CLOSE WINDOW

D4047
བོད་ཡིག

@##/ /rgya gar skad du/ yo gA tsa R+Ya b+hU mi s+ye bo d+hi satwa b+hU mi byA khyA/ bod skad du/ rnal 'byor spyod pa'i sa las byang chub sems dpa'i sa'i rnam par bshad pa/ 'phags pa 'jam dpal gzhon nur gyur pa la phyag 'tshal lo//sangs rgyas dang byang chub sems dpa' thams cad la phyag 'tshal lo/ /'phags pa byams pa la phyag 'tshal lo/ /dang por bstan bcos kyi lus rnam par gzhag par bya ba'i phyir/chos bcu po 'di dag ni zhes bya ba la sogs pa smos te/ byang chub sems dpa'i lam ni byang chub sems dpa'i spyod pa la sbyor ba'o/ /'bras bu ni spangs pa rnam pa gnyis dang /ye shes rnam pa gnyis te/ nyon mongs pa'i sgrib pa spangs pa dang / shes bya'i sgrib pa spangs pa dang / rnam par dag pa'i ye shes dang / thogs pa med pa'i ye shes so//sangs rgyas par ni sangs rgyas kyi chos ma 'dres pa brgya bzhi bcu'o/ /'di dag nyid gnyis ka yang theg pa chen po zhes bya ste/ 'di nas 'gro bas sam/ 'di dag 'gro ba'i phyir theg pa'am/bgrod bya'am/ 'gro ba ni theg pa zhes byas nas so/ /chen po yang de yin la lam yang de yin pas na theg pa chen po'o/ /yang theg pa chen po ni chen po rnam pa bdun dang ldan pas so//chos chen po ni stong phrag brgya pa la sogs pa dpag tu med pa'i mdo sde la sogs pa'i chos ston pa la sbyor ba nyid do/ /sems bskyed pa chen po ni yon tan dang skyon thams cad thob pa dang spangs pa'i mthar thug pa la gnas pa'i bla na med pa yang dag par rdzogs pa'i byang chub tu sems bskyed pa'o//mos pa chen po ni zab cing rgya che ba'i chos rnams la mngon par mos pa nyid do/ /bsam pa chen po nyid ni lhag pa'i bsam pa rnam par dag pa'i sa la sems can thams cad la bdag dang mnyam pa'i bsam pa thob pa nyid do//tshogs chen po nyid ni sa la zhugs pa'i byang chub sems dpa' rnams skad cig re re la yang bsod nams dang ye shes kyi tshogs dpag tu med pa nye bar sogs par byed pa nyid do//dus chen po nyid ni bskal pa mi nyung ba grangs med par rgyun mi 'chad par sbyor ba nyid do/ /'bras bu chen po nyid ni sems can thams cad dang thun mong ma yin pa'i sangs rgyas kyi bdag nyid che ba thob pa nyid do//byang chub sems dpa'i sa de dag kyang mdor bsdu na gnas skabs gnyis te/ rgyu'i gnas skabs dang / 'bras bu'i gnas skabs so/ /de la gzhi la sogs pa rgyu ni ji ltar rigs par rgyu dang 'bras bu'i gnas skabs so/ /tha ma ni 'bras bu'i gnas skabs kho nas bsdus pa nyid yin no//yang byang chub sems dpa'i sa ma lus pa ni gnas gsum gyis bsdus par rig par bya'o/ /gzhi'i rnal 'byor gyi gnas dang / gzhi'i rjes su mthun pa'i rnal 'byor gyi gnas dang / gzhi'i mthar thug pa'i rnal 'byor gyi gnas so/ /gzhi'i rnal 'byor gyi gnas ni le'u bco brgyad kyis bsdus pa'o//gnyis pa ni le'u bzhis bsdus so/ /gsum pa ni le'u lnga'i bdag nyid do/ /yang gnas gsum gyis bsdus par rig par bya ste/ rgyu'i khyad par dang / 'bras bu'i khyad par dang / de gnyi ga'i gnas skabs kyi khyad par ste/dang po dang / tha ma dang / bar ma rnams ji ltar rigs par ro/ /de la gzhi la sogs pa'i go rims ni 'di yin te/ dang po nyid nas bla na med pa yang dag par rdzogs pa'i byang chub la slob par byed pa na de'i rgyu'i tshogs rnam pa gsum ni gzhi ste/ de nye bar blangs nas 'jug pa zhes bya bas ni gzhi bstan pa yin no//de las tha ma byang chub sems dpa'i spyod pa la sbyor ba'i mtshan nyid kyi gzhi la 'jug pa na/ dge sbyong dang thun mong du gyur ba'i rtags 'byung bar 'gyur te/ rtags gang dang ldan pas byang chub sems dpa' zhes bya bar yang dag par chud pa 'thob par 'gyur ba ste/ brtse ba dang bcas pa dang / snyan par smra ba dang / brtan pa dang / lag brkyang ba dang / don zab mo'i dgongs pa nges par 'grel pa'o/ /yang rtags de dag ni legs par byas pa'i las kyi mtha' la sogs pa phyogs kyi chos la sbyor ba ni khyim pa'i phyogs sam/ rab tu byung ba'i phyogs la 'jug par 'gyur ro//de lta bas na de'i rjes la phyogs bstan to/ /yang rtags de dag 'gro ba de dag tu phyogs de dag gis 'jug par gyur pa rnams las kyang lhag pa'i bsam pa rnam par sbyangs pa rnams la 'byung gi gzhan la ni ma yin no zhes bstan pa'i phyir/ de'i rjes la lhag pa'i bsam pa bstan to//ji skad bstan pa'i byang chub kyi gzhi la zhugs pa rnams la ji skad bstan pa'i rtags rnams mthong bar gyur cing byang chub sems dpa'i phyogs kyi sbyor ba dang yang dag par ldan par gyur pas/ ji skad bstan pa'i byang chub sems dpa'i lhag pa'i bsam pa rnam par sbyong bar byed pa'i byang chub sems dpa' rnams mdor bsdu na byang chub sems dpa'i gnas pa bcu gnyis dang /bcu gsum pa de bzhin gshegs pa'i gnas pa la gnas par 'gyur ro zhes bya bar de'i rjes la gnas pa bstan te/ gnas pa 'di dag la gnas shing gnas pa thams cad la 'jug par 'gyur ba'i byang chub sems dpa' thams cad la kha na ma tho ba med pa'i sems can thams cad la phan pa dang bde bar bya ba'i phyir skye ba rnam pa lnga len par byed pa bstan par bya ba'i phyir de'i rjes la skye ba bstan to//de bzhin du gnas pa thams cad du gtogs pa'i byang chub sems dpa'i spyod pa la gnas pa'i byang chub sems dpa' rnam pa drug gis sems can rnams yang dag par 'dzin to zhes bya bar de'i rjes la yongs su 'dzin pa nye bar bstan to//ji skad bstan pa'i gnas pa bcu gsum du gtogs pa de dag sa bdun du 'gyur ro zhes bya bar de'i rjes la sa nye bar bstan to//mos pas spyod pa'i sa nas nye bar bzung nas byang chub sems dpa'i sa thams cad la byang chub sems dpa'i spyod pa rnam pa bzhir 'gyur bas de'i rjes la spyod pa bstan to/ /de lta bu'i spyod pa dang ldan pa rnams ni de bzhin gshegs pa'i gnas pa las brtsams te de bzhin gshegs pa'i sa'i mthar thug par gtogs pa sangs rgyas kyi chos ma 'dres pa brgya bzhi bcu bstan pa ni rab tu gnas pa ste/de la snang ba dang tshig gi sbyor ba dang ldan pa'i phyir/ sangs rgyas de la rab tu bzhugs pas na rab tu gnas pa zhes bya'o/ /'dis 'dzin par byed pas na gzhi ste/rtogs par byed pa zhes bya ba'i don to/ /thog ma dang bar ma dang tha mar byang chub sems dpa' rnams byang chub thob pa dang / rjes su mthun pa'i chos ni rigs la sogs pa'i chos gsum yin par rig par bya'o/ /gzhi'i dbye ba yang mdor bsdu na rnam pa lngar rig par bya ste/ngo bo'i dbye ba bstan pa dang / de'i don bstan pa dang / rtsa ba'i gzhir bstan pa nyid dang / nye ba'i gzhir bstan pa dang / rnam grangs nye bar bstan pa'o/ /de la ngo bo'i dbye ba'i dbang du byas nas 'di la byang chub sems dpa'i rang gi rigs dang / dang po sems bskyed pa dang /byang chub kyi phyogs kyi chos thams cad ni gzhi zhes bya'o zhes bya ba la/ dang po'i gzhi ni rigs so/ /bar du ni sems bskyed pa'o/ /de'i phyi nas byang chub kyi phyogs kyi chos so/ /yang na chung ngu dang / 'bring dang / chen po'i dbye bas so/ /sbyin pa la sogs pa'i pha rol tu phyin pas bsdus pa'i chos thams cad kyang byang chub kyi phyogs kyi chos yin te/byang chub thob pa la rjes su mthun pa yin pa'i phyir byang chub kyi phyogs su rig par bya'o/ /'jig rten na yang gang zhig gang gi rjes su mthun par gyur pa de la de'i phyogs zhes rjod par byed do/ /de ci'i phyir zhe na zhes bya ba ni rgyu gang dang /rkyen gang gis rigs la sogs pa chos gsum la gzhi zhes bya zhes the tshom du gyur pa rnams la rnam par gnyis kyis de dag gzhir gyur pa'i don bstan pa'i phyir/ de ci'i phyir zhe na zhes bya ba smras te/ de ltar de dag gis ni snga ma las phyi ma phyi ma 'byung bar 'gyur ba dang /yang dag par rdzogs pa'i byang chub yongs su rdzogs par bya ba'i phyir gzhi'i don bstan pa yin no/ /de ltar 'di dag gis ni mngon sum dang gcig nas gcig tu brgyud pa'i byang chub thob pa'i tshogs su 'gyur ba'i phyir dang / rgyur gyur pa'i phyir gzhi zhes bstan pa'i rgyur 'gyur ro//rigs la brten cing gnas nas zhes bya ba ni don de nyid ston par byed pa dang / rab tu gnas par byed pa ste/ rigs yod na zhes bya ba'i don to/ /skal ba can du bstan pa'i phyir mthu dang ldan pa zhes bya'o/ /yang skal ba can zhes bya ba ni 'dir yang dag pa'i don la sems bskyed pa'o//de'i rigs med pa rnams la ni ji lta ba bzhin gyi sems bskyed pa med do zhes bya'o/ /sems bskyed pa ni sbyin pa la sogs pa la sbyor bar 'gyur bas pha rol tu phyin pa'i ming 'thob kyi/ sems ma bskyed pas ni ma yin no zhes bstan par bya ba'i phyir/ sems bskyed pa la brten cing zhes bya ba gsungs te/'di dag gnyi ga yang gong nas gong du 'byung bar 'gyur ba nyid kyi gzhir gyur pa nyid do/ /sems bskyed pa nyid kyis sbyin pa la sogs pa la sbyor ba ni pha rol tu phyin pa zhes bya ba'i ming 'thob pa yin no zhes bya bar bstan pa'i phyir pha rol tu phyin pa drug po zhes bya ba yin no//pha rol tu phyin pa drug po 'di dag nyid ji ltar rigs par bsod rnams kyi tshogs dang ye shes kyi tshogs yin no zhes bstan par bya ba'i phyir bsod nams kyi tshogs dang ye shes kyi tshogs zhes bya ba gsungs te/ de la sbyin pa'i pha rol tu phyin pa dang /tshul khrims kyi pha rol tu phyin pa dang / bzod pa'i pha rol tu phyin pa dang gsum ni bsod nams kyi tshogs te/ bdag gi dngos po dang / longs spyod dang 'khor phun sum tshogs pa'i 'bras bu yin pa'i phyir ro/ /bsam gtan gyi pha rol tu phyin pa dang / shes rab kyi pha rol tu phyin pa ni ye shes kyi tshogs yin te/'bras bu 'bral bar byed pa yin pa'i phyir ro/ /brtson 'grus kyi pha rol tu phyin pa ni gnyi ga'i phyogs so/ /byang chub kyi phyogs kyi chos thams cad la zhes bya ba ni pha rol tu phyin pa las ma gtogs pa'i bsdu ba'i dngos po la sogs pa pha rol tu phyin pa bstan pa las gzhan bstan pa thams cad do//yang dag par rdzogs pa'i byang chub yongs su rdzogs par 'gyur ba'i phyir zhes ci'i phyir rjod par byed/ 'thob par 'gyur ba zhes ci'i phyir mi smra zhe na/ don ni de nyid yin par rig par bya ste/ yongs su rdzogs par 'gyur ba dang /thob par 'gyur ba dang / reg par 'gyur ba dang / mngon gsum du byed ces bya ba rnams don gcig pa'i phyir ro/ /tshig gis 'jug pa ni 'dod pa'i dbang gis yin pas don la yongs su brtag par bya'o/ /yang na rim gyis 'thob par 'gyur bar bstan pa'i phyir yang ste/spangs pa dang / ye shes dang / yang dag par rdzogs pa'i byang chub dang / sangs rgyas kyi chos ma 'dres pa rnams sngar bstan pa de dag ni dus gcig tu thob par mi nus te/ sa dang sa rnams la spangs pa dang / ye shes khyad par can du 'gyur bar sbyor ba'i phyir ro//de yang rnam pa gsum du gsungs te/ pags par gtogs pa dang / sha mthangs su gtogs pa dang / snying por gtogs pa'o/ /de la dang por ni pags par gtogs pa spong ngo / /de nas ni sha mthangs su gtogs pa'o/ /phyi nas ni snying por gtogs pa'o zhes bya ba'o//sangs rgyas kyi chos ma 'dres pa'i ngo bo nyid kyang gzugs dang / ming gi tshogs kyi khyad par gyi ngo bo nyid byang chub ces bstan par 'gyur ro/ /de dag gnyi ga yang sa dang po nas nye bar bzung nas sa dang sa la khyad par thob par 'gyur ro/ /de'i phyir na bstod pa/yang dag rdzogs pa'i byang chub ma lus pa/ /khyod la gtad pa lta bur mngon par snang / /dri ma med pa'i mtsho chu dwangs pa la/ /zla ba skar ma'i gzugs rnams snang ba bzhin/ /zhes bya ba dang / slob dpon sgra gcan zin bzang pos kyang / de bzhin gshegs pas 'dir ni gnas gnyis par//stobs bcu po ni thob par gyur pa gsungs/ /mi 'jigs pa ni bzhi po thob pa yang / /gnas gsum par ni gsal po nyid du gsungs/ /zhes bstan pa yin no/ /rigs la gnas pa ma yin pa zhes bya ba la sogs pa'i gzhung gis ni rigs la gnas pa nyid rtsa ba'i gzhir bstan te/gzhi gzhan la ltos pa med par gzhi nyid yin pa'i phyir ro/ /rigs med na de dag yod par gyur kyang gzhi zhes bya ba yod pa ma yin no/ /gzhan de dag med par gyur kyang rigs ni gzhi nyid du 'gyur gyi/ sems bskyed par gyur pa dang sbyor ba byas par gyur kyang rigs med par gyur na gzhi yod pa ma yin te/rigs med pa'i sems bskyed pa dang sbyor ba byed pas kyang don ji lta ba mi 'thob pa ni bya bas rdzas sbyong bar byed kyi rdzas med par ni ma yin no zhes bya bas nges par shin tu yang skal ba med pa yin no/ /rigs yod par gyur na sems bskyed pa dang sbyor ba la sogs pa med du zin kyang skal ba dang ldan pa rnams dus yun ring pos bla na med pa yang dag par rdzogs pa'i byang chub yongs su rdzogs par byed do//de lta bas na sems bskyed kyang rung ma bskyed kyang rung rigs nyid rtag tu gzhi zhes brngod do//'bad pa la yang dag par gnas su zin kyang zhes bya ba ni/ sbyin pa la sogs pa'i sbyor ba byed du zin kyang zhes bya ba'i don to/ /gal te rigs la gnas kyang zhes bya ba sogs pas ni sems bskyed pa dang / spyod pa la sbyor ba dag gis ni nye bar gyur pa'i gzhi bstan pa yin no//bzlog pa'i sems ma bskyed pa dang / sbyor ba ma brtsams pa ni skal ba dang ldan par bden na yang bla na med pa yang dag par rdzogs pa'i byang chub dang ring bar gyur pa yin no/ /bzlog pas ni nye bar gyur pa yin no/ /gzhi de nyid mngon par gsal bar bya ba'i phyir ming gi rnam grangs gzhan dang gzhan gyi mtshan nyid bstan par bya'o//rnam grangs 'di dag kyang don gcig pa'i phyir nyes pa med do/ /sangs rgyas rnams kyis kyang ming gi rnam grangs gsungs pa ni dgos pa dang bcas pa'i phyir bstan to/ / don tha dad pa ltar na yang 'bras bu nges par 'dzin pas na gzhi ste/ 'bras bu gnas pa'i rgyun 'byung bar byed pas rgyu nyid kyi phyir ston pa zhes bya'o/ /rgyus 'bras bu kun du 'phel bar byed pa ni rgyu ste/ chus ut+pal bzhin no/ /'bras bu'i dus na yang rjes su 'jug pas brten to/ / rim gyis 'byung bar byed pas na nyer gnas so/ /'bras bu'i sngon du 'gro ba yin pa'i phyir sngon du 'gro ba zhes bya'o/ /'bras bu nges par 'gro ba yin pa'i phyir gnas zhes bya'o/ /rigs ji lta ba bzhin du dang po sems bskyed pa zhes bya ba la/ sems bskyed pa dang / spyod pa la sbyor ba dag kyang gzhi'i rang bzhin yin pa'i phyir/rnam grangs de yang des bstan par bya'o zhes bshad pa yin no/ /rigs rnam par gzhag pa ni rnam pa drug tu rig par bya ste/ rab tu dbye ba dang / ngo bo nyid dang / rnam grangs nyid dang / rnam pa nyid dang / bye brag nyid dang /rtags nyid do/ /de la rab tu dbye ba'i rnam par gzhag pa bstan pa'i phyir bshad pa/ mdor na rnam pa gnyis te zhes bya ba ni rgyud mang po rnam pa sna tshogs pa yin pa de lta na ngo bo nyid ni rnam pa gnyis su rnam par gzhag go/ /rang bzhin gyis gnas pa zhes bya ba ni ngo bo nyid kyis sgrub pa ste/ma bsgrub pa/ mngon par 'dus ma byas pas rnam par 'gyur ba ma yin pa zhes bya ba'i don to/ /de las bzlog pa ni yang dag par bsgrubs par rig par bya'o/ /de la rang bzhin gyis gnas pa ni sems ma bskyed pa rigs la gnas par rig par bya'o//shin tu rnam par dag pa'i chos kyi dbyings kyi rgyu mthun pa las skyes pa'i dge ba'i rtsa bas 'dus ma byas pa'i phyir ro/ /sems bskyed pa ni gzhan yin par rig par bya ste/ rigs de nyid gnas skabs kyi khyad par gzhan du gyur pa la ming gzhan gyis bstan pa ni yang dag par bsgrubs pa zhes bya ba ste/gnas skabs kyi khyad par las ming tha dad du btags pa ni mar sar dang / mar zhes bya ba lta bu'am/ 'du byed kyi rkyen gyis rnam par shes pa zhes bya ba lta bu'o/ /yang na rigs nges pa ni rang bzhin gyis gnas pa yin la/ rigs ma nges pa ni yang dag par bsgrub pa zhes bya ste/rkyen gyi khyad par gyis bsgrubs pa'i phyir ro/ /yang na mthar gyis 'jug pa'i sbyor ba dang ldan pa'i byang chub sems dpa' ni rang bzhin gyis gnas pa yin la/ nyan thos kyi theg pa sngon du song ba'i byang chub tu yongs su gyur pa can ni gnyis pa ste/'jig rten las 'das pa'i dge ba'i sa bon la rigs zhes bya'o/ /sa bon de yang 'dus byas las de nyid dang gzhan du brjod pa la grol ba gzung bar mi nus pa/ skye mched drug gi khyad par zhes bya'o/ /skye mched drug po de yang sems can dang rdzas kyi rtsa bar gyur pa'o//de'i phyir sems can gyi khyad par ro zhes brjod par bya ste/ gang dang ldan pas sems can dang / snying po dang / gcig pu dpa' ba dang / skyes bu'i khyad par zhes brjod do/ /yang na snyoms par 'jug pa dang / skye bas thob pa de dang der skye mched gang yang rung ba dang mi phyed par gyur pa la rigs zhes rab tu bstan pa'i phyir/skye mched drug gzung ngo / /de yang de dang de la brten nas byung ba'i dge ba'i sems dang sems las byung ba'i chos sems bskyed pas pha rol tu phyin pa'i ming thob bo/ /de'i phyir na yang skye mched drug gi khyad par la brjod par bya'o//yang na skye mched drug po de dag nyid bsgom pa rab kyi mthar phyin pa thob par gyur pa'i sbyor ba dang ldan pas gnas gyur pa na ji ltar rigs par ming dang gzugs kyi rnam par gzhag pa rab tu thob bar gyur te/ rdzas su gyur pa'i phyir ro//des na skye mched drug gi khyad par kho na rigs yin no/ /yang de dag gi khyad par de ni khams dang / 'gro ba dang / skye gnas dang / sa la sogs par rgyun mi 'chad pa'i sbyor bas skye ba gcig nas gcig tu 'gro ba'i phyir gcig nas gcig tu brgyud de 'ongs pa zhes brjod do//de ltar na gnas skabs gang du yang rigs ni rgyun 'chad pa ma yin no zhes bstan par 'gyur ro/ /de ltar skye mched drug gi khyad par gcig nas gcig tu brgyud de 'ongs kyang 'ga' zhig gi res 'ga' bar 'gyur te/ dper na dmyal ba rnams dang / lha rnams kyi reg bya'i skye mched drug dang ldan pa rnams kyi mi 'dod pa dang / 'dod pa'i tshor ba myong bar gyur pa'i rten du gyur pa 'jug pa rgyun 'chad pa lta bu'o/ /de lta bu ma yin pas thog ma med pa'i dus can zhes bya ste/ sngon gyi mtha' yod pa ma yin zhes bya ba'o/ / de ltar na dus dpag tu med par bstan pa yin no/ /ngo bo nyid kyis grub pa'i phyir chos nyid kyis thob pa ste/ sus kyang mngon par 'dus ma byas pa'i phyir dang / ma 'ongs pa'i phyir zhes bya ba'i don to/ /yang na gcig nas gcig tu brgyud de 'ongs pa'i phyir thog ma med pa'i dus can no//thog ma med pa'i dus can yin pa'i phyir chos nyid kyis thob pa'o zhes phyi ma phyi ma 'bras bur bstan pa yin no/ /sngon dge ba'i rtsa ba goms par byas pa las thob pa zhes bya ba ni/ dang por bskyed pa'i dge ba'i rtsa ba'i stobs las byung ba rigs nges pa'am/ rigs ma nges pa'am/ byang chub tu 'gyur ba can no/ don gyi skabs 'dir ni rnam pa gnyi ga yang 'dod do zhes bya ba ni de gnyi ga dang ldan pas skal ba can dang / mthu yod par 'gyur zhing bla na med pa yang dag par rdzogs pa'i byang chub mngon par rdzogs par byang chub par 'gyur bas de'i phyir gnyi ga yang gzhi zhes bya'o//de ltar rigs kyi ngo bo rnam par gzhag pa bstan nas/ rnam grangs bstan par bya ste/ kha cig 'ga' zhig gis mngon sum du byed par 'gyur ba'i phyir ro/ /de yang 'jig rten las 'das pa'i chos kyi 'byung gnas yin pa'i phyir rigs so//de 'byung ba'i rgyu mtshan yin pa'i phyir sa bon no/ /rang dang rjes su mthun pa'i 'bras bu 'dzin pa'i phyir khams so/ /bcos ma yin pa'i phyir rang bzhin zhes bya'o/ /rnam grangs kyi dbye ba bstan pa'o/ /'bras bu yang dag par ma grub pa ni 'bras bu dmigs par ma gyur pa nyid do//yang 'bras bu ni rigs kyi rtags sam/ byang chub sems dpa'i rtags yin par rig par bya'o/ /de bzhin du rtags gsal po med pa'i gnas skabs shes par dka' ba dang / yongs su gcad par dka' ba dang / nges par gzung bar dka' ba ni cha phra ba zhes bya'o//de las bzlog pa ni rgya che ba ste/ 'bras bu nye bar dmigs pa'i phyir ro/ /yang na rang bzhin gyis gnas pa ni phra ba ste/ skye mched drug gi khyad par gyis rab tu phye ba tsam yin pa'i phyir ro/ /yang dag par bsgrubs pa ni rgya che ba ste/'bad pa'i khyad par gyis rab tu bsgrubs pa'i phyir ro/ /nyan thos kyi rigs la sogs pa las rigs 'di khyad par du 'phags par gyur pa bstan pa'i phyir/ byang chub sems dpa'i rigs de dang ldan pa rnams ni zhes bya ba la sogs pa la/ thams cad ces bya ba ni nyan thos kyi gtso bor gzung ba'i don to//nyan thos kyi gtso bo rnams kyang rung / rang sangs rgyas kyi bse ru lta bu yang rung / khyad par de dag med pas de dag las nges par 'das nas 'jug par 'gyur ro/ /gzhan thams cad lta la smos kyang ci dgos zhes bya ba ni 'jig rten pa gzhan dag las shin tu yang 'das par bstan pa yin no//de'i phyir bla na med pa zhes brjod de/ de'i gong mar gyur pa med pa'i phyir ro/ /de ci'i phyir zhe na zhes bya ba ni byang chub sems dpa'i rigs khyad par du 'phags pa yin par mi bzod nas dris pa ste/ nyan thos dang rang sangs rgyas rnams kyi rigs kyang rnam par grol ba'i rgyu yin la/rnam par grol ba la yang tha dad du bya ba med pa'i phyir/ rigs thams cad ni mnyam pas mnyam pa yin no zhes bsams pa'o/ /rnam par dag pa thun mong ma yin pa'i khyad par gyi rgyus bla na med pa'i khyad par bstan pa'i phyir/nyon mongs pa nyid sgrib pa yin pas nyon mongs pa'i sgrib pa ste/ nyon mongs pa can gyi mi shes pa dang ldan pas rang gi gnyen po'i phyogs dge ba'i chos skye ba la gegs byed pa'i phyir ro/ /shes bya nyid sgrib pa yin pas shes bya'i sgrib pa ste/nyon mongs pa can ma yin pa'i mi shes pa dang ldan pas shes bya de nyid ni de dang 'dra ba ste/ gang sangs rgyas rnams kyi ye shes de las gzhan pa'i shes pa las lhag par gyur pa'i phyir ro/ /de'i phyir bstod pa/ khyod kyi ye shes gcig gis ni/ /shes bya ma lus kun khyab can//khyod las gzhan pa thams cad kyi/ /shes bya shes pa las lhag gyur/ /zhes bya bas/ de ltar na nyan thos la sogs pa'i rigs kyi 'bras bu ni rnam par grol ba'i lus yin pa dang / gcig tu mya ngan las 'das pa'i 'bras bu yin par bstan pa'i phyir ro/ / byang chub sems dpa' rnams kyi 'bras bu ni sku gsum dang / mi gnas pa'i mya ngan las 'das pa'i 'bras bu'o/ /de'i phyir khyad par gong na med pa dang ldan par rig par bya ste/ yang khyad par de dag ni 'bras bu'i dus su shes pa yin no/ /gzhan yang zhes bya bas thog ma dang /bar dang / tha mar rigs las gyur pa'i khyad par bstan pa'i phyir/ dbang po las gyur pa zhes bya ba ni dbang po las gyur pa'i khyad par ro/ /de bzhin du khyad par thams cad kyis khyad par can du gyur pa'o/ /dbang po las gyur pa'i khyad par ni sems ma bskyed pa rnams kyis rig par bya'o//nyan thos la sogs pa'i phan par brjod pa ni nyon mongs pa thams cad spangs pa dang / shin tu yang spangs pa dang / de thob par byed pa'i 'phags pa'i bden pa bzhi shes pa'o/ /de ltar na de dag ni rang gi theg pa la 'jug pa'i dus su sdug bsngal dang bral ba'i gnas skabs kyi mya ngan las 'das pa'i 'bras bu 'dod pas zhugs pa yin te/bya ba nyung ba nyid dang / 'bras bu chung ba nyid dang / bdag nyid 'gengs pa nyid dang / bdag nyid dul ba dang / bdag nyid zhi ba dang / bdag nyid mya ngan las 'das par bya ba'i phyir zhugs pa yin no zhes bya bas so//byang chub sems dpa' rnams kyi bdag la phan pa yang rnam pa gnyis te/ ye shes rnam pa gnyis dang / spangs pa rnam pa gnyis te/ rang gi rgyud du gtogs pa'i phyir ro/ /gzhan zhes bya ba ni rigs la gnas pa dang / rigs la gnas pa ma yin pa'i gang zag rnams so/ /de dag la phan pa'i phyir zhugs pa ni/ gzhan la phan pa'i phyir zhugs pa yin no/ /de ltar byang chub sems dpa' gnyi ga la phan pa'i phyir zhugs pa ni sems bskyed pa'i dus su rig par bya'o/ /gzhan la phan pa bsgrub pa de nyid de ltar bstan nas/rnam par phye nas bstan par bya ba'i phyir/ skye bo mang po la phan pa dang zhes bya ba la sogs pa'o/ /de la skye bo mang po ni rigs la gnas pa ma yin pa'i gang zag rnams su 'dod do/ /de dag la phan pa ni mi dge ba'i chos spong du 'jug pa ste/dus de srid pa'i sbyor bas dang po dag yang dag par spangs nas dus de srid du ngan 'gror 'gro ba las bskyab pa'i phyir ro/ /bde ba ni dge ba'i chos la yang dag par sbyar bas phyi ma dag yang dag par spong ba ste/ bde 'gro la 'god pa'i phyir ro/ /dge ba la sdang nga /skal ba med pa/ snod du ma gyur pa ngan 'gror 'gro ba de dag la ded dpon bzhin du phan pa dang bde ba'i bsam pa mi gtong bar dus kyi 'ong ba la sdod cing / rjes su gzung ba'i phyir zhugs pa yin no/ /gang yang mya ngan las 'das pa'i chos can mngon par rtogs pa'i skal ba can lha dang mi rnams kyi don du zhugs pa yin te/don zhes bya ba ni dge sbyong gi mngon par 'dod pa'o/ /phan pa ni der mngon par 'byin par byed pa'i lam mo/ /bde ba ni mthong ba'i chos la bde bar gnas pa'o/ /shin tu sbyangs pa'i khyad par gyis lus dang sems bde ba'am/rnam par grol ba'i bde ba rab tu myong ba'o/ /des na lha dang mi gzung ba ni de dag mngon par rtogs pa'i skal ba can yin pa'i phyir ro/ /nyan thos rnams ni smon lam btab pa'i phyi nas 'phags pa'i bden pa bzhi la mi rtag pa dang / sdug bsngal ba dang /stong pa dang / bdag med pa'i shes pa thob par bya ba'i phyir ro/ /byang chub sems dpa' rnams ni de dag dang / rig pa'i gnas lnga la mkhas pa dang / thams cad mkhyen pa'i mthar thug pa'i thogs pa med pa'i ye shes thob par bya ba'i phyir ro/ de bzhin du nyan thos rnams ni gcig nyid la mkhas pa'am/ phung po la sogs pa rnam pa lnga la mkhas pa'o/ /byang chub sems dpa' rnams ni rnam pa gnyis sam/ rnam pa bcu la'o/ /de ltar na rnam pa mang po la mkhas pa ni mkhas pa las gyur pa'i khyad par yin no//de la 'bras bu las gyur pa'i khyad par ni bla na med pa yang dag par rdzogs pa'i byang chub rab tu khyad par du 'phags pa yin pas rtogs par bya'o/ /rtags 'di dag gis rigs yod pa nyid du mtshon par byed pas ni rigs kyi rtags so/ /yang de'i rtags sbyin pa la sogs pa pha rol tu phyin pa'i sngon du 'gro ba'i rtags yin pa'i phyir/pha rol tu phyin pa'i rtags zhes brjod de/ sbyin pa nas bzung nas shes rab kyi bar la lus dang ngag dang yid kyis yang dag par sgrub par byed pa de la rtags zhes brjod do/ /yang de dag ni sbyin pa la sogs pa'i ngo bo dang /sbyin pa la sogs pa dang rjes su mthun par ci rigs par shes par bya'o/ /de la pha rol tu phyin pa'i rtags rnams mdor rnam par gzhag par bya ste/ sbyin pa dang / longs spyod dang / 'du ba'i sgo dang / rnyed pa'i dbang du byas par rig par bya'o//de la sbyin pa yang rnam pa gnyis te/ rdzas la ltos pa dang / rdzas la mi ltos pa'o/ /de la rdzas la ltos pa'i sbyin pa ni gzhan yongs su gzung ba'i phyir rang gi rdzas gtong ba ste/ lus bstan par byed pa'i rgyu yin no/ /yang sbyin pa de rnam pa gnyis te/ bdag gir gtogs pa dang / gzhan gyir gtogs pa'o/ /bdag gir gtogs pa'i sbyin pa de ni bsam pa nyid dang / sbyor ba nyid kyis yang dag par nan tan byed pa ni rtags so/ /de la rang bzhin nyid kyis sbyin pa la dga' ba yin zhes bya ba 'dis ni bsams pas yang dag par nan tan byed pa bstan te/rtag tu rgyun mi 'chad par dngos po thams cad yongs su gtong ba'i rang bzhin can gyi sbyor ba nyid kyis so/ /sbyin pa la mngon par mos pa ni sbyin pa la dga' ba'o/ /rtag tu rgyun mi 'chad par gzhan dag la bgo bsha' byed pa'i ngang tshul can yin te zhes bya bas ni yang dang yang ster ba'i sbyin pa bshad pa yin no//rab tu dga' ba'i sems kyis sbyin par byed ces bya bas ni sbyin pa'i dbang du byas nas dus gsum du rab tu dga' ba dang bcas pa'i sems kyis sbyin pa ni rab tu dga' ba'i sems kyis sbyin pa nyid bstan pa yin no//nyung ngu las kyang bgo bsha' byed pa yin zhes bya ba ni dus thams cad du sbyin pa dang dka' ba'i sbyin pa'o/ /bzang po sbyin par byed pa ni dman pa sbyin pa ma yin pa'o/ /yang de ni rnam pa gsum du rig par bya ste/ brtags shing brtags shing 'thab mo byas nas mi sbyin pa dang /bzang zhing mang po yod bzhin du dman zhing nyung ba mi sbyin pa dang / dam pa gya nom pa yod la shin tu dman pa mi sbyin pa'o/ /sbyin pa mi byed pa la yang 'dzem par byed ces bya ba ni slong ba po med cing mi slong ba na yid la yang dag par gdung ba skye bar 'gyur bas ngo tsha ba ste/bdag ni skal ba chung bar gyur pas bdag gi bdog pa rnams 'bras bu med par gyur te/ dur khrod kyi shing gi 'bras bu bzhin du nye bar longs spyad pa la mkho bar ma gyur to/ /de ltar re zhig bdag nyid kyi bdog pa gtong ba'i mtshan nyid can gyi sbyin pa'i rtags bstan pa yin no//nga ni gzhan du gtogs pa'i sbyin pa la yang dag par nan tan byed pa'i rtags bstan pa'i phyir/ gzhan dag la yang zhes bya ba la sogs pa la sbyin pa'i dbang du byas nas/ gang zag rnam pa bzhir shes par bya ste/ sbyin pa'i yon tan dang bsngags pa yongs su mi shes pa kun du rmongs pa dang /bag med pa dang / zhum pa dang / yang dag par rab tu zhugs pa'o/ /de la kun du rmongs pa rnams la sbyin pa'i yon tan dang bsngags pa rab tu bstan cing bshad pas yang dag par bstan nas/sbyin pa sbyor bar byed pa'i phyir sbyin pa'i bsngags pa rjod par byed do zhes bya ba'o/ /bag med pa dang zhum pa sbyin pa la yang dag par sbyor ba dang gzengs bstod pa'i phyir 'dun pa bskyed du 'jug par byed do zhes bya ba'o/ /yang dag par rab tu zhugs pa rnams rab tu dga' ba bskyed pa'i phyir sbyin phod pa mthong na yang yi rangs pa dang yid bde bar 'gyur ro zhes zhes bya ba ste/phod pa zhes bya ba ni yi rangs pa dang yid bde bar 'gyur zhes bya bas bshad pa yin no/ /de ltar re zhig bdog cing yod pa'i rdzas yongs su btang ba bstan nas/ yongs su longs spyad pa'i dngos po yongs su gtong ba'i sbyin pa'i rtags bstan pa'i phyir/bla ma rnams dang zhes bya ba la sogs pa'o/ /de la khyim pa'i phyogs kyi bla ma ni ma dang pha'o/ /rab tu byung ba rnams kyi ni mkhan po dang slob dpon rnams so/ /rgan rabs rnams kyi ni khyim pa'i phyogs rnams la ni rigs kyis rgan pa'o//rab tu byung ba'i phyogs la ni tshangs par spyod pa dang bcas pa'i dge slong gi dngos po'o/ /yon gnas rnams zhes bya ba ni/ khyim pa'i phyogs la ni tshul khrims dang ldan pa dang / yon tan dang ldan pa dang / dge ba'i chos kyi dge sbyong dang bram ze rnams so//rab tu byung ba'i phyogs la ni rtogs pa'i chos dang lung gi chos 'dzin pa shes rab can rnams dang / tshangs par spyod pa dang bcas pa rnams kyis brtsis pa'o/ /bkur stir bya bar 'os pa rnams la yang langs nas mdun du bsu bas stan stobs par byed ces bya ba ni stan la 'dug cig par go bar byed pa'o//de ltar yod cing bdog pa'i rdzas yongs su gtong ba'i sbyin pa'i rtags dang yongs su longs spyod pa'i sbyin pa'i rtags bstan nas/ rdzas la mi ltos pa'i sbyin pa'i rtags bstan pa'i phyir/ rdzas la mi ltos pa'i sbyin pa ni rnam pa gnyis te/man ngag nye bar bstan pas lus nye bar brtan par byed pa dang / mi 'jigs pa rab tu sbyin pas srog nye bar brtan par byed pa'o/ /de la dang po'i dbang du byas nas gsungs pa/ dris kyang rung ma dris kyang rung zhes bya ba ni/ gsol ba btab kyang rung ma btab kyang rung zhes bya ba ste/don du gnyer ba'am mi gnyer ba dag la yang rung ba'o/ /sems can gyi bya ba dag la zhes bya ba ni bya bya bar 'os pa skabs la bab pa'i tshe yon tan dang skyon mi shes pa dag la yang nyes par mi 'gyur ba ste/ mi slu ba dang / phyin ci ma log pa zhes bya ba'i don to//rigs pa'i man ngag ces bya ba ni kha na ma tho ba med pa'i man ngag ste/ de dag la yang bya bar 'os pa dang / bya bar 'os pa ma yin pa'i yon tan dang skyon ni 'di dag go zhes man ngag nye bar bstan pa'o/ /mi 'jigs pa sbyin par byed cing zhes bya ba ni dbugs 'byin par byed pa dang /rten sbyin par byed pa'o/ /yongs su skyob par byed do zhes bya ba ni 'jigs pa de dag las grol bar byed pa ste/ thar bar byed ces bya ba'i don to/ /sgo sna tshogs zhes bya ba ni sgo mang po nas zhugs pa ste 'jigs pa de dang de las byung ba'i zhes bya bar dgongs pa'o//mang po drag po zhes bya ba ni rgyun mi 'chad cing dus ring por 'byung ba'o/ /drag po ni chen po nyid do/ /gzhan la gnod pa mi 'byung bar bya ba'i phyir gzhan de nyid la yongs su gtong ba'i mtshan nyid can gyi rdzas sbyin pa'i dbang du byas nas smras pa/ gzhan gyi nor gtams na yang zhes bya ba ni/byang chub sems dpa' rigs la gnas pa dag nyon mongs pa dang / nye ba'i nyon mongs pa'i dbang gis nam yang gzhan gyi nor gtams pa 'phrog par mi byed do/ /de nyid bstan pa'i phyir/ dor mi byed do zhes bya ba ni 'phrog par mi byed cing co 'dri bar mi byed pa'o zhes bya ba'i don to//bu lon chags na yang blu bar mi byed ces bya ba ni skyed ji tsam 'phel dang bcas par ster bar byed pa'o/ /dor mi byed do zhes bya ba ni rtsod pa byas nas langs nas mi 'gro ba'o/ /rigs rgyud kyi nor yod par gyur pa rnams la bgo ba sha 'byed cing g.yo mi byed la blu bar mi byed de/chung ngu tsam ston pa'am/ ngan pa ston pa'am/ ye mi ster ba ma yin pa'o/ /rin po che brtag pa la mi mkhas shing / rin po che mi shes pa dag dang / nyo tshong byed pa na rdzas kyi bdag pos rin chung ngu btab pa las/ bdag nyid rin po che brtag pa la shin tu mkhas pas des phab pa'i rin des de nyo bar mi byed cing /ji tsam ri ba yang dag par bstan nas/ /gal te bdag la rdzas bdog na ji tsam ri bas de len par byed do/ /med na de la ji tsam ri ba yang dag par ston par byed do/ /de ltar phyin ci ma log par yang dag par bstan nas/de ci nas gzhan gyis kyang blu bar mi 'gyur bar yang dag par khong du chud par byed do/ /nye bar longs spyad pa'i khyad par gyis phan gdags pa'i sbyin pas yang dag par nan tan bya ba'i rtags yang dag par bstan pa ni/ phan gdags pa'i bye brag rnams kyang sbyin pa zhes brjod de/gtang bar bya ba yin pas zhes byas nas so/ /ji skad du mdo gzhan dag las/ bza' ba dang btung ba'i sbyin bdag tu 'gyur zhes rgya cher gsungs pas bza' ba dang btung ba rgya chen po yod cing bdog par gyur na de la bgo bsha' byed par 'gyur ro//longs spyod rnams 'byung ba'i sgor gyur pa gang yin pa la yang dag pa'i nan tan gyis sbyin pa'i rtags ston par byed do/ /nus pa yod par gyur na longs spyod rgya chen po 'phel bar 'gyur ba de lta bu'i las kyi mtha' la sbyor gyi/ las kyi mtha' chung ngu la ni ma yin/ de lta bu la bsam pa yang mi 'jug go/ /'du ba'i sgo chung ngu dag la ma yin no zhes bya ba ni mos pa ma yin pa'o zhes bya ba dang sbyar ro/ /longs spyod 'byung ba'i sgo ma yin pa de dag la rgyab kyis phyogs par byed pa ni longs spyod la nan tan byed pa zhes bya'o/ /de'i dbang du bas nas smras pa/zhugs pa ni 'di dag yin te zhes bya ba la sogs pa la/ 'dod chags dang bral ba thob par 'gyur zhes bya ba ni mi mthun pa'i phyogs las 'dod chags dang bral bar 'dod pa ste/ de dag la skyon mthong ba dang mi mthun par mthong bas rab tu spong bar 'gyur ro/ / sngon bsten pa la yang ngo tsha skye bar 'gyur ro/ /de'i phyir ngo tsha shes pa dang khrel yod pa ston to zhes bya ba ste/ 'gyod par 'gyur ba'i phyir ro/ /longs spyod thob pa la sgrub pa'i rtags de nyid kyang sbyin pa'i rtags su bstan pa'i phyir/ longs spyod rgya chen po dag rnyed na yang zhes bya ba la sogs pa la nor chen po rnyed pa'i dus na yang dman pa rnams kyis rnyed pa ltar shin tu chags par mi 'gyur bas na/shas cher brkam par mi 'gyur zhes bya ste/ ma chags pa'i sbyor bas longs spyod la ltos pa med par gnas par 'gyur ro/ /mdor bsdu na 'jug pa'i tshul khrims dang /ldog pa'i tshul khrims kyis/ tshul khrims rnam pa gnyis su rig par bya'o/ /de la ldog pa'i tshul khrims ni nyes par spyod pa las ldog pa'i sdom pa blangs pa'i tshul khrims so/ /'jug pa'i tshul khrims ni dge ba'i chos sdud pa'i tshul khrims dang /sems can gyi don byed pa'i tshul khrims te/ de dag ni bsil bar byed pa'i rang bzhin yin pa'i phyir ro/ /nyes par spyod pa rgya che ba'am/ rgya chung ba'i nyes par spyod pa'i khyad par nges par bstan pas/ ldog pa'i tshul khrims bstan pa'i phyir/lus dang ngag gi las mi dge ba chung ngu dang ldan pa yin zhes bya ba la sogs pa la/ lus dang ngag gi smos pa ni/ ldog pa'i tshul khrims ni lus dang ngag gi sdom pas bsdus pa'i phyir ro/ /nyes par spyod pa rgya che ba ni las kyi lam gyis bsdus pa'o/ /rgya che ba ma yin pa ni las kyi lam gyis bsdus pa ma yin pa'o//de la las kyi lam gyi sbyor ba dang / dngos dang / mjug gi dbang du byas nas nyes par spyod pa chung ba nyid bstan pa'i phyir/ lus dang ngag gi las chung ngu zhes bya ba la sogs pa la/ byang chub sems dpa'i rigs dang ldan pa la sems kyi rgyud rtag par nyon mongs pa drag cing mthug pa ma yin pa dag la sems can rnams kyi srog dang longs spyod dang /chung ma la gnod pa byed pa'i lus dang ngag gi las 'byung ba med de/ sangs rgyas kyi thugs rje chen po'i sa bon dang ldan pa'i phyir ro/ / shin tu rjes su mi mthun pa ma yin pa ni mi 'dod pa 'bras bu chen po 'byin par mi nus pa zhes bya ba'i don to/ /shin tu drag po ma yin pa zhes bya ba la/ drag po ni sems kyi drag po dang / lus kyi drag po'o/ /de la sems kyi drag po ni sems can rnams la snying rje med pa'i sems kyis bsad pa dang /rdeg pa'i sems bskyed par rig par bya'o/ /lus kyi drag po nyid ni bag med cing ngo tsha dang bral bas rdeg pa dang / rab tu rdeg par byed cing lag pa khrag gis sbags pa'o/ /sems can la shin tu gnod pa dang ldan pa ma yin te zhes bya ba la/drag po'i las byed pa nyid sems can la shin tu gnod pa dang ldan pa yin no/ /de lta bas na de ni de nyid kyi khyad par yin no/ /de ltar re zhig las kyi lam gyi sbyor ba'i dbang du byas nas bstan pa'o/ /mjug gi dbang du byas nas smras pa/ sdig pa'i las shig byas su zin kyang zhes bya ba ni/byang chub sems dpa' las kyi lam gyi mthar thug par gyur pa na yang byas pa'i las de dang rjes su mthun par sems par mi byed kyi/ bdag nyid kyis byas pa'i las de la dmad nas bdag nyid 'gyod pa mang bar gnas shing / myur ba myur bar te/ las byas ma thag tu 'gyod pa yin gyi de'i rgyu mtshan gyis mthong ba'i chos nyid la nyes par mthong bar gyur nas/ de'i rjes la 'gyod pa lta bu ni ma yin zhes bya ba'i don to/ /de la yang 'dzem bzhin du spyod kyi zhes bya ba ni/ dngos gzhi'i dbang du byas nas bstan pa ste/ma byas na yang gzhan nyes dmigs che la byed pa na yang sems bag tsha ba dang / 'dzem pa bzhin du ste/ ngo tsha ba dang bcas pa'i sems dang mi mthun pa'i sems kyis sdig de byed kyi/ dga' ba dang yid bde bas ni ma yin te/ rigs kyi stobs dang bsam pa'i khyad par gyis de lta bu'i rang bzhin du 'gyur ba yin no//nyes par spyod pa rgya che ba ma yin pa la kun du spyod pa'i khyad par gyi dbang du byas nas/ sems can rnams la lag pa dang zhes bya ba la sogs pas bstan te/ byang chub sems dpa' rigs dang ldan pa la mnar sems dang /gnod sems kyis lag pa dang / bong ba dang / dbyug pa dang / mtshon cha la sogs pas sems can rnams la brnag dka' ba dang / drag po'i sdug bsngal bskyed pa ma yin te/ sems can rnams la rjes su brtse ba mang ba'i phyir dang /de bzhin gshegs pa'i rigs sun par mi byed pa'i bdag nyid kyi chos can yin pa'i phyir ro/ /de'i phyir smras pa/ rang bzhin gyis mnyes gshin pa zhes bya ba la/ snying rjes sems can rnams la rjes su brtse ba'i sems dang ldan pa'i phyir dang / rnam par smin pa la re ba med pa'i sems dang /tshe 'di la lan du phan 'dogs pa la re ba med pa'i phyir/ rang bzhin gyis mnyes gshin pa zhes bya'o/ /bdag dang gzhan du mnyam pa'i lhag pa'i bsam pas rigs dang ldan pa'i phyir/ sems can la dga' ba yin no/ / rnam pa bcus ji ltar rigs par sems can la sogs pa'i yul la yang dag par sgrub par byed pas 'jug pa'i tshul khrims kyi rtags bstan pa'i phyir/ bkur sti bya bar 'os pa rnams la yang zhes bya ba la sogs pa la/ tshul khrims kyi pha rol tu phyin pa'i rigs kyi rtags yongs su rdzogs kyi bar du'o//de la 'jig rten shes pa'i dbang dbang du byas nas khyad par can dang / mnyam pa dang / dman pa'i sems can rnams la nus pa ci yod pa dang / di ltar 'os par sgrub par byed phan/ nye ba'i nyon mongs pa gsum spangs la/ de'i gnyen po'i phyogs kyi rnam pas rab tu bsgrub par bya'o//de la khyad par can gyi dbang du byas nas bstan pa ni/ bkur sti bya bar 'os pa rnams la yang zhes bya ba ste/ yang de dag ni sngar bstan pa'i bla ma dang / rgan rabs dang / mchod gnas rnams su rig par bya'o/ /de dag la nye ba'i nyon mongs pa'i phrag dog spangs la/bsnyen bkur dang / g.yog gi las la yang dag par nan tan byed par 'gyur pa'o/ /de nyid smras pa/ 'dud pa'i las kyis zhes bya ba yin no/ /mnyam pa rnams la 'gran pa'i nye ba'i nyon mongs pa spangs nas/ de'i sems bsrung bar bya zhing /dmad par mi bya bar rab tu gnas pas yang dag par bsgrub pa bstan pa'i phyir/ mthun par 'dzin pa dang / shes nyen can dang / pha rol gyi sems dang mthun par 'jug pa yin zhes bya ba'o/ /dman pa rnams la brnyas pa yang / nye ba'i nyon mongs pa yin pas rnam par spangs la/mdangs bzang po bstan nas mngon du phyogs par byas la/ yang dag par bsgrub par bstan pa'i phyir/ 'dzum pa sngon du gtong pa dang zhes bya ba la sogs pas bstan pa yin no/ /sems can phan 'dogs pa rnams la byas pa gzo zhing byas pa shes pas rtag tu gnas nas lan du phan gdags pa'i phyir rab tu gnas pa yin no//phan gdags pa yang dang yang rjes su dran pa dang ldan pa'i sbyor bas gnas pas na byas pa shes pa'o/ /bdag gis 'di la lan du phan gdags par 'os pa yin zhes drin shes pas na byas pa gzo ba'o//sems can slong ba rnams la ste/ phongs par gyur pa rnams kyi don bsgrubs pas bsam pa yongs su rdzogs par byed pa/ gzhan 'dun par byed pa'i sgrub par byed pa ni yang dag pa'i nan tan te/ drang por byed kyi zhes bya ba la sogs pas bstan pa yin no//bya'o zhes khas blangs nas dus ring por mi sgrub par 'jog pa ni g.yo dang sgyu zhes bya'o/ /rang gi las kyi mtha' rnams yang dag par bsgrub pa'i dbang du byas nas smras pa/ chos kyis zhes bya ba ni rigs pa bzhin no/ /bab col ma yin pa zhes bya ba ni sdig pa mi byed pa'o//yang na gdong mchi ma dang bcas par dub dang / rang gi bran pho dang / bran mo dang / las byed pa'i skyes bu dag kyang chos ma yin pa la mi sbyor ba'o/ /gzhan dbang du gyur pa rang dbang med pa dag stobs kyis bkug nas mi sbyor ba yang bab col ma yin pa'o//bsod nams bya ba'i dngos po rnams yang dag par bsgrub pa'i dbang du byas nas smras pa/ rang bzhin gyis kyang bsod nams la dga' ba yin zhes bya ba la sogs pa la/ gzhan bsod nams byed pa dag gi grogs bya ba la yang gus pa dang bcas par byed na/rang gi bsod nams kyi las la ni shin tu yang 'bad par byed par 'gyur ba'o/ /de lta bu la 'bad par bya ba ni sbyin pa dag sbyin par bya'o/ /bsod nams dag kyang bya ba yin no/ /smyung bar gnas par yang bya'o/ /tshul khrims dag kyang yang dag par blangs nas gnas par bya'o zhes bya ba la sogs pa'i mdo gzhan gyi rjes su 'brangs nas rig par bya'o//sngar bstan pa'i sgrub pa dag kyang ji ltar rigs par ma la mar 'dzin pa dang zhes bya ba la sogs pa'i mdo'i rjes su 'brangs nas rig par bya'o/ /gzhan gyis gnod pa byas pa'i sdug bsngal gyis sdug bsngal ba'i sems can de dag gi sdug bsngal mthong ngam thos nas shin tu drag po'i snying rje nye bar skye bar 'gyur ba ni yang dag pa'i sgrub ba'o//de dag gi sdug bsngal bdag gi rgyud kyi bzhin du mthong ba'i snying rje'i khyad par bstan pa'i phyir/ gzhan la gnod pas shin tu gnod pas shin tu gnod par 'gyur ro zhes bya ba yin no/ /chos yang dag par blang ba ched cher 'dzin pa zhes bya ba ni yi dam blangs pa la bstan pa'i phyir ro/ /lus dang srog dang / longs spyod la ltos pa med par gyur pas na tshe phyi mched cher 'dzin pa yin zhes bya'o/ / 'jig rten 'di'i bde ba la chags na'ang nag po'i phyogs kyi nyes dmigs mthong ba'i phyir/ kha na ma tho ba phra rab tsam dag la yang 'jigs par lta na mang po la lta ci smos zhes bya ba ni da ltar yang shin tu sdug bsngal la/ sdug bsngal gzhan dag kyang 'byung ba'i skye mched du gyur pa zhes bya ba'i don to//chos dang 'gal ba med pa dang / don nye bar ldan pa dang / rigs pa dang bral pa ma yin pa'i sems can gzhan gyi bya ba dag la grogs bya ba'i phyir/ 'gro bar byed pa na bdag nyid kyis dam pa'i bya bas byed pa nyid yin no/ /don dang ldan pa ma yin pa bstan pa'i phyir gsungs pa/bdag dang gzhan dag la gnod pa dang zhes bya ba la sogs pa la de ltar re zhig pa'i bya ba dag la grogs bya ba bstan nas/ yang bya ba ma yin pa dgag pa'i phyir/ dge ba'i bshes gnyen du gyur par byas la bya ba ma yin pa las bzlog par bya ba'i phyir/ bya ba ma yin pa 'di lta ste zhes bya ba la/bya ba ma yin pa ni bdag dang gzhan phung bar byed pa'i las de dag ni gcig tu bya ba ma yin pa kho na ste/ mi dge ba bcu'i las kyi lam gang yin pa'o/ /de'i phyir sdig pa mi dge ba bcu'i las kyi lam zhes bya ba la sogs pa gsungs pa yin no//de bzhin du re zhig gsol ba ma btab cing ma bcol ba dag la yang grogs byed du 'gro bar bstan nas/ gzhan gyis bcol zhing gsol ba btab pa rnams la grogs byed du 'gro ba bstan pa'i phyir gzhan gyi dbang du byed cing gzhan la rag las par byed de zhes bya ba ni/gzhan gyi bya ba'i rjes su zhugs pa ni gzhan gyi dbang du byed pa'o/ /de'i phyir bdag gi 'dor du bcug nas rang rang gi don la ci dga' mgur spyod par byed do zhes bstan to/ /tshul khrims mtshungs pa ni de'i las dang rang gi mtshungs pa'i ngang tshul can no//bzod pa mtshungs pa ni de'i las dang 'dra bar skyo ba med par byed pa'i ngang tshul can no/ /gzhan gyi dbang du byed pa'i rgyu bstan pa'i phyir/ sems mnyen zhing zhes bya ba ni snying nye ba nyid dang sems kyi rgyud 'jam par byas pa'i phyir zhes bya ba'i don to/ /gzhan gyis gnod pa byas par gyur na yang khro ba dang khon du 'dzin par mi 'gyur bar bstan pa'i phyir yun ring du 'dzin par mi byed ces bya ba la sogs pas bstan to//so sor brtags pa nas sems gzu'o tsam du rnam par gzhag par bya'o zhes bstan pa'i phyir/ de'i mod la de'i sems bzang por 'gyur ro zhes bstan pa yin no//de ltar re zhig sems can la khro ba med par 'jug pa bstan pas 'jug pa'i tshul khrims bshad nas/ yang ngag gi legs par spyad pa rnam pa bzhi la 'jug pas/ 'jug pa'i tshul khrims kyi rtags bstan pa'i phyir/ bden pa ched cher 'dzin pa yin te zhes bya ba ni/bden pa ched cher 'dzin pas srog dang / longs spyod dang / rgyal srid kyi ched du yang bden pa spangs nas bsams bzhin du brdzun gyi tshig mi smra ba yin no/ /dbyen bya bar mi dga' zhing mi byed ces bya ba ni dbyen bya bar bsam pa med cing mi byed ces bya ba'i don to//mi byed do zhes bya ba ni dbyen gyi tshig smra bar mi byed ces bya ba'i bsam pa'o/ /ma gtsigs pa ni skabs dang 'brel pa med par 'jug pa'i tshig go/ /bdag dang gzhan dag la phan pa med pa'i tshig ni mi dgos pa'o/ /dgos pa med pa'i phyir don med pa'o/ /yid du 'ong ba'i tshig smra bas na bab chol du yang smra ba ma yin pa'o//pha rol gyi zhe gcod pa mi smra ba ni gzhan gyi gnad la 'phog pa mi smra ba'o/ /tha na bdag gi bran g.yog la sogs pa dman pa rnams la yang tshig rtsub po smra bar mi byed na/ gzhan dag la lta smos kyang ci dgos/ rnam pa gnyis kyis tshig rtsub po las ldog pa bstan par bya ba'i phyir/pha rol la gnod pa byed pa na mi smra ba ni/ pha rol gyi zhe gcod pa mi smra zhes bya ba yin no/ /yon tan rjod par byed pa nyid ni/ yon tan la dga' ba yin zhes bya bas ston to/ /gzhan gnod pa byed pa la ji mi snyam pa'i bzod pa'i dbang du byas nas bzod pa'i pha rol tu phyin pa'i rtags rnam par gzhag par rig par bya'i/sdug bsngal dang du len pa'i bzod pa yang ma yin/ chos la nges par rtogs pa'i yang ma yin no/ /dus gnyis su bsam pa dang sbyor bas bzod par byed cing / bzod pa med pa ni shin tu dmad pa yin pa dang /nyes dmigs dang bcas pa'i phyir kha na ma tho ba dang bcas pa nyid de/ nyes dmigs ldan dang ldan pa'i phyir ro/ /bzod pa de yang gzhan gnod pa byed par gyur pa'i tshe bsam pa bstan pa ni/ kun nas mnar sems su mi byed la zhes bya ba ste/gang yang slar gnod pa bya bar mi sems pa'o/ /sbyor ba ni gnod pa yang mi byed do zhes bya ba ste/ sems kyis gnod pa bya bar mi rtsom pa'o/ /gnod pa byas pa'i mjug tu bzod pa gsol zhing gros btab na de bzod pa de len cing nyan no/ /bzod pa'i sbyor ba bstan pa'i phyir/zhe la mi 'dzin cing yun ring du khon du 'dzin par mi byed do zhes bya ba'i tshig gnyi gas kyang bzod pa'i bsam pa gsal bar bstan pa yin no/ /de ltar bsam pa dang sbyor ba'i dus gnyi gar gzhan gnod pa byed pa la ji mi snyam pa'i bzod pa nyid bzod pa'i pha rol tu phyin pa'i rtags su rig par bya'o//brtson 'grus rnam pa lnga dang / de dag gi 'bras bu phan yon gyi dbang du byas nas brtson 'grus kyi pha rol tu phyin pa'i rtags rnam par gzhag par rig par bya'o/ /dus kun du sbyor ba nyid ni rtag tu byed pa'i brtson 'grus te/ des sbyor ba'i brtson 'grus la gnas par 'gyur ro//de'i rtags bstan par bya ba'i phyir/ nang par sngar ldang zhing zhes bya ba nas/ bde ba ha cang nyams su len par mi byed pa dang zhes bya ba'i bar du'o/ /de ltar na mnyan par bya bar 'os pa rnams la brtson 'grus kyis rgyun mi 'chad par bya ba bstan to//gus par byed pa nyid ni rtag tu bya ba'i brtson 'grus te/ de ni brtan pa dang ldan pa zhes bya'o/ /de'i rtags ni bya ba zhig byung na don de 'grub par bya ba'i phyir zhes bya ba ni bya ba dang nye bar gyur pa na zhes bya ba'i don to/ /de la sbyor bar mi byed pa'i rgyu ni gnyis te/ byed par 'dod pa'i 'dun pa med pa dang /le lo la sbyor ba'o/ /de dag gnyi ga yang so sor rtog pa'i stobs kyis zil gyis mnan nas ji srid rdzogs kyi bar du sbyor bar byed do/ /go cha brtan pa la rab tu sbyor ba nyid dang / sbyor ba las byung ba'i brtson 'grus kyis spro bar 'gyur zhing / de'i rtags kyis bya ba thams cad la mnyam par sbyor bas nges par brtan par 'gyur ro//nges par brtan pa nyid bshad pa ni/ ma byas sam/ ma zin gyi bar du brtson pa mi 'dor zhing zhes bya ba ste/ bya bar 'os pa ma byas pa dang / thob par bya ba ma thob pa zhes bya ba'i don to/ /bar du brtson pa mi 'dor zhing zhes bya ba ni/res 'ga' lus dang sems yongs su skyo zhing ngal ba'i 'jigs pas brtson 'grus mi rtsom pa de med par brtan pa'i phyir/ sdug bsngal thams cad myong bas sgyid lug par mi byed pa ste/ ngo bo gzhan du mi 'gyur ba nyid do/ /zhum par mi byed pa'i brtson 'grus kyis pha rol gnon pa brtan par 'gyur ro//de'i rtags ni/ don gyi mchog rgya chen po zhes bya ba'o/ /rnam par yangs shing rgya che ba dang / gya nom pa'i don la sems zhum pa med par 'gyur te/ shin tu yangs shing rgya che ba dag yongs su rdzogs par bya bar mi nus so zhes bya ba ni bdag gis bsgrub par mi nus so zhes bdag nyid la brnyas par mi byed pa'o//de'i phyir smras pa/ bdag gis ni 'di rtogs par nus te/ zho sha dang ldan no snyam du spro ba bskyed pa dang zhes bya ba bstan pa yin no/ /ngoms pa med pa'i brtson 'grus ni chung ngu tsam mam/ dman pa tsam gyis chog par mi 'dzin pa'i sbyor bas dge ba'i chos la sbyor ba'i brtson 'grus mi 'dor ba'o//de'i phyir sems zhum par mi byed cing bdag la khyad du gsod par mi byed pa dang zhes bya ba'o/ /de ltar sbyor ba'i brtson 'grus rnam pa lnga ste/ dpa' ba dang / brtan pa dang / sra ba dang / sran thub pa dang / sems can snying po dang / 'jigs pa med pa dang / mi 'jigs par gyur par de dang der 'gro ba'o/ /de'i phyir tshogs chen po'i nang du 'gro ba'am/ dka' ba dag la yang brtan pa yin zhing zhes brjod do/ /gzhan dag dang lhan cig 'gyed pa'am/ phyir rgol ba'am/ mi phal pa gzhan dag gis bya bar dka' ba'i las dag la yang brtan pa yin zhing /sems zhum pa med pa ni brtan pa zhes brjod do/ /zab cing rgya che ba'i bya ba gcig tu nges par bya dgos pa'i don dang ldan pa'i brtsal ba chen po dag la yang shas cher skyo bar mi byed do/ /bsam gtan gyi sbyor ba dang tshad med pa bzhi'i sbyor ba dang / de dag gnyi ga'i rgyu'i dbang du byas nas/bsam gtan gyi pha rol tu phyin pa'i rtags rnams par gzhag par rig par bya'o/ /de la las dang po'i bsam gtan gyi sbyor ba ni rnam pa lnga'o/ /las dang po pa ni rtsom pa'i dang po'o/ /lnga gang zhe na/ sems rtse gcig pa nyid dang / rab tu dben pa dang / sgrib pa rnam par dag pa dang /yid la byed pa bsgom pa dang / sdom pa bsrung zhing 'phel bar byed pa'o/ /sems rtse gcig pa'i rtags kyi dbang du byas nas smras pa/ chos kyi don la nges par sems pa na/ g.yeng ba mi med ba yin pa dang / nges par sems rtse gcig par gyur pas gang do na so so yang dag par rig par 'gyur ba dang /chos so so yang dag par rig par 'gyur ba'o/ /rab tu dben pa'i rtags kyi dbang du byas nas smras pa/ dgon pa nags tshal gyi gnas/ bas mtha'i gnas mal te/ shing drung dang / khyim stong pa dang / dben pa'i rang bzhin no/ /dgon pa ni nags kyi nang ngo //ba sa mtha' ni grong dang grong khyer zad pa'i mtshams so/ /mi rnams kyis dben pa ni skye bo mang po spangs shing mi bsten pa dang / skye bo gdug pa can dang sdig pa byed pa rnams kyang mi rgyu ba'o/ /yan lag lnga dang ldan pa'i nang du yang dag 'jog gi rjes su mthun pa'i gnas de lta bu mthong ngam/thos na lus dang sems dben par bya ba la spro ba skyed par byed do/ /de la gzhol ba dang / de la 'bab par sems bskyed do/ /de'i phyir rab tu dben pa la shin tu spro ba bskyed do zhes bya ba smras so/ /sgrib pa rnam par dag pa'i rtags kyi dbang du byas nas smras pa/rang bzhin gyis kyang nyon mongs pa shas chung zhing zhes bya ba la sogs pa la/ nyon mongs pa shas chung ba'o/ /yun ring po nas nyon mongs pa mi 'byung ba'am byung na yang de ma thag med par 'gyur ba'o/ /sgrib pa shas chung ba yang de bzhin no/ /gnas ngan len shas chung ba ni shin tu sa bon gso bar byed pa ma yin pa'o//yid la byed pa sgom pa dang / sdom pa bsrung zhing 'phel bar byed pa'i dbang du byas nas smras pa/ de rab tu dben pa na gnas shing rang gi don la yongs su rtog pa na zhes bya ba la sogs pa la spyod pa rnam par sbyong ba'i dmigs pa rnam gsum la nye bar rtog pa na yid la byed pa bsgom pa dang ldan pas rnam par rtog pa la kun du spyod na sems rnam par g.yo bar 'gyur bas tshogs yongs su rdzogs par 'gyur ba na/rnam par rtog pas sems bsgyur bar mi nus pas yongs su bzung nas mi gnas so zhes bya ba smos so/ /byams pa tshad med pa'i dbang du byas nas smras pa/mi mdza' ba'i phyogs la yang zhes bya ba la sogs pa la/ de'i rigs can nyon mongs pa chung ba'i rgyud la dang po nyid du mi mdza' ba'i phyogs la yang bde ba nye bar bsgrub pa'i bsam pa skye bar 'gyur na/ gzhan dag la lta smos kyang ci dgos/ snying rje'i dbang du byas na smras pa/ sems can sdug bsngal rnam pa sna tshogs kyis sdug bsngal bdag ces bya ba la sogs pa la/brdeg pa dang / bcing ba dang / gcad pa dang / dbug pa la sogs pa'i sgo nas zhugs pa'i sdug bsngal sna tshogs kyis gnod par gyur pa'i gnas skabs mthong ngam thos na snying rje chen po bskyed nas sdug bsngal de dag bsal ba'i phyir/nus pa ji lta ba bzhin du sgrub par byed do/ /dga' ba'i rtags kyi dbang du byas nas smras pa/ rang bzhin gyis kyang sems can rnams la phan par 'dod pa dang / bde bar 'dod pa yin zhes bya ba la sogs pa la/ rang gi ngang gis sems can rnams la bde ba 'byung bar gyur cig ces dga' ba dang bde ba thob par gyur pa rnams la rjes su yi rang zhing dga' ba'o//btang snyoms tshad med pa'i rtags kyi dbang du byas nas smras pa/ rgud par gyur pa dag la yang mi dga' ba med pa yin zhes bya ba la bdag dang gzhan gyi rgud pa dag gis sems g.yo bar mi 'gyur ba ste/ mya ngan gyis kun du rmongs par mi 'gyur ba'i phyir dang /sdug bsngal thams cad la bzod nas btang snyoms su gnas pa'i phyir ro/ /de dag gi rgyu'i dbang du byas nas smras pa/ yid kyang gzhungs te zhes bya ba la/ sogs pa la/ bsam gtan dang / tshad med pa'i sbyor ba'i dbang du byas nas yid gzhungs pa dang /dran pa zhes bya ba'i chos 'di gnyis ni shin tu phan pa byed pa yin no/ /yid gzhungs pas ni bsam gtan dang ldan pa'i chos rnams mang po myur du blang ba dang 'dzin par nus te/ yid gzhungs pa ni shes rab kyi khyad par yin pa'i phyir dang / don sems pa'i nus pa yod pa'i phyir/ shin tu 'dzin nus par 'gyur ba nyid do//de ltar yid gzhungs pa'i byed pa rnam pa gsum bstan nas/ dran pa'i byed pa bstan pa'i phyir smras pa/ des byas nas ring du lon pa dang zhes bya ba la sogs pa'o/ /shes rab rnam pa gsum gyi dbang du byas nas shes rab kyi pha rol tu phyin pa'i rtags bstan pa'i phyir/skye bas thob pa'i dbang du byas nas rig pa'i gnas shes bya thams cad la 'jug par bya ba'i phyir/ lhan cig skyes pa'i shes rab dang ldan pa yin zhes bya ba smras so/ /lud las skyes pa'i dbang du byas te smras pa/ yid mi rtul ba dang blo mi zhan pa zhes bya ba smras te/ legs par bstan pa dang /nyes par bstan pa'i don rang gis shes par nus pa'o/ /rtogs pa las byung ba'i dbang du byas nas smras pa/ rmongs pa'i rang bzhin can ma yin zhes bya ba ste/ ma rig pa'i mtshan nyid can gyi rmongs pa'i gnyen po'i phyogs rig pa 'byung bar gyur pas rmongs pa'i rang bzhin can ma yin pa'o shes rab de dag gi byed pa bstan pa'i phyir/bag med pa'i gnas de dag spong ba zhes bya ba ni nyes dmigs kyi gnas thams cad yongs su spong ba'o/ /so sor rtog pa'i mthu dang ldan pa yin zhes bya ba ni so sor rtog pa'i mthu dang ldan par 'gyur ba nyid do/ /de lta bu'i sbyin pa la sogs pa dang yang dag pa dang ldan pa'i dkar po'i chos kyi rigs kyi rtags bstan par bya ba'i phyir/de dag ni byang chub sems dpa'i zhes bya ba la sogs pa smras te/ 'di lta bu'i rtags 'di dag ni rigs yod pa nyid du rjes su dpog par byed pa'i rtags su gyur pa'o zhes bya ba'o/ rigs pa ni lus dang ngag dang yid kyi 'jug pa'i ngo bo nyid do/ /rjes su dpag tu rung ba ni/ rjes su dpag tu rung ba nyid yin pa'i phyir ro/ /'di dag gis rigs yod par rjes su dpog par byed pa'i byed pa bstan gyi/ ngo bo nyid 'dzin pa ni ma yin no/ /ngo bo nyid yongs su 'dzin pa ni sangs rgyas nyid kyi spyod yul yin no zhes bstan pa'i phyir/yang dag pa'i don du nges par bya ba la sogs pa la/ ngo bo nyid yongs su gzung ba ni zhes bya ba'i don to/ /'di lta bu'i rigs kyi rgyu dang rjes su mthun pa'i 'bras bu yang dag par bstan pa'i phyir/ de ltar yon tan ldan zhing zhes bya ba la sogs pa ste/sems ma bskyed pa'i gnas skabs na yang rtags dang yang dag par ldan pa la 'di lta bu'i yon tan dang ldan par 'gyur ro/ /'jug pa'i dus su ni bdag dang gzhan gyi don ma lus pa la nan tan byed pas bzang ba'o/ /phyir mi ldog pa'i sbyor bas blu ba med pa'i phyir dge ba'o/ /sbyin pa la sogs pa'i pha rol tu phyin pa'i spyod pa'i gnas skabs na/dkar po'i chos dang ldan pa'o/ /de lta bur thog ma dang / bar dang / tha mar dge ba'i rigs ni 'chad par 'gyur ba'i thun mong ma yin pa'i sangs rgyas nyid kyi yon tan rnams kyi rgyu nyid du rigs kyi/ gzhan dag ni ma yin no/ /des ni rigs las gzhan pa ni de'i rgyur mi rigs so zhes gsal bar bstan pa yin no//rnyed par dka' bas na bskyed par dka' ba ste dus yun ring pos bsod nams dang ye shes kyi tshogs chen po bsags nas pha rol tu phyin pa drug dang / dka' ba spyad pa brgya stong du mas thob pa yin pa'i phyir ro/ /dpag tu med pa dang grangs med pa'i yon tan gyis brgyan pas na gtso bo'o//grangs dang mthu 'di lta bu'o zhes bstan par mi nus pas na bsam gyis mi khyab pa'o/ /rtag tu chos kyi sku'i ngo bo nyid yin pas 'chi 'pho dang bral ba'i phyir mi g.yo ba'o/ /de las gong mar gyur pa med pas bla na med pa'o/ /yang ci rigs de lta bu dang ldan pa la dus thams cad du rtags 'di dag yod par 'gyur ram zhe na/ma yin no zhes bstan pa'i phyir/ byang chub sems dpa' ni ji srid du zhes bya ba la sogs pa smras te/ gang gi tshe nye ba'i nyon mongs pa bzhi las thams cad dam/ kha cig gis nye ba'i nyon mongs pa can du ma gyur pa de srid du de dag dang ldan par 'gyur ro//nye ba'i nyon mongs pa rnams kyis zil gyis mnan par gyur na ni de dag dang ldan par mi 'gyur ro/ /rtags rnams 'byung bar mi 'gyur ba ni skye bar mi 'gyur ba'o zhes bya ba nas so/ /byang chub sems dpa' rtags dang ldan par 'gyur ba'i skabs su ni ngan song du skye bar 'gyur pa ma yin no//nye ba'i nyon mongs pas nyon mongs pa can du gyur na ni der skye bar 'gyur pa'i las byas nas ngan song dag tu yang lan 'ga' skye ba srid do zhes bstan pa'i phyir/ ngan song dag tu yang skabs 'ga' skye bar 'gyur te zhes bya ba ni de ltar re zhig pha rol tu phyin pa drug gi rtags dang ldan pa bde 'gror skyes pa rnams gzhan dag las khyad par du 'phags par gyur pa ltar/de'i rigs dang ldan pa rnams res 'ga' ngan song du skyes par gyur na yang der skyes pa gzhan dag las khyad par rnam pa lngas khyad par du 'phags pa yin te/ skabs 'ga' skyes par gyur na yang zhes bya ba ni/ji ltar de las gzhan pa'i sems can rnams la rgya mtsho chen por g.yengs pa'i gnya' shing gi bu gar rus sbal gyi mgrin pa chud par dka' ba yin pa ltar bde 'gror skye ba dka' ba yin te/ der skyes nas yun ring por de nas thar bar mi nus pa yin la/ de'i rigs dang ldan pa rnams ni ngan 'gror 'gro ba de ltar dkon pa yin pas de'i phyir/brgya lam na zhes bya ba smras so/ /skyes par gyur na yang zhes bya ba ni tshe ji srid par de'i rigs dang ldan pa rnams der gnas par mi 'gyur gyi/ bar du 'chi ba'i dus byed par 'gyur te/ dper na bde 'gror skyes pa'i sems can kha cig sngon gyi las drag po'i dbang gis skyes ma thag la sogs par 'chi bar 'gyur ba bzhin du rigs dang ldan pa dag ngan song du skyes pa yang snying rje chen po'i stobs dang /'gyod pa drag pos de ma thag tu 'chi bar rig par bya'o/ /so sor rtog pa'i stobs dang / brtan pa'i stobs dang /yang dag par ldan pas sdug bsngal gyi tshor ba chung ngu myong bar 'gyur gyi der skyes pa'i sems can gzhan bzhin du ni ma yin no/ /de lta bu'i sdug bsngal gyi tshor ba myong ba des reg na yang rgyu dang 'bras bus bsdus pa'i ngan song gis 'gyod cing skyo bar gyur la mi mthun pa dang / ngan par blta zhing spong bar 'dun par so sor rig pa 'byung bar 'gyur ro//bdag ni re zhig brtan pa dang ldan zhing / so sor rtog pa'i mthu dang ldan la/ sdug bsngal gyi tshor ba chung ngu tsam myong ba yang 'di 'dra na/ gzhan dag gi gnas skabs ji lta bur 'gyur zhes gzhan gyi rgyud du gtogs pa'i sdug bsngal gyis shin tu gnod par gyur nas/snying rje chen po'i sems skyed par byed de/ sangs rgyas kyi thugs rje chen po'i sa bon gyi rang bzhin du gyur pa'i phyir ro zhes bstan pa'i phyir/ sangs rgyas kyi snying rje chen po'i rgyu'i rigs de nyid kyis bskul bas zhes bya ba yin no/ /nyon mongs pa ni mi dge ba yin pa'i phyir dkar po'i chos dang mi mthun pa'o//sems dri ma can du byed pas na nye ba'i nyon mongs pa'o/ /blun pa ni de kho na nyid dang / de kho na nyid ma yin pa yongs su shes pa la mi mkhas pa dang / mi dge ba'i grogs pos yongs su gzung ba'o/ /de'i sdig pa can gyi grogs kyis yongs su gzung bas/dge ba'i chos ma skyes pa rnams ni mi skye la/ skyes pa rnams ni yongs su nyams par 'gyur te/ des na de'i sems kyi rgyud nyon mongs pa can du 'gyur ro/ /de'i phyir yang de ni nye ba'i nyon mongs pa zhes bya'o/ /phyir rgol bas dbang byas shing de'i sems rnam par rmongs par gyur pas lus dang sems la rang dbang med par 'gyur ro//rang dbang med par 'jug par 'gyur bas dge ba'i chos yongs su nyams par 'gyur zhing / sems kyi rgyud nyon mongs pa can du 'gyur ro/ /de'i phyir de ni nye ba'i nyon mongs pa zhes bya'o/ /nye bar mkho ba dang bral bas 'tsho ba med pa'i 'jigs pa 'byung bar 'gyur ro//de ltar lhag par gyur pa na 'jigs pa thams cad las de khyad par che bar gyur pa de yang snga ma'i tshul du rig par bya'o/ /de ltar na mdor bsdu na lus dang sems brtan par byed pa dang bral ba gang yin pa de dag ni nye ba'i nyon mongs pa yin par gsal bar byed pa'i tshig gnyis dang /gnyis kyis yin par rig par bya'o/ /gal te rigs dang ldan na skal ba dang ldan par 'gyur zhing / stobs dang ldan par gyur na yang gang gi phyir 'khor ba thog ma med pa yin pa ltar sangs rgyas 'byung ba yang thog ma med pa'i dus can yin par 'dod na/thams cad kyis yang dag par rdzogs pa'i byang chub ci'i phyir mi 'thob ce na/ byang chub sems dpa'i rigs dang ldan pa yang rgyu bzhis na zhes bya ba la sogs pa smras te/ rgyu 'di dag nyid ni thob par sla ba'i phyir dang / byang chub thob pa'i rgyu nyid ni shin tu rnyed par dka' ba'i phyir/rigs phun sum tshogs pa nyid yin na yang phal cher mi mthun pa'i phyogs kyi gnyen po'i phyogs kyi gnas skabs nyid bstan pa'i phyir ro/ /byang chub kyi lam phyin ci ma log pa ston pa zhes bya ba ni dbang po dang / mos pa dang / khams kyi bye brag shes nas phyin ci ma log pa'i theg pa chen po'i lam ston par byed pa'i sangs rgyas dang byang chub sems dpa' ni shin tu rnyed par dka' ba yin no//de ltar na dge ba'i bshes gnyen mnyes par ma byas pas ni byang chub thob par nus pa ma yin no/ /dge ba'i bshes gnyen dang phrad cing yongs su zin kyang rang gi lta ba mchog tu 'dzin pa'i dbang gis gnas nas phyin ci log tu slob pa ni phyin ci log tu bsgrub pa'o//byis pas yongs su brtags pa'i bdag nyid du chos thams cad yod do zhes 'dzin pa'i sbyor ba dang / rang gi mtshan nyid du yang med do zhes med par 'dzin pa'i sbyor ba dang ldan pa'o/ /mtha' gnyis su ma lhung du zin kyang byang chub sems dpa'i bslab pa la mos pa chung bar gyur pas sbyor ba g.yel zhing le lo byed pa ste/snyom las dang ldan pas rtag tu byed pa dang / dam par byed pa'i btson 'grus med pa ni/ de ltar re zhig dge ba'i chos la sbyor ba dman pas byang chub thob par mi 'gyur ro/ / sngar bstan pa'i rgyu gsum po de dag yod du zin kyang dbang po yongs su ma smin pa'i rgyud ni snod ma yin pas tshogs longs su rdzogs par mi 'gyur te/ des kyang 'thob par mi 'gyur ro/ /yun ring du zhes bya ba ni yun ring du 'dris par byas pa'i sbyor bas tshogs yongs su rdzogs par ma byas pa'o zhes sbyar bar bya'o//rigs med na ni thams cad kyi thams cad rnam pa thams cad du zhes bya ba ni byang chub 'thob pa'i rgyu yod kyang rung / med kyang rung 'thob par mi 'gyur ba nyid de/ shin tu snod ma yin pa'i phyir ro/ /rnal 'byor spyod pa'i sa las byang chub sems dpa'i sa'i dang po rigs kyi le'u'i 'grel pa'o// //de lta bu'i rigs la brten nas bla na med pa yang dag par rdzogs pa'i byang chub tu sems bskyed par 'gyur ro zhes bya bar rigs kyi gzhi'i le'u'i rjes la sems bskyed pa'i gzhi nges par bstan par bya ba yin pas dang po nyid du sems bskyed pa de rnam pa lngas bstan par bya ste/de'i zab pa dang rgya che ba bstan par bya ba'i phyir ro/ /de yang rnam pa bzhi ni rgya che ba'o/ /phyi ma ni zab pa'o/ /de las gzhan pa'i yang dag pa'i smon lam thams cad sdud pa yin pas ngo bo nyid rgya che ba'o/ /de la smon lam yang rnam pa gnyis te/yang dag pa ma yin pa'i smon lam dang / yang dag pa'i smon lam mo/ /de la yang dag pa ma yin pa'i smon lam ni/ bdag dang gzhan gyi bde 'gro dang / ngan 'gro dang / 'khor ba'i nyes pas gnod pa'i sdug bsngal gyi rgyur gyur par rig par bya'o/ /yang dag pa'i smon lam la yang rnam pa gsum ste/dman pa dang / 'bring dang / mchog gi bye brag gis nyan thos dang / rang sangs rgyas dang / byang chub sems dpa' rnams kyi'o/ /yang 'dir ni byang chub sems dpa'i smon lam la bya bar 'dod do/ /byang chub sems dpa'i smon lam de yangs so so la rnam pa du mar shes par bya ste/'jig rten dang 'jig rten las 'das pa'i yon tan nyid kyis sems mngon par 'du byed pa ni smon lam ste sems las byung ba'i khyad par yin pas bsam pa'i khyad par zhes bya ba'i don to/ /de lta bas na byang chub kyi sems kyang theg pa chen po ste/ yon tan gyis sems mngon par 'du byed pa'i mtshan nyid can ni smon lam mo//yang de ni byang chub sems dpa'i yang dag pa'i smon lam ji snyed yod pa yongs su sdud pa ste/ yongs su mi nyams pa'i rgyu yin pa'i phyir ro/ /de'i phyir smon lam ni sems bskyed pa'i ngo bo yin par rig par bya'o/ /sems de mngon par 'du byed pa yang dmigs pa dang bcas pa'o//dmigs pa dang bcas pa'i phyir rnam pa dang bcas pa'o/ /des na de'i rnam pa dang dmigs pa nges par gzung ba'i phyir smras pa/ 'di ltar sems mngon par 'du byed cing zhes bya ba la sogs pa la/ bdag gi rgyud bla na med pa yang dag par rdzogs pa'i byang chub mngon par 'dod pa ni sems kyis 'di ltar smon par byed de/theg pa gsum gyis bsdus pa'i mya ngan las 'das pa'i chos can rigs la gnas pa rgyu dang 'bras bu la yang 'dod par byed do/ /de'i phyir bdag bla na med pa yang dag par rdzogs pa'i byang chub mngon par rdzogs par sangs rgyas nas sems can thams cad kyi don yang byed par gyur cig ces bya ba'o//de la nyan thos dang rang sangs rgyas kyi rigs can rnams kyang mya ngan las 'das pa la bkod pas don byas pa nyid du 'gyur ro/ /des na shin tu mthar thug pa'i mya ngan las 'das pa la 'god par gyur cig ces smras pa yin no//byang chub sems dpa' rnams ni mi gnas pa'i mya ngan las 'das pa la 'god par bya ba yin pas de'i phyir de bzhin gshegs pa'i ye shes la zhes bya ba yin no/ /de ltar rnam pa 'di lta bus byang chub dang sems can gyi don du gnyer ba ni sems bskyed pa yin pas de'i phyir don du gnyer ba'i rnam pa yin no zhes grub pa yin no//bdag dang gzhan gyi don ma lus pa don du gnyer ba yin pa'i phyir rgya che ba'i rnam pa zhes bya'o/ /de ltar rnam pa 'di lta bus byang chub dang / yang rnam pa de lta bur sems bskyed pa de'i dmigs pa ji lta bu zhig la dmigs nas bskyed ce na/ de'i phyir sems bskyed pa de yang zhes bya ba la sogs pa la/de la byang chub la dmigs pa ni de'i dbang gis byung ba yin la/ sems can gyi don ni gtso bo yin no/ /de'i phyir/ stobs bcu'i yon tan dag gis mdzad pa las gzhan khyod la phra mi mnga' zhes bstod pa yin no/ /gzhan nas kyang gsungs pa/gang gi de bzhin gshegs pa nyid ni zhar la 'ongs pa ste/ /zhes bstod pa yin no/ /de bzhin du yon tan dang skyon thams cad rab kyi mthar thug par thob pa dang / lhag ma ma lus par zad par gyur pa'i bla na med pa yang dag par rdzogs pa'i byang chub la dmigs pa'i phyir dang /nam mkha'i khams kyi mthas gtugs pa'i 'jig rten gyi khams thams cad kyi sems can thams cad kyi don bya ba'i dngos po la 'khor ba'i mtha'i bar du dmigs pa ni dmigs pa rgya che ba'o/ /'jug pa rgya che ba'i dbang du byas nas/ sems bskyed pa de yang byang chub kyi phyogs kyi zhes bya ba la sogs pa la/sems bskyed pa de ni rnam pa gnyis kyis dge ba yin par rig par bya'o/ /shes rab dang snying rje zhes bya ba'i dge ba'i rtsa ba dang yang dag par ldan pa dang / byang chub kyi phyogs kyi chos thams cad kyi dge ba'i rtsa ba'i rgyur gyur pa'i phyir ro//de'i phyir/ dge ba dang mchog tu dge ba'i yon tan dang ldan pa dang zhes bya ba la/ de la dang po'i rnam pa ni dge ba'o/ /gnyis pa ni mchog tu dge bar rig par bya'o/ /dge ba nyid kyis na bzang ba ste/ gar dang glu la mkhas pa'i gar mkhan bzhin no//rang gi don sgrub par byed pas na yang bzang ba'o/ /gzhan gyi don yang dag par sgrub par byed pas na mchog tu bzang ba'o/ /rang gi don la mi blu zhing phrad par byed pa'i phyir legs pa'o/ /gzhan gyi don la mi blu ba dang / de lta bu'i rang bzhin du gyur pas mchog tu legs pa'o//de ltar re zhig dge ba'i chos thams cad kyi rjes su mthun pa la 'jug pa'i khyad par bstan nas/ mi dge ba'i chos thams cad dang 'gal ba nyid du 'jug pa bstan par bya ba'i phyir/ sems can thams cad la brten pa'i zhes bya ba la sogs pa la/ sems can thams cad la brten pa zhes bya ba ni sems can thams cad kyi rgyud la zhes bya ba'i don to//de dag dang mi mthun pa ni de dag dang mi mthun par gyur pa nyan thos la sogs pa'i rigs can theg pa gsum gyis bsdus pa/ 'khor ba'i mi mthun par gyur pa dge ba'i chos la rab tu 'god par rig par bya'o//smon lam dge ba de dag thams cad kyi nang na smon lam gyi mchog bla na med pa yin no zhes bya ba ni tshad med pa/ dpag tu med pa/ bsam gyis mi khyab pa'o/ /de'i phyir zab pa zhes bya ba ste/ mthar thug par nges par bstan pas zab pa nyid bstan par 'gyur ro/ / yang sems bskyed pa de'i khyad par rnam pa lnga po de dag nyid bstan par bya ba'i phyir rnam pa lnga po nyid kyi nges par ston par byed pa ni/ ngo bo nyid kyi khyad par nas khyad par du 'phags pa'i khyad par gyi bar du'o/ /yang sems bskyed pa de'i gnas skabs dang / rgyud yongs su smin pa'i rgyu dang /kun nas slong ba dang / de'i rgyu mthun pa'i khyad par yang dag par bstan par bya ba'i phyir rnam pa bzhir bstan par rigs par bya ste/ sems de bskyed ma thag tu zhes bya ba la sogs pa la/ rigs dang / 'jug pa dang / nges par 'byung ba'i ming can gyis gsum ni byang chub sems dpa' rnams la yang yin no//de'i phyir 'jug pas bsdus pas ni gnas skabs kyi khyad par bstan pa yin no/ /rigs yod du zin kyang sems ma bskyed pa'i dus su zhugs pa ma yin pas/ sems bskyed pa ni zhugs pa zhes bya ste/ byang chub sems dpa'i lam la zhugs pa'i phyir ro//brda dang tha snyad kyi tshul gyis zhes bya ba ni ming du btags pa'i tha snyad kyis byang chub sems dpa' zhes bya ste/ brda las byung ba'i sems bskyed pa'o/ /bla na med pa yang dag par rdzogs pa'i byang chub tu don dam pa zag pa med pa'i sems bskyed pa ni sa dang po rab tu rtogs pa'i dus so//byang chub sems dpa'i nges pa la yang 'jug par 'gyur ro/ /de bzhin gshegs pa'i rigs su skyes pa yin no/ /don dam pa'i byang chub sems dpa' zhes bya'o/ /sems bskyed pas ni rim gyis bsod nams dang ye shes kyi tshogs bsags shing bskyed pa dang ldan pas rgyud yongs su smin pa'i khyad par thob par 'gyur gyi/sems ma bskyed pa ni ma yin no/ /de'i phyir bla na med pa yang dag par rdzogs pa'i byang chub kyi rgyu'i gtso bo ni sems bskyed pa de yin no/ /mdor na byang chub sems dpa' rnams kyis ni/ /brtse ba zad dang brtse ba 'phel bya ste/ / rang gi bya ba la ni chags zad bya/ /gzhan gyi bya ba la ni chags 'phel bya/ /shes rab snying rje de zad 'phel pa'i rgyu/ /de phyir byang chub rtsa ba gnyis zhes gsungs/ /zhes bya bas nges par shes rab dang snying rje gnyis ni byang chub kyi rgyu'i gtso bo yin no/ / de dag las kyang ci byang chub kyi sems de shes rab las 'byung bar 'gyur ram/ 'on te snying rje las 'byung bar 'gyur zhe na/ de lta bas na sems can sdug bsngal ba rnams la zhes bya ba la sogs pa la/ shes rab las kun du 'byung ba yin na ni byang chub thob pa gtso bor 'gyur zhing / de'i dbang gis byung bar mi 'gyur ro/ /de'i phyir snying rje las kun du byung ba yin pas/ de lta bas na sems bskyed pa de ni snying rje'i rgyu mthun pa yin no zhes bya bar rig par bya'o/ /byang chub sems dpa' ni sngar sems can yongs su bskyab pa'i bsam pa brtan po mi g.yo ba bskyed nas/de'i rjes la yongs su bskyab pa'i thabs kyi lam tshol bar byed pa na/ sangs rgyas nyid las gzhan mthong nas bla na med pa yang dag par rdzogs pa'i byang chub tu sems skyed bar byed do/ /de lta bas na sdug bsngal ba'i sems can rnams yongs su bskyab pa ni snying rje yin no zhes 'di'i don rig par bya'o//'dir khron pa'i nang du bu lhung ba'i ma dper bya'o/ /sems bskyed pa'i sbyin pa la sogs pa la sbyor ba ni pha rol tu phyin pa'i ming thob par 'gyur ba yin no/ /de'i phyir/ sems bskyed pa de la brten cing gnas nas byang chub kyi phyogs kyi chos rnams la sbyor bar byed do zhes bya ba yin no//sems bskyed pa rnams ni nus pa ji lta ba bzhin du sems can rnams yongs su smin par byed kyi/ sems ma bskyed pa rnam ni ma yin no/ /de'i phyir/ sems can gyi don bya ba dag la sbyor bar byed do zhes bya ba smras te/ sangs rgyas kyi chos rnams kun du 'phel bar 'gyur ba dang /sems can rnams yongs su smin par bya ba nyid na byang chub sems dpa'i bslab pa yin no/ /des na byang chub sems dpa'i bslab pa rnams kyi rten yin te zhes smras so/ /de ltar rten du gyur pa las rgyu mthun pa'i khyad par yang dag par bstan pa yin no/ /thams cad kyi sems bskyed pa'i rnam pa gcig pa ma yin par bstan pa'i phyir dang /de lta bu'i yon tan gyi khyad par dang ldan pa'i sems bskyed pa'i rnam pa yongs su bstan pa'i phyir/ nges par 'byin pa dang zhes bya ba la lan cig sems bskyed nas nges par 'byin cing bla na med pa'i byang chub tu 'gro bar 'gyur ro//thob par 'gyur bas na nges par 'byin pa'o/ /de las bzlog pa ni nges par 'byin pa ma yin pa'o/ /gtan du ba dang / gtan du ba ma yin pa dang / brtan pa dang / mi brtan pa dang / phyir mi ldog pa dang / phyir ldog pa zhes bya ba ni de'i rnam grangs so//de'i phyir smras pa/ gang skyes na gtan du 'jug la phyir ldog par mi 'gyur ba'o zhes bya ba la/ rgyu rnam pa bzhis sems de ldog par 'gyur te/ rigs kyi yon tan med pa dang / sdig pa'i grogs pos yongs su gzung ba dang / sems can rnams la snying rje chud ba dang / 'khor ba'i sdug bsngal gyis 'jigs pa nyid do/ /de dag las bzlog pa'i rgyu bzhis ni mi ldog par 'gyur ba yin no/ /skye ba'i rgyu'i bye brag gis sems bskyed pa'i bye brag tu 'gyur zhes shes par bya ba'i phyir/ sems bskyed pa de yang rkyen bzhis zhes smras te/ ji ltar rkyen rnams dang /rgyu rnams dang / /stobs rnams kyi rnam par gzhag pa yin zhe na/ rigs kyi stobs brtan par gyur nas rkyen dang po las skye bar 'gyur ro/ /rigs kyi stobs dang ldan pa zhig gis/ sangs rgyas dang byang chub sems dpa' rnams kyi mthu mthong ba'am/ thos nas rgya che ba la mos pa rnams kyi sems skye bar 'gyur ro//dge ba'i bshes gnyen gyis yongs su gzung bdag gis byang chub sems dpa'i lung gi chos thos nas dbang po rnon po rnams sems skye bar 'gyur ro/ /snying rje'i stobs nye bar brtan pa thob nas byang chub sems dpa'i rtogs pa'i chos la bsgrub pa dang ldan pa bdag por gyur ba las sems skye bar 'gyur ro//'khor ba'i sdug bsngal la 'jigs pa med cing sems can rnams kyi rgud pa'i gnas skabs mthong ba bdag bor gyur pas stobs brtan pa thob par gyur pa las sems skye bar 'gyur ro/ /dang po'i rgyu gnyis nyid stobs gnyis yin zhing /dang po'i rkyen gnyis kyang stobs gnyis yin no/ /rigs kyi stobs can rgya chen po la mos pas sangs rgyas dang byang chub sems dpa'i mthu chen po mthong ngam thos pa bdag por gyur pa las skye bar 'gyur ro/ /byang chub sems dpa' rnams kyi mngon par shes pa thams cad ni zab cing rgya che ba'i phyir mthu zhes bya'o//de dag las gsum ni mngon par shes pa yin la/ gsum ni cho 'phrul yin no/ /zab pa nyid kyis bsam gyis mi khyab pa'o/ /rgya che ba nyid kyis rmad du byung ba'o/ /yid brtan pa las zhes bya ba ni dad par bya ba las zhes bya ba'i don to//gang la gnas par gyur pa'am zhes bya ba ni de bzhin gshegs pa rnams so/ /zhugs par gyur pa'i zhes bya ba ni byang chub sems dpa' rnams kyi'o/ /byang chub chen por mos shing zhes bya ba ni byang chub chen po la mngon par mos par gyur pa'o//sems skyed par byed pa zhes bya ba ni de thob par bya ba'i phyir sems de la bstod cing skul bar byed pa ste/ smon lam 'debs shing mngon par 'du byed pas sems skyed par byed ces bya ba'i don to/ /dge ba'i bshes gnyen gyis yongs su gzung zhing dbang po rnon po rnams kyis zab cing rgya che ba shin tu rgyas pa'i mdo sde'i don thos nas rab tu dga' bar 'gyur ro//sems rab tu dga' bar gyur pas dam pa'i chos thos pa de nyid bdag por byas nas de bzhin gshegs pa'i ye shes la mos par 'gyur zhing / de bzhin gshegs pa'i ye shes thob par bya ba'i phyir sems skyed par byed do//sems can rnams la snying rje'i stobs brtan pa thob par gyur pas/ dam pa'i chos 'jig par 'gyur ba'i dus kyi tshe 'di ltar sems skyed par byed do/ /byang chub sems dpa'i lam dang / byang chub sems dpa'i chos gnas par 'gyur bas sems can tshad med pa rnams kyi sdug bsngal nye bar zhi bar bya ba dang /bde ba yang dag par 'phel bar bya ba'i phyir/ sdig pa mi dge ba'i chos mang po rnams ni spang bar bya ba dang / dge ba'i chos mang po rnams ni 'phel zhing rgyas par bya ba'i phyir sgrub par byed do/ / 'di lta bu'i dam pa'i chos kyi tshul 'jig par 'gyur ba dang nye bar 'gyur gyi/ de'i phyir bdag gis re zhig dam pa'i chos yun ring du gnas par bya ba'i phyir bsgrub par bya zhing sems bskyed la/ sems can 'di dag gi sdug bsngal bsal bar bya'o zhes rtags pa'i chos la nan tan bya ba'i phyir sems skyed par byed do//dus kyi tha ma dus kyi mjug tu bab pa'i tshe zhes bya ba ni snyigs ma lnga dang ldan pa'i dus kyi tshe'o/ /dus ngan pa ste phongs par gyur pa'i tshe/ snyigs ma lnga dang ldan pas sems can rnams rnam pa bzhis phongs par 'gyur te/ tshe'i snyigs ma ni tshe rgud pa ste tshe thung ba nyid do//sems can gyi snyigs ma ni bdag gi dngos po rgud pa ste/ yan lag dang nying lag gi tshad chung ba dang ma tshang bar gyur pa nyid do/ /nyon mongs pa dang / lta ba'i snyigs ma ni dge ba'i chos kyis phongs pa ste/ khyim pa dang / rab tu byung ba'i phyogs la'o/ / bskal pa'i snyigs ma ni nye bar mkho bas phongs pa ste/ ro brgya dang ldan pa la sogs pa rnams nub par gyur pas de nyid kyis rgud par gyur pa'o/ /tha ma'i dus kyi sems can rnams nye ba'i nyon mongs pa rnam pa bcu lhag par gyur pa bstan pa'i phyir/ nye ba'i nyon mongs pa bcu po 'di lta ste zhes bya ba smras so//nye ba'i nyon mongs pa bcu'i rnam par gzhag pa ni 'jug pa la bar chad du gyur pa dang / 'jug par dka' ba nyid dang / 'jug pa la nan tan byed pa'i bar chad du gyur pa'i nye ba'i nyon mongs pa'i dbang du byas nas zhes bya ba'i 'grel pa las rgyu gsum gyis 'jug par 'gyur te/shes rab bdag por gyur pas sam/ bdag nyid kha na ma tho bas 'jigs pas sam/ snying rjes sems can la ltos pa'o/ /gsum po 'di dag gi mi mthun pa'i phyogs su gyur pa nye ba'i nyon mongs pa gsum ste/ gti mug shas che ba dang / ngo tsha med pa dang khrel med pa shas che ba dang /phrag dog dang ser sna shas che ba'o/ /'jug par dka' ba nyid dang / gnyi ga'i sgrib pa ni gsum ste/ sdug bsngal shas che ba smos pa ni rnam par smin pa'i sgrib pa'o/ /gnas ngan len shas che ba dang / nyon mongs pa shas che ba ni nyon mongs pa'i sgrib ba'o/ / nyes par spyod pa shas che ba ni las kyi sgrib pa'o/ /yang na sdug bsngal ba dang / gnas ngan len shas che ba ni rnam par smin pa'i sgrib pa'o/ /de la ngan 'gro ni rnam par smin pa'i sgrib pa ste/ sdug bsngal shas che ba'i phyir ro/ /bde 'gro'i rnam par smin pa'i sgrib pa ni gnas ngan len shas che ba nyid do zhes bya ba nas so//bag med pa shas che ba dang / le lo shas che ba dang / ma dad pa shas che ba rnams kyis sgrub pa'i bar du gcod par byed de/ bya ba ngan pa la mngon par zhen pa dang / bar ma dor 'jog pa dang / thob par bya ba thob pa'i thabs la dad pa med pa'o//bag med pas ni sgrub par mi byed pa'o/ /le los ni sgrub pa la zhugs kyang bar du 'dor bar 'gyur ro/ /ma dad pa shas che bas ni sgrub pa la mi brtan par 'gyur ro zhes rnam par gzhag pa ni gzhan gyi lugs kyi rjes su 'brangs nas bstan pa yin no//yang 'di ltar ni rigs pa yin te/ nye ba'i nyon mongs pa bcu'i rnam par gzhag pa ni mngon par mtho ba'i lam gyi bar chad du gyur pa dang / nges par legs pa'i lam gyi bar chad du gyur pa dang / lam gnyi ga'i bar chad du gyur pa'i dbang du byas pa'o/ / de la mngon par mtho ba ni bde 'gro'i bdag gi dngos po phun sum tshogs pa dang / longs spyod phun sum tshogs pa'o/ /bdag gi dngos po phun sum tshogs pa'i lam ni tshul khrims so/ /longs spyod phun sum tshogs pa'i lam ni sbyin pa'o/ /de la ma rig pas rmongs par gyur na kha na ma tho bas 'jigs pa med pas tshul khrims nyams par 'gyur ro//gzhan gyi 'byor pa mi bzod pa dang / longs spyod la zhen pa che ba las sbyin pa las nyams par 'gyur ro/ /de ltar nye ba'i nyon mongs pa gsum po 'di dag ni mngon par mtho ba'i bar du gcod pa yin no/ / de la nges par legs pa'i lam gyi sbyor ba ni lam bsgom pa yin par rig par bya'o/ /de'i bar du gcod pa ni sngar bstan pa'i sgrib pa gsum gyis bsdus pa'i nye ba'i nyon mongs pa rnam pa bzhi'o/ /de dag gis bsgribs pas shin tu skal ba dang mi ldan par 'gyur ro/ /bag med par gyur na le lo shas che bar 'gyur bas lam de dag gnyi ga la sbyor bar mi 'gyur ro//dad pa med pa yang sbyor bar mi 'gyur ro/ /de lta bu'i nye ba'i nyon mongs pa bcu po 'di dag gis mngon par mtho ba'i lam dang / nges par legs pa'i lam la sems can rnams nyams par byed pas na nye ba'i nyon mongs pa zhes bya'o//gcig tu ngan song du gzhol bar 'gyur bas na rgud par gnas pa yang yin no/ /de ltar snyigs ma lnga dang ldan pa'i dus su nyan thos kyi theg pa la nan tan byed pa yang shin tu rnyed par dka' ba yin la/ theg pa chen po la nan tan byed pa ni de bas kyang ches shin tu rnyed par dka' ba yin no//gang rnyed sla ba de ni thams cad kyis bya bar nus pa yin la/ gang rnyed par dka' ba de ni sems can khyad par can 'ga' zhig gis yin no zhes bstan pa'i phyir/ sems bskyed par dka' ba dang / theg pa chen po sgrub par byed pa rnyed par dka' ba bdag por byas nas/ byang chub chen por sems skyed par byed do/ /'khor ba'i sdug bsngal ni skye ba la sogs pa'o/ /'jigs pa ni rnam pa gnyis su rig par bya ste/ dman pa ni nyan thos kyi lam la nan tan byed pa na 'khor ba'i sdug bsngal myong ba'i tshe zil gyis mnan zhing mya ngan byed/ngu bar byed/ smre sngags 'don par byed/ brang rdung bar byed/ kun du rmongs par 'gyur ro/ 'bring po ni kun du zhum par 'gyur bas/ 'bring po rnams kyang 'khor ba'i sdug bsngal myong ba na shin tu sgyid lug par gyur nas/ dka' ba spyod pas 'jigs shing skrag par 'gyur na/byang chub sems dpa'i dka' ba spyad pa ni thos par yang nus pa ma yin na spyad pa ma yin na spyad pa lta smos kyang ci dgos/ gnyi ga'i sdug bsngal yang so sor rnam pa bzhi bzhir bstan pa'i phyir/ rnam pa bzhis sdug bsngal khyad par can lhag par 'jug par 'gyur te/dus kyi khyad par ni gang yun ring ba zhes bya ba ste/ dus mang por 'gor ba'i phyir ro/ /gzhi'i khyad par na rnam pa sna tshogs pa'i sgo nas zhugs pa'i phyir ro/ /dbye ba'i khyad par ni chen po las kyang chen por gyur bas 'jug pa ste/ gang drag pa zhes bya ba'o/ /rgyun gyi khyad par ni bar ma chad cing mtshams med par sbyor ba ste/gang yang bar chad med pas zhes bya ba'o/ /mdor bstan pa rgyas par bstan pas rab tu dbye ba bstan pa'i phyir/ rigs phun sum tshogs pa ni zhes bya ba la sogs pa la/ rigs ni chos nyid kyis thob pa yin gyi/rgyu dang rkyen gyis mngon par 'dus byas pa ni ma yin no/ /de'i phyir rnam pa gcig nyid yin gyi de la dbye ba yod pa ma yin no/ /gang yang bsgrubs pa las byung ba de yang rgyu dang rkyen gyis mngon par 'dus byas pa yin yang dbye ba med de/ de'i rkyen ngo bo gcig pa'i phyir 'bras bu la yang dbye ba med do//de'i phyir 'di las gzhan pa'i rgyu gsum gyis dbye ba ni yod do/ /byang chub sems dpa'i bshes gnyen phun sum tshogs pa ni rnam pa bzhir rig par bya ste zhes bya ba ni bshes gnyen ma yin pa rnam pa bzhi'i gnyen po'i phyogs kyis bshes gnyen phun sum tshogs pa rnam par gzhag par bya'o//byang chub sems dpa'i bshes gnyen ngan pa ni rnam pa bzhi ste/ nyan thos kyi theg pa pa bdag la phan pa'i phyir zhugs pa dang / rang sangs rgyas kyi theg pa pa don nyung zhing bya ba nyung ba dang / 'jig rten skyed par byed pa sngags dang spobs pa sna tshogs la zhugs pa dang /gang la brten pas 'jig rten gyi zang zing sdud par 'gyur gyi chos sdud par 'gyur ba ma yin pa'o/ /de la 'jig rten skyed par byed pa ni bshes gnyen ngan pa'o/ /gnyen po'i phyogs ni bshes gnyen phun sum tshogs pa dang po'o//bshes gnyen ngan pa de yang lta bar lhung ba dang / lta ba log par gyur pa'o/ /de las bzlog pa'i dge ba'i bshes gnyen ni shes rab lhag par gyur pa shes rab gsal ba yin no zhes bstan pa'i phyir/ blun po ma yin zhing zhes bya ba la sogs pa yang / blun po ma yin pa dang /yid rtul ba ma yin pa dang / mkhas pa dang / mdzangs pa zhes bya ba'i tshig bzhi ni byis pa dang / rmongs pa dang / mi gsal ba dang / mi mkhas pa rnams las bzlog pa las rig par bya'o/ /byis pa ma yin pas na ma rmongs pa ste/ rig pa'i gnas thams cad la rjes su 'jug pa dang mthun pa'i lhan cig skyes pa'i shes rab dang yang dag par ldan pa'i phyir ro//ma rmongs pa ni mang du thos pa'i rigs can te/ thos pa las byung ba'i shes rab can no/ /mkhas pa ni gsal ba ste/ bsams pa las byung ba'i shes rab can no/ /mdzangs pa ni kun la rigs pa can no//de dag las sngar smos pa'i bshes gnyen ngan pa ni shin tu ngan pa yin no/ /de'i gnyen po'i phyogs kyi yan lag ni gtso bor gyur pa'i phyir ro/ /rnam pa gnyis kyis bshes gnyen phun sum tshogs pa rnam par gzhag par rig par bya'o/ /ji ltar bshad pa'i shes rab kyi mtshan nyid kyis phan pa dang bde ba bsgrub pa'i thabs shes pa'i rnam pa dang pos phun sum tshogs pa dang po yongs su gsal bar byas pa yin no//gnas ma yin pa la mi sbyor ba'i gnas ma yin pa la yang rnam pa gsum ste/ lung du ma bstan pa la gnas pa dang /dge ba ma yin pa la gnas pa dang / dman pa'i dge ba la gnas pa'o/ /de la dang po'i gnas ma yin pa la sbyor ba'i dbang du byas nas smras pa/ bag med pa la yang de 'jug par mi byed la zhes bya ba la sogs pa la/ de la bag med pa'i bya ba ni/ dge ba'i chos mi bsgom pa nyid do//bag med pa'i gnas ni bya ba'i gnas kyi dngos po'o/ /de bzhin du nyes par spyod pa dang / de'i gnas kyang rig par bya'o/ /de la mdo bzhi pa bshes gnyen ngan pa rnam pa gnyis su byas nas 'di'i phun sum tshogs pa rnam pa gnyis su rig par bya ste/gang la brten par gyur na kha na ma tho ba dang bcas kyang rung / kha na ma tho ba med kyang rung / 'jig rten 'di'i bde ba tsam 'byung bar 'gyur ba'o/ /de la dang po dang gnyis pa'i bshes gnyen gcig tu byas nas de las bzlog pa ni phun sum tshogs pa bzhi par rig par bya'o/ / ches khyad par du 'phags pa la gzhag pa dang / ches dman pa la gzhag pa ni mdor bsdu na theg pa la ltos pa dang / dngos po la ltos pa'o/ /de la theg pa chen po ni ches khyad par du 'phags par 'jug pa yin la/ nyan thos dang rang sangs rgyas kyi theg pa ni ches dman pa'o/ /de la dad pa ni thob par bya ba'i dngos po thob par byed pa'i thabs nyid ni dad pa'o//yang de ni rnam pa gsum ste/ yod pa nyid la yid ches pa'i rnam pa dang / bsgrub par nus pa la ma mngon par 'dod pa'i rnam pa nyid dang / yon tan dang ldan pa rab tu dang ba'i rnam pa'o//dad pa dang ldan pa la 'dun pa skye bar 'gyur ro zhes bya bar de'i rjes la dge ba'i chos la 'dun pa bstan to/ /'dun pa skyes nas de thob par bya ba'i phyir sems kyis smon par byed cing mngon par 'du byed skyed par byed pas de'i rjes la yang dag par blang ba'o/ /de ltar sems bskyed cing smon lam gdab pa byas pa ni tshogs yongs su rdzogs par bya ba'i phyir sbyor bar 'gyur ro zhes bya bar de'i rjes la brtson 'grus rtsom mo//brtson 'grus de yang thabs kyis yongs su gzung zhing tshul bzhin du bsgrubs na 'dod pa'i 'bras bu 'grub par 'gyur ro zhes bya bar de'i rjes la thabs bstan to//'di dag ni yon tan te/ skyon rnams kyi gnyen po'i phyogs yin pa'i phyir ro/ /de la theg pa'i dbang du byas nas ches khyad par du 'phags pa dang / ches dman pa'i gnas skabs bstan pa'i phyir/ 'di lta ste zhes bya ba la sogs pa'o/ /dngos po la yang rnam pa gnyis te/ye shes kyi dngos po dang / bsod nams kyi dngos po'o/ /ye shes kyi dngos po la ltos nas bsgoms pa las byung ba la sogs pas ches khyad par du 'phags pa dang / khyad par du 'phags pa ma yin pa'i rnam par gzhag pa'o/ /dge slong gi bya ba'i dbang du byas nas/khyad par du 'phags pa dang / 'bring po dang / dman pa'o/ /de la dge slong gi bya ba'i gtso bo ni bsam gtan dang / sgom pa la sbyor ba'o/ /'bring po ni klog pa dang / nyan pa dang / sems pas bsdus pa bsam gtan ma yin pa'i sbyor ba'o/ /gnyi ga yang thams cad kyi thams cad du sbyor bar mi nus na/dad pas byin pa longs spyod pa 'bras bu dang bcas par bya ba'i phyir/ zhal ta ba'i las la sbyor bar gnang ba yin no/ /de yang rnam pa gnyis te/ dge 'dun gyi zas la sko bar byed cing res la sogs pa'i sko ba'i zhal ta byed pa dang / bla ma la gus shing rim gror byed pas bla ma'i yongs su spyod pas g.yog byed pa'o/ /bsod nams kyi dngos po'i dbang du byas nas/ tshul khrims las byung ba las zhes bya ba la sogs pa smras so/ /rgyu bzhis snying rje brtan cing bshad par rig par bya'o/ /kun nas nyon mongs pa can gyi 'jig rten gyi khams su skyes pa'i sems can las dang po pa rnams la snying rje skye bar 'gyur gyi/kun nas nyon mongs pa med pa rnams la ni ma yin no zhes bstan pa'i phyir smras pa/ 'jig rten gyi khams gang na sdug bsngal med pa de lta bu dag kyang yod na zhes bya ba'o//de la kun nas nyon mongs pa can ma yin pa la rnam pa gnyis te/ rnam par dag pa dang / rnam par ma dag pa'o/ /de la rnam par dag pa'i 'jig rten gyi khams ni bud med la sogs pa'i ming yang shes par mi 'gyur na skye ba lta smos kyang ci dgos/ sangs rgyas dang byang chub sems dpa' mthu chen po thob pa 'ba' zhig 'byung bar 'gyur ba'o/ /de na theg pa chen po gcig gi dbang du byas nas chos ston par byed pa nyid do/ /des na nyan thos dang rang sangs rgyas kyi ming yang shes par mi 'gyur ro/ /'jig rten gyi khams de dag na sdug bsngal dang kun 'byung gi bden pas bsdus pa yod pa ma yin te/shin tu rnam par dag pa'i 'jig rten las 'das pa'i dge ba las nges par byung ba'i phyir ro/ /yongs su ma dag pa'i 'jig rten gyi khams yin la/ /snyigs ma lnga dang bral ba de dag na thams cad kyi thams cad du sems can rnams rgud par 'gyur ba ni med do//mdor na sdug bsngal ni rnam par gsum ste/ gzhan gyis byas pa dang lhan cig skyes pa dang / yongs su gyur pa las byung ba'o/ /de dag las bzlog par gyur pa ni sdug bsngal med pa'i 'jig rten gyi khams su rig par bya'o//gang na snyigs ma lnga dang / sems can rnams kyi rgud pa dang / sdug bsngal rnam pa gsum dang ldan pa der skyes pa rnams la mdor na sdug bsngal rnam pa gnyis la bltas nas snying rje skye bar 'gyur ro/ /gzhan gyi rgyud la bab pa dang / rang gi rgyud la bab pa'o/ /de gnyis ka la yang snying rje'i rgyu rnam pa gnyis su 'gyur ro//gzhan gyi rgyud la bab pa'i sdug bsngal gyi rgyu'i dbang du byas nas smras pa/ gzhan yang sdug bsngal ci yang rung bas zhes bya ba la sogs pa la/ thebs shing zhes bya ba ni dang por ro/ / gnod par 'gyur te zhes bya ba ni bar du'o/ /non pa zhes bya ba tha mar ro/ /yang na lhan cig skyes pas thebs shing yongs su gyur pa las byung bas gnod par gyur te/ gzhan gyis byas pas non pa'o/ /rgyu gnyis pa rang gi rgyud la bab pa'i sdug bsngal gyi dbang du byas nas smras pa/ bdag kyang sdug bsngal ci yang rung bas zhes bya ba la sogs pa'o/ /de ltar bdag dang gzhan gyi rgyud la bab pa'i sdug bsngal chung ngu'i rnam pa gnyis kyi rgyu bstan nas/ bdag dang gzhan du gtogs pa'i rgyu gnyis bstan par bya ba'i phyir/ gzhan nam bdag gam zhes bya ba la sogs pa la/gnyi ga yang rung zhes bya ba la dus gcig tu bsngal myong ba'i dbang du byas na bstan pa ni/ sdug bsngal rnam pa bzhis chen por bstan pa yin te/ dus chen po nyid dang / sgo du ma nyid dang / chen po'i rnam pa nyid dang / rgyun mi 'chad par 'jug pa nyid kyis so/ /yang gzhan dag gi rgyu gzhan rnam pa bzhir 'chad par byed de/gang na sdug bsngal ba dang / gang dag sdug bsngal ba dang / sdug bsngal gyi rnam pa gang yin pa la nye bar dmigs nas snying rje chen po skye bar 'gyur ro/ /gang na sdug bsngal ba zhes bya ba ni sdug bsngal dang bcas pa'i 'jig rten gyi khams su skyes pa'o//gang dag ces bya ba ni bdag dang gzhan rnams so/ /rnam pa gang yin pa ni chung ngu dang / 'bring dang / chen po'i rnam pa rnams kyis so zhes zer ro/ /rnam par gzhag pa 'di la skyon 'di yod de/ sdug bsngal chung ngu nyid la bdag dang gzhan gyi dbye ba byas pas rgyu gnyis bstan la/chen po la ma yin pa'i rgyu ci yin de'i phyir rnam par gzhag pa snga ma nyid kha na ma tho ba med pa yin no/ /rgyu de dag gi phyir rigs phun sum tshogs pa nyid las snying rje nye bar skye bar 'gyur ro zhes bstan pa'i phyir smras pa/ rang gi rigs la brten cing zhes bya ba la/'dir rigs dang ldan pa las snying stobs kyi khyad par du 'gyur la/ snying stobs kyi khyad par nyid las ni rang bzhin gyis dge ba nyid du 'gyur bar rig par bya ste/ dmigs pa'i rnam grangs nyid rten zhes bya'o/ /de la gzhan gyi rgyud la bab pa'i sdug bsngal chung ngu la ni snying rje chung ngu nyid do//de nyid bdag gi rgyud la bab pa la ni 'bring po'o/ /bdag dang gzhan gyi rgyud la bab par gyur pa chen po la ni chen po'o/ /rnam par gzhag pa gnyis pa'i rjes su 'brangs nas sdug bsngal dang bcas pa'i 'jig rten gyi khams su skyes pa la ni chung ngu'o//bdag dang gzhan gyi rgyud la bab pa la ni 'bring ngo / /de dag nyid chen po la ni chen po'o/ /goms pa med par yang zhes bya ba ni goms pa med par ro/ /rgyu rnam pa bzhis de ltar snying rje skye bar rig par bya'o/ /goms pa'i sbyor bas ni thams cad du chen po nyid du gyur ro//snying rje'i dbang gis sdug bsngal la 'jigs par mi 'gyur gyi/ gzhan du ni ma yin no zhes bstan pa'i phyir smras pa/ sems can rnams la snying rje yang dag par sngon du btang nas zhes bya ba la/ mi 'jags shing mi skrag na zhes bya ba la/ mi 'jigs zhes bya ba ni mya ngan med pa'o//mi skrag pa ni 'gyod cing gdung bar mi 'gyur ba'o/ /gzhan gyi rgyud la skyes pa'i sdug bsngal gyis gang zag rnam pa bzhi la bya ba rnam pa bzhi sgrub par byed do/ /de la shin tu dman pa ni dga' ba skye bar byed do/ /de la khyad par du 'phags pa ni mya ngan skye bar 'gyur ro//de bas kyang khyad par du 'phags pa ni gdung ba skye bar 'gyur ro/ /de bas kyang shin tu khyad par du 'phags pa ni snying rje skye bar 'gyur ro/ /de'i phyir bstod pa las/ dman pa gzhan gyi sdug bsngal mthong na dga' 'gyur zhing / /'bring po rnams ni rmongs pas mya ngan skye bar 'gyur//rab 'og rnams ni gdung ba skye bar 'gyur/ /sems can mchog khyod snying rje brnyes par gyur/ /zhes bstan pa yin no/ /sdug bsngal gyis mi 'jigs pa'i rgyu bzhi mdor rnam par gzhag pa ni lus kyi stobs dang / sems kyi stobs kyi dbang du byas pa'o/ /de la rgyu dang bcas pa'i lus kyi stobs bstan pa ni/snying stobs che zhing brtan pa dang ldan pas stobs dang ldan pa yin te zhes bya ba la/ snying stobs che ba dang / dpa' ba dang / rtul phod pa dang / sems stobs can zhes bya ba ni don gcig go/ /kha cig ni brtson 'grus kyi khyad par la snying stobs zhes zer ro//yang de ni rnam pa gnyis te/ nyon mongs pa can dang / nyon mongs pa can ma yin pa'o/ /de la nyon mongs pa can gyi sbyor ba ni g.yul dor dpa' ba'o/ /nyon mongs pa can ma yin pa'i sbyor ba ni sbyin pa la dpa' ba'o/ /de'i phyir/ sems can nyid la sbyin zhing de dang g.yul sprad pa//snying stobs lhag par gyur pas bya dang bya min shes/ /zhes gsungs pa yin no/ /brtan pa ni dang dal ba ste/ 'byung ba chen po'i khyad par ro/ /gzhan dag ni shes rab kyi khyad par du 'dod do/ /de ni mi rigs te/ de'i dbye ba ni tha dad du bshad pa'i phyir ro//gang la 'di dag gnyis ka yod pa de la nges par rang bzhin gyis lus kyi stobs dang ldan par 'gyur ro zhes bya bar stobs dang ldan pa yin te zhes smras so/ /yid kyi stobs ni rnam pa gsum ste/ shes rab kyi stobs dang / lhag par mos pa'i stobs dang / snying rje'i stobs so/ /stobs dang po bstan pa'i phyir/ yang dag par sems pa'i ngang tshul can zhes bya ba la/ sngon dang phyi ma'i skyon dang yon tan yongs su rtog pa la nges par sems pa'i dang tshul can no/ /'di ltar brtags nas kyang 'khor ba'i sdug bsngal gyis 'jigs par mi 'gyur te/gzhan gyi bud med la ni zhugs pa dang / /rgan por gyur kyang ba lang ri dwags lug /gyur tshe don med sdug bsngal sna tshogs myong / /zhes bstan pas 'khor ba dpag tu med pa'i sdug bsngal gyi rigs nyams su myong bar gyur te/ dgos pa med pa'i bya ba ma yin pa'i las byas ba'i rgyus de ltar gyur to zhes bya ba'i don to//de ni gzhan la phan pa'i phyir rab tu zhugs pa yin pas dmyal ba'i sdug bsngal nyams su myong bar gyur pa yang bsngags par 'os pa yin no zhes nges par sems par byed do/ /don 'di nyid/ srid gsum dag la phan brtson blo mnga' ngan 'gro'i gnas na'ang bsngags par 'os//zhes bya ba'i bstod pa'i rjes su 'brangs nas rig par bya'o/ /de ltar nges par bsams nas sems can rnams phyin ci log tu grub cing sdug bsngal ster bar byed kyang sems can 'di dag ni rang dbang med pa/ nyon mongs pa'i dbang gis 'gro ba/nyon mongs pa'i gdon gyis zin pas 'di lta bu'i bya ba ma yin pa byed kyis/ de'i phyir 'di dag nyon mongs pa'i gdon las thar bar bya'o zhes nges par brtag pa yang / ji ltar dman pa gdon gyis zin la gdon rnams bsal bar bgyi slad du/ /zhes bya ba'i tshigs bcad kyi rjes su 'brangs nas rig par bya'o//de ltar nges par brtag pa ni dka' ba spyod pa'i sdug bsngal gyis 'jigs par mi 'gyur ro/ /mir gyur pa nyid las 'dun pa dang / brtson 'grus dang / sems pa dang / so sor rtog pa dang ldan nas las de lta bu byas shing goms pa'i rim gyis sangs rgyas par 'gyur ro//bdag gis kyang goms par ma byas pa 'ba' zhig gis dka' ba'i spyod par snang bar zad pas/ de'i phyir bdag gis kyang rim gyis goms par byas la bsgrub po zhes nges par sems pa ni/ gang zhig thob par gyur na'ang 'jig rten 'di la gnod pa skye 'gyur dang //zhes bya ba'i tshigs su bcad pa'i rjes su 'brangs nas 'di ltar nges par brtag par bya bar rig par bya'o/ /sngar bstan pa'i bstan pa dang bcas pa'i nges par sems pa nyid kyi rnam pa'i shes rab ni so sor rtog pa'i stobs zhes brjod do/ /rigs kyi khyad par dang /bshes gnyen gyi khyad par gyis byang chub chen po 'dod pa dang / mos pa dang / bzod pa la nye bar gyur pa de ni bdud dang phas kyi rgol ba rnams kyis bkri bar mi nus pa yin no/ /des na byang chub chen po la mos pa'i stobs can ni sdug bsngal gyis mi 'jigs so/ / bdag nyid bde ba 'dod pa dang gzhan don byed pa zung du 'jug pa yod pa ma yin pas/ zhes bya bas sems can rnams la snying rje chen po dang ldan pas sdug bsngal gang ci yang rung ba de thams cad snying rje 'phel ba'i rgyur 'gyur ba yin gyi/ 'di gas pa'i rgyu ni ma yin no/ /'di lta bu'i rgyu yang /'jig rten phongs pa'i gnas skabs gyur na bdag nyid gtong bar bgyid/ /ces bya ba'i bstod pa'i rjes su 'brangs nas rig par bya'o/ /rgyu dang po gnyis ni stobs brtan par gyur pa'i stobs gnyis las so/ /de bzhin du stobs rnams kyi rang bzhin rnam par gzhag pa dang /mdor bsdus nas rnam par gzhag pa ni stobs bzhi bsdus na stobs gnyis su 'gyur te/ bdag gi stobs dang / gzhan gyi stobs so/ /de la bdag gi stobs ni rnam pa gsum ste/ skye ba gcig nas gcig tu 'ongs pa'i sa bon gyis stobs bskyed pa dang ldan pa nyid dang /skye ba gzhan gyi dge ba'i rtsa ba goms par byas pa dang ldan pa nyid dang / mthong ba'i chos kyi dge ba'i chos dang ldan pa nyid do/ /rang gi mthus zhes bya ba ni/ rang gi rgyud du gtogs pa'i nus pas rang dbang du 'dod pa dang / bzod pa dang / mos pa zhes bya ba ni rnam grangs so/ /rang nyid kyi khyad par gyis byang chub chen por mos par 'gyur ba ni bdag gi stobs zhes bya'o/ /gzhan gyi mthus bskyed pa gang yin pa de ni zhes bya ba ni gzhan la brten nas bskyed pa ste/ dge ba'i bshes gnyen gyi mthus nges par bstan par byas pa las byung ba'i 'dod pa dang /bzod pa dang / mos pa zhes bya ba ni snga ma bzhin no/ /sngon byang chub tu sems bskyed nas ji skad bstan pa'i rgyu'i byed pa dang / sngon goms pa'i dbang gis sam/ da ltar sangs rgyas dang byang chub sems dpa' mthong ba tsam mam/ de dag gi yon tan thos pa tsam gyis myur du sems skye bar 'gyur na/khyad par can gyi dam bcas pa'i chos thos pa'am/ mthu mthong bas lta ci smos te/ de lta bas na sngon gyi dus su theg pa chen po la rab tu zhugs pa dang / dge ba la goms pa ni rgyu'i stobs zhes bya'o/ /da ltar gyi tshe 'di nyid la dge ba'i bshes gnyen la bsnyen bkur byas pa dang /byang chub sems dpa'i sde snod mnyan pa dang / bsams pa la sogs pa dus yun ring du goms par byas pas dge ba'i chos la goms pa ni sbyor ba'i stobs zhes bya'o/ /de ltar sems bskyed pa'i dbye ba'i rgyu bstan nas/ sngar bstan pa'i nges par 'byung ba dang /nges par 'byung ba ma yin pa'i dbye ba bsdus pa'i phyir rkyen bzhi po las 'ga' zhig gis sam/ tshogs pas kyang rung ba'am/ rgyu bzhi las 'ga' zhig gis sam/ tshogs pa la brten nas nang gi stobs dang / rgyu'i stobs 'di gnyis tshogs pa'am/so so las sems de skyed na ni brtan par 'gyur te/ nyon mongs chu bo 'khrug dang ngan 'gro'i kha dag rtag tu gdangs pa dang / /zhes bya ba'i tshigs su bcad pa'i rjes su 'brangs nas mi dge ba'i grogs pos mi g.yo ba'i phyir ro/ /snying por gyur pa ni snying rje dman par gyur pas ldog pa med pa'i phyir ro//mi g.yo bar gyur pa ni sdug bsngal gyis 'jigs shing g.yo ba med pa'i phyir ro/ /rnam grangs gzhan yang 'khor ba'i sdug bsngal gyis mi ldog pas na brtan pa'o/ /sems can gnod pa byed pas ldog par mi 'gyur bas na snying por gyur pa'o/ / dka' ba spyod pa'i sdug bsngal gyis mi ldog pas na mi g.yo bar 'gyur ro/ /'di dag las gzhan pa'i stobs las bskyed pa ni brtan par mi 'gyur ro/ /de ltar rgyu dang / rkyen gyi stobs kyis sems bskyed pa'i dbye bas nges par 'byung ba dang / nges par 'byung ba ma yin pa bstan nas/da ni ldog pa dang / mi ldog pa'i rgyu bstan pa'i phyir/ sems ldog pa'i rgyu ni rnam pa bzhi ste zhes bya ba'o/ /de la mi dge ba'i bshes gnyen ni theg pa chen po la mos pa 'dor du 'jug cing / theg pa gzhan la smon pa byed du 'dzud pa'am/ thar pa'i lam la sbyor bar byed pa 'dor bar byed cing brtson pa 'dor bar sbyor ba ste/de ltar na de'i sems ldog par 'gyur ro/ /snying rje chung bas sems can la ltos pa med par 'gyur ro/ /de ltar na sems can gyi don gtso bor byas nas byang chub la dmigs pa yin na/ sems can rnams la ltos pa med pas byang chub las sems ldog par 'gyur ro//'du byed kyi sdug bsngal gyi rigs bzhi'i 'jigs pa mthong nas drag cing gdung ba'i yid la byed pa skye bar 'gyur ro/ /des na myur du yongs su mya ngan las 'da' bar 'gyur bar 'dod cing / sems bskyed pa de ldog par 'gyur ro/ /rgyu gsum po 'di dag gis ldog pa ni gtan ldog pa ma yin no//rigs phun sum tshogs pa ma yin pa ni gtan ldog par 'gyur ro/ /sems skye ba'i rgyu las bzlog pa las ldog pa'i rgyur rig par bya ste/ dkar po'i phyogs dang / nag po'i phyogs kyi dbye ba dang / tshang ba dang / ma tshang ba'i dbye bas kyang rig par bya'o/ /dkar po'i phyogs dang tshang ba ni 'jug pa'i rgyu yin no/ /nag po'i phyogs dang / ma tshang ba ni ldog pa'i rgyu yin no/ /de'i phyir sems ldog par 'gyur ba'i rgyu bzhi po zhes bya ba la sogs pa smras so/ /de ltar re zhig byang chub kyi sems la rmongs pa rnams la rang gi mtshan nyid dang /khyad par gyi mtshan nyid dang / rab tu dbye ba'i mtshan nyid dang / rgyu dang rkyen gyi dbye ba dang / 'jug pa dang ldog pa'i dbye bas byang chub kyi sems rnam pa lnga bstan nas/ yang rigs ma nges pa theg pa gzhan la zhugs pa rnams byang chub kyi sems kyi phan yon thos nas de dag la mos pa bor nas 'dir 'jug par bya ba'i phyir dang /rigs ma nges pa sangs rgyas nyid la zhugs pa mi brtan pa rnams nges par gzung ba'i phyir dang / rigs nges pa bag med pa dang / zhum pa dang / yang dag par zhugs pa rnams go rims bzhin du byang chub kyi sems la yang dag par bskul ba dang /gzengs bstod pa dang / yang dag par rab tu dga' bar bya ba'i phyir/ byang chub tu sems bskyed pa'i ngo mtshar rmad du byung ba'i chos bstan pa'i phyir/ 'di gnyis ni byang chub sems dpa' dang po sems bskyed pa brtan pa'i zhes bya ba ni ji skad bstan pa'i nang gi stobs dang /rgyu'i stobs kyis phyir mi ldog cing nges par 'byung ba zhes bya ba'i don to/ /'jig rten dang thun mong ma yin pa ni da ltar gyi dus la nyi bar ltos nas gzhan dag la thams cad kyi thams cad du med pa'i phyir ro/ / ngo mtshar ni 'das pa'i dus na yang ma byung ba'o/ /rmad du byung ba ni ma 'ongs pa'i dus na yang mi 'byung ba'o zhes byas nas ngo mtshar rmad du byung ba'i chos rnams kyi rim pa rnam par gzhag pa ni 'di ltar rig par bya'o/ /'jig rten pa rnams kyi ni bu dang chung ma la sogs pa yongs su bzung ba rnams mtha' yod pa dang /yongs su chad pa yod pa yin la byang chub sems dpa' rnams kyi ni nam mkha'i khams kyi mthas gtugs pa'i sems can gyi khams thams cad chung ma'i tshul du yongs su 'dzin pa ngo mtshar rmad du byung ba'i chos so/ /sems can thams cad chung ma'i tshul du 'dzin na yang des nyon mongs pa yang mi skye ba ni gnyis pa'o//nyon mongs pa med pas bsam pa phun sum tshogs pa dang / sbyor ba phun sum tshogs par 'gyur ro/ /bsam pa dang sbyor ba dang ldan pa'i dge ba'i chos rnams nye bar sogs par 'gyur ro/ /de'i phyir de'i dge ba'i chos rnams skye zhing 'phel bar 'gyur bas rgyu dang 'bras bu khyad par can du 'gyur ro//des na rgyu dang 'bras bu khyad par can dang ldan pa ni bsod nams kyi tshogs bsags pa dang yang dag par ldan pas mthong ba'i chos dang / 'jig rten gzhan du byang chub kyi sems bskyed pa'i yon tan dang /phan yon 'di dag thob par 'gyur ro/ /byang chub sems dpa' sems de bskyed ma thag tu sems can thams cad kyi gcig tu dge ba'i bshes gnyen du 'gyur te/ mi phan pa las zlog par byed cing phan pa la sbyor bar byed pa'i phyir ro/ /de'i phyir sems can gyi khams thams cad chung ma'i tshul du gzung bar 'gyur ba yin no//de'i phyir bstod pa las/ khyod ni ma bcol legs mdzad pa/ /khyod ni rgyu med bzhin du byams/ /khyod ni ma 'dris mdza' bshes te/ /'brel pa med pa'i gnyen 'dun lags/ /zhes bstan pa yin no//chung mar 'dzin pa ni 'byor pa dang rgud pa'i tshe phan 'dogs pa dang gnod pa byed pa la mthun pa dang mi mthun pa ste/ bde ba dang sdug bsngal ba can du 'gyur te/ dga' ba dang mi dga' ba zhes bya ba'i don te/ yang byang chub sems dpa' ni sems can la phan pa dang gnod pa las sems can gyi ngor de ltar 'gyur gyi nyon mongs pa ni yod pa ma yin no//de la nyon mongs pa can gyi ngor 'dod chags dang / brtse ba dang nges par 'dzin pas bu dang bu mo la sogs pa la brtse ba ni nyon mongs pa can no/ /'gal ba byed pa'i sems can la khro ba la sogs pas sems can la brdeg pa dang /gsod pa la sogs pa'i nyon mongs pa ni byang chub sems dpa' la med do/ /sems can gcig tsam la rjes su chags pa dang / khong khro bar gyur na yang rang gi don yang bya bar mi nus na/ sems can thams cad la de dag gis nyon mongs pa can du gyur na gzhan gyi don bya ba lta smos kyang ci dgos/nyon mongs pa can ma yin pas mthun pa dang mi mthun pa'i sbyor bas byang chub sems dpa' snying rje dang ldan pas sems can la snying brtse ba 'phel bar byed cing snying rje dang ldan pas nyon mongs pa med kyang gzhan gyi ngor byed do//de'i phyir/ ye shes nyi ma'i me 'bar yang / /gang gi sred pa 'phel 'gyur mtshar/ /zhes bstod pa yin no/ /nyon mongs pa med pa'i mi mthun pa ni sems can log par spyod pa rnams la thabs gzhan med pas dus de srid du rgyab kyis phyogs par byed do/ / des na bdag ni byis pa'i skye bo thos dang mthong mi 'dod/ /ces bya ba'i tshigs su bcad pa'i rjes su 'brangs nas rig par bya'o/ /lhag pa'i bsam pa bzang pos 'jug pa yang ngo mtshar rmad du byung ba'o zhes bya bas 'jig rten thams cad phyogs gsum gyis 'jug par 'gyur te/ bshes gnyen gyi phyogs dang / dgra'i phyogs dang / tha ma la pa'i phyogs so/ /yang byang chub sems dpa'i ni sems can thams cad bshes gnyen gyi phyogs kyis yang dag par bsdus pa nyid do/ /de'i phyir sems can thams cad la phan pa bya ba'i lhag pa'i bsam pa dang / bde ba bya ba'i lhag pa'i bsam pa 'jug par 'gyur ro//de'i phyir/ 'gro bas 'gro la gnod dang phan pa yis/ /phyogs gnyis dag la spyod dang ldan pa lags/ skye bo ma lus pa la phan 'dogs pa'i/ /phyogs gcig po la snying rje'i bdag nyid zhugs/ /zhes bstod pa yin no//yang sems can thams cad la/ phan pa dang bde ba'i lhag pa'i bsam pas zhugs pa de yang ngo mtshar rmad du byung ba ste/ ma dang pha dang bu gcig pa shin tu gces pa la yang de lta bu med pa'i phyir ro/ /de'i phyir na/ 'di ltar khyod ni 'jig rten phan phyir 'jig rten la/ /mnyam pa'i sems kyis dus ring zhugs pa ltar//rang las skyes pa'i bu la pha yi sems kyis kyang / /skad cig tsam yang mnyam par 'jog mi nus/ /zhes bstod pa yin no/ /mi dge ba'i gnas zhes bya ba ni nyes par spyod pa'i gnas dang / kha na ma tho ba dang bcas pa'i gnas dang / mthar mi 'dod pa'i rnam smin ster ba'i gnas zhes bya ba'i don to/ /de'i gnyen po'i phyogs su gyur pa ni dge ba'i gnas te/ de la rab tu dgod pa ni yang dag par sgrub cing / de la sbyor bar byed pa'o/ /de bzhin du sems can rnams la 'jig rten pha rol tu phan pa'i lhag pa'i bsam pa ni phan par bya ba'i bsam pa zhes bya'o//phongs pa zhes bya ba ni nye bar mkho ba dang bral bas sdug bsngal bar gyur pa'o/ /mgon med pa zhes bya ba ni snying rje'i yul du gyur pa nye bar mkho ba bsgrub par mi nus pa/ sdug bsngal bsal bar rang gis mi nus pa'o/ /rten med pa ni 'dod pa'i rten gzhan med pa'o//phan pa'i dngos po yang rnam pa gnyis te/ nyon mongs pa can gyi bde bas sdud par byed pa dang / nyon mongs pa can ma yin pa'i bde bas sdud par byed pa'o/ /de la nyon mongs pa can gyi bde bas bsdus pa ni kun du rmongs pa dang / bag med pas dge ba'i chos rnams las yongs su nyams par 'gyur zhing mi dge ba'i chos rnams la 'jug cing 'phel bar byed pa'o//nyon mongs pa can ma yin pa'i bde bas bsdus pa ni mi dge ba'i chos rnams spangs nas/ dge ba'i chos rnams yang dag par blangs nas 'phel bar byed pa'o//de'i phyir/ nyon mongs pa can spangs te phan pa'i dngos po bsgrub par 'dod pa gang yin pa'o zhes bya ba'o/ /nyin gcig bzhin du yang dag par spel ba'o zhes bya ba ni nyin lan gsum mtshan lan gsum du phan pa dang bde ba'i bsam pa de nyid bsten par bya'o/ /bsgom par bya'o/ / mang du bya'o/ /rnam par 'phel bar bya'o/ /bstan par bya'o zhes bya ba de lta bu ni yang dag par spel ba zhes bya'o/ /sems can thams cad la byams pa yid la byed pa mang bas ni phan pa'i lhag pa'i bsam pa 'phel bar 'gyur ro/ /snying rje yid la byed pa mang bas ni bde ba'i lhag pa'i bsam pa 'phel bar 'gyur ro//chos la nges par rtogs pa'i bzod pa ni yang dag par chos la rtog par byed pa dang / chos la so sor rtog pas rab tu dben pa'i sangs rgyas kyi chos rnams yongs su smin par byed pa'i sbyor ba'o/ /sbyin pa dang / tshul khrims la rab tu 'jug pa yang sbyor ba zhes bya bar brjod do/ /bzod pa dang / bsdu ba'i dngos po bzhis sems can rnams rjes su sdud pa yang lhag pa'i bsam pa'i sbyor ba'o/ /de'i phyir phan pa dang bde ba bsgrub pa'i sbyor ba'o zhes bya ba smras te/ bsod nams rgya chen po 'byung ba'i rgyu mtshan du gyur pas chos chen po 'du ba'i sgo zhes bya'o//de ltar sems bskyed nas lus dang ngag dang yid kyis sbyin pa la sogs pa'i pha rol tu phyin pa dang ldan pa'i las byas nas bla na med pa yang dag par rdzogs pa'i byang chub tu yongs su bsngo ba ni/ rang gi don gyi sbyor bar 'gyur ro//de nyid ni byang chub chen po yang dag par sgrub par byed pa'i rgyur 'gyur ro/ /sngar bstan pa'i sgrub pa'i sbyor ba'i pha rol tu phyin pa'i sbyor ba dang ldan pa'i las de dag kyang sems can thams cad dang thun mong du byas nas/ sems can thams cad kyis de'i 'bras bu thob par bya ba'i phyir yongs su sngo bar byed do//de'i phyir gzhan gyi don gyi sbyor ba yin no/ /sngar bstan pa'i phan pa dang bde bas bsdus pa'i sbyor ba yang sems can rnams 'jug cing rnam par grol bar bya ba'i phyir zhes byas nas so/ /de'i phyir/ sdug bsngal thams cad bsal ba'i phyir//zhes bya ba yin no/ /sbyor ba 'di gnyis ni dge ba'i chos kyi tshogs chen po gnyis zhes kyang brjod de/ bsod nams kyi phung po mi zad pa yin pa'i phyir ro/ /dge ba'i chos kyi phung po zhes kyang bya ste/ bsod nams kyi phung po'i ngo bo nyid yin pa'i phyir ro/ /de nyid ni dpag tu med pa'i dge ba'i chos kyi phung po nye bar sogs pa la dang po sems bskyed pa nas bzung nas rgyu khyad par du 'phags pa dang /'bras bu khyad par du 'phags pa ni ngo mtshar rmad du byung ba'i chos yin no zhes bstan pa'i phyir/ de las gzhan nyan thos la sogs pa'i rgyud kyi dge ba yongs su 'dzin pa la ltos nas/khyad par du 'phags pa'i bsod nams bsags pa ni bla na med pa yang dag par rdzogs pa'i byang chub kyi rgyur 'gyur zhing / dge ba yongs su 'dzin pa gzhan ni ma yin pa 'di ni rgyu'i khyad par du 'phags pa'o/ /de'i 'bras bu ni bla na med pa yang dag par rdzogs pa'i byang chub de nyid yin gyi gzhan ma yin pa ni 'bras bu khyad par du 'phags pa'o//de lta bas na sems bskyed pa'i byang chub sems dpa' dge ba'i chos gang yongs su 'dzin pa de ni rgyu nyid dang / 'bras bu nyid kyis rab tu khyad par du 'phags pa yin no/ /nyan thos la sogs pa thams cad kyi dge ba yongs su 'dzin pa la yang thams cad kyi thams cad du med pa yin no//de lta bu'i yon tan dang ldan pa'i sems bskyed pa ni 'jig rten thams cad las yang dag par 'das pa ste/ phan yon dang bcas par bstan pa'i phyir/ sems bskyed ma thag nas kyang zhes bya ba la sogs pa la/sems can thams cad kyi yon gnas su gyur pa dang zhes bya ba ni 'jig rten thams cad kyis mchod pa'i phyir dang / 'jig rten thams cad las khyad par du 'phags pa'i phyir dang / bla mar gyur pa dang / slob dpon dang / mkhan po dang / pha mar brtags pa'i phyir ro/ /de'i phyir/gang tshe dang po byang chub tu/ /khyod kyis thugs ni bskyed gyur pa/ /de nas bzung nas khyod nyid ni/ /'jig rten mchod gnas gong mar gnas/ /zhes bstod pa yin no/ /yon gnas dang bla mar gyur pa'i phyir de nyid 'gro ba'i bsod nams kyi zhing yin pas de la phan pa'i bya ba byas nas 'bras bu khyad par du 'phags shing /'dod par bya ba'i 'bras bu dang bcas pa dang / myur zhing dge ba 'thob par 'gyur ro/ /lta bu'i bsod nams dang yang dag par ldan pa'i tshe 'di dang gzhan la bdag nyid la gnod pa med par 'gyur zhing / gnod pa med pa'i bsod nams des bskyed pa'i bdag gi dngos pos gzhan gyi gnod pa rab tu zhi bar byed nus par 'gyur ba nyid do//gnod pa med pa'i bsod nams ni gang dang ldan pa'i byang chub sems dpa'i rnam par gzhag pa ni rnam pa lnga ste/ mthong ba'i chos la bde ba dang ldan pas gzhan gyis gnod par mi nus pa yin te/'khor los sgyur ba'i rgyal po ltar rab tu khyad par du 'phags pa'i bsrung bas bsrungs pa'i phyir dang / byang chub sems dpa' de'i bdag gi dngos po ni sangs rgyas kyi ljon shing gi myu gu'i gnas yin pa'i phyir ro/ /de'i phyir/ lha dang / mi dang / klu dang /gnod sbyin la sogs pa thams cad kyis gnod pa med pa'i sbyor bas bsrung bar 'gyur ba'i phyir/ gnas skabs thams cad du gnod pa bya bar mi nus pa yin no zhes bya bar gnyid log gam zhes bya ba nas/ brtse bar mi nus so zhes bya ba'i bar gyis so/ /skye ba gzhan la yang phyi ma'i tshe yang bdag gi dngos po khyad par du 'phags pa rab tu thob par 'gyur ba ni yang tshe brjes pa'i 'og tu ste tshe phyi ma la yang bdag dang gzhan gyi don byed par nus pa'i bdag gi dngos po rab tu thob par 'gyur ro//lus kyis chos ston pa yang byang chub sems dpa' gang la gzhan yang dag par dgod par 'dod pa de la bdag nyid yang dag par zhugs nas rtag tu gus pa dang bcas pas sbyor bar byed pa na/gzhan de'i rjes su slob par 'dod pa rnams kyang de bzhin du slob par byed de/ de lta bu ni de'i lus kyis chos ston pa yin no/ /rten khyad par can thob par gyur pa las kyang sems bskyed pa'i byang chub sems dpa' ni skye ba de nyid la shin tu sbyangs pa'i rten 'thob par 'gyur gyi/gnas ngan len gyi rten ni ma yin pas gnas ngan len shin tu chung bar 'gyur ro/ /ngag gi khyad par thob par gyur pa las kyang gzhan gyis ma grub pa'i sngags la sogs pa 'grub par 'gyur ba ni bsod nams khyad par can gyis yongs su gzung ba nyid kyi phyir ro//bsam pa'i khyad par thob par gyur pa las kyang yin te/ bzod pa dang / des pa rab tu thob pa'i phyir dang / khro ba la sogs pa nye ba'i nyon mongs pa dang bral ba'i phyir ro/ / bzod pa'i mtshan nyid bstan pa'i phyir/ gzhan gyis gnod pa byas pa bzod pa zhes bya ba la/ gang dang lhan cig gnas pa de dag gis gnod pa byas par gyur na yang / de dag gis gnod pa byas pa de dag bzod cing 'gyur bar mi byed do zhes bya ba'o/ /des pa'i mtshan nyid bstan pa'i phyir gzhan la yang gnod pa mi byed pa zhes bya ba la/gzhan gnod pa byed dam ste/ nye bar 'tshe bar byed cing khro zhing 'khrug na yang bdag nyid thams cad du mi byed pa ste/ de ltar na nges pa mang bar 'gyur ro/ /gzhan gyis gzhan dag la gnong pa byed pa mthong ngam thos na yang snying rje khyad par can dang ldan pa'i phyir/shin tu mi dga' bar 'gyur na/ ji ltar na gzhan la de gnod pa byed par 'gyur/ sems can rnams la rjes su brtse ba mang ba'i phyir/ khro ba la sogs pa nye ba'i nyon mongs pa mang bar mi 'gyur ro/ /res 'ga' skyes par gyur na yang myur du bcom zhing nyam dmad par 'gyur ba'o//nyam dmad pa nyid bstan pa'i phyir/ myur du 'bral bar 'gyur ba'o/ /brgya la spyod par gyur na yang zhes bya ba ni rtag tu dus thams cad du mi spyod pa'o/ /skyes par gyur na yang myur du 'bral bar 'gyur gyi/ rgyun 'jug par mi 'gyur ba'o//chung ba'i rnam pas skye bar 'gyur gyi/ chen pos ni ma yin no/ /de ltar na skye ba dman pa nyid dang / gnas pa dman pa nyid dang / ngo bo nyid dman pa nyid kyis nyam chung ba nyid du skye bar 'gyur ro/ /ngan song du skyes pa'i khyad par du 'phags pa rnam pa lnga ni sngar rigs kyi rtags su bstan pa bzhin du rig par bya'o//byang chub sems dpa'i sa'i 'grel pa las/ sems bskyed pa'i le'u'i 'grel pa rdzogs so// //de ltar sems bskyed pa'i byang chub sems dpa' rnams kyi byang chub sems dpa'i spyod pa gang zhe na zhes bya ba 'di'i 'grel pa ni mdor bstan pa'i chos bcu po de dag las chos dang po bzhi'i chos ji lta ba bzhin rnam par phye ba'i rigs dang /sems bskyed pa dang / byang chub sems dpa'i spyod pa la sbyor ba zhes bya ba de dag las gnyis bshad nas/ sems bskyed pa'i byang chub sems dpa'i spyod pa gang zhe na zhes dris pa'o//byang chub sems dpa'i spyod pa ni byang chub sems dpa'i bslab pa'o/ /de yang rnam pa gsum du rig par bya'o zhes rab tu bstan pa'i phyir/ gang la slob pa dang zhes bya ba la sogs pa la/ 'di dag gis ni bslab pa'i gnas dang bslab pa'i gzhi dang / bslab pa'i tshig la slob par byed do zhes bstan pa'i phyir ro//ji ltar slob pa dang zhes bya bas ni bslab pa'i ngo bo nyid yongs su gsal bar byed do/ /gang dag slob pa zhes bya bas ni bslab pa'i rten gang yin pa de la bslab pa zhes bya ba'i sgras bstan pa yin no/ /byang chub sems dpa'i bslab pa'i gnas thams cad bsdus nas bstan pa'i phyir smras pa/gnas bdun la slob ste zhes bya ba la/ go 'phang dang / gzhi dang / tshig ces bya ba ni rnam grangs so/ /ji ltar slob ce na/ kha na ma tho ba med pa'i thabs kyis yongs su zin pa'i lus dang ngag dang yid kyi las 'chad par 'gyur bas so//gang dag slob ce na/ ngo tsha dang bcas pa'i byang chub sems dpa' slob par 'gyur ro zhes 'chad par 'gyur ro zhes 'chad par 'gyur ro/ /gnas de dag ni don zhes kyang brjod par bya'o zhes bstan pa'i phyir/ don gyi sgo nas nges par bstan pa ni/ rtog par 'os pa zhes bya ba'i don te/ji ltar 'os par thob par bya ba mngon du thob par byas pa dang / shes par bya ba mngon du shes pa nye bar bzung nas thob par gyur pa dang / shes par gyur pa zhes bya ba'i don to/ /don rnam pa bdun gyi go rims rnam par gzhag pa ni/ byang chub sems dpa' dang por byang chub nyid la dmigs nas rang gi don la slob pa'i phyir dang /sems can la dmigs nas ni gzhan gyi don la slob par byed do zhes bya bas dang por rang dang gzhan gyi don gyi gnas bstan to/ /rang gi don dang gzhan gyi don la yang kun nas nyon mongs pa med pa nyid kyis slob par byed kyi/kun nas nyon mongs pa dang bcas pas ni ma yin te/ nyon mongs pa chen por spyod pas bdag la phan pa bya ba'ang nus ma yin zhes bstod pa'i tshig gis so/ /nyon mongs pa med pas ni de kho na nyid kyi don la slob nus so zhes bstan pa'i phyir/ de'i 'og tu de kho na'i gnas bstan to//de bzhin du rang gi don dang / gzhan gyi don la slob par byed pa na kun nas nyon mongs pa med pa'i thabs kyis slob par 'gyur ro/ /kun nas nyon mongs pa med pa yang nus pa med pa ni slob pa ma yin pas mthu'i gnas bstan te/ de bzhin du mi dal ba'i thabs kyis slob par byed do zhes bstan to//de ltar kun nas nyon mongs pa med cing mthu dang ldan par theg pa gsum la ci rigs par sems can yongs su smin par byed pa la slob pa'o/ /rang gi sangs rgyas kyi chos rnams yongs su smin par byed cing / de dag gnyi ga yongs su smin par gyur pa na bla na med pa yang dag par rdzogs pa'i byang chub la slob po zhes bya bas de'i rjes la rdzogs pa'i byang chub kyi gnas bstan te/'di dag gis ni byang chub sems dpa' rnams kyi thog ma dang bar dang / tha ma'i slob pa yongs su rdzogs pa yongs su gsal bar bstan pa yin no//de la rang dang gzhan gyi don gyis dbye na rnam pa bcur 'gyur ro zhes bstan pa'i phyir/ mdor bsdu na rnam pa bcur rig par bya ste zhes bya ba smras te/ rnam pa bcur 'gyur ro zhes bya ba'i don to/ /don bcu rnam par gzhag pa ni rgyud du gtogs pa ni gnyis so//rdzas kyi dbye ba ni gnyis so/ /gnas skabs kyi dbye ba ni gnyis so/ /skye ba'i dbye ba ni gnyis so/ /'chi 'pho ba'i dbye ba ni gnyis so/ /de la 'ba' zhig pa zhes bya ba ni ma 'dres par gyur pa ste/ gzhan dang ma 'dres pa zhes bya ba'i don to/ / gzhan gyi don dang yang ma 'brel la rang gi don dang yang ma 'brel pa ni 'ba' zhig pa zhes bya ba'o/ /gzhan dang 'brel pa ni gzhan dang rab tu 'brel pa ste/ 'dres par gyur pa'o/ /de yang rnam par gnyis te/ gzhan gyi don dang 'brel pa'i rang gi don dang / rang gi don dang 'brel pa'i gzhan gyi don to//phyi nas rang dang gzhan gyi don de dag gi bde ba'i rnam par smin pa nyid ni phan pa'i rgyu yin no/ /mthong ba'i chos nyid la rjes su sdud par byed pa'i phyir ni bde ba'o/ /rtsom pa'i dus na ni rgyus bsdus pa'o/ /yongs su rdzogs pa'i dus na ni 'bras bus bsdus pa nyid do/ /tshe 'di nyid la thob pa ni tshe 'di pa'o//gzhan dag tu thob pa ni tshe rabs gzhan pa'o/ /don dag mi nyams pa ni gtan du ba'o/ /nyams par 'gyur ba ni gtan du ba ma yin pa'o/ /de la yongs su shes par byas la spang bar bya'o zhes pa ni so sor brtags shing nges par yang dag par brtags nas yongs su btang zhing yongs su spang bar bya ba yin no//byang chub sems dpa' gzhan gcig pu'i don ni spang bar bya ba yin te/ gnyi ga'i don gtso bo yin pa'i phyir ro/ /rang gi don 'ba' zhig pa gang yin pa de ni byang chub sems dpa'i bya ba las shin tu 'das shing 'tsham pa ma yin pas yongs su shes par byas la spang bar bya'o//byang chub sems dpa' ni sems can la phan pa bskyed par bya'i/ bdag la phan pa ni ma yin te/ mthu chen po dang ldan pa'i sman bzhin no/ /de lta bas na gzhan gyi bya ba gang yin pa de nyid bdag gi bya ba yin la/gzhan gyi don gang yin pa de nyid bdag gi don yin no/ /de lta bas na/ snying rje'i bdag nyid can nyid 'gro la phan pa'i phyir/ /srid par skye ba len yang srid la chags ma yin/ /nad kun sel bar byed pa'i mthu ldan pa'i/ /'gro la phan pa'i sman rnams 'byung ba bzhin//zhes bstod pa yin no/ /de'i phyir rang gi don 'ba' zhig ni byang chub sems dpa'i don las yang dag par 'das par 'gyur ba yin no/ /de lta bas na byang chub sems dpa' de spang bar bya zhing mi bslab po/ /'tsham pa ma yin pa zhes bya ba ni/ byang chub thob pa'i yon tan med pa'i phyir te/byang chub thob pa dang 'gal ba'i phyir ro/ /gang gzhan byang chub kyi tshogs la 'jog par mi nus pa'i gzhan gyi don de yang spang bar bya ba yin te/ de la dgos pa med pa'i phyir ro/ /rang gi don 'ba' zhig pa rnam par gzhag pa ni longs spyod tshol zhing yongs su spyod pa dang /chos tshol zhing nges par 'dzin pa dang / tshul khrims dang / brtson 'grus dang / bsam gtan dang / shes rab kyi sbyor ba dang / yongs su mya ngan las 'das pa'i bla ma la mchod pa dang / 'tsho ba log pa la sbyor ba dang / rab tu byung ba'i phyogs la zang zing la spyod pa dang /khyim pa'i phyogs la gzhan gyi byed pa'i dbang du byas par rig par bya'o/ /longs spyod la chags pa dang / 'jig tshogs la chags pas bdag nyid lus tshim par bya ba'i phyir longs spyod tshol bar byed pa ste/ de longs spyod tshol ba de yang rang gi don 'ba' zhig pa nyid de/bde ba'i rjes su mthun pa'i rgyu 'ba' zhig gis bsdus pa tshe 'di pa dang / gtan du ba ma yin pa'o/ /de bzhin du yongs su btsal ba la longs spyod pa'i dus na yang de dang 'dra'o/ /byang chub sems dpa' rnams kyi longs spyod tshol ba ni khyim bdag rin po che lta bu yin te/gzhan gyi dgos pa gtsor byed pa'i phyir ro/ /longs spyod pa ni bu la nu zho ldud pa'i ma bzhin no/ /de lta bu'i chos la thal zhing 'das pas rang gi don nyid yin no/ /bdag nyid la yod pa'i mang du thos pa phun sum tshogs pa dang / shes rab phun sum tshogs pa bstan bcos su gtogs pa rnams bdag las gzhan la yod par ma gyur cig ces bsams nas ston par mi byed/'chad par mi byed de/ de'i bsam pas kyang chos btsal zhing gzung nas 'di dang gzhan du dang gtan du ma yin pa ni rang gi don 'ba' zhig pa zhes bya'o/ / mtho ris 'dod pa'i phyir zhes bya ba la/ smon lam ngan pas yongs su gzung ba'i tshul khrims dang / tshul khrims de phun sum tshogs par byed pa'i sbyor bas bsdus pa'i brtson 'grus dang / gzugs dang gzugs med par skye bar 'dod pa'i bsam gtan dang / de'i don gyi shes rab yang dag par blangs nas gnas pa'o//de yang sems can gzhan rnams rjes su gzung ba'i phyir zhugs pa ma yin pas zhes bya bas rang gi don 'ba' zhig pa'o/ /phan pa'i rjes su mthun pa dang / rgyus bsdus pa dang / 'jig rten gzhan pa dang / gtan du ba ma yin pa'o//gang yang tshul khrims yang dag par blangs pa de mi 'jigs pa'i sbyin pa'i rnam par gzhag pa yin zhing / sems can la bsam pa dge ba yin na yang / de'i sgo nas gzhan rjes su gzung ba med pa'i phyir rang gi don nyid yin no/ /'jig rten gyi zang zing zhes bya ba ni rnyed pa'o//'dod pa'i yon tan ni longs spyod do/ /ro myong ba chung la ste/ ji skad du mdo sde las/ so so'i skye bo gang chags pa'i/ /'jig rten zang zing 'jigs pa yin/ /zhes bshad pa yin no/ /de'i 'bras bu 'dod pa ni gzhan du longs spyod chen po 'dod pa zhes bya ba'i don to/ / 'jig rten gyi zang zing thob pa'i rgyur zhes bya ba ni byas pa shes pa'i yongs su mya ngan las 'das pa'i bla ma'i mchod pa bkag pa yin no/ /byas pa shes pas de bzhin gshegs pa'i mchod rten la mchod pa byed pa ma yin/ yongs su mya ngan las 'das pa'i bla ma mchod pa'i phyir ma yin gyi/'jig rten gyi zang zing 'ba' zhig gi rgyur zhes bya ba'o/ /de lta na yang bde ba'i rjes su mthun pa'i bde ba'i rgyus bsdus pa dang / 'jig rten gzhan pa dang / gtan du ba ma yin pa ni rang gi don te/ /de dag la gzhan rjes su gzung ba med pa'i phyir 'ba' zhig pa nyid yin no//rnyed pa 'dod pa zhes bya ba ni log pa'i 'tsho ba tshol zhing / rnyed pa'i rgyu dang zhes bya bas dgos pa med pa bstan pa yin no/ /rnyed pa 'grub pa zhes bya ba ni rnyed par nges pa nyid do/ /don med pa ni bre mo'i gtam gyis bsdus pa'i phyir ro/ /spro ba bskyed pa ni nyon mongs pa can gyi yid bde bas spro zhing ba spu ldang ba'o//yang dag pa ma yin pa'i yon tan sna tshogs ni sna tshogs pa'i sgo nas zhugs pa'i yon tan rjod par byed pa'i kha gsag gi gtam gyis yang dag par bsdus pa nyid de/ bde ba'i rjes su mthun pa 'di pa tsam dang gtan du ba ma yin pa'i phyir rang gi don to//de ltar gzhan dag yang dag par dga' ba skyed par byed kyang gzhan dag khyad par du 'phags pa'i dge ba'i phyogs la 'dzud par byed pa ma yin pa zhes bya bas kha gsag 'ba' zhig ces bya'o/ /de'i phyir de dag ni gzhan gyi don ltar snang ba'i rang gi don 'ba' zhig pa nyid du brjod do//bsnyen bkur bya ba bdag gir bya bar 'dod pa zhes bya ba ni de'i bsam pas las dang bya ba byed pa'i dbang du byas pa yin gyi gzhan du ma yin pa'o/ /las kyi ched du rab tu 'byin par byed/ bsnyen par rdzogs par byed gnas sbyin par byed kyang yang de ni rigs pa ma yin pa'i chos kyi tshogs sdud par byed pa yin te/las kyi don du slob ma'ang 'dzin par byed ces bya ba'i tshig gis so/ /de yang bde ba'i rjes su mthun pa yin na yang 'di pa nyid dang / gtan du ba ma yin pa nyid yin pas bdag gi don 'ba' zhig pa nyid yin no//de lta bur yongs su gzung ba'i tshogs de dag la yang rang la phan pa ni med pa nyid do/ /gzhan gyi stobs kyis bran du byas pa'i sems can rnams bdag gi mthus de dag bran las thar bar byas nas bdag nyid kyi bran gyi dngos por byas nas 'khol bar byed na/ de yang rang gi don 'ba' zhig pa'o//de bzhin du sems can bcing bas bcings pa rnams bdag gi don bsgrub par bya ba'i ched du bcings pa las thar bar byed pa dang / chad pa la sogs pa'i 'jigs pas skrag pa rnams zhes bya ba la sogs pa la/ sogs pa'i sgras 'tsho ba med pa'i 'jigs pas skrag pa rnams rang gi chad pa la sogs pa las bya ba'i phyir thar bar byed pa ste/'di dag thams cad kyang rang gi don 'ba' zhig pa ste/ de dag la phan pa dang / yongs su gzung ba med pa'i phyir ro/ /de'i rgyu zhes bya ba la sogs pa'i don yang ji ltar rigs pas rig par bya'o/ / sngar ni skye ba thob pa'i rgyu'i bsam gtan bstan nas/ de ni gnas pa'i rgyu'i bsam gtan snyoms par 'jug pa'i sbyor ba bstan te/ de dag la ni thams cad du sems can gyi don med pas rang gi don 'ba' zhig pa'o/ /sems can gzhan dag la sbyin pas nye bar longs spyod pa 'di pas bsdus pa gzhan dag gi don du ji lta ba de lta bur byin pas gnyi ga'i don du 'gyur ro//nus bzhin du gzhan gnod pa byed pa la lan ma byas pas gnyis ka'i don du 'gyur ro/ /de dag las ma gtogs pa'i zhes bya ba ni gzhan gyi don du longs spyod tshol ba la sogs pa thams cad ji ltar rigs par rig par bya'o//gzhan gyi don 'ba' zhig pa ni rnam pa drug tu rnam par gzhag par rig par bya'o/ /lta ba phyin ci log gis sbyin pa las byung ba'i bsod nams bya ba'i dngos po la sbyor ba dang / tshul khrims nyams kyang sgrub par byed pa'i skal ba dang ldan pa rnams la gzhan la chos bstan ba'i sbyor ba dang /shin tu 'dod chags dang bral ba las der gtogs pa'i dge ba'i chos nye bar sgrub pa'i sbyor ba dang / bsam gtan las ldog par nus bzhin du bsam gtan la mngon par dga' ba'i sbyor ba dang / dbang thob par gyur pas sprul pa rnam pa sna tshogs pa'i sems can gyi don la sbyor ba dang /de bzhin gshegs pa'i mdzad pa rdzogs par gyur kyang sems can gyi don la sbyor ba'o/ /'dir 'ba' zhig pa zhes bya ba'i sgra ni don gyi gtso bo'i tshig go/ /lta ba log par zhugs pa dang zhes bya ba la sogs pa'i tshig gsum ni phyi ma phyi mas bshad pa yin te/rgyu dang 'bras bu la skur pa 'debs pa'i lta ba ni lta ba log par zhugs par 'gyur ro/ /des de'i gnyen po'i phyogs 'jig rten pa'i yang dag pa'i lta ba nyams par byas pa zhes bya ba'i don to/ /des sbyin pa btang ba'i 'bras bu 'byung bar ma mthong ba ni 'ong ba ma mthong ba'o/ / 'bras bu yod pa ma yin no zhes nges par byed pa ni 'bras bu ma mthong ba'o/ /rnam grangs gzhan yang lta ba log pa zhes bya ba ni mdor bstan pa'i tshig ste/ sbyin pa dang de'i 'bras bu la gzhan gyi stobs kyis mngon par yid ches pa'i dad pa med pa'i sbyor bas so/ /dad pa'i mi mthun pa'i phyogs ma dad pa nye ba'i nyon mongs pa rgyas par gyur pas 'ong ba ma mthong ba'o//rang gi stobs kyis sbyin pa'i 'bras bu ni med do zhes yang dag pa'i lta ba'i mi mthun pa'i phyogs su gyur pa log par lta ba ni 'bras bu ma mthong ba'o/ /yang rnam grangs gzhan ni skye ba mang po'i 'og tu sbyin pa las byung ba'i bsod nams bya ba'i dngos po'i 'bras bu myong bar bya ba yin no zhes bya ba'i 'bras bu mi 'dod pa ni lta ba log pa'o//'di nas 'chi 'phos ma thag pa'i skye bar nges par myong ba ma yin na skye ba mang pos chod pa'i 'bras bus ci zhig bya zhes zer ba ni 'ong ba ma mthong ba dang / 'bras bu ma mthong ba'o/ /de lta bu'i lta bas sbyin pa byin pa ni rang gi rgyud la 'bras bu ci yang med pa nyid do//sbyin pa de byin pa ni len pa po dang / rjes su mthun pa'i dngos po nyid yin pas gzhan gyi don 'ba' zhig pa nyid yin no/ /tshul khrims nyams pa zhes bya ba ni tshul khrims las ldog par gyur pa ste/ gang tshul khrims ngan par gyur pa zhes bya ba'i don to//sgrub pa med pa zhes bya ba ni nan tan byed par mi nus pa ste/ sgrub pa'i snod du ma gyur pa zhes bya ba'i don to/ /yang de dag gzhan ngan par spyod pa las bzlog pa'i phyir gzhan dag la chos ston par byed do/ /des gzhan dag la chos ston pas nyes par spyod pa'i gnas nas bslangs nas legs par spyod pa'i gnas la 'god par byed de zhes bya ba ni gzhan gyi don to//mthong ba'i chos 'di nyid la ston par byed pa'i tshe tshul khrims rnam par dag pa dang / ma 'ongs pa na shes rab rgyas par bya ba'i rgyu yang med pa ste/ rang gi rgyud nyams par byas pa'i phyir 'ba' zhig pa'o//sa 'og ma las yang dag par 'das pa zhes bya ba ni 'dod pa'i khams kyi 'dod chags dang bral bas dgra bcom pa'am/ phyir mi 'ong ba la gnas nas mthong ba'i chos la myong bar 'gyur ba'i las dang 'bras bu'i dbang du byas nas sbyin pa la sogs pa'i bya ba la sbyor ba ni gzhan gyi don 'ba' zhig pa ste/de ni rnam par smin pa'i sa las shin tu 'das pa'i phyir dang / gzhan dag rjes su gzung ba ni de la yod pa'i phyir ro/ /bsam gtan la dbang thob pa'i sbyor bas bsam gtan bsgyur ba la mkhas par 'gyur te/ las dang / nyon mongs pa dang / skye ba la dbang thob pa'i sbyor bas so/ /gzhan gyi don du bsam gtan bsgrubs nas de dag tu snyoms par 'jug pa dang / skye bas thob par bsgyur te/ de las nyams pa yang med bzhin du de'i dbang gis skye ba mi len gyi/ gzhan gyi don mang du bya ba gtsor gyur par mthong ba'i 'dod pa'i khams gang du 'dod pa der skye bar 'gyur ro//bsam gtan de la rang gi rgyud la rnam par smin pa'i 'bras bu med pa nyid dang / mthong ba'i chos la bde bar gnas pa med pa'i phyir dang / gzhan dag la nye bar phan 'dogs par byed pa yin pa'i phyir/ gzhan gyi don 'ba' zhig pa yin no/ / sa brgyad pa nas nyes bar bzung nas dbang thob pas dbang bcu'i sbyor bas mthu chen po thob pa'i byang chub sems dpa' rnams sangs rgyas kyis stong pa'i 'jig rten gyi khams rnams su sems can rnams kyi don du dga' ldan na bzhugs pa nas brtsams nas ji srid mya ngan las 'das pa chen po'i bar gyi mdzad pa ston par mdzad do//de lta na yang de nyid kyi don yod pa ma yin pas gzhan gyi don 'ba' zhig pa'o/ /rang gi don mdzad zin pa zhes bya ba ni rang gi mdzad pa rnams mdzad pas yongs su rdzogs par gyur pa'i de bzhin gshegs pa rnams stobs la sogs pa sangs rgyas kyi chos ma 'dres pa rnams la brten nas sems can gyi don mdzad pa rnam pa sna tshogs la 'jug par 'gyur ro zhes bya bar stobs dang mi 'jigs pa la sogs pa zhes bya ba la sogs pa la/de dag gi mdzad pa ni de dag nyid ci dgos pa ci yang yod pa ma yin pas gzhan gyi don 'ba' zhig pa'o//ji skad bstan pa'i snga ma gnyis ni zhes bya ba ni lta ba nyams pa ni gzhan gyi don sbyin pa'i sgo nas so/ /tshul khrims nyams pa ni ston pa'i sgo nas te/ yongs su shes par byas la gcig tu spang bar bya ba kho na'o/ /byang chub sems dpa' la lta ba nyams pas sbyin pa gtong ba dang /tshul khrims nyams pas gzhan tshul khrims pa 'god pa med de/ byang chub sems dpa'i chos las yang dag par 'das pa'i phyir ro/ /de ma yin pa zhes bya ba ni bsam gtan bsgyur ba la sogs pa ste/ gang gi phyir bsam gtan bsgyur bar byas nas gzhan gyi don yin pa des na bya ba kho na ste/rang gi rgyud kyi sangs rgyas kyi chos yongs su smin pa'i rgyur gyur pa nyid dang / sems can yongs su smin pa'i rgyur gyur pa'i phyir ro/ /sprul pa'i sems can rnams kyi don gyi bya ba la bslab par bya'o/ /khyad par du yang sems can rnams smin cing dgrol ba'i bya ba la bslab par bya'o//de dag las bzlog pa zhes bya ba ni lta ba phun sum tshogs pas sbyin pa gtong ba dang / tshul khrims phun sum tshogs pas chos ston pa'o/ /bdag dang gzhan gyi don phan pa'i rgyu rnam pa lnga ni mdor bsdu na gsum du rnam par gzhag par bya ste/rdzas kyis dang / dus kyis dang / khyad par gyis so/ /rdzas kyis ni gnyis te/ nyes par spyod pa las bslangs nas legs par spyod pa la 'god cing sbyor bar byed pa dang / mthong ba'i chos nyid la kha na ma tho ba med pa rjes su mthun pa'i rdzas su mthun pa'i rdzas nye bar sgrub par byed pa nyid do/ / dus kyang gnyis te/ khyad par can dang / cig shos nyid do/ /rnam grangs gzhan yang ngo bo nyid dang / thog ma dang / bar ma dang / tha ma'o/ /ngo bo nyid kyang gnyis te/ kha na ma tho ba med pa'i mtshan nyid can dang / rjes su 'dzin pa'i mtshan nyid do/ /thog ma ni tshe 'di pa'o/ /bar ma ni tshe rabs gzhan pa'o//tha ma ni nye bar zhi bar byed pa'o/ /de la chung ngu ni shes pa'i rdzas sam/ bsod nams bya ba'i dngos po'i rdzas sam/ khams sam rnam par smin par rig par bya'o/ /de dag las bzlog pas ni dge ba stsogs pa che bar rig par bya'o/ /dge ba ma thob pa rnams dang por bskyed pas thob pa ni dge ba yongs su gzung pa'o//thob pa rnams yang dang yang mngon du bsgom par sbyor ba ni dge ba stsogs pa'o/ /gzhan yang zhes bya ba ni gang bdag gis byas pa'i dge ba de la nges par gzhan dag yang dag par sbyor bar byed pa yin no//gzhan du na bdag nyid 'gyod pa'i rgyur 'gyur gyi/ dga' ba'i rgyur mi 'gyur ro/ /de'i phyir/ gzhan la yod pa'i yon tan gyis/ /yon tan med rnams gdung bar 'gyur/ /khyod ni nyid kyi yon tan rnams/ /gzhan la med pas de bzhin 'gyur/ /zhes bstod pa yin no//'dzin du 'jug pa ni 'di ltar gyis shig ces yang dag par sbyor ba ste/ yang dag par 'dzin du 'jug pa nyid yang dag par sbyor ba yin no/ /'dul bar byed ces bya ba ni dbang du gyur pa bsgrub pa'am/ bar chad sel bar byed pa'o/ /'dzud par byed ces bya ba ni bsgrub pa la 'god pa'o//'jog par byed ces bya ba ni mi g.yo par gyur pa dang / gzhan gyis bsgyur du mi nus pa'i phyir te/ kha na ma tho ba med pa'i mtshan nyid yin pa'i phyir dang / yongs su gyur pa'i dus su bde ba'i phyir te/ mthar thug pa'i dus su rjes su mthun pa'i phyir ro zhes bya bar dgongs pa'o//gang bdag nyid nyon mongs pa can ma yin pa'i bde ba nye bar sgrub par byed pa dang / nges par gzhan dag la yang dag par bsgrub par bya'o/ /gzhan du na 'dod pa'i bde ba la spyod pa nyid dang 'dra bar 'gyur ro/ /yo byad kyi bde ba zhes bya ba ni 'dod pa na kun du spyod pa'i rnam pa sna tshogs pa'i sgo nas bde ba rgya chen po nges par 'byung ba'o//bsam gtan la gnas pa'i bde ba zhes bya ba ni chen por gyur pa dang tshad med pa'o/ /phan 'dogs pa'i mtshan nyid ces bya ba ni/ de ma thag tu lus dang sems kyi bde bskyed par byed pas rjes su 'dzin par byed pa ste/nyon mongs pa can spangs pa'i phyir dang / phan 'dogs pas phye ba'i phyir phan pa'i rgyus bsdus pa zhes bya'o/ /bdag dang gzhan gyi don tshe 'di pa dang / tshe gzhan la 'chol pa'i sbyor bas bstan pa'i phyir/ bdag dang gzhan gyi don tshe 'di la phan la zhes bya ba la sogs pa smras te/tshe 'di la phan pa ni dang po rtsom pa'i dus na 'jig rten 'di'i bde ba dang / yid bde ba'i rgyu nyid yin gyi/ tshe gzhan ni ma yin pa ste/ mi 'dod pa'i 'bras bu 'byin pa'i phyir mi phan pa'i rang bzhin no zhes bya ba'o/ /tsha gzhan la phan pa la 'jig rten 'dir de lta ma yin pa ni gzhan du 'dod pa'i rnam par smin pa thob par bya ba'i dus na sdug bsngal dang yid mi bde pa'i rgyu nyid kyi phyir ro//gsum pa ni gnyis ka la phan pa ste/ bde ba dang yid bde ba'i rgyu nyid yin pa'i phyir dang / 'dod pa'i rnam par smin pa nyid kyi phyir ro//gnyis ka la phan pa ma yin pa ni smras ma thag pa gnyis las bzlog pa'o/ /chos yang dag par blangs pa bzhi po dag tu go rims bzhin zhes bya ba ni yang dag par blangs pa bzhi'i sgo nas ji skad bstan pa'i bdag dang gzhan gyi don rnam pa bzhi go rims bzhin rig par bya'o//dge ba'i chos 'phel bar bya ba'i phyir dang / ma 'ongs pa na 'dod pa'i rnam par smin pa thob par bya ba'i phyir dang / rtag tu bya ba dang 'brel par zhugs pa nyid ni chos yang dag par blangs pa zhes bya ste/ legs par spyad pa yin no/ /sngon mi dge ba'i chos kyi sbyor ba la goms par byas pa las dan ltar nyes par spyod pa la bde ba dang yid bde bas 'jug par 'gyur ba ni dang po'o//nyon mongs pa mang ba dang / sbyor ba goms par ma byas pas sdug bsngal dang yid mi bde ba dang bcas pa yin na yang rten gzhan gyi stobs kyis tshul khrims la sogs pa legs par spyod pa la 'jug pa ni gnyis pa'o//nyon mongs pa chung ba nyid dang / sngon sbyor ba goms par byas pa'i phyir dge ba'i phyogs la bde ba dang / yid bde ba dang bcas pas 'jug pa ni gsum pa'o/ /mi 'dod bzhin du gzhan gyi stobs kyis byed bcug pa'am/ sdug bsngal dang yid mi bde bas nyes par spyod pa la 'jug par gyur pa ni bzhi pa'i//de dag las nag po'i phyogs gnyis ni spang bar bya ba'o/ /dkar po'i phyogs gnyis ni ni nges par bsten par bya ba'o/ /dkar po'i phyogs kyi sgo nas bdag dang gzhan gyi don tshe 'di pa dang tshe gzhan par rig par bya'i nag po'i phyogs kyi sgo nas ni ma yin no//de la mya ngan las 'das pa ni skye ba la sogs pa'i sdug bsngal rgyu dang bcas par nye bar zhi bar byed pa'i rang bzhin yin pas zhi bar byed pa'o/ /de nyid ni bdag dang gzhan gyi don te/ don zhes bya ba'i sgra ni dgos pa zhes bya ba'i tshig yin pa'i phyir ro//'khor ba dang 'ga' ba'i dkar po'i chos 'jig rten pa dang las 'das pa ji ltar rigs pa'i dge sbyong gi 'bras bu rnam pa bzhi 'thob pa la rjes su mthun pa'i phyir dang / nye bar zhi bar byed pa la dgos pa'i phyir bzhi bar byed pa ste/ bdag dang gzhan gyi don yin no//mdor bsdu na bde ba'i rnam pa bzhi dang / rnam par gzhag pa rnam pa ltar rig par bya ste/ rgyu bde ba dang / ngo bo nyid kyi bde ba dang / sdug bsngal gyi gnyen po'i bde ba dang / don dam pa'o/ /gsum ni re re la re re go rims bzhin no/ /don dam pa'i bde ba ni gnyis te/de'i dus pa dang / gtan du ba'o/ /rgyu nyid bde ba ni rgyu bde ba'o/ /gzhan dag kyang de bzhin no/ /bde ba 'byung ba'i rgyu rnam pa gnyis kyi dbang du byas nas so so'am bsdus nas bde ba'i rgyur rnam par gzhag go/ /yul las skyes pa bdag po dang / dmigs pa'i rkyen gyis bsdus pa dbang po dang yul gyi lhan cig byed pa can ni bde ba'i rgyu yin pa'i phyir/ bde ba zhes brjod do/ /de dag rgyu gsum gyis bde bar rnam par gzhag par byas te/ mngon par 'dod pa nyid yin pa dang / bde ba'i rgyu yin pa'i phyir dang / 'dod pa'i rnam par smin pas bsdus pa'i phyir/gsum po 'di dag dang ji ltar rigs par sbyar bar bya'o/ /yang rgyu rnam pa gnyis su 'gyur te/ lhan cig 'byung ba'i rgyu dang / mtshungs par ldan pa'i rgyu zhes bya'o/ /ma 'ongs pa'i 'dod pa'i tshor ba myong ba'i rgyu yang khams gsum du yang rnam par smin pa dang bcas pa'i dge ba'i las sam/mthong ba'i chos kyi dbye ba ni bde ba'i rgyu zhes brjod do/ /bde ba'i rgyu ni bzhi po 'di dag yin gyi/ 'di dag las gzhan bde ba'i rgyu ni med do zhes bya bar bstan pa'i phyir/ 'di las gong na yang med do zhes bya ba la sogs pa smras so//de la bde ba ni yong su rdzogs pa'i bde ba dang / yongs su ma rdzogs pa'i bde ba'o/ /de la yongs su rdzogs pa ni sdug bsngal bsal bar bya ba la ltos pa med par bde ba'i rgyu dag las skyes par gyur pa gang yin pa de ni tshor ba bde ba'o zhes bstan pa'i phyir/ sdug bsngal rab tu zhi ba la mi ltos par zhes bya ba smras te/ sdug bsngal bsal ba las byung ba ma yin pa'o zhes bstan par 'gyur ro/ /gsum po de dag nyid las zhes bya ba ni dbang po dang / yul dang reg pa las bsdus pa'i bde ba'i rgyu zhes bya ba'i don to/ /lus dang sems rjes su 'dzin par byed pa ste/bde ba'i rang bzhin yin pa'i phyir ro/ /yang tshor ba bde ba de ni rnam pa gnyis su rnam par gzhag pa'i dbang du byas nas smras pa/ de yang mdor bsdu na rnam pa gnyis te zhes bya ba la sogs pa la/ zag pa med pa yang slob pa dang / mi slob pa'i lam gyis bsdus pa'i dbye bas rnam pa gnyis so//zag pa bcas pa yang khams gsum pa'i khams dang skye mched dang yang dag par dan pa'o/ /de'i phyir smras pa/ de yang ci rigs par khams gsum pa thams cad kyi skye mched drug gi bye brag las mig gi 'dus te reg pa las byung ba de nas zhes bya ba la sogs pa la/de la ci rigs pa'i don ni 'di yin te/ 'dod pa dang rab tu ldan pa'i rnam pa drug ni lus dang yang dag par ldan pa'i rnam par shes pa drug go/ /gzugs kyi khams dang yang dag par ldan pa ni rnam par shes pa bzhi dang yang dag par ldan pa'i rnam pa bzhi ste/de dag ni sna dang lce'i rnam par shes pa med pas so/ /gzugs med pa dang yang dag par ldan pa ni rnam pa gcig nyid do/ yid kyi 'dus te reg pa las skyes pa ste/ de na rnam par shes pa'i tshogs lnga med pa'i phyir ro/ /de ltar rnam pa drug go/ /yang rnam pa drug po de dag kyang rnam pa gnyis su 'gyur te/lus kyi dang / sems kyi'o/ /de lus kyi ni rnam pa lnga'o/ /sems kyi ni drug pa'o/ /de'i phyir smras pa/ rnam par shes pa'i tshogs lnga dang mtshungs par ldan pa ni lus kyi'o/ /yid kyi rnam par shes pa dang mtshungs par ldan pa ni yid kyi'o zhes bya ba la rnam par shes pa lnga dang yang dag par ldan pa'i tshor ba ni rdul phra rab bsags pa'i dbang po la brten pa'i phyir lus kyi'o//yid kyi rnam par shes pa la yang dag par brten pa ni sems tsam la brten pa'i phyir sems las byung ba'o/ /dus mi mnyam par gyur pa la sogs pa las byung ba'i sdug bsngal gyi gnyen pos zhi bar byas te/log pa tsam de nyid la sdug bsngal gyi gnyen po'i phyogs bde bar rnam par 'jog par byed do/ /tshor ba bde ba de yang yod cing tshor ba'i rgyu yang yod na sdug bsngal la gnas pas yang dag par bsdus pa'i tshor ba ldog par 'gyur bas tshor ba rgyun chad pa ni bde ba'o zhes bstan pa'i phyir smras pa dang /'du shes dang tshor ba 'gog pa la snyoms par 'jug pa zhes bya ba'o/ /gnod pa dang bcas pa'i sdug bsngal las thar pa ni gnod pa med pa'i bde ba'o/ /gnod pa dang bcas pa'i sdug bsngal ni rnam pa bzhi ste/khyim pa rnams kyis btsal ba dang / bsrung ba la sogs pas brel ba'i sdug bsngal dang / 'dod pa la mi mkhas pa'i sdug bsngal dang / rnam par rtog pa dang rnam par dpyod pas kun du dkrugs pa'i sdug bsngal dang / sgrib pa la kun du rmongs pa'i sdug bsngal lo//de dag las nges par thar pa'i rnam pa bzhi ni gnod pa med pa'i bde ba zhes bya ba'o/ /yang dag par dad pas zhes bya ba ni bdag dul bar bya ba'i phyir dang zhes bya ba nas bdag nyid yongs su mya ngan las 'da' bar bya ba'i don gyi bar gyi phyir rab tu byung ba ni mngon par 'byung ba'i bde ba'o zhes bstan pa'i phyir/khyim so'i sdug bsngal rnam pa sna tshogs las nges par thar pa zhes bya ba ste/ khyim so'i bya ba sna tshogs kyis sdug bsngal ba ni nor med pa rnams ni tshol ba'i sgo nas sdug bsngal lo/ /nor dang bcas pa rnams ni bsrung ba'i sgo nas sdug bsngal lo/ /de dag las nges par grol ba ni de dag gi gnyen po'i phyogs mngon par 'byung ba'i bde bar rnam par gzhag ste/khyim so las nges par 'byung ba ni gzhan la nges par yod pa ma yin pas de'i phyir mngon par 'byung ba'i bde ba zhes bya'o/ /gnyen po'i phyogs mngon sum du byas pas 'dod pa rnams dang sdig pa ming dge ba'i chos rnams spong bas na bde ba ste/bsam gtan dang po'i sa pa'i bde ba ni rab tu dben pa'i bde zhes bya ba'o/ /rtog pa med cing dpyod pa med pa'i rnam par rtog pa dang rnam par dpyod pa nye bar zhi nas ngang gis 'jug pa ni nye bar zhi ba'i bde bar rnam par gzhag par bya'o//khams gsum pa'i nyon mongs pa'i gnyen po'i phyogs mngon du gyur pas zag pa thams cad bral bar gyur pa'i sbyor bas shes bya'i dngos po yang dag pa ji lta ba bzhin du bde ba gang yin pa de ni mngon par rdzogs par byang chub pa'i bde ba zhes bya ste/spangs pa dang ye shes ni mngon par rdzogs par byang chub pa'o/ /de dag gnyi ga yang bde ba zhes brjod de/ sdug bsngal las nges par grol ba'i phyir ro/ /bde ba rnam pa lnga rnam pa gzhag pa'i phyir smras pa/ de la rgyu bde ba ni zhes bya ba la sogs pa la/tshor ba'i rgyur gyur pa bzhi po yang bde ba'i rgyu yin pa'i phyir bde ba nyid du rnam par gzhag gi /de dag gi ngo bo nyid kyis ni ma yin te/ ji ltar mi bde zhes bya ba dang / sangs rgyas 'byung ba bde ba ste/ /zhes bya ba lta bu'o/ /tshor ba bde ba ni nyams su myong ba'i mtshan nyid yin pa'i phyir/ngo bo nyid kyis bde ba zhes brjod de/ rgyu las byung ba ma yin pa'i phyir ro/ /rgyu'i dngos pos kyang ma yin la zhes bya ba ni/ bde ba de la rgyu yod pa ma yin gyi sdug bsngal dang bral bar gyur pa tsam yin pas de'i phyir bde ba de la rgyu yod pa ma yin la/ ngo bo nyid kyis kyang ma yin te/ tshor ba'i ngo bo nyid ma yin pa'i phyir ro/ /'on kyang sdug bsngal rgyun chad pa'i ngo bo tsam la bde ba zhes nye bar gdags so/ /de'i phyir/ sdug bsngal zhi bar gyur pa zhes bya ba la/ sdug bsngal zhi bar gyur pa'i don yang sdug bsngal bas zhes bya ba'o/ / yang na thams cad kyi thams cad du spangs pa yin pas zi bar gyur pa yin la/ chung bar gyur pa ni bsal ba'o/ /tshor ba rgyun chad pa'i bde ba ni sngar bstan ma thag pa'i bde ba rnam pa gsum po lta bu ni ma yin te/ 'on kyang sdug bsngal dang bde ba tshor ba yang dag par na sdug bsngal zhes brjod de/'du byed kyi sdug bsngal nyid yin pa'i phyir ro/ /de dag las rnam par grol ba'i ngo bo nyid ni dus re zhig pa'i sbyor bas don dam pa'i bde ba zhes bya'o/ /de'i phyir/ tshor ba gang ci yang rung ba zhes bya ba la sogs pa smras te/ gang ci yang rung ba zhes bya bas ni tshor ba rnam pa gsum bstan to//de las sdug bsngal gyi tshor ba ni ngo bo nyid kyis mi mthun pa'i phyogs su gyur pa'i phyir dang / sdug bsngal gyi sdug bsngal nyid yin pa'i phyir dang / bde ba'i tshor ba yang yongs su 'gyur ba'i sdug bsngal nyid kyis sdug bsngal ba yin te/ gzhan du 'gyur ba'i sbyor bas so//sdug bsngal yang ma yin bde ba yang ma yin pa ni sbyor ba med pa'i bde ba la sbyor bas 'du byed kyi sdug bsngal nyid yin pa'i phyir sdug bsngal lo/ /de bzhin du tshor ba thams cad sdug bsngal zhes brjod do/ /tha ma rdzogs par byang chub pa'i bde ba ni don dam pa ste/sdug bsngal las gtan du nges par grol bas bde ba ma lus pa'i mthar thug pa'o/ /phung po'i lhag ma dang bcas pa'i dbang du byas nas/ nyon mongs pa'i phyogs thams cad kyi zhes bya ba la sogs pa la/ nyon mongs pa'i phyogs ni khams gsum gyi nyon mongs pa'o/ gnas ngan len zhes bya ba ni nyon mongs pa'i sa bon no/ /rten la yod pa zhes bya ba ni rnam par shes pa la yang dag par gnas pa'o/ /gtan med par gyur pa zhes bya ba ni gtan tu kun nas bcom pa ste/ gang la rnam par grol ba'i bde ba zhes bya ba'o/ /'di las gzhan pa gsum ni rdzogs par byang chub pa'i bde ba la rjes su mthun pa yin pa'i phyir gnod pa med pa'i bde ba zhes de'i ming gis brjod do//de dang mthun pa nyid bstan pa'i phyir tshig phyi ma dag bstan pa yin no/ /gnod pa med pa'i bde ba'i rgyu yin pa'i phyir/ gnod pa med pa'i bde ba zhes bstan to/ /de bzhin du rgyu nyid dang /ngo bo nyid dang / sdug bsngal rgyun chad pa nyid dang / don dam pa nyid kyis bde ba rnam pa lnga'i rnam par dbye ba bstan par 'gyur ro/ /sngar bstan pa'i tshe gzhan pa'i dbye bas bdag dang gzhan gyi don chos yang dag par blangs pa bzhi yang bstan pa yin no//de la nag po'i phyogs rnams kyis bsdus pas ni sems can rnams nye bar bsdu bar mi bya la/ bdag nyid kyang yang dag par sbyar bar mi bya'o zhes bstan pa'i phyir smras pa/ de la byang chub sems dpa' zhes bya ba la sogs pa la/ phan pa'i phyogs zhes bya ba ni phyi ma'i rnam par smin pa bde ba'o//gnod pa'i phyogs ni ma yin no zhes bya ba ni ma 'ongs pa'i rnam par smin pa sdug bsngal bar 'gyur ba'o/ /rgyu gcig tu nyon mongs pa can nyid du gyur pas kha na ma tho ba dang bcas pa'i phyir/ de'i 'bras bu yang mi 'dod pa nyid du gyur pas de ni gzhan yang bsgrub par mi bya la/mi phan pa'i phyogs kyi bde ba la 'jug par gyur na yang sems can 'di dag 'jig rten 'di dang 'jig rten pha rol gyi don la zhugs pa ma yin gyi don med pa la zhugs pa yin no zhes shes rab kyis rnam par byas la/ de las sems can rnams bzlog par bya ste/bsngags pa ma yin pa brjod pa nyid dang / nyes dmigs ston pa nyid kyis de las bzlog pa'i sbyor bas nus pa yod na 'bad par bya'o/ /chos yang dag par blangs pa gnyis pa gang yin pa de la ni phan pa yin na ni mi 'dod cing / re zhig pa'i sdug bsngal dang yid mi bde ba skyer zin kyang /thabs gang yang rung bas stobs ji lta ba bzhin du sems can rnams kyis bsgrub par bya'o zhes bstan pa'i phyir smras pa/ thams mkhas pa la brten nas zhes bya ba la/ de la blangs pa dang po bsdus pa'i mi phan pa las sems can rnams bzlog pa na dus re zhig sdug bsngal dang /yid mi bde par skyer zin kyang de ni nye bar bslab par bya'o/ /gal te byang chub sems dpa' rnams ni bde ba sbyin par 'dod pa yin na/ ci'i phyir da ltar gyi bde ba bsal nas sdug bsngal la sbyor bar 'dod ce na/ smras pa/ sdug bsngal dang bcas pa'i bde ba bsgrub pa gang yin pa de dang zhes bya ba la sogs pa la/gang sdug bsngal dang bcas pas phan pa bsgrub pa dang / bde ba dang bcas pas mi phan pa las bzlog pa de gnyis ka yang ma 'ongs pa'i dus ring po'i bde ba sgrub par bya ba yin no/ /de'i phyir 'di dag kyang bde ba sgrub pa yin par rig par bya'o//sems can rnams la phan par 'dod pa gang yin pa de ni don gyis na bde ba 'dod pa yin par shes par bya'o zhes bya ba ste/ phan pa ni bde ba dang 'brel pa yin te/ yongs su gyur pa'i dus su bde ba mi 'dor ba yin no/ /de lta bu'i bsam pa nyid kyis sbyor ba'i dbang du byas nas smras pa/phan pa sbyin pa gang yin pa zhes bya ba la sogs pa la rgyu dang yang dag par 'brel pa'i 'bras bu bstan pa'i phyir/ 'di ltar phan pa ni rgyu lta bu yin la zhes bya ba la sogs pa la phan pa ni rgyu yin la/ ma 'ongs pa'i bde ba ni 'bras bu yin no//de lta bas na gang 'ga' zhig phan pa la rjes su zhugs pa de ni 'bras bu gyur pa'i bde ba la rjes su zhugs pa yin par rig par bya'o/ /mthong ba'i chos dang de las gzhan pa'i zhes bya ba ni mthong ba'i chos kyi 'bras bu dang / ma 'ongs pa'i 'bras bu bstan pa yin no//bzhi po 'di dag ni gcig tu bsgrub par bya ba ste/ tshe 'di 'am/ tshe rabs gzhan du gtan du pa dang / re zhig pa'i las la sogs pa gnod pa med pa rnams dpyad mi dgos par nges par bsgrub par bya ba ste/ brtag mi dgos par zhes bya ba'i don to/ /rgyu bstan par bya ba'i phyir/ phan 'dogs pa dang zhes bya ba la sogs pa la/ phan 'dogs pa'i phyir kha na ma tho ba med pa nyid do zhes bya ba'i don to/ /dbang po dang yul gyis bsdus pa'i kun nas nyon mongs par 'gyur ba ste/ nyon mongs pa'i rten dang dmigs pa yin pa'i phyir ro/ /reg pas bsdus pa ni nyon mongs pa can te/nyon mongs pa dang mtshungs par ldan pa'i phyir ro/ /tshor ba bde ba ni kha na ma tho ba dang bcas pa yin te/ nyon mongs pa'i phyir dang / kun nas nyon mongs pa'i rten gyi ngo bo yin pa'i phyir ro/ /mi phan pa ni bde ba dang 'gal ba'i phyir ro/ /mi 'phrod pa ni sdug bsngal dang rjes su 'brel ba'o//yang na mi phan pa'i don bstan pa ni/ mi 'phrod pa ste/ yongs su gyur nas sdug bsngal ba'i phyir mi 'phrod pa'i sman bzhin no/ /de dag ni bsgrub par mi bya ste/ kha na ma tho ba dang bcas pa la sogs pa yin pa'i phyir ro//de dag las bzlog pa kun nas nyon mongs par mi 'gyur ba dang / nyon mongs pa can ma yin pa ni bsgrub par bya ste/ kha na ma tho ba med pa la sogs pa'i phyir ro/ /ci nus kyis zhes bya ba ni bdag nyid kyi nus pa dang rjes su mthun par ro/ /ci lcogs pa bzhin du zhes bya ba ni sems can dang rjes su mthun par ro//bdag nyid kyis kyang zhes bya ba ni kun nas nyon mongs pa gang yin pa dang / nyon mongs pa can gang yin pa de la yang dag par spyod par mi byed slob par mi byed/ nyams su myong bar mi byed kyi/ de dag las bzlog pa la ni yang dag par spyad pa nas nyams su myong ba'i bar du byed do//de la yul dang / dbang po dang / reg pas bsdus pa 'dod pa'i rnam par smin pa 'byung ba'i chos rgyu bde ba la ni yang dag par spyad par bya'o/ /sdug bsngal gyi gnyen po'i bde ba dang / tshor ba rgyun chad pa'i bde ba dang / kha na ma tho ba med pa'i bde ba ste/de dag la ni bslab par bya'o/ /tshor ba bde ba gang kha na ma tho ba med pa de ni nyams su myong bar bya'o zhes bya ba ni 'di dag gi dbye ba'o/ /rgyu yang rnam pa gsum yod la zhes bya ba ni rgyu'i nges pa las 'bras bu'i nges par rig par bya'o/ /bsod nams kyi rnam par smin pa la gnas pa'i byang chub sems dpa'i tshogs nye bar sogs par 'gyur ro zhes bya bar sngon du rnam par smin pa'i rgyu bstan to//rnam par smin par byed pa'i rgyu ni rnam par smin pa'i rgyu zhes bya'o/ /tshogs kyang rnam pa gnyis te/ bsod nams dang / ye shes kyi tshogs so/ /de'i phyir 'dir gnyis ka'i rgyu bstan pa ni/bsod nams kyi rgyu dang / ye shes kyi rgyu zhes bya ba ste/ bsod nams kyi rgyu dang / ye shes kyi rgyu zhes bsdu bar bya'o/ /byed pa po gang rnam par smin pa la gnas pa dang / rnam par smin pa gang la gnas par 'gyur ba de ni rnam par smin pa'i 'bras bu'o/ / gang bsod nams dang ldan par gyur pa de ni bsod nams kyi 'bras bu'o/ /ye shes kyi bya ba ni ye shes kyi 'bras bu'o/ /de la rnam par smin pa gang zhe na zhes bya ba ni ji ltar mdor bstan pa de bzhin du bshad par bya ba yin no zhes bya bas sngar bstan pa'i rnam par smin pa bshad par bya'o//re re la yang dbye ba dpag tu med pa dang ldan pas/ mdor bsdu na zhes bya ba smras te/ de'i 'bras bu rnam pa brgyad yin pas rnam par smin pa ni brgyad do/ /yang na bde 'gror skyes nas ring du gnas pa'i dbang du byas nas rnam par smin pa dang po'i/ /bdag gi dngos po khyad par du 'phags pa dang /skye ba khyad par du 'phags pa dang / skye ba khyad par du 'phags pa dang / longs spyod dang 'khor khyad par du 'phags pa'i dbang du byas nas gnyis pa dang / gsum pa dang / bzhi pa'o/ /'jig rten pa rnams kyi tshad ma'i dbang du byas nas lnga pa'o/ /tshad mar gyur pa'i grags pa'i tshigs su bcad pa'i dbang du byas nas ni drug pa'o//yon tan thams cad kyi snod du gyur pa'i dbang du byas nas bdun pa'o/ /snod du gyur pas bya ba thams cad la mthu dang ldan pa'i dbang du byas nas ni brgyad pa'o/ /rnam pa gnyis kyis tshe phun sum tshogs pa bstan te/ 'phen pa chen po nyid dang /gnas pa chen po nyid do/ /byang chub sems dpa' bde 'gror skyes par gyur pa'i tshe ring bar 'phen pa'i las kyis 'phangs pa'i tshe ni ring ba nyid dang ldan par 'gyur gyi thung bar mi 'gyur te/ de ni der skyes pa'i sems can gzhan rnams las lhag par 'gyur ba'o/ /'phangs pa'i tshe ring ba dang ldan par ji srid 'phangs pa de las bar du chad par mi 'gyur bar ring du gnas pa ni ring du gnas pa nyid ces brjod do//de ltar 'phangs pa'i rjes su 'jug pa ni tshe ring zhing yun ring du gnas pa nyid ces bya'o/ /yang byang chub sems dpa'i tshe ring pa de dbye na rnam pa bzhir 'gyur te/ ring ba nyid dang / bar ma chad pa nyid dang / dge ba'i las dang rjes su mthun pa nyid dang / bde ba dang rjes su mthun pa nyid do/ /de dag thams cad ni tshe phun sum tshogs pa zhes bya'o/ /kha dog phun sum tshogs pa yang rnam pa gnyis te/ kha dog phun sum tshogs pa ni gzugs bzang pa'o/ / dbyibs phun sum tshogs pa ni blta na sdug pa'o/ /gnyis ka yang mdzes pa'i rgyu yin pa'i phyir mdzes pa'o/ /yang na chu zheng phun sum tshogs pa'i phyir mdzes pa'o zhes bya ba dang / rnam pa gsum po de yang rnam pa bzhir 'gyur te/ kha dog dang / dbyibs phun sum tshogs pa dang /dbang po ma tshang ba med pa phun sum tshogs pa dang / chu zheng phun sum tshogs pa'o/ /rnam pa gnyis kyis rigs mtho zhing khyad par du 'phags par rig par bya ste/ ma dang pha'i phyogs nas spyod pa smad du med pa dang / longs spyod chen po nyid do/ /yang de ni rnam pa bzhir 'gyur te/ma'i phyogs nas rigs rnam par dag pa dang / pha'i phyogs nas rigs rnam par dag pa dang / spyod pa phun sum tshogs pa dang / 'jig rten thams cad kyis mngon par 'dod pa'o/ /lhag par phun sum tshogs pa'i bdag por gyur pa ni gtso bo nyid du gyur pa zhes bya ba'i don to//de yang mdor bsdu na rnam pa gnyis te/ 'dus byas pa dang / sems can no/ /'dus byas pa ni srid pa'i nye bar mkho bas bsdus pa longs spyod la sogs pa 'tsho ba'i yo byad rnams so/ /sems can yang phyogs su gtogs pa dang / 'khor te rnam pa gnyis so zhes bya bar/ longs spyod che ba dang zhes bya ba la sogs pa la/longs spyod che ba yang rnam pa bzhi ste/ bzang zhing rgya che ba'i longs spyod nyid dang / gya nom pas khyad par du 'phags pa'i longs spyod nyid dang / rgyun mi 'chad pa'i longs spyod nyid dang / shin tu longs spyod pa'i longs spyod nyid de/ ma'i phyogs dang / pha'i phyogs su gtogs pa'i gnyen ni phyogs su gtogs pa zhes bya'o/ /de dag nyid la gnyen bshes dang / zhabs 'bring dang / snag gi gnyen mtshams zhes kyang bya'o/ /bran pho dang / bran mo dang / las byed pa'i skyes bu rnams ni 'khor zhes bya'o/ /'khor gyi phyogs chen po yang rnam pa bzhi ste/mchog tu gyur pa'i phyogs kyi 'khor nyid dang / gya nom zhing 'bar ba'i phyogs kyi 'khor nyid dang / rjes su mthun pa'i phyogs kyi 'khor nyid dang / rjes su chags pa'i phyogs kyi 'khor nyid do/ /lus dang ngag gi las gang dag gis gzhan dag la bslu ba med pas yid brten du rung bas de dang rjes su mthun pa'i ngag gi las la yid ches pa yin te/des na rtsod pa'i gnas thams cad du rtsod pa can rnams kyi dbang por gyur pas tshad mar gzhag par 'os pa'i phyir 'os pa'o/ /bslu ba med pa yang gsum rnam par dag pa nyid kyis bstan pa yin te/ gtong ba dang len pa'i tha snyad rnam par gzhag pa ni/gang gzhal lugs la g.yo byed pa dang zhes bya ba la sogs pa ste/ gzhal lugs la g.yo byed pa ni len pa dang gtong ba la mthon dman du byed pa'o/ /'jal ba la g.yo byed pa ni srang mthon dman du byed pa'o/ /de lta bu'i gzhal lugs la sogs pas bslu bar mi byed pa'o//rang gi nor gtong ba'i dbang du byas nas smras pa/ g.yo sgyu dang zhes bya ba la/ g.yo dang sgyus gzhan dag la kun du spyod pa ma yin gyi/ bden pa yang bden pa nyid du byed pa nyid do/ 'jig rten gyi tha snyad rnam par dag pa'i dbang du byas pa de la yang g.yo dang sgyus spyod par mi byed do zhes bya'o//yang na skyed gtong ba la sogs pa la yang g.yo dang sgyu mi byed pa'o/ /nor ser sna byas pa'i dbang du byas nas smras pa/ nor gtams pa la ngor mi byed cing zhes bya ba ste/ de ltar na nyo ba dang 'tshong ba'i sgo nas gtong ba dang len pa'i rnam par dag pa dang /skyed gtang ba dang nor gtams pa la rnam par dag pas bslu ba med pa bstan pa yin no/ /rnam grangs gzhan yang yid brtan du rung zhing zhes bya ba la smras pa/ sems can rnams kyis zhes bya ba la sogs pa la/ tshad mar gyur pa nyid kyi dpang por gzhag par 'os pa yin no/ / yid ches pa ji lta bu zhe na/ smras pa/ gzhal lugs la g.yo byed pa la sogs pas bslu ba med pa'o/ /gzhi des zhes bya ba ni yid brtan du rung ba dang / yid ches pa'i gzhi des bslu bar mi byed pa'i lus la sogs pa'i las kyi gzhi gang yin pa des zhes bya ba'i don to/ /'dzin par 'gyur ba zhes bya ba ni 'da' bar bya ba ma yin pa'i ngag ces bya ba'i don to//gzhan rnams kyis tshad mar gyur pas blang bar bya ba'i ngag yin pa'i phyir gzung bar bya ba'i tshig yin no zhes bstan par 'gyur ro/ /dbang che bar grags pa ni yangs pa dang / rgya che ba dang / rnam par bkram pa ste/ rdzas drug las kun du byung ba ni dbang che bar grags pa'o/ /bzo'i las kyi gnas rnam pa sna tshogs pa la mkhas pa las brtsams nas 'jig rten 'dir grags pas khyab pa ni grags pa chen po'o/ /de dag gnyi ga'i sbyor bas 'jig rten gyi bla mar byed pa ni snyan pa'o//de bzhin du/ dbang che ba dang / mthu che ba dang / nus pa che ba zhes bya ste/ skye bo mang pos 'dod par bya ba yin pa nyid du bstan pa yin no/ /de la dpa' ba ni snying stobs so/ /de yang rnam pa gnyis te/ nyon mongs pa can dang / nyon mongs pa can ma yin pa'o/ /nyon mongs pa can ni g.yul ngor dpa' ba'o//nyon mongs pa can ma yin pa ni sbyin pa la dpa' ba ste/ snying stobs sbyin dang 'thab pa la zhes bstan pa'i nges pas so/ /brtson pa ni yangs shing rgya che ba'i las kyi mtha' la lus spro zhing sbyor ba dang / dge ba'i chos la sems spro ba ste/ de dag gnyis ka yang brtson pa'o//brtan pa ni ngang brtan pa ste/ sdug bsngal drag po nyams su myong zhing bde ba dang bral bar gyur kyang lus dang sems la 'gyur ba med pas brtan zhing sra ba'o/ /bya ba de dang de la blos nyams su myong ba la mkhas pa ni mkhas pa'o/ /sbyor ba la mkhas pa ni shes nyan che ba'o//yang shes bya yangs pa la rjes su 'jug pa la sems pa ni mkhas pa'o/ /shes bya zab mo la rjes su 'jug pa ni shes nyen che ba'o/ /de dag gnyis ka dang ldan pa ni shes rab chen po dang / shes rab zab mo zhes brjod do/ /ngang tshul bzang ba ni nyes par spyod pa'i gnyen po'i phyogs su gyur pa lus la sogs pa'i legs par spyod pa dang ldan pa'i phyir ro//bzo dang las kyi gnas rnam pa sna tshogs dag la mkhas pa ni ji ltar thos pa las byung ba'i sa las bstan pa bzhin du de dag la rab kyi mthar thug par gyur pa la lhag par mkhas pa dang ldan par rig par bya ste/gcig la gcig ltos nas khyad par 'di dang 'di'o zhes mkhas pa'o/ /gzhi des zhes bya ba ni ji skad bstan pa'i mkhas pa dag gi gzhi des so/ /bla mar 'gyur zhing zhes bya ba ni gnas de dag la spyod pa na 'jig rten kun 'dod pa'o/ /de'i rigs skye bo'i tshogs chen po'i zhes bya ba smras so//bkur stir bya ba ni brtse ba'i gnas yin pa'i phyir ro/ /btsun par bya ba ni brtse ba dang rjes su mthun pa'i phyir ro/ /rim gror bya ba ni gus par bya ba dang rjes su mthun pa'i phyir ro/ /yang na bkur sti bya ba ni lus kyis so/ /btsun par bya ba ni ngag gis so//rim gror bya ba ni yid kyis te yon tan 'byung ba'i phyir ro/ /rnam pa de dag nyid kyis mchod par bya ba'i gnas yin no/ /skyes pa'i dngos po zhes bya ba ni gang dang ldan pas skyes pa zhes brjod pa'o/ /de gang yin zhe na/ skyes pa'i dbang po dang ldan pa'o zhes bstan pa'i phyir smras te/de ltar na mi nyid kyi gtso bo nyid bsdus par 'gyur ro/ /mi nyid kyang rnam pa gsum du 'gyur te/ dman pa dang / 'bring dang mchog gis so/ /dman pa ni ma ning gi mtshan dang ldan pa'o/ /bar ma ni bud med kyi dbang po dang ldan pa'o/ /mchog ni skyes pa'i dbang po dang ldan pa ste/de'i phyir mchog nye bar bzung nas/ skyes pa nyid ni zhes bya ba la sogs pa smras pa yin no/ /yang skyes bur rnam par gzhag pa ni gnyis te/ rnam pa dang / mtshan mas so/ /gzugs na spyod pa rnams ni skyes pa'i rnam pa dang ldan pas skyes pa zhes brjod kyi/ skyes pa'i mtshan ma dang ldan pas ni ma yin no/ /mi'i nang na kha cig ni skyes pa'i mtshan ma dang ldan yang bud med dang ma ning gi rnam pa lta bu yang yod pas de'i phyir tshig gnyis bstan to/ /stobs rnam pa gnyis kyi dbang du byas nas stobs phun sum tshogs pa rnam par gzhag par bya ste/ rgyu las byung ba dang / rkyen las byung ba'o/ /rgyu las byung ba ni las las skyes pa ste lhan cig skyes pa zhes brjod do/ /gya nom zhing rgya che ba'i kha zas la longs spyod pa'i rkyen las skyes pa gang yin pa de ni rkyen las byung ba'o/ /gnod pa chung ba dang nad med pa'i rang bzhin can gyis ni stobs dang po bstan te/nad mang ba la lhan cig skyes pa'i stobs yod pa ma yin no/ /spro ba che bas ni gnyis pa bstan te/ kha zas la longs spyod pa'i khyad par gyis lus rgyas pas lus gya nom par gyur na spro ba chen po 'byung bar 'gyur ro zhes bya ba yin no/ /las las skyes pa'i nad med pa ni gnod pa chung ba'o//dus las byung ba dang kha zas dang gnas kyi khyad par las skyes pa'i nad med pa ni nad med pa'o/ /de ltar sngon gyi las las skyes pa dang / rkyen ma snyoms par gyur pa las skyes pa'i nad med pas gnyi ga smos pa yin no/ /stobs su byed pa'i bya ba la rtsom pa dang ldan pa ni spro ba che ba'o//yang gnod pa chung ba dang / nad med pa'i rang bzhin can yin pas stobs dang ldan par 'gyur te/ reg byas bsdus pa'i nye bar len pa'i khyad par ro/ /spro ba che ba nyid kyis ni mthu dang ldan par 'gyur te/ bya ba thams cad la sbyor ba bzod pa'i phyir ro//de gnyi ga rang bzhin gyi stobs zhes bya'o/ /de'i phyir gzhan kha zas las byung ba la sogs pa ni rang bzhin gyi stobs zhes mi bya'o/ /yang stobs kyi rnam par gzhag pa gzhan bstan pa ni/ /lus kyi dang sems kyi dbang du gyur pa ste/ gnod pa chung ba dang / nad med pa'i rang bzhin can ni lus kyi'o//spro ba che ba ni sems kyi'o zhes bya ba'o/ /rnam par smin pa'i rgyu gang zhe na/ sngar bstan pa'i rgyu gsum po ste/ rnam par smin pa'i rgyu nas ye shes kyi rgyu'i bar gyis rnam par smin pa bstan nas/ de'i rgyu bstan pa'i phyir smras pa/ rnam par smin pa'i rgyu gang zhe na zhes bya ba la/sems can gyi rgyud las rnam pa sna tshogs kyis mngon par 'dus byas pa'i rnam par smin pa rnam pa sna tshogs pa'i rgyu yang rnam pa sna tshogs par bstan pa'i phyir/ mi 'tshe ba dang zhes bya ba la sogs pa la/ rnam par smin pa re re la yang rgyu rnam pa sna tshogs pa yod pa yin na yang rnam par smin pa brgyad kyis rnam par smin pa'i rgyu'i gtso bo nyid shes par bya ba'i phyir brgyad bstan pa yin te/bya ba mang pos 'jigs pa'i spro ba bskyed pa'i phyir/ 'bri rdzi'i bu la bslab pa gsum bstan pa bzhin no/ /de yang mdo'i rjes su 'brangs nas rig par bya'o/ / 'tshe ba ni srog gcod pa'o/ /de las ldog pa ni mi 'tshe ba'o/ /de yang rnam pa gnyis te/ yang dag par blangs pas spangs pa dang / chos nyid kyis spangs pa'o/ /de la yang dag par blangs pas spangs pa ni sdom pa rnam pa brgyad kyis bsdus pa'o/ /chos nyid kyis spangs pa ni rgyun du zhugs pa rnams kyi tshe brjes par gyur pa dang /byang chub sems dpa'i sa gnyis pa nas gzung ba rnams kyi'o/ /de gnyi gas bsdus pa'i mi 'tshe ba bstan pa'i phyir smras pa/ mi 'tshe ba'i bsam pa ni zhes bya ba la/ kha cig skye ba ji srid par rang bzhin gyis srog mi gcod pa yod kyang de sdig pa mi byed pa zhes bya ba'i gnyen po'i phyogs la legs par spyod pa ni ma yin no//de'i phyir spong bas bsdus pa'i legs par spyod pa gzung ba'i phyir mi 'tshe ba'i bsam pa smos te/ srog gcod pa las log pas tshe ring bar 'gyur ro zhes mdo las bstan to/ / snang ba dang / gos gtsang ma sbyin pa ni zhes bya ba ni/ mar me sbyin pas mig thob 'gyur/ /zhes mdo la la nas bstan pa snang ba sbyin pa gsungs pa yin no/ /snang ba sbyin pas kha dog snang bar byed pa'i phyir kha dog dang ldan par 'gyur ba'o/ /gos sbyin pas ni kha dog mdzes/ /zhes la la nas bstan pas de'i phyir bstan pa yin te/gos byin pas gsang ba'i gnas rnams bkab pas mdzes par 'gyur ba'i phyir ro/ /sar pa smos pa ni kha dog ldan pa'i gos byin par bstan par 'gyur te/ dri ma med pa'i gos sbyin pa zhes bya ba'i don to/ /thams cad du tshul khrims dang ldan pa'i rang bzhin yin no zhes bya bar rig par bya ste/tshul khrims ni bde 'gror skye ba'i rgyu yin pa'i phyir dang / de dag ni 'phangs pa'i rnam par smin pa'i rgyu'i khyad par las byung ba'i phyir te/ gcig gis gcig ni 'phangs pa las/ /du ma yongs su rdzogs par 'gyur/ /zhes bya bas so//nga rgyal nges par bcom pa