CLOSE WINDOW

D4046
བོད་ཡིག

@##/ /byang chub sems dpa'i tshul khrims kyi le'u rgya cher 'grel pa/ 'jam dpal gzhon nur gyur pa la phyag 'tshal lo/ /pha rol tu phyin pa drug car rnam pa 'dra bar bstan pa'i phyir thams cad la/ ngo bo nyid ces bya ba la sogs pa sdom gyi tshigs su bcad pa gcig kho nas bstan to //rnam pa dgu kho nas tshul khrims kyi pha rol tu phyin pa rnam par gzhag par rig par bya'o/ /rnam pa dgu rnam par gzhag pa ni sngar bstan pa kho na bzhin te/ ngo bo nyid bstan pa nas rnam par dag pa bstan pa'i bar rnams so/ /yon tan rnam pa bzhi dang ldan pa zhes bya ba ni rnam pa bzhis byang chub sems dpa'i tshul khrims kyi ngo bo nyid rnam par gzhag par rig par bya'o zhes bya ba'i tha tshig go//yon tan rnam pa bzhi ni mdor bsdu na rnam pa gnyis kyis rnam par gzhag ste/ sbyin pa ni 'di ltar pha rol las zhes bya ba smos pa'o/ / 'dzin pa ni tshig lhag ma rnams so/ /yang rnam pa gnyis te/ bsam pa dang sbyor bas tshig gcig dang / tshig gsum gyis ci rigs par sbyar ro/ /yang tshul khrims rnam par dag pa'i rgyu dang / tshul khrims rnam par dag pa'i 'bras bu'i dbang du byas nas gzhag pa yin no//rnam par dag pa'i rgyu ni rnam pa gnyis te/ khrel yod pa ni gzhan la ltos nas legs par yongs su srung ba'i phyir 'di ltar/ pha rol las legs par yang dag par blangs pa zhes bya ba smos so/ /ngo tsha shes pa ni bdag nyid la ltos nas legs par yongs su srung ba'i phyir 'di ltar bsam pa shin tu rnam par dag pa zhes bya ba smos so//tshul khrims rnam par dag pa'i 'bras bu ni 'gyod pa med pa ste/ yon tan phyi ma gnyis kyis bstan te/ /yang rnam pa gsum gyis bstan te/ bsam pa rnam par dag pa'i tshul khrims rnam pa gsum gyi dbang du byas nas byang chub sems dpa'i tshul khrims kyi ngo bo nyid rnam par gzhag ste/rnam pa gsum gang zhe na/ bsam pa dag pa'i sgo nas byang chub sems dpa'i chos smra ba ni gnas skabs su bdag nyid kyi tshig btsun par bya ba'i phyir tshul khrims yang dag par len pa'i phyir dang / byang chub sems dpa' rab tu byung ba bdag nyid bsod nams kyi zhing du 'gyur bar bya ba'i phyir tshul khrims yang dag par len pa'i phyir dang /dbang phyug gi bdag po thob pa na sems can la gnod pa mi bya ba'i phyir tshul khrims yang dag par len pa'i phyir te/ de'i phyir bstod pa byed pas kyang /ji ltar tshig ni btsun pa dang / /lus can rnams kyi bsod nams zhing / /gzhan la gnod byed mi 'gyur zhes/ /snying brtse'i bdag nyid khyod la brten/ /zhes smos so/ /tshul khrims ni rnam pa gsum ste/ yang dag par blang bar bya ba'i tshul khrims ni/ gang gi phyir legs par yang dag par blang ba zhes bya ba smos pa'o//phyir gso bar bya ba'i tshul khrims ni gang gi phyir/ nyams par gyur na sor chud par byed pa zhes smos pa'o/ /rjes su bsrung bar bya ba'i tshul khrims ni/ gang gi phyir mi nyams par bya ba'i phyir dran pa nye bar gnas pa zhes smos pa'o//de'i phyir ngo bo nyid du bstan par rig par bya ste/ tshul khrims kyi ngo bo nyid ni bslab pa yin la/ bslab pa yang ji skad bstan pa'i bya ba rnam pa gsum gyis rab tu phye ba'i phyir ro/ /yon tan rnam pa bzhi'i phan yon bstan pa'i phyir/ de la pha rol las tshul khrims yang dag par blangs pa ni zhes bya ba la sogs pa smos so//bslab pa las nyams par byed pa na zhes bya ba ni nyams par byed pa'i tshe nyams par byed pa'i rkyen rnams yod na yang / pha rol la ltos te nyams par mi byed pa'o/ /byang chub sems dpa' bsam pa shin tu rnam par dag pa ni nyams par byed pa'i rkyen yod du zin yang /bdag nyid la ltos nas nyams par mi byed do/ /brgyal bag med pa'am/ brjed ngas pa'am/ ma shes pa'i phyir nyams par byas na yang sor chud par byed pa dang / gus pa skyes nas thams cad kyi thams cad du nyams par mi byed pa'i phyir tshul khrims yongs su dag pa yin no//tshul khrims yongs su dag pa nyams pa med pa nyid kyis 'gyod pa med cing / yid la gcags pa med de/ de ltar na yon tan snga ma gnyis ni ngo tsha shes pa dang khrel yod pa skyed pa yin no/ / ngo tsha shes pa dang khrel yod pa gnyis kyis ni tshul khrims rjes su srung ba lhur len pas 'gyod pa med par 'gyur bar bstan to/ /yon tan snga ma gnyis ni phyi ma 'dren pa yin te/ nye ba'i rgyu'i dngos po yin par bstan pa'i phyir/ de la pha rol las yang dag par blangs pa gang yin pa dang zhes bya ba la sogs pa smos pa'o//gzhan yang yon tan rnam pa gsum gyis ni ma zhig ma nyams par byed pas tshul khrims blangs pa mi nyams par ston to/ /gcig gis ni nyams na yang phyir gso bar byed pa ston to/ /de ltar ngo bo nyid kyi tshul khrims kyi che ba nyid bstan pa'i phyir byang chub sems dpa' rnams kyi tshul khrims kyi ngo bo nyid yon tan bzhi dang ldan pa de ni zhes bya ba nas/dge ba yin par rig par bya'o zhes bya ba'i bar dag smos te/ byang chub sems dpa' rnams kyi tshul khrims la ni dge ba zhes bya ba ste/ dge ba nyid ni mi slu ba'i phyir ro//mi slu ba nyid ni bdag dang gzhan gyi don sgrub pa'i phyir ro/ /de bas na bdag la phan pa zhes bya ba la sogs pa smos te/ tshig de rnams kyi don dbye ba ni sngar ji skad bshad pa lta bu yin te/ de ni 'di yin te nyan thos la sogs pa dag gi bdag la phan pa zhes bya ba ni nyon mongs pa thams cad spangs shing gtan du spangs pa dang /de 'dren par byed pa bden pa bzhi po dag gi nang nas lam shes pa'o/ /de ltar na de dag ni gtan du sdug bsngal med pa'i gnas skabs mya ngan las 'das pa thob par bya ba'i phyir zhugs pa yin te/de dag ni theg pa de dang de la 'jug pa'i dus na bya ba nyung ba'i phyir dang / don nyung ba'i phyir dang / bdag gso bar byed pa'i phyir bdag dul bar byed pa dang / bdag zhi bar byed pa dang / bdag yongs su mya ngan las 'da' bar byed par zhugs pa yin no/ /byang chub sems dpa' rnams kyis bdag la phan pa ni spangs pa rnam pa gnyis dang /ye shes rnam pa gnyis te/ nang gi sems kyi rgyud la yod pa'i 'bras bu yin pa'i phyir ro/ /gzhan dag ces bya ba ni gang zag rigs med pa la gnas pa dag dang / rigs la gnas pa dag ste/ de dag la phan pa'i phyir zhugs pa ni gzhan la phan pa'i phyir zhugs pa yin no//de ltar zhugs pa'i gnyi ga la phan pa sgrub pa ni sems bskyed pa'i dus na yin par rig par bya'o/ /gzhan la phan par sgrub pa bstan pa de nyid skye bo mang po la phan pa'i phyir zhes bya ba la sogs pas rnam par phye ste 'chad do//de la gang zag rigs med pa la gnas pa dag ni skye bo mang po zhes bya bar 'dod do/ /de dag la phan pa ni re zhig ngan 'gro las yongs su bskyab pa'i phyir yang dag pa'i spong ba gong ma gnyis kyis re zhig pa'i tshul du mi dge ba'i chos spong ba'o/ /bde ba ni bde 'gro la dgod pa'i phyir yang dag pa'i spong ba 'og ma gnyis kyis dge ba'i chos yang dag par sgrub pa'o//de dag nyid kyi nang nas zhe 'gras pa dang / skal ba med pa dang / snod du gyur kyang log par ltung bar song ba 'gron po lta bu dag la phan pa dang / bde ba'i lhag pa'i bsam pa yongs su mi gtong ba'i phyir dus la bab pa la sdod pas snying brtse ba'i phyir zhugs pa yin no//yongs su mya ngan las 'das pa'i chos can rtogs pa'i skal ba yod pa'i lha dang mi gang dag yin pa de dag gi don gyi phyir zhugs pa zhes bya ba la/ don ni 'dir dge sbyong gi tshul gyi don la bya bar 'dod do//phan pa ni de 'dren par byed pa'i lam mo/ /bde ba ni tshe 'di la bde bar gnas pa ste/ shin tu sbyangs pa'i bye brag dang ldan pas lus dang sems la sim pa'i phyir ram/ rnam par grol ba'i bde ba kun du myong ba'i phyir ro/ /de nyid kyi phyir lha dang mi smos te/de dag la rtogs pa'i skal ba yod pa'i phyir ro/ /nyan thos rnams ni smon lam btab pa'i 'og tu 'phags pa'i bden pa bzhi po dag la mi rtag pa dang / sdug bsngal ba dang / stong pa dang / bdag med par shes pa thob par bya ba'i phyir gnas lnga po dag gam dngos po la mkhas pa na'o//byang chub sems dpa' rnams ni shes bya thams cad kyi mthar thug pa la shes pa chags pa med pa thob par bya ba'i phyir de dag dang rig pa'i gnas lnga po dag la yang mkhas pa yin no/ /de ltar na nyan thos la sogs pa dag gi mkhas pa ni gcig kho na ste/dngos po la mkhas pa'o/ /yang na rnam pa lnga ste/ phung po la sogs pa la mkhas pa'o/ /byang chub sems dpa' rnams ni rnam pa gnyis sam rnam pa bcur 'gyur ro/ /de ltar mkhas pa mang ba nyid kyi phyir mkhas pas khyad par du 'phags pa yin no/ /bla na med pa yang dag par rdzogs pa'i byang chub ni byang chub thams cad las khyad par du 'phags pa'i phyir 'bras bu khyad par du 'gyur ba yin par rig par bya'o zhes bshad do//da ni rnam pa gzhan du bshad de gzhan la phan pa'i dbye ba bstan pa'i phyir/ skye bo mang po la phan pa zhes bya ba la sogs pa smos te/phan pa zhes bya ba ni dge ba spyod pa'o/ /bde ba zhes bya ba ni gnod pa med pa'o/ /snying brtse ba ni ji ltar na 'di na la la dge ba dang gnod pa med pa'i spyod pas gzhan dag la snying brtse bar byed pa lta bu'o/ /don ni don du gnyer bar bya ba'i phyir dang / don dang ldan pa'i phyir te 'dod par bya ba dang /kha na ma tho ba med pa gang yin pa'o/ /phan pa dang bde bar 'gyur ba'i phyir zhes bya ba ni/ mi rnams ni dge ba dang gnod pa med pa'i spyod pa la gnas pa'i rgyal rigs la sogs pa gang dag yin pa ste/ gang dag la sangs rgyas 'byung ba dang / chos legs par gsungs pa dang /dge 'dun legs par sgrub pa rnams kyis shin tu mang po dag la shas cher phan pa dang bde bar 'gyur ro/ /mi de dag ni bdag nyid la phan pa dang / bde ba byas nas 'jig rten la snying brtse zhing de dag 'di snyam du sems te/ ji ltar byas na gzhan rnams phan pa dang bde ba la yang dag par sbyor bar 'gyur zhig gu snyam mo//gzhan dag kyang 'di snyam du sems te/ ji ltar byas na bdag kyang phan pa dang bde ba la yang dag par sbyor bar 'gyur zhig gu snyam mo/ /de'i phyir don dang zhes bya ba la sogs pa smos so/ /lha dang mi smos pa ni de dag don khong du chud pa dang /nan tan du sgrub pa la skal ba can yin pa'i phyir ro/ /gzhi dang bslab pa'i gnas kyi sgo nas dpag par mi nus pa'i phyir dpag tu med pa ste/ de'i phyir/ byang chub sems dpa'i bslab pa'i gzhi dpag tu med pa yongs su bsdus pas zhes bya ba smos so//'jug pa dang 'bras bu'i dus na sems can la phan pa dang bde ba'i phyir nye bar gnas pas sems can la phan 'dogs pa yin te/ de'i phyir sems can thams cad la phan pa dang bde ba'i phyir nye bar gnas pas zhes bya ba smos so/ /byang chub sems dpa'i gnas skabs na bla na med pa yang dag par rdzogs pa'i byang chub kyi 'bras bu yongs su 'dzin pa'i phyir 'bras bu che ba yin no//sangs rgyas kyi gnas skabs na 'bras bu sbyin par byed pas na phan yon che ba yin no/ /'di bstan pas ni nyan thos la sogs pa'i tshul khrims pas dge ba yongs su rdzogs shing mchog tu dge ba yin par bstan to//nyan thos rnams kyi tshul khrims dang ting nge 'dzin dang shes rab ni go rims bzhin du thog ma dang bar dang tha mar dge ba bstan te/ 'od srungs pa'i sde'i mdo las kyang de skad du dge slong dag ngas khyed la chos bstan pa zhes rgyas par 'byung ngo //byang chub sems dpa' rnams kyi ni tshul khrims kho na la yang thog ma dang bar dang tha mar dge ba yod de/ thog mar dge ba ni bdag dang gzhan la phan pa nas lha dang mi rnams kyi don dang phan pa dang bde bar 'gyur ba'i bar gyi phyir ro/ /bar du dge ba ni sems can la phan 'dogs pa'i phyir ro//tha mar dge ba ni 'bras bu dang phan yon che ba'i phyir ro/ /byang chub sems dpa'i gces par bya ba ni tshul khrims yin te/ phyogs gnyis kyi sgo nas ston to/ /'gro ba gsum na gnas pa'i byang chub sems dpa'i tshul khrims ni 'di las gong na yang med do//'di las lhag pa yang med do/ /ngan song gi 'gro ba dang lha'i 'gro ba na gnas pa'i chos nyid kyis thob pa ni khyim pa'i phyogs su gtogs pa'i tshul khrims so/ /mi'i 'gro ba na gnas pa'i ni gnas skabs mthun mthun du gnyi ga'i phyogs su gtogs pa yin no//yang tshul khrims kyi dbye ba rnam pa gsum gyis gnyi ga'i phyogs su gtogs pa'i tshul khrims thams cad rnam par gzhag pa bstan pa'i phyir/ sdom pa'i tshul khrims dang zhes bya ba la sogs pa smos so/ /dper na nyan thos rnams kyi sdom pa nyes par spyod pa kun nas slong ba'i nyon mongs pa rnam pa gsum spong ba rnam par gzhag pa'i phyir 'dod pa na spyod pa dang /gzugs na spyod pa dang / zag pa med pa ste/ so sor thar pa dang / bsam gtan dang / zag pa med pa'i sdom par gtogs pa rnam pa gsum ste/'dod pa na spyod pa'i sdom pas ni rtse 'jil bas spong ngo / /gzugs na spyod pas ni rnam par gnon pas spong ste/ rkyen rnams yod du zin kyang re zhig kun du mi spyod pa'i phyir ro/ /zag pa med pas ni rgyun gcod pas spangs te/ de thob na gtan du kun du mi spyod pa'i phyir ro/ / de lta bas na de dag gi tshul khrims rnam pa gsum khas blang bar bya ba de kho na dang 'dra bar grangs mthun pa'i phyir byang chub sems dpa' rnams kyi yang rnam pa gsum du yang rig par bya'o/ /bstan pa la zhugs pa'i byang chub sems dpa'i tshul khrims ni gang du gang la gnas kyang rung ste/de bzhin gshegs pas bcas pa'i tshul khrims yin par bstan pa'i phyir/ ris bdun po zhes bya ba smos te ris bdun po la brten nas/ ris bdun gyis phye ba'i phyir ro/ /rnam pas rnam pa tha dad pas ni bsnyan te gnas pa'i sdom pa logs shig tu phye ba'i phyir rnam pa brgyad du 'gyur ba'i phyir