CLOSE WINDOW

D4051
བོད་ཡིག

@##/ /rgya gar skad du/ ma hA yA na saM gra ha u pa ni ban+d+ha naM/ bod skad du/ theg pa chen po bsdus pa'i bshad sbyar/ bam po dang po/ 'jam dpal gzhon nur gyur pa la phyag 'tshal lo/ /slob dpon snga mas rigs tshul du/ /rnam par phye bas blo zhen rnams//mi rtogs pas na tshig re nas/ /bsdus pa rnam par dbye bar bya/ /don bcus theg pa chen po mtha' dag don du bsdu bar 'dod pas bstan bcos kyi lus kyi bdag nyid don bcu po de dag gtsug lag nyid du brjod pa'i sgo nas/ theg pa chen po la shin tu zhugs pa zhes bya ba la sogs pa gleng slong bar byed do//yon tan gyi tshig gam btags pa la theg pa chen po la shin tu zhugs pa zhes bya ste/ 'dis theg pa chen po shin tu rtogs pa'am/ de la shin tu zhugs pa'i phyir theg pa chen po la shin tu zhugs pa'o/ /byang chub sems dpa' theg pa chen po la shin tu zhugs pa gzungs dang spobs pa'i yon tan thob pa theg pa chen po'i don 'dzin pa dang rab tu ston par nus pa des sam/ming de skad ces bya bas gsungs pa'o/ /byang chub sems dpa' zhes bya ba ni 'di byang chub dang sems can la dmigs pa'i phyir byang chub sems dpa' ste/sems dpa' zhes bya ba'i sgras ni 'dir srog chags brjod pa yin no/ /dmigs pas kyang de skad ces bya bar snang ste/ dper na mi sdug pa la sogs pa la dmigs pa'i ting nge 'dzin la mi sdug pa dang / stong pa nyid ces bya ba dang / ngan par byas pa la dmigs pa'i yid la gcags pa la 'gyod pa zhes bya ba lta bu'o//yang na 'di byang chub kyi phyir sran thub pas na byang chub sems dpa'o/ /theg pa chen po'i che ba'i bdag nyid ces bya ba ni zab pa dang / rgya che ba gnyis kyis bla na med pa'o/ /bdag gi sgra ni ngo bo nyid dang / byed pa'i tshig ste/dper na me ni tsha ba'i bdag nyid/ dug ni 'chi bar byed pa'i bdag nyid ces bya ba lta bu'o/ 'di ni che ba'i bdag nyid yin pas che ba ste/ de'i dngos po ni che ba'i bdag nyid do/ /de brjod pa zhes bya ba ni gzhan dag rang gis mi shes pas de rab tu bshad pa'o/ /phyir zhes bya bas ni dgongs pa bstan pa'o//bcom ldan 'das kyi spyan sngar zhes bya ba la bdud bzhi bcom pa dang / dbang phyug la sogs pa'i yon tan dang ldan pa'i phyir bcom ldan 'das te sangs rgyas so/ /de ci'i phyir zhe na/ sangs rgyas bcom ldan 'das zhes 'og nas 'byung ba'i phyir ro//bcom ldan 'das de'i spyan sngar zhes bya bas ni sangs rgyas kyis gnang bas yid brtan du rung ba nyid du ston te/ ston pa dang nye na gzhan du mi smra ba'i phyir ro/ /'di lta ste zhes bya ba ni gnas bcu nye bar 'dod par 'god pa ston to/ /theg pa chen po las brtsams nas zhes bya ba ni de'i ched du'am/dbang du byas pa ste/ nyan thos kyi theg pa'am/ 'jig rten pa las brtsams pa ma yin pa'o/ /yang theg pa chen po smos pa ni 'di kho na las brtsams kyi gzhan las brtsams pa ni ma yin no zhes nges par bya ba'i phyir te/ 'di ltar 'jig rten pa las brtsams nas/bden par smra bya khro mi bya/ /slong la chung yang sbyin par bya/ /zhes bya ba la sogs pa rnam pa gzhan dag las sangs rgyas kyi gsung khyad par du 'phags so/ /nyan thos kyi dbang du byas na/ kye ma 'du byed rtag pa med/ /skye zhing 'jig pa'i chos can yin//zhes bya ba la sogs pa gzhan dag las khyad par du 'phags te/ de lta bas na nges par bya bar rigs so/ /chos mngon par theg pa chen po'i mdo las zhes bya ba ni chos rab tu rnam par 'byed pa'i rgyu'am/ grags pa'i phyir chos mngon par ming btags pa theg pa chen po'i mdo khyad par can las gsungs kyi gzhan las ni ma yin no//de ni theg pa yang yin la chen po yang yin pa'am/ chen po rnams kyi theg pa yin pas theg pa chen po ste/ rgyu dang 'bras bu che ba'i phyir byed pa dang / bgrod par bya ba bsgrub pa'i gzhi yin pa'i phyir ro/ /mdor bsdu na byang chub sems dpa'i sa bcu 'bras bu dang bcas pa'o//rgyas par bya na chen po rnam pa bdun dang ldan pa'i phyir te/ byang chub kyi phyogs dang mthun pa rnams dang / pha rol tu phyin pa rnams dang / bslab pa rnams dang / gzhi dang rtags la sogs pa ni theg pa chen po'o/ /de'i mdo ni smos pa'i phyir te/rkyang pa dang tshig tu sbyar ba'i sgrar snang ba 'dod pa'i don gyi rnam pa'i rjes su 'jug pa nyan pa'i rnam par rig pa'i tshig go/ /gal te de lta yin na byang chub sems dpas de ji ltar bshad de/ nyan pa'i rnam par rig pa ni des ma bshad do zhe na/ de'i dbang gis byung ba'i phyir de skad ces bya ste/lha la sogs pa'i dbang gis rmi lam na bstan bcos dang sngags la sogs pa rnyed pa bzhin no/ /gzhan du na ngag gi rnam par rig byed kyang sangs rgyas kyis gsungs pa ji ltar 'gyur/ re zhig ngag gi rang bzhin ni mdor mi 'thad de/ yi ge re re ni don rtogs par byed par mi rung ba'i phyir ro//rim gyis 'byung ba lhan cig mi gnas pa rnams kyang tshogs par mi rung ba'i phyir ro/ /de ltar na bdag ma thob pa'i ngag ni ming la 'jug par mi rung ngo / /yi ge'i bdag nyid ma yin pa'i sgra byung ba yang ming la cung zad kyang gsal bar mi byed de/de ltar na ming gi rang bzhin yang mdor mi 'thad do/ /de lta bas na ji skad bstan pa nyid mdor rigs te/ chos mngon pa zhes bya ba'i theg pa chen po'i mdo de las so/ /rnam pa zhes bya ba ni bye brag ste/ de dag nyid phan tshun ma 'dres pas khyad par du 'gyur bas na khyad par ram/nyan thos la sogs pa'i chos rnams las mchog tu gyur pa dang / lhag pa'i phyir khyad par te/ byang chub chen po sgrub par byed pa'i phyir ro/ /bcu zhes bya ba ni grangs te/ sangs rgyas kyi gsung bgrang bar bya ba khyad par du 'phags pas bstan bcos kyi lus rnam par 'jog go//'di dag gi gsung ni rnam pa bcus khyad par du 'phags pas/ sangs rgyas bcom ldan 'das rnams kyi gsung rnam pa bcus khyad par du 'phags pa'o/ /sangs rgyas zhes bya ba ni nyon mongs pa can dang / nyon mongs pa can ma yin pa'i gti mug gi gnyid gnyis zad pa dang //shes bya thams cad la shes pa rgyas pa'i phyir sangs rgyas te/ skyes bu gnyid sad pa bzhin no/ /me tog ku mu ta rgyas pa bzhin no/ /shes bya ni shes par bya'o/ /gnas kyi sgras phye ba'i phyir gnas pa rnams ni 'dus byas rnams te/ kun nas nyon mongs par 'gyur ba dang /rnam par byang bar 'gyur ba'i chos rnams so/ /'dus ma byas rnams ni ma yin te/ gnas kyi don med pa'i phyir ro/ /de dag gi gnas ni kun gzhi rnam par shes pa ste rgyu yin pa dang / rten yin pa'i phyir ci rigs su sbyar ro/ /shes bya nyid shes bya'i rten du 'gyur te/shes bya nyid kyang rnam par smin pa'i rnam par shes pa dang mi 'gal lo/ /shes bya'i gnas nyid khyad par yin pas/ shes bya'i gnas kyi khyad par te/ des 'di dag gi gsung khyad par du 'phags pas shes bya'i gnas kyi khyad par gyis khyad par du 'phags pa'i gsung ste/sangs rgyas bcom ldan 'das rnams kyi zhes bya bar thams cad du rnal ma dang sbyar ro/ /shes bya'i mtshan nyid ni shes bya'i ngo bo nyid de de mtshon par bya ba yin pa'i phyir ro/ /ngo bo nyid gsum zhes bya ba la yongs su grub pa ni dngos po yin pas ngo bo nyid do/ /kun brtags pa ni ngo bo nyid dang 'dra bas ngo bo nyid do//'khrul pa'i rgyu yin pa dang / ngo bo nyid kyi gnas yin pas gzhan gyi dbang gi ngo bo nyid do/ /de la yongs su grub pa'i mtshan nyid ni chos thams cad kyi nang du zhugs pas spyi'i mtshan nyid do/ /gzhan gyi dbang ni lus la sogs pa 'khrul pa'i rnam par rig pa rnams phan tshun tha dad pa'i phyir rang gi mtshan nyid do/sa'i khams la sogs pa bzhin no/ /dper na sa'i khams sra bar yongs su gcod pa na gzhan ma yin yang sra ba'i mtshan nyid ces brjod pa lta bu'o/ /yang dper na skyes bu chen po'i mtshan nyid rnams dang / mdo sde ba'i skye ba la sogs pa bzhin no//des na de ni shes bya'ang yin la mtshan nyid kyang yin pa'am yang na shes bya'i mtshan nyid yin pas shes bya'i mtshan nyid de/ de gzhan ma yin pa dang / gzhan dang gzhan ma yin pa las grol ba'i phyir ci rigs su sbyar ro/ /des 'di dag gi gsung khyad par du 'phags so//'dis shes bya'i mtshan nyid la 'jug pa'am/ 'di ni shes bya'i mtshan nyid la 'jug pa yin pas shes bya'i mtshan nyid la 'jug pa ste/ 'jug pa ni mngon par rtogs pa'o/ /rnam par rig pa tsam nyid ni shes bya'i mtshan nyid la 'jug pa'o/ /de nyid khyad par te/des 'di dag gi gsung khyad par du 'phags so/ /'jug pa de'i rgyu dang 'bras bu'i khyad par gyis khyad par du 'phags pa'i gsung zhes bya ba ni 'jug pa zhes bya ba rnam par rig pa tsam nyid de/ de'i rgyu ni mos pas spyod pa'i sa la sbyor ba'i dus na 'jig rten pa'i pha rol tu phyin pa ma dag pa rnams so//'bras bu ni rab tu rtogs pa'i dus na de dag nyid 'jig rten las 'das par gyur pa ste/ lhag pa'i bsam pa dag pas yongs su zin pa'o/ /de dag nyid des 'jug pa'i rgyu dang 'bras bu'i khyad par te/ des 'di dag gi gsung khyad par du 'phags so/ /de'i rgyu dang 'bras bu bsgom pa rab tu dbye ba zhes bya ba la rnam par rig pa tsam de nyid kyi rgyu dang 'bras bu ni de'i rgyu dang 'bras bu'o//bsgom pa ni de goms par byed pa'o/ /des rab tu dbye bas de'i rgyu dang 'bras bu bsgom pa rab tu dbye ba ste/ sa bcu'i ngo bo nyid do/ /de nyid khyad par te/ des 'di dag gi gsung khyad par du 'phags so//pha rol tu phyin pa goms par byed pa tha dad pa'i sa de dag nyid la de nye bar 'dzin pa la brtson pa na de la slob pa yin pas bslab pa gsum rnam par gzhag go/ /tshul khrims kyi dbang du byas pa'i bslab pa ni lhag pa'i tshul khrims kyi bslab pa ste/sa de dag nyid la byang chub sems dpa'i sdom pa spong ba dang / sems can gyi don bya ba dang / dge ba thams cad spyod pa dang / tshul khrims rnam pa gsum yang dag par len to/ /gdul ba srab kyi kha lo sgyur ba bzhin du lam log par zhugs pa'i lus la sogs pa'i las rnams 'dis sdom pas na sdom pa'o//de ltar na bslab pa nyid lhag pa'i tshul khrims te/ tshul khrims dang lhan cig spyod pa'i phyir ro/ /lhag pa'i tshul khrims nyid khyad par te/ des 'di dag gi gsung khyad par du 'phags so/ /sems kyi dbang du byas pa'i bslab pa ni lhag pa'i sems kyi bslab pa'o//dpa' bar 'gro ba dang nam mkha'i mdzod la sogs pa'i ting nge 'dzin dag ni zhes bya ba la sogs pa smos pas ni bzang skyong dang / ting nge 'dzin gyi rgyal po la sogs pa bsdu'o/ /lhag pa'i sems kyi bslab pa la ting nge 'dzin nyid sems su ston pas gsungs so zhes smras te/sems kyi rnam pa bris zhes bya ba las su bstan pa lta bu'o/ /shes rab kyi dbang du byas pa'i bslab pa ni lhag pa'i shes rab kyi bslab pa'o/ /rnam par mi rtog pa'i ye shes ni spros pa'i rnam par rtog pa thams cad kyi gnyen po'o//de la sbyor ba ba'i dngos gzhi'i dbang du byas/ de'i rjes la thob pa'i dbang du byas/ de'i bla na med pa'i dbang du byas nas tshul khrims dang / ting nge 'dzin dang / shes rab kyi bslab pa 'di dag ni lam gyi rang bzhin no/ /de'i 'bras bu spangs pa dang / ye shes kyi khyad par gnyis kyis khyad par du 'phags pa'i gsung zhes bstan te/ bslab pa 'di rnams kyi 'bras bu ni de'i 'bras bu'o/ /de ni de'i 'bras bu yang yin la spangs pa yang yin pas de'i 'bras bu spangs pa ste/ glo bur gyi sgrib pa dang bral ba de bzhin nyid rnam par grol ba'o//mi gnas pa'i mya ngan las 'das pa ni zhi ba nyid du mthong ba'i phyir 'khor ba nyid mya ngan las 'das pa ste/ de shes pa ni chags pa'i gnas ma yin no/ /phung po'i lhag ma med pa'i mya ngan las 'das pa'i dbyings ni gnas pa ma yin no/ /de nyid khyad par te/ des 'di dag gi gsung khyad par du 'phags so//bslab pa 'di rnams kyi 'bras bu ni de'i 'bras bu ste/ de ni de'i 'bras bu yang yin la ye shes kyang yin pas de'i 'bras bu ye shes so/ /sangs rgyas kyi sku gsung zhes bya ba la/ ngo bo nyid kyi sku ni dri ma med cing thogs pa med pa'i ye shes te/ chos kyi sku zhes bya ba'i tha tshig go//'di ltar gnyi ga yang rnam par rtog pa kun tu mi 'byung na rnam par mi rtog pa dang 'di bye brag ci yod ce na/ de ni gnyen po ste bya ba dang bcas pa'o/ /'di ni de'i 'bras bu bya ba byas pa ste/ 'di ni bye brag go/ /longs spyod rdzogs pa ni de'i dbang gis thob pa ste/ye shes khyad par can des byang chub sems dpa' chen po yang ye shes khyad par du 'phags pa rnams dang lhan cig thun mong ma yin pa'i chos kyi longs spyod rdzogs pa so sor myong ngo / /phyi rol rnam par dag pa'i ye shes med par byang chub sems dpa'i bya ba dang / tshogs lhag ma yang rdzogs par mi 'gyur ro//sprul pa ni de'i rjes la thob pa'i ye shes nyid kyi bye brag go/ /des de kho na las rab tu mi nyams shing byang chub sems dpa'i longs spyod rdzogs pa mi gtong bas las dang po ba'i byang chub sems dpa' rnams dang / nyan thos rnams la bya ba sgrub po/ / mig gi dbang po dang / de'i rnam par shes pa dang / gzugs kyi dpe rnams dang sbyar te/ de med na de med par 'gyur ro/ /de nyid khyad par te/ des de dag gi gsung khyad par du 'phags so/ /nyan thos kyi theg pa las khyad par du byas pa zhes bya ba ni der ma bstan pa'i phyir ro/ /gnas bcu po 'di dag ces bya ba ni de dag la theg pa chen po'i don mtha' dag gnas pas gnas te/gzhi zhes bya ba'i tha tshig go/ /gang dag byang chub sems dpas byang chub sems dpa'i ched du bshad pa dag go zhes brjod pa'i rigs pa las bcom ldan 'das kyis bstan pa dag go zhes smos pa ni sangs rgyas kyi spyan sngar des gnang nas bshad pa'i phyir te/sa bcu pa la sogs pa bzhin no/ /de'i phyir/ bcom ldan 'das kyi spyan sngar zhes bya ba smos so/ /mchog nyid ces bya ba ni lam de sangs rgyas nyid du 'gyur bar bstan pa mchog yin pa'i phyir ro/ /ji ltar na de bzhin gshegs pa'i gsung khyad par rnam pa bcus khyad par du 'phags pa 'dis zhes bya ba la sogs pa ni mi srid du dogs nas smras pa'o//'di ltar dngos po drug la sogs pa ni nyan thos kyi theg pa bstan par mi dmigs la/ bye brag la sogs pa la ni de dmigs te/ de tsam gyis ni bye brag yi sogs pa yang sangs rgyas kyi gsung du mi 'gyur ro zhes gzhan gyi skabs su 'gyur ba yid la bzhag nas/gnas bcu po 'di dag ni byang chub chen po kun du sgrub par byed pa ste zhes bya ba la sogs pa smos so/ /de ni byang chub kyang yin la chen po'ang yin pa'am/ chen po rnams kyi byang chub yin pas byang chub chen po'o//ye shes dang spangs pa'i khyad par gyi rang bzhin te/ nyon mongs shes bya'i sgrib pa dag /spangs pa yin te de spangs pas/ /dri med ye shes thogs pa med/ /'di ni byang chub rnam pa bzhi/ /zhes ji skad gsungs pa lta bu'o/ /de kun tu sgrub par byed cing thob par byed pa ni gnas bcu po dag yin gyi/dngos po drug gam/ gtso bo la sogs pa ni ma yin pas de dag ni sangs rgyas kyi bka' ma yin no/ /shin tu 'thad pa zhes bya ba ni tshad ma dang ldan pa'i phyir te/ 'di ltar 'og nas gtan la 'bebs so//mthun pa zhes bya ba ni mngon du 'gyur ba'i phyir te/ rjes su mthun pa zhes bya ba'i tha tshig go/ /'gal ba med pa zhes bya ba ni skyon med pa'i phyir te/ ji ltar dngos po drug la sogs pa shes pa'am/ nyan thos kyi theg pa skyon dang bcas shing sangs rgyas nyid dang mi mthun pa ltar gnas bcu po 'di dag ni de lta ma yin no//'dir tshigs su bcad pa zhes bya ba smos pa ni sngar bshad pa dang 'og nas 'byung ba'i don ston pa'o/ /'di ltar gzhan la ma mthong la/ zhes bya ba la sogs pas ni byang chub chen po mngon du 'gyur ba dang / grangs dang go rims kyi dgos pa 'thad pa dang bcas pa rnam par 'grel te/ 'di ltar byang chub sems dpa' thog ma nyid du re zhig chos rnams kyi rgyu la mkhas pa la brten nas rgyu 'di las 'bras bu 'di 'byung ngo / /'bras bu 'di'i rgyu ni 'di yin no zhes rten cing 'brel bar 'byung ba la mkhas par byas te/de yang rgyu bstan pa med par ni mi shes so/ /rgyu ni kun gzhi rnam par shes pa yin te/ rgyu med pa dang mi mthun pa'i rgyu spangs nas bstan pa'o/ /de'i 'og tu sgro 'dogs pa dang skur ba 'debs pa'i mtha' spangs pas rten cing 'brel par 'byung ba'i chos de dag gi mtshan nyid shes par byas te/med pa dang yod pa lhan cig gcig tu 'dogs pa ni sgro 'dogs pa'o/ /yod pa la skur cing sel ba ni skur pa 'debs pa'o/ /sgro 'dogs pa dang skur ba'i mtha' 'di gnyis ni g.yang sa zhes bya ba'i tha tshig ste/ /'di gnyis la gnas na dbu ma'i lam las rab tu nyams par 'gyur ro//de gnyis spangs pa la mkhas pa ni yang dag par so sor rtog pa ste/ med pa kun brtags pa la sgro mi 'dogs shing mi skur te med pa'i phyir ro/ /yod pa la skur pa 'debs pa'i phyir ro/ /gzhan gyi dbang la sgro 'dogs par mi byed de yod pa'i phyir ro//med pa la sgro 'dogs pa'i phyir ro/ /skur par yang mi byed de 'khrul pa tsam du yod pa'i phyir ro/ /yongs su grub pa la sgro 'dogs par mi byed de yod pa'i phyir ro/ /de nyid kyi phyir skur bar mi byed do/ /yang na 'dir sgro 'dogs pa dang / skur pa'i mtha' spangs pa la mkhas pa 'di ni gang gzhan gyi dbang la kun brtags pa med pas sgro mi 'dogs pa dang /yongs su grub pa yod pas skur par mi byed pa'o/ /mtha' gnyis spangs pas ngo bo nyid gsum la mkhas pa de lta bu la brten nas rnam par rig pa tsam nyid kyis ji skad smos pa'i shes bya'i mtshan nyid rtogs par bya'o//khong du chud pa ni rtogs pa ste/ 'jug pa dang mngon sum du byed pa'o/ /yang na gang gis rtogs pa'o/ /de'i 'og tu 'jug pa rnam par rig pa tsam nyid de dang mthun pa kun rdzob kyi pha rol tu phyin pa drug po dag don dam par rtogs par bya ste/lhag pa'i bsam pa dag pas yongs su zin par bya'o/ /'dun pa dang mos pa ni bsam pa ste/ shes nas dad pas bsdus pa'i phyir de'i tshe de gnyis lhag par che'o/ /'jug pa ni rdzogs pa'i byang chub mngon par rtogs pa zhes bya ba dang don gcig go/ /sa bcu dag tu bslab pa gsum la bslab cing bskal pa grangs med pa gsum du bsgoms pas de dag nyid yongs su rdzogs par bya'o//de'i 'og tu de'i 'bras bu nyon mongs pa dang / shes bya'i sgrib pa spangs pa dang / thams cad mkhyen pa'i ye shes dri ma med cing thogs pa med pa thob par bya'o/ de ltar na go rims dang grangs kyi dgongs pa dang / byang chub chen po dang mthun pa yang dngos dang zhar la bshad pa yin te/ go rims ni 'di kho na yin la grangs kyang bcu kho na ste/ mi nyung mi mang ngo / /'bras bu bye brag med par 'gyur ba'i phyir nyan thos kyi lam nyid sangs rgyas kyi lam nyid du mi rung ngo //byang chub sems dpa'i dbang du byas nas nyan thos kyi theg pa las ni gang du yang sangs rgyas kyi lam bstan pa med do/ /sangs rgyas ni nyan thos las khyad par du ma 'phags par yang mi 'dod de/ ston pa dang slob mar rnam par gzhag pa med par 'gyur ba'i phyir ro/ /de bas na lam gyi khyad par nye bar bstan pa 'ga' zhig bshad dgos te/de ni theg pa chen po 'di las gzhan du mi 'thad do/ /de lta bas na byang chub chen po kun du sgrub par byed pa'i phyir theg pa chen po ni sangs rgyas kyi gsung nyid du mngon te/ sangs rgyas kyi las ni sangs rgyas ma yin pas bshad par mi nus so//bstan pa 'dir ni theg pa chen po thams cad yongs su rdzogs pa yin no zhes bya ba ni 'dod pa med pa'i phyir te/ rgyu dang 'bras bu khyad par du 'phags pa'i rnam pa thams cad bshad pa'i phyir ro/ /de'i phyir 'di ni theg pa chen po bsdus pa ste/ ji snyed dang ji lta ba bzhin du khyad par dang bcas par bstan pa'i phyir ro/ /thog ma med pa'i dus kyi dbyings/ /zhes bya ba la sogs pa ni dang po'i mu med pas na thog ma med pa'i dus so/ /dbyings ni rgyu ste sa bon no/ /gang dag gi zhe na/ kun nas nyon mongs pa'i chos thams cad kyi'o//rnam par byang ba rnams kyi ni ma yin te/ 'di ltar 'og nas mang du thos pas bsgos pa'i gnas kun gzhi rnam par shes pas bsdus pa ma yin la/ kun gzhi rnam par shes pa ltar tshul bzhin yid la byed pas bsdus pa'i chos rnams kyi sa bon gang yod pa'o zhes 'byung ngo //rten yin pa'i phyir chos rnams kun gyi gnas yin te/ rgyu yin pa'i phyir ni ma yin no/ /rten gyi don ni gnas kyi don te/ rgyu'i don ni ma yin pas gnas logs shig tu smos so/ /gzhan du na ni dbyings kyi sgra nyid kyis chog par 'gyur ro/ /de yod pas na 'gro kun dang //mya ngan 'das pa'ang thob par 'gyur/ /zhes bya ba ni ji ltar gtan la dbab pa'i gnas su 'og nas bshad pa lta bu ste/ skye ba kun nas nyon mongs pa ni kun gzhi rnam par shes pa med na sems can dmyal ba la sogs par mi 'byung ngo zhes bya ba la sogs pa dang / skye ba la sogs pa'i kun nas nyon mongs pa log pa ni mya ngan las 'das pa ste/ de'i phyir de thob pa yang kun gzhi rnam par shes pa med na mi rung ngo zhes bya ba'o/ /yang zhal nas gsungs pas kun gzhi rnam par shes pa sgrub ste/ chos kun sa bon thams cad pa'i/ /rnam par shes pa kun gzhi ste//zhes bya ba la sogs pa'o/ /skye ba can zhes bya ba ni 'dus byas rnams so/ /kun nas nyon mongs pa'i chos thams cad ces bya ba ni rnam par byang ba'i chos rnams las rnam par dbye ba'o/ /rnam par byang ba'i chos rnams ni rang bzhin gyi kun nas nyon mongs pa can nyon mongs pa thams cad kyi bang ba dang mdzod lta bur gyur pa mi mthun pa'i phyogs la 'bras bu'i dngos por sbyor ba ma yin te/de'i gnyen po yin pa'i phyir ro/ /mi mthun pa dag ni rgyu dang 'bras bu'i dngos por mi rung ngo / /gang na mi mthun pa'i phyogs yod pa de na gnyen po yod pa'i phyir gnas ni yin no/ rgyu dang 'bras bu'i dngos po'i don ni kun gzhi'i don no/ /lhan cig 'jug pa'i don ni gnas kyi don te/ sman nad med kyi thigs pa dug gi bum pa dang lhan cig gnas pa ni dug gi rgyu las 'byung bar mi rung ngo / /der zhes bya ba ni bag chags kyi gnas ston te/ bag chags tsam ni kun gzhi rnam par shes pa ma yin gyi/bag chags kyi gnas dang bcas pa la bya ste/ dper na gzhan dag gi yid kyi rnam par shes pa lta bu'o/ /sbyor ba zhes bya ba ni/ mngon du khyad par bag chags bsgo/ /zhes bya ba'i tha tshig go/ /yang na sems can dag de'i bdag nyid du sbyor ba zhes bya ba ni yongs su 'dzin zhes bya ba'i tha tshig go//ji ltar chen po la sogs pa gsal ba dag gtso bo la mi gsal ba'i bdag nyid du sbyor ba ltar chos thams cad kun gzhi rnam par shes pa la de lta ni ma yin no zhes bye brag tu dbye ba'i phyir/ sa bon thams cad pa zhes bya ba smos te/sa bon thams cad dang lhan cig 'byung ba dang 'gag pa'i phyir ro/ /sten pa'i tshul gyis kun gzhi dang 'jug pa'i rnam par shes pa phan tshun du sbyor te/ gtso bo nyid gsal ba'ang yin la bdag gi ngo bo yang yin zhes bya ba de ni 'gal lo/ /dam pa dag la zhes bya ba ni byang chub sems dpa' khyad par can rnams la bshad pa ste/'os yin pa'i phyir ro/ /'os ma yin pas gzhan dag la ni ma bshad do/ /de ni len pa'i rnam par shes pa zhes kyang bya ste zhes bya ba ni lung gzhan gyis kun gzhi rnam par shes pa'i rnam par shes pa'i rnam grangs su rnam par 'jog pas grags pa ston to//len pa'i rnam par shes pa zab cing phra/ /zhes bya ba la sogs pa la zab pa ni 'jig rten pa'i mkhas pa'i blos kyang gting dpag dka' ba'i phyir ro/ /phra ba ni nyan thos rnams kyis kyang shes par dka' ba'i phyir ro/ /de'i phyir de dag shes bya phra ba thams cad shes pa'i skabs ma yin pas nyan thos rnams la ma bshad do//chu bo zhes bya ba ni skad cig gcig nas gcig tu brgyud pas rgyud mi 'chad pa'i phyir te/ chu'i chu bo bzhin no/ /ji srid 'khor gyi bar du rnam pa gzhan du 'gyur ba med pas 'di la bdag tu yongs su sems par gyur na mi rung zhes byis pa bdag tu lta ba de dag la ma bstan to//dbang po gzugs can thams cad kyi rgyu yin pa zhes bya ba la sogs pa ni sgra 'jug pa'i rgyur ston to/ /'dis tshe ji srid par rjes su 'jug gi bar du grub pa dang bde ba gcig pas dbang po gzugs can thams cad len pas len pa'i rnam par shes pa zhes bya'o//gzhan du na ni shi ba'i ro bzhin du 'jig par 'gyur ro/ /lus kun te/ lus thams cad nye bar len pa'i gnas su 'gyur ba'i phyir ro zhes bya ba ni dbang po gzugs can rnams ma byung ba dang / gzugs med par yang lus mngon par 'grub pa ste/nying mtshams sbyor ba'o/ /de sprel ba ni yongs su 'dzin pa'o/ /de mngon par 'grub pa nye bar 'dzin pa'i phyir khu chu dang khrag gi nang du brgyal ba na kun gzhi rnam par shes pas lus mtha' dag bzung ba yin te/ lus mtha' dag gi bag chags bsgos pa'i phyir yongs su bzung ba yin no/ / de ni sems zhes kyang bya ste/ zhes bya ba ni rnam grangs rnam par gzhag pa nyid du lung gzhan gyis ston par byed do/ /gnyis pa nyon mongs pa can gyi yid ces bya ba ni 'jig tshogs la lta ba la sogs pa nyon mongs pa bzhi po dag dang mtshungs par ldan pa'i phyir ro/ /de la 'jig tshogs la lta ba ni bdag dang bdag gis mngon par zhen pa'o//de'i dbang gis nga'o snyam pa'i nga rgyal te/ nga'o bdag go snyam du khengs so/ /de gnyis yod na bdag la chags pa 'byung ste/ bdag la dga'o/ /de gsum gyi rgyu ni ma rig pa ste/ mi shes pa rig pa'i mi mthun pa'i phyogs so/ /de ni rnam par shes pa kun nas nyon mongs pa'i gnas yin te/mnyam par gzhag pa dang / mnyam par ma bzhag pa dang / dge ba la sogs pa'i gnas skabs su'am/ 'gal ba med par kun du 'byung ba'i phyir ro/ /gzhan du na ni dge ba'i sems la nga'o snyam du ji ltar 'gyur/ gnas gcig pos ni skyed ces bya ba ni 'gags ma thag pa'i yid kyis so//gnyis pas ni nyon mongs pa can du byas pa ste zhes bya ba ni/ nyon mongs pa bzhi dang mtshungs par ldan pa ste/ ngar 'dzin pa la sogs pa'i kun nas nyon mongs pa ni des byas pa'i phyir ro/ /yul la rnam par rig pa'i phyir/ /zhes bya ba ni yul 'dzin par snang ba'i phyir rnam par shes pa'i sgrar grub bo//de ma thag pa dang ngar sems pa'i phyir yid ni rnam par gnyis so zhes bya ba ni/ nges pa'i tshig gi tshul gyis te/ yid ge mi mngon par byas pa'i phyir ro/ /rnam par sgrub pa dang / nges pa'i tshig gnyis kyis sgra'i don shes pa'i phyir ro//'thad pa med par gzhan la bstan par mi nus pas nyon mongs pa can gyi yid sgrub pa la rigs pa tshigs su bcad pa rnams kyis 'jog go/ /ma 'dres pa'i ma rig pa dang zhes bya ba la sogs pa la gal te nyon mongs pa can gyi yid med du zin na de med na ma rig pa ma 'dres pa yang med par 'gyur ro//ma rig pa ma 'dres pa ni de kho na la shes pa skye ba'i gags byed pa gti mug go zhes 'og nas 'chad do/ /de ni rnam par shes pa lnga po dag la mi 'byung ste/ de la gnas pa la gnyen po med pa'i phyir ro/ gang na mi mthun pa'i phyogs yod pa de na gnyen po yod par 'gyur ro//rnam par shes pa lnga ni de'i gnyen po ma yin te de dag la mthong ba'i lam mi skye ba'i phyir ro/ /nyon mongs pa can ma yin pa'i yid kyi rnam par shes pa la yang ma yin te/ nyon mongs pa'i ngo bo nyid de nyid kyis de nyon mongs pa can du 'gyur ba'i phyir ro/ /nyon mongs pa can la yang ma yin te/de las gzhan pa'i nyon mongs pa dang mtshungs par ldan pas ma 'dres par mi 'grub pa'i phyir ro/ /nyon mongs pa des yid kyi rnam par shes pa nyon mongs pa can du dam bca' na ni gtan du nyon mongs pa can du 'gyur te/ nyon mongs pa'i mtshan nyid de dang mtshungs par ldan pa'i phyir sbyin pa la sogs pa'i sems dge bar mi 'gyur ro//gang gi ltar na dge ba'i sems dang lhan cig 'byung ba'i nyon mongs pa can gyi yid yod pa de'i ltar na ni de nyid dang mtshungs par ldan par 'gyur gyi gzhan dang ni ma yin no/ /nyon mongs pa can gyi yid kyi rnam par shes pas ni de'i gnyen po mngon sum du byed par yang mi rung ste/gang gi ltar na nyon mongs pa can gyi yid dang lhan cig 'byung ba'i dge ba'i sems yod pa de'i ltar na ni des drangs pa'i gnyen po skye ba'i phyir mi mthun pa'i phyogs 'gags te rigs so/ /de ltar na'ang 'di las gzhan pa 'jig tshogs la lta ba la sogs pa'i nyon mongs pa dang mtshungs par ldan pa'i phyir ma 'dres par mi 'grub pa ma yin nam/mi mthun par bzhag pa ste/ nga ni nyon mongs pa gzhan dang mtshungs par ldan pa ma yin pa'i phyir ma 'dres pa nyid du 'dod pa ma yin gyi/'o na ji zhe na/ gzhan la med pa'i phyir te/ sangs rgyas kyi chos ma 'dres pa bco brgyad bzhin no/ /ma 'dres par mi 'grub pa'i phyir ro zhes gang smras pa de ni gzhan gyis rnam par gzhag pa la ltos nas nyes pa brjod pa'i phyir ro/ /lnga po dag dang 'dra ba zhes bya ba 'di ni sgrub pa ma yin no//'o na ci zhe na/ sun 'byin pa de/ su rnam par shes pa gang zhe na/ rnam par shes pa'i tshogs drug go zhes bya ba 'di khas len pa des ni mig la sogs pa'i rnam par shes pa lnga dang / yid kyi rnam par shes pa mthun par khas blangs pa de 'gal te/ lhan cig skyes pa'i gnas med pa'i phyir ro//gzhan gyi gzhung la ni gang lhan cig skye ba'i gnas med pa'i rnam par shes pa ci yang med do zhes so/ /kun gzhi rnam par shes pa'i lhan cig skye ba'i gnas ma yin nam zhe na/ ma yin te/ bdag po'i rkyen du brjod pas 'dod pa'i phyir ro/ /kun gzhi rnam par shes pa ni yid kyi rnam par shes pa'i rgyu'i rkyen yin no//'dir ni nyon mongs pa can gyi yid bdag po'i rkyen du brjod par 'dod do/ /gang dag snying la gnas pa'i gzugs ci yang rung ba zhig yid kyi rnam par shes pa'i lhan cig skye ba'i gnas so zhes smras pa/ de dag gi de yang rnam par rtog pa tsam du zad do//yid kyi rnam par shes pa thams cad ni thams cad du nges par rtogs pa dang / rjes su dran pa'i rnam par rtog pa gnyis kyis rnam par mi rtog pa nyid du 'gyur te/ dbang po gzugs can la brten pa mig la sogs pa'i rnam par shes pa bzhin no//snyoms par 'jug pa'i bye brag dang / /zhes bya ba ni 'du shes med pa dang / 'gog pa'i snyoms par 'jug pa'o/ /gang la nyon mongs pa can gyi yid yod pa de la ni 'du shes med pa'i snyoms par 'jug pa la de yod pa dang / 'gog pa'i snyoms par 'jug pa la ni med pa'i phyir khyad par du 'thad do//gzhan du na ni gnyi gar yang 'du shes dang tshor ba 'gog pa dang / nyon mongs pa can gyi yid kyi rnam par shes pa kun tu 'byung ba med pa'i phyir bye brag med par 'gyur ro/ /bsam gtan bzhi pa dang / srid pa'i rtse mo'i sa tha dad pa dang / nges par 'byung ba dang /zhi bar gnas par 'dod pa tha dad pa'i phyir yang tha dad par mi 'gyur ram zhe na/ ma yin te/ rang gi ngo bo tha dad pa med pa'i phyir ro/ /gnyi gar yang sems dang sems las byung ba 'gog par bye brag ci yod/ 'di ni mdo sde pa dang gtan la dbab pa ste/ de dang nye ba'i phyir ro/ /de ni mi ldan pa rnams rdzas su yod par mi 'dod na snyoms par 'jug pa rdzas tha dad par ga la 'gyur/ nges tshig med pa'i skyon du 'gyur/ /zhes bya ba la nges pa'i tshig ni nges pa'i tshig ste/ ngar sems pa'i phyir yid do zhes bya ba'i nges pa'i tshig gang yin pa 'di nyon mongs pa can gyi yid med na ji la gnas par 'gyur/rnam par shes pa drug po dag ni ngar sems pa'i phyir yid do zhes bya ba de ltar 'thad pa ma yin te 'gags zin pa'i phyir ro/ /'du shes med par skye ba'i rgyun/ /ngar 'dzin med pa'i skyon du 'gyur/ /zhes bya ba la 'du shes med pa zhes bya ba ni 'du shes med pa'i lha rnams kyi nang du sems dang sems las byung ba 'gags pa'o//der skye ba ni nying mtshams sbyor zhing sprel ba'o/ /de'i rgyun ni de phan chad rgyun du 'byung ba'o/ /gal te des nyon mongs pa can gyi yid mi 'dod na ngar 'dzin pa med pa nyid du 'gyur te/nyon mongs pa mtha' dag dang ldan pa'i skye ba'i rgyun ni ngar 'dzin pa med par ma mthong ngo / /de nyid kyi phyir de ni 'phags pas smras pa'i 'os yin no/ /skye ba'i skad cig la mngon du 'gyur ba'i yid kyi rnam par shes pa'i rten can ngar 'dzin pa'i 'phen pas ngar 'dzin pa dang bcas pa nyid do//ngar 'dzin pa ma spangs pa'i phyir rjod byed dang bcas pa la sogs pa lta bu'o zhes byar yang mi rung ste/ ngar 'dzin pa dang bcas te 'gags pa dang / rjod byed la sogs pa yang sems las gzhan du mi 'grub pa'i phyir ro/ /ngar 'dzin pa'i bag chags ni lus kyi rgyud la mi rigs te/gzugs kyi phung po la de med pa'i phyir ro/ /de lta bas na skad cig phan chad so so'i skye bo'i skye ba'i rgyun ngar 'dzin pa med pas ji skad bshad pa de rigs so/ /gang la de dang lhan cig 'byung ba'i sems ngar 'dzin pa'i gnas yod pa de la ni nyes pa med do//ngar 'dzin pa dang ldan par ni/ /rnam pa kun du mi 'thad do/ /zhes bya ba ni rnam pa thams cad du mi rung zhes bya ba'i tha tshig go/ /dge ba'i gnas skabs ni sbyin pa la sogs pa la ngar 'dzin pa dang ldan te/ nga sbyin pa byed do snyam du ngar sems pa'i phyir ro//ngar 'dzin pa dang ldan pa ni ma rig pa med na mi 'byung ngo / /ma rig pa yang sems las byung ba yin pas gnas med par mi 'byung ste/ nyon mongs pa can gyi yid ma gtogs par gnas gzhan med do/ /dge ba'i sems ni ma rig pa'i gnas su mi rung ngo / / nyon mongs pa can gyi yid med na gnyis med ces bya ba ni ma rig pa ma 'dres pa dang / lnga po dag dang 'dra ba'o/ /gsum po 'gal bar 'gyur zhes bya ba ni snyoms par 'jug pa'i bye brag dang / nges pa'i tshig dang / ngar 'dzin pa med pa'i skye ba gsum mo/ /ma rig pa ma 'dres pa sngar bstan pa de bshad de//yang dag don la 'jug pa yi/ /sems kyi gegs su rtag gyur dang / /zhes bya ba ni yang dag pa'i don mthong ba'i gags byed pa ste/ de yod na de mi 'byung ba'i phyir ro/ /dus rnams kun tu 'byung ba de/ zhes bya ba ni dge ba dang / mi dge ba dang lung du ma bstan pa'i gnas skabs su yang rjes su 'brel zhes bya ba'i tha tshig go//kun gzhi rnam par shes pa ma gtogs par sems kyi lus gsum pa mi dmigs te zhes bya ba ni ji ltar yid ces bya ba'i sgra'i lus ni 'gags ma thag pa'i rnam par shes pa yin la rnam par shes pa'i sgra'i ni rnam par shes pa drug po dag yin pa ltar sems zhes bya'i sgra'i lus gzhan ni de ltar mi dmigs so//brjod pa 'di'i lus med pa ni ma yin no/ /'di rnam grangs su gtogs pa'ang ma yin te/ yid dang rnam par shes pa'i sgra gnyis kyi brjod par bya ba tha dad pa'i phyir ro/ 'dir sgra'i lus su 'dod pa ni brjod par bya ba'o/ /de lta bas na kun gzhi rnam par shes pa ni sems zhes bya ba'i sgra'i brjod par bya ba'o/ /ji ltar zhe na/ 'jug pa'i rnam par shes pas bsdus pa'i chos kyi sa bon nus pa'i khyad par can sna tshogs rnam pa tha dad pa rnams kyis kun du bsags shing gang bar byas pa'i phyir ro zhes bya ba ni de sgor byas shing bsten nas zhes bya ba'i tha tshig ste/sems kyi sgra de la 'jug pa'i rgyur ston to/ /shes bya phra mo bsdus pa'i phyir ro zhes bya ba ni shes bya phra mo nye bar bzung ba khas blangs nas nyan thos rnams la ma bshad de/ de dag ni shes bya rags pa bsdu bas gdul ba yin pa'i phyir/ shes bya phra mo shes pa la gtogs pa med pa nyid do/ /nyan thos rnams ni shes bya thams cad shes pa la gtogs pa ma yin no zhes bya ba ni nus pa dang / don du gnyer ba dang / gtogs pa'i mtshan nyid med par ston to//de dag ni de bstan pa med par yang zhes bya ba la sogs pa ni nyan thos rnams la kun gzhi rnam par shes pa ma bstan kyang shes bya gzugs la sogs pa rags pa/ sdug bsngal dang kun 'byung ba'i bdag nyid la mi rtag pa la sogs pa'i rnam par so sor rtog pa dag nyon mongs pa rnams spangs te/de'i don du de dag bcom ldan 'das kyi drung na tshangs par spyod par gnas so/ /rags pa nyid ni gzugs ni lus can yin pa'i phyir ro/ /tshor ba la sogs pa ni dmigs pa dang rnam pa yongs su chad pa dang / rgyu rags pa'i phyir ro/ /de las bzlog pa kun gzhi rnam par shes pa ni phra ba'o//chos gcig mngon par ma shes shing yongs su ma shes na yang sdug bsngal mthar 'byin par ngas ma bshad do zhes gang gsungs pa de ni nyon mongs pa rnams las dgongs pa'o/ /ma spangs na zhes bya ba'i bye brag gi sgra dang gzhi mthun pa'i phyir te/nyon mongs pa la ma gtogs pa spang bar bya ba gzhan med pa'i phyir ro/ /yang na mi rtag pa la sogs pa spyi'i rnam par snyegs kyi/ kun gzhi rnam par shes pa nyid ces ma bzung bas nyes pa med do/ /byang chub sems dpa' rnams ni shes bya thams cad shes pa la gtogs pa yin no zhes bya ba ni rigs kyi mthus nus pa dang /don du gnyer ba dang / gtogs pa'i mtshan nyid dang ldan pa'i phyir/ thams cad shes par bya bar gtogs so/ /gzhan du na ni gzhan gyi don byed mi nus pa'i phyir ro/ /gzhan dag gi bsam pa dang /bag la nyal dang / khams dang / dbang po mchog dang / mchog ma yin pa dang / skal pa yod pa dang / skal ba med pa dang / dus dang dus ma yin pa mi shes pa thams cad mkhyen pa ma yin pas gzhan gyi don mtha' dag byed mi nus pa'i phyir de don du gnyer ba'i byang chub sems dpa' rnams la kun gzhi rnam par shes pa bshad do//de shes pa med par ni thams cad mkhyen pa'i ye shes thob par sla ba ma yin no zhes bya ba ni kun gzhi rnam par shes pa yongs su shes pa med par don du yongs su rtogs pa spong bar mi 'gyur te/ de ma spangs na yongs su brtag par bya ba'i don yod pa'i phyir rnam par mi rtog pa'i ye shes med do//de'i phyir shes bya thams cad kyi spyi'i mtshan nyid mngon sum du ma byas pas thams cad mkhyen pa'i ye shes thob par sla ba ma yin no/ /rnam par rtog pa dang bcas pa'i shes pas yongs su brtag par bya ba'i don gcig las gcig bzlog pa'i rang gi mtshan nyid ma rtogs na ni mtha' yas pa'i phyir thams cad rtogs par mi nus so//gal te 'di dag kun gzhi rnam par shes pa 'di nyid brjod pa'i bag chags yongs su 'gyur ba'i dbang gis don dang / sems can dang / bdag dang /rnam par rig par snang ba 'byung bar shes na de'i tshe gzung ba'i don med par rtogs nas 'dzin pa yang med par rigs pas khong du chud nas rnam par mi rtog pa'i ye shes 'thob bo/ /de'i rjes la thams cad kyi spyi'i mtshan nyid de bzhin nyid goms par byed cing de dang chos thams cad ro gcig par shes te/mtha' yas pa med pa'i phyir thams cad mkhyen pa'i ye shes thob par sla ba yin no/ /dmigs pa dag pa la ma gtogs par shes pa dag pa'i thabs gzhan med do/ /de ltar na skad cig gcig dang ldan pa'i shes rab kyis chos thams cad shes so zhes gsungs so//yang smras pa/ brtags pa'i chos la rnam rtog pa/ /shes bya kun la ma spangs na/ /thams cad mkhyen pa nyid med de/ /de phyir chos la bdag med bstan/ /zhe'o/ /lung gi tshul 'di mi mngon par mi shes pa dag ni/ dper na rgyun gyis nus pa'i phyir//mes ni thams cad sreg 'dod ltar/ /de bzhin thams cad mkhyen 'dod kyi/ /cig car thams cad rig phyir min/ /zhes smra'o/ /de lta bas na kun gzhi rnam par shes pa dang / ma shes pas thams cad mkhyen pa'i ye shes 'thob par bslab dang dka' bar 'gyur ro zhes gtso bo kho nar brjod do//chos thams cad bdag med pa'o zhes bya ba thams cad mkhyen pa ma yin nam zhe na/ thams cad mkhyen pa ni yin mod kyi/ rnam pa thams cad mkhyen pa ni ma yin no/ /yang rnam grangs kyis kun gzhi rnam par shes pa nyan thos kyi theg par yang bstan te zhes bya ba ni sde pa gzhan la grags par nye bar 'god pas kun gzhi rnam par shes pa'i lam po che btod pa nyid du mjug sdud par skabs sbyor ba'o//de bzhin gshegs pa byung na phan yon bzhi yod do zhes mdo gang las gsungs pa de ni/ de bzhin gshegs pa byung ba'i phan yon rnam pa bzhi'i mdo de las 'di gsungs so//skye dgu kun gzhi la kun tu dga' ba zhes bya ba la sogs pa la/ kun gzhi la brten nas dga' bas de ltar gyi dus na kun gzhi la kun du dga'o/ /ji lta zhe na/ 'di ltar kun gzhi las yang dag par byung ba zhes bya ba ni 'das pa'i dus te de las byung ba'i phyir ro/ / 'di ltar yang 'di ni ma 'ongs pa na mngon par dga' ba'i ngang tshul can te/ de 'dod pa la gzhol ba'i phyir ro/ /de lta bas na kun gzhi la mngon par dga' ba can zhes bya ba'o/ /kun gzhi spangs pa'i phyir zhes bya ba ni legs par gzhom pa'i phyir ro/ /nyan 'dod ces bya ba ni nyan par 'dod pa'o//rnam par gtod ces bya ba ni smon lam btab nas thos pa las byung ba'i shes pas nyan pa'o/ /kun shes par byed par sems nye bar 'jog ces bya ba ni bsams pa las byung ba'i shes pas don gtan la 'bebs pa'i phyir ro/ /chos kyi rjes su mthun pa'i chos sgrub ces bya ba ni bsgoms pa las byung ba 'jig rten las 'das pas so//lam gyi bden pa ni bstan pa'i chos kyi rjes su mthun pa'i chos te nan tan du bya ba yin pa'i phyir ro/ /de sgrub pa ni rang gi sems kyi rgyud la 'jog pa'i phyir ro/ /dge 'dun phal chen sde'i lung las kyang zhes byas ba 'dis kyang lam po che btod par sgrub bo//rtsa ba'i rnam par shes pa zhes bya ba ni rnam par shes pa gzhan dag gi rgyu yin pa'i phyir te/ dper na shing gi rtsa ba ni sdong bu la sogs pa'i rgyu yin pa lta bu'o/ /sa ston sde'i lung las kyang zhes bya ba ni de dag gi lung gi phung po rnam pa gsum la skad cig pa ni gang dag skad cig re re la skye ba dang 'gag pa'o//de'i tshe rabs pa ni gang dag 'chi ba la thug gi bar du rjes su 'brang ba'o/ /'khor ba ji srid pa ni gang dag rdo rje lta bu'i ting nge 'dzin ma thob kyi bar du rjes su 'brang ba'o/ /de dag kyang kun gzhi rnam par shes pa las gzhan mi srid pas kun gzhi rnam par shes pa de nyid ming gzhan gyis bstan pa ste/ji skad bstan pa'i phung po rnams ni ji srid 'khor bar yod pa ma yin pa'i phyir ro/ /ji lta zhe na/ la lar res 'ga' zhes bya ba la sogs pa smos te/ gzhi dang dus bstan to/ /de la gzugs med par ni gzugs rgyun chad do/ / 'du shes med pa dang / de'i snyoms par 'jug pa la ni sems kyi rgyun chad do/ /kun gzhi rnam par shes pa la ni gnyen po skyes kyi bar du gzugs dang sems kyi sa bon gyi rgyun mi 'chad do/ /'phags pa gnas brtan pa rnams kyi lung las ni srid pa'i yan lag gi sgrar gsungs te/ srid pa'i rgyu yin pa'i phyir ro//rnam par phye ste smra ba'i lung las kyang de skad du 'byung ngo / /lta ba la sogs pa drug ni mig la sogs pa'i rnam par shes pa nas/ yid la sogs pa'i bar du ci rigs su sbyar ro/ /gang zhig kun gzhi rnam par shes pa la zhes dang ba ni rnam par shes pa'i cha bdun dang ldan pa'i phreng ba lta bar byed pa nas dngos po yongs su gcod pa'i bar ro zhes smra ba de'i lan rigs pa thigs pa'i nang du blta bar bya'o//lam bo che btod pa yin no zhes bya ba ni sde pa gzhan gyi lung du ma las grags pas kun gzhi rnam par shes pa'i lam du dong ba dang rjes su dong ba nyid ston to//kha cig 'di snyam du zhes bya ba ni log par rtogs pa ston te/ sems dang yid dang rnam par shes pa ni don gcig ces bya ba la sogs pa ji skad bshad pa lta bu'o/ /de yang mi 'thad de zhes bya ba ni rigs pa ma yin no zhes bya ba'i tha tshig go/ /yid rnam par shes pa gnyis don tha dad par dmigs pa'i phyir ro//zhes bya ba ni rjod pa dang brjod par bya ba'i rang bzhin can gyi sgra gnyis dang don gnyis tha dang ba'i phyir te/ rnam par shes pa drug po 'das ma thag pa ni yid do/ /yul so sor rna par rig pa ni rnam par shes pa'o zhes 'byung bas yid dang rnam par shes pa gnyis don tha dad do//de bzhin du sems kyi don gyis kyang tha dad du dbye bar bya'o/ /yang kha cig ni zhes bya ba ni kun gzhi la kun du dga' ba la sogs pa don gzhan du rtogs te/ de smras pa/ nye bar len pa'i phung po lnga po dag ni kun gzhi zhes bya'o zhes bya ba ste/de dag la bdag nyid du 'dzin pa'i phyir ro/ /'jig tshogs la lta ba kun gzhi'o zhes bya ba ni des de dag la bdag nyid du 'dzin pa'i phyir ro/ /bde ba'i tshor ba 'dod chags dang bcas pa ni kun gzhi'o zhes bya ba ni/ 'dod chags dang tshor ba lhan cig spyod pa'i spyi ni kun gzhi nyid de/'dod chags rgyas par 'gyur ba'i phyir ro/ /yang na so so la bya ste/ chags pa dang de'i gnas yin pa'i phyir ro/ /de dag ni kun gzhi rnam par shes pa la rmongs pa rnams so/ /ji lta zhe na/ lung dang rtogs pas de snyam du sems so zhes bya ba smos pa ste/ nye bar bstan pa dang /nyes par khong du chud pa'i phyir ro/ /yang na yid ches pa'i lung med pa dang / rang gis kyang khong du ma chud pa'i phyir ro/ /nyan thos kyi theg pa rnam par gzhag pa'i tshul du na yang de dag gi rnam par gzhag pa de mi rung ba med mod kyi zhes bya ba ni smad pa ste/ rang gi lo rgyus kyi lugs kyis na de thams cad kyi thams cad du rung bar bstan to/ /de la ma rmongs pa rnams kyi kun gzhi rnam par gzhag pa de kun gzhi rnam par shes pa yin par yongs su bzung nas rnam par 'jog pa ni ches bzang ngo zhes bya ba ni smad par rnam par 'grel te/ de'i bshad pa'i rnam par rtog pa'i nyes pa brjod pa'i phyir ro//'di ltar nye bar len pa'i phung po lnga po dag ni shin tu sdug bsngal ba'i ngan 'gro rnams su skyes pa dag dang mi mthun pa ma yin no zhes bya ba la ngan 'gro ni sems can dmyal ba dang / dud 'gro dang / yi dags rnams so/ /de dag ni rtag par shin tu sdug bsngal ba nyid du bye brag med de/de dag la res 'ga' yang bde ba med do/ /mi mthun pa zhes bya ba ni mi 'dod pa'o/ /'dod pa med pa'i don la ni su yang mi sbyor te/ sbyor ba'i don dang mi ldan pa'i phyir ro/ /de dag ni de dang 'bral ba nyid du 'dod do zhes bya bas ni de ston te/ sdug bsngal gyi phung po 'di dag med kyang ci ma rung snyam du sdug bsngal gyi phung po dang bral bar 'dod ces bya ba'i tha tshig go/ /gang dag dang 'bral bar 'dod pa de dag la sbyor bar mi rung ste/ 'gal ba'i phyir ro/ /bde ba'i tshor ba 'dod chags dang bcas pa yang bsam gtan bzhi pa yan chad gong ma gzugs med pa rnams dang mi mthun pa yin te/yid 'byung ba'i rgyu yin pas rnam par sun 'byin pa'i phyir ro/ /de dang ldan pa'i sems can rnams/ /zhes bya ba ni bsam gtan bzhi pa thob pa rnams so/ /de lta bas na der yang de la de dag sbyor bar mi rigs te med pa'i phyir ro/ /'jigs tshogs la lta ba yang chos 'di la bdag med pa la mos pa dag dang mi mthun pa yin te zhes bya ba ni spang bar bya ba'i phyir ro//mos pa smos pa ni bdag med pa mthong ba rnams la de med pa'i phyir ro/ /de la yang de dag sbyor ba mi rigs so zhes bya ba ni spong bar 'dod pa dang / spong ba'i phyir ro/ /de ltar gzhan gyi lugs rnams la skyon brjod nas de rang gi phyogs la gsal zhing yon tan phul du phyin pa brjod par 'dod nas kun gzhi rnam par shes pa la nang gi bdag gi dngos po khas blangs pa ni zhes bya ba smos te/ni zhes bya ba'i sgra ni gzhan gyis smras pa'i khyad par bzlog pa'i don te/ nang du bdag gi dngos por khas blangs pa ni nang gi bdag gi dngos por khas blangs pa'o//de bas na shin tu sdug bsngal ba sems can dmyal ba la sogs pa'i 'gro ba rnams su skyes pa sdug bsngal gyi phung po rnam par zhig par 'dod pa la gzhol yang kun gzhi rnam par shes pa de la bdag tu chags pa'i zhags pas bcings pa rnams de rnam par zhig par 'dod par ni nam yang mi 'gyur te/tshor ba btang snyoms dang mtshungs par ldan pas mi mthun pa med pa'i phyir ro/ /'di ltar de dag ni rtag tu sdug bsngal ba'i phung po 'di dag med kyang ci ma rung snyam du smon gyi bdag med kyang ci ma rung snyam du ni ma yin te/bdag tu lta ba'i gnyen po med pa'i phyir ro/ /'gro ba gzhan la brten pa'i phung po rnams la de dag gi 'dod pa gang yin pa de'ang kun gzhi rnam par shes pa'i dbang gis 'gyur gyi/ yid kyi rnam par shes pa la de ltar bdag tu chags par ni mi rung ste/ de ni ngan 'gror sdug bsngal gyi tshor ba dang mtshungs par ldan pa'i phyir ro//de nyid kyi phyir 'gro ba gzhan du yang de la 'dod par ni mi rung ngo / /bsam gtan bzhi pa yan chad gzugs med par skyes pa rnams 'dod chags dang bcas pa'i bde ba dang mi mthun du zin kyang bdag tu chags pas bcings pa ni bdag tu chags pas gzhan gyi dbang gis kun gzhi rnam par shes pa kho na la 'jug gi yid kyi rnam par shes pa la ni ma yin te/'di ltar gnyen po ma byung gi bar du kun gzhi rnam par shes pa ni 'gyur ba med par 'jug gi/ yid kyi rnam par shes pa ni ma yin te/ 'du shes med pa'i snyoms par 'jug pa dang /'du shes med pa dang / 'gog pa'i snyoms par 'jug pa rnams su rgyun chad med pa'i phyir ro/ /yid kyi rnam par shes pa tshor ba med pa ni gnyi ga la yang grub pa med do/ /de bzhin du chos 'di pa kun brtags pa'i bdag tu lta ba dang mi mthun du zin kyang kun gzhi rnam par shes pa la bdag tu chags pa dang rjes su 'brel ba lhan cig tu skyes pa ni yod pa nyid de/glo bur du sgra chen po thos nas skrag pa skye ba'i phyir ro/ /chags pa de phung po dag nyid la ci'i phyir mi 'dod ce na/ 'di ltar de dag la de 'byung ba yang kun gzhi rnam par shes pa nyid las 'byung ngo //phung po bzhi po de dmigs pa dang rnam par yongs su chad pa dag ni 'du shes med pa dang / 'du shes med pa'i snyoms par 'jug pa la brten pa ma yin pa'i phyir ro/ /gal te de ltar na dgra bcom pa la yang 'byung ngo zhe na/bdag tu lta ba dang mi mthun du zin kyang zhes brjod kyi/ de spangs su zin kyang zhes brjod pa ni ma yin te/ dgra bcom pas ni de spangs pas nyes pa med do/ /yang na dgra bcom pa la ni de log pas kun gzhi rnam par shes pa la de chags pa med do/ /de lta bas na kun gzhi rnam par shes pa kun gzhi nyid du ches legs par rnam par gzhag pa grub po zhes bya ba ni gtan la phab nas mjug sdud pa'o//chos legs par zhes bya ba ni nyes pa med pa dang yon tan phul du byung ba'i phyir ro/ /de ltar rnam grangs rnam par bzhag nas ming tsam gyis rang bzhin yongs su rtogs pa'i phyir mtshan nyid rnam par 'jog ste/rang dang 'brel pa can gyi mtshan nyid kyis rtogs par byed do/ /de ni mdor bsdu na rnam pa gsum ste zhes bya ba ni rgyu dang 'bras bu tha dad pa'i phyir 'brel pa can gyi mtshan nyid phye bas so/ /rang gi mtshan nyid kyi dbang du byas te/ gang kun nas nyon mongs pa'i chos thams cad kyi bag chags la brten nas sa bon yongs su 'dzin pa dang ldan pas de skye ba'i rgyu mtshan nyid do zhes bya ba smos so/ /'dod chags la sogs pa kun nas nyon mongs pa'i chos thams cad dang lhan cig 'byung ba dang / 'gag pa yang dang yang myong nas skye bar 'dod pa de dag gi skye ba la rgyu'i dngos po yin no//sa bon yongs su 'dzin pa dang ldan pas zhes bya ba ni sa bon yongs su 'dzin pa dang ldan pa'i phyir zhes bya ba'i tha tshig go/ /de la sa bon yongs su 'dzin pa dang ldan pa 'di ni gang skye ba can rnams dang lhan cig byung ba dang 'gag pa myong ba ste/de lta bur gyur pa ni bag chags zhes bya ba sa bon yongs su 'dzin par rung ngo / /de dang ldan pa'i phyir yang de dag gi rgyur 'gyur ro/ /gtso bo la sogs pa ni ma yin te/ ji skad du bshad pa'i sa bon yongs su 'dzin pa dang mi ldan pa'i phyir ro/ /de ma thag pa la sogs pa'i rkyen rnams kyang ma yin te/de dag ni phan 'dogs pa yin gyi rgyu ma yin te/ gtso bo'i rgyu'i sa bon yongs su 'dzin pa dang mi ldan pa'i phyir ro/ /gtso bo'i rgyu ni sa bon te/ de yongs su 'dzin par byed pas kun gzhi rnam par shes pa ni rgyu mtshan yin gyi/phan 'dogs par byed pa ni ma yin no/ /rgyu'i mtshan nyid smos pas de skye ba'i rgyu mtshan nyid 'brel ba can gyi mtshan nyid ma yin nam zhe na ma yin te/ dngos po'i rkyen gyis byed pa'i nus pa ma byung ba rgyu mtshan tsam du brjod pa'i phyir ro/ /rgyu nyid ni byed pa'i nus pa nyid byung ba yin gyi/rgyu mtshan tsam nyid ni ma yin te/ kun gzhi rnam par shes pa sa bon thams cad pa de kun nas nyon mongs pa'i chos de dag nyid kyi rgyu nyid du dus thams cad du nye bar gnas pa yin no zhes 'byung ba'i phyir ro/ /'bras bu nyid kyi mtshan nyid ni de nyid kyi las kyi nus pa nyid du byung ba ste/gang 'jug pa'i rnam par shes pas bsdus pa'i 'dod chags la sogs pa kun nas nyon mongs pa'i chos kun du 'byung ba de dag gis bag chags skyed par byed pa de ni kun gzhi rnam par shes pa 'bras bu'i mtshan nyid de/ phan tshun rgyu dang 'bras bur byed pa'i phyir ro/ / 'og nas kyang / chos rnams brjod pa'i bag chags las/ /byung ste de dag nyid las de/ /zhes bya ba la sogs pa 'byung ngo / /bag chags zhes bya ba 'di ci zhig ces bya ba ni bag chags kyi rang bzhin gtan la dbab pa'i phyir 'dri bar byed pa'o/ /chos de dag lhan cig 'byung ba dang 'gags pa la brten nas de 'byung ba'i rgyu mtshan nyid gang yin pa de ni brjod par bya ba ste zhes bya ba ni bag chags sgo bar byed pa de dag dang lhan cig dus gcig tu skye ba dang 'gag pa yun ring du rnyed nas bag chags sgo bar byed pa de dag nye bar ma gyur kyang skye bar 'gyur ba'i rgyu mtshan nyid ni bag chags bsgo bar bya ba yin te/nyid ces bya ba ni bag chags bsgo bar bya ba dang sgo bar byed pa las bag chags logs shig tu phyung ba lta bur dngos po'i rkyen gyis ston to/ /dper na til dag la me tog gis bsgos na til dang me tog lhan cig 'byung zhing 'gags kyang til rnams de'i dri gzhan 'byung ba'i rgyu mtshan nyid du 'byung ba zhes bya ba ni grags pa'i dpe dper brjod pa'o//dper na til rnams sna ma'i me tog la sogs pa dang lhan cig tu yun ring du skye ba dang 'gag pa rnyed par gyur nas me tog bsal kyang de'i dri 'byung ba'i rgyu mtshan nyid yin pa dang / dper na 'dod chags la sogs pa la spyod pa rnams kyi 'dod chags la sogs pa'i bag chags lhan cig 'byung ba rnams dang 'gag pa'i rgyu las byung ba rnams dang / mang du thos pa rnams kyi mang du thos pa'i bag chags kyang thos pa dang lhan cig 'byung ba dang 'gag pa las 'byung ste/ des chos 'dzin pa'i blo dang sgra dag byas pa ltar kun gzhi rnam par shes pa la yang tshul de bzhin du blta bar bya'o zhes bya ba ni/ gzhan la grags pa la ltos nas kun gzhi'i rnam par shes pa nyid kyis kun gzhi rnam par shes pa nyid ston to/ /dper brjod pa mang po 'jig rten dang bstan bcos la ltos pa dang /phyi dang nang tha dad pa'i phyir ro/ /kun gzhi rnam par shes pa dang sa bon de dag gi rdzas de dag tha dad dam/ 'on te tha dad pa med par gnas zhes bya ba ni nyis 'geg tu gzhug par rtogs pa snying la bzhag ste/ gnyi ga la skyon gdags par 'dod nas dri ba'o//gal te so so na ni des na dge ba dang / mi dge ba dang / lung du ma bstan pa bag chags sgo bar byed pa'i chos de dag ji lta ba de bzhin du de dag gi bag chags kyang tha dad pa'i phyogs su 'gyur ba'i skyon du 'gyur ro/ /ji ste tha dad pa ma yin na ni de dag tha dad pa ma yin pa de nyid mi 'thad de/rgyu dang 'bras bu tha dad pa'i phyir ro/ /de dag dang rdzas su na tha dad pa yang ma yin tha mi dad pa yang ma yin mod kyi zhes bya ba ni tha dad pa dang tha dad pa ma yin pa las yang dag par 'das pa'i tshul gyis kun gzhi rnam par shes pa la bag chags rnams gnas par brjod de/nus pa'i khyad par gyi rang bzhin gyi phyir ro/ /bag chags zhes bya ba ni nus pa'i khyad par te/ nus pa yang nus pa can dang de nyid dam gzhan zhes brjod par bya ba ma yin no/ /de dag dang phan tshun tha dad dam tha dad pa ma yin zhes 'dri ba ni tshul bzhin ma yin pa ste/nus pa can rgyur byas nas btags pa'i phyir ro/ /mdo sde pa'i ltar na don gyi rnam par 'dzin pa'i blo 'byung ba dang / rnam pa rnams phan tshun tha dad pa dang tha dad pa ma yin par bsam pa'i skabs mi rnyed de/ de gnyi ga yang nyes par 'gyur ba'i phyir ro/ /ji lta zhe na shing rnams zhes bya ba'i blo de ni gcig yin la rnam pa ni mang ste/rnam pa rnams re zhig gcig pa nyid ni ma yin te/ mang po nyid du rang rang gis rig pa'i phyir ro/ /du ma nyid kyang ma yin te/ cig car shes pa du ma mi 'byung ba dang / rnam par shes pa'i de kho na gcig las mi 'da' ba'i phyir ro//de bzhin du kun gzhi rnam par shes pa la gnas pa'i bag chags rnams kyang tha dad pa dang / tha dad pa ma yin pa las yang dag par 'das par khong du chud par bya'o/ /kun gzhi rnam par shes pa dang kun nas nyon mongs pa'i chos de dang dus mnyam du gcig gi rgyu nyid du gcig 'gyur bas ji ltar lta zhe na zhes bya ba ni gcig la gcig rgyu dang ldan par mi srid pa'i phyir ro//dper na mar me 'bar ba zhes bya ba ni rigs pas shes par byed do/ /shing tshig na me lce 'byung ste de'i