pa'i lam gyis bral ba nyid kyi dbang du byas pa ste/ de ni sa la 'dod chags dang bral ba nyid du 'gyur bas rab tu phye ba'i phyir ro/ /de gnyis kyis bral bar gyur na mi skye ba'i chos nyid du byas pas phyi ma la sdug bsngal 'gog pa dang /kun du mi 'byung bas mthong ba'i chos la yid mi bde ba rnam par zhi bar 'gyur te/ de'i phyir de'i 'bras bur gyur ba sdug bsngal rnam pa gnyis spong ba'i dbang du byas nas 'gog pa dang rnam par zhi ba zhes bya ba smos so/ /sngon gyi las dang nyon mongs pas yang dag par bsgrub pa'i phung po rnams ni rang gi ngang gis 'jig pa'i dbang du byas nas nub pa zhes bya'o//de ltar byas na ma lus par spangs pa bstan par rig par bya'o/ /'dus ma byas ni 'dus byas las bzlog pa ste/ skye ba dang 'jig pa dang gnas pa gzhan du 'gyur ba med pa'i phyir ro//blta dka' ba ni 'phags pa gcig pu'i shes rab kyi spyan gyi spyod yul yin pa'i phyir ro/ /g.yo ba med pa ni sems can dmyal ba la sogs pa'i 'gro bar mi 'pho bas bstan pa'i phyir ro/ /mi 'dud pa ni 'dod pa dang gzugs dang gzugs med pa'i sred pa med pas srid par mi 'dud pa'i phyir ro//'chi ba med pa ni 'chi ba'i rten phung po med pa'i phyir ro/ /zag pa med pa ni zag pa dang bral ba'i phyir ro/ /gnas ni rnam par grol ba'i bde ba'i gzhi yin pa'i phyir ro/ /gling ni 'khor ba'i rgya mtsho chen po la thang lta bur gyur pa'i phyir ro//skyob pa ni de thob na skye ba la sogs pa'i gnod pa thams cad las bzlog pa'i phyir ro/ /mgon ni de'i bsam pa dang sbyor ba byas pa 'bras bu yod pa'i gzhi'i gnas yin pas rten yin pa'i phyir ro/ /dpung gnyen ni 'phags pa'i mchog nyid du 'gro ba'i gzhi'i gnas yin pa'i phyir to/dgra bcom pa nyid 'thob pa'i thabs la dmigs pa'i phyir zhes bya ba'i tha tshig go/ /'chi 'pho med pa ni ma skyes pas nyams pa med pa'i phyir ro/ /rims nad med pa ni 'dod pas phongs pa'i gdung ba thams cad med pa'i phyir ro/ /yongs su gdung ba med pa ni mya ngan la sogs pa'i yongs su gdung ba thams cad rgyun chad pas bsil ba'i phyir ro//bde ba ni na ba dang rga ba dang 'chi ba'i 'jigs pa dang bral bas 'phags pa'i gnas pa'i rten yin pa'i phyir ro/ /zhi ba ni dge ba'i chos thams cad kyi gnas yin pa'i phyir ro/ /bde gzhi ni 'jig rten las 'das pa'i bde ba'i gzhi yin pa'i phyir ro//bde bar 'gyur ba ni sbyor ba bde bas de thob par 'gyur ba'i dmigs pa yod pa'i phyir ro/ /nad med pa ni nyon mongs pa la sogs pa'i sgrib pa dang bral ba'i phyir ro/ /mi g.yo ba ni yul gyi spros pa'i rnam par g.yeng ba thams cad dang bral ba'i phyir ro//mya ngan las 'das pa ni gzugs la sogs pa'i 'du shes thams cad dang bral te zhi zhing bde bar gnas pa'i dmigs pa yin pa'i phyir ro/ /yang 'gog pa'i bden pa la brtsams nas/ ma skyes pa la sogs pa rnam grangs su gtogs pa rnams te/ sdug bsngal gyi mtshan nyid las bzlog par rig par bya'o//sdug bsngal ni sems can gyi ris de dang der nying mtshams sbyor bar byed pas skye ba'o/ /de'i 'og tu lus yongs su rdzogs par 'phel lo/ /sdug bsngal de yang sngon gyi las dang nyon mongs pas 'phangs te byas pa ni da ltar gyi las dang nyon mongs pa rnams kyis srid pa gzhan du byed pa'i gzhi'i gnas yin te/de'i rgyun mi 'chad pa'i tshul gyis yang srid pa'i rgyun skye bar 'gyur ro/ /de las bzlog pa ni sdug bsngal 'gog pa 'phags pa'i bden pa ste/ ma skyes pa dang / ma byung ba dang / ma byas pa dang / 'dus ma byas pa dang /skyes pa med pa dang / go rims bzhin du rig par bya'o/ /yang 'gog pa'i bden pa'i mtshan nyid rnam pa bzhir rig par bya ste/ 'gog pa'i mtshan nyid ni 'byung ba'i rgyu nyon mongs pa rnams dang bral ba'i dbang du byas pa'o/ /zhi ba'i mtshan nyid ni 'du byed kyi sdug bsngal nyid kyis ma zhi ba'i mtshan nyid nye bar len pa'i phung po lnga rnams dang bral ba'i dbang du byas pa'o//gya nom pa'i mtshan nyid ni nyon mongs pa dang sdug bsngal dang bral ba'i phyir/ bdag nyid gtsang ba dang bde ba'i ngo bo nyid kyi dbang du byas pa'o/ /nges par 'byung ba'i mtshan nyid ni rtag pa dang phan pa'i ngo bo nyid kyi dbang du byas pa ste/yang phyir mi ldog pa dang bde ba'i phyir phan pa dang bde ba dang go rims bzhin no/ /lam gyi bden pa ni gang gis sdug bsngal gyi bden pa yongs su shes pa zhes bya ba la sogs pa ste/ bden pa rnams la 'di'i bya ba'i skabs kyis mtshan nyid bstan par rig par bya'o//lam rnam pa lnga zhes bya ba ni rab tu dbye ba lnga'i skabs kyi'o/ /rab tu dbye ba 'di yang lam gyi bden pa 'khor dang bcas pa'i skabs kyis rig par bya'o/ /de la tshogs kyi lam ni tshul khrims la sogs pa ste/ de yongs su rdzogs pas dro bar gyur pa la sogs pa'i go rims kyis bden pa mthong bar bya ba dang / de la sgrib pa spang bar bya ba'i phyir sems kyi rgyud 'os su gyur pa 'thob bo/ /gang yang rgyur gyur pa'i dge ba gzhan zhes bya ba ni 'gyod pa med pa la sogs par rig par bya'o/ / dro bar gyur pa ni so so rang gis bden pa rnams la snang ba thob pa'i ting nge 'dzin shes rab dang mtshungs par ldan pa dang bcas pa'o zhes bya ba ni mnyam par gzhag pa'i sems kyis bden pa'i dbang du byas pa'i chos mdo sde la sogs pa yid kyis brjod pa'i sgo nas don snang bar gyur pa'i zhi gnas dang lhag mthong ni dro bar gyur par rig par bya'o//de 'phel ba ni rtse mo ste/ de'i gang na rnam par gnas pa'i phyir ro/ /bzod pa ni phyogs gcig la zhugs pa dang rjes su song ba'i ting nge 'dzin zhes bya ba la/ ji ltar na phyogs gcig la zhugs pa yin zhe na/ gcig tu gzung ba med par bzod pa'i phyir ro//ji ltar na phyogs gcig gi rjes su song ba yin zhe na/ 'dzin pa med par rtog pa'i rjes su mthun par gnas pa'i phyir ro/ /'jig rten pa'i chos kyi mchog ni gang gi 'og tu thog mar 'jig rten las 'das pa'i lam mo/ /mthong ba'i lam ni 'jig rten pa'i chos kyi mchog gi 'og gi rnam par mi rtog pa'i zhi gnas dang lhag mthong gi mtshan nyid du rig par bya'o//dmigs par bya ba dang dmigs par byed pa mnyam pas mnyam par shes pa'ang de bzhin te zhes bya ba ni des gzung ba dang 'dzin pa med pa'i de bzhin nyid rtogs pa'i phyir ro//so so rang la sems can gyi brda dang chos kyi brda gsal ba dang / thams cad du gnyi ga'i brda gsal ba la dmigs pa'i chos shes pa'ang de yin no zhes bya ba la/ sems can gyi brda so so rang gis gsal ba la dmigs pa'i chos shes pa ji lta bu zhe na/des rang gi rgyud la bdag gi mtshan mar rnam par mi rtog pa'i phyir ro/ /so so rang la chos kyi brda gsal ba la dmigs pa'i chos shes pa ji lta bu zhe na/ des rang gi rgyud nyid la gzugs la sogs pa'i mtshan mar rnam par mi rtog pa'i phyir ro/ /thams cad du gnyi ga'i brda gsal ba la dmigs pa'i chos shes pa ji lta bu zhe na/thams cad du bye brag med par bdag dang chos kyi mtshan ma la rnam par mi rtog pa'i phyir ro/ /yang mthong ba'i lam la rab tu dbye ba na bden pa rnam pa bcu drug ste/ chos dang rjes su rtog pa la bzod pa dang shes pa rnams so//de la sdug bsngal la chos shes pa'i bzod pa ni sbyor ba'i lam la/ sdug bsngal gyi bden pa'i dbang du byas pa'i mdo la sogs pa'i chos la rnam par dpyod pa'i shes pa ste/ tshul bzhin yid la byed pas bsdus pa'i dbang du byas nas rang gi rgyud la yod pa'i sdug bsngal gyi bden pa la de'i de bzhin nyid mngon sum du 'gyur pa'i 'jig rten las 'das pa'i shes rab yang dag par lta ba'i rang bzhin 'byung ste/des sdug bsngal mthong bas spang bar bya ba khams gsum pa'i bag la nyal nyi shu rtsa brgyad rab tu spang ngo / /de bas na sdug bsngal la chos shes pa'i bzod pa zhes bya'o//bzod pa des sdug bsngal mthong bas spang bar bya ba'i nyon mongs pa spangs pa'i phyir gnas gyur nas de ma thag tu shes pa gang gis gnas gyur ba de myong ba de ni sdug bsngal la chos shes pa zhes bya'o/ /dang po'i bzod pa dang shes pa 'di gnyis ni slob pa dang mi slob pa'i 'phags pa'i chos thams cad kyi rgyu yin te/de las de dag yang dag par 'byung ba'i phyir ro/ /de'i phyir 'di gnyis ni 'phags pa'i chos thams cad kyi rgyu'o zhes de la dmigs nas so so rang la mngon sum du 'gyur ba'i zag pa med pa'i shes rab ni sdug bsngal la rjes su rtog par shes pa'i bzod pa'o//rjes su rtog par shes pa'i bzod pa dang de shes pa gang gis myong ba de ni rjes su rtog pa'i shes pa zhes bya'o/ /'jig rten las 'das pa'i lam gyi yul ni gnyis te/ de bzhin nyid dang yang dag pa'i ye shes so/ /de la chos shes pa'i phyogs kyi lam gyi yul ni de bzhin nyid do//rjes su rtog pa'i shes pa'i phyogs kyi yul ni yang dag pa'i ye shes so/ /de'i phyir 'di skad ces bya ste chos shes pa'i bzod pa dang shes pa rnams kyis ni gzung ba rtogs so/ /rjes su rtog pa'i bzod pa dang shes pa rnams kyis ni 'dzin pa rtogs so zhes bya'o//bcom ldan 'das kyis gang mtshan ma med pa la gnas pa'i gang zag drug bka' stsal pa/ de ni bzod pa dang shes pa de dag la gnas par rig par bya ste/ mtshan ma thams cad mi dmigs pa'i phyir ro/ /bzod pa dang shes pas bsdus pa sems kyi skad cig bcu drug po 'di dag ni mthong ba'i lam ste/de dag gis sngon ma mthong ba'i 'phags pa'i bden pa re re la yang rnam pa bzhi bzhir mthong ba'i phyir ro/ /'dir dngos po ma byung ba byung ba tsam la sems kyi skad cig tu rig par bya ba ni ma yin gyi/ ji tsam du shes bya la shes pa 'byung ba yongs su rdzogs par 'gyur ba la bya ste/'di lta ste/ sdug bsngal ni yongs su shes par bya'o zhes bya ba ni sems kyi skad cig gcig go/ /kun 'byung ni spang bar bya'o zhes bya ba la sogs pa yang de bzhin no/ /gang mthong ba'i lam las brtsams te/ rgya cher rnam par spros pa de thams cad ni rnam par gzhag pa tsam du rig par bya ste/'jig rten las 'das pa'i gnas skabs ni so so rang gis rig par bya ba'i phyir ro/ /lam gyi bden pa thams cad ni rnam pa bzhir rig par bya ste/ rnam par gzhag pa dang / rnam par rtog pa dang / myong ba dang / yongs su rdzogs pa'o/ / de la rnam par gzhag pa ni nyan thos la sogs pas ji ltar rang gi khong du chud pa mthar phyin nas/ de'i rjes la thob pa'i shes pas gzhan dag la go bar bya ba'i phyir ming dang tshig dang yi ge'i tshogs rnams kyis lam gyi bden pa rnam par 'jog ste/ bden pa rnams la bzod pa dang shes pa ni 'di lta bu'o zhes bya ba la sogs pa'o//rnam par rtog pa ni mngon par rtogs pa la zhugs pa'i 'jig rten pa'i shes pas ji ltar rnam par gzhag pa bzhin du rnam par rtog cing goms par byed pa'o/ /myong ba ni de ltar goms par byed pa na mthong ba'i lam zhes brjod pa'i 'jig rten las 'das pa spros pa med pa'i gnas skabs gang yin pa dang po so sor rang gis myong ba'o//yongs su rdzogs pa ni de'i 'og tu gnas gyur pa yongs su rdzogs nas thob pa mthar phyin pa'i bar du 'thob pa'o/ /thob pa mthar phyin pa de dag ni de'i rjes la thob pa'i shes pas lam gyi bden pa rnam par 'jog go//de ltar na rnam pa 'di bzhi ni lam gyi 'khor lo ste/ yang dang yang gzhan dang gzhan la brten nas 'jug par rig par bya'o/ /chos rnams la chos kyi mig rdul med cing dri ma dang bral ba skyes so zhes bya ba gang gsungs pa de ni mthong ba'i lam gyi dbang du mdzad nas gsungs pa ste zhes bya ba de ni thog ma kho nar bden pa rnams la 'phags pa'i shes rab kyi spyan gyi rang bzhin yin pa'i phyir ro//de la chos la bzod pa rnams kyis ni rdul med de/ de dag gis nyon mongs pa'i rdul spong ba'i phyir ro/ /chos shes pa rnam pa ni dri ma dang bral ste/ de dag ni de'i sgrib pa'i dri ma spangs pa'i gnas su skyes pa'i phyir ro/ /yang bzod pa dang shes pa'i gnas skabs 'di gnyis ni go rims bzhin du yongs su shes pa dang spangs pa'i lam gyi rnam par dag pa'i dbang du byas pa ste/ rdul med pa dang dri ma dang bral bar rig par bya'o/ /chos mthong ba zhes pa la sogs pa yang mthong ba'i lam nyid kyi dbang du byas par rig par bya ste/'dul ba rnams bden pa mngon par rtogs pa zhes bya ba'i 'og tu gsungs pa'i phyir ro/ /de la chos la bzod pa rnams kyis ni chos mthong ste de dag gis de kho na rtogs pa'i phyir ro/ /chos shes pa rnams kyis chos thob ste/chos shes pa rnams kyi gnas gyur pa mngon sum du thob par byed pa'i phyir ro/ /rjes su rtog pa'i bzod pa rnams kyis chos rig ste/ de dag gis 'di ni 'phags pa'i chos kyi rgyu'o zhes de gnyis rig pa'i phyir ro/ /rjes su rtog pa'i shes pa rnams kyis chos rtogs te/de dag gis shes bya ji snyed pa yongs su rdzogs pa'i phyir ro/ /bzod pa dang shes pa thams cad kyis som nyi las brgal te/ 'jig rten las 'das pa'i lam gyi 'bras bu thob pas yun ring po nas 'dod pa rang gis thob pa la the tshom med pa'i phyir ro//thams cad kyi gzhan gyis thob pa la the tshom las brgal te/ de'i dus na gzhan dag gis kyang khyad par thob pa la yid gnyis za ba med pa'i phyir ro/ /lam bsgom pa la gzhan gyi dring mi 'jog pa ni gzhan la lung mnos pa med par yang bdag nyid kyis mkhas pa'i phyir ro/ / gzhan gyis mi bkri pa ni shes nas dad pa thob pas gzhan mu stegs can rnams kyis tshe rabs gzhan la yang ston pa'i bstan pa las mi 'phrogs pa'i phyir ro/ /chos rnams la 'jigs pa thob pa ni thob pa las brtsams nas yongs su dri ba'i chos rnams dang lung bstan pa'i chos rnams la sdig pa 'dod pa mngon pa'i nga rgyal can bzhin du sems zhum pa med pa'i phyir ro// //bam po drug pa/ bsgom pa'i lam ni 'phags pa nyan thos bden pa rnams mngon par rtogs pa dang ldan pa'i'o/ /de'i gong du gyur pa ni kun tu sbyor ba lhag ma spangs pa'i phyir zhugs pa ste/ gang 'jig rten pa la sogs pa'i lam mo/ /de la 'jig rten pa'i lam ni bsam gtan rnams dang gzugs med pa rnams so/ /bsam gtan dang gzugs med pa de dag kyang kun nas nyon mongs pa dang / rnam par byang ba dang / rnam par gzhag pa dang / rnam par dag pas rig par bya'o//kun nas nyon mongs pas ji lta bu zhe na/ lung du ma bstan pa'i rtsa ba bzhi po sred pa dang lta ba dang nga rgyal dang ma rig pa ste/ de dag gis sems kun nas nyon mongs pa can du gyur ba rnams kyi nyon mongs pa'i bsam gtan gyi sgo nas gzugs dang gzugs med pa na spyod pa'i nyon mongs pa dang nye ba'i nyon mongs pa thams cad bsgribs pa'i lung du mi ston par 'gyur ba'i phyir ro//de la sred pas ni ro myang ba'i kun nas nyon mongs pas kun nas nyon mongs te/ shin tu sbyangs pa'i bde ba'i ro myong bar byed pa'i phyir ro/ /lta bas ni lta ba shas che ba'i bsam gtan pa nyid kyis kun nas nyon mongs te/bsam gtan la brten nas sngon gyi mtha' la rtog pa la sogs pa'i lta ba kun nas slong ba'i phyir ro/ /nga rgyal gyis ni nga rgyal gyi shas che ba'i bsam gtan pa nyid kyis kun nas nyon mongs te/ des khyad par du thob na khengs par 'gyur ba'i phyir ro/ /ma rig pa ni the tshom gyi shas che ba'i bsam gtan pa nyid kyis kun nas nyon mongs pa ste/de kho na ma gtogs pas thar pa 'dod pa khyad par de thob pa la thar pa yin nam ma yin snyam du the tshom skye ba'i phyir ro/ /rnam par byang ba ji lta bu zhe na dag pa'i bsam gtan dang / gzugs med pa 'jig rten pa rnams kyang dge ba'i phyir kun nas dkris pa'i dri ma dang bral bas na rnam par byang ba zhes bya'o//rnam par gzhag pas ji lta bu zhe na bsam gtan rnams ni yan lag dang / snyoms par 'jug pa dang tshad dang / ming du gdags pa'i bye brag gis rnam pa bzhir rnam par gzhag go/ / gzugs med pa rnams ni yan lag ma gtogs pa rnam pa gsum mo/ /gang gi dbang du byas nas chos gzhan dag kyang yod bzhin du rtog pa la sogs pa kho na bsam gtan rnams la yan lag nyid du rnam par gzhag ce na/ de tsam gyis gnyen po dang / phan yon dang / de gnyi ga'i gnas kyi yan lag yongs su rdzogs pa'i phyir ro//bsam gtan dang po la rtog pa dang / dpyod pa ni gnyen po'i yan lag ste/ de gnyis kyis 'dod pa dang / gnod sems dang / 'tshe ba'i rnam par rtog pa la sogs pa spong ba'i phyir ro/ /dga' ba dang bde ba ni phan yon gyi yan lag ste/rtog pa dang dpyod pa gnyis kyis gnyen po byas pa'i mi mthun pa'i phyogs de las dben pa las skyes pa'i dga' ba dang bde ba thob pa'i phyir ro/ /sems rtse gcig pa nyid ni de gnyi ga'i gnas kyi yan lag ste/ ting nge 'dzin la brten pa'i stobs kyis rtog pa la sogs pa 'jug pa'i phyir ro//de bzhin du bsam gtan gnyis pa la nang rab tu dang ba ni gnyen po'i yan lag ste/ de rtog pa dang dpyod pa'i gnyen po byed pa'i phyir ro/ /dga' ba dang bde ba dang sems rtse gcig pa nyid ni yan lag lhag ma gnyis la snga ma bzhin no/ /bsam gtan gsum pa la btang snyoms dang ngan pa dang /shes bzhin ni gnyen po'i yan lag ste/ de dag dga' ba'i gnyen po byed pa'i phyir ro/ /bde ba dang sems rtse gcig pa nyid ni yan lag lhag ma gnyis dang go rims bzhin no/ /bsam gtan bzhi pa la btang snyoms yongs su dag pa dang dran pa yongs su dag pa ni gnyen po'i yan lag ste/de gnyis bde ba'i gnyen po byed pa'i phyir ro/ /sdug bsngal yang ma yin bde ba yang ma yin pa ni phan yon gyi yan lag go/ /sems rtse gcig pa nyid ni de gnyi ga'i gnas kyi yan lag go//ji ltar na bsam gtan dang po la snyoms par 'jug pa'i yid la byed pa bdun du 'gyur zhe na/ mnyam par gzhag pa'i sa pa'i yid la byed pa gang gi 'dod pa rnams la nyes dmigs la sogs par lta bas rags pa'i mtshan nyid rab tu rig pa ste/ de med pa'i phyir bsam gtan dang po la zhi ba'i mtshan nyid do//'di ni mtshan nyid rab tu rig pa'i yid la byed pa zhes bya ste/ de ni thos pa dang sems pa dang 'dres par rig par bya'o/ /de'i 'og tu thos pa dang sems pa las 'das nas gcig tu bsgom pa'i rnam pas de'i rags pa dang zhi ba'i mtshan nyid kyis mtshan ma la dmigs pa'i zhi gnas dang lhag mthong bsgom zhing yang ji ltar yongs su bsal ba rags pa dang zhi ba nyid du mos te/'di ni mos pa las byung ba zhes ba'o/ /de goms pas thog ma kho nar spong ba'i lam dang ldan pa'i yid la byed pa ni rab tu dben pa las byung ba ste/des nyon mongs pa'i rnam pa chen po spangs pa dang / de'i phyogs kyi gnas ngan len dang bral ba'i phyir ro/ /rnal 'byor ba de de'i 'og tu spong ba la dga' bar 'gyur zhing / spong ba la phan yon du lta ste/ rab tu dben pa'i dga' ba dang bde ba chung ngu reg nas dus dus su dang bar 'gyur ba'i yid la byed pa ji tsam du rmugs pa dang gnyid dang rgod pa dang bral bar bya ba'i phyir rab tu dga' bar byed pa 'di ni dga' ba sdud pa zhes bya'o//de ltar legs par zhugs pa de dge ba'i phyogs la sbyor bas brten pa'i phyir 'dod pa na spyod pa'i nyon mongs pa'i kun nas dkris pa kun nas mi 'byung bas/de spangs sam ma spangs pa khong du chud par bya ba'i phyir/ de 'byung ba dang mthun pa'i sdug pa'i mtshan ma yid la byed pas so sor rtog pa ni dpyod pa'i yid la byed pa'o/ /des de ltar dpyad nas gnyen po bsgoms pas dus de srid cig pa'i tshul gyis 'dod pa na spyod pa'i nyon mongs pa thams cad spang bar bya ba'i phyir bsam gtan dang po la sbyor ba'i mthar thug pa'i gnyen po yid la byed pa ni sbyor ba'i mtha'o//de'i 'og tu dngos gzhi'i bsam gtan dang por gyur ba ni sbyor ba'i mtha'i 'bras bu yid la byed pa zhes bya'o/ /de la mtshan nyid rab tu rig pas ni spang bar bya ba dang /thob par bya ba legs par yongs su shes nas spang ba dang thob par bya ba'i phyir sems 'jog go/ /mos pa las byung ba ni de'i 'og tu yang dag par sbyor ba tsam mo/ /rab tu dben pa las byung bas ni kun nas nyon mongs pa chen po rnams rab tu spong ngo //dga' ba sdud pas ni nyon mongs pa'i rnam pa 'bring du spong ngo / /dpyod pas ni thob par mngon pa'i nga rgyal med pa la sems 'jog par byed do/ /sbyor ba'i mthas ni nyon mongs pa'i rnam pa chung ngu rab tu spong ngo / /sbyor ba'i mtha'i 'bras bus ni yid la byed pa legs par bsgoms pa 'di dag gis bsgoms pa'i 'bras bu myong bar byed do//bsam gtan dang po la snyoms par 'jug pa'i phyir yid la byed pa rnam pa bdun ji lta ba bzhin du 'du shes med 'du shes med min skye mched kyi bar la snyoms par 'jug pa'i phyir yang ji ltar mthun mthun du sbyar bar bya'o//rags pa'i mtshan nyid ni sa 'og ma thams cad de/ ci yang med pa'i skye mched kyi bar du'o/ /mdor bsdu na rnam pa gnyis su rig par bya ste/ rab tu ma zhi bar gnas pas shin tu sdug bsngal bar gnas pa dang / shin tu tshe thung ba'o/ /de las bzlog ste sa gong ma ni zhi ba'i mtshan nyid du rig par bya'o//tshad rnam par gzhag pa zhes bya ba la/ bsam gtan rnams ni chung ngu dang 'bring dang cher yongs su bsgom pa'i phyir ro/ /re re la yang bsam gtan gyi skye ba gsum gsum ni 'bras bu yin te/ 'di lta ste tshangs ris dang / tshangs pa mdun na 'don dang / tshangs pa chen po zhes bya ba la sogs pa ji ltar gong du bshad pa'o/ /gzugs med pa rnams na ni gzhal med khang gi gnas gzhan gnas pa med pa'i phyir de ltar skye ba'i bye brag rnam par gzhag pa med de/ 'on kyang de dag chung ngu la sogs pa yongs su bsgoms pa rnams kyis skye ba la tshe la sogs pa'i khyad par gyis mthon po dang dma' ba dang /nyon mongs pa can dang nyon mongs pa can ma yin pa mang ba'i khyad par gyis ngan pa dang bzang po ni yod do/ /ming du gdags pa rnam par gzhag pa ni bsam gtan bzhi'i rab tu dbye ba'i ting nge 'dzin rnams kyi ming grangs med pa dang bsam gyis mi khyab pa rnams te/'di ltar bsam gtan dang pos bsdus pa ji snyed la sangs rgyas bcom ldan 'das rnams dang / byang chub sems dpa' mthu chen po thob pa rnams snyoms par 'jug pa'i ting nge 'dzin de dag gi ming yang nyan thos rnams dang rang sangs rgyas rnams kyis mi shes na/de dag gi grangs shes par 'gyur ba'am snyoms par 'jug par lta ga la 'gyur te/ ji ltar shes rab kyi pha rol tu phyin pa las ting nge 'dzin brgya lha ga cig bstan pa dang / de bzhin du theg pa chen po'i mdo sde gzhan de dang de dag nas 'byung ba'o//rnam par dag pas ji lta bu zhe na/ rab kyi mtha'i cha las byung ba'i bsam gtan dang gzugs med pa rnams ni rnam par dag pa zhes bya ste/ yon tan khyad par can mngon par bsgrub ba'i phyir 'dod pa bzhin du 'thob pa la sogs pas las su rung ba mchog tu phyin par khrid pa'i phyir ro//'jig rten las 'das pa'i lam gyi bsgom pa'i lam la brgyad de/ sdug bsngal la sogs pa la chos dang rjes su rtog pa'i shes pa rnams te/ ji ltar mthong ba'i lam la bstan pa rnams so/ /de dag dang mtshungs par ldan pa'i ting nge 'dzin ni mi lcogs pa med pas bsdus pa'am/bsam gtan dang po nas ci yang med pa'i skye mched kyi bar du'o/ /'du shes med 'du shes med min skye mched ni 'du shes kyi rgyu ba yongs su mi gsal bas 'phags pa'i lam mchog tu gsal ba'i gnas ma yin pa'i phyir gcig tu 'jig rten par rig par bya'o//de'i phyir de'i 'du shes dman pas dmigs pa la mtshan mar mi byed pa'i phyir mtshan ma med pa zhes bya'o/ /'du shes med 'du shes med min skye mched la 'phags pa'i lam med pa de ji ltar shes she na/ 'di ltar bcom ldan 'das kyis ji tsam du 'du shes kyi snyoms par 'jug pa de tsam du kun shes pas rtogs so zhes gsungs pa'i phyir ro//'gog pa'i snyoms par 'jug pa ni 'jig rten las 'das pa ste/ 'phags pa'i lam gyi rjes la thob pa'i phyir ro/ /mi rnams kyi nang du mngon par sgrub po zhes bya ba ni/ thog ma nyid du skyed ces bya ba'i tha tshig ste/ sngar skye na mi rnams kyi nang du tshe de nyid dam gzugs kyi khams su skyes nas mngon du 'gyur ro/ /'phags pa nyan thos gzugs kyi khams las 'dod chags dang bral ste/ gzugs med pa thob pa gzugs kyi khams su ji ltar skye zhe na/ gzugs kyi khams kyi 'dod chags dang bral ba nyid gzugs med pa la snyoms par 'jug pa nges pa med do//de'i phyir gang gzugs la 'dod chags dang bral ba de thams cad gzugs med pa zhi ba rnam par thar pa la snyoms par 'jug par byed la/ gang yang gzugs med pa zhi ba rnam par thar pa la snyoms par 'jug par byed pa de thams cad gzugs las 'dod chags dang bral ba yin nam zhe na/mu bzhir 'gyur te mi lcogs pa med pa la brten nas gzugs la 'dod chags dang bral ba ni mu dang po'o/ /bsam gtan bzhi pa thob pa'i 'phags pa gzugs med par skye ba don du mi gnyer ba la spong ba'i lam bsal nas khyad par can gyi lam la gnas te gzugs med pa zhi ba rnams par thar pa la snyoms par 'jug par byed pa ni mu gnyis pa'o//de nyid 'dod chags dang bral ba don du gnyer zhing spong ba'i lam la gnas te gzugs med pa zhi ba rnam par thar pa la snyoms par 'jug par byed pa ni mu gsum pa'o//rnam pa de dag ma gtogs pa ni mu bzhi pa'o/ gzugs med par skyes pa rnams la ci'i phyir mngon sum du mi 'gyur zhe na/ zhi bar gnas pas gnas par 'dod pa'i 'phags pa rnams mi'i nang du de mngon par bsgrubs nas mngon sum du byed do//gzugs med par skyes pa de dag ni bsgrim mi dgos par rnam par smin pa las byung ba mchog tu zhi ba rnam par thar pa la gnas pas gnas pa ste/ de'i phyir de mngon sum du bya ba'i don du yang 'bad pa mi rtsom mo//lam chung ngu dang 'bring dang chen po re re la yang chung ngu la sogs pas rnam pa gsum du phye nas rnam pa dgur rnam par gzhag ste/ bsgoms pas spang bar bya ba rnam pa rim gyis spang ba bstan pa'i phyir ro/ /ci'i phyir lam chung ngu'i chung ngus nyon mongs pa chen po'i chen po spang zhe na/de ni ngo tsha shes pa dang khrel yod pa dang shin tu bral zhing 'dzem pa med pa'i sems kyi rgyud la kun du 'byung bas de rtogs par sla zhing yongs su gcad par sla ba ste/ de'i phyir de ni dri ma che long bzhin du gnyen po chung ngus sel to/ /gang yongs su gcad par dka' bar kun tu 'byung zhing phra la rgyud la zhen pa'i nyon mongs pa chung ngu'i chung ngu de ni dri ma chung ngu bzhin du gnyen po chen po'i stobs kyis sel te/de'i phyir mi mthun pa'i phyogs kyi rnam pa las bzlog nas gnyen po'i phyogs kyi rnam par gzhag par rig par bya'o/ /sbyor ba'i lam ni lam gang bsgoms pas chen po'i yang chen po la sogs pa nyon mongs pa'i rnam pa'i bye brag dang phyogs kyi gnas ngan len gyi cha shas re re dang bral ba'i phyir rim gyis gnas gyur pa de ni bsgom pa'i lam la sbyor ba'i lam zhes bya'o//gang gi 'og tu de nyon mongs pa'i bye brag gi rnam pa dang / phyogs kyi gnas ngan len ma lus pa dang bral ba'i phyir des gnas ngan len med par gnas gyur pa de ni bar chad med pa'i lam mo/ /rnam par grol ba'i lam ni gang gis gnas gyur pa de so sor rang gis myong ba'o/ /khyad par gyi lam ni de'i 'og tu nyon mongs pa lhag ma spong bar byed pa'i sbyor ba dang bar chad med pa dang rnam par grol ba'i lam gang yin pa'o//rnam grangs gzhan du na khyad par gyi lam ni nyon mongs pa spong bar sbyor ba btang ste/ mdo la sogs pa'i chos sems pa'am sdar bsam pa dang khong du chud pa'i chos la so sor rtog pa'i gnas pas gnas pa'am/snyoms par 'jug pa gzhan la snyoms par 'jug pa'i lam gang yin pa'o/ /yang mngon par shes pa la sogs pa yon tan khyad par can mngon par sgrub pa'am de dag gi gnas pa'i lam gang yin pa'o/ /de ltar bsgom pa'i lam rgya cher bshad nas de'i zhar la byung ba'i lam bsgom pa brjod par bya'o//lam bsgom pa rnam pa bzhi ni yang dag par spong ba'i dbang du byas pa ste/ ji ltar mthun mthun du sbyar ro/ /de la thob par bya ba'i phyir bsgom pa ni thob par bya ba'i don du bsgom pa ste/ des dge ba'i chos ma thob pa rnams thob pa'i phyir ro//brten pa bsgom pa ni brten pa nyid bsgom pa ste/ dge ba'i chos thob pa goms par byed pa'i phyir ro/ /bsal ba'i phyir bsgom pa ni bsal ba'i don du bsgom pa ste/ kun 'byung ba'i gnas skabs su mi dge ba'i chos sel ba'i phyir ro/ /gnyen po bsgom pa ni gnyen po la bsgom pa ste/ma 'ongs pa'i mi dge ba'i chos mi skye ba'i chos can du byed pa'i phyir ro/ /rnam grangs gzhan du na 'phags pa'i lam skye ba na rang gi bag chags 'jog pa de ni bag chags thob par bya ba'i phyir bsgom pa ste/ de las de'i rgyu las byung ba rnams cher 'bar bar 'byung ba'i phyir ro//lam de nyid mngon du byed pa ni brten pa'i bsgom pa'o/ /des rang gi mi mthun pa'i phyogs kyi gnas ngan len 'gog par byed pa ni bsal ba'i phyir bsgom pa'o/ /gnas 'gyur ba'i phyir phyi ma la mi skye ba'i chos can du 'jog pa de ni gnyen po bsgom pa'o//yang gnyen po ni rnam par sun 'byin pa la sogs pa rnam pa bzhir rab tu dbye bar rig par bya ste/ de la rnam par sun 'byin pa'i gnyen po ni/ zag pa dang bcas pa'i 'du byed rnams la nyes dmigs su lta ba ste/ des nad dang 'bras la sogs pa'i rnam pa rnams kyis nye bar len pa'i phung po sun 'byin pa'i phyir ro//spong ba'i gnyen po ni sbyor ba dang bar chad med pa'i lam rnams te/ de dag gi nyon mongs pa spong ba'i phyir ro/ /rten gnyis po ni rnam par grol ba'i lam rnams te/ de dag gis spong ba'i thob pa kun tu 'dzin pa'i phyir ro//thag bsring ba'i gnyen po ni de'i gong ma'i lam ste/ des sngon spangs pa'i nyon mongs pa thag bsring ba'i phyir ro/ /yang byang chub kyi phyogs la sogs pa'i bye brag gis lam rnam pa bcu gcig tu rnam par gzhag ste/ 'di lta ste/ dngos po la yongs su rtog pa'i lam ni dran pa nye bar gzhag pa rnams te/ des thog ma nyid du mi gtsang ba la sogs pa'i rnam gyi lus dang / tshor ba dang / sems dang / chos kyi dngos po la yongs su rtog pa'i phyir ro/ /rtsol ba las byung ba'i lam ni yang dag par spong ba rnams te/de ltar dngos po rnams la yongs su brtags nas des sgrib pa spangs pa'i don du brtson 'grus rtsom pa'i phyir ro/ /ting nge 'dzin yongs su sbyong bar byed pa'i lam ni rdzu 'phrul gyi rkang pa rnams te/ de ltar sgrib pa yongs su sbyangs pa ni 'dis 'dun pa dang brtson 'grus dang sems dang dpyod pa'i sgo nas ting nge 'dzin rnams kyis las su rung bar byed pa'i phyir ro//mngon par rtogs par bya ba'i sbyor ba'i lam ni dbang po rnams te/ de ltar ting nge 'dzin yongs su sbyang ba byas pa ni des 'phags pa'i lam yang dag par sgrub pa'i phyir dbang byed par gyur pa dro bar gyur pa dang rtse mo la sbyor ba'i phyir ro//mngon par rtogs pa dang 'dres pa'i lam ni stobs rnams te/ de ltar dbang byed pa thob pa ni lnga po 'dis de ma thag tu bden pa rtogs par bya ba'i phyir ma dad pa la sogs pa mi mthun pa'i phyogs zil gyis mi non pa bzod pa dang 'jig rten pa'i chos kyi mchog la sbyor ba'i phyir ro//mngon par rtogs pa'i lam ni byang chub kyi yan lag rnams te/ des thog ma kho nar so so rang gis de kho nar mngon du yang dag par rtogs pa'i phyir ro/ /rnam par dag pa nges par 'byin pa'i lam ni 'phags pa'i lam yan lag brgyad pa ste/de'i 'og tu des bsgoms pas spang bar bya ba'i nyon mongs pa rnams rnam par dag par bya bar nges par 'byung ba'i phyir ro/ /de'i phyir de ltar byang chub kyi phyogs 'di dag gi go rims ni 'di lta bu yin par rig par bya'o/ /gnas dang dbang po tha dad pa'i lam ni lam bzhi ste/de la dka' ba'i lam ni mi lcogs pa med pa dang / gzugs med pa la brten pa ste/ go rims bzhin du zhi gnas dang lhag mthong zhan pa'i phyir ro/ /sla ba ni bsam gtan la brten pa ste/ zung ngu 'brel par 'jug pa'i phyir ro//mngon par shes pa bul ba ni dka' ba dang sla ba'i gnas 'di gnyis la ste/ dbang po rtul po rnams kyi'o/ /mngon par shes pa myur ba ni 'di gnyis nyid la ste/ dbang po rnon po rnams kyi'o/ /bslab pa gsum yongs su sbyong ba'i lam ni chos kyi gnas bzhi ste/ de la brnab sems med pa dang / gnod sems med pa gnyis kyis ni lhag pa'i tshul khrims kyi bslab pa yongs su sbyong ba ste/ rjes su chags pa dang / khong khro ba spangs pa'i bslab pa'i gnas mi nyams par byed pa'i phyir ro/ /yang dag pa'i dran pas ni lhag pa'i sems kyi bslab pa yongs su spyod pa ste/dmigs pa ma brjed pa ni sems mnyam par 'jog pa'i phyir ro/ /yang dag pa'i ting nge 'dzin gyis ni lhag pa'i shes rab kyi bslab pa yongs su sbyong ste/ sems mnyam par gzhag pa las yang dag pa ji lta ba bzhin du shes pa'i phyir ro/ /yon tan thams cad sgrub par byed pa'i rnal 'byor gyi lam ni zhi gnas dang lhag mthong ste/de las 'jig rten pa dang 'jig rten las 'das pa'i yon tan thams cad mngon par 'grub pa'i phyir ro/ /lam sdud pa'i lam ni dbang po gsum po dag ste/ de la mi shes pa kun shes par byed pa'i dbang pos ni sbyor ba dang mthong ba'i lam sdud do//kun shes pa'i dbang pos ni bsgom pa'i lam sdud do/ /kun shes pa dang ldan pa'i dbang pos ni mthar phyin pa'i lam sdud do/ /yang byang chub kyi phyogs kyi chos rnams ni rnam pa lngas rnam par gzhag par rig par bya ste/ dmigs pa dang /ngo bo nyid dang / grogs dang / bsgom pa dang / bsgoms pa'i 'bras bus so/ /de la dran pa nye bar gzhag pa rnams kyi dmigs pa ni lus dang / tshor ba dang sems dang chos rnams te/ go rims bzhin no/ /ci'i phyir 'di dag dmigs par rnam par gzhag ce na/ 'di ltar byis pa phyin ci log gi blo can rnams ni phal cher dbang po dang bcas pa'i lus la brten nas bde ba la sogs pa la spyod pa na dmigs pa'i mtshan nyid kyi bdag 'dod chags la sogs pa dang / dad pa la sogs pas kun nas nyon mongs par 'gyur ba dang rnam par byang bar 'gyur bar rtogs te/de'i phyir thog ma nyid du dngos po'i mtshan nyid de/ legs par yongs su brtags pa'i phyir dmigs pa rnam pa bzhi rnam par gzhag par rig par bya'o/ /ngo bo nyid ni shes rab dang dran pa ste/ lus la sogs pa la rjes su lta ba zhes 'byung ba dang /dran pa nye bar gzhag pa zhes 'byung ba'i phyir go rims bzhin no/ /grogs ni de gnyi ga dang mtshungs par ldan pa'i sems dang sems las byung ba rnams so/ /bsgom pa ni nang dang phyi'i lus la sogs pa la lus la sogs pa'i rjes su lta ba'o/ /de la nang gi lus ni mig dang rna ba dang sna dang lce dang lus kyi dbang po rnams te/nang gi skye mched kyis bsdus pa dang sems can gyi grangs su gtogs pa'i phyir ro/ /phyi'i lus ni phyi rol gyi gzugs dang sgra dang dri dang ro dang reg bya rnams te/ phyi'i skye mched kyis bsdus pa dang / sems can gyi grangs su ma gtogs pa'i phyir ro//nang dang phyi'i lus ni mig la sogs pa'i skye mched dang 'brel ba'i gzugs la sogs pa'i skye mched dbang po'i gnas su gyur pa rnams te/ sems can gyi grangs su gtogs pa dang phyi'i skye mched kyis sdud pa'i phyir ro/ /gzhan gyi rgyud la yod pa'i nang gi skye mched gzugs can rnams kyang nang dang phyi'i lus te/skye mched rnam par gzhag pa dang / rgyud rnam par gzhag pa brtson par byas pa'i phyir ro/ /lus la lus kyi rjes su lta ba ni lus la lus dang 'dra bar lta ba ste/ rnam par rtog pa'i gzugs brnyan gyi gzugs mthong ba dang mthun par rang [(]gzhin [,]bzhin [)]gyi gzugs kyi lus nges par 'dzin pa'i phyir ro//nang gi tshor ba la sogs pa ni nang gi lus la brten nas 'byung ba rnams te/ mig la sogs pa la dmigs pa dang rang gi gnas las byung ba'i phyir ro/ /phyi'i tshor ba la sogs pa ni phyi rol gyi lus la brten nas 'byung ba rnams te/gzugs la sogs pa la dmigs pa dang gzhan gyi gnas las byung ba'i phyir ro/ /nang dang phyi'i tshor ba la sogs pa ni nang dang phyi'i lus la brten nas 'byung ba rnams te/ rang gi rgyud la yod pa'i phyi'i skye mched la dmigs pa dang / gzhan gyi rgyud la yod pa'i nang gi skye mched la dmigs pa'i phyir ro//tshor ba la sogs pa'i rjes su lta ba yang de bzhin te/ ci rigs su sbyar ro zhes pa ni blo la snang ba dang khyad par med pa bsgom pa zhes bya'o/ /'dun pa la sogs pa dgu po 'di dag ni dran pa nye bar gzhag pa'i yan lag go/ /sems zhum pa ni khyad par thob par bya ba la bdag dman par sems pa'i sgo nas sgyid lug pa'o//gnod pas yongs su skyo ba ni sha sbrang dang sbrang bu la sogs pa'i gnod pas nyen pa mi bzod pa'o/ /cung zad tsam gyis chog par 'dzin pa ni dge ba'i phyogs 'di tsam gyis chog go zhes phyir bzlog pa'o/ / ltung bas yid la gcags pas ni 'gro ba dang ldog pa la sogs pa la shes bzhin med par spyod pa ste/ sngar bslab pa dang 'gal nas phyis 'gyod pa'o/ /brtson pa 'dor ba ni bag med pa'i nyes pas dge ba'i phyogs ji ltar brtsams pa la sbyor ba mthar mi 'byin pa'o/ /'bras bu ni go rims bzhin du dran pa nye bar gzhag pa rnams la gtsang ba dang /bde ba dang / rtag pa dang / bdag tu phyin ci log spang ba ste/ mi sdug pa bsgom pa'i phyir ro/ /gang ci tshor yang rung ste/ de ni 'di ltar sdug bsngal bar shes pa'i phyir ro/ /gnas dang dmigs pa la sogs pa'i bye brag gis rnam par shes pa skad cig re re la gzhan du 'gyur bar rtogs pa'i phyir ro//kun nas nyon mongs pa dang rnam par byang ba chos tsam du zad de byed pa med par yongs su rtogs pa'i phyir ro/ /yang 'di dag gi 'bras bu ni go rims bzhin du bden pa bzhi la 'jug ste/lus dran pa nye bar gzhag pas ni sdug bsngal gyi bden pa la 'jug ste/ lus ni 'du byed kyi sdug bsngal gyi mtshan nyid gnas ngan len gyis rab tu phye ba'i phyir ro/ /'di ltar de'i gnyen por gyur pa shin tu sbyangs pa ni lus nyid la khyad par can du 'byung ngo / /tshor ba dran pa nye bar gzhag pas ni kun 'byung gi bden pa la 'jug ste/phrad pa la sogs par srid pa ni bde ba la sogs pa'i tshor ba'i gnas yin pa'i phyir ro/ /sems dran pa nye bar gzhag pas ni 'gog pa'i bden pa la 'jug ste/ bdag med cing rnam par shes pa tsam med par 'gyur ba lta bas na/bdag chad par 'dogs pa'i sgo nas mya ngan las 'das pa la skrag pa med pa'i phyir ro/ /chos dran pa nye bar gzhag pas ni lam gyi bden pa la 'jug ste/ mi mthun pa'i phyogs kyi chos spong ba dang / gnyen po'i chos la brten pa'i phyir ro/ /yang 'di dag gi 'bras bu ni lus dang tshor ba dang sems dang chos dang bral bar go rims bzhin du rig par bya ste/de dag bsgoms pas lus la sogs pa'i phyogs kyi gnas ngan len dang bral ba'i phyir ro/ /yang dag par spong ba rnams kyi dang po'i dmigs pa ni mi mthun pa'i phyogs skyes pa ste/ des sdig pa mi dge ba'i chos skyes pa rnams spang ba'i phyir 'dun pa skyed pa'i phyir ro/ /gnyis pa'i dmigs pas ni mi mthun pa'i phyogs ma skyes pa dang / gsum pa'i dmigs pa ni gnyen po ma skyes pa dang / bzhi pa'i dmigs pa ni gnyen po skyes pa ste/ ji ltar mdo sde las 'byung ba bzhin du sbyar bar bya'o//'dun pa skyed do zhes bya ba la sogs pa'i tshig rnams kyis ni brtson 'grus bsgom pa gnas dang bcas pa yongs su bstan to/ /de la gnas ni 'dun pa ste/ de ni brtson 'grus rtsom pa'i sngon du 'gro ba'i phyir ro/ /gang gi tshe zhi gnas kyi mtshan ma yid la byed pas gnyen po skyon med pa 'ba' zhig sgom pa de'i tshe 'bad pa zhes bya'o//gang gi tshe nye ba'i nyon mongs pa bying ba 'byung ba de bsal ba'i phyir dga' bar gyur pa la sogs pa'i yid la byed pa rnams kyis sems 'bar bar byed pa dang / nye ba'i nyon mongs pa rgod pa byung ba na nang du sdud pa'i sgo nas sems 'dzin pa de'i tshe brtson 'grus rtsom pa zhes bya'o//de'i phyir bying ba dang rgod pa bsal ba'i thabs bstan pa'i phyir de'i 'og tu sems rab tu 'dzin pa dang / rab tu 'jog pa smos so/ /'bras bu ni yang dag pa'i spong ba dang po dang gnyis pa'i ni mi mthun pa'i phyogs ma lus par nyams pa ste/de gnyis kyis ji ltar mthun mthun du sdig pa mi dge ba'i chos skyes pa dang ma skyes pa'i chos rnams nyams par byed pa'i phyir ro/ /gsum pa'i ni gnyen po thob pa ste/ des dge ba'i chos ma skyes pa skyed pa'i phyir ro/ /bzhi pa'i ni gnyen po thob pas 'phel ba ste/ des dge ba'i chos skyes pa spong bar byed pa'i phyir ro/ /rdzu 'phrul gyi rkang pa rnams kyi dmigs pa ni ting nge 'dzin gyis grub pa'i bya ba rdzu 'phrul la sogs pa'i bye brag gang yin pa'o/ /'dun pa'i ting nge 'dzin ni gang gus par sbyor ba la brten nas sems rtse gcig pa nyid la reg pa ste/ gus par sbyor ba ni 'dun pa drag po dang rim gro cher byas te sbyor ba'o/ /brtson 'grus kyi ting nge 'dzin ni gang rgyun du sbyor ba la brten nas sems rtse gcig pa nyid la reg pa ste/ gang rtag tu sbyor zhing nam yang mi sbyor ba ma yin pa de ni brtson 'grus zhes bya'o/ /sems kyi ting nge 'dzin ni sngon gang gi tshe rabs gzhan na ting nge 'dzin bsgoms pa la brten nas des sems kyi sa bon yongs su brtas pa'i phyir rang gi ngang gis ting nge 'dzin gyi rjes su mthun par gyur na sems rtse gcig pa nyid la reg pa'o//rdzu 'phrul gyi rkang pa mngon par sgrub pa'i rgyu yang dag par bstan pa'i phyir yang dag par spong ba bsgom pa la 'dun pa skyed do zhes bya ba la sogs pas bstan par rig par bya'o//sems rab tu 'jog pa dang rab tu 'dzin zhes bya ba de ni 'dir brjod pa'i lugs kyi go rims su rig par bya'o/ /de la sems kyi ting nge 'dzin ni gang sems rab tu 'jog pa ni sems rtse gcig pa nyid la reg pa'o zhes bya ba ni sems nyid kyis sems nang du 'dzin zhing zhi bar byed/sdud par byed/ 'thob par byed ces bya ba'i tha tshig go/ /dpyod pa'i ting nge 'dzin ni sems rab tu 'dzin pa na zhes bya ba ni chos la lhag mthong gi sgo nas sems 'bar bar byed ces bya ba'i tha tshig go/ /bsgom pa ni 'dun pa la sogs pa spong ba'i 'du byed brgyad goms par byed pa'o//spong ba'i 'du byed brgyad po de dag ni rnam pa bzhir rig par bya ste/ 'di lta ste/ 'bad pa ni 'dun pa dang / rtsol ba dang dad pa'o/ /de la 'dun pa ni rtsol ba'i gnas so/ /'dun pa'i rgyu ni dad pa ste/ 'di ltar gang zag gang zhig don du gnyer bar 'gyur ba de ni de thob par bya ba'i phyir rtsol lo//de yod pa nyid la sogs pa yid ches pa med na don du gnyer bar mi 'gyur ro/ /phan 'dogs pa ni shin tu sbyangs pa ste/ des lus dang sems la phan 'dogs pa'i phyir ro//nye bar 'dogs pa ni dran pa dang shes bzhin te/ dmigs pa ma brjed pas sems rtse gcig pa nyid la 'jug pa dang / de la bag med par gyur na yongs su gcod pa'i phyir te/ go rims bzhin no/ /gnyen po ni sems pa dang btang snyoms te/ sems rab tu 'dzin pa dang rab tu 'jog pa mngon par 'du byed pas bying ba dang rgod pa 'byung ba yongs su spong ba dang /nye ba'i nyon mongs pa med pa ni zhi gnas la sogs pa'i mtshan ma rjes su 'jug pa'i phyir ro/ /yang 'dun pa la sogs pa'i sdud pa dang / g.yeng ba bzhi dang bcas par yongs su spangs pa la sogs pa sgom pa de la sdud pa'i gzhi ni lhag mthong dang bral ba ste/le lo'i sgo nas bying bar 'gyur ro/ /g.yeng ba'i gzhi ni mi sdug pa'i 'du shes dang bral ba ste/ rgod pa'i sgo nas yang dag par rab tu mi 'dzin to/ /sdud pa ni rmugs pa dang gnyid kyi sgo nas nang du zhum pa'o/ /g.yeng ba ni sdug pa'i mtshan ma'i rjes su 'brang ba'i sgo nas yul rnams la rnam par 'phro ba'o//zhum pa med pa dang mthun pa'i sgom pa ni so sor rtog pa'i mtshan ma la brten nas chos la rnam par blta ba'o/ /g.yeng ba med pa dang mthun pa ni skra la sogs pa'i rdzas la mi gtsang bar so sor rtog pa'o/ /de gnyi ga dang mthun pa ni snang ba'i 'du shes so//de yang bdag gi 'dun pa ha cang yang zhum par yang mi 'gyur ba dang / ha cang rab tu gzung bar yang ma yin pa dang / nang du bsdus pa yang ma yin pa dang / phyi rol tu g.yeng ba yang ma yin pa dang / phyi ma dang snga ma'i 'du shes dang / steng dang 'og gi 'du shes su bya'o snyam pa dang / de ltar rnam par phye ba'i sems kun nas dkris pa med pas snang ba dang ldan pa'i sems bsgom par bya'i bdag gi sems mun pa can gyi tshul du ni mi 'gyur bar bya'o zhes bya ba'i dbang du mdzad nas/ bcom ldan 'das kyis go rims bzhin du gsungs so//'bras bu ni ji ltar 'dod pa bzhin du rdzu 'phrul la sogs pa'i yon tan bsgrub pa'i phyir ro/ /dbang po rnams kyi dmigs pa ni 'phags pa'i bden pa bzhi po rnams te/ bden pa mngon par rtogs pa la sbyor bas bsdus pas de'i rnam par 'gyur ba'i phyir ro/ /'bras bu ni de'i dbang gis ring por mi thogs par mthong ba'i lam skye ba dang /de nyid kyi dus na nges par 'byed pa'i cha dang mthun pa la brten pa'i sems kyi rgyud do/ /stobs rnams kyi dmigs pa la sogs pa ni dbang po rnams dang mthun no/ /'bras bu la ni bye brag yod de/ 'di ltar de dag gi 'bras bu de ni ji skad du/ma dad pa la sogs pa'i mi mthun pa'i phyogs bsrabs pas lhag par bstan pa ste/ de'i phyir 'di dag gis dmigs pa dang ngo bo nyid la sogs pa mthun du zin yang mi brdzi ba'i don gyi bye brag gis byang chub kyi phyogs gzhan nyid do/ /byang chub kyi yan lag rnams kyi dmigs pa ni 'phags pa'i bden pa bzhi po dag gi yang dag pa nyid ji lta ba'o zhes bya ba ni don dam pa rnam par dag pa'i dmigs pa zhes bya ba'i tha tshig go//ngo bo nyid ni dran pa la sogs pa'i chos bdun no/ /de la dran pa ni gnas kyi yan lag ste/ dran pa nye bar gnas pa ni dge ba'i chos thams cad mngon par brjod pa'i phyir ro//chos rnam par 'byed pa ni ngo bo nyid kyi yan lag ste/ byang chub kyi mtshan nyid yin pa'i phyir ro/ /brtson 'grus ni nges par 'byung ba'i yan lag ste/ des bgrod pa ji srid par 'gro ba'i phyir ro/ /dga' ba ni phan yon gyi yan lag ste/ des sems kyi rgyud tshim par byed pa'i phyir ro//shin tu sbyangs pa dang ting nge 'dzin dang btang snyoms ni kun nas nyon mongs pa med pa'i yan lag ste/ de la shin tu sbyangs pas ni kun nas nyon mongs par mi 'gyur te/ des gnas ngan len 'jig pa'i phyir ro/ /ting nge 'dzin ni kun nas nyon mongs par mi 'gyur te/de la gnas 'gyur ba'i phyir ro/ /btang snyoms ni kun nas nyon mongs pa med pa ste/ brnab sems dang yid mi bde ba dang bral ba nyon mongs pa can ma yin pa'i gnas skabs kyi ngo bo nyid yin pa'i phyir ro/ /bsgom pa ni dran pa yang dag byang chub kyi yan lag dben pa la gnas pa bsgom pa zhes bya ba la sogs pa ste/tshig 'di dag dang go rims bzhin du 'phags pa'i bden pa la dmigs pa ni byang chub kyi yan lag bsgom pa yongs su bstan pa yin te/ 'di ltar sdug bsngal la sdug bsngal nyid du dmigs pa ni de las dben pa tshol bas sdug bsngal la dmigs pa ni dben pa la gnas pa zhes bya'o//srid pa'i mtshan nyid ni sdug bsngal kun 'byung ba ste/ sdug bsngal kun 'byung bar dmigs pa ni de dang bral ba tshol bas de la dmigs pa ni 'dod chags dang bral ba la gnas pa'o/ /sdug bsngal 'gog pa la sdug bsngal 'gog par dmigs pa ni de mngon sum du byed par 'dod pas de la dmigs pa ni 'gog pa la gnas pa'o//sdug bsngal 'gog par 'gro ba'i lam ni des sdug bsngal rnams spong ba'i phyir rnam par spong ba zhes bya'o/ /de la de ltar dmigs pa ni bsgom pa tshol bas de la dmigs pa ni rnam par spong bas yongs su bsgyur ba zhes bya'o//'bras bu ni mthong bas spang bar bya ba'i nyon mongs pa rnams spangs pa ste/ byang chub kyi yan lag rnams kyi mthong ba'i lam gyi ngo bo nyid yin pa'i phyir ro/ /lam gyi yan lag rnams kyi dmigs pa ni de'i 'og tu bden pa ji ltar mthong ba rnams kyi yang dag pa nyid ji lta ba de nyid do//ngo bo nyid ni yang dag pa'i lta ba la sogs pa chos brgyad po rnams so/ /de la yang dag pa'i lta ba ni yongs su gcod pa'i yan lag ste/ des ji ltar myong ba'i de kho na nges par 'dzin pa'i phyir ro/ /yang dag pa'i rtog pa ni gzhan go bar byed pa'i yan lag ste/des ji ltar rtog pa rnam par bzhag nas ngag kun nas slong ba'i phyir ro/ /yang dag pa'i ngag dang las kyi mtha' dang 'tsho ba ni gzhan yid ches par byed pa'i yan lag ste/ de dag gi rtogs pa dang ldan pa'i lta ba la sogs pa rnam par dag pa'i go rims bzhin du gzhan dag gis gtan la 'bebs pa'i phyir ro//de la yang dag pa'i ngag gis ni rtogs pa dang mthun par 'dri ba dang lung ston pa 'bel ba'i gtam gtan la 'bebs pas de'i lta ba rnam par dag par rnam par shes so/ /yang dag pa'i lam gyi mthas ni 'gro ba dang ldog pa la sogs pa la spyod pa phun sum tshogs pas tshul khrims rnam par dag par rnam par shes so//yang dag pa'i 'tsho bas ni ji ltar gnang ba bzhin du chos dang mthun pas gos la sogs pa tshol bas yang dag pa'i 'tsho ba rnam par dag par rnam par shes so/ /yang dag pa'i rtsol bas ni/ nyon mongs pa'i sgrib pa rnam par sbyor ba'i yan lag ste/des kun tu sbyor ba lhag ma spong ba'i phyir ro/ /yang dag pa'i dran pas ni nye ba'i nyon mongs pa'i sgrib pa rnam par sbyong ba'i yan lag ste/ des yang dag pa'i zhi gnas la sogs pa'i mtshan ma ma brjed pas nye ba'i nyon mongs pa bying ba la sogs pa'i skabs med pa'i phyir ro//yang dag pa'i ting nge 'dzin ni yon tan khyad par can la sgrib pa rnam par sbyong ba'i yan lag ste/ des mngon par shes pa la sogs pa'i yon tan mngon par sgrub pa'i phyir ro/ /bsgom pa ni byang chub kyi yan lag bzhin te/ 'di lta ste/ yang dag pa'i lta ba dben pa la gnas pa bsgom pa zhes rgya cher 'byung ba'o//lam dang chos kyi gnas rnams kyi don ni snga ma bzhin du bshad par rig par bya'o/ /zhi gnas ni sems gnas pa rnam pa dgu ste/ de la phyi rol gyi dmigs pa rnams las phyir blan nas nang du mi g.yeng bar gang dang po nyid du sems nye bar 'dogs pa ni 'jog pa'o//de ltar sems g.yo ba rags pa thog ma nyid du nye bar brtags pa de dmigs pa de nyid la rgyun gyi tshul dang phra bar byed pas mngon par bsdus pa ni rgyun du 'jog pa'o/ /brjed nas phyi rol tu g.yengs par gyur pa de yang phyir bkug pa ste/ brlan te 'jog pa'o//sems phyi rol tu mi 'phro bar bya ba'i phyir thog ma nyid du dran pa nye bar gnas pa ni nye bar 'jog pa'o/ /rnam par g.yeng ba'i rgyu gzugs la sogs pa la nyes dmigs kyi 'du shes kyi dbang du byas nas thog ma nyid du sems rab tu 'phror mi ster ba ni dul bar byed pa'o/ / sems 'khrug par byed pa nye ba'i nyon mongs pa rnam par rtog par byed pa la nyes dmigs su lta bas 'phror mi ster ba ni zhi bar byed pa'o/ /brjed nas rnam par rtog pa la sogs pa kun du 'byung ba na de dang du mi len pa ni rnam par zhi bar byed pa'o/ /mngon par 'du byed pas skabs med cing bar chad med par ting nge 'dzin rgyun du brlan te 'jog pa ni rtse gcig tu byed pa'o//shin tu goms pa'i phyir mngon par 'du byed pa med cing lhun gyis grub par sems kyi ting nge 'dzin gyi rgyun g.yeng ba med par 'byung ba ni mnyam par 'jog pa'o/ /lhag mthong ni 'di lta ste/chos rnams la rnam par 'byed pa zhes bya ba la sogs pa ste/ de la dpyod pa rnam par sbyong ba la dmigs pa'am/ /mkhas pa la dmigs pa'am/ nyon mongs pa rnam par sbyong ba'ang rung ste/ ji snyed yod pas rnam par 'byed pa'o/ /ji lta ba bzhin du yod pas rab tu rnam par 'byed pa'o//rnam par rtog pa dang bcas pa'i yid la byed pa shes rab dang bcas pas mtshan mar byed pa ni yongs su rnam par rtog pa'o/ /kun tu rtog pa ni yongs su dpyod par byed pa'o/ /yang zhi gnas dang lhag mthong la brten nas lam bzhir 'gyur te zhes bya ba ni lam bzhi bsten pa'i dbang du byas pa ste/de la dang po ni zhi gnas thob pa'i phyir 'dug bzhin du sems 'jog pa nas mnyam par 'jog pa'i bar dang / lhag mthong ma thob pa'i phyir ting nge 'dzin de la brten nas phyis de bzhin du 'dug ste/ chos de dag la rnam par 'byed pa nas yongs su dpyod par byed pa'i bar du'o//gnyis pa ni de las zlog par byed par rig par bya'o/ /gsum pa ni gnyi ga ma thob pa ste gnyi ga la brtson par byed do/ /ji ltar zhe na thos pa 'dzin pa'i sgo nas lhag mthong la brtson par byed do/ /de sngon du 'gro bas zhi gnas la brtson par byed do/ /bzhi ba ni gnyi ga thob pa'o/ /mi shes pa kun shes par byed pa'i dbang po ni sbyor ba'i lam nges par 'byed pa'i cha dang mthun pas bsdus pa dang /mthong ba'i lam gyi sems kyi skad cig bco lnga po dag la dbang po gang yin pa ste/ 'di lta ste/ yid kyi dbang po dang dad pa la sogs pa lnga dang mi lcogs pa med pa la sogs pa gnas kyi bye brag gis ji ltar mthun mthun du bde ba dang yid mi bde ba dang btang snyoms kyi dbang po rnams las gang yang rung ba'o//yid mi bde ba'i dbang po ni sbyor ba'i dus na nges par 'byed pa'i cha dang mthun pa'i rjes la rnam par thar pa mchog 'dod pas bsdus par rig par bya'o/ /de dag ni srid pas dbang po rnam pa bcu ste/de kho na sngon mi shes pa kun shes par bya ba'i phyir zhugs pas mi shes pa kun shes par byed pa'i dbang po zhes bya'o/ /dbang po rnam pa bcu po 'di dag nyid mthong ba'i lam gyi sems kyi skad cig bcu drug pa nas rdo rje lta bu'i ting nge 'dzin ces bya ba'i bar du slob pa'i lam de la kun shes pa'i dbang po zhes bya ste/sngon ma mthong ba'i shes bya med pa'i phyir ro/ /yid mi bde ba'i dbang po ma rtogs par dbang po rnam pa dgu po de dag nyid mi slob pa'i lam la kun shes pa dang ldan pa'i dbang po zhes bya ste/ kun shes pa dang ldan pa ni dgra bcom pa'i dbang po yin pa'i phyir ro//bsgom pa'i lam gyi skabs su 'di yang brjod par bya ste/ gong ma'i sa pa'i lam la mngon du byed pa bsgom pa na sa 'og ma'i dge ba'i rtsa ba mngon sum du ma gyur pa rnams kyang bsgom par 'gyur te/ de dag la dbang 'byor ba thob pa'i phyir ro/ /dbang 'byor ba ni mchog tu sbyangs pa thob pa ste/ mngon sum du byed pa ni dbang du rig par bya'o/ /mthar phyin pa'i lam ni gnas ngan len thams cad rgyun chad pa zhes rgya cher 'byung ba de la gnas ngan len thams cad ni nyi shu rtsa bzhi yin te/ 'di lta ste/ mngon par brjod pa'i gnas ngan len ni kun tu 'gro ba ni mig la sogs pa chos thams cad kyi ming la mngon par zhen pa'i bag chags kun gzhi rnam par shes pa la gnas pa thog ma med pa'i dus nas rjes su zhugs pa gang yin pa ste/de las mig la sogs pa'i chos ming la mngon par zhen pa dang bcas pa rnams yang dang yang 'byung ba'i phyir te de ni spros pa'i bag chags zhes bya'o/ /tshor ba'i gnas ngan len ni zag pa dang bcas pa'i tshor ba rnams kyi bag chags so//nyon mongs pa'i gnas ngan len ni nyon mongs pa rnams kyi bag la nyal lo/ /las kyi gnas ngan len ni zag pa dang bcas pa'i las rnams kyi bag chags so/ /rnam par smin pa'i gnas ngan len ni rnam par smin pa'i lus las su mi rung ba nyid do//nyon mongs pa'i sgrib pa'i gnas ngan len ni nyon mongs pa mi bzad cing rgyun ring ba'o/ /las kyi sgrib pa'i gnas ngan len ni lam gyi bar chad byed pa mtshams med pa la sogs pa'i las kyi sgrib pa nyid do/ /rnam par smin pa'i sgrib pa'i gnas ngan len ni bden pa mngon par rtogs pa dang mi mthun pa sems can dmyal ba la sogs pa'i lus thob pa'o//sgrib pa'i gnas ngan len ni dge ba'i phyogs la sbyor ba'i bar chad byed pa 'dod pa la 'dun pa la sogs pas zil gyis gnon pa nyid do/ /rtog pa'i gnas ngan len ni rab tu 'byung ba la gags byed pa 'dod pa la rnam par rtog pa la sogs pas zil byis gnon pa nyid do//zas kyi gnas ngan len ni za ha cang nyung ba dang mang du zos pas sbyor ba'i 'os su ma gyur ba nyid do/ /'khrig pa'i gnas ngan len ni gnyis kyis gnyis phrad pa las gyur pa dang / lus dang sems la gnod pa'o//rmi lam gyi gnas ngan len ni gnyid las gyur pa'i lus bems po nyid do/ /nad kyi gnas ngan len ni khams ma snyoms pa las gyur pa'i nyams rab tu mi bde ba nyid do/ /rga ba'i gnas ngan len ni 'byung bar 'gyur ba las gyur pa'i dbang med pa nyid do/ /'chi ba'i gnas ngan len ni 'chi ba na dbang po thams cad 'khrug pa'o//yongs su ngal ba'i gnas ngan len ni ha cang 'gro ba las gyur pa'i lus dub pa'o/ /gnas ngan len bstan pa ni mngon par brjod pa'i gnas ngan len la sogs pa 'di dag dang ji ltar mthun mthun du sbyar te/ yongs su mya ngan las mi 'da' ba'i chos can no//gnas ngan len chen po dang 'bring dang chung ngu ni go rims bzhin du 'dod pa dang gzugs dang gzugs med pa na spyod pa rnams su rig par bya'o/ /nyon mongs pa'i sgrib pa'i gnas ngan len ni nyan thos dang rang sangs rgyas kyi byang chub kyi mi mthun pa'i phyogs so//snyoms par 'jug pa'i sgrib pa'i gnas ngan len ni/ mthar gyi gnas pa'i snyoms par 'jug pa dgu mngon par bsgrub pa'i mi mthun pa'i phyogs so/ /shes bya'i sgrib pa'i gnas ngan len ni thams cad mkhyen pa nyid kyi mi mthun pa'i phyogs so/ /de ltar gnas ngan len 'di dag thams cad ji ltar mthun mthun du rgyun bcad pa ni mthar phyin pa'i lam ste/ji skad du sems rnam par grol ba yongs su rdzogs pa dang shes rab rnam par grol ba yongs su rdzogs nas lus kyi gnas ngan len rnams rgyun bcad de/ dran pa dang ldan pa'i rgyus 'di ltar de'i sgo dang po 'di lta ste/mig gis rnam par shes par bya ba'i gzugs rnams la shin tu dul ba dang / shin tu sbas pa dang / shin tu bsrungs pa dang / shin tu bsdams pa dang / shin tu bsgoms pa yin te/ yid kyis rnam par shes par bya ba'i chos rnams kyi bar la zhes gsungs pa lta bu'o//rdo rje lta bu'i ting nge 'dzin ni bsgom pa'i lam gyi mtha'i spong ba'i lam gyi gnas skabs su rig par bya'o/ /ting nge 'dzin de yang bar chad med pa ste/ de'i rkyen gyis 'jig rten pa'i spyod pas rab tu phan mi phyed pa'i phyir ro/ /brtan pa ni sgrib pa thams cad kyis mi phigs pa dang / sgrib pa thams cad ni phigs pas sra ba'i phyir ro/ /ro gcig pa ni rnam par mi rtog pa ro gcig pa'i phyir ro/ /khyab pa ni shes bya thams cad kyi spyi'i de bzhin nyid la dmigs pa'i phyir ro/ /de'i don dang 'dra bar bya ba'i don du bcom ldan 'das kyis dper na brag chen po ma grum pa ser ka med pa khong stong ma yin pa gcig tu bsdus pa shin tu mkhregs pa zhes gsungs so//gnas ma lus par gyur pa ni rnam pa gsum ste/ mi slob pa'i lam thob pa'i sems kyi gnas gyur ba ni chos nyid kyi sems rang bzhin gyis 'od gsal ba glo bur gyi nye ba'i nyon mongs pa ma lus pa dang bral bas gnas gyur pa gang yin pa ste/de bzhin nyid du gyur zhes bya ba'i tha tshig go/ /lam gyi gnas gyur pa ni 'jig rten pa'i lam snga ma mngon par rtogs pa'i dus na 'jig rten las 'das pa nyid du gyur pa ste/ bya ba'i lhag ma yod pa'i phyir slob pa zhes kyang bya'o/ /gang gi tshe khams gsum pa la 'dod chags dang bral ba mi mthun pa'i phyogs ma lus par gyur par bsal ba de'i tshe lam gyi ngo bo nyid kyi gnas gyur pa yongs su rdzogs par rnam par gzhag go//gnas ngan len gyi gnas gyur pa ni kun gzhi rnam par shes pa nyon mongs pa thams cad kyi bag la nyal gyi bag chags dang bral bar gyur par rig par bya'o//zad par gyur nas shes pa'am/ yul de la shes pa gang yin pa de ni zad pa shes pa ste/ de ni 'di skad du kun nas 'byung ba ma lus par spangs nas shes pa gang yin pa dang / de'i gnas skabs na rgyu 'gog pa la dmigs pa ni zad pa shes pa zhes bya'o//de bzhin du mi skye bar gyur nas shes pa'am/ yul de la shes pa gang yin pa de ni mi skye ba shes pa ste/ phyi ma la sdug bsngal thams cad gtan du mi skye ba'i chos nyid du gyur nas shes pa gang yin pa de ni bden pa gzhan la dmigs pa yang yin pa'o//yang na gang sdug bsngal gyi bden pa la mi skye bar dmigs pa de mi skye bar shes pa zhes bya ba'i tha tshig go/ /mi slob pa'i chos bcu ni mi slob pa'i tshul khrims la sogs pa'i phung po lnga'i dbang du byas pa ste/ de la mi slob pa'i yang dag pa'i ngag dang las kyi mtha' dang 'tsho ba rnams ni mi slob pa'i tshul khrims kyi phung po'o//yang dag pa'i dran pa dang ting nge 'dzin ni ting nge 'dzin gyi phung po'o/ /yang dag pa'i lta ba dang rtog pa dang rtsol ba rnams ni shes rab kyi phung po'o/ /yang dag pa'i rnam par grol ba ni rnam par grol ba'i phung po'o/ /yang dag pa'i shes pa ni rnam par grol ba'i ye shes mthong ba'i phung po'o//yang lam gyi bden pa'i rnam pa bzhi dang mtshan nyid bzhi'o/ /de la 'dis de kho na'i lam tshol bas lam mo/ /rigs pa ma yin par gyur pa'i nyon mongs pa rnams kyi gnyen por gyur pas rigs pa'o/ /de kho na khong du ma chud pa'i nyes pas mi rtag pa la rtag pa la sogs par phyin ci log pa rnams kyis phyin ci log tu gyur pa'i sems phyin ci log med pa de kho na khong du ma chud pa la 'jog pas sgrub pa'o//nges par 'byung ba'i gnas rtag pa brtan du bar 'gro bas nges par 'byin pa zhes bya'o/ / sdug bsngal la sogs pa'i bden pa rnams la mi rtag pa la sogs pa rnam pa bcu drug ni 'jig rten pa yang yod 'jig rten las 'das pa yang yod de/ de la 'jig rten pa rnams ni shes bya la legs par ma zhugs pa dang / sgrib pa dang bcas pa dang / rnam par rtog pa dang bcas pa ste/ de bzhin nyid ma rtogs pa dang /nyon mongs pa'i bag la nyal yod pa dang / mngon par brjod pa'i sgo nas spros pa'i phyir te/ go rims bzhin no/ /bzlog pa ni 'jig rten las 'das pa ste/ legs par zhugs pa dang / sgrib pa med par gyur nas rnam par mi rtog pas 'jig rten pa rnams las khyad par du 'gyur ro//de dag rnam par mi rtog na ji ltar shes bya la legs par zhugs par gyur zhe na/ 'di ltar 'di dag la gnas pa ni mi rtag pa'i don mthong zhing mngon du myong gi /mi rtag go zhes mngon par brjod pa dang spros pa'i sgo nas mthong ba ni ma yin no/ /de bzhin du sdug bsngal la sogs pa'i rnam pa rnams la yang sbyar bar bya'o//bden pa rnam par nges pa'o/ /chos rnam par nges pa la chos ni gsung rab tu gtogs pa yan lag bcu gnyis te/ de la mdo'i sde ni gang bzhed pa'i don smos pa'i tshul gyis rkyang bar gsungs pa'o/ /ci'i phyir de bzhin gshegs pas bzhed pa'i don rnam par phye ste/ma gsungs she na/ smas pa/ phan yon bcu gzigs nas de bzhin gshegs pa smos pa'i tshul gyis chos ston te/ rnam par gzhag par sla ba ni ston pas go bar bya ba'i don rnam pa mang du rnam par gzhag pa mdor bsdus te/ tshegs chung ngus rnam par 'jog pa'i phyir ro//bshad sla ba ni tshig nyung ngus don chen po rgyas par go bar byed pa'i phyir te/ 'di lta ste/ 'jog pa dang / rgyun du 'jog pa zhes bya ba la sogs pa'o/ /nyen pas kyang gzung sla ba'o/ /chos la gus pas myur du tshogs yongs su rdzogs par byed pa ni chos 'di dag bsgoms pas shes par bya ba yin par rtogs nas gus pa skyes pa chos de la gces spras su bya ba'i sgo nas dad pa la sogs pa'i tshogs yongs su rdzogs par byed pa'i phyir ro//myur du chos nyid rtogs par 'gyur ba ni de ltar gces spras su bya ba sbyor ba'i shes rab rno bar gyur pa'i phyir ro//dkon mchog rnams la shes nas dad pa thob pa ni bstan pa la legs par rnam par gnas par khong du chud nas ston pa la sogs pa la dad pa skye ba'i phyir ro/ /mthong ba'i chos la bde bar gnas pa'i mchog la reg pa ni dgongs pa'i don rtsol ba chen pos bsams nas rtogs pas rab tu dga' ba'i khyad par thob pa'i phyir ro//'bel ba'i gtam gyis gtan la 'bebs pas dam pa rnams kyi sems mgu bar byed pa ni don zab pa rnam par 'byed pas de'i phyir mkhas pa mkhas pa zhes bya ba'i grangs su 'gro ste/ 'di'i snyan pa kun tu 'byung zhes bya ba'i tha tshig go//tha ma 'di gnyi ga bsdus te phan yon gcig tu blta bar bya'o/ /nges pa'i don gyi mdo sde ni lung du bstan pa'i sde ste/ des rnam par phye nas dgongs pa lung ston pa'i phyir ro/ /ched du brjod pa'i sde ni gang yi rangs nas brjod pa ste/ 'di lta ste/ gang gi tshe chos de dag 'byung ngo zhes bya ba la sogs pa'o/ /gleng gzhi'i sde ni gang zag 'ga' zhig gi ched du gsungs pa dang / byung ba dang bcas pa'i bslab pa bcas pa gsungs pa ste/ 'di lta ste/ gzhi 'di dang skabs 'di zhes rgya cher 'byung ba'o/ /rtogs pa brjod pa'i sde ni dpe dang bcas par gsungs pa ste/des don gsal bar byed pa'i phyir te/ mngon du gsal bar byed pa'i phyir ro zhes bya ba'i tha tshig go/ /shin tu rgyas pa'i sde zhes bya ba la rnam par 'thag ba dang / mtshungs bral zhes bya ba ni theg pa chen po'i rnam grangs su gtogs pa ste/ de ni chen po rnam pa bdun dang ldan pa'i phyir theg pa chen po zhes bya'o//chen po rnam pa bdun la dmigs pa chen po ni byang chub sems dpa'i lam stong phrag brgya pa la sogs pa'i mdo sde bskyang du med pa'i bstan pa'i chos la dmigs pa'i phyir ro/ /sgrub pa chen po ni bdag dang gzhan gyi don mtha' dag sgrub pa'i phyir ro//ye shes chen po ni gang zag dang chos la bdag med par shes pa'i phyir ro/ /brtson 'grus chen po ni bskal pa grangs med pa chen po gsum du dka' ba brgya stong la sbyor ba'i phyir ro/ /thabs la mkhas pa chen po ni 'khor ba dang mya ngan las 'das pa la mi gnas pa'i phyir ro/ /'thob pa chen po ni stobs dang mi 'jigs pa dang sangs rgyas kyi chos ma 'dres pa la sogs pa yon tan dpag tu med cing grangs med pa thob pa'i phyir ro//las chen po ni 'khor ba ji srid par byang chub la sogs pa yang dag par ston pas sangs rgyas kyi mdzad pa sgrub pa'i phyir ro/ /gtan la phab par bstan pa'i sde ni gang du phyin ci ma log pa'i mtshan nyid du mdo sde la sogs pa'i don bshad pa'o//gleng gzhi'i sde ni byung ba dang bcas pa'i bslab pa bcas pa gsungs pa bsdus pa ni 'dul ba'i sde snod do/ /rtogs pa brjod pa la sogs pa ni de'i 'khor du rig par bya'o/ /rmad du byung ba'i chos rnams ni byang chub sems dpa'i mdo sde'i sde snod du bsdus pa ste/de dag gi khyad par gyi mthu bsam gyis mi khyab cing rgya cha ba'i khyad par dang ldan pa'i phyir ro/ /gtan la phab par bstan pa'i sde ni nyan thos kyi theg pa dang / theg pa chen po gnyi ga'i chos mngon pa'i sde snod do/ /nye ba'i nyon mongs pa the tshom gyi gnyen por ni mdo sde'i sde snod rnam par gzhag ste/gdul bya rnams kyi som nyi byung ba bcad pa'i ched du mdo'i sde dang / dbyangs kyis bsnyad pa'i sde la sogs pa bshad pa'i phyir ro/ /nye ba'i nyon mongs pa mtha' gnyis dang ldan pa'i gnyen por 'dul ba'i sde snod/ rnam par gzhag ste/ sog 'jog byed pas yongs su spyod pa la sogs pa spong ba dang / brgya stong ri ba'i gos la sogs pa gnang ba'i phyir ro/ /mtha' gnyis ni 'dod pa bsod snyoms kyi mtha' dang / bdag dub pa'i mtha'o/ /rang gi lta ba mchog tu 'dzin pa'i nye ba'i nyon mongs pa'i gnyen por chos mngon pa'i sde snod rnam par gzhag ste/der chos kyi mtshan nyid rgya cher bstan pa'i phyir ro/ /yang mdo sde'i sde snod la brten nas gdul bya rnams bslab pa gsum la byang bar byed do/ /de las de rgyas par brjod pa'i phyir ro/ /'dul ba la brten nas lhag pa'i tshul khrims dang lhag pa'i sems kyi bslab pa bsgrub ste/der so sor thar pa'i sdom pa'i bslab pa'i lam nye bar bstan pa la brten nas tshul khrims yongs su sbyong ba dang de yongs su dag par 'gyur te/ 'gyod pa med pa la sogs pa'i rim gyis sems mnyam par 'jog pa'i phyir ro/ /chos mngon pa la brten nas lhag pa'i shes rab kyi bslab pa 'grub ste/der chos rab tu rnam par 'byed pa'i thabs rgya cher bstan pa'i phyir ro/ /de'i phyir yang sde snod gsum rnam par gzhag go/ /yang mdo sde'i sde snod la brten nas tshig dang don la byang bar byed do/ /'dul ba la brten nas gnyi ga mngon sum du byed do//'dul ba'i sde snod ni bslab pa sgrub pas rab tu phye ba'i phyir ro/ /de'i phyir chos dang don mngon sum du bya ba'i gnas