ro//khyim pa dang rab tu byung ba'i phyogs la ci rigs par zhes bya ba la/ dge bsnyen gyi tshul khrims dang / dge bsnyen ma'i tshul khrims ni khyim pa'i phyogs su gtogs pa'i tshul khrims yin te/ nyes par spyod pa las dben pas rab tu phye ba'i phyir ro/ / gzhan ni rab tu byung ba'i phyogs su gtogs pa yin te/ 'dod pa las dben pas rab tu phye ba'i phyir ro/ /dge ba'i chos gang dag ci yang rung ba de dag thams cad ni tshul khrims la gnas nas zhes mdo las gsungs pas tshul khrims la gnas pa kho na'i dge ba'i chos skye ba dang / gnas pa dang 'phel bar bstan pa'i phyir/ yang dag par blangs pa'i 'og tu zhes bya ba smos te/ byang chub chen po'i phyir zhes bya ba ni byang chub chen po yang dag par bsgrub pa'i phyir ro/ /'dis ni rang gi sems kyi rgyud la sangs rgyas kyi chos yongs su smin par bya ba'i dbang du byas te/ dge ba sdud pa yin par rig par bya'o/ /gzhan gyi sems kyi rgyud la sems can yongs su smin par bya ba'i dbang du byas te/ sems can gyi don bya ba'i tshul khrims so/ /de ltar 'di gnyis kyi khyad par shin tu gsal ba yin no/ /khyad par gzhan ni bsam pa dang byed pa tha dad pa'i bye brag las rig par bya'o//yid ma smos pa ni yid kyi sgo nas 'jug pa'i dge ba yang yod mod kyi tshul khrims kyi skabs su bab pa'i phyir de rnam par mi gzhag ste/ tshul khrims ni lus dang ngag kho na'i yin pa'i phyir ro/ /de yang 'dus pa dang so sor byed par rig par bya ste/ dge ba'i chos la la ni lus kyis stsogs par byed do/ /la la ni ngag gis so/ /la la ni gnyi gas byed do/ /de yang gzhi'i sgo nas bstan pa ni thos pa la sbyor ba las skyes pa'i dbang du byas nas rnam pa gsum du ston te/ thos pa dang bsams pa dang bsgoms pa las byung ba'o/ / chos gnyis bsgom par bya zhes gsungs pa'i phyir zhi gnas dang lhag mthong gis bsgoms pa las byung ba yin par ston to/ /bsgom pa de yang lus dang sems dben pa sngon du 'gro ba'i phyir gcig pur dga' ba yin no/ /bsams pa dang bsgoms pa las byung ba'i yid kyis byas pa yin yang thos pa nyid la gdags te/ji ltar thos pa'i chos la sems pa dang sgrub par sbyor ba'i phyir ro/ /de nyid kyi phyir brtson par byed do zhes bya ba smos te/ sbyor ba rtsom pa zhes bya ba'i tha tshig go/ /bla ma la mchod pa'i las ni lus kyi byas pas ston to/ /bdag gis bsod nams 'phel bar bya ba'i phyir byas pa'i dge ba sdud pa ni/gzhan dag la phan gdags pa sgrub pa'i bsam pas sems can gyi don bya ba'i tshul khrims su yang 'gyur ro/ /rnam pa gnyis kyis ni phan 'dogs pa'i zhing la gnas pa dang / bla ma'i zhing la gnas pa bstan to//sdug bsngal ba'i zhing la gnas pa'i dbang du byas te/ nad pa rnams la zhes bya ba la sogs pa smos so/ /legs par smras pa la legs so zhes bya ba sbyin par byed pa yin no zhes bya ba la sogs pas ni ngag gi dge ba'i chos bsags pa ston te/ mdor bsdu na legs par smras pa zhes bya ba ni kun nas nyon mongs pa'i gnyen po dang /rnam par byang ba dang mthun pa'i tshig go/ /de yang rnam pa gnyis te/ sangs rgyas kyi bka' dang / dkon mchog gsum gyi yon tan la brten pa'i tshig la bya ba ste/ de nyid kyi phyir smra na 'di nyid smra bar bya zhes brjod do//rjod par byed pa ni yid la 'dzin pa'o/ /tshig tu 'byin pa yang de dang 'dra'o/ /dga' ba'i sems bskyed nas zhes bya ba ni g.yo med pa'i lhag pa'i bsam pa dang / mchog tu dga' ba dang ldan pa'i sems kyis zhes bya ba'i tha tshig go/ /bdag gis byas pa la ji ltar dga' ba de bzhin du gzhan gyis byas pa la yang dga' bar byed do//bzod par byed ces bya ba ni lus dang ngag gis phyir gnod pa mi byed pa'i phyir ro/ /dge ba byas pa rdzogs pa'i byang chub tu yongs su sngo bar byed pas bsod nams tha dad pa skye bar 'gyur bar bstan pa'i phyir/ yongs su sngo bar byed pa yin zhes smos so//smon lam chen po bcu sngon du 'gro ba'i yang dag pa'i smon lam rnams 'debs pa yin no/ /dkon mchog mchod pa ni mdor bsdu na zang zing gi mchod pa dang / sgrub pa'i mchod pa ste/ de'i phyir rnam pa thams cad ces smos so/ /mchod pa ngan pa dgag pa'i phyir rgya chen po zhes smos te/byang chub sems dpa' rnams kyis mchod pa ngan pa gtan mi bya'o/ /brtson zhing zhes bya ba la sogs pas ni/ sbyin pa la sogs pa pha rol tu phyin pa rnams la sbyor bas bsdus pa'i dge ba ston to/ /bag yod par gnas pa yin zhes bya bas ni brtson pa kho na ston to//tshogs kyi lam gyi gnas dge ba bstan pa'i phyir/ bslab pa'i gzhi rnams la zhes bya ba la sogs pa smos te/ dran pas spyod par mi byed pa'i tshul gyis srung bar byed/ shes bzhin gyis ni sbyin par gyur kyang phyir gso ba'i tshul gyis kun nas srung bar byed de/'di gnyis ni nyon mongs pa ma byung ba dang byung ba'i gnyen po yin pa'i phyir ro/ /bdag nyid la bdag byams pa med pas na/ bdag gi rgyud kyi 'khrul pa dang / nyes par spyod pa la nyes pa kho nar rab tu shes pa'i phyir yongs su shes pa'o/ /de yang tshe 'di dang tshe phyi ma'i nyes dmigs mthong bas na nyes pas lta ba yin no//yongs su shes shing nyes dmigs mthong nas tshul bzhin du yongs su spong ba'i phyir gtong bar byed do/ /'khrul pa byung na yang nyes pa la nyes pa yin par 'chags par byed pa'i phyir 'khrul pa zhes bya ba la sogs pas nyes pa 'chags pa'i gnas te/sgrub pa ni ma skyes pa skyed pa'o/ /srung ba ni skyes zin pa brjed mi ngas pa'i tshul gyis gnas par byed pa'o/ /rnam par 'phel bar byed pa ni gnas pa las khyad par du 'gro ba'i tshul gyis rgya che ba dang / 'phel ba dang yangs par 'gyur ro/ /sems can rnam pa gsum gyi dbang du byas nas sems can gyi don bya ba'i tshul khrims rnam pa bcu gcig tu rnam par gzhag ste/sems can rnam pa gsum ni phongs pa rnams dang / zhugs pa rnams dang / zhe 'gras pa rnams so/ /phongs pa rnam pa gnyis te/ phan 'dogs pa ma yin pa dang / phan 'dogs 'dogs pa'o/ /de la phan 'dogs pa ma yin pa ni sdug bsngal rnam pa gsum gyis g.yen spyo ba rnams te/ sems can gyi bya ba de dang de dag tu grogs med pa'i sdug bsngal gyis g.yen spyo ba de dag la grogs byed pa dang / nad kyi sdug bsngal gyis g.yen spyo ba rnams la nad g.yog gi sgo nas grogs byed pa dang /'jig rten pa dang 'jig rten las 'das pa'i don rnams la thabs mi shes pas rmongs pa'i sdug bsngal gyis g.yen spyo ba rnams la spyir chos bstan pa sngon du gtong ba'i rigs pa ston pa dang / sems can so so la bye brag tu thabs bstan pa sngon du gtong bar rigs pa ston pa'o//phan 'dogs 'dogs pa'i sems can ni rnam pa bzhi ste/ lan du phan 'dogs su re ba de dag la ni/ bya ba gzo ba rjes su srung ba'i sgo nas mnyam pa'am lhag par len du phan 'dogs pas nye bar gnas pa dang /'jigs pa rnam pa sna tshogs kyis skrag pa de dag 'jigs pa rnam pa sna tshogs las skyob pa dang / sdug bsngal bar gyur pa de dag gi mya ngan gyi mtshan nyid kyi sdug bsngal sel ba dang yo byad kyis phongs pa de dag la yang rigs pas yo byad thams cad nye bar sgrub pa'o/ /zhugs pa ni rnam pa gnyis te/rten la rag las pa de dag la ni zang zing med pa'i sems kyis rten sbyin pas tshogs yongs su sdud pa dang / chos mthun pa pa gzhan mi rten pa de dag la ni/ so so yang dag par dga' bar bya bas dus dus su thad du 'gro ba dang / zang zing len pa dang 'jig rten pa'i don dang mthun par spyad pa dang /'ong zhing 'gro ba la dbang du byed du gzhug pa dang / don dang ldan pa ma yin pa ma gtogs par sems dang mthun par byed pa dang / rten yod pa dag kyang rnam pa gnyis te/ yang dag par zhugs pa de dag gi yang dag pa'i yon tan rnam pa sna tshogs kyis yang dag par dga' bar bya ba'i phyir lkog gam mngon sum du gleng ba'o//log par zhugs pa de dag la ni lhag pa'i bsam pa dag pas tshar gcad par bya ba ste/ nyes pa chung ngu la ni smad bab pa'i mtshan nyid dang / 'bring la ni chad pa'i las byed du gzhug pa'i mtshan nyid dang /chen po la ni bskrad pa'i mtshan nyid kyis byed do/ /tshar gcad par bya ba'i don dang ldan par bstan pa'i phyir/ 'di lta ste zhes bya ba la sogs pa smos pa yin no/ /zhe 'gras pa yang rnam pa gnyis te/ nyes par spyad pa spyod pa de dag ni gnod pa rnam pa sna tshogs kyi sdug bsngal dang 'brel pa'i 'gro ba mngon sum du bstan pas mi dge ba las skyob par byed pa dang /legs par spyad pa spyod pa de dag ni rdzu 'phrul gyi cho 'phrul gyis 'dun par byed pa la sogs pas dga' ba chung ngu dang / 'bring dang chen po skyed pa'o/ /byang chub sems dpa'i tshul khrims rnam pa gsum la gnas pa'i tshul khrims rnam pa gsum yongs su rdzogs par 'gyur ba'i rgyu bstan par 'dod pa'i phyir/byang chub sems dpa' sdom pa'i tshul khrims la gnas pa dang zhes bya ba la sogs pa smos te/ rnam pa bcus na legs par bsdams pa'i tshul khrims can du 'gyur te/tshul khrims yongs su dag cing yongs su rdzogs zhes bya ba'i tha tshig ste/ 'dod pa spangs pa rnams la lta ba'i sred pa kun du mi spyod pas mi lta ba dang / ma 'ongs pa rnams la mngon par dga' ba'i sred pa kun du mi spyod pas mi lta ba dang / da ltar byung ba'i rnyed pa dang bkur sti dang ldan pa rnams la lhag par zhen pa med pa dang /lus dang sems dben pa dang / ngag dang rtog pa yongs su dag pa dang / bdag la khyad du mi gsod pa dang shas cher nges pa dang / shas cher bzod pa dang bag yod par gnas pa dang / chog dang 'tsho ba rnam par dag pa'o//phyag dar gyi 'du shes kyis yongs su spangs pa'i rtswa dang mi gtsang ba'i 'du shes kyis yongs su spangs pa'i phyi sa la ji ltar thams cad mi lta ba de bzhin du byang chub sems dpa' ni rtswa dang 'dra ba'i 'dod pa rnams la/ snying po med pa'i phyir mi lta ba dang / phyi sa dang 'dra ba'i 'dod pa rnams la nyon mongs pa phyi sa rul ba lta bu dang 'brel ba'i phyir mi lta ba'o//'tsho ba'i bsam pas rab tu byung bas ji ltar 'dod pa tha chad spangs pa rnams la mi lta ba de bas ni/ byang chub sems dpa' mi'i 'dod pa'i mchog rnams la mi lta ba khyad par du 'phags pa'i dbang du byas nas 'khor los sgyur ba'i 'dod pa rnams la mi lta ba zhes bya ba smos so//lha rdzas mchog gi dbang du byas nas bdud kyi gnas su gtogs pa'i 'dod pa rnams la zhes bya ba smos te/ dper na 'jigs pa chen po sna tshogs kyis gang zhing gzing gzing bar 'jug pa ni gnod pa'i rtsa ba yin te/thar bar bya mi nus pa de bzhin du 'dod pa rnams yang dag par mthong na mngon par dga' bar mi 'gyur ro/ /rnyed pa dang bkur sti rnams la 'dun pa'i 'dod chags dang bral ba'i phyir kha zas kyi skyugs pa dang 'dra bar shes rab kyis yang dag par mthong na lhag par zhen pa med cing ro myong bar mi byed do//rab tu dben par mngon par dga' ba yin zhes bya ba ni lus dben par 'gyur ba ste/ de bas na gcig pu zhes bya ba smos so/ /tshogs kyi nang na 'dus kyang sems dben par 'gyur te tshul khrims tsam gyis chog par mi 'dzin gyi de nyid la brten nas byang chub sems dpa'i ting nge 'dzin dpag tu med pa mngon par sgrub pa dang /dbang thob par bya ba'i phyir 'bad par byed do/ /ngan pa'i gtam zhes bya ba ni kun nas nyon mongs pa can gyi gtam mo/ /ngan pa'i tshig ces bya ba ni de nyid rnam grangs kyi sgo nas bstan pa'o/ /dang du len par mi byed ces bya ba ni mi smra ba ste/mi byed ces bya ba'i tha tshig go/ /brgya la brgya lam na yang brjed ngas pas 'dod pa la sogs pa'i rtog pa cung zad kyang mi skyed do/ /skyes par gyur na 'gyod pa dang nyes dmigs su lta ste/ de gnyi ga kun du mi spyad par dran pa nye bar gnas so/ / mi bya ba'i sems zhes bya ba ni mi bya ba'i blo nyid ces bya ba'i tha tshig go/ /sems gang gis skyes pa de 'dod par 'gyur te/ 'dod pa la goms na kun du mi spyod pa dga' ba dang / kun tu spyod pa dang mi mthun par gnas so/ /dge ba sdud pa rnams dang / sems can gyi don bya ba'i tshul khrims rnams ni yangs shing rgyas pa'i phyir rgyas pa'o//gzhi'i sgo nas tshad gzung mi nus pa'i phyir dpag tu med pa'o/ /rtog pa'i yul thams cad las 'das pa'i phyir bsam gyis mi khyab pa'o/ /yun mi thung bar zhugs pa'i phyir yun ring du len pa'o/ /gzhan dag gis bya ba mi nus pa'i phyir mchog tu dka' ba'o//skrag pa ni 'jigs pa'o/ /zhum pa ni bag tsha ba'o/ /'gong ba ni bdag gis mi nus kyang srid do snyam pa'i phyir ro/ /spro ba kho na bskyed pa'i phyir de dag kyang mir gyur pa yin la zhes bya ba la sogs pa smos so/ /bdag gi nyes pa gzhan dang 'khrul pa la rtog par byed kyi gzhan dag la sdug bsngal skyed par mi byed pa ni nges pa bstan pa'o//gzhan gnod pa byed pa la sems mi 'khrug pa dang / gzhan gyis gnod pa byas pa la phyir gnod pa mi byed pa dang / rnam par 'tshe ba med pas ni bzod pa bstan to/ /phyir rdeg pa ni lus kyis te/gnod pa bya ba dag gi sems kyis sngang bar mi byed na zhes bya ba dang sbyar ro/ /'das pa'i nyes pa so sor 'chags pa'i phyir ni sngon gyi mtha' dang ldan pa'o/ /ma 'ongs pa'i dus kyi ma 'ongs pa'i nyes pa la de ltar nan tan byed pas ni phyi ma'i mtha' dang ldan pa'o/ /da ltar byung ba'i nyes pa mi brjed pa'i phyir na dbus kyi mtha' dang ldan pa'o//so sor brtags nas kha na ma tho ba med pa'i lus dang ngag gi las 'jug pa'i phyir ni snga nas bya ba'o/ /de ltar so sor rtog pa na de kho na bzhin du rtog pa la 'jug pa'i phyir na rjes su spyod pa'o/ /cho ga phun sum tshogs pa'i dbang du byas nas/dge ba mi spyoms zhes bya ba la sogs pa smos so/ /grang ba la sogs pa'i sdug bsngal dpyad bzod pa'i phyir sdug bsngal la