yan lag tshig pa med par med pa'i phyir ro//des na ji ltar snying po tshig pa dang me lce 'byung ba dus gcig pa lta bu ste dus tha dad pa med pa'i phyir ro/ /gal te sngar tshig la phyis me lce 'byung na ni rgyu med pa las 'byung ba'i tshig pa de lta bu me lce yang gang las 'byung bar 'gyur/ ji ste sngar me lce 'byung ba phyis tshig na rgyu med pa las byung ba'i me lce ji lta bu tshig pa yang ji lta bu ste gnyi ga med par 'gyur ro//de lta bas na ji ltar mar me'i me lce 'byung ba dang / snying po tshig pa dag dus gcig pa de bzhin du kun gzhi rnam par shes pa dang 'jug pa'i rnam par shes pa yang dus gcig kho nar phan tshun gcig la gcig rgyu dang 'bras bu'i dngos por 'gyur ro//mdung khyim gcig la gcig brten pa yang de bzhin no/ /de ltar rgyu'i rkyen du rnam par gzhag sde zhes bya ba ni sa bon yongs su 'dzin pa dang ldan pa ji skad bshad pa ltar de gzhan du ma yin no//rgyu'i rkyen gzhan mi dmigs pa'i phyir ro zhes bya ba ni 'di skad du bstan par 'gyur te/ gang dag gis rgyu lnga ni rgyu'i rkyen to zhes smra ba de dag kyang rnam grangs kyis kun gzhi rnam par shes pa nyid du smra'o/ /bag chags bskyed pa med par ni skal ba mnyam pa dang / kun du 'gro ba dang rnam par smin pa'i rgyu 'das pa rnams rgyu nyid du mi rung ba'i phyir ro//bag chags rnams kyang kun gzhi rnam par shes pa las gzhan na med pa'i phyir ro/ /'dron po'i dpes ni mtshungs par ldan pa'i rgyu la yang sems dang sems las byung ba phan tshun ltos nas yul la spyod pa rnams kyi rang gi nus pa yod do//kun gzhi rnam par shes pa la brten pa'i sa bon med par ni nus pa mi 'thad do/ /lhan cig 'byung ba'i rgyu nyid ni btags pa pa ste/ dus gcig tu 'byung ba rnams la rgyu dang 'bras bu'i dngos po mi rung ba'i phyir ro/ /kun gzhi rnam par shes pa phyi dang nang gi sa bon thams cad pa yin pa'i yang phyir te/de la ma gtogs par rgyu'i rkyen gzhan mi dmigs so/ /bag chags tha dad pa ma yin zhing sna tshogs ma yin pa chos tha dad pa sna tshogs dag gi rgyur ji ltar rung zhe na zhes bya ba ni rigs pa med par rgol ba'o/ / dper na tshi gu'i rtsi sna tshogs kyis bsgyur ba zhes bya ba ni 'thad par smras pa'o/ /tshi gu'i rtsi ni tshon gyi bye brag ste/ sna tshogs su mi snang ba dag go/ /'bras bu mngon par 'grub pa nyid tshon gyi snod yin pas 'bras bu mngon par 'grub pa'i tshon gyi snod do/ /der bcug pa ni rkyen gyis yongs su zin pa'i phyir ro//ras lta bu ni kun gzhi rnam par shes pa ste/ tshon lta bu'i chos sna tshogs kun du ston pa'i phyir ro/ /theg pa chen po la phra ba zhes bya ba ni 'jig rten pa rnams kyis shes par dka' ba'i phyir ro/ /mchog tu zab pa zhes bya ba ni nyan thos la sogs pas gting dpag dka' ba'i phyir ro//rten cing 'brel par 'byung ba zhes bya ba ni rgyu las rgyu dang ldan pa 'byung zhes bya ba'i tha tshig go/ /ngo bo nyid rnam par 'byed pa can zhes bya ba la rang gi ngo bo nyid ni ngo bo nyid do/ /rnam par 'byed par byed pa ni rnam par 'byed pa'o//rnam par 'byed par nus pa'am/ rnam par 'byed par dgos pa ni rnam par 'byed pa can te/ kun gzhi rnam par shes pas kun nas nyon mongs pa'i chos kyi rang bzhin skye ba can thams cad rnam par 'byed par byed pa'i phyir ro/ /sdug pa dang mi sdug pa rnam par 'byed pa can zhes bya ba ni bde 'gro dang ngan 'gro dang /'dod pa dang / mi 'dod pa'i lus sna tshogs 'grub pa la gtso bo'i rkyen gyis rab tu phye ba'i ma rig pa la sogs pa'i yan lag bcu gnyis dang / kun gzhi rnam par shes pa las 'du byed la sogs pa 'byung ba na ma rig pa la sogs pa'i dbang gis bsod nams dang /bsod nams ma yin pa dang / mi g.yo ba tha dad pa'i phyir ro/ /rten cing 'brel par 'byung ba 'di nyid la rmongs pa dag kha cig ni sngon byas pa'i rgyu las byung ba nyid rtog ces bya ba ni skyes bu'i byed pa la skur pa'i phyir ro//de dag ni ma rig pas ldongs pas dmus long dper byas so/ /sna la reg ces bya ba ni sna la reg ces bya ba'i tha tshig go/ /mdor bsdu na kun gzhi rnam par shes pa'i ngo bo nyid ni rnam par smin pa'i rnam par shes pa sa bon thams cad pa ste zhes bya ba la mdor bsdu na sngon gyi dge ba dang mi dge ba'i las kyi bag chags dang /gzung ba dang 'dzin par rnam par rtog pa la mngon par zhen pa rnams kyis rnam par smin pa'i bdag nyid sems can gyi rdzas kyi dngos gzhi kun gzhi rnam par shes pa bsgrub pa ni rang gi mtshan nyid do/ /des khams gsum pa'i lus thams cad dang /'gro ba thams cad bsdus so zhes bya ba la 'dod pa dang gzugs dang / gzugs med pa na spyod pa'i lus thams cad dang / sems can gyi rgyud 'gro ba thams cad de/ lha la sogs pa bsdus pa ni 'brel pa can gyi mtshan nyid do//ji ltar gzugs dang 'jug pa'i rnam par shes pa yul kha cig dang / res 'ga'i dus su rgyun chad pa de ltar kun gzhi rnam par shes pa ni gnyen po ma byung gi bar du ma yin te/ khyab pa'i phyir thams cad 'dzin par byed pa'o//sa bon thams cad pa zhes bya ba ni 'dir sa bon zhes bya'o/ /phyi dang nang dang mi gsal ba/ /zhes bya ba la sogs pa'i tshigs su bcad pa lngas ni de rab tu dbye ba dang bcas pa ston te/ phyi rol gyi sa bon ni nas la sogs pa'o/ /nang gi sa bon ni kun gzhi rnam par shes pa'o//mi gsal ba ni lung du ma bstan pa'o/ /gnyis ni phyi dang nang gi'o/ /yang na 'bras bu dang rgyu ste/ de gnyis kyi rgyu mtshan kun gzhi rnam par shes pa yang gnyis so/ /de las rgyu dang gzhi'i dngos pos kun nas nyon mongs pa dang rnam par byang ba'i chos 'byung ba'i phyir ro//gang dag gnyis dag ces 'don pa de dag gi ltar na rgyu dang 'bras bu dag ces bshad do/ /kun rdzob ces bya ba ni phyi rol gyi nas la sogs pa ste/ kun gzhi rnam par shes pa gyur pa yin pa'i phyir ro/ /dam pa'i don ces bya ba la don dam pa'i sa bon ni kun gzhi rnam par shes pa ste/sa bon thams cad kyi rkyen yin pa dang de'i bdag nyid yan lag yin pa'i phyir ro/ /sa bon de gnyis ni chos tha dad pa'i phyir rnam pa drug tu dbye bar 'gyur ro/ /skad cig pa zhes bya ba ni byung ma thag tu rnam par 'jig pa'i phyir te bye brag med pa'i phyir sa bon rtag pa med do//skad cig pa yang 'gags zin pa ni ma yin te bya shi ba'i skad bzhin du 'gags nas 'bras bu mi rung ba'i phyir lhan cig 'byung ba'o/ /de lta bas na 'bras bu'i dus dang 'gal ba med pa'i phyir bon ni 'bras bu dang lhan cig gnas par 'dod de ut+pala'i rtsa ba la sogs pa bzhin no//lhan cig 'byung ba yang glog bzhin du skad cig gcig dang gnyis dang gsum du gnas pa ma yin gyi/ skad cig gcig nas gcig tu brgyud pas yun ring du rgyun chags su 'byung ba'i phyir rgyun chags su 'byung ba'o//de ci mngon zhe na/ rtsa ba la phan pa dang gnod pa ni yal ga la sogs pa la yang phan gnod du 'gyur te de dang ldan pa'i phyir ro/ /gal te rgyun chags su 'byung ba na btags pa'i phyogs kyang sa bon du khas blangs pa'i phyir thams cad las thams cad cig car ci'i phyir mi 'byung zhe na lan btab pa/nges pa zhes bya ste nus pa nges pa'i phyir rgyun chags su 'byung du zin kyang thams cad las thams cad cig car mi 'byung ngo / /de lta na yang dus thams cad du ci'i phyir 'bras bu mi 'byin zhe na lan btab pa/ rkyen la ltos pa zhes bya ba ste/rtag tu rkyen nye bar gnas pa ma yin pa'i phyir nyes pa med do/ /sa bon de'i sa bon gang zhe na/ de'i phyir rang gi 'bras bus bsgrubs pa'o zhes bya ba smos te/ sa bon dang sa bon can thog ma med pa'i phyir de'i 'bras bu gang yin pa de nyid sa bon yin no/ /des na ji skad smos pa'i sa bon gyi chos dang mi ldan pa'i phyir gtso bo la sogs pa'i sa bon nyid sel to//sa bon dang sa bon gyi dngos po ni bag chags bsgo bar bya ba dang sgo bar byed pa'i 'brel pa la ltos pas bsgo bar bya ba dpyod do/ /brtan zhes bya ba ni til la sogs pa bzhin du rgyud rgyun chags su 'byung ba ste/rlung bzhin du g.yo ba ni ma yin no/ /rlung yang me tog la sogs pas bsgo bar bya ba ma yin nam zhe na/ gal te bsgo bar bya ba yin na ni bsgos pa'i til dang 'brel pa can gyi rdzas gzhan gyi dri bzhin du de dang 'brel pa can gyi rdzas kyi dri yang dmigs par 'gyur ro//brtan du zin kyang gang lung du ma bstan pa dri mnyam pa de la bsgo bar 'gyur ro/ /dri zhim po la ni ma yin te/ gla rtsi bzhin no/ /dri nga ba la yang ma yin te/ sgog pa bzhin no/ /bsgo bya ba zhes bya ba ni gang bsgo bar nus pa'am bsgo bar bya ba ste/ phan tshun gyi cha shes 'dre ba'i phyir de ni bsgo bar bya'o//sngo ba la sogs pa ni ma yin te/ phan tshun 'dre ba med pa'i phyir ro/ /bsgo bar bya ba yang sgo bar byed pa dang 'brel pa gang yin pa de la sgo bar byed de so sor gnas shing 'brel pa med pa la ni ma yin no/ /de las gzhan ni min zhes bya ba la ni zhes bya ba'i sgra ni 'jug pa'i rnam par shes pa rnams bsgo bar bya ba nyid las bzlog pa'i phyir te/ji skad bshad pa dang mi mthun pa'i phyir ro/ /kun gzhi rnam par shes pa ni gnyen por ma byung gi bar du rgyun chags su 'byung bas rtag pa'o/ / gzhan ni res 'ga' rgyun chad pas ma yin no/ /de nyid gcig tu lung du ma bstan pa yin gyi gzhan ni ma yin te/ dge ba dang mi dge ba yang yod pa'i phyir ro/ /de nyid bag chags bsgo bar 'os pa dang bsgo bar nus pa yin te/ rtag la lung du ma bstan pa dang ldan pa'i phyir ro/ / 'jug pa'i rnam par shes pa rnams ni ma yin te/ 'di ltar drug po dag la 'brel med de/ ji lta zhe na/ tha dad gsum dang 'gal ba'i phyir/ zhes bya ba smos pa'o/ /gal te 'jug pa'i rnam par shes pa drug po dag lhan cig 'byung bar 'gyur na gnas dang / dmigs pa dang /yid la byed pa gsum so so rang gi tha dad par mi 'gyur ro/ /gang gi phyir gsum tha dad par 'gal ba med de tha dad pa nyid yin pa de'i phyir drug bo dag cig car 'byung ba med do/ /cig car mi 'byung na phan tshun 'brel ba med do/ /'brel ba med na bsgo bar bya ba dang sgo bar byed pa'i dngos por ga la 'gyur/ji ste skad cig snga mas phyi ma la bsgo bar 'dod na yang mi rung ste/ skad cig lhan cig med pa'i phyir de gnyis cig car du med pa'i phyir ro/ /'brel ba med na bsgo bar bya ba dang sgo bar byed pa med do zhes ston to/ /ji ste rigs kyi dngos po la brten nas rnam par shes pa drug car yang brjod par 'dod pa bye brag med pas rnam par shes pa rigs gcig go//de'i phyir rnam par shes pa 'ga' zhig gam skad cig 'ga' zhig la bsgos na/ thams cad la yang bsgos par 'gyur ro zhe na/ de'ang mi rung ste/ rigs la bya na gzhan du thal/dgra bcom pa rnams kyi sems kyang rnam par shes pa'i rigs las ma 'das te/ de la yang mi dge ba'i bag chags bsgos par 'gyur ro/ /yang na gzhan du yang thal bar 'gyur te/ rigs gzhan la yang zhes bya ba'i tha tshig go/ /ji lta zhe na/ mig la sogs pa'i dbang po dbang po'i rigs dang ldan pa rnams ni gzugs dang ba'i bdag nyid can yin pas dbang po nyid thun mong pa'i phyir yid kyi dbang po yang 'byung ba las gyur ba nyid du 'gyur ro//bsgo bar bya na yang bsgo ba ni 'dir zad de/ yang na phan tshun du'am skad cig snga mas skad cig phyi ma la'am/rnam par shes pa'i rigs la bsgo grang na/ rnam pa thams cad du mi rung bas kun gzhi rnam par shes pa las gzhan pa'i rnam par shes pa la sgo bar byed pa ni ma yin no zhes bya ba ni legs par bshad pa'o/ /phyi dang nang gi sa bon 'di gnyi ga yang skyed par byed pa dang 'phen par byed pa ste/phyi rol gyi sa bon ni myu gu mngon du skyed par byed pa'o/ /brgyud nas sdong bu la sogs pa'i 'phen pa yang yin no/ /nang gi sa bon kun gzhi rnam par shes pa yang ming dang gzugs mngon du skyed par byed pa'o/ /brgyud nas rga shi la thug pa'i bar du 'phen par byed pa yang yin no//skyed par byed pa ni yin grang na 'phen par byed par ji ltar 'gyur zhe na/ ma btab shi ba 'phen pa'i phyir/ /zhes bya ba smos so/ /gal te sa bon ni skyed par byed pa yin la/ 'phen par byed pa ma yin na sa bon du ma btab pa skyed pa la sogs pa'i nang du yod pa'i nas la sogs pa'i sa bon rnams kyi rgyun yun ring por rjes su 'phel bar mi 'gyur ro//shi ba'i ro rnams kyang rnam par bsngos pa la sogs pa'i gnas skabs su rjes su 'jug par mi 'gyur gyi shi ma thag tu rnam par 'jig par 'gyur ba'i rigs so/ /ji lta zhe na/ mda' ni bar du mi ltung bzhin/ dper na mda' ni sngar bkang la 'phangs na 'gro ba de la 'gro ba de'i skyed par byed pa ni bkang ba ma yin te/de med pa'i phyir ro/ /mi 'gro ba yang ma yin te/ tshu rol du lhung bar 'gyur ba'i phyir ro/ /ji srid du 'gro bar bya bar yang 'gro bas na de'i phyir bkang ba ni de la 'phen pa yin par mngon no/ /gang dag rang gi ngang gis mthar 'jig phyir//zhes 'don pa de dag gi ltar na 'di ni 'phen par byed pa nyid kyi gtan tshigs kyi don yin gyi dpe ma yin te/ 'di ltar snying po dang ma zad pa'i mar me 'chi ba'i tshul du mtha' 'gyur ba'i rgyun 'chad pa'i bdag nyid phyi rol gyi rkyen la mi ltos par rang gi ngang gis rnam par 'jig pa yin te/des na gang gis de ltar 'du byed rnams ji ltar sngon bzhin du rgyu na rgyas par mi byed pas nges par 'phen pas yongs su zad par rjes su dpag go// //bam po gnyis pa/ de ltar nang gi dang phyi'i sa bon gnyis mtshungs par bstan nas/phyi rol sa bon ma btab pa'am zhes bya ba la sogs pa mi mtshungs pa nyid brjod do/ /'am zhes bya ba ni nges pa med pa'i don to/ /phyi rol gyi sa bon ni btab kyang rung ste sa bon nyid du rnam par rtog ste dper na sol ba dang ba lang gi lci ba dang / lug gi bal la sogs pa ni til dang /ut+pala'i rtsa ba dang / rtswa drur ba la sogs pa la go rims bzhin te/ til la sogs pa sol ba la sogs pa la ma btab mod kyi 'on kyang de dag las skye'o/ /'bras sA lu la sogs pa'i sa bon btab pa ni sA lu'i myu gu la sogs pa sa bon du 'gyur ro/ /nges pa med pa'i sa bon nyid de ni nang gi kun gzhi rnam par shes pa la 'dod pa ma yin te/de la ni btab pa nyid sa bon du rung gi ma btab pa ni ma yin no/ /de ci mngon zhe na/ thos pa la sogs pa'i bag chags bskyed pa med na de'i 'bras bu mang du thos pa la sogs pa mi snang ba'i phyir ro/ /phyi rol gyi 'bras sA lu la sogs pa'i sa bon gang yin pa de ni btab kyang res 'ga' chud zos la sred la sogs pa ni ma btab kyang rung ste skye ba de ltar nang gi sa bon ni ma yin te/byas pa dang ma byas pa chud za ba dang skye ba med pas phyi rol dang mi 'dra'o/ /gal te nang gi sa bon las phyi'i sa bon tha dad pa yin na kun gzhi rnam par shes pa sa bon thams cad pa nyid du snga bshad pa la gnod par ji ltar mi 'gyur zhe na/lan btab pa/ nang ni phyir rol rkyen yin te/ /'di ltar de ni bag chags rten/ /zhes bya ba la sogs pa ste/ /'di ltar 'bras sA lu la sogs pa'i sa bon ni de la za ba'i srog chags rnams kyi las kyi bag chags kyi sa bon kun gzhi rnam par shes pa la gnas pa rnams kyis der snang bar bsgrubs pa ste/de'i phyir de las gud na med do/ /yang smras pa/ nam mkha' sa rlung nyi ma dang / /phyogs dang rgya mtsho 'bab chu rnams/ /nang gi byed pa yang dag gi/ /cha yin phyi rol 'dra bar gnas/ /zhes bya ba la sogs pa'o//yang 'jug pa'i rnam par shes pa gzhan gang yin pa de ni lus thams cad dang lha la sogs pa 'gro ba thams cad du nye bar spyod pa can du blta ste zhes bya ba ni nye bar spyod nus pa ste/ dmigs pa dang rnam pa yongs su chad pa'i phyir ro/ /gcig ni rkyen gyi rnam par shes/ /gnyis pa nye bar spyod pa can//nye bar spyod dang yongs spyod dang / /de yi 'jug byed sems las byung / /zhes bya ba de la nye bar spyod pa ni tshor ba'o/ /zhes bya ba la sogs pa dbus dang mtha' rnam par 'byed pa'i gzhung nye bar bkod pas ni yid ches pa dang ldan pa dang gzhung lugs gcig tu mthun par ston to/ / chos kun rnam par shes la spyor/ /zhes bya ba la sogs pa ni kun gzhi rnam par shes pa dang 'jug pa'i rnam par shes pa gnyis gcig gi rkyen gcig yin par lung gis brtan por byed de/ ma la bu rnams bdag cag ni khyod kyi yin no zhes smra ba lta bu'o/ /de dag la yang de de bzhin/ /zhes bya ba ni khyed nga'i yin no zhes smra ba lta bu'o//de lta bas na gcig la gcig 'byung bas kun gzhi dang 'jug pa'i rnam par shes pa gnyis phan tshun du rgyu'i rkyen to/ /rten cing 'brel par 'byung ba dang po la/ /zhes bya ba ni ngo bo nyid rnam par 'byed pa can la ste/ ji skad bshad ma thag pa'o/ /gnyis pa la zhes bya ba ni sdug pa dang mi sdug pa rnam par 'byed pa can la'o//bdag po'i rkyen to zhes bya ba ni dngos su na ma rig pa la sogs pa ste/ de dag gi mthus 'du byed la sogs pa bde 'gro dang ngan 'gror 'byung ba'i phyir ro/ /rnam par shes pa drug po dag rkyen gsum gyis skye zhes bya ba ni bdag po dang dmigs pa dang de ma thag pa zhes bya ba rnams so//de la mig ni mig gi rnam par shes pa'i bdag po'i rkyen to/ /gzugs ni dmigs pa'i rkyen to/ /'gags ma thag pa'i yid ni de ma thag pa'i rkyen te go skabs 'byed do/ /ji ltar 'di gsum gyis mig gi rnam par shes pa skyes pa ltar rna ba la sogs pa'i rnam par shes pa rnams kyang de bzhin te snga ma dang don mthun par rang rang gi gsum gsum po dag gis 'byung bar mtshungs par bshad do//'khor ba pa zhes bya ba ni ngo bo nyid rnam par 'byed pa can yin te/ de las gzhan pa'i rkyen gsum med pa'i phyir rgyu'i rkyen las 'byung ba nyid du nges so//de ltar rten cing 'brel par 'byung ba gsum po dag gi rkyen ni bzhi ste/ ci rigs su sbyar gyi sems dang sems las byung ba gcig la yang bzhi char ni ma yin par khong du chud par byed do/ /rang dang gzhan gyi lung dag gis kun gzhi rnam par shes pa bsgrubs nas ldan pa'i rigs las grub par bsgrubs te/rigs pa dang lung so sos mi nus pa'i phyir ro/ /ji skad du dad pas ni nga'i phyir ma 'gro shig ces bya ba la sogs pa gsungs pa lta bu'o/ /'di ltar kun gzhi rnam par shes pa las gzhan na kun nas nyon mongs pa dang rnam par byang ba med kyi de dag de la yod de de'i phyir de yod do//de la kun nas nyon mongs pa yin pas kun nas nyon mongs pa ste/ kun nas nyon mongs par gyur pa rnam par ma dag pa zhes bya ba'i tha tshig go/ /rnam par byang ba yin pas rnam par byang ba ste dag pa'o/ / kun nas nyon mongs pa rnam pa gsum ni nyon mongs pas byas pa dang / las kyis byas pa dang skye bas byas pa'o/ /rnam par byang ba rnam pa gnyis pa 'jig rten pa rnams ni re zhig pa ste/ nyon mongs pa rnam par gnon pa tsam du zad do/ /'jig rten las 'das pa ni gtan du ba ste/ lam gyi bden pas bag la nyal legs par bcom pa'i phyir ro/ /'jug pa'i rnam par shes pa rnams la nyon mongs pa'i kun nas nyon mongs pa mi srid pa'i dbang du byas nas 'di ltar mig gi rnam par shes pa gang zhes bya ba la sogs pa smras so/ /mig gi rnam par shes pa 'gags pa rnam par shes pa gzhan gyis bar du chod pa de la zhes bya ba ni rna ba la sogs pa'i rnam par shes pas bar du chod pa la bya ste/'dod chags la sogs pa'i bag chags gnas pa dang bcas pa 'gags pa'i phyir ro/ /'dod chags la sogs pa dang bcas pa 'byung du mi rung ste zhes bya ba ni yang mig gi rnam par shes pa la 'dod chags dang zhe sdang dang /gti mug dang ldan pa 'byung du mi rung ste/ rgyu med pa'i phyir ro/ 'dod chags la sogs pa dang bcas pa'i mig gi rnam par shes pa 'das pa de ni de'i rgyur mi rung ste/ 'das pa'i las las rnam par smin pa'i 'bras bu 'byung ba bzhin no//ji ltar bye brag tu smra ba rnams 'das pa'i las las rnam par smin pa'i 'bras bu 'byung zhes bya ba la bag chags kyi bya ba med pas mdo sde pa dag mi 'dod pa de ltar de dag la yang 'das pa med pas de las 'dod chags la sogs pa dang bcas pa'i sems 'byung du mi rung ngo / /'di ni re zhig 'dod chags la sogs pa dang lhan cig byung ba'i mig gi rnam par shes pa la 'dod chags la sogs pa'i bag chags khas blangs te/de las gzhan 'byung ba gang yin pa de 'dod chags la sogs pa dang ldan par 'byung du mi rung bar bstan pa yin no/ /da ni 'dod chags la sogs pa dang lhan cig 'byung ba'i rnam par shes pa de nyid la yang bag chags mi 'thad par dpyod de/mig gi rnam par shes pa 'dod chags la sogs pa dang lhan cig byung ba de la yang zhes bya ba la sogs pa'o/ /re zhig 'dod chags la ni ma yin te/ 'dod chags ni de la brten pa'i phyir ro zhes bya ba la re zhig sgra ni rim gyi don to//'dod chags ni sems las byung ba yin pas rnam par shes pa la brten pa'o/ /gnas pas gnas la bsgo ba ni rigs pa'i tshul yin gyi gnas nyid kyis gnas pa la bsgo pa ni mi rung ste/ bdag nyid la byed pa 'gal ba'i phyir ro/ /mi brtan pa'i phyir ro/ /zhes bya ba ni kha cig mi 'don te/rnam par shes pa yang mi brtan pa'i phyir ro/ /rnam par shes pa gzhan dag la yang ma yin te zhes bya ba ni rna ba la sogs pa'i rnam par shes pa rnams la'o/ /rnam par shes pa rnams kyi gnas tha dad pa'i phyir ro zhes bya la gnas ni rna ba la sogs pa ste/ rnam par shes pa rnams kyi gnas te tha dad do//des na mig gi rnam par shes pa nyid mig la brten te 'byung gi gzhan las ni ma yin te/ ji ltar sngar tha dad gsum dang 'gal ba'i phyir zhes bshad pa lta bu'o/ /lhan cig 'byung ba dang 'gag pa med pa'i phyir ro zhes bya ba ni lhan cig 'byung ba ma yin pa rnams la bag chags bsgo bar bya ba dang /sgo bar byed pa'i dngos po med pas bag chags kyi mtshan nyid med par ston to/ /rang gi dngos po la yang ma yin te zhes bya ba ni mig gi rnam par shes pa de nyid kyis mig gi rnam par shes pa de nyid la bag chags mi bsgo ste/ bsgo bar bya ba dang spo par byed pa las dang byed pa dag 'tshol ba'i skyon du 'gyur ba'i phyir ro//rnam par shes pa de la rnam par shes pas bsgos pa yang mi rung ngo / /zhes bya ba ni mig gi rnam par shes pa la rna ba la sogs pa'i rnam pa shes pas gzhan de dang lhan cig skyes pa'i 'dod chags la sogs pas bag chags bsgor mi rung zhes bya ba'i tha tshig ste/snga ma bzhin du gnas tha dad pa'i phyir ro/ /tshul ni 'di tsam dag tu zad de/ rnam pa thams cad du mi rung ngo / /mig gi rnam par shes pa la ji lta ba de bzhin du zhes bya ba la sogs pa ni snga ma dang don mtshungs par bshad do//gang yangs gong ma 'du shes med pa nas shi 'phos te 'dir skyes pa rnams kyi zhes bya ba ni 'dod pa'i khams su'o/ /nyon mongs pa dang nye ba'i nyon mongs pa zhes bya ba ni 'dod chags la sogs pa dang khro ba la sogs pas so/ /thog ma nyid du zhes bya ba ni nyid mtshams sbyor ba'i dus na'o//gnas dang bcas pa zhes bya ba ni snga ma bzhin du bshad do/ /mdo sde pa dang gtan la dbab pa'i skabs ston te de'i gzhung ltar na 'das pa dang ma 'ongs pa dag dngos po med pa'i phyir ro/ /nyon mongs pa'i gnyen po'i rnam par shes pa byung na zhes bya ba la sogs pas ni gal te kun gzhi rnam par shes pa med na gang gi tshe thog ma nyid du rgyun du zhugs pa'i 'bras bu la 'jug pa la mthong bas spang bar bya ba'i nyon mongs pa'i gnyen po la ma skyes pa de'i tshe 'jig rten pa'i shes pa thams cad ni 'gags na bsgom pas spang bar bya ba'i nyon mongs pa'i bag la nyal gang du gnas par 'gyur/gnyen po nyid mi mthun pa'i phyogs kyi sa bon dang 'brel par ni mi rung ngo / /ngo bo nyid kyis rnam par grol ba'i phyir zhes bya ba ni rang bzhin gyis rnam par byang ba'i phyir ro/ /zhes bya ba'i tha tshig go/ /lhan cig 'byung ba dang 'gag pa med pa'i phyir ro zhes bya ba ni mi mthun pa'i phyogs dang gnyen po phan tshun mi mthun pa'i phyir snang ba dang mun pa bzhin te/sa bon gyi mtshan nyid du mi rung bar ston to/ /de'i 'og tu zhes bya ba ni mthong ba'i lam gyi 'og tu bsgom pa'i lam la'o/ /'das nas yun ring ste zhes bya ba la sogs pa ni brda phrad par zad do/ /bye brag tu smra ba'i thob pa'i phyogs ni mdo sde ba nyid kyis bsal zin te de ni skyabs su mi rung ngo //nye bar gyur ba'i phyir mdo sde pa dang dpyad pa'i dbang du byas pa ste/ de la yang bag chags kyi gnas med pa'i skyon chags pa nyid do/ /de lta bas na kun gzhi rnam par shes pa med na nyon mongs pa'i kun nas nyon mongs pa mi rung ngo zhes bya ba ni gzhan du na mi srid pa'i tshul gyis nges par byas te mjug sdud pa'o//'du byed kyi rkyen gyis rnam par shes pa mi rung ba'i phyir ro/ /zhes bya ba ni 'jug pa'i rnam par shes pa rnams la las kyi kun nas nyon mongs pa mi srid par ston to/ /kun gzhi rnam par shes pa med na mig la sogs pa'i rnam par shes pa 'dod chags la sogs pa dang lhan cig skyes pa 'du byed kyi rkyen las byung bar 'dod na de yang mi rung ste/rnam par shes pa'i rkyen gyi ming dang gzugs zhes 'byung ba'i phyir ro/ /mig la sogs pa'i rnam par shes pa ni skad cig gis 'jig pa'i tshul can yin pas 'gags nas yun ring ba'i phyir ming dang gzugs kyi rkyen du mi rung ste/nyes pa mang du 'gyur ro/ /nyes pa 'dis 'jigs nas nying mtshams sbyor ba'i rnam par shes pa 'dod na de yang mi rung ste/ nying mtshams sbyor ba'i rnam par shes pa'i dus na bsod nams dang /bsod nams ma yin pa dang / mi g.yo ba'i 'du byed 'gags nas yun ring ba'i phyir ro/ /'gags pa rnams las ni de 'byung bar yang mi rigs so/ /rjes su chags pa dang khong khro ba dang ldan pa'i phyir nying mtshams sbyor ba'i sems ni lung du ma bstan pa ma yin no//rnam par smin pa ni lung du ma bstan pa yin pas de 'du byed kyi rkyen can du mi rung ngo / /'jug pa'i rnam par shes pa 'du byed dang mtshungs par ldan pa rnams kun gzhi rnam par shes pa la bag chags skyed na ni mi rung ngo / /de med na len pa'i rkyen gyis srid pa yang mi rung ba'i phyir ro//zhes bya ba ni bag chags kyi gnas skabs kyi las rnam par smin par mngon du phyogs par gyur ba'am/ 'jug pa rnyed pa ni srid pa ste/ nying mtshams sbyor ba'i rnam par shes pa ni ma yin no/ /'du byed kyis yongs su bsgos pa'i rnam par shes pa mi 'thad na skye ba'i 'bras bu 'byin par mngon du phyogs par gyur pa na las de gang du gnas te srid par 'gyur/de lta bas na kun gzhi rnam par shes pa med na las kyi kun nas nyon mongs pa yang mi rung ngo / /da ni nying mtshams sbyor ba sbrel ba mi rung ba'i phyir ro zhes bya ba la sogs pas rnam par shes pa gzhan dag la skye ba'i kun nas nyon mongs pa mi srid par ston to//mnyam par ma bzhag pa'i sa nas zhes bya ba ni 'dod pa'i khams nas so/ /shi 'phos pa'i zhes bya ba ni shi ba'o/ /yid bar mdo'i srid pa na gnas pa zhes bya ba ni shi ba dang skye ba'i srid pa gnyis kyi bar gyi srid pa la gnas pa'i sems so//yid kyi rnam par shes pa zhes bya ba ni de las gzhan pa'i rnam par shes pa rnams de'i tshe 'gags nas yun ring ba'i phyir ro/ /nyon mongs pa can zhes bya ba ni rjes su chags pa dang khong khro ba dang ldan pa'i phyir phyin ci log gis so/ /nying mtshams sbyor ba zhes bya ni nying mtshams sbyor bar byed pa'o//de 'brel pa ni skye ba ste lus yongs su 'dzin pa zhes bya ba'i tha tshig go/ /yid kyi rnam par shes pa nyon mongs pa can de zhes bya ba ni skye ba'i srid pa la dmigs pa'o/ /bar ma do'i srid par 'gag la zhes bya ba ni de ma 'gags na skye ba'i srid pa mi rung ba'i phyir ro//rnam par shes pa yang ma'i mngal du nur nur po nyid brgyal po zhes bya ba ni da 'gag pa dang dus mnyam du khu chu dang khrag dang lhan cig grub pa dang bde ba gcig pas 'dres par gyur nas nur nur por 'gyur te/ ji skad du bcom ldan 'das kyis bka' stsal pa/kun dga' bo gal te rnam par shes pa ma'i mngal du ma zhugs na nur nur po yang nur nur po nyid du chags par mi 'gyur ro zhes gsungs pa lta bu'o/ /gal te yid kyi rnam par shes pa de nyid brgyal na ni zhes bya ba ni kun gzhi rnam par shes pa ma yin pa'o/ /brgyal bzhes bya ba skyes pa rnam par smin par gyur pa ste/de la brten nas gzhan dad pa dang chags pa dang mtshungs par ldan pa'i dge ba dang mi dge ba dang bde ba dang sdug bsngal gyi tshor ba myong ba dang ldan pa rnam par rtog pa can gyi yid kyi rnam par shes pa phyi ma phyi ma'i gnas skabs rnams su 'byung ngo / /des na yid kyi rnam par shes pa gnyis dus gcig tu ma'i mngal du 'jug par 'gyur ro zhes bya ba ni gang rtsa bar gyur pa ste/sems can gyi rdzas de'i tshe mngon par 'du byed pa la mi ltos pa rnam par smin pa'i bdag nyid can lung du ma bstan pa dmigs pa dang rnam pa yongs su ma chad pa/ btang snyoms dang mtshungs par ldan pa brgyal ba de dang /gang de la brten nas gzhan mngon par 'du byed pa can rnam par smin pa'i rang bzhin ma yin pa dmigs pa dang rnam pa yongs su chad pa bde ba dang sdug bsngal gyi tshor ba dang mtshungs par ldan pa'i yid kyi rnam par shes pa ste/ de ni mdo dang 'gal ba'i phyir mi 'dod do//khyed ni 'di skad 'don te rnam par shes pa gnyis snga phyi med par 'byung ba ni gnas ma yin zhing go skabs med do zhes bya ba la sogs pa'o/ /de gnyis ni gcig pa nyid du yang mi 'thad de rang bzhin tha dad pa'i phyir ro/ /rnam par smin pa rgyun chad na ni srog gi rgyun chad par 'gyur ro//rnam par smin pa med na 'gro ba yang med par 'gyur ro/ /yid kyi rnam par shes pa brgyal ba de ni yid kyi rnam par shes pa nyid du mi rigs te/ dus rtag tu nyon mongs pa can nyid gnas yin pa zhes bya ba ni dam bca' ba'i don gyi skyon chos can gyi rang gi ngo bo nyid las bzlog pa ston to/ / gang yid kyi rnam par shes pa nyid du gnyi ga la nges pa de ni rtag tu nyon mongs pa can gnas ma yin te/ dper na dus phyi ma la 'byung ba'i yid kyi rnam par shes pa bzhin no/ /nying mtshams sbyor ba'i sems thams cad ni thams cad nas thams cad du nyon mongs pa gnas yin te/ bar ma do'i srid pas bsdus pa'i gnas skye ba'i srid pa la dmigs pa ni thams cad na rtag par nyon mongs pa can yin pa'i phyir ro//de ltar na yid kyi rnam par shes pa'i chos las 'das pa'i phyir de yid kyi rnam par shes par mi rung ngo / /yang na nyon mongs pa bzhi dang mtshungs par ldan pa nyon mongs pa can gnas yin pa'i phyir nying mtshams sbyor ba'i sems nyon mongs pa can du 'gyur ro//rnam par smin pa yin pa'i phyir de ni lung du ma bstan par yang 'dod do/ /nyon mongs pa can gyi yid ni bsgrubs zin to snyam du bsams pa'o/ /rnam par smin pa nyid kyang bkag ste/ yid kyi rnam par shes pa 'ba' zhig bkag pa ni ma yin no//yid kyi rnam par shes pa'i dmigs pa la mi dmigs pa'i phyir ro zhes bya ba ni de'i yid kyi rnam par shes pa ma yin zhes bya ba de nyid kyi gtan tshigs kyis gnon no/ /gang bdag cag gnyi ga la yid kyi rnam par shes par nges pa de ni rang gi dmigs pa la dmigs shing yongs su gcod de/dper na phyi ma'i gnas skabs gzhan na 'byung ba'i yid kyi rnam par shes pa bzhin te/ 'jug pa'i rnam par shes pa rnams yul so sor rnam par rig pa'i mtshan nyid yin pa'i phyir ro/ /nyid mtshams sbyor ba'i sems ni de ltar dmigs pa yongs su mi gcod pa ma yin pas de yid kyi rnam par shes pa ma yin no//'dir 'gog pa'i snyoms par 'jug pa'i sems dang mtshungs par phyir brgal du yang mi rung ste/ de ni yid kyi rnam par shes pa nyid du khas mi len pa'i phyir ro/ /de lta bas na 'dir ni dmigs pa la mi dmigs pa yongs su mi gcod pa yin gyi med pa nyid ni ma yin te/'di ltar de'i tshe chos med pa ni ma yin gyi/ yod bzhin du yongs su mi gcod do/ /yid kyi rnam par shes pa'i gnas mig la sogs pa yongs su ma rdzogs pa'i phyir ro/ /yid kyi rnam par shes pa de brgyal ba yin du chug na yang zhes bya ba nas bzung ste/de'i rnam par smin pa'i rnam par shes pa sa bon thams cad pa'o/ /zhes bya ba der grub po zhes bya ba'i bar de ni mjug sdud pa ste/ go sla bas ma bshad do/ /nying mtshams sbyor ba sprel zin pa rnams kyi zhes bya ba ni lus thob pa rnams kyi'o//dbang po gzugs can zhes bya ba ni yid ma gtogs pa'o/ /'dzin par byed pa zhes bya ba ni yongs su 'dzin pa'o/ /kun gzhi rnam par shes pa la ma gtogs pa de las gzhan zhes bya ba ni 'jug pa'i rnam par shes pa'o/ /ji lta zhe na/ gnas so sor nges pa'i phyir zhes bya ba ste/de mig la sogs pa drug po dag go/ /'dis ni 'dzin par byed pa gcig pu med par ston to/ /mig gi rnam par shes pa'i gnas ni mig nyid yin no/ /de bzhin du rna ba la sogs pa'i rnam par shes pa rnams kyi gnas kyang rna ba la sogs pa'o/ /gang gi gnas gang yin pa de nyid kyis de 'dzin par mi rung ngo //mi brtan pa'i phyir ro zhes bya ba ni g.yo ba'i phyir zhes bya ba'i tha tshig ste/ yud tsam yud tsam la bar chad dang bcas par 'tshol bar 'byung ba'i phyir ro/ /'du shes med pa la sogs par yang rgyun chad pas mig la sogs pa zin pa rnams kyang rgyun chad par 'gyur te/dper na shi ba'i lus kun gzhi rnam par shes pas btang ba rnams bzhin no/ /gal te lus kyi dbang pos khog pa zin te khyab pa'i phyir ro zhe na/ de yang mi rung ste/ lus kyi dbang po yang gzung bar bya ba yin pa'i phyir ro/ /gal te de 'dzin par byed pa yin na ni ma zin par 'gyur te/'dzin pa gzhan med pa'i phyir ro/ /bcom ldan 'das kyis kyang lus kyi dbang po yongs su btang bas 'chi bar 'gyur gyi rnam par shes pa yongs su btang bas ni ma yin no zhes gsungs pa'i rigs na/ tshe dang drod dang rnam par shes/ /'di dag gang tshe lus 'dor zhing / /bor nas de tshe 'dug pa ni//dper na shing la sems med bzhin/ /zhes kyang gsungs so/ /de lta bas na lus kyi dbang po ni 'dzin par byed par mi rigs so/ /rnam par shes pa dang ming dang gzugs mdung khyem ltar gcig la gcig brten pa'i tshul gyis 'jug pa gang yin pa de yang rnam par smin pa'i rnam par shes pa med na ni mi rung ngo zhes bya ba ni bcom ldan 'das kyis rnam par shes pa'i rkyen gyis ming dang gzugs zhes gsungs te/de la ming ni gzugs can ma yin pa'i phung bo bzhi'o/ /gzugs ni nur nur po'o/ /'di gnyis kyi rkyen rnam par shes pa gang yin pa skad cig gcig nas gcig tu brgyud de gnas nyid du gyur pa de yang kun gzhi rnam par shes pa las gzhan ma yin no//ming smos pas ni 'jug pa'i rnam par shes pa bzung na rnam par shes pa smos pas ci zhig gtso bor bstan par 'gyur/ rnam par shes pa las ni bdag gi yid bzlog na rnam par shes pa las 'das pa ni ma yin no zhes gang gsungs pa de yang kun gzhi rnam par shes pa yod na 'thad de/'di ltar de ni lus kyi gnas nyid du rgyun mi 'chad par 'jug go/ /de nyid kyi phyir de ming dang gzugs kyi rkyen du gsungs te/ des lus la khyab pa'i phyir ro/ /kun dga' bo gzhon nu'am gzhon nu ma'i rnam par shes pa gal te rgyun chad cing 'gags kyang ming dang gzugs de 'phel zhing rgyas pa dang yangs par 'gyur ram/bcom ldan 'das de ni mi 'gyur ro zhes bya ba la sogs pa gang gsungs pa de yang kun gzhi rnam par shes pa med na mi 'thad do//rnam par shes pa gzhan ni sems can 'byung po rnams kyi zas su yang mi rung ste/ zhes bya ba ni 'jug pa'i rnam par shes pa ste/ snyoms par 'jug pa gnyis dang 'du shes pa na med pas ma khyab pa'i phyir ro/ /zas med par ni khams gsum na spyod pa'i gnas pa med do/ /snyoms par 'jug pa'i sems dang sems las byung ba 'gog pa ni zas su mdo las ma gsungs te/kham gyi zas la sogs pa grangs nges pa'i phyir ro/ /de ltar re zhig kun gzhi rnam par shes pa med na 'dod pa'i khams su nying mtshams sbyor ba sbrel ba mi rung ba'i 'thad pa bstan nas/ /'di nas shi 'phos te mnyam par gzhag pa'i sar skye ba na zhes bya ba la sogs pas gzugs dang gzugs med pa rnams su yang de mi rigs pa'i 'thad pa ston te/'dod pa'i khams su shi nas gong du skye ba na zhes bya ba'i tha tshig go/ /yid kyi rnam par shes pa nyon mongs pa can zhes bya ba ni de'i sa pa'i snyoms par 'jug pa'i ro myang ba'i nyon mongs pa dang ldan pa'o//sa bon dang ldan pa gzhan mi 'thad do zhes bya ba la 'dod pa na spyod pa'i sems ni sa bon dang ldan pa ma yin te/ lhan cig 'byung ba dang 'gag pa med pa'i phyir ro/ /mnyam par gzhag pa'i sems kyang sa bon dang ldan pa yang ma yin te/gcig nyid sa bon dang sa bon can gyi dngos por mi rung ba'i phyir ro/ /gzugs na spyod pa'i sems tshe rabs gzhan na thob pa yang sa bon du mi rung ste/ bag chags kyi kun gzhi rnam par shes pa med pa'i phyir ro/ /gzugs kyi rgyud kyang sa bon can ma yin te/ gzugs khas mi len pa'i phyir ro/ /de lta bas na thog ma med pa'i dus can de'i sa pa'i sems gang la bag chags gnas pa'i kun gzhi rnam par shes pa la nges par gnas bca' bar bya'o/ /yang gzugs med pa'i khams su skyes pa zhes bya ba la sogs pa la/ nyon mongs pa can gyi dge ba'i sems yod pa rnams kyi zhes bya ba ni snyoms par 'jug pa'i ro myang ba rnams kyi nyon mongs pa can gyi dge ba'i sems kyang gzhi med par 'gyur te/rnam par smin pa med ces bya ba'i tha tshig go/ /de'i tshe na sems dang sems las byung ba thams cad ni de'i dngos por 'gyur ba'i phyir ro/ / de lta bas na de'i gzhi rnam par smin pa'i rnam par shes pa nges par khas blang bar bya'o/ /de nyid na zhes bya ba la sogs pa ni gzugs med pa rnams su 'jig rten las 'das pa'i sems zag pa med pa de mngon du byed de de skyes pa na gang zag pa med pa de las gzhan pa'i sems 'jig rten pa 'byung ba ni med par 'gyur te/'gags pa na 'gro bas bsdus pa'i rnam par smin pa med pas 'gro ba de ldog pa nyid du 'gyur te/ gnyen po mngon sum du gyur na mi mthun pa'i phyogs thams cad spangs pa'i phyir bsgrim mi dgos par phung po lhag ma med pa'i mya ngan las 'das pa thob par 'gyur ro//'du shes med 'du shes med min skye mched du skyes pa rnams kyang zhes bya ba la sogs pa ni gang gi tshe srid pa'i rtse mor skyes pa dag nyon mongs pa rnams par spang du zhen pa'i phyir rang gi sa pa'i lam med pas ci yang med pa'i skye mched kyi sa pa'i zag pa med pa'i sems gsal ba mngon du byed do//de'i tshe de rnams kyi 'gro ba gnyi ga ldog par 'gyur zhes bya ba ni srid pa'i rtse mo dang / ci yang med pa'i skye mched kyi 'gro ba gnyi ga las ldog par 'gyur te/ de gnyis kyi gnas med par 'gyur ba'i phyir ro/ /zag pa med pa'i chos ni 'gro bar gtogs pa ma yin te/ ldan pa ma yin pa dang 'gro ba'i gnyen por 'gyur ba'i phyir ro//mya ngan las 'das pa'i 'gro ba yang gnas su mi rung ngo zhes bya ba ni phung po'i lhag ma dang bcas pa'i mya ngan las 'das pa'i dbyings kyi gnas skabs yin pa dang / 'gro ba thams cad log pa'i phyir mya ngan las 'das pa ni 'gro ba ma yin te/ 'jig rten las 'das pa'i rnam par shes pa gnas mya ngan las 'das pa'i 'gro ba'i lus rnam par smin par gyur pa ni gang yang med do/ /mya ngan las 'das pa ni dgra bcom pa rnams kyi 'gro ba'o zhes gang gsungs pa ni brten pa la der 'gro ba'i sgrar brjod do/ /legs par byed pa'am nyes par byed pa 'chi 'pho ba na zhes bya ba la sogs pa la legs par byed pa rnams ni lus kyi smad nas rim gyis drod yal bar 'gyur ro//nyes par byed pa rnams ni lus kyi stod nas drod yal bar 'gyur ro/ /de lta bas na de yang kun gzhi rnam par shes pa med na mi 'thad de/ de'i tshe gang na yang yid kyi rnam par shes pa med pas ni ma yin no/ /kun gzhi rnam par shes pa ni med par mi rigs so/ /de ltar kun nas nyon mongs pa rnam par gsum mi srid par bstan nas 'jug pa'i rnam par shes pa rnams la 'jig rten pa'i rnam par byang ba mi srid par ston te/ 'di ltar 'dod pa rnams las 'dod chags dang ma bral ba zhes bya ba la sogs pa nas gzugs na spyod pa'i sems 'das pa tshe rabs du mar sems gzhan gyis bar du bcad pa de yang zhes bya ba la sogs pa'o//thog ma med pa'i 'khor ba na tshe rabs gzhan na thob pa'i gzugs na spyod pa'i sems gang yin pa de ni sa bon ma yin te/'di ltar de ni tshe rabs du mar 'dod pa na spyod pa'i sems du mas bar du chod pas mdo sde pa'i gzhung ltar na med de 'das pa'i phyir ro/ /med pa ni gzugs na spyod pa'i sems kyi sa bon du yang mi rung ngo / /de bzhin du 'dod chags dang bral ba nyid kyis thams cad la yang ci rigs su sbyar bar bya'o zhes bya ba ni snga ma dang mthun par sbyar ba'o//ci rigs par zhes bya ba ni gang la gang rigs pa'o/ /de lta bas na zhes bya ba la sogs pa nas gang sa bon thams cad pa rnam par smin pa'i rnam par shes pa gcig nas gcig tu brgyud de 'ongs pa de ni gzugs na spyod pa'i mnyam par gzhag pa'i sems de'i rgyu'i rkyen yin la/sbyor ba las byung ba'i dge ba'i sems de ni bdag po'i rkyen yin par de grub bo zhes bya ba'i bar ni 'dir lus pa dang shugs kyis de ltar 'gyur bas kun gzhi rnam par shes pa yod par mjug bsdus nas de ni rgyu'i can yin la/ 'dod pa na spyod pa'i sbyor ba las byung ba'i dge ba'i sems ni bdag po'i rkyen yin par bstan te/thun mong ma yin pa'i rgyu yin pa dang mthu lhag ma'i phyir go rims bzhin no/ /da ni 'jug pa'i rnam par shes pa rnams la 'jig rten las 'das pa'i rnam par byang ba mi srid par ston te/ gzhan gyi sgra dang so so rang gi tshul bzhin yid la byed pa la brten nas de'i rgyu las yang dag pa'i lta ba 'byung ngo zhes bya ba nas bzung ste/tshig de nyid kyis bshad zin to/ /de la thos pa'i bag chags ni de'i sa bon yongs su 'dzin par mi rigs pa'i phyir ro/ /zhes bya ba ni 'jig rten las 'das pa'i sa bon yongs su 'dzin par mi 'thad pa'i phyir te/gong du ji skad smos pa lta bu'o/ /sa bon thams cad pa rnam par smin pa'i rnam par shes pa ni zhes bya ba nas sa bon du ji ltar rung zhes bya ba'i bar ni mi srid pa'i gnod par dri ba ste/ nad las nad med pa ni nam yang ma mthong na nad lta bu'i kun gzhi rnam par shes pa las nad med pa lta bu'i 'jig rten las 'das pa'i sems ji ltar 'byung bar 'gyur/chos kyi dbyings shin tu rnam par dag pa'i rgyu mthun pa thos pa'i bag chags sa bon pa las de 'byung ngo / /zhes bya bas ni rgyu gzhan ston te/ kun gzhi rnam par shes pa ni de'i sa bon ma yin no/ / 'o na ci zhe na/ sangs rgyas rnams kyis chos kyi dbyings shin tu rnam par dag pa glo bur gyi sgrib pa dang bral ba gang yin pa de'i rgyu mthun pa ni bstan pa'i chos te/ de'i rgyu las byung bar gyur na 'dra ba'i phyir ro/ /de mnyan pa ni thos pa'o/ /de'i bag chags gang yin pa de ni 'jig rten las 'das pa zag pa med pa'i sems kyi sa bon te kun gzhi rnam par shes pa ni mthun pa ma yin pa'i phyir ro//thos pa'i bag chags gang yin pa de yang zhes bya ba nas de'i gnas ci zhig yin par blta zhe na zhes bya ba'i bar gyis ni gnas gzhan ston te/ sangs rgyas rnams kyi byang chub la brten nas zhes bya ba ni ye shes dri ma med cing thogs pa med pa mdo la sogs pa bstan pa'i chos thos pa'i bag chags kyi gnas yin gyi/kun gzhi rnam par shes pa ni gnas ma yin te/ de dang lhan cig 'jug go/ /de'i phyir gnas gang la zhes bya ba smos te/ rgyud gang la 'jug pa de lhan cig 'jug pa'i tshul gyis rnam par smin pa'i rnam par shes pa la 'jug te/'o ma dang chu bzhin no/ /zhes bya ba ni de rnam par smin pa'i rnam par shes pa dang lhan cig 'byung bar 'dod kyi/ de sa bon nyid du ni mi 'dod do/ /thos pa'i bag chags kyi sa bon de ni kun gzhi rnam par shes pa'i ngo bo nyid ma yin te/de'i gnyen po'i sa bon nyid yin pa'i phyir ro/ /zhes bya ba ni kun gzhi rnam par shes pa'i gnyen po rnam par mi rtog pa'i ye shes kyi rgyu yin no zhes bya ba'i tha tshig go/ /dper na khong du nad du ma zhugs sam dug sna tshogs 'thungs pas na yang rung / sman bcud kyis len dang dug sman 'thungs na nad dang lhan cig tu dus gzhan gyi bar du 'dug kyang dug gi sa bon can yang ma yin la/ dug gi ngo bo nyid kyang ma yin pa ltar thos pa'i bag chags sa bon du gyur pa yang de bzhin no/ /de la bag chags chung ngu la brten nas zhes bya ba la sogs pa ni bshad pa nyid gsal bas brda phrad par sla'o//chos kyi sku'i sa bon du blta ste zhes bstan nas rnam par 'grel pa ste/ kun gzhi rnam par shes pa'i gnyen po yin pas kun gzhi rnam par shes pa'i ngo bo nyid ma yin pa dang / 'jig rten pa yin yang 'jig rten las 'das pa chos kyi dbyings shin tu rnam par dag pa'i rgyu mthun pa yin pas zhes bya ba ste/zag pa dang bcas pa yin yang 'jig rten las 'das pa zag pa med pa'i sems kyi sa bon yin te/ de'i tshogs yod pa'i phyir ro/ /'dir ni rtogs pa'i mtshan nyid la chos kyi skur brjod par 'dod do/ /'jig rten pa nyid ni 'jig rten pa la brten nas 'byung ba dang /kun gzhi rnam par shes pa dang lhan cig 'jug pa'i phyir ro/ /gus pa bskyed pa'i phyir phan yon de ni 'jig rten las 'das pa'i sems ma byung du zin kyang zhes bya ba la sogs pa smos so/ /nyon mongs pas kun nas dkris pa'i gnyen po zhes bya ba ni yod na 'dod chags la sogs pa kun du mi 'byung ba'i phyir te/gnyen po yod na mi mthun pa'i phyogs mi skye'o/ /de'i phyir rgyu med na 'bras bu med pas ngan song du 'gro ba'i gnyen po zhes bya ba ste/ 'jig rten pa yin yang dag lta/ /chen po su la yod gyur pa/ /de ni tshe rabs stong du yang / /ngan 'gror 'gro bar mi 'gyur ro//zhes ji skad gsungs pa lta bu'o/ /'o na/ sngon byas pa'i nyes par spyad pa ngan song du 'gro bar mi 'gyur ram zhe na/ de'i phyir nyes par byas pa thams cad dengs par byed pa'i gnyen po yin no zhes bya ba smos te/ thog pa med pa'i dus kyi nyes par byas pa dengs par byed pa ni mthu 'joms par byed pa ste/de'i phyir gnyen po'o/ /chos kyi skur bsdus pa ni chos kyi sku'i rgyu yin pa'i phyir ro/ /rnam par grol ba'i lus su bsdus pa zhes bya ba yang de bzhin du brjed par bya'o/ /de la chos kyi sku dang rnam par grol ba'i lus kyi khyad par ni 'di yin te rnam par grol ba ni nyon mongs pa'i bcings pa dang bral ba tsam du zad de/dper na grong mi zhig lcags sgrog la sogs pa'i bcings pa dang bral na sdug bsngal de log pa'i 'bras bu tsam du zad kyi/ de las lhag pa'i dbang phyug gi khyad par dang ldan pa ma yin pa lta bu'o/ /chos kyi sku ni bag chags dang bcas pa'i nyon mongs pa dang shes bya'i sgrib pa las rnam par grol ba dang stobs dang mi 'jigs pa la sogs pa ngo mtshar gyi yon tan du mas brgyan pa 'byor ba thams cad kyi gnas ji ltar 'dod pa bzhin du spyod pas rang dbang mchog thob pa ste/dper na rgyal po'i bu bcings pa dang bral ma thag tu spyi bo nas dbang bskur ba dang /dbang phyug phun sum tshogs pa mchog dang ldan pa lta bu'o/ /gnas kyang 'gyur ro zhes bya ba ni sman bcud kyis len btang nas rgyas par gyur na nad med pa rgyas par 'gyur ba lta bu'i tshul gyis so/ /sa bon thams cad pa yang sa bon med par 'gyur/zhes bya ba la sogs pa ni sa bon gyi rnam pa thams cad spangs pa'i phyir te/ kun nas nyon mongs pa'i sa bon thams cad med pa nyid 'di'i spangs par rig par bya'o/ /ngang pas chu la 'o ma 'thungs pa lta bu dang 'jig rten pa'i 'dod chags dang bral ba na mnyam par bzhag pa ma yin pa'i sa ba'i bag chags 'gribs te/mnyam par bzhag pa'i sa pa'i bag chags 'phel nas gnas gyur pa bzhin no/ /zhes bya ba ni tshig de nyid kyis bshad zin to/ /de ltar kun nas nyon mongs pa dang rnam par byang ba'i mi 'thad pas kun gzhi rnam par shes pa bsgrubs nas 'gog pa la snyoms par zhugs pa rnams kyang zhes bya ba la sogs pas 'gog pa'i snyoms par 'jug pa mi srid par sgrub po//sangs rgyas dang / rang sangs rgyas dang / dgra bcom pa dang / phyir mi ldog pa'i byang chub sems dpa' rnams ma gtogs pa 'gog pa la snyoms par zhugs pa gzhan rnams shi ba las bye brag ston pa na bcom ldan 'das kyis de'i rnam par shes pa lus dang bral ba ma yin no//zhes bka' stsal te/ de ni kun gzhi rnam par shes pa las gzhan ma yin no/ /de ltar ci mngon zhe na/ 'gog pa'i snyoms par 'jug pa ni de'i gnyen po ma yin pa'i phyir ro//de'i gnyen por 'gog pa'i snyoms par 'jug pa skye ba ma yin te/ dmigs pa dang rnam pa yongs su ma chad pa'i phyir ro/ /rnam par rig pa'i las mi gsal ba ni ma zhi ba nyid du yongs su mi gcod pas gnyen po mi byed pa'i phyir 'gog pa'i snyoms par 'jug pa ni kun gzhi rnam par shes pa'i gnyen po ma yin no//gang la gnyen po med pa de ni 'gog par mi 'gyur ro/ /'jug pa'i rnam par shes pa gang dmigs pa dang rnam pa yongs su chad pas ma zhi ba de'i gnyen por skye ste/ de 'gag pa nyid do/ /ji ste 'gags kyang des blta ba'i phyir de dang ma bral ba zhes bya'o zhes bya bar 'dod na de'i phyir/de las langs pa rnams kyi zhes bya ba la sogs pa smos te/ tshig de nyid kyis bshad zin to/ /'di'i phyir yang de ni yid kyi rnam par shes pa ma yin te/ snyoms par 'jug par mi rung ba'i phyir ro//'du shes dang tshor ba 'gog pa med pa'i phyir ro/ /zhes bya ba'i tha tshig ste/ yid kyi rnam par shes pa ni sa mang po pa rnams dang mi ldan pa ma yin pas 'du shes dang tshor ba ma 'gags pa'i phyir snyoms par 'jug par mi rung ngo / /'di'i phyir yang de ni yid kyi rnam par shes pa ma yin te/dmigs pa dang rnam par mi dmigs pa'i phyir ro/ /yid kyi rnam par shes pa thams cad ni dmigs pa dang rnam par dmigs pa med par mi 'byung ngo / /de med pa'i phyir de yang mi 'grub bo/ /'di'i phyir yang de yid kyi rnam par shes pa ma yin te/ dge ba'i rtsa ba dang mtshungs par ldan pa'i phyir ro//snyoms par 'jug pa'i sems de ni mi dge ba ma yin la/ lung du ma bstan pa yang ma yin gyi/ dge ba nyid de ma chags pa la sogs pa med par dge ba nyid kyi sems kyang med de/ mtshungs par ldan pas de dang ldan no zhes grub pa'i mtha' las 'byung ba'i phyir ro//ma chags pa la sogs pa yang reg pa la sogs pa med par mi 'byung ste/ reg pa ni ting nge 'dzin las byung ba'i shin tu sbyangs pa dang btang snyoms kyi tshor ba dang mthun par gyur te/ /tshor ba yang de dang lhan cig skyes par gyur pas snyoms par 'jug pa med do/ /de la 'di snyam du 'du shes dang tshor ba gnyis la 'bras dang zug rngu la sogs pa'i dngos por rnam par sun 'byin pas 'gog pa'i snyoms par 'jug pa la 'gag par 'gyur ro snyam na/de'i mthus mnyam par gzhag par 'gyur ba'i phyir zhes bya ba la sogs pas de'i lan 'debs so/ /rnam par sun 'byin pas ni mnyam par 'jog par nus kyi/de 'gog par ni mi nus te/ de ci'i phyir zhe na/ mnyam par 'jog pa'i gzhan 'du shes med pa'i snyoms par 'jug pa la 'du shes rgyun chad pa tsam du 'gyur ba'i phyir ro/ /gal te gang rnam par sun phyung ba de 'gog par 'gyur na ni/ des na 'du shes med pa la snyoms par 'jug pa rnams kyis 'du shes rnam par sun phyung bas na 'du shes med pa'i snyoms par 'jug pa la 'du shes tsam rgyun chad par 'gyur gyi gzhan ni ma yin no//yang ji ltar gnas 'gog pa med par gnas pa 'gog pa mi srid pa'i phyir der sems kyang 'gog par gyur ba de bzhin du 'gog pa'i snyoms par 'jug pa la sems kyang 'gag par 'gyur gyi gnas pa 'ba' zhig ni ma yin te/gnas yod pa la gnas pa bsal du mi rung ba'i phyir ro/ /dpe yod pa'i phyir zhes bya ba la 'dir ni 'du shes med pa'i snyoms par 'jug pa dpe ste/ de bzhin du dbyer mi rung ba'i phyir gnyi ga 'gag par 'gyur ro/ /yang na 'byung ba dang 'byung ba las gyur pa yang dpe yin te/ phan tshun med par mi 'byung ba'i phyir ro/ /dge ba la sogs pa'i sar nges te/ gang dag thams cad du 'gro ba ma yin pa de dag ni sems thams cad la mi 'byung bar rigs so//'du shes dang tshor ba ni sa mang po pa yin pas thams cad du 'gro ba nyid du gnas pa'i rang bzhin no/ /de'i phyir rnam par shes pa yod na 'di gnyis med du mi rung ste/ de'i phyir kun du 'gro ba nyid yin pa las/ de bzhin du med pa'i phyir ro zhes bya ba smos so/ /'di'i phyir yang de yid kyi rnam par shes pa ma yin te/dge ba dang mi dge ba dang lung du ma bstan par mi 'thad pa'i phyir ro/ /yid kyi rnam par shes pa gang yin pa de ni dge ba'am/ mi dge ba'am/ lung du ma bstan pa'am/ gcig tu 'gyur ba de ni dge ba ma yin te/ dge ba'i rtsa ba dang mtshungs par ldan par 'gyur ba'i phyir te/gong du ma chags pa la sogs pa med par dge bar ji ltar 'gyur/ de dag kyang reg pa med par ji ltar 'byung / de yang lhan cig skyes pa'i tshor ba la sogs pa med par ji ltar 'byung zhes ji skad bstan pa bzhin no//su zhig sbyor ba las byung ba'i dge ba'i sems kyis 'phangs pas snyoms par 'jug pa'i sems dge ba yin gyi/ dge ba'i rtsa ba dang mtshungs par ldan pa'i phyir ni ma yin no snyam du de ltar rtogs pa de'i rtogs pa de ni bstan bcos dang mi mthun pa ste/ mtshungs par ldan pas de dang ldan zhes rnam par gzhag pa dang 'gal ba'i phyir ro//sbyor ba'i sems ni ma chags pa la sogs pa dang mtshungs par ldan pa'i phyir dge ba yin gyi/ de'i rgyu mthun pa'i 'bras bu snyoms par 'jug pa'i sems ni ma yin no zhes bya ba'i nges pa 'di sus byas/ de ni bdag nyid kyis dge ba yang ma yin te/bdag nyid kyis dge ba rnams ni dge ba'i rtsa ba la sogs pa ste/ grangs nges pa'i phyir ro/ /don dam par dge ba yang ma yin te/ thar pa nyid nges par bya ba'i phyir ro/ /gal te mthu 'dus pa ni 'dus pa ste/ reg pa zhes bya bar 'dod kyi/ thams cad ni ma yin te/ snyoms par 'jug pa la sbyor ba'i dus na tshor ba la sogs rnam par sun phyung ba'i phyir ro/ /de'i tshe tshor ba skyed pa'i mthu med do zhe na/ de tsam rgyun chad par 'gyur ro zhes bya ba la sogs pas de'i lan btab zin to/ /de lta bas na der tshor ba med pa'i yid kyi rnam par shes pa mi rung ngo //yang rtog pa dang dpyod pa dag gi 'du byed 'gags pas ngag 'byung bar mi 'gyur na yid kyi 'du byed 'gags kyang yid 'byung ba 'di la rgyu ci yod/ lus kyi 'du byed 'gags kyang lus gnas pa bzhin du yid kyi 'du byed 'gags kyang yid gnas so zhes slar gzhil du mi rung ste/'di ltar bcom ldan 'das kyis lus gnas pa'i rgyu gzhan dag kyang lus kyi 'du byed du gsungs te/ 'di ltar kha zas dang srog gi dbang po dang rnam par shes pa ste/ dbugs rgyu ba med par yang de dag gis lus gnas par 'gyur ro/ /sems pa dang 'du shes ma gtogs par yid kyi 'du byed gzhan dag ni gang du yang ma gsungs so//de lta bas na de gnyis med par de gnas par mi rung ste/ de'i phyir de yid kyi rnam par shes pa ma yin te/ zhar la byung ba de tsam gyis chog go/ /mi dge ba yang ma yin te/ snyoms par 'jug pa dge ba'i phyir ro/ /'du shes med pa'i snyoms par 'jug pa yang mi dge bar mi 'dod na rnam par thar pa dang /mthar gyis gnas pa'i snyoms par 'jug pa'i nang du gtogs pa 'gog pa'i snyoms par 'jug pa lta smos kyang ci dgos/ lung du ma bstan pa rnam pa gsum yang ma yin te/ med pa'i phyir ro//de'i tshe bzo'i gnas la sogs pa mi 'byung ngo / /rnam par smin pa las byung bar dam 'cha' na ni kun gzhi rnam par shes pa grub bo/ /gang rnam par smin pa yang ma yin la mngon par 'du byed par 'jug pa yang ma yin pa zhes bya ba lung du ma bstan pa lnga pa gzhan dag gis brtags pa de ni lung las mi 'byung ste/mdo dang chos mngon pa la med pa'i phyir ro/ /de ltar gyur na 'gro ba de ldog pa nyid du 'gyur zhes bya bas kyang de'i lan btab zin to/ /gang yang gzugs dang sems kyi mjug thogs su 'byung ba 'dus byas kyi chos rnams kyi rgyu nyid du mdo sde pa rtog ste/ de 'di snyam du gzugs kyi skad cig snga ma'i mjug thogs su gzugs kyi skad cig phyi ma 'byung la/ sems kyi skad cig snga ma'i mjug thogs su yang sems kyi skad cig mtshungs par ldan pa dang bcas pa phyi ma 'byung ste/ 'dir kun gzhi rnam par shes pa rgyur brtag ci dgos snyam du sems pa de gong ma bzhin du mi 'thad kyi steng du zhes bya bas sel to//gzugs dang sems ni 'ga' zhig tu res 'ga' rgyun chad par snang ba'i phyir ro zhes ji skad bstan pa lta bu'o/ /gzhan yang de'i ltar na gzugs med pa nas shi ba'i gzugs ni gzugs kyi sa bon las mi 'byung ste/'gags nas yun ring ba'i phyir ro/ /'du shes med pa shi ba dang 'gog pa'i snyoms par 'jug pa las langs pa'i sems kyang sems kyi sa bon las 'byung du mi rung ste/ 'gags nas yun ring ba'i phyir ro/ /yang gal te sems thams cad kun gzhi rnam par shes pa bzhin du sems gzhan gyi sa bon can du nges par 'gyur na ni/des na