yin pas gzhi'i gnas zhes bya'o/ /chos mngon pa la brten nas phan tshun 'bel ba'i gtam gtan la 'bebs pa las gyur ba'i chos la rdzogs par longs spyod pas bde ba la reg par gnas par 'gyur te/der chos rnam pa mang po rnams kyi rang dang spyi'i mtshan nyid la sogs pa'i chos nyid la byang bar byed pa'i phyir ro/ /nyan thos kyi theg pa'i skabs su gnas brtan kun dga' bos chos kyi phung po brgyad khri bzhi stong gang dag gzung ba rnams ni sde snod gsum po 'di dag nyid yin no//chos kyi phung po gcig gi tshad ji tsam zhe na/ grangs brgya phrag bcu ni chos kyi phung po ste/ grangs stong zhes bya ba'i tha tshig go/ /gal te de lta yin na grangs stong zhes de skad du ci'i phyir mi brjod ce na/ phung po re re la yang stong stong rnam par gzhag pa'i dgongs pa brtan pa'i phyir te/'di ltar gcig la sogs pa bskyed na grangs bcur 'gyur ro/ /bcur bskyed na grangs brgyar 'gyur ro/ /grangs stong la sogs pa'i gzhi ni grangs brgya phrag bcu yin par blta'o/ /'di lta ste brgya phrag bcu ni stong ngo / /stong phrag brgya ni 'bum mo//'bum phrag brgya ni bye ba'o/ /de bzhin du grangs gong ma thams cad la yang brgya dang bcu po 'di gnyis las gang yang rung ba zhig gdon mi za bar gzhir 'gyur te/ de'i phyir de dag bsdus na brgya phrag bcu po de dag la chos kyi phung po gcig rnam par gzhag go/ /bgrang ba'i tshul 'dis na chos kyi phung po brgyad khri bzhi stong gi tshig le 'ur byas pa bye ba phrag brgyad dang 'bum phrag bzhi bcur 'gyur ro// //bam po bdun pa/ sde snod gsum gyis bsdus pa'i chos 'di dag gang gi spyod yul yin zhe na/ thos pa las byung ba la sogs pa'i sems dang sems las byung ba rnams kyi spyod yul te/dmigs pa zhes bya ba'i tha tshig go/ /de'i zhar la dmigs pa dang bcas pa la sogs pa'i mtshan nyid sems dang sems las byung ba rnams kyi chos las brtsams te dmigs pa la sogs pa rnam par gzhag go/ /de la chos kyi nang nas de dag gi dmigs pa gang zhe na/ mdo'i sde la sogs pa ste/ ming dang tshig dang / yi ge'i tshogs kyis bsdus pa'i mdo'i sde la sogs pa bshad pa'o zhes bya ba'i tha tshig go/ /rnam pa ni gang phung po la sogs pa'i don gyi rnam pa rnams las brtsams te bstan pa gang yin pa de ni rnam pa rnams te/ de dag ni sems dang sems las byung ba rnams su rig par bya'o//gnas ni gzhan las rnam par rig pa dang dran pa dang bag chags so/ /de la bshad pa'i dus na gzhan las rnam par rig pa gnas te/ de ni gzhan gyi sgra las shes pa 'byung ngo / /de'i 'og tu dran pa gnas te ji ltar thos pa bzhin du rjes su dran pas goms par byed pa'i phyir ro//de'i 'og tu bag chags gnas te/ de'i rjes su dran pa med kyang goms pa'i bag chags kyi dbang gis phyis snang bar 'gyur ba'i phyir ro/ /mtshungs par ldan pa ni sems dang sems las byung ba rnams gcig gi grogs gcig yin pa'i tshul gyis phung po la sogs pa dang rab tu ldan pa'i don gyi rnam pa rnams kyi mdo sde la sogs pa'i dmigs pa yang dag par rtogs pa'o//chos la dmigs pa rab tu dbye ba ni khyab pa'i dmigs pa la sogs pa rnam pa bzhi'o/ /khyab pa'i dmigs pa ni rnam par rtog pa dang bcas pa'i gzugs brnyan la sogs pa'i bye brag gis rnam pa bzhi'o//de la mos pa yid la byed pa ni gang gcig tu 'jig rten pa'i yid la byed pa'o/ /de kho na yid la byed pa ni 'jig rten las 'das pa dang / de kho na'i rjes las thob pa'o/ /chos rnams kyi ji snyed yod pa ni chos thams cad kyi dngos po 'di dag tu zad do zhes gang shes bya rnam par gzhag pa ste/'di ltar phung po dang khams dang skye mched rnams so/ /ji lta ba bzhin du yod pa ni rnam pa 'di dag tu de shes par bya ba ste/ 'di ltar bden pa'i sgo nas phung po dang khams dang skye mched de dag nyid ji ltar mthun mthun du sdug bsngal nyid du shes par bya ba nas lam gyi bar du'o//rnam pa'i sgo nas bden pa re re la yang rnam pa bzhi bzhis shes par bya'o/ /bye brag med par na thams cad kyang de bzhin nyid kyis rnam par shes par bya'o/ /chos kyi sdom gyi skabs kyis na 'du byed thams cad mi rtag pa nyid du shes par bya ba nas/mya ngan las 'das pa zhi ba nyid kyi bar du'o/ /rnam par thar pa'i rnam pa'i skabs kyis na stong pa nyid nas mtshan ma med pa'i bar du'o/ /dgos pa yongs su grub pa ni gnas gyur pa grub pa ste/ gnas gyur pa la dmigs pa phyin ci ma log par snang ba nyid do/ /ji lta ba bzhin du yod par bstan pa rnam pa bcu drug dang /rnam par thar pa rnam pa gsum bstan pa de dag ni gcig gis gcig sdud do/ /ji lta zhe na/ rnam pa bcu drug gi nang nas gnyis ni stong pa nyid kyi rnam pa ste/ stong pa'i rnam pa dang / bdag med pa'i rnam pa'o/ /drug ni smon pa med pa'i rnam pa ste/mi rtag pa'i rnam pa dang / sdug bsngal gyi rnam pa dang / rgyu dang / kun 'byung ba dang / rab tu skye ba dang / rkyen gyi rnam pa ste/ de dag gis khams gsum pa la smon pa med pa'i phyir ro/ /lhag ma brgyad ni mtshan ma med pa'i rnam pa ste/ 'gog pa dang lam la mtshan mar byed mi nus pa'i phyir ro//spyod pa rnam par sbyong ba'i dmigs pa ni 'dod chags la spyod pa la sogs pa'i mi sdug pa la sogs pa ste/ des 'dod chags la sogs pa'i shas che ba nye bar zhi bar byed pa'i phyir ro/ /ma rig pa la sogs pa'i chos rnams ni 'du byed la sogs pa'i chos rnams mngon du 'byin te/'di dag rgyu med pa las byung par ma yin zhing dbang phyug la sogs pa mi mthun pa'i rgyu las byung ba yang ma yin par shes pa gang yin pa de ni/ rten cing 'brel bar 'byung ba la mkhas pa'o/ /chos tsam gyi rgyu las byung ba yin du zin kyang mthun pa'i rgyu las mthun pa'i 'bras bu nyid 'byung ste/'di lta ste legs par spyod pa'i rnam par smin pa sdug pa dang nyes par spyod pa'i rnam par smin pa mi sdug pa zhes bya ba la sogs par shes pa gang yin pa de ni gnas dang gnas ma yin pa la mkhas par rig par bya'o/ /nyon mongs pa rnam par sbyong ba'i dmigs pa ni 'jig rten pa'i lam gyi gnas skabs su sa 'og ma dang /gong ma rnams kyis rags pa dang zhi ba nyid des kun nas dkris pa rnam par gnon pa'i phyir ro/ /'jig rten las 'das pa'i lam gyi skabs su ni bsdu na de bzhin nyid do/ /spros na 'phags pa'i bden pa bzhi ste/ des bag la nyal legs par bcom pa'i phyir ro//mdo'i sde la sogs pa'i chos dpyad pa dang 'brel bas rig pa bzhir brjod par bya ste/ de dag gis de dpyad pa'i phyir ro/ /de la ltos pa'i rigs pa ni gang 'du byed rnams 'byung ba na rkyen la ltos pa ste/ 'di lta ste/ myu gu 'byung ba nas sa bon dang dus dang chu dang /zhing rnams la ltos pa dang / rnam par shes pa'i dbang po dang / don dang yid la byed pa zhes bya ba la sogs pa'o/ /bya ba byed pa'i rigs la ni 'di lta ste mig la sogs pa ni mig gi rnam par shes pa la sogs pa'i gnas kyi dngos po'o/ /gzugs la sogs pa ni dmigs pa'i dngos po'o//mig gi rnam par shes pa la sogs pa ni gzugs la sogs pa so sor rnam par rig par byed do/ /gser mgar la sogs pa'i lag bzo ba rnams ni gser la sogs pa byed ces bya ba la sogs pa'o/ /gtan tshigs sgrub pa'i rigs pa ni sgrub pa'i don ngo bo nyid dang / khyad par gyis bsdus pa mngon sum la sogs pa'i tshad ma dang mi 'gal bar dam bcas pa la sogs par bstan pa'o/ /chos nyid kyi rigs pa ni 'di lta ste/ mes ni tshig chus ni 'drul zhes bya ba la sogs par grags pa'i chos rnams kyi chos nyid de/ ji skad du 'byor ldan mig ni rtag pa nas bdag gi ba'i bar gyis stong ngo //de ci'i phyir zhe na/ 'di'i rang bzhin ni 'di'o zhes gsungs pa lta bu'o/ /ming kun tu tshol ba ni ming gi tshogs la sogs pa btags pa'i yod pa yin pa'i phyir 'di dag gi rang gi mtshan nyid yongs su grub pa med par dpyod pa'o/ /dngos po kun tu tshol ba ni ji ltar ming gi tshogs la sogs pa brjod pa de bzhin du phung po la sogs pa'i mtshan nyid yongs su grub pa med par gang rtog pa ste/yongs su rtog ces bya ba'i tha tshig go/ /ngo bo nyid du 'dogs pa kun tu tshol ba ni brjod pa dang brjod par bya ba 'brel pa la ngo bo nyid du 'dogs pa tsam gyi tha snyad kyi rgyu nyid du rtog pa'o zhes bya ba la brjod pa dang brjod par bya ba 'brel ba ni rtogs pa'i rgyu nyid do//'di ltar tha snyad la bya ba ni brjod pa tsam du thos pas de'i brjod par bya ba la dran pa'i sgo nas rtogs pa 'byung ngo / /brjod par bya ba dmigs na yang de brjod pa la rtogs pa 'byung ste/rnam pa de lta bur 'brel bar grags pa la mig la sogs pa'i rang gi mtshan nyid du btags pa tsam ni de brjod pa sha sna gu la sogs pa'i tha snyad kyi rgyur gyur par gang kun tu rtog pa de ni ngo bo nyid du 'dogs pa kun tu tshol ba zhes bya'o/ /khyad par du 'dogs pa kun tu tshol ba ni gang de bzhin du brjod pa dang brjod par bya ba 'brel ba rtag pa dang mi rtag pa dang /bla na yod pa dang / bla na med pa dang / gzugs can dang gzugs can ma yin pa dang / bstan du yod pa dang / bstan du med pa khyad par gyi mtshan nyid du 'dogs pa tsam gyi tha snyad kyi rgyu nyid du rtogs pa'o/ / yang dag pa ji lta ba bzhin du yongs su shes pa gzhi ni ji ltar kun du brtsal ba rnams kyis ming la sogs pa mi dmigs par shes pa rnams so/ /chos la ting nge 'dzin bar brtson pa'i rnal 'byor gyis ni rnam pa lnga ste/ gzhi la sogs pa'o/ /de la gzhi ni mang du thos pa ci 'dra bar dmigs pa'i tshul gyis zhi gnas dang lhag mthong gi gnas su 'gyur te/de ni gzhi zhes bya'o/ /de yang tshogs bsags pa'i bden pa mngon par rtogs pa'i dbang du byas pa ste/ gang mdo sde la sogs pa thos pas bzung ba'o/ /bskyed pa ni de la dmigs pa'i tshul bzhin yid la byed pa ste/ des mang du thos pa de la phyin ci ma log par don sems pa'i tshul gyis sems 'dzin pa'o//me long lta bu ni mang du thos pa de nyid la dmigs pa'i ting nge 'dzin mtshan ma dang bcas pa ste/ shes bya'i dngos po dang mthun pa gzugs brnyan lta bu zhes bya ba'i tha tshig go/ /'di'i me long lta bu nyid ni des shes bya'i gzugs brnyan la yongs su rtog par rig par bya'o//snang ba ni gzung ba dang 'dzin pa mi dmigs par shes pa ste/ mngon sum du 'byung ba'i phyir mthong ba'i lam gyis bsdus pa'o/ /ji ltar na byang chub sems dpa' rnal 'byor gyis 'di la brtson pa mi dmigs pa la reg ce na/ bsod nams dang ye shes kyi tshogs bsags pa'i byang chub sems dpa' ni bskal pa grangs med pa tshar phyin nas de bzhin nyid rtogs pa dang mthun pa'i chos thos pa tshul bzhin yid la byed cing ting nge 'dzin sgrub ste/ de de ltar mnyam par gzhag pa'i sems kyis shes bya'i gzugs brnyan gang yin pa la brten nas bsam gtan du byed do/mnyam par gzhag pa'i sems de las de gzhan ma yin par mthong nas gzugs brnyan de la yul gyi 'du shes bzlog ste/ de'i rnam pa rang gi 'du shes tsam du 'dzin to/ /de'i tshe rang gi sems tsam la gnas pa'i phyir sems nang du gnas par gyur pas gzung ba rnam pa thams cad du med par rab tu rtogs so//de'i 'og tu gzung ba med pas 'dzin pa yang yongs su ma grub bo zhes de yang med par rab tu rtogs so/ /de'i 'og tu so so rang la de gnyi ga'i rang bzhin du dmigs pa dang bral nas dmigs pa med par khong du chud do/ /de nyid kyi dbang du mdzad nas bcom ldan 'das kyis//byang chub sems dpa' mnyam gzhag pa/ /yid kyi gzugs brnyan mthong bas na/ /zhes rgya cher gsungs so/ /gnas ni gnas gyur pa ste/ gnas ngan len dang bral ba'i phyir gnas yongs su dag ces bya ba'i tha tshig go/ /rnal 'byor gyi sa 'di ni rgyu dang 'bras bus bstan par rig par bya ste/de la gzhi la sogs pa bzhis ni rgyu bstan to/ /tha ma gcig gis ni 'bras bu bstan to/ /gnas brtan kun dga' bos tshe dang ldan pa shA ri'i bu chos lnga dang ldan pa'i dge slong myur du 'dzin to zhes gang smras pa'i mdo de la chos lnga po 'di dag gis myur du 'dzin pa la sogs pa bzhin du ci rigs su rig par bya'o//ji ltar na chos la mkhas pas myur du 'dzin zhe na/ mang du thos pas tshig dang yi ge phal cher lcigs pa'i phyir ro/ /don la mkhas pas mang du 'dzin te/ chos mngon pa la sogs pa'i mtshan nyid shes pa'i phyir te/phung po dang khams la sogs pa'i gtam gyi gzhi'i skabs su tshig le'u mang du bzlums pa'i phyir ro/ /yi ge la mkhas pa dang nges pa'i tshig la mkhas pas ni tshig dang don ma nor bar 'dzin pas legs par zin par 'dzin te/ nges pa'i tshig bzang po'i yi ge shes pa dang /bdag go zhes yul gyi mi'i nges pa'i tshig la mngon par zhen pa rjes su tha snyad 'dogs pa shes pa nyid kyi phyir ro/ /sngon gyi mtha' dang phyi ma'i mtha' la dgongs pa la mkhas pas ni zin pa chud mi gzon te/ sngon zin pa'i chos rnams la brten nas phyis 'byung bar bya bar shes te/ dgongs pa shes pa'i phyir khong du chud pas de'i snying po len pa'i phyir ro//btsun pa chos la gnas pa'i dge slong zhes bya ba'i mdo der ni bcom ldan 'das kyis thos pa dang bsam pa dang bsgom pa ni ril gyis byed na chos la gnas pa yin gyi/ sbyor ba gang yang rung ba tsam gyis ni ma yin par bstan to/ /de la kun chub par byed pa dang /kha ton du byed pa dang / bshad pa mang ba dang rtog pa mang ba de 'ba' zhig ni thos pa dang sems pa la zhugs pa yin gyi/ bsgom pa la zhugs pa ma yin te/ rnal 'byor la sogs pa bor ba'i phyir ro/ /de'i phyir chos la gnas pa ma yin par rnam par gzhag go//gang la la zhig gis thos pa dang sems pa la ma brten par bsgom pa 'ba' zhig la zhugs pa de yang chos la gnas pa ma yin par rnam par gzhag go/ /de'i phyir bcom ldan 'das kyis chos la gnas pa'i dge slong las brtsams te/ ci nas thos pa dang bsam pa dang / bsgom pa la brten nas de gnyi ga la gnas pas chos la gnas pa yin par shes par bya ba'i phyir 'di la dge slong mdo'i sde dang dbyangs kyis bsnyad pa'i sde'i chos kun chub par byed pa zhes rgya cher bka' stsal nas de'i 'og tu rnal 'byor mi 'dor ro zhes bya ba la sogs pa gsungs so/ /rnal 'byor mi 'dor ro zhes bya ba la sogs pas ni/ting nge 'dzin la sbyor ba dang chog par mi 'dzin pas bsgom pa las 'byung ba bstan to/ /ting nge 'dzin la sbyor ba ni rnam pa gnyis te/ rgyun du chud pa dang gus par sbyor bas bsdus pa ni rnal 'byor mi 'dor ba zhes bya ba 'dis bstan to/ /ma log par sbyor bas bsdus pa ni yid la byed pa mi 'dor ba zhes bya ba 'dis bstan to//chog par mi 'dzin pa ni nang du sems zhi gnas su byed pa mi 'dor ba zhes bya ba 'dis bstan te de'i ro mi myang ba dang / gang du zhi gnas la sbyor bas mi 'dor bar blta'o/ /ci'i phyir mdo sde gzhan las shin tu rgyas pa'i byang chub sems dpa'i pha rol tu phyin pa'i sde snod ces bya zhe na/der pha rol tu phyin pa rnams kyi grangs bstan pa nas gcig la gcig rnam par nges pa'i bar du bstan pa'i phyir ro/ /de la grangs ni rnam pa gnyis te/ bgrang ba'i grangs dang / de tsam gyi grangs so/ /pha rol tu phyin pa drug ces bya ba ni bgrang ba'i grangs so//byang chub sems dpa'i lam mngon par mtho ba dang nges par legs pa rnam pa thams cad dang ldan pa gnyis gsum gsum gyis bsdus pa'i phyir pha rol tu phyin pa drug nyid de/ mi mang mi nyung ba ni de tsam gyi grangs so/ /mngon par mtho ba ni rnam pa gsum ste/ longs spyod chen po nyid dang /bdag nyid chen po nyid dang / phyogs chen po nyid do/ /de la sbyin pas longs spyod chen po thob pa'i phyir sbyin pa'i pha rol tu phyin pa'i 'bras bu ni longs spyod chen po nyid do/ /de la tshul khrims kyis bde 'gro'i lus phun sum tshogs pa 'thob pa'i phyir tshul khrims kyi pha rol tu phyin pa'i 'bras bu ni bdag nyid chen po nyid do//bzod pas skye bo thams cad kyi mngon du 'gro bar 'gyur ba thob pa'i phyir bzod pa'i pha rol tu phyin pa'i 'bras bu ni phyogs chen po nyid do/ /nges par legs pa'i lam yang rnam pa gsum ste/ nyon mongs pa zil gyis mnan nas dge ba'i phyogs la sbyor ba'i thabs dang /sems can yongs su smin par bya ba'i thabs dang / sangs rgyas kyi chos yang dag par sgrub pa'i thabs te/ 'di dag las gang yang rung ba zhig med na byang chub sems dpa'i nges par legs pa mi 'byung ba'i phyir ro/ /de la sems can yongs su smin par bya ba'i thabs ni bsam gtan gyi pha rol tu phyin pa ste/de la brten nas mngon par shes pa rnams kyis sems can yongs su smin par byed pa'i phyir ro/ /yang mi gnas pa'i mya ngan las 'das pa'i thabs su pha rol tu phyin pa drug nyid de/ byang chub sems dpa' mya ngan las 'das pa la gnas pa las bzlog ste/ 'khor ba na mngon par mtho ba yongs su gzung bar bya'o//'khor ba na gnas pa las bzlog ste/ der nyon mongs pa med par bya'o/ /de'i phyir gsum ni mngon par mtho ba thob pa'i thabs so/ /gsum ni de na nyon mongs pa med pa'i thabs te/ snga ma'i tshul du go rims bzhin du rig par bya'o/ /kun nas nyon mongs pa med pa'i thabs la brtson 'grus kyis ni gnyen po bsgom mo//bsam gtan gyis ni nyon mongs pa rnam par gnon to/ /shes rab kyis ni bag la nyal legs par 'joms so/ /sems can rjes su 'dzin pa dang / nyon mongs pa'i gnyen po'i phyir yang rnam grangs gzhan te/ de la sbyin pas ni byang chub sems dpa' sems can rnams la yo byad nye bar sgrub pa'i phan 'dogs pas rjes su 'dzin to//tshul khrims kyis ni phongs pa dang / gnod pa dang rnam par 'tshe ba mi byed pa'i tshul gyis rjes su 'dzin te/ go rims bzhin du longs spyod dang lus dang sems la gnod pa mi sgrub pa'i phyir ro/ / bzod pas ni phongs pa dang gnod pa la ji mi snyam par rjes su 'dzin to/ /gzhan dag gis bdag gi longs spyod la sogs pa la gnod pa la mi mjed pa'i phyir te/ de gsum gyis rjes su 'dzin to/ /brtson 'grus kyis ni nyon mongs pa rnam par ma mnan yang dge ba'i phyogs la sbyor ro//bsam gtan gyis ni nyon mongs pa rnam par gnon to/ /shes rab kyis ni bag la nyal legs par 'joms par byed do/ /'di gsum ni nyon mongs pa'i gnyen por rig par bya'o/ /de la byang chub sems dpa'i pha rol tu phyin pa'i mtshan nyid ni gang zhe na/ sbyin pa'i pha rol tu phyin pa ni gang byang chub sems dpa'i chos nyid la gnas pa'i byang chub sems dpa'i byang chub kyi sems la brten nas snying rje sngon du btang ba'i sems kyis bdog pa thams cad yongs su gtong ba la lus dang ngag dang yid kyi las te/de ltar byas na sbyin pa'i pha rol tu phyin pa'i mtshan nyid rigs dang /smon lam dang / bsam pa dang dngos po dang / ngo bo nyid kyis bstan par rig par bya'o/ 'di lta ste byang chub sems dpa'i chos nyid ni rigs so/ /byang chub kyi sems ni smon lam mo/ /snying rje sngon du gtong ba'i sems ni bsam pa'o/ /bdog pa thams cad yongs su gtong ba ni dngos po'o//lus dang ngag dang yid kyi las ni ngo bo nyid do/ /de bzhin du shes rab kyi pha rol tu phyin pa'i bar la yang rgya cher rig par bya'o/ /'di ni bye brag yin te/ tshul khrims dang bzod pa dang brtson 'grus kyi pha rol tu phyin pa rnams la ni sdom pa thams cad yang dag par len pa dang /rjes su bsrung ba dang / gnod par byed pa dang / sdug bsngal la ji mi snyam pa dang / dang du len pa dang / dge ba'i chos thams cad yang dag par bsgrub pa la lus dang ngag dang yid kyi las so zhes go rims bzhin du brjod par bya'o/ /bsam gtan gyi pha rol tu phyin pa la ni lus dang ngag dang yid kyi las kyi rnam pa thams cad dang dbang 'byor ba la sems kyi gnas pa rnam pa thams cad dang ldan pa'o//shes rab kyi pha rol tu phyin pa la ni lus dang ngag dang yid kyi las kyi rnam pa thams cad dang dbang 'byor pa la gang rnam pa thams cad du chos rab tu rnam par 'byed pa'o zhes brjod par bya'o//lhag ma thams cad ni sbyin pa bzhin du rig par bya'o/ /yang sbyin pa ni rnam pa thams cad mkhyen pa nyid la brtsams pa dang / thams cad mkhyen pa nyid du 'gyur ba dang / thams cad mkhyen pa nyid yongs su 'dzin pa dang / thams cad mkhyen pa nyid kyi bya ba byed pa ste/de ni sbyin pa'i pha rol tu phyin pa zhes bya'o/ /tshig bzhi po de dag ni go rims bzhin du rtsom pa dang / bag chags dang / sku dang / rgyu mthun par rig par bya'o/ /de la rtsom pa ni thams cad mkhyen pa nyid las brtsams te/ 'byung ba dang byung ba der yongs su bsngo ba'i phyir ro//sbyin pa de nyid rgyud la bag chags su bsgos te/ de las phyi ma la thams cad mkhyen pa nyid du 'gyur ro/ /gang gi tshe de nyid yongs su rdzogs par gyur pa de'i tshe/ chos kyi sku yongs su grub pa'i tshul gyis thams cad mkhyen pa nyid yongs su 'dzin to/ /de'i 'og tu longs spyod rdzogs pa dang /sprul pa'i skus rgyu mthun pa'i sgo nas thams cad mkhyen pa nyid kyi bya ba byed do/ /shes rab kyi pha rol tu phyin pa'i bar du yang de bzhin du rig par bya'o/ /go rims ni 'og ma 'og ma la brten pa'i phyir te/ sbyin pa'i pha rol tu phyin pas ni nang dang phyi'i dngos po thams cad yongs su gtong bar goms pas/lus dang srog la mi lta ba'i byang chub sems dpa' longs spyod kyi phung po chen po yang spangs nas tshul khrims la yang dag par 'dzin par byed do/ /tshul khrims rjes su bsrung ba ni gshe yang bdag gis slar gshe bar mi bya'o zhes bya ba la sogs pa'i rnam pa rnams kyis bzod par 'gyur ro//grang ba la sogs pa bzod pa ni de'i gzhi las sbyor ba mi nyams pas brtson 'grus brtsams pa yin no/ /brtson 'grus brtsams pa ni sbyor ba'i mtha'i 'bras bu thob pas bsam gtan bsgrub bo/ /bsam gtan phun sum tshogs te sems mnyam par gzhag pa ni yang dag pa ji lta ba bzhin du shes pas 'jig rten las 'das pa'i shes rab thob bo//yang gong ma gong ma ni gzhi yin pa'i phyir te/ tshul khrims ni sbyin pa'i gzhi yin no/ /de bzhin du shes rab ni bsam gtan gyi pha rol tu phyin pa'i gzhi yin pa'i bar du'o/ /'di ltar tshul khrims dang ldan pa ni sbyin pas phan btags pa la tshul khrims kyis gnod pa mi byed pa'i phyir sbyin pa rnam par dag par 'gyur ro//de ltar byang chub sems dpa' len pa po de la rnam par 'tshe ba dang bral bar yo byad kyis bde bar sbyor bas tshul khrims kyi stobs kyis sbyin pa rnam par dag par rig par bya'o//de ltar bzod pa dang ldan pa ni gzhan gnod par byed pa dag gis bslab pa'i gzhi mi 'dral bas tshul khrims rnam par dag go/ /brtson 'grus brtsams pas spro ba'i stobs kyi ched du 'khor ba khas blangs pa ni sems can log par sgrub pa'i sdug bsngal bde blag tu bzod pas bzod pa rnam par dag go//bsam gtan pa ni bde ba dang bcas pa dang yid bde ba dang bcas par dge ba'i chos thams cad la sbyor bas brtson 'grus rnam par dag go/ /brtson 'grus brtsams pas shes rab dang ldan pa ni chos rnam pa mang po la rnam par bltas nas nang du zhi bar byed pa ni ting nge 'dzin rnam par 'phel bas bsam gtan rnam par dag ste/shes rab med la bsam gtan med/ /ces tshigs su bcad pa las gsungs pa'i phyir ro/ /ji ltar rags pa'i rim gyis yang go rims bzhin du rig par bya'o//sbyin pa ni thams cad kyi nang nas rags ste/ de'i phyir sbyin pa thog mar rnam par gzhag go/ /de'i 'og tu bzod pa la sogs pas tshul khrims rags so/ /de bzhin du shes rab pas bsam gtan rags pa'i bar du'o/ /shes rab ni thams cad kyi nang na phra ste/ de'i phyir thams cad kyi tha mar rnam par gzhag go//nges pa'i tshig ni ci'i phyir sbyin pa la sbyin pa'i pha rol du phyin pa zhes bya zhe na/ sbyin pa chen po dang / skyon med pa dang / dri ma med pa ni sbyin pa'i pha rol tu phyin pa zhes bya'o/ /de la sbyin pa chen po ni nang dang phyi'i dngos po'i rnam pa thams cad sbyin pa dang /yun ring du sbyin pa'i phyir ro/ /skyon med pa ni gnod pas kun tu tshol ba la sogs pa rnam par spangs pa'i phyir ro/ /ji skad du 'phags pa blo gros mi zad pas bstan pa'i mdo las sbyin pa mi zad pa las brtsams te bstan pa/ btsun pa sha ra dwa ti'i bu byang chub sems dpa' rnams kyi sbyin pa yang mi zad pa ste/de ci'i phyir zhe na/ tshad med pa'i phyir ro/ /btsun pa sha ra dwa ti'i bu byang chub sems dpa' rnams kyi sbyin pa yongs su sbyang ba yang tshad med pa ste/ tshe dang spobs pa dang bde ba dang stobs dang kha dog nye bar brtan pa'i phyir zas 'dod pa rnams la zas sbyin pa'o//nyon mongs pa'i sred pa bsal ba'i phyir btung ba 'dod pa rnams la btung ba sbyin pa'o/ /bde ba dang 'byor pa'i dngos po thams cad bsdu ba'i phyir/ bzhon pa 'dod pa rnams la bzhon pa sbyin pa'o/ /ngo tsha shes pa dang khrel yod pa dang mdog gser gyi kha dog yongs su sbyang ba'i phyir gos 'dod pa rnams la gos sbyin pa'o//de bzhin gshegs pa'i lha'i spyan yongs su rdzogs par bya ba'i phyir mar me 'dod pa rnams la mar me sbyin pa'o/ /de bzhin gshegs pa'i lha'i snyan yongs su dag par bya ba'i phyir sil snyan 'dod pa rnams la sil snyan sbyin pa'o/ /tshul khrims dang thos pa dang ting nge 'dzin gyi dris byug pa'i phyir spos dang byug pa 'dod pa rnams la spos dang byug pa sbyin pa'o//gzungs dang spobs pa dang byang chub kyi yan lag gi me tog thob par bya ba'i phyir phreng ba 'dod pa rnams la phreng ba sbyin pa'o/ /lus kyi dri yid du 'ong ba thob par bya ba'i phyir/ phye ma 'dod pa rnams la phye ma sbyin pa'o/ /skyes bu chen po'i mtshan ro bro ba'i mchog yongs su rdzogs par bya ba'i phyir ro bro ba thams cad 'dod pa la ro bro ba thams cad sbyin pa'o/ /sems can thams cad kyi gnas dang / skyabs dang / gon dang / dpung gnyen bya ba'i phyir gnas 'dod pa rnams la gnas sbyin pa'o//sgrib pa thams cad rab tu spangs pa dang / lha dang tshangs pa'i gnas pa de bzhin gshegs pa'i gzims cha thob par bya ba'i phyir/ /mal cha 'dod pa rnams la mal cha sbyin pa'o/ /stong gsum gyi stong chen po'i 'jig rten gyi sa thams cad kyi byang chub kyi snying po rdo rje'i gdan thob par bya ba'i phyir stan 'dod pa rnams la stan sbyin pa'o//byang chub kyi yo byad thams cad yongs su bskang bar bya ba'i phyir yo byad 'dod pa rnams la yo byad sbyin pa'o/ /mi rga mi 'chi ba'i bdud rtsi'i bde bas yongs su bskang ba'i phyir na ba dang sman 'dod pa rnams la sman sbyin pa'o//rang dbang dang rang nyams dang rang byung gi ye shes yongs su bskang ba'i phyir byang chub sems dpa' rnams kyis bran po dang bran mo yongs su gtong ba'i sbyin pa'o zhes rgya cher 'byung ba lta bu'o/ /dri ma med pa ni mi mthun pa'i phyogs bag chags dang bcas pa spangs pa'i phyir ro//dam pa rnam pa 'di gsum gyis sbyin pa'i pha rol tu phyin pa zhes brjod pa yin te/ dam pa rnam pa gsum ni 'dris pa dang bcas pa'i ngo bo nyid dam pa dang / thabs dam pa dang / 'bras bu dam pa'o/ /'dris pa ni yun ring po nas sbyin par rig par bya'o/ /shes rab kyi pha rol tu phyin pa'i bar du yang de bzhin du rig par bya'o//tshul khrims la sogs pa'i skyon med pa ni bdag tu sgro 'dogs pa rnam par spangs pa la sogs pa'i phyir te/ ci rigs su blo gros mi zad pas bstan pa las blta bar bya'o/ /yang dam pa rnam pa bcu gnyis dang ldan pa'i phyir pha rol tu phyin pa zhes bya'o//dam pa rnam pa bcu gnyis la/ rgya che ba dam pa ni 'jig rten gyi phun sum tshogs pa thams cad mi 'dod pa dang mchog tu gyur ba'i phyir ro/ /yun ring ba dam pa ni bskal ba grangs med pa gsum du yongs su bsgom pa'i phyir ro/ /ched du bya ba dam pa ni sems can thams cad kyi don bya ba'i ched kyi phyir ro//zad mi shes pa dam pa ni byang chub chen por yongs su bsngos pas gtan du yongs su gtugs par mi 'gyur pa'i phyir ro/ /rgyun mi 'chad pa dam pa ni bdag dang gzhan mnyam pa nyid du mos pa'i phyir sems can thams cad kyi sbyin pa la sogs pas pha rol tu phyin pa rnams yongs su rdzogs par byed pa'i phyir ro//chogs med pa dam pa ni gzhan gyi sbyin pa la sogs pa la rjes su yi rang ba tsam gyis pha rol tu phyin pa yongs su rdzogs par byed pa'i phyir ro/ /dbang 'byor pa dam pa ni nam mkha' mdzod kyi ting nge 'dzin la sogs pas sbyin pa la sogs pa yongs su rdzogs par byed pa'i phyir ro//yongs su bzung ba dam pa ni rnam par mi rtog pa'i ye shes kyis yongs su bzung ba'i phyir ro/ /rtsom pa dam pa ni mos pas spyod pa'i sa la bzod pa chen por gyur pa la'o/ /thob pa dam pa ni sa dang po la'o/ /rgyu mthun pa dam pa ni de ma yin pa gzhan brgyad po dag la'o//'grub pa dam pa ni sa bcu pa dang de bzhin gshegs pa'i sa la byang chub sems dpa' 'grub pa dang / sangs rgyas 'grub pa'i phyir ro/ /yang dam pa rnams kyis spyad pa dang bgrod pa'i phyir pha rol tu phyin pa ste/ sangs rgyas dang byang chub sems dpa' rnams kyis spyad pa dang bgrod ces bya ba'i tha tshig go//yang shes bya'i pha rol tu son pas pha rol tu phyin pa ste/ sangs rgyas nyid la gnas zhes bya ba'i tha tshig go/ /yang gzhan dang bdag mchog tu gnod pa las sgrol bar byed pa'i phyir pha rol tu phyin pa rnams te/ gzhan dang bdag sdug bsngal gyi rgya mtsho las 'da' bar byed ces bya ba'i tha tshig go//'di ni re zhig thun mong gi nges pa'i tshig go/ /so so'i nges pa'i tshig ni sbyin bdag gi dbul ba sel ba dang / len pa po rnams kyi gdung ba sel ba'i phyir sbyin pa'o/ /dbang po zhi ba thob pa dang / 'gro ba bzang por sbyor ba dang / bsil pa'i gnas yin pas tshul khrims te/go rims bzhin du dbang po rnams kyi sgo sdom par byed pa dang / bde 'gror 'gro ba'i rgyur gyur pa dang 'gyod pa med pa la sogs pa'i rim gyis mya ngan las 'das pa la sogs pa'i bar gyi gnas yin pa'i phyir ro/ /khro ba'i tsha ba sel ba dang / rma 'byin pa'i sems 'ongs pa sel ba dang /zhi bar brjod pa'i phyir bzod pa'o/ /rma 'byin pa'i sems zhes bya ba ni gang gis gnod pa byed pa rnams la lan du gnod pa byed pa ste/ de 'ongs pa 'dis 'bral bar byed pa ni sel bar rig par bya'o/ /rma 'byin pa ni 'di dag la shar gnyer ba yod pas rma 'byin pa can te/de dag la mi 'jigs pa sgrogs pa ni bde bar brjod par rig par bya'o/ /sel ba dang / 'phel bar byed pa dang ldan pas brtson 'grus te/ de la sel ba'i phyir spyod pa ni yang dag par spong ba gnyis kyis mi dge ba'i chos dang bral bar byed pa'o/ /'phel ba'i phyir spyod pa ni yang dag par spong ba gnyis kyis dge ba'i chos yang dag par sgrub pa'o//'dzin pa dang / sdom pa dang / 'dul ba dang / 'thob par byed pas bsam gtan te/ de la 'dzin pa ni dmigs pa la sems 'dzin pa'o/ /sdom pa ni rnam par g.yeng ba las sems yang dag par sdom pa'o//'dul ba ni kun nas dkris pa rnams rnam par gnod pa'o/ /thob par byed pa ni dbang 'byor pa thob par byed par rig par bya'o/ /gzhan gyis smras pa shes pa dang / so so rang gis shes pa dang / rnam par shes pa dang / rab tu zhi ba thob pa dang //yon tan mchog tu phyin par shes pas shes rab ste/ de la gzhan gyis smras pa shes pa ni gzhan gyi sgra'i rgyu las byung ba'i tshul bzhin yid la byed pa dang mtshungs par ldan pa'i shes rab bo/ /so so rang gis shes pa ni 'jig rten las 'das pa'o/ /rnam par shes pa ni 'jig rten las 'das pa'i rjes las thob pa'o//zhi ba thob par bya ba'i phyir shes pa ni bsgom pa'i lam la nyon mongs pa'i gnyen por gyur pa'o/ /yon tan mchog tu phyin par bya ba'i phyir shes pa ni yon tan khyad par can mngon par sgrub pa'i shes rab tu rig par bya'o/ /bsgom pa ni rnam lnga ste/ phung po la gnas pa nas dbang 'byor pa la gnas pa'i bar du'o/ /'dir tshigs su bcad pa/ phung por brten nas bsgom pa ste/ /yid la byed dang bsams pa dang / /thabs dang dbang 'byor de bzhin te/ /de dag thams cad brjod pa yin/ /ji skad du/ rgyu dang smin dang smon lam dang / / so sor brtags pas phung por dran/ /zhes bshad pa lta bu'o/ /de la phung po la gnas pa rnam pa bzhi ste/ de la rgyu la gnas pa ni gang rigs kyi stobs kyis pha rol tu phyin pa rnams la nan tan gyis goms par byed pa'o/ /rnam par smin pa la gnas pa ni gang lus phun sum tshogs pa'i stobs kyis so//smon lam la gnas pa ni gang sngon gyi smon lam gyi stobs so/ /so sor brtags pa'i stobs la gnas pa ni shes rab kyi stobs kyis pha rol tu phyin pa rnams la nan tan gyis goms par byed pa'o/ /yid la byed pa la gnas pa ni pha rol tu phyin pa bsgom pa rnam pa bzhi ste/mos pa yid la byed pas bsgom pa ni pha rol tu phyin pa thams cad dang ldan pa'i mdo sde la mos pa bsgom pa'o/ /ro myang ba'i yid la byed pas bsgom pa ni pha rol tu phyin pa thob pa rnams la phan yon mthong ba'i tshul gyis ro myong bar byed pa'o/ /rjes su yi rang ba yid la byed pas bsgom pa ni 'jig rten gyi khams thams cad kyi sems can thams cad kyi sbyin pa la sogs pa la rjes su yi rang ba'o//mngon par dga' ba yid la byed pas bsgom pa ni bdag dang sems can rnams kyi ma 'ongs pa'i pha rol tu phyin pa'i khyad par la mngon par dga' ba'o/ /bsam pa la gnas pa ni pha rol tu phyin pa bsgom pa rnam pa drug ste/mi ngoms pa'i bsam pa dang / yangs pa'i bsam pa dang / dga' ba'i bsam pa dang / phan gdags pa'i bsam pa dang / gos pa med pa'i bsam pa dang / dge ba'i bsam pa'o/ /de la byang chub sems dpa'i sbyin pa la mi ngoms pa'i bsam pa ni gang byang chub sems dpa' skad cig gcig la gang gA'i klung gi bye ma snyed kyi 'jig rten gyi khams rin po che sna bdun gyis yongs su bkang ba dang /lus gang gA'i klung gi bye ma snyed sems can gcig la sbyin par byed ce'o/ /de bzhin du skad cig re re la gang gA'i klung gi bye ma snyed kyi bskal par sbyin par byed cing sems can gcig la ji lta ba bzhin du sems can gyi khams ji snyed pa bla na med pa yang dag par rdzogs pa'i