ji mi snyam pa'o/ /ma rnyed pas yid mi bde ba med pa'i phyir yongs su gdung ba med pa'i rang bzhin no/ /dbang po dul zhing zhi ba'i phyir rgod pa med pa dang /yeng yeng po ma yin pa'o/ /'tsho ba phun sum tshogs pa'i dbang du byas nas tshul 'chos pa zhes bya ba la sogs pa smos so/ /pha rol tu phyin pa drug mngon par sgrub pa la ni/ mi mthun pa'i phyogs spong bas mi mthun pa'i phyogs dang du mi len pa'i phyir dge ba sdud pa'i tshul khrims rnam par gzhag ste/pha rol tu phyin pa lnga'i ni mi mthun pa'i phyogs kyi dpyad gnyen po lnga kho nar nges so/ /shes rab kyi pha rol tu phyin pa'i ni rnam pa lnga ste/ de ltar na de dag gi gnyen por gyur pa rnam pa bcu sa de la gnas pa'i byang chub sems dpa'i dge ba dpag tu med pa myur du sdud par 'gyur ro//lus dang longs spyod la lhag par zhen na lus dang longs spyod la lta bar 'gyur ro/ /lta ba yod na yongs su mi gtong ngo / /de lta bas na de ni sbyin pa'i pha rol tu phyin pa'i mi mthun pa'i phyogs yin te/ de dang du len par mi byed na sbyin pa'i pha rol tu phyin pa mngon par 'grub par 'gyur ro zhes bya ba'i tha tshig go//'chal ba'i tshul khrims kyi gzhi dang du ma blangs pas ni tshul khrims kyi pha rol tu phyin pa'o/ /sems can rnams la kun nas mnar sems kyi sems mi skyed pas ni bzod pa'i pha rol tu phyin pa'o/ /gnyid la sogs pa'i bde ba'i dbang du byas te le lo mi bsten pa ni brtson 'grus kyi pha rol tu phyin pa'o//bsam gtan gyis la nyon mongs pa mi skyed pas ni bsam gtan gyi pha rol tu phyin pa'o/ /shes rab kyi pha rol tu phyin pa'i mi mthun pa'i phyogs ni 'chal ba'i shes rab rnam pa lnga ste/bsod nams kyi 'bras bu'i phan yon rab tu mi shes pa dang / dge ba'i rgyu rab tu mi shes pa dang / 'bras bu la phyin ci log tu kun du spyod pa dang / phyin ci log gi gnyen po rab tu mi shes pa dang / dge ba'i chos la bar du gcod pa rab tu mi shes pa'o/ /de dag gi gnyen por gyur pa'i gnas lnga yang dag pa ji lta ba bzhin du yongs su shes pas shes rab kyi pha rol tu phyin pa mngon par bsgrub pa'i sgo nas dge ba sdud par bstan to//sems can gyi don bya ba'i tshul khrims rnam pa bcu gcig ni sems can rnam pa bcu gcig yod pa'i dbang du byas nas rnam par gzhag ste/sems can thams cad ni bsdus na yongs su gcad pa rnam pa bcu gcig gis rnam par bzhag nas de dang 'tsham pa'i don bya ba'i rjes su 'brangs pas sems can gyi don bya ba'i tshul khrims su 'gyur ba dang / rnam pa re re la ni dpag tu med par rig par bya'o/ / sems can rnam pa bcu gcig po dag gang zhe na/ bya ba de dang de dag la grogs byed de de 'dod pa rnams dang / sdug bsngal zhing rigs pa la rmongs te de 'dod pa rnams dang phan 'dogs 'dogs phyir len du phan 'dogs par 'dod pa rnams dang / 'jigs te skyabs 'dod pa rnams dang /phongs par gyur pa dang / mya ngan gyis gzir ba dang / yo byad med de de 'dod pa rnams dang / mkhan po dang slob dpon dang bla ma la rten 'cha' bar 'dod pa rnams dang / yongs su 'dzin par gnas pa rnams dang / mthun par byed pa sems dang mthun par bya bas 'dul ba rnams dang /yang dag pa dang log par zhugs pa rnams bsdu ba dang / tshar gcad par 'os pa rnams dang / de bzhin gshegs pa'i bstan pa la zhe 'gras pa rnams so/ /grogs byed pa ni so sor phye na bya ba dang mi bya ba rnams la grogs bya ba rnams pa brgyad yod par rig par bya ste/bya ba dang mi bya ba brtag pa ni gang gi phyir/ bya ba sems pa zhes smos pa ste/ gang du byas pa dang ma byas pa las 'byor ba dang rgud par 'gyur bar mthong nas de la sems pa'o/ /da ltar byung ba'i dus nas bzung ste/ bya ba gdon mi za bar nges par 'dzin pa ni bya ba gtan la 'bebs pa'o//de dag gnyi ga bstan pa'i phyir der grogs su 'gro'o/ /lam du 'gro ba 'dren pa med pa'o/ /phyi bzhin du 'brang ba med pa rnams la grogs su 'gro ba dang / rigs pas brtsams pa'i bya ba la sogs pa las kyi mtha'i bya ba la sbyor ba dag dang / longs spyod bsgrub pa srung ba dang / sems can phan tshun bye ba sdum pa dang / nyi ma nges par bsod nams kyi khyad par myong bar byed pa'i dus dang / bsod nams brtson pa'i dus na'o/ /sems can rnams kyi lus dang sems kyi sdug bsngal rnam pa gnyis kyis sdug bsngal te/ lus kyi rnam pa bzhi ste/ nad kyi sdug bsngal dang / dbang po nyams pa'i sdug bsngal dang /yan lag med pa'i sdug bsngal dang / ngal ba dang dub pa'i sdug bsngal dang / sems las byung ba'i sdug bsngal yang sdug bsngal gyi rgyu yin pa'i phyir sdug bsngal du rnam par gzhag go/ /de ni rnam pa gsum ste/ sgrib pa'i kun nas dkris pa'i phyir sgrib pa'i sdug bsngal dang /rtog pa kun du spyod pa'i phyir bar chad med pa'i sdug bsngal dang / gzhan gyis sma phab pa'i sdug bsngal lo/ /de la nad kyis thebs pa la ni g.yog bya ba dang sman sbyin pas rim gro byed do/ /'ong ba rnams la ni 'dod pa'i gnas su phyin par byed pa'am/ lam ston par byed do/ /'on pa rnams la ni yongs su spang bar bya ba dang / bsten par bya ba'i dngos po brda sprod pa dang / yan lag gi mtshan ma ston par byed do/ /yan lag med pa rkang pa med pa rnams la ni bdag nyid kyis lus sam bzhon pas 'dod pa'i gnas su phyin par byed do/ / gdams pa dang rjes su bstan pas ni/ kun nas dkris pa sel bar byed do/ /rtog pa kun du spyod pa yang de dang 'dra'o/ /gzhan dag gis sma phab pa la ni de dang dbral ba'i thabs la rjes su rtog pa sel bar byed do/ /khyad du gsod pa dang ldan pa ni gsos sbyin pa'i khyim mam nye du'i khyim las 'gyur ba'o//'byor pa'i rjes su rtog pa ni khyim gyi 'byor pa dang ldan pa'o/ /chos nyid bstan pa'am/ 'jig rten thams cad kyi chos dang 'brel pa bstan pas ni pham par byas pa'i sdug bsngal sel bar byed do/ /nyes par spyad pa spyod pa mi dge ba'i las kyi 'bras bu rnam par smin pas kun nas nyon mongs pa rnams la ni chos bstan pa'i sgo nas de spong ba'i phyir nyes par spyod pa las ldog pa yang dag par len du gzhug pa'i tshul gyis byed do//tshig 'bru 'byor pas zhes bya ba la sogs pa'i tshig brgyad kyis ni/ dri ba rnam pa gsum la/ yon tan bzhi dang ldan pa'i lan btab par bstan te/mi shes pa'i dri ba la ni don dang / mtshams sbyor ba'i dbang du byas nas/ phyin ci ma log pa'i don dang / mtshams sbyor bas lan 'debs so/ /'gal ba'i dri ba la ni chos nyid dang snga phyi'i dbang du byas nas/ chos nyid dang mthun pa dang / dgongs pa bstan pas lan 'debs so//gnyi ga dri ba la ni go bar byed pa dang / 'dul ba ji lta ba bzhin du ston pas lan 'debs so/ /thob pa'i dbang du byas nas 'jig rten pa'i yon tan mngon par sgrub pa dang mthun pa dang / 'grus skyong gi 'phags pa'i lam gyi tshogs kyi phyir lan 'debs so/ /rtag tu byed pa dang byang bar byed pa'i phyir na 'grus skyong zhes bya ba ste/rtag tu gus par byed pas zag pa rnams las sems srung bar byed pa'i phyir ro/ /gzhan yang tshig 'bru 'byor pa ni 'brel pas bstan te/ snga phyi mi mthun pa med pa dang rjes su mthun pa ni rjes su 'phrod pas bstan te/ /chos nyid dang mi mthun pa med pa dang /thabs dang ldan pa ni 'tsham pas bstan te/ 'dul ba'i rkyen du bab pa dang / mthun pa ni 'grus skyong gi yan lag gi tshogs kyis bstan te/ tshangs par spyod pa dang mthun pas gsal bar byed de/ dper na yan lag lnga dang ldan pa'i gsung bstan pa ni snga ma phyi mas gsal bar byed de/zab pa ni 'brug sgra lta bu zhes bya ba la sogs pa bzhin du tshig bzhi po 'di dag gis phyi ma dang bcas par ston par byed pa'i yon tan phun sum tshogs pa'i lan btab par bstan te/ /dri ba thams cad la yang snga phyi ma 'gal ba dang / chos nyid dang mi 'gal ba dang 'dul ba dang mi 'gal ba dang dam pa dang 'brel pa yin no//thabs mkhas pas ston pa ni bstan pa'i sgo nas ston te/ ji ltar tshul khrims kyi mi mthun pa'i phyogs 'chal pa'i tshul khrims spangs pa'i phyir/ rigs pas ston pa bzhin du sbyin pa yang ser sna spang ba'i phyir bstan to/ /longs spyod grub pa la bzo dang las kyi gnas rnam pa sna tshogs bstan to//bsrung ba'i phyir ni tshegs chung ngus nor dang / 'bru bsdu ba'i bya ba bstan to/ /bstan pa la ma zhugs pa rnams ni dad pa thob par bya ba'i sgo nas 'jug par byed do/ /zhugs pa rnams ni mthong bas spang bar bya ba'i nyon mongs pa spong ba'i sgo nas ngan song las yang dag par 'da' bar bya ba'i phyir yang dag phul gyi chos ston to//lam thob pa rnams la ni kun du sbyor ba lhag ma spong ba'i sgo nas yang srid pa'i sdug bsngal las 'da' bar bya ba'i phyir thabs mkhas pas ston to/ /phan 'dogs pa la lan du phan gdags par 'dod pa rnams la ni yang dag par dga' bar byed pa sngon du gtong ba'i rnyed pa dang bkur sti'i lan du phan 'dogs pa mnyam pa'am lhag pas nye bar gnas pas don byed do//de dag nyid kyi bya ba la grogs med pa de dag nyid 'di la ni grogs byed du 'gro bar byed do/ /sdug bsngal ba rnams la ni sdug bsngal rab tu zhi bar byed do//'jigs pa rnams la ni 'jigs pa las skyob par byed do/ /sdug bsngal bar gnas pa rnams la ni mya ngan bsang bar byed do/ /yo byad med pa rnams la ni nye bar sgrub par byed do/ /gnas 'dod pa rnams la ni gnas sbyin par byed do/ /mthun par byed pa rnams la ni sems dang mthun par byed do//yang dag par bskyang ba rnams la ni yang dag par dga' bar byed do/ /log par zhugs pa rnams la ni tshar gcod par byed do/ /zhe 'gras pa rnams la ni bstan pa la 'dun par byed pas grogs byed de/ de lta na yang dag par sgrub pa rnam pa bcu gcig gis de rnams kyi don byed do//'jigs pa'i bskyab bya ba ni mdor bsdu na rnam pa bcu ste/ dud 'gror gyur pa'i sems can gyi 'jigs pa las skyob par byed pa de yang rnam pa gnyis te/ thang la gnas pa dang chu na gnas pa'o/ /mi 'jigs pa las skyob par byed de/ mi rnams kyi 'jigs pa nye bar sgrub nus pa la yang rnam pa bzhi yod de/bdag gi yul na chad pas gcad pa dang / nan thur du bya ba'i mthu yod pa'i yul gyi bdag po dang / mthu'am 'jab bus nor 'phrog pa'i rkun 'joms rnams dang / longs spyod la sogs pa'i bar chad byed pa'i dgra rnams dang /dngos po tshad med pa'i bdag po thob pa'i rje dpon rnams so/ /gces pa dang mi ldan pa ni rnam pa gsum ste/ yo byad dang mi ldan pa'i phyir 'tsho ba med pa'i 'jigs pa dang / legs par spyod pa dang mi ldan pa'i phyir mi snyan pa'i 'jigs pa dang smra ba'i bya ba dang mi ldan pa'i phyir 'khor du bag tsha ba'i 'jigs pa'o//mi ma yin pa las gyur pa ni rnam pa gnyis te/ skye ba'i khyad par gyis bskyed pa dang / rig sngags kyi khyad par gyis bskyed pa'o/ /sdug bsngal ba yang rnam pa gnyis te/ gnyen bshes kyi sdug bsngal ba dang / longs spyod kyi sdug bsngal ba'o/ / de la gnas skabs kyi log par brjod pa'i rgyu'i rtog pa ni mya ngan no/ /skye gnas dang dgos pa dang 'brel pa dang ldan pa'i phyir gnyen bshes rnam pa lnga yod de/ de dag shi ba las gyur pa'i mya ngan la ni/ sems can thams cad kyi ris mthun pa'i mi rtag par bstan pas de sel bar byed do/ / rab tu byung ba'i phyogs kyi bla ma shi ba las gyur pa de dag la yang rnam pa gsum ste/ slob dpon dang mkhan po dang tshangs pa mtshungs par spyod pa rnams so/ /longs spyod zhig pa ni longs spyod kyi sdug bsngal ba'o/ /zhig pa yang mi rtag pa rnam pa gsum gyis 'gyur te/ dbang gis 'jig pa'i mi rtag pas gyur pa ni gang gi phyir/rgyal pos phrogs na yang zhes bya ba la sogs pa smos pa dang / mi mthun pa'i rkyen byung bas 'jig pa'i mi rtag pas gyur pa ni/ gang gi phyir mes tshig ces bya ba las gso ba dang / gnas mi mthun pa las ni bral ba'i mi rtag pas 'jig pa'o//sbyor ba mi mthun pa las ni ma grub pa las gyur pa dang / skal bas nyes pa las gyur pa ni rang gi dang gis 'jig pa ste/ de'i mya ngan las ni 'du byed rnams mi rtag par bstan pas sel bar byed do/ /de las skyes pa'i mya ngan la yang pha ma shi ba las gyur pa dang / bu dang chung ma shi ba las gyur pa rnams ni che ba'o//bran la sogs pa la ni/ dgos shing gces pa'i sgo nas ci rigs par rnam pa gsum du 'gyur ro/ /rdzas rnams la yang yo byad bsgrub par bya ba'i tshul khrims sngon du btang ste/ sdug bsngal rnam pa bzhi'i gnyen por bstan pa yang de dang 'dra'o/ /yongs su sdud pa'i tshul khrims ni bsam pa phun sum tshogs pa dang zang zing sgrub pas bstan to//bsam pa phun sum tshogs pa ni zang zing med pa'i gtong bas bstan to/ /zang zing gi longs spyod ni rnam pa gnyis te/ gzhan las bslang ba dang / thun mong du longs spyod pa'o/ /sems dang mthun pa'i tshul khrims ni/bstan pa dang rgyas pa'i sgo nas rig par bya ste/ bstan pa ni sems can rnams kyi mos pa dang / khams kyi dbang gis de lta de lta bur sgrub par bstan pa ste/ gzhung las byung ba bzhin no/ /de la bsam pa ni sems pa'o/ /rang bzhin ni mos pa'o/ /khams ni bag la nyal ba'o//lus dang ngag gi sbyor ba gang gis gzhan dag gis sdug bsngal ba dang yid mi bde ba skye bar 'gyur la/ sdug bsngal ba dang yid mi bde ba skye yang gal te de dag la phan pa dang bde bar mi 'gyur na ni byang chub sems dpa' so sor brtags te/ bdag nyid dang gzhan dag la yang phan pa med pa'i phyir 'jug par mi byed do//gal te phan pa dang bde bar 'gyur ba zhig yin ni mthun par 'jug par yang mi byed de/ yongs su 'gyur ba'i tshe de dag nyid la bde ba'i phyir ro/ /snying brtse ba'i sems kyis ni byed pa nyid do/ /de bzhin du gzhan gyi sbyor ba la yang / gzhan gyi sems dang mthun par bya ba'i