phung po'i lhag ma med pa'i mya ngan las 'das pa'i dbyings su dgra bcom pa'i tha ma'i sems mi rung ste/ de ma thag pa'i rkyen gyi dngos pos sems gzhan gyi sa bon gyi dngos po mi zad pa'i phyir ro//de lta na yang phung po'i lhag ma med pa mya ngan las 'das pa med pa nyid du 'gyur ro/ /de ltar na sa bon thams cad pa rnam par smin pa'i rnam par shes pa med na nyes pa chen po mang por 'gyur ba'i phyir rang gi don lhur byed pas mi 'dod bzhin du yang rnam par smin pa'i rnam par shes pa nges par rtogs par bya ste/'di ni ldan pa'i rigs pa'o/ /'di la bral ba'i rigs pa yang yod de/ 'jug pa'i rnam par shes pa rnams ni sems dang lhan cig 'byung ba ste/ rnam pa dang bcas pa'i phyir tshor ba la sogs pa bzhin no/ /tshor ba la sogs pa dmigs pa dang rnam pa yongs su chad pa'i sems dang lhan cig 'byung ba'i phyir chos can gyi khyad par las bzlog pa'i rgyus sgrub pa yang ma yin te/nur nur po la sogs pa'i dus kyi sems las byung ba rnams kyang dmigs pa dang rnam pa yongs su ma chad pa'i sems dang lhan cig 'byung bas nges pa med pa'i phyir ro//gzhan yang kun gzhi rnam par shes pa med du zin na ji ltar 'jug pa'i rnam par shes pa la gnas par 'gyur ba mi srid pa de ltar tshigs su bcad pa rnams kyis 'dri ste tshigs su sbyar ba bsdebs nas brjod pa'i phyir tshigs su bcad pa'o//byang chub sems dpa' bzang po'i sems zhes bya ba la sogs pa la byang chub sems dpa' ni bshad zin to/ /bzang po zhes bya ba ni dge ba'o/ /rnam par shes pa lnga spangs pa zhes bya ba ni yid kyi rnam par shes pa'o/ /bstsal ba med las gzhan pa zhes bya ba la/ bstsal ba ni mi dge ba dang lung du ma bstan pa las grol ba zag pa med pa ste/zag pa med pa de las gzhan pa zag pa dang bcas pa ni bstsal ba de las gzhan pa'o/ /gnyen po nyid la ni mthun pa'i phyogs kyi bag la nyal du mi rung ngo / /gal te gnyen po nyid 'gyur ba yin par 'dod na de'i phyir/spangs pa min phyir mi rung ngo / /zhes bya ba smos te/ gnyen po ni spangs pa ma yin no/ /'o na ci zhe na/ spangs pa'i rgyu yin no/ /gyur pa ni spangs pa ste/ 'bras bu yin pa'i phyir ro/ /gal te gnyen po nyid spangs pa yin par 'dod na/ rgyu 'bras tha dad med par 'gyur//spangs pa'i rgyu gnyen po 'bras bu nyid du khas len na gcig tu gyur pa'i phyir ro/ /gal te sa bon bral ba'am/ /dngos po med par 'gyur 'dod na/ /zhes bya ba ni rnam par rtog pa ste/ 'gyur ba zhig yin na kun nas nyon mongs pa'i sa bon rnam pa mang po bsags pa'i sems kyi sa bon dang bral bar 'gyur ba'am/yang na sa bon rnams med par 'gyur grang na/ de med par ni gnyis med de/ /zhes bya ba ni yod na sa bon dang bral ba'am/ dngos po med par 'gyur gyi/ med na ni ma yin no/ /'jig rten las 'das pa'i sems mngon du gyur pa de'i tshe ni de dag med na sa bon dang bral ba'am/chad pa ji ltar 'gyur/ kun gzhi rnam par shes pa 'di'i rab tu dbye ba gang zhe na zhes bya ba ni grub pa'i mtshan nyid kyi don rab tu dbye dgos pas rab tu dbye ba 'dri ba'o/ /rnam pa gsum dang rnam pa bzhir blta bar bya'o/ /zhes bya ba la/ mngon par brjod pa'i bag chags kyi bye brag ces bya ba ni bdag dang chos dang /bya bar mngon par brjod pa tha snyad btags pa rnams te/ lha dang mi dang mig dang / gzugs dang / 'gro'o zhes bya ba la sogs pa'i bag chags sna tshogs yin te/ nus pa'i khyad par gang las bdag dang /chos dang / bya ba'i mngon par brjod par 'byung ba'o/ /bdag tu lta ba'i bag chags kyi bye brag ces bya ba ni nyon mongs pa bzhis nyon mongs par gyur pa'i yid 'jig tshogs la lta ba'i dbang gis kun gzhi rnam par shes pa la bdag go snyam pa'i bag chags kyi bye brag go//srid pa'i yan lag gi bag chags kyi bye brag ces bya ba ni bsod nams dang bsod nams ma yin pa dang / mi g.yo ba'i 'du byed kyi dbang gis lha la sogs pa'i 'gro ba rnams su ma rig pa nas rga shi la thug pa rnams kyi bag chags kyi bye brag go/ / rnam pa gsum bshad zin to/ /rnam pa bzhir brjod par bya ste/ 'phen pas rab tu dbye ba zhes bya ba la/ gang rnam par smin pa'i bag chags gsar du 'byung ba zhes bya ba ni bag chags 'byung ba brjod pas thog mar skye ba gang yin pa/ de 'phen pas rab tu dbye ba ste/ des skye ba 'phen pa'i phyir ro//de med du zin na 'du byed kyi rkyen gyis rnam par shes pa dang / len pa'i rkyen gyis srid pa mi rung ngo / /zhes bya ba ni 'di ltar kun gzhi rnam par shes pa nyon mongs pa'i bag la nyal la ltos pa skye ba la mngon du phyogs par gnas pa de nyid srid pa zhes bya'o//rnam par smin pas rab tu dbye ba zhes bya ba ni gang 'du byed dang / srid pa'i rkyen gyis 'gro ba rnams su 'phangs pa rnam par smin pa ste/ de med du zin na rgyu med par gyur pas yang 'byung ba'i mig la sogs pa'i chos rnams skye bar mi rung ste/ rtsa ba med par yal ga la sogs pa mi 'byung ngo //rgyu nyid du rab tu dbye ba zhes bya ba ni gang kun gzhi rnam par shes pa nyon mongs pa can gyi yid kyis 'jig tshogs la lta ba'i dbang gis bdag tu 'dzin pas dmigs pa de nyid ni bdag tu 'dzin pa'i rgyu nyid de/ de med du zin na nyon mongs pa can gyi yid dang 'brel ba can gyi ngar 'dzin pa'i dmigs pa med par 'gyur ro/mtshan nyid kyis rab tu dbye ba ni thun mong pa la sogs pa'i bye brag gi rnam pa du ma'o/ /de la thun mong ni snod kyi 'jig rten gyi sa bon gang yin pa'o/ /zhes bya ba ni snod kyi 'jig rten du snang ba'i rnam par rig pa rnams kyi byed rgyu'o//thun mong ba ni rang gi las dang mthun pa'i rnam par smin pa'i dbang gis de la spyod pa po thams cad la der snang ba'i rnam par rig pa skye ba'i phyir ro/ /thun mong ma yin pa ni so so rang gi skye mched kyi sa bon gang yin pa'o zhes bya ba la rang rang la yod pa ni so so rang rang gi ste/nang gi skye mched drug gi sa bon zhes bya ba'i tha tshig go/ /thun mong ma yin pa de ni tshor ba med pa 'byung ba'i sa bon no zhes bya ba ni bde ba dang sdug bsngal gyi tshor bas phan 'dogs pa dang gnod par byed pa med pa'i phyir te/ snod kyi 'jig rten la bde ba dang sdug bsngal ba med do//gnyen po byung ste lam gyi bden pa skyes pa na mi mthun pa'i phyogs nang gi skye mched drug gi sa bon 'gags te mi mthun pa'i phyir ro/ /thun mong ba gzhan gyi rnam par rtog pas yongs su zin pa la ni mthong ba rnam par dag par 'gyur te/ zhes bya ba ni rnal 'byor pa nang gi skye mched kyi rnam par rtog pa 'gags pa rnams kyang thun mong ba snod kyi 'jig rten sems can gzhan gyi rnam par rtog pas zin pa gang yin pa de la mthong ba rnam par dag par 'gyur te/de dag gis de nam mkha' dang 'dra bar mthong bas chus kyang mi 'khru'o/ /sas kyang mi 'dzin to//mes kyang mi tshig go/ /rlung gis kyang mi bsgul to/ /don yod pa la mthong ba rnam par dag par ji ltar 'gyur zhes gzhan gyi klan ka'i skabs rig nas/ rnal 'byor pa rnams kyi mos pa tha dad pas zhes bya ba la sogs pa smos te/ mos pa gang dang gang yin pa ji ltar mos pa bzhin du gser la sogs pa'i bye brag gis blta bar bya ba sna tshogs pa dmigs pa lta bu ste/gser dang / dngul dang / rtswa dang shing la sogs pa'i bye brag gis dmigs pa sna tshogs so/ /thun mong 'ching ba spang dka' dang / /yongs shes bya bar dka' bar 'dod//ces bya ba la/ thun mong zhes bya ba ni thun mong gi rgyu las byung ba'i phyir de skad ces bya'o/ /'ching ba zhes bya ba ni chags pa'o/ /spangs par dka' zhing yongs su shes par bya ba dka' bas na spang dka' dang yongs shes bya bar dka' ba'o/ /phyi rol mtshan ma chen po las//zhes bya ba ni gnas pa chen po snod kyi 'jig rten las zhes bya ba'i tha tshig go/ /tha dad sems zhes bya ba ni mos pa sna tshogs rnams kyi'o/ /de ni 'gags par ma gyur kyang / /zhes bya ba ni sems can gzhan gyi rnam par rtog pas yongs su zin pa'i phyir ma 'gags pa'o/ / dag pa rnams kyi zhes bya ba ni gnas gyur pa rnams kyi'o/ /sangs rgyas gzigs pa rnam dag phyir/ /zhes bya ba la sogs pa ni gzugs la sogs pa'i rnam par rtog pa ma spangs pa'i so so'i skye bo rnams kyis zhing gang dag 'dam rdzab dang / rdo dang ba tsha can dang /mi mnyam pa dang / sdong dum dang / tsher ma dang / mi gtsang ba dang / ldan par mthong ba de dag nyid gzugs la sogs pa'i rnam par rtog pa spangs pa de bzhin gshegs pa rnams kyis gser la sogs pa'i rang bzhin du gzigs te/ mya ngan la shing du mthong ba bzhin no/ / thun mong ma yin pa gang yin pa de ni tshor ba dang bcas pa 'byung ba'i sa bon te zhes bya ba ni bde ba dang sdug bsngal la sogs pa'i tshor ba'i gnas yin pa'i phyir ro/ /de med du zin na zhes bya ba ni thun mong dang thun mong ma yin pa'i mtshan nyid kyi kun gzhi rnam par shes pa med du zin na 'di ni sems can gyi 'jig rten no// 'di ni snod kyi 'jig rten no/ /'di ni bde ba can no/ /'di ni sdug bsngal can no zhes bya ba'i bye brag med par 'gyur ro/ /gnas ngan len gyi mtshan nyid ces bya ba la ngan pa ni sdig pa'o/ /de len pa ni gnas ngan len no/ /nyon mongs pa dang nye ba'i nyon mongs pa'i sa bon no//gnas ngan len ni las su mi rung ba nyid do/ /shin tu sbyangs pa'i mtshan nyid ces bya ba la/ shin tu sbyangs pa ni ji skad smos pa las bzlog pa ste/ las su rung ba nyid dang yang ba dang / zo mdog bde ba zhes bya ba'i tha tshig go/ /spyad zin pa'i mtshan nyid ni gang dge ba dang mi dge ba zhes bya ba la sogs pa ni rnam par smin zin pa yang smin par mi nus te/spyad zin pa'i phyir ro/ /dper na sa bon gyis myu gu bskyed nas yang bskyed mi nus pa bzhin no/ /ma spyad pa'i mtshan nyid ni gang mngon par brjod pa'i bag chags kyi sa bon te/ zhes bya ba ni rkyen ji lta ba bzhin du sa bon rgyas par 'gyur ba la thog ma'i mtha' med pa'i spros pa rgyur gyur pa'i phyir ro/ /de med du zin na zhes bya ba ni gnyi ga'i mtshan nyid kyi kun gzhi rnam par shes pa med na ste/ re zhig spyod zin pa'i mtshan nyid med na dge ba dang sdig pa zhes bya ba la sogs pa ni 'bras bu byin pas spyad zin pa 'jig pa de med par 'gyur te/'bras bu byin nas yang 'bras bur 'gyur ro zhes bya ba'i tha tshig go/ ma spyad pa'i kun gzhi rnam par shes pa med du zin na mngon par brjod pa'i bag chags gsar du 'byung bar yang mi rung ste/ mngon par brjod pa sngon gyi rnying bar ma gyur pa sngon ma byung ba la da ltar gyur pa ni 'jig rten na gang med do//dpe mtshan nyid ces bya ba ni/ dpe sgyu ma la sogs pa dang bstun par bya bar mtshon pa ste/ dper na sgyu ma la sogs pa ni yang dag pa gang yin pa mthong ba'i rgyur gyur pa ji lta bar kun gzhi rnam par shes pa yang de bzhin no//de med du zin na zhes bya ba ni dpe sgyu ma la sogs pa dang bstun par bya ba med du zin na kun gzhi rnam par shes pa phyin ci log gi rgyur rtog par mi 'gyur gyi/ yang dag pa ma mthong ba'i rgyu nyid du rtog par 'gyur ro/ /de ltar kun gzhi rnam par shes pa'i don rnam grangs dang /nges pa'i tshig dang / mtshan nyid dang / rab tu dbye bas bshad zin te/ /so so yang dag par rig pa dang mthun pa'i phyir ro/ /ci'i phyir zhes bya ba la sogs pas ni dri ba brtsams nas brjod pa 'dod pa brjod de/ ma bsgribs la lung du ma bstan pa zhes bya ba ni nyon mongs pa can ma yin la lung du ma bstan pa zhes bya ba'i tha tshig go//'di ltar zhes bya bas ni rgyu ston to/ /'di ltar ma bsgribs la lung du ma bstan pa ni dge ba dang mi dge ba dang 'gal ba med do zhes bya ba ni rgyu dang 'bras bu'i dngos por ro/ /phan tshun ma yin te/ mi mthun pa'i phyogs dang gnyen po yin pa'i phyir ro//de lta bas na rnam par smin pa ni dge ba dang mi dge ba ma yin te/ mi mthun pa gnyis lhan cig tu gnas par 'gyur du 'ong ngo / /shes bya'i gnas bshad zin to/ /zhes bya ba ni yang bshad par bya ba ma yin pa'o// //bam po gsum pa/ shes bya'i mtshan nyid mdor bsdu na rnam pa gsum ste/zhes bya ba ni chos thams cad rnam pa gsum du yongs su chad pa'i phyir ro/ /gzhan gyi dbang gi mtshan nyid ces bya ba ni gzung ba dang 'dzin par yongs su rtog pa'i rjes su 'jug pa'i las dang nyon mongs pa gzhan dag gis dbang byas pa'i phyir te/ shes bya ci yang rung ste de ltar mtshon pa ni gzhan gyi dbang gi mtshan nyid do//kun brtags pa'i mtshan nyid ces bya ba ni gtan med pa'i mtshan nyid de/ kun brtags par bya ba gzung bas dang 'dzin pa dang / gang zag dang chos gang yin pa kun brtags par mtshon pa'i phyir mtshan nyid do//de ji ltar na mtshan nyid du 'gyur zhe na/ ji ltar na mi 'gyur/ 'di ltar kun brtags pa shes pa med de/ yod par thal bar 'gyur ba'i phyir ro/ /mi shes pa ni mtshan nyid du yang mi rung mtshan gzhir yang mi rung ngo zhe na/ ji ltar mi shes te/ bcom ldan 'das kyis ji tsam du yod pa la yod par mi shes pa dang /ci tsam du med pa la med par mi shes pa zhes bya ba dang / de bzhin du yod pa la yang yod par shes par 'gyur/ med pa la yang med par shes par 'gyur zhes ma gsungs sam/ kun brtags pa gzung ba'am/ 'dzin pa'am/ bdag gam chos kyi med pa yongs su grub pa'i mtshan nyid gang yin pa de tshad ma'i yul du gyur na rnam par shes so/ /de yongs su shes pas kun du brtags pa yod pa yin par yongs su gcod de mi mthun pa yod pa'i phyir ro/ /yul gyi dngos por khas blangs pas yongs su gcod pa ni ma yin no//lus dang lus can dang za ba po'i rnam par rig pa zhes bya ba la sogs pa de la lus kyi rnam par rig pa ni dbang po gzugs can du snang ba ste/ de bzhin du 'og ma rnams la yang snang ba'i sgra sbyar bar bya'o/ /lus can gyi rnam par rig pa ni yid do//za ba po'i rnam par rig pa ni yid kyi rnam par shes pa'o/ /des nye bar spyad par bya ba'i rnam par rig pa ni phyi'i skye mched rnams so/ /de la nye bar spyod pa'i rnam par rig pa ni rnam par shes pa lnga po dag go/ /dus kyi rnam par rig pa ni dus gsum du snang ba'o/ /grangs kyi rnam par rig pa ni gcig la sogs par bgrang bar snang ba'o//yul gyi rnam par rig pa ni grong dang kun dga' ra ba la sogs par snang ba'o/ /tha snyad kyi rnam par rig pa ni mthong ba dang thos pa dang / bye brag phyed pa dang / rnam par shes pa zhes bya'o/ /bdag dang gzhan gyi bye brag gi rnam par rig pa ni ngar 'dzin pa dang nga yir 'dzin par chad pa lus la sogs pa'i rnam par rig pa ste/nga'o nga'i'o/ /'di ni nga'i ma yin gyi 'di ni gzhan gyi'o/ /zhes bya ba la sogs pa'i bye brag tu 'dzin pa'i phyir ro/ /bde 'gro dang ngan 'gro dang / 'chi 'pho dang / skye ba'i rnam par rig pa ni lha dang /mi dang / sems can dmyal ba dang / dud 'gro dang / yi dags dang / skye ba dang / 'chi bar snang ba'o/ /de la lus dang lus can dang / zhes bya ba nas tha snyad kyi rnam par rig pa gang yin pa de ni mngon par brjod pa'i bag chags kyi sa bon las byung ba'i phyir ro//zhes bya ba'i bar ni de'i rgyu las byung ba'i phyir ro/ /de bzhin du bdag dang gzhan gyi bye brag gi rnam par rig pa ni bdag tu lta ba'i bag chags kyi rgyu las byung ba ste/ nyon mongs pa can gyi yid sa bon yin pa'i phyir ro/ /bde 'gro la sogs pa'i rnam par rig pa ni ma rig pa la sogs pa srid pa'i yan lag bcu gnyis kyi bag chags kyi rgyu las byung ba'o//rnam par rig pa 'di rnams kyi zhes bya ba la sogs pa'i don ni brda phrad par zad do/ /rnam par rig pa 'di rnams kyi zhes bya ba ni ji skad smos pa rnams kyi'o/ /rnam par rig pa tsam nyid ces bya ba ni log par yongs su rtog pa'o//yang dag pa ma yin pa'i kun tu rtog pas bsdus pa zhes bya ba ni gzung ba dang 'dzin pa'i dngos por rnam par 'jog pa'o/ /yod pa ma yin pa dang nor ba'i don snang ba'i gnas zhes bya ba ni/ gzugs la sogs pa yod pa ma yin pa dang / der rnam par rtog pa nor bar snang ba rab tu gsal ba'i rgyu'o//'di ni gzhan gyi dbang gi mtshan nyid do zhes bya ba ni rtogs par bya ba zlos te ston pa'o/ /gang don med kyang zhes bya ba la sogs pa ni gzhan gyi dbang gi rang bzhin rnam par rig pa tsam nyid sems dang sems las byung ba 'khrul pa'i rang gi ngo bo nyid kyi don gyi rnam par rig pa'i cha la dngos por byed pa ni kun brtags pa'i mtshan nyid do//de nyid kun brtags pa de dang gtan du bral ba ni yongs su grub pa'i mtshan nyid de/ dper na smig rgyu la rang gi rgyud sngon du btang ste/ chur gzung ba dang 'dzin pa'i dngos por rnam par 'jog pa'i log par yongs su rtog pa ni gzhan gyi dbang ngo //chur snang ba la dngos por byed pa ni kun brtags pa'o/ /de dang gtan du bral ba ni yongs su grub pa lta bu'o/ /rnam par rtog pas brtags pa'i don/ /kun du brtags pa'i ngo bo nyid/ /rnam par rtog pa gzhan gyi dbang //de yi stong nyid yongs su grub/ /rnam par rig pa 'di dag gi/ /zhes bya ba ni lus la sogs pa nas de la nye bar spyod pa la thug pa'i bar gyi rab tu dbye ba ste/ de dag las byung ba'i phyir ro/ /rnam par rig pa rnam par don med pa'i dper rmi lam smos te grub pa'i phyir ro/ dper na rmi lam zhes bya ba la sogs pa ni tshig de nyid kyis bshad zin to/ /lung dang rigs pas zhes bya ba brjod pas ni lung las 'byung ba'i don rjes su dpag pa'i yul nyid du ston to/ /sa bcu pa zhes bya ba ni mdo gang las byang chub sems dpa'i sa bcu bstan pa de sa bcu rnam par gzhag pa'i rnam pa ste/ming dang / tshig dang / yi ge'i tshogs su snang ba'i rnam par rig pa 'dus pa 'phags pa rdo rje'i snying po'i dbang gis nyan pa po'i sems kyi rgyud la yod pa'i chos kyi rnam grangs te/ de brjod pa yid ches par rung ba nyid du ston to/ /sems tsam zhes bya ba la sogs pa la sems ni rnam par rig pa dang don gcig go//tsam gyi sgras ni don sel bar byed de/ de med pas 'dzin pa yang sel te/ brtags pa'i phyir ro/ /de sems las 'byung ba med par mi 'byung ba'i phyir sems las byung ba rnams ni mi dgag ste/ ji skad du sems las byung ba rnams med par sems nam yang mi 'byung ngo zhes bya ba la sogs pa gsungs pa lta bu'o//'gog pa'i snyoms par 'jug pa gang yin pa de'i sems ji lta bu zhe na/ 'di ni phyogs can la nyes par 'gyur ro/ /kho bo cag la ni de na sems gang yod pa de mtshungs par ldan pa dang bcas par yod do/ /gang med pa de ni mtshungs par ldan pa dang bcas su med de/khams gsum pa ni khams gsum du snang ba'i rnam par rig pa rnams so/ /khams gsum pa smos pas ni 'dod pa la sogs pa'i sred pa dang mtshungs par ldan pa khams gsum par gtogs pa'i sems dang sems las byung ba rnams rnam par rig pa tsam nyid du dam bca' ba ste//de bzhin nyid la dmigs pa dang / /gzhan gyi dbang la dmigs pa lam gyi bden pas bsdus pa rnams dang rjes las thob pa rnams ni ma yin te/ khams gsum na spyod pa'i sred pa rnams kyis bdag gir ma byas pa dang / gnyen po yin pa dang /ma 'khrul pa'i phyir ro/ /mdo sde pa'i gzhung ltar na gzugs med pa'i khams ni sems dang sems las byung ba tsam du zad pas khams gnyis pa zhes mi bya'am zhe na ma yin te/ nor bar bstan pa'i phyir ro/ /gzugs 'ba' zhig med pas rnam par rig pa tsam ni ma yin gyi don thams cad med pas so//mdo sde pa rnams ni gzugs med pa rnams kyi dmigs pa nor bar khas mi len to/ /dgongs pa nges par 'grel pa yang sa bcu pa bzhin du'am/ chos mngon pa'i mdor bsdus byas pa bzhin du bshad par bya'o/ /ting nge 'dzin ni sems rtse gcig tu byed pa sems las byung ba'i chos so//de'i spyod yul ni yul lo/ /gzugs brnyan ni gzugs dngos ltar snang ba'o/ /dmigs pa rnam par rig pa tsam gyis rab tu phye ba can zhes bya ba ni phyi rol gyi dmigs pa med pa'o/ /rnam par shes pa dmigs pa yin par ngas bshad do//zhes bya ba ni 'di ltar dmigs pa de rnam par rig pa tsam gyis rab tu phye ba ni de'i ngo bo nyid ces bya ba'i tha tshig ste/ rnam par shes pa ni dmigs par snang ba tsam gyis rab tu phye ba yin par bshad do zhes bya ba'i tha tshig go/ /sems de nyid kyis zhes bya ba la sogs pa ni bdag nyid la byed pa 'gal bar ston pa'o//byams pa chos gang yang zhes bya ba la sogs pa ni lan 'debs pa ste/ chos thams cad ni byed pa med pas byed pa dang byed pa po mi 'thad pa'i phyir ro/ /de ltar skyes pa zhes bya ba ni rten cing 'brel par 'byung ba'i che ba nyid kyis ni gcig kho na rnam pa gnyis su snang ba'i tshul brjod pa'o//dper na gzugs kyi gzhi po rang gi bzhin nyid la brten nas me long la sogs pa'i nang du de nyid snang yang gzugs brnyan mthong ngo snyam du log par sems te/ me long la sogs pa rgyu'i mthus don gzhan du med kyang snang ba'i phyir ro/ /de bzhin du dran pa dang kun du rtog pa la sogs pa'i rkyen gyis mthus gang tha dad pa ma yin yang tha dad par snang ba ting nge 'dzin gyi spyod yul gyi gzugs brnyan de de bzhin du skyes so//lung de ni tshad ma dang bcas par bcom ldan 'das nyid kyis gtan la phab po/ /'di ltar sems mnyam par gzhag pa na zhes bya ba la sogs pas ni rigs pa gzhan nye bar 'god do//ji ltar 'dod pa bzhin du snang ba'i phyir rnam par bsngos pa la sogs pa ni sems las gzhan ma yin te/ rnal 'byor pa'i rmi lam du rnam par bsngos pa la sogs pa rmis pa bzhin no/ /dran pa'i rnam par shes pa'ang mi rung ste zhes bya ba ni gzhan gyi dogs pa bsal ba'i phyir smos pa ste/su 'di snyam du ting nge 'dzin gyi spyod yul gyi gzugs brnyan ni dur khrod la sogs pa na mthong ba'i keng rus mong po myong ba'i rgyu las byung ba'i dran no snyam du sems pa de la/ 'di ni de lta ma yin no zhes sel to//dmigs pa de mdun du gzhag na snang ba'i phyir ro zhes bya ba ni gal te de dran pa yin na ni ji ltar yul na mthong ba de'i yul nges par 'di ji ltar myong ba bzhin du dran pa'i rigs na de ni de lta yang ma yin no/ /de'i phyir de ltar mngon sum du grub pa bsgoms pa las byung ba'i shes pa de ni dran pa ma yin no//'o na thos pa dang bsams pa las byung ba'i dngos po la rnam par shes pa gang 'byung ba de dran pa yin pas de'i spyod yul ni rnam par shes pa dang tha dad par 'grub par 'gyur ro/ /zhe na/ de yang de ltar ma yin te/ 'di ltar thos pa la sogs pa las byung ba la dran pa gang yin pa de ni 'das pa la dmigs pa'i phyir ro//'das pa ni med pa'i phyir der snang ba ni rnam par rig pa tsam nyid du 'gyur te/ dran par byas pas stong pa'i phyir ro/ /de lta bas na de ltar snang ba'i phyir 'di ni rnam par rig pa tsam ste/ rnal 'byor pas mdun du keng rus dmigs pa de'i gzugs brnyan bzhin no//rjes su dpag pa 'dis zhes bya ba la sogs pa ni gsal ba'i phyir rnam par dgrol bar mi 'bad do/ /gang rmi lam lta bu'i rnam par rig pa sna tshogs zhes bya ba ni lus dang lus can la sogs pa'i rnam par rig pa rnams so/ /de dag las mig gi rnam par shes pa la sogs pa'i rnam par rig pa rnams ni zhes bya ba la sogs pa smos pas ni lus can dang za ba po'i rnam par rig pa bsdu'o//de dag ni rnam par rig pa tsam nyid du rigs te rnam par shes pa'i ngo bo nyid yin pa'i phyir ro/ /mig la sogs pa'i rnam par rig pa gzugs can rnams zhes bya ba la sogs pa smos pas ni dpyad par bya ba'i rnam par rig pa bsdu'o//ji ltar rnam par rig pa tsam nyid du zhes bya ba ni gzugs can yin pas mi srid pa 'dzin pa'o/ /de dag kyang zhes bya ba la sogs pa la lung ni sa bcu pa dang / dgongs pa nges par 'grel pa las gsungs pa'o/ /rigs pa ni ting nge 'dzin gyi spyod yul gyi gzugs brnyan dang rmi lam la sogs pa'o/ /snga ma bzhin no zhes bya ba ni mtshungs par sbyar ba'o/ /gal te de dag kyang zhes bya ba ni mtshungs pa la/ brtan par rgyun gyis 'jug pa'i rgyu 'dri ba ste/de la mtshungs pa ni 'dra ba'o/ /brtan pa ni bar ma dor rgyun chad par mi mthong ba'o/ /de nyid rgyun te rgyun chags pa'i phyir ro/ /phyin ci log la sogs pa'i kun nas nyon mongs pa'i gzhi'i gnas yin pa'i phyir ro/ /zhes bya ba la sogs pa smos pas ni nyon mongs pa dang las dang skye ba bsdu'o//mig la sogs pa'i rnam par reg pa rnams ni phyin ci log la sogs pa'i kun nas nyon mongs pa'i gzhi'i gnas nyid yin te/ rgyu'i dngos por gnas pa nyid yin pa'i phyir ro/ /phyir ro zhes bya ba ni dgos pa 'dri ba la ltos nas lan btab pa ste/ gang gi phyir mig la sogs pa dang gzugs la sogs pa'i don med bzhin du de dag tu snang ba'i rnam par rig pa rnams mtshungs pa dang /brtan par rgyun gyis 'jug pa de kho na'i phyir phyin ci log rnams 'byung ngo / /gzhan du na zhes bya ba ni gal te ji ltar mi 'byung na don med pa la don du phyin ci log tu mi 'gyur ro//phyin ci log med na rgyu med pa'i phyir/ nyon mongs pa dang shes bya'i sgrib pas kun nas nyon mongs pa med par 'gyur ro/ /kun nas nyon mongs pa med du zin na/ rnam par byang ba yang med par 'gyur te/ de ldog pas rab tu phye ba'i phyir ro/ /de'i phyir de ltar 'di dag ces bya ba'i don ni brda phrad par zad do//dgos pa'i dbang gis 'byung ba ni ma yin gyi/ rgyu'i dbang gis 'byung ba ma yin nam zhe na ma yin te/ ji ltar dris ba bzhin lan btab pa'i phyir te/ gzhan gyis ni dgos pa dris kyi/ sa bon zhes bya ba'i rgyu ni ma dris te/de ni kun gzhi rnam par shes pa la gnas pa thog ma med pa can yin par shes pas ma dris so/ /'khrul pa'i rgyu ni gzugs su snang ba'i rnam par rig par 'dod do/ /'khrul pa ni gzugs can ma yin pa'i rnam par rig par 'dod do/ /de bas na gal te gzugs su snang ba gzugs can gyi rnam par rig pa med du zin na 'khrul pa gzugs can ma yin pa'i rnam par rig pa yang med par 'gyur te/yul med pa'i yul can ni mi rung ngo / /ci'i phyir lus la sogs pa'i rnam par rig pa lhan cig 'byung zhes bya ba la sogs pas ni snga ma bzhin du 'dri bar byed do//skye ba dang nye bar spyod pa yongs su rdzogs par mngon pa'i phyir ro zhes bya ba ni lan 'debs pa ste/ snga ma bzhin no/ /'di ltar rnam par rig pa lnga po 'di dag lus thams cad la zhugs na nye bar spyad pa dang bcas pa'i lus mtha' dag mngon te/ yan lag gang yang rung ba zhig ma tshang na der mi 'gyur ro/ /ci'i phyir dus kyi rnam par rig pa la sogs pa zhes bya ba la sogs pa ni 'dri ba ste/ snga ma bzhin no/ /sogs pa smos pa ni grangs dang / yul dang / tha snyad dang / bdag dang / gzhan dang / bde 'gro dang / ngan 'gro dang /'chi 'pho dang / skye bar snang ba'i rnam par rig pa drug bsdu'o/ /thog ma med pa'i dus kyi 'khor ba'i rgyun mi 'chad pa zhes bya ba la sogs pa nas/ skye ba dang rga shi myong ba'i rab tu dbye ba dpag tu med pa'i phyir ro/ /zhes bya ba'i bar ni dgos pa drug po dag gis dus la sogs pa'i rnam par rig pa 'chi 'pho dang /skye ba'i rnam par rig pa la thug pa dag 'byung bar ston te go rims bzhin no/ /ji ltar rnam par rig pa 'di dag ces bya ba la sogs pas rigs pa'i skabs kyis 'thad pa gzhan dang sgrub pa 'dri ba'o/ /de tsam du zad pas zhes bya ba ni don med ces bya ba'i tha tshig ste/don med pa'i phyir ro zhes 'byung ba'i phyir ro/ /de ltar na tsam smos pas ni don dgag pa'i don bshad pa yin no/ /ji ltar don med pa de ltar lung gis kyang bstan to/ /rigs pa ni kha cig ni bshad zin kha cig ni 'chad par 'gyur ro/ gnyis kyis zhes bya ba la sogs pa ni rgyu mtshan dang lta ba ni rgyu mtshan dang lta ba dag go/ /de gnyis dang lhan cig pa ni rnam par rig pa rgyu mtshan dang lta ba dang bcas pa ste/ mig la sogs pa zhes bya ba nas lus kyi rnam par rig pa la thug pa rnams so/ /bdag nyid ji lta ba bzhin du gzugs la sogs par snang ba'i rnam par rig pa'i rgyu mtshan gyis ni rgyu mtshan dang bcas pa'o//mig gi rnam par shes pa la sogs pa yul so sor rnam par rig pa snang ba'i lta bas ni lta ba dang bcas pa'o/ /yang na gzung ba'i cha ni rgyu mtshan/'dzin pa'i cha ni lta ba ste gnyis so/ /sna tshogs kyi rnam pa 'byung ba'i phyir te zhes bya ba ni ri mo'i gding ba la sogs pa la sna tshogs kyi rnam pa'i rnam par shes pa gcig kho na cha gcig ni gzung ba dang / cha gcig ni 'dzin par cig car 'byung ngo / /gang dag de'i skye ba rim gyis 'byung bar 'dod pa de dag gi ltar na gzhi chen po la yang nyin gcig tu yang sna tshogs kyi blo 'byung bar mi 'gyur ro//yid kyi rnam par rig pa ni mig la sogs pa nas chos la thug pa'i rnam par rig pa thams cad kyis zhes bya ba la sogs pa ni don thams cad dmigs pa la yid kyi rnam par shes pa dbang byed pa mig la sogs pa'i rnam par rig pa nas chos kyi rnam par rig pa la thug pa'i bar dag rgyu mtshan nyid du rnam par gnas te/de dag gis de rgyu mtshan dang bcas pa'o/ /yid kyi rnam par shes pa'i rnam par rig pas ni lta ba dang bcas pa ste/'di ltar de dag thams cad la rnam par rtog par byed pa dang / rnam par rig pa thams cad kyi rnam par 'byung ba'i tshul can yang yin te/ de lta bas na yid kyi rnam par shes pa de 'dir lta ba zhes bya'o/ /'dir tshigs su bcad pa zhes bya bas ni de tsam nyid dang gnyis dang sna tshogs nyid du rtogs pas/de tsam gnyis dang sna tshogs nyid/ /rnal 'byor pa rnams rtogs par 'dod/ /ces bya ba ste/ rnal 'byor spyod pa rnams kyis yongs su shes par 'dod do/ /de dang bral na zhes bya ba la sogs pa la bral bar gyur pas bral ba ste/dmigs pa med pa'o/ /dmigs pa rnam par bshig pa de med na rnam par rig pa tsam nyid dang bral ba nye bar gnas te/ rnam par rig pa rnam par shes par byed pa nyid du med pa'i phyir ro/ /shes bya med na shes par byed pa mi rung ste/rgyu yul med pa'i yul can du 'gyur du 'ong ngo / /gzung ba dang 'dzin par rnam par brtag par bya ba ma yin pa'i dngos po 'phags pa'i so so rang gi ye shes kyis rig pa bems po ma yin pa'i dngos po 'di ni gnas so/ /yid kyi rnam par shes pa de nyid ces bya ba la sogs pas ni lta ba'i bye brag brjod de/yid kyi rnam par shes pa gcig kho na mig la sogs pa rten de dang de nas skye ba na mig gi rnam par shes pa nas yid kyi rnam par shes pa zhes bya ba'i bar de dang de'i ming 'thob ste/ rigs gzhan du gyur pa'i rnam par shes pa gzhan ni med do snyam du byang chub sems dpa' kha cig sems so//ci dang 'dra zhe na sems pa dper brjod de/ dper na sems pa gcig lus la gnas te/ lus 'jug par byed pa na lus kyi las zhes bya/ ngag la gnas te ngag 'jug par byed pa na ngag gi las zhes bya/ yid dang mtshungs par ldan pa na yid kyi las zhes bya ba lta bu'o/ /gal te yid kyi rnam par shes pa de lta bu ni rnam par mi rtog par 'gyur te/ gnas kyi rigs kyis mig gi rnam par shes pa bzhin no/ /gnas pa ni gnas kyi rjes su byed de/ 'di ltar nyon mongs pa can gyi yid kun nas nyon mongs pa'i gnas kyis yid kyi rnam par shes pa 'byung ba na nyon mongs pa can nyid du 'gyur ro zhe na/rten thams cad du 'byung ba na zhes bya ba la sogs pas lan 'debs te/ mig la sogs pa gnas thams cad du 'byung ba ni skye ba'o/ /sna tshogs kyi rnam pas gnyis su snang ba 'byung ste/zhes bya ba ni 'dzin par rnam par rtog pa'i bdag nyid sna tshogs kyi rnam pas gnyis su snang ste/ rnam par shes pa gcig po las cha gcig ni don tsam du snang bar 'gyur/ de'i cha gcig ni don la rnam par rtog pa'i rnam par 'byung ngo //de lta bas na rnam par mi rtog pa nyid kyi skyon du mi 'gyur ro/ /gzugs can gyi khams na zhes bya ba ni gzugs med pa'i khams na ma yin pa'o/ /de ci'i phyir zhe na/ yid kyi rnam par shes pa lus la gnas pa'i phyir zhes bya ba la sogs pa'o/ /dper na mig la sogs pa'i dbang po lus la gnas pa bzhin du zhes bya ba ni des byas pa'i phan pa dang gnod pa lus kyi yang yin pa de bzhin du gzugs can gyi khams na yid kyi rnam par shes pa lus la gnas pa'i phyir des byas pa'i myong ba lus kyi yang yin no//gnas thams cad du yang reg bya la 'dzin par snang ba yang 'byung ngo zhes bya ba ni mnyam par gzhag pa khong lci ba dang /yang na myong ba yongs su gcod pa'i phyir ro/ /gcig bur smra ba'i byang chub sems dpa' lung smos pa/ gang zhig lus med ces bya ba la sogs pa ste/ lus med ces bya ba ni khog pa med pa'i phyir ro//phug gnas zhes bya ba ni nang na yod pa'i phyir ro/ /ring du 'gro zhes bya ba ni shes bya thams cad du 'gro ba'i phyir ro/ /gcig pu rgyu zhes bya ba de ni khungs te/ gnyis pa med pa'i phyir ro/ /gdul dka' zhes bya ba ni dmu rgod do/ /'dul byed ces bya ba ni dbang du byed pa'o//lung gnyis pa yang dbang po lnga po 'di dag gi zhes bya ba la sogs pa ste/ spyod yul gyi yul ni yid kyis myong ste/ zhes bya ba la yid kyi rnam par shes pas zhes bya ba'i tha tshig go/ /yid ni 'di dag gi rton pa'o/ /zhes bya ba ni de'i dbang gis 'grub pa'i phyir ro//yang khungs gsum pa smos so/ /rnam par shes pa'i tshogs drug ni yid kyi skye mched do zhes bya ba ni yid kyi rnam par shes pa'i skye mched ces bya ba'i tha tshig go/ /gang du yang kun gzhi rnam par shes pa'i rnam par rig pa ni don gyi rnam par rig par rnam par 'jog pa zhes bya ba ni don gyi rnam par shes pa'i rgyu yin pas de ltar rnam par 'jog ces bya ba'i tha tshig go//de las gzhan pa zhes bya ba ni lus la sogs pa'i rnam par rig pa rnams so/ /rgyu mtshan zhes bya ba ni dmigs pa yin te/ rnam par byang ba yin pa'i phyir ro//yid kyi rnam par shes pa'i rnam par rig pa rten dang bcas pa ni zhes bya ba ni 'das ma thag pa'i yid dang nyon mongs pa can dang bcas pa ste/ de gnyis skyed pa dang kun nas nyon mongs pa'i gnas yin pa'i phyir ro/ /lta ba ni rnam par rtog pa'i phyir ro/ /de'i lta ba 'byung ba'i rgyu mtshan yin pa'i phyir zhes bya ba ni kun gzhi rnam par shes pa de'i lta ba rnam pa sna tshogs 'byung ba'i rgyu mtshan yin pa'i phyir ro//mig la sogs pa'i rnam par rig pa dag don ltar snang ba ni yid kyi rnam par rig pa'i lta ba de dang / rtsa ba'i rnam par shes pa 'byung ba'i rten gyi bya ba byed do/ / yang don med par bstan pa'i phyir lung gzhan dang rigs pa gzhan brjod de/ byang chub sems dpa' chos bzhi dang ldan na zhes bya ba la sogs pa'o/ phan tshun mi mthun pa 'gal ba'i rnam par shes pa rnams kyi rgyu mtshan gyi dngos po ni rnam par shes pa 'byung ba'i rgyu mtshan nyid de/ phyi rol gyi don ni rgyu mtshan nyid du mi rung ba'i phyir de shes pas ni don med par khong du chud par bya'o//yi dags dang / dung 'gro dang mi zhes bya ba la sogs pa ni chu klung gang la yi dags rnams kyi rang gi las kyi rnam par smin pa'i dbang gis rnag la sogs pas gang bar mthong ba de nyid la dud 'gro nyal sogs pas btung ba dang gnas yin pa'i blos gnas par byed do//mi rnams ni dngar ba dang dang ba dang bsil ba'i chur rtog cing khrus byed do/ /'thung ngo / /'jug go/ /nam mkha' mtha' yas skye mched la snyoms par 'jug pa'i lha rnams kyis ni nam mkhar mthong ste/ gzugs kyi 'du shes rnam par bshig pa'i phyir ro//dngos po gcig la phan tshun mi mthun pa'i rnam par shes pa du ma 'byung ba de ni mi rung ba ste/ chu klung de nyid rnag dang gcin dang phyi sa sa gang ba dang / dbyug pa dang ral gri thogs pa'i mis bsrungs pa yin pa dri zhim pa dang bsil ba'i chu dang / gnas dang / btung ba la sogs pa'i bya ba'i 'os dang nam mkha'i bdag nyid du ji ltar 'gyur te/ phyi rol gyi don med do/ /brtags pas der snang bar ni rung ste/ ji skad du/ /bud med lus ni gcig pu la/ /ro dang 'dod bya za ba zhes/ /kun rgyu 'dod can khyi rnams kyi/ /rnam par rtog pa rnam gsum mo//zhes bshad pa lta bu'o/ /'das pa dang ma 'ongs pa la ni mdo sde pa'i ltar na rnam par shes pa dmigs pa med par grub po/ /rmi lam yang grags so/ /ting nge 'dzin gyi spyod yul gyi gzugs brnyan ni brjod zin te/ mdun na snang ba'i phyir de ni dran par mi rung ngo zhes bshad pa yin no//me long la sogs pa'i nang du bzhin la sogs pa'i gzugs brnyan snang ba yang ji ltar ci yang ma yin pa de ltar sngar bshad zin te/ de dag la rnam par shes pa dmigs pa med pa nyid du grub bo/ /'bad pa med par yang phyin ci log med par 'gyur ba ni gsal ba'i phyir rnam par dgrol bar kho bos 'bad pa ma byas so//gal te ji ltar dmigs pa bzhin/ /don rnams yang dag nyid rtogs na/ /yang dag mthong bas lus can rnams/ /'bad pa med par dgrol bar 'gyur/ /bsam gtan pa zhes bya ba ni nyan thos dang / rang sangs rgyas rnams te/bsam gtan ni sems rtse gcig pa dge ba'o/ /'di dag la bsam gtan byed pa'i ngang tshul yod pa ni bsam gtan pa'o/ /sems la dbang thob pas rnams la zhes bya ba ni sems las su rung ba nyid thob pa rnams so/ /mos pa ni mo par byed pa ste/ yid ches pa'o/ de'i dbang gis zhes bya ba ni ji ltar mos pa bzhin dus la sogs pa chu la sogs pa'i dngos por snang ba'i phyir ro//zhi gnas thob pa zhes bya ba ni ting nge 'dzin thob pa rnams te/ zhi gnas dang ting nge 'dzin ni don gcig go/ /'dis sems g.yengs ba zhi bar byed pas zhi gnas so/ /rnal 'byor pa zhes bya ba ni stong pa nyid la dmigs pa'am/'phags pa'i bden pa bzhi la dmigs pa'i zhi gnas dang lhag mthong zung du 'brel par 'jug pa rang gi ngang gis 'jug pa dang ldan pa ni rnal 'byor pa ste/ de su dag la yod pa de dag ni rnal 'byor pa'o/ /de dag gi rjes la thob pa med pa la sogs pa'i chos la lhag mthong zhes bya ba ni shes rab bo//de la brtson pa rnams zhes bya ba ni mngon par brtson pa rnams so/ /mdo la sogs pa'i chos la lhag mthong byed pa na mi rtag pa la sogs pa'i don gcig pu la yang ji lta ji ltar skad cig mar 'jig pa la sogs pa'i dngos por yid la byed pa rnams kyi yul du 'gyur ba de lta de ltar rnam pa du mar snang ngo //rnam par mi rtog pa'i ye shes thob ste/ de la gnas pa rnams la don thams cad mi snang ngo zhes bya ba la rnam par mi rtog pa'i ye shes ni 'og nas 'chad do/ /don de yod na rnam par mi rtog par mi rung ste/rnam par brtag par bya ba yod na rnam par mi rtog pa nyid du mi 'thad do/ /gal te don yang dag pa yin du zin na rnam par mi rtog pa'i ye shes byung yang de mi snang bar mi 'gyur te/ yang dag pa'i don la dmigs pa'i phyir ro/ /de ltar na zhes bya ba ni rigs pa smos ma thag pa dang rgyud sngar bshad pa rnams kyis kyang don med do zhes mjug sdud pa'o//de ji ltar na gzhan gyi dbang yin zhes bya ba ni bdag rang gis shes par bya zhes bya ba'i tha tshig go/ /ci'i phyir zhe na/ zhes bya ba ni gzhan la brjod ces bya ba'i tha tshig go/ /de bzhin du ngo bo nyid gnyis po la yang dri ba gnyis gnyis so//dri ba de dag gi lan kyang gnyis gnyis so/ /rang gi bag chags kyi sa bon zhes bya ba la sogs pa ni kun brtags par brjod pa'i bag chags su bstan te/ rang gi sa bon des dbang du byas pa'i phyir gzhan gyi dbang ste/ bdag rang gis shes par bya ba yin no//skad cig las lhag par mi gnas pa'i phyir gzhan la brjod do/ /sa bon gyi gzhan gyi dbang dang / skye ba dang 'jig pa gzhan gyi dbang gi phyir te go rims bzhin no/ /de la gnas pa'i zhes bya ba ni gzhan gyi dbang la brten pa'o/ /don med pa zhes bya ba gal te med na don zhes ji skad bya zhe na/len 'debs te/ snang ba zhes bya ba ni de mngon par brjod pa'i sa bon las yod pa ma yin yang don bzhin du snang ba ste/ des na don zhes brjod do/ /snang ba ni gsal ba dang mngon pa dang rab tu gsal ba zhes bya ba'i tha tshig go/ /dpag tu med pa'i rnam pa can gyi zhes bya ba ni bdag dang chos rnam pa sna tshogs mtha' yas pa yul du snang ba'i yid kyi rnam par shes pa zhes bya ba kun du rtog pa'o//phyin ci log ces bya ba ni 'khrul pa ste/ gzung ba dang 'dzin pa'i don gyi rnam par 'byung ba'i rgyu yin pa'i phyir kun du brtags pa ste/ de la don du kun du rtog pa'i phyir ro//rang gi mtshan nyid med la kun du rtog pa tsam du dmigs pas zhes bya ba ni/ bdag dang chos dag med pa la rtog pa'i de'i rnam par snang bas kun brtags pa zhes bya'o/ /gzhan du mi 'gyur ba ni 'gyur ba med par yongs su grub pas yongs su grub par shes par bya'o//rnam par dag pa'i dmigs pa yin pa dang / dge ba'i chos thams cad kyi mchog yin pa gnyis kyi yongs su grub pa zhes brjod do/ /yang kun du rtog pa yod cing zhes bya ba la sogs pa kun brtags pa dpyod do/ /yid kyi rnam par shes pa ni kun du rtog pa ste/rnam par rtog pa can gyi phyir ro/ /zhes bya ba ni nges par rtog pa dang rjes su dran pa'i rnam par rtog pa dang 'brel ba'i phyir ro/ /rang brjod pa'i bag chags kyi sa bon las byung ba zhes bya ba ni yid kyi rnam par shes pa yid kyi rnam par shes pa zhes thog ma med pa'i 'khor ba na tha snyad du brjod pa ste/de'i bag chags ni 'di'i sa bon no/ /rnam par rig pa thams cad kyi brjod pa'i bag chags kyi sa bon las byung ba zhes bya ba ni 'di ltar gzugs la sogs pa mtha' yas par snang ba'i rnam par rig pa brjod pa'i bag chags kyi rgyu las byung ba ste/ der snang bar 'byung ba'i tshul can yin pa'i phyir ro/ /de'i phyir yid kyi rnam par shes pa ni rnam pa mtha' yas pa'i rnam par rtog pa thams cad kyis 'byung ba'o/ /gzhan gyi dbang gi ngo bo nyid ni kun du brtags par bya'o zhes bya ba ni de'i phyogs gcig mig la sogs pa yul du gyur pa'o//rnam pa gang du gzhan gyi dbang gi ngo bo nyid la kun du brtags pa de ni de la kun brtags pa'i ngo bo nyid do zhes bya ba ni rnam pa rgyur gyur pa kun brtags pa nyid du bstan to/ /kun du rtog pas ji ltar kun du rtog ces bya ba ni rnam pa'i rab tu dbye ba dris nas/ kun brtags pa'i rab tu dbye ba ston to//ming gis dmigs pa zhes bya ba ni lha sbyin zhes bya ba la sogs pa'i ming thos nas don la kun du rtog par byed kyi ming ma thos par ni don la rnam par rtog par byed mi nus so/ /gzhan gyi dbang gi ngo bo nyid lus la sogs pa la der mtshan mar 'dzin pa zhes bya ba ni rang gi mtshan ma la mngon par zhen zhes bya ba'i tha tshig go//mtshan mar 'dzin pa ni 'du shes te/ ji ltar 'du shes su 'gyur ba de ltar rjes su tha snyad 'dogs so/ /yang na gzhan gyi dbang gi ngo bo nyid mig la sogs pa la'o/ /lta ba rnam pa lnga nges par rtog pa'i rnam par 'jug pas so//de la mngon par zhen pa zhes bya ba ni mtshan mar byas pas mngon par zhen pa'i phyir te mtshan ma la mngon par zhen pa'i dbang gis zhes bya ba'i tha tshig go/ /lta bas nges par brtags pa'i don la 'di ni de bzhin no zhes mngon par zhen nas gzhan dag la ston par 'dod pa na rtog pa dang dpyod pa dag gis ngag kun nas slong ste/ma brtags ma dpyad par tshig mi smra'o zhes ji skad gsungs pa lta bu'o/ /mthong ba la sogs pa zhes bya ba ni mthong ba dang thos pa dang / bye brag phyed pa dang / rnam par shes pa tha snyad rnam pa bzhi po dag gis te/ ji ltar sprul gyi ming la dmigs pa na thag pa la sprul gyi mtshan ma kyag kyog la sogs pa mtshan mar byed cing de la mngon par zhen nas gzhan la bstan pa'i phyir sprul mthong ngo zhes tshig tu smra ba de dang mtshungs so/ /tha dad pa yang ma yin zhes bya ba ni kun brtags pa dang gzhan gyi dbang gnyis yod pa dang med pa'i phyir ro//yod pa las yod pa nyid ni gzhan ma yin te/ ri bong gi rwa la sogs pa med pa ni yod pa las gzhan ma yin no/ /tha dad pa ma yin pa yang ma yin zhes bya ba ni yod pa dang med pa gcig pa nyid du mi 'thad pa'i phyir te/ de bzhin du gzhan gyi dbang dang yongs su grub pa gnyis kyang rang bzhin gyis dag pa dang ma dag pa'i ngo bo yin pa'i phyir ro//'dir dgongs pa'i rnam grangs la brten nas ni 'di dag gcig par yang 'gyur/ du mar yang 'gyur bas rnam grangs kyis gzhan gyi dbang nyid kun brtags par bstan te/ kun du rtog pa'i rgyu mtshan yin pa dang des kun brtags pa'i phyir ro/ /zhes bya ba ni 'di ltar bdag dang gzugs la sogs pa kun brtags pa'i rten yin pa dang / kun du rtog pa zhes bya ba yid kyi rnam par shes pa bdag dang gzugs la sogs pa'i dngos por kun du rtog ste/ dgongs pa des kun brtags pa zhes nye bar 'dogs par mdzad do/ /rnam grangs kyis ni de nyid yongs su grub pa'o zhes bya ba ni ji ltar snang ba gtan du med pa'i phyir ro/ /bag chags kyi sa bon gyi gzhan gyi dbang zhes bya ba ni rgyu la rag las pas gzhan gyi dbang ngo / /kun nas nyon mongs pa dang rnam par byang ba'i ngo bo nyid yongs su ma grub pa gzhan gyi dbang zhes bya ba ni 'di ltar rnam par brtag par bya ba'i tshe ni kun nas nyon mongs par 'gyur ro//rnam par brtag par bya ba ma yin pa'i tshe ni rnam par byang bar 'gyur te/ de ltar rnam pa gnyis la rag lus pas gzhan gyi dbang ngo //de ltar na re zhig ngo bo nyid rnam pa gsum po de dag gi tshul ni ltos pa'i bye brag gis tha dad pa yang ma yin/ tha dad pa ma yin pa yang ma yin te/ bag chags kyi sa bon las byung ba la sogs pa la ltos pa gang gis gzhan gyi dbang yin pa de nyid kyis gnyis po dag ni ma yin no/ kun du rtog pa'i rgyu mtshan dang / des kun brtags pa nyid la/ ltos pa gang gis kun brtags pa yin pa de nyid kyis gnyis po dag ni ma yin no/ /kun brtags pa gtan med pa la ltos pa gang gis yongs su grub pa yin pa de nyid kyis gnyis po dag ni ma yin no/ /ji ltar gzhan gyi dbang gi rnam pa gnyis yin pa ltar kun brtags pa yang de bzhin te/de la ngo bo nyid du kun du rtog pa ni mig la sogs pa ste/ dngos po tsam nye bar 'dzin pa'o/ /khyad par du kun du rtog pa ni mi rtag pa nyid la sogs pa'i chos la rtog pa'o/ /rang bzhin gyis yongs su grub pa ni dri ma dang bcas pa'i de bzhin nyid du bstan to//rnam par dag par yongs su grub pa ni dri ma med pa'i de bzhin nyid do/ /bya ba ni tha snyad la mkhas pa rnams kyi zhes bya ba ni tshig sngon du btang nas rang gi bsam pa brjod pa dang 'brel pa'o/ /ma byang ba ni bzlog pa ste/ /ba lang la sogs pa rnams kyi'o//ming la brten te ming gi ngo bo nyid la kun du rtog pa zhes bya ba ni dper na na li ke ra'i gling na gnas pas ba lang gi sgra thos nas de'i don ma rtogs nas ba lang gi sgra'i ming gis ming la kun du rtog pa'o/ /ming ma rtogs pa'i don zhes bya ba ni ming dang ming can 'brel bar ma byas pa de nyid kyis ba lang gi lus mthong nas phyir zhing don la rtog pa'o//de gnyi ga la brten pa ni brda shes par bya ba brjod pa dang / brjod par bya ba gnyis la brten nas rtog pa'o/ /rtsa ba'i rnam par rtog pa ni rnam par rtog pa de las gzhan pa dag gi rtsa ba yang yin la/ rang yang rnam par rtog pas na rtsa ba'i rnam par rtog pa ste/ kun gzhi rnam par shes pa'o/ /mtshan ma'i rnam par rtog pa ni 'di lta ste/ gzugs la sogs pa ste/ 'di'o zhes mtshan mar byed pa'i phyir ro/ /mtshan mar snang ba'i rnam par rtog pa ni 'di lta ste/ rten dang bcas pa'i mig gi rnam par shes pa la sogs pa'i rnam par rig pa'o zhes bya ba ni mtshan mar snang ba'i phyir ro//mtshan mar 'gyur ba'i rnam par rtog pa zhes bya ba ni gzugs la sogs par snang ba'i rnam par rig pa'i 'gyur ba ste/ de nyid rnam par rtog pa'o/ /rga ba la sogs pa zhes bya ba ni rga ba la sogs pas gzugs la sogs par snang ba'i rnam par rig pa rnams 'gyur bar byed pa'i phyir te/'di ltar rgas na phyi dang nang gi gzugs la sogs par 'gyur ro/ /sogs pa smos pas ni bde ba la sogs pa'i tshor ba bsdu ste/ bde ba'i mig dang bzhin gsal ba'i phyir te/khros par gyur pa la sogs pa'i mdog mi sdug ces ji skad gsungs pa lta bu'o/ /gnod pa dang dus kyis yongs su 'gyur ba la sogs pa zhes bya ba ni gsad pa dang bcing ba la sogs pas lus la sogs pa'i 'gyur ba skyed pa'i phyir la/ grang ba dang / tsha ba dang / char pa la sogs pas kyang phyi dang nang gi lus dang shing la sogs pa'i gzugs la sogs pa gzhan du 'gyur te/grang ba'i tshe grang bas nyen pa zhes bya ba la sogs pa ji skad gsungs pa lta bu'o/ /sems can dmyal ba'i 'gro ba la sogs pa zhes bya ba la sogs pa smos pas ni ngan 'gro thams cad bsdus te/de dag tu gzugs la sogs pa 'gyur ba ni grags pa yin no/ /'dod pa'i khams la sogs pa zhes bya ba la sogs pa smos pas ni gzugs kyi khams bsdus te/ gzugs med pa'i khams na gzugs la sogs par snang ba'i rnam par rig pa med pa'i phyir ro/ / bsam gtan bzhi po dag na sems can dang snod kyi gzugs la sogs pa nor bu'i 'od ltar dang ba yin du zin kyang 'gyur ba yod pa nyid de/ gnas pa gzhan du 'gyur ba yang snang ngo zhes gsungs pa'i phyir ro/ /mtshan mar snang ba 'gyur ba'i rnam par rtog pa zhes bya ba ni mig gi rnam par shes pa la sogs pa'i rnam par rig pa gzugs la sogs pa'i mtshan mar snang ba rnams te/rten mig la sogs pa dang bcas te 'gyur ba'o/ /de nyid rnam par rtog pa ste/ /ji skad smos pa rga ba la sogs pa 'di dag gis ji ltar mthun mthun du 'gyur bar byed pa'i phyir ro//'di ltar rgas na mig la sogs pa nyams pa nyid dang / rtul ba nyid ces bya ba la sogs pa 'byung ste/ gnas gyur pa'i phyir de la gnas pa'i rnam par rig pa rnams kyang 'gyur ro/ /de bzhin du bde ba la sogs pa'i tshor ba la sogs pas kyang gzhan du 'gyur te/ bde bar gyur ba'i sems mnyam par 'jog pa dang /sdug bsngal bar gyur ba'i sems rnam par 'khrug pa'i phyir ro/ /de bzhin du gnod pa bsad pa la sogs pa dang / dus kyi yongs su 'gyur ba dang / /'dod pa la sogs pa'i khams rnams kyi gnas dang bcas pa'i rnam par rig par 'gyur te/ji ltar mthun mthun du sbyor ro/ /gzugs med pa'i khams na ni bde ba la sogs pa'i tshor bas byas pa'i rnam par rig par 'gyur ba'i rnam par rtog pa'o/ /gzhan gyis bstan pa'i rnam par rtog pa zhes bya ba ni dam pa dang / dam pa ma yin pa'i bshes gnyen dang phrad nas dam pa dang dam pa ma yin pa'i chos mnyan pa'i rgyu las byung ba'i rnam par rtog pa'o//'di nyid phyi rol pa ser skya la sogs pa dang / chos 'di pa bde bar gshegs pa pa rnams kyi ni tshul bzhin ma yin pa zhes bya ba yin te/ yang dag pa dang log pa'i lta ba dang mtshungs par ldan pa'i phyir ci rigs su sbyar ro//tshul zhes bya ba ni rigs pa ste/ de la de yod pas tshul bzhin no/ /'jig tshogs la lta ba'i rgyu las byung ba lta bar song ba drug cu rtsa gnyis dang mtshungs par ldan pa'i rnam par rtog pa zhes bya ba ni sngon dang /phyi ma dang / dbus la rtog pa'i rnam pa ste/ /tshangs pa'i dran ba'i mdo las 'byung ba'i tshul du ci bdag 'das pa'i dus na 'byung ba zhig gam zhes bya ba la sogs pa'o/ /lta ba la mngon par zhen pa de nyid rnam par rtog pa'o/ /song ba zhes bya ba'i sgra ni rnam pa'i don to/ / rnam par g.yeng ba'i rnam par rtog pa zhes bya ni rnam par g.yeng bar byed pas rnam par g.yeng ba ste/ de nyid rnam par rtog pa'o/ /gang las rnam par g.yeng bar byed ce na/ rnam par mi rtog pa'i ye shes las so/ /ci mngon zhe na/ shes rab kyi pha rol tu phyin pa'i mi mthun pa'i phyogs yin pa'i phyir ro//rnam par mi rtog pa'i ye shes ni shes rab kyi pha rol tu phyin pa ste/ de nyid lhur na rnam par rtog pa rnam pa bcus sel ba yin no/ dngos kyi sgo nas de kho na rtogs pa'am/ brjod par mi nus pa'i phyir te/ de lta bas na shes rab kyi pha rol tu phyin pa thams cad du rnam par rtog pa rnam pa bcu'i gnyen po nyid bstan to//'di lta ste/ byang chub sems dpas ji ltar shes rab kyi pha rol tu phyin pa la spyad par bya zhe na/ shA ri'i bu 'di la byang chub sems dpa' ni byang chub sems dpa' nyid du yod bzhin du byang chub sems dpa' yang dag par rjes su mi mthong ngo //byang chub sems dpa'i ming yang dag par rjes su mi mthong ngo / /shes rab kyi pha rol tu phyin pa yang dag par rjes su mi mthong / spyod ces bya bar yang dag par rjes su mi mthong / mi spyod ces bya bar yang dag par rjes su mi mthong /gzugs yang dag par rjes su mi mthong / tshor ba dang / 'du shes dang / 'du byed dang / rnam par shes pa yang dag par rjes su mi mthong ngo / /de ci'i phyir zhe na/ 'di ltar ming ni ming gi ngo bo nyid kyis stong / gzugs ni gzugs kyi ngo bo nyid kyis stong ste/ stong pa nyid kyis ni ma yin no/ /gzugs kyi stong ba nyid gang yin pa de gzugs ma yin no/ /gzugs ni stong pa nyid las gzhan ma yin te/ gzugs nyid stong pa nyid do/ /stong pa nyid gzugs so/ /de ci'i phyir zhe na/ shA ri'i bu 'di lta ste/ gzugs zhes bya ba 'di ni ming tsam ste/ngo bo nyid kyis mi skye mi 'gag/ kun nas nyon mongs pa ma yin/ rnam par byang ba ma yin te/ ming bcos ma la chos de dag so sor brtags nas glo bur gyi ming gis rjes su tha snyad 'dogs pa'i phyir ro/ /ji ltar ji ltar rjes su tha snyad 'dogs pa de lta de ltar mngon par zhen to//byang chub sems dpa' ni de dag thams cad kyi thams cad du yang dag par rjes su mi mthong ngo / /yang dag par rjes su mi mthong bas mngon par zhen pa med do/ /gzugs la ji ltar bar rnam par shes pa'i bar du yang de bzhin du blta bar bya'o/ /de la dngos po med pa'i mtshan ma'i rnam par g.yeng ba'i rnam par rtog pa'i gnyen por bka' stsal pa/byang chub sems dpa' nyid du yod bzhin du zhes bya ba la sogs pa ste/ byang chub sems dpa' la stong pa nyid kyi rang bzhin yod pa'i phyir ro/ /dngos po'i mtshan mar rnam par rtog pa'i gnyen por bka' stsal pa/byang chub sems dpa' yang dag par rjes su mi mthong ba zhes bya ba la sogs pa ste/ kun brtags pa'i bdag nyid du med pa'i phyir ro/ /sgro 'dogs pa'i rnam par rtog pa'i gnyen por bka' stsal/ 'di ltar ming ni ngo bo nyid kyis stong ngo zhes bya ba la sogs pa'i bar du ste/brtags pas so zhes bya bar dgongs pa'o/ /skur pa 'debs pa'i rnam par rtog pa'i gnyen por bka' stsal pa/ stong pa nyid kyis ni ma yin no zhes bya ba ste/ chos nyid yod pa'i phyir ro/ /gcig pa nyid du rnam par rtog pa dgag pa'i don du bka' stsal pa/gzugs kyi stong pa nyid gang yin pa de gzugs ma yin no zhes bya ba la sogs pa ste/ dag pa dang ma dag pa la dmigs pa'i phyir ro/ /tha dad pa nyid du rnam par rtog pa dgag pa'i don du bka' stsal pa/ gzugs ni stong pa nyid las gzhan pa yang ma yin zhes bya ba la sogs pa ste/kun brtags pa'i gzugs kyi dngos po med pa nyid stong pa nyid ces bya ba'i tha tshig go/ /ngo bo nyid rnam par rtog pa dgag pa'i don du bka' stsal pa/ 'di lta ste/ gzugs zhes bya ba 'di ni ming tsam mo zhes bya ba la sogs pa'o//khyad par du rnam par rtog pa dgag pa'i don du bka' stsal pa/ ngo bo nyid ni mi skye mi 'gag ces bya ba la sogs pa'o/ /ming ji lta ba bzhin du yang dag pa'i don du rnam par rtog pa dgag pa'i don du bka' stsal pa/ ming bcos ma la chos de dag so sor brtags nas ming glo bur gyis rjes su tha snyad 'dogs zhes bya'o//don ji lta ba bzhin du ming du rnam par rtog pa dgag pa'i don du bka' stsal pa/ byang chub sems dpas ming de dag thams cad yang dag par rjes su mi mthong ngo / /yang dag par rjes su mi mthong bas mngon par zhen pa med do zhes bya ba ste/don ji lta ba bzhin du zhes bya bar dgongs pa'o zhes bya ba'o/ /rnam par g.yeng ba bcu po 'di dag gi zhes bya ba nas bzung ste/ des kun brtags ma yin zhes bya ba'i bar ni tshig de nyid kyis bshad zin te/ brda phrad par zad do/ /ji ltar gzhan gyi dbang kun brtags pa'i char snang yang de'i bdag nyid ma yin pa de bzhin du khong du chud par bya ba'i phyir ming gi sngo rol na blo med pas zhes bya ba smos te/gal te gzhan gyi dbang nyid kun brtags pa yin du zin na ming smos pa med par yang kun brtags pa la blo 'byung ba'i rigs so//gang ji ltar dmigs pa de yod pas gzhan gyi dbang la ming la mi ltos par blo 'byung ba zhig na de ni yod pa ma yin te/ de'i phyir gzhan gyi dbang ni kun brtags pa'i bdag nyid du 'gal lo/ /ming mang pos zhes bya ba ni ming gi dbang gis gzhan gyi dbang gi ngo bo nyid don nyid du rtog ste/don gcig la ming mang po yod pa ni sgra nges par sbyor ba las rnam grangs 'byung ba/ 'gro ba dang bzod pa dang sa dang sra bar gyur pa zhes bya ba la sogs pa ste/ gcig la du ma'i ngo bo nyid med pas 'gal ba'i phyir gzhan gyi dbang dang kun brtags pa gnyis gcig tu mi rung ngo //ming nges pa med pas zhes bya ba ni dper na 'gro lding ba rnams rna ba la mig ces zer ba dang / 'bras chan la chom rkun zhes zer ba dang / mchu la tha dad pa zhes zer ba lta bu'o/ /gal te ming dang don gnyis gcig par gyur du