zhes bya ba ni tshul khrims dang ldan pa ni nga rgyal bcom pa nyid kyis rigs mthon po'i rgyu yin te/ bla ma dang bla ma'i gnas rnams la phyag 'tshal ba dang / 'dud pa dang / gzhan dag la yang gus pa'i sems kyis 'dud pa dang / bran dang 'dra ba dang /gdol pa dang 'dra bar 'jig rten shes pas rjes su 'jug pa'o/ /des ni rigs mtho zhing che ba rnams su so sor skye bar 'gyur te/ nga rgyal nges par bcom pa yis/ /mthon po'i rigs su skye bar 'gyur/ /zhes mdo las bstan pa'i phyir ro/ /dbang phyug phun sum tshogs pa rnam pa gsum bstan pa'i rgyu 'dir bstan par bya ste/gzhan gnyis kyang de'i khongs su 'dus pa'i phyir dang / de'i rjes su 'brangs pa'i phyir dang / gang la spyod pa dang / gang dag dang spyod pa dang / gang dag gis 'dus byas pa spyod pas de thams cad longs spyod ces byas nas dbang phyug phun sum tshogs pa'i rgyu ni sbyin pa yin par bstan pa yin no//slong ba rnams dang zhes bya ba la sogs pa ni sbyin pa rnam pa gnyis bstan te/ don du gnyer ba dang / don du mi gnyer ba'o/ /'dod cing gsol ba 'debs pa rnams la byin pa ni don du gnyer ba la sbyin pa ste/zas 'dod pa rnams la zas la sogs pa gang 'dod pa sbyin pa'o/ /yo byad mi bdog pa rnams dang / phan 'dogs pa rnams dang / sdug bsngal ba rnams dang / yon gnas rnams la don du mi gnyer yang yo byad med par rang gis shes nas rdzas byin pas nye bar sdud pa yin no//de la don du gnyer ba la byin pas ni bdag nyid kyis nye bar longs spyod pa'i nye bar mkho ba rnams thob par 'gyur ro/ /don du mi gnyer ba la byin pas ni nye bar spyad pa ma yin pa'i nor gyi phung po chen po thob pas de ltar longs spyod chen por 'gyur ro/ /longs spyod bsags pa dang ldan pas longs spyod chen po nyid do//de'i phyir mdo gzhan nas gsungs pa/ phyug por 'gyur/ nor chen po dang ldan par 'gyur/ longs spyod chen po dang ldan par 'gyur zhes bya ba la sogs pa gsungs pa yin no/ /ngag gis nye bar spyod pa bzhi dang bral ba'i ngag yon tan lnga dang ldan par 'gyur ro zhes bstan pa'i phyir smras pa/bden pa'i tshig dang zhes bya ba la sogs pa la/ yon tan lnga dang ldan pa ni/ snyan pa dang / rnam par gsal ba dang / shes par bya ba dang / mnyan par bya ba dang / mi mthun pa med pa'o/ /goms pa smos pa ni brten par bya ba la sogs pa mtshon pa'i don to//phyi ma la zhes bya ba ni skye ba phyi ma la'o/ /bdag nyid la zhes bya ba ni rang gi rgyud do/ /yon tan rnam pa sna tshogs bsgrub par smon lam 'debs shing zhes bya ba ni bdag nyid la yon tan rnam pa sna tshogs pa bsgrub pa'i phyir smon lam 'debs pa zhes bya ba'i don te/bdag ni rtag tu sdig pa'i grogs po dang bral dge ba'i bshes dang mngon par mi 'bral zhing / /bdud kyi zhags pa dang bral zab cing rgya che'i chos rab 'byed la nges par rab mkhas shing / /'jig rten chos kyis mi gos skye ba kun du rtag tu gzhon nur tshangs par spyod pa dang //sems can mchog gyur byang chub sems dpa' gzhan phan la dgyes thugs rje can du byang chub bar du 'gyur bar shog /ces bya ba'i tshigs su bcad pa'i rjes su 'brangs nas smon lam la kun du spyod cing / dkon mchog gsum la mchod pa dang / bla ma la mchod pa'o/ /bla ma la mchod pa la yang dus gnyis kyis rnam pa gnyis te/ de bzhin gshegs pa 'tsho zhing gzhes pa la chos gos la sogs pa na ba'i gsos sman dang yo byad rnams rab tu 'bul ba dang / nye bar 'gro ba la sogs pa dang / sdud pa'i las ni sangs rgyas dkon mchog la zang zing gi mchod pa'o//chos dang rjes su mthun pa'i chos la nan tan byed pa'i sgrub pa'i mchod pa ni bdag gi don te 'di ni mchod pa'i cho ga'o/ /de'i phyir sgra gcan zin bzang pos/ bdag la phan pa bsgrub pa'i 'gro ba gang / /mkhas pas bsngags pa'i zhi ba 'dod pa yang //des kyang khyod la rab tu mchod lags kyis/ /zang zing mchod pa spangs pa de lta min/ /zhes bstan pa yin no/ /de bzhin gshegs pa yongs su mya ngan las 'das pa'i sku'i gzugs brnyan bzhengs pa dang / sngar mi bzhugs pa'i sa phyogs su de bzhin gshegs pa'i mchod rten bzhengs pa dang /mchod rten rnying pa la sogs pa gso ba dang / gnyis ka la yang me tog dang / spos dang / gdugs dang / rgyal mtshan dang / ba dan la sogs pa 'bul ba dang / de lta bu'i rang bzhin ni sangs rgyas dkon mchog la mchod pa'o/ / yi ge 'dri ba la sogs pa chos spyod bcu'i sgo nas spyod pa ni chos la mchod pa'o/ /rkyen bzhis nye bar sdud par byed pa dang / 'dud cing phyag 'tshal ba la sogs pa ni dge 'dun dkon mchog la mchod pa'o/ /bdag nyid kyi bla ma ni khyim pa'i phyogs la ma dang pha'o/ /rab tu byung ba'i phyogs la ni mkhan po dang slob dpon te/de dag la mchod pa ni bla ma yongs su mnyes pa'i spyod pa dang g.yog bya ba la sogs pa rgyas par rig par bya'o/ /de lta bu'i yon tan gyi dris bsgos pa'i rgyud ni dkon mchog gsum dang / bla ma'i mchod pa la brten nas rgyu dang rkyen gyi khyad par gyis dbang che bar grags par 'gyur ro zhes bstan par 'gyur ro//bdag dang gzhan gyi dbang du byas nas rgyud gnyis dang gnyis kyis mi nyid kyi rgyu bstan pa ni skyes par gyur cing skyes pa'i dbang po dang yang ldan la/ de lta bu'i skyas pa'i dngos pos 'dun pa dang /brtson 'grus dang / brtan pa dang / shes rab chen po la brten pa'i yon tan mthong nas mngon par dga' ba'i rang bzhin can du gyur nas gnas pa ni bdag gi dbang du byas pa'i rgyu dang po'o/ /bud med du gyur kyang bud med kyi dngos po la smod cing mi mthun par blta la/ skyon mang po'i gnas su blta bas gnas shing 'dun pa la sogs pa dman pa la brten pa'i phyir dang / brgya byin la sogs pa'i gnas khyad par can thob pa'i snod ma yin pa'i phyir nyes dmigs mthong bas gnas pa de ni ma 'ongs pa'i dus su skyes pa'i dbang po dang ldan par 'gyur ba'o/ / gzhan la brten pa'i rgyu ni rnam pa gnyis su rig par bya ste/ bud med du gyur cing bud med kyi dngos po la mngon par dga' ba rnams la sngar bstan pa'i bud med kyi dngos po'i nyes dmigs ston cing de las 'dun pa bzlog pa ni skyes pa'i dbang po rab tu thob par 'gyur ro/ /bud med kyi dngos por gyur kyang nyung rum la sogs pa pho'i dbang po bcad pa'i phyir khrid pa'i mi rnams dang /dud 'gro rnams chos dang mthun pas te/ rin gyis blu ba'am/ chos bstan pas de mgu bar byas nas thar bar byed kyi/ stobs kyis ni ma yin te/ de ltar thar bar byed na skyes pa'i dbang po thob par 'gyur te/bzhi po de dag ni skyes pa nyid thob pa'i rgyu yin no zhes brjod do/ /sems can rnams kyi bya ba'i ngo bo ni bya ba byung ngo cog go/ /de'i bya ba ni byung ngo cog gi bya ba'o/ /gzhan gyi las kyi grogs la 'gro ba zhes bya ba'i don to/ /thams cad kyi thams cad du mi nus pa'am mi shes pas ye nas mi rtsom pa de la bdag nyid kyis byas nas sbyin par byed pa 'di ni bya ba la grogs byed pa'o//gcig pus bya bar brtsams pa las bya ba bsgrub par mi nus pa dag la bdag nyid gnyis par gyur nas sgrub pa 'di ni lhan cig byed pa'i grogs yin no/ /de dag la bdag nyid kyi nus pa dang mthun par grogs bya'o zhes bya bar ci nus ci lcogs zhes bya ba smos so//chos dang mi 'gal zhing don dang mthun pa dag ni 'dod pa'i rnam par smin pa'i rgyu yin pas de lta bu'i bya ba la grogs bya'o zhes bstan pa'i phyir/ chos dang mthun pa zhes bya ba la sogs pa la/de lta bu'i gzhan dag gi bya ba la grogs byed pa dang lhan cig byed pas bya ba dag la 'gro ba ni ma 'ongs pa'i stobs kyi rgyur bstan te/ de dag gis gzhan gyis lus kyi spro ba brtan par byed pa'i phyir stobs kyi rgyu nyid yin no/ /da ni btung ba byin pas stobs dang ldan zhes bya ba'i mdo'i rjes su 'brangs nas rgyu gnyis pa bstan pa'i phyir/brtas par 'gyur ba ni stobs skyed par byed pa'o/ /spro ba skyed par byed pa zhes pa ni brtsams pa'i las kyi bya ba'i rgyur gyur pa rnams bsgrub pa'o/ /de ltar rnam par smin pa rnam pa brgyad kyi so sor nges pa'i rgyu rnam pa brgyad bstan te/rgyu'i dbye bas rnam par smin pa dbye bar bya'o zhes bya bas so/ /da ni ji skad bstan pa'i rnam par smin pa'i rgyu rnam pa brgyad po dge ba'i bdag nyid can gyi rnam par smin pa rgyas pa la sogs par byed pa bstan pa'i phyir/ rgyu gsum gyis zhes bya ba la sogs pa la/rgyas par 'gyur te zhes bya ba ni bsags pas zhugs par gyur pas khyad par can du 'gyur ba ste/ rnam par smin pa'i khyad par mngon par sgrub par byed pa la'o/ /de'i phyir smras pa/ yongs su rdzogs pa dang zhes bya ba la sogs pa la/ yongs su rdzogs pa zhes bya ba ni ma tshang ba med pa ste/mi dman zhing zhes bya ba'i don to/ /brtas pa zhes bya bas ni kha dog bzang bar 'gyur ba'o/ /rgya che ba zhes bya ba ni yangs pa'o/ /yang na snga ma'i bshad pa yin no/ /rgyu gsum gyis sems rnam par dag par rig par bya ste/ rnam par smin pa la mi re bas dri ma med pa nyid yin te/de'i phyir/ bla na med pa yang dag par rdzogs pa'i byang chub tu dge ba'i rtsa ba de dag yongs su bsngos pas zhes bya ba'o/ /bsam pa chen po dang ldan pa'i phyir drag cing ro gcig pa'i dga' ba'i shugs kyis las de dag nan tan gyis spyod do//de ltar rang la ltos nas sems rnam par dag pa rnam pa gnyis so/ /chos dang ldan par mtshungs pa dman pa dang 'bring dang mchog gi las de lta bu dang ldan pa mthong na las de dag la brnyas pa dang / 'gran pa dang / phrag dog gi nye ba'i nyon mongs pa mi skyed cing rjes su yi rang ba'i sgo nas mngon par dga' ba dang /rab tu dga' ba'i bsam pa dang / rnyog pa med pa'i bsam pa dang ldan pa'o/ /mi nus shing stobs med na yang las de spyad cing nyams su blang ba'i dbang du byas nas yid kyi rjes su rnam par rtog cing rjes su dpyod pa las de mngon par 'dod pa ni sems rnam par dag pa'o//mdor na sbyor ba rnam par dag pa ni rnam pa gnyis te/ rtag tu bya ba'i sbyor ba dang / gus par bya ba'i sbyor ba'o/ /rtag tu bya ba'i sbyor ba la yang rnam pa gnyis su byas nas rang gi rgyud kyi sbyor ba rnam par dag pa rnam pa gsum du rig par bya ste/dus yun ring por goms par byed pa dang / skye ba rangs pa dang / nyin gcig pa dang / skad cig la sogs pa'i rgyun du sbyor ba dang / de dag gnyi ga la yang grims par byed pa ni gus par byed pa'i sbyor ba'o/ /de ltar na bdag nyid kyi dbang du byas pa'i sbyor ba rnam par dag pa gsum yin no//gzhan la brten pa'i sbyor ba rnam par dag pa rnam pa bzhi bstan pa ni/ gzhan dag la yang yang dag par len du gzhug pa'i phyir zhes bya ba la sogs pa la/ thams cad la thams cad du goms par ma byas pa'i sems can rnams las de yang dag par len du 'jug pa dang /yang dag par sbyar ba'i phyir bsngags pa brjod pa dang zhes bya ba smras so/ /las de la brtson 'grus brtsams pa'i sems can rnams yang dag par rab tu dga' ba bskyed pa'i phyir lhag par bsngags pa brjod pa zhes bya ba'o/ /yang dge ba'i las de nyid la de dag rgyun mi 'chad cing bar med par nges par sbyor bar byed pa dang mi 'dor ba'i sbyor ba la 'god par byed pa'o//de ltar ma zhugs pa rnams dang zhugs pa rnams dang / mi brtan par zhugs pa rnams la yang dag par len du 'jug pa dang / bsngags pa brjod pa dang / lhag par bsngags pa brjod pa dang /mi 'dor ba'i sbyor ba la 'god par byed pa bsal bar byed pa yin no/ /snod dang snod ma yin pa la rtog pa med do zhes bya ba'i dbang du byas nas byang chub sems dpa'i bsam pa dang sbyor ba las ma gtogs pa'i zhing gzhan ni med do/ /de'i phyir smras pa/ sems can kun la snying rje can/ /khyod la mngon du phyogs 'di rnams/ /snod dang snod min ma mchis par/ /bdag nyid chen po'i mchod gnas byed/ /ces bya ba de'i phyir bsam pa dang sbyor ba'i khyad par nyid zhing yin no/ /des na smras pa/ yang dag par bsgrub pa dang zhes bya ba la dus su nye bar bsgrub pa ni yang dag par bsgrub pa'o//de lta bur yang dag par bsgrubs pa'i yang dag pa'i sbyor ba'i 'bras bu'i gnas skabs su 'bras bu nges par sbyin par nges par 'gyur ba ni zhing rnam par dag pa zhes bya bas so/ /zhing dang 'dra bas zhing zhes byas nas te/'bras bu mang zhing bzang ba nges par ster bar chos mtshungs pas rnam par smin pa la gnas pa'i byang chub sems dpas bya ba gang yin pa dang / rnam par smin pa la gnas pas rnam par smin pa bdag por gyur pa'i dbang gis cir 'gyur ba de gnyis ka yang rnam par smin pa'i 'bras bur rig par bya'o//tshe ring ba dang ldan zhing ring du gnas pa'i phyir yun ring por sbyor ba'o/ /yang de ni yang dag par spong ba gsum pa gtsor gyur pas dge ba'i phyogs ma skyes pa rnams bskyed pa'i phyir rab tu sbyor ba de bstan pa'i phyir/ dge ba'i phyogs la sbyor ba dang zhes bya ba ni/yun ring por yang dag par spong ba bzhi pa gtso bor gyur pas 'phel zhing rgyas par bya ba'i phyir rab tu sbyor bar byed do/ /de bstan pa'i phyir/ mang po sogs par byed pa zhes bya ba la sogs pa la/ bdag gi don dang gzhan gyi don las brtsams nas zhes bya ba ni las des sangs rgyas kyi chos rnams yongs su smin par 'gyur ba zhes bya ba ni bdag gi don to//yang na bdag la phan pa dang bde ba yang dag par sgrub pa zhes bya ba ni bdag gi don to/ /sems can yongs su smin par bya ba'i phyir sems can rnams la phan pa dang bde ba sgrub par byed pa zhes bya ba ni gzhan gyi don to//mdog phun sum tshogs par gyur na rim gyis gdul bya rnams dga' zhing 'dun par 'gyur ba ni 'bras bu yin no zhes bstan pa'i phyir/ mdog phun sum tshogs par gyur na skye bo'i tshogs chen po'i snying du sdug par 'gyur te/ mthong ba tsam gyis rab tu dga' bar 'gyur ba'i phyir ro//dga' bar gyur nas yang dang yang de'i thad du 'gro bar 'gyur ro/ /de bzhin du gzugs yid du 'ong ba dang ldan pa'i phyir mngon par phrad par 'gyur zhing / skye bo'i tshogs chen po dag de'i tshig mnyan par 'dod par 'gyur zhing des smras pa de byed par yang 'dod par 'gyur ba'o//de lta bu'i rim gyis dbang du 'gyur zhing 'dul bar 'gyur ro/ /rigs phun sum tshogs par gyur pa'i rim gyis bsgo ba las 'da' bar mi byed pa ni de'i 'bras bu'o zhes bstan pa nyid ni rigs phun sum tshogs par gyur na dang por 'jig rten pa thams cad kyis mngon par 'dod par 'gyur ro//rigs bzang po dang nges par ldan pa'i phyir skye bo'i tshogs chen po'i drung du nye bar 'ong zhing bkur ba ste lus kyi nye bar spyod pa'i khyad par gyis mchod par 'gyur ro/ /ngag gi nye bar spyod pa'i khyad par gyis rab tu bsngags par 'gyur ro//yid kyi nye bar spyod pa'i khyad par gyis rab tu dang ba bskyed par 'gyur ro/ /rgyu gsum po 'di dag gis gang dang gang la yang dag par sbyar ba de dang de la de'i gzi brjid kyis zil gyis mnan nas myur du yang dag pa'i gus pas bsgo ba bzhin sgrub par byed do/ /byed par mi 'dod pa dag gis kyang tshig gi lan mngon sum du 'debs par nus pa ma yin te/phyin ci log tu byed mi nus zhes bya ba'i don to/ /zlog par mi byed pa ni ma gus pas mi byed pa'o/ /log par mi byed pa ni 'dren par mi byed pa ste/ bya bar mi 'dod pa dag la yang ngo / /de'i phyir smras pa/ mi bya'o zhes bya'o//byang chub sems dpa'i longs spyod phun sum tshogs pa ni/ dbang phyug phun sum tshogs pa zhes bya ba'o/ /rang gi 'bras bu la ltos pa med par rgyu la mngon par zhen pas longs spyod de dang de sems can gzhan dag la rab tu sgrub par byed do/ /des na smras pa/ sbyin pas sems can rnams sdud cing zhes bya ba ni lus brtan par byed pas rjes su sdud pas na sdud cing zhes bya ba'o/ /dbang du gyur pas na yongs su smin par byed pa zhes bya ba'o/ /ngag gi legs par spyod pa rnam pa bzhi'i 'bras bu yin pa'i phyir tshig btsun pa nyid dang / chos nye bar ston pa'i rang bzhin yin pa'i phyir/snyan par smra ba nyid de/ sems nye bar brtan par byed pas nye bar bsdus pa yin no/ /ngag gi legs par spyad pa bzhis yang dag par nye bar bsdus pa'i mtshan nyid can ni don spyod pas bsdus pa yin no/ /mtshungs par bya ba la nan tan byed pa'i mtshan nyid ni don mthun pas bsdus pa ste/phan pa la yang dag par sbyor ba ni yongs su smin par byed pa'o/ /dbang che bar grags par 'gyur ba ni rim gyis sems dang 'brel par 'gyur ba las rim gyis 'bras bur 'gyur ba bstan pa'i phyir dang / bzo'i gnas rnam pa sna tshogs pa la mkhas pa'i phyir bya ba byed pa rnam pa sna tshogs dag gis sems can rnams kyi grogs byed du 'gro zhing /grogs su 'gro ba des phan 'dogs par 'gyur ro/ /des na sems dang 'brel par 'gyur zhing gus pa dang bcas par 'gyur/ byas pa gzo bar 'gyur ro//gus pa de dang / byas pa gzo ba des bsdus pas bsgo ba bzhin du nyan par 'gyur ro/ /mnyan par bya ba dang / las su bya ba rnams gus pa dang bcas pas len par byed do/ /de ltar rjes su 'jug pas rab tu gzung bar bya'o/ /'jig rten dang 'jig rten las 'das pa dang theg pa gsum gyis bsdus pa'i yon tan rnams bskyed pa la nus pa dang ldan pa'i phyir snod du gyur par 'gyur ba yin no//'dun pa dang / brtson 'grus dang / brtan pa dang ldan pa'i phyir nyams su blang ba thams cad kyi snod du gyur pa yin no/ /shes rab yangs pa dang ldan pa'i phyir rab tu rnam par 'byed pa thams cad kyi snod du gyur pa yin no//de la dpa' ba'i khyad par dang ldan pas mi zhum zhing mi 'gong la bag tsha ba med par 'gyur ro/ /'khor gyi nang du 'jigs pa med par 'gyur ro/ /spyod lam dang / gnas thams cad la bzlog pa med cing sgrib pa med par 'gyur ro//sgrib pa med pa nyid bstan pa ni dus thams cad du sems can thams cad dang 'gro ba la 'gog pa med pa nyid dang / sems can thams cad dang dus thams cad du smra ba la bkag pa med pa nyid dang / de bzhin du ma grags pa la sogs pa la yang rig par bya'o//de ltar 'jigs pa med par 'gyur ba nyid dang / sgrib pa med pa nyid dang / dben par gnas pa'i bar gyi snod du gyur pa yin no zhes bya bar sbyar ro/ /dge ba'i phyogs la sbyor bas na lus ngal ba med pa ni mi skye ba ste/ bdag gi don gyi dbang du byas pa'o//gzhan gyi don gyi dbang du byas nas ni sems can gyi don la mi skyo ba'o/ /spro ba che ba nyid dang / go cha chen po bgos pa'i phyir brtson 'grus rtsom pa'o/ /brtson 'grus khyad par du 'phags pa dang ldan pa dang / brtson 'grus mi dman pas na brtson 'grus brtan pa'o//stobs dang mthu dang ldan pa dang / myur du so sor rtog pa dang ldan pa'i phyir mngon par shes pa myur ba'o/ /rnam par smin pa'i 'bras bu brgyad po 'di dag sems can rnams la phan pa'i phyir dang / dge ba'i phyir dang / yongs su smin par bya ba'i phyir bsgrub par bya'o zhes bya bas phan pa ste gzhan gyi don las brtsams pa'o//bdag gi don las brtsams nas ni sangs rgyas kyi chos rnams yongs su smin par 'gyur bas skye ba la yang mthun zhing zhes bya ba'o/ /de'i phyir mthun zhing 'phrod pa zhes bya bas gnyi ga'i don sgrub par byed pa'i phyir ro//rnam par smin pa'i 'bras bu rnam pa brgyad las gang yang rung ba cig ma tshang na yang gzhan gyi don yongs su rdzogs par bya ba yod pa ma yin no zhes bstan pa'i phyir smras pa/ rnam par smin pa'i 'bras bu 'di la gnas na zhes bya ba la sogs pa la rnam par smin pa'i 'bras bu rnam par gzhag pa rnam pa thams cad du yongs su rdzogs par gyur pa des ni sems can rnams kyi don rnam pa sna tshogs byed pa dang /rnam pa sna tshogs kyi sgo nas thabs tha dad pas phan pa dang bde ba bsgrub par nus pa'o/ /thabs kyi sgo re res kyang phan pa dang bde ba dpag tu med pa'i don bsgrub par nus pa ni lcogs pa zhes bya'o//yang na lus dang sems kyi stobs dang ldan pa ni nus shing lcogs pa zhes bya'o/ /rnam par smin pa brgyad po 'di dag gi stobs kyis ji ltar rigs par 'dul bar bya ba de dag la rjes su mthun par 'gyur ro/ /ji ltar 'dod pa bzhin du bya ba dag la bsgo ba nyan par 'gyur ba yang ji skad bstan pa'i rjes su bstan pa'i sbyor ba dang ldan pa las ji lta ba bzhin du byed pa'o//de'i phyir rang gi don bya ba yan chad la zhes bya ba'o/ /de'i phyir 'di gnyis las gang yang rung ba cig ma tshang na yang mi 'grub par bstan pa'i phyir/don che ba yin zhes bya ba la sogs pa ni don rnam pa sna tshogs pa mang po byed mi nus pa'o/ /don khyad par can byed pa med pa'i phyir mthun pa ma yin pa'o/ /ji lta ji ltar gzhan gyi don la 'bad pa chung ba de lta de ltar gzhan gyi don yongs su rdzogs par byed mi nus so zhes bstan pa'i phyir/des na des gzhan gyi don byed mi nus so zhes bya ba la sogs pa la de'i phyir zhes bya ba'i don to/ /bdag nyid nus pa dang bral bas ni gzhan gyi don bya ba la don chen por mi 'gyur ro zhes bstan pa'i phyir bdag nyid kyis mi nus shing mi lcogs la zhes bya ba la sogs pa la/de lta na yang gzhan gyi don yongs su rdzogs par bya bar mi nus pas gnyi ga'i yan lag tshogs na gnyi ga'i don 'grub par 'gyur ro zhes bstan pa'i phyir/ de ltar gyur na byang chub sems dpa' des zhes bya ba la sogs pa la/ bdag nyid kyang nus shing lcogs par gyur/sems can rnams kyang bsgo ba bzhin du nyan par gyur zhes bya ba'i don to/ /bdag nyid nus pa dang ldan pas ni sangs rgyas kyi chos rnams yongs su smin par byed la/ sems can rnams bsgo ba bzhin nyan pas ni theg pa gsum la myur du yongs su smin par byed de/ sangs rgyas kyi chos rnams myur du yongs su smin par gyur pa las ni rang nyid bla na med pa yang dag par rdzogs pa'i byang chub tu mngon par rdzogs par sangs rgyas par 'gyur ro//sems can yongs su smin par gyur pa las ni rnam par grol bar 'gyur ro/ /de lta bas na rnam pa 'di dag gis rnam par smin pa'i 'bras bu rnam pa brgyad kyis sems can rnams la phan pa dang bde ba yang dag par sgrub par byed do//de'i phyir na sems can rnams 'gro ba lnga'i 'khor ba na 'khor ba'i tshe sangs rgyas dang byang chub sems dpa' rnams dang phrad par gyur na phan pa thob par 'gyur/ bde ba dang phrad par 'gyur ro/ /de lta bas na 'khor ba 'bras bu dang bcas par 'gyur/ don dang bcas par 'gyur ro/ /de dang bral bar gyur na 'bras bu med par 'gyur/ don med par 'gyur ro/ /bsod nams dang ye shes bstan pas bsod nams dang / ye shes kyi 'bras bu yang bstan par nus pas/de la bsod nams ni gang yin/ ye shes ni gang yin zhes bya ba smras so/ /pha rol tu phyin pa gsum ste zhes bya ba ni ngo bo nyid rnam par gzhag pa'i dbang du byas pa'o/ /pha rol tu phyin pa gsum gyi ngo bo ni bsod nams zhes brjod de/ dngos po nyid dang / 'bras bu nyid kyis so//dngos po nyid ni bsod nams bya ba'i dngos po gsum zhes bstan pa'i phyir te/ sbyin pa'i pha rol tu phyin pa ni sbyin pa las byung ba'i bsod nams so/ /tshul khrims kyi pha rol tu phyin pa ni tshul khrims las byung ba'o/ /bzod pa'i pha rol tu phyin pa ni bsgoms pa las byung ba'i bsod nams so zhes bya ba la/bzod pa yang rnam pa gnyis te/ so sor brtags pa'i stobs kyis yang dag par bsdus pa dang / bsgom pa'i stobs kyis bsdus pa'o/ /bsgom pa'i stobs kyis bsdus pa ni byams pa bsgom pa'i ngo bo nyid de/ gnod sems spangs pas bzod pa yongs su rdzogs par 'gyur bas gnod sems spangs pa ni byams pa bsgom pa yin no zhes byas nas so//de lta bu ni re zhig dngos po nyid do/ /'bras bu nyid ni rang gi rgyud kyi longs spyod dang / bdag gi dngos po dang / 'khor gyi 'bras bu nyid yin pa'i phyir ro/ /ye shes dang shes rab ni don gcig pa'i phyir shes rab kyi pha rol tu phyin pa'i rang bzhin nyid ye shes so//rab tu shes pa'i phyir shes rab ste/ ji lta ba bzhin du nges par rtogs pa'o/ /ye shes ni the tshom gyi gnyen po'i phyogs su gyur pa'am/ yang dag par gtan la 'bebs pa'i bdag nyid yin pa'i phyir ro/ /bsod nams dang ye shes dang rjes su mthun pas de dag gi rnam par gzhag pa bstan pa'i phyir smras pa/brtson 'grus kyi pha rol tu phyin pa dang zhes bya ba la sogs pa'o/ /yang na byang chub sems dpa' rnams kyi tshogs ni rnam pa gnyis te/ bsod nams kyi tshogs dang / ye shes kyi tshogs so/ /des na pha rol tu phyin pa drug po nyid byang chub kyi tshogs su rnam par gzhag go zhes bya ba yin no//gal te pha rol tu phyin pa gsum ni bsod nams kyi tshogs su 'gyur la/ gcig ni ye shes kyi tshogs su gzhag na/ de ltar na pha rol tu phyin pa gnyis gang gi khongs su 'du bar 'gyur zhe na/ smras pa/ brtson 'grus kyi pha rol tu phyin pa dang zhes bya ba la sogs pa la/yang brtson 'grus ni dge ba'i sa chen po ba ste/ thams cad du brtson 'grus med na dge ba mi 'byung ba nyid de/ dge ba la sems spro ba ni brtson 'grus so zhes bstan pa'i phyir ro/ /yang na brtson 'grus ni pha rol tu phyin pa'i mi mthun pa'i phyogs thams cad kyi gnyen por gyur pa'i phyir/brtson 'grus ni pha rol tu phyin pa lnga'i rjes su 'jug par 'gyur ba yin no/ /mdo'i rjes su 'brangs nas kyang 'di dag rnam par gzhag par bye ste/ mdo sde las bstan pa/ byang chub sems dpa'i sbyin pa gtong ba na pha rol tu phyin pa drug bsgom pa yongs su rdzogs par 'gyur te zhes bya ba nas/de bzhin du shes rab kyi pha rol tu phyin pa bsgom pa'i bar du'o/ /de'i phyir thams cad la pha rol tu phyin pa thams cad yod pa nyid du mtshon par byed pa nyid do/ /de ltar na yang ngo bo nyid dang rjes su mthun pa'i dbang du byas nas bsod nams dang ye shes su rnam par gzhag par rig par bya'o//de'i phyir brtson 'grus la brten nas zhes bya ba la sogs pa la/ tshul khrims yang dag par len pa ni sdom pa yang dag par len pa'i dus su'o/ /bsrung ba ni de'i rjes la yan lag lnga bag yod pas bsdus pa yongs su sbyong ba'o/ byams pa la sogs pa zhes bya ba ni tshad med pa rnams bsgom pas ni bzod pa'i pha rol tu phyin pa yongs su rdzogs par 'gyur te/gnod sems dang / rnam par 'tshe ba dang / phrag dog dang / zhe sdang gi gnyen po ni tshad med pa rnams yin la/ bzod pa yang de dag gi gnyen por gyur pa nyid yin pas so/ / brtson 'grus la brten nas ye shes ma skyes pa ni skye bar 'gyur la/ skyes pa rnams ni 'phel zhing rgyas pa dang / yangs par 'gyur ro/ /de'i phyir smras pa/ brtson 'grus la brten nas thos pa dang / bsams pa dang / bsgoms pa las byung ba zhes bya ba la sogs pa la/ thos pas bzung nas bsams shing sgom par byed do zhes bya ba'i don to//de ltar thos pa la sogs pa'i sbyor bas thos pa'i shes rab kyis phung po la sogs pa la nye bar rtogs par byed do zhes bya ba smras pa/ phung po la mkhas pa dang zhes bya ba la sogs pa yin no/ /de ltar re zhig ye shes la mkhas pa'i dbang du byas nas bstan nas/bden pa rnam par 'byed pa la mkhas pa'i dbang du byas nas smras pa/ sdug bsngal la ni zhes bya ba la sogs pa'o/ /chos rab tu rnam par 'byed pa la mkhas pa'i dbang du byas nas/ dge ba'am zhes bya ba la sogs pa'o/ /yang bsam gtan ni rnam par g.yeng ba med pa/sems rtse gcig pa yang dag par nye bar gtod pa'o/ /de'i phyir sems rnam par g.yengs pa rnams kyis dge ba la sbyor bar mi nus pas dge ba thams cad la bsam gtan dang ldan no zhes bstan pa'i phyir smras pa/ bsam gtan la brten nas zhes bya ba la sogs pa'o/ / rnam pa drug yod do zhes bya ba ni pha rol tu phyin pa drug gi mtshan nyid can no/ /yang na bsod nams dang bsod nams kyi phyogs brtson 'grus dang / bsam gtan zhes bya ba dang rnam pa gsum mo/ /ye shes dang ye shes kyi phyogs brtson 'grus dang / bsam gtan zhes bya ba dang rnam pa gsum mo/ /de re re'i rnam par dbye ba ni tshad med par rig par bya'o zhes bya ba ni sbyin pa la sogs pa'i dngos po dpag tu med pa'i sgo nas zhugs pa'i phyir ro//bsod nams dang ye shes kyi mtshungs pa'i rgyu khas blangs nas dris pa ni bsod nams dang ye shes kyi rgyu gang zhe na zhes bya ba'o/ /lan yang dus gcig tu btab pa ni mdor bsdu na gsum yod par rig par bya ste zhes bya ba la rgyu dang rkyen bsdoms nas rgyu zhes rnam par gzhag go//'das pa dang da ltar gyi tshe'i rkyen gyi dbang du byas nas rgyu zhes bya bar bstan te/ mdor bsdu na dge ba'i chos skye bar byed pa ni bzhi yin te/ skyes bu dam pa la brten pa dang /dam ba'i chos nyan pa dang / de la tshul bzhin yid la byed pa dang / skye ba snga ma'i dus su spyad pa dang bzhi ni rgyu gnyis su rnam par gzhag par bya'o/ /'di dag tu ma gtogs pa ni dge ba'i chos la 'dun pa ste chos thams cad kyi rtsa ba ni 'dun pa yin pa'i phyir rgyu khyad par du 'phags pa'i mtshan nyid can rnams kyi nang nas dang po'i rgyu yin no//yang 'dun pa de ni rnam pa gsum ste/ ma thob pa thob par bya ba'i phyir smras pa ni/ 'thob pa dang zhes bya ba'o/ /thob par gyur pa rnams mi nyams pa'i sbyor ba la gnas pa ni gang yang gnas pa dang zhes bya ba'o/ /gnas pa rnams gong nas gong du 'phel ba dang rgyas par 'gyur ba dang /'dun pa zhes bya ba ni rgyu dang po ste/ yang dag pa'i spong ba tha ma'i rjes su 'brangs nas shes par bya'o/ /mthun la zhes bya ba'i don bstan pa'i phyir/ mi mthun pa med pa zhes bya ba ste/ skye ba gzhan dag tu goms par byas pas ni rgyu nye bar bsags par 'gyur ro//rgyu nye bar bsags pa dang ldan pa ni bsod nams dang ye shes skyed par byed kyi ma bskyed pa ni ma yin no/ /de'i phyir sngon yang zhes bya ba la sogs pa'o/ /de la mi mthun pa med pa'i rkyen ni dngos po med pa dang / dngos po dang ldan pa rnam pa gnyis su bstan pa'i phyir dngos po kha cig mngon du ma gyur pas mi mthun pa med pa yin la/dngos po kha cig mngon du gyur pa dang ldan pas mi mthun pa med pa ste/ bar du gcod pa'i rgyu med cing bar chad ma yin pa'i rgyu dang ldan pas dngos po rnams skye bar 'gyur ro zhes bya bas gnyi ga yang mi mthun pa med pa'i rkyen du bstan pa yin no/ /phyin ci log mi mthun pa'i phyogs 'gal ba dag bsod nams dang ye shes ma yin pa skye ba'i mthun pa yin pa de dag ni bsod nams dang ye shes la phyin ci log tu gyur pa'i phyir/phyin ci log gi rkyen zhes bya'o/ /des na smras pa/ nye bar mi gnas shing zhes bya ba la/ nye bar mi gnas pa ni nye bar ma gyur pa'o/ / nye bar ma gyur pa nyid de nye bar ma gyur pas na phyin ci ma log pa'i rkyen ni nye bar gnas pas bsod nams dang ye shes skye ba la rjes su mthun pa yin no/ /phyin ci log gi rkyen bstan par bya ba'i phyir/ sdig pa'i grogs po zhes bya ba la/ sngar bstan pa bzhin du rig par bya ba'am/sdig pa'i grogs po ni rnam pa bzhi ste zhes bya ba'i mdo'i rjes su 'brangs nas shes par bya'o/ /phyin ci log tu bstan pa ni 'jig rten 'phel bar byed pa dag gi bstan bcos kyi rjes su 'brangs nas shes par bya ste/ byol song 'ching ba la sogs pa ni bsod nams rab tu 'phel ba'i rgyur rnam par 'jog par byed la/de'i bcings pa bkrol na bsod nams ma yin par rnam par 'jog par byed pa dang / nyan thos kyi bslab pa phyogs gcig pa'i rjes su 'brangs ba dag kyang byang chub sems dpa'i bslab pa las phyin ci log tu ston par byed pa yin te/ sa le sbram dang /dngul la sogs pa ma blangs na bsod nams 'phel bar 'gyur ro zhes bya ba la sogs pa lta bu'o/ /mu stegs kyi bstan bcos kyi rjes su 'brangs nas ye shes phyin ci log tu bstan pas/ mi shes pa dang the tshom dang 'chal pa'i shes pas bslab pa rab tu thob cing ldan par 'gyur ro//chos 'di pa kha cig kyang chos rnams phyin ci log gi mtshan nyid du rnam par 'jog cing phyin ci log gi mtshan nyid du 'dzin par 'gyur te/ de bzhin du log par nges par 'gyur ro/ /bsod nams dang ye shes thob pa dang zhes bya ba la/ mi dge ba'i chos skye ba'i rkyen ma yin na yang 'gal ba'i rkyen gzhan dag kyang yod do zhes bstan pa nyid ni de yang sngar gyi lus dang sems g.yo bar byed pa ji ltar nyan thos kyi sa las bstan pa lta bu rnams so//rgyu gsum po 'di dag ma lus pa ma tshang ba med pa nyid bsod nams dang ye shes kyi tshogs kyi rgyur 'gyur ro zhes bstan pa'i phyir/ rgyu gsum po 'di dag las zhes bya ba la sogs pa'o//de la bsod nams kyi 'bras bu ni rnam par smin pa'i 'bras bu nyid dang / de la yang dag par brten pa'i sems can gyi don bya bar rig par bya'o/ /ye shes kyi 'bras bu ni ye shes kyi rgyu mthun pa'i 'bras bur rig par bya'o/ /gnod pa med par zhes bya ba ni rjes su mi mthun pa med pa ste/sdug bsngal gyi gnod pa med pa zhes bya ba'i don to/ /de'i phyir smras pa/ sdug bsngal dag gis shin tu gzir ba med pa zhes bya ba la sogs pa la/ bsod nams kyis bsdus pa'i pha rol tu phyin pa gsum dang ldan pas rnam par smin pa'i longs spyod dang /bdag gi dngos po dang / 'khor phun sum tshogs par longs spyod kyis rgud pa'i sdug bsngal dang / bdag gi dngos pos rgud pa'i sdug bsngal dang / 'khor gyis phongs pa'i sdug bsngal gyi gnod pa med par 'khor ba na 'khor ba'i longs spyod chen po la brten nas sems can gyi don bya bar nus par 'gyur ro//bdag gi dngos po'i rnam par smin pa la brten nas bsdu ba'i dngos po gzhan gsum gyis sems can gyi don byed par nus so/ /de ltar bdag dang gzhan gyi rgyud la brten nas bsod nams kyi 'bras bu rnam pa gnyis so/ /ye shes la brten nas ni phyin ci ma log pa dang rgya che ba'i bsod nams byed pa dang /nye bar sogs par 'gyur te/ dge ba'i chos rnams kyi sngon du 'gro ba ni rigs pa yin pa'i phyir ro/ /ye shes kyis ni shes bya'i rnam pa thams cad rab tu rnam par 'byed pa'i mtshan nyid can gyi sbyor ba goms par byas pas rgyud khyad par du 'phags pa'i ye shes kyis bla na med pa yang dag par rdzogs pa'i byang chub rtog par 'gyur ba'i 'bras bur rig par bya'o//de ltar na bsod nams kyi rnam pa gnyis dang / ye shes kyi rnam pa gnyis kyis rnam pa bzhir 'gyur ro/ /khongs su gtogs pa rnams kyi dbye ba ni dpag tu med do/ /rnam par smin pa dang /de'i rgyu dang / de'i 'bras bu las bsod nams dang ye shes dag gis byed pa'i gtso bo nyid du gyur pas bla na med pa yang dag par rdzogs par byang chub par 'gyur bar bstan pa'i phyir smras pa/ de la rnam par smin pa'i rgyu gang yin pa dang zhes bya ba la sogs pa la/ de'i phyir de dag kyang tshogs su rnam par gzhag par bya ba nyid do//bsod nams la brten cing bsod nams las byung ba nyid do zhes bya ba ni/ re zhig rnam par smin pa nyid ni bsod nams las byung ba'i phyir bsod nams la brten pa nyid yin no/ /gnod sems med pa la sogs pa rnam par smin pa'i rgyu rnam pa brgyad kyang sngon bsod nams byed pa goms pa'i stobs la brten nas zhes byas nas bsod nams la brten pa nyid do//dus ring por dge ba bsags pa la sogs pa rnam par smin pa'i 'bras bu yang sngon bsod nams goms par byas pa'i stobs nyid kyi rgyu mthun pa nyid kyis 'jug par 'gyur ro zhes byas nas de yang bsod nams la brten pa nyid do//de ltar na re zhig bsod nams gtso bo yin no/ /bsod nams kyang ye shes la brten pa yin te/ ye shes la brten nas bsod nams yongs su rdzogs par byed do zhes bya ba'i tshig gis so/ /de lta bas na rnam par smin pa la sogs pa chos dgu po gang yin pa de dag las 'di gnyis kho na gtso bo'i byed pa ste/bsod nams dang / ye shes yongs su rdzogs par byas nas/ bla na med pa yang dag par rdzogs pa'i byang chub 'thob pa'i gzhi yin no/ /de dag las kyang ye shes gtso bo yin par bstan pa'i phyir/bsod nams kyang de'i rgyu can yin pa'i phyir ro/ /rigs pa zhes bya ba ni kha na ma tho ba med pa'i las so/ /dpyas dang bcas pa'i las kyi gnas kyis longs spyod bsgrub pa ni gnod par 'gyur ba'i phyir ro/ /tshod zin par longs spyad par bya ste/ tshod ma zin par longs spyod pa ni tshul ma yin pa'i rgyu yin pa'i phyir dang /nad rnams 'byung ba'i gnas yin pa'i phyir gnod par 'gyur ba yin no/ /de ltar re zhig bdag po'i 'bras bu so sor myong ba mthong ba'i chos kyi don nyid bstan nas/ da ni rnam par smin pa'i 'bras bu so sor myong ba bstan pa'i phyir/ rnam par smin par 'gyur ba'i sngon gyi las kyi rnam par smin pa zhes bya ba ni/rnam par smin pa las byung ba zhes bya ba'i don to/ /mthong ba'i chos la bde bar gnas par bya ba nyid kyi phyir bsam gtan bsgrubs nas bsam gtan gyi sbyor bas mthong ba'i chos la bsam gtan bsgyur ba la mkhas pas/ tshe 'di nyid la bde ba la rig par bya ba'i phyir yin gyi/tshe gzhan gyi don du ni ma yin te/ bsam gtan gyis bsgyur ba'i phyir ro/ /bsam gtan gyi sbyor ba de ni gzhan gyi don du sbyor ba ma yin te/ gzhan du sbyor bar gyur na 'jig rten pha rol por 'gyur ro/ /de bzhin gshegs pa mthar thug pa rnyed par gyur pa'i phung po'i lhag ma dang bcas pa'i mya ngan las 'das pa mngon sum du mdzad pa nyid ni mthong ba'i chos kyi don nyid yin te/des rnam par grol ba'i bde ba rab tu bstan pa'i phyir dang / skye ba gzhan mi mnga' ba'i phyir ro/ /de bzhin gshegs pa smos pa ni byang chub sems dpa'i mthong ba'i chos la mya ngan las 'das pa bsal ba'i phyir te/de'i de ni pha rol du yang 'byung ba yin te/ skye ba khyad par can gong nas gong du 'gro bar 'gyur ba 'thob pa'i phyir ro/ /'jig rten dang 'jig rten las 'das pa'i chos dang / mthong ba'i chos kyi lam dang / tshogs su gyur pas lus dang sems rjes su sdud par byed pa'i phyir mthong ba'i chos kyi don to//phyi mar yang skye bar gyur pa med pa'i phyir pha rol med pa zhes bya ba'i don to/ /gzhan gang dag byang chub sems dpas btul ba zhes bya ba la/ gang dag byang chub sems dpas ji skad bstan pa'i don la yang dag par sbyar ba dang /nges par yang dag par sbyar ba de dag gi mthong ba'i chos kyi don yin no/ /'phangs shing yongs su gzung bas skye ba phyi ma la longs spyod pa'i 'bras bu ni longs spyod phun sum tshogs pa zhes bya'o/ /de ni yang phyi ma pa zhes bya ba'i don to/ /ma 'ongs pa na rnam par smin par 'gyur ba'i phyir ro//'dod pa'i khams smos pa ni gzhan dag na longs spyod kyi rnam par smin pa med pa'i phyir ro/ /'dod pa'i khams de na tshe phyi ma'i lus phun sum tshogs pa ni 'jig rten phyi ma pa zhes pa'i don te/ dge ba'i rnam par smin pa nyid kyis ma 'ongs pa sdud par byed pa'i phyir dang /rnam par smin pa gzhan dang sbyor ba med pa'i phyir ro/ /bsam gtan dang gzugs med par skye ba zhes bya ba ni bsam gtan dang gzugs med par bdag gi lus len pa zhes bya ba'i don to/ /phun sum tshogs pa gnyis po 'di dag ni bsam gtan dang gzugs med par skyes pa rnams kyi rgyur gyur pa sbyin pa dang /tshul khrims dang / sgom pa la brten pa ni phyi ma'i don to/ /de dag sdug bsngal gyis 'jug par 'gyur ba ni mthong ba'i chos ma yin pa'o/ /phyi ma la 'dod pa'i rnam par smin par 'gyur bas pha rol po zhes bya'o/ /de bde ba dang yid bde ba dang bcas pas dge ba'i chos la sbyor bar gyur na mthong ba'i chos dang phyi ma gnyi gar rig par bya'o//de lta bu'i tshul gyis gzhan dag la yang de bzhin du gzhan gyi don du 'gyur bar rig par bya'o/ /gang dag byang chub sems dpas btul bar gyur pa zhes bya ni snga ma bzhin no/ / longs spyod dang lus phun sum tshogs par 'gyur ba zhes bya ba la de'i skye ba gcig tsam gyis bsgos pa'i phyir gtan du ba ma yin pa nyid de/ de'i rgyu yang tshad yod pa'i skye bas thob pa'i phyir gtan du ba ma yin pa nyid do/ /'jig rten pa'i dag pa 'jig rten pa'i lam gyis 'dod chags dang bral bar gyur pa ni nyams par yang 'gyur ba dang /yang 'dir 'byung bar 'gyur ba'i phyir ro/ /so so'i skye bo smos pa ni bden pa mthong ba bsal ba'i don to/ /bden pa mthong bas 'jig rten pa'i lam nyid kyis 'dod chags dang bral bar gyur na gtan du ba zhes bya'o/ /nyon mongs pa thams cad gtan spangs pa'i mya ngan las 'das pa 'dus pa 'dus ma byas pa de ni gtan du ba'o/de'i phyir yongs su nyams pa dang / de'i phyir 'ong ba med pa'i phyir ro/ /de 'thob par byed pa'i 'phags pa'i lam yang gtan du ba nyid dang / yongs su mi nyams pa nyid do/ /byang chub sems dpa'i yon tan khyad par can du gyur pa de la brten pa de dag kyang yongs su nyams pa med pa yin no zhes bya'o//yang de ni sa gnon cing yongs su sbyong ba'i dus su rig par bya'o/ /'dus byas kyi chos rnams ni mi rtag pa dang / ther zug pa la sogs pa ma yin pa rnams ji ltar gtan du bar 'gyur zhe na/rnam par phye nas bstan par bya ba'i phyir/ rgyu rnam pa gsum gyis na zhes bya ba la sogs pa la/ ngo bo nyid ni mya ngan las 'das pa zhes bya ba ste/ de ni 'dus ma byas pa'i phyir rtag pa nyid kyis na gtan du ba nyid do/ /'dus byas pa rnams ni mi rtag pa'i phyir gtan du ba ma yin pa'o//'phags pa'i lam ni yongs su nyams pa ma yin pas rtag tu rjes su ldan pa nyid do/ /des na de'i rnam grangs ni gtan du ba zhes bya ste/ 'bras bu longs spyad nas zad par mi 'gyur ba'i phyir yod do/ /'bras bu byin nas ldog bar gyur pa ma yin pa zhes bya ba'i don te//ji ltar zag pa dang bcas pa'i dge ba ni 'bras bu ma myong gi bar du rgyud la nges par 'brel par gnas la 'bras bu byin nas nges par ldog par 'gyur ro/ /des na 'bras bu nye bar longs spyod nas zad par 'gyur ba'i phyir gtan du ba ma yin pa'o//lam ni de lta bu ma yin no/ /des na de las gzhan pa'i zhes bya ba la sogs pa yin no/ /ci nus zhes bya ba la sogs pa la byang chub sems dpa' sa bcu gcig la 'jug par 'gyur ba na bdag nyid kyi nus pa dang mthun par bslab par bya'o/ /dus gsum du byang chub sems dpa' thams cad kyis bslab pa'i gnas kyi don bcu po 'di dag la bslab par bya'o zhes bstan pa'i phyir/'di las gong na yang med ces bya ba la sogs pa smras so/ /byang chub sems dpa'i sa'i 'grel pa las bdag dang gzhan gyi don gyi le'u'i bshad pa ste gsum pa rdzogs so// //bdag dang gzhan gyi don bslabs par gyur pa'i byang chub sems dpas de kho na nyid kyi don la slob par byed na nyon mongs pa med par 'gyur ro zhes bya bar de'i rjes la de kho na nyid kyi don bstan to/ /nyon mongs pa med pa yang rnam pa gnyis te/nyon mongs pa med pas nyon mongs pa med pa dang / rnam par rtog pa med pa'i nyon mongs pa med pa'o/ /gnyi ga'i nyon mongs pa med pa ni de kho na rnam par rig par 'gyur ro zhes bya bar de kho na'i don gang zhe na zhes bya ba smras te/ de'i ngo bo nyid ni de nyid do//de kho na nyid kyi don ni de kho na'i don te/ ye shes kyi spyod yul dang yul nyid do/ /mdor bsdu na de kho na nyid ni rnam pa gnyis te/ dngos po'i de kho na nyid dang / chos rnams kyi rang gi rang bzhin ni 'di'o zhes yongs su gcod pa'o/ /de dag ni dngos po ma lus pa'i de nyid de/ chos de dag kyang 'di tsam mo zhes grangs yongs su gcod pa'o/ /de'i phyir smras pa/ ji ltar yod pa las brtsams te/ /zhes pa la sogs pa la/ ji ltar ni phyin ci ma log pa'o/ /'di yod pa'i ngang tshul can ni ji ltar yod pa'o/ /ji ltar yod pa nyid ni ji ltar yod pa can no/ / de'i ngo bo ni ji ltar yod pa nyid do/ /de las brtsams te zhes bya ba ni de'i dbang du byas nas de kho na dang po'i don phyin ci ma log par rnam par gzhag par bya ba'o/ /de'i phyir smras pa/ chos rnams kyi yang dag pa nyid/ /ces bya ba ni yang dag pa nyid dang / phyin ci ma log pa nyid de dngos po nyid kyi ji lta bu nyid do//ji snyed yod pa zhes bya ba la sogs pa yang snga ma bzhin du rig par bya'o/ /thams cad nyid ces bya ba ni ma lus pa ste/ kun zhes bya ba'i don to/ /de kho na'i don mtha' dag yin par rig par bya'o zhes bya ba ni mdor bsdus nas zhes bya ba'i don to//de la de kho na'i don ni rnam pa gnyis te/ shes pa rnam pa gnyis gnyis skyed par byed do/ /'jig rten pa'i 'khrul pa med pa'i shes pa dang / chos 'di pa rnams kyi phyin ci ma log pa'i shes pa ste/ kun rdzob kyi shes pa dang / don dam pa'i shes pa'i dbang du byas pa'o//kun rdzob kyi shes pas bsdus pa'i 'khrul pa med pa'i shes pa yang rnam pa gnyis te/ tha snyad kyi rjes su zhugs pa tha snyad du gdags pa 'jig rten tha mal pa rnams kyi dang / rigs pas nye bar brtags pa'i rjes su 'jug pa'i rigs pas bsgrubs pa dang ldan pa ni khyad par du 'phags pa'i 'jig rten gnyis pa rnams kyi'o//de la chos 'di pa rnams kyi de kho na 'khrul pa med pa'i ye shes kyang rnam pa gnyis te/ nyon mongs pa can gyi ma rig pa'i gnyen po'i phyogs su gyur pa rig pa'i mtshan nyid dang nyon mongs pa can ma yin pa'i ma rig pa'i gnyen po'i phyogs su gyur pa thogs pa med pa'i ye shes te/don dam pa'i bden pa'i dbang du byas pa'o/ de'i phyir smras pa/ de kho na'i don de yang rab tu dbye na rnam pa bzhi ste zhes bya ba la 'jig rten pa rnams la grags pa ni 'jig rten gyi grags pa ste/ 'jig rten gyi chos kyi rtsod pa med pa'i mthar thug pa'o zhes bya bas byis pa dang mkhas pa'i bar gyi 'jig rten pa rnams gang dag la mtshungs par blo 'jug par 'gyur zhing grags pa'i dbang gis tha mi dad par mthong ba'o//de'i phyir 'jig rten gyi grags pa zhes brjod pa yin no/ /rigs pa ni rab tu grags pa'i tshad ma rnam pa gsum mo//grags pa ni so sor shes pa dang khong du chud pa ni rigs pas grags pa'o/ /nyon mongs pa nyid sgrib pa yin pas nyon mongs pa'i sgrib pa ste/ rang gi gnyen po'i phyogs kyi ye shes skye ba la bar du gcod pa'i phyir ro/ /de las rnam par grol ba'i ye shes ni nyon mongs pa'i sgrib pa rnam par dag pa'i shes pa ste/ma rig pa dang bral ba ni shes rab kyi rnam par grol ba'o zhes bya ba'i tshig gis so/ /rnam par grol ba gang yin pa de ni rnam par dag pa'o/ /de'i yul nyid ni spyod yul te/ de kho na'i don gsum pa'o/ /shes bya nyid sgrib pa yin pas shes bya'i sgrib pa ste/shes bya nyid ni de dang 'du ba ste/ gang sangs rgyas kyi ye shes las gzhan pa'i shes pa rnams zil gyis mnan nas 'jug pa'o/ /des rnam par dag pa'i shes pa ni shes bya'i sgrib pa rnam par dag pa'i shes pa ste/ shes bya thams cad la chags pa med cing thogs pa med pa'o//de'i spyod yul du gyur pa ni de kho na bzhi pa'o/ /de ltar na 'dir chos 'di pa rnams kyi yang 'jig rten pa'i bzhin du tha mal pa dang / khyad par du 'phags pa'i dbye bas ye shes gnyis su rig par bya'o/ /de ltar re zhig mdor rnam par bzhag nas de kho na nyid bzhi'i don mdor bstan pa de dag rnam par dbye zhing bshad pa'i phyir smras pa/de la brda dang zhes bya ba la sogs pa la/ thams cad kyi zhes bya ba ni byis pa nas mkhas pa'i bar tha snyad mkhas pa rnams kyi'o/ /dngos po gang la zhes bya ba ni mdor bsdu na 'chad par 'gyur ba'i dngos po rnam pa bzhi po 'di lta ste/'byung ba'i dngos po dang / 'byung ba las gyur pa'i dngos po dang / de sdom pa'i dngos po dang / gnyi ga ma yin pa'i dngos po'o/ /mthong ba mtshungs pa'i rgyu bstan pa'i phyir smras pa/ brda dang kun rdzob la 'dris pa'i rjes su 'gro bas zhes bya ba ni/brda dang kun rdzob la 'dris pa'i rjes su 'gro bas zhugs pa'i blo skye bar 'gyur ba zhes bya ba'i don to/ /dngos po gang las 'jig rten pa thams cad kyi rtsod pa med pas rtsod pa dang bral ba'i lta mtshungs par gyur pas mtshungs pa'i blo dang shes pa skye bar 'gyur ba de la de kho na nyid ces bstan pa yin no//de la brda ni ming la nges par sbyor ba ste/ des dngos po rnams de lta de ltar mtshon par byed pa'o/ /kun rdzob ni tha snyad de/ brtags nas ji ltar 'du shes 'jug par 'gyur ba de ltar tha snyad du byed par zhes bya ba'i mdo'i tshig gis so//'dris pa ni de dag nyid skye ba gcig nas gcig tu brgyud pa dpag tu med par goms pas rjod pa dang brjod par bya ba'i mtshan nyid can gyi sgra dang 'brel pa ste/ dngos po 'di'i ming ni 'di yin no zhes btags pa'o/ /de'i rjes su 'gro bar zhugs pa ni brda dang kun rdzob la 'dris pa'i rjes su 'brang zhing de'i sgo nas zhugs shing rab tu zhugs pa na blo de'i rjes su zhugs shing skyes pas lta ba mtshungs par gyur pa ste/dngos po la mos pa mtshungs par gyur ces bya ba'i don to/ /dngos po'i tshogs de'i dbang du byas nas rnam pa gsum du brtag par bya ste/'byung ba'i dngos po dang / 'byung ba las gyur pa'i dngos po dang / gnyis ka'i dngos po'o/ /lus kyi yo byad rnam pa bcu'i dbang du byas pa dang yongs su bzung ba'i dngos po'i dbang du byas pa'o/ /rgyan du bya ba dang / snod spyad dang zhes bya ba la/ nye bar spyod pa ni nye bar spyod pa ste/rgyan la sogs par gtags pa mtshungs pa zhes bya ba'i don to/ /sems dang sems las byung ba'i tshogs rab tu grags pa'i dbang du byas nas/ bde ba dang sdug bsngal la yang zhes bya ba'i tshig smras so/ /'dus ma byas ni rjod pa tsam du zad kyi tha snyad du bya ba ma yin pas 'dus byas rnams bstan to//'di ni 'di yin gyi 'di ni ma yin no zhes nges par dpyod pa na shes pa mtshungs par bstan pa'i phyir 'di ni 'di yin gyi gzhan ni ma yin no zhes nges pa'i dngos po la mos pa mtshungs pa ni dngos po la mos pa mtshungs pa'am/ nges pa'i rnam pa la lhag par mos ba'o//lhag par mos pa gang yin zhe na/ nges pa'i dngos po la de bzhin du 'dzin pa zhes bya ba ni mtshan nyid nges par bstan pa yin no/ /de'i 'jig rten gyi grags pa'i de kho na bstan pa'i phyir smras pa/ gcig nas gcig tu 'ongs pa zhes bya ba la sogs pa la/ gcig nas gcig tu 'ongs pa ni brda dang 'dris pas zhes bya ba'i don to/ /rang gi rnam par rtog pa las grags pa zhes bya ba ni skye ba de dang yul der sngon gyi rnam par rtog pa'i dbang gis rab tu grags pa'o/ /de las gzhan du yang bshad pa ni/ gcig nas gcig tu 'ongs pa zhes bya ba ste/brda'i rjes su 'gro ba'i don sngar bstan pa nyid brjod pa'i phyir rang gi rnam par rtog pa las grags pa zhes bya ba yin no/ /ma bsams ma brtags ma dpyad par zhes bya ba la sogs pas ni rigs pas grags pa rnam par gcod par byed pa yin te/ tshad ma'i sgo nas len par byed pa ma yin gyi/'on kyang thog ma med pa'i dus nas gcig nas gcig tu brgyud de 'ongs pa'i ming gi rnam par rtog pa'i dbang gis so zhes bstan pa'i phyir ro/ /'jig rten rnams kyi mkhas par 'dod pas na mkhas pa'o/ /rigs pa'i don ni phyin ci ma log pa'i don to//shes rab la mkhas pa dang ldan pas rigs pa'i don la mkhas pa dang / 'jig rten pa'i yang dag pa'i lta ba dang ldan pa'o/ /'di dag gis ni mu stegs can gyi bstan bcos kyi rjes su 'brangs pa'i mkhas pa bkag pa yin te/ de dag ni phyin ci log gi shes rab kyi rigs pa ma yin pa'i don la mkhas par 'gyur ba'i phyir ro//rigs pa'i don rnams gzhan dag la rab tu bsgrub pa la mkhas pa ni mdzangs pa zhes bya'o/ /rtogs pa dang lung dang bral bas de dag rigs par ltung ba bstan par bya ba'i phyir smras pa/ rtog ge pa zhes bya ba la sogs pa la/rnam pa gnyis kyis rtog ge par 'gyur te/ kun du rtog pa na gzhan sel ba'am/ bsgrub par nus pas spyod pa dang ldan pa zhes bya ba dang / ring du rnam par 'phros par gyur kyang rtog ge pa yul las 'das par mi 'gyur te/ rtog ge'i yul la gnas pa yin gyi/ rtogs pa la yang ma yin/lung yang ma yin pa'o/ /gang smras pa/ rtog ger gtogs pa'i sa'o/ /spobs pa las byung ba zhes bya ba la yang rtog ger gtogs pa'i sa de gang yin zhe na/ de rnam pa gsum du bstan pa'i phyir/ sngon rtog ge la goms par byas shing zhugs pas rang gi spobs pa las byung ba'o//zag pa med pa'i rtogs pa dang mi ldan pas so so'i skye bo pa zhes bya'o/ /lung gi sgo nas ma skyed cing rtog ge skam po tsam las byung ba'i phyir dpyod pa'i rjes su spyod pa la gnas pa'o/ /de bzhin du tshig gcig ni bstan pa'o//tshig gnyis ni bshad ba'o/ /tshig gsum pa ni bstan pa'o/ /gnyis pa ni bshad pa'o/ /gsum pa ni bshad pa'i bshad pa zhes rig par bya'o/ /yang de dag gi shes pa ni rigs pa'i sgo nas skyes pa yin gyi rnam par rtog pa'i sgo nas ni ma yin no/ /rigs pa yang tshad ma rnam pa gsum du bstan par bya ba'i phyir smras pa/rang gi rtogs pa rnam pa gsum gyi dbang du byas nas ni mngon sum dang rjes su dpag pa'i don dang / dad par bya ba'i don to/ /yang rang gi mtshan nyid dang / spyi'i mtshan nyid dang / khyad par gyi mtshan nyid do//shin tu rnam par phye ba ni rjes su dpag pa dang / lung skyon med pa'i sgo nas skyes pa nyid do/ /nges pa ni mngon sum la brten nas skyes pa nyid do/ /rtags mthong ba dang / dbang po ni rjes su dpag pa dang / mngon sum zhes byas nas so/ / yang na shin tu rnam par phye ba ni rigs pa'i sgo nas skyes pa'i phyir ro/ /nges pa ni mi 'phrogs pa'i phyir ro/ /yang na mi shes pa dang / phyin ci log gi shes pa'i gnyen po'i phyogs yin pa'i phyir shin tu rnam par phye ba'o/ /the tshom gyi shes pa'i gnyen po'i phyogs yin pa'i phyir nges pa'o/ / de ltar na mi shes pa dang / phyin ci log gi shes pa dang / the tshom gyi shes pa las rnam par grol ba ni 'jig rten pa'i yang dag pa'i shes pa zhes brjod par 'gyur ro/ /dngos po rnam pa gsum po de dag gi rigs pas gzhan dag la rab tu bsgrub pa ni rigs pas rab tu bsgrub pa zhes bya'o//rjes su dpag pa'i mtshan nyid kyi rigs pas rab tu bsgrubs shing lung gi mtshan nyid can gyis rnam par gzhag pa'o/ /yang na don gcig pa nyid do/ /thams cad kyi zhes bya ba smos pa ni dman pa dang 'bring dang khyad par du 'phags pa gnyis kyis nyan thos rnam pa gsum dang / rang sangs rgyas rnam pa gsum gyi rtogs pa mnyam par rab tu bstan pa'i phyir ro//nyon mongs pa rnams kyi sngon du 'gro ba ni ma rig pa yin pa'i phyir ro/ /ma rig pa'i gnyen po'i phyogs skyes par gyur na rab tu spong bar 'gyur ro/ /de'i phyir rigs pa'i spyod yul gyi dngos po ni nyon mongs pa'i sgrib pa rnam par dag pa'i ye shes kyi spyod yul yin no zhes bstan pa'i phyir smras pa/rigs pa yang rnam pa gsum du rnam par gzhag par bya ste/ dngos po la rnam par spyod pas dang / dngos po mngon par rtogs pas dang / dngos po rnam par 'jog pas so/ gtso bo ni 'jig rten las 'das pa'i ye shes te/ dngos po rnams ji lta ba bzhin du rab tu rnam par 'byed pa ni rigs pa zhes brjod do/ /ji skad du mdo gzhan dag las rab tu shes shing rab tu shes pa ni rigs pa zhes brjod do zhes bstan pa yin no/ /ci zhig rab tu shes she na/ gzugs dang /gzugs kun 'byung ba dang / gzugs 'gog pa dang / gzugs 'gog par 'gyur ba'i lam dang / des ni 'phags pa'i bden pa bzhi la dmigs pa bstan pa yin no/ /de dag nyid bshad pa'i phyir/ zag pa med pa dang zhes bya ba'o/ /de'i tshogs su gyur pa'i phyir dang /de la rnam par dpyod pa dang ldan pa'i phyir thos pa las byung ba'i shes pa la sogs pa yang rigs pa zhes bya'o/ /de'i phyir smras pa/ zag pa med pa thob par byed pa zhes bya ba la sogs pa'o/ /de'i rjes la thob pa dag pa 'jig rten pa yang de'i rgyus byung ba'i phyir rigs pa zhes brjod do//gang gi phyir smras pa/ zag pa med pa'i rjes la thob pa zhes bya ba la/ de thob par byed pa dang / de'i rjes la thob pa'i dbang du byas nas 'jig rten pa'i zhes bya ba'o/ /gang gi spyod yul dang yul du gyur bas zhes bya ba ste/ de'i phyir shes bya dang yul zhes bya ba'i don to/ / don gang gis na shes bya rnam pa gsum nyon mongs pa'i sgrib pa rnam par dag pa'i ye shes kyi spyod yul yang rigs pa zhes brjod do/ /des na de'i rgyu bstan pa'i phyir smras pa de la dmigs pas zhes bya ba la sogs pa la/ nyon mongs pa'i sgrib pa las shes pa rnam par dag par 'gyur ba zhes bya ba 'dis ni ngo bo nyid kyi rnam par grol ba'i rnam par grol ba bstan pa yin no//phyis sgrib pa med pa nyid du yang dag par gnas par 'gyur te zhes bya bas ni rgyud rnam par grol ba bstan pa yin no/ /yang na zag pa med pa dang / de 'thob par byed pa ni nyon mongs pa'i sgrib pa rnam par dag pa'o//de'i rjes la thob pa ni sgrib pa med pa nyid du yang dag par gnas pa'o/ /da ni de kho na'i dngos po bstan pa'i phyir/ 'phags pa'i bden pa bzhi ste zhes bya ba la/ bden pa bzhi shes pa ni 'khor ba'i gnyen po yin pa'i phyir dngos po de la dmigs pas nyon mongs pa spong bar 'gyur te/yang dag mthong na rnam par grol/ /zhes bya ba'i tshig gis so/ /ji skad du mdo gzhan dag las 'phags pa'i bden pa bzhi po 'di dag ma mthong ba dang / ma rtogs pa dang so sor ma rtogs pas khyed rnams yun ring por 'khor ba na 'khor zhing rgyug par gyur to zhes bstan pa yin no//rab tu rnam par 'byed pa ni zag pa med pa 'thob par byed pa bden pa rnam par 'byed pa'i gnas skabs na'o/ /mngon par rtogs par byed pa ni zag pa med pa'i ye shes mngon par rtogs pa'i dus na'o/ / mngon par rtogs par gyur pa'i ye shes ni de'i rjes la thob pa bden pa rnam par 'jog pa'i dus kyi'o/ /yang ye shes de dngos po de dag la rnam pa gang dag gis ji ltar skye bar 'gyur/ rim pa ni gang gis she na/ de'i rnam pa dang go rims bstan pa'i phyir smras pa/ bden pa mngon par rtogs pa de yang zhes bya ba la sogs pa la/yod pa la yang yod pa nyid kyi rnam par dmigs nas shes pa skye bar 'gyur ro/ /med pa la yang med pa'i rnam par dmigs nas shes pa skye bar 'gyur ro/ /de'i phyir smras pa/ phung po tsam du dmigs shing zhes bya ba la sogs pa la/'dis ni gang zag la bdag med par rab tu rtogs pa'i rnam pa skye bar 'gyur ro zhes bstan par 'gyur ro/ /go rims bstan pa'i phyir smras pa/ rten cing 'brel par 'byung ba'i 'du byed skye ba dang 'jig pa dang ldan pa'i shes rab kyi phung po las ma gtogs pa'i gang zag med par lta ba goms par byas pa la 'byung ngo zhes bya ba ni stong pa dang bdag med par mthong ba goms par zhes bya ba'i don to//shes bya la shes pa'i bgegs byed pa zhes bya ba ni shes bya la shes pa 'jug pa'i bgegs su gyur pa'o/ /ye shes dang rab tu 'brel pa'i bgegs yod par gyur pa de ni nyon mongs pa can ma yin pa'i mi shes par rig par bya ste/nyan thos la sogs pa'i 'o/ /so so'i skye bo rnams kyis ni nyon mongs pa can dang nyon mongs pa can ma yin pa yang ngo / /yang kha cig ni shes bya nyid sgrib pa yin pas shes bya'i sgrib pa yin no zhes rnam par 'jog par byed de/shes bya nyid ni de bzhin du gnas na yang sangs rgyas nyid kyi mkhyen pa las gzhan pa'i shes pa las lhag par gyur pa yin no zhes zer ro/ /de ni mi bden te/ shes bya'i sgrib pa ni nyon mongs pa can ma yin pa'i mi shes pa ni shes bya'i sgrib par rnam par gzhag pa'i phyir ro//de la shes bya lhag par gyur pa'i shes bya'i stobs kyis 'phangs bar gyur pas de ni nyon mongs pa can ma yin pa'i shes bya'i sgrib pa zhes bya ba yin no/ /de lta bas na thams cad du nyon mongs pa can ma yin pa ni shes bya'i sgrib pa yin te/de la shes pa skye ba la bgegs su gyur pa'i phyir ro/ /shes bya ni shes pa'i mi mthun pa'i phyogs su bsgrub par nus pa ma yin no/ /de lta bas na smras pa/ shes bya'i sgrib pa de las rnam par grol ba zhes bya ba'o/ /yang de ni de kho na nyid de/ shes bya'i ngo bo nyid ni yongs su grub pa'i ngo bo nyid yin pa'i phyir ro//de'i phyir shes pas bstan par 'gyur te/ shes pas shes bya yongs su gcod par 'gyur bas zhes byas nas so/ /byang chub sems dpa' rnams dang zhes bya ba la sogs pa la/ byang chub sems dpa' rnams kyi chos la bdag med pa la 'jug pa slob pa'i lam gyis rab tu phye ba'o//sangs rgyas bcom ldan 'das rnams kyi ni chos bdag med pa la zhugs par gyur pa'i ye shes te/ sgom pa rab kyi mthar thug par gyur pa yongs su rdzogs pa yongs su dag pa'o/ /ye shes de'i rnam pa bstan pa'i phyir/chos thams cad brjod du med pa'i ngo bo nyid las brtsams te zhes bya ba la chos thams cad ni ngag gi brjod pa thams cad kyi lus 'das pa thams cad la 'bad pa med par rnam par rtog pa'i spros pa dang bral ba'i ye shes kyi shes byar gyur pa ni brjod du med pa zhes bya bar rig par bya'o//ye shes de'i gzung ba dang 'dzin pa'i rtog pa las grol ba'i phyir smras pa/ btags pa'i brjod pa'i ngo bo nyid du zhes bya ba la sogs pa la/ shes bya'i dngos po de ji lta ba bzhin du btags pa'i brjod pa'i ngo bo nyid kyang rnam par mi rtog pa nyid de/rang gi ngo bo rnam par rtog pa'i spyod yul ma yin pa'i phyir te/ rtog pa yang ma yin mi rtog pa yang ma yin zhes byas nas so/ /de bzhin du ye shes 'di dang / rnam par rtog pa'i rnam pa thams cad dang bral bas rnam par mi rtog pa'i phyir shes bya dang mnyam pa zhes brjod do//ye shes des shes par bya ba'i yul de ni de kho na nyid do/ /de yang rnam par gzhag pa'i dbye bas rnam pa gnyis te/ nyon mongs pa can dang nyon mongs pa can ma yin pa'o zhes bya ba'o/ /de la glo bur ba'i nye ba'i nyon mongs pas nyon mongs pa can mngon par brjod pa'i gnas dang / gzhir gyur pa'i phyir rgyu mtshan zhes brjod do/ /rkyen ji lta ba bzhin du gzung ba dang 'dzin par 'jug pa nye bar bzung nas ni gzhan gyi dbang gi ngo bo zhes brjod do/ /rkyen gyi dbang gis de lta de lta bur yongs su 'jug go zhes byas nas so/ /yongs su 'jug pa yang mngon par brjod pa ma spangs kyi bar du'o//yang de nyid rnam par rtog pa dang bral bas yongs su dag par gyur cing rkyen la ltos pa med par rang nyid kyis rang bzhin gyi ngo bo la gnas pa nyid ni yongs su grub pa'i phyir yongs su grub pa zhes brjod do/ /gzhan du mi 'gyur ba'i rang bzhin yin pas na de bzhin nyid do//des na smras pa/ gang yin pa de ni de bzhin nyid mchog ces bya ba ni chu'i khams dang gser dang nam mkha' rnams dag pa dang 'dra bas mchog ces brjod pa'am/ ye shes mchog gi spyod yul nyid yin pa'i phyir mchog ces brjod do/ /shes bya'i mthar thug par phyin par gyur pas bla na med pa'o//des na shes bya'i mthar thug pa nyid bstan pa'i phyir smras pa/ chos thams cad rab tu rnam par 'byed pa 'grub par 'gyur te zhes bya ba la/ de'i pha rol na chos rab tu rnam par 'byed pa med pa'i phyir ro/ /'grub par 'gyur ba ni des bya ba rdzogs pas ldog par 'gyur ba'o//'da' bar mi 'gyur ba ni de las 'das nas gzhan du 'jug pa med pa zhes bya ba'i don to/ /de ltar ye shes kyi spyod yul du gyur pa nyid bstan nas/ de kho na nyid kyi mtshan nyid rnam par gzhag pa bstan pa'i phyir smras pa/ de kho na'i mtshan nyid de yang zhes bya ba la sogs pa la/gnyis su med pas rab tu phye ba zhes bya ba ni gnyis las rnam par grol ba mtha' gnyis rnam par spangs pa'i phyir dbu ma'i lam gyis bsdus pa/ sgyu ma dang / smig rgyu dang / gzugs brnyan dang / brag ca dang 'dra bar dngos po dang / dngos po med par yang ston par mi byed de/rnam par 'jog par mi byed pa'o/ /de ltar byas na gnyis su med pas rab tu phye bar 'gyur ro/ /de ltar na yang byis pas btags pa'i sgyu ma'i glang po la sogs pa'i bdag nyid du med pa'o/ /de lta bur dngos po las rnam par grol ba yin gyi thams cad du med pa ni ma yin te/shing bu dang bong ba la sogs pa'i rdzas rnams ni yod pa nyid do/ /de bzhin smig rgyu la sogs pa rnams kyang ji ltar rigs par sbyar bar bya'o/ /de ltar na dngos po 'di dag ni byis pas yongs su btags pa'i rang bzhin las rnam par grol ba'i phyir dngos po dang bral ba'o/ /dngos po tsam gyis rab tu phye ba'i phyir dang /'phags pa'i ye shes kyi spyod yul du gyur pa nyid yongs su grub pa'i phyir dngos po med pa dang bral ba'o/ /de ltar na sgro 'dogs pa dang skur pa 'debs pa'i mtha' gnyis dang bral bar 'gyur ro/ /de ltar byas na dbu ma'i lam rab tu bstan pa yin no//yang gnyis kyi don ni 'di yin te/ dngos po dang / dngos po med pa ste/ dbu ma'i lam rnam par gzhag pa'i dbang du byas nas so/ /dngos po ni btags pa'i brjod pa'i ngo bo nyid ces bya ba ni btags pa'i brjod pa dang / tha snyad dang / mngon par brjod pa zhes bya ba'o/ /de rnam par gzhag pa ni bstan pa dang tha snyad du byas pa ste//ngo bo nyid dang khyad par la sogs pa'o/ /de ltar byas na ji ltar byis pas tshig gis ji skad brjod pa dang / sems kyis ji ltar brtag pa de ltar yod pa ma yin no zhes bstan pa yin no/ /yun ring po nas mngon par zhen pa zhes bya ba ni mngon par zhen pas gzung ba zhes bya ba'i don to//de ltar byas na ji ltar byis pas gzung ba de bzhin du yod pa ma yin no zhes bstan pa yin no/ /rnam par rtog pa dang spro ba thams cad kyi rtsa bar gyur te zhes bya ba ni rnam par rtog pa thams cad ni 'chad par 'gyur ba'i rnam pa brgyad du rig par bya'o//rtag pa la sogs pa'i tha snyad kyis rnam par brtag par bya ba dang / rnam par rtog pa'i tha snyad ni spros pa'o/ /de dag la gnas pa dang / rgyu mtshan du gyur pa ni rtsa ba'o/ /de ltar byas na dngos po de ni ming dang rnam par rtog pa la gnas par bstan par 'gyur ro//yang rnam par rtog pa thams cad ni mdor na gzung ba dang 'dzin pa'i rnam par rtog pa'o/ /de rtsa bar gyur pa las 'khor ba 'jug par 'gyur ba ni spros pa'o/ /de dag gi rgyu mtshan ni rtsa ba gyur pa'o/ /de la ngo bo nyid kyi dbang du byas nas/'di lta ste/ gzugs zhes bya ba'am zhes bya ba nas rnam par shes pa zhes bya ba'i bar du'o/ /'dzin pa'i rnam par rtog pa'i dbang du byas nas/ mig ces bya ba nas yid ces bya ba'i bar du'o/ /gzung ba'i rnam par rtog pa'i dbang du byas nas sa zhes bya ba nas/ reg bya zhes bya ba'i bar du ste/rten dang brten pa'i gzugs dag gcig tu byas nas gzung ba nyid du bstan to/ /khyad par la rnam par rtog pa'i dbang du byas nas smras pa/ dge ba zhes bya ba nas/ 'dus ma byas zhes bya ba'i bar du'o/ /mthong ba'i chos dang phyi ma'i rnam par rtog pa'i dbang du byas nas smras pa/'jig rten 'di dang zhes bya ba la sogs pa'o/ /nyin mo dang mtshan mo'i rnam par rtog pa'i dbang du byas nas smras pa/ nyi ma dang zla ba 'di gnyis dang zhes bya ba'o/ /tha snyad kyi rnam par rtog pa'i dbang du byas nas/ mthong ba dang zhes bya ba la sogs pa'o/ / shes rab kyis rab tu dpyod pa'i dbang du byas nas smras pa/ thob pa dang yongs su tshol ba dang zhes bya ba'o/ /tha na zhes bya ba ni spros pa thams cad zad pa'i mya ngan las 'das ba'o/ /de lta yin na yang byis ba'i blo can nye bar bzung nas rnam par rtog pa'i ngo bo yin zhes bstan pa'i phyir/ de lta bu dang mthun pa btags par brjod pas zhes bya ba ni ming dang brdas rnam par gzhag pa'o//'jig rten gyi zhes bya ba ni byis pa'i skye bos yongs su btags pa'i ngo bo zhes ston par byed ba'o/ dngos po med pa nyid ni dngos po lnga'i nang nas dang por rab tu bkag pa ni dngos po med pa nyid ces bya'o/ / de ltar byas nas ming gi rnam par rtog pa'i dngos po bsal bar gyur pa yin no/ /ngo bo nyid gsum las gzhan gyi dbang bkag pas ni mtshan ma med pa nyid do/ /des na smras pa/ btags par brjod pa'i rten thams cad kyi thams cad du med pa zhes bya ba la/ btags pa brjod pa la brten pa dang /mngon par brjod pa'i tshig la brten pa'i dngos po bkag pas/ thams cad kyi thams cad du med cing yod pa ma yin pa'o/ /thams cad kyi thams cad du btags pa tsam tha snyad tsam yin no zhes smras pa de dag gis tha snyad tsam la yang skur pa btab par 'gyur ro/ /de ltar byas na mtshan ma med pa brten pa med pa'i btags pa tsam 'thob par 'gyur ro//de ni 'jig rten pa yang mi 'dod cing bstan bcos las kyang mi 'byung ngo / /mdor bsdus na btags pa ni rnam pa gsum du gzhag par bya ste/ tshogs pa dang / rgyu dang gnas skabs kyi khyad par gyis btags pa'i dbye ba nyid do//de dag las gang / tshogs pa dang ldan pa de ni mtshan ma dang bcas pa'o/ /de bzhin du gzugs la sogs par btags pa rnams kyang dngos par 'gyur ro/ /de med par gyur na btags par rig pa ma yin no/ /de ltar na dngos po thams cad med par smras pa nyid thob par 'gyur te/de med par smra ba 'ba' zhig par 'gyur ro/ /chos kyi mtshan nyid kyis bsdus pa zhes bya ba ni chos thams cad bdag med pas rab tu phye ba'i phyir ro zhes bya ba'i don to/ /de ltar na dngos po de ni gnyis su med pa ste/ gnyis dang bral ba'i phyir dbu ma'i lam yin no/ /gnyis dang bral ba nyid bstan pa'i phyir/mtha' gnyis spangs pa zhes bya ba ni ji skad bstan pa'i rnam pa dang po yod do zhes bya ba ni mtha' dang po'o/ /dngos po tsam yang med do zhes bya ba ni mtha' gnyis pa'o/ /de gnyi ga spangs pa ni mtha' gnyis spangs pa'o/ / gzugs med pa bstan du med pa la sogs pa'i khyad par dang ldan pa ni bla na med pa'o/ /yang de kho na nyid de ni sangs rgyas dang byang chub sems dpa' rnams nyid kyi yul yin no zhes bstan pa'i phyir te/ de dag ni shes bya thams cad la rab tu 'byed pa la dbang ba'i phyir ro/ /shes bya'i mthar phyin pa'i phyir dang /shes bya'i mthar 'gro ba la zhugs shing nan tan dang ldan pa'i phyir ro/ /sangs rgyas rnams kyi ni shin tu rnam par dag pa yin te/ sa'i mthar thug pa brnyes pa dang ldan pa'i phyir dang / byang chub sems dpa' rnams kyi ni sa bcu rnams su slob pa'i sa la rab tu 'byed pa'i lhag pa'i tshul khrims la sogs pa bslab pa gsum gyis bsdus pa'i phyir ro//de la zhes bya ba ni de kho na de la'o/ /de ltar sangs rgyas rnams kyi ni yongs su dag pa dang / yongs su rdzogs pa'i ye shes yin la/ byang chub sems dpa' rnams kyi ni yongs su ma dag pa dang /yongs su rdzogs pa yin no zhes bstan par 'gyur ro/ /shes rab de yang thabs chen po yin no zhes bya ba la thabs ma yin pa'i gnyen po'i phyogs su gyur pa nyid kyi phyir ro/ /thabs ma yin pa de la yang rnam pa bzhi ste/ bla na med pa yang dag par rdzogs pa'i byang chub thob pa dang 'gal ba yin no//de dag kyang bdag tu lta ba dang sred pa dag gis 'khor ba la mngon par dga' zhing / mya ngan las 'das pa la skrag pa dang / 'khor ba'i nyes dmigs mthong bas myur du 'dod chags dang bral bar 'dod pas mya ngan las 'das pa sgom par byed cing mya ngan las 'das pa ni zhi bar mthong bas de la gcig tu gzhol zhing 'bab pa'o//de dag gi gnyen po'i phyogs su gyur pa'i phyir thabs chen po'o/ /de dag gi thabs su gyur pa nyid kyang shes rab dang snying rje gnyis phan tshun rjes su mthun par 'jug pa'i phyir te/ shes rab kyis ni 'khor ba'i nyes dmigs dang mya ngan las 'das pa zhi bar mthong ba'o//de lta na yang snying rje'i stobs kyis 'khor ba yang yongs su mi gtong la/ mya ngan las 'das pa yang mngon sum du mi byed pa'o/ /yang na mi gnas pa'i mya ngan las 'das pa'i gnas skabs nyid de/ de lta bu'i shes rab 'dis mi gnas pa'i mya ngan las 'das pa la byang chub sems dpa' gnas par 'gyur gyi/'khor ba na gnas pa'i sems can bzhin du 'khor ba na gnas pa yang ma yin la/ nyan thos la sogs pa bzhin du mya ngan las 'das pa yang ma yin no/ /des na 'khor ba'i sdug bsngal gyis kyang kun nas nyon mongs pas sems can rnams kyi don yang mi 'dor zhing /mya ngan las 'das pa yang mngon sum du mi byed pa'o/ /de'i phyir de dag gi gnas skabs mtshungs par 'jug pa'i shes rab de ni thabs chen po yin no/ /shes rab des sems can rnams dang /sangs rgyas kyi chos yongs su smin par bya ba la rab tu sbyor bar byed pa na 'khor ba'i sdug bsngal yang dag pa ji lta ba bzhin du rab tu shes so/ /de ltar sdug bsngal rab tu shes pas 'khor ba de yang dag pa ji lta ba bzhin du rab tu shes so/ /yongs su shes nas kyang 'dod chags dang bral ba dang /mya ngan las 'das pa dang rnam par grol ba rab tu sgrub par mi byed de/ yongs su smin par bya ba gnyis la sbyor ba dang ldan pa'i phyir ro/ /gal te de lta na thog ma nas 'khor ba'i yon tan mthong bar ci'i phyir mi bya zhe na/ de'i phyir smras pa/ gal te 'khor ba yang dag pa zhes bya ba la sogs pa la/ 'khor ba la mngon par dga' bas 'khor ba'i skyon gyis gos par 'gyur ro/ /skyon gyis gos par gyur na bdag gi don yang bya bar mi nus so/ /des na snga ma'i skyon du thal bar 'gyur ro/ /kun nas nyon mongs pa yongs su spangs pa'i phyir 'khor ba la yid byung bas 'gyod pa drag po yid la byed pa de dag ni myur ba nyid du yongs su mya ngan las 'das par 'gyur ro/de ltar lhag ma med pa'i mya ngan las 'das par gyur na yongs su smin par bya ba rnam pa gnyis las shin tu nyams par 'gyur ro zhes bya ba smras pa/sangs rgyas kyi chos rnams dang zhes bya ba la sogs pa la/ stong pa nyid du mos pa des zhes bya ba ni gzung ba dang 'dzin pas stong pa nyid du gnas pa zhes bya ba'i don to/ /byang chub sems dpas mya ngan las 'das pa la mngon sum du ma byas kyang mya ngan las 'das pas skrag pa yang med do//de bsam pa mya ngan las 'das pa la song ba'i phyir ro/ /gzhan du na 'di'i sangs rgyas kyi chos dang sems can yongs su smin par bya ba yang 'thob par mi 'gyur ro/ /de'i phyir smras pa/ tshogs yongs su rdzogs par mi 'gyur ro zhes bya bas ni de'i rgyu ston par byed do//yid skrag ste zhes bya ba ni sems skrag par gyur pa ni phan yon mthong ba ma yin la/ phan yon ma mthong bas mya ngan las 'das pa'i phan yon mthong ba sngon du song ba'i lhag par mos pa ni rab tu dang ba med par 'gyur ro//de'i phyir de'i tshogs yongs su rdzogs par mi 'gyur ro zhes bstan pa yin no/ /gang la yon tan gyis sems mngon par 'dus byas pa yod pa de ni smon lam zhes bya ba ste/ de thob par byed pa nyid la 'bad pa yin pa'i phyir ro zhes bya bas so/ / mi mthun pa'i phyogs su gyur pa ni thabs ma yin la/ gnyen po'i phyogs su gyur pa ni thabs yin no zhes bstan pa'i phyir/ /de la 'khor ba yang dag pa ji lta ba bzhin du zhes bya ba la sogs pa la/ ji skad bstan pa'i thabs rnam pa bzhi po chos bdag med pas bsdus pa ni de la brten pa yin no zhes bya bar bstan pa'i phyir/thabs de yang stong pa nyid la mos pa 'di la brten pa yin te zhes bya la/ de yod na 'di yod par 'gyur ro zhes bya ba'i don to/ /ring du zhugs pa zhes bya ba ni/ sa bcu'i mthar thug par zhugs par 'gyur ba'i ye shes gang gis rnam par rtog pa'i spros pa thams cad spangs par gyur ba'o//chos gang yang rung ste zhes bya ba ni gzugs nas mya ngan las 'das pa'i bar ro/ /ji lta bur yang zhes bya ba ni ngo bo 'am khyad par ram/ rnam par rtog pa'i dbye bas gzhan yang rung ba'o/ /de lta bu'i rnam par rtog pa dang bral ba'i ye shes des mngon par brjod pa'i gnas su gyur pa'i dngos po tsam 'dzin pa ni gzhi lnga'i dang po gang yin pa'o//de bzhin nyid tsam du zhes bya ba ni yongs su dag pa'i gnas skabs so/ /yang na dngos po tsam mthong ba nyid bshad pa'i phyir de bzhin nyid tsam du 'dzin pa zhes bya ba'o//de bzhin nyid kyi dngos po de la de'i dngos po tsam du yang rnam par mi rtog ste/ rnam par rtog pa thams cad dang bral ba'i phyir ro/ /des na spros pa thams cad spangs pa'i don dam pa la spyod pa ni/ mtshan ma med pa la gnas pa thob pa yin no/ / de ltar spyod pa las skyes pa'i phan yon mang po thob par 'gyur ro zhes bstan pa'i phyir/ mtshungs par mnyam pa zhes bya la sogs pa la/ sa dang po kun du 'gro ba nyid du bzhin nyid so sor rtog pas de bzhin nyid ro gcig pa nyid dang / chos rnams mnyam pa nyid du mthong bar 'gyur ba ni chos thams cad dang /sems can thams cad la mnyam pa'i sems kyis btang snyoms thob par 'gyur te/ khyad par dang sna tshogs kyi dbye ba med pa'i phyir ro/ /gang la dbye ba yod pa de la mnyam pa'i sems med do/ /de ltar byas na sems snyoms pa nyid dang ldan pas/nyon mongs pa can ma yin pa'i btang snyoms thob par 'gyur ro/ /nyon mongs pa med par rig pa'i gnas thams cad la mkhas pa yang nyon mongs pa med pa sgrub par byed do/ /sgrub par byed pa na yang nyon mongs pa med pa'i phyir/ sdug bsngal thams cad dang /yongs su ngal ba thams cad kyis phyir ldog par mi 'gyur ro/ /nyon mongs pa dang ldan na ngal bas gnod par 'gyur zhing / sdug bsngal dang bcas par gyur ro zhes bya ba'o/ /de ltar nyon mongs pa med pa'i lus dang sems kyi mthar thug par 'gyur te zhes bya ba yongs su rdzogs par 'gyur ba'o//de dag gis ni mang du thos pa'i che ba bstan pa yin no/ /de dag gis rten bsags pa'i dbang du byas nas smras pa/ dran pa'i stobs skyed pa chen po yang thob par 'gyur ro zhes bya ba ni thos pas yang dag par bsdus pa'i rig pa'i gnas rnams las la zhugs pa'i byang chub sems dpa' rnams kyi 'khor ba ji srid par brjed pa med pa'o zhes bya ba yin no//de lta bu'i thos pa'i bdag nyid che ba dang ldan du zin kyang bdag la bstod cing khengs par yang mi 'gyur la/ thams cad la sems mnyam pa'i phyir gzhan la phun sum tshogs pa'i khyad par thob par 'dod pas bdag dang gzhan du mnyam pa'i lhag pa'i bsam pas de dag la slob dpon gyis dpe mkhyud kyang mi byed do//gzhan dag la yang yang dag par ston par byed do/ /gsal par byed do/ /thabs la mkhas pa de dag la rnam pa gnyis kyis sems zhum par yang mi 'gyur te/ma gus pas 'dun pa med cing mi sbyor ba dang / bdag nyid la brnyas pas spro ba med pa'o/ /bdud kyi 'khor la sogs pa 'dun pa bsgyur ba na ldog par mi 'gyur ba ni/ 'jug pa yang thogs pa med par 'gyur ro zhes bya bas go cha'i sbyor ba yang bstan par 'gyur ba yin no//sdug bsngal gyi khyad par zhes bya ba ni drag pa la sogs pa'i rnam pa'o/ /yang sdug bsngal gyi khyad par de ni/ 'khor ba na gnas pa'i sems can rnams log par bsgrub pa'i sdug bsngal gyis bsdus pa de lta bu'i sdug bsngal gyis reg par gyur kyang sems can rnams la snying rjes mngon du phyogs par 'gyur ro//de lta bas na bdag nyid myur du mya ngan las 'da' bar mi byed kyi/ sems can rnams kyi sdug bsngal bsal ba'i phyir 'bad par byed sgrub par byed do//de'i phyir smras pa/ spro ba skye bar 'gyur ro zhes bya ba la sogs pa la/ lus kyi khyad par thob pa zhes bya ba ni/ rigs mthon po la sogs pa'i mtho ba'o/ /nga rgyal med par 'gyur zhes bya ba ni 'jig rten shes pa'i phyir te/ sems can thams cad ji ltar snod du 'gyur bde lta bur sgrub par byed ces bya bas so//shes pa'i khyad par thob pa zhes bya ba ni rtsod pa med pa ni dge sbyong gi chos kyi mchog go zhes byas nas so/ /gzhan gyis nye bar sbyar ba'am/ rtsod pa'am/ rtsod pa brgyud pa las sems bsrung zhing spang bar bya ste/ brtsam par mi bya'o zhes bya ba'i don to//ye shes la brten par 'gyur pas nyon mongs pa rnam par sbyong ba dang / rnam par sel bar byed pas nyon mongs pa rnams las sems srung bar byed do/ /de'i stobs kyis kha na ma thob thams cad nye bar spyod pa las nyes dmigs mthong nas sems srung bar byed de/btang snyoms su byed pas nyon mongs pa can ma yin par 'gyur ro zhes bya ba'i don to/ /yon tan dang phan yon 'di dag rnam par 'phel bar gyur pas mthar thug pa thob pa na/ dang pa skyed pa rnams dbang du bya ba'i 'dod pa med cing / dge ba mi spyoms par 'gyur zhing / gzhan las shes kyi khe dang / de yon tan skye bo mang pos shes par 'dod pa nyid do/ /de lta bu dang ldan par gyur cig ces sems kyis kyang 'dod par mi byed na de sgrub par byed pa lta smos kyang ci dgos zhes bya ba'o/ /phan yon mang po dang ldan par 'gyur ro zhes bya ba ni 'jig rten pa thams cad dang /nyan thos dang rang sangs rgyas rnams kyi rgyud las shin tu 'das pa'i phyir thun mong ma yin pa'i yon tan gyi phan yon dang ldan par 'gyur te/ ye shes de dag bdag por gyur pa las skye bar 'gyur ro zhes byas nas te/ de las gzhan pa'i ye shes la med pa'i phyir ro//phan yon 'di dag ni byang chub kyi lam gyi tshogs kyis bsdus pa'i phyir byang chub sems dpa' rnams la phan pa mang du byed pa yin no zhes bstan pa'i phyir byang chub kyi phyogs dang zhes bya ba la sogs pa la/ ye shes de ni dus nyid dang / rgyud nyid la khyad par bstan pa'i phyir smras pa/de bas na gang la la dag ces bya ba la sogs pa la/ de ni dus thams cad pa dang / byang chub sems dpa' thams cad kyi rgyud du gtogs pa'o zhes bstan par 'gyur ro/ /ye shes de med par nam yang gang du yang bla na med pa yang dag par rdzogs pa'i byang chub rjes su thob pa med do zhes rnam par gzhag pas ni sangs rgyas kyi lam gyi gtso bo yin no zhes bya ba grub pa yin no//da ni ye shes de la yang dag par brten pa ye shes de'i stobs kyis 'phangs pa'i thun mong ma yin pa'i sgrub pa bstan pa'i phyir smras pa/ de ltar spros pa med pa'i tshul la zhugs shing zhes bya ba la sogs pa la/spros pa zhes bya ba ni sdug bsngal gyi rtsa bar gyur pa'i phyir dang / spang bar bya ba yin pa'i phyir rnam par rtog pa thams cad do/ /de'i gnyen po'i phyogs su gyur pa'i ye shes de ni spros pa med pa'i tshul zhes bya'o//zhugs pa ni de la gnas pa dang / de la brten pa zhes bya ba'i don to/ /ji skad bstan pa'i phan yon dang ldan pa'i phyir phan yon mang po dang ldan pa'o/ /bdag nyid kyang sangs rgyas kyi chos yongs su smin par bya ba'i phyir yang dag par zhugs pa yin no zhes bya ba ni rang gi don la zhugs pa zhes bya ba'i don to//de dag rang gi rgyud la thob pa nyid ni rang gi don te/ rang la dgos pa'i dbang gis bsgrubs pa ni ma yin no/ /de las sangs rgyas kyi chos rnams ni stobs dang mi 'jigs pa la sogs pa'o/ /chos de dag gi yongs su smin pa ni de'i rgyu'i khyad par gcig nas gcig tu brgyud pa'i 'phel bar gyur pa'i sbyor ba dang /dus kyi khyad par gzhan du gyur pa'i yongs su gyur pa khyad par can thob par gyur pa'o/ /de'i phyir zhugs pa dang / pha rol tu phyin pa mngon par bsgrubs pa'i sgo nas de yongs su smin par gyur pas yang dag par zhugs par 'gyur ro//theg pa gsum gyi chos yongs su smin par bya ba'i phyir zhes bya ba ni theg pa gsum po de rgyu dang 'bras bus bsdus pa dag ni theg pa gsum zhes brjod do/ /de dag gi yongs su smin pa ni 'jug pa dang / yongs su smin pa dang /rnam par grol ba'i gnas skabs so/ /kha cig la nus pa ji lta ba dang / stobs ji lta bas khams dang / mos pa'i dbang gis theg pa gsum la 'jug par byed pa dang zhugs pa rnams yongs su smin par byed pa dang / yongs su smin pa rnams rnam par grol bar byed do zhes bya ba ste/'di dag ni de dag gi yang dag pa'i sgrub pa yin no/ /rang gi sangs rgyas kyi chos yongs su smin pa'i yang dag pa'i sgrub pa ni de la pha rol tu phyin pa drug gis bsdus pa'i sgrub pa'i sbyor ba yin par rig par bya'o/ /de la sbyin pa'i pha rol tu phyin pa'i sbyor ba'i dbang du byas nas smras pa/longs spyod rnams dang zhes bya ba la sogs pa la/ longs spyod rnams dang lus la yang sred pa med pa zhes bya ba chags pa dang bral bar 'gyur ba ste/ longs spyod dang / lus la ltos pa med pa zhes bya ba'i don to/ /de dag la ltos pa med pa yang byang chub sems dpa' rnam pa gnyis te/lhag par mos pa'i stobs dang / bsam pa'i stobs kyis 'gyur ro/ /de la lhag par mos pa'i stobs kyis ni mos pas spyod pa'i dus na ste/ de kho na nyid rtog pa med pa'i phyir ro/ /sa la zhugs pa rnams kyi ni bsam pa'i stobs kyis te/ de la sa la zhugs pa rnams kyi ni sred pa med pa'o//mos pas spyod pa rnams kyi ni sred pa med par slob pa'o/ /rnam grangs gzhan yang tshol ba dang yongs su 'dzin pa'i ngo bos stong pas sred pa med pa'o/ /de tshul bzhin yid la byed pa'i sbyor ba'i slob pa'o/ /yang na sems can thams cad la lus dang /longs spyod gtong zhing sred pa med par slob par byed pa'o/ /de'i phyir smras pa/ longs spyod dang lus yongs su gtong ba'i phyir zhes bya'o/ /lus can bsod nams zhing 'gyur zhing / /gzhan la gnod pa mi byed par/ /brtse ba'i bdag nyid khyod bsten pas//gzung 'os tshig tu 'gyur ba yin/ /zhes bya ba'i nges pas tshul khrims yang dag par blangs pa'i dgos pa bstan pa'i phyir smras pa/ sems can rnams kyi don gyi phyir/ /zhes bya ba la sogs pa la/ byang chub sems dpa'i tshul khrims ni rnam pa gsum ste/ sdom pa'i tshul khrims dang / sems can gyi don byed pa'i tshul khrims dang / dge ba'i chos sdud pa'i tshul khrims zhes bya ba'o/ /'dir ni sdom pa blangs pa'i tshul khrims kyi dbang du byas nas smras pa'o/ /bsdams pa yang yin la zhes bya ba ni ldog pa'i sdom pa yang dag par blangs pas so//de'i rjes la bsrung ba ni shin tu bsdams pa'o/ /ma 'ongs pa'i chos nyid kyis thob pa'i tshul khrims la dmigs pa ni slob pa'o/ /chos nyid kyis thob pa'i byang chub sems dpa'i tshul khrims kyang rnam pa gnyis te/ de dang der skyes par bsam pa'i khyad par gyis thob pa dang /rten gyi khyad par gyis thob pa'o/ /de la bsam pa'i khyad par ni/ rang bzhin gyis sdig ba la mi dga' ba dang / kha na ma tho ba la ngo tsha bas nye bar spyod pa nyid dang / sems can rnams la gtong ba dang ldan pa nyid do/ / de dag bstan pa'i phyir/ rang bzhin gyis bzang zhing dge ba'i phyir zhes bya ba'o/ /rten gyi khyad par ni/ ji skad bstan pa'i rten gyi khyad par dang ldan pas sdig pa'i las kyi bya ba byed par mi nus pa'i lus thob par rig par bya'o/ /bzod pa'i pha rol tu phyin pa'i dbang du byas nas smras pa/thams cad la yang bzod pa yin la zhes bya ba la sogs pa la/ bzod pa ni brnags nus pa ste/ gnod pa brnags nus pa zhes bya ba'i don to/ /de la gnod pa ni ngan par smras pa dang / ngan par brjod pa tshig gi lam yid mi bde ba skyed par byed pa'i don to/ /log par sgrub pa zhes bya ba ni/mi 'dod pa'i reg pa nye bar bsgrubs pas lus kyi sdug bsngal skyed par byed pa'i don to/ /bzod pa la yang slob po zhes bya ba ni so sor rtog pa'i stobs sam/ bsgoms pa'i stobs kyis bzod pa'i stobs thob pa la rab tu sbyor ba'o/ /khro ba chung ba ni sems la khro ba nyung ba'o//gzhan la gnod pa mi bya ba'i phyir zhes bya ba ni thos pa tsam gyis gnod pa dang / mi snyan pa'i ngag brjod par mi bya ba ni gzhan la gnod pa mi bya ba'i phyir zhes bya'o/ /de ltar bsam pa dang sbyor ba nyid kyis bzod pa bstan nas brtson pa'am mkhas pa yin no zhes bya ba ni rtag tu gus par byed pa'i sbyor ba dang ldan pa'i phyir goms par byas pa'i rig pa'i gnas de dag la skyes shing skyes pa'i the tshom gcad par bya ba'i phyir mkhas pa yin no//goms par ma byas pa'i gnas de dag la yang nges par sbyor bas yongs su gzung ba'i phyir nye bar gzung ba la mkhas pa yin te/nus pa dang ldan pa'i phyir zhes bya ba'i don to/ /bdag nyid kyang thams cad mkhyen pa nyid kyi rgyu yongs su gzung ba'i phyir rig pa'i gnas thams cad la yang brtson pa'am mkhas pa yin no/ /bsam gtan gyi pha rol tu phyin pa'i dbang du byas nas smras pa/ sems nang na gnas shing zhes bya ba la sogs pa la/dge ba'i las de dang de'i phyogs la sems rnam par g.yeng ba med par sbyor ba ni sems nang na gnas pa zhes bya'o/ /don la yang dag par nges pa ni sems shin tu mnyam par gzhag pa'o/ /de ltar mnyam par ma bzhag pa'i sa pa'i bsam gtan gyi sbyor ba'i dbang du byas nas bstan nas/mnyam par bzhag pa'i sa pa'i dbang du byas nas smras pa/ sems gnas pa dang zhes bya ba'o/ /bdag nyid kyi bsod nams kyi tshogs bsags pa'i rtsa bar gyur pa ni tshad med pa rnams kyis bsdus par gyur pa yin no zhes bstan pa'i phyir smras pa/tshangs pa'i gnas bzhi yongs su dag par bya ba dang zhes bya ba'o/ /mngon par shes pa dang ldan pa'i mthu'i sgo nas sems can gyi don bsgrub par bya ba'i phyir bsam gtan bskyed par bya'o zhes bya bar/ mngon par shes pa rnam pa lngas rnam par rtse bas zhes bya ba la sogs pa smras so//bsam gtan gyi stobs kyis phung po la mkhas pa la sogs pa la sbyor bar byed pa na/ lus dang sems ngal ba med do zhes bstan pa'i phyir smras pa/ mkhas par bya ba thams cad la mngon par brtson pa las byung ba zhes bya ba'o/ / shes rab kyi pha rol tu phyin pa la sbyor ba'i dbang du byas nas smras pa/ mdzangs shing zhes bya ba la sogs pa la/ skye ba de dang de dag tu rig pa'i gnas thams cad la 'jug pa dang / rjes su mthun pa'i skye bas thob pa'i shes rab thob pa dang ldan pa ni mdzangs shing zhes bya ba'o/ / sbyor ba las byung ba'i shes rab dang ldan pa'i phyir de kho na mchog shes pa'o/ /shes rab de nyid la bsgom pa rab kyi mthar thug par gyur pa dang ldan pa ni de kho na mchog shes pa la slob pa'o/ /de kho na mchog shes pa gang yin pa de la slob pas rim gyis theg pa chen pos yongs su mya ngan las 'da' bar 'gyur ro zhes bstan pa'i phyir smras pa/bdag nyid theg pa chen pos yongs su mya ngan las 'da' ba zhes bya ba ni/ theg pa chen po'i mya ngan las 'da' ba ni mi gnas pa'i mya ngan las 'das pa ste/ 'khor ba ji srid kyi bar du sems can gyi don gyi bya ba bsgrub par byed pa'i phyir ro//sems can rnams theg pa gsum gyis yongs su smin par bya ba'i phyir bden pa bzhi la rnam pa bzhi'i sgo nas bsam pa dang sbyor ba dag pa dang ldan pa bstan pa'i phyir/ de ltar yang dag pa'i sbyor ba byed pa de ni zhes bya ba la sogs pa dang / ma dang / pha dang / dge sbyong dang / bram ze dang / bla ma dang / yon tan dang ldan pa'i mchod gnas rnams la ni dus dang dus su sbyin pa dang / bstod pa la sogs pa'i bya ba dang ldan par 'gyur ro/ /de dag gis ni brtse ba dang bcas pa'i gus par bya ba la nan tan bya bar bstan pa yin no//sdig pa can rnams sdug bsngal gyi rgyu la zhugs pa'i skyon dang ldan pa de dag la nyin zhag gcig tsam gyi sdug bsngal yang bsal bar bya'o zhes bya ba'i bsam pa dang / snying rje'i sems kyis ma 'ongs pa'i sdug bsngal gyi 'bras bu bsal bar 'dod pa'i brtse ba'i sems sam snying rje nyid kyi sems kyi rnam grangs yin no//de dag gi sbyor ba rdzogs pa'i dbang du byas nas smras pa/ ci nus zhes bya ba la sogs pa la bdag nyid kyi nus pa dang mthun pas mi dge ba'i gnas nas bslangs nas dge ba'i gnas la rab tu bkod nas skyon bsal ba la 'god par byed do/ /de ltar skyon dang ldan pa'i gang zag rnams la bsam pa dang sbyor bas yang dag par bsgrub pa bstan pa'i phyir/byang chub sems dpa' la gnod par byed pa mi phan pa dang mi bde ba sgrub par byed pa'i sems can gnod pa byed pa rnams la phan pa dang bde ba bsgrub pa'i phyir mngon du phyogs pa'i byams pa'i sems kyis rab tu gnas par 'gyur ro//sbyor bas kyang phan pa dang bde bde nye bar bsgrub pa'i phyir ro zhes bstan pa'i phyir/ ci nus zhes bya ba la sogs pa la/ de ltar gnod pa byed pa dag la rnam pa gnyis kyis yang dag par sgrub par byed do/ /gnod pa byas pa med pa bzhin du gnod pa byas pa byed pa dag la sdang bar mi byed do zhes bstan pa'i phyir smras pa/de dag gi rang gi bsam pa dang sbyor ba'i nyes pas zhes bya ba ni/ de dag gis ni sngon gnod pa byas pa'i dogs pas 'dis gnod pa byed par 'gyur ro snyam pa dgal gnod pa byed par mi 'gyur bas rang gi bsam pa dang /sbyor ba'i nyes pa yin no zhes shes par bya ba'i phyir phan pa dang bde ba sgrub pa'i sbyor bas 'ga' zhig gis ji ltar yang bsam pa de gtong bar 'gyur ba de ltar sbyor bar byed do zhes bstan pa'i phyir smras pa/ spang ba'i phyir zhes bya ba la/ bya ba thams cad kyi 'dir yang rnam pa gnyis kyis yang dag par sgrub pa zhes bya'o//phan 'dogs pa zhes bya ba ni/ sngon phan pa byed pa dag la de dag la byas pa shes pa'i sgo nas lan du phan 'dogs pas gnas par 'gyur ro/ /byas pa shes pa de dgrol ba'i phyir mnyam pa'am lhag pas nye bar gnas pa zhes bya ba la phan 'dogs pa'i bya ba thams cad kyi dgos pa'i gtso bo'i dbang du byas nas smas pa/bsam pa yang yongs su rdzogs par byed do zhes bya ba ni kha na ma tho ba med pa yin la/ nus pa yang yod la yongs su rdzogs par byed pa'o/ /de'i phyir smras pa/ ci nus zhes bya ba la/mthu med na yang bya ba de dang de la de dang rjes su mthun pa'i bsam pa dang / sbyor ba bstan pa'i phyir gang gis 'di ni byed mi 'dod pa ni ma yin gyi/ nus pa med pa kho na'o zhes shes par byed do/ /de ltar re zhig yon tan dang ldan pa dang / skyon dang ldan pa dang / phan 'dogs pa dang /gnod pa byed pa'i sems can rnams la bsam pa dang sbyor bas yang dag par bsgrub pa bstan nas/ ji skad bstan pa'i dngos po de dag nyid la yod pa'i phyogs dang / med pa'i phyogs kyi dbu ma'i rnam par bsgrub pa ma grub pa rnams rnam par bsgrub pa'i phyir rigs pa gang yin zhe na/smras pa/ 'thad pa sgrub pa'i rigs pas de bsgrub par 'dod pa ste/ 'dir rigs pa bzhi'i nang nas 'thad pa sgrub pa'i rigs pa yin par 'dod pa ni tshad ma rnam pa gsum gyis bsdus pa sngar bstan pa ste/ chos thams cad brjod du med pa de rgyu gang gis yongs su gcad par nus zhes bya ba'i don to//rigs pas bstan par bya ba'i phyir/ btags ba tsam du zad par rig par bya ste zhes bya la/ dngos po 'di dag ni yongs su btags pa nyid de/ ngo bo nyid yongs su gsal bar byed pa la btags pa tsam mo zhes bya ba yin no/ /de'i phyir smras pa/ngo bo nyid kyang ma yin/ de las ma gtogs pa yang ma yin zhes bya ba la/ btags par brjod pa de ni dngos po de la de'i bdag nyid du yang yod pa ma yin la/ de las gzhan na yang med do/ /yang dag pa ma yin pa'i kun brtags pa 'ba' zhig pa tsam nyid do//de ltar byas nas chos de dag ni byis pas ji ltar btags pa'i rnam pa de lta bur yod pa ma yin no/ /gzhan du na yongs su grub pa'i rnam pas ni yod pa yin no zhes bstan pa'i phyir smras pa/ thams cad kyi thams cad du med pa yang ma yin no zhes bya ba la sogs pa la de ltar na mtha' gnyis spangs pa'i dbu ma'i lam ni yod do zhes bya ba'i don bstan par gyur pa yin no//ji skad bstan pa'i rnam pas yod pa yang ma yin/ med pa yang ma yin na rnam pa ji lta bus yod pa yin zhe na/ de bstan pa'i phyir/ ji ltar yod ce na/zhes bya ba smras pa/ rang gi mtshan nyid kyis yod pa ma yin pa'i rang bzhin la mtshan mar bzung nas sgro btags pa dang / log par gzung ba dang / spangs pa ni yod pa ma yin pa la sgro btags pa'o/ /de nyid ni legs par ma zin pa ste/ yongs su brtags pa'i rang bzhin yin pa'i phyir ro//yongs su brtags pa'i rang bzhin yang phyin ci log tu gzung ba la sogs pa'i rnam grangs su bstan pa yin no/ /legs par ma zin pa zhes smos pa ni mngon par zhen pa gsal bar bstan pa'i phyir ro/ /mngon par brjod pa'i gnas su gyur pa'i phyir dang /btags pa'i rgyu mtshan yin pa'i phyir yod par gyur pa'i dngos po rnams la thams cad du med do zhes rnam par 'gyur ba ni skur pa 'debs pa'o/ /de nyid ni legs par ma zin pa ste snga ma bzhin no/ /de ltar na sgro 'dogs pa dang skur pa 'debs pa'i mtha' gnyis dang bral ba'i rnam pa ni yod do zhes bstan par 'gyur ro//de lta bu'i yod pa de gang gis yongs su gcod par 'gyur zhe na de ni nges par shes byas bsdus pa yin pa'i phyir shes pas yongs su gcod pa 'thob par 'gyur ro zhes bstan pa'i phyir/ rnam par mi rtog pa'i zhes bya ba la/ 'jig rten thams cad las rab tu khyad par du 'phags par gyur pa'i ye shes des yongs su gcod par byed kyi gzhan gyis ni ma yin no//gang la de lta bu'i ye shes yod pa de dag de las som nyi med cing kun du rmongs pa med de/ des mngon sum du byas pa'i phyir ro/ /de bzhin du de ni 'phags pa nyid kyi spyod yul yin no zhes bstan pa yin no//dngos po la mngon par zhen pa'i phyogs la skyon rnam pa gsum yod par bstan pa'i phyir/ gal te chos gang dag ces bya ba la sogs pa'o/ /rten cing 'brel par 'byung ba'i ngo bo nyid gzhan gyi dbang gi rdzas yod pa nyid du bzung nas smras pa ni/chos zhes bya ba yin no/ /de nyid yongs su dag pa'i gnas skabs don dam pa nyid yod pa yongs su grub par nye bar bzung nas smras pa ni dngos po zhes bya ba'o/ /yang na yongs su grub pa'i ngo bo nyid ni chos zhes bstan te/ rang gi mtshan nyid 'dzin pa'i phyir ro//dngos po lnga'i nang nas rgyu mtshan gang yin pa de ni dngos po zhes brjod do/ /mngon par brjod pa'i gnas su gyur pa'i phyir ro/ /yang na de rdzas su yod pa nyid du bstan pa'i phyir chos zhes brjod do/ /de nyid ming dang rnam par rtog pa la brten pa'i phyir dngos po zhes brjod do//de'i bdag nyid du gyur na ni zhes bya ba ni/ brjod pa'i bdag nyid de des nges par brtags pa'i bdag nyid yin pa'i phyir te/ mngon par brjod pa'i tshig gi rang bzhin no zhes bya ba'i don te/ chos kyi ngo bo la ltos nas ni rnam pa sna tshogs zhes bya'o/ /dngos po'i ngo bo la ltos nas ni mang por gyur pa zhes bya'o//de ltar chos gcig pu nyid kyi ngo bo nyid du ma'i bdag nyid 'thob par 'gyur ba ni sna tshogs par brjod pa'i phyir te yul dang dus kyi dbye ba mang ba'i phyir ro/ /dngos po gcig nyid la dus kyi khyad par gyi dbang gis brjod pa sna tshogs mang po 'jug par 'gyur te/skye bo de dang de dag la nges pa'i tshig mang po'i rnam grangs kyi dge ba'i dbang gis 'jug pa'o/ /gal te gzhan dag na re mang po dag gis brjod par bya ba yin na yang rjod par byed pa gcig gis de'i ngo bo nges par gzung ba dang / gzhan gyis ni ma yin no/ / de'i phyir smras pa/ 'dogs pa'i tshig lhag ma gzhan dag ni ma yin no zhes bya ba la sogs pa la/ 'di ltar btags pa'i brjod pa gcig gis dngos po mngon par rjod par byed pa'i nges pa ni ci yang mi dmigs te zhes bya ba ni gang yang rung ba cig gis dngos po rjod par byed pa na de'i bdag nyid du gyur gyi gzhan dag gis ma yin zhes bya ba'i nges pa ni ci yang med pa ste/rgyu'i khyad par med pa'i phyir thams cad kyang de'i ngo bo nyid dang / de'i rang bzhin 'thob par 'gyur ro/ /de ltar byas na du ma'i bdag nyid du 'gyur ba'i skyon bsal bar dka' ba nyid yin no//yang gzhan dag dang ni ma yin no zhe na/ gcig dang yang ma yin te/ rgyu la khyad par med pa'i phyir ro/ /des na smras pa/ de bas na btags pa'i tshig thams cad ni zhes bya ba la sogs pa la/ de lta na ni re zhig rnam par rtog pa rnam pa gnyis su 'gyur ro/ /brjod pa mang po'i bdag nyid yin pas de yang du mar 'gyur te/brjod pa thams cad de'i bdag nyid yin pa'i phyir ro/ /yang na gcig kyang de'i rang bzhin du mi 'gyur te/ gcig nyid kyi ngo bo yin pa'i nges pa med pa'i phyir ro/ /gzhan yang gal te zhes bya ba la sogs pas ni nyes pa mang po gzhan yang bstan pa'i phyir ro//dngos po sngar byung la zhes bya ba ni 'jig rten thog ma med pa'i dus nas sngon du byung bar gyur te chos rnams rtag tu rnam par gnas pa'i phyi nas sems can gyi 'jig rten byung zhing / de dag la ji ltar 'dod pa'i 'dun pas tha snyad du btags pas nye bar rjod par byed do//de ltar sngon du dngos po byung la phyi nas ni tshig gis nye bar 'dogs par byed do/ /de ltar byas na 'dogs pa ma byas pa'i snga rol na ste/ 'dogs pa'i tshig gis nye bar ma btags pa'i tshe dngos po des de'i ngo bo mi thob ste/ de'i tshe 'dogs pa'i tshig gis nye bar btags pa med pa'i phyir btags pa'i bdag nyid can gyi dngos po'i ngo bo rnams/dngos po med pa nyid du grub pa yin no/ /dngos po'i ngo bo las ma gtogs pa'i chos 'jug pa ni yod pa ma yin pas de ni 'dod pa ma yin no zhes byas nas/ sngar dngos po med par gyur na ni/ nye bar btags pa yang med par 'gyur bas de'i phyir de'i bdag nyid yin pas nye bar 'dogs pa'i tshig med pa'i phyir/chos thams cad brjod du med pa'i ngo bo nyid do zhes rnam par gzhag pa rigs so/ /de ltar sngar dngos po med pa nyid du 'gyur ba'i nyes par thal bar 'gyur ro/ /de lta bu'i skyon spangs pa'i phyir sngon nas de lta bu'i ngo bo nyid yin no zhes smras na/de'i phyogs la skyon gzhan yod par bstan pa'i phyir smras pa/ gal te 'dogs pa'i tshig ces bya ba la sogs pa la/ sngar gzugs kyi mtshan nyid yin la/ phyis nye bar 'dogs pa'i tshig yin no zhe na/ de lta na med kyang 'byung ba'i skyon du thal bar 'gyur ro//med kyang 'byung bar 'gyur na ni brjod bya dang / brjod pa'i 'brel pa nyams par 'gyur ro/ /de med na nye bar 'dogs pa'i tshig gis 'dogs pa med kyang dngos po de'i blo skye bar 'gyur na de ltar skye ba ni med do/ /de'i phyir sngar nas gzugs kyi bdag nyid yin par rigs pa ma yin no//de ltar na skyon gsum dang ldan par 'gyur bas chos thams cad brjod du med pa'i ngo bo nyid du khong du chud par bya'o zhes bya ba yin no/ /de bzhin du tshor ba la sogs pa nas mya ngan las 'das pa'i bar du yang nye bar btags pa'i tshig gis bsdus par rig par bya'o/ /gnyis pa dngos po med pa la mngon par zhen pa'i phyogs kyi nyes pa yang gsal por bstan par bya ba'i phyir/gzugs la sogs pa'i chos 'di gnyis ni zhes bya ba la sogs pa la/ chos 'phul ba 'di las zhes bya ba ni de bzhin gshegs pa'o/ /chos 'dul ba zhes bya ba ni de la yang dag pa'i ye shes 'thob par byed pas chos so//spangs pa 'thob par byed pas 'dul ba'o/ /de ltar ni de bzhin gshegs pa'i bstan pa'i sgrub pa ni ye shes dang / spangs pa rab tu phye ba dang / lam dang 'bras bus rab tu phye bar gsal por bstan par 'gyur ro/ /rab tu nyams pa zhes bya ba ni phyi rol du gyur pa zhes bya bar bstan par 'gyur te/skyon dang bcas par gyur cing bstan pa la zhugs pas phan yon ci yang ma thob pa'i phyir ro/ /de lta bas na yod pa ma yin pa la sgro btags nas phung bar byed do zhes bstan pa yin no/ /bstan pa 'di la skyon ni rnam pa gnyis te/ tshul khrims kyi skyon dang / lta ba'i skyon no/ /de la kha na ma tho ba dang bcas pa'i lta ba'i skyon dang ldan pa bstan pa'i phyir smras pa/ gang yin pa zhes bya ba la sogs pa la/ de ni 'dogs pa'i tshig gis ngo bo nyid la mngon par zhen pa'i phyir sgro btags pa'i lta ba dang ldan pa yin no zhes bstan pa'i phyir smras pa/yod pa ma yin pa la sgro btags nas mngon par zhen pa zhes bya'o/ /gzhan skur pa 'debs pa'i lta ba dang yang dag par ldan pa ni dngos po med pa la mngon par zhen pa'i phyir ro zhes bstan pa'i phyir smras pa/ chud gson par byed pa gang yin pa 'di zhes bya ba la/de ltar na sgro 'dogs pa'i lta ba la mngon par zhen pa'i phyir dang / skur pa 'debs pa'i lta ba la mngon par zhen pa'i phyir/ rim pa bzhin du gnyis ka yang nyams pa yin no zhes bstan par 'gyur ro/ /don dam pa nyid kyi rgyu bstan pa'i phyir/ brjod du med pa'i bdag nyid kyis zhes bya ba ni ngag gi yul thams cad las 'das pa'i phyir dang /spros pa thams cad dang bral ba'i phyir don dam pa'i bden pa zhes bya'o/ /thog ma nyid du zhes bya ba ni yod pa ma yin pa la sgro 'dogs pa'i phyogs la yang gcig nyid du ma'i bdag nyid du 'gyur ba la sogs pa'i skyon gsum bstan pa yin no//dpyad cing zhes bya ba la sogs pa'i tshig bzhi ni rnam grangs su rig par bya ste/ gsang bar bya ba ci yang med/ /ces bya ba'i don to/ /skyon gang dag gis bstan pa 'di las nyams par 'gyur ba'i skyon 'di dag go zhes sbyar bar bya ste smras zin to/ /yod pa'i dngos po la skur ba 'debs pa med pa rnams skyon gang gis nyams par 'gyur ba de bstan par 'dod nas smras pa/de ltar bshad par bya ste zhes bya ba la/ gzugs la sogs pa'i chos rnams kyi dngos po tsam la skur pa 'debs pa rnams kyis ni thams cad med par smra ba gsal por bstan pa yin te/ nye bar btags pa'i rgyu mtshan la skur pa btab par 'gyur la/de la skur pa btab pa des na btags pa med pas 'jig rten dang 'gal ba yin la/ rgyu mtshan la skur pa btab pas bstan pa dang 'gal bar 'gyur ro/ /de ltar na rgyu mtshan dang / btags pa la skur pa btab pa'i sgo nas 'jig rten pa dang / bstan pa nyams par byas pas thams cad nyams par byed pa yin no zhes bstan pa'i phyir smras pa/ 'di lta ste zhes bya ba la sogs pa la/ 'jig rten las kyang rung / bstan bcos las kyang rung / rgyu mtshan dang bcas pa dang / rten dang bcas par btags pa mthong zhing grags pa'o/ / de la lung bstan pa'i phyir/ phung po rnams yod na zhes bya ba la sogs pa la/ de bzhin phung po nyer brten nas/ /sems can zhes bya'i tha snyad brjod/ /ces bya ba'i tshigs su bcad pa'i rjes su 'brangs nas bstan pa yin no/ /dngos po med pa la ni zhes bya ba ni shin tu mya ngan las 'das pa bstan pa'i phyir ro//'di ltar gzugs la sogs pa'i gdags pa yang rgyu mtshan gyi dngos po yod na rigs par 'gyur gyi/ med na ni mi 'gyur ro/ /de'i phyir btags pa'i dngos po dang rgyu mtshan la skur pa btab pas rten med pa'i phyir btags pa yang med par 'gyur ro/ /rgyu mtshan dang btags pa la skur pa btab pas thams cad med par lta ba nyid thob par 'gyur ro//nyan thos kyi theg par yang chos kyi mtshan nyid gsal bar ston pa'i mdo sde nas ji skad bstan pa las bzlog pa la zhen pas/ sgro 'dogs pa'i lta ba la mngon par zhen cing 'jug pa de ni rab tu grags pa'i phyir ma bstan to//skur pa 'debs pa'i lta ba la mngon par zhen pas mdo'i don ji lta ba bzhin ma yin pa'i don du btags pa bstan pa'i phyir smras pa/ de bas gang zag kha cig ces bya ba la sogs pa la/ kha cig ces bya ba ni dbu ma par smra ba'o/ /shes par dka' ba ni drang ba'i don gyis rab tu phye ba'i phyir ro//theg pa chen po dang yang dag par ldan pa ni byang chub sems dpa'i sde snod kyis bsdus pa nyid do/ /zab mo ni chos bdag med pa'i dbang du byas nas zhugs pa nyid do/ /byis pas yongs su btags pa'i chos thams cad kyi chos rnams kyi ngo bo nyid kyis dben pa'i don gsal bar byed pas stong pa nyid dang ldan pa'o//dgongs pa can gyi don bstan pa'i phyir/ dgongs pa'i don bstan pa dag ces bya ba ste/ chos thams cad ma skyes pa/ ma 'gags pa/ gzod ma nas zhi ba/ rang bzhin gyis mya ngan las 'das pa/ sgyu ma lta bu zhes bya ba la sogs pas bstan pa yin par rig par bya'o//de dag gis ni mdo'i don yang dag pa ji lta ba bzhin du ma shes pas sgra ji bzhin pa'i don du bzung nas mngon par zhen cing rtog ge ngan pa'i lam nas zhugs pas 'di ltar lta bar 'gyur ro/ /de kho na nyid ni btags pa tsam mo//de mthong ba ni theg pa chen po'i mthar thug par 'gyur ro zhes gsal bar byas pa yin no/ /smos pa'i 'os ma yin pa dang zhes bya ba ni de kho na nyid la skur pa 'debs pa dang po ngo / /'grogs par mi bya ba ni btags pa la skur ba 'debs pa dang po/ /yang na gnyis ka la skur pa 'debs pa ste/de dang gtam tsam yang skabs dbye bar mi bya zhes bya ba'i don to/ /de'i lta ba ngan pa'i dris gos na mi rung ngo zhes ring du spang bar bya ba yin pa'i phyir smos pa'i 'os ma yin pa'o/ /rnam grangs gzhan yang bdag nyid phung bar byed pa yin pas smos pa'i 'os ma yin pa'o/ /'jig rten phung bar byed pas 'grogs par mi bya'o//de'i phyir smras pa/ bdag nyid kyang phung bar byed ces bya ba la sogs pa la/ 'jig rten ni 'dir de'i lta ba la zhugs pa rnams so zhes bstan pa'i phyir smras pa/ 'jig rten gang de'i lta ba la zhes bya ba la sogs pa la/ skur pa 'debs pa 'di kha na ma tho ba chen po dang bcas pa yin no zhes mdo'i lung gis bstan pa'i phyir/'di las dgongs nas zhes bya ba la sogs pa la/ yang gang zag tu lta ba de ni sems can med pa la kun du btags nas sgro 'dogs par byed pa'o/ /gang yang zhes bya ba'i dngos po yod pa yang spong bar byed pas log par gzung ba'i stong pa nyid du lta ba'o//gang zag tu lta ba ni mtho ris kyi bar du gcod par byed pa ma yin te/ bdag nyid kyi rgyud la rmongs pa'i phyir dang / dge ba bskyed pa la rjes su mthun pa yin pa'i phyir ro/ /yang 'di ni rgyu dang 'bras bu'i rang gi mtshan nyid la skur pa 'debs pa'i phyir mtho ris kyi bar du gcod pa yin no//gang zag tu lta ba ni thar pa 'dod pa rnams thar pa la zhugs pa la slu bar byed pa ma yin no/ /yang 'di ni phyin ci log gi lam nye bar ston pas slu bar byed pa yin no/ /gang zag tu lta ba can gyi gang zag ni sems can gzhan chos 'dod pa rnams chos la 'jog par byed do//yang 'di ni dngos po thams cad med par 'dzin pa yin no/ /gang zag tu lta ba ni tshul khrims las nyams par mi 'gyur te/ bslab pa la gus par byed pa'i phyir ro/ /yang 'di ni btags pa tsam brtags pa'i phyir bslab pa la gus par mi 'gyur zhing lhod par 'gyur ro//de ltar na lta ba 'di dag mchog dang / mchog ma yin par rig par bya ste/ de lta bu'i rnam pas chos 'dul ba 'di las rab tu nyams par 'gyur ba yin no/ /sbyor ba ma yin par gzung ba ni log par zin pa ste/ shin tu dngos po med pa nyid kyi phyir de ni dngos po med pa'i ngo bo nyid stong pa nyid yin gyi/don dam pa stong pa nyid ni ma yin no/ /de nyid bstan pa'i phyir/ gang la la gang gis zhes bya ba ni brtags pas so/ /de yang zhes bya ba ni stong pa gang yin pa ste/ dngos po de dang bral ba'i ngo bo de yang mi 'dod pa'o/ /de lta bu'i thams cad stong pa nyid ni med pa nyid de thams cad du dngos po med pa'i stong pa nyid du 'gyur ro//gang gis stong pa zhes bya ba ni yongs su brtags pa'i ngo bo nyid kyis so/ /btags par smra ba la skur pa btab pas de med pa'o/ /gang stong pa de zhes bya ba ni btags pa la brten pa'o/ / btags pa'i dngos po'i rgyu mtshan la skur pa btab pas de la yang skur pa btab pa yin no/ /de ltar de dag gnyis ka'i rang bzhin med pas stong pa nyid kyang ga la yod/ gang gis stong pa dang / gang stong par 'gyur zhes bya ba thams cad rigs pa ma yin no/ /gang du zhes bya ba la las 'don pa de ni/gzugs la sogs pa'i dngos po zhes bya ba'i don to/ /de ni rigs pa ma yin te/ gang la zhes bya ba'i phyogs dang pos bstan pa'i phyir ro/ /de lta na yang smras pa/ btags pa tsam gang yin pa ni stong pa zhes brjod do/ /de'i phyir smras pa/ des de nyid stong pa nyid du 'gyur du ni mi rung ngo zhes bya ba la/de nyid kyis de nyid stong zhes brjod par nus pa ma yin no/ /stong pa zhes bya ba'i don ni/ bral ba la zhes bya ba'i don yin te/ btags pa tsam yang med pa de dang bral ba'i stong pa nyid do zhes brjod pa yin no/ /de bas na de yang med pa'i stong pa nyid smras pa ni log par gzung ba yin no//gang la zhes bya ba ni gang gi phyir te/ gang med pa zhes bya bas ni kun du brtags pa'i bdag nyid do/ /yang na gang la zhes bya ba ni gzugs la sogs pa'i dngos po rnams so/ /de ltar na gzugs la sogs pa'i rnam par gnas pa'i dngos po rnams byis pas kun du brtags pa'i dngos por med pa'o//de'i phyir gzugs la sogs pa'i dngos po rnams des stong ngo zhes smra bar nus pa yin no/ /de ltar skyon dang bcas pa'i dngos po rnams kyi de nyid tsam mthong ba ni don dam pa'i stong pa nyid mthong ba yin no zhes bya bar rig par bya'o//de nyid dbye ba'i phyir/ 'di la lhag ma gang yin pa zhes bya ba la sogs pa la/ yang dag pa ji lta ba zhes bya ba ni gang stong pa de yang dag par mthong ba ni phyin ci ma log par ro/ /gzugs la sogs pa'i dngos po de la gzung ba dang 'dzin pa'i rnam par rtog pa med do zhes bya ba'i stong pa nyid do//de la shin tu chags pa med pa'i phyir ro zhes bya bas rnam par rtog pa de yod pa ma yin pa'i phyir ro/ /de ltar na yang dag pa ma yin pa'i kun du rtog pa tsam yod de/ de'i mngon par brjod pa'i gnas su gyur ba'i phyir ro/ /de'i phyir smras pa/ gzugs zhes bya ba la sogs pa 'dogs pa'i tshig tsam po yin te zhes bya ba la/'di skad bstan par 'gyur te/ btags pa'i bdag nyid kyis stong pa'i dngos po tsam ni de'i bdag nyid du yod pa ma yin pa'i phyir ro/ /de lta na yang / kun du sgro btags pa'i ngo bos 'jug par 'gyur ro/ /des na smras pa/ yang dag ma yin kun rtog yod//de la gnyis po yod ma yin/ /zhes bya bas/ de ltar dngos po tsam dang 'dogs pa tsam du dngos po yang dag pa ji lta ba bzhin du rab tu shes pa'o/ /de ltar na yod pa ma yin pa la sgro btags pa'i shes pa ni kun du btags pa'o/ /dngos po tsam yod pa la skur pa mi 'debs pa de'i rnam grangs brjod pa'i phyir lhag par yang mi byed do zhes bya ba la sogs pa'o//de ltar re zhig rigs pas chos thams cad brjod du med pa'i ngo bo nyid do zhes bsgrubs nas/ lung gis kyang bsgrub par 'dod nas tshigs su bcad pa'i don gyis bstan pa'i phyir/ ming ni gang dang gang gis su/ /zhes bya ba la sogs pa la/gang dang gang gis su zhes bya ba ni mngon par brjod pa gang dang gang gis so/ /chos rnams gang dang gang zhes bya ba ni gzhan gyi dbang gi ngo bo nyid do/ /gang brjod pa zhes bya ba ni kun brtags pa'o/ /de ni zhes bya ba ni kun du brtags pa'i ngo bo nyid do/ /de la zhes bya ba ni gzhan gyi dbang gi ngo bo la yod pa ma yin pa'o//de'i phyir de nyid las smras pa/ brjod pa las ni gzhan gyur pa'i/ /brjod par bya ba yod ma yin/ /zhes bya ba 'dis ni sgro 'dogs pa'i mtha' yongs su bsal ba dang / ngo bo nyid gnyis gsal bar bstan pa yin no/ /'di ni chos rnams nyid do zhes bya ba ni dus rtag tu gzhan gyi dbang gi ngo bo la mngon par brjod pa dang /kun du brtags pa'i ngo bo ni yod pa ma yin no zhes bya ba'i don to/ /'dis ni skur pa 'debs pa'i mtha' yongs su bsal ba dang / yongs su grub pa'i ngo bo nyid gsal bar bstan pa yin no/ /'di dag ni tshigs su bcad pa'i bsdus pa'i don te/gzugs la sogs pa'i ming can gyi chos rnams ming gis ngo bo nyid brjod pa na de dag gi ming med pa'i phyir ro/ /des ni de nyid las/ chos rnams ming ni yod ma yin/ /zhes bya ba ni/ gang la ming de 'jug par 'gyur ba de las gzhan pa'i chos de'i bdag nyid du gyur pa yang yod pa ma yin no//de ltar na chos de dag ni ming dag gis nges par brtags pa na yang ming med pa nyid yin pa'i phyir gzhan ma yin pa nyid do/ /de'i phyir smras pa/ de la de ni yod ma yin/ /zhes bya ba yin no/ /de ni brjod du med pa'i ngo bo nyid dang / rang bzhin gyis sgrub pa'i phyir don dam pa'i ngo bo nyid kyi chos nyid do zhes bstan pa yin no//nyan thos kyi theg pa dang yang dag par ldan pa'i lung gnyis pa bstan pa'i phyir/ tshigs su bcad pa 'di'i don bsdus nas bstan par rig par bya'o zhes zhal gyis mi bzhes te zhes bya ba ni lta ba dang / sred pa dag gis gzugs la sogs pa'i dngos po khas blangs nas so//lta ba ni mngon par zhen pa'i rnam pa'o/ /sred pa ni mi gtong ba'i rnam pas dngos po de 'dzin pa ni khas len pa'o/ /de dag gnyis ka las thub pa grol bas zhal gyis mi bzhes pa'o/ /de ni gzugs la sogs pa'i dngos po'i ngo bo la mngon par zhen par mi 'gyur te/ sgro 'dogs pa dang skur pa 'debs pa'i lta ba rab tu spangs pa'i phyir ro/ /des na smras pa/ de kun thub pas zhal gyis mi bzhes te/ /zhes bya ba la/ sgro 'dogs pa dang skur pa 'debs pa'i lta ba la brten nas sred pa rnam pa gnyis skye bar 'gyur te/ srid pa'i sred pa dang /srid pa ma yin pa'i sred pa dang / rim pa bzhin du sbyar bar bya'o/ /de la srid pa ma yin pa'i sred pa ni dngos po yang dngos po med par mthong ba'i sgo nas skye bar 'gyur ro zhes bya bas gzigs pa dang bzhed pa skye bar 'gyur ro/ /srid pa la sred pa ni mngon par brjod pa thos pa'i sgo nas skye ba ni gsan la bzhed pa'o//de gnyi ga'i ngo bo med pas zhal gyis mi bzhes pa'o/ /'dogs pa'i rnam grangs ni kun rdzob yin no zhes bstan pa'i phyir/ btags pa gang yin pa de dag ni kun rdzob ces bya ste zhes bya ba la kun rdzob de la dngos po'i ngo bor ni mngon par zhen par mi bya ste/lta ba med pa'o zhes bstan pa yin no/ /des na rgyu des zhal gyis mi bzhes pa zhes bya'o/ /zhal gyis mi bzhes pa'i phyir gang yang nye bar mi 'dzin pas gang gis kyang ma yin no zhes bya ba'i don to/ /'dzin pa bshad pa ni/ sgro 'dogs pa'am skur pa 'debs pas sam zhes bya ba ni rdzas de 'dzin pa'i skabs kyis so//de ltar phyin ci log gi lta ba spangs pas yang dag pa'i lta ba can du 'gyur ro/ /des shes bya de yang yang dag pa ji lta ba bzhin mthong ba'i phyir gzigs pa zhes brjod do/ /des shes bya'i brjod pa thos pa'i phyir gsan pa zhes brjod do/ / sred pa skyed par yang mi mdzad/ 'phel bar yang mi mdzad ces bya ba'i rang bzhin gyi don bstan pa'i phyir/ dmigs pa de spong zhing btang snyoms can du gnas te zhes bya ba la/ skyed par mi mdzad ces bya ba ni spong bar mdzad pa'o/ /'phel bar mi mdzad ces bya ba ni btang snyoms su gnas pa'o//nyan thos kyi theg pa dang yang dag par ldan pa'i lung gsum pa nyid bstan pa/ sa la brten cing bsam gtan mi byed ces bya ba ni sa gang yin pa de ni bdag go zhe'am/ bdag gang yin pa de nyid sa'o zhes bya bar de ltar sa la bdag dang bdag gir bzung nas bsam gtan mi byed de zhes bstan par 'gyur ro//de ltar chu dang me dang rlung la yang sbyar bar bya'o/ /de bzhin du 'byung ba chen po bzhi'i tshig gis 'dod pa'i khams dang / gzugs kyi khams la brten nas bsam gtan mi byed do zhes bstan par 'gyur ro/ /gzugs med pa'i skye mched bzhi ni rang gi sgras bstan pa yin no//'dod pa'i khams ni 'jig rten 'di la/ gzugs dang gzugs med pa'i khams ni 'jig rten gzhan no/ /nyi ma dang zla ba tha dad du smos pa ni 'jig rten gzhan du yang mngon sum du mthong ba'i phyir ro/ /mthong ba dang zhes bya ba la sogs pas ni tha snyad la brten nas bsam gtan mi byed do zhes bstan pa yin no//bsnyen pa dang zhes bya ba la sogs pas ni spros pa la brten nas bsam gtan mi byed do zhes bstan pa yin no/ /mi rten pa'i rgyu bstan pa'i phyir/ sa la sar 'du shes pa gang yin pa de bsal ba yin no zhes bya ba ni rab tu spangs pa zhes bya ba'i don to//de ltar brten pa med par bsam gtan byed pa'i dge slong la ni lha dang tshangs pa la sogs pas kyang mchod par 'gyur ro zhes bstan pa'i phyir/ dbang po dang bcas pa'i zhes bya ba la sogs pa'o/ /sa'i 'du shes la sgro 'dogs pa dang skur pa 'debs pa'i sgo nas bstan pa'i phyir/sgro 'dogs pa dang zhes bya ba la sogs pa la sgro 'dogs pa ni brjod pa'i ngo bo la mngon par zhen pa nyid do/ /skur pa 'debs pa ni don dam par yod pa yang dag pa'i dngos po la skur pa 'debs pa'o/ /bsal ba'i don bstan pa'i phyir/ bsal zhes bya ba ni spong ba dang gtong ba'o zhes bya ba'o//de ltar chos thams cad brjod du med pa'i ngo bo rab tu rtogs nas de'i bdag nyid ma yin na yang brjod pa'i bdag nyid kyi sgo nas ston par mdzad kyang / brjod du med pa'i bdag nyid la bstan du med pa nyid yin te/ ngag gi spyod yul thams cad las 'das pa'i phyir ro/ / des de brjod pa na 'phags pa'i ye shes kyi rgyu mthun pa'i bstan pas bsdus pa de ni yang dag pa'i ye shes skye ba la rjes su mthun pa yin pa'i phyir ro/ /de'i phyir smras pa/ brjod pa med na yang de gzhan dag la bsnyad pa dang / thos par byed kyang mi nus te/ so so rang gis rig par bya ba yin pa'i phyir ro//thos par yang mi nus te/ thos pa'i spyod yul las 'das pa'i phyir ro/ /de ltar byas nas shes pas kyang shes par nus pa ma yin te/ de'i yul can gyi shes pa ni man ngag dang nye bar 'brel pa yin pa'i phyir ro/ /de ltar na yang dag pa ma yin pa la rnam par rtog pa yin na yang /'ga' zhig rnam par byang ba dang mthun par 'gyur ba yin te/ 'phags pa'i ye shes kyi rgyu mthun pa la dmigs pa'o/ /de'i phyir tshigs su bcad pas smras pa/ yang dag min rtog yang dag min/ /yang dag ma yin min mi rtog//rtog min mi rtog ma yin pa/ /shes bya thams cad yin par brjod/ /ces bya ba yin no/ /de la yang dag min rtog ni thar pa dang rjes su mthun pa ma yin pa'o/ /yang dag min/ /yang dag ma yin min ni brjod du med pa'i mtshan nyid rab tu rnam par 'byed pa'i rjes su mthun pa'o//mi rtog ces bya ba ni de kho na nyid dang / 'jig rten las 'das pa'i ye shes te/ rnam par mi rtog pa'i mtshan nyid med pa'i phyir ro/ /rtog min mi rtog ma yin pa ni/ 'phags pa rnams kyi 'jig rten las 'das pa'i ye shes kyi rjes la thob pa dag pa 'jig rten pa'i ye shes te/ yang dag pa'i yul can yin pa'i phyir/chos kyi mtshan nyid rnam par 'jog pa'i phyir ro/ /ji skad bstan pa de khon nyid yongs su shes na rnam par rtog pa spong ngo / /rnam par rtog pa spangs na 'khor ba las ldog par 'gyur ro/ /de ltar byas na de kho na nyid mthong ba rnams ni rnam par grol ba la 'jug par 'gyur ro zhes bstan pa yin no//da ni de kho na nyid ma mthong na ni 'ching ba'i rgyur 'gyur ro zhes bstan pa'i phyir smras pa/ de bzhin nyid de de ltar yongs su ma shes pas zhes bya ba la sogs pa la/ chos thams cad brjod du med pa'i mtshan nyid du yongs su ma shes pa ste/ de ltar ma mthong ba'i phyir ro//de kho na shes pa dang bral ba'i byis pa rnams kyis de kho na nyid ma mthong ba'i gzhi des te/ de'i rgyus zhes bya ba'i don to/ /rnam par rtog pa rnam pa brgyad ni 'jug pa'i 'bras bu'i rgyu nyid dang / 'jug pa'i gzhi'i rgyu nyid kyi dbang du byas nas rnam par gzhag pa'o/ /de la 'jug pa'i 'bras bu ni khams dang 'gro ba dang skye gnas kyis bsdus pa'i gzugs la sogs pa'i 'du byed rnams so//de dag gi rgyu ni rnam par rtog pa gsum mo/ /'jug pa'i gzhi ni bdag med par mthong ba'i mi mthun pa'i phyogs su gyur pa bdag tu mthong ba dang / de'i rtsa ba can gyi lta ba'o/ / de'i gzhi las 'dod chags dang / zhe sdang dang / gti mug ste/ de dag ni rnam par rtog pa rnam pa lnga'o/ /de ltar na chos kyi mtshan nyid dang / chos kyi khyad par gyi mtshan nyid dang / bsdus pa'i mtshan nyid dang / bsdus pa'i khyad par gyi mtshan nyid dang / chos kyi rnam par dbye ba'i dbang du byas nas rnam pa brgyad do//gzhi gsum skyed par byed pa yin pas sems can thams cad dang / snod kyi 'jig rten rnams sgrub par byed par 'gyur ro/ /chos rnams kyi ngo bo la dmigs pa'i rnam pa'i rnam par rtog pa ni ngo bo nyid du rnam par rtog pa'o/ /bye brag tu rnam par rtog pa yang de bzhin no//chos bsdus pa la dmigs pa'i rnam par rtog pa ni ril por 'dzin pa'i rnam par rtog pa'o/ /rang gi rgyud kyi 'du byed la bdag dang bdag gi rnam par 'dzin pa'i rnam par rtog pa ni bdag dang bdag gi rnam par rtog pa'o/ /tshor ba rnam pa gsum gyi gnas su gyur pa'i chos rnams la rjes su chags pa dang /khong khro ba dang / so sor ma brtags pa'i rnam par rtog pa ni sdug pa la sogs pa'i rnam par rtog pa'o/ /de ltar dmigs pa dang / rnam pa'i dbang gis rnam par rtog pa rnams rnam par gzhag par rig par bya'o/ /rnam par rtog pa nyid spros pa ste/ brtags pa'i ngo bo nyid yin pa'i phyir ro//de'i gnas ni dmigs pa'o zhes bstan to/ /skye ba snga ma'i las kyis 'phangs pa'i gzugs la sogs pa'i phung po lnga po la rnam par rtog pas bskyed ces brjod par bya ste/ ji lta ji ltar rnam par rtog pa de dag la kun du spyod par byed pa de lta de ltar spros pa la mngon par dga' bar 'gyur zhing de las spros pa mngon par 'byung bar 'gyur ro//de'i phyir rnam par rtog pa gsum po ni spros pa'i gnas kyis bskyed pa yin no/ /yang dngos po de dag nyid la gnas nas sngon gyi spros ba'i bag chags kyis bsgos pa'i rnam par rtog pa kun nas spyod par 'gyur ro zhes bstan pa'i phyir smras pa//ming gi 'du shes kyi brjod pas yongs su gzung ba zhes bya ba ni ming la 'du shes pa ni ming la 'du shes te/ ming gi mtshan ma 'dzin pa'i bdag nyid can no/ /de sngon du song ba las rjes su tha snyad du byed pa ni brjod pa ste/ ji ltar 'du shes pa de bzhin du tha snyad du byed do zhes mdo las gsungs pa'i phyir ro//des yongs su gzung ba zhes bya ba'i bshad pa ni yongs su bsgos pa zhes bya ba yin no/ /rnam par rtog pa'i spros pa zhes bya ba ni spros pa med pa'i dngos po la gzugs nas rnam par shes pa'o zhes bya ba'i bar du bzung nas rtog cing dpyod pas 'byung bar 'gyur zhes bya ba'i don to//rdzas kyi dbye bas ni rnam pa sna tshogs mang por 'gyur ro/ /de las gzhan pa'i lta ba thams cad kyi rtsa ba zhes bya ba la/ 'jig tshogs la lta ba las gzhan pa mthar 'dzin pa'i lta ba la sogs pa'i rtsa ba ni 'jig tshogs la lta ba de nyid kyis nga'o snyam pa'i nga rgyal yang rgyas par byed pa yin la/rnam par rtog pa gang las de byung ba de las yang 'byung ba yin no/ /nga'o snyam pa'i nga rgyal de las/ nga rgyal las kyang nga rgyal la sogs pa nga rgyal gzhan thams cad 'byung bas de ni rtsa bar gyur pa yin no/ /ci rigs par zhes bya ba ni 'dir rim pa ji lta ba bzhin du lta ba'am/yang na gang na rjes su chags pa yod pa de na khong khro yang yod pas zhes bya bas don ji ltar 'byung ba bzhin no/ /gzhi gsum po dbye bar bya ste/ dang po ni rnam par rtog pa la gnas pa'o/ /de nyid la lta ba las ngo'o snyam pa'i nga rgyal kun du 'jug pa ni gnyis pa'o/ / de la brten pa'i 'dod chags dang / zhe sdang dang gti mug ni gsum pa'o/ /gzhi gsum po dag gcig la gcig brten pa'i don bstan pa'i phyir smras pa/ de la rnam par rtog pa'i spros pa'i zhes bya ba la sogs pa la/ 'jig rten thams cad kyi zhes bya ba ni snod dang sems can gyi 'jig rten rnams so//gzugs zhes bya ba ni gzung bar bya bas rab tu phye ba'i rtog pa ste/ gzugs kyi ngo bo nyid du rtog pa'o/ /de bzhin du gzhan dag kyang yin no/ /de dag gi ngo bo nyid rnam par gzhag pas yongs su bsdus pa ni bye brag tu rnam par rtog par rig par bya ste/ ngo bo nyid du rtog pa nyid la gnas nas de'i rjes su 'brangs nas 'jug pa ni bye brag tu rnam par rtog pa'o zhes bstan pa'i phyir smras pa/ngo bo nyid du rnam par rtog pa la brten pa de zhes bya ba la sogs pa yang ngo / /mang po gcig nyid du 'dzin pa'i rnam par rtog pa ni ril por 'dzin pa'i rnam par rtog pa'o zhes bstan pa'i phyir dang /phyi rol gyi dngos po bstan pa'i phyir/ khyim dang / dmag dang zhes bya ba la sogs pa'o/ /zag pa dang bcas pa'i sa bon rjes su bsgos pa'i phyir zag pa dang bcas pa'o/ /de'i phyir nye bar len pa dang bcas pa'i phyir nye bar len pa'i gnas su gyur pa'i phyir ro/ 'dris shing zhes bya ba ni lhan cig skyes pa'i 'jig tshogs kyi lta ba la kun du brtags nas mngon par zhen pa'o//goms pa la log par 'dzin cing 'dres pa yang mngon par shes pa'o/ /rang gi zhes bya ba ni rang gi rgyud do/ /log pa'i rnam par rtog pa zhes bya ba ni sgro btags pa'i rnam pa nyid do//mdzes pa yid du 'ong ba'i dngos po la dmigs pa zhes bya ba ni yid du 'ong ba'i dngos po la dmigs pa zhes bya ba'i don to/ /kun nas nyon mongs pa'i phyogs 'di dag thams cad gzung ba dang 'dzin pa'i dbye bas gnyis su rnam par gzhag par bya ba'am kun nas nyon mongs pa can gyi shes pa dang /shes bya'i dbye bas so/ /'di dag gnyi ga yang sngon gyi mtha' mi shes so zhes bya bas thog ma med pa'o/ /phan tshun gyi rgyu can yin pa'i phyir mthong ba'i chos dang / phyi ma pa'o/ /de'i phyir smras pa/ rnam par rtog pa snga ma ni zhes bya ba la sogs pa'o/ /rnam par rtog pa ngo ma shes pa ni spro ba'i gnas kyi rgyur 'gyur gyi/yongs su shes pa ni ma yin no zhes bstan pa'i phyir smras pa/ de la da ltar gyi zhes bya ba la sogs pa la/ da ltar gyi ste tshe 'di'o/ /rnam par rtog pa yongs su ma shes pa ni de kho na ma mthong ba'o/ /des de'i dmigs pa'i dngos po 'byung ba'i rgyu ste/de byung bar gyur pas rnam par rtog pa yang 'byung bas de ltar na phan tshun gyi rgyu can nyid yin no/ /de ltar 'jug par 'gyur ba'i rnam par rtog pa ldog par 'gyur ba'i thabs rab tu bstan par bya ba'i phyir smras pa/ rnam par rtog pa de ji ltar shes par 'gyur zhe na zhes bya ba la sogs pa la/ rnam par rtog pa yongs su shes pa ni rnam par mi rtog pa'i ye shes kyi sbyor ba yin no/ /des na smras pa/ yongs su tshol ba rnam pa bzhi dang zhes bya ba la sogs pa la/ de la dngos po ji lta ba bzhin du rnam par 'jog pa ni yongs su tshol ba'o/ /yongs su btsal ba'i dngos po'i mthar thug pa rnam par nges pa thob pa ni yang dag pa ji lta ba bzhin du yongs su shes pa'o//ming yang dag pa ji lta ba bzhin du nye bar yongs su rtog pa dang / rigs pas yongs su rtog pa de ni ming yongs su tshol ba zhes bya'o/ /ji lta ba bzhin du yongs su tshol ba gzhan yang rig par bya'o//ming la ming tsam du zhes bya ba ni dngos pos dben pa'i ming ngo / /de la blos sbyar ba de ni de'i bdag nyid ma yin pa nyid du mthong ba zhes bya ba'i don to/ /ming gis dben pa'i dngos po ni/ de'i bdag nyid ma yin pa'i phyir ro/ /yongs su grub pa'i dngos po tsam mthong ba ni dngos po yongs su tshol ba'o//ngo bo nyid du btags pa tsam nyid du lta ba dang / bye brag tu btags pa tsam du lta ba ni de gnyis ka yongs su tshol ba'o/ /de lta de ltar yongs su tshol na/ ming dang dngos po shin tu tha dad par yang mthong la/ /tha dad yang dngos po gang gi ming gang yin pa de gzhan dag la shin tu 'jug par mi 'gyur ro zhes bya bas rjes su 'jug pa'i mtshan nyid kyang rab tu rig par 'gyur te//de gnyi ga'i 'brel ba la brten nas ngo bo nyid dang bye brag tu btags pa yang khong du chud par bya'o/ /de ltar na yongs su tshol ba bzhi po ni yongs su shes pa bzhi'i sbyor ba pa yin par rig par bya'o//ming dang dngos po tha dad par gyur na de dag gnyi ga'i 'brel pa'i dgos pa yongs su shes pa ni yang dag pa ji lta ba bzhin yongs su shes pa dang po yin no/ /des na smras pa/ des de ltar ming yang dag pa ji lta ba bzhin yongs su shes so zhes bya ba yin no//shin tu tha dad pa yin na yang dngos po de'i ming 'di zhes sangs rgyas dang byang chub sems dpa' rnams kyis des dben par mkhyen na yang / ji srid tha snyad rjes su 'jug par 'gyur ba de srid du ming la sogs pa'i rim par de ston par mdzad do//ming gis 'du shes su byed pa'i mtshan nyid yin pa'i phyir/ 'du shes kyi don dang zhes bya ba ni dngos po de ming dang rgyu mtshan gyis nye bar mtshon par byed pa'i don to zhes bya bar dgongs pa'o/ /ji ltar 'du shes pa bzhin du mngon par zhen par 'gyur ro zhes bya bar/ lta ba'i don dang zhes bya ba smras te/ji ltar mngon par zhen par gyur pa de ltar tha snyad du byed do zhes bya bar nye bar 'dogs pa'i don du'o zhes bya ba smras so/ /de med na ming 'byung bar sbyar ba'i phyir/ /gal te gzugs la sogs par zhes bya ba la sogs pa'o/ /'du shes med na dngos po nye bar mtshon par mi 'gyur la/de med na btags pa la mngon par zhen par yang mi 'gyur ro/ /mngon par zhen pa med na bdag nyid don la nges par 'gyur ba dang / /gzhan dag la nges pa bskyed par mi nus la/ /de bzhin du bstan pa dang mnyam pa yang med par 'gyur ro zhes bstan par 'gyur ro//de ltar na ming rnam par gzhag pa shes pa ni ming tshol bar gyur pa yang dag pa ji lta ba bzhin du yongs su shes pa'o/ /dngos po la dngos po tsam du des yongs su btsal ba na ma 'dres pa ste mi ldan par ro/ /brjod du med pa'i dngos po tsam du lta ba ni/shes pa gnyis pa'o/ /yongs su grub pa dang / dngos po'i ngo bo dag ni bden na yang de'i ngo bo ni ma yin te/ de'i snang ba gzugs brnyan nyid dang 'bra bar yong su shes shing lta ba ni shes pa gsum pa'o/ /de'i phyir smras pa/ des de'i ngo bo nyid sprul pa dang zhes bya ba la sogs pa la/ji ltar sprul pa dang / gzugs brnyan te de'i rnam pa de dang 'dra bar sprul pa'o/ /de bzhin du dngos po'i rnam par yang gzugs brnyan dang 'dra ba kun du brtags pa'i ngo bo nyid du rig par bya'o/ /de bzhin du gzugs brnyan la sogs pa rnams la sbyar bar bya'o/ /kun du brtags pa'i ngo bos dben pa mthong ba de ni shin tu zab pa'i don spyod yul du gyur pa zhes bya bar gsungs pa yin no//chos rnams kyi bye brag ni gnas skabs kyi khyad par gyis bsdus pa nyid do/ /de'i gnyis su med pa'i mtshan nyid la lta ba ni shes pa bzhi pa'o/ /ngo bo nyid kyang gnyis su med pa'i mtshan nyid du rig pa yin no//de lta na yang de las 'di la bye brag bstan pa'i phyir dang / dbye ba bstan pa'i phyir bye brag tu btags pa'i tshol ba nyid la gnyis su med pa'i mtshan nyid ces bstan pa yin no/ /gnyis su med pa nyid kyang dngos po yang ma yin/dngos po med pa yang ma yin pa nyid do zhes bya bar rtsa ba'i tshig gis yod pa dang med pa ma yin pa dang sbyar pa'i phyir smras pa/ dngos po de yang yod pa yang ma yin/ med pa yang ma yin te zhes bya ba la/ byis pas kun du brtags pa'i bdag nyid kyi yongs su ma grub pa nyid kyi phyir yod pa ma yin pa'o//med pa yang ma yin te/ rnam par mi rtog pa'i ye shes kyi spyod yul du gyur pa nyid kyis brjod du med pa'i bdag nyid du rnam par gnas pa'i phyir ro/ /de ltar gzugs la sogs pa yang yod pa ma yin te/ don dam par gzugs kyang gzugs su bsgrub par nus pa ma yin pa'i phyir ro//gzugs med pa yang ma yin te/ kun rdzob tu lag pa la sogs pa'i reg pas reg cing nom du yod pa'i phyir ro/ /de'i phyir/ gzugs su nye bar 'dogs pas zhes smras pa yin no/ /de bzhin du bstan du yod pa la sogs pa la yang tshul 'di nyid kyis rig par bya'o//yang dag pa ji lta ba bzhin du shes pa med pa nyid de de ni rnam par rtog pa'i sdug bsngal gyi spros pa skyed par byed pa yin no zhes bstan pa'i phyir smras pa/ de la byis pa rnams kyi log par rtog pa rnam pa brgyad po zhes bya ba la sogs pa la/ rnam par rtog pa ni kun nas nyon mongs pa'i rgyu nyid du rab tu bstan pa'i phyir/log par zhes bya ba smos so/ /'khor ba ni nyon mongs pa'i rtsa ba can nyid yin pa'i phyir kun nas nyon mongs pas 'khor ba kun du bskyed cing / 'khor ba yang gcig tu sdug bsngal bar ro gcig pa'i phyir sdug bsngal bskyed cing 'jug par 'gyur pa yin no//de ltar na re zhig rnam par rtog pa'i rtsa ba las sdug bsngal 'byung bar 'gyur ro zhes bstan pa yin no/ /rnam par rtog pa spangs pa'i 'gog pa las sdug bsngal 'gag par 'gyur ba bstan pa'i phyir smras pa/ gang gi tshe zhes bya ba la sogs pa la/ rnam par rtog pa spangs pas spros pa 'gag par 'gyur bas 'khor bar gnas par yang mi 'gyur la/ sangs rgyas kyi chos dang / sems can yongs su smin par bya ba'i sbyor ba mngon par 'du byed pa'i bye brag gis mya ngan las 'das par yang mi gnas so/ /de lta bu ni theg pa chen po'i mi gnas pa'i mya ngan las 'das pas/yongs su mya ngan las 'das pa yin no/ /shes bya'i sgrib pa rnam par dag pa'i ye shes kyi spyod yul gyi de kho na nyid ni/ de kho na'i don gyi mchog go/ /de spyod yul du byas pa'i ye shes ni shes bya'i sgrib pa las rnam par grol ba'i ye shes so//de rnam par dag pa ni sa brgyad pa nas nye bar bzung nas rig par bya'o/ /thams cad la dbang thob pa ni mdor na phyi'i dngos po la dang / nang gi bdag nyid la'o/ /de ltar phyi'i dngos po yang rnam pa gnyis la dbang thob pa ste/ yod pa ma yin pa'i dngos po bskyed pa ni/sprul pa sna tshogs la yang zhes bya ba la sogs pa'o/ /yod pa'i dngos po gzhan du ba sgrubs pa ni yongs su bsgyur ba sna tshogs pa yang ngo zhes bya ba'o/ /nang gi bdag nyid kyang rnam pa gnyis te/ tshe byin gyis brlabs pas dus ji srid du 'dod pa de srid du gnas pa la dbang ba ni gang yang ji srid du 'dod pa de srid du gnas pa dang zhes bya bas bstan pa yin no//dga' mgur te/ 'dod pa bzhin dpyad nas gnod pa med par 'chi ba la dbang thob pas 'dod pa tsam gyis tshe 'dor ba'o/ /de'i phyir smras pa/ gnod pa med par dga' mgur 'chi 'pho ba la yang ngo zhes bya ba yin no//thams cad la dbang thob pa'i byang chub sems dpa' ni sems can thams cad kyi gtso bor 'gyur ba yin no/ /de ltar dbang thob pa'i byang chub sems dpa' de la ji ltar gtso bor gzung ba'i phan yon lnga bstan te/ nyon mongs pa rab tu zhi ba ma yin na yang gang rab tu zhi bar gyur bas gnas pa'i mchog la gnas par 'gyur ba'i rab tu zhi ba de nyon mongs pa zhi ba'i nyan thos la sogs pa la med pa'i phan yon 'di dag 'byung bar 'gyur ro//rig pa'i gnas thams cad la shes bya'i mthar thug pa'i shes pa gang / nyan thos la sogs pa la med pa gang thob pa de yang 'di'i phan yon yin no//'khor ba dang sems can rnams kyi phyin ci log gi spyod pas sdug bsngal ba dang / kun nas nyon mongs pa'i sems can thams cad kyi don la skyo bar mi 'gyur ba dang / dran pa dang bcas pa'i shes rab kyi khyad par dang ldan pa'i phyir de bzhin gshegs pa thams cad ldem po ngag thams cad la 'jug pa la nus pa dang ldan par 'gyur ro//phyir mi ldog pa nyid kyi phyir mos pa mi zlogs par 'gyur ro/ /phas kyi rgol ba thams cad kyis bzlog kyang mi zlogs pas brtson 'grus brtsams pa mi 'dor bar 'gyur ro//de'i phyir smras pa/ gzhan gyi dring mi 'jog pa zhes bya ba ni/ gzhan gyi tshig gi rjes su mi 'jug pa'o/ /phan yon 'di dag dang ldan pas phan yon gyi las 'di dag byed par 'gyur ro/ /dang po ni re zhig kun nas nyon mongs pa med pa'i mthong ba'i chos kyi bde ba khyad par can la gnas pas sems zhi ba'i phan yon 'di nyid yin no//de bzhin du kun nas nyon mongs pa med pa'i zhi par gnas pas bya ba rnam pa bzhi bya ba yin te/ rang gi don gyi dbang du byas nas rang gi rgyud yongs su smin pa'o/ /gang gi phyir smras pa/ sangs rgyas kyi chos thams cad yongs su smin pa zhes bya ba'o//gzhan gyi don ni gzhan gyi rgyud yongs su smin pa ste/ gang gi phyir smras pa/ sems can yongs su smin par byed pa zhes bya ba yin no/ /dgongs pa can gyi tshig la mkhas pas dam pa'i chos 'dzin pa'o/ /de dbye bar bya ste/ sems can thams cad kyi the tshom skyes shing skyes pa rnams gcod par byed pa nyid dang /gang yang dkon mchog gsum gyi gdung rgyud mi 'chad par 'jug par byed pa'o/ /de dag gis ni de bzhin gshegs pas gsungs pa'i mdo sde rnams mnyan pa dang / gzung ba dang / bcang ba dang ldan pa'i bya bas yongs su mnyan par bya/yang dag par gzung bar bya/ yun ring du gnas par bya bar mi mthun pa'i phyogs spang bar bya'o zhes bstan pa yin no/ /dam pa'i chos ltar bcos pa zhes bya ba la dam pa'i chos ltar bcos pa ni dam pa'i chos kyi gzugs brnyan te/ gzhi bslu ba nas ji skad bstan pa lta bu'o//yang de ni bstan pa nub par byed pa zhes bya ba ni bstan pa'i bar du gcod par byed cing 'jug pa'o/ /de dam pa'i chos ni ma yin gyi/ gzhan du ni dam pa'i chos kyi gzugs brnyan te/ de'i mi mthun pa'i phyogs su gyur pa'o zhes bya ba'o/ /yongs su shes pa ni yongs su gcod pa'o//de bzhin du gzhan dag la smra ba ni ston pa'o/ /de ltar yongs su shes nas spong ba ni bsal ba'o/ /de'i mi mthun pa'i phyogs gzhan gyis smras pa/ sun 'byin pa ni bya ba bzhi ba'o/ /gzhan gyi dring mi 'jog pas mi 'phrogs pa'i sbyor ba mi 'dor bas brtson 'grus brtan pa dang ldan par 'gyur ba dang /smon lam brtan po dang ldan pa'i phyir ro/ /byang chub sems dpa'i bya ba thams cad 'di dag gi khongs su gtogs pa'o zhes bstan pa'i phyir smras pa/ byang chub sems dpa'i bya ba gang ci yang rung ba de dag ces bya ba la sogs pa'o//de kho na nyid bzhi po 'di dag ni dman pa dang / 'bring dang / mchog tu rnam par gzhag pa bstan pa'i phyir smras pa/ gnyis ni tha ma ste/ 'jig rten pa'i shes pa'i spyod yul yin pa'i phyir dang / nyon mongs pa dang shes bya'i sgrib pa'i gnyen po'i phyogs ma yin pa'i phyir ro//'bring po ni/ zag pa med pa'i phyir dang / nyon mongs pa'i sgrib pa'i gnyen po yin pa'i phyir ro/ /sgrib pa gnyi ga'i gnyen po'i phyogs yin pa'i phyir bzhi pa ni mchog yin no/ /byang chub sems dpa'i sa las/ de kho na nyid kyi don gyi le'u bshad pa ste bzhi pa rdzogs so// //de kho na'i don mthong ba ni nyon mongs pa med par 'gyur bas skyo ba med pa'i thabs rnyed par 'gyur ro zhes bya bar de'i rjes la mthu bstan par bya'o/ /sangs rgyas dang byang chub sems dpa' thams cad kyi mthu ni bsam gyis mi khyab par 'gyur te/ shin tu zab cing rgya che ba'i phyir ro//rgyu rnam pa lngas mthu bsam gyis mi khyab par rig par bya ste/ sems can thams cad las yang dag par 'das pa'i phyir dang / 'jig rten gyi dpe thams cad las 'das pa'i phyir dang / de'i mthu rnams legs par dpyod pa'i las byas pa'i sems tsam dang / rab tu 'brel ba'i phyir dang / mnyam par ma bzhag pa'i sa pa'i sems kyis bsgrub par dka' ba'i phyir dang / mnyam par bzhag pa'i sa pa'i sems dang rab tu 'brel pa'i phyir ro/ /mdor bsdu na byang chub sems dpa'i mthu ni rnam pa gsum du rig par bya ste/ting nge 'dzin la dbang thob pa'i byang chub sems dpa' rnams kyi mngon par shes pa'i mthu ste/ yangs shing rgya che la zab pa'i mngon par shes pa drug go/ /bsod nams dang chos kyi mthu ni 'jig rten las 'das pa'i pha rol tu phyin pa drug go/ /ngo mtshar rmad du byung ba'i chos kyi mthu ni 'bras bu'i khyad par gyis bsdus pa ste gsum pa'o//de la mthu dang po gang yin pa de yang rnam pa gsum du bstan par bya'o/ /rten nyid dang / ngo bo nyid dang / sbyor ba'i las kyi sbyor ba nyid do/ /ting nge 'dzin la dbang thob pa ni mkhas pa bdun gyis ting nge 'dzin la dbang thob pa yin par rig par bya ste/ting nge 'dzin la mkhas pa dang / gnas pa la mkhas pa dang / ldang ba la mkhas pa dang / mngon par sgrub pa la mkhas pa dang / spyod yul la mkhas pa dang / 'phel ba la mkhas pa dang / 'grib pa la mkhas pa'o//yang ting nge 'dzin la dbang thob pa ni rnam pa gsum ste/ ting nge 'dzin gyi dri ma ring du byas pa nyid dang / ting nge 'dzin gyi nye ba'i nyon mongs pa ring du byas pa nyid dang / ting nge 'dzin gyi khyad par thob pa nyid do/ /yang gsum ste/ myur ba dang / dus ring du dang / ma tshang ba med pa'o//mthu'i ngo bo bstan pa'i phyir/ 'dod pa tsam gyis don thams cad 'grub pa zhes bya ba ni don thams cad 'grub pa nyid ni ji ltar 'dod pa mngon du phyogs par 'gyur ba'o/ /sems shin tu yongs su bsgoms pa nyid ni las su rung bar 'gyur pa'i phyir ting nge 'dzin la dbang thob par 'gyur zhes bya ba ni go rims so//'jig rten thams cad las shin tu yang dag par 'das pas na 'phags pa'o/ /chos rnams kyi zhes bya ba ni sbyin pa la sogs pa rnams so/ /'bras bu chen po ni rnam par smin pa shin tu gya nom pa dang / shin tu rgya che ba nyid des byang chub sems dpa' bde ba nye bar len pa'i rgyu la sogs pa'i bye brag 'thob pa'o//phan yon chen po nyid ni mthong ba'i chos kyi 'bras bu'i bye brag dang ldan pa'o/ /yang na 'bras bu chen po nyid phan yon chen po'o/ /sngon bsags pa las lhan cig skyes pa zhes bya ba ni/ dus dpag tu med par goms par byas pa'i bsod nams kyi tshogs bsags pa las zhes bya ba'i don to//lhan cig skyes pa'i ting nge 'dzin gyi bye brag dang / khyad par rang gi ngang gis 'byung bar 'gyur bas zhes byas nas so/ /yang mthu thams cad bsdu na mthu rnam pa lngar 'gyur te/ mngon par shes pa drug dang ldan pa'i mngon par shes pa'i mthu dang /sbyin pa la sogs pa'i khyad par dang ldan pa'i chos kyi mthu dang / rang bzhin gyis skye ba dran pa la sogs pa ngo bo nyid kyis grub pa'i yon tan gyi khyad par rnams dang ldan pas lhan cig skyes pa'i mthu'o/ /rnam pa gsum gyis mnyam pa med pa'i phyir thun mong ma yin pa ste/phra ba nyid dang / rnam pa nyid dang / khams kyis so/ /de las gzhan ni mnyam pas thun mong nyid do/ /mngon par shes pa drug ji ltar rigs par lus dang ngag dang yid yongs su dag pa'i dbang du byas nas rnam par gzhag pa'am/ mngon par shes pa rnams kyi dbang gis gzhag pa'o/ /sbyin pa la sogs pa ni rgyu dang 'bras bu'i mtshan nyid 'dzin pas na zhes brjod par bya'o/ /de dag gi byin gyis brlabs pa ni mthu zhes bya'o/ /yang de ni rnam pa bzhir rig par bya ste/ mi mthun pa'i phyogs spong bar byed pa nyid dang / tshogs yongs su smin pa'i bye brag nyid dang / bdag dang gzhan rjes su 'dzin pa nyid dang / ma 'ongs pa'i 'bras bu'i bye brag nyid do/ /nyan thos rnams kyi rdzu 'phrul ni sbrul bar byed pa dang / 'gro ba dang 'ong ba'i sgo nas rnam par gzhag par byed pa'o/ /yang byang chub sems dpa' rnams kyi rdzu 'phrul ni sprul pa dang sgyur ba'i sgo nas rnam par 'jog par byed de/shin tu zab cing rgya che ba'i don bstan pa'i phyir ro/ /yongs su bsgyur nas spyod par byed/ sgrub par byed pas yod cing bdog pa'i dngos po rnams gzhan du bsgyur ba'i khyad par du bskyed pa dang ldan pa ni yongs su bsgyur ba'o//sngon med pa'i dngos po skyed par byed pa'i don gyis na sprul par byed pa'o/ /mdor bsdu na dngos po rnam pa bzhi yongs su sgyur bar byed pas na yongs su bsgyur ba ste/ ji ltar rigs par snod kyi 'jig rten dang / sems can gyi 'jig rten dang / 'byung ba'i dngos po dang / 'byung ba las gyur pa'i dngos po'o/ /sems can gyi 'jig rten yang bdag dang / gzhan gyi dbye bas rnam pa gnyis su tha dad par rig par bya'o/ /snod kyi 'jig rten yang grong dang / yul 'khor dang / gling dang / lcags ris bskor ba dang / 'jig rten gyi khams kyi dbye bas tha dad par rig par bya'o//yongs su bsgyur ba'i rdzu 'phrul gyi rnam pa'i dbye ba ni/ mdo sder gtogs pa'i mdor bstan pa las shes par bya'o/ /mdo las ni g.yo bar byed pa dang / 'bar bar byed pa la sogs pa byang chub sems dpa'i mthu bstan pa yin no//rang bzhin gyis g.yo ba dang bral ba'i brnyan pa'i dngos po rnams 'gul ba'i bya ba skyed par byed pa ni g.yo ba'o/ /mthu 'di sangs rgyas dang byang chub sems dpa' rnams kyis mnyam par bstan pa'i phyir/ 'di la de bzhin gshegs pa'am/ sems la dbang thob pa'i mngon par shes pa'i mthu zhes bya ba bstan pa yin no//byang chub sems dpa' rnams kyang dbang ma thob pa la sogs pa'i gnas skabs las bye brag tu phye ba'i phyir smras pa/ ting nge 'dzin la dbang thob pa zhes bya ba smos so/ /de nyid kyi khyad par ni sems las su rung ba zhes bya'o/ /g.yo ba'i rim gyis 'phel bar bstan par bya ba'i phyir/gtsug lag khang yang g.yo bar byed ces bya ba la sogs pa smos so/ /zhing smos pa ni grong dang grong khyer gyi nye 'khor bzung ba'i don to/ /de dag ni sa dang / 'gro ba dang / gling bzhi pa'i 'jig rten gyi khams la sogs pa'i dbye bas dpag tu med pa g.yo ba la sogs par rig par bya'o//lus kyang 'bar par byed pa yang mdor na rnam pa gnyis te/ cho 'phrul ya ma zung ston pa dang / gnas pa'i bye brag go/ /cho 'phrul ya ma zung ston pa yang rnam pa gnyis te/ 'bar ba dang ldan pa dang / char gyi rgyun 'bebs pa dang ldan pa'o/ /cho 'phrul zung du ston pa ni yang shin tu phra ba'i mthur thug pa'i ba spu'i khung bu'i sgo nas 'bab bar mthong ba'o/ /gnas pa'i bye brag las ni me'i khams la snyoms par zhugs nas lus thams cad 'bar bar 'gyur te/ ji srid 'bar ba gcig tu gyur gyi bar du 'od zer kha dog sna tshogs kyang lus las 'byin par 'gyur ro//khyab par byed pa ni 'od tsam gyis spro zhing khyab par 'dod pa yin no/ /rim gyis 'phel ba'i dbang du byas nas smras pa/ snga ma bzhin du zhes bya ba la sogs pa'o/ /gzugs sna tshogs ston pa'am/khyad par can gyi gzugs ston pa'i dbang du byas pa ni rnam par ston pa'o/ /des sangs rgyas dang / byang chub sems dpa'i mthus lhags pa'i sems can thams cad kyi mngon par shes pa'i yul las kyang shin tu 'das pa'i gzugs rnams mthong bar 'gyur ba de ni rnam par ston pa zhes bya'o//lhags shing bde bar 'khod pa zhes bya ba ni bde bar 'ongs shing lhags nas nye bar 'khod pa zhes pa'i don to/ /'di dag gis ni lta ba dang rnam par lta ba'i bya ba dang / 'bad pa med par mthong ngo zhes bstan par 'gyur ro/ /mchog dang mchog ma yin pa 'dra bar mthong bar bstan pa'i phyir bye brag bstan pa yin no//'gro ba'i dbang du byas nas smras pa/ 'og tu ngan song dag kyang zhes bya ba ni 'og gi 'gro bas bsdus pa'i phyir ngan song zhes bya ba smos so/ /bde 'gros bsdus pa'i phyir mi dang lha ni steng du zhes bya'o/ / phyogs bcu'i 'jig rten gyi khams rnam par gnas pa'i dbang du byas nas/ sangs rgyas kyi zhing dag kyang rnam par ston zhes byabs bstan to/ /de dag na gnas pa'i sems can rnams kyis mthong ba'i dbang du byas nas smras pa/ de dag tu yang sangs rgyas dang byang chub sems dpa' rnams zhes bya'o//rnam pa thams cad nges par mthong ba'i dbang du byas nas smras pa/ ming ji skad grags pa dang zhes bya ba la sogs pa la/ ming ni tshig gis nye par bstan pa ste/ blta bar mi nus pa'i phyir ro/ /de'i phyir smras pa/ ston pa zhes bya ba'o/ /bar ma chad pa dang / bar chad pa dag mthong ba'i phyir smras pa de'i tshu rol dang pha rol dag kyang zhes bya ba la sogs pa smras te/ gang 'dod pa de dag go/ /ji srid du 'dod pa zhes bya ba ni ji srid du 'dod pa de srid du lta ba'o/ /'byung ba chen po yongs su bsgyur ba ni/ gzhan du 'gyur bar byed pa zhes bya ste/de dag gi mtshan nyid la rnam par 'jog pa yin pa'i phyir ro/ /de yongs su bsgyur ba ni shin tu dga' bar bstan pa nyid kyis 'byung ba chen po bzhi po rnams phan tshun du yongs su bsgyur bas gzhan du sgyur bar byed pa bstan pa yin no/ /sgra rnams sgyur bar byed pa ma smos pa ni rgyun 'jug pa med pa'i phyir ro//de dag gnyi ga'i tshogs yongs su bsgyur ba'i dbang du byas nas smras pa ni/ gal te rtswa dang lo ma dang zhes bya ba la sogs pa'o/ /sra ba dang / mkhregs pa dang / brtan pa dang / rgya che ba dang / yangs pa rnams kyang yongs su bsgyur bar byed pa bstan pa'i phyir smras pa/ri'i rgyal po gangs la sogs pa zhes bya ba la sogs pa'o/ /sems can yongs su bsgyur ba'i dbang du byas nas smras pa/ sems can kha dog bzang po rnams la zhes bya ba la sogs pa'o/ /gzhan du bsgyur ba ci yang rung ba zhes bya ba la sogs pa ni sngon gyi dngos po las gzhan du bsgyur ba zhes bya ba'i don to//gang la las kyi nus pa med pa de la mos par mi bya'o zhes bstan pa'i phyir smras pa/ nus pa'i ngo bo la gzhan du mos pa zhes bya ba la sogs pa'o/ /de bzhin du 'gro ba rnams dang / khams rnams yongs su bsgyur ba ni rab tu grub pa'i dngos por gyur pa ni ma yin no//'gro ba dang 'ong ba la bdag nyid lus yang bar yongs su bsgyur bar rig par bya'o/ /rtsig pa dang / ri brags dang / ra ba smos pa ni grong dang / gtsug lag khang dang / dgon par gtogs pa 'di dag gi nye bar spyad par bya ba yin no zhes rab tu bstan pa'i phyir ro//de ltar bsgribs pa dang / 'gro ba dang / khams dang / khyad par can gyi gnas kyi khyad par du 'gro ba dang / 'ong ba la yongs su bsgyur ba bstan nas/ gong du 'og min la thug par shin tu ring bar 'gro ba'o/ /de la tshad med dpag tu med pa smos pa ni/der mi'i lus 'di nyid kyis 'gro bar 'gyur ba'i phyir smras pa/ rgyas par zhes bya ba la sogs pa'o/ /rgyang ring po la nye bar mos na zhes bya ba la sogs pas ni/ mngon par mos pa'i 'gro ba bstan pa yin no/ /yid dang 'dra bar zhes bya ba ni yid las byung bas 'gro ba dang 'ong ba'o//sdud pa dang rgyas par byed pa ni/ tshad chung ba ni tshad chen por 'jog par byed pa dang / tshad chen po gang yin pa de dag ni tshad chung bar 'jog par byed pa ste/ phra ba ni rags par byed pa dang / rags pa ni phra bar byed ces bya ba'i don to/ /gzugs thams cad lus su sdud pa ni rang gi lus su sems can dang /sems can ma yin pa'i dngos po'i tshogs rnams sdud par byed pa'o/ /de'i phyir smras pa/ grong dang grong rdal dang zhes bya ba la sogs pa la/ 'khor de dag gis kyang rang rang gi sa phyogs nyid na 'dug par shes pa'o/ / de bzhin du de bzhin gshegs pa dang / byang chub sems dpa'i lus kyi nang du song bar yang kun du shes so/ /skal pa mnyam pa'i gan du 'gro ba ni sems can ma mthong ba/ ma thos pa/ ma 'dris pa'i gan du de dang 'dra bar bsgyur nas nye bar 'gro ba'o/ /der nye bar 'gro ba na rnam pa bzhis skal ba mnyam par rig par bya ste/kha dog bstan pa'i phyir smras pa/ kha dog rgyas pa ji lta bur zhes bya ba la sogs pa'o/ /rnam pa smras pa/ de dag gi chu zheng ji lta ba dang zhes bya ba'o/ /ngag smras pa ni/ smra ba'i stangs ji lta ba bzhin du zhes bya ba'o/ /brjod par bya ba smras pa/de dag don gang smra bar byed pa de ni de yang smra bar byed ces bya ba la sogs pa'o/ /skal ba mnyam pa'i bye brag bstan par bya ba'i phyir smras pa/ mjug tu de dag la zhes bya ba la sogs pa la/ dngos gzhi la yang dag par bstan pa dang / yang dag par 'dzin du 'jug pa dang / yang dag par gzengs bstod pa dang / yang dag par rab tu dga' bar byed pa'i phyir dang / bdag gis lus ni gsal por mi ston pa'i phyir smras pa/ mi snang bar byed la zhes bya ba la sogs pa'o/ /dbang byed pa ni/ sems can gyi khams thams cad bdag gi bsam pa'i dbang gis spyod lam gyi gnas skabs sgrub par byed ba'o//de'i phyir smras pa/ 'gro ba dang / 'ong ba dang zhes bya ba la sogs pa'o/ /gzhan gyi rdzu 'phrul zil gyis mnan nas rgyal bar byed pa ste/ gzhan dag gi rdzu 'phrul thams cad mi gsal bar byas nas ji ltar bsams pa'i don thams cad gsal por byed pa zhes bya ba'i don to//mthar phyin pa'i byang chub sems dpa' ni sa bcu ba la dbang bskur ba thob pa'o/ /de yang rnam pa gnyis te/ skye ba gcig gis thogs pa ni dga' ldan du skye ba blangs pa ji skad bstan pa'i mtshan nyid can nyid do/ / srid pa tha ma pa ni thams cad kyi phyi ma skye ba blangs pas rab tu phye ba ste/ bdag nyid kyi lus de nyid kyis sangs rgyas nyid mngon sum du byed pa'o/ /spobs pa sbyin pa ni chos ston pa'i dus sam/ rtsod pa byed pa'i dus su spobs pa yongs su gtugs pa la shes rab bla na med pas spobs pa nye bar bsgrub pa'o//dran pa sbyin pa ni klog pa dang / 'don pa la sogs pa'i dus su sngon goms par byas pa'i gzhung dag la dran pa nyams pa rnams dran pa gso bar byed pa'o/ /bde ba sbyin pa ni chos nyan par 'dod pa rnams la thob pa dang rjes su mthun pa rnams kyis sdud cing nye bar bsgrub pas gang gis bde ba sbyin pas tshim par gyur na de nas ldang bar 'dod pa yang mi skye la/nyan pa la gus pa skye ba dang / nyan pa la rjes su mthun pa'i lus dang / sems kyi gnas skabs 'thob pa dang / gnyid dang snyom pa dang / phyin ci log dang bral bas chos nyan pa dang / nad kyis nyen pa'i sems can thos pa la sogs pa la nad nye bar zhi bar byed pa nyid dang de las gzhan pa'i gnod pa nye bar zhi bar byed pa ni bde ba sbyin pa ste/ bde ba gang gis tshim par gyur na mchog tu nad med pa nyid dang / mi ma yin pas btang ba'i nye bar 'tshe ba zhi bar gyur pa yang 'thob pa'o//'od zer 'byin pa ni sangs rgyas dang byang chub sems dpa' rnams kyi sku'i cha shas las 'od zer 'byin pa ste/ mang du spros pa byas pas sems can thams cad kyi don du sbyor ba rnam pa gnyis kyis sangs rgyas dang byang chub sems dpa' rnams kyi mdzad pa nges par sgrub par byed de/ sprul pa'i sbyor ba dang / 'od zer spro ba'i sbyor bas so/ /'od zer rab tu spros pas kyang dgos pa gnyis sgrub par byed de/ ngan 'gro rnams kyi sdug bsngal rgyun gcod par byed pa nyid dang / bde 'gro rnams la bdud kyi gzhal yas khang la sogs pa mog mog por byed pa nyid dang / de las gzhan pa'i sems can rnams skul bar byed pa nyid kyis de'i phyir de'i dbye ba byas pa yin no/ /bya ba rnams kyi gtso bo'i dbang du byas nas smras pa/ sems can tshad med pa dag gi don zhes bya ba la sogs pa'o/ /yongs su bsgyur ba de dag ni mdor na/ snod kyi 'jig rten gyi bya ba'i bye brag bskyed bar bya ba'i don dang /'byung ba dang / 'byung ba las gyur pa rnams mtshan nyid gzhan 'thob par bya ba'i don dang / bdag gi lus su gtogs pa'i bye brag yongs su bsgyur ba dang / sems can gzhan rnams kyi lus dang / dpang po'i bya ba yongs su bsgyur ba'i don du rig par bya'o//sprul pa'i rdzu 'phrul ni ngo bo nyid dang / rab tu dbye ba zhes bya bas bstan pa'o/ /dngos po med pa las sprul pa ni rgyu mtshan med cing thams cad kyi thams cad du yod pa ma yin pa las so/ /sprul pa'i sems kyis zhes bya ba ni/ sprul par 'dod pa'i sems bdag por gyur pa nyid kyis yin pa'o//'dis ni rnam par smin pa las skyes pa ni sprul pa ma yin no zhes bstan par 'gyur te/ de ni sprul par 'dod pa'i sems bdag por gyur pa las skyes pa ni ma yin pas so/ /'on ji lta bu yin zhe na/ rnam par smin pa la sogs pa'i rgyu'i dbang gis so/ / ji ltar 'dod pa zhes bya ba ni bsam pa ji lta ba bzhin du dang / ji ltar dga' bar ro/ /mngon par 'dus byas nas zhes bya ba ni sprul par 'dod pa'i sems kyis gang bsams pa smon pa byas pa ste/ bsams pa 'di dang 'di de bzhin du gyur cig ces byas pa de de bzhin du 'gyur gyi gzhan du ma yin pa 'di ni ngo bo nyid do//dbye ba'i dbang du byas nas smras pa/ de yang rnam pa du ma yod do zhes bya ba la/ yang sprul pa de ni mdor bsdu na rnam pa gnyis te/ sems can gyi dngos po sprul pa dang / sems can rnams la nye bar mkho ba'i dngos po sprul pa'o/ /sems can gyi dngos po'i sprul pa yang rnam pa gnyis te/sems can gyi rten sprul pa dang / sems can gyi ngag gi bya ba sprul pa'o/ /de'i phyir smras pa/ lus sprul pa dang zhes bya ba la sogs pa'o/ /lus sprul pa yang mdor bsdu na rnam pa gnyis te/ rang dang 'brel pa dang / gzhan dang 'brel pa'o/ /bdag dang 'brel pa yang rnam pa gnyis te/ bdag dang 'dra ba dang / mi 'dra ba'o/ /gzhan dang 'brel pa yang de bzhin te/ gzhan dang 'dra ba dang / mi 'dra ba'o/ /de'i phyir smras pa/ bdag dang 'dra ba'am/ mi 'dra ba'am zhes bya ba'o//'am zhes bya ba'i sgra ni gzhan gyi la yang 'dra ba dang / mi 'dra ba'o zhes bstan pa'i phyir ro/ /dbang po'i rten sprul par byed kyi dbang po nyid ni ma yin no/ /de ci'i phyir zhe na/ dbang po rnams ni sems can dang gcig tu bgrang pa yin pa'i phyir ro/ /gal te dbang po rnams sprul par gyur na ni sngon med pa'i sems can 'byung bar thal bar 'gyur na sngon med pa'i sems can 'byung ba ni med do//'khor ba'i thog ma shes par mi 'gyur ro zhes bya ba'i mdo'i tshig gis so/ /'khor ba la thog ma yod par yang thal bar 'gyur ro/ / des na rten nyid sprul par byed pa yin no/ /rnam pa gnyis kyis de'i rten dang dbang po 'dra ba zhes brjod par bya'o/ /lta ba po rnams la yang / dbang po nyid ltar snang bar 'gyur ro/ /dbang po dang bcas pa'i rten gyis bya ba gang byed pa'i bya ba de des kyang byed par nus so zhes bya ba'i don to zhes bya'o//yul sprul pa nyid ni 'dra ba nyid yin gyi mi 'dra ba ni ma yin no zhes bstan pa'i phyir te/ sems can la phan pa byed pa'i rigs su mtshan nyid mi 'dra ba med pa'i phyir ro/ /de'i phyir smras pa/ zas dang skom la sogs pa dang zhes bya ba la sogs pa'o/ /gnyi ga la skye mched bzhi nyid du rig par bya'o//de lta na yang phyi rol gyi bye brag tu bstan pa yin no/ /gzhan dag la ni dbang po dgag par byas pa nyid kyis skye mched bzhi nyid grub pa yin no/ /sgra ma smos pa ni/ ngag sprul par bstan pa'i phyir ro/ /sems can ma yin pas bsdus pa rnams kyi sgra'i sprul pa yang /'byung ba chen po thug pa las byung ba yin no/ /de 'dra ba zhes bya ba ni las dang / mtshan nyid dang 'dra ba'o/ /de ma yin ba ni rnam par smin pa'i 'bras bu la sogs pas ma bsdus pa'i phyir ro/ /ji ltar 'dod pa bzhin du zhes bya ba ni sangs rgyas dang byang chub sems dpa' rnams kyi sprul pa dpag tu med pa'i ngo bor ston par byed pa'o//bdag dang 'dra ba zhes bya ba ni bdag gi lus dang 'dra ba'o/ /rnam pa du ma mang po ni bdag dang 'dra ba dang / de dang 'dra ba'i dbye bas dbye ba du ma nyid do/ /des na smras pa/ lha dang / klu dang zhes bya ba sogs ba'o//dud 'gro dang / yi dags dang / sems can dmyal ba smos pa ni srid pa'i dbang du byas nas bstan pa yin gyi/ rang dang 'dra ba ni ma yin no/ /de'i phyir smras pa/ ci 'dra ba de 'dra ba nyid du zhes bya ba nas/ de lta ma yin pa ni bdag dang mi 'dra bar 'gyur ro zhes bya ba'i bar du'o//de ltar na bde 'gro'i sprul pa ni gnyi ga yin no/ /ngan 'gro'i sprul pa ni mi 'dra ba kho na'o/ /lha la sogs pas 'dul ba rnams la lha la sogs pa'i byad gzugs dang 'dra ba sprul par byed ces bya bar rig par bya'o/ /lha la sogs pa'i 'gro bar skyes pa rnams la de dang 'dra ba'i sprul pa gzhan rnams sprul pas 'dul ba de ni gzhan dang 'dra ba'i sprul pa zhes bya ste/rnam pa dang 'gro ba 'dra ba nyid do/ /'gro ba de yin yang rnam pa mi 'dra ba de ni mi 'dra ba nyid du rig par bya'o/ /byang chub sems dpa' rnams kyi mang po sprul pa dang /nyung ngu sprul pa dang zhes bya ba ni mdo'i tshig go/ /dris pa ni de la lus kyi sprul pa mang po gang zhe na zhes bya ba ni skad cig gcig la yang 'jig rten gyi khams bye ba phrag brgyar dus gcig tu dga' ldan gyi gnas na bzhugs pa la sogs pa ston pa ni/ chos mang po zhes brjod pa dang /gzhan yang sangs rgyas 'byung bas stong pa'i 'jig rten gyi khams gzhan rnams su yang dus gcig tu dga' ldan na bzhugs pa la sogs pa ston pa yin no/ /de'i phyir smras pa/ phyogs bcu'i 'jig rten gyi khams dpag tu med/ grangs med pa dag tu zhes bya ba la sogs pa'o//sprul pa de yang rnam pa gnyis te/ gtan du ba dang / gtan du ba ma yin pa'o/ /de la gtan du ba ma yin pa ni/ de srid du ston pa tsam dang ldan pa'o/ /gtan du ba ma yin pa bstan pa'i phyir smras pa/ sprul pa la la ni zhes bya ba la sogs pa la/sprul par byed pa 'das nas kyang / sprul pa des ji srid sems can gyi don bya bar yod pa de srid du rjes su 'jug par 'gyur ro/ /yang rnam pa gnyis te/ sems can sprul pa dang / sems can ma yin pa sprul pa'o/ /de yang de lta bur bstan pa tsam dang /bya ba sgrub par byed pa'o/ /de'i phyir smras pa/ sprul pa la la ni zhes bya ba la sogs pa'o/ /bya ba sgrub par nus pa bstan pa'i phyir de kho na bzhin du 'gyur ba yin te/ gzhan du mi 'gyur pa 'di ni zhes bya ba yin no/ /ngag gi sprul pa yang mdor na rnam pa gsum du rnam par gzhag par rig par bya ste/ngo bo nyid dang / rten nyid dang / dbye ba nyid do/ /yon tan gnyis phun sum tshogs pa dang ldan na ngo bo nyid phun sum tshogs pa zhes brjod do/ /rnar snyan pa nyid dang / rgya che ba nyid do/ /de yang smras pa/ gdangs snyan pa dang ldan pa yang yod/ skad gsal ba dang ldan pa yang yod ces bya'o//rten nyid ni/ bdag dang 'brel ba dang zhes bya ba la sogs pa'o/ /byed pa nyid ni/ chos ston par gtogs pa dang zhes bya ba la sogs pa'o/ /dpe dang / gling gzhi dang / sbyor ba phun sum tshogs pa dang ldan pas yan lag lnga dang ldan pa ni/ gdangs snyan pa dang ldan pa zhes bstan to//sangs rgyas bcom ldan 'das rnams 'khor gyi nang du chos ston par mdzad pa dang / zhal nas yan lag lnga dang ldan pa'i gsung 'byon par mdzad pa'o/ /de ni yang yon tan lnga dang ldan pa'i gsung zhes brjod do/ /yan lag lnga dang ldan pa'i gsung gi tshig rnams kyang tshig phyi ma phyi mas bshad pa yin par rig par bya'o//zab pa nyid bstan pa ni/ 'brug sgra lta bu zhes bya ba yin no/ /de la dpe bstan pa ni/ ka la ping ka'i sgra skad yid du 'ong ba dang 'dra ba zhes bya ba ste/ ji ltar bya ka la ping ka'i sgra skad zab cing yid du 'ong ba bzhin du 'di dag gi yang de lta bu yin pa'o//snying du 'thad pa ston par byed pa ni dga' bar byed pa'o/ /yang dga' bar byed pa ni grags pa nyid kyi dbang gis bshad pa yin no/ /thams cad las shin tu khyad par du 'phags pa'i don mya ngan las 'das pa'i grong khyer du 'jug pa'i skal ba dang ldan pas grong khyer du 'gro ba'o/ / snyan cing 'jebs pa bstan pa ni rnar snyan pa'o/ /zur phyin pa'i bshad pa ni brda phrad pa ste/ grags pa'i don rnams dang mthun pa'i phyir ro/ /snyan pa'i bshad pa ni mi mthun pa med pa ste/ tshig dang yi ge rnam pa sna tshogs pas yid 'phrog par byed pa'o/ /gleng gzhi phun sum tshogs pa bstan pa ni/mi rten pa dang zhes bya ba ste/ rnyed pa dang bkur sti la sogs pa la dga' ba'i dbang du byas pa la mi rten pa'i phyir ro/ /sbyor ba phun sum tshogs pa ston pa ni/ mi zad pa yin no zhes bya ba ste/ spobs pa dpag tu med pa dang ldan pa'i phyir ro/ /yan lag lnga po 'di dag dang ldan pas de bzhin gshegs pa'i gsung yon tan lnga dang ldan pa zhes yongs su grags te/rgya che ba dang / rnar snyan pa dang / don dang ldan pa nyid dang / gzung bar sla ba nyid dang / 'dod pa sna tshogs dang ldan pa nyid do/ /yon tan lnga po 'di dag ni gzhan yon tan lnga'i yan lag tu 'gyur ba yin te/go rims bzhin du mnyan par bya ba dang / rnam par mi g.yeng ba dang / rnam par grol ba dang / nges par gtogs pa dang / yongs su smin par byed pa'o/ /snyan cing 'jebs pa ni rnar snyan par rig par bya'o/ /shin tu yangs shing rgya che ba'i phyir bur phyin pa nyid de/ 'khor der 'dus par gyur pa thams cad kyis rnam pa gcig tu thos par 'gyur ba'o//des na smras pa gang dag thag ring po na 'dug pa yang rung zhes bya ba la sogs pa'o/ /ji ltar 'dod par 'jug par 'gyur ba bstan pa'i phyir/ bzhed na stong chung ngu'i zhes bya ba ste/ 'dis ni de bzhin gshegs pa'i gsung ni dpag tu med cing mthar thug pa med par ji snyed pa de snyed du 'jug par 'gyur ro zhes gsal bar bstan pa yin no//sems can rnams la chos ston pa 'byung bar 'gyur ba yin no zhes bya ba ni/ sems can rnams mos pa'i dbang gis don rnam pa sna tshogs gsal bar byed pa zhes bya ba'i don to//de'i phyir bstod pa/ gsung gcig bka' ni gsal ba las/ /du ma lta bur snang 'gyur te/ /kun gyis 'di ni bdag gi ched/ /kho na'o snyam du go ba gang / /zhes bstan pa yin no/ /rten dang 'brel ba'i ngag yongs su btang nas sprul pa'i ngag gang yin pa des chos ston par byed cing bag med pa rnams la skul bar byed pa de ni bdag dang 'brel pa'i ngag gi sprul pa zhes bya ste/rang gi rgyud dang 'brel par 'jug pa'i phyir ro/ /sangs rgyas dang byang chub sems dpa' rnams kyi mthus gzhan dag gi rgyud la sprul pa'i ngag gis chos ston pa gang yin pa nas gzhan la skul bar byed pa'i bar gang yin pa de ni/gzhan gyi rgyud dang 'brel pa'i ngag sprul pa ste/ gzhan gyi rten la brten pa ltar snang ba'i phyir ro/ /sangs rgyas dang byang chub sems dpa' rnams kyi byin gyi rlabs kyis nam mkha'i dkyil nas sgra 'byung ba'am/ sprul pa'i sems can gyi kha nas sam/gzhan dag las kyang rung ste/ sems can du bgrang ba ma yin pa ta la'i phreng ba la sogs par gtogs pa las byung ba'i sgra ni ma 'brel ba ste/ bdag dang gzhan gyi rten la ma 'brel pa'i phyir ro/ /de la chos ston pa'i sprul pa ni/ de dang der rmongs pa rnams la zhes bya ba la dkon mchog gsum gyi yon tan dang /chos rnams kyi mtshan nyid mi shes pa dang / the tshom za ba dang / phyin ci log tu shes pa rnams la phyin ci ma log pa'i ngo bo nyid yang dag pa ji lta ba bzhin rnam par phye nas yang dag par ston pa'o/ /de dag gis ni mi shes pa'i chos rnams kyi don yang dag par rab tu ston to zhes bstan pa yin te/gzhan dag gi rgyud la don dang / tshig dang / yi ge rnams nges par shes par byed pa ni ston pa yin no zhes byas nas so/ /sngon chos kyi mtshan nyid rtogs par byas pa nyid dang / dkon mchog gsum gyi yon tan rnam par dbye ba la rmongs pa med pa thob cing rab tu dad pa rnyed par gyur pa de lta na yang yul gyi bde ba'i ro myong bar byed pas bag med par gyur pa de dag la 'das pa'i yul dag dran par byas la ngo tsha bskyed par bya'o//ma 'ongs pa nye bar gzung nas ni yang dag par bskul bar bya'o/ /rnam pa'i dbye ba ni rnam pa du ma nyid yin yang mdor bsdu na rnam pa gsum mo zhes bstan pa'i phyir smras pa/sprul pa rnam pa du ma de yang mdor bsdu na/ /zhes bya ba la sogs pa/ re re'i rnam pa'i dbye ba ni sngar mthu'i skabs su bstan pa'i ting nge 'dzin la yang dag par brten nas don thams cad 'grub par 'gyur pa'o/ / de ltar mthu de dag kyang zhes bya ba ni/ de lta bu mngon par shes pa dang po'i mthu yin no/ /las rnam pa gnyis sgrub par byed do zhes bstan pa'i phyir smras pa/ 'dun par byas pa'i sgo nas sems can rnams bstan pa la 'god par byed pa ni las dang po'o/ /phan 'dogs pa ni gnyis pa'o/de la sdang ba rnams dang / phan gdags pa ni bar ma rnams kyi sems dang por 'phrog par byed pas na rdzu 'phrul gyi cho 'phrul zhes bya'o/ /cho 'phrul zhes bya ba ni dngos po gzhan gyi sems shin tu 'phrog par byed pa'i phyir ro/ /yang 'jug par byed pa ni/ bstan pa'i bdag nyid che ba brjod pa'i sgo nas rab tu dang ba skyed pa'o//phan gdags pa ni/ yang ji ltar rigs par yongs su bsgyur ba dang / sprul pas nye bar mkho bas phongs pa'i sems can rnams la yongs su sgyur ba dang / sprul pas nye bar mkho bas phan 'dogs pa'i sgo nas rig par bya'o/ / bdag dang gzhan gyi 'das pa'i dus kyi sngon gyi gnas rnam pa du ma nyid sngon gyi gnas te/ lus dang / ngag dang / yid kyi bya ba ni sngon gyi gnas zhes bya ba'i don to/ /de la lkog tu ma gyur pa'i shes pa ni/ sngon gyi gnas rjes su dran pa'i shes pa'o/ /yang de ni sangs rgyas dang byang chub sems dpa' rnams kyi zab cing rgya che ba nyid yin pa'i phyir/theg pa chen po'i mdo sde'i rjes su 'brangs nas bstan pa yin gyi/ nyan thos kyi theg pa'i rjes su 'brangs nas ni ma yin no/ /de'i rnam par gzhag pa ni mdor na gsum du rig par bya ste/ rten nyid dang / dmigs pa nyid dang / rnam pa nyid do//de la rten ni bdag dang gzhan te/ de shes pa ni sangs rgyas dang byang chub sems dpa' rnams kyi rang rgyud la skyes pas ras 'ga' bdag dang gzhan gyi skye ba rnams dran par 'gyur ro/ /gang yang bdag dang gzhan gyis kyang dran par byed de/ gzhan gyi rgyud la skyed par byed pa'o/ / ye shes de bdag por gyur pas de'i dbang gis de dag la de skye bar 'gyur ba'o/ /gzhan gyi rgyud kyi rnam par rig pa bdag por gyur pas gzhan gyi rgyud la rnam par rig pa'i bye brag skyed par byed pa zhes bya ba ste/ ji ltar rdzu 'phrul dang ldan pa'am/ sha za'i rnam par rig pa bdag por gyur pa'i dbang gis 'jug pa lta bu'o//dmigs pa ni gzhan dag dang bdag nyid kyi 'das pa'i skye ba'i rgyun la'o/ /rnam pa ni de dag nyid kyi ming dang / rigs la sogs pa rjes su dran pa'i rnam pa'o/ /de bzhin du rnam pa bzhir 'gyur te/ bdag nyid kyi skye ba dran pa dang /gzhan gyi dran pa dang / gzhan nyid kyi skye ba dran pa dang / des bdag gi dran pa'o/ /de la rnam pa bstan par bya ba'i phyir smras pa/ sems can che ge mo zhes bya ba la sogs pa'o/ /de bzhin du rnam pa brgyad du yang dag par rjes su dran par rig par bya ste/ khams dang /'gro ba dang / skye gnas la sogs pas bsdus pa'i sems can gyi ris kyi dbye ba dang / yang de dag gi ming dang / rigs dang / rus dang / kha zad dang / longs spyod dang / rnam par smin pa'i dbye ba dang / tshe dang gnas pa'i mthar thug pa'i bar nyid do/ /mdo las 'byung ba bzhin du zhes bya ba'i rgya cher bstan pa ni des sngon gyi skye ba rnam pa du ma rjes su dran te/'di lta ste/ skye ba gcig kyang rjes su dran pa nas/ bskal ba bye ba khrag khrig dpag tu med pa du ma yang rjes su dran te/ bdag gi gnas ni 'di zhes bya/ ming ni 'di zhes bya/ rigs ni 'di zhes bya/rus ni 'di zhes bya/ skye ba ni 'di lta bu/ kha zas ni 'di lta bu za za/ bde ba dang sdug bsngal ni 'di lta bu zhig nyams su myong myong / tshe'i tshad ni ji tsam du 'gyur/ yun ni ji srid cig gnas gnas/ bdag de nas shi 'phos nas ni che ge mo zhig tu skyes/ de nas shi 'phos nas ni 'dir skyes po zhes yul phyogs dang bcas/rnam pa dang bcas/ mtshan ma dang bcas pas sngon gyi gnas rnam pa sna tshogs par rjes su dran no zhes bya ba'o/ /rnam pa brgyad kyis yongs su bsdus pa'i phyir smras pa/ sems can gyi lus la sogs pa thams cad kyang rjes su dgongs so zhes bya ba la/de dag gi rnam pa ni sngon gyi gnas rjes su dran pa'i stobs bstan par rnam par phye nas ston par 'gyur ro/ /sems can gyi ris gang yin pa gzhan dag la yang dran par mdzad do/ /sngon gyi mthas yongs su bsdus pa gang yin pa bdag nyid dang / grogs bshes pa dang / skal ba mnyam pa de dag gi thabs rjes su dran no zhes bya ba'i don to/ /de dag la gzhan dag kyang dran par mdzad do zhes bya ba la/ gzhan dag la yang dran par mdzad do zhes bya ba ni ma 'ongs pa ste/ gang dag lkog tu gyur pa dang / /gang dag mngon du gyur pa rnams//thams cad khyod kyis mngon du gyur/ /zhes bya ba'i tshig gis so/ /ye shes de'i spyod yul du gyur pa nyid bstan pa'i phyir smras pa/ bdag nyid kyi tshe 'di ji lta ba zhes bya ba la sogs pa la/ ji ltar bdag nyid kyi tshe 'di nyid dang / da ltar gyi tshe 'di'i 'das pa'i bya ba'i gnas de dag thams cad kyang yang dag pa ji lta ba bzhin du rjes su dran no//de bzhin du 'das pa'i skye ba gzhan dag kyang rjes su dran no zhes bya ba'i don to/ /mi tha mal pas mthong ba'i chos 'di nyid kyi gang dran par mi nus pa de ni cha phra ba'o/ /yang de ni rnam pa gnyis te/ mi gsal ba'i gnas skabs kyis bsdus pa nur nur po la sogs par gtogs pa dang /rnam par gsal ba'i srid pas bsdus pa'o/ /nyung du'am/ mang po zhes bya ba rang nyid kyis bshad pa ni/ sngon gyi spyod pa dran pa las brjed pa gang yin pa zhes bya ste/ 'das pa'i skye ba la lus kyis byas pa dang / ngag gis smras pa dang / sems kyis dran zhing bsams pa'am/ brtags pa'am/ rjes su rnam par dpyad pa de lta bu'i lus dang / ngag dang / yid kyi spyod pa dang zhes bya bar bstan par 'gyur ro/ /brjed par gyur pa ni rgyu gnyis kyis te/ dran pa'i yul ma yin pa nyid do/ /bar chad med pa ni skye ba skad cig bar chad med par sbyor bas go rims bzhin du 'jug pa'o//yang ngo zhes bya ba'i sgra ni bar du chod pa dag kyang ngo / /grangs su byar nus pa ni gang nyung ba ste/ grangs su bgrang bar nus pa ni grangs su bgrang bar nus pa nyid do/ /gang mang ba de ni dpag tu med tshad med pa'o//rnam pa gsum gyis thogs pa med pa yin te/ ye shes de la thogs pa med pa'o zhes bya bas so/ /bdag dang gzhan la bar ma chad par ram/ bar chad dang bcas par yang rung ba ni gang bzhed pa'o/ /bdag nyid kyis kyang dgongs shing gzhan dag kyang dran par byed pa dang /nyung yang rung / mang yang rung ji srid 'dod pa dran pa ni ji ltar bzhed pa'o/ /yang gang bzhed pa ni cha phra ba'am/ mang po brjed pa med par dran pa'o/ /ji ltar bzhed pa ni bar chad med pa dang / bar du chod pa dang / grangs su byar nus pa dang / dpag tu med grangs med pa yang rjes su dgongs so zhes bya ba'o//yang na ji ltar 'dod par sbyar bar bya ste/ bar chad med pa dang / bar chad dang bcas pa dran pa'i phyir ro/ /skyes pa'i rabs zhes nges par gzung ba'i don ni/ sangs rgyas nyid kyi sngon gyi sku tshe'i skyes pa'i rabs bstan pa yin no/ / smra ba'i skyes bu de dag nyid kyis gzhan gyi don du bstan pa'i phyir dang / bstan pa las kyang bsam gyis mi khyab cing rgya che ba'i yon tan gyi rten du 'gyur ba'i phyir ro/ /de'i phyir skyes pa'i rabs kyi rgyud las/ dpal ldan yon tan dam pa'i rten tu gyur pas bkra shis shing / /zhes bya ba la sogs pa'i tshigs su bcad pa bstan pa yin no//byang chub sems dpa'i spyod pa nyid bstan pa'i phyir/ mchog tu rmad du byung ba zhes bya ba ni gzhan dag gis bya bar mi nus pa'i phyir dang / mchog tu dga' ba'i phyir ro/ /ji skad du/ byang chub sems dpa'i spyod pa dag la yi rang ba yang sla ba min na dngos su spyod pa smos ci dgos zhes bstan pa lta bu'o//dad pa bskyed pa zhes bya ba ni/ bcom ldan 'das de sku tshe snga ma dag la yang lus dang / ngag dang yid kyi spyod pa 'di lta bu'i rnam pas phan 'dogs so zhes bstan pa'i phyir sdang ba rnams dang / 'bring po rnams dang / mchog tu gyur pa rnams thun mong ma yin pa thos pa'i sgo nas gzhan la phan pa sgrub pa la dad pa skye ba ni spro ba dang ldan pa'i sems zhes bya'o//de sngon du song ba las yon tan dang ldan pa rnams la gus pa 'byung bar 'gyur ro/ /skyo ba skyed pa'i phyir zhes bya ba ni/ byang chub sems dpa' rnams kyis ngan 'gros bsdus pa'i skye ba blangs pa thob pa na da 'di lta bu'i skyo ba skyed par 'gyur te/de lta bu'i sems can chen po rnams la yang skye ba 'di lta bu 'thob pa'i gnas skabs yod par 'gyur na/ gzhan dag lta smos kyang ci dgos zhes yid la byas nas 'khor ba ni sdug bsngal ba/ yid brtan du mi rung ba'o zhes skyo ba skyed par 'gyur ro//sbyin pa la sogs pa pha rol tu phyin pa rnam pa sna tshogs la sbyor bas bsdus pa yang dag par ston pa ni spro ba bskyed pa'i phyir ro zhes bya bar sngon byung ba'i las sna tshogs kyi gtam las dang 'bras bu rnam par smin pa'i sgo nas rgud pa dang / 'byor ba'i dbang du byas pa thos pa dang /bdag dang gzhan gyi rgud pa dang / 'byor pa la yang yid 'byung ba skyed par 'gyur te/ gzhan gyi rgud pa 'gyod pa skye ba'i gnas su gyur pa dang / bdag rgud pa la zhes bya ba'o/ /shes pa 'di ni rig par gtogs pa'ang yin pa'i phyir rig pa 'di ni sngon gyi mi shes pa'i gnyen po'i phyogs nyid yin la sngar gyi mi shes pa ni rtag par lta ba las skye bar 'gyur ro//de'i phyir lta ba spong ba nyid 'bras bu nyid du bstan pa'i phyir smras pa/ rtag par lta ba rnams kyi zhes bya ba la sogs pa la/ rtag par lta ba'i gang zag bstan pa'i phyir smras pa/ sngon gyi mthar rtog pa'o zhes bya ba la/de yang rnam pa gnyis te/ ma lus par rtag par 'dod pa dang / 'ga' zhig rtag par 'dod pa'o/ /lha'i rna ba'i mkhyen pa ni mdor bsdu na rnam pa gnyis su rnam par gzhag par rig par bya'o/ /gang yang rten gyi dbang du byas nas smras pa/ byang chub sems dpa'i lha'i rna bas zhes bya ba ni/mngon par shes pas rab tu phye ba'i rna ba'i dbang po ni rten yin no zhes bya ba'i don to/ /dmigs pa ni rnam pa brgyad du rnam par gzhag par rig par bya'o/ /'gro ba'i rten ni gang yang lha dang mi'i sgra 'og dang steng du zhes bya'o/ /legs par bshad pa dang / legs par bshad pa ma yin pa'i dbang du byas nas ni/'phags pa rnams dang 'phags pa ma yin pa rnams zhes bya'o/ /rnam pa'i dbye ba nyid ni sgra chen po rnams dang / sgra chung ngu rnams zhes bya'o/ /don dang bcas pa dang / don dang bcas pa ma yin pa'i dbye ba smras pa/ gsal ba rnams dang /mi gsal ba rnams zhes bya ba'o/ /mthu dang mthu med pa'i dbye ba smras pa/ sprul pa rnams dang / sprul pa ma yin pa rnams zhes bya ba'o/ /gang yang yul gyi dbye ba bstan pa ni/ rgyang ring po dang / drung na 'dug pa rnams zhes bya ba'o/ /lha'i 'gro bar gtogs pa rnams lha zhes bstan pa'i phyir/lha zhes bya ba'i sgras ni 'dod pa dang / gzugs kyi khams su gtogs pa'o/ /gnas kyi dbye bas ni rnam pa du ma nyid do zhes bstan pa'i phyir smras pa/ gong du 'og min gyi mthar thug pa man chang du zhes bya ba'o/ /de bzhin du stong gsum gyi stong chen po'i 'jig rten gyi khams su gtogs pa'i lha'i sgra rnams 'bad pa med par thos so//'bad pa dang bcas na ni/ 'jig rten gyi khams gzhan gyi yang thos par 'gyur ro zhes bstan pa'i phyir smras pa/ ci ste 'jug pa mdzad na ni zhes bya ba la sogs pa'o/ /mi rnams su gtogs pa rnams ni mi nyid du bstan pa'i phyir smras pa/gling bzhi pa thams cad du sems can skyes pa zhes bya ba la/ mi'i 'gro ba'i snod ni thad kar yin pas thad kar zhes bya ba'o/ /sangs rgyas rnams dang / nyan thos rnams kyis bstan pa'i sgra ni 'phags pa ste/ 'phags pas gsungs pa'i phyir ro/ / yang na kun nas nyon mongs pa dang rnam par byang ba'i gnyen po'i phyogs su gyur pa dang / rjes su mthun par gyur pas rang nyid kyang 'phags pa yin no zhes bya ba'o/ /de yang rnam pa gnyis te/ mngon sum dang gcig nas gcig tu brgyud pa 'jug par gyur pa'o zhes byas nas so/ /gcig nas gcig tu 'jug pa'i don yang bstan pa'i phyir smras pa/de dag las thos nas zhes bya ba la/ gang rang nyid kyis smra ba yin yang sangs rgyas kyi bka' zhes bya bar smras pa yin no/ /de'i phyir gzhan gyi kha nas nges par byung ba yin yang sgra ni yi ge dang / dbyangs kyi