phyir ji skad bstan pa'i mtshan nyid la mthun par 'jug par yang mi byed la/ mthun par 'jug par yang byed de/ mdor bsdu na bdag nyid dang gzhan la ltos te rjes su 'jug go/ /bdag nyid kyi lus dang ngag gi kun du spyod pa de yang de bzhin gshegs pas bcas pa'i bslab pa'i gzhir gtogs pa yang ma yin/bsod nams dang ye shes kyi tshogs kyi ngo bo nyid kyang ma yin na ni gzhan gyi sems bsrung ba'i phyir te gtong bar byed do/ /de las bzlog pa ni gtong bar mi byed do/ /bdag la ltos pa yang de dang 'dra'o/ /ji ltar de pha rol gyi bsam pa la ltos nas lus dang ngag gi kun du spyod pa gtong zhing gzhan dag gi bde ba dang sdug bsngal skye ba'i sgo nas phan pa dang bde ba'i phyir 'jug cing mi gtong la/de las bzlog pa la ni gtong bar byed ce na/ gcig la rnam par 'khrugs na thams cad la gnod par 'gyur ba'i phyir dga' bar bya ba yang mi brjod do//shad kyis sbyangs pa ni bzod par gsol ba'o/ /mi smra ba la zhes bya ba ni ngom zung can 'jig rten gyi tshul mi shes pa la yang bdag nyid gsong por smra ba yin pa'i phyir/ yang dag par dga' bar byed na de las bzlog pa lta bu la ma log kyang byed mod/'khrug par mi byed ces bya ba ni/ pha rol gyi sdug bsngal skye ba spangs pas de dag nyid la phan pa'i phyir tshar gcod par byed pa ni zad de zhes bya ba 'dis bstan to/ /'phya bar yang mi byed ces bya ba ni/ skye bo mang po'i nang du sma 'bab pa'i rgyu yin pa'i phyir ro/ / gnas ma yin par 'gyod pa skyed par yang mi byed de/ yid mi bde ba'i gnas yin pa'i phyir ro/ /'chad pa'i gnas kyis kyang gleng bar mi byed de ngo tsha bar bya ba yin pa'i phyir ro/ /dga' ba'i shas chung ba rnams la yang bdag la stod par mi byed de/ zhum pa'i rnam pa rgyu'i yin pa'i phyir ro//rnam pa gsum gyi sgo nas bsten pa'i nyes pa spangs pa ni 'brel pa gcod pa'i phyir ro/ /mdza' bo la smod par yang mi byed mi mdza' ba'i bsngags pa yang mi brjod ces bya ba ni/ de dag mi dga' bar 'gyur ba'i phyir ro/ /lhan cig gnas pa bzhin du yid rton par yang mi byed de/de dag gis sems kyi mtshan ma gzhan dag tu 'gyur ba'i phyir ro/ /rgyun du slong bar byed pa yang mi byed de/ skyo ba'i gnas yin pa'i phyir ro/ /rang gis byin na yang tshod shes pa yin te/ 'byin pa'i 'og tu yang khyad du gsod pa'i sems skye bar 'gyur ba'i phyir ro/ / mgron du bos na yang spong bar mi byed de 'dod pas phongs par gyur pa spang ba'i phyir ro/ /de dag ci nas 'dod pas phongs bar mi 'gyur ba de lta bur yang shad kyis byang bar byed do/ /yang dag par dga' bar bya ba'i tshul khrims ni 'jug pa dang bcas pa'i mngon par mtho ba'i rgyu dang / yang dag par blangs pa dang nges par legs pa'i rgyu ste/yang dag par blang ba'i dbang du byas nas de la dang bas 'jug pa'o/ /mngon par mtho ba'i rgyu ni tshul khrims dang gtong ba ste/ bde 'gro'i lus dang longs spyod kyi rgyu yin pa'i phyir ro/ /thos pa ni shes rab 'dren pa yin par rig par bya'o/ / shes rab kyang nges par legs pa'i rgyu yin no/ /tshar gcad pa'i tshul khrims ni dga' ba rnam pa gsum las tshar gcad pa rnam pa gsum du so sor sbyar bar rig par bya'o/ /bsod nams ma yin pa yongs su 'dzin par 'gyur ba zhes bya ba ni mi rigs par dad pas byin pa longs spyod pa dang /tshangs pa mtshungs par spyod pa las phyag bya ba la sogs pa bdag gir byed pa'i phyir ro/ /zhe 'gras pa rnams la ni mdor bsdu na sgrub pa rnam pa gnyis yod de/ nyes par spyad pa spyod pa rnams la ni de dag la skyo ba skyed pa'i phyir nyes par sbyor ba'i 'bras bu yang dag par ston to/ / 'khor chen po'i nang du byang chub sems dpa' la gnod par bya ba'i bsam pas mi smra ba la phyir dris pa'i lan ldon du gzhug pa'i phyir/ rdzu 'phrul gyi stobs kyis sprul pa'i gzugs 'jigs pa bstan pas skrag par byas nas/ dri ba lan 'debs su gzhug pa dang / de'i sgo nas skye bo phal po che 'du ba'i phyir ro//rdzu 'phrul bya bas kyang 'dun par byed de/ thun mong ba dang thun mong ma yin pas 'dun par byas nas sgrub pa la dgod pa'i phyir yang dag par dga' bar byas nas zhes bya ba la sogs pas bstan te/ bslab pa'i dngos po'i tshogs mtha' yas pa bsdus pas na tshul khrims kyi phung po'o//bsod nams dpag tu med pa'i tshogs bsdus pas na bsod nams kyi phung po'o/ /de ltar byang chub sems dpa'i tshul khrims thams cad rgyas par bstan nas/ da ni byang chub sems dpa'i tshul khrims kyi sdom pa yang dag par blang ba'i cho ga bstan te/byang chub sems dpa'i tshul khrims ni phyogs gnyis su gtogs pa ste/ de bas na de la byang chub sems dpa' khyim pa'am zhes bya ba la sogs pa smos so/ /dper na skyabs su song ba nyi tshe la so sor thar pa'i sdom pa yang dag par blang ba yod pa de bzhin du sems bskyed pa la yang dag par blang ba yod par 'gyur ba'i phyir/smon lam btab pas zhes smos so/ /dper na nyan thos kyi tshul khrims gang smad du med pa la yang dag par blang ba de bzhin du 'di la yang de dang 'dra bar bstan pa'i phyir chos mthun pa zhes smos so/ /de yang shes pa las gnod par bstan pa'i phyir/mkhas pa zhes bya ba la sogs pa smos te/ ngag gi rnam par rig byed kyi don ni tshig 'bru'i sgo nas 'dzin nus pa'o/ /don gyi sgo nas ni go bar nus pa'o/ /gus pa yod pa la sdom pa skye bar 'gyur gyi/ gus pa med pa la ni mi skye bas na/ gus pa'i bsnyen bkur gyi rim pa bstan pa'i phyir rkang pa gnyis la thog mar phyag byas nas zhes smos so//'dod pa la sdom pa skye'i mi 'dod pa la ma yin pas na gsol ba gdab par bya ste zhes smos so/ /gsan cing stsal ba'i rigs so zhes bya ba ni bdag gis gsol ba gson la stsol cig ces bya ba'i tha tshig go//nyan thos rnams kyi sdom pa ni tshogs rnams 'dus pa tsam la gus par bya bas thob par 'gyur gyi/ sdom pa 'di ni de las ches khyad par du 'phags pa'i phyir sangs rgyas dang byang chub sems dpa' thams cad la mchod pa bya ba sngon du btang bas thob par 'gyur bas bstan pa'i phyir/sangs rgyas bcom ldan 'das rnams dang zhes bya ba la sogs pa smos te/ ye shes chen po dang mthu chen po thob pa rnams zhes bya ba ni sa chen po la zhugs pa sha stag yin par bstan to/ /mchod pa zhes bya ba ni ci nus kyis me tog dang spos la sogs pa'i mchod pa dang /lus kyis kyang phyag byas nas zhes bya ba'i tha tshig go/ /yon tan rnams kyang zhes bya ba ni/ sdom pa 'di lta bu dang ldan pa rnams kyi yon tan gyi khyad par ni de lta bu yin no zhes thun mong ma yin pa'i yon tan rjes su dran par byas nas/ de ltar lus dang ngag dang yid kyis mchod pa bya bar bstan to//sdom pa de mchog tu dge ba'i bsam pas bskyed pa yin pa'i phyir snying nas zhes smos so/ /chung ngu yang zhes bya ba ni nges pa med par bstan pa ste/ gal te nus pa dang rgyu'i stobs yod na ni snying nas bya ba'am/ de lta ma yin na ni chung ngus bya ba'o/ /gal te khyim pa yin na ni rigs kyi du zhes bya ba dang /gal te gzhon pa zhig yin na ni tshe dang ldan pa zhes bya ba dang / gal te rgan pa zhig yin na ni btsun pa zhes bya ba ni tshig gi rim pa yin no/ /sdom pa yang dag par blang ba de rnyed pa che ba yin par rjes su dran pa dang / bdag nyid kyis de thob par 'gyur bar sems bzhin du cang mi smra bar bya'o//dper na nyan thos kyi sdom pa la skyabs su sngon du 'gro ba de bzhin du byang chub sems dpa'i yang smon lam sngon du 'gro bar bstan pa'i phyir/ brtan par bya ba'i don du smon lam 'dri bar byed do/ /don dam zhes kyang 'dri'o/ /bslab pa'i gnas su gyur pas na bslab pa'i gzhi rnams te/de ltar gnas kyi sgo nas bstan nas/ byang chub sems dpa'i tshul khrims thams cad de zhes bya ba la sogs pas ngo bo nyid bstan to/ /sangs rgyas dang byang chub sems dpa' thams cad kyi nges pa yin pa'i phyir/ dus gsum du yang yang dag par blangs pa la bdag dbang du gyur par mkhyen par gsol lo//chos nyid ces bya ba ni sdom pa yang dag par blang ba'i che ba nyid kyi khyad par gdon mi za bar yod pa'i phyir dang / sangs rgyas dang byang chub sems dpa' rnams smon lam la dgongs pa'i khyad par gyi phyir ro/ /de lta bu'i ltas zhes bya ba ni gdan kun du g.yo ba'i ltas so//ltas des bskul na nges par 'di snyam du dgongs par 'gyur te/ skad cig 'di la gcig cig gis tshul khrims kyi sdom pa yang dag par blangs na 'jig rten gyi khams gang du su zhig gis blangs snyam du dgongs par 'gyur te/ de sngon du btang ba'i ye shes kyis gzigs pa ni ye shes gzigs pa yin no//gcig tu na ye shes nyid gzigs pa yin te/ mngon sum du 'jug pa'i phyir ro/ /bu dang 'dra zhes bya ba ni sangs rgyas kyi'o/ /spun dang 'dra zhes bya ba ni byang chub sems dpa' rnams kyi'o/ /bar chad med par don grub par 'gyur ba'i phyir dgongs pa bzang pos so so nas thugs brtse bar mdzad do//de dag gis btang snyoms su ma mdzad pas na/ 'phel ba nyid do/ /sangs rgyas dang byang chub sems dpa' de dag gis thugs su chud pa zhes bya ba ni mkhyen ces bya ba'i tha tshig go/ /sdom pa yang dag par blang ba thams cad las ches bla mar gyur pa dang /ches gya nom par gyur pa'i phyir khyad du 'phags pa yin no/ /khyad par du 'phags pa nyid kyang rnam pa bzhis bstan te/ de las ches gong mar gyur pa med pas na bla na med pa'o/ /bsod nams kyi 'bras bu dpag tu med pas bsdus pas na bsod nams kyi phung po dpag tu med pa dang ldan pa'o//sems can thams cad la phan pa dang / bde ba'i lhag pa'i bsam pas bskyed pas na/ sems kyi bsam pa mchog tu dge bas bskyed pa'o/ /sems can thams cad kyi gnas la ni nyes pa spyod pa rnam pa thams cad kyi gnyen por gyur pa'i sdom pa dang ldan na sems can thams cad kyi gnas la rnam pa thams cad du lus dang ngag dang yid kyi nyes par spyad pa mi spyod de 'jug par mi byed do//de'i gnyen por gyur pa khyad par du 'phags pa nyid ni/ so sor thar pa'i sdom pa zhes bya ba la sogs pa'i rnam par dbye bas ston to//yang dag par blang ba'i tshul khrims la gnas pa'i byang chub sems dpa' rjes su bsrung ba'i thabs ni bdag nyid kyang zhes bya ba la sogs pas ston to/ /bdag gi blo'i stobs kyis bya ba dang mi bya ba nyes par brtag cing lus la sogs pas bsgrub par bya ba 'di ni byang chub sems dpa'i cha yin no//de bzhin du bsgrub pa nyid ni bslab pa'o/ /rgyas pa ni byang chub sems dpa'i sde snod dam/ byang chub sems dpa'i sde snod kyi ma mo bstan pa las mnyan pa de lta bur rjes su srung ba dang tshul khrims su bstan pa yin no/ /khyad par du 'phags pa'i 'bogs par byed pa las gnod par bya bar bstan pa'i phyir/'bogs par byed pa'i khyad par nyes pa yongs su spangs pa'i sgo nas dad pa zhes bya ba la sogs pas bstan to/ /dad pa nyid ni sdom pa 'di la mos pa'i stobs bskyed pa dang ldan pa'i phyir ro/ /de'i mi mthun pa'i phyogs kyis ni dad pa med pa nyid ston to//ma mos pa ni dad pa chen pos so/ /mi 'jug pa ni 'bring gis so/ /mi rtog pa ni chung ngus so/ /pha rol tu phyin pa drug gi mi mthun pa'i phyogs kyi gnas pas nyes pa rnam pa drug dang ldan pa las kyang gnod par mi bya bar bstan pa la lus dang longs spyod la lta ba kun du spyod pas na brkam chags can no//de'i dbang du gyur pas na chags pas zil gyis non pa ste/ de lta bu ni sbyin pa'i pha rol tu phyin pa'i mi mthun pa'i phyogs dang du len pa'o/ /tshul khrims kyi pha rol tu phyin pa'i mi mthun pa'i phyogs kyi dbang du byas nas/tshul khrims nyams pa zhes smos te/ 'chal pa'i tshul khrims ni rnam pa gnyis kyis bstan te/ rtsa ba'i nyes pa byed de ma lus par chad pa'i phyir ni tshul khrims nyams pa zhes smos so/ /lhag ma dang bcas pa'i nyes pa spyod de nyams par byas pa'i phyir ni/ bslab pa dag la gus par mi byed ces smos so//gus par mi byed pa nyid ni lhod pa'o/ /mi bzod pa ni bsam pa dang spyod pa'i sgo nas bstan te/ gnod pa byed pa la zhugs pa'i tshe sems 'khrugs pas na khro ba'o/ /de phyin chad gnod pa dran pa'i tshul gyis yang dang yang du sems 'khrugs pas na khon du 'dzin pa'o//dge sbyong gi chos rnam pa bzhi'i mi mthun pa'i phyogs tshul gyis ni nyes pa mi bzod pa'o/ /dge ba'i phyogs la sems spro ba med pas na snyom las can no/ /mi mthun pa'i phyogs la dga' bas na le lo can no/ /mi mthun pa'i phyogs la dga' ba nyid ni shas cher zhes bya ba la sogs pas bstan to//sems rnam par g.yengs pa ni zhi gnas la sogs pa bsgom pa la sems gnas su mi btub pa'i phyir ro/ /'chal ba'i shes rab ni rnam pa gnyis kyis bstan te/ kun du spyad pa las ni yid rtul ba dang rmongs pa'i rang bzhin can zhes smos te/legs par bshad pa la sogs pa'i de kho na bdag nyid kyis yongs su shes par mi nus pas na yid rtul ba'o/ /gzhan las thos su zin kyang yongs su shes par byed mi nus pas na rmongs pa'i rang bzhin can te/ de lta na kun du spyod pa las bstan to/ /rang bzhin gyis rmongs par 'dug pa nyid ni zhum pa zhes bya bas bstan to//byang chub sems dpa'i sde snod ces bya ba la sogs pas ni rgyu yongs su 'dzin pa las 'chal pa'i shes rab ston te/ dam pa'i chos la skur ba btab pas ni tshe rabs gzhan rnams su yang shes rab 'chal par 'gyur ro//kun chub par byas pa ni tshig gis brjod pa ste/ de dag gi tshul khrims de la yang skur pa 'debs par 'gyur la/ gang zag la yang smod par 'gyur te/ de'i rgyus bsod nams ma yin pa chen po yongs su sdud par 'gyur ba'i phyir bsnyad pa'i nyes dmigs bstan to//de la yid kyis mngon par zhen pas na lta ba'o/ /de'i 'du shes yid la byed pa kun du spyod pas na kun du rtog pa'o/ /sngon