zin na/ de'i phyir rna ba la sogs pa'i don 'chol bar 'gyur te/de yang med pas ji ltar brjod pa bzhin du don med do/ /don med pa de nyid tshig tu sbyar bas sdud de/ bde blag tu blang ba dang zin par bya ba'i phyir ro/ /ji ltar chos rnams med pa'ang yin la dmigs par yang 'gyur ba dang / ji ltar kun nas nyon mongs pa yang mi 'gyur la/rnam par byang bar yang 'gyur zhes gtan la dbab pa'i phyir tshigs su bcad pa smos te/ chos rnams med la dmigs pa dang / /zhes bya ba la sogs pa'o/ sgyu ma la sogs pa'i glang po che la sogs pa bzhin du med kyang don du snang ba dang / ji ltar nam mkha' rnam par dag pas sprin la sogs pas nyon mongs par ma gyur kyang de dang bral na rnam par dag pa zhes bya ba bzhin no//thams cad kyi thams cad du med par ci'i phyir mi 'gyur zhes bya ba la thams cad kyi zhes bya ba ni snang ba'i gnas dang / rtsa nas bton pas dmigs pa med pa'i phyir ro//thams cad du zhes bya ba ni dus thams cad du'o/ /yongs su grub pa med ces bya ba de gnyi med na yongs su grub pa shin tu 'grub pa ma yin nam zhe na/ rang bzhin gyis rnam par byang ba ni 'grub kyi/ dri ma med pa'i rnam par byang bA ni med do zhes lan 'debs so/ /tshigs su bcad pa ni tshig de nyid kyis bshad zin to//theg pa chen po bstan pa la sbyor bas gzhan gyi dbang la sogs pa mtshon pa'i phyir dri ba sngon du btang ste/ med pa la sogs pa'i rnam grangs ston to/ /sgyu ma la sogs pa dpe rnams kyi don tha dad pa ni 'og nas 'chad do/ /rang bzhin gyis rnam par byang ba ni so so'i skye bo rnams kyi ngo bo nyid yang dag pa gang yin pa'o//de bzhin nyid ni gzhan du mi 'gyur ba'i phyir chos thams cad kyi spyi'i mtshan nyid yin te/ de nyid la brten nas sems can thams cad ni de bzhin gshegs pa'i snying po'i zhes gsungs rab las 'byung ngo //stong pa nyid ces bya ba ni kun brtags pa med pa'o/ /yang dag pa'i mtha' zhes bya ba ni bden pa'i mur thug pa'o/ /mtshan ma med pa ni gzugs la sogs pa'i mtshan ma thams cad dang bral ba'i phyir ro/ /don dam pa ni ye shes mchog gis thob par bya ba'i phyir ro//chos kyi dbyings ni rnam par byang ba'i chos rnams kyi rgyu yin pa'i phyir ro/ /dbyings kyi sgra ni 'dir rgyu'i tshig ste/ gser la sogs pa'i 'byung khungs bzhin no/ /dri ma med pas rnam par byang ba zhes bya ba ni tshig de nyid kyis bshad zin to/ /de 'thob pa'i lam rnam par byang ba zhes bya ba ni stong pa nyid thob par bya ba'i phyir te/lam nyid rnam par byang ba zhes bya ba'i tha tshig go/ /byang chub ni nyon mongs pa dang shes bya'i sgrib pa spangs pa dri ma med cing thogs pa med pa'i ye shes kyi rang bzhin no/ /de'i rjes su mthun pa'i phyir dran pa nye bar gzhag pa la sogs pa'i ming du sum cu rtsa bdun la/rdzas su bcu dang / shes rab la sogs pa pha rol tu phyin pa 'og nas 'byung ba rnams so/ /de skyed pa'i phyir dmigs pa rnam par byang ba zhes bya ba la de zhes bya ba ni lam dang sbyar te/ byang chub kyi phyogs la sogs pa'o/ / lhag ma rnams ni tshigs su bcad pa gnyis dang bcas te/ tshig de nyid kyis bshad zin to/ /nor ba nyid du som nyi za ba las bzlog pa'i phyir ro zhes bya ba ni nor ba nyid du som nyi za ba ste/ ji ltar don med pa kun brtags pa spyod yul du 'gyur snyam du sems pa de dag gi som nyi de bzlog pa'i don du sgyu ma lta bu nyid de/ji ltar sgyu ma la glang po che med kyang dmigs pa de bzhin du gzugs la sogs pa med kyang gzhan gyi dbang la skye mched drug nyid du rnam par rtog pa ni yul du 'gyur ro/ /smig rgyu lta bu nyid ni ji ltar nyi ma'i smig rgyu g.yo ba na chu med kyang de'i blo 'byung ba ltar phyi rol gyi snod kyi 'jig rten yang de bzhin no//rmi lam ni gnyid kyis sems dang sems las byung ba'i tshogs bsdus par 'gyur ba'o/ /de dang 'dra ba ni ji ltar de ni gos la sogs pa'i don med par yang sdug pa dang mi sdug pa'i yul la nye bar spyod pa ltar gnyid kyis ma log pa'i spyod pa yang de bzhin no//gzugs brnyan lta bu nyid ni ji ltar me long la sogs pa'i nang du gzugs kyi ngo bo nyid snang gi/ gzugs brnyan med kyang gzugs brnyan mthong ngo snyam du sems pa de bzhin du mnyam par ma bzhag pa'i dge ba dang mi dge ba'i sems pa las kyi ngo bo la brten nas med bzhin du yang 'bras bu 'grub pa'o//mig yor ni bag 'dra ba'i rtsed mo ste/ de dang 'dre ba nyid ni mnyam par ma bzhag pa'i rnam par shes pa sna tshogs rnams de ma yin pa'i bdag nyid don med pa rnams la 'byung ba'i phyir ro/ /brag ca lta bu nyid ni ji ltar brag ca med bzhin du rna ba'i yul mang por gnas pa de bzhin du ngag gi las med bzhin du yang tha snyad rnam pa sna tshogs su gnas so//chu zla ni chu'i nang gi zla ba ste/ ji ltar chu gsher ba dang / dang ba'i phyir zla ba med bzhin du yang de'i nang na yod par 'dzin pa de bzhin du yang dag pa'i don la dmigs pa nyid du yid ches pa'i rlan gyis bdag nyid kyi ting nge 'dzin dang ldan pa'i yid kyang dmigs pa'i don med bzhin du 'jug go//'di gzugs brnyan dang bye brag ci yod ce na/ mnyam par bzhag pa dang / mnyam par ma bzhag pa nyid du brjod par 'dod pa'o/ /gal te 'di snyam du bzhin la sogs pa rkyen tshogs pa'i che ba nyid kyis chu dang me long la sogs pa de ltar byung ba la 'dzin te/dper na nye bar gzhag pa la sogs pa'i dbang gis shel la sogs pa lta bu'o snyam du sems na/ de ni ma yin te/ tha dad du 'dzin pa'i phyir ro/ khron pa'i nang ltar bzhin dang zla ba la sogs pa'i gzugs brnyan me long dang chu dang tha dad par dmigs pa ltar shes la sogs pa ni de ltar ma yin te mi 'dra'o//kho bo cag gi gzhung la ni chu la sogs pa'i don yod pa ma yin pas chos can mi 'grub bo/ /sprul pa byas pa gang yin pa de ni sprul pa ste/ de dang 'dra ba ni ji ltar sprul pa med bzhin du yang sprul pa byed pa la nor ba med pa de'i phyir 'bad pa byed pa de bzhin du byang chub sems dpa' rnams kyang brtags pa'i don med bzhin du gzhan gyi dbang gis sems can rjes su bzung bar 'dod pas skye ba'i gnas de dang de dag tu lus yongs su 'dzin to//'di ni de tsam du zad de/'di lta ste/ nad dang phyi'i'o/ /de'i dbye ba ni nye bar spyod pa lus kyi las dang ngag gi las dang / yid kyi las rnam pa gsum dang / mnyam par ma bzhag pa'i sa dang / mnyam par bzhag pa'i sa dang / nor ba med pa'o/ /don brgyad po 'di dag gi dpe brgyad de/ji skad du bcom ldan 'das kyis skyes bu mkhas pa kha cig ni dpes bshad pa'i don shes par 'gyur ro zhes gsungs pa lta bu'o/ /bcom ldan 'das kyis ci las dgongs te zhes bya ba nas bzung ste/ 'di las dgongs nas bka' stsal to zhes bya ba'i mdo gnyis ka'i tshig kyang tshig de nyid kyis bshad zin to//'khor ba dang mya ngan las 'das pa gnyis bye brag med pa la dgongs nas zhes bya ba ni rnam par rtog pa ma lus par rnam par bshig pas 'khor ba mi dmigs so/ /de mi dmigs na gang gi 'gog pa la mya ngan las 'das par lta/gzhan nyid du yongs su grub pa med pa ni 'dir bye brag med pa nyid de/ byis pas mngon par zhen pa'i khyad par las bzlog pa'i phyir ro/ /ngo bo nyid gnyis kyi dbang du gyur pa nyid gang yin pa de nyid gnyis gzhan gyi dbang gi don gyi mchog go/ /dper na sa khong na gser yod pa la ni sa'i khams dang /sa dang gser dang gsum dmigs so zhes bya ba la sa'i khams ni sra ba nyid do/ /sa ni kha dog dang dbyibs te/ 'byung ba dang / 'byung ba las gyur pa dang go rims bzhin no/ /gser zhes bya ba ni gser gyi sa bon no/ /sar snang ba na log par snang ngo zhes bya ba ni de'i bdag nyid ma yin pa'i phyir ro//gser du snang ba na de bzhin nyid du snang ba zhes bya ba ni de'i bdag nyid yin pa'i phyir ro/ /sa'i khams ni gnyi ga'i char gtogs pa'o zhes bya ba ni sa dang gser gnyis kyi cha dang ldan pa ste/ gzhan gyi dbang gi dpe'o/ /sa dang gser ni kun brtags pa dang yongs su grub pa'i dpe'o//de bzhin du zhes bya ba ni dpe dang bstun par bya ba la dpe gtod pa ste/ rnam par rig pa tsam nyid ni gzhan gyi dbang gi ngo bo nyid do/ brtags pa dang yongs su grub pa gnyis kyi cha dang ldan pa'o/ /de la rnam par mi rtog pa'i ye shes kyi mes reg pa na yang dag pa dang yang dag pa ma yin pa'i cha snang ba dang mi snang ba go rims bzhin no//bcom ldan 'das kyis la lar ni chos thams cad rtag go zhes bstan pa zhes bya ba la sogs pa la gzhan gyi dbang gi chos nyid de bzhin nyid gang yin pa des de rtag go/ / kun brtags pa'i chas mi rtag pa ste/ de la rtag pa med pa'i phyir ro/ /rtag pa med pa ni mi rtag pa'o zhes nges pa'i tshig go/ /gnyi ga'i chas rtag pa yang ma yin mi rtag pa yang ma yin zhes bya ba ni gnyis su med pa nyid do/ /yongs su grub pa'i chos bde ba dag go/ /kun brtags pa'i chas sdug bsngal dag go//gzhan gyi dbang gi chas gnyis su med do/ /de bzhin du dge ba dang mi dge ba dag dang / stong pa dang mi stong pa dag dang / bdag dang bdag med pa dag dang / zhi ba dang ma zhi ba dag dang / ngo bo nyid yod pa dag dang / ngo bo nyid med pa dag dang / skyes pa dang ma skyes pa dag dang / 'gags pa dang ma 'gags pa dag dang / mya ngan las 'das pa dang mya ngan las ma 'das pa dag kyang gnyis su med do zhes bya ba la sogs pa yang ci rigs su ngo bo nyid gsum la brten te sbyar bar bya'o/ /bde blag tu blang bar bya ba dang zin par bya ba'i phyir/ /ji ltar chos rnams yod min zhing //ji ltar rnam pa du mar snang zhes bya ba la sogs pa smos te/ rkyang pa dang tshigs su bcad pa sbyar ba dag gis gsal bar byed pa'i phyir ro/ /ji ltar snang ba bzhin du med pas chos rnams yod pa ma yin no/ /snang bas na chos rnams med pa yang ma yin no/ /gang gi phyir chos kyang ma yin/chos med pa yang ma yin pa de'i phyir gnyis su med pa'i don du bstan to/ /de ltar na cha res de dag med pa dang yod pa zhes kyang bshad par bya ste/ ji ltar snang ba bzhin du med pa dang snang ba'i phyir ro/ /gnyi ga'i chas ni chas ni yod min zhing / /med pa'ang min zhes brjod pa mdzad//ces bya ba ni gnyis su med pa'i phyir te/ /snga ma bzhin no/ /ji ltar snang ba de bzhin med/ /ces bya ba bya ba ni bdag dang chos sam gzung ba dang 'dzin pa'i dngos por med pa nyid de/ tshad ma med pa'i phyir ro/ /gang phyir de ltar snang gyur ba/ /zhes bya ba ni bdag dang bdag gi la sogs pa med bzhin du yang 'jig tshogs la lta ba bzhin du thog ma med pa'i dus kyi mngon par brjod pa'i bag chags yongs su smin pa'i dbang gis so//de'i phyir yod ces brjod pa mdzad/ /ces bya ba ni snang ba'i sgo nas sgra 'jug pa'i phyir ro/ /rnam pa ji lta ba bzhin du ma yin pas gnyis su med pa nyid do//de lta na gcer bu pa'i smra ba ltar mi 'gyur ram zhe na/ 'brel pa ci zhig yod de/ de dag ni log par lta ba tshogs par yod pa la yang dag par lta ba'o zhes lta ba thams cad dang mi mthun pa la brten nas gcig pu 'gal ba du ma'i bdag nyid can du 'dod do//'dir ni gnyi ga ma yin pa'i bdag nyid de/ de ltar snang bas bdag nyid gcig tu brjod par mi nus pas gzhan gyi dbang ni gnyis su med pa'o zhes bya'o/ /de dag ni gnyis su brjod pas mi mthun no/ /rang dang bdag nyid med pa'i phyir/ /zhes bya ba la rang med pa ni rkyen gyi kha na las pa'i phyir ro//bdag nyid kyis med pa ni sngar 'gags pa'i skad cig rnying pa med pa dang gsar pa ni yod pa'i phyir ro/ /rang gi dngos la mi gnas phyir/ /zhes bya ba ni skad cig gi 'og tu 'jig pa'i phyir ro/ /'di ni nyan thos dang thun mong ba'i bdag nyid med pa'o/ / gzung ba bzhin du med phyir/ /zhes bya ba ni thun mong ma yin pa'i bdag med pa bstan pa ste/ rtag pa la sogs par phyin ci log tu bzung ba lta bu dang / gzugs la sogs par phyin ci log tu bzung ba lta bu med pa'i phyir ro/ /byis pa rnams kyis ji ltar bzung ba de bzhin du med pas theg pa chen po la ngo bo nyid med par 'dod do//ngo bo nyid med pas 'dis kyang skye ba med pa dang / 'gag pa med pa la sogs par grub bo/ /phyi ma phyi ma brten byas te/ /zhes bya ba ni gang gi phyir ngo bo nyid med pa de'i phyir ma skyes pa'o/ /gang gi phyir ma skyes pa de'i phyir ma 'gags pa'o/ / gang gi phyir ma 'gags pa de'i phyir gzod ma nas zhi ba'o/ /gang gi phyir gzod ma nas zhi ba de'i phyir rang bzhin gyis yongs su mya ngan las 'das pa ste/ tshig snga ma snga ma la brten nas tshig phyi ma phyi ma bshad par rig par bya'o/ /dgongs pa ni yid la gzhag pa tsam yin gyi pha rol ltos par ni khas mi len no//ldem por dgongs pa ni de nyid pha rol gzud pa la ltos pa'o/ /mnyam pa nyid la dgongs pa ni sangs rgyas thams cad kyi chos mnyam pa'i phyir/ nga nyid de'i tshe de'i dus na zhes bya ba la sogs pa ste/ dper na 'ga' zhig mtshungs pa yid la bsams nas 'di gang yin pa de nga'o zhes bya ba lta bu yin gyi/rnam par gzigs pa gang yin pa de nyid shAkya thub pa ni ma yin pa'o/ /dus gzhan la dgongs pa zhes bya ba ni le lo can gang dag chos 'di la mi sbyor ba de dag la ltos nas de bzhin gshegs pa rin chen mang gi mtshan bzung bas nges par 'gyur ba dang /smon lam btab pa tsam gyis bde ba can du skye bar bstan to/ /de dag sngon du btang ba'i dge ba'i rtsa ba la dgongs pa ste/ dper na 'jig rten na pa ni gcig gis stong bsgrubs so zhes bya ba lta bu'o/ /don gzhan la dgongs pa zhes bya ba ni lung gi mtshan nyid kyi theg pa chen po'i chos las rtogs pa'i mtshan nyid kyi theg pa chen po'i chos ni don gzhan te/de la dgongs nas sangs rgyas gang gA'i klung gi bye ma snyed 'di snyed cig la bsnyen bkur byas nas theg pa chen po'i chos kyi don khong du chud par 'gyur ro zhes bya ba gsungs te/ 'phags pa so so rang gis rig pa'i chos ni rtogs par dka' ba'i phyir ro//'dis ni theg pa chen po la sgra ji bzhin nyid bstsal par rig par bya'o/ /gang zag gi bsam pa la dgongs pa ni 'chal ba'i tshul khrims can gang yin pa de la tshul khrims bsngags pa dang / tshul khrims dang ldan pa la dge ba'i phyogs rgya chen po la gzhug pa'i phyir tshul khrims mi bsngags pa'o//bsgom pa kha cig ces bya ba ni 'jig rten pa'i'o/ /gzhug pa la ldem por dgongs pa zhes bya ba ni gzhan gzhung pa'i phyir gang du gang zag dang / chos nyid kyi ngo bo nyid dang khyad par kun rdzob tu bstan pa ste/dper na nyan thos kyi theg pa la gzhug pa'i phyir rdzus te byung ba'i sems can yod do zhes bya ba la sogs pa dang / theg pa chen po la gzhug pa'i phyir gzugs stong pa zhes bya ba la sogs pa lta bu ste/ chad par 'gyur gyis 'jigs pa'i skye bo'i dbang gis so/ /mtshan nyid la ldem por dgongs pa zhes bya ba ni shes bya'i mtshan nyid la gzhug pa'i phyir ro//gnyen po la ldem por dgongs pa ni 'dod chags la sogs pa la spyod pa mi mthun pa'i phyogs 'gal ba brgyad khri bzhi stong zhes bya ba la sogs pa ste/ tshig de nyid kyis bshad zin to//bsgyur ba la ldem por dgongs pa ni yi ge'i don gzhan du bsgyur ba'i phyir te/ snying po med pa la snying por shes/ /zhes bya ba la sogs pa'o/ /'phro bar byed pas 'phro ba ste rnam par g.yeng ba'o/ /mi 'phro bas na 'phro ba med pa ni rnam par mi g.yeng ba ste/ting nge 'dzin to/ /de la snying por 'du shes pa ni shes rab brtan pa'o/ phyin ci log ces bya ba ni phyin ci log bzhi ste/ de dag la shin du gnas zhes bya ba ni 'di dag phyin ci log go zhes bya bar nges te mi 'gyur ba'i phyir ro/ /nyon mongs kun nas rab nyon mongs/ /zhes bya ba ni sha thang bzhin du sems can gyi don byed pa ste/dub bzhes bya ba'i tha tshig go/ /ji skad du/ /thugs rje'i phyir ni 'ba' zhig gis/ /'khor bar yun ring khyod 'o brgyal/ /zhes bya ba la sogs pa smras pa lta bu'o/ /byang chub dam pa thob par 'gyur/ /zhes bya ba ni sangs rgyas kyi byang chub thob par 'gyur zhes bya ba'i tha tshig go// //bam po bzhi pa/ 'chad par byed pa rnams kyi bshad pa'i rigs pa bye brag tu bstan pa'i dbang du byas nas/ mdor bsdu na rnam pa gsum gyis bshad par bya ste zhes bya ba la sogs pa smos te/ rten cing 'brel par 'byung ba bstan pa zhes bya ba la sogs pa'o//de la rten cing 'brel par 'byung ba dang / rten cing 'brel par 'byung ba'i chos rnams ni shes bya'i gnas bshad pa'i skabs su rten cing 'brel par 'byung ba rnam pa gsum gyi mtshan nyid rab tu rnam par phye ba'i sgo nas mtshan nyid kyis rnam par phye zin to//'dir ni sbyor bas yang kun gzhi dang / 'jug pa'i rnam par shes pa dag phan tshun du rgyu dang / phan tshun du rgyu dang ldan pa'i dngos por tshigs su bcad pas ston te/ /chos rnams brjod pa'i bag chags las/ /zhes bya ba la sogs pa'o/ /rgyu mtshan dang lta ba dang bcas pa'i rnam par rig pa'i ngo bo nyid do zhes bya ba ni ji skad du sngar bshad pa lta bu ste/rgyu mtshan dang bcas pa'i rnam par rig pa'i ngo bo nyid ni gzugs kyi rnam par rig pa la sogs pa'o/ /lta ba dang bcas pa'i rnam par rig pa'i ngo bo nyid ni mig gi rnam par rig pa la sogs pa dang /mig la sogs pa'i rnam par shes pa la sogs pa'o/ /de dag kyang gnas kyi mtshan nyid dang zhes bya ba ni gzhan gyi dbang gi mtshan nyid dag ste/ de ni gnyi ga'i gnas yin pa'i phyir ro/ /kun brtags pa'i mtshan nyid ces bya ba ni de dag gnyis der yongs su brtag par bya ba'i phyir ro//chos nyid kyi mtshan nyid ces bya ba ni de'i char rnam par gzhag pa'i phyir ro/ /don de nyid tshigs su bcad pa phyed kyis ston te/ /rgyu mtshan lta dang bcas pa las/ /de dag mtshan nyid gsum shes bya/ /zhes bya ba'o/ /de kho na ma mthong ba dang /mthong bas dus gcig tu zhes bya ba ni gang gi tshe de kho na ma mthong bas gzhan gyi dbang gi ngo bo nyid la yongs su grub pa ni med par mthong la/ kun brtags pa ni yod par mthong ba de nyid kyi tshe/ de kho na mthong bas kun brtags pa ni med par dmigs la/ yongs su grub pa ni yod par dmigs so//de ci'i phyir zhe na/ 'di ltar/ /gzhan dbang la ni brtags pa med/ /ces bya ba'o/ /'o na de la ci yod ce na/ /yongs su grub pa de ni yod/ /ces bya ba smos so/ /de la yang dag pa ma mthong ba ni byis pa rnams te/ med pa la yod par 'dzin pa dang / yod pa la med par 'dzin pas phyin ci log tu dmigs so//de kho na mthong ba ni yang dag pa mthong ba ste/ gang med pa de yang med pa dang / gang yang yod pa de yang yod par khong du chud do/ /don de nyid tshigs su bcad pa phyed kyis ston te/ /de phyir de la gnyi ga yang / /mi dmigs pa mnyam pa yin/ /zhes bya ba'o//'di ni re zhig 'chad par byed pa'i bsam pa la mi ltos par bshad par bya'o/ /bshad zin pa'i don bshad pa ni 'chad par byed pa'i bsam pa'i ngor bya ba'o/ /yon tan gyi dbang du bya ba'am don gyi dbang du bya ba zhes bya ba ni yon tan gyi bsam pa dang / don gyi bsam pas so/ /bzlas shing bya ba yin pa ni yon tan rnams te/gang bdag la legs su 'dod pa rnams kyis lam bzhin du goms par bya ba'o/ /rtogs par bya ba yin pas don de shes par bya ba nyid yin gyi gdon mi za bar goms par bya ba ni ma yin te sdug bsngal nyid bzhin no/ / shin du rnam par dag pa'i blo mnga' ba/ /zhes bya ba'i tshig dang po 'di ni tshig lhag ma rnams kyis rnam par dgrol ba ste/ /gal te yon tan mang pos yon tan gcig bshad na/ /de lta na legs par bshad pa yin no/ /shes bya la shin du sgrib pa med par 'jug pa'i yon tan zhes bya ba ni kun du spyod pa gnyis mi mnga' ba zhes bya ba 'grel te/dngos po'i bye brag thams cad la chags pa med cing thogs pa med pa'i phyir ye shes shin du sgrib pa med pa ste/ ji ltar nyan thos la sogs pa kha cig tu ni sgrib pa dang bcas pa la/ kha cig tu ni sgrib pa med pas kun du spyod pa gnyis dang ldan pa de lta bu ni ma yin gyi/'di'i 'am 'di la kun du spyod pa gnyis mi mnga' bas kun du spyod pa gnyis mi mnga' ba'o/ /des na shin du rnam par dag pa'i blo mnga' ba'o zhes bya bar sbyar te/ ye shes dang spangs pa phun sum tshogs pa'i phyir ro/ /de bzhin du tshig 'og ma rnams la yang sbyar bar bya'o//mtshan nyid med pa'i chos la mchog tu gzhol bar mdzad pa zhes gang gsungs pa de'i 'grel pa ni yod pa dang med pa gnyis su med pa'i mtshan nyid ces bya ba la sogs pa ste/ bdag nyid kyis yod pa'i phyir yod pa'i mtshan nyid do/ /kun brtags pa med pa'i phyir med pa'i mtshan nyid do//rigs pa 'di nyid kyis med pa'i phyir yod pa ma yin pa'i mtshan nyid dang / yod pa'i phyir med pa ma yin pa'i mtshan nyid pas gnyis su med pa'i mtshan nyid do/ /mchog tu rnam par dag pa shes par mdzad pa'i yon tan zhes bya ba ni de bzhin nyid mchog tu rnam par dag pa ste/glo bur gyi dri ma thams cad dang bral ba'i phyir mchog tu dri ma med pa'o/ /de rang gis kyang thugs su chud la/ gzhan dag la yang khong du chud par mdzad pas mchog tu rnam par dag pa shes par mdzad pa zhes bya ste/ de nyid yon tan no/ /des na snga ma bzhin du de dang sbyar bar bya ste/ bdag kyang rnam par dag la gzhan yang rnam par sbyor zhes bya ba'i tha tshig go/ /sangs rgyas kyi gnas pas gnas pa zhes bya ba 'di'i rnam par bshad pa ni/ sangs rgyas kyi mdzad pa lhun gyis grub pa rgyun mi gcod par gnas pa'i yon tan te/ bsgrim mi dgos par sangs rgyas kyi mdzad pa sems can gyi don la sogs pa la 'phags pa dang lha dang /tshangs pa'i gnas pa rnams kyis rgyun mi 'chad par ji ltar mthun mthun du gnas pa'i phyir te/ nyan thos ltar rab tu bsgrims te bsgrubs nas gnas pa ni ma yin pas khyad par du 'phags so/ /sangs rgyas thams cad dang mnyam pa nyid brnyes pa zhes bya ba 'di'i rnam par 'grel pa ni/chos kyi skul gnas dang dgongs pa dang phrin las tha dad pa med pa'i yon tan zhes bya ba ste/ gnas tha dad pa med pa ni thams cad kyang ye shes rnam par dag pa'i bdag nyid yin pa'i phyir ro/ /dgongs pa tha dad pa med pa ni thams cad kyang sems can thams cad la phan pa dang bde ba mdzad par dgongs pa'i phyir ro//phrin las tha dad pa med pa ni thams cad kyang longs spyod rdzogs pa dang / sprul pa gnyis kyis gzhan gyi don bsgrubs pa'i phyir te/ nyan thos la sogs pa ltar bsam pa tsam 'ba' zhig ni ma yin no//sgrib pa mi mnga' bas rtag par thugs su chud pa zhes bya ba 'di'i bshad pa ni sgrib pa thams cad kyi gnyen po bsgoms pa'i yon tan zhes bya ba ste/ nyon mongs pa dang / shes bya'i sgrib pa thams cad kyi gnyen po 'phags pa'i lam rnam pa thams cad mkhyen pa nyid dang /ting nge 'dzin la dbang ba'i bdag nyid can goms par mdzad pas sgrib pa thams cad kyi dri ma rnams kyis ma bsgribs pa'i rtogs pa brtan pa zhes bya ba thugs su chud pa ste/ brnyes pa zhes bya ba'i tha tshig go/ /phyir mi bzlog pa'i chos dang ldan pa zhes bya ba 'di'i 'grel pa ni/mu stegs can thams cad kyis mi thub pa'i yon tan zhes bya ba ste/ bstan pa dang thugs su chud pa'i chos gnyis gzhan dag gis phyir bzlog mi nus pa'i phyir te/ de las ches khyad par du 'phags pa'i chos med ces bya ba'i tha tshig go/ /spyod yul gyis mi 'phrogs pa zhes bya ba 'di'i bshad pa ni/'jig rten du skyes kyang 'jig rten gyi chos kyis mi 'phrogs pa'i yon tan zhes bya ba ste/ gang la su spyod pa de de'i spyod yul yin pa dang 'dra bas spyod yul te/ rjes su chags pa dang khong khro ba la sogs pa med pa'i phyir de la rnyed pa dang ma rnyed pa la sogs pa'i 'jig rten gyi chos brgyad kyis 'phrogs par mi nus te/ji skad du gang zhig sa la 'jig rten chos brgyad rlung gi stobs kyis mi bskyod pa/ zhes bya ba la sogs pa bshad pa lta bu'o/ /rnam par gzhag pa bsam gyis mi khyab pa zhes bya ba 'di'i rnam par bshad pa ni/chos rnam par gzhag pa'i yon tan zhes bya ste/ mdo la sogs pa gsungs rab yan lag bcu gnyis po de dang de'i rang dang spyi'i mtshan nyid bshad pa rnam par 'jog pa'o/ /de bsam gyis mi khyab pa ni brtag tu med pa'i phyir te/ byis pa'i blo'i spyod yul ma yin pa'i phyir dang /'jig rten las 'das pa'i phyir ro/ /de'i rnam par gzhag pa bsam gyis mi khyab pas na rnam par gzhag pa bsam gyis mi khyab pa ste/ de nyid yon tan no zhes snga ma bzhin no/ /dus gsum mnyam pa nyid du thugs su chud pa zhes bya ba 'di'i rnam par bshad pa ni/lung ston pa'i yon tan zhes bya ba ste/ dus gsum po dag la mnyam pa nyid du thugs su chud par gyur pa'am/ dus gsum mnyam pa nyid du thugs su chud ces bya ba'i tshig rnam par sbyar ba'o/ /da ltar gyi bzhin du 'das pa dang ma 'ongs pa'i dus kyi don rnams kyang 'byung ngo / /'byung bar 'gyur ro zhes lung ston pa'i phyir ro//'jig rten gyi khams thams cad du zhugs pa'i sku dang ldan pa zhes bya ba 'di'i bshad pa ni/ 'jig rten gyi khams thams cad du longs spyod rdzogs pa dang / sprul pa'i sku ston pa'i yon tan zhes bya ba ste/ phyogs bcu'i zhing thams cad du sku gnyis gdul ba ji lta ba bzhin du kun du ston pa'i phyir ro//chos thams cad la the tsom med pa'i ye shes mnga' ba zhes bya ba 'di'i rnam par bshad pa ni the tsom gcod pa'i yon tan zhes bya ba ste/ bdag nyid kyis gtan la phebs pa bzhin du gzhan la yang gtan la 'bebs pa'i phyir ro/ / bdag nyid la nges pa med par gzhan gyi the tshom nges par byed mi nus te/ nges pa med par the tshom gcod pa med do/ /spyod pa thams cad dang ldan pa'i blo mnga' ba zhes bya ba'i rnam par bshad pa ni spyod pa sna tshogs kyis 'jug par mdzad pa'i yon tan zhes bya ba ste/ rigs dang gnas spyod dang ya mtshan can thams cad kyi spyod pa dang 'dra ba rnams kyi sems can skal ba yod pa rnams 'dzud pa'i phyir te/skal ba mnyam pa'i gang du 'gro ba'i mdo las 'byung ba bzhin no/ /gzugs ni gang dang gang gis su/ /lus can dag ni 'dul 'gyur ba/ / thugs rjes non nas de dang de/ /thugs brtse bdag nyid ston pa mdzad/ /ces kyang bshad do/ /chos mkhyen pa la nem nur med pa zhes bya ba 'di'i bshad pa ni/ phyi ma la chos 'byung ba mkhyen pa'i yon tan zhes bya ba ste/ 'phags pa nyan thos rnams kyis gang la 'di ni dge ba'i rtsa ba med pa'o zhes smras pa de la sangs rgyas bcom ldan 'das rnams kyis ma 'ongs pa'i dus na 'byung bar 'gyur ba'i dge ba'i chos 'byung ba mkhyen te/tshe rabs gzhan dang 'brel ba'i dge ba phra mo mngon sum du mdzad pa'i phyir ro/ /rnam par ma brtags pa'i sku mnga' ba zhes bya ba 'di'i bshad pa ni/mos pa ji lta ba bzhin du ston pa'i yon tan zhes bya ba ste/ mos pa ji lta ba bzhin du gser la sogs pa'i rang bzhin du snang yang skul rnam par rtog pa mi mnga' ba'i phyir nor bu dang sil snyan la sogs pa bzhin te/ de bzhin gshegs pa'i gsang ba'i mdo las ji skad gsungs pa lta bu'o//ye shes byang chub sems dpa' thams cad kyis yang dag par mnos pa zhes bya ba 'di'i bshad pa ni/ sku dpag tu med pa sems can 'dul bar spyod pa'i yon tan zhes bya ba ste/ byang chub sems dpa' ye shes thob pa khyad par can rnams kyis byang chub sems dpa'i lus dpag tu med pas sems can 'dul ba'i don du sbyor ba chos mnyan pa sngon du btang ba gang yin pa de ni sangs rgyas kyi dbang gis phan gdags pa dang /yongs su gtad pa gnyis kyis rgyun mi 'chad par gcig nas gcig tu brgyud de 'byung ngo //byang chub sems dpa' thams cad kyis yang dag par mnos pa ni bdag nyid du byas pa'o/ /sangs rgyas kyi gnas pa gnyis su med pa dam pa'i pha rol tu phyin pa zhes bya ba 'di'i bshad pa ni/ chos kyi sku mnyam pa nyid la pha rol tu phyin pa rnams grub pa'i yon tan zhes bya ba ste/gnyis su med pa'i phyir mnyam pa nyid do/ /chos kyi sku mnyam pa la pha rol tu phyin pa rnams grub pa ni 'bras bu'i gnas skabs yin pa'i phyir ro/ /yang na mnyam pa ni lhag chad med pa ste/ chos kyi pha rol tu phyin pa thams cad grub pa ste/ sa dag la byang chub sems dpa' rnams kyi ltar de la ni lhag chad ci yang med do/ /pha rol tu phyin pa zhes bya ba ni pha rol tu phyin pa zhes bya ba'i tha tshig go/ /de bzhin gshegs pa ma 'dres pa'i rnam par thar par mdzad pa'i ye shes kyi mthar phyin pa zhes bya ba 'di'i bshad pa ni/ mos pa ji lta ba bzhin du sangs rgyas kyi zhing ma 'dres pa ston pa'i yon tan zhes bya ba ste/dbyer med pas sangs rgyas kyi zhing gcig yin yang sems can rnams kyi mos pa la ltos nas mkhyen bzhin du bcom ldan 'das kyis gser la sogs pa'i rang bzhin du mos par mdzad nas ma 'dres par kun du ston to//de'i phyir sangs rgyas ma 'dres pa'i mos pa'i ye shes kyi mthar phyin pa zhes bya bar tshig rnam par sbyar te/ rnam par thar pa zhes bya ba ni 'dir mos par bzhed do/ /mtha' dang dbus med pa'i sangs rgyas kyis mnyam pa nyid thugs su chud pa zhes bya ba 'di'i bshad pa ni/sangs rgyas kyi sku gsum gyi yul yongs su ma chad pa'i yon tan zhes bya ba ste/ yul yongs su ma chad pa'i yon tan gyis ni 'jig rten gyi khams bzhin du sangs rgyas kyis mtha' med cing dbus med pa rnams su'am/ yang na sa ni 'dir 'jig rten gyi khams te/de nyid yul lo/ /mtha' dang dbus med pa'i sku gsum gyi bdag nyid can gyi sangs rgyas rnams kyis ni 'jig rten gyi khams ma lus pa thams cad du mnyam par gshegs te/ chos kyi sku la sems pa ni 'jig rten gyi khams 'di tsam du zad kyi/ gzhan du ni ma yin no zhes bya bar yongs su chad pa med pa'i phyir ro//yang na chos kyi sku la sogs pa mtha' dang dbus med pa mnga' ba'i sangs rgyas dag pa rnams su mnyam par thugs su chud pa zhes bya bar tshig rnam par sbyar ba ste/ thams cad du yang sems can gyi don kun du ston pa'i phyir dang /chos kyi sku yang rang bzhin gyis mtha' dang dbus med pa'i phyir ro/ /chos kyi dbyings kyis klas pa zhes bya ba 'di'i bshad pa ni/ 'khor ba'i mtha' ji tsam par sems can thams cad la phan pa dang bde ba nye bar gnas pa'i yon tan zhes bya ba ste/ chos kyi dbyings kyi don ni bshad zin to//'di'i des klas pa na shin du rnam par dag pa'i phyir ro/ /de'i rgyu mthun pa mdo la sogs pa'i chos rnams ni da ltar dang / phyi ma la ji ltar mthun mthun du sems can thams cad la phan pa dang bde ba'i phyir nye bar gnas so/ /nam mkha'i khams kyi mthas gtugs pa zhes bya ba 'di'i bshad pa ni/mi zad pa nyid kyi yon tan zhes bya ba ste/ nam mkha' ni sgrib pa med pa'i ngo bo nyid de/ thogs pa dang bcas pa'i rdzas rnams la mi sgrib pa'i las can no/ /de nyid khams te/ rang gi mtshan nyid 'dzin pa'i phyir ro/ /khung bu dang snang ba dang mun pa'i ngo bo nyid ni ma yin te/mtha' yod par 'gyur ba'i phyir ro/ /ji ltar nam mkha' mtha' yas mu med cing zad pa med la 'jig pa dang skye ba'i 'gyur ba med cing rtag tu lus can rnams la skabs 'byed par nye bar gnas pa de bzhin du chos kyi sku yang sems can thams cad la phan pa dang bde ba nye bar gnas pa'i mtshan nyid de/sems can gyi khams ji srid par 'gro ba thams cad kyi don mdzad pa rgyun mi gcod do/ /blo phul du byung ba'i phyir yon tan des na shin tu rnam par dag pa'i blo mnga' ba zhes bya'o/ /bcom ldan 'das ni nyan thos dang byang chub sems dpa' rnams las blo phul du byung ba'i phyir khyad par du 'phags so//ji lta zhe na/ kun du spyod pa gnyis mi mnga' ba zhes bya ba smos te/ nyan thos la sogs pa ni shes bya la gnyis kun du 'byung ste/ ye shes dang nyon mongs pa can ma yin pa'i mi shes pa'o/ /de med pa'i phyir sangs rgyas kyi ye shes phun sum tshogs so//spangs pa phun sum tshogs pa'i dbang du byas nas/ mtshan nyid med pa'i chos la mchog tu gzhol bar mdzad pa zhes bya ba smos te/ 'khor ba dang mya ngan las 'das pa'i mtshan nyid dang mi mthun pa'i mtshan nyid mi gnas pa'i mya ngan las 'das pa'i phyir ro//de thabs gang gis brnyes she na/ /sangs rgyas kyi gnas pa gnas pa zhes bya ba smos te/ stong pa nyid dang thugs rje chen po la gnas pa'i phyir bcom ldan 'das ni 'khor ba la yang mi gnas/ mya ngan las 'das pa la yang mi gnas so//sangs rgyas kyi gnas pa 'di ci zhig gzhan dag dang thun mong ma yin nam zhe na/ ma yin te/ sangs rgyas thams cad dang mnyam pa nyid brnyes pa zhes smos pa ste/ sangs rgyas rnams ni phan tshul 'dres par rnam pa thams cad du gnas pa'i phyir ro/ / da ltar rang gi don phun sum tshogs pa gzhan gyi don mdzad pa la gdul ba rnams kyi sgrib pa thams cad kyi gnyen po'i dbang du byas nas sgrib pa mi mnga' bar rtogs par thugs su chud pa zhes bya ba smos so/ /de la bar chad byed pa bdud la sogs pas de las phyir mi zlogs pa'i dbang du byas nas phyir mi zlogs pa'i chos dang ldan pa zhes bya ba smos so//sems can gang dag gi don mdzad pa na de dag gi spyod pas mthon dman du 'gyur ba med pas spyod yul gyis mi 'phrogs pa'o/ /thabs gang gis sems can gyi don mdzad pa de'i dbang du byas nas rnam par gzhag pa bsam gyis mi khyab pa zhes bya ba smos so//ci sangs rgyas rnams kyi so so'i sbyor ba tha dad dam zhe na/ ma yin te/ ci'i phyir zhe na/ dus gsum mnyam pa nyid du nges par 'byung ba smos pa ste/ dus gsum rnams su sangs rgyas thams cad don thams cad mdzad par mthun par nges par 'byung ba'i phyir ro//de de ltar sems can gyi don mdzad na 'jig rten gyi khams re rer rim gyis mdzad dam zhe na/ ma yin te/ ci'i phyir zhe na/ 'jig rten gyi khams thams cad du zhugs pa'i sku dang ldan pa zhes bya ba smos pa ste/ 'jig rten gyi khams thams cad du sangs rgyas 'byung ba kun du ston pa'i phyir ro//de dang der the tsom skyes shing skyes pa rnams gcod pa'i mthu mnga' bar brjod pa'i phyir/ chos thams cad la the tsom mi mnga' ba'i mkhyen pa can zhes bya ba smos pa'o/ /gdul ba rnams kyi rigs tha dad pa'i phyir ci rigs su theg pa la 'dul ba la mkhas pa'i dbang du byas nas/spyod pa thams cad dang ldan pa'i blo mnga' ba zhes bya ba smos so/ /gdul ba de dag nyid la skal ba yod pa'am/ skal ba med pa la mkhas pa'i dbang du byas nas/ chos la nem nur mi mnga' ba'i mkhyen pa dang ldan pa zhes bya ba smos so//yang dag pa dang / log pa dang / de gnyi ga sgrub pa dang ldan pa'i gdul ba de dag la dga' ba la sogs pa'i rnam pa'i rnam par rtog pa mi mnga' ba'i dbang du byas nas/ rnam par ma brtags pa'i sku mnga' ba zhes bya ba smos so/ /ma nges pa'i rigs kyi nyan thos dang /byang chub sems dpa' rnams drang ba dang / yang dag pa gzung ba'i phyir dang / theg pa chen po yang dag par bsngags pa'i dbang du byas nas/ ye shes byang chub sems dpa' thams cad kyis yang dag par mnos pa zhes bya ba smos so/ / thams cad mkhyen pa yin nam ma yin zhes ston pa la 'dul ba rnams the tsom za ba'i skabs kyi dbang du byas nas/ sangs rgyas kyis gnas pa gnyis su med pa dam pa'i pha rol tu phyin pa zhes bya ba smos te/ sangs rgyas thams cad dang mnyam pa nyid brnyes pa zhes gsungs pa'i phyir ro//thams cad gcig tu thal bar 'gyur ba spangs pa'i phyir/ de bzhin gshegs pa ma 'dres pa'i rnam par thar par mdzad pa'i ye shes kyi mthar phyin pa zhes bya ba smos so/ /gal te gcig pa yang ma yin/ tha dad pa yang ma yin na mtshan nyid ci 'dra zhe na/ mtha' dang dbus med pa'i sangs rgyas kyis mnyam pa nyid thugs su chud pa zhes bya ba smos so//rtag pa dang mi rtag pa nyid la sogs pa thams cad mtha' yin na de'i mtshan nyid med pa spangs pa'i phyir chos kyi dbyings kyis klas pa zhes bya ba smos te/ chos kyi dbyings kyi mtshan nyid yongs su dag pa ste/spros pa dang bral ba zhes bya ba'i tha tshig go/ /de lta yin na dus ji srid cig tu sems can gyi don mdzad ce na/ nam mkha'i khams kyi mtha' gtugs pa zhes bya ba smos so/ /don sum cu rtsa gnyis po dag ni/ las bcu drug gis rab tu dbye bar rig par bya'o zhes bya ba la/las nyid ni bya ba yin pa nyid du bstan pa'i phyir ro/ /phan pa dang bde bar bya ba'i lhag pa'i bsam pa zhes bya ba la phan pa ni phyi ma la bde ba ste/ dper na 'dod chags kyi shas che ba tshangs bar spyod pa lta bu'o/ /bde ba ni da ltar gyi dga' ba ste/ dper na 'dod pa can rnams kha na ma tho ba dang bcas pa'i yul la nye bar spyod pa lta bu'o/ /phan pa dang bde ba ni da ltar dang ma 'ongs pa na dga' ba ste/ dper na 'dod chags chung ngu'i tshangs par spyod pa de nyid lta bu'o/ /de la byang chub sems dpa' rnams ni da ltar dang ma 'ongs pa na lus can rnams bde ba bla na med pa la brten par ji ltar 'gyur zhig gu snyam du dad pa dang 'dun pa'i ngo bo nyid kyi bsam pa shas che ba ni lhag pa'i bsam pa'o//thams cad mkhyen pa'i ye shes la 'dzud pa zhes bya ba ni gcig nas gcig tu brgyud pa'i las kyis ston te/ mar me las mar me stong du mched par byed pa bzhin du gcig nas gcig tu brgyud pa'i las kyis phan pa dang bde bar bya ba'i lhag pa'i bsam pa bstan pa yin te/de bzhin du tshig 'og ma thams cad la yang phan pa dang bde bar bya ba'i lhag pa'i bsam pa'i bshad pa sbyar bar bya'o/ /la la ni phan pa dang bde bar bya ba'i lhag pa'i bsam pa can yin yang phyin ci log tu 'gyur ba yod pas/bdag ci ri zhes bya ba'i shes pas phyin ci log med pa'i las bstan te/ bdag shes pa ni phyin ci ma log par sbyor ba'i phyir ro/ /ji skad du/ bdag shes pa'i yon tan mtshungs pa med/ bdag mi shes pa'i dri ma mtshungs pa med/lha dang mir bcas pa'i 'gro ba 'di/ cha 'di gnyis kyis brgyad cing gnod par 'gyur zhes bshad pa lta bu'o/ /de skad du/ bdag shes pa ni snying gi rtsa lag gyur pa yin zhes bya ba la sogs pas kyang bshad do/ /nga rgyal bcom pa zhes bya ba ni/ gzhan gyis byed du ma bcug par bdag nyid sbyor ba'i las kyis bshad de/ gsol ba 'debs pa la mi sdod par chos ston par 'jug pa'i phyir ro/ /lhag pa'i bsam pa bstan pa zhes bya ba ni mi 'khrugs pa'i las kyis ston te/ 'khor ba'i sdug bsngal rnams kyis sems skyo bar byed mi nus pa'i phyir ro//bcos ma yin par byams pa dang / mdza' ba dang / mi mdza' ba la sems snyoms pa dang / mya ngan las 'das pa'i mtha'i bar du gtan du mdza' ba zhes bya ba gsum ni zang zing med pa'i las rnam pa gsum gyis 'chad de/ de la zang zing dang ma 'brel pa zhes bya ba la/zang zing gi phyir byams pa de ni bcos pa ste/ /rnyed pa yod kyi bar du byams pa'i phyir ro/ /zang zing med par byams pa ni bcos ma ma yin pa ste/ dus thams cad du med par mi 'gyur ba'i phyir ro/ /su gang zang zing la rag lus te mdza' ba ni mdza' ba dang mi mdza' ba la rjes su chags pa dang khong khro ba dang ldan te/sems snyoms par mi 'gyur ro/ /zang zing med pa'i sems dang ldan pa ni gnyi ga la yang sems snyoms par 'jug go/ /zang zing gis byas pa'i mdza' ba la mthun par byed pa ni ji srid 'tsho'i bar du mthun par byed pa ste/gtan du ma yin no/ /byang chub sems dpa' ni zang zing med par byams pa ste/ tshe rabs gzhan dag na yang rjes su mthun par byed pas mya ngan las 'das pa la thug gi bar du gtan du byams so/ /tshig ran pa dang 'dzum pa'i bzhin gyis gsod por smra ba zhes bya ba 'di gnyis ni phan pa dang bde bar bya ba'i lhag pa'i bsam pa dang mthun pa'i ngag dang lus kyi las kyis bshad do//snying rje chen po yongs su ma chad pa zhes bya ba ni bde ba dang sdug bsngal gnyis su med par mnyam pa nyid kyi las kyis bshad de/ su dag sdug bsngal ba nyid dag la snying rje 'jug gi/bde ba rnams la ni ma yin pa de'i las ni ma snyoms pa ste/ gzhan du mi 'jug pa'i phyir ro/ /byang chub sems dpa' ni bde ba dang sdug bsngal dang sdug bsngal ba yang ma yin bde ba yang ma yin pa yang rung / sems can du bsdus pa rnams 'du byed kyi sdug bsngal nyid dang ldan pas de dag la bye brag med par snying rje ba'i phyir las mnyam pa yin no//khur blangs pa rnams la sgyid lug pa med pa zhes bya ba ni mi zhum pa'i las kyis brjod do/ /sems can thams cad bsgral ba'i khur la brtson par byas pa'i rtsol ba yongs su mi gtong ba'i phyir ji ltar dam bcas pa sgrub pa'i phyir ro//yid yongs su mi skyo ba zhes bya ba ni mi bzlog pa'i las kyi rnam par 'grel te/ sems can log pa bsgrubs pas phan pa dang bde bar bya ba'i lhag pa'i bsam pa dang mthun pa'i las las bzlog par mi nus pa'i phyir ro//thos pa dang don gyis ngoms mi myong ba zhes bya ba ni/ thabs yongs su 'dzin pa'i las kyis rnam par 'byed do/ /mnyan pa yin pas thos pa ste/ mdo la sogs pa'i chos rnams yin gyi mnyan par bya ba gang ci yang rung ba ma yin no/ /don ni de dag nyid kyis brjod par bya ba'o//thos pa dang / don gnyis la ngoms mi myong ba ni chog mi shes pa ste/ de ni sems can yongs su smin par bya ba'i thabs yongs su 'dzin pa'i las te/ thos pa dang don gyis mi ngoms pa ni skal ba ji lta ba bzhin du tshig dang yi ge 'brel pa rnams kyis chos ston pa'i phyir ro/ / tshig gnyis kyis mi mthun pa'i phyogs las 'dun pa bzlog pa'i las zhes bya ba ni/ bdag gi 'khrul pa rnams la nyes par lta ba dang / gzhan gyi 'khrul pa rnams la mi gshe bar bsgo ba zhes bya ba 'di gnyis kyis so/ /de la mi mthun pa'i phyogs ni 'dod chags sogs pa'o/ / de las 'dun pa bzlog pa ni phyir bzlog pa ste/ bdag gi 'khrul pa'i skyon yang dag par mthong na de las ldog go/ /legs pa bsdams pas kyang tshig gzung bar 'os pas gzhan dag bya ba ma yin pa las bzlog par nus kyi gzhan du ni ma yin te/ ji skad du/ gnas ma yin zhing go skabs med de/gang bdag log par zhugs pa la zhes bya ba la sogs pa mdo las ji skad gsungs pa lta bu'o/ /'jig rten na yang / /rang gi nyes la nyes shes na/ /dus zhig na ni 'bral bar 'gyur/ /de la yon tan 'dzin pa yi/ /nga rgyal can la 'bral mi 'gyur/ /zhes brjod do/ /su zhig ltung ba 'byung ba la phan par 'dod pa'i phyir ma yin gyi/khros te gleng na de'i tshig de yang gzung bar 'os pa ma yin pas je mi mthun zhing log par sgrub par 'gyur gyi/ bu gcig pa dang 'dra bar byams pa skyes pa ni lhung ba yang gleng bar byed la/ phyin cad mi bya ba'i sdom pa yang 'dzin tu 'jug go//spyod lam thams cad du byang chub kyi sems yongs su sbyong ba zhes bya ba ni/ rgyun mi 'chad par de yid la byed pa'i las kyis de shes par byed do/ /de zhes bya ba ni phan pa dang bde bar bya ba'i lhag pa'i bsam pa dang sbyar ro/ /byed pa thams cad du byang chub kyi sems yongs su sbyong ba'i phyir te/spyod yul yongs su dag pa'i mdo las ji skad du/ 'dug pa na 'di ltar sems can thams cad byang chub kyi snying bo la 'dug par gyur cig ces sems bskyed do zhes bya ba la sogs pa gsungs pa lta bu'o/ /tshig bdun gyis khyad par du 'gro ba'i las zhes bya ba ni/ rnam par smin pa la mi re ba'i sbyin pa zhes bya ba nas/bsdu ba'i dngos po bzhis zin pa'i thabs zhes bya ba'i bar ro/ /gong nas gong du rab tu dga' ba la sogs pa'i sa'i gnas skabs pa'i pha rol tu phyin pa drug po ji skad smos pa'i mi mthun pa'i phyogs ma lus par bsal ba rnams dang / bsdu ba'i dngos po rnams ni khyad zhugs par khyad par du 'gro ba 'phel ba 'thob pa'i rgyu'o//las ni bya ba yin pa'i phyir ro/ /pha rol tu phyin pa bzhi ni tshig de nyid kyis bshad zin to/ gang la khyad par yod pa de bshad par bya ste/ de na sems can gyi don bya ba mi mthong ba'i phyir byang chub sems dpa' ni gzugs med pa'i khams su mi skye'o//des na byang chub sems dpa'i bsam gtan gang yin pa ni/ gzugs med pa'i khams rnam par bsal ba ste spangs zhes bya ba'i tha tshig go/ /thabs la mkhas pa ni snying rje dang ldan pa'i shes rab ste/ des sems can gyi don byed pa'i phyir ro//de med na sems can gyi don med par 'gyur te/ sangs rgyas nyid ni sems can gyi don no/ /ji skad du/ khyod ni shes rab thugs rje zung 'brel bas/ /zin nas gzhan la phan pa mdzad par gyur/ /gzhan gyi don du yang dag spyod pa ni/ /byang chub bgrod pa gcig pu'i lam lags so//zhes bshad pa lta bu'o/ /bsdu ba'i dngos po bzhi ni sbyin pa dang / snyan par smra ba dang / don spyod pa dang / don mthun pa'o/ /sbyin pa ni phan 'dogs pa'i phyir sbyin pa la 'jug pa'o/ /snyan par smra ba ni bye brag tu rtogs pa'i phyir te/chos ston pa'i mtshan nyid yin pa'i phyir ro/ /don spyod pa ni dge ba la 'dzud pa'i phyir te/ yang dag pa len du 'jug pa'i ngo bo nyid yin pa'i phyir ro/ /don mthun pa ni mthun par 'jug pa'i phyir te/ yon tan mtshungs pa nyid kyi ngo bo nyid yin pa'i phyir ro/ /yang na sbyin pas ni chos kyi snod du byed do//snyan par smra bas ni chos la mos par byed do/ /don spyod pas ni chos la mos pa sgrub par byed do/ /don mthun pas ni zhugs pa sbyor bar byed de/ yang dang yang du bkra bar byed pa'i phyir ro/ /de dag nyid thabs te/ ngo bo nyid kyis bsdud pa'i phyir ro/ /tshig drug gis grub par sbyor ba'i las zhes bya ba la grub par bya ba'i phyir sbyor ba ni grub par sbyor ba'o//gang gis grub pa de ni las so/ /skyes bu dam pa la brten pa dang zhes bya ba nas/ grogs kyi yon tan zhes bya ba de dag ni mdo'i tshig brgyad pa'o/ /tshul khrims dang ldan pa dang / tshul khrims 'chal ba rnams la gnyis su med pa'i byams pa zhes bya ba nas/dge ba'i bshes gnyen la brten pa zhes bya ba'i bar gyis bshad de/ yid la byed pa'i yon tan dang grogs kyi yon tan gnyis tshig gnyis gnyis kyis bshad pa'i phyir ro/ /'di dag la tshul khrims yod pa'i phyir tshul khrims dang ldan pa'o//tshul khrims sdig pa can ni tshul khrims 'chal pa'o/ /de dag las chos nyan pa na chos la gus pa'i phyir de gnyi ga la yang bshes gnyen bzang por 'du shes nas de dag la brten to/ /tshul khrims 'chal ba la skyes bu tha shal zhes brnyas par mi byed de/ ji skad du/ /mkhas pa tshul khrims ngan yang mi dman zhing / /phan par smra la gsal bar smra ba la/ /bla ma ci 'dra de bzhin gus par byed/ /de yis legs par smra la byams de 'dra/ /zhes bshad pa lta bu'o/ /gus par byas te chos nyan zhes bya ba ni ji skad du/ don rnam pa bcu drug gis chos mnyan par bya'o//zhes bshad pa lta bu'o/ /gnas nas rgyang grags gcig phan chad ni dgon pa'o/ /gus par byas te zhes bya ba ni ji lta ba bzhin du gus pa'o/ /rnam par rtog pa bzang po ma yin pa ni 'dod pa la sogs pa dang ldan pa ste/ gar byed pa dang / gar byed du 'jug pa dang /glu len pa la sogs pa 'jig rten gyi sna tshogs la mi dga' bas de dag yongs su spong ngo / /yid la byed pa'i yon tan ni nyan thos dang rang sangs rgyas kyi theg pa 'dod pa 'dor ba dang / theg pa chen po'i yon tan 'dod pa dang ldan pa'i phyir ro/ /grogs kyi yon tan ni sdig pa'i grogs po yongs su spong ba dang /dge ba'i bshes gnyen la brten pa'o/ /gsum gyis grub pa las zhes bya ba ni grub pa'i rtags so/ /las kyi sgra ni 'dir rtags kyi rnam grangs su gtogs pa ste/ tshad med pa dang / mthu dang / rtogs pa'i yon tan rnams kyis de dag bshad do//tshangs pa'i gnas pa bzhi yongs su sbyong ba zhes bya ba la sogs pa la/ tshad med pa bzhi po byams pa dang / snying rje dang / dga' ba dang / btang snyoms ni tshangs pa'i gnas pa'o/ /de dag ni grub pa na rnam par dag pa bag la zha ba bzhin du shes par byed pas rtags kyi sgra 'thob bo//mthu zhes bya ba ni mthu stobs te/ mngon par shes pa lnga po dag gis rnam par rol pa'i phyir rdzu 'phrul che ba nyid do/ /zag pa zad pa'i mngon par shes pa ni mthu ma yin te/ shes rab kyis rnam par grol ba rdzu 'phrul che ba ma yin pa'i phyir ro/ /yang na byang chub sems dpa'i skabs yin pas de ma smos te/'di yang grub pa'i rtags so/ /rtogs pa ni mngon sum du byed pa dang / de mngon sum du byed pa'i dbang ste/ ye shes la rton pa zhes bya bas ston te/ so so rang gis rig pa bdag nyid kyis mngon sum pa'i ye shes so/ rton pa ni phug ste tshad mar bshad pa yin gyi/ don tsam rnam par shes pa ni ma yin te/ des zhi bar mi 'gyur ba'i phyir ro/ /tshig bzhis des 'jog pa'i las zhes bya ba ni phan ba dang bde bar bya ba'i lhag pa'i bsam pa des 'jog pa ni des 'jog pa'o/ /de nyid las te/ sgrub pa dang log par sgrub pa la gnas pa'i sems can rnams zhes bya ba nas rdzogs pa'i bar ro//'di dag gi bshad pa ni/ tshogs yongs su sdud pa'i yon tan zhes bya ba nas bzung ste/ tha mar thug gi bar te/ tshul khrims 'chal ba mi dge ba'i gnas las bskyod de/dge ba la 'jog gi/ phyug bar ni mi byed do/ /tshig gcig tu chad pa ni the tshom med par gyur pa'i gdams pa dang rjes su bstan pa tshig gzung bar 'os pa yin pa'i phyir/ the tshom can gyi tshig ni gzung bar 'os pa ma yin pa'i phyir ro/ /bden pa gces su byed pa zhes bya ba ni/chos dang zang zing gi sdud pa zhes bya bas 'chad de bsgo ba dang / gang yang rung ba dang / gnyi ga las yang dag par bgo bsha' bya bar dam bcas nas chos dang zang zing gnyis kyis de bzhin du sgrub pa'i phyir ro/ /'di yang las yin no/ /byang chub kyi sems sngon du 'gro ba ni des yongs su bzung bas sems kun nas nyon mongs pa med par byed de/bsnyen bkur byed pa la sogs pa tshe 'di'i 'bras bu la chags par mi sems pa'i phyir dang / byang chub chen po thob par bya bar sems pa'i phyir ro/ /tshigs su bcad pa'i don ni brda sprad par zad do/ / de lta bu'i las dang ldan pa'i byang chub sems dpas shes bya'i mtshan nyid ji ltar mngon par rtogs par byed pa de ltar brjod par bya'o/ /mang du thos pas bsgos pa'i gnas zhes bya ba ni theg pa chen po'i skabs yin pa'i phyir ro/ /theg pa chen po'i chos dang don mang du thos pas sems dang sems las byung ba'i rgyud bsgos pa yin te/mang du ma thos pa la ni mngon par rtogs pa med pa'i phyir ro/ /'di ltar bcom ldan 'das la 'phags pa sgra gcan zin gyis gsol pa/ bcom ldan 'das kyis bdag la mngon par rtogs par bgyi ba'i slad du/ gdams su gsol/bka' stsal pa/ sgra gcan zin khyod kyis phung po pa bzung ngam/ des gsol pa/ /bcom ldan 'das ma bzung lags so/ /bcom ldan 'das kyis bka' stsal pa/ /sgra gcan zin de lta bas na phung po ba nyid je zung shig/ kun chub par gyis shig ces bya ba la sogs pa'o//kun gzhi rnam par shes pas bsdus pa ma yin zhes bya ba ni chos kyi dbyings shin du rnam par dag pa'i rgyu mthun pa dang / de'i gnyen po yin pa'i phyir/ /de'i rang bzhin ma yin te/ /'gal ba'i phyir des bsdus pa ma yin no/ /kun gzhi rnam par shes pa ltar sa bon yin pa zhes bya ba ni ji ltar kun gzhi rnam par shes pa kun nas nyon mongs pa'i chos rnams kyi rgyu yin pa de bzhin du gnas 'di yang rnam par byang ba'i chos rnams kyi rgyu yin te/rgyu'i dngos po tsam du dpe dang bstun pa yin gyi/ gzhan du ni ma yin no/ /chos ni mdo la sogs pa'o//don ni de dag nyid kyi brjod par bya ba bdag med pa la sogs pa'o/ /'di dag ni de'i rnam par 'byung ba'i ngang tshul can yin pas der snang ba 'byung ba'i tshul can no/ /gzung ba'i dngos po'i gnas lta bu zhes bya ba ni de dang 'dra bar snang ba'i phyir ro/ /lta ba dang bcas pa zhes bya ba ni rna ba'i rnam par shes pa dang bcas pa'o//yid kyi brjod pa rnams zhes bya ba ni yid kyi rnam par shes pa rnams so/ /yang na lta ba'i cha dang bcas pa'i gzung ba dang 'dzin pa'i dngos por rnam par gzhag pa rnams te/ ji skad sngar bshad pa bzhin no/ /'jug pa su zhe na/ zhes bya ba ni 'jug par byed pa mngon par rtogs par byed pa po dpyod pas 'dri ba gleng slong ngo / /sems kyi rgyud theg pa chen po chos mang du thos pas bsgos pa zhes bya ba la sogs pa la/ sangs rgyas 'byung ba tshad med pa mnyes par bya ba ni mngon du byed pa ste/ 'dis de thob pas sangs rgyas 'byung ba tshad med pa mngon du byed pa thob ces bya ba'i tha tshig go//gcig tu mos pa can zhes bya ba ni gang theg pa chen po'i chos la mngon par yid ches te/ bshes gnyen ngan pa gang gis kyang dbyer mi phyed pa'o/ /theg pa chen po mang du thos pa la sogs pa rnam pa 'di gsum gyis/dge ba'i rtsa ba legs par bsags pa'i phyir bsod nams dang ye shes kyi tshogs legs par bsags pa'i byang chub sems dpa'o/ /gang du 'jug ce na zhes bya ba ni yul dmigs kyis dbye ba lhur len pas 'dri ba'o/ /lta ba dang bcas pa'i chos zhes bya ba la sogs pa la/theg pa chen po'i chos kyi rgyu las de'i rnam par 'byung ba 'jug pa po'i yid kyi brjod pa ni 'jug par bya ba'i yul yin pas gzhi nyid du brjod par 'dod pa'o/ /yid kyi brjod pa de la 'jug pa kha cig ni/ mos pas spyod pa'i sa la 'jug ste/thos pa tsam gyis chos thams cad rnam par rig pa tsam nyid du mos pa'i phyir ro/ /kha cig ni mthong ba'i lam la 'jug ste/ ji lta ba bzhin du yid kyi brjod pa rab tu rtogs pa'i phyir ro/ /de la ji lta ba bzhin du rab tu rtogs pa ni 'di yin te/ 'di ltar sems can med pa dang /chos med pa dang / gzung ba med pa dang / 'dzin pa med par rab tu rtogs pa'o/ /kha cig ni bsgom pa'i lam la 'jug ste/ nyon mongs pa dang / shes bya'i sgrib pa thams cad kyi gnyen po nyid du bsgoms pas de rnam par dag pa'i phyir ro/ /kha cig ni mthar phyin pa'i lam la 'jug ste/sgrib pa med pa'i phyir ro/ /de ltar na rab tu rtogs pa rnam pa bzhi'o/ /gang gis 'jug ce na zhes bya ba ni rgyu yongs su 'dri ba ste/ thab gang gis 'jug ce na zhes bya ba'i tha tshig go/ /dge ba'i rtsa ba'i stobs bskyed pa zhes bya ba la sogs pas ni de ston to//dge ba'i rtsa ba'i stobs can du gyur du zin kyang sems zhum pa yang yod do snyam pa la/ rnam pa gsum gyis sems sbyong ba zhes bya ba smos so/ /'jig rten gyi khams dpag tu med pa rnams kyi zhes bya ba la sogs pa la sems sbyong ba dang po'o/ /zhes bya ba ni gsal bar byed pa ste/bshad pa nyid kyis gsal bar byas zin to/ /bsam pa de bdag gis thob pa ste zhes bya ba ni bgegs med ces bya ba'i tha tshig go/ /gang gi phyir de ser sna med pa dang / 'dod pa la rnam par rtog pa med pa dang / gnod sems med pa dang / le lo med pa dang / gnyid dang rmugs pa med pa dang / /ma rig pa med pa de'i phyir/ tshegs chung dus pha rol tu phyin pa drug po dag bsgom pa yongs su rdzogs par 'gyur ro snyam pa ni sems sbyong ba gnyis pa ste/ bsam pa khyad par du 'phags pa thob na sbyin pa la sogs pa rang gi ngang gis 'byung ba'i phyi ro//dge ba sgrib pa dang bcas pa yang zhes bya ba ni 'jig rten pa'i dge ba ste/ de dang ldan pa'o/ /de ni mi mthun pa'i phyogs ma spangs pa'i phyir sgrib pa dang bcas pa'o/ /bdag ni mi mthun pa'i phyogs spangs pa sgrib pa med pa'i dge bas dge ba can yin nam/ sangs rgyas nyid du phun sum tshogs par ci'i phyir mi 'gyur snyam pa ni sems sbyong ba rnam pa gsum pa ste/sems rab tu 'dzin cing rnon por byed ces bya ba'i tha tshig go/ /don de nyid tshigs su bcad pa rnams kyis sdud de/ /gang phyir sems can dpag med pa/ /mir 'gyur skad cig re re la/ rdzogs pa'i byang chub thob gyur pa/ /zhes bya ba la sogs pa'o/ /zhum pa zhes bya ba ni sems gang ba'o/ /de mi bya zhes bya ba'i tha tshig ste/ bdag gis bla na med pa yang dag par rdzogs pa'i byang chub mngon par rdzogs par 'tshang rgya bar mi nus so snyam du bdag la nus pa med par bsam par mi bya ba ste/ji skad du/ gang dag kha cig bde bar gshegs pa'i go 'phang thob gyur pa/ /de yang shin du dman pa'i gnas skabs der ni lhung bar gyur/ /khyod ni nyam ngar ltung yang bdag la smad par mdzad ma gyur/ /bdag smod ro yin skyes bu skyid pa 'jig par byed/ /ces bshad pa lta bu'o//bsam pa gang gis zhes bya ba'i bsam pa de ni sngar bshad zin to/ /chags pa med par sbyin pa la 'jug pa'i rgyu yin no/ /legs yid kyis zhes bya ba ni dge ba'i sems rnams kyis yin gyi/ mi dge ba dang lung du ma bstan pa'i sems rnams kyis ni ma yin te/ji ltar 'jig rten pa dge ba dang mi dge ba dang lung du ma bstan pa rnam par g.yengs pa'i sems dang ldan pa rnams kyang srid pa dang longs spyod 'dod pas sbyin pa la sogs pa la 'jug pa ltar/ byang chub sems dpa' rnams ni de lta ma yin te/ bla na med pa yang dag par rdzogs pa'i byang chub don du gnyer ba'i phyir ro//bsam pa de thob ces bya ba ni rang gi ngang gis 'byung ba'i bsam pa ji skad smos pa gang gis pha rol tu phyin pa rnams sgom pa de thob pa'o/ /brtan rnams kyi zhes bya ba ni byang chub sems dpa' rnams kyi ste/ gang gi phyir/ sbyin pa la sogs pa