lugs tsam gyi lugs 'dra bas dang /yul gcig la 'jug par byed pa'i phyir de'i ming rab tu 'thob po/ /sems can de dag kyang 'phags pa nyid du bstan pa'i phyir smras pa/ yang dag par ston pa dang zhes bya ba la sogs pa la/ de ni shin tu khyad par du 'phags pa rnam pa bzhi'i dgongs pa sgrub par byed pa'i phyir 'phags pa zhes bya'o//de la mi shes pa dang ldan pa'i chos kyi mtshan nyid la rmongs pa la sogs pa rmongs pa rnams la yang dag par ston pa'o/ /le lo can dang 'dun pa med pa dang / bya ba ngan pas 'brel pa rnams bag med par gyur pa la yang dag par skul bar byed pa ni yang dag par len du 'jug pa ste/de'i don du yang dag par sbyor ba'o/ /dman pa la mos pa dang / bdag nyid la smod pa dang / snyom las can dang / 'jigs pa dang bcas pa dang 'gyod pa mang ba rnams la yang dag par gzengs bstod pa ste/ spro ba skyed par byed pa'o/ /dngos po de dang de la yang dag par zhugs pa rnams yang dag par dga' bar byed pa ste/dga' ba skyed par byed pa nyid do/ /dgos pa'i dbang du byas nas smras pa/ dge ba yang dag par blang ba dang zhes bya ba la sogs pa la/ de ltar yang dag par dga' bar byed pa'i bar dang ldan na mi dge ba'i chos rnams ni spong bar byed/dge ba'i chos rnams ni sgom par byed do zhes bya bas sdig pa rnams ni spong bar byed la/ bsod nams ni yang dag par len par byed ces bya bar nges pas so/ /rjes su thob pa rnams kyang 'phags pa nyid du bstan pa'i phyir smras pa/ kun nas nyon mongs pa can ma yin pa'i sems kyis zhes bya ba la sogs pa la/de la kun nas nyon mongs pa can gyi sems ni rnyed pa dang bkur sti la sogs pa 'dod pas ston pa la sogs pa la zhugs pa'o/ /de las bzlog pa ni bdag dang gzhan rnam par grol ba nyid thob par bya ba'i phyir zhugs par gyur pa ni kun nas nyon mongs pa can ma yin pa'i sems zhes bya'o//bskul ba yang rnam pa gnyis te/ don la bskul ba dang / don med pa la bskul ba'o/ /de la don la bskul ba ni dkar po'i phyogs kyi tshig gi lam lnga dang ldan pa la zhugs pa ni bdag dang gzhan dang bstan pa la phan pa byed pa yin pa'i phyir ro//de las bzlog pa kun nas nyon mongs pa can gyis bskul bar gtogs pa ni 'phags pa ma yin pa'o/ /gang zag 'das pa'i ltung ba rnams ston par byed pa ni dran par byed pa'o/ /da ltar dang ma 'ongs pa'i dus kyi ltung ba mi 'byung zhing sdom par byed pa ni 'doms pa dang rjes su ston pa'o//gzhan yang legs par smras pa dang zhes bya ba la/ 'dir legs par byon nam zhes bya ba la sogs pas bsdus pa rnams dang / ngag gi nyes par spyod pa las log pas bsdus pa rnams so/ /rgya che ba'i 'phags pa las bzlog pa rnams ni 'phags pa ma yin par bstan pa'i phyir smras pa/ngag gi nyes par spyod pa rnam pa bzhis bsdus pa'i sgra gang yin pa rnams zhes bya ba yang / rtsa ba la la las ni 'og dang / thad kar dang steng du zhes 'don par byed pa de'i dbang du byas nas 'og tu zhes bya ba la sogs pa la/ sngar bstan pa'i lha dang mi'i sgra las gzhan pa'i rnam par gzhag pa'am/yang na de nyid kyi rnam par 'byed pa'o/ /rnam pa gnyis kyis chen por rig par bya ste/ kun nas slong bar byed pa nyid dang / rten nyid kyis so/ /kun nas slong bar byed pa yang rnam pa gnyis te/ dga' ba'i rnam pa'i sems kyi dbang du byas nas smras pa/sems can gyi tshogs chen po'i sgra zhes bya ba ni/ sems can gyi tshogs chen po 'dus pa'i sgra zhes bya ba'i don to/ /yang na sems can gyi tshogs rnams kyi sgra chen po zhes bya ba'o/ /de ltar na dga' ba drag pos bskyed pa'i dga' ba'i shugs kyis chen por bskyed pa zhes bya bar bstan pa yin no//sdug bsngal dang yid mi bde ba drag pos bskyed pa'i sgra yang chen po zhes bya bar bstan pa'i phyir smras pa/ gnod pa rnam pa sna tshogs kyis zhes bya ba la sogs pa'o/ /rten mang po nyid bstan pa'i phyir smras pa/ 'brug sgra grag pa'am zhes bya ba la sogs pa la/sgra chung ngu yang rnam pa gnyis te/ shin tu phra ba'i rnam par gtogs pa nyid ni 'bad pa drag po'i sgrub pas thos pa nyid dang / sems can gcig gi rgyud kyis thos kyi gzhan gyis ma yin pa nyid do/ /de'i phyir smras pa/ tha na rna bar bshubs pa'i sgra yan chad do zhes bya ba'i don to//kha don dang rnam pa 'dren yang don la brdar byas pa'i sgras tshig dang yi ge gsal ba gang yin pa ni sgra gsal ba zhes brjod do/ /gang dag gis don go ba yin no zhes bya ba de las bzlog pa ni don mi gsal ba'o/ /sngags thams cad don dang ldan pa ma yin na yang /'gro lding ba'i sngags kho na smos pa de ni gsang ba'i sngags yin pa'i phyir ro/ /ne tso dang ri skegs la sogs pa'i skad ni ma bslabs pa rnams kyis gzung bar rig par bya'o/ /rdzu 'phrul gyi mngon par 'dus byas pa'i sgra ni sprul pa zhes bstan pa'i phyir ro/ /yang de ni sprul pa de nyid la brten pa dang /rten gzhan dag la brten par rig par bya'o/ /rang gi gnas la brten pa rnams ni nye ba zhes bstan pa yin te/ byang chub sems dpa' khyim pa dang / rab tu byung ba'i phyogs la go rims ji lta ba bzhin du grong dang / gtsug lag khang bstan pa yin no//de dag las gzhan par gyur pa ni rgyang ring po'i sgra ste/ de dag yongs su chad pa med par bstan pa'i phyir/ 'jig rten gyi khams grangs med ces bya ba la sogs pa'o/ /'chi 'pho dang skye ba shes pa'i ye shes ni 'chi 'pho dang skye ba dgongs pa ste/ de dag gi gnas skabs yul du mdzad cing gzung zhes bya ba'i don to//ye shes des thog ma dang tha ma smos pas bar gyi gnas skabs rnams kyang mkhyen pa'o/ /mdor bsdu na ye shes de rnam pa gsum du gzhag par rig par bya ste/ rten nyid dang / dmigs pa nyid dang / dmigs pa'i dbye ba nyid do//yang rten dang dmigs pa dang / rnam pa'o/ /rten gyi dbang du byas nas smras pa/ lha'i mig gis zhes bya ba la sogs pa la/ da la brten pa'i ste/ de la brten nas shes pa zhes bya ba'i don to/ /rten la brten par nye bar btags nas so/ /ji ltar mig gis rnam par shes par bya ba ni gzugs zhes bya ba lta bu dang /dril bu sgrogs zhes bya ba lta bu'o/ /lha'i 'gro bar gtogs pa'i phyir lha'i zhes bya ba'o/ /mngon par shes pas rab tu phye ba'i phyir/ rnam par dag pa'o/ /'dis ni las las skyes pa dang / skye bas thob pa bsal ba yin no/ /de'i phyir mi'i las 'das pa zhes bya ba ste/thag ring ba dang / shin tu phra ba dang / bsgribs pa rnams kyang spyod yul nyid yin pa'i phyir ro/ /dmigs pa ni sems can rnams te/ gang gi phyir smras pa/ sems can rnams 'chi 'pho ba'i ched dang zhes bya ba la sogs pa la/ de yang gtso bo tsam smras pa yin te/sems can 'ba' zhig pas mi mthong ba ni ma yin gyi/ gzugs gzhan dag kyang mthong ba yin no/ /rnam pa bzhis sems can rnams gzung bar bya'o zhes bstan pa'i phyir ris mthun pa'i lus len cing gtong ba'i gnas skabs kyis gzung bar bya ba nyid ni gang yang 'chi 'pho ba'i tshe zhes bya ba ni 'chi bar 'gyur ba'i tshe zhes bya ba'i don to//shi 'phos pa na zhes bya ba ni skye bar 'gyur pa na ste/ srid pa bar ma'i gnas skabs la skye bar 'gyur ba zhes brjod pa'i phyir ro/ /sngon gyi ris mthun pa'i lus shi bar gyur nas skye ba gzhan ma blangs pa ni skye bar 'gyur ba zhes bya ba'o//srid pa bar ma'i gnas skabs na yang kha dog nyid dang ldan pa'i phyir smras pa/ mdog sdug pa dang zhes bya ba la sogs pa la/ bde 'gror 'gro ba'i srid pa bar ma ni ji ltar yar ngo'i zla ba'i 'od kyis bskor ba lta bur gsal bar snang ba yin no/ / ngan 'gror 'gro pa'i srid pa bar ma'i mtshan ma ni mun pa'i nang du zhugs pa lta bu'am/ mdog shin tu mi sdug par 'gyur ro/ /de'i phyir smras pa/ ngan pa dang / bzang po dang zhes bya ba yin no/ /mdo'i tshig las/ bde 'gro dang / ngan 'gro zhes bya ba der/ ngan 'gro ni dman pa'o/ / bde 'gro ni bzang po'o/ /de lta bu ni re zhig srid pa bar ma'i gnas skabs pa'i bye ba'o/ /sngon dus kyi srid pa la gnas pa'i dbang du byas nas smras pa/ phyi ma'i mthar skyes shing zhes bya ba ni ji ltar las kyi dbang gis 'gro ba rnams zhes bya ba'i mdo'i tshig gis so/ /de'i bshad pa ni/ skyes shing 'phel ba'i rgyus dbang po rnams yongs su smin pas zhes bya ba'o/ /lus kyi spyod pa zhes bya ba ni dang po bstan pas lhag ma rnams kyang grub par rig par bya'o/ /srid pa 'dir lus dang / ngag dang / yid kyis nyes par spyod pa dang ldan pa dang / legs par spyod pa dang ldan pa'o zhes bya ba'i mdo'i tshig gis so//lung du ma bstan pa ma smos pas don gyis bstan pa yin par rig par bya'o/ /mdor ma bstan pa ni mdo las bde 'gro dang / ngan 'gro'i rgyur shes par bya ba'i phyir nyes par spyod pa dang / legs par spyod pa bstan pa yin no/ /de bzhin du snang ba yang zhes bya ba ni sems can ma yin pa'i lus ston pa'i dbang du byas nas smras pa'o//mig gi yul gang yin pa de mthong ngo zhes bya bar bstan pa'i phyir smras pa/ cha phra ba yang zhes bya ba la de nyid bshad pa ni/ gzugs sprul pa gang yin pa dang zhes bya ba la sogs pa'o/ /yongs su rdzogs par ma gyur pa'i gnas skabs kyi gang yin pa dang sprul pa ni cha phra ba'o//yang cha phra ba'i sprul pa'i dbang du byas nas bstan par bya ste/ ji ltar 'dul ba las ma 'gags pas smras pa/ ngas sangs rgyas kyi spyan gyis lta na/ srid pa bar ma dang / sangs rgyas kyi sprul pa dpag tu med pa mthong ngo zhes smras pas de ltar byas na/sangs rgyas dang byang chub sems dpa'i sprul pa cha phra ba yang bstan par 'gyur ba yin no/ /lha'i 'gro bar gtogs pa ni mi la ltos nas cha phra ba yin no zhes bya bar smras pa/ lha'i gzugs dang zhes bya ba la/ gzugs na kun du spyod pa'i gzugs gang yin pa'o//srid pa bar ma'i skye ba cha phra bas cha phra ba'o/ /gzhig tu med pas dang ba'o/ /thag ring ba dang / bsgribs pa spyod yul du gyur par bstan pa'i phyir smras pa/ 'og tu mnar med pa la thug pa zhes bya ba ste/ 'dod pa dang ldan pa'i gzugs ston pa'i dbang du byas nas smras pa'o//sangs rgyas kyi zhing yongs su dag pa rnams ni/ de bzhin gshegs pa rnams kyi ngo bo nyid kyi skus bsdus pa'i gzugs mthong bar 'gyur ro zhes bstan pa'i phyir smras pa/ de bzhin gshegs pa'am zhes bya ba la sogs pa'o/ /mngon par shes pa gnyis ni las mtshungs pa nyid du bstan pas las bstan par bya ste/dge ba byed pa'i sems can rnams yang dag par rab tu dga' bar bya ba'i phyir rab tu 'god par byed pa dang / mi dge ba byed pa rnams mi dge ba las bslang nas dge ba la rab tu 'god par byed pas gang gis rab tu 'jog pa de ni yang dag par ston pa dag yang dag par bskul ba dang /yang dag par gzengs bstod pa rnams dang / ji ltar rigs par ram/ go rims bzhin du yang rung ngo / /lha'i rna bas dge ba dang / mi dge ba'i ngag 'jug par gyur pa na thos shing shes par byas nas de dag la de bzhin du sgrub par byed do/ /sems dang sems pa dang yid kyi rnam par shes pa zhes bya ba ni rnam grangs te/de gcig nas gcig tu 'jug pa'o/ /de 'dzin par byed pa'i shes pa ni sems kyi rnam grangs mkhyen pa'o/ /nyon mongs pas kun nas dkris pa zhes bya ba la sogs pa ni mdo'i rjes su 'brangs nas bstan pa ste/gang gi phyir mdo las bstan pa ni 'dod chags dang bcas pa dang / zhe sdang dang bcas pa dang / gti mug dang bcas pa dang zhes bya'o/ /nyon mongs pas kun nas dkris pa dang bral ba dang zhes bya ba ni gang yang mdo las/ 'dod chags dang bral ba dang / zhe sdang dang bral ba dang / gti mug dang bral ba dang zhes bya bas bstan to/ /nyon mongs pa dang 'brel pa dang bcas pa ni nyon mongs pa bag chags dang bcas par gyur pa'i phyir ro/ /de'i phyir smras pa/ bag la nyal ba dang bcas pa dang zhes bya ba'o/ /nyon mongs pa dang bcas pa dang /nyon mongs pa dang bral ba dang zhes bya ba'i mdo'i bshad pa yin no/ /phyin ci log dang bcas pa dang / phyin ci log dang bcas pa ma yin pa'i mdo'i don bshad pa ni/ smon lam log par btab pa dang / smon lam legs par btab pa zhes bya ba la/ smon lam log par btab pa ni srid par skye ba'i phyir yongs su bsngos pa ste/de'i phyir smras pa/ mu stegs can gyi sems dang zhes bya ba ste/ phyi rol pa thams cad kyi sems ni 'khor ba la mngon par dga' ba nyid kyi phyir byas nas so/ /rnyed pa dang / bkur sti dang / rab tu dga' bar byas pa'i dbang du byas nas/'dod pa'i dbang gis mthong ba'i chos la dge ba'i phyogs la spyod pa dang ldan du zin kyang sems kyis smon lam log par btab pa'o zhes bstan pa'i phyir/ zang zing dang bcas pa'i bsam pa can gyi nyon mongs pa can ma yin pa'i sems zhes bya ba'o/ /de las bzlog pa zhes bya ba ni/chos 'di pa'i mya ngan las 'das par gtogs pa'i sems dang / zang zing med pa'i bsam pa nyon mongs pa med pa'i sems ni smon lam legs par btab pa'o/ /'dod par gtogs pa'i sems ni dman pa'i khams pa yin pa'i phyir ro/ /dman pa nyid du bstan pa ni/ 'dod pa'i khams su skyes pa'i sems can zhes bya ba ni 'dod par gtogs pa rnams kyi yang kha cig rten skyon dang ldan pa la brten pas phra zhing rtogs par dka' ba yin na yang shes par 'gyur zhes bstan pa'i phyir/ tha na ri dwags dang bya yan chad kyi sems mkhyen zhes bya ba'o/ / gzugs kyi khams su gtogs pa'i sems ni khams bar ma yin pas bar ma'o/ /gzugs med par gtogs pa'i sems ni khams gya nom par skyes pas gya nom pa'i sems zhes bya'o/ /khams gsum po 'di dag tu tshor ba rnam pa gsum dang ldan pa'i sems kyang ji ltar rigs par shes par bya'o zhes bya bar smras pa/bde ba dang ldan pa dang zhes bya ba la sogs pa'o/ /dus gcig tu'am rim gyis 'dzin pa'i dbang du byas nas smras pa/ sems mkhyen pa gcig gis zhes bya ba la sogs pa'o/ /sems kyi skad cig gcig gis sems kyi rgyun rab tu shes so//de'i phyir smras pa/ gang gi sems gang yin pa dang zhes bya ba la sogs pa la/ gang gi zhes bya ba ni/ sems can gzhan dag go/ /gang yin pa zhes bya ba ni sems so/ /ji lta bu zhes bya ba ni 'dod chags dang bcas pa la sogs pa'o/ /ci 'dra ba zhes bya ba ni dman pa dang gya nom pa la sogs pa'o//ji snyed pa zhes bya ba ni skad cig pa dang rgyun gyis 'jug pa'o/ /rnam pa 'di dag dus gcig tu mkhyen pa'i phyir smras pa/ cig car zhes bya ba'am/ 'dis ni sems can thams cad kyi sems kyang cig car 'dzin par byed de/ mthu bsam gyis mi khyab pa'i phyir ro//mngon par shes pa 'di ni stobs rnam pa bzhi kun nas skyed par byed pa dang / 'phel bar byed pa'o zhes bya bas stobs kyi las kyi sgo nas de'i las bstan pa'i phyir dbang po mchog dang mchog ma yin pa mkhyen pa dang zhes bya ba la sogs pa la/ dbang po rnams ni dman pa dang /bar ma dang / mchog gi bye brag gis mchog dang mchog ma yin pa'o/ /de mkhyen pa ni 'jug pa zhes bya ba'i dbang du byas nas so/ /lam sna tshogs mkhyen pa'i stobs kyis sems can rnams bde 'gror 'gro ba dang / mya ngan las 'das par 'gro ba'i lam la rab tu 'god par byed cing yang dag par spyod par byed do zhes bya bar smras pa/ci rigs par zhes bya ba'o/ /zag pa rnams zad par mkhyen pa'am/ zag pa zad par byed pa ni zag pa zad pa mkhyen pa ste/ zad pa'i nga rgyal dang bral ba'am/ zad par bya ba'i nga rgyal dang bcas pa'i shes pa dang bral ba ni zag pa zad pa mkhyen pa'o zhes bstan pa'i phyir de bzhin gshegs pa'i dbang du byas nas smras pa/bdag gis sam/ gzhan dag gis thob pa'am zhes bya ba la/ byang chub sems dpa' rnams gzhan gyi zad pa shes pa yin no//de'i phyir 'og nas mngon sum du ni mi byed do zhes ston pa yin no/ /lam dang lam ma yin pa mkhyen pa yang zad pa shes pa yin no zhes bstan pa'i phyir 'thob pa'i thabs kyang zhes bya ba la sogs pa la/ byang chub sems dpa' rnams ni gzhan gyi rgyud kyi zag pa zad pa mngon sum du yang dag pa ji lta ba bzhin du rab tu mkhyen pa yin gyi/rang nyid kyis mngon sum du mi mdzad de/ 'khor ba yongs su mi gtong ba'i phyir dang / nyon mongs pa rnams kyang byang chub la rjes su phan pa yin pa'i phyir ro/ /de'i phyir 'di skad du/ khyod kyi nyon mongs byang chub rgyu ru gyur pa lags//zhes bstan pa yin no/ /'khor ba yongs su mi gtong ba nyid bstan par bya ba'i phyir/ zag pa dang bcas pa'i dngos po zhes bya ba la sogs pa la/ zag pa dang bcas pa dang / zag pa med pa yang mi spong ba'o/ /de la zag pa dang bcas pa la spyod cing de kun nas 'phel bar byed pa dang /de dang yang dag par ldan pas gnas kyi zag pa med pas ni ma yin no/ /de la kun du spyod na yang 'khor ba'i sdug bsngal nyid kyis kyang mi gnod la/ nyon mongs pa ma spangs kyang nyon mongs pas kyang mi gnod pa'o zhes bstan pa ni mi gnas pa'i mya ngan las 'das pa nyid do zhes bsams pa'o//mthu thams cad kyi nang na ches mthu che ba yin te/ bsam gyis mi khyab pa'i phyir ro/ /zag pa zad pa ji lta ba bzhin du shes par byas kyang / mngon sum du yang mi byed la/ 'khor ba na kun nas nyon mongs par yang mi 'gyur ro zhes bya ba ni shin tu rtogs par dka' ba nyid do//chos kyi mthu ni sbyin pa la sogs pa pha rol tu phyin pas bsdus pa rnam pa drug tu bsdus par rig par bya'o/ /sbyin pa la sogs pa'i bya ba gang yin pa de ni mthu zhes bya ste/ nus pa'i khyad par zhes bya pa'i don gang yin pa'o//de dag re re yang rnam pa bzhi bzhi'o zhes bstan pa'i phyir smras pa/ sbyin pa la sogs pa'i chos 'di dag gi mthu de yang mdor bsdu na rnam pa bzhi bzhir rig par bya'o zhes bya ba la sogs pa la/ bdag dang gzhan la phan 'dogs pa dang / 'bras bu 'byin pa dang /so sor rnam pa du mar 'gyur ba'i phyir mdor bsdu na zhes bya ba smras pa yin no/ /mthu de ni yang mdor na ji ltar rigs par rang dang gzhan gyi rgyud la rig par bya ste/ phan 'dogs pa'i phyogs gcig na gzhan gyi rgyud du gtogs pa'o/ /lhag ma ni rang gi rgyud kyis bsdus pa'o//yang na dus kyi dbye bas rnam pa gnyis te/ tshe 'di pa dang / phyi ma pa'o/ /de la mi mthun pa'i phyogs spong ba dang / phan 'dogs pa ni mthong ba'i chos la 'byung bar 'gyur ro/ /lhag ma ni phyi ma la'o/ /yang mthu rnam pa bzhi ni rnam pa gnyis su gzhag par rig par bya ste/nyes pa nges par spong ba ni dang pos so/ /yon tan yang dag par sgrub pa ni gsum gyis so/ /yang na mthong ba'i chos kyi 'bras bu dang / tshe phyi ma'i dbang du byas nas mthu rnam pa bzhi rnam par gzhag par bya'o/ /yang mthong ba'i chos kyi 'bras bu dang / 'jig rten pha rol gyi dbang du byas nas mthu rnam pa bzhi rnam par gzhag par bya'o//mthong ba'i chos kyi 'bras bu yang rnam pa gnyis su 'gyur te/ dge ba'i bar du gcod pa rnams yongs su spong ba ni gang gi phyir smras pa/ mi mthun pa'i phyogs spong ba dang zhes pa'o/ /yang de ni dus re zhig par rig par bya'o//kha na ma tho ba med pa'i bde ba dang / yid bde ba ni gang gi phyir yang smras pa/ bdag dang gzhan la phan 'dogs pa zhes bya'o/ /tshe phyi ma'i 'bras bu rnam pa gsum gyi dbang du byas par rig par bya ste/ gtan du rnam par spangs pa'i 'bras bu ni gang yang tshogs yongs su smin par byed pa dang zhes bya ba'o//rnam par smin pa dang / rgyu mthun pa'i 'bras bu ni gang yang phyi ma la 'bras bu 'byin par byed pa zhes bya ba'o/ /kun la yang khyad par gyi tshig brjod par bya ste/ rnam par spangs pa'i 'bras bu'i khyad par dang zhes bya ba nas/phyi ma la 'bras bu 'byin par byed pa'i khyad par nyid dang zhes bya'o/ /sbyin pa'i mi mthun pa'i phyogs ni mi mthun pa'i phyogs so/ /yang de ni ser sna ste/ de yod na sbyin pa la mi 'jug pa ste/ ser sna dang / dngos po la chags pa dang / shin tu zhen pa zhes bya ba ni khyad par te/sbyin pa dang 'gal ba'i sems las byung ba kun du 'dzin pas 'di bdag dang nam yang 'bral bar ma gyur cig ces bya ba'i rnam par zhugs pa ni ser sna'o/ /nyon mongs pa dang nye ba'i nyon mongs pa thams cad kyang mi mthun pa'i phyogs su gyur pa yin na yang / ser sna kho na smos pa ni/ mngon sum du mi mthun pa'i phyogs su gyur pa nye bar bzung nas bstan pa'i phyir te/ de'i rnam pa dang 'bras bu phyin ci log tu 'byung bar rig par bya'o/ /byang chub sems dpa'i sbyin pa snying rje las byung ba ni rgyu dang 'bras bu la ltos pa med pa'i phyir/ de gnyi ga'i 'dzin pa dang bral bas tshe 'di dang pha rol du yang rgyu dang 'bras bu la ser sna spangs par rig par bya'o//'dir skyes pa rnams sel bar byed pa spong ba yin te/ tshe 'di la sbyin pa la goms par byas pas pha rol du mi skye ba nyid spangs pa yin no/ /tshogs yongs su smin pa bstan pa'i phyir/byang chub kyi tshogs su gyur pa yang yin la zhes bya ba ni byang chub sdud par byed pas na byang chub kyi tshogs te/ 'di thos par byed pas na zhes byas nas yang dag par sdud par byed cing 'thob par byed pas tshogs te/ dus ring por goms par byas pa thams cad gcig tu byas nas bsdoms te dus gzhan dag na 'thob pa'i thabs su nye bar gnas par gyur pa'o zhes byas nas so//sbyin pa ni bsdu ba'i dngos po bzhi'i nang nas gcig yin pa'i phyir smras pa/ bsdu pa'i dngos po sbyin pas kyang / /zhes bya ba la mdor bsdu na rnam pa gnyis kyis sems can yongs su smin par rig par bya ste/'di dang pha rol dag tu'o/ /yang dag par bdag gi dbang du gyur pas ji ltar 'dod pa'i bya ba byed pa nyid dang / phyi ma la nus pa ji lta ba bzhin du theg pa rnam pa gsum la 'jug par bya ba la rgyud snod du rung bar byed pa'i phyir ro/ /de ltar mdor bstan pas bdag dang gzhan rjes su gzung ba bstan nas/bdag nyid gzung ba rgyas par bstan pa'i phyir/ dus gsum du yid dga' zhing rab tu dga' ba dang / rab tu mgu ba mang ba nyid kyi phyir te/ sbyor ba dang / dngos gzhi dang mjug gis bsdus pa'am/ thog ma dang / bar dang / tha mas yang dag par bsdus pa ste/thog mar rnam par brtag pa la sogs pa dang bral bas rtsod pa dang bral ba'i sbyin pa las nges pa thob pa na yid dga' la/ bar du dngos gzhi'i dus su rang gi rgyud la 'dod pa dang / ser sna spong ba dang / gzhan gyi rgyud la phan 'dogs pa la zhugs pa'i sgro nas byams pa thob pa'i sems dang bar byed cing /mjug gi dus su ste mthar yang 'gyod par mi byed pas na 'gyod pa med pa'o/ /'gyod pa med na sems dga' bar 'gyur ba'i rang bzhin no/ /de lta bu'i 'gro ba rnam pa gsum sbyin bdag dang / gtong ba po la skyed pa'i phyir len pa po la bcom ldan 'das kyi bya ba rnam pa gsum gnas te/bdag gir bya ba'i bya ba dang / nye bar btags pa'i bya ba dang / rjes su yi rang ba'i bya ba'o/ /gzhan dag la yang gtso bor gyur pa rnam pa gnyis kyis phan 'dogs pa rnam pa gnyis su rig par bya'o/ /yongs su spyod pa'i sbyin pas ni bkres pa dang /skom pa dang / nad kyi sdug bsngal sel bar byed do/ /de la bza' ba dang / btung ba longs spyod pas ni bkres pa dang / skom pa'i sdug bsngal sel to/ /gos dang / khyim sbyin par byas pas ni grang ba dang tsha ba'i sdug bsngal sel te/ sman dang nye bar longs spyod pa byin pas ni nad kyi sdug bsngal sel to//yongs su gtong pa'i sbyin pas ni/ 'dod pas phongs pa'i sdug bsngal sel bar byed pas phan 'dogs par byed de/ mngon par 'dod pa grub pas sems yang dag par dga' ba bskyed pa'i phyir ro/ /mi 'jigs pa'i sbyin pas ni 'chi bas 'jigs shing skrag pa rnams sel bar byed do//de ltar yongs su longs spyod pa yongs su gtong ba dang / mi 'jigs pa'i sbyin pas pha rol po la bde ba dang / yid bde ba skyed par byed pa'i sgo nas lus dang sems la phan 'dogs pa gsal bar bstan pa yin no//gang dang gang du skyes par zhes bya ba ni lha rnams su'am/ mi rnams su'am/ rgyal rigs la sogs pa shing sA la chen po lta bu rnams so/ /sbyin pa'i 'bras bu chen po rnam pa gsum gyis longs spyod chen por 'gyur ba nyid bstan pa'i phyir/ gang la longs spyod pa dang / gang dag longs spyod pa dang / gang dag gis mngon par bsgrubs pa de dag thams cad longs spyod ces byas nas so/ /phan 'dogs pa'i dbang du byas nas smras pa/ phyug pa dang zhes bya ba la sogs pa la de'i nye bar longs spyod pa'i dngos po yang rnam pa gnyis te/nor dang 'bru'o/ /de dag gnyi ga bsags pa chen po dang ldan pa ni phyug pa ste/ ji skad du/ nor dang / 'bru dang / mdzod dang / bang mdzod mang po phun sum tshogs pa dang ldan pa zhes bya bas bstan pa yin no/ /nye bar longs spyod pas ni/ kha zas dang / snod spyad dang /nye bar mkho ba la sogs pa chen po dang ldan pa ni longs spyod chen po'o/ /des na nor dang / longs spyod phun sum tshogs pa zhes gang bstan pa yin no/ /grogs bshes la sogs pa mang ba ni rtsa 'jing che ba bzhi'o/ /bran po la sogs pa mang ba ni g.yog 'khor la sogs sogs pa mang bar 'gyur ba'o//de dag gis ni rnam par smin pa'i 'bras bu bstan to/ /rgyu mthun pa'i 'bras bu'i dbang du byas nas smras pa/ sbyin pa la yang mos par 'gyur te zhes bya ba ni phyi ma la yang sbyin pa la sems 'gro bar 'gyur ro zhes byas nas so/ /sbyin pa'i 'bras bu'i khyad par rnams ni bstan pa de dag las lhag par sgrub pa'i nus pa med par smras pa/'di las gong na yang med ces bya ba la sogs ba smras pa yin no/ /yang tshul khrims 'chal ba ni kun nas slong ba dang bcas pa'i lus dang ngag gi nyes par spyod pa'o/ /dmad pa'i tshul khrims ni 'chal pa'i tshul khrims so//de'i ngo bo ni tshul khrims 'chal ba nyid do/ /de dang ldan pa'i skyes bu ni tshul khrims 'chal pa nyid do/ /tshul khrims ni 'dir lus dang ngag gi mnyam par spyod pa ste/ don de la mos pa nyid do/ /bsdu ba'i dngos po bzhi las ni tshul khrims don mthun pa yin te/ gzhan dag tshul khrims la yang dag par gzhag par 'dod pa des bdag nyid tshul khrims la yang dag par gnas par byas pas so/ /de bzhin du don mthun pa gzhan dag la yang rig par bya'o/ /sems can rnams yongs su smin par byed do zhes bstan pas ni bdag dang gzhan la phan gdags pa bstan pa yin no//de bzhin du thams cad du blta bar bya'o/ /'chal pa'i tshul khrims kyi rkyen gyis zhes bya ba la sogs pa la/ 'di la 'jigs par 'gyur ro zhes bya ba dgos pa ni 'jigs pa'o/ /'chal pa'i tshul khrims spangs pas de yang spong bar 'gyur ba ni bdag nyid la phan 'dogs pa'o//kha na ma tho ba ni dpyas su byas pa ste/ skyes bu dam pas da med pa'o/ /khon du 'dzin pa ni mthong ba'i chos nyid la gzhan gyis mi 'dod pa'i bya ba byed par 'brel pa'o/ /de lta bu'i mi phan pa dang / mi bde ba yongs su spangs pa la phan pa'i don gyi sgo nas phan gdags pa gsungs pa yin no//da ni bde ba dang yid bde ba la gnas pas phan gdags pa bstan pa'i phyir smras pa/ bde bar gnyid kyis log cing zhes bya ba la sogs pa la/ tshul khrims ni lus dang sems gdung ba med par byed pa yin pas nyin dang mtshan du bde bar gnas par 'gyur ro zhes bya ba yin no//de la bde bar gnyid kyis log ces bya bas ni mtshan mo gdung ba med pa nyid bstan to/ /bde bar sad par 'gyur zhes bya bas ni nyin mo bstan pa yin no/ /de'i phyir tshigs su bcad pa las bstan pa/ tshul khrims yang dag blangs pa bde/ /lus kyang gdung ba med pa dang //mtshan mo'ang bde bar gnyid kyis log/ /sad pa na'ang dga' bar 'gyur/ /zhes bya ba yin no/ /tshul khrims ni ting nge 'dzin gyi rgyud pa'i rgyu yin par bstan pa'i phyir/ de bzhin du zhes bya ba la/ tshul khrims dang ldan pa ni 'gyod pa med par 'gyur la zhes bya ba'i rim gyis ting nge 'dzin 'thob par 'gyur ro//de las dben pa las skyes pa'i bde ba 'byung bar 'gyur bas de ltar na bdag nyid la phan 'dogs pa yin no/ /gzhan la phan 'dogs pa bstan pa'i phyir/ sems can thams cad la yang zhes bya ba la sogs pa smras te/tshul khrims dang ldan pa la ni/ gzhan dag 'dis bdag lag pa dang / dbyug pa dang / bong ba la sogs pas sam/ sbyor ba dang dngos gzhi dang / mjug gi dus su'am/ lus dang ngag gi gnod pa byed cing sdug bsngal skyed par 'gyur ro zhes dogs pa skye bar mi 'gyur bas mi 'jigs pa sbyin par byed pa yang yin no//de'i phyir sbyin pa chen po ni lnga ste zhes gsungs pa yin no/ /tshul khrims la yang mos par 'gyur te zhes bya ba ni phyi ma la ste/ dbang phyug chen po'i rgyus kyang / 'dul dang 'gal bar 'jug mi mdzad/ /ces bstan pas so//mi bzod pa zhes bya ba ni gnod pa byed pa la brten nas de la khong khro ba'i rgyun 'jug par 'gyur ba'o/ /bzod pa ni khon zhi bar byed pa yin pas gzhan dag gis gnod pa byed pa dang / 'ching bal sogs pa'i sdug bsngal mi byed pas bdag yongs su skyob par byed pa nyid do/ /skye bo dam pa'i bzod pa'i rang bzhin go cha yis//skye bo ngan pa'i tshig gi mda' ni log gyur nas/ /zhes bya ba'i tshig gis so/ /de dag gi kha na ma tho ba dang / mi 'dod pa'i 'bras bu'i sdug bsngal las kyang yongs su skyob pa yin no/ /de lta bu'i bdag dang gzhan la phan 'dogs pa'i rgyu mthun pa'i 'bras bu bstan pa'i phyir/phyi ma la yang zhes bya ba la sogs pa la/ de la khon mang bar mi 'gyur ba ni phyi ma la dgra'i phyogs med par 'gyur ba'am/ dman par 'gyur ba'o/ /'byed pa mi mang ba ni grogs dang 'khor dang mi phyed par 'gyur ba'o/ /de'i phyir gzhan dag gis mi 'dod pa byed par dogs pa med pa'i phyir/sdug bsngal ba dang / yid mi bde ba mang bar yang mi 'gyur ro/ /tshe 'di nyid la yang khon du 'dzin pa rab tu zhi bas lus dang ngag gi las dpyas med pa kun du spyod pas 'gyod pa med par 'gyur ba'o/ brten pa na zhes bya ba ni byang chub pa'i dus na yang brtson 'grus dang lhan cig 'jug par 'gyur ba'i phyir te/byang chub thob pa'i dus na'ang brtson 'grus brtsams pa dang bcas pa yin pas de nyid kyis de thob par byed pas so/ /brtson 'grus brtsams pa ni gcig tu dge ba byed par 'gyur ro/ /de rtag tu gus pa rgyun mi 'chad pa'i sbyor ba nyid kyis kun nas nyon mongs pa kun du spyod pa'i skabs med pa yin no//de'i phyir smras pa/ bde ba la reg par gnas pa na zhes bya ba la sogs pa la/ de ltar reg par bya ba ma yin pa la gnas pa yongs su spangs pa'i phyir bdag nyid la phan 'dogs pa yin no/ /de ni brtson 'grus kyi sgo nas gong ma'i khyad par 'thob par 'gro ba'i dga' bas phan 'dogs pa bstan pa'i phyir/sngon las gong du dogs par zhes bya ba la sogs pa la/ rgyun mi 'chad par dge ba'i phyogs la sbyor ba dang ldan pa'i phyir gzhan dag la nye bar 'tshe ba'i skabs med pa nyid do/ /de ltar nye bar 'tshe ba mi byed pa nyid kyis gzhan la phan 'dogs pa nyid du bstan pa'i phyir te/rnam pa gnyi gas kyang bdag dang gzhan la phan 'dogs pa yin pa ni nye bar 'tshe bar mi byed pa dang / phan 'dogs pa la mngon sum du phyogs pa'i phyir ro/ /da lta bur zhugs pa des gzhan dag kyang brtson 'grus brtsams pas 'dun pa bskyed par 'gyur ro//de lta bus kyang gzhan la phan 'dogs pa yin no/ /sngon dge ba'i chos la goms par byas pa ni rgyu'i stobs can no/ /brtsams pa thams cad la spro ba mang ba nyid de/ skyes bu'i rtsal la mngon par dga' ba'o/ /bsam gtan gyi mi mthun pa'i phyogs kyi nyon mongs pa ni rten gyis dang /ring gi sa pa'i ma thob pa dang / thob pa las yongs su nyams pa'i rgyur gyur pa'i phyir bsam gtan gyi nyon mongs pa mi mthun pa'i phyogs kyi dbang du byas nas smras pa/ tshig gi rtog pa zhes bya ba la sogs pa la/ tshig gi rnam par rtog pa ni/rtog pa dang dpyod pa ste/ bsam gtan dang po'i nyon mongs pa'o/ /dga' ba ni gnyis pa'i 'o/ /bde ba ni gsum pa'i'o/ /gzugs kyi 'du shes ni bzhi pa'i 'o/ /sogs pa smos pas ni thogs pa'i 'du shes la sogs pa yang rig par bya'o/ /rten du gyur pa yang yin la zhes bya ba ni zhi gnas dang lhag mthong zung du 'jug pa ni byang chub kyi lam nyid yin pa'i phyir ro//nyon mongs pa'i nyes par spyod pa spangs pa ni zhi zhing ngo / /nyon mongs pa'i kun du spyod pa spangs pi ni rab tu zhi ba'o/ /de dag gi gnyen po'i phyogs thob pa ni 'dod chags dang bral ba nyid do//de ltar mi mthun pa'i phyogs dang gnyen po'i phyogs spangs pa dang thob pas lus dang ngag la gnod pa med cing sems rnam par mi 'khrugs pa'o/ /bsam gtan la goms par byas nas stobs kyi ye shes thob par 'gyur ro zhes bstan pa'i phyir/ ye shes rnam par dag pa dang //zhes bya ba'o/ /nye ba dang shin tu nye ba'i sbyor bas goms par byas pa'i bsam gtan gyi sbyor ba med par yang mngon par shes pa thob par 'gyur ro zhes bstan pa'i phyir smras pa/ mngon par shes pa mngon par bsgrubs pa dang / /zhes bya ba la ji skad du/ goms par 'dod chags dang bral ba nyid kyis zhes bstan pas 'dod chags dang bral ba nyid kyis thob par 'gyur ro zhes bya ba'i don to//'di nas shi nas gzugs dang gzugs med pa'i khams su skye'o zhes bstan pa'i phyir smras pa/ rnam par dag pa'i lhar zhes bya ba la/ lha ni gsum ste/ tha snyad kyi lha dang / skyes pas thob pa'i lha dang / rnam par dag pa'i lha'o zhes bya ba'o/ /de la rnam par dag pa'i lha ni gzugs dang gzugs med pa na kun du spyod pa dang / dgra bcom pa ste/ rten gyis pa'i nyon mongs pa spangs pa'i phyir dang / nyon mongs pa thams cad spangs pa'i phyir go rims bzhin du'o/ / byang chub sems dpa'i tshogs dang lam thams cad ni shes rab kyis yongs su gzung ba nyid do/ /de'i phyir smras pa/ sbyin pa dang zhes bya ba la sogs pa la/ gang gi tshe shes rab yongs su rdzogs par gyur pa na bzhi po yang yongs su rdzogs par 'gyur ro zhes bya ba'o/ /kun du rmongs pa'i sdug bsngal dang bral bar gyur cing /shes bya'i dngos po don ji lta ba bzhin du so sor rtogs pa dang ldan pa'i dga' ba dang / mchog tu dga' ba rgya chen po mang bar 'gyur ro/ /des na 'di dang pa rol thams cad du bdag nyid la phan btags par 'gyur ro/ /de'i phyir smras pa/ tshe 'di dang phyi ma la phan pa dang zhes bya ba la/tshe 'di la ni rigs pa nye bar bstan pas bde bar phan 'dogs par byed do/ /skye ba gzhan la ni rigs pa nye bar bstan pas phan pa dang bde ba dag bsgrub ste/ dge ba'i chos thams cad kyi sngon du 'gro ba ni shes rab yin par smras pa/ des dge ba'i rtsa ba thams cad kyang zhes bya ba la sogs pa'o//shes rab kyi stobs kyis ni sangs rgyas nyid kyang 'thob bo zhes bya bar smras pa/ phyi ma la yang sgrib pa rnam pa gnyis dang zhes bya ba la sogs pa'o/ /ji skad bstan pa'i bsod nams kyi 'bras bu rnam par smin pa la gnas pa'i sangs rgyas dang byang chub sems dpa' rnams kyi byin gyi rlabs gang yin pa de ni lhan cig skyes pa'i mthu yin par rig par bya'o//yang de ni rang dang gzhan gyi rgyud dag la bya ba byed par 'gyur te/ bdag dang gzhan la phan 'dogs pa'i phyir ro/ /yang de ni gnas skabs gsum du rnam par gzhag par bya'o//sangs rgyas dang byang chub sems dpa' rnams la ci rigs par bya ste/ rgyu'i gnas skabs dang / 'bras bu'i gnas skabs dang sems can rnams la phan pa byed pa'i bya ba'i gnas skabs so/ /smon lam dang las kyi bye brag gis sbyangs pa med bzhin du yang 'das pa'i skye ba'i gnas rjes su dran pa ni rang bzhin gyis tshe rabs dgongs pa zhes bya'o//so sor brtags nas zhes bya ba ni snying rje dang shes rab kyi stobs dag gis ni zhes bya ba'i don to/ /bdag la chags pa drag pos zhen par gyur na yang 'jig rten pa rnams kyi bdag nyid kyi sdug bsngal chung ngu tsam yang rang gi don du yang bzod par mi nus la/byang chub sems dpa' rnams ni gzhan gyi don du sdug bsngal rnam pa bzhi nyams su len par byed pa zhes bya ba ni sdug bsngal gyis mi mjed pa'i mthu zhes bya'o/ /gzhan gyi sdug bsngal de mi spro bzhin du sdug bsngal dang / yid mi bde bas brnags pa ma yin gyi gzhan du sems can gyi bde ba bsgrub par bya ba'i phyir te/des dga' ba skye bar 'gyur bas so zhes bya ba ni sdug bsngal gyis mi mjed pa'i mthu gsum pa ste/ gzhan la phan par 'dod pa rnams/ /mnar med par yang dga' bar 'gyur/ /zhes bya ba'i tshig gis so/ / de ltar spyod pa'i lam la gnas pa rnams kyi thun mong gi mthu bstan nas/ da ni skye ba gcig gis thogs pa rnams kyi brjod par bya'o/ /tshe'i tshad ji srid par dga' ldan na gnas pa dang zhes bya ba ni dga' ldan gyi pho brang du skyes pa'i byang chub sems dpa' las gzhan pa'i lha'i bu rnams la ni gcig tu tshe ji srid gnas par ma nges pas de ni der skyes pa'i ris mthun pa'i skal ba mnyam pa'i sems can rnams la yang dag par 'das pa'i phyir de yang mthu zhes bya'o//yang res 'ga' 'ga' zhig dga' ldan du skyes pa'i byang chub sems dpa' rnams ni dus ring du gnas par 'gyur ro//de'i phyir gtso bor gyur pa'i bsod nams kyi las kyis der skye bar 'gyur zhing skyes par gyur nas kyang gnas der skyes pa'i so sor nges pa tshe'i tshad la ltos pa med par shin tu nges pa'i gnas skabs kyis tshe'i tshad ji srid par der gnas pa ste/ ji ltar da ltar 'phags pa byams pa dang da ltar 'grib pa'i dus 'di 'das par gyur pa dang /yang rim gyis 'phel bar 'gyur ro/ /de nas 'grib par brtson pa na 'dir bltam par 'gyur te/ de snyed du gnas pa'i skal ba dga' ldan du skyes pa'i lha'i bu gzhan la yod pa ma yin te/ dus shin tu ring por 'das par gyur pa'i phyir ro//lha'i tshe dang zhes bya ba ni der skyes pa rnams la gang gis bde bar 'tsho ba dang / shes rab kyis 'tsho ba zhes brjod pa de dang 'dra ba'i tshe phun sum tshogs pa med pa'i phyir ro/ /der 'dus par gyur pa'i 'dod pa na spyod pa dang / gzugs na spyod pa'i lha'i bu rnams kyi kha dog dang /lus las shin tu 'das nas byang chub sems dpa' nyid kyi lus khyad par du 'phags par 'gyur ro zhes bya bas ni kha dog gis so/ /de nyid 'jig rten thams cad kyis bsngags par gyur pa nyid kyis ni/ grags pas zhes bya ba ni grags pas so/ /srid pa tha ma pa'i mthu'i dbang du byas nas smras pa/ji ltar byang chub sems dpa'i srid pa bar ma'i gnas skabs nyid na yang stong gsum gyi stong chen po'i 'jig rten gyi khams snang ba chen pos khyab par mdzad pa lta bu ni sems can gyi rigs 'ga' la yang snang bar byed pa de lta bu'i gnas skabs yod pa ma yin no/ /lhums su gshegs pa na yang mthu sems can thams cad las shin tu 'das pa'o zhes bya bas so so'i skye bo thams cad dang /nyan thos rnams kyi mngal du 'jug pa ni dman pa'i phyogs yin no/ /'khor los sgyur ba rnams kyi ni yan lag gcig dang ldan pa'o/ /rang sangs rgyas rnams kyi ni yan lag gcig mtshang ba'o//byang chub sems dpa' rnams kyi ni yan lag thams cad dang ldan pa'o zhes bstan pa'i phyir/ mkhyen bzhin du yum gyi lhums su gshegs pa dang zhes bya ba'o/ /bltam pa nyid ni bltam pa'o/ /bltams ma thag tu yang phyogs bzhir gom pa bdun bdun por ba dang tshig kyang smras pa ni byang chub sems dpa' ma yin pa'i sems can gzhan dag gang la yang yod pa ma yin no//bltams pa na yang lha la sogs pa'i mchod pa rgya chen po dang / lus kyi mthu'i dbang du byas nas smras pa/ skyes bu chen po'i mtshan bla na med pa zhes bya ba ni yul na gnas pa dang /gsal ba dang / yongs su rdzogs pa nyid do/ /mi brdzi ba'i chos nyid thob pas gnod pa thams cad kyis mi brdzi ba dang / byang chub kyi snying po la zhugs nas kyang bsam pa'i stobs kyis bdud sde rnams las rgyal ba'o/ / tshigs re re la yang sred med kyi bu'i stobs dang ldan pa'o/ /sbyor ba rnams la sbyang ba'i bya ba ma mdzad bzhin du 'jig rten pa'i bzo'i gnas thams cad la shin tu myur bar thugs su chud pa'o/ /spyad ba'i bya ba ma mdzad pa'i ngang tshul gang la yod pa de ni sbyang ba'i bya ba ma mdzad pa'o/ /ma mdzad pa ni ma mdzad pa ste/rang nyid mkhas par gyur pa ni sbyang ba'i bya ba yang ma mdzad pa'o/ /gzhan gyi man ngag dang rten la mi brten par 'dzam bu'i gling bye ba phrag brgyar dus gcig tu mngon par byang chub pa dang / tshangs pas bskul ba dang / gling bzhi pa khyab pa'i sprin chen po las char gyi rgyun dus gcig tu 'bab pa'i sgra chen po des kyang snyoms par 'jug pa las mi g.yo ba'i snyoms par 'jug pa zhi ba dang /byams pa'i rgyu mthun pa'i bye brag dang ldan pas bya dang ri dwags phra mo rnams kyang mchog tu yid rton pa dang / de dag dus thams cad du de'i drung du ci dgar 'ong zhing bag tsha ba med par 'khod pa dang dud 'gro rnams kyang de bzhin gshegs pa la mchod pa byed pa dang /chu'i snying po can gyi sprin rnams kyang de bzhin gshegs pa khrus mdzad pa'i dus su ma rig pa'i chus de bzhin gshegs pa la khrus gsol ba'i dbang du byas pa dang / shing gi drung du bzhugs pa na dus yol yang grib ma mi 'pho bar de bzhin gshegs pas bkab nas gnas pa dang / dus ring por bdud kyis rjes su 'brangs shing glags btsal yang skyon dang bug rdol ma mthong pa dang / rtag par rgyun du mnyam par gzhag pas rtag tu dran pa dang ldan pas rtag par rgyun du nye bar gnas pa'o//des dus rtag tu nye bar gnas pa'i phyir de bzhin gshegs pa la dran pa nyams pa mi mnga' pa'o/ /dran pa nyams pa mi mnga' ba'i phyir bcom ldan 'das ni rtag tu mnyam par gzhag pa ste/ glang chen 'gro na'ang mnyam par gzhag /ces bya ba'i tshigs su bcad pa'i rjes su 'brangs nas so//dran pa mchog yang dag par bskyed pa yang mdo'i rjes su 'brangs nas bstan par bya ba'i phyir/ so so yang dag par mkhyen bzhin du zhes bya ba la sogs pa la/ tshor ba yang yang dag par mkhyen to/ /'byung ba dang / gnas pa yang dag par mkhyen te/'gag par 'gyur ba ste/ zad par 'gyur ba yang mkhyen pa'o/ /'du shes rnams dang / rtog pa rnams kyang de bzhin no/ /gsum po kho na smos pa ni de dag ni thams cad du 'gro ba rnams kyi rtsa ba yin pa'i phyir ro/ /yang na rnam par smin par gtogs pa'am/yul du gtogs pa'am/ lam mngon par 'du byed par gtogs pa la/ dran pa mchog yang dag par skye bar 'gyur ba bstan pa'i phyir rim bzhin no/ /tshor ba gtso bor gyur pa ni rnam par smin pa'o/ /sems 'byung ba'i khyad par ni rtog pa'o zhes byas nas so//de bzhin gshegs pa mthong ba tsam gyis kyang 'ga' zhig la phan 'dogs par gyur pa ni/ mthong bas phan 'dogs pa'i mthu'o/ /yang de ni spyod par gtogs par rig par bya ste/ smyon pa rnams rang bzhin du gnas pa 'thob pa dang / bud med mngal mi mthun pa rnams bde bar btsa' bar 'gyur ba dang /de bzhin gshegs pa grong khyer du gshegs pa'i tshe sku mi mthong ba med do zhes bya bas long ba rnams kyis de bzhin gshegs pa'i gzugs mthong bar 'gyur ba'o/ /kha cig ni de srid du gzugs thams cad mthong bar 'gyur ro zhes zer ro//'on pa rnams kyis de bzhin gshegs pa'i gsung thos par 'gyur ro/ /kha cig ni sgra thams cad thos par 'gyur ro zhes zer ro/ /de bzhin gshegs pa mthong ba ni nyon mongs pa rnams dang bral bar 'gyur ba'am/ yang na gtan bral bar 'gyur ba'o//de lta bur gtogs pa rnams ni mthong pas phan 'dogs pa'i mthu zhes bya'o/ /glo phyogs gcig gis gzims pa na/ gdan dang gzims mal mi 'khrugs pa dang / rlung drag pos kyang chos gos kyi mtha' mi g.yo ba dang / ri dwags kyi rgyal po'i stabs su gshegs pa nyid dang /zhabs g.yas pa sngon du 'degs pa nyid dang / gshegs pa na sa phyogs mtho ba dang dma' ba mnyam par 'gyur zhing / reg na bde bar 'gyur ba nyid dang / rdo dang gseg ma dang / gyo mo med pa zhes bya ba reg pa bde bar 'gyur ba nyid dang / grong du gshegs pa'i tshe yang dben pa la gzhol ba nyid dang /khyim du 'jug pa'i tshe de bzhin gshegs pa'i sku dang 'tsham pa'i sgor gnas par 'gyur ba dang / zhal zas la longs spyod pa'i dus su/ 'bras bu can gyi rdog ma yang bcas nas gsol ba dang zhes bya ba ni zhib mor ma byas pa'i rdog ma mi bzhes pa zhes bya pa'i don to//zhal zas bzhes pa'i dus su/ kham gcig gsol ba na zhal du rtsam pa'i cha tsam yang mi lus pa nyid de/ dper na bkrus pa ltar 'gyur ba'o/ /de lta bu'i spyod pa dang / gnas pa dang ldan pa yin no/ /yongs su mya ngan las 'das pa'i nye bar bzhi ba'i mthu bstan pa'i phyir smras pa/sa chen po g.yo ba dar zhes bya ba la sogs pa'o/ /rnam pa gsum du rig par bya ste zhes bya ba la rnam pa gsum ni rnam pa gnyis su bsdus par 'gyur te/ zab pa dang rgya che bas so/ /gcig dang gnyis kyi go rims bzhin no/ /phra ba nyid dang /rtogs par dka' ba nyid kyis sems can thams cad kyi shes pa'i spyod yul las shin tu 'das pa'i phyir dang / sangs rgyas dang byang chub sems dpa' rnams kyis ni skad cig gcig la dus gcig tu grangs las 'das pa'i sems can rnams la thabs sna tshogs kyis sems can rnams kyi don gyi bya ba sna tshogs mdzad pa ni phra ba mkhyen pa'i mthu zhes bya ste/thos pa dang bsam par yang mi nus pa'i rnam pa'i dbye ba zhes bya ba'i don to/ /de dag gi mthu ni rnam pa thams cad dang ldan pa yin te/ nyan thos la sogs pa ni ma yin no//yul dpag tu med pas mthu yang dpag tu med par bstan pa'i phyir smras pa/ khams so zhes bya ba ni sems can rnams kyi mos pa dang / khams rnams ji ltar gnas pa ltar zhes bya ba'i tshig gis so/ /khams dang rjes su mthun pa'i mos pa 'byung la/ mos pa dang rjes su mthun pa'i sgrub pa byed par 'gyur/sgrub pa dang rjes su mthun pa'i 'bras bu 'grub par 'gyur ro zhes bstan pa'i phyir smras pa/ bdag gcig pu 'dul ba'i phyir zhugs pa yin gyi zhes bya ba la sogs pa la/ de dag ni bdag nyid gcig pu 'dul ba'i phyir mya ngan las 'das par zhugs pa'i phyir dang /de dag gi shes pa yang khams gcig la 'jug gi gzhan du ni ma yin no zhes bstan pa yin no/ /rnam pa 'di dag ma gtogs pa zhes bya ba ni ma gtogs pa gang yin pa de bzhin gshegs pa rnams kyis stong gnyis pa gzigs pas 'jug pa'i ye shes de ni nyan thos rnams dang thun mong gi mthu'o//gang yang stong gsum gyi stong chen po'i 'jig rten gyi khams gzigs pa'i ye shes ni rang sangs rgyas rnams dang thun mong ba'o/ /nyan thos rnams dang / rang sangs rgyas smos pa ni so so'i skye bo thams cad las shin tu ring du gyur pa'i phyir ro zhes bstan pa'i phyir smras pa/mtshungs re skan zhes bya ba la sogs pa'o/ /mthu gzhan rnam pa gsum yang yod de/ rdzu 'phrul gyi cho 'phrul gyi mthu dang / kun brjod pa'i cho 'phrul gyi mthu dang / rjes su bstan pa'i cho 'phrul gyi mthu'o/ /de dag 'dir ma bstan to snyam du the tshom za ba bsal ba'i dbang du byas nas smras pa/gang yin pa de yang zhes bya ba la sogs pa la/ mngon par shes pa'i mthu rnams su zhes bya ba ni dang po dang gsum pa dang drug pa ni cho 'phrul rnams dang go rims bzhin no/ /rdzu 'phrul yang dag par bstan pas/sems 'dun par bya ba'i las can nyid dang / sems kun rjod par byed pa'i rab tu dga' ba bskyed pa'i las can yin pa'i phyir dang / mos pa dang / khams dang / rjes su mthun pa'i sems can rnams la phyin ci ma log par gdams ngag dang / rjes su bstan pa 'jug pa'i las can nyid dang go rims bzhin no//byang chub sems dpa'i sa'i rnal 'byor gyi gzhi'i gnas las/ byang chub sems dpa'i mthu'i le'u'i 'grel pa ste lnga pa rdzogs so// //mtshan nyid bstan pa dang / yongs su smin pa'i rten bstan pa dang /yongs su smin pa'i dngos po'i dbye ba bstan pa dang / yongs su smin pa'i byed pa'i bye brag dang / yongs su smin pa'i mnyam pa'i rten dang / yongs su smin pa'i gnas skabs kyi bye brag ste rnam pa drug tu rig par bya'o/ /theg pa gsum gyi sgo nas rnam par grol ba'i 'bras bu 'thob par byed pa'i lus dang sems kyi sbyor ba las su rung ba nyid ni yongs su smin pa'i mtshan nyid yin par bstan par 'gyur ro//dge ba'i chos kyi sa bon yod na zhes bya ba ni 'dir 'jig rten las 'das pa'i dge ba'i sa bon yin par dgongs so/ /de dag ni 'khor ba dang /mi dge ba'i gnyen po yin pa nyid kyis kha na ma tho ba med pa'i dge bar gtogs pa nyid do/ /'di dag gis ni yongs su smin pa'i rgyu bstan to/ /bsten pa'i rgyus zhes bya ba ni chung ngu dang / 'bring dang / chen po'i sbyor ba kun du bsten pas/ kun du bsten pa dang / bsgom pa dang / mang du bya ba nyid do zhes bya ba'i tshig gsum dang sbyar bar bya ba'am/ thog ma dang / bar dang / tha ma'i gnas skabs te/ de lta bu'i rkyen thob nas yin no zhes bstan pa yin no/ /rang gi ngo bo bstan pa'i phyir/ rnam par dag pa dang mthun pa'i lus dang sems las su rung pa dang zhes bya ba la/ ji skad bstan pa'i mtshan nyid can gyi rgyu dang rkyen thob nas phung po lnga'i mtshan nyid can gyi ming dang gzugs kyi rgyud yongs su gyur pa'i bye brag ni yongs su smin pa zhes bya'o/ /bye brag bstan pa'i phyir rnam par dag pa dang mthun pa zhes bya ba ni/ nyon mongs pa dang / shes bya'i sgrib pa las rnam par grol ba 'thob pa dang /rjes su mthun par ji ltar rigs pa zhes bya ba'i don to/ /spong bar bzod pa'i lus gang yin pa'i lus las su rung ba nyid ni lus nyams bde ba'o/ /sgom pa bzod pa'i sems las su rung ba gang yin pas ni sems nyams bde ba'o/ / de dag gi rgyud bstan pa ni/ yang dag pa'i sbyor ba mthar phyin pa zhes bya ba la/ tshogs kyi lam gyis bsdus pa'i yang dag pa'i sbyor ba'i tha ma bdag gi lus yongs su rdzogs par grub pa ni mthar phyin pa'o/ /de ni rnam par dag pa'i sbyor ba'i mthar thug pa yin pas las su rung ba'o//de'i phyir smras pa/ de la gnas na zhes bya ba la/ ston pa dang phrad kyang rung zhes bya ba ni nyan thos rnams so/ /ston pa dang ma phrad kyang rung zhes bya ba ni rang sangs rgyas dang byang chub sems dpa' rnams so/ /de'i mod la zhes bya ba ni skye ba de nyid do/ /de bzhin du bdag gi lus kyi tha ma la theg pa gsum gyi sgo nas 'jig rten las 'das pa'i phun sum tshogs pa thob pa la rjes su mthun pa'i lus dang /sems kyi rgyud yongs su gyur pa'i bye brag ni yongs su smin pa'i ngo bo yin no zhes bstan par 'gyur ro/ /'jig rten la grags pa'i yongs su smin pa'i dngos po rnams kyi chos mthun pa'i dpe nye bar bsgrubs nas/dpe rnam pa gsum gyis don gyi bye brag gsum rig par bya'o/ /rma'i nad ni gang gi tshe brtol nas btsir du rung ba de'i tshe yongs su smin pa zhes bya'o/ /de bzhin du kun nas nyon mongs pa can gyi chos rnams kyang bsal zhing spang du rung bar gnas par gyur pa ni yongs su smin pa zhes bya'o//sa'i rang bzhin gyi snod ni gang gi tshe las kyi bya ba yongs su rdzogs nas spyad la rag par sbyor ba mthar thug par gyur pa'i tshe nye bar spyod pa'i 'os yin pas de'i tshe tshos pa zhes bya'o/ /de bzhin du yang dag pa'i sbyor ba'i mthar thug pa'i gnas skabs thob pa'i lus dang sems dag ni yongs su smin pa zhes bya'o//a mra la sogs pa'i 'bras bu ni gang gi tshe ro khyad par du 'phags pa so sor thob par gyur pa na yongs su smin pa zhes bya'o/ /de bzhin du rnam par grol ba'i bde ba so sor myong bar rung ba'i lus dang sems kyi gnas skabs thob pa ni/yongs su smin pa zhes bya'o/ /dpe gsum po 'di dag gis ni spang bar bya ba 'thob pa la rjes su mthun pa'i lus dang / sems kyi gnas skabs dang / 'phags pa'i lam 'thob pa la rjes su mthun pa'i ngo bo ni yongs su smin pa zhes bya'o//sgrub pa dang 'bras bu'i dbye bas gang zag bzhi zhes brjod do/ /re re la yang dbye ba dpag tu med pa yod pa'i phyir/ mdor bsdu na zhes bya ba la 'bras bu dang bcas pa'i nyan thos kyi lam ni nyan thos kyi theg pa zhes bya'o/ /rang sangs rgyas kyi theg pa dang / theg pa chen po yang de bzhin te/rang sangs rgyas kyi lam dang / byang chub sems dpa'i lam zhes bya ba yang rig par bya'o/ /khams gsum du bde 'gror 'gro bar bya ba'i phyir zhes bya ba ni khams gsum gyi mngon par mtho ba'i phun sum tshogs pa zhes bya ba'i don to/ /dngos po'i dbye ba nyid dang /rnam par dbye ba ni rnam pa drug tu 'gyur ro/ /dngos po'i dbye ba yang rnam pa gsum ste/ so sor chung ngu dang / 'bring dang / chen po'i dbye bas rnam par gzhag pa'o/ /de la dbang po yongs su smin pa ni/ dbang po dang bcas pa'i lus kyi rten te/ bdag gi lus zhes bya ba'i don to//yang dbang po yongs su smin pa de yon tan rnam pa brgyad dang ldan par bstan pa'i phyir dang / rnam pa thams cad du rnam par dag pa 'thob pa la rjes su mthun pa'i rten yongs su smin pa'i dbang du byas pa'o/ /de lta na yang nyan thos la sogs pa kha cig ni mdog phun sum tshogs pa la sogs pa med par yang yongs su smin par 'gyur ba nyid do//tshe phun sum tshogs pa ni mngon par 'phags pa'i tshe mang du 'jug pa nyid dang / rgyun mi 'chad par 'jug pa'i phyir gang gi tshe ring po dang / dus ring por gnas pa zhes brjod pa'o/ / srid pa tha ma thams cad la bar ma dor 'chi ba ni med do zhes byas nas so/ /de bzhin du dbang po'i rten khyad par can thob pa la dbang po yongs su smin pa zhes brjod par 'gyur te/ de yod par gyur na dbang po yun ring du gnas par 'gyur bas so zhes byas nas sa//mdog phun sum tshogs pa ni dbang po la brten pa'i gzugs gang yin pa'i dbyibs su rig par bya'o/ /rigs phun sum tshogs pa ni rigs mthon po rnams su skye ba gzung bar gyur pa ste/ rigs chen po zhes bya ba'i don to/ /longs spyod dang / bdag gi phyogs dang 'khor chen po dang ldan pa ni dbang phyug phun sum tshogs pa'o//ji skad smras pa de bzhin byed pa'i phyir tshig btsun pa'o/ /bzo dang rig pa'i gnas thams cad la mkhas pa'i grags pa thob pas dbang che bar grags pa'o/ /bud med dang / skyes pa'i dbang po dang rab tu ldan pa'i phyir mi nyid dang /stobs phun sum tshogs pa dang ldan pa'i phyir spro ba che ba nyid de/ gang gi lus kyi stobs dang brtan pa dang ldan pas rdo rje lta bu'i ting nge 'dzin mngon sum du mdzad nas zag pa thams cad zad pa yongs su mkhyen pa thob par 'gyur ba'o/ /de dag gis ni rten du gtogs pa'i rnam par smin pa'i bye brag 'thob par 'gyur ro zhes bstan pa'i phyir smras pa/rnam par smin pa'i 'bras bu phun sum tshogs pa'i lus de la brten nas zhes bya ba la/ rnam par smin pa'i 'bras bus bsdus pa'i rten phun sum tshogs pa zhes bya ba'i don to/ /brtul ba ni spong ba dang rjes su mthun pa'i lus dang sems kyi gnas skabs su rig par bya ste/gang gis 'das pa dang / ma 'ongs pa dang / da ltar byung ba'i dus nye bar bzung nas go rims bzhin du spong ba la dga' ba dang / spong ba la dga' ba nyid dang / spong ba la dga' bar gyur pa ni rnal 'byor dang ldan pas gnas pa zhes brjod do//dge ba'i chos bsgom pa la sbyor ba ni rjes su sbyor ba zhes bya ste/ dus gsum po nyid kyi dbang du byas nas rnal 'byor la dga' ba dang / rnal 'byor la dga' ba nyid dang / rnal 'byor la dga' bar gyur pa nyid ni rnal 'byor gyi rjes su mthun pa zhes bya ba'o//yid yongs su skyo bar mi 'gyur ba zhes bya ba ni spong ba dang / sgom pa la dga' ba dang ldan pas bzo dang rig pa'i gnas thams cad la goms par byed pa na lus ngal ba med pa dang / sems la gnod pa med pa dang / dran pa brjed pa med pa yin no zhes byas nas so//nyon mongs pa chung ba ni nyon mongs pa chung ngu'i gnas skabs so/ /de'i bag chags kyang gnas skabs nyid kyis bsdus pa las ni nyon mongs pa mang por 'gyur ba las gsum gyi chung ngu'i chung ngus bsdus pa nyid kun du spyod pa'o/ /thams cad kyi thams cad du nyes par spyod pa la 'jug pa'i nyon mongs pa la kun du mi spyod do zhes bstan pa'i phyir smras pa/de rang bzhin gyis sdig pa mi dge ba'i chos rnams la sems mi 'jug cing zhes bya ba la phyi ma la mi 'dod pa'i 'bras bu ster ba'i phyir dang / tshe 'di la gzhan la gnod pa byed pa la zhugs pa'i phyir dang /dam pa rnams kyis dmad pa'i phyir/ nyes par spyod pa la sdig pa zhes brjod de/ de la bsam pa yang 'jug par mi 'gyur na/ sbyor bar lta ga la 'gyur/ de ltar sbyor ba'i lam la sgrub par byed pa'i dus na yang / nyon mongs pa'i bar chad las grol bar bstan nas/ting nge 'dzin gyi sbyor ba'i dus kyi dbang du byas nas smras pa/ sgrib pa chung ba dang zhes bya ba la sogs pa la/ sgrib pa dang / rtog pa ni ting nge 'dzin gyi mi mthun pa yin pas nyon mongs pa chung ba nyid ni gdams ngag dang rjes su bstan pa'i snod yin no zhes bstan pa'i phyir smras pa/de la bsam pas nan tan byed pa ni dran zhing ngo / /sbyor bas nan tan byed pa ni/ mthun par 'dzin pa zhes bya'o/ /de bzhin gshegs pas bstan pa'i lung gi chos dang / rtogs pa'i chos la bya ba rnam pa gsum byed pa'i shes rab ni ye shes so zhes bstan pa'i phyir/dran pa dang ldan pa dang zhes bya ba la sogs pa la/ byas nas ring du lon pa dang / smras nas ring du lon pa dran par byed pa gang yin pa ni dran pa dang ldan pa yin no/ /de bzhin gshegs pas gsungs pa'i mdo sde la sogs pa'i chos mang po rnams myur du 'dzin par nus pa ni yid gzhungs pa zhes bya'o//so sor rab tu 'byed par nus pa'i shes rab dang ldan pa'i phyir kun shes par bya bar nus pa yin no/ /gsum po nyid kyi bya ba bstan pa'i phyir/ blang bar bya ba dang / gzung bar bya ba dang /rab tu rtogs par bya ba zhes bya ba rnams dang / ji ltar rigs par sbyar ro/ /de dag thams cad kyang rnam par grol ba yongs su smin par byed pa'i shes rab dang yang dag par ldan par 'di dag thams cad 'gyur ro zhes bstan pa'i phyir smras pa/ lhan cig skyes pa'i shes rab ces bya ba la sogs pa la/thams cad nas zhes bya ba ni khams gsum pa'i'o/ /gtan du zhes bya ba ni yang sgrib par mi 'gyur ba'i sbyor bas so/ /yang mi nyung mi mang bar dngos po rnam pa gsum kho na yongs su smin par gang gi phyir bstan zhe na/ de'i phyir smras pa/rnam par smin pa'i sgrib pa'i zhes bya ba la sogs pa la/ 'phags pa'i lam dang / de la rab tu sbyor ba'i dge ba'i rtsa ba rnams kyi mi mthun par 'gyur ba'i sgrib pa rnam pa gsum gyi gnyen po'i phyogs su gyur pa rnam pa gsum nyid la yongs su smin pa zhes bya'o zhes bstan pa'i phyir/de la rnam par smin pa'i sgrib pa ni ngan song gsum dang / byang gi sgra mi snyan dang / 'du shes med pa'i sems can rnams te/ de dag tu skyes pa rnams la dbang po yongs su smin pa rnam pa brgyad po 'di dag shin tu rnyed par dka' ba'i phyir ro/ /nyon mongs pa chung ba'i phyir gzhan dag la brten nas kyang srog gcod pa'i las la sogs pa'i gnas skabs la kun du mi spyod na bla ma'i gnas su gyur pa rnams la lta smos kyang ci dgos zhes bya bas ni las kyi sgrib pa las rnam par grol bar 'gyur ro zhes bya ba'o//de la mtshams med pa lnga ni las kyi sgrib pa'o/ /gzhan srid pa brgyad pa sgrub par byed pa'i las dag kyang yod pa ma yin nam/mtshams med pa lnga kho na bstan pa ni/ rgyu rnam pa lngas bstan par sla ba nyid dang / gdags par sla ba nyid kyi phyir zhes byas nas so/ /de la rgyu lnga ni/ rten nyid dang / 'gro ba nyid dang / 'bras bu nyid dang / rnam pa nyid dang /ngo bo nyid kyis so/ /ye shes kyi khyad par gyi gnas skabs thob par 'gyur bas dus ring por gnas pa'i nyon mongs pa rnams dang bral ba ni shes pa yongs su smin pas ni nyon mongs pa'i sgrib pa las rnam par grol bar 'gyur ro/ /khams brtas pa la sogs pa yongs su smin pa'i rnam pa nyi shu rtsa bdun la rtag tu sbyor ba dang bral bas/yun ring po nas ma goms pa ste/ sbyor ba dang mi ldan pa'i phyir ro/ /dus mi ring bar goms par byas pa dang / rtag tu byed pa'i sbyor ba dang bral bar gyur pas/ rgyu ma brtas pa dang / chung ngu la goms pa'o/ / de ltar yan lag gnyis dang bral ba'i phyir chung ngur yongs su gsal bar byas pa yin no/ /yan lag gcig ma tshang ba ni 'bring zhes bya'o/ /yan lag gnyis dang ldan pa ni chen po zhes gsal bar byas pa yin no/ /yongs su smin pa'i thabs rnam pa nyi shu rtsa bdun ni ji ltar rigs par rnam pa bcur rnam par gzhag par rig par bya ste/rgyu dang rkyen bstan pa dang / dge ba'i rtsa ba la 'jug pa'i dbye ba dang / dus kyi dbye ba nyid dang / nges par 'byung ba'i tshul khrims kyi rgyu dag la yang dag par sgrub pa'i dbye ba nyid dang / rkyen gyi dbye ba nyid dang / rnam pa'i dbye ba nyid dang /ye shes kyi dbye ba nyid dang / bya ba'i rab tu dbye ba nyid dang / rgyud kyi rab tu dbye ba nyid do/ /de lta bu'i yongs su smin pa'i thabs thams cad kyang rgyu dang rkyen gyis bsdus par 'gyur ro/ /de ltar mdor bstan pa rnams nges par bstan pa ni rnam pa bcu'o/ / sa bon gzhan las rab tu khyad par du 'phags pa'i phyir sa bon phun sum tshogs pa zhes brjod par bya'o/ /yang na shin tu khyad par du 'phags pa'i dge ba'i chos kyi sa bon yin pa nyid kyi phyir ro/ /sa bon phun sum tshogs pa la brten nas zhes bya ba ni de yang yod la dge ba yang kun du brten pa la sogs pa'i rnam pas des dge ba'i rtsa ba'i chos kyi sa bon gong nas gong du skye ba'i dbang gis yongs su smin pa rab dang rab mchog tu skye bar 'gyur te/yongs su smin pa'i khyad par ro/ /der skyes pa rnams gnas pa yongs su mi nyams par sbyor ba ni khams yongs su brtas pa'o//yang de ni yongs su smin par byed pa'i dus su rig par bya'o/ /yongs su smin pa de ni rgyus bsdus pa'i thabs su rig par bya ste/ 'das pa'i skye ba'i'o/ /theg pa gsum gyi sgo nas thar pa'i cha dang mthun pa'i dge ba'i rtsa ba bskyed pa ni skye ba 'di dang /da ltar gyi dus su rkyen nye bar sgrub pa'o/ /gang gi phyir tshe 'di nyid la zhes bya ba la/ thar pa'i cha dang mthun pa'i dge ba'i rtsa ba bskyed pa rnams kyis ji ltar rigs par thos pa dang / bsams pa dang / bsgoms pa las byung ba'i shes pa rab tu thob par 'gyur ro zhes bstan pa'i phyir/phyin ci ma log pa'i chos ston la zhes bya ba la sogs pa la/ sems can rnams la dbang po dang / mngon par mos pa dang / khams kyi dbang gis ston pa nyid ni phyin ci ma log pa'i chos ston pa'o/ /de dag gis ni thos pa las byung ba'i shes pa thob pa bstan pa yin no/ / de bzhin du legs par gsungs pa'i chos 'dul ba la shes pa rnam pa gsum 'thob pa'i thabs nye bar bsgrub pa yin no/ /de sngon du song ba las rgyud yongs su smin par 'gyur ro/ /de'i phyir yang yongs su smin pa'i thabs su 'gyur ro/ /khams brtas pa dang / da ltar gyi rkyen nye bar bsgrub pa la bye brag ci yod ce na/de bstan pa'i phyir smras pa/ de la khams brtas pa ni zhes bya ba la sogs pa la/ sngon gyi skye ba gzhan du gtogs pa'i rgyus da ltar gyi skye ba'i khams yongs su brtas pas bsdus pa nyid ni yongs su smin pa sgrub par byed pa'o/ / yongs su smin pa de nyid ni yongs su smin pa yin na yang khams brtas pas zhes brjod do/ /de nyid bden pa yin na yang yongs su smin pa zhes kyang rnam par gzhag go/ /da ltar gyi rkyen nye bar bsgrubs pas da ltar nyid kyi skye ba 'di'i yongs su smin pa'i rgyur gyur pa ni da ltar gyi yongs su smin pa'i rkyen nye bar bsgrub pa zhes bya ba ste/de lta bu ni 'di dag gi khyad par yin no/ /de bzhin gshegs pas bcas pa'i bslab pa'i gnas yang dag par blangs nas theg pa gsum gyi sgo nas nges par 'byung ba'i tshul khrims la yang dag par gnas pa ni 'jug pa zhes brjod do//dad pa thob pa zhes bya ba la sogs pa la/ dad pa thob pa'i dbang du byas nas zhes bya ba ni dad pa thob pa dang yang dag par ldan par gyur cing sngar bstan pa'i shes pa gsum mngon par bsgrubs pas bsdus pa'i nyes par spyod pa las dben pa las brtsams pa'i bslab pa'i gnas skabs yang dag par blangs nas gnas pa'am/khyim gyi gnas spangs nas 'dod pa las dben pa'i sgo nas rab tu byung ba'i bslab pa yang dag par blangs te gnas pa ni 'jug pa zhes bya'o/ /'jig rten pa'i lam la ltos nas theg pa gsum gyis bsdus pa'i lam gyis ngan song gi srid pa las yongs su skyob pa'i phyir sdug bsngal thams cad las nges par 'byung ba nyid khong du chud par byas nas khyim pa dang rab tu byung ba'i phyogs kyi mtha' gnyis spangs pa'i rnam pas dbu ma'i lam de nyid nas dbu ma'i sgrub pa thugs su chud pa nyid kyis gsungs pa'i chos 'dul ba la mngon par mos pa dang /mngon par dga' ba dang / rab tu dang ba ni lam gyi phan yon mthong nas dga' bar 'dzin pa zhes brjod do/ /'khor ba'i phung po la yid 'byung bar bya ba'i chos bde 'gro dang ngan 'gros bsdus pa bdag dang gzhan la ji ltar rigs par rgud pa dang 'byor pa'i gnas kyis yang dag par bsdus pa 'di dag gi nyes dmigs mthong nas skyo ba'i 'du shes yid la byed pas yid byung zhing rtogs nas 'khor ba'i nyes dmigs mthong bas bstan par 'gyur ro//rigs pa'i don dang / de'i sgrub pa ni lam gyi 'bras bu dang /lam nyid du rig par bya'o/ /de dag bzhis ni mya ngan las 'das pa'i phan yon bstan par 'gyur ro/ /de lta bu'i 'khor ba dang mya ngan las 'das pa'i nyes dmigs dang / phan yon mthong nas yongs su smin par 'gyur ro/ /de ltar de ltar gyi dus kyi rkyen nye bar bsgrub pa rnam pa gsum du phye nas bstan to//de nyid ma 'ongs pa'i khams yongs su brtas par byed par 'gyur ro/ /dang po 'jug pa ma yin pa gang yin pa de ni dang po'i 'jug pa ma yin pa ste/ 'das pa'i skye bar khams brtas par gyur pa'i rkyen gyis so/ /de'i phyir smras pa/zhugs zin pa zhes bya ba la sogs pa la/ da ltar yongs su smin pa'i gnas skabs la gnas pa'i sems can sangs rgyas dang byang chub sems dpa' rnams dang phrad na yang nga rgyal la sogs pa'i skyon gyi dbang gis de dag gi drung du nye bar mi 'gro ba de dag btang snyoms su mi 'jog gi /de'i phyir yang dang yang der gshegs nas sngar bstan pa'i gnas de nyid yang dang yang sangs rgyas dang byang chub sems dpa' rnams kyis ston to/ /des na rgyu de dang rkyen des gong nas gong du khyad par du yongs su smin par gyur pa ni dang po 'jug pa ma yin pa zhes bya'o//le lo pa'am rkyen dang mi ldan pa la brten nas zhes bya ba ni gnyid kyi bde ba dang / glos 'bebs pa'i bde ba dang / nyal ba'i bde ba nyams su len cing le lo can gyi dngos po brgyad gsal bar ston pas sam/ rkyen dang mi ldan pa la brten nas te/ bag med pa mang ba dang / dge ba'i bshes gnyen ma yin pas yongs su gzung bas sam/ sdug bsngal nye par bab pa la brten nas so/ /dus thag ring ba bshad pa ni/ dus yun ring po 'gyangs pa tshe rabs brjes pa zhes bya ba la sogs pa'o/ /de las bzlog pa ni zhes bya ba la sogs pa la/ brtson 'grus brtsams pa nyid dang / rkyen dang ldan pa nyid dang / dus yun thung du nyid kyis zhes bya ba la sogs pa'o/ /de ltar yongs su smin pa'i thabs thams cad kyi dus rnam pa gnyis su 'gyur te/ rnam par dag pa thag ring ba dang / rnam par dag pa thag nye ba'o/ /tshul khrims kyi dbang du byas nas sdom pa yang dag par blangs te nan tan byed pa ni sbyor ba zhes bya'o//tshul khrims la dge ba'i rtsa ba thams cad rab tu brten par shes par byas nas rgyu gnyis dang / rkyen rnam pa gnyis kyis bslab pa'i gnas rnams la gus par byed pa nyid ni sbyor ba zhes bya'o/ /tshul khrims la dge ba'i rtsa ba thams cad rab tu brten pa'i dbang du byas nas smras pa/rang gi don thob par bya ba la 'dun pa drag po'am zhes bya ba'o/ /tshul khrims 'chal pa ni dag pa'i chos rnams yongs su nyams pa'i rgyu nyid yin pas tshul khrims kyi mi mthun pa'i phyogs tshul khrims 'chal pa'i ma 'ongs pa'i dus kyi mi 'dod pa'i 'bras bu'i dbang du byas nas smras pa/phyi ma la log par lhung ba'i 'jigs pa la brten te zhes bya ba ni phyi ma la'o/ /mthong ba'i chos la tshigs su bcad pa ma yin pa'i dbang du byas te de ltar re zhig rgyu smras nas/ rnam pa bstan par bya ba'i phyir/ rtag tu byed pa dang / gus par byed pa dang / srung bar byed pa zhes bya ba la rjes su srung ba dang / gus par byed pa dang / gsal bar byed par 'gyur ba'o/ /de nyid bstan pa ni rtag tu byed pa dang / gus par byed pa'o/ /bsam pa ni legs par gsungs pa'i chos 'dul ba 'di la shes rab thob pa dang /dad pa thob pa zhes bstan pa'o/ /yang dag par rtog pa'i bzod pa zhes bya ba ni chos la nges par rtog pa'i bzod pa zhes bya ba'i don to/ /chos rnams la phyin ci ma log par byed pa'i bzod pa chen po'i chos la gnas pa'i ye shes ni yang dag par rtog pa'i bzod pa zhes bya'o//de'i phyir smras pa/ mi g.yo ba gang yin pa'o zhes bya ba ni de 'thob par gyur na bdud dang phas kyi rgol ba thams cad kyis chos 'dul ba 'di las 'phrogs par mi 'gyur pa'o/ /'das pa dang da ltar gyi dus las brtsams nas gzhan dag gi rtog pa la yid ches par byas nas dad pa ston par byed pa dang /dkon mchog gsum la rab tu dang bar byed pa dang / rang gi bya ba la mngon par 'dod pa'i rnam pa'o/ /de ltar 'dod pa rnam pa gsum gyis legs par gsungs pa'i chos 'dul ba 'di la bsam pa phun sum tshogs par 'gyur ro/ /bsam pa phun sum tshogs pa nyid ni bsam pa phun sum tshogs pas yongs su smin pa zhes bya'o//de bzhin du thabs thams cad la yang rig par bya'o/ /gang zang zing gi sbyin pa ni zang zing nye bar sgrub pa zhes bstan pa'i phyir ro/ /yang sbyin pa de ni tha mal pa dang / khyad par can gyi rnam pa gnyis su 'gyur ro//tha mal pa la sbyin pa ni sdug bsngal ba rnams dang / phongs pa rnams la sbyin pa'o/ /khyad par can la sbyin pa ni yon gnas rnams la sbyin pa'o/ /sbyin pa dang po'i dbang du byas nas smras pa/ thams cad kyi thams cad du med pa rnams la zas dang skom la sogs pa nye bar sgrub pa dang zhes bya ba la sogs pa'o//gnyis pa'i dbang du byas nas smras pa/ mthun pa'i zas dang zhes bya ba la sogs pa la/ de ltar phongs pa rnams dang sdug bsngal ba'i sems can rnams la nyung du'am dman pa yang rung sbyin gnas rnams la mang po'am gya nom pa'i sbyin pas yongs su smin pa'i rgyur 'gyur ro//chos nye bar sgrub pa ni chos kyi sbyin pa ste/ thams cad kyi thams cad du mi shes pa rnams lung gi chos la gzhug pa'i dbang du byas nas so/ /de yang rnam pa gnyis te/ gang yi ge sbyin pa bstan pa smras pa/ lung 'bogs pas sam zhes bya bas chos rnams sbyin par byed pa gang yin pa'o zhes bya'o/ /don sbyin pa ni/ don yang dag par 'brel pas zhes bya bas bstan pa yin no/ /rdzu 'phrul gyis 'dun par byed pa'i ngo bo nyid ni rdzu 'phrul gyis 'dun par byed pa'o/ /rdzu 'phrul dang ldan pas zhes bya ba ni mthu dang ldan pa'o//de dag gis ni sngags dang sman la sogs pas 'dun par bya ba bkag pa yin no/ /yang 'dun par byed pa ni ji ltar rigs par bsam pa dag par sgrub pa la 'god pa'o/ /snying brtse bas zhes bya ba ni rnyed pa dang bkur sti'i ched du sems dang bar byed pa ma yin pa'o zhes bya ba'i don to//gang la rdzu 'phrul bstan pas 'dun par bya ba'i rdzu 'phrul bstan pa'i yul de dag gang yin zhe na/ sems can rnams kyi bsam pa dag pa'am zhes bya ba la/ de dag kyang de bzhin du yang dag par sgrub par byed pa'o zhes bya'o/ /gcig tu nges par bstan pa'i phyir/'dun par byas pa'i yid kyis zhes bya ba la sogs pa'o/ /chos nye bar sgrub pa dang / ston pa la khyad par ci yod ce na/ mi shes pa rnams lung gi chos la gzhug pa'i dbang du byas pa ni/ chos nye bar sgrub pa yin la/ zhugs par gyur pa rnams rtogs pa'i chos la gzhug pa'i dbang du byas nas chos dang rjes su mthun pa'i chos la nan tan byed du gzhug pa'i phyir lung 'bogs pas nye bar bstan pas chos ston pa ste/nyan thos kyi lam ni nye bar bstan pa dang 'brel pa yin pa'i phyir ro/ /rgyu gnyis kyis zhes bya ba la sogs pa'i mdo'i rjes su 'brangs nas so//gsang ba'i gnas kyang rnam pa gnyis te/ dngos po nyid dang / dbang du bya ba nyid do/ /kun gzhi rnam par shes pa la sogs pa la ni nyan thos kyi theg pa la sogs pa dang mthun pa ma yin te/ ji skad du tshigs su bcad pas/ de ni byis pa rnams la ngas ma bstan//zhes bya ba gsungs pa'i phyir de don ma yin par 'gyur pa'am/ phan pa ci yang mi 'gyur pas zhes byas nas so/ /dbang du bya ba nyid ni chos la bdag med pa la nyan thos la sogs pa dbang bam yin pa nyid do/ /des na smras pa/ shin tu rgya che zhing zab pa'i don bcabs te zhes bya ba'o//de'i phyir nyan thos kyi theg par shin tu zab cing rgya che ba'i chos rnams ma bstan te/ bden pa ma mthong pa'i nyan thos rnams ni byis pa'i shes rab can yin pa'i phyir ro/ /bden pa mthong ba rnams kyis ni byang chub sems dpa' rnams las thos nas sgrub par byed do//de'i phyir de dag la tha dad du ma bstan to/ /des na de dag la rags pa'i chos ston pa yin te/ ji ltar rags pa'i dngos po nas ston pa'o/ /'jug par sla ba'i chos ston pa ni ji ltar 'byung ba'i dngos po'i chos ston pa'o/ /thabs sla bas 'jug pa'i chos ni rtogs pa'i chos ji lta ba bzhin du ston pa ste/dper na phung po dang / bsam gtan dang / gzugs med pa dang / bden pa rnams dang go rims bzhin no/ /rnam par phye ba ni gsal por byas nas chos ston pas na rnam par phye ste chos brjod pa ste/ kun du rjod par byed pa zhes bya ba'i don to/ /de'i phyir smras pa/shin tu rgya che zhing zab pa'i gnas rnam par 'grel pa zhes bya ba la/ rnam par 'grel pa nyid dang / rab tu 'byed pa nyid kyi phyir ro/ /yongs su smin pa'i rgyu chung ngu gang yin pa de ni chung ngur 'dod do/ /des na smras pa/ de la sbyor ba chung ngu gang zhe na zhes bya ba ni thabs kyi dbang du byas pa'o//legs par gsungs pa'i chos 'dul ba thos pa la sogs pa'i shes pa thob pa nyid kyis gsung rab la lhag par mos pa ni thos pa zhes brjod kyi/ gzhan dag dang rtsod pa gtsor byed pas ni ma yin no zhes bstan pa'i phyir de yang thos pa la sbyor ba ni dang por te sngon du sbyor ba yin par rig par bya ste/gang yang len pa dang / bar du ji ltar thos pa rnams mi brjed pa'i sbyor bas gnas pa ni gang yang smras pa 'dzin pa zhes bya'o/ /mjug gi gnas skabs su tshig gis yang dang yang du goms par byed pa ni kha ton byed pa la mngon par brtson pa zhes bya'o//rab tu dben par zhes bya ba ni rab tu dben par song nas gcig pu dben par gnas pa zhes bya ba'i don to/ /chos nges par sems pa la mngon par dga' bas zhes bya ba ni ji ltar thos pa'i chos rnams kyi don rigs pa rnam pa bzhis nges par rtog par byed pa zhes bya ba'i don to//bsams pa las byung ba'i shes rab chung ngu ni don la mngon par rtogs pa'o/ /'bring po ni kun du dpyod pa'o/ /chen po ni gtan la 'bebs pa'o/ /yang sngon dang phyi ma mi 'gal ba ni don la mngon par rtogs pa'o/ /rigs pa dang mi 'gal ba ni kun du dpyod pa'o//mi mthun pa'i phyogs thams cad kyis zil gyis mnan par mi nus pa ni gtan la 'bebs pa'o/ /yang bstan par sems pa dang / nges par sems pa dang / nag po bstan pa dang chen po bstan pa'i bsam pa dang / ji skad bstan pa'i tshig gsum rim pa bzhin du rig par bya'o//sems rgod pa'am rgod du dogs pa na zhi gnas kyi mtshan ma gzung bar bya'o/ /yang de ni rnam pa gsum du rig par bya ste/ zhi gnas dang / zhi gnas kyi dmigs pa dang / zhi gnas kyi rgyu'o/ /de la zhi gnas nyid ni zhi gnas kyi mtshan ma zhes bya ste/ gzugs la sogs pa'i mtshan ma bzhin no/ /zhi gnas kyi rgyu mtshan la dmigs nas yid la byed pa ni zhi gnas la dmigs pa zhes bya ba mtshan ma gnyis pa'o/ /zhi gnas kyi tshogs nges par sten par byed pa ni gsum pa'o/ /sems zhum pa'am zhum du dogs pa na rab tu dga' ba'i dngos po'i mtshan ma rnams 'dir yang de bzhin du blta bar bya'o//sems mnyam par gnas pa thob par gyur nas rang gi ngang gis 'jug pa ni mi btsal bar btang snyoms su gnas pa ni mtshan nyid gsum pa'o/ /de lta bu'i mtshan ma gzung zhing zhi gnas kyi dus dang / lhag mthong gi dus dang /btang snyoms kyi dus su mtshan ma de dag brten pa la mngon par dga' bas mtshan ma de dag la rnam par g.yeng ba med par sems kyis bsgom pa'o/ /sdud pa ni phyogs yongs su gzung ba dang / phan btags pa'i bya ba khas blangs pa'o/ /zang zing med pa'i sems kyis zhes bya ba ni bsam pa yongs su dag pas tshogs sdud pa zhes bya ba'i don to//rten sbyin par byed pa zhes bya ba ni rab tu 'byung ba dang / bsnyen par rdzogs pa la sogs par blta bar bya'o/ /de'i phyir smras pa/ slob dpon dang mkhan po'i tshul du zhes bya ba'o/ /de ltar re zhig yongs su gzung ba'i dbang du byas nas smras pa/bsnyen bkur rnam pa sna tshogs zhes bya ba la/ zang zing med pa'i sems kyis zhes bya ba'i dbang du byas nas 'jug par 'gyur ro/ /nad pa rnams kyi g.yog bya ba'i bsnyen bkur dang / tshangs pa mtshungs par spyod pa rnams kyi sems mgu bar bya ba'i phyir chos kyi sgo nas zang zing bgo bsha' byed pa'i bsnyen bkur dang /sdug pa dang bral ba'i sdug bsngal mang po can rnams la mya ngan bsal ba'i bsnyen bkur dang / bslab pa'i gnas rnams la shin tu gus pa'am gus pa rnams la 'gyod pa bsal ba'i bsnyen bkur dang / dge sbyong la gnod pa byed pa'i gnod pa rnams la nyon mongs pa bsal ba'i bsnyen bkur ro//chung ngu dang / 'bring dang / chen po ste gnod pa rnam pa gsum byas pa rnams la drag po'i bya ba kun du spyad pa ni tshar bcad pa zhes bya'o/ /de la drag po'i bya ba kun du spyod pa rnams kyis skyon gyi rgyu yongs su spang ba'i dbang du byas nas smras pa/bdag la yod pa'i zhes bya ba la sogs pa la/ bdag la yod pa zhes bya ba ni bdag nyid kyi zhes bya ba'i don to/ /kun nas nyon mongs pa rnams kun du bsrungs nas zhes bya ba ni kun nas nyon mongs pa kun du bsrungs nas gnod sems kyi mthar thug pa so sor rtog pa'i stobs kyis bsal nas phan pa'i sems dang /bde ba'i sems kyis sman pa mkhas pas nad pa la ltar ram/ snying du sdug pa'i bu bya ba ma yin pa byed pa'i pha ltar nyes pa las bzlog pa 'ba' zhig gi phyir brtse ba dang bcas pa'i sems kyis drag po'i sbyor ba ston pa yin te/bya ba yin pa chung ngu byed pas nyes pa can du gyur pa la ni bskul zhing gleng bar byed do/ /de bas nyes par spyod pa cher byas pa rnams la ni dmad pa dang ldan pa'i tshig gis spyo bar byed do/ /skrod par byed pa ni gnas nas 'byin pa'o//gzhan yang rnam grangs rnam par gzhag pa rig par bya ste/ chung ngu la ni gshe bar bya'o/ /'bring la ni chad pa'i las so/ /chen po byas pa la ni bskrad pa'o/ /bya ba drag po gsum po 'di dag ni phan pa dang bde ba'i bsam pas kun nas bslang pa yin pa'i phyir gzhan dag la yang phan pa dang bde bsgrub par byed pa yin no zhes bstan pa'i phyir smras pa/de la gleng ba gang yin pa dang zhes bya ba la sogs pa la/ 'di dag gis ni da ltar gyi dus su sdug bsngal la yongs su gyur pa'i dus su bde bar 'gyur bar bstan par 'gyur ro/ /de dag nyid la phan pa dang bde ba'i don du 'gyur ba yin no zhes bya ba la/de dag la sbyor ba des bstan pa nyes pa byung ba rnams la nyes par mthong nas bshags shing phyin chad mi byed par sdom pa la sogs pa la gnas pas byas pa bshags shing phyis mi byed par sdom pas phan pa dang bde ba yang sgrub par 'gyur ro zhes bya bas phan pa dang bde ba zhes bya ba'o//de las gzhan pa dag la yang phan pa dang bde ba'i don du 'gyur zhes bya ba ni de'i dus na nyes pa ma byas pa dag gis kyang de thos nas shin tu yang 'da' bar mi byed pa sdom pa ni de dag la phan pa dag bde ba sgrub par byed pa yin no/ /bskrad pa yang gnyis te/gtan du ba ma yin pa ni dus cung zhig nas phyir dgug pa'o/ /gtan du ba ni phyis mi 'jug par gtan spangs pa'i phyir te/ nyes par spyad pa gang gis skal ba dang mi ldan par byas pa'i phyir ro/ /de la dang po ni de dag nyid dang gzhan la yang phan pa dang bde bar 'gyur ba yin pa'i phyir te/phyis mi byed pa'i rgyu yin pa'i phyir te/ gnyis pa ni gzhan dag nyid yang dag par bsrung bar 'gyur ba yin no/ /de'i phyir smras pa/ slar mi dgug par bskrad pa gang yin pa de ni zhes bya ba la/ rang yang nyams nas gzhan dag kyang nyams par byed par 'gyur pas zhes byas nas so//don de dag nyid kyi dbang du byas nas bcom ldan 'das kyis/ sred dang 'dra ba'i nyams pa sol cig ces bka' stsal te/ sred zhes bya ba nas kyi rnam pa 'dra ba zhig dus gcig la skye ste/ de ma bsal na nas thams cad nyams par byed do/ /de bsal nas thams cad bzang por skye bar 'gyur ro//de bzhin du 'di yang de dang 'dra bar rig par bya'o/ /yan lag gnyis dang ldan na rang gis yongs su smin par 'gyur te/ nus pa'i stobs dang / sgrub pa'i stobs kyis so/ /de la yan lag dang po'i dbang du byas nas smras pa/mthun pa'i chos kyang ston to zhes bya ba la/ chos ston pa'i nus pa dang ldan pa'i phyir zhes bya ba'i don to/ /gnyis pa bstan pa'i phyir/ ji skad smras pa de bzhin du byed pa yang yin te zhes bya ba smras te/ rang gi tshig dang mthun pa rang nyid rjes su zhugs pa ni chos kyi rjes su mthun pa'i chos la zhugs pa zhes brjod do//de ltar na don dang mthun par 'gyur gyi/ gzhan du na mthun par mi 'gyur ro zhes bya bar smras pa/ de dang mthun par 'jug ste zhes bya ba la/ mi mthun par zhugs par gyur na gzhan dag gi dpyas dang bzhad gad du 'gyur zhing /de'i tshig la gus pa byed par mi 'gyur ro zhes bya ba smras pa/ ci nas gzhan dag 'di skad du zhes bya ba la sogs pa la/ rang nyid kyang gzhan gyis smin par bya ba yin na des gzhan dag smin par byed par ga la 'gyur zhes bstan par 'gyur ro/ /gzhan la bcol ba ni gang tshig gzung bar 'os pa dang /bla ma'i gnas su grags pa'i yan lag gnyis dang yang dag par ldan pa gzhan dag la gsol ba btab pas bcol bar bya'o/ /de'i phyir smras pa/ sems can rnams gang la shas cher dga' zhing gus pa yod par gyur la zhes bya ba la/nus shing lcogs pa thabs dang ldan pa la bcol ba'o/ /de'i phyir smras pa/ de yang chos bstan pa'i thabs shes shing zhes bya ba la/ legs par bslabs pa ni las de la mkhas par byas pas de lta bu'i rang bzhin ston pa'o/ /bcol ba'i don bstan pa'i phyir/ bya ba'i phyir byed du 'jug pa yin no zhes bya ba'o//de ltar bdag dang gzhan gnyi gas yongs su smin par bya ba yin no zhes gsal bar bstan pa'i phyir/ bdag kyang byed cing gzhan la yang bcol nas zhes bya ba la/ ji skad bstan pa'i mtshan nyid can gyi yongs su smin pa'i thabs rnams yongs su smin pa ji lta bu zhig gi rgyur 'gyur zhe na/de nges par bstan pa'i phyir smras pa/ rab tu dbye ba rnam pa drug go zhes bya ba la sogs pa la/ thabs 'di dag gis ji ltar rigs par dbang po yongs su smin pa rnam pa gsum dang dge pa'i rtsa ba dang /shes pa la yang de bzhin no/ /des na yongs su smin pa rnam pa smin pa drug gi rgyu dang thabs zhes brjod do/ /sa drug la rnam par gnas pa'i byang chub sems dpa' rnams ni sgrib pa rnam pa gsum rab tu spangs pas phye ba yin te/ 'bras bu'i sa la gnas pa'i byang chub sems dpa' ni gsum mo//sgrib pa rnam pa gsum ni pags pa la gnas pa lta bu dang / sha la gnas pa lta bu dang / rkang la gnas pa lta bu'o/ /de dag spangs pas rab tu phye ba ni sa gsum la go rims bzhin te/ lhag pa'i bsam pa dag pa'i sa dang nges pa'i sa la 'jug pa'i sa dang / mthar thug pa'i sa'o//de dag la rab tu gnas pa'i byang chub sems dpa' lhag pa'i bsam pa dag pa dang / nges pa'i sa la gnas pa dang / mthar thug par 'gyur ba'o/ /de dag gi spyod pa la nan tan byed pa'i sa yang rnam pa gsum ste/ mos pas spyod pa'i sa ni lhag pa'i bsam pa dag pa'i sa la 'jug pa'i sbyor ba'i lam gyi ngo bo nyid do//spyod pa la nan tan byed pa'i sa dag ni nges pa'i sa la 'jug pa'o/ /nges pa'i spyod pa la nan tan byed pa'i sa la gnas pa ni mthar thug pa'i sa la 'jug pa'o/ /de dag bsdus na drug tu 'gyur ro/ /gang zag gi dbye bas gtan du yongs su smin pa dang / gtan du ma yin pa bstan pa'i phyir smras pa/ rigs la mi gnas pa dang / rigs la gnas pa zhes bya ba la sogs pa la/ rigs la mi gnas pa'i 'jig rten pa'i phun sum tshogs pa 'thob pa'i dbang du byas pa'i yongs su smin pa ni 'jig rten 'di pa tsam gyi phun sum tshogs pa ste/ de ni bde zhing brtan par 'jug pa ma yin pas slar nyams par 'gyur ba yin no//de'i phyir smras pa/ yang dang yang du phyir ldog cing yang dang yang du bya dgos pa yin no zhes bya ba la/ yang dang yang du phyir ldog cing zhes bya ba de nyid kyi bshad pa ni yang dang yang du bya dgos pa zhes bya ba'o/ /rigs la gnas pa rnams kyi ni snga ma las bzlog pa yin pas gtan du ba yin no//mtshan nyid gang dang / mtshan ma gang dang / rtags gang gis sems can rnams kyi yongs su smin pa'i bye brag gcod cing nye bar mtshon par byed pa zhes bya ba ni yongs su smin pa'i mtshan nyid du brjod do/ /yang mdor bsdu rgyu dang / 'bras bu'i bye brag gis rnam pa gnyis so//rgyur gtogs pa'i mtshan nyid kyang rnam pa gnyis te/ bsam pa dang / las kyi bye brag gis so/ /des na smras pa/ 'dun pa chung ba dang / sbyor ba chung ba yin te zhes bya ba la/ 'dun pa dang / brtson 'grus dang / dad pa chung ba'i sbyor ba gang yin pa de ni 'dun ba chung bar 'gyur ro//rtag tu sbyor ba dang / gus par byed pa'i sbyor ba dang bral bas sbyor ba dman pa'o/ /'bras bu yang rnam pa gnyis te/ 'dod pa dang / mi 'dod pa'o/ /mi 'dod pa'i 'bras bu 'thob pa dang / 'dod pa'i 'bras bu mi 'thob pa'i sbyor ba chung ngu bstan pa'i phyir/ ngan song rnams su'ang 'gro la/ tshe 'di nyid la dge sbyong gi 'bras bu yang mi 'thob cing zhes bya ba la/ 'dun pa chung ba dang / sbyor ba chung ba'i phyir gnyen po'i phyogs chung bar 'gyur la/ gnyen po'i phyogs chung ba'i phyir mi mthun pa'i phyogs kyis zil gyis mnan par 'gyur ro/ /mi mthun pa'i phyogs kyis zil gyis mnan pas ngan song du skye bar 'gyur ro zhes bya ba yin no//smin pa 'bring la gnas par gyur pa ni nyan thos ni dus nges par mya ngan las 'das pa 'thob par 'gyur bar bstan pa'i phyir smras pa/ tshe de nyid la dge sbyong gi 'bras bu 'thob par 'gyur te/ tshe de nyid la yongs su mya ngan las 'da' bar ni mi 'gyur ro zhes bya ba'o//yongs su smin pa'i mthar thug pa la gnas pa ni thams cad yod par 'gyur ro zhes bstan pa yin no/ /rang sangs rgyas dang / rang sangs rgyas kyis yang rnam pa gsum du dbye bar bya ste/ de'i rjes su 'brangs nas 'dir yang tshul de bzhin du rig par bya'o//de'i phyir smras pa/ ji lta ba de kho na bzhin du rig par bya'o zhes bya ba la/ gal te nyan thos dang rang sangs rgyas rnams yongs su smin pa'i 'bras bu 'thob pa mnyam par 'gyur na de dag gi rgyu dang 'bras bu la bye brag med pas gang zag gi dbye bas rnam par gzhag pa yang rigs par mi 'gyur ro zhes bstan pa'i phyir smras pa/de ci'i phyir zhe na zhes bya ba la/ nyan thos kyi gtso bo dag dang / rang sangs rgyas dag la rgyu dang 'bras bu la bye brag med de/ lam dang 'bras bu tha mi dad pa'i phyir ro/ /gnyi ga yang nyon mongs pa las rnam par grol ba'i rgyan dang ldan pa'i 'bras bu 'thob pa la bye brag med pa nyid do zhes bstan pa'i phyir smras pa/'di yin te zhes bya ba la sogs pa'o/ /byang chub sems dpa' rnams nyid ni gnas kyi khyad par mang ba'i phyir dang / yongs su smin pa chung ngu dang / 'bring dang / chen po dang / sa'i sgo nas bstan pa'i phyir/ yang byang chub sems dpa' mos pas spyod pa'i zhes bya ba la sogs pa la/bskal pa grangs med pa dang por gtogs pa zhes bya ba la bskal pa grangs med pa de rdzogs par 'gyur ba med pas de'i phyir bskal pa grangs med pa dang por gtogs pa zhes bya bas de'i mthar thug par 'gyur ro/ /dge ba rnam pa gsum dang bral bar 'gyur te/mngon par rtogs pa med pa'i phyir ro/ /de'i phyir de ngan 'gror yang res 'ga' 'gro bar 'gyur ro/ /bsam pa khyad par can thob pa dang / spyod pa'i sa la rab tu zhugs pa'i phyir yongs su smin pa gnyis pa thob pa ni 'dun pa 'bring po dang / sbyor ba 'bring po dang ldan par 'gyur ro//rgyu dang 'bras bu khyad par can dang / bral ba'i 'bras bu rtogs pa dang ldan pas ngan song du skye bar 'gyur ba med do/ /de'i phyir mdo las/ de ni 'jigs pa lnga dang bral ba yin no zhes gsungs pa yin te/ bskal pa grangs med pa dang po las 'das par gyur pa yin pa'i phyir ro//gsum pa ni mthar thug pa thob par gyur cing / bslab pa'i lam yongs su rdzogs par gyur nas dge ba'i rtsa ba rnam pa thams cad dang ldan par 'gyur ro/ /rang bzhin gyis brling ba ni rab tu dang ba'i shugs kyis kun du bskyed pa'i phyir brling ba'o/ /rtag tu byed pa dang / gus par byed pa'i sbyor ba las skyes pa'i phyir gsal ba'o//yang bsam pa'i yon tan dang ldan pa'i phyir brling ba'o/ /sbyor ba'i yon tan dang ldan pa'i phyir gsal ba'o/ /rgyu gnyi ga nyid kyis 'bras bu chen po nyid chen po zhes bya ba'i sgras sbyar bar bya'o/ /rnam par smin pa'i 'bras bu'i dbang du byas nas 'bras bu shin tu che ba'o//rgyu mthun pa'i 'bras bu'i dbang du byas nas phan yon che ba'i phyir zhes bya ba'o/ /yang na skye ba gzhan gyi 'bras bu nyid ni 'bras bu shin tu che'o/ /mthong ba'i chos kyi 'bras bu nyid ni phan yon che ba'i phyir zhes bya'o/ /mi brjed pa'i sbyor ba dang ldan pas phyir mi ldog pa ste/ gnas pa'i cha dang mthun pa nyid kyi phyir ro//don de nyid bstan pa'i phyir/ yongs su mi nyams pa dang zhes bya ba'o/ /gong nas gong du khyad par gyi rgyu yin pa'i phyir khyad par du 'gro ba'o/ /de'i phyir mi g.yo ba zhes brjod de/ yongs su mi nyams pa nyid dang / khyad par du 'gro ba'i rgyu yin pa'i phyir ro/ /'jig rten thams cad las shin tu 'das pa'i phyir shin tu rnam par dag pa zhes bya'o//yongs su smin pa'i thabs 'di dag nyid las yongs su smin pa chung ngu'i rgyu nyid kyi ngo bo nyid dbye bas bstan pa'i phyir smras pa/ zang zil las gyur pa'i yongs su smin pa gang yin pa de ni dman pa'i phyir dang / lus brtan par byed pa tsam gyi phyir dus ring por spyad kyang yongs su smin pa chung ngu'i rgyu nyid do//rdzu 'phrul gyis 'dun par byas pa yang dus re zhig tsam sems dad ba bskyed pas rab tu phye ba'i phyir de dang 'dra'o/ /gsang ste chos brjod pa las gyur pa gang yin pa zhes bya ba ni zab mo ma yin pa'i chos brjod pa las gyur pa zhes bya ba'i don to//tha mal pa'i chos yongs su shes pa de yang de dag dang 'dra pa nyid do/ /thos pa tsam gyis bskyed pa thos pa'i rjes su 'brangs pas rab tu phye ba'i phyir de'i ngo bo nyid do/ /de dag las gzhan dag ni dus kyi dbang gis chung ngu dang / 'bring dang / chen por yongs su smin pa'i rgyu nyid du bstan pa nyid yin gyi/ngo bo nyid kyi dbang gis ni ma yin no/ /de ltar re zhig rtsa ba'i dbye bas yongs su smin pa'i dbye ba rnam pa gsum bstan nas/ da ni rtsa ba'i rab tu bye bas so so'i dbye bstan pa'i phyir/ re re la yang rnam pa gsum gsum gyi tshul du zhes bya ba la sogs pa la/ de dag la yang gong ma dang gong ma ma yin pa'i khyad par gyi dbye bas dbye ba dpag tu med par bstan pa'i phyir/ gong nas gong du rab tu dbye ba'i tshul gyis zhes bya bas ni sems can dpag tu med pa yongs su smin par byed pa'i rgyu dang yon tan dang ldan pa'i sangs rgyas dang byang chub sems dpa' rnams 'byung bar 'gyur ro zhes bstan pa yin no//ji skad bstan pa'i thabs de dag gis gzhan gsol ba 'debs pa ma gtogs pa'i byang chub sems dpa'i rgyud la dbang po yongs su smin pa nas shes pa yongs su smin pa'i bar dang / yongs su smin pa chung ngu nas yongs su smin pa chen po'i bar gyis sangs rgyas kyi chos rnams yongs su smin par 'gyur ro zhes bstan pa'i phyir smras pa/de la zhes bya ba la sogs pa la/ de ltar na sangs rgyas kyi chos rnams yongs su smin par bya ba shugs kyis bstan pa yin par rig par bya'o/ /'dra ba'i rgyu'i sbyor ba las byung ba mnyam par yongs su smin pa rnam pa gnyi ga rig par bya'o//ji ltar byas nas she na/ sbyor ba gang gis sems can rnams yongs su smin par byed cing / sems can rnams theg pa gsum gyis 'thob pa dang rjes su mthun pa'i rgyud snod du rung bar gyur pa ltar sbyor ba de nyid kyis bdag nyid kyi rgyud kyang sangs rgyas kyi chos yongs su 'thob pa dang rjes su mthun pa nyid kyis gnas par byed par 'gyur bas ni gnyi ga yongs su smin pa'i rgyur 'gyur ro//byang chub sems dpa'i sa'i gzhi'i rnal 'byor gyi gnas las yongs su smin pa'i le'u bshad pa ste drug pa rdzogs so// //sgrub pa dang rtsom pa thams cad kyi 'bras bu ni spang ba dang nye bar blang ba yin pas spangs pa dang nye bar blangs pa'i 'bras bu nyid 'dir yang bstan pa'i phyir smras pa/spangs pa rnam pa gnyis dang / ye shes rnam pa gnyis la zhes bya ba la/ rnam pa gnyis smos pa ni byang chub gzhan rnam par bcad pa'i phyir ro/ /byang chub gzhan ni rnam pa gcig spangs pa'i ye shes kyi ngo bo nyid do//yang bla na med pa'i byang chub ni rten yongs su gyur par brjod par bya'o/ /rten yongs su gyur pa yang rnam pa gnyis kyis rab tu phye ba ste/ kun nas nyon mongs pa'i chos rnams dang bral ba'i rnam pa dang / rnam par byang ba'i chos rnams la 'jug pa'i rnam pa'o/ /de'i phyir rnam pa gnyis zhes bya ba la sogs pa gsungs so//yang chos kyi sku gtso bor gyur pas bla na med pa yang dag par rdzogs pa'i byang chub po zhes bstan pa'i phyir smras pa/ chos kyi sku ni de bzhin nyid yang dag pa'i ngo bo tsam ste yang dag pa'i ye shes zhes bya ba'o/ /ji skad du/ sgrib pa thams cad zad pa dang / /dkar po'i chos kun gyis gang nyid//de bzhin nyid kyi ngo bo nyid/ /ye shes de ni gzhan du 'dod/ /ces bstan pa yin no/ /de yang kun brtags pa dang gzhan gyi dbang gi ngo bo nyid yongs su grub pa'i ngo bo nyid du gyur pa ni bla na med pa yang dag par rdzogs pa'i byang chub tu rnam par gzhag pa'i ngo bo nyid du bstan pa yin no//da la gzhan gyi dbang gi ngo bo nyid yongs su grub pa'i rang bzhin du gyur pa ni spangs pa zhes bya'o/ /kun du brtags pa'i ngo bo nyid yongs su grub par gyur pa ni ye shes zhes bya'o/ /nyon mongs pa'i dri ma thams cad dang bral ba'i phyir dri ma med pa'o/ /de yang rnam pa gnyis te/ nyon mongs pa zad par byed pa'i ye shes dang /nyon mongs pa zad pa'i ye shes so/ /de la dang po ni ngo bo nyid kyis rnam par grol bas rnam par grol ba'i phyir dri ma med pa'o/ /yang gnyis pa ni rgyud rnam par grol bas rnam par grol ba'i phyir des na dri ma med pa'o zhes brjod nas dang po las rnam par bcad pa'i phyir smras pa/nyon mongs pa thams cad dang / rjes su 'brel ba med pa zhes bya ba'o/ /thogs pa med pa nyid bstan pa'i phyir sgrib pa med pa'i ye shes zhes bya'o/ /rnam grangs gnyis pa ni spangs pa'i bye brag gis ye shes kyi dbye ba byas nas byang chub bstan pa'i phyir des na smras pa/ nyon mongs pa'i bag chags thams cad yang dag par bcom pa zhes bya ba la sogs pa la/rnam pa bzhis spangs pa'i bye brag bstan par bya ba'i phyir bag chags dang bcas pa spangs pas ni dgra bcom pa dang / rang sangs rgyas rnams las so/ /spangs pa'i khyad par bstan pa nyid nyon mongs pa thams cad spangs pas ni slob pa rnams las so//thams cad du spangs pas ni mi slob pa rnams las so/ /thams cad las spangs pa dang / shin tu thams cad du spangs pas 'jig rten pa rnams las te/ rnam pa thams cad du zhes bya ba ni gnas ngan len gyi 'ching ba dang / mtshan ma'i 'ching ba las so/ /de lta bu ni re zhig spangs pa'i khyad par yin no//spangs pa'i khyad par de ni rnam par dag pa'i ye shes zhes bya'o/ /thams cad mkhyen pa bstan pa'i phyir/ khams thams cad dang / dngos po thams cad dang / rnam pa thams cad dang / dus thams cad du shes pa gang yin pa de ni thams cad mkhyen pa zhes bya'o/ /de ni khams dang /dngos po dang / rnam pa'i dbye ba thams cad dang / dus gsum po kun shes pa zhes bya ba'i don to/ /'jig rten gyi khams rnams kyi yang ming dang khyad par la sogs pa ji lta ba bzhin yang dag par rab tu mkhyen to/ /sems can gyi 'jig rten yang ming dang rigs la sogs pa yang dag pa ji lta ba bzhin du rab tu mkhyen to//khams de dag tu 'dus byas dang / 'dus ma byas kyi ngos po rnams kyang yang dag pa ji lta ba bzhin du rab tu mkhyen to/ /dngos po rnams kyi phyi ma'i rigs kyi rnam pa'i dbye ba yang yang dag pa ji lta ba bzhin du rab tu mkhyen to/ /rang gi mtshan nyid dang / spyi'i mtshan nyid dang / rgyu dang 'bras bu'i mtshan nyid kyi dbye ba rnams kyang ngo / /khams dang / 'gro ba dang / skye gnas la sogs pa'i rnam pa'i dbye ba yang ngo / /'das pa la sogs pa'i dus rnams kyi dbye ba yang mkhyen pas thams cad mkhyen pa zhes bya'o/ /dgongs pa tsam dang rab tu 'brel bar 'jug pa'i ye shes ni chags pa med pa'i ye shes so//dgongs pa tsam dang 'brel ba nyid ni phyi ma phyi ma'i tshig gis ston par byed pas so/ /thogs pa med cing zhes bya ba la sogs pa la/ de ma thag tu shes pas na thogs pa med do/ /des na smras pa/ myur bar zhes bya ste/ bsgribs pa med par 'jug pas na chags pa med pa'o//de lta bu'i ye shes ni dgongs pa tsam gyis grub pa'i ye shes zhes kyang bya/ lhun gyis grub pa'i ye shes zhes kyang bya'o/ /lan cig dgongs pa dang 'brel pas dgongs pa tsam gyis grub ye zhes so/ /yang dang yang du dgongs par bya mi dgos pas lhun gyis grub pa'i ye shes zhes bya'o//de'i phyir smras pa/ ye shes de yang dang yang du zhes bya ba la sogs pa'o/ /rnam grangs gsum pa ni sangs rgyas kyi chos thams cad nyid byang chub ces bstan pa yin no/ /yang na gzugs kyi skud dang ming gi sku ni sangs rgyas nyid kyi byang chub po zhes bstan pa yin no//nyon mongs pa med pa la sogs pa ni sangs rgyas kyi chos ma 'dres pa rnams kyi nang du ma gtogs pas tha dad kyi tshig gis bstan pa yin no/ /rgyu'i gnas skabs na chen bdun dang ldan pas theg pa chen po zhes bya'o/ /yang de'i 'bras bu ni dam pa rnam pa bdun dang ldan pas mchog tu bla na med pa'o zhes bstan pa'i phyir smras pa/de la zhes bya ba la sogs pa'o/ /yang na rnam pa bdun gyis nyan thos la sogs pa'i byang chub rnam par spyad nas byang chub chen po khyad par du bstan pa'i phyir de la byang chub dam pa 'di ni zhes bya ba ni khyad par rnam pa bdun po 'di dag nyid kyi dam pa dang / bla na med pa dang / rdzogs pa'i byang chub dang / byang chub chen po zhes kyang brjod do/ /dam pa bdun zhes bya ba ni de'i rnam grangs so/ /dam pa rnam pa bdun rnam par gzhag pa las byang chub kyi rten gyi dbang du byas pa ni dang po'o/ /de yang gang las 'byung bar 'gyur zhe na/ sgrub pa'i khyad par las yin no zhes bstan pa'i phyir smras pa/sgrub pa dam pa nyid do/ /de ltar 'di gnyis ni rgyu dang 'bras bu'i rnam par gzhag pa'o/ /de lta bu'i rten dam pa la gnas pa ni phun sum tshogs pa dang ldan par 'gyur gyi rgud par ni mi 'gyur ro zhes bstan pa'i phyir/ de'i rjes la phun sum tshogs pa dam pa'o/ /de lta bu'i phun sum tshogs pa las ni ye shes kyi khyad par 'byung bar 'gyur ro zhes bstan pa'i phyir ye shes dam nyid do//ya shes khyad par can dang ldan pa la 'di lta bu'i mthu 'byung bar 'gyur ro zhes bstan pa'i phyir de nas mthu dam pa nyid do/ /mthu dang ldan na kun nas nyon mongs pa spong bar 'gyur bas des na spangs pa dam pa nyid do//spangs pa dang ldan na kun nas nyon mongs pa med par gnas par 'gyur bas des gnas pa dam pa nyid bstan to/ /dam pa 'di dag tsam zhig smos pa ni gshegs pa thams cad kyis bstan pa ni dam pa rnam pa bdun po dag tu 'dus par bstan pa yin te/ gtso bor bstan pas 'dus par bstan pa'i phyir ro//sems can thams cad kyi rten las shin tu 'das pa'i phyir sku dam pa'o/ /yang de ni bsam gyis mi khyab pa'i rten du rig par bya'o/ /yang na shin tu mthar thug pa'i pha rol tu phyin par gyur pa ni dam pa zhes bya ste/ sems can thams cad kyi shes pa'i spyod yul las yang dag par shin tu 'das bar byur pa'i sku yin pa'i phyir ro//de bzhin du gzhan dag la yang sbyar bar bya'o/ /gzhan su yang gnyi ga la phan pa'i phyir zhugs pa yod pa ma yin no zhes bya ba ni sgrub pa dam pa'o/ /tshul khrims bsam gyis mi khyab pa'i phyir tshul khrims phun sum tshogs pa'o//de bzhin du gzhan dag la yang rig par bya'o/ /so so yang dag par rig pa bzhi ni theg pa chen po'i mdo'i rjes su 'brangs nas gong na med pa nyid du rig par bya'o/ /mthu'i le'ur ji skad bstan pa'i rjes su 'brangs nas mngon par shes pa la sogs pa rig par bya'o/ /bsam gyis mi khyab pa'i 'jug pa dang /gnas pa dang / ldang pa dang ldan pa ni gnas pa gong na med par rig par bya'o/ /yang na dmigs pa dang / rnam pa'i dbye bas kyang rung ste/ ji ltar rigs par sbyar ro/ /'du byed kyi sdug bsngal 'jug pa'i gnyen po'i phyogs nyid kyis 'phags pa'i gnas pa'o/ /yul gyi kun nas nyon mongs pa'i sdug bsngal gyi gnyen po'i phyogs su gyur pas na lha'i gnas pa'o//sems can gyi kun nas nyon mongs pa'i sdug bsngal gyi gnyen po'i phyogs su gyur pas na tshangs pa'i gnas pa'o/ /re re la yang rnam pa bzhi bzhir dbye ba byas nas gnas pa rnam pa bcu gnyis su 'gyur ro//de dag las de bzhin gshegs pa'i gnas pa rnam par gzhag pa'i phyir smras pa gnas pa gsum po de dag las kyang zhes bya ba la sogs pa la/ de bzhin gshegs pa stong pa nyid kyi gnas pas gnas pa yin te/ stong pa nyid kyi gnas pas mang du gnas pa yin no zhes bya ba'i tshig gis so//de bzhin gshegs pa ni spros pa dang bral ba nyid yin pa'i phyir dang / mya ngan las 'das pa la gzhol ba nyid kyi phyir 'du shes dang tshor ba 'gog pa la gnas pa dang / yon tan thams cad kyi rten du gyur pa'i phyir dang / gsal zhing las su rung ba'i ting nge 'dzin yin pa'i phyir mi g.yo bas gnas pa dang /sangs rgyas kyi spyan gyis 'jig rten la rnam par gzigs nas thugs rje chen po dang ldan pas snying rje chen po la mang du gnas pa dang / bar du zhes bya ba'i sgras dad pa phun sum tshogs pa dang / gtong ba dang / tshul khrims dang / shes rab phun sum tshogs pas rgyun du zhugs pa la sogs pa nas bzung pa'o//skyes bu chen po nyid kyis ni de'i rnam grangs rig par bya ste/ skyes bu mchog dang / skyes bu gtso bo zhes bya ba la sogs pa'o/ /thugs rje chen po dang ldan pa'i phyir rjes su brtse ba dang zhes bya ba la sogs pa'o/ /tshul khrims chen po nyid dang ldan pa'i phyir bla na med pa'i tshul khrims la sogs par rig par bya'o//ye shes dam pa'i rnam grangs ni shes rab chen po zhes bya ba la sogs pa'o/ /mthu dam pa ni grags pa chen po la sogs par rig par bya'o/ /spangs pa dam pa na rnam par grol ba'i sems la sogs pa'o/ /gnas pa dam pa ni bde bar gnas pa dang /reg par gnas pa zhes bya ba la sogs pas bsdus pa'o/ /de bzhin du de bzhin gshegs pa rnams kyi yon tan thams cad kyi ming bstan par rig par bya'o/ /mdor bsdu na rnam pa gnyis kyis byang chub chen po zhes brjod par rig par bya ste/ ngo bo nyid dang / bye brag nyid do/ /de la ngo po nyid kyi rnam pa ni gsum du bstan to//bye brag gi rnam pa ni bzhir bstan to/ /dam pa nyid dang ste dam pa rnam pa bdun dang ldan pa nyid do/ /yang de'i rnam pa bdun dang ldan pa'i rnam pa ni bstan cing brjod zin pa'i ngo bo nyid do/ /da ni yon tan mngon par brjod cing dran pa'i rnam pa bstan par 'dod nas smras pa/rnam pa bcus de bzhin gshegs pa de dag gi zhes bya ba la sogs pa la/ de lta bu'i tshul du nyan thos la sogs pa rnams byang chub chen po de dag dang yid kyis yang dag par sgrub par byed pa'am/ bsod nams 'phel ba'i sgo nas kyang dran par bya ba'o/ /rnam pa bcus zhes bya ba ni rnam pa bcu'i bye brag gis yon tan bstan pa rnams te/rnam pa bcu po nyid kyis yongs su bsdus par 'gyur ba'o/ /mdor bsdu na sangs rgyas bcom ldan 'das rnams kyi yon tan brjod cing dran pa ni gnas skabs rnam pa gsum gyis bsdus par 'gyur te/ rgyu'i gnas skabs dang / 'bras bu'i gnas skabs dang / sems can la phan 'dogs pa'i bya ba'i gnas skabs so/ /ji skad du/ shin tu dka' ba'i tshogs bsags pas/ /bla med sangs rgyas chos thob nas/ /'gro ba'i don gyi bya ba nyid/ /sangs rgyas rjes su dgongs pa mdzad/ /ces bya bas bstan pa yin no/ / 'dir ni mngon par byang chub pa bstan pa'i dbang du byas nas 'bras bu'i gnas skabs nyid kyi skabs bstan pa/ bcom ldan 'das zhes bya ba ni mtshan bstan pa yin gyi yon tan bstan pa ni ma yin no/ /de bzhin te phyin ca ma log par ro/ /gshegs pa ni gsung ba ste/ phyin ci ma log par gsung ba ni gshegs pa ste/ yi ge de ltar byas nas so/ /de'i phyir smras pa/ phyin ci ma log par gsung bas na de bzhin gshegs pa zhes bya'o zhes bya ba ni phyin ci ma log par gsung ba zhes bya ba'i don to/ /de dag gis gzhan du mi gsung ba nyid dag tu gsal bar bstan par 'gyur te/tshad mar gyur pa nyid kyi phyir ro/ /de skad du yang / khyod kyi gsung ni mngon sum las/ /khyad par gsal bar gyur pa lags/ /zhes bstan pa yin no/ /rnam pa gnyis kyis dgra bcom pa nyid rab tu bstan par bya ba'i phyir dang / de'i rgyu rab tu bstan par bya ba'i phyir smras pa/thob par bya ba'i don thams cad brnyes pa zhes bya ba'o/ /mdor bsdus na thob par bya ba'i don thams cad ni rnam pa gnyis te/ skyon thams cad spangs pa'i mthar thug par gyur pa dang / yon tan thams cad thob par mthar par gyur pa'o/ /de la skyon thams cad spangs pa'i mthar thug par gyur pas ni bsod nams kyi zhing bla na med par 'gyur ba yin te/'dod pa'i 'bras bu myur du mi bslu bar nges par 'byin pa'i phyir/ des ni mchod par 'os pa'i phyir dgra bcom pa zhes bstan par 'gyur ro/ /yon tan thams cad thob pa'i mthar thug pa thob par gyur pas ni sems can thams cad kyis mchod par 'os bar bstan pa'i phyir ro//yang dag par zhes bya ba'i don bstan pa'i phyir/ ji lta ba bzhin du zhes bya ba la/ de nyid kyi don bstan pa ni/ don dam par zhes bya ba'o/ /gang zag la bdag med pa dang / chos la bdag med pa'i dbang du byas nas yod pa dang /med pa'i dngos po khas mi len par dbu ma'i rnam par chos thams cad rtogs pa ni yang dag par kun du khong du chud pas yang dag par rdzogs pa'i sangs rgyas zhes bstan to/ /gang zag la bdag med pa'i phyogs la ji ltar yod par khas mi len par rtogs she na/ kun dga' bo yod par khas len na ni rtag par lta ba 'phel bar byed do zhes bya ba'i tshig gis yod par khas len rtag par lta ba 'phel bar byed do//kun dga' bo med par khas len na ni med par lta ba 'phel bar byed do zhes bya ba'i tshig gis med ces smra bar byed na chad par lta bar 'gyur ro/ /de bzhin du gnyi ga'i mtha' khas mi len par dbu ma'i rnam pas gang zag la bdag med pa rtogs na sngar bstan pa'i gnyis su med pa'i mtshan nyid can/mtha' gnyis dang bral bas yang dag pa'i chos la bdag med pa rtogs par 'gyur bar rig par bya'o/ /sngon gyi mtha' la sogs pa la ma rig pa'i gnyen por gyur pa'i phyir rig pa gsum ni mngon par shes pa gsum zhes brjod do//sngon gyi gnas rjes su dran pa mngon sum du byed pa'i mngon par shes pa dang / zag pa zad pa mngon sum du byed pa'i mngon par shes pa dang / 'chi 'pho dang skye ba shes pa mngon sum du byed pa'i mngon par shes pa ste rig pa gsum dang /mdo las ji skad gsungs pa'i zhabs zhes bya ba la/ mdo las/ srog gcod pa spong zhing srog gcod pa las slar ldog par byed ces bya ba ni re zhig tshul khrims kyi dbang du byas par rig par bya'o/ /bsam gtan bzhi yang de bzhin te/ de ltar na tshul khrims dang / ting nge 'dzin ni rkang pa dang chos mthun par grags pas rkang pa zhes bya ste/ gnas kyi khyad par gzhan du phyin par byed pa'i phyir ro/ /mig med cing rkang pa med pas ni 'gro bar mi nus so zhes bya ba ste/ mig med pa ni long ba zhes bya ba'i don to/ /de'i phyir smras pa/ rig pa dang zhabs su ldan pa zhes bya ba la/ de bzhin du bstan ma thag pa'i bslab pa gsum pa'i mthar thug pa thob par gyur pa yang bstan par 'gyur ro/ /bstan pa'i don gyi rnam grangs bstan pa'i phyir smras pa/ lhag mthong dang / zhi gnas dang / gnyi ga'i phyogs dang shin tu ldan pas na zhes bya ba'o/ /de la rig pa ni lhag mthong gi phyogs so//ting nge 'dzin ni zhi gnas kyi phyogs so/ /tshul khrims la sogs pa ni gnyi ga'i phyogs so/ /rnam grangs gzhan yang lhag mthong dang / zhi gnas dang / gnyi ga'i phyogs dang ldan pas rig pa dang zhabs su ldan pa zhes btags par rig par bya'o/ /de la shes rab ni yang dag pa ji lta ba bzhin mthong ba'i phyir rig pa zhes brjod do//ting nge 'dzin dang / dran pa ni zhi gnas kyi phyogs so/ /rnam grangs yan lag lhag ma rnams ni gnyi ga'i phyogs te/ de ltar byas nas 'phags pa'i lam yan lag brgyad dang ldan pa ni rig pa dang zhabs su ldan pa zhes brjod do//mchog tu khyad zhugs par gshegs pa zhes bya ba ni shin tu khyad par du 'phags par gshegs pa zhes bya ba'i don to/ /de dag gis ni don rnam pa gsum dang ldan par bde bar zhes bya ba'i sgra'i don bstan par byed de/ bgrod par bya ba'i mthar thug par phyin pas na bde bar gshegs pa ste/bum pa legs par gang ba bzhin no/ /ji ltar lhag ma ma lus par gang ba'i bum pa la legs par gang ba zhes rjod par byed do/ /de bzhin du bgrod par bya ba ma lus pa'i mthar thug par phyin par gyur pa ni bde bar gshegs pa zhes brjod do/ /rab tu bsngags pa'i mthar thug pa thob par gyur pas na bde bar gshegs pa ste/gzugs mdzes pa bzhin no/ /ji ltar rab tu bsngags pa'i gzugs ni gzugs mdzes pa yin pa ltar/ rab tu bsngags pa'i mthar phyin par gyur pas na bde bar gshegs pa'o/ /slar mi ldog par gshegs pas na yang bde bar gshegs pa ste/rims nad legs par byang ba bzhin no/ /ji ltar rims nad legs par byang zhing brtas pa ni phyir ldog par mi 'gyur zhing yang mi 'byung ngo / /de bzhin du gang thob cing phyin pa de las mi nyams shing mi ldog pas na/ bde bar gshegs pa zhes bya ste/ shin tu bgrod par bya bar phyin pa'i phyir ro//sems can dang 'jig rten gyi khams la gzigs nas rnam pa thams cad kyis mkhyen pas na 'jig rten mkhyen pa ste/ kun nas nyon mongs pa can gyi sems can gyi khams kyang kun nas nyon mongs pa can du yang dag pa ji lta ba bzhin du rab tu mkhyen to/ /kun nas nyon mongs pa med pa yang kun nas nyon mongs pa med par yang dag pa ji lta ba bzhin du rab tu mkhyen to//'jig rten gyi khams rnams kyang de bzhin du rab tu mkhyen to/ /de'i phyir smras pa/ kun nas nyon mongs pa can dang rnam par byang ba'i rnam pa thams cad mkhyen pas na zhes bya ba'o/ /sems 'dul ba'i thabs dam pa mkhyen pa'i ngo bo ni thabs dam pa mkhyen par rig par bya'o//yang sems nyid gdul bar 'os pa yin pa'am de 'dul bar byed pa'i phyir te/ gang dang gang du 'dod pa der/ /sems ni myur du 'gro 'gyur ba'i/ /sems 'dul ba ni legs pa ste/sems 'dul ba ni bde bar 'gyur/ /zhes tshigs su bcad pas bstan pa yin te/ sems nyid dul bar gyur na de'i bdag nyid du gyur pa ni skyes bu yin pas so/ /des na gzhan nas kyang gsungs pa/ /bdag nyid legs par thul ba yis/ /mkhas pas mtho ris thob par 'gyur/ / zhes bya ba yin no/ /ji ltar gzhan nas kyang / shing mkhan shing 'jog sbyong ba ltar/ /mkhas pas bdag nyid 'dul bar byed/ /ces bya bas de ltar na bdag tu gyur pa dang / skyes bur gyur pa'i sems 'dul bar byed pa'i thabs shes pa ni skyes bu 'dul ba'i kha lo sgyur ba zhes bcom ldan 'das la brjod do//bla na med pa ni gdul bar dka' ba'i sems 'dul bar byed pa dang / kha na ma tho ba med pa'i bde ba'i thabs dang / shin tu yang don gyi mchog mya ngan las 'das pa la 'dul bar byed pa'o/ /yang dag par ston cing rnam par brjod pas na ston pa zhes bya'o/ / ci zhig ston zhe na/ smras pa/ sdug bsngal thams cad las 'byung ba zhes bya ba la/ sdug bsngal thams cad ni khams gsum pa'i ngan 'gro'i sdug bsngal dang / yang srid kyi sdug bsngal lo/ /de las nges par 'byung ba ni rgyu dang 'bras bu'i bye brag gis rnam pa gnyis te/ 'dis nges par 'byung bas sam/'dir nges par 'byung bas zhes byas nas so/ /de dag gis ni lam dang / lam gyi 'bras bu yang dag par bstan cing brjod pa yin te/ lam ston cing 'bras bu rnam par brjod pa yin no/ /yang thob par bya ba ston zhing thob par byed pa'i thabs rnam par brjod pa'o/ /yang na don de nyid yin no//de ltar na yang dag par phyin ci ma log pa ston pas na ston pa zhes bstan par 'gyur ro/ /lha dang mi smos pa ni rtogs pa'i snod yin pa'i phyir ro/ /ston pa nyid mdo'i tshig gis rgyas par rab tu bstan pa'i phyir smras pa/ mig ltar gyur pa dang zhes bya ba la sogs pa la/ mig ltar gyur pa'i phyir dang /ye shes su gyur pa'i phyir dang / don du gyur pa'i phyir dang / chos su gyur pa'i phyir dang zhes pa'i rtsa ba'i tshig bzhi'o/ /de la mig ltar gyur pa bshad pa'i phyir don gsal ba gtan la 'bebs pa'i phyir zhes bya bas so/ /gsal ba dang / rtogs sla ba dang /de kho na nyid ni don gcig pa'o/ /de nyid bstan pa ni gtan la 'bebs pa'i phyir zhes bya ba'o/ /gdul bya rnams la de kho na nyid ston pa'i thabs su gyur pas na mig ltar gyur pa zhes bstan par 'gyur ro/ /ji skad du bstod pa mkhan gyis/ khyod kyis bstan la ma brten par/ /'gas kyang de nyid mi mthong bas//'jig rten long ba lta bu yi/ /mig tu gyur pa khyod la 'dud/ /ces bstan pa yin no/ /ye shes su gyur pa bstan pa'i phyir/ don thams cad rtogs pa'i phyir zhes bya ba la/ 'dus byas dang / 'dus ma byas kyi don thams cad ston pa'i phyir zhes bya ba ni de la ston pa'o//de yang dag par gtan la 'bebs pa ni de sngon du 'gro ba'i phyir ro/ /de ltar re zhig phyin ci log gi shes pa'i gnyen po'i phyogs su gyur pa yang dag pa'i ye shes nye bar sgrub pa'i phyir ye shes su gyur pa bshad pa yin no/ /da ni mi shes pa dang / the tshom za ba'i shes pa'i gnyen po'i phyogs yang dag pa'i ye shes nye bar sgrub pa'i phyir ye shes su gyur pa bstan pa'i phyir/mi rtogs pa'i don rtogs par mdzad pa'i phyir zhes bya ba la sogs pa la/ mi rtogs pa dang / khong du ma chud pa dang / mi shes pa zhes bya ba'i don to/ /ji skad du/ chos la blo gros ma byang ba/ /phan pa'ang phan par ma 'tshal zhing //gnod pa'ang gnod par ma 'tshal la/ /byang ba khyod la brten nas 'gyur/ /zhes bstan pa yin no/ /don du gyur pa bstan pa'i phyir/ zab mo'i gnas rnams la ste/ dge sbyong gi lam dang / bram ze'i lam ma grol ba rnams 'grol ba dang / grol ba rnams rnam par sbyong bar mdzad pas don du gyur pa zhes bya'o//de'i phyir bstod pa/ byis pa phal cher gnod pa dag /dor bar 'tshal la phan ba spong / /phan pa gnyer yang ma 'tshal bas/ /gnod pa so sor ston par bgyid/ /de dag thabs ni ston mdzad phyir/ /khyod la brten nas gnyi ga yang / /yang dag ji bzhin rtogs gyur pas/ / sman par gyur pa khyod la 'dud/ /ces bya ba yin no/ /chos su gyur pa bshad pa'i phyir/ chos thams cad kyi rtsa ba ni bcom ldan 'das so zhes bya ba'i tshig gis te/ dge ba la sogs pa'i chos rnams des dang por bstan pa'i phyir de rtsa bar gyur pa'o/ /nyan thos kyis bshad pa la sogs pa yang des rjes su gnang pa'i phyir dang /tshad mar gyur pa'i phyir dang / des 'dren par byed pa'i phyir ro/ /de ston pa yin pa'i khyad par bstan pa yin te/ don la brten par bya'o yi ge la ni ma yin no zhes bya ba la sogs pas de la brten par bya ba nyid do/ /chos thams cad kyi rnam pa mtha' dag thugs su chud pas sangs rgyas zhes bya'o zhes bstan pa'i phyir/don dang ldan pa'i chos kyis tshogs zhes bya ba la/ mdo las ni yang dag pa dang / phyin ci log la sogs pa'i sgo nas rnam par gzhag par rig par bya ba'am/ dge ba dang mi dge ba dang lung du ma bstan pa'i chos kyi rab tu dbye pa'i sgo nas kyang de lta bu rtogs pa ni sangs rgyas zhes brjod do//bdud rnams bcom pas na bcom ldan 'das zhes bstan pa'i phyir bdud bye ba phrag brgya'i dpung dang bcas pa rnams kyi g.yul ngo chen po bcom pas na bcom ldan 'das zhes bya'o/ /de ltar re zhig brjod par bya ba'i khyad par nyid bstan nas/ da ni skye ba'i khyad par nyid kyis byang chub bstan pa'i phyir sangs rgyas rnams kyi 'byung ba bar chad dang bcas pa dang / bar chad med par 'byung ba bstan pa yin no/ /de la bar chad dang bcas par 'byung ba bstan pa'i phyir bar chad dang bcas pa'i 'byung ba ni bskal pa du mar yang 'jig rten gyi khams gcig tu sangs rgyas gcig kyang 'byung bar mi 'gyur ba'o//res 'ga' ni bskal pa gcig la yang 'jig rten gyi khams gcig tu sangs rgyas mang po yang 'byung bar 'gyur te/ de ltar na bar chad dang bcas pa dang / bar chad med par 'byung par 'gyur ba yin no/ /dus gcig tu 'byung ba dang / dus gcig ma yin par 'byung ba bstan pa'i phyir smras pa/ phyogs bcu'i 'jig rten gyi khams dpag tu med grangs med pa de dang de dag tu zhes bya ba la sogs pa la/ mang por mang po dus gcig tu 'byung ba gang yin pa de ni dus gcig tu 'byung ba zhes bya ba'i 'jig rten gyi khams gcig tu gnyis dus gcig tu 'byung ba ni med kyi rim gyis ni 'byung ngo //mang po dus gcig tu 'byung ba la rigs pa dang 'gal ba med pa bstan pa'i phyir smras pa/ de ci'i phyir zhe na zhes bya ba la sogs pa la/ smon lam mnyam par btab pa dang / tshogs mnyam par nye bar bsgrubs pa rnams 'jig rten gyi khams tha dad pa rnams su dus gcig tu 'byung bar 'gyur ba la rigs pa dang 'gal ba ni ci yang yod pa ma yin no zhes bya ba'o//sngon de dag nyid kyis sangs rgyas kyi zhing so sor gzung zhing smon lam btab pa'i phyir zhing gcig nyid du ni gnyis kyang 'byung ba ma yin na mang po dag ni shin tu 'byung ba ma yin no//tshogs yongs su rdzogs par ya'o/ /tham ni rim gyis 'byung bar 'gyur ba yang mi rigs la/ gtan 'byung bar mi 'gyur ba yang mi rigs pas des na 'jig rten gyi khams tha dad pa rnams su nges par 'byung bar 'gyur bar khong du chud par bya'o/ /gal te dus gcig tu sangs rgyas rnams 'byung bar 'gyur na sangs rgyas kyi zhing gcig tu yang dus gcig tu ci'i phyir mi 'byung zhes gzhan dag smra ba yongs su spang ba'i phyir smras pa/de ci'i phyir zhe na zhes bya ba la sogs pa la/ zhing gcig tu gnyis dus gcig tu 'byung ba ma yin te/ sngon gyi smon lam gyi dbang gi phyir dang /dgos pa med pa'i phyir dang / gdul bya rnams gus pa dang bcas pas bsgrub par mi 'gyur ba'i phyir ro zhes bstan pa'i phyir/ ci nas bdag 'dren pa med pa'i zhes bya ba la sogs pa la/ 'dren pa med pa'i 'jig rten du yongs su 'dren par gyur nas yongs su mya ngan las zlo bar gyur cig ces smon lam btab pa de dag de bzhin du yang dag par 'grub par 'gyur zhing /bsod nams chen po yongs su 'dzin par 'gyur bas de'i phyir gcig tu dus cig car 'byung ba ni ma yin te/ sangs rgyas kyi zhing gcig tu ni gcig nyid kyis mdzad pa thams cad kyang mdzad par spyod pa'i phyir ro//sangs rgyas rnams 'byung ba ni 'jig rten la phan pa'i phyir yin la/ des na gnyis pa 'byung ba la dgos pa med do zhes bya bas dus gcig tu gnyis 'byung ba med do/ /sangs rgyas mang po byung bar gyur na gdul bya rnams rang gi don sgrub pa'i phyir shin tu gus par sgrub par mi 'gyur la/myur du nan tan byed par mi 'gyur te/ gcig mya ngan las 'das par gyur kyang gzhan dag kyang bzhugs so snyam pa'i blos dus gzhan la ltos par yang 'gyur ro/ /de las bzlog pas ni 'jig rten kun la sangs rgyas gcig nyid do zhes shes nas gzhan dag tu ljongs rgyur gshegs sam/mya ngan las 'das na bdag cag mgon med par 'gyur ro zhes bsams nas myur ba myur bar sgrub pa la 'jug par 'gyur zhing / chos mnyan ba dang / tshangs par spyod pas gnas pa mos pa drag po dang / ro gcig tu gyur bas 'bad par byed do/ /de ltar na gcig cig byung nas sems can mang po'i phan pa dang don du 'gyur pa'i phyir ro//sangs rgyas thams cad mnyam pa dang mi mnyam par yang brjod par bya ste/ mnyam pa nyid ni tshogs dang / chos kyi sku dang / 'gro ba'i don kun du spyod pas rig par bya'o/ /rnam pa bzhis mi mnyam pa nyid bstan pa yin te/dus kyi dbye bas sku tshe dus ring por bzhugs pa dang / dus thung ngur bzhugs pas sku tshe'i dbye bar rig par bya'o/ /thams cad kyang mtshan mi 'dra bas mtshan tha dad par 'gyur ba yin no/ /bram ze dang / rgyal rigs la sogs pas rigs tha dad pa dang / sku'i tshad shin tu chung ba'am/ shin tu che bar 'gyur ba'o/ /mi yin na yang skyes pa'i mtshan dang ldan pa nyid sangs rgyas su 'gyur gyi/ bud med ni ma yin no zhes bstan pa'i phyir/ /bud med kyis kyang zhes bya ba la sogs pa la/ bud med kyis sangs rgyas pa med de/ rten dman pa'i phyir dang / bud med la mtshan phun sum tshogs pa yongs su rdzogs pa'i rten gyi lus med pa'i phyir dang /'di ltar bud med kyi lus ni byang chub sems dpas dus ring po nas spangs pa'i phyir ro/ /bsam pa yang dman pa yin te/ nyon mongs pa drags pa dang / brtson 'grus dang / brten pa dang shes rab dman pa'i phyir ro/ /de lta bu'i bsam pa dman pa dang /brtan pa dang brtson 'grus dang shes rab dman pas de lta bu'i phun sum tshogs pa bsgrub par nus pa ma yin no/ /zhes bstan pa'i phyir/ rang bzhin gyis nyon mongs pa mang ba la sogs pas sangs rgyas par mi nus pa'i phyir ro shes bya ba la sogs pa'o/ /ji skad bstan pa'i rnam pa mdor bsdus nas bstan pa'i phyir/de ltar na zhes bya ba la sogs pa ni de ltar na dam pa rnam pa bdun dang ldan pa ni byang chub ba chen po dam pa zhes bya'o/ /yang de'i rnam pa gzhan yang de bzhin du mchog dang / gtso bo dang / dam pa dang / gya nom pa nyid du bstan pa'i phyir smras pa/ gzhan yang zhes bya ba la sogs pa la/ rtog pa'i shes pa thams cad kyi yul las yang dag par 'das pa'i phyir bsam gyis mi khyab pa'o/ /bsam gyis mi khyab pa'i phyir mchog go zhes bya bar sbyar par bya'o/ /bsam gyis mi khyab pa'i yon tan bskyed par bya ba'i phyir dpag tu med pa'o/ / de'i phyir mchog go zhes bya ba nas gya nom pa zhes bya ba'i bar du'o/ /byang chub thams cad kyi rtsa par gyur bas na de nyid ni bla na med pa'o/ /de'i phyir mchog dang / gtso bo dang / gya nom pa'i bar du'o zhes bya pa'i dbang du byas pa yin no/ /byang chub sems dpa'i sa'i rnal 'byor gyi gzhi'i gnas las byang chub chen po'i le'u bshad pa ste bdun pa rdzogs so// //sngar bstan pa'i gang la bslab par bya ba dang / ji ltar dang / gang dag slob par byed ces bya ba la/ gang la bslab par bya ba ni bstan zin to/ /de dag bsgrub par bya ba'i phyir khyad par du byang chub sems dpa'i sde snod tshol bar byed de/byang chub sems dpa'i bslab pa yongs su dag par bya ba'i phyir ro/ /gzhan dag la bstan par bya ba'i phyir nyan thos kyi sde snod kyang tshol te/ rang nyid slob pa'i phyir ni ma yin no/ /phyi rol gyi bstan bcos rig pa'i gnas gsum gyis bsdus pa yang rig par bya'o/ /'jig rten pa rnams la grags pa'i phyir 'jig rten pa'o//de dag gi chos ji snyed yod pa bstan pa'i phyir smras pa/ rig pa'i gnas kyis yongs su bsdus pa de dag thams cad ni zhes bya ba la sogs pa la/ 'di dag gi rnam par gzhag pa ni snga ma bzhin du bstan to/ /gang gi phyir phyi rol pa rnams la yang bsam gtan dang /snyoms par 'jug pa thob pa yod na yang / de ltar na yang de dag gi man ngag ni nang gi bstan bcos su rnam par gzhag par bya ba ma yin te/ lta ba ngan pas kun nas bslang ba'i phyir dang / nyon mongs pa can yin pa'i phyir dang / gnyen po'i phyogs yongs su ma rdzogs pa yin pa'i phyir dang /gtan du ba ma yin pa'i gnyen po'i phyogs yin pa'i phyir ro/ /de'i phyir smras pa/ de la sangs rgyas kyi gsung rab ni nang gi bstan bcos zhes bya ste zhes bya ba la/ nye bar zhi ba'i bstan bcos kyis bsdus pa'i phyir dang / ji skad bstan pa'i gnyen po'i phyogs yin pa'i phyir ro//rig pa'i gnas 'di dag gi bya ba'i rnam pa bstan pa'i phyir smras pa/ de yang rnam pa dus 'jug ces bya ba la sogs pa la/ rnam pa ni 'dir 'jug pa'i bye brag ste/ don gyi khyad par zhes bya ba'i don to/ /sangs rgyas kyi gsung rab ni nyes pa dang bral bas bsdus pa'i phyir ro//nyes pa dang bral ba yang mi bslu ba'i phyir ro/ /phyin ci ma log pa'i don gsal bar byed pa'i dbang du byas nas 'jug pa bstan pa'i phyir smras pa/ rgyu dang 'bras bu zhes smos pa ni sgrub pa'i snying por byed pa nyid rab tu bstan pa'i phyir dang / byang chub sems dpa'i bslab pa'i lam gyi dbang du byas pa'i phyir ro//byas pa chud mi za ba'i rnam pa gsal bar bstan par zhes bya ba ni theg pa gsum gyi dbang du byas pa'i bya ba'i sbyor ba rnams mi nyams pa'i sbyor bas yang dang yang du byed pa med pa'i phyir ro/ /ma byas pa dang phrad par mi 'gyur ba yang theg pa gzhan du byas pa dang /gzhan dag gis byas pa gang yin pa des phan 'dogs par mi 'gyur ba'o/ /pha rol ni gzhan dag klan ka tshol ba ni gzhan dag klan ka tshol du 'ong ba ste/ gzhan gyi phyogs la nyes pa rjod par byed pa zhes bya ba'i don to/ /de nyid ni phan yon te/ 'dis ni gzhan gyi phyogs sun 'byin pa'i don gsal bar bstan pa yin no//gzhan las byung ba de lta bur smra ba zhes bya ba la gzhan dag las byung ba'i 'dod pa ni de lta bu'o/ /de'i 'dod pa ni 'di lta bu'o/ /de dag la skyon 'di dang 'di lta bu yod do zhes bya ba'i don to/ /de lta bas na de lta bu'i smra ba las thar pa ni de lta bu smra ba las thar pa'i phan yon ston pa yin te/de nyid ni phan yon no/ /de bzhin du rang gi phyogs kyi skyon spangs pa'i phyir dang / yon tan bsgrag pa'i phyir dang / rang gi phyogs bstan par gzhag pa'i phyir 'di skad bstan par 'gyur ro/ /skad kyi dbyings kyi ngo bo zhes bya ba la sogs pa la/ dbyings 'di las 'di 'byung bar 'gyur ro zhes rnam par gzhag pa'i don to/ /ma grags pa rab tu ston pa ni sgrub pa yin la/ sbyor ba'i bye brag gis nges par 'byed pa ni rnam par gzhag pa zhes bya ba'am/ yang na don gcig pa nyid do/ /de dag gis sgra'i mtshan nyid yongs su shes pa'i don bstan par 'gyur ro//tshig 'dus byas pa ni tshig legs par sbyar bas te/ de nyid ni phan yon no/ /des sbyor ba la mkhas pa nyid bstan pa yin te/ sgra'i mtshon bya mtshon byed kyi dbang du byas nas so/ /gso ba'i bstan bcos ni mdo'i rjes su 'brangs nas rnam pa bzhir bstan te/nad dang / nad kyi rgyu dang / de bsal ba dang / de'i sman yongs su shes pa'o/ /bzo'i gnas gang dang gang la legs par gnas pa des bya ba gang dang gang nges par 'grub pa de de'i rnam par yongs su gsal bar byed par rig par bya'o/ /rgyu rnams ji snyed yod pa'i dbang du byas nas smras pa/rgyu bcu po 'di dag ces bya ba la sogs pa la/ rgyu thams cad bsdus par rig par bya'o zhes bya ba ni rgyu thams cad mdor bsdu na rnam pa gnyis te/ sems can gyi 'jig rten gyi rgyu dang / snod kyi 'jig rten gyi rgyu'o/ /sems can gyi 'jig rten gyi rgyu yang rnam pa gnyis te/gang gi phyir 'jug pa'i rgyu smras pa/ kun nas nyon mongs pa dang zhes bya ba'o/ /ldog pa'i rgyu ni gang gi phyir rnam par byang ba dang zhes bya ba'o/ /snod kyi 'jig rten gyi dbang du byas nas smras pa/ 'jig rten pa rnams kyi zhes bya ba'o/ /sde pa tha dad kyi gzhung las bstan pa'am/byed pa'i rgyu la sogs pa rnams kyi don yang 'di dag nyid du 'dus zhes bya bar smras pa/ bsdus pa yin zhes bya ba la/ rgyu bcu po rnams bsdus na rnam pa gsum du gzhag par bya ste/ ngo bo nyid dang / gnas skabs kyi khyad par nyid dang / bsdus pa nyid kyis so/ /rjes su tha snyad 'dogs pa'i rgyu ni rjes su tha snyad 'dogs pa'i rgyu nyid de/sngon gyi skye ba rnams su spros pa la goms pa'i bag chags kyis phan tshun rjes su tha snyad 'dogs shing dngos po bsal bar byed pa'i ngag gis 'jug pa'o/ /de'i chos gsum ni rgyu zhes brjod de/ ming dang lhan cig dngos po so sor rig pa'o/ /ji skad du/yid kyi rnam par shes pa dang ldan pas sngon po la 'di ni sngon po'o zhes sngon po nyid du shes so zhes bstan pa yin no/ /gang yang ming dang zhes bya ba la/ ji ltar tshor ba de bzhin du mtshon par byed de/ ji ltar tshor ba de bzhin du kun du shes par bya ba'i tshig gis so/ /gang gi phyir smras pa/ 'du shes dang zhes bya ba'o//gang kun du shes pa de rjes su tha snyad 'dogs so zhes bya bas 'du shes sngon du 'gro ba'i brjod pa gang yin pa'o/ /chos gsum po 'di dag ni phan tshun dngos po rnams gsal bar byed pa'i dbang du byas nas 'jug par 'gyur ba'i phyir rjes su tha snyad 'dogs pa'i rgyu zhes bya ba'am/ rjes su tha snyad 'dogs pa nyid rgyu yin pas rjes su tha snyad 'dogs pa ste/ de'i yul can gyi shes pa'i rgyu yin pa'i phyir ro/ /ltos nas rgyu yin pas ltos pa'i rgyu ste/ bya ba ni byed pa la ltos pa nyid kyi phyir ro/ /gang la ltos shing zhes bya ba ni de'i don bstan pa'i phyir/ rgyu gang las byung ba zhes bya ba la/de yod pa las zhes bya ba'i don to/ /lus kyi las kyi rgyu can sngon du bstan nas/ yang na ni yid kyi las kyang lus kyi las kyi rgyu can du bstan pa'i phyir smras pa/ 'dod pa dang / len par 'gyur ba 'di ni zhes bya ba la/ de'i dpe bstan pa'i phyir 'di lta ste zhes bya ba la sogs pa la/ de ltar re zhig lus kyi las kyi phyogs kyi dpe bstan pas don gyis yid kyi las kyang rig par bya'o//lag pa la ltos shing lag pa'i rgyu las byung ba ni len pa'i las so zhes bya ba la sogs pa la/ de ltar rgyu de dag gnyi ga'i mtshan nyid bstan par rig par bya'o/ /gnas skabs kyi khyad par gyis rgyu'i rnam par gzhag pa bstan par bya ba'i phyir smras pa/de la sa bon ni zhes bya ba la sogs pa la/ zhing dang chu dang sa bon la sogs pa nye bar gyur pa las myu gu la sogs pa nas me tog la sogs pa'i rim gyis 'bras bu'i bar du 'phel ba ni yongs su 'dzin pa'i rgyu yin la/ sa bon ni 'phen pa'i rgyu yin te/sa bon des myu gu la sogs pa'i rgyun gyis rim gyis rang gi ngo bo dang 'dra ba skyed pa'i nus pa gzhag pa'i phyir ro/ /gang gi phyir de'i rgyud yongs su smin pa 'byung ba'i khyad par thob pa las me tog gi rjes la 'bras bu 'byung bar 'gyur ro/ /de lta bur brgyud pa'i sbyor bas 'dzin pa ni 'bras bu de'i rgyu yin pas 'phen pa'i 'bras bu zhes bya'o//zhing dang chu la sogs pa'i rkyen ni 'bras bu'i yongs su 'dzin pa'i rgyu yin te/ thams cad kyis 'bras bu de yongs su 'dzin par byed pas zhes byas nas so/ /sa bon de nyid ni rang gi 'bras bu ste/ myu gu mngon par 'grub pa'i rgyu yin no zhes bya ba'i don te/de'i rjes thogs la de skye bar 'gyur ba'i phyir zhes byas nas so/ /mngon par te gsar du'o/ /'grub pa ni kun gyi dang por 'grub pa zhes bya ba'i don to/ /sa bon gyis mngon par bsgrubs pa'i 'bras bu zhes bya ba ni myu gu'o/ /sa bon gyis 'phangs pa zhes bya ba ni 'bras bu phyi ma rnams kyi'o//rang gi 'bras bu phyi ma 'dren pa'i rgyu yin te/ rim gyis de'i 'bras bu 'dren par byed pa'i phyir ro/ /rgyu dang 'bras bu dag rigs mi mthun pa yin pa ni bden na yang thams cad las thams cad 'byung ba ni ma yin no/ /'o na ji lta bur 'byung ba yin zhe na/ rgyu so sor nges pa las 'byung bar 'gyur ro zhes bya ba ni so sor nges pa'i rgyu zhes bya'o//chos kyi ngo bo tha dad pa rnams kyi nus pa yang tha dad pa yin no zhes byas nas rang dang rjes su mthun pa'i 'bras bu skyed par byed pa nyid do/ /rgyu dang rkyen gyi gzhan dbang du gyur pa 'dus byas kyi chos bya ba dang bral ba rnams tshogs par gyur pas bya ba sgrub pa nyid de dag thams cad ni lhan cig byed pa'i rgyu zhes bya'o//skye ba la bar du gcod pa zhes bya ba ni bar du gcod par byed pas na skye ba la gags byed pa dang 'brel pa zhes bya ba'i don te/ so sor nges par gnas pa dang 'gal bar gnas pa'i rgyu zhes bya'o/ /bar du gcod pa'i rgyu dang bral ba ni mi mthun pa med pa'i rgyu ste/mngon du phyogs pa'i rgyu gang yin pa yang mi mthun pa med pa'i rgyu yin gyi/ med pa 'ba' zhig ni ma yin te/ med pa ni rgyur rnam par gzhag par rigs pa ma yin no/ /de yang de'i dus su nyams pa med pa yin pas nus pa dang ldan par 'gyur ro zhes bya brag rnam par gzhag pas 'thob par 'gyur ro//'di dang 'gal zhing 'di mi gsal bar byed pas na mi mthun pa'o/ /mi mthun pa nyid rgyur gyur pa ni mi mthun pa'i rgyu'o/ /mi mthun pa'i rgyu'i dbang du byas nas mi mthun par 'byung ba rab tu bstan pa'i phyir smras pa/ mdor bsdu na rnam pa drug ste zhes bya ba la/tshig nyid mi mthun pa ni tshig mi mthun pa'o/ /rigs pa dang 'gal ba nyid dang / skye ba dang / mi mthun pa dang / lhan cig gnas pa mi mthun pa dang / mi 'phrod pa'i mi mthun pa dang / mi mthun pa'i phyogs dang gnyen po'i phyogs kyi mi mthun pa'o/ / de la rang gi tshig dang 'gal ba ni tshig mi mthun pa ste/ de nyid kyi tshig snga ma dang phyi ma mi mthun pa'o zhes byas nas te/ dper na bdag gi pha gzhon nu nas tshangs par spyod pa'o zhes bya ba la sogs pa lta bu'o/ /phyi rol pa'i bstan bcos las ni sngon dang phyi ma mi mthun pa mang du 'byung ngo zhes bstan par bya ba'i phyir smras pa/dge sbyong dang bram ze kha cig ces bya ba la sogs pa'o/ /bsgrub par bya ba'i don gtan tshigs kyis rab tu 'jog pa na tshad ma rnam pa gsum gyis bsdus pa nye bar gzhag pa gang yin pa'i rigs pa la ma tshang ba la sogs pa'i skyon dang bcas pa ni rigs pa dang 'gal ba zhes bya'o//yan lag gnyis nye bar gyur pa dang nye bar ma gyur pa las dngos po 'byung bar 'gyur ba las de dag las gang yang rung ba cig ma tshang pa ni skye ba dang mi mthun pa zhes bya'o/ /snang ba dang mun pa dag kyang lhan cig gnas par 'gal ba yin te/ phan tshun byed pa tha dad pa'i phyir ro//mun pa'i byed pa ni sgrib pa yin la/ snang ba'i byed pa ni gsal ba ston pa yin pas so/ /'dod chags dang zhe sdang dag ni dga' ba dang zhum pa'i rnam pa can yin pas so/ /bde ba dang sdug bsngal dag ni len pa dang 'dor bar 'dod pa'i rnam pa can yin pas so/ /gsod pa dang gsad bya ni mi 'phrod pa'i 'gal ba'o//gzhan dag gcig tu dgrar gyur pa dag la yang bstan par bya ba'i phyir smras pa/ gcig la gcig phyir rgol zhing zhes bya ba la sogs pa'o/ /gnyis las gang lhag par bsgoms pas gzhan spong ba'am 'byung ba'i gegs byed pa ni mi mthun pa dang gnyen po'i phyogs kyi mi mthun pa zhes bya ba'o//bye brag gi gnyen po'i phyogs kyi dbang du byas nas mi sdug pa la sogs pa dper byas pa'o/ /spyi'i gnyen po'i phyogs kyi dbang du byas nas ni byang chub kyi yan lag dang / lam yan lag brgyad pa dper byas pa'o/ /don gyi skabs 'dir ni zhes bya ba la rgyu'i dbang du byas nas don de nyid rigs pa yin no//de ltar rgyas par bstan pa'i don rnams bsdus nas mdor bstan pa'i phyir smras pa/ yang rgyu 'di dag thams cad ni zhes bya ba la sogs pa la/ rgyu mang po rnams las gang dang 'dra bar 'bras bu skyed par byed pa ni bskyed pa'i rgyu zhes bya ste/thun mong ma yin pa'i dbye ba yin pa'i phyir dang / de'i 'bras bu de yin par grags pa'i phyir ro/ /gzhan thams cad yongs su 'dzin pa tsam gyis phan 'dogs pa'i rgyu yin te/ de dag med par yang mi 'byung ba'i phyir thabs kyi rgyu yin no//rgyu de dag nyid rkyen rnam pa bzhir gzhag go zhes bstan pa'i phyir smras pa/ bskyed pa'i rgyu gang yin pa de ni zhes bya ba la sogs pa la/ rgyu dang rkyen ni rgyu dang rkyen te/ 'bras bu de rgyu dang mthun par 'byung bar byed pa ni rgyu zhes bya'o/ /de ni 'di dag las 'byung bar 'gyur bas na rkyen zhes bya ste/so so'i sbyor ba dang ldan pas so/ /thabs kyi rgyu yang ji ltar rigs par bdag po'i rkyen yin gyi/ ma lus pa ni ma yin no/ /sems dang sems las byung ba'i chos dmigs pas yongs su bsdus pa rnams rab tu 'byung ba'i dus su ni 'dra bar 'byung bar 'gyur zhing 'jug par 'gyur ba ni mi 'dra ba 'byung ba'i dus su'o//de dag ni dmigs pa dang bcas pa dang / rnam pa dang bcas pa yin pa'i phyir des na dmigs pa'i rkyen zhes bya'o/ /des na de nyid ni de ma thag pa'i rkyen zhes kyang bya ste/ mnyam du skye zhing rdzas mtshungs par 'jug par 'gyur ba'i phyir/ sems dang sems byung bzhi las so zhes pa'i nges pas so/ /de lta bu'i rnam grangs kyis yongs su 'dzin pa'i rgyus bsdus pa ni rkyen gnyis su rig par bya'o/ /sngar bstan pa'i rgyu thams cad kyis bsdus pa dang / kun nas nyon mongs pa dang / rnam par byang ba dang / 'jig rten pa rnams kyi lo tog la sogs pa zhes bya ba'i don bstan pa'i phyir smras pa/'jig rten pa'i dngos po thams cad ni ji ltar 'byung bar 'gyur zhes bya ba nas/ rnam par byang ba'i bar ni ji ltar 'byung bar 'gyur zhes bya ba'i bar du'o/ /phyi'i dngos po rnams ji ltar rigs par rgyu bcu las 'byung bar 'gyur ro zhes bstan pa'i phyir smras pa/'di ltar na 'jig rten na 'bru'i grangs su gtogs pa zhes bya ba la sogs pa'o/ /lo tog rnams kyi ming 'bru zhes bya bar brjod pa'i phyir smras pa/ tshig tu brjod pa rnam pa sna tshogs zhes bya ba la de nyid ni gnas pa 'dzin par byed pas 'bru zhes bya ste/ de dag gi ming gis 'jig rten pa rnams tha snyad du byed pa'i phyir tha snyad kyi rgyu zhes bya'o//de dag gi longs spyod ni rnam pa gnyis te/ 'dod chags dang ma bral ba dang / 'dod chags dang bral ba'o/ /de la 'dod chags dang bral ba'i ni rnam pa bzhis ltos pa yin no/ /'dod chags dang ma bral ba rnams kyi ni kha zas la sred pa yang ngo //de la 'dod pa ni zas la sogs pa la mngon par 'dod pa'o/ /tshol ba ni de thob par bya ba'i thabs thams cad la nan tan byed pa'o/ /len pa ni rnyed pa la'o/ /rnyed pa rnams kha dang sna nas khong du btang zhing spyad pa ni longs spyod par byed pa ste/ de ltar 'bru rnams la bya ba rnam pa lnga yod pas na ltos pa'i rgyu zhes bya'o//de dag rang rang gi rgyu las nges par skyes pas na 'phen pa'i rgyu zhes bya'o/ /lhan cig byed pa'i bya ba dang ldan pas yongs su 'dzin pa'i rgyu zhes bya'o/ /sa bon gyi rjes thogs su myu gu 'byung bar 'gyur ba ni mngon par grub pa'i rgyu'o/ /myu gu la sogs pa'i rgyun gnas skabs gzhan du gyur pa dang ldan pa'i rgyud yongs su gyur pa'i khyad par gyis 'bras bu 'byin par byed pa ni 'dren par byed pa'i rgyu zhes bya'o//tha mi dad pa'i sa bon las so sor nges pa'i 'bras bu 'byung ba ni so sor nges pa'i rgyu zhes bya'o/ /lo tog la ji lta ba bzhin du shing rnams dang / rtswa rnams la yang rig par bya'o/ /rgyu de dag tshogs nas byed pa nyid ni lhan cig byed pa'i rgyu zhes bya'o/ /ser ba bab pa dang / lo tog gi nad kyis de skye ba la bar du gcod pa ni mi mthun pa'i rgyu zhes bya'o/ /de dag dang bral ba ni mi mthun pa med pa'i rgyu zhes bya'o/ /kun nas nyon mongs pa rnam pa gsum ni ji ltar rigs par rgyu bcur 'gyur ro zhes rang nyid kyis sbyar bar bya ba'i phyir smras pa/kun nas nyon mongs pa zhes bya ba la sogs pa la/ sred pa sngon du song ba las kun nas nyon mongs pa thams cad 'jug par 'gyur te/ yul gyi ro myong bas 'phangs pa'o zhes bya bar smras pa/ ma rig pa la sogs pa'i sa bon gyis 'phangs pa'i yang srid pa dang ldan pas ma 'ongs pa'i skye bas bsdus pa'i rga shi'i 'phen pa'i rgyu yin no//ma rig pa la sogs pa rnams ni ji ltar rigs par yongs su 'dzin pa'i rgyu yin no/ /yang sa bon ni de ma thag tu 'bras bu mngon par 'grub par byed pas mngon par 'grub pa'i rgyu zhes bya'o//ma rig pa la sogs pa de dag nyid phyi ma phyi ma'i phan tshun gyi yan lag dang ldan pa ni ma 'ongs pa'i skye ba dang rga shi rnams 'dren par byed pas 'dren pa'i rgyu zhes bya'o/ /ma rig pa la sogs pa 'gro ba lnga'i rgyur so sor nges pa ni so sor nges pa'i rgyu zhes bya'o//de dag kun tshogs pa'i bya ba byed pas lhan cig byed pa'i rgyu zhes bya'o/ /thar pa'i rgyu gang yin pa de nyid kun nas nyon mongs pa'i mi mthun pa'i rgyu yin no zhes bstan pa'i phyir smras pa/ rigs dang ldan pa dang zhes bya ba la sogs pa'o/ /thar pa'i rgyu dang bral ba ni kun nas nyon mongs pa dang mi mthun pa med pa'i rgyu'o zhes bstan pa'i phyir smras pa/ji skad bstan pa'i chos de dag nyid ces bya ba la sogs pa'o/ /rnam par byang ba'i yang rgyu bcu po nyid ji ltar rigs par rnam par gzhag pa'i rgyu dang / skye ba'i rgyu dang / 'thob pa'i rgyur 'gyur ro zhes bstan pa'i phyir smras pa/ de la rnam par byang ba'i zhes bya ba la sogs pa la rnam par byang ba yang gnyis te rnam par byang ba'i rgyu yin pa'i phyir/ lam yang rnam par byang ba zhes bya ste/ gang yang dran pa nye bar gzhag pa la sogs pa rnams rnam par byang bar byed pas na rnam par byang ba zhes bya ste/ gang gi phyir smras pa/ rnam par byang ba'i phyogs kyi chos thams cad dang zhes bya ba la sogs pa'o/ /rnam par byang ba'i 'bras bu yang rnam par byang ba zhes bya ste/ 'dir rnam par byang bar 'gyur bas na zhes byas nas so/ /gang gi phyir smras pa/ 'gog pa mya ngan las 'das pa zhes bya ba la sogs pa la/ de lta bu ni re zhig rnam par gzhag pa'i rgyu yin no//rgyu 'di dag gis rnam par byang ba rnam par 'jog par byed/ rab tu 'dogs par byed/ nges par spyod par byed pas so zhes bstan pa'i phyir smras pa/ tshig tu brjod pa gang yin pa de ni zhes bya ba la sogs pa'o/ /kun nas nyon mongs pa rnam pa gsum log par gyur pa'i mtshan nyid ni tha snyad du rnam par byang bzhes bya ba'i dbang du byas nas smras pa/ma rig pa 'gags pas zhes bya ba la sogs pa'o/ /'du byed kyi nyes dmigs la ltos nas zhes bya ba ni 'du byed ni khams gsum du ji ltar 'os par nye bar len pa'i phung po lnga dang bzhir rig par bya'o//de'i nyes dmigs kyi rnam par yang dag par mthong pas skyon de la ltos nas skyo ba dang bcas pa'i yid kyis 'khor ba la yid byung zhing / sems mya ngan las 'das pa 'dod pas thar pa'i cha dang mthun pa'i dge ba'i rtsa ba bskyed pa nas brtsams nas/ yongs su smin par 'gyur gyi bar du ni/rnam par byang ba tshol ba zhes bya'o/ /yongs su smin pa'i khyad par thob par gyur pas/ byang chub kyi phyogs kyi chos sum cu rtsa bdun bsgom pa ni rnam par byang ba yongs su 'dzin pa zhes bya'o/ /de ltar lam bsgom pa dang ldan pa des 'bras bu bzhi yongs su rdzogs par 'gyur ba ni rnam par byang ba yongs su 'grub pa zhes bya'o//rnam par byang ba rnam pa gsum po 'di dag la 'jug pa yang sngar bstan pa'i nyes dmigs mthong bas ltos pa med par gyur pa na'o/ /rigs dang ldan pa nyan thos la sogs pa'i ris su lhung ba dus gzhan du gyur pa na rgyud yongs su gyur pa'i khyad par dang ldan pas mya ngan las 'das par 'gro ba'i sngon du 'gro ba'i phyir 'phen pa'i rgyu yin no//srid pa tha ma pa skyes bu dam pa la brten pa la sogs pas sngon gyi skye bar dbang po yongs su smin pa ni yongs su smin pa'i rgyu zhes bya ste/ rnam par byang ba 'dod pa rnams kyis blang par bya ba yin pa'i phyir dang /de dag gis rnam par byang ba blangs pa'i phyir ro/ /rgyas pa las byung ba'i rigs kyi gnas skabs la gnas pa la zag pa med pa'i byang chub kyi phyogs kyi chos thams cad kyi sa bon yongs su rgyas pa'i gnas skabs na rgyun mi 'chad par lam bskyed pa ni mngon par 'grub pa'i rgyu zhes bya ste/de ma thag tu lam bskyed pa'i phyir ro/ /byang chub kyi phyogs kyi chos de dag rim gyis bsgom pa las mya ngan las 'das pa thob par nus par gyur pa ni 'dren par byed pa'i rgyu zhes bya'o/ /rigs gsum dang so sor 'brel pa'i rim pa ji lta ba bzhin du byang chub gsum gyi rigs kyang rnam pa gsum gang yin pa de ni so sor nges pa'i rgyu yin te/rgyu dang 'bras bu nges pa dang ldan pa'i phyir ro/ /ltos pa la sogs pa rnams ni sngar bstan pa'i rnam par byang ba la 'dus nas byed pa'i phyir lhan cig byed pa'i rgyu zhes bya'o//kun nas nyon mongs pa rnam pa gsum dang rjes su mthun pa'i rgyu gang yin pa de ni rnam par byang ba'i mi mthun pa'i rgyur ro zhes bstan pa'i phyir smras pa/ rigs dang mi ldan pa dang zhes bya ba la sogs pa'o/ /'jug pa dang ldog pa ni gcig la rjes su mthun pa dang / cig shos gnyis ni 'gal ba yin te/mi mthun pa yin pa'i phyir zhes byas nas so/ /rigs dang ldan du zin kyang sangs rgyas mi 'byung ba dang / de dang phrad na yang mi khom par skyes pa dang / der ma skyes na yang skyes bu dam pa ma yin pa bsten pa la sogs par rig par bya'o/ /de dag dang bral ba ni de las bzlog pa'i rigs dang ldan pa la sogs par rig par bya'o//rgyu 'di dag gis ni khyab pa nyid dang / gcig tu nges pa dang / phyin ci ma log pa rnam par gzhag pa'i phyir smras pa/ 'das pa'i dus na 'byung ba dang zhes bya ba la sogs pa la/ de ltar re zhig rgyu phyin ci ma log pa rnam par gzhag par byas nas phyin ci ma log pa'i 'bras bu rnam par gzhag pa'i phyir smras pa/de la 'bras bu gang zhe na zhes bya ba la sogs pa la/ 'bras bu phyin ci ma log par gzhag pa ni rnam pa gnyis te/ ji snyed yod pa nye bar bzung nas gang smras pa ni/ 'bras bu ni lnga ste zhes bya ba'o//ji ltar yod pa'i nye bar bzung nas kyang smras pa/ mi dge ba'i chos rnams kyi rnam par smin pa zhes bya ba la sogs pa la/ srog gcod pa la sogs pa mi dge ba bcu'i las kyi lam gyis bsdus pa'i las kyis ni dmyal ba dang / dung 'gro dang / yi dwags rnams su skye bar 'gyur ba ni 'di dag gi rnam par smin pa'i 'bras bu yin no//sbyin pa dang / tshul khrims dang / bsgom pa las byung ba'i bsod nams bya ba'i dngos pos bsdus pa'i dge ba'i las rnams kyis ni ji ltar 'os par gling bzhi rnams dang / 'dod pa na spyod pa'i lha'i ris drug rnams dang / srid pa'i rtse mo'i bar du skye bar 'gyur ba 'di ni dge ba'i rnam par smin pa'i 'bras bu yin te/rnam smin lung du ma bstan chos/ /sems can zhes bya lung bstan byung / /zhes bya bas so/ /rgyu mthun par gyur pa'i 'bras bu ni rgyu mthun pa'i 'bras bu ste/ rgyu mthun rgyu dang 'dra ba'o/ /zhes bstan pas so/ / sngon gyi skye bar mi dge ba la goms par byas pas 'di la yang de mi dge ba la dga' bar 'gyur zhing sems mi dge ba la gnas par 'gyur te/ des na mi dge ba la mang bar gnas pa nyid ni lus la sogs pa yang de bzhin du 'jug par 'gyur ba zhes bya ba ste/ mi dge ba la mang du gnas pa nyid do/ / dge ba yang de bzhin no/ /de ltar re zhig rgyu mthun pa'i dbang du byas nas bstan pa yin no/ /sngon gyi las dang mthun par zhes bya ba la/ 'gro ba gzhan du 'bras bu myong ba dang 'dra bar de las gzhan pa'i 'gro bar yang 'bras bu rjes su 'jug par 'gyur ba ni 'bras bu dang 'dra ba'o/ /de yang rgyu mthun pa'i 'bras bu yin te/srog gcod pa'i las mang du byas shing goms la mang du bsten pas gal te 'dir mi rnams dang skal ba mnyam par skyes na yang tshe thung bar 'gyur ro zhes bya ba'o/ /gang yang 'bras bu rnam pa bdun bstan pa der ni rgyu mthun pa'i 'bras bu gang yin pa de ni bdag po'i 'bras bu nyid de/bya ba de dang rjes su mthun pa nye bar bzung nas bcom ldan 'das kyis rgyu mthun pa'i 'bras bu nyid du gsungs so/ /zad pa'i shes pas bral bar 'dod/ /ces bya bas lam ni shes rab gtso bor gyur pa yin pa'i phyir des byas pa'i nyon mongs pa dang bral ba ni bral ba'i 'bras bu zhes bya ste/zag pa dang bcas pa'i chos dang bral bas na bral ba zhes byas nas so/ /sde pa gzhan dag 'jig rten pa'i lam gyis thob pa'i so sor brtags pa'i 'gog pa bral ba'i 'bras bur 'dod pa de ma yin par bstan pa'i phyir smras pa/ so so'i skye bo rnams kyi zhes bya ba la sogs pa la/bral ba'i mtshan nyid dang mi ldan pa'i phyir dang / nyams par 'gyur ba dang / yang 'jug par 'gyur ba'i phyir dang / phyir zhing sbyor bar 'gyur bas so/ /skyes bu'i byed pa ni skyes bu'i bya ba ste/ bzo la sogs pa'i las kyi gnas rnams nyams su len pas sngon gyi las la ltos pa med par gzhan nor la sogs pa 'thob pa nyid ni skyes bu byed pa'i 'bras bu zhes bya'o//de dag gis ni sde pa gzhan dag gi chos rnams kyi byed pa lhag par 'jug pa'i 'bras bur 'dod pa bkag pa yin te/ de dag ni chos rnams kyi byed pa gang yin pa yang skyes bu'i byed par 'dod par byed de/skyes bu'i byed pa dang 'dra bas skyes bu'i byed pa zhes byas nas so/ /de ni bdag po'i 'bras bu'i khongs su gtogs pa'o zhes bya ba yin no/ /nang gi bdag nyid can gyi skye mched drug gi tshogs dbang po drug gis bsdus pa rnams kyi ni go rims bzhin rnam par shes pa'i tshogs drug gi'o//de 'gyur bas na de 'gyur phyir/ /mig sogs de yi rten du 'dod/ /ces bya ba'i mtshan nyid kyis dbang po dang rjes su mthun par de la brten pa'i rnam par shes pa skye bar 'gyur ro/ /srog gi dbang po'i bdag po'i 'bras bu'i dbang du byas nas smras pa/srog dang ma bral ba ni srog gi dbang po'i yin no zhes bya ba la/ ma bral ba ni srog dang bcas pa ste/ ris mthun pa dang skal ba mnyam par gnas pa zhes bya ba'i don to/ /bar chad med par gyur pa tshe ji srid bar de'i dbang gis 'jug par 'gyur ba'o//thams cad kyi zhes bya ba ni dbang po lhag ma rnams kyi yang ste/ gzhi bsdu ba las bstan pa'o/ /tshor ba lnga'i dbang po rnams kyis 'dod chags dang / zhe sdang dang / gti mug rnams yongs su rgyas par byed pa ni bdag po'i 'bras bu zhes bya ba ste/ bde ba'i tshor ba la brten nas 'dod chags 'phel bar 'gyur ro zhes bstan pa'i mdo'i rjes su 'brangs nas so//dad pa la sogs pa lnga ni rnam par byang ba'i tshogs kyi bdag po yin pas rnam par byang ba'i tshogs ni bdag po'i 'bras bu yin te/ de yang de dag gis nyon mongs pa rnam par sel zhing lam rdzogs par byed pa'i phyir ro//mi shes pa kun shes pa'i dbang po la sogs pa gsum ni phyi ma phyi ma thob par byed pa dang / mya ngan las 'das pa thob par byed pas bdag po'i 'bras bu ste/ mthong ba dang bsgom pas spang bar bya ba spangs pa dang / rnam par grol ba'i bde ba rab tu myong ba dang go rims bzhin no//de ltar re zhig rgyu rnam pa bcu po rnams ji ltar rigs par 'dus byas dang 'dus ma byas kyi 'bras bur bstan par 'gyur te/ ji ltar rigs par de rnam par gzhag pa dang / skye ba dang 'thob pa'i rgyu mtshan yin pa'i phyir ro/ /de ltar rgyu dang 'bras bu phyin ci ma log pa yang dag par ston pa'i dbang du byas nas 'jug pas sangs rgyas kyi gsung rab la goms par byas pas bdag gi sangs rgyas kyi chos yongs su smin par 'gyur bar bstan pa'i phyir smras pa/mos pas spyod pa'i sa de bsten pa las byung ba'i sa dang po thob pa na rigs rnam par dag par byed cing zhes bya ba yongs su dag par byed pa zhes bya ba'i don te/sa dang po la phra mo thob nas zhes bya bas so/ /sa phyi ma rnams su 'phel bar 'gyur bas sa dang po la stobs kyi khyad par 'phel ba dang ldan par 'gyur ro/ /bla na med pa yang dag par rdzogs pa'i byang chub tu byang chub sems dpa' brtson 'grus brtsoms pa'i sgrub pa gsal bar bstan pa'i phyir sangs rgyas kyi gsung rab rnam pa gnyis pa bstan pa'i phyir bsod nams dang ye shes kyi tshogs kyis bsdus pas tshogs kyi lam ma sbyangs par de ltar gzhan gyis byas pas de thob par mi byed do// de'i phyir bdag nyid kyis myur ba myur bar bsgrub po zhes bstan pa'i phyir/ ma byas pa dang phrad par mi 'gyur ro/ /byang chub 'thob pa dang mthun pa ma yin pa'i 'gro bar skyes pa dang / mthun pa ma yin pa'i grogs dang bsten pas da ltar gnas pa na sngon skyed pa'i dge ba'i rtsa ba rnams yongs su zad par 'gyur ba'am/chud za bar 'gyur ram snyam du the tshom za ba bsal ba'i phyir/ byas pa dang bdag gis byas pa'i las rnams ni zhes bya ba la/ de bzhin gshegs pa'i bstan pa la yang dag par brten nas theg pa gsum gyi dbang du byas nas bya ba byas pa ni bya ba byas pa nyid de/de las nyams par 'gyur ba med pas yang dang yang du byed pa ma yin no/ /de ltar re zhig nang gi rig pa theg pa gsum la sems can rnams yongs su smin par byas nas bdag nyid kyang sangs rgyas kyi chos rnams la 'chad par 'gyur ba'i dgos pa sgrub par rig par bya'o//mdor bsdu na byang chub sems dpa' rnam pa gsum gyis thos pa tshol te/ gus pa chen po nye bar gzhag pa nyid dang / nye bar 'gro ba phun sum tshogs pa nyid dang / nyan pa phun sum tshogs pa nyid dang / de la rnam pa dang po'i dbang du byas nas smras pa/ gus pa chen po'i nye bar gzhag nas zhes bya ba la sogs pa la/ chen po ni drag po'o/ /gus pa ni yon tan thob par byed pa ste/ chos kyi don chen po dang / phan yon dang / yon tan mngon sum du mthong bas so/ /kun nas nyon mongs pa dang / rnam par byang ba dag gi gnyen po'i phyogs dang rjes su mthun par gyur pa'i phyir legs par gsungs pa zhes bya'o//legs par bsnyad pa yang de nyid de rnam grangs so/ /yang na kun nas nyon mongs pa'i gnyen po'i phyogs su gyur pas na legs par gsungs pas so/ /rnam par byang ba la phan 'dogs pa yin pa'i phyir legs par bsnyad pa'o//'di lta bu'i tshul gyis kyang zhes bya ba ni mdo'i rjes su 'brangs nas rig par bya ste/ de de ltar shin tu brtags pa'i shes pa dang ldan pas de bas shas cher dam pa'i chos tshol ba la mngon par brtson par gnas te/ nyin mtshan du chos nyan pa don du gnyer ba yin/ sangs rgyas kyi chos btsal ba'i don du chos la mos shing ngoms mi shes la rgyun mi 'chad pa yin/chos la dga' zhing spro ba mang ba dang / chos la rab tu 'jug pa yin/ chos la gzhol zhing chos la 'bab pa dang / chos la 'bab pa yin/ chos la rten cing chos la skyabs tshol ba dang / chos la mthu tshol ba yin/chos don du gnyer zhing chos la mngon par brtson pa yin te/ de de ltar chos tshol ba la mngon par brtson pas rin po che'i rnam pa'am/ dbyig gi rnam pa'am/ nor dang / 'bru dang / mdzod dang / bang ba yang rung ste yongs su mi gtong ba de lta bu gang yang med do//chos smra ba'i gang zag de 'ba' zhig la rnyed dka' ba'i 'du shes su gyur pas gnas kyi/ gzhan dag la cung zad kyang dka' ba'i 'du shes mi bskyed do/ /de chos kyi don du phyi rol gyi dngos po nye bar gzung ba mi gtong ba de lta bu gang yang med do/ /nang gi dngos po yongs su gtang bar mi bya ba de lta bu gang cung zad kyang med de/gang 'di dag 'di lta ste/ g.yog 'khor yongs su gtang ba'am/ rgyal srid yongs su gtang ba'am/ longs spyod yongs su gtang ba 'am/ nor dang / 'bru dang / nor bu dang / gser dang / mdzod dang / bang ba yongs su gtang ba dang /rta dang / glang po dang / shing rta yongs su gtang ba'am/ rin po che'i rgyan dang / lhab lhub yongs su gtang ba dang / chung ma dang / bu dang / bu mo yongs su gtang ba'am/ mgo dang / rkang lag dang / yan lag gi dam pa yongs su gtang ba'am/ lus thams cad yongs su gtang bar bya ba yang rung ste de dag thams cad chos kyi don du mi gtong ba gang yang med do//bla ma la bsnyen bkur dang rim gror bya ba gang yang rung ste nyams su mi len pa gang yang med do/ /nga rgyal dang / lhag pa'i nga rgyal yongs su btang bas nga rgyal med pa la spyad pa gang yang rung ste nyams su mi len pa gang yang med do//lus kyi gnod pa gang yang rung ste nyams su mi len pa gang yang med do/ /de ma thos pa'i chos kyi tshig gcig thos pa yang don che bar yang 'dzin gyi/ stong gsum gyi stong chen po'i 'jig rten gyi khams yongs su gang ba'i rin po che'i phung po thob pa ni de lta ma yin no//legs par bshad pa'i tshigs su bcad pa gcig thos pas sems dga' bar 'gyur gyi/ brgya byin dang / tshangs pa dang / 'khor los sgyur ba'i rgyal srid la bskal pa brgya stong mang po'i mthar thug par gnas pas ni ma yin no/ /de la la la zhig gal te 'di skad zer te/khyod kyis me'i dong chen por lus bor te sdug bsngal gyi tshor ba'i phung po chen po rang gi lus kyis nyams su blang bar nus na ngas khyod la chos kyi tshig yang dag par rdzogs pa'i sangs rgyas kyis bstan pa byang chub sems dpa'i spyod pa yongs su sbyor bar byed pa 'di bshad par bya'o zhes zer na yang / de 'di snyam du sems te/ chos kyi tshig yang dag par rdzogs pa'i sangs rgyas kyis gsungs pa byang chub sems dpa'i spyod pa yongs su sbyong ba'i don du ni stong gsum gyi stong chen po'i 'jig rten gyi khams mes yongs su gang bar yang tshangs pa'i 'jig rten nas bdag gis bdag 'dor bar mos na zhes bya ba gsungs pa yin no//de dag thams cad bsdus nas phyi nas gus par nan tan bya ba'i phyir smras pa/ tsha zhing 'bar ba la yang zhes bya ba la sogs pa la/ ji ltar chos don du byed pa de ltar bdag gi lus kyi dngos po gang gis sangs rgyas kyi chos dang / sems can yongs su smin par bya ba mang du 'grub pa'i lus kyi dngos po de lta bu la yang sred cing dang du len par mi byed do/ /bdag la sred pa'i sgo nas ma yin par bstan pa'i phyir/ brgya'i char yang mi phod do/ /stong gi cha dang / grangs dang / cha dang / bgrang ba dang / rgyur yang mi phyod do zhes bya ba la grangs kyi gnas bcu bcu lhag pa'i rnam grangs su rig par bya'o//de ltar re zhig gus par rab tu nye bar gzhag pa nyid kyis nye bar 'gro ba phun sum tshogs pa'i bya ba bstan pa'i phyir smras pa/ skyo bar yang mi 'gyur zhes bya ba la sogs pa la/ chos nyan par byed pa na lus la yang gnod pa med cing /sems nyams par yang mi 'gyur la/ dran pa brjed par yang mi 'gyur ro/ /chu bo rnams kyi rgya mtsho bzhin du thos pas mi ngoms shing chog pa med par 'gyur ro/ /de'i phyir byang chub sems dpa' thos pa'i rgya mtsho zhes brjod pa yin te/ thos pas gang ba yang med/ma thos pas bri ba yang med pa'o/ /legs par gsungs shing legs par rnyed pa don chen po dang ldan par yid ches pa ni dad pa dang ldan pa zhes bya'o/ /de'i sgo nas dga' ba dang rab tu dga' ba thob pa ni dang ba mang ba zhes bya'o/ /legs par gsungs pa la sdang ba med pa ni rgyud mnyen pa zhes bya'o//chos dang chos smra ba la lus kyis gzhan du byed pa med pa ni drang ba zhes bya'o/ /sems la g.yo med pa ni drang por lta ba zhes bya'o/ /'di dag thams cad gus pa rab tu nye bar gzhag pa'i 'bras bu yin par rig par bya'o/ /nye bar 'gro ba phun sum tshogs pa'i rgyu yang yin no//mi mthun pa'i phyogs dang bral ba'i nye bar 'gro ba phun sum tshogs pa'i rnam pa bzhi bstan pa'i phyir thos pa'i shes pa'i yon tan don du gnyer ba nyid gang gi phyir smras pa/ de yon tan 'dod pas zhes bya ba'o/ /de'i mi mthun pa'i phyogs bstan pa'i phyir/klan ka tshol ba'i sems kyis ni ma yin no zhes bya ba ste/ skyon tshol ba'i sems kyis ma yin no zhes bya ba'i don to/ /dge ba'i bshes gnyen la ston pa'i 'du shes kyis 'dud cing nye bar 'gro ba yin pas gang gi phyir smras pa/ gus pa dang bcas pas 'gro'o zhes bya ba'o//mi mthun pa'i phyogs med par bstan pa'i phyir smras pa/ nga rgyal gyis khengs pas ni ma yin no zhes bya ba la/ nga rgyal gyis khengs pa'i sems med pa zhes bya ba'i don to/ /dge ba la sogs pa'i chos rnams yongs su btsal ba'i bsam pa ni de dge ba la ji lta bu zhig btsal zhes bya ba la sogs pa'o//de'i mi mthun pa'i phyogs bstan pa ni/ bdag nyid bsgrags pa'i phyir ni ma yin no zhes bya ba la/ nga lta bu'i skyes bu ga la yod ces mi zer ba zhes bya ba'i don to/ /thos nas chos dang rjes su mthun pa'i chos bsgrub pa'i phyir gang yang smras pa/ bdag dang gzhan dag ces bya ba la sogs pa'o//byang chub sems dpa' rnams kyi chos nyan pa phun sum tshogs pa ni rnam pa bcu drug dang ldan pa yin no/ /rnam pa de dag gi mdor bsdus pa bstan par bya'o/ /mdor na thos pa'i bar du gcod par byed pa'i skyon ni gnyis te/ bsam pa ma dag pa nyid kyis khyi ltar ngan ngon tshol zhing zhen pas chos nyan pa'i dus su rnam par rtog pa ngan pa la mngon du phyogs nas gnas pa'o//de'i gnyen po'i phyogs bstan pa'i phyir smras pa/ kun nas nyon mongs pa med pa dang zhes bya ba'o/ /rjes su mi 'dzin pa'i skyon ni dmigs pa gzhan dag la rnam par 'phro ba ste/de'i gnyen po'i phyogs bstan pa'i phyir smras pa/ rnam par g.yeng ba med par chos nyan to zhes bya ba'o/ /kun nas nyon mongs pa rnam pa gsum rnam par spangs pa las kun nas nyon mongs pa med pa rnam par dbye bar bya'o/ /rnam pa drug gis bdag nyid khengs par byed pa ni khengs pa'i kun nas nyon mongs par rig par bya'o//rigs mthon po dang ldan pas khengs pa'i nga rgyal dang / de'i gnyen po'i phyogs smras pa/ dus su nyam pa dang zhes bya ba ste/ chos smra ba'i rjes su 'jug pa zhes bya ba'i don to/ /dbang phyug dang / bdag po la sogs pas kyang ste/ de'i gnyen po'i phyogs smras pa/ bkur sti byed pa dang zhes bya ba'o/ /gzugs kyis khengs pa dang / de'i gnyen po'i phyogs smras pa/ legs par nyan par 'dud pa dang zhes bya ba'o/ /gzhan mang du thos pa dang ldan pa mi bzod pas bdag nyid mtho bar bya ba'i phyir 'ga' zhig nyan par byed pa srid pa'i phyir de'i gnyen po'i phyogs smras pa/phrag dog med pa dang zhes bya ba'o/ /shes rab kyi che ba ni rnam pa gnyis te/ don so sor rig par nus pa nyid dang / skyon phra mo mthong bar nus pa nyid do/ /shes rab kyi yon tan che ba de dag ldan pas khengs pa dang /de'i gnyen po'i phyogs smras pa/ go rims bzhin du rjes su sgrub pa dang / klan ka mi tshol ba dang zhes bya ba'o/ /rjes su sgrub pa yang rnam pa gzhan gyi don go bar gsal bar bstan par bya'o/ /chos dang chos smra ba la rnam pa bzhis khyad du gsod par 'gyur te/chos la legs par gsungs pa dang / don che bar yid la mi byed pa nyid dang / chos smra ba la dge ba'i bshes gnyen du yid la mi byed pa dang / yang chos la tshig dang don sna tshogs med par yid la byed pa dang / chos smra ba la rigs dang / tshul khrims dang / gzugs dang /ngag la sogs pa dman pa yin par yid la byed pa'o/ /de dag gi gnyen po'i phyogs rnam pa bzhi dang ldan na khyad du gsod pa'i kun nas nyon mongs pa dang bral bar 'gyur ro/ /bdag nyid la nus pa med par sems pa ni zhum pa'i kun nas nyon mongs pa'i/ /de'i gnyen po'i phyogs kyi kun nas nyon mongs pa de dang bral bar 'gyur ro//de ltar rnam pa bcu gcig po de dag gis kun nas nyon mongs par rnam pa gsum dang bral bar 'gyur ro/ /rnam pa bcu gcig gis bsdus pa'i mdo'i tshig gi dbang du byas nas bstan par bya ba'i phyir/ dus su nyan pa dang zhes bya ba la sogs pas bstan pa yin no//rnam par g.yeng ba ni rnam pa bzhi ste/ don la rnam par g.yeng ba dang / yi ge la rnam par g.yeng ba dang / dran pa rnam par g.yeng ba dang / yid la byed pa'i rnam par g.yeng ba'o/ /don la rnam par g.yeng ba ni nang du bsdus par gyur bas 'bad pa med par 'jug pa yang yin te/de'i gnyen por kun shes par bya ba'i sems dang ldan pa zhes bya ba'o/ /yid kyi rnam par shes pa rang yul las 'das pa ste/ de'i gnyen po'i phyogs su gyur pa ni sems rtse gcig pa zhes bya'o/ /yi ge la rnam par g.yeng ba ni phyi rol gyi yul gzhan la mig la sogs pa'i dbang po rgyu ba'o//de'i gnyen po'i phyogs su gyur pa smras pa ni/ rna blags pa dang zhes bya ba'o/ /gnyis po de dag ni gzhan nas nang gi rnam par g.yeng ba dang / phyi'i rnam par g.yeng ba zhes bshad do/ /dran pa rnam par g.yeng ba ni gus par ma bzung bas 'dzin par mi nus pa ste/de'i gnyen po'i phyogs smras pa/ yang dag par sems btud pa dang zhes bya ba ste/ legs par yid la byed pa ni yang dag par sems btud pa zhes bya'o/ /yid la byed pa'i rnam par g.yeng ba ni dgongs pa dang / bsam pa yid la mi byed par yi ge dang don phyin ci log tu bzung bas so//de'i gnyen po'i phyogs smras pa/ sems kyis bsams nas chos nyan te zhes bya ba la sogs pa la/ shin tu yid la byed pa zhes bya'o/ /chos kyi rjes su mthun pa'i chos kyi nan tan gyis sangs rgyas kyi chos tshol gyi/ tshig 'ba' zhig rnam par dag pas ni ma yin no zhes bya bas bsgrub pa yongs su rdzogs par bya ba'i phyir sangs rgyas kyi chos yongs su tshol te/de ni sgrub pa gtsor byed pa yin pa'i phyir ro/ /gzhan dag la yang rgya cher yang dag par bstan par bya ba'i phyir zhes bya ba ni yang dag par mthong bar bya ba la bskul ba'i phyir ro/ /de bzhin du rang gi sangs rgyas kyi chos yongs su smin par bya ba'i phyir dang /theg pa gsum la sems can rnams yongs su smin par bya ba'i phyir ro zhes bstan par 'gyur ro/ /rtsod pa'i bstan bcos ni nyes pa mang po'i skyon chags pa yin te/ kun nas nyon mongs pa'i 'byung gnas yin pa'i phyir nyes par bshad pa nyid de/ de yongs su shes par bya ba'i phyir yongs su tshol te/chos rnams thos na skyon dang yon tan gyi snod du gyur pa shes kyi/ ma thos par ni ma yin no zhes bstan pas so/ /rtsod pa la mkhas par ma byas na rigs par smra ba yin na yang phyin ci log gi rtsod pa la dga' ba rnams kyis chos 'dri bar 'gyur ba dang phas kyi rgol ba rnams tshar bcad pa'i phyir rtsod pa'i sbyor ba la mkhas par bya'o zhes bya ba ni nges pa yin no//de dag gis ni gzhan gyi phyogs sun dbyung bar bya'o zhes bstan par 'gyur ro/ /'di dag gi gtan tshigs kyi sbyor ba la gzhan dag gzu bor bzhag nas de kho na nyid kyi don shes par bya ba'i phyir gang smras pa/bstan pa 'di la ma dad pa rnams dad par bya ba'i phyir dang zhes bya ba'o/ /zhugs pa rnams phyir zhing 'phel bar bya ba'i phyir smras pa/ dad pa rnams kyang phyir zhing 'phel bar bya ba'i phyir zhes bya'o/ /'di dag gis ni rang gi phyogs gnas par bya bar bstan par 'gyur ro//sbyar ba'i skad la mngon par dga' ba rnams bdag gi yon tan la yid ches pa bskyed par bya ba'i phyir tshig dang yi ge nges pa'i tshig bzang po spyod pas legs par sbyar te zhes bya ba ni sgra legs par sbyar ba'i sbyor bas zhes bya ba'i don to/ /'di dag gis ni sbyor ba la mkhas par bya ba'i don bstan par 'gyur ro//nges pa'i tshig rnam pa sna tshogs kyis zhes bya ba ni sgra sna tshogs la ngon du ma nyid du 'gyur bas de la 'jug pa'i yi ge la mkhas par 'gyur ro/ /'di dag gis ni mtshan nyid la mkhas pa bstan par 'gyur ro/ /nad rnam pa sna tshogs rnam par zhi bar bya ba'i phyir zhes bya ba ni nad pa rnams kyi nad zhi bar bya ba'i phyir zhes bya ba'i don to//phan gdags pa'i phyir ro zhes bya ba ni nad med par bya ba'i phyir ro/ /gzhan yang bskyed pa'i nad rnams gso ba gang yin pa de ni rnam par zhi bar byed pa'o/ /ma skyes pa rnams gtan mi skye bar byed pa ni phan gdags pa'i phyir ro zhes bya ba'o//byang chub sems dpa' dbul por gyur na yang tshogs chung dus longs spyod bsgrub pa'i phyir dang / longs spyod kyis sems can rnams la phan gdags pa'i phyir 'di lta bu'i bya bas phun sum tshogs pa thob par bya ba'i dbang du byas nas smras pa/ gces par bya ba bskyed pa'i phyir dang zhes bya ba la/bzo'i las kyi gnas kyi sgo nas grags pa chen por 'gyur ro/ /nye bar mkho bas phongs pa'i sems can rnams la longs spyod sgrub pa'i thabs dang man ngag bslabs shing bstan pas ni phan 'dogs par 'gyur ro/ /rig pa'i gnas lnga po 'di dag bsdus pa'i 'bras bu gcig nyid bstan pa'i phyir smras pa/rig pa'i gnas lnga po 'di dag thams cad tshol ba yang zhes bya ba la sogs pa la/ rig pa'i gnas lnga po 'di dag la sbyor ba goms par ma byas par thams cad mkhyen pa nyid kyi ye shes shes bya thams cad la thogs pa med par mi 'gyur ro zhes byas nas rig pa'i gnas lngas bsdus pa'i chos tshol bar byed cing /de nas de gzhan dag la yang ston par byed do/ /de ltar na gang btsal ba'i sangs rgyas kyi gsung de gzhan dag kyang chos kyi rjes su mthun pa'i chos la nan tan byed du gzhug pa'i phyir ston par byed cing gzhan dag la yang ston du 'jug pa'i phyir ro/ /de bzhin du gzhan dag la yang rig par bya'o//rnam pa nyi shus gtam brjod par bya'o zhes mdo'i rjes su 'brangs nas bstan pa de dag nyid bstan par 'dod pas de dag gi bsdus pa'i don nges par bstan pa ni/ rnam pa gnyis kyis ston te zhes bya ba la sogs pa la/ gzhan gyi don thams cad la rjes su mthun pas na mthun pa'i gtam brjod pas so//kun nas nyon mongs pa can ma yin pas na yongs su dag pas so zhes bya'o/ /dus su dang zhes bya ba la sogs pa la/ don bstan pa'i phyir yang dus gang zhe na/ spyod lam gyi tshul dang mthun par gnas pa la zhes bya ba la/ tshul dang mthun pa'i spyod lam yang so sor thar pa'i mdo'i rjes su 'brangs nas bstan te/stan ches mthon po la 'dug pa la ma yin/ mgo g.yogs pa la ma yin/ mdun du 'gro ba la ma yin zhes bya ba la sogs pa'o/ /bdag nyid las khyad par du 'phags par gyur pa'i gang zag gzhan med pas sangs rgyas bcom ldan 'das kyi chos nyid la bkur sti mdzad de/chos nyid kyis gnas khyad par can thob par gyur pa'i phyir ro/ /byang chub sems dpa' rnams kyang chos la bla mar byas pas khyad par du 'gro zhing 'gro bar 'gyur ro/ /bdag nyid kyis chos la bkur sti byas nas gzhan dag kyang chos la shas cher chos la gus pa bskyed par 'gyur ro//gus pas bsnyen bkur byed bas na khyad du gsod par mi byed do zhes bya'o/ /bkur sti dang zhes bya ba'i don ni thams cad la ston cing zhes bya ba la/ gus pas yin gyi ma gus pas ni ma yin pa ste/ seng ge mchod ba bzhin no/ /thams cad ston to zhes bya ba dang / rgyun mi 'chad par zhes bya ba ni bar du bcad cing mi ston pa ste/chos la ser sna med pas thams cad la ston cing / /slob dpon gyi dpe mkhyud med pas thams cad ston pa'o/ /go rims dang zhes bya ba ni tshig dang yi ge go rims bzhin du ston pa'o/ /gang gi phyir mdor bstan pa'i tshig bkod pa bzhin du 'chad par byed pa ni go rims bzhin du 'chad par byed pa'o//tshig de dag bshad pa'i go rims kyang rnam pa bzhir rig par bya'o/ /ji ltar skye ba nyid ni dper na bsam gtan dang gzugs med pa lta bu'o/ /ji ltar gnyen po'i phyogs nyid yin pa ni dper na phyin ci log rnams kyi gnyen po'i phyogs nyid dran pa nye par gzhag pa rnams lta bu'o//rags pa'i go rims nyid ni brjod pa la sogs pa bde bas ji ltar phung po rnams bzhin no/ /ji ltar so sor rig pa ni bden pa rnams ji lta ba bzhin no/ /mtshams sbyor ba dang zhes bya ba ni rim gyis bstan par bya ba'i tshig rnams mdor bstan pa ji lta ba bzhin du 'chad par byed pa ste/rim pa bzhin du don rnam par 'byed pa'o/ /chos kyang don dang nye bar ldan pa ni rjes su mthun pa dang zhes bstan pa'i phyir ro/ /brjod par bya ba'i don phyin ci ma log pa dang ldan pa'i phyir don dang ldan pa'o/ /gang gis legs par bshad pa zhes brjod par bya ba'i brjod bya phun sum tshogs pa go bar byed pa nyid ni chos dang ldan pa ste/gang gis tshig 'bru bzang po zhes brjod pa'o/ /yang shes rab 'phel bar byed pas na don dang ldan pa'o/ /bsod nams 'phel bar byed pas na chos dang ldan pa'o/ /thar pa'i rten du gyur pa'i dkon mchog gsum dang /thar pa'i dmigs pa bden pa bzhi la mi shes pa dang / the tshom za ba dang / phyin ci log gi shes par dang ldan pas rmongs pa de rnams kyis dkon mchog gsum gyi yon tan thos pa dang / bden pa'i rnam par dbye ba thos pas rab tu dga' ba bskyed par 'gyur ro//de'i phyir smras pa/ dga' bar byed pa dang zhes bya ba'o/ /le lo can dang / 'dun pa med pa dang / rnam par g.yeng ba'i nyes pas dge ba'i chos la bag med par gyur pas dge ba'i chos la nan tan mi byed pa de dag dge ba'i chos de dag la yang dag par sbyor ba dang / rab tu dgod pas mngon par mos pa skyed par byed do//de'i phyir smras pa/ 'dod par byed pa dang zhes bya ba'o/ /sems can zhum pa dang dman pa bdag nyid la nus pa med par sems pa dang / 'gyod pa mang ba dang / bya ba mang ba rnams dang / 'jigs pa dang ldan pa rnams sems can de dag brtson 'grus brtsams pa la yang dag par sbyor bar byed/gzengs stod par byed do/ /des de dag khyad par du 'gro bar 'gyur bas rab tu dga' ba skye bar 'gyur ro/ /des na smras pa/ mgu par byed pa dang zhes bya ba'o/ /spro bar bya bar 'os pa ni yang dag par zhugs pa'o/ /sma dbab par 'os pa ni phyin ci log tu zhugs pa rnams so//de dag la spro ba yang mi bskyed/ sma yang mi 'bebs te/ de lta bus 'dul ba'i gdul bya mngon par mi shes pas des 'dul ba ma yin pa rnams khong khro ba skye bar 'gyur ba'i phyir chos 'ba' zhig bshad par bya'o/ /de'i phyir smras pa/ spro bar mi byed pa dang /sma mi 'bebs pa dang zhes bya ba'o/ /tshad ma dang mi 'gal ba ni rigs pa yin no zhes bstan pa'i phyir/ rigs pa dang zhes bya ba'o/ /bde 'gro dang 'brel ba'i phyir 'tsham pa'o/ /gang gi tshe mngon par mtho ba las brtsams nas chos ston par byed pa'i tshe sbyin pa dang / tshul khrims dang /mtho ris kyi gtam byed pa'o zhes bya ba'o/ /rnam par ma 'khrugs pa'i phyir ma 'dres pa'o/ /rnam par ma 'khrugs pa nyid bstan pa'i phyir 'jug sla zhing zhes bya ba la sogs pa'o/ /tshig dang yi ge bzang po nyid yin pa'i phyir 'jug sla ba'o/ /legs par rab tu phye ba'i don nyid kyi phyir glag glag pa ma yin pa'o//ngan 'gro dang / 'khor ba nas 'don pa'i phyir 'phags pa'i bden pa bzhi ston par ni chos dang ldan pa'o/ /'khor rnams dang rjes su mthun pa'i phyir 'khor ji lta ba zhes bya bar bstan te/ gzhung bsdus pa la dga' ba la sogs pa la mos pa'i dbye bas ji ltar rigs pa bzhin du ston pa'o//rnam pa bco lnga po de dag lta bu ni rjes su mthun pa'i gtam yin par rig par bya'o/ /gnod pa byed pa'i sems can rnams la gnod sems dang / khong khro ba dang / rab tu sdang ba'i sems skye bar 'gyur ba de spang bar bya'o zhes bstan pa'i phyir/ byams pa'i sems nye bar gzhag ste zhes bya ba'o//nyes par spyod pa'i sems can rnams nyes par spyod pa'i gnas nas bslangs nas legs par spyod pa la dgod pa'i bsam pas zhes bstan pa'i phyir smras pa/ phan pa'i sems nye bar gzhag ste zhes bya'o/ /sems can skyid pa ste/bag med pa rnams la bag med pa spong du gzhug pa'i phyir phan pa'i sems nye bar 'jog par byed do/ /sems can sdug bsngal gyis zhum pa rnams la ni sdug bsngal bsal bar 'dod pas chos ston par byed do/ /de'i phyir smras pa/ phan pa'i sems nye bar gzhag ste zhes bya ba'o//phan pa dang bde ba nyid de snying brtse ba'o/ /phrag dog la brten nas bdag nyid la bstod cing gzhan la smod par 'gyur ro/ /de'i gnyen po'i phyogs bstan pa'i phyir smras pa/ phrag dog gis kun nas dkris pa'i dbang du byas te zhes bya ba'o/ /rnyed pa dang bkur sti la mi rten cing re ba med par bstan pa'i phyir dang /ji skad bstan pa'i rnam pa'i mdo'i tshig rnams bstan pa'i phyir smras pa/ de dag kyang zhes bya ba la sogs pa'o/ /bstan pa'i chos kyi rjes su mthun pa'i chos sgrub pa bsgom par bya'o zhes bstan par gyur pa de rnam par dbye bar 'dod nas smras pa/ de la byang chub sems dpa'i chos kyi rjes su mthun pa'i chos sgrub pa gang zhe na zhes bya ba la ji ltar thos pa'i chos kyi rjes su 'brangs nas lus dang ngag dang yid kyis rjes su sgrub pa dang /ji ltar thos pa'i don sems pa dang / sgom par byed pa ni chos kyi rjes su mthun pa'i chos sgrub pa yin no zhes bstan pa'i phyir ji ltar rigs pa dang /don dang don ma yin pa dag bya ba dang bya ba ma yin pa'i dbang du byas nas bstan pa rnams la rjes su gnang ba dang / rab tu dgag pa gtsor mdzad pa nyid kyi phyir de bzhin gshegs pa'i man ngag rnams lus dang ngag dang yid kyi bya ba la bkag pa dang gnang ba dag smras pa/bcom ldan 'das kyis chos gang dag ces bya ba la sogs pa la/ gnang ba dang ma gnang ba dge ba dang mi dge ba'i las kyi lam la bkag pa'i bya ba rnams spang ba dang / rjes su gnang ba rnams so sor brten pa ste/ ma thob pa rnams thob par byed pa'o/ /yang dag par sdud pa ni so sor thob pa rnams mngon sum du byed pa'o//de ni nges par bsten pa'o/ /yang na sngar thob pa yang thob pa ni so sor bsten pa'o/ /sngar so sor ma thob pa thob pa ni yang dag par sdud pa'o/ /thos pa tsam gyis tshim par mi bya ste/ de nyid la nges pa'i stobs bskyed pa'i phyir gdod yongs su sems pa ni chos kyi rjes su mthun pa'i chos sgrub pa zhes bya'o//bsams pa'i don rnams mi mthun pa'i phyogs rnams spang pa'i phyir sgom pas yid la byed pa yang chos kyi rjes su mthun pa'i chos sgrub pa'o/ /de bzhin du bslab pa gsum dang / shes rab rnam pa gnyis kyi dbang du byas nas chos rnam pa lngas chos kyi rjes su mthun pa'i chos sgrub pa yin par rig par bya'o//gcig pu zhes bya ba ni gnyis pa med pa'o/ /gnyis pa med pa'i phyir dben pa'i gnas su song nas zhes bstan pa nyid do/ /dben par song ste zhes bya ba la/ de dag gis lus dben par gnas pa thob na sems pa la bde bar 'jug par 'gyur ro zhes bstan pa yin no//ji ltar thos pa'i don rnams yid la byed pa'i sbyor bas sems pa dang / sngon dang phyi ma mi 'gal bas 'grang bar byed pa ni gzhal bar 'dod pa'o/ /rigs pa dang mi 'gal ba ni nye bar brtag par 'dod pa'o//nyes pa rnam pa brgyad kyi gnyen po rnam pa brgyad dang ldan pa bstan pa'i phyir kun du rmongs pa'i rnam par g.yeng ba'i gnas yin pa'i phyir spang bar bya ste/ de sems par byed pa na nyes pa mang po 'byung bar 'gyur ro/ /de dag kyang bsams pa las byung ba'i sar bstan pa yin no/ / rtag tu gus par byed pa dang zhes bya ba ni gus pa dang bcas par rgyun mi 'chad pas so/ /de'i phyir smras pa/ rtag tu byed pa dang / gus par byed pa'i sbyor bas rgyun du sems par byed de zhes bya'o/ /de'i mi mthun pa'i phyogs ni lhod pa zhes bya ba ste/ sbyor ba lhod pa'i phyir ro/ /de dgag pa'i phyir lhod par mi byed do zhes bya ba'o//dpyod cing zhes bya bas ni 'di dang 'di lta bur rigs pa yin no zhes bya ba'o/ /rjes su 'jug pa zhes bya ba ni nges pa rnyed pa'o/ /la la ni mos pa kho nar bsam zhes bya ba ni de bzhin gshegs pa nyid la tshad mar gyur pa yin no zhes bsams nas dad par byed pa'o/ /don la rton par byed kyi zhes bya ba ni yi ge la zhen pa spangs nas dgongs pa'i don yid la bya'o zhes bya ba'i don to//rton pa ni gnas pas so/ /nag po bstan pa ni mdo sde la mi 'jug 'dul ba la mi snang / chos nyid dang 'gal bar gnas pa'o/ /de las bzlog pa dkar po'i phyogs ni chen po bstan pa'o//ma zhugs pa'i sngon du sems pa la zhugs pa ni thog ma 'jug pa nas kyang zhes bya ba ste/ de dang por sems pa'o/ /zhugs nas kyang bsam pa'i mthar thug pa'i shes pa'i khyad par thob pa'o/ /ji ltar bsams pa rnams yang dang yang du rtog par byed pa ni snying po nyid thob par byed pa'o//bsam pa rnam pa brgyad kyis mi mthun pa'i phyogs spangs pa'i phan yon dang / 'bras bu bstan pa'i phyir/ rmongs par mi 'gyur ba ni shes rab kyi khyad par thob pa'i phyir ro/ /rtse gcig tu nges par sems par byed pas na sems g.yeng bar yang mi 'gyur ro//thos pa'i dus su ma rtogs pa'i don yang khong du chud par 'gyur la/ rtogs pa'i don yang rtogs par 'gyur ba ni thob par 'gyur ba'o zhes bstan pa'i phyir sngon thos pa'i dus su ma shes pa dang / ma thos pa'i dus su khong du ma chud pa rnams rtogs shing thob par 'gyur ba dang go rims bzhin no//rigs pas tshol bar byed pa'i phyir gzhan gyi dring 'jog par mi 'gyur ba'o/ /chos zab mo gang dag la mos par ma gyur na yang skur pa mi gdab cing mos pa mang du skyed par bya'o/ /skur pa ma btab pas bsod nams ma yin pa mang du skye bar mi 'gyur ro/ / bdag nyid nyams pa yang spong bar 'gyur te/ chos spong ba'i las nye bar ma bsags pas bdag nyid ma smas ma nyams par 'gyur ro/ /dgongs pa'i don rtogs pa dang ldan pas dgongs pa can gyi tshig la 'jug par 'gyur gyi/ yi ge'i rjes su 'gro bar mi 'gyur ro/ /nag po bstan pa dang /chen po bstan pa la mkhas pa ni de kho na'i don las sus kyang bskyod pa'am bskul bar mi nus so/ /thog ma nas chos sems pa la 'jug pa ni sngon ma thob pa'i bzod pa chen po'i rnam pa