nas byang chub sems dpa'i bslab pa'i gzhi bsgrags pa ni bstan par bya ba'i phyir ro/ /bslab pa'i gzhi de dag kyang byang chub sems dpa'i sa la mdor bsdus te bstan pas na/byang chub sems dpa'i sde snod kyi ma mo las zhes smos so/ /snying nas zhes bya ba ni mos pa'i stobs bskyed pa'i phyir ro/ /so sor brtags nas zhes bya ba ni nus sam mi nus pa de nye bar brtags nas zhes bya ba'i tha tshig go/ /de las bzlog pa ni pha rol gyis yang dag par 'dzin du bcug pa'i phyir ma yin zhes bya bas bstan te/la la snying nas mos pa med du zin kyang gzhan gyi dring 'jog pa'am/ gzhan dang 'gran pa'i phyir len pa yang yod pas na de gnyi ga 'gog par byed do/ /nyan thos kyi bslab pa las rtsa ba'i nyes pa'i khyad par bstan pa dang /bslab pa'i khyad par bstan pa'i phyir/ pham pa'i gnas lta bu'i chos bzhi yod de zhes smos te/ nyan thos 'dod chags dang / zhe sdang dang / gti mug la gnas nas 'khrig pa'i 'dod chags kyis gnyis kyis gnyis sprod pa'i sbyor ba dang / yo byad kyi 'dod chags kyis gzhan gyi nor rku ba dang / sems can la kun nas mnar sems kyi kun nas dkris pas mi bsad pa dang gti mug gi kun nas dkris pas bdag la med bzhin du 'jig rten las 'das pa'i chos sgrogs pa'i chos bzhi byas na skal ba med par 'gyur ba de dang 'dra bar byang chub sems dpa'i pham pa'i gnas lta bu'i chos gzhan bzhi yod par rig par bya ste/rnyed pa dang bkur sti byung ba kun du myong bas byang chub sems dpa' skal ba med par 'gyur ro/ /bdag la bstod pa zhes bya ba la sogs pas bkur sti ston to/ /nyan thos ji ltar 'khrig pa'i 'dod chags kyis bdag dang gzhan sun phyung bas skal ba med par 'gyur ba de bzhin du byang chub sems dpa' yang rnyed pa dang bkur sti la brkam pas bdag dang gzhan sun phyung na pham par 'gyur ro//de bas na tshul khrims de bas tshul khrims 'di ches zab pa dang rgya che ba yin te/de bzhin du gzhan la yang shes par bya'o/ /nyan thos ni brkam chags kyis gzhan gyi nor brkus na pham par 'gyur la/ byang chub sems dpa' ni bdag la nor yod bzhin du zang zing la ser sna byed pas slong ba po nyam thag pa la ma byin nam chos kyi bgo bsha' ma byas na pham par 'gyur ro//nyan thos ni mi bsad pas pham par 'gyur la/ byang chub sems dpa' ni sems can thams cad la kun nas mnar sems kyi sems bskyed nas lag pa'am bong ba la sogs pas gnod pa bskyed nas gnod pa byed byed pas gnod pa'i nyes pa shad kyis sbyangs shing nyes pa bshags pa las kyang mi nyan na pham par 'gyur ro//nyan thos ni med bzhin du thob pa'i chos bsgrags pas pham par 'gyur la/ byang chub sems dpa' ni yod pa mi ston pa dang / dam pa'i chos la skur ba 'debs pa dang / dam pa'i chos ma yin pa ston pas pham par 'gyur ro//de la dga' ba ni bdag nyid 'dod pa'i phyir ro/ /de kho na bzhin du gzhan dag la 'chad pas na ston pa'o/ /'jog pa ni sgrub pa'i sgo nas 'dzugs pa'i phyir ro/ /dam pa'i chos ltar bcos pa zhes bya ba la sogs pas ni bdag dang gzhan gyi stobs gnyis las 'gyur bar ston to//gang yang rung ba zhes bya ba la sogs pas ni tshang ba yang rung / ma tshang ba yang rung bas skal ba med par 'gyur bar ston to/ /pham pa byung ba'i dge slong la tshe 'di nyid la 'phags pa'i lam 'thob pa dang / de'i sbyor ba las byung ba'i dge ba'i chos thob pa'i skal pa med pa de bzhin du byang chub sems dpa' yang rtogs pa dang /nye ba'i tshogs bsags pa dang sa rtogs par 'gyur ba'i skal ba med de/ de'i phyir bsam pa rnam par dag par 'gyur ba de zhes bya ba smos so/ /dper na nyan thos ni rtsa ba'i nyes pa byas pas dge slong ma yin/ dge sbyong ma yin/ shAkya'i sras ma yin par 'gyur te/ cha lugs tsam gyi sgo nas dge slong zhes bya bar zad pa de bzhin du byang chub sems dpa' yang de byas pas khas 'che ba tsam gyi byang chub sems dpar zad do/ /nyon mongs pa'i kun nas dkris pa chung ngu dang 'bring gis ni pham pa'i gnas lta bu'i 'gal ba byas na yang sdom pa btang ba ma yin te/tshul 'di ni nyan thos dang mi 'dra'o/ /chen pos ni gtong bar 'gyur te/ de ni gang gi phyir zhes bya ba la sogs pas ston to/ /pham pa'i gnas lta bu'i chos rnams rgyun mi 'chad par kun du spyod pas ni de ltar ngo tsha shes pa dang khrel yod pa rnam pa thams cad du nyams par byas par 'gyur te/de'i phyir chung ngu tsam yang zhes bya ba la sogs pa smos te/ ngo tsha med pa nges kyang mgu bar byed do/ /des kun du spyod pa mi spang bas na dga'o/ /de la yang nyes dmigs su mi lta bas na yon tan du lta ba can te/rnam pa 'di rnams kyis ni kun nas dkris pa chen po yin par rig par bya'o/ /nyan thos rnams kyi so sor thar pa'i sdom pa ni dge ba'i chos thams cad kyi gnas su gyur pa'i phyir rtsa ba'i sdom pa zhes bya ste/ de chad par gyur na ngo tsha med pa dang khrel med pa drag po kun du spyod pas ngo tsha shes pa dang khrel yod pa nyams par byas pas/tshe 'di nyid la sdom pa yang dag par blang ba'i skal ba med par 'gyur ro/ /byang chub sems dpa' ni de lta ma yin te/ tshe 'di nyid la byang chub sems dpa'i sdom pa yongs su btang du zin kyang tshe 'di la phyir mnod pa'i skal ba yod do//ngo tsha shes pa dang khrel yod pa nyams pa med pa'i phyir ro/ /gtan du gtong ba'i rgyu bstan pa'i phyir/ smon pa yongs su btang ba zhes bya ba la sogs pa smos te/ kun nas dkris pa chen po kun du spyod pas pham pa'i gnas lta bu'i chos kun du spyod pas gtong bar 'gyur ro//nyan thos rnams kyi sdom pa ni tshe'i mtha' dang nyin zhag gcig gi mtha'i bar du gnas par zad do/ /shi ba'i 'og tu de dag gi dran pa med pa dang / shin tu mi mthun pa'i lus thob pa'i phyir tshe rabs phyi ma la rjes su mi 'brang bas na de kho na bzhin du bcas so/ /byang chub sems dpa' rnams kyi dran pa dang blo gros dang bye brag phyed pa'i stobs bskyed pa thob pa dang /rten gyi khyad par thob pa'i phyir byang chub kyi snying po la thug pa'i bar gyi sdom par 'gyur te/ de bas na tshe ba brjes su zin kyang zhes bya ba la sogs pa smos so/ /'og ces bya ba ni ngan song rnams te/smon lam gyi stobs dang / dbang gi sbyor bas sems can yongs su smin par bya ba'i don du ngan song du skyes na yang sdom pa yongs su btang ba med de/ gtong ba'i rgyu med pa'i phyir ro/ /byang chub sems dpa'i sdom pa gtong ba'i rgyu rnam pa gnyis ni bstan zin to/ /so sor thar pa'i sdom pa gtong ba'i rgyu ni rnam pa lngar bstan te/bye brag med pa'i bslab pa phul ba dang shi 'phos pa dang / mtshan gnyis cig car skyes pa dang / dge ba'i rtsa ba chad pa dang / nyin zhag 'das pa'o/ /de bas na byang chub sems dpa' ni dus nges pa dang / gtong ba'i rgyu med pa'i phyir tshe brjes su zin kyang sdom pa gtong ba med pa kho na yin no//steng zhes bya ba ni lha rnams kyi nang du'o/ /thad ka zhes bya ba ni mi rnams kyi nang du'o/ /gtong ba'i rgyu med pa ni byang chub sems dpa' ni gang gis zhes bya ba la sogs pas ston to/ /mi dran du zin na yang rang bzhin gyis byang chub sems dpa'i chos nyid la gnas pa dang /byang chub sems dpa' rnams kyi 'tsham pa ma yin pa byed pa med pas na de rjes su 'brang ba kho nar 'gyur te/ dran pa gso ba'i phyir yang mnos na yang nyes pa med pa ni/ dge ba'i bshes gnyen zhes bya ba la sogs pas ston to/ /dper na nyan thos la la zhig la res 'ga' tsam dngos po'i 'gal ba byung na yang dngos po de nyid kyi nyes par 'gyur ba bzhin du byang chub sems dpa' rnams kyi yang de 'dra bar bstan pa'i phyir/nyes pa dang zhes bya ba la sogs pa smos so/ /dper na nyan thos rnams kyi nyes pa ni rnam pa gnyis yod do//nyon mongs pa can gyi sems kyis de byas na ni nyon mongs pa can du 'gyur la/ nyon mongs pa can ma yin pa'i sems kyis byas na ni nyon mongs pa can ma yin par 'gyur ba de bzhin du byang chub sems dpa' rnams kyi yang nyon mongs pa can dang nyon mongs pa can ma yin par 'gyur ro//dper na nyan thos rnams kyi nyes pa rnams ni rnam pa lngas chung ngu dang 'bring dang chen por 'gyur te/ ngo bo nyid dang / nyes pa byed pa dang / bsam pa dang / dngos po dang / bsags pa'o/ /de la pham pa rnams ni ngo bo nyid kyis nyes pa chen po yin no//dge 'dun gyi lhag ma ni 'bring ngo / /de ma yin pa rnams ni chung ngu'o/ /yang na pham pa rnams dang / dge 'dun lhag ma rnams ni chen po ste/ nyes pa lci bas phye ba yin pa'i phyir ro/ /ltung ba ni 'bring ngo / /nyes byas ni yang ba ste/ de ltar na ngo bo nyid kyi sgo nas chung ngu dang 'bring dang chen por 'gyur ro//nyes pa byed pa'i sgo nas ji lta bu zhe na/ mi shes pa'am/ bag med pas byas pa gang yin pa 'di ni chung ngu'o/ /nyon mongs pa shas che bas byas pa gang yin pa 'di ni 'bring ngo / /ma gus pas byas pa gang yin pa 'di ni chen po'o/ /bsam pa'i sgo nas ji lta bu zhe na/'dod chags la sogs pa'i kun nas dkris pa chung ngus byas pa gang yin pa 'di ni chung ngu'o/ /'bring dang chen pos byas pa ni 'bring dang chen por 'gyur ro/ /dngos po'i sgo nas ji lta bu zhe na/ bsam pa'i sgo nas mtshungs su zin kyang dngos po'i khyad par gyis chung ngu dang 'bring dang chen por 'gyur bar rig par bya ste/'di lta ste kun nas dkris pa mtshungs pas dud 'gro'i skye gnas su gyur pa'i srog chags bsad dam gsod du bcug na ltung bar 'gyur gyi mi ni de lta ma yin no/ mir gyur pa las kyang pha ma bsad dam gsod du bcug na ni pham par yang 'gyur la/mtshams med par yang 'gyur te/ de ltar na dngos po'i sgo nas kyang 'gyur ro/ /bsags pa'i sgo nas ji lta bu zhe na/ ji ltar 'di ni kha cig nyes pa gcig gam gnyis sam/ gsum mam lnga'i bar du byas na yang chos bzhin du phyir 'chos par mi byed pa 'di ni bsags pa'i sgo nas chung ngu yin no//de yan chad nyes pa bcu'am nyi shu nas rtogs par nus pa brgya'i bar du byas kyang phyir 'chos par mi byed pa 'di ni 'bring ngo / /nyes pa tshad med pa byung yang phyir 'chos par mi byed pa 'di ni chen po yin te/ de bzhin du 'dir yang chung ngu la sogs pa'i tshul gyis sbyar bar bya'o//gsum la skyabs su song ba dang / lhag par yang bla na med pa yang dag par rdzogs pa'i byang chub tu sems bskyed pas ni nyin gcig bzhin du dkon mchog gsum la mchod pa la sogs pa dang rim gro mi byar mi rung bas na/ dkon mchog gsum la mchod pa mi byed pa'i nyes pa de bzhin gshegs pa zhes bya bas bstan te/de bzhin gshegs pa phyogs gang na bzhugs pa'i phyogs de logs su bltas nas rjes su dran pa'i rnam pas phyag bya'o/ /de'i yon tan rjes su dran pa'i sgo nas mchod rten la yang de bzhin du bya'o/ /chos dang dam pa'i chos kyi glegs bam la yang de bzhin du bya ste/'dir ni bla na med par gtogs pa kho na'i bstan pa'i chos la bya ba'i phyir/ byang chub sems dpa'i sde snod ces bya ba la sogs pa smos so/ /'dir phyir mi ldog pa'i byang chub sems dpa' dge 'dun la bya ba'i phyir/ dge 'dun la yang rung zhes bya ba nas/gang yin pa zhes bya ba la sogs pa'i bar gyis ston to/ /mchod pa ni lus dang ngag dang yid kyis bya ba ste/ lus kyi ni tha na phyag bya ba yan chad de/ gcig tsam zhes bya bas ston to/ /ngag gi ni tha na zhes bya ba nas/ tshig bzhi pa'i tshigs su bcad pa gcig tsam zhes bya ba la sogs pa'i bar gyis ston to//yid kyi ni dkon mchog gsum gyi yon tan rjes su dran pas ston to/ /de la yang mtha' ni dang ba gcig tsam zhes bya ba yin no/ /de la nyes pa dang bcas pa ni kha na ma tho ba skye ba'i phyir ro/ /'gal ba dang bcas pa ni byang chub sems dpa'i chos nyid dang 'gal ba'i phyir ro//bsam pa dag pa'i sar chud pa'i byang chub sems dpa' ni bsam pa dag pa'i khyad par thob pa'i phyir chos nyid kyis dkon mchog gsum gyi mchod pa la rtag tu zhugs pa nyid yin pas de ni sgrub pa'i mchod pa dang bral ba'i dus med de/dper na bden pa mthong ba'i 'phags pa'i gang zag bzhin no/ /gal te lus dang longs spyod la lta bas 'dod pa che ba la sogs pa gsum dang du len par byed na nyes pa dang bcas par 'gyur te/ byang chub sems dpa'i chos nyid dang 'gal ba'i phyir ro/ /'dod pa che ba la sogs pa ni gcig tu nges par nyon mongs pa can kho na yin pas na de la ni nyon mongs pa can ma yin pa med do//spang ba'i 'dun pa bskyed na ni nyes pa med de de'i gnyen po la legs par brten pas 'bad par rtsol la/ de'i gags la gnas shing zlog par byed bzhin pas na rgyu'i stobs kyis zil gyis mnan nas kun du spyod na yang nyes pa med do//bkur sti bya bar 'os pa rnams la bkur sti bya ba'i dbang du byas nas/ ches rgan pa zhes bya ba la sogs pa smos te/ yon tan dang ldan pa ni yid ches par bya ba'o/ /bkur sti bya bar 'os pa ni rnam pa de gnyis kyi sgo nas gsong por smra ba la sogs pa'i 'os yin pa'i phyir ro//ma byas na nyes pa dang bcas pa'i rgyu ni nga rgyal gyis non ces bya bas ston to/ /nga rgyal gyis khengs na nyon mongs pa can du 'gyur ba'i phyir ro/ /snyom las dang le los ma byas pa ni nyon mongs pa can ma yin te/ sems kyi nyes pa shas che ba med pa'i phyir ro/ /smra ba ni glo thor gyi tshig go/ /kun du smra ba ni thugs bde ba'am/ zhes dris pa la sogs pa'i tshig go/ /yang dag par dga' bar byed pa ni don gzhan 'dri ba'o/ /rigs pa'i tshul gyis zhes bya ba ni lan gyi rnyed pa'i bsam pa spangs pa'o/ / gnyid log pa na yang thang du 'ong ba la sogs pa'i bya ba 'byung ba ni sad pa'i 'du shes zhes bya bas ston to/ /'bel ba'i gtam rnam par gtan la 'bebs pa ni chos mngon pa dang 'dul ba'i dbang du byas nas phan tshun rtogs