nyid du brjod pa yin gyi de ni mi mthun pa'i phyogs ni ma yin par nges par byas bas mi mthun pa'i phyogs spong bas bsgrim mi dgos par 'jug pa nyid bstan to//sogs pa smos pa ni tshul khrims la sogs pa'i pha rol tu phyin pa khong du chud par bya'o/ /dge ba dang ldan pa shi ma thag ces bya ba ni 'jig rten pa'i dge bas dge ba can shi ba'o//'dod bzhin phun sum tshogs lus thob/ /ces bya ba ni 'jig rten pa rnams srid pa'i rtse mo'i bar du yang skye bar 'gyur zhes bya ba'i tha tshig go/ /spangs pa dge ldan zhes bya ba ni sgrib pa spangs pa'i dge bas dge ba dang ldan pa rnams zhes bya ba'i tha tshig go//phun sum tshogs de zhes bya ba ni ji ltar 'dod pa'i sangs rgyas nyid do/ /gnas bzhi spong ba zhes gang smos pa'i spang bar bya ba de dag ston te/ yid la byed pa spangs pas zhes bya ba ni/ nyan thos dang rang sangs rgyas kyi theg pa yid la byed pa 'dor ba'i phyir ro/ /yid gnyis dang som nyi spangs zhes bya ba ni/theg pa chen po'i zab pa nyid dang rgya che ba nyid la yid gnyis phyin ci log dang theg tsom med par bya'o/ /chos la mngon par zhen pa spangs pas zhes bya ba ni/ thos pa dang bsams pa'i chos la ngar 'dzin pa dang nga yir 'dzin par mngon par zhen pa spang bar bya ste/ mngon par rtogs pa'i bar du gcod pa'i phyir ngas nyan to//ngas khong du chud do/ /nga'i thos pa'o/ /nga'i don to zhes mngon par zhen par mi bya'o/ /rnam par rtog pa spangs pas zhes bya ba ni gang mdun na bstsal mi dgos par rang gi ngang gis gzugs la sogs pa gnas pa dang / gang yang ting nge 'dzin 'dod pas bsgrims te/ rnam par byang ba ba'i keng rus la sogs pa bzhag pa dmigs par gyur pa'i mtshan ma de thams cad yid la mi byed pas rnam par mi rtog par spong ba'am/pha rol tu phyin pa la sogs pa nas sangs rgyas dang / byang chub sems dpa'i mtshan ma'i bar la/ de ni 'di yin no zhes mngon par zhen nas rnam par rtog par mi byed pa'o/ /tshigs su bcad pa ni tshig de nyid kyis bshad zin to//gang gis ji ltar 'jug ce na/ /zhes bya ba ni byed pa dang 'di ltar bya ba 'dri ba'o/ /'di ltar 'jug par byed pa po las 'jug par byed pa na/ byed pa po dang mngon par rtogs pa'i mtshan nyid kyi bya ba 'di lta bu dang 'di lta bu bya'o zhes bya ba 'di ltar bya ba gdon mi za bar dgos par 'gyur te/des na gnyi ga ston to/ /thos pa'i bag chags kyi rgyu las byung ba zhes bya ba la sogs pas ni byed pa ston to/ yongs su tshol ba bzhi dang / yang dag pa ji lta ba bzhin du yongs su shes pa bzhi zhes bya bas ni 'di ltar bya ba ston to/ /sbyor ba'i dus na ni yongs su tshol ba ste/ nges par rtog pa'i rnam pa'i lta ba dmigs pa med pa'i rnam par 'jug pa'i yongs su rtog pa'o//dmigs pa med par nges pa'i ye shes ni 'bras bu'i rang bzhin te/ yang dag pa ji lta ba bzhin du yongs su shes pa'o/ /de la ming ni gzugs zhes bya ba la sogs pa'i tha tshig go/ /ming de yongs su tshol ba ni yid kyi brjod pa tsam nyid du rtog pa ste/yid kyi brjod pa las gud na med pas brtags par yod pa'i phyir ro/ /dngos po yongs su tshol ba ni ji ltar ming gi tshogs la sogs pas phung po dang khams la sogs par brjod pa de bzhin du yongs su grub pa med par rtog pa ste/ rigs dang rigs can gyi 'brel pa tha dad na de dang ldan pa'i brjod pa mi rung ba'i phyir ro//ming gi dngos po brjod par bya ba'i don gang yin pa ming la brten pa'i brjod par bya ba de la yang yid kyi brjod pa tsam du zad par rtog par byed de/ phyi rol gyi rnam par 'dzin pa las zlog cing / nang gi yan lag tu nye bar rtog par byed do/ /gzugs la sogs pa zhes bya ba'i tshig de yang yang na ni ngo bo nyid du brtags pa'i rang bzhin du 'gyur te/lus dang tshor ba zhes bya ba la sogs pa ste/ gang zag brtags pa ltar med bzhin du yang ngo bo nyid du 'dogs pa'i phyir ro/ /yang na ni khyad par du gdags pa'i mtshan nyid de/ mi rtag pa dang sdug bsngal ba zhes bya ba la sogs pa ste/ mi bzhin du khyad par 'dogs pa'i phyir ro//ming dang bcas pa'i don zhes bya ba ni ming dang brjod par bya ba dang bcas pa'o/ /ngo bo nyid dang khyad par du btags pa dang bcas shing zhes bya ba ni ngo bo nyid dang khyad par gyi sgra gnyis dang bcas pa'o/ /ngo bo nyid dang khyad par du bcas pa zhes bya ba ni don gnyis dang bcas pa ste/ 'di thams cad don gyi mtshan nyid du mi dmigs pa na zhes bya ba la sogs pa ni kun brtags pa'i don mi dmigs par nges par sems pa'i rnam pa yongs su tshol ba bzhi po thabs su gyur pa rnams kyi 'bras bu yang dag pa ji lta ba bzhin du shes pa rnam pa bzhi nyid do/ /de dag mi dmigs pa'i phyir ro zhes bya ba ni ming la sogs par mi dmigs par nges pa'i phyir ro zhes bya ba'i tha tshig go//nges par rtog pa'i yongs su tshol ba'i 'bras bu ni mi dmigs pa ste/ ming yongs su tshol ba'i 'bras bu ni ming mi dmigs pa'i shes pa'o/ /dngos po yongs su tshol ba'i 'bras bu ni dngos po mi dmigs pa'i shes pa'o//de bzhin du ngo bo nyid dang khyad par du gdags pa la yang brjod par bya'o/ /gal te don med pa'i phyir rnam par rig pa tsam nyid la 'jug na/ rnam par rig pa tsam nyid de la 'jug ces ji skad bya zhes bya bas spong bar byed de/ de nyid 'di'i don yin par bsams pa'o//de dgag pa'i phyir de tsam nyid ces bya ba smos so/ /rnam par rig pa'i don gyis kyang don med pa nyid yin gyi/ phyi rol 'ba' zhig gis ni ma yin no/ /gal te don med pa nyid yin na skye mched bcu gnyis la sogs pa bshad pa dang / 'jig rten pa'i don gyi tha snyad kyi rjes su zhugs pa ji lta bu zhe na/de'i phyir rgyu mtshan dang lta ba dang bcas pa gnyis zhes bya ba 'di smos te/ don med bzhin du yang phyir rol gyi don du snang ba'i rnam par rig pa ni don mngon par brjod pa'i bag chags kyi dbang gis 'grub la/ rnam par rig pa snang ba yang lta ba zhes bya ba btags pas 'gal ba med do/ ci rgyu mtshan dang lta bar snang ba'i rnam par rig pa 'di dag rigs gzhan du gyur ba nyid ces 'jug par byed dam/ 'on te ma yin zhe na/ de'i phyir sna tshogs kyi rnam pa nyid la 'jug ces bya ba smos te/ rnam par shes pa gcig nyid gzung ba dang 'dzin pa'i dngos por rnam pa tha dad pas dus gcig tu rnam pa sna tshogs su snang ngo zhes 'jug go//sna tshogs zhes bya ba ni shes pa gcig nyid rnam pa mang por rang gis rig go/ /rtog pa rnam pa 'di gsum rnam par dgrol ba'i skabs kyis ming la sogs pa don rnam pa drug don med pa nyid ces bya ba la sogs pa gsum bstan to/ /ci 'dra bar ni 'jug ces gang smos pa de'i dper/mun khung na sbrul du snang ba'i thag pa bzhin du 'jug ces bya ba la sogs pa smos te/ dpes ngo bo nyid gsum rtogs par ston to/ /dper na med pa'i phyir thag pa la sbrul ni nor ba ste/ de bzhin du ming la sogs pa don rnam pa drug gis yi ge dang don du snang ba'i yid kyi brjod pa gzhan gyi dbar la ming la sogs pa yang nor ba yin no//de la ji ltar thag pa'i blo la brten nas med pa la 'khrul pa'i phyir sbrul gyi blo ldog pa med pa de bzhin du gzhan gyi dbang la brten nas ming la sogs pa kun brtags pa'i don rnam pa drug gi blo rnam par ldog go/ /ji ltar kha dog dang dri la sogs pa la brten nas cha shas su bshig na thag pa'i blo yang ldog ste/de skad du/ /thag pa sbrul du shes pa las/ /thag par mthong nas don med do/ /de yi cha mthong de la yang / /shes pa sbrul ltar rnam par 'khrul/ /ces bshad do/ /de bzhin du rnam pa drug la yang dag pa'i don bstsal na zhes bya ba la/bstsal ba ni phral ba ste/ /med ces bya ba'i tha tshig go/ /don yang dag pa ma yin pa rnam pa drug po med pa'i mtshan nyid yongs su grub pa la brten nas gzhan gyi dbang 'khrul pa yang bzlog par bya ba yin te/ bstsal bar bya ba yin no/ /yid kyi brjod par snang ba'i don gyi mtshan nyid la 'jug pas zhes bya ba ni yid kyi brjod pa 'di don du snang gi/kun brtags par bya ba'i don ni med do/ /zhes kun brtags pa la 'jug go/ /rnam par rig pa tsam la 'jug pas zhes bya ba ni rnam par rig pa tsam 'di ma rig pa'i dbang gis 'khrul te don med bzhin du 'khrul pa don gyi rnam par snang ngo zhes gzhan gyi dbang la 'jug go//yongs su grub pa la 'jug pa'i skabs kyi don gyi 'du shes rnam par bshig pa zhes bya ba smos te/ don gyi 'du shes bstsal zhes bya ba'i tha tshig go/ /don du snang ba thams cad 'byung ba'i gnas skabs med pa yin no/ /zhes bya ba ni don du snang ba gang gis kyang skyed mi nus so zhes bya ba'i tha tshig go//des na rnam par rig pa tsam du snang ba yang mi 'byung zhes bya ba ni gzung ba med na 'dzin pa med pa'i phyir te/ rnam par rig pa tsam don du byas nas mi 'byung zhes bya ba'i tha tshig go/ /don thams cad la rnam par mi rtog pa'i ming la gnas shing zhes bya ba la sogs pas ni ming gi spyod yul mdo la sogs pa'i chos gang yin pa de dag gis ma 'bags pa la 'di thams cad ni ming tsam mo zhes bya bar rnam par gnas shing ste/ji skad du/ /thams cad ming tsam kho na ste/ /rtog pa thams cad 'jug pa med/ /ming du snang ba'i rnam rig la/ / ming zhes nye bar 'dogs par byed/ /ces bshad pa lta bu'o/ /chos kyi dbyings la mngon sum gyi tshul gyis gnas so zhes bya ba ni so so rang gis mngon sum du byed pas gnas kyi mos pas ni ma yin no/ /dmigs par bya ba dang / dmigs par byed pa mnyam pas mnyam pa'i ye shes bya ba ni ji ltar dmigs par bya ba med pa de bzhin du dmigs par byed pa yang med pas dmigs par bya ba dang dmigs par byed pa gnyis mnyam pas mnyam pa nyid do//de ltar na 'di yongs su grub pa'i ngo bo nyid la zhugs pa yin no zhes bya ba ni 'jug pa'i byed pa po'i spyod pa med par gyur pa'i mthar thug pa ston to//brtags pa dang gzhan gyi dbang la 'jug pa ni lhag ma dang bcas pa'i phyir 'jug pa'i bya ba mthar thug pa ma yin pas byed pa po nyid du brjod par 'dod pas 'jug par bstan pa yin no/ /don thams cad la rnam par mi rtog pa'i ming la zhes gang bshad pa yul dang bcas pa'i ming de rab tu dbye ba ni tshigs su bcad pas ston te/chos zhes bya ba ni sa gajugs la sogs pa'o/ /gang zag ces bya ba ni lha sbyin dang / dad pas rjes su 'brang zhes bya ba la sogs pa'o/ /chos zhes bya ba ni sangs rgyas kyi gsung rab mdo sde dang / dbyangs kyis bsnyad pa'i sde la sogs pa'o/ /don zhes bya ba ni de'i brjod par bya ba ste//pha dang ma ni gsad byas shing / /rgyal po gtsang sbra can gnyis dang / /yul 'khor 'khor dang bcas bcom nas/ /mi ni dag pa nyid du 'gyur/ /zhes bya ba la sogs pa'o/ /bsdus pa zhes bya ba ni chos thams cad bdag med pa zhes bya ba la sogs pa'o/ /rgyas pa zhes bya ba ni gzugs bdag med pa zhes bya ba la sogs pa'o//rigs zhes bya ba ni yi ge'i 'bru a zhes bya ba la sogs pa ste/ tshig dang ngag gi rgyu yin pa'i phyir ro/ /ma dag pa zhes bya ba ni so so'i skye bo rnams te/ nyon mongs pas dri ma can du gyur pa'i phyir ro/ /dag pa zhes bya ba ni 'phags rnams te/dri ma spangs pa'i phyir ro/ /mtha' zhes bya ba ni bsdus pa la dmigs pa ste/ shes rab kyi pha rol tu phyin pa dang / sa bcu la sogs pa bsdus pa'i don la dmigs pa'i phyir ro/ /chos kyi dbyings legs par rtogs pa yin zhes bya ba ni de mngon sum du byed pa'i phyir ro//de bzhin gshegs pa'i rigs su skyes pa yin zhes bya ba la/ de bzhin gshegs pa'i rigs ni chos kyi dbyings yin te/ de rtogs pa dang de la dmigs pa'i ye shes khyad par can bskyed pa dang / sngon gyi gnas gyur pa dang gnas gzhan bskyed pa'i phyir der skyes pa yin te/phal pa rigs mthun par skyes pa bzhin du sangs rgyas nyid du nying mtshams sbyor ba'o/ /gang gi phyir sa dang po mngon par rtogs nas de bzhin gshegs pa'i rigs su sangs rgyas kyi sras su skyes pa de nyid kyi phyir 'phags pa byams pas bcu la gnas pa shAkya thub pas sras kyi thu bo nyid du bye brag tu byas te spobs pa'i rgyan gyis bstod pa las//gang phyir khyed ni da ltar yon tan gyis/ /de dag bstan pa kun gyi spyi bor gnas/ /de phyir khyod nyid shAkya thub pa yi/ /sras kyi thu bo yon tan rnams kyis legs/ /zhes rgya cher 'byung ngo / /sems can thams cad la sems mnyam pa thob pa yin zhes bya ba ni thams cad la bdag med par mnyam pa nyid du mthong ba'i phyir te/ji skad du/ sems can thams cad ni de bzhin gshegs pa'i snying po'o zhes gsungs pa lta bu'o/ /byang chub sems dpa' thams cad la sems mnyam pa zhes bya ba ni de dag gi gnas gang yin pa de bdag gi yang yin no snyam pa'i phyir ro//sangs rgyas thams cad la sems mnyam pa thob pa yin te zhes bya ba ni de dag chos kyi sku gang yin pa de bdag gis kyang thob bo snyam pa'i phyir ro de ni de'i mthong ba'i lam yin no zhes bya ba ni nyan thos kyi mthong ba'i lam bzhin du chos kyi dbyings sngon ma mthong ba mthong ba'i phyir ro//ci'i phyir yang rnam par rig pa tsam de la 'jug ce na zhes bya ba ni dgongs pa 'dri ba ste/ thams cad mkhyen pa'i ye shes thob par bya ba'i phyir ro zhes brjod pa'i rigs pa las de'i go rims smos pa ni byang bar bya ba'i phyir te/ ji ltar bstan pa bzhin du sbyar bar bya'o zhes gdul ba'i tshogs skal ba yod pa la phan 'dogs pa'o//'dres pa'i chos la dmigs pa zhes bya ba ni de bzhin nyid kyi rang bzhin yin pas theg pa chen po bstan pa'i chos thams cad bsdus te dmigs pa'o/ /gzhan du na ni dus ring mo zhig tu rnam par mi rtog pa'i ye shes skye bar mi 'gyur ro//'jig rten las 'das pa ni zag pa med pa dang rnam par mi rtog pa'i phyir ro/ /zhi gnas dang lhag mthong gi shes pa zhes bya ba ni de skad ces bya ba'i mnyam par gzhag pa phyin ci ma log pa'i shes pas so/ /sna tshogs kyi rnam par rig pa'i shes pas zhes bya ba ni chos rnams kyi rgyu dang 'bras bu'i dngos po bla na yod pa dang /bla na med par rnam par 'jog pa ste/ gzung ba dang 'dzin pa'i rnam pa can gyis zhes bya ba'i tha tshig go/ /kun gzhi rnam par shes pa'i sa bon rgyu mtshan dang bcas pa thams cad ces bya ba ni gzugs la sogs par snang ba'i bag chags sgo bar byed pa dang bcas pa rnams te/rgyu dang 'bras bur bcas pa'i sa bon rnams spangs pa bstan to/ /chos kyi sku la reg pa'i sa bon zhes bya ba ni theg pa chen po mang du thos pa'i bag chags rnams te/ de ni chos kyi sku thob pa'i sngon du 'dren pa'i phyir ro//gnas gyur nas zhes bya ba ni de bzhin nyid rtog pas sems dang sems las byung ba rnams dri ma med par 'byung ba'am/ de bzhin nyid rnam par dag pas te/ stobs dang mi 'jigs pa la sogs pa/ sangs rgyas kyi chos thams cad 'grub pa'i sgo nas so/ /thams cad mkhyen pa'i ye shes thob par bya ba'i phyir ro zhes bya ba ni dri ma med cing thogs pa med pa'i ye shes brnyes par bya ba'i phyir ro//rjes la thob pa'i ye shes de zhes bya ba la sogs pa la kun gzhi rnam par shes pa thams cad rab tu skye ba zhes bya ba ni rgyur gyur pa rnams so/ /rnam par rig pa'i mtshan ma thams cad la zhes bya ba ni 'bras bur gyur pa rnams la ste/gzhan gyi dbang gi ngo bo nyid ji lta ba bzhin du mthong ba'i phyir gzung ba dang 'dzin par snang ba rnams la phyin ci log dang nor ba med par rtog go/ /ji ltar sgyu ma mkhan ni de la glang po che la sogs pa med par mthong ba'i phyir rtswa la sogs pa sgyu ma'i rgyu rnams la phyin ci log med kyi/gzhan dag ni rtswa la sogs pa la glang po che la sogs par mthong ba'i phyir 'khrul pa de bzhin du de kho na mthong bas gzung ba dang 'dzin pa med pa'i ngo bo nyid yongs su grub pa mngon sum du byas nas langs pa na yang rjes la dag pas dag pa ston pa'i dus na chos rnams kyi rgyu dang 'bras bu ston pa kun nas slong bar byed pa kun rdzob kyi shes pa dus thams cad du phyin ci ma log par gnas so//nyan pa po dag ni phyin ci log ste/ de dag kyang sems kyi rgyud la thos pa'i bag chags bsgos te/ des bya ba sgrub pa'i phyir rim gyis khad kyis khad kyis phyin ci log med par 'gyur ro//rjes la thob pa ni rnam par mi rtog pa yang ma yin/ rnam par rtog pa dang bcas pa yang ma yin te/ nyon mongs pa can du thal bar 'gyur ba'i phyir ro/ /de'i phyir lhag pa'i shes rab kyi bslab pa bstan pa'i gnas su rnam par mi rtog pa rjes dang dngos dang 'jug pa'i bye brag gis rnam par mi rtog pa rnam pa gsum du 'chad par 'gyur ro//mngon par rtogs pa thams cad la nges par 'byed ba'i cha dang mthun pa rnams 'byung ste/ de ni snga ma'i rang bzhin yin pa'i phyir de dag bstan to/ / yongs su tshol ba bzhi po dag gis zhes bya ba ni ming dang don dang ngo bo nyid dang khyad par du brtags pa nges par rtog pa'i bdag nyid can ji skad bstan pa rnams kyis so/ /don med par bzod pa chung ngu'i tshe zhes bya ba ni don med par bzod pa chung ngu'o/ /snang ba ni gsal ba ste/ don med par shes par bya'o//de 'dod pa'i phyir thob pa ste/ des na snang ba thob pa'i ting nge 'dzin ni snang ba thob ces bya ba'i tha tshig go/ /dro bar gyur pa zhes bya ba ni dro ba lta bu'i dge ba'i rtsa ba ste/ gtsub shing gtsubs pa las me 'byung bar 'gyur ba bzhin du de kho na shes pa'i me'i snga rol gyi yang rang bzhin gyi gnas rgyu zhes bya ba'i tha tshig go//nges par 'byed pa ni mngon par rtogs pa'o/ /de'i cha ni chos bdag med par bzod pa'o/ /de la phan pa dag ni de'i cha dang mthun pa dag go/ /rtse mo ni dge ba'i rtsa ba g.yo ba'i rtse mor phyin pa'i phyir ro/ /yang dag pa ji lta ba bzhin du yongs su shes pa bzhi po ming la sogs pa mi dmigs par nges pa gong du smos pa rnams la gnas pa ni ming la sogs pa ni rnam par rig pa tsam du zad kyi/don ni gang yang med do zhes bya bar nges pa ni de kho na'i don gyi phyogs gcig la zhugs pa'i ting nge 'dzin to/ /gzung ba tsam gyi dngos po 'gog pa'i phyir phyogs gcig nyid de/'di ltar don med par khong du chud pa yin gyi/ rnam par rig pa tsam yang med par ni ma yin no/ /de nyid kyi phyir de ni bden pa'i rjes su mthun pa'i bzod pa'i gnas yin no/ /rjes su mthun pa ni nye ba'i phyir te/ des gzung ba med pa la brten nas 'dzin pa yang med par rtogs par 'gyur ba'i phyir ro//ting nge 'dzin 'di dag ni mngon par rtogs pa dang nye ba yin par zhes bya ba ni mngon par rtogs pa'i dus na 'byung ba yin par zhes bya ba'i tha tshig go/ /ji ltar rnam par gnas pa bstan pa zhes bya ba ni rang dang spyi'i mtshan nyid dang / rtags la sogs pa spros pa gang dang gang gis sa bcu par sa rnams bstan pa de dag la 'dres pa'i chos ma dmigs pa nyid ni 'dres par byas nas dmigs pa'i phyir ro//gzhan du na tshogs bsags su zin kyang rnam par mi rtog pa'i ye shes mi srid pa'i phyir ro/ /'jig rten las 'das pa zhes bya ba ni rnam par mi rtog pa'o//de'i rjes la thob pa rnams par 'jog par byed pa dang / rjes la dag pas dag pa 'jig rten pas kyang de yul du byas pa'i phyir ro/ /de gnas gyur nas zhes bya ba ni rnam par mi rtog pa dang rjes la thob pa gnyis kyis gnas sems dang sems las byung ba'i rgyud rnam par dag nas te/sangs rgyas kyi sku rnam pa gsum thob par bya ba'i phyir zhes 'og nas 'chad do/ /khyad par gyi gnas skabs nas bcus zhes bya ba la sogs pa la/ dmigs pa'i khyad par ni theg pa chen po'i chos la byang chub sems dpa' thos pa las byung ba la sogs pa'i shes rab gsum gyis dmigs te/nyan thos kyi theg pa'i chos la ni ma yin no/ /bsod nams kyi tshogs kyi sbyin pa dang tshul khrims dang bzod pa la sbyor ba rnams so/ /ye shes kyi tshogs ni thos pa la sogs pa ste/ de dag bskal pa mi nyung bar bsags pa dag gis bstan nas khyad par des byang chub dpa' la byang chub sems dpa'i mngon par rtogs pa'i stobs bskyed pa'o//rtogs pa'i khyad par ni nyan thos ni gang zag la bdag med pa tsam mngon par rtogs par byed do/ /byang chub sems dpa' ni gang zag dang chos la bdag med pa mngon par rtogs par byed do/ /mya ngan las 'das pa'i khyad par ni byang chub sems dpa' rnams kyi ni mi gnas pa'i mya ngan las 'das pa ste/shes rab dang snying rje'i thabs kyis yongs su zin pas 'khor ba dang mya ngan las 'das pa'i mtha' la mi gnas pa'i phyir ro/ /nyan thos ni 'dus ma byas kyi mya ngan las 'das pa la gnas so//sa'i khyad par ni byang chub sems dpa' ni sa bcu po dag gis nges par 'byung ngo / /nyan thos rnams la ni sa rnam par gzhag pa med do/ /yongs su dag pa'i khyad par ni byang chub sems dpa' rnams kyi ni nyon mongs pa yang bag chags dang bcas par spong la/ sangs rgyas kyi zhing yang gser la sogs pa'i rang bzhin du rnam par dag go//nyan thos rnams la ni bag chags dang bcas par spong ba yang med la/ sangs rgyas kyi zhing yongs su dag pa yang med do/ /bag chags zhes bya ba ni nyon mongs pa med du zin kyang nyon mongs dang bcas pa bzhin du g.yo bar byed pa'o/ / sems can thams cad dang bdag sems mnyam pa nyid thob pa'i khyad par ni byang chub sems dpa' ni bdag dang gzhan mnyam pa nyid thob pas sems can yongs su smin par bya ba'i sbyor ba rgyun mi gcod do/ /nyan thos ni bdag dang gzhan tha dad du phye bas bdag gi don nyid la sbyor gyi/ gzhan gyi don la mi sbyor ro//skye ba'i khyad par ni byang chub sems dpa' ni de bzhin gshegs pa'i rigs chos kyi dbyings su skyes nas sangs rgyas su 'gyur te/ 'khor los sgyur ba'i rigs su skyes pa'i gzhon nu mtshan dang ldan pa bzhin no/ /nyan thos ni de lta ma yin te/ ma rabs kyi rigs bran khol gyi bu bzhin no//skye 'byung gi khyad par ni byang chub sems dpa' ni pad+ma'i snying po la skyil mo krung bcas te 'dug par rdzus te skyes nas sangs rgyas nyid thob kyi bar du dus thams cad du de bzhin gshegs pa'i 'khor gyi dkyil 'khor rnams su skye'o/ /sangs rgyas kyi 'khor gyi dkyil 'khor ni zag pa med pa'i dbyings te/sangs rgyas kyi yul lo/ /nyan thos ni ma'i mngal du skyes te phal pa bzhin no/ /'bras bu'i khyad par ni byang chub sems dpa'i 'bras bu ni stobs la sogs pa yon tan gyi tshogs kyis brgyan pa lhun gyis grub par sems can gyi don byed nus pa chos kyi sku thob pa'o//cig shos kyi 'bras bu ni zag pa dang bcas pa'i skye ba med pa'o/ /yongs su tshol ba dang de'i 'bras bu bde blag tu rtogs par bya ba'i phyir tshigs su bcas pa gnyis kyis sdud do/ /ming dang dngos gnyis phan tshun du/ /glo bur yin par yongs su btsal/ / zhes bya ba ni ming la dngos po glo bur ba dang / dngos po la'ang ming glo bur ba zhes bya ba yin gyi/ ji ltar kha cig sgra dang don rtag tu 'brel ba ni lhan cig skyes pa'o zhes bya ba la sogs par sems pa lta bu ni ma yin no/ /de tsam nyid du btsal bar bya/ yul gang du zhe na/ btags pa rnams pa gnyis po la zhes bya ba smos te/ngo bo nyid du btags pa dang khyad par du btags pa'o/ /ji ltar zhe na/ 'di ni btags pa tsam ste tha snyad btags par zad kyi 'di la ngo bo nyid dang khyad par du btags pa ni med do zhes bya bar sbyar ro/ /yang dag ji bzhin yongs shes pas/ /yongs su tshol ba bzhi po 'dis so//don med par zhes bya ba ni don dang bral ba'o/ /rtog gsum zhes bya ba ni ming du rtog pa dang / ngo bo nyid du btags par rtog pa dang / khyad par du btags par rtog pa'o/ /de med phyi zhes bya ba ni don med pa'i phyir ro/ /don med par zhes bya ba ni rtog pa rnam pa gsum med par mthong ba'o//gsum la 'jug pa yin zhes bya ba ni ngo bo nyid gsum la 'jug pa'o/ /tshigs su bcad pa dang po'i phyed kyis ni ming dang dngos po gnyis gcig la gcig glo bur yin par mthong nas kun btags pa'i ngo bo nyid la zhugs pa yin no/ /tshigs su bcad pa dang po'i phyed 'og mas ni ngo bo nyid dang /khyad par du btags pa rtog pa tsam nyid du mthong nas gzhan gyi dbang gi ngo bo nyid mngon par rtogs pa yin no/ /tshigs su bcad pa gnyis pa rangs pas ni rtog par zad kyi/ dngos por ni ma yin no zhes rtog pa rnams kyang med par mthong bas yongs su grub pa la 'jug go/ / gzhan du na ni dag pa dang ma dag pa med pas bcings pa dang thar pa mi 'grub po/ /su zhig de ltar yongs su tshol nas 'bras bu thob pa dang su la de skad bstan pa de'i dbang du byas nas tshigs su bcad pa/ byang chub sems dpa' mnyam gzhag pas/ /gzugs brnyan yid du mthong ba ni/ / zhes bya ba la sogs pa'o/ /chos dang don du snang ba ting nge 'dzin gyi gzugs brnyan gang yin pa de nyid yin par mthong ba ste/ ji skad du rnam par shes pa ni dmigs pa rnam par rig pas rab tu phye ba can no/ zhes ngas bshad pa lta bu'o/ /sus mthong zhe na byang chub sems dpa' mnyam par gzhag pas zhes bya ba ste/sems rtse gcig pas so/ /don gyi 'du shes bzlog nas su/ /zhes bya ba ni gzugs brnyan de las don gyi 'du shes bsal nas so/ /rang gi 'du shes nges par gzung / /zhes bya ba ni bdag gi mnyam par gzhag pa'i sems 'di nyid chos dang don lta bur so sor snang ngo snyam du'o//de ltar nang du sems gnas so zhes bya ba ni de'i tshe de'i sems nyid la sems gnas pa yin no zhes bya ba'i tha tshig go/ /gzung ba med par rab rtogs byos/ /zhes bya ba ni gzung ba med par shes par bya ba'o/ /de'i phyir 'dzin pa med rtogs kyis/ /zhes bya ba ni gzung ba med na 'dzin pa mi 'thad pa'i phyir ro//des na dmigs pa med la reg /ces bya ba ni de gnyi ga'i ngo bo nyid dmigs pa dang bral ba'i de bzhin nyid khong du chud de rab tu rtogs pa'o/ /bsod nams kyi tshogs ni sbyin pa la sogs pa pha rol tu phyin pa gsum mo/ /ye shes kyi tshogs ni shes rab kyi pha rol tu phyin pa'o/ /brtson 'grus ni gnyi gar gtogs so//bsam gtan ni tshad med pa la dmigs pa ni bsod nams kyi tshogs so/ /gzhan ni ye shes kyi yan lag go/ /mtha' yas pha rol med ces bya ba ni mtha' yas shing pha rol med pa ste/ mang ba dang rgyang ring ba'i phyir go rims bzhin no/ /glu dbyangs dang sil snyan mtha' yas pa dang 'dra'o//rgya mtsho pha mtha' med pa dang 'dra'o/ /bsags te zhes bya ba ni yongs su rdzogs par byas te zhes bya ba'i tha tshig go/ /chos la sems pa legs par rnam nges phyir/ /zhes bya ba ni ting nge 'dzin gyi rjes la mdo'i sde la sogs pa la shin tu nges pa'i phyir te/ the tshom med pa'i phyir ro//don gyi rnam pa brjod pa'i rgyus 'byung rtogs/ /zhes bya ba ni don rnams kyi rgyu ni yid kyi brjod pa yin par shes pa ste/ ji skad du chos rnams brjod pa'i bag chags las byung ste zhes bya ba la sogs pa gsungs pa lta bu'o/ /rtog pa de yis bsgos pa yis/ /rtog pa yid byed de'i gnas ni/ /zhes kyang bshad de/tshigs su bcad pa 'dis ni tshogs kyi lam bstan to/ /de 'dra ba'i sems tsam nyid la gnas zhes bya ba ni don gyi rnam pa la ste/ 'di ltar de 'di snyam du sems 'di nyid don gyi rnam par yongs su gyur to snyam du sems so/ /de bas gnyis kyi mtshan nyid bral ba yi//chos kyi dbyings ni mngon sum nyid du 'gyur/ /zhes bya ba ni don med par rtogs pa sngon du 'gro ba'i sems tsam la gnas nas bzung ba dang 'dzin pa'i mtshan nyid gnyis dang bral ba gnyis su med pa'i chos kyi dbyings mngon sum du 'gyur te/ nges par skyes pa'i phyir ro/ /tshigs su bcad pa 'dis ni sbyor ba'i lam bstan to//ji ltar mngon sum du 'gyur ba de ltar ston te/ sems las gzhan med par ni blos rtogs nas/ /de phyir sems kyang med pa nyid du rtogs/ /zhes bya ba ni sems las gzhan pa dmigs par bya ba'i don med de/ de med pas dmigs par byed pa yang mi 'thad de zhes bya bar sbyar ro//blo dang ldan pa zhes bya ba ni shes rab kyi khyad par dang ldan pa'i phyir ro/ /gnyis po med rtogs nas zhes bya ba ni nges par gyur pa'o/ /de dang mi ldan chos kyi dbyings la gnas/ /zhes bya ba ni gzung ba dang 'dzin pa dang bral ba la zhes bya ba'i tha tshig go/ /gnas zhes bya ba ni gnas par byed pa'o//tshigs su bcad pa 'dis ni mthong ba'i lam bstan to/ /rtogs med shes stobs zhes bya ba ni rnam par mi rtog pa'i ye shes kyi mthus so/ /mnyam pa'i rjes song ba zhes bya ba ni ji ltar gzung ba med pa de ltar 'dzin pa yang med do zhes mnyam pa nyid kyi rjes su song nas mdo'i sde la sogs pa'i chos rnams nam mkha' ltar mnyam pa nyid du mthong ba'i phyir ro//kun nas zhes bya ba ni phyi dang nang nas so/ /rtag par yang zhes bya ba ni dus thams cad du'o/ /de'i gnas thibs po nyes pa bsags pa zhes bya ba ni kun nas nyon mongs pa'i chos de dag gi rgyu'o//thibs po ni shes par dka' zhing rtogs par dka' ba ste/ kun nas nyon mongs pa'i chos kyi bag chags kyi mdzod kun gzhi'o/ /rtsi sman chen pos dug ni sel ba bzhin/ /zhes bya ba ni go sla bsam bshad do/ /tshigs su bcad pa 'dis ni bsgom pa'i lam bstan to/ / thub pas gsungs pa'i legs chos legs gzhag pa/ /zhes bya ba ni thub pas gsungs pa'i chos bzang po mdzes par rnam par gzhag pa'o/ /rtsa ba chos kyi dbyings zhes bya ba ni tshig bsdus pa la dmigs pa'o/ /rtsa ba zhes bya ba ni sa bcu pa ste/ mdo sde thams cad kyi ma mo yin pa'i phyir ro/ / de'i chos rnams ni chos gang dag la de 'jug pa'o/ /chos de dag gi dbyings ni stong pa nyid de/ de la rjes la thob pa'i ye shes kyis dran pa gzhag ste'o/ /dran pa'i rgyud ni rtog pa tsam shes nas/ /zhes bya ba ni dran pa'i rgyud ni rtsa ba'i chos kyi dbyings la 'jug pa'o/ /de rtog pa tsam du shes pa ni dran par bya ba'i tshe chos med par zhes bya ba'i tha tshig ste/mdo'i sde la sogs pa'i chos dran pas pha rol tu phyin pa la sogs pa 'bras bu dang bcas pa dran par bya ba rnams kun brtags pa'i bdag nyid du med pa'i phyir ro/ /mngon par rtogs pa'i go rims 'dis rnam par mi rtog pa dang rjes su thob pa gnyis kyis/yon tan rgya mtsho'i pha rol brtan myur 'gro/ /zhes bya ba ste/ yon tan phun tshogs thams cad kyi gnas sangs rgyas nyid kyis 'thob ste/ ji skad du/ mngon par byang chub dus na yon tan mtha' yas de dag cig car du/ /bya rnams gnas 'cha' slad du shing ltar khyod kyis ji zhig ltar brnyes gyur//ces bshad pa lta bu'o/ /brtan pa zhes bya ba ni rnam par mi rtog pa dang de'i rjes la thob pa'i de gnyi ga 'dzin pa'o/ /de su zhe na byang chub sems dpa' zhes sbyar bar bya'o/ /myur du zhes bya ba ni skyen par ro/ /bskal pa chen po grangs med pa gsum gyi dus chen po zhes brjod na de myur du zhes ji skad du bya zhe na/rtog pa tsam du zad pa'i phyir de lta ma yin te/ dus gsum brtag pa las ji skad du/ /rmi lam na ni lo gcig kun/ /yud tsam gyis kyang dmigs pa ste/ /des na dpag med dus dag kyang //skad cig nyid du 'du bar 'gyur/ /ces bshad pa lta bu'o/ /brtson 'grus sbyangs pa'i yang phyir te/ /ji skad du/ legs phyir dus thung ba yang brtson 'grus lhod pa rnams la ring du snang / /rab tu brtson pa khyod la dpag tu med pa'i dus kyang thung ngur 'das/ /zhes bya ba la sogs pa smras pa lta bu'o// //bam po lnga pa/ rnam par rig pa tsam nyid la 'jug pa'i rgyu ni pha rol tu phyin pa drug go sbyor ba'i dus na 'jig rten pa ste/ de dag ston to/ /'di la byang chub sems dpa' longs spyod rnams la kun du ma chags pa zhes bya ba ni sbyin pa'i pha rol tu phyin pa'o//kun du chags pa ni gtong ba'i mi mthun pa'i phyogs chags pa ste/ de nyid rnam par g.yeng ba'o/ /'og ma la yang de bzhin du brjod par bya'o/ /tshul khrims rnams la ltung ba med pa zhes bya ba ni tshul khrims kyi pha rol tu phyin pa'o/ /ltung ba ni rnam par g.yeng ba'o//sdug bsngal rnams la 'khrug pa med pa zhes bya ba ni bzod pa'i pha rol tu phyin pa'o/ /'khrul pa ni rnam par g.yeng ba'o/ /bsgom pa la le lo med pa zhes bya ba ni brtson 'grus kyi pha rol tu phyin pa'o/ /le lo ni rnam par g.yeng ba'o/ /rnam par g.yeng ba'i rgyu 'di dag la mi 'jug pa zhes bya ba ni mi mthun pa'i phyogs rnam par g.yeng ba'i rgyu dag la mi 'jug pa ste/yongs su spangs pa'i phyir ro/ /sems rtse gcig tu byas nas zhes bya ba ni sems mnyam par gzhag nas te/ bsam gtan gyi pha rol tu phyin pa'o/ /tshul bzhin du chos rnams la rab tu rnam par 'byed ces bya ba ni shes rab kyi pha rol tu phyin pa ste/pha rol tu phyin pa drug po 'di dag gis rnam par rig pa tsam nyid la 'jug go/ /zhugs pas ni lhag pa'i bsam pa dag pas yongs su zin pa'i pha rol tu phyin pa drug po 'bras bur gyur pa dag 'thob ste/'di ltar 'di'i pha rol tu phyin pa drug la kun du spyod pa'i sbyor ba med kyang rtag par rgyun du rgyun mi 'chad pa'i tshul du pha rol tu phyin pa drug bsgom pa yongs su rdzogs par 'gyur ro zhes bya ba gal te byang chub sems dpa' 'di tshul khrims kyi pha rol tu phyin pa la mi sbyor na tshul khrims 'chal bar mi 'gyur ram zhe na/ma yin te/ rab tsam du mi sbyor ba'i phyir ro/ /tshul khrims la mi sbyor na ni skyon 'di 'byung na/ rab tsam du mi sbyor ba'i phyir nyes pa ma yin te/ 'di ltar bstan pa la mos pa la sogs pas sbyor bas de'i phyir nyes pa med do/ /de la bstan pa la mos pa ni gang pha rol tu phyin pa dang rab tu ldan pa'i bstan pa zab mo rnams la yang dad pa'o//ro myang ba yid la byed pa ni pha rol tu phyin pa rnams la yon tan tu lta ba'o/ /rjes su yi rang ba yid la byed pa ni gzhan la gnas pa'am/ bdag la gnas pa'i pha rol tu phyin pa rnams la gzhan nam bdag gi phyir rab tu dga' ba'o//mngon par dga' ba yid la byed pa ni rtag tu khyad par du 'phags par gyur cig ces de dang mi 'bral bar smon pa'o/ /lhag pa'i bsam pa dag pa ni tshogs dang bzod pa dang / dmigs pa dang yid la byed pa dang / gnyen po dang ngo bo nyid dang /rtags dang phan yon gyis brjod par bya'o/ /de la mos pas spyod pa'i sa la ni tshogs legs par bsags pa'i phyir te/ dkar po'i chos rnams kun rdzogs dang / /zhes bya ba ni tshogs kyis so/ /bzod rnon thob ces bya ba ni chung ngu dang / 'bring po bsal nas chos la nges par rtog pa'i bzod pa chen po la 'jug pa ste/bzod pas so/ /rang gi theg ces bya ba la sogs pa ni dmigs pa ste/ zab pa ni phra ba'i don nyid de chos la bdag med pa nyid do/ /rgya che ba ni mthu dang ldan pa ste/ nam mkha' mdzod la sogs pa'i ting nge 'dzin to/ /rtog pa tsam du rtogs pa'i phyir//zhes bya ba ni yid la byed pas te/ chos thams cad rtogs pa tsam du shes pa'i phyir ro/ /mi rtog ye shes thob pa'i phyir/ /zhes bya ba ni gnyen pos so/ /'dod pa dang ni mos pa dag /ces bya ba ni ngo bo nyid kyis te/ dad pa dang 'dun pa'i ngo bo nyid yin pa'i phyir ro/ /snga logs su yang chos rgyun der//sangs rgyas rnams ni mthong bas na/ /zhes bya ba ni rtags kyis so/ /gang gi snga logs su zhe na/ dag pa'i snga rol du'o/ /chos rgyun ces bya ba ni ting nge 'dzin nyid du bstan to/ /der zhes bya ba ni ting nge 'dzin la ste/ mnyam par gzhag pas sangs rgyas mthong ngo //de mthong ba'i phyir byang chub dang nye bar rtogs so/ /nye bar rtogs kyang tshegs chen pos 'thob pa'am snyam pa bzlog pa'i phyir/ tshegs med par ni thob phyir ro/ /zhes bya ba smos te/ 'di ni phan yon no/ /de'i gnas skabs ni de thob par bya ba'i thabs rnyed pas byang chub dang nye bar yang mthong la/tshogs goms par byas pas yongs su smin pa'i shugs kyi mthus tshegs med par yang 'thob po/ /de bas na tshigs su bcad pa gsum po 'di dag gis lhag pa'i bsam pa dag pa rnam pa brgyad bshad do/ /de dag grangs dang de yi mtshan nyid dang //go rims nges tshig goms bya yon tan dang / /zhes bya ba la sogs pa ni 'og nas 'byung ba'i don gleng slong ba'i tshigs su bcad pa'o/ /grangs rnam par gzhag pa'i dbang du byas nas/ mi mthun pa'i phyogs dang gnyen po rnam par gzhag pa zhes bya ba la sogs pa smos so//rgyu gsum gyis pha rol tu phyin pa rnam pa drug nyid de mi nyung mi mang ngo / /mi mthun pa'i phyogs dang gnyen po rnam par gzhag pa rnams kyis rnam par 'grel pa ni/ mi 'phags pa'i rgyu'i gnyen por sbyin pa'i pha rol tu phyin pa dang / tshul khrims kyi pha rol tu phyin pa ste//zhes bya ba nas spags nas mi ldog pa'i chud za ba'i rgyu'i gnyen por bsam gtan gyi pha rol tu phyin pa dang / shes rab kyi pha rol tu phyin pa ste zhes bya ba'i bar du'o/ /chud za ba'i rgyu ni rnam par g.yeng ba dang / 'chal pa'i shes rab bo zhes bya ba la smad pa'i shes rab can rnams kyis phyin ci log tu bzung ba ni chud za ba ste/mu stegs can bzhin no/ /lhag ma ni go bar sla ste bshad pa nyid kyis legs par rnam par phye zin to/ /sangs rgyas kyi chos thams cad yang dag par 'grub pa'i gzhi'i gnas kyis zhes bya ba ni grangs rnam par gzhag pa'i rgyu gnyis pa ste/sangs rgyas kyi chos thams cad kyi rgyu yin pa'i phyir pha rol tu phyin pa drug nyid de mi nyung mi mang ngo / /ji lta zhe na/ rnam par mi g.yeng ba'i rgyu sbyin pa la sogs pa bzhis pha rol tu phyin pa rnam par mi g.yeng ba gcig 'grub bo zhes bya ba ni mi mthun pa'i phyogs rnam par g.yeng ba med pa'i phyir ro//rnam par mi g.yeng ba zhes bya ba ni bsam gtan gyi pha rol tu phyin pa'o/ /rnam par mi g.yeng ba de la brten nas zhes bya ba ni bsam gtan gyi pha rol tu phyin pa de nyid la brten nas so/ /chos kyi de kho na ji lta ba bzhin du mngon du yang dag par rtogs pa'i phyir zhes bya ba ni de bzhin nyid la dmigs pa'i shes rab kyi pha rol tu phyin pas sangs rgyas kyi chos stobs la sogs pa yang dag par 'grub ste/'grub par 'gyur ro/ /sems can thams cad yongs su smin par bya ba dang mthun pas zhes bya ba ni grangs rnam par gzhag pa'i rgyu gsum pa'o//sbyin pa'i pha rol tu phyin pas sems can la phan 'dogs pa ni bde ba skyed pa'o/ /tshul khrims kyi pha rol tu phyin pas sems can la gnod pa mi byed pa ni sdug bsngal mi skyed pa'o/ /bzod pa'i pha rol tu phyin pas gnod pa la ji mi snyam pa ni mi mjed pa ste/ mi mjed na gnod pa mi byed pa'i phyir gzhan la phan 'dogs so//brtson 'grus kyi pha rol tu phyin pas bya ba byed par 'gyur ba'i phyir zhes bya ba ni de dag la phan 'dogs pa'i phyir dang / gnod pa mi byed pa'i phyir ro/ /sems mnyam par ma bzhag pa mnyam par gzhag pa'i phyir zhes bya ba ni bsam gtan gyi pha rol tu phyin pas so//sems mnyam par bzhag pa rnam par thar par bya ba'i phyir zhes bya ba ni shes rab kyi pha rol tu phyin pas so/ /gdams par bya ba rnams zhes bya ba ni gdams ngag gi yul du gyur pa rnams so/ /yongs su smin par 'gyur zhes bya ba ni yongs su smin par bya ba'i yul du 'gyur ba'o//mtshan nyid kyi skabs kyis/ dam pa drug gis blta bar bya ste/ gnas dam pa ni zhes bya ba la sogs pa smos te/ re re la yang dam pa drug ste/ phal cher ni bshad pa nyid kyis rnam par bkrol bas go bar bla'o/ /des na chung zad tsam zhig rnam par dgrol lo//mtha' dag kun du spyod pa'i phyir/ /zhes bya ba ni phyi dang nang gi dngos po rnam pa thams cad yongs su gtong ba'i phyir ro/ /rnam par mi rtog pa'i ye shes kyis yongs su zin pa'i phyir ro zhes bya ba ni sbyin par bya ba dang / sbyin par byed pa dang / len pa la rnam par rtog par mi byed pas 'khor gsum yongs su dag pa'o//lhag ma ni go sla bas ma bshad do/ /sbyin pa yin la pha rol tu phyin pa ma yin pa'ang yod ces bya ba ni dam pa drug dang bral ba'o/ /pha rol tu phyin pa yin la sbyin pa ma yin pa yang yod ces bya ba ni dam pa drug dang ldan pa'i tshul khrims la sogs pa'o//sbyin pa yang yin la pha rol tu phyin pa yang yin pa'ang yod ces bya ba ni dam pa drug dang ldan pa'i sbyin pa la sogs pa'o/ /sbyin pa yang ma yin la pha rol tu phyin pa yang ma yin pa yang yod ces bya ba ni dam pa drug dang bral ba'i tshul khrims la sogs pa'o//ji ltar sbyin pa la mu bzhi yod pa de bzhin du pha rol tu phyin pa gzhan lnga po dag la yang ci rigs su sbyar bar bya'o/ /de nyid kyi phyir/ bse ru lta bu rnams la ni/ /pha rol phyin drug ming yang med/ /bcom ldan nyag gcig pha rol phyin/ /drug gi spyi la bzhugs pa lags//zhes gsungs so/ /de'i phyi ma 'byung ba dang mthun pa'i phyir ro/ /zhes bya ba ni longs spyod rnams la ma chags na tshul khrims srung nus so/ /tshul khrims dang ldan na bzod do/ /bzod na mi mthun pa la mi mjed pas brtson 'grus rtsom mo/ /brtson 'grus brtsams na sems mnyam par 'jog go//sems mnyam par gzhag na yang dag pa ji lta ba bzhin du rab tu shes te/ go rims kyi dgos pa'o/ /'jig rten pa dang / nyan thos dang / rang sangs rgyas kyi sbyin pa la sogs pa'i dge ba'i rtsa ba thams cad las phul du byung bar pha rol du 'gro ba'i phyir zhes bya ba ni 'di dag gi spyi'i nges pa'i tshig ste/'dir phul gyi tshig gi don ni pha rol la bya'o/ /ser sna dang dbul ba 'joms pa zhes bya ba la sogs pa ni so so'i bye brag gi nges pa'i tshig go/ /de la ser sna dang dbul ba 'joms zhes bya ba ni rgyu'i dus na'o/ /longs spyod chen po dang bsod nams kyi tshogs thob par byed pa zhes bya ba ni 'bras bu'i dus na'o//'chal ba'i tshul khrims dang / ngan 'gro zhi bar byed pa zhes bya ba ni rgyu'i dus na'o/ /bde 'gro dang ting nge 'dzin 'thob par byed pa zhes bya ba ni 'bras bu'i dus na'o/ /khro ba ni zhe sdang mngon du gyur ba ste/ 'phral du gnod pa byed pa'i gzhi'o/ /'khon pa ni mdud par 'dzin pa ste/zhe sdang mi 'dor ba'o/ /de gnyi ga zad par byed pa ni rgyu'i dus na'o/ /bdag dang gzhan la bde bar byed pa ni 'bras bu'i dus na'o/ /nges pa'i tshig 'og ma rnams la yang de bzhin du blta bar bya ste/ bshad pa nyid kyis legs par rnam par phye zin to/ / bsgom pa ni goms par bya ba ste lhur len pa'o/ /kun du spyod pa la sogs pa'i bye brag gis rnam pa lngar dbye'o/ /kun du spyod pa la sbyor ba bsgom pa zhes bya ba ni sbyin pa la sogs pa la legs par 'jug pa ste/ dad sogs sbyin phod khyad par 'phags/ /zhes bya ba dang / bsti stang byas nas dus su lag dar te//sbyin zhes ji skad bshad pa lta bu'o/ /yang ji skad du/ nus pa chung yang gzhan phan sbyor/ /rnam pa kun du gtang mi bya/ /gnas skabs kun du nus mthun par/ /sems can rnams la phan gdags so/ /zhes bshad pa lta bu'o/ /mos pa bsgom pa ni dad pa dang 'dod pa gnyis kyis sbyin pa la sogs pa la mngon par yid ches pa dang /sbyin pa 'dod pa la sogs pa skyed pa'i phyir te/ ji skad du/ gzhan phan las la mthu med kyang / /de yi bsam pa rtag tu bya/ /gang la bsam pa de yod pa/ /de ni de la don gyis zhugs/ /zhes bshad pa lta bu'o/ / yid la byed pa bsgom pa ni ro myang ba dang / rjes su yi rang ba dang / mngon par dga' ba yid la byed pas bsdus pa ste snga ma bzhin no/ /thabs la mkhas pa bsgom pa ni rnam par mi rtog pa'i ye shes kyis yongs su zin pa'i phyir te snga ma bzhin no/ /bya ba sgrub pa bsgom pa ni de bzhin gshegs pa pha rol tu phyin pa drug yongs su rdzogs pa'i chos dang ldan pa rnams sngon gyi 'phen pas bsgrim mi dgos par skal ba ji lta ba bzhin du sbyin pa la sogs pas gzhan gyi don nan tan du mdzad pa'o//bsgom pa ni de nyid bsgom pa'am/ de'i phyir bsgom pa'o/ /ni zhes bya ba'i sgra ni yid la byed pa bsgom pa las khyad par du bstan to//bsam pa drug gis yongs su zin pas bsgom pa zhes bya ba ni mi ngoms pa'i bsam pa la sogs pa ste/ bshad pa nyid kyis shin tu legs par rnam par phye zin mod kyi/ 'ga' zhig cung zad bshad par bya'o/ / mi ngoms pa ni chog par mi 'dzin pa'o/ /de rnyed kyi dus skad cig ma gcig tu byas pa'i skad cig re re la zhes bya ba ni gal te de grangs med pa gsum gyi tshad kyi dus skad cig gcig tu gyur la/ de 'dra ba'i skad cig gi dus ji srid kyis byang chub ba de snyed kyi dus su skad cig re re la zhes bya ba la sogs pa'i don ni brda phrad par zad do//mes yongs su gang ba zhes bya ba ni gnas dang mi ldan pa'o/ /yo byad thams cad dang mi ldan yang zhes bya ba ni phyir bcos su med pa ste/ yo byad dang bcas pa ni sdug bsngal la phyir bcos par rtsom pa'o/ /spyod lam bzhi smos pas ni shin tu rgya che ba nyid du ston te/gnas dang yo byad dang mi ldan pa yang spyod lam bzhi po dag gis tshul khrims la sogs pa pha rol tu phyin pa rnams mngon du byed pa'i phyir ro/ /rgyun ring po nyid ni dus ring por rgyun mi gcod pa'i phyir ro/ /phan 'dogs pa'i bsam pas slong ba ni byang chub sems dpa'i dge ba'i bshes gnyen no zhes bya ba la sogs pa'o//'dod pa'i 'bras bu rnam par smin pa zhes bya ba ni 'dod pa'i 'bras bu rnam par smin par bya ba'i phyir ro/ /che ba'i bdag nyid kyi bsam pa ni che ba'i bdag nyid dang ldan pa'i bsam pa'o/ /su zhig bdag 'byor bar bya ba'i phyir yongs su bsngo ba de'i bsam pa ni bdag 'tsho ba'i phyir chung ba'o//su zhig sems can thams cad kyi don du yongs su bsngo ba'i bsam pa de'i che ba nyid ni gzhan la phan 'dogs pa'i skabs yin pa'i phyir ro/ /dge ba ni kha na ma tho ba med pa dang / dag pa dang / bkra shis pa dang don gcig go/ /su zhig srid pa dang longs spyod phun sum tshogs par bya ba'i phyir sbyin pa la sogs pa yongs su bsngo ba de'i bsam pa ni sdug bsngal don du gnyer ba'i phyir kha na ma tho ba dang bcas pa'o/ /su zhig sems can thams cad sangs rgyas nyid thob par bya ba'i phyir yongs su bsngo ba de'i bsam pa ni kha na ma tho ba med pa'i phyir dge ba'o//bsam pa drug po 'di dag gis yongs su zin pa'i ro myang ba yid la byed pa sgom mo zhes bya ba'i don ni brda phrad par zad do/ /rjes su yi rang ba dang mngon par dga' ba yid la byed pa'i rnam par 'grel pa ni bshad pa nyid kyis legs par rnam par phye zin to//bshig par 'gyur zhes bya ba ni 'bras bu med par byed ces bya ba'i tha tshig ste/ ngan 'gro'i gnyen po yin pa'i phyir ro/ /re re la yang gsum gsum du dbye bas rab tu dbye ba ston to/ /chos sbyin yang dag ji bzhin du/ /mdo sogs nyon mongs can min ston//zang zing gi sbyin pa ni 'tsho ba'i yo byad yongs su gtong ba'o/ /mi 'jigs pa'i sbyin pa ni gsod pa la sogs pa bzlog pa'i phyir te/ mi 'jigs pa'i sbyin bas mgron du gnyer ba'i phyir ro/ /chos kyi sbyin pa ni dge ba'i rtsa ba rton pa'i phyir ro/ /zang zing gi sbyin pa ni lus rton pa'i phyir ro//mi 'jigs pa'i sbyin pa ni sems rton pa'i phyir ro/ /sdom pa'i tshul khrims ni mi dge ba rnams las sdom pa yang dag par blangs pa ste/ 'dis lus dang / ngag sdig pa'i las rnams las sdom pas na sdom pa'o/ /de nyid tshul khrims te/ tshul khrims 'og ma gnyis kyi rten to//sdom pa'i bdag nyid can gyis sangs rgyas la mchod pa la sogs pa/ dge ba'i chos sdud pa'i tshul khrims ni stobs la sogs pa sangs rgyas kyi chos thams cad thob par 'gyur ba'o/ /sems can gyi don bya ba'i tshul khrims ni sems can yongs su smin par bya ba'i phyir chos dang mthun pa'i grogs byed pa dang //kha na ma tho ba med pa yang dag par 'ged pa la sogs pa'o/ /de la gnod pa byed pa la ji mi snyam pa'i bzod pa ni sems can yongs su smin par bya ba las mi ldog pa'i rgyu'o/ /gnyis pa ni sangs rgyas nyid las mi ldog pa'i rgyu ste/grang ba dang / tsha ba dang / bkres pa dang / skom pa la sogs pa'i sdug bsngal rnams kyis mi zlogs pa'i phyir ro/ /gsum pa ni bzod pa snga ma gnyis kyi rten te/ zab pa dang rgya che ba'i chos la bzod pa'i phyir ro/ /go cha'i brtson 'grus ni 'di lta bu dang 'di lta bu bya'o zhes thog mar brtson pa ste/mthu dang ldan bar gnas zhes bya ba'i mdo'i tshig 'dis bstan to/ /sbyor ba'i brtson 'grus ni bsam pa ji lta ba bzhin du sbyor ba'i dus na brtson pa ste/ brtson 'grus dang ldan pa zhes bya ba mdo'i tshig 'dis bstan to/ /mi zhum zhing mi 'khrugs la chog par mi 'dzin pa'i brtson 'grus ni bsam pa dang mthun pa'i spyod pa de byang chub kyi snying po la 'dug gi bar du yongs su mi gtong ba'o//bdag nyid skyo bas spro ba nyams par mi byed pa ni mi zhum pa'o/ /gzhan gyi gnod pa rnams kyis mi zlogs pa ni mi 'khrugs pa'o/ /byang chub la thug gi bar du bar ma dor yongs su mi gtong ba ni chog par mi 'dzin pa ste/dge ba'i chos rnams la spro ba dang / rtul ba dang / brtson pa mi 'dor ba zhes bya ba'i lung gis ni go rims bzhin du mi zhum pa la sogs pa'i 'grel ba'o/ /gnas pa'i bsam gtan ni mthong ba'i chos la bde bar gnas par bya ba'i phyir te/nga rgyal dang / lta ba dang sred pa la sogs pa spangs pas dag pa can yin pa'i phyir ro/ /gnyis pa ni mngon par shes pa la sogs pa yon tan mngon par sgrub pa'i phyir ro/ /gsum pa ni sems can gyi don bya ba bsgrub pa'i phyir te/ bsam gtan byas na mu ge dang nad kyi 'jigs pa la sogs pa zhi bar 'gyur ba'i phyir ro//rnam par mi rtog par bya ba'i phyir sbyor ba ni rnam par mi rtog par sbyor ba ste/ de'i tshogs yin pa'i phyir ro/ /rnam par mi rtog pa ni dngos gzhi'o/ /de'i rjes la thob pa ni mngon par rtogs pa'i mthu las byung ba ste/ kun rdzob shes pa'i bdag nyid can chos ston pa kun nas slong ba'o/ /'di dag bsdus par ji ltar blta zhe na zhes brjod pa/ 'di dag gis dge ba'i chos thams cad bsdus pa'i phyir ro zhes bstan pa ni mi rigs te/ bstan pa bzhin ma byas pa'i phyir ro/ /'di ni nyes pa ma yin te/gal te 'di dag gis dge ba'i chos thams cad bsdus na don du dge ba'i chos thams cad kyis kyang 'di dag bsdus par bstan pa yin no/ /dge ba'i chos thams cad ni gsum ste/ sbyin pa la sogs pa dang / dad pa la sogs pa dang / dran pa nye bar gzhag pa la sogs pa nas stobs la thug pa rnams so//de la de'i mtshan nyid kyis bsdus pa ni sbyin pa la sogs pa nyid do/ /sbyin pa la sogs pas dad pa la sogs pa dge ba'i sa mang po pa sbyin pa la sogs pa dge ba'i sems 'byung ba rnams ni de dang mthun pas bsdus te/ dad pa la sogs pa dang ldan na phyin pa la sogs pa la 'jug pa'i phyir ro//byang chub kyi phyogs rnams dang / nyon mongs pa med pa la sogs pa dang / stobs la sogs pa ni de'i 'bras bur bsdus pa ste/ pha rol tu phyin pa'i 'bras bu yin pa'i phyir ro/ /ji skad du/ sa dang pha rol phyin pa ni/ /sangs rgyas chos kyi gnas yin no//gnas gyur pa ni 'bras bu ste/ /chos kyi sku zhes brjod pa yin/ /zhes bshad pa lta bu'o/ /'di dag gi mi mthun pa'i phyogs ser sna dang / 'chal ba'i tshul khrims dang khro ba dang / le lo dang / rnam par g.yeng ba dang / 'chal ba'i shes rab rnams kyis/ kun nas nyon mongs pa thams cad ji ltar bsdus par blta zhe na/de'i mtshan nyid kyis zhes bya ba ni ser sna la sogs pa nyid de/ gzhan gyi dngos po dang bral ba'i phyir ngo bo nyid kyis bsdus pa'o/ /de'i gzhi zhes bya ba ni ma dad pa la sogs pa nas log par lta ba la thug pa rnams te/ ser sna la sogs pa'i rgyu yin pa'i phyir ro//de'i 'bras bus zhes bya ba ni g.yo la sogs pa ste/ ser sna la sogs pa'i 'bras bu yin pa'i phyir ro/ /pha rol tu phyin pa rnams kyi phan yon gyi dbang du byas nas/ dbang phyug bsdus pa zhes bya ba smos pa ni sbyin pa'i pha rol tu phyin pa'i phan yon nyon mongs pa can ma yin zhing /kha na ma tho ba med pa ste/ phan yon mngon par mtho ba kha na ma tho ba med pa zhes bya ba ni thams cad dang sbyar bar bya'o/ /chen por skye ba bsdus pa ni tshul khrims kyi pha rol tu phyin pa ste/ bde 'gro yin pa'i phyir ro/ /phyogs dang g.yog 'khor chen po bsdus pa ni bzod pa'i pha rol tu phyin pa ste/phyogs ni nye du'i tshogs so/ /g.yog 'khor ni bran pho dang bran mo la sogs pa'i tshogs so/ /las kyi mtha' chen po la sbyor ba 'grub pas yongs su bzung ba ni brtson 'grus kyi pha rol tu phyin pa ste/ las kyi mtha' chen po'i mtha' ni 'khor los sgyur ba'i rgyal srid la sogs pa'o//de dag la sbyor ba ni rab tu 'bad pa'o/ /de 'grub pa ni mngon par 'grub pa'o/ /des yongs su bzung ba ni thogs pa med pa'i phyir ro/ /gnod pa med pa dang nyon mongs pa chung ba'i sa bon yongs su bzung ba ni bsam gtan gyi pha rol tu phyin pa ste/ bsam gtan gyis de'i mthu 'joms pa'i phyir ro//bzo dang bstan bcos dang rig pa'i gnas thams cad la mkhas pa yongs su bzung ba mngon par mtho ba kha na ma tho ba med pa ni 'jig rten pa'i mngon par mtho ba ltar kha na ma tho ba dang bcas pa ma yin pa'o/ /kha na ma tho ba med pa yin yang dus yongs su chad pa ma yin no//'o na ci zhe na/ byang chub kyi snying po la gnas kyi bar du'o/ /'jig rten pa rnams kyi bdag gi don byed pa lta bu yang ma yin no/ /'o na ci zhe na/ /sems can thams cad kyi don bya bar nye bar gnas pa ste/ pha rol tu phyin pa thams cad re re la yang mngon par mtho ba'i khyad par 'di bzhin du brjod par bya ba'o//la lar ni sbyin pa'i sgrar bstan ces bya ba ni rdo rje gcod pa la sogs pa'i mdo dag las gcig bstan gyi/ thams cad ma bstan pa de ci las dgongs zhes ldem por dgongs pa 'dri ba'o/ /pha rol tu phyin pa thams cad la sbyor ba ni 'di dag thams cad kyi spyod pa 'gro ba las ldem por dgongs pa ste/'di ltar sdom pa dang / bzod pa dang ldan pa dang / spro ba dang ldan pa dang / sems rtse gcig pa dang / las dang 'bras bur 'brel pa rig pa dang ldan pa sbyin pa la 'jig gi/ gzhan du ni ma yin no/ /de bzhin du ser sna dang /khro ba dang / le lo dang / rnam par g.yeng ba dang / log par lta ba spangs pa tshul khrims la 'jug gi/ gzhan du ma yin no/ /de bzhin du pha rol tu phyin pa gzhan dag la yang brjod par bya'o/ /yang smras pa/ sbyin 'dod nyid kyis chags pa sel bar byed/ byams pas zhe sdang gus byin nga rgyal te/ /phrag dog ldan pa slong la bde 'dod pas/ med can byin pa yod par lta bas sel/ /zhe'o/ /yang ji skad du/ chos dang zang zing mi 'jigs tshul du rnam par 'byed pa na/ /pha rol phyin pa drug po dag ni sbyin pa'i bdag nyid yin/ /zhes bshad do/ / shes bya'i mtshan nyid la 'jug pa'i rgyu dang / 'bras bu bstan pa bshad zin to/ /shes bya'i mtshan nyid la 'jug pa'i rgyu dang 'bras bur gyur pa pha rol tu phyin pa 'di dag ci rigs su mthong ba dang / bsgom pas spang bar bya ba'i gti mug spang ba'i phyir bsgom par bya bas na de bsgom pa rab tu dbye ba'i dbang du byed do//sa bcu rnams su zhes bya ba ni byang chub sems dpa' rnams kyi mngon par rtogs pa dang / sdom pa dang / 'dod chags dang bral ba dang / byang chub kyi phyogs bsgom pa dang / bden pa la lta ba dang / rten cing 'brel par 'byung ba la so so rtog pa dang /rtsol ba dang bcas pa dang / lhun gyis grub par mtshan ma med par gnas pa dang / so so yang dag par rig pa dang / dbang bskur ba'i shes bya'i sgrib pa dang / nyon mongs pa 'di dag tu sel bas nas rnams so/ /chos kyi dbyings ni kun du 'gro ba la sogs pa rnam pa bcur yongs su shes par bya'o//rnam pa bcu po de dag gi mi mthun pa'i phyogs ma rig pa rnam pa bcu nyid de/ de spang bar bya ba'i phyir yongs su shes pa rnam pa bcu'o/ /de yongs su shes pas sa bcu dag la 'jug ste/ chos bdag med pa shes pa'i gnas skabs ni sa rnams so/ /sa dang po la ni kun du 'gro ba'i don du shes par bya'o zhes bya ba la sogs pa la/chos thams cad stong pa'i phyir gang mi stong pa'i chos de med do zhes de ltar sa dang po la zhugs pa yin no/ /gnyis pa la ni mchog gi don du ste/ 'di ni chos thams cad kyi mchog yin pas dper na 'dod chags dang bral ba'i mchog ces gsungs pa lta bu ste/de ltar sa gnyis pa la zhugs pa yin no/ /gsum pa la ni rgyu mthun pa don gyi mchog tu ste/ bstan pa'i chos ni 'di'i rgyu mthun pa'i mchog go zhes gsum pa la zhugs pa ste/ 'di ltar legs par gsungs pa gcig gi don du yang bdag nyid yongs su 'dor ro//bzhi pa la ni yongs bzung ba ma yin pa'i don du ste/ 'di ni bdag gam gzhan gang gi yongs su bzung ba yang ma yin no zhes bdag gi med pas bzhi pa la zhugs pa yin te/ mdo'i sde la sogs pa'i chos la sred pa rnam par bzlog pa'i phyir ro/ /lnga pa la ni rgyud tha dad pa med pa'i don du ste/ji ltar gzugs la sogs pa rgyud tha dad pa ltar 'di ni de lta ma yin no zhes lnga pa la zhugs pa yin no/ /drug pa la ni kun nas nyon mongs pa dang rnam par byang ba ma yin pa'i don du ste/ 'di ni rang bzhin gyis kun nas nyon mongs pa can ma yin na rnam par dag par yang lta ga la 'gyur/rnam par byang ba ni kun nas nyon mongs pa sngon du 'gro ba'i phyir ro zhes drug pa la zhugs pa yin no/ /bdun pa la ni chos sna tshogs tha dad pa med pa'i don du ste/ ji ltar mdo'i sde la sogs