thob par 'gyur ro/ /thob par gyur nas ni snying po thob par bya ba'i phyir dang / don rab tu rtogs par bya ba'i phyir bsgom pa la 'jug par 'gyur ro//chos kyi rjes su mthun pa'i chos sgrub pa bstan pas lus dang ngag dang yid rjes su 'jug pa dang / bsam pa dang / sgom pa bstan pa las bsam pa bstan nas/ sgom pa gang zhe na zhes smras pa dang / sgom pa ni rnam pa bzhi ste/ dngos po nyid dang /sbyor ba nyid dang / sbyor ba yongs su rdzogs pa nyid do/ /mdo las chos gnyis bsgom par bya'o zhes bstan pas dngos po gnyis bsgom par bya ste/ zhi gnas bsgom pa dang / lhag mthong bsgom pa'o/ /de dag rtag tu byed pa dang / gus par byed pa'i sbyor ba dang ldan pa ni kun du brten cing goms par bsgom pa'o//bsten pa dang ldan pa dang / mang du bya ba dang ldan pa ni dgongs pa yongs su grub pa bsgom pa'o/ /thog ma dang bar dang tha mar bsgom pa bzhir rig par ba'am/ chung ngu la sogs pa'i rnam pa'i dbye bas so/ /bsam pa yongs su rdzogs pa grub par 'gyur bas bsam pa'i mthar thug par gyur pa nas bsgom pa rab tu rigs pa yin no//de'i phyir smras pa/ shin tu rdzogs pa'i phyir zhes bya ba'o/ /byang chub sems dpa' rnams kyi zhi gnas dang / lhag mthong bsgom pa rnams shin tu khyad par can gnyis te/ dngos po nyid dang /rnam pa nyid do/ /dngos po'i bye brag bstan pa'i phyir/ brjod du med pa'i dngos po tsam dang zhes bya ba la sogs pa la/ yongs su grub pa'i ngo bo nyid kyis ngag gi spyod yul las 'das pa'o/ /ming dang rnam par rtog pa la gnas pa'i phyir dngos po zhes brjod do/ /tsam zhes bya ba'i sgra ni de gnyi gas dben pa nyid du ston par byed do//dngos po nyid la yongs su ma dag pa'i dus na ni ngo bo zhes bya'o/ /don smos pa ni yongs su dag pa'i gnas skabs na yang dag pa'i ye shes kyi spyod yul nyid de/ de gnyi ga yang dmigs pa nyid yin no/ /sems nges par gtad nas zhes bya ba ni dmigs pa gzhan las sems bzlog nas de nyid la yang dag par 'jog par byed pa zhes bya ba'i don to//rnam pa bstan pa'i phyir smras pa/ spros pa thams cad dang bral ba dang zhes bya ba la sogs pa la/ dngos po de la g.yeng ba thams cad dang bral ba'i zhes bya ba ni rnam par rtog pa thams cad dang bral ba'i rnam pa yid la byed pa la 'jug pa'o zhes bya ba'i don to//sems yongs su g.yeng ba thams cad dang bral ba'i zhes bya ba ni longs spyod thams cad las dben pa nyid du bstan pa yin no/ /'du shes yid la byed pa ni 'du shes yid la byed pas sam/'du shes sngon du 'gro ba'i yid la byed pa'o/ /dmigs pa thams cad ces bya ba ni mi sdug pa la sogs pa'o/ /mnyam par gzhag pa'i sa pa'i dmigs pa yin pa'i phyir nang gi ting nge 'dzin gyi dmigs pa'i mtshan ma ni ting nge 'dzin gyi spyod yul yin pa'i phyir de lta bu'i ting nge 'dzin gyi mtshan ma rnams dngos po'i brjod pa dang bral bas ji skad bstan pa'i rnam pas rnam pa dgu po la sems gnas pa ni ting nge 'dzin bsgom pa zhes bya ba'o//mnyam par bzhag pas sems yang dag pa ji lta ba bzhin du shes par 'gyur ro zhes bya ba'i nges pas de nyid kyis ji ltar bsams pa'i zhes bya ba smras te/sngon bsam pa'i brjod du med pa'i chos rnams kyi mtshan ma yid la byed pa'o zhes bya ba nas shes rab kyis 'jug pa 'di ni lhag mthong zhes bya'o zhes bya ba'i bar du'o/ /dngos po 'di dag dang / rnam grangs 'di dag gis lhag mthong mdor bstan nas/yang 'di dag gis grangs kyi khyad par dang / rnam pa'i khyad par bstan pa'i phyir/ de la 'byed pa ni sdug bsngal gyi ris ma lus pa gzung ba ste/ sdug bsngal 'phags pa'i bden pa zhes byas nas so/ /rab tu rnam par 'byed pa ni so sor rnam par phye nas 'dzin pa ste/ dper na skye ba sdug bsngal zhes bya ba la sogs pa lta bu'o/ /chos rab tu rnam par 'byed pa ni de dag rab tu ston pa'i mdo sde la so sor rtog pa dang ldan pa'o/ /mtshan nyid ni shes bya'i dngos po yid la byed pas gtod pa'o/ /yang dag pa'i mtshan nyid ni gang la gtad pa de tshol bar byed pa'o//nye ba'i mtshan nyid ni rnam par rtog pa'i dngos po sun 'byin par byed pa'o/ /yang dag par rab tu rtogs pa ni shes bya'i dngos po rnams so/ /rig pa ni ji snyed yod par brtags pa dang / /ji ltar yod par brtags pa gzung ste/ sngon las ltos nas yang dang yang du gong nas gong du 'phel ba'o//rtogs pa ni sngon dang phyi ma'i don ma nor bar rig par byed pa'o/ /blo ni rab tu 'byed par nus pa lhan cig skyes pa'o/ /mkhas pa ni yang dag par bsgrubs pa'o/ /shes rab kyis 'jug pa zhes bya ba ni nyan pa dang / 'don pa dang / 'bel ba'i gtam byed pa dang /rnam par gtan la 'bebs pa la sogs pa la mi shes par don gong nas gong du shes par byed pa dang ldan pa'i shes rab po/ /rtag tu sbyor zhing gus par sbyor ba zhes bya ba la/ zhi gnas dang lhag mthong bsgom pa nyid ni sbyor ba'i khyad par gyis goms par byed pa nyid sgom pa yin no zhes bstan pa nyid yin no//sems mi g.yo la zhes bya ba ni bstan pa'i tshig yin no/ /rang gi ngang gis zhes bya ba ni bying ba dang rgod pa'i mtshan ma med pa zhes bya ba'i don to/ /mngon par 'du byed pa med par 'jug cing zhes bya ba ni lhun gyis grub par 'jug pa ste/ sems mngon par 'du byed pa med cing mi g.yo bar 'jug pa zhes bya bar bstan par 'gyur ro/ /gnas pa ni de nyid kyi yon tan dang phan yon mthong bas so/ /gzhan dag ni dbugs thon pa ma yin la/ yon tan dang phan yon ma mthong bas sdud cing zhes bya ba'o/ /rnam pa gnyi ga las kyang mi 'phro ba'o//zhi gnas dang lhag mthong la goms par byed pa zhes bya ba ni rtag tu gus pa dang bcas pa'i sbyor bas rab tu gtod par byed pa zhes bya ba'i don to/ /mngon par dga' bar gnas par 'gyur zhes bya ba ni bsgom pa'i mthar phyin pa na'o/ /yongs su dag par 'gyur ro zhes bya ba ni dgos pa yongs su grub pa nyid na'o//de'i phyir smras pa/ lus shin tu sbyangs pa dang zhes bya ba la sogs pa'o/ /ye shes kyis mthong ba ni ye shes mthong ba zhes bya ba'am/ ye shes nyid mthong ba ni ye shes mthong ba zhes byas nas te/ nges pa'i don shes pas don mngon sum du mthong ba'o//gnas ngan len zhes bya ba ni rten la yod pa'i sa bon no/ /de dag gis ni nyon mongs pa'i sgrib pa spang bar bya ba bstan to/ /ye shes mthong ba rnam par dag pas ni shes bya'i sgrib pa spang bar bstan to/ /gdams ngag gang zhen zhes bya ba la/ yang dag par rtogs par byed pa'i phyir dang /smra ba'i tshig gi ro myong ba ni gdams ngag ces bya'o/ /gdams par bya ba'i dngos po ni rnam pa brgyad do/ /sems shes par byas nas mthun pa'i tshig smra ba ni gdams ngag ste/ gdams ngag rnam pa gnyis so/ /bsam gtan dang snyoms par 'jug pa la snyoms par zhugs pa'i shes pa la sogs pa'i stobs la brten nas te/gang yang smras pa/ ting nge 'dzin la brten nas zhes bya ba'am/ yun ring du 'grogs shing 'dris pa'i rgyus rang bzhin shes par byas nas te/ gang gi phyir smras pa/ 'grogs pa'i rgyus sems btsal nas zhes bya ba la/rgyal po chen po 'grogs pa'i dbang gis rang bzhin shes par bya'o zhes gsungs pa'i mdo'i rjes su 'brangs nas shes par bya'o/ /gang dag la 'doms par 'dod pa'am zhes bya ba la/ gang gis 'doms par byed 'dod pa des zhes mtshon pa yin no//gang yang rung ste zhes bya ba ni gdams ngag dang rjes su ston pa la gnas pa na'o zhes bstan pa yin no/ /sems btsal nas zhes bya ba ni ci 'di 'dod chags la mang du spyod pa zhig gam/ 'on te 'dod chags dang bral ba la mang du spyod pa zhig ces sems kyis sems btsal ba ni mkhyen to zhes bya ba ni 'di lta bu zhig go zhes nges pa thob pa'o//dbang po rnams ni rtul po la sogs pa'i dbye bas tshol lo/ /bsam pa ni dman pa la mos pa la sogs pa'i dbye bas tshol lo/ /bag la nyal ba ni khams sna tshogs pa la sogs pa'i dbye bas tshol lo/ /legs par gzung ba ma yin pa rtag pa'i mtha'i gnyen por dbu ma'i lam ston pa dang zhes bya ba la/sngon gyi gnas rjes su dran pa'i shes pa'i stobs kyis gzhan dag de dang der skyes pa'i gnas de dag gi ming la sogs pa'i yongs su gyur pa'i gtam brjod pas rnam pa'i khyad par gzhan du gyur pa la sogs pa mtshon pa'i phyir dang /legs par spyad pa dang nyes par spyad pa'i dbang gis bde 'gro dang ngan 'gro rnams su shi ba'i rjes la skyes par gyur to zhes bstan pas mtshon par bya ba'i phyir ro/ /legs par gzung ba ma yin pa chad pa'i mtha'i gnyen por dbu ma'i lam ston pa ni 'chi 'pho dang skye ba shes pa'i stobs kyis so//ma byas pa la byas so snyam pa zhes bya ba ni ma lus par ma byas pa la'o/ /ma thob pa zhes bya ba ni lam ma thob par ro/ /ma reg pa ni sems rnam par ma grol ba ste/ rnam par grol ba med pa nyid do/ /mngon sum du ma byas pa ni rnam par grol ba'i ye shes mthong ba med pa nyid do//gdams ngag rnam pa brgyad kyis mdor bsdus pa'i gnas bstan pa'i phyir smras pa/ yang gnas rnam pa gsum gyis bsdus par rig par bya ste zhes bya ba la sogs pa la/ sems ma btul zhing ma bsgoms pa rnam pa gnyis te/ mnyam par ma bzhag pa dang /rnam par ma grol ba'o/ /de la dang por sems mnyam par ma bzhag pa mnyam par bzhag pa'i dbang du byas nas smras pa/ sems mi gnas pa gnas par bya ba'i phyir zhes bya ba ni dang po'i gdams ngag rnam pa lnga ste/ sems mnyam par ma bzhag pa mnyam par 'jog tu gzhug pa'i phyir zhes bya ba'i don to//sems gnas pa la zhes bya ba ni mnyam par bzhag pa la thabs kyi lam ston pa ste/ spangs pa 'thob pa'i thabs kyi lam nye bar ston pa ni mtha' gnyis kyi gnyen po'i phyogs su gyur pa dbu ma'i lam gyi man ngag gi gdams ngag bstan pas so//rang gi dgos pa mthar ma phyin pa la zhes bya ba ni rang gi bya ba yongs su rdzogs par ma gyur par bdag gis bya ba byas zin to zhes sbyor ba bshol nas gnas pa dag la de dag gi de lta bu'i mngon pa'i nga rgyal spong du gzhug pa'i phyir te mngon pa'i nga rgyal spong du gzhug pa zhes bya pa'i don to//gnas gsum gyis bsdus par sbyar ba'i phyir/ de la sems dang / dbang po dang zhes bya ba la sogs pa'o/ /de bzhin du byang chub sems dpa' gdams ngag gzhan las thob pa'am zhes bya ba la/ 'dis ni gdams ngag dang rjes su bstan pa la gnas par mtshon pa yin no//gzhan dag la yang byin pas zhes bya ba ni gdams ngag dang rjes su bstan pa byed par 'os pa yin par mtshon pa yin no/ /de ltar gdams ngag dang rjes su bstan pa la gnas pa dang gdams ngag dang rjes su bstan pa byed par 'os pa 'di dag gis kyang stobs kyi rigs rim gyis rnam par sbyong zhing zhes bya ba ni stobs rnams dang por skyes pa nyid do//rnam par 'phel bar byed pa ni skyes pa rnams 'phel bar byed pa'o/ /gdams ngag rnam pa brgyad kyi stobs rnam pa brgyad go rims bzhin no/ /sems shes pa'i gdams ngag gis ni bsam gtan dang rnam par thar pa dang /ting nge 'dzin dang / snyoms par 'jug pa mkhyen pa'i stobs kyi rigs sbyong ngo / /dbang po la gdams pas ni dbang po mchog dang mchog ma yin pa mkhyen pa'i stobs so/ /bsam pa la gdams pas ni mos pa sna tshogs mkhyen pa'i stobs so//bag la nyal la gdams pas ni khams sna tshogs mkhyen pa'i stobs so/ /'jug pa'i sgo sna tshogs la gdams pas ni kun du 'gro ba'i lam mkhyen pa'i stobs so/ /mi bden pa'i rtag pa'i mthar 'dzin pa la gdams pas ni sngon gyi gnas rjes su dran pa mkhyen pa'i stobs so//mi bden pa'i chad pa'i mthar 'dzin pa la gdams pas ni 'chi 'pho dang skye ba mkhyen pa'i stobs so/ /ma byas pa byas par mngon par nga rgyal ba la gdams pas ni zag pa zad pa mkhyen pa'i stobs so/ /de la rjes su bstan pa gang zhe na zhes bya ba ni gdams ngag dang rjes su bstan pa zhes bstan pa de las rjes su bstan pa'i don blangs nas dris pa yin no//rnam pa lngar rig par bya ste zhes bya ba ni dngos po nyid kyis ni gnyis so/ /rnam pas ni gsum mo/ /de dag gnyi ga bsdus na rnam pa lnga'o/ /sems la sogs pa shes par byas nas gnang ba dang bkag pa dag bya ba dang bya ba ma yin par ston pa'i tshig ni rjes su bstan pa'o//de bzhin gshegs pas bcas pa'i bslab pa'i tshig rnams kyi rjes su 'brangs nas sems la sogs pa shes par byas nas slob ma la ston pa ni rjes su bstan pa'o/ /de'i phyir smras pa/ /kha na ma tho ba dang bcas pa kun du spyod pa dgag pa dang zhes bya ba la sogs pa'o//lus dang ngag sdom pas na sdom pa ste/ kha na ma tho ba dang bcas pa'i dngos po kun du spyod pa dgag pa'o/ /lus dang ngag gis 'di dag ni bya ba ma yin no zhes slob pa ni rjes su bstan pa'i don yin no/ /kha na ma tho ba med pa kun du spyod pa gnang ba dang zhes bya ba ni lus dang ngag gis 'jug par bskul ba ste/'di ni lus dang ngag gis bya ba yin no zhes rjes su ston pa'o/ /de ltar rjes su bstan pa byas na yang 'ga' zhig gus par mi byed pas sam/ bag med pa'i dbang gis bya ba ni mi byed la/ bya ba ma yin pa ni byed pa de ni 'khrul pa kun du spyod pa zhes bya ste/lus kyi kun du spyod pa las 'das pa zhes bya ba'i don to/ /khyod kyis bya ba ma yin pa ni 'di dang 'di lta bu byas bya ba 'di dang lta bu ni ma byas zhes mtshon par byed pa ni bskul ba zhes bya ba'o/ /de ltar bskul ba na yang gus par mi byed cing bya ba ma yin pa la spyod na sma dbab par bya ste/tshig rtsub mo dang / chad pa'i las dang / gnas nas bskrad pas sma dbab cing / dran par byed du gzhug pa ste/ phyis sdom du gzhug pa'i phyir ro/ /rang gi rgyud kyi sems bsrungs nas bsam pa bzang pos sma dbab pa la sogs pa'i las bya'o zhes bstan pa'i phyir/rnyog pa med pa dang zhes bya ba la sogs pa smos te/ de'i don bstan pa'i phyir/ mi mthun pa med pa dang zhes bya ba dang / gnod sems la sogs pa kun du spyod na smad par bya ba yin pas mi mthun par spyod pa zhes bya ba'am/ ngan pa'i rnam pa zhes bya'o/ / de lta bu ma yin pa ni mi mthun pa med pa zhes bya'o/ /'o na 'di lta bu bsam pa ji lta bus she na/ snum pa'i bsam pas zhes smos te/ phan pa dang bde ba'i bsam pas zhes bya ba'i don to/ /nad pa dang bu gcig pa gces pa la sman pa mkhas pa dang pha byams pas sbyor ba rtsub po byed pa bzhin no//ji skad bstan pa sgrub pa'i sbyor ba dang yang dag par ldan pa'i nan tan byed pa dag la ni khyod ni dad pa la sogs pa phun sum tshogs pa yin no zhes bya ba la sogs pa yang dag pa'i yon tan brjod par bya'o/ /des na dga' ba bstan pas zhes bya ba ni bzang po tshur spyon dang zhes bya ba la sogs pas yang dag par dga' bar bya'o zhes bya ba ste/sems spro ba bskyed par bya'o/ /de lta na bskul ba dang / chad pa dang / spro ba bskyed pas rjes su gnang ba dang rab tu dgag pas 'jug pa dang ldog pa la nges par gzhag par bya ba yongs su gsal bar byas pa yin no//lus dang ngag dang yid kyi las thabs kyis zin pa ni bslab pa zhes gsungs pas bslab pa'i rnam pa mdor bstan pa'i tha ma'o/ /des na dris pa/ thabs kyis zin pa gang zhe na zhes bya ba la/ bsdu ba'i dngos po bzhi'i ngo bos bsdus pa'i dngos po bzhi'i sgo nas zhugs par gyur pa na lus la sogs pa'i las thabs kyis zin pa'o zhes bstan pas bsdu ba'i dngos po bzhi po thabs nyid du lung gis bstan pa'i phyir/ji skad gsungs pa lta bu'o zhes bya ba la sogs pa la/ byang chub sems dpa' zhes bya'o zhes bya ba ni yang dag pa'i don ni byang chub sems dpa' zhes bya ba'i don to//de dag gi thabs man ngag bstan pas rgyu dris pa/ ci'i phyir zhes bya ba la sogs pa la/ don gang gi phyir zhes bya ba'i don to/ /sems can yongs su smin par bya ba'i thabs su gyur pas thabs zhes bya'o zhes bstan pa'i phyir des na smras pa/sems can rnams gdul ba dang zhes bya ba la sogs pa'am/ de dag las gzhan pa med pa'i phyir smras pa/ 'di las gong na yang med ces bya ba la sogs pa la/ sbyin pa ni lus brtan par byed pa yin pa'i phyir phan 'dogs pa yin no/ /phan btags par gyur pas ji ltar 'dod pa bzhin du byed par 'gyur ro//de'i phyir 'khor sdud pa'i thabs yin no/ /des na smras pa/ tshig mnyan pa dang zhes bya ba la sogs pa la/ de ltar phan btags pas gus par byed cing smras pa'i tshig mnyan pa dang ngo / /bsgrub par 'dod pas na byed par sems pa'o//de ltar de dag la nyes par spyod pa las dben pa dang / legs par spyod pa la sgrub tu gzhug pa'i phyir rigs pa dang bcas pa sems 'phrog par byed pa'i chos ston to/ /de'i phyir smras pa/ snyan par smra bas zhes bya ba la sogs pa la/ kha na ma tho ba dang bcas pa dang / kha na ma tho ba med pa'i chos rnam par phye nas shes par byed pas 'dzin du 'jug pa'i thabs yin no//de ltar 'dzin du bcug nas kyang mi dge ba spong zhing dge ba la yang dag par 'god cing 'dzud pa zhes bya ba 'di dang 'di lta bur gyis shig ces sbyor ba ni don spyod pa ste/ gdul ba'i thabs su gyur pa 'dul ba zhes bya'o//sgrub pa la 'god par byed pas 'jog pa zhes bya'o/ /bya ba la mi g.yo bar sbyor bas na 'god pa zhes bya'o/ /yang na 'di dag ni spang bar bya'o/ /'di ni yang dag par sgrub cing gnas par bya'o zhes man ngag rjes su ston pa ni yang dag par 'dzin du 'jug pa'o/ / mi dge ba'i gnas nas slong ba ni 'dul ba'o/ /dge ba la 'god pa ni 'jog pa zhes bya'o/ /de las mi 'phrogs par 'god pa ni phan pa dang bde ba'i rgyu yin pa'i phyir/ don dpyod pa zhes bya'o/ /gdul bya yang dag par 'dzin du bcug pa la sogs pa rnams bstan par bya ba'i phyir rang nyid kyang de bzhin du rjes su sgrub par byed cing de dang skal ba mnyam par spyod pa ni don mthun pa zhes bya ste/mthun par sgrub pa'i thabs zhes bya'o/ /de ltar sgrub par byed na su yang ci yang smra bar mi 'gyur ro zhes bstan pa'i phyir smras pa/ gang gis na de la da dung khyod bdag nyid kyang zhes bya ba la sogs pa la/bsdus pas sam/ so so bas yongs su zin pa gang yin pa zhes bya ba ni de'i bdag nyid can zhes bya ba'i don to/ /dang pos ni sdud par byed do/ /gnyis pas ni 'dul bar byed do/ /phyi ma gnyis kyis ni yongs su smin par byed do/ /byang chub sems dpa'i sa'i gzhi'i rnal 'byor gyi gnas las stobs kyi rigs kyi le'u ste brgyad pa'i 'grel pa rdzogs so// //ngo bo nyid la sogs pa'i sdom gyis bsdus pa'i dgos pa ci yin zhe na/ bdag dang gzhan gyi don la sogs pa'i don rnam pa bdun la mos pa mang ba nyid la sogs pa rnam pa bdun gyis bslab par bya'o zhes bstan pa yin no//don de dag nyid yang sbyin pa la sogs pa pha rol tu phyin pa mngon par sgrub pa'i sbyor bas kyang bslab par bya'o zhes bstan pa'i phyir pha rol tu phyin pa mdor bstan pa'i dbang du byas nas mdor bstan pa'i sdom gyis ston par byed pa ni pha rol tu phyin pa drug cir yang rnam pa 'dra bar mdor bstan pa'i phyir te/sbyin pa la sogs pa'i pha rol tu phyin pa rnams la ma bslabs par rang gi don la sogs pa la bslab par mi nus pas pha rol tu phyin pa rnams yongs su rdzogs par byas nas bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro zhes bya bar smras pa/sa dang sa la pha rol tu phyin pa re re rim gyis yongs su rdzogs par byas nas te bzhi pa'i bdun pa'i don to/ /sbyin pa la sogs pa pha rol tu phyin pa'i ngo bo ma yin pa'i phyir pha rol tu phyin pa rnams rdzogs par ma byas par bla na med pa yang dag par rdzogs pa'i byang chub mngon par rdzogs par 'tshang rgya bar nus pa ma yin no//de'i phyir smras pa/ rdzogs par byas nas zhes bya ba ni yongs su rdzogs par gyur ba'o/ /pha rol tu phyin pa drug kho na bstan pa ni pha rol tu phyin pa gzhan rnams de dag gi nang du 'dus pa'i phyir ro//pha rol tu phyin pa rnams kyi rnam par gzhag pa ni bsod nams dang ye shes kyi tshogs kyi rnam par dbye ba'i sgo nas sngar nyid du bstan pa yin no/ /sbyin pa'i pha rol tu phyin pa ni rnam pa dgus bstan te/ mtshan nyid bstan pa nyid dang / sbyin pa'i dngos po bstan pa nyid dang / 'jug par mi nus pa bstan pa nyid dang / sgo bstan pa nyid dang / rten bstan pa nyid dang / rnam pa stan pa nyid dang / sdug bsngal bsal ba'i bya ba bstan pa nyid dang / 'jig rten gnyi gar bde ba nye bar sgrub pa'i mtshan nyid dang / rnam par dag pa bstan pa nyid do/ /rnam pa dgu nyid mdor bsdu na rnam pa gnyis su gzhag par bya ste/mtshan nyid dang / mtshan nyid kyi dbye ba'o/ /de yang dang po dang phyi ma rnams kyis rnam pa rnams rim pa bzhin no/ /yang thams cad kyang 'dus byas kyi mtshan nyid bzhi rab tu mi 'dor bar zhes bya bas rnam pa dgu po nyid mtshan nyid rnam pa bzhi por gzhag par bya ste/ji ltar rigs par rang gi mtshan nyid dang / rab tu dbye ba'i mtshan nyid dang / rgyu'i mtshan nyid dang / 'bras bu'i mtshan nyid do/ /rnam pa re re la yang rang rang gi phun sum tshogs pa'i mthar thug par 'gro ba'i don gyis na pha rol tu phyin pa zhes bya bar bstan ba'i phyir smras pa/sbyin pa'i pha rol tu phyin pa zhes bya ste zhes bya ba ni ma lus pa lam ma yin gyi/ 'o na ji lta zhe na/ re re la yang ste/ ngo bo nyid kyi sbyin pa nas rnam par dag pa'i sbyin pa zhes bya ba'i bar du'o/ /rnam pa thams cad yongs su rdzogs pa ni byang chub sems dpa' kho na'i ste/ sbyin pa'i ngo bo nyid nas rnam par dag pa'i sbyin pa'i bar du'o//de'i phyir bstod pa/ bse ru lta bu'i rang rgyal la/ /pha rol phyin pa'i ming yang med/ /pha rol phyin pa drug po yang / /spyi bor khyod nyid zhon par gyur/ /zhes bya ba yin no/ /sbyin pa'i ngo bo nyid ni mdor na rnam pa lngar rig par bya ste/ ngo bo nyid kyi khyad par dang / sgor 'jug pa'i khyad par dang / dngos po'i khyad par dang / bsam pa'i khyad par dang / len pa po'i khyad par ro/ /ngo bo nyid kyi khyad par gyi dbang du byas nas smras pa/ sems pa'i ma chags pa dang / lhan cig skyes pa zhes bya'o/ /sgor 'jug pa'i khyad par gyi dbang du byas nas smras pa/des kun nas bslang ba'i lus dang ngag gi las zhes bya ba'o/ /sbyin par bya ba'i dngos po'i khyad par gyi dbang du byas nas smras pa/ sbyin par bya ba'i dngos po thams cad yongs su gtong ba dang zhes bya ba'o/ /bsam pa'i khyad par ni tshul khrims dang lta ba dag tu rig par bya'o//gang gi phyir smras pa/ sdom pa la gnas pa dang zhes bya ba la sogs pa'o/ /len pa po'i dbang du byas nas smras pa/ su gang 'dod pa zhes bya ba la sogs pa'o/ /yang khyad par rnam pa gsum gyi ngo po nyid kyi sbyin pa rnam par gzhag par rig par bya ste/ngo bo nyid kyi khyad par dang / sbyin par bya ba'i chos kyi khyad par dang / lhag pa'i bsam pa'i khyad par ro/ /yo byad thams cad dang / rang gi lus la mi lta ba dang zhes bya ba ni 'di dang / pha rol dang / mthar thug pa'i gnas skabs na yang go rims bzhin du 'bras bu rnam pa gsum la re ba med pa ni de gnyi ga la mi ltos par 'gyur te/'di la phan 'dogs pa'i 'bras bu dang / pha rol tu rnam par smin pa'i 'bras bu dang / mthar thug pa'i tshe rnam par grol ba'i 'bras bu'o/ /de dag gis ni ngo bo nyid kyi khyad par gsal bar byas pa yin no/ /'jig rten pa dang / nyan thos dang /rang sangs rgyas rnams kyi sbyin pa'i sems kyang de lta bu'i ma chags pa dang bcas par 'gyur ba ma yin te/ ji ltar rigs par 'bras bu rnam pa gsum la re ba dang bcas pa'i phyir ro/ /yang shes rab dang snying rje dag gis go rims bzhin du bdag la chags pa zad par byed pa dang / gzhan la chags pa 'phel bar byed pa'i phyir yo byad thams cad dang / rang gi lus la mi lta ba nyid du rig par bya'o/ /de dag gis ni ma chags pa'i dge ba'i rtsa ba dang bcas pa nyid kyi phyir sbyin pa'i sems pa bstan pa yin no/ /des kun nas bslang ba zhes bya ba ni ji skad bstan pa'i sems pas kun nas bslang ba'o//rang gi lag gis ster ba'i dus su ni lus kyi las so/ /gzhan la byin cig ces ster du bcug pa ni ngag gi las so/ /de dag gis ni kun tu rtog pa tsam gyis sems pa bsal par 'gyur ro/ /phung po lnga'i mtshan nyid can gyi sbyin pa'i mtshan nyid bstan par 'gyur te/ji skad du/ dge ba yid la byed pa'i dngos/ /skyes bu gang tshe sbyin byed pa/ /dge ba'i phung po'i skad cig de/ /sbyin pa zhes ni brjod pa yin/ /zhes bstan pa yin no/ /kha na ma tho ba med pa zhes bya ba ni gang byang chub sems dpa' sbyin par bya ba ma yin pa de yongs su spang zhing mi sbyin pa'o//de ltar sbyin par bya ba'i chos rnam pa thams cad yongs su gtong bas rab tu phye ba ni byang chub sems dpa'i sbyin pa'o/ /gzhan dag gi ni gang gis longs spyod pa'i lus de yang sbyin par mi byed do/ /gang gi don du longs spyod par byed pa'i srog gi don du spyod pa de yang sbyin par mi byed do//gang dang lhan cig longs spyod pa'i bu la sogs pa yang sbyin par mi byed do/ /gang la longs spyod par bya ba gya nom zhing rgya che ba'i dngos po de yang sbyin par mi byed do/ /des na de dag dngos po thams cad yongs su gtong pa ma yin no//sdom pa la gnas pa dang zhes bya ba ni slong ba rnams la lus la sogs pas gnod pa mi byed pa zhes bya ba'i don to/ /de dag gis ni zhe sdang med pa'i dge ba'i rtsa ba bstan to/ /byang chub sems dpa' rnams ni slong ba rnams la yid khro ba med de/ dge ba'i bshes gnyen gyi 'du shes bskyed pa'i phyir ro//sbyin pa byin pa las 'bras bu rnam pa gsum 'thob par mthong pa ni 'ong ba mthong pa zhes bya'o/ /de'i don bstan pa ni 'bras bu la lta ba zhes bya'o/ /'bras bu rnam pa gsum ni rnam par smin pa'i 'bras bu dang / rgyu mthun pa'i 'bras bu dang / mngon par byang chub ba'i 'bras bu'o//de dag gis ni gti mug med pa'i dge ba'i rtsa ba dang yang dag par ldan pa'i khyad par bstan to/ /gzhan dag ni longs spyod chen po nyid kyi 'bras bu mthong ba nyid do/ /ji skad du sbyin pa las byung ba'i bsod nams bya ba'i dngos po bstan pa lta bu'o/ /su gang 'dod pa de la zhes bya ba ni snying rje'i bsam pa bstan pa yin te/slong ba po'i bsam pa'i dbang gis sbyin pa gtong ba'o/ /de'i phyir snying rje las byung ba'i sbyin pa ston pa yin no/ /thams cad sbyin pa ni thams cad gtong ba ste/ des na smras pa/ thams cad ces bya ba ni zhes bya la/ nang gi bdag nyid can sngon gyi skye ba'i las kyi rnam par smin pa nyid thob pa rnam par smin pas bsdus pa'o//de'i rnam par gzhag pa ni rnam pa gnyis su rig par bya'o/ /lus zhes bya ba ni bsdus pa'o/ /lag pa dang / rkang pa la sogs pa ni de'i dbye ba'o/ /de dag gnyi ga bstan pa'i phyir/ rkang yan chad rang gi lus su gtogs pa zhes bya ba ste/nang gi bdag nyid 'ba' zhig ces bya ba'i don to/ /gnyis ka'i bdag nyid can gyi 'dres pa yang yod pas de bstan pa'i phyir/ gang yin pa de ni zhes bya ba la sogs pa la/ skyugs pa za bas 'tsho ba ni yi dwags dang / dud 'gro kha cig ste/ de yang zos nas ma zhu ba'i gnas yan chad du zhugs pa yin pas na nang gi bdag nyid can yin te/ bdag gi lus gnas pa'i rgyu yin pa'i phyir ro/ /ma zin pa yin pas phyi rol zhes bya'o/ /gnyis kar gtogs pas 'dres pa ste/ de'i phyir smras pa/ 'dres pa'i sbyin pa zhes bya ba la sogs pa'o//nang gi bdag nyid can dang phyi'i dngos po so sor yang sbyin pa'i rnam pa gnyis su rig par bya ste/ yongs su btod ba'i sbyin pa ni gang yang smras pa/ ci dga' dgur byed du 'jug pas zhes bya ba ni sbyin par byed pa la sogs pa dbang du gyur pa'i sbyor bas ji ltar 'dod pa bzhin dga' dgur byed pa nyid do//de nyid kyi don bstan pa'i phyir smras pa/ gzhan la dbang yod pa dang zhes bya ba la sogs pa la/ ji ltar gsos pa'i bran sngon rang dbang yod pa las phyis gzhan gyi dbang du gyur pa ltar/ de bzhin du byang chub sems dpa' yang rang gi lus ji ltar 'dod bar gsungs pa'o//pha rol la phan pa dang bde ba yongs su spyad pa'i phyir gzhan dag la yongs su sbyin par byed da/ /zang zing med pa'i sems ni 'bras bu la rjes su ltos pa med pa ste/ rgyu med par gzhan la brtse ba'o/ /zang zing med pa nyid bstan pa ni/ byang chub dam pa 'dod pa zhes bya ba la sogs pa la/ byang chub dam pa 'dod pa zhes bya ba ni rang gi thar pa'i 'bras bu 'dod pa ma yin par gsungs pa'o/ /pha rol la phan pa dang bde ba bya bar 'dod pa zhes bya ba ni rnam par smin pa dang / lan la re ba med pa'o/ /sbyin pa'i pha rol tu phyin pa yongs su rdzogs par byed par 'dod de zhes bya ba ni rgyu mthun pa'i 'bras bu 'dod pa nyid do//gzhan dag ni gzhan du 'chad de/ snying po med pa'i lus las snying po blang ba'i phyir tshig gsum po 'di dag gsal bar bstan pa yin no zhes zer te/ lus snying po med pa nyid las shin tu rgya che ba'i 'bras bu mchog tu gyur pa'i phyir te/lus la ltos pa med par gyur pa zhes bya ba'i don to/ /rnag dang bcas pa'i lus 'di ni lha dang mi rnams la mkho ba ma yin pas de btang bas lha dang mi mang po la phan pa dang bde ba bsgrub par bya ba dang / lus rin med pa'am rin chung ba yang bsod nams kyi phung po chen po rin thang med par 'gyur ba'i phyir rnam pa gsum gyis snying po len par rig par bya'o//yongs su spyad pa'i sbyin pa ni gzhan dag gi nye bar longs spyad pa'i phyir te/ gang yang smras pa/ lag pa dang / rkang pa dang zhes bya ba la sogs pa'o/ /de bzhin du phyi rol gyi dngos po yang rnam pa gnyis kyis yongs su gtong bar bstan pa nyid de/phyi rol gyi yongs su longs spyod pa mthong yang dus re zhig tsam mthong bas thams cad kyi thams cad du dngos po yongs su gtong ba'i sgo nas ma yin pa dang / de lta bu las bzlog pa'i yongs su gtong ba'i sbyin pa'o/ /byang chub sems dpa' ni thams cad sbyin pa yin no zhes brjod na yang /de ltar na dus dang yul dang dngos po'i bye brag la ltos nas de'i rnam par dbye ba bstan pa'i phyir smras pa/ thams cad bye brag med par zhes bya ba la sogs pa la/ de ltar na res 'ga' 'ga' zhig la thams cad sbyin par bya'o/ /res 'ga' 'ga' zhig la ci yang sbyin par mi bya'o zhes pa ni rnam par dbye ba yin no//'o na ci zhig ni sbyin par byed ces bya ba la sogs pa la/ gang bde ba kho na'i rgyur 'gyur ba de ni sbyin par mi bya ste/ de'i sgo nas gcig tu bya ba ma yin pa la 'jug par ma byed cig/ /theg pa gsum gyis yongs su smin par 'gyur ba ma yin pa nyon mongs pa can gyi bde ba bskyed pa'am/gang yang 'chi bar byed pa de ni phan pa yang ma yin/ bde ba yang ma yin pas sbyin par mi bya'o/ /'di dang pha rol gnyis su bde bar 'gyur ba de ni yongs su gyur nas bde ba yin pa'i phyir da ltar nges par bde ba ni ma yin yang nges par sbyin par bya ste/'phral du bde ba ma yin pas de mi 'dod kyang dbang med du sbyin par bya'o/ /mdor bstan pa yin no zhes bya ba ni mtshan nyid mdor bstan pa'o/ /pha rol la gnod pa bya ba dang zhes bya ba ni gzhan dag gi srog gcod pa la sogs pa'i ched du byang chub sems dpa'i lus kyis grogs bya dgos par gsol ba 'debs par byed na de grogs su khas mi len to//pha rol brid pa dang zhes bya ba ni gzhan dag slu ba'i don du'o/ /mi rigs pas bskyed pas byed du bcug na zhes bya ba ni bud med kyi yul dang 'khrig pa spyod pa la sogs pa'i bya ba la de dag gi dbang du 'gyur bar bdag nyid sbyin par mi byed do//ci ste zhe na/ snying rje chen po dang ldan pa'i phyir dang / gzhan la phan pa'i phyir zhugs pa yin pa'i phyir gzhan gyi ngor bdag nyid kyi srog 'dor ba ni nus kyi/ gzhan gyi ngor gzhan dag la gnod pa byed pa'i grogs su ni 'gro bar mi byed do zhes bstan pa'i phyir ro/ /sbyin pa las brtsams te bsam pa dag pa yin du zin kyang zhes bya ba ni de la byang chub sems dpa' dngos po yongs su gtong ba ni rgyu rnam pa gnyis kyis te/bdag nyid kyi ser sna'i 'dzin pa dam po'i 'dri ma spang ba'i phyir ro/ /gang la lhag par zhen pa chen po skye ba'i dngos po mi slong yang sbyin par bya ste/ yongs su 'dzin pa'i skyon gyis gnod pa byed par 'gyur ba'i phyir zhes byas nas sam/sems can rnams la phan gdags pa'i phyir ro/ /de la rgyu dang po med par bstan pa'i phyir/ bsam pa dag pa yin du zin kyang zhes bya ba la/ rnam pa gnyis kyis bsam pa dag par 'gyur te/ de'i gnyen po'i phyogs kyi dge ba'i rtsa ba chen pos rgyud nye bar bstan par bya ba'i phyir ji ltar sa dang po mngon sum du byed pa dang nye bar gnas pa'i gnas skabs dang /rtogs pa'i khyad par thob pas dang po la zhugs pa'o/ /rgyu gnyis pa med par bstan pa'i phyir/ nye bar gnas par gyur na zhes bya ba la sogs pa la/'di dag gis ni sbyin pa'i rgyu med pas sbyin par mi bya'o zhes bstan par 'gyur ro/ /bdud kyi ris kyis lha la sogs pa tho 'tshams pa'i bsam pas yin pa'i phyir dang / mi'i lus kyis lha rnams la dgos pa med pa'i phyir slong bar gyur kyang sbyin par mi byed do/ /de dag nyid la gnod pa dang zhes bya ba ni bsod nams ma yin pa mang po sogs par 'gyur ba'i phyir ro//phung po chen por zhes bya ba ni pha rol du mi 'dod pa'i 'bras bu 'thob par 'gyur ro/ /des byin gyis brlabs pa rnams la yang de bzhin du sbyin par mi bya bar shes par bya'o/ /smyon pa ni las kyi rnam par smin pas sems 'jigs pa la sogs pa'i dbang du gyur pas rnal du mi gnas par g.yengs pa sems rang gi gnas skabs la mi gnas pa rang gi rang bzhin la mi gnas pa'i sems so//sems 'khrugs pa ni dbang du ma gyur pa'o/ /de dag gis ni blo sngon du song bas slong ba yang ma yin la/ 'dod nas slong ba yang ma yin par bstan pa yin no//bla rdol tsam du zad pas zhes bya ba ni bla rdol tsam gyis slong ba zhes bya ba'i don to/ /phyi rol gyi dngos po yang gzhan dag gi srog la gnod pa'am/ longs spyod la gnod pa'am bud med la nye bar gnod pa sbyin par mi byed do/ /gang yang gzhan dag la bag med pa dang /nyes par spyod pa'i gnas su gyur pa yang sbyin par mi bya'o zhes bstan pa'i phyir smras pa/ yang phyi rol gyi dngos po las ni zhes bya ba la sogs pa la/ bdag la gnod par bya ba'am zhes bya ba ni bdag nyid 'chi bar bya ba'i phyir slong ba'o/ /pha rol la gnod par bya ba'i phyir zhes bya ba ni gzhan gsad pa la sogs pa'i don du slong ba'o//phan par bya ba'i phyir zhes bya ba ni dug kyang sman gyi don du yin na sbyin par bya'o/ /me yang btso ba la sogs pa'i dgos pa bsgrub pa'i phyir sbyin pa'o/ /mtshon cha yang bsrung ba dang / mdzes par bya ba'i phyir sbyin pa'o/ /chang yang sman gyi don du sbyin no//pha rol yid brtan pa ma yin pa'i rdzas kyang zhes bya ba ni ma byin par len pa'i skyon dang ldan par 'gyur bas sbyin par mi byed do/ /yid brtan pa la ni nyes pa med do zhes bstan pa'i phyir smras pa/ yid brtan pa ma yin pa'i zhes bya ba'o/ /smyan byed cing zhes bya ba ni skyes pa dang bud med gzhan gyi gzhan dang yang dag par sbyor ba ste/pho nya'i bya ba'i sgo nas zhes bya ba'i don to/ /gzhan gyi bud med la gnod pa byas nas yongs su blangs pa'i phyir ro/ /de lta bas na gzhan la gnod pa byed pa'i sbyin pa sbyin par mi byed do/ /bza' ba dang btung ba srog chags dang bcas pa yang srog chags la gnod pa'i 'jigs pa yod pa dang /bza' bar 'os pa ma yin pa'i phyir mi sbyin no/ /dngos po gang dag dga' ba dang brtse ba dang ldan pa zhes bya ba ni gzhan dag la nye bar gnod pa'i sgo nas nyon mongs pa can gyi dga' ba dang / rab tu dga' ba skyed par byed pa nye bar mkho ba las byung ba'am/bzo las byung ba yang rung gzhan dag la gnod pa byed pa ni smad par bya ba'i las yin pa'i phyir zhes byas nas so/ /'on te de dag gis kyang sems can rnams la phan par 'gyur ba yin na ci'i phyir sbyin par mi bya zhe na/ sbyin pa de ni skyon mang po dang ldan pa yin no zhes bstan pa'i phyir smras pa/de byin na de dag byang chub sems dpa' la dga' ba tsam skye bar 'gyur mod kyi zhes bya ba'o/ /ngan song dag tu skye bar 'gyur zhes bya ba ni 'di dag gis ni nyes par spyod pa'i gnas rnams rab tu bkag pa yin no/ /mi dge ba'i rtsa ba sogs par 'gyur ba yang ma yin na zhes bya ba 'dis ni bag med pa'i gnas ma yin na sbyin no zhes bstan pa'i phyir ro//sems dga' bar bya ba'i phyir zhes bya ba ni ji ltar 'dod par ro/ /bdag gi dbang du 'gyur bar bya ba'i phyir sdud pa dang / theg pa gsum la sgrub pa'i snod du rung ba'i phyir yongs su smin pa'o/ /ri dwags gsad pa'i thabs bslab pa zhes bya ba ni rgyu mtshan nyid do//rab tu smad pa'i mchod sbyin ni mchod sbyin ngan pa'o/ /yo lang chen po ni srog chags mang po gsod pa'i gnas so/ /srog chags mang po bsogs nas gsod pa ste/ bsogs nas dus gcig tu srog gcod pa zhes bya ba'i don to/ /bdag nyid kyang zhes bya ba ni mchod sbyin gyi bdag pos mi byed pa'o//gzhan dag kyang mchod sbyin byed du mi 'jug go zhes bya ba ni mchod sbyin gyi slob dpon yang byed du mi 'jug pa'o/ /lha rten rnams su zhes bya ba ni lha rten la sogs pa rnams su byol song bsad nas khrag la sogs pas mchod pa'o/ /srog chags mang po gnas pa'i sa phyogs zhes bya ba la/de'i don bstan pa'i phyir chu las skyes pa ni nya la sogs pa'o/ /thang las skyes pa ni ri dwags la sogs pa'o/ /gnas pa lta bu zhes bya ba ni gnas su gyur pa'o/ /de dag gi gnas dang yul du gyur pa zhes bya bar sbyar bar bya'o/ /de dag na gnas pa bsad pa'i phyir nya la sogs pa rnams kyis chu 'gram dang /mtsho 'gram la sogs pa gtsor gyur pa'i sa phyogs dang / dgon pa dang / ngas 'dab la sogs pas bsdus pa rnams slong na sems can de dag la gnod pa spang ba'i phyir ster bar mi byed do/ /gang ci yang rung zhes bya ba ni de lta bu'i rigs gzhan thams cad kyang zhes bya ba'i don to//dga' ba dang rtsed mo'i nye bar mkho bar gyur pa'i dngos po rnams kyang nyes par spyod pa dang bag med pa'i gnas spangs nas sbyin par bya'o zhes bstan pa'i phyir/ glang po che la sogs pa gang yin pa de dag ces bya ba la sogs pa la/ dga' bar bya ba'i phyir zhes bya ba ni rgyu des byang chub sems dpa' la de dag dga' ba drag po skye bar 'gyur ba dang /gus pa 'thob par 'gyur ba dang / rgyu des de dag yongs su smin par 'gyur ba'o/ /gcig tu nad 'phel bar byed pa dang / nad skyed par byed pa de lta bu sbyin par mi bya'o zhes bstan pa'i phyir/ slong du zin kyang kha zas dang btung ba tshod ma zin pa rnams la zhes bya ba la/tshod ma zin pa zhes bya ba ni phan pa yin du zin kyang shin tu mang po ni legs par zhu bar mi 'gyur ba'i phyir ro/ /mi phan pa ni tshod zin kyang mi sbyin no/ /brkam pa'i rang bzhin can zhes bya ba ni kha zas kyi tshod mi zin pa dang / kha zas bsod pa la sred pa rnams la yang mi sbyin pa'o//dga' mgur byed pa'i dbang du byas nas smras pa/ mya ngan gyis gdungs pa rnams la zhes bya ba la sogs pa la/ de'i phyir dga' mgur byed du mi 'jug go zhes bya ba'o/ /thams cad du sbyin par bya ba ma yin pa'i dngos po bstan pa'i phyir pha ma zhes bya ba la de'i rgyu bstan pa'i phyir/bla ma lta bu'i gnas kyi mchog ces bya ba smos te/ bdag gi lus skyed par byed pa'i phyir dang / phan pa chen po byed pa yin pa'i phyir dang / de dag bdag gi dbang du gyur pa ma yin gyi/ bdag ni de dag gi dbang du gyur pa yin no zhes bstan pa'i phyir nu ma bsnun pa dang rgya che ba'i kha zas rnams kyis gso ba dang skyed pa yin pa ni mi phan pa spong bar byed pas so//de dag gis mi mthun pa dang mthun pa spangs pa dang nye bar bsgrubs pas lus gsos shing bskyangs pa'i phyir bla ma'i gnas su bstan pa yin no/ /dus yun ring por zhes bya ba ni ji srid 'tsho'i bar du'o/ /spyi bo la zhes bya ba ni yan lag gi mchog ste/dka' ba spyod pa'i bya ba bstan pa'i phyir ro/ /de bzhin du bskur bar bya'o zhes bya ba ste/ nges par bas la bar bya ba yin pa'i phyir ro/ /de dag ji ltar dga' ba de ltar spyad par bya ba'i bdag nyid rang dbang du dga' mgur spyad par ni mi bya'o zhes bstan pa'i phyir/ sbyin par ji ltar sems te zhes bya ba ni yid kyis kyang mi bsam pa'o//lus dang ngag gis sbyin pa lta smos kyang ci dgos/ zil gyis mnan nas sems can rnams sbyin par bya ba dgag pa'i phyir smras pa/ phrogs te gzhan dag la sbyin par mi byed kyi zhes bya ba la sogs pa la/ rgyal po ni de'i rigs can no/ / dbang bskur ba ni dbang bskur pa'i gnas thob pa'o/ /bdag por gyur pa ni bka' thogs pa med par sgrub pa'o/ /yul de na nye bar gnas pa'i 'khor dang gnyen rnams kyi dpon yin na yang so rang rang bdag por gyur pa yin pa'i phyir bran ni ma yin pas de'i phyir stobs kyis phrogs nas sbyin par mi bya'o//rgyal srid nye bar longs spyod pa'i dngos po sbyin pa'i sgo nas de dag la sbyin pa yin no zhes bstan pa'i phyir/ gzhan dag las phrogs te gzhan dag la zhes bya ba la sogs pa'o/ /bdag gi dbang du gyur pa yin na yang sems pa'i gnas skabs dang / len pa po'i gnas skabs la ltos nas sbyin par mi bya bar bstan pa'i phyir bstan pa/bdag gi bu dang chung ma dang zhes bya ba la sogs pa la/ legs par brda ma sprad pa ni rjes su mthun par ma dris pa ste/ de dag la spro ba dri ba med par ro/ /de'i phyir smras pa/ mi 'dod bzhin zhes bya ba'o/ /de nyid ni yid mi dga' bzhin du ste/ gdong mchi mas gang zhing bral ba'i sdug bsngal gyis zil gyis mnan cing de dag la sdug bsngal drag po skyes nas gzhan dag la ni phan gdags pa tsam byed pa de lta bu med de//thams cad la snyoms pa'i snying rje can yin pa'i phyir ro/ ji skad bstan pa'i phyir skyon rnams med na yang gnas ma yin pa la sbyin par mi byed do zhes bstan pa'i phyir legs par brda sprad de yid dga' zhing zhes bya ba la sogs pa la/brjed ngas pa rnams zhes bya ba ni shin tu 'khor rnams la drag shul byed pa'o/ /rigs dang rjes su 'tsham pa dang / de la gzhan dag dmod par 'gyur ba'i phyir dang / des las de lta bu mi nus pa nyid ni bran du sbyin par mi bya ste/des na smras pa/ skyid de bar 'dug pa zhes bya ba la sogs pa'o/ /rgyal srid sbyin pa'i dbang du byas nas smras pa/ shes cher gzhan la gnod pa byed par zhugs shing zhes bya ba la sogs pa la/ shas cher sems can rnams kyi srog gcod pa la zhugs pa rnams la yang sbyin par mi byed de/yul rlag par byed pa rnams la zhes bya ba'i don to/ /rgyal srid las kyang 'byin par byed do zhes bya ba ni bsam pa dge ba yin pa'i phyir ma byin par len par thal bar mi 'gyur ro/ /rang gi 'khor rnams kyi nor rnams kyang rnam par dbye ba bstan pa'i phyir/ pha ma'i longs spyod phrogs te slong ba rnams la sbyin par yang mi byed do zhes bya ba la sogs pa la/de dag la ni bdag nyid sbyin par bya ba yin pa'i phyir de dag gi bdag mi len gyi de dag nyid sbyin pa la nges par sbyor ba ni byed do/ /de ltar na kha na ma tho ba med par 'gyur ro/ /de bzhin du/ gnod pa byas nas gtong bar yang mi byed do zhes bya ba ni de dag la gzhan ster ba med pa'i phyir dang /bsrung bar bya ba yin pa'i phyir dang / mi snyan par brjod pa'i rgyu yin pa'i phyir yang sbyin par mi byed do/ /chos kyis rnyed pa gang yin pa de sbyin par bya'o zhes bstan pa'i phyir smras pa/ chos kyis bab col ma yin par zhes bya ba la sogs pa la/byang chub sems dpa'i sbyin pa ni nyon mongs pa can ma yin pas rab tu phye ba yin pa'i phyir sbyin par bya ba'i rdzas kyang nyon mongs pa can rab tu dgag pa'i phyir ro/ /pha rol la gnod pa byas pas kyang ma yin no zhes bya ba ni gzhan gyi rdzas phrogs nas mi sbyin zhes bya ba'i don to/ /dge sbyong gi yo byad kyi dbye ba bstan pa'i phyir smras pa/sangs rgyas bcom ldan 'das rnams kyi zhes bya ba la sogs pa la/ sangs rgyas bcom ldan 'das rnams kyi bslab pa bcas pa'i kha na ma tho ba rnams ni thams cad kyi thams cad du 'dra ba ma yin te/ kha cig gi ni nyung ngo / /kha cig gi ni mang ngo / /de'i phyir dge sbyong gi 'tsho ba'i yo byad rnams mi sbyin par bslab pa bcas pa yin no//des na lhung bzed dang chos gos la sogs pa rnams slong ba la mi sbyin par bstan to/ /bdag nyid la gnod pa mi bya ba'i bslab pa yang bcas pas nang gi bdag nyid rnams sbyin par mi bya'o/ /de bzhin du ji ltar rigs pa thams cad du sbyar bar bya'o//mi mnyam pa'i sbyin pa dgag pa'i phyir de dag gi ngo bo la bltas nas sbyin par mi byed do/ /sems can thams cad la snyoms pa'i sems kyis zhes bya ba la sogs pa la/ byang chub sems dpa' slong ba thams cad la rnam pa gnyis kyis mnyam pa'i 'du shes bskyed pas kun du spyad par bya ste/dge ba'i bshes gnyen gyi 'du shes sam/ sbyin gnas kyi 'du shes bskyed par bya'o/ /'dir sbyin gnas kyi 'du shes bskyed pa'i dbang du byas nas smras pa/ sems can kun la snying rje can/ /khyod la mngon du phyogs 'di rnams/ /snod dang snod min ma mchis par/ /bdag nyid chen po'i mchod gnas bgyid//ces bya ba'i tshig gis so/ /ji skad smras pa ma yin pa'i sbyin pa dgag pa'i phyir smras pa/ ji skad smras pa dang / ji ltar dam bcas pa las zhes bya ba la sogs pa la/ khyad par du 'phags pa'am/ mang po ster ba la ni ji skad smras pa bzhin mi ster ba'i nyes pa med par bstan pa'i phyir/mtshungs pa'am/ lhag pa kho nar byed do zhes bya ba'o/ /rnam par g.yengs pa'i sbyin pa dgag pa'i phyir/ yid mi dga' ba dang zhes bya ba ni byang chub sems dpa' ni mi dga' ba'am/ dman pa'i sems kyis sbyin pa med de/ de ni dman pa dang / mi mos pas sbyin pa bsdus pa'i phyir ro//byang chub sems dpa'i sbyin pa ni dman pa ma yin pa la sogs pas rab tu phye ba yin pa'i phyir ro/ /de dag las bzlog pas ni bla na med pa yang dag par rdzogs pa'i byang chub kyi tshogs kyang rigs pa ma yin no/ /khros pa dang zhes bya ba ni rang gi 'khor rnams la ste/'di dag la med na yang rung zhes bya ba'i bsam pas sbyin par mi byed pa dang / byang chub sems dpa'i sbyin pa ni gzhan la phan pa'i phyir zhugs pa yin pa'i phyir ro/ /dmod pa'i sbyin pa dgag pa'i phyir/ yang dang yang du dmod par yang mi byed do zhes bya ba la sogs pa la/dmod par yang mi byed ces bya ba ni brnyas par mi byed pa'o/ /de bstan pa'i phyir/ yang dang yang du zhes bya ba la sogs pa ste/ phongs pa'i gnas skabs las ngas phan btags so zhes brjod pa'o/ /gus par ma byas pa'i sbyin pa dgag pa'i phyir/ brnyas shing ma gus par zhes bya ba la sogs pa'o//rgyab kyis phyogs pa'i sbyin pa dgag par bya par bya ba'i phyir/ /log par sgrub pa rnam pa sna tshogs la gnas zhes bya ba la sogs pa la/ rgod pa zhes bya ba ni ma zhi ba'i bdag nyid can no/ bdag nyid ma bsdams pa ni lus dang ngag ma bsdams pa'o/ /log par sgrub pa nyid bstan pa'i phyir/gshe ba/ khro ba zhes bya ba la sogs pa'o/ /de dag la yang phan gdags pa'i sems su bya'o zhes bstan pa'i phyir/ gzhan du na byang chub sems dpa' ni de dag nyid la zhes bya ba la sogs pa'o/ /lta ba ngan pa mchog tu 'dzin pa'i sbyin pa dgag pa'i phyir/ lta ba ngan pa mchog tu 'dzin cing zhes bya ba la sogs pa la/de yang rnam pa gnyis te/ phyin ci log gi chos dang ldan pa'i phyir chos ma yin pa la chos su 'du shes pas 'jug pa ste/ gang gi phyir smras pa/ gnod pa chen po'i mchod sbyin rnams dang zhes bya ba la sogs pa la/ gong du yang gzhan la gnod pa byed pa'i sbyin pa mi bya bar bstan na/da ltar ni lta ba ngan pas yongs su gzung ba'i sbyin pa 'gog par byed pa yin pas zlos pa'i skyon yod par thal bar mi 'gyur ro/ /'tshe ba'i sbyin pas zhes bya ba la sogs pa la/ lha'i rigs la sogs pa dge mtshan dang / bkra shis dang mi ldan du zin kyang nyi ma dang rgyu skar la sogs pa rnam par rtog pa'i sbyor bas so//tshul khrims dang brtul zhugs mchog tu 'dzin pa'i lta ba sngon du song ba yin na yang dgag par bya ba'i phyir/ shin tu rnam par dag pas kyang zhes bya ba la sogs pa ni thar par yongs su bsngos pa yin na yang zhes bya ba'i don to//'bras bu la lta zhing zhes bya ba ni 'bras bu la ltos pa dang bcas pa'o/ /de dag gis ni rnam par smin pa la re ba dang bcas pa'i sbyin pa bstan to/ /de'i phyir smras pa/ byang chub tu yongs su sngo bar byed de zhes bya ba'o/ /'bras bu med par lta ba dang / yid ches pa med pa'i sbyin pa dgag pa'i phyir sbyin pa rnam pa thams cad kyi 'bras bu zhes bya ba la sogs pa la/yang dag pa ji lta ba bzhin du shes rab kyis shes so zhes bya ba ni tshig gi lhag ma'o/ /dad pas mngon par yid ches pa skyes pa ni gzhan gyi dring mi 'jog cing rang gis sbyin pa'i 'bras bu la nges pa thob pa'o/ /sogs pa'i sgras bsdus pa/sman byin pas nad med pa mang bar 'gyur ba dang / gnas byin pas thams cad kyi sbyin bdag tu 'gyur ro/ /rkyen bzlog pa'i sbyin pa dgag pa'i phyir/ dbul por 'gyur du dogs pa'i 'jigs pas zhes bya ba la sogs pa'o/ /rjes su mthun pa ma yin pa'i sbyin pa dgag pa'i phyir/ zas dang skom lhag mar gyur pa zhes bya ba la sogs pa la/zhag lon pa zhes bya ba ni khengs bu nyid do/ /ma bsnyad ma sbran pa zhes bya ba ni go bar ma byas pa ste/ go bar byas na nyes pa med do zhes bstan pa yin no/ /mi mthun pa'i las byed du 'jug cing zhes bya ba ni las gang de yang 'tsham pa ma yin pa'o/ / yongs su ngal ba'i sbyin pa dgag pa'i phyir/ slong ba po yang dang yang bslang dgos pa dang zhes bya ba la sogs pa la/ slong ba po'i nyon mongs pa ni rnam pa gsum du bstan pa'i phyir/ yun ring du bslang dgos pa ni gang yang smras pa/ yang dang yang bslang dgos pa dang zhes bya ba'o/ yang dang yang 'ong dgos pas ni gang yang smras pa/song zhing phyir 'ong du gzhug pa dang zhes bya ba'o/ /'khor 'dod pa nyid kyis bsring ba'i phyir gang smras pa/ rnyed pa 'tshol ba'i tshul gyis nyon mongs shing zhes bya ba'o/ /rten cing sbyin pa dgag pa'i phyir/ sgra dang tshigs su bcad pa la rten cing sbyin pa sbyin par mi byed do zhes bya ba la sogs pa'o//shes par byed pa tsam gyi sbyin pa dgag par bya ba ni gzhan gyis go bar bya ba'i phyir dang / gzhan gyis shes par bya ba'i phyir sbyin pa'o/ /de'i phyir smras pa/ pha rol rgyal po'am zhes bya ba la sogs pa'o/ /phongs pa'i tshul gyis sbyin pa dgag pa'i phyir/ bkren pa'i tshul du sbyin pa sbyin par yang mi byed ces bya ba ni 'tsho ba'i phyir sri zhing nyung shas las mi ster ba'o/ /yid ches pa bskyed nas rgyus sbyin pa dgag pa'i phyir/ 'di sbyin pa 'dis brid de zhes bya ba'o/ /gzhan 'byed pa'i sbyin pa dgag pa'i phyir/ 'di lta ste zhes bya ba la sogs pa la/skyon rnams kyang de dang der ji ltar rigs par bya'o/ /mkhas pa zhes bya ba ni bya ba nyams su len pa la gzo ba'o/ /le lo med pa ni snyom las dang bral ba'o/ /bya ba brtsams pa'i sbyor ba dang ldan pas sgrub phod pa phun sum tshogs pa'o/ /de nyid kyi phyir bdag nyid kyis sta gon du bsngogs pa yin no//rjes su mthun pa ma yin pa'i sbyin pa dgag pa ni zas sbyin pa'i dus su ste/ slong ba'i tshogs chen po 'dus pa'i tshe zhes bya ba'o/ /sbyin par bya ba'i chos dag las nyung ngu ster ba dgag pa'i phyir/ nyung ngu sbyin par mi byed do zhes bya ba'o/ /bdag gi mi mthun pa'i phyogs su gzung ba tshar bcad pa'i phyir/sbyin par byed pa dgag pa'i phyir/ gzhan la brtse ba'i phyir gzhan dag la sbyin pa sbyin par mi byed ces bya ba smras so/ /ma dad pa'i sbyin pa dgag pa'i phyir/ snga rol nyid nas kyang yid dga' la zhes bya ba la sogs pa la/ sbyor ba'i dus na chags pa'i dri ma dang bral ba'i phyir yid dga' ba'o//dngos gzhi'i dus na len pa po la phrag dog gi dri ma dang bral bas sems dga' bar byed cing ngo / /mjug gi dus na 'gyod pa'i dri ma dang bral bas byin nas kyang 'gyod pa med pa nyid de/ phan yon mthong ba'i phyir ro/ /bcos ma sbyin pa dgag pa'i phyir/ g.yo sgyu'i sbyin pa sbyin par mi byed do zhes bya ba la sogs pa'o//ma btang ba'i sbyin pa dgag pa'i phyir/ nyung du'am mang po ci yang rung zhes bya ba la sogs pa'o/ /phan yon rnam pa bzhi lhag par mthong ba'i byang chub sems dpa' ni ma btang ba med pa'i sbyin pa gtong bar 'gyur te/ yid kyis dngos po yongs su gtong bas ser sna'i dri ma spang ba dang /yongs su 'dzin pa'i skyon dang bral ba dang / slong ba rnams kyi yid ngal bso ba'i gnas su gyur pa dang / bdag nyid la dad par 'gyur ba'i rgyu mtshan gyi ngag dang ldan pa'o/ /slong mo pas bdag gi nor bzhin no zhes bya ba ni/ dus re zhig tsam yongs su longs spyod pa'i sgo nas bdag la gtams pa slar len pa'i nor gyi bdag po bzhin no//som nyi med par slong ba yang de bzhin no zhes bstan pa'i phyir dang / dus ma yin par dus su rung ba sbyin pa rab tu dgag pa'i phyir/ dus su sbyin pa sbyin par byed kyi zhes bya ba la sogs pa la/ yang dus ni sdom pa la gnas pa dang /gnas skabs thob par gyur pa ste/ zas la longs spyad par 'os pa'i dus su sbyin pa'o/ /rung ba sbyin pa ni bdag dang len pa po gnyis ka la gnod pa med pa dang / don ma yin pa dang / grags pa ma yin pa med pa'o/ /tshul bzhin du sbyin par byed kyi zhes bya ba ni/ 'jig rten thams cad kyis bsngags pa spyod pa ste/rtsa ba med pa'i gnas su sbyin pa zhes bya'o/ /'khrul pa'i sbyin pa spang ba'i phyir/ sems ma g.yengs par sbyin par byed kyi zhes bya ba la sogs pa'o/ /dpyas byed cing sbyin pa dgag pa'i phyir/ slong ba la 'phya bar mi byed ces bya ba la sogs pa'o//bsting bar mi byed pa ni skyon zur gyis smra bar mi byed pa'o/ /spa 'gong ba ni ngan pa'am rtsub po smra bas so/ /khro gnyer can du mi byed pa ni sems 'khrugs par mi byed pa'o/ /brgyangs te sbyin pa dgag pa'i phyir/ sbyin pa brgyangs te sbyin par mi byed ces bya ba'o/ /gzhan 'dod pa la sbyin par bstan pa'i phyir/yon tan dang ldan pa dang / sbyin gnas rnams la 'dod pa dang sbyar nas rjes su sbyin pa'o/ /lkog tu gyur pa'i sbyin pa dgag pa bstan pa'i phyir/ rang rang gis blangs pa de dag ces bya ba la sogs pa'o/ /blo sngon du ma song ba'i sbyin pa dgag pa'i phyir/ 'chal ba'i shes rab kyis sbyin pa sbyin par mi byed ces bya ba'o//sbyin par bya ba'i chos bdog kyang rung / mi bdog kyang rung skyid cing ste nye bar mkho ba dang ma bral ba'o/ /bkren pa ma yin pa ni gnas skabs gzhan thob pa'o/ /phongs pa ma yin pa ni phyogs dang 'dzin pa yod pa'o/ /mgon dang bcas pa ni grogs byed pa gzhan yod pa'o//rten dang bcas pa ni rnam pa gang ci yang rung bas de nye bar sgrub pa'i thabs kyis yongs su zin pa dang ldan pa'o/ /'di dag las bzlog pa ni sdug cing zhes bya ba la sogs pa'o/ /tshim par bya ba dang zhes bya ba ni bkres pa dang / skom pa'i sdug bsngal bsal ba'o//'dod pa bzhin du yongs su bskang ba zhes bya ba ni bsam pa yongs su rdzogs par byed pa'o/ /ji ltar mngon par 'dus byas pa kho na bzhin du las su sgrub par byed do zhes bya ba ni/ ji ltar bsams pa ltar byed do zhes bya ba'i don to/ /de las gzhan pa dag rgyab kyis phyogs par gyur cing mdza' ba dang bral bar 'gyur ba spang ba'i don gyi thabs bstan pa'i phyir/slong ba de la 'di skad du zhes bya ba la sogs pa smos so/ /brdzun gyi tshig yongs su spang ba'i phyir/ rtog pa snga ma de nyid la brten te zhes bya ba smras so/ /yod de bdog kyang rung mi bdog kyang rung zhes bya ba ni zang zing gi sbyin pa'i dbang du byas pa'o//de bzhin du chos kyi sbyin pa yang ngo / /sbyin pa so so yang dag par rig pa ste/ sbyin pa'i bsam pa dang / sbyin pa'i bar du gcod pa dang / de'i gnyen po'i phyogs kyi ye shes dang / lhag pa'i bsam pa dang / lhag par mos pa'i sbyin pa ni shes rab kyi sbyin pa'i rnam pa la gzhag par rig par bya'o//ser sna can sbyin pa la ma zhugs pa rnams sbyin pa'i sa bon bskyed pa la mkhas pa'i dbang du byas nas shes rab can gyi sbyin pa gtang ba'i phyir smras pa/ yod de bdog na ser sna can gyi khyim dang zhes bya ba la sogs pa la/yo byad rnams 'dzin cing mi 'dor ba ni ser sna can zhes bya ba'o/ /yang dang yang ser sna byed pa ni mchog tu ser sna can no/ /des na smras pa/ yo byad rnams kun du 'dzin cing zhes bya ba'o/ /yo byad rnams la shin tu sems zhen pa ni 'jungs pa zhes bya ba'o/ /sbyin par bya ba'i chos ni sbyin pa zhes bya ba'i tshig gi don to//'dis ni thams cad kyi thams cad du sbyin pa la ma zhugs par bstan to/ /byang chub sems dpa' song nas zhes bya ba ni yang dang yang song nas so/ /de sngon du 'gro ba'i yang dag par mgu bar bya ba'i sgo nas bag phebs par byas te mgu bar gyur pa dang /smras pa las mi 'da' bar shes nas tshur sheg ces bya ba ni nga'i gan du shog dang zhes bya ba'o/ /nor 'god pa med par zhes bya ba ni rang gi nor 'god pa med par te/ rang gi nor las 'god mi dgos par zhes bya ba'i don to/ /shin tu mang ba ni rgya chen po zhes bya ba'o/ /nye bar longs spyod pa'i dbang du byas nas ni longs spyod ces bya ba'o//sbyin par bya ba'i dbang du byas nas ni/ sbyin par bya ba'i chos zhes brjod do/ /sbyin pa'i pha rol tu phyin pa yongs su rdzogs par bya ba'i phyir zhes bya ba ni slong ba rnams bdag la dgos pa yod do zhes bya ba'i don to/ /slong ba dang phrad na zhes bya ba la/khyod nyid kyis sbyin par bya ba'am/ yang na nga'i gan du thong shig ces bcol ba'o/ /rnam pa 'di dag gnyis kyang slong ba la phan gdags par zhugs pas sbyin pa la 'dzud par byed do/ /gsum pa 'jug pa'i sgo bstan pa ni rjes su yi rang ba nyid do/ /de ltar rnam pa gsum gyis sbyin pa'i sa bon bskrun pa yin te/ser sna'i dri ma bsal ba'i phyir ro/ /shes rab dang thabs la mkhas pa sngon du 'gro bas de ltar rim gyis goms par byas pas sbyin pa la zhugs pa ni/ de'i mi mthun pa'i phyogs chags pa rim gyis spangs nas de'i gnyen po'i phyogs 'thob par 'gyur ro//rab tu byung ba'i phyogs kyi dbang du byas nas shes rab can gyi sbyin pa bstan pa'i phyir/ de'i mkhan po dang / slob dpon dang zhes bya ba la sogs pa la/ chags pa'i bdag nyid can yin pas na rang bzhin zhes bya ba ste/ yo byad la ched du byed pa nyid do/ /yang gang sbyin par bya ba'i chos med de/sbyin pa la ma zhugs pa 'dod pa'i bar chad du gyur pa rnams sangs rgyas la brten pa'am zhes bya ba ni/ sangs rgyas la dmigs nas sbyin pa'i rdzas yongs su btang bas bskrun cing de dag kyang byed du 'jug pa'o/ /de ltar bdag nyid kyang byed cing gzhan dag kyang byed du 'jug pa yin gyi/ bdag nyid tsam byed pa ni ma yin te/ thabs la mkhas pa'i phyir ro/ /de lta bu'i sgo nas bsdus pa dang / yongs su smin par 'gyur ro/ /mtshan ma tsam gyis zhes bya ba ni mi bsal ba zhes bya ba'i don to/ /sgyu tshong gis zhes bya ba ni chom rkun pa'i lugs kyis so/ /pha rol pa'i sbyin pa dang bral bar gyur pa dag la/shes rab kyi stobs kyis sbyin pa yang dag par bsgrub pa'i phyir bstan pa yin no/ /g.yo sgyus brid par gyur la zhes bya ba ni chom rkun pa'i rgyus so/ /des sngar ma rtogs te zhes bya ba ni bya ba'i dus na'o/ /dus phyis rtogs par gyur na yang rtogs bzhin du shes rab kyi stobs kyis rnam par 'gyur bar mi byed kyi/rdzas de gtong bar byed pa ni shes rab can gyi sbyin pa zhes bya'o/ /bsam pas zhes bya ba ni lhag pa'i bsam pas so/ /sbyangs pa zhes bya ba ni mkhas par sbyangs pa'o/ /mngon du byed pa ni nyams su len par byed pa'o/ /rdzas med cing mi bdog na gzhan dag yang dag par bskul bar bya'o zhes bstan pa'i phyir/gzhan dag la zhes bya ba la sogs pa'o/ /gzhan dag sbyin pa byed pa'i grogs byed du 'gro bas sbyin pa la 'jug pa bstan pa'i phyir/ yang na slong ba po lhags shing lhags pa rnams zhes bya ba la sogs pa la/ bdag nyid kyang rigs pas bsgrubs pa'i sbyin pa gtong bar byed do//rnam pa gsum gyis nyes par bsgrubs pa'i sbyin pa yin par bstan pa nyid de/ phyogs su lhung bas sbyin pa dang / spyod lam ngan pas zhugs pa nyid dang / dran pa brjed ngas pa zhal ta byed pa nyid do/ /lhag pa'i bsam pa dag pa'i sa la zhugs pa ni ngan 'gror 'gro ba'i 'jigs pa las yang dag par 'das pa'i phyir/ngan 'gror 'gro ba las 'das pa thob pa yin no/ /de bzhin du 'tsho ba med pa'i 'jigs pa las yang dag par 'das pa'i phyir longs spyod chen po nyid rab tu 'thob pa yin no/ /chos kyi sbyin pa'i dbang du byas nas smras pa/ mu stegs can glags tshol ba la zhes bya ba la sogs pa la/mu stegs can bstan pa 'di la sdang ba gzhan gyi bug pa dang skyon tshol ba'o/ /chos khas 'chad pa'am zhes bya ba ni ston pa dang / 'chad pa dang / 'grel pa'o/ /glegs bam du byas pa ni gzhung du gtogs pa'o/ /chags pa'i rang bzhin nyid mtshon par bya ba ni rnam pa gnyis te/dngos po gzhan la chags pa'am/ glegs bam nyid la chags pa ste/ zhen pa shin tu che ba'i phyir ro/ /skyon de dag gnyi ga med na yang don du mi gnyer ba la yang sbyin par mi bya'o zhes bstan pa dang / don du gnyer ba yin na yang rang gi bya ba rdzogs nas sbyin no zhes bstan pa'i phyir ro//rang gi don du glegs bam de bsgrubs pa'i don ma grub na ni ye shes chen po'i tshogs su gyur pa'i phyir gzhan med na ma byin na yang nyes pa med par bstan pa'i phyir gang gi don du zhes bya ba la sogs pa la/ de'i tshe so sor brtags nas nyes pa med par byas la sbyin par mi bya'o//nyon mongs pa'i dri ma yod na ni sbyin par bya'o/ /thog ma kho nar zhes bya ba ni dang po nyid du'o/ /byang chub sems dpa' rgyu rnam pa gsum gyis chos kyi sbyin pa byed de/ chos la ser sna byed pa gzhom pa'i don dang / ma 'ongs pa'i ye shes yongs su rdzogs par bya ba'i phyir dang /sems can rnams yongs su smin par bya ba'i phyir ro/ /gsum po 'di dag med par gyur na ma byin na yang kha na ma tho ba yod pa ma yin no zhes bstan pa ni/ phyi ma la chos kyi rnyed pa chen por 'gyur la/ mthong ba'i chos la ni rtogs pa chen por mi 'gyur na chos kyi mdzod de'i sgo nas dang /shes rab la mkhas pa'i sgo nas sems can mang po rnams la phan pa dang bde ba sgrub par byed do/ /de la sbyin pas ni sems can gcig nyid kyir 'gyur ro/ /de'i phyir sems can mang po'i dgos pa nye bar gnas pa mthong nas sbyin par mi byed de/ de ltar na yang kha na ma tho bar yang mi 'gyur te/nyes pa med pa'i phyir ro/ /'gyod par yang mi 'gyur ba ni phyis sems gdung ba med par 'gyur ba'o/ /dngos po yod cing slong ba rnams la ma byin na byang chub sems dpa'i chos las shin tu 'das par 'gyur ba de yang 'di la yod pa ma yin te/ blo sngon du song ba yin pa'i phyir ro//glo bur du mi sbyin no zhes bya ba ni tshig blang po yin pas de'i phyir smras pa/ khyod la mi sbyin no zhes bya ba la sogs pa la/ thabs la mkhas pas zhes bya ba ni ji ltar na brdzun du mi 'gyur ba de ltar ro zhes bya ba'i don to/ /ji ltar nyan thos rnams chos gos rnams brtags nas 'chang ba ltar bstan pa'i phyir smras pa/dper na zhes bya ba la sogs pa la/ sangs rgyas dang byang chub sems dpa' rnams la brtags pa'i yo byad yin pa'i phyir 'dzin pa med par yang 'gyur zhing yongs su 'dzin pa dang bcas na yang 'phags pa'i rigs la gnas par yang 'gyur ro//bsod nams kyi phung po rab tu mang po dang ldan par yang 'gyur te/ bla na med pa'i bsod nams kyi zhing la longs spyod thams cad bsngos pa'i phyir ro/ /de dag ni byang chub sems dpa'i yo byad yongs su brtags pa'i phan yon yin no/ /phan yon gsum pa ni brdzun ma yin par slong ba rnams la bdag nyid ji ltar 'dod pa bzhin sgrub par byed de gang gi tshe slong ba rnams la sbyin par byed pa na sangs rgyas dang byang chub sems dpa' rnams kyis ni ma btang ba ci yang mi mnga' bas rjes su gnang ngo zhes bstan pa'i phyir smras pa/sems can rnams la ma btang ba de gang yang med do zhes bya ba la sogs pa'o//khyed la sbyin par gnang ba med do zhes bya ba ni sangs rgyas dang byang chub sems dpa' de dag gis zhes bsams nas smra bar byed pa'o/ /de dag ni snod ma yin pa la sbyin par mdzad pa ma yin pa'i phyir ro/ /dngos po gzhan yod na byin la de'i sems mi dga' ba med par byas la gtang bar bya'o//sbyin pa so so yang dag par rig pa thob pa'i byang chub sems dpa'i shes rab kyi sbyin pa bstan pa yin no/ /chos dang zang zing gi rang bzhin gyi sbyin pa zhes bya ba ni de dag gi rang bzhin nyid do/ /rnam grangs zhes bya bas ni chos so so yang dag par rig pa bstan te/sbyin pa dang / gtong ba dang / yongs su gtong ba dang / don gtong ba dang / nor rab tu sgrub pa dang zhes bya ba ni rnam grangs so/ /de bzhin du chos kyi sbyin pa la yang ngo / /mtshan nyid dang zhes bya bas ni so so yang dag par rig pa bstan te/ mtshan nyid kyis ni ngo bo nyid kyi sbyin par rig par bya'o//nges pa'i tshig dang zhes bya bas ni nges pa'i tshig so so yang dag par rig pa ston to/ /ser sna gcod par byed pa'am/ dbul ba sel bar byed pas na sbyin pa zhes bya'o/ rgyu dang 'bras bu dang rab tu dbye ba las zhes bya bas ni spobs pa so so yang dag par rig par bstan te/kha zas byin pas stobs dang ldan zhes bya ba'i rgyu dang 'bras bu lta bu'o/ /rab tu dbye ba ni chos kyi sbyin pa dang / zang zing gi sbyin pa dang / nang dang phyi'i dngos po sbyin pa zhes bya ba la sogs pa'o/ /shes rab kyi stobs kyis nyon mongs pa spongs bar byed do zhes bya bas shes rab can gyi sbyin pa bstan pa'i phyir/gnod pa byed pa rnams la zhe sdang spangs nas byams pa dang / sdug bsngal can rnams la gnod sems bsal nas snying rje dang / yon tan dang ldan pa rnams la phrag dog spangs nas dga' ba'i sems bskyed pa dang / phan 'dogs pa rnams la chags pa spangs nas btang snyoms kyi sems bskyed par bya'o//sngon ma goms pa zhes bya ba ni sngon gyi tshe rabs su zhes bya ba'i don to/ /goms par byas su zin kyang sbyin par bya ba'i chos nyung zhing med pa yang sbyin pa'i gegs byed pa gnyis pa'o/ /dngos po la zhen pa ni gsum pa'o/ /phyi ma la 'bras bu chen po 'byung ba mthong bas mngon par dga' ba ni bzhi pa'o//de la dang po gsum ni sbyin pa'i gegs byed pas na sbyin pa'i bar chad yin no/ /bzhi pa ni pha rol tu phyin pa rnam par gzhag pa la mi mthun par gyur par byed pa'i phyir ro/ /mi mthun pa'i phyogs dang gnyen po'i phyogs nyid ni rang nyid kyis sbyar bar bya ba'i phyir/gang gi phyir sbyin par bya ba'i zhes bya ba la sogs pa la/ sbyin pa la sems mi 'jug pa ni sbyin pa la sems mi dga' ba'o/ /ma byas pa ni bya bar 'os pa yin pas zhes byas nas so/ /phongs pa las gyur pa zhes bya ba la sogs pa la/ longs spyod chung ba las gyur pa'i sngon gyi las kyi nyes pas yi dwags rnams sam/dbul po'i khyim du skyes par gyur pas na gzhan gyi dbang du gyur pa'i phyir bcings pa la sogs pa thob par 'gyur ro/ /myong bar gyur gyi zhes bya ba ni skye ba de lta bu'o/ /pha rol la phan ma btags par zhes bya ba ni don med par zhes bya ba'i don to//sbyin pa'i sgo nas gzhan la phan gdags pa byas pas phongs pa'i sdug bsngal gyis bdag 'ching bar gyur kyang rung gi slong ba bzlog par ni mi bya'o zhes so sor rtog cing 'tsho bar bya ba'i thabs gzhan yang yod bzhin du slong ba rnams ci ste zlog par byed ces bstan pa yin no//yid du 'ong ba'i dngos po rnams kyang yongs su 'gyur ba'i sdug bsngal gyi rgyu yin pas de la zhen pa ni/ sdug bsngal la bde ba'i 'du shes su phyin ci log pa yin la/ phyin ci log ni sdug bsngal gyi rtsa ba yin pa'i phyir smras pa/ phyi ma la sdug bsngal skyed pa yin no zhes bya ba'o/ / phyin ci log tu yongs su shes nas zhes bya ba ni phyin ci log nyid du'o zhes bya ba'i don to/ /sbyin pa'i 'bras bu nyid bstan pa'i phyir/ longs spyod chen po zhes bya ba la sogs pa'o/ /log pa'i 'bras bu la lta ba las gyur pa zhes bya ba ni log pa la mngon par zhen pa las gyur pa'i 'bras bu'i nyes pa zhes bya ba'i don to//mi rtag pa rnam pa gsum gyis snying po med pa nyid du mthong ba dang / skad cig ma nyid kyis 'jig pa'i mi rtag pa yin pa'i phyir gang yang smras pa skad cig la 'jig pa'i ngang can dang zhes bya ba'o/ /rgyun gyis 'jig pa'i mi rtag pa nyid ni gang yang smras pa/ 'bras bu longs spyad pa rnams ni yongs su zad nas 'jig pa'i dang can zhes bya ba'o/ /'bral bas 'jig pa'i mi rtag pa nyid ni gang yang smras pa/ 'bral bas 'jig pa'i ngang can zhes bya ba'o/ /ma goms par rtogs pa dang / sdug bsngal dang du len pa dang / phyin ci log yongs su shes pa dang /'du byed la snying po med pa nyid du lta ba zhes bya ba ni gegs byed pa'i gnyen po rnam pa bzhi shes pa yin no/ /dang po gsum ni sbyin pa la 'jug pa'i rgyu yin pa'i phyir smras pa/ yang dag par sbyin pa sbyin par byed do zhes bya ba'o/ /bzhi pa ni byang chub chen por yongs su bsngos pas smras pa/yang dag pa'i bsod nams kyi 'bras bu yongs su 'dzin par byed de zhes bya ba'o/ /nang du bsdus nas zhes bya ba ni g.yeng ba med par ston pa yin no/ /bsam pa dag cing zhes bya ba ni bcos ma ma yin pa nyid du bstan pa yin no/ /de ltar na byang chub sems dpa' thabs kyis yongs su zin pa mngon par mos pa'i stobs las byung ba'i kun du rtog pa'i sbyin pa ste/sbyor ba las byung ba med par yang tshad med pa'i bsod nams skye ba'i rgyur 'gyur ba yin no zhes bstan pa yin no/ /ji skad bstan pa'i shes rab kyis sbyin pa mdor bstan pa'i phyir/ de ltar mdor bsdu na zhes bya ba la sogs pa la/lhag pa'i bsam pa'i sbyin pa'i mi mthun pa'i phyogs ni gnod sems la sogs pa'o/ /'di man chad ces bya ba ni thams cad sbyin pa'i phyogs gcig dka' ba'i sbyin pa la sogs pa rnam par gzhag par bya ba yin gyi thams cad sbyin pa las ma gtogs pa dka' ba'i sbyin pa la sogs pa logs na med par mtshon pa yin no//rgyu rnam pa gsum gyis sbyin pa sbyin par mi nus te/ shin tu bdag nyid la zhen cing chags pa dang / sbyin par bya ba'i dngos po la lhag par chags par gyur pa dang / sbyin par bya ba'i dngos po shin tu rnyed dka' ba nyid do/ /rgyu gsum po 'di dag byang chub sems dpa' zil gyis mnan cing spangs nas sbyin pa sbyin par byed pa ni/dka' ba'i sbyin pa zhes bya bar rnam par gzhag go/ /chung ngu bdog na zhes bya ba ni bdag nyid kyi 'tsho ba tsam gyis rab tu phye ba nyid do/ /bdag nyid la gnod pa byas te zhes bya ba ni thams cad kyi thams cad du bdag nyid yongs su spyad par bya ba rnams dang phral nas rgyun mi 'chad pa'i sdug bsngal zil gyis mnan cing nyin re bzhin ster bar byed pa ni dka' ba'i sbyin pa dang po ste/bdag nyid la ltos pa med pa'i phyir ro/ /sbyin par bya ba'i dngos po yang rnam pa gnyis te/ sems can du gtogs pa dang / sems can du gtogs pa ma yin pa'o/ /de la sems can du gtogs pa rnams la rgyu rnam pa gsum gyis zhen cing chags par 'gyur te/ skye ba gzhan dag tu goms pa'i sbyor bas rgyu med pa shin tu byams par 'gyur ba nyid ni gang yang smras pa/ rang bzhin gyis byams pa'am zhes bya ba'o/ / dus ring po nas 'brel pa nyid ni yun ring po nas 'dris pa'am zhes bya ba'o/ /bya ba sgrub pa la shin tu mkho bas kyang gang yang smras pa/ shas cher phan pa'am zhes bya ba'o/ /de lta bu'i dngos po rnams la chags pa btang nas ster ba'o/ /sems can du gtogs pa ma yin pa nye bar mkho ba'i dngos po rnams te/rin thang med pa'am/ rin thang shin tu che ba ni dngos po mchog ces bya'o/ /gya nom pa'am/ kha dog la sogs pa phun sum tshogs pa ni rab mchog tu gyur pa zhes bya'o/ /de lta bu la zhen pa ste/ chags pa zil gyis mnan nas sbyin par byed cing / 'di lta bu la yang ltos pa med pa ni dka' ba'i sbyin pa zhes bya'o//rgyu rnam pa gsum gyis dngos po tshogs chen pos sgrub pa yin te/ /bdag nyid bsod nams chung ba nyid dang / yul gyi stobs chung ba nyid dang / dus kyi stobs chung ba nyid de/ de lta bur rnyed par dka' ba'i dngos po rnams yang rnyed pa la ltos pa med par rjes su ster bar byed pa'o//gang sbyin par bya ba yang sgo gnyis nas 'jug pa yin la/ gang dag la sbyin par bya ba yang sgo gnyis nas 'jug pa yin pas thabs thams cad kyi sgo nas sbyin pa ni rnam pa bzhi ste/ sgo bzhi nas 'jug pa'i phyir ro/ /bdag dbang ba'i dngos po rnams kyis ma la sogs pa rang gis yongs su gzung ba nges par gso zhing dgang dgos pa rnams la gcig tu gso bar bya ba yin pas ster bar byed do//sdug bsngal ba rnams dang 'dod pa rnams la yang sbyin par byed do/ /de ltar sgo gnyis nas zhugs pa yin no/ / sbyin par bya ba'i chos bdag dbang ba med na gzhan gang su yang rung ba 'dun pa bskyed nas chos dang mthun par thob pa de snga ma bzhin du rnam pa gnyis la sbyin par byed do/ /de yang sgo gnyis nas zhugs pa yin pas de lta bu'i rnam pa bzhi ni sgo bzhi nas zhugs pa zhes brjod do/ /byang chub sems dpa' ni skyes bu'i mchog yin pas skyes bu dam pa zhes bya'o//de'i sbyin pa thams cad ni skyes bu dam pa'i sbyin pa zhes bya bar rnam par gzhag par bya ste/ dri mi zhim pa'i mar bzhin no/ /yang de ni rnam pa lnga ste/ byang chub sems dpa' la ni ma dad pa'i sbyin pa med do/ /de'i phyir dad pas sbyin pa ni skyes bu dam pa'i sbyin pa nyid de//dus gsum du yang rab tu dga' ba dang ldan pa'i phyir dad pa'i sbyin pa zhes brjod pa'am/ dge ba'i rtsa ba gsum gyi khyad par dang yang dag par ldan pa'i phyir ro/ /bkur sti byas pa'i sbyin pa dang / lag dar ba'i sbyin pa dang / thob pa'i dus su sbyin pa dang /gzhan la mi gnod pa'i sbyin pa'o/ /skyes bu dam pa'i sbyin pa rnam pa lnga po 'di yang mdor bsdus na rnam pa gnyis su gzhag par bya ste/ dang po ni bsam pa nyid kyis so/ /bzhi ni sbyor ba nyid de/ bstod pa dang / bya ba dang / nye bar longs spyad pa grub pa dang / gzhan la mi gnod pa'i dbang du byas pa'o//yang rnam pa bzhir rig par bya ste/ lhag par mos pa'i khyad par nyid dang / rang gi sbyor ba'i khyad par nyid dang / dus kyi khyad par nyid dang / gzhan la mi gnod pa'i khyad par nyid do/ /yang mi gnod par sbyin pa yang rnam pa gnyis te/ rang gi 'khor rnams dang /yongs su 'dzin pa dang bcas pa rnams la ste/ rang gi rdzas yin na yang rdzas grub pa'i 'khor rnams gdong mchi ma dang bcas par gyur na yang sbyin par mi byed do/ /yongs su gzung ba dang bcas pa rnams kyi nor phrogs nas kyang sbyin par mi byed do/ /rnam pa thams cad dang ldan pa ni rnam pa thams cad kyi sbyin pa ste/de dag gi rnam pa ni mdo de dang de dag tu gsungs pas de dag gi rjes su 'brangs nas rig par bya'o/ /lhug par gtong bas na mi rten par sbyin pa zhes bya ba ste grags pa la sogs pa mi 'dod pa nyid do/ /rtag tu lag brkyang bas na mi sri bar sbyin pa zhes bya ste/lag pa brkyang ba dang ldan pa nyid kyi phyir ro/ /gtong pa la dga' ba'i phyir dga' bas sbyin pa zhes bya ste/ dus gsum du rab tu dga' ba dang ldan pa'i phyir ro/ /rtag pa'i mchod sbyin dang ldan pas na rgyun mi 'chad par sbyin pa zhes bya ste/ rtag tu sems can skyob pa'i sbyin pa gtong ba dang ldan pa nyid do//gtong ba dang yang dag par ldan pa ni snod la sbyin pa ste/ 'tsho ba log pa ma yin pa la sbyin pa'o/ /bgo bsha' byed pa la dga' ba ni snod ma yin pa la sbyin pa ste/ dge sbyong rnams nas lam nas 'gro ba'i bar thams cad la sbyin pa zhes bya ba'o/ /nang gi bdag nyid can gyi dngos po thams cad ma lus par gtong ba ni thams cad sbyin pa'o//gnod pa byed pa dang / phan pa byed pa dang / yon tan dang ldan pa rnams dang / sdug bsngal ba rnams la sbyin pa ni kun la sbyin pa zhes bya'o/ yang na rang gi yul dang yul gzhan du yang sbyin pa ni kun la sbyin pa'o//nyin mo dang mtshan mo thams cad du sbyin pa ni dus thams cad du sbyin pa ste dus nges pa med pa nyid do/ /yang dus thams cad du sbyin pa zhes bya ba'i phyug pa'i dus dang dbul ba'i dus thams cad du sbyin pa zhes bya ba'o/ /dpyas dang bcas pa'i dngos po'i sbyin pa ma yin pa ni kha na ma tho ba med pa'i sbyin pa zhes bya ba'am/kun nas nyon mongs pa med pa'i sbyin pa nyid do/ /'du ba'i sgor gyur pa'i sbyin pa ni/ dngos po thams cad sbyin pa zhes bya ste/ 'du ba'i sgor gyur pa ni zhing gi dngos po la sogs pa'o/ /gang gi phyir smras pa/ yul gyi dngos po zhes bya ba ste/'du ba'i nor dang 'bru'am de la sogs pa'o/ /la la nas ni sems can gyi dngos po thams cad sbyin pa zhes 'don te/ de lta na ni sems can ma yin pa'i dngos po sbyin pa nyid kyang 'don par 'gyur bar thal bar 'gyur ro/ /phongs pa dang 'dod pa ni phongs shing 'dod pa ste 'dod pa nyid ni 'dod pa dang ldan pa'o//de la sbyin pa ni phongs shing 'dod pa la sbyin pa ste/ phongs pa bsal ba'i phyir dang / 'dod pa spang ba'i phyir zhugs pa zhes bya ba'i don to/ /rgyan dang snod spyad 'dod pa nas byug pa 'dod pa'i bar ni 'dod pa la sbyin pa zhes bya ste/sems dga' bar byed pa'i phyir ro/ /zas sbyin pa la sogs pa ni phongs pa la sbyin pa zhes bya ste/ phongs pa spong bar byed pa dang / sdug bsngal bzlog pa'i rgyur gyur pa dang / rgyas par byed pa'i phyir ro/ /sdug bsngal rnam pa drug spang bar bya ba'i phyir sbyin pa rnam pa brgyad du rig par bya'o/sdug bsngal rnam pa drug las bkres pa dang skom pa ni lhan cig skyes pa'i sdug bsngal sel ba'i sbyin pa zhes bya ba ni phongs pa de bsal ba'i phyir bza' ba dang btung pa sbyin pa'o/ /de yang rnam pa gnyis te/ bslangs pa dang / ma bslangs pa'o/ /de la ma bslangs pa ni bkres pa dang skom pas yongs su gdungs pa mthong nas ma bslangs par rang gis ster ba ste/de'i phyir ma bslangs pa'i sbyin pa zhes bya'o/ 'dod pa rnams kyis bslangs nas byin pa ni bslangs pa'i sbyin pa zhes bya'o/ /de bzhin du bzhon pa la sogs pa la yang ji ltar rigs par sbyar ro//lam du 'gro ba'i yan lag ma tshang bas sdug bsngal bsal bar bya ba'i phyir bzhon pa sbyin pa'o/ /bgo ba med pa'i sdug bsngal ni gsang ba dgag pa dang bral ba rnams la de bsal bar bya ba'i phyir gos sbyin par byed do/ /'dod pas phongs pa'i sdug bsngal can rnams mngon par 'dod pa'i don 'dod pa dang ldan pa rnams la de bsal ba'i phyir rgyan nas brtsams nas dri dang byug pa'i bar sbyin par byed pa'o//grang ba dang tsha ba la sogs pa'i reg pa'i sdug bsngal brnag dka' ba bsal bar bya ba'i phyir brten te gnas sbyin par byed do/ /'gro 'ong la sogs pa'i tha snyad rgyun 'chad pa'i sdug bsngal can rnams la de bsal ba'i phyir snang ba sbyin par byed do//de ltar 'di dag ni sbyin par bya ba'i rdzas kyi dbye bas rnam pa brgyad du 'gyur ro/ /len pa po rnams la 'jig rten 'di dang 'jig rten pha rol du phan gdags par 'gyur bas 'di dang gzhan du bde bar 'gyur ba'i sbyin pa zhes bya'o//thams cad kyang bsdus nas gsum du brjod par bya ste/ zang zing gi sbyin pa ni dngos po gtong bas rab tu phye ba yin te/ lus nye bar brtan par byed pa'i phyir ro/ /mi 'jigs pa'i sbyin pa ni nyam nga ba'i gnas nas skyob par byed pa ste/ srog nye bar brtan par byed pa'i phyir ro/ /chos kyi sbyin pa ni bstan pa dang / bshad pa dang / nye bar bshad pas kha na ma tho ba med pa la sbyor bar byed pa ste/ sems nye bar brtan par byed pa'i phyir ro/ /zang zing gi sbyin pas phan 'dogs par byed pa mdor bsdus nas bstan pa'i phyir/ bzang po dang zhes bya ba la sogs pa la kha dog la sogs pa phun sum tshogs pas na bzang po'o/ /de dag gis ni dbang po lnga'i sgo nas phan 'dogs par bstan pa yin no/ /mi gtsang ba'i dngos po dang ma 'dres pas na gtsang ba'o/ /kha na ma tho ba med pa'i phyir rung ba'o/ /'di gnyis kyis ni yid kyi sgo nas phan 'dogs par bstan to//ser sna'i dri ma bsal ba'i phyir ni dngos po mchog sbyin par bstan to/ /sog 'jog gi dri ma bsal ba'i phyir ni mang po sbyin par bstan to/ /rnam pa 'di gnyis kyis ni slong ba'i mngon par 'dod pa'i don grub cing yid la re ba yongs su rdzogs par gyur pas yid kyi sgo nas phan btags par bstan pa yin no//sbyin pa rnam pa lnga po 'di dag ni 'di la bde ba yin te/ dbang po drug gi sgo nas ji ltar rigs par phan 'dogs par byed pa'i phyir ro/ /ser sna'i dri ma ni sems kyis kun du 'dzin pa ste sbyin pa dang 'gal ba'o/ /sog 'jog gi dri ma ni longs spyod kun du 'dzin pa ste/bdag nyid la longs spyod pa dang 'gal ba'o/ /'di dag gnyi ga yang sems can dman pa rnams kyi yin gyi gzhan dag gi ni ma yin no/ /de'i phyir/ dman pa'i 'jig rten zad pa'i 'jigs pa yis/ /bdag nyid mi spyod gzhan la'ang sbyin mi byed/ / ces bstan pa yin no/ /srog nyams pa'i 'jigs pa las bskyab pa'i phyir mi 'jigs pa'i sbyin pa bstan pa ni/ seng ge dang zhes bya ba la sogs pa'o/ /chos kyi sbyin pa ni rnam pa gsum ste/ mdo'i sde la sogs pa'i chos rnams don dang yi ge phyin ci ma log pa nyid du ston pa nyid dang / 'jig rten pa'i las thams cad kha na ma tho ba med par tshul bzhin du nye bar ston pa nyid dang /nyes par spyod pa las ldog pa yang dag par 'dzin du 'jug pa'o/ /chos rnams kyi sbyin pa ni chos kyi sbyin pa'o/ /chos kyang rnam pa gnyis te/ don 'dir ni bstan pa'i chos dang legs par spyad pa'i chos so//sems can gzhan dag la de dag gnyi ga nye bar sgrub pa'i dbang du byas nas chos kyi sbyin pa zhes bya'o/ /de dag thams cad mngon par bsdus nas ji ltar bstan pa'i zang zing la sogs pa'i sbyin pa sngar bstan pa'i rnam pa dgus bsdus pa rnams ji ltar rigs par 'di dang gzhan du bde bar bstan pa yin no//rab tu dbye ba dang bcas pa zhes bya ba ni zang zing gi sbyin pa'i dbye ba rnam pa lnga bstan pa'o/ /mi 'jigs pa'i sbyin pa yang rnam pa lnga nyid de/ seng ge la sogs pa'i dngos po las yongs su skyob pas bsdus pa'o/ /chos kyi sbyin pa ni rnam pa gsum mam/ sngar bstan pa'i dbye bas rgyas par rig par bya'o//rnam par dag pa rnam pa bcu'i spros pa'i rnam pa ni mdo nas bstan pas 'dir ni mdor bsdus nas bstan pa yin no/ /sbyin pa'i bar du gcod pa ni mang du 'byung la/ dal 'byor phun sum tshogs pa yang rnyed par dka' bar shes nas myur du sbyin pa ni thogs pa med pa'i sbyin pa'o/ /rkyen du byed pa de lta bur ni zhes bya ba ni byang chub sems dpa' ji ltar sbyin pa las brtsams te sems dga' bar 'gyur ba de ltar slong ba pos rnyed pa thob pas dga' bar mi 'gyur ba'o//de'i sgo nas shin tu myur du ster bar rig par bya'o/ /mdor bsdu na mchog tu 'dzin pa med pa'i sbyin pa ni rnam pa gnyis te/ med par smra ba'i log par lta ba ni sbyin pa'i 'bras bu med par lta bar mngon par zhen pa'o//gang gi phyir smras pa/ sbyin pa 'di'i 'bras bu med do zhe'am zhes bya ba'o/ /sgro 'dogs pa yang ngo / /de yang rnam pa gnyis so/ /rgyu ma yin pa la rgyur sgro btags pa ni tshul khrims dang brtul zhugs mchog tu 'dzin pa'i lta ba ste/gang gi phyir smras pa/ 'tshe ba'i sbyin pas chos su 'gyur ro zhe'am zhes bya ba la sogs pa'o/ /dman pa la mchog tu sgro btags pa ni lta ba mchog tu 'dzin pa ste/ gang gi phyir smras pa/ sbyin pa shin tu rdzogs pa tsam gyis zhes bya ba la sogs pa la/ sbyin pa ni dman pa ste/gcig tu 'dod pa na spyod par byed pa'i phyir ro/ /de la mchog ste rnam par dag pa'i rgyur mchog tu 'dzin pa'o/ /gzhan bsags pa med pa'i sbyin pa ni rnam pa gsum du rig par bya ste/ dge mtshan dang / bkra shis sam/ nyi ma bzang po la sogs pa la sdod pa dang / dus 'di la byin na 'bras bu chen por 'gyur ro zhes bya bas sbyin par bya ba'i chos rnams bsags shing bsdoms nas dus gcig tu byin na bsod nams chen por 'gyur ro zhes brtags pa dang /grags pa la sogs pa 'dod pa ste gsum po 'di dag byang chub sems dpa' la med do/ /de'i phyir byang chub sems dpa'i bsags pa med pa'i sbyin pa zhes bya'o//skyon yang yod de slong ba rnams phyir zlog par byed pa dang / sbyin par bya ba med do zhes zhe gcod pa'i tshig smra ba'o/ /de nyid bstan pa'i phyir/ byang chub sems dpa' ni phyir ldog par mi byed do zhes bya ba la sogs pa la/ slong ba ldog pa la dgos pa yang med pa'i phyir smras pa/bzlog par bya ba'i 'os kyang mi mthong na zhes bya ba'o/ /slong mo'i tshogs la dus gcig tu byin pa la bsod nams kyi khyad par yang ma mthong ba bstan pa'i phyir/ ci'i phyir bsod nams khyad par yod par zhes bya ba la sogs pa la/ de ltar bsags shing sbyin pa la ni kha na ma tho ba dang bcas par mthong la/ji ltar byung ba ster ba ni kha na ma tho ba med par mthong ngo / /de dag gnyi ga dgrol ba'i phyir/ de ci'i phyir zhe na zhes bya ba la sogs pa la/ mnar sems ni zhe sdang ngo / /mi bzod pa ni khro ba'o/ /yid mi ches pa ni rgyun du khon du 'dzin pa'o/ /dman pa dang / mnyam pa dang / khyad par du 'phags pa rnams la brnyas pa dang / 'gran pa dang / phrag dog mi byed par sbyin pa ni khengs pa med pa'i sbyin pa yin par bstan pa'i phyir slong ba po la dma' ba'i sems kyis zhes bya ba la sogs pa'o/ /grags pa'i don la mi brten pa'i sbyin pa ni rten pa med pa'i sbyin pa'o zhes bstan pa'i phyir/brten pa ni grags pa la ste sgra dang tshigs su bcad pa zhes brjod de/ brjod par bya ba yin pa'i phyir ro/ /go rims bzhin du brjod pa dang sbyor bas bsod nams zhes bya bar 'dod pa ni tshigs su bcad pa zhes bya'o/ /brag ca'i sgra dang 'dra bar grags pa yongs su ma grub par bstan par bya ba'i phyir grags pa ni rnam par rtog pa'i yi ge las byung ba dang zhes bya ba la/de nyid smras pa/ sgra tsam dang 'brel pa dang zhes bya ba la/ yi ge so sor dbye ba byas na ci yang dmigs par mi 'gyur ro zhes bya ba'o/ /snying po med pa nyid du bstan pa'i phyir lo ma skam po lta bu yin par 'dzin pa'i phyir zhes bya ba la/skam po zhes bya ba ni rnying nas sa la lhung ba'i lo ma zhes bya ba'i don to/ /kha cig ni me tog gi phreng ba la longs spyad nas dor ba yin zhes zer ro/ /dus gsum du dga' ba'i rnam pa dang ldan pa'i phyir zhum pa med pa'i sbyin pa zhes bstan te/byang chub sems dpa' chen po rnams kyi sbyin pa rgya chen po thos nas bdag gi lus kyis de lta bu mi nus so zhes bsams pa'i sgo nas sems bag 'khums pa med pa'o/ /nan tan du bsams shing yongs su brtags nas mchog dang rab mchog khyad par du 'phags pa'i dngos po sbyin pa ni ngan pa ma yin pa'i sbyin pa zhes bstan to//thams cad du mnyam pa'i sems kyis sbyin zhing mi mnyam pa'i sbyin pa med pa ni rgyab kyis phyogs pa med pa'i sbyin pa zhes bya ste/ 'das pa dang / da ltar dang / ma 'ongs pa'i dus gsum la ltos pas phan btags so/ /phan 'dogs so/ /phan 'dogs par 'gyur ba'o zhes bsams nas sbyin par mi byed do zhes byas nas so/ /sdug bsngal gyis skyo bas na bde ba 'dod pa zhes bya ba'o/ /bde ba dang ldan par gyur cig ces bde ba 'dod pa ni sreg pa'i mes tshig pa'o//rang nyid kyis sdug bsngal bsal bar mi nus pa ni mthu med pa zhes bya'o/ /rnam par smin pa'i sdug bsngal gyi bdag nyid yin pas na rang bzhin gyis sdug bsngal ba dag ces bya'o/ /'jig rten pha rol gyi mngon par mtho ba la re ba med pa nyid bstan par bya ba'i phyir dang /de'i rgyu bstan pa'i phyir/ 'du byed thams cad ni snying po med par lta ba la zhes bya ba la/ mi rtag pa gnyis dang rjes su 'brel pa'i phyir ro/ /rnam pa thams cad yongs su rdzogs pa'i sbyin pa yin pa'i phyir sbyin pa'i pha rol tu phyin pa la zhes bstan pa'i phyir smras pa/sbyin pa rnam pa dgu po 'di dag la brten te zhes bya ba la sogs pa yin no/ /byang chub sems dpa'i sa'i gzhi'i rnal 'byor gyi gnas las/ sbyin pa'i pha rol tu phyin pa'i le'u'i 'grel pa ste dgu pa rdzogs so// //pha rol tu phyin pa drug car rnam pa 'dra bar bstan pa'i phyir thams cad la ngo bo nyid ces bya ba la sogs pa sdom gyi tshigs su bcad pa gcig kho nas bstan te/ ngo bo nyid dang zhes bya ba la sogs pa'o/ /rnam pa dgu kho nas tshul khrims kyi pha rol tu phyin pa rnam par gzhag par rig par bya'o//rnam pa dgu rnam par gzhag pa ni sngar bstan pa kho na bzhin te/ ngo bo nyid bstan pa nas rnam par dag pa bstan pa'i bar rnams so/ /yon tan rnam pa bzhi dang ldan pa zhes bya ba ni rnam pa bzhis byang chub sems dpa'i tshul khrims kyi ngo bo nyid rnam par gzhag par rig par bya'o zhes bya ba'i tha tshig go//yon tan rnam pa bzhi ni mdor bsdu na rnam pa gnyis kyis rnam par gzhag ste/ len pa ni 'di ltar pha rol las zhes bya ba smos pa'o/ /bsrung ba ni tshig lhag ma rnams so/ /yang rnam pa gnyis te/ bsam pa dang sbyor bas tshig gcig dang tshig gsum gyis ci rigs par sbyar ro//yang tshul khrims rnam par dag pa'i rgyu dang / tshul khrims rnam par dag pa'i 'bras bu'i dbang du byas nas gzhag pa yin no/ /rnam par dag pa'i rgyu ni rnam pa gnyis te/ khrel yod pa ni gzhan la ltos nas legs par yongs su bsrung ba'i phyir 'di ltar/pha rol las legs par yang dag par blang ba zhes bya ba smos so/ /ngo tsha shes pa ni bdag nyid la ltos nas legs par yongs su bsrung ba'i phyir/ 'di ltar bsam pa shin tu rnam par dag pa zhes smos so/ /tshul khrims rnam par dag pa'i 'bras bu ni 'gyod pa med pa ste/yon tan phyi ma gnyis kyis bstan to/ /yang rnam pa gsum gyis bstan te/ bsam pa rnam par dag pa'i tshul khrims rnam pa gsum gyi dbang du byas nas byang chub sems dpa'i tshul khrims kyi ngo bo rnam par gzhag ste/rnam pa gsum gang zhe na/ bsam pa dag pa'i sgo nas byang chub sems dpa' chos smra ba'i gnas skabs su bdag nyid kyi tshig btsun par bya ba'i phyir tshul khrims yang dag par len pa'i phyir dang / byang chub sems dpa' rab tu byung ba ni bdag nyid bsod nams kyi zhing du 'gyur bar bya ba'i phyir/tshul khrims yang dag par len pa'i phyir dang / dbang phyug gi bdag po thob nas sems can la gnod pa mi bya ba'i phyir tshul khrims yang dag par len pa'i phyir te/ de'i phyir bstod pa byed pas kyang / ji ltar tshig ni btsun pa dang //lus can rnams kyi bsod nams zhing / /gzhan la gnod byed mi 'gyur zhes/ /snying brtse'i bdag nyid khyad par brten/ /zhes smras so/ /tshul khrims ni rnam pa gsum ste/ yang dag par blang bar bya ba'i tshul khrims ni gang gi phyir legs par yang dag par blang ba zhes bya ba smos pa'o//phyir gso bar bya ba'i tshul khrims ni gang gi phyir nyams par gyur na phyir gso bar byed pa zhes smos pa'o/ /rjes su bsrung bar bya ba'i tshul khrims ni gang gi phyir/ mi nyams par bya ba'i phyir dran pa nye bar gzhag pa zhes bya ba smos pa'o//de'i phyir ngo bo nyid du bstan par rig par bya ste/ tshul khrims kyi ngo bo nyid ni bslab pa yin la bslab pa yang ji skad bstan pa'i bya ba rnam pa gsum gyis rab tu phye ba'i phyir ro/ /yon tan rnam pa bzhi'i phan yon bstan pa'i phyir de la pha rol las tshul khrims yang dag par blangs pas ni zhes bya ba la sogs pa smos so//bslab pa las nyams par byed pa na zhes bya ba ni nyams par byed pa'i tshe na nyams pa'i skyon rnams yod na yang / pha rol la ltos te nyams par mi byed do/ /byang chub sems dpa' bsam pa shin tu rnam par dag pa ni nyams par byed pa'i rkyen yod du zin kyang /bdag nyid la ltos nas nyams par mi byed do/ /brgya la bag med pa'am/ brjed ngas pa'am/ ma shes pa'i phyir nyams par byas nas yang sor chud par byed pa dang / gus pa skyes nas thams cad kyi thams cad du nyams par mi byed pa'i phyir tshul khrims yongs su dag na nyams pa med pa nyid kyis 'gyod pa med cing yid la gcags pa med de/de ltar na yon tan snga ma gnyis ni ngo tsha shes pa dang khrel yod pa bskyed pa yin no/ /ngo tsha shes pa dang khrel yod pa gnyis kyis ni tshul khrims rjes su bsrung ba lhur len pas 'gyod pa med par 'gyur bar bstan to//yon tan snga ma gnyis ni phyi ma 'dren pa yin te/ nye ba'i rgyu'i dngos po yin par bstan pa'i phyir/ de la pha rol las yang dag par blangs pa gang yin pa dang zhes bya ba la sogs pa smos so//gzhan yang yon tan rnam pa gsum gyis ni ma zhig ma nyams par byed pas tshul khrims blangs pa mi nyams par ston to/ /gcig gis ni nyams na yang phyir gso bar byed par ston to/ / de ltar ngo bo nyid kyi tshul khrims kyi che ba nyid bstan pa'i phyir byang chub sems dpa' rnams kyi tshul khrims kyi ngo bo nyid yon tan bzhi dang ldan pa de ni zhes bya ba nas/ dge ba yin par rig par bya'o zhes bya ba'i bar dag smos te/ byang chub sems dpa' rnams kyi tshul khrims la ni dge ba zhes bya ste/dge ba nyid ni mi blu ba'i phyir ro/ /mi blu ba nyid ni bdag dang gzhan gyi don sgrub pa'i phyir ro/ /de bas na bdag la phan pa dang zhes bya ba smos te/ nyan thos la sogs pa dag gi bdag la phan pa zhes bya ba ni nyon mongs pa thams cad spangs shing gtan du spang ba dang /de 'dren par byed pa bden pa bzhi po dag gi nang nas lam shes pa'o/ /de ltar na de dag ni gtan du sdug bsngal med pa'i gnas skabs mya ngan las 'das pa thob par bya ba'i phyir zhugs pa yin te/ de dag ni theg pa de dang de la 'jug pa'i dus na bya ba nyung ba'i phyir dang /don nyung ba'i phyir dang / bdag gso bar byed pa'i phyir dang / bdag 'dul bar byed pa dang / bdag zhi bar byed pa dang / bdag yongs su mya ngan las 'da' bar byed pa zhugs pa yin no/ /byang chub sems dpa' rnams kyi bdag la phan pa ni spangs pa rnam pa gnyis dang /ye shes rnam pa gnyis te/ nang gi sems kyi rgyud la yod pa'i 'bras bu yin pa'i phyir ro/ /gzhan dag gces bya ba ni gang zag rigs med pa la gnas pa dag dang / rigs la gnas pa dag la ste/ de dag la phan pa'i phyir zhugs pa ni gzhan la phan pa'i phyir zhugs pa yin no//de ltar zhugs pa'i gnyi ga la phan pa sgrub pa ni sems bskyed pa'i dus na yin par rig par bya'o/ /gzhan la phan pa sgrub pa bstan pa de nyid skye bo mang po la phan pa'i phyir zhes bya ba la sogs pas rnam par phye ste 'chad do/ /de la gang zag rigs med pa la gnas pa dag ni skye bo mang po zhes bya bar 'dod do//de dag la phan pa ni re zhig ngan 'gro las yongs su bskyab pa'i phyir yang dag par spong ba gong ma gnyis kyis re zhig pa'i tshul du mi dge ba'i chos spong ba'o/ /bde ba ni bde 'gro la dgod pa'i phyir yang dag par spong ba 'og ma gnyis kyis dge ba'i chos yang dag par sgrub pa'o//de dag nyid kyi nang nas zhe 'gras pa dang / skal ba med pa dang / snod du ma gyur pa log par ltung ba spong ba 'dron po lta bu dag la phan pa dang bde ba'i lhag pa'i bsam pa yongs su mi gtong ba'i phyir dus la 'bab pa la sdod pas snying brtse ba'i phyir zhugs pa yin no//yongs su mya ngan las 'da' ba'i chos can rtogs pa'i skal ba yod pa'i lha dang mi gang dag yin pa de dag gi don gyi phyir zhugs pa zhes bya ba la/ don ni 'dir dge sbyong gi tshul gyi don la bya bar 'dod do/ /phan pa ni de 'dren par byed pa'i lam mo//bde ba ni tshe 'di la bde bar gnas pa ste/ shin tu sbyangs pa'i bye brag dang ldan pas lus dang sems la sim pa'i phyir ram/ rnam par grol ba'i bde ba kun du myong ba'i phyir ro/ /de nyid kyi phyir lha dang mi smos te/ de dag la rtogs pa'i skal ba yod pa'i phyir ro/ /da ni rnam pa gzhan du bshad de/gzhan la phan pa'i dbye ba bstan pa'i phyir skye bo mang po la phan pa zhes bya ba la sogs pa smos te/ phan pa zhes bya ba ni dge ba spyod pa'o/ /bde ba zhes bya ba ni gnod pa med pa'o/ /snying brtse ba ni ji ltar 'di na la la dge ba dang / gnod pa med pa'i spyod pas gzhan dag la snying brtse bar byed pa lta bu'o//don ni don du gnyer bar bya ba'i phyir dang / don dang ldan pa'i phyir te/ 'dod par bya ba dang / kha na ma tho ba med pa gang yin pa'o/ /phan pa dang bde bar 'gyur ba'i phyir zhes bya ba ni mi rnams ni dge ba dang / gnod pa med pa'i spyod pa la gnas pa'i rgyal rigs la sogs pa gang dag yin pa ste/gang dag la sangs rgyas 'byung ba dang / chos legs par gsungs pa dang / dge 'dun legs par sgrub pa rnams kyis shin tu mang po dag shas cher phan pa dang bde bar 'gyur ba'o/ /mi de dag ni bdag nyid la phan pa dang bde ba byas nas 'jig rten la snying brtse zhing de dag 'di snyam du sems te/ji ltar byas na gzhan rnams phan pa dang bde ba la yang dag par sbyor bar 'gyur zhig gu snyam mo/ /gzhan dag kyang 'di snyam du sems te/ ji ltar byas na bdag cag kyang phan pa dang bde ba la yang dag par sbyor bar 'gyur zhig gu snyam mo//de'i phyir don dang zhes bya ba la sogs pa smos so/ /lha dang mi smos pa ni de dag don khong du chud pa dang / nan tan du sgrub pa la skal ba can yin pa'i phyir ro/ /gzhi dang bslab pa'i gnas kyi sgo nas dpag par mi nus pa'i phyir dpag tu med pa ste/ de'i phyir/ byang chub sems dpa'i bslab pa'i gzhi dpag tu med pa yongs su bsdus pas zhes bya ba smos so//'jug pa dang 'bras bu'i dus na sems can la phan pa dang bde ba'i phyir nye bar gnas pas sems can la phan 'dogs pa yin te/ de'i phyir/ sems can thams cad la phan pa dang bde ba'i phyir nye bar gnas pas zhes bya ba smos so//byang chub sems dpa'i gnas skabs na bla na med pa yang dag par rdzogs pa'i byang chub kyi 'bras bu yongs su 'dzin pa'i phyir 'bras bu che ba yin no/ /sangs rgyas kyi gnas skabs na 'bras bu smin par byed pas na phan yon che ba yin no/ / 'di bstan pas ni nyan thos la sogs pa'i tshul khrims pas dge ba yongs su rdzogs shing mchog tu dge ba yin par bstan to/ /nyan thos rnams kyi tshul khrims dang / ting nge 'dzin dang / shes rab ni go rims bzhin du thog ma dang / bar dang / tha mar dge bar bstan te/ 'od srungs pa'i sde'i mdo las kyang de skad du/ dge slong dag ngas khyed la chos bstan pa zhes rgyas par 'byung ngo / byang chub sems dpa' rnams kyi ni tshul khrims kho na la yang thog ma dang / bar dang / tha mar dge ba yod de thog mar dge ba ni bdag dang gzhan la phan pa nas/lha dang mi rnams kyi don dang phan pa dang bde bar 'gyur ba'i bar gyi phyir ro/ /bar du dge ba ni sems can la phan 'dogs pa'i phyir ro/ /tha mar dge ba ni 'bras bu dang phan yon che ba'i phyir ro/ /byang chub sems dpa'i gces par bya ba ni tshul khrims yin te/ phyogs gnyis kyi sgo nas ston to//'gro ba gsum na gnas pa'i byang chub sems dpa'i tshul khrims ni 'di las gong na yang med do/ /'di las lhag pa yang med do/ /ngan song gi 'gro ba dang lha'i 'gro ba na gnas pa'i chos nyid kyis thob pa ni khyim pa'i phyogs su gtogs pa'i tshul khrims so/ /mi'i 'gro ba na gnas pa'i ni gnas skabs dang mthun mthun du gnyi ga'i phyogs su gtogs pa yin no//yang tshul khrims kyi dbye ba rnam pa gsum gyis ni gnyi ga'i phyogs su gtogs pa'i tshul khrims thams cad rnam par gzhag pa bstan pa'i phyir sdom pa'i tshul khrims dang zhes bya ba la sogs pa smos so/ /dper na nyan thos rnams kyi sdom pa nyes par spyod pa kun nas slong ba'i nyon mongs pa rnam pa gsum spong bar rnam par gzhag pa'i phyir 'dod pa na spyod pa dang /gzugs na spyod pa dang / zag pa med pa ste/ so sor thar pa dang / bsam gtan dang / zag pa med pa'i sdom par gtogs pa rnam pa gsum ste/ 'dod pa na spyod pa'i sdom pas ni rtse 'jil bas spong ngo //gzugs na spyod pas ni rnam par gnon pas spong ste/ rkyen rnams yod du zin kyang re zhig kun du mi spyod pa'i phyir ro/ /zag pa med pas ni rgyun gcod pas spong ste/ de thob nas gtan du kun du mi spyod pa'i phyir ro/ /de lta bas na de dag gi tshul khrims rnam pa gsum khas blang bar bya ba de kho na 'dra bar grangs mthun pa'i phyir byang chub sems dpa' rnams kyi yang rnam pa gsum du rig par bya'o//bstan pa la zhugs pa'i byang chub sems dpa'i tshul khrims ni gang du gang la gnas kyang rung ste/ de bzhin gshegs pas bcas pa nyid tshul khrims yin par bstan pa'i phyir/ris bdun po zhes bya ba smos te/ ris bdun po la brten nas/ ris bdun gyis phye ba'i phyir ro/ /rnam pas rnam pa tha dad pa ni bsnyen gnas te/ bsnyen gnas pa'i sdom pa logs shig tu phye ba'i phyir rnam pa brgyad du 'gyur ro/ /khyim pa dang rab tu byung ba'i phyogs la ci rigs par zhes bya ba la dge bsnyen gyi tshul khrims dang dge bsnyen ma'i tshul khrims ni khyim pa'i phyogs su gtogs pa'i tshul khrims yin te/nyes par spyod pa las dben pas rab tu phye ba'i phyir ro/ /gzhan ni rab tu byung ba'i phyogs su gtogs pa yin te/ 'dod pa las dben pas rab tu phye ba'i phyir ro//dge ba'i chos gang dag ci yang rung ba de dag thams cad ni tshul khrims la gnas nas zhes mdo las gsungs pas tshul khrims la gnas pa kho na'i dge ba'i chos skye ba dang gnas pa dang 'phel bar bstan pa'i phyir/ yang dag par blangs pa'i 'og tu zhes bya ba smos te/byang chub chen po'i phyir zhes bya ba ni byang chub chen po yang dag par sgrub pa'i phyir ro/ /'dis ni rang gi sems kyi rgyud la sangs rgyas kyi chos yongs su smin par bya ba'i dbang du byas te/ dge ba sdud pa'i tshul khrims yin par rig par bya'o/ /gzhan gyi sems kyi rgyud la sems can yongs su smin par bya ba'i dbang du byas te sems can gyi don bya ba'i tshul khrims so//de ltar 'di gnyis kyi khyad par shin tu gsal ba yin no/ /khyad par gzhan ni bsam pa dang byed pa tha dad pa'i bye brag las rig par bya'o/ /yid ma smos pa ni yid kyi sgo nas 'jug pa'i dge ba yang yod mod kyi tshul khrims kyi skabs su bab pa'i phyir de rnam par mi gzhag ste/tshul khrims ni lus dang ngag kho na'i yin pa'i phyir ro/ de yang 'dus pa dang so sor byed pas rig par bya ste/ dge ba'i chos la la ni lus kyis sogs par byed do/ /la la ni ngag gis so/ /la la ni gnyis kas byed do/ / de yang gzhi'i sgo nas bstan pa ni thos pa la sogs pa'i sbyor ba las skyes pa'i dbang du byas nas rnam pa gsum du ston te/ thos pa dang bsams pa dang bsgoms pa las byung ba'o/ /chos gnyis bsgom par bya ba zhes gsungs pa'i phyir/ zhi gnas dang lhag mthong gnyis kyi bsgoms pa las byung ba yin par bstan te/sgom pa de yang lus dang sems dben pa sngon du 'gro ba'i phyir gcig pur dga' ba yin no/ /bsams pa dang / bsgoms pa las byung ba yid kyis byas pa yin yang thos pa nyid la gdags te/ ji ltar thos pa'i chos la sems pa dang grub pa sbyor ba'i phyir ro//de nyid kyi phyir brtson par byed de zhes bya ba smos te/ sbyor ba brtson pa zhes bya ba'i tha tshig go/ /bla ma la mchod pa'i las ni lus kyis byas par ston to/ /bdag gi bsod nams 'phel bar bya ba'i phyir dge ba'i chos sdud pa ni gzhan dag la phan gdags pa sgrub pa'i bsam pas sems can gyi don bya ba'i tshul khrims su yang 'gyur ro//rnam pa gnyis kyis ni phan 'dogs pa'i zhing la gnas pa dang / bla ma'i zhing la gnas pa bstan to/ /sdug bsngal ba'i zhing la gnas pa'i dbang du byas te/ nad pa rnams la zhes bya ba la sogs pas smos so/ legs par smras pa la legs so zhes bya ba sbyin par byed pa yin no zhes bya ba la sogs pas ni ngag gi dge ba'i chos bsags pa ston te/ mdor bsdu na legs par smras pa zhes bya ba ni kun nas nyon mongs pa'i gnyen po dang rnam par byang ba dang mthun pa'i tshig go/ /de yang rnam pa gnyis te/sangs rgyas kyi bka' dang dkon mchog gsum gyi yon tan la brten pa'i tshig la bya ba ste/ de nyid kyi phyir smra na 'di nyid smra bar bya zhes brjod do/ /rjod par byed pa ni yid la 'dzin pa'o/ /tshig tu 'byin pa yang de dang 'dra'o/ /dga' ba'i sems bskyed nas zhes bya ba ni g.yo med pa'i lhag pa'i bsam pa dang /mchog tu dga' ba'i sems kyis zhes bya ba'i tha tshig go/ /bdag gis byas pa la ji ltar dga' ba de bzhin du gzhan gyis byas pa la yang rjes su yi rang zhing dga' bar byed do/ /bzod par byed ces bya ba ni lus dang ngag gi phyir gnod pa mi byed pa'i phyir ro//dge ba byas pa rdzogs pa'i byang chub tu yongs su sngo bar byed pas bsod nams tha dad pa skye bar 'gyur bar bstan pa'i phyir yongs su sngo bar byed pa yin no zhes smos so/ /smon lam chen po bcu sngon du 'gro ba'i yang dag pa'i smon lam rnams 'debs pa yin no/ /dkon mchog mchod pa ni mdor bsdu na zang zing gi mchod pa dang sgrub pa'i mchod pa ste/de'i phyir rnam pa thams cad ces smos so/ /mchod pa ngan pa dgag pa'i phyir rgya chen po zhes smos te/ byang chub sems dpa' rnams kyis mchod pa ngan pa gtan du mi bya'o/ /brtson zhing zhes bya ba la sogs pas ni sbyin pa la sogs pa pha rol tu phyin pa rnams la sbyor bas bsdus pa'i dge ba ston to//bag yod par gnas pa yin no zhes bya ba ni brtson pa kho na ston to/ /tshogs kyi lam gyi gnas dge ba bstan pa'i phyir/ bslab pa'i gzhi rnams la zhes bya ba la sogs pa smos te/ dran pas spyod par mi byed pa'i tshul gyis srung bar byed de/ shes bzhin gyis ni spyad par gyur kyang phyir gso ba'i tshul gyis kun nas srung bar byed do/ /'di gnyis ni nyon mongs pa mi 'byung ba dang byung ba'i gnyen po yin pa'i phyir ro/ /bdag nyid la bdag byams pa med pas na bdag gi rgyud kyi 'khrul pa dang / nyes par spyod pa la nyes ba kho na rab tu shes pa'i phyir yongs su shes pa'o//de yang tshe 'di dang phyi ma'i nyes dmigs mthong bas na nyes par lta ba yin no/ /yongs su shes shing nyes dmigs mthong nas tshul bzhin du yongs su spong ba'i phyir gtong bar byed do/ /'khrul pa byung na yang nyes pa la nyes pa yin par 'chags par byed pa'i phyir 'khrul pa zhes bya ba la sogs pas nyes pa 'chags pa'i gnas bstan to//sgrub pa ni ma skyes pa skyed pa'o/ /srung ba ni skyes zin pa brjed mi ngas pa'i tshul gyis gnas par byed pa'o/ /rnam par 'phel bar byed pa ni gnas pa la khyad par du 'gro ba'i tshul gyis rgya chen po dang 'phel ba dang /yangs par 'gyur ro/ /sems can rnam pa gsum gyi dbang du byas nas sems can gyi don bya ba'i tshul khrims rnam pa bcu gcig tu rnam par gzhag pa ste/ sems can rnam pa gsum ni phongs pa rnams dang / zhugs pa rnams dang / zhe 'gras pa rnams so/ /phongs pa ni rnam pa gnyis te/phan 'dogs pa ma yin pa dang / phan 'dogs 'dogs pa'o/ /de la phan 'dogs pa ma yin pa ni sdug bsngal rnam pa gsum gyis g.yen spyo ba rnams te/ sems can gyi bya ba de dang de dag tu grogs med pa'i sdug bsngal gyis g.yen spyo ba de dag la grogs byed pa dang / nad kyi sdug bsngal gyis g.yen spyo ba rnams la nad g.yog gi sgo nas grogs byed pa dang /'jig rten pa dang 'jig rten las 'das pa'i don rnams la thabs mi shes pas rmongs pa'i sdug bsngal gyis g.yen spyo ba rnams la spyir chos bstan pa sngon du gtong ba'i rigs pa ston pa dang / sems can so so la bye brag tu thabs bstan pa sngon du gtong ba'i rigs pa ston pa'o/ /phan 'dogs 'dogs pa'i sems can ni rnam pa bzhi ste/ lan du phan 'dogs su re ba de dag la ni byas pa gzo brjes su srung ba'i sgo nas mnyam pa'am lhag par lan du phan 'dogs pas nye bar gnas pa dang / 'jigs pa rnam pa sna tshogs kyis skrag pa de dag 'jigs pa rnam pa sna tshogs la skyob pa dang / sdug bsngal bar gyur pa de dag gi mya ngan gyi mtshan nyid kyi sdug bsngal sel ba dang / yo byad kyis phongs pa de dag la yang rigs pas yo byad thams cad nye bar sgrub pa'o/ /zhugs pa ni rnam pa gnyis te/rten la rag las pa de dag la ni zang zing med pa'i sems kyis rten sbyin pas tshogs yongs su sdud pa dang / chos mthun pa gzhan la mi rten pa de dag la ni so sor yang dag par dga' bar bya bas dus dus su thad du 'gro ba dang / zang zing len pa dang / 'jig rten pa'i don dang mthun par spyod pa dang /'ong zhing 'gro ba la dbang byed du 'jug pa dang / don dang ldan pa ma yin pa ma gtogs par sems dang mthun par byed pa dang / rten yod pa dag kyang rnam pa gnyis te/ yang dag par zhugs pa de dag gi yang dag pa'i yon tan rnam pa sna tshogs kyis yang dag par dga' bar bya ba'i bying lkog gam mngon sum du gleng ba'o//log par zhugs pa de dag la ni lhag pa'i bsam pa dag pas tshar gcad par bya ba ste/ nyes pa chung ngu ni sma dbab pa'i mtshan nyid dang / 'bring la ni chad pa'i las byed du gzhug pa'i mtshan nyid dang / chen po la ni bskrad pa'i mtshan nyid kyis byed do//tshar gcad par bya ba'i don dang ldan par bstan pa'i phyir 'di lta ste/ zhes bya ba la sogs pa smos pa yin no/ /zhe 'gras pa yang rnam pa gnyis te nyes par spyad pa spyod pa de dag ni gnod pa rnam pa sna tshogs kyi sdug bsngal dang 'brel pa'i 'gro ba mngon gsum du bstan pas mi dge ba las skyo bar byed pa dang /legs par spyad pa spyod pa de dag ni rdzu 'phrul gyi cho 'phrul gyis 'dun par byed pa la sogs pas dga' ba chung ngu dang / 'bring dang / chen po bskyed pa'o/ /byang chub sems dpa' tshul khrims rnam pa gsum la gnas pa'i tshul khrims rnam pa gsum yongs su rdzogs par 'gyur ba'i rgyu bstan par 'dod pa'i phyir byang chub sems dpa'i sdom pa'i tshul khrims la gnas pa dang zhes bya ba la sogs pa smos te/rnam pa bcus na legs par bsdoms pa'i tshul khrims can du 'gyur te/ tshul khrims yongs su dag cing yongs su rdzogs par 'gyur ro zhes bya ba'i tha tshig ste/'das pa'i 'dod pa spangs pa rnams la lta ba'i srid pa kun du mi spyod pas mi lta ba dang / ma 'ongs pa rnams la mngon par dga' ba'i sred pa kun du mi spyod pas mi lta ba dang / da ltar byung ba'i rnyed pa dang bkur sti dang ldan pa rnams la lhag par zhen pa med pa dang / lus dang sems dben pa dang /ngag dang rtog pa yongs su dag pa dang / bdag la khyad du mi gsod pa dang / shas cher nges pa dang / shes cher bzod pa dang / bag yod par gnas pa dang / cho ga dang 'tsho ba rnam par dag pa'o/ /phyag dar gyi 'du shes kyis yongs su spangs pa'i rtswa dang mi gtsang ba'i 'du shes kyis yongs su spangs pa'i phyi sa la ji ltar thams cad mi lta ba de bas ni byang chub sems dpa' ni rtswa dang ba'i 'dod pa rnams la snying po med pa'i phyir/mi lta ba dang / phyi sa dang 'dra ba'i 'dod pa rnams la nyon mongs pa'i phyi sa rul ba lta bu dang 'brel pa'i phyir mi lta ba'o/ /'tsho ba'i bsam pas rab tu byung bas ji ltar 'dod pa thams cad spangs pa rnams la mi lta ba de bas ni byang chub sems dpa' mi'i 'dod pa'i mchog rnams la mi lta ba khyad par du byas nas/'khor los sgyur ba'i 'dod pa rnams la mi lta ba zhes bya ba smos so/ /lha rdzas mchog gi dbang du byas nas bdud kyi gnas su gtogs pa'i 'dod pa rnams la zhes bya ba smos te/dper na 'jigs pa chen po sna tshogs kyis gang zhing zing par 'jug pa ni gnod pa'i rtsa ba yin te/ thar bar bya ba mi nus pa de bzhin du 'dod pa rnams la yang dag par mthong na mngon par dga' bar mi 'gyur ro/ / rnyed pa dang bkur sti rnams la 'dun pa'i 'dod chags dang bral ba'i phyir/ kha zas kyi skyugs pa dang 'dra bar shes rab kyis yang dag par mthong na lhag par zhen pa med cing ro myong bar mi byed do/ /rab tu dben par mngon par dga' ba yin te zhes bya ba ni lus dben par gyur pa ste/de bas na gcig pu zhes smos so/ /tshogs kyi nang na 'dug kyang sems dben par gyur te/ tshul khrims tsam gyis chog par mi 'dzin gyi de nyid la brten nas byang chub sems dpa'i ting nge 'dzin dpag tu med par mngon par sgrub pa dang / dbang thob par bya ba'i phyir 'bad par byed do/ /ngan pa'i gtam zhes bya ba ni kun nas nyon mongs pa can gyi gtam mo//ngan pa'i tshig ces bya ba ni de nyid rnam grangs kyi sgo nas bstan pa'o/ /dang du len par mi byed ces bya ba ni mi smra ba ste/ mi byed ces bya ba'i tha tshig go/ /brgya la brgya lam na yang brjed ngas pas 'dod pa la sogs pa'i rtog pa ngan pa cung zad kyang mi bskyed do//skyes par gyur na yang 'gyod pa dang nyes dmigs su lta ste/ de dag gnyi ga kun du mi spyod par dran pa nye bar gnas so/ /mi bya ba'i sems zhes bya ba ni mi bya ba'i blo nyid ces bya ba'i tha tshig go/ /sems gang gis skyes pa de 'dor bar 'gyur te/ 'dor ba la goms na kun du mi spyod pa la dga' ba dang /kun du spyod pa dang mi mthun par gnas so/ /dge ba sdud pa rnams dang sems can gyi don bya ba'i tshul khrims rnam ni yangs shing rgyas pa'i phyir rgya che ba'o/ /gzhi'i sgo nas tshad gzung mi nus pa'i phyir dpag tu med pa'o/ /rtog pa'i yul thams cad las 'das pa'i phyir bsam gyis mi khyab pa'o//yun mi thung bar bzhugs pa'i phyir yun ring du lon pa'o/ /gzhan dag gis bya mi nus pa'i phyir mchog tu dga' ba'o/ /skrag pa ni 'jigs pa'o/ /zhum pa ni bag tsha ba'o/ /'gong ba ni bdag gis mi nus kyang srid do snyam pa'i phyir ro//spro ba kho na bskyed pa'i phyir/ de dag kyang mir gyur pa yin la zhes bya ba la sogs pa smos so/ /bdag gi nyes pa dang gzhan la gnod pa'i 'khrul pa la rtog par byed kyi gzhan dag la sdug bsngal skyed par mi byed pas ni nges pa bstan to/ /gzhan gnod pa byed pa la sems mi 'khrugs pa dang /gzhan gyis gnod pa byas pa la phyir gnod pa mi byed pa dang / rnam par 'tshe ba med pas ni bzod pa bstan to/ /phyir rdeg pa ni lus kyis te/ gnod pa byas pa dag la sems kyis kyang sdang bar mi byed na zhes bya ba dang sbyor ro/ /'das pa'i nyes pa so sor 'chags pa'i phyir ni sngon gyi mtha' dad ldan pa'o//ma 'ongs pa'i dus kyi ma 'ongs pa'i nyes pa la de ltar nan tan byed pas na phyi ma'i mtha' dang ldan pa'o/ /da ltar byung ba'i nyes pa mi brjod pa'i phyir na dbus kyi mtha' dang ldan pa'o/ /so sor brtags nas kha na ma tho ba med pa'i lus dang ngag gi las la 'jug pa'i phyir ni snga nas bya ba'o//de ltar so sor rtog pa ni de kho na bzhin du spyod pa la 'jug pa'i phyir ni lhan cig rjes su spyod pa'o/ /cho ga phun sum tshogs pa'i dbang du byas nas/ dge ba mi spyoms shing zhes bya ba la sogs pa smos so/ /grang ba la sogs pa'i sdug bsngal bzod pa'i phyir sdug bsngal la ji mi snyam pa'o//ma rnyed pas yid mi bde ba med pa'i phyir yongs su gdung ba med pa'i rang bzhin can no/ /dbang po dul zhing zhi ba'i phyir rgod pa med pa dang / yeng yeng po ma yin pa'o/ /'tsho ba phun sum tshogs pa'i dbang du byas nas tshul 'chos pa zhes bya ba la sogs pa smos so//pha rol tu phyin pa drug mngon par sgrub pa la ni mi mthun pa'i phyogs spang bas mi mthun pa'i phyogs dang du mi len pa'i phyir dge ba sdud pa'i tshul khrims rnam par gzhag ste/ pha rol tu phyin pa lnga'i mi mthun pa'i phyogs kyi gnyen po lnga kho nar nges pa'o/ /shes rab kyi pha rol tu phyin pa ni rnam pa lnga ste/de lta na de dag gi gnyen por gyur pa rnam pa bcus de la gnas pa'i byang chub sems dpa'i dge ba dpag tu med pa myur du sdud par 'gyur ro/ /lus dang longs spyod la lhag par zhen na lus dang longs spyod la lta bar 'gyur ro/ /lta ba yod na yongs su mi gtong ngo //de lta bas na de ni sbyin pa'i pha rol tu phyin pa'i mi mthun pa'i phyogs yin te/ de dang du len par mi byed na sbyin pa'i pha rol tu phyin pa mngon par 'grub par 'gyur ro zhes bya ba'i tha tshig go/ /'chal ba'i khrims kyi gzhi dang du ma blangs pas ni tshul khrims kyi pha rol tu phyin pa'o//sems can rnams la kun nas mnar sems mi skyed pas ni bzod pa'i pha rol tu phyin pa'o/ /gnyid log pa'i bde ba'i dbang du byas te le lo mi bsten pas ni brtson 'grus kyi pha rol tu phyin pa'o/ /bsam gtan gyis pa'i nyon mongs pa mi skyed pas ni bsam gtan gyi pha rol tu phyin pa'o//shes rab kyi pha rol tu phyin pa'i mi mthun pa'i phyogs ni 'chal ba'i shes rab rnam pa lnga ste/ bsod nams kyi 'bras bu'i phan yon rab tu mi shes pa dang / dge ba'i rgyu rab tu mi shes pa dang / 'bras bu la phyin ci log tu kun du spyod pa dang / phyin ci log gi gnyen po rab tu mi shes pa dang / dge ba'i chos la bar du gcod pa rab tu mi shes pa'o/ /de dag gi gnyen por gyur pa'i gnas lnga yang dag pa ji lta ba bzhin du yongs su shes pas shes rab kyi pha rol tu phyin pa mngon par sgrub pa'i sgo nas dge ba sdud par bstan to/ /sems can gyi don bya ba'i tshul khrims rnam pa bcu gcig ni sems can rnam pa bcu gcig yod pa'i dbang du byas nas rnam par gzhag ste/sems can thams cad ni bsdus nas yongs su bcad pa rnam pa bcu gcig gis rnam par bzhag nas de dang 'tsham pa'i don bya ba'i rjes su 'brang bas sems can gyi don bya ba'i tshul khrims su 'gyur ba dang /rnam pa re re la yang dpag tu med par rig par bya'o/ sems can rnam pa bcu gcig po dag gang zhe na/ bya ba de dang de dag la grogs byed de/ de 'dod pa rnams dang sdug bsngal zhing rigs pa la rmongs te de 'dod pa rnams dang / phan 'dogs 'dod pas phyir lan du phan 'dogs par 'dod pa rnams dang /'jig rten skyabs 'dod pa rnams dang / phongs par gyur pa dang / mya ngan gyis gzir ba dang / yo byad med de de 'dod pa rnams dang / mkhan po dang slob dpon dang bla ma la rten 'cha' bar 'dod pa rnams dang / yongs su 'dzin pas gnas pa rnams dang / mthun par byed pa'i sems dang / mthun par bya bas 'dul ba rnams dang / yang dag pa dang log par zhugs pa rnams dang bsdu ba dang tshar bcad par 'os pa rnams dang / de bzhin gshegs pa'i bstan pa la zhe 'gras pa rnams so/ /grogs byed pa ni so sor phye na bya ba dang mi bya ba rnams la grogs byed pa rnam pa brgyad yod par rig par bya ste/bya ba dang mi bya ba brtag pa ni gang gi phyir/ bya ba sems pa zhes bya ba smos pa ste/ gang du byas pa dang ma byas pa las 'byor pa dang rgud par gyur par mthong nas de la sems pa'o/ de ltar byung ba'i dus nas gzung ste/bya ba gdon mi za bar nges par 'dzin pa ni bya ba gtan la 'bebs pa'o/ de dag gnyi ga bstan pa'i phyir de dang der grogs su 'gro ba'o/ /lam du 'gro ba 'dron po med pa'am/ phyi bzhin du 'brang ba med pa rnams la grogs su 'gro ba dang / rigs pas brtsam pa'i bya ba la sogs pa las kyi mtha'i sbyor ba dag pa dang /longs spyod bsgrubs pa bsrung ba dang / sems can phan tshun bye ba sdums pa dang / nyi ma nges par bsod nams kyi khyad par myong bar 'gro ba'i dus dang / bsod nams rtsom pa'i dus na'o/ /sems can rnams ni lus dang sems kyi sdug bsngal rnam pa gnyis kyis sdug bsngal te/lus kyi rnam pa bzhi ste/ nad kyi sdug bsngal dang / dbang po nyams pa'i sdug bsngal dang / yan lag med pa'i sdug bsngal dang / ngal ba dang dub pa'i sdug bsngal lo/ /sems las byung ba'i sdug bsngal te/ sems las byung ba'i sdug bsngal ba yang sdug bsngal gyi rgyu yin pa'i phyir sdug bsngal du rnam par gzhag go//de ni rnam pa gsum ste/ sgrib pa'i kun nas dkris pa'i phyir sgrib pa'i sdug bsngal dang / rtog pa kun du spyod pa'i phyir bar chad byed pa'i sdug bsngal dang gzhan gyis sma phab pa'i phyir pham pa'i sdug bsngal lo//de la nad kyis thebs pa la ni g.yog bya ba dang sman sbyin pas rim gro byed do/ /long ba rnams la ni 'dod pa'i gnas su phyin par byed pa'am/ lam ston par byed do/ /'on pa rnams la ni yongs su spang bar bya ba dang / bstan par bya ba'i dngos po brda sprod pa dang / yan lag gi mtshan ma ston par byed do//yan lag med pa rkang pa med pa rnams la ni bdag nyid kyi lus sam bzhon pas 'dod pa'i gnas su phyin par byed do/ /gdams pa dang rjes su bstan pas ni kun nas dkris pa sel bar byed do/ /rtog pa kun du spyod pa yang de dang 'dra'o/ /gzhan dag gis sma phab pa la ni de dang bral ba'i thabs la rjes su rtog pas sel bar byed do//khyad du gsod pa dang ldan pa ni gos sbyin pa'i khyim pa'am nye du'i khyim las 'gyur ba'o/ /'byor pa'i rjes su rtog pa ni khyim gyi 'byor pa dang ldan pa'o/ /chos nyid bstan pa'am 'jig rten thams cad kyi chos dang 'brel pa bstan pas ni pham par byas pa'i sdug bsngal sel bar byed do//nyes par spyad pa spyod pa ni mi dge ba'i las kyi 'bras bu rnam par smin par gyur pas kun nas nyon mongs pa rnams la ni chos bstan pa'i sgo nas de spang ba'i phyir nyes par spyod pa las ldog pa yang dag par len du gzhug pa'i tshul gyis byed do//tshig 'bru sbyor ba zhes bya ba la sogs pa'i tshig brgyad kyis ni dri ba rnam pa gsum la yon tan bzhi dang ldan pa'i lan btab par bstan te/ mi shes pa 'dri ba la ni don dang mtshams sbyor ba'i dbang du byas nas phyin ci ma log pa'i don dang / mtshams sbyor bas lan 'debs so//'gal ba 'dri ba la ni chos nyid dang snga phyi'i dbang du byas nas chos nyid dang rjes su mthun pa nyid dang / dgongs pa bstan pas lan 'debs so/ gnyi ga 'dri ba la ni go bar byed pa dang / 'dul ba ji lta ba bzhin du ston pas lan 'debs so/ thob pa'i dbang du byas nas 'jig rten pa'i yon tan mngon par sgrub pa dang mthun pa dang /'grus skyong gi 'phags pa'i lam gyi tshogs kyi phyir lan 'debs so/ /rtag tu byed pa dang byang bar byed pa'i phyir na 'grus skyong zhes bya ba ste/ rtag tu gus par byed pas zag pa rnams las sems srung bar byed pa'i phyir ro//gzhan yang tshig 'bru 'byor pa ni 'brel bas bstan te/ snga phyi mi mthun pa med pa dang / rjes su mthun pa ni rjes su 'phrod pas bstan te/ chos nyid dang mi mthun pa med pa dang / thabs dang ldan pa ni 'tsham pas bstan te/ 'dul ba'i rkyen du bab pa dang / mthun pa ni 'grus skyong gi yan lag gi tshogs kyis bstan te/tshangs par spyod pa dang mthun pas gsal bar byed de/ dper na yan lag lnga dang ldan pa'i gsung bstan pa na snga ma phyi mas gsal bar byed de/ zab pa ni 'brug sgra lta bu zhes bya ba la sogs pa bzhin du tshig bzhi po 'di dag gis ni tshig phyi ma dang bcas par ston par byed pa'i yon tan phun sum tshogs pa'i lan btab par bstan te/dri ba thams cad la yang snga phyi mi 'gal ba dang / chos nyid dang mi 'gal ba dang / 'dul ba dang mi 'gal ba dang / don dam pa dang 'brel pa yin no/ /thabs mkhas pas ston pa ni bstan pa'i sgo nas ston to//ji ltar tshul khrims kyi mi mthun pa'i phyogs 'chal pa'i tshul khrims spang ba'i phyir rigs pa ston pa bzhin du sbyin pa yang ser sna spang ba'i phyir bstan to/ /longs spyod sgrub pa la bzo dang las kyi gnas rnam pa sna tshogs bstan to/ /bsrung ba'i phyir ni tshigs chung ngus nor dang 'bru bsdu ba'i bya ba bstan to//bstan pa la ma zhugs pa rnams ni dad pa thob par bya ba'i sgo nas 'jug par byed do/ /zhugs pa rnams ni mthong bas spang bar bya ba'i nyon mongs pa spang ba'i sgo nas ngan song las yang dag par 'da' bar bya ba'i phyir yang dag phul gyi chos ston to/ /lam thob pa rnams la ni kun du sbyor ba lhag ma spang ba'i sgo nas yang srid pa'i sdug bsngal thams cad las yang 'da' bar bya ba'i phyir thabs mkhas pas ston to//phan 'dogs pa la lan mang du phan gdags par 'dod pa rnams la ni yang dag par dga' bar byed pa sngon du btang ba'i rnyed pa dang bkur sti'i len du phan gdags pa mnyam pa'am lhag pas nye bar gnas pas don byed do//de dag nyid kyi bya ba la grogs byed pa de dag nyid la ni grogs byed du 'gro bar byed do/ /sdug bsngal ba rnams ni sdug bsngal rab tu zhi bar byed do/ /'jigs pa rnams la ni 'jigs pa las skyob par byed do/ /sdug bsngal bar gnas pa rnams la ni mya ngan bsang bar byed do//yo byad med pa rnams la ni yo byad nye bar sgrub par byed do/ /gnas 'dod pa rnams la ni gnas sbyin par byed do/ /'dul ba rnams la ni sems dang mthun par byed do/ /yang dag par bskyang ba rnams la ni yang dag par dga' bar byed do/ / log par zhugs pa rnams la ni tshar gcod par byed do/ /zhe 'gras pa rnams la ni bstan pa la 'dun par byed pas grogs byed do/ /de ltar na yang dag par sgrub pa bcu gcig gis de rnams kyi don byed do/ /'jigs pa'i skyabs bya ba ni mdor bsdu na rnam pa bcu ste/ dud 'gror gyur pa'i sems can gyi 'jigs pa las skyob par byed pa de yang rnam pa gnyis te/thang la gnas pa dang / chu la gnas pa'o/ /mi'i 'jigs pa las skyob par byed de/ mi rnams kyi 'jigs pa nye bar sgrub nus pa la yang rnam pa bzhi yod de/ bdag gi yul chad pas bcad pa dang /nan thur bya ba'i mthu yod pa'i yul gyi bdag po dang / mthu'am 'jab bus nor 'phrog pa'i rkun 'joms rnams dang / longs spyod la sogs pa'i bar chad byed pa'i dgra rnams dang / dngos po tshad nges pa'i bdag po thob pa'i rje dpon rnams so/ /gces pa dang mi ldan pa ni rnam pa gsum ste/yo byad dang mi ldan pa'i phyir 'tsho ba med pa'i 'jigs pa dang / legs par spyod pa dang mi ldan pa'i phyir mi snyan pa'i 'jigs pa dang / smra ba'i bya ba dang mi ldan pa'i phyir 'khor du bag tsha ba'i 'jigs pa'o/ /mi ma yin pa las gyur pa la ni rnam pa gnyis te/skye ba'i khyad par gyis bskyed pa dang / rig sngags kyi khyad par gyis bskyed pa'o/ /sdug bsngal ba yang rnam pa gnyis te/ bshes gnyen gyis sdug bsngal ba dang / longs spyod kyis sdug bsngal ba'o/ /de la gnas skabs kyi log par brjod pa'i rgyu'i rtog pa ni mya ngan no//skye gnas dang / dgos pa dang / rig pa dang 'brel ba dang ldan pa'i phyir gnyen bshes rnam pa lnga yod de/ de dag shi ba las gyur pa'i mya ngan la ni sems can thams cad kyi rigs mthun pa'i mi rtag par bstan pas de sel bar byed do//rab tu byung ba'i phyogs kyi bla ma shi ba las gyur pa de dag la yang rnam pa gsum ste/ slob dpon dang mkhan po dang tshangs pa mtshungs par spyod pa rnams so/ /longs spyod zhig pa ni longs spyod kyi sdug bsngal ba'o/ /zhig pa yang mi rtag pa rnam pa gsum gyis 'gyur te/ dbang gis 'jig pa'i mi rtag par gyur pa ni gang gi phyir rgyal pos phrogs na yang zhes bya ba la sogs pa smos pa dang /mi mthun pa'i rkyen byung bas 'jig pa'i mi rtag par gyur pa ni gang gi phyir mes tshig ces bya ba la sogs pa smos pa dang / gnas mi mthun pa las ni bral ba'i mi rtag pas 'jig go//sbyor ba mi mthun pa las ni ma grub pa las gyur pa dang / skal bas nyes pa las gyur pa'i rang gi ngang gis 'jig pa ste/ de'i mya ngan ni 'du byed rnams mi rtag par bstan pas sel bar byed do/ /de las skyes pa'i mya ngan la yang pha ma shi ba las gyur pa dang / bu dang chung ma shi ba las gyur pa rnams ni che ba'o//bran la sogs pa la ni dgos shing gces pa'i sgo nas ci rigs par rnam pa gsum du 'gyur ro/ /rdzas rnams la yang yo byang sgrub par bya ba'i phyir tshul khrims sngon du btang ste/ sdug bsngal rnam pa bzhi'i gnyen por bstan pa yang de dang 'dra'o/ yongs su sdud pa'i tshul khrims ni bsam pa phun sum tshogs pa dang / zang zing sgrub pas bstan to/ /bsam pa phun sum tshogs pa ni zang zing med pa'i gtong bas bstan to/ /zang zing gi longs spyod ni rnam pa gnyis te/ gzhan las blangs pa dang / thun mong du longs spyod pa'o//sems dang mthun par byed pa'i tshul khrims ni bstan pa dang rgyas pa'i sgo nas rig par bya ste/ bstan pa ni sems can rnams kyi mos pa dang khams kyi dbang gis de lta de lta bur sgrub par bstan pa ste/ gzhung las 'byung ba bzhin no/ /de la bsam pa ni sems pa'o/ / rang bzhin ni bag la nyal te khams so/ /lus dang ngag gi sbyor ba gang gis gzhan dag gi sdug bsngal ba dang yid mi bde ba skye bar 'gyur bar mthong la/ sdug bsngal ba dang yid mi bde ba de yang gal te de dag la phan pa dang bde bar mi 'gyur na ni byang chub sems dpa' so sor brtags te/bdag nyid dang gzhan dag la yang phan pa med pa'i phyir 'jug par mi byed do/ /gal te phan pa dang bde bar 'gyur ba zhig yin na ni mthun par 'jug par byed de/ yongs su 'gyur ba'i tshe de dag nyid la bde ba'i phyir ro/ /snying brtse ba'i sems kyis ni byed pa nyid do//de bzhin du gzhan gyi sbyor ba la yang gzhan gyi sems dang mthun par bya ba'i phyir ji skad bstan pa'i mtshan nyid la mthun par 'jug par yang mi byed la/ mthun par 'jug par yang byed de/ mdor bsdu na bdag nyid dang gzhan la ltos te rjes su 'jug go/ /bdag nyid kyi lus dang ngag gi kun du spyod pa de yang de bzhin gshegs pas bcas pa'i bslab pa'i gzhir gtogs pa yang ma yin/bsod nams dang ye shes kyi tshogs kyi ngo bo nyid kyang ma yin na ni gzhan gyi sems bsrung ba'i phyir de gtong bar byed do/ /de las bzlog pa ni gtong bar mi byed de//bdag la ltos pa yang de dang 'dra'o/ /ji ltar de pha rol gyi bsam pa la ltos nas lus dang ngag gi kun du spyod pa gtong zhing gzhan dag gi bde ba dang sdug bsngal skye ba'i sgo nas phan pa dang bde ba'i phyir 'jug cing mi gtong ba de las bzlog pa la ni gtong bar byed ce na/gcig la rnam par 'khrugs na thams cad la gnod par 'gyur ba'i phyir dga' bar bya ba yang mi brjed de/ shad kyis sbyong ba ni bzod pa gsol ba'o/ /mi smra ba la zhes bya ba ni ngom zum can 'jig rten gyi tshul mi shes pa la yang bdag nyid gsong por smra ba yin pa'i phyir yang dag par dga' bar byed na de las bzlog pa la lta smos kyang byed mod/'khrugs par mi byed ces bya ba ni pha rol gyi sdug bsngal skye ba spangs pas de dag nyid la phan pa'i phyir tshar gcod par byed pa ni zad de zhes bya ba 'dis bstan to/ /'phya bar yang mi byed ces bya ba ni skye bo mang po'i nang du sma dbab pa'i rgyu yin pa'i phyir ro//gnas ma yin par 'gyod pa skyed par yang mi byed de/ de yid mi bde ba'i gnas yin pa'i phyir ro/ /chad pa'i las kyis kyang gleng bar mi byed de ngo tsha bar bya ba yin pa'i phyir ro/ /dga' ba'i shas chung pa rnams la yang bdag la stod par mi byed de/zhum pa'i rnam pa'i rgyu yin pa'i phyir ro/ /rnam pa gsum gyi sgo nas bsten pa'i nyes pa spang ba ni 'brel pa gcod pa'i phyir ro/ /mdza' bo la dmod par yang mi byed/ mi mdza' ba'i bsngags pa yang mi brjod ces bya ba ni de dag mi dga' bar 'gyur ba'i phyir ro/ / lhan cig gnas pa bzhin du yid rton par yang mi byed de/ de dag gi sems kyi mtshan ma gzhan dag tu 'gyur ba'i phyir ro/ /rgyun du slong bar yang mi byed de skyo ba'i gnas yin pa'i phyir ro/ /rang gis byin na yang tshod shes pa yin te/ byin pa'i 'og tu yang khyad du gsod pa'i sems skye bar mi 'gyur ba'i phyir ro//mgron du bos nas yang spong bar mi byed do/ 'dod pas phongs par gyur pa spang ba'i phyir ro/ /de dag ci nas 'dod pas phongs par mi 'gyur ba de lta bur yang shad kyis byang bar byed do/ /yang dag par dga' bar bya ba'i tshul khrims ni 'jug pa dang bcas pa'i mngon par mtho ba'i rgyu yang dag par blang ba dang /nges par legs pa'i rgyu yang dag par blangs pa'i dbang du byas nas de la dad pas 'jug pa'o/ /mngon par mtho ba'i rgyu ni tshul khrims dang gtong ba ste/ bde 'gro'i lus dang longs spyod kyi rgyu yin pa'i phyir ro/ / thos pa ni shes rab 'dren pa yin par rig par bya'o/ /shes rab kyang nges par legs pa'i rgyu yin no/ /tshar bcad pa'i tshul khrims ni 'gal ba rnam pa gsum las tshar bcad pa rnam pa gsum du so sor sbyar bar rig par bya'o/ /bsod nams ma yin pa yongs su 'dzin par 'gyur ba zhes bya ba ni mi rigs par dad pas byin pa longs spyod pa dang /tshangs pa mtshungs par spyod pa las phyag bya ba la sogs pa bdag gir byed pa'i phyir ro/ /zhe 'gras pa rnams la ni mdor bsdu na sgrub pa gnyis yod de/ nyes par spyad pa spyod pa rnams la ni de dag las skyob bskyed pa'i phyir/nyes par spyod pa'i 'bras bu yang dag par ston to/ /'khor chen po'i nang du byang chub sems dpa' la gnod par bya ba'i bsam pas mi smra ba la phyir 'dri ba'i lan lon du gzhug pa'i phyir rdzu 'phrul gyi stobs kyis sprul pa'i gzugs 'jigs pa bstan pas skrag par byas nas 'dri ba'i lan 'debs su gzhug pa dang /de'i sgo nas skye bo phal po che 'dul ba'i phyir ro/ /rdzu 'phrul bya bas kyang 'dun par byed de/ thun mong pa dang thun mong ma yin pas 'dun par byas nas sgrub pa la 'god pa'i phyir/ yang dag par dga' bar byas nas zhes bya ba la sogs pa bstan te/bslab pa'i dngos po'i tshogs mtha' yas pa bsdus pas na tshul khrims kyi phung po'o/ bsod nams dpag tu med pa'i tshogs bsdus pas na bsod nams kyi phung po'o/ /de ltar byang chub sems dpa'i tshul khrims thams cad rgyas par bstan nas/ da ni byang chub sems dpa'i tshul khrims kyi sdom pa yang dag par blang ba'i cho ga bstan te/ byang chub sems dpa'i tshul khrims ni phyogs gnyis su gtogs pa ste/ de bas na de la byang chub sems dpa' khyim pa'am zhes bya ba la sogs pa smos so/ /dper na skyabs su song ba nyi tshe la so sor thar pa'i sdom pa yang dag par blang ba yod pa de bzhin du sems bskyed pa la yang dag par blang ba yod par 'gyur pa'i phyir smon lam btab pa zhes smos so//dper na nyan thos kyi tshul khrims gang dmad du med pa las yang dag par blang ba bzhin du 'di la yang de dang 'dra bar bstan pa'i phyir chos mthun pa zhes smos so//de yang shes pa las mngon par bstan pa'i phyir mkhas pa zhes bya ba la sogs pa smos so/ /ngag gi rnam par rig byed kyi don ni tshig 'bru'i sgo nas 'dzin nus pa'o/ /don gyi sgo nas ni go bar nus pa'o/ /gus pa yod pa la sdom pa skye bar 'gyur gyi gus pa med pa la ni mi skye bas na gus pa'i bsnyen bkur gyi rim pa bstan pa'i phyir/rkang pa gnyis la thog mar phyag byas nas zhes smos so/ /'dod pa la sdom pa skye'i mi 'dod pa la ma yin pas na gsol ba gdab par bya ste zhes smos so/ /gsan cing stsal ba'i rigs so zhes bya ba ni bdag gis gsol ba gson la stsol cig ces bya ba'i tha tshig go/nyan thos rnams kyi sdom pa ni tshogs rnams 'dus pa tsam la gus par bya bas thob par 'gyur gyi sdom pa 'di ni de las ches khyad par du 'phags pa'i phyir sangs rgyas dang byang chub sems dpa' thams cad la mchod pa bya ba sngon du btang bas thob par 'gyur bar bstan pa'i phyir/sangs rgyas bcom ldan 'das rnams dang zhes bya ba la sogs pa smos te/ ye shes chen po dang mthu chen po thob pa rnams zhes bya ba ni sa chen po la zhugs pa sha stag yin par bstan to/ /mchod pa zhes bya ba ni ci nus kyis me tog dang spos la sogs pa'i mchod pa dang lus kyis kyang phyag byas nas zhes bya ba'i tha tshig go//yon tan rnams kyang zhes bya ba ni sdom pa 'di lta bu dang ldan pa rnams kyi yon tan gyi khyad par ni de lta bu yin no zhes thun mong ma yin pa'i yon tan rjes su dran par byas nas de ltar lus dang ngag dang yid kyi mchod pa bya bar bstan to//sdom pa de mchog tu dge ba'i bsam pas sems bskyed pa yin pa'i phyir snying nas zhes smos so/ /chung ngu yang zhes bya ba ni nges pa med par bstan pa ste/ gal te nus pa dang rgyu'i stobs yod na ni snying nas bya ba'am/ de lta ma yin na ni chung ngus bya ba'o/ /gal te khyim pa yin na ni rigs kyi bu zhes bya ba'am/gal te gzhon pa zhig yin na ni tshe dang ldan pa zhes bya ba dang / gal te rgan pa zhig yin na ni btsun pa zhes bya ba'i tshig gis rim pa bzhin no/ /sdom pa yang dag par blang ba de rnyed pa che ba yin par rjes su dran pa dang bdag nyid kyis de 'thob par 'gyur bar sems bzhin du cang mi smra bar bya'o//dper na nyan thos kyi sdom pa la skyabs su 'gro ba sngon du 'gro ba de bzhin du byang chub sems dpa'i yang smon lam sngon du 'gro bar bstan pa'i phyir brtan par bya ba'i don du smon lam 'dri bar byed do/ /'dod dam zhes kyang dri'o/ /bslab pa'i gnas su gyur pas na bslab pa'i gzhi rnams te/de ltar na gnas kyi sgo nas bstan nas/ byang chub sems dpa'i tshul khrims thams cad de zhes bya ba la sogs pas ngo bo nyid bstan to/ /sangs rgyas dang byang chub sems dpa' thams cad kyi nges pa yin pa'i phyir dus gsum du yang dang yang dag par blangs pa la bdag dbang du gyur par mkhyen par gsol ba'o//chos nyid ces bya ba ni sdom pa yang dag par blang pa'i che ba nyid kyi khyad par gdon mi za bar yod pa'i phyir dang / sangs rgyas dang byang chub sems dpa' rnams smon lam la dgongs pa'i khyad par gyi phyir ro/ /de lta bu'i ltas zhes bya ba ni gdan kun du g.yo ba'i ltas so//ltas des bskul ba na nges par 'di snyam du dgongs par 'gyur te/ skad cig 'di la gcig cig gis tshul khrims kyi sdom pa yang dag par blangs na 'jig rten gyi khams gang du su zhig gis blangs snyam du dgongs par 'gyur te/ de sngon du btang ba'i ye shes kyis gzigs pa ni ye shes gzigs pa yin no//gcig tu na ye shes nyid gzigs pa yin te/ mngon sum du 'jug pa'i phyir ro/ /bu dang 'dra ba zhes bya ba ni sangs rgyas rnams kyi'o/ /spun dang 'dra zhes bya ba ni byang chub sems dpa' rnams kyi'o/ /bar chad med par don grub par 'gyur ba'i phyir dgongs pa bzang pos so so nas thugs brtse bar mdzad do//de dag gis btang snyoms su mdzad pas na 'phel ba nyid do/ /sangs rgyas dang byang chub sems dpa' de dag gis thugs su chud pa zhes bya ba ni mkhyen zhes bya ba'i tha tshig go/ /sdom pa yang dag par blang ba thams cad las ches bla mar gyur pa dang /ches gya nom par gyur pa'i phyir khyad par du 'phags pa yin no/ /khyad par du 'phags pa nyid kyang rnam pa bzhis bstan te/ de las ches gong mar gyur pa med pas na/ bla na med pa'o/ /bsod nams kyi 'bras bu dpag tu med par bsdus pas na/bsod nams kyi phung po dpag tu med pa dang ldan pa'o/ /sems can thams cad la phan pa dang bde ba'i lhag pa'i bsam pas bskyed pas na/ sems can gyi bsam pa mchog tu dge bas bskyed pa'o/ /sems can thams cad kyi gnas la nyes par spyod pa/ rnam pa thams cad kyi gnyen por gyur pa'i sdom pa dang ldan na sems can thams cad kyi gnas la rnam pa thams cad du lus dang ngag dang yid kyis nyes par spyad pa mi spyod de 'jug par mi byed do//de'i gnyen por gyur pas khyad par du 'phags pa nyid ni so sor thar pa'i sdom pa zhes bya ba la sogs pa'i rnam par 'byed pas ston te//yang dag par blangs pa'i tshul khrims la gnas pa'i byang chub sems dpa'i rjes su bsrung ba'i thabs ni bdag nyid kyis kyang zhes bya ba la sogs pas ston to/ /bdag gi blo'i stobs kyis bya ba dang mi bya bar nye bar brtag cing lus la sogs pas sgrub par bya ba 'di ni byang chub sems dpa'i bya ba'i cha yin no//de bzhin du bsgrub pa nyid ni bslab pa'o/ /rgyas par ni byang chub sems dpa'i mdo sde'i sde snod dam/ byang chub sems dpa'i mdo sde'i sde snod kyi ma mo bstan pa las mnyan pa de lta bur rjes su bsrung ba'i tshul khrims su bstan pa yin no/ /khyad par du 'phags pa'i 'bogs par byed pa las mnod par bya ba bstan pa'i phyir ro//'bogs par byed pa'i khyad par nyes pa yongs su spang ba'i sgo nas dad pa med pa zhes bya ba la sogs pas bstan te/ dad pa nyid ni sdom pa 'di la mos pa'i stobs bskyed pa dang ldan pa'i phyir ro/ /de'i mi mthun pa'i phyogs kyis ni dad pa med pa nyid ston to//ma mos pa ni ma dad pa chen pos so/ /mi 'jug pa ni 'bring gis so/ /mi rtog pa ni chung ngus so/ /pha rol tu phyin pa drug gi mi mthun pa'i phyogs kyis gnas pas nyes pa rnam pa drug dang ldan pa las kyang mnod par mi bya bar bstan pa la/ lus dang longs spyod la lta ba kun du spyod pas na brkam chags can no/ /de'i dbang du gyur pas na chags pas zil gyis non pa ste/ de lta bu ni sbyin pa'i pha rol tu phyin pa'i mi mthun pa'i phyogs dang du len pa'o/ /tshul khrims kyi pha rol tu phyin pa'i mi mthun pa'i dbang du byas nas tshul khrims nyams pa zhes smos so//'chal ba'i tshul khrims ni rnam pa gnyis kyis bstan te/ rtsa ba'i nyes pa byed de ma lus par chad pa'i phyir ni tshul khrims nyams pa zhes smos so/ /lhag ma dang bcas pa'i nyes pa spyod de nyams par byas pa'i phyir ni bslab pa dag la gus par mi byed ces smos so//gus par mi byed pa nyid ni lhod pa'o/ /mi bzod pa ni bsam pa dang sbyor ba'i sgo nas bstan te/ gnod pa byed pa la zhugs pa'i tshe sems 'khrugs pas na khro ba'o/ /de phyin chad gnod pa dran pa'i tshul gyis yang dang yang du sems 'khrugs pas na khon du 'dzin pa'o/ /dge sbyong gi chos rnam pa bzhi'i mi mthun pa'i phyogs kyi tshul gyis ni nyes pa mi bzod pa'o//dge ba'i phyogs la sems spro ba med pas na snyom las can no/ /mi mthun pa'i phyogs la dga' bas na le lo can no/ /mi mthun pa'i phyogs la dga' ba nyid ni shas cher zhes bya ba la sogs pas bstan to/ / sems rnam par g.yeng ba ni zhi gnas la sogs pa bsgom pa la sems gnas su mi btub pa'i phyir ro/ /'chal ba'i shes rab ni rnam pa gnyis kyis bstan te/ kun du spyod pa las ni yid rtul ba dang / rmongs pa'i rang bzhin can zhes smos te/ legs par bshad pa la sogs pa'i de kho na bdag nyid kyis yongs su shes par mi nus pas na yid rtul ba'o//gzhan las thos su zin kyang yongs su shes par mi nus pas na rmongs pa'i rang bzhin can te/ de ltar na kun du spyod pa las bstan to/ /rang bzhin gyis rmongs par gyur pa nyid ni sems zhum pa zhes bya bas bstan to//byang chub sems dpa'i sde snod ces bya ba la sogs pas ni rgyu yongs su 'dzin pa las 'chal ba'i shes rab ston to/ /dam pa'i chos la skur ba btab pas ni tshe rabs gzhan rnams su yang shes rab 'chal bar 'gyur ro/ /kun chub par byas pa ni tshig gis brjod pa ste/de dag gi tshul khrims de la yang skur pa 'debs par 'gyur la gang zag la yang smod par 'gyur te/ de'i rgyus bsod nams ma yin pa chen po yongs su sdud par 'gyur ba'i phyir smad pa'i nyes dmigs bstan to/ /de la yid kyis mngon par zhen pas na lta ba'o/ /de'i 'du shes yid la byed pa kun du spyod pas na kun du rtog pa'o//snga nas byang chub sems dpa'i bslab pa'i gzhi bsgrag pa ni brtag par bya ba'i phyir ro/ /bslab pa'i gzhi de dag kyang byang chub sems dpa'i sa las mdor bsdus te bstan pas na byang chub sems dpa'i sde snod kyi ma mo 'di las zhes smos so/ /snying nas zhes bya ba ni mos pa'i stobs bskyed pa'i phyir ro//so sor brtags nas zhes bya ba ni nus sam mi nus pa nye bar brtags nas zhes bya ba'i tha tshig go/ /de las bzlog pa ni pha rol gyis yang dag par 'dzin du bcug pa'i phyir yang ma yin zhes bya bas bstan te/ la la snying nas mos pa med du zin kyang gzhan gyi dring 'jog pa'am/gzhan dang 'gran pa'i phyir len pa yang yod pas na de gnyi ga 'gog par byed do/ /nyan thos kyi bslab pa las rtsa ba'i nyes pa'i khyad par bstan pa dang / bslab pa'i khyad par bstan pa'i phyir pham pa'i gnas lta bu'i chos bzhi yod de zhes smos te/ /nyan thos 'dod chags dang zhe sdang dang gti mug la gnas nas 'khrig pa'i 'dod chags kyis gnyis kyis gnyis sprod pa'i sbyor ba dang /yo byad kyi 'dod chags kyis gzhan gyi nor rku ba dang / sems can la kun nas mnar sems kyis kun nas dkris pas mi gsod pa dang / gti mug gi kun nas dkris pas bdag la med bzhin du 'jig rten las 'das pa'i chos sgrogs pa'i chos gzhi byas na skal ba med par 'gyur ba bde dang 'dra bar byang chub sems dpa'i pham pa'i gnas lta bu'i chos gzhan bzhi yod par rig par bya ste/rnyed pa dang bkur sti byung ba kun du myong bas byang chub sems dpa' skal ba med par 'gyur ro//bdag la bstod pa zhes bya ba la sogs pas bkur sti ston to/ /nyan thos ji ltar 'khrig pa'i 'dod chags kyis bdag dang gzhan sun phyung bas skal ba med par 'gyur ba de bzhin du byang chub sems dpa' yang rnyed pa dang bkur sti la brkam pas bdag dang gzhan sun phyung na pham par 'gyur ro//de bas na tshul khrims 'di ches zab pa dang rgya che ba yin te/ de bzhin du gzhan la yang shes par bya'o/ /nyan thos ni brkam chags kyis gzhan gyi nor brkus na pham par 'gyur la/ byang chub sems dpa' ni bdag la nor yod bzhin du zang zing la ser sna byed pas slong ba po nyam thag pa la ma byin nam/chos kyi bgo bsha' ma byas na pham par 'gyur ro/ /nyan thos ni mi bsad pas pham par 'gyur la/ byang chub sems dpa' ni sems can thams cad la kun nas mnar sems kyi sems bskyed nas lag pa'am bong ba la sogs pas gnod pa bskyed nas gnod pa byed byed pas gnod pa'i nyes pa shad kyi sbyangs shing nyes pa bshags pa las kyang mi nyan na pham par 'gyur ro//nyan thos ni med bzhin du thob pa'i chos bsgrags pas pham par 'gyur ro/ /byang chub sems dpa' ni yod pa mi ston pa dang / dam pa'i chos la skur pa 'debs pa dang / dam pa'i chos ma yin pa ston pas pham par 'gyur ro//de la dga' ba ni bdag nyid 'dod pa'i phyir ro/ /de kho na bzhin du gzhan dag la 'chad pas na ston pa'o/ /'jog pa ni sgrub pa'i sgo nas 'dzud pa'i phyir ro/ /dam pa'i chos ltar bcos pa zhes bya ba la sogs pas na bdag nyid dang gzhan gyi stobs gnyis las 'gyur bar ston to//gang yang rung ba zhes bya ba la sogs pas ni tshang ba yang rung mtshang pa yang rung bas skal ba med par 'gyur bar ston to/ /pham pa byung ba'i dge slong la tshe 'di nyid la 'phags pa'i lam thob pa dang / de'i sbyor ba las byung ba'i dge ba'i chos 'thob pa'i skal ba med pa de bzhin du byang chub sems dpa' yang rtogs pa dang /nyis pa'i tshogs bsags pas rtogs par 'gyur ba'i skal ba med de de'i phyir bsam pa rnam par dag par 'gyur ba zhes bya ba smos so/ /dper na nyan thos ni rtsa ba'i nyes pa byas pas dge slong ma yin dge sbyong ma yin/shAkya'i sras ma yin par 'gyur te/ cha lugs tsam gyi sgo nas dge sbyong zhes bya bar zad pa de bzhin du byang chub sems dpa' yang de byas pas khas 'che ba tsam gyi byang chub sems dpar zad do/ /nyon mongs pa'i kun nas dkris pa chung ngu dang / 'bring gis ni pham pa'i gnas lta bu'i 'gal ba byas na yang sdom pa btang ba ma yin te/tshul 'di ni nyan thos dang mi 'dra'o/ /chen pos ni btang bar 'gyur te/ de ni gang gi phyir zhes bya ba la sogs pas ston to/ /pham pa'i gnas lta bu'i chos rnams rgyun ma chad par kun du spyod pas ni de ltar ngo tsha shes pa dang khrel yod pa rnam pa thams cad du nyams par byas par 'gyur te/de'i phyir chung ngu tsam yang zhes bya ba la sogs pa smos te/ ngo tsha med pa des kyang mgu bar byed de de kun du spyod pa mi spong bas na dag pa'o/ /de la yang nyes dmigs su mi lta bas na yon tan du lta ba can te/ rnam pa 'di rnams kyis ni kun nas dkris pa chen po yin par rig par bya'o/ /nyan thos rnams kyi so sor thar pa'i sdom pa ni dge ba'i chos thams cad kyi gnas su gyur pa'i phyir rtsa ba'i sdom pa zhes bya ste/ de chad par gyur na ngo tsha med pa dang khrel med pa drag po kun du spyod pas ngo tsha shes pa dang / khrel yod pa nyams par byas pas tshe 'di nyid la sdom pa yang dag par blang ba'i skal ba med par 'gyur ro/ /byang chub sems dpa' ni de lta ma yin te/ tshe 'di nyid la byang chub sems dpa'i sdom pa yongs su btang du zin kyang tshe 'di la phyir mnod pa'i skal ba yod de/ /ngo tsha shes pa dang khrel yod pa nyams pa med pa'i phyir ro//gtan du gtong ba'i rgyu bstan pa'i phyir smon pa yongs su btang ba zhes bya ba la sogs pa smos te/ kun nas dkris pa chen po kun du spyod pas pham pa'i gnas lta bu'i chos kun du spyod pas gtong bar 'gyur ro/ /nyan thos rnams kyi sdom pa ni tshe'i mtha' dang nyin zhag gcig gi mtha'i bar du gnas par zad de/shi ba'i 'og tu de dag gi dran pa med pa dang / shin tu mi mthun pa'i lus thob pa'i phyir tshe rabs phyi ma la rjes su mi 'brang bas na de kho na bzhin du bcas so/ /byang chub sems dpa' rnams kyi dran pa dang blo gros dang bye brag byed pa'i stobs bskyed pa thob pa dang /rten gyi khyad par thob pa'i phyir byang chub kyi snying po la thug pa'i bar gyi sdom par 'gyur te/ de bas na tshe brjes su zin kyang zhes bya ba la sogs pa smos so/ /'og ces bya ba ni ngan song rnams te/ smon lam gyi stobs dang dbang gi sbyor bas sems can yongs su smin par bya ba'i don du ngan song du skyes nas yang sdom pa yongs su btang ba med de/gtong ba'i rgyu med pa'i phyir ro/ /byang chub sems dpa' sdom pa gtong ba'i rgyu rnam pa gnyis ni bstan zin to/ /so so thar pa'i sdom pa gtong ba'i rgyu ni rnam pa lngar bstan te/ bye brag med par bslab pa phul ba dang / shi 'phos pa dang / mtshan gnyis cig car skyes pa dang / dge ba'i rtsa ba chad pa dang / nyin zhag 'das pas pa'o/ /de bas na byang chub sems dpa'i dus nges pa med pa dang / gtong ba'i rgyu med pa'i phyir tshe brjes su zin kyang sdom pa gtong ba med pa kho na yin no/ /steng zhes bya ba ni lha rnams kyi nang du'o//thad ka zhes bya ba ni mi rnams kyi nang du'o/ /gtong ba'i rgyu med pa ni byang chub sems dpa' gang gis zhes bya ba la sogs pas ston to/ /mi dran du zin na yang rang bzhin gyis byang chub sems dpa'i chos nyid la gnas pa dang / byang chub sems dpa' rnams kyi 'tsham pa ma yin pa byed pa med pas na de rjes su 'brang ba kho nar 'gyur te/dran pa gso pa'i phyir yang ma nos na yang nyes pa med pa de ni dge ba'i bshes gnyen zhes bya ba la sogs pas ston to/ /dper na nyan thos kyi 'dul ba la la la zhig la res 'ga' tsam dngos po'i 'gal ba byung na yang dngos po de nyid kyi nyes par 'gyur ba bzhin du byang chub sems dpa' rnams kyi yang de dang 'dra bar bstan pa'i phyir nyes pa dang zhes bya ba la sogs pa smos so//dper na nyan thos rnams kyi nyes pa ni rnam pa gnyis yod de/ nyon mongs pa can gyi sems kyis de byas na ni nyon mongs pa can du 'gyur la/ nyon mongs pa can ma yin pas byas na ni nyon mongs pa can ma yin par 'gyur ba de bzhin du byang chub sems dpa' rnams kyi yang nyon mongs pa can dang /nyon mongs pa can ma yin par 'gyur ro/ /dper na nyan thos rnams kyi nyes pa rnams ni rnam pa lngas chung ngu dang / 'bring dang / chen por 'gyur te/ ngo bo nyid dang / nyes pa byed pa dang /bsam pa dang / dngos po dang / bsags pa'o/ /de la pham pa rnams ni ngo bo nyid kyis nyes pa chen po yin no/ /dge 'dun gyi lhag ma ni 'bring ngo / /de ma yin pa rnams ni chung ngu'o/ /yang pham pa rnams dang / dge 'dun lhag ma rnams kyi ni chen po ste/ nyes pa lci bas phye ba yin pa'i phyir ro/ /ltung ba ni 'bring po'o/ /nyes byas ni yang ba ste/ de ltar na ngo bo nyid kyi sgo nas chung ngu dang / 'bring dang / chen por 'gyur ro/ /nyes pa byed pa'i sgo nas ji lta bu zhe na/ mi shes pa'am bag med pas byas pa gang yin pa 'di ni chung ngu'o/ /nyon mongs pa shas che bas byas pa gang yin pa 'di ni 'bring ngo //ma gus pas byas pa gang yin pa 'di ni chen po'o/ /bsam pa'i sgo nas ji lta bu zhe na/ 'dod chags la sogs pa'i kun nas dkris pa chung dus byas pa gang yin pa de ni chung ngu'o/ /'bring dang chen pos byas pa ni 'bring dang chen por 'gyur ro/ /dngos po'i sgo nas ji lta bu zhe na/bsam pa'i sgo nas mtshungs su zin kyang dngos po'i khyad par gyis chung ngu dang 'bring dang / chen por 'gyur bar rig par bya ste/ 'di lta ste/ kun nas dkris pa mtshungs pas dud 'gro'i skye gnas su gyur pa'i srog chags gsod dam gsod du bcug na ltung bar 'gyur gyi mi ni de lta ma yin no//mir gyur pa las kyang pha ma gsod dam gsod du bcug na ni pham par yang 'gyur la/ mtshams med par yang skye bar 'gyur te/ de ltar na dngos po'i sgo nas kyang 'gyur ro/ /bsags pa'i sgo nas ji lta bu zhe na/ ji ltar 'di na kha cig nyes pa gcig gam/ gnyis sam/gsum mam/ /lnga'i bar du byas na yang chos bzhin du yang phyir 'chos par mi byed pa 'di ni bsags pa'i sgo nas chung ngu yin no/ /de yan chad nyes pa bcu'am nyi shu nas rtogs par nus pa brgya'i bar du byas kyang phyir 'chos par mi byed pa 'di ni 'bring ngo / /nyes pa tshad med pa byung yang phyir 'chos par mi byed pa 'di ni chen po yin te/de bzhin du 'dir yang chung ngu la sogs pa'i tshul gyis sbyar bar bya'o/ /gsum la skyabs su song ba dang / lhag par yang bla na med pa yang dag par rdzogs pa'i byang chub tu sems bskyed pas ni nyin gcig bzhin du dkon mchog gsum la mchod pa dang /rim gro mi bya bar mi rung bas na dkon mchog gsum la mchod pa mi byed pa'i nyes pa de bzhin gshegs pa zhes bya bas bstan te/ de bzhin gshegs pa phyogs gang na bzhugs pa'i phyogs de logs su bltas nas rjes su dran pa'i rnam pas phyag bya'o/ /de'i yon tan rjes su dran pa'i sgo nas mchod rten la yang de bzhin du bya'o//chos dang dam pa'i chos kyi glegs bam la yang de bzhin du bya ste/ 'di ni bla na med par gtogs pa kho na'i bstan pa'i chos la bya ba'i phyir/ byang chub sems dpa'i sde snod ces bya ba la sogs pa smos so/ /'dir phyir mi ldog pa'i byang chub sems dpa'i dge 'dun la bya ba'i phyir dge 'dun la yang rung zhes bya ba nas gang yin pa zhes bya ba la sogs pa'i bar gyis ston to//mchod pa ni lus dang ngag dang yid kyis bya ba ste/ lus kyis ni tha na phyag bya ba yan chad de gcig tsam zhes bya bas ston to/ /ngag gis ni tha na zhes bya ba nas/ tshig bzhi pa'i tshigs su bcad pa gcig tsam zhes bya ba la sogs pa'i bar gyis ston to//yid kyis ni dkon mchog gsum gyi yon tan rjes su dran pas ston to/ de la yang mtha' ni dad pa gcig tsam zhes bya ba yin no/ /de la nyes pa dang bcas pa ni kha na ma tho ba bskyed pa'i phyir ro/ /'gal ba dang bcas pa ni byang chub sems dpa'i chos nyid dang 'gal ba'i phyir ro//bsam pa dag pa'i sar chud pa'i byang chub sems dpa' ni bsam pa dag pa'i khyad par thob pa'i phyir chos nyid kyis dkon mchog gsum gyi mchod pa la rtag tu zhugs pa nyid yin pas de ni sgrub pa'i mchod pa dang 'bral ba'i dus med de/ dper na bden pa mthong ba'i 'phags pa'i gang zag bzhin no//gal te lus dang longs spyod la lta bas 'dod pa che ba la sogs pa gsum dang du len par byed na nyes pa dang bcas par 'gyur te/ byang chub sems dpa'i chos nyid dang 'gal ba'i phyir ro/ /'dod pa che ba la sogs pa ni gcig tu nges par nyon mongs pa can kho na yin pas na de la ni nyon mongs can ma yin pa med do//spang ba'i phyir 'dun pa bskyed na ni nyes pa med de de'i gnyen po la legs par bsten pas 'bad pa la sogs pa de'i gegs la gnas shing bzlog pa med bzhin pas na rgyu'i stobs kyis zil gyis mnan nas kun du spyod na yang nyes pa med do//bkur sti bya bar 'os pa rnams la bkur sti bya ba'i 'os su byas nas ches rgan pa zhes bya ba la sogs pa smos te/ /yon tan dang ldan pa ni yid ches par bya ba'o/ /bkur sti bya bar 'os pa ni rnam pa de gnyis kyi sgo nas gsong por smra ba la sogs pa'i 'os yin pa'i phyir ro//ma byas na nyes pa dang bcas pa'i rgyu ni nga rgyal gyis non ces bya bas bstan te/ nga rgyal gyis khengs na nyon mongs pa can du 'gyur ba'i phyir ro/ /snyom las dang le lo ma byas pa ni nyon mongs pa can ma yin te/ sems kyi nyes pa shas che ba nyid med pa'i phyir ro/ /smra ba pa ni blo dor gyi tshig go//kun du smra ba thugs bde ba'am zhes 'dri ba la sogs pa'i tshig go/ /yang dag par dga' bar byed pa ni don gzhan gyi tshig dri ba'o/ /rigs pa'i tshul gyis zhes bya ba ni lan gyi rnyed pa'i bsam pa spangs pa'o/ /gnyid kyis log pa ni yang phrad du 'ongs pa la sogs pa'i bya ba byung ba ni sad pa'i 'du shes zhes bya bar bstan to//'brel ba'i gtam rnam par gtan la 'bebs pa ni chos mngon pa dang 'dul ba mngon pa'i dbang du byas nas phan tshun rtog par byed pa'o/ /'dri ba'i tshul gyis gzhan yang dag par dga' bar byed pa na ngag cig car 'byung du mi rung bas na nyes pa med do//chos nyan pa'i bar chad du 'gyur ro snyam pa'i bsam pa can la yang nyes pa med do/ /rnam par gtan la 'bebs pa yang de dang 'dra'o/ /de bzhin du gzhan chos nyan pa rnams kyi g.yeng ba bsrung bsam pa dang chos smra ba'i sems bsrung na yang nyes pa med do/ /de ltar byas na de dag la phan par 'gyur ba zhig na yang nyes pa med do//gal te dge 'dun gyis der phyag bya ba'i las de mi bya ba'am/ de dang lhan cig tu gtam mi bya ba de lta bu'i nang khrims bcas pa'am/ de dang lhan cig tu de ltar byas na gzhan ches mang ba rnams byang chub sems dpa' la kun nas mnar sems kyi sems skye bar 'gyur ba de bsrung ba'i phyir yang nyes pa med do//zang zing yongs su 'dzin pa'i dbang du byas nas bos pa zhes bya ba la sogs pa smos te/ /dge ba'i phyogs kyi bar chad du 'gyur ba bsrung ba'i phyir zhes bya ba ni rgyun du bya ba las nyams par 'gyur ba bsrung ba'i phyir zhes bya ba'i tha tshig go//ma thos pa'i chos mnyan pa las nyams par 'gyur du dogs pa la yang nyes pa med do/ /'bel ba'i gtam gtan la 'bebs pa yang de dang 'dra'o/ /kun nas mnar sems kyi sems kyis zhes bya ba ni de dag la dga' ba med pa'i phyir zhes bya ba'i tha tshig go/ /chags pa zhes bya ba ni yongs su gzung ba de la bdag nyid kun du 'dzin par 'gyur bar mthong ba'o//sbyin pa po 'gyod par 'gyur ba'am gti mug gi dbang gis sbyin pa 'khrul pa'am/ kun du 'dzin pa btang ste nor thams cad btang bas dbul por 'gyur du dogs pa la yang nyes pa med do/ /chos ma yin pa'i sbyin par bya ba'i chos ma blangs na nyes pa med do//mi rigs pa las 'ongs pa de dang 'dra ste mi rigs pa las 'ongs pa blangs pa'i nyes dmigs bstan pa'i phyir rgyu des zhes bya ba smos so/ /chos kyi 'go bsha'i dbang du byas nas gzhan chos 'dod pa rnams la zhes bya ba la sogs pa smos pa la/ rnam pa gnyis kyis nyan pa po snod du mi 'gyur te/zhe 'gras pa'i sems kyi phyir ni mu stegs can zhes bya ba smos so/ /zhes med pa'i phyir ni ma gus zhes bya ba smos so/ /dbang po yongs su ma smin pa la zab mo bstan pa bsrung ba'i bsam pa can la nyes pa med de/ de'i nyes dmigs ni skrag ces bya ba la sogs pas bstan te/skrag pa ni dka' bar 'dzin pa'i phyir ro/ /log par lta ba ni yid mi ches pa'i phyir ro/ /log par mngon par zhen pa ni gzhan dag gis legs par brda sprad kyang mi nyan pa'i phyir ro/ /de'i rgyu las kyang bsod nams ma yin pa 'phel ba dang ngan song gi 'gro bar 'gro ba'i phyir gnod pa dang nyams par 'gyur ro//gcig nas gcig tu snod du ma gyur pa la ston par 'gyur bar mthong na yang nyes pa med do/ /tshul khrims kho na'i dbang du byas nas tshul khrims 'chal ba rnams la sems 'khrul pas yal bar 'dor ba dang / brnyas pa'i sems kyis khyad du gsod na nyes pa dang bcas par 'gyur ro//de ci'i phyir zhe na/ tshul khrims 'chal pa rnams la snying rje chen po nye bar 'jog pas yang dag par bsgrub pa ltar tshul khrims dang ldan pa rnams la ni de lta ma yin no zhes bya bar ston to/ /de dag ni bdag nyid legs par zhugs pa ma yin pa'i phyir de dag la phan pa dang bde ba byar med pas na de'i phyir sdug bsngal gyi rgyu zhes bya ba la sogs pa smos so//'di ni tshul khrims 'chal ba dang 'dra ba yin no zhes skur pa 'debs pa bsrung ba dang / dge 'dun gyi nang khrims srung na nyes pa med do/ /so sor thar pa'i sdom pa la nyan thos rnams dang thun mong pa dang thun mong ma yin pa'i bslab pa rnam par gzhag pa bstan pa'i phyir/so sor thar pa zhes bya ba la sogs pa smos te/ so sor thar pa ni ma mo'i mdo yin no/ /'dul ba ni de'i rnam par dbye ba'o/ /bcas pa'i kha na ma tho ba dang bcas pa ni bcas pa'i kha na ma tho ba dang bcas pa ste/ rang bzhin gyis mi dge ba ma yin la mi bya bar bcom ldan 'das kyis bcas pa'i phyir kha na ma tho ba ste/de byas na kha na ma tho ba 'phel ba'i phyir dper na chang 'thung ba la sogs pa lta bu'o/ /chang 'thung ba ji ltar bcas pa'i kha na ma tho ba yin par mngon/ 'o na ma yin par yang ji ltar mngon smras pa/ srog gcod pa la sogs pa bzhin du nyes par spyod pa zhes gsungs pa'i phyir dang /ngan song gi 'gro ba'i rgyu nyid du bstan pa'i phyir dang / bag med pa'i gnas kyi gzhi yin par gsungs pa'i phyir dang / gcig tu nges par ma gnang ba'i phyir ro/ /ji tsam gyis rang bzhin gyi kha na ma tho ba dang bcas pa dang / bcas pa'i kha na ma tho ba dang bcas par 'gyur ba 'di spyad na nyon mongs pa can gyi sems kho nas byas pa gang yin pa de ni rang bzhin gyi kha na ma tho ba dang bcas pa yin no//nyon mongs pa can ma yin pa'i sems kyis kyang spyad par nus la/ nyes pa gzhan bsrung ba'i phyir bcom ldan 'das kyis bcas pa gang yin pa de ni bcas pa'i kha na ma tho ba dang bcas pa yin no//'di yang dpyad par bya ste/ ci mi 'dod bzhin du yang nyon mongs pa can ma yin pa'i sems kyis sman pa'i man ngag las so sor brtags te chang 'thung bar gyur pa yod dam 'on te med/ 'di las cir 'gyur/ gal te yod na ni nyon mongs pa can ma yin pa'i sems ji ltar nyes par spyod par rung /'on te med na ni de bzhin du 'thung ba nyon mongs pa med pa'i sems su ji ltar 'gyur te/ gang gi phyir des chang ni kha na ma tho ba dang bcas pa yin par shes bzhin du ngo tsha mi shes pas 'thung ba'i phyir ro/ /kha na ma tho ba dang bcas pa'i chang la kha na ma tho ba ma yin par 'dzin pa de kha na ma tho ba med par ji ltar 'gyur/ran par 'thung bas ra ro bar mi nus pa de ltar yang shes bzhin du 'thung ba gang yin pa de ci'i phyir kha na ma tho ba dang bcas par 'gyur te/ dper na dug tshod zin par sbyar te zos na dug gi nyes pa bskyed pa'i mthu med de nyes par mi 'gyur ba bzhin no//de bas na chang 'thungs so cog kyang nyes par spyod pa ma yin no/ /chang 'thung ba rnams ni phal cher ra ro bar bya ba'i phyir chang 'thung bar byed de/ ci nas dga' bar bya'o snyam pa dang / yang na ra ro bar 'gyur bar bdag nyid kyis shes bzhin du 'thung ba de dag ni nyon mongs pa can gyi sems yin pa'i phyir da lus kyis nyes par spyod par 'gyur ba 'dir dgongs par rig par bya ste/de dag nyid kyis ngan 'gror 'gro ba'i rgyu yin no/ /nyes dmigs mang pas na bag med pa'i gnas kyi gzhi yin no/ /'thung ba na tshod rig par mi nus pas na gcig tu nges par ma gnang ngo / / 'dod chags dang bral ba rnams kyis kyang spyad pa'i phyir te/ 'dod chags dang bral ba rnams kyis spyad pa gang yin pa de ni mi dge ba ma yin no/ /chang ni 'dod chags dang bral bas kyang 'thung ste/ de bas na rang bzhin gyi kha na ma tho ba dang bcas pa ma yin no/ /sogs pa'i sgras ni dus ma yin pa'i kha zas la sogs pa bstan to//gzhan dag gi sems srung bas zhes bya ba ni gzhan dag gi sems srung pas zhes bya ba'i tha tshig go/ /ma dad pa rnams zhes bya ba la sogs pas ni de nyid rnam par 'grel te/ gang zag ma dad pa rnams slob ma sgrub pa rnams nyid la dad pa bskyed pa'i phyir dang / snga nas dad pa rnams kyi dad pa 'phel bar bya ba'i phyir ro//de la zhes bya ba ni bcom ldan 'das kyis ma gnang ba'i dngos po ci yang rung ba'o/ /mtshungs par bslab ces bya ba na nyan thos rnams kyis kyang mi bya la byang chub sems dpa' rnams kyang mi bya'o/ /de bas na mtshungs par 'gyur te/ mtshungs par 'gyur ba'i gtan tshigs ni de ci'i phyir zhe na zhes bya ba la sogs pas bstan to//bdag gi don lhur byed ces bya ba ni bdag nyid 'dul ba la zhugs pa'i phyir ro/ /gzhan gyi don la mi lta ba zhes bya ba ni de dag ni gzhan la phan pa'i phyir zhugs pa ma yin mod kyi/ de dag kyang gal te na gzhan dad par bya ba'i phyir 'jug par byed na/byang chub sems dpa' gzhan la phan pa'i phyir zhugs pa rnams lta los kyang byed do zhes bstan to/ /don nyung ba las brtsams te zhes bya ba ni 'dod pa chung ba'i sgo nas so/ /bya ba nyung ba zhes bya ba ni yo byad yongs su 'dzin pa mang na bya ba mang bar 'gyur te de spang ba'i phyir ro//snying las chung ngur gnas pa zhes bya ba ni 'phags pa'i rigs la gnas pa ste/ byang chub sems dpa' rnam pa thams cad du sems can thams cad la phan pa dang bde ba'i phyir zhugs pa gzhan gyi don la brtsams te don nyung zhing bya ba nyung la snying las chung ngur gnas pa ni mdzes pa ma yin te/de bas na gzhan gyi don nyid bdag gi don yin pa'i phyir byang chub sems dpa' rnams kyis ni ci nas kyang gzhan gyi don rnams la bslab par bya bar nye dur mi 'ong ba'i bram ze dang khyim bdag rnams las mi bslang par mi bya bas ston to/ /nyan thos rnams la ni mi gnang bar bcas te gos mang po dag la skabs phye ba rnams la yang gos ya gnyis tsam blang bar bya ba'i phyir bcas so//lhung bzed rnams kyang de dang 'dra'o/ /bdag nyid kyis rgyu skud pa blangs pa nye dur mi 'ong ba'i thag pa la 'thag tu 'jug pa yang de dang 'dra'o/ /mal stan srin bal can gding ba dang / stan nang tshangs can bcad bar mi bya ba yang de dang 'dra'o//gser dngul blang bar mi bya zhes bya ba la sogs pa bcas pa'i kha na ma tho ba dang bcas pa la ni byang chub sems dpa' nyan thos rnams dang bslab pa mtshungs pa ma yin te/ gal te nyan thos ltar bslab na ni nyes pa dang bcas par 'gyur ro/ /gnas 'di dag ni byang chub sems dpa'i sde snod las byang chub sems dpa' rnams la gnang ba'i phyir ro//de ltar na bcas pa'i kha na ma tho ba dang bcas pa'i dbang du byas nas byang chub sems dpa' rnams kyi bslab pa nyan thos rnams dang thun mong ba dang thun mong ma yin pa rnam par gzhag pa ni bshad zin to//da ni byang chub sems dpa' rnams kyi rang bzhin gyi kha na ma tho ba dang bcas pa zhes bya ba la bslab pa'i khyad par bstan par 'dod pa'i phyir/ rang bzhin gyi kha na ma tho ba dang bcas pa la zhes bya ba la sogs pa smos te/ nyan thos la ltos nas grags pa'i sgo nas rang bzhin gyi kha na ma tho ba dang bcas pa zhes bya'i/byang chub sems dpa' rnams kyi ni de rang bzhin gyi kha na ma tho ba dang bcas pa nyid ma yin te/ nyon mongs can ma yin pa'i sems kyis byed pa'i phyir ro/ /thabs mkhas pa zhes bya ba ni gzhan mtshams med pa la sogs pa'i las bya bar mngon du phyogs par mthong na las de'i rnam par smin pa yun ring por mi bzad par 'gyur bar rig nas snying rje skye ste/de bsad pas bdag nyid sems can dmyal bar skye bar khas blangs nas de yongs su spang ba'i phyir dge ba dang lung du ma bstan pa'i sems la gnas nas bdag sems can dmyal ba rnams su skye bar 'gyur ba ni bla'i/'di sdug bsngal gyi phung po chen po dang phrad na mi rung ngo snyam nas srog dang bral bar byed do/ /de lta yin na mchod sbyin byed pa rnams dang 'khor ba las thar par 'dod pa rnams kyi phan par 'dod pa dang / de dag mtho ris thob par bya ba'i phyir phyugs rnams dang / dud 'gro sna tshogs gsod pa gang yin pa de dag kyang ci'i phyir kha na ma tho ba med par mi 'gyur/ci'o thug dang khwa mtshungs sam/ de dag gi srog gcod pa de ni gti mug las byung ba dang chags pa las byung ba yin te/ phyugs sam/ srog chags gzhan mchod sbyin du sdug bsngal ba'i gsod pas bsad na mtho ris sam/thar pa thob par 'gyur ro snyam pa ni gti mug yin te/ las kyi 'bras bu phyin ci log la mngon par zhen pa'i phyir ro/ /las 'dis bdag mtho ris su 'gro bar 'gyur ro snyam du 'dzin na ni gti mug dang chags pa yin no/ /mi dge ba'i las kyi lam rnams kyi spyi'i mtshan nyid bcom ldan 'das kyis rnam par gzhag pa ni dge slong dag srog gcod pa la rnam pa gsum ste/chags pa las byung ba dang / gti mug las byung ba dang / zhe sdang las byung ba'o/ /de bzhin du log par lta ba'i bar du yang de bzhin no zhes gsungs so/ /de bas na de kha na ma tho ba med par ji ltar 'grub par 'gyur/ thabs mkhas pa'i mdo las kyang / chags pa med pa la sogs pa'i srog gcod pa kha na ma tho ba med par bstan na de dang de dag ji ltar mtshungs/ de bas na dge ba'i sems las byung ba'i phyir dge ba yin te/ sems de ni chags pa med pa la sogs pa dang mtshungs par ldan pa'i phyir ro/ las su bya ba thams cad ni sems kyi dbang gis rnam par gzhag par bcom ldan 'das kyis gsungs te/yid ni chos rnams sngon du 'gro/ /gtso bo yid yin yid las byung / /dga' ba'i yid du gyur na ni/ /smra'am yang na byed par 'gyur/ /sdang ba'i yid du gyur na ni/ /smra'am yang na byed par 'gyur//yang gsungs pa/ 'jig rten dag ni sems kyis khrid/ /sems kyis yongs su 'dren par byed/ /thams cad kyang ni sems gcig gi/ chos kyi phyi bzhin 'brang bar 'gyur/ /zhe'o/ /de ltar na bsam pa'i rjes su zhugs pas sbyor ba la 'jug pa'i phyir bsam pa dag pas srog gcod pa ni kha na ma tho ba med pa kho na yin no//ci ste chags pa med pa la sogs pa las byung ba'i srog gcod pa yang skyon chags par 'gyur na ni de bzhin gshegs pa rnams sems can la phan pa'i tshig rtsub po gsung pa dang / brdzun du gsung pa dang / mdza' po 'byed pa yang skyon chags par 'gyur te/mngal gnas khyod ni bran mo'i bu yin no zhes gsungs pa dang / 'char ka'i mdo las kyang mi dbul po long ba kho na dang mtshungs pa khyod lta bu yang mig dang ldan pa dge slong shA ri'i bu dang lhan cig tu chos mngon pa dang 'dul ba mngon pa las kun brjod par sems sam zhes gsungs pa lta bu ni tshig rtsub po yin no//'jigs srung gi mdo las kyang mdza' bo 'byed pa'i tshig phal cher gsungs te/ 'di ltar mdo sde de nyid las sngon gcer bu pa'i dge bsnyen du gyur pa grong dpon ral gri thogs kyis 'di skad du/ btsun pa dper na mi zhig 'byor pa 'tshal zhing 'byor pa tshol la rta dmu rgod gsos na des 'byor pa de yang ma thob kyi steng du gnod pa chen po yang thob par 'gyur ba de bzhin du btsun pa bdag gis ni 'byor pa 'tshal zhing 'byor pa tshol ba las gcer bu pa byis pa lta bu rmongs shing mi gsal la mi mkhas pa don ma mchis par bsten te/don ma mchis par bskor to/ /don ma mchis par bsnyen bkur bgyis so//bdag gis ni de dag las 'byor pa de yang ma thob kyi steng du gnod pa chen po yang thob par gyur to zhes smos so/ /mdo gzhan las kyang gsungs te/ rgyas par bstan nas shA ri'i bu dang maud gal gyi bu lta bu rung ba gnyis la yang ngas dge slong gi dge 'dun ma btang na ro dang 'dra ba ngar snabs za ba khyod la lta ci smos zhes bya ba la sogs pa gsungs te/de ltar na phra ma tshig rtsub po yang bstan to/ /brdzun du smra ba yang don ji lta ba bzhin du ma bstan pa'i phyir gsungs te/ 'di lta ste/ dge slong dag tshur shog khyed kyis ma'i na tshod tsam mthong na ni ma'i 'du shes nye bar zhog cig /sring mo'i na tshod tsam mthong na ni zhes bya ba nas rgyas par sbyar ro/ /'o na de yongs su gtong ba'i sems de nyid 'dir zhe sdang ma yin nam/ sdug bsngal gyi chu bo las yongs su bskyab par 'dod de/ bdag la byams pa bas kyang lhag pa'i byams pas nges par myong bar 'gyur ba'i las byas pa las mngon du phyogs pa'i gnas las yang dag pa'i rten bzang po thob par byas nas de ji ltar yongs su btang bar 'gyur/gzhan yang / 'byor pa gang gis bdag nyid 'chi ba phan par mthong / /de ni snying brtse'i bdag nyid ldan pa rnams kyi yin/ /gang phyir dge slong drug cu la sogs shi bar 'gyur//mdo sde gnyis las de ni thub pas ma gsungs sam/ /mdo sde gnyis las gsungs pa ni shing gi phung po lta bu'i mdo las chos kyi rnam grangs 'di bshad pa na dge slong drug cu ni len pa med par zag pa rnams las sems rnam par grol lo/ /dge slong drug cu ni kha nas khrag dron mo skyugs so//dge slong drug cu ni bslab pa phul nas nyams par gyur te/ 'di skad du ston pa'i bstan pa la brtson par bgyi ba ni bcom ldan 'das dka' lags so/ /bde bar gshegs pa dka' ba lags so zhes kyang zer to zhes 'byung ste/ mdo de las de skad ces bshad pa'i rgyus 'bras bu rnam pa gsum bstan te/bstan pa'i mjug thogs su dgra bcom pa'i 'bras bu thob pa dang / kha cig ni mngon par ma thob pa dang / kha cig ni dge ba'i chos mang po las nyams te gnas yongs su btang ba ni sems tha dad pa rnams so/ /dbyug pas ri dwags 'chor gyi mdo las kyang de la bcom ldan 'das kyis dge slong rnams la mi sdug pa bshad cing mi sdug pa bsgom pa'i bsngags pa yang brjod de/dge slong dag mi sdug pa bsgom pa zhes bya ba nas phan yon che'o zhes bya ba'i bar dang / de'i tshe dge slong rnams mi sdug pa sgom par byed de/ mi sdug pa bsgoms nas lus rul pa 'dis do cha zhing 'phya smod de/des dmod pa'i bar du byed cing mtshon gyis kyang lceb par byed/ dug kyang za bar byed/ g.yang sar yang mchod par byed/ thag pas kyang 'gegs te 'chi bar yang byed pas dge slong gis dge slong gsod par byed pa'i bar du byed de/ srog gcod pa de dang snga ma'i tshig rtsub po la sogs pa la dgongs pa yongs su dag pa'i de bzhin gshegs pa rnams ji ltar zhugs pa yin/byang chub sems dpa' rnams la yang tshul de kho na bzhin du shes bya'o/ /gzhan yang sangs rgyas bcom ldan 'das rnams ni bya ba byas pa byed pa byas pa yin mod kyi sems can thams cad rnam pa thams cad kyis 'dul ba'i thabs la mkhas pa'i phyir/than dbugs phyi nang du rgyu ba yang sems can rnams kyi don dang phan pa dang bde ba la zhugs pa yin te/ byis pa ni tshe 'di ched cher 'dzin to/ /mkhas pa ni tshe phyi ma ched cher 'dzin to zhes mdo las 'byung ba'i phyir ro/ / mig rgyang ring ba dag tshe phyi ma ched cher 'dzin pa'i phyir yang sems can rnams kyi tshe 'di'i kha na ma tho ba dang bcas pa'i bde ba chung ngu phran tshegs tsam la ni mi lta'i/ sdug bsngal yang tshe phyi ma'i phan pa dang bde ba mang po kha na ma tho ba med pa kho na la lta ste/ 'di ltar kha cig la ni dge ba gzhig pa'i phyir chos ston to//kha cig la ni longs spyod gzhig pa'i phyir/ kha cig la ni bde ba gzhig pa'i phyir/ kha cig la ni bde ba dang yid bde bas sbyor bar mdzad do/ /kha cig la ni sdug bsngal ba dang yid mi bde bas sbyor bar mdzad do/ /kha cig la ni lag na rdo rje la sogs pa gnod sbyin drag po yang dag par bstan pas 'chi ba'i 'jigs pa bskyed nas 'dul bar byed do//de bas na sangs rgyas bcom ldan 'das dgongs pa yongs su dag pa rnams kyis ni sems can la phan pa dang bde bar bya ba'i phyir mi mdzad pa'i bag med de/ byang chub sems dpa' rnams kyang de dang 'dra'o/ / nyon mongs pa can ma yin pa'i sems la ni mi dge ba'i las kyi lam rnam par gzhag pa ye med de/ 'di ltar 'dul ba las kyang chom rkun gyis khyer ba'i rdzas dgra bcom pas phyir dgug go zhes 'byung la/ ma byin par len pa'i nyes pa yang med de/ bsam pa nyon mongs pa can ma yin pa'i phyir ro//dgra bcom pas ni til gyi 'bru tsam nang du bcug tu zin kyang nyon mongs pa can gyi bsam pa med de nyams su myong ba med cing tshor ba med pa'i phyir 'khrig pa yongs su spyod pa med pa de bzhin du byang chub sems dpa' nyon mongs pa can ma yin pa'i bsam pa can dbang thob cing bsam pa yongs su dag pa rnams ni sems can yongs su smin par bya ba'i thabs la zhugs pa yin pas na ngag gi kun du spyod pa mi dge ba'i las kyi lam dang 'brel pa med pa kho na rig par bya'o//byang chub sems dpa' thabs la mkhas pa'i mchog pha rol tu phyin pa thob pa rnams kyi spyod pa ni bsam gyis mi khyab ste/de la ni dge ba'i rtsa ba chung ba dang / shes rab rtul ba dang / bdag gi phyogs la mngon par zhen pa dang / sgra ji bzhin du don 'dzin pa rnams kyi blo yang 'jug par mi 'gyur ro/ /de la ni sangs rgyas nyid kyi mngon sum yin te/ de dag gi kha na ma tho ba dang bcas pa spyod pa ni de dag nyid kyis mkhyen par zad de/de bas na gzhan dag gis ni bsod nams ma yin pa mang po yongs su 'dzin pa'i thabs ye spang bar bya'o/ /dge ba'i sems sam lung du ma bstan pa'i sems su rig nas zhes bya ba ni bdag nyid kyi bsam pa dag pa rtogs nas byed pa'o/ /'dzem bzhin du zhes bya ba ni thabs gzhan med de phongs chos su byed pa'i phyir ro//phyi ma la snying brtse ba'i sems kho nas zhes bya ba ni de dag la phyi ma la phan pa'i bsam pa kho na bskyed na las de lta bu byed du zin kyang nyes pa med de/ yang dag pa'i don gyi byang chub sems dpa' ni bya ba la nan tan byed pa yin pa'i phyir zhes ston to//rang bzhin gyi kha na ma tho ba dang bcas pa la ni byang chub sems dpa' khyim pa rnams kho na 'jug par rig par bya ste/ mdo las de dag kho na'i yin par mthong ba'i phyir ro/ /ma byin par len pa'i skabs su rgyal srid kyang 'phrog pa ni sems can mang po la nor mang po sbyin pa'i bsam pa yod pa yin par bstan pa'i phyir smos so//gcig tu nges par pha rol la gnod pa byed pa la zhugs pa zhes bya ba ni srog la sogs pa la gnod pa byed pa'o/ /nor de la longs spyad pas yun ring por gnod pa dang rjes su 'brel pa'i phyir nor de slar 'phrogs te/gnas ji lta ba bzhin du 'bul bar byed na nyes pa med do/ /mi tshangs par spyod pas gzir ba zhes bya ba ni ma phrad na 'chi bar 'gyur la/ byang chub sems dpa' la yang khon gyi bsam pa 'dzin pas sems can dmyal ba rnams su skye bar 'gyur ro snyam du de ltar rig nas byed do//mgo gtsang zhes bya ba ni 'dod pa la sogs pa g.yem pa'i nyes pa spangs pa'i phyir te/ de ltar bud med dbang du gyur na ci dga' mgur dge ba'i rtsa ba la yang sbyar du yod la mi dge ba yang spang du gzhug tu rung ba'i phyir ro/ /de lta bu'i las mang po sems can la phan pa dag mthong na bdag la mi lta zhing sems can gyi don la bltas te byed na nyes pa med do//mi dge ba'i bshes gnyen gyis yongs su zin pa rnams yongs su smin par bya ba'i gnas skabs la bab pa'i tshe thabs gzhan med pa'i phra mas mdza' po'i dbyen byas nas bstan pa la 'dzud par byed na yang nyes pa med do//tshig rtsub po drag po'i sbyor ba drag pos mi dge pa'i gnas nas bslang ste/ dge ba'i gnas su dgod pa'i phyir sma 'bebs par byed na tshig rtsub mo smras kyang nyes pa med do/ /tshig 'khyal pas 'dul ba'i sems can rnams de'i sgo nas 'dul ba la yang nyes pa med par bstan to//nyan thos kyang log par 'tsho ba'i sbyor bas nyes pa dang bcas par 'gyur la/ byang chub sems dpa' rnams ni log par 'tsho ba'i sems skyes ma thag tu nyes par yongs su ma shes na nyes par 'gyur bar ston to/ /rgod pas yongs su zin pa zhes bya ba ni 'dod chags kyis bskyed pa'i rnam par ma zhi ba dang ldan pa zhes bya ba'i tha tshig ste/rnam par ma zhi ba zhes smos pa yin no/ /rta gad du dgod pa zhes bya ba ni skad cher dgod pa'o/ /kun du rtse zhes bya ba ni lus kyi sbyor ba'o/ /kun du ca co 'don zhes bya ba ni lus dang ngag gi sgo nas so/ /dga' ba'i bzhin gyis ni nang gi bsam pa dag par bstan pa'i phyir ro//bcom ldan 'das kyis gsungs pa'i don ngas rtogs te/ byang chub sems dpa' ni 'khor ba nyid du gnas par bya ba yin no zhes mdo las byung ba kho na bzhin du byang chub sems dpa' rnams 'khor pa la mngon par dga' bar gnas na yang nyes par 'gyur par bstan te/nyan thos shes rab rtul pos kyang 'khor ba'i nyes dmigs can gyi nyon mongs pa yongs su shes pa yang mya ngan las 'das pa la mngon par dga' zhing 'khor ba la skyo bar bya dgos na byang chub sems dpa' la ha cang yang bya dgos par ston to/ /de las khyad par du 'phags pa kun nas nyon mongs pa med pa dang ldan pa ni byang chub sems dpa' yin te/ye shes chen po dang mthu chen po dang ldan pa'i phyir ro/ /dge slong dgra bcom pa ni de lta ma yin no/ /snyan pa dang mi snyan pa shin tu rtogs pa de nyid ni dri ngas zhes bya ba la sogs pas bshad do/ / mi srung zhes bya ba ni yongs su mi spong ba ste/ mi bden pas mi byed ces bya ba'i tha tshig ste/ bden pa'i dngos po dang / bden pa'i dngos po ma yin pa dang go rims bzhin du sbyar ro/ /mu stegs can ni shin tu mngon par zhen te dga' bar bya bar mi nus pa'i phyir ro/ /byis pa rnams kyis kha na ma tho ba ma yin pa'i sgo nas gzhag pa'i dri ngas la dri ngas ma yin pa'i 'du shes kyis yongs su spong bar mi byed na nyes pa med do//thabs drag po zhes bya ba ni lus dang ngag gi spyod pa mi sdug pas chad pas 'dul ba rnams la bya ba'o/ /yid mi dga' bar 'gyur ba bsrung ba'i phyir zhes bya ba ni bdag gi sems kyi sdug bsngal ba yongs su spang ba'i tha tshig go//gzhan dag gi don chung ngu la bdag nyid kyi tshegs chen por 'gyur na ma byas kyang nyes pa med do/ /dge sbyong gi chos bzhi dang bral ba'i nyes pa bstan te/ gshe ba ni khros nas spyo ba'i tha tshig go/ /khro ba ni khror gzhug pa'i bsam pa can gyi ngag gi spyod pa mi sdug pa'o//rdeg pa