par byed pa'o/ /'dri ba'i tshul gyis gzhan yang dag par dga' bar byed pa ni ngag cig car 'byung du mi rung bas na nyes pa med do//chos nyan pa'i bar chad du 'gyur snyam pa'i bsam pa can la yang nyes pa med do/ /rnam par gtan la 'bebs pa la yang de dang 'dra'o/ /de bzhin du gzhan chos nyan pa rnams kyi g.yeng ba bsrung ba'i bsam pa can dang /chos smra ba'i sems bsrungs na yang nyes pa med do/ /de ltar byas na de dag la phan par 'gyur ba zhig na yang nyes pa med do/ /gal te dge 'dun gyi der phyag bya ba'i las de mi bya ba'am/ de dang lhan cig tu gtam mi bya ba de lta bu'i nang khrims bcas pa'am/ /de dang lhan cig tu de ltar byas na gzhan ches mang ba rnams byang chub sems dpa' la kun nas mnar sems kyi sems skye bar 'gyur ba de bsrung ba'i phyir yang nyes pa med do//zang zing yongs su 'dzin pa'i dbang du byas nas bos pa zhes bya ba la sogs pa smos te/ dge ba'i phyogs kyi bar chad du 'gyur ba bsrung ba'i phyir zhes bya ba ni rgyun du bya ba las nyams par 'gyur ba bsrung ba'i phyir zhes bya ba'i tha tshig go//ma thos pa'i chos nyan pa las nyams par 'gyur du dogs pa la yang nyes pa med do/ /'bel ba'i gtam rnam par gtan la 'bebs pa yang de dang 'dra'o/ /kun nas mnar sems kyi sems zhes bya ba ni de dag la dga' ba med pa'i phyir zhes bya ba'i tha tshig go//chags pa zhes bya ba ni yongs su gzung ba de la bdag nyid kun du 'dzin par 'gyur bar mthong ba'o/ /sbyin pa po 'gyod par 'gyur ba'am/ gti mug gi dbang gis sbyin pa 'khrug pa'am/ kun du 'dzin pa btang ste/nor thams cad btang bas dbul bor gyur du dogs pa yang nyes pa med do/ /chos ma yin pa'i sbyin par bya ba'i chos ma blangs na yang nyes pa med do/ /mi rigs pa las 'ongs pa yang de dang 'dra ste/ mi rigs pa las 'ongs pa blangs pa'i nyes dmigs bstan pa'i phyir/ rgyu des zhes bya ba smos so//chos kyi bgo bsha'i dbang du byas nas/ gzhan chos 'dod pa rnams la zhes bya ba la sogs pa smos pa la rnam pa gnyis kyis nyan pa po snod du mi 'gyur te/ zhe 'gras pa'i sems kyi phyir ni mu stegs can zhes bya ba smos so zhes med pa'i phyir ni ma gus zhes bya ba smos so/ /dbang po yongs su ma smin pa la zab mo bstan pa bsrung ba'i bsam pa can la nyes pa med de/de'i nyes dmigs ni skrag ces bya ba la sogs pas bstan te/ skrag pa ni dka' bar 'dzin pa'i phyir ro/ /log par lta ba ni yid mi ches pa'i phyir ro/ /log par mngon par zhen pa ni gzhan dag gis legs par brda sprad kyang mi nyan pa'i phyir ro//de'i rgyu las kyang bsod nams ma yin pa 'phel ba dang / ngan song du 'gro bar 'gro ba'i phyir gnod pa dang nyams par 'gyur ro/ /gcig nas gcig tu snod du ma gyur pa la ston par 'gyur bar mthong na yang nyes pa med do/ /tshul khrims kho na'i dbang du byas nas tshul khrims 'chal pa rnams la sems 'khrugs pas yal bar 'dor ba dang brnyas pa'i sems kyis khyad du gsod na nyes pa dang bcas par 'gyur ro//de ci'i phyir zhe na/ tshul khrims 'chal pa rnams la snying rje chen po nye bar 'jog pas yang dag par bsgrub pa ltar tshul khrims dang ldan pa rnams la ni de lta ma yin no zhes bya bas ston te/de dag ni bdag nyid legs par zhugs pa yin pa'i phyir de dag la phan pa dang bde ba byar med pas na de'i phyir sdug bsngal gyi rgyu zhes bya ba la sogs pa smos so/ /'di ni tshul khrims 'chal pa dang 'dre ba yin no zhes skur pa 'debs pa bsrung ba dang /dge 'dun gyi nang khrims srung ba na nyes pa med do/ /so sor thar pa'i sdom pa la nyan thos rnams dang thun mong ba dang thun mong ma yin pa'i bslab pa rnam par gzhag pa bstan pa'i phyir/ so sor thar pa zhes bya ba la sogs pa smos te//so sor thar pa ni ma mo'i mdo yin no/ /'dul ba ni de'i rnam par dbye ba'o/ /bcas pa'i kha na ma tho ba dang bcas pa ni bcas pa'i kha na ma tho ba dang bcas pa ste/ rang bzhin gyis mi dge ba ma yin pa la mi bya ba la bcom ldan 'das kyis bcas pa'i phyir kha na ma tho ba ste/de byas na kha na ma tho ba 'phel ba'i phyir te/ dper na chang 'thung ba la sogs pa lta bu'o/ /chang 'thung ba ji ltar bcas pa'i kha na ma tho ba yin par mngon/ 'o na ma yin pa yang ji ltar mngon/ smras pa/ srog gcod pa la sogs pa bzhin du nyes par spyod pa zhes gsungs pa'i phyir dang /ngan song gi 'gro ba'i rgyu nyid du bstan pa'i phyir dang / bag med pa'i gnas kyi gzhi yin par gsungs pa'i phyir dang / gcig tu nges par ma gnang ba'i phyir ro/ /ji tsam gyis rang bzhin gyis kha na ma tho ba dang bcas pa dang / bcas pa'i kha na ma tho ba dang bcas par 'gyur ba 'di dpyad na nyon mongs pa can gyi sems can gyi sems kho nas byas pa gang yin pa de ni rang bzhin gyis kha na ma tho ba dang bcas pa yin no//nyon mongs pa can ma yin pa'i sems kyis kyang spyad par nus la/ nyes pa gzhan bsrung ba'i phyir bcom ldan 'das kyis bcas pa gang yin pa de ni bcas pa'i kha na ma tho ba dang bcas pa yin no//'di yang dpyad par bya ste/ ci mi 'dod bzhin du yang nyon mongs pa can ma yin pa'i sems kyis sman pa'i man ngag las so sor brtags te chang 'thung bar 'gyur ba lta yod dam 'on te med/ 'di las cir 'gyur/ gal te yod na ni nyon mongs pa can ma yin pa'i sems kyis ji ltar nyes par spyod par rung /'on te med na ni de bzhin du 'thung ba nyon mongs pa can ma yin pa'i sems su ji ltar 'gyur te/ gang gi phyir nges chang gi kha na ma tho ba dang bcas pa yin par shes bzhin du ngo tsha mi shes pas 'thung ba'i phyir ro/ / kha na ma tho ba dang bcas pa'i chang la kha na ma tho ba ma yin par 'dzin pa de kha na ma tho ba med par ji ltar 'gyur/ ran par 'thungs pas ra ro bar mi nus la/ de ltar yang shes bzhin du 'thung ba gang yin pa de ci'i phyir kha na ma tho ba dang bcas par 'gyur te/ dper na/ dug tshod zin par sbyar te zos na dug gi nyes pa skyed pa'i mthu med de/nyes par mi 'gyur ba bzhin no/ /de bas na chang 'thungs so cog kyang nyes par spyod pa ma yin no/ /chang 'thung ba rnams ni phal che bar ra ro bar bya ba'i phyir chang 'thung bar byed de/ ci nas dga' bar bya'o snyam pa dang / yang na ra ro bar 'gyur bar bdag nyid kyis shes bzhin pa de dag gi ni nyon mongs pa can gyi sems yin pa'i phyir de lus kyi nyes par spyod par 'gyur bar 'dir dgongs par rig par bya ste de dag nyid kyis ngan 'gror 'gro ba'i rgyu yin no//nyes dmigs mang bas na bag med pa'i gnas kyi gzhi yin no/ / 'thung ba na tshod rig par mi nus pa nas gcig tu nges par ma gnang do/ /'dod chags dang bral ba rnams kyis kyang spyad pa'i phyir te/ 'dod chags dang bral ba rnams kyis spyad pa gang yin pa de ni mi dge ba ma yin no/ /chang ni 'dod chags dang bral bas kyang 'thung ste/ de bas na rang bzhin gyis kha na ma tho ba dang bcas pa ma yin no//sogs pa'i sgras ni dus ma yin pa'i kha zas la sogs pa bstan to/ /gzhan dag gi sems srung ba zhes bya ba ni/ gzhan dag gi sems bsrung bas zhes bya ba'i tha tshig go/ /ma dad pa rnams zhes bya ba la sogs pas ni de nyid rnam par 'grel te/gang zag ma dag pa rnams slob ma sgrub pa rnams nyid la dad pa skyed pa'i phyir dang / snga nas dad pa rnams kyi dad pa 'phel bar bya ba'i phyir ro/ /de lta bus zhes bya ba ni bcom ldan 'das kyis ma gnang ba'i dngos po ci yang rung ba'o/ /mtshungs par slob ces bya ba ni nyan thos rnams kyis kyang mi bya la/byang chub sems dpa' rnams kyis mi bya'o/ /de lta bas na mtshungs par 'gyur te/ mtshungs par 'gyur ba'i gtan tshigs ni/ de ci'i phyir zhen zhes bya ba la sogs pas bstan to/ /bdag gi don lhur byed pa'i zhes bya ba ni bdag nyid 'dul ba la zhugs pa'i phyir ro//gzhan gyi don la mi lta ba zhes bya ba de dag ni gzhan la phan pa'i phyir zhugs pa ma yin mod kyi/ de dag kyang gal te na gzhan dad par bya ba'i phyir 'jug par byed na byang chub sems dpa' gzhan la phan pa'i phyir zhugs pa rnams lta los kyang byed do zhes ston to//don nyung ba las brtsams te zhes bya ba ni 'dod pa chung ba'i sgo nas so/ /bya ba nyung ba zhes bya ba ni yo byad yongs su 'dzin pa mang na bya ba mang bar 'gyur te de spang ba'i phyir ro/ /snying las chung ngur gnas pa zhes bya ba ni 'phags pa'i rigs la gnas pa ste/byang chub sems dpa' rnam pa thams cad du sems can thams cad la phan pa dang bde ba'i phyir zhugs pa gzhan gyi don la bya ba nyung ba snying las chung ngur gnas pa ni mdzes pa ma yin te/ de bas na gzhan gyi don nyid bdag gi don yin pa'i phyir byang chub sems dpa' rnams kyis ci nas kyang gzhan gyi don rnams la bslab par bya ba'i nye dur mi 'ong ba'i bram ze dang khyim bdag rnams las mi bslang bar mi bya zhes bya bas ston to//nyan thos rnams la ni mi gnang bar bcas te/ gos mang po dag las skabs phye ba rnams la yang gos ya gnyis tsam blang bar bya ba'i phyir bcas so//lhung bzed rnams la yang de dang 'dra'o/ /bdag nyid kyis rgyu skud pa bslangs pa thag pa la 'thag tu mi gzhug pa yang de dang 'dra'o/ /mal stan srin bal can dang gding ba dang stan nang tshangs can bcang bar mi bya ba yang de dang 'dra'o/ /gser dang dngul blang bar mi bya zhes bya ba la sogs pa bcas pa'i kha na ma tho ba dang bcas pa la ni byang chub sems dpa' nyan thos rnams dang bslab pa mtshungs pa ma yin te/gal te nyan thos ltar slob na ni nyes pa dang bcas par 'gyur ro/ /gnas 'di dag ni byang chub sems dpa'i sde snod las byang chub sems dpa' rnams la gnang ba'i phyir ro//de ltar na bcas pa'i kha na ma tho ba dang bcas pa'i dbang du byas nas byang chub sems dpa' rnams kyi bslab pa nyan thos rnams dang thun mong ba dang / thun mong ma yin pa rnam par gzhag pa ni bshad zin to/ /da ni byang chub sems dpa' rnams kyi rang bzhin gyis kha na ma tho ba dang bcas pa zhes bya ba bslab pa'i khyad par bstan par 'dod pa'i phyir/rang bzhin gyis kha na ma tho ba dang bcas pa la zhes bya ba la sogs pa smos te/ nyan thos las ltos nas grags pa'i sgo nas rang bzhin gyis kha na ma tho ba dang bcas pa zhes bya ba byang chub sems dpa' rnams kyi ni de rang bzhin gyis kha na ma tho ba dang bcas pa nyid ma yin te/nyon mongs pa can ma yin pa'i sems kyis byed pa'i phyir ro/ /thabs mkhas pa zhes bya ba ni gzhan mtshams med pa la sogs pa las bya bar mngon du phyogs pa mthong na las de'i rnam par smin pa yun ring por mi bzad par 'gyur bar rig nas snying rje ste/de bsad pas bdag nyid sems can dmyal bar skye bar khas blangs nas de yongs su bslab pa'i phyir/ dge ba dang lung du ma bstan pa'i sems la gnas nas bdag sems can dmyal ba rnams su skye bar 'gyur ba ni bla'i/'di sdug bsngal gyi phung po chen po dang phrad pas ni mi rung ngo snyam nas srog dang bral bar byed do/ /de lta yin na mchod sbyin byed pa rnams dang 'khor ba las thar bar 'dod pa rnams kyi phan par 'dod pa dang / de dag la mtho ris thob par bya ba'i phyir phyugs rnams dang dud 'gro sna tshogs gsod pa gang yin pa dag ci'i phyir kha na ma tho ba med par mi 'gyur/ci 'o thug dang tshwa mtshungs sam de dag gi srog gcod pa de ni gti mug las 'byung ba dang / chags pa las 'byung ba yin te/ phyugs sam srog chags gzhan mchod sbyin du sdug bsngal ba'i bsad pas bsad na mtho ris sam thar pa 'thob par 'gyur ro snyam pa ni gti mug yin te/las kyi 'bras bu phyin ci log la mngon par zhen pa'i phyir ro/ /las 'dis bdag mtho ris su 'gro bar 'gyur ro snyam du 'dzin na ni gti mug dang chags pa yin no/ /mi dge ba'i las kyi lam rnams spyi'i mtshan nyid bcom ldan 'das kyis rnam par gzhag pa ni dge slong dag srog gcod pa la rnam pa gsum ste/chags pa las 'byung ba dang / gti mug las 'byung ba dang / zhe sdang las 'byung ba'o/ /de bzhin du log par lta ba'i bar du yang de dang 'dra'o zhes gsungs so/ / de bas na de kha na ma tho ba med par ji ltar 'grub par 'gyur/ thabs mkhas pa'i mdo las kyang chags pa med pa la sogs pa'i srog gcod pa kha na ma tho ba med par bstan na de dang de dag ji ltar mtshungs/ de bas na dge ba'i sems las byung ba'i phyir dge ba yin te/ sems de ni chags pa med pa la sogs pa dang mtshungs par ldan pa'i phyir ro//las su bya ba thams cad ni sems can gyi dbang gis rnam par gzhag par bcom ldan 'das kyis gsungs te/ yid ni chos rnams sngon du 'gro/ gtso bo yid yin yid las byung / /dga' ba'i yid du gyur na ni/ /smra'am yang na byed par 'gyur//sdang ba'i yid du gyur na ni/ /smra'am yang na byed par 'gyur/ /yang gsungs pa/ 'jig rten dag ni sems kyis khrid/ /sems kyis yongs su 'dren par byed/ /thams cad kyang ni sems gcig gi /chos kyi phyi bzhin 'brang bar 'gyur/ /zhe'o/ /de ltar na bsam pa'i rjes su zhugs pas sbyor ba la 'dzug pa'i phyir bsam pa dag pas srog gcod pa ni kha na ma tho ba med pa kho na yin no//ji ste chags pa med pa la sogs pa las 'byung ba'i srog gcod pa yang skyon chags par 'gyur na ni de bzhin gshegs pa rnams sems can la phan pa'i phyir tshig rtsub po gsung ba dang /brdzun du gsung ba dang / mdza' bo 'byed pa yang skyon chags par 'gyur te/ ma la gnas khyod ni bran mo'i bu yin no zhes gsungs pa dang / 'char ka'i mdo las kyang mi blun po long ba kho na dang mtshungs pa khyod lta bu yang mig dang ldan pa'i dge slong shA ri'i bu dang lhan cig tu chos mngon pa dang /'dul ba mngon pa las kun brjod par sems sam zhes gsungs pa lta bu ni tshig rtsub po yin no/ /ci gsung gi mdo las kyang mdza' bo 'byed pa'i tshig