pa chos 'di dag sna tshogs pa ltar 'di ni de lta ma yin no zhes bdun pa la zhugs pa yin no//brgyad pa la ni bri ba med cing lhag pa med pa'i don zhes bya ba la/ bri ba med pa ni chos thams cad du chud pa'i phyir ro/ /lhag pa med pa ni chos la lhag par gnas pa med pa'i phyir ro/ /yang na kun nas nyon mongs pa 'bri ba na 'bri bar mi 'gyur ba dang /rnam par byang ba 'phel ba na 'phel bar mi 'gyur ba'o/ /mtshan ma la dbang ba'i gnas kyi don dang / zhing la dbang ba'i gnas kyi don du chos kyi dbyings su brgyad pa nyid la rtogs te/ de thob pa ni ji lta bur gang 'dod pa 'thob bo/ /de thob pa ni zhing gser las grub pa'am gzhan ji lta bur mos pa de bzhin du snang ngo //sa gong ma rnams la ni mtshan ma med par gnas pa bsgrims te bsgrubs pa yod do/ /sa brgyad pa ni lhun gyis grub pas 'dod pa tsam la rag las pa'i phyir te/ de ltar sa brgyad pa la zhugs pa yin no/ /dgu pa la ni ye shes la dbang ba'i gnas kyi don du ste/de la brten nas so so yang dag par rig pa thob pa'i phyir ro/ /ye shes kyi tshogs kyi pha rol tu phyin pa yang thob pas chos thams cad la sgra ji bzhin ma yin par dgongs pa'i don shes te/ ji lta ba bzhin du sems can yongs su smin par bya ba dang /chos la rdzogs par longs spyod pa so sor myong ba'i phyir de ltar dgu pa la zhugs pa yin no/ /bcu pa la ni las la dbang ba'i gnas kyi don dang / gzungs dang ting nge 'dzin gyi sgo la dbang ba'i gnas kyi don du ste/ ji ltar 'dod pa bzhin du lus dang / ngag dang yid kyi las thob pa'i phyir ro//mngon par shes pa lnga po dag gis rang rang gi las ji lta ba bzhin du bsgrub pa'i phyir ro/ /gzungs ni gang gi tshig dang don la sogs pa 'dzin pa'o/ /dbang ni de la dbang ba'am des dbang byed pa ste/ sangs rgyas kyis gsungs pa thams cad kyi tshig dang don 'dzin pa'i phyir ro//ting nge 'dzin gyi sgo la dbang ba ni snyoms par 'jug pa thams cad kyi sgrib pa spangs pas ji ltar 'dod pa de bzhin du nam mkha' mdzod la sogs pa'i ting nge 'dzin la snyoms par 'jug par bya ba'i phyir ro/ /chos kyi dbyings ni dbang 'di gnyis kyi gnas kyi don dus bcu pa la rab tu rtogs so//ma rig pa 'di yang nyan thos rnams kyi ni nyon mongs pa can ma yin gyi zhes bya ba ni spang bar bya ba ma yin pa'i phyir ro/ /de mi spong ba ni de'i gnyen po'i sa la 'jug pa'i skabs ma yin pa dang / mya ngan las 'das pa la bgegs mi byed pa'i phyir ro/ /byang chub sems dpa' rnams kyi ni nyon mongs pa can te zhes bya ba ni spang bar bya ba'i phyir ro//spong ba ni de'i gnyen po'i sa la 'jug pa'i skabs yin pa dang / rnam pa thams cad mkhyen pa nyid kyi bgegs byed pa'i phyir ro/ /sa dang po la 'jug pa nyid na chos kyi dbyings ni rnam pa thams cad rab tu thob pa yin na gong nas gong du rnam pa ci'i phyir brjod ce na/chos kyi dbyings thob nas gnas pa'i rnam pa'i dag gis gnas te/ thob pa tsam gyis chog par 'dzin cing gyi na 'jug pa ma yin par ji ltar shes par 'gyur zhes gnas pa'i kun du spyod pa yang dag par bstan pa'i phyir ro/ /sgra 'jug pa'i rgyu mtshan gyi dbang du byas nas/bdag dang gzhan gyi don sgrub nus pa thob pa'i phyir ro zhes bya ba smras te/ ji ltar mngon par rtogs pa'i byang chub sems dpa' gnyi ga'i don sgrub nus pa thob pa'i phyir rab tu dga' ba de ltar nyan thos la sogs pa ni ma yin te/ rang gi don tsam sgrub nus pa thob pa'i phyir ro//de'i phyir de dag gis ni rab tu dga' ba zhes mi bya'o/ /sa dang po mi rigs pas sa gong ma rnams kyang mi rigs te/ de sngon du 'gro ba'i phyir ro/ /dri ma med pa ni 'chal ba'i tshul khrims kyi dri ma thams cad bral bas rang bzhin gyis tshul khrims dang ldan pa'i phyir ro/ /'od ni chos kyi snang ba ste/de byed pa'o/ /ting nge 'dzin dang snyoms par 'jug pa nyams pa med pa'i gnas yin zhes bya ba la/ ting nge 'dzin rnams ni bsam gtan rnams so/ /snyoms par 'jug pa rnams ni gzugs med pa'o/ /yang na ting nge 'dzin sems rtse gcig pa'i mtshan nyid kyi mnyam par 'jog pa ni snyoms par 'jug pa ste/mngon sum du byed pa'o/ /mi nyams pas na nyams pa med pa'o/ /chos kyi snang ba chen po'i gnas ni 'di ltar byang chub sems dpa' sa de la ting nge 'dzin dang snyoms par 'jug pa rnams dang bral ba ma yin te/ de dang ma bral bas na theg pa chen po'i mdo'i sde la sogs pa'i chos rnams la snang ba 'thob bo//de'i gnas yin pa dang rgyu yin pa'i phyir 'od byed pa zhes bya'o/ /de la 'od 'phro ba yod pas na 'od 'phro ba can te/ de ci zhe na/ byang chub kyi phyogs rnams so/ /de dag gi 'od 'phro ba ni sgrib pa thams cad bsregs pa'i phyir ro//sa de la byang chub kyi phyogs rnams kyis mang du gnas pa'i phyir de dag gi nyon mongs pa dang nye ba'i nyon mongs pa thams cad thal par rlog go/ /shin tu sbyang bar bya dka' bas na shin tu sbyang dka' ste/ sa de la kun rdzob dang don dam pa'i bden pa la mkhas pa'i phyir bden pa shes pa rnam par mi rtog pa dang /'jig rten pa'i yi ge dang / lag rtsis dang / bzo dang bstan bcos la sogs pa shes pa rnam par rtog pa dang bcas pa yang dag par sgrub po/ /kun rdzob dang don dam pa'i bden pa la mkhas pa mi mthun pa gnyis kyis bsgrub par dka' ba'i phyir ro//mngon du gyur pa nyid ni shes rab kyi pha rol tu phyin pa la gnas mngon du gyur pa'i phyir ro/ /sa de la rten cing 'brel par 'byung ba la gnas pa yin pas rkyen nyid 'di pa zhes bya ba shes pa'i stobs kyis rnam par mi rtog par shes rab kyi pha rol tu phyin pa la gnas pa mngon du byed do//chos rnams kun nas nyon mongs pa'am/ rnam par dag par bye brag mi 'byed do/ /ring du song ba ni sbyor ba las byung ba'i spyod pa'i mthar 'gro ba'i phyir te/ /gang gis sa de la sbyor ba'i spyod pa yongs su rdzogs par 'gyur ba de rtsol ba dang ldan par 'bad nas chos thams cad kyi mtshan ma la mi g.yo ba yin no//mi g.yo ba nyid ni mtshan ma thams cad dang mngon par 'du byed pa thams cad kyis sa de la g.yos par mi nus pa'i phyir ro/ /sa bdun pa la yang kun du mi spyod pas mtshan ma thams cad kyis mi g.yos par 'dod mod kyi/ mngon par 'du byed pa med cing rang gi ngang gis ma yin la/brgyad pa la ni bsgrim mi dgos par rang gi ngang gis 'jug pas 'di ni khyad par ro/ /de'i blo gros legs pa yin pas/ legs pa'i blo gros te/ so so yang dag par rig pa bzhi thob pa'i phyir ro/ /de ni dang po yang yin la so so yang dag par rig pa'i shes pa yang yin pas/so so yang dag par rig pa'i shes pa dang po'o/ /shes pa ni blo gros zhes bya ba dang don gcig ste/ chos dang don dang nges pa'i tshig dang spobs pa so so yang dag par rig pa'o/ /'di dag thob pas/ chos kyi tshig kun mngon par mkhyen/ /don rnams kun gyi tshul la mkhas//skad kun rnam par 'byed pa mkhyen/ /phyogs rnams kun du spobs dang ldan/ /zhes bya ba yin no/ /dang po ni thog ma ste/ so so yang dag par rig pa'i mtshan nyid shes pa sngon ma thob pa thob pa'i phyir ro/ /chos kyi sprin ni 'dres pa la dmigs pa zhes bya ba la sogs pa ni 'di 'dres pa la dmigs pa yin pas 'dres pa la dmigs pa ste/de ni 'dres pa la dmigs pa yang yin la chos thams cad shes pa yang yin pas 'dres pa la dmigs pa chos thams cad shes pa'o/ /de bzhin nyid las gzhan ma yin pas mdo'i sde la sogs pa chos thams cad bsdus pa la dmigs te/chos thams cad kyi spyi'i mtshan nyid kyi yul shes pa de ni sprin lta bu'o/ /de'i khong na ni sprin la chu ji lta bar ting nge 'dzin dang gzungs kyi sgo chu lta bu dag yod de/ de dag skyed par nus pa'i phyir ro/ /ji ltar sprin gyi nam mkha' la sgrib par byed khabs par byad pa de bzhin du chos thams cad bsdus pa la dmigs pa'i shes pa des kyang nyon mongs pa dang shes bya'i sgrib pa chen po nam mkha' lta bu rgya che zhing mu med pa la sgrib par byed pa sel bar byed de//spong bar byed ces bya ba'i tha tshig go/ /yang ji ltar sprin gyis nam mkha' chus kun du 'gengs pa de bzhin du ye shes des kyang yon tan gyi tshogs kyi gnas chos kyi sku yongs su rdzogs par byed do//thob pa'i dbang du byas nas/ rnam pa bzhis blta ste zhes bya ba smos so/ /mos pa thob pa ni sa'i dbang du bya ba bstan pa'i chos la 'di ni de bzhin no zhes nges par 'dzin pa'i phyir ro/ /spyod pa thob pas zhes bya ba ni sa dang rab tu ldan pa'i bstan pa'i chos spyod pa bcu thob pa'i phyir ro zhes bya ba las bstan pa'i chos spyod pa bcu ni/yi ge 'dri mchod sbyin pa dang / /nyan dang klog dang 'dzin pa dang / /'chad dang kha ton byed pa dang / de sems pa dang sgom pa'o/ /rtogs pa thob pas ni sa dang po la zhes bya ba la sogs pa ni sa dang po yang dag par rtogs pa las thams cad rtogs pa yin te/de dang rigs gcig pa'i phyir te/ ji skad du/ ji ltar smyug tshigs dang po pa/ /bkas pa'i tshul ltar thams cad kyang / /de ltar myur du 'gas par 'gyur/ / de bzhin ye shes gcig nas gcig /ces bshad pa lta bu'o/ /'grub pa thob pas ni bsgom pa'i mthar phyin par 'gro ba'i phyir ro/ /sa dang sa zhes bya ba ni sa re re la ste zlos pa'o/ /zhi gnas ni ting nge 'dzin te/ rnam par g.yeng ba'i gnyen po'o/ /lhag mthong ni phyin ci log gi gnyen po ste shes rab bo//de gnyis sgom pa ni so so la brtson pa ste/ rnam pa lngas ni goms par byed pa'o/ /'dres par bsgom pa zhes bya ba la sogs pa la 'dres pa ni bsdus pa ste/ sa gcig kho na la thams cad mngon par bsdus te goms par byed pa'i phyir ro/ /gzhan yang sgom pa na dmigs pa keng rus la sogs pa la thams cad 'des par byed do snyam pa de bsal ba'i phyir mtshan ma med par sgom pa zhes bya ba smos te/mtshan ma thams cad dang bral ba'i chos kyi dbyings dbyer med pa bsgom pa'i phyir ro/ /mtshan ma med pa sgom pa yang rtsol ba dang bcas shing 'bad pas 'jug par 'gyur ro snyam pa gsal ba'i phyir/lhun gyis grub par sgom pa zhes bya ba smos te bsgrim mi dgos par rang gi ngang gis 'jug pa'i phyir ro/ /lhun gyis grub par sgom pa yang mchog dang mchog ma yin pas rnam pa gnyis su 'gyur ro snyam pa bsal ba'i phyir/ /'bar bar sgom pa zhes bya ba smos te/'bar ba dang mchog ces bya ba ni don gcig go/ /la la 'bar bar bsgom pa thob nas 'dis thams cad byas zin na gzhan gyis ci zhig bya zhes chog par 'dzin par 'gyur ro snyam pa bsal ba'i phyir/ chog par mi 'dzin par sgom pas so zhes bya ba smos te//mtshan ma med pa 'bar bar bsgoms so zhes mi sbyor bar mi bya'i/ /khyad par thob par bya ba'i phyir bsgom pa la brtson par bya'o/ /gnas ngan len gyi gnas thams cad 'jig par byed ces bya ba la gnas ngan len gyi gnas ni kun gzhi rnam par shes pa'o/ /de 'jig par byed pa ni tshogs su mi byed pa ste/tshogs 'jig pa'i phyir dper na sman bcud kyis len gyis nad kyi tshogs bzlog pa bzhin no/ /sna tshogs kyi 'du shes dang bral te chos kyi kun dga' la dga' ba thob pa zhes bya ba ni bdag dang chos dang sangs rgyas la sogs pa'i 'du shes kyi mtshan ma dang bral ba'i phyir ro//'dir kun nas dga' bas na kun dga' ste/ chos nyid kun dga' yin pas chos kyi kun dga'o/ /chos ni 'dir chos kyi dbyings so/ /der dga' ba ni tshim pa ste/ dper na yul can nam thub pa 'ga' zhig phyi rol gyi kun dga' ra ba'am/ skyed mos tshal lam nags su dga' ba bzhin no//thams cad du tshad med ces bya ba ni/ phyogs bcur 'di tsam zhes yongs su ma chad pa dang / rnam pa tshad med pa'i phyir rnam pa yongs su ma chad pa'i chos kyi snang ba yang dag par rnam par shes te/ gzhung goms pa la lta ba bzhin no//rnam par dag pa'i cha dang mthun pa'i mtshan ma rnam par btags pa ma yin pa rnams de la kun du 'byung zhes bya ba la rnam par dag pa'i cha dang mthun pa ni sangs rgyas nyid du 'gyur ba'i cha la phan pa ste/ rnam par dag pa ma skyes su zin kyang sangs rgyas dang / 'khor los sgyur ba dang /gdugs dkar po la sogs pa'i mtshan ma rnam par gtags pa ma yin pa rnams kun du 'byung ngo / /chos kyi sku yongs su rdzogs par bya ba ni sa bcu pa la'o/ /de nyid grub pa ni sa bcu gcig pa sangs rgyas kyi sa la'o/ /gong ma bas ches gong ma ni gong nas gong du ste/ sangs rgyas kyi sa'i rgyu mdzes pa nyid de/ rgyu shin tu bsags pa'i phyir ro/ /de ltar bsgom pa rnam pa lnga'i 'bras bu rnam pa 'di lnga go rims bzhin du brjod nas gtsor nas bcu dag tu pha rol tu phyin pa bcu bsgom par 'gyur te zhes bya ba la sogs pa ni bsgom pa rnam par dbye ba'i nges pa nyid brjod do//sa so so la yang pha rol tu phyin pa bcu char sgom par mi 'gyur ram/ sa 'di la pha rol tu phyin pa 'di sgom par 'gyur ro zhes nges par bya ba ni mi rigs so zhe na/ /gtsor na zhes bya ba smos pas nyes pa med de/ gang la gtsor gang sgom par 'gyur ba de de la ston gyi/der gzhan yang sgom par 'gyur ba dgag pa ni med de/ mdo las ji skad du/ sa rab tu dga' ba de la sbyin pa'i pha rol tu phyin pa lhag par che ba yin te/ lhag ma rnams kyang yang dag par mi sgrub pa ni ma yin no zhes bya ba la sogs pa gsungs pa yin no/ / drug tu ni drug ces bya ba ni rab tu dga' ba la sogs pa la sbyin pa la sogs pa'o/ /phyi ma bzhir ni bzhi ste zhes bya ba ni ring du song ba la sogs pa la thabs la sogs pa'o/ /thabs la mkhas pa'i pha rol tu phyin pa zhes bya ba la sogs pa la/ 'dir thabs la mkhas pa gang zhe na/ gang 'khor ba yang yongs su mi gtong la mya ngan las 'das pa yang don du gnyer ba de thabs la mkhas pa ste/ dge ba'i rtsa ba 'dis sems can thams cad kyi don bya'o snyam nas sems can thams cad dang thun mong du byed des sems can rnams yongs su mi gtong bas 'khor ba yongs su mi gtong ngo //gang yang byang chub mngon par rdzogs par 'tshang rgya bar bya'o/ /snyam nas yang dag par rdzogs pa'i byang chub tu yongs su sngo bar byed pa 'di ni mya ngan las 'das pa don du gnyer ba'o/ /smon lam gyi pha rol tu phyin pa ni phyi ma la zhes bya ba 'di ni pha rol tu phyin pa'i rkyen sdud ces bya ba dang sbyar ro//smon lam sna tshogs mngon par sgrub pa ni smon pa'i don mngon par 'du byed pa'i phyir te/ sangs rgyas su grub shig /sems can thams cad kyi don byed par shog shig ces bya ba la sogs pas de mngon par sgrub pa'i phyir gang la pha rol tu phyin pa rnams kyi rkyen yod pa der skye'o//stobs kyi pha rol tu phyin pa ni so sor rtog pa dang / bsgom pa'i stobs kyis zhes bya ba la sogs pa la/ so sor rtog pa'i stobs ni bsgom pa'i stobs med pa'i dus na'o/ /yod pa'i dus na ni gnyi ga yang yod de/ stobs cig shos kyang de na yod pa'i phyir ro//ye shes kyi pha rol tu phyin pa ni pha rol tu phyin pa drug po dag rnam par 'jog pa gang yin pa ste/ grangs dang de'i mtshan nyid la sogs pa'i rnam pa'i bye brag gis/ chos la longs spyod pas myong ngo / /'di ni sbyin pa'o/ /'di ni tshul khrims so/ /'di ni bzod pa ste/ mtshan nyid 'di lta bu'o zhes bya ba la sogs pa shes pas sgra ji bzhin ma yin par chos khong du chud pa'i phyir sems can yongs su smin par byed do/ /yang pha rol tu phyin pa bzhi po 'di dag ni shes rab kyi pha rol tu phyin pa zhes bya ba ni bcu pa rnam par mi rtog pa'i ye shes dang de'i rjes la thob pa nyid pha rol tu phyin pa bcu rnam par gzhag pa 'dir ni thabs la sogs pa pha rol tu phyin pa nyid du bstan to//gang gi tshe pha rol tu phyin pa drug tu rnam par gzhag pa de'i tshe ni rnam par mi rtog pa dang / de'i rjes la thob pa shes rab kyi pha rol tu phyin pa ste/ bzhi po dag der 'dus pa'i phyir ro//sa bcu pa'i chos kyi rnam grangs de pha rol tu phyin pa'i sde snod kyis bsdus pa'i phyir zhes bya ba la pha rol tu phyin pa'i sde snod ni thag pa chen po'i chos thams cad de/ des sa bcu pa 'di bsdus so/ /de lta bas nas thams cad du pha rol tu phyin pa bsgom par mi 'gyur ba yang ma yin zhes khungs brjod do//gang zag lnga ni bskal pa grangs med pa gsum gyis rdzogs par 'gyur te zhes bya ba ni gang zag gcig nyid la gnas skabs tha dad pa mos pas spyod pa la sogs pa'i bye brag gis rnam pa lngar 'gyur ro/ /de la lhag pa'i bsam pa dag pa la spyod pa yang rnam pa gnyis te/mtshan ma la spyod pa dang / mtshan ma med pa la spyod pa'o/ /mtshan ma med pa la spyod pa yang rnam pa gnyis te/ mngon par 'du byed pa dang mngon par 'du mi byed pa la spyod pa'i phyir ro/ /de la mos pas spyod pa ni bskal pa grangs med pa dang pos sa dang po yongs su rdzogs par 'gyur te/de las de kho na rtogs pa'i phyir ro/ /lhag pa'i bsam pa dag pas la spyod pas drug po dag tu mtshan ma dang bcas pa la spyod pa dang / bdun pa la mtshan ma med pa la spyod pa ni bskal pa grangs med pa gnyis pas yongs su rdzogs par 'gyur ro/ /de nyid mngon par 'du byed pa med par spyod pa ni de yan chad sa bcu pa'i bar du bskal pa grangs med pa gsum pas bsgom pa yongs su rdzogs par 'gyur te/brgyad pa la ni mngon par 'du byed pa med par spyod pa nyid yongs su grub bo/ /dgu pa dang bcu pa la ni mngon par 'du byed pa med par spyod pa nyid do/ / gang zag gcig kho na la gnas skabs gzhan dang ldan pas tha dad de/ rgyun du zhugs pa la sogs pa bzhin no/ /'o na thog ma med pa'i 'khor ba la gang nas bzung ste/ grangs med pa gsum gyi rtsom pa bgrang zhes dri ba khong du bzhag ste tshigs su bcad pas ston to//bzang dang smon pa'i stobs can dang / /zhes bya ba la bzang po ni dge ba ste/ de stobs dang ldan par gyur pa ni bzang po'i stobs can te/ de la de yod pa'i phyir ro/ /smon pa ni 'dir smon lam du 'dod de/ de la de yod pas smon lam gyi stobs can no/ /de la dge ba'i rtsa ba'i stobs can ni mi mthun pa'i phyogs kyis zil gyis mi non pa'i phyir ro//smon lam gyi stobs can ni rtag tu dge ba'i bshes gnyen dang phrad pa'i phyir ro/ /sems brtan pa nyid ni mi dge ba'i grogs pos mos pa bzlog kyang byang chub kyi sems yongs su mi gtong ba'i phyir ro/ /khyad par 'gro ba ni mthong ba'i chos dang tshe rabs phyi ma la dge ba'i chos 'phel ba dang /yongs su mi nyams pa'i phyir ro/ /de ltar gang gi tshe dge ba'i rtsa ba dang / smon lam gyi stobs can dang / sems brtan te bar mdor mi ldog pa dang / khyad par du 'gro ste/ yon tan cung zad kyis chog par mi 'dzin pa de nas bzung ste/grangs med pa gsum brtsam mo/ /rgyu dang 'bras bu rab tu dbye ba bshad zin to/ /tshul khrims kyi dbang du byas te bslab pa ni lhag pa'i tshul khrims kyi bslab pa ste/ byang chub sems dpa'i sa las ji skad bshad pa lta bu zhes bya ba la sogs pa la der ji skad bshad snyam pa la/mdor bsdu na khyad par rnam pa bzhis zhes bya ba la sogs pa smos so/ /rab tu dbye ba'i khyad par ni sdom pa dang dge ba'i rtsa ba sdud pa dang sems can gyi don bya ba'i tshul khrims tha dad pa'i phyir ro/ /sdom pa'i tshul khrims ni rnam pa thams cad du mi dge ba spong ba yang dag par 'dzin pa'o//dge ba'i chos sdud pa'i tshul khrims ni rnam pa thams cad du dge ba'i chos yang dag par sgrub pa'o/ /sems can gyi don bya ba'i tshul khrims ni bdag gi bde ba la mi chags mi lta bar rnam pa thams cad du sems can gyi don byed pa'o//tshul khrims gnyis kyi rten gyi don du rig par bya'o zhes bya ba ni rgyu yin pa'i phyir te/ lus dang ngag dang yid bsdams na sangs rgyas kyi chos stobs la sogs pa yang dag par sgrub pa dang / yang dag par phul du phyin pa thob par byed kyang nus la/ theg pa gsum la 'dzud pas sems can yongs su smin par byed pa'i skal ba can du yang 'gyur gyi/gzhan du ni ma yin no/ /'di ni byang chub sems dpa'i tshul khrims kyi khyad par te/ nyan thos la sogs pa la bslab pa gnyis med pa'i phyir ro/ /sdom pa'i tshul khrims kyang khyad par du 'phags pa'o zhes bstan te/ bslab pa thun mong dang thun mong ma yin pa'i khyad par zhes bya ba de la bslab pa thun mong ba ni rang bzhin gyis kha na ma tho ba dang bcas pa rnams te/ bkag pa bcas pa med par yang mi 'dod pa'i 'bras bu can srog gcod pa la sogs pa nyan thos dang / byang chub sems dpa' gnyi gas mi bya bar nges par mthun pa'o//bslab pa thun mong ma yin pa ni bcad pas bkag pa bcas pa'i kha na ma tho ba dang bcas pa rnams te/ dbyar gyi nang logs su 'gro ba la sogs pa kun du spyod pa'i phyir ro/ /bslab pa de la ni zhes bya ba ni bslab pa phyi ma bcas pa'i kha na ma tho ba kun du spyod pa la'o//gang du dbyar gyi nang logs su song na nyan thos kyi ltung bar 'gyur ba de la ni dbyar bcad kyang gdul ba la lta bas yul gzhan du 'gro ba'i byang chub sems dpa' la ltung ba med de/ gzhan gyi don gtso bo yin pa'i phyir ro/ /gang du sems can gyi don byar yod kyang dbyar chad pas 'jigs nas yul gzhan du mi 'gro ba'i phyir byang chub sems dpa' la ltung bar 'gyur ba de la nyan thos la ltung bar mi 'gyur te/snying rje chung ba'i phyir ro/ /byang chub sems dpa' rnams kyi tshul khrims sems kyi yin pa ni 'di ltar 'dod pa la 'dun pa dang gnod sems la sogs pa'i rnam par rtog pa ni byang chub sems dpa'i 'chal ba'i tshul khrims yin gyi/nyan thos kyi ni ma yin te/ bdun spong ba yang dag par blangs pa'i phyir ro/ /de'i phyir nyan thos rnams kyi tshul khrims ni lus kyi dang ngag gi yin gyi sems kyi ni ma yin no/ / mdor bsdu na gang kha na ma tho ba med par sems can thams cad la phan 'dogs pa zhes bya ba ni sems can thams cad la phan 'dogs pa kha na ma tho ba med ces bya ba'i tha tshig ste/ ji ltar bgrod par bya ba ma yin par 'gro ba la sogs pa lta bu ni ma yin no/ /de ni phan 'dogs pa yin yang kha na ma tho ba med pa ma yin te/de lta bu spang ba'i phyir kha na ma tho ba med pa smos so/ /lhag pa'i tshul khrims la sogs pa bslab pa gsum mo/ /pha rol tu phyin pa rnams kyi nang du ma 'dus sam/ ci'i phyir logs shig tu brjod ce na/ rnam par gzhag pa gzhan gyi ngor bya ba'i phyir te/snga phyi rgyu dang 'bras bu'i dngos por bstan pa'i phyir ro/ /ji skad du tshul khrims kyi phung po la brten nas ting nge 'dzin gyi phung bo 'byung ngo / /bsam gtan nas brten nas shes rab kyi phung po 'byung ngo / /de las rnam par grol ba dang rnam par grol ba'i ye shes mthong ba'i phung po 'byung ngo zhes gsungs pa lta bu'o//rgya che ba nyid kyi khyad par zhes bya ba ni byang chub sems dpa' rnams kyi bslab pa ni sna tshogs dang tshad med pa ste/ 'di ltar de dag gis sems can rjes su bzung ba'i phyir de lta bu dang de lta bu yang bslab par bya'o//bsod nams tshad med pa rgya che ba yongs su 'dzin pa nyid ni snying rje chen po yongs su ma chad pa'i phyir bsod nams tshad med pa yongs su 'dzin to/ /sems can thams cad la phan pa dang bde ba bya ba'i bsam pa yongs su 'dzin pa rgya che ba nyid ces bya ba la dge ba la yang dag par 'dzud pa ni phan pa'i bsam pa'o//de nyid la lam bde bas sbyor ba ni bde ba'i bsam pa'o/ /yang na phyi ma la bde bar smon pa ni phan pa'i bsam pa'o/ /bla na med pa yang dag par rdzogs pa'i byang chub la brten pa ni dmigs pa'i phyir ro/ /nyan thos la sogs pa la 'di thams cad med pas rgya che ba nyid kyi khyad par ro//zab pa'i khyad par gyi dbang du byas nas/ gang byang chub sems dpa' thabs la mkhas pa de lta bus zhes bya ba la sogs pa smos so/ /srog gcod pa la sogs pa'i las gang gi gnas skabs su spyod ce na/ gal te de gzhan mi dge pa'i las la 'jug par mngon du phyogs par shes shing de'i sems kyang rig par gyur la/de rnam pa gzhan gyis kyang mi zlogs pa dang / ngan song du yang 'gro ba dang / de bsad na bde 'gror skye ba yang mthong nas bdag las 'dis ngan song du 'gro ba ni bla'i/ 'di dag sdug bsngal gyi phung po chen po dang ldan par gyur na mi rung ngo snyam pa'i bsam pa khyad par du 'phags pa thob pas mi gtong zhing sman pa lta bur phan par 'dod pas srog gcod pa'i las byed na kha na ma tho ba med par 'gyur te/bsod nams tshad med pa yang skyed cing bla na med pa yang dag par rdzogs pa'i byang chub kyang myur du mngon par rdzogs par 'tshang rgya ste/gzhan du ni ma yin no/ /zab pa nyid ni rtogs par dka' ba'i phyir ro/ /yang lus dang ngag gi las rtogs par dka' ba ni des rgyal srid kyang byed ces bya ba la sogs pa ste/ dper na rgyal po me'i spyod pa gshed ma dang gnod pa dang gsod par bsgo pa'i rnam par rig pa rnams lta bu dang /'phags pa 'jam dpal la sogs pa byang chub sems dpa' rnams kyi srog gcod pa sprul pa lta bu yin no/ /gzhan du na sdig pa'i las las sems can mi zlogs so/ /sems can gdul ba'i phyir sems can la gtse ba rnam pa sna tshogs de dag kyang sprul pa byed do//skyes pa'i rabs sna tshogs bstan pas zhes bya ba ni sprul pa'i lus dang ngag gi las rtogs par dka' ba'i phyir zab ces bya ba dang sbyar te/ dper na thams cad sgrol la sogs pa'i skyes pa'i rabs las bram ze la bu gnyis la sogs pa byin pa sprul pa lta bu'o//ci'i phyir zhe na/ byang chub sems dpa' ni sems can gzhan la gnod pas sems can gzhan la phan 'dogs pa mi mdzad pa'i phyir ro/ /gal te de lta na sprul pa'i sbyin pa la sogs pas pha rol tu phyin pa rnams ji ltar rdzogs par 'gyur zhe na/ len pa po la sprul pa dang / ma sprul pas phan btags pa mtshungs pa'i phyir ro/ /ji ste len pa po yang sprul par gyur na de lta na yang nyes pa med de/ 'di lta bu'i sbyin pas pha rol tu phyin pa rnams 'grub pa ni ma yin no/ /'o na ci zhe na/ sbyin pa la sogs pa la sems can sems dang ba sngon du 'gro ba'i yongs su smin par bya ba'i phyir ro//rab tu dbye ba 'dis ni zhes bya ba ni lhag pa'i tshul khrims kyi rab tu dbye bas so/ /bslab pa'i rab tu dbye ba tshad med ces bya ba ni ji ltar 'dul ba bsnyad pa theg pa chen po'i mdo las khyad par bzhi po 'di dag spros pa dang bcas par stong phrag brgyas bshad pa lta bu'o//lhag pa'i tshul khrims kyi bslab pa'i rnam par 'grel pa'o// //lhag pa'i sems kyi bslab pa'i dbang du byas nas/ mdor bsdu na rab tu dbye ba drug gis rab tu blta bar bya ste zhes bya ba smos so/ /sems kyi sgra ni 'dir sems las byung ba'i ting nge 'dzin du brjod de/sems kyis bris zhes bya ba'i sems pa la bya ba bzhin no/ /ting nge 'dzin de dmigs pa dang bcas pa'i phyir dmigs pa la sogs pas rab tu dbye'o/ /theg pa chen po'i chos la dmigs pa'i phyir ro zhes bya ba ni nyan thos kyi chos la dmigs pa sel to/ /sna tshogs kyis rab tu dbye ba ni theg pa chen po snang ba zhes bya ba la sogs pa ste/gang la snyoms par zhugs na theg pa chen po'i chos mtha' dag snang ba de theg pa chen po snang ba'i ting nge 'dzin to/ /gang du bsod nams thams cad yang dag par bsags te/ bdag gir byas par gyur pa de ni bsod nams thams cad yang dag par bsags pa zhes bya'o//ting nge 'dzin gyi rgyal po bzang skyong ni/ 'jig rten gyi rgyal po bzhin du ting nge 'dzin thams cad kyi bdag po ste/ gang yod na phyogs bcu rnams su da ltar byung ba'i dus kyi sangs rgyas bcom ldan 'das rnams mngon sum du mthong bar 'gyur ro//dpa' bar 'gro ba ni ting nge 'dzin rnams kyi mchog ste/ dmag mi rnams kyi nang na dmag dpon dpa' bo bzhin du bdud kyi tshogs 'joms par nus pa'o/ /gnyen pos rab tu dbye ba ni chos thams cad 'dres pa la dmigs pa dang ldan pas sgrib pa thams cad kyi gnyen po'i dngos por gnas pa'o//de bzhin nyid du chos thams cad 'dres par byed de/ de las gud na med pa'i phyir ro/ /khye'us khye'u dbyung ba'i tshul du zhes bya ba ni khye'u snga ma khye'u phyi mas dbyung ba'i tshul du zhes bya ba'i tha tshig ste/ dper na khye'u phra mos khye'u sbom po 'byin pa de bzhin du kun gzhi rnam par shes pa la nyon mongs pa dang shes bya'i sgrib pa'i sa bon bag chags kyi bdag nyid rags pa gnas pa thams cad de bzhin nyid la dmigs pa gnyen po'i shes pa dang ldan pa'i ting nge 'dzin phra mos 'byin to//las su rung ba nyid kyis rab tu dbye ba ni bsam gtan gyi bde ba dag gis gnas nas bsam gtan las yongs su ma nyams pa bzhin du ji ltar 'dod pa gang du sems can gyi don mthong ba der skye ste/ting nge 'dzin las su rung ba'i phyir ro/ /'di 'dra ba'i ting nge 'dzin gyi las su rung ba nyid ni nyan thos la sogs pa nyid la med do/ /mngon par bsgrub pas rab tu dbye ba ni ting nge 'dzin gyi yon tan gyis 'jig rten gyi khams dpag tu med pa rnams su thogs pa med pa'i mngon par shes pa skyed do//de la g.yo ba la sogs pa'i rnam par 'phrul pa 'byung ste/ 'jig rten gyi khams tshad med pa g.yo bar byed pa ni ting nge 'dzin gyi mthus 'gul bar byed pa ste/ 'bar bar byed pa dang khyab par byed pa yang de bzhin no//'jig rten gyi khams mthong bar mi nus pa mtha' yas pa gzhan dag gam sangs rgyas la sogs pa yang ston to/ /sa la sogs pa yang chu la sogs pa'i dngos por gzhan du sgyur ro/ /skad cig gis 'jig rten gyi khams du mar 'gro'o/ / 'ong ngo / /rdul phra rab gcig gi nang du 'jig rten gyi khams mang po sdud kyang cher mi skye bar byed do/ /'jig rten gyi khams mtha' yas pa rnams su rdul gcig gis rgyas par byed de/ khyab par byed do/ /rang gi lus su gzugs kyi lus thams cad 'jug go/ /gdul ba'i phyir gang gi gzugs gang yin pa de'i gan du gzugs de nyid kyis 'gro'o//snang bar byed pa ni mngon par byed pa'o/ /mi snang bar byed pa ni mi mngon par byed pa'o/ /dbang nyid du byed pa ni bdud sangs rgyas nyid du sgyur ba'o/ /gzhan gyi rdzu 'phrul rab tu 'joms pa ni gzhan gyi rdzu 'phrul zil gyis gnon pa'o//spobs pa med pa rnams la spobs pa sbyin par byed do/ /brjed ngas pa rnams la dran pa sbyin par byed do/ /gang dag gis byang chub sems dpa' rnams la 'gug par 'gyur ba pho nya lta bu'i 'od zer gtong ste/ gang dag nyan thos la sogs pa la med pa'i rdzu 'phrul chen po 'di dag mngon par 'du byed do//gang dka' ba spyod pa'i byang chub sems dpa' zhes brjod pa dka' ba spyod pa rnam pa bcu po de dag ston to/ /khas blang bar dka' ba spyod pa ni byang chub chen por smon lam 'debs pa khas len pa'i phyir te/ dka' ba ni bdag gi bde ba la mi lta bar gzhan gyi don byed par dam 'cha' ba'i phyir ro//mi ldog par dka' ba spyod pa ni 'khor ba'i sdug bsngal grang ba dang rlung la sogs pas mi zlogs pa'i phyir ro/ /phyir mi phyogs pa ni sems can log par sgrub pa dang ldan pa rnams kyi don bya dka' ba las phyir mi phyogs pa ste/ gang dag ma la sogs pa la log par sgrub pa dang /brtse ba'i phyir mi dgos par yang mig bslangs nas rkang pa gnyis kyis 'dril ba de'i don bya dka' ba'o/ /mngon du phyogs par dka' ba ni gnod pa byed pa'i sems can rnams kyi don bya ba bya dka' ba'o/ /'jig rten du skyes kyang 'jig rten pa'i chos rnyed pa la sogs pa brgyad kyis mi gos pa ni dka' ba'o//rtogs pa med par yang theg pa chen po'i don phra zhing mthu'i khyad par can la mos shing dad par dka' ba'o/ /rtogs pa ni mngon par rtogs pa ste/ yang dag par khong du chud ces bya ba dang don gcig go/ /gang zag dang chos med pa'i ngo bo nyid kun brtags pa dgag pa'i sgo nas bya dka' ba'o//khong du chud pa ni dgongs te gsungs pa'o/ /dka' ba ni thos pa'i don btang ste/ ma thos pa'i don rjes su rtogs pa'i phyir ro/ /'khor ba yang yongs su mi gtong la de'i nyes pas kyang kun nas nyon mongs pa can ma yin pa ni dka' ba ste/ de gnyis mi 'byed pa'i phyir ro/ /sbyor bar dka' ba ni nyon mongs pa dang shes bya'i sgrib pa thams cad las rnam par grol ba spangs pa la zhugs pa'i de bzhin gshegs pa rnams sems can gyi don mdzad pa'i khyad par ro/ /gal te sbyin pa cung zad mi sbyin la zhes bya ba ni bdag dang gzhan mnyam pa nyid du rtogs pas sems can thams cad bdag gir byas te/sbyin pa de byang chub sems dpas sbyin pa'i phyir te/ thams cad la thams cad sbyin par dgongs pa'o/ /yang na sbyin par bya ba dang sbyin par byed pa dang / len pa po mi dmigs pa'i phyir 'khor gsum yongs su dag pas so//gal te sbyin pa thams cad la 'dod par mi byed pa'o zhes bya ba ni bkag pa la 'dod pa med ces bya ba'i tha tshig ste/ nye ba la sbyin pa dang / bdag la sbyin pa byin pa dang / bdag la sbyin pa byin par 'gyur ba dang / bdag gi snga rabs rnams kyis byin pas sbyin no snyam pa de la 'dod par mi byed kyi/mya ngan las 'das pa la dmigs pa dang / dngos po la mi gnas par 'dod par byed pa'o/ /gal te de bzhin gshegs pa rnams la dad pas mi 'gro ba'o zhes bya ba ni so so rang gis rig par bya ba'i chos nyid khong du chud nas rang gi rtogs pas sbyin par byed ces bya ba'i tha tshig go//gal te bdag sbyin pa la 'jug par mi byed pa zhes bya ba ni rang gi ngang gis 'jug pas sbyin pa'i phyir de la bdag nyid 'jug mi dgos pa'o/ /gzhan ni 'jug par byed de/ yang dag par 'dzin du 'jug pa'i phyir ro gal te lan 'ga' sbyin pa ci yang sbyin par mi byed pa'o zhes bya ba ni rtag tu thams cad sbyin par byed ces bya ba'i tha tshig go//gal te sbyin pa la snying po med pa'i 'du shes su gyur pa'o zhes bya ba la mi 'phro ba ni ting nge 'dzin te/ /des sems rnam par mi 'phro ba'i phyir ro/ /der 'du shes pa ni mnyam par bzhag pas sbyin par byed ces bya ba'i tha tshig go//gal te ser sna 'byung bar byed pa'o zhes bya ba ni rtsa nas 'byin ces bya ba'i tha tshig go/ /gal te mtha' la mi gnas par gyur pa'o zhes bya ba ni zhi bar bgrod pa gcig pu la nyan thos ltar gnas pa ma yin pa'o/ /gal te sbyin pa la dbang byed pa ma yin pa'o zhes bya ba ni sbyin pa'i mi mthun pa'i phyogs ser sna la sogs pa dbang byed pa ma yin zhes bya ba'i tha tshig go//gal te mi zad pa la mi gnas par gyur pa'o zhes bya ba ni phun sum tshogs pa phul du byung ba'i mthar thug pa sangs rgyas nyid thob nas de nyid du mi gnas kyi/ sprul pa rnams kyis gzhan la phan gdags pa'i phyir sbyin pa la 'jug ces bya ba'i tha tshig go//sbyin pa la ji lta ba de bzhin du tshul khrims la sogs pa la yang ci rigs su zhes bya ba ni snga ma bzhin du sbyar ba ste/ ji ltar na tshul khrims dang ldan pa yin zhe na/ gal te tshul khrims chung zad mi srung ba ste/bdag dang gzhan mnyam pa nyid du mthong ba'i phyir gzhan gyi tshul khrims dang ldan par 'gyur ba'o/ /mdo gang las/ dge slong dag nga ni srog gcod pa'o zhes bya ba la sogs pa 'byung ba der dgongs pa ston te/ gal te srog chags rnams 'khor ba las shin tu zlo ba'o zhes bya ba ni 'da' bar byed ces bya ba'i tha tshig go//gal te sus kyang ma byin par zhes bya ba ni ma sprul par ro/ /bdag nyid kyis sems can thams cad len pa'o zhes bya ba ni gzhan gyis byed du ma bcug par zhes bya ba'i tha tshig go/ /'dod pa rnams la log pa'o zhes spyod pa'o zhes bya ba ni yul gyi 'dod pa rnams dang kun du rtog pa'i 'dod pa rnams 'khrul pa tsam gyi phyir te/ji skad du/ 'dod chags zhe sdang gti mug ni/ /kun du rtog las 'byung zhes brjod/ /sdug dang mi sdug log pa las/ /brten nas kun du 'byung ba yin/ /sdug dang mi sdug log pa las/ /brten nas gang dag 'byung ba ni//de dag ngo bo nyid kyis med/ /de bas 'dod pa yang dag min/ /zhes bshad pa lta bu'o/ /gang brdzun pa de la brdzun no zhes smra ba'o zhes bya ba ni/ ji skad du/ bcom ldan 'das kyis slu chos zhes/ /gang gsungs de ni brdzun pa ste/ /'du byed thams cad bslu ba'i chos/ /des na de dag brdzun zhes bya//zhes bshad pa lta bu'o/ /stong pa nyid la gnas pa'i mchog gis zhes bya ba ni nges pa'i tshig gi tshul lo/ /shes bya'i pha rol tu gnas pa zhes bya ba ni 'dug ces bya ba'i tha tshig ste/ shes bya'i pha rol ni thams cad mkhyen pa nyid do/ /gal te chos thams cad yang dag par rnam par phye ste smra ba'o zhes bya ba ni tshig de nyid kyis bshad zin to//gal te rgyun du bla na med pa'i bsam gtan thob par byed pa'o zhes bya ba ni nges pa'i tshig gi tshul du snga ma bzhin te/ sangs rgyas kyi thugs kyi rgyud la mnga' ba'i bsam gtan ni bla na med pa'o/ /sems la nyon mongs par byed pa thams cad la 'dis gnod par byas pa yin no zhes bya ba ni bkag pa ste/spong du bcug ces bya ba'i tha tshig go/ /thams cad na thams cad la 'dug pa'i log pa zhes bya ba ni yang dag pa ma yin pa kun du rtog pa'o/ /yang dag pa ji lta ba bzhin du mthong ba zhes bya ba ni ma nor ba nyid du mthong ba'o//sangs rgyas kyi chos rnams zab po zhes mdo las gsungs pa de dag gang zhe na/ gang mdo gzhan las 'byung ba rtag pa'i chos rnams ni sangs rgyas kyi chos rnams te zhes bya ba nas gos pa med pa'i chos rnams ni sangs rgyas kyi chos rnams so zhes bya ba der dgongs pa ston te/chos kyi sku rtag pa'i phyir ro zhes bya ba la/ chos kyi sku ni gnas gyur pa'i mtshan nyid de/ sgrib pa thams cad dang bral ba de bzhin nyid do/ /rtag pa ni 'gyur ba med pa'i phyir ro/ /dri ma med cing thogs pa med pa'i ye shes bla na med pa yang yin te/ zag pa med pa'i phyir gzugs med pa ltar rnam par smin pa ni ma yin no//de rtag pa ni de bzhin nyid dang 'dres pa'i phyir ro/ /las dang nyon mongs pas mngon par 'dus ma byas pa'i phyir ro/ /sems can gyi spyod pa brgyad khri bzhi stong ni 'dod chags dang zhe sdang dang gti mug dang mnyam pa la spyod pa rnams re re la yang grangs nyi khri chig stong yod pa'i phyir ro//gnyen po dang bcas pa ni chos kyi phung po brgyad khri bzhi stong rnams so/ /'dod chags dang bcas pa'i chos rnams dang / zhe sdang dang bcas pa'i chos rnams dang / gti mug dang bcas pa'i chos rnams zhes bya ba ni bshad pa nyid kyis rnam par bkrol zin to/ /mi gos pa'i chos rnams zhes bya ba ni shin tu rnam par dag pa'i de bzhin nyid la sgrib pa thams cad kyis mi gos pa'i phyir ro//'jig rten du skyes kyang 'jig rten pa'i chos rnams kyis nye bar gos pa med pa'i don ni brda phrad par zad do/ /dgongs te gsungs pa'i 'bras bu ci yin zhe na/ ston pa pos gzhag bla pa ste/don yongs su bsdus pa'i phyir ro/ /gzhan dag la yang bshad bla pa'o/ /de nyid kyi phyir nyan pa pos gzung sla'o/ /de nyid kyi phyir bstan pa bzung bas tshogs yongs su rdzogs par bla ba'o/ /tshogs yongs su rdzogs pas bde bar chos nyid rtogs par byed do/sangs rgyas la shes nas dad pa 'thob ste/ de'i che ba nyid dmigs pa'i phyir ro/ /chos dang dge bdun la yang de bzhin no/ /mthong ba'i chos la bde bar gnas pa'i mchog kyang 'thob ste/ de rtogs pa'i phyir ro/ /'bel pa'i gtam gtan la 'bebs pas mkhas pa rnams kyi mdun na mkhas pa mkhas pa zhes bya ba'i grangs su 'gro ste/dgongs nas gsungs pa'i dgongs pa ni bcu po 'di dag go/ /de nyid kyi phyir nyan thos kyi theg par yang / pha dang ma ni gsad byas shing / /zhes bya ba la sogs pa bstan to/ /byang chub sems dpa' rnams kyi ting nge 'dzin rnams kyi las ni rnam pa bzhi ste/pha rol tu phyin pa bsgom pa dang / de la brten nas ji ltar 'dod pa bzhin du gser la sogs pa'i rang bzhin du bsgyur ba'i phyir sangs rgyas kyi zhing yongs su dag par byed pa dang / stobs la sogs pa sangs rgyas kyi chos yang dag par sgrub pa dang / rdzu 'phrul la sogs pas 'dun par byas nas sems can rnams 'dzud cing yongs su smin par byed pa'o/ /ji skad bshad pa lta bu'i ting nge 'dzin med par ni pha rol tu phyin pa sgom pa la sogs pa bzhi sgrub par mi nus te/ nyan thos bzhin no/ /lhag pa'i sems kyi bslab pa bshad zin to// //bam po drug pa/ sems mnyam par gzhag na yang dag pa ji lta ba bzhin rab tu shes so zhes 'byung bas ting nge 'dzin gyi 'og tu lhag pa'i shes rab kyi bslab pa brjod par bya'o/ /bslab pa ni rig pa 'dzin pa yin pas shes rab dang bslab pa gnyis tha dad pa med pa ma yin nam zhe na gal te de lta na lhag pa'i shes rab nyid bslab pa'o zhes gzhi mthun par bya'o//de ltar na yang dbang du bya ste zhes bya ba'i don med de/ de las gzhan pa ci'i dbang du byas nas lhag pa'i shes rab ces bya/ ji ltar bslab pa snga ma gnyis tshul khrims kyi dbang du byas/ sems kyi dbang du byas nas bslab pa shes rab gzhan yod pa ltar lhag pa'i shes rab ces bya ba 'dir ni de lta ma yin no zhe na/ de lta na 'o na ni sbyor ba las byung ba'i shes rab ni dngos gzhi'i dbang du byas pa'o/ /dngos gzhi ni de'i rjes la thob pa'i dbang du byas pa ste/ /gnyi ga yang ye shes bla na med pa'i dbang du byas pa'o//lhag pa'i shes rab kyi bslab pa de gang zhe na/ rnam par mi rtog pa'i ye shes te/ de ni ngo bo nyid la sogs pa zab pa nyid la thug pa'i bar dag gis bshad do/ /ngo bo nyid kyi dbang du byas nas rnam pa lnga rnam par spangs pa zhes bya ba smos so/ /bzlog pa'i sgo nas mtshan nyid ston te/dmus long la gzugs bsnyad pa bzhin du bsgrub pa'i sgo nas brjod par mi nus pa'i phyir ro/ /rnam par rtog pa bstsal pa'i sgo nas rnam par mi rtog pa'i ye shes bsgrub tu rung gi gzhan du na rnam par rtog pa dang bcas par 'gyur ro/ /rnam par mi rtog pa de dag gang zhe na/yid la mi byed pa zhes bya ba la sogs pa rgyas par smos pa'o/ /gal te yid la mi byed pa nyid rnam par mi rtog pa'i ye shes yin du zin na/ gnyid kyis log pa dang ra ro ba la sogs pa yid la ci yang mi byed pa yang rnam par mi rtog pa'i ye shes su 'gyur ro/ / de yang 'dod pa ma yin te 'bad pa med par yang thams cad phyin ci log med par thal bar 'gyur ba'i phyir ro/ /rtog pa dang bcas shing dpyod pa dang bcas pa zhes bya ba la sogs pa ni gal te rtog pa dang dpyod pa las 'das pa rnam par mi rtog pa'i ye shes yin na ni des na bsam gtan gnyis pa yan chad kyi so so'i skye bo dang /nyan thos la sogs pa yang rnam par mi rtog pa'i ye shes su 'gyur bas de yang 'thad pa ma yin no/ /'du shes dang tshor ba 'gog pa zhes bya ba la sogs pa yang gal te 'du shes dang tshor ba rnam par zhi ba rnam par mi rtog pa yin na ni des na rnam par mi rtog pa'i ye shes nyid du rnam par mi 'gyur te/sems med par sems las byung ba rnams mi 'byung ba'i phyir ro/ /'gog pa'i snyoms par 'jug pa la sogs pa la yid kyi rnam par shes pas sems dang bcas pa nyid du 'gal te/ sems las byung ba med par ni//sems ni nams kyang mi 'byung ste/ /nyi ma dang ni 'od zer bzhin/ /de dag nyid dang lhan cig 'byung / /zhes ji skad bshad pa lta bu'o/ /gzugs kyi ngo bo nyid yongs su spangs pa zhes bya ba ni gal te rnam par mi rtog pa'i gzugs la sogs pa lta bu yin na ni des na ye shes nyid du mi 'gyur te/'byung ba las gyur pa yin pa'i phyir ro/ /de kho na'i don la bkra bar 'dzin pa zhes bya ba la sogs pa ni gal te de kho na'i don la rnam par mi rtog pa bkra bar 'dzin pa 'byung ba gang yin pa de rnam par mi rtog pa yin na ni de rnam par mi rtog pa nyid du mi 'grub ste/bkra bar 'dzin pa nyid rnam par rtog pa'i phyir ro/ /rnam pa lnga po 'di dag nyid tshigs su bcad pa rtsa ba gsum gyis bkag nas rtsa ba bzhi pas rnam par mi rtog pa'i ye shes kyi ngo bo nyid ston te/ yang dag don la bkrar 'dzin med/ /ces bya ba ni bkra bar mi 'dzin pa'i ngo bo nyid ces bya ba'i tha tshig go//'di ltar gnas brtan par 'dod nas tshigs su bcad pas smras pa/ byang chub sems dpa' rnams kyi shes/ /rnam par rtog pa med pa'i gnas/ /zhes bya ba la sogs pa ste/ ye shes ni sems las byung ba yin pas sems ni gnas su 'gyur ba yin no//sems gnas yin dang rnam par mi rtog pa ni mi rung ste/ sems kyi sgra ni sems dpa'i rgyu las byung ba'i phyir ro/ /ji ste sems med pa gnas yin na ni des na ye shes nyid du mi 'gyur te/ gzugs bzhin no zhe na/ nyis 'geg gi thag pa 'di tshigs su bcad pa phyed kyis lan 'debs so//don la mi sems rgyus byung phyir/ /zhes bya ba ni rnam par mi rtog pa de'i gnas sems ma yin te/ 'di ltar don la mi sems pa'i phyir ro/ /sems med pa yang de'i gnas ma yin te/ sems kyi rgyu las byung ba'i phyir ro/ / 'di ltar de ni sems kyi rgyu las byung ba ste/ bsgoms pa'i dbang gis gang na sems dang sems med par rnam par rtog pa las shin tu 'das pa'i gnas zhes brjod pa'i gnas skabs de 'thob bo/ /gzhi zhes bya ba ni rgyu ste/ byed rgyu'o/ /de'i dbang du byas nas/ thos pa'i bag chags brjod bcas pa'i//zhes bya ba smos so/ /gzhan dag las sgra thos pa de ni mnyan par bya ba yin pa'i phyir thos pa ste/ gzhan ni ma yin no/ /de goms pa'i phyir nus pa khyad par can ni bag chags te/ de'i rgyu las byung ba yid kyi brjod pa yid la byed pa'o/ /de ni tshul bzhin zhes bya ba ni rigs pa ste/rnam par byang ba zhes bya ba'i tha tshig go/ /dmigs pa dang bcas pa'i phyir ye shes kyi dmigs pa ston te/ byang chub sems dpa' rnams kyi shes/ /rnam rtog med pa'i dmigs pa ni/ /chos rnams brjod du med pa nyid/ /ces bya ba la sogs pa'o/ / brjod du med pa nyid ces bya ba ni brjod pa rang bzhin med pa nyid de/ brjod pa kun brtags pa'i ngo bo nyid dang bral ba'o/ /bdag med de bzhin nyid kyang de/ /zhes bya ba ni grags pa'i tshig gnyis kyis gsal bar byed pa ste/ gang zag dang chos med pa'i ngo bo nyid sgro btags pa dang skur ba 'debs pa'i mtha' las grol ba ni rnam par mi rtog pa'i ye shes kyi dmigs pa'o//dmigs pa dang bcas pa'i chos rnams ni rnam pa dang bcas pa'i phyir dmigs pa 'dzin par byed do/ /rnam par mi rtog pa'i ye shes kyi rnam pa ni de bzhin nyid la dmigs par brjod do/ /mtshan ma med pa gang yin pa'o zhes bya ba ni mtshan ma thams cad yid la mi byed pa ste/rnam pa med pa nyid rnam pa'o zhes bstan par 'gyur ro/ /gal te rnam par brtag par bya ba'i don med na rnam par brtag par bya ba 'di ci zhe na/ de'i don bstan pa'i phyir/ sbyor las byung ba'i rang bzhin te/ /zhes bya ba la sogs pa smos te/yi ge'i 'bru phan tshun du sbyor bas rta lcag ces bya ba la sogs pa rgyun ma chad par brjod pa brda la 'dris pa la/ ltos nas don kun brtags pa'o/ /de las gzhan du min zhes bya ba ni sbyor ba las byung ba de las gzhan du ma yin pa ste/ 'brel pa brjod pa med na de med pa'i phyir don dam pa ma yin zhes bya ba'i tha tshig ste/brjod du med pa zhes bya ba ji ltar brjod du med ces bya ba'i 'thad pa smos pa/ rjod pa med par brjod bya la shes pa 'jug pa ma yin no zhes bya ba la sogs pa ste/ gal te brjod par bya ba'i don zhig yod na ni rjod pa med par yang de shes par 'gyur ba'i rigs na brjod pa la ma byang ba ni brjod par bya ba yod kyang de'i blo mi 'byung bas brjod par bya ba'i don med par nges so//ji ste rjod pa la brjod par bya ba'i blo 'byung ngo snyam na/ de spang ba'i don 'gal ba'i phyir brjod la min zhes bya ba smos te/ mtshan nyid mi 'dra ba zhes bya ba'i tha tshig go//dbang po tha dad pas gzung ba yin pas rjod pa ni brjod par bya ba dang mtshan nyid mi 'dra ba yin na de ji ltar brjod par bya bar rung / de'i phyir thams cad brjod du med ces bya ba la/ thams cad ces bya ba smos pas ni brjod pa dang brjod par bya ba dang / gnyi ga smos pas mjug sdud do/ /rnam par mi rtog pa'i ye shes de gang gi rten yin zhe na/ rnam par mi rtog ye shes te/ /byang chub sems dpa'i de rjes la/ /thob pa spyod pa'i rten yin te/ /zhes bya ba smos te/ ye shes de ni rnam par mi rtog pa'i ye shes kyi rjes las byang chub sems dpa'i spyod pa gang thob pa de'i rten te gnas yin no//de ni 'phel bar 'gyur phyir ro/ /zhes bya ba ni byang chub sems dpa'i spyod pa de 'phel bar 'gyur ba'i phyir te/ rten gyi dgos pa bstan to/ /gcig pus ni mi nus pa'i phyir ye shes de'i grogs gang zhe na/ byang chub sems dpa' rnams kyi shes/ /rnam par rtog pa med pa'i grogs//lam gnyis su ni brjod pa ste/ /zhes bya ba smos te/ tshogs kyi lam dang / rten gyi lam mo/ /pha rol tu phyin pa lnga'i rang bzhin no zhes bya ba ni de'i ngo bo nyid do/ /de la pha rol tu phyin pa bzhi ni tshogs kyi lam mo/ /bsam gtan gyi pha rol tu phyin pa ni rten gyi lam mo/ /sems mnyam par gzhag pa sngar bshad pa'i pha rol tu phyin pa'i dge bas brtan pa la shes rab kyi pha rol tu phyin pa pha rol tu phyin pa zhes brjod pa'i rnam par mi rtog pa'i ye shes 'byung ngo //ji srid du sangs rgyas nyid ma thob pa de srid du rnam par mi rtog pas gang du rnam par smin par byed snyam pa la/ byang chub sems dpa' rnams kyis shes/ /rnam rtog med pa'i rnam smin ni/sangs rgyas dkyil 'khor gnyis su ste/ /zhes bya ba smos te/ longs spyod rdzogs pa'i dkyil 'khor dang / /sprul pa'i dkyil 'khor ro/ /sbyor ba dang ni thob pas so/ /zhes bya ba ni rnam par smin pa'i don brjod kyi/ 'di rnam par smin pa'i rgyu ni ma yin te/ de'i gnyen po yin pa'i phyir ro/ /'di ni rnam par smin pa'i don gzhan yin te/'di lta ste/ bdag po'i don to/ /gal te rnam par mi rtog pa'i don du brtson par gyur na ni de'i tshe de'i dbang gis sprul pa'i dkyil 'khor du skye'o/ /ji ste rnam par mi rtog pa thob par gyur na ni/ de'i tshe longs spyod rdzogs pa'i dkyil 'khor du skye'o/ /ye shes de'i rgyu mthun pa gang yin snyam pa la/byang chub sems dpa' rnams kyis shes/ /rnam rtog med pa'i rgyu mthun ni/ /phyi ma phyi ma'i tshe rnams su/ /zhes bya ba la sogs pa smos te/ dkyil 'khor gnyis po de nyid du tshe rabs phyi ma phyi ma dag la rnam par mi rtog pa'i ye shes de nyid khyad zhugs par khyad zhugs par du 'gyur te/ phyis skyes pa'i khyad par de nyid de'i rgyu mthun pa'o//de'i nges par 'byung ba ji lta bu snyam pa la/ byang chub sems dpa' rnams kyis shes/ /rnam rtog med pa'i nges 'byung ni/ /sa bcu dag tu shes bya ste/ /thob pa dang ni grub phyir ro/ /zhes bya ba smos te/ sa dang po la zhugs na mthong ba'i lam gyi gnas skabs su sa thams cad thob pa'i phyir rnam par mi rtog pa nges par 'byung ngo //bsgom pa'i lam la ni de dag nyid du grub bo/ /mthar phyin pa'i dbang du byas nas/ dag pa'i sku gsum thob phyir dang / /zhes bya ba smos te/ dag pa smos pa ni 'di ltar sa dang po nyid la sku gsum thob cing sa bcu pa la ni dag pa yin te/des na gang gi tshe dag pa'i sku gsum thob par 'gyur gyi/ sku gsum tsam du mi zad la de thob pas kyang dbang dam pa bcu yang thob pa yin gyi/ dag pa'i sku gsum 'ba' zhig thob pa ni ma yin pa de'i tshe rnam par mi rtog pa'i ye shes kyi mthar phyin to/ /ye shes de/ gang dag gis ci 'dra bar gang gis gos pa med snyam pa la/rnam rtog med pa'i ye shes de/ /dad pa tsam dang mos pa yis/ /sdig pa sna tshogs drag rnams kyis/ /gos pa med de nam mkha' bzhin/ /zhes bya ba smos so/ /gang dag gis shes pa gang smos pa ni sdig pa sna tshogs drag po rnams kyis so/ /ci 'dra bar zhes bya ba ni de nam mkha' lta bur gyur pa'o//gang gis zhes gang smos pa ni/ /dad pa tsam dang mos pas ni/ /dad pa tsam gyi shes rab dang / /mos pa'i rgyus mi gos pa'o/ /sgrib pa kun las grol ba'i phyir/ /zhes bya ba ni nyon mongs pa'i sgrib pa dang shes bya'i sgrib pa dang bral ba'i phyir ro/ /thob dang grub dang ldan pas na/zhes bya ba ni sa dang po la ni thob po/ /sangs rgyas kyi sa la ni grub po/ /'jig rten dag na rnam rgyu yang / /'jig rten chos kyis rtag mi gos/ /zhes bya ba ni skye ba'i gnas thams cad du skye ba ston kyang rnyed pa la sogs pa 'jig rten gyi chos brgyad po dag dang mi 'dre bas 'jig rten las 'das pa ste/pad+ma bzhin no/ /'o na sbyor ba las byung ba dang / dngos gzhi dang rjes las thob pa rnam par mi rtog pa'i ye shes rnam pa gsum khyad par ci yod ce na/ khyad par bstan pa'i phyir/ lkugs pas don ni myong 'dod dang / /zhes bya ba la sogs pa smos te/ dper na lkugs pas don myong bar 'dod pa la re zhig mi myong ba de bzhin du sbyor ba las byung bar blta'o//dper na lkugs pas don myong yang mi rjod pa de bzhin du dngos bzhi blta'o/ /ji ltar ma lkugs pas don myong zhing smra ba de bzhin du de'i rjes la thob par blta'o/ /rmongs pas don ni myong 'dod dang / /zhes bya ba ni tshigs su bcad pa 'di 'ang de bzhin du bshad par bya'o//rnam par shes pa lnga pos don ni myong 'dod dang / /zhes bya ba ni don myong bar mos shing don myong bar 'dun pa zhes bya ba'i tha tshig ste/ de lta bur ni sbyor ba las byung bar blta'o/ /dper na rnam par shes pa lnga po dag gi don myong yang rnam par mi rtog pa de lta bu ni dngos gzhi'o//dper na yid kyi rnam par shes pa dgos pa gnyi ga can gyis ni don myong zhing rnam par rtog par yang byed de/ de lta bur ni de'i rjes la thob pa'o/ /de bzhin du bstan bcos mi shes pa bstan bcos shes par 'dod pa dang / bstan bcos brjod pa na tshig 'bru myong ba dang /de nyid nyan pas chos kyi don rtogs par 'gyur te/ dpe gsum po dag gis sbyor ba la sogs pa gsum go rims bzhin du dpe dang bstun to/ /mi zhig mig ni btsums pa ltar/ /zhes bya ba la sogs pa ni dngos gzhi dang rjes la thob pa'i dpe ste/ rnam rtog med pa'i shes de ni//nam mkha' bzhin du shes par bya/ /zhes bya ba dang tshigs su bcad pa 'di gnyis kyis ni dngos gzhi dang rjes la thob pa'i khyad par bstan to/ /de la gzugs ni snang ba ltar/ /zhes bya ba ni nam mkha' la'o/ /de'i rjes la thob pa'i ye shes ni de ltar blta bar bya ba ste/ rnam par brtag par bya ba dang rnam par rtog pa zhes bya ba'i tha tshig go//sbyor ba las byung ba ni rnam par mi rtog pa'i rgyu yin pas rnam par mi rtog pa'o/ /rjes la thob pa ni de'i rgyu las byung ba'i phyir ro/ /gal te sangs rgyas nyid rnam par mi rtog pa'i ye shes kyis rab tu phye ba yin na sems can du rnam par rtog pa mi mnga' bar sems can gyi don ji ltar mdzad ce na/nor bu dang sil snyan la sogs pa'i dpe rnams kyis lhun gyis grub par mdzad par ston to/ /ji ltar nor bu sil snyan dag /ces bya ba la sogs pa'o/ /de dag ni sems pa med pa'i phyir 'di snyam du bdag cag gis 'bar bar bya'o//sgra 'byung bar bya'o snyam du mi sems mod kyi/ 'on kyang yid bzhin gyi nor bu rnams dang lha'i sil snyan ma dkrol ba rnams der skyes pa'i sems can gyi dbang gis 'bar ro/ /sgra 'byung ngo / /de bzhin du sangs rgyas bcom ldan 'das rnams kyi mdzad pa yang sems can la sogs pa'i rnam par rtog pa mi mnga' bar gdul ba ji lta ba bzhin du phan 'dogs pa sna tshogs 'byung ngo //rnam par mi rtog pa de nyid kyi zab par brjod de/ ji lta zhe na/ 'di la rnam par mi rtog pa'i ye shes gzhan gyi dbang zhes bya ba rnam par rtog pa la dmigs pa zhig gam/ de las gzhan pa'am/de bzhin du shes pa zhig gam/ mi shes pa zhig ce na/ 'dis ci zhig bya/ gal te gzhan gyi dbang rnam par rtog pa la dmigs na ji ltar rnam par mi rtog par 'gyur/ ji ste de las gzhan pa zhig ces byar ni de med pa nyid do/ /gal te mi shes pa zhig na ni rnam par mi rtog pa'i ye shes kyang ji skad du bya/ji ste shes pa yin na yang de'i shes bya dgos par 'gyur bas rnam pa thams cad du yang nyes par 'gyur ro zhe na/ de la ma yin gzhan la min/ /zhes bya ba la sogs pas de'i lan 'debs so/ /re zhig rnam par mi rtog pa'i phyir gzhan gyi dbang zhes bya ba rnam par rtog pa la 'jug ces bya bar ni mi rung ste/rnam par rtog pa la dmigs pa ni rnam par mi rtog par mi srid pa'i phyir ro/ /de las gzhan pa la yang ma yin te/ 'di ltar rnam par rtog pa de nyid kyi chos nyid la dmigs pa'i phyir te/ chos nyid ni chos las de nyid dang gzhan nyid du brjod du med pa'i phyir ro//ye shes kyang rnam par rtog pa dang / rnam par mi rtog pa la dmigs pa nyid du brjod du med do/ /sbyor ba las byung ba dang rjes la thob pa ltar shes pa yang ma yin te/ rnam par mi rtog pa'i phyir ro/ /mi shes pa yang ma yin te/ sbyor ba las byung ba'i shes pa sngon du 'gro ba'i phyir ro//shes bya dang ni khyad med pa'i/ /shes gang de nyid mi rtog nyid/ /ces bya ba ni gzung ba dang 'dzin par rnam par dbye bar yongs su chad pa med pa'i phyir 'di ni shes pa'o/ /'di ni shes bya'o zhes khyad par med pa gang yin pa de ye shes de'i rnam par mi rtog pa nyid de/ gang shes bya dang tha dad pa ma yin pa de ni nam mkha' dang snang ba bzhin no//rnam par brtag bya med pas na/ /zhes bya bas ni mdo'i sde gzhan dag las chos thams cad rang bzhin gyis rnam par mi rtog pa'o zhes gang 