ni sdug bsngal bskyed pa'i bsam pas snun par byed pa'o/ /mtshang 'dru ba ni gcig la gcig nyes pa gleng ba'o/ /nyes pa byas pa shad kyis byang bar mi byed pa'i nyes pa bstan te/ nyes pa byas sam ma byas par yang brgya la na byas su dogs pa ni de lta de ltar 'dzin pa'i phyir ro//kun nas mnar sems zhes bya ba ni phrag dog gi shas che ba'i phyir ro/ nga rgyal gyis non pa zhes bya ba ni dman pa'i tshul gyis ngo tsha ba'i phyir ro/ /nyes pa byas na yang shad kyis byang bar mi byed pa dang / dgos pa la yal bar 'dor ba'o//'thab krol can zhes bya ba ni shad kyis byang bar byas na yang 'khrug par 'gyur ba'o/ /rtsod par byed pa ni de'i sgo nas rtsod par byed pa'i phyir ro/ /bzod pa'i ngang tshul can zhes bya ba ni 'gyur ba med par shes pa ste/ shad kyis byang bar byas kyang rung de'i sems 'gyur ba med par rig pa'am/shad kyis byang bar byed mi 'dod pa'am/ ngo tsha bar byed de mi mthun par 'du shes par rig na shad kyis ma sbyangs kyang nyes pa med do/ /rtsod pa gang la gzhan nyes pa byung ba dag ces bya ba ni rtsod pa byung ba rnams dang rtsod pa la zhugs pa rnams la shad kyis byang bar byed pa'o//mi nyan zhes bya ba ni sems mi dga' ba'am/ mi bzod pa'i ngang tshul can yin pa'i phyir ro/ /chos bzhin ma yin pa zhes bya ba ni mi rigs pa'o/ /khro ba'i bsam pa zhes bya ba ni khro ba'i sems te/ de rgyun mi 'chad par 'byung ba'o/ /'dzin pa ni rnam grangs so//tshogs sdud pa'i dbang du byas te smras pa ni rim gro bya ba dang bsnyen bkur bya ba kho na'i dbang du byas nas de kho na'i phyir zang zing med pa'i sems dang ldan pas rim gro bya ba dang bsnyen bkur bya ba bdag gir byed na nyes pa med de sbyor ba yod du zin kyang bsam pa dag pa'i phyir ro//'du 'dzi'i gtam la kun du chags pa'i sems ni bre mo'i gtam la 'dus pa'i nang du rgyal po dang chom rkun la sogs pa'i gtam ngan pa la 'jug pa'o/ /brjed pa zhes bya ba ni sems rnam par g.yeng ba'o/ /dran pa la gnas kyang pha rol gyi ngor nyan pa dang / ya mtshan du 'dzin te 'dri ba tsam dang dris pa'i lan 'debs pa tsam la ni nyes pa med do//slob pa la brtson pa dang / 'og nas 'byung ba la ni de yang nyes pa'i gnas yin no/ /sems gnas pa nyid ni sems mnyam par 'jog par 'dod ces bya bas ston to/ /bsam gtan la brtson pa kho na'i sgrib pa'i dbang du byas nas byung ba zhes bya ba la sogs pa smos so//ting nge 'dzin thob na yang bsam gtan tsam gyis chog par 'dzin pa nyes par 'gyur ba ni yon tan du blta zhes bya bas ston to/ /shes rab mngon par sgrub pa'i sbyor ba la nyes par 'gyur ba'i dbang du byas nas/byang chub sems dpa' gang zhes bya ba la sogs pa smos so/ /da la bslab par yang mi bya'o zhes bya ba ni nan tan du sgrub par mi bya'o zhes bya ba'i tha tshig go/ /don med pa ni ci zhig bya zhes bya ba la sogs pas ston to/ /de nyid la bye brag tu brtson par bya ba ni/ 'di ltar zhes bya ba la sogs pas ston to//gcig tu nges par de la brtson pa'i 'dun pa bzlog pa'i phyir na nyes pa med do/ /byang chub sems dpa'i sde snod ni bsod nams dang ye shes kyi tshogs phal po che'i lam ston par byed pa yin pas na de nyid la bye brag tu bslab par bya dgos te/ de'i phyir byang chub sems dpa'i sde snod ces bya ba la sogs pa smos so//yun thung ngus kyang dran par nus pa dang / sems rno zhing shes rab gsal bas don sems pa dang rtogs par byed nus pa dang / lhan cig skyes pa'i shes rab kyis sangs rgyas kyi gsung rab rtogs par nus te/ rtogs pa'i shas che ba la ni nyes pa med de/de las nyis 'gyur du zhes bya ba ni myur ba kho nar rgyun du chud pa dang / gus par brtson zhing goms par byed de/ rang gi gzhung la brtson du zin kyang nyes pa med do/ /de lta bu'i tshul dang yang mi 'gal bar zhes bya ba ni sangs rgyas kyi gsung rab la brtson par byas su zin kyang de la gnas pa'i lta ba can gyi mu stegs can gyi bstan bcos la sbyor ba ma gnang ste/dper na dgos pa'i dbang gis sman tsha ba la brten pa de bzhin du mu stegs can gyi bstan bcos la yang de dang 'dra bar bya'o/ /mchog tu zab pa ni nyan thos la sogs pa'i blo las 'das pa'i phyir de kho na'i don zhes bya ba la sogs pa smos so//don dang ldan pa ma yin zhes bya ba ni don dang 'brel pa ma yin zhing shes rab kyi khyad par gyi rten ma yin pa'i phyir ro/ /chos dang ldan pa ma yin zhes bya ba ni bsod nams kyi khyad par gyi rten ma yin pa'i phyir ro//gcig tu na don bzang po yang ma yin la tshig 'bru bzang po yang ma yin pa ste/ go rims bzhin du sbyar ro/ /de'i phyir phan pa dang / bde bar 'gyur ba ma yin zhes smos so/ /skur pa 'debs pa dang ldan pa ni bdag nyid kyi tshul bzhin ma yin pa yid la byed pa'am zhes bya ba la sogs pas ston te/rang gi stobs sam rgyu'i stobs sam zhes bya ba'i tha tshig go/ /gzhan gyi rjes su zhugs pa zhes bya ba ni gzhan gyi stobs dang sbyor ba'i stobs so/ /gal te zab mo la sems mi 'jug par 'gyur na/ de la sgrub pa ni/de la byang chub sems dpa' dad pa dang zhes bya ba la sogs pas ston to/ /long ba zhes bya ba ni zag pa med pa'i mig med pa'i phyir ro/ /de bzhin gshegs pa'i spyan gyis zhes bya ba ni yid ches pa'i lung gi tshad mas zhes bya ba'i tha tshig go/ /dgongs te gsungs pa zhes bya ba ni don gzhan la ldem por dgongs pa'i tshig yin pa'i phyir ro//mos pa'i dbang kho nas spong bar mi byed na ni nyes pa med do/ /la las ni mos pa med du zin kyang zhes brjod de/ de dang sbyar na ni ma mos su zin kyang spong bar mi byed na nyes pa med ces bya'o/ /sngar ni rnyed pa dang bkur sti la brkam pa'i dbang du byas nas bdag la bstod pa pham pa lta bu'i gnas su bstan to//'dir ni bdag la gces par 'dzin pa'i sems kyis bdag la stod par byed pa'i nyes pa'i gnas gzhan bstan te/ de'i phyir zang zing dang bcas pa'i sems zhes smos so/ /bstan pa'i dgra yin par bstan pa'i phyir mu stegs can la dmod par byed pa la ni nyes pa med do//mu stegs can rnams zil gyis gnon pa'i dgos pa ni bstan pa gnas par bya ba la zhes bya ba la sogs pas bstan to/ /bdag nyid gces par bya ba bskyed pa'i sgo nas gzhan gyi dad pa bskyed pa'i phyir bdag la bstod pa la ni nyes pa med do//ma tshor na zhes bya ba ni chos sgrogs pa yod par mi shes pa'o/ /gal te der 'gro na chos smra ba mi dga' bar 'gyur ba dang / lan mang du thos pa dang sngon shes zin pa'i don gyi gtam yin par shes na nyes pa med do/ /thos pa mthar phyin pa ni mang du thos pa zhes bya ba la sogs pas bstan to//rgyun mi 'chad par bsam gtan la brtson pa ni rtag tu zhes bya ba la sogs pas bstan to/ /shes rab rtul ba dang lung nod pa la sogs pa bslab pa la brtson pa la yang nyes pa med do/ /khyad du gsod ces bya ba ni snying nas dge ba'i bshes gnyen gyi 'du shes dang /ston pa la sogs pa'i 'du shes mi bskyed ces bya ba'i tha tshig go/ /bkur sti mi byed ces bya ba ni lus kyi spyod pa'o/ /'phya ba zhes bya ba ni sma 'bebs pa dang ldan pa'i tshig go/ /bsting bar byed ces bya ba ni tshig blang po ste/ de lta bu ni chos smra ba la ma gus pa dang ldan pa yin no//chos la ma gus pa'i dbang du byas nas tshig 'bru la rton gyi zhes bya ba smos so/ /sems can gyi don bya ba la mi brtson pa'i nyes pa ni sems can gyi bya ba zhes bya ba la sogs pas bstan te/ sems can gyi don bya ba'i tshul khrims bstan pa las byung ba'i sems can gyi bya ba rnam par dbye ba las brtsams te grogs bya ba yin par rig par bya'o//rten yod pa ni byed pa yod pa'o/ /chos ma yin pa'i bya ba dag la nyes pa med pa ni gnod pa dang ldan pa zhes bya bas bstan to/ /gzhan la bcol ba zhes bya ba ni gzhan byed du gzhug pa'o/ /de bas chos khyad par du 'phags par dge ba'i phyogs la brtson pa dang /rang bzhin gyis shes rab med pa dang / bslab pa la brtson pa dang / sems can ches mang po dag gi sems srung ba dang / dge 'dun gyis bcas pa srung ba la yang nyes pa med do/ /mgon yod pa nyid kyi phyir na nus pa'o//de'i phyir yang rten yod pa ste/ rnam pa gzhan du yang 'tshol nus pa'i phyir ro/ /yang na bdag nyid kyis nus pa'i phyir ro/ /nad rgyun rings ni yun ring du na ba la yang zhes bya ba'i tha tshig go/ /bsam gtan dang kha ton la brtson pa ni snga ma kho na bzhin no/ /rigs pa'i gdams ngag mi ston pa'i nyes pa bstan te/rigs pa zhes bya ba ni skyon med pa'o/ /mi shes zhes bya ba ni tshul ston mi shes pa'o/ /de nyid mkhas sam ston pa gzhan yod pa dang / gal te mi dga' bas nyan par mi 'gyur ba'am/ bka' blo mi bde bas log par 'dzin pa dang / dga' zhing gus pa med pas gdul dka' ba'i phyir dmu rgod kyi rang bzhin can dang / lan du phan 'dogs pa la brtson par byas kyang mi 'dod na ma byas kyang nyes pa med do/ /yang dag par slong ba zhes bya ba ni rigs pa dang ldan pa'i slong ba po ste/ sdug bsngal bar gyur pa la sogs pas bsdus so//rung ba ma yin pa'i bsam pas ma yin pa dang / mi 'phrod pa slong ba dang / rgyal po la gnod par sems shing rgyal po la glo ba ring ba la rgyal po'i sems srung na nyes pa med do/ /'khor bsdus la zhes bya ba ni yongs su gzung ba bdag nyid grags shing bsod nams che ba'i phyir gos la sogs pa rnyed pa'am/yang na bdag nyid tshol nus kyang rung ste de ma byin pa'o/ /mi rigs pa la zhugs pa'i phyir 'dul ba'i skal ba med pa ste/ de la ma byin na yang nyes pa med do/ /mu stegs can ni bstan pa'i dgra yin pa'i phyir tshar gcad par bya ba yin no//yon tan brjod pa nyid ni bsngags pa yin par shes par bya'o/ /'dod pa chung ba ni bdag nyid kyi yon tan rnams gzhan yang brjod du mi 'jug pa'i phyir ro/ /yon tan gleng ba'i rgyus gang zag de nyid kyi rgyags pa la sogs pa kun nas nyon mongs par 'gyur ba mthong na nyes pa med do//bskrad pa ni gtan du ma yin pa'i phyir ro/ /bcos su mi rung ba'i skabs nyid ni bka' blo mi bde ba zhes bya ba la sogs pas bshad do/ /dus la sdod ces bya ba ni dus gzhan la sdod pa dang 'thab pa la sogs pa'i 'jigs pa la lta ba'o/ /dge 'dun 'khrug cing dbye ba zhes bya ba ni dge 'dun khrag 'khrug tu gyur pa'am thad kar dbye bar 'gyur ba dang /de nyid g.yo med pa dang / shas cher ngo tsha shes pa dang khrel yod pa dang ldan pas sgrub ste/ nyes pa 'chags par byed pa la ni nyes pa med do/ /bstan pa la zhe 'gras pa rnams kyi dad pas byin pa'i longs spyod kha na ma tho ba dang bcas par 'gyur bas na/spong du gzhug pa'i phyir zhes bya ba smos so/ /mngon par zhen pa zhes bya ba ni sngags sam sman nam cho 'phrul byed pa yin gyi rdzu 'phrul gyi stobs kyis ni ma yin no zhes sgrogs pa'o/ /gnas thams cad la yang nyes pa med pa ni sems 'khrugs pa dang /tshor bas nyen pa la lhag par yang nyes pa med de/ tshor bas nyen pa ni tshor ba drag pos brgyal bar gyur pa'o/ /sdom pa ma mnos pa ni sdom pa ma bzung ba'o/ /dngos su byung ba sha stag ste zhes bya ba ni tshul khrims rnam pa gsum gyi dbang du byas pa ste/ / de dag der dngos su bstan pa rnams so/ /thor bu zhes bya ba ni 'thor ba rnams so/ /tshang bar zhes bya ba ni lhan cig tu bsdus te bstan pa'o/ /slob par 'dod pa'i bsam pas zhes bya ba ni sdom pa'i tshul khrims la'o/ /byang chub 'dod pa'i bsam pas zhes bya ba ni dge ba sdud pa'i tshul khrims la'o//sems can gyi don bya ba'i bsam pas zhes bya ba ni sems can gyi don bya ba'i tshul khrims la'o/ /nyes byas su bsdus pa zhes bya ba ni byang chub sems dpa' rnams kyi nyes pa ni tha dad pa med de/ byang chub sems dpa'i bya ba las 'gal ba'i phyir nyes pa kho nar zad do/ /gang su yang rung ste khong du chud pa la zhes bya bas ni byang chub sems dpa' rnams kyi nyes pa ni skal ba med pa ma yin par ston te/nyan thos la sogs pa thams cad las 'das pa'i sdom pa'i khyad par la gnas pa ni dge ba'i phyogs kyi sbyor bal skal ba med par 'gyur ba med pa'i phyir ro/ /pham pa'i gnas lta bu'i nyes pa 'bring ni tshogs sam/yang na dge 'dun la bshags par bya'o zhes ston te/ de yang gnas kyis lci ba yin pa'i phyir ro/ /thog mar dngos po brjod de zhes bya ba ni tshe dang ldan pa bdag la ni dngos po che ge mo zhig las nyes byas kyi nongs pa byung ste zhes bshags pa'i rim pa ston to//lhag ma zhes bya pa ni nyes byas kyi nongs pa byung ba de dag bshags so zhes bya ba'o/ /len pa pos kyang nyes pa de dag mthong ngam zhes brjod par bya'o/ /des kyang mthong ngo zhes brjod par bya'o/ /phyin chad sdom par byed dam/ legs par sdom par bgyid do zhes de ltar lan gsum gyi bar du bya'o//len pa po med na byin gyis brlabs pa'i sgo nas kyang nyes pa bshags par bstan to/ /sdom pa blang pa'i chog gzhan yang byang chub sems dpa'i sdom pa yang dag par blang ba de yang zhes bya ba la sogs pas ston to/ /'dod chags ni 'dir sems can la rjes su chags pa yin par bstan te/sems can la byams pa de'i sgo nas byang chub sems dpa' gang ci spyod kyang rung de dag thams cad ni byang chub sems dpa'i bya ba nyid yin te/ sems can gyi don du gtogs pa'i phyir byas na yang nyes byas su ni mi 'gyur gyi/ cir 'gyur zhe na/legs par byas pa nyid du 'gyur ro/ /de bas na 'dod chags las 'byung ba ni nyes pa ma yin no/ /byang chub sems dpa' sems can la sdang ba ni bdag dang gzhan la phan par spyod pa ma yin te/ bdag gi sangs rgyas kyi chos yongs su smin par yang mi 'gyur la/sems can yongs su smin par yang mi 'gyur bas de yang byang chub sems dpa' rnams kyi bya ba ma yin te/ bya ba ma yin pa byed pa ni nyes byas kyi nyes par 'gyur ro/ /de bas na zhe sdang las byung ba'i nyes pa'i gnas la phal cher kun nas mnar sems kyi sems zhes 'byung ngo / /'di lta ste gzhi bsdu ba las 'byung ba bzhin zhes bya ba ni rgyu rnam pa lnga ste/chung ngu dang chen po la sogs pa sngar bstan pa bzhin no/ /tshul khrims kyi dbang du byas nas nyan thos rnams kyi phun sum tshogs pa dang / nyams pa bzhi bzhir rnam par gzhag ste/ tshul khrims phun sum tshogs pa dang /lta ba phun sum tshogs pa dang / cho ga phun sum tshogs pa dang / 'tsho ba phun sum tshogs pa'o/ /de la byang chub sems dpa' rnams kyi ni gtan gyi sdom pa yin pa'i phyir tshul khrims nyams pa med do/ /de bas na rnam pa gzhan du phun sum tshogs pa rnam pa gsum bstan pa'i phyir/rang gi 'dul ba zhes bya ba la sogs pa smos te/ lus dang ngag dang yid kyi kun du spyod pa yongs su dag pa la brten pa ni phun sum tshogs pa dang po'o/ /yang dag par rab tu byung ba'i sgrub pa'i bsam pas legs par brjod pa'i gnas pa la brten pa ni gnyis pa'o/ /'tsho ba'i yo byad rnams kyis phongs pa med pa'i mchog la brten pa ni gsum pa'o//'dral bar mi byed pa ni bslab pa'i gzhi las 'gal bar mi byed pa'i phyir ro/ /bslab par rtogs pa'i lus dang ngag dang yid kyi las kun du spyod pa'i phyir lus la sogs pa'i kun du spyod pa yongs su dag pa'//bslab pa dag la gus pa dang bag yod par shas cher gnas pas na nyes pa rgyun du mi byed do/ /brgya la nyes pa zhig byas na yang ma thol bas sdig pa 'chags par byed do/ /rnam pa gsum po 'di dag gis thog ma dang bar ma dang / tha ma rnams su sbyor ba phun sum tshogs pa bstan to//yang dag par rab tu byung bar sbyor ba ni chos kyi bsam pas rab tu byung ba yin no/ /nyan thos rnams ni bdag gdul bar bya ba la sogs pa'i don du rab tu byung ba'i phyir legs par rab tu byung ba zhes bya'o/ /byang chub sems dpa' ni bdag nyid kyi sangs rgyas kyi chos yongs su smin par bya ba'i don du rab tu byung ba'i phyir legs par rab tu byung ba yin te/de'i phyir/ byang chub chen po don du gnyer ba zhes smos so/ /don du mi gnyer ba ma yin zhes bya ba ni de gcig pur nges par bstan pa ste/ de'i don kho nar rab tu byung ba'i tha tshig go/ /dge sbyong gi tshul don du gnyer ba zhes bya ba ni sgrub pa'i sbyor ba dang 'bras bu bstan pa ste/byang chub sems dpa'i dge sbyong gi tshul ni sa bcu po dag la bslab pa gsum gyi sbyor bar gtogs pa'i lam mo/ /mya ngan las 'das pa ni theg pa chen po'i yongs su mya ngan las 'das pa ste/ mi gnas pa'i mya ngan las 'das pa yin par rig par bya'o//de ltar 'jug pa'i bsam pa'i dbang gis bsam pa phun sum tshogs pa kun nas nyon mongs pa med par bstan te/ kun nas nyon mongs pa med par gnas pa'i phyir bsam pa phun sum tshogs pa ni le lo med pa zhes bya ba la sogs pas ston te/le lo med pa zhes bya ba ni dge ba rnams la brtson 'grus brtsams pa'i phyir ro/ /ma 'dres pa ni sdig pa mi dge ba'i chos rnam par spyod pa dang bar chad med par kun du mi spyod pa ste/ de la sdig pa ni dmad pa yin pa'i phyir ro/ /mi dge ba rnams ni dge ba dang mi mthun pa'i phyir ro//kun nas nyon mongs pa ni tshe 'di nyid la kun nas nyon mongs pa phyir zhing 'grub par 'gyur ba'i phyir ro/ /yang 'byung ba ni tshe phyi ma la yang 'byung ba'i sdug bsngal 'grub pa'i phyir ro/ /rims nad ni kun nas nyon mongs pa yin pa'i phyir ro//rnam par smin pa sdug bsngal ba ni yang 'byung bar 'gyur ba'i phyir te/ de'i nyes dmigs ni tshe 'di la nyon mongs pa kun du spyod pas lus dang sems yongs su gdung bar 'gyur ba dang / tshe phyi ma la ngan 'gror 'grub par 'gyur ba'i phyir ro/ /yang 'byung ba rnams yod pas na tshe phyi ma la skye ba dang rga shir 'gyur ba de ni nyes dmigs yin te/yun ring por skye ba dang rga shi 'dren pa'i phyir ro/ /bsod nams byas pa ni sbyin pa las byung ba'i bsod nams bya ba'i dngos po kun tu bsten pa'i phyir ro/ /dge ba byas pa ni longs spyod chen po'i bar du gcod pa yongs su spong ba'i phyir ro//gzhan yang bsod nams ni bsod nams kyi don gyi phyir ro/ /dge ba ni kha na ma tho ba med pa'i don gyi phyir ro/ /phongs par mi 'gyur zhes bya ba ni mi ldan pa ma yin pa ste/ de dag thob ces bya ba'i tha tshig go/ /phun sum tshogs pa dang pos nyin mtshan du dga' zhing mchog tu dga' ba'i shas che ba'i phyir bde ba la reg par gnas so//gnyis pa ste kun nas nyon mongs pa can ma yin par gnas pa'i phyir yang bde ba la reg par gnas so/ /gsum pa ste phong pa rnam par spangs pa'i phyir yang bde ba la reg par gnas so//bsdus pa dang rgyas pa zhes bya ba la mdor bsdus pa ni rnam pa gnyis te/ khyim pa'i phyogs su gtogs pa dang / rab tu byung ba'i phyogs su gtogs pa'o/ /yang rnam pa gsum ste/ sdom pa yang dag par len pa dang dge ba sdud pa dang / sems can gyi don bya ba'i tshul khrims so/ /rgyas par bshad pa ni ji skad bstan pa'i rab tu dbye ba bzhin no/ /de las gzhan pa 'di'i rab tu dbye ba zhes bya ba ni tshul khrims thams cad pa nyid kyi phyogs gcig ste/ dka' ba'i tshul khrims nas rnam par dag pa'i tshul khrims kyi bar ro//de ltar bstan pas ni tshul khrims kyi ngo bo nyid bstan te/ bshad pas ni tshul khrims thams cad bstan to/ /bshad pa'i rab tu dbye bas ni dka' ba'i tshul khrims la sogs pa bstan to/ /dka' ba'i tshul khrims ni rnam pa gsum gyis rnam par gzhag ste/ gtang dka' ba'i dngos po yongs su gtong bas na tshul khrims len pas na yang dag par len pa dka' ba la brten to/ /blangs nas nyam thag par gyur kyang yongs su mi gtong bas na rjes su bsrung ba dka' ba la brten to/ /rgyu ba dang gnas pa dag la shin tu dran pa nye bar gnas pas yongs su dag pa dka' ba la brten pa'o//gzhan dag ni gzhan du yang 'chad de/ len pa dang srung ba'i sgo nas dka' bar bstan to/ /de la srung ba ni nyams la bab par gyur kyang shin tu yongs su skyong ba dang shin tu rnam par dag pa'i phyir ro/ /longs spyod che ba ni rnam pa bzhi dang lngas rig par bya ste/bzhi zhes bya ba ni gang gis longs spyad par bya ba'i lus kyis te/ lus kyi 'byor pas gyur pas na longs spyod che ba'o/ /gang dag dang lhan cig pa ste/ gnyen 'dab pa dang rtsa lag sdug cing byams pa nas yid du 'ong ba'i bar dag dang ngo / /de dag kyang mang ba dang che ba'i phyir na che ba'o//gang dag gis bsgrubs pa ni bran la sogs pa rnams kyis te/ de dag kyang mang ba dang che ba'i phyir che ba'o/ /gang longs spyod pa ni zas dang skom la sogs pa ste/ de ltar na lus phun sum tshogs pa dang phyogs chen po dang / 'khor chen po dang /nor dang yo byad phal po cher gyur pa'i phyir longs spyod che bar bstan to/ /rnam pa lngas ji ltar zhe na/ lus dang ngag gis ci'i phyir longs spyod pa yin te/ 'tsho ba'i phyir yin la de gnyis kyang che ba'i phyir che ba'o/ /lhag ma ni snga ma dang 'dra'o/ /nor dang 'bru dang mdzod dang bang ba'i tshogs phal po che spangs pa'i phyir dka' ba'o//nor dang 'bru mang bas na longs spyod chen po'i dka' btsan pas de dag la ci dga' mgur dbang byed pa'i tshul gyis dbang phyug chen po la dbang byed pa ste/ gsum po 'di dag ni gtang bar mi nus pa yin la/de btang dgos pas na tshul khrims yang dag par len pa dka' ba yin te/ mdo gzhan las kyang 'di skad du 'khor log sgyur ba'i rgyal po gling bzhi'i dbang phyug la dbang byed par gyur pa de lta bu yang 'dod na skad cig gcig kho nas btsun mo dang longs spyod thams cad spangs nas de bzhin gshegs pa'i bstan pa la rab tu 'gyur ro zhes rgyas par gsungs so//nyams pa la bab par gyur pa ni srog la thug kyang zhes bya bas bstan te/ 'chi bas thug pa'i sdug bsngal gyis thebs na yang gtong bas srog gi phyir yang zhes bya ba'i tha tshig go//rgyu ba dang gnas pa dang yid la byed pa thams cad la zhes bya ba ni 'gro ba la sogs pa la dran pa dang shes bzhin mchog dang ldan pa'i phyir dang / yan lag lnga dang ldan pa'i bag yod pa la gnas pa'i phyir ro/ /byang chub sems dpa' ni bsam pa dang sbyor ba dag pas na brgya lam na gnas skabs 'ga' tsam la yang yang dag par blangs pa'i skad cig phyin chad nas ma shi'i bar du yang sdig pa mi byed do//de ltar na rjes su srung ba'i tshul khrims kyi dbang du byas te dka' ba nyid yin no/ /rnam pa bzhi'i sgo nas zhugs pa'i tshul khrims ni thams cad kyi sgo'o//sbyor ba'i khyad par gyis bsgrubs pas na yang dag par blang bar byas pa'o/ /sems pa dang mngon par 'du byed pa dang smon pa la mi ltos pas na rang bzhin gyi tshul khrims so/ /yun ring po dang rgyun mi 'chad pa'i dus nas zhugs pa na goms pa'o//bsdu ba'i dngos pos yongs su zin pas na thabs dang ldan pa'o/ /rigs la gnas pa zhes bya ba ni sbyin pa la sogs pa pha rol tu phyin pa'i rtags kun du spyod pa'i gnas skabs kyi'o/ /kha na ma tho ba med pa ni lus dang ngag dang yid kyi las te/ de yang tshul khrims kyi pha rol tu phyin pa'i rgyu yin pas na pha rol tu phyin pa zhes bya ba 'thob po//goms pa'i khyad par gyi sbyor bas gong ma bas kyang ches gong ma dang / gya nom pa bas kyang ches gya nom par tshul khrims la goms par 'gyur te/ de bas na sngon gyi tshe rabs gzhan dag tu zhes bya ba la sogs pa smos te/de'i phyir dper na/ rang bzhin gyis gtsang zhing khrus byas la lus byugs pa ni mi gtsang ba dang mi mthun zhing mi 'dod pa de bzhin du rang bzhin gyis sdig pa rnams la zhe sdang la de'i gnyen por dge ba rnams la dga' zhing dge ba 'dod do//bslab pa la brtson pa'i byang chub sems dpa' sbyin pa la sogs pa'i sgo nas zhugs pa'i lus la sogs pa'i las ni thabs dang ldan pa'i tshul khrims te/ bsdu ba'i dngos po bzhi ni thabs kyis yongs su zin pa'i phyir ro/ /bdag dang gzhan la mi gnod par sgrub pa'i phyir skyes bu dam pa yin te/sgrub pa de yang bdag nyid dang gzhan dag la phan 'dogs pa'i lus dang ngag dang yid kyi las kun du spyod pa'i phyir ro/ /skyes bu dam pa'i tshul khrims rnam par gzhag pa ni bdag nyid kyang yang dag par len pa dang / yongs su bsrung ba'i yan lag phun sum tshogs pas thog ma dang tha mas skyes bu dam pa'i tshul khrims su gyur pa'o//gzhan ni tha mal pa dang / zhe 'gras pa dang / yang dag par zhugs pa'i bye brag gis tshul khrims rnam pa gsum gyi dbang du byas pa'o/ /de la snga ma rnams ni yang dag par len du 'jug go/ / zhe 'gras pa rnams la na bsngags pa brjod do/ /de dag gis bsngags pa dang phan yon thos na kun nas mnar sems kyi sems rtse zhil bar 'gyur du re ba'i phyir ro/ /yang dag par zhugs pa rnams mthong na ni yid dga' bar 'gyur la 'gran par yang mi byed de/ de ltar na tshul khrims kyi dbang du byas nas gzhan dag la lus dang ngag dang yid kyi las kyi khyad par dang ldan pa'i skyes bu dam pa'i tshul khrims nyid du bstan to//rnam grangs gcig gis rnam pa drug yongs su rdzogs par 'gyur bas na rnam pa drug go/ /rnam grangs cig shos kyis ni rnam pa bdun yongs su rdzogs par 'gyur bas na rnam pa bdun no//gnyis ka bsdoms pas rnam pa bcu gsum yongs su rdzogs par 'gyur bas na rnam pa bcu gsum mo/ /byang chub chen por yongs su bsngos pa'i phyir 'bras bu dang phan yon che ba ste/ de bas na 'bras bu yongs su rdzogs pas yongs su rdzogs pa'o//rgya chen po ni bslab pa'i gzhi rgyas par blangs pa'i phyir gnas yongs su rdzogs pas yongs su rdzogs pa'o/ /rgya che ba ni rgya cher brjod par bya ba'o/ /'dod pa'i bsod nyams kyi mtha' rnam par spangs pa'i phyir nyon mongs pa can gyi bde ba dang bral ba yin te/de bas na kha na ma tho ba med pa'o/ /bdag nyid dub par byed pa'i mtha' rnam par spangs pa'i phyir dang don med pa'i sdug bsngal rnam par spangs te/ de bas na rab tu dga' ba'i gnas dang mthun pa'o/ /bar du gcod pa yongs su btang bas ji srid 'tsho'i bar gyi bslab pa dang ldan pas na rgyun du chud pa'o//rnyed pa dang bkur sti la mi brten te de'i sgo nas nyams par mi byed pas de'i phyir zil gyis mi non pa'o/ /de bzhin gshegs pas bcas pa'i tshul khrims phul nas mu stegs can gyi gnas rnams su sdom pa yang dag par len pa'i phyir phas kyi rgol ba la sogs pas zil gyis gnon par mi 'gyur te/de med pas na de dag gis zil gyis gnon par gyur pa ma yin no/ /dge sbyong sar pa sar pa rnams ni dge sbyong gi gnod pa rnams kyis gtses so zhes mdo las gsungs pa'i phyir nyon mongs pa'i kun nas dkris pa de lta bus bslab pa phul nas nyams shing ldog pa'i phyir dang /bslab pa 'dral bas nye ba'i nyon mongs pa rnams kyis zil gyis non par 'gyur la/ rnam pa de rnams kyis mi 'phrogs pa'i phyir bstan pa'o/ /rgyan dang ldan pa yin pas na rgyan dang bcas pa'o//'di lta ste nyan thos kyi sa las zhes bya ba ni dad pa dang ldan pa dang / g.yo med pa dang / nad nyung ba dang / brtson 'grus brtsams pa nyid dang / shes rab can dang 'dod pa chung ba la sogs pa nas sbyangs pa'i yon tan la thug pa rnams ni tshul khrims kyi rgyan yin no zhes de las bstan to//tshul khrims ni mdor bsdu na rnam pa gnyis te/ gtan mi bya ba kho nas nyes par spyod pa spong ba yang dag par len pa'i phyir ldog pa'i tshul khrims dang / gcig tu nges par bya ba kho nas bslab pa ste 'jug pa'i tshul khrims dang /de gnyis rtag tu bag yod par bsrung ba'i phyir kun nas bsrung ba'i tshul khrims te/ de ltar rnam pa gsum dang / rnam par smin pa'i 'bras bus rab tu phye bas na rnam par smin par byed pa ste/ de yang sa re re la ji ltar 'tsham pa'i mtshan 'grub par byed pa'i phyir dang de bzhin du byang chub sems dpa'i ting nge 'dzin 'grub par byed pa'i phyir dang /lha dang mi'i 'gro ba 'grub par byed pa'i phyir dang / sems can gyi don mang po'i 'bras bu 'grub par byed pa'i phyir rnam pa bzhir rig par bya ste/ de ltar na rnam pa bdun du 'gyur ro//bdag dang gzhan mnyam pa nyid thob pa'i phyir 'dod pa nyid dang / phongs pa nyid la lta zhing so sor brtags nas blangs pa ni phongs shing 'dod pa'i tshul khrims so/ /de yang sdug bsngal rnam pa brgyad kyi gnyen po'i phyir rnam pa brgyad de/ sems can thams cad ni 'tsho ba 'dod kyi 'chi ba mi 'dod pa'i phyir 'tsho ba dang srog 'dod pa rnams dang /longs spyod 'dod pa rnams dang / kha mi phyin pa'i chung ma 'dod pa rnams dang / mi blu ba 'dod pa rnams dang / mi phyed pa'i g.yog 'khor 'dod pa rnams dang / sgra snyan pa thos pa rnams dang / don dang ldan pa'i 'brel pa'i gtam 'dod pa rnams dang /sdug pa'i 'dus te reg pa 'dod pa rnams so/ /de las bzlog pa ni sdug bsngal rnam pa brgyad de/ phongs par byed pa dang / mi sdug pa dang / yid du mi 'ong ba de las bzlog pa'i sgo nas phongs shing 'dod pa'i tshul khrims rnam par gzhag go//sdug bsngal gyi rgyu la 'jug pa bkag pa'i sgo nas 'di dang phyi ma la bdag dang gzhan rnams la phan 'dogs par byed pa yin pas na 'gog pa'i tshul khrims so/ /'di dang phyi ma la bde ba ste bde ba'i rgyu la 'jug pa gnang bas na gnang ba'i tshul khrims so/ /de bzhin du gnyi gar phan 'dogs par byed pa'i phyir de gnyis la yang dag par zhugs pa'i sems can sdud pas na sdud pa'i tshul khrims so//gzhan dag gi 'di dang phyi ma'i bde ba la log par zhugs pa'i sems can tshar gcod par byed pas na tshar gcod pa'i tshul khrims so/ /sbyin pa dang ldan pa kho nas phyi ma la longs spyod chen po'i 'bras bur gyur pa'i phyir dang bzod pa dang ldan pas ni 'di dang phyi ma la bdag dang gzhan gyi bde ba'i rgyur 'gyur ba'i phyir dang /phyi ma la bdag nyid g.yog 'khor dang ldan pa'i rgyur 'gyur ba'i phyir 'di dang phyi ma la bde ba dang brtson 'grus dang ldan pa ni tshe 'di nyid la brtson 'grus brtsams pas sdig pa mi dge ba'i chos rnams dang mi 'dre ba'i rgyur 'gyur ba'i phyir dang /phyi ma la bde ba chen po'i rgyur 'gyur ba'i phyir 'di dang phyi ma la bde ba dang / bsam gtan dang ldan pa'i tshe 'di nyid la bde ba la reg pa'i rgyur 'gyur ba'i phyir dang /phyi ma la rnam par dag pa'i lhar skye ba'i rgyur 'gyur ba'i phyir gnyi gar bde ba dang / shes rab dang ldan pa ni tshe 'di nyid la de dang de dag la mkhas pa bskyed pa'i phyir dang / phyi ma la shes rab kyi khyad par gyi rgyur gyur pa'i phyir gnyi gar bde ba ste//de ltar na tshul khrims rnam pa bzhi ni pha rol tu phyin pa drug gis bsdus te ci rigs par sbyar ro/ /bdag dang pha rol rnam pa gnyi gar phan 'dogs pas na 'di dang phyi ma la bde ba'o/ /nyes pa rnam pa bcu'i gnyen por gyur pas na rnam par dag pa ste/ rnam pa bcu ni nyes pa rnam pa bcu'o//bsam pa nyams pas na yang dag par len pa nyams pa'i nyes pa'o/ /de'i gnyen por dge sbyong gi tshul 'dod pa nas tha ma rdzogs pa'i byang chub 'dod pa la thug pa rnams smos so/ /bslab pa la mi sbyor ba'i nyes pa ni de bzhin gshegs pas bslab pa'i gzhi bcas pa rnams la gus par mi byed pas na de'i phyir ha cang zhum pa ma yin pa zhes smos te/de nyid ni 'gal bar byas pa zhes bya ba la sogs pas rnam par 'grel to/ /bslab pa'i gzhi ma bcas pa'i rjes su 'jug pa'i nyes pa yin pas na ha cang thal ba nyid do/ / nyes pa de gnyi ga'i gnyen por ji ltar bcas pa rnams la yang dag par bslab pas na rnam par dag pa'o/ /le lo'i nyes pa nyams par gyur pa'i gnyen por le lo med pa zhes bya ba la sogs pa smos so/ /le lo dang bral ba ni nyin mtshan du dge ba'i phyogs la mngon par brtson pa zhes bya bas bstan to//bag med pa'i nyes pa'i gnyen por ni bag yod pas yongs su zin pa zhes bya ba la sogs pa smos so/ /rten ngan pa'i nyes pa ni rnyed pa dang bkur sti dang skye ba'i khyad par la brten pa'i phyir te/ de'i gnyen por smon lam legs par btab pa zhes bya ba la sogs pa smos so//gzhan dag 'dun par mi byed pa'i nyes pa de'i gnyen por ni cho ga phun sum tshogs pa zhes bya ba la sogs pa smos so/ /log par 'tsho ba'i nyes pa de'i gnyen por ni 'tsho ba phun sum tshogs pa zhes bya ba la sogs pa smos so/ /mtha' gnyis su lhung ba'i nyes pa de'i gnyen por ni mtha' gnyis rnam par spangs pa zhes bya ba la sogs pa smos so//mchog tu 'dzin pa'i nyes pa de'i gnyen por ni nges par 'byin pa zhes bya ba la sogs pa smos so/ /nyams par byed pa'i gnyen por ni bslab pa las 'gal bar byed pa ste/ de'i gnyen por ni ma nyams pa zhes bya ba la sogs pa smos so//tshul khrims kyi phung po chen po ni yangs shing rgya che la bsod nams che ba'i phyir ro/ /byang chub chen po'i 'bras bu bskyed pa ni 'bras bu che ba'i phyir te/ de gnyis ni tshul khrims kyi pha rol tu phyin pa zhes bya ba la sogs pas rnam par 'grel te/ byang chub sems dpa'i sdom pa'i tshul khrims la slob pa ni phan yon nyan thos la sogs pa dang thun mong ma yin par bstan te/ de la slob pa ni sangs rgyas dang byang chub sems dpa' rnams kyis dgongs par 'gyur gyi/ nyan thos kyi sdom pa la slob pa la ni ma yin no/ /'chi ba'i tshe 'di nas shi 'phos nas sangs rgyas dang byang chub sems dpa' rnams dang phrad pa yid la byed pas 'chi ba'i 'jigs pa las 'das pa'i phyir mchog tu dga' ba chen po 'thob bo//phyi ma la sangs rgyas dang byang chub sems dpa'i dge ba'i bshes gnyen dang phrad pa'i phan yon gsum pa'o/ /pha rol tu phyin pa bsdus pa'i bsod nams yongs su 'dzin pa'i phyir bzhi pa'o//gtan du ba'i tshul khrims yin pas chos nyid kyi tshul khrims thob pa'i phyir lnga pa'o/ /rnam pa re re la yang tshul khrims rnam pa gsum gsum du bsdus pa ni de thams cad ni sdom pa'i tshul khrims dang zhes bya ba la sogs pas bstan to//ci'i phyir byang chub sems dpa' rnams kyi tshul khrims rnam pa gsum las mi nyung mi mang zhes rgol pa'i lan gyi sgo nas tshul khrims rnam pa gsum du gzhag par bstan pa'i phyir gsum zhes bya ba la sogs pa smos so/ /sdom pa'i tshul khrims kyis ni sems gnas pa ste/kun nas nyon mongs pa med pa'i chos kyi bde ba la gnas pa'i phyir ro/ /lus dang sems kyi mngon par 'dus bya ba yang de dang 'dra'o/ /dge ba'i chos sdud pa'i tshul khrims kyis ni sangs rgyas kyi chos yongs su smin pa'i sgo nas bdag la phan pa sgrub pa'o/ /sems can gyi don bya ba'i tshul khrims kyi sgo ste sems can yongs su smin par byed pa'i sgo nas ni gzhan la phan pa sgrub po//byang chub sems dpa'i bya ba ni 'di dag tu zad do/ /'di lta ste bdag nyid snod du gyur par bya ba dang / gnyi ga la phan pa sgrub pa'o/ /byang chub sems dpa'i tshul khrims kyi le'u ste bcu pa'i rgya cher 'grel pa rdzogs so// //pha rol tu phyin pa drug car yang rnam pa dgu nyid du rnam par gzhag par bya'o zhes bya bas kun la yang sdom gyi tshig gcig nyid kyis bstan pa yin no/ /rnam pa bzhir bzod pa'i ngo bo nyid rnam par gzhag par bya ste/ rten gyi khyad par nyid dang /gzhi'i khyad par nyid dang / dmigs pa'i khyad par nyid dang / rgyu'i khyad par nyid do/ /de la rten ni mos pas spyod pa'i gnas skabs kyi ni so sor rtog pa'i stobs yin te/ gang gi phyir smras pa/ so sor brtags pa'i stobs la brten/ /zhes bya ba ste/ mi mthun pa'i phyogs kyis zil gyis mi non pa'i phyir stobs zhes bya'o//sa la zhugs pa rnams kyi ni bsgoms pa'i stobs kyis te/ gang gi phyir smras pa/ rang bzhin gyis zhes bya ba ste/ sa la zhugs pa rnams kyis bdag med pa rnam pa gnyis rab tu rtogs pas 'khor gsum yongs su dag pa'i bzod pa la rab tu zhugs pas zhes bya bas rang bzhin gyis bzod pa'o//gzhi ni gnod pa byed pa'i sems can thams cad de/ de dag dbye ba med pa'o/ /des na smras pa/ ji mi snyam pa dang zhes bya ba'o/ /dmigs pa ni gnod pa byas pa thams cad la dbye ba med pa'o/ /gang gi phyir smras pa/thams cad la ji mi snyam pa ste zhes bya ba la/ rnam pa gnyis kyis ji mi snyam pas nus pa dang ldan yang rung / nus pa dang mi ldan yang rung / go rims bzhin du lan du gnod pa mi byed pa dang / sems mi khro ba'o/ zang zing med pa'i sems ni mthong ba'i chos la lan du phan 'dogs pa la re ba med pa'i phyir dang /phyi ma la yang 'dod pa dang / mi 'dod pa'i 'gro ba la mngon par 'dod pa dang / bag tsha ba med pa'i phyir ro/ /rgyu'i khyad par nyid ni gang gi phyir smras pa snying rje 'ba' zhig gis zhes bya ba'o/ /rnam grangs gzhan yang bzod pa'i ngo bo rnam par gzhag pa ni rnam pa gsum ste/gnyen po'i khyad par dang so sor rtog pa'i stobs dang / bsgoms pa'i stobs dang / rgyu'i khyad par te/ gnod pa byed pa'i sems can dang / byas pa'i gnod pa'o/ /rgyu'i khyad par ni zang zing med pa'i sems dang / snying rje 'ba' zhig pa'o/ / bzod pa thams cad mdor bsdu na rnam pa gnyis su gzhag par bya ste/ phyogs nyid dang / dbye ba nyid do/ /mi'i 'gro ba nyid la bzod pa'o/ /mi bzod pa mang du 'byung bar 'gyur zhing de nyid la mnar sems kyi dngos po 'byung bar 'gyur la/ mnar sems kyi dngos po rnams spong bar byed pa'i gnyen po kun du spyod par byed pa yang 'byung bar 'gyur ro//de'i phyir smras pa/ khyim pa'i phyogs la brten pa dang / rab tu byung ba'i phyogs la brtan pa'o zhes bya ba'o/ /'di'i phyir yang / de ltar bskyed pa'i bzod pa de ni bsngags par 'os pa zhes bya ba'i tha tshig go/ /khyim pa rnams las kyang longs spyod kyi 'byor pa dang ldan pa rnams kyis lan du gnod pa bya bar nus la/rab tu byung ba rnams kyang sems kyi 'byor pa dang ldan pas lan du gnod pa byed nus so/ /de ltar byed nus na yang lus la sogs pas bzod par bya'o zhes gsungs pa yin te/ khyim par gyur kyang rung /rab tu byung bas kyang rung bzod par bya'o zhes bya ba'i tha tshig go/ /dbye ba nyid ni rnam pa gsum ste/ ji mi snyam pa'i bzod pa ni gnod pa byed par yid la mi byed pa dang / mnar sems kyi gnyen po yid la byed pa'o/ /de dag ni zhe sdang med pa dang / khong khro ba med pa'i rang bzhin du rig par bya'o//sdug bsngal dang du len pa'i bzod pa ni lus kyi brtson 'grus kyi stobs dang / tshul bzhin yid la byed pa'i stobs la brten nas skyes pa dang / ma skyes pa'i sdug bsngal ba rnags par nus pa nyid do/ /chos la so sor rtog pa'i bzod pa ni chos rnams kyi phyin ci ma log pa nyid chen por bzod pa ste/yang de ni shes rab kyi ngo bo nyid do/ /bzod pa dang / 'dod pa dang / shes rab ces bya ba 'di ni rnam grangs so/ /de ltar na rdzas su ni ngo bo gnyis bzod par rig par bya ste/ zhe sdang med pa'i ngo bo nyid dang / shes rab kyi ngo bo nyid do/ / ji ltar na gzhan gnod par byed pa la ji mi snyam par bzod par byed ce na zhes bya ba ni/ so sor rtog pa'i rab tu dbye ba bstan te so sor rtog pa'i stobs kyis yin gyi/ bsgoms pa'i stobs kyis ni ma yin no zhes bya ba'o/ /ji mi snyam par zhes bya ba ni lan du gnod par byed pa ma yin pa'i phyir ro//bzod par byed ces bya ba ni sems rab tu mi 'khrugs pa nyid do/ /yang na tshig gzhan gyis bshad pa yin no/ /drag pa ni brnags par mi nus pa'o/ /rgyun mi 'chad pa ni par mtshams med pa'o/ /sna tshogs pa ni sgo sna tshogs nas 'byung ba'o/ / yun ring ba ni dus yun ring po dag tu 'jug pa'i phyir ro/ /'di ltar yang dag par slob ste zhes bya ba ni brtag pa bzhis brtags la bzod par bya'o zhes bya ba'o/ /rnam grangs dang po bstan pa'i phyir brtag pa bzhi ni bdag nyid kyi sngon gyi las kyi dbang gis 'byung bar brtag pa ste/ bdag gi lus 'byung ba bzhi las gyur pa'i gzugs thogs pa dang bcas pa 'di lta bu gang la bdag gnas na mi 'dod pa'i sdug bsngal gyi reg pa myong zhing / mi 'dod pa tshig gi lam yang thos par 'gyur gyi zhes rang gi las kyi dbang kho nas 'di ltar gyur to zhes lta zhing / gzhan dag la mnar sems sam/lan du gnod pa bya ba'i sems bskyed par mi byed do/ /yang na sdug bsngal gyi tshor ba 'di lta bu nyams su myong ba na bdag gis mi dge ba'i las byas pa'i rnam par smin pa kho na yin no zhes yid la bsams nas snga ma bzhin no/ /brtag pa gnyis pa ni mi bzod pa ni phyi ma la rang gi rgyud kyi sdug bsngal gyi rgyu yin pa nyid du so sor brtags nas sdug bsngal ni mi 'dod la/bde ba ni 'dod pa nyid yin pas bzod par byed de/ /gang gi phyir smras pa/ bdag ni sdug bsngal mi 'dod de/ /zhes bya ba la sogs pa'o/ /bdag dang gzhan dag rang bzhin gyis sdug bsngal pa'i gnas skabs la so sor brtag pa nyid du'o//gang yang smras pa/ ngo bo nyid kyis kyang sdug bsngal ba'i rang bzhin te zhes bya ba la sogs pa la rang bzhin gyis sdug bsngal bar gyur pa'i sems can rnams la mi shes pa'i sems can gzhan dag ni sdug bsngal skyed par 'dod kyi/bdag gis 'di ni shes bzhin du de dag la ji ltar sdug bsngal skyed par byed par rigs te/ rma'i nang du tsha ldugs pa dang 'dra'o snyam du brtags nas snga ma bzhin du bzod par byed do/ /bzhi pa ni bdag nyid kyi sgrub pa'i gnas skabs la brtags nas gzhan gyi sdug bsngal bsal ba'i phyir zhugs pa yin no//bdag nyid kyis de dag la gnod pa byed pa ni shin tu mdzes pa ma yin no zhes brtags nas snga ma bzhin du bzod par byed do/ /rnam grangs gnyis pa ni brten nas so sor brtags pa'i dbye ba nges par ston pa ste/ 'du shes rnam pa lnga bsgom zhing zhes bya ba la sogs pas ni sngar bstan pa'i thams cad kyi zhes bya ba la sogs pas 'grel par byed do//'di dag gis ni rgyu'i khyad par khong du chud par bya'o/ /byang chub sems dpa' las gzhan dag ni shes pa rnams mi mthun pa byed pa la bzod par zad do/ / dgra'i phyogs kyang ma yin pa'i bar ma rnams la ni btang snyoms su byed do/ /yang byang chub sems dpa' rnams ni snying rje ba'i dbang gis de lta bu'i rang bzhin can no/ /gzhan dag ni dman pa rnams la nga rgyal dang / mtshungs pa rnams la 'gran pa dang / khyad par du 'phags pa rnams la phrag dog byed do//byang chub sems dpa' rnams ni snying rje'i dbang gis de lta bu ma yin no/ /yang gzhan dag ni skyid pa rnams la ni gnod pa byed par nus kyang 'dod pa'i dbang gis ster du re ba'i blos bzod par byed do/ /sdug pa rnams la ni phyi ma'i rnam par smin pa 'dod pa'i dbang gis so//yon tan dang ldan pa dang / skyon dang ldan pa rnams la ni 'di nyid la mi 'dod pa'i bya ba 'byung du dogs pas bzod par byed do/ /byang chub sems dpa' rnams ni snying rje kho nas so/ /gnod pa thams cad bzod par byed do zhes bya ba ni mi khro ba la sogs pa'i sgo nas zhugs pa'i phyir ro//'du shes lnga ni tha snyad dang / dam pa'i don dag gi mtshan nyid de/ tha snyad dang dam pa'i don du nye par mtshon pa'i dbang du byas nas rnam par gzhag pa ni dang po dang tha ma dang / bar ma'i tshig la go rims bzhin no/ /gnod pa byed pa rnams la 'das pa'i dus nye bar bzung nas ji ltar 'os shing gsha' bar gnyen bshes kyi 'du shes yid la byed pas khro ba'i sems skyes pa rnams bsal nas snying rje kho nas bzod par byed do zhes bya ba'i dbang du byas pa'o//thog ma med pa'i dus nas sems can gyi gnas skabs la yang nges pa med pas rnyed par dka'o zhes smras pa/sems can gang bdag gi pha ma la sogs par ma gyur pa ni rnyed par dka'o zhes bya bar bsams pa'o/ /gnas skabs dang rjes su mthun par 'du shes yid la bya ba'i bye brag ni gang gi phyir gnod pa byed pa'i sems can bud med yin la rgan par gyur na ni ma'i 'du shes yid la bya'o//'on te skyes pa yin la rgan na ni pha'i 'du shes yid la bya'o/ /na tshod mnyam pa'i skyes pa la ni spun zla'i 'du shes so/ /bud med la ni sring mo'i 'du shes so/ /de lta bu ni khyim pa'i phyogs kyi 'du shes yid la bya ba'o/ /gal te rab tu byung ba gnod par byed par gyur na ni slob dpon la sogs pa'i 'du shes ji ltar rigs par rig par bya'o//chos tsam du rjes su 'brang ba'i 'du shes zhes bya ba ni bdag med par mthong ba'i rjes su 'brang ba zhes bya ba'i tha tshig go/ /rkyen la rag las pa dang zhes bya ba ni/ srid pa brag ca lta bur yid la byed pa dang / gzugs brnyan lta bur yid la byed pa'o/ /'du byed tsam dang zhes bya ba ni/ bdag dang gzhan dag sems can med par yid la byed pa'o/ /bdag nyid bdag med pa'i dbang du byas nas smras pa/ gshe bar byed pa'am zhes bya ba la sogs pa la/'du shes skad cig gcig nas gcig tu brgyud pas 'jug pas na/ gang dag sdug bsngal skyed par byed cing bde ba 'gag par byed pa de dag ni zang cing 'gags la bral zhing yongs su gyur to/ /da ltar byung ba ni gzhan dag ste/ gnod pa mi byed pa de dag la bdag gnod pa byed pa ni bdag gi tshul dang mthun pa ma yin no zhes mi rtag pa nyid yid la byed pas gnas so zhes bya ba ni rang bzhin no//sems can thams cad ni don dam par na sdug bsngal du bying ba yin gyi/ sems can gang yang gcig tu bde ba ni 'ga' yang med do/ / de lta bur rang bzhin gyis sdug bsngal bar gyur pa'i sems can rnams la snying rje bskyed la bdag gis sdug bsngal bsal ba la 'bad par 'os pa yin gyi/ sdug bsngal bskyed par 'os pa ni ma yin no zhes yid la byed cing snga ma bzhin du bzod par byed do/ /bdag gis byang chub tu sems bskyed pa'i smon lam btab pa'i rjes thogs la sems can thams cad chung ma'i tshul du yongs su bzung nas/sdug bsngal las yongs su bskyab par 'dod pa'i sbyor bas/ de ltar mi 'jigs pa'i sbyin pa la mgron du bos nas bdag nyid kyis 'jigs pa skyed par byed pa ni/ tshul dang mthun pa ma yin no zhes yid la byed cing snga ma bzhin du bzod par byed de/de la bzod pa gang zhe na zhes bya ba ni bzod pa rnam pa gsum gyi bye brag las 'jug pa'i rnam pa'i khyad par bstan par 'dod pa'o/ /bzod pa dang po'i dbang du byas nas smras pa/ mi 'khrugs pa dang zhes bya ba ni sems so//phyir gnod pa mi byed pa dang zhes bya ba ni lus dang ngag gis so/ /de bzhin du 'dir dge sbyong du byed pa'i chos bzhi yang ji ltar rigs par sbyar bar rig par bya'o/ /sems la yang mi 'dzin zhes bya ba ni gnod pa byed pas byas pa'i phyi nas khon du 'dzin pa spong ba'o//bdag sngon gyis byis pa'i gnas skabs na don med pa'i sdug bsngal nyams su myong bar byas so zhes dran par byas nas/ de ni sems bskyed nas sdug bsngal dang du len pa na ni don dang bcas pa yin no zhes bsam nas sdug bsngal dang du blang bar bya ba ni gcig tu legs pa yin par ston par byed do//'dod pa spyod pa ni 'dod pa tshol pa dang / srung ba dang / longs spyod pa'i dbang du byas nas lus dang ngag gis sbyor ba'o/ /rang bzhin gyis sdug bsngal gyi bdag nyid can yin na 'dod pa zhes ci'i phyir bya zhe na som nyi bzlog pa'i phyir smras pa/sdug bsngal gyi rgyu yin par tshor bzhin du zhes bya ba la/ sdug bsngal gyi rgyu yin pa'i phyir sdug bsngal yin gyi ngo bo nyid kyi sdug bsngal ni ma yin no/ /des na slob dpon ku mA ra la tas kyang / sdug bsngal nyid kyi rgyu yi phyir/ /sdug bsngal mi nyung bas bsgrubs shing / / sdug bsngal nyid la bder brtags pas/ /sdug bsngal yin par de nyid 'dod/ /ces bstan pa yin no/ /nyams su blangs pa ni sdug bsngal 'ong par shes bzhin du nyams su blangs shing brtsams pa'o/ /dang du blangs pa ni myong ba'i tshe brnags pa'o/ / nyams su myong ba ni de la zhugs par gyur pa'i tshe bzod par byed pa'o/ /ci'i don du zhe na/ de'i rgyu bstan pa'i phyir mi shes pa'i nyes pas zhes bya ba la/ de ltar 'dod pa skyon dang ldan pa yin yang mi shes pa'i dbang gis nyes dmigs mthong bar ma gyur to zhes bsams pa'o//bde bsgrub pa zhes bya ba ni bdag dang gzhan gyi bde ba 'byung ba'i gnas so/ /nyams su blang ba ni cha yin no zhes bya ba ni don dang bcas pa'i phyir ro/ /gzhi thams cad las byung ba zhes bya ba ni thams cad las byung ba'o/ /sdug bsngal la brten pa ni rnam pa brgyad du rnam par gzhag par bya ste/khyim pa dang / rab tu byung ba'am/ bdag gi don dang ldan pa'am/ gzhan gyi don dang ldan pa ji ltar rigs par sbyar ro/ /lus nye bar brtan par byed pa'i phyir chos gos la sogs pa bzhi ni/ 'tsho ba'i yo byad de/ rten ces brjod do/ /ji skad du 'dul ba las zas kyi nang na bsod snyoms ni rung ba rnyed kyang sla ba'o zhes bya ba la sogs pa rgya cher bstan pa yin no//rab tu byung ba rnams ni chos gos la sogs par ngan nam med na sdug bsngal 'byung bar 'gyur te/ gang gi phyir smras pa/ de dag ngan pa dang zhes bya ba la sogs pa la/de dag ji ltar rigs par lus dang sems kyi sdug bsngal du shes par bya'o/ /de'i phyir smras pa/ mi dga' bar mi 'gyur zhes bya ba la/ mi dga' bar mi 'gyur ba ni mngon par dga' zhing mi dga' ba med pa'o/ /yongs su yi chad par mi 'gyur ba ni tshul bzhin ma yin pa yid la byed pa'i sems kyi gdung ba med pa'o//gzhi des brtson 'grus kyang gtong bar mi byed ces bya ba ni le lo'i dngos po bstan pa'i rjes su 'brangs nas nyams par mi byed pa'am/ brtson 'grus brtsams pa'i dngos po'i sgo nas brtsams pa zhes bya ba'i tha tshig go/ / 'jig rten gyi chos ni rnam pa gnyis su rnam par gzhag par rig par bya ste/ rab tu grags pa'i nag po'i phyogs dang / dkar po'i phyogs kyis brgyad las de dag las nag po'i phyogs su gyur pa/ 'dir yongs su bzung bas sdug bsngal gyi dbang du byas pa'i phyir ro/ /mtshan nyid kyis ni rnam pa lnga ste/rgas pa dang / na ba dang / 'chi ba dang / 'jig pa dang / zad pa'i rang bzhin no/ /de la 'gal ba'i rkyen nye bar gnas pas dngos po myur du nyams par 'gyur ba ni 'jig pa zhes bya'o/ /rang nyid dus gzhan na ngang gis med par 'gyur pa ni zad pa zhes bya'o/ / yid du 'ong ba'i lang tsho nyams par 'gyur ba ni rga ba'o/ /'dod par bya ba'i nad med pa nyams par gyur pa ni nad do/ /yid du 'ong ba'i srog yongs su gtong ba ni 'chi ba'o/ /spyod lam ni bzhi ste zhes bya ba la gang gis 'gro bar byed pa la sogs pa dang / gang 'gro bar byed pa de dag gnyi ga spyod lam nyid du rnam par gzhag par bya'o//'gro ba la sogs pa kun nas slong bar byed pa'i sems ni skul bar byed pas spyod lam zhes bya ste/ 'dis 'byung ba rnams skul zhing 'debs pa dang yul gzhan du phyin par byed pas so/ /de'i lam ni 'gro ba la sogs pa'i bya ba ste/'gro ba la sogs pa'i sgo nas de la 'jug pa'o/ /nyin mo dang mtshan mo dus ring du sems kyi sgrib pa sbyong bar byed pa na spyod lam gcig gis gnas par byed pa ni sdug bsngal skyed par byed pas/ de la btang snyoms su yid la byed cing de bsal ba'i thabs kyang mi byed par dge ba'i phyogs la rab tu sbyor ba ni sdug bsngal byung ba dang du len pa zhes bya ba'o//de bsal ba'i thabs mi byed pa nyid bstan pa'i phyir/ dus ma yin par khri'am zhes bya ba la sogs pa la/ khri'am khri'u zhes bya ba ni gtsug lag khang du gtogs pa yin no//rtswa bting ba'am lo ma bting ba ni dgon par gtogs pa'o/ /chos yongs su 'dzin pa rnam par gzhag pa ni rnam pa bdun te/ rab tu byung ba ni dman pa dang / 'bring dang / mchog ste/ dge slong gi dbang du byas nas dman pa ni zhal ta bya ba'o/ /de yang rnams pa gnyis te/gang gi phyir smras pa/ dkon mchog gsum la mchod pa dang / rim gro bya ba dang zhes bya ba la/ ji ltar rigs par lus la sogs pas sangs rgyas la mchod pa nas dge 'dun la mchod pa'i bar du byed do zhes bya ba'i don to/ /bla ma mchod pa ni slob dpon dang /mkhan po la yongs su bsnyen bkur byed pa'o/ /mdo la sogs pa gzhan gyis bstan pa 'dzin pa ni chos rnams bzung ba'o/ /bzung ba'i don dang gzhung rnams gzhan dag la ston pa ni rgya cher ston pa'o/ /de dag nyid tshig gis yang dang yang du zlos pa ni kha ton du bya'o//thos pa'i rjes su 'brangs nas dben par 'jal ba ni sems pa'o/ /zhi gnas dang lhag mthong goms par byed pa ni sgom pa'o/ /tshe dang ldan pa dag slong mo pa rnams kyis slong mo'i gnas nyi shu rtsa gnyis la brtag par bya'o zhes bstan pa'i mdo de las gnas dang po bdun bzung nas 'di ltar bstan te/de dag ni sdug bsngal gyi gnas kyis rab tu phye ba yin pa'i phyir ro/ /bdag ni khyim pa'i rtags spangs pas gzugs mi sdug pa'o zhes bya ba ni rnam pas gzugs mi sdug pa la blangs pa yang khyim pa'i mtshan ma spangs pas mtshon to/ / khyim pa'i mtshan ma spangs pa'i phyir skra dang kha spu la sogs pa bregs pa'o/ /bdag gis kha dog ngan pa nyams su blang ngo zhes bya ba ni gnyis pa'o/ /gos dras pa dang / gos kha dog ngan pa 'chang ba ni kha dog ngan pa 'chang ba'o/ /gos kha dog dmar ser 'chang ba ni gos/ kha dog na pa 'chang ba'o/ /bdag gis tshul gzhan bya'o zhes bya ba ni gsum pa ste/ 'gro ba la sogs pa la 'jig rten pa'i spyod pa dang spyod du yul thams cad las bsdams nas gnas pa'i phyir ro/ /bdag gzhan la rag las pas 'tsho bar bya'o snyam pa ni bzhi pa ste/ las kyi mtha' thams cad yongs su spangs nas gzhan gyis byin pas nye bar 'tsho zhing gzhan dag las rnyed pas srog 'dzin par byed cing dus 'da' bar byed de/ ji srid 'tsho'i bar du gzhan dag las bslangs shing 'tsho bar bya ba ste/ lan cig la mang po rnyed du zin kyang bsags nas longs spyad par ma gnang ba'i phyir ro//mi'i 'dod pa rnams ni 'khrig pa'i 'dod pa'o/ /de las ldog pa ni 'khrig pa'i chos las ldog pa yang dag par blangs pa'i phyir ro/ /mi'i dga' ba dang / rtsed mo dang / gar la sogs pa mthong na de dag las ldog pa'i sdom pa yang dag par blangs pas spangs pa'o//mdza' bo ni mi phan pa spong du 'jug cing phan pa la yang dag par sbyor ba'o/ /snying du sdug pa ni phongs pa'i dus na yang mi 'dor ba'o/ /chung po grogs ni byis pa'i dus nas yun ring du 'grogs ba'o/ /bgad pa ni 'dod chags kyis kun nas bslang ba'i ngag gi sbyor ba'o/ /rtse ba ni de bzhin du lus kyi sbyor ba'o//dga' ba ni de bzhin du yid kyi kun du spyod pa'o/ /dga' mgur spyod pa ni phan tshun nyon mongs pas kun nas bslang ba'i dga' ba'o/ /de lta bu las ldog par bya ste/ de lta bu'i sdug bsngal ba rnams ji ltar rigs par sbyar bar bya'o/ /lus kyi dub pa ni shin tu brtson 'grus brtsams pas lus ngal ba'o//sems kyi 'khrugs pa ni dran pa brjed ngas pa dang / sems rnam par nyams pa'o/ /rnam pa bcu gcig tu rig par bya ste zhes bya ba ni 'di ltar bya ba rnams te/ rab tu byung ba rnams kyi ni chos sgrub pa'i yo byad rnams gzung ba'i bya ba'o//khyim pa rnams kyi ni yang dag pa'i las kyi mtha' nyams su len pa'o/ /yang dag par rdzogs pa'i byang chub la 'dzud pa kho nar byed kyi zhes bya ba ni nges par byang chub kyi tshogs la yang dag par 'dzud par byed pa zhes bya ba'i tha tshig go/ /brtson 'grus brtsams su zin kyang bar du ldog pa yang srid pas zhugs nas kyang ldog par mi byed cing zhes bya ba'o//de la mi dga' ba med pas yid mi dga' ba med pa'o/ /yongs su gdung ba med pas kun nas nyon mongs pa can ma yin pa'o/ /yang dag pa'i lam la so sor rtog pa ni rab tu rnam par 'byed pa ste/ yang dag pa zhes bya ba ni phyin ci ma log pa'i rnam pa'o/ /chos ni zag pa dang bcas pa dang zag pa med pa la sogs pa'o/ /so sor 'byed pas na rab tu rnam par 'byed pa'o/ /rigs pa dang bcas pa yin na yang phyin ci ma log par rang dang spyi'i mtshan nyid tshul bzhin yid la byed pa ni rab tu rnam par 'byed pa ste/de la rigs pa rnam pa bzhi la brten nas rnam par 'byed pa ni shin tu brtags pa'o/ /rgyu des mos pa ni shin tu brtags pa'i blos mos pa'o/ /nges pa'i dngos po la de kho na bzhin du nges par 'dzin pa ni legs par gnas pa zhes bya ste/ bdud dang phas kyi rgol ba thams cad kyis mi thub pa'i phyir dang /stobs brtan po thob pa'i phyir ro/ /dkon mchog gi yon tan zhes bya bya ba ni dkon mchog gi che ba'i bdag nyid do/ /de kho na'i don ni gang zag dang chos la bdag med pa'o/ /mthu chen po ni sngar bstan pa'i rnam pa gsum mo/ /gang gnas gsum bo 'di la mos pa'i byang chub sems dpa' ni zab mo la mos pa dang /rgya che ba la mos pa zhes bya'o/ ji skad bstan pa'i rgyu dang 'bras bu la mngon par yid ches pa ni mos pa ste/ rgyu dang 'bras bu'i mtshan nyid ni 'di lta bu'o zhes nges pa'i stobs kyis len pa'o/ /bdag gis thob par bya ba'i don 'di ni nges par yod de//de thob par bya'o zhes nges par thob pa'o/ /de thob par byed pa'i lam ni 'di yin no zhes nges par thob pa ni de thob pa'i thabs zhes bya ste/ 'di dag ni mngon par mos pa zhes bya'o/ /shes bya'i spyod yul zhes bya ba ni mi rtag pa la sogs pa'i rnam pa la 'di ni 'di lta bu yin gyi/ gzhan du ma yin no zhes nges par gzung ba thob pa'o//bskal pa grangs med pa chen po gcig tu yongs su bsgoms pa nyid kyi phyir mos pas spyod pa'i sa la yun ring du sbyor ba'o/ /sa bcu la legs par zhugs par gyur pa'i rtogs pa'i khyad par thob par gyur pa'i chos bdag med pa'i mtshan nyid can shin tu rnam par dag pa'i ye shes thob par 'gyur ro//bzod pa thams cad du dka' ba'i bzod pa la sogs pa rnam par gzhag pa bstan pa'i phyir smras pa/ de la brten nas zhes bya ba la sogs pa la/ de ni rnam pa gsum du blta bar bya ste zhes bya ba la/ dka' ba'i bzod pa yang rnam pa gsum du rnam par gzhag par bya ste/bzod par bya ba'i khyad par dang / bzod par byed pa'i khyad par dang / gnod pa'i dngos po'i khyad par ro/ /bzod par bya ba'i dbang du byas nas smras pa/ nyam chung ba rnams kyi zhes bya ba la/ dman pa de dag ni byams pa'i yul yin zhing /snying rje'i rten yin pas bzod par bya ba yin gyi/ gzhan pa'i bya ba med pas bzod pa ni dka' ba'i bzod pa'o/ /bzod par byed pa'i dbang du byas nas smras pa/ bzod par byed pa ni zhes bya ba la/ rje dpon ni nus pa dang ldan pa ste/ rnam pa thams cad du gnod pa byed par nus pa de lta bu la bzod pa 'di ni dka' ba'i bzod pa zhes bya'o//dman pa'i gnas na gnas pa dag gis srog la thug pa'i gnod pa byas la bdag nyid ni chen por gyur pa cig yin na yang bzod pa dang / de bzhin du nyam chung ba rnams kyis gnod pa byas pa la bzod pa dang / mtshungs pa rnams kyis gnod pa byas pa yang bzod pa dang /dma' ba rnams kyis ba rnag par dka' ba'i gnod pa byas pa yang bzod pa ni dka' ba'i bzod pa zhes brjod do/ /mdza' bo rnams la ni phan pa'i sems kyis bzod par byed do/ /mi mdza' ba rnams la ni byams pa'i sems kyis so/ /tha mal pa rnams la ni so sor ma brtags pa'i btang snyoms kyis so//de ltar sgo gsum nas so/ /gsum char la yang mnyam pa'i rnam pas bzod par byed pa ni sgo bzhi pa'o/ /mi bzod pa'i sgo nas bdag dang gzhan la gnod pa mi byed pa ni skyes bu dam pa zhes bya'o/ /de'i bzod pa ni skyes bu dam pa'i bzod pa'o/ /mi bzod pa'i nyes pa rnam pa lnga mthong zhing /de las ldog pa'i bzod pa'i phan yon rnam pa lnga mthong bar 'gyur ro/ /phan yon bstan pa'i phyir phyi ma la dgra mang bar mi 'gyur ba dang zhes bya ba la sogs pa la 'di dag gi phan yon gyi don bstan pa ni snga ma bzhin du rig par bya ste/ 'di lta ste thos pa las byung ba'i sa las 'byung ba bzhin no//de ltar bzod pa'i phan yon mthong ba ni de la mang du gnas par 'gyur ro/ /sems can rnams la yang rjes su brtse ba'i phyir gzhan dag kyang bzod pa la yang dag par 'gong par byed do/ /bzod pa'i dbang du byas nas/ sems can rnam pa gsum yang dag par 'god par byed pa la sogs pa snga ma bzhin du rig par bya'o//mi sdug pa'i rnam par smin pa zhes bya ba ni dpyas shing 'jigs su rung ba la bzod pa zhes bya bar bstan par 'gyur ro/ /snying brtse ba'i sems ni sems can rnams la phan pa dang bde ba'i bsam pa nyid do/ / snying rje'i sems ni sdug bsngal bar 'dod pa nyid do/ /mnyen pa'i sems ni sems can rnams mi gtong ba nyid do/ /de lta na sems can rnam pa gsum la ltos nas bzod par byed do zhes bstan par 'gyur ro/ /yang dag par rdzogs pa'i byang chub la lhag par mos pa'i bsam pa drag po dang ldan pas byang chub kyi tshogs yongs su rdzogs par bya ba'i phyir bzod pa'o//bzod pa'i stobs can zhes bya ba ni dka' thub can thams cad kyi nang na bzod pa'i dka' thub ni mchog yin pa'i phyir dang / de'i stobs kyis dka' thub dang tshul khrims yang dag par 'gyur ba'i phyir bzod pa'i stobs can zhes brjod do//de ltar na bdag nyid kyi gnas skabs kyi khyad par la ltos pa dang bcas pas bzod par byed do/ /rigs phun sum tshogs pa zhes bya ba ni rigs kyi rtogs pa dang ldan pa'o/ /sngon zhes bya ba ni mos pas spyod pa'i gnas skabs so/ /gnas shing zhes bya ba bstan pa ni 'dug pas zhes bya ba'o//kha cig nas gnas pa la zhes 'don pa der ni don 'di yin te/ bzod pa goms par byas pas mngon du phyogs par gyur pas 'dug pa ni gnas pa'o/ /rang bzhin gyis kyang bzod pa dang / /zhes bya ba ni rgyu'i stobs can yin gyi/ sbyor ba'i stobs can ma yin no zhes bya ba'i tha tshig go//sa la zhugs pa'i byang chub sems dpa'i dbang du byas nas smras pa/ gang zag la bdag med pa so sor rig pas 'di la bzod par bya ba bdag gis bzod par bya'o zhes rlom sems med pa ni bzod pa'o/ /gang gi phyir smras pa/ sems can med par rig nas zhes bya ba ni chos la bdag med par rab tu rtogs nas gnod pa byed pa thams cad la ji mi snyam pa'o//de ltar na de kho na nyid kyi rnam par shes pa'i stobs kyis bzod par 'gyur ro zhes bstan par 'gyur te/ de ltar na rnam pa drug go/ /rnam pa bdun gyi dbang du byas nas smras pa/ thams cad kyis bzod pa dang zhes bya ba la sogs pa'o//de ltar na dngos po'i bye brag dang / yul gyi bye brag dang / ngus kyi bye brag dang / gnas skabs kyi bye brag dang / rnam pa gsum la bye brag med par bzod pa zhes bya ba ni rnam pa bdun yin no/ /phongs shing 'dod pa'i bzod pa rnam pa brgyad ni mdor bsdu na rnam pa gnyis su rnam par gzhag par bya ste/gang gis sems can la gnod par 'gyur ba de bzod par byas nas spong bar byed pa dang / gang dag don du gnyer ba de dag la nye bar sgrub par byed par rig par bya'o/ /slong ba'i gnod pa bzod pa zhes bya ba ni slong ba po rnams kyi 'khrul pa sna tshogs la mi 'byed pa'i bzod pa ste/ /de lta bu'i bya bas 'dod pa rnams kyi bsam pa sgrub pas phongs shing 'dod pa'i bzod pa zhes bya'o//ma rungs pa sdig pa chen po'i las kyi nyes par spyod pa chen po la spyod pa sdug bsngal gyi rgyu la zhugs pa snying rje chen po'i dbang du byas nas gnod sems mi skyed cing nyes par spyod pa la gnas pa rnams la mnar sems med pa ni bzod pa ste/de lta bu ni khyim pa'i phyogs kyi dbang du byas pa'o/ /rab tu byung ba log par zhugs pa rnams la bzod par bya ba bstan pa'i phyir/ tshul khrims 'chal pa rnams la zhes bya ba la sogs pa la/ brtsal ba mi mjed pa'i bzod pa zhes bya ba ni de'i sgo nas skyes pa'i sdug bsngal dang du len pa'i bzod pa'o//gang gis phongs par 'gyur ba de ni zhes bya ba la/ mi 'dod pa dang mi 'phrod pa ni phongs par gyur pa'o/ /bzod pas yongs su spong bar byed la zhes bya ba ni bzod pa la brten nas lus la sogs pas lan du gnod pa mi byed pa'o/ /gang 'dod pa zhes bya ba ni zang zing dang chos la sogs pa'o//de'i sgrub par byed pa'i phyir ro zhes bya ba ni chos de dag nyid gzhan dag la rgya cher bstan pa zhes bya ba la sogs pas rig par bya'o/ /sdug bsngal rnam pa brgyad po dang du blangs nas dge ba'i phyogs la sbyor ba dang ldan pas mthong ba'i chos la sdig pa mi dge ba'i chos rnams dang ma 'dres pa'i phyir sdug bsngal dang du len pa'i bzod pa ni 'jig rten 'dir bde ba'o//de'i sgo nas bdag nyid kyi dge ba'i chos rnams nye bar bsags pas 'jig rten gzhan du bde bar 'gyur ba'o/ /ji skad bstan pa'i sdug bsngal khyad du bsad nas gzhan dag 'di dang gzhan du bde bar 'gyur ba la rab tu bkod pa ni gzhan dag 'di dang gzhan du bde bar 'gyur ba'i bzod pa zhes bya ba'o//sdug bsngal rnam pa brgyad ni dus tshigs gzhan du gyur pa las byung ba ni gang yang smras pa/ grang ba dang / tsha ba zhes bya ba'o/ /lhan cig skyes pa gang yin pa ni bkres pa dang / skom pa zhes bya ba'o//rtsub pa'i reg pa las byung ba'i sgo nas rnam pa gnyis su byas pa ni gang yang smras pa/ sbrang bus zin pa dang / sha sbrang gis zin pa dang zhes bya ba'o/ /lus gdungs pa las skyes pa ni rlung dang / nyi tshan dang zhes bya ba la gdung ba dang / skam par byed pa'o/ / sos reg ba las skyes pa ni brang 'gro la sogs pa ste/ gang yang smras pa/ sdig sbrul gyis zin pa rnams zhes bya ba'o/ /rtsal drags pa las byung ba ni gang yang smras pa/ ngal ba las byung ba'i lus dang / sems dub pa dang zhes bya ba'o/ /skye ba la sogs pa 'khor ba'i sdug bsngal ni gang gi phyir smras pa/'khor ba na yod pa'i zhes bya ba la sogs pa'o/ /de dag thams cad dang du blangs nas ji ltar rigs par bdag la phan pa dang gzhan la phan pa la yang dag par sbyor bar byed pa ni dang du len pa'i bzod pa ste/ bdag dang gzhan dag 'di dang gzhan du bde ba'o/ /gnod pa byas par gyur pa la lan du gnod pa mi byed pa ni sbyor ba dag pas ni rnam par dag pa'i bzod pa zhes bya ba'o//da ltar gzhan gyis gnod pa byed par gyur pa la sems 'khrugs par mi byed pa nyid dang / 'das pa'i dus su byas par shes kyang zhe la mi 'dzin pa nyid dang / de dag la slar phan gdags par 'dod pa nye bar bzung nas bsam pa dag pa yin pas rnam par dag pa zhes bya ba'o//sems can gnod pa byed pa rnams la rang nyid song nas mthun par smra zhing kho na med par ston pa dang / gzhan gnod par byed pa dag 'ongs nas bzod pa gsol na de bzhin du dang du len par byed pa nyid ni phyir bcos pas rnam par dag pa'o//mi bzod pa las brtsams te shas cher ngo tsha shes pa ni bzod pa'i sgo nas ston pa la gus par bya ba'i bsam pa nyid dang / rnam par tho ma'i tshams pa las brtsams te/ snying rje ba'i bsam pa nyid dang / dngos po'i khyad par gyi sgo nas bsam pa'i khyad par rnam par dag pa'o/ /mi bzod pa'i chos kyi grogs ni khong khro la sogs pa'i nyon mongs pa rnams so//'dod chags dang bral ba rnams kyi bzod pa'i mi mthun pa'i phyogs rab tu spangs pas rnam par dag pa yin no/ /de ltar na mdor bsdu na sbyor ba rnam par dag pa dang / bsam pa rnam par dag pa dang / sbyor ba'i khyad par rnam par dag pa dang /bsam pa'i khyad par rnam par dag pa dang / 'dod chags dang bral ba rnam par dag pas bzod pa gsol bar byas pa yin no/ /bzod pa'i pha rol tu phyin pa'i le'u ste bcu gcig pa'i 'grel pa rdzogs so// //brtson 'grus kyi ngo bo nyid kyi rnam pa ni rnam pa bzhir rnam par gzhag par bya ste/gang yang rnam pa nyid smras pa/ sems mngon par spro ba zhes bya ba smras so/ /sems las byung pa'i chos rnams kyi rang gi mtshan nyid ni rnam pa zhes brjod par bya ste/ brtson 'grus gang zhe na/ dge ba'i las la sems spro ba'o zhes bstan pa'i phyir ro/ /sems mngon par spro ba zhes bya ba dang /sems mngon par 'du byed pa zhes bya ba la khyad par ci yod ce na sems mngon par 'du byed pa ni dge ba dang / mi dge ba dang / lung du ma bstan pa la yang 'jug pas zhes bya ba nas spyi'i rnam pa ste/ de ni las mngon par 'du byed pa'i sems yongs su g.yo ba'i bdag nyid can yin pa'i phyir ro//yang mngon par spro ba zhes bya ba ni 'dod pa'i bya ba sgrub pa'i bdag nyid can te/ yang dag pa'i gtso bos bsdus pa'i phyir ro/ /spro ba ni brtson 'grus te/ sems las byung ba dge ba rnams kyi rgyur gyur pa'o/ /de bzhin du bya ba la mngon par phyogs pa ni spro ba ste/ mngon par spro ba zhes brjod do//mngon par 'du byed pa ni yongs su g.yo ba tsam 'ba' zhig nyid do/ /dmigs pa nyid ni gang yang smras pa/ dpag tu med pa bsdu ba dang / /zhes bya ba la dge ba'i chos dpag tu med pa dang / sems can gyi don bya ba la 'jug pa'i phyir ro/ /de'i phyir smras pa/ dge ba'i chos dpag tu med pa bsdu ba dang zhes bya ba la sogs pa'o//gang yang sbyor ba nyid smras pa/ /sbyangs pa zhes bya ba la sogs pa la/ gus par bya ba'i sbyor bas yongs su bzung ba ni sbyangs pa zhes bya ba ste/ mngon par 'dus byas pa'i rnam pa yin pa'i phyir ro/ /rgyun mi 'chad par rtag tu 'jug pa nye bar bzung nas rtag tu sbyor bas yongs su bsdus pa ni bar chad med pa'o//thabs kyi sbyor bas yongs su bzung ba ni phyin ca mi log pa ste/ brtson 'grus tshul bzhin brtsams pa la/ /dka' ba cung zad yod ma yin/ /zhes bya ba'i tshigs su bcad pas so/ /rgyu mthun pa nyid ni gang yang smras pa/de las byung ba'i zhes bya ba la/ de ltar na lus dang ngag dang yid kyi dge ba'i chos rnams ni brtson 'grus kyis kun nas slong ba'o zhes bya ba'i tshig gis te/ mngon par spro ba dang ldan pa'i sems kyis mngon par 'du byed pa'i zhes bstan pa yin no/ /sdom pa pa'i tshul khrims kyi yul ni brtson 'grus 'di la ma smos te/de ni ldog pa'i ngo bo yin pa'i phyir la/ brtson 'grus ni spro ba'i bdag nyid can yin pas 'jug pa'i ngo bo nyid yin pa'i phyir ro/ /'jug pa'i tshul khrims nyid ni spro ba nyid du rnam par gzhag pa'i phyir ldog pa'i tshul khrims nyid ni ma yin no/ /tshul khrims zhes bya ba ni kha na ma tho ba med pa'i lus dang ngag dang yid kyi las kyis bsdus pa yin pa'i phyir dang /de yang yongs su g.yo ba tsam zhes bya ba'i tshig nyid kyis bsdus pa'i phyir ro/ /khyim pa'am rab tu byung ba'i byang chub sems dpa' sangs rgyas kyi chos yongs su smin par bya ba dang sems can yongs su smin par bya ba la rab tu sbyor bar byed do zhes bya ba smras pa/rnam pa gnyis su zhes bya ba la/ de yang gnyi ga'i phyogs la brten pas so sor rnam pa gsum du 'gyur ro/ /brtson 'grus thams cad ni rnam pa gnyis su bsdu ste/ go cha'i brtson 'grus dang sbyor ba'i brtson 'grus so/ /sbyor ba'i brtson 'grus la rdzas kyi rnam pa dbye bas rnam pa gnyis su byas nas rnam pa gsum du smras te/tshul khrims la sogs pa'i mdor bstan pa dang chos mtshungs pa'o/ /rtsom pa'i brtson 'grus dang / rdzogs par byed pa'i brtson 'grus zhes bya ba ni 'di dag gi rnam grangs so/ /go cha zhes brjod pa ni dang por rnam par brtags nas yongs su len pa'o//de'i phyir smras pa/ sbyor ba'i snga rol nas zhes bya ba la sogs pa la byang chub sems dpa' rnams kyi go cha'i brtson 'grus ni tshad med pa bzhis bsdus pa yin par rig par bya'o/ /de'i phyir bstod pa/ tshad med pa ni bzhi po yis/ /yongs su bzung bas 'jigs pa med//ces bya ba yin no/ /tshad med pa bzhi gang zhe na/ dus tshad med pa ni bskal pa grangs med pa gsum gyis sangs rgyas nyid thob par thos nas de bzhin du dam bcas nas brtson 'grus rtsom pa dang / sdug bsngal dpag tu med pa ni dus de snyed grangs med pa'i skye ba la sogs pa'i sdug bsngal so sor rab tu myong ba nyams su len pa nyid do//bsod nams tshad med pa ni nyan thos dang rang sangs rgyas dang 'jig rten pa thams cad las yang dag par 'das pa'i bsod nams nye bar sogs pa yongs su 'dzin pa'i phyir ro/ /sems can tshad med pa zhes bya ba ni sems can gyi khams dpag tu med pa yongs su mya ngan las 'das pa'i phyir yongs su 'dzin pa nyid do//de dag nyid kyi don gyi rnam grangs rim gyis 'dir bstan pa'i phyir gal te sangs rgyas nyid las brtsams te/ sbyor ba byas ba las dgos pa chung ngu tsam du gyur la ngal ba ni chen por gyur kyang / de lta na yang sangs rgyas nyid thob par bya ba'i phyir sbyor bar byed pa nyid ces bya ba ni go cha chen po nyid bstan pa'o//dgos pa chung ba nyid du bstan pa'i phyir/ gal te sems can gcig ces bya ba la/ de lta bu'i rtsom pa chen po brtsams pa las sems can gcig cig mya ngan las 'das par byed nus na yang de lta na yang sbyor ba nyid du byed na mang po dag gis lta ci smos zhes bstan pa'i phyir dang /dus dang sdug bsngal chen pos yongs su ngal ba chen po bstan pa'i phyir te/ yongs su bgrang ba bzung na bskal pa stong phrag grangs med pa'i nyin dang mtshan mo'i rnam par gzhag pa dang mnyam pa grangs med pa brgya stong yongs su bgrang ba bzung ba snyed du ji srid 'tsho'i bar du dmyal bar gnas pas bdag gis bla na med pa yang dag par rdzogs pa'i byang chub par 'gyur na yang de lta na yang bla na med pa yang dag par rdzogs pa'i byang chub la sbyor bar bya'o zhes go bgos na mthar thug par ma gyur gyi bar du bar ma dor 'dor bar mi bya ba dang /gal te de bas yun thung ba dang /sdug bsngal chung bas thob par 'gyur na lta shin tu yang 'jug par bya'o zhes bya ba'o/ /'di dag gis ni dus ring po dang / dus rgyun mi 'chad par 'jug pas sdug bsngal shin tu drag cing che ba'i sgo nas bla na med pa yang dag par rdzogs pa'i byang chub 'thob par 'gyur ba de lta na yang de'i don du sbyor ba'i dor bar mi bya'o zhes bya ba ni bsam gyis mi khyab pa'i go cha yongs su gsal bar byas pa yin no//de lta bu la mos pa tsam dang zhes bya ba ni 'di lta bu thams cad ni byang chub sems dpa'i go cha'o zhes de bzhin du bzung nas de lta bu'i mos pa tsam gyis de dang 'dra ba'i go cha la dad pa skye bar 'gyur ba ni dad pa tsam skyed pa'o//de yang brtan po yin te zhes bya ba ni phyir mi ldog cing brtan por 'gyur ba ste/ phyir ni ldog pa'i sa bon dang yang dag par 'gyur bar ldan pa'i phyir ro/ /de'i phyir smras pa/ rgyu yongs su rtas par byed pa yin na zhes bya ba la/ byang chub kyi don du brtson 'grus brtsams pas sa bon bskrun pa zhes bya ba'i don to//go cha de dang yang dag par ldan par gyur pa ni sangs rgyas kyi chos yongs su smin par bya ba dang / sems can yongs su smin par bya ba'i dbang du byas nas dka' ba'i spyod pa'i bya ba yod pa ma yin te/ de las khyad par du 'phags par 'jug pa'i dka' ba med pa'i phyir ro//sems zhum pa ni rtsom pa'i dus su yi bsad pa'o/ /dka' ba spyad dgos pa ni sbyor ba'i dus na mi nus nga med pa'i phyir te/ thams cad rim gyis bde bar byed pa'i phyir ro/ /pha rol tu phyin pa drug la sbyor ba dang / mngon par sgrub pa dang / 'jug pa'i brtson 'grus ni dge ba sdud pa'i brtson 'grus zhes bstan pa yin no//re re yang rnam pa bdun bdun gyis bsdus par rig par bya ste zhes bya ba la/ rnam pa bdun po de dag kyang mdor bsdu na gsum du byas pas bsdu bar bya'o/ /stobs brtan pos bskyed pa dang / sbyor ba'i khyad par dang / gnas rnams dang ji ltar rigs par sbyar par bya'o//mi g.yos pa zhes bya ba ni brtan pa ste/ mi mthun pa'i phyogs thams cad kyis zil gyis gnon par mi nus pa'i phyir ro/ /mi mthun pa'i phyogs thams cad kyang rnam pa gnyis su bsdu bar bya ste/ rang gi rgyud du gtogs pa dang / gzhan gyi rgyud du gtogs pa'o/ /rang gi rgyud du gtogs pa yang rnam pa gnyis te/nyon mongs pa med pa dang / nyon mongs pa can no/ /de la 'khor ba'i sdug bsngal dang / sems can gyi log par sgrub par tung ba yid pa byed pas ni brtson 'grus nyams par 'gyur ro zhes bya bas brtson 'grus mi brtan par 'gyur ro/ /de las bzlog pa ni brtan pa ste gnas pa'o//gnas pa'i phyir mi g.yo ba'o/ /nyon mongs pa can ni nyon mongs pa dang / nye ba'i nyon mongs pa ste/ de dag gis mi bskyod pas na brtan pa'o/ /gzhan gyi rgyud du gtogs pa yang rnam pa gnyis te/ bstan pa 'di la sdang zhing gnod par byed pa rnams kyis bzlog tu zin kyang 'di nyid la brtson 'grus rgyun mi 'chad par gyur pa ni brtan pa'o//sdug bsngal gyi tshor pa'i gzhi nyid yin pa'i phyir sdug bsngal yang dag par myong zhing de dag gi gnod pa drag po myong yang brtson 'grus rgyun mi 'chad pa'o/ /brtan pa ni shin tu legs par zhugs pa'i brtson 'grus te/ gus par byed pa'i sbyor ba'o/'di dag nyid rig pa'i gnas thams cad la mkhas pa thob par byed pa'i phyir dang / mkhas pa'i sgor zhugs pa'i phyir dpag med pa'o/ /thob par bya ba'i thabs yang dag pa dang ldan pas thabs dang ldan pa'o/ /mnyam pa nyid rab tu rtogs pas nyon mongs pa nyid dang bral ba'i phyir yang thabs dang ldan pa'o//don chen po la sbyor ba'i phyir yang dag pa'i brtson 'grus zhes bya'o/ /dus rtag tu sbyor ba dang / rgyas par zhugs pas na/ rgyas pa zhes bya'o/ /ngar sems pa'i skyon dang bral pa'i phyir dang rgyal med pa'o zhes bstan pa'i rnam pa bdun po 'di dag ni brtson 'grus brtsams pa'i tshul bstan pa yin no//brtson 'grus tshul bzhin du brtsams ba'i 'bras bu nyi bar bstan pa'i phyir rgyu dang 'bras bu yongs su rdzogs par gyur pa ni myur du bla na med pa yang dag par rdzogs pa'i byang chub thob par byed do zhes bya ba la/ byang chub kyi tshogs thams cad kyi tshogs thams cad kyi gtso bo ni brtson 'grus yin par bstan pa'i phyir te/sbyin pa la sogs pa de ni de'i rgyu can yin pa'i phyir ro/ /de'i phyir smras pa/ gang gi phyir zhes bya ba la sogs pa la/ bstan pas ston par mdzad do zhes bya ba ni kun dga' bo brtson 'grus ni byang chub kyi rgyu'i gtso bo'o zhes mdo sde nas bstan pa'i phyir ro/ /lus kyi stobs dang /nus pa thob par gyur pas longs spyod dang lus dang srog la ltos pa med par sbyor bar byed par mi nus pa nyid dka' ba dang / rnam pa 'dra bas dus ring por rgyun mi 'chad par sbyor ba byed par dka' ba ni gnyis pa'o/ /brtson 'grus kyi mnyam pa nyid rab tu rtogs par dka' ba nyid dang / phyin ci ma log pa la 'jug par dka' ba nyid ni dka' ba gsum pa'o/ /de'i rgyu bstan pa'i phyir/ 'di sdud pa'i rgyu ni zhes bya ba la sogs pa smras te/ lus kyi mthu dang stobs thob par gyur pas lus dang srog la ltos pa med par sbyor bar byed do zhes bya ba ni rgyu dang po'o/ /sems can rnams la snying rje'i stobs brtan po thob par gyur pas sems can rnams kyi sdug bsngal bsal bar bya ba'i phyir ji srid 'tsho'i bar du sbyor ba zhes bya ba ni snying rje'i sbyor ba ste/brtson 'grus kyi rgyu gnyis pa'o/ /skyes shing skyes pa'i nyon mongs pa rnams yongs su shes par rab tu sbyor bas kun nas nyon mongs pa med pa'i brtson 'grus zhes bya ba ste/mnyam pa nyid kyi brtson 'grus kyi rgyu ni shes rab yin no/ /sdud par byed pa'i rgyu zhes bya ba ni 'dren par byed pa'i rgyu ste/ sgrub par byed pa zhes byas nas rgyu gsum pa'o/ /thams cad kyi sgo nas brtson 'grus ni yang dag par spong bas bsdus pa ste/ de rdzogs par byed pa'i thabs kyis yongs su bsdus pa dang /rnam par gzhag pa ni gnyis dang gnyis kyis bsdus par rig par bya'o/ /nyon mongs pa can gyi chos rnam par spong par byed pa zhes bya ba ni yang dag par spong ba snga ma dag gis bsdus pa yin no/ /dge ba'i chos rnams skyed par byed pa ni phyi ma dag gis bsdus pa yin no/yongs su dag pa'i lus dang ngag dang yid kyi kun du spyod pas ni yang dag par spong ba dang po gnyis kyis sgom pa yongs su rdzogs par byed pa'i zhes bya ba las yongs su dag par byed pa dag gi thabs kyi rgyu yin no/ /ye shes kyi khyad par thob par gyur pa dang / dge ba'i chos la yang dag par sbyor bas ye shes rnam par 'phel bar byed pa ni phyi ma gnyis rnam par dag par byed pa'i thabs kyi rgyu yin no//rnam par dag par byed pa zhes bya ba ni lus la sogs pa'i las kun nas nyon mongs pa can ma yin ste/gcig tu dge ba yin pa'i phyir ro/ /dge ba'i chos rnams nye bar sogs pa'i phyir sdud par byed pa'o//ma skyes pa las skyes pa ni yang dag par sgrub pa zhes bya'o/ /skyes pa rnams khyad par du 'gro ba ni rnam par 'phel bar byed pa'o/ /skyes bu dman pa rnams kyi brtson 'grus kyi mi mthun pa'i phyogs su gyur pa ni skyes bu dam pa rnams kyi brtson 'grus rnam par gzhag par bya'o/ /dman pa rnams ni 'dun pa dang mos pa skyes pa rnams kyang 'dor bar byed do//de las bzlog pa ni skyes bu dam pa ste/ 'dun pa skyed par byed do zhes byas nas so/ /dman pa rnams ni brtsams nas kyang 'dor bar byed de/ sbyor ba mi brtan pa'i phyir ro/ /de las bzlog pa rnams ni phyir zhing rtsom pa khyad par du 'phags pa dang ldan pa'i phyir 'phel bar byed pa'o//brtson 'grus rtsom pa la zhes bya ba'i mdo'i tshig gis ni rtag tu byed pa dang gus par byed pa'i sbyor bas brtson 'grus brtsams pa'o/ /sems mi 'gong zhing sgyid lug pa med pa ni rab tu spro ba nyid do/ /phyin ci ma log pa'i sgrub pas 'bras bu nye bar byed pa'i phyir dang yang dag par spong bas phyin ci ma log par spangs pa bstan pa'i phyir mgo'am gos la me 'bar ba gsod pa la brtson pa lta bu'i sbyor bas myur du brtson 'grus rtsom pa ni brtun te sbyor ba'o//yon tan rnam pa thams cad kyis brgyan pa'i phyir rnam pa thams cad de bsdus pa dang so so'i rnam pa bstan pa'i phyir ro/ /dus rtag tu 'jug pa'i phyir rtag pa'i brtson 'grus zhes bya'o//'dun pa drag po'i sbyor ba dang ldan pas gus pa'i brtson 'grus zhes bya'o/ /mos pas spyod pa'i sa'i gnas skabs kyi rgyu'i stobs las kun du 'byung ba'i phyir rgyu mthun pa'i brtson 'grus zhes bya'o/ /skyes shing 'byung ba'i mi mthun pa'i phyogs kyis zil gyis mi non pa'i phyir sbyor ba las byung ba'i brtson 'grus zhes bya'o//sdug bsngal drag cing rtsub pa'i reg pa thams cad kyis mi ldog cing skyo ba med pa ni 'khrugs pa'i brtson 'grus zhes bya'o/ /brtson 'grus brtsams nas 'bras bu mthar thug pa'i bar du 'gro ba nyid ni chog mi shes pa'i brtson 'grus zhes bya'o//brtson 'grus rnam pa drug po 'di ni mdo'i tshig drug dang yang dag par sbyar bar byas te/ brtson 'grus brtsams pa nyid ni rtag pa'i brtson 'grus zhes bya'o/ /brtson 'grus kyi mthu dang stobs thob pa'i phyir gus pa'i brtson 'grus zhes bya'o/ /khyad par can gyi brtson 'grus kyi sbyor ba'i rgyu mthun pa'i brtson 'grus dang ldan pa'i phyir rgyu mthun pa'i brtson 'grus zhes bya'o//gnyen po'i phyogs kyi stobs kyis mi mthun pa'i phyogs zil gyis mnan nas spro ba dang ldan pa'i phyir sbyor ba las byung ba'i brtson 'grus zhes bya'o/ /brtun pa brtan pa'i phyir mi 'khrus pa'i brtson 'grus zhes bya'o//ngan ngon tsam gyis chog mi shes pa'i phyir brtson pa mi gtong ba zhes bya'o/ brtson 'grus gang gis bla na med pa yang dag par rdzogs pa'i byang chub tu 'dun pa drag po dang ldan par gyur pa dang / smon lam mang du 'debs pa ni 'dun pa dang ldan pa'i go cha'i brtson 'grus zhes bya'o//dge ba'i sems ma skyes pa'i mi mthun pa nyon mongs pa'i gnyen po'i phyogs dang mthun zhing zhes bya'o/ /kun nas nyon mongs pa gnyis rnam par spangs pas mthun pa dang ldan pas dge ba'i chos skyes pa rnams mi 'phrogs pa la gnas pas mi rmongs pa'i phyir rnal du gnas pa ste/ 'phel zhing spangs par 'gro ba'i phyir ro/ /nyon mongs pa skyes pa rnams dang lhan cig mi gnas pas spong bar byed pas gnyen po'i phyogs nyid yin pa'i phyir khyad par can dang ldan pa'i phyir khyad par can zhes bya'o/ /rig pa'i gnas mngon par rtogs pa'i sbyor ba'i sgo nas zhugs pa'i phyir dang de thob par byed pa'i lam nas zhugs pa nye bar bzung nas tshol ba pa zhes bya'o//khong du chud pa'i rig pa'i gnas rnams la sgom zhing nan tan byed pas slob pa ni slob pa'i brtson 'grus zhes bya'o/ /sems can thams cad kyi don gyi bya ba dang ldan pa'i phyir pha rol gyi don byed pa'i brtson 'grus zhes bya'o/ /nyes pa byas pa las slar gso ba'i sbyor ba ni kun nas srung ba'i brtson 'grus zhes bya'o//mngon par mos pa dang / 'dun pa sngon du 'gro ba dang / gnyen po'i phyogs dang / mi mthun pa'i phyogs 'thob pa dang spong ba'i brtson 'grus dang / lung dang rtogs pa'i chos la nan tan byed pa'i brtson 'grus dang / sems can gyi don la nan tan byed pa'i brtson 'grus dang /bslab pa rjes su srung ba'i brtson 'grus te/ bdun po 'di dag gi dbang du byas nas ji ltar rigs par rig par bya'o/ /bzod pa bzhin du zhes bya ba ni rnam pa brgyad du'o/ /slong mo'i don du sdug bsngal ba'i sems can rnams 'ongs pa la bzod pa zhes bya ba de 'dir brtson 'grus zhes bya ba la sogs pas bstan te/ sems can gzhan dag la yang de bzhin no/ /spyod pa dang rjes su mthun pa'i sbyor ba yin pa'i phyir ro/ /'tsham pa zhes bstan pa'i phyir gang dang gang gis zhes bya ba la sogs pa'o/ /dus ring por yongs su 'dris pa'i dngos po la sbyor ba'i phyir goms pa dang zhes bya'o/ /ma 'ongs pa'i dus su yang rgyun mi 'chad par gus par sbyor ba'i phyir mi g.yel ba zhes bya'o//bdag nyid kyang lta ba mchog tu 'dzin pa la mngon par zhen par mi byed pa'i dus sam/ gzhan dag las gdams ngag dang rjes su bstan pa bzung nas sgrub par byed pa'i dus su yang rung phyin ci ma log pa'i lta ba'i dbang gis yang dag par mtshon pa'i sbyor ba yin pa'i phyir legs par zin pa zhes bya'o//mtshan ma bsgom pa'i dus su sbyor ba'i phyir dus su goms par brtson pa zhes bstan te/ /mtshan ma rnam pa drug la mkhas pa ni mtshan ma rtog pa dang ldan pa'i brtson 'grus zhes bya'o/ /mtshan ma nyid kyang dang po nyid du ji lta ba bzhin du yongs su shes pas nye bar mtshon nas mtshan ma rnams yang dag par bzung nas mi brjed par mtshon pa'i dus su yongs su shes shing rab tu rtogs pa'o//zab pa ni de kho na'i don khong du chud pa'i brtson 'grus so/ /mthu rnams khong du chud par bya ba'i phyir sbyor ba ni bsam gyis mi khyab pa'i brtson 'grus so/ /bdag nyid la khyad du mi gsod pa ni de dag kyang mir gyur pas 'di lta bu'i brtson 'grus brtsams kyis bdag kyang mir gyur pa yin pas rim gyis bsgrub par bya'o zhes go cha bgo bar byed cing /go cha chen po'i sbyor ba mi 'dor zhing bdag gis mi nus so zhes bya ba'i 'du shes yid la mi byed pa'i phyir zhum par mi byed pa'o/ /bar mdor ldog par mi 'gyur ba'i phyir chog pa med pa'i brtson 'grus zhes bya'o//bcu po 'di dag ni rnam par dag pa'i brtson 'grus kyi rnam pa yin no/ /mdor bsdu na sbyor ba rnam pa lngas rnam par dag par rig par bya ste/ ting nge 'dzin gyi sbyor ba rnam par dag pa dang rjes su skrag pa dang / yang dag par dga' ba dang bral ba'i sgrub pa rnam par dag pa dang /ting nge 'dzin gyi tshogs kyi sbyor ba rnam par dag pa dang / zhi gnas kyi sbyor ba rnam par dag pa dang / 'bras bu'i khyad par la sbyor ba rnam par dag pa ste/ ji ltar rigs par sbyar bar bya'o/ /brtson 'grus kyi pha rol tu phyin pa'i le'u'i 'grel pa ste bcu gnyis pa rdzogs so// //byang chub sems dpa' rnams kyi bsam gtan gyi ngo bo nyid kyi rnam pa ni bzhir rnam par gzhag par bya ste/ 'gang yang dmigs pa nyid smras pa/ byang chub sems dpa'i sde snod thos pa dang bsam pa sngon du 'gro ba'i zhes bya ba ni theg pa chen po'i mdo sde shin tu rgyas pa thos pa dang /de'i don bsam pa sngon du 'gro bar byas nas bsgom pa dang ldan pas bskyed pa'i sems rtse gcig pa gang yin pa de ni dmigs pa zhes bya bar rnam par gzhag par bya ste/ bsam gtan gyi dbang du byas pa'i chos rnams de las skyed pa'i phyir ro/ /gang gi phyir rnam pa smras pa/ 'jig rten pa dang / 'jig rten las 'das pa zhes bya ba ni 'jig rten pa'i rnam pa dang / 'jig rten las 'das pa'i rnam pa zhes bya ba'i tha tshig go/ /ngo bo nyid gang gi phyir smras pa/ sems rtse gcig pa zhes bya ba la dmigs pa gcig la sems rnam par mi g.yeng ba'i rgyun gyis 'jug pa ni sems rtse gcig pa zhes bya ste/dmigs pa la gtad pas zhes byas nas so/ /de'i phyir smras pa/ sems gnas pa zhes bya'o/ /rab tu dbye ba ni gang gi phyir smras pa/ zhi gnas kyi phyogs sam zhes bya ba la sogs pa la/ bsam gtan gyi rtsa ba ni zhi gnas kyi phyogs yin la/ nye bar gyur pa ni lhag mthong gi phyogs yin no/ /gzhi la brten nas 'phags pa'i lam skye bas gnyis ka'i phyogs so//yang na sems gnas pa rnam pa dgu ni zhi gnas kyi phyogs so/ /sems gnas pa rnam pa bzhi ni lhag mthong gi phyogs so/ /'phags pa'i lam ni gnyi ga'i phyogs so/ /bdag nyid kyi rnam pa thams cad dang / bdag nyid kyi bya ba thams cad kyi dbang du byas nas bsam gtan thams cad rnam par gzhag par bya'o//bsam gtan thams cad kyi rnam pa ni rnam pa gnyis te/ 'jig rten dang / 'jig rten las 'das pa'o/ /bya ba ni rnam pa gsum ste/ tshe 'di la bde bar reg par bya ba'i phyir gnas pa ni bde bar gnas par bya ba'i bsam gtan zhes bya ste/rang gi rgyud du gtogs pa yongs su smin par byed pa'i phyir ro/ /ting nge 'dzin gyi yon tan sgrub pa'i bsam gtan zhes bya ba ni sangs rgyas kyi chos yongs su smin par byed pa'i phyir ro/ /sems can gyi don bya ba'i bsam gtan ni sems can yongs su smin par byed pa nyid do/ /re zhig byang chub sems dpa'i bya ba ni 'di tsam ste/gang yang bdag gi rgyud snod du rung bar bya ba dang snod du rung bar gyur nas sangs rgyas kyi chos dang / sems can yongs su smin par byed pa'o/ /ci rigs par zhes bya ba ni 'jig rten las 'das pa ni rnam pa gnyis te/ sems can gyi don bya ba'i bsam gtan rnam par spangs pa'o//'jig rten pa'i ni rnam pa gsum yang yin no/ /kun nas nyon mongs pa rnam pa bzhi spangs pa'i bsam gtan ni tshe 'di nyid la bde bar gnas pa yang dag par sgrub par byed pa yin no zhes bstan pa'i phyir rnam par rtog pa'i rab tu rgyu ba dang bral ba ni gang gi phyir smras pa/rnam par rtog pa thams cad dang bral ba zhes bya ba la/ rnam par rtog pa thams cad ni ngo bo nyid kyi rnam par rtog pa la sogs pa sngar bstan pa rnams so/ /de khyad par can du gyur pa las shin tu sbyangs pas bskyed pas mchog tu rab tu zhi ba zhes bya ba la/ rten la phan 'dogs pa'i khyad par dang ldan pas shin tu sbyangs pas bskyed pa'o//rang gi ngang gis 'jug pa'i phyir mchog tu zhi ba zhes bya ba'o/ /lta ba'i kun nas nyon mongs pa dang bral ba'i phyir rlom sems dang bral ba zhes bya'o/ sred pa'i kun nas nyon mongs pa dang bral ba'i phyir ro myong ba med pa'o/ /gzugs la sogs pa'i longs spyod thams cad spangs pa'i phyir mtshan ma thams cad dang bral ba'o//byang chub sems dpa' rnams kyi ting nge 'dzin tha dad pa ni mang bas na sna tshogs pa'i phyir ro/ /bsam gyis mi khyab pa nyid ni de dag gi ming yang spyod yul ma yin pa'i phyir ro/ /de'i phyir smras pa/ ming yang mi shes na zhes bya ba'o/ /ngo bo yang spyod yul ma yin pa'i phyir tshad med pa nyid do//gang gi phyir smras pa/ snyoms par 'jug par lta ga la 'gyur zhes bya ba'o/ /yon tan sgrub pa'i bsam gtan bstan pas khyad par du 'phags pa'i yon tan rnams nges par bstan pa'i phyir ro/ /nyan thos dang thun mong ba rnams zhes bya ba ni ming nyid kyis yin gyi rgya che ba ni ma yin no//bsam gtan la brten nas de'i stobs kyis sems can dpag tu med pa rnams kyi don bdag gi lus sprul pa dus gcig tu spros pas sdug bsngal ba rnams kyi sdug bsngal sel ba dang / phan pa byas pa rnams la lan du phan 'dogs pa'i phyir du byed pa dang / 'jigs pa rnams las srung ba dang /sdug bsngal bar gnas pa rnams kyi mya ngan sel ba dang / skrag par byed pa'i bar du'o/ /de lta bu'i bsam gtan gyi sems can rnams kyi bya ba sgrub par byed pa ni sems can gyi don byed pa'i bsam gtan zhes bya'o/ bya ba sgrub pa nyid la de dag las gzhan pa'i bsam gtan ni med do zhes bstan pa'i phyir smras pa/'di las gong na yang med ces bya ba la sogs pa'o/ /bsam gtan las yongs su ma nyams pa'i rnam par smin pa'i skye ba gzhan dag gis bzlog par dka' ba gang yin pa bzlog pa ni dka' ba'i bsam gtan yin no/ /byang chub sems dpa' bsam gtan la brten nas bsam gtan dpag tu med pa grangs med pa bsam gyis mi khyab pa gzhan dag gis mi nus pa dang /nyan thos la sogs pa la med pa gang yin pa de ni dka' ba'i bsam gtan gnyis pa dang gsum pa'o/ /dang po ni rtog dpyod dang ldan pa'o/ /gnyis pa ni yid bde ba'i dbang po dang ldan pa'o//gsum pa ni bde ba'i dbang po dang ldan pa'o/ /bzhi pa ni btang snyoms dang ldan pa ste/ phyin ci log gi mdo'i rjes su 'brangs nas shes par bya'o/ /rang gi rgyud kyi bde ba la 'jug pa nye bar gzung nas zag pa med pa'i dge ba ni ro myang ba med pa'i phyir skyes bu dam pa'i bsam gtan zhes bya ste sred pas ro ma myangs pa'i phyir ro//sems can gzhan la bstan nas gnod sems la sogs pa'i gnyen po'i phyogs tshad med pa bzhi ni skyes bu dam pa'i bsam gtan zhes bya'o/ /rnam pa drug ni yang rab tu dbye ba nyid kyang rnam pa gnyis so/ /phyogs kyi dbye ba yang rnam pa gnyis so//bya ba'i bye brag kyang rnam pa gnyis so/ /rab tu dbye ba nyid ni byang chub sems dpa'i bsam gtan thams cad ni dge ba dang / lung du ma bstan pa ste/ nyon mongs pa can med pa'i phyir ro/ /phyogs nyid kyi dbye ba ni zhi gnas kyi phyogs dang / lhag mthong gi phyogs te/ ma 'dres pa'i dbye ba'o//de'i phyir gnyi ga'i phyogs ma smos so/ /bya ba'i bye brag nyid ni gang yang bsam gtan la brten nas phyin ci ma log pa'i rang gi don dang gzhan gyi don la legs par sems pa ni don legs par nges par bsams pa'i bsam gtan zhes bya'o/ /mngon par bsgrub pa'i bsam gtan ni khyad par can gyi yon tan gyi rten du gyur pa'i phyir ro//rnam pa bdun ni mdor bsdus na dmigs pa nyid do/ /bya ba nyid du rnam par gzhag par bya'o/ /dmigs pa yang rnam pa gnyis te/ mnyam par bzhag pa'i sa dang / mnyam par ma bzhag pa'i sa pa'o/ /ming la dmigs pa ni bsam gtan la brten nas byang chub sems dpa' sangs rgyas thams cad kyis bstan pa mnyan pa dang /gzung ba dang / bcang ba dang / bsam gtan gyi stobs kyis sems can mos pa sna tshogs pa rnams la yi ge sna tshogs kyis chos ston pa ste/ bsam gtan de ni ming la dmigs pa zhes bya'o//don la dmigs pa ni bsam gtan gyi stobs kyis bstan pa'i don rnams rtogs nas gzhan la ston pa nyid do/ /mnyam par gzhag pa'i sa pa'i dbang du byas nas smras pa/ zhi gnas kyi mtshan ma la dmigs pa zhes bya ba la dmigs pa ni mtshan ma sgom pa'i dus so/ /bya ba yang rnam pa gnyis te/ bdag dang gzhan gyi rgyud kyi dbye ba'o/ /phongs shing 'dod pa dang ldan pa'i sems can rnams phongs pa bsal bar bya ba'i phyir dang / 'dod pa yongs su rdzogs par byed pa'i bsam gtan ni phongs shing 'dod pa dang ldan pa'i bsam gtan zhes bya ba'o/ /'byung po dang gdon la sogs pa nye bar zhi bar byed pa'i sgrub pa'i gsang sngags rnams byang chub sems dpa'i bsam gtan la brten nas bsam gtan gyi stobs dang /gsang sngags kyis byin gyis brlabs pas sems can rnams kyi 'byung po dang gdon gyi gnod pa 'byung ba rnams rab tu zhi bar bya ba'i phyir de dang rjes su mthun pa'i sngags kyi tshig rnams bstan pas nye bar 'che ba la sogs pa de dag rab tu zhi par 'gyur ro//dang por brtags nas gnod pa byung ba rnams rab tu zhi bar bya ba'i phyir dang / bsam gtan gyi stobs kyis dngos po rnams kyi ro dang nus pa yongs su gyur pa'i khyad par shes nas byin gyis rlob par byed pa'i bsam gtan de yang de'i ming du rnam par gzhag pa 'thob po//mu ge'i ngu 'bod chen po dag byung ba'i tshe zhes bya ba ni lo mang por shin tu drag pa'i mu ge byung zhing char mi 'bab pa'i tshe char 'bebs par byed do/ /bsam gtan gyi stobs kyis sems can rnams 'jigs pa las yongs su skyob par yang byed do//'brog dgon pa la sogs par zhugs shing lam stor ba rnams la lam ston cing bzhon pa la sogs pa yang sgrub par byed do/ /longs spyod sbyin pas 'dul ba rnams la longs spyod nye bar sgrub par byed de/ de dag gdul ba'i don du'o/ /dus gcig tu phyogs thams cad du bag med pa la skul bar yang byed do//de bzhin du sems can gyi don byed pa la 'jug par byed de/ de dag ni phongs shing 'dod pa dang ldan pa'i bsam gtan zhes bya'o/ /dang por rdzu 'phrul gyi cho 'phrul gyis ma zhugs pa rnams 'jug par byed do/ /gnyis pas ni zhugs pa rnams yongs su smin par byed do//gsum pa rjes su bstan pas ni yongs su smin pa rnams grol bar byed do/ /sems can nyes par spyod pa rnams 'gyod pa bskyed pa'i phyir nyes par spyod pa'i rnam par smin pa'i sa ston par byed do/ /snga ma gsum ni tshe 'di la bde ba zhes bya ba'o/ / ngan 'gro'i sa rnam par ston par byed pa ni tshe phyi ma la bde ba'o/ /gzhan dag rtsod pa byed pa'i dus dang / don ston pa'i dus su ni spobs pa nye bar sgrub par byed do/ /dran pa nye bar sgrub par byed pa ni chos ston pa dang / dkon mchog gsum gyi yon tan brjod pa'i dus su'o/ /phyin ci ma log pa ni yang dag pa'i chos kyi mtshan nyid nye bar ston pa nyid ni bstan bcos te/gzhan la mi ltos par don gsal bar ston par byed pa'o/ /snyan ngag ni tshigs su bcad par sbyar ba'o/ /ma mo zhes bya ba ni mdo sde'i man ngag ston par byed pa'o/ /sbyor ba rnam par gzhag pa ston par byed cing ston pa ni dam pa'i chos yun ring du gnas par bya ba'i phyir zhes bya ba yin no//byang chub sems dpa' ni kha na ma tho ba med pa'i bzo'i gnas la sogs pa la sngon goms par byas pas zhes bya ba de lta bu yang 'di la bde ba'i bsam gtan zhes bya'o/ 'od zer spros pas 'gro ba'i sdug bsngal sel bar byed pa yang 'di la bde ba'o//de bzhin du mdor bsdu rnam par dag pa rnam pa lngas rnam par dag pa rnam par gzhag pa rnam pa bcur 'gyur ro/ /'jig rten pa'i dag pa ni mdor bsdu na dag par byed par rig par bya ste/ khyad par du 'gro ba'i cha dang mthun pa'am/ nges par 'byed pa'i cha dang mthun pa'o//gnas pa'i cha dang mthun pa dang / nyams pa'i cha dang mthun pa dag ni rang gis pa dang / sa 'og ma pa dag gi nyon mongs pa skye ba dang mthun pa'i phyir ma dag pa'o/ /de'i phyir smras pa/ ro myong ba med pa'i bsam gtan zhes bya'o/ /'jig rten las 'das pa'i dag pa ni rnam par rtog pa'i spros pa thams cad dang bral ba'o//de dag gnyis ka yang rnam par dag pas dag pa zhes bya'o/ /sbyor ba dang / dngos gzhi dag gi dag pa ni thob pa'i dag pa zhes bya'o/ /gang yang smras pa/ sbyor ba'i dag pas dag pa dang zhes bya ba la sogs pa'o/ /dngos gzhi las khyad par gong ma rnam par dag pas zhes bya ba ni bsam gtan khyad par can thob pa ste/de yang thob pa'i dag pa zhes bya'o/ /ting nge 'dzin la 'jug pa dang / gnas pa la sogs pa la dbang ba'i sbyor ba nyid dang / bsam gtan las zlog pa la dbang ba nyid kyi sbyor ba dang / yon tan yang dag par sgrub pa la dbang ba nyid kyi sbyor ba gang dag yin pa ni dbang ba dag pas rnam par dag pa'i bsam gtan no//lta bar gyur pa'i skyon thams cad dang bral bas ni rten rnam par dag pa'o/ /nyon mongs pa dang shes bya'i sgrib pa rgyud la yod pa rnams rab tu spong ba ni sgrib pa rnam par dag pas rnam par dag pa'i bsam gtan zhes bya'o//bsam gtan gyi le'u ste bcu gsum pa'i 'grel pa rdzogs so// //byang chub sems dpa'i shes rab kyi ngo bo ni rnam pa gsum du gzhag par bya ste/ gnas skabs nyid ni gang yang smras pa/ shes bya thams cad la 'jug pa dang zhugs pa zhes bya ba la mos pas spyod pa'i byang chub sems dpa' rnams kyi shes rab ni shes bya la rjes su 'jug pa yin te/chos bdag med pa rab tu rtogs pa la sbyor bar byed pa'i phyir ro/ /sa la zhugs pa rnams kyi shes rab ni shes bya'i rjes su zhugs pa yin te/ /mngon par rtogs pas rab tu phye ba'i phyir ro/ /ngo bo nyid ni gang yang smras pa/ chos rnams rab tu rnam par 'byed pa zhes bya ba la/shes rab ni rab tu rtog pa'i mtshan nyid yin te/ rab tu rnam par 'byed pa'i rnam pa yin pa'i phyir ro/ /dmigs pa nyid ni gang yang smras pa/ rig pa'i gnas lnga po zhes bya ba la rig pa'i gnas lnga po dag la mkhas pa thob par bya ba'i phyir zhugs pa'i shes rab kyang de dag la dmigs pa zhes bya bar brjod par bya'o//shes rab thams cad ni mdor bsdu na rnam pa gnyis su bstan to/ /de la bsdus pa nyid ni gang yang smras pa/ 'jig rten pa dang / 'jig rten las 'das pa'i zhes bya ba ste/ shes rab thams cad ni 'jig rten pa'i dang / 'jig rten las 'das pas bsdus par 'gyur ro zhes bya ba'o//rnam pa de dag gnyi ga yang ci rigs par gsum du rig par bya ste/ de kho na'i rjes su zhugs pa dang / mkhas pa'i rjes su zhugs pa dang / bya ba'i rjes su zhugs pa ste/ dbye ba ni de dag go/ de kho na'i rjes su zhugs pa yang rnam pa bzhir rnam par gzhag par bya ste/dmigs pa nyid dang / rab tu dbye ba nyid dang / rnam pa nyid dang / zhugs pa'i lam rnam par gzhag pa'o/ /de la dmigs pa rnam par gzhag pa ni bden pa'i tshul gyi dbang du byas nas de bzhin nyid kyis rab tu phye ba'i bden pa bzhi pa'o/ /de'i phyir smras pa/chos bdag med pa brjod du med pa las brtsams te zhes bya ba'o/ /bden pa rtogs par bya ba'am zhes bya ba la sbyor ba dang / dngos gzhi dang / mjug gi dbye bas rnam pa gsum mo/ /de la mngon par rtogs pa la sbyor ba'i shes rab kyi dbang du byas nas smras pa/ bden pa rtogs par bya ba'am zhes bya ba la/de ni mos pas spyod pa'i sar gtogs pa'o/ /mngon par rtogs pas rab tu phye ba'i dbang du byas nas smras pa/ bden pa rtogs pa'i dus sam zhes bya bas ni sa dang po la zhugs pa'i dus su'o/ /de'i rjes la thob pa'i dbang du byas nas smras pa/ bden pa mngon par rtogs pa yan chad ces bya ba ste/de ni sa gzhan la rig par bya'o/ /de lta bu ni rab tu dbye ba nyid do/ /rnam pa'i dbang du byas nas smras pa/ mchog tu rab tu zhi bar nye bar gnas pa zhes bya ba la sogs pa la/ rnam par rtog pa'i rgyu ba thams cad dang bral ba'i phyir rnam par mi rtog pa'o/ /rnam par rtog pa'i spyod yul las shin tu 'das pa'i phyir dang /tshig gis brjod pa'i gnas dang bral pa'i phyir spros pa thams cad dang bral ba'o/ /dag gi spyod yul thams cad las 'das pa'i phyir chos thams cad la mnyam pa nyid kyi rjes su song ba zhes bya'o/ /de bzhin nyid du ro gcig pa rab tu rtogs pa'i phyir dang / mnyam pa nyid kyi rjes su song ba nyid du bstan pa'i phyir spyi'i mtshan nyid chen po la zhugs pa zhes bya ba la de bzhin nyid kun du 'gro ba la zhugs pa'i phyir spyi'i mtshan nyid chen po la zhugs pa zhes bya'o/ /mchog la sogs pa'i rnam pa rab tu rtogs pa'i phyir shes bya'i mthar phyin pa'o/ /gnyis su med pas rab tu phye bas mtha' gnyis rnam par spangs pa'o//mtha' gnyis rnam par spangs pa'i phyir dbu ma'i lam du 'gro ba'o zhes bya ste/ ji skad du mdo sde las/ 'od srungs yod ces bya ba 'di ni mtha' gcig go/ /med ces bya ba 'di ni mtha' gnyis pa'o/ /'di gnyis kyi dbus gang yin pa de ni gzugs med pa/bstan du med pa/ thogs pa med pa/ mi gnas pa/ snang ba med pa/ rnam par shes par byar med pa gang yin pa de ni 'od srungs dbu ma'i lam chos rnams kyi yang dag pa la rtogs pa zhes brjod do zhes bstan pa yin no/ /gnas brgyad la mkhas pa ni rnam par gzhag pa'i rab tu nges pa yin par rig par bya'o//rgyas par ni rigs kyi le'u'i rjes su 'brangs nas so/ /don dang ldan pa'i chos rnams kyi tshogs ni dang po dge ba'i chos kyi tshogs so/ /gnyis pa ni mi dge ba'i chos kyi tshogs so/ /gsum pa ni lung du ma bstan pa'i chos kyi tshogs so/ /de dag la de ni rnam pa yongs su shes pa la mkhas pa'o//rnam grangs gzhan yang chos thams cad kyi don dam pa'i tshul gyi dbang du byas nas don dam par yod pa ni tshogs dang po'o/ /rang gi mtshan nyid kyi dbang du byas nas rdzas su yod pa'i dbang du byas pa ni tshogs gnyis pa'o/ /kun rdzob kyi tshul gyis btags pa nyid du yod pa'i dbang du byas pa ni tshogs gsum pa'o//gnas brgyad la mkhas pas bsdus pa'i shes rab ni byang chub chen po thob pa dang / /rjes su mthun pa'i phyir dang / shin tu phan 'dogs par bstan pa'i phyir dang / mkhas pa yongs su 'dzin pa zhes bya ba la sogs pa'o/ /shes rab gsum pa ni rab tu dbye na bcu gcig tu rig par bya ste/de nyid bstan pa'i phyir smras pa/ snga ma bzhin du rnam pa bcu gcig ces bya ba la sogs pa'o/ /dka' ba'i shes rab ni rnam pa gsum du bstan te/ de kho na'i don rtogs pa'i mthar thug pa nyid de/ chos bdag med pa rab tu rig pa'i rnam pas zhugs pa nyid dang / gdul ba'i thabs kyi mthar thug pa nyid de/sems can thams cad la rnam pa thams cad kyis gdul ba'i thabs yongs su shes pa'i phyir dang / shes bya thams cad kyi mthar thug pa la thogs pa med par 'gyur ba'i phyir ro/ /shes rab de dag ni bdag dang gzhan la phan pa sgrub pa dang / gzhan la phan pa'i thabs sgrub pa dang /gzhan la phan pa'i nus pa sgrub pa'i dbang du byas pa yin par rig par bya'o/ /mnyam par ma bzhag pa'i sa pa'i sbyor ba'i dbye ba dang / mnyam par bzhag pa dang mnyam par ma bzhag pa'i sa pa'i shes rab kyi stobs bskyed pa 'phel ba dang / mnyam par bzhag pa'i sa pa'i shes rab kyi dbang du byas nas sgo bzhir rnam par bzhag par bya'o//mnyam par ma bzhag pa'i sbyor ba las byung ba'i shes rab kyang rnam pa gnyis te/ dam pa'i chos thos pa'i rjes la thob pa'i sbyor ba las skyes pa thos pa las byung ba'i shes rab dang / de nyid la tshul bzhin yid la byed pa dang ldan pas rigs pas nges par brtags pa'i sbyor ba las skyes pa bsams pa las byung ba'o//de nyid sbyor ba byed pa'i dus su lus kyi stobs dang / nus pa dang / brtan pa dang bcas pas gegs su gyur pa zil gyis mnan nas sgrub par byed pa ni so sor rtog pa'i stobs zhes bya'o/ /byang chub sems dpa'i bya ba ni rnam pa gnyis su rig par bya ste/bya ba la 'jug pa dang / bya ba ma yin pa las ldog pa'o/ /mnyam par bzhag pa'i sa pa'i shes rab kyi stobs kyis bsdus pa thob kyang rung ma thob kyang rung bsgoms pa'i stobs zhes brjod do/ /de'i rab tu dbye ba dpag tu med pa'i phyir smras pa/ tshad med pa'o zhes bya ba'o//skyes bu dam pa ma yin pa'i shes rab las bzlog pa ni skyes bu dam pa'i shes rab tu rnam par gzhag par shes par bya'o/ /skyes bu dam pa ma yin pa'i rim gyis 'jug pa'i shes rab ni rnam pa lngar 'gyur ro/ /de la dang por skyes bu dam pa ma yin pa dang bstan pa las dam pa ma yin pa'i chos thos pas phyin ci log gi thos pa las byung ba'i shes rab thob pa'o//de'i rjes la tshul bzhin ma yin pa'i yid la byed pa dang ldan pas phyin ci log gi bsams pa las byung ba'i shes pa'o/ /de las bdag dang gzhan gyi don phyin ci log tu bsgrub pa las thabs ma yin pa dang bcas pa'i bsgoms pa las byung ba'o//de ltar rab tu zhugs pa las phyin ci log gi chos kyi mtshan nyid rnam par 'jog pa las phyin ci log gi chos la gnas pa'i shes pa 'byung ngo / /de lta bu'i lam nas de ltar rim gyis zhugs pa las nyon mongs pa zlog pa thob par mi 'gyur te/ shes rab des kun nas nyon mongs pa spong bar mi 'gyur ro//de dag las bzlog pas ni skyes bu dam pa'i shes rab la rim gyis 'jug par rig par bya'o/ /rnam grangs gnyis pa ni de kho na nyid kyi don la nan tan bya ba'i dbye ba dang / rgyu rab tu dbye ba'i dbang du byas nas rnam par gzhag par rig par bya'o/ /de kho na'i don yang ngo bo nyid dang /grangs su yongs su bcad pas cha phra ba dang / mkhas par shes par bya'o/ /sngon gyi las las nges par byung ba'i shes rab ni lhan cig skyes pa'o/ /de nyid ni skye bas thob pa zhes bya'o/ /rgyu bstan pa'i phyir/ ye shes kyi tshogs sngar yang dag par thob pa'i phyir zhes bya ba ste/sngon gyi skye bas ye shes kyi tshogs yang dag par bsags pa'i phyir zhes bya ba'i tha tshig go/ /byang chub sems dpa'i sde snod thos pa la sogs pa las skyes pa ni lung dang ldan pa'i shes rab ces bya'o/ /sa bcu rnams su so sor rig pa ni rtogs pa dang ldan pa zhes bya'o/ /dmigs pa dang / rnam pa'i dbye bas dang / bya ba gnyis byas pa'i lam gyi shes rab ni rnam pa drug tu blta bar bya ste/ 'phags pa'i bden pa bzhi shes pa'i dbye bas ni rnam pa bzhi'o/ /'di nyid la nyon mongs pa zad pa shes pa dang / ma 'ongs pa na phung po mi skye ba shes pa'o/ /phung po lhag ma dang bcas pa'i mya ngan las 'das pa'i dbang du byas nas zad pa shes pa dang /mi skyes ba shes pa rnam par gzhag go/ /gnyen po'i phyogs shes rab kyi khyad par dang / rnam pa'i khyad par dang / mthu'i rab tu dbye ba dang / rgyu'i dngos po'i khyad par dang / sbyor ba'i khyad par dang / rten gyi khyad par gyi dbang du byas nas rnam pa bdun du rnam par gzhag go//de la zag pa med pa'i shes pa 'dod pa'i khams kyi gnyen po'i phyogs su gyur pa ni chos shes pa'i bzod pa'o/ /gzugs dang gzugs med pa'i gnyen po'i phyogs su gyur pa'i rjes su rtog pa shes pa ste/ de ltar na gnyen po'i phyogs so/ /zag pa dang bcas pa thams cad ni kun rdzob kyi rnam pa yin pa'i phyir kun rdzob shes pa zhes brjod do//mthu rnam pa drug dang ldan pa ni yang mngon par shes pa zhes bya'o/ /mtshan rnams nges par sgrub par byed pa shes pa ni mtshan rnams kyi rgyu yongs su shes pa'i phyir mtshan nyid shes pa'i shes pa zhes bya'o/ /stobs bcu'i sbyor bar gyur pa'i ye shes ni stobs bcu sngon du 'gro ba'i shes pa'o//yang gzhan dag ni stobs bcu'i sgo nas 'jug pa yin no zhes smra bar byed do/ /rigs pa rnam pa bzhi la brten nas de dang de las rigs pas yongs su brtags pa'i rnam pa ni rigs pa shes pa zhes bya'o/ /rnam pa thams cad du gzhan gyi don ston pa la mkhas pa dang /bstan pa rjes su srung ba la nus pa dang ldan pa dang / khyim rgyud legs par bskyang ba la mkhas pa dang / rgyal po'i tshul dang / 'jig rten gyi tha snyad la mkhas pa'i dbang du byas nas phongs shing 'dod pa dang ldan pa rnams la chos nye bar sgrub par byed pa nyid dang / khong du chud par bya ba la sogs pa nye bar bsgrub pa ni phongs shing 'dod pa'i shes rab ces bya bar rnam par gzhag go//rnam pa thams cad du gzhan gyi don ston pa la mkhas pa ni so so yang dag par rig pa bzhir rig par bya ste/ shes pa gang gis chos rnams kyi rnam grangs nges par ston pa la thogs pa med pa'i rnam pas rab tu mkhyen pa de ni chos so so yang dag par rig pa zhes bya'o//mtshan nyid las brtsams nas de bzhin du shes pa ni don so so yang dag par rig pa zhes bya'o/ /nges pa'i tshig brjod pa las brtsams nas ni nges pa'i tshig so so yang dag par rig pa'o/ /rab tu dbye ba las brtsams nas spobs pa so so yang dag par rig pa'o//shes rab gang gis mu stegs can gyi nyes pa brjod par nus pas phas kyi rgol ba tshar gcod pa gang yin pa de ni tshar gcod pa'i shes rab ces bya'o/ /gang yang rang gi phyogs kyi yon tan rjod par byed pa nyid ni rang gi grub pa'i mtha' thob pa ston par byed pa ni yang dag par rnam par 'jog pa'i shes rab ces bya'o//khyim rgyud legs par bskyang ba la mkhas pas ni khyim gyi 'byor pa 'phel bar byed do/ /rgyal po'i bya ba la mkhas pa dang / 'jig rten gyi tha snyad la mkhas pas rgyal po bsrung pa dang / 'jig rten shes pa'i shes rab ces bya'o/ /nges pa zhes bya ba ni shin tu nges pa ste/mkhas pa zhes bya ba'i don to/ /shes rab kyi gnas nyid dang / shes rab kyi bya ba de nyid kyis 'di dang gzhan du bde bar 'gyur ba'i shes rab rnam par gzhag par bya'o/ /rig pa'i gnas rnam pa lnga la shin tu rnam par byang zhing shin tu rnam par byang ba ste/ rnam par gnas pa'i dbang du byas nas chos dang chos kyi rjes su mthun pa'i rjes su 'gro bas so//rab tu gnas pa ni ma yin zhes bya ba ni rig pa'i gnas bzhi la chos dang rjes su mthun pa'i chos sgrub pas gnas par mi byed pa'i phyir ro/ /shes rab gang dang gang gis de dang de la rmongs pa rnams la bstan pa nas/ yang dag par dga' bar byed pa'i bar ni bya ba byas pa'i shes rab ces bya'o//dbye ba gnyis kyis tha dad du byas pas don rnam pa lnga nyid la brten nas de la dmigs pa'i shes rab ni phyin ci ma log pa'i rnam par dag pa bcur rig par bya'o/ /don rnam pa lnga ni de kho na'i don dang / 'jug pa'i don dang / nye bar len pa'i don dang /thabs kyi don dang / mthar thug pa'i don to/ /de kho na'i don yang rnam pa gnyis te/ de kho na'i don yang dag pa dang / rnam pa thams cad yongs su gcod pa'o/ /rgyu dang 'bras bu'i don ni 'jug pa'i don dang zhes bya ba ste/ rgyu dang 'bras bu dag gi rgyun 'jug pa'i phyir ro/ /de yang rnam pa gnyis te/phyin ci ma log pa'i rnam pas rgyur 'dzin pa dang / 'bras bur 'dzin pa'o/ /nye bar len pa'i don rnam pa gnyis ni phyin ci log dang phyin ci ma log pa ste/ 'jug pa dang ldog pa'i phyogs nye bar len pa'i phyir ro/ /'dis nye bar len pa'i phyir zhes bya bas de dag gnyis ka yang yongs su shes pas de ltar rnam pa gnyis so//thabs ni 'jug pa'i tshul khrims dang ldog pa'i tshul khrims so/ /de lta na yang bya ba dang / bya ba ma yin pa thams cad yang dag pa ji lta ba bzhin du shes pas las rnam pa gnyis so/ /mthar thug pa'i don ni kun nas nyon mongs pa rab tu spangs pa dang / rnam par byang ba yang dag par bsgrubs pa'o/ /de gnyi ga yang dag pa ji lta ba bzhin du yongs su shes pa ni de bzhin du shes rab rnam pa gnyis so/ /shes rab shin tu rnam par nges shing ste/ rnam par byad pa sbyin par byed pa'i phyir ro/ /dpag tu med pa ni rdzas kyi rnam pa'i dbye bas so/ /pha rol tu phyin pa drug po 'di rnams ni mdo nas bstan pa yin no zhes bstan pa'i phyir smras pa/'di ni mdo sde gzhan de dang de dag tu zhes bya ba la sogs pa la/ 'phags pa blo gros mi zad pa'i mdo la sogs pa'i mdo rnams so/ /thor bu thor bus zhes bya ba ni nyung shas nyung shas kyis bstan pa rnams so/ /mdor bsdus te bstan pa zhes bya ba ni mtshan nyid bsdus nas bstan pa zhes bya ba'i tha tshig go//bstan pa zhes bya ba ni mdor bsdus te bstan pa'o/ /nges par bshad pa ni rgyas par bstan pa'o/ /sbyin pa la sogs pa'i ngo bo nyid la sogs pa'i mtshan nyid 'dir bstan pa'i don nges par gzung ba mdo gzhan dag nas bstan pa'i pha rol tu phyin pa dag la yang ngo bo nyid la sogs pa nges par sbyar bar bya'o//'dir bshad pa'i lugs 'di yang gzhan dag tu grangs la sbyar bar bya'o zhes bya bar smras pa/ bsdu ba yang ci rigs par rig par bya'o zhes bya ba'o/ /mdo sde 'ba' zhig tu ma zad kyi skyes pa'i rabs la sogs pa rnams la yang sbyar bar bya'o zhes bstan pa'i phyir smras pa/skyes pa'i rabs dpag tu med pa zhes bya ba la sogs pa la/ byang chub sems dpa'i skyes pa'i rabs thams cad ni pha rol tu phyin pa drug dang yang dag par ldan pa yin te/ byang chub sems dpa'i spyod pa thams cad ni bsod nams dang ye shes kyis rab tu phye ba yin pa'i phyir ro//skyes pa'i rabs la sogs pa de dag las kyang sbyin pa la sogs pa'i pha rol tu phyin pa'i ngo bo nyid la sogs pa 'ga' zhig kyang ston to zhes bstan pa'i phyir smras pa/ kha cig ni zhes bya ba la sogs pa la/ de dag ji ltar rigs par dpyad nas sbyar bar bya'o/ /pha rol tu phyin pa drug dang yang dag par ldan pa'i bsod nams kyis yang dag par bsdus pa'i bsod nams dang ye shes kyi tshogs bsags pa dang /dge ba'i chos 'das pa nye bar bzung nas chen po nyid de dang ldan pas dkar po'i chos kyi chu chen po ste/ bsod nams dang ye shes kyi tshogs chen po bsags pa dang ldan pa'i phyir ro//ma 'ongs pa'i dus nye bar bzung nas bsod nams dang ye shes kyi tshogs chen po bsags pa dang ldan pas dkar po'i chos chen po'i rgya mtsho chen po zhes bya ba ste/ /ji ltar rgya mtshor gnas pa'i chu chen po nyid yin pas chu chen po zhes bya'o/ /bya ba sna tshogs 'bab che ba'i phyir rgya mtsho chen po zhes bya'o//tshul 'di yang de dang 'dra ba yin no/ /rgya mtsho chen po dang chos mtshungs par bstan pa'i phyir ji ltar rgya mtsho chen po rin po che thams cad kyi 'byung gnas yin pa de bzhin du byang chub sems dpa' yang sems can thams cad kyi don gyi rnam pa thams cad kyi rin po che chen po'i 'byung gnas yin te/de ni sems can thams cad kyi phun sum tshogs pa thams cad kyi rgyur gyur pas rin po che'i 'byung gnas yin te/ rab tu skyed par byed pas zhes bya bas so/ /de'i phyir de la rin po che chen po rab tu sbyin pa yin no zhes bya'o/ /'di dag gis ni bsod nams dang ye shes ni byang chub chen po dang rgyu dang 'bras bu mtshungs par bstan pa'i phyir de'i rgyu 'di ni 'bras bu dang rjes su mthun pa'o zhes bya ba'o//shes rab kyi pha rol tu phyin pa'i le'u ste bcu bzhi pa'i 'grel pa rdzogs so// //sdom ni snga ma bzhin du zhes bya ba'i 'grel ba ni sngar bstan pa'i gang la bslab pa dang / ji ltar slob pa zhes bstan pa de la pha rol tu phyin pa drug gi sbyor bas mngon par bsgrub pas bslab par bya'o zhes bstan pa yin no//da ni bsdu ba'i dngos po rnam pa bzhi'i sbyor bas kyang bslab par bya'o zhes rab tu bstan pa'i phyir bsdu ba'i dngos po bzhi po yang pha rol tu phyin pa drug dang mthun par bstan par bya ba'i phyir smras pa/sdom ni snga ma bzhin du zhes bya ba'o/ /bsdu ba'i dngos po dang po ni sbyin pa'i pha rol tu phyin pa'i ngo bo nyid yin pas de bstan pa nyid kyis de yang bstan par 'gyur ro zhes bsams nas de bzhag nas snyan par smra ba nyid bstan pa ni thog ma dang / bar dang / tha mar dge ba nyid kyi tshig ni snyan par smra ba nyid kyi ngo bo zhes brjod pa yin te/de la rna ba'i dbang pos thos pa'i dus na dbang po 'phrog cing dga' bar bya ba yin pa'i phyir thog mar dge ba'o/ /yid 'phrog par byed cing bya ba nyams dga' ba dang ldan pa'i phyir dang / yongs su brtags pa bzod pa'i phyir bar du dge ba'o/ /sgrub pa nyams su len pa'i dus su yongs su gyur pa'i bde ba yin pa'i phyir tha mar dge ba'o//de la yid du 'ong ba'i tshig ni thog mar dge ba'o/ /bden pa ni slu ba med pa yin pa'i phyir dang / yongs su brtag bzod pa'i phyir bar du dge ba'o/ /bde bar yongs su 'gyur ba dang / phan par yongs su 'gyur ba'i phyir dang /phan pa dang bde ba'i 'bras bu chos kyi don dang ldan pa yin pa'i phyir des na tha mar dge ba zhes bya'o/ /rnam grangs gzhan yang thog ma dang bar dang tha ma rnams su de'i tshig bzhin du byas na bdud rtsi'i rang bzhin du 'gyur zhing / yan lag gsum dang ldan pa'i legs par bshad pa ni snyan par smra ba'i ngo bo nyid du rig par bya'o//yan lag gsum ni snyan pa dang / bde ba dang / phan par 'gyur ba'o/ /snyan pa'i phyir rnar bde ba'o/ /bde ba ni yid bde bar byed pa ste/ sgrub par byed pa'i dus su dga' ba skyed par byed pa'i phyir ro/ /chos dang rjes su mthun pa'i chos sgrub pa'i dus su mngon par mtho ba dang /nges par legs pa'i 'bras bu 'byung ba'i phyir phan pa dang bde ba 'dren par byed pa ste/ 'di dag ni byang chub sems dpa'i snyan par smra ba'i ngo bo nyid de/ /mdor bsdu na rnam pa thams cad du kha na ma tho ba med pa yin par rig par bya'o/ /mdor bsdu na snyan par smra ba thams cad ni rnam pa gnyis su rnam par gzhag par rig par bya ste/'jig rten gyi gtam gyi ngo bo nyid dang / chos ston pa'i gtam gyi ngo bo nyid do/ /de la 'jig rten gyi gtam gyi ngo bo yang rnam pa gnyis te/ dus thams cad du rab tu 'jug par bya ba yin pa'i phyir rtag tu ba dang / yang dag par 'byor pa dang ldan pa'i dus su 'jug par bya ba yin pa'i phyir res 'ga' ba'o//de yang snga ma ni yang dag par dga' bar byed pa'o/ /gnyis pa ni kun du dga' bar byed pa'o/ /yang dag par dga' bar byed pa'i ngag gang yin pa de yang rnam pa gnyis su rnam par gzhag par bya ste/ lus dang ngag gi nyes pa rnam par spong bar byed pa nyid dang /dngos po rnam pa bzhi yongs su 'dri bar byed pa'i rnam pa nyid do/ /de la lus kyi skyon ni gnod sems dang khong khro ba dang / mnar sems dang / phrag dog gi kun nas ldang ba dang bcas pa'i bzhin gyi 'gyur ba'o/ /de med pa'i ngo bo bstan pa'i phyir/ khro gnyer med la zhes bya ba'o/ /ngag gi skyon ni rigs mthon po la sogs pa'i nga rgyal gyis khengs pas yid kyis mi 'dud pa dang /drung du 'ongs ba rnams la mtshor ba ltar gnas pa'o/ /de med pa'i ngo bo bstan pa'i phyir gsong por smra zhing zhes bya ba la/ rang nyid mngon du phyogs par bstan pa'i phyir 'ongs pa rnams la bde bar 'ongs sam zhes bya ba la sogs pa rang nyid sngon du smra ba'o//tshig gnyis po 'di dag tshig gzhan gnyis kyis bstan pa nyid de/ tshig gnyis kyis bstan ces bya ba yang go rims la brten nas bzhin gyi mdangs 'byin la zhes bya bas ni khro gnyer med la zhes bya ba bstan to/ /'dzum pa sngon du gtong zhing tshig gang gi zhes bya bas ni gsong por smra zhing zhes bya ba bstan to//de ltar lus dang ngag gi skyon spangs pa yin no/ /dngos po yongs su 'dri ba'i rnam pa bstan pa'i phyir/ bde ba dang zhes bya ba la sogs pa la/ bde ba dang bde legs nyid ni gnod pa med pa nyid de/ gdon dang mi ma yin pa la sogs pa'i gnod pa med pa'i phyir gnod pa med pa zhes bya'o//nad kyi gnod pa med pa nyid ni khams snyoms pa'o/ /gzhan dag gi lus dang sems la gnod pa med pa ni mtshan mo dang nyin mo bde ba yongs su 'dri ba'o/ /ci zhig 'dri zhe na bde'am/ khams snyoms sam/ mtshan mo bde'am/ nyin mo bde'am zhes 'dri bar byed do/ /tshur shog legs par 'ongs so zhes smra zhing stan 'dings pa ni yongs su 'dri ba'o//'jig rten pa'i tha snyad ni grong khyer ba'i skye bo rnams so/ /de dag ni dngos po'i dbang du bya ba'o/ /'byor pa 'phel ba'i dus su dang por snyan pa'i ngag smra ba ni yang dag par dga' bar byed pa'o/ /mdor bsdu na 'phel ba yang rnam pa gnyis te/ 'jig rten 'di'i 'byor pa dang / 'jig rten pha rol gyi 'byor pa'i dbang du bya ba'o/ /'jig rten 'di'i 'byor pa ni sems can dang sems can ma yin par bgrang ba'i mthar thug pa'i khyad par ro/ /de la sems can du bgrang ba yang rnam pa gnyis te/ rigs rgyud nges par 'dzin pa ni gang smras pa/bu 'byor pa'am zhes bya ba ste/ bu rnyed pa zhes bya ba'i tha tshig go/ /rtsed mo dga' ba'i dngos po ni gang smras pa/ chung ma 'byor pa'am zhes bya ba ni rigs la sogs pa khyad par du 'phags pa thog pa zhes bya ba'i tha tshig go/ /ma dang pa'i phyogs su gtogs pa'i dngos po ni gang smras pa/ nye du 'byor pa'am zhes bya ba ni nye du'i phun sum tshogs pa'i khyad par thob par 'gyur ba ni 'byor pa'o//sems can ma yin par bgrang ba'i dngos po yang rnam pa gnyis te/ nyo tshong 'du ba'i sgor gyur pa'i 'bras bu ni gang smras pa/ nor 'byor pa zhes bya ba'o/ /zhing gis 'du ba'i sgor gyur pa ni gang yang smras pa/'bru 'byor pa zhes bya ba ste/ 'byor pa ni phun sum tshogs pa'i khyad par thob pa zhes bya ba'i tha tshig go/ /bdag 'byor pa dang ldan par ma rtogs shing ma shes pa la 'byor pa mthong na zhes bya ba ni ji ltar 'byor pa dang ldan par bdag nyid kyis sngar ma shes pa la dang por de brjod pa las de thob pas rab tu dga' bar 'gyur ba'i phyir gang smras pa/bsnyad cing kun du dga' bar byed pa zhes bya ba'o/ /'jig rten pha rol gyi 'byor pa ni mngon par mtho ba dang / nges par legs pa'i lam 'jug pa dang bcas pa thob pa yin par rig par bya'o/ /de la dad pa dang / tshul khrims dang / gtong bas ni 'jug par 'gyur te/ de dag gis lus dang longs spyod khyad par du 'phags pa rjes su thob par byed pa yin pas de ltar na mngon par ma tho ba 'byor pa yin no/ /dad pas thos pa la 'jug par 'gyur ro/ /de las shes rab rnam pa gsum 'byung bar 'gyur ro//shes rab rnam pa gsum gyis ci rigs par mthong ba dang bsgom pas spang bar bya ba'i nyon mongs pa spangs pas nges par legs pa yang dag par 'thob bo/ /de ltar na nges par legs pa 'byor bar 'gyur te/ pha rol gyi 'byor pa zhes bya'o/ /rnam pa thams cad kyi yon tan dang ldan pa ni rnam pa nyi shur rig par bya ste/phan pa mchog gis phan 'dogs par gyur pa zhes bya ba ni snyan par smra ba gsum gyi nang nas phyi ma mchog nyid du bstan pa yin no/ /de ltar na snyan par smra ba nyid kyang rnam pa gsum du rig par bya ste/ dman pa dang bar ma dang / mchog tu gyur pa nyid du rig par bya'o//rab tu dbye bas zhes bya ba ni rgyas pa nyid do/ /mdor bsdu na zhes bya ba ni mdor bstan pa'o/ /'jig rten gyi tshul dang ldan pa ni 'jig rten pa'i lugs kyis bsdus pa'o/ /chos bstan pa dang ldan pa ni de'i ngo bo zhes bya ba'i don to/ /dka' ba'i snyan par smra ba ni rnam pa gsum du rnam par gzhag par bya'o//gnod pa drag po byed pa'i sems can rnams la yang lan du gnod pa byed par 'dod pa byams pa'i sems bskyed pa nyid kyis zil gyis mnan pa nyid dang / shin tu rmongs shing dbang po rtul po rnams la snying rje'i sems nye bar bzhag nas yid skyo ba zil gyis mnan te phan pa dang bde ba ston pa dang /yon gnas rnams la sgyu dang g.yos rnam par gnas shing log par sgrub pa chen po byed pa rnams la yang gnod sems mi skyed pa ste/ tshig rnam pa gsum ni ji ltar rigs par dka' ba yin no/ /gnod pa che thang du byed pa nyid bstan pa'i phyir gsod pa zhes bya ba la sogs pa la/gsod pa ni srog gi bar chad byed pa'o/ /phyir rgol ba ni longs spyod kyi bar chad byed pa'o/ /dgra ni chung ma 'phrog par byed pa'o/ /rnam grangs gzhan yang dge ba'i bar chad byed pa ni phyir rgol ba'o/ /phan pa ma yin pa dang / don ma yin pa 'dod pa ni dgra zhes bya'o//sgo bzhi nas 'jug pa'i snyan par smra ba ni mdor bsdus na gang zag gsum gyi bya bas rnam par gzhag par bya ste/ gang zag gsum yang sgrub pa la mngon du phyogs pa dang / sgrub pa la rgyab kyis phyogs pa dang sgrub par 'dod pa thabs mi shes pa'o/ /de la sgrub pa la mngon du phyogs pa la yang rnam pa gnyis te/rgyud yongs su ma smin pa dang / rgyud yongs su smin pa'o/ /rgyud yongs su ma smin pa'i lam bskyed pa la gegs dang bcas par kun du spyod pa la dga' ba dang spro ba'i sems thob nas rgyud snod du bya ba'i phyir snga rol du bya ba'i chos bstan pa rnam pa dgu po sbyin pa'i gtam la sogs pa ston par byed do//rgyud yongs su smin pa ni sems dga' zhing sgrib pa med la spro ba dang bcas pa ste/ de'i 'phags pa'i lam bskyed pa'i phyir dang / dar 'gro las gdon pa'i phyir dang / yang dag pa'i 'don par byed pa'i 'phags pa'i bden pa bzhi ston par byed do/ /sgrub pa la rgyab kyis phyogs pa la yang khyim pa dang /rab tu byung ba'i phyogs kyi dbye bas rnam pa gnyis so/ /de la khyim pa ni 'dod pa la zhen pa dang ldan pas bag med pa'i phyir dge ba'i chos rnams sgom par mi byed pa'o/ /rab tu byung ba ni rnyed pa dang bkur sti la chags pa dang ldan pas so/ /yang khyim pa ni mi dge ba'i chos la spyod pas so//rab tu byung ba ni lung du ma bstan pa'i chos la spyod pas so/ /bag med pa gnyi ga la yang dge ba'i chos bsgom pa med pa'i phyir de dag la yang dag par bskul ba ni dus dang mthun par don 'dod pas byams pa'i sems nyid kyis tshig snyan pas 'di ltar mi nyid dang /'phags pa'i rigs kyi yul du skyes pa dang / dbang po mtshang ba med pa dang / las kyi mtha' phyin ci ma log pa dang / de bzhin gshegs pa'i bstan pa la dad pa thob par gyur nas khyod lta bu 'di ltar phyin ci log tu zhugs nas don ma yin pa la ci'i phyir spyod ces dran par byed cing yang dag par skul bar byed do//thabs mi shes pa rnams kyi the tshom byung ngo cog ste chos som nyi dang ldan pa de dag gi skyes shing skyes pa'i the tshom gcod pa ni bstan pa dang / nye bar bstan pas ston pa ste/ chos bstan pa dang / 'bel ba'i gtam rnam par nges par bya'i zhes bya ba'o//skyes bu mchog gi snyan par smra ba ni skyes bu dam pa rnams kyi snyan par smra ba zhes bya ba ste/ skyes bu dam pa nyid kyi thun mong ma yin pas ston te/ chos ston pa ni rnam pa lngar yongs su bstan pa ste/ byang chub sems dpa' byang chub sems dpar gyur pa dang zhes bya bas ni sa chen po la zhugs pa rang gi ngo bo lus la gnas pa'o//de bzhin gshegs par gyur pa zhes bya bas ni de nyid sangs rgyas kyi sprul pa'i sku'i tshul gyis gnas pa'o/ /thun mong ma yin pa ston pa ni 'dul ba las bcas pa dang / mdo sde las bcas pa'i dbang du byas nas rnam pa lngar shes par bya'o/ /'dul ba las bcas pa'i dbang du byas nas smras pa/gleng gzhi dang bcas pa dang / nges par 'byung ba dang bcas pa dang zhes bya ba la/ ltung ba byung ba la mkhas pa dang / de las nges par 'byung ba la mkhas pa la brten nas go rims bzhin te/ ltung ba 'byung ba la mkhas pa la brten nas/ gdul bya rnams kyis bya ba ma yin pa spyod pa'i dngos po dang mthun pa'i nyes pa byas pa las bslab pa'i gzhi gnas te dus su 'cha' ba gang yin pa de ni gleng gzhi dang bcas pa zhes bya'o//ji skad du 'dul ba las/ bcom ldan 'das kyis gleng gzhi 'di dang / rab tu dbye ba 'di dang / dngos po 'di las zhes rgyas par bstan pa yin no//nges par 'byung ba dang bcas pa ni de bzhin du bslab pa'i gzhi'i gnas su bcas pa'i chos ston pa dang / nges par 'byung ba la mkhas pa la brten nas dus dang / yul dang / gang zag dang / gnas skabs la ltos nas ltung ba med pa yang gsungs te/ las dang po pa la nyes pa med do zhes bya ba la sogs pa rgyas par bstan pa yin no//de lta bu'i 'dul ba'i bslab pa rnam pa gnyis po bcas pa ltung ba byung ba dang / nges par 'byung ba la mkhas pa 'di ni sangs rgyas dang / byang chub sems dpa' chen po rnams ma yin pa gzhan nyan thos la sogs pa rnams kyi ma yin pa'o//de'i phyir thun mong ma yin pa zhes brjod do/ /mdo sde las bcas pa'i dbang du byas nas ni rnam pa gsum bstan to/ /rton pa dang bcas par bstan pa ni dngos po rnam pa bzhi la rton pa rnam pa bzhi bstan pa'o/ /rtul ba dang bcas pa bstan pa ni sdug bsngal thams cad las nges par 'byung ba'i lam bstan pa'o//cho 'phrul dang bcas pa ston pa ni cho 'phrul rnam pa gsum la brten nas ji ltar rigs par sems can rnams gzhug par bya ba'i phyir ro/ /dngos po rnam pa bzhi las dang po gnyis ni 'di gnyis te/ chos dang / gang zag go/ /de las chos la brtan par bya'i gang zag la ni ma yin te/gang gi tshe de nyid las rnam par gyur nas gzhan du 'gyur ba yang srid pa'i phyir ro/ /chos kyang rnam pa gnyis te/ don dang yi ge'i dbye bas so/ /de dag las kyang don la brtan par bya'i yi ge la ni ma yin te/ yi ge ni rnam grangs dang / yongs su 'gyur ba'i sgo nas yang dag pa ma yin pa dang /yang dag pa'i don rab tu ston pas so/ /don yang rnam pa gnyis te/ drang ba'i don dang / nges pa'i don to/ /de la nges pa'i don la brtan par bya ste/ tshig gi don so sor rtogs pa'i phyir ro/ /drang ba'i don la ni ma yin te/ don gzhan ston pas na tshig gi don rtogs par dka' ba'i phyir ro//don nye bar thob pa yang rnam pa gnyis te/ rang gi mtshan nyid nye bar thob pa ni snang ba tsam gyi dngos po 'dzin pa'i rnam par shes pa'o/ /phyin ci ma log pa'i spyi'i mtshan nyid thob pa ni 'dod chags dang bral ba dang rjes su mthun pa dang / kun nas nyon mongs pa'i gnyen po'i phyogs rnam par byang ba dang mthun pa'i rnam pa yongs su 'dzin pa'i ye shes so//de las dang po la bstan par mi bya ste/ 'dod chags dang bral ba la rjes su mthun pa ma yin pa'i phyir ro/ /gnyis pa de las bzlog pa ye shes kyi bdag nyid can la ni bstan par bya'o/ /de ltar na rton pa dang bcas pa yin no//rtul ba ni lam gyi nus pa'i khyad par ro/ /de ni sdug bsngal thams cad las nges par 'byung bar byed pa nyid du khong du chud par byed do/ /phyir mi ldog par zhes bya ba ni shin tu zhes bya ba'i tha tshig go/ /bstan pa don dang bcas pa ni cho 'phrul dang bcas pa'i chos ston pa'o/ /snyan par smra ba rnam pa drug ni rnam pa gnyis su rnam par gzhag par bya ste/'dul ba'i bslab pa'i gnas la rjes su gnang ba dang / dgag par bstan pa dang / mdo sde las rnam pa thams cad kyi tshig gi don nges par bstan pa'i bstan pa'o/ /rnam pa thams cad kyi tshig gi don nges par bstan pa ni so so yang dag par rig pa bzhi la brten pa'i rnam grangs dang /mtshan nyid dang nges pa'i tshig dang / spobs pa so so yang dag par rig pa'i dbye bas so/ /rnam pa bdun du rnam par gzhag pa ni 'jig rten gyi tshul gyi gtam dang / dman pa dang / bar ma dang / mchog rnams ji ltar rigs par yang dag par zhugs pa la ji ltar 'dod pa'i don sbyin pa dang /'jigs pa rnams la dbugs dbyung ba'i gtam dang / rmongs pa rnams la rigs pas nye bar ston pa dang / phyin ci log la zhugs pa rnams yang dag pa'i dngos por skul ba dang / rang nyid la nus pa med na yang gzhan dag la skul bar byed pa'i gtam gyi dbang du byas pa'o//'jig rten gyi tshul gyi gtam ni yang dag par dga' bar byed pa dang / kun du dga' bar byed pa'o/ /ji ltar 'dod pa'i don sbyin pa ni rnam pa gnyis te yo byad thams cad kyis snying las chung bar bya ba dang / bya ba thams cad la snying las chung bar bya ba'i phyir bdag nyid kyis de dag yang dag par sgrub par byed pa'o//slu zhing rnam par nyams pa'i bdag nyid can gyi ngag ni de lta bu'i tha snyad kyis sems can rnams sdug bsngal bar 'gyur ba'i phyir ro/ /de las bzlog pa'i 'dod pa rnams la mi slu ba'i rnam pa ni ngag gi tha snyad rnam pa brgyad do/ /yongs su dag pa'i ngag gi kun du spyod pa ni phongs shing 'dod pa'i snyan par smra ba'o//ngag rnam par dag pa rnam pa bzhi la brten nas zhes bya bas ni 'phags pa'i tha snyad kyi rgyu gsal bar bya ba'i phyir bstan to/ /rnam pa bzhis yongs su dag pa'i ngag gi kun du spyod pa nyid la 'phags pa'i tha snyad brgyad gzhag par bya'o/ / gzhan la ni ma yin no zhes bsams pa'o/ /'di dang gzhan du bde ba'i snyan par smra ba ni phongs pa spong ba dang / phun sum tshogs pa nye bar sgrub par byed pa'i dbang du byas nas rnam par gzhag pa yin no/ /phongs pa yang mdor bsdu na rnam pa gnyis te/ 'jig rten 'dir thob pa dang / 'jig rten pha rol du thob par 'gyur ba'o//yang rgyu dang / 'bras bu'i dbye bas rgyus phongs pa dang / 'bras bus phongs pa zhes bya ba'o/ /dang po ni rnam pa gsum ste/ nye du srog dang bral ba'am sdug pa dang bral ba'i phongs pa dang / de lta bu la gnas pa la 'chi ba dang / mi rtag pa bstan pas mya ngan sel bar byed pa'i snyan par smra ba nyid dang /yid du 'ong ba'i longs spyod dang nye bar spyod pa rnam par nyams pa ni me la sogs pas longs spyod rlag pa'i mya ngan sel ba ste snga ma bzhin no/ /nad mngon du gyur pas nad med pas phongs par gyur pa la so sor rtog pa'i stobs dang / sdug bsngal dang du len pa'i bzod pa bstan pas so//phongs pa gnyis pa ni rnam pa gnyis te/ /tshul khrims nyams pa las kun du spyod pa dang / phyin ci log tu mngon par zhen pa'o/ /de dag gnyi ga spang ba'i phyir tshul khrims kyi yang dag pa'i gtam dang / shes rab kyi yang dag pa'i gtam byed pa ni snyan par smra ba'o/ phun sum tshogs pa nye bar sgrub par byed pa ni 'dul ba'i bslab pa dang yang dag par ldan pa ni dge slong rnams rigs bzhi'i bslab pa'i gnas la yongs su dag par slob par ston pa'o/ /rigs kyi le'u las zhes bya ba ni rjes su mthun par zhes bya ba la sogs pa'o/ /snyan par smra ba gang yin pa de ni don spyod pa yang yin te/snyan par smra ba de dang der nye bar bsgrub par bya ba gang yin pa de ni 'dod pa'i don spyod pa yang yin pas don spyod pa zhes bya'o/ /de'i phyir smras pa/ don spyod pa ni zhes bya ba la tshig 'khyal pa rnam par gzhag pa yin te/ ji ltar brdzun du smra ba la sogs pa'i tshig rnams ni ngag 'khyal pa yang yin te/nyon mongs pa can yin pa'i phyir ro/ /nyon mongs can rnams ni ngag 'khyal pa yin no zhes bya ba'i tshig gis so/ /gang don de lta na ni ngag gi nyes par spyod pa bzhi char ma yin par thal bar 'gyur ro zhes zer ba'i skyon spang ba'i phyir brdzun du smra ba la sogs pa lam gzhan du gyur pa'i ngag 'khyal pa yang yod pas rnam par 'jog pa bzhin du/'dir yang snyan par smra ba nyid kyi mtshan nyid don spyod pa yin na yang bsdu ba'i dngos po bzhi tha dad du rnam par gzhag pa'i phyir smras pa/ de las bye brag tu gyur pa'i don spyod pa gzhan yang zhes bya ba la sogs pa'o//de dag gnyi ga bshad pa'i phyir 'di ltar byang chub sems dpa' ni zhes bya ba la sogs pa la/ snyan par smra pa dang ldan pa de ni snyan par smra bar rigs pas zhes bya ste/ sems can sdud pa'i thabs su gyur pa'i phyir ro/ /yang dag par bstan pa ni rjes su gzung bas khas blangs shing bdag gir byas pa'o//de ltar na go rims bstan par 'gyur ro/ /snyan par smra ba'i rjes thogs su don mthun pa la 'jug par byed do zhes bya ba yin no/ /bslab pa rnams zhes bya ba ni lhag pa'i tshul khrims kyi bslab pa la sogs pa bslab pa rnam pa gsum yin la/ de dag kyang don spyod pa rnam pa bcus rab tu phye ba yin par rgyu bcus rnam par gzhag par bya'o/ /de'i phyir rnam pa thams cad kyis don yongs su rdzogs par byed pa'i dbang du byas nas smras pa/ don spyod pa'i ngo bo nyid rnam par gzhag par rig par bya ste/ don gyi gtso bo yongs su 'dzin pa'i dbang du byas nas so//rgyu bcu po gang yin zhe na/ sdom pa gsum gyi rgyu yin pa'i phyir ro/ /sdom pa gsum ni tshul khrims nyams pa las sdom pa dang / yul las sdom pa dang / nyon mongs pa las sdom pa'o/ /tshangs par spyod pa gsum gyi rgyu yin pa'i yang phyir ro/ /tshangs par spyod pa rnam pa gsum ni log pa'i sdom pa blangs pa dang /gtan du ma spangs pa dang / gtan du spangs pa'o/ /kun nas nyon mongs pa rnam pa gsum gyi gnyen po'i yang phyir te/ kun nas nyon mongs pa gsum ni nyes par spyod pa'i kun nas nyon mongs pa ni sdig pa byed pa rnams kyi'o/ /srad pa'i kun nas nyon mongs pa ni de las gzhan pa'i 'dod pa can rnams kyi'o//lta ba'i kun nas nyon mongs pa ni mu stegs can rnams kyi'o/ /ngan 'gro dang / gnod pa dang bcas pa'i bde 'gro dang / gnod pa med pa'i bde 'gro'i gnyen po'i phyogs su gyur pa'i yang phyir te/ ngan 'gro ni ngan song rnam pa gsum mo//gnod pa dang bcas pa'i bde 'gro ni ngan 'gro rnams ma gtogs pa 'dod pa'i khams pa ste/ sdug bsngal gyi tshor ba yod pa'i phyir ro/ /gnod pa med pa'i bde 'gro ni gzugs dang / gzugs med pa'o/ /nag po'i las dang / las 'dren ma dang / dkar po'i las rnams kyi gnyen po'i phyogs su gyur pa'i yang phyir te/nag po ni mi dge ba'o/ /'dren ma ni 'dod pa na spyod pa'i dge ba'o/ /dkar po ni gzugs dang / gzugs med pa na spyod pa'i dge ba'o/ /gnas skabs gsum gyi nyon mongs pa'i gnyen po'i phyogs su gyur pa'i yang phyir te//gnas skabs gsum gyi nyon mongs pa ni mngon par zil gyis gnon pa'i gnas skabs dang / kun du spyod pa'i gnas skabs dang / bag la nyal gyi gnas skabs so/ /yang sdig pa'i spyod pa dang / 'dod pa'i spyod pa dang / dka' ba'i spyod pa'i gnyen po'i phyogs su gyur pa'i yang phyir te/ sdig pa'i spyod pa ni las ngan pa byed pa rnams kyi'o/ /'dod pa'i spyod pa ni 'dod pa'i bde ba la mngon par zhen pa rnams so/ /dka' ba'i spyod pa ni bdag nyid ngal zhing dub par byed pa'o/ /rab tu byung bas ni mtha' de gnyi ga spang bar bya'o zhes bya ba yin no/ /yang bde 'gro dang / /'jig rten pa dang /'jig rten las 'das pa'i rnam par dag pa'i rgyur gyur pa'i yang phyir ro/ /yang ting nge 'dzin dang / shes rab dang / rnam par grol ba'i rgyur gyur pa'i yang phyir dang / gnyis kyis skal ba dang ldan pa rnams mnyam par gzhag pa dang rnam par grol ba'i rgyu yang yin pa'i phyir ro/ / bslab pa'i don rjes su spyod pa ni don spyod pa zhes bya ba ni ji ltar bslab pa bcas pa'i rjes su 'brangs nas sbyor ba byed pa ni sgrub pa zhes bya ba'o/ /de nyid bshad pa ni chos kyi rjes su mthun pa'i chos sgrub pa'i spyod pa zhes bya'o/ /rgyu med par ngo bo nyid kyis snying brtse ba'i bdag nyid can de la yang dag par dgod pa'i phyir smras pa/snying rje'i sems zhes bya ba la sogs pa'o/ /ngo bo nyid mdor bstan pa yin no zhes bya ba la de dag gis dge sbyong gi bya ba thams cad yongs su rdzogs pa yin no/ /de la don spyod pa thams cad ni sems can thams cad kyi rnam pa thams cad kyi don sdud pa nye bar bzung nas rnam pa gnyis su rnam par gzhag par bya ste/ma smin pa rnams smin par bya ba dang / smin pa rnams grol bar bya ba'i phyir ro/ /yang de'i don gyi bya ba ni yongs su mya ngan las mi 'da' ba'i chos can dang / yongs su mya ngan las 'das pa'i chos can rnams kyi 'jig rten dang / 'jig rten las 'das pa'i yongs su smin pa dang / rnam par grol bar rig par bya'o/ /yang de ni dngos po yongs su spong ba'i sgo gsum du 'jug pa'o zhes bstan pa'i phyir smras pa/ tshe 'di'i don zhes bya ba ni 'jig rten 'di'o/ /tshe phyi ma'i don zhes bya ba ni 'jig rten pha rol gyi'o/ /tshe 'di dang phyi ma'i don zhes bya ba ni 'jig rten gnyi ga'i don to//longs spyod kyi bde ba dang / nges par 'byung ba'i bde ba dang / nye bar zhi ba'i bde ba'i dbang du byas nas sgo gsum du rig par bya ste/ /chos dang mthun pa ni nyes par spyod pa rnams rnam par spang pa'o/ /yon tan dang ldan pa ni slu ba dang /'drid pa dang / bcos pa'i g.yo dang / sgyu rnam par spangs pa'i phyir ro/ /sgrub pa ni ma thob pa thob par byed pa'o/ /thob pa rnam par mi nyams pa ni bsrung ba'o/ /bsrungs pa rnam par 'phel ba ni spel ba nyid de/ las kyi yon tan 'di dag gis 'jig rten 'dir yang kha na ma tho ba med pa'i snyan pa dang bde ba thob par 'gyur te/de lta bu ni 'jig rten 'di pa zhes brjod do/ /'di lta ste gzhan gyis kyang dmad par mi 'gyur la/ rang nyid kyang dga' ba dang mgu ba'i gnas 'phel bar 'gyur ro/ /longs spyod spangs nas gzhan la rag las pa'i 'tsho ba dang rab tu 'brel pa'o/ /rab tu byung ba'i tshul la yang dag par sbyor ba ni gcig tu phyi ma'i don yin te/nges par phyi ma la rab tu bsngags pa'i 'gro ba rnams su 'gro bar 'gyur zhing bde bar 'gyur ro/ /'jig rten 'di la ni gcig tu bde ba ma yin te/ nges pa med pa'i phyir ro/ rim gyis 'dod chags dang bral bar 'gyur ba zhes bya pa ni mthong ba'i lam gyis 'dod pa'i khams kyi ngan 'gro'i 'gro ba las 'dod chags dang bral ba dang /bsgom pa'i lam gyis 'dod pa'i khams ma lus pa las 'dod chags dang bral ba ste/ de lta bur ji srid srid pa'i rtse mo'i bar las 'dod chags dang bral bas bstan par bya'o/ /des tshe 'di'i don bstan pa'i phyir/lus shin tu sbyangs pa dang / sems shin tu sbyangs pa dang zhes bya ba la/ lus dang sems shin tu sbyangs pa'i khyad par dang ldan pa ste/ lus dang sems shin tu sbyangs pa'i bde ba rab tu myong bar 'gyur bas de'i phyir smras pa/ /bde ba la reg pas gnas par 'gyur la zhes bya ba la/'jig rten pa'i 'dod chags dang bral bas rnam par dag pa'i lhar skye bar 'gyur ba dang / 'jig rten las 'das pa'i mthar thug pa thob pas mya ngan las 'das pa'i khams su yongs su mya ngan las 'das par 'gyur ro/ /gang zag rnam pa gsum la go rims bzhin du dge ba yang dag par 'dzin du gzhug pa'i spyod pa dang /rab tu byung ba yang dag par 'dzin du 'jug pa'i spyod pa dang / lta ba ngan pa 'dor du bcug nas bstan pa la 'dzud par byed pa'i spyod pa ni nus pa dka' ba'i phyir dka' ba'i don spyod pa zhes bya'o/ /gang zag gsum las rgyu las nyams pa ni sngon gyi dus nye bar bzung nas dge ba'i rtsa ba thams cad du ma spyad cing dge ba la goms par ma byas pa nyid la byang chub sems dpa' 'bad pa chen pos so sor brtags nas skye ba 'di nyid la mi byed pa gang yin pa de phyis kyang byed par mi 'gyur ba nyid du rig nas dge ba la yang dag par 'dzud par byed pa'o//da ltar gyi dus su longs spyod chen po dang ldan pas bag med pa la mang du gnas shing 'dod pa la gcig tu zhen pa de dag gi rab tu byung bar skul ba ni shin tu dka' ba yin pa las de bzhin du yang dag par skul bar byed pa'o/ /skye ba gzhan dag tu mu stegs can gyi lta ba la mos pa brtan zhing sbags pa de dag lta ba ngan pa dang phral nas bstan pa 'di la gzhug par dka' ba las lta ba ngan pa de dang phral nas de bzhin gshegs pa'i bstan pa la 'god par byed pa'o//bdag nyid kyis blun pa ni phyin ci log tu gyur pa'i blo can yin pa'i phyir ro/ /mngon par zhen pa ni 'di kho na bden gyi/ gzhan ni rmongs pa'o zhes bya ba ste/ log par lta ba mang po dang ldan pa'i phyir rigs pa dang rigs pa ma yin pa ston pa'i tshig gi sgo nas bstan cing bsgrubs kyang khas len par mi byed pa'o/ /mngon par mtho ba'i lam gnyis 'jug pa dang bcas pa dang nges par legs pa'i lam gyi ngo bo ni gcig go//'jig rten dang 'jig rten las 'das pa'i phun sum tshogs pa'i dbang du byas nas yang dag par skul bar byed pas sgo bzhi nas 'jug pa ni thams cad kyi sgo nas don spyod pa zhes bya'o/ /de la dad pas ni sbyin pa dang tshul khrims la 'jug par 'gyur ro/ /de dag gis ni ma 'ongs pa na lus dang longs spyod khyad par du 'phags pa thob par 'gyur te/khams gsum du ji ltar rigs pa ste/ 'jig rten pa'i phun sum tshogs pa'i rgyu yin pa'i phyir ro/ /dad pas ni shes rab la yang 'jug par 'gyur la/ shes rab kyis sgom pa rab kyi mthar thug par gyur pa na nyon mongs pa rab tu spangs nas 'jig rten las 'das pa'i phun sum tshogs pa thob par 'gyur ro//yang na rim gyis nan tan du bya ba yin pa'i dbang du byas nas dad pa la sogs pa bzhi rnam par gzhag go/ /'di ni rigs kyi bu'am/ rigs kyi bu mo gang zhig gis byang chub sems dpa' las chos thos pa na las dang 'bras bu dang /dkon mchog dang / bden pa rnam pa gsum la dad pa thob par 'gyur ro/ /de dad pa thob pa de dang ldan pas khyim na gnas pa'i nyes dmigs dang / rab tu byung ba'i phan yon mthong ba na lus kyi sdom pa dang / dag gi sdom pa dang / 'tsho ba yongs su dag pa yang dag par 'dzin du 'jug go/ /yang de lta bu'i tshul gyis tshul khrims kyi phung po dang ldan par shes nas 'jig rten dang / 'jig rten las 'das pa'i shes rab la 'god par byed do/ /des don ngan pa gtong bar byed do zhes bya bas gtong ba phun sum tshogs pa yang dag par 'dzin du 'jug go zhes brjod de/'dus byas zag pa dang bcas pa rnams la 'dzin pa ni ser sna can no zhes bya bas so/ /tshig rnam pa lnga'i dbang du byas nas/ skyes bu dam pa'i don spyod pa ni rnam pa lnga'o/ /yang tshig gi don rnam pa lnga ni skul ba dang / rjes su ston pa dang / chos ston pa rnams su rig par bya'o//de'i phyir smras pa/ yang dag pa'i don yang dag par 'dzin du 'jug pa zhes bya ba la sogs pa la/ tshig gi lam lnga ni yang dag pa'i don la sogs pa'o/ /rnam pa gnyis ni rang gi 'khor du gtogs pa yang dag pa dang / log par zhugs pa rnams yongs su bzung ba dang /tshar bcad pa'i dbang du byas pa dang / gzhan dag bstan pa la sdang ba dang / bar ma dang zhugs pa dang yongs su smin pa'i sems can rnams la drang ba dang gzhug pa dang yongs su smin par bya ba dang rnam par grol ba'i dbang du byas pa'o/ /yongs su gzung ba'i bya ba ni gnyis te/zang zing gi bgo bsha' bya bas dang yang dag par rab tu dga' bar bya bas so/ /tshar gcad pa'i bya ba ni chung ngu la sogs pa'i rim gyis rnam pa gsum ste/ spyo ba dang / chad pa'i las dang / bskrad par bya'o/ /rnam pa bdun du rnam par gzhag pa ni spyi'i rim gyis sgom pa la sbyor ba'i nan tan la yang dag par sbyor bar byed pa'o//rnam pa lnga sta/ khyad par nyid ni theg pa gsum la rab tu dgod pa'i dbang du byas nas ni rnam pa gnyis so/ /spyi'i bstan par bya ba'i phyir/ theg pa dman pa las brtsams pa dang / theg pa chen po las brtsams pa zhes bya ba la/ /theg pa'i dbye ba'i dbang du byas pa zhes bya ba'i tha tshig go//de la tshogs ni dbang po'i sgo bsdams pa'i phyir ro/ /de dag srung ba ni nyams pa las srung ba'o/ /bsags pa ni 'phel bar byed pa'o/ /rab tu dben pa ni lus dang sems dben pa'o/ /sems rtse gcig tu bya ba ni de la dang por sems yang dag par gtod pa'o//sgrib pa rnam par dag par bya ba ni kun du spyod pa rnam par sbyong ba la sogs pa la dmigs pa yid la byed pa sgom pa'o/ /las dang po la skyo ba bskyed pa'i phyir mtshan ma lnga bzung la bsgom par bya'o zhes bya ba'o/ /phongs shing 'dod pa dang ldan pa'i don spyod pa ni kun nas dkris pa rnam pa brgyad rab tu spong ba la 'dzud pa'i dbang du byas nas rnam par gzhag par bya'o//kun nas dkris pa rnam pa brgyad rnam par gzhag pa ni tshul khrims dang / ting nge 'dzin dang / shes rab kyi phung po tshogs dang bcas pa'i gegs byed pa nyid kyi dbang du byas pa yin no/ /de la ngo tsha med pa dang /khrel med pa ni tshul khrims kyi phung po'i gegs su gyur pa ste/ bdag dang gzhan la ltos nas nyes par spyod pa spangs nas tshul khrims yang dag par len pa med pa'i phyir dang / blangs pa yang dag par mi srung ba'i phyir ro/ /ting nge 'dzin dang rab tu ldan pa la bying ba dang rmugs pa'i 'jigs pa yod pas nang gi bdag nyid zhum par 'gyur te//de dag gis ting 'dzin gyi phung po'i gegs byed pa'i phyir ro/ /lhag mthong dang rab tu ldan pa la ni rgod pa dang / 'gyod pa'i 'jigs pa yod pa nyid do/ /chags pa dang 'gyod pa dang bcas pa'i phyir shes bya'i gzugs brnyan mthong ba med pa nyid do//de'i phyir de dag gnyi ga yang shes rab kyi phung po'i gegs su gyur pa yin te/ de'i bar du gcod par byed pa'i phyir ro/ /lus dang sems nye bar brtan par gyur pa ni phung po gsum sgom par byed do/ /de la lus nye bar brtan pa ni skye ba gzhan du byas pa'i sbyin pas tshe 'di la de dang rjes su mthun pa'i rkyen mngon par 'grub par 'gyur ro//sems nye bar brtan pa ni skye ba gzhan la byas pa'i chos kyi sbyin pas tshe 'di la de dang rjes su mthun pa'i chos thos pa dang / gdams ngag dang rjes su bstan pa rab tu thob par 'gyur ro//sbyin pa rnam pa gnyi ga'i bar du gcod par byed pa ni gzhan gyi 'byor pa mi bzod pa dang / dngos por 'dzin pa chen po yin na sbyin pa la 'jug par mi 'gyur ro zhes bya bas so/ /sel bar byed ces bya ba ni so sor rtog pa'i stobs kyis skyes pa rnam spong ba'o/ / spong bar byed pa zhes bya ba ni bsgoms pa'i stobs kyis ma skyes pa rnams shin tu mi skyed pa'o/ /rnam pa dgu ni lus dang ngag gi nyes par spyod pa'i rnam par dbye bas so sor rnam pa bzhir 'gyur la/ yid kyi nyes par spyod pa'i dbye ba rnams ni yang gcig tu byas pa'o/ /de la rigs pa gnyis kyis lus kyi nyes par spyod pa rnam pa bzhir gzhag par bya ste/las kyi lam rnam par gzhag pa dang / dge bsnyen gyi bslab pa'i gnas kyi mi mthun pa'i phyogs rnam par gzhag pa'i dbang du byas pas so/ /las kyi lam rnam par gzhag pa'i tshul gyis ni lus kyi nyes par spyod pa rnam pa gsum mo/ / tshul gzhan gyis ni bzhi pa myos par 'gyur ba'i btung ba gtogs par byas pa'o/ /yid kyi nyes par spyod pa rnams gcig tu byas pa ni de dag la bya ba tha dad yod du zin kyang mngon du gyur pa tsam gyis las kyi lam du rnam par 'jog pa'i phyir ro/ /rnam pa thams cad spangs pa zhes bya ba ni sbyor ba dang /dngos gzhi dang / mjug rnams su'o/ /rnam pa bcu mdor bsdu na sbyor ba rnam par dag pa dang / bsam pa rnam par dag pa'i dbang du byas pa'o/ /sbyor ba rnam par dag pa yang rnam pa lnga'o/ /de bzhin du bsam pa rnam par dag pa yang ngo / /yang 'di dag gi rnam par gzhag pa gzhan smras pa/phyi rol dag pa dang / nang dag pa la brten te zhes bya ba la/ mi mthun pa'i phyogs dang ma 'dres pa'i dge ba'i rtsa ba yang dag par blangs pa'i phyir kha na ma tho ba med pa zhes bya'o/ /des na smras pa/ nyes par spyod pa dang 'dres shing zhes bya ba la/ bar bar du nyes par spyod pa la 'jug pa ni 'dres pa nyid do//nyes par spyod pa sngon du 'gro ba ni dge ba bya ba'i phyir sngon du nyes par spyod pa byed pa zhes bya'o/ /de'i phyir kun nas nyon mongs pa can nyid kha na ma tho ba dang bcas pa nyid de/ dper na chos ma yin pas longs spyod bsgrubs nas sam/ pha rol las phrogs nas sbyin pa byed pa lta bu'o//de bzhin du gzhan dag la yang ci rigs par sbyar bar bya'o/ /shin tu ma yin pas na phyir ldog par 'gyur ba dang / thar pa ma yin pa'i srid pa 'ded pa dang gzugs dag/ gzugs med pas bsdus pa dang / gcig tu nges par rnam par dag pa ma yin par nga gis pa'i bag la nyal dang bcas la gcig tu rnam par dag pa'i thar pa yin no zhes yang dag par 'dzud par mi byed do//de lta bas na phyin ci ma log pa'i don gyi bya ba yin no/ /rims su 'bab pa ni go rims bzhin du nan tan bya ba la sbyor ba'o/ /des na smras pa/ thog mar bslab pa'i chos zhes bya ba la sogs pa'o//thams cad du 'gro ba dang / phyogs gcig pa ma yin pa nyid ni rigs la sogs pa'i nges pa med par 'jug par byed pa zhes byas nas so/ /de'i phyir smras pa/ rigs bzhi dang zhes bya ba la sogs pa la/ ci nus ci lcogs kyis sems can dang rjes su mthun pa'i don nye bar sgrub pa'o//mthun mthun du sbyor ba ni thabs sna tshogs kyis nye bar sgrub pa'o/ /de'i phyir smras pa/ gang dag ces bya ba la sogs pa'o/ /gang zag sdig pa'i las shin tu drag po dang ldan pas sdug bsngal che thang du myong ba'i rgyu la zhugs pa rnams la chos kyi snying rje chen po'i bsam pa na da dag pa dang po'o//sems can cher rmongs pa rnams la sdug bsngal thams cad kyis yongs su ngal bar gyur kyang skyo ba bzod par byas nas rab tu dga' ba'i bsam pas spyod pa ni gnyis pa'o/ /shin tu dman zhing phongs pa'i gang zag la yang bdag nyid rigs dang 'byor pa la sogs pa khyad par du 'phags pa yin du zin kyang dman pa'i bsam pas spyod pa ni gsum la'o//g.yo sgyu sa nye bar spyod pa rnams la bcos ma ma yin pa'i sems kyis spyod pa ni bzhi pa'o/ /gnod po byed pa rnams la yang byams pa'i bsam pas spyod pa ni rnam par dag pa lnga pa'o//don spyod pa bstan pa'i sgo nas don mthun pa yang yin pas ngo bo nyid la sogs pa yang bstan par mi bya ste/ grub zin pa'i phyir ro/ /de'i phyir 'dir rnam pa gzhan gyis don mthun pa bstan par bya'o/ /dang por don mthun pa rnam pa gsum du rnam par gzhag par bya ste/dngos po nyid ni don gang dang / dge ba'i rtsa ba gang la zhes bya ba ni dge ba'i rtsa ba nyid don ces brjod do/ /bdag dang gzhan gyi phan pa dang bde ba 'dod pa rnams kyis 'dod par bya ba yin pas zhes byas nas so/ /rang sgrub par byed pa nyid ni gang gi phyir smras pa/bdag nyid dang yang dag par ston te zhes bya ba la/ don mthun pa zhes bya ba ni gzhan dang don mthun pa nyid de/ don 'dra ba nyid dang / sgrub pa 'dra ba nyid do/ /dgos pa nyid ni dgos pa rnam pa gnyis te/ dge ba'i rtsa ba yang dag par blangs pa la gzhan dag gus pa bskyed pa'i phyir dang /bdag nyid kyi tshig gzung bar 'os par bya ba dang skur pa 'debs pa'i skabs med par bya ba'i phyir ro/ /dang po bstan pa'i phyir smras pa/ de 'dul ba gzhan dag gis zhes bya ba la sogs pa la brtan zhing nges te zhes bya ba ni gus par byas nas sgrub pa las phyir mi ldog par 'gyur ba'o//des na smras pa/ /phyir mi ldog par 'gyur ro zhes bya ba la/ brtan zhing nges pa'i sbyor ba'i rgyu bstan pa'i phyir/ byang chub sems dpa' 'dis gang kho na bdag cag la bstan pa de nyid la bdag nyid kyang brtan zhing nges par kun du spyod par byed pa las na/ nges par bdag cag la phan pa dang bde ba bstan pa yin te/ 'di nyid kyang phan pa dang bde ba 'dod pa bzhin du mi phan pa dang mi bde ba la spyod par mi byed do zhes bsams nas 'di la bsgrub par bya'o zhes sgrub par byed do/ /gnyis pa'i dbang du byas nas smras pa/ bcos dgos so zhes mi zer ro zhes bya ba la sogs pa'o//byang chub sems dpa' thams cad gcig tu don mthun pa yang ma yin te rnam par dbye ba yod do zhes bstan pa'i phyir ro/ /mu bzhi dang ldan par ston par byed de/ mu gsum ni dkar po'i phyogs su gtogs pa yin no/ /bzhi pa ni nag po'i phyogs su gtogs pa yin no//de ni spang bar bya ba yin te/ byang chub sems dpa'i chos nyid las yang dag par 'das pa'i phyir ro/ /bdag nyid kyi rgyud bzang po rnams gzhan dag dang mnyam du zin kyang rab tu sbas nas gnas pa gtsor byas nas dman par ston pa ni kha na ma tho ba med par 'gyur ro zhes bya ba ni mu dang po ste//byang chub sems dpa' ni rnam pa gnyis kyis phan tshun mnyam pa nyid de/ mnyam pa'i sa la gnas pa nyid dang / gang yang sa rnam par sbyong bar byed pa nyid do/ /yon tan mnyam pa ni sbyin pa la sogs pa'i pha rol tu phyin pa dang / dge ba'i chos la sbyor ba nyid do//mthu mnyam pa ni mngon par shes pa'i mthu'o/ /byang chub sems dpa'i lam ni byang chub sems dpa'i sgrub pa'o/ /slob dpon ni 'jig rten thams cad kyis slob dpon du 'dod pa'o/ /de dang mnyam pa nyid yin na yang mnyam pa nyid du mi ston te/ ci'i phyir zhe na//de nyid la 'jig rten thams cad kyis gus pa dang bsnyen bkur dang rim gro byed par 'gyur ba dang / 'jig rten thams cad kyis slob dpon du 'dzin par bya ba'i phyir ro/ /don mthun pa nyid du bstan na de la de ltar 'dzin par mi 'gyur zhing / gus pa dang bsnyen bkur byed pa nyams par byed par 'gyur ro//de lta bu mthong bas don mthun pa nyid du ston par mi byed do/ /bdag nyid yon tan dang mthu khyad du 'phags pa dang ldan par gyur la dman pa la mos pa nyan thos la sogs pa chos thams cad brjod du med pa nyid thos pa dang / bsgrub par mi 'gyur zhing skrag pa rnams la'o//so sor brtags nas zhes bya ba ni dgos pa'i dbang gis de'i rnam pas don mthun pa nyed du ston par byed do/ /dper na de bzhin gshegs pa nyan thos la sogs pa dang bdag nyid don mthun par stan par mdzad do/ /des 'dul ba rnams kyi don byed pa lta bu'o//sems can dman pa rnams kyi don yang byed par 'dod pas skye gnas dang / rigs dang / rus la sogs pa bdag nyid mnyam par ston par byed do/ /de'i phyir smras pa/ bsams bzhin du zhes bya ba la sogs pa'o/ /mu gsum pa ni bskul bar bya ba gang zhig 'dris shing bshes pas 'jug par 'gyur ba de dag kyang yang dag par blangs pa la brtan par bya ba'i phyir de dang don mthun pa nyid du ston par byed pa 'di ni yang rab tu grags pa'i don mthun pa yin par rig par bya'o//bdag nyid kyi don dang / gzhan gyi don la yang 'jug pa ma yin pa zhes bya bas gzhan gyi don la yang bag med pa'i dbang gis btang snyoms su gnas pas don mthun pa bstan pa'i sgo nas gzhan gyi don byed pa ma yin no//sa bcu pa la sogs pa'i mdo sde nas gsungs pa'i sa dang po la sbyin pa'i pha rol tu phyin pa lhag par spyod par 'gyur zhing /bsdu ba'i dngos po yang sbyin pa las byung ba'o/ /de bzhin du gzhan dag la yang ngo / /gnyi ga smos pa'i dgos pa bstan pa'i phyir smras pa/ de la sbyin pa rnam pa du mar bstan pa gang yin pa zhes bya ba la sogs pa la/ /byang chub sems dpa'i bya ba ni rnam pa gnyis te/ bdag gi rgyud kyis sangs rgyas kyi chos yongs su smin par bya ba dang /phyi rol gyi sems can yongs su smin par bya ba'o/ /de la pha rol tu phyin pas ni snga ma yongs su smin par byed do/ /bsdu ba'i dngos po rnams kyis ni gzhan no/ /des na byang chub sems dpa'i dge ba'i rtsa ba'i bya ba thams cad ni 'di dag gis bsdus pa yin no//da ni pha rol tu phyin pa la sogs pa de dag nyid byang chub thob pa la rjes su mthun pa yin pa'i phyir dang / byang chub kyi phyogs rnams kyang kun du spyod pa dang / phul du byung ba nyid dang / rnam par dag pa'i dbang du byas nas de'i rgyu bstan pa'i phyir smras pa gsum gyis zhes bya ba la sogs pa la/rgyu zhes bya ba ni sgo zhes bya ba'i don te/ dge ba'i chos la legs par spyod pa zhes brjod do/ /legs par spyod pa ni kha na ma tho ba med pa'i lus dang ngag dang yid kyi las kyis bsdus pa nyid de/ sbyin pa la sogs pa'i chos rnams lus la sogs pa'i sgo gsum nas kun du spyod pa'o//rgya che ba'i phyir zhes bya ba la sogs pa ni phul du byung ba'i rnam pa bstan to/ /rgya che ba nyid ni chen por gyur pa zhes bya ba'i don to/ /rgyu gsum gyis dbye ba med pa'i phyir ma lus pa la 'jug pas na des na rgya che ba nyid do/ /sems can la dbye ba med pa ni bdag dang /gzhan zhes dbye ba'i rnam par rtog pa med pa nyid do/ /dngos po la dbye ba med pa ni 'di ni sbyin par bya'o/ /'di ni sbyin par mi bya'o zhes bya ba'i rnam par rtog pa med pa nyid do/ /dus la dbye ba med pa nyid ni dus 'di la ni sbyin pa zhes bya ba la sogs pa'i rnam par rtog pa med pa'i phyir ro//de'i phyir sems can thams cad dang / dngos po thams cad dang / dus thams cad kyi sgo nas 'jug pa ni rgya che ba zhes bstan par 'gyur ro/ /yang dbye ba med pa'i phyir spyi'i chen po nyid do/ /spyi'i chen po yin pa'i phyir chen po nyid do/ /de ltar na rten dang dngos po dang /dus chen po nyid kyis chen po zhes bya'o/ /chen po yin pas na rgya che ba zhes yongs su gsal bar byas pa yin no/ /rgyu de nyid kyis zhes bya ba la sogs pa la/ skye ba gzhan gyi rgyu'i stobs kyi rab tu spyod pas de bzhin du kun du spyod pa bstan pa yin no/ /rnam pa bzhir zhes bya ba ni dga' ba'i bsam pa'i sbyor ba nyid yin pa'i phyir dang ba'i rab tu dga' ba dang bcas pa nyid de//de'i phyir kun nas nyon mongs pa med pa'o zhes sbyar bar bya'o/ /ma 'dres pa'i sbyor ba nyid yin pa'i phyir mi mnyam pa med pa'o/ /gus pa dang bcas pa'i bsam pa'i sbyor ba yin pa'i phyir gus par bya ba byed pa'o//ltos pa med pa'i bsam pa'i sbyor ba yin pa'i phyir rten pa med pa'o/ /de ltar na kun nas nyon mongs pa can gyi bsam pa'i sbyor ba spangs pa'i phyir kun nas nyon mongs pa med par rig par bya'o/ /yang de dag gi dag pa nyid kyis dag pa ni dri ma med cing 'od gsal bar rig par bya'o//'dres par gyur pa'i sbyor ba yin pa'i phyir gzhan la gnod pa byed pa nyid dang / /da yang lta ba sngon du 'gro ba nyid do/ /de la rgyu dang po med par bstan pa'i phyir/ /gzhan la gnod pa med pa dang zhes bya ba la sogs pa la/gzhan dag la gnod pa mi byed ces bya ba'i don to/ /rgyu gnyis pa med par bstan pa'i phyir/ lta bar gyur pa rnams la mngon par zhen pa med pa zhes bya'o/ /de'i phyir smras pa/ /ma 'dres pa de dag kun du spyod do zhes bya'o/ /gus par byed pa'i sbyor ba ni rnam pa gnyis te/phan yon mthong ba nyid dang / de lo na nyid la rab tu nged pa nyid do/ /sgo gsum nas phan yon bstan pa'i phyir yon tan du lta ba nyid ni gzhan rjes su gzung ba la rab tu zhugs pa'o/ /'bras bu khyad par chen po nyid mthong ba ni snying por lta ba'o//mi mthun pa'i phyogs kyi gnyen po'i phyogs gang yin pa ni zhi bar lta ba'o/ /rgyu gnyis pa bstan pa'i phyir shin tu nges pa zhes bya ba la rgyu dang 'bras bu blo'i mngon sum du gyur pa nyid do/ /des na smras pa/ gzhan gyi dring mi 'jog cing zhes bya'o/ /gzhan gyi dad pa bskyed nas sgrub pa ma yin te/gzhan gyi gdong du lta bar byed pa ma yin zhes bya ba'i tha tshig go/ /khams gsum gyi shin tu rab tu khyad par du 'phags pa'i rnam par smin pa la ltos pa med par bstan pa ni mi rnams kyi 'khor los sgyur ba'i rgyal srid la yang ltos pa med pa nyid dang / 'dod pa na spyod pa'i lha rnams ni rnam pa gnyis te/ /sa la brten pa dang / gzhal yas khang la brten pa'o/ /sa la brten pa'i lha rnams kyi rgyal po ni brgya byin nyid do/ /gzhan rnams kyi lha'i rgyal po ni bdud nyid do/ /gzugs dang gzugs med pa'i rnam par smin pa'i dbang du byas nas smras pa/tshangs pa nyid ces bya'o/ /tshe 'di la lan du phan 'dogs pa la yang re ba med par bstan pa'i phyir/ phan 'dogs pa la yang re ba med ces bya'o/ /rnyed pa dang bkur sti la ltos pa med pa nyid du bstan pa'i phyir/ khe dang / rnyed pa dang zhes bya ba la sogs pa'o//bdag gi lus kyi khyad par la yang mi brten par bstan pa'i phyir smras pa/ tha na lus dang srog la yang zhes bya ba la sogs pa'o/ /kun nas nyon mongs pa can ma yin pa rnam pa bzhi nye bar bsdu bar bya ba'i phyir dang ba dang zhes bya ba la sogs pa la/ mchog tu dga' ba dang ldan pa dang zhes bya ba ni dad ba dang rab tu dga' ba dang ldan pa'o//gzhan la gnod pa mi byed pas na mi mthun pa med pa'o/ /yon tan la sogs pa mthong bas yang dag par blangs la 'jug pa zhes bya ba ni gus par bya ba byed pa'o/ /rnam par smin pa la sogs pa la mi ltos pas na mi brten pa'o//rnam par dag pa gsum gyi rnam pa bstan pa'i phyir/ sbyangs pa nyid dang / mi g.yo ba nyid dang / shin tu rnam par dag pa nyid ces bya ba ni mthar thug pa'i sa ma thob pa'i byang chub sems dpa' rnams kyi ni dge ba'i rtsa ba rnams rnam pa gnyis kyis rnam par dag pa'o//mthar thug par gyur pa rnams kyi ni gsum char gyis kyang ngo / /sbyangs pa ni bsam pa'i khyad par thob pa dang / rang gi ngang gis 'jug pa dang 'bad pa med par 'jug pa nyid dang / mngon par 'du bya ba med par 'jug pa nyid do/ /de'i phyir smras pa/ so sor ma brtags par byed pa yin no zhes bya ba la/so sor brtags nas byed pa nyid ni ma yin na'o/ /gang gis 'bad pa med par kun du spyod par 'gyur ba de lta bur 'jug par 'gyur ba'i rten dang sems kyi rgyud thob par 'gyur ba'o/ /mi g.yo ba nyid ni brten pas so/ /yang na gzhan du 'gyur pa med pa nyid de/yongs su ma nyams pa'i sbyor bas so/ /dper na bden pa mthong ba'i nyan thos rnams dge ba'i chos rnams las kyang mi nyams te/ khyad par du 'gro ba'i phyir ro/ /de bzhin du sa la zhugs pa'i byang chub sems dpa' rnams kyang khyad par du 'gro ba yin pa'i phyir yongs su nyams par mi 'gyur ro//'phel bar 'gyur ba'i rgyu ni rnam pa gnyis te/ rgyu nye bar bsags pa dang ldan pa nyid dang / rnam par smin pa'i khyad par thob pa nyid do/ /de'i phyir smras pa/ mtshan mo dang nyin mo dang de dang de dag ces bya ba la sogs pa la/dus la ltos nas nges par 'phel bar 'gyur ba ni 'jig rten la rab tu grags pa'i dngos po dper byas pa'o/ /de bzhin du zhes bya ba ni dper na zhes bya ba'i don te/ de ltar mig sman ri mo sna tshogs ltar/ /zhes bya ba lta bu'o/ /byang chub sems dpa' mthar thug par 'gro ba'i sa la gnas pa ni sa bcu pa la dbang bskur ba thob pa'o//de'i don dam pa'i tshul dang / rab tu grags pa'i tshul rnam pa gnyis kyi dbang du byas nas rnam par gzhag par bya'o/ /don dam pa'i tshul gyi dbang du byas pa ni dbang phyug chen po'i gnas su skyes pa de dag la dbye ba med pa'o//rab tu grags pa'i tshul gyi dbang du byas pa ni smras pa/ skye ba gcig gis thogs pa dang / srid pa tha ma pa'o/ /de la skye ba gcig gis thogs pa ni dga' ldan gyi pho brang du skyes par gyur pa'o/ /srid pa tha ma pa ni de nas shi 'phos nas mi'i rigs su skyes pa'o//de'i dge ba'i rtsa ba des byang chub sems dpa'i spyod pa'i mthar thug pa rnam par dag par 'gyur ba'o/ /de'i phyir smras pa/ byang chub sems dpa'i sa la de dag las zhes bya ba la sogs pa ste/ sbyin pa la sogs pa'i chos 'di dag gi mthar thug pa'i 'bras bu la dbye ba med par bstan pa yin no//gzhan du na sngar bstan pa'i tshul gyis bsdus pa'i dngos po rnams kyis ni sems can yongs su smin par byed do zhes bya ba'i tshig gis ji ltar rang gi rgyud rab tu khyad par du 'phags pa thob par 'gyur/des na byang chub kyi phyogs kyi chos thams cad kyi ngo bo nyid kun gyi spyi'i 'bras bu gcig pa nyid du bstan pa yin no/ /de ltar na sbyin pa la sogs pa rnam pa dgur ci'i phyir bstan zhe na/ de dag gi 'bras bu rnam pa dgu nyid do zhes bstan pa'i yon tan bstan pa'i phyir/de ltar na byang chub kyi phyogs kyi chos rnams kyi 'bras bu mthar thug pa dang mthar thug pa ma yin pas gcig dang du ma'i bdag nyid kyi 'bras bu bstan pa'i phyir/ bla na med pa yang dag par rdzogs pa'i byang chub kyi spangs pa rnam pa gnyis dang / ye shes rnam pa gnyis kyi dang po'i dbang du byas pa'o//rdo rje snying po'i sku nyid ni de'i rten du gyur pa mtshan gyis brgyan pa'i gzugs kyi sku ste/ de bzhin gshegs pa'i gzugs kyi sku gcad du med cing gzhig tu med pa'i phyir thams cad rdo rje'i rang bzhin yin gyi sku gdung 'ba' zhig tu ma zad pa'o//dka' ba'i sbyin pa la sogs pa ngo mtshar rmad du gyur pa nyid kyi 'bras bu ni de bzhin gshegs pa'i ngo mtshar rmad du byung ba'i chos rnams thob pa'o/ /thams cad kyi sgo nas sbyin pa la sogs pa la zhugs pas ni lha dang mi rnams kyis thams cad kyi sgo nas mchod pa ni 'bras bu'o//skyes bu dam pa la brten pa'i phyir sems can thams cad kyi dam par gyur pa nyid de/ nges pa'i don gyi dbang du byas nas mdo'i tshig rnams bstan pa yin par rig par bya'o/ /tshul bzhin na rkang pas 'gro bar byed ces bya ba'i tshig gis drang ba'i don to/ /phyin ci log bcu gnyis la rkang pa zhes brjod de/yang srid par 'gro bar byed pa'i phyir dang / 'dis 'gro zhing bskyod pas zhes byas nas so/ /de dag lhag ma ma lus par spangs pas na dgra bcom pa ni rkang pa med pa'o/ /phyir mi 'ong ba ni rkang pa gnyis pa ste/ yang srid pa'i sdug bsngal la bde bar 'du shes pa'i phyir phyin ci log tu kun du spyod pa nyid do//gal te de la gcig tu sdug bsngal gyi 'du shes dang sems kyis kun du spyod par gyur na ni yang srid par skye ba thob par mi 'gyur ro/ /de'i phyir de ni de dag kun du spyod pa'i phyir rkang gnyis pa'o/ /rkang bzhi pa ni 'phags pa nyan thos 'dod chags dang ma bral ba'i gang zag ste/de dag ni mi gtsang ba'i mtshan nyid can gyi 'khrig pa'i 'dod pa la gtsang bar 'du shes pa dang / sems phyin ci log yod pa dang yang srid kyi sdug bsngal bde bar 'du shes dang sems phyin ci log tu gyur pa yod pa'i phyir ro/ /rkang mongs ni so so'i skye bo ste/thams cad ma spangs pa'i phyir ro/ /yang de ni khams dang / skye ba'i dbye bas gzugs can dang / gzugs can ma yin pa'o/ /gzugs can las ming gi phung po bzhi la zhugs pa ni 'du shes can no/ de las bzlog pa ni 'du shes med pa'o/ / de bzhin du mi gsal ba'i 'du shes kun du spyod pa'i gzugs med pa ni 'du shes med 'du shes med min yin no/ /de ltar na dgra bcom pa dang / slob pa dang / 'jig rten pa'i 'dod chags dang bral ba'i mchog nyid du bstan par 'gyur gyi/ gzhan du ni nye bar dgod pa 'di mdzes shing rjes su mthun pa ma yin no//mtshan rnams ni dpag tu med pa'i bsod nams kyis yongs su gzung ba'i phyir te/ re re yang bsod nams brgya yis bskyod pa yin pa'i phyir ro/ /byang chub kyi snying po la bzhugs pa la bdud dang phyir rgol ba rnams kyis gnod pa la sogs pa med pa'i 'bras bu'o//de la bar du gcod pa med pa ni gnod pa med pa'o/ /sku la mi 'dod pa'i dngos po'i reg pa mi 'byung ba ni tho 'tshams pa med pa'o/ /thugs la rnam par 'gyur ba med pa ni bskyod par mi nus pa'o/ /'di dang gzhan du bde bar 'gyur ba'i sbyin pa la sogs pa ni 'di nyid dang gzhan nyid du mchog tu bde ba'i dngos po mi las shin tu 'das pa'i 'bras bu thob pa'o zhes bya bar smras pa/de bzhin gshegs pa'i zhes bya ba la sogs pa la/ bde ba'i mchog ni de bzhin gshegs pa'i rgyud kyis bsdus pa'o/ /sbyin pa la sogs pa'i rnam par dag pa'i 'bras bu ni sangs rgyas kyi chos ma 'dres pa rnams rnam par dag pa'o//byang chub sems dpa'i sa'i gzhi las bsdu ba'i dngos po'i le'u ste bco lnga pa'i 'grel pa rdzogs so// //dkon mchog la mchod pa dang / mdza' bo bstan pa'i sdom gyi 'grel pa ni ji ltar bslab par bya ba'i dbang du byas shing rjes su 'brangs nas de dang mthun par bsdu ba'i dngos po bzhi'i sgo nas ji ltar bslab par bya ba'i sbyor ba bstan nas/da ni dkon mchog gsum la mchod pa'i sgo nas dang / /dge ba'i bshes gnyen bsten pa'i sbyor ba dang / tshad med pa bzhi bsgom pa'i sbyor bas kyang bslab par bya'o zhes bstan par bya ba'i phyir sdom tha ma smras pa yin no//de las dang po kho nar sangs rgyas dkon mchog la mchod pa bstan par 'dod nas smras pa/ de bzhin gshegs pa la mchod pa gang zhe na zhes bya ba la sogs pa la/ de bzhin gshegs pa zhes bya ba ni de bzhin gshegs pa'i rten la zhes bya ba'i tha tshig go//re re la yang rab tu dbye ba dpag tu med pa yod pas mdor bsdu na zhes smras so/ /rnam pa bcur zhes bya ba ni de bzhin gshegs pa'i mchod pa ni rnam pa bcur rig par bya'o zhes bstan pa yin no/ /rnam pa bcu po de dag kyang mdor bsdu na rnam pa gsum du gzhag par bya ste/mchod bya'i dngos po khyad par nyid dang / mchod pa po'i khyad par nyid dang / mchod pa'i rab tu dbye ba'i khyad par nyid de/ gang la mchod pa dang / gang gis mchod pa dang / gang dag gis mchod pa zhes bya ba gsum po 'di dag gi dbang du byas nas rnam pa bzhi dang /gnyis dang tshig lhag mas so/ /mdor bsdu na mchod bya'i dngos po yang gnyis te/ de bzhin gshegs pa'i gzugs ye shes dang bcas pa ma gyur pa la mchod pa dang / gyur pa dang bcas pa ni gang yang smras pa/ mchod rten la mchod pa zhes bya bas so//de dag gnyis ka la mchod pa yang rnam pa gnyis te/ mngon du gyur pa la'am/ mngon du ma gyur pa la mchod pa rnam pa gnyis so/ /mngon du gyur pa la mchod pa dang / mngon du ma gyur pa la mchod pa zhes bya bas de ltar na mchod par bya ba'i dngos po yang rnam pa bzhir dbye bar bya'o/ /zang zing gi mchod pa gang yin pa de yang sbyin pa dang 'dra bar rnam pa gnyis kyis 'jug par 'gyur te/lus kyi sgo nas mchod pa ni gang yang smras pa/ bdag gis byas pa'i mchod pa dang zhes bya ba'o/ ngag gi sgo nas byed du bcug pa ni gang yang smras pa/ gzhan byed du bcug pa'i mchod pa dang zhes bya ba'o/gzhan byed du bcug pa'i mchod pa yang gnyis te/ kun nas nyon mongs pa can gyi mchod pa ni skyon dang ldan pa'i sgo nas dgag par bya'o/ /'bras bu chen po dang ldan pas yon tan dang ldan pa ni rjes su gnang ba yin pas yang 'dir rjes su gnang bar bstan par rig par bya'o/ / mchod pa'i ngo bo yang rnam pa gnyis te/ rdzas la brten cing gnas pas rab tu phye ba nyid ni rnyed pa dang bkur sti'i mchod pa'o/ /rdzas la mi brten pa rang gi don la mngon par brtson pas rab tu phye ba ni sgrub pa'i mchod pa'o/ /rnyed pa dang bkur sti'i mchod pa'i bye brag gi dbye ba yang rnam pa gnyis te/rgya chen po'i mchod pa dang / kun nas nyon mongs pa can ma yin pa'i mchod pa'o/ /chen po nyid dang ldan pas rgya chen po'o/ /dag pa nyid dang ldan pas kun nas nyon mongs pa can ma yin pa'o/ /de ltar na 'dir mchod pa rnam pa gnyis yin no/ /mngon sum du zhes bya ba ni de bzhin gshegs pa mngon sum du byas pa ste/sha'i mig gis mthong nas zhes bya ba'i tha tshig go/ /mchod par byed pa zhes bya ba ni bkur sti byas nas zhes bya ba'i don to/ /gyur pas shes pa dang mi ldan pa'i de bzhin gshegs pa'i gzugs kyang 'du shes rnam pa gnyis kyis rnam par gzhag par bya ste/tha mal pa dang / khyad par can no/ /tha mal pa ni bsod nams bsags pa'i sgor gyur pa rnam pa sna tshogs pa'i gnas dang dbyibs kyis rab tu phye ba'i phyir ro/ /khyad par can gyi ni dbyibs kyi dbye bas rnam pa gsum mo/ /gang yang smras pa/ /mchod rten nam zhes bya ba la sogs pa'o//de la mchod rten ni de bzhin gshegs pa'i sku gdung gi snying po can 'bru'i phung po'i dbyibs lta bus rab tu phye ba'o/ /gtsang khang phyur bu ni nang na sku gzugs bzhugs pa'i gru bzhi'o/ /gtsang khang ni de gnyis ka'i snying po can gyi zlum po'o/ /gsum po 'di dag nyid so sor gnas skabs kyi bye brag gis ni rnam pa gnyis te/mchod rten rnying ngam mchod rten gsar/ /zhes bya ba'o/ /de la rnying pa ni gang yang mi bzhugs pas mchod pa dang bsnyen bkur thams cad dang bral ba'o/ /de las bzlog pa ni gsar pa'o/ /yang de dag ni dbyibs nyams shing 'thor bar gyur pa ni rnying ba'o//rnying pa las bzlog par gyur pa ni gsar pa'o/ /de dag gi dbye ba bstan pa yang mchod pa byas na bsod nams yongs su 'dzin pa mnyam par bstan pa'i phyir brjod pa yin no/ /mngon du gyur pa zhes bya ba ni dbang po'i yul du gyur pa'o/ /de'i phyir smras pa/ mngon sum du zhes bya ba ste/ /mig gi mdun na gnas pas zhes byas nas so/ /mngon sum du mchod pa'i dbye ba bstan pa'i phyir smras pa/ mngon sum du mchod pa byed pa de ni zhes bya ba la sogs pa la/ mchod par gyur pa'i bsam pa rnam pa drug las gang yang rung ba dang ldan pa'i phyir lhag pa'i bsam pa dang ldan pa'o//de'i sgo nas dga' ba dang rab tu dga' ba dang ldan pa ni dga' ba dang ldan pa'o/ /de bzhin gshegs pa gcig gi chos nyid gang yin pa zhes bya ba ni gnas skabs gsum yongs su bsdus pa'i ngo bo nyid ces bya ba'i tha tshig go/ /tshogs dang chos kyi sku dag dang / / 'gro ba'i don ni spyod pa yis/ /sangs rgyas thams cad mnyam par bzhed/ /ces bya bas so/ /mchod rten gcig gi chos nyid gang yin pa zhes bya ba la/ 'jig rten gyi khams thams cad kyi de bzhin gshegs pa yongs su mya ngan las 'das pa'i sku gdung gi snying po can gyi chos nyid mtshungs pa nyid kyi phyir ro//de ltar na mngon sum dang / mngon sum ma yin pa'i thun mong gi mchod pa ste/ gcig mngon du byas nas mchod pa byed pa ni mngon sum gyi mchod pa'o/ /de las gzhan pa ni mngon sum ma yin pa'i mchod pa'o/ /de dag gnyi ga thun mong gi rnam pa la zhugs pa'i phyir thun mong gi mchod pa'o//mngon sum du ma gyur pa la zhes bya ba ni rjes su thos pa dang / rjes su dran pa ste/ gzhan dag na de bzhin gshegs pa bzhugs su zin kyang mthong ba'i yul las 'das pa'i phyir ram/ ma byung ba'am yongs su mya ngan las 'das pa ni mngon sum du ma gyur ba zhes bya ba'o//mchod rten rnams kyang de bzhin no/ /de bzhin du sems mngon par 'dus byas te zhes bya ba ni rmi lam bzhin du yid kyis brtags pa ni bsod nams chung ba'i phyir 'ba' zhig ces brjod de/ mngon sum du ma yin pa'i mchod pa gnyis pa la rgya chen po zhes brjod pa'i tshig gis so//des ni thun mong ma yin pa la mi bya ste/ sangs rgyas thams cad kyi phyir zhes bya ba'i tshig gis so/ /mngon sum ma yin pa'i mchod pa yang rnam pa gnyis te/ dngos po nye bar stobs pa'i mchod pa ni gang gi phyir smras pa/ de bzhin gshegs pa'am zhes bya ba la sogs pa'o//dngos po nye bar bzhag pa'i mchod pa ni gang gi phyir smras pa/ yongs su mya ngan las 'das nas zhes bya ba la sogs pa'o/ /ci nus zhes bya ba ni nus pa dang rjes su mthun par ro/ /de nyid kyi don bstan pa na ci lcogs kyis zhes bya ba'o/ /yang na bsam pa dang /'byor pa ji lta bus tshig gnyis so/ /rgya che ba nyid bstan pa ni tshad med pa'i 'bras bu nyid dang ldan par bstan pas tshangs pa du ma'i bsod nams kyis yongs su zin pa yin te zhes bya ba la mchod rten gcig cig rab tu bzhengs pa'i bsod nams yongs su gzung ba mang tshangs pa'i bsod nams yongs su gzung bar 'gyur na du ma nyid kyi bzhengs pas ni tshangs pa du ma nyid kyi bsod nams yongs su gzung bar 'gyur ro//ji skad du mdo gzhan dag las/ sa phyogs gang dag na de bzhin gshegs pa'i mchod rten mi bzhugs pa de dag tu bzhengs par byed na tshangs pa'i bsod nams yongs su gzung ba yang tshangs pa'i bsod nams dang mnyam par thob par 'gyur ro zhes bstan pa yin no//tshangs pa'i bsod nams kyi tshad ni bsod nams gang gis bskal pa gcig tu mtho ris su 'gro bar 'gyur ba ste/ yang dang yang rgyun mi 'chad par rnam par smin pa 'jug par 'gyur ba'i bsod nams la tshangs pa'i bsod nams zhes brjod do//bsam gtan dang po'i sems can gyi bsod nams dang mtshungs pa la bya'o/ de la mdo gcig las ni dge 'dun mthun par byas na tshangs pa dang mnyam pa'i bsod nams 'thob par 'gyur ro zhes gsungs so//tshigs su bcad pa gzhan dag las ni/ dge 'dun mthun par byas na ni/ /bskal par mtho ris bde ba 'thob/ /ces gsungs pa yin no/ /log par ltung ba mi 'gyur la/ /zhes bya ba ni mos pas spyod pa'i gnas skabs kyi dbang du byas pa'o/ /bde 'gror yang rgyun mi 'chad par rnam par smin pa'i 'bras bu 'jug pa'o//tshogs yongs su rdzogs par mi byed par yang mi 'gyur ro zhes bya ba ni mchod pa'i bsod nams kyi tshogs chen po nyid mtshon par byed do/ /de dag gis ni ji ltar rigs pa'i rgyud dang 'bras bu'i che ba nyid yongs su gsal bar byas pa yin no//'ba' zhig gi sgra'i don ni thun mong ma yin pa'i don du blta bar bya'o/ /'ba' zhig gi sgra gnyis pa ni de bzhin gshegs pa'i mchod rten gcig bzhengs pa'i 'ba' zhig go/ /de la de bzhin gshegs pa thams cad kyi mchod rten du byin gyis brlabs pa ni shin tu khyad