byang chub la yongs su smin par byed la rnam grangs 'dis de la sbyin yang mi ngoms pa nyid ni byang chub sems dpa'i sbyin pa'i bsam pa ste/rnam pa 'di lta bu'i bsam pa gang yin pa 'di ni sbyin pa la byang chub sems dpa'i bsam pa mi ngoms pa yin no/ /byang chub kyi snying po la 'dug gi bar du byang chub sems dpa' rnam pa de lta bur sbyin pa gcig nas gcig tu brgyud pa skad cig tsam yang nyams par mi byed cing rgyun mi gcod de/rnam pa 'di lta bu'i bsam pa gang yin pa 'di ni sbyin pa la byang chub sems dpa'i yangs pa'i bsam pa'o/ /de ltar sbyin pas sems can de dag rjes su 'dzin pa'i byang chub sems dpa' ni shin tu dga' ba yin gyi sbyin pa des rjes su gzung ba'i sems can de dag ni de lta ma yin te/rnam pa de lta bu'i bsam pa gang yin pa de ni sbyin pa la byang chub sems dpa' dga' ba'i bsam pa'o/ /gang dag la de ltar sbyin pas phan 'dogs pa'i sems can de dag ni bdag la shin tu phan 'dogs par byang chub sems dpas mthong gi /bdag gis ni ma yin te/de dag ni bla na med pa yang dag par rdzogs pa'i byang chub ston pa'i phyir ro/ /rnam pa 'di lta bu'i bsam pa gang yin pa de ni sbyin pa la byang chub sems dpa'i phan 'dogs pa'i bsam pa'o/ /byang chub sems dpa' ni sems can rnams la de ltar sbyin pa las byung ba'i bsod nams yangs pa mngon par 'du byas kyang len du phan 'dogs pa'am/rnam par smin pa 'dod pa med de/ rnam pa 'di lta bu'i bsam pa gang yin pa 'di ni sbyin pa'i pha rol tu phyin pa bsgom pa la byang chub sems dpa'i gos pa med pa'i bsam pa'o/ /byang chub sems dpa' sbyin pa'i phung po yangs pa'i rnam par smin pa de lta bu yang sems can rnams kyi yin par mngon par dga' bar byed kyi/bdag la ni ma yin te/ sems can thams cad dang thun mong du byas nas bla na med pa yang dag par rdzogs pa'i byang chub tu yongs su bsngo'o/ /rnam pa 'di lta bu'i bsam pa gang yin pa 'di ni sbyin pa'i pha rol tu phyin pa bsgom pa la byang chub sems dpa'i dge ba'i bsam pa'o//de la tshul khrims kyi pha rol tu phyin pa bsgom pa nas shes rab kyi pha rol tu phyin pa bsgom pa'i bar la byang chub sems dpa'i mi ngoms pa'i bsam pa ni/ gang byang chub sems dpa' lus gang gla'i klung gi bye ma snyed du gyur cing tshe'i tshad bskal ba gang gla'i klung gi bye ma snyed du gyur la rgyun du yo byad thams cad kyis phongs par gyur cing /stong gsum gyi stong chen po'i 'jig rten gyi khams mes rab tu gang ba na spyod lam bzhi byed cing skad cig gcig la tshul khrims kyi pha rol tu phyin pa nas/skad cig gcig la shes rab kyi pha rol tu phyin pa'i bar du bsgom zhing rnam grangs 'dis tshul khrims kyi phung po ji snyed pa dang / shes rab kyi bar gyi phung po ji snyed pa gang gis bla na med pa yang dag par rdzogs pa'i byang chub mngon par rdzogs par 'tshang rgya ba'i tshul khrims kyi phu nga po nas shes rab kyi bar gyi phung po de bsgom yang byang chub sems dpa'i mi ngoms pa nyid ni tshul khrims kyi pha rol tu phyin pa bsgom pa la mi ngoms pa'i bsam pa nas/shes rab kyi pha rol tu phyin pa'i bar du bsgom pa la mi ngoms pa'i bsam pa ste/ byang chub sems dpa'i bsam pa rnam pa 'di lta bu gang yin pa 'di ni tshul khrims kyi pha rol tu phyin pa bsgom pa la mi ngoms pa'i bsam pa nas/shes rab kyi pha rol tu phyin pa'i bar du bsgom pa la mi ngoms pa'i bsam pa'o/ /byang chub sems dpa' byang chub kyi snying po la 'dug gi bar du tshul khrims kyi pha rol tu phyin pa bsgom pa gcig nas gcig tu brgyud pa nas shes rab kyi pha rol tu phyin pa'i bar du bsgom pa gcig nas gcig tu brgyud pa nyams par mi byed cing /rgyun mi gcod pa'i bsam pa rnam pa 'di lta bu gang yin pa 'di ni tshul khrims kyi pha rol tu phyin pa bsgom pa nas/shes rab kyi pha rol tu phyin pa'i bar du bsgom pa la byang chub sems dpa' yangs pa'i bsam pa'o/ /tshul khrims kyi pha rol tu phyin pa bsgom pa nas/ shes rab kyi pha rol tu phyin pa'i bar du bsgom pa des sems can rjes su 'dzin pa'i byang chub sems dpa' ni rab tu dga' ba yin gyi/rjes su bzung ba'i sems can de dag ni de lta ma yin te/ rnam pa de lta bu'i bsam pa gang yin pa de ni/ tshul khrims kyi pha rol tu phyin pa bsgom pa nas/ shes rab kyi pha rol tu phyin pa'i bar du bsgom pa la byang chub sems dpa'i dga' ba'i bsam pa'o/ /tshul khrims kyi pha rol tu phyin pa bsgom pa nas/shes rab kyi pha rol tu phyin pa'i bar du bsgom pas/ gang dag la phan 'dogs pa'i sems can de dag ni bdag la shin tu phan 'dogs par byang chub sems dpas mthong gi bdag gis ni ma yin no/ /de dag ni bla na med pa yang dag par rdzogs pa'i byang chub ston pa'i phyir ro//rnam pa 'di lta bu'i bsam pa gang yin pa 'di ni tshul khrims kyi pha rol tu phyin pa bsgom pa nas/ shes rab kyi pha rol tu phyin pa'i bar du bsgom pa la/ byang chub sems dpa'i phan 'dogs pa'i bsam pa'o/ /byang chub sems dpa' ni 'di ltar tshul khrims kyi pha rol tu phyin pa las byung ba nas/shes rab kyi pha rol tu phyin pa'i bar las byung ba'i bsod nams yangs pa mngon par 'dus byas kyang / de la lan du phan 'dogs pa'am rnam par smin pa las 'dod pa med de/ rnam pa 'di lta bu'i bsam pa gang yin pa de ni tshul khrims kyi pha rol tu phyin pa bsgom pa nas/shes rab kyi pha rol tu phyin pa'i bar du bsgom pa la byang chub sems dpa'i gos pa med pa'i bsam pa'o/ /de la byang chub sems dpa' tshul khrims kyi pha rol tu phyin pa bsgoms pa las byung ba nas/ shes rab kyi pha rol tu phyin pa'i bar du bsgoms pa las byung ba'i bsod nams kyi phung po rnam par smin pa de lta bu yang sems can rnams kyi yin par mngon par dga' bar byed kyi bdag la ni ma yin te/ sems can thams cad dang thun mong du byas nas bla na med pa yang dag par rdzogs pa'i byang chub tu yongs su bsngo'o//rnam pa de lta bu'i bsam pa gang yin pa de ni tshul khrims kyi pha rol tu phyin pa bsgom pa nas/ shes rab kyi pha rol tu phyin pa'i bar du bsgom pa la byang chub sems dpa'i dge ba'i bsam pa'o/ /thabs la gnas te pha rol tu phyin pa bsgom pa gang zhe na/ rnam pa gsum ste/ so sor rtog pa'i phyir rnam par mi rtog pa'i ye shes kyis 'khor gsum yongs su dag pa ste/ thabs de ni yid la byed pa thams cad mngon par 'grub pa'i phyir ro/ /dbang 'byor ba la gnas te pha rol tu phyin pa bsgom pa ni rnam pa gsum ste/ lus la dbang 'byor pa dang / spyod pa la dbang 'byor pa dang /bshad pa la dbang 'byor pa'o/ /lus la dbang 'byor pa ni de bzhin gshegs pa'i sku gnyis su blta bar bya ste/ rang bzhin dang longs spyod rdzogs pa'o/ /de la spyod pa la dbang 'byor pa ni sprul pa'i skur blta bar bya ste/ des sems can thams cad la spyod pa rnam pa thams cad kun tu ston to//bshad pa la dbang 'byor pa ni pha rol tu phyin pa drug rnam pa thams cad du bshad pa la thogs pa med pa'o/ /rab tu dbye ba ni ston pa bco brgyad kyis pha rol tu phyin pa drug rab tu dbye bar blta bar bya'o/ /rton pa bco brgyad ni lus rton pa dang /sems rton pa dang / dge ba rton pa dang / bde 'gro rton pa dang / byang chub rton pa dang / snying rje rton pa dang / sems can yongs su mi gtong ba rton pa dang / dman pa'i sems yongs su dor ba rton pa dang / mi skye ba'i chos la bzod pa rton pa dang / dge ba'i rtsa ba la sbyor ba rton pa dang /dge ba'i rtsa ba yang dag par sgrub pa rton pa dang / /dge ba'i rtsa ba mi zad pa rton pa dang / dge ba'i rtsa ba la yongs su mi skyo ba rton pa dang / bsam pa'i don thams cad 'byor ba rton pa dang / tshogs sdud pa rton pa dang / sa la 'jug pa rton pa dang / sangs rgyas kyi chos yang dag par sgrub pa rton pa dang /sangs rgyas kyi mdzad pa sgrub pa rton pa ste/ sbyin pa la sogs pa rnam pa gsum gsum du tha dad pas/ gsum gsum gyi go rims bzhin du bsdus par rig par bya'o/ /de la sbyin pa rnam pa gsum ni zang zing gi sbyin pa dang / mi 'jigs pa'i sbyin pa dang /chos kyi sbyin pa'o/ /tshul khrims rnam pa gsum ni sdom pa'i tshul khrims dang / dge ba'i chos sdud pa'i tshul khrims dang / sems can gyi don bya ba'i tshul khrims so/ /bzod pa rnam pa gsum ni/ gnod pa byed pa la ji mi snyam pa'i bzod pa dang / sdug bsngal dang du len pa'i bzod pa dang / chos la nges par sems pa'i bzod pa'o/ /brtson 'grus rnam pa gsum ni/ go cha'i brtson 'grus dang / sbyor ba'i brtson 'grus dang / sems can gyi don bya ba'i brtson 'grus so/ /bsam gtan rnam pa gsum ni mthong ba'i chos la bde bar gnas par bya ba'i bsam gtan dang /mngon par shes pa mngon par sgrub bsam gtan dang / sems can gyi don bya ba'i bsam gtan no/ /shes rab rnam pa gsum ni kun rdzob la dmigs pa dang / don dam pa la dmigs pa dang / sems can gyi don la dmigs pa'o//de la zang zing gi sbyin pa ni lus rton pa ste/ bza' ba dang btung ba la la sogs pa'i yo byad rnams kyis len pa'i lus la phan 'dogs pa'i phyir ro/ /mi 'jigs pa'i sbyin pa ni sems rton pa ste/ yid mi bde ba'i bye brag dang bral bar bya ba'i phyir sems kyi dbugs 'byin pa nye bar bsgrub pa'i phyir ro//gzhan la yang de bzhin du sbyar bar bya'o/ /dman pa'i sems ni byang chub sems dpa' 'khor ba'i sdug bsngal gyis yongs su skyo bas nyan thos dang / rang sangs rgyas kyi sems te/ de yongs su 'dor ba rton pa ni sdug bsngal dang du len pa'i bzod par rig par bya'o//dge ba'i rtsa ba mi zad pa ni sems can thams cad kyi don du bya ba lhag par byed pas 'khor ba ji srid pa dang / phung po lhag ma med pa'i mya ngan las 'das pa'i dbyings su yongs su mi gtong ba ste/ de rton pa ni sems can gyi don bya ba'i brtson 'grus su rig par bya'o//tshogs sdud pa ni thob pa la brten nas 'dus pa rnams sems mnyam par ma bzhag pa mnyam par gzhag par bya ba dang / sems mnyam par bzhag pa rnam par thar par bya ba'i phyir gdams pa dang rjes su bstan pa rab tu sbyin pa ste/de rton pa ni sems can gyi don bya ba'i bsam gtan no/ /sa la 'jug pa ni chos la mos pa sngon du btang ba'i bshad pa gang gis tshogs yongs su rdzogs par byas nas/ rab tu dga' ba'i sa la 'jug pa ste/ de rton pa ni kun rdzob kyi bden pa la dmigs pa'o/ /lhag ma ni legs par sbyor ba'i phyir sbyar bar ma byas so//yang rab tu dbye ba ni sbyin pa bdun te/ rtsa ba'i sbyin pa ni rigs kyi gnas skabs pa'i byang chub sems dpa'i sbyin pa'i pha rol tu phyin pa ste/ rigs tsam la brten nas sbyin pa'i phyir ro/ /blangs pa'i sbyin pa ni sems bskyed pa'i gnas skabs pa'i ste/smon lam yang dag par blangs pa la brten nas sbyin pa'i phyir ro/ /rjes su 'dzin pa'i sbyin pa ni bdag dang gzhan gyi don sgrub pa'i gnas skabs pa'o/ /'dzin pa ngan pa med pa'i sbyin pa ni de kho na'i don la yongs su rtogs pa'i gnas skabs pa ste/ sbyin bdag la sogs par rnam par rtog pa la mngon par zhen pa'i 'dzin pa ngan pa med pa'i phyir ro//yongs su 'dzin pa med pa'i sbyin pa ni mthu'i gnas skabs pa ste/ phyi rol gyi yo byad yongs su 'dzin pa med par yang nam mkha' mdzod la sogs pa'i ting nge 'dzin rnams kyis nam mkha' la lag pa brkyang nas ji ltar 'dod pa bzhin du rin po che la sogs pa'i char 'bebs pa'o//so sor rig pa'i sbyin pa ni yongs su smin pa'i gnas skabs pa'i ste/ sbyin pa 'dul ba ji lta ba bzhin du mthun par sbyin pa'i phyir ro/ /sbyin pa chen po ni byang chub mchog gi gnas skabs pa'i ste/ bla na med pa'i phyir ro/ / de bzhin du shes rab kyi bar du ci rigs su sbyar bar rig par bya'o/ /bsdus pa ni sbyin pa la sogs pas byang chub sems dpa'i sa bsdus pa'i phyir te/ de la pha rol tu phyin pa rnams kyis rigs bsdus pa 'di ni dpe tsam mo/ /sbyin pa'i pha rol tu phyin pa la sogs pa ni rigs kyi rtags kyis bsdus par shes par bya'o//sems bskyed pas bsdus pa ni khyad par du 'phags pa'i sems bskyed pas bsdus pa'i phyir ro/ /sems bskyed pa ni rnam pa gnyis te/ khyad par can ma yin pa dang / khyad par du 'phags pa'o/ /de la khyad par can ma yin pa ni kye ma'o bdag bla na med pa yang dag par rdzogs pa'i byang chub tu mngon par rdzogs par 'tshang rgya bar shog shig snyam pa'o//khyad par du 'phags pa de ni de ltar sbyin pa'i pha rol tu phyin pa yongs su rdzogs par shog shig snyam pa nas/ shes rab kyi pha rol tu phyin pa'i bar du'o/ /khyad par du 'phags pa'i sems bskyed pa 'dis ni pha rol tu phyin pa rnams bsdus par rig par bya ste/de dag gi rgyu yin pa'i phyir ro/ /bdag dang gzhan gyi don bsdus pa las gang sbyin pas phyug po yongs su 'dzin pa 'di ni bdag gi don to/ /gang gzhan la yo byad nye bar sgrub pas rjes su 'dzin pa 'di ni gzhan gyi don to//lhag ma rnams kyis bsdus pa yang de bzhin du rig par bya'o/ /don dam pas bsdus pa chos kyi dbyings las brtsams pa ni de bzhin nyid sbyin pa la sogs pa spyi'i mtshan nyid yin pa'i phyir ro/ /ye shes kyi tshogs las brtsams pa ni thams cad mkhyen pa nyid kyi snod du sgrub pa'i phyir ro//ye shes yongs su 'dzin pa las brtsams pa ni thams cad mkhyen pa nyid yongs su sgrub pa'i phyir ro/ /ye shes kyi rjes su 'jug pa las brtsams pa ni lnga po dag shes rab kyi pha rol tu phyin pa'i rjes su mthun pa'i phyir ro/ /ye shes kyi mtshan nyid las brtsams pa ni shes rab kyi pha rol tu phyin pa yang dag pa'i ye shes kyi ngo bo nyid yin pa'i phyir te/de ltar na de bzhin nyid dang yang dag pa'i ye shes kyi ngo bo nyid don dam pa ni sbyin pa la sogs pas bsdus par rig par bya'o/ /dpe brjod pa 'dis bsdus pa la lhag ma rnams brtag par bya'o/ / mi mthun pa'i phyogs ni ser sna dang / 'chal ba'i tshul khrims dang / khro ba dang / le lo dang / rnam par g.yeng ba dang / 'chal ba'i shes rab ste sbyin pa la sogs pa dang go rims bzhin no/ /yang pha rol tu phyin pa rnams kyis bsdus pa'i dge ba'i chos ji snyed pa de dag gi mi mthun pa'i phyogs gang yin pa dang /shes bya'i sgrib pa gang yin pa de yang de dag gi mi mthun pa'i phyogs su rig par bya'o/ /phan yon ni 'bras bu rnam pa lnga'i gnas skabs su dpag tu med par rig par bya'o/ /'di lta ste/ ji ltar 'di dag gi rang gi mi mthun pa'i phyogs spong ba bral ba'i 'bras bu dang /mthong ba'i chos la bdag dang gzhan rjes su 'dzin pa skyes bu byed pa'i 'bras bu dang / phyi ma la gong nas gong du khyad par du 'phags pa mchog dam pa 'byung ba rgyu mthun pa'i 'bras bu dang / byang chub chen po dbang gi 'bras bu dang / longs spyod chen po dang / bde 'gror 'gro ba dang / khon med pa dang / dbye ba med pa dang / bde ba dang yid bde ba mang ba dang / sems la dbang ba dang / lus la gnod pa med pa dang / dbang che bar grags pa ni go rims bzhin du sbyin pa la sogs pa'i rnam par smin pa'i 'bras bur rig par bya'o/ /gcig la gcig rnam par nges pa ni rnam pa gsum ste/sbyor ba las gyur pa dang / rab tu dbye ba las gyur pa dang / rab tu phye nas bstan pa las gyur pa'o/ /de la sbyor ba las gyur pa ni sbyin pa la sbyor bar thams cad 'dus par dmigs te/ 'di lta ste/ nang dang phyi'i dngos po yongs su gtong ba'i sbyin pa la sbyor ba'o//de la gang yongs su btang ba de ni sbyin pa'i pha rol tu phyin pa'o/ /de la byams pa'i sems dang ldan pa'i phyir gang gzhan la kun nas mnar sems pa dang gnod pa dang rnam par 'tshe ba sdom pa de ni tshul khrims kyi pha rol tu phyin pa'o/ /de nyid la gang nye bar skor ba dang /phongs pa dang / skyo ba la ji mi snyam pa de ni bzod pa'i pha rol tu phyin pa'o/ /de nyid la gang phyir zhing sems spro ba de ni brtson 'grus kyi pha rol tu phyin pa'o/ /de nyid la gang sems rtse gcig pa nyid de dge ba las sems phyi rol tu mi 'phro ba de ni bsam gtan gyi pha rol tu phyin pa'o//de nyid la rgyu dang 'bras bu ji lta ba bzhin du legs par bzung ba dang / lta ba mchog tu 'dzin pa med pa de ni shes rab kyi pha rol tu phyin pa'o/ /de bzhin du shes rab kyi pha rol tu phyin pa'i bar la yang ci rigs su sbyar bar bya ste/ mi 'jigs pa'i sbyin pa ni thams cad du yang sbyin pa yin pa'i phyir ro//de yang rab tu dbye ba las gyur pa ni ngo bo nyid kyis rab tu dbye ba dang / rjes su byed pas rab tu dbye ba dang / rjes su sbyor bas rab tu dbye ba dang / skyed pas rab tu dbye ba'o/ /de la sbyin pa la sogs pa'i ngo bo nyid ni rnam par gtong ba dang / sdom pa dang / ji mi snyam pa dang / mngon par spro ba dang / sems gnas pa dang / rab tu rnam par 'byed pa ste/ go rims bzhin no/ /de la sbyin pa la sogs pa'i rjes su byed pa ni sbyin pa la sogs pa la sbyor ba na/ de las gzhan pa'i pha rol tu phyin pa rnams rjes su 'jug pa ste snga ma bzhin no/ /de la sbyin pa la sogs pa'i rjes su sbyor ba ni 'dzin du 'jug pa dang /bsngags pa brjod pa dang / rab tu dga' ba'o/ /de la sbyin pa la sogs pa skyed pa ni gzhan gyi sems kyi rgyud la 'jog pa'o/ /de la sbyin pa'i pha rol tu phyin pa ni zang zing gi sbyin pa'o/ /de ma yin pa gzhan lnga ni mi 'jigs pa'i sbyin pa'o/ / thams cad ni dam pa'i chos kyi sbyin pa ste/ gzhan gyi sems kyi rgyud la skyes pa'i phyir ro/ /de la rab tu phye nas bstan pa las gyur pa ni gcig nas rtogs pa la sogs pa ste/ 'di lta ste/ sbyin pa'i pha rol tu phyin pa gang yin pa tshul khrims kyi pha rol tu phyin pa'ang de yin nam/ tshul khrims kyi pha rol tu phyin pa gang yin pa sbyin pa'i pha rol tu phyin pa'ang de yin nam zhe na/tshig 'og ma dang sbyar ba ste/ tshul khrims kyi pha rol tu phyin pa gang yin pa de sbyin pa'i pha rol tu phyin pa'ang de'o/ /sbyin pa'i pha rol tu phyin pa yin la/ tshul khrims kyi pha rol tu phyin pa ma yin pa yang yod de/tshul khrims kyi pha rol tu phyin pas ma zin pa'i sbyin pa'i pha rol tu phyin pa'o/ /de bzhin du shes rab kyi pha rol tu phyin pa'i bar du sbyin pa'i pha rol tu phyin pa tshig 'og ma dang sbyor ba rnams dang sbyar bar bya'o/ /sbyin pa gang yin pa de thams cad sbyin pa'i pha rol tu phyin pa yin nam/pha rol tu phyin pa gang yin pa de thams cad sbyin pa yin nam zhe na/ mu gsum du 'gyur te/ sbyin pa yin la pha rol tu phyin pa ma yin pa ni/ gang byang chub chen por yongs su ma bsngos pa'i sbyin pa'o/ /sbyin pa'ang yin la pha rol tu phyin pa'ang yin pa yod de/byang chub chen por yongs su bsngos pa'i sbyin pa rnams so/ /sbyin pa yang ma yin la pha rol tu phyin pa yang ma yin pa yod de/ sngar bshad pa ma gtogs pa'i chos rnams so/ /de bzhin du shes rab kyi pha rol tu phyin pa'i bar las brtsams te/ re re la yang mu gsum gsum du sbyar bar bya'o//sbyin pa la kun tu spyod pa gang yin pa de thams cad sbyin pa'i pha rol tu phyin pa'i rgyu las byung ba'i bsod nams skyed dam zhe na/ mu bzhir 'gyur te/ mu dang po ni byang chub chen por yongs su ma bsngos pa'i sbyin pa spyod pa'o/ /mu gnyis pa ni sbyin pa'i pha rol tu phyin pa las yang dag par 'dzin du 'jug pa dang /bsngags pa brjod pa dang / yid rab tu dga' ba'o/ /mu gsum pa ni byang chub chen por yongs su bsngos pa'i sbyin pa'o/ /mu bzhi pa ni rnam pa 'di dag ma gtogs pas so/ /de bzhin du shes rab kyi pha rol tu phyin pa'i bar las brtsams te/ re re la yang mu bzhi bzhir sbyar bar bya'o//shin tu rgyas pa la rgya che ba dang zab par yang bstan pa ni de'i 'bras bu thams cad mkhyen pa nyid mchog tu rgya che ba dang zab pa'i phyir 'bras bu dang mthun par rgyu bsten par blta'o/ /kha cig de la mi mos pa dang skrag pa ni byang chub sems dpa'i rigs dang mi ldan pa dang /rang bzhin gyis sems dman pa'i phyir ro/ /de'i rigs su gyur du zin kyang byang chub chen po las brtsams te/ smon lam la sogs pa'i dge ba'i rtsa ba ma bskyed pa'i phyir ro/ /dge ba'i rtsa ba bskyed du zin kyang theg pa chen po spong ba'i sems can gyis yongs su zin pa'i phyir ro/ / kha cig mos kyang nges par 'byung bar mi 'gyur ba ni nges pa'i don gyi mdo sde ma brtsal te/ bdag nyid lta ba mchog tu 'dzin pa la gnas pa dang / don la sgra ji bzhin du mngon par zhen pa'i phyir te/ 'di lta ste/ chos thams cad ngo bo nyid med pa'o zhes bya ba'i tshig gis mtshan nyid thams cad kyis dngos po thams cad la skur ba 'debs pa'o//de bzhin du gzhan la yang don la sgra ji bzhin du mngon par zhen pa ni theg pa chen po las nges par mi 'byung bar rig par bya ste/ theg pa chen po la ni dgongs pa sna tshogs kyis gsungs pa'i phyir ro/ /'di la dgongs nas bcom ldan 'das kyis chos kyi me long chen po'i chos kyi rnam grangs las gsungs pa/byang chub sems dpa' sgra ji bzhin du tshul bzhin ma yin par chos rnams rnam par 'byed pa la lta ba ngan pa nyi shu rtsa brgyad 'byung ste/ lta ba ngan pa nyi shu rtsa brgyad po dag gang zhe na/ mtshan mar lta ba nas mngon pa'i nga rgyal gyi bar du lta ba'o//de la theg pa chen po la chos thams cad ngo bo nyid med pa dang / ma skyes pa zhes bya ba la sogs pa'i sgrar dmigs shing thos nas/ dgongs pa de la mi mkhas pa dag 'di'i don la sgra ji bzhin du mos nas 'di ni dngos po med pa nyid du bstan to zhes chos thams cad ma skyes pa nyid du med pa la sogs pa'i mtshan mar mngon par zhen pa ni de dag gi mtshan mar lta ba yin no//de dag nyid med pa la sogs pa'i mtshan mar mngon par zhen nas kun brtags pa'i ngo bo nyid dang / gzhan gyi dbang dang / yongs su grub pa'i ngo bo nyid gsum la skur pa 'debs pa'o//de la 'di ni kun brtags pa'i ngo bo nyid de gang gzugs zhes bya ba nas/ mya ngan las 'das pa zhes bya ba'i bar du brjod pas brtags pa tsam du zad nas yang dag pa ma yin pa lus med pa'i don gang la byis pa rnams kyis gzugs la sogs pa'i mtshan nyid du sgro btags nas yongs su rtog pa'o//de la 'di ni gzhan gyi dbang gi ngo bo nyid de/ gang yang dag pa ma yin pa kun tu rtog pa tsam de nyid do/ /de la 'di ni yongs su grub pa'i ngo bo nyid de/ gang zhe na/ chos thams cad kyi de kho na de bzhin nyid do/ /de la skur pa 'debs pa'i rnam pa 'dis lta ba gsum du 'gyur te/btags pa la skur pa 'debs pa'i lta ba dang / kun du rtog pa la skur ba 'debs pa'i lta ba dang / de kho na la skur pa 'debs pa'i lta ba'o/ /de ltar de dag rnam pa thams cad du chos thams cad la skur pa 'debs pas na/ skur pa 'debs pa'i lta ba de gzhag pa'i phyir rigs pa 'ga' zhig yongs su 'dzin pa dang /nges pa'i don gyi mdo sde gang dag brjod du med pa'i chos nyid ston pa de dag thams cad kyang rang gi lta ba dang mthun par yongs su grub pa de dag ni lta ba gnyis su 'gyur te/ /yongs su 'dzin pa'i lta ba dang /sgyur ba'i lta ba'o/ /de dag yang lta ba 'di 'dra bar 'gyur te/ lta ba 'di lta bu la brten nas dge ba'am mi dge ba yang rung spyad na kha na ma tho ba med pa dang skyon med par 'gyur zhing de thams cad dge bar 'gyur ba dang / sngon bsags pa'i sgrib pa las de 'byung bar 'gyur bar 'dzin pa de lta bu de dag gi lta ba gnyis te/kha na ma tho ba med par lta ba dang / nges par 'byung bar lta ba'o/ /de dag lta ba de lta bu la mngon par zhen pas lta ba de las bzlog pa'i phung po la sogs pa'i chos rnam par 'jog pa nyan thos kyi sde snod khyad du gsod pa dang / gang dag skur ba 'debs par lta ba de la mi mos pa nyan thos kyi theg pa pa de dag la rab tu sdang ba'i lta ba 'di gnyis te/dbang za ba'i lta ba dang / rab tu 'khrug pa'i lta ba'o/ /rang gi lta ba'i tshul du na stong pa nyid dang / mtshan ma med pa dang / smon pa med pa ji lta ba bzhin du rnam par gzhag pa yin no snyam nas/de'i mtshan nyid ma yin pa la de'i mtshan nyid du 'du shes pa ni de dag gi mtshan nyid phyin ci log tu rnam par 'jog cing 'di snyam du yang sems te/ gang dag chos nyid 'di lta bu la 'jug pa dang 'dzud pa de dag thams cad bsod nams kyi phung po dpag tu med pa skyed do snyam pa la de lta bu'i lta ba 'di gnyis te/phyin ci log tu lta ba dang / 'phel ba'i lta ba'o/ /gang gi tshe de dag lta ba de las brtsams te gzhan dag gis dris pa de'i tshe bdag ni ci yang khas len par mi 'dod kyi/ tshig dor dang ltag chod kyis gzhan la 'dri ba'i lta ba 'di gnyis te/khas mi len pa'i lta ba dang / ngan g.yo'i lta ba'o/ /de dag yang 'di lta bu'i nga rgyal can du 'gyur ro/ /gang dag de ltar sgrub pa de dag ni sangs rgyas bcom ldan 'das rnams la mchod pa byed pa dang / rim gro byed par 'dzin pa de dag gi lta ba ni bkur sti'i lta ba'o/ / phyin ci log ma yin pa'i chos nyid la mkhas pa dag gis lta ba de dang 'byed cing legs par 'thad pa dang / rab tu grags pa'i rigs pas yid ches par byed pa na yang lta ba de ji ltar yang yongs su mi 'dor te 'di nyid bden gyi gzhan ni log pa'o snyam pa de dag ni rmongs pa brtan pa'i lta ba'o//lta ba ji skad du bstan pa de dag gi bag chags kyi gnas ngan len gang yin pa de ni rtsa ba'i lta ba'o/ /lta ba bcu bdun po de dag nyid kyi skyon brjod pa'i sgo nas yang bshad par bya ste/ 'di lta ste/ mtshan mar lta ba ni lta ba la lta ba ma yin par lta ba zhes bya ste/ med pa la sogs pa'i mtshan ma la mngon par zhen pa nyid du gyur kyang /mtshan ma thams cad la mngon par zhen pa med do snyam pa'i 'du shes can du gyur pa'i phyir ro/ /brtags pa la skur pa 'debs pa'i lta ba dang / kun du rtog pa la skur pa 'debs pa'i lta ba dang / de kho na la skur pa 'debs pa'i lta ba ni sbyor ba sel ba'i lta ba ste/thams cad la skur pa 'debs pa'i lta ba ni 'bad pa mthu med pa'i 'du shes can du 'gyur ba'i phyir ro/ /yongs su 'dzin pa'i lta ba dang / sgyur ba'i lta ba ni nges par 'byin pa ma yin pa'i lta ba ste/ thabs ma yin pa la sbyor ba ni de'i 'bras bu mi 'thob pa'i phyir ro//kha na ma tho ba med par lta ba dang / nges par 'byung ba'i lta ba ni sgrib pa sogs pa'i lta ba ste/ log par sgrub pa'i sgrub pa zad mi srid pa'i phyir ro/ /dbang za ba'i lta ba dang / rab tu 'khrug pa'i lta ba ni bsod nams ma yin pa 'phel ba'i lta ba ste/ dam pa'i chos dang tshangs pa mtshungs par spyod pa la log par sgrub pa'i sgo nas smas pa chen po 'thob pa'i phyir ro//phyin ci log tu lta ba dang / 'phel ba'i lta ba ni 'bras bu med pa'i lta ba ste/ yang dag pa ma yin pa'i chos nyid rnam par 'jog pa 'dzin pa dang / 'dzin du 'jug pa la khyad par mi 'thob pa'i phyir ro//khas mi len pa'i lta ba dang / ngan g.yo'i lta ba ni chad pas bcad pa'i lta ba ste/ rigs pa ma yin pas rgol na rgyal mi srid pa'i phyir ro/ /bkur sti'i lta ba ni skur pa 'debs pa'i lta ba ste/ de mi gsung ba la de sgro 'dogs pa'i phyir ro/ /rmongs pa brtan pa'i lta ba ni bsnyad pa ma yin pa'i lta ba ste/log pa la mngon par zhen pa dang / 'bel ba'i gtam bya ba bkag pa'i phyir te/ don med pa'i phyir ro/ /rtsa ba'i lta ba ni lta ba chen po ste/ de las phyi ma la lta bar gyur pa thams cad shin tu brtas pa rgyas par 'gyur pa'i phyir ro//lta ba nyi shu rtsa bdun po thams cad ni mngon pa'i nga rgyal gyi lta ba ste/ yang dag pa ma yin pa'i mngon pa'i nga rgyal gyis slong ba'i phyir ro/ /de'i phyir mdo sde de nyid las de'i 'og tu 'di dag gi bcu bdun yin yang bcur 'gyur ro/ /bcu yin yang bcu bdun du 'gyur ro//nyi shu rtsa bdun yin yang gcig tu 'gyur ro/ /gcig yin yang nyi shu rtsa bdun du 'gyur ro zhes gsungs so// //bam po brgyad pa/ chos thams cad ngo bo nyid med pa ste/ 'di ltar 'di dag ni bdag nyid kyis 'byung ba med kyi/ rkyen la ltos nas 'byung ba bkag pa ni ma yin no//ngo bo nyid gang du de dag sngar byung ba'i ngo bo nyid der yang de dag gis bskyed mi nus pas ngo bo nyid med pa'o/ /thob la ma nyams pa dang da ltar byung ba rnams kyang rang gi ngo bo la mi gnas pas ngo bo nyid med pa'o/ /bden pa ma mthong ba rnams kyis chos rnams kyi ngo bo nyid de mtshan nyid mngon par brjod pa spros pa'i bag chags kyi sgo nas ji ltar bzung ba bzhin du byis pas bzung ba dang mthun pa'i ngo bo nyid de dang bral ba'i phyir ngo bo nyid med pa'o//yang chos thams cad ces bya ba ni ngo bo nyid gsum ste/ de la kun brtags kyi ngo bo nyid ni rang gi mtshan nyid kyis med pa ste/de'i phyir rang gi mtshan nyid ngo bo nyid med pas ngo bo nyid med pa'o/ /gzhan gyi dbang ni rkyen la ltos pa'i phyir bdag nyid kyis 'byung ba med pa ste/ de'i phyir rang gis 'byung ba med pas na skye ba ngo bo nyid med pas ngo bo nyid med pa'o/ /yongs su grub pa ni rnam par dag pa'i dmigs pa yin pa dang gzhan gyi dbang dang kun brtags pa'i mtshan nyid med pa'i ngo bo nyid yin pa'i phyir te/don dam pa yin la ngo bo nyid med pas rab tu phye ba ste/ don dam pa ngo bo nyid med pas ngo bo nyid med pa'o/ /de ltar chos thams cad la ngo bo nyid med par lta'i/ rnam pa thams cad du mtshan nyid med pa'i dbang du byas pa ni ma yin no//yang theg pa chen po la de bzhin gshegs pa'i dgongs pa thams cad ni mdor na bzhir 'gyur te/ 'di lta ste/ mnyam pa nyid la dgongs pa ni nga nyid de'i tshe yang dag par rdzogs pa'i sangs rgyas rnam par gzigs su gyur to zhes gang gsungs pa ste/chos kyi sku la bye brag med pa'i phyir ro/ /dus gzhan la dgongs pa ni gang dag bde ba can gyi 'jig rten gyi khams su smon lam 'debs pa ste/ de dag der skye bar 'gyur zhes bya ba dang / de bzhin gshegs pa dri med zla 'od kyi mtshan bzung ba tsam gyis nges par bla na med pa yang dag par rdzogs pa'i byang chub 'thob bo zhes gang gsungs pa ste/dus gzhan na'o zhes dgongs pa'o/ /don gzhan la dgongs pa ni chos thams cad ngo bo nyid med pa'o/ /ma skyes pa'o zhes bya ba la sogs pa gang gsungs pa ste/ sgra ji bzhin ma yin pa'i phyir ro//gang zag gi bsam pa la dgongs pa ni gang la la nas bsngags pa'i dge ba'i rtsa ba de nyid cung zad tsam gyis chog par 'dzin pa la la la smod do/ /de bzhin du 'dod chags la spyod pa la ni sangs rgyas kyi zhing gi rnam par 'byor ba bsngags so/ /nga rgyal la spyod pa ni sangs rgyas kha cig gis phun sum tshogs pa lhag par bsngags so//'gyod pas bsgribs pa la ni gang dag sangs rgyas dang byang chub sems dpa' rnams la gnod par byed pa de dag thams cad kyang mtho ris su nye bar 'gro bar 'gyur ro zhes gsungs so/ /ma nges pa'i rigs can la ni nyan thos nyid kyi bsam pa dor ba'i phyir nyan thos chen po rnams sangs rgyas nyid du lung ston cing theg pa ni gcig ste gnyis su med do zhes ston to/yang ldem por dgongs pa thams cad ni mdor na gzhug pa la ldem por dgongs pa la sogs pa bzhir 'gyur ro/ /de la gzhug pa la ldem por dgongs pa ni nyan thos rnams la blta bar bya ste/bstan pa la gzhug pa'i don du mi skag par bya ba'i phyir gzugs la sogs pa yod pa skad du bstan pa'i phyir ro/ /mtshan nyid la ldem por dgongs pa ni kun brtags la sogs pa ngo bo nyid gsum la blta ste/ chos thams cad ngo bo nyid med pa dang /ma skyes pa la sogs pa bstan pa'i phyir ro/ /gnyen po la ldem por dgongs pa ni nyes pa rnams 'dul bar blta ste/ dper na sgrib pa brgyad kyi gnyen por theg pa mchog yang dag par bshad pa lta bu'o/ /sgrib pa brgyad ni/ sangs rgyas dang ni chos la brnyas pa dang //zhes rgya cher 'byung ba ste/ de'i dper brjod pa ni ci rigs su dgongs pa bzhi bstan par blta'o/ /bsgyur ba la ldem por dgongs pa ni brjod pa zab pa la blta bar bya ste/ ji skad du/ snying po med la snying por shes/ /phyin ci log la shin tu gnas/ /nyon mongs kun nas rab nyon mongs//byang chub dam pa thob par 'gyur/ /zhes bya ba 'di la ldem por dgongs pa ni 'di yin te/ rnam par mi g.yeng ba la gang dag snying por blo 'byung ba dang mchog tu blo 'byung ba'o/ /rnam par g.yeng ba ni sems rnam par 'phro ba'o/ /phyin ci log la shin tu gnas zhes bya ba ni/ rtag pa dang /bde ba dang / gtsang ba dang / bdag las bzlog pa ste/ mi rtag pa la sogs pa'i phyin ci log la shin tu gnas pa yongs su mi nyams pa'i phyir ro/ /nyon mongs kun nas rab nyon mongs/ /zhes bya ba ni yun ring por dka' ba byed pa'i rtsol bas shin tu yongs su nyon mongs par gyur pa'o/ /shin tu rgyas pa la byang chub sems dpa' chos la ting nge 'dzin du mkhas par bstan pa ni zhi gnas kyi phan yon dang /lhag mthong gi phan yon dang / de gnyi ga'i phan yon gyi dbang du byas par rig par bya'o/ /de la zhi gnas kyi phan yon ni rnam pa gnyis te/ skad cig skad cig la khyad par du 'gro ba'i shin tu sbyangs pas rgyun mi 'chad par lus la khyab pa'i phyir skad cig re re la gnas ngan len gyi gnas thams cad 'jig par byed pa dang /bstan pa'i chos thams cad khyad par med pas ro gcig par mos te/ mnyam par 'jog pas phung po la sogs pa'i don gyi rnam pa tha dad pa'i 'du shes dang bral bas mdo la sogs pa'i chos kyi dga' ba las dga' ba thob pa'o//lhag mthong gi phan yon yang rnam pa gnyis te/ ji ltar rab tu rnam par phye ba'i chos rgyun mi 'chad par mi brjed pas so sor dran pa tsam gyi sgo nas mdo la sogs pa'i chos rnams la shes rab kyi snang ba'i rnam pa yongs su ma chad pa tshad med pa dang /gnas 'gyur ba'i snga rtags su gyur pa rnam par mi rtog pa mngon par 'dus ma byas pa'i mtshan ma rnams kun du 'byung ba'o/ /de gnyi ga'i phan yon ni chos kyi sku shes bya'i sgrib pa spangs pa gnas gyur pas bsdus pas sa bcu pa la yongs su rdzogs par bya ba dang /de bzhin gshegs pa'i sa la yongs su bsgrub pa'i phyir gong ma bas