'byung ba de ston te/ gang gi phyir rnam par brtag par bya ba kun brtags pa'i don med pas de'i phyir rang bzhin gyis rnam par mi rtog pa'o zhes mdo las 'byung ngo //gal te chos thams cad rang bzhin gyis rnam par mi rtog pa yin na de'i ched du 'bad mi dgos pas ci'i phyir srog chags thams cad ma grol zhe na/ 'di ltar de dag la chos de dag ni 'di lta bu'o zhes mngon sum du rtogs pa'i ye shes ma skyes pa'i phyir ro//rnam par rtag par bya ba med pa'i phyir byang chub sems dpa' rnams la ni shes pa de skye ste/ de'i phyir de dag nyid rnam par grol gyi/ gzhan dag ni ma yin no/ /rgyu dang 'phen pa dang goms pa las byung bas rab tu dbye ba'i phyir ro zhes bya bas ni sbyor bas byung ba la sogs pa re re la yang rnam pa gsum du ston to//la la'i rigs ni 'di lta bu yin te/ gang zhig rkyen rnyed nas myur du de la sbyor ba las byung ba skye ba de'i rigs las de 'byung ngo / /rigs ni thog ma med pa'i dus kyi skye mched drug bye brag can sangs rgyas kyi snod du gyur pa'o//su la sngon gyi rgyu yod pa de la tshe rabs snga ma la goms par byas pa'i 'phen pa'i stobs kyis 'byung bar 'gyur ro/ /kha cig ni da ltar byung ba'i tshe la goms par byas pas skyes bu byed pa'i stobs kyis 'byung ngo / /chog shes pa'i phyir rnam par mi rtog pa ni chog shes pas rnam par mi rtog pa ste/don nyung ngus chog par bzung nas gong ma'i khyad par la rnam par mi rtog pa'i phyir te/ dper na 'jig rten pa rnams kyi thos pa dang / bsams pa las byung ba'i shes pa gnyis kyis don 'ga' zhig la dad par byas sam/ nges par byas sam/ bsgoms nas srid pa'i rtse mo'i bar du thob nas ldog pa lta bu ste/de nyid la thar pa snyam du mngon par zhen pa'i phyir ro/ /phyin ci ma log pas rnam par mi rtog pa ni 'phags pa nyan thos rnams kyi ste/ de dag ni bsgoms pa las byung ba'i shes rab kyi sdug bsngal la sogs pa'i bden pa la mi rtag pa la sogs pa phyin ci ma log pa bzhis dmigs kyi/de phan chad mi rtag pa la sogs pa la ni phyin ci log tu rnam par mi rtog go/ /spros pa med pas rnam par mi rtog pa ni byang chub sems dpa' rnams kyi ste/ de dag ni mi rtag pa la sogs pas kyang rnam par mi rtog cing byang chub ces bya ba'i bar du yang spros par mi byed de/de kho na nyid dag gi lam las 'das pa dang / 'jig rten pa'i shes pa las 'das pa'i phyir ro/ /spros pa zhes bya ba la sogs pa ni kun rdzob ste skra dang 'jig rten pa'i shes pas bsdus pa ste/ de med pa'i phyir spros pa med pa nyid do/ /de'i rjes la thob pa ni rnam pa lnga ste/ rtog pa dang / rjes su dran pa dang / rnam par gzhag pa la sogs pa 'bras bu tha dad pa'i phyir ro/ /dpyod pa zhes bya ba'i sgra ni re re dang sbyar ro/ /de la rtog pa la dpyod pa zhes bya ba la rtog pa ni mngon par rtogs pa dang de kho na gtan la phebs pa ste/ ting nge 'dzin la de'i rjes la thob pas 'di ni de lta bu'o zhes so so rang rang gi dpyod pa'o//de nyid rjes su dran pa la dpyod pa ni de'i 'og tu bdag gis 'di lta bu rtogs so zhes rtog pa rjes su dran pa'i phyir ro/ /rnam par gzhag pa la dpyod pa ni langs nas gzhan dag la ji ltar rtogs pa bzhin du brjod pa'i phyir ro/ /'dres pa la dpyod pa ni chos thams cad bzlums nas dmigs pa'i phyir te/gang gis gnas 'gyur ba'o/ /gnas gyur nas/ 'byor bar bya ba'i dpyod pa ni ye shes mngon du gyur pa can gyis gang bsams pa de thams cad 'byor bar 'gyur te/ des sa la sogs pa yang gser la sogs pa nyid du 'gyur ro/ /dpyad pa ni 'dir shes pa zhes bya ba'i sgrar 'dod do/ /rnam par brtag par bya ba med pa'i phyir rnam par mi rtog pa'o zhes bshad pa ji ltar rnam par brtag par bya ba'i don de med ce na/de med par tshigs su bcad pa rnams kyis bsgrub ste/ yi dags dud 'gro mi rnams dang / /zhes bya ba la sogs pa ste/ gang la mi rnams chu'i blo 'byung ba de la yi dags rnams kyis thang bur mthong ngo //gang la mi rnams kyis mi gtsang ba'i blo 'byung ba de la dud 'gro rnams kyis kha zas kyi blo 'byung ngo / /gang la yi dags rnams dang dud 'gro rnams gtsang ba'i blo 'byung ba de la mi rnams mi gtsang ba'i blo 'byung ngo / /gang la mi rnams kha zas kyi blo 'byung ba de la lha rnams kyis mi gtsang bar mthong ste/'gal ba rnams ni gcig la mi srid pas kun brtags pa'i don med do/ /gal te med na dmigs pa med pa'i shes pa ji ltar kun du 'byung zhe na/ 'di la dri ba ci yod ce na/ mdo sde pa khyod kyi ltar na yang 'das pa dang ma 'ongs pa la dmigs pa med pa'i shes pa ji ltar 'jug /rmi lam na yang zhes bya ba ni khyim ngan pa chung ngu'i nang na nyal ba'i rmi lam gyi shes pa'i dang chu klung dang glang po che po'i shes pa dang / rang gi mgo gcod par mthong ba yang dmigs pa dang bcas pa ma yin no/ /gzugs brnyan rnam pa gnyis po la//zhes bya ba ni me long dang ting nge 'dzin gyi spyod yul zhes bya ba la ste/ rang gi sems kyi gzugs brnyan la dmigs pa'i phyir dmigs pa med pa'o/ /de la dmigs pa dang ldan pa'i phyir zhes bya ba ni mjug sdud pa ste/ 'das pa dang ma 'ongs pa la sogs pa la dmigs pa dang ldan pa'i phyir zhes bya ba'i tha tshig go//don ni don du grub na ni/ /ye shes rtog pa med mi 'gyur/ /zhes bya ba ni gal te don ngo bo nyid kyis don du grub par gyur na rnam par mi rtog pa'i ye shes mi 'grub ste/ rnam par brtag par bya ba yod pa'i phyir ro/ /rnam par mi rtog pa med pa'i phyir/ sangs rgyas nyid med par 'gyur zhes bya ba ni rtsa ba la gnod pa'i skyon no//de lta bas na nges par don mi 'grub par shes par bya'o/ /'di'i phyir yang don med de 'di ltar byang chub sems dpa' dbang thob dang zhes bya ba la sogs pa ste/ dbang rnyed pa can zhes bya ba'i tha tshig go/ /bsam gtan pa'i zhes bya ba ni byang chub sems dpa' las gzhan pa nyan thos la sogs pa rnams te/de dag bsam gtan byed pa'i tshul can yin pas bsam gtan pa'o/ /mos pa'i dbang gis zhes bya ba ni bsam pa'i dbang gis so/ /'di ltar sa la sogs pa dag/ /dngos po de ltar dmigs par 'gyur/ /zhes bya ba ni gser la sogs pa'i dngos por zhes bya ba'i tha tshig go//'di la rnam par 'byed grub pa/ /zhes bya ba ni shes rab grub pa zhes bya ba'i tha tshig go/ /blo ldan zhes bya ba ni glo grub pa dang ldan pa'i phyir te/ byang chub sems dpa' nyid blo ldan no/ /zhi ba thob pa'i zhes bya ba ni ting nge 'dzin thob pa'o/ / chos kun yid la byed pa la/ /zhes bya ba ni mdo'i sde dang dbyangs kyis bsnyad pa'i sde la sogs pa'i chos thams cad do/ /de ltar don du snang phyir ro/ /zhes bya ba ni ji ltar ji ltar mdo'i sde la sogs pa bdag med pa la sogs pa'i rnam par yid la byed pa de lta de ltar de dag gi don snang bar 'gyur ba'i phyir te/yid la byed pa nyid gzung ba dang 'dzin pa nyid du de la snang bar 'gyur gyi/ phyir rol gyi don gang yang med par mngon no/ /ye shes rgyu ba rtog med la/ /zhes bya ba la sogs pa ni don du grub pa med ces bya bar sbyar te/ gang gi phyir rnam par mi rtog pa'i ye shes mngon du gyur pa la don thams cad mi snang bas de'i phyir yang don med par khong du chud par bya'o//de med pas na rnam rig med/ /ces bya ba ni don med pa'i phyir te/ de'i phyir rnam par rig pa yang med par khong du chud par bya'o/ /rnam par shes par bya ba'i don med na rnam par rig par mi rung ngo zhes shes bya'i mtshan nyid bshad pa nyid du sngar legs par rnam par phye zin to//shes rab kyi pha rol tu phyin pa dang rnam par mi rtog pa'i ye shes ni khyad par med de zhes bya ba ni mtshungs pa ste/ rnam par mi rtog pa'i ye shes gang yin pa de nyid shes rab kyi pha rol tu phyin pa ste/ 'di ltar de nyid las kyang /byang chub sems dpa' shes rab kyi pha rol tu phyin pa la mi gnas pa'i tshul gyis gnas nas de las gzhan pa'i pha rol tu phyin pa rnams bsgoms pas yongs su rdzogs par 'gyur ro zhes 'byung ngo / /de ji lta bu zhe na/ gnas rnam pa lnga yongs su spong ba'i phyir zhes bya ba smos te/ mu stegs can gyi ngar 'dzin pa'i gnas yongs su spong zhes bya ba la sogs pas gnas lnga bstan to/ /'di la gnas pas gnas te bdag cag gi shes rab kyi bdag cag gis rab tu shes so zhes mu stegs can rnams ngar 'dzin pa la gnas so/ /gnas de ni byang chub sems dpas yongs su spong ste/nga dang nga'i zhes bya ba shes rab la mi 'byung ngo / /de yongs su spangs pa'i phyir mi gnas pa'i tshul gyis shes rab kyi pha rol tu phyin pa la gnas pa yin no/ /de kho na ma mthong ba'i byang chub sems dpa' ni shes rab kyi pha rol tu phyin pa rnam par mi rtog pa yin na shes rab kyi pha rol tu phyin pa zhes rnam par rtog pa la gnas pa lta bu ste/gnas de byang chub sems dpas yongs su spong ngo / /de ltar na mi gnas pa'i tshul gyis de la gnas pa yin te/ ji skad du/ /khyod nyid mthong ba 'ching ba ste/ ma mthong ba yang 'ching bar 'gyur/ /khyod nyid mthong ba grol ba ste/ma mthong ba yang grol bar 'gyur/ /zhes bshad pa lta bu'o/ /'khor ba dang mya ngan las 'das pa'i mtha' gnyis kyi gnas yongs su spong ba zhes bya ba ni ji ltar 'jig rten pa dag nga rgyal dang bcas pa'i phyir 'khor ba'i mtha' la gnas pa dang / ji ltar 'phags pa nyan thos dag nyon mongs pa spangs pa'i phyir mya ngan las pa'i mtha' la gnas pa ltar/byang chub sems dpa' rnams ni de lta ma yin te/ de lta bas na mtha' de gnyi ga'i gnas yongs su spangs pas mi gnas pa'i tshul du'o/ /nyon mongs pa'i sgrib pa spangs pa tsam gyis chog par 'dzin pa'i gnas zhes bya ba ni nyan thos rnams kyi ste/de tsam gyis don byas par sems dpa'i phyir ro/ /de ni sems can gyi don gyi bar chad byed pas byang chub sems dpa' rnams kyis yongs su spong ste/ ji skad du/ /dmyal bar 'gro ba byang chub la/ gtan du bgegs byed ma yin gyi/ / rang sangs rgyas kyis dang ni/ /nyan thos sa dag bgegs byed do/ /zhes bshad pa lta bu ste/ gnas de yongs su spangs pas mi gnas pa'i tshul du'o/ /sems can gyi don la mi lta ba phung po'i lhag ma med pa'i mya ngan las 'das pa'i dbyings kyi gnas zhes bya ba ni nyan thos rnams/ sems can gyi don la mi lta bar phung po'i lhag ma med pa'i mya ngan las 'das pa la gnas te/ shing tshig pa'i me bzhin du mya ngan las 'das pa'o/ /de ni byang chub sems dpa' rnams kyis yongs su spong ste/ shes rab dang snying rjes mi gnas pa'i mya ngan las 'das pa'i phyir ro/ / de yongs su bor bas mi gnas pa'i tshul du bshad par bya'o/ /nyan thos kyi ye shes las byang chub sems dpa'i ye shes rnam pa lngas khyad par du ston te/ rnam par mi rtog pa'i khyad par zhes bya ba ni nyan thos rnams ni phyin ci log bzhi la rnam par mi rtog go/ /byang chub sems dpa' rnams ni byang chub ces bya ba'i bar du chos thams cad la rnam par mi rtog go//nyi tshe ba ma yin pa'i khyad par ni rnam pa gsum ste/ de kho na rtogs pa nyi tshe ba ma yin pa ni nyan thos rnams de kho na'i phyogs gcig gang zag la bdag med par rtogs pa'o/ /byang chub sems dpa' rnams ni gang zag dang chos gnyi ga la bdag med par rtogs so//shes bya'i nyi tshe ba ma yin pa ni nyan thos rnams sdug bsngal la sogs pa'i bden pa tsam la shes pa skyed de/ de tsam gyis don byas pa'i phyir ro/ /byang chub sems dpa' rnams ni shes bya thams cad la ni shes pa bskyed de/ sems can rnams la nyi tshe ba ma yin pa ni nyan thos rnams ni bdag gi don du zad pa dang mi skye ba shes pa la sbyor ba'o//byang chub sems dpa' rnams ni sems can thams cad kyi ched du byang chub chen por sbyor te/ rnam pa 'di gsum ni nyan thos dang byang chub sems dpa' gnyis kyi nyi tshe ba ma yin pa'i khyad par ro//mi gnas pa nyid khyad par yin pas mi gnas pa'i khyad par te/ nyan thos rnams ni mya ngan las 'das pa la gnas so/ /byang chub sems dpa' rnams ni snying rje dang ye shes kyi dbang gis mya ngan las 'das pa la mi gnas so/ /gtan du ba'i khyad par zhes bya ba ni nyan thos dang byang chub sems dpa'i mya ngan las 'das pa'i khyad par ston te/nyan thos rnams ni mar me'i 'od bzhin du phung po'i lhag ma med pa'i mya ngan las 'das par zad par 'gyur ro/ /byang chub sems dpa' rnams ni sangs rgyas su gyur nas gzugs med pa bzhin du chos kyi skus 'khor ba ji srid par gnas so//gong na med pa'i khyad par zhes bya ba'i khyad par 'dis kyang de dag gi ye shes khyad par du 'phags te/ nyan thos rnams kyi gong na ni rang sangs rgyas kyi theg pa dang / theg pa chen po yang yod do/ /byang chub sems dpa' rnams kyi sangs rgyas kyi theg pa'i gong na ni theg pa gzhan med pas rnam pa lnga po 'di dag ni nyan thos dang byang chub sems dpa'i ye shes kyi khyad par du rig par bya'o//don de nyid tshigs su bcad pas sdud de/ snying rje'i bdag nyid ye shes kyis/ /rnam lnga khyad par 'phags pa rnams/ /zhes bya ba la sogs pa ste/ rnam pa lnga bshad zin to//'jig rten 'jig rten 'das pa yi/ /zhes bya ba ni 'jig rten pa dang 'jig rten las 'das pa ste/ 'jig rten pa'i phun sum tshogs pa ni bsam gtan dang gzugs med pa rnams so/ /'jig rten las 'das pa ni mya ngan las 'das pa khyad par du 'phags pa'o//de'i bgegs su gyur ba'i las mthong ba'i phyir zhes bya ba ni byang chub sems dpa' rnams la mthu mnga' yang ci'i phyir gzhan la nor la sogs pa mi sgrub pa de brjod de/ de'i zhes bya ba ni longs spyod rnams dang sbyar ro/ /longs spyod rnams kyi bar du gcod pa'i las mthong nas spyad du med pa'i phyir sbyin pa 'bras bu med par 'gyur du 'ong zhes de dag la mi sbyin te/gal te de dag la longs spyod phun sum tshogs pa bsgrubs kyang longs spyod mi nus pas 'di bsgrubs kyang ci phan snyam mo/ /dper na/ ma ni byis pa'i bu rnams la/ nu zho blud par nus mod kyi/ /kha yi bug zums pa yi//bu la mas ni ji ltar bya/ /zhes bshad pa lta bu'o/ /longs spyod de nye bar sgrub na dge ba'i chos skye ba'i bar du gcod pa nyid du mthong ba'i phyir zhes bya ba ni longs spyod bsgrubs pa la spyod pa'i bgegs su gyur pa'i las med du zin kyang / gal te 'di ltar de longs spyod phun sum tshogs pa rnyed nas bag med pas dge ba'i chos skye bar mi 'gyur bar mthong na mi sgrub ste/'di ni mthong ba'i chos la dbul por gyur pa ni bla'i/ 'di tshe rabs gzhan dag na yang longs spyod phun sum tshogs pa dang bral bar gyur na mi rung ngo zhes mi sgrub po/ /'di lta bus kyang mi sgrub ste/ kun du skyo ba mngon du gyur par mthong ba'i phyir//zhes bya ba'o/ /bdag ni dbul po'o zhes gang zhig kun du skyo ba mngon du gyur par mthong na de la yang mi sgrub ste/ longs spyod bsgrubs pas bde bar gyur na kun du skyo ba mngon du gyur ba med par 'gyur te/ des kyang dge ba'i chos rnams mi skye bar gyur na mi rung ngo snyam mo//mi dge ba'i chos sogs pa'i rgyu nyid du mthong ba'i phyir zhes bya ba ni gang longs spyod chen po bsgrubs phun sum tshogs pa des rgyags nas mi dge ba'i chos la sogs par mthong ba de la yang mi sgrub ste/ dper na blo gros yangs pa rnams la nor med dger 'gyur te//nyis na dbul bar gyur nyid bla yi sdig spyod de lta min/ /ma rabs sems rgyags gyur na dbang po'i rta 'khrul te/ /rigs pa min dang phongs pa kun gyi snod du 'gyur/ /zhes bshad pa lta bu'o/ /sems can ches mang ba dag la gnod pa'i rgyu nyid du ma thob pa'i phyir zhes bya ba ni su dbang phyug thob nas sems can shin tu mang po dag la gnod par byed pa de la yang mi sgrub ste/'di gcig pu dbul ba'i sdug bsngal myong ba ni bla'i/ 'dis gzhan mang po la gnod pa byas na mi rung ngo snyam mo/ /don de nyid tshigs su bcad pas sdud de/ las dang sgrib dang mngon gyur dang / /zhes bya ba la sogs pa'o//lhag pa'i shes rab kyi bslab pa bshad zin to/ /mi mthun pa'i phyogs spang ba'i phyir rnam par mi rtog pa'i ye shes ni gnyen po nyid yin pas de'i 'og tu spong ba'i khyad par brjod do/ /mi gnas pa'i mya ngan las 'das pa zhes bya ba ni 'jig rten pa dang nyan thos ltar 'khor ba dang mya ngan 'das pa la mi gnas pa'i phyir ro//nyon mongs pa yongs su btang ba dang bcas pa zhes bya ba ni kun nas nyon mongs pa rnams dang / de yongs su btang ba dang bcas pa ste/ de'i mthu la gnod pa'i phyir ro/ /'khor ba yongs su mi gtong pa'i gnas te/ gnas gyur pa zhes bya ba ni gnas gyur pa de la gzugs med pa bzhin du gnas pa ni shes rab kyi khyad par dang ldan pa'i phyir nyon mongs pa rnams kyi skabs kyang mi 'byed la/ snying rje'i gzhan gyi dbang gis 'khor ba yang mi 'dor ro/ /gnas ni gang de'i gyur pa ni gang zhe na/ 'khor ba ni gzhan gyi dbang gi ngo bo nyid de zhes bya bas ston to//'khor ba ni 'khrul ba'i sems dang sems las byung ba rnams te/ skye ba dang 'chi ba'i dpyangs thag la 'phyang mo nyug pa'i rgyun mi 'chad pa'i phyir ro/ /kun nas nyon mongs pa'i cha zhes bya ba ni kun brtags pa'i rnam pa'i chas so/ /mya ngan las 'das pa ni de nyid rnam par byang ba'i char gtogs pa ste/kun brtags pa'i dngos po med pa'i char gtogs pa'o/ /gnas ni de nyid gnyi ga'i char gtogs pa ste/ gzhan gyi dbang ngo / /gang gi gnas she na/ gyur ba'i ste 'brel pa'i phyir ro/ /de gyur pa ni de yongs su gyur pa'o//yang na sangs rgyas kyi chos rnams kyi gnas te/ ji skad du/ sa dang pha rol phyin pa ni/ /sangs rgyas chos kyi gnas yin no/ /gnas gyur pa ni 'bras bu ste/ /chos kyi sku zhes brjod pa yin/ /zhes bshad pa lta bu'o/ /ji ltar ni 'gyur gyur pa de gang yin snyam pa la/gzhan gyi dbang 'khrul pa'i bdag nyid de'i gnyen po skyes na zhes bya ba smos te/ rnam par mi rtog pa'i ye shes skyes na'o/ /kun nas nyon mongs pa'i cha ldog cing zhes bya ba ni 'khrul pa'i cha gzung ba dang 'dzin pa nyid de/ ldog pa ni gzhan du gyur pa'o/ / rnam par byang ba'i char gyur pa/ /zhes bya ba ni gzung ba dang 'dzin pa med pa'i dngos por te/ gzung ba dang 'dzin pa med pa nyid ni so so rang gis rig par bya ba brjod du med pa'o/ /nyam chung bar byed cing rgyas par gyur pa ste/ mos pa'i dbang gis thos pa'i bag chags bskyed pa'i stobs kyis rnam par smin pa'i rnam par shes pa la gnas pa'i nyon mongs pa'i bag chags nyam chung bar byed cing rnam par byang ba rgyas par 'gyur ba'o//mos pa dang thos pa'i bag chags gnas pas 'dzems pa dang bcas pa la nyon mongs pa chung ngu kun du 'byung ba'am kun du mi 'byung bar 'gyur ro//rtogs nas gyur pa ni sar chud pa'i byang chub sems dpa' rnams kyi ste zhes bya ba la sogs pa ste/ de kho na dang de kho na yin pa snang ba ste/ bar chad dang bcas pa dang / bar chad med par rnam par mi rtog pa'i ye shes kun du 'byung ba'i phyir de la res 'ga' ni de kho na snang /res 'ga' ni de kho na ma yin pa snang ste/ langs pa'i 'og tu ste sa drug pa'i bar du'o/ /bsgoms pas gyur pa ni sgrib pa dang bcas pa rnams kyi ste zhes bya ba la sogs pa ni shes bya'i sgrib pa dang bcas par gyur pa'i mtshan ma thams cad mi snang ba dang / de kho na nyid snang bar gnas gyur pa gang yin pa de ste/sa bcu pa'i bar du'o/ /'bras bu yongs su rdzogs par gyur pa ni sgrib pa med pa rnams kyi ye shes zhes bya ba la sogs pa ni gang sgrib pa thams cad kyis sgrib pa med par gyur pa'i mtshan ma thams cad mi snang bar gyur pa dang / sgrib pa thams cad med pa'i phyir de shin tu rnam par dag pa'i de kho na snang ba dang mtshan med dag nyid la dbang thob par gyur ba'i gnas yin te/'di ltar mtshan ma la dbang thob pa de nyid kyis ji ltar 'dod pa bzhin du sems can gyi don byed do/ /gyur pa dam pa ni go bla ste/ bshad pa nyid kyis de bshad pa yin no/ /gyur pa rgya che ba ni byang chub sems dpa' rnams kyi ste zhes bya ba la sogs pa la/kun nas nyon mongs pa spong zhing de yongs su mi gtong ba'i phyir zhes bya ba ni kun nas nyon mongs pa med pa'i phyir ro/ /de yang yongs su mi gtong ba ni 'khor ba de nyid la zhi bar mthong bas so//gyur pa dman pa'i nyes dmigs ni go bla bas ma bshad do/ /gyur pa rgya che ba'i phan yon ni chos thams cad la dbang 'byor pa thob nas de skal ba mnyam pa'i lus thams cad kun du ston pas thabs rnam pa sna tshogs kyis mngon bar ma tho ba 'jig rten pa'i phun sum tshogs pa dang /theg pa gsum la gdul ba la skal ba can rnams 'dul zhing 'god de chos nyid khong du chud par byed pa ni phan yon yin no/ /gnas gyur ba'i skabs nas tshigs su bcad pa/ byis pa rnams la yang dag bsgribs/ /yang dag ma yin kun du snang //zhes bya ba la sogs pa'o/ /ma rig pa ma spangs pa rnams la ni de kho na mi snang ste/ de'i phyir bsgribs pa zhes bya'o/ /byis pa rnams la ji ltar de kho na bsgribs nas ma rig pa'i dbang gis de kho na ma yin pa kun du snang ba de ltar byang chub sems rnams la ni ma yin te/ ma rig pa spangs pa'i phyir bdag la ni de kho na nyid snang ste/rig pas kyang de kho na ma yin pa med par rtogs pa'i phyir ro/ /de ltar byas na don med pa dang don yod pa/ /mi snang snang bar shes par bya/ /zhes bya ba la mi snang ba ni don med pa kun du brtags pa'o/ /snang ba ni don yod pa yongs su grub pa'i gdul de kho na ma yin pa mi snang ba dang de kho na snang ba 'di ni gnas gyur pa'o//'dod dgur sgyur phyir thar pa yin/ /zhes bya ba ni gnas gyur pa de nyid thar pa ste/ rang dbang yod pa'i phyir ro/ /'jig rten na yang 'dod dgur sgyur ba 'thob pa ni 'dod pa bzhin spyod pas grol ba zhes bya'o//'khor ba dang ni mya ngan lags/ /mtshungs par shes pa nam skye ba/ /zhes bya ba la/ 'khor ba zhes bya ba ni kun brtags pa'i ngo bo nyid do/ /de yang dngos po med pa nyid ni stong pa nyid de/ stong pa nyid ni mya ngan las 'das pa zhes bya'o/ /de ltar na gtong ba ma yin te/'di ltar 'khor ba nyid de'i mya ngan las 'das par 'gyur ro/ /mi gtong min te/ 'di ltar de yang 'khor ba la 'khor ba'i 'du shes mi 'jug go/ /thob pa ma yin te/ 'di ltar 'khor ba las gud na mya ngan las 'das pa mi rnyed do/ /mi 'thob min te/ 'di ltar de nyid de'i mya ngan las 'das pa'o//spong ba'i rnam par 'grel ba'o/ /spong bar bya ba spangs pas ye shes dri ma med cing thogs pa med par 'gyur bas na spong ba'i khyad par gyi 'og tu ye shes kyi khyad par brjod do/ /ngo bo nyid kyi zhes bya ba ni bcos ma ma yin pa'i phyir ro/ /sku ni bstsags pa lta bu ste/ chos rnams kyi sku ni chos nyid kyi sku'o/ /chos thams cad la dbang sgyur ba'i gnas yin pa'i phyir ro zhes bya ba ni 'di ni chos thams cad la dbang sgyur ba'i gnas dang ldan pa'i phyir ro/ /yang na chos thams cad la dbang sgyur ba yang yin la gnas kyang yin no/ /longs spyod rdzogs pa'i sku ni gang sangs rgyas kyi 'khor gyi dkyil 'khor sna tshogs kyis rab tu phye ba ste/bde ba can la sogs pas rab tu phye ba'o/ /chos kyi sku la bstan pa zhes bya ba ni de yod na de yod pa'i phyir ro/ /sangs rgyas kyi zhing yongs su dag par bya ba'i phyir theg pa chen po'i mdo la sogs pa'i chos myong ste/de'i don rtogs pa'i phyir ro/ /yang na sangs rgyas kyi zhing yongs su dag pa gser la sogs pa'i rang bzhin can dang chos myong bar mdzad pa ste/ sngon gyi tshogs kyi 'phen pa'i mthus so/ /rnam par mi rtog cing dri ma med la thogs pa med pa'i ye shes sngon du 'gro ba'i ye shes de'i dbang gis rnam par thar pa bsam gyis mi khyab pa la gnas pas sa chen por chud pa'i byang chub sems dpa' rnams la sangs rgyas kyi zhing yongs su dag pa dang /theg pa chen po'i chos la longs spyod par snang ba'i ye shes skye'o/ /sprul pa'i sku ni gang chos kyi sku la brten pa nyid de snga ma bzhin no//ye shes kyi khyad par de'i mthus dga' ldan gyi gnas na bzhugs pa nas bzung ste/ yongs su mya ngan las 'das pa/ /zhes bya ba'i bar skal ba can rnams kyi rgyud gzhan dag la ming dang skal ba mnyam par snang ba'i rnam par rig pa rnams 'byung ngo / /'dir sdom gyi tshigs su bcad pa zhes bya ba ni bsdoms pa'i don bstan pa ni sdom mo//mtshan nyid dang ni thob pa dang / /zhes bya ba la sogs pa la/ mtshan nyid lnga zhes bya ba ni bstan pa'o/ /gnas gyur pa'i mtshan nyid ces bya ba la sogs pa ni bshad pa'o/ /sgrib pa thams cad kun nas nyon mongs pa'i char gtogs pa'i gzhan gyi dbang gi ngo bo nyid rnam par log na zhes bya ba ni gzhan gyi dbang gi kun nas nyon mongs pa'i cha gzung ba dang /'dzin pa'i dngos po gang yin pa de'i gzung ba dang 'dzin pa rnam par log par gyur na sgrib pa las rnam par grol ba'i phyir ro/ /chos thams cad la dbang sgyur ba nye bar gnas pa rnam par byang ba'i char gtogs pa'i gzhan gyi dbang gi ngo bo nyid du yongs su gyur te/gzung ba dang 'dzin pa'i dngos po'i ngo bo nyid las gyur pa'o/ /dkar po'i chos kyi rang bzhin gyi mtshan nyid ni nyan thos rnams kyi gnas gyur pa ni nyon mongs pa spangs pa tsam gyis rab tu phye ba'i phyir dkar po'i chos kyi rang bzhin ma yin gyi/byang chub sems dpa' rnams ni pha rol tu phyin pa yongs su rdzogs pa dkar po'i chos kyi rang bzhin nyid de/ de la ni lung du ma bstan pa'i gnas skabs kyang gang yang med na nyon mongs pa can gyi gnas skabs ltag la yod/dbang bcu ston te/ tshe la dbang ba ni ji ltar 'dod pa bzhin du 'chi ba'i phyir ro/ /sems la dbang ba ni gang 'khor ba kun nas nyon mongs pa med pa dang / gzhan dag gi bsam pa ji lta ba bzhin du yo byad kyang sgrub cing de la de dag gi sems gtong pa'o/ /yo byad la dbang ba ni zas la sogs pa'i yo byad rnams ji ltar bsams pa bzhin du gnas pa'i phyir ro//yo byad ni 'tshog chas zhes bya ba dang don gcig ste/ bsam pa ji ltar ba bzhin du sems can rnams la yo byad sbyin pa'i phyir ro/ /sbyin pa'i pha rol tu phyin pa yongs su rdzogs pa'i phyir ro zhes bya ba ni gsum char yang de'i 'bras bu yin pa'i phyir ro//las la dbang ba ni lus dang ngag gi las ji ltar bsams pa bzhin du gnas pa'i phyir te/ sems can rnams kyang de la 'dzud pa'i phyir ro/ /skye ba la dbang ba ni ji ltar bsams pa bzhin du 'gro ba rnams su skye ba'i phyir te//ji skad du/ tshul khrims dang ldan pa'i smon pa 'grub po zhes gsungs pa lta bu'o/ /mos pa la dbang ba ni ji ltar mos pa bzhin du sa la sogs pa gser la sogs par bsgyur bas de'i mos pa'i rjes su 'jug pa'i phyir ro/ /bzod pa'i pha rol tu phyin pa'i 'bras bu ni/ ji ltar sngon sems can thams cad kyi sems dang mthun par byas pa de bzhin dus la sogs pa yang de'i mos pa'i rjes su mthun par 'gyur ro//smon lam la dbang ba ji ltar smon lam btab pa bzhin du don 'grub pa'i phyir ro/ /brtson 'grus kyi pha rol tu phyin pa'i 'bras bu ni sngon sems can gyi don la brtson 'grus ma btang ba'i phyir ro//mngon par shes pa lngas bsdus pa'i rdzu 'phrul la dbang ba ni ji ltar bsams pa bzhin du mngon par sgrub pa'i phyir ro/ /bsam gtan gyi 'bras bu ni sngon sems can rnams kyi dgos pa ji lta ba bzhin du bsam gtan la snyoms par zhugs pa'i phyir ro//ye shes la dbang ba ni ji ltar bzhed pa bzhin ye shes mngon sum du mdzad pa'i phyir ro/ /chos la dbang ba ni mdo'i sde dang dbyangs kyis bsnyad pa'i sde la sogs pa bsam pa ji lta ba bzhin du ston pa'i phyir te/ sngon gzhan dag la ji ltar 'dod pa bzhin du ye shes btang ba'i phyir ro//shes rab kyi pha rol tu phyin pa'i 'bras bu'i khyad par ro/ /yod pa dang med pa gnyis su med pa'i mtshan nyid kyis zhes bya ba la yod pa'i mtshan nyid ma yin pa ni/ chos thams cad dngos po med pa'i bdag nyid yin pa'i phyir ro/ /med pa'i mtshan nyid ma yin pa ni/stong pa nyid kyi ngo bo nyid yin pa'i phyir ro/ /'dus byas dang 'dus ma byas gnyis su med pa'i mtshan nyid ces bya ba ni/ las dang nyon mongs pa rnams kyis mngon par 'dus ma byas pa'i phyir 'dus byas kyi mtshan nyid ma yin no/ /chos 'dus byas su snang ba kun du ston pa la dbang 'byor pa thob nas de dag la yang dang yang ston pa'i phyir 'dus ma byas kyi mtshan nyid ma yin no//tha dad pa dang lhan cig pa gnyis su med pa'i mtshan nyid ces bya ba ni chos kyi sku gcig pa'i phyir tha dad pa'i mtshan nyid ma yin no/ /gnas tshad med pa dag gis 'thob pa'i phyir gcig pa'i mtshan nyid ma yin no//'di gnyis las gang yang rung ba gcig med pa'i phyir gnyis su med pa'o/ /rtogs par sla bar bya ba'i phyir don de nyid tshigs su bcad pa gnyis kyis sdud de/ bdag tu 'dzin pa med pa'i phyir/ /zhes bya ba la sogs pa'o/ /gang la nga'o snyam du 'dzin pa yod pa de la ni 'di ni gzhan no zhes bya ba yod la/gang la gzhan zhes bya ba ni rnam par gcod pa yod pa de na tha dad pa yod kyi chos kyi sku la ni bdag tu 'dzin pa gang yang med pas tha dad pa med do/ /gal te tha dad pa med na ji ltar sangs rgyas nyid mang snyam pa la/ sngon gyi rjes su 'brang bas na/ /de la gdags pa tha dad byed//ces bya ba smos te/ byang chub sems dpa'i gnas skabs kyi rjes su 'gro bas 'di ni shAkya thub pa'o/ /'di ni rnam par gzigs so zhes tha snyad dang mthun par byas pa'i phyir ro/ /tha dad rigs phyir sangs rgyas nyid gcig ma yin no/ /rigs ni skye mched drug gi khyad par te/de ni tha dad de/ rang bzhin du gnas pa dang yang dag par bsgrubs pa'i phyir ro/ /de tha dad pas sbyor ba yang tha dad de/ de las sangs rgyas ni gcig yin gyi/ gzhan du ma yin no zhes bya ba mi rigs so/ /don med phyir zhes bya ba ni sangs rgyas nyid mang po nyid ces bya bar sbyar te/sangs rgyas nyid gcig tu zad na ni so so'i tshogs rnams don med par 'gyur ro/ /kun phyir zhes bya ba ni sangs rgyas rnams ni theg pa gsum po dag la 'god pa'i phyir so sor sems can gyi don mtha' dag la nan tan mdzad do/ /gal te sangs rgyas gcig kho na yin na ni sangs rgyas gnyis pa med pa'i phyir de sems can rnams sangs rgyas nyid la 'jog par mi mdzad pas sangs rgyas kyi mdzad pa mtha' dag mdzad par ma gyur te/de'i phyir sangs rgyas nyid mang po nyid du shes par bya'o/ /thog ma med pa'i phyir zhes bya ba ni 'khor ba bzhin du sangs rgyas bcom ldan 'das rnams la yang thog ma'i mtha' med par 'dod de/sangs rgyas gzhan la bsnyen bkur ma byas pa'i byang chub sems dpa'i sangs rgyas nyid ni rgyu med pa las byung bar gyur du 'ong ngo / /de lta bas na gcig pa ma yin no/ /mang po yang ma yin te/dri ma med pa'i gnas la tha dad pa med pa'i phyir ro/ /dri ma med pa'i gnas ni 'dir chos kyi dbyings su 'dod de/ ye shes kyi bye brag gis glo bur dri ma spangs pa'i phyir te/ de la tha dad pa med do/ /rtag pa'i mtshan nyid ces bya ba ni ther zug gi mtshan nyid do/ /de bzhin nyid rnam par dag pa de ni rtag pa ste/gzhan du na de bzhin nyid ces bya ba yang med par 'gyur ro/ /sngon gyi smon lam gyi shugs kyi phyir zhes bya ba ni des sngon 'di skad du sems can tshad med pa dag yongs su mya ngan las bzla'o zhes smon lam btab pa yang rtag pa nyid med du zin na de grub par mi 'gyur ro/ /smon lam btab tu zin kyang sems can mtha' yas pa'i phyir bya ba yongs su rdzogs par mi 'gyur te/sems can ji srid par gnas pa'i phyir rtag pa nyid do/ /bsam gyis mi khyab pa'i mtshan nyid ni de bzhin nyid rnam par dag pa de so so rang gis rig par bya ba zhes bya ba la sogs pa la/ bsam pa zhes bya ba ni rigs pa nges par sems pa las byung ba'i shes pa ste/rtog ger rtogs pa dper shes par bya ste/ de'i spyod yul ma yin pas rtog ge'i sa la yang dag par 'das pa'i phyir bsam gyis mi khyab pa nyid do/ /chos kyi sku ni mos pa dang chos spyod pa rnams kyis kyang thog ma nyid du 'thob pas na reg pas 'thob ces bye brag tu byas te/'thob pas rnyed pa yin no/ /rtag pa'i phyir bskyed pa zhes ni mi brjod do/ /theg pa chen po'i chos 'dres/ pa la dmigs pa rnam par mi rtog pa zhes bya ba la sogs pa'i don ni brda phrad par zad de/ /rnam pa lnga legs par bsgoms pa zhes bya ba la/rnam pa lnga ni skad cig re re la gnas ngan len gyi gnas thams cad 'jig par byed pa dang / sna tshogs kyi 'du shes dang bral te/ chos kyi kun dga' la dga' ba thob pa dang / chos kyi snang ba thams cad du tshad med cing rnam pa yongs su ma chad pa yang dag par shes pa dang /rnam par dag pa'i cha dang mthun pa'i mtshan ma rnam par brtags pa ma yin pa rnams de la kun du 'byung ba dang / chos kyi sku yongs su rdzogs pa dang yongs su grub par bya ba'i phyir gong ma bas ches gong ma'i rgyu yongs su 'dzin par byed pa'o/ /sgrib pa srab mo gzhig par dka' ba shigs pa'i phyir zhes bya ba ni rdo rje lta bu'i mtshan ma ston te/dper na rdo rjes ni shin tu sra ba gzhig par dka' ba'i rdo rje yang phigs so/ /de bzhin du ting nge 'dzin 'di yang de las gzhan pa'i shes pa rnams kyis gzhig par dka' ba nyon mongs pa can ma yin pa'i mi shes pa'i rnam pa shin tu sra ba gzhig pa'i phyir ye shes kyi de ma thag pa'i lam yin pas rdo rje dang bstun pa ste/ting nge 'dzin des ni sgrib pa thams cad dang bral lo/ /de dag gis gnas gyur pas 'thob bo zhes bya ba ni rnam par mi rtog pa dang de'i rjes la thob pa'i ye shes de gnyis kyis gnas gyur pa chos kyi sku 'thob bo//'byor pa rnam pa lngas zhes bya ba ni phung po lnga gyur pas so/ /nyan thos ni sdug bsngal gyis 'jigs pa'i phyir mdze can lus 'dor ba bzhin du phung po'i rgyun gcod do/ /byang chub sems dpa' ni thabs yongs su bzung ba'i phyir mdze can sgrin po sman bcud kyis len la brtan pa bzhin du kha na ma tho ba med pa nyid du sgyur ro//de la gzugs kyi phung po gyur pas sangs rgyas kyi zhing la dbang 'byor te/ ji ltar 'dod pa bzhin du gser la sogs pa'i rang bzhin du ston pa'i phyir ro/ /lus bstan pa la dbang 'byor te/ ji ltar bsams pa bzhin du lus 'gyur ba dang 'khor gyi dkyil 'khor tha dad pa rnams su skal ba ji lta ba bzhin du sems can rnams la ston pa'i phyir ro//mtshan dang dpe byad bzang po la dbang 'byor te/ mtshan de dang dpe byad bzang po de dang de ji ltar 'dod pa bzhin du rab tu ston pa'i phyir ro/ /sangs rgyas kyi gsung dbyangs mtha' yas pa dang /spyi gtsug bltar mi mthong ba la yang dbang 'byor to/ /tshor ba'i phung po gyur pas ni kha na ma tho ba med cing tshad med la/ rgya che ba'i bde bar gnas pa la dbang 'byor pa 'thob ste/ de la kha na ma tho ba med pa ni nyon mongs pa med pa'i phyir ro/ /tshad med pa ni sna tshogs kyi phyir ro//rgya che ba ni khams gsum pa'i bde ba las shin tu 'das pa'i phyir ro/ /'du shes kyi phung bo gyur pas ni bstan pa la sogs pa la dbang 'byor ba thob ste/ 'di ltar 'du shes ni mtshan mar 'dzin pa'i bdag nyid de/ don yongs su gcod pa'o/ /ji ltar 'du shes su 'gyur ba de lta bu ming gi tshogs la sogs pas rjes su tha snyad 'dogs so//'du byed kyi phung po gyur pas ni sprul pa dang bsgyur ba dang / 'khor bsdu ba dang / dkar po'i chos bsdu ba la dbang 'byor ba thob ste/ de la sprul pa la dbang 'byor ba ni ji ltar 'dod pa bzhin du sprul pa'i phyir ro/ /bsgyur ba la dbang 'byor ba ni sa la sogs pa ji ltar 'dod pa bzhin du gser la sogs pa dngos por bsgyur ba'i phyir ro//'khor bsdu ba la dbang 'byor pa ni ji ltar bsams pa bzhin du lha la sogs pa'i 'khor 'gugs pa'i phyir ro/ /dkar po'i chos bsdu ba la dbang 'byor pa ni ji ltar bsams pa bzhin du zag pa med pa'i chos mngon du byed pa'i phyir ro//rnam par shes pa'i phung po gyur pas ni me long lta bu dang / mnyam pa nyid dang / so sor rtog pa dang / bya ba sgrub pa'i ye shes la dbang 'byor pa thob ste/ de la me long lta bu'i ye shes ni dmigs pa mngon du ma gyur kyang bsnyel pa mi mnga' ba'o//mnyam pa nyid kyi ye shes ni sems can thams cad la mnyam par gzigs pa gang las byung ba'o/ /so sor rtog pa'i ye shes ni gang gis ting nge 'dzin dang / gzungs kyi sgo rnams dang / shes bya gzhan dag kyang ji ltar bzhed pa bzhin du thogs pa med par mkhyen pa'o//bya ba sgrub pa'i ye shes ni gang gis dga' ldan la sogs pa na gnas pa nas bzung ste/ mya ngan las 'das pa'i bar du de dag kun du ston pas sangs rgyas kyi mdzad pa sgrub pa'o/ /chos ji snyed cig gi gnas yin zhes bya ba ni 'dri bar smras pa'o//mdor bsdu na gsum gyis gnas te zhes bya ba ni rgyas par bya na yon tan tshad med pa rnams kyi gnas so/ /mdor bsdu na ni gsum gyi gnas te/ sangs rgyas kyi gnas pa sna tshogs kyis gnas zhes bya ba ni 'di ltar chos kyi sku la brten nas gnas pa rnam pa sna tshogs lha dang 'phags pa dang tshangs pa'i gnas pa rnams kyis gnas te/de'i phyir de ni de dag gi gnas so/ /de la lha'i gnas pa rnams kyi nang na ni bsam gtan bzhi pa la de bzhin gshegs pa rnams lan mang du gnas pa mdzad do/ /'phags pa'i gnas pa rnams kyi nang na ni stong pa nyid la gnas so//tshangs pa'i gnas pa rnams kyi nang na ni snying rje la gnas so/ /sna tshogs 'di dag gis nyan thos la sogs pa las khyad par du 'phags so/ /nyan thos kyi mya ngan las 'das pa las khyad par du bstan pa'i phyir/ gang phyir sangs rgyas rang gis dbyings brnyes nas/ /zhes bya ba la sogs pa smos so//rang gi dbyings brnyes zhes bya ba ni chos kyi dbyings brnyes pa'o/ /dga' dang bral zhes bya ba ni nyan thos rnams chos kyi dbyings de ma rnyed pas rnam pa lnga'i bdag nyid kyi dga' ba dang bral te/ mgo bcad pa dang 'dra ba'i mya ngan las 'das par mya ngan las 'da' bas dga' ba dang bral ba'o//de'i phyir/ de 'dod pas ni de thob byed/ /ces bya ba ni dga' ba rnam pa lnga 'dod pa'i byang chub sems dpas chos kyi dbyings de yang dag par thob par byed do/ /rnam pa lnga'i bdag nyid kyi dga' ba de gang zhe na/ mthu dang bya ba grub dang chos ro dang / /zhes bya ba la sogs pa smos te/dga' ba'i rgyu tha dad pa'i phyir ro/ /mthu ni nus pa ste/ de'i dpag tu med pa ni de de bzhin gshegs pa mthu dang ldan pa gang gA'i klung du ma'i bye ma bgrang ba las 'das pa rnyed kyi chos kyi sku la tha dad pa med pa'i phyir te/ thams cad kyang mthu mtshungs pa'i phyir ro/ / gang dag la mthu dpag tu med pa mnga' ba de dag la dgyes pa skye'o/ /dang zhes bya ba'i sgra ni bsdu ba'i don to/ /bya ba ni byed pa ste/ sems can gyi don te/ skal ba ji lta ba bzhin du theg pa gsum la 'god pa'o/ /de grub pa dpag tu med pa ni dus gsum po dag la yang thogs pa med pa'i phyir ro//de'i phyir mthu dpag tu med pa dang bya ba grub pa dpag tu med pa las dgyes pa skye ba'o/ /chos kyi ro ni mdo'i sde dang dbyangs kyis bsnyad pa'i sde'i chos dang ldan pa'o/ /dpag tu med pa ni 'dres pa'i phyir ro/ /de'i don ni mdo'i sde la sogs pa'i chos kyis brjod par par bya'o//de'i 'byor pa ni ji ltar yid la byed pa bzhin du snang ba'i phyir ro/ /chos kyi ro dpag tu med pa dang / don 'byor pa dpag tu med pa las dgyes pa skye'o/ /yon tan rnams ni mngon par shes pa la sogs pa ste/ de dag gi 'byor pa dpag tu med pa las dgyes pa skye'o//kha cig na re don ni mya ngan las 'das pa'am ji ltar 'dod pa'o/ /yon tan ni stobs la sogs pa zhe'o/ /rtag tu mi zad gzigs pas zhes bya ba ni mthu la sogs pa bdag la yod pa de bzhin nyid dang ro gcig pa de dag nyid mya ngan las 'das par yang yongs su zad pa med par gzigs nas dgyes pa skye'o//mchog ni khams gsum pa las yang dag par 'das pa'i phyir ro/ /kha na ma tho ba med pa ni bag chags dang bcas pa'i nyon mongs pa dang shes bya'i sgrib pa spangs pa'i phyir ro/ /chos kyi sku ni longs spyod rdzogs pa'i sku'i gnas nyid de de yod na kun du ston pa 'byung ba'i phyir ro//de ni nyi ma dang 'od zer gyi tshul lta bu yin no/ /sprul pa'i sku'i gnas zhes bya ba ni 'dir yang de nyid gnas kyi don to/ /phal cher zhes bya ba la sogs pas ni mos pas spyod pa'i byang chub sems dpa' bsdu ba'i phyir ro/ /nyan thos rnams ni dman pa la mos pa ste/de dag dang las dang po pa'i byang chub sems dpa' rnams ni sangs rgyas mthong ba med par yongs su smin par mi 'gyur ro/ /sa chen por chud pa rnams ni chos zab cing rgya che ba rtogs pa'i phyir sprul pa'i skus yongs su smin par bya ba ma yin no/ /bsdus pa ngo bo nyid kyis bsdus pa ni/sangs rgyas kyi chos rnam par dag pas zhes bya ba ste/ chos kyi sku'i ngo bo nyid gang yin pa de ston te/ chos kyi sku shin tu rnam par dag pa'i phyir ro/ /gang zhig rnam par dag pa'am/ gang zhig gyur pas yin snyam pa la/ kun gzhi rnam par shes pa gyur nas zhes bya ba smos te/kun nas nyon mongs pa thams cad kyi sa bon can de gnyen pos bstsal na yon tan kha na ma tho ba med pa mang po thams cad dang mthun par 'gyur te/ /dper na sman nang med kyis dug bsal na sman nad med du 'gyur ba bzhin du gyur pa brjod par bya'o//rnam par smin pas zhes bya ba ni sangs rgyas kyi chos kyis bsdus zhes bya bar sbyar ro/ /mig la sogs pa'i dbang po gyur nas zhes bya ba ni de dag rnam par smin pa yin pa'i phyir ro/ /de gyur pa yang sngon byung ba'i tshul gyis rnam par smin pa nyid du gnas te/ sngon byung ba'i tshul nyid kyis rnam par smin pa'i ye shes thob po//gnas pas zhes bya ba ni sangs rgyas kyi chos kyis bsdus pa'o/ /'dod pa la spyod pa la sogs pa la gnas gyur nas zhes bya ba la sogs pa smos pas ni mos pas spyod pa la sogs pa bsdu'o/ /de gyur pas gnas pa'i ye shes 'thob po//ye shes tshad med pas gnas pa thob pa'i phyir ro zhes bya ba ni gang gis lha la sogs pa'i gnas pa sna tshogs rnams kyis gnas so/ /dbang 'byor bas sa ni yongs su 'dzin pa'i las sna tshogs gyur nas zhes bya ba ni 'jig rten na zhing las dang la sogs pa yongs su 'dzin pa'i las sna tshogs gang yin pa de gyur nas 'jig rten gyi khams thams cad du thogs pa med pa'i mngon par shes pa'i ye shes 'thob bo//tha snyad pas/ zhes bya ba ni 'jig rten na mthong ba la sogs pa'i tha snyad gang yin pa de dag gyur nas mthong ba dang thos pa la sogs pa la dbang 'byor ba thob ste/des sems can thams cad kyi sems tshim par byed pa'i ye shes thob bo/ /sel babs zhes bya ba ni gang 'jig rten na mdza' bo dang nor gyi stobs kyis rgyal/ po'i pho brang 'khor ba la sogs pa nas byung ba'i gnod pa zhi bar byed pa ste/ de gyur nas sems can thams cad kyi gnod pa thams cad zhi bar byed pa'i ye shes 'thob bo//rnam pa drug po 'di dag gyur pas sangs rgyas kyi chos drug 'thob bo/ /gnas dang dgongs pa dang phrin las tha dad pa med pa gsum gyis sangs rgyas thams cad kyi chos kyi sku dbyer med do/ /gnas tha dad pa med pa ni de bzhin nyid tha dad pa med pa'i phyir ro//dgongs pa tha dad pa med pa ni thams cad kyang phan pa dang bde bar dgongs pa'i phyir ro/ /phrin las tha dad pa med pa ni thams cad kyang 'gro ba'i don mdzad pa'i phyir te/ mngon par rdzogs par byang chub pa dang yongs su mya ngan las 'das pa ston pa'i phrin las can yin pa'i phyir ro//lus tshad med pa mngon par rdzogs par byang chub par bya ba'i phyir tha dad pa zhes bya'o zhes bya ba ni 'di ltar lus gzhan dang gzhan tshad med pa rnams kyis byang chub sems dpa' dag mngon par rdzogs par sangs rgyas pa ste/ de'i phyir tha dad pa med pa ma yin te/ ji skad du sngar/ bdag tu 'dzin pa med pa'i phyir/ /gnas pa tha dad yod ma yin/ /sngon gyi rjes su 'brang bas na/ /de la gdags pas tha dad byed/ /ces bshad pa lta bu'o/ /de bzhin du gnyis pa la yang brjod par bya ste/ de gnyis kyi gnas ni chos kyi sku yin la/dgongs pa dang phrin las dag kyang tha dad pa med do/ /tha dad pa 'di ni 'khor gyi dkyil 'khor gzhan no/ /'di ni gzhan no zhes bya ba dang / 'di ni shAkya thub pa'o/ /'di ni rnam par gzigs so zhes bya'o/ /bcom ldan 'das kyis slob ma la sogs pa dang thun mong ma yin pa'i yon tan rnams kyang shin tu sbyangs pa'i phyir/khyad par du 'phags pa brjod de/ shin tu yongs su dag pa zhes bya ba ni nyon mongs pa dang shes bya'i sgrib pa spangs pa'i rgyud la yod pa'i phyir ro/ /tshad med pa zhes bya ba ni sems can tshad med pa la dmigs pa'i byams pa dang / snying rje dang dga' ba dang btang snyoms rnams so//so so yang dag par rig pa bzhi ni chos dang don dang nges pa'i tshig dang / spobs pa so so yang dag par rig pa'o/ /mngon par shes pa drug ces bya ba ni rdzu 'phrul dang / lha'i rna ba dang / sems kyi rnam grangs shes pa dang / sngon gyi gnas rjes su dran pa'i shes pa dang /'chi 'pho dang skye ba shes pa dang / zag pa zad pa shes pa'i bdag nyid do/ /skyes bu chen po'i mtshan sum cu rtsa gnyis ni phyag dang zhabs kyi mthil la 'khor lo yod pa la sogs pa'o/ /dpe byad bzang po brgyad cu ni sen mo mtho ba la sogs pa ste/ mdo las ji skad du 'byung ba bzhin no//de dag ni chos kyi sku dang ldan pa ste/ de yod na de dag kun du ston pa'i phyir ro zhes bshad pa yin no/ /rnam pa thams cad yongs su dag pa bzhi zhes bya ba ni gnas yongs su dag pa dang / dmigs pa yongs su dag pa dang / thugs yongs su dag pa dang / mkhyen pa yongs su dag pa'o/ /stobs bcu ni gnas dang gnas ma yin pa mkhyen pa'i stobs dang / las bdag gir bya ba mkhyen pa'i stobs dang / bsam gtan dang rnam par thar pa dang / ting nge 'dzin dang snyoms par 'jug pa mkhyen pa'i stobs dang / dbang po mchog dang mchog ma yin pa mkhyen pa'i stobs dang /mos pa sna tshogs mkhyen pa'i stobs dang / khams sna tshogs mkhyen pa'i stobs dang / thams cad du 'gro ba'i lam mkhyen pa'i stobs dang / sngon gyi gnas rjes su dran pa mkhyen pa'i stobs dang / 'chi 'pho dang skye ba mkhyen pa'i stobs dang / zag pa zad pa mkhyen pa'i stobs so//mi 'jigs pa bzhi ni nga yang dag par rdzogs par sangs rgyas pa la nga la chos 'di dag mngon par rdzogs par sangs ma rgyas so zhes 'dir nga la su yang rgol ba'i mtshan ma yang dag par mi mthong zhes bya ba ni mi 'jigs pa dang po'o/ /nga zag pa zad pa la nga zag pa 'di dag ma zad do zhes 'dir nga la su yang rgol ba'i mtshan ma yang dag par mi mthong ngo zhes bya ba ni mi 'jigs pa gnyis pa'o//ngas nyan thos rnams la nges par 'byung ba'i lam bshad pa de ni de byed pa'i sdug bsngal yang dag par zad par nges par 'byung ba ma yin no zhes 'dir nga la su yang rgol pa'i mtshan ma yang dag par mi mthong ngo zhes bya ba ni mi 'jigs pa gsum pa'o//ngas nyan thos rnams la bar du gcod pa'i chos gang dag bshad pa de dag bstan kyang bar du gcod par mi 'gyur ro zhes 'di rang la su yang rgol ba'i mtshan ma yang dag par mi mthong ngo zhes bya ba ni mi 'jigs pa bzhi pa'i//mtshan ma yang dag par rjes su mi mthong bas bde ba thob pa bag tsha ba med pa thob/ mi 'jigs pa thob nas gnas so zhes bya ba zhig kun la yang brjod par bya'o// //bam po bdun pa ste tha ma/ bsrung ba med pa gsum ni de bzhin gshegs pa'i sku'i phrin las kyi sbyong ba yongs su dag pa ste/de bzhin gshegs pa la ma ltos te gzhan gyis shes par gyur na mi rung ngo zhes bcas par bya ba sku'i phrin las yongs su ma dag pa med pa 'di ni bsrung ba med pa dang po'o/ /sku'i phrin las ji lta ba de bzhin du gsung gi phrin las dang /thugs kyi phrin las kyang brjod par bya'o/ /dran pa nye bar gzhag pa gsum ni de bzhin gshegs pa chos ston pa na kha cig gus par nyan cing rna ba gtod pa dang / kun shes par byed pa'i sems nye bar 'jog pa dang / chos kyi rjes su mthun pa'i chos sgrub kyang des de bzhin gshegs pa dgyes par mi 'gyur/yid bde bar mi 'gyur/ thugs ya ya por mi 'gyur ba dang / bzlog ste kha cig gus par mi nyan ces bya ba rgyas par sbyar te/ des de bzhin gshegs pa kun nas mnar sems su mi 'gyur/ mi bzod par mi 'gyur/thugs mi ches par mi 'gyur ba dang / kha cig gus par byas te nyan pa dang / kha cig gus par mi nyan kyang des de bzhin gshegs pa dgyes pa dang kun nas mnar sems gnyi gar mi 'gyur te/ de bzhin gshegs pa ni thams cad du yang dran pa dang ldan zhing mkhyen bzhin du btang snyoms can du bzhugs so//bsnyel ba mi mnga' ba'i chos nyid ni bag chags legs par bcom pa kho na'i phyir te/ 'og nas 'chad do/ /sangs rgyas kyi chos ma 'dres pa bco brgyad ces bya ba la/ thun mong ma yin pa'i don ni ma 'dres pa'i don to/ /de bzhin gshegs pa la 'khrul pa med pa ni 'di lta ste/dge slong dgra bcom pa zag pa zad pa bsod snyoms kyi phyir grong rgyu ba na res 'ga' glang po che gtum po dang / rta gtum po dang / ba rdung khus ma dang / khyi za ba dang / lhan cig 'gro ba dang / tshang tshing tsher mas 'dzings par 'gro ba dang / sbrul la rkang pa gnyis kas brdzis pa dang / gang du bud med mi rigs pa skyes pas bos pa'i khyim de lta bur 'jug pa dang / dgon par lam nor nas lam log par 'gro ba dang / chom rkun rnams dang / rkun po rnams dang / seng ge dang / stag dang / spyang ki dang lhan cig 'gro ba dang /de lta bu la sogs pa dgra bcom pa'i 'khrul pa de de bzhin gshegs pa la thams cad kyi thams cad du mi mnga'o/ /gzhan yang dgra bcom pa res 'ga' dgon pa na nags khrod chen por rgyu ba na lam nor te grong stong du phyin nas sgra 'byin pa dang / sgra sgrogs pa dang / ku co cher 'don pa dang /bag chags kyi nyes pa la brten nas nyon mongs pa can gyi gad mo rta gad mo snang bar dgod pa nye bar ston pa de lta bu'i dgra bcom pa'i ca co de/ de bzhin gshegs pa la thams cad kyi thams cad du mi mnga'o/ /de bzhin gshegs pa la bsnyel ba mi mnga' ba ste nyon mongs pa med par yun ring po nas mdzad pa dang gsungs pa rjes su dran pa'i phyir ro//gzhan yang dgra bcom pa ni snyoms par zhugs na mnyam par gzhag par 'gyur gyi/ langs na mnyam par gzhag pa ma yin no/ /de bzhin gshegs pa la ni gnas skabs thams cad du sems mnyam par ma bzhag pa med do/ /gzhan yang dgra bcom pa ni phung po la shin tu mi mthun pa'i 'du shes su mi 'gyur zhing /phung po med pa'i mya ngan las 'das pa la zhi ba'i 'du shes su 'gyur ro/ /de bzhin gshegs pa la ni phung po dang mya ngan las 'das pa la tha dad pa'i 'du shes mi mnga'o/ /gzhan yang dgra bcom pa la ni so sor ma brtags par sems can gyi don yal bar 'dor ro//de bzhin gshegs pa la ni so sor ma brtags pa'i btang snyoms de lta bu mi mnga'o/ /gzhan yang dgra bcom pa ni shes bya'i sgrib pa rnam par dag pa las brtsams te/ 'dun pa las kyang ma thob pa'i yongs su nyams pas yongs su nyams so//brtson 'grus dang dran pa dang ting nge 'dzin dang shes rab dang rnam par grol ba las kyang yongs su nyams/ /de bzhin gshegs pa la ni yongs su nyams pa rnam pa 'di drug med do/ /gzhan yang dgra bcom pa ni res 'ga' lus kyi las dge ba la 'jug /res 'ga' lung du ma bstan pa la 'jug go//lus kyi las ji lta bar ngag gi las dang yid kyi las kyang de bzhin no/ /de bzhin gshegs pa'i phrin las gsum po ni ye shes sngon du 'gro ba dang / ye shes kyi rjes su 'brang ba'i phyir lung du ma bstan pa'i las med do/ /de la ye shes kyis kun nas bslang ba'i phyir ye shes sngon du 'gro ba'o//ye shes dang lhan cig rgyu ba'i phyir ye shes kyi rjes su 'brang ba'o/ /gzhan yang dgra bcom pa ni rtsol ba tsam gyis dus gsum gyi shes bya'i dngos po rtogs par mi nus te/ des na de'i ye shes mthong ba chags par gyur ro/ /thams cad rtogs par yang mi 'gyur te/des na de'i ye shes mthong ba thogs par 'gyur ro/ /de bzhin gshegs pa ni rtsol ba tsam gyis dus gsum gyi shes bya'i dngos po thams cad rtogs te/ de lta bas na de dag ni sangs rgyas kyi chos ma 'dres pa bco brgyad ces bya'o/ / rnam pa'i mchog thams cad mkhyen pa nyid ni phung po dang khams dang skye mched rnams la yod pa'i rnam pa'i mchog thams cad mkhyen pa ste de'i ngo bo'o/ /'dir tshigs su bcad pa zhes bya ba ni chos kyi sku la gnas pa'i yon tan thun mong ma yin pa rnam par 'grel pa 'dir bstod pa'i sgo nas tshigs su sbyar ba byas te/des yon tan 'di dag rnam par 'grel to/ /sems can rnams la thugs brtse ba/ /zhes bya ba ni tshad med pa bzhi bo dag snying brtse ba'i ngo bo nyid yin pa'i phyir bshad pa'o/ /sdug bsngal yang ma yin bde ba yang ma yin pa'i dus na bde ba dang phrad par shog cig ces pa'i bsam pa ni byams pa'o//sdug bsngal gyi dus na de dang bral bar shog cig pa'i bsam pa ni snying rje'o/ /bde ba'i dus na de dang mi 'bral bar shog cig pa'i bsam pa ni dga' ba'o/ /dgongs pa can zhes bya ba ni bod pa'o/ /bde ba dang phan dgongs pa zhes bya ba nyid btang snyoms te/btang snyoms ni brtul ces bya ba'i tha tshig ste/ gzhan dag gi nyon mongs pa mi skye bar bya ba'i phyir kun nas nyon mongs pa med pa'i bsam pa'i mtshan nyid do/ /gang gi phyir khyod nyid yon tan yin pa de'i phyir/ khyod la phyag 'tshal lo zhes phyag 'tshal ba thams cad dang sbyar ro//sgrib pa kun las nges par grol/ /zhes bya ba ni nyan thos rnams las bcom ldan 'das kyi rnam par thar pa khyad pa bstan pa'o/ /thub pas 'jig rten kun zil man na/ /zhes bya ba 'di ni zil gyis gnon pa'i skye mched kyi khyad par yongs su ston to/ /khyod kyi mkhyen pas shes bya khyab//ces bya ba ni zad par gyi skye mched yongs su ston te/ nyan thos kyi theg pa las byung ba lta bu'i rnam par thar pa brgyad dang / zil gyis gnon pa'i skye mched brgyad dang / zad bar gyi skye ba mched bcu ni ma yin gyi/ rnam par gzhag pa 'dir ni rnam par thar ba zil gyis gnon pa'i skye mched dang /zad par gyi skye mched rnams kyi sngon du 'gro ba'i phyir ro/ /nyon mongs pa med pa ni kun rdzob kyi mkhyen pa'i bdag nyid do/ /de'i khyad par du byed de/ nyan thos kyi nyon mongs pa med pa ni grong ngam 'brog gang du song na sems can gcig 'ga' la 'thab pa dang /nyon mongs pa bdag dang gzhan la gnod pa 'byung bar 'gyur ba der yang mi 'jug go/ /sangs rgyas ni de lta ma yin te/ de ni nyon mongs pa skye yang skal pa yod pa rnams 'dul bar gzigs/ gshegs nas nyon mongs pa 'dul te/ de ni/ sems can kun gyi nyon mongs kun//ma lus pa dag 'dul mdzad pa/ /zhes bya bas 'brel to/ /ji ltar nyon mongs pa med pa la gnas pa gzhan dag las nyon mongs pa 'ga' zhig skye ba'i rkyen tsam spong ba dang / 'dod pa na spyod pa'i nyon mongs pa gzhi dang bcas pa 'dul gyi gzhan ni mi 'dul ba ltar/sangs rgyas ni de ltar ma yin te/ de ni nyon mongs pa thams cad spong ngo / /nyon mongs pa sel ba yin gyi/ nyon mongs pa can spong ba ni ma yin zhing nyon mongs pa can rnams la rtag tu thugs brtse ba dang bcas pa ste/ ji skad du/ gdon gyis zin la gnod gsal phyir ni sman pa brdeg pa dang //tshig rtsub smra ba spyod byed zin pa brdeg par mi byed ltar/ /de bzhin nyon mongs rnams la thugs rje 'jug pa mi mnga' zhing / /nyon mongs zin pa'i skye bo'i ched du khyod ni bzhugs par 'gyur/ /zhes bshad pa lta bu'o/ /smon nas shes pa yang rnam pa lngas khyad par du 'phags te/lhun gyis grub pa dang / chags pa mi mdza' ba dang / thogs pa mi mnga' ba dang / rtag tu mnyam par gzhag pa dang / the tshom thams cad gcod pas so/ /nyan thos ni shes pa gang la smon nas mnyam par gzhag pa de kho na shes kyi/ gzhan du ma yin no/ /sangs rgyas ni de lta ma yin te/bsgrim mi dgos par lhun gyis grub par mkhyen pas nor bu dang sil snyan bzhin no/ /shes par bya ba mkhyen par gyur zin pas mkhyen pa la chags pa mi mnga' ste/ nyon mongs pa'i sgrib pa bag chags dang bcas te spangs pa'i phyir ro/ /shes bya'i sgrib pa spangs pa'i phyir mkhyen pa thogs pa mi mnga'o//snyoms par 'jug pa'i sgrib pa spangs pa'i phyir rtag tu mnyam par gzhag pa ste/ skyon med bzhud kyang mnyam par gzhag /ces bya ba la sogs pa 'byung ngo / /gang gi phyir de lta bur gyur ba de'i phyir khyod rtag tu 'dri ba thams cad kyi lan ldon pa zhes bya'o//so so yang dag par rig pa'i 'grel ba'i tshigs su bcad pa ni/ gnas dang gnas pa bshad bya dang / /zhes bya ba la sogs pa'o/ /de la gnas ni bstan pa'i chos te/ mdo'i sde la sogs pa'o/ /gnas pa ni de'i brjod par bya ba'i don to//de ni gnyis kyis bshad par bya ba yin pas ston pa gnyis te/ tshig dang / shes pa ste/ ngag kun du slong bar byed pa'i phyir ro/ /de dag la blo gros mi thogs pa