par du 'phags pa'i 'bras bu thun mong pa'o//bdag gis byas pa'i mchod pa bstan pa'i phyir bdag nyid kyi rang gi lag gis nye bar bzung nas te/ nyes pa'i dbang gis gzhan byed du bcug pa ma yin pa'o/ /de nyid bstan pa'i phyir le lo la sogs pa la brten te zhes bya ba la sogs pa/lus kyi le lo dang / sems kyi snyom las bdag por byas nas zhes pa'i tha tshig go/ /bya ba ngan pa dang 'brel pa'i nyes pa dang / bag med pa'i nyes pa'i gnas kyis te/ de lta bus kyang kun nas nyon mongs pa can gyi mchod pa yin no/ /ma dang pha la sogs pa sngon du 'gro bar byas nas byed du bcug pa dang /de bzhin du sems can thams cad yongs su gzung ba'i phyir dngos po sngon du 'gro bar byas pa yin gyi yongs su gzung ba'i dngos po 'ba' zhig ni ma yin te/ /'on kyang de las gzhan pa'i sems can gyi dngos po sngon du 'gro bar byas nas zhes bstan pa'i phyir rgyal po rnams dang zhes bya ba la sogs pa la/de ltar khyim pa gzhan byed du bcug pa'o/ /de lta bu'i 'byor pa dang longs spyod mang po yod pa'i tshul bstan nas/ chung ba rnams kyi lugs bstan pa'i phyir/ /dngos po chung ngu yod pa zhes bya ba'o/ snying rje dang ldan pa'i zhes bya ba la/sems can la brtse ba bdag por byas nas zhes bya ba'i tha tshig go/ /sngon bsod nams ma byas pas tshe 'di la sdug bsngal bar gyur la/ tshe 'di la bsod nams ma byas pas phyi ma la de bzhin du sdug bsngal bar 'gyur gyi zhes bya bar shes nas snying rjes de mngon du gyur pa rnams la mchod pa byed du 'jug gi byang chub sems dpa' rang nyid ni ma yin no zhes bya ba'o//de la bdag nyid kyis mchod pa gang yin pa de ni mchod bya'i dngos po'i che ba'i bdag nyid kyis 'bras bu chen po nyid do/ /gzhan gyis mchod pa gang yin pa de yang 'bras bu chen po nyid de/ phyogs gcig tu lhung ba yin yang mchod bya'i dngos po dang / mchod pa po'i dngos po'i khyad par gyis so/ /gnyi gas byas pa gang yin pa de ni gnyi ga'i phyogs su gyur pas bsod nams kyi 'bras bu chen po nyid du 'gyur pas sngar bstan pa'i mchod pa bas shin tu khyad par du 'phags pa yin pas gong na med par rig par bya'o zhes bya ba'o//rnyed pa dang bkur sti'i mchod pa'i dbang du byas nas smras pa/ na bza' dang zhes bya ba la sogs pa la/ phyi'i dngos po yongs su gtong bas rab tu phye ba ni rnyed pa'i mchod pa'o/ /nang gi bdag nyid lus kyi 'gyur ba la sogs pas byas pa ni bsnyen bkur gyi mchod pa'o//de bzhin gshegs pa'i mchod rten la mngon par phyag 'tshal ba dang / thal mo sbyor ba dang / 'dud pa la sogs pas bsdus pa ni gnyi ga'i rnam pas yin par rig par bya ste/ bsnyen bkur gyi bya bas yongs su bsdus pa nyid do//da ni bsnyen bkur bya ba'i dngos po rnams kyis yang dag par mchod par bya ba rnyed pa'i mchod pas bsdus pa bstan par bya ba'i phyir/ bdug pa'i spos rnams dang zhes bya ba la sogs pa la/ g.yas phyogs su skor ba dag gis zhes bya ba ni skor ba byed pas mchod pa'o//de lta bur rgyal mtshan dang / ba dan la sogs pa'i mchod pa yongs su btang ba'i dngos po'i longs spyod kyi sgo nas rnam pa sna tshogs pa dang / zad mi shes pa can gyi sbyin pa dang zhes bya ba ni grong dang shing la sogs pa gtan zad par mi 'gyur ba'i dngos po rab tu sbyin par byed pa'o//rin po che'i mchod pa bstan pa'i phyir rin po che rab tu sbyin pas bsdus pa ni nor bu dang / mu tig ces bya ba la sogs pa'o/ /rgyan gyi mchod pa ni snyan cha gdub kor dang zhes bya ba la sogs pa'o/ /tha mar gyur pa'i rin po che'i mchod pa bstan pa'i phyir/ tha na dril bu 'bul ba dang //zhes bya ba la sogs pa'o/ /shin tu dman pa'i rgyan gyi mchod pa bstan pa'i phyir srad bus dkri ba rnams kyis mchod pa byed pa zhes bya ba'o/ /rnam pa bdun gyis yongs su bsdus pa'i rgya che ba'i mchod pa rnam pa bzhi bstan pa'i phyir dngos po chung ngu yang dus ring du mchod pa la zhugs pas rtag tu byed pa'i sbyor bas dus rgya che ba'i phyir rgya che ba nyid de/gang gi phyir smras pa/ yun ring por mchod pa byed de zhes bya ba'o/ /lan cig nyid yin na yang mchog tu gyur pa'i dngos po nye bar 'bul bas rab tu phye ba nyid de/ dngos po mang po'i sgo nas mchod pas dngos po rgya che ba'i phyir rgya che ba'o//dngos po gcig cig gtong ba'i sgo la zhugs pa yin na yang yid du 'ong ba dang / rin che ba'i dngos po yongs su gtong ba la zhugs pa yang dngos po gong na med pa'i phyir rgya che ba zhes bya ba'o/ /bya ba rgya che bas rgya che ba ni mngon du gyur pa la mchod pa nas gzhan byed du bcug pa'i bar dag la gcig tu der zhen pas byas pa'i phyir ro//mos pa drag pos byas pa ni bsam pa rgya che bas rgya che ba nyid do/ /rgya che ba'i dngos po thams cad rgya che ba nyid du yongs su bsngo bar bya ba'i phyir smras pa/ dge ba'i rtsa ba de yang zhes bya ba la sogs pa'o/ / nyes pa drug rnam par spangs pa'i kun nas nyon mongs pa can ma yin pa'i mchod pa rnam pa drug bstan pa'i phyir bag med pa dang / le lo'i nyes pa spangs pa ni rang gi lag gis zhes bya ba la sogs pa'o/ /sbyin pa la khyad du gsod pa'i nyes pa spangs pa'i phyir gus pas byed de zhes bya ba'o/ /rnam par g.yeng ba'i nyes pa spangs pa'i phyir//sems mi g.yeng bas byed ces bya ba'o/ /rnyed pa dang bkur sti'i nyes pa spangs pa'i phyir sems kun nas nyon mongs pa can ma yin pas zhes bya ba'o/ /grags pa dang / sgra dang / tshigs su bcad pa'i nyes pa spangs pa'i phyir tshul 'chos pa'i phyir mi byed pa zhes bya ba'o//dngos po dman pa'i skyon spangs pa'i phyir mthun pa'i dngos pos mchod pa byed de zhes bya ba'o/ /dngos po dman pa ni dam pa ma yin te/ 'jig rten gyis mngon par 'dod par bya ba ma yin pa dman pas mos pa'i lha la sogs pa mchod pas rab tu phye ba nyid do/ /yo byad rung ba ma yin pa zhes bya ba ni chang dang sha la sogs pa'o//ji skad bstan pa'i rnyed pa dang bkur sti'i mchod pa ni sgro gsum nas 'jug pa'i nye bar mkho ba'i khyad par yin no zhes bstan pa'i phyir smras pa/ rang gi zho shas bsgrubs pa rnams sam zhes bya ba la sogs pa la/ rang gi zho shas bsgrubs pa zhes bya ba ni chos dang mthun pa nyid du bstan pa yin te/ma byin par len pa yongs su spangs pa'i phyir ro/ /gzhan las yongs su btsal ba rnams sam shes bya ba ni chos dang mthun pa thob pa yin te/ /log par 'tsho ba rnam par spangs pa'i phyir ro/ /yo byad la dbang thob pa rnams kyi zhes bya ba ni mthu dang nus pa khyad par can thob pa zhes bya ba'i don to//dbang thob par gyur pas yongs su tshol ba'i ngal ba rnam par spangs pa'i phyir lus dang longs spyod rgya chen po thob pas rgya che bar bstan pa'i phyir/ lus gnyis sam zhes bya ba la sogs pa la/ mngon par sprul nas zhes bya ba ni bdag nyid kyi lus so/ /lha'i las yang dag par 'das pa'i me tog ces bya ba ni lha dang mi thams cad kyi bsod nams las shin tu 'das pa mthu khyad par can las skyes pa'o/ /bstod pa shin tu rgya chen po zhes bya ba ni bdag dang gzhan gyi don gyi rnam pa thams cad sgrub par byed pa mtshon par byed pa'o//'jig rten gyi khams thams cad du 'gro ba la dgag pa med pa'i phyir sangs rgyas 'byung ba don du gnyer mi dgos so/ /de'i phyir smras pa/ thogs pa med par 'gro ba'i phyir ro zhes bya ba'o/ /thams cad kyi thams cad du mchod pa'i yo byad med par gyur na mchod pa la mkhas pa'i bsod nams 'phel bar bya ba'i thabs bstan pa ni 'dzam bu'i gling la sogs pa 'jig rten gyi khams thams cad kyi khyad par ni yul rgya chen po khyab par 'jug pa'i mchod pa rnams de bzhin gshegs pa thams cad kyi mchod par yongs su gzung nas chung ngu dang /'bring dang / chen po'i bye brag gis nus pa ji lta ba bzhin du 'jug par byed do/ /dga' ba dang ldan pa dang zhes bya ba ni 'gran pa dang phrag dog spangs nas ji ltar rang gi bsod nams kyis mgu zhing dga' ba bzhin du gzhan gyi bsod nams byas pa la dga' bar bya ba'i tha tshig go//rgya chen po la mos pa dang ldan pa zhes bya ba ni bsod nams rgya chen po yongs su gzung bar nges par byas nas sbyar bar bya'o zhes bya ba yin no/ sdig pa so sor bshags pa dang / bsod nams la rjes su yi rang ba dang / sangs rgyas rnams la gsol ba btab pa dang / yang dag par rdzogs par byang chub pa'i ye shes zhes bya ba'i lam rnam pa bzhi ni bsod nams chen po yongs su 'dzin pa'i thabs kyis rab tu phye ba yin pa'i phyir smras pa yin no/ /sgrub pa'i mchod pa bstan pa ni rnam pa brgyad de/ tshad med pa bzhi bsgom par bya ba nyid kyis dang / 'dus byas kyi nyes dmigs bsgom pa nyid kyis dang / mya ngan las 'das pa'i phan yon mthong bas dang / dkon mchog gsum dang byang chub sems dpa'i lam rjes su dran pa bsgom pa nyid kyis dang / chos bdag med pa yid la byed pa bsgom pa nyid kyis dang /byang chub sems dpa'i bslab pa gsum yang dag par blangs pas dang / byang chub kyi phyogs kyi chos rnams dang mngon par mi 'bral ba'i bya ba nyid kyis dang / pha rol tu phyin pa bsdu ba'i dngos po la sbyar bas so/ /zang zing gi mchod pa bas sgrub pa'i mchod pa chen po nyid du bstan pa'i phyir/mchod pa de'i brgya'i cha dang zhes bya ba la sogs pa'o/ /chos la mchod pa dang / dge 'dun la mchod pa yang de dang 'dra bar ci rigs par rig par bya'o zhes bya ba la/ mchod rten la mchod pa ma gtogs pa lhag ma chos la mchod pa dang / dge 'dun la mchod pa brjod par bya'o/ /lhag pa'i bsam pa dang ldan pa ni sngar bstan zin to/ /bsam pa de'i dbye ba bstan pa'i phyir/ /drug gis byed de zhes bya ba la/ yon tan gyi zhing gi lhag pa'i bsam pa ni bsod nams kyi zhing bla na med pa yin pa'i phyir ro/ /phan 'dogs pa'i lhag pa'i bsam pa rnam pa thams cad kyis shin tu phan 'dogs pa sgrub par byed pas rab tu phye ba'i phyir ro//mchog tu gyur pa'i lhag pa'i bsam pa ni sems can thams cad kyi dam par gyur pa'i phyir ro/ /dkon pa'i lhag pa'i bsam pa ni res 'ga' zhig rnyed pa'i phyir ro/ / 'ga' zhig pa'i lhag pa'i bsam pa ni stong gsum gyi stong chen po'i 'jig rten gyi khams su gcig pu 'byung ba'i phyir ro/ /rton pa'i lhag pa'i bsam pa ni 'jig rten dang 'jig rten las 'das pa'i don gyi rnam pa thams cad kyi yon tan rton pa'i phyir ro/ /de'i chos sam de'i nyan thos kyi dge 'dun la mchod pa byas pa ni zhes bya ba ni chos dang dge 'dun la yang ste/chos dang dge 'dun la yang lhag pa'i bsam pa de nyid kyis mchod par bya ba yin pa ni ston pa dang / bstan pa dang / slob ma'i 'brel pas so/ /rnam pa bdun nyid kyis dge ba'i bshes gnyen du rnam par gzhag par bya ste/yan lag rnam par gzhag pa dang / bya ba don yod pa rnam par gzhag pa dang / dad pa'i gzhi'i gnas la gnas par bstan pa nyid dang / dge ba'i bshes gnyen gyi bya ba nyid nges par bstan pa nyid dang / dge ba'i bshes gnyen la brten pa nyid dang chos mnyan pa'i bya ba bstan pa nyid dang /yid la mi bya ba'i gnas bstan pa nyid do/ /yan lag rnam pa brgyad ni gzhan la phan gdags pa'i phyir 'jug pa'i rgyu dang / ldog pa'i rgyu rnams med pa nyid kyi dbang du byas nas rnam par gzhag pa'o/ /rnam pa bzhis gzhan la phan 'dogs pa la 'jug par 'gyur te/tshig gzung bar 'os pa nyid dang mang du thos pa nyid dang / rtogs pa dang ldan pa nyid dang / sems can gyi don 'dod pa nyid do/ /rgyu rnam pa bzhis gzhan la phan 'dogs pa las ldog par 'gyur te/ rgyu rnam pa bzhi dang ldan du zin kyang spobs pa med pas 'jigs pa dang /sdug bsngal bzod par mi nus pa nyid dang / ngal ba dang yid yongs su skyo ba mang ba nyid dang / ngag gi brjod pa ma tshang ba nyid do/ /de dag las bzlog pa'i rgyu bzhi dang ldan pa las ni gzhan la phan 'dogs pa las ldog par mi 'gyur ro//yang yan lag rnam pa brgyad kyis dge ba'i bshes gnyen gyi yon tan rnam pa gsum gsal bar bstan pa yin te/ tshig gzung bar 'os pa dang / gzhan gyi don sgrub par byed pa'i yon tan dang ldan pa dang / gzhan don sgrub pa'i byed pa dang ldan pa ste/ yan lag gcig dang /gsum dang / bzhi dang go rims bzhin no/ /tshul khrims la gnas pa ni tshig gzung bar 'os par 'gyur ro/ /byang chub sems dpa'i tshul khrims kyi sdom pa legs par blangs pa'i phyir tshul khrims rnams la gnas pa'o/ /de'i rjes su bsrung ba'i phyir ma nyams pa'o/ / nyes pa byung ba phyir 'chos pa'i phyir skyon med par byed pa'o/ /de ltar na yang dag par blangs pa dang / bsrung ba dang / phyir bcos pas tshul khrims la gnas par gsal par bstan pa yin no/ /lung gi chos mang du thos par byas na blos rtogs nas ni mang du thos pa zhes bya ste/ byang chub sems dpa'i sde snod las brtsams nas chos gang dag gis byang chub sems dpa'i lam mngon par brjod pas rjod par byed la/de lta bu'i chos mang du thos par gyur la gzung zhing brjod nas yid kyis legs par dpyad de lta bas rab tu rig par byas pa de lta bu ni mang du thos pa zhes bya'o//zhi gnas dang lhag mthong bsgom pa dang ldan pa ni rtogs pa dang ldan pa zhes bya ste/ bsam gtan dang po nas 'du shes med 'du shes med min skye mched kyi bar du dang / byams pa la sogs pa tshad med pa bzhi dang / byang chub sems dpa'i ting nge 'dzin sna tshogs pa de lta bu thob pa ni zhi gnas thob pa zhes bya'o//mi rtag pa'i 'du shes nas 'gog pa'i 'du shes kyi bar du thob pa de lta bu ni lhag mthong thob pa zhes bya'o/ /sems can rnams la phan pa dang bde ba'i bsam pa dang ldan pa'i phyir snying brtse ba'i bsam pa can zhes bya ba'o/ /bdag nyid la ltos pa med par gzhan la phan pa sgrub par byed pa ni snying rje dang ldan pa'o//des na smras pa/ rang gi bde ba yal bar dor nas zhes bya ba la/ rang gi nyams su myong ba'i bde ba yongs su btang nas gzhan gyi don la sbyor ba zhes bya'o/ /dran pa nyams pa med pa dang / so so yang dag par rig pa zad pa med pas chos ston pa na bag tsha ba med pa yin pa'i phyir 'jigs pa med pa yin zhes bya'o//gzhan gyi gnod pa byas pa bzod pas bzod pa can du bstan pa'i phyir brnyas kyang rung / 'phyas kyang rung / bstings kyang rung / ngan du brjod kyang rung 'gyur ba mi bskyed par gzhan gyi don la sems par byed pa dang /khros pa la lan du mi khro ba yin/ gzhan gyis smod cing tshig ngan pa brjod pa'i bar du byas kyang gzhan dag la khro bar yang mi byed la yid kyis kyang log par mi sems so/ /brdeg pa la sogs pas kun du skyo bar mi 'gyur te/ lus kyi mthu thob pa'i phyir ro/ / so sor rtog pa'i stobs kyis yid yongs su mi skyo ba yin no zhes bya ba ni so sor rtog pa mang pa nyid do/ /de'i phyir smras pa/ /ngal ba med pas zhes bya ba la sogs pa la/ dge ba'i tshig yin pa'i phyir rdzogs pa zhes bya ba la sogs pas rgyas par 'chad par 'gyur ro/ /mdor bsdu na chos nyid las ma nyams pa'i ngag dang /slu ba med pas rgyun chags su 'byung ba dang / yi ge gsal bas gsal ba nyid do/ /de lta bu'i yan lag brgyad dang ldan pa'i dge ba'i bshes gnyen ni rnam pa thams cad kyis gzhan gyi don byed par nus so zhes bstan par 'gyur ro/ / bya ba don yod pa yin te zhes bya ba ni nges par phan bsgrub par byed pa'i phyir ro/ /don yod pa rnam pa lnga po 'di dag ni sngar bstan pa'i yan lag gi rjes su 'brangs nas shes par bya'o/ /snying brtse ba can ni phan pa dang bde bar 'dod pa'o/ /mang du thos pa ni yang dag pa ji lta ba bzhin du rab tu shes pa'o//rtogs pa dang ldan pa ni blo phyin ci log tu mi 'gyur ba'o/ /'jigs pa med pa dang / gsal ba'i tshig nyid ni thabs gang dang / chos bstan pa'i tshul gang gis sems can gang 'dul nus pa zhes bya ba yin no/ /ldang ba phun sum tshogs pa ni yid yongs su mi skyo ba yin no//bzod pa dang ldan pa'i phyir phyogs su ma lhung ba'o/ /de ltar na bsam pas don 'dod pa yin pa nyid dang / bstan pa'i tshul phun sum tshogs pas lung dang rtogs pa dag gi don ji lta ba bzhin mkhyen pa nyid dang / 'dul ba'i thabs mkhyen pa dang / brtson 'grus brtsams pa nyid dang /sems snyoms pa nyid yongs su gsal bar byas pa yin no/ /mthong ba dang thos pas kyang sems mngon par dang bar byed na zhes bya ba ni dad par bya ba'i gnas su bstan pa yin te/ sems rab tu zhi ba'i phyir spyod lam rab tu zhi ba phun sum tshogs pa ste/ yan lag mi 'gyur bas rab tu mdzes pa nyid do//lus la sogs pa'i las rab tu zhi ba'i phyir dbang po rnams zhi zhing mi g.yo bas brtan pa ste/ lus dang ngag dang yid g.yo ba med pa'i phyir ro/ /gzhan las rnyed pa la sogs pa la ltos pa med pa'i phyir tshul 'chos pa med pa yin no/ /rnyed pa dang bkur sti yongs su bsgyur pa dang /yongs su thob pa'i gang zag la phrag dog med pa yin te/ ji ltar bdag nyid kyis rnyed pa dang bkur sti thob pas dga' ba de bas ches gzhan gyis thob na dga' bas phrag dog med pa'o/ /de ltar na bsam pa nyid dang / sbyor ba nyid kyis phrag dog med pa gsal bar bstan pa yin no//zang zing la shin tu 'dod pa ma yin pas yo byad bsnyungs pa yin no/ /yo byad bsnyungs pa nyid kyang rnyed do cog thams cad yongs su gtong bas zhes bya bas bstan pa yin no/ /lhag pa'i tshul khrims kyi tshul khrims nyams pa dang / spyod pa nyams pa'i dbang du byas nas mthong ba la sogs pa'i tshig gi lam lngas skul bar byed pa ni gleng bar byed pa zhes bya'o//ltung ba'i chos sam/ chos rnams dran par byed pa ni dran par byed pa zhes bya'o/ /rab tu dben pas ji srid du zhi gnas dang lhag mthong phyin ci ma log pa'i gdams ngag ston pa ni 'doms par byed pa yin no//chos dang 'dul ba las yang dag par bstan pa rnams las 'das pa las shes na spyo ba nas bskrad pa'i las kyi bar du byed pa ni bya ba dang bya ba ma yin pa dag la spyad kyang rung / ma spyad kyang rung / byas pa dang ma byas pa dag la ston par byed pa dang / rjes su ston par byed pa zhes bya'o//dus dang dus su sngon gyi dus su byas pa'i gtam dang / yang dag par 'byin par byed pa'i gtam gyis sems can yongs su smin par byed pa dang / rnam par byang ba dang ldan pa'i tshig dang yi ge nas mkhas par gyur pa'i bar gyi lam gyi tshogs kyi chos rab tu ston par byed pas na chos ston par byed pa yin zhes bya'o//'di lta ste/ nyan thos kyi sa las rig par bya'o zhes bya ba la ji ltar rtogs par bya zhe na khyad par rgyas par ni stobs kyi rigs kyi le'u las rig par bya'o zhes bstan pa yin no/ /dge ba'i bshes gnyen la brten pa ni rnam pa bzhis yongs su rdzogs par rig par bya ste zhes bya ba la dge ba'i bshes gnyen bsten par bya ba ni dge ba'i bshes gnyen mi slu ba ste/dge ba'i bshes gnyen yang dag par bsgrubs pas mnyes par byed ces bya ba'i tha tshig go/ /rnam pa bzhi nyid mdor bsdu na mchod pa rnam pa gnyis su gsal bar bstan te/ sgrub pa'i mchod pa dang / zang zing gi mchod pa'o/ /sgrub pa'i mchod pa ni na ba dang mi na ba'i dus su g.yog bya ba'i spyod pas so/ /sbyin pa ni gos la sogs pa'o/ /sdud pa'i las bya ba ni brtse ba dang gus pas nye bar bsdus pa ste/ sgrub pa'i mchod par rig par bya'o/ /chos dang mthun pa shes bya ba ni chos dang mi 'gal ba'i don rnams la bdag nyid yang dag par sgrub par byed pa ni yang dag par gzung ba zhes bya'o//rnam par gzung ba ni bla ma'i bka' sgrub par byed pa'o/ /don la dbang byed pa ni de bzhin du nan tan byed cing bla ma'i bka' mi gcog pa'o/ /de dag gnyi ga la gus pas sgrub par byed pa ni rnam par mi g.yo ba zhes bya'o//bdag nyid kyi skyon mi 'chab pa ni 'chags pa'o/ /shes par bya ba'i bsam pas zhes bya ba ni shes par 'dod pas drung du 'gro ba dang / bsnyen bkur byed pa ni phyag 'tshal ba la sogs pa'i bya bas rjes su 'jug pa'o//'dri ba ni the tshom gcad pa'i phyir ro/ /nyan pa ni des gsungs pa rnams so/ /legs par bshad pa ni 'ga' zhig res 'ga' rnyed par 'gyur gyi rtag tu ni ma yin te/ u dum+Wa ra'i me tog bzhin no zhes bya bas rnyed par dka' bar bstan to/ /de ltar na lus dang srog dang longs spyod ni rnyed par sla ba yin la/legs par gsung ba ni rnyed par dka' ba yin pas des na de dag la ltos pa med par byas la chos mnyan pa la rab tu sbyar bar bya'o zhes bstan pa yin no/ /'phags pa'i shes rab kyi mig thob pa'i rgyu yin pa'i phyir mig tu gyur pa yin te/ chos mnyan pas phra ba dang rgya che ba'i don mthong ba dang /ma 'ongs pa na skye bas thob pa'i shes rab thob par 'gyur bas zhes bya bas so/ /snang pa ni lhan cig skyes pa'i mig thob tu zin kyang de gong du shes bya'i don ji lta ba bzhin du gsal por rab tu ston pa ste/ 'bras bu dang phan yon chen po'i mya ngan las 'das pa'i go 'phang gi rgyu yin pa'i phyir ro//chos thos pa ni mya ngan las 'das pa dang / rdzogs pa'i byang chub dag kyang yang dge par rab tu 'byed pa'i zhi gnas dang lhag mthong dag gi kha na ma tho ba med pa'i dga' ba'i rgyu yin pa'i phyir dga' ba kha na ma tho ba med pa'i 'du shes so/ /yid la byed pa mi bya'o zhes bya ba la/'bad pa dang bcas pas mi bya'o zhes bya ba'i tha tshig go/ /tshul khrims 'chal pa nyid dang / rigs dman pa nyid dang / byad ngan pa nyid dang / tshig 'bru ngan zhing legs par sbyar ba ma yin pa nyid yin na yang don la brten par bya ba yin pa'i phyir ro/ /khro zhing snyan par smra ba ma yin pa nyid yin na yang yid la byed par mi bya ste de'i rgyu bstan pa'i phyir/chos ni nam yang gang zag gi skyon gyis skyon can du mi 'gyur pa'i phyir te/ gang zag kyang gzhan yin la chos kyang gzhan yin pa'i phyir ro/ /de'i phyir gang zag gi skyon gyis chos skyon can du mi 'gyur te/ des ni chos kyi skyon med par bstan pa yin no//de'i phyir gang zag gi skyon gyis sems sun 'byin par gyur pa'i byang chub sems dpa' shes rab dman pa dag chos nyan par mi byed do/ /ma mnyan pas bdag nyid phan pa ma yin pa la 'jug par 'gyur te/ shes rab las yongs su nyams pa dang ldan par 'gyur ro zhes nye bar brtags nas gnas lnga la yid la byed pa med par chos mnyan pa la 'bad par bya'o//tshad med pa bsgom pa'i byang chub sems dpa' ni rnam pa gnyis te/ so so'i skye bo rnams dang thun mong ma yin pa'o/ /de'i phyir smras pa/ ji ltar zhes bya ba la sogs pa la/ bzhi'i ming bstan pa'i phyir byams pa dang zhes bya ba la sogs pa'o//rnam pa gsum du zhes bya ba ni byang chub sems dpa' mdor bsdus nas kun rdzob kyi tshul dang don dam pa'i tshul la brten nas tshad med pa rnams bsgom par bya ba nyid do/ /kun rdzob kyi tshul ni mos pas spyod pa'i gnas skabs kyi de kho na ma rtogs pa'i tshe ste//sems can rnams bde bar gyur cig ces yid la byas nas tshad med pa rnams sgom par byed pa'o/ /gang gi phyir smras pa/ sems can la dmigs pa dang zhes bya ba'o/ /don dam pa'i tshul gyis rab tu dbye ba ni rnam pa gnyis te/ gang zag la bdag med pa mthong ba'i stobs kyis bsgom pa ni chos la dmigs pa zhes bya'o//chos la bdag med pa mthong ba'i stobs kyis goms par byed pa ni dmigs pa med pa zhes bya'o/ /de ltar na rnam pa gsum mo/ /tshad med pa bzhir rnam par gzhag par bya ba ni dmigs pa'i dbye bas rnam par gzhag pa nyid do/ /tshogs gsum du rnam par bzhag nas zhes bya ba la sogs pa'o//ngo bo nyid rnam par gzhag pa ni bde ba bsgrub pa'i lhag pa'i bsam pa dang zhes bya ba'o/ /khyad par nyid du rnam par gzhag pa ni gang yang smras pa/ phyogs bcu khyab par byas nas zhes bya ba'o/ /yid la byed pa'i khyad par rnam par gzhag pa nyid ni gang gi phyir smras pa sems can la mos pas gnas pa zhes bya ba'o//de ltar na tshul dang pos tshad med pa rnams mos pas rab tu phye ba bstan te/ mos pas sems can rnams bde bar gyur cig ces dmigs pa'i phyir ro/ /tshad med pa bzhi rnam pa'i dbye bas dbye bar bya'o/ /rnam pa'i dbye ba yang dmigs pa'i dbye ba med pa ma yin zhes bya bas dmigs pa'i dbye ba rnam par gzhag par bya'o//gal te sdug bsngal yang ma yin bde ba yang ma yin pa'i sems can la dmigs pa byams pa yin na/ mdo las sems can thams cad la byams pa'i sems bsgom par bya'o zhes bya ba ji lta bu zhe na/phyogs kyi dbye ba dang / gnas kyi dbye ba'i dbang du byas nas zhes bya bar dgongs pa'o/ /sdug bsngal yang ma yin bde ba yang ma yin pa'i sems can rnams bdag gi phyogs la sogs pa rnam pa gsum du 'gyur te/ dgra dang / gnyan bshes dang /tha mal pa'o/ /sems can de dag gi gnas kyi dbye ba yang nam mkha'i khams kyi mthar thug pa'i 'jig rten gyi khams dpag tu med par gtogs pa de dag thams cad la dmigs pa'o/ /de'i phyir smras pa/ phyogs bcu khyab par byas nas zhes bya ba'o/ /chos tsam du 'du shes dang ldan pa ni gang zag la bdag med par rab tu rtogs pa bdag gis dben pa'i gzugs la sogs pa mthong ba'i phyir ro//sems can du 'dogs par bsam pa thag pa nas mthong ste zhes bya ba ni sems can du tha snyad du btags pa zhes bya ba'i don to/ /de dag gis ni sems can zhes mos par mi bya bar bstan to//de ltar na yang de'i gnas skabs kyi chos la bde ba'i bsam pas nye bar sgrub par byed do/ /de'i phyir smras pa/ byams pa nyid sgom par byed pa de ni zhes bya ba ni de dag thams cad bde bar gyur cig ces yid la byas nas chos la dmigs pas sgom par byed kyi sems can du mos pas ni ma yin no//chos de dag kyang byis pas yongs su brtags pa'i rnam par rtog par mi byed pa'o/ /chos tsam la yang mngon par zhen pa med pa de lta na yang bde ba nye bar bsgrub cing sbyin par 'dod pa ni byams pa'o/ /de bzhin du snying rje la sogs pa'i tshul yang rig par bya'o/ /da ltar gyi sdug bsngal bsal bar 'dod pa'i bsam pa ni snying rje ste/bsam pa thag pa nas sdug bsngal bsal bar 'dod pa nyid do/ /de bzhin du bde ba dang bral bar ma gyur cig ces don du gnyer ba ni dga' ba'o/ /de'i phyir bde ba la rjes su yi rang ba'i lhag pa'i bsam pa dga' ba dang ldan pa zhes smras pa yin no//sems can gyi tshogs gsum gyi so sor nges pa'i kun nas nyon mongs pa bsal bar 'dod pa ni btang snyoms te/ bde ba dang ldan pa rnams la rjes su chags pa med par ston pa dang / sdug bsngal ba dang ldan pa rnams la khong khro ba med par ston par byed cing khro ba med par byed pa dang /sdug bsngal yang ma yin bde ba ma yin pa dang ldan pa'i sems can rnams la so sor ma brtags pa'i btang snyoms mi byed pas kun du rmongs par mi 'gyur ro/ /de ltar kun nas nyon mongs pa med pa'i btang snyoms su gnas pa nyid kyis de dag kyang de dang bral bar 'dod par byed de nyon mongs pa bsal bar 'dod pa'i lhag pa'i bsam pa zhes bya ba la/'di dag 'dod chags la sogs pa dang bral bar gyur cig ces yid la byas nas btang snyoms sgom par byed do/ /gzhan dag dang thun mong pa bstan par bya ba'i phyir gzhan mu stegs can dang thun mong pa yin no zhes bya ba ni so so'i skye bo dang thun mong pa ste/ji ltar sems can du lta ba la mngon par zhen pa so so'i skye bo rnams sgom par byed pa de bzhin du byang chub sems dpa' yang sgom par byed pa'o/ /ji ltar nyan thos la sogs pa dag bdag med pa la mngon par zhen pa de bzhin du byang chub sems dpa' rnams kyang zhes bya bas de dag dang thun mong pa'o//rnam par rtog pa'i spros pa thams cad dang bral du zin kyang phan pa dang bde ba'i bsam pas nye bar sgrub pa'i ngo bo ni thun mong ma yin pa'o/ /bde bar bya ba'i lhag pa'i bsam pas bsdus pa zhes bya ba ni bde ba ma skyes pa sgrub par 'dod pa dang / sdug bsngal skyes pa bsal ba'i bde ba sgrub par 'dod pa dang /bde ba skyes pa rnams gnas par rjes su yi rang ba'i rnam pa dang go rims bzhin no/ /phan par bya ba'i lhag pa'i bsam pas bsdus pa zhes bya ba ni kun nas nyon mongs pa rnam par spang ba'i bsam pa'i rnam pa yin pa'i phyir ro/ /de'i phyir tshad med pa bzhi la snying brtse ba zhes brjod do//de dag kyang phan pa dang bde ba'i mtshan nyid can gyi lhag pa'i bsam pa yin la snying brtse bar yang de'i mtshan nyid can yin pa'i phyir ro/ /de'i phyir tshad med pa thob pa'i phyir byang chub sems dpa' la snying brtse ba can zhes brjod do/ /nyan thos la sogs pa'i snying rje ni sdug bsngal gyi sdug bsngal tsam la dmigs pa'i phyir snying rje chen po ma yin no//byang chub sems dpa' rnams kyi ni sdug bsngal gyi rnam pa thams cad kyi dbye ba la dmigs pa'i phyir snying rje chen po yin no zhes bstan pa'i phyir smras pa/ sdug bsngal rnam pa brgya rtsa bcu mthong bas zhes bya ba la/ lnga bcu rtsa lnga dang lnga bcu rtsa lnga pa'i rnam grangs rnam pa gnyis kyis rnam par gzhag par bya'o//rnam grangs dang po lnga bcu rtsa lnga bstan pa'i phyir sdug bsngal rnam pa gcig ni zhes bya ba la sogs pa la rnam pa gcig ces bya ba ni 'dus byas thams cad du gtogs pa'i bye brag med pa'i spyi'i sdug bsngal ni 'jug pa'i sdug bsngal zhes brjod do//de'i phyir smras pa/ sems can thams cad 'jug par gtogs pa'i sdug bsngal dang ldan pa'o zhes bya ba brjod do/ /'dod chags dang gti mug gi rgyus go rims bzhin du 'gyur ba'i sdug bsngal dang / sdug bsngal gyi sdug bsngal gyi dbang du byas nas sdug bsngal gyi rnam pa gnyis ni 'dun pa'i rtsa ba can zhes bya ba la/gang la 'dun pa'i 'dod chags yod pa ste 'gyur ba ste gzhan du gyur pa las mya ngan la sogs pa'i sdug bsngal lo/ /de sngon du 'gro ba yin pas na 'dun pa'i rtsa ba can zhes bya'o/ /'gyur ba rnam pa brgyad ni ji ltar nyan thos kyis las bstan pa yin no//de dag las dus kyis yongs su 'gyur ba ni 'gyur ba'i sdug bsngal lo/ /lhag ma ni gzhan du 'gyur ba'o/ /byis pa mi mkhas pa'i rang bzhin can dag lus la sdug bsngal gyi reg pa skyes par gyur pa na rmongs par 'gyur ro zhes bya ba so/ /de ni kun du rmongs pa'i rnam par min pa'i sdug bsngal te/gang la kun du rmongs pa'i rnam par smin pa'i sdug bsngal yod pa de ni kun du rmongs pa'i 'bras bu zhes bya ba'i tha tshig go/ /ji skad du bcom ldan 'das kyis dge slong dag byis pa so so'i skye bo thos pa dang mi ldan pa dag lus kyis sdug bsngal gyi reg pa'i tshor ba myong bar gyur pa na mya ngan gyis kun du rmongs pa'i dbang du 'gyur ro zhes gsungs pa yin no//de'i phyir smras pa/ tshor ba drag po gang dag gis zhes bya ba la sogs pa la/ zug rngu gnyis zhes bya ba ni lus kyi dang / sems kyi sdug bsngal rnam pa gnyis kyis gnod ba'o/ /sdug bsngal gsum gyi tshul gyis sdug bsngal rnam pa gsum pa nyid do//rnam pa bzhi mdor bsdu na rnam pa gnyis su rnam par gzhag par bya ste/ bral ba'i sdug bsngal dang / kun du rmongs pa'i sdug bsngal gyi dbang du byas pa'o/ /de la bral ba'i sdug bsngal yang rnam pa gnyis te/ 'dod pa dang bral ba las byung ba gang yin pa de ni dang po'o//'tsho ba dang bral ba las byung ba gang yin pa de ni gnyis pa'o/ /gzhan yang rnam pa gnyis te/ dus re zhig pa'i skye ba gcig nas gcig tu brgyud pa'i sdug bsngal gang yin pa de ni des na smras pa/ skye ba gcig nas gcig tu brgyud pa zhes bya ba'o/ /skye ba thams cad du gtan sdug bsngal ba gang yin pa de ni bzhi pa'o//rnam pa lnga ni kun nas dkris pa'i sgrib pa rnam pa ldas byas pa ste/ ji skad du mdo gzhan dag las/ 'di na 'ga' zhig 'dod pa la 'dun pas kun nas dkris pa'i rkyen gyis sdug bsngal dang yid mi bde ba rab tu myong bar 'gyur ro zhes bya ba nas/ de bzhin du the tshom gyi rkyen gyis zhes bya ba'i bar du'o//rnam pa drug tu rnam par gzhag pa ni nyes par spyod pa byed pa rnams kyi rgyu dang 'bras bu'i dbye ba dang / longs spyod bsgrub pa la sogs pa'i dbang du byas pa'o/ /sdug bsngal rnam pa bdun ni sdug bsngal gyi bden pa bstan pa'i tshig rnams las phyi ma rtsa ba'i sdug bsngal ma gtogs pa rnams so//sdug bsngal rnam pa brgyad ni dus yongs su gyur pa las byung ba dang / 'byung ba yongs su gyur pa las byung ba dang / lhan cig skyes pa dang / byed pa dang bcas pa'i sdug bsngal dang / gnas pa'i sdug bsngal gyi dbang du byas pa'o/ /dang po dang gnyis pa ni rnam pa gnyis gnyis su dbye ba'o//gsum pa ni rnam pa gcig nyid do/ /bzhi pa ni rnam pa gnyis so/ /gzhan gyis byas pa yang rnam pa gnyis te/ gzhan gyi bsam pa sngon du song nas byas pa dang / reg pa nyams su myong ba sngon du song ba las byung ba'o/ /rnam pa dgu ni dngos po'i dbye ba dang /bye brag gi dbye ba dang / gnas skabs kyi dbye ba'i dbang du byas pa'o/ /dngos po'i dbye ba yang rnam pa gnyis te/ bdag dang gzhan no/ /gzhan gcig pu yang rnam pa gnyis te/ sdug pa'i sems can dang dngos po'i dbye bas so/ /gang gi phyir smras pa/ nye du rgud pa'i sdug bsngal dang zhes bya ba'o//bdag nyid rgud pa'i dbang du byas pa ni rnam pa gsum ste/ 'bras bu dang rgyu'i dbye bas so/ /nad med pa ni rnyed pa'i mchog ces bya ba'i tshig gis de rgud pa ni 'bras bus bsdus pa'o/ /tshul khrims dang lta ba rgud pa ni rgyus bsdus pa'o/ /gnas skabs kyi dbye ba yang rnam pa gnyis te/tshul khrims kyis phongs pa dang / lta bas phongs pa'i sdug bsngal gnyis ma gtogs pa gzhan dag ni tshe 'di pa'o/ /de gnyis ni tshe gzhan pa'o/ /rnam pa bcu ni lus kyi yo byad bcus phongs pa'i dbye ba ste/ /de ltar lnga bcu rtsa lngar bstan to/ /yang sdug bsngal ni zhes bya ba la sogs pa la/rnam grangs gnyis pas lhag ma sdug bsngal rnam pa lnga bcu rtsa lnga rnam par gzhag pa'i phyir bstan te/ yang zhes bya ba ni rnam grangs gzhan gyi sdug bsngal rnam pa dgu rnam par gzhag pa ste/ /mdor bstan pa rnam par dbye ba nyid ni sdug bsngal gyi rgyu ma lus par yongs su 'dzin pa nyid dang /sdug bsngal thams cad rnam par gzhag pa'o/ /sdug bsngal gyi rgyu yang rnam pa gnyis te/ 'das pa'i skye bar sngon bsags pa'i las kyis bskyed pa gang yin pa'i rnam par smin pa'i 'bras bu sdug bsngal du 'gyur ba dang / tshe 'di'i rang gi rkyen gyis yongs su gzung ba ste/gang las rgud pa'i sdug bsngal gyi 'bras bu 'byung bar 'gyur ba'o/ /dus la sogs pa chen po dang ldan pas sdug bsngal rnam pa bzhi ni sdug bsngal chen po'o/ /'gro ba thams cad kyi sgo nas zhugs pa'i phyir thams cad kyi sgo nas te/ ji ltar rigs par sbyar ro/ /bdag nyid kyis lus dang ngag dang yid kyis ngan par spyod pa las skyes pa ni log par zhugs ba'i sdug bsngal lo//yang log par zhugs pa de ni dngos po rnam pa drug tu shes par bya ste/ sems can gzhan gyis byas pa ni gang gi phyir smras pa/ gzhan gyis gnod pa byas pa dang zhes bya ba la sogs pa la/ gzhan gyis gnod pa byas pa bshad pa ni gzhan la gnod pa byas pa las byung ba zhes bya ba ste/ gzhan dag la mi 'dod pa'i gnod pa byas pa las byung ba zhes bya ba'i tha tshig go/ /byang pas byed pa pos thob bo zhes bstan pa'i phyir smras pa/ gnod pa byas pa las byung ba dang zhes bya ba la rang nyid ldang ba'i phyir kun nas slong ba'o/kha zas mi mthun pa zos pas khams ma snyoms pa las byung ba ni nad sna tshogs kyi sdug bsngal zhes bya ba'i don to/ /bdag nyid kyis mi rigs par sdug bsngal bar byas pa las zhes bya ba ni bsod nams ma yin pa la bsod nams kyi blos spyod par byed pa dang /rang gi rnam par rtog pa'i dbang gis phyin ci log tu yid la byed pa mang ba las nyon mongs pas kun nas dkris pa'i rkyen gyis sdug bsngal so sor myong bar 'gyur ba las 'byung ngo / /nyes par spyod pa mang du spyad pas rgyu des ma 'ongs pa na ngan 'gro'i sdug bsngal thob par 'gyur ro/ /'jug pa'i sdug bsngal ni 'khor ba na nges pa med pa'i bya bas gnas skabs gzhan du gyur pa'i tshul gyis yongs su gyur pa dang ldan pa na sngon gyi gnas skabs btang nas gnas skabs gzhan thob par 'gyur ba'o/lus ma nges pas zhes bya ba ni bdag la nges pa med pas zhes bya ba'i tha tshig go/ /mi 'dod pas byas pa'i sdug bsngal ni 'dod pa'i phun sum tshogs pa rnam pa bdun las bzlog pa'i rgud pa nye bar thob pa ste/tshe ring ba phun sum tshogs pa 'dod pa las de las bzlog pa'i mi 'dod pa'i sdug bsngal thob par 'gyur ba dang / de bzhin du gzhan dag la yang sbyar bar bya ste/ gzugs phun sum tshogs pa dang rigs phun sum tshogs pa dang /longs spyod phun sum tshogs pa dang / stobs phun sum tshogs pa dang / shes rab phun sum tshogs pa dang / rnam par rgyal ba phun sum tshogs pas te/ phun sum tshogs pa ni 'di dag go/ /gang ci yang rung ba'i rnam pas mi 'dod pa dang phrad pa ni phongs pa'i sdug bsngal zhes bya ste/de yang khyim pa rnams kyi ni yongs su bzung ba'i dngos po nyams par gyur pa las byung ba'i sdug bsngal dang / mu ge byung bas nye bar gnod pa'i bkres pa'i sdug bsngal dang / gzhan gyis gnod pa byas pas rnam par nyams pa'i sdug bsngal dang / gcong rong du zhugs pa'i sdug bsngal dang /'tsho ba nyams pa'i sdug bsngal dang / yan lag nyams pa'i sdug bsngal dang / gzhan gyis mi 'dod pa byas pa'i yan lag bcing ba dang gcad pa la sogs pa las byung ba'i sdug bsngal gyi dbang du byas pa'o/ /sems can thams cad dang thun mongs pa gang yin pa ni rjes su 'brel pa las byung ba'i sdug bsngal te/dngos po med par gyur pa ni 'jig pa'o/ /ma lus par gyur pa ni zad pa'o/ /dngos po gzhan du gyur pa ni rga ba'o/ /khams ma snyoms par gyur pas yongs su gnod pa ni na ba'o/ /ris mthun pa'i lus 'dor ba ni 'chi ba'o/ /'dod pa'i don ma thob pa ni ma rnyed pa'o/ / gyi tshig nas smra ba ni grags pa ma yin pa'o/ /mngon sum du skyon smra ba ni dmod ba'o/ /gzhan dag las ma 'ongs pa'i don thob par 'dod pa ni sdug bsngal lo/ /bdag dang gzhan gyi don gyi le'ur ji skad bstan pa'i bde ba rnam pa lnga po rgyu bde ba nas bde ba'i tshor ba dang mthun pa'i dbang po la sogs pa nas bde ba'i las kyi rnam par smin pa'i bar ro//de dag las bzlog pa'i sbyor bas ni rgyu'i sdug bsngal lo/ /tshor ba bde ba ni lus dang sems tshim par byed pa'i bde ba'i tshor ba'o/ /zas la sogs pa longs spyad pa las byung ba'i bde ba ni bkres skom gyi sdug bsngal ldog pas rab tu phye pa yin no//de las bzlog pa ni zas la sogs pa longs spyad pa las byung ba'i bde ba med pa tsam gyi sdug bsngal zhes bya'o/ tshor ba rgyun mi 'chad pa'i sdug bsngal ni bde ba las bzlog pa'o/ /mngon par 'byung ba'i bde ba ni khyim na gnas pa'i sdug bsngal dang bral ba'o/ /de las bzlog pa ni khyim na gnas pa'i sdug bsngal zhes bya'o//rab tu dben pa'i bde ba ni 'dod pa dang sdig pa mi dge pa'i chos spangs pa'i dben pa bsam gtan dang po'i dga' ba'o/ /de las bzlog pa ni 'dod pa'i sdug bsngal lo/ /nye bar zhi ba'i bde ba ni rtog pa dang dpyod pa nye par zhi pa'i bsam gtan gnyis pa la sogs pa'o//de las bzlog pa ni rtog pa dang dpyod pas rnam par dkrug pa'i sdug bsngal zhes bya'o/ /mngon par byang chub ba'i bde ba ni nyon mongs pa thams cad gtan du spangs par gyur pa'o/ /de'i mi mthun par gyur pa ni so so'i skye bo'i sdug bsngal zhes bya'o/ /bzhi po 'di dag gcig tu byas pa ni lnga pa'o//yang rnam pa lnga ste/ gnod pa las byung ba ni gcig la sogs pa sngar bstan pa rnams so/ /yo byad med pa las byung ba ni lus kyi yo byad med pa las byung ba'o/ /khams ma snyoms pa las byung ba ni mi mthun pa'i longs spyod dregs pa las byung ba'o/ /dga' ba 'gyur ba las byung ba ni yid du 'ong ba gzhan du gyur pa las byung ba'o//nyon mongs pa'i phyogs gnas ngan len las skyes pa ni 'du byed kyi sdug bsngal lo/ /rnam pa bcu po 'di dag ni rnam pa thams cad ces bya'o/ /de ltar na mdor bstan pa rnam pa dgu'i bshad pa las brtsams nas sdug bsngal lnga bcu rtsa lnga'o//gnyi ga bsdoms na sdug bsngal brgya rtsa bcu yin no/ /de dag la dmigs nas mos pas spyod pa'i gnas skabs na snying rje skye bar 'gyur ro/ /rnam par 'phel ba ni sa dang sa dag la'o/ /yongs su rdzogs pa ni mthar thug pa'i sa dag la'o/ /sdug bsngal gyi phung po ni ji skad bstan pa'i sdug bsngal gyis yongs su bsdus pa'i sdug bsngal rnam pa bcu dgu la dmigs nas yang dang yang du snying rje 'jug par 'gyur ro//de lta bu'i sdug bsngal de dag ni zab pa la sogs par shes par bya'o/ /ji ltar rigs par dbye ba dang de dag gis zab pa ste/ cha phra ba'i phyir ro/ /cha phra ba nyid kyang rtogs par dka' ba'i phyir ro//tshor ba'i sdug bsngal ni tshor ba gang ci yang rung ba de ni sdug bsngal ba'o zhes bya bas so/ /rgyu rnam pa bzhis zhes bya ba ni chen po bzhi dang ldan pas na snying rje chen po zhes bstan pa yin no/ /chen po rnam pa bzhi'i dmigs pa chen po nyid ni gang gi phyir smras pa/ zab cing cha phra la zhes bya ba la sogs pa'o//dus chen po nyid ni gang yang smras pa/ yun ring po nas zhes bya ba la sogs pa'o/ /yid la byed pa chen po nyid ni gang gi phyir smras pa/ rtsol ba drag pos dmigs pa zhes bya ba la sogs pa'o/ /de ltar 'bad pa med par snying rjes non pa'i byang chub sems dpa' rnams sems can gcig gi don du yang bdag nyid dang /bdag gi lus dang nye bar mkho ba thams cad yongs su btang nas bdag nyid sdug bsngal gyi rnam pa thams cad yongs su 'dzin par byed do/ /'di dag gis ni bdag nyid la ltos pa med pa dang / lhun gyis grub pa'i khyad par can gyi snying rje sems can rnams la skyed par byed do zhes bstan pa yin no//rnam par dag pa chen po nyid ni gang gi phyir smras pa/ shin tu rnam par dag pa yang yin te zhes bya ba la rnam par dag pa ni mthar thug pa'i sa thob pa'i byang chub sems dpa' rnams kyis ni snying po la yod pa'i sgrib pa spangs pa'i phyir ro//de bzhin gshegs pa ni bag chags dang bcas pa spangs pas so/ /byang chub sems dpa'i snying rje thams cad ces bya ba ni sems can dang / chos dmigs pa med pa'i snying rje'o/ /yang na bstan ma thag pa'i snying rje thams cad do/ /snying rje'i bsam pa rnam par dag bzhes bya ba ni snying rje bsgom pa zhes bya bar bsams pa'o//sems shin tu mnyen pa ni sems can rnams yongs su mi gtong ba'i bsam pa nyid do/ /byams pa'i sems ni kha na ma tho ba med pa'i 'dod pa'i bde ba nye bar bsgrub pa'i bsams pa'o/ /byed 'dod pa'i sems ni phan pa dang bde ba nye bar bsgrub pa'i bya ba brtsams pa'i bsam pa nyid do//skyo ba med pa'i sems ni bar du ldog par mi 'gyur ba'i bsam pa nyid do/ /sdug bsngal nyams su len pa'i sems ni sems can gyi sdug bsngal nyams su len pa'i bsam pa nyid do/ /las su rung ba'i sems ni sems can thams cad kyi bran gyi bsam pas gnas pa'o//de ltar mi 'jug go zhes bya ba la sogs pa la/ 'phags pa nyan thos skyo ba dang ldan pa'i sems kyis legs par bsgoms pas bden pa mthong ba'i gang zag dag gi rgyud kyi sdug bsngal zhi bar bya ba'i phyir thar par 'jug pa de bas ni byang chub sems dpa' sems can gyi rgyud kyi sdug bsngal bsal bar bya ba'i phyir dang /rnam par grol bar bya ba'i phyir myur du 'jug par byed do/ /de ltar snying rje bsgoms pa'i byang chub sems dpa'i pha rol tu phyin pa drug kyang yongs su rdzogs par 'gyur ro zhes bstan pa'i phyir smras pa/ gang ci yang yongs su mi gtong ba med do zhes bya ba la sogs pa la pha rol tu phyin pa yongs su rdzogs pa ni snying rje'i rtsa ba las yin la pha rol tu phyin pa rdzogs par gyur na ni yang dag par rdzogs pa'i byang chub thob pa'i phyir dang byang chub ni snying rje la gnas pa'i byang chub sems dpa' yin no zhes bstan pa'i phyir/tshad med pa phun sum tshogs pa zhes bya ba la byang chub sems dpa' kho na'i tshad med pa phun sum tshogs pa yin gyi gzhan dag gi phun sum tshogs pa ma yin no//phun sum tshogs pa zhes bya ba ni 'bras bu tshad med pa yongs su 'dzin pa dang / rnam pa tshad med pa dang ldan pa dang / phan yon gyi khyad par tshad med pa dang ldan pa'i phyir ro/ /bskal pa dpag tu med par 'dod pa'i 'bras bu rgyun mi 'chad pa ster par sbyor ba'i phyir 'dod pa'i 'bras bu yongs su 'dzin pa yin no//ji skad bstan pa'i sdug bsngal rnams la dmigs pa nyid ni tshad med pa'i rnam pa'o/ /rnam pa de dag gzhan la phan pa dang bde ba'i lhag pa'i bsam pas yongs su goms par byas pa'i phyir dge zhing kha na ma tho ba med pa zhes bya'o//phan yon rnam pa bzhi ni tsho 'di pa nyid kyi yin gyi gzhan gyi ni ma yin no/ /rten dang brten pa'i khyad par dang sbyor bas te/ tshe 'di la bde bar gnas pa ni rten gyi khyad par gyis dug dang mtshon la sogs pa'i gnod pas mi tshugs pa'o/ /brten pa'i khyad par ni tshangs pa'i gnas kyis yongs su bsdus pa'i sems dang sems las byung ba'i 'jug pa'o/bsod nams tshad med pa yongs su sdud pa'i phyir bsod nams kyi tshogs tshad med pa yongs su 'dzin pa'o/ /brtan par 'gyur ba ni sems can rnams la phan pa dang bde ba'i bsam pa legs par bsgoms pa'i phyir ro/ /de nyid kyi phyir bdag nyid la ltos pa med par bsgrubs pa dang ldan pas sdug bsngal nyams su len par 'gyur ba'o//mchod pa dang bshes gnyen bsten pa dang / tshad med pa bsgom pa'i le'u ste bcu drug pa'i 'grel pa rdzogs so// //ngo tsha brtan dad mi skyo dang / /zhes bya ba la sogs pa'i sdom gyi tshigs su bcad pa rnams kyi 'grel pa ni sngar/gang la ji ltar gang dag slob/ /ces bstan pa de las gang la ji ltar slob pa ni bstan nas gang dag slob pa ma bstan pas de'i dbang du byas nas smras pa/ byang chub sems dpa' rnam pa bcu gnyis yongs su rdzogs pa la slob bo zhes chos kyi sdom 'di dag bstan pa yin te/ngo tsha brtan pa ni chos kyi mdo rnam pa bzhi'i bar la slob par 'gyur ro zhes rig par bya'o/ /ngo tsha shes pa dang khrel yod pa ni rnam pa gnyis su gzhag par rig par bya ste/ rang gi mtshan nyid dang / dmigs pa'o/ /de'i phyir rnam pa gnyis su rig par bya ste zhes bya ba smras te/ sangs rgyas dang byang chub sems dpa' rnams kyis dmad cing brjod par rigs pa ma yin pa ni kha na ma tho ba dang bcas pa'o//yang de ni mdor bsdu na dngos po nyid ni rnam pa gnyis te/ byang chub sems dpa'i ldog pa'i tshul khrims dang / 'jug pa'i tshul khrims las brtsams nas bya bar 'os pa mi byed pa dang /bya ba ma yin pa byed pa'o/ /yang de dag las nyes pa byas nas phyir mi 'chos pa las brtsams nas rnam pa gnyis ni kha na ma tho ba dang bcas pa'i dngos po zhes bya'o/ /bzhi po 'di dag ni gnas zhes bya ste/ de la gnas ni ngo tsha shes pa dang khrel yod pa 'jug par 'gyur ro zhes bya ba'o/ /de la ji skad bstan pa'i kha na ma tho ba'i bya ba kun du spyod pa ni bdag gi zhes bya ba ni bdag nyid kyi dbang du byas nas te/bdag nyid la ltos nas 'di ni bdag dang mthun pa ma yin no zhes shes par byas nas so/ /'dzem pa ni sems rab tu bag tsha ba dang sems 'khums pas sems ldog par byed pa'o//gzhan dag la zhes bya ba ni 'jig rten la ltos nas te/ ji ltar ltos nas she na/ 'jigs shing gus pas so/ /'jigs pa ni mngon du gyur pa dang mngon du ma gyur kyang gus pa dang bcas pas ngo tsha ba dang / da byas kyis dogs pa'o/ /de ltar na 'di gnyis ni ltos pa'i dbye bas tha dad kyi ngo bo la ni tha dad pa med do//rang bzhin nyid kyis zhes bya ba ni rigs kyi rtags kyi dus na yang shas che ba yin na sems bskyed pa rnams kyi ni shin tu yang che bar gyur pa yin no/ /de bzhi ni rang gi mtshan nyid dang / rang gi mtshan nyid kyi khyad par nyid kyis rang gi ngo bo bstan par byas pa yin no/ /re re yang dpag tu med pas mdor bsdu na gang smras pa byang chub sems dpa'i bya ba zhes bya ba ni bya ba la 'jug pa'i tshul khrims gang yin pa'o//de la nan tan mi byed pa ni mi sgrub pa'o/ /des 'dzem pa gang yin pa de ni zhes bya ba ni ngo tsha ba'o/ /bya ba ma yin pa ni ldog pa'i tshul khrims so/ /de la nan tan byed pa ni de dbye ba nyid dang dngos po'i gnas dang rnam pa gnyis so//nyams par 'gyur ba rnam pa gnyis bstan pa'i phyir/ /bdag nyid kyi sdig pa 'chab pa la zhes bya ba ni tshul khrims de dag la nyams su mi len pa dang nyams su len pa la chos bzhin du mi bsgrub pa la 'dzem pa dang / de las 'das pa gzhan la mi ston pa ste/bdag nyid ji lta ba bzhin du gzhan la mi ston pa de la khrel yod pa'o/ /bdag nyid 'gyod pa skyes pa gzhan la ston du zin kyang rton pa dang bcas par bstan te/ bshags pa mi byed par yun ring du nyes pa dang bcas par 'jug pa ni gnas bzhi pa'o/ /de bzhin du nyes pa byung ba gzhan la ston pa dang /mthol nas bshags pa mi byed pa ni yang gnas gnyis zhes brjod do/ /mi g.yo ba ni mi sprul pa nyid do/ /de'i brten pa nyid ni mi mthun pa'i phyogs kyis zil gyis mi non pa nye bar bzung nas te/ mdor bsdus nas spyod pa dang / gnas pa gnyis bstan pa yin no//spyod par gtogs pa yang rnam pa gsum ste/ kun nas nyon mongs pa ma skyes ba mi bskyed pa nyid ni gang gi phyir smras pa nyon mongs pa can gyi sems yang dag par sdom pa dang zhes bya ba ni brtan pa dang brtan pa'i stobs bskyed pa zhes bya ba ste/ thams cad kyi thams cad du kun nas nyon mongs pa can gyi sems mi bskyed pa ni mi g.yo ba zhes bya ba'i tha tshig go//nyon mongs pa skyes pa rnams dang lhan cig mi gnas pa nyid ni gang yang smras pa/ nyon mongs pa'i dbang du mi 'gro ba dang zhes bya ba la ci zhig ltar skyes par gyur na yang de'i dbang gis mi gnas pa ste/ nyon mongs pa'i dbang du gyur nas gnas par mi 'gyur zhes bya ba'i don to//dge ba'i phyogs la rab tu sbyor ba grang ba la sogs pa'i sdug bsngal nyams su myong bas mi g.yo ba zhes bya ba ni sdug bsngal dang du len pa'i dang tshul can zhes bya ba'o/ /gnas su gtogs pa ni dben par gnas pa na 'jigs shing skrag pa rnam pa sna tshogs du ma sgo sna tshogs par 'jug par 'gyur ba'i zhing mang ba'i sdug bsngal thams cad kyi sgo nas shin tu drag pa myong bar gyur kyang 'jigs par mi 'gyur zhing sbyor ba las ldog par mi byed pa'o//brtan pa nyid kyi rgyu bstan pa ni/ rang bzhin gyis snying stobs dang ldan pa'am zhes bya ba la sogs pa la/ rang bzhin gyis snying stobs zhes bya ba ni 'dod chags dang bral ba rnams kyi bsgoms pa'i stobs so//so sor brtags pa'i stobs bskyed pa ni 'dod chags dang ma bral ba rnams kyi'o/ /yang chos gsum shin tu lhag par 'jug cing 'byor par gyur pa ni snying stobs zhes bya ste/ 'di lta ste shes rab dang / snying rje dang / brtson 'grus so/ /de dag nyid chen por gyur pa thob par gyur pa ni rang bzhin gyis snying stobs dang ldan pa ste brtan pa nyid do/ /rnam pa sna tshogs dang zhes bya ba ni skye ba la sogs pa'i sgo nas 'jug pa ste/ de lta bu'i bdag nyid kyi 'khor ba'i sdug bsngal gyis gnod par gyur kyang sgrub par byed pa las mi g.yo ba'o zhes bya bas sdug bsngal dang phrad pa ni gnas dang po'o//sems can rnams kyi log par sgrub pa ni gnyis pa'o/ /sems can gyi don du 'khor bar gnas par bdag nyid kyis khas len pa ni gsum pa'o/ /pha rol gyi rgol ba dag gis rang gi phyogs rnam par gzhag pa'i sgo nas de rgyal bar gyur pas bdag gi phyogs sun phyung bas mthar thug par byas kyang chos ston pa la yang lus dang sems kyi 'gyur pa mi bskyed cing brtan pa nyid ni bzhi ba'o//bsam gyis mi khyab pa'i byang chub sems dpa'i bslab pa thams cad khas blangs pa dang / byang chub sems dpa'i mthu dang /de kho na'i don gyi dbang du byas nas chos zab mo thos pa ni lnga pa'o/ /de ltar na sdug bsngal nyams su myong ba dang / sems can gyi log par sgrub pa dang / 'khor ba'i sdug bsngal khas blangs pa dang / pha rol gyi rgol bas brtsad kyang 'khor gyi nang du chos ston pa dang byang chub sems dpa'i sgrub pa'i chos dang /lung gi chos kyi dbang du byas nas gnas rnam par gzhag pa yin no/ /yid yongs su mi skyo pa nyid ni lus kyi dal du ba dang sems skyo ba med pa la brten pa dang / sbyor ba brtsams pa la brtan nas ldog par mi 'gyur ba'o/ /rgyu rnam pa lnga ni rten gyi khyad par dang / sbyor ba'i khyad par dang / bsam pa'i khyad par gyi dbang du byas nas rnam par gzhag pa yin no/ /rten gyi khyad par ni lus stobs dang ldan pa ste/ gang gi phyir smras pa/ rang bzhin gyis stobs dang ldan pa yin te zhes bya ba'o/ /des na lus nyam chung ba'o zhes bya ba nas phyir mi ldog pa'o zhes bya bar ro/ /sbyor ba'i dbye pa la yang rnam pa gsum ste/goms pa'i sbyor ba ste/ rigs pa'i sbyor ba dang / so sor brtags pa'i sbyor ba'o/ /dang po'i dbang du byas nas smras pa/ yang dang yang du goms par byas pa zhes bya ba la/ dus ring por goms par byas pa de'i rang bzhin du gyur pas de la chags shing gnas skabs de las mi ldog pa'o//rigs pa'i sbyor ba'i bye brag yang dag par mthong bas kyang ldog par mi 'gyur ro/ /brtags shing brtags shing yang brtsams pa las ldog par mi 'gyur ro/ /bsam pa ni sems can rnams la snying rje'i sems te/ snying rje'i stobs kyis nye bar gzung bas sems can gyi don las ldog par mi 'gyur pas snying rje can ni skyo bar mi 'gyur ro zhes byas nas so//mdor bsdu na bstan bcos shes pa ni yi ge la mkhas pa dang don la mkhas pa'i dbang du byas nas bstan bcos shes pa rnam par gzhag par bya'o/ /yi ge la mkhas pa ni gzhan dag las phyin ci ma log pa'i yi ge thos pa nyid de/gang gi phyir smras pa/ gzhan las legs par gzung ste zhes bya ba la/ thos pa legs par gzung bas na gang gi phyir smras pa/ kha don legs par byang ba yin/ /zhes bya ba'o/ /shes rab rnam pa gsum thob pa ni don la mkhas pa'o/ /phyin ci ma log pa'i don thos pa las byung ba ste/gang gi phyir smras pa/ legs par thos pa yin zhes bya'o/ /phyin ci ma log pa'i don rigs pa dang ldan pas legs par bsams shing legs par brtags pa ni bsams pa las byung ba'o/ /ming dang tshig thos pa 'dzin pa nyid ni chos shes pa zhes bya'o/ /don thos pa dang sems pa ni don shes pa zhes bya ste thos pa gsal bar bya ba'i phyir dang /ma thob pa thob par bya ba'i phyir bsam pa'i sbyor ba dor bar mi 'gyur ro/ /de'i phyir smras pa/ gong nas gong du shes par bya ba'i phyir zhes bya ba la de ltar na thos pa dang / bsam pa'i shes rab mthar thug par 'gyur ro/ /de'i phyir smras pa/thos pa dang bsam pa'i mthar thug pa zhes bya ba'o/ /yongs su smin pa ni bsgoms pa las byung ba'i shes rab thob pa'o/ /dad pa thob pa ni lhag par mos pa ste/ chos dang don mngon par rtogs pa'i rjes su zhugs pa'i phyir dang / phas kyi rgol ba thams cad kyis mi bzlogs pa'i phyir ro//tshad med pa ni rig pa'i gnas lnga'i rjes su 'jug pa'i phyir ro/ /yongs su rdzogs pa ni chos dang don thos pa dang bsam pa mi 'dor ba'o/ /phyir ci ma log pa nyid ni yongs su smin pa'o/ /mdor bsdu na sems can dang / snod kyi 'jig rten yongs su shes pa ni 'jig rten gyi rjes su 'jug pas na 'jig rten shes pa zhes bya ste/rnam pa bzhis sems can dang / snod kyi 'jig rten yongs su rig par 'gyur ba ni sems can dang snod kyi 'jig rten 'jug pa nyid dang / rnam pa brgyad kyis 'jig rten rnam par brtag pa'i don nyid dang / 'jig rten gyi don dam pa nyid dang / de sems can gyi 'jig rten de la snying rje'i mig gis rnam par bltas pa nyam nga bar zhugs pa ste/nyam nga ba'i gnas skabs thob pa mgon med pa dus ring por 'khor ba'i sdug bsngal la rjes su zhugs par mthong nas ston par byed de/ nyam nga ba zhes bya ba ni bstan pa'i tshig go/ /skye yang skye zhes bya ba ni ngan 'gro thob bas bcos su med pa'i 'gro ba thob par bstan pa'o//rga yang rga zhes bya ba ni yid du 'od ba'i lang tsho las yongs su nyams par bstan pa'o/ /'chi yang 'chi zhes bya ba ni 'tsho ba nyams par 'gyur pa'o/ /de ltar 'dod pa'i khams kyi dbang du byas nas bstan nas gzugs dang gzugs med pa'i dbang du byas nas smras pa/'chi 'pho yang 'chi 'pho/ skye yang skye mod kyi zhes bya ba la/ ma thob ba mi thob pa dang / thob pa brtan pa med pa ni nyam nga bar zhugs pa thob par bstan to/ /mgon med pa dang skyabs med par bstan pa ni nges par 'byung ba yang dag pa ji lta ba bzhin du rab tu mi shes so zhes bya ba la/ de ltar na rang gis grol bar bya ba ni nus pa ma yin no zhes bya bas mgon med pa dang /skyabs med pa yin no/ /yang 'jig rten gyi 'byor pa dang / phongs pa rnams kyang shes so zhes bya bar smras pa/ sems can gyi 'jig rten zhes bya ba la sogs pa la bkus te bor ba lta bur gyur pas na snyigs ma zhes bya ste/ shin tu smad par bya'o//tshe'i snyigs ma ni tshe thung ba nyid do/ /sems can gyi snyigs ma ni yang dag pa'i sgrub pa las nyams pa'o/ /nyon mongs pa ni bzad pa'i dbang gis nyes par spyod pa zhes bya ba'o/ nyon mongs pa'i snyigs ma zhes bya'o/ /phyin ci log gi chos don du nges par 'dzin pa ni lta ba'i snyigs ma zhes bya'o//bar gyi bskal pa dang nye ba'i chos la kun du spyod pa ni bskal pa'i snyigs ma'o/ /tshe'i snyigs ma'i dbang du byas nas smras pa/ 'tsho ba yun thung ste zhes bya ba la sogs pa la/ /mi rnams ni zhes bya ba ni 'dzam bu'i gling pa rnams te/ /gzhan dag gi tshe ni nges par gnas pa nyid yin pas so/ / bla ma dang / bla ma'i gnas lta bu dag la rim gro med pa dang / rang gi las kyi mtha' la bsod nams kyi las kyi bya ba la nan tan mi byed pa ni sems can gyi snyigs ma zhes brjod do/ /tshig 'di dag gi don ni sngar bstan pa bzhin no/ /da ltar gyi mi phal cher ni chos ma yin pa la 'dod chags pa dang / mi mthun pa la chags pas mngon par zil gyis mnan pa dang log pa'i chos su gtogs pa zhes bya ba'i mdo'i tshig ni dum bu gnyis su byas te gnyis dang gcig gis te nyon mongs pa'i snyigs ma dang lta ba'i snyigs ma smras pa/de la chos ma yin pa la 'dod chags pa ni tshul bzhin ma yin pa'i yid la byed pa'i yul gyi longs spyod dang /'dod pa la log par spyod pa dang ldan pa'o/ /mi mthun pa la chags pa ni chos ma yin pas longs spyod tshol ba ste/ /chom rkun la sogs pa'i las kyis gzhan gyi nor len pa'o/ /des kun nas blang ba'i lus la sogs pa'i nyes par spyod pa bstan pa'i phyir/ /mtshon cha thogs pa dang zhes bya ba la sogs pa'o//dge ba ma yin pa'i sdig pa can gyi chos kun du spyod pa ni/ nyon mongs pa'i snyigs ma zhes bstan to/ /dam pa'i chos 'jig par 'gyur ba ni dam pa'i chos yongs su nyams shing nub pas lhag ma ma lus par nub par gyur pa'o/ /chos ltar bcos pa zhes bya ba ni de'i gzugs brnyan ltar snang ba ste/de dang 'dra ba zhes bya tha tshig ste/ /'di lta ste gzhi bsdu ba las bstan pa bzhin no/ /phyin ci log gi lta ba sngon du 'gro ba'o zhes bstan pa'i phyir smras pa/ log pa'i chos ki don spyod pa sngon du 'gro ba zhes bya ba'o/ /bar gyi bskal ba dag nye bar gyur te zhes bya ba ni shin tu drag pa'i mu ge zhes bya ba'i tha tshig go//phal cher snang do zhes pa ni bar skabs par skabs su 'byung ba'o/ /'jig pa ni nyams par 'gyur ba'o/ /'chags pa ni 'byung bar 'gyur ba'o/ /chags pa yang chags nas 'di snyed cig tu gnas so/ /bya ba yang shes so/ /'chags pa yang dag pa ji lta pa bzhin du zhes bya ba ni de bzhin du 'jig pa yang shes par bya ba yin pas me dang chu dang rlung gis zhes bya bar shes pa ste/de'i rim gyis 'jig par 'gyur ro zhes bya bar rab tu shes pa'o/ /'jig rten ni nye bar len pa'i phung po lnga'o/ /kun 'byung ba ni sreg pa'o/ /'gog pa ni mya ngan las 'dag pa'o/ /kun 'byung bar 'gyur ba ni chags pa'i dga' ba'o//'gog par 'gyur ba'i lam ni 'phags pa'i lam yan lag brgyad pa'o/ /ro myang ba ni gang 'jig rten la rab tu grags pa'i bde ba dang yid bde bar tshor ba'o/ /de la mi rtag pa la sogs pa nyid ni nyes dmigs so/ 'dun pa'i 'dod chags spangs ba ni nges par 'byung ba'o//mi nyid kyi mdo'i rjes su 'brangs nas don dam pa bstan te/ de las bstan pa ni mig dang gzugs la brten nas mig gi rnam par shes pa skye bar 'gyur ro/ /gsum 'dus par gyur pa las ni reg pa'o/ /reg pa las byung ba'i tshor ba dang 'du shes dang sems pa'i bar du 'byung ngo //de bzhin du yid dang chos la brten nas sems pa'i bar du ste zhes bya ba la gzugs can ma yin pa'i phung po bzhi dang 'byung ba chen po bzhi las gyur pa gzugs kyi phung po 'di dag la mi nyid ces bya'o zhes bya ba'o/ /de la bdag gam sems can zhes bya ba'i 'du shes gang yin pa de ni zhes bya ba rgyas par 'byung ba yin no//de la gang bdag gis ni mig gis gzugs rnams mthong ngo zhes dam 'cha' ba gang yin pa de ni zhes bya ba la sogs pa rgyas par gsungs pa yin no/ /de la tha snyad gang yin pa 'di ni zhes bya ba ni ming 'di zhes bya ba la sogs pa rgyas bar 'byung ba'o/ /de ltar 'di dag ni 'du shes tsam dang dam bcas pa tsam dang /tha snyad tsam ste chos 'di dag thams cad ni mi rtag pa sems las byung ba rten cing 'brel par 'byung ba zhes bya'o/ /sems can gyi 'jig rten gyi 'jug pa zhes bya ba ni 'jug pa'i sdug bsngal dang ldan pa nyid do/ /snod kyi 'jig rten gyi 'jug pa zhes bya ba ni 'chags pa dang 'jig pa'o//nye bar brtags pa'i don rnam pa brgyad ni nye bar len pa'i phung po rtog pa dang / nye bar len pa'i tha snyad la brten pa dang / 'jig rten rnam par gzhag pa dang / 'jig rten gyi don dam pa nyid dang / ji ltar 'jig rten gyi shes pa de bzhin du de'i dbang du byas nas 'jig rten shes pa ston par byed do//yang ji ltar 'jig pa dang 'jug pa'i dbang du byas nas 'jig rten shes pa bstan pa yin no/ /sems can gyi dbye ba rnam pa bcu gcig la ci nus ci rigs kyis de lta de ltar yang dag par bsgrub pa dang / bdag nyid la yang dag par bsgrub pa ni 'jig rten shes pa zhes bya ba'o/ /dbye ba'i rnam pa bcu gcig gang dag ce na/khyad par du 'phags pa dang / mtshungs pa dang / dman pa dang / dman pa'i 'dod pa dang ldan pa dang / mtshungs pa dang / khyad par can thams cad 'dod pa dang ldan pa dang / dgra dang gnyen dang bar ma rnams rgud par gyur pa dang / mgon med pa dang /sems can gzhan dang / grogs rnams dang / gnod pa byed pa byed pa rnams so/ /mdor bsdu na khyad par rnam pa gnyis kyis khyad par du 'phags pa'i 'jig rten shes pa zhes bstan pa yin no/ /na tshod khyad par du 'phags pa ni ches rgan pa zhes pa'o/ /yon tan khyad par du 'phags pa ni ches yon tan gyis khyad par du 'phags pa'o//ngag gi las dang / lus kyi las dag las ngag gi las kyi dbang du byas nas smras pa/ legs par kun du smra bar byed/ /ces bya ba ste/ de dag 'tsham pa'i tshig smra bas nye bar sgrub par byed ces bya ba'i tha tshig go/ /lus kyi las rnam pa gnyis te sbyin pa dang / bstod pa'i dbye bas so/ /sbyin pa'i dbang du byas nas smras pa ni/ stan stobs par byed ces bya ba la sogs pa'o/ /bstod pa'i dbang du byas nas smras pa ni phyag 'tshal ba dang zhes bya ba la sogs pa'o/ /mtshungs pa la yang rnam pa gnyis te/ na tshod dang / yon tan gyis so/ /de la rnam pa gnyis kyis yang dag par sgrub par byed de/snying dga' bar byed pa'i tshig gis legs par smra bar byed pa dang / yid kyis bdag dang mnyam po yin zhes dpog pas ma gus par mi byed pa'o/ /dman pa yang rnam pa gnyis te/ na tshod dang / yon tan gyi rnam pas so/ /de la 'jig rten shes pa ni rnam pa bzhi ste/yon tan bskyed par 'dod pa nyid dang / yon tan yod pa la rjod par byed pa dang / skyon yod pa 'chab par byed pa dang / brnyas par mi byed pa nyid do/ /dman pa 'ga' zhig 'dod par gyur na de la yang ci nus kyis sgrub par byed pa ni rnam pa gsum du bstan par bya ste/ phyir phyogs par mi byed pa ni/gang gi phyir smras pa/ phyir phyogs shing khro gnyer mi byed pa zhes bya ba'o/ /bzhad gad dang dpyas mi byed pa ni/ 'khrul pa la yang 'phyas mi byed ces bya ba ste/ yang dang yang mi lta zhes bya ba'i tha tshig go/ /brnyas par yang mi byed pa ni dman par gyur pa la yang brnyas par mi byed pa'o//don 'dod pa de dag gsum char la yang rnam pa bzhis 'jig rten shes par 'dod par byed de/ gsong por smra ba'i tshig gis tshur shog bde bar 'ongs so zhes smra ba nyid dang / sbyin par dam bcas pas bsam pa yongs su rdzogs par byed pa ste/ gang yang smras pa/ ngal sor 'jug cing zhes bya ba ni/'dod pa zhi bar byed pas na ngal sor 'jug pa'o/ /khas blangs pa ltar byed pa zhes 'don pa de'i don ni 'di yin te/ ji ltar dam bcas pa de bzhin du sgrub par byed pa'o/ /de'i phyir smras pa ci nus kyis sdud par byed ces bya ba'o/ /'dod pa'i don du gnyer bas bslangs pa na bcos ma'i zab mo ltar bcos nas cang mi smra bar 'dug pa ste/gang gi phyir smras pa drod mi zin pa dang ldan par mi byed ces bya ba la sogs pa'o/ /yang na gya gyus zab pa ltar ston pa ste bcos pa'i zab pa ltar ston pa'o/ /phongs pa rnams la sgrub par byed pa bstan pa'i phyir/ yo byad thams cad dang zhes bya ba la sogs pa la/nye bar longs spyad pa thams cad kyis nye bar sgrub par byed pa'o/ /mthun pa'i lus dang / ngag gi las kyis kyang yal bar mi 'dor ro zhes sbyar bar bya'o/ /'dis ni sbyin pa'i spyod pa kun du tshol pa'i yang dag pa'i sgrub pa bstan to/ /grogs po la sogs pa'i dbang du byas nas smras pa/ thams cad kyang mdza' bo dang grogs por byed do zhes bya ba ni thams cad grogs po'i bya ba sgrub par byed pa ni/thams cad mdza' bo dang grogs por byed pa ste/ bdag nyid kyi sgrub pas phyir rgol ba med pa nyid ni/ phyir rgol ba dang bral bar gyur ba'o/ /mgon med pa'i dbang du byas nas smras pa mgon med cing rten med pa zhes bya ba la/mgon dang bcas pa'i gnas skabs su bya'o zhes bya ba'i tha tshig go/ /sems can gyi dbang du byas nas smras pa/ rnam grangs gang gis kyang zhes bya ba ni gang ci yang rung ba'i rnam par reg par mi gnas pa'i bsam pas sdug bsngal dang yid mi bde ba sgrub par mi byed do//na tshod kyi dbang du byas nas smras pa/ dgod par byed na yang ran par dgod par byed kyi ma 'os par dgod par mi byed pa'o/ /tshogs par mi 'byung ba'i tshig brjod par mi byed ces bya ba ni gang dang shin tu gcugs par gyur pa de la yang tshig mi snyan pa rjod par mi byed pa'o/ /de ltar na de dag 'jig rten shes pa yin no//gnod par byed pa rnams la bzod pa'i sgo nas 'jig rten shes pa bstan pa'i phyir gnod pa byas pa dag la yang khro bar mi bya ba yin pas/ gang gi phyir smras pa/ khro bar yang mi byed do zhes bya ba'o/ /khros su zin kyang tshig ngan pa smra bar mi byed pa'o zhes bstan pa'i phyir smras pa/mtshang sgrogs par yang mi byed do zhes bya ba'o/ /khro ba la slar khro bar mi bya zhing brdegs kyang slar brdeg par mi bya'o zhes bstan pa'i phyir smras pa/ gzhan dag gi lus dang ngag gis zhes bya ba la sogs pa'o/ /bstings su zin kyang zhes bya ba ni brdegs shing spyos kyang ngo / /de'i rgyu bstan pa'i phyir smras pa/chos nyid yid la byed pa'am/ byis pa'i rang bzhin can gyi gnod pa byed par brtags nas bzod pa la mang du gnas pa yin no zhes bstan pa'i phyir smras pa/ sems brtan zhing zhes bya ba la sngar ji lta ba de bzhin du gnod pa byas pa'i dus su yang lus la sogs pas bzod pas bzod pa bstan pas mi rgod pa'o//de'i phyir smras pa/ brtan pa yin zhes bya ba la sogs pa'o/ /bdag nyid yang dag par bsgrub pa'i 'jig rten shes pa bstan pa nyid ni khyim par gyur cing de lta bur gnas kyang de lta bur 'jug par bya'o zhes bya ba bstan pa'i phyir/ dri ma'i las kyi mtha' bcu bzhi dang bral ba zhes bya ba la sogs pa la dri ma'i las kyi mtha' ni dge ba ma yin pa'i las kyi mtha' zhes bya ba'i don to//de la mdo'i tshig ni khyim bdag gi bu bzhi po 'di dag ni spang bar bya ba'i las kyi nyon mongs pa ste/ srog gcod pa dang / ma byin par len pa dang / 'dod pas log par spyod pa dang / brdzun du smra ba'o/ / gnas bzhis sdig pa'i las byed par 'gyur te/ 'dun pa dang / zhe sdang dang / 'jigs pa dang / gti mug go/ /longs spyod zad par 'gyur ba'i sgo ni drug ste/ /chang dang bcos pa'i chang dang myos par 'gyur pa bag med pa'i gnas la chags pa dang / dus ma yin pa'i mtshan mo kun du spyod pa la chags pa dang / ltad mo dang 'dus pa la kun du chags pa dang / rgyan po dang sho 'gyed pa la kun du chags pa dang / sdig pa'i grogs po la kun du chags pa dang / le lo dang snyom las la kun du chags pa'o/ /dri ma'i las kyi mtha' bcu bzhi po 'di dag spang ba byas pas dri ma'i las kyi mtha' bcu bzhi dang bral ba 'thob par 'gyur ro//phyogs drug gis bkab pa ni rjes su gzung bzhes bya ba'i tha tshig go/ /phyogs drug la phyag bya/ mchod pa bya/ phyag byas shing mchod pa byas na de dag gis so sor rjes su brtse bar 'gyur ro zhes byas nas so/ /de la shar gyi phyogs ni ma dang pha'o/ /lho'i phyogs ni slob dpon dang mkhan po'o//nub kyi phyogs ni bu dang chung ma'o/ /byang gi phyogs ni grogs po dang blon po la sogs pa'o/ /'og gi phyogs ni bran la sogs pa'o/ /steng gi phyogs ni dge slong dang bram ze'o/ /sdig pa'i grogs po bzhi spangs pa yin zhes bya ba la sdig pa'i grogs po bzhi ni gzhan gyi nor 'phrog pa dang /dge ba'i bshes gnyen gyi gzugs kyis sdig pa'i grogs por gnas pa dang / bcos ma'i ngag smra pas snyan par smra ba tsam shis pa dang / thabs dang mi ldan pa'i grogs po'o/ /dge ba'i bshes gnyen bzhi ni phan pa byed pa dang / bde ba dang sdug bsngal mnyam du spyod pa dang / pan pa ston pa dang / rjes su brtse ba can no/ /'di dag gis bshad pa ni ji ltar gtsug phud can gyi mdo las 'byung ba bzhin no/ /tshe 'di la chos dang mthun pa'i longs spyod dang rab tu ldan pa'i phan 'dogs pa las brtsams nas 'jig rten shes pa dang ldan pa'i phyir dang / yang dag pa'i las kyi mtha' nyams su len pa'i sgrub pa las brtsams nas sgrub phod pas le lo la sogs pa rnam par spangs pa dang /yongs su srung ba las brtsams nas/ kun nas srung ba dang ldan pa ste/ mtshon cha len pa la sogs pa spangs pa nyid kyis nor legs par srung ba'o/ /longs spyod pa'i dbang du byas nas smras pa/ mthun pas 'tsho ba dang zhes bya ba la bdag nyid kyang tshim par byed ces bya ba nas rgyas par bslab par bya ba la slob par byed ces bya ba'i bar tshigs su bcad pas bstan pa yin te//de la mkhas par gyur pa thob pa'o/ /gzhan dag la slu bar mi byed pas na pha rol 'drid pa'i ngang tshul can ma yin pa'i 'jig rten shes pa bstan pa'i phyir dang /'jal lugs la sogs pas gzhan dag slu bar mi byed pas na g.yo med pa'o/ /bya ba de lta bu la ngo tsha bar 'gyur bas na sgyu med par gyur pa yin no/ /yul la sogs pa'i rjes su 'jug pas spyod pa phun sum tshogs pa'o/ /nam yang 'da' bar mi byed pas na de lhur len pa'o/ / de nyid kyis na spyod pa srung ba'o/ /nor bcol ba nyams par mi byed pas na de gtams pa la yang g.yo mi byed pa yin zhes bya ba'o/ /bu lon chags pa la yang mi slu bas na smras pa/ bu lon chags pa la yang dor ba mi byed pa yin zhes bya'o/ /bgo bsha' la sogs pa la yang mi slu bas smras pa/ bgo skal gcig pa la yang mi 'drid pa yin zhes bya ba'o//rin po che brtag pa la rmongs pa rnams la yang slu bar mi byed pas smras pa/ rin po che'am rin po cher smos pa zhes bya ba la sogs pa ste/ mi shes pa la slu bar mi byed ces bya ba'i tha tshig go/ /kha na ma tho ba med pa'i 'jig rten gyi tha snyad kyi tshul la yang mkhas pa yin pas rang nyid grogs su g.yar ba'i blo dang ldan pa'o//grogs med pa dag la bcol na grogs su 'gro ste/ mi 'gyur ba ni log par sgrub par mi byed pa yin no/ /gtam rlung skur ba ni gzhan gyis dris na gzhan gyis lan 'debs pa ste/ dris pa'i lan mi 'debs pa'o/ /las kyi mtha' bzang po dang ldan pa ni dus dang 'tsham pa dang /thabs dang ldan par brtsams pa nyid do/ /rgyal por gyur pa'i 'jug pa bstan pa'i phyir rgyal po byed na yang zhes bya ba la sogs pa la/ rnam pa gnyis kyis rgyal po byed pa yin te/ rtsod pa med par rgyal srid skyong ba gang yin pa de ni chos kyi rgyal srid byed pa yin gyi rtsod pas rgyal po byed pa ma yin no//tshe 'di'i bde ba 'ba' zhig sgrub par byed pa ma yin gyi 'jig rten la phan pa byed do zhes bstan pa'i phyir ro/ /skye bo phal po che 'chal ba'i tshul khrims las bzlog nas zhes bya ba la sogs pa'o/ /rgyal po smra ba lan gcig go/ /zhes bya ba'i tshig gis smras pa/ 'phags pa'i tha snyad ces bya ba la sogs pa'o//'jig rten shes pa'i bsdus pa'i don bstan pa'i phyir smras pa/ /'jig rten ji ltar shes par bya ba dang / /zhes bya ba la sogs pa la/ rnam pa gnyis su 'jig rten shes pa rnam par gzhag par bya ste/ 'jig rten yongs su shes pa dang / /'jig rten rjes su 'jug pa'o//rton pa bzhi po dag la zhes bya ba ni don rnam pa bzhis rton pa rnam pa bzhi la ji ltar rton par rigs par 'gyur zhes dris pa'i don to/ /don 'dod pa'i phyir zhes bya ba ni don lhur len par gyur pas nyan par byed kyi yi ge sbyar ba lhur len pa ni ma yin no/ /don lhur len pa'i phyir phal pa'i skad kyis chos ston na yang gus par byas te chos nyan par byed do//de ltar na don la rton pa yin no/ /chos la rton pa'i dbang du byas nas smras pa/ nag po bstan pa dang / chen po bstan pa zhes bya ba la/ nag po dang dkar po ma 'dres par zhes bya ba ste rigs pa shes pa zhes bya ba'i tha tshig go/ /de'i phyir smras pa rigs pa la rton par byed pa yin gyi zhes bya ba'o//gnas brtan zhes bya ba ni chos nyid la gnas pa brtan pa yin te/ sgrub pa dang ldan pa zhes bya ba'i tha tshig go/ /shes pa'i gang zag ces bya ba ni kun gyis slob dpon du 'khur ba ste/ mang du thos pa zhes bya ba'i don to/ /dge 'dun gyis zhes bya ba ni tshogs kyi dge 'dun te/'dis ni btags pa'i dge 'dun la bya bar bstan to/ /de ltar gang zag la brten par mi bya'i/ gzhan du na rigs pa la brten par bya'o/ /de'i phan yon bstan pa'i phyir/ de kho na'i don las mi g.yo zhing zhes bya ba ni chos 'di ston pas gsungs pa'i bstan pa yin gyi zung shig ces zer ba ni/rigs pa la rton pa sun 'byin par byed cing bkrir mi btub par 'gyur ro/ /de las bzlog pa ni len par byed do/ /de'i phyir gzhan gyi dring mi 'jog pa yang yin te/ /gzhan gyi rkyen gyis mi 'gro ba/ /zhes bya'o/ /dad pas zhen zhing zhes bya ba ni de bzhin gshegs pa la dad pas zhen pa ste/mdo gzhan las bzhi las skyes pa/ /zhes bya ba'i bar du'o/ /de lta na yang gzhan du mi 'gyur zhing gcig tu nges pa'i gsungs la ni mngon par rab tu dga' bar 'gyur pa yin no/ /gcig tu nges pa'i gsung bstan pa'i phyir nges pa'i don gyi mdo sde zhes bya ste/ /ji ltar ma dang pha ni rjes su mthun pa'i gnas yin no zhes bya ba lta bu drang ba'i don gyi mdo sde la ni ma yin te/ji ltar gang zag yod pa nyid du bstan pa la gang zag ni rnam pa bzhi ste zhes bya ba la sogs pa lta bu'o/ /rab tu grub pa'i de kho na'i don la gnas pa ni mi 'phrogs par 'gyur ba yin no/ /drang ba'i don ji ltar tshad ma ma yin pa de bstan pa'i phyir sgo sna tshogs nas zhugs pa zhes bya ba la sogs pa la/de dang de dag gis ji ltar 'dod par yongs su 'dren par byed pas the tshom skye ba'i phyir de dag tshad ma ma yin no/ /nges pa'i don gyi mdo sde tshad ma ma yin no zhes zer ba'i nyes dmigs bstan pa'i phyir gal te byang chub sems dpa' nges pa'i don gyi mdo sde la yang zhes bya ba la sogs pa'o//nges pa'i don yin yang thams cad kyis ye shes 'thob pa ma yin pas tshad ma ma yin no/ /'o na tshad ma'i shes pa thob pa ji lta bu zhe na/ smras pa/ rtogs pa'i ye shes la snying por blta ba zhes bya ba la sogs pa la/ thos pa dang bsams pa'i shes pa ni cung zad tsam shes pas rnam par shes pa zhes rnam par gzhag par bya ste/de dag ni lung gi yul can yin pa'i phyir rtogs pa la 'jug pa med do/ /de'i phyir smras pa/ des bsgoms pa'i shes pas shes par bya ba gang yin pa zhes bya ba la sogs pa la/ de lta bu'i thos pa dang /bsams pa'i shes nga / dang ldan pa yang bsgoms pa'i shes pa'i yul du gyur pa'i mdo sde gang yin pa la 'di ni de bzhin gshegs pas gsungs pa ma yin no zhes skur pa mi 'debs so/ /ji skad bstan pa'i don khong du chud par bya ba'i phyir/ /de ltar na byang chub sems dpa' zhes bya ba la sogs pa la/gnyis gnyis su bcad pa bzhis ni tshad ma bzhi dang / tshad ma ma yin pa bzhi bstan par 'gyur ro/ /de bzhin gshegs pa rnams kyis ni gnyis gsungs te/ don dang yi ge'o/ /de dag las don tshad ma yin gyi yi ge ni ma yin no/ /bstan pa'i don ni gnyis te chos dang gang zag go//de las chos tshad ma yin gyi/ gang zag ni ma yin te/ de yongs su gyur nas gzhan du yang 'gyur ba'i phyir la chos ni gcig tu nges pa'i phyir ro/ /de'i phyir smras pa rigs pa dang zhes bya ba la chos kyang rnam pa gnyis te/ nges pa'i don la sogs pa'i dbye bas so/ /de dag las nges pa'i don ni tshad ma yin te/gcig tu nges pa'i don ston par byed pa'i phyir ro/ drang ba'i don ni ma yin te/ don sna tshogs su brjod du rung ba'i phyir ro/ /de'i phyir smras pa/ rton pa dang zhes bya ba la gcig tu nges pa gsungs pa yin pa'i phyir ro/ /de las kyang shes pa gsum 'byung bar 'gyur te/rnam par rtog pa las byung ba thos pa dang bsams pa'i shes pa dang / slu ba med pa bsgoms pa las byung ba'i so so rang rig pa'o/ /de dag las dang po ni rang gi rnam par rtog pa'i rnam pa la gnas pa nyid do/ /des na bsgoms pa las byung ba ni tshad ma yin no/ /byang chub sems dpa' rton pa dang ldan pa sgrub pa dang ldan pa ni kun du brtags pa'i sgo nas mngon par zhen pa med pas nges par 'byung ba 'khrul pa med pa yin no//chos thams cad ces bya ba ni 'dus byas rnams kyi don so sor legs par rtogs pa ni so so yang dag par rig pa'o/ /rnam grangs thams cad de/ ming gi khyad par thams cad la'o//ji snyed yod pa zhes bya ba ni 'di snyed cig go zhes yongs su gcod pa'o/ /ji ltar yod pa zhes bya ba ni 'di kho na ltar yin gyi gzhan du ni ma yin no zhes bya ba'o/ /yang na rang bzhin dang byed pa la sogs pas ngo bo ji lta ba bzhin du bsgrub pa shes pa'o/ /thogs pa med cing zhes bya ba ni shes pa de dang ldan pas chos thams cad kyi rnam grangs gzhan las thos pa na ming 'di'i rjod bya gang yin zhes bdag nyid la sgrub pa'i dus su kun du thogs pa med pa'o//gzhan las ston pa'i dus na ni mi bzlogs pa'o/ /de bzhin du mtshan nyid la sogs pa la yang rig par bya'o//mtshan nyid thams cad la zhes bya ba ni rang gi mtshan nyid la sogs pa 'di dag go zhes yongs su gcod pa'i shes pa 'jug par shes par bya'o/ /nges pa'i ngag ni nges pa'i tshig ste/ gzugs su rung ba'i don gyis na gzugs so zhes bya ba la sogs pa lta bu'o/ /'jig rten la grags pa'i tshul gyis ni rnam pa lngar shes par bya ste/yi ge skye zhing gzhan du bzlog pa dang / /yi ge bsgyur zhing phyi ba gzhan gnyis dang / skad byings don ni shin tu gzhan sbyor dang / /rnam lnga de la nges pa'i tshig ces brjod/ /ces bya ba'o/ /rab tu dbye ba zhes bya ba ni bltar yod pa la sogs pa'o/ /mdor bsdu na so so yang dag par rig pa rnams ni de bzhin gshegs pa'i bstan pa 'di la thun mong ma yin pa'i gnas la ston pa la mkhas pa yin par bstan pa'i phyir chos rnam pa 'di bzhis zhes bya ba la sogs pa'o//so so yang dag par rig pa bzhis bstan pa'i chos kyi dbang du byas nas bstan pa'i phyir/ bdag nyid kyis legs par zhes bya ba la sogs pa'o/ /chos thams cad kyi tshig dang don rnam pa thams cad du bstan par bya ba la rab tu dbye ba bzhi po 'di las gong na med do zhes bstan pa yin no/ /kun rdzob tu bsod nams dang ye shes kyi tshogs la bslab par bya'o zhes bstan pa'i phyir smras pa/ byang chub kyi tshogs gang zhe na zhes bya ba la tshogs kyang mdor bsdu na rnam pa gnyis te/ bsod nams kyi tshogs dang / ye shes tshogs so/ /de dag dbye ba yang snga ma bzhin te/ 'di lta ste/ bdag dang gzhan gyi don gyi le'u las bstan pa bzhin no/ tshogs de dag la brten pa dang / bsgoms pa dang /mang du byas pa dang ldan pa las bskal ba grangs med pa gsum gyis sangs rgyas nyid 'thob pa yin no/ /des na grangs med pa gsum ni chung ngu la sogs pa'i rnam pas gzhag pa ste/ mos pas spyod pa ni chung ngu yin te/ brtson 'grus 'bar ba la sogs pa dang bral ba'i phyir ro/ / spyod pa'i sas bsdus pa ni shin tu sbyang dka' ba dang / /mi g.yo ba'i phyir 'bring po'o/ /nges pa'i sa la gnas pa ni rnam par dag pa'i phyir chen po'o/ /tshogs yongs su rdzogs par gyur pa ni tshogs bsags pa dang ldan pa'i phyir byang chub kyi phyogs bsgom par rigs so zhes bya bar bstan pa'i phyir/ byang chub kyi phyogs bsgom pa bstan to//so so yang dag par rig pa bzhi po dag la brten nas zhes bya ba ni so so yang dag par rig pa bzhis bdag nyid kyi chos thams cad rnam pa thams cad du rtogs pa'i thabs kyis rab tu phye ba'i phyir dang / gzhan la rab tu sgrub par byed pa'i thabs kyis rab tu phye ba'i phyir ro/ / de dag la brtan nas byang chub kyi phyogs kyi chos rnams kyang rnam pa bzhir rab tu shes par bya'o/ /thabs kyis yongs su zin pa zhes bya ba ni rigs pa dang yang dag par ldan pa yin gyi mi rigs par byed pa ni ma yin pa ste/ shes pa gang gis byang chub kyi phyogs rnams ji lta ba bzhin du yang dag par rig pa'i sgo nas rab tu shes pa'o//de gang zhe na mngon sum du ma byas pa'i sgo nas so/ /de'i phyir smras pa/ de dag mngon sum ni mi byed do zhes bya na ni thabs kyis yongs su zin pa'i shes pa de'o/ /nyan thos kyi theg pa'i tshul gyis byang chub kyi phyogs bsgom pa ni shes pa'i rnam pa gnyis kyi tshul gyis te/ de la nyan thos kyi theg pa'i tshul gyis zhes bya ba la sogs pa la/gang zag la bdag med pa la 'jug pa'i sgo nas rang dang spyi'i mtshan nyid kyi rnam pas de dag nyan thos kyi theg pa'i tshul gyis yang dag pa ji lta ba bzhin du yongs su shes par nyan thos kyis las bstan pa yin no/ /chos la bdag med pa la 'jug pa'i sgo nas don dam pa'i tshul la brten nas gnyis su med pa'i rnam par theg pa chen po'i tshul gyis ji lta ba bzhin du yongs su shes pa'o//lus kyi rjes su lta zhing zhes bya ba ni rnam par mi rtog pa'i ye shes kyis dbu ma'i lam gyis rab tu bsdus pa'i phyir sgro 'dogs pa'i mtha' rnam par spangs pa'i ye shes nyid de/ngo bo nyid dang / khyad par du rnam par mi rtog pa'o/ /don dam pa'i ngo bo la dmigs pa'i phyir de med pa yang ma yin pa'o/ /dbu ma'i rnam pas bsdus pa bstan pa'i phyir smras pa/ brjod du med pa'i ngo bo nyid kyi chos nyid ces bya ba ni lus kyi de bzhin nyid kyi ngo bo nyid ces bya ba'i tha tshig go//des na smras pa/ don dam pa'o zhes bya ba ni shes pa dang shes bya dag ste de bzhin nyid dang / yang dag pa'i ye shes kyi ngo bo nyid kyis rab tu phye ba yin pa'i phyir ji ltar rigs par don dam pa nyid do/ /kun rdzob kyi tshul gyis ni lus dran pa nye bar gzhag pa'i rnam pa dpag tu med pa nyid de/lus kyi 'byung ba dang 'byung ba las gyur pa'i bye brag gi dbye ba tshad med pas tha dad pa'i phyir ro/ /de bzhin du lhag pa rnams kyang blta bar bya'o/ /nyan thos rnams byang chub kyi phyogs bsgoms pa ni bden pa rnam par gzhag pa rab tu shes pa nyid do/ /byang chub sems dpa'i don dam pa'i tshul du byang chub kyi phyogs kyi chos bsgom pa'i tshul gyis chos nyid rab tu rtogs par bstan pa'i phyir smras pa/lus dang tshor ba la sogs pa la 'bras bur gyur pa sdug bsngal nyid du yang rnam par mi rtog la kun 'byung ba la rgyur gyur par yang rnam par mi rtog cing byang chub kyi phyogs bsgoms pas byas pa'i mi mthun pa'i phyogs spong ba la yang 'gog pa zhes mi rtog la/spong ba thob pa'i rgyur gyur pa la yang lam du mi rtog cing bden pa rnam par gzhag pa'i tshul gyi dbang du byas nas bden pa mthong ba'i dus su chos bdag med pa'i shes pas bden pa mthong ngo zhes byas nas brjod du med pa'i ngo bor sdug bsngal gyi chos nyid la sogs pa bstan pas de ltar don dam pa'i tshul gyis bden pa bsgom pa bstan pa yin no//kun rdzob kyi tshul gyis ni bden pa la mkhas pa tshad med pa'i tshul gyis rjes su 'gro bar shes par bya ba'o/ /zhi gnas kyi rnam pa'am/ lhag mthong gi rnam pas kyang byang chub kyi phyogs bsgom par bya'o zhes bya ba bstan pa'i phyir de'i rjes la zhi gnas dang lhag mthong bstan te//chos de dang de dag la rnam par mi rtog pa'i gzugs brnyan gyi rnam pas rab tu phye ba'i phyir rtog pa med pa ni zhi gnas so zhes bstan pa yin no/ /lhag mthong ni ye shes kyis rab tu phye ba'i phyir ji lta ba bzhin shes pa ni lhag mthong zhes bstan pa yin no//rnam pa bzhi po 'di dag ces bya ba ni rgyu bsgom pa nyid dang / 'bras bu bsgom pa nyid dang / lhun gyis grub par 'jug pa nyid dang / ro gcig par 'jug pa nyid do/ /de ltar na rgyu'i ngo bo dang / 'bras bu'i ngo bo dang / rnam pa'i khyad par gyi dbang du byas nas rnam pa bzhir rnam par gzhag go//zhi gnas la brten nas lhag mthong bsgom par bya'o zhes bstan pa'i phyir smras pa/ don dam pa pa dang / brdar btags pa'i shes ba sngon du 'gro ba zhes bya ba ni rgyu'i ngo bos 'jug pa zhes bya ba'i tha tshig go/ /don dam pa ni brjod du med pa'i chos nyid la dmigs pa'o//brdar btags pa ni rnam par gzhag pa tshad med pa'i rjes su 'jug pas rang dang spyi'i mtshan nyid la dmigs pa'o/ /dang po'i sngon du 'gro ba ni mtshan ma med pa'i rnam par mi rtog pa'o/ /gnyis pa'i sngon du 'gro ba ni mtshan ma dang bcas pa'i rnam par mi rtog pa'o//gang gi tshe lhag mthong la brten nas zhi gnas sgom par byed na ni de'i tshe shes pa'i 'bras bu rnam par gzhag par bya ste/ /don dam pa'i shes pa'i 'bras bu ni zhi gnas so/ /tha snyad thams cad kyi 'du shes yid la mi byed par 'jug pa dang lhun gyis grub par 'jug pa ste/ brjod du med pa'i rnam pa nyid yin pa'i phyir yid la byed pas dben pa nyid do//de'i phyir smras pa/ brjod du med pa'i dngos po tsam de la yang zhes bya ba la sogs pa la/ gzugs la sogs pa yid la mi byed pas dben pa'i phyir mtshan ma med pa'o/ /ngo bo nyid du rtogs pa la sogs pa dang bral ba'i phyir rnam par mi rtog pa'o/ / rnam pa 'di gnyis nyid kyis ni zhi ba'o/ /mnyam pa nyid du ro gcig pa nyid ni don dam pa'i rnam pa nyid dang / ro gcig par 'jug pa nyid dang / de bzhin du thog ma dang bar ma dang tha mar sa dang sa rnams la zhi gnas kyi lam 'jug par 'gyur ro/ /lhag mthong rnam pa bzhi yang thabs kyi rgyu nyid dang / rab tu dbye bas rnam par gzhag par bya'o/ /ji skad bshad pa'i zhi gnas la brten nas don dam pa pa dang / brdar btags pa'i shes pas bsdus pa'i lhag mthong bsgom par bya'o/ /rgyu'i sgo nas rnam par gcig rnam par gzhag par bya'o/ /don dam pa'i ye shes kyis bsdus pa ni mtha' gnyis rnam par spangs pa'i sgo nas rnam pa gnyis so//kun rdzob kyi shes pa'i sgo nas bsdus pa ni tshad med pa'i dbye ba'i tshul gyis so/ /de lta bu'i zhi gnas dang lhag mthong dag bsgoms pas bla na med pa yang dag par rdzogs pa'i byang chub 'thob par 'gyur ro zhes bya bar smras pa/ yang dag par 'thob pa'i bar du 'jug ste zhes bya ba la sogs pa'o//thabs la mkhas pas zhi gnas dang lhag mthong bsgom par bya'o zhes bya bar de'i rjes la thabs mkhas pas bstan to/ /gzhan du thabs la mkhas pa med par zhi gnas dang lhag mthong sgom par byed pa ni 'gog pa mngon sum du byed par thal bar 'gyur ro//sangs rgyas kyi chos yongs su smin par byed pa'i thabs ma yin pa'i chos ni drug go/ /de'i gnyen po'i phyogs rnam pa drug ni thabs la mkhas pa ste/ sems can rnams la nyon mongs pa can gyi snying brtse ba dang / 'khor ba'i nyes dmigs la blta ba dang / mya ngan las 'das pa thob pa'i phan yon mthong ba dang /de dag gnyi ga la brten pa'i 'khor ba yongs su spong ba dang / kun du rmongs pa la brten pa dang / le los brtson 'grus mi rtsom pa'o/ /nyon mongs pa can gyi snying brtse ba'i gnyen por smras pa/ snying rje dang ldan par blta ba zhes bya ba la sogs pa'o/ /de bzhin du ji ltar rigs par sbyar bar bya'o//thabs la mkhas pa 'di dag ni mdor bsdu na rnam pa gsum du gzhag par bya ste/ shes rab dang thabs mi 'gal bar 'jug pa nyid dang / 'khor ba dang mya ngan las 'das pa mi 'gal bar bsgrub pa nyid dang / kun nas nyon mongs pa med pa dang / brtson 'grus brtsams pa mi 'gal bar 'jug pa nyid do//kun nas nyon mongs pa can yin yang nyon mongs pa dang bral bar bya ba'i phyir brtson 'grus 'bar bar gyur pa ste/ byang chub sems dpa' kun nas nyon mongs pa dang bral bzhin du brtson 'grus 'bar ba dang ldan pa 'di ni thabs la mkhas pa'o/ /'bras bu tshad med pa yongs su 'dzin pa dang /de bzhin du bsod nams tshad med pa yongs su 'dzin pa dang / sems can rnam pa bzhi la yang dag pa'i sgrub pa rnam pa bzhi'i dbang du byas nas smras pa'o/ /gzhan yang thabs la mkhas pa rnam pa drug ste/ dngos po dang zhing dag chung ngu dag las dge ba chung du bskyed pa las/yongs su bsngo ba'i khyad par gyi sbyor bas 'bras bu tshad med par 'gyur ro/ /de ni gzhung nyid las don go bar zad de/ sdug bsngal ba dang yid mi bde ba dang / 'khrug pa dang / nor zad pa dang bral bas bde ba dang / yid bde ba'i sgo nas bsod nams mang po la yang dag par sbyor ba ni bsod nams tshad med pa yongs su 'dzin to//nyon mongs pa'i sgo nas zhugs kyang bsod nams med pa'i sbyor ba rnams la ngal ba med pa'i sgo nas bsod nams mang po sogs par 'gyur ba'i thabs ston par byed do/ /de las 'dun pa bzlog cing zhes pa mi 'dod pa'i 'bras bu ster ba thabs ma yin pa de las bzlog nas tshegs chung zhing 'bras bu che ba'i yang dag par blangs ba la 'dzud de/de ltar na 'bad pa chung dus dge ba'i rtsa ba rgya chen po yang dag par skyed par byed do/ /yang dka' spyad kyi dka' thub kyis don med pa la zhugs pa'i sems can rnams la de las 'dun pa bzlog nas bde ba rjes su 'jug pa 'bras bu che ba de dag la ston par byed do//yang mtho ris 'dod cing bde 'gro'i lam las nyams pas tshul ma yin pa'i sgor zhugs pas ngal bar gyur pa rnams la tshul dang mthun pa'i lugs 'jig rten gnyi gar bde ba'i lam ston par byed do/ /yang dag par bya ba'i bsam pas yongs su ngal bar gyur cing don med pa'i bstan bcos la lhag par mos pa rnams sangs rgyas kyi theg pa la 'dzud cing yang dag par ston par byed do//yang shes bya'i dngos po rnams kyi rnam pa'i khyad par la shes bya'i mig gis yid la byed pa tsam gyis bsod nams rgya che zhing tshad med pa bskyed par 'gyur ro zhes byas nas yang dag par 'dzud par byed do//de ni mdo las ji skad gsungs pa bzhin te 'dus byas thams cad la 'dod chags dang 'bral bar mthong ba dang zhes bya ba nas 'di ni de bas ches 'bras bu chen po dang ldan par 'gyur ro zhes bya ba'i bar gyis sbyin pa las khyad par du 'phags par bstan pa yin no//yang yid la byed pas bdag gir ma bzung zhing yongs su gzung ba med pa'i dngos po rnams kyis dkon mchog gsum la mchod par lhag par mos pa'i sgo nas kyang bsod nams yongs su 'dzin to/ /yang phyogs bcu'i dkon mchog gi mchod pa la rjes su yi rang ba'i sgo nas dang /rjes su dran pa drug bsgom pa'i sgo nas dang / kun du rtog pa'i mchod pa'i sgo nas mchod pa'i bya ba dang / sems can thams cad kyi bsod nams thams cad la rjes su yi rang ba dang snying rje'i sems kyis sems can thams cad kyi rnam par smin pa mi 'dod pa de thams cad bdag gis myong bar 'dod pa'i sgo nas dang /bslab pa 'dod pa'i rjes su 'jug pa'i bsam pas dgongs par byas pas sangs rgyas thams cad kyi spyan sngar sdig pa so sor bshags pa'i sgo nas sdig pa so sor 'chags par byed pa'i phan yon gyi khyad par bstan pa'i phyir las kyi sgrib pa thams cad las rnam par thar par 'gyur ro zhes bya ba'o//sems la dbang bsgyur ba thob pa'i sprul pas de bzhin gshegs pa la mchod pa dang / sems can gyi don bya ba'i sgo nas kyang ngo / /tshad med pa bzhi bsgom pa'i sgo nas kyang bsod nams chen po yongs su 'dzin pa bstan pa nyid yin no/ /de ltar rnam pa bcu gnyis po ma lus pa spangs shing tshad med pa'i bsod nams sogs par rig par bya ba'o//log pa'i lam gyi bsnyung ba la mos pa rnams la phyin ci ma log pa'i bsnyung ba'i lam ston pa dang / dka' spyad kyi brtul zhugs la mos pa rnams la dbu ma'i lam nges par ston pa dang / mtho ris kyi lam rnam par nyams pa rnams la phyin ci ma log pa'i lam nye bar ston pa dang /bstan bcos ngan pa la mos pa rnams la phyin ci ma log pa'i chos ston pa dang / shes bya'i de kho na nyid la rmongs pa rnams la shes bya phyin ci ma log par ston pa'o/ /thabs la mkhas pas yongs su zin pa'i mchod pa nye bar bsgrub pa ni gzhan gyis byas pa'i mchod pa la rjes su yi rang ba nyid do//rjes su dran pa drug bsgom pa ni kun du rtog pa'i mchod pa'i bya ba'o/ /sems can thams cad kyi bsod nams la rjes su yi rang ba dang / gzhan gyi sdug bsngal bdag gis myong bar 'dod pa dang / 'das pa la sogs pa'i sdig pa bshags par byed pa nyid dang /sprul pas mchod pa dang / sems can gyi don bya ba dang / tshad med pa bsgom par bya ba'o/ /mdor bsdus nas thabs rnam pa drug tu rnam par gzhag pa ni bsam pa'i sbyor ba dang / bya ba la 'khyig pa'i dbye ba'i sbyor ba dang / mi mthun pa'i bsam pa'i sbyor ba dang chad pas tshar bcad pa'i sbyor ba dang /byas pa la lan du phan 'dogs pa'i sbyor ba dang / ngo bo nyid kyis grub pa'i sbyor ba'i dbang du byas nas bstan to/ /de la mdor bsdu na mthun pa'i thabs ni rnam pa bdun du bstan te/ rim gyis 'jug pa'i chos ston pa dang / cho 'phrul rnam pa gsum ston pa dang /gzhan la gsol ba 'debs pa nyid dang / bstan bcos kyi rjes su 'jug pa'i bya ba dang / mdor bstan pa la sogs pas sbyin pa dang / gdams ngag dang rjes su bstan pa pa dag dang / de bzhin gshegs pas dgongs te gsungs pa'i 'grel pa'o/ /rim gyis 'jug pa'i chos ston pa la yang rnam pa sngar shes par bya ste/'jig rten shes pa gtso bor byas pa nyid kyis rab tu dga' bar byas pa dang / zang zing rab tu sbyor ba dang / mthun par 'jug pas rab tu gzung ba dang / bdag yid la gus pa bskyed par bya ba dang / chos la 'dod pa bskyed par bya ba'o/ /rnam pa 'di ldas snod du rung bar byas nas yang nye bar zhi ba'i rgyur gyur pa'i chos lnga bstan par bya ste/dgos pa rnam pa lnga bsgrub pa'i phyir ro/ /rnam pa lnga po nyid smras pa dang gdul bya dang rjes su mthun par ston pa ni gang yang smras pa/ ci rigs pa zhes bya ba'o/ /don rnam par phye nas ston pa ni gang yang smras pa yang legs par 'jug par 'gyur ba zhes bya ba'o//nges pa'i tshig dang yi ge ni gang yang smras pa/ brda phrad par zhes bya ba'o/ /rjes su mthun pa'i spyod lam gyis gnas pas yongs su smin pa ni gang yang smras pa/ dus su zhes bya ba'o/ /sbyin pa la sogs pa rim gyis ston pa'am mdor bstan nas rgyas par phyis ston pa ni rim gyis zhes bya ba'o//ji ltar dgongs pa'i sgo nas sdug bsngal thams cad las nges par 'byung ba ni gang gi phyir smras pa/ phyin ci ma log pa dang zhes bya ba la sogs pa ste/ nang gi rig pas bsdus pa de bzhin gshegs pas bstan pa'i don bstan pa yin no//sems can dag gi don rnam pa bzhi bsgrub pa ni gzhan du nus pa ma yin no zhes bya bas gzhan gyis brgal yang rung khyad du bsad kyang rung khro bar mi byed de/ /g.yo bar mi par rjes su mthu pa'i lan 'debs par byed pa ni mi brjed par byed do zhes bya ba ste/ sems can rnams kyi dgos pa rnam pa bzhi yang dag par sgrub par byed pa zhes bya ba'i tha tshig go//byed 'dod pa'i sems kyis rab tu 'jug pa nyid la rab tu sbyor bar byed do zhes bstan pa'i phyir gang ci yang rung ba'i rnam pas don de bsgrub par bya'o zhes nges par byed pa nyid ni byed 'dod pa nyid do/ /de'i rgyu bstan pa ni snying brtse ba'i sems dang yang ldan no zhes bya ba la sems can thams cad la phan pa dang bde ba'i bsam pa ni byed 'dod par 'gyur ro zhes bya ba yin no//cho 'phrul rnam pa gsum gyi dbang du byas nas smras pa/ de rdzu 'phrul dang zhes bya ba la sogs pa la/ rang gis mi nus na yang gzhan la gsol ba btab pas sam/sprul pa'i sbyor bas sems can rnams 'dul bar byed de/ dgos pa rnam pa bzhi la sgrub pas so/ /mdor bsdus pa rnams zhes bya ba la mdor bstan pa rnams zhes bya ba ni de'i tshig dang yi ge la sogs pas rgyas par bstan par bya'o/ /ha cang yang rgyas ches pa rnams zhes bya ba ni rgyas par bstan pas 'jigs pa rnams la snying po'i don dang yi ge mdor bsdus pa'i bya bas yang dang yang du bstan pa byas pas blo dman pa rnams rjes su gzung ba'o//rnam pa bzhis de bzhin gshegs pas bstan pa'i chos 'dul ba don dang yi ges rtogs par bya ba'i phyir bstan pa la sogs pas ston par shes par bya'o//mdor bstan pa dang dran par bya ba'i phyir yi ge bsgrub pa'o/ phyin ci ma log par gzung ba dang / dran pas len pa dang go rims bzhin no/ /dris pa'i lan gdab pa dang / don bstan pa nyid ni don nye bar bsgrub pa ste/ the tshom dang / mi shes pa gnyis kyi gnyen po'i phyogs so/ /'jug pa'i sgo zhes bya ba ni mi sdug pa bsgom pa la sogs pa'i ting nge 'dzin gyi sgo nas so/ /don dam pa nye bar sbas pa'i phyir shin tu zab pa'i chos ston pa dang / bdag med pa gsal bar byed pas stong pa nyid dang ldan pa'o/ / dgongs pa dang bcas pa'i tshig gis bstan pas na dgongs pa'i don zhes bya ba'o/ /mdo sde gang dag las zhes bya ba ni rang bzhin med pa la sogs par ston pa rnams so/ /nyan thos kyi theg par ni chos rnams kyi ngo bo la sogs pas bstan to zhes bya bas dngos po la mngon par zhen pa nyid 'jig pa'i sems kyis 'di ni de bzhin gshegs pa'i bstan pa ma yin no zhes rab tu spong bar byed do//de dag las mthun pa dang / 'gal ba med pa dang / dgongs pa dang bcas pa'i don ston par byed/ 'dzin du 'jug go/ /ji lta bu zhe na/ de'i phyir smras pa/ 'di ltar chos 'di dag ni thams cad kyi thams cad du med pa ma yin gyi zhes bya ba ni dngos po med pa'i ngo bor 'gyur ba'o//'on kyang byis pas kun du brtags pa'i ngo bo 'di la med pas ngo bo med pa zhes brjod do/ /dngos po med pa ji lta bu zhe na/ smras pa/ dngos po zhes brjod pa ni mngon par brjod pa'i tshig gi gnas su gyur pa gang la brten nas byis pa rnams kyi brjod pa 'jug pa'o//de ltar na yang dngos po ni ngag gi yul las 'das par gyur pa'i phyir mngon par brjod pa'i bdag nyid du yod pa ma yin te/ don dam pa'i ngo bo yin pa'i phyir ro/ /de'i phyir ngo bo nyid med pa'o/ /ji ltar nam mkha' gos pa med cing spros pa dang bral ba gzugs med pa bya ba thams cad kyi skabs 'byed pa dang rten du gyur pa nyid la glo bur gyi gzugs kyi dri ma dang bral bar gyur na 'od gsal ba zhes brjod do//de bzhin du brjod du med pa'i yongs su grub pa'i dngos po yang glo bur gyi nye ba'i nyon mongs pas nye bar nyon mongs pa rnam par rtog pa thams cad kyi spros pa dang bcas par snang ba yang rnam par rtog pa'i spros pa dang bral na rang bzhin gyis 'od gsal ba yin te/de'i phyir nam mkha' dang mtshungs par bstan pa yin no/ /'du shes rnams kyi rnam par rtog pa'i ngo bor gtogs pa'i spros pa ni khyad par du rnam par rtog pa la sogs pa'o/ / de la chags pa ni mngon par zhen pa'o/ /de ltar na rnam par rtog pa la mngon par zhen cing chags pa zhes bya ba'i tha tshig ste/ gzugs kyi bya ba'i gnas glo bur bas 'jug pa'i phyir ro/ /rnam par rtog pa 'di rnams ni rang gi ngang gis 'jug pa'i rnam par rtog pa dang bral bar bstan pa'i phyir/ ye shes 'phags pa zhes bya ba ni gang gi tshe ye shes kyi stobs kyis bsal ba de'i tshe 'phags pa'i mchog byang chub sems dpa' rnams kyi 'phags pa'i mchog gi ye shes yongs su grub pa'i yul gyi ngo bor 'gyur ro/ /de'i phyir smras pa/ snang ste zhes bya ba la/ 'di las mchog tu gyur pa'i ngo bo med pa ste/de nyid ni yongs su grub pa'i ngo bo yin pa'i phyir ro/ /de'i phyir smras pa/ gzhan tshol bar mi byed de zhes bya'o/ /ji ltar sgyu ma dngos po dang dngos po med pa las grol ba'i phyir gnyis su med pa'i rnam pa yin pa ltar chos thams cad kyang sgyu ma lta bu'o/ /de ltar na gnyis su med pa'i chos nyid kyi rnam pa la gzhan cung zad kyang bsal bar bya ba med de/de tsam du khas blangs pa'i phyir dang / skur pa 'debs pa'i mtha' spangs pa'i phyir ro/ /cung zhig bstan du yang med de/ sgro 'dogs pa'i mtha' spangs pa'i phyir ro/ /de'i rnam grangs nyid ni nyung ngur yang mi byed/lhag par yang mi byed ces bya ba la sogs pa'o/ /rnam par 'jig par yang mi byed ces bya ba'i don bstan pa'i phyir yang dag pa la zhes bya ba la sogs pa'o/ /sems can rnam pa dgu la 'dod pa'i don bsgrub par bya ba nyid kyi phyir mngon du lhags pa'i bar chad byed pa ni phan pa'i bsam pa ste/mdo las ma dang pha'i bu la re zhig mi ster ba lta bu'o zhes bstan to/ /sems can rnam pa dgu ni lus kyi yo byad 'dod pa dang / de dag 'du ba'i sgo 'dod pa dang / bzo'i gnas 'dod pa dang / gnyen 'brel dang 'dris pa 'dod pa dang / grogs byed pa 'dod pa dang / gzhan gyis gnod pa byed pa dang /'jigs shing skrag pa dang / 'dod pa dang mi 'dod pa dang phrad pa dang bral bar 'dod pa dang / nad las thar par 'dod pa'o/ /nan tur yang mdor bsdu na rnam pa gnyis te/ dgos pa gnyis bsgrub pa'i phyir te dge ba la yang dag par bskul ba'i phyir dang / mi dge ba spang bar bya ba'i phyir ro//de'i phyir smras pa/ sdig pa spang ba dang dge ba yang dag par blang ba de la zhes bya ba la sogs pa la dga' mgur byed pa zhes bya ba ni mngon du lhags pa'i don de gtsor byed pa yin pas de bzhin du sgrub par byed pa zhes bya ba la sogs pa'i don to/ /gal te bsngags pa bzhin mi byed na rjes su mthun par ma byas su zin kyang phan pa'i bsam pa can la kha na ma tho bar mi 'gyur ro zhes bstan pa'i phyir gnod pa byung ba la sogs pa la dus cung zhig btang snyoms su 'jog ste gtan du ni ma yin no//de'i phyir smras pa/ re zhig yal bar 'jog ste yal bar 'dor ba'i bsam pa dang zhes bya ba la sogs pa'o//mi 'dra ba'i las bstan pa'i phyir slob pa yang med la zhes bya ba sogs pa la/ de dag la ni mthun pa'i thabs bstan pa'o/ /'on kyang 'dris shing mdza' bshes yin par gyur na de dag mthun pa'i thabs kyis dge ba la yang dag par 'god par byed do/ /de ltar yang dag par bskul yang sgrub par mi byed na de dag la khro ba'i bsam pa bstan par bya ste/phan pa 'dod pa yin gyi mi mthun pa'i bsam pas ni ma yin no/ /mi mthun pa'i sbyor ba'i bya ba ston pa yin gyi bsam pas ni ma yin no/ /'jig rten 'di'i dus re zhig pa'i sdug bsngal dang yid mi bde ba bskyed pa don med pa las zlog par byed kyi/don mi 'dod pas ni ma yin te bsam pa dag pa'i phyir ro/ /de ltar na sems can de dang de dag la bya ba de dang de dag gis bsam pa gzhan gyis sbyor ba gzhan dag ston pa ni bsam pa mi 'dra ba zhes bya'o/ /thabs nyid du bstan pa'i phyir de ni mi mthun pa'i bsam pa zhes bya ba yin no//stobs kyis zil gyis mnan nas 'dul bar byed pa ni nan tur las byung ba'i thabs zhes bya'o/ /dge ba yang dag par blangs te gnas so zhes bya ba ni gzhan la gnod pa med pa'i thabs kyis dgongs pa sgrub par nus pa zhes bya ba'i don to/ /phan pa byas pa dag la lan du phan gdags par 'dod pa phan 'dogs pa la 'jug pa ni lan ldon pa'i thabs zhes bya'o//phan 'dogs pa bstan pa'i phyir zang zing gi sbyin pa dang / mi 'jigs pa'i sbyin pa dang / yid la re ba yongs su rdzogs par byed pa'i phyir dang / nad rab tu zhi bar byed pa nyid do/ /sems can de dag la byas pa la lan ldon par 'dod pas thabs shes par bya'o//mthar thug pa thob pa'i phyir rnam par dag pa'i thabs zhes brjod do/ /'di las mchog tu gyur pa'i thabs gzhan yod pa ma yin te/ mthar thug par gyur pa'i phyir sa la zhugs pa zhes bya ba'i tha tshig go/ /byang chub sems dpa'i lam shin tu rnam par sbyangs pa zhes bya ba nis de yongs su sbyangs pas bsod nams dang ye shes kyi tshogs yongs su rdzogs nas dga' ldan gyi gnas su skye ba bstan pa ni byang chub dang nye ba'i phyir dang sems can tshad med pa 'dod pa bskyed pa'i phyir zhes bya'o//de nyes par byas te zhes bya ba ni yang de dang 'brel pa'i skye ba yang dag par 'grub pa'i las byas pas de dang nye bar skye bar 'gyur ro//de ltar na de dag 'dun pa mang du bskyed par bya ba'i phyir dga' ldan du skye ba bstan pa yin no/ /rigs mthon po zhes bya ni rgyal rigs so/ /kun gyis bskur ba ni mdun na 'don gyi rigs so/ / dbang phyug spangs nas nges par 'byung ba'i rgyu bstan pa'i phyir gces par bya ba bskyed pa'i phyir zhes bya ba'o/ de bzhin du dka' ba spyod pa la sogs pa la bdag nyid bsams bzhin du sgrub pa la 'jug pa'i dgos pa bstan pa'i phyir ro/ /byang chub dang rnam par grol ba thun mong du 'gyur ba zhes bya ba ni nyan thos rnams dang /bdag nyid ye shes dang spangs pa thun mong du gyur pa zhes ba'i tha tshig go/ /mchog rnams kyis gsol ba btab pa'i sgo nas chos ston pa mdzad do zhes bya bas ni sems can rnams bdag nyid la gus pa bskyed pa'i phyir ro/ /gsol ba btab nas kyang 'jig rten la rnam par gzigs par mdzad pa ni gzhan gyis bskul ba'i phyir chos ston par zad kyi thugs rje'i dbang gis bdag nyid dang rjes su mthun pas ni ma yin no snyam du 'gal zhig phyin ci log tu zhen pa bzlog pa'i phyir bstan to//sngon ma bskor ba zhes pa ni dge sbyong ngam bram ze'am zhes rgyas par mdo bzhin no/ /chos ston par mdzad ces bya ba ni chos kyi dbang du byas pa'o//bslab pa'i gzhi ni mngon pa dang 'dul ba'o/ /de ltar na chos dang 'dul ba bstan pa yin no zhes bya bar bstan to/ /mdor bstan pas zhes bya ba la mdor bstan pa ni sngar bstan pa'i rnam pa bcu pa'o/ /rgyas par bstan pa ni phyi ma'i rnam pa drug go//de bzhin gshegs pa thams cad dang byang chub sems dpa'i thams cad kyis gsungs pa thos nas 'dzin par byed pas na gzungs zhes brjod do/ /de lta bu'i dran pa zhes bya ba ni mos pas spyod pa'i gnas skabs na sbyin pa la sogs pa'i gnas skabs pas bsdus pa'i bsod nams dang ye shes kyi tshogs bstan pa nas mang du bya ba'i bar du mi mthun pa'i tshogs dang ma 'dres pa'i dran pa'am/shes rab sngon med pa thob par 'gyur ro/ /de mi mthun pa'i phyogs kyis zil gyis mi non pas na stobs bskyed pa thob par 'gyur ba'o/ /thos pa tsam kho nas zhes bya ba ni yang dang yang du goms par byas pa med pa'i phyir ro//de'i phyir ma goms shing zhes bya ba'o/ /de'i phyir smras pa/ ma goms pa'i phyir kha don byang bar ma byas pa zhes bya ba ste/ dus dang dus su kha don gyi bya bas goms par ma byas pa zhes bya ba'i don to/ /ming la sogs pa dag tu 'dzin par 'gyur ba zhes pa ni don la sgras brdar byas pa'i ngo bo nyid ces bya ba'i tha tshig go//go rims bzhin du bsdebs pa ni tshigs su bcad pa bstan pa'o/ /rim bzhin du sbyar ba ni lhug par bstan pa'o/ /gzhung tshad med pa zhes bya ba ni stong phrag brgya pa la sogs pa'i gzhung gi tshad do/ /dus tshad med pa zhes bya ba ni bla na med pa yang dag par rdzogs pa'i byang chub thob kyi bar du'o//de ltar na rnam pa gsum gyis chos kyi gzungs bstan pa yin te/ ming dang / tshig dang / yi ge rim bzhin du 'dzin pa dang / gzhung tshad med pa 'dzin pa dang / dus tshad med par 'dzin pa'o/ /snga ma dang 'dra ba las zhes bya ba ni de lta bu'i dran pa dang zhes bya ba la sogs pa'o//chos de dag gnyid kyi don gang yin pa goms par ma byas pa dag kyang yid kyis mthar thug gi bar du 'dzin pa'o/ /yams kyi nang yang dag par zhi bar bya ba'i phyir zhes bya ba ni brjod pa tsam nyid kyis yams rab tu zhi bar byed nus pa zhes bya ba'i don to/ /byin gyis rlob par byed de zhes bya ba ni ting nge 'dzin la dbang thob pa la brten nas gsungs pa zhes bya ba'i tha tshig go//mchog tu grub pa zhes bya ba ni gcig tu nges par grub par bstan pa yin no/ /don yod pa zhes bya ba ni gtan du nges par grub par bstan pa yin no/ /byang chub sems dpa'i rnams kyi byang chub sems dpa'i bzod pa zhes brjod pa ni bden pa dang rjes su mthun pas rab tu rtogs pa'i sngon du 'gro ba'i shes rab ste/bdag med pa'i rnam pa chen po la bzod pas na bzod pa'o/ /yang tshogs kyi lam gyis bsdus pa'o zhes bstan pa'i phyir smras pa/ rgyu la shin tu spyad pa zhes bya ba ni mos pas spyod pa'i gnas skabs na bsod nams dang ye shes kyi tshogs legs par bsags pa'o//shes rab dang ldan pa zhes bya ba ni thun mong ma yin pa'i shes bzhin du gnas pa bstan to/ /dben pa na gnas shing zhes bya ba ni de bzhin du lus rnam par dben pa dang / dbang po'i sgo bsdams pa'o/ /tshig kyang mi smra la zhes bya ba ni mang du mi smra ba la mos pa'o//su dang yang mi phrad cing zhes bya ba ni rten med par gnas pa'i phyir ro/ /mi nyung mi mang bar za bas na ran par za ba zhes bya'o/ /dus nges par byas pa la za bas na bab chol du mi za ba'o/ /mi phan pa dang 'dres pa mi za bas na kha zas sna gcig za ba'o/ /de ltar na thun mong ma yin pa'i zas kyi tshod shes pa bstan pa yin no//sems pa lhur byed pa dang zhes bya ba la sogs pa'i tshig gsum gyis na nyan thos la sogs pa las rab tu khyad par du 'phags pa'i mi nyal ba de dang rjes su mthun pa dang ldan pa bstan to/ /de bzhin gshegs pas gsungs pa zhes bya ba ni/de bzhin gshegs pa thams cad kyis gsungs pa ma thos par bdag nyid kyis de dag gi brjod par bya ba'i don med pa nyid du su las kyang ma thos par ro/ /don yongs su grub pa ci yang med de zhes bya ba ni brjod bya dang rjod byed kyi 'brel pas yang dag par bsdus pa'o/ /de bzhin gshegs pa thams cad kyi gsung de dag kyang rnam par brtags na don med do zhes bya bas de dag don med pa'o//des de ltar zhes bya ba ni ring du song zhing brtags kyang ji skad bstan pa'i brjod du med pa'i don las med pas de'i phyir chol bar mi byed do/ /de ltar na gsang sngags kyi don brjod du med par legs par rig par 'gyur ro/don de nyid kyi rjes su 'brangs nas zhes bya ba ni/ ji ltar gsang sngags kyi tshogs rnams brjod du med pa yin pa de bzhin du chos thams cad kyang ngag gi spyod yul las 'das pa'i phyir/ sngar thos pa med par brjod du med pa'i don rab tu rig par 'gyur ro/ /brjod du med pa'i ngo bo nyid ni yongs su ma grub pa'i phyir 'di dag gi don ni brjod du med pa'o zhes bya ba nyid do//rgya chen po zhes bya ba ni sngar rab tu ma rtogs pa'i shin tu zab pa'i chos kyi tshig shes rab kyis rab tu rig pa ste/ des dga' ba dang mchog tu dga' ba rgya chen po 'thob pas so/ /gzungs kyi tshig thos pa de dag la brten nas zhes bya ba ni de la brten nas byang chub sems dpa'i bzod pa bskyed pa'o//de bskyed pas sa rab tu rtogs par 'gyur ro zhes bstan pa'i phyir smras pa/ de thob pas kyang zhes bya ba la sogs pa la/ mthun pa'i bzod pa ni chung ngu la sogs pa'i dbye bas rnam pa gsum ste/ de dag gi chen po'i gnas skabs nyid bstan pa'i phyir smras pa/bzod pa chen po la gnas par 'gyur te zhes bya ba la sogs pa'o/ /des sa dang po nges par rab tu thob par 'gyur te/ khyad par can gyi sbyor bas ro gcig par gyur bas so/ /bstan pa ni nyams pa med pa'o/ /rgya che ba ni chos kyi sgo brgya yang skad cig la rig par 'gyur ro zhes bya ba'i tshig gis so//de tshun chad ni zhes bya ba ni mos pas spyod pa'i sa la ni 'thob pa la nges pa med pa ste/ smon lam gyi dbang dang / ting nge 'dzin gyi stobs kyis brgya la rnyed par 'gyur ro zhes byas nas so/ /brtan pa yang ma yin pa ni nyams par 'gyur bas so/ /rgya che ba yang ma yin pa ni chung ba nyid kyi phyir ro//ji skad brjod pa de kho na bzhin du zhes bya ba ni de'i nges pas mos pas spyod pa'i sa 'thob pa'o/ /byang chub sems dpa'i chos bzhi dang ldan na gzungs thams cad thob par 'gyur ro zhes bya ba'i tshig gis gzungs 'thob par 'gyur ba'i rgyu bstan pa'i phyir/ yon tan bzhi dang ldan na gzungs 'di dag thams cad 'thob ste zhes bya ba la sogs pa la bdag dang gzhan du mnyam pa'o/ /mi mthun pa'i phyogs su gyur pa'i chos ni bzhi ste/ 'dod pa la zhen pa dang bcas pas lus dang longs spyod dang srog la ltos pa dang bcas pa nyid dang / gzhan gyi 'byor pa mi bzod pas phrag dog dang ldan pa dang yongs su 'dzin pa dang bcas pas ser sna ste/'di dag gsum dang / dam pa'i chos la mi dga' ba'o/ /de dag gi gnyen po'i phyogs su gyur pa yon tan rnam pa bzhi ste/ 'dod pa rnams la lhag par zhen pa med par 'gyur zhes bya ba ni ji ltar brtson 'grus brtsams pas 'dod par gyur na ci nas kyang khyim dang /chung ma dang / longs spyod rnams btang nas ji ltar brtson 'grus brtsams pas 'jug cing rab tu 'byung bar bstan pa yin no/ /phrag dog dang ser sna'i kun nas dkris pas zil gyis non par mi 'gyur ro zhes bya ba'i tshig gis phrag dog mi bskyed de zhes bya ba la de'i gnyen po'i phyogs mang du bsten pas [(]gzhin [,]gzhan [)]gyi 'byor pa la dga' zhing rjes su yi rang ba'o//bslang ba thams cad rab tu sbyin zhing zhes bya ba ni nang gi bdag nyid la sogs pa'i dngos po rnams la 'dzin pa med pa nyid dang / 'gyod pa med par sbyin pa ni phyis 'gyod pa med pa nyid do//de dag gis ni ser sna'i gnyen po'i phyogs la brten par bya bar gsungs so/ /rtag tu chos nyan pa la sogs pa dang ldan pa'i phyir chos la kun du dga' ba'o/ /chos btsal ba'i phyir dngos po thams cad yongs su gtong ba ni chos la dga' ba'o/ /byang chub sems dpa' rnams kyi smon lam ni dpag tu med pa las mdor bsdu na zhes bya ba ni mdor bsdus pa'i tshig go//smon lam thams cad kyi dngos por gyur pa ni dang po sems bskyed pa'i smon lam ste/ de ni smon lam thams cad kyi rab mchog yin pa'i phyir ro/ /smon lam gyi ngo bo ni yon tan gyi sgo nas sems mngon par 'du byed pa'o zhes bya bas so//gang du sems can mang po'i don 'grub par 'gyur ba der smon lam 'debs shing skye bar 'gyur ba ni skye ba'i smon lam zhes bya'o/ /byang chub sems dpa'i spyod yul ni zhi gnas dang lhag mthong ngo / /de'i don du smon lam 'debs pa ni spyod yul gyi smon lam zhes bya'o/ /zab cing rgya che ba'i chos rab tu dbye ba la mkhas pa zhes bya ba la sogs pa'i rnam pa ni chos rab tu rnam par 'byed pa'i smon lam mo//sems can thams cad la byams pa'i sems dang zhes bya ba la sogs pa'i rnam pas ni tshad med pa bsgom pa'i spyod yul gyi smon lam mo/ /sbyin pa la sogs pa'i pha rol tu phyin pas yang dag par bsdus pa gang yin pa ni yang dag pa'i smon lam ste/nyes pa thams cad kyi gnyen por gyur pa dang / bdag dang gzhan gyi don la rjes su mthun pa'i phyir ro/ /yang dag pa'i smon lam de las ji skad bstan pa'i smon lam gyis yongs su bsdus pa ni smon lam chen po rnam pa bcu zhes bya'o//smon lam chen po de yang mdo sde sa bcu'i gzhung gi rjes su 'brangs nas shes par bya'o/ /mchod pa'i rnam pa thams cad ni mchod pa'i le'u las ji skad bstan pa bzhin du gzung bar bya ste/ de bzhin gshegs pa rnams kyi mchod pa dang rim gro bya ba tshad med pa dag go zhes bya bar gzung bar bya'o//de yang dri la sogs pa ni mchod pa'o/ /chos gos la sogs pa ni rim gro'o/ /dam pa'i chos yongs su gzung bar bya ba dang / bsrung bar bya ba dang / tshul yang dag par 'dzin pa la sogs pa'i smon lam 'di dag gi don rnam par 'byed pa ni phyi nas 'chad par 'gyur ro//stong pa nyid la sogs pa'i ting nge 'dzin gsum ni thun mong dang thun mong ma yin pa'i rnam pa gnyis so/ /de la thun mong ma yin pa'i dbang du byas nas smras pa/ stong pa nyid kyi ting nge 'dzin gang zhe na zhes bya ba la/ byis pas yongs su brtags pa'i chos thams cad kyi rnam par yang dag par rjes su mthong ba med pa la gang gi sems gnas pa ni stong pa nyid kyi ting nge 'dzin yin te/stong pa nyid mchog gi rnam pa can yin pa'i phyir ro/ /log par rnam par brtags pa las byung ba'i nyon mongs pa dang / sdug bsngal gyis yongs su zin pa'i phyir zhes bya ba ni gzung ba dang 'dzin pa'i rnam par rtog pa la kun du spyod pa'i 'dod chags la sogs pa'i nyon mongs pa kun du 'byung bar 'gyur ro//de rgyur gyur pa las yang srid kyi sdug bsngal lo/ /de'i phyir smras pa/ nyes pa du ma'i skyon chags par yang dag par mthong nas te/ glo bur ba'i nyon mongs pa dang las dang / skye ba'i nyon mongs pa nyid kyi phyir kun du brtags pa dang /gzhan gyi dbang gi ngo bo nyid du rnam par 'jog pa la sems can rnams kyi sdug bsngal skyed par byed pa'i skyon de mthong nas de la mi smon pa sngon du 'gro ba'i sems gnas pa gang yin pa de ni smon pa med pa'i ting nge 'dzin zhes bya'o/ /brjod du med pa'i dngos po'i ngo bo de nyid la shes pa'i khyad par thong pas rnam par rtog pa dang spros pa'i mtshan ma thams cad bsal ba ni mtshan ma med pa'o zhes bya ba la/zhi bde yid la byed pas sems gnas pa gang yin pa de ni mtshan ma med pa'i ting nge 'dzin zhes bya'o/ /ci'i phyir ting nge 'dzin gsum zhig tu bstan zhe na/ de'i rnam par gzhag pa bstan pa'i phyir smras pa/'di las gong na yang med la/ 'di las lhag pa yang med ces bya ba la sogs pa la/ shes bya thams cad yod pa dang med pa rnam pa gnyis su rnam par gzhag ste yod pa'i rnam pa dang / med pa'i rnam pa'o/ /de'i phyir smras pa/ 'di gnyis yin te zhes bya ba la sogs pa la/yod pa la yang yod par yang dag pa ji lta ba bzhin du rab tu shes zhes bya ba nas bla na med par yang dag pa ji lta ba bzhin du rab tu shes zhes bya ba'i mdo'i rjes su 'brangs nas ting nge 'dzin gsum nges par bstan pa yin no/ /de la yod pa ni rnam pa gnyis te/ skyon dang bcas pa dang yon tan dang ldan pa'o//yang mi bden pa ni bdag la sogs pa'i dngos po'o/ /de la skyon dang bcas pa'i 'dus byas kyi dngos po ni mi mthun pa yin pas smon par bya ba ma yin pa'i phyir smon pa med pa'i ting nge 'dzin zhes bya'o/ /yon tan dang ldan pa ni 'dus ma byas pa mya ngan las 'das pa zhes bya ba'i dngos po ni zhi ba'i rnam par mthong bas smon par byed cing mngon par dga' bar 'dzin pa la sbyor ba ni mtshan med pa'i ting nge 'dzin to//yod pa ma yin pa'i dngos po la ni smon par yang mi byed la/ mi smon par yang mi byed pa ni de'i rnam pa 'ba' zhig mthong ba'i phyir stong pa nyid kyi ting nge 'dzin to//de'i phyir/ med pa skyon dang bcas pa'am/ /yang na dngos po yon tan can/ / yongs su yon tan can 'dzin dang / /yon tan med 'dzin gnyen po ni/ /zhes bstan pas stong pa nyid kyi ting nge 'dzin la sogs pa la gzhag go zhes bya'o/ /de las gzhan pa'i rnam pa zhes bya ba ni nyan thos dang thun mong ba'i ting nge 'dzin gsum gyi rnam par gzhag pa'i tshul la 'jug pa dang /sgom pa'i tshul la 'jug pa yang dag pa ji lta ba bzhin du rab tu shes so/ /de la rnam par gzhag pa'i tshul ni gang zag la bdag med pa'i dbang du byas nas gzugs la sogs pa'i 'dus byas rnams la bdag med pa'i rnam pa'i ting nge 'dzin ni stong pa nyid kyi ting nge 'dzin to//mi rtag pa dang / sdug bsngal ba dang / rgyu dang / rkyen dang / rab tu skye ba dang / kun 'byung ba'i rnam pa'i ting nge 'dzin ni sdug bsngal dang kun 'byung pa'i bden pa dag la smon pa med pa'i ting nge 'dzin to/ / yang kha cig ni rnam pa bcur 'jog par byed de lam gyi rnam pa dang gzings kyi dpes dor bar bya ba yin pa'i phyir na de'i rnam pa rnams kyang smon pa med pa'i rnam pa zhes bya'o/ /'gog pa'i zhi ba la sogs pa'i rnam pa bzhi ni mtshan ma med pa'i ting nge 'dzin to/ /de bzhin du bsgom pa'i tshul gyi sbyor bas bsgom pa'i tshul 'jug par bya'o//de bzhin gshegs pas chos thams cad mdor bsdus nas chos kyi mdo bzhir rnam par gzhag par mdzad do/ /'du byed thams cad mi rtag pa/ /zhes bya ba ni rtag par smra ba'i dge sbyong la sogs pa dang / lha tshe ring po rnams rtag pa'i 'du shes rnam par spang ba'i phyir ro//sdug bsngal ba'o zhes bya ba ni bde ba'i 'du shes can gyi lha dang mi rnams kyi 'du shes de spong du gzhug pa'i phyir ro/ /bdag med pa'o zhes bya ba ni bdag tu smra ba rnams kyi de spong du gzhug pa'i phyir ro/ /zhi ba'o zhes bya ba ni mya ngan las 'das pa ni zhi ba ma yin no zhes mngon pa'i nga rgyal can rnams rnam par rtog pa kun du spong ba'i phyir ro//yang thun mong ma yin pa'i zab mo'i chos bstan pa'i dbang du byas nas chos kyi mdo rnam pa bzhi bstan to/ /yang de bzhin gshegs pas gang du cha gcig tu gsungs pa'i tshig gi dbang du byas nas chos kyi mdo rnams mngon par brjod pa'i chos kyi mdo bstan pa'i phyir mi rtag pa la sogs pa dang yang dag par rab tu ldan pa'i chos kyi don de dag dang ldan pa'i don gyi chos phal cher ston te zhes bya ba ni de'i don mngon par rjod par byed pa la chos kyi mdo zhes bstan te/yang dang yang brjod pa ni mdo zhes bya'o/ /da ni nges pa'i bya bas ched du brjod pa nyid du bstan pa'i phyir rtag tu brjod cing brjod pa'i phyir yang mdo zhes bya'o zhes bya ba'o//'byor pa chen por 'gyur ba dang / /zhes bya ba la 'byor pa'i sgra ni tshogs pa chen po'i 'byung bar ston pa ste/ dper na chung ngu tsam las byung ba'i 'byor pa chen po zhes bya ba lta bu'o/ /srid pa'i rtse mo las gong du 'gro ba zhes bya ba ni gong du 'gro ba'i lam gyi don bstan te//ji ltar bstan pa las langs zhes bya ba lta bu'o/ /mi rtag pa nyid bstan pa ni rnam pa gnyis te/ nyan thos la sogs pa dang thun mong ma yin pa'o/ /de mthun mong pa'i dbang du byas nas smras pa/ ji ltar yang dag par mthong zhe na zhes bya ba la sogs pa la//de la skye ba dang 'gag pa dang ldan pas na 'dus byas rnams mi rtag pa zhes brjod de/ ji skad du nyan thos kyi theg pa las/ kye ma 'du byed rnams mi rtag /skye zhing 'jig pa'i chos can yin/ /skyes nas 'jig par 'gyur bas na/ /zhes bstan pa yin no/ / dus rtag tu med cing yod pa ma yin no zhes bya bas 'dir med pa'i don ni mi rtag pa'i don to zhes rnam par gzhag par bya'o/ /de ltar na de'i bdag nyid kyis dus thams cad du rtag par rjes su ma dmigs pas mi rtag pa nyid de/ de ltar na med pa'i don ni mi rtag pa'i don yin no/ /yang brjod du med pa'i ngo bo nyid yin na yang theg pa chen po'i chos kyi tshul la brten nas skye zhing 'gag pa'i sbyor bas mi rtag bar bstan pa'i phyir smras pa/yang brjod du med pa'i dngos po de nyid ces bya ba la sogs pa la/ yongs su ma shes pa'i phyir zhes bya ba la 'phags pa'i ye shes kyi mthong bas rab tu ma rtogs pa zhes bya ba'i tha tshig go//yongs su ma shes pa'i rgyu las byung ba'i zhes bya ba ni yongs su ma shes pas dngos po'i rnam par rtog pa la brten nas 'jug par 'gyur te/ rnam par rtog pa'i rkyen gyi dbang gis skye zhing 'gag par 'gyur ro/ /de ltar na yongs su ma shes pa'i rgyu las byung ba'i skye ba dang 'jig pas bsdus pas blos rtogs par byas pas tshul des brjod du med pa yin na yang 'du byed rnams mi rtag pa nyid du yang dag par rjes su mthong ngo //de ltar na mi bden pa'i rnam pa dang / skye zhing 'gag pa rnam pa gnyis kyi sgo nas mi rtag pa'i rnam pa yongs su gsal bar byas pa yin no//da ni dus gsum gyi 'du byed rnams kyi yod pa ma yin pa'i rnam pas rnam par chad pa'i rtag pa bstan pa'i phyir smras pa/ des 'das pa'i 'du byed rnams zhes bya ba la sogs pa la/ cha gnyis dang / cha re res so/ /'das pa ni skyes zin pa'i phyir rgyu dmigs par mi 'gyur te/skyes zin pa ni yang skye ba med pa'i phyir ro/ /skye ba med pas na rgyu yod pa ma yin no zhes bya bas skye ba dang ldan pa la rgyu rnam par 'jog pa yin no/ /rang gi bdag nyid nyams par gyur pa la ngo bo dmigs par mi 'gyur ro/ /de ltar na cha rnam pa gnyis med pas 'das pa yod pa ma yin no/ /de'i phyir mi rtag pa nyid do//da ltar byung ba yang skyes zin pa'i phyir rgyu dmigs pa ma yin te/ 'bras bu bskyed nas rgyu ldog pa'i phyir ro/ /de'i phyir smras pa/ 'bras bu bskyed zin pa'i phyir ro zhes bya ba'o/ /rang gi mtshan nyid la gnas pa'i phyir ngo bo nyid ni dmigs so/ /de'i phyir cha gcig gis mi rtag pa yin no//ma 'ongs pa rnams kyi ni rgyu yod de 'bras bu ma bskyed pa'i phyir ro/ /rgyu ni nye bar dmigs so/ /ngo bo nyid ni mi dmigs te ngo bo nyid ma thob pa'i phyir ro/ /des na cha gcig gis mi rtag pa yin no/ /rgyun 'chad cing zhes bya ba ni so so so'i mtshan nyid la gnas nas so/ /rgyun mi 'chad par zhes 'don pa der ni rgyu dang 'bras bu'i rgyun rgyun mi 'chad par zhes bya bas so//de ltar 'du byed mi rtag pa la 'dus byas kyi mtshan nyid rnam par gzhag par bya'o zhes bstan pa'i phyir smras pa/ skad cig re re la zhes bya ba la sogs pa la/ skad cig gcig la 'dus byas kyi mtshan nyid gsum mthong la zhes bya ba la skye ba dang /gnas pa dang / 'gag pa'o/ /skad cig gi 'og tu 'dus byas kyi mtshan nyid bzhi pa zhes bya ba ni sngar gyi mtshan nyid rnams la ltos nas gzhan du rnam par gzhag pa ni rga ba yin no zhes byas nas so/ /'du byed kyi skad cig dang po zhes bya ba la sogs pa'i mtshan nyid sbyar bar bya'o/ / des na skye ba ni dngos po sngo na med pa'i 'byung ba'o zhes bstan par 'gyur ro/ /skyes pa rang gi mtshan nyid kyi gnas skabs na de'i dus na ma nyams pa ni gnas pa zhes bya'o/ /sngar 'gags pa de la ltos nas zhes bya ba ni rga ba ni gzhan du 'gyur ba'i mtshan nyid can te/ gzhan du 'gyur ba yang sngon dang phyi ma'i khyad par gyi mtshan nyid do//des na skad cig de nyid gzhan du 'gyur ba'i khyad par ni dmigs par mi 'gyur ro/ /de'i phyir/ de bzhin gnas pas rgas mi 'grub/ /gzhan du gyur na gzhan nyid yin/ /de phyir chos ni gcig nyid la/ /rgas zhes bya ba dmigs pa med/ /ces bstan pa yin no/ /rga ba ni rnam pa gnyis te nye bar 'gro ba'i rga ba dang /yongs su dbye ba dang bcas pa'i rga ba'o/ /de gnyis ka'i dbang du byas nas smras pa/ gzhan nam gzhan du gyur pa gang yin pa zhes bya ba'o/ /yang de nyid don gzhan du bstan pa ni gzhan nam zhes bya ba ni 'dra bar 'byung ba'i dus su'o/ /gzhan du zhes bya ba ni rang gi ngo bo nyams pa dang /rang go ngo bo rab tu zhi pa'o/ /de ltar na mtshan nyid rnam par gzhag nas mtshan nyid 'di dag la sde ba gzhag dag gis 'dod pas dbang gis btags pa'i rdzas kyi khyad par dgag pa'i phyir/ ngo bo nyid yang dag par mthong ba gang yin pa de ni zhes bya ba la sogs pa la//ngo bo zhes bya ba ni gzugs la sogs pa las gzhan par 'dod pa 'gog par byed do/ /da ni skye ba la sogs pa las gzhan pa'i 'jig pa med par bstan pa'i phyir/ de'i ngo bo nyid ces bya ba la sogs pa la/ de dag ni mtshan nyid kyi gnas skabs kyi khyad par gyis rab tu phye ba'i phyir dngos po dang dngos po med pa gnyis su rnam par gzhag go//mdo las mtshan nyid gsum rnam par gzhag pa bstan pa'i phyir mtshan nyid bzhi po de dag ces bya ba la sogs pa la/ yod pa gang yin pa de ni zhes bya ba la skyes pa ni bdag gi lus kyi mtshan nyid yin pa'i phyir skye ba zhes bya ste/ mngon par 'grub pa zhes byas nas so/ /ngo bo nyid gang yin pa de ni zhes bya ba ni 'gag pa ste/ de'i ngo bo med pa nyid do/ /skad cig so so la skye ba dang 'jig pa dang ldan pas 'jug pa na 'du byed kyi rgyun gzhan du 'gyur ba ni mtshan nyid gsum pa'o/ /de ltar gnas skabs gsum bstan pa'i phyir gsum du bstan te/'dus byas zhes bya ba med pa las byung ba dang / byung ba nyams par 'gyur ba dang / de'i rgyun zhes bya ba 'jug pa gzhan du 'gyur ba zhes bya ba ste/ mi rtag pa rnam pa gsum gyi dbang du byas nas mtshan nyid rnam pa gsum gsungs pa yin no/ /dngos po snga na med pa'i mi rtag pa dang /dngos po rnam par 'gyur ba'i mi rtag pa dang / dngos po 'gag pa'i mi rtag pa'o/ /mtshan nyid de dag kyang rdzas nyid du yod par 'dod pa la tshad ma med par bstan pa'i phyir smras pa/ de la byang chub sems dpas zhes bya ba la sogs pa la/ des 'du byed tsam zhig 'byung bar dmigs par zad ces bya bas ni ngo bo nyid med par mngon sum gyi tshad mas bstan pa yin no//de ltar na skye ba la sogs pa rnams mngon sum gyi tshad mas ngo bo nyid nges par gzung bar mi nus pa yin no zhes bstan pa yin no/ /rigs pas dpyad na zhes bya ba ni rjes su dpag pas kyang bya ba mi dmigs par bstan pa yin no/ / de ltar ngo bo nyid dang / bya ba nges par mi dmigs pas rdzas nyid du med do zhes bya ba ni rang bzhin no/ /rjes su dpag pa'i rigs pas rnam par dgrol ba ni gal te gzugs la sogs pa zhes bya ba la sogs pa la/ gzugs kyi skye ba gzugs las gzhan nyid du 'gyur na ni tshor ba la sogs pa bzhin du dngos po tha dad du skye bar thal par 'gyur ro//'dod pa kho na yin pas gnod pa med do zhes bya bar gzhan gyi 'dod pa bkod nas smras pa/ de lta na ni 'du byed kyi skye ba gang yin pa dang zhes bya ba la sogs pa la/ chos kyi skye ba yang gzhan yin la skye ba'i skye ba yang gzhan yin pas de chos brgyad dang gcig la 'jug par byed do zhes rnam par 'jog par byed pas de dag ni skye ba gnyis 'dod pa yin no//de'i phyogs la skyon bstan pa'i phyir de la 'du byed kyi skye ba de zhes bya ba la sogs pa la/ 'du byed kyi skye ba dang / skye ba'i skye ba de tha dad pa yin nam gcig nyid yin/ rnam par rtog pa gsum pa ni med do/ / gcig nyid yin na ni don tha dad par rigs pa ma yin te/ de dag skye ba gcig gis rab tu phye ba'i lus yin pa'i phyir ro/ /tha dad pa yin na ni gzugs kyi skye ba zhes tha snyad du gdags par mi rigs te/ tshor ba la sogs pa'i rang bzhin no/ /ji ltar gzugs las gzhan pa'i tshor ba la sogs pa'i skye ba gcig pa ma yin pa de bzhin du 'dus byas kyi ngo bo dang /skye ba yang rigs pa'i lam 'dis rnam par gzhag par bya'o/ /de bzhin du rga ba la sogs pa la yang ci rigs par sbyar bar bya'o/ /'jig pa yang don tha dad pa zhig yin par gyur na nyes pa 'phel ba bstan pa'i phyir smras pa/ gal te 'jig pa zhes bya ba la sogs pa la 'jig pa yang don tha dad par gyur pa zhig yin na ni tha dad du gyur pa'i skye ba dang 'jig pa 'thob par 'gyur ro//de dag la skye ba yod par gyur na ni de 'gag par yang 'gyur bas de nyams par 'gyur ba yang 'thob par 'gyur ro zhes bya ba smras pa/ 'du byed thams cad 'gag par 'gyur te zhes bya ba la phyogs de khas len par byed na skyon bstan pa'i phyir/de lta na ni tshegs chung ngus zhes bya ba la sogs pa la/ tshegs chung ngus zhes bya ba ni mthar gyis 'jug pa'i snyoms par 'jug pa dgu la ma ltos par yang so so'i skye bo thams cad kyis kyang 'gog pa'i snyoms par 'jug pa ltar sems dang sems las byung ba 'gog pa 'thob par 'gyur ro//ji ltar 'gog pa'i snyoms par 'jug pa sems dang sems las byung ba 'gags pas rab tu phye ba yin pa ltar 'jig pa skye bar gyur pa yang de bzhin no zhes bya ba ste/ ji ltar 'gog pa'i snyoms par 'jug pa dang bral bar gyur pa'i gnas skabs na sems dang sems las byung ba 'jug pa ltar/'jig pa 'gag par 'gyur ba'i dus na yang skye bar thal bar 'gyur ro zhes bya ba ni nyes pa lhag par sogs par bstan pa yin no/ /de ltar mtshan nyid rab tu bkag nas 'du byed rnams dus thams cad du yod par rab tu dgag pa'i phyir/rigs kyi bu'am zhes bya ba la sogs pa la/ dus gsum du yang 'du byed rnams rnam par gnas pa la ngo bo nyid kyis yod par gyur na ni rtag par thal bar 'gyur bas de lta na de dag la 'dod chags dang bral ba dang rnam par grol bar yang mi 'gyur ro//bzlog pas bstan pa'i phyir de las bzlog pa ni rung ste zhes bya ba smos te/ ther zug ma yin pa dang mi rtag par mthong bas ni 'dod chags dang bral ba dang / rnam par grol bar yang rung ngo zhes bya ba'o/ /ji skad bstan pa'i mi rtag pa nyid kyi rjes su 'brangs nas byang chub sems dpa' rnams kyi sdug bsngal gyi rnam pa'i khyad par bstan pa'i phyir de ltar rnam pa de dag gis zhes bya ba la sogs pa la/gzugs la sogs pa'i 'du byed la gang zag la bdag med pas bdag med par bstan te/ gzugs la sogs pa rang nyid kyis bdag med pa'i mtshan nyid yin pa'i phyir dang //de dag la de las gzhan pa'i mtshan nyid kyang med pa'i phyir ro/ /brjod par bya ba'i dngos po thams cad ces bya ba ni brjod par bya ba'i tshig gi gnas la'o/ /brjod pa'i ngo bo nyid kyi zhes bya ba ni brjod par bya'o/ /de ltar brtags pa'i chos rnams kyis dben pa gang yin pa de ni chos la bdag med pa zhes bstan to//sngar gyi rgyu yang dag par chad pa zhes bya ba ni gang la sngar gyi rgyu yang dag par chad pa yod pa de ni sngar gyi rgyu yang dag par chad pa'o/ /de dag gi rgyu yang rnam pa gnyis te/ nyon mongs pa bskyed pa'i rgyu dang / skye ba bskyed pa'i rgyu'o/ /de la nyon mongs pa bskyed pa'i rgyu yang dag par chad pa la ni nyon mongs pa ma lus pa dang bral bar phung po lhag ma dang bcas pa'i mya ngan las 'das pa'o//skye ba bskyed pa'i rgyu yang dag par chad pa las ni phung po'i lhag ma ma lus pa spangs pas phung po'i lhag ma med pa'i mya ngan las 'das pa ste/de ltar na rnam pa gnyis so/ /de la lhag ma dang bcas pas ni nyon mongs pa dang nye ba'i nyon mongs pa nye bar zhi ba zhes bya'o/ /cig shos ni sdug bsngal nye bar zhi ba'i phyir zhi bar rig par bya ba'o/ /de ltar na rgyu dang bcas pa'i skye ba la sogs pa'i sdug bsngal nye bar zhi bas zhi ba nyid du gsungs pa yin no//lhag pa'i bsam pa ma dag pa'am zhes bya ba ni mos pas spyod pa'o/ /bden pa ma mthong ba zhes bya ba ni bden pa rtogs pa dang nges pa ma yin pa nyan thos so so'i skye bo'o/ /gzhan las thos pa'i rjes su 'brangs nas mya ngan las 'das pa la mos par 'gyur te/ tshig gis mya ngan las 'das pa ni zhi ba'o zhes smra bar byed pa'o/ /de ltar yang dag pa ma yin pa'i mya ngan las 'das pa la mos pa ste/ mya ngan las 'das pa la dmigs nas so so rang gis rig pa'i ye shes ma thob pa'o/ /de'i phyir smras pa/ 'on kyang de ni zhes bya ba la sogs pa la/ de la mya ngan las 'das pa'i rnam par rtog pas ni yang dag pa ma yin pa'i rnam par rab tu spong ste/yang dag pa yang ma yin yang dag pa ma yin pa yang ma yin zhes byas nas so/ /tshul bzhin yid la byed pa de ni yod de zhes bya ba ni rnam par byang ba dang mthun pa yin te/ tshul bzhin yid la byed pa dang ldan pa'i phyir ro//de lta bas na theg pa chen po las tshigs su bcad pa/ yang dag min rtog yang dag min/ /yang dag ma yin min mi rtog /rtog min mi rtog ma yin pa/ /shes bya thams cad yin par brjod/ /ces bstan pa yin no/ /yang dag pa yang ma yin yang dag pa ma yin pa yang ma yin pa ni/rnam par byang ba dang mthun pa de bzhin gshegs pas bstan pa'i rgyu las byung ba'i rnam par rtog pa'o/ /rtog pa ma yin pa ni de bzhin nyid dang / de'i ye shes gang yin pa'o/ /rtog min mi rtog ma yin pa ni de'i rjes la thob pa'i 'jig rten pa'i shes pa'o/ /don de nyid rab tu bsgrub pa'i phyir dpe bstan pa ni 'di lta ste/rgyal po'i bu'am zhes bya ba la sogs pa la/ rgyal po dang khyim bdag gi bu smos pa ni bdag por gyur pa dang 'byor pa dang ldan pas khyim nas phyir mi 'byung bar nus pas so/ /yang dag pa'i ri dwags kyi bsngags pa thos nas de dag sngar sngon du gyur pa'i ri dwags kyi bsngags pa yin no snyam nas de dag la mos pa 'jug par 'gyur te/yang dag pa'i ri dwags sngar ma mthong ba'i phyir ro/ /sngon med pa de dang de dag mthong nas ni bdag nyid kyi mos pa byas pa de dag la brdzun pa'i 'du shes skye bar 'gyur te/ de'i bdag nyid ma yin pa la mos par gyur to snyam ste/sngon gyi mos pas de dag ngo tsha ba skye bar 'gyur ro/ /tshogs yongs su smin cing 'phel bar gyur pa na ni zhes bya ba ni byang chub sems dpa' rnams kyi ni sa rab tu rtogs pa'i dus na'o/ /nyan thos rnams kyi ni bden pa mthong ba'i dus na'o/ /mngon sum gyi shes pa skye bar gyur te zhes bya ba ni gnyis ka ste/bdag med pa gnyis mthong bas so/ /gang yang byang chub sems dpa' byis pa'i blo can nam/ nyan thos dag 'di lta bu ni mya ngan las 'das pa'o zhes de tsam la mos par byas nas cung zhig spong ba la mtshams sbyor bas spang bya'i gnyen po thob par bya ba'i phyir gong nas gong du bstan pa'i khyad par la 'jug par mi 'gyur bas de sdug bsngal thams cad las grol bar mi 'gyur ro zhes rab tu bstan pa'i phyir dpe gnyis pa bstan pa'i ched du smras pa/dper na mi nad kyis thebs pa zhes bya ba la sogs pa la rim gro byas na zhes bya ba ni nye bar spyod pa dag gis so//de dag la mos shing zhes bya ba ni 'di kho na nad thams cad kyi gnyen por gyur pa'i sman yin no zhes bya'o/ /sman snga ma dang phyi ma de dag bsten nas zhes bya ba la snga ma'i gnyen po ni snga ma nyid do/ /phyi ma'i gnyen po ni phyi ma nyid do/ /yid ches par mi byed pa'i don bstan pa'i phyir de'i tshig la mngon par dad par mi 'gyur ba zhes bya ba la sogs pa'o//yang na sgra'i rjes su 'brangs pas de nyid la de kho nar 'du shes nas yang dag pa'i mya ngan las 'das pa mthong bar mi 'gyur ro/ /de ma mthong na nyon mongs pa'i nad las grol bar yang mi 'gyur te/ nad kyis btab pa'i skyes bu bzhin no zhes bya bas dpe gnyis pa bstan pa yin te de'i phyir mi nad kyis thebs pa lta bu zhes bya ba la bla ma las kyang ches bla mar gyur pa ni 'jug pa'i sgos bsdus pa'o//shin tu bla mar gyur pa gsal ba ni mos pas spyod pa'i gnas skabs na'o/ /shin tu zab pa dang rgya che ba ni yongs su smin pa'i gnas skabs na'o//ches rgya che zhing shin tu rgya che ba ni rnam par grol ba'i gnas skabs na'o/ /yang dag par bstan cing gtams te/ rjes su bstan pa zhes bya ba ni nyan thos kyi dbang du byas nas bstan pa dang bshad pa'o/ /yang na don gcig pa nyid do/ /yan lag dang nying lag dang /yo byad thams cad dang shin tu ldan pa zhes bya ba ni bzhon pa skyon dang bral ba dang / lam brgyags kyi yo byad thams cad dang ldan par bstan pa'o/ /gnyis las gang yang rung ba gcig ma tshang na bgrod par bya ba ji srid par phyin par mi 'gyur ro/ /byang chub sems dpa'i sa'i gzhi'i rnal 'byor gyi gnas las byang chub kyi phyogs kyi le'u ste bcu bdun pa'i 'grel pa rdzogs so// //yang byang chub sems dpa'i yon tan gyi dbang du byas nas sdom gyi tshig so sor 'byed do zhes bya ba'o/ /dang por byang chub sems dpa'i yon tan bstan pa ni ngo mtshar rmad du byung ba'i chos rnam par gzhag pa nas sbyor ba'i 'bras bu yod pa rnam par gzhag pa'i bar te/ma 'ongs pa'i dus nye bar bzung nas 'byung bar mi 'gyur ro zhes bya ba ni ngo mtshar ro/ /'das pa dang de ltar gyi dus nye bar bzung nas ma byung bas na rmad du byung ba nyid do/ /nyan thos dang sems can thams cad dang thun mong ma yin zhing med pa de'i phyir mthar bstan te gzhan gyi don bsgrub pa dang bdag gi don bsgrub pa'i dbang du byas nas ngo mtshar rmad du byung ba'i chos lnga rnam par gzhag pa yin no//gzhan gyi don bsgrub pa yang rnam pa gnyis te sbyor ba dang bsam pa nyid do/ /de la sbyor ba nyid smras pa/ rgyu med par sems can thams cad la mnyes gshin pa zhes bya ba la byang chub sems dpa' rnams ni sems can thams cad la rgyu med par mnyes gshin pa'i ngo bo nyid de/rnam par smin pa la re ba med pa'i phyir yin gyi sems can gzhan ni de lta ma yin no/ /yang sbyor ba ni rnam pa gnyis te/ sems can rnams kyi don du sbyor ba na sdug bsngal gyis mi mjed pa dang /'dod chags la sogs pa'i nyon mongs pa lhag par spyod pa'i gdul bya 'dul ba'i thabs shes pa'o/ /rang gi don phun sum tshogs pa yang gnyis te/ shes bya'i sgrib pa rnam par dag pa'i ye shes kyi spyod yul gyi de kho na nyid so sor rig pa dang mthu'i chos rgya cher thob pa'o//yang na bsam pa nyid dang / sbyor ba nyid kyis gzhan gyi don sgrub pa nyid kyi dbang du byas nas ngo mtshar rmad du byung ba'i chos lnga rnam par gzhag go/ /bsam pa ni snga ma bzhin no/ /sbyor ba'i sgrub pa ni rnam pa bzhi ste/ bdag nyid sdug bsngal la mi mjed pa dang /gdul bya'i thabs shes pa dang / nyon mongs pa med par sbyor ba dang / skyo ba med par sbyor ba nyid do/ /thun mong ma yin pa zhes bya ba ni ngo mtshar nyid ston pa ste/ bdag nyid la ltos nas ngo mtshar ma yin pa'o/ /gzhan la phan pa'i rgyu las byung ba'i sdug bsngal gyi bde ba'i bdag nyid du gyur pa ni ngo mtshar nyid do//'jig rten gzhan gyi don la 'dun pa chen po med pa de'i bdag nyid can rnams ni gzhan la phan par bya ba'i phyir sdug bsngal dang du len pa la ngo mtshar ba med pa'o/ /yang na gzhan la phan pa'i phyir sdug bsngal nyid bde ba'i bdag nyid du 'gyur pa ni ngo mtshar ba med pa ste/gzhan la brtse ba'i bsam pa dang ldan pa'i phyir ro/ /de'i bsam pa can ni sdug bsngal ba khas len pa ni ngo mtshar ba ste/ sdug bsngal nyid la sdug bsngal du mi lta ba bzhin du khas len pa'o/ /de kho na nyid kyi don mthong ba'i shes rab dang ldan pa ni 'khor ba dang mya ngan las 'das pa'i nyes dmigs dang phan yon mthong ba la ngo mtshar che ba med pa dang /de lta na yang sems can la brtse ba'i phyir 'khor bar sgrub par byed pa ngo mtshar che ba dang / yang na bzlog nas sems can rnams la brtse bas 'khor ba dang mya ngan las 'das pa'i skyon dang yon tan la blta ba ngo mtshar che ba dang //sems can la brtse ba yin pa'i phyir 'khor ba'i sdug bsngal khas len pa la ngo mtshar che ba med pa'o/ /dben pa gtsor byed pa la zhugs pas bde ba'i nyams shes bzhin du mi smra ba la ngo mtshar che ba med pa dang / de lta na yang 'du 'dzi'i nang na gnas pa'i sbyor bas chos bstan pa la sbyor ba ngo mtshar che ba dang /bzlog nas ni sems can rnams la byams pa yin pas chos ston pa ni ngo mtshar mi che ba dang / de lta na yang mi smra ba'i tshul gyis bde ba'i nyams shes pa ngo mtshar che'o/ /sems can rnams la brtse bas sems can rnams kyi don du pha rol tu phyin pa las byung ba'i dge ba'i rtsa ba yongs su bsngo ba ngo mtshar mi che ba dang /cung zad la ltos pas spyod pa ni ngo mtshar che ba dang / gzhan gyi bya ba la rang gi bya bar mthong bas/ bdag gi bya ba ltar byed pa ngo mtshar mi che ba dang snying rje'i dbang gis gzhan gyi don bdag gi don nyid du byed pa ni ngo mtshar che ba'o//bsam pa'i bye brag med par rnam pa lngas sems can thams cad la sems snyoms par 'gyur ro/ /dang po byang chub tu sems bskyed pa'i dus na yang dbye ba med pa'i bsam pas smon lam 'debs pa ste/ sems can thams cad kyi don gyi dbang du byas nas sems bskyed pa'i phyir dang /phan dang bde ba'i bsam pa'i dbye ba med pa dang / snying brtse ba'i bsam pa'i dbye ba med pa dang / chos nyid kyi bsam pa'i dbye ba med pa dang / don dang sbyor ba'i bsam pa'i dbye ba med pa'o/ /rnam pa lnga po 'di dag gis byang chub sems dpa' rnams sems can rnams la sna tshogs kyi blo skyed par mi byed do//des na de sems can thams cad la sems snyoms pa yin no/ /de lta na yang sems can thams cad kyi don du bdag gis sbyar bar bya'o zhes 'jug par 'gyur gyi tha dad kyi bsam pas ni ma yin no/ /byang chub sems dpa' rnams kyi sems can rnams la phan 'dogs pa'i bya ba thams cad ni mdor bsdu na rnam pa lngar rig par bya ste zhes bya ba la phan 'dogs pa ni mdor na rnam pa gnyis te//tshe 'di pa dang / ma 'ongs pa'i'o/ tshe 'di pa'i yang sems can rnam pa gsum la rnam pa gnyis te/'jig rten 'di'i bde ba'i phyir 'tsho ba log pa la zhugs pa rnams la yang dag pa'i 'tsho ba ston pa bsgrub pa dang / bya ba dag la mi mthun par bsgrub pa dag la rigs pa nye bar ston pa dang / bdag nyid kyi bde ba'i don bsgrub par mi nus pa dag la mgon yod par byed pa'o/ /ma 'ongs pa yang rnam pa gnyis te/mngon par mtho ba 'dod pa rnams la mngon par mtho ba'i lam ston pa dang / thar pa 'dod pa rnams la theg pa gsum nye bar ston pa ste/ rnam pa lnga po 'di dag gis byang chub sems dpa' sems can rnams la phan 'dogs par byed do/ /rnam pa lnga po 'di dag gis dus rtag tu sems can rnams la yang dag par sgrubs shig ces smon lam 'debs par byed do//de ltar byas na lan du phan 'dogs par rnam par gzhag go/ /rtag tu smon par bya ba yin te zhes bya ba ni nyin zhag gcig la yang byang chub sems dpa' mang du smon par byed par 'gyur ba ste/bsam pa de la mang du zhugs pa'i phyir ro/ /de'i phyir gnas lnga po de la 'dod par bya ba yin te/ /mos pas spyod pa ni rnam pa gsum mo/ /phyi ma gnyis ni sa la zhugs pa rnams kyi'o/ /sangs rgyas 'byung ba mnyes par bya ba ni/ gang gi tshe gang du sangs rgyas 'byung bar 'gyur ba der skye bar smon lam 'debs pa dang /de dag gi spyan sngar chos nyan par smon lam 'debs pa nyid dang / sems can yongs su smin par byed nus par smon pa nyid dang / sangs rgyas mthong ba dang yid la byed pa dang mi 'bral ba dang / dam pa'i chos thos pa dang mi 'bral ba dang /sems can gyi don yid la byed pa dang 'bral ba'o/ /sa la zhugs pa rnams kyi ni byang chub tu smon pa dang / byang chub 'thob pa rnams kyi ni nyan pa'i 'khor tshogs par smon pa'o/ /dge ba la brten pa'i phyir de'i bsam pas sems can gyi don gang ci byas pa de grub par 'gyur zhes bya ba ni sbyor ba dang 'bras bu dang bcas pa'o//'di dag thams cad ni dge ba'i bshes gnyen gyi bya ba bstan pa'i rjes su 'brangs nas shes par bya'o/ /de'i phyir smras pa/ mchod pa dang / bsten pa dang / tshad med pa'i le'u las zhes bya ba'o/ /gang gis sbyor ba dang / gang ltar sbyor ba dang /gang la sbyor ba'i dbang du byas nas yang dag pa'i sbyor ba rnam par gzhag par bya'o/ /rjes su bsrung ba'i sbyor bas rab tu sbyor ba'o/ /kha na ma tho ba med pa'i sbyor bas gang ltar sbyor ro/ /mos pas spyod pa'i sa dang / skyon med pa'i sa la 'jug pa dang spyod pa'i sa la rab tu sbyor bar byed do//de bzhin gshegs pa'i bstan pa la nan tan byed pa dang / bdag nyid kun nas nyon mongs pa med par nan tan byed pa dang / sems can yongs su smin par byed pa la nan tan byed pa'i dbang du byas nas 'phags pa'i chos rjes su bsrung ngo / de la yid gzhungs pa ni shes rab kyi khyad par ro//de'i phyir smras pa/ shes pa des zhes bya ba ste gang gis myur du 'dzin par nus par 'gyur ba'o/ /des na smras pa/ myur ba myur ba kho nar zhes bya'o/ /dran pa ni thos pa brjed par mi 'gyur ba'o/ /nge'i phyir smras pa/ blangs pa'i chos rnams zhes bya'o//shes pa ni yang dag ji lta bzhin du mthong ba'o/ /gzung ba'i chos rnams kyi don la nye bar rtog go zhes bya bas ni bsams pa las byung ba'i shes pa bstan to/ /so sor rtogs par 'gyur ro zhes bya ba ni bsgoms pa las byung ba'o/ /'grib pa ni yang mi 'byung ba ste zad pa zhes bya ba'i tha tshig go//de dag 'thob par byed pa ni 'grib pa dang mthun pa'o/ /de la phan pa yin pas na 'grib pa dang mthun pa'i gzhi zhes bya'o/ /gzhi de nyid la yang rnam pa gnyis te/ tshe 'di la nyams pa'i cha dang mthun pa dang / /ma gus par spyod pa'o/ /ma 'ongs pa'i ni las kyi nyes pas bsdus pa rnams te/gang gis yid gzhungs pa la sogs pa nyams par byed pa'i ngag gi las de dang mthun pa rnams so/ /de dag gnyi ga yongs su spangs pa dang nges par bstan pa ni bya ba'o/ /gnas pa ni dus kyi rjes su 'jug pa'o/ /'phel ba ni khyad par du 'phags par 'gro ba'o//lhag ma ni snga ma bzhin no/ /dbang po rnams kyi sgo bsdoms pas ni yul dang nyon mongs pa rnams las rang gi sems kun du bsrung ngo / /'jig rten gyi rjes su 'jug pa'i nyon mongs pa med pas ni gzhan gyi sems kun du bsrung ngo / /sbyor ba rnam pa gsum gyis kha na ma tho ba med pa'i sbyor ba rnam pa lnga bsdus pa yin te/cho ga ma nyams pa'i sbyor ba nyid dang / chen po nyid dang / rang gi sbyor ba mthar thug par 'gro ba nyid do/ /sbyor ba rnam pa 'di gsum ni gus par byed pa'i sbyor ba zhes bya ba yin la/ gzhan ni rtag tu byed pa'i sbyor ba dang / yongs su bsngo pa'i sbyor ba zhes bya'o//mos pa'i stobs bskyed pa'i sbyor ba so sor rtog pa'i stobs bskyed pa'i sbyor ba ni mos pas spyod pa'i sa la'o/ /bsam pa'i khyad par 'thob pas lhag pa'i bsam pa dag pa'i sbyor ba ni sa bdun la'o/ /nges par gyur pa'i sbyor ba ni sa lhag ma rnams la'o/ /'bri ba dang mthun pa ni thos pa dang /bsams pa dang / bsgoms pa'i shes pa'i mi mthun par gyur par gyur par rnam par gzhag par bya ste go rims bzhin du dang po dang / gsum dang / gcig gis so/ /gnyid la sogs pa bde ba'i dbang du gyur pas ji ltar thos pa'i don sems par mi byed pa nas ji srid yongs su mi rtog pa'i bar du'am/bya ba ngan pa'i las kyi mtha' la zhen pa dang / gcig tu dben par song nas sgrib pa'i rnam par rtog pa la kun du spyod pa la gnas pa nyid kyis dad/ de'i dbang du gyur pas ni bsams pa las byung ba'i shes pa las nyams par 'gyur ro//dpog par byed cing dman pa la sogs pa rtog cing nga rgyal byed pa ste/ de ltar na brnyas pa dang / 'gran pa dang / phrag dog gis nyon mongs pa'i dbang du gyur pas dge ba'i bshes gnyen dag las gdams ngag mi 'thob cing gdams ngag tshol bar mi byed do/ / mngon pa'i nga rgyal byed pa ni ma thob pa la thob po snyam du mngon pa'i nga rgyal byed pas yang dang yang du dge ba'i bshes gnyen la yongs su 'dri bar mi byed do/ /rang gi lta ba mchog tu 'dzin pas phyin ci log tu mngon pa'i nga rgyal byed cing rang gi rnam par rtog pas rab tu sbyor bar byed do zhes byas nas so/ / yang chos la phyin ci log tu mngon pa'i nga rgyal byed pa ni dman pa la sogs par ro/ /ma thob pa la thob par 'du shes pa la sogs pa las bzlog pa ni khyad par du 'gro ba la mthun par rnam par gzhag go/ /nyes pa dang bcas pa'i gang zag yongs su spong zhing gnod sems kyis kun nas bslang ba'i gnod pa byed pa'i bya ba dang /rnyed pa dang / bkur sti 'dod pas spyod lam phun sum tshogs pa dang / phyi rol pa'i gzhung thos pa dang / shes pas mkhas par bgrang ba dang / kha na ma tho ba dang bcas pa'i dge ba spyod pa dang / sred pa ni bdag nyid kyis mngon sum du byed par 'dod pa'o//ston pa ni gzhan dag la nges par sbyor bar byed pa'o/ /rnam par 'jog pa ni rigs pas nges par dpyod pa'o/ /de dag las bzlog pa ni yang dag pa'i yon tan no/ /bslab pa gsum ni gdul bya'i dbang du byas nas gnas bcur rnam par gzhag par bya ba ste/ khyim pa dang rab tu byung ba'i tshul khrims yang dag par blangs pa dang /tshul khrims de ma nyams shing ma ral ba'i dbang du byas nas gsum mo/ /sdom pa dang bcas pa'i lhag pa'i sems kyi bslab pa yang dag par blangs pa'i dbang du byas nas ni drug go/ /lhag pa'i shes rab kyi bslab pa yang dag par blangs pa'i dbang du byas nas ni tha ma'o//yang kha cig tu ni mngon du rgyu dang / bag la nyal gyi gnyen por 'gyur ba'i phyir gnas tha ma gnyis lhag pa'i shes rab kyi bslab par 'jog par byed do/ /byang chub sems dpa'i lung bstan pa thams cad mdor bsdu na rnam pa drug tu gzhag par bya'o//de'i phyir lung bstan pa ni rnam pa drug ste/ rigs la gnas pa lung ston pa ni pha rol tu phyin pa'i rigs kyi rtags ma lus pa dang ldan pa'i sems can skal ba dang ldan pa khyad par can la ma 'ongs pa'i dus na 'di sangs rgyas su 'gyur ro zhes byang chub tu lung ston par mdzad do/ /de ltar na rigs la gnas pa thams cad lung ston pa ma yin gyi/'on kyang bsam pa dang sbyor ba khyad par can 'ga' zhig lung ston par mdzad do/ /sems bskyed pa lung ston pa ni kha cig shin tu drag cing dang ba'i dad pa ro gcig par gyur pas bsod nams rgya chen po yongs su gzung ba byas nas de bzhin gshegs pa'i spyan sngar rdzogs pa'i byang chub tu sems skyed par byed pa de lta bu la yang dag par gzengs bstod pa'i phyir lung ston par mdzad do//mngon sum du gyur pa la lung ston pa ni sangs rgyas kyi spyan snga na gnas pa lung ston pa'o/ /lkog na gnas pa ni rab tu grags pa'i gang zag mngon sum du ma gyur pa lung ston pa'o//dus dpag tu rung ba ni dus thams cad kyi tshad byas nas lung ston pa'o/ /dus dpag tu mi rung ba ni dus nges pa med par lung ston pa'o/ /de ltar na gnas skabs kyi dbye ba dang / nye ba dang nye ba ma yin pa'i dbye ba dang / dus kyi dbye bar lung bstan pa rnam pa drug go/ /nges par zhugs pa ni rnam pa gsum ste/ skal ba dang ldan pa nyid dang / rigs la gnas pa'i theg pa gzhan gyis mya ngan las 'da' ba'i skal ba can ma yin pa'am/ mya ngan las mi 'da' ba ma yin pa'o/ /de lta bas na dus ring du gnas kyang byang chub kyi snod nyid yin pas des na nges par zhugs pa zhes bya'o//gnyis pa ni brtan zhing snying por gyur pa'i smon lam yongs su gzung bas yang dag par rdzogs pa'i byang chub las cis kyang ldog par mi 'gyur zhing rdzogs pa'i byang chub tu sems bskyed pa las cis kyang gzhan du smon lam 'debs par mi 'gyur ro zhes bya bas de sems bskyed pa'i nges pa la 'jug pa yin no//spyod pa nges pa la 'jug pa ni lhun gyis grub pa'i sbyor bas mngon par 'du byed pa med pa'i phyir spyod pa'i sbyor ba 'bras bu dang bcas pa yin no/ /yang de ni sa brgyad pa la gnas pa ste/phyi ma gtsor byas nas nges pa la 'jug pa zhes brjod pa yin no/ /de'i phyir smras pa/ de la de bzhin gshegs pa rnams ni zhes bya ba la sogs pa'o/ /byang chub sems dpas nges par bya ba ni zhes bya ba la/ ji ltar rigs pa de dag ma byas na byang chub sems dpa' zhes bya bar rnam par mi gzhag la sangs rgyas nyid thob pa yang ma yin no zhes bya bar nges par bya ba yin no//des na smras pa/ de dag ma byas na zhes bya ba la sogs pa la sems ma bskyed pa'i sbyin pa la sogs pa'i bsod nams kyi bya ba rnams pha rol tu phyin pa'i grangs su mi chud pas/des na dang por smon lam nyid gdab par bya ba yin no/ /snying rje can ma yin pa la sems can sems yongs su smin par byed pa med la/ de med par sangs rgyas nyid thob pa yod pa ma yin no/ /de'i phyir snying brtse ba ni nges par bya ba yin no/ /sems bskyed pa dang / snying brtse ba dang bcas pa yin yang brtson 'grus brtsams pa med na tshogs yongs su rdzogs par mi 'gyur bas/des na brtson 'grus 'bar ba ni nges par bya ba yin no/ /brtson 'grus kyang thabs kyis yongs su zin par gyur na gnas de dang de la 'dod pa'i 'bras bu bsgrub par nus par 'gyur te/tshul bzhin brtson 'grus brtsams pa la/ /dka' ba cung zad yod ma yin zhes bya ba'i tshig gis so/ /de lta bus rig pa'i gnas rnams la sbyar bar bya ba yin no/ /de lta bu'i sbyor ba dang ldan yang skyo bas sbyor ba lhod par gyur na yang sbyor ba lhod pa'i rig pa'i gnas yongs su rdzogs par 'gyur ba ma yin pas de'i phyir skyo ba med par bya'o//rnam pa gsum gyis skyo ba skye bar gyur na yang dag par rdzogs par byang chub par mi 'gyur te/ pha rol tu phyin pa'i sbyor ba la yongs su ngal ba dang / sems can rnams kyi log par bsgrub pa'i sdug bsngal ba dang /'khor ba'i sdug bsngal lo/ /de'i phyir skyo ba med pa'i yid kyis brtan zhing nges par bya'o zhes skyo ba med par bya'o/ /rtag par bya zhes bya ba ni skye zhing skye ba thams cad dang / nyi ma re re zhing sangs rgyas kyi chos yongs su smin par bya ba'i dbang du byas nas bag yod par dge ba'i chos bsgom pa nyid dang /sems can yongs su smin pa'i dbang du byas nas sems can rnams mgon dang bcas pa'i bya ba dang / byas pa shes pa dang bsod nams kyi tshogs yongs su rdzogs par bya ba'i dbang du byas nas de bzhin gshegs pa la mchod pa'o/ /bdag gi 'khrul pa yongs su shes pa ni ltung ba'i gnas kyi chos la so sor rtog pa'o//bya ba dang spyod par gtogs pa thams cad la byang chub kyi sems sngon du 'gro bas bla na med pa yang dag par rdzogs pa'i byang chub tu bya ba thams cad yongs su bsngo ba ni brtag par bya ba phyi ma ste/ spyod yul yongs su dag pa'i mdo'i rjes su 'brangs nas shes par bya'o//byang chub sems dpa' gnas bcu gtso bo yin par yid la bya zhing gzhan dag la yang de bzhin du bstan par bya ba yin no/ /de'i phyir smras pa/ 'dzin zhing mchog tu 'dogs pa zhes bya ba la/ sangs rgyas kyi rigs na rigs thams cad kyi gtso bo yin te/yon tan thams cad kyi rgyu'i ngo bo yin pa'i phyir dang / gzhan gyi don thams cad bsgrub pa'i rgyur 'gyur ba'i phyir ro/ /smon lam thams cad kyi gtso bo ni dang po sems bskyed pa yin te/ de'i rgyu las dge ba'i rtsa ba gzhan thams cad 'byung ba'i phyir ro/ /dge ba'i chos thams cad la sbyor ba dang /dge ba thams cad la rtsom pas bsdus pa'i phyir brtson 'grus dang / shes rab ni gtso bo yin no/ /kha na ma tho ba med pa'i chos bstan pas bsdus pa'i phyir snyan par smra ba nyid gtso bo yin no/ /skyon dang yon tan thams cad spangs pa dang / mthar thug pa thob pa'i phyir de bzhin gshegs pa ni sems can thams cad kyi mchog go//thabs la mkhas pa rnams kyi nang na ni rnam par dag pa'i thabs la mkhas pa gtso bo yin no/ /gang la gdags par bya ba dang / gang gi phyir gdags par bya ba dang / gang ltar gdags pa dang / gang gi sgo nas gdags pa'i dbang du byas nas gdags pa rnam pa bzhir rnam par gzhag go//mdo'i sde la sogs pa gsung rab tu gtogs pa yan lag bcu gnyis po go rims bzhin du sbyar ba dang / go rims bzhin du yang dag par bkod pa rnams pa gzhan dag gis gdags pa ma byas shing ma bstan te/de'i phyir sangs rgyas dang / byang chub sems dpa' thams cad kho nas rnam par gzhag pa'o/ /des na de lta bu'i tshig gsungs pa de ni de bzhin gshegs pa'i bstan pa zhes bya ba'am/ sangs rgyas kyi gsung zhes bya'o/ /chos de yang bden pa mngon par rtogs par bya ba'i phyir zhes bya bar de'i rjes la de rnam par gzhag go//bden pa'i don ni phyin ci ma log pa'i don te/ rnam pa de dang des phyin ci ma log pa'i don to zhes bya ba'i tha tshig go/ /nyan thos rnams kyi bden pa'i dbye ba rnam par gzhag pa ni bzhi'i bar du ste/ la lar ni gcig go//kha cig tu ni gnyis so/ /kha cig tu ni gsum mo/ /la lar ni bzhir bstan to/ /byang chub sems dpa' rnams kyi ni gcig la sogs pa bcu'i bar gyi dbye bas so/ /ston pa po'i gzhung tha dad kyi dbang du byas nas bden pa ni gcig kho na ste/ gnyis su med do zhes bstan te/phan tshun gcig la gcig 'gal bar gyur pa ni bden pa yin par dka' ste/ phan tshun 'gal ba ni bden pa ma yin pa'i phyir ro/ /rnam pa gnyis ni 'jig rten dang 'jig rten las 'das pa'i tshad nam mkha'i spyod yul gyi dbang du byas nas te/ 'khrul pa med pa'i 'jig rten gyi shes pa'i dbang du byas nas ni/kun rdzob kyi bden pa ste/ de rtogs par bya ba'i phyir mngon par brjod pa 'jug pa ni kun rdzob ces bya ste/ ko bas pha rol tu sgrol bar byed pa la ko bas sgrol zhes bya ba lta bu'o/ /dam pa'i shes pa ni 'jig rten las 'das pa'o/ /de'i don ni don dam pa ste/don dam pa'i ye shes kyi spyod yul zhes bya'o/ /de la dang po ni 'jig rten la grags pa dang / rigs pas grags pa'i dbang du byas pa'o/ /gnyis pa ni nyon mongs pa dang shes bya'i sgrib pa rnam par dag pa'i spyod yul gyi de kho na nyid do/ /mtshan nyid kyi bden pa ni/ chos rnams kyi rang dang spyi'i mtshan nyid kyi dbang du byas nas med na mi 'byung ba'o//ngag gi bden pa ni drang po'i ngag ste/ slu ba med pa nyid do/ /bya ba'i bden pa ni/ ji skad smras pa de bzhin byed pa ste/ rang gi tshig dang rjes su mthun pa'i bya ba byed pa'o/ /yang las kyi mtshan nyid kyi dbang du byas nas/skye bo bram ze rnams kyi mchod sbyin las ni/ sems can de dang de bsad na zhes 'byung la/ de'i gnyen po'i phyogs las ni sems can rnams la gnod pa mi bya zhes 'byung ngo / /yang gzhan dag na re ni/ rtag pa'i 'jig rten thob par 'gyur/ /zhes zer ro/ /'di lta bu dag ni brdzun te/de las bzlog nas ni 'du byed thams cad mi rtag par ston pa'i tshig ni bden pa yin no/ /yang de dag gis smras pa de'i 'bras bu ni bdag gir 'gyur ro/ /bdag ni 'bras bu la longs spyod par 'gyur ro zhes bya ba'o/ /yang dag pa'i bram ze rnams kyis ni de dag gis smras pa de dag brdzun par shes pas de las bzlog pas 'di dag bdag kyang ma yin la/bdag gi yang ma yin pa zhes bstan pa ni bya ba'i bden pa zhes bya'o/ /kun nas nyon mongs pa dang rnam par byang ba'i phyogs dag gi rgyu dang 'bras bus bsdus pas phyin ci la log pa dag gi dbang du byas nas 'phags pa'i bden pa bzhi'o//bzhi po de dag nyid kyi dbye ba las rnam pa lngar bstan te/ rgyu'i bden pa ni kun 'byung gi bden pa'o/ /'bras bu'i bden pa ni sdug bsngal gyi bden pa'o/ /rgyu dang 'bras bu'i bden pa rnam par gzhag pa'i rim gyis dbye ba tha dad pa nyid de/ shes pa'i bden pa ni lam gyi bden pa'o//bzhi po kun kyang shes bya'i bden pa ste/ shes bya thams cad bsdus pa'i phyir ro/ /yang phyin ci ma log pa'i rgyu rnam par gzhag pa ni rgyu'i bden pa'o/ /de bzhin du 'bras bu rnam par gzhag pa ni 'bras bu'i bden pa'o/ /bden pa bzhi la rjes su shes pa rnams ni shes pa'i bden pa'o//yang dag pa'i ye shes dang / de bzhin nyid ni shes bya'i bden pa'o/ mya ngan las 'das pa ni mchog gi bden pa'o/ /bden pa'i bden pa ni drang po'i ngag go/ /brdzun pa'i bden pa ni drang po ma yin pa'i tshig ste/ de'i ngo bor yod pa'i phyir ro/ /yang dngos po brjod du med pa ni bden pa'i bden pa ste/de bzhin nyid dang / phyin ci ma log pa'i don gyis so/ /khams gsum na nyi bar spyod pa'i nye bar len pa'i phung po ni brdzun pa'i bden pa ste/ sgyu ma lta bu'o zhes bya ba'i mdo'i tshig gis so/ /gzhan dag ni gzhan du ston par byed de/ bden pa'i bden pa ni 'gog pa'i bden pa dang /lam gyi bden pa'o/ /brdzun pa'i bden pa ni sdug bsngal dang / kun 'byung gi bden pa yin par shes par bya'o zhes zer ro/ /yongs su shes par bya ba'i bden pa ni 'phags pa'i bden pa bzhi'o/ /'du byed rnams sam/'dod pa'i yon tan rnams la bde ba'i tshor ba lus dang sems kyis myong bar phyin ci ma log par ni ro myang ba'i bden pa'o/ /sdug bsngal dang yid mi bde ba ni nyes dmigs kyi bden pa'o/ /'dod pa la 'dun pa spangs pa ni nges par 'byung ba'i bden pa'o/ /chos la bdag med pa'am/skye ba la sogs pa'i chos nyid ni chos nyid kyi bden pa'o/ /rang gi gnas la dad pa thob pa ni mos pa'i bden pa'o/ /'phags pa rnams kyi bden pa ni 'gog pa dang lam mo/ /'phags pa yin pa rnams kyi bden pa ni sdug bsngal dang / kun 'byung dag go/ /yang 'phags pa rnams kyi bden pa ni bden pa bzhi po de dag nyid la de dang de la de bzhin du sgrub pa'o//'phags pa ma yin pa rnams kyi bden pa ni de dag nyid la phyin ci log gi rnam par sgrub pa'i dbang du byas pa'o/ /'di dag kho na bden gyi gzhan ni gti mug go zhes rnam par gzhag pa'i tshul gyis sdug bsngal gsum po gang yin pa nyid 'jug pa dang /ldog pa dang / kun nas nyon mongs pa dang / rnam par byang ba'i dbang du byas nas rnam pa brgyad de/ 'jug pa'i bden pa ni kun rdzob kyi bden pa'o/ /ldog pa'i bden pa ni don dam pa'i bden pa'o/ /kun nas nyon mongs pa'i bden pa dang /rnam par byang ba'i bden pa ni 'phags pa'i bden pa bzhi'o/ /bden pa la rnam par rtog pa'i sbyor ba dang / bsod nams dang ye shes kyi tshogs kyi sbyor ba ni yang dag pa'i sbyor ba'i bden pa'o/ /bden pa rnam pa dgu ni lam gyi rnam pa dang / lam gyi mi mthun pa'i phyogs dang /lam gyi ngo bo dang / lam gyi 'bras bu'i dbang du byas pa'o/ /de la nye bar len pa'i phung po bzhi ni lam mo/ /de'i phyir smras pa/ mi rtag pa'i bden pa nas/ bdag med pa'i bar ro zhes bya'o/ /lam gyi mi mthun pa'i phyogs ni srid pa las sred pa ste/des 'khor ba'i nyes dmigs mi mthong ba'i phyir ro/ /srid pa dang bral ba la sred pa ste/ des mya ngan las 'das pa'i phan yon mi mthong ba'i phyir ro/ /de dag nyes dmigs dang / phan yon ma mthong bas lam skye bar 'gyur ba med pas shes nas so/ /lam gyi ngo bo ni mya ngan las 'das pa 'thob par rig par bya ste/gang gi phyir smras pa/ de spong ba'i thabs kyi bden pa dang zhes bya ba'o/ /'bras bu ni mya ngan las 'das pa rnam pa gnyis so/ /sdug bsngal gyi bden pa ni rnam pa bcu'o/ /sdug bsngal thams cad ni sdug bsngal rnam pa gsum gyi dbye ba'o//de la sdug bsngal gyi sdug bsngal ni rnam pa gnyis so/ /rnam par 'gyur ba'i sdug bsngal yang rnam pa gnyis so/ /'du byed kyi sdug bsngal nyid kyi rgyu dang 'bras bu'i dbye bas rnam pa gsum mo/ /gang gi phyir smras pa/ gnas ngan len gyi sdug bsngal gyi bden pa nas nyon mongs pa'i bden pa'i bar du'o//yang sdug bsngal gyi gnyen po dang spangs pa'i dbang du byas nas rnam pa gsum mo/ /sdug bsngal gyi gnyen po ni thog ma dang bar dang tha mar thob pa'i shes rab po/ /gang gi phyir smras pa/ thos pa dang tshul bzhin yid la byed pa'i bden pa dang / yang dag pa'i lta ba'i bden pa zhes bya'o/ /spangs pa ni yang dag pa'i lta ba'i 'bras bu'i bden pas te zhes bya ba'o/ /de'i rnam par dbye ba ni tshad med par rig par bya'o zhes bya ba ni bden pa re re yang dbye ba dpag tu med pa'i phyir ro/ /rnam par gzhag pa ni rnam pa bdun mdor bsdu na lam nyid dang /lam gyi 'bras bu rnam par gzhag pa'o/ /de la lam ni gtsor shes rab yin te/ nyon mongs pa ye shes kyis bcom nas zhes bya ba'i tshig gis so/ /gang gi phyir smras pa/ shes rab gang yin pa dang zhes bya ba la/ shes rab de ni yang rnam pa drug tu brjod par bya ste/de yang sems las byung ba yin pa'i phyir rten dang bcas pa nyid yin pas rten med par mi 'byung ngo zhes bya bar smras pa/ rten dang zhes bya ba la dmigs pa dang bcas pa yin pa'i phyir de bzhin no/ /rdzas dang lhan cig 'jug pa'i phyir grogs med pa ma yin no//bya bas rab tu phye ba yin pa'i phyir las med pa ma yin no/ /ma goms par ma yin pa'i phyir tshogs ma bsags par yang ma yin no/ /'bras bu dang bcas pa'i theg pa yin no zhes bya bar de ltar rnam pa bdun gyis theg pa rnam par gzhag pa yin no/ / lam yang tshogs dang bcas pa'i lam smos pas rnam pa gnyis su bstan pa yin no/ /theg pa chen po'i 'bras bu'i sgo nyid nas shes rab kyi dmigs pa'i khyad par bstan pa'i phyir smras pa brjod du med pa'i dngos po dmigs pa zhes bya ba la sogs pa la yang shes rab de nyid kyi dmigs pa dang /rnam pa dang / las kyis bstan pa ni de bzhin nyid ces bya ba la sogs pa la/ chos thams cad kyi don dam pa'i ngo bo nyid gang yin pa de ni de bzhin nyid do/ /de la dmigs pa'i rnam pa nyid ni rnam par mi rtog pa mnyam pa nyid do/ /ji ltar dmigs par 'gyur ba'i de bzhin nyid la rnam par rtog pa med pa de bzhin du shes rab kyang yin no zhes bya bas rnam par mi rtog pa mnyam pa nyid do//byung ba'i zhes bya ba ni las nyid de nyon mongs pa dang shes bya'i sgrib pa'i gnyen por gyur pa nyid kyis na/ rnam par mi rtog pa mnyam pa nyid do/ /de ltar na dmigs pa la sogs pa'i khyad par gyis shes rab bstan to//yang 'bras bu ni nyon mongs pa dang shes bya'i sgrib pa las rnam par grol ba'o/ /rnam pa 'di dag gis khyad par rnam par gzhag pa bstan pa'i phyir 'das pa dang / ma 'ongs pa dang zhes bya ba la sogs pa ni byang chub sems dpa'i yon tan bstan pa'i dbang du byas pa yin te/shes rab la sogs pa yang bstan pa yin no/ /yang dag pa ji lta ba bzhin yongs su shes pa'i sngon du 'gro ba nyid kyis gnas yin pa'i phyir yongs su btsal ba'i dngos po zhes bya'o/ /de'i phyir shes pa rnams la dngos po zhes ma bstan pa yin te/ yongs su tshol ba nyid dngos po'i don du shes par bya ba'i phyir ro//byang chub sems dpa' rnams kyi yon tan gyi khyad par dpag tu med pa bstan pa'i phyir smras pa/ dpag tu med pa lnga po 'di dag ces bya ba la/ grangs dang tshad yongs su chad pa med pa'i phyir dpag tu med pa'o/ / 'di dag la byang chub sems dpa' rnams thabs mkhas pas 'jug pa'i phyir zhes bya bas yul nyid do/ /de'i phyir smras pa thabs la mkhas par byed par zhes bya ba la thabs la mkhas pa thams cad ni de la brten pa'i phyir zhes byas nas so/ /byang chub sems dpas gang la dmigs nas de dag gi don du 'jug par 'gyur ba'i sems can de dag ni dpag tu med pas sems can gyi khams dpag tu med pa zhes bya'o//de dag gang du gnas pa dpag tu med pa dang / chos gang dang ldan pa'i dge ba la sogs pa kun du spyod pa dpag tu med pa dang / 'dul bar bya ba gang yin pa dpag tu med pa dang /rnam pa gang gis 'dul bar byed pa'i thabs dpag tu med pas 'dul ba'i thabs dpag tu med pa'o/ /yid kyis las 'byung ba bzhin no zhes bya ba ni 'di lta ste/ dmyal ba nas 'khor los sgyur ba'i bar du'o/ /sems can so so'i rgyud la ltos nas ni dpag tu med pa yin te/de ltar na rnam par gzhag pa dang / rgyud kyi dpag tu med pas sems can gyi khams dpag tu med pa bzhin no/ /'jig rten gyi khams kyang dbyibs dang / ming bstan pa dpag tu med pa'i phyir dpag tu med pa'o/ /de'i phyir smras pa/ phyogs bcu dag tu zhes bya ba la sogs pa'o//'jig rten gyi khams kyi dbang du byas nas de dag gi ming dang rnam par gzhag pa'i dbang du byas nas smras pa/ mi mjed de zhes bya'o/ /de bzhin du gzhan dag kyang rig par bya'o/ /gcig tu 'gyur ro zhes bya ba ni thams cad sdug bsngal las nges par grol bar bya ba'i phyir ro//gang yang tha dad kyi dbye ba ni rnam pa bcu'i bar du'o/ /rnam pa gnyis ni nyon mongs pa spangs pa dang ma spangs pa'i phyir te/ thams cad kyi thams cad du nyon mongs pa ma spangs pa ni mtha' dag gis bcings pa zhes bya'o/ /nyon mongs pa'i phyogs gcig spangs pa ni mtha' dag ma yin pas bcings pa'o//sa'i bye brag dang nyon mongs pa'i dbye bas kyang lhag ma dang bcas par spangs pa dang / ma spangs pa'i dbye ba'i dbang du byas nas so/ /dbang po'i bye brag gis ni rnam pa gsum mo/ /rigs kyi bye brag gis ni rnam pa bzhi'o//spyod pa'i bye brag gis ni rnam pa lnga'o/ /phyogs dang gnas skabs kyi dbye bas ni rnam pa drug go/ /yang bstan pa la ma zhugs pa'i dbye ba dang zhugs pa'i dbye bas ni rnam pa bdun no/ /bstan pa la ma zhugs pa ni rnam pa gnyis te/ gnas ngan pa la mngon par mos pa'i dbang gis de la zhugs pa dang /de la ma zhugs kyang mos pa med pa'o/ /zhugs pa yang dbang po'i bye brag gis rgyas pa dang / bsdus pa la mos pa rnam pa gnyis te/ gang gi phyir smras pa/ spros pas shes pa dang zhes bya ba la sogs pa'o/ /mdor bstan pa tsam gyis rtogs par 'gyur ba ni mgo glengs pas shes pa'o//de dag kyang gnas skabs kyi dbye bas ni rnam pa gsum du 'gyur ro/ /tshe de nyid la bstan pa'i dus su 'dul bar 'gyur ba'i phyir de'i mod la 'dul bar 'gyur ba ste/ tshul bzhin yid la byed pas so sor rig pa'i lam zhes bya'o//go rims bzhin du bsgrub pas 'dul bar 'gyur ba ni phyis 'dul bar 'gyur ba zhes bya'o/ /rkyen ji lta ba bzhin du 'jug par 'gyur bas na rkyen las 'gyur ba'i gdul bya zhes bya'o/ /yang tshe 'di dang skye ba gzhan la gdul byar 'gyur ba'i phyir gnyis ka'i ste rim bzhin no//dus gnyis kar byung ba ni rkyen las gyur pa'i zhes bya'o/ /'khor gyi bye brag gis ni rnam pa brgyad do/ /'dul ba po dang / 'dul bya'i thabs kyi bye brag dang / dus kyi bye brag gis rnam pa dgu nyid de/ bsgrub par dka' ba ni dbang po gdul bar dka' ba'o//de las bzlog pa ni bsgrub par sla ba nyid do/ /'jam pos gdul bar bya ba ni 'jam pos bsgrub par bya ba'o/ /chad pa'i las kyi sbyor bas gdul bar bya ba yin pa'i phyir tshar bcad pas bsgrub par bya ba'o/ /dus kyi bye brag gis drung nas 'dul ba la sogs pa la/de'i mod la 'dul ba gang yin pa de ni drung nas 'dul ba'o/ /de las bzlog pa ni rgyang ring po nas 'dul ba'o/ /'gro ba'i dbye ba dang / 'gro ba ma yin pa'i dbye ba dang / lus kyi dbye ba dang / 'du shes kyi dbye bas dbye ba rnam pa bcu ste/ 'gro ba'i dbye ba ni rnam pa lnga nyid do//'gro ba ma yin pa ni gcig nyid de/ srid pa bar ma ni 'gro ba'i ris las grol ba yin pa'i phyir ro/ /lus kyi dbye ba ni gzugs can dang gzugs can ma yin pa'i dbye bas rnam pa gnyis so/ /'du byed kyi dbye ba ni rnam pa gsum ste/ 'du shes gsal po 'jug pa dang /'jug pa ma yin pa gnyis dang / 'du shes mi gsal ba 'jug pa ni gsum pa'o/ /gcig la sogs pa nas bcu 'das kyi bar du lnga bcu rtsa lnga ste/ de dag rgyud so so'i dbye bas ni dpag tu med pa nyid do/ /sngar bstan pa bzhin du zhes bya ba ni stobs kyi rigs kyi le'ur bstan pa bzhin no//dpag tu med pa yang rnam pa lngar rnam par gzhag pa'i phyir de dag bsdus na dpag tu med pa rnam po lngar 'gyur ro zhes bya ba la sogs pa'o/ /de dag gis sems can rnams kyi spyi nyid dang / de dag gi rten nyid dang / /sems can gyi gnas skabs dang /skal ba dang ldan pa nyid dang / rab tu dbye ba'i dbang du byas nas dpag tu med pa rnam pa lnga bstan pa yin no/ /lnga po 'di dag ni zhes bya ba la sogs pa la/ lnga po 'di dag ni chos bstan pa'i 'bras bu'i phan yon rgya che ba yin par rig par bya'o zhes sbyar bar bya ste/ mod de dang de dag nas bstan pa'i 'bras bu'i dbang du byas nas lnga nyid du gzhag pa yin no/ /bstan pa'i 'bras bu ni mdor bsdu na nyan thos dang byang chub sems dpa'o/ /de la nyan thos rnams kyi ni tshul bzhin yid la byed pa dang / rab tu 'brel pa'i 'bras bu rnam pa gnyis te/mthong bas spang bar bya ba'i nyon mongs pa spangs pa dang / mthar thug pa'i lam thob pas nyon mongs pa ma lus par spangs pa'o/ /de la 'dir mdo nas bstan pa ni yang chos kyi rnam grangs 'di bstan pa na chos kyi mig skyes nas thag pa rnams las sems rnam par grol lo zhes bya ba'o//byang chub sems dpa' yang rnam pa gnyis kho na ste/ theg pa chen po la 'jug pa dang / so sor rtog pa'i dbye bas so/ /de la mdo nas bstan pa ni 'di na 'ga' zhig yang dag par rdzogs pa'i byang chub tu sems bskyed pa dang / sems bskyed pa rnams ni mi skye ba'i chos la bzod pa thob par 'gyur ro zhes bya ba'o//gnyi ga'i yang sgrub pa la ltos pa'i 'bras bu ni lnga pa'o/ /chen po nyid rnam pa bdun dang ldan pas byang chub sems dpa' sems dpa' chen por brjod do/ /de'i phyir yon tan bstan pa'i sgo nas chen po nyid bstan to//rnam pa bdun yang mdor bsdu na lam dang lam gyi 'bras bu'i dbang du byas nas rnam par gzhag go/ /byang chub sems dpa'i lam 'bras bu dang bcas pa ni theg pa chen po yin pas chen por rnam par gzhag go/ /lam yang rnam pa gnyis te/ sgrub pa'i chos dang /bstan pa'i chos kyi dbye bas so/ /rnam pa gcig nyid kyis ni bstan pa'i chos chen po nyid du rnam par gzhag ste/ shin tu rgya che zhing yangs pa'i gzhung dang ldan pa'i phyir ro/ /de'i phyir smras pa/ shin tu rgyas pa zhes bya ba la/ theg pa chen po'i gzhung rgyas pa ni theg pa chen po yin no zhes byas nas so//sgrub pa'i chos ni rnam pa lnga ste/ dang po smon lam nyid de/ des na smras pa/ sems bskyed pa chen po ni zhes bya ba'o/ /yon tan dang skyon thams cad bskyed pa dang sngangs pa'i mthar thug pa thob pa'i byang chub tu sems bskyed pa de ni chen po nyid yin pa'i phyir ro//bsam pa dag pa'i sa la spyod pa sgrub pa dang ldan pa ni gnyis pa ste/ gang yang smras pa/ mos pa chen po ni zhes bya ba ste/ shin tu zab cing rgya che ba'i chos la mos pa chen po nyid do/ /rtogs pa'i khyad par ni gsum pa ste/ gang yang smras pa/lhag pa'i bsam pa chen po ni zhes bya ba ste/ bdag dang gzhan du mnyam pa nyid thob pa'i phyir de chen po nyid do/ /tshogs khyad par can ni bzhi pa ste/ gang yang smras pa/ tshogs chen po ni zhes bya ba la sogs pa ste/ sa la zhugs pa rnams kyi skad cig re re la yang dpag tu med pa'i bsod nams dang ye shes kyi tshogs nye bar sogs pa'i phyir de chen po nyid do//dus khyad par can ni lnga pa dus chen po ste/ gang gi phyir smras pa/ bskal pa grangs med pa gsum zhes bya ba la sogs pa'o/ /'bras bu chen po nyid ni sems can thams cad las yang dag par 'das pa'i sangs rgyas kyi sku yang dag par thob pa'i phyir ro//chen po drug ni 'di dag gis 'gro bar byed pas theg pa zhes bya ste/ rgyu'i ngo bor bstan pa'o/ /bdun pa ni 'dir 'gro bas na theg pa zhes bya ste/ 'bras bu'i ngo bo bstan pa'o/ /chos rnam pa brgyad ni brjod par byed pa dang /brjod bya phun sum tshogs pa'o/ /de la brjod bya ni shes rab rnam pa bzhi thob pa dang / de'i 'bras bu'i dbang du byas nas rnam par gzhag pa ste/ kun rdzob dang don dam pa ni theg pa chen po'i tshul gyis bsdus pa'o/ /rjod par byed pa'i dbang du byas nas smras pa/byang chub sems dpa'i sde snod bstan pa dang zhes bya ba ste/ shin tu rgyas pa'i yan lag gis bsdus pa'i phyir ro/ /brjod par bya ba phun sum tshogs pa'i dbang du byas nas smras pa/ de kho na'i don bstan pa gang yin pa dang / mthu bstan pa gang yin pa dang zhes bya ba la/mchog tu zab cing rgya che ba'i brjod par bya ba nyid yin pa'i phyir ro/ /de la thos pa las byung ba'i shes rab kyi dbang du byas nas smras pa/ tshul bzhin du nyan pa dang zhes bya ba'o/ /bsams pa las byung ba'i shes rab kyi dbang du byas nas smras pa/ tshul bzhin du sems pa zhes bya ba'o//bsgoms pa las byung ba'i shes rab ni rnam pa gsum ste/ thog ma dang / bar ma dang / tha ma'o/ /dang po ni mthong ba'i lam gyis bsdus pa'o/ /gang gi phyir smras pa/ /tshul bzhin du sems pa sngon du 'gro ba'i lhag pa'i bsam pa nyams su blang ba zhes bya ba ste/sa dang po'o/ /bar ma ni bsgom pa'i lam gyis bsdus pa ste/ gang gi phyir smras pa/ bsgom pa'i rnam pas 'jug pa dang zhes bya ba ste/ de'i phyi ma sa brgyad nyid do/ /mthar thug pa'i gnas skabs kyis bsdus pa ni gang gi phyir smras pa/bsgoms pa'i 'bras bus yongs su 'grub pa zhes bya ba ste/ bcu pa'o/ 'bras bu bstan pa'i phyir/ gtan du nges par 'byin pa ste zhes bya ba'o/ ji ltar bslab pa las brtsams pa'i dbang du byas pa yongs su rdzogs par bstan pas dang po ji ltar bslab pa las brtsams pa'i bslab pa rdzogs par bstan pa yin pas de ltar na bslab pa po yongs su rdzogs par bstan pa yin no//sngar gang dag bslab pa zhes bya ba bstan pas ni mdor na slob pa po bstan to/ /gang dag slob pa bstan pa'i phyir smras pa/ byang chub sems dpa' gang dag de ltar slob na zhes bya ba la sogs pa la/de dag kyang skal ba dang ldan pa dang / zhugs pa dang / rtogs pa dang / gnas skabs kyi dbye bas rnam pa bcur 'gyur te/ ji ltar rigs par sbyar ro/ /de la skal ba dang ldan pa dang / zhugs pa la dbye ba med de re rer rnam par gzhag go//rtogs pa'i dbye ba ni ma thob pa dang / thob pa nyid de/ de'i phyir smras pa/ bsam pa ma dag pa dang / bsam pa dag pa zhes bya ba'o/ /gnas skabs kyi dbye bas ni rnam pa drug ste/ yongs su ma smin pa'i gnas skabs dang / yongs su smin pa'i gnas skabs dang /nges par ma zhugs pa'i gnas skabs dang / nges pa'i gnas skabs dang / skye ba gcig gis thogs pa dang / srid pa tha ma pa'o/ /de dag gi bslang pa'i sbyor ba'i dbye ba bstan pa'i phyir/ de la rigs la gnas pa'i zhes bya ba la sogs pa la/sems skyed par byed pa de ni zhes bya ba ni sems bskyed nas slob par byed do zhes bya ba'i tha tshig ste/ sems bskyed nas rnam pa bdun la slob par byed do zhes sngar rtsom pa bstan pa yin no/ /de bzhin du mos pas spyod pa'i ni gsum par bstan