kyang ches gong ma'i rgyu mthun pa'i bag chags bskyed pa'i tshul gyis rgyu yongs su 'dzin par byed pa'o/ /chos kyi sku'i rgyu mthun par 'dra ba la ci'i phyir shin tu rgyas pa'i chos la bdug pa dang / phye ma la sogs pas mchod par 'os kyi/nyan thos kyi theg pa'i chos la ni de lta ma yin zhe na/ shin tu rgyas pa'i chos ni sems can thams cad la phan pa dang / bde ba'i gzhir gyur pa'i phyir te/ don che bas bsod nams bla na med cing dpag tu med pa skyed pa'i gnas su gyur pa'i phyir ro/ /thob pa rnam par nges pa ni thob par byed pa'i gang zag rnam par gzhag pa dang /mngon par rtogs par rnam par gzhag par lta ba'o/ /gang zag rdzas su med kyang rnam pa bzhis gang zag rnam par gzhag ste/ 'di lta ste/ sla bar tha snyad gdags pa'i phyir ni gzugs la sogs pa rnam pa mang po mtshan nyid dang ming tha dad pa mang po rnams gcig tu bsdus te/sems can zhes brtags nas so zhes bya ba la sogs pa tshegs med pa nyid du tha snyad 'dogs pa'i phyir ro/ /'jig rten pa dang mthun par bya ba'i phyir ni 'jig rten na chos tsam gyi ming rnams kyi tha snyad thams cad ma grags kyi phal cher sems can gyi ming gis so//de bas na 'phags pa rnams kyis kyang gdon mi za bar 'jig rten dang mthun pa'i tha snyad rnams kyis de dang mthun par bya'o/ /mi skrag par bya ba'i phyir ni rten cing 'brel bar 'byung ba'i chos nyid la mi mkhas pa glo bur du thog mar rnam pa thams cad du sems can med pa thos pa na skrag par 'gyur ba'i phyir ro//bdag dang gzhan dag gi nyes pa dang ldan pa dang / yon tan dang ldan pa brjod pa'i phyir na gzhan du sems can du btags pa med par kun nas nyon mongs pa dang / rnam par byang ba'i mtshan nyid tsam bstan na che ge mo zhig gi sems kyi rgyud la nyes pa 'di rnams spangs so//yon tan 'di rnams skyes so zhes shes par mi nus pa'i phyir ro/ /gang zag rnam par gzhag pa ni spyod pa la sogs pa'i bye brag gis rnam pa bdun te/ de la 'dod chags la spyod pa ni/ 'dod chags kyi shas che zhing rgyun ring ba ste/ chags par 'gyur ba'i dngos po ngan pa la yang 'dod chags cher 'byung ba dang / byung nas kyang yun ring du rjes su 'brel pa'i phyir ro/ /rnam par rtog pa la spyod pa'i bar du yang de bzhin te/ rang gi dngos po ji lta ba bzhin du sbyar bar bya'o/ /cha mnyam pa la spyod pa ni/ /nyon mongs pa rang bzhin du gnas pa ste/nyon mongs pa shas che ba dang / shas chung ba rnam par spangs nas mnyam pa'i gnas skabs zhes bya ba'i tha tshig ste/ dngos po ji lta ba dang mthun par nyon mongs pa kun du 'byung ba'i phyir ro/ /nyon mongs pa chung ngu ni nyon mongs pa shin tu srab pa'i rang bzhin du gnas pa ste/nyon mongs pa rang bzhin du gnas pa'i mtshan nyid bstan pa dag nas/ nyon mongs pa ches srab pa yod pa de ni nyon mongs pa'i rang bzhin du gnas pas srab pa ste/ sngon gnyen po chen po goms par bya ba'i dbang gis dngos po shas che ba la yang rang bzhin gyis nyon mongs pa chung ngus kun du 'byung ba'i phyir ro//nyan thos rnams kyi theg pa ni rigs dang / dbang po dang / smon lam dang / bsam pa dang / dmigs pa dang / sgrub pa dang / 'bras bu'i rab tu dbye ba'i dbang gis bstan par rig par bya'o/ /'di'i dbang po rtul po nyid ni rang sangs rgyas dang byang chub sems dpa'i dbang po las ltos pa'o//gzhan du ni chos kyi rjes su 'brang ba la sogs pa dbang po rnon po yin no zhes bya ba dang 'gal bar 'gyur ro/ /de la nges par 'byed pa'i cha dang mthun pa sngon ma bskyed pa dang / sngon 'bras bu ma thob pa ni bse ru lta bur gyur te gcig pur gnas pa'o/ /de las gzhan pa'i rang rgyal ba ni tshogs dang spyod pa'o//lung bstan pa yang thob ces bya ba ni sa brgyad pa la mi skye ba'i chos la bzod pa thob ces bya ba'i tha tshig go/ /tshogs ma bsags pa la sogs pa ni thar pa'i cha dang mthun pa rnams dang / nges par 'byed pa'i cha dang mthun pa chung ngu dang / 'bring dang chen po rnams kyi nges par 'byed pa'i phyogs dang bden pa mngon par rtogs pa skyed pa'o/ /de yang nges pa dang ma nges pa dang / tshe rabs de nyid kyi dus dang ldan pa'i phyir go rims bzhin du rig par bya'o/ /'di la bden pa'i dbang du byas pa'i chos la mos pa dang / dad pa'i mtshan nyid kyi thar pa'i cha dang mthun pa rnams te/de nyid la chos la nges par sems pa'i bzod pa'i mtshan nyid kyis nges par 'byed pa'i cha dang mthun pa rnams ni dad pa mchog yin pa dang / shes rab mchog yin pa'i phyir te/ go rims bzhin no/ /'jig rten pa'i chos kyi mchog ni rang bzhin gyis skad cig pa ste zhes bya ba ni rgyun ma yin pa zhes bya ba'i tha tshig go//bag chags yongs su nyams pas yongs su nyams pa ni ma yin no zhes bya ba ni mya ngan las 'das par byed pa'i dge ba'i rtsa ba sngar bskyed pa'ang skyed mi dgos pa'i phyir ro/ /thar pa'i cha dang mthun pa chung ngu'i dbang du mdzad nas bcom ldan 'das kyis bka' stsal pa//'jig rten pa yi yang dag lta/ /chen po su la yod gyur pa/ /de ni tshe rabs stong du yang / /ngan 'gror 'gro bar mi 'gyur ro/ /zhe'o/ /yang thar pa'i cha dang mthun pa bzhi ste/ skabs su gtogs pa dang / mos pa las gyur pa dang / lhag par 'dod pa las gyur pa dang /thob pa las gyur pa'o/ /dge ba'i phyogs la 'dun pa nas nye bar bzung ste/ thar pa'i cha mthun du bya ba ji snyed pa de ni skabs su gtogs pa'o/ /de dang rab tu ldan pa'i bstan pa la mos pa dang ldan pa gang yin pa de ni mos pa las gyur pa'o/ /dga' ba dang dad pa dang ldan pa thar pa la dmigs pa'i yid la byed pa mang ba gang yin pa de ni lhag par 'dod pa las gyur pa'o//tshe 'di nyid la nges par 'byed pa'i cha dang mthun pa skyed par nges pa gang yin pa de ni thob pa las gyur pa'o/ /nges par 'byed pa'i cha dang mthun pa ni rnam pa drug ste/ rjes su mthun pa dang / khyad par ba dang / rab tu rtogs pa dang / gzhan du yongs su sgyur ba dang / skye ba gcig pa dang / stan gcig pa'o/ /de la gang bden pa la dmigs pa'i rnam pa'i dge ba'i rtsa ba dang po nyid du chung ngu 'byung ba de ni rjes su mthun pa pa'o/ /gang 'bring du gyur pa de ni khyad par ba ste/ de bas chos mchog tu gyur pa'i phyir ro//gang tshe 'di nyid la bden pa rtogs pa shas chen por gyur pa de ni rab tu rtogs pa pa'o/ /de yang gang ma nges pa'i rigs can rnams byang chub khyad par du gyur par yongs su bsgyur ba dang / gang yang rang sangs rgyas rnams tshe rabs gzhan la slob dpon med par mngon par rdzogs par byang chub par yongs su bsgyur ba de ni gzhan du yongs su bsgyur pa'o//gang gi tshe de nyid la rab tu rtogs par 'gyur ba de ni tshe gcig pa'o/ /gang stan de nyid la rab tu rtogs par 'gyur ba de ni stan gcig pa'o/ /lus kyis mngon du byed pa zhes bya ba ni phyir mi 'ong ba rnam par thar pa brgyad thob pa'o//rnam par thar pa brgyad po de dag lus kyis mngon sum du byas nas rdzogs par byas te gnas pa'i phyir ro/ /rnam par thar pa brgyad ni gzugs can gzugs rnams la lta ba zhes bya ba la sogs pa ste/ 'og nas 'chad do/ /shes rab kyis rnam par grol ba zhes bya ba ni shes rab kyis mi mthun pa'i phyogs nyon mongs pa'i sgrib pa tsam ma lus par spangs pa'i phyir ro//gnyi ga'i cha las rnam par grol ba ni nyon mongs pa dang snyoms par 'jug pa'i sgrib pa thams cad las gang rnam par grol ba'o/ /rgyun du zhugs pa'i 'bras bu la 'jug pa ni nges par 'byed pa'i cha dang mthun pa stan gcig pa nas bzung ste/dang po'i 'bras bu ma thob kyi bar du'o/ /mthong ba'i lam gyi tha ma la dang po'i 'bras bu thob pa gang zhe na/ gang phyogs las 'dod chags dang bral yang 'dod pa dag las 'dod chags dang ma bral zhing yang dag pa nyid du nges par 'gyur ba la 'jug pa'o//gang sdar 'jig rten pa'i lam gyis bsgom pas spang bar bya ba'i 'dod pa na spyod pa rnam pa drug spangs nas phal cher las 'dod chags dang bral bar gyur te/ phyis yang dag pa nyid la nges par 'jug pa de ni sems kyi skad cig bcu drug pa la lan cig phyir 'ong ba nyid du 'gyur ba'o/ / gang rnam pa dgu char spangs nas 'dod pa las 'dod chags dang bral bar 'gyur te/ nges par gyur pa la 'jug pa de ni phyir mi 'ong ba nyid du 'gyur ba'o/ /mthong bas spang par bya ba thams cad spangs kyang kun du sbyor ba gsum spangs nas rgyun du zhugs pa zhes brjod pa ni/ 'di dag thar pa thob pa'i gegs su gyur pas gtso bo yin pa'i phyir te/'di ltar 'jig tshogs la lta bas nye bar len pa'i phung po lnga po dag la bdag dang bdag gir mngon par zhen nas bdag la dga' ba sdug bsngal las mi 'phags so/ /ji snyed 'phags kyang thar par bya ba'i phyir tshul khrims dang brtul zhugs mchog tu 'dzin pa dang /the tshom gyi lam ngan pa la mngon par zhen pa dang / lam bzang po la the tshom za ba'i phyir/ log pas nges par 'byung gi yang dag par nges par mi 'byung ngo / /yang 'jig tshogs la lta bas zhes bya ba la log par rtogs pa ste/ sdug bsngal tsam la bdag dang bdag gi ba'i mtshan nyid du sgro 'dogs pa'i phyir ro//tshul khrims dang brtul zhugs mchog tu 'dzin pas lta ba la log par rtogs te/ des dag par yid ches pa'i phyir ro/ /the tshom gyis ni gnyen po la log par rtogs te/ dkon mchog gsum la nges par mi byed pa'i phyir ro/ /lan cig phyir 'ong ba'i 'bras bu la 'jug pa ni mthong ba'i lam gyi gong du 'dod pa na spyod pa'i nyon mongs pa'i rnam pa 'bring po'i 'bring gi bar du spong ba'i lam la gnas pa'i gang zag gang yin pa'o//lan cig phyir 'ong ba ni nyon mongs pa'i rnam pa 'bring po'i chung ngu spong ba'i lam yongs su rdzogs pa la gnas pa'i gang zag gang yin pa'o//phyir mi 'ong ba'i 'bras bu la 'jug pa ni/ lan cig phyir 'ong ba'i 'bras bu'i gong du 'dod pa na spyod pa'i nyon mongs pa'i rnam pa chung ngu'i chen po dang / chung ngu'i 'bring po spangs pa'i lam la gnas pa'i gang zag gang yin pa'o/ /phyir mi 'ong ba ni dgu pa nyon mongs pa'i rnam pa chung ngu'i chung ngu spong ba'i lam yongs su rdzogs pa la gnas pa'i gang zag gang yin pa'o//'dod pa na spyod pa gang bsgom pas spang bar bya ba thams cad spangs kyang tha ma'i cha dang mthun pa'i kun du sbyor ba lnga spangs pas phyir mi 'ong ba zhes mdo las 'byung ba ni 'di dag 'gro ba dang khams tha ma'i rgyur gyur pas gtso bo yin pa'i phyir te/'gro ba tha ma ni sems can dmyal ba dang yid gas dang dud 'gro'o/ /khams tha ma ni 'dod pa'i khams so/ /de la 'jig tshogs la lta ba dang / tshul khrims dang brtul zhugs mchog tu 'dzin pa dang / the tshom rnams kyis ni 'gro ba tha ma las mi 'da' bas de'i rgyu nyid do//'dod pa la 'dun pa dang / gnod sems gnyis kyis ni khams tha ma la mi 'da' bas de'i rgyu nyid do/ /khams gsum pa'i nyon mongs pa thams cad spangs kyang gong ma'i cha dang mthun pa lnga spangs pas dgra bcom pa zhes brjod pa ni gong ma nye bar len pa dang /yongs su mi gtong ba'i rgyur gyur pas gtso bo yin pa'i phyir te/ de la gzugs dang gzugs med pa'i 'dod chags gnyis kyis ni 'dod pa'i khams nas gong ma nye bar len te/ gzugs dang gzugs med pa'i khams su skye zhes bya ba'i tha tshig go//rgod pa dang nga rgyal dang ma rig pa rnams kyis ni gong ma yongs su mi gtong ste/ sred pa dang nga rgyal dang the tshom gyi shas che ba'i bsam gtan pa nyid du der kun nas nyon mongs pa'i phyir ro/ /rigs nas rigs su skye ba ni rgyun du zhugs pa nyid de/ lan cig phyir 'ong ba'i 'bras bu la 'jug pa lha'am mi rnams kyi nang du nges par srid pa gnyis 'khor bar byas nas yongs su mya ngan las 'da' ba'o//bar chad gcig pa ni lan cig phyir 'ong ba nyid de/ phyir mi 'ong ba'i 'bras bu la 'jug pa lha nyid kyi nang du srid pa gcig 'khor ba byas nas yongs su mya ngan las 'da' ba'o/ /bar chad gcig pa ni bar skabs te skye ba'i skabs yod pa de'i phyir de ni bar chad gcig pa'o//bar ma dor yongs su mya ngan las 'da' ba ni nyon mongs pa'i shugs gang gis skye ba'i yul du song na nying mtshams sbyor ba de zad nas bag la nyal tsam gang gis shi ba'i 'og tu phung po mngon par 'grub pa de'i lhag ma lus pas bar do'i srid pa mngon par 'grub ste/sngon goms par byas pa'i lam mngon du gyur pas bag la nyal lhag ma spangs ste/ de nyid du yongs su mya ngan las 'da' ba'o/ /de yang skye ba'i yul las mi 'phags pa dang / 'phags pa tsam dang / ring du song ba'i gnas skabs kyi rnam pa gsum ste/skyes bu dam pa'i 'gro ba'i mdo'i tshul du rig par bya'o/ /mngon par 'du byed pa med par lam mngon du byas nas zhes bya ba ni sngon shin tu goms par 'jug pa'i phyir te/ bsgrim mi dgos zhes bya ba'i tha tshig go/ /de las bzlog pa ni mngon par 'du byed pa dang bcas pas yongs su mya ngan las 'da' ba'o//gong du 'pho ba ni rnam pa gnyis te/ 'og min du 'gro ba dang / srid pa'i rtse mor 'gro ba'o/ /de la 'og min du 'gro ba ni ro myang ba mang bas bsam gtan gyi rnam pa chung ngu la sogs pa skyes shing skyes pa'i ro myong bar byed pa'i phyir tshangs ris nas bzung ste/ rgyun mi 'chad par gnas gzhan thams cad du lan re re skyes nas 'og min gyi bar du zhugs te/yongs su mya ngan las 'da' ba'o/ /srid pa'i rtse mor 'gro ba ni bsam gtan bzhi pa la spel mar ma bsgoms pas gnas gtsang ma 'ba' zhig bkol te/ de bzhin du srid pa'i rtse mo'i bar du song nas yongs su mya ngan las 'da' ba'o//spel mar bsgom pa ni bsam gtan bzhi pa'i rnam pa chung ngu la sogs pa lnga bsgoms pas go rims bzhin du gnas gtsang ma lnga po rnams su skye bar rig par bya'o/ /gsod kyang rung mi gsod kyang rung zhes bya ba ni bdag gis bdag gi srog gcod pa'am/ mi gcod ces bya ba'i tha tshig go//mthong ba'i chos la bde bar gnas pa las yongs su nyams pa zhes bya ba ni/ 'jig rten pa'i bsam gtan rnams las zhes bya ba'i tha tshig go/ /dbang po rnams sbyong ba zhes bya ba ni chen po thob par byed pa ste/ rno bar byed ces bya ba'i tha tshig go/ /de'i phyir mi 'khrugs pa'i chos can la dbang po rnams yongs su sbyong ba'i skal ba can zhes ma bshad de/rang bzhin gyis dbang po rno ba'i phyir ro/ /byang chub sems dpa' ni 'dod pa na spyod pa dang / gzugs na spyod pa nyid yin gyi gzugs med pa na spyod pa ni ma yin te/ sems can yongs su smin par bya ba'i gnas ma yin pa'i phyir mthu'i khyad par thob pa der mi skye'o//gzugs med pa'i khams rnams par spangs pa'i bsam gtan zhes bya ba ni gzugs med par skye ba bor ba'i ting nge 'dzin zhes bya ba'i tha tshig go/ /bsam gtan gyi bden pas gnas pa ni yongs su ma nyams pa nyid de/ bsam gtan las rnam par bzlog pa la mkhas pas sems can yongs su smin par bya ba'i phyir byang chub sems dpa' ni 'dod pa'i khams su yang skye bar rig par bya'o//byang chub sems dpa'i spyod pa thams cad ces bya ba ni dga' ldan gyi gnas na gnas pa nas bzung ste/ bdud las rgyal ba'i bar du'o/ /sangs rgyas kyi spyod pa zhes bya ba ni mngon par rdzogs par byang chub pa nas bzung ste/yongs su mya ngan las 'das pa chen po'i bar du'o/ /mos pas spyod pa can gyi byang chub sems dpa' ni rigs las gnas pa thog mar smon lam chen po btab pa nas bzung nas rab tu dga' ba'i sa la ma zhugs kyi bar du ste/so sor rang gis 'jig rten las 'das pa thob pa med pa'i phyir ro/ /lhag pa'i bsam pas spyod pa can ni sa bcu rnams su 'jig rten las 'das pa thob pas bsam pa dag pa'i phyir ro/ /mtshan ma la spyod pa can ni sa drug po dag la mi 'dod bzhin du mtshan ma dang 'dre ba'i phyir ro//mtshan ma med par spyod pa can ni sa bdun po dag la bsgrims nas ji srid 'dod par mtshan ma kun du mi 'byung ba'i phyir ro/ /mngon par 'du byed pa med par spyod pa can ni sa lhag ma rnams su rnam par smin pa las byung ba'i rnam par mi rtog pa'i ye shes rnams thob pa'i phyir ro//cig car nges par 'byin pa ni khams gsum na spyod pa'i nyon mongs pa'i rnam pa cig car spong ba'o/ /rnam pas zhes bya ba ni bsgom pas spang bar bya bar 'dod pa dang / gzugs dang gzugs med pa na spyod pa chen po'i chen po cig car spong ba dang / de bzhin du chung ngu'i chung ngu'i bar du ste/mthong bas spang bar bya ba bzhin no/ /'jig rten pa'i lam bzhin du sa'i rnam pa'i bye brag gis so so ba ni ma yin pa zhes bya ba'i tha tshig go/ /'dir khungs ni sor mo'i rtse mo'i mdo las gzugs gang ci yang rung ste zhes bya ba nas/ rnam par shes pa'i bar du 'das pa dang /ma 'ongs pa dang / da ltar byung ba zhes rgya cher 'byung ba nas/ rgyang ring po dang / thag nye ba zhes bya ba'i bar du de thams cad gcig tu bsdus te cha gcig tu byed do/ /gcig tu bzlum mo/ /gcig tu sdom mo/ /phung po gcig tu byed do/ /cha gcig tu byas shing phung po gcig gi bar du byas nas 'di ltar yang dag par slob ste/'di thams cad ni mi rtag pa/ 'di thams cad ni sdug bsngal ba zhes rgya cher gsungs pa lta bu'o/ /de ni 'bras bu dang po'o/ /tha ma gnyis kho na la gdags te/ de gnyis ni khams gsum pa'i mthong ba dang / bsgom pas spong bar bya ba thams cad ma lus pa spangs pas rab tu phye ba'i phyir go rims bzhin no//bar ma dag la mi gdags te/ de dag ni bden pa mthong ba'i bsgom pas spang bar bya ba 'dod pa na spyod pa nyid la lhag ma dang bcas pa dang / lhag ma med par spangs pas rab tu phye ba'i phyir ro/ /cig car nges par 'byin pa'i dbang du byas nas rnam par 'byed pa'i mdo las rgyun du zhugs pa'i 'bras bu'i 'og tu dgra bcom pa rnam par gzhag par rig par bya'o//thams cad la ma lus par 'dod chags dang bral ba ma yin pas de gal te mthong ba'i chos la kun shes pa thob par mi byed na myur du yongs su mya ngan las 'da' bar bya ba'i phyir smon lam gyi dbang gis 'dod pa'i khams nyid du skye'o//mngon par rtogs pa rnam par gzhag pa ni rnam pa bcu ste/ de la chos mngon par rtogs pa ni gzhan gyi sgra'i dbang du byas pa ste/ bden pa'i dbang du byas pa'i chos rnams la thar pa'i cha dang mthun pa tha mas bsdus pa'i mos pa dang /dad pa chen po thob pa ste/ 'di ltar de la mos pa dang dad pa thob pas bden pa de dag la chos mngon par rtogs pas mngon par rtogs par gyur zhes bya ba'i tha tshig go/ /don mngon par rtogs pa ni chos de dag nyid la gang tshul bzhin du yid la byed pa'i dbang du byas nas bden pa rnams la nges par 'byed pa'i cha dang mthun pa tha mas bsdus pa'i chos nges par sems pa'i bzod pa chen po thob pa'o//chos nges par sems pa'i bzod pa de yang tshul bzhin yid la byed pa rnam pa gsum gyis rab tu phye ba ste/ chen po'i chung ngus ni tshe de'i dro bar gyur pa rnams su'o//chen po'i 'bring pos ni rtse mo dang bzod pa rnams su'o/ /chen po'i chen pos ni 'jig rten pa'i chos kyi mchog rnams su'o/ /de kho na mngon par rtogs pa ni mthong ba'i lam ste/ der ni bden pa rnam par 'jog pa mngon par rtogs pa'i mtha' las byung ba kun rdzob shes pa rnams thob ste/'jig rten las 'das pa'i ye shes kyi dbang gis de'i sa bon gsos pa'i phyir gyi mngon sum du byed pa ni ma yin te/ mthong ba'i lam gyi sems kyi skad cig bcu drug po dag rgyun mi 'chad pas 'jig rten pa'i sems kyi skabs med pa'i phyir ro/ /rjes la mngon par rtogs pa ni mthong ba'i lam gyi gong du 'jig rten pa yang rung /'jig rten las 'das pa yang rung ste/ bsgom pa'i lam thams cad do/ /dkon mchog mngon par rtogs pa ni/ /kye ma bcom ldan 'das ni yang dag par rdzogs pa'i sangs rgyas rnams so//de'i chos 'dul ba ni legs par gsungs pa'o/ /nyan thos kyi dge 'dun ni legs par zhugs pa'o zhes de ltar shes te/ nges nas sangs rgyas la sogs pa la 'phags pa nyan thos dad pa'o/ /kun du mi 'byung bar mngon par rtogs pa ni mi bya ba'i sdom pa 'phags pa dgyes pa'i tshul khrims kyis bsdus pa thob pas de'i mi mthun pa'i phyogs byed pa la sogs pa kun du mi 'byung ste/bdag gi sems can dmyal ba zad do zhes bya ba la sogs pa ste/ de ltar nges par 'byung ba de ni kun du mi 'byung ba mngon par rtogs pa'o/ /mthar thug pa mngon par rtogs pa ni gnas ngan len thams cad shin tu sbyangs pa zhes bya ba la sogs pas ji ltar lam gyi bden pa las mthar phyin pa'i lam bstan pa lta bu'o//mngon par rtogs pa bdun po de dag ni nyan thos rnams kyis gzhan gyi sgra la brten nas thob pas nyan thos kyi mngon par rtogs pa zhes bya'o//gzhan gyi sgra la ma brten par thob pas rang sangs rgyas kyi mngon par rtogs pa zhes bya'o/ /byang chub sems dpa'i mngon par rtogs pa ni nyan thos dang / rang sangs rgyas 'dul ba'i thabs la mkhas par bya ba'i phyir/ mngon par rtogs pa bdun po de dag la byang chub sems dpa'i yang dag par 'grub pa'i bzod pa gang yin pa ste/sems can la lta bas theg pa chung ngus nges par mi 'byung ba'i phyir mngon du byed pa ni ma yin no/ /yang thog ma nyid du sa la 'jug pa yang byang chub sems dpa'i mngon par rtogs pa zhes bya'o/ /mngon par rtogs pa de la brten nas nyan thos kyi mngon par rtogs pa las byang chub sems dpa'i mngon par rtogs pa khyad par ci yod pa brjod par bya ste/dmigs pa'i khyad par na shin tu rgyas pa la dmigs pa'i phyir ro/ /nye bar rton pa'i khyad par ni bskal pa chen po grangs med par bsod nams dang ye shes kyi tshogs yongs su rdzogs par byed pa'i phyir ro//rab tu rtogs pa'i khyad par ni gang zag dang chos la bdag med pa'i dbang du byas pa'i chos la sbyor ba'i 'phen pas 'jig rten las 'das pa'i ye shes kyis de gnyi ga rab tu rtogs pa'i phyir ro/ /khas len pa'i khyad par ni bdag dang sems can thams cad mnyam pa nyid du khas len pa'i phyir ro//nges par 'byung ba'i khyad par ni sa bcu po dag gis nges par 'byung ba'i phyir ro/ /yongs su 'dzin pa'i khyad par ni mi gnas pa'i mya ngan las 'das pa yongs su 'dzin pa'i phyir ro/ /gnas dang g.yog 'khor gyi khyad par ni sangs rgyas kyi zhing yongs su sbyong ba dang /gdul ba'i skye bo nye bar sdud pa'i phyir ro/ /btsun par skye ba'i khyad par ni pha bzhin du rang gi rigs yang dag par 'dzin pa'i bu gtso bo'i mtshan nyid yin pa'i phyir ro/ /skye ba'i khyad par ni 'khor gyi dkyil 'khor rnams su skye ba'i phyir ro/ / 'bras bu'i khyad par de yang gnas gyur pa'i khyad par ni nyon mongs pa can dang nyon mongs pa can ma yin pa'i gnas ngan len gyi rnam pa thams cad spangs pa'i phyir yon tan bla na med pa thams cad kyi gnas nyid du gyur pas gnas gyur pa'i phyir ro/ /yon tan phun sum tshogs pa'i khyad par ni stobs dang mi 'jigs pa dang /sangs rgyas kyi chos ma 'dres pa la sogs pa yon tan dpag tu med pa 'grub pa'i phyir ro/ /rnam pa lnga'i khyad par ni rnam par dag pa la sogs pa'i khyad par gyi phyir te/ /rnam par dag dang yongs dag dang / /lus dang longs spyod rdzogs pa dang / /las kyi sangs rgyas chos rnams kyi//khyad par yongs su brjod pa yin/ /de la rnam par dag pa'i khyad par ni bag chags dang bcas pa'i nyon mongs pa spong ba'i phyir ro/ /yongs su dag pa'i khyad par ni/ sangs rgyas kyi zhing yongs su sbyong ba'i phyir ro/ /lus kyi khyad par ni chos kyi sku yongs su sgrub pa'i phyir ro//longs spyod kyi khyad par ni rtag tu byang chub sems dpa' rnams dang lhan cig 'khor gyi dkyil 'khor rnams su chos sna tshogs la rdzogs par longs spyod pa'i phyir ro/ /las kyi khyad par ni ci rigs par sprul pa rnams kyis kun du 'jig rten gyi khams mtha' yas mu med pa rnams su sangs rgyas kyi mdzad pa sgrub pa'i phyir ro//sku gsum gyi khyad par ni rang bzhin dang longs spyod rdzogs pa dang / sprul pa'i sku 'grub pa thob pa'i phyir ro/ /mya ngan las 'das pa'i khyad par ni phung po lhag ma med pa'i mya ngan las 'das pa'i dbyings su yang sems can thams cad la phan par yon tan thams cad rgyun mi gcod pa'i phyir ro//'dres shing nye bar 'dres pa'i ye shes kyi nus pa thob pa'i khyad par ni chos kyi dbyings rnam par dag par ro gcig pa nyid dang / de la brten pa rnams rnam pa thams cad kyi mchog shes pa nyid rnams la sangs rgyas thams cad so sor mthu dang ldan pa'i phyir ro//sgrib pa thams cad rnam par dag pa'i khyad par ni nyon mongs pa dang shes bya'i sgrib pa thams cad spong ba'i phyir ro/ /'dres pa dang nye bar 'dres pa'i las byed pa'i khyad par ni/ sems can re re 'dul ba'i phyir yang sangs rgyas thams cad kyi dbang gis byed pa'i phyir ro//mngon par rdzogs par byang chub pa dang / mya ngan las 'das pa ston pa'i thabs kyi khyad par ni phyogs bcu'i 'jig rten gyi khams thams cad du ci rigs par phyi ma'i mtha'i bar du yang dang yang sangs rgyas 'byung ba la sogs pa ston pas 'dul ba thams cad yongs su smin par byed pa dang rnam par thar par byed pa'i phyir ro//yongs su skyob pa rnam pa lnga'i khyad par gyis kyang rig par bya'o zhes bya ba ni gnod pa la sogs pa las yongs su skyob pa'i phyir ro/ /de la gnod pa las yongs su skyob pa ni grong khyer du 'jug pa la sogs pas long ba la sogs pas mig la sogs pa thob pa'i phyir ro//thabs ma yin pa las yongs su skyob pa ni 'jig rten pa'i yang dag pa'i lta ba thob pas lta ba ngan pa thams cad dang bral bar byed pa'i phyir ro/ /ngan song las yongs su skyob pa ni mthong ba'i lam skyed pas ngan 'gro las shin tu bzlog pa'i phyir ro//'jig tshogs las yongs su skyob pa ni dgra bcom pa nyid mngon du byed pas khams gsum pa las rnam par thar par byed pa'i phyir ro/ /theg pa dman pa las yongs su skyob pa ni byang chub sems dpa' rnams theg pa dman pa las 'dun pa bzlog pa'i phyir ro//gnod pa dag ni thams cad dang / /thabs ma yin dang ngan song dang //theg pa dman las skyob pas na/ /de phyir mgon po dam pa'o/ /yon tan khyad par can rnams ni 'phags pa nyan thos rnams kyis bsgom pa'i lam dang mi slob pa'i lam la mngon par sgrub ste/de'i phyir 'di dag rjes la mngon par rtogs pa dang / thar thug pa'i mngon par rtogs pas bsdus par rig par bya'o/ /byams pa la sogs pa mdo sde gzhan dag las ji skad bstan pa de dag ni nyan thos kyi theg pa dang theg pa chen por yang de bzhin du rig par bya'o/ / de dag kyang mdor bsdus na rnam pa lngas ci rigs su mtshan nyid bshad par blta ste/ gnas dang / dmigs pa dang / rnam pa dang / rang bzhin dang / grogs kyis so/ /de la byams pa'i gnas ni bsam gtan no/ /dmigs pa ni sems can no/ /rnam pa ni bde ba dang ldan par gyur cig snyam pa'o/ / rang bzhin ni ting nge 'dzin dang shes rab ste/ zhi gnas dang lhag mthong gis bsdus pa'i phyir ro/ /yon tan thams cad kyi grogs ni sems dang sems las byung ba rnams so/ /snying rje la sogs pa la yang de bzhin du ji ltar mthun mthun du sbyar bar bya'o/ /sems can bde bar gyur pa la sogs pa la yang rjes su chags pa la sogs pa btang snyoms su byed cing kye ma nyon mongs pa las rnam par grol bar gyur cig snyam pa 'di ni btang snyoms kyi rnam par rig par bya ste/de yang phan pa'i bsam pas gnas pa zhes bya'o/ /rnam par thar pa brgyad ni gzugs can gzugs rnams la lta ba 'di ni rnam par thar pa dang po'o zhes rgya cher 'byung ba'o//de la ji ltar na gzugs can zhes bya zhe na/ gzugs med pa'i snyoms par 'jug pa la brten nas bdag la gzugs kyi 'du shes rnam par mi 'jog pa'i phyir ram/ gzugs kyi 'du shes 'jog pa'i phyir te/ lta ba po bdag la gzugs kyi 'du shes mngon du byed ces bya ba'i tha tshig go//ji ltar na gzugs rnams la lta ba zhes bya zhe na/ kha dog mdzes pa dang / kha dog mi sdug pa la sogs pa'i gzugs rnams su mos nas lta ba'i phyir ro/ /ji ltar rnam par thar pa zhes bya zhe na/ 'dis sprul pa'i sgrib pa las rnam par grol ba'i phyir ro//nang gzugs med par 'du shes pa zhes bya ba ni gzugs med pa'i snyoms par 'jug pa la brten nas gzugs kyi 'du shes rnam par 'jig pa'i phyir ram/ gzugs med pa'i 'du shes 'jog pa'i phyir te/ lta ba po la ming du 'du shes pa mngon du byed ces bya ba'i tha tshig go//lhag ma ni snga ma bzhin no/ /sdug pa'i rnam par thar pa lus kyis mngon sum du byas te/ rdzogs par byas nas gnas pa ni sdug pa dang / mi sdug pa'i gzugs rnams la phan tshun ltos pa'i 'du shes dang / phan tshun rjes su 'brel ba'i 'du shes la brten nas phan tshun ro gcig pa'i 'du shes thob pa'i phyir ro//'di ltar sdug pa'i gzugs rnams la ltos nas de las gzhan pa rnams la mi sdug go zhes bya bar 'gyur la mi sdug pa la ltos nas sdug ces bya bar 'gyur gyi/ ma ltos par ni ma yin no/ /rigs gcig pa rnams nyid mthong na sdug pa dang mi sdug pa gnyis kyi blo mi 'byung ba'i phyir ro//de bzhin du sdug pa rnams la yang mi sdug pa nyid rjes su 'brel to/ /mi sdug pa rnams la yang sdug pa nyid rjes su 'brel to/ /sdug par grags pa yang brtags pa tsam du zad de/ skra la sogs pa mi gtsang ba'i rdzas sum cu rtsa drug gi nang du 'dus pa'i phyir ro//de ltar gzugs thams cad phan tshun bsres te sdug pa nyid du ro gcig pa'i rnam pa'i 'du shes kyis mos par byed do/ /de ji ltar 'dod pa bzhin du gzugs la sogs par mos pa la dbang 'byor pa thob pa de sdug pa dang mi sdug pa la sprul pa la sgrib pa spong ste/der ni kun nas nyon mongs pa 'byung ba'i sgrib pa spong ngo / /sprul pa la kun nas nyon mongs pa gang yin zhe na/ sdug pa'i gzugs sprul pa la ni chags pa'o/ /mi sdug pa'i gzugs sprul pa la ni mi mthun pa'o/ /nam mkha' mtha' yas skye mched la sogs pa bzhi ni 'phags pa nyan thos kyi zag pa med pa'i rjes su mthun pa dag pa gang yin pa de dag rnam par thar pa zhes bya ba thob ste/de'i ro myang ba las rnam par thar par bya ba'i phyir ro/ /zhi ba'i rnam par thar pa ni gzugs rnams las shin tu 'das nas gzugs med pa gang yin pa dag ste/ de dag la mi chags pa ni yongs su dag pa'o//de'i sgrib pa ni gzugs med pa'i ro myang ba'o/ /'du shes dang tshor ba 'gog pa'i gnas ni 'du shes med 'du shes med min skye mched do/ /sems dang sems las byung ba rnams med pa'i phyir dmigs pa dang rnam pa dang grogs ni med do/ de'i rang bzhin ni sems dang sems las byung ba'i chos rnams 'gog pa'o//de yang thar pa dang mthun par gnas pa ste/ 'jig rten las 'das pa'i lam gyis gnas gyur pa'i nyan thos rnams kyi sems dang sems las byung ba rnams kyang mi 'byung ba'i gnas skabs na/ mchog tu zhi ba dang / nyon mongs pa can gyi yid kyang kun du mi 'byung ba'i phyir ro//'phags pa rnams ni 'di dag gis gnas pa'i phyir 'di dag ni 'phags pa gnas pa'i rnam par thar pa brgyad ces bya'o/ /de la 'phags pa dag ni gnas pa gnyis kyis lan mang du gnas te/ gsum pa dang brgyad pa ste/ mchog yin pa'i phyir ro//de'i phyir de gnyis lus kyis mngon sum du byas te/ rdzogs par byas nas gnas so zhes gsungs kyi gzhan rnams la ni ma yin te/ gzugs can dang gzugs med pa'i rnam par thar pa la sgrib pa ma lus par spangs pa'i phyir go rims bzhin no/ /rnam grangs gzhan du na de gnyis kyi gnas gyur pa rdzogs pa mngon du byed pa'i phyir ro//zil gyis gnon pa'i skye mched brgyad po de la nang gzugs su 'du shes pa'i phyi rol gyi gzugs chung ngu kha dog mdzes pa dang / kha dog mi sdug pa dang / ngan pa dang / bzang po rnams la lta zhing gzugs de dag zil gyis mnan nas shes zil gyis mnan nas mthong ste/de lta bur 'du shes par 'gyur ba 'di ni zil gyis gnon pa'i skye mched dang po'o/ /nang gzugs su 'du shes pas phyi rol gyi gzugs chen po kha dog mdzes pa dang / kha dog mi sdug pa dang / ngan pa dang / bzang po rnams la lta zhing gzugs de dag zil gyis mnan nas shes zin gyis mnan nas mthong ste/de lta bur 'du shes par 'gyur ba 'di ni zil gyis gnon pa'i skye mched gnyis pa'o zhes bya ba zil gyis gnon pa'i skye mched 'di gnyis ni gzugs can gzugs rnams la lta ba'o zhes bya ba'i rnam par thar pa de las 'byung ngo //nang gzugs med par 'du shes pas phyi rol gyi gzugs chung ngu kha dog mdzes pa dang / kha dog mi sdug pa dang / ngan pa dang / bzang po rnams la lta zhing gzugs de dag zil gyis mnan nas shes zil gyis mnan nas mthong ste/ de lta bur 'du shes par 'gyur ba 'di ni zil gyis gnon pa'i skye mched gsum pa'o//nang gzugs med par 'du shes pas phyi rol gyi gzugs chen po kha dog mdzes pa dang / kha dog mi sdug pa dang / ngan pa dang / bzang po rnams la lta zhing gzugs de dag zil gyis mnan nas shes zil gyis mnan nas mthong ste/de lta bur 'du shes par gyur pa 'di ni zil gyis gnon pa'i skye mched bzhi pa'o zhes bya ba zil gyis gnon pa'i skye mched 'di gnyis ni nang gzugs med par 'du shes pas phyi rol gyi gzugs rnams la lta zhes bya ba'i rnam par thar pa de las 'byung ngo / /de ltar na zil gyis gnon pa'i skye mched bzhi ni rnam par thar pa gnyis kyis rig par bya'o//nang gzugs med par 'du shes pas phyi rol gyi gzugs sngon po/ /kha dog sngon po/ /sngon po lta bur ston pa/ 'od sngon po 'byung ba rnams la lta ste/ dper na zar ma'i me tog gam yul wA rA Na sIr byas pa'i ras phun sum tshogs pa sngon po//kha dog sngon po/ /sngon po lta bur ston pa/ 'od sngon po 'byung ba de bzhin du nang gzugs med par 'du shes pas phyi rol gyi gzugs sngon po/ /kha dog sngon po/ /sngon po lta bur ston pa/ 'od sngon po 'byung ba rnams la lta zhing gzugs de dag zil gyis mnan nas shes zil gyis mnan nas mthong ste/de lta bur 'du shes par 'gyur ba 'di ni zil gyis gnon pa'i skye mched lnga pa'o/ /nang gzugs med par 'du shes pas phyi rol gyi gzugs ser