phal cher gsungs te/ 'di ltar mdo de nyid las sngon gcer bu pa'i dge bsnyen du gyur pa grong dpon ral gri thogs kyis 'di skad du btsun pa dper na mi zhig 'byor pa 'tshal zhing 'byor ba 'tshol la/stag dmu rgod gsos na des 'byor pa de yang ma thob kyi steng du gnod pa chen po yang thob par gyur pa med bzhin du btsun pa bdag gis ni 'byor par 'tshal zhing 'byor pa tshol ba las gcer bu pa byis pa lta bu rmongs shing mi gsal la mi mkhas pa don ma mchis par brten to//don ma mchis par bskor to/ /don ma mchis par bsnyen bkur bgyis so/ /bdag gis ni de dag las 'byor pa de yang ma thob kyi steng du gnod pa chen po yang thob par gyur to zhes smos so//mdo gzhan las kyang gsungs te/ rgyas par bstan nas shA ri'i bu dang / maud gal gyi bu lta bu rung ba gnyis la yang ngas dge slong gi dge 'dun ma gtad na ro dang 'dra pa dar snabs za ba khyod lta la ci smos zhes bya ba la sogs pa gsungs te/ de ltar na phra ma dang / tshig rtsub po yang bstan to//brdzun du smra ba yang don ci lta ba bzhin du ma bstan pa'i phyir gsungs te/ 'di lta ste/ dge slong dag tshur sheg /khyod kyis ma'i na tshod tsam mthong na ni ma'i 'du shes nye bar zhog shig /sring mo'i na tshod tsam mthong na ni zhes bya ba nas rgyas par sbyar ro/ /'o na de yongs su gtong ba'i sems de nyid 'dir zhe sdang ma yin nam sdug bsngal gyi chu bo chen po las yongs su bskyab par 'dod de bdag la byams pa bas lhag pa'i byams pas des par myong bar 'gyur ba'i las bya ba la dge ba la mngon du phyogs pa'i gnas las yang dag pa'i rten bzang po mthong bar byas na ji ltar yongs su btang bar 'gyur/gzhan yang / sbyor ba gang gis gzhan gyi 'chi ba phan par mthong / /de ni snying brtse'i bdag nyid ldan pa rnams kyi yin/ /gang phyir dge slong drug cu la sogs shi bar gyur/ /mdo sde gnyis las de ni thub pas ma gsungs sam//mdo sde gnyis la shing gi phung po lta bu'i mdo las chos kyi rnam grangs 'di bshad pa na dge slong drug cu ni len pa med par zag pa rnams las sems rnam par grol lo/ /dge slong drug cu ni kha nas khrag dron mo skyugs so/ /dge slong drug cu ni bslab pa phul nas nyams par gyur te/'di skad du ston pa'i bstan pa la brtson par bgyi ba ni bcom ldan 'das dka' lags so/ /bde bar gshegs pa dka' lags so zhes kyang 'dzer te zhes bya ba 'byung ste/ mdo de las de skad ces bshad pa'i rgyus 'bras bu rnam pa gsum bstan te/bstan pa'i mjug thogs su dgra bcom pa'i 'bras bu 'thob pa dang / kha cig ni mngon par mtho ba thob pa dang kha cig ni dge ba'i chos mang po las nyams te/ gnas yongs su btang ba ni sems tha dad pa rnams so/ /dbyug pas ri dgas 'tshor gyi mdo las kyang de la bcom ldan 'das kyis dge slong la mi sdug pa bshad cing mi sdug pa bsgom pa'i bsngags pa yang brjod de/dge slong dag mi sdug pa bsgom zhes bya ba nas phan yon che'o zhes bya ba'i bar dang / de'i tshe dge slong rnams mi sdug pa sgom par byed de/ mi sdug pa bsgoms nas lus rul pa 'dis ngo tsha zhing 'phya smad de/des smod pa'i bar du byed cing mtshon gyis kyang lceb par byed/ dug kyang za bar byed g.yang sar yang mchong bar byed/ thag pas kyang 'gegs te 'chi bar byed pa nas/ dge slong gis dge slong gsod par byed pa'i bar byed de/ srog gcod pa de dang snga ma'i tshig rtsub po la sogs pa la dgongs pa yongs su dag pa'i de bzhin gshegs pa rnams ji ltar zhugs pa yin/byang chub sems dpa' rnams la yang tshul de kho na bzhin du shes par bya'o/ /gzhan yang sangs rgyas bcom ldan 'das rnams ni bya ba byas pa byed pa byas pa yin mod kyi/sems can thams cad rnam pa thams cad kyis 'dul ba'i thabs la mkhas pa'i phyir tha na dbugs phyi nang du rgyu bas kyang sems can rnams kyi don dang / phan pa dang bde ba la zhugs pa yin te/ byis pa ni tshe 'di ched cher 'dzin to/ /mkhas pa pa ni tshe phyi ma ched cher 'dzin to zhes mdo las 'byung ba'i phyir ro//mig rgyang ring bar tshe phyi ma ched cher 'dzin pa'i phyir yang sems can rnams kyi tshe 'di'i kha na ma tho ba dang bcas pa'i bde ba chung ngu phran tshegs tsam la ni mi lta'i/ yun ring po tshe phyi ma'i phan pa dang bde ba mang po kha na ma tho ba med pa kho na la lta ste/'di ltar kha cig la ni dge ba gzhig pa'i phyir chos ston to/ /kha cig la ni longs spyod gzhig pa'i phyir/ kha cig la ni bde ba gzhig pa'i phyir/ kha cig la ni g.yog 'khor gzhig pa'i phyir chos ston to/ /kha cig la ni bde ba dang / yid bde bas sbyor bar mdzad do//kha cig la ni sdug bsngal ba dang / yid mi bde bas sbyor bar mdzad do/ /kha cig la ni lag na rdo rje la sogs pa gnod sbyin drag po yang dag par bstan pas 'chi ba'i 'jigs pa skyed nas 'dul bar byed do/ /de bas na sangs rgyas bcom ldan 'das dgongs pa yongs su dag pa rnams kyis ni sems can la phan pa dang bde bar bya ba'i phyir mi mdzad pa'i bag med de/byang chub sems dpa' rnams kyang de dang 'dra'o/ /nyon mongs pa can ma yin pa'i phyir sems la ni dge ba'i las kyi lam rnam par gzhag pa ye med de/'di ltar 'dul ba las kyang chom rkun gyis khyer ba'i rdzas dgra bcom pas phyir bkug go zhes 'byung ba la ma byin par len pa'i nyes pa yang med de/ bsam pa nyon mongs pa can ma yin pa'i phyir ro/ /dgra bcom pa'i til gyi 'bru tsam nang du bcug tu zin kyang nyon mongs pa can gyi bsam pa med de nyams su myong ba med cing tshor ba med pa'i phyir 'khrig pa yongs su spyod pa med pa de bzhin du byang chub sems dpa' nyon mongs pa can ma yin pa'i bsam pa can dbang thob cing bsam pa yongs su dag pa rnams ni sems can yongs su smin par bya ba'i thabs la zhugs pa yin pas ni ngag gi kun tu spyod pas mi dge ba las kyi lam dang 'brel pa med pa kho nar rig par bya'o//byang chub sems dpa' thabs la mkhas pa'i mchog pha rol tu phyin pa thob pa rnams kyi spyod pa ni bsam gyis mi khyab ste/ de la ni dge ba'i rtsa ba chung ba dang /shes rab rtul ba dang / bdag gi phyogs la mngon par zhen pa dang / sgra ji bzhin du don 'dzin pa rnams kyi blo yang 'jug par mi 'gyur ro/ /de la ni sangs rgyas nyid kyi mngon sum yin te/ de dag gi kha na ma tho ba dang bcas pa spyod pa ni de dag nyid kyis mkhyen par zad de/de bas na gzhan dag gis ni bsod nams ma yin pa mang pos yongs su 'dzin pa'i thabs ye spang bar bya'o/ /dge ba'i sems sam lung du ma bstan pa'i sems su rig nas zhes bya ba ni bdag nyid kyi bsam pa dag par rtogs nas byed pa'o//'dzem bzhin du zhes bya ba ni thabs gzhan med de phongs chos su byed pa'i phyir ro/ /phyi ma la snying brtse ba'i sems kho nas zhes bya ba ni de dag la phyi ma la phan pa'i bsam pa kho na bskyed na las de lta bu byed du zin kyang nyes pa med de/ yang dag pa'i don gyi byang chub sems dpa' ni bya ba la nan tan byed pa yin pa'i phyir zhes bstan to//rang bzhin gyis kha na ma tho ba dang bcas pa la ni byang chub sems dpa' khyim pa rnams kho na 'jug par rig par bya ste/ mdo las de dag kho na'i yin par mthong ba'i phyir ro/ /ma byin par len pa'i skabs su rgyal srid kyang dbrog pa ni sems can mang po la nor mang po sbyin pa'i bsam pa yod pa yin par bstan pa'i phyir smos so//gcig tu nges par pha rol la gnod pa byed pa la zhugs pa zhes bya ba ni srog la sogs pa la gnod par byed pa'o/ /nor de la longs spyod pas yun ring por gnod pa dang rjes su 'brel pa'i phyir nor de slar 'phrogs te gnas ji lta ba bzhin du 'bul bar byed na nyes pa med do//mi tshangs par spyod pas gzir ba zhes bya ba ni ma 'phrad na 'chi bar 'gyur la byang chub sems dpa' yang khon gyi bsam pa 'dzin te sems can dmyal ba rnams su skye bar 'gyur ro snyam du de ltar rig nas byed do//mgo gtsang zhes bya ba ni 'dod pa la log par g.yem pa'i nyes pa spang ba'i phyir te/ de ltar bud med dbang du gyur na ni dga' mgur dge ba'i rtsa ba la yang sbyar du yod la/ mi dge ba la yang spang du gzhug tu rung ba'i phyir ro/ /de lta bu'i las mang po sems can la phan pa dag mthong na bdag la mi lta zhing sems can gyi don la lta ste byed na nyes pa med do//mi dge ba'i bshes gnyen gyis yongs su zin pa rnams yongs su smin par bya ba'i gnas skabs la bab pa'i tshe thabs gzhan med pa'i phyir phra mas mdza' bo'i dbyen byas nas bstan pa la 'dzud par byed na yang nyes pa med do//tshig rtsub po drag po'i sbyor ba drag pos mi dge ba'i gnas nas bslangs te/ dge ba'i gnas su dgod pa'i phyir sma 'bebs par byed na tshig rtsub po smras kyang nyes pa med do/ /tshig kyal pas 'dul ba'i sems can rnams de'i sgo nas 'dul ba la yang nyes pa med par ston to//nyan thos kyang log par 'tsho ba'i sbyor bas nyes pa dang bcas par 'gyur la/ byang chub sems dpa' rnams ni log par 'tsho bar sems bskyed ma thag tu nyes par yongs su ma shes na nyes par 'gyur bar ston to/ /rgod pas yongs su zin pa zhes bya ba ni 'dod chags kyis bskyed pa'i rnam par ma zhi ba dang ldan pa zhes bya ba'i tha tshig ste/rnam par ma zhi ba zhes smos pa ma yin no/ /rta gad du dgod pa zhes bya ba ni skad cher dgod pa'o/ /kun tu rtse zhes bya ba ni lus kyi sbyor ba'o/ /kun du ca co 'don zhes bya ba ni lus dang ngag gi sgo nas so//dga' bzhin gyis ni gang gi bsam pa dag par bstan pa'i phyir ro/ /bcom ldan 'das kyis gsungs pa'i don ngas rtogs te/ byang chub sems dpa' ni 'khor ba nyid du gnas par bya ba yin no zhes mdo las byung ba kho na bzhin du byang chub sems dpa' rnams 'khor ba la mngon par dga' bar gnas na yang nyes par 'gyur bar bstan te/nyan thos shes rab rtul bas kyang 'khor ba'i nyes dmigs can gyi nyon mongs pa yongs su shes pa yang mya ngan las 'das pa la mngon par dga' zhing 'khor ba la skyo bar bya dgongs na byang chub sems dpas lta ha cang yang bya dgos par ston to//de las khyad par du 'phags par kun nas nyon mongs pa med pa dang ldan pa ni byang chub sems dpa' yin te/ ye shes chen po dang / mthu chen po dang ldan pa'i phyir ro/ /dge slong dgra bcom pa ni de lta ma yin no//snyan pa dang mi snyan pa shin tu rtogs pa de nyid ni/ dri ngas zhes bya ba la sogs pas bshad do/ /mi srung zhes bya ba ni yongs su mi spong ba ste/ mi bden pas mi byed ces bya ba'i tha tshig ste/ bden pa'i dngos po dang bden pa'i dngos po ma yin pa dang go rims su sbyar ro//mu stegs can ni shin tu mngon par zhen te/ dga' bar byar mi nus pa'i phyir ro/ /byis pa rnams kyis kha na ma tho ba ma yin pa'i sgo nas gzhag pa'i dri ngas la dri ngas ma yin pa'i 'du shes kyis yongs su spong bar mi byed na nyes pa med do/ /thabs drag po zhes bya ba ni lus dang ngag gi spyod pa mi sdug pas chad pas gdul ba rnams la bya'o//yid mi dga' bar gyur pa bsrung ba'i phyir zhes bya ba ni bdag gi sems kyi sdug bsngal ba yongs su spang ba'i tha tshig go/ /gzhan dag gi don chung la bdag nyid kyi tshegs chen por gyur na ma byas kyang nyes pa med do/ / dge slong gi chos bzhi dang / bral ba'i nyes pa bstan te/ gshe ba ni khros nas spyo ba'i tha tshig go/ /khro ba ni khror gzhug pa'i bsam pa can gyi ngag gi spyod pa mi sdug pa'o/ /rdeg pa ni sdug bsngal bskyed pa'i bsam pas snun par byed pa'o/ /mtshang 'bru ba ni gcig la gcig nyes pa gleng ba'o//nyes pa byas pa shad kyis byang bar mi byed pa'i nyes pa bstan te/ nyes pa byas sam ma byas par yang nga rgyal na byas su dogs pa ni de lta de ltar 'dzin pa'i phyir ro/ /kun nas mnar sems zhes bya ba ni phrag dog shas che ba'i phyir ro/ /nga rgyal gyis nod pa zhes bya ba ni dman pa'i tshul gyis ngo tsha ba'i phyir ro//nyes pa byas na yang shad kyis byang bar mi byed pa dang / dgos pa la yal bar 'dor ba'o/ /'thab krol can zhes bya ba ni shad kyis byang bar byas na yang 'khrug par 'gyur ba'o/ /rtsod par byed pa ni de'i sgo nas rtsod par byed pa'i phyir ro//bzod pa'i ngang tshul can zhes bya ba ni 'gyur ba med par shes pa ste/ shad kyis byang bar byas kyang rung ma byas kyang rung de'i sems 'gyur ba med par rig pa'am/ shad kyis byang bar byed mi 'dod pa'am/ ngo tsha bar byed de mi mthun par 'du shes par rig pa na shad kyis ma sbyangs kyang nyes pa med do//rtsod pa la nyes pa byung ba dag ces bya ba ni rtsod pa byung ba rnams dang / rtsod pa la zhugs pa rnams la/ shad kyis byang bar byed pa'o/ /mi nyan zhes bya ba ni sems mi dga' ba'am/ mi bzod pa'i ngang tshul can yin pa'i phyir ro/ / chos bzhin ma yin pa zhes bya ba ni mi rigs pa'o/ /khro ba'i bsam pa zhes bya ba ni khro ba'i sems te rgyun mi 'chad par 'byung ba'o/ /'dzin pa ni rnam grangs so/ /tshogs sdud pa'i dbang du byas te smas pa ni/ rim gro bya ba dang bsnyen bkur bya ba kho na'i dbang du byas nas de kho na'i phyir zang zing med pa'i phyir sems dang ldan pas rim gro bya ba dang /bsnyen bkur bya ba bdag gir byed na nyes pa med de/ sbyor ba yongs su zin kyang bsam pa dag pa'i phyir ro/ /bre mo gtam la kun du chags pa'i sems kyis ni bre mo gtam la 'dus pa'i nang du rgyal po dang chom rkun la sogs pa'i gtam ngan pa la 'jug pa'o//brjed pa zhes bya ba ni sems rnam par g.yengs pa'o/ /dran pa la gnas kyang pha rol gyi ngor nyan pa dang / ya mtshan du 'dzin pa dang dris pa'i lan 'debs pa tsam la ni nyes pa med de/ /slob pa la brtson pa dang / 'og nas 'byung ba la ni de yang nyes pa'i gnas yin no//sems gnas pa nyid ni sems mnyam par 'jog par 'dod la zhes bya bas ston to/ /bsam gtan