pa'o/ /zhugs pa de nyid ji srid du zhes bya ba la sogs pa la/sa la zhugs pa ni bzhi par bstan to/ /de dag nyid kyi lhag pa'i gnas skabs kyi khyad par bstan pa'i phyir yongs su ma rdzogs pa'i sa la gnas pa ste/ sa dgu ni yongs su smin pa'o/ /yang yongs su ma smin pa'i gnas skabs gnyis bstan pa ni mtshan ma med pa'i gnas pa ma thob pa dang /thob pa'i dbye bas so/ /yongs su smin pa yang rnam pa gnyis te/ skye ba gcig gis thogs pa dang / skye ba de las lhag ma ma lus pa'o/ /skye ba gcig gis thogs pa ni skye ba gcig gis thogs ba zhes bya ba nyid kyis bstan to/ / srid pa tham pa bstan pa'i phyir/ tshe de nyid la zhes bya ba la sogs pas bstan to/ /ji skad bstan pa'i bslab pa mdor bsdus pa bstan pa'i phyir/ de las gong na yang med do zhes bya ba la sogs pa la/ gang la slob pa dang zhes bya ba la sogs pas ni bslab pa'i gnas bdun po 'di dag go zhes nges par byed do//ji ltar slob pa zhes bya ba ni sbyin pa la sogs pa la sbyor ba'i dbang du byas nas theg pa chen po'i yon tan bsdus pa la sbyor ba'i bar du'o zhes nges par byas pa yin no/ /ji skad bstan pa'i byang chub sems dpa' de dag las zhes bya ba ni byang chub sems dpa' rnams nges par byed pa'i byang chub sems dpa' rnams kyi ming mthun mong pa bstan pa'i phyir te/gzhan du na thun mong gi ming gcig cig tu 'gyur ro/ /thams cad du byang chub sems dpa' zhes bya bar bstan pa ni yon tan gyis rab tu phye ba'i tha mal pa rnams so/ /byang chub dang / sems can la dmigs pa'i phyir/byang chub sems dpa' zhes bya'o/ /chen po rnam pa bdun dang ldan pa'i phyir sems dpa' chen po'o/ /shin tu zab cing rgya che ba'i shes rab dang ldan pa dang / shin tu zab pa'i don gyi dgongs pa 'grel par nus pas blo dang ldan pa'o/ /shes rab kyi snang ba'i khyad par thob pas gsal ba'i mchog go//de bzhin gshegs pa'i rigs su skyes pa'i phyir rgyal ba'i sras so/ /sangs rgyas kyi gdung rgyun mi 'chad par sgrub par byed pas rgyal ba'i gzhi zhes bya'o/ /lo ma la sogs pa dang 'dra pa'i gnas su 'gyur ba'i stobs dang /mi 'jigs pa la sogs pa sangs rgyas kyi chos rnams skye ba'i rgyur ba'i phyir rgyal ba'i myu gu zhes bya'o/ /bdag dang gzhan gyi rgyud kyi nyon mongs pa las rnam par rgyal bas na rnam rgyal byed ces bya'o/ /gcig pu dpa' pa'i phyir rtsal dang ldan pa'o/ /ma lus par don dam par sgrub pas na 'phags pa'i mchog ces bya'o//'khor ba'i dgon par 'khyams pa'i sems can gyi tshogs chen po mya ngan las 'das pa'i grong khyer du phyin par byed pas na ded dpon zhes bya'o/ /phyogs thams cad du yon tan gyi dris khyab pas na brags pa chen po zhes bya'o//snying rje chen po dang ldan pas na snying rje can no/ /sbyin pa la sogs pa'i bsod nams chen po dang ldan pas na bsod nams che ba zhes bya'o/ /dbang phyug la sogs pa'i bdag po dang ldan pas na dbang phyug ces bya'o/ /lus la sogs pa'i kun du spyod pa kha na ma tho ba med pa'i phyir chos dang ldan pa zhes bya'o//so so'i ming gi khyad par ni dpag tu med par bstan pa'i phyir yang phyogs bcu mtha' yas mu med pa zhes bya ba la/ so so rang gi ming zhes bya ba ni byang chub sems dpa' so so'i ming ni zhes bya ba'i tha tshig go/ /yang mdor bsdu na byang chub sems dpa' rnam pa gnyis su bstan to//khas len pa'i dge slong dang 'dra bar yang dag pa'i don gyi byang chub sems dpa' ma yin bzhin du khas len pa tsam gyis byang chub sems dpar dam 'cha' bar byed kyang bslab pa la mi sob pa de dag ni byang chub sems dpa' ltar bcos pa zhes brjod do//de lta bu las bzlog pa ni yang dag pa'i byang chub sems dpa' zhes bya ste/ yang dag pa'i dge slong bzhin no/ /byang chub sems dpa'i sa'i gzhi'i rnal 'byor gyi gnas las yon tan gyi le'u ste bco brgyad pa'i 'grel pa rdzogs so// // ji skad bstan pa'i yon tan gyi chos de dag dang ldan pa'i byang chub sems dpa' rnams kyis pha rol tu phyin pa drug tu gtogs pa'i dge ba rnams sbas shing ma bsgrags su zin kyang / 'jig rten thams cad kyis rtags lnga'i sgo nas shes par 'gyur ba bstan pa'i phyir/ yon tan bstan pa'i rjes la rtags bstan pa yin no//de dag kyang so sor rnam pa lnga lngar bshad par bya ba yin no zhes bya bas de dag mdor bstan pa ni ngo bo nyid dang zhes bya ba la sogs pa la/ yang dag pa'i zhes bya ba ni byang chub sems dpa'i don ji lta ba'o/ /rtags zhes bya ba ni byang chub sems dpa'i rtags te/byang chub sems dpar go bar byed pa nyid do/ /des na smras pa/ de dag dang ldan na zhes bya ba la sogs pa la/ byang chub sems dpa' zhes bya bar gcod par byed pa zhes bya ba'i tha tshig go/ /bsam pa phun sum tshogs pa dang / sbyor ba phun sum tshogs pa'i dbang du byas nas rtags lnga rnam par gzhag par bya ste/gcig dang bzhi'i go rims bzhin no/ /de la bsam pa phun sum tshogs pa ni da ltar sems can sdug bsngal dang sdug bsngal gyi rgyu la spyod pa rnams la go rims bzhin du bde ba'i bsam pa dang / phan pa'i bsam pa bskyed pa'o//sbyor ba phun sum tshogs pa ni sems can yongs su smin par byed pa'i dbang du byas nas ni rnam pa gnyis te/ don spyod pa ni gang gi phyir smras pa/ snyan par smra pa dang zhes bya'o/ /bde bar spyod pa ni gang yang smras pa/ lag rkyong ba dang zhes bya'o/ /gang gis sangs rgyas kyi chos yongs su smin pa'i dbang du byas nas kyang rnam pa gnyis te/dge ba'i phyogs la rab tu sbyor ba dang ldan pas mi mthun pa'i phyogs kyis mi g.yos pas na brtan pa dang zhes bya ba ste shes rab kyis zab mo'i don rab tu rtogs pa dang / dgongs pa nges par 'grel pa'o/ /yang sems can gyi don nyid kyi dbang du byas nas sbyor ba phun sum tshogs pa rnam pa bzhi'o//de la rtags gnyis pas sems nye bar brtan par byed pa'i rnam pas chos kyi sbyin pa ni sems can gyi don to/ /lnga pas ni chos kyi sbyin pa'i nus pa bstan to/ /bzhi pas ni lus brtan par byed pa'i rnam pas zang zing gi sbyin pas sems can gyi don byed pa'o//gsum pa bstan pas ni de'i nus mthu bskyed de ltos pa med par dngos po thams cad yongs su gtong ba'i phyir ro/ /lngar bsgre bar rig par bya zhes bya ba ni/ /yan lag lngas ngo bo nyid bstan nas bsdu ba'i bar du de bzhin du yin gyi/ rtags gcig la dus gcig tu rnam pa lnga char 'byung ba ni ma yin no//lnga po rnams la sngar ngo bo nyid bstan nas/ de nas gnas la sogs pa yang de bzhin du bsgre bar bya'o/ /bsgre zhing bsgre zhing bstan par bya'o/ /ngo bo nyid kyis ni snying brtse ba la sogs pa'i don bstan to/ gnas zhes bya bas ni yul bstan to//'bras bu'i phan yon gyis ni phan yon gyi che ba bstan to/ /go rims kyis ni 'jug pa'i go rims bstan to/ /bsdu bas ni de dag gi pha rol tu phyin pa'i rnam par gzhag pa bstan to/ /ngo bo nyid ni rnam pa gnyis te zhes bya ba ni bsam pas 'jug pa dang / sbyor bas 'jug pa'o/ /de ltar rnam pa nyid dang / las nyid kyi ngo bo go rims bzhin du bstan pa yin no/ /bsam pa dang rjes su mthun bar lus dang ngag gis sems can gyi don sgrub par byed do zhes bya ba yin no/ /snyan par smra ba zhes bya ba ni snyan pa nyid smra ba ste/ sngar bstan pa'i tshig rnam pa gsum mo zhes bya bas snyan par smra ba'i ngo bo bstan to/ /sems can rnam pa gsum la tshig rnam pa gsum ni dman pa dang / bar ma dang / khyad par gyis 'jig rten shes pa'i dbang du byas nas yang dag par dga' bar byed pa dang / 'phel bar 'gyur bas kun du dga' bar byed pa la sogs pa sngar bstan pa'i rnam pa'o//chos gsum po shes rab dang / snying rje dang / brtson 'grus gsum sems can gyi don la mnyam du 'jug pa gang yin pa la snying stobs zhes bya'o/ /mi mthun pa'i phyogs kyis mi thub pas na sran thub pa'o//zab cing rgya che ba'i chos rnams la sems ma zhum pa ni zhum pa med pa'o/ /yang 'jigs pa med pa ni snying stobs so/ /sdug bsngal gyis g.yo ba med pa ni sran thub pa'o/ /rgya chen po thos kyang 'jigs pa med pa ni zhum pa med pa'o/ /stobs dang ldan pa ni mthu thob pa'o/ / brtan pa nyid kyi mtshan nyid gsum ni mi mthun pa'i phyogs kyis zil gyis mi non pa ni brtan pa'i ngo bo nyid ces brjod do/ /phran tshogs sbyin pa ni rgya cher sbyin pa nyid do/ /rnam par dag pa'i sbyin pa yin pa'i phyir kun nas nyon mongs pa can ma yin pa'i sbyin pa nyid do/ /'di gnyis kyi ngo bo nyid ni gnas bstan pa nas 'chad par 'gyur ro//so so yang dag par rig pa'i stobs kyis don dang dgongs pa zab mo nges par 'grel pa nyid dam/ mnyam par ma bzhag pa'i sa pa'i shes pa yang rung / de dag gnyis ka yang de'i ngo bo nyid yin par bstan to/ /mngon par bsgrub pa ni de thob pa la rjes su mthun pa rnams so//des na smras pa/ sbyor ba las byung ba zhes bya ba'o/ /mdor bsdu na bsgre ba rnam pa gnyis kyis sems can rnam pa lnga la snying brtse bar gnas par 'gyur te/ da ltar sdug bsngal nye bar myur du myong bar 'gyur ba dang / da ltar sdug bsngal de bskyed par nus pa'i nges pa'i rgyu la spyod pa'i 'gro ba lnga'i sems can gang yang rung ba la ji ltar rigs par rig par bya'o//de'i phyir smras pa/ sems can gang su yang rung pa/ /zhes bya ba la rgyun du gnas shing gcig tu rgyud le zhen par 'dug pa zhes bstan pa yin no/ / gcig tu rgyud la zhen par 'dug pa zhes bya ba ni tshor ba de nyid rgyud la zhen pas zhes bya ba'o/ /sdug bsngal gyi rgyu yang kun nas nyon mongs pa'i gzhi ste/ nyes par spyod pa'i kun nas nyon mongs pa ni sdom pa ma yin pa la sogs pa spyod pa de la gcig tu zhen pa dang / rnam par smin pa mi 'dod pa nges par sgrub par byed pa'o//sred pa'i kun nas nyon mongs pa ni 'dod pa rnams kyis bag med pa'i dbang du gyur pas 'dod pa'i rnam par smin pa med pa'i phyir ro/ /lta ba'i kun nas nyon mongs pa ni phyi rol pa'i lta ba la zhugs pa kha cig sdug bsngal du zhugs su zin kyang 'dod pa'i 'bras bu med pa lta bu'o//nyon mongs pa'i kun nas nyon mongs pa ni bde ba dang mi ldan zhing sdug bsngal skyed par byed pa'o/ /de la mngon par dga' ba'i rang bzhin zhes bya bas ni/ de la mngon par dga' ba bstan pa'o/ /bdag pa/ gi byi dor lhur len pa'i sems can zhes bya bas ni yul la gcig tu zhen pa bstan to/ /lam ngan par zhugs pa ni phyin ci log tu zhugs pa'o/ /de dag ni khyim pa dang rab tu byung ba rnams la ci rigs par shes par bya'o/ /sems can rnam pa lnga la bya rnam pa lngas snyan par smra ba la sogs pas gnas te/rang bzhin tu gnas pa dang / 'phel ba thob pa dang / 'jigs pa dang ldan pa dang / yang dag par zhugs pa dang / rigs pa la rmongs pa'o/ /de dag gi rim pa ni legs par smra bar bya ba dang zhes bya ba la sogs pa'o/ / 'di lta ste/ bsdu ba'i dngos po'i le'u las rig par bya'o zhes bya ba ni yang dag par dga' bar bya ba dang zhes bya ba la sogs pa ji skad bstan pa lta bu'o/ /gong du bstan pa'i stobs bskyed pa gnas pa de nyid la 'dir bstan pa'i gnas su 'gyur ro zhes bstan pa'i phyir ro/ / yang de 'khor ba'i sdug bsngal rnam pa sna tshogs nye bar bab pas zhes bya ba la sogs pa'o/ /sbyin pa rnam pa lngas ni lag rkyong ba la gnas pa bstan pa yin te/ de la gnas nas de la 'jug pa yin no/ /don zab pa ni zab mo'o/ /yi ge zab pa ni zab par snang ba ste/kha cig ni zab pa nyid yin la zab par snang ba yang yod la/ kha cig ni zab pa ma yin pa la zab par snang ba yin pa yod pas de gnyis ka las khyad par du bya ba'i phyir gnyis smos so/ /chos la bdag med pa la gsal bar byed pas stong pa nyid dang rab tu ldan pa'o/ /rten cing 'brel par 'byung ba lugs su 'byung bas bdag med pa la 'jug pa gsal bar byed pa nyid de/mi rtag pa la sogs pa'i rnam pa gsal bar byed pa'i phyir ro/ /de ltar na mdo bshad pa yin no/ /ltung ba la mkhas pa la sogs pa ni 'dul ba bstan pa yin no/ /phyin ci ma log pa'i chos kyi mtshan nyid rnam par 'jog pa ni ma mo bstan pa'o//dgongs pa can gyi bka'i don ni dgongs pa can no/ /de nyid ni drangs nas bshad par bya ba yin pas brtag dka' ba ste/ chos rnams kyi brda'i don zhes bstan pa'o/ /mngon par 'dod pa'i don nyid yin pa'i phyir don rnam par 'byed pa'o//brjod du med pa'i tshig gi don thams cad la mkhas pa ni gnas lnga pa'o/ /zab mo'i don la mngon par dgongs pa ni don zab mo dgongs pa'o/ /de nges par 'grel pa ni de'i dgongs pa dang bsam pa rab tu ston pa ste/ dgongs pa zab mo rnam par 'byed par byed pa zhes bya ba'i tha tshig go//ji skad bstan pa'i gnas rnam pa lngas 'jug par 'gyur zhes bya ba ni de'i gnas nyid do/ /snying brtse ba'i phan yon lnga bstan pa'i phyir thog ma nyid du kho na spong bar 'gyur ro zhes bya ba ni kho na med pa'i rgyu la 'jug par 'gyur ba'o//yid zhum pa med par sbyor zhing zhes bya ba ni yid mi bde ba med pa ste/ bde bas shas cher gnas pas skyo ba med pas tshad med pa bsgom pa dang ldan pas tshe 'di la bde bar gnas par 'gyur ro/ /sems can rnams la yang phan pa dang bde ba nye bar sgrub par byed pa dang /bdag nyid bde bar gnas pas gzhan la snying brtse bar yang 'gyur ro zhes byams pa'i phan yon bstan pa gang yin pa rnams kyang rig par bya'o zhes bstan pa yin te/ byams pa yang brtse ba'i mtshan nyid yin pa'i phyir ro/ /ngag gi nyes par spyod pa ni gcig tu gzhan gyis mi 'dod pa yin pa'i phyir ngag gi nyes pa spang bar bya'o zhes bstan pa'i phyir smras pa/ngag gi nyes par spyod pa ni bdag dang gzhan la gnod par skyed pa'i rgyu yin la/ de'i gnyen por gyur pa snyan par smra ba ni bdag dang gzhan sdud pa yin no zhes bstan pa yin no//snyan par smra ba ni slu ba med pa'i phyir/ tshig gzung bar 'os pa yin no zhes bstan pa yin no/ /brtan pa ni brtson 'grus kyi ngo bo nyid yin pa'i phyir le lo dang bral bar 'gyur ro/ /dka' ba'i las kyis bag mi 'khums pas sems rab tu dga' bar 'gyur ro//bzod pa'i ngo bo nyid yin pas gnyi ga'i don byed par 'gyur ro/ /brtson 'grus brtan po'i go bgos pas yang dag par rtsom pa brtan par 'gyur te/ ma byas par bar du phyir mi ldog par ro/ /mthu'i le'u las sbyin pa'i chos kyi mthu bstan pa gang yin pa de ni lag rkyong pa'i phan yon no//shes rab kyi chos kyi mthu bstan pa gang yin pa de ni don dang dgongs pa zab mo nges par 'grel pa'i phan yon bstan pa yin no/ /go rims kyi dbang du byas nas smras pa/ de dag gi go rims gang yin zhe na zhes bya ba la sogs pa la/bya ba thams cad la bsam pa sngon du 'gro ba'i phyir dang por bsam pa phun sum tshogs pa yin no zhes snying brtse ba bstan to/ /de dag ni sems can la ltos pa dang bcas pa yin pa'i phyir ro/ /sems can rnams la phan pa dang bde ba'i don byed par 'dod pa yin no zhes bya bas ni dge ba'i gnas nas bslangs nas dge ba la 'god par bya ba'i phyir de nas snyan par smra ba nyid do//rigs par smra zhing zhes bya bas ni yi ges so/ /'dzin du 'jug pa ni don ji lta ba bzhin du'o/ /ston par byed pa ni de gnyi ga khyad par du 'phags pa'o//yang dag par zhugs pa rnams yang dag par bsgrub pa'i dbang du byas pa dang / sems can zhugs pa rnams log par sgrub pa la mi mjed pas de dag mi spod pa ni brtan pa zhes bya'o/ /de lta bu'i brtan pa dang ldan pas zang zing dang chos kyis rjes su 'dzin par byed do zhes bya ba ni phyi ma gnyis kyis so//rtags de dag gis pha rol tu phyin pa bsdus pa yin par bstan pa'i phyir smras pa/ 'di ni byang chub sems dpa'i rtags lnga po de dag gi go rims zhes bya ba la sogs pa la/ snying brtse ba ni sems can la phan pa dang bde ba'i bsam pa yin pa'i phyir dang /tshad med pa bzhi'i ngo bo yin pa'i phyir ro/ /tshad med pa ni bsam gtan gyi pha rol tu phyin pa'i khongs su gtogs pa nyid kyi phyir des bsdus pa yin no/ /'byor pa thob pa'i sems can rnams la de lta de ltar don bsgrub pa ni sems can gyi don bya ba'i tshul khrims su bsdu bar 'dod do//phan par byed pa'i ngag rigs pa ston pa'i mtshan nyid can ni shes rab kyi pha rol tu phyin pas bsdus so/ /brtan pa ni snying stobs kyi ngo bo yin la/ snying stobs kyang brtson 'grus kyi bdag nyid yin pas des bsdus so/ /brtan par gyur na sems can rnams kyi log par bsgrub pas mi mjed pa'i phyir bzod pa'i pha rol tu phyin pa yang yin no//de bzhin du so sor rtog pa mang bar 'gyur bas shes rab kyi pha rol tu phyin pa yang yin no/ /yang shes rab dang / brtson 'grus dang / snying rje rnams ni snying stobs kyi bdag nyid do zhes bstan pas de'i phyir snying stobs kyi bdag nyid can gyi brten pa ni pha rol tu phyin pa gsum gyis bsdus pa yin la/lag rkyong ba ni sbyin pa'i pha rol tu phyin pa kho nas bsdus zhes bya ba ni/ gcig tu sbyin pa'i ngo bos bsdus pa'i phyir ro/ /don dang dgongs pa zab mo nges par 'grel pa ni so so yang dag par rig pa'i ngo bo yin pa dang /bsam gtan gyi pha rol tu phyin pa ni/ ye shes kyi ngo bo yin pa'i phyir shes rab kyi pha rol tu phyin pa'o/ /byang chub sems dpa'i sa'i gzhi dang mthun pa'i rnal 'byor gyi gnas las rtags kyi le'u ste dang po'i 'grel pa rdzogs so// //de ltar rtags rnams 'byung ba ni khyim pa'i phyogs sam/ rab tu 'byung ba yin no zhes bstan pa'i phyir/ de'i rjes la phyogs bstan to/ /phyogs de gnyi ga la gnas pa yang cha byad tsam gtso bo ma yin gyi/ byang chub sems dpa'i chos gtso bor gyur pas byang chub sems dpa'i grangs su 'gro bar 'gyur ro zhes bstan pa'i phyir/phyogs gnyi gar gtogs pa'i byang chub sems dpa'i bslab pa dang rjes su mthun pa byang chub dang shin tu nye par 'jug pa'i chos bzhi bstan pa ni khyim pa'am rab tu byung bas bslabs na myur ba kho nar zhes bya ba la sogs pa ste/pha rol tu phyin pa drug la yang dag par sbyor ba'i dbang du byas nas/ las kyi mtha' legs par byas pa zhes bya ba'o/ /gnas skabs thams cad du sems can gdul bya'i dbang du byas nas ni mkhas pa zhes bya'o//sems can yongs su smin par byed pa'i dbang du byas nas ni gzhan la phan 'dogs pa'o/ /rnam par smin pa dang lan la re ba med pa'i phyir byang chub tu yongs su bsngo ba'o/ /las kyi mtha' legs par byed pa bzhi bstan par bya ste/ gcig tu nges par sbyor bar byed pa ni nges par byed pa nyid do//gus par byed pa'i sbyor ba ni byang bar byed pa nyid do/ /rab tu sbyor bar byed pa nyid ni rtag tu byed pa nyid do/ /kun nas nyon mongs pa med pa'i sbyor ba ni kha na ma tho ba med par byed pa nyid do/ /gzhan dag gis bkag tu zin kyang gzhan gyi tshig mi nyan par nges par 'ga' zhig la ci zhig sbyin par 'dod pa ni nges par byed pa zhes bya ste/byang chub sems dpa'i sbyin pa'i bar du gcod par nus pa ni sems can gyi ris na 'ga' yang yod pa ma yin no zhes bstan pa'i phyir smras pa/ slong ba po yang legs par 'ongs na zhes bya ba la sogs pa'o//dngos po thams cad yongs su gtong ba na gus par byed pas de'i phyir byang bar byed pa zhes bya ba'o/ /de'i phyir smras pa/ 'di lta ste/ sbyin par bya ba zhes bya ba la sogs pa'o/ /yongs su skyo ba med par zhes bya ba ni phongs par gyur kyang ngo //phangs pa med par sbyin par byed pa zhes bya ba ni rtag tu byed pa zhes bya ba'o/ /sbyin pa'i bsngags pa bstan pa zhes bya ba'i tha tshig go/ /tshul khrims la sogs pa la yang ji ltar rigs par shes par bya'o zhes bya ba ni gnas skabs thams cad du yang mi mthun pa'i phyogs zil gyis mnan la/tshul khrims yang dag par blangs nas 'jug pa'i sems la sus kyang bar du bcad cing bskyod par mi nus so zhes bya ba'i bar du rgyas par sbyar ro/ /gnas skabs thams cad du sems can 'dul ba la mkhas pa dang / rig pa'i gnas la mkhas pa dang /tshul khrims brtag pa la mkhas pa dang / phyi ma'i 'dod pa'i don bsgrub pa la mkhas pa dang / theg pa la mkhas pa'i dbang du byas nas mkhas pa rnam pa bcur gzhag go/ /mkhas pa 'di dag ni gnas ji lta ba bzhin du shes par bya'i zhes bya bar smras pa/ 'di dag ces bya ba la sogs pa la/byang chub sems dpa'i bya ba thams cad ni bya ba lngar bsdus pas bya ba lnga zhig bya'o zhes bya bar smras pa/ mkhas pa gong ma bzhis ni zhes bya ba la/ dang po sems can yongs su smin par byed pa la mkhas pa ni/ rnam pa bzhis sems can rnams kyi don sgrub par byed do zhes bya bar smras pa/sems can rnams rang gi don la 'dzud do zhes bya ba'o/ /lnga pas ni bstan bcos thams cad la mi 'jigs pa thob pas phas kyi rgol ba thams cad tshar gcod par byed do/ /drug pas ni tshul khrims rnam par dag par byed do/ / bdun pas ni 'dod pa'i don sgrub par byed do/ /phyi ma gsum gyis ni rigs pa sogs pa'i dbang gis chos ston par nus pa yin te/ de dag gis ni byang chub sems dpa'i bya ba thams cad byed par 'gyur ro zhes bstan pa yin no/ /des na smras pa/ bya ba thams cad yongs su rdzogs par 'gyur ro zhes bya ba la/bya ba thams cad kyis don gnyis sgrub par byed do zhes bstan pa'i phyir ro/ /tshe 'di dang zhes bya ba la sogs pa'o/ /phan pa dang bde ba dag gis bsdus pa dang mthun pas bsdus pa'o zhes bstan pa'i phyir/ bsdu ba'i dngos po bzhi po zhes bya ba la sogs pa la/de dag las phan pa dang bde ba ni bdag dang gzhan gyi don gyi le'u las bstan pa bzhin no zhes bstan pa'i phyir smras pa/ 'di lta ste bdag dang gzhan gyi don gyi le'u las rig par bya'o/ /sgo gsum po 'di dag ces bya ba ni legs par byas pa'i las kyi sgo nas dang /mkhas pa'i sgo nas dang / phan 'dogs pa'i sgo nas so zhes bstan pa yin no/ /snying thag pa nas zhes bya ba ni chen por gyur pas so/ /de lta bu'i smon lam rnam par spang ba'i phyir yongs su bsngo ba'i khyad par gyis yongs su dgos pa yin no/ / byang chub sems dpa' khyim pa rnams kyi bslab pa'i lam ni drag shul can gyis zhus pa'i mdo las bstan pa yin no/ /byang chub sems dpa' rab tu byung ba rnams kyi ni mdo gzhan dag las bstan pa bzhin te/ mdor bsdu na bzhi po 'di dag tu thams cad bsdu bar 'gyur ro zhes bstan pa yin no//'di ltar 'thob par zhes bya ba la sogs pa la/ de ltar na byang chub sems dpa'i bslab pa bsdus par gtogs pa 'bad pa med pa byang chub 'thob pa'i phyir yon tan gtso bor gyur pa yin gyi cha byad ni ma yin no zhes yongs su gsal bar bstan pa yin no//de ltar na byang chub sems dpa' rnams kyi thun mong du mtshon pa'i phyir/ gang su yang rung ba de thams cad ces bya ba'o/ /chos bzhi po 'di dag la ni byang chub sems dpa'i khyim pa dang rab tu byung ba thams cad kyis kyang khyad par med par bslab par bya'o/ / gzhan dag la ni khyad par yod do zhes bya bar smras pa/ sbyor du zin kyang zhes bya ba la sogs pa la/ gzhan du na khyim pa dang rab tu byung ba dag khyad par med par thal bar 'gyur ro/ /de ltar gyur na ni rab tu byung ba yang don med par thal bar 'gyur ro/ /khyad par rnam pa lngas khyad par rnam par gzhag par bya ste//yongs su 'dzin pa'i nyes pa med par bstan pa ni gang yang smras pa/ yongs su grol ba yin gyi zhes bya ba la sogs pa'o/ /yongs su ngal ba'i skyon med par bstan pa ni gang gi phyir smras pa/ sdug bsngal ba rnams las yongs su grol pa yin gyi zhes bya ba la sogs pa'o//yang dag par blangs pa'i tshul khrims rnam par dag pa ni khyim pa rnams kyis ni dka' pa'i phyir ro zhes bya ba la sogs pa rgyas par bstan pa yin no/ /dge ba la gcig tu brtson pa yin pas gang yang smras pa/mngon par shes pa myur ba yin te zhes bya ba'o/ /yid ches par bya ba'i gnas yin pa'i phyir tshig btsun pa yin gyi zhes bya ba'o/ /byang chub sems dpa'i sa'i gzhi dang mthun pa'i chos kyi rnal 'byor gyi gnas las phyogs kyi le'u ste gnyis pa'i 'grel pa rdzogs so// //byang chub sems dpa' khyim pa'am/ rab tu byung ba yang rung bsam pa dag pa ni chos bzhi po de dag yang dag par spyod par 'gyur gyi gzhan ni ma yin no zhes bstan pa'i phyir phyogs kyi rjes la bsam pa bstan to/ /bsam pa dag pa nyid ni lhag pa'i bsam pa'i khyad par dang ldan par shes par bya'o//'phel ba dang / sa dang / rnam par gzhag pa'i tshul gyis lhag pa'i bsam pa rnam pa gsum rnam par gzhag ste/ rgyu nyid dang / rab tu dbye ba nyid dang / bya ba nyid kyis so/ /rgyu nyid ni sems can thams cad la mnyes gshin pa rnam pa bdun no//rab tu dbye ba ni bsam pa bco lnga ste zhes bya ba'o/ /bya ba nyid ni/ bya ba bcu ni byed par bstan/ /zhes bya ba'o/ mnyes gshin pa ni sems can rnams kyi yid la 'dod pa sgrub par byed pa'o/ /de yang rgyu'i skyon dang bral ba dang / yon tan gyi rnam pa dang ldan pa'o//de ltar na mnyes gshin pa rnam pa bdun no/ /de la 'jig rten pa'i mnyes gshin pa ni kun nas nyon mongs pa rnam pa gsum gyis kun nas nyon mongs pa yin te/ 'jigs pas sam/ gzhan gyi ngor ram/ bsam pas ma yin no/ /de la 'jigs pas kun nas bslang pa gang yin pa de ni rigs pa ma yin te/gnas ma yin pa la sbyor ba yang srid pa la mi dga' bas rab tu ldog par yang 'gyur ba'o/ /gzhan gyi ngor byed pa de yang rgya che bar mi 'gyur ro/ /bsam pas ma zhugs pa de yang mnyam par mi 'gyur ro//de ltar na rgyu dang po las skyes pa'i mnyes gshin pa de yang skyon dang bcas pa yin te/ kun nas nyon mongs pa can yin pa'i phyir kha na ma tho ba dang bcas pa yin no/ /de'i gnyen po'i phyogs ni kha na ma tho ba med pa ste/ mi skyo ba'i bar du'o/ gzhan gyi ngor bskyed pa gang yin pa de ni gsol ba btab pas byas pa'o//de'i gnyen po'i phyogs gang yin pa de ni gsol ba ma btab pa dang zhes bya ba'o/ /bsam pa ma yin pas bskyed pa gang yin pa de ni zang zing dang bcas pa'o/ /de'i gnyen po'i phyogs gang yin pa de ni zang zing med pa dang zhes bya ba'o/ /de dag gis byas pa'i skyon med pas rgya che ba dang mnyam pa nyid do//yang chos bzhi ni rang bzhin med pas 'gro bas 'jug pa'o/ /'di na 'ga' zhig gcig tu mi phan pa sdug bsngal bskyed par 'dod pa ma yin yang / gzhan gyi rkyen gyis sems can la mnyes gshin pa'o/ /des na de'i mnyes gshin pa de ni rigs pa ma yin no//mi dga' bar yang 'gyur ro/ /kha cig ni zhe sdang gis mnyes gshin pa ste/ mnyes gshin pa de ni gsol ba btab ste/ rgya che ba ma yin no/ /de'i gnyen por gsol ba ma btab pa dang / rgya che ba'o/ /kha cig ni 'dun pas mnyes gshin pa ste/de'i gnyen por zang zing med pa dang / mnyam pa nyid do/ /rmongs pas mnyes gshin pa ni rgya che ba ma yin pa dang / mnyam pa ma yin pa'o/ /de dag gi gnyen por rgya che ba dang / mnyam pa nyid do/ /yang 'jigs pa'i mnyes gshin pa'i gnyen por ni 'jigs pa med pa'o//skyon dang bcas pa'i mnyes gshin pa'i gnyen por ni rigs pa dang mi skyo ba'o/ /'dun pa'i mnyes gshin pa'i gnyen por ni gsol ba ma btab pa dang zang zing med pa'o/ /gti mug gis mnyes gshin pa'i gnyen por ni lhag ma dag go/ /mthun pa nyid yin pas yid du 'ong zhing zhes bya ba'o//yid du 'ong ba'i phyir phan pa ste 'dod pa'o/ /bde ba dang ldan pa zhes bya ba ste/ yid dang 'tsham pa'o/ /rigs pa ma yin pas bskyed pa bshad pa ni/ nyes par spyod pa la yang dag par sbyor ba ni chas ma yin pa la yang dag par 'dzud pa'o/nyon mongs pas kun nas dkris pa la yang dag par sbyor bas 'dul ba ma yin pa la sbyor ba ste/ 'jig rten gyis mi spyod cing ma bsngags pa ni tshogs par kun du spyod par mi 'os pa ste/ gsum po 'di dag ni gnas ma yin pa'o/ /sems can rnams kyi don la rab tu sbyor ba ni shin tu ngal bar gyur kyang yongs su mi skyo ba ni lus la ngal ba med pa dang /yid la skyo ba med pa ste/ snying rje can ni skyo bar mi 'gyur ro zhes bya bas so/ /rnam par smin pa la re ba med pa'i phyir/ zang zing med pa nyid bstan pa'i phyir rgyu med par mnyes gshin pa'o//rgya che ba nyid ni chen po nyid de/ mi mthun pa'i phyogs kyis zil gyis mi non pa nyid do/ /de'i phyir smras pa/ rnam pa thams cad dang phrad kyang spong bar mi byed de zhes bya ba la sogs pa'o/ /dga' dgur mi sdug par byed kyang zhes bya ba ni bdag gi bde ba la ltos pa med pa'i phyir ro//de'i phyir smras pa/ gzhan dag la ni rnam grangs gang gis kyang sdig pa byed par mi 'dod de zhes bya ba'o/ /gcig la ji ltar byed pa de bzhin du thams cad la byed pas kun la mnyam pa yin no/ /de'i phyir phyogs gcig la ma yin no/ /sems can rnams la phan pa dang bde ba'i bsam pa dang ldan pa'i phyir dge ba'i bsam pa can zhes bya'o//sbyor bas phan 'dogs pa'i phyir mchog tu dge ba'i bsam pa can zhes bya'o/ /mos pa ni lhag par mos pa'o/ /de bzhin du nges par 'dzin pas sems kyi dga' ba ste/ dngos po de mi 'dor ba'o/ /gzhan gyi stobs kyis bskyed pa ni dad pa sngon du 'gro ba'o//rang gi stobs kyis bskyed pa ni chos rab tu 'byed pa sngon du 'gro ba ste/ dbang po rnon po dang rtul ba'i dbye bas so/ /dad pa sngon du 'gro ba ni so sor rtogs pa zhes bya'o/ /cig shos ni nges par byed pa zhes bya'o/ /bsam pa lhag par gyur pa ni lhag pa'i bsam ste/lhag par mos pa'i bsam pa zhes bya'o/ /lhag pa nyid kyang 'chad par 'gyur bas shes par bya'o/ /de ltar na bsam pa'i mtshan nyid tha dad pa med na yang dngos po'i dbye ba dang / gnas skabs kyi dbye bas rnam pa bco lngar bstan to zhes bya bar smras pa/de dag kyang mdor bsdu na rnam pa bco lngar zhes bya ba la sogs pa la/ de la lhag par mos pa'i dngos po ni bcu ste/ skyabs su 'gro ba'i dngos po ni gang gi phyir smras pa/ mchog gi bsam pa dang zhes bya ba'o/ /bslab pa'i bsam pa ni gang gi phyir smras pa/tshul khrims kyi bsam pa dang zhes bya ba'o/ /sdom pa la gnas pa'i dge ba'i chos bsgom pa'i dngos po ni gang gi phyir smras pa/ pha rol tu phyin pa'i bsam pa dang zhes bya ba'o/ /kun nas nyon mongs pa med pa'i dngos po ni gang gi phyir smras pa/ /de kho na'i don gyi bsam pa dang zhes bya ba'o//rgya che ba'i dngos po ni gang gi phyir smras pa/ /mthu'i bsam pa dang zhes bya ba'o/ /dang po ni mchog gi gnas la lhag par mos par 'gyur ba'o/ /gnyis pa ni nyes par spyod pa las dben pa la'o/ /gsum pa ni dge ba'i chos la'o/ /bzhi pa ni zab mo'i chos la'o/ / lnga pa ni rgya che ba'i chos la'o/ /sems can pha rol po'i dbang du byas nas sdug bsngal rnam pa gsum gyi rgyu la gnas pa'i sems can rnams la phan pa'i bsam pa ni phan pa la lhag par mos pa'o/ /sdug bsngal can rnams la ni bde ba'i bsam pa nyid de/ bde bar lhag par mos pa'o//gnyi ga la zang zing med pa'i phyir lhag pa'i bsam pa zhes bya'o/ /gcig tu byang chub kyi sems brtan pa'i phyir brtan pa'i bsam pa dang zhes bya ba'o/ /thabs la lhag par mos pa'i phyir mi slu ba'i bsam pa zhes bya ba ste/ de lta bu ni dngos po'i dbye ba yin no/ /gnas skabs kyi dbye ba ni rnam pa gsum ste/ma dag pa'i bsam pa dang zhes bya ba la sogs pa'o/ /sbyor ba'i bye brag gis ni rnam pa gnyis te/ so sor rtog pa'i stobs kyis 'jug pa dang / lhun gyis grub par 'jug pa'o/ /bsam pa'i khyad par gyis 'jug pa'i phyir ma dag pa'i bsam pa'o//dmigs pa med pa nyid ni dag pa'i bsam pa'o/ /mthar thug par gyur pa ni shin tu rnam par dag pa'i bsam pa'o/ /ma dag pa'i bsam pa de nyid so sor rtogs nas 'jug par bya ba nye bar bzung nas tshar gcad par bya ba'i bsam pa zhes bya'o/ /gzhan dag rang gi ngang gis 'jug pa de ni lhan cig skyes pa'i bsam pa zhes bya'o//de'i phyir smras pa de'i bdag nyid du gyur pa dang zhes bya ba'o/ /yang bsam pa de ni skye ba thams cad du rten la shin tu gnas pa'i phyir zhes bya ba ni rten des bar mi gtong pa'o/ /de ltar na de'i bsam pa ni sa thams cad du gtogs par rjes su 'jug par 'gyur ba'o//des na 'di dag gis bya ba bcu byed par 'gyur ro/ /dang pos ni dkon mchog gsum la lhag par mos pas rab tu dang ba'i bya ba byed do/ /dpag tu med pa'i bsod nams kyi tshogs yongs su 'dzin pa'i sbyor bas tshogs thams cad kyi mchog tu gyur pa dkon mchog gsum la mchod pa byed pa'o//gnyis pas ni tshul khrims yang dag par blangs pa la brtan par gnas pas ma nyams shing ma ral ba'o/ /gsum pas ni dge ba la rtag tu gus par byed pa'i phyir bag yod pa la gnas pa'o/ /bzhi pas ni 'khor bar gtogs pa'i sbyor ba dang mya ngan las 'das par gtogs pa'i bsam pa dang ldan pa'o//lnga pas ni bstan pa la ma zhugs pa rnams nges par 'dzud par byed do/ /drug pa la sogs pa gsum gyis ni sems can rnams kyi don la sbyor bar byed do/ /dgu pas ni brtson 'grus brtan pa dang brtson 'grus rgya chen por 'gyur ro//de'i phyir smras pa/ brtson 'grus 'bar ba dang / brtson 'grus rgya chen po yang dag par rtsom par gnas te zhes bya ba la sogs pa'o/ /de dag gnyi ga'i bshad pa ni sbyor ba lhod par mi 'gyur zhing sbyor ba nyams par mi 'gyur ro zhes bya ba'o//bcu pas ni dge ba rnams la rab dang gtso bor 'gyur ba'o/ /de'i phyir smras pa/ myur du bla na med pa yang dag par rdzogs pa'i zhes bya ba la sogs pa la/ mngon par 'du byed pa med par 'dren no/ /des ni gong nas gong du bla na med pa'i byang chub thob pa la mthun pa nyid yin no//bsam pa 'di dag ni bsdus pa dang rgyas par bstan pa tsam yin gyi/ dbye ba ni bcom ldan 'das kyis skabs de dang de dag tu zhes bya ba la sogs pa la/ bsdus par rig par bya'o zhes bya ba ni de dag gi dbang du byas pa'o/ /byang chub sems dpa'i sa'i gzhi dang mthun pa'i chos kyi rnal 'byor gyi gnas las lhag pa'i bsam pa'i le'u ste gsum pa'i 'grel pa rdzogs so// //de lta bu'i lhag pa'i bsam pa dang ldan pa'i lus la sogs pa'i spyod pa'i dbang du byas nas gnas skabs thams cad du rjes su 'jug pa ni gnas pa zhes bstan to zhes bya bar de dag gi sdom gyi tshigs su bcad pas ston par byed do//gnas pa 'di dag ni zhugs pa dang / ma zhugs pa rnams dang / mngon par rdzogs par sangs rgyas kyi bar du ci rigs par sbyar bar bya'o/ /de'i phyir smras pa/ rigs phun sum tshogs pa las gzung ste zhes bya ba la/lhag pa'i bsam pa'i rjes thogs la bstan pa'i go rims kyi 'grel pa bstan pa'i phyir smras pa/ ji ltar bstan pa'i byang chub sems dpa'i bslab pa la zhes bya ba la sogs pa la/ ji skad bstan pa'i rtags rnams dang ldan pa dang / byang chub kyi sbyor ba la zhugs pa dang / bsam pa rnam par sbyong bar byed pas 'di ltar slob pa'i byang chub sems dpa'i gnas 'di dag la gnas par 'gyur ro zhes bstan pa'i phyir te/ rigs la gnas pa yang sems bskyed pa'i bslab pa'i dbang du byas nas bstan pa yin no/ /gnas pa re re la yang gnas skabs kyi khyad par dpag tu med pas mdor bsdus pa yin no zhes smras pa/gnas pa ni mdor bsdu na bcu gnyis yod de zhes bya ba la sogs pa la/ gnas pa'i don ni byang chub sems dpa'i lus la sogs pa'i spyod pa'i sbyor ba yin no zhes bya ba'i tha tshig go/ /de'i phyir smras pa/ byang chub sems dpa'i spyod pa thams cad bsdus par rig par bya'o zhes bya ba la/byang chub sems dpa'i gnas pa bstan pa'i dbang du byas nas de bzhin gshegs pa'i yang bstan pa ste/ byang chub sems dpa' kho nas de 'thob pa yin pa'i phyir ro/ /de'i phyir smras pa/ byang chub mngon par rdzogs par sangs rgyas pa zhes bya ba la/'di'i pha rol na mchog tu gyur pa'i gnas pa gzhan med pas bla na med pa'o zhes de dag gi ming rnam par gzhag pa'i dbang du byas nas smras pa/ gnas pa bcu gnyis gang zhe na zhes bya ba la sogs pa'i rigs la gnas pa ni rigs dang /de'i rgyur gyur ba lus la sogs pa'i las kyi khyad par ni rigs la gnas pa'o/ /sems bskyed pa rnams kyi ni bsam pa ma dag pa'i sa ste/ de dang 'dra bar mos pas spyod pa la gnas pa'o/ /gzhan dag kyang de bzhin no/ /gnas pa dang po ni bslab pa la gnas pas bsdus pa ma yin te/bsam pa dag pa nyid du yongs su dag pa'i bslab pa gsum la gnas kyi/ gzhan ni ma yin no zhes rab tu bstan pa'i phyir de lta bas na mos pas spyod pa'i gnas skabs na yang yod du zin kyang / lhag pa'i tshul khrims dang / lhag pa'i sems dang / lhag pa'i shes rab kyi bslab par rnam par gzhag pa mi 'thob ste/ bslab pa ma yin pa dang 'dres pa'i phyir ro/ /rab tu dga' ba'i sa la yang nges pa med pa yin la/ gang las bslab pa'i nges pa thob pa nas de'i rnam par gzhag pa yin no/ /rab tu dga' ba la gnas pa ni sa dang po ste/rab tu dga' ba rnam pa bcu rnam par gzhag pas rab tu phye ba yin pa'i phyir ro/ /lhag pa'i tshul khrims la gnas pa ni sa gnyis pa ste/ rang bzhin gyis mi dge ba bcu'i las kyi lam gyi gnyen po dge ba la kun du spyod pas rab tu phye ba'i phyir ro/ /lhag pa'i sems la gnas pa ni sa gsum pa ste/bsam gtan dang / gzugs med pa dang / ting nge 'dzin dang / snyoms par 'jug pa la snyoms par 'jug pa thob pa bstan pas rab tu phye ba'i phyir ro/ /bzhi pa ni byang chub kyi phyogs dang yang dag par ldan pa ste/ byang chub kyi phyogs bsgom pa rab tu bstan pa'i phyir ro//de bsgom pa ni shes rab kyi las yin pa'i phyir/ lhag mthong gi rjes su mthun pa nyid de/ des na lhag pa'i shes rab la gnas pa'o/ /ji ltar nyan thos kyi lhag pa'i shes rab kyi bslab pa 'bras bu bzhis bsdus pa yin pa ltar 'dir yang lhag pa'i shes rab kyi bslab pa'i dbye ba rnam par gzhag par bya'o//sa lnga pa ni bden pa nges par rtogs pa dang ldan pa'o/ /bden pa mthong nas kyang bden pa mngon par rtogs pa'i rjes la rten cing 'brel par 'byung ba la rtogs pa mang bar 'gyur ro zhes bya bas nag po'i phyogs dang /dkar po'i phyogs kyi dbye ba de dang de dag dang ldan par gyur pa ni sa drug pa'o/ /gang gis zhes bya ba ni chos rab tu rnam par dbye ba'o/ /gang zhes bya ba ni bden pa'i de kho na nyid do/ /de ma shes pas sdug bsngal la 'jug pa dang / yang shes pas ni 'jug par mi 'gyur ba'o zhes rab tu rtogs par byed pa'i rnam pa gsum char yang lhag pa'i shes rab la gnas pa zhes bya'o//mtshan ma med pa yang rnam pa gnyis te/ mngon par 'du byed pa dang bcas shing 'bad pa dang bcas pa dang / de las bzlog pa'o/ /sa bdun pa la gnas pa yang mtshan ma med pa kun du spyod pa yin mod kyi/yang de ni mi mthun pa'i phyogs las nges par rgyal ba ma yin pas 'bad pa med par bsgrub par bya ba ma yin pas zhes byas nas mngon par 'du byed pa dang bcas pa yin no/ /brgyad pa ni de mang du bsgom pa dang ldan pas de ni lhun gyis grub pa'i lam bsgom pa la 'jug pa yin no zhes byas nas mngon par 'du byed pa med par 'jug pa'o//rnam pa thams cad kyis chos 'chad pa la mkhas pas chos smra ba chen po nyid kyi gnas rab tu thob pas sa dgu pa so so yang dag par rig pa la gnas pa zhes bya'o/ / byang chub sems dpa'i spyod pa yongs su rdzogs pa dang ldan zhing pha rol tu phyin pa rnams yongs su rdzogs pa'i gnas pa mchog ni sa bcu pa'o/ /de ltar na gnyis ni sbyor ba'i sa'o/ /bcu ni mngon par rtogs pa'i sa ste bsdus nas bcu gnyis so/ /gnas pa thams cad bsdus te zhes bya ba ni dge ba'i chos thams cad bsdus so zhes bya ba'i don to//de'i phyir smras pa/ byang chub sems dpa'i spyod pa thams cad bsdus so zhes bya ba'o/ /de bzhin gshegs pa'i gnas pa ni/ byang chub sems dpa' rnams la yod pa ma yin te zhes bya bar smras pa/ byang chub sems dpa'i gnas pa thams cad las yang dag par 'das pa zhes bya ba la sogs pa'o/ /de'i gnas pa ni rnal 'byor gyi gnas tha ma las ston par 'gyur ro/ /des na smras pa/ gnas pa tha ma ni zhes bya ba la sogs pa la/ /chos bcu ni de'i gnas su gyur pa yin pa'i phyir/rab tu gnas pa'i gnas kyis bsdus pa'i phyir ro/ /ji ltar rnam par gnas pa de bzhin du zhes bya ba ni rnam pa gang gis mdo sde nas gnas pa bstan pa de bzhin du bstan to zhes bya ba'i don to/ /rnam pa bzhis rigs la gnas pa rnam par gzhag ste/ bsam pa phun sum tshogs pa nyid dang /sbyor ba phun sum tshogs pa nyid dang / rgyu yun sum tshogs pa nyid dang / las kyi mtha' phun sum tshogs pa nyid do/ /de la dang po'i dbang du byas nas smras pa/ rang bzhin gyis sems kyi rgyud dge ba'i phyir zhes bya ba la sogs pa la/ rang bzhin gyis rgyud dge ba yin pa'i phyir/spyi dang khyad par la so sor brtag pa med par yang ngo / /dge ba'i chos rnams dang ldan par 'gyur ro zhes bya ba ni sa bon dang mngon par ldan pa yin par bzhed kyi mngon sum du byas pa dang ldan pa ni ma yin te/ kun du spyod pa yang yang dag par mthong ngo zhes bya ba'i tshig gis so//gnyis pa'i dbang du byas nas smras pa/ de yang dag par spyod pa la yang yang dag par snang ba zhes bya ba la/ de dag gi rigs kyi rtags kyis bsdus pa'i yon tan rnams mngon sum du gyur pa'o/ /de la yang dag par snang la zhes bya ba ni de dang yang dag par spyod pa dang ldan pa zhes bya ba'i tha tshig go//nan gyis sbyor ba ni ma yin zhes bya ba ni bdag nyid kyis brtan par byas nas sbyor ba ma yin zhes bya ba'i tha tshig go/ /de'i phyir smras pa/ so sor brtags te gags dang bcas par ma gyur pa ni ma yin no zhes bya ba ste/ tshar bcad pas ma yin zhes bya ba'i tha tshig go//gsum pa'i dbang du byas nas smras pa/ sa bon 'dzin pa yin te zhes bya ba la sogs pa'o/ bzhi pa'i dbang du byas nas smras pa/ dri ma rags pa dang bral ba yin te zhes bya ba la sogs pa la/ rags pa nyid ni kha na ma tho ba chen pos kun nas bslang ba'o//kha na ma tho ba dang bcas pa yang lus kyi nyes par spyod pa la sogs pa'i las te/ ma la sogs pa'i rten gyi srog gcod pa dang / de la sbyor ba'o/ /ngag gi las dge 'dun gyi dbyen la sogs pa dang / yid kyi nyes par spyod pa log par lta ba'o/ /bya ba gang bstan pa zhes bya ba la/bya ba gang bstan pa 'di dag thams cad kyang rigs la gnas pa'i yin par rig par bya'o zhes bya ba'i don to/ /de ltar ming gis bstan pa'i gnas pa rnams don gyi sgo nas bstan pa'i dbang du byas nas rigs la gnas pa ni gang yin zhes bya ba la sogs pa la/ dri ba byas pa bzhin du mos pas spyod pa'i sa la gnas pa la sogs pa la yang sbyar te/ thun mong dang thun mong ma yin pa rnam pa lnga bstan pa ni gnas skabs nyid dang / ngo bo nyid dang / rtsom pa nyid dang / thob pa nyid dang / yongs su rdzogs pa nyid do/ /ngo bo nyid ma gtogs pa gzhan rnam pa bzhi ni sa bstan pa thams cad du rjes su rtogs pas thun mong pa zhes bya'o//ngo bo nyid ni so sor nges pa yin pa'i phyir/ thun mong ma yin pa zhes bya'o/ /dang po sems bskyed pa nas bzung ste zhes bya ba la sogs pas ni gnas skabs gsal bar byas pa yin no/ /byang chub sems dpa'i spyod pa gang ci yang rung zhes bya bas ni ngo bo bstan to//rgyu tsam la 'jug cing zhes bya ba ni byang chub sems dpa'i yon tan thams cad dang ldan pa'i phyir/ byang chub sems dpa'i gnas pa rnams kyi rgyu tsam la 'jug pa yin pa dang / sangs rgyas kyi chos thams cad kyi sa bon 'dzin pa yin pas de bzhin gshegs pa'i gnas pa'i rgyu tsam yin no//don de nyid bstan pa ni rgyu yongs su 'dzin par zad kyi zhes bya ba la des rgyu yongs su gzung bar zad kyi 'bras bu ni ma yin no zhes bya ba'i don to/ /de'i phyir smras pa/ gnas pa gzhan ci yang brtsams pa yang med ces bya ba ni brtsams su zin kyang gnas pa 'thob pa dang rjes su mthun pa sbyor ba'i lam gyi gnas skabs sbyor ba'i lam zhes bya ba ste/des bsdus pa med de/ sems bskyed pa med pa'i phyir dang / sbyin pa la sogs pa'i sbyor ba dag pa med pa'i phyir/de bzhin gshegs pa'i lta shin tu ring ba nyid yin no/ /byang chub sems dpa'i gnas pa thams cad brtsams pa yin te zhes bya ba ni sems bskyed pa dang / sbyin pa la sogs pa'i pha rol tu phyin pa la sbyor ba yod pas des sa 'thob par 'gyur ba'i phyir brtsams pa zhes bya ste/de'i don du shin tu 'bad par byed do zhes bya bas 'thob pa yang med ces bya ba ni yang dag par mngon du byas pa med pa'o/ /rnam par sbyangs pa yang med ces bya ba ni yongs su rdzogs pa med do/ /mos pas spyod pa'i sa la gnas pa thob cing de la gnas pa'i phyir de nyid kyi rnam par dag pa rab tu 'thob pas rim gyis de'i mthar thug pa thob pa'o//sa nas sa su 'pho ba bstan pa'i phyir mos pas spyod pa la gnas pa yongs su dag na zhes bya ba la sogs pa la/ sa de 'thob kyang sa gong ma 'thob pa ste/ bsam gtan thob kyang gong ma thob pa lta bu'o//ji ltar bsam gtan thob kyang gong ma ma thob pas de yongs su sbyangs nas gong ma thob par byed do/ /de bzhin du 'dir yang tshul de dang 'dra ba yin te/ bskal pa mang pos sa yongs su spyod par byed pa yin no/ /de bzhin gshegs pa'i gnas pa ni thob pa dang dag pa cig car yin te/bla na med pa yin pa'i phyir dang / yang rtsom pa med pa'i phyir ro/ /de'i phyir bstod pa/ shing la bya rnams gnas 'cha' bzhin du khyod kyis skad cig gcig la de 'dir brnyes/ /zhes bstan pa yin te zung du 'jug par brnyes pa la dgongs pa yin no/ /mi slob pa'i sas bsdus pa yin pa'i phyir de'i dag pa nyid rim gyis 'thob pa ma yin te/yang bslab par bya ba med pa'i phyir ro/ /lhag pa'i bsam pa dag pa zhes bya ba ni gnas skabs bstan to/ /gnas pa gang yin pa zhes bya ba ni ngo bo nyid bstan te/ de'i khyad par med pa'i phyir ro/ /bsam pa dag pa'i gzhis zhes bya ba ni/ji ltar nyan thos lta ba phun sum tshogs pa bsam pa dag pa ni rang bzhin gyis tshul khrims dang ldan pa bzhin du bsam pa rnam par dag pa'i byang chub sems dpa'i yin no zhes bya bar de'i rgyu bstan pa'i phyir/ rang bzhin gyis tshul khrims dang ldan pa'i phyir zhes bya ba la sogs pa la skyes shing skyes pa thams cad du dge ba bcu'i las kyi lam yang dag par blangs pa med par yang dag par ldan pa ste/sa de dag la lus la sogs pa'i las dge ba'i las kyis bsdus pas kun du spyod pa la mang du gnas pa dang ldan pa yin no//tshul khrims dang ldan pa'i sems mnyam par 'jog par 'gyur ro zhes bya ba'i tshig gis so zhes bya ba nas yang ma zhig pa nyid dang zhes bya ba nas/ ting nge 'dzin yang dag par sgrub par byed pa'i tshul khrims zhes bya ba'i tshig gi bar gyis/ tshul khrims rnam par dag pa'i gzhi las ting nge 'dzin la snyoms par 'jug cing gnas pa'o//'jig rten pa'i zhes smos pa ni bsam gtan dang / gzugs med pa dang / de dag las byung ba'i yon tan sa der bstan pa rnams ni de'i sa zhes bstan to/ /yang dang yang du bsam gtan dang ting nge 'dzin du 'jug pa dang /yang dag par ldan pa de lta bu ni dge ba'i chos la kun du spyod pa yin no/ /de'i phyir gnas pa zhes rnam par gzhag ste/ thams cad kyang de bzhin no/ /ting nge 'dzin la brten nas zhes bya ba ni sngar nas thob pa'i lhag pa'i sems la brten nas te/ sems mnyam par gzhag pa ni yang dag pa ji lta ba bzhin shes par 'gyur ro zhes bya ba'i tshig gis so//de ni rab tu rnam par 'byed pa'i gnas pa zhes bya'o/ /sa de la ni byang chub kyi phyogs kyi chos bsgom pa la mang du gnas pa yin no/ /ji ltar nyan thos rnams kyang byang chub kyi phyogs kyi chos bsgom pa sngon du 'gro bas bden pa rab tu rtogs pa yin pa ltar byang chub sems dpa' rnams kyis kyang rab tu rnam par 'byed pa la brten nas bden pa mngon par rtogs pa'i gnas pa ste/bden pa so sor rig pa'i rnam pas sa de la ni bden pa la lta ba mang du gnas pa yin no//sdug bsngal shes pa'i rgyus sdug bsngal 'gog par 'gyur ro zhes bya ba'i nges pas bden pa shes pa dang ldan pa ni 'jug pa dang ldog pa'i rim gyis so sor rtog par byed do zhes bya bas bden pa mngon par rtogs pa gtsor byed pa'i dbang du byas nas smras pa/de ma shes pas zhes bya ba ni bden pa so sor ma rtogs pas so/ /sdug bsngal 'byung ba rgyu dang bcas pa zhes bya ba'i rgyu ni nyon mongs pa dang / las kyis kun nas nyon mongs pa'o/ /lhag pa'i shes rab kyi bslab pa yongs su rdzogs par mtshan ma med par bsgom par bya'o zhes bya bar smras pa rnam pa de gsum gyi zhes bya ba la sogs pa la/mngon par 'du byed pa dang bcas pa'i sbyor ba zhes bya ba'i tha tshig go/ /de nyid bstan pa'i phyir smras pa/ rtsol bas zhes bya ba la/ rgyun chags su bar chad med par zhes bya ba ni/ skad cig ma rgyun chags su'o/ /chos thams cad la zhes bya ba ni 'dus ma byas la sogs pa'o/ /rnam par mi rtog pa'i shes rab bsgom pa dang ldan pa zhes bya ba ni ji ltar de bzhin nyid rnam par mi rtog pa shes bya'i mchog la rnam par rtog pa thams cad med pa ltar de la dmigs pa'i shes rab kyang de dang 'dra bar rnam par mi rtog pa nyid do//de'i rnam par bsgom pa ni shes rab bsgom pa dang ldan pa zhes bya'o/ /de la 'di dang gnyis pa'i khyad par ni/ sngar bstan pa'i rnam par mi rtog pa'i shes rab shas cher bsgom pas mngon par 'du byed pa dang rtsol ba med par rang gi ngang gis 'jug pa rgyun mi 'chad pa'i rnam pa can gyi lam du gyur pa yin no//shes rab dang ldan pa'i ting nge 'dzin zhes bya ba ni ting nge 'dzin la mnyam par gzhag pa'i shes rab ces bya ba'i don to/ /bstan pa'i chos ni so so yang dag par rig pa rnams kyis yang dag par bsdus pa'i phyir shes rab kyang rgya che ba'i phyir blo gros chen po rgya che ba rjes su 'thob pa yin no//des na chos smra ba chen po yin pa'i phyir chos yang dag par ston pa bla na med pa zhes bya ba la/ de'i chos ston pa ni rnam pa thams cad yongs su rdzogs pas bla na med pa yin no//des na bla na med pa zhes bya ba yin no/ /rnam grangs dang zhes bya ba la sogs pas ni so so yang dag par rig pa'i yul bstan to/ /lam gyi mthar thug pa ste zhes bya ba ni bsod nams dang ye shes kyi tshogs yongs su rdzogs pa'i phyir ro/ /bla na med pa yang dag par rdzogs pa'i byang chub la dbang ba nyid kyi phyir chos kyi dbang bskur ba chen po thob pa zhes bya'o//yang de ni rnam pa gnyis su bstan pa'i phyir skye ba gcig gis thogs pa'am zhes bya ba la sogs pa'o/ /de ltar gnas pa rnams kyi ngo bo bstan nas bsgom pa'i rnam pa'i khyad par bstan pa'i phyir/de la zhes bya ba la sogs pa'o/ /'di'i lus la sogs pa'i bya ba'i las rnams ni 'jig rten pa thams cad dang / nyan thos la sogs pa las khyad par du 'phags pa yin na sa la zhugs pa la ltos nas bya ba chung ngu dang ldan pa yin gyi rgya che ba ma yin zhing tshad med pa ma yin no//rgyun chags pa ma yin par byed pa ni res 'ga' ni byed la res 'ga' mi byed pa'o/ /nges par mi byed pa ni yongs su nyams par 'gyur ba ste/ yang bya dgos shing sbyor ba nyid do/ /de'i phyir smras pa/ yongs su nyams par 'gyur ro zhes bya ba'o/ /sa la zhugs pa'i ni rgya cher byed pa yin gyi/dpag tu med par byed pa ni ma yin no/ /rgyun mi 'chad par sbyor ba ni rgyun chags su byed pa'o/ /yongs su nyams par mi 'gyur pa ni nges par byed pa yin no/ /ji lta ba bzhin du zhes bya ba ni bslab pa'i lam la gnas pa'i khyad par med pa'o//lhag ma gsum gyis rnam pa 'dra bar bstan pa'i phyir/ mtshan ma med pa la gnas pa dang po nas bzung ste zhes bya ba la sogs pa la/ de'i skad cig gcig la bskyed pa'i dge ba yang dpag tu med pa yin pa'i phyir tshad med par byed pa zhes bya'o/ /gnas pa dang po gnyis ni sa la ma zhugs pa yin par bstan pa'i phyir smras pa/yang dag par rtsom pa yin par rig par bya'o zhes bya ba la sogs pa'o/ /chos bdag med par rab tu rtogs par rab tu sbyor ba yin pa'i phyir ro/ /sa drug po rnams su chos bdag med pa la sbyor ba'o/ /thog pa rnams khyad par du 'phel ba ni 'grub pa zhes bya'o//'phel ba mthar thug par gyur pa ni yongs su dag pa'o/ /'bras bu so sor myong ba ni kha na ma tho ba med pa'i chos smra ba chen po nyid 'thob ba'o/ /bcu pa la ni dbang bskur ba thob pa'o/ /yang gnas pa 'di dag gis so so'i rnam pa la sogs pa bstan pa ni gnas pa de dag la gnas pa legs par mtshon par bya ba'i phyir ro//rnam pa la sogs pa gsum ni don gcig pa nyid do/ /de lta de ltar snang ba'i phyir/ /zhes bya ba ni rnam pa'o/ /'dis mtshon par byed shes par byed pas na rtags so/ /mtshan mar gyur pas mtshan ma'o//rnam pa la sogs pa rnams mdor bsdu na rnam pa bzhir rnam par gzhag par bya'o/ /rigs la gnas pa la med pa'i yon tan gang yin pa de 'di la ldan pa dang / sa la gnas pa rnams la skyon gang med pa de 'di la yod pa dang / de la yod pa'i yon tan gyi phyogs gcig 'di la yod pa dang /rigs la gnas pa rnams kyi skyon gang yin pa'i phyogs gcig 'di la yod pa ma yin te/ rigs la gnas pa'i byang chub sems dpa' rnams ni sems can gyi don la so sor brtags nas 'jug par mi byed do/ /'di ni yang rab tu sbyor bar byed do zhes bya ba ni khyad par ro//rang bzhin gyis ni ma yin te zhes bya ba ni sa la zhugs pa bas dman par bstan pa'o/ /brtan pa la sogs pa dang / yongs su mi nyams pa ni don gcig pa nyid do/ /thob pa ni ma yin no zhes bya ba ni gnas pa de la ni yongs su nyams pa srid pa yin no//'dis ni sa la zhugs pa bas dman par bstan to/ /de bzhin du 'jigs pa rnams las kyang yang dag par 'das pa yang ma yin no/ /sems can gyi don rnams la yang sbyor ba dag la so sor brtags te sbyor bar byed kyi zhes bya ba ni bdag dang gzhan du mnyam pa'i bsam pa med pa'i phyir ro//ched 'ga' ni log par yang bsgrub po zhes bya ba ni mi phan pa dang sdug bsngal yang bskyed do zhes bya ba'i tha tshig ste/ mi dge ba bcu'i las kyi lam yang kun du spyod pa yod pa nyid do/ /ched 'ga' ni lhag par zhen par gyur ro zhes bya ba ni 'dod pa'i nyes dmigs ma mthong bas chags pa'i dbang gis 'dod pa la yongs su spyod par byed do zhes bya ba la sogs pa rgyas par bstan pa yin no//kun du 'dzin par yang snang ngo zhes bya ba ni sbyin par bya ba'i chos kyang yod la slong mo pa nye bar lhags kyang sbyin pa la mi 'jug pa'o//dad pas 'gro bar 'gyur zhes bya ba ni gzhan gyi rkyen gyis drangs pa zhes bya ba'i don to/ /de'i phyir smras pa/ sangs rgyas dang byang chub sems dpa'i mthu'am zhes bya ba la sngar bstan pa'i don brgyad po la gzhan gyi dbang gis 'jug pa nyid do//sa la zhugs pa'i shes pa la ltos nas chung ngu dang ldan pa yin pa dang / dran pa brjed ngas pa dang ldan pas ched 'ga' brjed ngas pa dang / dman pa'i lam dang ldan pa yang yin zhes bstan pa'i phyir/ mngon par shes pa bul la dka' ba dang ldan pa zhes bya ba la sogs pa la/'dun pa drag po med do zhes bya ba nyid bstan pa'i phyir/ brtson 'grus 'bar ba ma yin no/ /zab mo la dga' ba legs par gnas pa ma yin no zhes bya bas bstan pa yin no/ /yul rnams la brjed ngas pa ni 'dod pa dang / mi 'dod pa rnams la chags pa dang /sdang ba dag gis sems phyin ci log pa nyid do/ /skye ba gzhan du skyes pa nas 'das pa'i lus mi dran pa dang / chos rnams la bzung nas ring du lon pa'am byas nas ring du long pa'i chos rnams mi dran pa'o/ /yid gzhungs pa dang / dran pa dang / shes rab dang ldan pas chos rnams len pa la sogs par nus pa la ched 'ga' dran pa brjed ngas par yang 'gyur ro//thams cad kyi thams cad du thabs la mkhas pa dang bral ba yin no zhes bstan pa'i phyir sems can 'dul ba'i thabs ji lta ba bzhin du mi shes pa zhes bya ba la sogs pa la/nan gyis chos ston cing zhes bya ba ni gzhan gyis gsol ba btab pa'i stobs zhes bya ba'i don to/ /'bras bu med par yang 'gyur zhes bya ba ni 'bras bu grub pa med pa'o/ /de'i phyir dpe bstan pa yin no/ /kha cig tu smon lam yang gtong bar byed la/ de bzhin du tshul khrims kyi sdom pa yang dag par blangs pa nyid kyang gtong ngo //ched 'ga' ni 'jigs pa dang bcas pa'i yid kyis byang chub sems dpa'i tshul khrims kyi sdom pa yang dag par len par mi byed do/ /ched 'ga' ni sems can rnams kyi log par bsgrub pa'i sdug bsngal gyi rgyus sems can gyi don las ldog par yang byed do//bsam pa thag pa nas zhes bya ba ni ngo bo nyid kyis so/ /so sor brtags te zhes bya ba ni so sor brtags pa nyid kyis so/ /bdag gi 'khrul pa yongs su shes pa bzhin du mi spong bar de bzhin du yang 'khrul pa la spyod pa nyid yin no//'di las khrid par 'gyur ro zhes bya ba ni dge ba'i bshes gnyen ngan pas theg pa chen po las 'dun pa zlog par byed pa'o/ /skrag par 'gyur zhes bya ba ni thams cad kyi thams cad du phyin ci log tu sbyor bas log pa la nges par gzung ba'o//g.yo ba ni blo gros ngan pa skye bar 'gyur bas the tshom za ba nyid do/ /bsam pa'i khyad par ma thob pas snying rje chen pos kun du spyod pa yang spong bar 'gyur ro/ /gzhan gyi don gyi bya ba la sbyor ba yin na yang sbyor ba chung dus nye bar bsgrub pa ste/ bsam pa chung ba'i phyir ji skad bstan pa'i mtshan nyid can gyi bslab pa yongs su rdzogs pa dang /de bzhin du rtags dang / phyogs kyi sbyor ba dang / lhag pa'i bsam pa med pa yin no/ /de'i phyir yang dag par rdzogs pa'i sangs rgyas dang ring ba nyid yin no/ /ched 'ga' ni bdag tu lta ba la kun du spyod par yang 'gyur ro zhes bstan pa'i phyir smras pa/bdag nyid kyang ring bar 'dzin to zhes bya ba la des na 'khor ba na 'khor ba'i bsam pa yin no zhes bstan pa yin no/ /rnam pa la sogs pa 'di dag gnyen po'i dbang gis chen po dang 'bring dang chung ngu nyid du bstan pa'i phyir/ bzod pa chung ngu la gnas pa'i zhes bya ba la sogs pa'o/ /de la bzod pa chung ngu'i gnas skabs na mi mthun pa'i phyogs kyi rnam pa la sogs pa chen po yin la/ /gnyen po'i phyogs ni chung ngu'i yin no/ /bzod pa chen po la zhugs par gyur pa'i tshe 'di dag ma lus par rab tu spong bar 'gyur ro zhes des na rab tu dga' ba'i gnas pa la 'jug par bstan pa'i phyir/'thob pa'i tshul gyis 'jug par rig par bya'o zhes bya ba ste/ mos pas spyod pa na 'di la bstan pa las bzlog nas rab tu dga' ba la gnas pa la bar chad de dag thams cad mi 'byung bar bstan pa'i phyir/thams cad kyi thams cad du zhes bya ba la/ rab tu dga' ba'i gnas pa 'thob pa'i mi mthun pa'i phyogs yin pa'i phyir ro/ /ji skad bstan pa'i mi mthun pa'i phyogs kyi chos kyi gnyen po'i phyogs kyi chos rab tu dga' ba'i gnas pa'i rnam pa la sogs pa bstan pa'i phyir smras pa/de dag dang ldan na zhes bya ba la sogs pa la/ 'on te mos pas spyod pa'i gnas skabs na yang lhag pa'i bsam pa dag pa yod kyang ci'i phyir der rnam par gzhag par mi bya zhe na/ des na smras pa/ yod mod kyi zhes bya ba la sogs pa'o/ /kun nas nyon mongs pas nyon mongs pa can du byas pa'i phyir de'i lhag par mos pa de bsam pa dag par rnam par gzhag pa ma yin no zhes bstan pa yin no//rab tu dga' ba'i gnas pa ni kun nas nyon mongs pa can ma yin te/ bsam pa dag pa'i phyir ro/ /mos pas spyod pa'i gnas pa rdzogs so// //khyad par gyi rnam pa la sogs pa'i dbang du byas nas smras pa/ rnam pa ni gang dag yin zhes bya ba la sogs pa la/ sngon gyi smon lam btang nas sngon med pa'i smon lam yongs su bzung nas rab tu dga' ba'i gnas pa la 'jug pa bstan pa'i phyir zag pa med pa'i don dam pa'i sems bskyed pa nyid do//sngon gyi smon lam gtong ba'i rgyu nyid bstan pa ni/ rnam pa bzhis dman ba nyid de/ yang dag par rdzogs pa'i byang chub kyi che ba'i bdag nyid yang dag pa ni lta ba bzhin rtogs pa las skyes pa ma yin pa'i phyir/byang chub par bya ba'i thabs legs pa rtogs pa ma yin no/ /de bzhin du sa dang pha rol tu phyin pa la sogs pa'i thabs kyi che ba'i bdag nyid ma shes pa'i phyir byang chub kyi thabs legs par rtogs pa ma yin no/ /gzhan la yid ches pa'i dbang gis 'gro ba'i phyir gzhan gyi rkyen gyis 'gro ba zhes bya'o//rang gis nyams su myong ba med pa'i phyir nges pa ma yin pa zhes bya ba de dag ni dman pa ste/ des na spangs nas zhes smras pa yin no/ /sar pa gzhan zhes bya ba ni zag pa med pa'i don dam pa'o/ /rnam pa drug po de las gzhan pa'i dkar po'i phyogs kyi smon lam thams cad las shin tu 'das pa nyid dang /mtshungs pa med pa nyid dang / 'bras bu thun mong ma yin pa nyid dang / 'jig rten thams cad kyi yul las yang dag par 'das pa nyid dang / 'gyur ba med pa nyid dang / khyad par du bsgoms pa nyid do//mdor bsdu na rab tu dga' ba'i gnas pa'i rnam pa ni brgyad du bstan te/ shin tu rnam par nges pa nyid dang / sems bskyed pa'i rnam pa bzhi dang / yang dag pa'i smon lam dang / brtson 'grus brtsams pas mngon par bsgrub pa nyid dang / gnas yongs su sbyong ba nyid dang /de las gzhan pa'i gnas pa thams cad shes par byed pa dang / dge ba'i rtsa ba yongs su sbyong ba nyid dang / skye ba nying dang / mthu nyid do/ /de la shin tu rnam par nges pa nyid kyi dbang du byas nas bstan pa ni rnam pa drug po bya ba la sogs pa la/ shin tu rnam par des pa ni/rang gi dbang gis 'gro ba'o/ /rang gi dbang gis 'gro ba ni bsgoms pa las byung ba'i phyir ro/ /de las gzhan pa'i smon lam thams cad las yang dag par 'das pa'i phyir/ de dag las yang dag par 'das pa zhes bya'o/ /nyan thos la sogs pa thams cad dang mi mnyam pas na mtshungs pa med pa'o//'dod pa'i 'bras bu dpag tu med pa'i phyir 'bras bu thun mong ma yin pa'o/ /sems can thams cad kyi sdug bsngal yongs su skyob par rjes su zhugs pa nyid kyi rnam pas ni 'jig rten pa yin par snang ba'o/ /'jig rten thams cad kyi yul las yang dag par 'das pa'i phyir skye ba ni 'jig rten las 'das pa yin par shes par bya'o//de skad cig gcig tsam skyes pa'i mthu khyad par can yin par bstan pa'i phyir smras pa/ chos kyi rang bzhin de dang zhes bya ba la sogs pa la/ chos kyi ngo bo nyid nge / chos rnams kyi nus pa zhes bya ba'i tha tshig go/ /dkar po'i chos kyi sdug pa'i 'bras bu dpag tu med pa zhes bya ba ni rgyu mthun pa'i 'bras bu'i dbang du byas pa'o/ /sdug pa'i 'bras bu dpag tu med pa zhes bya ba ni rnam par smin pa'i 'bras bu'i dbang du byas ba'o//'gyur ba med pa nyid bstan pa'i phyir yongs su nyams par 'gyur ba med pa zhes bya ba ni byang chub kyi sems brjed pas ni yongs su nyams pa yin par shes par bya'o/ /gzhan dag 'gyur ba ni smon lam yongs su gtong ba'o/ /zad mi shes pa nyid bstan pa ni khyad par du 'gro ba'i cha dang mthun pa zhes bya ba ste/khyad par du 'gro ba'i cha dang mthun pa nyid ni rnam pa gnyis te/ 'khor ba ji srid kyi bar du sems can gyi don gyi bya ba nyams su len pas phyi ma'i mtha'i bar du spyod pa dang / rang gi rgyud la 'bras bu khyad par du 'phags pa byang chub chen po'i bar du bsgrub pa'o//sgrub pa de ltar shin tu nges par byas pa'i smon lam shin tu rnam par dag pa de ni sems bskyed pa zhes bya ba ste/ yon tan gyis sems mngon par 'du byed pa yin pa'i phyir ro/ /smon lam yang byang chub don du gnyer ba'i rnam pa nyid yin no//sems bskyed pa mdor bstan pa'i dbang du byas nas smras pa/ sems bskyed pa de ni mdor bsdu na zhes bya ba la sogs pa rnam pa bzhi ni bcu tshan bzhis sa bcu'i mdo las shes par bya ste/ rten nyid dang / dmigs pa nyid dang / rnam pa nyid dang /'bras bu'i phan yon nyid do/ /rten gang las skye bar 'gyur zhe na/ smras pa/ ji lta bu dag las skye zhes bya ba'o/ /ci'i don du skyed par byed ce na/ smras pa/ ci la dmigs nas skye ba dang / /zhes bya ba'o/ /ngo bo nyid ni ji lta bu/ /rgyu ni gang zhe na/ smras pa/ ji lta bu'i mtshan nyid ces bya ba la sogs pa'o//'bras bu'i phan yon gyi dbang du byas nas smras pa/ phan yon cir 'gyur zhes bya ba'o/ /ji lta bu dag las skye bar 'gyur ba mdor bstan par bya ste/ kye rgyal ba'i sras dag de la sems can dge ba'i rtsa ba shin tu bsags pa tshogs shin tu bsags pa/spyad pa shin tu spyad pa/ sangs rgyas 'byung ba la shin tu bsnyen bkur byas pa/ chos dkar po shin tu bsdus pa/ dge ba'i bshes gnyen gyis shin tu gzung ba/ bsam pa shin tu rnam par dag pa/ lhag pa'i bsam pa rgya chen po dang ldan pa/mos pa rgya chen po dang ldan pa/ snying brtse ba dang / snying rje mngon du gyur pa zhes bya ba ste bcu po 'di dag gis bsdus pa'i don bstan pa'i phyir smras pa/ mdor bsdu na yang dag par rdzogs pa'i byang chub tu bsngos pa'i byang chub sems dpa' rnams zhes bya ba la/sangs rgyas 'byung ba la shin tu mnyes par byas pa dang / dge ba'i bshes gnyen gyis shin tu gzung ba zhes bya ba gnyis ni dge ba'i rtsa ba shin tu bsags pa zhes bya bas bstan to/ /lhag ma rnams ni byang chub sems dpa'i spyod pa la nges par 'byung ba zhes bya bas bstan to//dge ba'i rtsa ba shin tu bsags pa zhes bya ba ni bstan pa'i tshig yin la/ yang de'i bshad pa ni lhag ma dgu yin no/ /tshul khrims 'khor dang bcas pa la legs par spyad pa nyid de/ tshul khrims ni lus dang ngag gi sdom pa'o/ de'i 'khor ni dbang po'i sgo bsdams pa la sogs pa nas 'dod pa chung ba'i bar du'o//yang spyad pa shin tu spyad pa zhes bya ba ni legs par spyad pa 'khor dang bcas pa'i ting nge 'dzin 'di yin te/ ting nge 'dzin ni sems rtse gcig pa'o/ /de'i 'khor ni zas kyi tshod rig pa nas sgrib pa rnam par sel ba'i bar du ste/nang dang phyi'i g.yeng ba spangs nas dmigs pa la spyod pa nyid kyi phyir ro/ /yan lag yongs su rdzogs pa'am/ ma tshang yang rung / dngos gzhi dang nye bar gyur pa ni bsam gtan la spyod pa'o/ /yang bsnyen bkur shin tu byas pa ni thos pa legs par byas pa'i shes pa nyid dang /yongs su bsdus pa ni bsams pa las byung ba'i shes pas legs par bsdus pa/ pha rol tu phyin pa la sogs pa'i dge ba'i chos nyid do/ /yang yongs su bzung bas shin tu bsam pa ni de kho na nyid mngon par rtogs pa'i sbyor ba bsgoms pa'i gdams ngag legs par thob pa nyid do//yang bsam pa dag pa shin tu bsam pa ni de kho na nyid mngon par rtogs pa nyid do/ /yang shin tu rgyas pa shin tu bsam pa ni sems can gyi don bya ba'i bsam pa nyid do//yang lhag par mos pa shin tu bsam pa ni/ rnam pa thams cad mkhyen pa'i ye shes la mngon par mos pa nyid de/ lhag par mos pa'i 'bras bu nyid ni mngon par mos pa yin pa'i phyir ro/ /yang mngon du gyur pa shin tu bsam pa ni snying brtse ba dang / snying rje mang du gnas pa nyid de/ sdug bsngal gyi sdug bsngal dang / 'gyur ba'i sdug bsngal las brtsams pa ni snying brtse ba zhes bya'o/ 'du byed kyi sdug bsngal las brtsams pa ni snying rje zhes bya'o/ /gang yang dmigs pa bstan pa'i phyir phyi ma la yang dag par zhes bya ba la sogs pa la/bcu tshan gnyis pa'i mdor bsdus pa'i don gzung ba nyid ni dmigs pa rnam pa lnga yin no/ /de la bcu tshan ni 'di yin te/ rnam pa thams cad du sangs rgyas kyi ye shes la mngon par 'dod par bya ba'i phyir dang / stobs bcu'i stobs thob par bya ba'i phyir dang /mi 'jigs pa chen po thob par bya ba'i phyir dang / sangs rgyas kyi chos mnyam pa nyid thob par bya ba'i phyir dang / 'gro ba thams cad yongs su bskyab par bya ba'i phyir dang / snying brtse ba dang / snying rje chen po rnam par dag pa'i phyir dang /phyogs bcu ma lus par shes pa thob par bya ba'i phyir dang / sangs rgyas kyi zhing thams cad la thogs pa med par yongs su spyad par bya ba'i phyir dang dus gsum skad cig gcig gis khong du chud par bya ba'i phyir dang / chos kyi 'khor lo chen po rab tu bskor ba la 'jigs pa med par bya ba'i phyir zhes bya ba'o//de la dang po bzhis ni tshogs yongs su rdzogs par bya ba bstan te/ sangs rgyas kyi ye shes la mngon par mos par gyur na myur du byang chub kyi tshogs thams cad yongs su rdzogs par 'gyur ba'i phyir zhes bya ba ste/sangs rgyas kyi chos mnyam pa nyid thob par bya ba'i phyir zhes bya ba'i bar du'o/ /gcig gis ni sems can rnams kyi don gyi bya ba yongs su rdzogs pa ste/ 'gro ba thams cad yongs su bskyab par bya ba zhes bya bas so/ /gcig gis ni bla na med pa yang dag par rdzogs pa'i byang chub bstan te/de'i rgyu ni snying brtse ba dang / snying rje yongs su sbyangs pa'i phyir ro/ /gsum gyis ni sangs rgyas kyi chos rnam pa thams cad kyis yongs su rdzogs par byed pa'o/ /rnam pa thams cad dang sangs rgyas dang / chos gsum du rnam par gzhag pa la/sangs rgyas kyi spyan gyis 'jig rten la gzigs pa'i phrin las can ni dang po ste/ phyogs bcu ma lus par shes pa thob par bya ba'i phyir dang zhes gsungs pa yin no/ /zhing thams cad yongs su sbyang bar bya ba'i phyir sangs rgyas kyi ye shes kyis thams cad la thogs pa med pa/nyon mongs pa med par sprul pa 'jug pa'i las can te/ ye shes dang sems thogs pa med pa'i phyir te/ gnyis pa'o/ /de'i phyir smras pa/ sangs rgyas kyi chos thams cad ces bya ba la sogs pa'o//rnam pa ma lus par mkhyen pa ni sangs rgyas kyi ye shes te/ dus gsum gyi sems can de rnams kyi bsam pa dang / bag la nyal skad cig gcig la mkhyen pa'i las can te/ sangs rgyas kyi chos gsum pa'o/ /de'i phyir smras pa/ dus gsum skad cig gcig gis zhes bya ba la sogs pa'o//gcig gis ni sangs rgyas kyi phrin las mdzad pa yongs su rdzogs pa ste/ 'dzam bu'i gling bye ba phrag brgyar dus gcig tu chos kyi 'khor lo bskor bar byed pa'o/ /de'i phyir chos kyi 'khor lo chen po rab tu bskor ba zhes bya ba la sogs pa gsungs pa yin no//ji lta bu zhig yin zhe na/ /yang dag par myur du zhes bya ba la sogs pa'o/ /de la mdo'i tshig bcu pa gsum pa ni snying rje chen po sngon du 'gro ba shes rab dang ye shes kyi dbang du gyur pa dang / thabs la mkhas pas yongs su gzung ba dang /bsam pa dang lhag pa'i bsam pa brtan pa/ de bzhin gshegs pa'i stobs dpag tu med pa dang ldan pa snying brtse ba'i stobs dang / blo'i stobs kyis shin tu rnam par phye ba'i rnam par 'byed pa dang ldan pa/ rang byung gi ye shes dang mthun pa/ sangs rgyas kyi chos thams cad la shes rab dang ye shes kyi gdams ngag yang dag par tshol ba/chos kyi dbyings shin tu rgyas pa dang / nam mkha'i khams kyi mthas gtugs pa/ phyi ma'i mtha'i mur thug pa zhes bya ba yin no/ /snying rje chen po sngon du 'gro ba nyid kyi phyir/ byang chub kyi tshogs thams cad dang mthun pa nyid do/ /gnyis pa dang gsum pa dang / bzhi pa ni byang chub sems dpa'i bya ba dang mthun pa yin no/ /lnga pa dang drug pa dang / bdun pa ni bla na med pa yang dag par rdzogs pa'i byang chub rang byung gi ye shes 'thob pa dang mthun pa'o//lhag ma gsum ni sangs rgyas kyi phrin las mdzad pa dang mthun pa nyid do/ /phan yon gang yin zhes bya ba'i dbang du byas nas smras pa/ sems de skyes pas zhes bya ba la sogs pa la/ 'di'i mdo'i tshig rnams kyang mdo ji lta ba bzhin no/ /byang chub sems dpa' byis pa'i sa ni mos pas spyod pa'i sa'o//so so'i skye bo'i sa ni rigs kyi sa ste/ de dag gnyi ga las shin tu 'das pa'o/ /de las shin tu 'das nas 'phags pa'i 'jig rten las 'das pa'i lam thob pa/ /byang chub sems dpa'i skyon med pa la zhugs pa yin zhes bya ba 'dis ni mngal du zhugs pa bzhin du zhugs pa bstan to//'jig rten las 'das pa'i sems dang po bstan te/ dang po mngal du 'jug pa dang chos mthun pa'o/ /rigs su skyes pa yin zhes bya ba ni rigs kyi skye ba dang chos mthun par de bzhin gshegs pa'i thugs las skyes pa'i sras yin gyi/mngal nas ni ma yin zhes bstan pa yin no/ /mnad smad pa'i skyon med pa yin zhes bya ba ni mo'i rigs kyi skyon las kyang shin tu 'das pa yin te/ rigs mnyam pa las skyes pa'i bu dang chos mthun par theg pa chen po'i spyod pa nges pa las skyes pa'i phyir ro//'jig rten gyi 'gro ba thams cad las phyir log pa ste/ 'jig rten las 'das pa'i 'gro bar zhugs pa zhes bya ba ni 'gro ba gzhan btang nas gzhan len pa dang chos mthun pa'o//byang chub sems dpa'i chos nyid la gnas pa yin to/ snying rje'i bdag nyid can yin pas gzhan gyi bya ba nyid bdag gi bya ba nyid yin pa'i phyir te/ bdag gi lus dang chos mtshungs pa nyid kyis so/ /byang chub sems dpa'i gnas skabs la rab tu gnas pa yin zhes bya ba ni gnas pa las rab tu 'das par bstan to//'khor ba yongs su mi gtong ba dang / kun nas nyon mongs pa can yang ma yin pa la thabs la mkhas pa ni skyes pa'i gnas skabs dang chos mthun pa'o/ /dus gsum mnyam pa nyid du rtogs pa ni mnyam pa nyid kyis rab tu 'da' bar bya ba yin te/'das pa la sogs pa la stong pa nyid rjes su zhugs pa'i 'phags pa'i shes rab dang ldan pa'i phyir skyes nas 'tsho ba la brten ba dang chos mthun pa yin no/ /de bzhin gshegs pa'i rigs su nges shing rdzogs pa'i byang chub la gzhol ba yin zhes bya ba 'dis ni nges par rab tu 'das pa yin te/sangs rgyas kyi rigs las mi nyams pa dang / mya ngan las 'das pa la mchog tu gzhol ba'i phyir phun sum tshogs pa dang chos mthun pa yin no/ / 'di dag las 'das pa'i phyir so so'i skye bo'i sa las shin tu 'das pa zhes bstan par 'gyur ro/ /da ni sa'i nges pa'i tshig gi tshul gyi sgo nas bstan par bya ste/ mchog tu dga' ba mang ba yin pa ni rab tu dga' ba zhes bya'o/ /ji lta bu'i mchog tu dga' ba zhig gis rab tu dga' ba yin zhe na/mdo nas bstan pa'i bcu tshan gcig gis bstan pa yin no/ /de la mchog tu dga' ba'i dga' ba ni sems mgu ba ste/ yid kyis bsdus pa'o/ /de yang rnam pa dgu ste/ dang ba mang ba'i dga' ba ni dkon mchog gi yon tan rjes su dran pa'i phyir ro//de'i phyir smras pa/ dang ba mang ba yin zhes bya ba'o/ /rab tu dga' ba de nyid mtshon pa'i phyir de shes nas dad pa thob nas zhes bya ba smos so/ /dga' ba'i dga' ba ni dmigs pa la dga' bas tshim par gyur pa'o/ /de'i phyir smras pa/dga' ba mang ba yin zhes bya ba'o/ /rangs pa mang ba'i dga' ba ni mngon par rtogs pa'i khyad par gyis bskul bar gyur pa'o/ /mgu ba mang ba'i dga' ba ni rang gi lus dang sems kyis bsdus pa'i sangs rgyas nyid do/ /dga' rlabs kyi dga' ba ni rang gi lus dang sems la phan pas khyab pa'i//spro ba mang ba'i dga' ba ni byang chub dang nye bas bskul ba'i phyir ro/ /mi 'khrugs pa mang ba'i dga' ba ni 'bel ba'i gtam gtan la 'bebs pa na kun nas mi 'khrugs pa'o/ /rnam par 'tshe ba med ba'i dga' ba ni gzhan yongs su smin par byed cing sems can yang dag par sdud pa'i dus su snying rje dang nges pas gzhan gyi sems bsrung ba'o//khong khro ba med pa'i dga' ba ni sems can rnams log pa sgrub pa'i dus su bzod pa'o/ /mdo'i dang po dang tha ma'i tshig blangs pas ni dga' ba'i khyad par bstan pa'i phyir ro//shes nas dad pa thob nas mchog tu dga' ba nas khong khro ba med pa'i dga' ba'i bar gyis sems can la nyon mongs pa mi bskyed par bstan pa yin no/ /ji lta bu'i dga' ba dang ldan pa yin pa de bstan nas/ ji lta bu'i dmigs pa la dga' ba skye ba bstan pa'i phyir de la mdo'i tshig gis bstan pa ni rab tu dga' ba la gnas pa'i byang chub sems dpa' ni sangs rgyas bcom ldan 'das rnams dang /sangs rgyas kyi chos rnams dang / byang chub sems dpa' rnams dang / byang chub sems dpa'i spyod pa rnams dang / pha rol tu phyin pa rnam par dag pa dang / byang chub sems dpa'i sa'i khyad par dang / byang chub sems dpa' mi 'phrogs pa nyid dang / de bzhin gshegs pa'i gdams ngag dang / rjes su bstan pa dang / sems can gyi don yang dag par thob par byed pa dang /de bzhin gshegs pa'i ye shes la 'jug pa'i sbyor ba rjes su dran zhing zhes bya ba la/ tshig bcu po 'di dag gis bsdus pa'i don bstan pa'i phyir/ rnam pa thams cad du zhes bya ba la sogs pa la/ yang mdo 'di las ni rim pa gzhan du bstan te/'dir ni don gyi go rims bzhin du mdor bsdus pa'i don bstan pa ni/ byang chub sems dpa'i sems can gyi don gyi bya ba zhes bya ba gnyis kyis ni/ byang chub sems dpa' rnams dang / byang chub sems dpa'i spyod pa rnams zhes bya ba'i don to//byang chub sems dpa'i spyod pa kho na sems can gyi don bya ba ste/ gzhan gyi don nyid bdag gis bya ba yin pa'i phyir ro/ /pha rol tu phyin pa rnam par dag pa dang / byang chub sems dpa'i sa'i khyad par dang / byang chub sems dpa' mi 'phrogs pa zhes bya ba'i tshig gsum gyis ni tshogs yongs su rdzogs pa bstan to//sangs rgyas zhes bya ba'i sgras ni byang chub bstan la/ sangs rgyas kyi chos rnams dang zhes bya ba'i don ni/ sangs rgyas kyi chos rnams dang zhes bya ba'i sgra nyid kyis bstan to//de bzhin gshegs pa'i gdams ngag dang rjes su bstan pa dang / yang dag par thob par byed pa dang / ye shes la 'jug pa'i sbyor ba zhes bya ba'i tshig gsum gyi don ni/ sangs rgyas kyi phrin las sgrub pa zhes bya'o/ /mdo las ni dang por dga' bar bya ba bstan to//'dir don gyi go rims kyis bstan te/ byang chub sems dpa' dang byang chub sems dpa'i sems can gyi don gyi bya ba dang / tshogs yongs su rdzogs pa ni rgya chen po rjes su dran par 'gyur ro zhes bya bar bstan pa'i phyir/ de dag gnyi ga sngar bstan zin to//de ltar ma 'ongs pa la dmigs nas dga' ba skye bar 'gyur ba bstan nas/ da ltar gyi la dmigs nas dga' ba skye bar 'gyur ba bstan pa'i phyir/ /lhag pa'i bsam pa dag pas zhes bya ba la sogs pa la/ de'i mdo'i tshig ni phyir zhing mchog tu dga' ba dang ldan pa yin te/bdag gi 'gro ba thams cad kyi yul las phyir log go zhes bya ba la mchog tu dga' ba skye bar 'gyur ba ste/ bdag ni sangs rgyas kyi sa dang nye bar zhugs so zhes bya ba nas bdag ni 'jigs pa dang / dang nga ba dang / bag tsha ba dang bral lo zhes bya ba'i bar gyis mchog tu dga' ba skyed par byed do//dmigs pa byas shing zhes bya ba'i don bstan pa'i phyir mos pas 'jug pa zhes bya bas so/ /tshig de dag gis bsdus pa'i don ngo bo gcig par bstan par bya ba'i phyir chos 'di myur du yang dag par 'grub pa dang /mthun par bdag nyid yang dag par mthong zhing zhes bya ba ni/ /bstan ma thag pa'i chos rnams myur du yang dag par 'grub pa dang mthun par bdag nyid mthong ba dang / yul thams cad las phyir log pa nas 'jigs pa dang / dang nga ba dang /bag tsha ba dang bral lo zhes bya ba'i bar dang mthun par bdag nyid yang dag par mthong bas mchog tu dga' ba mang bar 'gyur ba yin no/ /byang chub sems dpa' sems can gyi don bya ba mthong ba dang / dge ba'i tshogs yongs su rdzogs pa mthong ba dang /byang chub rgya chen po mthong ba dang / sangs rgyas kyi chos rnams kyis mngon par 'byung ba dang nye bar mthong ba dang / zang zing med pa'i sangs rgyas kyi mdzad pa mthong bas mtshungs pa med pa dang / bsam pa dag pa'i lus dang sems kyis rjes su bsdus pa yin no//byang chub dang nye ba nyid bstan pa'i phyir/ dge ba'i chos 'bar ba dag dang ldan no zhes bya ba la sogs pa la/ rdzogs pa'i byang chub la gcig tu mos pa'i phyir lhag pa'i bsam pa rnam par dag pa'o/ /'jigs pa lnga las yang dag par 'das par mdo nas bstan pa'i cho ga'i rnam pa bstan par bya'o//des bdag med par mthong bas gang zag la bdag med par lta ba legs par bsgom pa yin no/ /de'i phyir bdag tu 'du shes pa yang mi 'gyur na/ yang bdag tu lta ba 'byung bar ga la 'gyur/ de med pa'i phyir de sngon du 'gro ba'i bdag tu lta ba dang /lus la sred pa yang med de bdag tu lta ba sngon du song ba las bdag gir lta ba yang 'byung ba'i phyir ro/ /de gnyis sngon du song ba las srid pa dang srid pa'i yo byad la chags par 'gyur ro/ /de med pas de dag la chags pa yang med par 'gyur ro//de'i phyir de la 'tsho ba med pa'i 'jigs pa yang mi 'byung ngo zhes bstan par 'gyur ro/ /rnyed pa la sogs pa gzhan la ltos par gyur na tshigs su bcad pa med pa'i 'jigs pa 'byung na/ byang chub sems dpa'i lus la sogs pa yang sems can rnams la bsngos pa'i phyir/de la ltos pa med pas tshigs su bcad pa med pa'i 'jigs pa mi 'byung ngo / /bdag tu lta ba dang bral bar bdag gi 'du shes med pa'i phyir/ 'chi ba'i 'jigs pa yang mi 'byung ngo / /'di las shi 'phos par gyur nas nges par sangs rgyas dang byang chub sems dpa' rnams dang 'grogs par 'gyur ba'i phyir dang /ngan song du 'gro ba'i 'jigs pa yang med do/ /sa la zhugs pa'i byang chub sems dpa' ma gtogs pa gzhan thams cad dang 'di bsam pa mnyam pa yang med na lhag pa lta ga la yod/thams cad bsam pa ma dag pa yin pa'i phyir ro/ /des na 'khor gyi nang du bag tsha ba'i 'jigs pa mi 'byung ngo / /de yang mdo nas bstan pa de ltar 'jigs pa dang / dngang ba dang / bag tsha ba dang / spu zing zhes bya ba med pa'i zhes bya pa la/'jigs pa dang zhes bya ba nas/ spu zing zhes bya ba'i bar so so'i don rim pa bzhin bshad par bya ste/ 'jigs pa lnga spangs pa ni 'jigs pa dang bral ba yin no/ /chos zab mo ston pa la 'jigs par mi 'gyur ba ni skrag pa dang bral pa'o//bdag nyid mthong bar gyur kyang bdag la bstod pa med pas khengs pa dang bral ba zhes bya'o/ /gzhan gyis gnod pa byas pa dang / log par sgrub pa thams cad la zhe sdang dang bral ba nyid do/ /de'i phyir spu zing zhes byed pa dang bral ba yin no//'jig rten gyi zang zing thams cad dga' ba mi bskyed pas 'du 'dzi la dga' ba spangs pa ste/ gang yang mdo las bstan pa/ snying rje chen po sngon du 'gro ba'i phyir lhag pa'i bsam pa ma nyams pa dang / mi dma' ba zhes bya ba yin no/ /de'i don bstan pa ste/snying rje chen po sngon du 'gro ba'i phyir nyon mongs pa can ma yin pa ste/ des na nyams pa med pa'o/ /shin tu sbyangs pa'i phyir phal pa ma yin pa ste/ sems can thams cad dang thun mong ma yin pa'i phyir ro/ /mdo las gsungs pa ni/ lhag pa'i bsam pa ma nyams pa dang /mi dma' bas dge ba'i rtsa ba thams cad yang dag par sdud pa'i phyir shin tu brtson par byed de/ yid ches pa'i dbang gi phyir dang zhes byas nas kye rgyal ba'i sras dag su sbyong ba'i rnam pa 'di lta bu dag dang yang dag par ldan pa'i byang chub sems dpa' ni byang chub sems dpa'i sa rab tu dga' ba la gnas pa yin te zhes bya ba'i bar du ste//mdo'i tshig 'di dag gis bsdus pa'i don bstan pa yin no/ /dad pa dang ldan pa ni brtson 'grus rtsom par byed do zhes bya ba'i mdo'i tshig gis dad pa sngon du 'gro ba'i dbang gis tshe 'di la yang dge ba'i rtsa ba thams cad yang dag par sgrub par byed la/phyi ma la yang byang chub sems dpa'i brtson 'grus rnam pa thams cad du yongs su rdzogs pa rtsom par byed do zhes bstan pa'i phyir/sngar bstan pa'i smon lam chen bo bcu bo gang yin pa de dag ni/ rab tu dga' ba la gnas pas rab tu sgrub par 'gyur gyi/ mos pas spyod pa'i sa la gnas pas ni ma yin no/ /de'i rgyu bstan pa'i phyir/ /bsam pa dag pa la brten nas zhes bya ba la/bsam pa dag pa nyid yin pa'i phyir/ gnas pa 'di la de'i smon lam 'grub par 'gyur gyi/ bsam pa ma dag pa ni ma yin te/ mos pas spyod pa'i 'o/ /de yang dge slong dag pa rnam par dag pa'i sems kyis smon pa ni 'grub par 'gyur ro zhes gsungs pa'i tshig gis so//de bzhin gshegs pa la mchod pa'i dbang du byas pa'i smon lam dang po ni de bzhin gshegs pa nyid mchod pa'i 'os yin par bstan pa'i phyir/ sems can thams cad kyi mchog yon gyi gnas/ lha dang mi rnams kyi ston pa ni chos kyi mnga' bdag nyid yin pa'i phyir ro zhes bya'o//dam pa'i chos yang dag par 'dzin pa'i dbang du byas nas ni gnyis pa'o/ /de nyid dga' ldan na bzhugs pa la sogs pa'i rim gyis go rims bzhin du 'jug par byed pa'i dbang du byas pa ni gsum pa'o//dam pa'i chos gnas par bya ba'i phyir byang chub sems dpa'i spyod pa spyad pa ni bzhi pa'o/ /sems can yongs su smin par byed pa'i dbang du byas pa ni lnga pa'o/ /sangs rgyas kyi zhing thams cad du mthus nye bar 'gro ba'i dbang du byas pa ni drug pa'o//rang gi sangs rgyas kyi zhing yongs su sbyong ba'i dbang du byas pa ni bdun pa'o/ /sangs rgyas dang byang chub sems dpa' rnams dang mi 'bral pa'i dbang du byas pa ni brgyad pa'o/ /sems can rnams kyi don bya ba'i dbang du byas pa ni dgu pa'o//yang dag par rdzogs pa'i byang chub mngon par rdzogs par 'tshang rgya ba'i dbang du mdzad pa ni bcu pa'o/ /'di dag gi gzhung ni mdo'i rjes su 'brangs nas rig par bya'o/ /mdo las sems can gyi khams gcig nas gcig tu brgyud pa rgyun mi 'chad pa lta bu dang /'jig rten gyi chos rgyun mi 'chad par bstan pa bzhin du byang chub kyi mthar thug pa'i tshe rabs thams cad du bdag gi smon lam 'di dag thob pa dang / mi brjed pa dang / mi 'bral ba'i dbang du byas nas 'dir smon lam nyid la smon lam 'debs pa bstan pa'i phyir mdo'i tshig rnams kyis bstan te/de la mdo'i tshig ni mthar thug pa med pa'i gnas bcur mngon par bsgrub ste/ 'di lta ste/ sems can gyi khams kyi mthar thug pa dang zhes bya ba nas/ ye shes kyi rgyud kyi khams kyi mthar thug pa zhes bya ba dang /bdag gi dge ba'i rtsa ba 'di dag kyang mthar thug pa med par gyur cig ces bya ba'i bar la/ thob pa ni yongs su mi nyams pa'o/ /mi brjed pa ni dran pa la gnas pa'o/ /thams cad kyi thams cad du smon lam dang mi 'bral ba ni mi 'bral ba'o//dang po ni dngos po la smon lam 'debs pa'o/ /gnyis pa ni smon lam nyid la smon lam 'debs pa'o zhes bstan pa'i phyir/ snga ma ni smon par bya ba'i don la smon pa'o zhes bya ba la sogs pa smras te/ 'di dag ni rtsa ba'i smon lam yin no/ / de las gzhan pa ni dpag tu med par rig par bya'o zhes mdo'i rjes su 'brangs nas bstan pa ni smon lam chen po 'di dag la sogs pa zhes bya ba la sogs pa'o/ /chos bcu la kun du spyod pa'i rgyu bstan pa ni phyi ma la ni smon lam gyi stobs skye la/ tshe 'di la ni brtson 'grus brtsams pa ste/phyi ma la zhes bya ba la sogs pa bstan to/ /chos 'di dag gi skye ba'i rim pa ni mdo ji lta ba bzhin du rig par bya'o/ /go rims kyi rgyu bstan pa ni de la re zhig dang por ni sangs rgyas kyi chos rnams la mngon par yid ches pa skyes pa ni dad pa'o/ / sems can gyi sdug bsngal gyi gnas skabs la lta ba ni snying rje'o/ /sdug bsngal can la phan pa nye bar bsgrub pa ni byams pa'o/ /sdug bsngal las yongs su bskyab pa'i bsam pas bdag nyid la ltos pa med pa ni yongs su gtong ba'o/ /sems can yongs su bskyab pa'i phyir sangs rgyas kyi chos yongs su tshol ba la mi skyo ba dang skyo ba med pa'i phyir bstan bcos thams cad shes par bya ba thob pa dang /yongs su dag par byed pa ni bstan bcos shes pa zhes bya'o/ /'jig rten ji ltar 'byung bar 'gyur ba dang / 'jig rten ji ltar 'jug pa ji lta ba bzhin shes pa ni 'jig rten shes pa'o/ /'jig rten shes par gyur nas dus dang tshod shes pa la sogs pas spyod pa phun sum tshogs pa dang / ngo tsha zhing khrel yod pa dang ldan zhing / sran thub pa'i stobs bskyed pas de bzhin gshegs pa la mchod pa bya ba'i phyir ro//yang dag par blangs nas gnas pa zhes bya ba ni ma thob pa thob par gyur pa'o/ /lan mang du byed do zhes bya ba ni thob pa rnams gnas shing 'phel bar byed pa'i sbyor ba'o/ /gnas pa thams cad la yang lam gyi yon tan te//sa'i mi mthun pa'i phyogs kyi gnyen por gyur pa'o/ /skyon ni sa'i mi mthun pa'i phyogs so/ /yongs su tshol bar byed pa ni sangs rgyas dang byang chub sems dpa' rnams las nyan pa dang / the tshom dri ba'o/ /de lta bu ni yongs su tshol ba yin no//'dir mdos bstan pa ni/ kye rgyal ba'i sras dag gzhan yang byang chub sems dpa'i sa dang po 'di la gnas pa'i byang chub sems dpas byang chub sems dpa'i sa dang po nyid kyi rnam pa dang / thos par bya ba dang / rgyu mthun pa dang /sangs rgyas dang byang chub sems dpa' dag dang / dge ba'i bshes gnyen rnams las yongs su btsal bar bya/ yongs su dri bar bya zhes bya ba nas/ de de ltar shes pas sems can gyi 'dren pa phal po che ye shes kyi grong khyer chen por phyin par byed cing /byang chub sems dpas yongs su mi skyo bar sa yongs su sbyong ba'i khyad par la brtson par bya'o zhes bya ba'i bar du'o/ /de shes nas kyang zhes bya ba ni lam gyi yon tan dang skyon shes pa'o/ /bde blag tu zhes bya ba ni dka' ba med par ro/ /lam chud mi za ba ni lam gyi yon tan shes pa'i phyir ro//de ni don nyid bstan pa'i phyir/ legs par gzung ba zhes bya ba la sogs pa la/ legs par gzung ba'i rnam pa la sogs pa nyid kyi lam chud mi za ba'i rnam pa dang zhes bya ba ni lam gyi yon tan rnam par shes pa'i phyir ro/ / don de nyid bstan pa'i phyir/ /mtshan ma legs par bzung la zhes bya ba la sogs pa la rnam pa la sogs pa legs par gzung ba'i phyir lam chud mi za ba'o zhes bya bar/ kye rgyal ba'i sras dag de bzhin du byang chub sems dpa' sa'i rnam pa mngon par sgrub pa la mkhas pa ni sa dang po las gyen du bskyod nas sa bcu pa'i bar du thob par bya ba la lam du thogs pa med par 'gro ba dang /sa shes pa'i snang bas ye shes kyi snang ba yang thob po zhes bya ba'i mdo'i don bstan pa'i phyir/ bdag nyid kyis kyang gnas pa thams cad mnan nas zhes bya ba sogs pa'o//ded dpon mkhas pa'i dpe bstan pa nas/ 'khor ba'i nags khungs ya nga ba bgrod dka' ba las brgal te thams cad mkhyen pa nyid kyi ye shes kyi grong khyer chen po'i bar du phyin par byed cing zhes bya ba'i don bstan pa'i phyir ro//sems can gyi tshogs chen po'i ded dpon yang 'khor ba'i 'brog dgon pa nas sems can rnams sgrol bar byed do zhes bya ba'o/ /rnam pa la sogs pa rnams kyi don bstan par bya ste/ gang ye shes kyi rnam pas sam bsgom pa'i rnam pas kyang rung sa dang po la 'jug pa de ni rnam pa zhes bya ste/grong khyer du 'jug pa'i lam gyi rnam pa lta bu'o/ /de nyid 'jug pa ni 'thob pa ste/ /grong khyer du 'jug pa lta bu'o/ /zhugs nas kyang 'bras bu chen po'i phan yon 'grub cing yang dag par 'grub pa zhes bya ba ni sa yongs su sbyong ba'i chos grub pa zhes bya ba'i tha tshig go//'grub pa zhes bya ba ni de dag nyid 'jug par sgrub par byed pa'o/ /byang chub sems dpa'i sa 'di la gnas pa'i byang chub sems dpa' de la ni sangs rgyas mang po bltar snang bar 'gyur te/ lta ba rgya chen po dang /smon lam gyi stobs kyis so zhes mdo las gsungs pa'i don bstan pa ni gnas pa de la zhes bya ba la sogs pa la/ snang bar 'gyur zhes bya ba ni bltar snang bar zhes bya bar 'brel to/ /rgya che ba nyid bstan pa'i phyir/ thos pa dang bsam pa'i sgo nas so//sems kyis mos pas zhes bya ba ni gang gi phyir thos pa med kyang de lta na 'jig rten gyi khams sna tshogs na sangs rgyas bcom ldan 'das dpag tu med pa bzhugs so zhes rang nyid mos par byed pa'o/ /rgya che ba'i don bstan pa'i phyir/ dad pa rgya chen po dang ldan pa'i sems kyis zhes bya ba'o//'dod par byed pa zhes bya ba ni don du gnyer ba'o/ /de lta bur gyur pa de'i zhes bya ba ni bsam pa dag pa de'i ste/ sangs rgyas la bskrun pa'i dge ba'i rtsa ba zhes bya ba'i tha tshig go/ de ltar rgya che bas bsdus pa'i rgyu dang po bstan nas/smon lam gyi stobs bstan pa'i phyir/ de ltar yang sems kyis smon par byed de zhes bya ba la sogs pa la/ gang du 'byung ba der zhes bya ba ni 'jig rten der zhes bya ba'o/ /rnam pa thams cad du sgrub par byed do zhes bya ba ni rnyed pa dang bkur sti dang / sgrub pas bsdus pa'o/ /bde ba'i yo byad ces bya ba ni byang chub sems dpa'i bde ba'i yo byad ces mdo nas bstan pa'i tshig bstan pa'i phyir/ byang chub sems dpa'i bde ba'i yo byad gang gis byang chub sems dpa' dang / 'jig rten rnams thun mong du 'gyur ba'i yongs su mkho ba las byung ba'o//dge 'dun la yang bkur sti byed do zhes bya ba ni dge 'dun gyi tshogs la bkur sti byed do zhes bya ba'i mdo'i tshig bstan pas dge slong gi dge 'dun dang / byang chub sems dpa'i tshogs la mchod pa dang / bsnyen bkur byed pa'o//chos kyang nyan pa dang zhes bya ba ni byang chub sems dpa'i sde snod nyan pa'o/ /'dzin par byed do zhes bya ba ni brjed pa med par ro/ /bsgom pa'i sgo nas ni nan tan gyis sgrub par byed pa'o/ /dge ba'i rtsa ba de dag thams cad kyang bla na med pa yang dag par rdzogs pa'i byang chub chen por yongs su sngo bar byed do zhes bya ba mdo'i tshig bstan pa ni der sems can rnams kyang yongs su smin par byed ces bya ba'o//don mthun pa yin zhes bya ba'i bar gyi mdo'i tshig bstan pa ni bsdu ba'i dngos po bzhis kyang zhes bya ba la sogs pa'o//dpe'i sgo nas de ltar dge ba'i rtsa ba thams cad mkhyen pa nyid du yongs su bsngos pa de dag rab tu byang ba dang / yongs su dag pa dang / ci dgar las su rung bar 'gyur ro zhes bstan pa yin no/ /de ltar bstan du zin kyang dag pa'i rgyu bstan pa'i phyir/de'i rnam par dag pa'i rgyu gsum po de dag gis zhes bya ba la sogs pa la/ ji skad bstan pa'i de bzhin gshegs pa la sogs pa la mchod pa yongs su gzung ba dang / sems can yongs su smin par bya ba dang / byang chub tu yongs su bsngo ba'i bar gyis te/de bzhin gshegs pa'i mchod pa dang / bsnyen bkur gyis ni rab tu byang bar 'gyur ro/ /sems can yongs su smin par byed pas ni yongs su dag par 'gyur ro/ /byang chub tu yongs su bsngos pa ni las su rung bar 'gyur te/ de 'thob pa la mthun pa yin pa'i phyir ro//de'i phyir mdo las bla na med pa yang dag par rdzogs pa'i byang chub tu ji ltar 'dod par sbyar bar bya'o zhes bstan pa yin no/ /bskal pa du ma bye ba khrag khrig phrag 'bum gyi bar du zhes bya ba 'dis ni sa yongs su sbyang bar bya ba'i dus chen po nyid bstan to//dper na zhes bya bas ni dpe ston par byed do/ /rang bzhin du gnas pa zhes bya ba ni 'byung khungs nas byung ba'o/ /gser mgar mkhas pa zhes bya ba ni yongs su sbyong ba la mkhas pa'o/ /de la gnas pa'i byang chub sems dpa' phal cher 'dzam bu'i gling gi bdag por 'gyur zhing zhes bya ba'i mdo'i tshig gi don bstan pa ni de la gnas pa de ni zhes bya ba la sogs pa'o//dbang phyug chen po la dbang rab tu 'thob pa la chos rjes su srung zhing gtong zhing gtong ba chen pos sems can rnams sdud pa'i zhes bya ba'i mdo'i tshig gi don bstan pa ni ser sna'i dri ma thams cad dang bral ba zhes bya ba'o//sems can rnams kyi ser sna'i dri ma zlog pa la mkhas pa yin zhes bya ba'i mdo'i don bstan pa ni ser sna'i dri ma sel ba'i bdag por 'gyur ro zhes bya ba la sogs pa yin no/ /bsdu ba'i dngos po bzhi'i sgo nas bsags pa'i dge ba yid la byed pa mdo nas gsungs pa bstan pa ni bsdu ba'i dngos po bzhi gang ci rtsom yang rung zhes bya ba'o//sangs rgyas dang / chos dang / dge 'dun yid la byed pa bstan pa ni dkon mchog dang zhes bya bas bstan pa yin no//lhag mas ni byang chub yang dag par 'grub pa'i rnam pa thams cad du rtogs pa'i yid la byed pa'o/ /yid la byed pa 'di dag gi don bstan pa'i phyir bdag sems can thams cad kyi mchog ces bya ba la sogs pa la/ 'di ni don dam pa'i sangs rgyas la sogs pa yid la byed par shes par bya ste/gang sangs rgyas la sogs pa'i chos nyid yid la byed pas gang yang bdag gis sbyin par bya'o/ /'di la sbyin par bya'o/ /'di sbyin par bya'o/ /'di'i don du sbyin par bya'o zhes rlom sems med pa'o/ /de lta na yang las thams cad la yang byed pa po dang /las dang / byed pa dang / bya bar rlom sems med par bya'o zhes bstan pa yin no/ /de dag thams cad kyang byang chub tu yongs su sngo bar byed do/ /de la mchog ni rnam pa gnyis te/ mchog nyid ni yon tan rab tu 'bar ba nyid do//gtso bo nyid ni gnyis pa med pa nyid do/ /de'i phyir smras pa/ mchog tu 'gyur/ gtso bor 'gyur zhes bya ba'o/ /mchog nyid kyi rnam pa yang gnyis te/ phul du gyur pa ni ye shes phun sum tshogs pa dang ldan pa'o/ /dam par 'gyur ba ni spangs pa phun sum tshogs pa dang ldan pa'i phyir ro//de'i phyir smras pa/ phul du 'gyur/ dam par 'gyur zhes bya ba yin no/ /gtso bo yang rnam pa gnyis nyid do/ rab mchog tu gyur pa nyid ni de dang mnyam pa med pa'i phyir ro/ /gong mar gyur pa nyid ni de'i gong na gzhan med pa'i phyir ro//de'i phyir smras pa/ rab mchog tu 'gyur gong mar 'gyur zhes bya ba yin no/ /thams cad mkhyen pa'i ye shes la rton pa'i bar du 'gyur zhes bya ba ni don thams cad rtogs par gyur kyang ci ma rung snyam mo zhes bya ba'i don to/ /de ltar na byang chub sems dpa' khyem pa'i rnam par smin pa yongs su 'dzin pa'i 'bras bu'i phan yon gyi khyad par bstan to//yang rab tu byung ba rnams kyis ni bsam gtan gtsor byed pa'i las te/ /ting nge 'dzin dang ting nge 'dzin gyi las so/ /ting nge 'dzin ni skad cig gcig la ting nge 'dzin brgya thob pa'o//de'i phyir smras pa/ 'dod na yud tsam cig la ting nge 'dzin brgya la snyoms par 'jug pa dang zhes bya ba la sogs pa'o/ /ting nge 'dzin gyi las ni gang gi phyir smras pa/ de bzhin gshegs pa brgya mthong ba dang zhes bya ba la sangs rgyas kyi zhing thams cad du khyab pa'i lha'i mig gis sangs rgyas kyi zhing thams cad kyi de bzhin gshegs pa mthong ngo //sangs rgyas dang byang chub sems dpa' de dag gis byin gyis brlabs pa ni sprul pas byin gyis rlob pa'o/ /'jig rten gyi khams brgya yang g.yo bar byed ces bya ba ni sems can rnams bsdu bar bya ba'i phyir ro//lus kyis kyang 'gro bar byed pa ni 'gro ba dang snang ba dag gis so/ /song nas snang bar byas pas kyang yongs su smin par byed do/ /sprul pa brgyas 'dul ba'i sems can brgya yongs su smin par byed pa ni skye ba'i khyad par gyis bsdus pa'o//gnas par byin gyis rlob pa zhes bya ba ni bskal pa brgya la sogs par gnas pa'o/ /bskal pa brgyar yang ye shes mthong ba 'jug go zhes bya ba ni skye pa'i khyad par gyis yongs su gzung ba'o/ /sngon gyi mtha' dang phyi ma'i mtha' zhes bya ba ni sems can rnams sdig pa spong du 'jug pa'i dbang du byas nas las dang 'gro ba nye bar bstan pas skye ba snga ma'i rgyu'i nye par tshogs pa shes par bya ste/ma 'ongs pa'i dge ba'i rtsa ba bskyed pa'i phyir ro/ /chos kyi sgo brgya yang rab tu rnam par 'byed do zhes bya ba ni rang gi blo yongs su smin par bya ba'i phyir ro//phung po la sogs pa zhes bya ba ni 'phags pa blo gros mi zad pas bstan pa la sogs pa rnams so/ /byang chub sems dpa' rnams don mang po myur du byed pa bstan pa'i phyir/ lus brgya yang sprul par byed do zhes bya ba la sogs pa'o/ /smon lam dang ye shes kyi 'bras bu'i phan yon gyi khyad par gang yin pa bstan par bya ba'i phyir/ 'di las lhag par yang zhes bya ba la sogs pa la/ de dag kyang dpag tu med par bstan pa'i phyir/ smon lam de dag gi grangs ni bcad par sla ba ma yin no zhes bya ba la sogs pa'o/ /yang gnas pa 'di'i mdor bsdus pa'i don bstan pa ni de'i rnam pa ni rnam pa brgyad de gzhung las shes par bya'o/ /mngon par rtogs pa thob pa'i byang chub sems dpa' rnams kyi gnas pa'i bye brag bcu ni sa bcu dang mthun par bstan pa'i phyir smras pa/sa bcu'i mdo sde las ji skad 'byung ba bzhin no zhes bya ba la sogs pa'o/ /yongs su gzung ba'i don gyis ni sa zhes bya ba ni ji ltar 'jig rten pa yin pa ltar de bzhin du byang chub sems dpa' yang chos de dag gis yongs su gzung ba yin no zhes byas nas te/gnas skabs kyi khyad par gyis zhes bya ba'i tha tshig go/ /nye bar longs spyod pa'i gnas kyi don gyis sa ni gnas pa zhes bya'o/ /de bzhin du chos de dang de la gnas pas bde bar gnas pa gang yin pa de ni gnas pa zhes bya'o//yang na bde bar gnas ba'i don gyis ni mthong ba'i chos la bde bar gnas pa bzhin nam dka' thub kyi gnas bzhin du gnas kyi don du blta'o/ /rab tu dga' ba'i gnas pa'o/ /mngon par rtogs pa dang ldan pa'i byang chub sems dpas 'jig rten las 'das pa'i lam la yang dag par brten nas tshul khrims rnam par dag pa'i dbang du byas nas gnas pa gnyis pa rnam par gzhag par bya'o//tshul khrims rnam par dag pa de yang mdor bsdu na rnam pa gnyis te/ kun nas slong bas dag pa dang / ngo bo nyid kyis dag pa'o/ /de la kun nas slong bas dag pa ni sems kyi bsam pa bcus bstan to/ /ngo bo nyid kyis rnam par dag pa ni rnam pa gsum ste/ ldog pa'i tshul khrims dang / dge ba'i chos sdud pa'i tshul khrims dang / sems can gyi don byed pa'i tshul khrims so//ldog pa'i tshul khrims ni dge ba bcu'i las kyi lam bstan pa'o/ /de nyid ni sdom pa'i tshul khrims rnam par dag pa yang yin no/ /tshul khrims rnam par dag pa gnyis pa ni de'i gong du yang de lta bas na bdag gis mngon par bsgrub tu 'dra ba las rnam pa thams cad du yongs su sbyang zhing mngon par bsgrub pa nyid la brtson par bya'o zhes de las shas cher de 'di ltar yang dag par slob ste zhes bya ba'i bar gyis mdo nas bstan pa'i cho gas bstan pa yin no zhes rig par bya'o//tshul khrims rnam par dag pa la gsum pa ni de'i yang gong du de sems can rnams la phan pa'i sems nyid dang /bde ba'i sems nyid dang zhes bya ba nas ston pa'i sems nyid ces bya ba'i bar gyi tshig bcus bstan pa yin no/ /lhag pa'i tshul khrims ma lus pa'i dbang du byas nas gnas rnam par gzhag pa brgyad du bstan te/rang bzhin gyi tshul khrims dang ldan pa'i phyir tshul khrims 'chal ba'i dri ma thams cad bral ba nyid dang / las kyi lam thams cad kyi rgyu dang 'bras bu shes pas so sor rtogs pa nyid dang / dge ba'i las la gzhan dag yang dag par 'god pa la dga' pa nyid dang /snying brtse ba rgya chen por rab tu thob pa nyid dang / /sems can gyi khams kyi las las skyes pa'i sdug bsngal gyis mnar ba la rnam par blta ba nyid dang / dge ba'i rtsa ba rnam par dag pa nyid dang / skye ba nyid dang / mthu dbye ba nyid do/ / thog ma nyid du zhes bya ba ni rab tu dga' ba'i gnas pa la gnas pa'o/ /gnas pa gnyis pa'i dbang du byas pa'i chos kyi rim pa smras pa/ sems kyi bsam pa rnam pa bcus zhes bya ba la sogs pa la/ bsam pa rnam pa bcu po 'di dag gis bsam pa rnam par dag pa chen po thob par 'gyur ro//de thob pas gnas gnyis pa rnam par gnon par 'gyur ba ste/ kye rgyal ba'i sras dag byang chub sems dpa'i sa dang po la legs par yongs su sbyang ba byas pa'i byang chub sems dpa' de byang chub sems dpa'i sa gnyis pa la mngon par 'dod pa yin te/de'i sems la bsam pa rnam pa bcu 'byung ngo / /bcu gang zhe na/ 'di lta lte/ drang po'i bsam pa nyid dang / 'jal ba'i bsam pa nyid dang / las su rung ba'i bsam pa nyid dang / dul ba'i bsam pa nyid dang / zhi ba'i bsam pa nyid dang /dge ba'i bsam pa nyid dang / ma 'dres pa'i bsam pa nyid dang / mi lta ba'i bsam pa nyid dang / rlabs po che'i bsam pa nyid dang / che ba nyid kyi bsam pa nyid dang / sems kyi bsam pa bcu po de dag 'byung ste/ des nas gnyis pa la gnas par 'gyur ro zhes bstan pa yin no//de dag gi don bstan pa'i dbang du byas nas smras pa/ mi slu ba'i lhag pa'i bsam pa dang zhes bya ba la sogs pa la/ sgyu dang g.yos slob dpon la sogs pa la mi slu ba nyid ni drang po'i bsam pa nyid do/ /chos mthun pa nyid yin pas 'grogs na bde ba'i phyir 'jam pa'i bsam pa nyid do//nyon mongs pa dang nye ba'i nyon mongs pa dang bdud kyi las rnams zil gyis mnan nas de'i gnyen po'i phyogs la gnas par gyur pas na las su rung ba'i bsam pa nyid de/ dge ba'i chos sgom pa'i mi mthun pa'i phyogs kyis zil gyis mi non pa'i sems nyid kyis de'i sgom pa dang 'tsham pa ni las su rung ba'i bsam pa nyid ces bya'o//'du byed thams cad kyi nyes dmigs mthong ba'i bsam pa nyid ni dul ba'i bsam pa nyid de/ de dag las yid byung bar gyur nas dul bar 'gyur ro zhes byas nas so//'du byed thams cad nye bar zhi ba'i mya ngan las 'das pa la zhi ba'i rnam par mthong ba ni zhi ba'i bsam pa nyid do/ /byang chub kyi phyogs kyi chos rnams rtag tu bsgom pa'i bsam pa ni dge ba'i bsam pa nyid do/ /de dag bsgom pa la rjes su mthun pa'i rab tu dben pa'i bsam pa nyid ni ma 'dres ba'i bsam pa nyid do//'du 'dzi kun du spyod pa ring du spangs pa'i phyir ro/ /khyim pas ni 'dod pa'i yon tan rnams dang / 'byor pa'i khyad par rnams la mi lta ba'i bsam pa nyid dang / rab tu byung ba ni rnyed pa dang bkur sti la mi lta ba'i bsam pa ste/de ltar na lus dang gnas dang longs spyod la mi lta ba'i bsam pa yin no/ /theg pa dman pa spangs te/ theg pa chen po la mos pa nyid ni rlabs po che'i bsam pa nyid do/ /sems can thams cad kyi don bya ba'i bsam pa nyid ni che ba'i bsam pa nyid de/gzhan gyi don nyid bdag gi don du byed pa'i phyir ro/ /sems de la 'jug pa zhes bya ba ni gnas pa dang po'i smon lam gyis rab tu phye ba'i sems so/ /de la gnas nas bsam pa 'dir 'jug par 'gyur ro/ /de'i dbang gis bsam pa dag pa zhes brjod do//che ba'i phyir dang zhes bya ba ni sgom pa rab kyi mthar thug par 'gyur ba'o/ /ngo bo nyid kyis 'phel ba ni yongs su rdzogs pa nyid do/ /rab tu dga' ba nyid kyis gnyis pa la 'jug pa thob par 'gyur ro zhes bya ba'i tha tshig go/ /rang bzhin gyis tshul khrims 'chal ba kun du spyod pa med pa'i phyir rang bzhin gyis tshul khrims can yin no//de'i phyir smras pa/ chung ngu yang kun du mi spyod na zhes bya ba la sogs pa la/ las kyi lam chung ngu ni de la kun du rtog pa tsam gyis kyang srog chags rnams la rnam par 'tsho bar mi byed na zhes bya ba la sogs pas mi dge pa'i las kyi lam bcu'i mthar thug par bstan pa yin no//'bring ngam chen po lta ci smos zhes bya ba la sogs pas kyang bstan pa yin no/ /dge ba'i las kyi lam bcu yongs su rdzogs pa dag la yang skye ba thams cad du snang ngo //de la mdo'i tshig ni 'di yin te/ sa dri ma med pa la gnas pa'i byang chub sems dpa' ni rang bzhin gyis dge ba bcu'i las kyi lam rnams dang ldan pa yin no zhes bya ba nas sangs rgyas dang chos dang dge 'dun la bsam pa nges pa yin no zhes bya ba'i bar de dag gi don ni 'di yin te/rang bzhin gyis yang dag par snang ngo zhes bya ba'o/ /de dge ba bcu'i las kyi lam 'di rtag tu rgyun mi 'chad par bsrung zhing zhes bya ba nas/ gshin rje'i 'jig rten gyi 'gro ba yod par shes par bya'o zhes bya ba'i bar gyi don bstan pa ni des de ltar rang bzhin gyis tshul khrims can gyi zhes bya ba la sogs pa la/nyon mongs pa can ni ngan 'gro rnams dang zhes bya ba ste/ ngan song gsum mo/ /chung ngu la sogs pa rtsom pa'i las kun du spyod pas rgyu dang 'bras bu'i bya ba rnam par gzhag pa rab tu shes pa zhes bya'o//yang dge ba bcu'i las kyi lam yang dag par blangs pa'i rgyus ni srid pa'i rtse mo'i bar du skye ba yod par shes so zhes bya ba'i bar gyi don bstan pa ni bde 'gro rnams zhes bya ste/ de'i rnam par gzhag pa rab tu shes par bya'o//de'i gong du dge ba bcu'i las kyi lam 'di dag nyi tshe ba'i sems dang zhes bya ba nas/ rnam pa thams cad yongs su spyang zhing mngon par bsgrub pa nyid la brtson par bya'o zhes bya ba'i bar 'di dag gi don bstan pa ni/ theg pa gsum po rnam par gzhag pa rab tu shes so zhes bya ba'o//de bas kyang shas cher 'di ltar yang dag par slob ste zhes bya ba nas/ de ltar na mi dge ba bcu'i las kyi lam 'di dag ni sdug bsngal gyi phung po chen po tshad med pa sdud par 'gyur gyi/ bdag gis mi dge ba bcu'i las kyi lam 'di dag spangs te/chos kyi kun dga' bas dga' bar gnas par bya'o zhes bya ba'i bar gyi don bstan pa'i phyir/ rnam par smin pa dang / rgyu mthun pa'i zhes bya ba smras pa yin no/ /de la rnam par smin pa'i 'bras bu ni chen po dang / 'bring dang chung ngu'i rgyu las dmyal ba dang /byol song dang / yi dwags rnams su skye'o/ /de nas shi 'phos nas mi'i nang du skyes nas kyang tshe thung ba dang / sgyu dang g.yo la sogs pas spyod pa'i bar ni rgyu mthun pa'i 'bras bu yin no/ /bdag kyang dge ba bcu'i las kyi lam la gnas shing gzhan rnams kyang de dag nyid la rab tu dgong ngo zhes bya ba ni bzlog pa'i don bstan pa ni/bdag nyid kyang mi dge ba'i las spong ba dang zhes bya ba nas/ yang dag par 'dzud par yang byed do zhes bya ba'i bar du'o/ /de'i gong du shas cher phan pa'i sems nyid dang zhes bya ba nas/bla na med pa'i theg po chen po la dgod par bya'o snyam mo zhes bya ba'i bar gyi don bstan pa ni/ las mi mthun pa kun du spyod pa'i nyes pa'i zhes bya ba nas/ sdug bsngal ba yin par so sor rtog go zhes bya ba'i bar gyis bstan to/ /'di dag gi don ni mdo'i rjes su 'brangs nas shes par bya'o//sangs rgyas mthong ba ni rnam pa gnyis te snga ma bzhin no/ /dge ba'i rtsa ba rnam par dag pa yang rgyu rnam pa gsum ste snga ma bzhin no/ /de dpe'i khyad par ni tha dad do/ /gser de nyid nag tshur gyi nang du bcug nas bsregs na shin tu rnam par dag par 'gyur ro//de bzhin du bskal pa brgya stong dpag tu med par bsags pa'i dge ba'i rtsa ba ches rnam par dag par gyur pas ser sna dang / tshul khrims 'chal ba'i dri ma spangs pa dang / de dag gi gnyen po gtong ba dang / tshul khrims rnam pang dag pas shes par bya ste/ bsam pa dag pa'i sems kyis zhugs pa'i phyir ro/ /sa de la gnas pa'i byang chub sems dpa' ni phal cher gling bzhi pa'i 'khor los sgyur ba'i rgyal por 'gyur ro/ /dge ba bcu'i las kyi lam rnams la dgod par bya ba la mkhas pa yin no zhes bya ba'i don bstan pa yin pa'i phyir/skye bas phal cher gling bzhi pa'i 'khor los sgyur bar 'gyur te zhes bya ba la sogs pa'o/ /snga ma las bcu 'gyur du rig par bya ste zhes bya ba la ting nge 'dzin stong rab tu thob cing zhes mdo nas bstan pa yin no/ /gnas pa ma lus pa'i don mdor bstan pa'i phyir/de ltar na byang chub sems dpa' rnams kyi zhes bya ba la sogs pa de dag gi rnam pa ni don bstan pa'i rjes su 'brang nas shes par bya'o/ /nges pa'i tshig bstan pa ni tshul khrims 'chal ba'i dri ma rnam pa thams cad sel ba dang zhes bya'o//tshul khrims lhag par gyur pa de dag ni lhag pa'i tshul khrims kyi gnas pa zhes bya'o/ /lhag pa'i tshul khrims kyi gnas pa rdzogs so// //tshul khrims rnam par dag pa ni sems mnyam par 'jog par 'gyur bas lhag pa'i tshul khrims kyi gnas pa'i rjes thogs la/lhag pa'i sems kyi gnas pa rnam par gzhag pa yin te/ 'dod chags dang bral ba'i sbyor ba kun nas slong ba dang / 'dod chags dang bral ba'i sbyor ba dang / 'dod chags dang bral ba nyid dang / 'dod chags dang bral ba'i 'bras bu'i dbang du byas pa'o//de la dang po ni sems kyi bsam pa ni yid la byed par shes par bya'o/ /'dod chags dang bral ba'i sbyor ba ni ji srid du bsam gtan la snyoms par zhugs pas mi gnas pa'i bar du'o/ /'dod chags dang bral ba ni bsam gtan dang gzugs med pa'i snyoms par 'jug pa thob pa'o//'bras bu ni tshad med pa la sogs pa'o/ /gnas pa gsum pa 'di ni rnam pa brgyad du rnam par gzhag par bya ste/ sems kyi yid la byed pa rdzogs par bya ba la 'jug pa nyid dang / byang chub kyi bar du rab tu rtogs pa dang /thabs de dang des yang dag par tshol ba nyid dang / chos yongs su tshol ba nyid dang / de mngon par shes pa la gnas pa nyid dang / gang du 'dod pa der skye ba nyid dang / dge ba'i rtsa ba rnam par dag pa nyid dang / skye ba nyid dang / mthu nyid do/ /de yang kye rgyal ba'i sras dag sa gnyis pa lhag pa'i bsam pa shin tu sbyangs pa'i byang chub sems dpa' de byang chub sems dpa'i sa gsum pa gnon te/ des sems kyi bsam pa yid la byed pa bcus gnon no/ /bcu gang zhe na/ 'di lta ste/dag pa'i sems kyi bsam pa yid la byed pa dang / brtan pa'i sems kyi bsam pa yid la byed pa dang / skyo ba'i sems kyi bsam pa yid la byed pa dang / 'dod chags dang bral ba'i sems kyi bsam pa yid la byed pa dang / phyir mi ldog pa'i sems kyi bsam pa yid la byed pa dang /sra ba'i sems kyi bsam pa yid la byed pa dang / sbyangs pa'i sems kyi bsam pa yid la byed pa dang / rang dbang gi sems kyi bsam pa yid la byed pa dang / rlabs po che'i sems kyi bsam pa yid la byed pa dang / che ba nyid kyi sems kyi bsam pa yid la byed pa ste/sems kyi bsam pa yid la byed pa bcu po de dag gis gnon te zhes mdo na sa gsungs pa 'di dag gi don bstan par bya ba'i phyir/ de la byang chub sems dpa' rnams kyi lhag pa'i sems la gnas pa'i zhes bya ba la sogs pa'o//bsam pa dag pa bcu po zhes bya ba ni sa gnyis par bstan pa'i yid la byed pa ste/ rtogs par gyur pa'i zhes bya ba'i bar ni thos pa dang / bsam pa dang / bsgom pa'i gnas pas rim pa bzhin no/ /gzhan rnam pa bcus zhes bya ba ni de lta bu'i bsam pa dag pa yid la byed pa dang zhes bya ba nas rtogs par gyur pa'i bar du'o//de nas sems kyi yid la byed pa de dag bsgom pa chen po la gnas pa'i phyir dang / ma lus pa mdor bstan pas gnas pa gnyis pa las shin tu 'das nas gnas gsum la 'jug par 'gyur te/rnam pa bcus bdag gi sems kyi bsam pa dag par 'gyur ro snyam pa'i yid la byed pa dang zhes bya ba ni dang po'o/ /'di las yongs su nyams par 'gyur ba'i cha ma yin no zhes bya ba ni gnyis pa'o/ zag pa dang bcas pa'i chos rnams la sems mi 'jug cing mi mthun par yang gnas so snyam pa'i yid la byed pa ni gsum pa'o//sgom pa sems la brtan pa yid la byed pa ni bzhi pa'o/ /gnyen po 'di las nyams par 'gyur ba ni cha ma yin no snyam du yid la byed pa ni lnga pa'o/ /'di ltar gnyen po brtan par gyur pas mi mthun pa'i phyogs kyis bskyod par mi nus pa ni drug pa'o//sangs rgyas kyi chos thams cad la 'dun pa rgya chen po yid la byed pa ni bdun pa'o/ /dka' ba spyod pa thams cad kyis mi gnod par yid la byed pa ni brgyad pa'o/ /theg pa chen po rgya chen po la mos pa yid la byed pa ni dgu pa'o//sems can gyi don bya bar mngon par dga' ba'i yid la byed pa ni bcu pa'o/ /kye rgyal ba'i sras dag byang chub sems dpa'i sa gsum pa la gnas pa byang chub sems dpa' 'du byed du gyur pa thams cad la mi rtag par so sor rtog go zhes bya ba nas/ skye bo mang po yongs su skyob pa nyid du yang dag par mthong ngo zhes bya ba'i bar gyi mdo'i don bstan pa'i phyir/'du byed thams cad la nyes dmigs mthong bas sun 'byin par byed/ yid skyo bar byed ces bya ba nas 'dod pa bskyed pa yin no zhes bya ba'i bar du smras so/ / des de bzhin gshegs pa'i ye shes de ltar gnod pa med pa mthong nas zhes bya ba nas brtsams nas/ mya ngan las 'das pa'i bde ba la 'god par nus so snyam nas zhes bya ba'i bar gyi don bstan pa'i phyir/ snying thag pa nas 'dun pas sems can gyi khams la sdug bsngal rnam pa sna tshogs kyis sdug bsngal bar rnam par blta'o zhes bya ba la sogs pas so//de de ltar de bzhin gshegs pa'i ye shes la rtog pas sems can thams cad yongs su bskyab par bya ba la brtson zhing zhes bya ba ni 'di dag gi don bstan pa'i phyir/sems can de dag thams cad la ltos pa dang bcas pa'i sems dang ldan pa yin no/ /don la rton pa'i sems dang zhes bya ba la/ 'du byed rnams kyi nyes dmigs mthong bas ni bag yod par 'gyur ro/ /de bzhin gshegs pa'i ye shes kyi phan yon mthong bas ni byang chub kyi phyir brtson 'grus 'bar ba'o//sems can thams cad yongs su bskyab par bya ba la gzhol zhing 'di ltar yongs su rtog ste zhes bya ba nas de yang thos pa la mkhas pa ma gtogs par gzhan gyis ma yin no snyam mo zhes bya ba'i bar mdo'i don bstan pa ni//sems can rnams la snying rje'i bsam pa rgya chen po dang ldan pa yin zhes bya ba nas/ ma bsgribs pa'i ye shes kho na yin par mthong ba yin zhes bya ba'i bar gyis bstan to/ /shes rab rgyu ba med cing skye ba med pa la spyod pa'i shes rab ma gtogs par zhes bya ba'i don bstan pa ni/chos kyi dbyings la rnam par rtog pa'i rgyu ba zhes bya ba la sogs pa la/ chos kyi dbyings ni de bzhin nyid do/ /rnam par mi rtog pa'i rgyu ba thams cad dang bral ba'i phyir rgyu ba med pa zhes bya'o/ kun nas nyon mongs pa'i gnyen po yin pa'i phyir skye ba med pa la spyod pa'o//shes rab kyi snang ba de yang bsam gtan la mkhas pa blos rnam par nges pa la/ blos so sor rtog pa ma gtogs par gzhan gyis ma yin no zhes bya ba'i don bstan pa ni/ ye shes kyi snang ba de 'grub par byed pa ni zhes bya ba la sogs pa'o/ /bsam gtan la mkhas pa la rnam par nges pas so sor rtog pa de yang thos pa la mkhas pa ma gtogs par gzhan gyis ma yin no snyam mo zhes bya ba'i don bstan pa ni/bsam gtan dang / rnam par thar pa dang zhes bya ba nas/ nyan pa sngon du 'gro ba dang / nyan pa'i gzhi yin par mthong ba yin no zhes bya ba'i bar gyis bstan pa yin no//de de ltar so sor brtags pa'i shes pa dang ldan pas zhes bya ba nas/ de rnam pa de lta bu'i brtson 'grus rtsom pas chos yongs su tshol zhing zhes bya ba'i bar gyi don bstan pa ni/ mthong nas kyang brtson 'grus chen po rtsom pas zhes bya ba la sogs pas bstan pa yin te/mdo'i rjes su 'brangs nas rig par bya ste/ dam pa'i chos mnyan pa'i phyir zhes bya ba nas/ snga ma bzhin du yid la byed pa zhes bya ba'i bar du'o/ /sangs rgyas kyi chos rnams ni 'di ltar chos kyi rjes su mthun pa'i chos bsgrub pa la brten pa yin gyi zhes bya ba ni/bsgom pas bsgrub par bya'o zhes bya ba'i tha tshig go/ /tshig 'bru dang sgra tsam gyis rnam par dag pa ni ma yin no zhes bya ba ni mang du thos pa tsam gyis bsgrub par bya ba ni ma yin no zhes bya ba'i tha tshig go/ /de la mdo las ni ji skad thos pa'i chos rnams la tshul bzhin du so sor rtog pa'i rang bzhin can yin te zhes bya ba nas tshig gi las yongs su dag pa 'ba' zhig gis ni ma yin no zhes bya ba'i bar gyis bstan pa yin no//thos pa de nyid la brten te zhes bya ba ni ji skad thos pa'i chos rnams la sgom pa'i sbyor bas yid la byed pa'o//chos kyi mtshan ma rnams zhes bya ba ni chos de'i gzugs brnyan gyi mtshan ma la dmigs pa zhes bya ba'i tha tshig go/ /de'i phyir smras pa/ dmigs pa byas nas zhes bya ba ste/ 'dod pa rnams las dben pa zhes bya ba nas brtsams nas/ mngon par shes pa lnga bsgrubs te gnas so zhes bya ba'i bar gyis ni/bsam gtan dang / gzugs med pa dang / tshad med pa dang / mngon par shes pa mngon par bsgrub pa bstan pa yin no/ de de dag gis lan mang du gnas te zhes bya ba ni bsam gtan dang / ting nge 'dzin la snyoms par 'jug pa bzlog pa la mkhas pa bstan pa yin no//de'i dbang gis sa der mi skye ba'o/ /de la mdo'i tshig gis bstan pa ni/ de bsam gtan dang ting nge 'dzin dang zhes bya ba nas brtsams nas smon lam btab pa ma gtogs pa dang / thabs la mkhas pas mngon par bsgrub pa'i sems kyi rgyud dang ldan pa'i phyir ro zhes bya ba'i bar du yin no//yang 'dod pa'i khams kyi 'dod chags dang bral ba yang 'dod pa'i khams su slar skye ba'i rgyu gang yin pa de bstan pa'i phyir/ de de dag gi dbang gis skye bar mi 'gyur ro zhes bya ba'o//de la mdo'i tshig ni 'di yin te/ de de bas kyang shas cher 'dod pa'i 'ching ba thams cad bsrabs par 'gyur ro/ /srid pas bcings pa thams cad dang / de'i lta bar gyur ba'i bcings pa thams cad ni snga nas kyang spangs pa yin no zhes bya ba'i don bstan pa yin no//de ni 'dod pa'i khams kyi 'dod chags dang bral ba'i phyir 'dod pa'i 'ching ba rnams spangs pa yin/ bsam gtan bzlog pa ma mkhas pa'i phyir/ gzugs dang gzugs med pa'i srid pa'i 'ching ba rnams spangs pa yin no/ /mos pas spyod pa'i sa nyid nas chos thams cad kyi de bzhin nyid la mos pa'i phyir lta bas byas pa'i 'ching ba rnams bsrabs pa yin no zhes bya ba'o//de yang mdo las/ sa 'od byed pa 'di la gnas pa'i zhes bya ba nas/ bskal pa bye ba khrag khrig 'bum phrag du mar log pa'i 'dod chags 'grib par bya ba ma yin par spong bar 'gyur ro zhes bya ba nas/ log pa'i gti mug 'grib par chos yin par spong bar 'gyur ro zhes bya ba'i bar gyi don bstan pa'i phyir/log pa'i 'dod chags dang zhes bya ba la sogs pa la/ bdag dang gzhan la gnod pa byed par zhugs par gyur pa'i phyir log pa nyid yin no/ /de la bye brag ni 'di yod do zhes bya ba ni dpe 'di'o/ /tshad bzhin du 'dug go zhes bya ba'i don bstan pa ni/skye 'bri med par tshad mnyam pa de bzhin du zhes bya ba'o/ /de bzhin du sa 'di la gnas pa'i byang chub sems dpa'i dge ba'i rtsa ba rnam par dag pa yang snga ma dang 'dra bar rnam par dag par 'gyur bar rig par bya'o/ /skye bas bsdus pa bstan pa'i phyir/skye pas na phal cher zhes bya ba la sogs pa'o//sa'i nges pa'i tshig bstan pa ni/ thos pa'i rnam pa'i chos rnams kyi snang ba gsal ba nyid dang / ting nge 'dzin gyi snang ba gsal bas rab tu phye ba'i phyir 'od byed pa zhes bya'o zhes bya ba yin no/ /nang gi bdag nyid kyi sems rnam par dag pa la nye bar bstan pa'i 'di yod pas zhes bya ba nas so/lhag pa'i sems kyi gnas rdzogs so// //lhag pa'i shes rab kyi gnas pa'i dbye ba ni gsum ste/ khyad par bstan pa ni/ byang chub kyi phyogs dang mthun pa ni byang chub kyi phyogs bsgom pa dang / yang dag par ldan pa zhes bya ba'i tha tshig go/ / sa bzhi pa yang ji ltar thos pa'i don gyis bsdus pa'i ting nge 'dzin rnam par dag pa'i ye shes rnam par dag pas rab tu phye ba'o/ /de ni rnam pa bzhir rnam par gzhag par rig par bya ste/ rnam par dag pa'i gnyen po bsgom pa 'phel ba'i rgyu rnam par gzhag pa nyid dang / rnam par dag pa 'phel ba rnam par gzhag pa nyid dang /gnyen po bsgom pa 'phel ba rnam par gzhag pa nyid dang / de dag gi 'bras bu rnam par gzhag pa nyid do/ /de la rnam par dag pa gnyen po bsgom pa 'phel ba'i rgyu ni chos snang ba la 'jug pa bcu thob pa yin te zhes bya ba'o/ /mang du thos pa yongs su btsal ba'i dbang du byas nas zhes bya ba ni mang du thos pa la brten nas zhes bya ba'i don to//chos kyi snang ba'i dngos po bcu po bstan pa ni chos la snang ba 'jug pa bcu thob pa yin te zhes brjod do/ /de dag che ba dang / yongs su rdzogs par gyur pa nyid ni de'i sa gnon pa'i rgyu nyid yin par bstan pa'i phyir/ lhag pa'i sems la gnas pa zhes bya ba la sogs pa smras te/de dag gi mdor bsdus pa'i don bstan cing brjod pa'i phyir smras pa/ gzhung gi mdo las ji skad 'byung ba bzhin du rig par bya ste zhes bya ba ni kye rgyal ba'i sras dag byang chub sems dpa'i sa gsum pa la snang ba bzhin du yongs su dag pa'i byang chub sems dpa' de/ byang chub sems dpa'i sa bzhi pa non te/de chos la snang bas 'jug pa bcus gnon no/ /bcu gang zhe na/ 'di lta ste/ sems can gyi khams rnam par dpyad pa la snang bas 'jug pa dang / de bzhin du 'jig rten gyi khams dang / chos kyi dbyings dang / nam mkha'i khams dang / rnam par shes pa'i khams dang /'dod pa dang / gzugs dang / gzugs med pa'i khams dang / bsam pa rlabs po che'i mos pa'i khams dang / bsam pa chen po nyid kyi mos pa'i khams rnam par dpyad pa la snang bas 'jug pa'o zhes bya ba'o/ /gang dag 'dogs pa dang zhes bya ba ni/ khams dang skye gnas kyis bsdus pa'i sems can rnams so//de lta bu'i 'jig rten de rnam par brtag pa'i dbang du byas nas gsungs pa ni/ sems can gyi khams rnam par dpyad pa snang bas 'jug pa dang zhes bya ba'o/ /de dag ni nam mkha'i khams kyi mthas gtugs par 'dogs par byed do zhes bstan par bya ba'i phyir/ de'i rjes la 'jig rten gyi khams gsungs pa yin no//don de nyid bstan pa ni/ gang du 'dogs pa dang zhes bya ba'o/ /yang sems can dang 'jig rten de dag ni de bzhin du ro gcig pa'i phyir/ don dam par ni chos kyi dbyings kyi ngo bo nyid do zhes smras so/ /yang de dag ni don dam par nam mkha' dang mnyam pa'o zhes bstan pa'i phyir/nam mkha'i khams rnam par dpyod pa la snang bas 'jug pa dang zhes bya ba'o/ /de ltar btags pa tsam du yod pa'i sems can gyi khams rnams kun nas nyon mongs pa dang / rnam par byang ba'i don bstan pa'i phyir/ rnam par shes pa'i khams bstan te/ sems kun nas nyon mongs pas sems can rnams kun nas nyon mongs par 'gyur la/sems rnam par dag pas rnam par byang bar 'gyur ro zhes bya ba'i mdo'i tshig gis so/ /khams gsum ni kun du spyod pa'i nyon mongs pas nyon mongs par 'gyur ro zhes bstan pa'i phyir 'dod pa la sogs pa'i khams smos pa yin no/ /gang du rnam par dag par 'gyur ba zhes bya ba ni kun nas nyon mongs pa med pa dang /sems can yang yongs su mi gtong ba'i dbang du byas pa yin no/ /nyan thos la sogs pa dang thun mong ma yin pa'i don gyis ni bsam pa rlabs po che nyid kyis byang chub chen po la 'dod pa nyid kyi rnam par dag par 'gyur ro/ /che ba nyid kyi bsam pa ni sems can gyi don bya'o zhes bstan pa yin no//de ltar na sangs rgyas kyi chos yongs su smin pa dang / sems can yongs su smin par bya ba la brten nas rnam par byang bar 'gyur ro zhes bstan par 'gyur ro/ /de yang kye rgyal ba'i sras dag ces bya ba nas brtsams nas de'i bdag nyid kyi chos rab tu thob pa'i phyir zhes bya ba'i bar gyi don bstan pa'i phyir/de ni mi phyed pa'i bsam pa la sogs pa ye shes zhes bya ba la ye shes yongs su smin par byed pa'i chos zhes bya ba ni ye shes yongs su smin par byed pa'i chos bcu dang ldan pa nyid de/ ye shes yongs su smin par byed pa rnam pa bcu dang ldan pa'o/ /rab tu grub pa zhes bya ba ni rnam par dag pa 'phel ba'i dbang du byas pa ni de bzhin gshegs pa'i rigs su rab tu grub pa ste/mang du thos pa la brten nas ye shes kyi mthar thug par gyur pa nyid do/ /de'i phyir smras pa/ de'i bdag nyid kyi chos rab tu thob pas zhes bya ba'o/ /rnam pa thams cad du byang chub dang / sems can la lta ba gtsor byas nas/byang chub kyi phyogs kyi chos bsgom pa mthar thug pa bstan pa'i dbang du byas nas bstan pa'i mdo ni/ sems can thams cad la lta ba dang bcas pa dang zhes bya ba nas/ byams pa chen po de dang ldan pa zhes bya ba'i bar gyis ni sems can la lta ba dang bcas pa bstan pa yin no/ / thams cad mkhyen pa'i ye shes la lhag par dmigs pa dang zhes bya ba nas thabs la mkhas pa chen pos rnam par dpyod pas so zhes bya ba'i bar gyis ni byang chub sems dpa' la lta ba bstan pa yin no/ /mdo nyid las 'byung ba bzhin bsgom par bya'o zhes bya bas ni byang chub kyi phyogs bsgom pa yod du zin kyang zag pa dang bcas pa dang zag pa med par bstan pa yin no//thabs mkhas pa chen pos rnam par dpyod pas zhes bya ba nyid kyis thabs la mkhas pa nyid kyis yongs su zin par bsgom par bya'o zhes bya bar rig par bya'o/ /de 'jig tshogs la lta ba sngon du 'gro ba'i bdag dang zhes bya ba nas/'jig rten gyi gnas rnams gang yin pa de dag thams cad dang de bral ba yin no zhes bya ba'i bar gyi mdo'i tshig gi don bstan pa'i phyir/ 'jig tshogs la lta ba shin tu cha phra ba dang zhes bya ba la sogs pa smras te/ thams cad kun du mi spyod pas zhes bya ba ni bag chags tsam yang ma lus pa'o zhes pa'o//'jig tshogs la lta ba de nyid ni phung po dang khams dang skye mched la mngon par zhen par gyur pa ste/ gcig nyid dang / byed pa po nyid dang / spyod pa po nyid du gzung ba'o/ /des ni de dag spangs na de yang spong bar 'gyur ro/ /g.yo ba thams cad kun du mi spyod pas gtan du spong bar byed do zhes bya ba ni 'jig rten la lta ba sngon du song ba rnams so//yang dag par rdzogs pa'i sangs rgyas kyis smad pa'i las gang yin pa de thams cad kyi thams cad du spong ngo zhes bya ba'i don bstan pa ni/ de rnams spangs pas thams cad kyi thams cad du mi spyod do zhes bya ba yin no/ /yang dag par rdzogs pa'i sangs rgyas kyis bsngags pa'i las byang chub sems dpa'i lam gyi tshogs dang mthun pa de dag ni yang dag par blangs te gnas so zhes bstan pa'i phyir/bsngags pa gang yin pa zhes bya ba nas ji lta ba bzhin du zhes bya ba'i bar gyis bstan to/ /de de bas kyang gang ji lta ji ltar zhes bya ba nas brtsams nas/mthun par 'dzin pa yin no zhes bya ba'i bar gyi mdo'i don bstan pa'i phyir/ de ltar gyur na de bas kyang shas cher zhes bya ba nas brtsams te/ dkar po'i chos rnam pas sna tshogs dang ldan par 'gyur ro zhes bya ba'i bar gyis bstan to/ /sa gong ma rnams yongs su sbyong ba'i las rnams kyang yang dag par tshol zhing brtson 'grus rtsom pa chen po thob ste gnas so zhes bstan pa'i mdo'i tshig ni de de ltar dul ba dang ldan zhes bya ba nas brtsams nas tshul dang tshul ma yin pa rnam par 'byed pa'i brtson 'grus dad pa yin no zhes bya ba'i bar gyis bstan pa yin no//de de bas kyang shas cher bsam pa'i khams yongs su dag par 'gyur ro zhes bya ba nas/sems can gyi bsam pa dang yang dag par ldan par 'gyur ro zhes 'di dag gi don bstan pa ni/ gzhi des de'i bsam pa dang zhes bya ba nas/ mu stegs can dang / bdud thams cad kyis kyang mi 'phrogs shing mi bskyod par 'gyur ro zhes bya ba'i bar gyis bstan to/ / dpe'i khyad par bstan pa'i phyir/ de la bye brag ni 'di yod de zhes bya ba la sogs pa'o/ /dpe gnyis pa bstan pa ni dper na nor bu rin po che snang ba rab tu gtong ba ni zhes bya ba la sogs pa'o/ /lhag ma ni snga ma bzhin du rig par bya'o/ /ye shes kyi 'od 'phro bar gyur pa dang zhes bya ba ni 'od 'phro ba dang chos mthun pa'i chos bstan pa'i phyir te/chos bstan pas 'jig rten pa rnams la shes rab kyi snang ba byed pas zhes bya'o/ /lhag pa'i shes rab kyi gnas pa dang po rdzogs so// //sa lnga pa ni rnam pa gsum du rnam par gzhag par bya ste/ yid kyi gnyen po'i khyad par rnam par gzhag pa nyid dang / /mi gnas pa'i lam so sor rtogs pa rnam par gzhag pa nyid dang /de'i 'bras bu rnam par gzhag pa nyid do/ /de la yid kyi gnyen po'i khyad par nyid ni/ sems kyi bsam pa mnyam pa nyid bcu thob ste/ de'i yid la byed pa de ni ldog par mi 'gyur ba dang bcas pa ste/ sngar yang chos rtogs so snyam pa'i mngon pa'i nga rgyal gyi gnyen por gsungs pa yin no//sa 'di la rnam par dag pa'i rgyud tha dad du mngon pa'i nga rgyal gyi gnyen po nye bar bstan pa'i phyir smras pa/ rnam par dag pa la bsam pa mnyam pa nyid bcu thob ces bya ba la/ mdo las ji skad du 'byung ba bzhin zhes bya ba ni kye rgyal ba'i sras dag byang chub sems dpa'i sa bzhi pa la lam yongs su rdzogs par byas pa'i byang chub sems dpa' de byang chub sems dpa'i sa lnga pa la 'jug ste/de rnam par dag pa la sems kyi bsam pa mnyam pa nyid rnam pa bcus 'jug go/ /bcu gang zhe na 'di lta ste/ 'das pa'i sangs rgyas kyi chos rnam par dag pa la bsam pa mnyam pa nyid dang /ma 'ongs pa'i sangs rgyas kyi chos rnam par dag pa la bsam pa mnyam pa nyid dang / da ltar byung ba'i sangs rgyas kyi chos rnam par dag pa la bsam pa mnyam pa nyid dang / tshul khrims rnam par dag pa la bsam pa mnyam pa nyid dang / sems rnam par dag pa la bsam pa mnyam pa nyid dang /lta ba dang / som nyi dang / yid gnyis dang / 'gyod pa sel ba rnam par dag pa la bsam pa mnyam pa nyid dang / lam dang lam ma yin pa shes pa rnam par dag pa la bsam pa mnyam pa nyid dang / lam gyis spong ba shes pa rnam par dag pa la bsam pa mnyam pa nyid dang / byang chub kyi phyogs kyi chos thams cad gong ma gong mas rnam par 'jog pa rnam par dag pa la bsam pa mnyam pa nyid dang /sems can thams cad yongs su smin par byed pa rnam par dag pa la bsam pa mnyam pa nyid de/ 'di dag gis 'jug go zhes bya ba'i bar gyis bstan pa yin no/ /de las gzhan pa'i sems can gyi khams las yang dag par 'das pa'i phyir mnyam pa med pa'i sangs rgyas rnams dang mi mnyam la/chos kyi chos gang dag dang ldan pa dang / sangs rgyas kyi chos dang ji ltar mnyam pa de dbye bas rnam pa bcur shes par bya'o/ /yang sangs rgyas kyi chos gang dag dang ldan pa yang dus gsum gyi stobs la sogs pa ste/rnam pa gsum mnyam pa nyid du rig par bya'o/ /sangs rgyas kyi chos dang ji ltar mnyam pa zhes bya ba ni mdor bsdus na tshul khrims dang / ting nge 'dzin dang / shes rab sems can yongs su smin par byed pa dang bcas pa rnams dang / sems can thams cad yongs su smin par byed pa rnam par dag pa la bsam pa mnyam pa nyid kyi bar du'o//de ni phyir zhing ye shes khyad par can 'dod pas zhes bya ba'i mdo'i tshig ni kye rgyal ba'i sras dag byang chub sems dpa'i sa lnga pa thob pa'i zhes bya ba nas/ phyir mi ldog par gyur nas yang dag pa ji lta ba bzhin du rab tu shes so zhes bya ba'i bar du'o/ /'phags pa'i bden pa bzhi la zhes bya ba la sogs pa'i mdo'i tshig ni/'di ni sdug bsngal 'phags pa'i bden pa'o zhes yang dag pa ji lta ba bzhin du rab tu shes so zhes bya ba nas/ 'di ni sdug bsngal 'gog par 'gro ba'i lam 'phags pa'i bden pa'o zhes bya ba'i bar du'o/ /mdo nyid las ji skad 'byung ba bzhin du thams cad rig par bya'o zhes bya ba ni kun rdzob kyi bden pa la mkhas pa yin/don dam pa'i bden pa la mkhas pa yin/ mtshan nyid kyi bden pa la mkhas pa yin/ rnam par dbye ba'i bden pa la mkhas pa yin/ phye ste rtogs pa'i dngos po'i bden pa la mkhas pa yin/ rab tu skye ba'i bden pa la mkhas pa yin/ zad pa dang mi skye ba shes pa'i bden pa la mkhas pa yin/lam shes pa la 'jug pa'i bden pa la mkhas pa yin/ byang chub sems dpa'i sa'i go rims thams cad kyi mtshams sbyar ba bsgrub pa nas/ de bzhin gshegs pa'i ye shes yang dag par 'byung ba'i bar gyi bden pa la mkhas pa yin zhes bya ba yin no/ /de sems can gzhan dag gi bsam pa ji lta ba bzhin du tshim par byed pas kun rdzob kyi bden pa rab tu shes so zhes bya ba'i mdo'i don bstan pa'i phyir/gzhan la go bar byed pa dang zhes bya ba'o/ /bgrod pa gcig pu la yang dag par gzhol bas don dam pa'i bden pa rab tu shes so zhes bya ba'i mdo'i don bstan pa'i phyir/ so so rang gis shes pa dang zhes bya ba'o//rang dang spyi'i mtshan nyid rtogs pas mtshan nyid kyi bden pa rab tu shes so zhes bya ba'i mdo'i don bstan pa ni/ de gnyi ga'i gnas las brtsams te gang bstan pa dang zhes bya ba yin te bstan pa'i chos dang / rtogs pa'i chos rnams kyi rang dang spyi'i mtshan nyid kyi gnas phyin ci ma log pa'i rang dang spyi'i mtshan nyid yongs su gsal bar byed pa'i dbang du byas pa la 'jug pa nyid ni bstan pa'i chos yin no//de bzhin nyid la dmigs pas rab tu phye ba nyid ni so so rang gis rig pa'o/ /gang gis bstan pa dang zhes bya ba la/ mdo las/ chos rnam par dbye ba rnam par gzhag pas rtogs pas rnam par dbye ba'i bden pa rab tu shes so zhes bya ba ni mdo sde dang ma mo las brtsams pa'o//phung po dang khams dang skye mched rnam par gzhag pas rab tu phye ste rtogs pa'i bden pa rab tu shes so zhes bya ba ni 'dul ba dang ma mo las brtsams pa'o/ /de ltar na bstan pa dang zhes bya ba bstan nas/ gang gis bstan pa dang zhes bya bas lhag ma bden pa'i rnam pa rnams bstan pa'o//lus dang sems la gnod pa nyams su 'bab pas dngos po'i bden pa rab tu shes so zhes bya ba'i don bstan pa ni/ de ltar byung ba'i sdug bsngal gyi bdag nyid dang zhes bya ba'o/ /'gro bar mtshams sbyor ba rtogs pas rab tu skye ba'i bden pa rab tu shes so zhes bya ba'i don bstan pa ni/rgyu las ma 'ongs pa'i sdug bsngal 'byung ba dang zhes bya'o/ /rims nad kyis yongs su gdung ba thams cad zhi bas zad pa dang mi skye ba shes pa'i bden pa rab tu shes so zhes bya ba'i mdo'i tshig gi don bstan pa'i phyir/ rgyud zad pas de zad de mi skye ba dang zhes bya ba'o/ /mi gnyis pa mngon par bsgrubs pas lam shes pa la 'jug pa'i bden pa rab tu shes so zhes bya ba nas/de bzhin gshegs pa'i ye shes yang dag par 'byung ba'i bar gyi bden pa rab tu shes so zhes bya ba'i mdo'i don bstan pa ni/ de spang ba'i thabs bstan pa las brtsams nas ches ji ltar bstan pa ste zhes bya pa'o//'du byed du gyur pa thams cad shes rab kyis yang dag par rnam par sun 'byin par byed do zhes bya ba'i mdo'i tshig ni/ de de ltar bden pa la mkhas pas mngon par bsgrubs pa'i blo 'dus byas thams cad brdzun pa dang slu ba'i chos can zhes bya ba nas/ byis pa 'drid pa yang dag pa ji lta ba bzhin du rab tu shes so zhes bya ba'i bar yin no//sems can gyi khams la snying rje'i bsam pa rnam par 'phel bar 'gyur ro zhes bya ba'i mdo'i tshig ni/ de de bas na shas cher sems can rnams la snying rje chen po mngon du 'gyur zhing byams pa chen po'i snang ba yang rab tu 'byung ngo zhes bya ba yin no/ /sems can byis pa'i log par sgrub pa yang sngon gyi mtha' dang phyi ma'i mtha' las 'das par yang dag par rab tu rtogs so zhes bya ba 'di'i mdo'i tshig ni/de de ltar ye shes kyi stobs bskyed pa thob ste zhes bya ba nas/ 'di lta ste/ skye ba dang / rga ba dang / na ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrugs pa'i sdug bsngal mang po nyams su myong ba ngo mtshar che'i zhes bya ba'i bar yin no/ /de dag rnam par thar par bya ba'i phyir bsod nams dang ye shes kyi tshogs chen po yongs su gzung ba la sems kyis smon par byed cing zhes bya ba'i mdo'i tshig ni/ma la bdag gis sems can de ltar sdug bsngal gyis nyam thag pa zhes bya ba nas/ ye shes chags pa med pa'i bar gyis mthar thug pa thob par 'gyur ba'i rnam pa de lta bu'i bsod nams dang ye shes kyi tshogs bsag par bya'o snyam mo zhes bya ba'i bar yin no/ /de la gnas pa'i bsam pa yang dag par bsgrub po zhes bya ba 'di'i mdo'i tshig ni/de de ltar shin tu bsngags pa'i shes pas mngon par bsgrubs pa'i blos zhes bya ba nas/ sems can thams cad mya ngan las bzla ba'i phyir rtsom ste zhes bya ba'i bar yin no/ /dran pa dang / blo gros dang / rtogs pa la sogs pa yon tan mang po rnam pa sna tshogs dang ldan pa dang zhes bya ba 'di'i mdo'i tshig ni/de ni de bas kyang shas cher brjod bar mi 'gyur ba'i chos nyid kyis dran pa dang ldan pa yin zhes bya ba nas/ thabs la mkhas pa chen pos 'jig rten du mtshams sbyor bar smon lam shin tu btab pa'i sems dang ldan pa yin zhes bya ba'i bar gyis bstan pa yin no//yid la byed pa gzhan dang bral ba dang / yongs su smin par bya ba'i thabs sna tshogs kyis kyang sems can rnams yongs su smin par byed do zhes bya ba'i mdo'i tshig ni/ sems can thams cad yongs su smin par byed pa la brtson pas nyin mtshan du sems gzhan yongs su spangs pa yin te zhes bya ba nas/rdzu 'phrul gyi rnam par 'phrul pa chen po mngon par sgrub pas nye bar spyad pas bya ba la sbyor ba rnams kyis kyang sems can yongs su smin par byed do zhes bya ba'i bar yin no/ /de de ltar sems can yongs su smin par bya ba la brtson pas zhes bya ba'i don ni/ sems can rnams la phan 'dogs pa'i 'jig rten pa'i yi ge dang /bstan bcos dang / rgya dang / rtsis dang / shod thabs la sogs pa bzo dang las kyi gnas rnams mdo las ji skad 'byung ba bzhin bstan pa ni gang dag yin pa de dag thams cad kyang zhes bya ba la sogs pa la/ 'jig rten pa'i tha snyad dang mthun par bya ba ni yi ge dang /bstan bcos dang / rgya dang / rtsis dang / shod thabs gang dag yod pa rnams dang zhes bya ba'o/ /dbul ba bsal bar bya ba dang zhes bya ba ni thams cad kyi spyi'i mtshan nyid du rig par bya ste/ rig pa'i gnas thams cad ni tshe 'di'i 'tsho ba'i cho ga tsam gyis rab tu phye ba yin pa'i phyir ro/ /yang na dbul ba bsal ba'i thabs ni nor bsgyur ba'i dpyad yin no//khams ma snyoms pa dang mi dang mi ma yin pas byas pa'i gnod bzhi bar bya ba ni skem byed dang / brjed byed dang / 'byung po'i gdon dang / dug dang / ro langs kyi sbyor ba bsal ba dang gso ba'i cho ga'o/ /kha na ma thob med pa'i rtsed mo ni snyan dngags dang / gar thabs dang gtam rgyud dang / rol mo dang / de lta bu byung ba brjod pas rab tu dga' bar bya'o//de'i rgyu bstan pa ni chos ma yin pa la dga' ba las bzlog par bya ba dang zhes bya ba la sogs pa'o/ /khyim gyi yo byad 'dod pa rnams la tshegs chung dus khyim gyi yo byad bsgrub par bya ba ni grong dang / grong khyer dang / skyed mos tshal dang / 'bab chu dang / mtshe'u dang / rdzing dang / me tog dang / 'bras bu dang /sman dang / nags tshal mngon par bsgrub pa'o/ /rgyal po dang chom rkun la sogs pa'i gnod pa las yongs su bskyab par bya ba ni gser dang / dngul dang / nor bu dang / mu tig dang / bai DU R+Ya dang / dung dang / man shel dang / byi ru dang / rin po che'i 'byung gnas rnams bstan pa'o/ /gnas dang gnas ma yin pa'i sbyor ba la gnang ba dgag par bya ba ni zla ba dang /nyi ma dang / gza' dang / skar ma dang / rgyu skar dang / sa g.yo ba dang / gcan gzan gyi la nye ba dang / bya'i la nye ba dang / rmi ltas dang / ltas ston pa shes pa'o/ /bkra shis pa dang / bkra mi shis pa'i dngos po blang ba dang dor ba la gzud pa ni yan lag dang nying lag thams cad kyi mtshan dang spyod yul gyi sbyor ba'o//tshe 'di la gcig la gcig mi 'khu ba dang / phyi ma la phyin ci ma log pa'i mngon par mtho ba'i lam bstan pa ni/ sdom pa'i cho ga la gnas pa dang / bsam gtan dang / mngon par shes pa dang / tshad med pa dang / gzugs med pa'i gnas rnams bstan pa'o/ /gzhan thams cad ni snga ma bzhin no/ / zhes bya ba ni sangs rgyas mthong ba la sogs pa'o/ /dpe'i khyad par bstan pa'i phyir dper na zhes bya ba la sogs pa la/ nor bu spug gis byi dor byas shing spras pa ni mtshungs pa med pa'i phyir ro/ /spras pa zhes bya ba ni yongs su dag pa dang / shin tu 'od gsal bar 'gyur ro/ /mi 'phrogs pa'i don bstan pa ni mtshungs pa med pa'i phyir zhes bya ba'o//de nyid kyi dpe gnyis pa bstan pa ni/ dper na zhes bya ba sogs pa la/ rlung gi dkyil 'khor thams cad mnyam par 'gro yang rlung gi dkyil 'khor thams cad kyis mi 'phrogs pa'o/ /lhag pa'i shes rab kyi gnas gnyis pa rdzogs so// //chos mnyam pa nyid bcu 'thob ste zhes bya ba la/de yang de chung ngu dang / 'bring gis sa yongs su sbyang ba byas pa las rnam par gzhag par bya'o/ /de'i phyir smras pa/ chos mnyam pa nyid bcu 'thob ste zhes bya ba yin no/ /chen po'i rnam pas sa gnon pa'i lam dang mthun par rnam par gzhag pa ni des na smras pa/de dag che ba'i phyir dang zhes bya ba la sogs pa'o/ /mdo las ji skad 'byung ba bzhin zhes bya ba la sogs pa la/ mdo las ji skad 'byung ba bzhin zhes bya ba'i mdo'i tshig blangs nas bshad par bya'o/ /kye rgyal ba'i sras dag byang chub sems dpa'i sa lnga pa la lam shin tu yongs su rdzogs pa'i byang chub sems dpa' de byang chub sems dpa'i sa drug pa la 'jug ste/de chos mnyam pa nyid bcus 'jug go/ /bcu gang zhe na 'di lta ste/ chos thams cad mtshan ma med pa mnyam pa nyid dang zhes bya ba la de'i don bstan pa ni/chos thams cad la don dam par yod pa'i ngo bo nyid kyi mtshan ma med pa'i mnyam pa nyid dang zhes bya ba la don dam pa'i ngo bo nyid kyang yongs su grub pa'i chos kyi dbyings so/ /de yang rnam par rtog pa can gyi shes pas mtshan mar bya bar mi nus pas te/rnam par mi rtog pa'i ye shes kyi spyod yul yin pa'i phyir ro/ /de bas na de'i ngo bo nyid kyis chos thams cad mtshan ma med pa'o zhes chos thams cad mnyam pa nyid du rig par bya'o/ /de'i yul can ye shes kyang de bzhin du 'dod do/ /gzhan dag kyang de bzhin du rig par bya'o//chos thams cad mtshan nyid med par mnyam pa nyid dang zhes bya ba'i don bstan pa ni/ brjod du med par mngon par 'du byed par snang ba mtshan nyid med pa'i mnyam pa nyid dang zhes bya ba la/ brjod du med par snang pa ni brjod du med pa'i ngo bo'o/ /mngon par 'du byed par snang ba ni/rnam par rtog pa'i gzung ba'i ngo bo'o/ /de dag gi mtshan nyid ni/ yongs su ma grub pa'i phyir shin tu med pa nyid de/ mtshan nyid des chos thams cad mtshan nyid med pa'o/ /de dag med pa'i phyir rang gi ngo bor skye pa med pa nyid ni/ de nyid mtshan nyid med pas bdag nyid ma skyes pa'i mnyam pa nyid ces bya'o//chos thams cad rgyu las ma skyes pa'i phyir zhes bya ba ni ma skyes pa'i mnyam pa nyid ces bya ste/ bdag nyid kyi rgyu las ma skyes pa'i phyir 'gag pa med pa'o/ /ma skyes pa dang mi 'gag pa ni gzod ma nas shin tu zhi ba'i mnyam pa nyid do//don dam pa'i dngos po de nyid kyi gzung bar bya ba yang dag pa'i ye shes spros pa dang bral ba'i gzung bar gyur pas chos thams cad spros pa med pa'i rnam par gyur pa'i phyir/ chos thams cad spros pa med pa'i mnyam pa nyid ces bya'o/ /chos thams cad blang ba dang dor ba ste/'dzin pa dang gtong ba dang bral ba'i phyir mngon par 'du byed pa dang bral ba'i mnyam pa nyid de/ 'gro ba gzhan du phung po'i khyad par gzhan dor ba dang / len pa med pa'i phyir chos thams cad bya ba dang bral ba nyid do/ /don dam par zhi ba'i rnam pa yin pa'i phyir blang ba dang dor ba'i mngon par 'du byed pa dang bral ba nyid ces bya'o//de nyid ni don dam par ngo bo nyid kyis nyon mongs pa dang / sdug bsngal gyis kun nas nyon mongs pa dang bral ba'i phyir chos thams cad ni de dang bral ba'o zhes pas dben pa'i khyad par mnyam pa nyid ces bya'o/ /rnam par brtags pa'i ngo bo nyid ni dngos po dang dngos po med pa las grol ba nyid kyi mtshan nyid kyi phyir/sgyu ma lta bu'i mnyam pa nyid ni/ sprul pa lta bu'o bar gyi mnyam pa nyid ces bya'o/ /de nyid ni rnam par mi rtog pa'i ye shes kyi spyod yul dngos po dang dngos po med pa'i mtshan nyid ni gnyis su med pa'i mnyam pa nyid ces bya ste/de ltar de dag gi don rnam par phye ba yin no/ /gnas pa de la gnas pa de sems can rnam la snying rje rgyas par 'gyur ro/ /'dir mdo'i tshig ni/ de de ltar chos thams cad kyi rang bzhin la de ltar rtog pa na/ de de bas kyang shas cher snying rje chen po sngon du 'gro ba dang zhes bya ba'o//byang chub la 'dun pa drag po skyes shing zhes bya ba'i mdo'i tshig ni/ gang yang snying rje chen po yongs su rdzogs par bya ba'i phyir zhes bya ba yin no/ /'byung ba dang 'jig pa zhes bya ba la de'i mdo'i tshig ni 'jig rten 'byung ba dang 'jig pa la rnam par lta'o zhes bya ba yin te/de la 'byung ba ni nag po'i phyogs te/ rten cing 'brel par 'byung ba ma rig pa la sogs pa rim gyis 'byung ba'o/ /'jig pa ni dkar po'i phyogs te/ rten cing 'brel bar 'byung ba la brten pa'i ma rig pa 'gag pa la sogs pa'i rim gyis rab tu phye ba'o//rnam pa thams cad dpyod par byed cing zhes bya bas ni rnam pa bcu pos so/ /rten cing 'brel bar 'byung ba legs par dpyod pa'i zhes bya ba la des dpyod par byed cing zhes bya ba ni rtog pa'o/ /des na smras pa/rab tu shes so zhes bya ba'o/ /de yang rten cing 'brel par 'byung ba la rtog pa rnam pa bcus rtog pa ni mdo ji lta ba bzhin du rgya cher rig par bya'o/ /rten cing 'brel par 'byung ba shes pa la brten nas/ de'i rnam par thar pa'i sgo gsum skye'o zhes bya ba ni rten cing 'brel par 'byung ba la brten nas rnam pa bcus rtog par dpyod pa ni skye bar 'gyur ro zhes bya ba'o//rnam par thar pa gsum po bshad pa ni ming tsam ste stong pa nyid la sogs pa'o/ /gzhi des kyang zhes bya ba ni/ stong pa nyid la sogs pa ni rnam par thar pa thob pas bdag dang gzhan gyi 'du shes dang /byed pa po'i 'du shes dang / tshor ba po'i 'du shes dang / dngos po dang / dngos po med pa'i 'du shes mi 'byung ngo / /'dir mdo'i tshig ni/ de rnam par thar pa'i sgo gsum po 'di dag bsgoms pas bdag dang gzhan gyi 'du shes dang bral ba dang /byed pa po dang / tshor ba po'i 'du shes dang bral ba dang / yod pa dang med pa'i 'du shes dang bral ba zhes bya ba la/ bdag dang gzhan gyi 'dus shes bsdus pa ni/ byed pa po dang tshor ba po zhes brjod pa yin no/ /de ltar don dam pa la mkhas pa dang / sems can la lta ba de ni zhes bya ba'i mdo'i tshig ni/ de byang chub kyi yan lag yongs su ma grub pa rnams yongs su grub par bya ba'i phyir snying rje chen po sngon du btang ste/ de bas kyang shas cher shin tu brtson par byed do zhes bya ba yin no/ /nyon mongs pa dang ldan pa dang / rkyen tshogs pa las ni 'byung la zhes bya ba'i mdo'i tshig ni/de 'di snyam du sems te/ 'du ba las ni 'dus byas 'byung ngo / /'bral ba las ni 'dus byas mi 'byung ngo / /tshogs pa las ni 'dus byas 'byung ngo / /ma tshogs pa las ni mi 'byung ngo zhes bya ba ni nyon mongs pa'i kun du sbyor ba'i rkyen tshogs pa yod na ni/'byung bar 'gyur la med na ni 'byung bar mi 'gyur ro zhes bya ba'o/ /de'i phyir smras pa/ rkyen ma tshogs pa las ni mi 'byung bas de bas na bdag gis zhes bya ba la sogs pa la/ de dag gi mdo'i tshig ni/ de ltar bdag gis 'dus byas nyes pa'i skyon chags pa de lta bu 'di shes par byas la 'du ba 'di dang /tshogs pa 'di'i rgyun bcad par yang bya zhing / sems can rnams yongs su smin par bya ba'i phyir dang / 'du byed rnams shin tu zhi bar bya ba thob par yang mi bya'o snyam mo zhes bya ba'o/ bdag nyid bsrung ba'i phyir zhes bya ba ni bdag nyid nyon mongs pa med par bya ba'i phyir zhes bya ba'i don to/ /'dus byas rnam par zhi bar mi bya'o zhes bya ba ni sems can yongs su gzung ba'i phyir ro/ /de ltar ye shes dang snying rje dang ldan pa de ni zhes bya ba la/ de'i mdo ni/ kye rgyal ba'i sras dag de de ltar 'du byed du gyur pa nyes pa mang po'i skyon chags shing ngo bo nyid med pa dang /ma skyes pa dang / mi 'gag par so sor rtog pa ni/ snying rje chen po mngon par bsgrub pa dang / sems can gyi tshogs yongs su mi gtong bas chags pa med pa'i ye shes la mngon par phyogs pa zhes bya ba shes rab kyi pha rol tu phyin pa la gnas pa snang ba'i tshul gyis mngon sum du 'gyur ro zhes bya ba yin no//chags pa med pa'i don bstan pa'i phyir/ des na de 'jig rten pa'i spyod pa thams cad la chags pa med par spyod de zhes bya ba la/mngon par zhen pa med pa'i sbyor ba ni/ chags pa med pa'o/ /'jig rten pa'i spyod pa la spyod de zhes bya ba ni/ rang gi don gyi spyod pa bstan pa'i phyir ro/ /gnas pa de la yang sa bdun pa la zhes bya ba la sogs pa la/ rnon po zhes bya ba ni chen po yin pa'i phyir te/sbyor ba las byung ba'i spyod pa mthar thug par gyur pa zhes bya ba'i tha tshig go/ /de'i ngo po'i bzod pas bsdus par rig par bya'o/ /de yang mdo las/ de ye shes de lta bu dang ldan zhing shes rab kyi pha rol tu phyin pa la gnas pa snang bar gyur nas/byang chub kyi yan lag sdud pa'i rkyen rnams kyang nye bar sgrub la 'dus byas dang 'grogs par yang mi gnas so zhes bstan pa yin no/ /mdo 'di'i don bstan pa ni/ de chags pa med pa'i ye shes la zhes bya ba la sogs pa la/ 'dus byas kyi ngo bo nyid kyi byang chub kyi phyogs kyi chos rnams la rab tu sbyor bar yang byed la/'dus byas kyi skyon gyis kyang mi gos pa zhes bya ba'i don to/ /rab tu zhi ba la yang zhi bar lta la/ de la yang mi gnas so zhes bya ba la/ 'di'i mdo'i tshig ni/ 'du byed rnams la rang bzhin gyis zhi bar yang so sor rtog la/ byang chub kyi yan lag yongs su ma rdzogs pa'i phyir/de la yang mi gnas te zhes bya ba yin no/ /de nyid kyi rjes thogs su de'i tshig bstan pa'i mdo ni/ byang chub sems dpa'i sa mngon du gyur pa 'di la gnas pa'i zhes bya ba nas thabs dang shes rab dang ldan pa'i bsam pa nyid yongs su rdzogs par 'gyur te zhes bya ba'i bar yin no//de dag bsdus pa'i don bstan pa'i phyir/ de ltar thabs dang / shes rab kyi ye shes dang zhes bya ba la sogs pa nas/ smon pa med pa dang / mtshan ma med pa'i ting nge 'dzin la yang de dang 'dra bar rig par bya'o zhes bya ba'i bar du'o/ /de thob pas sngar bstan pa'i bsam pa'i gtso bo yang thob par bstan par bya ba'i phyir/de dag mngon du gyur pas na mi phyed pa'i bsam pa can du 'gyur ro zhes bstan pa yin no/ /mi 'phrogs par 'gyur ba nyid ni mu stegs can dang bdud thams cad kyis kyang zhes bya ba la sogs pa gzhung nyid kyis bshad pa yin no/ rnam pa thams cad du zhes bya ba ni dbye ba thams cad kyis zhes bya ba'i tha tshig go//snga ma bzhin no zhes bya ba ni sangs rgyas mthong ba la sogs pa ni sngar bstan pa dang 'dra'o/ /dpe'i khyad par bstan pa ni/ dper na zhes bya ba la sogs pas mdo'i rjes su 'brangs nas shes par bya'o/ /dpe gnyis pas khyad par bstan pa ni/ dper na zla ba'i 'od ni zhes bya ba la sogs pa la/ mdor bsdus pa'i don bstan pa ni/ chos mnyam pa nyid yongs su 'grub pa la 'jug pa dang zhes bya ba la sogs pa'o/ /sa'i nges pa'i tshig ni mngon du gyur pa'i don gyis bstan pa'i phyir/ shes rab kyi pha rol tu phyin pa la gnas pa 'di la/ sa la chags pa med pa'i ye shes mngon du gyur pa'i phyir/ mngon du gyur pa zhes brjod de/ lhag pa'i shes rab kyi gnas pa gsum pa'o// //lam gzhan brtsams pa'i khyad par bcu thob par 'gyur ro zhes bya bar sbyar bar bya'o/ /mdo las de thabs dang shes rab kyis bsgrubs pa'i lam gzhan brtsams pa'i khyad par bcus gnon to zhes gsungs so//de nas thabs dang shes rab kyis nye bar bsgrubs pa zhes bya ba smras te/ sems can thams cad dang thun mong ma yin pa'i 'jig rten pa ni cha gcig gis so/ /'jig rten thams cad dang thun mong ma yin pa ni cha gzhan dag gis kyang ngo //de dag ni rnam pa gnyis kas rab tu phye bar gyur pa yin no/ /mdo 'di nyid las 'byung ba bzhin du zhes bya ba la/ mdo'i tshig ni kye rgyal ba'i sras dag byang chub sems dpa' sa drug pa la lam shin tu yongs su rdzogs pas byang chub sems dpa'i de byang chub sems dpa'i sa bdun pa gnon te/de thabs dang shes rab kyis mngon par bsgrubs pa'i lam gzhan brtsams pa'i khyad par bcus gnon te/ bcu gang zhe na/ 'di lta ste/ stong pa nyid dang / mtshan ma med pa dang / smon pa med pa shin tu bsgoms pa'i yid dang ldan la/ bsod nams dang ye shes kyi tshogs chen po bsags pa yang /sogs pa yin zhes bya ba de'i dbang du byas nas bstan pa ni 'jig rten gyi phun sum tshogs pa 'grub par byed pa'i bsod nams yongs su 'dzin pa las brtsams pa dang zhes bya ba ni bsod nams kyi tshogs gzhan dag ni stong pa nyid dang / 'gal ba med pas thabs zhes bya ba 'di ma yin no//sems can rnams la phan pa dang / bde ba'i bsam pa las brtsams pa dang zhes bya ba'i mdo'i tshig ni/ bdag med pa dang / srog med pa dang / sems can med pa dang / gang zag med pa'i chos la yang 'jug la/ tshad med pa bzhi mngon par sgrub pa yang mi gtong ba yin zhes bya ba yin te/shes rab kyis 'dus byas rnams stong par mthong ba la gnas par 'gyur ro/ /snying rjes ni sems can rnams la tshad med pas gnas par 'gyur ro zhes bya ba'i don to/ /bsod nams kyi chos kyi tshogs pha rol tu phyin pa mngon par 'du bya ba yang mngon par 'du byed la/chos gang la yang mngon par zhen pa med pa yin zhes bya ba'i mdo'i don bstan pa'i phyir/ byang chub kyi phyir bsod nams kyi tshogs byang chub kyi phyogs dang mthun pa'i chos gong nas gong du yang skye ba las brtsams pa dang zhes bya ba la byang chub kyi phyir bsod nams kyi tshogs kyis byang chub kyi phyogs dang mthun pa'i chos rnams gong nas gong du gong ma'i mthar thug pa'i mngon par 'du byed pa zhes bya ba ste/rtag tu dge ba bsgom pa'i sbyor bas zhes bya ba'o/ /de lta na yang chos gang la yang mngon par zhen par mi byed do zhes bya ba'o/ /mdo'i tshig ni/ khams gsum pa thams cad las dben par gyur pa yang thob la/ khams gsum pa'i rgyan rnam par bsgrub pa mngon par bsgrub pa yang mngon par bsgrub pa yin zhes bya ba'i don ni 'di yin te/ nyan thos dang thun mong ma yin pa las brtsams pa dang zhes bya ba la nyan thos rnams ni bsam pa dang /sbyor ba gnyis kas mya ngan las 'das pa 'dod pa nyid kyi phyir khams gsum las dben pa nyid thob par 'gyur gyi khams gsum pa'i rgyan rnam par sgrub pa mngon par sgrub pa yong ma yin pa'o/ /byang chub sems dpa' rnams ni mya ngan las 'das par gtogs pa'i bsam pa nyid dang /'khor bar gtogs pa'i sbyor bas dben par gyur pa thob kyang rgyan rnam par sgrub pa yang mngon par sgrub par byed pa yin no/ /mdo'i tshig ni/ nyon mongs pa 'bar ba thams cad dang bral bas shin tu zhi zhing nye bar zhi ba yang yin la/ sems can thams cad kyi 'dod chags dang / zhe sdang dang / gti mug gi nyon mongs pa 'bar ba rab tu zhi bar bya ba yang mngon par sgrub pa yin zhes bya ba yin no/ /de'i don ni/ rang sangs rgyas dang thun mong ma yin pa las brtsams pa dang zhes bya ba la rang sangs rgyas rnams kyang nyon mongs pa rnams zhi zhing rab tu zhi ba'i phyir gcig pur gnas pa yin pa'i phyir sems can rnams kyi nyon mongs pa rab tu 'bar ba nye bar zhi bar bya ba'i phyir mngon par sgrub pa yang ma yin te/tshogs kyi nang du gnas pas 'jigs pa'i phyir ro/ /yang byang chub sems dpa' rnams ni rnam pa gnyi ga phun sum tshogs pa yin no/ /mdo las/ sgyu ma dang smig rgyu dang zhes bya ba nas gnyis su med par yang khong du chud la/las dang bya ba rnam par phye ba tshad med pa'i bsam pa yang mngon par sgrub pa yin zhes bya ba'i don ni sems can gyi khams las brtsams pa dang zhes bya ba ste/ sems can thams cad sgyu ma'i rjes su 'gro ba dang / 'jig rten gyi khams thams cad kyang de ltar rab tu shes pa'o//de lta na yang bya ba'i dbye ba tshad med pa dag kyang mngon par sgrub pa yin te/ las sna tshogs mngon par 'du byed pa dang ldan pa'i phyir ro/ /zhing gi tha gru nam mkha' dang mnyam par shin tu bsgoms pa'i yid dang yang ldan la/sangs rgyas kyi zhing gi rgyan rnam par bsgrub pa mngon par bsgrub pa yang mngon par bsgrub pa yin zhes bya ba'i mdo'i don ni/ 'jig rten gyi khams las brtsams pa dang zhes bya ba'o/ /sangs rgyas kyi zhing rnams nam mkha' dang 'dra bar yang shes la/ de lta na yang sangs rgyas kyi zhing rnams yongs su sbyang ba'i phyir las rnam pa sna tshogs kyang mngon par 'du byed pa'o zhes bya ba'i don to//'di dag gi mdo'i don ni/ sangs rgyas thams cad chos kyi sku'i rang bzhin du yang 'jug la/ gzugs kyi sku mtshan dang dpe byad bzang po'i rgyan rnam par sgrub pa yang mngon par bsgrub pa yin/de bzhin gshegs pa'i gsung brjod du med cing sgra dbyangs dang bral ba ste/ rang bzhin gyis zhi bar yang mos la/ gsung dbyangs yan lag thams cad rnam par phye bas rnam par dag pa'i rgyan mngon par sgrub pa yang mngon par sgrub pa yin/ sangs rgyas bcom ldan 'das rnams kyis dus gsum mtshan nyid gcig tu thugs su chud pa la yang 'jug la/sems can gyi bsam pa brjod pa'i phyir/ mtshan nyid la rtog pa bgrang ba tha dad pa brjod pa la yang 'jug pa yin te zhes bya ba yin no/ /de'i don ni 'di yin te/ de bzhin gshegs pa'i sku dang gsung dang thugs shes pa las brtsams pa ste zhes bya ba'o//de bzhin gshegs pa rnams ni nam mkha'i ngo bo nyid dang / rang bzhin gyis chos nyid kyi ngo bo nyid kyis chos kyi skur ji lta ba bzhin du rab tu shes so zhes bya ba ste/ gzugs med pa'i phyir ro/ /de lta na yang gzugs kyi sku 'thob par byed pa'i phrin las rnam pa sna tshogs la mngon par 'du byed pa yang mdzad do//de bzhin gshegs pa rnams kyi gsung brjod du med cing sgra dbyangs dang bral ba rang bzhin gyis zhi ba'o zhes ji lta ba bzhin du brjod do/ /de bzhin gshegs pa'i gsung gi gsang ba'i mdo las/de bzhin gshegs pa la ni yi ge gcig kyang brjod pa mi mnga'o zhes bya ba'i mdo'i rjes su 'brangs nas so/ /de lta na yang de bzhin gshegs pa'i gsung dbyangs yan lag drug cu dang ldan pa thob par 'gyur ba'i phrin las rnam pa sna tshogs kyang mngon par 'du mdzad do zhes bya ba yin no//mtshan nyid gcig par zhes bya ba'i tshig ni don dam par mtshan nyid gcig pas mtshan nyid gcig par dus gsum thugs su chud pa la 'jug pa'o/ /de lta na yang bskal pa du ma mang por mtshan nyid sna tshogs dang grangs sna tshogs kyi sgo nas sgom pa la yang 'jug par mdzad de sems can gyi bsam pa la ltos pa'i phyir ro//de de dag dang ldan pas zhes bya ba ni ji skad bstan pa'i lam gzhan gyi khyad par las brtsams pa dang ldan pa'o/ /de las gong du byang chub sems dpa'i sa bdun pa la gnas pa'i byang chub sems dpa' de sems can gyi khams tshad med pa la yang 'jug pa zhes bya ba nas brtsams nas/sangs rgyas bcom ldan 'das kyi theg pa chen po yang dag par sgrub pa la 'jug pa tshad med pa yang 'jug go zhes bya ba'i gzhung mdor bstan pa ni de bzhin gshegs pa'i yul tshad med grangs med par khong du chud par 'gyur ro zhes bstan pa yin no/ /de las gong du mdor bstan pa ni de 'di snyam du sems te/de bzhin gshegs pa dgra bcom pa yang dag par rdzogs pa'i sangs rgyas rnams kyi yul ni tshad med pa ste/ de ni bskal pa khru bye ba khrag khrig phrag bcu pa ji snyed pa de snyed kyis bgrang bar sla ba ma yin te/ sangs rgyas bcom ldan 'das rnams kyi yul de bdag gis yang dag par bskyed par bya'o//rtog pa med pa dang / rnam par rtog pa med pa dang / lhun gyis grub par yongs su rdzogs par bya'o zhes bya ba'i mdo'i don bstan pa'i phyir/ de yang dag par bskyed pa'i phyir yang lhun gyis grub cing mtshan ma med pa dang / rtog pa med pa dang / rnam par rtog pa med pas sangs rgyas kyi yul tshad med pa yang dag par bskyed par mthong nas zhes bya ba yin no/ /de'i rjes la de ltar legs par so sor brtags pa'i ye shes dang mngon par shes pa dang ldan zhing zhes bya ba nas/ spyod lam thams cad la gnas shing 'du shes yid la bya ba de lta bu dag dang mi 'bral ba yin no zhes bya ba'i mdo'i don bstan pa ni/rgyun mi 'chad pa dang / bar chad med par sbyor bar byed do zhes bya ba nas/ gnas skabs thams cad na gnas pa de lam dang bral bar mi 'gyur ro zhes bya ba'i bar yin no/ /yang de'i rjes la mdo'i tshig bstan pa ni/ de sems bskyed pa re re la yang byang chub sems dpa'i pha rol tu phyin pa bcu yang dag par bsgrub pa yang dag par 'grub po zhes bya ba nas/mdor na byang chub kyi yan lag gi chos thams cad skad cig re re la yang yongs su rdzogs par 'gyur ro zhes bya ba'i bar yin no/ /de'i don bstan pa ni/ de ni sems kyi skad cig re re la pha rol tu phyin pa bcu la sogs pa byang chub kyi phyogs dang mthun pa'i chos thams cad khyad par du 'phags pa yongs su rdzogs par 'gyur ro zhes bya ba yin no/ /de'i rjes la yang mdo'i tshig bstan pa ni/ de skad ces smras pa dang / byang chub sems dpa' rnam par grol ba'i zla bas byang chub sems dpa' rdo rje snying po la 'di skad ces smras so zhes bya ba nas/byang chub sems dpa'i sa bdun pa 'di dag la ni sangs rgyas kyi chos thams cad yang dag par skyes pas byang chub kyi yan lag rnams skad cig re re la yongs su rdzogs par 'gyur ro zhes bya ba'o/ /'di'i don bstan pa'i phyir/gnas pa gzhan dag la ni de lta ma yin te zhes bya ba nas/ mdo'i rjes su 'brangs nas shes par bya ste/ gnas pa dang po la ni smon lam gyis yongs su bsdus pa'i byang chub kyi chos rnams la kun du spyod do/ /gnas pa gnyis pa la ni tshul khrims 'chal pa'i dri ma dang bral ba'i phyir dang /de'i gnyen po'i phyogs kyi dge ba'i rtsa ba las kyi lam gyis bsdus pa nyid do/ /gnas pa gsum pa la ni smon lam rnams rnam par 'phel zhing mang du thos pa tshol zhing / bsam gtan dang / ting nge 'dzin la brten nas chos kyi snang bas rab tu phye ba la kun du spyod pa'o//gnas pa bzhi pa la ni byang chub kyi phyogs kyi chos rnams bsgom pa'i rnam pa'o/ /gnas pa lnga pa la ni 'jig rten pa'i bzo'i las kyi gnas kha na ma tho ba med pa rnams kyis yongs su bsdus pa'o/ /gnas pa drug pa la ni rten cing 'brel par 'byung ba zab mo la so sor rtog pa la 'jug par gtogs pa'o//de lta bu'i tshul gyis rnam pa re re nas yongs su bcad pas sangs rgyas kyi chos rnams yongs su rdzogs par 'gyur ro/ /yang gnas pa bdun pa 'di la ni khyad par du sangs rgyas kyi chos thams cad yang dag par bskyed pas byang chub kyi phyogs rnams yongs su rdzogs par 'gyur bas lhun gyis grub cing mtshan ma dang bral ba rtog pa dang /rnam par rtog pa dang bral ba'i phyir ro/ /de'i phyir de nyid la de dag thams cad yongs su rdzogs par 'gyur ro zhes gsal bar bstan pa yin no/ /de dag gi rgyu bstan pa ni mdo las/ de ci'i phyir zhe na/kye rgyal ba'i sras dag byang chub sems dpa' rnams kyis 'di ni sbyor ba las byung ba'i spyod pa yongs su rdzogs par byed pas ye shes dang / mngon par shes pa'i spyod pa gnon pa'i phyir ro zhes bya ba yin no/ /'dir yang de'i rgyu bstan pa'i phyir/ gnas pa 'di ni byang chub sems dpa'i sbyor ba las byung ba'i spyod pa yongs su rdzogs pas bsdus pa dang /ye shes dang / mngon par shes pa dang / spyod pa rnam par dag pas bsdus pa'i gnas pa brgyad pa la 'jug pa yin te zhes bya ba yin no/ /de lta bas na de'i phyir 'di ni yongs su rdzogs par 'gyur bar bstan pa yin no/ /gnas pa brgyad pa la 'jug pa bstan pa'i phyir 'di ltar byang chub sems dpa' zhes bya ba la sogs pa la/gcig tu nges par zhes bya ba ni dri ma rnam pa bzhi rab tu spangs pas lhun gyis grub par 'gyur ba'i phyir ro/ de dag spong ba ni nge nyid nas ston par 'gyur te/ byang chub sems dpa' rnam par grol ba'i zla bas byang chub sems dpa' rdo rje snying po la 'di skad ces smras so zhes bya ba nas brtsams nas dpe dang bcas par bstan pas 'di dag kho nas 'gro ba thams cad du rgyu zhing kun nas nyon mongs pa'i nyes pa rnams kyang rab tu shes te/shin tu 'das pas de dag gis gos par gyur ces mi bya'o zhes bya ba'i bar du'o//'di dag gi don ni 'di yin te/ gnas pa bdun po 'di dag ni 'dren pa ma yin te/ rnam grangs kyis kun nas nyon mongs pa dang / rnam par dag pa zhes brjod do/ /rnam par dag pa nyid bstan pa'i phyir/ gnas pa rnam par dag pa'i sngon du 'gro ba'i phyir ni kun nas nyon mongs can yang ma yin la zhes bya ba ni gnas pa rnam par dag pa'i rgyu yin pa'i phyir rnam par dag pa zhes bstan to//de ma thob pa'i phyir zhes bya ba ni de'i ngo bo ma yin pa'o zhes bya ba'i don to/ /kun nas nyon mongs pa can gyi spyod par gtogs par brjod do zhes bya ba ni rnam par dag par gnas pa'i ngo bo ma yin pa'o zhes bya ba'o//'di'i mdo ni/ sa bdun pa 'di la gnas pa'i byang chub sems dpa' ni 'dod chags la sogs pa'i nyon mongs pa thams cad las yang dag par 'das te zhes bya ba nas/ de bzhin gshegs pa'i ye shes mngon par 'dod pa dang /bsam pa yongs su ma rdzogs pas nyon mongs pa med pa zhes kyang mi bya'o zhes bya ba'i bar du ste/ de'i don ni/ gnas pa de la de'i 'dod chags la sogs pa nyon mongs pa thams cad spong bar 'gyur te zhes bya ba la sogs pa nas/ sangs rgyas kyi ye shes 'dod pa'i phyir ro zhes bya ba'i bar du'o/ /de la mdo ni/ byang chub sems dpa'i sa bdun pa 'di la gnas pa'i byang chub sems dpa' de ni zhes bya ba nas lhag pa'i bsam pa yongs su dag pa'i yid kyi las dang ldan pa yin ni zhes bya ba'i bar yin te/ de'i rnam par dbye ba bstan pa'o//de ltar gyur pa de ni lhag pa'i bsam pa yongs su dag cing lus dang ngag dang yid kyi las tshad med par 'jug go zhes bya ba'o/ /de'i rjes la/ de mi dge ba'i las kyi lam gang dag de bzhin gshegs pas smad pa de las thams cad kyi thams cad du yang lhag par 'das pa yin zhes bya ba nas/slob dpon du lhag pa'i grags pa yin te/ de dag dang bsam pa'am sbyor bas mnyam pa su yang med do zhes bya ba'i bar 'di dag gi don bstan pa ni mdo las bstan pa'i rjes su 'brangs pa nyid kyis te/ de las gang dag de bzhin gshegs pas ma bsngags pa rnams ni snga ma bzhin no zhes bya ba nas/lhag pa'i bsam pa dang sbyor ba mtshungs pa 'ga' yang med do zhes bya ba yin no/ /de'i rjes la mdo bstan pa ni/ bsam gtan rnams dang / ting nge 'dzin rnams dang / snyoms par 'jug pa rnams dang mngon par shes pa rnams dang /rnam par thar pa rnams gang dag yin pa de dag kyang bsgom pa'i tshul gyis thams cad kyi thams cad du de la mngon du 'gyur ro/ /'on kyang de tsam gyis rnam par smin pa yongs su grub pa ni ma yin no zhes bya ba la/ de'i don bstan pa ni/ bsam gtan la sogs pa byang chub kyi phyogs dang mthun pa'i chos zhes bya ba nas/ gnas pa brgyad pa la ji lta ba bzhin du rnam par smin pa la gnas pa ni ma yin no zhes bya ba yin no/ /de'i rjes la 'di ltar byang chub sems dpa'i sa bdun pa 'di la gnas pa'i zhes bya ba nas/ ting nge 'dzin dang / sa yongs su sbyong bar byed pa 'bum phrag bcu tshang ba la snyoms par 'jug go zhes bya ba'i mdo'i don bstan pa ni/ de ltar zhugs pa de ni byang chub sems dpa'i ting nge 'dzin zhes bya ba nas/ 'bum phrag bcu mngon par bsgrub po zhes bya ba'i bar yin no/ /de'i rjes la mdos bstan pa ni/de thabs dang shes rab kyis yongs su sbyangs pa'i zhes bya ba nas/ rnam par dpyad pa'i sa yang mngon du gyur pa yin no zhes bya ba yin no/ /de'i don nye bar bstan par bya ste/ de dag thob pas nyan thos dang rang sangs rgyas kyi ting nge 'dzin gyi yul las yang dag par 'das par 'gyur ro zhes bya ba la/de dag gis ni bsam gtan gyi stobs dang ting nge 'dzin rnams kyi ming yang mi shes na snyoms par 'jug pa dang ldan pa lta smos kyang ci dgos zhes bya ba yin no/ /yang mdo las/ sa bdun pa 'di la gnas pa'i byang chub sems dpa' de'i lus kyi las tshad med pa mtshan ma dang bral ba 'byung zhes bya ba nas/yid kyi las tshad med pa mtshan ma dang bral ba shin tu yongs su sbyangs pa'i mi skye ba'i chos la bzod pas snang bar gyur pa 'byung ngo zhes bya ba'i bar gyi mdo'i don bstan pa ni legs par yongs su sbyangs pas na shin tu yongs su sbyangs pa zhes bya'o//tshad med pa nyid kyi phyir shes par dka' ba yin no/ /mtshan ma dang bral ba'i phyir rnam par rtog pa'i kun du rgyu ba thams cad dang bral ba'o zhes bya ba bstan pa yin no/ /rgyal po'i bu'i dpes rang gi blos rnam par dpyod pa'i phyir byas nas/ lus dang ngag dang yid kyi las zab cing dben la rgyu ba med pa yang thob pa yin te zhes bstan nas/gong du khyad par du 'phags pa yongs su tshol ba'i brtson pa yang yongs su mi gtong ngo zhes gsungs pa'i mdo'i don bstan pa ni/ gong du khyad par yongs su tshol ba la mngon par brtson pa yang mi gtong ste/ byang chub yongs su rdzogs par bya ba'i phyir zhes bya ba la/ sngar nas kyang nyan thos dang rang sangs rgyas kyi sa las yang dag par 'das pa yod na yang / de las gzhan pa'i gnas pa drug po sangs rgyas kyi chos rnams la dmigs pa'i phyir gnas pa 'di la ni rang gi blos yul du shes pa la gnas pa'o zhes bya ba ste/sngar nyid du de bzhin gshegs pa'i rigs su skyes pa nyid kyis nyan thos dang rang sangs rgyas kyi sa las shin tu 'das pa'i phyir ro/ /da ni blo yongs su smin par rtogs par byas nas de dag gi yul las 'das pa yin no zhes bya bar dper mtshon pa'i phyir/kye rgyal ba'i sras dag byang chub sems dpa'i sa gang yan chad byang chub sems dpa' 'gog pa la snyoms par 'jug ces bya ba nas/ kye rgyal ba'i sras byang chub sems dpa' yang dag pa'i mtha' la gnas pas kyang gnas la 'gog pa yang mngon sum du mi byed do zhes bya ba'i mdo'i don bstan pa ni/gnas pa drug pa la ni zhes bya ba la sogs pa la/ gnas pa drug pa la ni mthar gyis gnas pa'i snyoms par 'jug pa'i rim gyis 'gog pa la snyoms par 'jug par 'gyur ro/ /'di la ni skad cig re re la yang snyoms par 'jug par 'gyur ro zhes bya ba yin te/sems kyi skad cig gcig la snyoms par 'jug par byed ces bya ba'i tha tshig go/ /de 'dod par gyur na 'dod pa na kun du spyod pa'i sems kyi rjes thogs la 'gog pa la snyoms par 'jug par byed do zhes bya ba nas/ 'gog pa la snyoms par zhugs pa las langs nas de yongs su shes pa la mkhas pa la sogs pa yang go bar bya'o//'gog pa yang mngon sum du mi byed ces bya ba ni phyir mi 'ong ba dang / dgra bcom pa bzhin du mngon sum du mi byed do zhes bya ba'i don to/ /rmad du byung ba'i chos bsam gyis mi khyab pa zhes bya ba ni rigs pas dpyad du med pa'i tshig dang /thabs la mkhas pa'i tshul gyis bsdus pa'i phyir ro/ /de'i phyir mdo las gru bo che'i dpes bstan pas ji skad bstan pa'i thabs kyi ye shes kyis mngon par bsgrubs pa la brten nas/ mdo las gsungs pa'i sems can thams cad dang thun mong ma yin pa'i byang chub sems dpa'i spyod pa rnam pa bcu po 'jig rten pa'i spyod pa ltar snang yang de'i bdag nyid ma yin pa ni mdo ji lta ba bzhin du mdor bsdus pa'i don rnam pa bcu bstan te/tshig dang yi ge ni mdo nas gzung bar bya'o/ /don 'di bstan to zhes shes par bya ba'i phyir/ 'khor ba'i sgo yang ston la//mya ngan las 'das pa la yang gnas pa yin zhes bya ba'i don bstan pa ni/ bsod nams bya ba las brtsams pa dang zhes bya bas bstan pa yin te/ 'khor ba na rnam par smin pa'i 'bras bu yang dag par sgrub par byed pa'i bsod nams kyi las kyang byed la/ de lta na yang mya ngan las 'das par gtogs pa'i bsam pa yang mi gtong bar 'gyur ro//'khor mang pos kun nas bskor bar yang snang la/ rtag par rgyun du shin tu dben pa'i sems thob pa yang yin zhes bya ba'i mdo'i don ni/ chung ma dang 'khor yongs su 'dzin pa dang zhes bya ba yin no/ / smon lam gyi dbang gis khams gsum du skye ba yang mngon par sgrub la/ 'jig rten gyi nyes pas kyang mi gos pa yin zhes bya ba'i don bstan pa ni/ mngon par 'grub pa'i khyad par 'dod pa yang dag par brtsams pa dang zhes bya ba yin no zhi zhing rab tu zhi ba yang yin la/ thabs kyis kyang rab tu 'bar te 'bar yang 'tshig par mi 'gyur ba yin zhes bya ba'i don ni/rnam par thar pa gsum la gnas pa dang zhes bya ba yin no/ /sangs rgyas kyi ye shes la yang 'jug la/ nyan thos dang rang sangs rgyas kyi sa las kyang ldog pa yin zhes bya ba'i don bstan pa ni/ theg pa dman pa la mos pa thabs kyis 'dul ba dang zhes bya ba yin no//sangs rgyas kyi yul gyi mdzod du yang son la/ bdud kyi yul na 'dug par snang ba yang yin zhes bya ba'i don ni/ 'dod pa yongs su spyad pa dang zhes bya ba yin no/ /bdud bzhi'i yul las kyang yang dag par 'das la/ bdud kyi spyod yul yang ston pa yin zhes bya ba'i don ni/'dod pa'i khyad par don du gnyer ba dang zhes bya ba yin no/ /mu stegs kyi gnas thams cad na yang 'dug par snang la/ sangs rgyas kyi mu stegs kyi gnas mi 'dor ba'i bsam pa dang ldan pa yang yin zhes bya ba'i don ni/ mu stegs can bzlog pa dang zhes bya ba'o//'jig rten gyi bya ba thams cad dang ldan par yang snang la/ 'jig rten las 'das pa'i chos kyi tshul la yang dag par gzhol ba yin zhes bya ba'i don bstan pa ni/ gzhan gyi sems dang mthun par 'jug pa dang zhes bya ba yin no/ /lha dang / klu dang / gnod sbyin dang zhes bya ba nas/tshangs pa dang / 'jig rten skyong ba thams cad las lhag pa'i bkod pa rnam par sgrub pa yang thob la/ chos la dga' ba'i yid la byed pa yang mi spong ba yin no zhes bya ba'i don ni/ skye bo'i tshogs chen po dang mthun par 'jug pa las brtsams pa'o zhes bya bas bstan pa yin no/ / dpe'i khyad par ni mdo'i rjes su 'brangs nas rig par bya'o/ /nyan thos dang rang sangs rgyas dag pas rnam pa thams cad kyis mkhas pa dang ldan pa'i phyir/ nyan thos dang rang sangs rgyas rnams kyi mngon par rtogs pa sgrub pa la mkhas pa dang zhes brjod do/ /sbyor ba las byung ba'i spyod pa yongs su rdzogs pas bstan pa dang zhes bya ba ni sbyor ba las byung ba'i spyod pa mthar thug par gyur pas ring du song ba'i phyir ring du song ba zhes bstan pa yin no//'bad pa dang bcas pa mtshan ma med pa'i gnas pa'o// //chos thams cad kyi don dam pa la 'jug pa'i ye shes kyi rnam pa ni bcu yin pas don dam pa la 'jug pa'i ye shes kyi rnam pa zhes bya'o//de'i don rnam par gzhag pa bstan pa ni/ dus gsum du ci rigs par zhes bya ba'o/ /kye rgyal ba'i sras dag byang chub sems dpa'i sa bdun po dag la rnam par 'byed pa shin tu byas pas zhes bya ba nas/ye shes kyi lam tshad med pa dang ldan pa de chos thams cad gzod ma nas skye ba med pa nyid la yang dag pa ji lta ba bzhin du 'jug go/ /ma byung ba dang / ma skyes pa nyid dang / mtshan nyid med pa nyid dang / 'byung ba med pa nyid dang / 'jig pa med pa nyid dang / thug pa med pa nyid dang / 'jug pa med pa nyid dang /dngos po med pa'i ngo bo nyid dang / thog ma dang / bar ma dang / tha mar mnyam pa nyid dang / de bzhin nyid ltar thams cad mkhyen pa'i ye shes rnam par mi rtog pa rtogs par bya ba nyid las brtsams nas 'jug go zhes bya ba'i don bstan pa la/ ma 'ongs pa'i dus nye bar bzung nas ni gzod ma nas ma byung ba nyid ni rnam par byang ba'i phyogs so//ma skyes pa nyid ni 'das pa'i dus la ltos pa'o/ /mtshan ma med pa la gnas pa ni da ltar gyi dus la ltos nas so/ /'byung ba med pa nyid kyis 'jig pa med pa nyid ni ldog pa med pa nyid yin no/ /dus gsum du yang don dam pa'i ngo bo nyid kyis gzod ma nas rang bzhin nyid kyis ma skyes pa'i phyir/gzod ma nas ma skyes pa nyid de/ de nyid ni ma skyes pa nyid do/ /de nyid ni byis pa'i skye bos btags pa'i rnam pa'i mtshan nyid dang bral ba'o/ /de las gzhan pa'i rgyu'i dngos po las ma byung bas na 'byung ba med pa nyid dang / brjod ba med par snang ba'i ngo bo nyid dang / mtshan nyid dang rgyu'i dngos por med pa dang / kun nas nyon mongs pa'i bdag nyid du 'jug pa med pas 'jug pa med pa nyid do/ /de nyid la kun nas nyon mongs pa las ldog pa med pas ldog pa yang med pa las brtsams pa nyid do/ /yod pa'i dngos po brjod du med pa'i ngo bo nyid ma shes pas de nyid la mi bden pa'i mngon par zhen pa'o//de'i rgyu las byung ba'i phyir zhes bya bas dngos po med pa'i ngo bo nyid du bstan pa'i phyir/ thog ma dang bar dang tha ma zhes bya ba ni dus thams cad du'o/ /de la kun nas nyon mongs pa 'jug pa dang ldan pa med pa nyid do/ /de bzhin nyid kyi phyir rnam par mi rtog pa la 'jug pa dang /spyi'i dus na yang de bzhin nyid la yang dag par 'jug pa ni mnyam pa nyid do/ /kun nas nyon mongs pa mnyam pa nyid ni kun nas nyon mongs pa 'jug pa'i dus na'o/ /'di la gnas pa ni zhes bya ba ni gnas pa brgyad pa la gnas pa'o/ /mchog nyid ni shin tu rnam par dag pa zhes bya ba'o//bzod pa'i ngo bo nyid bstan pa'i phyir/ de yang gang zhe na zhes bya ba la sogs pa la/ yongs su tshol ba rnam pa bzhis ji lta ba bzhin du yongs su shes pa na yang dag pa ma yin pa'i rnam par rtog pa thams cad kyi mngon par zhen pa thams cad bsal nas bdag gi dngos pos bsdus pa'i chos thams cad kun nas nyon mongs pa mi skye ba dang rjes su mthun par bzod pa gang gis mthong ba de ni mi skye ba'i chos la bzod pa zhes bya'o//'das pa'i skye bar rnam par rtog pa la mngon par zhen pa'i rgyu las byung pa rnams dang / de'i rgyu can gyi 'du byed rnams phyi ma la yang mi skye bar yang dag par mthong ngo /de'i phyir bzod pa ni mi skye ba'i chos la bzod pa ste/ de rnam par dag pas bsgom pa'i rab kyi mthar thug par 'gyur ro zhes bstan pa'i phyir de dag mos pas spyod pa la gnas pa yan chad ces bya ba la sogs pa la/ skye ba med pa'i chos kyi rnam par dag par gyur pa'i shes rab gang yin pa de bzod pa thob pa yin no zhes bstan pa'i phyir/gnas pa zab mo thob pa yin te zhes bya ba la/ 'di'i mdo'i tshig ni/ kye rgyal ba'i sras dag de la bzod pa de lta bu dang ldan pa'i byang chub sems dpa' ni byang chub sems dpa'i sa mi g.yo ba thob ma thag tu byang chub sems dpa'i gnas pa zab mo shes par dka' ba thob pa yin no zhes bya ba la/shes par dka' ba zhes bya ba'i mdo'i tshig bstan pa ni/ gnas pa zab mo thob pa yin te zhes bya ba la sogs pas dpe dang bcas par bstan pa yin no/ /bzod pa rnam par dag pa'i rgyu bstan pa'i phyir/ skyon rnam pa bzhi po gang yin pa de dag kyang spangs pa yin zhes bya ba la sogs pa la/rtsol ba'i mngon par 'du byed pa gang yin pa de yang spangs pa yin zhes bya ba ni gang yang mdo las/ 'bad pa thams cad