po/ /kha dog ser po/ /ser po lta bur ston pa/ 'od ser po 'byung ba rnams la lta ste/ dper na dong ka'i me tog gam/yul wA rA Na sI'i ras phun sum tshogs pa ser po/ /kha dog ser po/ /ser po lta bur ston pa/ 'od ser po 'byung ba de bzhin du nang gi gzugs med par 'du shes pas phyi rol gyi gzugs ser po/ /kha dog ser po/ /ser po lta bur ston pa/ 'od ser po 'byung ba rnams la lta zhing /gzugs de dag zil gyis mnan nas shes zil gyis mnan nas mthong ste/ de lta bur 'du shes par 'gyur ba 'di ni zil gyis gnon pa'i skye mched drug pa'o/ /nang gzugs med par 'du shes pas phyi rol gyi gzugs dmar po/ /kha dog dmar po/ dmar po lta bur ston pa/ 'od dmar po 'byung ba rnams la lta ste/ dper na ban du dzi ba ka'i me tog gam/ yul wA rA Na sI'i ras phun sum tshogs pa dmar po/ kha dog dmar po/ dmar po lta bur ston pa/ 'od dmar po 'byung ba de bzhin du/ nang gzugs med par 'du shes pas phyi rol gyi gzugs dmar po kha dog dmar po/dmar po lta bur ston pa/ 'od dmar po 'byung ba rnams la lta zhing / gzugs de dag zil gyis mnan nas shes zil gyis mnan nas mthong ste/ de lta bur 'du shes par 'gyur pa 'di ni zil gyis gnon pa'i skye mched bdun pa'o/ /nang gzugs med par 'du shes pas phyi rol gyi gzugs dkar po/kha dog dkar po/ dkar po lta bur ston pa/ 'od dkar po 'byung ba rnams la lta ste/ dper na skar ma pa wa sangs kyi mdog gam/ yul wA rA Na sI'i ras phun sum tshogs pa dkar po/ kha dog dkar po/ dkar po lta bur ston pa/'od dkar po 'byung ba de bzhin du/ nang gzugs med par 'du shes pas phyi rol gyi gzugs dkar po/ kha dog dkar po/ dkar po lta bur ston pa/ 'od dkar po 'byung ba rnams la lta zhing gzugs de dag zil gyis mnan nas shes zil gyis mnan nas mthong ste/ de lta bur 'du shes par 'gyur ba 'di ni zil gyis gnon pa'i skye mched brgyad pa'o zhes bya ba 'di bzhi ni sdug pa'i rnam par thar pa lus kyis mngon sum du byas te/rdzogs par byas nas gnas so zhes bya ba'i rnam par thar pa de las 'byung ngo / /de la rnam par thar pa rnams kyis ni dmigs pa chung ngu la sogs pa la mos par byed do//zil gyis gnon pa rnams kyis ni dbang byed pa'i phyir zil gyis gnon te/ de'i nang du 'dus par byed pa dang / ji ltar 'dod pa bzhin du byed pa'i phyir ro/ /de la gzugs chung ngu rnams ni sems can du gtogs pa ste/ chung ba'i phyir ro/ /chen po ni sems can ma yin par gtogs pa ste/khang pa dang gzhal med khang dang / ri la sogs pa rgya che ba'i phyir ro/ /kha dog mdzes pa dang / kha dog mi sdug pa ni kha dog sdug pa dang / kha dog mi sdug pa las bsdus pa rnams so/ /mi'i dang lha rnams ni bzang po dang ngan pa rnams te/ go rims bzhin no/ /gzugs de dag zil gyis mnan nas shes zhes bya ba ni dbang bsgyur nas so zhes bya ba ni zhi gnas kyi lam gyis so/ /mthong zhes bya ba ni lhag mthong gi lam gyis so/ /de lta bur 'du shes par 'gyur ba zhes bya ba ni zil gyis mnan tam/ zil gyis ma mnan kyang rung ste/ de la mngon pa'i nga rgyal med pa'i 'du shes can gyi phyir ro//sngon po zhes bya ba ni bstan pa'i tshig go/ /kha dog sngon po zhes bya ba ni lhan cig skyes pa'i sngo ba nyid kyi phyir ro/ /sngon po lta bur ston pa zhes bya ba ni sbyar ba las gyur pa'i sngo ba nyid kyi phyir ro/ /'od sngon po 'byung ba rnams zhes bya ba 'di ni de gnyi ga las 'od 'byung ba rnams 'od gsal ba nyid kyi phyir ro//sngon po la ji lta ba de bzhin du ser po dang dmar po dang dkar po rnams la yang rgya cher rig par bya'o/ /dpe gnyis po re re la yang lhan cig skyes pa dang / sbyar ba las byung ba'i kha dog brjod pa'i phyir ro/ /'di lta ste/ sngon po zhes bya ba ni me tog dang ras gnyi ga la mtshungs par bstan pa'i tshig go//kha dog sngon po zhes bya ba ni me tog nyid kyi dbang du byas pa ste/ de lhan cig skyes pa'i sngon po yin pa'i phyir ro/ /sngon po lta bur ston pa zhes bya ba ni ras kyi dbang du byas pa ste/ de la sbyor ba las gyur pa'i sngon po nyid yod pa'i phyir ro//'od sngon po 'byung ba zhes bya ba ni me tog dang ras gnyi ga'i dbang du byas pa ste/ gnyi ga la yang 'od gsal ba nyid yod pa'i phyir ro/ /de ltar byas na dper na zar ma'i me tog dang / yul wA rA Na sI'i ras phun sum tshogs pa sngon po kha dog sngon po zhes bya ba la sogs pa bstan pa'i dpe yang 'thad par 'gyur ro//de bzhin du ser po la sogs pa la yang sbyar bar bya'o/ /lhag ma ni rnam par thar pa las byung ba ji lta ba bzhin no zhes bya ba la lhag ma gang zhe na/ nang gzugs su 'du shes pas phyi rol gyi gzugs rnams mthong ba zhes bya ba la sogs pa ste/ de ni gzugs can gzugs rnams la lta ba zhes ji skad bstan pa'i tshul bzhin du blta bar bya'o//ji ltar zil gyis gnon pa'i skye mched rnams kyis dmigs pa la dbang bsgyur nas zad par gyi skye mched rnams kyis zad par rgyas par byed de/ kun du mtha' yas pa khyab par byed ces bya ba'i tha tshig go//zad par gyi skye mched de dag ni bcu yin te/ zad par sa dang / zad par chu dang / zad par me dang / zad par rlung dang / zad par sngon po dang / zad par ser po dang / zad par dmar po dang / zad par dkar po dang / zad par nam mkha' mtha' yas skye mched dang / zad par rnam shes mtha' yas skye mched do//zad par gyi skye mched rnams la sa la sogs pa rnam par mi gzhag na ni des na gnas 'byung ba chen po rnams la rgyur byas pa'i gzugs sngon po la sogs pa des khyab par byed mi nus pa ste/ de bas na gnas dang bcas pa'i gzugs la khyab par bya ba 'byor pa nyid kyi phyir/de dag ni zad par la rnam par gzhag par rig par bya'o/ /lhag ma ni rnam par thar pa bzhin du ji ltar mthun mthun du sbyar bar bya'o zhes bya ba ni zad par nam mkha' mtha' yas skye mched la sogs pa'o/ /de la rnam par thar pa rnams kyis ni rnam par thar pa rnams rtsom mo/ /zil gyis gnon pa'i skye mched rnams kyis ni sbyor ro//zad par gyi skye mched rnams kyis ni yongs su grub par rig par bya'o// //bam po dgu pa/ nyon mongs pa med par gnas pa ni sems can gang dag gi mig lam du snang bar 'dod pa de dag bdag la nyon mongs pa kun du mi 'byung ba'i rnam pa'i dbang du byas nas 'dug bzhin du bsams nas shes pa'i dbang gis ma 'ongs pa na 'byung ba la lta ste/de ltar de'i drung du 'gro yang rung mi 'gro yang rung ci nas der de dag la rjes su chags pa dang / khong khro ba dang / phrag dog dang / ser sna la sogs pa'i nyon mongs pa dang nye ba'i nyon mongs pa dang 'thab rtsod mi skyed do//de'i phyir nyon mongs pa med pa ni bsam gtan la brten nas gzhan gyi nyon mongs pa 'byung ba rjes su srung bar gnas pa yang dag par 'byor pa'i zhes rgya cher 'byung ba de skad ces bya ba'o/ /bsams nas zhes bya ba ni de thob pa gal te dus gsum pa la sogs pa'i shes bya'i rnam pa de nyid shes par 'dod par gyur na de dang der 'di shes par 'gyur bar bya'o zhes bsams nas bsam gtan la snyoms par 'jug cing de las langs nas de'i smon pa 'grub par 'gyur te/shes bya de ni shes so zhes bya ba'i tha tshig go/ /chos so so yang dag par rig pa ni rnam grangs su gtogs pa rnams la 'di lta ste/ma rig pa la sogs pa la brtsams nas mi shes pa dang / mi mthong ba dang / mngon par mi rtogs pa zhes bya ba la sogs pa la thogs pa med par yang dag par 'byor pa'i ting nge 'dzin zhes bya ba la sogs pa rgya cher 'byung ba'o/ /don so so yang dag par rig pa ni/chos rnams kyi rang dang spyi'i mtshan nyid dang / don gzhan la sogs pa la dgongs pa la thogs pa med par yang dag par 'byor pa'i zhes rgya cher 'byung ba'o/ /nges pa'i tshig so so yang dag par rig pa la yul mi'i skad ces bya ba ni yul so so bas ji ltar rang rang gis gzhan dang gzhan ming gzhan gyi tha snyad 'dogs pa'o//chos kyi nges pa'i tshig la zhes bya ba ni 'di lta ste/ 'jig pa dang / rab tu 'jig pas de'i phyir 'jig rten zhes bya ba dang gzugs su rung bas de'i phyir gzugs zhes bya ba la sogs pa'o/ /spobs pa so so yang dag par rig pa ni rdzas su yod pa'o//btags pa'i yod pa'o/ /kun rdzob tu yod pa'o/ /don dam par yod pa'o zhes bya ba la sogs pa chos rab tu 'byed pa'o/ /rdzu 'phrul gyi mngon par shes pa la rdzu 'phrul gyis rnam par 'phrul pa sna tshogs yang dag par 'byor pa'i zhes bya ba ni 'di lta ste gcig tu gyur nas mang por gyur zhes bya ba la sogs pa'o//sgra sna tshogs nyan pa yang dag par 'byor pa zhes bya ba ni lha dang mi'i la sogs pa'o/ /sems can gzhan dag gi sems can gyi spyod pa la 'jug pa yang dag par 'byor pa zhes bya ba ni 'dod chags dang bcas pa la sogs pa'i sems kyi rgyu ba yang dag pa ji lta ba bzhin du shes pa yang dag par 'byor pa'i zhes bya ba'i tha tshig go//sngon gyi mtha'i spyod pa rjes su dran pa yang dag par 'byor pa'i zhes bya ba ni 'das pa'i tshe rabs gcig nas gcig tu brgyud pa las brtsams te/ ming dang rigs dang rus la sogs pa'i rnam pa'i lo drung shes zhes bya ba'i tha tshig go//'chi 'pho dang skye ba mngon par shes pa ni lha'i mig gis sems can 'chi 'pho ba dang / skye ba dang / kha dog bzang po dang / kha dog ngan pa dang / bde 'gror 'gro ba dang / ngan 'gror 'gro ba dang / phyi ma'i mtha' las brtsams te/ 'chi 'pho dang skye ba mthong ba yang dag par 'byor pa'i ting nge 'dzin la sogs pa'o//zag pa zad pa shes pa yang dag par 'byor pa'i zhes bya ba ni thabs gang gis zag pa rnams yongs su zad pa dang / de dag yongs su zad pa gang yin pa de shes pa 'grub pa'i rgyu zhes bya ba'i tha tshig go/ /mtshan dang dpe byad bzang po rnams ni gang ting nge 'dzin dang shes rab kyi dbang gis sangs rgyas bcom ldan 'das rnams skyes bu chen po'i mtshan sum cu rtsa gnyis dang /dpe byad bzang po brgyad cus rnam par mdzes pa'i gzugs kyi skus 'dul ba rnams la kun du ston to/ /de dag gi de dag ni de'i rang bzhin du rig par bya ste/ sangs rgyas bcom ldan 'das rnams ni chos kyi skus rab tu phye ba'i phyir ro/ /byang chub sems dpa' de ltar ston nus pa rnams kyang ting nge 'dzin dang shes rab kyi rang bzhin no/ /de la gzhan pa 'khor gyi dkyil 'khor dag tu skyes pa rnams ni de las byung ba'i rnam par smin pa'i rang bzhin du rig par bya'o//sangs rgyas bcom ldan 'das rnams dang / byang chub sems dpa' mngon par shes pa chen po thob pa rnams kyi rnam pa thams cad yongs su dag pa ni bzhi ste/ de la ji ltar bzhed pa bzhin du gnas len pa dang / bzhugs pa dang / yongs su gtong ba yang dag par 'byor pa'i zhes bya ba ni gang du bzhed pa der skye ba 'dzin pa dang /der skyes nas kyang tshe'i 'du byed byin gyis brlabs te ji srid bzhed par bzhugs pa dang / gang gi tshe bzhed pa de'i dus na tshe de'i 'du byed 'dor ba ste/ go rims bzhin no/ /ji ltar bzhed pa bzhin du dmigs pa'i dbang du mdzad pa'i sprul pa dang sgyur ba dang /mkhyen pa yang dag par 'byor pa dang zhes bya ba ni sngon ma byung ba'i gzugs la sogs pa sprul pa dang / sngon byung ba'i gzugs la sogs pa gser la sogs par bsgyur ba dang / rnam pa thams cad du thugs su chud pa'i phyir de go rims bzhin no/ /ji ltar bzhed pa bzhin du ting nge 'dzin gyi sgo la dbang sgyur ba yang dag par 'byor ba'i zhes bya ba ni skad cig re re la ji ltar bzhed pa bzhin du ting nge 'dzin gzhan dpag tu med pa la snyoms par 'jug pa'i phyir ro//ji ltar bzhed pa bzhin du gzungs kyi sgo kun du 'dzin pa yang dag par 'byor pa'i zhes bya ba ni yi ge bzhi bcu rtsa gnyis las yi ge gang yang rung ba yid la byed pa na des thog ma kho nar chos kyi rnam grangs thams cad brjod nus pa thob pa'i phyir zhes bya ba'i tha tshig go//stobs ni bcu ste/ gnas dang gnas ma yin pa mkhyen pa'i stobs dang / las bdag gir bya ba mkhyen pa'i stobs dang //bsam gtan dang rnam par thar pa dang ting nge 'dzin dang snyoms par 'jug pa mkhyen pa'i stobs dang / dbang po mchog dang mchog ma yin pa mkhyen pa'i stobs dang / mos pa sna tshogs mkhyen pa'i stobs dang / khams sna tshogs mkhyen pa'i stobs dang / thams cad du 'gro ba'i lam mkhyen pa'i stobs dang / sngon gyi gnas rjes su dran pa'i mkhyen pa'i stobs dang / shi 'pho ba dang skye ba mkhyen pa'i stobs dang / zag pa zad pa mkhyen pa'i stobs so/ /gnas dang gnas ma yin pa mkhyen pa'i stobs ni bsam gtan la brten nas rgyu dang rgyu ma yin pa rnam pa thams cad du mkhyen pa chags pa med cing thogs pa med pa mngon du gyur pa'i ting nge 'dzin la sogs pa'o//de bzhin du las bdag gir bya ba mkhyen pa'i stobs la sogs pa la yang rnam pa thams cad du de mkhyen pa chags pa med cing thogs pa med pa mngon du gyur pa'i ting nge 'dzin la sogs pa zhes bya bar sbyar bar bya'o//mi 'jigs pa ni bzhi ste/ nga mngon par rdzogs par sangs rgyas so zhes bya ba 'di la chos 'di dag mngon par rdzogs par sangs ma rgyas so zhes dge sbyong dang / bram ze'am/ lha'am/ bdud dam/ /tshangs pa'am/sus kyang chos dang mthun par nga la rgol ba'am/ drod bar byed pa'i mtshan ma mi mthong ste/ mtshan ma de mi mthong bas bde ba thob mi 'jigs pa thob bag tsha ba med pa thob nas gnas so/ /khyu mchog gi gnas rgya chen por zhal gyis 'che'o//tshangs pa'i 'khor lo bskor ro/ /'khor gyi nang du seng ge'i sgra yang dag par sgrog go/ /nga zag pa zad do zhes bya ba la zag pa 'di dag yongs su ma zad do/ zhes bya ba dang ngas nyan thos rnams la bar du gcod pa'i chos gang dag bstan pa de dag bsten kyang bar du gcod par mi 'gyur ro zhes bya ba dang / yang ngas nyan thos rnams la nges par 'byung bar bya ba'i phyir/'phags pa nges par 'byin pa nges par 'byung ba'i lam gang bshad pa de nges par 'byung ba ma yin no zhe'am/ de byed pa'i sdug bsngal yang dag par zad par 'gyur ba dang / sdug bsngal gyi tha ma byed par mi 'gyur ro zhes 'di la dge sbyong ngam sus kyang nga la zhes bya ba nas seng ge'i sgra yang dag par sgrog ces bya ba'i bar du rgya cher re re la yang brjod par bya'o//mi 'jigs pa bzhi po 'di dag ni rang gi don dang gzhan gyi don las brtsam par rig par bya'o/ /de la rang gi don ni rnam pa gnyis te/ ye shes kyi khyad par dang / spangs pa'i khyad par ro//gzhan gyi don yang rnam pa gnyis te/ mi mthun pa'i chos yongs su spang ba dang / gnyen po'i chos la brten pa'o/ /de la mngon par rdzogs par byang chub pa la mi 'jigs pa ni ye shes kyi bdag nyid de rang gi don la brtsams nas rnam pa thams cad du ngas rab tu dbye ba'i mtha' dang bcas par shes par bya ba mngon par sangs rgyas so zhes zhal gyis 'che ba ste/yang dag par rgol ba med par 'jig rten thams cad du 'jog pa yang dag par 'byor pa'i ting nge 'dzin gang yin pa zhes bya ba snga ma bzhin no/ /mi 'jigs pa lhag ma rnams kyang de bzhin du sbyar bar bya'o//zag pa'i rnam pa thams cad ces bya ba ni bag chags dang bcas pa'i nyon mongs pa rnams su rig par bya'o/ /bar du gcod pa'i chos rnam pa thams cad ces bya ba ni mi mthun pa'i phyogs kyi chos kun nas nyon mongs pa thams cad du rig par bya'o/ /nges par 'byin pa'i lam gyi rnam pa thams cad ces bya ba ni sbyor ba nas bzung ste/mthar phyin pa'i lam gyi bar du rig par bya'o/ /dran pa nye bar gzhag pa gsum ni 'di la ston pa thugs brtse ba can thugs rje dang ldan pa/ don bzhed pa/ phan par bzhed pa/ thugs rje can nyan thos rnams la dge slong dag 'di ni phan par 'gyur ba'o//'di ni bde bar 'gyur ba'o/ /'di ni phan pa dang bde bar 'gyur ba'o zhes chos ston pa 'di la nyan thos de dag gus par nyan pa dang / rna ba gtod pa dang / kun shes pa'i sems nye bar 'jog pa dang / chos kyi rjes su mthun pa'i chos sgrub pa de la de bzhin gshegs pa dgyes par mi 'gyur/yid bde bar mi 'gyur/ thugs dga' ba ya ya por mi 'gyur gyi btang snyoms can du de bzhin gshes pa de la gnas te/ dran pa dang shes bzhin dang ldan pa 'di ni ma 'dres pa'i dran pa nye bar gzhag pa dang po ste/ gang 'phags pa bsten nas kyang 'khor la rjes su bstan par 'os pa'o//gzhan yang ston pa 'di ni phan pa dang bde bar 'gyur ba'o zhes bya ba'i bar du chos ston pa de la nyon thos de dag gus par mi nyan pa nas/ chos kyi rjes su mthun pa'i chos mi sgrub pa'i bar de la de bzhin gshegs pa kun nas mnar sems su mi 'gyur/mi bzod par mi 'gyur/ thugs mi ches par mi 'gyur/ thugs mi mnyes par mi 'gyur gyi btang snyoms can du de la zhes bya ba rgya cher sbyar te 'di ni gnyis pa'o/ /gsum pa'i bye brag ni 'di yin te/ de la nyan thos kha cig gus par nyan pa nas chos kyi rjes su mthun pa'i chos sgrub par byed pa dang /kha cig gus par mi nyan pa nas chos kyi rjes su mthun pa'i chos mi sgrub pa'i bar de la de bzhin gshegs pa dgyes par mi 'gyur ba nas thugs mi mnyes par mi 'gyur ba'i bar du'o/ /dran pa nye bar gzhag pa gsum po 'di dag ni ston pa'i tshogs yongs su sdud pa la go rims bzhin du rjes su chags pa dang /khong khro ba dang / de gnyi ga'i kun nas nyon mongs pa dang / bag chags kyi rnam pa thams cad kun du mi 'byung ba yang dag par 'byor pa'i ting nge 'dzin la sogs pa'o/ /bsrung ba med pa gsum ni de bzhin gshegs pa'i sku'i phrin las kyi spyod pa yongs su dag pa ste/de bzhin gshegs pa la sku'i phrin las yongs su ma dag pa med de/ bdag la gzhan gyis shes su 'ong ngo zhes bcab par dgongs pa med pa dang / de bzhin du gsung dang / thugs kyi phrin las la yang rig par bya'o/ /de dag gi tha snyad gdags su med par dogs pa mi mnga' ba'i phyir/ston pa nyid kyis gdul ba'i skye bo sdug pa las brtsams te/ ji ltar bzhed pa bzhin du tshar bcad de spa bkong nas gdams pa dang rjes su bstan pa la sbyor ba yang dag par 'byor par rig par bya'o/ /bsnyel ba med pa'i chos nyid ni gdul ba'i bya ba thams cad las brtsams te/ji lta ba bzhin du mdzad pa dang gsungs pa'i rnam pa thams cad mngon par brjod pa yang dag par 'byor pa'i ting nge 'dzin la sogs pa'o/ /bag chags yang dag par bcom pa ni thams cad mkhyen par gyur nas nyon mongs pa dang shes bya'i sgrib pa'i lhag ma yod pa ston pa'i sku dang gsung gi g.yo ba kun du mi 'byung ba yang dag par 'byor pa'i ting nge 'dzin la sogs pa'o//thugs rje chen po ni khams gsum na spyod pa'i sems can thams cad kyi sdug bsngal gyi rnam pa thams cad la dmigs pa'i thugs rje la gnas pa yang dag par 'byor pa'i ting nge 'dzin la sogs pa'o//sangs rgyas kyi chos ma 'dres pa ni bco brgyad de/ 'di lta ste de bzhin gshegs pa la 'khrul pa med pa dang / ca co med pa dang / bsnyel ba med pa dang / sems mnyam par ma bzhag pa med pa dang / tha dad pa'i 'du shes med pa dang / so sor ma brtags pa'i btang snyoms med pa dang /'dun pa nyams pa med pa dang / brtson 'grus nyams pa med pa dang / dran pa nyams pa med pa dang / ting nge 'dzin nyams pa med pa dang / shes rab nyams pa med pa dang / rnam par grol ba nyams pa med pa dang / de bzhin gshegs pa'i lus kyi las thams cad ye shes sngon du 'gro zhing ye shes kyi rjes su 'brang ba dang /ngag gi las thams cad ye shes sngon du 'gro zhing ye shes kyi rjes su 'brang ba dang / yid kyi las thams cad ye shes sngon du 'gro zhing ye shes kyi rjes su 'brang ba dang / 'das pa'i dus la ma chags ma thogs pa'i ye shes dang /ma 'ongs pa'i dus la ma chags ma thogs pa'i ye shes dang / da ltar byung ba'i dus la ma chags ma thogs pa'i ye shes so/ /de dag gi rnam par gzhag pa ni 'di lta ste/ dge slong dgra bcom pa zag pa zad pa bsod snyoms kyi phyir grong du rgyu ba na res 'ga' glang po che gtum po dang lhan cig 'gro ba dang //glang po che gtum po ji lta ba de bzhin du rta gtum po dang / ba rdung khus ma dang / khyi za ba dang / tshang tshing tsher mas 'dzings pa dang / sbrul la rkang pa gnyis kas rdzi ba dang / gang du bud med mi rigs pa skyes pas bos pa'i khyim de lta bur 'jug pa dang /dgon par lam nor nas lam log par 'gro ba dang / chom rkun rnams dang / rkun po rnams dang / seng ge dang / stag dang / spyang ki dang lhan cig 'gro ba dang / de lta bu dang mthun pa la sogs pa dgra bcom pa'i 'khrul pa de ni de bzhin gshegs pa la thams cad kyi thams cad du mi mnga'o//gzhan yang dgra bcom pa res 'ga' dgon pa na nags khrod chen por rgyu ba na lam nor te/ grong stong du phyin nas sgra 'byin pa dang / sgra sgrogs pa dang / ku co cher 'don pa dang / bag chags kyi nyes pa la brten nas nyon mongs pa can gyi gad mo rta gad so snang bar dgod pa dang /'phya ba nye bar ston pa dang / de lta bu dang mthun pa dgra bcom pa'i ca co de bzhin gshegs pa la thams cad kyi thams cad du mi mnga' ba'o/ /de bzhin gshegs pa la bsnyel ba med de nyon mongs pa med par yun ring po nas mdzad pa dang gsungs pa rjes su dran pa'i phyir ro//gzhan yang dgra bcom pa ni snyoms par zhugs nas mnyam par bzhag par 'gyur gyi langs nas mnyam par bzhag pa ni ma yin no/ /de bzhin gshegs pa la ni gnas skabs thams cad du sems mnyam par ma bzhag pa med do/ /gzhan yang dgra bcom pa ni phung po la shin tu mi mthun pa'i 'du shes su lta zhing phung po med pa'i mya ngan las 'das pa la zhi ba'i 'du shes su 'gyur ro//de bzhin gshegs pa la ni phung po dang mya ngan las 'das pa la tha dad pa'i 'du shes mi mnga'o/ /gzhan yang dgra bcom pa ni so sor ma brtags par sems can gyi don yal bar 'dor ro//de bzhin gshegs pa la ni de lta bu dang mthun pa so sor ma brtags pa'i btang snyoms mi mnga'o/ /gzhan yang dgra bcom pa ni shes bya'i sgrib pa rnam par dag pa las brtsams te/ 'dun pa las kyang ma thob pa'i yongs su nyams pas yongs su nyams so//brtson 'grus dang / dran pa dang / ting nge 'dzin dang / shes rab dang / rnam par grol ba las kyang yongs su nyams so/ /de bzhin gshegs pa la ni yongs su nyams pa rnam pa 'di drug med do/ /gzhan yang dgra bcom pa ni res 'ga' lus kyi las dge ba la 'jug /res 'ga' lung du ma bstan pa la 'jug go/ /lus kyi las ji lta bar ngag gi las dang yid kyi las kyang de bzhin no/ /de bzhin gshegs pa'i phrin las gsum po ni ye shes sngon du 'gro ba dang / ye shes kyi rjes su 'brang ba'i phyir lung du ma bstan pa'i las med do/ / de la ye shes kun nas slong ba'i phyir ye shes sngon du 'gro ba'o/ /ye shes dang lhan cig rgyu ba'i phyir ye shes kyi rjes su 'brang ba'o/ /gzhan yang dgra bcom pa ni rtsol ba tsam gyis dus gsum gyi shes bya'i dngos po rtogs par mi 'gyur te/ des na de'i ye shes mthong ba chags par 'gyur ro//thams cad rtogs par yang mi 'gyur te/ des na de'i ye shes mthong ba thogs par 'gyur ro/ /de bzhin gshegs pa ni rtsol ba tsam gyis dus gsum gyi shes bya'i dngos po thams cad rtogs te/ de lta bas na de dag ni sangs rgyas kyi chos ma 'dres pa bco brgyad ces bya'o//de la 'di dag las dang po drug ni sku dang gsungs dang thugs kyi phrin las thun mong ma yin pa yongs su dag pa yang dag par 'byor pa'i ting nge 'dzin la sogs pa'o/ /de la 'khrul pa med ces bya ba 'di ni sku'i phrin las yongs su dag pa las brtsams pa'o/ /ca co med ces bya ba 'di ni gsung gi phrin las yongs su dag pa las brtsams pa'o//bsnyel ba med pa dang / tha dad pa'i 'du shes med pa dang / sems mnyam par ma bzhag pa med pa dang / so sor ma brtags pa'i btang snyoms med ces bya ba 'di bzhis ni thugs kyi phrin las yongs su dag pa'i dbang du byas par rig par bya'o//'dun pa nyams pa med ces bya ba nas/ rnam par grol ba nyams pa med ces bya ba'i bar du drug ni de bzhin gshegs pa'i dbang po gnas dang bcas pa dang / 'bras bu dang bcas pa rnams ma thob pa'i yongs su nyams pa med pa yang dag par 'byor pa'i ting nge 'dzin la sogs pa'o//de la gnas ni 'dun pa'o/ /'bras bu ni rnam par grol ba'o/ /dbang po ni brtson 'grus la sogs par rig par bya'o/ /lus kyi las dang ngag gi las dang yid kyi las thams cad ye shes sngon du 'gro zhing ye shes kyi rjes su 'brang ba zhes bya ba 'di gsum ni thun mong ma yin pa'i phrin las mdzad pa yang dag par 'byor pa'i ting nge 'dzin la sogs pa'o//'das pa'i dus la ma chags ma thogs pa'i ye shes zhes bya ba nas/ da ltar byung ba'i dus la zhes bya ba 'di gsum ni ye shes la gnas pa thun mong ma yin pa yang dag par 'byor pa'i ting nge 'dzin la sogs pa'o//phung po dang khams dang skye mched rnams la rnam pa thams cad mkhyen pa nyid yang dag par 'byor pa zhes bya ba ni phung po la sogs pa'i ngo bo nyid dang khyad par gyi mtshan nyid dang rab tu dbye ba'i mthar thug pa mkhyen pa grub ces bya ba'i tha tshig go/ /de dag ni mngon par sgrub pa'i gnas dang /mngon par sgrub pa po gang zag dang / mngon par sgrub pa'i thabs kyis yongs su bstan to/ /mngon par sgrub pa'i thabs ni ji ltar rnam par gzhag pa bzhin du lan mang du yid la byed pa ste/ ji ltar bstan pa bzhin du sems mnyam par gzhag nas yang dang yang de la 'jog ces bya ba'i tha tshig go//'di lta ste tshad med pa mngon par bsgrub par 'dod pa byams pa dang ldan pa'i sems kho na med pa 'gran zla med pa zhes bya ba la sogs pas bstan pa bsam gtan la brten nas bsams pas yid la byed pas mang du byed do/ /de bzhin du mngon par shes pa la sogs pa mngon par bsgrub par 'dod pas gcig tu gyur nas mang por 'gyur zhes bya ba la sogs pa rnam par gzhag pa yid la byed pas mang du byed do zhes sbyar bar bya'o//tshad med pa la sogs pa yon tan 'di dag ni rnam pa gnyis te/ rang gi bya ba la nye bar gnas pa ni gang dag gis 'phags pa ci rigs su mi mthun pa'i phyogs spong ba la sogs pa'i las byed pa'o//gnas pa las gyur pa ni mchog tu zhi ba rnam par mi rtog pa'i ye shes kyis bsdus pa dmigs pa med pa'i tshad med pa la sogs pa gang dag gis mthong ba'i chos la bde bar gnas pa'o/ /de la tshad med pa rnams kyis mi mthun pa'i phyogs spong ngo zhes bya ba ni gnod sems dang /rnam par 'tshe ba dang / mi dga' ba dang / rjes su chags pa dang / khong khro ba dang / go rims bzhin no/ /tshad med pa bzhi po 'di dag ni snying brtse ba zhes bya ste/ 'di dag gis sems can gyi don gyi rjes su mthun par 'jug pa'i phyir ro//de'i phyir de dag gi gnas na sems can thams cad la thugs brtse bar gnas pas bsod nams kyi tshogs yongs su rdzogs par mdzad do/ /de nyid kyi phyir sems can yongs su smin par mdzad pa la yongs su mi skyo ste/ sems can thams cad la thugs brtse bas bdag la mi lta ba'i phyir ro//rnam par thar pa rnams las gnyis kyis ni sprul pa'i lam mngon par sgrub bo/ /gsum pas ni dge ba sprul pa la kun nas nyon mongs par mi 'gyur ro/ /gzugs med pa'i rnam par thar pa bzhi ni zhi ba'i rnam par thar pa rnams la mi chags so/ / tha mas ni 'phags pa'i gnas pa mchog tu rab tu zhi ba'i gnas pas gnas te/ de la de ltar mos pa'i don ni rnam par thar pa'i don du rig par bya'o/ /zil gyis gnon pa'i skye mched la sogs pa'i las kyang snga ma bzhin du de bstan pa'i tshul du sbyar bar bya'o/ /nyon mongs pa med pas ni gzhan gyi sems rjes su bsrung ba gces su byed pas ji ltar mthun pa bzhin du smra ba'i phyir gzung ba'i tshig tu 'gyur ro//bsams nas shes pas ni thams cad shes so zhes gus par bya ba'i phyir 'jig rten na mang pos bkur bar 'gyur ro/ so so yang dag par rig pa rnams kyis ni rnam pa sna tshogs mang pos the tshom gcod pa'i phyir bshad pas sems can rnams kyi sems tshim par mdzad do//rdzu 'phrul dang / lha'i rna ba dang / gzhan gyi sems shes pa dang / sngon gyi gnas dang / 'chi 'pho ba dang skye ba dang / zag pa zad pa'i mngon par shes pa rnams kyis ni go rims bzhin du lus kyi las la sogs pas bstan pa la 'dun par mdzad do//lha'i rna ba'i mngon par shes pas ni sgra'i rnam pa thams cad rtogs nas ngag gi las kyis 'dun par mdzad par rig par bya'o/ /gnas yongs su dag pas ni ji ltar bzhed pa bzhin du gnas len pa dang / bzhugs pa dang /yongs su gtong ba'i dbang du byas nas srid par skye ba yongs su 'dzin pa la sogs pa gsum du rig par bya'o/ /dmigs pa yongs su dag pas ni chos la dbang sgyur ro/ /sems yongs su dag pas ni ting nge 'dzin la dbang sgyur ro/ /ye shes yongs su dag pas ni dam pa'i chos yang dag par 'dzin to//stobs rnams kyi nang nas stobs gnyis kyis ni mngon par mtho ba'i lam ston to/ /lhag ma rnams kyis ni nges par legs pa'i lam ston te/ /sangs rgyas bcom ldan 'das rnams kyi mdzad pa ni 'di dag go/ /de la bcom ldan 'das kyis gnas dang gnas ma yin pa mkhyen pa'i stobs kyis ni mngon par mtho ba rgyu med pa las byung ba dang /rang bzhin dang dbang phyug la sogs pa'i rgyu las byung ngo zhes rgyu med pa dang / mi mthun pa rgyur smra ba de spong ngo / /las bdag gir bya ba mkhyen pa'i stobs kyis ni las bdag gis ma byas kyang las 'ong ngo zhes ma byas pa dang phrad par smra ba de spong ngo //'di ltar yang dag par ma nor bar bde 'gro'i lam ston to/ /bsam gtan dang rnam par thar pa dang ting nge 'dzin dang par 'jug pa mkhyen pa'i stobs kyis ni sems can gyi sems kyi spyod pa rnams te/sems kyi rgyu ba rnams rjes su rtogs so/ /dbang po mchog dang mchog ma yin pa mkhyen pa'i stobs kyis ni bshad pa'i snod dad pa la sogs pa'i dbang po yongs su smin pa rjes su rtogs so/ /mos pa sna tshogs mkhyen pa'i stobs kyis ni bsam pa ste/ ngan pa dang bzang po la mos pa rjes su rtogs so//khams sna tshogs mkhyen pa'i stobs kyis ni bag la nyal skyed nus pa'i nyon mongs pa rjes su rtogs so/ /thams cad du 'gro ba'i lam mkhyen pa'i stobs kyis ni dmigs pa nyan thos kyi theg pa'am/ theg pa chen po bstan pa'i chos kyis bsdus pa rjes su rtogs so//sngon gyi gnas rjes su dran pa mkhyen pa'i stobs kyis ni tshe rabs snga ma dag na tshogs yang dag par sgrub pa 'phags pa'i lam gyi rgyu rjes su rtogs so/ /'chi 'pho dang skye ba mkhyen pa'i stobs kyis ni phyi ma la 'os su 'gyur ba rjes su rtogs so/ /zag pa zad pa mkhyen pa'i stobs kyis ni 'jig rten thams cad nas nges par 'byung ba rjes su rtogs te/gang las ji lta ba bzhin du thar pa'i lam ston to/ /stobs nyid ni 'di dag gi phung po dang / nyon mongs pa dang / lha'i bu dang / 'chi bdag gi bdud tshar gcod pa'i khyad par gyi phyir ro/ /khyad par ni shes bya'i sgrib pa spangs nas bar chad mi byed pa dang /gnas dang gnas ma yin pa nas zag pa zad pa mkhyen pa'i stobs kyi bar thams cad du dri ba dris na dri ba lung ston pa la thogs pa med pa'i phyir ro/ /mi 'jigs pa rnams kyis ni 'khor gyi nang du bdag ston pa yang dag pa bdag dang gzhan la phan par zhugs pa nyid du yang dag par 'jog pa'o//mngon par rdzogs par byang chub pa nas lam gyi bar la rgol ba'i mu stegs can rnams chos dang mthun pas tshar gcod do/ /dran pa nye bar gzhag pa rnams kyis ni gus par nyan pa la sogs pa la rjes su chags pa la sogs pa'i kun nas nyon mongs pa med pa'i phyir/kun nas nyon mongs pa can ma yin pas tshogs yongs su sdud do/ /bsrung ba med pa rnams kyis ni rang gi nyes pa brjod du dogs nas bsrung ba med pa'i phyir rgyun mi 'chad par tshogs la 'doms so/ /bsnyel ba med pa'i chos nyid kyis ni sems can gyi don bya ba nye bar gnas pa la skad cig tsam yang bag med pas 'gal bar mi mdzad pa'i phyir sangs rgyas kyi mdzad pa mi 'dor ro//bag chags legs par bcom pas ni de ltar dgra bcom pa las 'khrul pa la sogs pa ston pa lta bu ma yin te/ nyon mongs pa med pas/ nyon mongs pa lta bu'i spyod pa mi ston to/ /thugs rje chen pos ni su nyams par 'gyur su 'phel bar 'gyur zhes bya ba la sogs pa'i rnam pa rnams kyis so sor rtog pa'i phyir nyin mtshan lan drug du 'jig rten rnam par gzigs so/ /sangs rgyas kyi chos ma 'dres pa rnams ni sku dang gsung dang thugs kyi phrin las thun mong ma yin pa yongs su dag pa yang dag par 'byor pa'i zhes bya ba la sogs pa'i mtshan nyid bstan pa'i skabs bzhin du sbyar bar bya'o//rnam pa thams cad mkhyen pa nyid kyis ni thams cad du ye shes thogs pa med pas sems can thams cad kyi the tshom gcod do//the tshom bcad pa'i phyir de dang der bstan pa'i chos kyi rnam grangs rnams yang dag par bsdus pa'i rim gyis yang dag par bsdus nas chos kyi tshul yang yun ring du 'jog go/ /chos kyi tshul de la brten nas sems can yongs su ma smin pa rnams ni yongs su smin par mdzad/yongs su smin pa rnams ni rnam par grol bar mdzad do/ /khyad par du 'phags pa'i lam thob nas lam dman pa 'dor ba ni 'di lta ste/ 'bras bus bsdus pa'i lam thob par gyur na 'jug pa'i lam rnam par 'dor zhes bya ste/ yang mngon du mi byed pa'i phyir ro//bsdoms te spong ba yang mngon sum du byed do zhes bya ba ni 'bras bu thob pa'i dus te/ de'i mi mthun pa'i rigs kyi nyon mongs pa'i phyogs kyi gnas ngan len ma lus par spangs pas gnas gyur pa'i khyad par thob pa'i phyir ro/ /rgyun yang dag par gcod pa'i rnam par 'dor bas rnam par spong zhes bya ba ni gtan du kun du mi spyod pas rnam par 'dor zhes bya ba'i tha tshig go//byang chub sems dpa' ni de ltar rnam par spong ba ma yin te/ de'i lam ni sems can thams cad yongs su mya ngan las 'das pa'i bsam pa sngon du btang ba'i phyir ro/ /de'i phyir byang chub sems dpa' rnams ni dge ba'i rtsa ba mi zad pa dang yon tan mi zad pa zhes bya ste/'di ltar blo gros mi zad pas bstan pa'i mdo las mi zad pa