ni mkhyen pa ldog pa med pa'o/ /de la gnas pa blo gros thogs pa med pa ni/ chos so so yang dag par rig pa ste/ rnam grangs su gtogs pa rnams la thogs pa med pa'i phyir ro/ /gnas pa blo gros thogs pa med pa ni don so so yang dag par rig pa ste/ rang dang spyi'i mtshan nyid dang / chos rnams kyi don gzhan la sogs pa'i dgongs pa la thogs pa med pa'i phyir ro/ /tshig la blo gros thogs pa med pa ni nges pa'i tshig so so yang dag par rig pa ste/yul gyi skad tha dad pa rang rang dang phan tshun ming gzhan gyis tha snyad 'dogs pa dang / chos kyi nges pa'i tshig la thogs pa med pa'i phyir ro/ /chos rab tu dbye ba'i shes pa la blo gros thogs pa med pa ni spobs pa so so yang dag par rig pa'o//mngon par shes pa rnam par 'byed pa'i tshigs su bcad pa ni/ ched du bzhud dang de dag gi/ /zhes bya ba la sogs pa'o/ /legs 'doms zhes bya ba'i sgra ni re re dang sbyar te/ de ni mdzes par 'doms pa yin pas legs par 'doms so/ /bye brag khong du chud par bya ba'i phyir smra ba ni 'doms pa'o//ched du bzhud nas legs par 'doms/ /zhes bya ba ni rdzu 'phrul gyi mngon par shes pas 'dul ba ji lta ba bzhin du bzhud pa'i phyir ro/ /de dag gi tshig rnams kyis legs par 'doms zhes bya ba ni lha'i rna ba'i mngon par shes pas 'gro ba thams cad pa'i 'dul ba rnams kyis smras pa'i sgra don dang ldan pa'i rgyang ring po yang gsan nas ji ltar mthun par chos ston pa'i phyir ro//spyod pa mkhyen nas legs par 'doms/ /zhes bya ba ni sems kyi rnam grangs kyi mngon par shes pas dbang po mchog dang mchog ma yin pa rtogs pa'i phyir ro//'ongs pa la legs par 'doms zhes bya ba ni sngon gyi gnas rjes su dran pa'i shes pa ste/ des 'ongs pa rtogs pa'i phyir ro/ /'gro ba la legs par 'doms pa zhes bya ba ni 'chi 'pho dang skye ba shes pa ste/ des 'gro ba rtogs pa'i phyir ro/ /nges par 'byung ba la legs par 'doms zhes bya ba ni zag pa zad pa'i mngon par shes pas nyon mongs pa spangs pa rtogs pa'i phyir ro//chos kyi sku ni mtshan dang dpe byad bzang po kun du ston pa'i gnas yin pas de dang ldan pa lta bur ston to/ /sems can kun gyis khyod mthong na/ / skyes bu mchog tu rtogs par 'gyur/ /zhes bya ba ni skyes bu chen po khong du chud par 'gyur ba ste/ mtshan dang dpe byad dang ldan pa khyod mthong na kye ma bcom ldan 'das ni skyes bu chen po'o zhes rtogs par 'gyur ro/ /mthong ba tsam gyis dad par 'gyur/ /zhes bya ba ni dad pa skyed par mdzad pa'o//yongs su dag pa bzhi'i rnam par 'grel pa'i bstod pa ni/ len dang gnas dang gtong ba dang / /sprul pa dang ni bsgyur ba dang / /zhes bya ba la sogs pa'o/ /gnas yongs su dag pa ni bsam gtan la brten nas ji ltar bzhed pa dang / ji srid du bzhed pa bzhin du sku lus len pa dang /bzhugs pa dang 'dor ba la mnga' brnyes pa'o/ /dmigs pa yongs su dag pa ni sngon med pa'i gzugs sprul pa dang / sngon byung ba'i gzugs gser la sogs pa'i dngos por bsgyur ba dang / rnam pa thams cad du thugs su chud pa mnga' brnyes pa'o//thugs yongs su dag pa ni ji ltar bzhed pa bzhin du ting nge 'dzin gyi sgo la dbang bsgyur ba ste/ skad cig re re la ji ltar bzhed pa bzhin du ting nge 'dzin gzhan la snyoms par 'jug pa'i phyir ro/ /mkhyen pa yongs su dag pa ni ji ltar bzhed pa bzhin du gzungs kyi sgo kun du 'dzin pa yang dag par 'byor pa'o//stobs kyi rnam par 'grel pa'i bstod pa ni/ thabs dang skyabs dang dag pa dang / /zhes bya ba la sogs pa ste/ bde 'gro dang ngan 'gro dang las dang dag pa dang / theg pa chen po dang / don bzhi po dag la sems can rnams slu ba'i phyir bdud gang yin pa de 'joms par byed pas stobs bcu rnams kyi las brjod do//de la dge ba ni bde 'gro'i thabs so/ /mi dge ba ni ngan 'gro'i thabs so zhes de ston pa la bslu ba'i phyir bdud nye bar gnas te/ 'di ni de lta ma yin gyi/ 'di ni log pa ste/ mi dge ba las bde 'gro'o/ /bde ba las ni ngan 'gro zhe'am//yang na thams cad ni rgyu med pa'am/ dbang phyug la sogs pa'i rgyu las byung ba'o zhes zer ba la bcom ldan 'das kyis gnas dang gnas ma yin pa mkhyen pa'i stobs kyis 'gro ba rgyu med pa las byung ba dang / mi mthun pa'i rgyu las byung ba ni gnas ma yin zhing go skabs med de/'di yod pas 'di 'byung / 'di skyes pa'i phyir 'di skye ba ste/ 'di ltar ma rig pa'i rkyen gyis 'du byed rnams 'byung gi / rim la sogs pas dbang phyug la sogs pa la ma yin no zhes 'joms te/ gnas dang thabs zhes bya ba ni don gcig go/ / skyabs zhes bya ba ni las te/ ji skad du/ 'jig rten 'di ni las bdag gir bya ba las kyi bgo skal la spyod pa zhes bya ba la sogs pa gsungs pa lta bu'o/ /'dir yang slu ba ni snga ma bzhin no/ /de yang bdud gang yin pa de bcom ldan 'das kyis las kyi rnam par smin pa mkhyen pa'i stobs thogs pa med pa sems can ni las kyis mthon po dang /dma' ba dang / ngan pa dang / bzang por rnam par phye ba yin gyi/ dbang phyug la sogs pa las byung ba ni ma yin/ glo bur du byung ba ma yin no zhes bya ba la sogs pa snga ma bzhin du 'joms so/ /dag pa zhes bya ba ni dag pa rnam pa gnyis te/'jig rten pa dang 'jig rten las 'das pa ste/ rnam par gnon pa dang bag la nyal yang dag par 'joms pa bsam gtan dang ting nge 'dzin dang snyoms par 'jug pas dag pa dang / 'phags pa'i lam gyis dag pa'i phyir re zhig pa dang gtan du ba'o//'di la yang slu ba ni snga ma bzhin no/ /der yang bdud gang yin pa de bcom ldan 'das kyi ting nge 'dzin dang snyoms par 'jug pa mkhyen pa'i stobs kyis 'joms so/ /nges 'byung theg pa chen po la/ /zhes bya ba ni stobs lhag ma'i las ston to/ /sangs rgyas nyid du nges par 'byung bar bya ba'i phyir theg pa chen po ston pa na slu ba'i phyir bdud nye bar 'dug ste/bla na med par yang dag par rdzogs pa'i byang chub ni rnyed par dka' bas/ nyan thos nyid du nges par 'byung yang bla'o zhes zer ba de la/ bcom ldan 'das kyi stobs rnam pa bdun gyis 'joms so/ /mi 'jigs pa rnams rnam par 'byed pa ni bstod pa'i sgo nas/ye shes dang ni spangs pa dang / nges 'byung bgegs byed ston mdzad pa'i/ /zhes bya ba la sogs pa smos te/ nga yang dag par rdzogs pa'i sangs rgyas pa zhes bya ba ni ye shes so/ /zag pa 'di dag spangs so zhes bya ba ni spangs pa ste/'di gnyis ni rang gi don gyi dbang du bya'o/ /ngas nyan thos rnams la nges par 'byung ba'i chos gang dag bshad pa zhes bya ba ni nges par 'byung ba ston pa'o/ /de dag nyid la bar du gcod pa'i chos gang dag bstan pa zhes bya ba ni bgegs byed pa ste/ bar du gcod pa dang bgegs byed pa zhes bya ba ni don gcig go//'di gnyis ni gzhan gyi dbang las brtsams pa ste/ de'i phyir/ bdag gzhan don la mu stegs gzhan/ /mi tshugs khyod la phyag 'tshal lo/ /zhes bya ba smos te/ 'jigs pa med cing mi tshugs pa'i phyir 'jigs pa dang bral bar ston to//bsrung ba med pa dang dran pa nye bar gzhag pa rnam par 'byed pas bstod pa'i tshigs su bcad pa/ 'khor du tshar bcad gsung mdzad pa/ /zhes bya ba ni bsrung ba med pa rnams ston te/ su la bsrung bar bya ba lus la sogs pa'i las sba bar bya ba yod pa des ni spyod lam ngan pa la sogs pa'i 'jigs pas 'khor gyi nang du tshar bcad nas smra bar mi nus so//kun nas nyon mongs gnyis spangs pa/ /zhes bya ba ni gus par nyan pa dang / gus par mi nyan pa dang / gnyi ga la rjes su chags pa dang / khong khro ba med pa'i phyir ro/ /slob ma'i tshogs sdud pa ni dran pa nye bar gzhag pa'i phyir te/de'i phyir bsnyel ba mi mnga' zhes bya ba la sogs pa smos te/ bod pa'i tshig go/ /bag chags legs par bcom pa'i dbang du byas te bstod pa/ gshegs bzhugs kun du rtag par yang / /zhes bya ba la sogs pa ste/grong ngam grong khyer gang du bsod snyoms kyi phyir gshegs pa de ni gshegs pa'o/ /bzhugs pa ni shing drung la sogs pa gang du spyod lam bzhi po dag gis bzhugs pa'o/ /kun mkhyen ma legs spyod mi mnga'/ /zhes bya ba ni nyon mongs pa zad kyang bag chags kyi rjes su bcing bas byas pa'i rgod pa la sogs pa ste/dper na gnas brtan maud gal gyi bu chen po tshe rabs lnga brgyar spre'ur gyur pa'i bag chags kyi rjes su 'ching ba yod pas nyon mongs pa med par gyur kyang spre'u ltar mchod zhing 'gro'o zhes grags pa dang / rang sangs rgyas gcig tshe rabs mang por smad 'tshong par gyur pa'i bag chags kyi lhag mas bdag cha bar byed pa rnam pa de lta bu thams cad mkhyen pa ma yin pa'i spyod pa de bcom ldan 'das la mi mnga' bas thun mong ma yin pa'i yon tan brjod do//khyod ni yang dag don du na/ /kun mkhyen khyod la phyag 'tshal lo//zhes bya ba ni ji ltar rdzogs byed la sogs pa gzhan thams cad mkhyen pa ma yin par thams cad mkhyen pa ltar 'chos pa ltar bcom ldan 'das ni de lta ma yin te/ de'i phyir bden pa'i don du thams cad mkhyen pa'o/ /yang na yang dag pa'i don du na zhes bya ba dang / kun mkhyen zhes bya ba gnyi ga so sor bod pa'i tshig go/ /bsnyel ba med pa'i chos nyid kyis bstod pa ni/ sems can kun gyi don mdzad la/ /khyod ni dus las yol mi gda'/ /zhes bya ba la sogs pa'o/ /gang gi tshe gang gi bya ba yod pa de'i tshe de la bcom ldan 'das nye bar bzhugs shing dus las yol bar mi mdzad de/ji skad du/ chu srin gnas pa'i rgya mtsho ni/ /dus las yol bar 'gyur yang srid/ /be'u lta bu'i 'dul ba la/ /sangs rgyas dus las yol mi 'gyur/ /zhes gsungs pa lta bu'o/ /rtag tu 'bras bu yod mdzad pa/ /zhes bya ba ni de'i mdzad pa 'bras bu yod par mdzad pas 'bras bu yod pa ste/mdzad pa don med pa ma yin zhes bya ba'i tha tshig go/ /de la bsnyel ba mi mnga' bas mi bsnyel lo/ /thugs rje chen pos bstod pa/ 'jig rten kun la gdugs zhag gcig /ces bya'o/ /thugs rje chen po ni kun rdzob kyi mkhyen pa ste/ des su ni 'phel su ni 'grib/su ni yongs su smin par bya ba yin/ su ni rnam par grol bar bya ba yin zhes bya ba la sogs par bcom ldan 'das nyin mtshan lan drug 'jig rten la so sor rtog go/ /thugs rje chen po de yang 'jig rten thams cad la so sor rtog pa'i las can dang / phan par bya ba bsam pa'i ngo bo nyid do/ /de'i chen po nyid ni bsod nams dang ye shes kyi tshogs chen po yang dag par sdud pa dang / sdug bsngal nyid gsum dang bral ba'i rnam pa dang / khams gsum pa'i sems can la dmigs pa dang / sems can thams cad la mtshungs par 'jug pa dang /de bas ches khyad par du 'phags pa med pa'i phyir ro/ /sangs rgyas kyi chos ma 'dres pa bco brgyad po dag gis bstod pa/ gshegs dang thugs su chud pa dang / /zhes bya ba la sogs pa ste/ gshegs pa zhes bya bas ni de bzhin gshegs pa la 'khrul pa med pa zhes bya ba nas bzung ste/so sor ma brtags pa'i btang snyoms med pa zhes bya ba'i bar chos drug bstan to/ /thugs su chud pa zhes bya ba 'dis kyang dran pa nyams pa med pa zhes bya ba nas bzung ste/ rnam par grol ba nyams pa med pa zhes bya ba'i bar drug ston to/ /mkhyen pa dang zhes bya ba 'dis ni dus gsum la ma chags ma thogs pa'i ye shes mthong ba 'jug ces bya ba gsum ston te/phrin las kyis zhes bya ba 'dis kyang gsum bstan te/ sku dang gsung dang thugs kyi phrin las 'jug par byed pa dang / rjes su 'brang ba'i ye shes dang ldan pa'i phyir ro//nyan thos dang ni rang sangs rgyas/ /kun mchog ces bya ba ni ma 'dres pa'i yon tan dang ldan pa'i phyir ro/ /rnam pa thams cad mkhyen pa nyid kyi dbang du byas nas bstod pa/ byang chub chen po rnam pa kun/ /sku gsum dag gis brnyes gyur pa/ /zhes bya ba la sogs pa ste/ rnam pa rnams kyi mchog thams cad mkhyen pas rnam pa'i mchog thams cad mkhyen pa ste/ de'i ngo bo ni rnam pa'i mchog thams cad mkhyen pa nyid do/ /rnam pa'i khyad par thams cad du 'phags pa thams cad kyis shes bya thams cad mkhyen pa'o/ /sku gsum ni ngo bo nyid kyi sku la sogs pa ste/de dag gis byang chub chen po dri ma med cing thogs pa med pa'i ye shes kyi ngo bo nyid rnam pa thams cad du brnyes pas sangs rgyas bcom ldan 'das kyis gang mkhyen par ma gyur pa'i rnam pa de med do/ /de'i phyir 'jig rten thams cad na lha dang mi la sogs pa sems can thams cad kyi the tshom thams cad gcod pa'i phyir dogs pa thams cad gcod pa ste/som nyi thams cad kyi mdud pa 'grel pa la mkhas pa nyid kyi byed pas rnam pa thams cad mkhyen pa nyid bye brag du byas so/ /pha rol tu phyin pa rnams kyis bstod pa/sri pa mi mnga' skyon mi mnga'/ /zhes bya ba la sogs pa ste/ sri pa mi mnga' ba ni sbyin pa'i pha rol tu phyin pa'o/ /skyon mi mnga' ba ni tshul khrims kyi pha rol tu phyin pa'o/ /rnyog pa mi mnga' ba ni bzod pa'i pha rol tu phyin pa ste/ rnyog pa'i rgyu gnod sems kyi sems de med pas rnyog pa med pa'o//bzhugs mi mnga' ba zhes bya ba ni spro ba sngon du drangs pa'i sbyor bas bskyed pa'i brtson 'grus kyis mi bzhugs pa'o/ /g.yo ba mi mnga' ba ni bsam gtan gyi pha rol tu phyin pa ste mnyam par gzhag pas ma g.yengs pa ni mi g.yo ba'o/ /chos kun la ma spros zhes bya ba ni shes rab ste/rnam par mi rtog pa'i ye shes so/ /shes rab de yang chung zad kyang spros pa mi byed pa ste/ lhag ma ni snga ma bzhin no/ /chos kyi sku ni gzhan yang ngo bo nyid dang zhes bya ba la sogs pa yon tan drug dang ldan no zhes bstan nas tshigs su bcad pa 'di dag gis 'chad do//khyod ni dam pa'i don grub ste/ /zhes bya ba ni rnam par dag pa'i de bzhin nyid kyis rab tu phye ba'i phyir ngo bo nyid kyis chos kyi sku yongs su grub pa'i phyir ro/ /brjod par 'dod pa'i dbang gis na ngo bo nyid kho na bcom ldan 'das kyi yon tan nyid du ston te/ dper na yon tan brjod par 'dod pa la me'i tsha ba zhes bya ba lta bu'o/ /sa rnams kyis 'byung ba lags zhes bya ba ni rab tu dga' ba la sogs pa sa bcu thams cad kyis nges par 'byung ba zhes bya ba'i tha tshig ste/ 'dis ni don dam pa 'grub pa'i rgyu ston to/ /sems can kun gyi mchog nyid brnyes/ zhes bya ba ni 'bras bu bstan pa ste/ 'bras bu ni sems can thams cad kyi mchog thams cad mkhyen pa nyid do/ /sems can thams cad rnam 'grel ba/ /zhes bya bas ni las ston to/ /mi bas mtshungs pa ma mchis pa'i/ /yon tan ldan zhing zhes bya ba ni ldan pa ste/ stobs la sogs pa thun mong ma yin pa'i yon tan mtha' yas pa dag dang ldan pa'i phyir yon tan dang 'brel pa yin no//'jig rten dang / 'khor ma gda' la rnam kun du/ /lha mis mthong ba yang ma lags/ /zhes bya ba la/ yang gi sgra ni mthong ba sdud do/ /rnam pa kun du lha mi rnams kyis mthong ba yang ma lags zhes bya ba ni sku gsum gyis bcom ldan 'das kyi tshul bstan pa ste/gnyis kyis ni mthong ba'i phyir ro/ /gcig gis ni mi mthong ba'i phyir ro/ /zab pa zhes bya bas ni ngo bo nyid ston to/ /mchog tu zab pa zhes bya bas ni khyad par ston to/ /'jig rten gyi mkhas pa'i blo'i spyod yul ma yin pa'i phyir gang rtogs par dka' ba 'di ni chos kyi sku'i ngo bo nyid do//nyan thos la sogs pa'i blo'i spyod yul ma yin pa'i phyir gang mchog tu zab pa 'di ni de'i khyad par ro/ /zab pa nyid rnam pa bcu gnyis po 'di ni tshigs su bcad pa rnams kyis sdud de/ de la skye ba zab pa nyid de/ skye med sangs rgyas skye ba ste//zhes bya ba la/ sangs rgyas kyi skye ba ni gzhan nyon mongs pa rnams kyi skye ba med pa ste/ de dag skye ba med pa ni sangs rgyas rnams kyi skye ba yin pas skye med skye ba'o/ /mya ngan las 'das pa zab pa nyid ni/ mi gnas pa la rab tu bzhugs/ /zhes bya ba'o/ /'khor ba dang mya ngan las 'das pa la mi gnas pa la rab tu bzhugs pa ste/mi gnas pa'i mya ngan las 'das pa zhes bya ba'i tha tshig go/ /phrin las zab pa nyid ni lhun gyis grub par thams cad mdzad ces bya ba ste/ nor bu dang sil snyan la sogs pa bzhin du 'bad pa yang med la sems can gyi don yang mdzad do//gnas pa zab pa nyid ni/ zas bzhi po ni gsol ba lags/ /zhes bya ba ste/ zas rnam pa bzhi la ma dag pa'i rten gnas par byed pa ni kham gyi zas te/ /nyon mongs pa'i 'ching ba can mtha' dag gnas par 'gyur ba'o/ /dag pa dang ma dag pa'i rten gnas par byed pa ni gzugs dang /gzugs med par skyes pa rnams kyi reg pa dang / yid la sems pa dang / rnam par shes pa ste/ kham gyi zas las 'dod chags dang bral ba rnyed pa'i phyir ro/ /rgyun du zhugs pa la sogs pa la yang lus dag pa dang ma dag pa ste/ slob pa'i phyir ro//de dag ni zas rnam pa bzhi char gyis gnas par 'gyur ro/ /rnam par dag pa'i rten gnas par byed pa ni dgra bcom pa rnams kyi ste/ bzhi po de dag nyid do/ /zas kyis gnas pa ltar ston pa sangs rgyas bcom ldan 'das rnams kyi zas kyang kham gyi zas la sogs pa bzhi bo de dag nyid do//de dag ni de dag mi gsol la/ de dag gis de dag gnas pa'ang ma yin mod kyi/ 'jig rten dang mthun par de ltar ston cing gnas par yang mdzad do/ /tha dad med ces bya ba ni rnam par gnas pa zab pa nyid do/ /dpag tu med ces bya ba ni grangs zab pa nyid de chos kyi sku dbyer med pa dang /sku mang po mngon par rdzogs par byang chub pa'i phyir te go rims bzhin no/ /dpag tu med pa yin yang phrin las tha dad pa ma yin no/ /'o na ci zhe na/ phrin las gcig pa dag pa ste/ sprul pa dang longs spyod rdzogs pas gzhan gyi don grub pa'i phyir ro/ /de'i phyir/mi brtan pa brtan pa'i phrin las can zhes bya ba ste/ gnyis kyis ni mi brtan no/ /ngo bo nyid kyis ni brtan te/ 'di ni phrin las zab pa nyid gzhan no/ /gang yang mngon rdzogs sangs rgyas med/ /ces bya ba la sogs pa ni mngon par byang chub pa zab pa nyid do/ /ji ltar mngon par rdzogs par sangs rgyas pa med ce na/gzhan gyi dbang kun brtags pa nyid du med pa'i phyir ro/ /thams cad sangs rgyas ma yin min/ /zhes bya ba ni gzhan gyi dbang gi ngo bo nyid yongs su grub par yod pa'i phyir ro/ /skad cig re la dpag tu med/ /ces bya ba ni gang gA'i klung gi bye ma'i grangs las 'das pa snyed kyi 'jig rten gyi khams rnams su mngon par rdzogs par byang chub pa'i phyir ro//dngos po'i dngos med rab tu phye/ /zhes bya ba ni dngos po rnams kyi dngos po med pa stong pa nyid kyis sangs rgyas nyid phul du phyin pa'i go 'phang brnyes par byas pa'o//'dod chags dang bral ba zab pa nyid ni/ /chags pa ma yin mi chags min/ /zhes bya ba ste/ ji ltar chags pa ma yin zhe na/ gzhan gyi dbang kun brtags pa nyid du med pa'i phyir ro/ /gang gi phyir chags pa ma yin pa de nyid kyi phyir mi chags pa ma yin te/ 'dod chags yod na 'dod chags med pa 'byung ba'i phyir ro//'dod chags nyid kyis 'byung ba yin/ /zhes bya ba ni stong pa nyid la chags pa gang yin pa dge ba'i chos la 'dun pa zhes bya ba'i rgyu des byung ba yin no/ /yang na 'dod chags kyis kun nas dkris pa ni spangs la/ 'dod chags kyi bag la nyal mi sel ba ste/de nyid yo byad du byas nas byang chub chen po thob pa'o/ /gal te bag la nyal sel na nyan thos bzhin du yongs su mya ngan las 'da' bar 'gyur ro/ /'dod chags 'dod chags min mkhyen nas/ /zhes bya ba ni kun brtags pa'i 'dod chags 'dod chags ma yin pa nyid du mkhyen nas so//'dod chags chos nyid la yang bzhugs/ /zhes bya ba ni de bzhin nyid la ste/ de la 'jug pa ni mngon sum du byed pa'o/ /phung bo spangs pa zab pa nyid ni/ /sangs rgyas phung po rnams las 'das/ /zhes bya ba ste/ kun brtags pa'i gzugs la sogs pa phung po lnga la kun ma brtags pas 'das te/de mi dmigs pa'i phyir ro/ /phung bo rnams la'ang rnam par bzhugs/ /zhes bya ba ni chos nyid kyi phung po rnams la'o/ /de las gzhan min zhes bya ba ni kun brtags pa'i phung po rnams las chos nyid kyi phung po rnams gzhan ma yin te/kun brtags pa med pa'i phyir ro/ /gzhan min yin zhes bya ba ni kun brtags pa rnams kun nas nyon mongs pa yin pa'i phyir/ chos dang chos can gzhan dang gzhan ma yin pa nyid las grol ba'i yang phyir ro/ /de ma btang bas legs par 'das/ / zhes bya ba ni chos nyid kyi phung po yongs su ma btang bas shis par mya ngan las 'das pa'o/ /yongs su smin par mdzad pa zab pa nyid ni/ /kun kyang 'dres pa'i phrin las can/ /zhes bya ba ste/ sems can gyi don gyi phyir phan tshun du yan lag gi dngos por 'dre ba'i phyir spyod pa 'dres pa dang nye bar 'dres pa dag go//ci 'dra zhe na/ rgya mtshor chu 'dra zhes bya ba smos te/ dper na rgya mtsho chen por bab pa'i klung gi chu rnam par dbye ba med par nyal sogs pa'i don byed pa de bzhin no/ /byas so byed do bya'o zhes/ /gzhan gyi don la dgongs pa med/ /ces bya ba ni sems mngon par 'du bya ba med par bsgrim mi dgos par mdzad pa ste/brgya byin la sogs pa bzhin no/ /gal te de bzhin gshegs pa rnams kyi sku rtag pa yin na ci'i phyir rtag tu mi snang snyam pa la sems can nyes pas mi snang ste/ snod chag pa'i yi zla ba bzhin/ /zhes bya ba smos te/ dper na snod chag pa'i nang du zla ba mi snang ba ni snod kyi nyes pas chu mi gnas pa'i phyir ro/ /de bzhin du zhi gnas kyi rlan med pa dag gi rgyud rnams la sangs rgyas mi snang ste/ rgyud kyi nyes pa'i phyir ro/ /chu lta bu ni ting nge 'dzin te/ mnyen pa'i bdag nyid yin pa'i phyir ro/ /de bzhin gshegs pa ni dge ba'i chos zag pa med pa'i gzugs brnyan lta bu'o zhes bya ba la sogs pa yang gsungs pas so//gang dag skal ba yod pa de dag gis ni mthong ngo / /de dag mi snang du zin kyang phrin las rnams mthong ste/ 'di ltar/ 'jig rten kun la nyi bzhin du/ /de dag chos 'dod khyab par mdzad/ / mdo'i sde la sogs pa dam pa'i chos dag gi rang bzhin gyi 'od zer stong gi phreng ba dang ldan pa'i sangs rgyas nyi ma rnams ni bshad pas 'jig rten mngon par khyab par mdzad nas/ yongs su smin par mdzad pa la sogs pa phrin las mdzad pa nyid do/ /rdzogs par byang chub pa dang mya ngan las 'das pa kun du ston pa zab pa nyid ni/la lar rdzogs par byang chub ston/ /la lar me bzhin mya ngan 'das/ /zhes bya ba ste/ dper na me ni kha cig tu 'bar la/ kha cig tu 'chi ba de bzhin du sangs rgyas rnams kyang yongs su smin pa kha cig la rdzogs par byang chub pa ston te/ de rnam par thar par bya ba'i phyir ro//yongs su ma smin pa kha cig tu mya ngan las 'das te mdzad pa med pa'i phyir ro/ /nam yang med pa ma yin te/ /zhes bya ba la sogs pa'i don ni brda phrad par zad do/ /gzugs pa la zab pa nyid ni/ sangs rgyas 'phags min chos rnams dang / /zhes bya ba la sogs pa'o/ / 'phags pa ma yin pa rnams kyi chos ni mi dge ba rnams te/ de dag la yang bdag nyid mchog dang bzhugs pa mchog yin te/ stong pa nyid dang / smon pa med pa dang / mtshan ma med pa zhes bya ba'i gnas pas mi dge ba'i chos la dmigs nas bzhugs pa'i phyir ro/ /mi dang ngan song ba rnams la yang bdag nyid dang bzhugs pa mchog rnams yin te/bsam gtan dang snyoms par 'jug pa lha'i gnas pas de la dmigs nas bzhugs pa'i phyir ro/ /tshangs spyod ma yin chos rnams la yang bdag nyid dang bzhugs pa mchog rnams yin te/ tshad med pa bzhi zhes bya ba'i tshangs pa'i gnas pas de la dmigs nas bzhugs pa'i phyir ro//de la mchog ni chos kyi dbyings so/ /de'i bdag nyid de/ de bzhin gshegs pa rnams ni de'i ngo bo nyid yin no/ /de nyid kyi phyir rtag pa'o/ /sku kun du ston pa zab pa nyid ni/ de dag kun du rnam par dpyod/ /ces bya ba ste/ rnam par mi rtog pa'i rjes la thob pa'i ye shes kyis rnam par dpyod pa ni 'dir rnam par dpyod pa'o//gang du zhe na/ kun du ste/ dge ba dang mi dge ba dang lung du ma bstan pa dang / zag pa dang bcas pa dang / zag pa med pa dang / 'dus byas dang 'dus ma byas la sogs pa shes bya tha dad pa la lo/ / gang du'ang rnam par dpyod mi mnga'/ /zhes bya ba ni rnam par mi rtog pas te/ de rnam par dpyod pa dang bral ba'i phyir ro/ /gnas rnams kun du'ang snang mod kyi/ /zhes bya ba ni skus skye ba la sogs pa kun du ston pa'i phyir ro/ /dbang po drug gi spyod yul min/ /zhes bya ba ni don dam par chos kyi sku ni skye ba'i skye mched sems can dmyal ba la sogs pa dang skal ba mnyam pa rnams kyi mi rtogs pa'i phyir ro//nyon mongs pa spangs pa zab pa nyid ni/ nyon mongs thul la spangs pa med/ /ces bya ba ste/ thul ba ni byang chub sems dpa'i gnas skabs na de dag gi nyon mongs pa ma spangs pa ste/'di ltar/ sngags kyis bsad pa'i dug dang 'dra/ /dper na sngags kyis bsad pa'i dug ni nad pa rnams kyi yo byad du 'gyur ba de bzhin du de dag gi nyon mongs pa rnams kyang kun nas dkris pa med cing bag la nyal lus pa'i phyir ro/ /ci'i phyir bag la nyal lhag ma 'jog ce na/nyan thos kyi theg pas myur du yongs su mya ngan las 'das na mi rung ngo snyam mo/ /de'i phyir nyon mongs pa nyid nyon mongs pa zad pa thams cad mkhyen pa'i rgyu ste/ ji skad du/ dran dang shes pas zin pa'i nyon mongs yon tan sna tshogs yongs 'grub pas/ /yang par gyur pa khyod kyi byang chub yo byad rnams su 'gyur ba lags//zhes bshad pa lta bu'o/ /bsam gyis mi khyab pa zab pa nyid ni ji ltar na/ de dag gi nyon mongs pa byang chub kyi yan lag tu 'gyur zhing 'khor ba yang zhi ba'i bdag nyid du 'gyur ba dang / de'i 'bras bu ci yin zhes de ltar rigs pas nam yang sangs rgyas rnams bsam par mi nus pa'o//zab pa nyid rnam pa bcu gnyis bshad zin to/ /zab pa'i don ni rtogs par dka' ba'i don to/ /sangs rgyas rjes su dran pa'i dbang du byas nas/ sangs rgyas bcom ldan 'das ni chos thams cad la dbang sgyur ba'i ngang can zhes bya ba smos te/ chos thams cad la dbang sgyur ba'i ngang tshul can yin pas dbang sgyur pa'i dang can te/bzhed pa tsam la rag las par yon tan phun sum tshogs pa thams cad mngon du 'gyur ba'i phyir ro/ /de'i phyir/ 'jig rten gyi khams mtha' yas mu med pa thams cad du thogs pa med pa'i mngon par shes pa brnyes pa'i phyir zhes bya ba smos so//gal te de bzhin gshegs pa rnams kyi mngon par shes pa 'jig rten gyi khams thams cad du thogs pa med pa yin na ci'i phyir sems can thams cad yongs su mya ngan las mi zlo zhe na/ chos thams cad la dbang sgyur ba spyir gtang ba dmigs kyis bsal bar tshigs su bcad pas ston te/bsgribs shing rgyu dang mi ldan la/ /zhes bya ba la sogs pa'o/ /de la bsgribs pa ni nyon mongs pa dang / las dang / rnam par smin pa'i sgrib pa rnams kyis te/ nyon mongs pa shas che ba yin/ /mtshams med pa'i las byed pa yin/ blun zhing lkugs pa yin no//rgyu dang mi ldan pa ni yongs su mya ngan las mi 'da' ba'i rigs can te/ log pa nyid du nges pa'o/ /nges pa gnyis ni las byed par nges pa dang / rnam par smin pa myong bar nges pa'o/ /yul 'di la ni yongs su mya ngan las 'da' bar sangs rgyas rnams la mnga' dbang mi mnga'o/ /de la las byed par nges pa ni yang dang yang du goms pa'i phyir skal ba mnyam pa'i rgyu las gdon mi za bar rgyu mthun pa'i 'bras bu 'byung ba'i phyir te/dper na rgyal po ma skyes dgras pha bsad pa lta bu'o/ /rnam par smin pa myong bar nges pa ni nges par rnam par smin pa'i las kyi 'bras bu myong bar 'gyur bas te/dper na shAkya pa rnams 'phags skyes pos gnod pa byas te bsad pa lta bu'o/ /sangs rgyas bcom ldan 'das rnams chos thams cad la dbang sgyur pa'i ngang can zhes spyir btang ba gang yin pa de ni dmigs kyis bsal ba'i yul 'di byas te/ mtshams med pa yi las rnams dang //nyon mongs drag dang ngan 'gro dang / /mi snyan sems can 'du shes med/ /sgrib pa gsum du 'dod pa yin/ /zhes kyang bshad do/ /de bzhin gshegs pa rnams kyi sku rtag pa'o zhes bya ba ni shin tu rnam par dag pa'i de bzhin nyid kyi ngo bo nyid yin pa'i phyir ro/ /de yang gzhan du mi 'gyur bas 'gyur ba med pa'i phyir ro//de bzhin gshegs pa rnams mchog tu kha na ma tho ba mi mnga'o zhes bya ba ni nyon mongs pa dang shes bya'i sgrib pa kha na ma tho ba spangs pa'i phyir ro/ /de bzhin gshegs pa rnams lhun gyis grub pa'o zhes bya ba'i don ni brda phrad par zad de/ rnam pa ni sil snyan la sogs pa lta bu'o//de bzhin gshegs pa rnams la longs spyod chen po mnga' ba'o zhes bya ba ni sangs rgyas kyi zhing gi yon tan bkod pa'i rgyan ni longs spyod che ba'i phyir ro/ /gos pa med pa'i rnam pa'i don yang brda phrad par zad de pad+ma bzhin no/ /de bzhin gshegs pa rnams don chen po'o zhes bya ba ni sems can gyi don che ba'i phyir te/skal ba ji lta ba bzhin du rdzogs par byang chub pa dang / mya ngan las 'das par kun du ston pas yongs su smin pa dang / rnam par grol bar mdzad pa'i phyir ro/ /sangs rgyas rjes su dran pa rnam pa bdun po 'di nyid tshigs su bcad pa gnyis kyis sdud de/rang gi sems la rag las dang / /zhes bya ba la sogs pa'o/ /rang gi sems la rag las pa'i phun sum tshogs pa zhes bya ba 'dis ni chos thams cad la dbang sgyur ba'i rnam pa ston te/ rtag pa phun sum tshogs pa zhes bya ba ni rang gi sgra nyid kyis rtag pa'i rnam pa ston to//dge ldan phun sum tshogs pa zhes bya bas ni mchog tu kha na ma tho ba mi mnga' ba ston to/ /brtsal mi dgos pa phun sum tshogs pa zhes bya ba 'dis ni lhun gyis grub pa'i rnam pa ston to/ /chos kyi longs spyod chen po rnams/ /rjes su sbyin mdzad phun sum tshogs/ /zhes bya ba 'dis ni longs spyod chen po'i rnam pa ston to//dbang du ma gyur rab tu rgyu/ /phun sum tshogs pa zhes bya ba 'dis ni 'jig rten gyi chos thams cad kyis mi gos pa ston to/ /skye bo mang por 'dir 'dod pa/ /phun sum tshogs pa zhes bya ba 'dis ni don chen po mdzad pa'i phyir ro/ /sangs rgyas kun gyi 'di dag kun//ces bya ba ni sangs rgyas thams cad kyi phun sum tshogs pa rnam pa bdun po 'di dag thams cad blo ldan byang chub sems dpa' rnams kyis rjes su dran par byas te/ bsam par bya/ rjod par bya zhing / brjed par mi bya'o zhes bya ba'i tha tshig go/ / sangs rgyas kyi zhing yongs su dag pa'i dbang du byas nas/ bcom ldan 'das gzhal med khang chen po rin po che sna bdun mchog tu 'bar ba bkod pa zhes bya ba la sogs pa smos te/ rin po che mchog tu 'bar ba sna bdun gyis bkod pa ste spras pa'i bye brag go/ /yang na bkod pa de nyid de dag gis mchog tu 'bar ba'o//de la rin po che sna bdun ni gser dang / dngul dang / bai DU R+Ya dang / shel dang / rdo'i snying po dang / mu tig dmar po'o/ /rdo'i snying po ni an+da rnyil dang / mthon kha dang / mthon kha chen po la sogs pa'o/ /mu tig dmar po ni srog chags dmar po pa zhes bya ba'i rigs kyi ste/de'i khong nas byung ba'i mu tig ni mu tig dmar po zhes bya'o/ /de ltar mchog tu 'bar ba de ni gang 'jig rten gyi khams dpag tu med pa rgyas par 'gengs pa'i 'od zer chen po shin tu 'byung ba ste/ 'jig rten gyi khams dpag tu med pa dag rgyas par 'gengs pas/'jig rten gyi khams dpag tu med par rgyas par 'gengs pa ste/ de dag ni 'jig rten gyi khams dpag tu med pa rgyas par 'gengs pa yang yin la/ 'od zer chen po yang yin pas 'jig rten gyi khams dpag tu med pa rgyas par 'gengs pa'i 'od zer dag ste/de na zhes bya bar tshig rnam par sbyar te/ 'jig rten gyi khams dpag tu med pa rgyas par 'gengs pa'i 'od zer chen po shin tu 'byung ba de na'o/ /de lta bas na 'dis ni sangs rgyas kyi zhing yongs su dag pa'i kha dog phun sum tshogs pa bstan to/ /'dir gnas kyi bye brag shin tu rnam par phye ba tshad med pa dag rnam par gzhag pas/gnas kyi bye brag shin tu rnam par phye ba tshad med pa rnam par gzhag pa ste/ shin tu rnam par phye ba ni blo sngon du btang nas cha rnam par gzhag ste bkod pa'i phyir ro/ /'dis ni dbyibs phun sum tshogs pa bstan to/ /dkyil 'khor yongs su ma chad pa//zhes bya ba ni dkyil 'khor dag 'di tsam mo zhes yongs su ma chad pa'am/ yang na gang gi dkyil 'khor yongs su ma chad pa de ni dkyil 'khor yongs su ma chad pa'o de na ste/ 'dis ni tshad phun sum tshogs pa bstan to/ /de'i gnas sam yul khams gsum pa las yang dag par 'das pa'i spyod yul yin pas/khams gsum pa las yang dag par 'das pa'i spyod yul ni sangs rgyas kyi zhing ste/ khams gsum na spyod pa'i sred pa rnams kyi rnam par smin pa ma yin pa'i phyir ro/ /'dis ni yul phun sum tshogs pa bstan to/ /gal te rnam par smin pa ma yin na de'i rgyu gang yin snyam pa la/'jig rten las 'das pa de'i bla ma'i dge ba'i rtsa ba las byung ba zhes bya ba smos so/ /'jig rten las 'das pa'i dge ba'i rtsa ba ni rnam par mi rtog pa'o/ /de'i bla ma'i dge ba'i rtsa ba ni de'i rjes la thob pa ste/ rgyu des 'byung ba yin gyi/ rgyu med pa las byung ba'am/dbang phyug la sogs pa'i rgyu las byung ba ni ma yin no/ /'dis ni rgyu phun sum tshogs pa bstan to/ /dbang sgyur ba'i rnam par rig pa shin tu rnam par dag pa'i mtshan nyid ces bya ba ni de dbang sgyur ba'i rnam par rig pa shin tu rnam par dag pa gang yin pa de'i mtshan yid yin te/de rnam par rig pa tsam gyi phyir ro/ /de na rnam par rig pa las gzhan pa'i rin po che la sogs pa med kyi/ rnam par rig pa de nyid shin tu rnam par dag pas de ltar snang ste/ 'dis ni 'bras bu phun sum tshogs pa bstan to/ /de bzhin gshegs pa'i gnas zhes bya ba 'dis ni bdag po phun sum tshogs pa bstan te/bdag po khyad par can sangs rgyas bcom ldan 'das kyi gnas yin gyi/ gzhan gyi ni ma yin no/ /byang chub sems dpa' chen po'i rten/ /zhes bya ba ni phyogs phun sum tshogs pa ste/ der ni chen por chud pa'i byang chub sems dpa' rnams phyogs yin gyi/nyan thos rnams ni ma yin no/ /lha dang klu dang gnod sbyin dang / /dri za dang lha ma yin dang nam mkha' lding dang mi'am ci dang lto 'phye chen po dang mi ma yin pa tshad med pa rnam par rgyu ba zhes bya bas ni zhabs 'bring ba phun sum tshogs pa ston te/ der ni lha la sogs pa zhabs 'bring ba yin gyi/ gang yang rung ba ni ma yin no/ /lto 'phye chen po ni sprul lo/ /lhag ma ni go bla bsam bshad do/ /chos kyi ro'i dga' ba dang bde ba chen pos brtan pa zhes bya ba ni de na chos kyi ro'i dga' ba dang bde ba chen pos brtan pa yod pas zhes tshig rnam par sbyar ro//brtan pa ni zas te 'dis ni de'i phun sum tshogs pa bstan to/ /sems can thams cad kyi don thams cad mdzad pas nye bar gnas pa zhes bya ba ni phrin las phun sum tshogs pa ste/ sems can gyi don mdzad pa'i phyir ro/ /nyon mongs pa'i gnod pa thams cad dang bral ba zhes bya ba ni phan 'dogs pa phun sum tshogs pa ste/nyon mongs pa las gyur ba'i gnod pa med pa'i phyir ro/ /bdud thams cad yongs su spangs pa zhes bya ba ni 'jigs pa med pa phun sum tshogs pa ste/ phung po dang nyon mongs pa dang 'chi bdag dang lha'i bu'i bdud kyi dgra'i 'jigs pa med pa'i phyir ro//thams cad kyi bkod pa las lhag pa de bzhin gshegs pa'i byin gyi rlabs kyis bkod pa zhes bya ba ni byang chub sems dpa' thams cad kyi bkod pa gang dag yin pa de dag pas lhag pa de bzhin gshegs pa'i byin gyi rlabs kyis der bkod pa zhes bya ba'i phyir ro/'dis ni rten phun sum tshogs pa bstan te/ gnas thams cad kyi mchog yin pa'i phyir ro/ /dran pa dang blo gos dang rtogs pa chen pos nges par 'byung ba zhes bya ba la dran pa chen po thos pa las byung ba'i shes rab gang yin pa'o/ /blo gros chen po ni bsams pa las byung ba'i shes rab po//rtogs pa chen po ri bsgoms pa las byung ba'i shes rab ste/ 'dis ni lam phun sum tshogs pa bstan to/ /lam ni nges par 'byung ba'i rnam grangs su gtogs pa'i phyir ro/ /zhi gnas dang lhag mthong chen po'i theg pa zhes bya ba ni lam nas gang la zhon te 'gro ba de theg pa ste zhi gnas dang lhag mthong gnyis kyis 'gro ba'i phyir ro//chen po ni nyan thos dang rang sangs rgyas dang byang chub sems dpa' rnams las khyad par du 'phags pa'i phyir te/ 'dis ni bzhon pa phun sum tshogs pa bstan to/ /rnam par thar pa'i sgo chen po stong pa nyid dang / mtshan ma med pa dang / smon pa med pa nas 'jug pa zhes bya bas ni sgo phun sum tshogs pa ston to/ /sgo ni sgo mo dang don gcig go/ /'jig rten gyi grong khyer dang mthun par rnam par thar pa'i sgo gsum po dag nas der 'jug pa'i phyir ro/ /chen po ni snga ma bzhin no/ /yon tan gyi tshogs tshad med pas brgyan pa rin po che pad+ma'i rgyal po chen po'i bkod pa la brten pa zhes bya ba ni gzhi phun sum tshogs pa bstan te/dper nas ni rlung gi dkyil 'khor la brten pa de bzhin du yon tan gyi tshogs tshad med pas brgyan pa yang pad+ma chen po'i rgyal po la brten to/ /rgyal po bkod pa ni pad+ma gzhan thams cad pas mchog tu gyur pa'i phyir ro//yang na rgyal po chen po ni sangs rgyas rnams te/ chos kyi rgyal po yin pa'i phyir ro/ /de dag gi pad+ma bkod pa'i brten pa de la dus dang mthun par bzhugs so/ /sangs rgyas kyi zhing yongs su dag pa de'i longs spyod ni shin tu dag pa ste/bshang gci dang bral bas mi gtsang ba med pa'i phyir ro/ /shin tu bde ba ste/ sdug bsngal dang tshor ba bar ma med pa'i phyir ro/ /shin tu kha na ma thob med pa ste/ mi dge ba dang lung du ma bstan pa med pa'i phyir ro/ /shin tu dbang sgyur ba can te/ sems bskyed pa tsam la rag las pas rkyen la mi ltos pa'i phyir ro/ /chos kyi dbyings de ni zhes bya ba ni chos kyi sku'o/ /phrin las lnga dang ldan pa zhes bya ba la/ gnod pa yongs su skyob pa'i phrin las can zhes bya ba la/ gnod pa ni smyos pa dang 'on pa la sogs pa ste/ ji skad du sangs rgyas mthong bas long ba rnams kyis ni mig rnyed/ 'on pa rnams kyis ni rna bas thos/ smyon pa rnams kyis ni dran pa rnyed ces bya ba la sogs pa gsungs pa lta bu'o/ /chos kyi sku ni dbang po drug gi spyod yul ma yin no zhes bshad pa ma yin nam/ long ba'am gzhan dag gis mthong ba zhes bya ba de ji lta bu zhe na/chos kyi sku mthong zhes mi smra'i/ 'on kyang sngon gyi smon lam gyi shugs kyi dbang gis rnam par mi rtog bzhin du de dag gi sprul pa'i sku'i 'jug pa yod pa de ltar long ba la sogs pas mig la sogs pa 'thob pa gang yin pa de chos kyi sku grub pa'i phrin las te/tshogs kyi shugs kyi mthus 'khor lo bskor ba bzhin no/ /ngan song las yongs su skyob pa'i phrin las can zhes bya ba ni mi dge ba'i gnas nas bslang ste/ dge ba'i gnas la 'jog pa'i phyir ro/ /don gyis na ngan song las yongs su skyob par 'gyur te/ rgyu med na 'bras bu med pa'i phyir ro//thabs ma yin pa las yongs su skyob pa'i phrin las can zhes bya ba ni bshad pa de nyid kyis bkrol zin to/ /'jig tshogs las yongs su skyob pa'i phrin las can zhes bya ba la 'jig tshogs ni 'jig pa'i bdag nyid kyi tshogs so/ /khams gsum pa gang du 'jig tshogs la lta ba 'jug pa de las 'da' ba'i phyir sprul pa'i skus chos ston pas yongs su skyob bo//theg pa las yongs su skyob pa'i phrin las can zhes bya ba ni ma nges pa'i rigs can nyid ni byang chub sems dpa' dang nyan thos rnams dang sbyar te/ de dag theg pa chen po la 'jog pa ni phrin las lnga pa'o//lnga po de dag la sangs rgyas rnams phrin las mtshungs par blta bar bya'o/ /ji lta zhe na/ rgyu dang gnas dang bya ba dang ni bsam pa dang zhes bya ba la sogs pa'i tshigs su bcad pa smos pa'o/ /rgyu tha dad pas 'jig rten na las tha dad par 'gyur te/'di lta ste/ rgyu gzhan gyis lhar 'gyur ro/ /gzhan gyis mir 'gyur ro/ /de tha dad pas lha la sogs pa'i las tha dad do/ /sangs rgyas rnams ni de lta ma yin te/ tshogs tha dad pa med pa'i phyir/ rgyu tha dad pa med do/ /gnas ni lus te khog pa'o/ /de tha dad pas kyang las tha dad par 'gyur te/'di lta ste/ lha sbyin gyi lus kyang gzhan/ mchod sbyin gyi lus kyang gzhan no/ /sangs rgyas rnams ni de lta ma yin te/ chos kyi sku tha dad pa med pa'i phyir sku tha dad pa med do/ /bya ba ni byed pa ste/ dgos pa zhes bya ba dang don gcig go/ /de tha dad pa'i phyir yang las tha dad de/'di lta ste/ tshong ba rnams kyi las kyang gzhan/ zhing rmed pa rnams kyi las kyang gzhan/ rgyal po'i zhabs 'bring byed pa rnams kyi las kyang gzhan no/ /sangs rgyas rnams ni de lta ma yin te/ 'gro ba'i don spyod pa'i mdzad pa tha dad pa med pa'i phyir ro/ / bsam pa ni sems pa ste/ de tha dad pas kyang las tha dad de 'di lta ste/ phan pa'i bsam pa'i las kyang gzhan/ phan pa ma yin pa'i bsam pa'i las kyang gzhan no/ /sangs rgyas rnams ni de lta ma yin te/ phan pa dang bde ba mdzad par dgongs pa'i phyir ro/ /'du byed ni rtsol ba ste/ de tha dad pas kyang las tha dad par 'gyur te/ 'di lta ste/ rtsol ba chung ngu'i las ni chung ba dang / rtsol ba chen po'i las ni che ba'o/ /sangs rgyas rnams ni de lta ma yin te/ de mi mnga' ba'i phyir de dag ni mdzad pa thams cad lhun gyis grub pa'o/ /de bas na rgyu la sogs pa tha dad pa lnga pa med pa'i phyir lnga po dag las phrin las tha dad pa mi mnga' ba ni legs par brjod pa yin no//theg pa gcig bstan pa'i dgongs pa/ kha cig dag ni drang phyir dang / /zhes bya ba la sogs pa tshigs su bcad pas ston to/ /ma nges pa'i rigs can gyi nyan thos rnams kyis rnam pa gzhan gyis thar par mi 'gyur bar rtogs nas theg pa chen po nyid kyis nges par 'byung bar bya ba dang /ma nges pa'i rigs can gyi byang chub sems dpa' gzhan yang kun du bzung ba'i phyir te/ de dag spro ba med par gyur kyang theg pa gcig thos par byas pas kun du bzung na nyan thos kyi theg pas yongs su mya ngan las 'da' bar mi 'gyur bar bya ba yin no//chos mthun pa'i phyir zhes bya ba la chos ni 'dir de bzhin nyid de/ 'di ni nyan thos la sogs pa thams cad dang yang thun mong ngo / /de'i phyir las su sgrub par theg pa'i sgra smos te/ de bzhin nyid gcig pa'i phyir theg pa gcig go//bdag med pa mthun pa'i phyir zhes bya ba ni gang zag la bdag med pa mthun pa'i phyir ro/ /gang zag gi rdzas tha dad pa yin na ni 'di ni nyan thos so/ /'di ni byang chub sems dpa'o zhes theg pa tha dad par 'gyur ba zhig na de med pa'i phyir theg pa gcig pa nyid do//grol ba mthun phyir zhes bya ba ni nyon mongs pa'i sgrib pa las rnam par grol ba tha dad pa med pa'i phyir te/ ji skad du/ bcom ldan 'das kyis rnam par grol ba dang rnam par grol ba ni tha dad du dbyer med do zhes gsungs pa lta bu'o/ /dgongs pa des na theg pa gcig pa nyid do//rigs ni tha dad gyur pa'i phyir/ /zhes bya ba ni 'di ltar rigs ma nges pa'i phyir ro/ /byang chub tu bsngos pa dag ni nyan thos kyi rigs yin du zin kyang sangs rgyas kyi rigs su 'gyur te/ de'i phyir theg pa gcig nyid do/ /bsam gnyis brnyes phyir zhes bya ba ni bsam pa rnam pa gnyis thob pa'i phyir te/sangs rgyas rnams ni bdag gang yin pa de dag go zhes sems can thams cad la bdag gi skur dgongs pa brnyes so/ /des na mngon par rdzogs par sangs rgyas pa des de dag kyang mngon par rdzogs par sangs rgyas par 'gyur te/ re zhig 'di ni bsam pa brnyes pa gcig go//gnyis pa ni sangs rgyas bcom ldan 'das kyis dam pa'i chos pad+ma dkar po las shA ri'i bu la sogs pa nyan thos rnams lung bstan pa ste/ bdag cag kyang sangs rgyas dang mtshungs so snyam pa'i bsam pa 'dzin du gzhug pa'i phyir ro//yang na ming de skad ces bya ba'i byang chub sems dpa' rnams 'khor der de skad lung bstan to/ /de'i phyir sangs rgyas rnams kyi gsung gcig la rnam pa gnyis te/ nyan thos rnams kyang sangs rgyas dang mtshungs par thob pa'i bsam pa 'dzin du bcug pa dang / byang chub sems dpa' rnams kyang lung bstan to/ /sprul ba'i phyir zhes bya ba ni dge slong dag ngas mngon par shes te/ nyan thos nyid du lan brgya phrag du ma byas nas mya ngan las 'das so zhes gsungs pa lta bu'o/ /sangs rgyas su gyur nas ji ltar nyan thos nyid du mya ngan las 'da' bar 'gyur te/ de la dgongs pa ni 'dul ba rnams la lus de dang der sprul nas ngas dgos pa byas te mya ngan las 'das pa bstan to snyam pa 'di yin no/ /de'i phyir don du nyan thos dang rang sangs rgyas kyi theg pa gang yin pa de nyid theg pa chen po yin pas theg pa gcig pa nyid du gyur to/ /mthar phyin pas zhes bya ba ni mthar phyin par zhal gyis bzhes nas theg pa gcig ces gsungs kyi gzhan dag med pa ni ma yin no//'o na ci zhe na/ de'i gong na theg pa med pa'i phyir theg pa gcig ste khyad par can med pa'i phyir ro/ /theg pa gzhan dag ni khyad par can dang bcas pa'o/ /khams gcig na ni gnyis med phyir//zhes bya ba ni 'jig rten gyi khams gcig na sangs rgyas gnyis med pa'i phyir ro/ /'o na gcig nyid du 'gyur ro snyam pa de bzlog pa'i phyir/ dpag med lhan cig tshogs bsags phyir/ /zhes bya ba smos so/ /'o na ni 'jig rten gyi khams gcig tu sangs rgyas mang po rim gyis 'byung ngo snyam pa de'i phyir/rim gyis 'byung bar mi rigs phyir/ /zhes bya ba smos te/ tshogs yongs su rdzogs pa rnams la rim gyis 'byung ba'i rgyu ci yang med do/ /'di la kha cig theg pa chen po pa nyid du gyur kyang phung po'i lhag ma med pa'i mya ngan las 'das pa'i dbyings kyi bsam pas sangs rgyas rnams gtan du yongs su mya ngan las 'da' bar 'dod do//kha cig ni phung po'i lhag ma dang bcas pa'i mya ngan las 'das pa'i dbyings kyi bsam pas gtan du yongs su mya ngan las 'das pa ma yin par 'dod do/ /de gnyi ga yang mi rung ste/ sangs rgyas rnams ni gtan du yongs su mya ngan las 'das pa yang ma yin/ gtan du yongs su mya ngan las 'das pa ma yin pa yang ma yin te/ dgongs pa rags ni gtan du yongs su mya ngan las 'das so/ /dgongs pa 'gas ni gtan du yongs su mya ngan las ma 'das so/ / sgrib pa kun las nges grol phyir/ /gtan du yongs su mya ngan las 'das so/ /mdzad pa rnams kyang ma rdzogs phyir/ /yongs su mya ngan las 'das pa ma yin no/ /de gzugs kyi skur snang ba'i phyir zhes bya ba ni longs spyod rdzogs par snang ba'i phyir ro/ /ngo bo nyid ni gzugs kyi skur snang ba ma yin no//sangs rgyas kyi 'khor gyi dkyil 'khor tshad med pa dag na longs spyod rdzogs pa tha dad pa snang gi ngo bo nyid tha dad pa med do/ /mos pa ji lta ba bzhin du mthong bas ma nges pa'i ngo bo nyid du snang ba'i phyir zhes bya ba ni 'di ltar kha cig longs spyod rdzogs pa'i sangs rgyas la bsgres par mthong ngo //kha cig gis gzhon nur mthong / kha cig gis dar la bab par mthong yang ngo bo nyid la ni ma nges pa med do/ /g.yo ba'i ngo bo nyid du snang ba'i phyir zhes bya ba ni mthong ba po gcig nyid kyis kyang longs spyod rdzogs pa de/ res 'ga' ni rnam pa gzhan du mthong yang /ngo bo nyid la ni g.yo ba med do/ /byang chub sems dpa' dang nyan thos dang lha la sogs pa dang / longs spyod rdzogs pa'i sku rtag tu 'dres pa yin yang ngo bo nyid la ni 'dres par mi rung ngo / /gnas gyur pa mi rigs par snang ba'i phyir ro zhes bya ba la/ kun gzhi rnam par shes pa gyur pa ni ngo bo nyid do//'jug pa'i rnam par shes pa gyur pa ni longs spyod rdzogs pa'o/ /mi rigs pa drug po 'di dag gis ngo bo nyid ni longs spyod rdzogs par mi rung ngo / /sprul pa ni rnam pa brgyad kyis ngo bo nyid du mi rung ste/ byang chub sems dpa' yun ring po nas mi nyams pa'i ting nge 'dzin thob pa yongs su ma nyams pa rnams dga' ldan gyi lha dang mi'i nang du 'dod pa na spyod pa rnams su skye bar mi rigs te/skal pa mi rung bar ting nge 'dzin las mi nyams pa'i 'bras bu ni 'dod pa na spyod par mi rigs so/ /de'i phyir sprul pa de ni ngo bo nyid las gzhan zhes bya bar grub bo//skye ba dran pa rnams zhes bya ba nas bzung ste/ dka' ba spyod pa mi rigs so/ /zhes bya ba'i bar ni 'grel pa la mi ltos par tshig de nyid kyis bshad zin to/ /'dzam bu'i gling bye ba phrag brgya bor te/ gcig tu mngon par rdzogs par byang chub pa dang / chos kyi 'khor lo bskor pa mi rigs so zhes bya ba ni sprul pa ni rigs te/thams cad du mthun pa'i phyir ro/ /de'i phyir sprul ba ni ngo bo nyid du mi rung ngo / /ji ste 'dzam bu gling gzhan rnams su mngon par rdzogs par byang chub pa bstan pa med par 'dzam bu'i gling gcig tu mngon par rdzogs par sangs rgyas nas lhag ma rnams su sprul pa rnams kyis sangs rgyas kyi mdzad pa mdzad par 'dod na/de'i phyir dga' ldan nyid du mngon par rdzogs par sangs rgyas par ci'i phyir mi 'dod/ /gal te khyod kyi lugs ltar 'dzam bu gling gcig tu mngon par rdzogs par sangs rgyas la/ lhag ma rnams su sprul pa ston par rung na/de'i phyir dga' ldan nyid du mngon par rdzogs par sangs rgyas la/ de nyid na bzhugs bzhin du gling bzhi ba'i 'dzam bu'i gling thams cad du sprul pa ston par ci'i phyir mi rung ste/ gling bzhi pa'i 'dzam bu'i gling thams cad du mngon par rdzogs par byang chub pa med do zhes gang gi stobs kyis 'dzam bu'i gling gang du yang sangs rgyas 'byung ba mi snang bar shes par bya ba'i lung yang med la/rigs pa yang med do/ /'on te de bzhin gshegs pa gnyis snga phyi med par 'jig rten gyi khams gcig tu 'byung ba ni/ gnas ma yin zhing go skabs med do zhes gang gsungs pa'i mdo dang mi 'gal lam/'dzam bu'i gling thams cad du sangs rgyas cig car byung bar gyur na de dang 'gal lo zhe na/ de bzhin gshegs pa gnyis zhes bya ba la sogs pas lan 'debs te/ mdo 'dir ni 'jig rten gyi khams gling bzhi par brjod par bzhed pa yin gyi/ stong gsum pa ni ma yin no//'khor los sgyur ba'i rgyal po gnyis mi 'byung ba bzhin no zhes bya ba ni ji ltar de bzhin gshegs pa cig car du mi 'byung ba de bzhin du 'khor los sgyur ba yang cig car du mi 'byung ngo zhes mdo las gsungs la/ de dag ni gling bzhi pa gcig tu mi 'byung gi/ stong gsum du ni ma yin pas/sangs rgyas kyang de bzhin du sbyar bar bya'o/ /'dir tshigs su bcad pa zhes bya ba ni mngon par rdzogs par byang chub pa de/ sangs rgyas sprul pa phra ba ni/ /zhes bya ba la sogs pa'i tshigs su bcad pas ston pa'o/ /ji ltar sangs rgyas sprul pa'i sku/ /yum gyi lhums su mngal du 'jug pa de bzhin du de'i zhabs 'bring ba gnas brtan shA ri'i bu la sogs pa nyan thos mang po dag kyang /rang rang gi sprul pas/ rang rang gi ji lta ba bzhin ma'i mngal du zhugs so/ /mtshungs par zhes bya ba ni dus mthun pa ste/ de ltar na rnam pa thams cad mngon par rdzogs par byang chub par rab tu bstan pa yin no//sems can thams cad kyi don du smon lam btab pa dang / sgrub pa gnyis kyis zhes bya bas ni ji ltar gtan du yongs su mya ngan las 'das pa de ltar mi rung bar bstan to/ /sems can thams cad kyi don bya'o snyam du smon lam btab cing sgrub pas sems can gyi don nyid mdzad do//gal te gtan du yongs su mya ngan las 'da' bas yongs su mya ngan 'da' na/ de gnyis 'bras bu med par 'gyur ro zhes bya bas ni yongs su mya ngan las 'da' bar mi 'thad pa'i rgyu bar du chod pa de brjod do/ /kha cig tu de bzhin gshegs pa rnams kyi sku ni rtag pa'o zhes gang gsungs pa de ni longs spyod rdzogs pa dang /sprul pa'i sku ni mi rtag pa'i phyir ro/ /gal te de gnyis mi rtag na sku rtag pa'o zhes ji skad du zhe na/ de gnyis kyang rtag pa yin te/ rgyu mthun pa dang sprul pa'i sku gnyis chos kyi sku rtag pa la brten pa'i phyir ro//rnam grangs kyi rtag pa nyid du ston te/ chos kyi sku la ltos nas de dag gi sku rtag pa'o zhes tshig rnam par sbyar ro/ /sku gzhan gnyis la ltos nas/ de dag gi sku mi rtag pa la gnas pa'o zhes tshig rnam par sbyar ro/ /yang longs spyod rdzogs pa ni/ longs spyod rdzogs par rgyun ma chad pa zhes bya ba ni/longs spyod rdzogs pa rgyun ma chad cing rgyun du 'jug pas rtag pa'o/ /rtag tu bde ba spyod de zhes bya ba bzhin no zhes bya ba ni re zhig dper na rgyun ma chad par bde ba spyod pa ma yin mod kyi/ 'on kyang rgyun mi 'chad pa'i phyir 'di rtag tu bde ba spyod do zhes bya ba de bzhin du longs spyod rdzogs pa'i sku yang gtan du gnas pa ma yin mod kyi/'on kyang rtag pa zhes bya ste/ byang chub sems dpa'i 'khor gyi dkyil 'khor de dang der rgyun mi 'chad par ston pa'i phyir ro/ /sprul pa ni yang dag yang ston pa'i dgos pas rtag pa ste/ rtag tu zas sbyin no zhes bya ba bzhin no//dper na rtag tu zas sbyin pa ma yin mod kyi/ yang dag yang du sbyin pa'i phyir rnyed sla ba la dgongs nas/ rtag tu zas sbyin pa zhes bya ba de bzhin du sprul pa'i sku yang skye ba dang 'jig pa med pas rtag pa ma yin mod kyi/ 'dul ba ji lta ba bzhin du yang dag yang ston to/ /rnyed sla ba'i phyir rtag pa zhes bya'o//mya ngan 'das pa la 'dun pa med pa'i phyir ro zhes bya ba ni yongs su mya ngan las 'das pa kun du ston pa'i dgos pa bstan to/ de bzhin gshegs pa rtag par rig na/ sangs rgyas kyi sku rtag pa don du gnyer te/ mya ngan las 'das pa la mi phyogs par 'gyur bas bcom ldan 'das kyis de bstan na de la 'dod par 'gyur ro//chos zab mo bstan pa khong du ma chud pa la zhes bya ba ni/ sangs rgyas bzhugs na 'di rtag go/ /zhes chos zab mo bstan pa khong chud par bya ba la 'bad pa med par 'gyur te/ gal te de ltar khong du ma chud kyang dus shig na rtogs par 'gyur grang snyam mo//yang dang yang 'dri'am 'dzin na brnyas pa skye bar 'gyur te/ bdag gis log par zin na/ de la 'dis de skad bshad do zhes zer ro/ /mi bzhugs na ni brnyas pa mi skyed do/ /de'i dgongs pa bdag cag gis ma zin gyis/ bcom ldan 'das ni yongs su mya ngan las ma 'das na/bdag cag la khong du chud par byed pa su yod ces chos rtogs par byed pa lhur len par 'gyur ro/ /ston pa mi dmigs pa zhes bya ba ni/ bcom ldan 'das yongs su mya ngan las 'das na/ bdag cag kyang brtson 'grus la gnas te/ ston pa med pa'i 'gro ba la ston pa thob par bya ba'i rigs so snyam mo//gzhan du na ni bcom ldan 'das ston pa 'gro ba'i mgon mdzad do zhes brtson 'grus mi rtsom par 'gyur ro/ /so so rang brtson 'grus mi 'dor bas zhes bya ba ni brtson 'grus brtsams pa rnams brtson 'grus 'dor ba yongs su spang ba'i phyir te/ji srid du bcom ldan 'das bzhugs pa de srid du dge ba'i rtsa ba yongs su smin par bya'o snyam mo/ /rgyu drug ji skad bstan pa bsdu ba'i tshigs su bcad pa ni/ mdzad pa rdzogs par 'gyur ba'i phyir/ /zhes bya ba la sogs pa'o/ /gal te chos kyi skus sangs rgyas gtan du dpag tu med na sangs rgyas kyis phongs pa cung zad kyang med kyi/de'i don du 'bad ci dgos zhes rgol ba'i skabs rig nas/ sangs rgyas rnams kyi chos kyi sku/ thog ma med pa'i dus nas zhes bya ba la sogs pa smos so/ /kha cig 'di snyam du sems te/ sangs rgyas gcig kho nas sems can thams cad kyi dgos pa sgrub par spyod kyis/ de ni don la 'bad ci dgos snyam du sems pa de'i blo bsal ba'i phyir/ gal te sangs rgyas brnyes pa khyad med dpag med pa/ /zhes bya ba la sogs pa smos so/ /gal te chos kyi sku la sangs rgyas nyid thob pa dus thams cad du khyad par med pa/sangs rgyas nyid la 'bad pa ldog pa'i rgyur 'gyur na sangs rgyas nyid thob par rtag tu rgyu med pa las byung bar 'gyur bas/ sngon gyi sangs rgyas de dag kyang bsgrim pa med par sangs rgyas nyid du 'gyur bar thal bar 'gyur ro/ /ji ste de dag rgyu med pa las 'byung bar mi 'dod na/rgyu'i rgyun gcod pa ni rigs pa'i tshul ma yin/ sangs rgyas nyid thob pa dus thams cad du khyad par med pa ni/ 'bad pa nyams pa'i rgyur mi 'gyur ro/ /bshad 'di ngo bo nyid med pa/ /sangs rgyas nyid du smon byas shing / /lung rigs dag pas dag pa'i blor/ /snying rjer brtul ba'i yid kyis byas//theg chen zab mo 'di la ni/ /sems ni mnyam gzhag ma yin zhing / /da ltar gyi ni cha mthong ba'o/ /bdag 'dra'i rtog pa ci zhig 'dra/ /'on kyang grub mtha' la brten nas/ /dge ba goms pa sngon 'gro ba'i/ /bsod nams kyis ni 'jig rten rnams/ /rnam kun mchog mkhyen thob par shog//theg pa chen po bsdus pa'i bshad sbyar slob dpon dge bsnyen btsun pa ngo bo nyid med pa chos rnams la sgyu ma lta bu'i ngo bo nyid du thugs su chud pas mdzad pa rdzogs so// //rgya gar gyi mkhan po dzi na mi tra dang / shI len+d+ra bo d+hi dang / zhu chen gyi lo tsA ba ban de ye shes sdes bsgyur cing zhus te gtan la phab pa/dge slong dpal brtsegs kyis zhus te gtan la phab pa'o/ /'di la sh+lA+o ka ni nyis stong bdun brgya bdun cu rtsa bzhi yod// //bam po bdun du byas so// //