dang bral te lhun gyis grub pa'i chos nyid thob cing zhes bya ba'i bar gyis bstan pa yin no/ /snying las su gyur pa yang spangs pa yin zhes bya ba ni gang yang mdo las/lus dang ngag dang sems kyi rtsol ba dang bral nas zhes gsungs pa yin no/ /'du shes phra mo kun du 'byung ba yang spangs pa yin te zhes bya ba la/ mdo las gang yang gsungs pa/ rtsol ba thams cad dang bral ba'i rnam par smin pa'i chos la gnas pa zhes bya ba nas 'jig rten pa'i kun du 'byung ba rnams lta smos kyang ci dgos zhes bya ba'i bar gyis so//zab mo'i gnas pa de la mngon par dga' ba de'i chos kyi sgo'i rgyun de la de bzhin gshegs pas bskul ba dang zhes bya ba'i mdo ni/ de ltar byang chub sems dpa'i sa mi g.yo ba 'di la zhes bya ba nas/de bzhin gshegs pa'i ye shes nye bar sgrub par mdzad de zhes bya ba'i bar yin no/ /yang dag par 'dzin du 'jug pa dang zhes bya ba'i mdo ni/ rigs kyi bu legs so legs so zhes bya ba nas/ sangs rgyas bcom ldan 'das de dag ye shes mngon par bsgrub pa'i sgo tshad med pa zhes bya ba yin no//mngon par bsgrub pa'i sgo dang zhes bya ba ni ye shes rnam par phye ba tshad med pas mngon par bsgrub pa'i las rnams mngon par bsgrub par mdzad do zhes bya ba'i don bstan pa yin no/ /ye shes dang mngon par shes pa'i las dpag tu med pa nye bar bsgrub pa ste zhes bya ba'i mdo ni/ gal te sangs rgyas bcom ldan 'das de dag gis zhes bya ba nas/ sngon chad ni lus gcig gis mngon par bsgrub pas spyod pa mngon par bsgrub par gyur gyi zhes bya ba'i bar yin no/ /de ltar bskul bas lus rnam par dbye ba shes pa tshad med pa mngon par bsgrub pa dang zhes bya ba ni sa 'di la gnas pa'i byang chub sems dpa' ni zhes bya ba nas/gzugs kyis lus gsal bar byed pa nyid kyang rab tu shes so zhes bya ba'i bar gyi don yin no/ /dbang bcu yang thob par 'gyur te zhes bya ba'i mdo ni/ des lus dang shes pa mngon par bsgrub pa de lta bu 'dod pas zhes bya ba nas/ de bzhin gshegs pa'i stobs dang /mi 'jigs pa dang / sangs rgyas kyi chos ma 'dres pa dang / mtshan dang dpe byad bzang po dang / mngon par rdzogs par byang chub pa kun tu ston pas ye shes la dbang thob po zhes bya ba'i bar gyis bcu las bstan pa bzhin no/ /dbang bcu'i bsdus pa'i don bstan pa'i phyir/dbang thob pa de ni ji srid du 'dod pa de srid du gnas par 'gyur ro zhes bya ba la sogs pa la/ tshe la dbang ba ni bskal pa du mar yang gnas par nus pa dang ldan pa'o/ /sems kyi gnas par nus pa gang gis shes bya ba la sogs pa ni sems la dbang ba ste/ dpag tu med pa'i ting nge 'dzin la 'jug pa shes pa'i phyir ro//bsam pa tsam gyis zhes bya ba la sogs pas ni yo byad la dbang ba bstan te/ 'jig rten gyi khams thams cad du bkod pa du ma'i rgyan rnam par bkod pa yang dag par ston pa'i phyir ro/ /bzo dang las kyi gnas thams cad la zhes bya ba la sogs pa nas/ skye ba'i gnas thams cad la yang zhes bya ba'i bar gyis ni las la dbang ba bstan te/ ji ltar 'dod pa bzhin las kyi bya ba dang / rnam par smin pa gnas par yang dag par ston pa'i phyir ro/ /skye ba'i gnas thams cad du ji ltar 'dod pa bzhin du skye bar 'gyur ba'i las thams cad byed pa ni skye ba la dbang thob pa'o//dngos po gang dang gang la ji ltar mos pa de yang zhes bya ba la sogs pas ni mos pa la dbang ba bstan te/ 'jig rten gyi khams thams cad du sangs rgyas bcom ldan 'das rnams kyis rab tu gang bar yang dag par ston pa'i phyir ro/ /smon lam gyi mngon par shes pas sprul pa nyid ni smon lam la dbang ba yin te/ji ltar 'dod pa bzhin sangs rgyas kyi zhing rnams su mngon par byang chub pa'i dus yang dag par ston pa'i phyir ro/ /rdzu 'phrul gyi bya ba thams cad kyang ji ltar 'dod pa bzhin du byed do zhes bya bas ni rdzu 'phrul la dbang ba bstan pa yin te/ sangs rgyas kyi zhing thams cad kyi yon tan yang dag par ston pa'i phyir ro//shes bya gang shes par 'dod pa de yang zhes bya ba la sogs pas ni ye shes la dbang ba bstan te/ de bzhin gshegs pa'i mi 'jigs pa mngon par byang chub pa ston pa'i phyir ro/ /ming gi tshogs dang / tshig gi tshogs dang zhes bya ba la sogs pas ni chos la dbang ba bstan pa yin te/chos thams cad yang dag par rnam par gzhag pa la yang mkhas pa ste/ mtha' dang dbus med par chos kyi sgo'i snang ba yang dag par ston pa'i phyir ro/ /dbang thob pas byas pa'i phan yon bstan pa ni/ de de ltar byang chub sems dpa'i sa mi g.yo ba 'di thob pas zhes bya ba'i bar du yin par rig par bya'o//sangs rgyas mthong ba rags pa yang spangs nas zhes bya ba 'di'i mdo'i tshig ni/ kye rgyal ba'i sras dag de la byang chub sems dpa'i sa mi g.yo ba thob pa'i byang chub sems dpa' de ni zhes bya ba nas/chos kyi snang ba nye bar bsgrubs pa yang yang dag par len to zhes bya ba'i bar yin no/ /lhag ma dge ba'i rtsa ba rnam par dag pa zhes bya ba'i mdo ni/ de de bas kyang shas cher zhes bya ba nas/ yongs su dag pa dang / shin tu 'od gsal bar 'gyur ro zhes bya ba'i bar gyis bstan to//gser gyi dpe dang / 'od kyi dpes mdo bzhin du rig par bya'o/ /mdo las ji skad 'byung ba bzhin zhes bya ba ni skye bas ni tshangs pa chen por ro/ /mthu'i khyad par ni sangs rgyas kyi zhing 'bum phrag bcu'i rdul phra rab kyi rdul snyed kyi 'jig rten zhes bya ba la sogs pa'o/ /mtshan ma med cing lhun gyis grub pa'i gnas pa ste brgyad pa'o// //gnas pa zab mo des kyang chog par mi 'dzin te/ gong du ye shes khyad par du 'phags pa'i rjes su 'gro la zhes bya ba'i mdo ni/ kye rgyal ba'i sras zhes bya ba nas/ byang chub sems dpa'i sa dgu pa gnon te zhes bya ba'i bar du'o/ /chos rnams la shes pa mngon par 'du byed pa ni chos shes pa la mngon par 'du byed pa ste/chos rnams kyi yang dag pa ji lta ba yongs su shes pa zhes bya ba'i tha tshig go/ /chos shes pa mngon par 'du byed pa gang dag gis zhes bya ba 'dis ni dge ba dang mi dge ba dang lung du ma bstan pa'i chos mngon par 'du byed pa yang dag pa ji lta ba bzhin du rab tu shes so zhes bya ba la sogs pa bcu tshan gyi don bstan pa yin no//bstan par bya ba gang yin pa de dag thams cad kyang rang nyid kyis bshad pa ni/ de la chos yang dag par bstan par bya ba ni 'di yin te zhes bya ba la sogs pa la gang dag ces bya ba ni sems gtso bor gyur pa'i sems can rnams so//de'i phyir mdo las/ sems can gyi sems kyi rgyu ba'i thibs po yang dag pa ji lta ba bzhin rab tu shes te zhes bya ba'o/ /gang yin pa de dag zhes bya ba ni gang yang gsungs pa/ nyon mongs pa rgyu ba'i thibs po dang zhes bya ba la sogs pa'o/ /gang gis rnam par dag par 'gyur ba zhes bya ba la de'i phyir mdo las dbang po'i rgyu ba'i thibs po dang zhes bya ba'o//kun nas nyon mongs pa dang / rnam par byang ba gang yin pa dang zhes bya ba'i mdo ni/ gang yang mos pa'i rgyu'i thibs po dang zhes bya ba la/ kun nas nyon mongs pa can dang / kun nas nyon mongs pa can ma yin pa las phyin ci log gi mos pa dang /yang dag pa'i mos pa rnam par gzhag go/ gcig tu ma nges pa gang yin pa ni de'i phyir mdo las khams kyi/ rgyu'i thibs po dang / bsam pa dang / bag la nyal gyi rgyu ba'i thibs po dang zhes bya ba ste/ mya ngan las 'das pa'i khams can dang /mya ngan las mi 'da' ba'i khams can gyi phyir ro/ /kun nas nyon mongs pa dang rnam par byang ba gcig pu nyid de zhes bya ba ni gang yang mdo las/ skye ba'i rgyu ba'i thibs po dang bag chags kyi mtshams sbyor ba'i rgyu ba'i thibs po dang zhes bya ba yin te/ rnam par byang ba la gcig tu nges pa nyid do//phung po gsum du rnam par gnas pa'i rgyu'i thibs po ni gcig tu nges pa dang gcig tu ma nges pa yin no/ /bcu po 'di dag ni re re la yang bcu bcur mdo nas sa bstan to/ /de ltar chos bstan pa la mkhas pa dang zhes bya ba'i mdo'i tshig ni/ byang chub sems dpa'i sa legs pa'i blo gros can 'di la gnas pa'i zhes bya ba nas/de bzhin gshegs pa'i sa bstan pa yang yang dag pa ji lta ba bzhin du rab tu shes so zhes bya ba'i bar yin no/ /bstan pa'i bya ba la mkhas pa dang zhes bya ba 'di'i mdo ni/ des de ltar shes nas zhes bya ba nas brtsams te tshig so so yang dag par rig pa bzhi mngon par bsgrubs pas chos ston te zhes bya ba yin no//'di dag ni yang sngar bstan pa mdor bsdus pa'i rjes su 'brangs nas rig par bya'o/ /shes pa mngon par 'du byed pa gang dag gis chos ston pa'i bya ba gang byed pa zhes bya bas chos smra ba chen po nyid do/ /de'i phyir mdo las/ de ni chos smra ba chen po nyid byed cing zhes bya ba nas/shes pa la mkhas pa tshad med pa dang ldan pas zhes bya ba'i bar yin no/ /gzungs dpag tu med pa thob pa dang zhes bya ba ni yongs su 'dzin par nus pa ni so se yang dag par rig pa'i stobs kyi tshig gis gzhan la ston par nus so zhes bstan pa'i phyir bstan bcos las gzungs thob pa sngon du bstan la so so yang dag par rig pa ni phyis bstan to//'dir mdo ni byang chub sems dpa' sa dgu pa thob pa/ de bzhin gshegs pa'i chos kyi mdzod thob pa/ chos smra ba chen po byed pa ni don dang ldan pa'i gzungs thob pa yin te zhes bya ba nas/ mtha' yas pa'i sgo dang ldan pa'i gzungs dang zhes bya ba'i bar yin no//tshig gi yan lag rnam par dbye ba thams cad la mkhas pa dang zhes bya ba'i mdo ni/ gzungs kyi sgo grangs med pa 'bum phrag bcu tshang ba thob ste zhes bya ba nas/ bskal pa 'bum du gzung ba'i byin gyi rlabs kyis de ltar mi zin to zhes bya ba'i bar du'o//spobs pa mi zad pa zhes bya ba'i mdo ni/ de de lta bu'i gzungs thob cing spobs pa thob pas zhes bya ba nas/ thams cad la lan 'debs shing go bar byed do zhes bya ba'i bar gyis bstan to/ /chos 'dzin pa nyid kyi mdo ni/ de de lta bu'i tshad med pa zhes bya bya ba nas/yang dag par rdzogs pa'i sangs rgyas rnams las chos kyi sgo zhes bya ba'i bar yin no/ /so so yang dag par rig pas mngon par bsgrubs pa'i tshig gang dang zhes bya ba la/ 'di'i mdo'i tshig ni/ so so yang dag par rig pa bzhis mngon par bsgrubs pas chos ston to zhes bya ba nas/ de bzhin gshegs pa'i ye shes kyi snang ba spyod pa'i dkyil 'khor la mos pas ston to zhes bya ba'i bar yin no//chos kyi stan ji lta bu la 'dug pa dang zhes bya ba'i mdo ni/ chos kyi stan la 'dug cing bsam pa ji lta ba bzhin du zhes bya ba nas/ snang ba tshad med pa dang ldan pa yin no zhes bya ba'i bar yin no//gang dag la zhes bya ba ni 'khor gyi dkyil 'khor du'o/ /des na mdo las/ 'dod na sgra skad gcig gis 'khor thams cad go bar byed do zhes bya ba yin no/ /gang du zhes bya ba de ni 'jig rten gyi khams su'o/ /gang gi phyir smras pa/ 'dod na stong gsum gyi stong chen po'i 'jig rten khams na zhes bya ba la sogs pa yin no//chos kyi sgo ji snyed dang zhes bya ba la sogs pa ni mdo ji lta ba bzhin du shes par bya'o/ /skye bas ni tshangs pa chen por ro/ /mthu'i khyad par ni sangs rgyas kyi zhing 'bum phrag bcu'i rdul phra rab dang mnyam pa'i ting nge 'dzin gyis zhes bya ba la sogs pa'o//so so yang dag par rig pa'i gnas pa ste dgu pa'o// //rnam pa brgyad kyis gnas pa mchog rnam par gzhag par bya ste/ sa yongs su sbyangs pa'i las yongs su rdzogs pa nyid ni/ chos kyi rgyal por 'os shing zhes bya ba'o/ /de la mdo'i tshig ni/ kye rgyal ba'i sras byang chub sems dpa' de de ltar zhes bya ba nas brtsams nas/rnam pa thams cad dang ldan pa'i thams cad mkhyen pa'i ye shes dbang bskur ba'i sa thob pa zhes bya'o zhes bya ba'i ting nge 'dzin yongs su rdzogs par thob pa nyid ni/ de'i phyir smras pa/ dbang bskur ba thob pa ting nge 'dzin dri ma med pa zhes bya ba nas/de'i bya ba byed pa dang zhes bya ba'i bar du'o/ /de la mdo ni/ kye rgyal ba'i sras byang chub sems dpa'i ye shes de lta bu dang ldan zhing dbang bskur ba'i sa thob pa de la zhes bya ba nas/ thams cad mkhyen pa'i ye shes kyi khyad par dang ldan par dbang bskur ba dang ldan pa zhes bya ba mngon du 'gyur te zhes bya ba'i bar yin no//dbang bskur ba thob pa nyid ni/ des na de smras pa/ thams cad mkhyen pa'i ye shes kyi khyad par la dbang bskur ba'i tha ma'i ting nge 'dzin mngon du gyur pa zhes bya ba nas/ rnam pa thams cad dang ldan par dbang bskur ba thob pa dang zhes bya ba'i bar gyi mdo'i tshig ni/de mngon du gyur ma thag tu zhes bya ba nas/ de dag gis dbang bskur ma thag tu ye shes kyi dbang bskur bas dbang bskur ba zhes bya ste zhes bya ba'i bar yin no/ /dbang bskur ba thob pa rnams kyi che ba'i bdag nyid mthar thug pa nyid ni gang yang smras pa/ dbang bskur ba nas kyang 'dul ba thams cad ces bya ba nas/mngon par shes pa dpag tu med pa thob pa dang zhes bya ba'i bar du'o/ /de la mdo'i tshig ni/ de'i rjes la chos zab mo'i tshul la 'jug pa 'bum dang / snying rje chen po la 'jug pa 'bum dang / byang chub sems dpa'i dbang la 'jug pa 'bum 'thob po zhes bya ba'i bar du yin no//de'i dbang gis dran pa chen pos nye bar sgrub pa dang zhes bya ba la/ 'dir mdo ni/ de ye shes de lta bu dang ldan pa'i blo dang zhes bya ba nas/ bdag gir byed do/ /yang dag par 'dzin to zhes bya ba'i bar du yin no/ /sa'i nges pa'i tshig nyid ni gang yang smras pa/ des pa'i tshig rnam par gzhag pa dang zhes bya'o//'di'i mdo ni/ de'i rjes la yang dag par len/ bdag gir byed/ yang dag par 'dzin to/ /de'i phyir sa 'di chos kyi sprin zhes bya'o zhes bya ba'i bar du yin no/ /mngon par shes pa chen po mngon par sgrub pa dang / dge ba'i rtsa ba rnam par dag pa dang /skye ba dang mthu'i khyad par las gnas pa mchog mdor bstan par rig par bya'o zhes bya ba la/ 'di dag gnyi ga'i mdo ni de'i rjes thogs la mdo rdzogs pa'i bar gyis bstan par shes par bya'o/ /sa dgur byang chub sems dpa'i lam yongs su rdzogs par byas pa 'di sa bcu pa yongs su sbyor bar byed pa'i chos rnams ni byang chub kyi tshogs yongs su rdzogs par byed pa yin no//sa'i nges tshig bstan pa ni/ de bzhin gshegs pa rnams las zhes bya ba la sogs pa nas/ de lta bas na sa de chos kyi sprin zhes bya ste zhes bya ba'i bar du'o/ gnas pa dang gnas pa la 'jug pa'i chos bstan pa rnams ni gnas pa snga ma rnams la yang yod mod kyi/ chung ngu dang / 'bring dang / chen po nyid kyi khyad par yod par bstan pa'i phyir/ gnas pa gong ma gong ma rnams su yan lag gang dag bstan pa de dag gi ni zhes bya ba la sogs pa la/chos bcu po 'di dag sa 'di la rnam par gzhag par bya'o zhes bya bas bstan pa'i chos rnams ni rten gyis snga ma rnams la yang yod kyang chung ba'i phyir chos 'di'i grangs su mi chud pas gong mar rnam par mi gzhag go/ /des na bdag gis de dag sa gong ma thob pas chen por gyur pa de'i tshe de'i chos khyad par can du rnam par gzhag pa yin no//gnas pa 'di dag ni dus chen pos yongs su 'grub par bstan pa'i phyir/ de la gnas pa re re yang bskal pa chen po zhes bya ba'o/ /thams cad kyis thob pa'i dus kyi tshad nges par bstan pa ni/ bskal chen po grangs med pa gsum gyis zhes bya ba la sogs pas ni brtson 'grus 'bar ba rgyun mi 'chad par dge ba'i rtsa ba la gnas pas ni mos pas spyod pa'i sa nas grangs med pa yin par bstan pa'i phyir/de yang rtag tu 'bad pas zhes bya ba la sogs pa la/ 'bad pa zhes bya ba ni myur du zhes bya ba'i tshig go/ /grangs med pa gnyis pas ni mtshan ma med pa gnyis pa'i gnas pa thob po zhes bstan pa'i phyir ro//de la ni bskal pa grangs med pa rnam par gzhag pa thams cad kyang 'dra bar bstan pa ni/ de ni nges pa kho na ste zhes bya ba la/ bsam pa dag pa rnams la brtson 'grus rtsom pa la khyad par med pa'i phyir ro/ / de'i phyir smras pa/ de ni nges par 'bad pa'i phyir ro zhes bya ba yin no/ /gsum zhes bya ba dang / grangs med pa zhes bya ba ji lta bu yin zhe na/ 'di ltar/ de la bskal pa grangs med pa ni gnyis su rig par bya ste zhes bya ba la/ rnam pa gnyis kyis bskal pa chen po la grangs med pa zhes bya ste/nyin zhag la sogs pa bgrang ba'i lam las 'das pas bskal pa gcig la yang grangs med pa zhes bya ba'o/ /de'i phyir smras pa/ nyin mtshan dang zla ba dang zhes bya ba la sogs pas bgrang bar mi nus pas na grangs med pa zhes bya'o/ /bskal pa chen po ni grangs kyi gnas gzhan gyi khyad par grangs med pas bsdus pa'i phyir grangs med pa gnyis pa zhes bya'o//de'i phyir smras pa/ bgrang ba'i tshul gyis bgrang ba thams cad las 'das pa'i zhes bya ba la sogs pa la/ yang de ni rnam pa gnyis kyis grangs med pa zhes brjod de/ tha mal pa'i grangs las 'das pa'i phyir ni gang yang smras pa/bgrang ba thams cad las 'das pa'i zhes bya ba ste/ de'i ming gis rnam par gzhag pa'i phyir ro/ /de lta bu'i grangs kyi gnas gzhan du phyin pa la yang bya ste/ lhug par bstan pa'i mdo las 'don pa'i gnas gzhan drug cur phyin pa ni grangs med pa zhes bya ba yin no//de'i phyir smras pa/ phyi ma shos kyis ni zhes bya ba la sogs pa la/ gang gi dbang du byas nas grangs med pa gsum zhes bstan pa de ni phyi ma shos kyi yin no/ /lhag pas ni ma yin te zhes bya ba ni sde pa gzhan gyi 'dod pa 'gog par byed pa yin no/ /'ga' zhig gis bskal pa 'ga' zhig 'dums par bya bar nus pa ni srid kyi bskal pa grangs med pa 'dums pa ni 'ga' yang yod pa ma yin no zhes bstan pa'i phyir/su brtson 'grus rtsom pa chen po yang chen pos sbyor ba de'i zhes bya ba la sogs pa la gang yang bcom ldan 'das shAkya thub pas bskal pa dgu 'dums so zhes 'don pa yin no//sgrib pa gnyis spang ba ni shin tu dka' ba'i phyir dus ring por 'bad pa chen pos thob pa yin no zhes bstan pa'i phyir/ byang chub sems dpa'i gnas pa bcu gnyis po de dag gis zhes bya ba la sogs pa yin no/ /nyon mongs pa dang shes bya'i sgrib pa gnyis kyi phyogs kyi gnas ngan len rim gyis spong bar bstan pa'i phyir/de la gnas pa gsum po dag la ni zhes bya ba la sogs pa la/ byang chub sems dpa' rnams kyi nyon mongs pa'i dbye ba ni gnyis te/ mthong bas spang bar bya ba dang / sgom pas spang bar bya ba'o/ /de la mthong bas spang bar bya ba ni rab tu dga' ba'i gnas pa la ste/bag la nyal dang mngon du rgyu dang bcas pa rab tu spong ngo / /de'i phyir smras pa/ thams cad kyi thams cad du spong ngo zhes bya'o/ /sgom pas spang bar bya ba la ni gzhi'i bye brag gis rnam pa gsum ste/ chen po dang / 'bring dang / chung ngu zhes bya'o/ / sgom pas spang bar bya ba chen po'i mngon du rgyu ni sa la zhugs pa la med do zhes bstan pa'i phyir/ kun du spyod pa las ni zhes bya ba la sogs pa la spang bar bya ba yin no zhes bya ba ni rang bzhin no/ /chung ngu'i dbye ba yang kha cig ni gnas pa gnyis pa la gnyi ga ji ltar spong bar bstan pa'i phyir/ mtshan ma med pa lhun gyis grub pa la zhes bya ba la sogs pa la/gnas ngan len ni yongs su rgyas par byed pa'i sa bon no/ /bag la nyal ni sa bon phra ba'o/ /de'i phyir smras pa/ nyon mongs pa'i bag chags kyi bag la nyal gyi sgrib pa thams cad spong bar rig par bya ste zhes bya ba'o/ /gnas pa mchog las 'da' ba na zhes bya ba'i tha tshig go//de nyid bstan pa ni/ de yang de bzhin gshegs pa'i gnas pa la 'jug pa'o zhes bya bas/ nyon mongs pa'i sgrib pa spong ba'i dbye ba bstan nas shes bya'i sgrib pa spong ba'i rab tu dbye ba bstan pa'i phyir/ rnam pa gsum du rig par bya ste zhes bya ba la/ pags shun la yod pa zhes bya ba ni pags shun dang 'dra bas pags shun la gnas pa ltar dus dang 'bad pa nyung ngu zhig gis spong bar nus pa'o/ /pri la yod pa lta bu ni dus dang 'bad pa 'bring gis spong bar nus pa'o/ /snying po la yod pa lta bu ni dus ring por 'bad pa chen pos spang bar bya'o/ des ni gnas pa gsum la dus chen po nyid dang / 'bad pa chen po nyid bstan pa'i phyir/ de spangs ma thag nyid du de'i gnyen po'i ye shes 'thob par bstan pa'i phyir/ rnam par dag pa'i ye shes nyid kyang yin no zhes bya ba la/ gnas pa rnam pa gsum las spangs pa'i dbye ba rnam pa gsum yin la/de dag las gzhan pa'i gnas pa rnams ni zhugs pa'i lam du rnam par gzhag par bya ba'i phyir/ de ma yin pa'i gnas pa rnams yin no zhes bya ba la sogs pa'o/ /gnas pa rnams kyis byang chub sems dpa'i rnam par yang dag pas bsdus pa bstan pa'i phyir/ gnas pa gcu gsum po de dag la zhes bya ba la sogs pa la/rnam par dag pa bcu gcig po de dag kyang mdor bsdu na thog ma dang / bar dang / tha mar rig par bya'o/ /rigs nyid rnam par dag pa ni rigs rnam par dag pa ste/ rab tu khyad par du 'phags pa'i chos thams cad kyi 'byung gnas su gyur pa'i phyir gser gyi rigs bzhin no//mos pas spyod pa'i gnas skabs na ni dad pas mos pa rnam par dag pa zhes bya ste/ gzhan gyis mi 'phrogs pa'i phyir ro/ /rab tu dga' ba la ni lhag pa'i bsam pa rnam par dag pa zhes bya ste/ bdag dang gzhan mnyam pa nyid rab tu thob pa'i phyir ro//dri ma med pa'i sa la ni tshul khrims rnam par dag pa zhes bya ba ste/ rang bzhin gyi tshul khrims dang ldan pa'i phyir ro/ /'od byed pa la ni lhag pa'i sems rnam par dag pa ste/ 'jig rten pa'i bsam gtan dang snyoms par 'jug pa'i khyad par thams cad thob pa'i phyir ro/ /lhag pa'i shes rab kyi gnas pa gsum la ni ye shes la kun du rtsom pa rnam par dag pa zhes bya ste/shes rab rnam pa gsum gyi khyad par thob pa'i phyir ro/ /rtsol ba dang bcas pa'i mtshan ma med pa'i gnas pa la ni sbyor ba las byung ba'i spyod pa yongs su rdzogs pa rnam par dag pa zhes bya ste/ de'i mthar thug par 'gro ba'i phyir ro//lhun gyis grub pa'i ye shes mngon par sgrub pa rnam par dag pa la ni bzod pa'i mchog thob pa'i phyir ro/ /so so yang dag par rig pa'i gnas pa ni rnam pa thams cad du tshig gi don thams cad ston pa'i phyir so so yang dag par rig pa rnam par dag pa'o/ / gnas pa mchog la ni rnam pa thams cad du shes bya thams cad la 'jug pa'i ye shes dang ldan pas shes bya thams cad kyi rjes su 'jug pa'i ye shes rnam par dag pa zhes bya'o/ /de bzhin gshegs pa'i gnas pa la ni sgrib pa gnyi ga spangs pa nyid de/ shin tu dri ma med pa'i phyir ro/ /sngar bstan pa'i theg pa chen po sdud par byed pa'i chos rnams dang gnas pa 'di dag ji ltar rigs par phan tshun bsdus par bstan pa'i phyir smras pa/ gnas pa bcu gsum po 'di dag ni zhes bya ba la sogs pa la/ de dag ni byang chub sems dpa'i sde snod bstan pa la sogs pa nas shes par bya'o//gnas pa dang po dang / gnyis pa la ni zhes bya ba la/ /gnyis pa'i tshig dang mang po'i tshig gis bstan te/ dang po la dad pa skyes pa dang / gnyis pa la lhag par mos pa skyes pas so/ /lhag pa'i bsam pa nyams su len pa ni sgom pa'i rnam pas 'jug pa nyid du bstan pa'i phyir dang /de las gzhan pa'i sgom pa'i rab tu dbye ba bstan pa'i phyir ro/ /des na smras pa/ bsgom pa mang du byed do zhes bya ba la/ de kho na'i don la 'jug pa dang / mthu'i don la 'jug pa ni bsdu bar ma bstan du zin kyang bsdu ba thams cad du de dag shes par bya'o//ci'i phyir gnas pa bcu gnyis rnam par gzhag pa yin no zhes bya ba'i don 'dir bstan pa'i phyir/ byang chub sems dpa'i gnas pa bcu gnyis po 'di dag ni go rims bzhin du nyan thos kyi gnas pa dang 'dra bar rig par bya ste zhes bya ba la/ nyan thos kyi rang gi rigs la gnas pa ji lta ba de bzhin du 'di'i gnas pa dang po zhes bya ba la/thar pa'i cha dang mthun pa'i dge ba'i rtsa ba bskyed pa nas nye bar bzung nas nges par 'byed pa'i cha dang mthun pa bskyed pa dang / de'i yang dag pa skyon med pa'i sa la 'jug pa'i sbyor ba la gnas pa ni mos pas spyod pa'i gnas pa lta bu dang /nges pa'i sa la 'jug pa'i gnas pa ni mthong ba'i lam thob pa lta bu'o/ /de ltar nges pa la zhugs pa'i gnas pa la gnas pa ni sdig pa rnam pa lnga ni shin tu mi byed cing 'phags pas bsngags pa'i tshul khrims la gnas pa zag pa zad par bya ba'i phyir 'bad pa dang 'dra bar byang chub sems dpa'i yang de dang 'dra'o//mi dge ba bcu'i las kyi lam shin tu mi byed pas tshul khrims rnam par dag pa dang ldan zhing bsam gtan mngon par bsgrub pa la gnas pa de bzhin du byang chub sems dpa'i yang de dang 'dra'o/ /ji ltar dang po gsum la lhag pa'i shes rab kyis gnas pa de bzhin du byang chub sems dpa'i yang yin no//ji ltar bsam gtan dang / ting nge 'dzin thob pa dang / mtshan ma med pa'i sbyor ba la gnas pa yin pa de bzhin du byang chub sems dpa'i yang yin no/ /ji ltar de dag mtshan ma med pa la gnas pa de bzhin du byang chub sems dpa'i yang yin no//ji ltar de'i de las langs nas rnam par grol ba'i skye mched la gnas pa dben pa la sems gzhol bar 'gyur bar bstan pa de bzhin du byang chub sems dpa'i yang yin no/ /ji ltar dgra bcom pa'i gnas pa la ma gnas par bya ba byas pa yin pa de bzhin du de bzhin gshegs pa'i gnas pa yang yin no//byang chub sems dpa'i sa'i gzhi'i mthun pa'i chos kyi rnal 'byor gyi gnas pa las gnas pa'i le'u bzhi pa ste rnal 'byor gyi gnas pa gnyis pa'i 'grel pa rdzogs so// //ji skad bstan pa'i gnas pa rnams la byang chub sems dpa' rnams kyis mang du bdag po'i skye ba len par bstan pas de'i rjes la thams cad du skye ba len pa bstan pa'i phyir skye ba len pa bstan pa brtsam par bya'o//skye ba re re la yang dbye ba dpag tu med pa'i phyir mdor bsdus nas smras pa/yang skye ba de ni rnam pa gnyis te/ bsams bzhin du skye ba zhes bya ba ste/ smon lam gyi stobs dang / dbang thob pa'i stobs kyis so/ /de la skye ba dang po ni sems can thams cad kyi thun mong du skyes pa'i sdug bsngal gyi gnyen po nyid kyi bde ba skyed par byed pa ni bde ba skyed par byed pa yin no zhes brjod do//yang gnyis pa ni ris mthun pa 'phen par byed pa'i mi dge ba'i gnas nas bzlog nas dge ba'i gnas la 'god pa'i phyir 'bad pa'i don du 'gyur ro zhes bya ste/ phan pa skyed par byed pa zhes bya ba'o/ /ris mthun pa rnams 'dra bar 'don na yang khyad par du 'phags pa mngon par bsgrubs pas sems can rnams la phan pa dang bde ba skyed par byed pa ni gsum pa'o//gnas skabs dang rjes su mthun par lha dang mi rnams su dbang phyug gi bdag po'i gnas thob pa ni bdag por skye ba ste bzhi pa'o/ /de ltar na skye ba'i gnas kyi dbye bas rnam pa bzhi ste/dus kyi dbang gis so/ /skye ba rnams kyi phyi ma ni tha ma'i skye ba ste/ skye ba rnams kyi tha ma yin pa'i phyir ji ltar dgra bcom pa'i bzhin no/ /gang yang mdor bsdus nas sems can rnams kyi yo byad dang / bdag gi dngos pos phongs par byed pa ni gnod pa zhes bya'o//de yang sems can thams cad la dus dang yul gyi dbang gis bza' ba dang btung bas phongs pas mu ges gnod pa dang / 'brog nyam nga bar 'khyams pa'i gnod pa rnams so/ /de'i phyir smras pa/ mu ges phongs shing gnod pa chen po byung ba'i dus dag tu zhes bya ba la sogs pa'o//smon lam btab nas zhes bya ba ni sngar nyid nas byang chub sems dpa' sems 'di ltar mngon par 'du byed de/ 'di lta bu'i sems can rnams bde bar bya ba'i phyir bdag 'di dang 'di lta bur gyur cig ces smon par byed de/ de lta bu'i smon lam de ni bsod nams shin tu che ba'i phyir dang /bsam pa dge ba'i phyir de bzhin du 'grub par 'gyur te/ dge slong dag bsod nams dang ldan pa'i smon lam 'grub par 'gyur ro zhes gsungs pa'i phyir ro/ /tshegs chung dus zhes bya ba ni 'bad pa med par ro/ /'tsho bar 'gyur ba'i rgyur zhes bya ba ni ltad mo'i ched du sems can rnams kyi longs spyod bya ba'i phyir nya chen po la sogs par skye bar 'gyur te/rlon mid dang rlon mid chen po la sogs par smon lam gyi stobs kyis sha mi zad par gyur pas 'gro ba ma lus pa tshim par byed do/ /khams ma snyoms pas lus la gnod par gyur pa rnams la grub pa'i rig pa 'dzin pa la sogs pa'i lus yongs su bzung nas ji lta bur gnas na gnod pa zhi bar byed pa'i sngags grub pa dang /mthu che ba'i sman shes pa'i sman par gyur nas de bzhin du gnod pa zhi bar byed do/ /longs spyod dang 'khor rnam par nyams par byed pa'i pha rol gyi dpung la sogs pa'i tshe ni stobs kyi bdag por gyur nas gzhan gyi dpung gi 'jigs pa zlog par byed kyi/chos dang ldan pa yin pas gzhan gyi dpung brlag par ni mi byed do/ /de ni yang chos dang ldan pa'i stobs can du 'gyur ro zhes bya bar smras pa/thabs mkhas pas zhes bya ba ni gzhan la gnod par ma byas pa zhes bya ba'i tshig go/ /phan tshun mi mthun pa rnams la ni bdag nyid la tshig gzung bar 'os pa dang / sdums byed par nus par gyur nas 'khor rnams zhi bar byed pa'i tshad mar gyur par skye bar 'gyur ro/ / phan tshun dgrar cing srog gcod par byed pa dag tu ni srog bskyab pa'i phyir dang / tha mal pa'i yul gyi rgyal po gtum pos chos dang mi ldan par 'bangs rnams la chad pa dang / 'ching ba dang / gnod pa sna tshogs byed pa la zhugs pa dag la ni gnod pa de dag zhi bar bya ba'i phyir/ rgyal por skye bar 'gyur te/ bu la byams pa'i rigs su skyes pa tsam gyis bcings pa la sogs pa thams cad grol bar 'gyur ro/ /bdag nyid rgyal por gyur nas gnod pa de dag nye bar zhi bar byed do/ /chos dang ldan par gyur nas sems can rnams la phan pa dang bde ba'i bsam pas snying brtse ba can yin no//de ltar na mu ge'i gnod pa'i sdug bsngal dang / pha rol gyi dpung gis gnod pa'i sdug bsngal dang / 'tsho ba med pas 'jigs pa'i sdug bsngal dang / rang gi 'khor gyis 'jigs pa'i sdug bsngal gyi dbang du byas nas/ gnod pa de dag nyid zhi bar bya ba'i phyir ro//de'i phyir smras pa/ snying brtse ba sngon du 'gro ba zhes bya ba ni sems can rnams la phan pa dang bde ba'i phyir skye bar 'gyur ba'o/ /de dang skal ba mnyam par mthun par 'jug pa'i skye ba ni phan tshun mi mthun pa'i dud 'gro'i skye gnas su skyes nas rang nyid kyi byams pa'i sems kyis khon rnams zhi bar byed do//log par lta ba shin tu mang ba'i bram ze'i rigs dang / nyes par spyad pa spyod pa'i nya pa la sogs pa'i rigs dang / 'dod pa la gcig tu zhen pa'i rigs rnams kyi gtso bor skyes nas lta bas byas pa dang / nyes par spyod pa dang / 'dod pa la sred pa rnams rab tu zhi bar byed do//de'i phyir smras pa/ nyes pa de bzlog pa'i phyir zhes bya ba'o/ /'jig rten tha mal pa rnams kyi gtso bo'i rjes su 'jug pa yin pa'i phyir da dag las bzlog pa las spyod cing ston to zhes bstan pa'i phyir/ de lta bu'i skal ba mnyam par spyod pa nyid kyis nyes pa las zlog par byed do zhes bstan to//rigs pas man ngag ston pa'i dbang du byas nas smras pa/ de dag la chos ston pa ste zhes bya ba'o/ /de bzhin du res 'ga' 'ga' zhig tu skyes pa na byang chub sems dpa' de tshe la sogs pa mthun pa rnams las khyad par du 'phags par 'gyur te/rnam par smin pa mnyam pa med pa yongs su gzung ba'i phyir ro/ /rnam par smin pa'i 'bras bus kyang sems can rnams kyang yang dag par sdud cing bdag nyid kyang ci rigs par spyod do/ /de'i phyir smras pa/ bdag dang gzhan gyi don gyi le'u las ji skad bshad pa'i las byed do zhes bya ba yin no//'di lta bu ni bdag dang gzhan gnyis ka la phan pa yin la/ snga ma ni gzhan 'ba' zhig la phan pa nyid yin no/ /sa la zhugs pa rnams kyi ni/ lha dang mi rnams kyi nang du gtso bor skyes pa gang yin pa de ni bdag po'i skye ba zhes bya ste/ de ni gnas pa bstan pa bstan zin to/ /gnas pa mchog la gnas pa'i bdag por skye ba bstan pa'i phyir/'og min las 'das nas zhes bya ba'o/ /yang de ni 'jig rten las 'das pa'i dge ba las skyes pas thun mong ma yin pa'i skye ba yin no zhes bstan pa'i phyir/ skye ba'i gnas thams cad las khyad par du 'phags pa zhes bya ba la sogs pa'o//tshogs yongs su rdzogs pa'i mi'i skye ba ni srid pa tha ma pa'o zhes bstan pa'i phyir/ der skyes pa de ni sangs rgyas kyi phrin las thams cad kyang mdzad pa zhes bya ba la sogs pa yin no/ byang chub sems dpa' 'di dag thams cad ni nges pa yin no zhes bstan pa'i phyir/ gang su dag kyang rung ba de dag thams cad kyang zhes bya ba la sogs pa yin no//mngon par byang chub pa'i 'bras bu can du bstan pa'i phyir/ de dag la brten nas zhes bya ba la sogs pa bstan to/ /byang chub sems dpa'i sa'i gzhi'i rnal 'byor gyi gnas tha ma las skye ba'i le'u'i 'grel pa ste dang po rdzogs so// //de ltar gzhan gyi don dang nye bar bstan pa'i don byang chub sems dpa' rnams ni gzhan gyi don bya ba yongs su 'dzin par byed kyi/ nor dang 'bru yongs su 'dzin par mi byed do zhes bstan pa'i phyir/ skye ba bstan pa'i rjes la yongs su 'dzin pa bstan to/ /byang chub sems dpa'i spyod pa thams cad ni ji ltar rigs par rnam pa drug tu yongs su bsdus par rjes su bstan pa'i phyir smras pa/de la byang chub sems dpa' rnams kyi gnas pa la gnas pa'i zhes bya ba la/ yongs su 'dzin pa'i nyes pa dang bral bar bstan pa'i phyir/ yang dag par yongs su 'dzin pa zhes bya ba smras so//phyi rol gyi dngos po yongs su 'dzin pa bsal ba'i phyir dang / sems can yongs su 'dzin pa bstan pa'i phyir/ sems can thams cad cig car yongs su 'dzin pa dang zhes bya ba smras te/ khyim par gyur pa dang / rab tu byung ba'i thun mong dang thun mong ma yin pas yongs su 'dzin pa ni rnam pa gsum mo//de nyid dus kyi dbye bas kyang rnam pa gsum mo/ /de ltar na rnam pa drug ste/ sems bskyed ma thag tu sems can gyi khams thams cad chung ma'i tshul du cig car yongs su gzung ste zhes bya ba ni sems can yongs su 'dzin pa tha mal pa'o/ /khyad par can ni bdag por gyur pa'i tshul gyis nges pa kho nar dga' bar bya ba dang /gso bar bya ba dang / skyong bar byed pa ni bdag pos yongs su 'dzin pa zhes bya'o/ /rab tu byung bar gyur pas ni yang dag pa'i 'khor yongs su 'dzin pa ni sems can yongs su 'dzin pas 'dzin pa zhes bya'o/ / yun ring po ni mdor bstan pa nyid du rnam par phye bas yin no/ /sems can thams cad la shin tu phan pa dang bde ba'i bsam pas sgrub pa dang ldan bzhin du cig car sems can yongs su 'dzin pa'o zhes bstan pa ni/ bdag gis 'di dag la ci nus ci lcogs kyis zhes bya ba la sogs pas bstan te/ji skad du/ skye bo sdug bsngal du gyur pa 'di dag ni/ bskyab pa'i phyir khyed kyis byang chub mngon par bsgrubs zhes bstan pa yin no/ /yongs su 'dzin pa'i dngos po ni/ rgyal por gyur pa na 'bangs la zhes bya ba ni rang gi yul gyi nye 'khor na gnas pa la yongs su 'dzin pa'i 'du shes 'byung ste zhes bya ba la/da las gzhan pa la skye bo gzhan gyi 'du shes 'byung ba'o/ /yongs su 'dzin pa dang 'tsham pa'i zhes bya ba ni 'jig rten la grags pa ste/ nges par gso bar bya ba dang / yongs su bskyang bar bya ba'o/ /byang chub sems dpa'i rjes su mthun pa ni 'jig rten phal pa las 'das pa'o//pha dang ma yongs su gzung ba'i bya ba ni rnam pa gsum du bstan pa ste/ dge ba'i phyogs la yang dag par sbyor bar byed pa nyid ni dad pa med pa ni dad pa phun sum tshogs pa la sbyor ro zhes bya ba la sogs pa rgyas par mdo las 'byung ba yin no//bla mar bya zhing bsnyen bkur bya bas nye bar gzung ba ni dus dus su bsnyen bkur dang bla mar yang byed pa'o/ /de'i dbang du gyur pas gnas par bya ba ni pha'i sems dang mthun par byed pa'o/ /bu dang chung ma la sogs pa la ni mdor bsdu na rnam pa gnyis kyis yongs su 'dzin par byed do//bsam pa nyid dang sbyor ba nyid kyis so sbyor ba nyid kyis ni rnam pa drug go/ /bsam pa nyid kyis ni rnam pa gcig go/ /'tsho ba'i yo byad kyis phongs pa med par yongs su 'dzin pa ni gang yang smras pa/ zas dang gos legs par sbyin par byed do zhes bya ba yin no/ /rjes su mthun pa'i las la sbyor bar byed pa ni las kyi mtha' rnams kyis gnod par yang mi byed do zhes bstan pa yin no//gnod pa byas kyang bzod pa ni gang gi phyir smras pa/ nyes par byed pa yang bzod par byed do zhes bya ba'o/ /na ba rnams la mgon bya ba ni gang gi phyir smras pa/ legs par nad g.yog byed do zhes bya ba'o//dge ba la sbyor bar byed pa nyid ni gang yang smras pa/ de dag dge ba la yang 'dzud par byed do zhes bya ba'o/ /dus su khyad par du sdud par byed pa ni gang yang smras pa/ dus dus su lhag par bya dga' sbyin pa dang zhes pa'o/ /ci nas kyang tshig 'jam par byed do zhes bya ba ni nye bar phan pa la sbyor bar byed ngo zhes bya ba'i don to//bsam pa nyid smras pa/ de dag la bran dang bran mo'i 'du shes kyang mi skyed de zhes bya ba la sogs pa'o/ /rgyal por gyur na rgyal po'i 'khor rnams la rnam pa dgus yongs su 'dzin pa'i bya ba mdzad pa'i bstan pa'i chos kyis rgyal srid byed pa nyid ni gang gi phyir smras pa/'bangs la chad pa med pa dang zhes bya ba la sogs pa ni longs spyod 'phrogs pa dang / srog gcod pa'i bya ba ma yin pa mi byed pa zhes bya ba'i tha tshig go/ /sho gam la sogs par ci rigs par 'bebs par byed pas des na smras pa/ chos bzhin du longs spyod sgrub par byed do zhes bya ba yin no//rigs brgyud kyi rigs kyis 'ongs pa'i rgyal srid la dbang byed kyi gzhan la mi gnod par bstan pa ni/ rgyud kyis byung ba'i zhes bya ba la sogs pa'o/ /phan pa la yang dag par sbyor ba nyid ni gang gi phyir smras pa/ ci nus ci lcogs kyis sems can rnams sdig pa las zlog par byed de zhes bya ba la sogs pa'o//bu'i 'du shes bskyed par bstan pa nyid ni de ni smras pa/ 'bangs rnams kyi pha dang 'dra ba yin zhes bya ba'o/ /phongs pa rnams la longs spyod rab tu sbyin pa nyid des na smras pa/ bgo bsha' byed pa'i dang tshul can yin zhes bya ba la sogs pa'o//rigs pa ma yin pa'i bya ba mi byed pa nyid ni gang yang smras pa/ ma'i khu ba dang zhes bya ba yin no/ /ji ltar khas blangs pa bzhin bya ba byed pa ni gang yang smras pa/ bden par smra ba zhes bya ba yin no/ /gzhan la gnod pa byed pa spangs pa nyid ni/ gsad pa dang / bcing ba dang zhes bya ba la sogs pa'o//rnam pa gnyis kyis tshogs yang dag par sdud pa yin par bstan pa nyid ni bsam pa nyid dang sbyor ba nyid kyis te/ de'i phyir smras pa/ zang zing med pa'i sems kyis zhes bya ba la sogs pa la/ zang zing nyid ni bsnyen bkur gyi phyir dang / 'dod pa'i phyir yongs su 'dzin pa ma yin pa'o zhes bya ba'o//rang gi don gyi sbyor ba yang mdor na rnam pa gnyis te/ don la rab tu sbyor ba nyid ni gang yang smras pa/ rang gi don la legs par 'dzud par byed de/ log pa'i sbyor bas slu bar mi byed pa'o zhes bya ba'o/ /sbyor ba mnyam pa nyid bstan pa'i phyir/ sems snyoms pa yin te zhes bya ba la/sems snyoms pa de nyid bshad pa ni/ phyogs 'dzin par mi byed do zhes bya ba'o/ /chos la rab tu sbyor ba nyid ni chos la ser sna byed pa ni thams cad kyi thams cad du chos mi ston pa'o/ /de med pa ni chos la ser sna mi byed pa'o/ /slob dpon gyi dpe mkhyud ni don gyi gtso bo sbed pa ste/de med pa'o gzhan gyi don gcig pu byed par bstan pa'i phyir/ rim gro dang bsnyen bkur byed pa la yang mi re ba zhes bya'o/ /de dag nyid rang byed pa la yang tshogs sog tu gzhug pa'i phyir zlog par mi byed de/ 'khor gyi bslab pa yongs su rdzogs par byed du gzhug pa'i phyir ro//dus la bab na zhes bya ba ni phongs par gyur pa'i dus su zhes bya ba'i don to/ /dman pa la sogs pa rnams la rang gi don la sbyor bar bstan pa'i phyir/ de dag gis ma rtogs pa'i don yang rtogs par byed la zhes bya ba la sogs pa la/ ma rtogs pa'i don ni mi shes pas kun du rmongs pa'o//de la don yang dag par ston pa ni rtogs par byed pa'o/ /rtogs pa ni chos kyi don la mkhas pa'o/ /khyad par can gyi don la sbyor bar byed pa ni gsal bar byed pa'o/ /the tshom skyes pa'i rmongs pa rnams kyi the tshom yang sel bar byed pa'o/ /gcig tu bde ba 'dod pa rnams kyi dbang du byas nas smras pa/'gyod pa yang sel bar byed do zhes bya ba'o/ /sems can rnam pa gsum char yang rgyud yongs su smin par shes nas mngon par rtogs pa ston par byed do zhes bya bar bstan pa ni/ don zab mo'i tshig kyang zhes bya ba la sogs pa'o/ /bya ba mngon du gyur pa na don mthun par bstan pa'i phyir/sdug bsngal dang bde ba yang dag dang mtshungs par byed do zhes bya ba'o/ /gnod pa dang ldan pa rnams kyi gnod pa bsal ba'i phyir bdag nyid spro ba bstan pa ni/ bdag nyid las de dag gis zhes bya ba la sogs pa'o/ /nyes pa dang ldan pa rnams kyi rjes su mthun par bya ba bstan pa'i phyir/dus dus su de dag gi nyes pa yang gleng bar byed de zhes bya ba la sogs pa'o/ /sdug bsngal ba dang yid mi bde ba bsal bar bya ba bstan pa'i phyir/ de dag na ba'am mi dga' bas zhes bya ba la sogs pa'o/ /brnyas par mi bya ba bstan pa'i phyir/ dman pa la yang brnyas par mi byed do zhes bya ba la sogs pa'o/ /gdams ngag dang rjes su bstan pa rab tu sbyin pa bstan pa'i phyir/ dus dus su de dag la skyo ba dang du blangs te zhes bya ba la sogs pa'o/ /gzhan dag gis brgal ba na rnam par brtags nas mi brjed par rjes su mthun pa'i lan 'debs shing mi 'khrugs pa'o//tshul dang spyod pa mthun pa'i don mthun pa'i dbang du byas nas bstan pa'i phyir/ dman par yang mi byed do zhes bya ba la sogs pa'o/ /brten pa med par 'jug pa bstan pa'i phyir/ rnyed pa dang bkur ste la yang zhes bya ba la sogs pa'o/ /tshig lhag ma rnams kyis ni bsam pa dang sbyor ba dag gis nges par 'jug pa bstan pa yin no//yongs su 'dzin pa'i nye bar bzung nas gcig tu 'dzin pa'am/ gcig tu mi 'dzin par 'jug pa yang 'gog par byed do zhes bya bar/ yongs su 'dzin par mi byed de zhes bya ba la sogs pa la/ gang gi tshe gdul bya gdul dka' ba bdag nyid kyis 'dul bar mi nus pa de'i tshe rang sangs rgyas bzhin du kun nas nyon mongs pa spang ba'i phyir 'khor yongs su 'dzin par mi byed do//mi 'dzin par mi byed do zhes bstan pa'i phyir mi 'dzin par yang mi byed do zhes bya ba'o/ /yang dag pa ma yin par mi byed do zhes bstan pa'i phyir/gzhan du yang mi byed do zhes bya ba'o/ /byang chub sems dpa' gang dag gis 'ga' zhig yongs su 'dzin pa ni 'di dag kho nar nges pa yin zhes bya bar/ de ltar na rnam pa drug po 'di dag ni zhes bya ba la sogs pa'o/ /ji ltar 'jig rten pa rnams yongs su 'dzin pa la zhugs par gyur pa na gnod cing nyam nga ba dang phrad par gyur pa bzhin du byang chub sems dpa' yang yongs su 'dzin pa la zhugs par gyur pa na gnod cing nyam nga ba dang phrad par 'gyur ro zhes bya ba'o//khyad par ni 'di yod de 'di dag ni gnod cing nyam nga ba dang phrad pa na kun du rmongs par 'gyur ro/ / byang chub sems dpa' ni yang mkhas pa yin pa'i phyir ro/ /bcos pa'i thabs tshol bar byed do/ /gnod pa yang de yin la nyam nga yang de yin pa'am/ yang na gnod pa dang nyam nga ba ni gnod cing nyam nga ba ste/ gnyis ka'i phyogs kyi tshul gyis de byas sam ma byas na yang skyon du 'gyur ba'i phyir/gnod cing nyam nga ba zhes bya ba'o/ /de ltar na byang chub sems dpa' phyogs gnyis ka'i tshul la mkhas par bya'o zhes bya ba ste/ de'i tshe rang dang rjes su mthun pa'i bya ba nyams su blang ba la mkhas par bya'o zhes bya ba'i tha tshig go/ /sems can la gnod pa byed pa spong ba'i sgo nas btang snyoms su 'jog pa yang tshul dang mthun pa ma yin pa la/gzhan la gnod pa byed pa yang de dang 'dra bas de ltar na dngos po gcig la bya ba yang yin la/ mi bya ba yang yin pa ni gnod cing nyam nga ba dang phrad pa dang zhes bya ba ste/ de lta bu la thabs la mkhas par 'gyur bar bya ste/de la gnod pa byas pas bya ba ma yin pa las kyang bzlog par bya la/ shin tu gnod par yang mi bya ba la yang thabs la mkhas par bya ba'o/ /sbyor ba drag po yang kun du spyod pa ni gnod pa yin la bdag nyid kyi nyon mongs pa bsrung bar bya dgos pa ni nyam nga ba zhes bya ba'o/ /'dir ni lci ba dang / yang ba yongs su brtags la thabs la mkhas pas btang snyoms su bya zhing sems kyi g.yeng ba bzlog par bya'o/ /sbyin par bya ba'i chos ni nyung ngu zhig la de la don du gnyer ba ni mang du lhags la/ gal te gcig la byin na ni gzhan gyi sems mi dga' bar 'gyur la/ 'on te thams cad la byin na ni chung bas sbyin gyi mi long bas ma byin na yang byang chub sems dpa'i rjes su mthun pa ma yin no//de lta bu ni nyam nga ba yin no/ /des na 'dir gang zag rnam par dpyad par bya ste/ don du gnyer ba dang / sdug bsngal ba dang / mgon med pa dang skyabs med pa dag la sbyin par bya zhing / gzhan dag gi rjes su mthun pas bzod par byas la gtang bar bya'o//de ni gcig pu yin la zhes bya ba ni bdag ni grogs med pa gcig pu yin zhing mthun yang med la/ gcig cig gi grogs byas na ni mang po dag mi dga' bar 'gyur la/ thams cad kyi grogs bya ba'i nus pa yang med pas/ kha cig gi yang grogs mi bya ba yang byang chub sems dpa'i tshul dang mthun pa ma yin pas de'i phyir gnod pa dang nyam nga ba dang phrad pa yin no/ /'dir yang lci ba dang yang ba la btang snyoms su bya ba'am/ nus pa yod pa'am/ nus pa med pa'i gang zag rnam par dpyad par bya'o/ /dge ba zhes bya ba ni dag pa zhes bya ba'i tha tshig go//snyoms par 'jug pa dge ba ma bskyed na yang sangs rgyas kyi chos rnams yongs su smin par mi 'gyur ba la sogs pa'i mthu med par 'gyur la/ snyoms par 'jug pa bskyed na yang bag med pa'i gnas su 'gyur te/ de'i ro myangs pas dbang ma thob pa rnams lha'i 'jig rten du skye bar 'gyur ro//de'i phyir smras pa/ sems las su mi rung ba ni gnod cing nyam nga ba dang phrad pa yin no zhes bya ba la/ des na 'dir bstan pa la dmigs pa 'jug par bya ste/ gnyen po'i phyogs kyi rgyu gang gis ro myang ba de spong bar byed pa'am/ yang na gnas de nas myur du 'chi bar 'gyur ba'i thabs byed pa'o//sems can gyi don bya bar 'dod la zhes bya ba ni sems can gyi don ni byed par 'dod la lus nyam chung ba la sogs pa'i rgyus de byed par mi nus pa'o/ /de la ni yang dag pa'i smon lam gdab par bya ba'am/ so sor rtogs pa drag po nye bar gzhag nas skyo ba med par brtsam par bya'o//blun po ste blo dman pa rnams la chos ston pa yang shin tu dka' ba dang / g.yon can de bzhin du zhugs par 'gyur ba nyid dang / dmu rgod de tshig ngan par smra ba nyid la ni bstan yang 'bras bu med pa'i phyir dang / btang snyoms su gnas pa yang rjes su mthun pa ma yin na ji ltar bya ste/'dir yang so sor rtogs pa'i stobs kyis blun po la ni rim gyis skyo ba med par bya'o/ /g.yon can dang dmu rgod la ni btang snyoms nyid du gnas pa'o/ /'khor ba'i nyes dmigs mthong bas 'khor ba yongs su gtong ba'i sgo nas ni theg pa dman par lhung bar 'gyur la/ skyon med par mthong ba las ni mya ngan las 'das par 'gro ba'i bsam pa med pas 'khor ba mi gtong ba nyid do/ /de'i phyir gnod cing nyam nga ba dang phrad pa yin te/ 'dir yang thabs la mkhas pa bsgom par bya ste/ shes rab la brten nas ni 'khor ba'i skyon mthong bar 'gyur ro/ /snying rje la brten nas ni 'khor ba yongs su mi gtong ngo //bsam pa ma dag pa rnams la ni rmongs bzhin du 'ching bar 'gyur bas 'chi ba de ni gnod cing nyam nga ba ste/ sems can gyi don bya bar 'dod pa la nus pa'i nges pa ma mthong ba'i phyir dang / bdag nyid yongs su smin par bya ba la yang nges pa med pa'i phyir ro//'dir ni brtson 'grus shin tu 'bar ba brtsam par bya ba'am dran pa brjed pa med pa thob par bya ba'i phyir smon lam rgya chen po gdab par bya'o/ /bsam pa rnam par ma dag pa ni sdug pa'i dngos po gtang bar bya ba mi nus pa yin la/ ma byin na yang tshul dang mthun pa ma yin no/ / des na gnod cing nyam nga ba yin te/ der ni sems nges par spro bar bya'o/ /bsam pa sna tshogs tha dad pa rnams phan tshun 'dod pa tha dad pa dang / mos pa yang tha dad pa sna tshogs pa rnams kyi mos pa sna tshogs pa rnams la 'dod pa'i mos pa bskyed pa'i phyir go bar bya ba ni dka' ba dang /de lta na yang btang snyoms su gnas par rigs pa ma yin te/ nges par bstan par bya dgos pa'i phyir ro/ /de'i phyir so sor brtags pa'i stobs kyis brtan par gzhag par bya'o/ /shin tu bag yod par bya ba la goms par byas na nyon mongs pa spong bar thal bar 'gyur bas de la thabs la mkhas pa bsgom par bya'o//gnod pa dang nyam nga ba dang phrad par gyur pa na ni de dang 'tsham pa'i dngos po brgyad la nan tan gyis bsgrub par bya'o/ /de ltar na yang dag pa'i gnyen po la mkhas par 'gyur ro/ /des na gnod pa dang nyam nga bas 'khrugs par mi 'gyur ro/ /des na bdag nyid yang dag par 'dren par 'gyur ro//des na gnod pa dang nyam nga bas gnod par mi 'gyur ro/ /byang chub sems dpa'i sa'i gzhi'i rnal 'byor gyi gnas tha ma las yongs su 'dzin pa'i le'u ste gnyis pa'i 'grel pa rdzogs so// //de ltar na sems can yongs su 'dzin pa la zhugs pa'i byang chub sems dpa' rnams gnas skabs kyi khyad par gyi don yang dag par bstan pas mdor bstan to//'dren ma gcig ste zhes bya ba ni byang chub sems dpa' dang de bzhin gshegs pa rnams kyi'o/ /de ni byang chub sems dpa'i yang yin la/ de bzhin gshegs pa'i yang yin no//sa 'di dag gi rnam par gzhag pa ni skal ba dang mnyam pa nyid dang / mngon par rtogs pa la sbyor ba dang / mngon par rtogs pa dang / nges pa'i sa la zhugs pa dang / nges pa'i spyod pa la zhugs pa dang / mthar thug par 'gro ba'i dbang du byas pa yin no/ /yang na skal ba dang ldan pa bskal pa grangs med pas nges par 'byung ba'i sbyor ba dang /nges par 'byung ba'i dbang du byas nas sa rnam par gzhag par bya ste/ rigs kyis la gnas pa ni nges par 'byung ba'i skal ba dang ldan pa yin la/ mos pas spyod pa'i sa ni bskal pa grangs med pa dang pos nges par 'byung ba'i sbyor ba yin no//bsam pa dag pa'i sa ni de'i nges par 'byung ba yin no/ /spyod pa la zhugs pa'i sa ni grangs med pa gnyis pa'i sbyor ba yin la/ nges pa'i sa ni de'i nges par 'byung ba yin no/ /nges pa'i sa la spyod pa ni grangs med pa gsum pa'i sbyor ba yin la/ mthar thug par 'gro ba'i sa ni de'i nges par 'byung ba'o//de'i phyir sa bdun po yin no/ /de dag las gsum ni gnas pa dang po gsum yin no/ /de nas gnas pa drug ni sa bzhi pa'o/ /mtshan ma med par lhun gyis grub pa'i gnas pa ni sa lnga pa'o/ /so so yang dag par rig pa'i gnas pa ni sa drug pa'o//gnas pa mchog dang de bzhin gshegs pa'i gnas pa ni sa bdun pa ste/ da ltar nas dang gnas pa dag phan tshun bsdus par bstan nas/ sngar bstan pa'i sa dang po thob pa nyid nas ngan 'gro'i 'jigs pa las yang dag par 'das pa yin zhes bya ba'i ngan 'gro las yang dag par 'das pa'i lam bsgom pa bstan pa'i phyir/yongs su dag pa'i bsam gtan bzhi pa ni rnam pa gnyis kyis yongs su dag pa yin te/ pha rol tu phyin par gtogs par bsdus pa'i phyir dang / mi g.yo ba'i ting nge 'dzin gsal pos rab tu phye ba'i phyir ro/ /gzhan yid la mi byed par zhes bya ba ni rgyun mi 'chad par zhes bstan pa yin no//sems can rnams la phan pa dang bde ba bsgrub pa'i phyir/ snying brtse ba sgom par byed de/ de bsgoms pas de dang mthun pa'i snying rje'i bsam pa yang 'thob par 'gyur te/ bsam pa gang gis sems can rnams kyi don du ngan song rnam pa gsum ni gnas pa yang rang gi khyim na gnas pa dang 'dra bar gnas te/ji ltar 'dod pa zhen pa'i khyim pa dag rang gi khyim na gnas par dga' ba de bzhin du byang chub sems dpa' sems can gyi don bya ba'i phyir zhugs pa rnams ngan song du gnas par dga' ba yin te/ sems can thams cad kyi ngan song du skye bar 'gyur ba'i las ci byas pa de thams cad kyi rnam par smin pa bdag gis myang bar bya'o zhes mos par byed do//de ltar bsam pa dang mos pa'i khyad par bstan nas/ sbyor ba'i khyad par bstan pa'i phyir mi dge ba'i las thams cad gtan kun du mi spyod par zhes bya ba la sogs pa la/ngan song gi rgyu'i mi dge ba rnams ji ltar yang kun du mi spyod pa de ltar sems mngon par 'du byed de/ ji ltar sngar bstan pa'i bsam pa yongs su rdzogs par byas pa dang / yongs su dag pa'i bsam gtan yongs su rdzogs par byas pas gnas ngan len spong bar 'gyur te/gser gyi khams yod pa'i sems legs par bzhus pa bzhin du yongs su 'gyur bar bstan pa'i phyir/ ngan song du 'gro ba'i las gtan mi byed pa dang zhes bya ba la/ ngan song du 'gro ba la sogs pa dang mthun pa yang ma yin la/ ngan song gi phung po bskyed pa dang mthun pa yang ma yin pa'o//de lta bu'i gnas yongs su gyur pas mos pa spyod pa'i sa nas ngan song du 'gro ba las 'das nas bsam pa dag pa'i sa la 'jug par 'gyur ro/ /rab tu dga' ba'i gnas pa yongs su spyod bar byed pa'i chos bstan pas gnas pa thams cad yongs su sbyong ba nyid bstan pa'i phyir smras pa/chos bcu po gang dag bstan pa zhes bya ba la sogs pa la/ bcu po 'di dag ni zhes bya ba ni sa yongs su sbyong bar rig par bya'o/ /de dag gi dbang du byas nas smras pa/ mi mthun pa'i phyogs kyi gnyen po zhes bya ba ni mi mthun pa'i phyogs kyi gnyen pos spong ba zhes bya ba'i tha tshig go//de dag ni bsdus nas rnam par gzhag pa dang go rims bstan pa'i phyir/ sems bskyed pa mi rtsom zhing zhes bya ba la/ mi rtsom pa nyid ni mngon par yid ches pa'i mi mthun pa'i phyogs ma dad pa zhes bstan to/ /sems mi bskyed pa nyid ni mngon par 'dod pa'i rnam pa mi mthun pa'i phyogs ma dad pa'o//de ltar na dad pa med pa dang / mngon par 'dod pa med pa ni de'i don du sgrub par mi byed de zhes bya ba nas dad pa la sogs pa'i mi mthun pa'i phyogs su rnam par gzhag go/ /sems can rnams la rnam par 'tshe ba ni gnod sems dang ldan pa ste/ snying rje'i mi mthun pa'i phyogs so//gnod sems mang du bskyed pa ni byams pa'i mi mthun pa'i phyogs so/ /bdag la chags pa dang / longs spyod la chags pa ni sbyin pa'i mi mthun pa'i phyogs so/ /sems can rnams la gnod pa byed pa dang / log par bsgrub pa la skyo ba mang ba ni mi skyo ba'i mi mthun pa'i phyogs so/ / bdag dang gzhan gyi don la bstan bcos shes pa med pa ni rmongs pa mang ba ste/ bstan bcos shes pa'i mi mthun pa'i phyogs ni/ mi des pa la sogs pa la sogs pa ni 'jig rten shes pa'i mi mthun pa'i phyogs te/ gzhan dag la gcig tu sdug bsngal skyed par byed pa'o/ /bya ba ngan pa la chags pa ni bag med pa'o//thams cad kyi thams cad du sbyor ba mi byed pa ni le lo'o/ /de dag gnyis ka yang sdig pa dang rjes su mthun zhing dge ba dang rjes su mi mthun pa yin pa'i phyir ngo tsha shes pa dang khrel yod pa'i mi mthun pa'i phyogs yin no/ /sdug bsngal rnam pa bzhis nye ba ni bdag nyid brtan par 'dzin par mi nus pas brtan pa'i stobs bskyed pa'i mi mthun pa'i phyogs yin no//ston pa la mos pa med cing mi dad pa ni de bzhin gshegs pa la mchod pa'i mi mthun pa'i phyogs yin no/ /bdag dang gzhan gyi don la dad pa dang ldan na bla na med pa yang dag par rdzogs pa'i byang chub sgrub par byed do zhes bya bas dad pa'i bsam pa rnam par dag pa'o//sems can sdug bsngal ba rnams la snying rje bar byed do zhes bya ba ni snying rje'i bsam pa rnam par dag pa'o/ /sems can yongs su bskyab par bya'o zhes bya ba ni byams pa'i bsam pa rnam par dag pa'o/ /de ltar na bsam pa rnam par dag pa gsum bstan nas/lhag ma rnams kyis ni sbyor ba yongs su dag pa bstan to/ /go rims bstan pa'i phyir/ byang chub la mngon par 'dod pa ni zhes bya ba la sogs pa la/ dad pa dang ldan pa ni gzhan gyi don la snying rje skye'o/ /snying rje dang ldan pas gzhan la byams par 'gyur ro//snying rje dang byams pa dang ldan pa'i bsam pas ni thams cad gtong ngo / /thams cad gtong bas ni de sems can gyi don la skyo bar mi 'gyur ro/ /skyo ba med pa ni bstan bcos kyi mthar thug par 'gyur bas bstan bcos shes pa bstan pa yin no/ /de'i rjes su 'brangs nas 'jig rten yang shes par 'gyur bas 'jig rten shes pa bstan to//de ltar bstan bcos shes pa dang 'jig rten shes pa ni bdag dang gzhan la ltos nas kun la nyon mongs pa la spyod pa la ngo tsha shes par 'gyur bas ngo tsha shes pa dang khrel yod pa dang ldan par 'gyur ro/ /de dag dang yang dag par ldan pas nyon mongs pa'i dbang du mi 'gyur ba'i phyir/brten pa'i stobs bskyed pa 'thob par 'gyur ro/ /de ltar de yang dag pa'i sbyor ba dang ldan pa ni dge ba'i rtsa ba 'phel bar 'gyur ro zhes byas pas shes pa'i dbang du byas nas rnam pa gnyis kyis mchod pa dang /bsnyen bkur mang du byed par 'gyur ro zhes bya ba ni 'di'i go rims yin no/ /byang chub sems dpa'i sa'i gzhi'i rnal 'byor gyi gnas tha ma las sa'i le'u ste gsum pa'i 'grel pa rdzogs so// //de ltar sa la gnas pa'i byang chub sems dpa'i spyod pa'i sbyor ba bstan pa'i phyir/mdor bsdu na zhes bya ba la sogs pa la/ rang gi don rtogs pa'i sbyor ba ni rang gi don rtogs pa'i dbang du byas pa ni gnyis pa'o/ gzhan gyi don la bya ba la nus pa ni gzhan gyi don gyi dbang du byas pa ste/ phyi ma gnyis so/ /yang na bya ba rnam pa bzhi yang dag par sgrub par byed pa'i phyir spyod pa bzhi'o//bya ba rnam pa bzhi ni tshogs nye bar bsags pa dang / de kho na'i don mngon par rtogs par bya ba dang / mthu phun sum tshogs pa dang / gzhan gyi bsgrub par bya ba'o/ /byang chub sems dpa' rnams kyi bya ba bzhi po 'di'i phyir spyod pa yang rnam pa bzhi ste/pha rol tu phyin pa mngon par bsgrub pa dang / pha rol tu phyin pa la sbyor ba dang / pha rol tu phyin pa la yang dag par rtogs pa ni pha rol tu phyin pa'i spyod pa zhes bstan to/ /rnam pa gnyis kyis pha rol tu phyin pa rnam par gzhag par bya ste/ dngos po nyid kyis rnam pa drug go/ /rab tu dbye ba nyid kyis ni bcu'o//thabs la mkhas pa nyid thabs kyi pha rol tu phyin pa'o zhes bstan pa'i phyir smras pa/ de la sngar bstan pa'i zhes bya ba la sogs pa'o/ /smon lam lnga po nyid smon lam gyi pha rol tu phyin pa'o zhes bstan pa'i phyir/ smon lam rnam pa lnga ni zhes bya ba la sogs pa'o//de bzhin gshegs pa'i stobs bcu po yang dag par rtogs pa'i sbyor ba sngar stobs kyi rigs kyi le'ur bstan pa gang dag yin pa de dag rnam par dag pa stobs kyi pha rol tu phyin pa'o/ /chos thams cad rnam par 'jog pa ni ye shes kyi pha rol tu phyin pa zhes bya ba'o/ /mngon par rtogs pa rnam par 'jog pa ni/shes rab kyi pha rol tu phyin pa zhes bya'o/ /rnam grangs gzhan yang pha rol tu phyin pa bzhi ni shes rab nyid kyi rab tu dbye ba yin no zhes bstan pa'i phyir ye shes tshad med pa ni thabs la mkhas pa'i pha rol tu phyin pa'o zhes bya ba ste/ bzhi ni rab de ltar gyi tshe 'di la don gyi rnam pa thams cad yongs su gcod pa la mkhas pa nye bar gzung nas so//ma 'ongs pa ni gong nas gong du khyad par 'gro ba don du gnyer ba ni smon lam gyi pha rol tu phyin pa ste/ khyad par du 'phags pa'i ye shes rtogs pa'i rgyu yin pa'i phyir ro/ /lhag par mos pa'i stobs la brten nas/rnam pa thams cad du 'phrogs par mi nus pa ni stobs kyi pha rol tu phyin pa'o/ /shes bya ji lta ba bzhin du yongs su spyod pa ni nges pa'i bdag nyid yin pa'i phyir ye shes kyi pha rol tu phyin pa'o/ /byang chub kyi phyogs kyi spyod pa ji lta ba bzhin du shes pa ni byang chub kyi phyogs kyi spyod pa zhes bstan pa'i phyir/yongs su tshol ba dang bcas pa'i yongs su shes pa'o/ /gang yongs su smin par bya ba dang / /gang gis yongs su smin par byed pa dang / ji ltar yongs su smin par byed pa'o/ /gsum po de dag ni yongs su smin pa zhes bstan pa yin no/ /byang chub sems dpa'i spyod pa dpag tu med pa tshad med pa dag mdor bsdus nas rnam par gzhag pa'i dbang du byas nas spyod pa rnam par gzhag pa byas so zhes yongs su gsal bar bstan pa ni/spyod pa 'di bzhis ni zhes bya ba la sogs pa'o/ /pha rol tu phyin pa'i nges pa'i tshig bstan pa ni/rab kyi mthar thug par 'gro ba'i don gyis na pha rol tu phyin pa zhes bya ba ste/ rab kyi mthar thug par 'gro ba dang dus kyi rab kyi mthar 'gro ba ni gang yang smras pa/ yun ring po bskal pa grangs med pa zhes bya ba la sogs pa'o/ /ngo bo rab kyi mthar thug pa ni gang yang smras pa/ rang bzhin gyis rnam par dag pa zhes bya ba la sogs pa'o/ /'bras bu rab kyi mthar gyur pa ni gang yang smras pa/ byang chub mchog gi 'bras bu zhes bya ba la sogs pa'o/ /ji ltar mi mthun pa'i phyogs la kun du spyod pa de ltar de'i gnyen po'i phyogs kyang bstan par bya ba yin no zhes bya bar mi mthun pa'i phyogs dang /gnyen po'i phyogs kyang rnam par gzhag par bya ste/ bslab pa gsum po bzhin no/ /'byung ba nyid kyis ni gang dag rim gyis 'byung ba de dag ni de bzhin du bstan par bya ste/ bsam gtan dang gzugs med pa bzhin no/ / rnam par smin pa'i 'bras bu zhes bya ba ni ji ltar 'bras bu mchog tu zhugs pa de yang rnam par gzhag par bya ste/ bsod nams bya ba'i dngos po bzhin no/ /'dod pa'i khams ni longs spyod la gcig tu zhen pas dang po nyid du longs spyod la ser sna kun du spyod do/ /longs spyod la chags pa'i rgyus lus la sogs pa'i nyes par spyod par byed do//de'i bar du gcod pa'i dgra la gnod pa byed par 'gyur ro/ /gsum po de dag dang ldan pa'i rgyus dge ba'i phyogs la mi spro ba las le lo skye bar 'gyur ro/ /de dang ldan pas yul la rnam par g.yeng bas g.yeng bar 'gyur ro//rnam par g.yeng ba dang ldan pas rmongs shing dman par 'gyur ro/ /des na chos drug po 'di dag ni yang dag par rdzogs pa'i byang chub kyi bar du gcod pa'i gnas yin te/ de 'thob par byed pa'i chos bsod nams dang ye shes kyi tshogs kyi mi mthun par 'gyur pa'i phyir ro/ /de ltar na mi mthun pa'i phyogs kyi rim gyis gnyen po'i phyogs kyi rim pa gzhag pa yin no//de las gzhan pa'i lhag ma bzhi'i go rims rnam par ma bzhag pa ni 'di dag nyid kyi khongs su 'dus pa yin par bstan pa'i phyir smras pa/ de ma yin pa'i pha rol tu phyin pa zhes bya ba la sogs pa'o/ /longs spyod gtong ba sngon du 'gro ba las sdom pa yang dag par len par 'gyur ro zhes bya bar smras pa/longs spyod la mi lta na khyim gyi 'dod pa rnams btang nas tshul khrims yang dag par len to zhes bya ba'o/ /tshul khrims rjes su bsrung ba ni gzhan gyi gnod pa byas pa bzod par 'gyur ro zhes bya ba smras pa/tshul khrims la gus na zhes bya ba la sogs pa'o/ /de ltar na yang dag par blangs pa rjes su bsrung bas tshul khrims rnam par dag pa dang ldan pa'i dge ba'i phyogs la sems spro ba nyid du 'gyur gyi/ mi mthun pa'i phyogs la ni ma yin no zhes bya bar smras pa/ mi 'byung ba dang rgyun mi 'chad pa zhes bya ba la sogs pa'o/de lta ra brtson 'grus brtsams pa ni bag yod pas mthar thug par 'gro ba'i phyir/ sems rtse gcig pas bde ba la reg par 'gyur ro/ /de ltar sems mnyam par gzhag pa ni shes bya ji lta ba bzhin shes pa skye bar 'gyur ro zhes bya ba smras pa/ de de ltar sems mnyam par gzhag na zhes bya ba la sogs pa'o/ /de ltar rab tu shes pa'i mtshan nyid gang yin pa de shes rab kyis rab tu shes pa yin te/ gang gis zag pa med pa blta bar bya ba mthong ste/ ji ltar gzhan dag nas de ltar shes shing de ltar mthong ngo zhes bstan pa lta bu'o/ / mdor bsdu na sbyin pa la sogs pa rnams kyi 'bras bu ni rnam pa gnyis te/ longs spyod phun sum tshogs pa 'thob pa dang / lus phun sum tshogs pa 'thob pa'o/ /de dag gi rgyu ni sbyin pa dang / tshul khrims dag go rims bzhin no/ yang tshul khrims ni de las gzhan pa'i dge ba dag dang lhan cig phun sum tshogs pa lnga dang ldan pa'i lus mngon par 'grub par byed do zhes bya bar smras pa/de ma yin pa'i zhes bya ba la sogs pa la/ tshe la sogs pa khyad par du 'phags pa'i bde 'gro'i lus kyi dngos po rab tu 'thob pa ni phun sum tshogs pa dang po ste/ de'i rgyu ni tshul khrims so/ de dag gi lus de lta bu yang dag dge ba'i phyogs la yang dag par sbyor ba na sdug bsngal dang du len pa'i phyir skyo ba bzod pa dang / gzhan gyis gnod pa byas pa la brnags nus pas gnod pa byed pa bzod pa dang / gzhan la gnod pa byed pa la mi dga' ba'i phyir ro/ /gnod pa mi byed pa ste phun sum tshogs pa 'di dag ni bzod pa rnam pa gsum gyi rgyu yin no//'di ni gnyis pa'o/ /bdag gi lus de lta bu dang ldan pas brtsams pa thams cad la 'bad pa brtan pa'i go cha gyon par 'gyur ba 'di ni gsum pa'o/ yang de ni tshe rabs gzhan dag tu brtson 'grus brtsams pa'i rgyu las byung ba yin no//de ltar brtson 'grus brtan po brtsams pa dang ldan pa'o/ /dge ba'i phyogs dang yang dag par ldan pa'i mi mthun pa'i phyogs kun du spyod pa dman par gyur pas nyon mongs pa chung ba nyid kyi phyir de'i gnyen po bsgoms pa la sems las su rung bas des na mngon par shes pa myur bar 'gyur ba 'di ni bzhi pa yin no//de yang bsam gtan dang ting nge 'dzin gyi rgyu las byung ba yin no/ /de ltar nyon mongs pa chung bar gyur pas don mang po la 'jug par nus pa ni blo rgya che ba zhes bya'o/ /don zab mo la 'jug par nus pa ni mkhas pa zhes bya'o/ /don la blo myur du 'jug par 'gyur ba ni mdzangs pa zhes bya'o//'di dag skye ba gzhan du goms par bya ba'i shes rab kyi rgyu las byung ba yin te/ 'di ni lnga pa'o/ /de ltar na 'bras bu'i go rims kyis pha rol tu phyin pa'i rim pa yin no/ /bslab pa gsum gyis bsdus pa'i phyir smras pa/ de la pha rol tu phyin pa bzhi zhes bya ba la sogs pa la/lhag pa'i tshul khrims kyi bslab pa'i tshogs su gyur pa ni sbyin pa yin te/ longs spyod la ltos pa med na tshul khrims yang dag par len par byed do zhes bstan pas so/ /tshul khrims nyid ni ngo bo nyid do/ /bzod pa ni 'khor yin no/ /tshul khrims kun nas bsrung ba'i don du gzhan gnod par byed pa la bzod do//kun nas bsrung ba ni brtson 'grus te/ de'i mi mthun pa'i phyogs kyi mi dge ba skyes pa ste skyes pa rnams spong ba dang / mi skye bar byed pa'i bya ba dang ldan pa'i phyir ro/ /de ltar na tshogs dang bcas pa nas bsrung ba dang bcas pa'i bar gyis tshul khrims kyi pha rol tu phyin pas ni lhag pa'i tshul khrims kyi bslab pa bstan pa yin no//bsam gtan gyi pha rol tu phyin pas ni lhag pa'i sems kyi bslab pa'i ngo bo nyid do/ /shes rab kyi pha rol tu phyin pas ni lhag pa'i shes rab kyi bslab pa'o zhes bya ba'o/ /bslab pa ni gsum mo zhes bya ba'i nges pas bslab pa'i lam 'di las lhag par ma bstan to//de ltar na byang chub sems dpa' rnams kyi bslab pa'i dbang du byas nas/ pha rol tu phyin pa rnam pa drug rnam par gzhag go/ /bya ba'i gtso bo bzhi yang dag par bsgrub par bya ba'i phyir spyod pa bzhi bstan te/ spyod pa mang du yod pas bden pa yang der 'dus pa'i phyir ro//de'i phyir smras pa/ mdor bsdu na bzhi po 'di dag yin te zhes bya ba la sogs pa'o/ /byang chub sems dpa'i sa'i gzhi'i rnal 'byor gyi gnas tha ma las spyod pa'i le'u ste bzhi pa'i 'grel pa rdzogs so/ /gnas pa rnam par gzhag pa las bcu gsum pa ni de bzhin gshegs pa'i gnas pa ste/rten dang brten par gyur pa'i sangs rgyas kyi chos rnams nyid gnas pa zhes bya ste/ de dag la gnas shing de dag gis gnas par rig par bya'o/ sa rnam par gzhag pa la ni mthar thug pa'i sa nyid ces bya ste/ de nyid ni sangs rgyas kyi chos rnams te yongs su rdzogs shing yongs su dag pas rab tu phye ba'i phyir ro//de ltar na sangs rgyas kyi chos rnams nyid sangs rgyas kyi gnas pa dang sangs rgyas kyi sa zhes bya ste/ chos de dag la ma gtogs pa gnas pa rnam par gzhag pa yod pa ma yin no/ /'di dag ni rten dang brtan pa'i ngo bor rnam par gzhag par bya ste/thun mong ma yin pa'i phyir sangs rgyas kyi chos zhes brjod do/ /gzhan dag la 'di lta bu mi srid pa'i phyir zhes bya bas so/ /mtshan sum cu rtsa gnyis zhes bya ba ni/ 'jig rten la grags pa ste/ thos pa dang 'dra ba nyid ni zhes rig byed las 'don pa'i phyir ro//'og gi zhabs kyi mthil nas nye bar bzung nas mtshan rnams rnam par gzhag par bstan pa'i phyir smras pa/ zhabs shin tu mnyam pa ste zhes bya ba ni zhabs kyi mthil gnyis mnyam pa'i dbang du byas nas so/ /'di'i phyir smras pa/ sa la mnyam par 'bab pa zhes bya ba la sogs pa la/sa la mnyam du reg pa zhes bya ba'i tha tshig ste/ 'dod chags spyod pa la sogs pa rkang pa 'dor ba las bzlog pa'i tshul gyis de bzhin gshegs pa'i zhabs bskyod par mdzad pa'o/ /zhabs kyi mthil nyid na mtshan ma'i khyad par mnga' ba ni mtshan gnyis pa ste/ rtsibs stong dang ldan pa la sogs pa'i rnam pa gsum rnam pa thams cad du yongs su rdzogs pa'o//sor mor gtogs pa'i dbyibs kyi khyad par ni gsum pa'o/ /zhabs su gtogs pa'i dbyibs kyi khyad par ni bzhi pa'o/ /phyag dang zhabs 'jam pa'i khyad par dang ldan pa dang / sor mo rnams kyi bar dra bas 'brel pa dang /zhabs kyi gong rgyas pa dang / byin pa gnyis rim gyis phra ba'i khyad par dang / sku ma lus pa sra zhing brtan pa dang ldan pa'i khyad par dang ldan pa dang / sku drang por bzhugs pa dang / glang po cang shes kyi ltar gsang ba sbubs su nub pa ni dgu pa'o/ /shing n+ya sgro d+ha ltar chu zheng gab pa ni bcu pa'o//'od 'dom gang ba dang sku'i spu re re nas skyes shing ma reg pa la 'jam pa ste/ des na mdog dang dbyibs smras pa/ mthon mthing la lcang lor zhes bya ba la sogs pa la/ 'khyil par gyur na yang mdzes shing bkra shis par bstan pa'i phyir/g.yas phyogs su 'khyil pa zhes bya'o/ /sku'i pags pa'i mdog dang srab pa'i khyad par dang / pags pa reg pa'i khyad par gyis rdul dang dri ma mi 'chags par bstan pa yin no/ /bdun mtho ba ni gnas bdun du sha bsags pas mtho bar gyur pa ste/ zhabs gong rgyas par sngar bstan pa ni rgyas pa tsam bstan pa'o//'dir ni shin tu shas rgyas par bstan pa yin no/ /seng ge bzhin du ro stod rim gyis stod 'phel che ba dang yangs pas de rnam par gzhag ste/ sku'i dbus nas stod kyi cha'i dbyibs kyi khyad par dang ldan pa'o/ /dpung mgo la sha bsags pa lta bu dang ldan pa dang /bzhugs pa na sku drang zhing mi g.yo ba dang / tshems kyi grangs dang tshad yongs su rdzogs pa nyid dang / de dag nyid la bar mtshams med pa nyid dang / de dag nyid kyi kha dog gi khyad par nyid do/ /'gram pa'i dbyibs seng ge'i 'dra ba nyid dang / ljags ring zhing yangs la srab pa nyid dang / ljags ring zhing yangs pa'i bya ba bstan pa'i phyir/ zhal la sogs pa ljags kyis khebs par mdzad pa nyid do/ /ro bro ba'i khyad par mkhyen pa dang ldan pa dang / dbyangs kyi khyad par dang ldan pa dang / dbyangs kyi khyad par yang dpes bstan pa'i phyir smras pa/ gsung yid du 'ong ba dang rnga sgra lta bu dang zhes bya ba'o//spyan 'bras bu'i kha dog gi khyad par nyid dang / spyan gyi spu'i khyad par nyid dang / dbu'i khyad par dang ldan pa nyid dang / lhan cig skyes pa'i thig le'i khyad par lta bu'i g.yas su 'khyil pa'i spu'i khyad par dang ldan pa'i mtshan nyid yin par shes par bya'o/ dpe byad rnams kyi grangs yongs su chad pa dang /ming dang rnam par gzhag pa ni ji skad bstan pa bzhin no/ /de sde pa gzhan dag ni de bzhin gshegs par 'gyur ba kho na la mtshan dang dpe byad rnam par gzhag par bya'o zhes 'dod pa de dgag par bya'o zhes bstan pa'i phyir dang / rim gyis 'thob pas rnam par dag par bstan pa'i phyir smras pa/lhag pa'i bsam pa dag pa'i sa la bzhugs pa'i zhes bya ba la sogs pa la/ ji ltar 'khor los sgyur ba'i rgyal po'i rigs su skyes pa'i rgyal po'i bu ni 'khor los sgyur ba'i rgyal po'i rgyud rgyun mi 'chad par zhugs pas mtshan thams cad dang ldan par 'gyur ba yin no//de bzhin du de bzhin gshegs pa'i rigs su skyes pa'i rgyal ba'i sras ni sangs rgyas kyi gdung mi gcod par zhugs par rig par bya'o/ /de'i gong ma'i sa dgu gong ma gong ma'i khyad par bstan pa'i phyir gong nas gong du rnam par dag pa rdzogs pa nyid kyis byang chub kyi snying po la zhugs pa'i bar du zhes bya ba'i bar gyis zhes bya ba nas ni mngon par byang chub pa'i dus su rten yongs su gyur pa'i khyad par dang bsam pa'i khyad par bstan pa'i phyir/gzugs kyi ngo bo'i sangs rgyas kyi chos chen po lhag ma ma lus pa'i rnam par dag pa rab tu 'thob par 'gyur ro zhes bya ba ni mngon par byang chub pa'i dus nyid na'o//sa la zhugs pa'i dus nas nye bar bzung nas ni byang chub sems dpa'i gnas skabs na dman pa yin te byang chub pa'i dus 'ba' zhig tu ma zad do/ /de ltar gnas skabs kyi mtshan rnams 'thob par bstan nas/ yang mtshan bstan pa'i mdo las bstan pa'i rgyu dang 'bras bu bstan pa'i phyir te/bya ba mang pos 'jigs pa'i gdul bya la de dag sgrub par byed pa'i lus la spro ba bskyed pa'i phyir dang / mtshan rnams sgrub par byed pa'i las gang gis las kyi 'bras bu ster bar byed pa dang / 'phel bar byed pa 'thob pa dang mi 'thob pa bstan pa'o//rnam par smin pas 'thob pa'i mtshan rnams kyi 'bras bu ster ba'i tshogs ni byang chub dang nye ba dang / brtsams pa'i 'bras bu yin pa'i phyir ro/ /'phel ba ma thob pa ni ring ba ste/ de'i phyir smras pa/ rnam par smin pa ma thob pa'i zhes bya ba la sogs pa la/ de la dang po zhes bya ba ni sa dang po la'o//de las gong nas gong du rnam par dag pa'i khyad par du gyur pa'i zhes bya ba ni de las gong du'o/ /so so kun yang tshogs ma lus pa las grub pa yin na yang mtshan rnams las sna tshogs kyis mngon par sgrub par mdo las bstan pas de dag gi rgyu nyid bstan pa ni/gdul bya bya ba mang pos 'jigs pa rnams la zhes bya ba la sogs pa bstan pa yin no/ /de'i mi mthun pa'i phyogs kun du spyod pa la zhugs pa'i gdul bya rnams mi mthun pa'i phyogs las bzlog nas gnyen po'i phyogs la yang dag par gzung ba'i phyir ro zhes bstan pa'i phyir/sbyin pa dang tshul khrims dang bzod pa'i pha rol tu phyin pa'i ngo bo brtul zhugs dang rnam pa bzhi la legs par rab tu gnas pa'i phyir te/ legs par rab tu gnas pa'i rkang pa yin pa'i phyir ro/ /bla ma'i bsnyen bkur gyi bya ba dang / sems can gyi gnod pa bya ba bsrung ba'i phyir rkang pas 'gro ba dang /'ongs pa'i bya ba mang du byas pas zhabs mdzes pa nyid 'thob po zhes bya bar smras pa/ phyag dang zhabs 'khor lo'i mtshan nyid dang ldan pa brnyes so zhes bya ba yin no/ /mtshan sgrub par byed pa'i las 'di dag ni ji ltar rigs par pha rol tu phyin pa rnams kyi nang du 'dus par sbyar bar bya ste/kha na ma tho ba med pa'i las kyi tshogs pa'i tshe na 'khor lo'i rjes su 'byung ba'i 'khor lo 'thob po zhes bya ba'o/ /sems can rnams la srog gcod pa la sogs pa'i gnod pa spangs pa dang / bla ma la bsnyen bkur byas pa dang / lag pas byas pa'i sdig pa ma byas pa dang / des byas pa'i dge ba byas pas phyag sor ring zhing legs pa brnyes pa yin no/ /sor mo smos pa ni brkyang bskum la sogs pa'i bya ba rnams mtshon pa yin no/ /gzhan dag gi yid mgu bar bya ba la ma bsgyings pa dang gzhan dag la gnod pa spangs pa dang / dga' ba'i longs spyod nyams par ma byas pa ste/ma byin par len pa spangs pa'i phyir dang / thung bar byed pa'i las zhal gyis mi bzhes pas na mi thung ba'i sor mo dang ldan par 'gyur ro zhes bstan pa yin no/ /nga rgyal nges par bcom pa zhes bya ba 'dis kyang yan lag ring ba 'thob pa'i las bstan pa yin no/ /las gsum po gang dag gi skyes bu chen po'i mtshan gsum de dag 'grub par bstan pa las de dag kun gyi zhabs kyi rting pa yangs pa 'grub pa bstan te/ji ltar nye bar len pa'i phung po'i rten 'byung ba chen po yang las kyi rnam par smin pa'i 'bras bu 'dod pa bzhin no/ /bla ma'i zhing dang sems can rnams bsdu ba'i las byas pas phyag dang zhabs kyi sor mo dra bar 'brel pa brnyes pa yin no//de dag nyid la reg bya'i khyad par gyis bsnyen bkur byas pas ni yan lag gi reg bya khyad par can brnyes pa yin no/ /dge ba spel ba'i sbyor ba dang ldan pas ni zhabs ma yangs pa 'thob po zhes bstan pa'i phyir/ dge ba'i chos rnams gong nas gong du spel ba ni zhabs 'bar 'bur med pa brnyes so zhes bstan pa yin no/ /bdag nyid kyang bstan pa'i chos la legs par zhugs shing gzhan la yang myur du ston te/ gzhan gyi bya ba dag kyang myur du sgrub par byed pa 'gro zhing 'ong ba la nus pa dang ldan pa'i yan lag 'thob par 'gyur pa'o//mdo sde la sogs pa bstan pa'i chos rnams rim gyis bstan pas slob ma gcig nas gcig tu chos kyi tshul yang dag par ston pas ni/ sku rim gyis drang zhing che bar bstan pa'i phyir yid dang lus la sogs pa la yon po med pas sku ma btud pa brnyes pa yin no//legs par brtan pa zhes bya ba ni de nyid la gcig tu zhen bar byed pa brtan pa'i phyir te/ /des na lus la sogs pa'i las rnams de las bzlog par mi 'gyur ba'o/ /de bzhin du dman pa'i gnas su gyur pa'i sdig pa'i las rnams spangs pa dang / nad kyis mnar zhing nyam thag pa bslang bas kyang sku ma btud pa brnyes par bstan pa'i phyir/nad pa rnams la zhes bya ba la sogs pa la/ yang zas la gcig tu zhen pa med pa dang / 'dod pa rnams la mi zhen par sbyor ba ste/ de lta bu'i las rnam pa bzhis sku ma btud pa brnyes par bstan pa yin no/ /gzhan dag gis bskrad cing gnas med pa'i gnod pas nyen pa rnams la chos dang mthun par bsdus pa dang ngo tsha dang ldan zhing khrel yod pa rnams la yod pa rnams la gsang bdag ba pa byin pas ni mdoms kyi sba ba sbubs su nub pa 'thob par gsungs pa yin no//gnas med pa bsdus pas ni sbubs thob pa yin la/ cig shos kyis ni sba ba nub pa yin no//lus la sogs pa bsdoms pas mi mnyam pa'i las la mi 'jug pa dang / yongs su 'dzin pa'i kha zas la tshod zin pas mi mthun pa'i kha zas la mi 'jug pa dang / nad pa rnams la sman byin pa dang / khams ma snyoms pa rnams kyi mthun par byas nas gsum po 'di dag la 'jug pa bstan pa ni lus dang ngag dang yid ces bya ba la/de ltar mi mthun pa la mi 'jug pas sku chu zheng gab pa brnyes pa yin te kun gyis mngon par 'dod pa'i sku zhes bya ba'i tha tshig go/ /las gang gis zhes bya ba la sogs pa la/ dge ba'i rtsa ba gong nas gong du 'phel bar bstan pa'i phyir/sku'i spu gyen du phyogs pa bstan pa yin no/ /bdag nyid kyis dge ba spyad pa la mkhas pa'i phyir gcig pu gnas pa zhes bya'o/ /mkhas pa dang rgan pa la brten pas na bshes gnyen gcig la brten pa'o/ /dpyod pa dang ldan pa'i phyir cha phra ba'i don la sems pa'o//mkhas pa dang rgan pa la brten pa'i phyir/ bla ma rnams kyi gnas kyi byi dor byas pa'o/ /chu la sogs pa nas rtswa dang lo ma la sogs pa bsal ba dang / lam gyi bsrel dang / rang bzhin gyis rnam par dag pa'i mchod rten la sogs pa'i gnas phyag bdar byed pas ni spu re re nas skyes pa yin no//gnas pa gcig pas cha phra ba'i don la 'jug pa'o/ /glo bur gyi dri ma bsal bas na spu re re nas ma 'dzings pa brnyes pa ste/ kha dog dang dbyibs phun sum tshogs pa dang ldan pa'i spu nyid do/ /dga' bar byed pa'i zhes bya bas ni kha dog phun sum tshogs pa sbyin par ston to//khro ba med pas zhes bya ba ni khros pa kha dog ngan pa'i rgyu yin pa'i phyir ro/ /de med pas kha dog phun sum tshogs pa 'thob pa'i rgyu bstan to/ /'od 'dom gang ba yang kha dog gi khyad par yin no/ /las gang gis zhes bya ba ni cha phra ba la 'jug pas pags pa srab pa brnyes pa yin no//nyon mongs pa'i dri ma bsal bas ni pags pa 'jam pa nyid brnyes pa yin no/ /zas dang skom mang po zhes bya ba ni rab tu mang ba'o/ /gya nom pa zhes bya ba ni phul du byung ba'o/ /phal po che zhes bya ba ni sna chogs pas so/ /gsar pa zhes bya ba ni rnying pa ma yin pa'o/ /de lta bu'i dngos bo bzang po byin pas na sku'i bdun mtho ba thob pa yin//gtso bor gnas pa dang zhes bya ba ni rang gi rigs brgyud la sogs pa'i 'o/ /nga rgyal mi byed pa dang zhes bya ba la sogs pas ni lus dang ngag dang yid nga rgyal med par bstan pa yin no/ /sems can rnams la gnod pa bzlog pa las ni bzlog ces bya ba la sogs pa la/don thams cad bya ba'i phyir shin tu pha rol gnon pa'i ngang tshul can gyi sku brnyes par bstan pa yin te/ de'i phyir smras pa/ seng ge bzhin du zhes bya ba la sogs pa la/ las de kho nas ni zhes bya ba ni/ /seng ge bzhin du pha rol gnon pa'i ngang tshul can dang sku ro stod seng ge dang 'dra ba rab tu brnyes pa bstan pa yin no//las gang gi zhes bya ba ni gzhan dag la bya ba ma yin pa'i las ma byas pa dang / bya bar 'os pa'i las byas pas sku che zhing drang ba brnyes so/ /dbye ba'i tshig ma smras pa dang / bye bya rnams bsdums byas pas ni tshems tshang ba dang /bar med pa dang / mnyam pa brnyes te/ sems can gzhan bsdums byas pas so/ /'dod pa na spyod pa smos pa ni mtshan rnams ni 'dod pa na spyod pa'i sems can rnams dang 'brel ba yin pa'i phyir ro/ /byams pa bsgoms pas ni bsam pa rnam par dag pa bstan to//chos kyi don sems pa zhes bya ba ni/ shes pa dag pa'o/ /de ltar gnyis ka rnam par dag pas ni tshems shin tu dkar ba nyid brnyes so/ /snod dang dngos po phun sum tshogs pa byin pas ni 'gram pa seng ge lta bu'i brnyes te/ de yang chen po nyid dang 'dod pa nyid de chen po nyid ni yid du 'ong ba dang tshim par byed pa'o//bdag gi bu bzhin du zhes bya ba ni sems can la snying brtse ba yin no/ /dad pa dang ldan pa dang zhes bya ba ni rab tu dang ba'i bsam pa nyid do/ /snying brtse ba dang ldan pa zhes bya ba ni phan pa dang bde ba'i bsam pa can no/ / sman byin pa dang zhes bya ba ni rjes su gzung ba'i bsam pa nyid do/ /de lta bus ni ro bro ba'i mchog dang ldan pa brnyes pa yin te/ ro bro ba'i mchog 'dzin pa'i mtshan nyid dang ldan pas/ gang ci yang rung ba ljags la bdar ba de thams cad ro'i mchog dang gya nom par 'gyur ro/ /lhag pa'i rgyu bstan pa'i phyir chos kyi bcud byin pa dang /chos kyi bdud kyi ro myongs pa dang / ro nyams pa bcos pa dang zhes bya ba la sogs pa la ma rtogs pa'i don gsal por bstan pas ro bro ba'i mchog brnyes pa nyid do/ /bslab pa'i gnas mthon bo rnams la bdag nyid kyang yang dag par gnas pas dbu'i gtsug tor 'thob par 'gyur la/gzhan dag kyang de la 'god par byed pa'i chos ston par byed pa la gzhol bas ni ljags ring zhing srab pa brnyes so/ /rnam pa thams cad du brdzun du smra ba spangs pa'i phyir tshangs pa'i dbyangs dang ldan pa brnyes so/ /'jam zhing byams pa'i yid kyis sems can rnams la blta bas na spyan mthon mthing dang /ba'i rdzi ma lta bu brnyes pa yin no/ /gzhan dag gi yang dag pa'i yon tan gyi bsngags pa brjod cing yon tan dang ldan par bstan pas ni dkar zhing ring pa'i mdzod spu brnyes par bstan pa'i phyir yon tan can rnams kyi zhes bya ba la sogs pa la mtshan rnams ni bdag gi lus phun sum tshogs pas bsdus pa yin la/lus phun sum tshogs pa dang / mtshan thams cad kyang bye brag med par tshul khrims kyi rgyus thob pa yin no zhes bya bar smras pa/ tshul khrims dang ldan pa rnams kyis ji skad bstan pa'i las rnams byas pas mtshan thams cad 'thob par 'gyur ro zhes bya ba yin no//'dir rigs pa bstan pa'i phyir de ci'i phyir zhe na zhes bya ba la sogs pa smos so/ /'ga' zhig spyi gtsug bltar mi mthong ba'i skyes bu chen po'i mtshan ma bstan to snyam du the tshom za ba bzlog pa'i phyir smras pa/gnyis ka yang gcig yin par rig par bya ste zhes bya ba 'di la don gyi khyad par ni med kyi/ 'on kyang rnam grangs kyi khyad par yin no zhes bstan pa yin no/ /de ltar mtshan rnams sgrub par byed pa'i las rnam par gzhag pa yin no/ /las de dag nyid kyi rnam pa dang rten dang /sbyor ba'i bye brag bstan pa'i phyir smras pa/ /mdor bsdu na las kyi mtha' legs par byas pa zhes bya ba la sogs pa la rnam pa bzhi ni nges par byas pas zhes bya ba nas/ kha na ma tho ba med par byed pa zhes bya ba'i bar du'o/ /rnam pa 'di dag gis ni ji skad bstan pa'i las rnams rig par bya'o//las de dag gi rten ni khyim pa dang rab tu byung ba'o/ /des na smras pa/ phyogs gnyis su gyur pa zhes bya ba'o/ /legs par byas pa nyid ni gnod pa med pa'i sbyor ba dang ldan pa'o/ /de'i phyir smras pa/ rnam pa bzhis zhes bya ba la sogs pa'o/ /rnam pa'i khyad par gyis mtshan gyi khyad par bstan pa'i phyir/de la nges par byed pas ni zhes bya ba la sogs pa'o/ /legs par byas pa'i las kyi mthas mtshan gyi bye brag 'grub par bstan pa'i phyir/ de la sems can rnams la zhes bya ba la sogs pa la/ mtshan de dag sa dang po la 'thob par rig par bya'o/ /sa de'i gong ma rnams la ni de dag rnam par dag par rig par bya'o zhes bya ba la de'i gong ma rnams la rigs kyis rnam par dag par rig par bya'o//'dis mtshon par byed pas na mtshan zhes byas nas shes rab la sogs pa'i chos rnams kyang skyes bu chen po'i mtshan yin pas skyes bu chen po'i mtshan zhes bya ba ma yin nam/ci'i phyir 'di dag kho na mtshan zhes bya zhe na/ des na smras pa/ mtshan rnams 'di ni gzugs can yin pa'i phyir zhes bya ba la sogs pa la/ 'di dag mig gi yul yin pas mtshon par sla la/ shes rab la sogs pa ni yid kyi yin pas srab pa'i phyir ro/ / des na dbang po thams cad kyis gzung bar bya ba yin pa'i phyir/ rtogs par sla bas na 'di dag kho na bstan to/ /shes rab la sogs pa ni mkhas pas rtogs par bya ba yin zhing mtshan nyid dpyad par bya ba yin pas 'ga' zhig gis res 'ga' zhig rtogs par bya ba yin no zhes bya ba'o/ /nye bar bsgyur ba'i bye brag gis dpe byad rnams kyi don bstan pa'i phyir/rjes su shes par byed pa'i sgra ni gnas kyi don bsdus pa nyid kyi rten gyi ngo bo nyid do/ /mdzes pa'i don gyis bsdus pa'i phyir gzugs bzang pos zhes bya ba ste/ gzugs bzang pos mdzes par byed pa'i phyir gzugs bzang po ston pa zhes bya ba'i don to//mtshan rnams ni las sna tshogs kyis mngon par 'dus byas pa yin par bstan nas/ bsod nams chen po nyid kyis thob pa yin par bstan pa'i phyir/ de la mdor bsdus na sems can thams cad kyi zhes bya ba la sogs pa la/ sems can thams cad ces bya ba ni 'dzam bu'i gling ba nyid tsam gzung ste/phyogs gcig tsam la 'jug pa mthong ba'i phyir zhun mar thams cad 'thungs zhes bya ba lta bu'o/ /'di na gnas pa kho na gzung ba ni 'dzam bu'i gling pa ni las kyis pa yin pa'i phyir ro/ /de dag gi bsod nams kyi rnam par smin pas longs spyod gang dag 'grub pa'i bsod nams ji snyed pa'i rnam par smin pa ni longs spyod chen po brjod pa'i 'dzam bu'i gling gcig tu gtogs pa'i bsod nams kyis so//mtshan dang dpe byad bzang po la ma gtogs pa zhes bya ba ni de dag tu gtogs par mi 'don pa'i phyir ro//de ltar na yang de dag nyid kyi khongs su gtogs par shes par bya ste/ de dag tu ma gtogs pa'i yan lag gzhan med pa'i phyir ro/ /de'i bya ba bdag nyid che bar bstan pa'i phyir/ des na de bzhin gshegs pas zhes bya ba la sogs pa'o/ /de ltar na zhes bya ba la/ bsod nams dang ye shes kyi tshogs dpag tu med pa las yang dag par 'grub par bstan pa'i phyir/rnam pa gsum gyis tshad med par bstan pa yin te/ dus tshad med pa nyid dang / bsam pa tshad med pa nyid dang / rnam pa tshad med pa nyid kyis so/ /byang chub sems dpa'i sa'i gzhi'i rnal 'byor gyi gnas tha ma las mtshan dang dpe byad bzang po'i le'u lnga pa'i 'grel pa rdzogs so// //gzugs kyi skus bsdus pa'i sangs rgyas kyi chos rnams bstan nas/ da ni ming gi tshogs kyis bsdus pa'i sangs rgyas kyi chos mdor bstan pa bshad par 'dod nas smras pa/rnam pa thams cad yongs su dag pa'i gzhi gang zhe na zhes bya ba la/ bzhi po 'di dag mdor bsdus nas rnam pa gsum du gzhag par bya ste/ rab tu dbye ba ni thams cad kyis kun nas nyon mongs pa'i chos kyis bon yang dag par 'dzin pa nyid ni dang po'o/ /de'i gnyen po'i dge ba'i chos kyi rnam pa'i sa bon yang dag par bsdus pa nyid ni gsum pa'o//de dag gnyis ka'i spangs pa dang yang dag par blang ba'i bya ba ni gzhan dag go/ /de la mdor bsdus na rten ni ming dang gzugs so/ /de dag gi rnam par dag pa ni bsam gyis mi khyab pa'i dbyings gnas yongs su gyur pa yin par shes par bya'o//de'i phyir smras pa/ gnas ngan len bag chags dang bcas pa zhes bya ba la sogs pa la/ de la bag chags ni rnam pa gnyis te/ nyon mongs pa'i sa bon gyi bag chags dang / rnam par smin pa'i gnas ngan len gyi bag chags so/ /de la nyon mongs pa'i sa bon gyi bag chags ni nyan thos la sogs pas kyang spong ste/nyon mongs pa'i bag la nyal dang bcas pa spong ba ni de dag la yang yod pa'i phyir ro/ /yang 'dir ni gnas ngan len gyi bag chags spang bar bzhed de/ de ni de nyid kyis rab tu spangs pa yin te/ lam gyi khyad par brnyes pa'i phyir ro//de'i phyir nyes pa bag chags dang bcas pa yang / skyob pa gcig pu la mi mnga' zhes bstan pa yin no/ /thams cad kyi sgras ni mthong ba dang sgom pas spang bar bya ba'i nyon mongs pa'am/ khams gsum na kun du spyod pa rnams so/ /de'i phyogs kyi gnas ngan len gyi sa bon ni gnas la zhes bya ba ni bskal pa grangs med pa gsum dpag tu med pa'i bsod nams dang ye shes kyi tshogs yongs su bsgoms pa nyid kyi bdag gi lus zhes bya ba'i don to//ma lus par gtan med par gyur la zhes bya ba ni slob ma rnams kyi spangs pa las khyad par du 'phags pa'o//gtan zhes bya bas ni 'jig rten pa'i spongs pa'o/ /de ltar na bag chags dang bcas pa spangs pa dang gtan du spangs pa ni sangs rgyas rnams kyi gnas gyur pa yin no zhes brjod do/ /gnas rnam par dag pa de yang chu'i khams dang gser dang / nam mkha' bzhin du glo bur gyi dri ma rnams dang bral bas rang bzhin gyis 'od gsal ba de bzhin gshegs pa'i sku dri ma med pa yang dag par gnas pa zhes bya ba'o//de nyid ni chos kyi sku zhes bya'o/ /de la brten pa'i sku gzhan gnyis kyang yin pa ste/ gsum la dbang bar gyur pas bya ba gsum byed par bstan pa'i phyir rang gi lus kyang zhes bya ba la sogs pa la/rang gi lus zhes bya ba ni ngo bo nyid kyi sku ste/ chos kyi sku'o/ /ji ltar 'dod pa zhes bya ba ni rang ji ltar dga' ba ste/ lhun gyis grub pa'i smon lam gyi dbang gis zhes bya ba'i tha tshig go/ /len pa dang zhes bya ba ni sprul pa'i skus dga' ldan gyi gnas na bzhugs pa la sogs pa ston pa'o//sangs rgyas kyi gdul bya rnams la ni sangs rgyas kyi skur ston pa la sogs pa de bzhin gshegs pa'i gsang ba'i mdo'i rjes su 'brangs nas shes par bya'o/ /gnas pa dang zhes bya ba ni 'khor ba ji srid kyi bar du sems can gyi don du gnas par sbyor ba'am/tshe byin gyis brlabs nas gnas pa la dbang ba'o/ /'chi 'pho ba zhes bya ba ni mya ngan las 'das pa chen po yang dag par ston pa'am/ tshe 'dor ba la dbang ba'o/ /yang gnas gyur pa de ni ngo bo nyid dang / rkyen gyi khyad par dang ldan pas bsam gyis mi khyab pa'i rmad du byung bas spros pa med pa zhes brjod do//dmigs pa la dbang ba nyid ni rnam pa gsum du bstan pa'i phyir/ de la dmigs pa yongs su dag pa gang zhe na zhes bya ba la phyi'i dngos po sprul pa dang / bsgyur ba dang / bstan pa'o/ /de la sprul pa ni sngon med pa'i sems can gyi rnam pa lta bu sprul par byed pa'o//bsgyur ba ni dngos po gzhan dngos po gzhan du byed pa'o/ /bstan pa ni sems can du bgrang ba snga na med pa rab tu ston pa'o/ /de ltar dmigs pa la dbang bas dmigs pa rnam par dag pa yin no/ /snga ma bzhin du zhes bya ba ni bag chags dang bcas pa zhes bya bas bstan pa dag go//dge ba'i rtsa ba thams cad bsags pas zhes bya ba ni/ dge ba'i rtsa ba thams cad skye ba la mthun pa nye bar gzung nas sems rnam par dag pa zhes bya'o/ /de bzhin du nyan thos rnams kyi sems rnam par grol ba gang yin pa de de bzhin gshegs pa'i sems rnam par dag pa zhes brjod do//rnam pa thams cad yongs su rdzogs pa thun mong ma yin pa'i phyir ro/ /de dag ni shes rab kyis rnam par grol ba yin la/ de bzhin gshegs pa ni rnam pa thams cad yongs su rdzogs pa'i ye shes rnam par dag pa yin no//de'i phyir smras pa/ ma rig pa'i gnas ngan len thams cad dang bral ba zhes bya ba la/ gnas yongs su gyur pa yod na rnam par dag pa gsum po 'di dag 'byung bar 'gyur ro zhes bya bar shes nas/ de'i phyir gnas pa 'di ni rgyu'i gtso bo yin par shes par bya'o/ /de'i phyir bsam gyis mi khyab pa'i chos mang po'i rten du gyur pa'i phyir gnas gyur pa de ni/bsam gyis mi khyab pa zhes brjod do/ /stobs bcu'i ming gis bstan pa'i phyir/ stobs bcu po dag gang zhe na zhes bya ba la sogs pa la/ stobs bcu'i mdo las rgyas par ji skad bstan pa bzhin du rig par bya'o zhes bya ba la/mdo las ni re re nas bshad pa yin no/ /de dag bde bar gzung ba'i phyir de'i don bstan pa/ tshe dang ldan pa bcu po 'di dag ni de bzhin gshegs pa'i stobs bcu ste/ bcu gang zhe na/ tshe dang ldan pa 'di la de bzhin gshegs pas ni gnas la yang gnas su yang dag pa ji lta ba bzhin du rab tu mkhyen to//gnas ma yin pa la yang gnas ma yin par yang dag pa ji lta ba bzhin du rab tu mkhyen to zhes bya bas so/ /'di ni de bzhin gshegs pa rnams kyi de bzhin gshegs pa'i stobs dang bo ste/ stobs gang dang ldan pas de bzhin gshegs pa dgra bcom pa yang dag par rdzogs pa'i sangs rgyas khyu mchog rlabs po che'i gnas su dam 'cha' zhing tshangs pa'i 'khor lo bskor bas 'khor gyi nang du seng ge'i sgra sgrogs par byed do zhes bya ba'i mdo 'di dag gi don bstan pa'i phyir/de la des gang ci bstan pa dang zhes bya ba la sogs pa'o/ /de bzhin gshegs pa zhes bya ba'i tshig gi don bstan pa la/de bzhin zhes bya ba ni phyin ci ma log pa nyid do/ /de lta bu'i phyin ci ma log pa de gsung bas na de bzhin gshegs pa zhes bya ste/ nges pa'i tshig gi sbyor bas yi ge de ltar bsgyur nas so/ /bstan pa la sogs pa'i tshig gsum ni don gcig nyid yin pa'am/don sna tshogs pa nyid yin no/ /de la bstan pa ni bstan pa'i chos kyi dbang du byas nas so/ /brjod pa ni 'jig rten gyi tha snyad kyis so/ /gsungs pa ni dris pa'i lan 'debs pa'i tshul gyis so/ /'di dag ni de bzhin du phyin ci ma log par bstan pa'i phyir ro/ /rgyu'i don gnas pa'i don bstan pa'i phyir smras pa/de la 'bras bu dge ba'i zhes bya ba la sogs pa la/ 'bras bu de dang de'i 'dod pa dang mi 'dod pa zhes bya ba smras pa/ dge ba dang mi dge ba zhes bya'o/ /'byung bar 'gyur ba zhes bya ba ni gcig tu nges par 'byung ba zhes bya ba'i tha tshig ste/ mi mthun pa med par nges par 'bras bu 'byung bar byed pa zhes bya ba'i don to//de las bzlog pa'i rgyu mi mthun pa nyid ni 'bras bu 'byin pa la phyin ci log tu zhugs bas na mi mthun pa zhes bya ba'o/ /'di la gnas pas na gnas zhes bya ste/ 'bras bu de la brten pas na gzhi yin la/ de la brten nas skye bas na rten zhes bya'o//sgo de nas mngon par 'byung bas na mngon par 'grub par byed pa zhes bya'o/ /de lta bu'i 'bras bu'i rgyu ni dbang phyug la sogs pa yin par 'dod pa ni mi mthun pa zhes bya ste/ de la 'bras bu de dag bskyed pa'i nus pa med pa'i phyir ro//de las bzlog pa'i rgyu zhes bya ba ni yang dag pa ma yin par zhugs pa zhes bya ba la sogs par rig par bya'o/ /mngon pa'i nga rgyal med pa'i ye shes ni yang dag pa'i ye shes te slu ba med pa'i phyir dang / mi shes pa'i gnyen po yin pa'i phyir ro/ /des na smras pa/ thams cad mkhyen pa dang zhes bya ba la sogs pa la/shes bya thams cad la thogs pa med par 'jug pa'i phyir thams cad mkhyen pa'o/ /'bad pa med par 'jug pa ni chags pa med pa'i ye shes so/ /dri ma med pa'i phyir dag pa'o/ /bgrang ba'i tshul gyis dang po yin gyi skye ba'i rim pas ni ma yin no zhes bstan pa ni 'di dag bgrang ba ni go rims bzhin bgrang ba dang /zlog nas bgrang ba ste rnam pa gnyis so/ /lugs las bzlog pa'i bgrang ba bsal ba'i phyir smras pa/ go rims kyis bgrang ba'i dang po'o zhes bya ba'o/ /stobs nyid bstan pa'i phyir rnam pa gsum gyis mi 'phrogs pa'i phyir gang yang smras pa/bla na med pa'i phyir dang zhes bya ba'o/ /bya ba yang dag par nus pa'i phyir gang yang smras pa/ nus pa dang ldan pa'i phyir dang zhes bya ba'o/ /mi mthun pa'i phyogs zil gyis gnon par byed pa'i phyir gang yang smras pa/ gtan du zil gyis mnan pa zhes bya pa'o//ji lta ba bzhin du yang dag par 'grub pa zhes bya ba ni rgyas par byed pa'i sa bon dbang du gyur pa'i dus na yang dag par 'grub pa'i rgyu yongs su 'dzin pa zhes bya'o/ /de'i phyir smras pa/ yang dag par spyod pa la dbang byed pa ni ldan pa rnam pa gsum ste sa bon dang / mngon du gyur pa dang /dbang gsum gyi dbye bas so/ /'dir ni dbang du gyur pa nyid ldan pa zhes bya bar 'dod do/ /mya ngan las 'das pa ni bla na med pa ste/ 'dus byas dang 'dus ma byas rnams kyi mchog nyid yin pa'i phyir ro/ /rlabs po che ni dge ba dang rtag pa'i phyir de'i nges pa'i tshig nyid ni khyu mchog ces bya bas bstan te/yi ge as bsdus pa'i don ni 'phags pa'i lam yan lag brgyad pa thob pas yi ge bsgyur nas gnod pa thams cad las 'das pa nyid dang / de lta bu'i 'phags pa'i lam thob pa'i phyir dang 'jigs pa thams cad las 'das pa'i phyir khyu mchog ces bya'o zhes bstan pa'i phyir ro//bdag nyid kyis de rtogs par zhal gyis bzhes pa'i phyir zhes bya ba ni mi 'jigs pa gnyis pa la brten nas zag pa zad pa nyid du dam 'cha' ba'o zhes bya ba'i don to/ /gzhan la go bar byed pa'i 'khor lo skor bar byed do zhes bya bar bstan pa'i phyir/ bdag nyid kyis thugs su chud nas zhes bya ba la sogs pa la 'khor lo dang 'dra bas na 'khor lo dang 'dra bas na 'khor lo zhes bya ba ste/de lta bu'i 'khor lo de sngar sus kyang ma bskor bar bstan pa'i phyir tshangs pa'i zhes bya'o/ /de'i phyir smras pa/ de ci'i phyir zhe na zhes bya ba la sogs pa la/ gal te yang nyan thos la sogs pa rnams kyis kyang bskor ba ma yin nam zhes the tshom za ba bzlog pa'i phyir smras pa/thog mar des bskor ro zhes bya ba'o/ /'khor lo'i don bstan pa'i phyir rgyu des zhes bya ba ste/ bskor zhes bya ba'i tha tshig go/ /mchog tu gang gas par gtogs pa dang zhes bya ba la/ sems can thams cad kyi mchog tu gyur pa dang /bstan pa yang dag pa ji lta ba bzhin du ston par gyur pas so/ /bdag nyid rnam par bsgrags pa'i phyir zhes bya ba ni/ nga ni gtso bo la zhes bya ba la sogs pa 'khor gyi nang du gsungs pa lta bu'o/ /mu stegs pa mi mthun par smra bar 'ongs pa'i ri dwags rnams bag 'khums par byed pa'i phyir zhes bya ba la/des de dag la lam bstan pas thams cad bzlog par 'gyur ro/ /pha rol po'i smra ba mngon du gyur pa na bag 'khums par byed pa'i phyir/ pha rol po'i rgol ba dag zil gyis gnon par nus pa'i phyir dang / rgya che ba'i gsung sgrogs pa zhes bstan pa'i phyir seng ge'i sgra sgrogs pa zhes bstan to//de ltar seng ge ltar sgrogs pas na seng ge'i sgra zhes bstan pa'i phyir seng ge'i sgra sgrogs pas bya ba ci zhig byed ce na/ bdag nyid seng ge yin par sgrogs pa dang / ri dwags ngan pa skrag par byed pa dang / yan lag bzhis pha rol gnon par byed pa dang /ri dwags gzhan gyis zil gyis mi gnon pa'o/ /de bzhin du de bzhin gshegs pa yang bya ba rnam pa bzhi mdzad pa'i phyir seng ge'i sgra sgrogs par mdzad do zhes brjod do/ /rgya che ba'i gsung zhes bya ba ni lhag pa nyid du ston pa nyid de zab pa'i phyir ro//bla na med pa ni sus kyang ma bstan pa'i chos kyi 'khor lo ston par mdzad pa'i phyir ro/ /re re nas tshig gi don bstan pas mdor bsdus pa'i don bstan pa'i phyir/ mdor bsdu na ni zhes bya ba la sogs pa'o/ /khyu mchog gi gnas su dam 'cha'o zhes bstan pas ni bdag la phan pa sgrub pa phun sum tshogs pa gsungs pa yin no//tshangs pa'i 'khor lo bskor zhes bya bas ni gzhan la phan pa sgrub pa phun sum tshogs pa bstan to/ /'khor gyi nang du seng ge'i sgra sgrogs so zhes bya ba ni thun mong ba nyid do/ /bdag nyid kyis thugs su chud nas zhes bya bas ni dam bca' ba zhal gyis bzhes pa nyid bstan to//yang dag par bsdus pa'i don gyis thob par bya ba ni khyu mchog rlabs po che'i gnas so/ /thob par bya ba'i thabs ni tshangs pa'i 'khor lo bskor ba zhes bya ba'o/ /skye bo thams cad la phan pa ni lha dang mi thob pa rnams las te/ yang skye bo thams cad la phan pa de yang nga nyid las thob par 'gyur ro zhes bstan to//de yang dpe'i sgo nas bsdus pa'i don bstan pa ni nyon mongs pa'i nad thams cad dang bral ba'i phyir mchog tu nad med pa'i gnas te/ khyu mchog tu rlabs po che'i gnas ni nad rab tu zhi ba dang 'dra bar blta bar bya'o/ /tshangs pa'i 'khor lo bskor ba ni nad rab tu zhi ba'i thabs kyi sman bsten pa lta bur blta bar bya'o//'khor gyi nang du seng ge'i sgra yang dag par bsgrags pa ni sman pa ngan pa thams cad kyis dam bcas pa spangs nas/ 'jig rten gsum gyi sman pa'i rgyal por dam bcas pa lta bu yin no/ /stobs gnyis pa'i dbang du byas nas las gang dag byas shing bsags la zhes bya ba la sogs pa la/de'i mdo ni gzhan yang tshe dang ldan pa de bzhin gshegs pas 'das pa dang ma 'ongs pa dang da ltar byung ba'i chos kyi las yang dag par blangs pa rnams gnas dang / dngos po dang rgyu dang rnam par smin pa rnams yang dag pa ji lta ba bzhin du rab tu mkhyen to zhes bya ba'o//lhag ma ni snga ma bzhin no/ /byung ba 'gags pa ni 'das pa'o zhes bstan pa'i phyir byas shing bsags pa 'gags pa zhes bya ba la sogs pa la/ bsags pa zhes bya ba smos pa ni rnam par smin pa med pa'i las rnams bsal ba'i phyir te/ yang de ni zag pa med pa dang / lung du ma bstan pa'i las yin par rig par bya ste/ rnam smin rgyu ni mi dge dang / /dge ba zag bcas rnams kho na/ /zhes bstan pa'i tshig gis so/ /gang 'das pa dang da ltar byung ba ma yin pa de ni ma 'ongs pa'i ngo bo nyid yin no zhes bstan pa'i phyir/ gang dag byas pa yang ma yin zhes bya ba la sogs pa'o//bya ba kho nar brtsams shing bsal ba zhes bya ba 'di ni bdag gis bya'o zhes byed pa la mngon par phyogs pa'o/ /'di ltar bya'o zhes bya ba'i gnas skabs la gnas pa ni da ltar byung bar bstan pa'i phyir byas pa yang ma yin zhes bya ba la sogs pa'o//de dag kyang lus kyi las la sogs pa'i dbye bas so sor rnam pa gsum mo/ /chos yang dag par blang ba bzhi sngar ji skad bstan pa zhes bya ba ni ji ltar rigs par 'jig rten 'dir yang bde ba'i don dang / 'jig rten pha rol du yang bde ba'i don dang / de bzhin du sdug bsngal ba'i don mngon par sgrub par byed pa la chos yang dag par blang ba zhes bya'o//de'i phyir smras pa/ de dag kyang tshe 'di dang phyi ma la zhes bya ba la sogs pa'o/ /'jig rten gang dag tu'am 'gro ba'am/ sa'am/ gling ngam/ yul lam/ grong khyer ram/ chu'am/ thang yang rung gang du las byed pa de ni de dag gi gnas zhes bya'o//gnas kyi dngos po gang la brten nas las byed pa la 'jug pa ni sems can du bgrang ba'am zhes bya ba la sogs pa ni de dag gi dngos po zhes bya'o/ /gang gis dge ba'i rtsa ba'am/ mi dge ba'i rtsa bas byas pa ni rgyu zhes bya ba ste/ las kyi rgyu gsum yang dag par blangs pa'i rgyu zhes bya ba'i tshig gis so//des na de ni de dag gi rgyu'o/ /sdug pa dang mi sdug pa zhes bya ba ni dge ba dang mi dge ba dag gi mi 'dod pa nyes dmigs dang bcas par 'jug pa dang / 'dod pa rnams phan yon dang bcas par 'jug pa'o/ /de lta bu ni rnam par smin pa ste/ de dag gi rnam par smin pa'i 'bras bu'o//dus thams cad ni 'das pa la sogs pa'i dbye ba'o/ /rnam pa thams cad ni yul la sogs pa'i bye brag go/ /gnas skabs thams cad ni chos yang dag par blangs pa'i dbye ba'o/ /yul thams cad ni gnas brtan pa rnams so//gnas thams cad ni dngos por rab tu dbye ba rnams so/ /gzhi thams cad ni rgyu bstan pa rnams so/ /nyes dmigs dang phan yon thams cad ni sdug pa dang / mi sdug pa'i 'bras bu nyid do/ /de ltar rnam pa bdun gyis rang gi las la spyod pa shes pa bstan pa yin no/ /gzhan yang tshe dang ldan pa de bzhin gshegs pas ni bsam gtan dang rnam par thar pa dang /ting nge 'dzin la snyoms par zhugs pa rnams kyi kun nas nyon mongs pa dang rnam par byang ba dang rnam par gzhag pa'i rnam par dag pa yang dag pa ji lta ba bzhin du yang dag par mkhyen to zhes bya ba'o/ /lhag ma rnams ni snga ma bzhin no//'di ni de bzhin gshegs pa'i stobs gsum pa ste/ 'di'i don bstan par bya'o/ /bsam gtan gyi sgras ni dang po la sogs pa'i bsam gtan bzhi pa bstan to/ /rnam par thar pa'i sgras ni rnam par thar pa brgyad bstan te/ gzugs can gzugs rnams la lta ba zhes bya ba la sogs pa'o//bsam gtan dang ting nge 'dzin 'di dag nyid kyis rnal 'byor pa'i bya bsgrub par nus pa'i khyad par dang ldan pa ni ting nge 'dzin zhes bstan pa yin no/ /bsam gtan dang rnam par thar pa zhes bya ba la sogs pa la/ de la ting nge 'dzin yang dag par bsgrub pa'i phyir mngon du phyogs par gyur pa ni snyoms par zhugs pa zhes bstan to//de ston par byed pa'i mdo ni ji skad du bcom ldan 'das zhes bya ba la sogs pa la/ ting nge 'dzin de lta bu la snyoms par zhugs te zhes bya ba ni snyoms par zhugs pa nyid ting nge 'dzin la mnyam par gzhag pa bstan pa yin no/ /rab tu sgrub pa'i phyir zhes bya ba ni dpe snang ba chen pos zhes bya ba la sogs pas so//ci'i phyir mnyam par gzhag ce na/ snang bas khyad par spro ba'i phyir/ /zhes bstan te/ bsam gtan gyi stobs kyis 'bad pa med par don rab tu bsgrub pa nyid dang / de bzhin du 'jig rten las 'das pa'i don sgrub par byed pa nyid kyi phyir ro//bsam gtan pa rnams kyi bya ba zhes bya ba la/ ci'i phyir 'di dag kho na smos/ zil gyis gnon pa dang / zad par la sogs pa ma yin zhe na/ de'i phyir smras pa/ de las gong na yang med ces bya ba la sogs pa la/ bsam gtan dang rnam par thar pa la dbang thob pa'i sems kyis ni sems kyi dbang phyug tu 'gyur la/dbang phyug thob par gyur pas ni sems bskyed pa tsam gyis don thams cad 'grub par 'gyur ro/ /gnyis po 'di dag ni rnal 'byor ba'i bya ba yin te/ 'di lta ste/ sems kyi dbang phyug dang / 'dod pa'i don 'grub pa'o//des ni de dag nyid bsdus pa'i phyir ro/ /'dir ni ye shes rnam pa bzhi la stobs zhes bstan par 'gyur ro/ /de las rnam par dbye ba'i phyir/ kun nas nyon mongs pa rnam pa gnyis yod de zhes bya ba ni nyon mongs pa rnam pa gnyis ni rten gyis pa dang / rang gis pa'o/ /dri ma'i don dang mi mthun pa'i don 'di kun nas nyon mongs pa'o zhes bstan pa'i phyir thob par bya ba la gegs byed pa'i kun nas nyon mongs pa zhes bya bas bstan to//rten gyi sa pa'i kun nas nyon mongs pa yang rnam pa gnyis te/ kun nas nyon mongs pa can dang / de nas nyon mongs pa can ma yin pa'o//de la kun nas nyon mongs pa can ma yin pa ni thabs ma yin pa'i sbyor ba'o/ /kun nas nyon mongs pa can ni sgrib pa la sogs pa kun du spyod pa'o/ /de dag gnyis ka yang ma thob pa'i nyams pa'i dbang du byas nas/ kun nas nyon mongs pa can yongs su mi mthun pa nyid du rnam par gzhag par bya'o//rang gi sa pa'i kun nas nyon mongs pa can ni sred pa la sogs pa'i nyon mongs pa'i kun du spyod pas bsdus pa ste/ de yang thob pa nyams pa'i dbang du byas pa'o/ /de'i ming smras pa/ de dag thob zin pa la yang zhes bya ba la sogs pa'o/ /'di dag las bzlog pa ni rnam par byang ba ni rnam pa gnyis su bstan to//de ltar mngon par bsgrub nas rjes su mthun pa'i ming dang brda dang gdags pa rnam par gzhag pa dang / rjes su mthun pa'i tshig dang yi ges rnam par 'jog par byed do/ /de ltar bsgom pa yongs su rdzogs pa ra rab tu thob pa'i 'dod pa bzhin du thob pas ni gang 'dod pa de la snyoms par 'jug ste/'bad pa med par ji ltar 'dod par 'grub pa'o/ /ngan don ma yin par 'thob pas na ji ltar 'dod pa de 'thob po/ /tshegs med par 'thob pa ni ji snyed 'dod pa de snyed du snyoms par 'jug pa la dbang pa rnam par dag pa zhes bya'o//de dag mi thob pa gang yin pa ni kun nas nyon mongs pas so/ /thob pa ni rnam par byang ba'o/ /nyams pa gang yin pa ni rang gi sa pa'i nyon mongs pa'o/ /gya nom pa ni de las bzlog pa'i rnam par byang ba'o/ /mchog gi mthar thug pa ni rnam par dag pa'o/ / gzhan yang tshe dang ldan pa de bzhin gshegs pa ni gang zag gzhan dang sems can gzhan rnams kyi dbang po mchog dang mchog ma yin pa yang dag pa ji lta ba bzhin du rab tu mkhyen to zhes gsungs pas mchog dang mchog ma yin pa'i rgyu bstan pa'i phyir/ ji ltar yongs su smin pa yang dag par 'grub pa las zhes bya ba la/'jug pa'i gnas skabs na ni dbang po rtul po yin la/ yongs su smin pa'i gnas skabs na ni dbang po rnon po yin no/ /de ltar na ji ltar yongs su smin pa'i rim gyis dbang po rtul po la sogs par dbye bar bya'o/ /nyan thos la sogs pa'i rim gyis kyang dbang po rtul po la sogs par dbye bar bya'o//de'i phyir yang dag par 'grub pa las de dag dbang po rtul po la sogs par dbye ba la/ dbang po mchog ni khyad par du 'phags pa ste/ mchog ces bya ba'o/ /de la ltos nas 'bring dang rtul po ni mchog ma yin pa zhes bya'o/ /yang snga ma bzhin du de bzhin gshegs pas sems can gzhan dang gang zag gzhan gyi mos pa sna tshogs pa gang yin pa de yang yang dag pa ji lta ba bzhin du rab tu mkhyen to//de la mdor bsdu na rigs dang dbang po'i dbye bas gang zag ni rnam pa gnyis te/ dad pa'i rjes su 'brang ba dang chos kyi rjes su 'brang ba'o//de la snga ma ni gzhan la yid ches pa sngon du 'gro ba yin la/ phyi ma shos ni chos kyi spyod pa sngon du 'gro ba yin no/ /sna tshogs kyi don bstan pa nyid ni chung ngu la sogs pa'i dbye ba yin la/ mos pa'i don bstan pa ni 'dod cing rtogs pa zhes bya'o/ /snga ma bzhin du khams sna tshogs dang khams du ma nyid yang dag pa ji lta ba bzhin yang dag par rab tu mkhyen to zhes bya ba la/khams sna tshogs pa nyid ni khams du ma nyid yin te/ rnam pa gnyis ka bstan pa'i phyir/ nyan thos la sogs pa'i rigs kyi dbye ba'am/ 'dod chags la sogs pa la spyod pa'i spyod pa brgyad khri bzhi stong gi dbye ba'am/yang na go rims bzhin du khams sna tshogs nyid ni rigs kyi dbye bas so/ /khams du ma nyid ni spyod pa'i dbye bas so/ /gzhan yang thams cad du 'gro ba'i lam yang dag pa ji lta ba bzhin du rab tu mkhyen to zhes bya ba'o/ /de bstan pa'i phyir/ de dag nyid kyi 'jug pa'i sgo dang zhes bya ba la sogs pa la/mos pa sna tshogs pa'i sems can rnams 'jug pa'i sgo dang 'tsham pa thams cad du 'gro ba'i lam ste/ thams cad kyi rang gi spyod pa dang rjes su mthun pa'i phyir ro/ /de'i phyir smras pa/ 'dod chags la spyod pa rnams la zhes bya ba la sogs pa'o//de ltar na tshe 'di la thams cad du 'gro ba'i don du rig par bya'o/ /rnam grangs gnyis pa ni phyi ma la thams cad du 'gro ba'i don nyid ni 'gro ba lngar 'gro ba'i lam thams cad du zhes bya ba'o/ /gsum pa ni gnyi gar kun du 'gro ba'i don gyis te/ de ltar na rnam grangs gsum gyis thams cad du 'gro ba'i lam bstan pa yin no//rnam grangs gzhan yang phan tshun mi mthun zhing zhes bya ba la/ rang rang gi lta ba blangs nas gnas pa'o/ /des na smras pa phyogs sna tshogs la brten zhes bya ba ni rang gi lta ba la zhen pa'i dbang gis gcig la gcig 'dod pa'i lta ba mi mthun pas gzhan dag gi 'dod pa bzlog pas 'dod pas sun 'byin te/de dag 'dod pa ni phan tshun mi mthun pa yin pa'i phyir ro/ /mi mthun par smra ba tha dad pa zhes bya ba la/ de dag gi 'dod pa de rnams las gang yang mos pa 'di dang phyi ma la kha na ma tho ba med par blang bar smras pa/ de ni thams cad du 'gro ba zhes bya ste zhes bya ba la sogs pa'o//thams cad du 'gro ba'i lam de yang sgyu rtsal shes kyi bu'i mdo'i rjes su 'brangs nas shes par bya'o/ /yang brgyad pa'i dbang du byas nas smras pa/ sems can gyi ris rnam pa sna tshogs pa 'di lta ste zhes bya ba la sogs pa la/ gzhan yang snga ma pa bzhin du sngon gyi gnas rnam pa du ma rjes su dran te/'di lta ste/ skye ba gcig kyang rjes su dran pa nas zhes bya ba nas/ bdun dang brgyad dang dgu dang bcu yang rjes su dran pa nas/ du ma'i bar dang 'jig pa dang 'chags pa'i bskal pa yang yang dag par rjes su dran pa nas/bdag dang sems can 'di dag 'dir skyes pa na ming 'di zhes bya/ skye ba ni 'di lta bu/ rigs ni 'di zhes bya/ rus ni 'di zhes bya/ kha zas ni 'di lta bu zhig za za/ bde ba dang sdug bsngal ni 'di lta bu zhig myong ngo / /tshe'i tshad ni 'di tsam zhig thub/ dus ni 'di snyed cig tu gnas/tshe'i mtha' ni 'di tsam du thub par 'gyur/ de nas shi 'phos nas che ge mo zhig tu skyes de nas shi 'phos nas 'dir skyes so zhes rnam pa dang bcas/ yul phyogs dang bcas pa'i sngon gyi gnas du ma rjes su dran no/ /gang du gnas pa de bstan pa'i phyir sems can gyi ris rnam pa sna tshogs zhes bya ba la sogs pa la/sna tshogs nyid kyang phyogs kyi dbye bas bstan pa'i phyir/ shar phyogs rnams dang zhes bya ba la sogs pa'o/ /sngon gyi don bstan pa'i phyir/ sngon 'das pa'i lus rnams la zhes bya ba la sogs pa'o/ /sems can rnams kyi spyod pa'i dbye ba bstan pa'i phyir ming dang brda sna tshogs rnam par gzhag pa tha dad pa zhes bya ba'o//gzhi rnam pa brgyad bstan pa'i phyir tha snyad kyi gzhi brgyad ces bya ba la/ ming dang brda la sogs pa'i tha snyad kyi rten du gyur pa'i ming la sogs pa brgyad ni tha snyad kyi gzhi zhes bya'o/ /de la brten pa zhes bya ba ni de la gnas nas 'jug pa'o//spyod pa drug tu 'gyur pa ni spyod par byed pas na spyod pa zhes bya ba ste/ nye bar spyod par byed cing thob par byed pa zhes bya ba'i tha tshig go/ /de ltar na 'das pa'i skye ba'i spyod pa drug rnam pa du mas rjes su dran pa ni sngon gyi gnas rjes su dran pa'o zhes pa bstan pa ni bsdus pa'i don yin no//tha snyad kyi tshig rnams ni mdo'i rjes su 'brangs nas bstan pa yin te/ ming ni 'di zhes bya zhes bya ba la sogs pa'o/ /spyod pa drug pa bstan pa'i phyir/ tha snyad kyi gzhi brgyad pa brten pa'i spyod pa drug gang zhe na/ bod pa'i brda zhes bya ba la sogs pa la/ming gi brda ni ming ni 'di zhes bya zhes bya ba'o/ /rigs kyi brda ni skye ba la sogs pa'o/ /pha ma'i brda ni rigs rnams so/ /zas skom la sogs pa'i brda ni kha zas so/ /'byor ba dang rgud pa'i brda ni bde ba dang sdug bsngal ba rab tu myong ba'o/ /tshe sna tshogs kyi brda ni tshe ring ba la sogs pa rnam pa gsum yin no//bdag dang gzhan rnams ni 'das pa'i gnas skabs nges par spyod par byed pa ni snod du rung ba'i phyir spyod pa drug po tha snyad 'dogs par nges pa yin no/ /bdag gi ming ni 'di zhes bya ba ni bdag gi ming ni tha snyad do/ /'di'i ming ni 'di zhes bya ba ni gzhan gyi'o//rgyal rigs so zhes bya ba ni bdag gam gzhan gyi tha snyad do/ /'di'i zhes bya ba ni gzhan gyi'o/ /de bzhin du gzhan dag la yang sbyar bar bya'o/ /'di ni zhes bya ba ni bdag yin no zhes bya ba'o/ /'di zhes bya ba ni gzhan gyi'o/ /bdag kha zas kyi bya ba bdag gu'am zhes bya ba la bdag gam zhes bya ba ni bdag nyi do//yang na 'di zhes bya ba ni gzhan dag go/ /de lta'i tshul gyis dar ba'am rgud pa ni bde ba dang sdug bsngal lo/ /bdag gam zhes bya ba ni bdag nyid kyi'o/ /'di zhes bya ba ni gzhan dag go/ /na tshod kyis ni zhes bya ba ni bdag nyid kyi na tshod sna tshogs bstan pa'o//'di zhes bya ba ni gzhan dag gi /de ltar na bdag dang gzhan dag gi spyod pa drug bstan pa yin no/ /rnam pa dang bcas don rtags dang bcas par zhes bya ba'i don gyi khyad par bstan pa'i phyir/ de la tha snyad kyi gzhi zhes bya ba la sogs pa'o/ /gzhan ni gzhan du yang 'chad de bdag gi ming ni 'di zhes bya ba nas bdag de nas che ge mo zhig tu skyes so zhes bya ba ni sngon gyi gnas bstan pa yin la/gnas kyi bye brag ni rnam pa yin no/ /de'i phyir 'jig rten pa rnams 'di skad rjod par byed de/ khyod gnas gang nas 'ongs zhes 'dri bar byed pa yin no//gzhan yang snga ma bzhin no/ /de'i lha'i mig rnam par dag pa me'i las 'das pa dang yang dag par ldan pas sems can 'chi 'pho ba rnams dang / skye ba rnams dang kha dog bzang po rnams dang kha dog ngan pa rnams dang / dman pa rnams dang / gya nom pa rnams dang / bde 'gror 'gro ba rnams dang /ngan 'gror 'gro ba rnams kyi las rnams yang dag pa ji lta ba bzhin du mkhyen to/ /sems can 'di dag ni lus kyis nyes par spyod pa nas yid kyis nyes par spyod pa'i bar dang ldan pa/ 'phags pa rnams la skur pa 'debs pa/ log par lta ba'i las kyi lam yang dag par blangs nas gnas pa'i rgyu dang rkyen gyis lus zhi gnas shi ba'i 'og tu ngan song ngan 'gro log par lhung ba sems can dmyal ba rnams su skye bar 'gyur ro/ /yang sems can 'di dag ni lus kyis legs par spyod pa zhes bya ba nas/ snga ma las bzlog pas bde 'gro mtho ris su lha'i nang du skye bar 'gyur ro zhes bya ba'i bar te/'di ni stobs dgu pa'o/ /de la lha'i mig bstan pa'i phyir/ lha'i gnas pas bsdus pa'i phyir bsam gtan rnams kyang lha'i zhes bya ba la/ de la brten pa'i phyir de la yang lha'i mig ces bya'o zhes bstan pa'i phyir ji ltar mig gis shes par bya ba'i gzugs bzhin no zhes bstan pa yin no//de la bstan pa'i phyir/ de'i 'bras bu dang zhes bya ba la/ 'di dag gis ni mig rnam pa gnyis su bstan pa yin te/ dad pa'i mig dang / shes rab kyi mig go/ /yongs su dag pa'i bsam gtan gyi 'bras bu yin pas na zhes pa ni mngon par shes pa'i rang bzhin yin par bstan pa'i phyir dang /'dod pa na spyod pa'i lha'i mig bsal ba'i phyir ro/ /de dag kyang lha'i mig yang dag pa ma yin te/ skye bas thob pa yin pa'i phyir ro/ /rnam pa gnyis ka yang mi las 'das pa yin par bstan pa'i phyir/ming 'dra ba nyid dang / mthu nyid kyis de'i rigs su gtogs pa rnams la/ /de dag dang 'dra ba yang med do zhes smras pa/ mi rnams la de dag dang 'dra ba yang med do zhes bya bar yang smras pa mi rnams la tha na 'dra ba yang med ces bya ba la ming yang med do zhes bya ba la sogs pa'i don to//'dod pa'i khams kyi mi las gzhan rnams la ming 'dra ba yod do zhes bya ba bstan pa'i phyir/ 'dod pa na spyod pa'i lha rnams la ni ming mthun pa tsam yod mod kyi zhes bya ba la sogs pa'o/ /'chi ba rnams la ni 'chi 'pho zhes bya ste/ 'chi ba la mngon par phyogs pa'i phyir ro//srid pa bar ma na gnas pa la ni skye ba zhes bya ste skye ba la mngon par phyogs pa'i phyir ro/ /srid pa bar ma na gnas pa de yang rnam pa gnyis te/ bde 'gror 'gro ba dang / ngan 'gror 'gro ba'i dbye bas so/ /de dag ni 'gro ba'i bye brag gis kha dog gi bye brag tu 'gyur ro zhes bya ba ni nges pa yin par smras pa/rnam pa gnyis kyi zhes bya ba la sogs pa la/ 'ga' zhig legs par spyad pa'i 'bras bu la gnas nas nyes par spyad pa spyod pa de dag ni ngan 'gror 'gro bas snang ba nas mun par 'jug par 'gyur ro/ /yang 'ga' zhig nyes par spyad pa'i 'bras bu la gnas nas nyes par spyad pa spyod pa de dag ni mun pa nas mun par 'jug pa'o zhes bya bas rnam pa gnyis ka yang mun khrod du 'jug pa yin pas la ba nag po'i kha dog 'dra ba'am zhes dpes bstan de nag po nyid yin pas kha dog ngan pa zhes bya'o//rgyu rnam pa gnyis kyis zhes bya ba ni 'ga' zhig legs par spyad pa'i 'bras bu la gnas nas legs par spyad pa'i las byed pa de dag ni snang bar 'jug par 'gyur zhes bde 'gror 'gro ba'o//de'i phyir dpe yang shin tu dkar ba nyid bstan pa ste/ dkar ba yin pa'i phyir kha dog bzang po zhes bya bas bstan to/ /de dag ni kha dog gi dbang gis bgrod par bya ba'i gnas dman pa dang gya nom par 'gro bar 'gyur ro//de yang / tshul khrims kyis ni bde 'gror 'gro bar 'gyur/ /tshul khrims bsrungs pas mtho ris skye bar 'gyur/ /zhes bya ba'i nges pas so/ /tshul khrims 'chal pas ni ngan song du 'gro bar 'gyur ro/ /de'i phyir smras pa/ tshul khrims nyams pa kun nas slong ba dang bcas bzhes bya ba la/ lus dang ngag gis nyes par spyod pa ni tshul khrims nyams pa'o/ /de kun nas slong ba ni yid kyis nyes par spyod pa'o/ /de nyid ni tshul khrims nyams pa ste/ mdo'i tshig dang sbyar bar bya'o/ /lus dang ngag dang yid kyis nyes par spyod pa zhes bya ba yang yid kyis nyes par spyod pa bstan zin na yang 'phags pa la skur ba 'debs pa la sogs pa'i lta ba log pa bstan pa'i dgos pa bstan pa'i phyir/yid kyis nyes par spyod pa'i gtso bo ni lta ba log pa nyid yin te/ nyes par spyod pa kun nas slong ba ni thun mong ma yin na yang /mi 'dod pa'i 'bras bu 'byung ba ma mthong ba ni lta ba yin pas so/ /yang log par lta ba de ni rnam pa gnyis te/ 'phags pa la skur pa 'debs pa dang / rgyu dang 'bras bu la skur pa 'debs pa'o/ /de la dang po ni 'phags pa la skur pa 'debs pa yin la/gnyis pa ni thams cad la skur pa 'debs pa'i log par lta ba'o/ /de'i mi mthun pa'i phyogs su rnam par gnas pa'i 'phags pa ni sangs rgyas dang nyan thos rnams te/ de'i gnyen po'i phyogs zag pa med pa'i lta ba dang yang dag par ldan pa rnams so/ /de dag la skur pa 'debs pa ni log par lta ba'i las kyi chos yang dag par blangs nas gnas pa'i rgyus zhes bya ba'i don bstan pa'i phyir/log par lta ba des na zhes bya ba la sogs pa la/ de'i phyir rgyu dang 'bras bu la log par mngon par zhen to/ /des na log pa'i las de mngon par 'du byed do/ / log par lta ba'i las de mngon par 'du byas pas nag po'i phyogs kyi chos yang dag par blang ba gnyis yang dag par len to/ /de'i rgyus log par lta ba'i lam gyi chos yang dag par len pa de gnyis yang dag par len to/ /yang de'i rkyen bstan pa'i phyir dang de'i don bstan pa'i phyir/ de ma yin pa'i dge ba'i chos rnam pa du ma dang ldan yang zhes bya ba la/de las gzhan pa'i dge ba'i rtsa ba dag yod du zin kyang / de'i dbang gis ngan 'gror 'gro bar 'gyur ro zhes smras pa/ rgyu de dang rkyen des zhes bya ba la sogs pa'o/ /lus zhig par bstan pa'i phyir ming dang gzugs gcig lag cig ces bya ba la sogs pa la/sngar ming dang gzugs dag phan tshun ltos shing bsten nas kun du 'brel par gyur pa las/ ma 'brel par gyur pa ni lus zhig pa zhes bya ste/ dbang po rnams yongs su bye zhing rnam par shes pas btang ba'o/ /shi ba thams cad kyi nang na shi ba tha ma de mchog tu ngan pa zhes bya ba la/'chi ba rnam pa bzhi'i nang nas ma dul ba'i 'chi ba gang yin pa de ni ngan pa ste/ de'i phyir/ ma dul ba ni 'chi 'gyur zhes/ /sems ni skyo ba bskyed par bya/ /zhes gsungs pa yin no/ /mchog tu ngan pa yin pas zhes bya ba ni ma dul par 'chi ba'o zhes bya ba'i don du bstan pa'i phyir/'di dag ni don gyis 'phangs pa dang / tshig dang yi ges 'phangs pa'o/ /skyes pa rnams ni 'chi bar nges pa yin la/ shi ba rnams ni nyon mongs pa dang bcas pa yin na skye bar 'gyur gyi/ nyon mongs pa med na ni skye bar mi 'gyur ro zhes 'dir bstan pa yin no//dmyal ba rnams kyi ming bstan pa'i phyir zhes bya ba ni khyad par gyi ming bstan pa'i phyir zhes bya ba'i don to/ /ngan song zhes bya ba ni dmyal ba zhes bya bar grags pa'o/ ngan 'gro log par ltung ba zhes bya ba yang de bzhin no/ /rang bzhin dang lus dang dngos po bstan pa'i phyir zhes bya ba la/de'i ngo bo nyid ni dmyal ba zhes bya ba'o/ /lus zhes bya ba ni ngo bo nyid de/ ngo bo nyid gzhan la khyad par du bya ba'i phyir ro/ /khyad par du gzhan gyi mtshan nyid kyi rten yin pa'i phyir dngos po zhes kyang brjod de/ de la brten nas de dag gi khyad par du 'jug pa'i phyir ro//'gro ba der 'gro ba'i rgyu ni shin tu dman pa yin pa'i phyir ngan song zhes brjod do/ /ngan 'gro zhes bya ba ni lam ngan pa ste/ de'i phyir smras pa/ chos ngan par spyod pa dang zhes bya ba la sogs pa la/ chos kyi mi mthun pa'i phyogs yin pa'i phyir chos ma yin pa zhes bya ba'i tha tshig go//de nyid ni bdag dang gzhan la gnod par byed par zhugs pa'i phyir yang bar spyod pa'o/ /de ni der 'gro ba'i lam yin pa'i phyir ngan song zhes bya'o/ sdug bsngal gyi 'dus te reg pa zhes bya ba la sogs pa la/ sdug bsngal ni 'gro ba ngan pa rnams kyi'o/ /'dus te zhes bya ba ni tshogs pa'o//reg pa zhes bya ba ni tshogs pa de nyid do/ /myong bar 'gro bas zhes bya ba ni reg pa mi bzad pa myong ba'i phyir ngan 'gro zhes bya'o/ /de'i phyir smras pa/ sdug bsngal myong bar 'gro bas zhes bya ba la sogs pa'o/ /'og gi phyogs su 'gro bas rab tu phye ba yin pa'i phyir dang /nyam nga ba'i sdug bsngal myong bas smre sngags 'don pa'i sgra chen po 'don pas na log par ltung ba zhes bya'o/ /sgyid lug pa che thang du skyes pas na dmyal ba zhes bya'o/ /de ltar na las byas pa gang gis skye ba dang / gang nyams su myong ba zhes bya ba ni sdug bsngal nyid do//sdug bsngal de ma yin pa gzhan yang mngon par 'grub pa ste zhes bya ba la/ ma 'ongs pa'i sdug bsngal 'grub pa'i rgyu'i las byed ces bya ba'i tha tshig go/ /de ltar na shin tu dman pa'i rgyu dang 'bras bus rab tu phye ba'i phyir dang / der skyes par gyur pa rnams dmad pa'i las kun du spyod pa'i phyir de dag la brten nas dmyal ba'i ming rnam pa gsum bstan to//yang na rgyu dang rnam par smin pa'i 'bras bu dang skyes bu byed pa'i 'bras bu'i dbang du byas nas bstan to/ /de las bzlog pa'i las ci rigs par bya'o zhes bya ba ni sems can 'di dag ni lus kyis legs par spyod pa dang ldan pa zhes bya ba la sogs pa ste/kun nas slong ba dang bcas pa'i tshul khrims phun sum tshogs pa dang lus dang ngag dang yid kyis legs par spyod pa dang yang dag par ldan pa'o/ /lta ba phun sum tshogs pa rnam pa gnyis la sogs pa yang sngar bstan pa las bzlog pa yin no//rgyu nyid dang 'bras bu nyid kyang khyad par can du shes par bya'o/ /de'i phyir smras pa/ legs par spyod pa sngon du 'gro ba zhes bya ba la sogs pa'o/ /snga ma bzhin du gzhan yang gang zag pa rnams zad pas zag pa med pa'i sems rnam par grol ba dang /shes rab rnam par grol bas tshe 'di nyid la bdag nyid kyis mngon par shes pa mngon sum du byas nas snyoms par zhugs nas gnas so/ /gzhan dag la yang ston par byed do/ /bdag gi skye ba ni zad do zhes bya ba nas/ 'di las srid pa gzhan ni mi shes so zhes bya ba'i bar du ste/'di ni de bzhin gshegs pa'i stobs bcu pa'o/ /zag pa thams cad kyi bag la nyal ma lus par spangs pa'i phyir zhes bya bas ni zag pa zad do zhes bya ba'i don bstan pa yin no/ /zag pa med pa'i sems dang zhes bya ba la/ sems rnam par grol ba'i don 'dod chags la chags pa dang bral bar 'gyur ba ni sems rnam par grol ba yin no zhes bya ba'i tha tshig ste/'dod pa'i zag pa dang srid pa'i zag pa spangs pa'i phyir ro/ /zag pa med pa'i shes rab ni shes rab rnam par grol ba zhes bya ste/ ma rig pa'i zag pa spangs pa'i phyir ro//de gnyis ka'i lhag pa'i sems kyi bslab pa dang / lhag pa'i shes rab kyi bslab par rnam par gzhag par bya'o/ /mchog nyid kyis ni yongs su rdzogs par bstan pa'i phyir/ srid pa tha ma de nyid la zhes bya ba 'di'i don ni mthong ba'i chos nyid la zhes bya ba'o/ /rang gis zhes bya ba ni bdag nyid kyis zhes bya ba'i don to//mngon par shes pa drug pas zhes bya ba ni zag pa zad pa'i mngon par shes pas zhes bya ba'i don bstan pa yin no/ /yang de ni mthong ba dang sgom pas spang bar bya ba'i nyon mongs pa'i gnyen po'i lam gyis bsdus pa yin no zhes bstan pa'i phyir/mthong ba'i lam la yang brten zhes bya ba la sogs pa'o/ /bdag gis thob po snyam du zhes bya bas ni bdag nyid kyis mngon par shes pas mngon sum du byas so zhes bya ba de'i don bstan pa yin no/ /'dod na gzhan dag la yang zhes bya bas ni de dag gnyis ka'i don bstan pa yin te/de lta bas na zhes bya ba la sogs pa'o/ /tshig rnams kyi dbye ba zhes bya ba la sogs pa la bdag gi skye ba ni zad do zhes bya ba ni brgyad pa la zhugs pa'o/ /bdag gis tshangs par spyod pa ni spyad do zhes bya ba ni lam legs par bsgoms pas yongs su nyams pa med pa'o/ / bya ba byas so zhes bya ba ni kun du sbyor ba thams cad spangs pas lam 'bras bu dang bcas par thob pa'o/ /'di las srid pa gzhan ni mi shes so zhes bya ba ni srid pa bdun pa la sogs pa zad pa'o/ /de ltar mdo'i don bstan nas yang rnam pa bdun gyis stobs bstan par 'dod nas smras pa/rang bzhin dang ni rab dbye dang / /zhes bya ba la sogs pa ni stobs kyi rnam pa thams cad khong du chud par bya ba'i phyir bstan pa'i don to/ /ma 'dres pa ni thun mong ma yin pa nyid do/ /mnyam pa nyid ni thun mong ba nyid do/ /las byed pa ni stobs kyi bya ba'o/ /go rims ni mthar gyis bstan pa'o//bye brag ni phan tshun gyi byed pa sna tshogs pa'o/ /shes rab kyi ngo bo nyid yin pas rang bzhin ni dbang po lnga yin te/ mi mthun pa'i phyogs zil gyis gnon par nus pa'i phyir stobs bcu'i bya ba nyid de/ lhan cig byed pa dang bcas pas don bya ba byed nus pa dang ldan pa'i phyir ro//gtso bo yin pa'i phyir zhes bya ba ni mdo las/ yang dag pa ji lta ba bzhin du rab tu shes so zhes bya ba'i tshig gis mkhyen pa'i stobs zhes tha snyad du byas pa yin no/ /de'i phyir smras pa/ gnas dang gnas ma yin pa mkhyen pa'i stobs zhes bya ba la sogs pa la/dngos po tshad med pa la dmigs pa'i phyir tshad med pa nyid do/ /tshad med pa nyid kyis rab tu dbye ba bstan par bya ste/ dus gsum kun nas 'jug pa'i phyir dus tshad med pa nyid kyi dbye ba'o/ /shes bya'i dngos po gcig gi yang rab tu dbye ba tshad med pa'i phyir shes bya'i rab tu dbye ba dang /phyogs bcu'i 'jig rten gyi khams kyi sems can gyi khams thams cad kyi rgyud kyi don la 'jug pa nyid ni rgyud tshad med pa'i rab tu dbye ba yin no/ /de bzhin du stobs thams cad kyang re re zhing tshad med par rig par bya'o/ /'di dag ni de bzhin gshegs pa kho na'i yin gyi nyan thos la sogs pa'i ni ma yin pas des na de bzhin gshegs pa'i stobs zhes bya'o//de'i phyir thun mong ma yin pa zhes bya zhing des na ma 'dres pa zhes bya'o/ /mnyam pa nyid bstan pa'i phyir de bzhin gshegs pa thams cad kyi stobs la khyad par med de/ sku'i stobs dang ye shes kyi stobs mnyam zhes bya ba'o//gzhan du na sangs rgyas thams cad kyi sku mnyam pa nyid thob par mi 'gyur ro/ /stobs rnams la khyad par med pa bden na yang gnas pa las khyad par yod pa bstan pa'i phyir dus kyi khyad par dang mos pa'i khyad par dang / gdul bya'i khyad par la ltos nas de bzhin gshegs pa 'ga' zhig la gnas par 'gyur ba'i phyir ro//stobs ldan thams cad las rgyal zhing / /'jig rten na ni gang brjod pa/ /rtsod bral khyad par 'phags pa nyid/ /thub pa khyod la rdzogs par mnga'/ /zhes bstod pa yin no/ /de lta bu dang yang dag par ldan pa de sems can rnams la 'jigs pa skyed par mdzad dam/'on te phan 'dogs par mdzad ce na/ mdzad pa yang nges par ston par mdzad ni des na bstod pa las/ stobs ldan 'jigs mi 'gyur bas khyod/ /mi bsnyengs gang lags rigs lags na/ /mthu mnga' bzhin du gzhan du yang //khyad du mi gsod gang de rmad/ /ces bstan pa yin no/ /stobs 'di dag ni re re zhing yang rang gi don bsgrub pa dang / gzhan gyi don bsgrub pa'i dbang du byas nas las rnam par gzhag go/ /de la rang gi don bsgrub pa'i phyir shes bya thams cad la ma rmongs pa'i ye shes dang ldan pa yin no//gang yang dang po'i dbang du byas nas smras pa/ rgyu la yang zhes bya ba la sogs pa'o/ /gzhan dag kha na ma tho ba dang bcas pa'i gnas nas slong ba ni gzhan gyi don bsgrub pa ste/ gang yang rgyu med pa dang mi mthun pa rgyur smra ba'i zhes bya ba la sogs pa la rgyu med pa dang mi mthun pa rgyur smra ba ni pha rol rgol ba smra ba bcu drug gi rjes su 'brangs nas shes par bya'o//tshar gcod par mdzad do zhes bya ba ni de'i lta ba bzlog par mdzad pa'o/ /las bdag gir bya ba mkhyen pa'i zhes bya bas ni bdag gi don bstan pa yin no/ /gnyis pas ni gzhan gyi don to/ / bsod nams dang bsod nams ma yin pa dang / sbyin pa dang blang ba'i sbyor bas 'pho bar smra ba ni bsod nams dang bsod nams ma yin pa gzhan gyis byas nas gzhan gyi spyod par smra ba'o/ /mngon par shes pa rnams ni bsam gtan la brten pa yin pa'i phyir ro/ /de'i khyad par las cho 'phrul rnam pa gsum yin pas/cho 'phrul gsum gyis zhes bya ba la sogs pa'o/ /bya ba gnyis pa bstan pa'i phyir so so dang 'gal ba dang zhes bya ba la sogs pa ni bstan pa la sdang ba rnams tshar gcod par mdzad pa zhes bya ba'i tha tshig go/ /de dag tshar gcod pa yang de'i gzhung 'gog par byed pa'o//yang na de dag gzu bor gnas par byed pa'o/ /de'i phyir de dag nyid la cho 'phrul gyis gzu bor 'jog cing dang por yid 'phrog par byed pas na cho 'phrul zhes bya'o/ /cho 'phrul gyi sgra ni las dang po pa shin tu sems 'phrog par byed pa'i don to/ /dbang po mchog dang mchog ma yin pa mkhyen pa'i stobs kyis ni sems can rnams kyi dbang po mkhyen nas dbang po mthun par chos ston pa mdzad do zhes bya ba ni mdzad pa rnam pa gnyis yin no//mos pa sna tshogs mkhyen pa'i stobs kyis ni sems can rnams kyi mos pa chung ngu la sogs pa gnas ngan pa la mos pa mkhyen nas de dag las bzlog par mdzad do//khams sna tshogs mkhyen pa'i stobs kyis ni de dang de mkhyen nas 'jug pa'i sgo de dang de la sbyor bar mdzad pas na 'jug par mdzad do zhes bya ba'o/ /nyan thos rnams la gdams pa'i bya ba ni nyan thos kyis las gsungs pas yang brjod par mi bya'o zhes bstan pa yin no//byang chub sems dpa' rnams ni chos bdag med par rab tu rtogs par bya ba la sbyar bar bya ba yin pas zhes byas nas de dag la gdams pa'i bya ba ni gzhan yin pas de'i phyir de dag gi khyad par rab tu bstan pa'i phyir ro//las dang po pa ni ting nge 'dzin bsgom pa la 'dris par ma byas pa'o/ /de nyid bstan pa ni/ las thog ma pa zhes bya ba'o/ /yang na sgom pa yid la byed pa la yang dag par ma zhugs pa ni las thog ma pa'o/ /yang de ni rnam pa gnyis te ting nge 'dzin gyi tshogs yongs su rdzogs pa dang /ting nge 'dzin gyi tshogs yongs su ma rdzogs pa spang ba'i phyir smras pa/ ting nge 'dzin gyi tshogs yongs su 'dzin pa la zhes bya ba la sogs pa'o/ /de yang rnam pa gnyis te/ mngon par zhen pa dang / mngon par zhen pa med pa'o/ /mngon par zhen pa med pa spang pa'i phyir smras pa/sems gnas par 'dod pa de la zhes bya ba'o/ /'dir yang mtshan ma med pa la sems gnas pa'i sgom pa'i dbang du byas nas gdams ngag gi bya ba bstan pa yin no/ /mtshan ma med pa'i sgom pa dang chos thams cad brjod du med pa'i don la zhugs pa na nges par 'grub pa yin te/don de la ming dang rgyu mtshan la sogs pa'i rnam par rtog pa rab tu spangs pa'i phyir ro/ /de dag spangs pas yang ming dang rgyu mtshan dag glo bur bar mthong ba'i phyir ro/ /ming de yang rnam pa gnyis te/ thog ma med pa'i dus nas gcig nas gcig tu brgyud pa'i sngon gyi spros pa'i bag chags su gtogs pa ste/'di lta ste/ gzugs dang sgra zhes bya ba la sogs pa dang / ma dang pha la sogs pas dang po sgro btags pa'o/ /'dir ni dang por de la 'jug par 'gyur ro/ /rab tu dben pa'i gnas mal du/ /zhes smos pa ni dben pa'i gnas su don yid la bya ba'o//'du 'dzi gnas pas ni ma yin no zhes bya ba'o/ /de'i phyir lus dben par bya'o zhes bya bar smras pa dang / gcig pu zhes bya ba la sogs pa dang / de la ming ni rnam pa gnyis te/ khyim pa'i phyogs dang / rab tu byung ba'i phyogs kyi'o/ /khyim pa'i phyogs kyir gtogs pa smras pa/pha ma gnyis sam zhes bya ba'o/ /rab tu byung ba'i phyogs kyis smras pa/ mkhan po dang slob dpon gnyis kyis zhes bya ba'o/ /yid la byed pa'i rnam pa bstan pa'i phyir ming de nyid nang du yid la byos la zhes bya ba la sogs pa la/ sems can gyi rdzas kyi rtsa ba ni skye mched drug yin la de dag so so la de'i mtshan nyid med pas de'i phyir smras pa/bdag gi skye mched la ma gtogs pa zhes bya ba la sogs pa la/ nang ngam zhes bya ba ni nang gi bdag nyid can gyi skye mched de de'i bdag nyid ces bya ba'i tha tshig go/ /phyi rol na zhes bya ba ni phyi'i skye mched ces bya ba ste/de'i bdag nyid ces bya ba'i tha tshig go/ /gnyis ka'i bar na yang yod dam zhes bya ba ni de dag gnyis ka las rnam par grol ba zhes bya ba'i tha tshig go/ /mi dmigs kyi zhes bya ba ni chos thams cad ming dang bral ba'i phyir dang / ming ni glo bur ba yin pa'i phyir ro//de'i phyir smras pa/ khyod 'di kho na snyam du zhes bya ba la/ de ltar rjes su mi mthun pa'i dmigs pas glo bur ba'i chos rnams la ming mi brten la/ ming la yang de dag med de glo bur ba yin pa'i phyir ro/ /'du shes skyes shing zhes bya ba ni yid la byed pa dang mthun pa bsgoms pa'i stobs kyis rab tu thob pa'o//de ltar re zhig rang gi ming glo bur ba'i 'du shes kyi dbang du byas nas smras pa/ mig la mig ces bya ba dang / /zhes bya ba la sogs pa la/ gnyis dmigs te zhes bya ba ni ming dang rgyu mtshan te/ mngon par brjod pa dang / mngon par brjod pa'i tshig gi gnas so//de yang ming dang ming nyid de/ de yang brjod bya dang rjod pa'i dbye ba'o/ /rgyu mtshan gyi ngo bo nyid mig ces brjod na yang rgyu mtshan gyi ngo bo nyid ni mig ma yin te/ gzugs la sogs pa bzhin du ming la ma ltos par gzung du med pa'i phyir ro/ / de'i phyir smras pa/ mig gi gdags pa med par ni su yang mig gi blo 'jug par mi 'gyur la zhes bya ba la/ gal te yang gzugs la sogs pa'i dngos po rnams la ming ma thos pa'i sngon du yang gzugs la sogs pa'i blo 'jug par 'gyur na ni de bzhin du mig la yang 'jug par 'gyur na de ltar ni 'jug pa ma yin no//de'i phyir ming dang mig ni shin tu tha dad pa yin te/ ming yang gzhan la mig kyang gzhan yin no zhes bya ba'o/ /des na glo bur ba'i chos la glo bur ba'i ming gis 'du shes par rig par bya'o/ /de de ltar yid la byed pa na mig gi 'du shes la yang snga ma bzhin du glo bur ba yin pa'i 'du shes skye bar 'gyur ro//de lta bu'i bdag nyid kyi ming thams cad kyi mngon par zhen pa bsal ba'i phyir/ sbyor ba'i lam gyis bsdus par chos rnams de ltar rig par bya'o/ /'du shes 'di lta bus kun du rtog par byed pa'i stobs kyis chos thams cad la spros pa'i 'du shes bsal nas dngos po de nyid la rnam par mi rtog pa'i sems kyis gnas par bya'o//de lta bur gnas pa gang yin pa de ni de bzhin gshegs pa'i ye shes rnam par dag pa mtshan ma med pa'i ting nge 'dzin gang yin pa de ni rigs dang rigs rgyud ces bya ba'i tha tshig ste/de'i rigs su gyur pa'i ting nge 'dzin de la sems rtse gcig pa thob par 'gyur ro zhes bya bar dgongs pa'o/ /de ltar yid la byed pa de ni mig thams cad la 'jug pa na rjes su 'gro ba yin par bstan pa'i phyir yid la byed pa 'di ma btang zhig ces bya ba'o//nyan thos rnams kyis kyang yid la byed pa 'di nyid mang du bya'o zhes bstan pa'i phyir/ mngon par shes pa shin tu myur bar 'gyur ro zhes bya ba ni thos nas skrag par 'gyur la goms par byed nus pa zhes bya ba'i tha tshig go/ /stobs lhag ma rnams kyi las ni gzhung nyid las rig par bya'o//stobs rnams ni rim gyis thob pa ma yin par bstan pa'i phyir/ mngon par rdzogs par sangs rgyas ma thag tu cig car brnyes te zhes bya ba la sogs pa'o/ /mngon sum du bya ba dang bya ba'i dbang gis 'di dag gi rim pa bstan pa'i phyir smras pa/ de dag gi rim gyis mngon sum du 'gyur te zhes bya ba la sogs pa'o//mngon par rdzogs par sangs rgyas ma thag tu zhes bya ba ni 'khor ba las nges par 'byung ba ste/ 'khor ba las nges par rgal ba'i gnas pa la gnas pa'o/ /yun ring por zhugs par gyur pa'i 'khor ba'i rgyu dang 'bras bu 'jug par 'gyur ba la/ rnam par gzigs nas gnas dang gnas ma yin pa mkhyen pa'i stobs mngon sum du mdzad do zhes bya ba'o/ /de ltar rnam par gzigs nas dus ring por goms par byas pa'i lus tha ma thob pa gang yin pa dang / ris mthun pa'i 'dod pa'i khams la mngon par mthong pa 'dod pa rnams la las bdag gir bya ba mkhyen pa'i stobs kyis mi dge ba yongs su spong du gzhug pa dang /dge ba yang dag par bsgrub pa la sbyor ba'o/ /khams gong ma dag tu skye bar 'dod pa rnams la ni stobs gsum pa mngon sum du byas nas 'dod chags dang bral bar bya ba'i phyir gdams ngag sbyin par mdzad do//de bzhin du khams gsum gyi sems can rnams la 'jig rten pa'i phun sum tshogs pa'i dbang du byas nas stobs gsum po rnams rim gyis mngon sum du mdzad par shes par bya'o/ /'jig rten las 'das pa'i phun sum tshogs pa'i dbang du byas nas mngon sum du bya ba'i rim pa bstan pa'i phyir/'jig rten las 'das pa'i 'dod chags dang bral ba 'dod pa rnams la ni zhes bya ba la sogs pa la/ 'jig rten las 'das pa'i 'dod chags dang bral ba 'dod pa rnams la dbang po mchog dang mchog ma yin pa nyid dang bsam pa dang bag la nyal gyi khyad par la ltos nas de dag gi lam bstan pa'i phyir stobs gsum mngon du byas nas dbang po la sogs pa ji lta ba bzhin du gzigs par mdzad do//kun du gzigs nas spyod pa dang rjes su mthun pa'i 'jug pa'i sgo thams cad du rjes su 'gro ba'i lam mkhyen pa'i stobs kyis 'dzud par mdzad do//de ltar 'jug pa'i sgo'i ting nge 'dzin thob nas stobs gnyis kyis dbu ma'i lam ston par mdzad do/ /yang des na mtha' gnyis ni 'jig tshogs la lta ba'i rtsa ba can yin la/ dbu ma'i lam ni bdag med pa mthong ba'i rtsa ba can yin pa'i phyir ro/ / bdag dang bdag gir lta ba'i dngos pos ni rtag pa dang chad par ltung bar byed do / /dbu ma'i lam ni khams gsum pa'i gnyen po yin pa'i phyir nyon mongs pa thams cad spong bar zhugs pa yin no shes bstan pa'i phyir/ de ltar yang dag par brtson zhing rgyu dge ba'i rtsa bas nye bar bstan pa de ni brgya la ma spangs na yang nyon mongs pas kun du spyod par mi 'gyur ro//de'i phyir kha cig ni ma byas bzhin du byas par mngon pa'i nga rgyal byed do/ /de dag gi mngon pa'i nga rgyal stobs bcu pas spong bar mdzad do zhes bya ba ni/ go rims kyi rnam grangs gcig yin no//rten cing 'brel par 'byung ba'i chos rnams la zhes bya ba ni/ gang rab tu ma rtogs pas dus ring por 'khor bar gnas par gyur pa de ni rten cing 'brel par 'byung ba 'di yin zhes bya bas kyang chos gnas pa'i ye shes kyis rtogs par mdzad do/ /ye shes de ni phyin ci ma log pa'i rgyu dang 'bras bu'i mtshan nyid can yongs su shes pa'i rnam pa yin pa'i phyir gnas dang gnas ma yin pa mkhyen pa'i stobs zhes brjod do//de ltar rten cing 'brel par 'byung ba la rnam par gzigs nas khyim pa rnams la stobs gnyis pas las kyi lam yang dag par blangs pa la dus gsum du gzigs par mdzad de/kun nas nyon mongs pa can gyi sems can gyi khams la rnam par gzigs pa'i phyir ro/ /stobs gsum pas rab tu byung ba rnam par byang ba yang dag par blang ba la 'ga' zhig rnam par byang ba'i snod du gyur pa yod dam zhes rnam par gzigs par mdzad pa'i phyir ro//stobs lhag ma rnams kyi snga ma bzhin du blta bar bya'o/ /gzigs nas kyang rnam par byang ba la sbyor bar mdzad de/ lhag ma rnams kyang rim pa de bzhin no/ /chos kyi khams dang zhes bya ba ni chos rnams la 'jug pa'i rgyu yid la byed pas chos de dag nyid la snyad kyi rjes su 'jug pas byed pa po la sogs pa'i sems can gyi khams med na yang rang gis byas pa'i las la nye bar spyod pa yid la byed pa la rnam par gzigs par mdzad do//de bzhin du 'dus byas bdag med pa la bdag tu phyin ci log tu mngon par zhen pa'i sgo nas sdug bsngal nyam nga ba thob pa rnams kyi sdug bsngal rnams las rnam par thar par bya ba'i phyir stobs gsum pas dbang po dang /mos pa dang rjes su mthun pa'i lam nye bar ston par mdzad do/ /lhag ma rnams kyi go rims ni snga ma bzhin no/ /stobs rnams kyi phan tshun byed brag yod pa dang bye brag med pa bstan pa ni gnas dang gnas ma yin pa mkhyen pa'i stobs kyis ni legs par spyad pa dang nyes par spyad pa'i 'bras bu 'dod pa dang mi 'dod pa'i 'bras bu rab tu mkhyen to//las bdag gir bya ba mkhyen pa'i stobs kyang de bzhin no/ /de ltar na bye brag ci yod ce na zhes bya ba la/spyi dang bye brag gi rnam pa ni de dag gi bye brag go/ /gzhan yang 'dod pa dang mi 'dod pa'i 'bras bu nges par yod pa yang rgyu gang gis las byas pa de la 'bras bu smin gyi gzhan la ma yin pa dang ma byas pa dang mi phrad pa'i dbang du byas nas stobs gnyis pa'i bye brag de yin par shes par bya'o/bsam gtan dang rnam par thar pa gang la yang brten nas sems can rnams la gdams par byed pa ni bsam gtan dang rnam par thar pa mkhyen pa'i stobs zhes bya'o/ /bsam gtan la brten nas las dang 'bras bu 'brel par shes pa gang yin pa de ni las bdag gir bya ba mkhyen pa'i stobs zhes bya'o//bsam gtan gyi dbang gis dbang po dang mtshungs par ldan pa'i sems tsam du thugs su chud pa nyid ni bsam gtan la sogs pa mkhyen pa'i stobs kyis so/ /dbang po'i bye brag mkhyen pa gang yin pa de ni dbang po mchog dang mchog ma yin pa mkhyen pa'i stobs kyis so//dbang po sngon du 'gro ba'i bsam pa'i spyi mkhyen pa ni dbang po mchog dang mchog ma yin pa mkhyen pas so/ /khyad par mkhyen pa ni mos pa sna tshogs mkhyen pa'i stobs kyis so/ /bsam pa rnam pa drug bstan pa'i phyir smras pa/ bsam pa de yang mdor bsdu na zhes bya ba la sogs pa la/gnas ma yin pa la lhag par mos pa'i sems can rnams kyi bsam pa de lta bus nges par 'byung ba ma yin pa zhes bya'o/ /rang gi lam la mos pa'i sems can rnams bsam pa des khams gsum las yang dag par 'da' bar 'gyur ba ni nges par 'byung ba zhes bya'o/ / de ltar mos pa'i bye brag gis bsam pa rnam pa gnyis so/ /yang bsam pa phyi ma de dus kyi dbye bas rnam pa gnyis su bstan pa'i phyir/ rnam par dag pa las ring ba dang rnam par dag pa dang nye ba'i zhes bya ba'o/ /yongs su smin pa'i chung ngu dang / 'bring la gnas pa rnams kyi'o zhes bya ba ni 'jug pa dang yongs su smin pa la gnas pa rnams kyi'o//smin pa chen po ni srid pa tha ma'i lus su shes par bya ste/ gang la gnas nas lam bskyed par nus pa'o/ /rnam par dag pa dang nye ba'i rnam pa gnyis bstan pa'i phyir/ tshe 'di nyid la mya ngan las 'das pa zhes bya ba la sogs pa'o//gzhan gyis mya ngan las 'das pa thob pa ni nyan thos rnams kyi'o/ /de'i phyir smras pa/ nyan thos kyi thos pas zhes bya ba la sogs pa'o/ /byang chub sems dpa' rnams kyi ni dngos po med pa mngon par byang chub pa'o/ /de'i phyir smras pa/ theg pa chen pos mya ngan las 'das pa thob par mos pa zhes bya'o//mos pa sngon du 'gro ba'i sa bon gyi spyi thugs su chud pa gang yin pa de ni mos pa sna tshogs pa mkhyen pa'i stobs so/ /rnam par phye nas mkhyen pa gang yin pa de ni khams sna tshogs mkhyen pa'i stobs kyis so/ /khams sna tshogs kyi dbang du byas nas khams sna tshogs kyang rnam pa bzhir blta bar bya'o//de la dang po dang gnyis pa ni sa bon de rigs gnyis so/ /de yang rigs gnyis bstan par shes par bya'o/ /rnam par dag par byar rung ba'i sa bon ni theg pa gsum gyis bsdus pa'i rigs can de/ de dag kyang mthun pa'i lam dang 'bras bu thob pa ni rigs rnam par dag par rnam par gzhag par bya'o//rnam par dag par byar mi rung ba'i sa bon ni mya ngan las 'da' bar 'gyur ba'i chos can ma yin pa rnams kyi'o/ /gcig tu 'khor ba'i sdug bsngal gyi snod du gyur pa'i phyir rnam par bya bar mi nus pa zhes bya ba'i don to//sa bon gyi spyi gang yin pa dang lam gyi spyi mkhyen pa gang yin pa de ni khams sna tshogs mkhyen pa'i stobs zhes bya'o/ /rnam par phye nas mkhyen pa gang yin pa de ni thams cad du 'gro ba'i lam mkhyen pa'i stobs zhes bya ste/ sngon gyi 'gro ba'i spyod pa'i spyi dran pa nyid ni 'chi 'pho dang skye ba mkhyen pa'i stobs zhes bya'o//da ltar gyi dus kyi 'chi 'pho dang skye ba rab tu phye nas shes pa nyid ni sngon gyi gnas rjes su dran pa mkhyen pa'i stobs kyis so/ /ma 'ongs pa'i dus la ltos na ni 'chi 'pho dang skye ba mkhyen pa'i stobs kyis so/ /rnam par grol ba rnams kyi nying mtshams sbyor ba mkhyen pa gang yin pa de ni 'chi 'pho ba dang skye ba mkhyen pa'i stobs kyis so//sems legs par rnam par grol ba rnams kyi tshe 'di nyid la mya ngan las 'das pa thob pa rab tu mkhyen pa gang yin pa de ni zag pa zad pa mkhyen pa'i stobs kyis so/ /mdo nyid las 'di skad du 'byung ba bzhin du rig par bya'o zhes bya ba la dge slong dag bzhi po 'di dag ni de bzhin gshegs pa'i mi 'jigs pa bzhi ste/gang dang yang dag par ldan pas de bzhin gshegs pa dgra bcom pa yang dag par rdzogs pa'i sangs rgyas khyu mchog rlabs po che'i gnas su dam 'cha' zhing zhes bya ba nas seng ge'i sgra sgrogs so zhes bya ba'i bar du'o//bzhi gang zhe na/ nga yang dag par rdzogs pa'i sangs rgyas so zhes zhal gyis bzhes pa na/ chos 'di mngon par rdzogs par sangs ma rgyas so zhes 'dir chos dang mthun par dge slong ngam bram ze'am/ lha'am/ bdud dam/ tshangs pa'am/ gzhan sus kyang chos dang mthun par rgol ba'am dran par byed pa'i rgyu ma mthong nas bde ba thob cing mi 'jigs pa thob pas gnas pa 'di ni dang po'o//ngas zag pa zad do zhes zhal gyis bzhes pa na zag pa 'di ma zad do zhes bya bar gzhan sus kyang zhes bya ba snga ma bzhin te gnyis pa'o/ /gang yang ngas nyan thos rnams la bar du gcod pa gang gsungs pa de dag bsten yang bar du gcod par mi 'gyur ro zhes bya bar yang snga ma bzhin te gsum pa'o//gang yang ngas nyan thos rnams kyi lam nges par 'byung bar byed pas 'phags pa'i nges par 'byung bas sdug bsngal thams cad zad par byed pa bstan pa ni 'dis nges par 'byung bar byed pa ma yin no zhes gzhan sus kyang zhes bya ba snga ma bzhin te bzhi pa'o//'khor gyi nang du dam 'cha' ba yin te zhes bya ba ni bdag gi don dang gzhan gyi don gyi phun sum tshogs pa'i dbang du byas nas bdag nyid 'jigs pa med pas 'khor gyi nang du dam 'cha' bar bya zhing / gsangs nas dam bca' bar bya ba ni ma yin no zhes bya ba'i tha tshig go//sems can thams cad kyi gnas las yang dag par 'das pa'i gnas dag bdag nyid kyis rab tu mkhyen nas gzhan dag gis rgal ba'i tshig gi skabs med pas bde ba thob pa la gnas pa zhes bya bar 'brel to//dang po ni nyan thos dang thun mong ma yin pa ste/ de dag la shes bya'i sgrib pa spangs nas med pa'i phyir dang / shes bya'i rnam pa thams cad shes pa'i nus pa med pa'i phyir ro/ /de ltar na shes bya thams cad la thogs pa med pa'i ye shes kyi dbang du byas nas ni dang po'o/ /nyan thos dang thun mong ba'i nyon mongs pa'i sgrib pa las rnam par thar pa ni rnam par grol ba la tha dad pa med pa'i phyir ro//bdag nyid kyis nyon mongs pa thams cad spangs pa'i dbang du byas pa la ste gnyis pa'o/ /thar pa 'dod pa rnams de'i don du zhugs pa rnams la 'jig rten las 'das pa'i lam nye bar bstan pa ni gsum pa'o//don gyi go rims kyis 'dir dang po bstan pa yin te/ lam bstan nas lam gyi bar du gcod pa rnams bstan par bya'o zhes bya ba'i dbang du byas so/ /nges par 'byung ba la bar du gcod par 'gyur ba'i chos rnams ni mi mthun pa yin pas gcig tu spang bar bya ba nyid ni bzhi pa'o//phyi ma gnyis ni lam dang de thob pa'i tshogs kyi dbang du byas pa yin no/ /bar du gcod pa'i chos bstan pa nyid kyis de yang bstan par 'gyur ba yin no/ /gnas bzhi po 'di dag ni 'gas kyang gzhan du bya bar nus ba ma yin pas so/ /dam bca' ba las gzhan du bya ba'i mtshan nyid dang / rgyu mtshan med par bstan pa'i phyir rgyu mtshan yang zhes bya ba la gnas snga ma gnyis kyis zhes bya ba ni thams cad mngon par byang chub pa dang / zag pa zad pa'i gnas dag las phyin ci log tu spyod pa ni ji ltar dam bcas pa las phyin ci log tu kun du 'jug pa las brtsams pa'o/ /lus la sogs pa'i las thams cad ye shes sngon du 'gro ba'i phyir/gnas dang po dag las bzlog nas/ 'jug pa'i sems pa med pa'o/ /de bzhin gshegs pas nye bar bstan pa la snga ma dang phyi ma 'gal ba med pa dang / rigs pa dang 'gal ba med pas gnas phyi ma dag kyang dam bca' ba dang 'gal bar 'jug pa med de rgyu mtshan yang dag par ma gzigs pa'i phyir ro//dge slong bram ze dag gi ni lha'i mig dang mi ldan pa'o/ /lha dang bdud ni lha'i mig dang ldan pa'o/ /de ltar na lha'i mig gis kyang log par 'jug pa yang dag par rjes su mthong ngo zhes bstan pa yin no/ /lha dang bdud ni gzhan gyi sems rig pa'o//de las gzhan dag ni gzhan gyi sems rig pa ma yin no/ /de ltar na bdud la sogs pas kyang rgol ba'i rgyu mtshan ma mthong ba yin no/ /dam bcas pa'i gnas las bzlog pa'i rgol pa'i gnas yang dag par ma mthong bas bde ba thob pa dang / mi bsnyengs pa thob pa dang bag tsha ba med pa thob pa yin no//thugs la zhum pa mi mnga' ba'i phyir mi bsnyengs pa nges par thob pa zhes bya'o/ /mi bsnyengs pa'i phyir thugs ma zhum pa zhes bya'o/ /grangs bzhir nges pa bstan pa'i phyir bzhi po 'di las mi mang mi nyung ba'o zhes bstan pa nyid do/ /bdag la phan pa sgrub pa dang zhes bya ba la sogs pa la/bdag la phan pa sgrub pa ni ye shes dang spangs pa phun sum tshogs pa'o/ /gzhan la phan pa sgrub pa ni lam dang tshogs bstan pa'o/ /theg pa chen po la yang dag par zhugs pa zhes bya ba ni/ yang dag par rdzogs pa'i byang chub de la zhugs pa'o/ /de bzhin gshegs pa'i gdung rgyun mi gcad pa'i phyir de bzhin gshegs pas zhugs pa'i shing rtar zhugs pa'o//des na de'i ched du byed pa ni dang po'o/ /nyan thos la sogs pas kyang nyon mongs pa spang bar bya ba'i bsam pas zhugs pa ni gnyis pa'o/ /gnas gzhan ni de dag gnyi ga'i dbang du byas pa'o/ /gnas phyi ma gnyis ni thun mong gi tshul gyis gsungs pa yin la//sdud par byed pas tha dad du byas pa yin no zhes bstan pa'i phyir ngas byang chub sems dpa' rnams dang nyan thos rnams kyi dbang du byas nas bar du gcod par gang bstan pa zhes bya'o/ /mdo las ji skad 'byung ba zhes bya ba ni 'dir nyan thos rnams la ston ba chos 'chad par mdzad pa na thugs brtse ba can don 'dod pa/phan pa 'dod pa/ snying rje'i rang bzhin can gyis dge slong dag 'di ni khyed la phan pa yin/ bde ba yin/ 'di ni phan pa dang bde ba yin zhes bstan pa na/ de la de dag legs par rab tu nyan pa yin/ rna gtod par byed/ kun shes par byed/sems nye bar 'jog par byed/ chos kyi rjes su mthun pa'i chos sgrub par byed/ mi 'da' bar 'jug par byed do/ /de la yang de bzhin gshegs pa lhag par dga' bar yang mi mdzad/ yid mi bde ba yang mi mnga'/ thugs spro bar yang mi mdzad de/ dran pa mngon du mdzad pas de la yang btang snyoms su mdzad nas bzhugs te/'di ni ma 'dres pa'i dran pa nye bar gzhag pa dang po'o/ /yang gnyis pa ni snga ma bzhin du chos ston pa na legs par rab tu nyan par mi byed pa nas/ chos kyi rjes su sgrub par mi byed pa'i bar du'o/ /de dag la yang de bzhin gshegs pa khong khro ba yang mi mnga'/mi bzod pa yang mi mnga'/ thugs mi dgyes pa yang mi mnga'o/ /lhag ma ni snga ma bzhin no/ /yang gsum pa ni 'ga' zhig legs par rab tu nyan pa nas chos kyi rjes su mthun pa'i chos sgrub pa'i bar du byed la/ 'ga' zhig ni chos kyi rjes su mthun pa'i chos sgrub pa'i bar du mi byed na yang de dag la de bzhin gshegs pa lhag par dga' bar yang mi mdzad pa nas/spro bar yang mi mdzad pa'i bar dang / mi dgyes pa mi mnga'o zhes bya ba'i bar ro/ /lhag ma ni snga ma bzhin no/ /'di ni gsum pa'o/ /de bzhin gshegs pas dus ring por thugs la dgongs pa ni ngas bstan pa'i chos 'dul ba 'di ci nas kyang sgrub par 'gyur na ci ma rung snyam pa de la yang dag par sgrub par byed pa de la yang rjes su chags par mi mdzad do//gnod pa byed pa la yang khong khro ba mi mnga'/ de dag gnyis ka'i rnam pa can de la yang de gnyis ka'i rnam pa mi mnga'o/ /'khor gyi tshogs yongs su sdud par byed pa dang ldan pa na nyon mongs pa rnam pa gsum byung ba dang /ma 'dres pa'i chos rnam pa gsum nyid 'jog par mdzad de 'khor gyi dbye bas rnam pa gsum nyid du bstan to/ /gcig tu dkar ba dang / gcig tu nag pa dang / 'dren ma ste rnam pa gsum du gsungs so/ /de'i phyir smras pa/ de dag kyang zhes bya ba la sogs pa'o/ /mdo nyid las ji skad 'byung ba bzhin du zhes bya ba ni/ de bzhin gshegs pa'i srung ba med pa ni gsum ste/ 'ga' zhig gzhan gyis shes na mi rung ngo zhes bsrung bar bya ba mi mnga'o/ /gsum po dag gang zhe na/ gang de bzhin gshegs pas bcas par bya ba de bzhin gshegs pa la sku'i kun du spyod pa ma dag pa mi mnga'o//de bzhin du yid kyi kun du spyod pa yongs su ma dag pa'i bar du'o/ /lhag ma ni snga ma bzhin no/ /'di dag gi bsdus pa'i don bstan pa'i phyir/ rnam pa thams cad du nyes pa byas pa 'chab pa spangs pa zhes bya ba la/ lus la sogs pa'i bya ba nyes pa byas pa nyid ni mi 'jigs pa'i gnas dang po gnyis kyi mi mthun par rig par bya'o//de bcab par bya ba de bzhin gshegs pas spangs pa yin te/ thams cad kyi thams cad du mi mnga'o zhes byas nas so/ /nyon mongs par snang ba tsam yang mi mnga'o zhes bstan pa'i phyir/ dgra bcom pa la yang zhes bya ba la sogs pa la/de ltar ji skad smras pa de bzhin byed par gyur na/ rang gi las la the tshom med par gyur nas nyan thos la sogs pa la drag shul gyis 'doms par mdzad cing tshar gcod par mdzad de sma 'bebs pa'i sgo nas so/ /bdag nyid la brjod du med par bstan pa'i phyir/ 'grogs pa'i rgyu las nga'i nyan thos rnams zhes bya ba la sogs pa'o//tshad med pa zhes bya ba ni de bzhin gshegs pa'i spyod yul du gtogs pa'i 'jig rten gyi khams kyi sems can la dmigs pa'i phyir tshad med pa zhes bya'o/ /bla na med pa zhes bya ba ni yongs su dag pa chen po nyid yin pa'i phyir ro/ /de bzhin gshegs pa thams cad kyi mdzad pa ni/rnam pa gsum gyis rtag tu gnas pas bsnyel ba mi mnga' ba'i chos nyid ces bya'o/ /sems can thams cad la de bzhin gshegs pas cung zad mi mdzad pa de la bsnyel ba mi mnga' ba nyid do/ /de lta bu'i yul thams cad du gtogs pa dang / thams cad kyis yongs su gzung ba nyid dang / dus thams cad du rnam par gzigs pa nyid do/ /de ltar mdzad pa thams cad la rnam pa thams cad du bsnyel ba mi mnga' ba nyid yin no/ /de la bskyod pa ni brkyang bskum la sogs pa sku'i phrin las so/ /gzigs pa ni spyan 'gyur ba la sogs pa spyan gyi phrin las so//gsungs pa ni gsung gi phrin las so/ /gnas pa ni chags pa la sogs pa'o/ /spyod lam thams cad du nyon mongs pa dang bcas pa kun du spyod pa'i g.yo ba shin tu 'jug pa mi mnga' ba nyid bag chags yang dag par bcom pa zhes bya'o/ /nyan thos la sogs pa la nyon mongs pa spangs su zin kyang nyon mongs pa dang bcas pa 'dra ba'i spyod pa dang /bskyod pa la sogs pa 'jug pa yin no/ /de'i phyir thun mong ma yin pa'i sangs rgyas kyi chos zhes bya'o/ /don dang ldan pa ni rnam par byang ba'i phyogs te/ shin tu phan pa dang bde ba'i chos rnams yang dag par sgrub pa'o//don dang ldan pa ma yin pa rnams ni kun nas nyon mongs pa'i phyogs kyi chos rnams te/ phan pa ma yin pa yang dag par sgrub pa'o/ /de gnyis ka las rnam par grol ba'i chos rnams ni phung po gsum pa'o/ /'di dag las phyi ma gnyis yongs su shes pa ni rnam pa thams cad yongs su mkhyen pa zhes bya'o//de ltar gnyis su byas pa'i mkhyen pas snga ma'i cha mkhyen pa gang yin pa de ni mchog mkhyen pa zhes bya ste/ chos kyi dam pa'i rnam pa mkhyen pa yin pa'i phyir ro/ /de ltar na 'di gnyis la rnam pa thams cad dang mchog mkhyen pa zhes bya'o/ /sangs rgyas kyi chos rnams kyi ngo bo nyid bstan nas so//yang thob pa'i rim pa bstan pa'i phyir de la mtshan dang dpe byad la sogs pa la mtshan dang dpe byad rnams ni de bzhin gshegs pa rnams dang byang chub sems dpa' srid pa tha ma pa rnams kyis rnam par smin pa thob pa yin la/ lhag ma rnams ni byang chub thob nas yin no zhes smras pa/ gang gi tshe zhes bya ba la sogs pa la/slob dpon med pas zhes bya ba ni gzhan gyis nye bar bstan pa med par yang 'byung ba nyid do/ /cha phyi ma byang chub kyi phyogs kyi chos rnams sgom pa la mngon par sbyor ba'i tshul gyis mkhyen pa'i skad cig gcig gis shes bya thams cad la sgrib pa med pa'i ye shes la brten nas ting nge 'dzin gyi bye brag rab tu 'thob po//de'i phyir smras pa/ skad cig gcig gis zhes bya ba la sogs pa la bslab pa dang / ting nge 'dzin thams cad kyi phyi ma bag chags thams cad 'joms par nus pa gang yin pa de la ni/ rdo rje lta bu'i ting nge 'dzin zhes bya ste/ de'i rjes thogs la bla na med pa yang dag par rdzogs pa'i byang chub thob par 'gyur ba'o zhes bya ba nas/stobs bcu la sogs pa'i sangs rgyas kyi chos rnams chen por gyur pa rdzogs pa ni shin tu rnam par dag pa zhes bya ste/ cig car 'thob par 'gyur ro/ /de thob pas shes bya'i sgrib pa las rnam par grol bas thogs pa med pa zhes bya'o//nyon mongs pa'i sgrib pa las grol bas na dri ma med pa zhes bya'o/ /shes bya la 'jug pa ni des sbyor ba ma byas par yang bzhed pa tsam dang 'brel par 'jug go/ /des na smras pa/ brtsal ba tsam la thogs pa med pa zhes bya'o/ /mngon par bzhed pa'i don thams cad thob pas brnag pa yongs su rdzogs pa zhes bya'o//de bzhin gshegs pa'i sa rab tu khyad par du 'phags pa thob pas byang chub sems dpa'i sa las yang dag par 'das pa zhes bya'o/ /rab tu brtan pa'i sa la gnas pas de bzhin gshegs pa'i sa la zhugs pa zhes bya'o/ /snying po la yod pa lta bu'i shes bya'i sgrib pa dang mthun par gnas pa'i gnas ngan len ma lus par spangs pa rten gnas su gyur pa'i mchog thob pa yin no//des na smras pa/ de'i gnas su gyur pa de ni zhes bya ba la sogs pa la rnam pa thams cad yongs su rdzogs pa dang / dri ma med pa'i phyir dang / chos kyi skus yang dag par bsdus pa'i phyir bla na med pa zhes bya'o//byang chub sems dpa'i gnas pa thams cad la gnas pa'i byang chub sems dpa' rnams ni gong ma gong ma la ltos nas bla na yod pa dang bcas pa yin no/ /gal te byang chub sems dpa' kha cig kyang mthar thug pa'i sa thob pa yin la/ de bzhin gshegs pa yang mthar thug pa'i sa thob pa yin na/de dag la khyad par ni du yod par rig par bya zhes the tshom za bas dris pa yin la/ spangs pa'i khyad par ni rab tu grags pa nyid do/ /snying po la yod pa lta bu'i shes bya'i sgrib pa'i gnas ngan len rab tu spangs pa yin no/ /seng ras kyis bar du tshod pa'i dpes ni ji ltar rigs par sgrib pa dang bral ba chen po nyid dang /lhag ma ma lus par spangs pas de bzhin gshegs pa'i yongs su gsal bar byas pa yin te/ dpe dang pos sgrib pa med par bstan te/ phyi mas ni tshon gyi ri mo legs par bkye bas shin tu mdzes pa'i ri mo'i las kyis gsal bar 'gyur zhing 'od gsal ba dang 'dra bar de bzhin gshegs pa'i ye shes blta bar bya'o//mun pa mun nag pa'i nang na blta ba dang / thag ring po nas blta ba dang / de dag las bzlog pa'i dpes kyang gsal bar bstan pa yin no/ /skyes pa dang ma skyes pa'i lus kyi dpes kyang gnas gyur pa chen po nyid bstan pa yin no/ /rab rib can gyi dpe las bzlog pas ni shin tu rnam par dag pa nyid bstan to//ye shes khyad par che ba ni/ ye shes kyi khyad par ro/ /shin tu rnam par dag pa'i mtshan dang dpe byad bla na med pa'i rten yongs su gyur pa yin no/ /de ltar de bzhin gshegs pa byang chub mngon par rdzogs par sangs rgyas nas sngar bstan pa'i chos rnams kyi dbang gis de bzhin gshegs pa'i mdzad pa bcu bstan par shes par bya'o//de'i phyir sangs rgyas kyi chos rnams bya ba rnam pa bcus nges par bsgrub par bya ba'i phyir le'u bcus bstan pa yin no/ /de dag gi yul yang rgya cher bstan pa'i phyir/ phyogs bcu'i zhes bya ba la sogs pa la/ dang po nyid du ni nyid kyi skus mngon par yid ches pa bskyed nas dad par mdzad pa yin no/ /de sngon du 'gro ba las de las gzhan pa'i gdul bya rnams kyi bya ba yin no/ /de yang sku mtshan dang dpe byad kyis brgyan pa nyid la de bzhin gshegs pa la mos pa'i dbang gis sems can rnams la snang bar 'gyur ro//de yang kha cig gis ni brgya byin gyi gzugs su mthong ngo zhes bya ba'i mdo'i rjes su 'brangs nas so/ /de ltar sems 'dun par byas pa la cho 'phrul rnam pa gsum gyis gdams pa'i sbyor ba ni gnyis pa ste/ de dag rnam pa thams cad yongs su dag pa la sbyor ba nyid do//de ltar gdams pa byas pas bya ba thams cad byed pa la nus pa dang ldan par byas nas mi shes pas kun du rmongs pa dang / the tshom gyi shes pa dang ldan pa rnams kyi the tshom gcod par nus pa ni gsum pa'o/ /de yang stobs bcu dang ldan par shes par bya zhing rig par bya ste/de dag ni ye shes kyi bdag nyid yin pa'i phyir ro/ /pha rol rgol ba thams cad tshar gcod pa dang / rang gi phyogs rnam par gzhag par bya ba ni rnam pa bzhi pa ste/ de ni mi 'jigs pa dang ldan pa'i phyir ro/ /ji skad bstan pa'i rim gyis bstan pa la zhugs pa ni rnam pa gsum mo/ /sems can kun nas nyon mongs pa can ma yin pa nyid ni lnga pa ste/tshogs yongs su sdud pa'i sgo nas 'dren pa dran pa nye bar gzhag pa dang ldan pa'i phyir ro/ /bsam pa dang sbyor ba ma 'dres pas/ ji skad smras pa ni drug pa ste/ de la srung ba med pa'i phyir ro/ /nyin mtshan du sangs rgyas kyi spyan gyis 'jig rten thams cad la rnam par gzigs pa ni bdun pa ste/de ni thugs rje chen po dang ldan pa'i phyir ro/ /sems can thams cad kyi bya ba mi 'dor zhing sems can gyi bya ba thams cad la nye bar gnas pa'i dran pa dang ldan pa nyid ni brgyad pa ste/ bsnyel ba mi mnga' ba'i chos nyid kyi phyir ro/ /de bzhin gshegs pa'i spyod pa dang gnas pa dag la ji lta ba bzhin du rjes su sgrub pa ni dgu pa ste/de ni bag chags yang dag par bcom pa'i phyir ro/ /ji lta ba bzhin du don ma yin pa ston pa spangs nas don du 'gyur ba nye bar ston par byed pa ni bcu pa ste/ de ni rnam pa thams cad kyi mchog mkhyen pa dang ldan pa'i phyir ro//de ltar na sangs rgyas kyi chos bcu tshan 'dis bsdus pa la rab tu phye nas mdzad pa rnam pa bcur 'byed do/ /mdzad pa re re'i bya ba yang sems can gyi khams dpag tu med pas tshad med par rig par bya'o/ /de'i phyir smras pa/ 'di nyid kyi rnam grangs gcad par bya ba sla ba ni ma yin no zhes bya ba la sogs pa la/de bzhin gshegs pa'i gnas pa 'di dag kho na la de bzhin gshegs pa'i sa dang rab tu gnas pa zhes bya ste/ byang chub sems dpa' thams cad kyi byang chub sems dpa'i bslab pa'i lam gyi gnas su gyur pa'i phyir dang / byang chub sems dpa' thams cad de la rab tu gnas nas de don du gnyer ba'i tshul gyis so//de yang byang chub sems dpa' bslab pa thams cad la slob pa na zhes bya bas sems can thams cad kyi don bya ba'i rten du gyur pa'i phyir/ rab tu gnas pa de la de bzhin gshegs pa gnas nas sems can thams cad kyi don yang dag par sgrub par mdzad do/ /des na rab tu gnas pa zhes brjod do//'di dag nyid sangs rgyas kyi chos ma 'dres pa nyid du bstan pa'i phyir sangs rgyas kyi chos 'di dag thams cad ni zhes bya ba la sogs pa la/ sems can gyi don bya ba la nus pa dang ldan pa'i phyir gzhan gyi don bya ba dang mthun pa yin la/ gcig tu gzhan gyi don byed pas rab tu phye ba yin pa'i phyir ro//nyan thos la sogs pa rnams ni de lta bu las bzlog pa yin pas de dag la chos 'di dag med pa'i phyir/ des na sangs rgyas kyi chos ma 'dres pa zhes bya'o/ /chos 'di dag las kha cig ni nyan thos la sogs pa rnams la thams cad kyi thams cad du yod pa ma yin te/de dag bstan pa'i phyir/ 'di lta ste thugs rje chen po dang zhes bya ba la sogs pa'o/ /gang dag dmigs pa de dag kyang / /zhes bya ba la/ rnam pa dang dmigs pa tsam te nye bar bzung nas 'jug pa ni gnas dang gnas ma yin pa shes pa la sogs pa'o/ / rnam pa thams cad yongs su rdzogs pa ma yin no zhes bya bas ni stobs dang mi 'jigs pa la sogs pa'i ming mi 'thob po/ /de las bzlog pas ni yongs su rdzogs pa nyed dang / shin tu 'das pa nyid de/ chen por gyur pa dang ldan pa'i phyir ro/ /ches gya nom pa nyid ni tshad med pa'i yul dang ldan pa'i phyir ro//de'i phyir ma 'dres pa zhes bya'o/ /bslab pa'i lam yongs su rdzogs pa dang zhes bya ba ni ji skad bstan pa'i byang chub sems dpa'i sa 'di rnam pa dgur rab tu phye ba ni bslab pa'i lam yin la/ 'bras bu ni rab tu gnas pa'i lam rab tu phye ba ste/ de gnyis ka yang ston pa'i gnas su gyur pa'o//da ni rnam pa bzhis byang chub sems dpa'i sa rnam par gzhag par bya ste/ gdul bya rnams de la gus pa bskyed pa'i phyir ro/ /che ba'i yon tan gyi ming gi rnam grangs nyid ni gang yang smras pa/ byang chub sems dpa'i sde snod kyi ma mo zhes bya ba la sogs pa la/byang chub sems dpa'i sa 'di ni byang chub sems dpa'i sde snod shin tu rgyas pa ma mo'i gnas lta bu ste/ mdo sde de dag thams cad la 'dis khyab pa yin te/ yi ge'i phyi mo bzhin no/ /theg pa chen po bsdus pa zhes bya bar yang brjod de/ mdo sde thams cad kyi don bstan pas rab tu phye ba'i phyir ro//chud za ba dang / chud za ba ma yin pa'i lam 'grel pa zhes kyang brjod de/ byang chub sems dpa'i dbu ma'i lam yang dag par rab tu ston pa'i don gyis so/ /sgrib pa med pa'i ye shes rnam par dag pa'i rtsa ba zhes kyang brjod de/ nyon mongs pa dang shes bya'i sgrib pa rnam par dag pa'i ye shes 'thob pa nye bar bstan pas rab tu phye ba'i phyir ro//chos 'di la kun du spyod pa'i sbyor ba dang ldan pa de ni bsod nams chen po nyid du 'gyur ro zhes bya bar gang yang smras pa/ gang dag lha dang mir bcas pa'i zhes bya ba la sogs pa la/ lha dang bcas pa zhes smras pa ni/'gro ba'i sgrub pa'i khyad par gyi bye brag med par thams cad kyis bsod nams chen po nyid thob par shes par bya ba'i phyir ro/ /de'i rgyu bstan pa'i phyir mdo'i sde thams cad kyi rtsa ba ni 'di yin pa'i phyir ro/ /chos 'di lta bu la kun du sbyor ba'i sbyor ba dang ldan pa yod pa de srid du bsod nams rab tu 'phel ba'i rgyu yin no zhes bya'o//mi mthun pa dang gnyen po'i bye brag kyang mdo sde gzhan dag tu bzhugs su zin kyang dam pa'i chos kyi gzugs brnyan lta bu'i chos rnams kyi gnyen por gyur pa ni byang chub sems dpa'i sa 'di yin te/ don shin tu gsal par bstan pas rab tu phye ba'i phyir ro//gang yang smras pa/ dam pa'i chos ltar bcos pa rnams 'phel bar mi 'gyur ro zhes bya ba'i bar du'o/ /gang gi tshe de 'phel bar 'gyur ba de'i tshe yang dag pa'i don dang ldan pa de nus par 'gyur zhing / yang dag pa'i mdo sde rnams kyang nus par 'gyur ro/ /mdo sde la brten pa'i dam pa'i chos ltar bcos pa rnams ni rgyas par 'gyur ro//byang chub sems dpa'i sa'i gzhi'i rnal 'byor gyi gnas tha ma las rab tu gnas pa'i le'u ste lnga pa'i 'grel pa rdzogs so// //de la byang chub sems dpa'i sa'i go rims ni 'di yin te/ rigs la gnas pa'i byang chub sems dpa' ni bla na med pa yang dag par rdzogs pa'i byang chub tu sems skyed par byed do/sems bskyed nas bdag dang gzhan gyi don la sbyar ro/ /bdag dang gzhan gyi don la sbyor na kun nas nyon mongs pa med par bya pa'i thabs rnyed par 'gyur ro/ /kun nas nyon mongs pa med na mi skyo ba'i thabs rnyed par 'gyur ro/ /skye ba med na dge ba'i rtsa ba 'phel bar bya ba'i thabs rnyed par 'gyur ro//dge ba'i rtsa ba rnams kyis rgyas par gyur na bla na med pa yang dag par rdzogs pa'i byang chub mngon par rdzogs par sangs rgyas par 'gyur te/ bdag dang gzhan gyi don la sbyor ba dang / kun nas nyon mongs pa med par bya ba'i thabs dang mi skyo ba'i thabs dang dge ba'i rtsa ba 'phel bar bya ba'i thabs dang /byang chub thob par bya ba la bsgrub pa na thog ma kho nar zab cing rgya che ba'i chos rnams la mos pa rnam par 'jog go/ /de la mos na chos de dag yongs su tshol lo/ /yongs su btsal nas gzhan dag la yang ston cing bdag nyid kyang nan tan gyis sgrub par byed do/ /bsgrubs nas kyang gang gis dang gang du dang gang gi phyir bsgrub par bya ba des der de'i phyir bsgrub po//des der de'i phyir bsgrubs pa na ci nas bsod nams sogs pa dang ye shes sogs par 'gyur ba de ltar bsgrub po/ /bsod nams dang ye shes bsags nas 'khor pa mi spong ba'i thabs bsgrub po/ /de la bsgrubs pa na 'khor ba'i kun nas nyon mongs pa med par bsgrub po//de la bsgrubs pa na bdag gi bde ba la lhag par chags pa med par bsgrub po/ /de la bsgrubs pa na 'khor ba'i sdug bsngal gyis yongs su mi skyo bar bsgrub po/ /des yongs su mi skyo na bstan bcos rnams la brten nas bstan bcos thams cad la mi 'jigs par 'gyur ro//bstan bcos shes na su la gang ji ltar bstan par bya ba de shes pas 'jig rten shes par 'gyur ro/ /de ltar bstan bcos shes shing 'jig rten shes na tshul bzhin du chos rnams yongs su tshol bar byed do/ /de ltar tshol bas sems can thams cad kyi the tshom thams cad gcod par nus par 'gyur ro//de ltar nus na gzhan gyi the tshom gcod pas bsod nams kyis mngon par skye zhing bsod nams kyi tshogs yongs su rdzogs par byed de/ bdag nyid kyang shes pas mngon par skye bas ye shes kyi tshogs yongs su rdzogs par byed do/ /tshogs yongs su rdzogs pa na bden pa'i rnam pas byang chub kyi phyogs dang mthun pa'i chos bsgom pa la sbyor bar 'gyur zhing bsgom pa'i thabs rab tu shes so//de ltar brtson na bsgoms pa de theg pa chen po'i yongs su mya ngan las 'das par yongs su sngo bar byed de/ nyan thos dang rang sangs rgyas kyi theg pa pa'i yongs su mya ngan las 'das par ni ma yin no/ /de ltar thabs la mkhas pas sangs rgyas dang byang chub sems dpa' thams cad kyis gsungs pa thos pa yang 'dzin par 'gyur la/sngon ma thos pa'i chos rnams kyang bsgoms pa'i stobs kyis de la rnam pa thams cad du snang bar 'gyur ro/ /de gzungs dang spobs pa dang ldan pas rnam par thar pa'i sgo gsum gyis dmigs pa thams cad spangs pa'i phyir bsgrub po//de ltar bsgrubs na bdag dang gzhan rnams kyi phyin ci log gi mngon pa'i nga rgyal spong ba la zhugs pa yin te/ 'di ni de'i rnam pa thams cad du sgrub pa phun sum tshogs pa yin no/ /de ltar zhugs pa de ni bsgrubs pa'i yon tan gyi khyad par dang / phan yon gyi khyad par gyis sems can thams cad dag nyan thos dang rang sangs rgyas rnams las kyang khyad par du 'phags par 'gyur ro//de la bsgrubs pa'i yon tan gyi khyad par ni byang chub sems dpa' ni bdag dang gzhan la phan pa'i phyir zhugs pa dang / gzhan gyi don rang gis dgos pa yin te/ nyan thos dang rang sangs rgyas rnams ni de ltar gzhan gyi don bdag gis dgos pa ma yin no/ /sems can thams cad la sems snyoms pa yin te/sems snyoms pas na rtag tu phan 'dogs pa'i phyir zhugs la/ lan du phan 'dogs pa la yang re ba med do/ /de ltar brtson pa ni rtag tu de la phan pa dang bde bar 'dod do/ /de ltar phan pa dang bde ba'i bsam pa dang ldan pa ni de dag la 'bras bu yod par sbyor bar byed de/ de ltar na 'dis ni gong nas gong du bsgrubs pa'i yon tan gyi khyad par bsgrubs so//de la phan yon gyi yon tan gyi khyad par ni byang chub sems dpa' ni sangs rgyas rnams las lung bstan pa thob kyi/ /nyan thos dang rang sangs rgyas rnams ni ma yin no/ /lung bstan nas phyir mi ldog pa'i sa la gnas par 'gyur te/ de la gnas na nges par bya ba dang rtag tu bya dgos pa la brjed pa med pa'i chos nyid thob par 'gyur ro//de ltar brjed pa med pa'i chos nyid thob par gyur pa ni sangs rgyas dang byang chub sems dpa' rnams kyis sems can thams cad kyi mchog tu gdags pa la 'dogs par mdzad do/ /bya ba thams cad dang yongs su nyams par mi byed de/ ma thob pa'i yongs su nyams pas kyang yongs su nyams par mi 'gyur ro//yongs su ma nyams na rtag tu rgyun mi 'chad par dge ba'i chos rnams kyis skye bar 'gyur te/ zla ba yar gyi ngo bzhin du skye ba na yang dag pa'i byang chub sems dpar 'gyur te/ byang chub sems dpa' ltar bcos ma ma yin no/ /yang dag pa'i byang chub sems dpar gyur na rnam pa thams cad du gdul ba'i thabs thams cad shes so//shes par gyur na gang las yongs su btsal dang / gang yongs su btsal ba dang / gang gis yongs su btsal ba rnam par gzhag pa thams cad la mkhas par 'gyur ro/ /yongs su btsal ba yang gang gis mthar thug par 'gyur ba de rnam par 'jog par byed do/ /rnam par gzhag pa la mkhas na gdams ngag la mkhas par 'gyur ro//gdams ngag la mkhas na dmigs pa tshad med pa'i ting nge 'dzin gyi rgyal po thob par 'gyur ro/ /ting nge 'dzin de thob pas 'bras bu yod pa'i chos ston par 'gyur ro/ /rnam pa sna tshogs kyi ston pa 'bras bu dang bcas par byed do/ /theg pa chen pos nges par 'byung bar yang 'gyur ro//theg pa chen pos nges par 'byung na theg pa chen po sdud par yang 'gyur ro/ /theg pa chen pos nges par 'byung ba'i gnas skabs de dang der ming de dang de thob par 'gyur la/ 'jig rten thams cad dang / sangs rgyas dang byang chub sems dpa' rnams kyis kyang byang chub sems dpa' thams cad dang thun mong du gyur pa'i ming 'dogs shing bstod par yang mdzad de/'di dag ni phan yon gyi yon tan gyi khyad par yin par rig par bya'o/ /de lta bu'i ming can de ni byang chub sems dpa'i rtags rnams yin te/ rtags gang dag gis rtags de dang ldan na sgrub pa de khyim pa'i phyogs dang rab tu byung ba'i phyogs la yang rnam pa thams cad du sgrub par byed do//gnyis ka'i phyogs la yang sgrub par byed na sgrub pa snying por byed pa ni gcig tu nges par dge ba'i phyogs la lhag pa'i bsam pa can du 'gyur te/ de lta bu'i bsam pas ji srid gnas kyi bar du khyim pa yongs su gzung ba'am rab tu byung ba yongs su gzung ba dge ba'i phyogs la 'dzud par byed do//de phyin chad ni gang du sangs rgyas dang byang chub sems dpa' rnams dang 'grogs par 'gyur ba dang / sems can gyi don du bsams bzhin du srid par skye ba 'dzin to/ /de sangs rgyas dang byang chub sems dpa' rnams kyis rtag tu rgyun mi chad par gdams ngag gis nye bar bstan te/ dge ba'i phyogs kyi khyad par thob pa'i gnas skabs nyams su myong bar 'gyur ro//de nyams su myong ba'i phan yon yongs su gzung bas khyad par thob pa'i gnas skabs der khyim gyi tshul gyis 'jug go/ /gnas skabs der blo gnas na gong nas gong du mthar thug par 'gro ba'i bar khyad par gyi gnas skabs rnams la rnam pa thams cad du rtul bar byed cing chog mi shes so//de ltar rtul na mthar thug pa'i gnas thob par 'gyur te/ de phyin chad kyang yongs su btsal ba med de bla na med pa thob pa yin no/ /byang chub sems dpa'i sa'i go rims rdzogs so// //rnal 'byor spyod pa'i sa'i dngos gzhi las/ byang chub sems dpa'i sa'i rgya cher 'grel pa slob dpon rgya mtsho sprin gyis mdzad pa rdzogs so// //lha btsun pa byang chub 'od kyi bka' lung gis bal yul gyi paN+Di ta chen po shAn ti b+ha dra'i zhal lnga nas dang / lo tsA ba dge slong tshul khrims rgyal bas bsgyur ba'o// //