bstan pa rnams yin no/ /'jig rten rtag pa'o mi rtag pa'o zhes bya ba la sogs pa 'dri ba la lung mi ston pa'i dngos po rnam par gzhag pa ni don dang mi ldan pas tshul bzhin ma yin pa'i phyir ro//'dri ba de dag gi 'dri ba'i don dang ldan pa ji lta bu zhe na/ 'di lta ste 'phags pa'i bden pa bzhi las brtsams nas gang 'dri ba ste/ 'di ltar de rgyu dang 'bras bu dang kun nas nyon mongs pa dang rnam par byang ba'i sems pa'i nang du gtogs pa'i phyir ro/ / byang chub sems dpa'i skyon med pa la zhugs kyang rgyun du zhugs pa la sogs par rnam par mi gzhag pa ni mi gnas pa'i lam thob pas rgyun la 'jug pa yongs su ma grub pa'i phyir ro/ /shes bya ni rnam pa drug ste/ 'khrul pa nas ma 'khrul pa'i rgyu mthun pa'i bar du'o/ /de la 'khrul pa ni gzung ba dang /'dzin par mngon par zhen pa'o/ /'khrul pa'i gnas ni 'phags pa'i ye shes kyi spyod yul 'du byed kyi rgyu tsam yang dag pa ma yin par kun du rtog pa'i bdag nyid du gyur ba gang la byis pa rnams gang mngon par zhen pas 'jug go/ /ma 'khrul pa'i gnas ni de bzhin nyid de/de rnam par mi rtog pa'i ye shes kyi rten yin pa'i phyir ro/ /'khrul pa yang yin la ma 'khrul pa yang yin pa ni 'jig rten las 'das pa'i ye shes dang mthun pa thos pa las byung ba la sogs pa dge ba'i chos rnams te/ shes bya la rnam par rtog pa dang / rnam par mi rtog pa'i ye shes dang mthun pa'i phyir ro//ma 'khrul pa ni rnam par mi rtog pa'i ye shes so/ /ma 'khrul pa'i rgyu mthun pa ni 'phags pa'i lam gyi rjes la thob pa'i dge ba'i chos rnams so/ /thabs la mkhas pa ni rnam pa bzhi ste/ sems can yongs su smin par bya ba la mkhas pa ni bsdu ba'i dngos po bzhi ste/de dag gis bsdus nas dge ba rnams la 'dzud pa'i phyir ro/ /sangs rgyas kyi chos yongs su rdzogs par bya ba la mkhas pa ni shes rab kyi pha rol tu phyin pa ste/ sbyin pa'i pha rol tu phyin pa nas/ rnam pa thams cad mkhyen pa nyid kyi bar du yongs su rdzogs par byed par 'dod pa'i byang chub sems dpa' sems dpa' chen pos shes rab kyi pha rol tu phyin pa 'di nyid la bslab par bya'o zhes gsungs pa'i phyir ro//mngon par shes pa myur ba la mkhas pas ni nyid mtshan lan drug tu sdig pa bshags pa dang / bsod nams la rjes su yi rang ba dang /sangs rgyas la gsol ba btab pa dang / dge ba'i rtsa ba yongs su bsngo ba ste/ 'phags pa byams pas zhus pa las ji skad gsungs pa lta bu'o/ /lam rgyun mi 'chad pa'i mkhas pa ni mi gnas pa'i mya ngan las 'das pas phyir zhing rgyun mi 'chad par gtan du 'jig rten gyi khams kun du 'dul ba ji lta ba bzhin du sangs rgyas dang byang chub sems dpa'i spyod pa kun du ston pa'i phyir ro//yang dag pa ma yin pa'i kun du rtog pa ni rnam pa bcu ste/ rtsa ba'i rnam par rtog pa ni kun gzhi'i rnam par shes pa ste/ rnam par rtog pa thams cad kyi sa bon du gyur pa'i phyir ro//mtshan ma'i rnam par rtog pa ni lus dang gnas dang / longs spyod kyi rnam par rig pa ste/ gzung ba dang mtshan mar gyur pa'i phyir ro/ /de dag ni dbang po gzugs can dang snod kyi 'jig rten dang gzugs la sogs pa'i yul gyi mtshan nyid dang go rims bzhin du blta bar bya'o//mtshan mar snang ba'i rnam par rtog pa ni rnam par shes pa'i tshogs drug dang yid de gzung ba'i mtshan ma ji skad du bshad pa'i rnam par gyur pa'i phyir ro/ /mtshan mar gyur pa'i rnam par rtog pa ni ji skad bshad pa'i lus la sogs pa'i mtshan ma'i rnam pa gzhan du bskyed pa'o//mtshan mar snang bar 'gyur ba'i rnam par rtog pa ni mig gi rnam par shes pa la sogs pa mtshan mar snang ba ji skad du bstan pa dag bde ba la sogs pa'i gnas skabs gzhan du bskyed pa'o/ /gzhan gyis bstan pa'i rnam par rtog pa ni bstan par bsdus pa'i ming dang tshig dang yi ge'i tshogs kyi mtshan nyid do//de la yang rnam pa gnyis te/ nyes par bshad pa'i chos kyi tshul gyi bdag nyid dang / legs par bshad pa'i chos kyi tshul gyi bdag nyid do/ /de'i phyir de'i dbang du byas pa yid la byed pas bsdus pa tshul bzhin ma yin pa'i rnam par rtog pa dang /tshul bzhin gyi rnam par rtog pa dang / go rims bzhin du rig par bya'o/ /mngon par zhen pa'i rnam par rtog pa ni tshul bzhin ma yin pa'i rnam par rtog pa las lta bar song ba drug cu rtsa gnyis su bsdus pa'i rnam par rtog pa gang yin pa'o/ /rnam par g.yeng ba'i rnam par rtog pa ni tshul bzhin dang tshul bzhin gyi rnam par rtog pa las dngos po med pa la sogs pa 'dzin pa'i mtshan nyid kyi rnam par rtog pa gang yin pa'o//de yang rnam pa bcu ste/ dngos po med par rnam par rtog pa nas don ji lta ba bzhin du ming du rnam par rtog pa'i bar du'o/ / rnam par rtog pa 'di bcu ni shes rab kyi pha rol tu phyin pa las thog mar bstan pa'i dbang du byas par rig par bya ste/ ji skad du shA ri'i bu 'di la byang chub sems dpa' ni byang chub sems dpa' nyid yod bzhin du byang chub sems dpa' yang dag par rjes su mi mthong / /byang chub sems dpa'i ming yang dag par rjes su mi mthong /shes rab kyi pha rol tu phyin pa yang dag par rjes su mi mthong / byang chub yang dag par rjes su mi mthong / spyod ces bya bar yang dag par rjes su mi mthong / mi spyod ces bya bar yang dag par rjes su mi mthong ste/ 'di ltar ming ni ming gi ngo bo nyid kyis stong ste/ stong pa nyid kyis ni stong pa ma yin no/ /gzugs ni ngo bo nyid kyis stong ste/ stong pa nyid kyis ni stong pa ma yin no/ /rnam par shes pa'i bar du ngo bo nyid kyis ni stong ste/ stong pa nyid kyis ni stong pa ma yin no/ /de ci'i phyir zhe na/ gzugs kyi stong pa nyid gang yin pa de gzugs ma yin no/ /stong pa nyid las gzugs gzhan ma yin no//gzugs nyid stong pa nyid do/ /stong pa nyid gzugs so/ /de bzhin du rnam par shes pa'i bar du'o/ /de ci'i phyir zhe na/ 'di lta ste/ byang chub sems dpa'i ming zhes bya ba dang / byang chub sems dpa' zhes bya ba dang / shes rab kyi pha rol tu phyin pa zhes bya ba dang / byang chub ces bya ba dang / gzugs zhes bya ba nas rnam par shes pa zhes bya ba'i bar 'di ni ming tsam ste/ ngo bo nyid kyis mi skye mi 'gag /kun nas nyon mongs pa ma yin/ /rnam par byang ba ma yin no/ /shes rab kyi pha rol tu phyin pa la spyod pa'i byang chub sems dpa' ni skye ba yang dag par rjes su mi mthong ba nas/rnam par byang ba'i bar du yang dag par rjes su mi mthong ngo / /de ci'i phyir zhe na/ ming bcos ma la chos de dag so sor brtags nas/ glo bur gyi ming gis rjes su tha snyad 'dogs pa'i phyir ro/ /ji lta ji ltar rjes su tha snyad 'dogs pa de lta de ltar mngon par zhen to//byang chub sems dpa' ni ming thams cad yang dag par rjes su mi mthong ngo / /yang dag par rjes su mi mthong bas mngon par zhen pa med do/ /de la dngos po med pa rnam par rtog pa'i gnyen por byang chub sems dpa' nyid du yod do zhes bya ba la sogs pa gsungs te/yod pa'i sgra ni dngos po'i don yin pa'i phyir ro/ /dngos por rnam par rtog pa'i gnyen por byang chub sems dpa' yang dag par rjes su mi mthong ba nas/ mi spyod do zhes bya bar yang dag par rjes su mi mthong ngo zhes bya ba'i bar du gsungs te/ gang zag dang chos kyi dngos po bkag pa'i phyir ro//sgro 'dogs pa'i rnam par rtog pa'i gnyen por 'di ltar ming ni ngo bo nyid kyis stong ngo zhes bya ba gsungs te/ yang dag pa ma yin pa'i kun du brtags pa'i ngo bo nyid bkag pa'i phyir ro/ /skur pa 'debs pa'i rnam par rtog pa'i gnyen por stong pa nyid kyis ma yin no zhes bya ba gsungs te/ming de kun brtags pa'i ngo bo nyid de dang bral ba nyid du thams cad du yod pa'i phyir ro/ /gcig pa nyid du rnam par rtog pa'i gnyen por gzugs kyi stong pa nyid gang yin pa de gzugs ma yin no zhes bya ba nas rnam par shes pa'i stong pa nyid gang yin pa de rnam par shes pa ma yin no zhes bya ba'i bar du gsungs te/ngo bo nyid gzhan ma yin pa'i phyir gzugs la sogs pa ni kun brtags pa'i ngo bo nyid do/ /stong pa nyid ni yongs su grub pa'o/ /tha dad pa nyid du rnam par rtog pa'i gnyen por stong pa nyid las gzugs gzhan pa yang ma yin no//gzugs nyid stong pa nyid do/ /stong pa nyid gzugs so zhes bya ba nas rnam par shes pa'i bar du gsungs te/ kun brtags pa'i ngo bo nyid kyi mtshan nyid yin pas/ de las ma gtogs par de med pa'i phyir ro/ /ngo bo nyid du rnam par rtog pa'i gnyen por 'di lta ste/ gzugs zhes bya ba nas rnam par shes pa zhes bya ba'i bar 'di ni ming tsam mo zhes bya ba gsungs te/ brjod pa las ma gtogs par brjod pa'i ngo bo nyid med pa'i phyir ro/ /khyad par du rnam par rtog pa'i gnyen por ngo bo nyid kyis mi skye zhes bya ba nas/ rnam par byang ba yang yang dag par rjes su ma mthong ngo zhes bya ba'i bar du gsungs te/skye ba la sogs pa'i khyad par gyi mtshan nyid bkag pa'i phyir ro/ /ming ji lta ba bzhin du don du rnam par rtog pa'i gnyen por ming bcos ma la chos de dag so sor brtags nas glo bur gyi ming gis rjes su tha snyad 'dogs pa zhes bya ba la sogs pa gsungs so//don ji lta ba bzhin du ming du rnam par rtog pa'i gnyen por byang chub sems dpa'i ming de dag thams cad yang dag par rjes su mi mthong do/ /yang dag par rjes su ma mthong bas mngon par zhen pa med do zhes bya ba gsungs te/don ji lta ba bzhin du ming du mi mthong na mngon par zhen pa med pa'i phyir ro/ /rnam par mi rtog pa nyid ni rnam pa gsum ste/ chog par 'dzin pa'i rnam par mi rtog pa la sogs pa'o/ /de la so so'i skye bo rnams ni gang mi rtag pa nyid la sogs pa chos nyid 'ga' zhig las brtsams nas sems pa mthar khrid de/'di ni de bzhin no zhes nges par 'byed cing yongs su tshim pa thob par byed par 'gyur te/ de dag gi de ni chog par 'dzin pa'i rnam par rtog pa nyid ces bya ste/ de la mi rtog pa zhes bya ba ni rnam par rtog pa thams cad rgyun bcad pa'i phyir ro/ /nyan thos rnams ni phung po rnams la rtag pa la sogs pa phyin ci log gi gnyen por ji lta ba bzhin du gzugs la sogs pa la chos tsam du yongs su brtags pas 'jig rten las 'das pa'i shes pas bdag med par rtogs te/de'i phyir de dag gi ni de phyin ci ma log pa'i rnam par mi rtog pa nyid ces bya'o//byang chub sems dpa' ni gzugs la sogs pa chos tsam de yang spros par rig nas chos thams cad kyi mtshan ma rnam par bshig ste/ 'jig rten las 'das pa'i ye shes mchog tu zhi bas de bzhin nyid thams cad du 'gro ba rtogs te/ de'i phyir de dag gi de ni spros pa med pa'i rnam par mi rtog pa nyid ces bya'o//ji ltar na de spros pa med pa'i rnam par mi rtog pa zhes bya zhe na gal te yid la byed pa med pas de skad bya ba ni/ des na gnyid kyis log pa dang / ra ro ba la sogs pa yang rnam par mi rtog pa nyid du 'gyur te/ de dag la chos kyi mtshan ma yid la byed pa med pa'i phyir ro//ji ste yang dag par 'das pas de skad bya na ni des na bsam gtan gnyis pa la sogs pa thams cad kyang rnam par mi rtog pa nyid du 'gyur te/ rtog pa dang dpyod pa'i rnam par rtog pa rnams las yang dag par 'das pa'i phyir ro/ /de'i phyir na rnam par rtog pa'i lus ni khams gsum pa'i sems dang sems las byung ba'o zhes bya ba ni 'di dang 'gal lo//ji ste rnam par zhi bas de skad bya na ni/ des na 'du shes dang tshor ba 'gog pa'i snyoms par 'jug pa yang rnam par mi rtog pa nyid du 'gyur te/ der sems dang sems las byung ba'i rnam par rtog pa rnam par zhi ba'i phyir ro//de'i phyir shes pa med par 'gyur ro/ /ji ste ngo bo nyid kyis de skad bya na ni/ des na gzugs kyang rnam par mi rtog pa nyid du 'gyur te/ de rnam par mi rtog pa'i ngo bo nyid yin pa'i phyir ro/ /ji ste dmigs pa la mngon par 'du byed pa med pas de skad bya na ni/des rnam par rtog pa dang bcas pa nyid rnam par mi rtog pa nyid du 'gyur te/ 'di ni rnam par mi rtog pa'o zhes mngon par 'du byed pa 'di ni mtshan ma la rnam par rtog pa'i mtshan nyid yin pa'i phyir ro/ /de lta bas na rnam pa de dag gis rnam par mi rtog pa nyid du mi blta ste/'on kyang dmigs pa la mngon par 'du byed pa med pa nyid du blta'o/ /ji ltar zhe na gang gi tshe byang chub sems dpa' rjes su mthun pa nyid kyi gdams pa la brten nas/ chos thams cad kyi mtshan ma ni rang bzhin gyis yongs su ma grub par rnam par rtog pa ste/rnam par rtog pa de la goms pa'i stobs bskyed pas so so rang gis mngon par 'du byed pa med pa nyid kyis ji lta ba bzhin du spros pa med pa'i chos kyi dbyings chos thams cad kyi de bzhin nyid la sems mnyam par 'jog ste/ de ni de'i spros pa med pa'i rnam par mi rtog pa nyid ces bya'o//byang chub sems dpa' ni rang bzhin gyis dbang po rnon po zhes sngar bshad na/ de ji ltar dus dus su dbang po rnams sbyang bar bya zhe na/ rang gi rigs kyi dbang po rtul po la sogs pa rnam pa gsum gyis gong nas gong du mngon par bsgrubs pas de sbyar bar rig par bya'o//gzhan du na dbang po rnon po'i rigs rnams kyi dbang po rnams rnam pa gcig tu gyur na ni/ byang chub sems dpa' rnams kyi dbang por gyur pa'i khyad par mi dmigs par 'gyur na/ de yang dmigs pa de'i phyir ji skad bshad pa de grub bo// // bam po bcu pa ste tha ma'o/ /'bel ba'i gtam gyi rnam par nges pa bdun la don rnam par nges pa ni ngo bo nyid kyi don la sogs pa don drug las brtsams par rig par bya'o/ /de la ngo bo nyid kyi don ni ngo bo nyid gsum ste/ kun brtags pa dang / gzhan gyi dbang dang / yongs su grub pa'o//rgyu'i don ni rgyu gsum ste/ skye ba'i rgyu ni 'di lta ste/ rgyu dang / de ma thag pa dang / dmigs pa dang / bdag po'i rkyen rnams te/ de la 'dus byas thams cad grub pa'i phyir ro/ /'byung ba'i rgyu ni 'di lta ste/ ma rig pa'i rkyen gyis 'du byed rnams zhes bya ba nas kun 'byung bar 'gyur ba dang /'gag par 'gyur ro zhes bya ba'i bar 'dis mthar gyis kun nas nyon mongs pa dang rnam par byang ba 'byung ba'i phyir ro/ /'grub pa'i rgyu ni mngon sum du dmigs pa dang mi dmigs pa mtshungs pa sro bsnyad pas bsdus pas te/ des bsgrub par ma grags pa'i don sgrub pa'i phyir ro//'bras bu'i don ni 'bras bu lnga ste/ rnam par smin pa'i 'bras bu ni 'di lta ste/ kun gzhi rnam par shes pa'o/ /rgyu mthun pa'i 'bras bu ni 'di lta ste/ sngar skyes pa'i dge ba la sogs pa'i chos rnams kyi de'i rgyu las byung ba dge ba la sogs pa chos phyi ma rnams so/ /bdag po'i 'bras bu ni 'di lta ste/sems can thams cad kyi thun mong gi las kyi dbang gis snod kyi 'jig rten no/ /skyes bu byed pa'i 'bras bu ni 'di lta ste/ lo tog la sogs pa'o/ /bral ba'i 'bras bu ni 'phags pa'i lam gyi bag la nyal legs par bcom pa'o/ /las kyi don ni 'di lta ste/las kyi kun nas nyon mongs pa bstan pa'o/ /ldan pa'i don ni rnam pa lnga ste/ mang po las gyur pa'i ldan pa ni 'di lta ste/ khang pa'i shing dang pha gu la sogs pa'o/ /rjes su 'ching ba las gyur pa'i ldan pa ni 'di lta ste/ bag la nyal ba la sogs pa'i rgyu ste/ 'di ltar de yod na kun du mi spyod kyang nyon mongs pa sogs pa dang ldan pa zhes bya'o//'brel par gyur pa'i ldan pa ni 'di lta ste/ rang gi skye bo rnams phan tshun 'brel pa'o/ /gnas skabs las gyur pa'i ldan pa ni 'di lta ste/ phan 'dogs pa la sogs pa'i sems kyi rgyud kyi gnas skabs te//'di ltar de'i 'phral du bde ba dang ldan pa nas/ sdug bsngal yang ma yin bde ba yang ma yin pa'i bar du ldan pa zhes bya'o/ /'gyur ba las gyur pa'i ldan pa ni 'di lta ste/ glo bur gyi nye ba'i nyon mongs pa la sogs pa mngon du gyur pa ste/ 'di lta ste/ de yod na 'dod chags la sogs pa dang /dad pa la sogs pa dang ldan pa zhes bya'o/ /'jug pa'i don ni 'jug pa lnga ste/ mtshan nyid la 'jug pa ni skye ba la sogs pa 'dus byas kyi mtshan nyid gsum ste/ de dag gi rnam par 'byung ba'i phyir ro/ /rten la 'jug pa ni rten la gnas par bya ba gnas pa ste/'di ltar sa la sems can rnams so/ /phyin ci log gi 'jug pa ni kun nas nyon mongs pa'i chos rnams te/ yang dag pa ji lta ba bzhin ma yin par 'jug pa'i phyir ro/ /phyin ci log ma yin pa'i 'jug pa ni 'phags pa'i lam ste/ de phyin ci ma log par 'jug pa'i phyir ro//rab tu dbye ba'i 'jug pa ni chos rnams kyi rnam pa tha dad pa gang yin pa ste/ 'di ltar 'du byed thams cad 'das pa dang ma 'ongs pa dang / da ltar byung ba dang nang dang phyi la sogs pa'i rnam par 'jug pa'i phyir ro/ /rnam par bshad pa rnam par nges pa ni gang gis mdo sde rnams kyi don ston pa ste/de yang yongs su shes par bya ba'i dngos po la sogs pa don drug po dag mdo sde so sor ji ltar mthun mthun du ston pa'i phyir ro/ /de la yongs su shes par bya ba'i dngos po ni phung po la sogs pa'o/ /yongs su shes par bya ba'i don ni mi rtag pa nyid la sogs pa'o//yongs su shes par bya ba'i rgyu ni tshul khrims dang dbang po'i sgo bsdams pa la sogs pa'o/ /yongs su shes pa ni byang chub kyi phyogs kyi chos rnams so/ /yongs su shes pa'i 'bras bu ni rnam par grol ba'o/ /de rab tu shes pa ni rnam par grol ba'i ye shes mthong ba'o//yang rnam par bshad pa'i sgo bcu bzhi ste/ rnam par bshad pa bsdu ba'i sgo ni gang na mdo sde 'byung ba'i dgos pa dang / tshig gi don dang / mtshams sbyar ba dang / dgongs pa dang / brgal ba dang / lan brjod pa'o/ /dngos po bsdu ba'i sgo ni gang na mdo sde bslab pa dang /'phags pa'i bden pa dang / dngos po la sogs par ston pa ste/ 'di lta ste/ sdig pa thams cad mi bya ste/ /dge ba phun sum tshogs par bya/ /rang gi sems ni yongs su 'dul/ /'di ni sangs rgyas bstan pa'o/ /zhes bya ba'i tshigs su bcad pa bslab pa gsum gyi dbang du byas pa la sogs pa'o//yan lag dang nye ba'i yan lag gi sgo ni gang du tshig gcig gis bstan pa la lhag ma rnams kyis bshad do zhes rab tu ston pa ste/ dper na dal 'byor phun sum tshogs pa bcu gnyis bstan pa las bdag phun sum tshogs pa dang /gzhan phun sum tshogs pa zhes bya ba'i tshig 'di gnyis go rims bzhin du tshig 'og ma lnga lngas bshad pa lta bu ste/ 'di lta ste mi nyid dang / yul dbus su skyes pa dang / dbang po rnams ma tshang ba med pa dang / las kyi mtha' smin par ma gyur pa dang / gnas su gyur pa la dad pa dang / sangs rgyas rnams 'byung ba dang / dam pa'i chos ston pa dang / bstan pa'i chos rnams gnas pa dang / gnas pa'i chos rnams kyi rjes su 'jug pa dang / gzhan la snying brtse ba'o/ /gong nas gong du mngon par bsgrub pa'i sgo ni gong du 'og ma ni gong ma la mngon par bsgrub pa'i gnas yin pa'i phyir chos de dag ni de ltar bstan to zhes ston pa'o//dper na dbang po lnga po rnams te 'di ltar dad na brtson 'grus brtsom mo/ /brtson 'grus brtsams na dran pa nye bar gnas so/ /dran pa nye bar gnas na sems mnyam par 'jog go/ /sems mnyam par bzhag na yang dag pa ji lta ba bzhin du rab tu shes so zhes bya'o//spong ba'i sgo ni 'di las brtsams nas 'di spong bar ston pa ste/ 'di lta ste/ ste'u yu lta bu'i mdo las zag pa zad pa las brtsams nas 'di las phyi rol pa dang / chos 'di ba thos pa dang sems pa tsam gyis chog par 'dzin pa dang /bsgom pas yongs su yi chad pa dang / tshogs yongs su ma rdzogs pa'o/ /dge slong dag nga ni shes bzhin mthong bzhin du zag pa rnams zad par smra'o zhes bya ba la sogs pa'i mdo'i tshig gi dum bus dang po'i gang zag spangs so/ /sgom par sbyor ba la brtson pa zhes bya ba la sogs pas ni gnyis pa spangs so//ste yu'i dpes ni gsum pa spangs so/ /gru'i dpes ni bzhi pa spangs so/ /yi ge yongs su sgyur ba'i sgo ni gang du don gzhan la rab tu grub pa'i yi ge rnams gzhan du yongs su bsgyur ba ste/ dper na mi gang ma dad byas mig za//zhes bya ba la sogs pa'i tshigs su bcad pa lta bu'o/ /chud za ba dang chud mi za ba'i sgo ni gang du rab tu chud za ba dang / rab tu chud mi za ba dang / de gnyi ga'i thabs dang / de gnyi ga'i rab tu dbye ba ston pa ste/ dper na legs par skyes kyi mdo las rab tu chud za ba ni phyi dang nang gi rdzas la lhag par chags pa'o//de la phyi'i rdzas ni khyim dang chung ma la sogs pa'i mtshan nyid do/ /nang gi rdzas ni nye bar len pa'i phung po lnga'i mtshan nyid do/ /rab tu chud mi za ba ni de gnyi ga la lhag par chags pa dang bral ba'o/ /rab tu chud za ba'i thabs ni rab tu mi 'byung ba dang /rab tu byung nas kyang zag pa zad par bya ba la bag mi byed pa'o/ /de las bzlog pa ni chud mi za ba'i thabs su blta bar bya'o/ /de la kye ma rigs kyi bu legs par skyes 'di ni gnyis kyis mdzes te/ gang skra dang kha spu bregs nas rab tu byung ba'i bar dang /gang zag pa zad nas rab tu shes so zhes bya ba'i bar 'dis chud mi za ba dang / de'i thabs nye bar bstan pas de las bzlog pa'i mtshan nyid chud za ba dang de'i thabs bstan par 'gyur ro/ /chud mi za bar rab tu dbye ba'i tshigs su bcad pa'i dbyangs kyis rab tu bstan pa/ dge slong 'di ni mdzes pa ste//nye bar zhi zhing zag pa zad/ /ces bya ba'o/ /de ltar rab tu byung ba dang zag pa zad pa yongs su bstan to/ /zag pa zad pa de yang / 'dod chags bral zhing bral ba ste/ /nyer len med pas mya ngan 'das/ /bdud kyi sde ni pham byas nas/ /lus kyi tha ma 'dzin pa yin//zhes bya ba ste/ 'dis ni 'jig rten pa'i lam la 'dod chags dang bral nas 'jig rten las 'das pa'i lam gyis tha ma'i cha dang mthun pa'i kun du sbyor ba spangs pa dang / gong ma'i cha dang mthun pa'i kun du sbyor ba yang spangs pa dang / nang gi rdzas yongs su spangs par yang bstan pa'o//rgyu dang 'bras bu zad pa'i skabs yin pas kyang 'di bstan par blta'o/ /'di las bzlog pa ni rab tu chud za ba'i bar du dbye ba bsnyad par blta bar bya'o/ /gang zag rnam par gzhag pa'i sgo ni gang du gang zag 'di snyed kyi dbang du byas nas 'di gsungs so zhes bya bar ston pa ste/dper na chu las gyur pa lta bu'i mdo las byung ba lta bu ste/ de ni gang zag gnyis dang gsum dang bzhir rab tu dbye ba'i dbang du mdzad nas gsungs te/ so so'i skye bo dang bden pa mthong ba'o/ /so so'i skye bo ni gsum du rab tu phye nas bsnyad par blta bar bya ste/ dkar po ma yin pa dang /cung zad dkar ba dang / cher dkar ba'o/ /bden pa mthong ba ni bzhir rab tu dbye ste/ 'bras bu la gnas pa bzhi ste/ gsum ni slob pa'o/ /gcig ni mi slob pa'o/ /rab tu dbye ba rnam par gzhag pa'i sgo ni gang du mu bzhi la sogs pa dri ba rnams kyi don brjod pa ste/ dper ni mi rtag pa'i mdo las gang gis 'di legs par mthong ba des gzugs thams cad mthong ngam/gang gis gzugs thams cad mthong ba des thams cad legs par mthong ngam zhes bya ba mu bzhi'o/ /mu dang po ni tshor ba la sogs pa phung po bzhi la rtag pa dang gtsang ba dang / bde ba dang bdag tu phyin ci log tu sgro ma btags par yongs su shes par bya ba dang spang bar bya ba yang dag par rjes su blta ba'o//mu gnyis pa ni gzugs la rtag pa dang gtsang ba dang bde ba dang bdag tu phyin ci log tu sgro btags nas yongs su shes par bya ba ma yin pa dang / yongs su spang bar bya ba ma yin par yang dag par rjes su blta ba'o//mu gsum pa ni gzugs la rtag pa dang gtsang ba dang bde ba dang bdag tu phyin ci log tu sgro ma btags par yongs su shes par bya ba dang / yongs su spang bar bya ba yang dag par rjes su blta ba'o/ /mu bzhi pa ni tshor ba la sogs pa phung po bzhi la rtag pa dang gtsang ba dang bde ba dang bdag tu phyin ci log tu sgro btags nas yongs su shes par bya ba ma yin pa dang /spang bar bya ba ma yin par yang dag par rjes su blta ba'o/ /gzugs la mu bzhi ji lta ba de bzhin du tshor ba la sogs pa thams cad la yang rgya cher sbyar bar bya'o/ /gang bya ba byas pa de thams cad 'di las srid pa gzhan mi shes so zhes bya ba yin nam/gang 'di las srid pa gzhan mi shes pa de thams cad bya ba byas pa yin nam zhes bya ba'i bar du'o/ /smras pa/ mu bzhi ste/ mu dang po ni ji srid 'tsho'i bar du legs par spyad pa spyod pa'i so so'i skye bo'i'o/ /gnyis pa ni chad par lta ba la sogs pa'o//gsum pa ni mi slob pa'i'o/ /bzhi pa ni rnam pa de dag ma gtogs pa'i'o zhes 'byung ba lta bu'o/ /tshul gyi sgo ni gang du tshul drug gi sa bon brjod pa ste/ de kho na'i don gyi tshul dang / 'thob pa'i tshul dang / bshad pa'i tshul dang / mtha' gnyis spangs pa'i tshul dang / bsam gyis mi khyab pa'i tshul dang / dgongs pa'i tshul gyis so/ /tshul drug po 'di dag las tshul gong ma gsum ni tshul 'og ma gsum gyis go rims bzhin du rig par bya ste/ dper na ro myang ba'i mdo las dge slong dag gzugs la ro myong ba yod do zhes bya ba la sogs pas ni skur pa 'debs pa'i mtha' dang /sgro 'dogs pa'i mtha' spangs nas de kho na'i don gyi tshul ston to/ /ro myang ba dang nyes dmigs dang / nges par 'byung ba yod do zhes bya ba 'dis ni skur ba 'debs pa'i mtha' spangs so/ /gzugs nas rnam par shes pa zhes bya ba'i bar 'dis ni sgro 'dogs pa'i mtha' spangs te/phung po tsam la kun nas nyon mongs pa'am/ rnam par byang bar zad kyi bdag ni med do zhes rab tu bstan to/ /dge slong dag ngas ji tsam tu bla na med pa yang dag par rdzogs pa'i byang chub kyi bar du mngon par rdzogs par sangs rgyas so zhes bya bar nang du 'du shes so zhes bya ba 'dis ni 'thob pa'i tshul bsam gyis mi khyab pa'i tshul gyis yongs su bstan te/so so rang gis rig par bya ba thob par ston pa'i phyir ro/ /mdo 'di thams cad ni bshad pa'i tshul gyis so/ /de yang dgongs pa'i tshul gyis khong du chud par bya ste/ yongs su shes par bya ba'i dngos po dang /yongs su shes par bya ba'i don dang / yongs su shes pa dang / yongs su shes par bya ba'i 'bras bu dang / de rab tu shes pa la dgongs nas mdo de dag bshad do/ /de la yongs su shes par bya ba'i dngos po ni gzugs la sogs pa'o/ /yongs su shes par bya ba'i don ni ro myang ba la sogs pa ste/rnam pa des gzugs la sogs pa'i dngos po de yongs su shes pa'i phyir ro/ yongs su shes pa ni nye bar len pa'i phung po lnga po dag de ltar gsum du bsgyur bas yang dag pa ji lta ba bzhin du rtogs pa'i shes pa'o/ yongs su shes pa'i 'bras bu ni lha dang bcas pa'i 'jig rten 'di las zhes bya ba nas/lha dang mi dang bcas pa zhes bya ba'i bar las grol ba nas rnam par rab tu grol zhes bya ba'i bar du'o/ /de rab tu shes pa ni bla na med pa yang dag par rdzogs pa'i byang chub mngon par rdzogs par sangs rgyas par nang du shes so zhes bya ba'o/ /yongs su shes pa la sogs pa'i sgo ni gang du de kho na'i mtshan nyid las brtsams nas yongs su shes pa'i mtshan nyid dang /spong ba'i mtshan nyid dang / mngon sum du byed pa'i mtshan nyid dang bsgom pa'i mtshan nyid dang / de kho na'i mtshan nyid la sogs pa 'di dag gi rnam pa'i rab tu dbye ba'i mtshan nyid dang /gnas dang gnas par 'brel ba'i mtshan nyid dang / yongs su shes pa la sogs pa'i bar du gcod pa'i chos kyi mtshan nyid dang / rjes su mthun pa'i chos kyi mtshan nyid dang / yongs su ma shes pa la sogs pa dang / yongs su shes pa la sogs pa la nyes dmigs dang phan yon gyi mtshan nyid kyis don ston pa ste/dper na ro myang ba'i mdo de nyid las 'byung ba/ de la de kho na'i mtshan nyid ni nye bar len pa'i phung po lngas bsdus pa sdug bsngal gyi bden pa'o/ /yongs su shes pa'i mtshan nyid ni ro myang ba la sogs pas de nyid yang dag pa ji lta ba bzhin du rab tu shes so//spang ba'i mtshan nyid dang mngon sum du byed pa'i mtshan nyid ni 'jig rten thams cad las rnam par grol ba ste/ sgrib pa spong ba dang gnas gyur pa mngon sum du byed pa'i phyir ro/ /bsgom pa'i mtshan nyid ni phyin ci log dang bral ba'i sems kyis len mang du gnas pa'o/ /rnam par rab tu dbye ba'i mtshan nyid ni de kho na'i mtshan nyid rnam pa lnga'i dbye ba ste/gzugs nas rnam par shes pa'i bar du'o/ /yongs su shes pa'i mtshan nyid ni rnam pa gsum du rab tu dbye ste/ ro myang ba la ro myang ba dang / nyes dmigs la nyes dmigs dang / nges par 'byung ba'i bar la nges par 'byung bar yang dag pa ji lta ba bzhin du rab tu shes so//spong ba'i mtshan nyid dang mngon sum du byed pa'i mtshan nyid ni rnam pa gnyis su dbye ste/ nyon mongs pa las rnam par grol ba dang / sdug bsngal las rnam par grol ba'o/ /de la lha dang bcas pa'i 'jig rten zhes bya ba nas/lha dang mir bcas pa'i skye dgu'i bar las grol ba ni nyon mongs pa rnams las rnam par thar pa'i phyir ro/ /de bas na de bye brag tu bya ba'i phyir nges par 'byung ba zhes gsungs te/ 'di ltar mdo gzhan las nges par 'byung ba gang zhe na/ gang 'dir 'dun pa dang 'dod chags 'dul ba dang /'dun pa dang 'dod chags spang ba dang / 'dun pa dang 'dod chags las yang dag par 'da' ba'o zhes gsungs so/ /de ltar ma 'ongs pa'i sdug bsngal mngon par 'grub par byed pa'i nyon mongs pa dang bral na sdug bsngal las kyang rnam par grol bar 'gyur ro zhes bye brag tu bya ba'i phyir bral ba dang /rnam par grol ba zhes bya ba gsungs so/ /bsgom pa'i mtshan nyid ni rnam pa gnyis su rab tu dbye ste/ mthong ba'i lam dang / bsgom pa'i lam mo/ /de la phyin ci log dang bral ba'i sems kyis zhes bya ba ni/ /mthong ba'i lam ston to/ /len mang du gnas par 'gyur ro zhes bya ba 'di ni bsgom pa'i lam ston to//gnas dang gnas par 'brel ba'i mtshan nyid ni/ de kho na'i mtshan nyid la sogs pa 'og ma gong ma'i gnas yin par ston pa'i phyir ro/ /yongs su shes pa la sogs pa'i bar du gcod pa'i mtshan nyid ni de ltar gsum du bsgyur ba yang dag pa ji lta ba bzhin du rnam par mi shes pa'o//rjes su mthun pa'i mtshan nyid ni gzugs la sogs pa 'di dag ji ltar gnas pa bzhin du nyes dmigs la sogs par rnam par dpyod pa'o/ /yongs su mi shes pa la sogs pa la nyes dmigs kyi mtshan nyid ni mi grol ba nas bla na med pa yang dag par rdzogs pa'i byang chub mngon par rdzogs par 'tshang mi rgya pa'i bar du'o//de las bzlog pa ni phan yon gyi mtshan nyid du rig par bya'o/ /stobs dang stobs ma yin pa'i sgo ni gang du tshig gcig ma brjod na don 'di go bar mi 'gyur bas tshig so so thams cad kyis nus pa ston pa ste/dper na rten cing 'brel bar 'byung ba'i mdo las 'di yod pas 'di 'byung / 'di skyes pa'i phyir 'di skye ba ste/ 'di ltar ma rig pa'i rkyen gyis 'du byed rnams zhes bya ba la sogs pa gsungs pa lta bu'o/ /tshig 'di dag gi so so'i nus pa ni ji ltar gang du rten cing 'brel bar 'byung ba'i mtshan nyid du bshad pa bzhin du rig par bya'o//bzlas te brjod pa'i sgo ni gang du mdo'i tshig gcig bzung bas rgya cher don yang dag par ston pa ste/ dper na chos drug dang ldan pa'i dge slong ni kha'i dbugs kyis ri'i rgyal po gangs ri yang 'thor na ro lta bu'i ma rig pa lta smos kyang ci dgos/drug gang zhe na/ 'di la dge slong dag 'di la dge slong sems bskyed pa la mkhas pa yin pa nas/ thabs la mkhas pa yin no zhes bya ba'i bar du gsungs pa lta bu'o/ /mdo 'di las ji ltar na dge slong sems bskyed pa la mkhas pa yin zhe na/'di la dge slong ni 'dod pa dag las dben pa nas bsam gtan bzhi pa'i bar du rdzogs par byas nas gnas te/ de ltar na dge slong sems bskyed pa la mkhas pa yin no/ /ji ltar na dge slong sems gnas pa la mkhas pa yin zhe na/ 'di la dge slong ni kun du bsten pa'i rgyu'i bar gyis gang nyams pa'i cha dang mthun pa'i bsam gtan de gnas pa'i cha dang mthun par byed de/de ltar na dge slong de sems gnas pa la mkhas pa yin no/ /ji ltar na dge slong de sems ldang bar byed pa la mkhas pa yin zhe na/ 'di la dge slong ni kun du bsten pa'i rgyus gnas pa'i cha dang mthun pa'i bsam gtan de khyad par du gyur pa'i cha dang mthun par byed de/de ltar na dge slong ldang bar byed pa la mkhas pa yin no/ /ji ltar na dge slong 'phel bar byed pa la mkhas pa yin zhe na/ 'di la dge slong ni dge ba'i chos ma skyes pa rnams zhes bya ba yang dag par spang ba nyid rgya cher bya ste/de ltar na dge slong 'phel ba la mkhas pa yin no/ /ji ltar na dge slong 'bri ba la mkhas pa yin zhe na/ sdig pa mi dge ba'i chos skyes pa rnams zhes bya ba yang dag par spong ba gnyis kyis rgya cher bya ste/ de ltar na dge slong 'bri ba la mkhas pa yin no//ji ltar na dge slong thabs la mkhas pa yin zhe na/ 'di la dge slong ni 'dun pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa bsgom mo zhes bya ba la sogs pa rdzu 'phrul gyi rkang pa bzhi rgya cher sbyar te/ de ltar na dge slong thabs la mkhas pa yin no zhes 'byung ngo //mngon par sgrub pa'i sgo ni gang du tshig re re la yang mu bzhi la sogs pa ston pa ste/ mu bzhi pa la sogs pa la de dag gi tshig re re la yang gzhan bzhi la sogs pas thug pa med par mngon bar bsgrub par rig par bya'o/ /dper na sangs rgyas rtsom pa'i mdo las/bzhi po 'di dag ni byang chub sems dpa' sems dpa' chen po rnams kyi byang chub yongs su sbyong bar byed pa'i chos rnams te/ stong pa nyid sgom pa dang / sems can thams cad la zhe 'gras pa med pa'i sems dang / byang chub sems dpa' rnams la rtag tu phan pa nye bar sgrub pa'i sems dang /zang zing med pa'i sems kyis chos kyi sbyin pa yang dag par rab tu ston pa'o zhes bya ba bzhi ni bdag dang gzhan gyi don las brtsams te/ byang chub yongs su sbyong ba'i phyir mi mthun pa'i phyogs bzhi'i gnyen por rig par bya'o/ /mi mthun pa'i phyogs bzhi ni snyoms par 'jug pa'i ro myang ba dang /gnod sems dang / nga rgyal dang rnyed pa dang / bkur sti la sred pa'o/ /rnams grangs gzhan du na chos dang pos ni nyon mongs pa spong ba'i gnyen po bstan to/ /lhag ma rnams kyis ni rgyu gsum gyis theg pa dman pa yongs su spang bar bsten te/byang chub kyi sems kyis sems can thams cad nye bar 'dzin pa dang / zhugs pa yongs su smin par byed pa dang / ma zhugs pa 'jug par byed pas so/ /rnam grangs gzhan du na dang pos ni ye shes kyi tshogs yongs su bstan to/ /gsum gyis ni bsod nams kyi tshogs yongs su bstan te/nye bar 'dzin pa dang / yongs su smin par byed pa dang / 'jug pa rnam pa re res kyang bsod nams kyi khyad par skyed pa'i phyir ro/ /yang rgyu gnyis kyis rig par bya ste/ bsam pas ni byams pa'i sems su'o/ /bsgrub pas ni thob pa dang lung nye bar ston par rig par bya'o/ / chos bzhi dang ldan na byang chub sems dpa' stong pa nyid bsgom ste/ nang du sems su rnam par mi rtog pa dang / mos pa la rab tu rnam par 'byed pa'i stobs skyed pa dang / chos thams cad ji lta ba bzhin du rtogs par byed pa dang / sgrib pa thams cad las rnam par thar pa ste/ 'di dag gis ni gang la brten nas ji ltar bsgom pa de yongs su bsten to//gang la brten nas she na/ bsam gtan gyi pha rol tu phyin pa la'o/ /ji ltar bsgom zhe na/ so so'i skye bo'i lam gyis thos pa dang / bsam pa'i stobs skyed pa dang / slob pa'i lam dang mi slob pa'i lam gyis so/ /byang chub sems dpa' chos bzhi dang ldan na/sems can thams cad la zhe 'gras pa med pa'i sems dang ldan pa yin te/ byams pa bsgom pa dang / sgrub pa rnam par mi 'khrugs pa dang / mtshan ma la rnam par mi rtog pa dang / skyo ba bzod pa'o/ /'dir yang gang la brten nas ji ltar zhe 'gras pa med pa'i sems dang ldan pa yin pa de yongs su bstan to//gang la brten nas she na/ tshe rabs snga ma'i byams pa bsgoms pa las so/ /ji ltar zhe 'gras pa med pa'i sems dang ldan pa yin zhe na/ log par sgrub pa la gnas pa rnams la sems rnam par mi 'khrugs pa dang /gnod par byed pa rnams la gnod par byed pa'i mtshan mar rnam par mi rtog pa dang / gzhan la phan pa'i don du rtsol ba la yongs su mi skyo ba'o/ /byang chub sems dpa' chos bzhi dang ldan na byang chub sems dpa' rnams la rtag tu phan pa nye bar bsgrub pa yin te/ bdag yongs su 'jal ba dang / yang dag pa'i gdams pa la 'jug pa dang / des shing 'grogs na bde ba dang / mchod pa dang rnyed pa dang bkur sti dang / bsnyen bkur bya ba nye bar sgrub pa'o/ /'dir yang gang la brten nas ji ltar nye bar bsgrub pa de yongs su bsten to/ /gang la brten nas she na/nga rgyal bcag pa la'o/ /ji ltar nye bar bsgrub ce na/ ji skad bstan pa rnam pa gsum gyis dma' ba dang mtshungs pa dang / khyad par du 'phags pa'i byang chub sems dpa' rnams la go rims bzhin no/ /byang chub sems dpa' chos bzhi dang ldan na zang zing med pa'i sems kyis chos kyi sbyin pa yang dag par rab tu ston te/bar du gcod pa legs par rab tu rtogs pa dang / rmongs pa dang bying ba sel ba la rab tu mkhas pa dang / yid bde ba nye bar sgrub pa dang / mgon byed pa'i chos las dga' ba'o/ /'dir yang gang la brten nas ji ltar yang dag par rab tu ston pa de yongs su bstan to//gang la brten nas she na/ rnyed pa dang bkur sti bar du gcod par byed pa nyid du legs par rtogs pa la'o/ /ji ltar yang dag par rab tu ston ce na/ rmongs pa rnams la yang dag par ston pa dang / bag med pa la chags pa dang / bdag dman par 'dzin pas zhum pa rnams la yang dag par 'dzin du 'jug pa dang / yang dag par gzengs bstod pa dang / yang dag par zhugs pa rnams la yang dag par rab tu dga' bar byed pa dang / rang bzhin gyis chos la dga' bas so/ /de ltar bzhi pa gzhan ni bzhi pa dang po'i tshig rab tu dbye ba mngon par sgrub par rig par bya'o//rab tu phye nas kun tu bstan pa rnam par nges pa ni ji skad du bstan pa'i phung po la sogs pa'i chos rnams la gcig nas rtogs pa la sogs par ci rigs par sbyar ro/ /de la gcig nas rtogs pa zhes bya ba'i dri ba ni gang gis chos gcig chos lhag ma gzhan rnams dang lhan cig tu re re nas dris nas de bor te/des gnyis pa yang gzhan rnams dang / lhan cig tu 'dri ba'o/ /de bzhin du re re nas thams cad 'dri ba ste/ dper na gang mig gi skye mched dang ldan pa de gzugs kyi skye mched dang yang ldan nam/gang gzugs kyi skye mched dang ldan pa de mig gi skye mched dang yang ldan nam zhes bya ba ni tshig gong ma dang sbyar ba'o/ /gang mig gi skye mched dang ldan pa de rna ba'i skye mched dang yang ldan nam zhes bya ba 'di la mu bzhi'o/ /de bzhin du de yid kyi skye mched dang yang ldan nam zhes bya ba'i bar du 'di la mu ci rigs su sbyar bar bya'o//de la chos kyi skye mched dang yang ldan nam zhes bya ba 'di ni tshig gong ma dang sbyar bar bya'o/ /gzugs kyi skye mched dang ldan pa gang yin pa de mig gi skye mched dang yang ldan nam/ gang mig gi skye mched dang ldan pa de gzugs kyi skye mched dang yang ldan nam zhes bya ba 'di ni tshig 'og ma dang yang sbyar ba'o//gang gzugs kyi skye mched dang ldan pa de rna ba'i skye mched dang yang ldan nam zhes bya ba 'di yang tshig 'og ma dang sbyar bar bya'o/ /de bzhin du chos kyi skye mched dang yang ldan nam zhes ci rigs su sbyar bar bya'o//gang rna ba'i skye mched dang ldan pa de ni mig gi skye mched dang yang ldan nam zhes bya ba 'di la mu bzhi'o/ /de bzhin du chos kyi skye mched kyi bar du yang sbyar bar bya'o/ /de ltar re re nas gsal ba'i tshul gyis skye mched thams cad phan tshun du sbyar bar bya'o//tshig gong ma dang sbyor ba gnyis gnyis po ni chos 'ga' zhig la brtsams nas phan tshun dris na chos gong ma la brten nas gang lung ston pa ste/ dper na shes pa gang yin pa de shes bya yang de'am/ shes bya gang yin pa shes pa yang de'am zhes bya ba'i ni tshig gong ma dang sbyor ba ste/shes pa gang yin pa de shes bya yang de yin no/ /shes bya yin la shes pa ma yin pa'ang yod de/ de las gzhan pa'i chos rnams so/ /tshig 'og ma dang sbyor ba ni/ de bzhin du gnyis gnyis dris pa la gang phyi ma la brten nas lung ston pa ste/ dper na gzung ba gang yin pa de 'dzin pa'ang de'am/'dzin pa gang yin pa de gzung ba'ang de'am zhes bya ba ni tshig 'og ma dang sbyor ba ste/ 'dzin pa gang yin pa gzung ba yang de'o/ /gzung ba yin la 'dzin pa ma yin pa'ang yod de/ gzugs la sogs pa yul lnga po dag dang mtshungs par ldan pa ma gtogs pa'i chos kyi skye mched do//mu gnyis pa ni gang du mu gnyis ston pa ste/ de las gzhan med pa'i phyir ro/ /dper na phung po rnam par gzhag pa dang / khams rnam par gzhag pa la brten nas brjod pa ste/ phung po'i grangs gang yin pa khams kyi grangs kyang de'am/khams kyi grangs gang yin pa phung po'i grangs kyang de'am zhes bya ba ni mu gnyis pa ste/ phung po'i grangs yin la khams kyi grangs ma yin pa'ang yod de gzugs kyi phung po dang rnam par shes pa'i phung po'o/ /'di ltar gzugs kyi phung po'i mtshan nyid mtha' dag gam rnam par shes pa'i phung po'i mtshan nyid mtha' dag khams gcig tu gyur pa med do//khams kyi grangs yin la phung po'i grangs ma yin pa'ang yod de/ chos kyi khams so/ /mu gsum pa ni gang du mu gsum pa kho na ston pa ste/ dper na phung po'i grangs gang yin pa skye mched kyi grangs kyang de'am/skye mched kyi grangs gang yin pa phung po'i grangs kyang de'am zhes bya ba ni mu gsum pa ste/ phung po'i grangs yin la skye mched kyi grangs ma yin pa'ang yod de/ gzugs kyi phung po'o//skye mched ni grangs yin la phung po'i grangs ma yin pa'ang yod de/ chos kyi skye mched do/ phung po'i grangs kyang yin la skye mched kyi grangs kyang yin pa'ang yod de/ rnam par shes pa'i phung po dang yid kyi skye mched do/ /gnyi ga ma yin pa'i grangs ni phung po dang skye mched la med do//mu bzhi pa ni gang du mu bzhi ston pa ste/ dper na mig gi dbang po dang ldan pa gang yin pa rna ba'i dbang po dang ldan pa'ang de'am/ rna ba'i dbang po dang ldan pa gang yin pa mig gi dbang po dang ldan pa'ang de'am zhes bya ba ni mu bzhi pa ste/mu dang po ni mig skyes shing ma nyams la 'on pa'o/ /mu gnyis pa ni rna ba skyes shing ma nyams la long ba'o/ /mu gsum pa ni mig dang rna ba skyes la ma nyams pa'o/ /mu bzhi pa ni rnam pa de dag ma gtogs pa'o/ /de de bzhin no zhes bya ba ni gang dris pa lung du bstan pa la de bzhin no zhes brjod pa ste/de de bzhin no zhes khas len ces bya ba'i tha tshig go/ /dper na gang mi rtag pa de dag thams cad 'dus byas yin nam/ 'dus byas gang yin pa de dag thams cad mi rtag pa'am zhes dris pa la de bzhin no zhes bstan par bya'o/ /spang ba ni gang du ma yin no zhes ba ste/dper na phung po lnga las ma gtogs pa'i 'du byed rnams bden pa gang dag gis bsdus zhes zer ba la phung po lnga las ma gtogs pa'i 'du byed dag med do zhes spong ba'o/ /yang dag par dri ba rnam par nges pa ni rnam pa brgyad de/ ci zhes bstan pa ni 'di lta ste/su zhig mi dmigs she na/ shes rab kyi pha rol tu phyin pa thob pa'i byang chub sems dpa'o/ /ci mi dmigs she na gzung ba'i mtshan nyid dang 'dzin pa'i mtshan nyid do/ /gang gis mi dmigs she na/ shes rab kyi pha rol tu phyin pas so/ /ci'i phyir mi dmigs she na/sems can thams cad yongs su bskyab pa dang / bla na med pa yang dag par rdzogs pa'i byang chub par bya ba'i phyir ro/ /gang las mi dmigs she na/ sangs rgyas 'byung ba mnyes par byed pa dang / dam pa'i chos nyan pa dang / tshul bzhin yid la byed pa dang /chos kyi rjes su mthun pa'i chos sgrub pa las so/ /gang dag gi mi dmigs she na/ chos thams cad kyi'o/ /gang du mi dmigs she na mos pas spyod pa'i sa nas sa bcu pa'i bar du'o/ /rnam pa du zhig mi dmigs she na/ rnam pa bcu gcig ste/ skyes nas 'gags pa dang / ma skyes pa dang / mngon du gyur pa dang / rgyu'i stobs las byung ba dang / mdza' bo'i stobs las byung ba dang / chos thams cad mi dmigs pa dang / stong pa nyid mi dmigs pa dang / nga'o snyam pa'i nga rgyal dang bcas pa dang / nga'o snyam pa'i nga rgyal med pa dang /tshogs ma bsags pa dang / tshogs bsags pa ste/ mi dmigs pa 'di dag ni gang ci yang rung ste/ 'das pa dang ma 'ongs pa dang da ltar byung ba dang / nang dang phyi dang / rags pa dang phra ba dang / ngan pa dang bzang po dang / rgyang ring ba dang thag nye ba zhes bya ba 'di dag gi go rims kyi tshul gyis blta bar bya'o//ci zhes bstan pa la ji lta bar gang zhes bstan pa la yang de bzhin no zhes bya ba 'di la gang zhig mi dmigs pa dang / gang dang / gang gis dang / gang gi phyir dang / gang las dang gang gi dang /gang du mi dmigs pa dang / ji snyed cig mi dmigs pa'o/ /yang rnam par nges pa'i lam bzhi ste/ sun 'byin par byed pa la sogs pa'o/ /de la sun 'byin par byed pa ni gzhan gyi phyogs nyes par smras pa la/ 'di legs pa ma yin no zhes sel bar byed pa'o//sgrub par byed pa ni rang gi phyogs legs par smras pa la 'di ni legs pa'o zhes 'jog par byed pa'o/ /gcod par byed pa ni gzhan dag gi the tshom skyed pa'am/ ma skyes pa la rnam par nges par sbyin par byed pa'o/ /khong du chud par byed pa ni don de dang de dag la rmongs pa rnams la don de ston par byed pa'o//bya ba sgrub pa rnam par nges pa ni 'jig rten phan tshun du 'tsho ba'i thabs la sogs pa'i dgos pa sgrub pa'o/ /'jug pa rnam par nges pa ni theg pa gsum po dag las theg pa gang la 'jug par bya zhing zhugs par bya zhes rnam par spyod pa'o//mos par rnam par nges pa ni thos pa las byung ba'i shes rab kyis ji ltar thos pa bzhin du yid ches pa'o/ /rigs pas rnam par nges pa ni bsam pa las byung ba'i shes rab kyis snga phyi'i dgongs pa yongs su 'jal ba'o/ /'bel pa'i gtam gyis rnam par nges pa ni ji ltar thos pa dang bsam pa rnams dri ba dang phyir zhing dri bar bya ba'i tshul gyis phan tshun chos la rdzogs par longs spyod pa'o//rab tu rtogs pas rnam par nges pa ni mthong ba'i lam ste/ des bden pa rab tu rtogs pa'i phyir ro/ /rnam par dag pas rnam par nges pa ni bsgom pa'i lam ste/des nyon mong pa ma lus par rnam par spong ba'i phyir ro/ /mngon par bsgrub pas rnam par nges pa ni khyad par can gyi lam ste/ des yon tan khyad par can mngon par sgrub pa'i phyir ro/ /tshig rab tu dbye ba rnam par nges pa ni gnyis pa dang gsum pa dang bzhi ba la sogs pa'i rnam pa mngon par sgrub pa'i sgo nas chos ston pa la mtha' yas so//lhun gyis grub pa dang rtsol ba tsam gyi don thams cad 'grub pa rnam par nges pa ni de bzhin gshegs pa'i ye shes te/ sngon gyi rtsol ba med par yang don thams cad la rtsol ba'i mdo las chags pa med pa dang /thogs pa med pa'i ye shes kyi mthong ba 'jug pa'i phyir ro/ /smra ba rnam par nges pa ni smra ba dang / smra ba'i zhal ce ba la sogs pa la mkhas pa ste/ de la smra ba ni tshig thams cad do/ /rmad khyer bar smra ba ni 'jig rten na rnam par smra ba'o//rtsod par smra ba ni mi mthun par smra ba'o/ /tshig ngan par smra ba ni smad par smra ba'o/ /mthun par smra ba ni rjes su mthun par smra ba'o/ /gdams par smra ba ni khong du chud par bya ba'i phyir smra ba'o/ /smra ba'i zhal ce ba ni gang du smra bar bya ba ste/ 'di lta ste/ rgyal po'i pho brang ni gang na rgyal po nyid bzhugs pa'o//bskos pa 'du ba'i sa ni gang du rgyal pos bskos pa rnams 'du ba'o/ /'dus pa ni tshong pa la 'dus pa la sogs pa'o/ /tshad mar rung ba'i zla grogs ni gang dag gi tshig smra ba dang phyir rgol ba gnyi gas mi gcod pa'o/ /dge sbyong dang bram ze chos dang don la mkhas pa rnams ni gang dag bstan bcos de dang de dag gi tshig dang don la blo byang ba'o//smra ba'i gzhi ni gang la brten nas smra bar bya ba ste/ 'di lta ste sgrub pa dang grub pa'o/ /de la ngo bo nyid sgrub pa ni bdag gi ngo bo nyid dang / chos kyi ngo bo nyid de yod do zhe'am/med do zhes bya ba'o/ /khyad par sgrub pa ni bdag gi khyad par dang chos kyi khyad par te/ thams cad du song ba'am/ thams cad du song ba ma yin pa'am/ rtag pa'am mi rtag pa'i gzugs can nam gzugs can ma yin pa zhes bya ba la sogs pa'i rnam pa su'o/ /dam bca' ba ni bdag 'dod pa sgrub pa'i don gzhan la go bar ston pa zhes bya ba la/gal te sgrub pa ma smos na bdag gi phyogs grub zin pa yang gzhan dag la bstan par dam bca' bar 'gyur ro/ /bdag 'dod pa'i don ma smos na ni gzhan gyi phyogs bsgrub pa'i tshig kyang dam bca' bar 'gyur ro//gzhan ma smos na ni gcig pu yang tshig de dam bca' bar 'gyur ro/ /gal te go bar ma smos na ni lus kyi don de brda spyod pa yang dam bca' bar 'gyur ro/ /gal te ston pa ma smos na ni nyan pa rnams kyis don de ma shes na yang dam bca' bar 'gyur ro/ /ji ltar bstan pa bzhin du rnam par gzhag pa la nyes pa 'di dag thams cad med par 'gyur te/de lta bas na 'di rnam par gzhag par rig par bya'o/ /gtan tshigs ni sgrub pa nyid la ma grags pa'i don yid ches par byed pa'i rgyu mngon sum du dmigs pa dang / mi dmigs par bsnyad pa'o zhes bya ba la/yid ches par byed pa'i rgyu'i don 'dir gtan tshigs kyi don zhes bya bar ston te/ 'di ltar mngon sum du dmigs pa dang / ma dmigs pa zhes bstan pa 'dis sgrub pa de nyid la ma grags pa'i don la yid ches pa skye ba ste/ des na de bsnyad pa'i rgyur gyur pa'i phyir gtan tshigs zhes bya'o//mngon sum du dmigs pa dang ma dmigs pa ni ngo bo nyid kyi tshul dang rtags kyi dbang du byas par rig par bya'o/ /dpe ni mtha' mthong ba dang / mtha' ma mthong ba mtshungs par sbyar zhing bsnyad pa'o zhes bya ba ni grags pa'i cha dang ma grags pa'i cha rtogs par bya ba'i phyir/bsnyad ces bya ba'i tha tshig go/ /nye bar sbyor ba ni de'i rigs kyi chos lhag ma de dang 'dra ba la de'i chos sbyar ba'i phyir tshul gyis mthun par bsnyad pa'o zhes bya ba ni ji ltar bsgrub pa'i don yan lag gsum gyis bsgrubs pa de bzhin du/lhag ma de dang 'dra ba sgrub pa grub pa rnams la yang sgrub pa'i don gyis chos sbyar ba'i phyir ro/ /tshul gyis mthun par bsnyad cing rigs pa 'dra bar ston pa ni nye bar sbyar bar bya'o/ /mjug sdud pas ni mthar phyin par bsnyad pa'o zhes bya ba ni gang gi phyir de ltar rigs pas legs par 'thad pa de'i phyir de ni de bzhin no zhes bya ba de ni mjug sdud du rig par bya'o//dam bca' ba la sogs pa 'di dag gi dper brjod pa tsam 'di rab tu bstan par bya ste/ dper na rtsod pa'i phyir rgol ba dang bcas pa de la bdag med par smra bas bdag med do zhes bya ba'i tshig 'di dam bca' ba'o//phung po la bdag tu 'dogs pa la nyes pa rnam pa bzhi dmigs pa'i phyir zhes bya ba ni gtan tshig te/ bdag de la 'dogs na phung po'i mtshan nyid du'am/ phung po rnams la'am/ phung po rnams las gzhan pa'am/ phung po med pa zhig tu gdags grang na/de gal te phung po'i mtshan nyid ces byar ni phung po de dag rang dbang med par rten cing 'brel par 'byung ba dang / 'jig pa'i chos can te/ bdag de'i mtshan nyid du mi 'thad pas nyes par 'gyur ro/ /ji ste phung po rnams la 'dogs na ni des na phung po mi rtag pa la brten pas bdag mi rtag par 'gyur ba'i phyir nyes par 'gyur ro//ji ste phung po dag las gzhan du 'dogs na ni des na bdag lus med cing sgrim mi dgos pa'i phyir nyes par 'gyur ro/ /gal te phung po med par 'dogs na ni/ rang bzhin gyis grol ba ma 'dres pa yin pas thar par bya ba'i phyir 'bad pa don med pa'i nyes par 'gyur ro//da ltar la 'das pa 'dogs pa bzhin no zhes bya ba ni dpe'o/ /'das pa de yod pa'i mtshan nyid kho nar 'dogs pa na de ltar gyi mtshan nyid du'am/ da ltar byung ba'am/ de ltar byung ngam sa gzhan du'am/ da ltar byung ba la mi ltos pa zhig tu gdags grang na/ de gal te da ltar gyi mtshan nyid du 'dogs na ni des na da ltar ni byung la ma 'gags pa yin pas de'i mtshan nyid 'das pa yang byung la ma 'gags pa'i mtshan nyid kyis nyes par 'gyur ro/ /ji ste da ltar la 'dogs na des na ma 'gags pa ni 'gags pa'i bdag nyid dang 'brel bar mi rung bas nyes par 'gyur ro//ji ste da ltar las gzhan du 'dogs na ni des na da ltar bor na dngos po de ci yang mi dmigs te/ de la de 'dogs pa nyes par 'gyur ro/ /ji ste da ltar la mi ltos na ni des na 'dus ma byas kyang 'das par 'gyur bas nyes par 'gyur ro//'das pa de ni mtshan nyid nyams pa'i phyir mtshan nyid kyis med par grub bo/ /de'i phyir da ltar la 'dogs pa la nyes pa bzhi grub pa 'dis/ bdag med pa ma grub pa yang phung po la 'dogs pa la nyes pa rnam pa bzhi dmigs pa'i phyir med par rab tu grub bo//de ltar bdag tu phyin ci log pa bkag nas rig pa 'dis rtag pa la sogs pa yang med do zhes 'dra bar ston pa ni nye bar sbyar ro/ /gang gi phyir de de ltar yin pa de'i phyir phung po lnga ni mi rtag pa nas bdag gi ba med pa'o zhes bya ba ni mjug sdud do/ /mngon sum ni rang gi don yod cing snang la ma nor ba'o zhes bya ba de la rang gi don ni 'di lta ste/mig gi gzugs so/ /yod pa smos pa ni bum pa la sogs pa'i rdzas 'jig rten na mngon sum du grags pa rnams mngon sum ma yin pa gsal ba'i phyir te/ brtags pa tsam gyi phyir ro/ /snang ba smos pa ni bsgrib pa la sogs pa mi dmigs pa'i rgyu rnams kyis mi snang bar 'gyur ba'i yul bsal ba'i phyir ro//ma nor ba smos pa ni mgal me bskor ba dang / sgyu ma dang / smig rgyu la sogs pa bstsal ba'i phyir ro/ /rjes su dpag pa ni mngon sum gyi lhag ma la yid ches pa'o zhes bya ba la/mngon sum las gzhan pa gang yin pa ni lhag mthong mngon sum ma yin pa ste/ nges par de dang lhan cig gnas par mthong ba la sngar rab tu grub pa'o/ /mngon sum de la de lta bas na de las gzhan pa lhag ma la 'dir ni 'di de dang lhan cig gnas pa yin no zhes yid ches par 'gyur ba de mngon sum sngon du song ba'i rjes su dpag pa ste/dper na du ba mthong ba la me lta bu'o/ /yid ches pa'i lung ni de gnyi ga dang mi 'gal bar ston pa ste/ nye bar bstan pa gang la mngon sum dang rjes su dpag pa de rnam pa thams cad du 'gal ba med cing 'khrul pa med pa ste/yid ches pa'i lung ni yid ches par byed pa'i phyir ro/ /smra ba'i rgyan ni gang dang ldan na smra ba smra bar byed pa'i tshe shin tu mdzes pa'o/ /de yang bdag dang gzhan gyi gzhung lugs shes pa la sogs pa ste/ de la bdag dang gzhan gyi gzhung lugs shes pa ni rang gi grub pa'i mtha' dang gzhan gyi grub pa'i mtha' las brtsams te/tshig dang don snga phyi rgyun chags par rnam par ston par lcogs pa'o/ /tshig zur phyin pa phun sum tshogs pa ni sgra smra ba 'og nas 'byung ba'i gtam gyis nyes pa las bzlog pa ste/ cal col la sogs pa med pa'i phyir ro//mi 'jigs pa ni du ma btsun pa dang mngon par zhen pa can mkhas pa dag 'dus par smra zhing / bag tsha ba med pa la 'dzem pa med pa'o/ /brtan pa ni phyir rgol ba'i tshig mjug tu phyin par bsdad nas yid dal du smra ba'o/ /mthun par byed pa ni rang bzhin gyis bzang bas gzu bo dang phyir rgol ba'i sems dang mthun pa'o//smra ba chad pas bcad pa ni gang gis smra ba chad pas bcad ces bya ba ste/ de yang gtam rjes bcad pa la sogs pa'o/ /de la gtam rjes bcad pa la ni bdag gi ni ma legs so/ /khyod kyi ni legs so zhes bya ba la sogs pa'i rnam pa rnams kyis rang dang gzhan gyi smra ba'i skyon dang yon tan khas blang ba'o//gtam 'phro lus pa ni gzhan nas gzhan du brgyud pa la sogs pas bskal pa'o/ /gtam gyi nyes pa ni cal col la sogs pa'i tshig go/ /de la cal col ni gang skabs bor te/gtam sna tshogs rgyas par byed pa'o/ /'khrugs pa ni gang khros pas g.yeng ba dang / dga' bas g.yeng ba'o/ /brda phrad du mi rung ba ni gang chos dang don 'khor dang phyir rgol ba rnams kyis ma zin pa'o/ /ran pa ma yin pa ni gang tshig lhag ma dang zlos pa dang nyungs pa'o//don dang ldan pa ma yin pa ni de rnam pa lngar blta bar bya ste/ don med pa dang / don dang bral ba dang / rigs pa dang bral ba dang / sgrub par mtshungs pa dang ltag chod dang ldan pa ste/ don mi dmigs pa'i phyir ro/ /don dang ma 'brel pa'i phyir ro/ /ma nges pa'i phyir ro//grub pa yang bsgrub dgos pa'i phyir ro/ /tshul bzhin ma yin pa dang / tshogs par 'byung ba ma yin pa dang / smra ba thams cad dang ldan pa'i phyir ro/ /dus tshigs ma yin par smra ba ni gang sngar smra bar bya ba de phyis smra ba dang / phyis smra bar bya ba de sngar smra bar bya'o/ / mi rtag pa ni gang dam bcas nas smod pa dang / smad nas yang dam 'cha' ba dang / myur ches pas ha cang rtab rtab por gyur te mi gsal ba'o/ /tshig mi gsal ba ni gang sgra'i mtshan nyid dang 'gal ba dang / phyir ma bzlas par len smras pa dang / legs par sbyar ba las brtsams te/tha mal pas mthar phyung ba dang / tha mal pa las brtsams te legs par sbyar bas mthar phyung ba'o/ /tshig rgyun chags pa ma yin pa ni/ gang bar skabs su tshig dang spobs pa thogs pa dang rgyun chad pa'o/ /smra ba las byung ba ni gang gis smras pa las byung ba ste/ smra ba'i yon tan dang nyes pa brtags nas mi byed pas 'byung ba ni chad pa'i gnas su mi 'gyur ba'i phyir ro//byed pas 'byung ba ni lcogs pa'i phyir ro/ /de la phyir rgol ba snod ma yin pa ni mi dge ba'i gnas nas bslang ste/ dge ba'i gnas su gzhag par mi nus pa'o/ /'khor yon tan med pa ni tshogs pa rung ba ma yin pa dang /mngon par zhen pa can dang / phyogs su lhung ba la sogs pa'o/ /bdag kyang mi mkhas pa ni smra ba nas smra ba'i rgyan gyi bar la ma byang ba'o/ /de las bzlog pa ni 'khor snod du gyur pa la sogs par rig par bya'o/ /smra ba la gces spras byed pa'i chos rnams ni gang dag smra ba rnams la gdon mi za bar dgos pa ste/'di ltar gzhan gyi gzhung lugs la mkhas pa ni smra ba la gces spras byed pa'i chos te/ des gtam gyi gzhi thams cad du smra bar byed do/ /lhag ma rnams ni go sla bas ma bshad do//dge ba'i phyogs la brtson pa zhes bya ba gsungs nas nan tan snying por byed pa zhes bka' stsal pa ni bsam pa rnam par dag pa bstan pa'i phyir te/ rnyed pa dang bkur sti la sogs pa'i rgyur thos pa la sogs pa dge ba'i phyogs la brtson pa ma yin zhes bya ba'i tha tshig go/ / sems can bsdus pa ni nyan thos la sogs pa las bye brag tu bya ba'i phyir te/ gzhan la phan par sgrub pa lhur len ces bya ba'i tha tshig go/ /de ltar bdag la phan pa dang / gzhan la phan par zhugs pa ni myur du bla na med pa yang dag par rdzogs pa'i byang chub mngon par rdzogs par 'tshang rgya ba zhes bya ba 'di ni tshig 'di dag gi mtshams sbyar bar rig par bya'o//mi rtsod par smra bar byed du zin kyang theg pa chen po'i chos ni rang bzhin gyis zab pa'i phyir kun shes pa dkon na rtsod pas lta smos kyang ci dgos/ gang dag dang lhan cig tu rtsod pas smra bar bya ba'i phyir/ smra ba de dag kun shes par bya ba'i bsam pas phyir smra ba ma yin gyi skyon gdags pa'i bsam pas so//gzu bo gang dag gi mdun du de smra bar bya ba'i tshogs de dag kyang rung ba ma yin zhing bya ba ma yin pa'am/ mngon par zhen pa can dag go/ /smra bar bya ba thams cad kyang phal cher nyes pa drug dang ldan pa yin te/'di ltar smra bar byed pa na yang res 'ga' byung rgyal du phyogs ngan pa yang yongs su bzung nas mngon par zhen pa dang / tshig dor dang ltag chod dang / chad pa'i gnas rnams la yang sbyor ba dang / tshig mjug tu phyin phyin du mi sdod par dus ma yin par smra bar rtsom pa dang /phyir rgol bas legs par smras kyang khyad du gsod de smod ces bya ba'i tha tshig go/ /tshig brlang po yang smra ba ste/ des phyir rgol ba la sogs pa'i sems 'khrugs par byed pa dang bdag kyang de dag la sems 'khrugs pa zhes bya ba'i nyes pa 'di drug dang ldan pa yin no//nye bar zhi ba ni smra ba dkon no/ /nye bar ma zhi ba la ni gang gis gzhan dad pa thob par 'gyur ba dang / rnam par grol ba'i gnas dang ldan pa dang / rang gi sems mnyam par 'jog par 'gyur ba dang / gzhan gyi sems bsrung ba dang / rang gi sems bsrung ba gnyi ga dkon no//smra ba phal cher ni ji ltar na bdag rgyal bar 'gyur zhing pha rol pham par 'gyur snyam pa'i sems de kun du 'byung ngo / /de yod na yongs su gdung ba'i sdug bsngal gyis kun nas nyon mongs par 'gyur ro/ /de yod na bde ba la gnas par mi 'gyur ro/ /de'i phyir rgyun mi chad par dge ba'i phyogs la sbyor bar mi nus so//de'i phyir khyad par thob par bya ba la ma thob pas yongs su nyams par 'gyur ro/ /pha dang ma ni bsad byas shing / /zhes bya ba'i tshigs su bcad pa 'di ni 'jig rten na gang shin tu kha na ma tho ba sdig tor rtsi ba da brjod pa'i yi ge rnams rnam par dag par yongs su bsgyur ba'o//'jig rten na shin tu kha na ma tho bar grags pa ni skye bo bla ma bsad pa dang / skye bo chen po bsad pa'o/ /skye bo bla ma de yang rnam pa gnyis te/ so sor nges pa dang / 'jig rten dang thun mong ba'o/ /'jig rten dang thun mong ba la yang rnam pa gnyis te/yongs su skyong bar byed pa dang / sbyin gnas so/ /de la so sor nges pa'i skye bo bla ma ni pha dang ma'o/ /skyong bar byed pa ni rgyal po'o/ /sbyin gnas ni bram ze gtsang sbra can rnams te/ de dag ni shin tu dag par grags pa'i phyir ro/ /de dag thams cad bsad na ni skye bo bla ma bsad pa zhes bya'o//skye bo chen po bsad pa ni yul 'khor 'khor dang bcas bcom nas zhes bya ba'o/ /'khor ni ba lang dang / rta dang / rnga mo dang / ma he la sogs par rig par bya'o/ /ji ltar yi ge 'di dag dag par yongs su bsgyur zhe na/ ma la sogs pa bsad pa'i tshig ni sred pa la sogs pa spong bar yongs su bsgyur ba'i phyir te/go rims bzhin du sred pa dang / las kyi sred pa dang / nye bar len pa dang bcas pa'i rnam par shes pa dang / lta ba dang / tshul khrims dang / brtul zhugs mchog tu 'dzin pa gnyis dang / skye mched drug spyod yul dang bcas pa'i dbang du byas nas/ma la sogs par blta bar bya ste/ de dang 'dra ba'i phyir ro/ /de la sred pa ni mngon par grub pa'i rgyu'o/ /las kyi srid pa ni skye ba'i rgyu ste/ de ni bsgom pa'i bag chags skyed pa'i tshul gyis pha lta bur blta bar bya'o/ / rgyu 'di gnyis las ni nye bar len pa dang bcas pa'i rnam par shes pa 'byung ngo / /de de ltar byung na thar pa 'dod du zin kyang mchog tu dag par yid ches par byed pa'i mchog tu 'dzin pa gnyis thar pa thob pa la gegs byed do/ /'di gnyis gtsang sbra can dang 'dra ba ni 'di lta bur rig par bya ste/'di ltar mchog dang 'dag par mngon par zhen pa'o/ /rnam par shes pa de'i gnas dang dmigs pa'i dngos pos skye mched drug spyod yul dang bcas par rig par bya'o/ /yid mi ches dang byas mi gzo/ /zhes bya ba'i tshigs su bcad pa 'di ni/ don ngan pa brjod pa'i yi ge rnams mchog gi don du yongs su bsgyur ba'o//'jig rten na ngan pa rnam pa bzhi ste/ yid kyi las ngan pa dang / lus kyi las ngan pa dang / ngag gi las ngan pa dang / longs spyod ngan pa'o/ /yid kyi las ngan pa yang rnam pa gnyis te/ dge ba la 'jug pa dang / mi mthun pas yid mi ches pa ste//'jig rten pa rol la sogs pa la yid mi ches pas/ sbyin pa la sogs pa la mi sbyor ba'i phyir ro/ /mi dge ba la 'jug pa dang / mthun pas byas pa mi gzo ba ste/ sngon phan btags pa la mi lta bar ma gsod pa la sogs pas nyes par spyod pa la yang mi 'dogs pa'i phyir ro//lus kyi las ngan pa ni khyim 'bigs pa'i rkun po ste/ 'tsho ba shin tu smad pa'i phyir ro/ /ngag gi las ngan pa ni brdzun du smra ba la sogs pa lhur len pa ste/ de lta bu dang ldan pa ni tshogs pa la sogs pa'i nang du 'jug tu mi rung ba'i phyir ro/ /longs spyod ngan pa ni/ khyi dang / bya rog dang / yi dwags la sogs pa ste/ skyugs pa za ba'i phyir ro/ /ji ltar yi ge 'di dag mchog gi don du yongs su bsgyur zhe na/ yid mi ches pa la sogs pa'i tshig rnams ni dgra bcom par yongs su bsgyur ba'i phyir ro/ /de la yid mi ches pa ni rnam par grol ba'i ye shes mthong ba dang ldan pas rang gi yid ches pa'i phyir ro//byas pa mi gzo ba ni 'dus ma byas pa mya ngan las 'das pa shes pa'i phyir ro/ /khyim 'bigs par byed pa ni yang srid par nying mtshams sbyor ba'i rgyu nyon mongs pa spangs pa'i phyir ro/ /go skabs bcom zhes bya ba ni/ phyi ma la 'gro ba thams cad du sdug bsngal mngon par mi 'grub pa'i phyir ro//skyugs pa za ba ni mthong ba'i chos la yo byad kyi stobs kyis lus 'dzin kyang longs spyod dang srog la re ba med pa'i phyir ro/ /snying po med la snying por shes/ /zhes bya ba'i tshigs su bcad pa 'di'i don snga ma bzhin du bshad par bya'o//'di'i lus ni byang chub sems dpa'i ting nge 'dzin la brten nas mthong ba dang / bsgom pa'i lam gnyis kyis byang chub chen po la reg pa'o/ /ser sna'i chos nyid 'phel bar byed pa ni bag chags dang bcas pa'i sems ser sna'i bag la nyal spangs pas de'i de bzhin nyid gnas gyur pa mngon du byed pa'i phyir ro//sbyin pas yongs su skyo ba ni yun ring por sbyin pa'i rgyu mchog tu bya dka' bas ngal bar bya ba khas blangs pa'i phyir ro/ /slong ba la tshig pa za ba ni rang gis len par 'dod pas slong ba dang mi mthun pa'i phyir ro/ /res 'ga' ni ci yang sbyin par mi byed pa ni dngos po thams cad rtag tu sbyin pa'i phyir ro//sbyin pa las ring du gyur pa ni nye ba la sbyin pa la sogs pa yongs su spangs pa'i phyir ro/ /tshangs par spyod pa dang ldan pa zhes bya ba ni/ 'jig rten las 'das pa'i lam dang ldan zhes bya ba'i tha tshig go/ /'khrig pa las gzhan du 'khrig pas nges par 'byung ba mi 'tshol ba ni de nyid yang dag pa ji lta ba bzhin du yongs su shes nas spong ba'i phyir ro//de la yang dag pa ji lta ba bzhin du yongs su shes pa ni/ de'i de bzhin nyid rab tu rtogs par rig par bya'o/ /'khrig pa spong ba la g.yeng ba ni mi tshangs par spyod pa spong ba'i thabs la rtog pa'i phyir ro//'khrig pa'i 'dod chags skyes pa dang du len pa ni/ 'dod pa la 'dod chags nang du skyes pa phyi rol du spong ba'i phyir ro/ /'khrig pa'i gnyen po'i chos kyis skrag pa ni de'i gnyen po'i chos kyis sems can thams cad bsgral ba'i don du rtsol ba'i phyir ro//rgyun mi 'chad par gnyis kyis gnyis sbyor ba ni/ zhi gnas dang lhag mthong gnyis kyis 'jig rten pa dang / 'jig rten las 'das pa gnyis la snyoms par 'jug pa ste/ kun nas nyon mongs pa dang rnam par byang ba gnyis kyis 'bras bu dang rgyu'i bye brag gis bden pa bzhi'i bdag nyid du gyur pa'i don du 'jig rten pa dang 'jig rten las 'das pa'i lam gnyis la snyoms par 'jug pa'i phyir ro//bstan bcos 'di ci'i phyir chos mngon pa kun las btus pa zhes bya bar ming btags she na/ nges pa'i tshig gi tshul gyis rtogs nas bsdus pa'i phyir te/byang chub sems dpa' rnams kyis de kho na nyid mngon par rtogs shing khong du chud nas mdor bsdus zhes bya ba'i tha tshig go/ /kun las btus pa'i phyir zhes bya ba ni chos mngon pa'i mdo rnams las te/ bsam pa'i gnas thams cad bsdus pa'i phyir zhes bya ba'i tha tshig go//yang dag par mtho ba'i gnas yin pa'i phyir zhes bya ba ni phyin ci ma log pa'i thabs kyis sangs rgyas nyid kyi bar du thob par byed pa'i phyir zhes bya ba'i tha tshig go/ /chos mngon pa kun las btus pa'i bshad pa/ slob dpon chen po rgyal ba'i sras kyis mdzad pa rdzogs so/