la brtson pa kho na'i sgrub pa'i dbang du byas nas/ /'byung ba zhes bya ba la sogs pa smos so/ /ting nge 'dzin thob pa na yang bsam gtan tsam gyis chog par 'dzin pa nyes par 'gyur ba ni/yon tan du lta zhes bya bas ston to/ /shes rab mngon par sgrub pa'i sbyor ba la nyes par 'gyur ba'i dbang du byas nas/ /byang chub sems dpa' gang zhes bya ba la sogs pa smos so/ /de la bslab par yang mi bya'o zhes bya ba ni nan tan du bsgrub par mi bya ba'i tha tshig go//don med pa ni ci zhig bya zhes bya ba la sogs pa ston to/ /de nyid la bye brag tu brtson par bya ba ni/ 'di ltar zhes bya ba la sogs pas ston to/ /gcig tu nges par de la brtson pa'i 'dun pa bzlog pa'i phyir na nyes pa med do//byang chub sems dpa'i sde snod ni bsod nams dang ye shes kyi tshogs phal po che'i lam ston par byed pa yin pas ni de nyid la bye brag tu bslab par bya dgos te/ de'i phyir byang chub sems dpa'i sde snod ces bya ba la sogs pa smos so/ /yun thung ngus kyang dran par nus pa dang /sems rno zhing shes rab gsal bas don sems pa dang rtogs par byed nus pa dang / lhan cig skyes pa'i shes rab kyis sangs rgyas kyi gsung rab rtogs par nus te/ rtogs pa'i shas che ba la ni nyes pa med do/ /de las nyes 'gyur du zhes bya ba ni myur ba kho nar rgyun du chud pa dang / gus par brtson zhing goms par byed de/rang gi gzhung la brtson du zin kyang nyes par 'gyur ro/ /de lta bu'i tshul dang yang ma 'gal bar zhes bya ba ni sangs rgyas kyi gsung rab la brtson par byas su zin kyang de la gnas pa'i lta ba can gyi mu stegs can gyi bstan bcos la sbyor ba ma gnang ste/ dper na dgos pa'i dbang gis sman tsha ba bstan pa de bzhin du mu stegs can gyi bstan bcos la yang de dang 'dra bar bya'o//mchog tu zab pa ni nyan thos la sogs pa'i blo las 'das pa'i phyir te/ de'i phyir/ de kho na'i don zhes bya ba la sogs pa smos so/ /don dang ldan pa ma yin zhes bya ba ni don dang 'brel pa ma yin zhing shes rab kyi khyad par gyi rten ma yin pa'i phyir ro//chos dang ldan pa ma yin zhes bya ba ni bsod nams kyi khyad par gyi rten ma yin pa'i phyir ro/ /gcig tu na don bzang po yang ma yin la tshig 'bru bzang po yang ma yin pa ste/ go rims bzhin du sbyar ro/ /de'i phyir phan pa dang bde bar 'gyur ba ma yin zhes smos so/ /skur pa 'debs pa dang ldan pa ni bdag nyid kyi tshul bzhin ma yin par byed pa'am zhes bya ba la sogs pa ston te/rang gi stobs dang rgyu'i stobs sam zhes bya ba'i tha tshig go/ /gzhan gyi rjes su zhugs pa zhes bya ba ni gzhan gyi stobs dang sbyor ba'i stobs so/ /gal te zab mo las sems mi 'jug par 'gyur na/ de las sgrub pa ni de la byang chub sems dpa' dad pa dang zhes bya ba la sogs pas ston to//long ba zhes bya ba ni zag pa med pa'i mig med pa'i phyir ro/ /de bzhin gshegs pa'i spyan gyis zhes bya ba ni yid ches pa'i lung gi tshad mas zhes bya ba'i tha tshig go/ /dgongs te gsungs zhes bya ba ni don gzhan la ldem por dgongs pa'i tshig yin pa'i phyir ro//mos pa'i dbang kho nas spong bar mi byed na ni nyes pa med do/ /la la ni mos pa med du zin kyang zhes brjod de de dang sbyar na ni ma mos su zin kyang spong bar mi byed na nyes pa med ces bya'o/ /sngar ni rnyed pa dang / /bkur sti la brkam pa'i dbang du byas nas bdag bstod pa'i pham pa lta bu'i gnas bstan to/ /da ni bdag la gces par 'dzin pa'i sems kyis bdag la stod par byed pa'i nyes pa'i gnas gzhan bstan te/de'i phyir zang zing bcas pa'i sems zhes smos so/ /bstan pa'i dgra yin pa'i phyir mu stegs can la smod par byed pa ni nyes pa med do/ /mu stegs can rnams zil gyis gnon pa'i dgos pa ni bstan pa gnas par bya ba zhes bya ba la sogs pas bstan to//bdag nyid gces par bya ba bskyed pa'i sgo nas gzhan dag gis dad pa bskyed pa'i phyir bdag bstod pa la nyes pa med do/ /ma tshor na zhes bya ba ni chos sgrogs pa yod par mi shes pa'o/ /gal te de ltar 'gro na chos smra ba mi dga' bar 'gyur ba dang / lan du ma thos pa dang sngon shes zin pa'i don gyi gtam yin par shes na nyes pa med do//thos pa mthar phyin pa ni mang du thos pa zhes bya ba la sogs pas bstan to/ /rgyun mi chad par bsam gtan la brtson pa ni rtag tu zhes bya ba la sogs pas bstan to/ /shes rab rtul ba dang / lung nod pa la sogs pa slob pa la brtson pa la yang nyes pa med do//khyad du gsod ces bya ba ni snying nas dge ba'i bshes gnyen gyi 'du shes dang ston pa la sogs pa'i 'du shes mi bskyed ces bya ba'i tha tshig go/ /bkur sti mi byed ces bya ba ni lus kyi spyod pa'o/ /'phya zhes bya ba ni sma 'bebs pa dang ldan pa'i tha tshig go//sting zhes bya ba ni tshig brlang po ste/ de lta bu ni chos smra ba la ma gus pa dang ldan pa yin no/ /chos la ma gus pa'i dbang du byas nas tshig 'bru la rton gyi zhes bya ba smos so/ /sems can gyi don bya ba la mi brtson pa'i nyes pa ni sems can gyi bya ba zhes bya ba la sogs pas bstan te/sems can gyi don bya ba'i tshul khrims bstan pa las byung ba'i sems can gyi bya ba rnam par dbye bas las brtsams te grogs bya ba yin par rig par bya'o/ /rten yod pa ni byed pa gzhan yod pa'o/ /chos ma yin pa'i bya ba dag la nyes pa med pa ni gnod pa dang ldan pa zhes bya bas bstan to//gzhan la bcol zhes bya ba ni gzhan byed du gzhug pa'o/ /de bas ches khyad par du 'phags pa'i dge ba'i phyogs la brtson pa dang / rang bzhin gyis shes rab med pa dang / slob pa la brtson pa dang / sems can ches mang ba dag gi sems srung ba dang /dge 'dun gyis bcas pa srung ba la yang nyes pa med do/ /mgon yod pa nyid kyi phyir na nus pa'o/ /de'i phyir yang rten yod pa ste/ rnam pa gzhan du yang tshol nus pa'i phyir ro/ /yang na bdag nyid kyis nus pa'i phyir ro/ /nad rgyun rings ni yun ring du na ba la yang zhes bya ba'i tha tshig go//bsam gtan dang kha ton la brtson pa ni snga ma kho na bzhin no/ /rigs pa'i gdams ngag mi ston pa'i nyes pa bstan te/ rigs pa zhes bya ba ni skyon med pa'o/ /mi shes zhes bya ba ni tshul ston mi shes pa'o/ /de nyid mkhas sam ston pa gzhan yod pa dang / gal te mi dga' bas nyan par mi 'gyur ba'am/bka' blo mi bde bas log par 'dzin pa dang / dga' zhing gus pa med pas gdul dka' ba'i phyir dmu rgod kyi rang bzhin can dang / lan du phan 'dogs pa la brtson par byas kyang mi 'dod na ma byas kyang nyes pa med do/ /yang dag par slong ba zhes bya ba ni rigs pa dang ldan pa'i slong ba po ste/sdug bsngal bar gyur pa la sogs pa bsdus so/ /rung ba ma yin pa'i bsam pas ma byin pa dang / mi 'phrod pa slong ba dang / rgyal po la gnod par sems shing rgyal po la glo ba ring ba la rgyal po'i sems srung na nyes pa med do/ /'khor bsdus pa zhes bya ba ni yongs su bzung la bdag nyid grags shing bsod nams che ba'i phyir gos la sogs pa rnyed pa'am/yang na bdag nyid tshol nus kyang rung ste ma byin pa'o/ /mi rigs pa la zhugs pa'i phyir 'dul ba'i skal ba med pa ste/ de la ma byin na yang nyes pa med do/ /mu stegs can ni bstan pa'i dgra yin pa'i phyir tshar bcad par bya ba yin no//yon tan brjod pa nyid ni bsngags pa yin par shes par bya'o/ /'dod pa chung ba ni bdag nyid kyi yon tan rnams gzhan yang brjod du mi 'jug pa'i phyir ro/ /yon tan gleng ba'i rgyus gang zag de nyid kyi rgyags pa la sogs pa kun nas nyon mongs par 'gyur bar mthong na nyes pa med do//bskrad pa dang gtan du ma yin pa'i phyir ro/ /bcos su mi rung ba'i skabs nyid ni bka' blo mi bde ba zhes bya ba la sogs pas bshad do/ /dus la sdod ces bya ba ni dus gzhan la sdod pa dang / 'thab pa la sogs pa'i 'jigs pa la lta ba'o/ / dge 'dun 'khrug cing dbye ba zhes bya ba ni dge 'dun khrag khrug tu 'gyur ba'am/ tha dgur byed par 'gyur ba dang / de nyid g.yo med pa dang / shas cher ngo tsha shes pa dang khrel yod pa dang ldan pas sgrub ste nyes pa 'chags par byed pa la ni nyes pa med do/ /bstan pa la zhe 'gras pa rnams kyi dad pas byin pa'i longs spyod kha na ma tho ba dang bcas par 'gyur bas na/spong du gzhug pa'i phyir zhes bya ba smos so/ /mngon par zhen pa zhes bya ba ni sngags sam sman nam cho 'phrul byed pa yin gyi/ rdzu 'phrul gyi stobs kyis ni ma yin no zhes sgrogs pa'o/ /gnas thams cad la yang nyes pa med pa ni sems 'khrugs pa dang tshor bas nyen pa la lhag par yang nyes pa med de/tshor bas nyen pa ni tshor ba drag pos brgyal bar 'gyur ba'o/ /sdom pa ma mnos pa ni sdom pa ma bzung ba'o/ /dngos su byung ba sha stag ste zhes bya ba ni tshul khrims rnam pa gsum gyi dbang du byas pa ste/ de dang der dngos su bstan pa rnams so//thor bu zhes bya ba ni 'thor ba rnams so/ /tshang ba zhes bya ba ni lhan cig tu bsdus te bstan pa'o/ /slob par 'dod pa'i bsam pas zhes bya ba ni sdom pa'i tshul khrims la'o/ /byang chub 'dod pa'i bsam pas zhes bya ba ni dge ba sdud pa'i tshul khrims la'o/ / sems can gyi don bya ba'i bsam pas zhes bya ba ni sems can gyi don bya ba'i tshul khrims la'o/ /nyes byas su bsdu ba zhes bya ba ni byang chub sems dpa' rnams kyi nyes pa ni tha dad pa med de/ byang chub sems dpa'i bya ba las 'gal ba'i phyir nyes byas kho nar zad do/ /gang su yang rung ste/ khong du chud pa la zhes bya ba ni/byang chub sems dpa' rnams kyi nyes pa ni skal ba med pa ma yin par ston te/ nyan thos la sogs pa thams cad las 'das pa'i sdom pa'i khyad par la gnas pa ni dge ba'i phyogs kyi sbyor ba la skal ba med par 'gyur ba med pa'i phyir ro/ /pham pa'i gnas lta bu'i nyes pa 'brid ni tshogs sam yang na dge 'dun la bshags par bya'o zhes ston te/de yang gnas kyis lci ba yin pa'i phyir ro/ /thog mar brjod de zhes bya ba ni tshe dang ldan pa bdag cag ni dngos po che ge mo zhig las nyes byas kyi nongs pa byung ba ste zhes bshags pa'i rim pa ston to//lhag ma zhes bya ba ni nyes byas kyi nongs pa byung ba de dag bshags so zhes bya ba'o/ /len pa pos kyang nyes pa de dag mthong ngam zhes brjod par bya'o/ /des kyang mthong ngo zhes brjod par bya'o/ /phyin chad sdom par byed dam/ legs par sdem par bgyid do zhes de ltar gsum gyi bar du bya'o/ /len pa po med na byin gyis brlabs pa'i sgo nas kyang nyes pa bshags par bstan to//sdom pa blang ba'i cho ga gzhan yang byang chub sems dpa'i sdom pa yang dag par blang ba de yang zhes bya ba la sogs pas ston to/ /'dod chags ni 'dir sems can la rjes su chags pa yin par bstan te/ sems can la byams pa de'i sgo nas byang chub sems dpa' gang ci spyod kyang rung ba de dag thams cad ni byang chub sems dpa'i bya ba nyid yin te/sems can gyi don du gtogs pa'i phyir byas na yang nyes byas su ni mi 'gyur gyi/ cir 'gyur zhe na/ legs par byas pa nyid du 'gyur ro/ /de bas na 'dod chags las 'byung ba ni nyes pa ma yin no//byang chub sems dpa' sems can la sdang ba ni bdag dang gzhan la phan par spyod pa ma yin te/ bdag gi sangs rgyas kyi chos yongs su smin par yang mi 'gyur la sems can yongs su smin par yang mi 'gyur bas de yang byang chub sems dpa' rnams kyi bya ba ma yin te/ bya ba ma yin pa byed pa ni nyes byas kyi nyes par 'gyur ro/ /de bas na zhe sdang las byung ba'i nyes pa'i gnas la phal cher kun nas mnar sems kyi sems zhes 'byung ngo / /'di lta ste gzhi bsdu ba las 'byung ba bzhin zhes bya ba ni rgyu rnam pa lnga ste chung ngu dang chen po la sogs pa sngar bstan pa bzhin no/ / tshul khrims kyi dbang du byas nas nyan thos rnams kyi phun sum tshogs pa dang / nyams pa bzhi bzhir rnam par gzhag ste/ tshul khrims phun sum tshogs pa dang / lta ba phun sum tshogs pa dang / cho ga phun sum tshogs pa dang / 'tsho ba phun sum tshogs pa'o/ /de la byang chub sems dpa' rnams kyi gtan gyi sdom pa yin pa'i phyir tshul khrims nyams pa med do//de lta bas na rnam pa gzhan du phun sum tshogs pa rnam pa gsum bstan pa'i phyir/ rang gi 'dul ba zhes bya ba la sogs pa smos te/ lus dang ngag dang yid kyi kun du spyod pa yongs su dag pa la brten pa ni phun sum tshogs pa dang po'o/ yang dag par rab tu byung ba'i bsgrub pa'i bsam pas legs par brjod pa'i gnas pa la brten pa ni gnyis pa'o/ /'tsho ba'i yo byad rnams kyis phongs pa med pa'i mchog la brten pa ni gsum pa'o/ /'dral bar mi byed pa ni bslab pa'i bzhi las 'gal bar mi byed pa'i phyir ro/ /bslab par gtogs pa'i lus dang ngag dang yid kyi las kun du spyod pa'i phyir lus la sogs pa'i kun du spyod pa yongs su dag go//bslab pa dag la gus pa dang / bag yod par shas cher gnas pas na nyes pa rgyun du mi byed do/ /brgya la nyes pa zhig byas na yang mthol bas sdig pa 'chags par byed de/ /rnam pa gsum po 'di dag gis thog ma dang bar dang tha ma rnams su sbyor ba phun sum tshogs pa bstan to//yang dag par rab tu byang bar sbyor ba ni chos kyi bsam pas rab tu 'byung ba yin no/ /nyan thos rnams ni bdag 'dul bar bya ba la sogs pa'i don rab tu byung ba'i phyir legs par rab tu byung ba zhes bya ba'o//byang chub sems dpa' ni bdag nyid kyi sangs rgyas kyi chos yongs su smin par bya ba'i don du rab tu byung ba'i phyir legs par rab tu byung ba yin te/ de'i phyir byang chub chen po don du gnyer ba zhes smos so/ /don du mi gnyer ba ma yin zhes bya ba ni de gcig pur nges par bstan pa ste/ de'i don kho nar rab tu byung zhes bya ba'i tha tshig go//dge sbyong gi tshul don du gnyer ba zhes bya ba ni sgrub pa'i sbyor ba'i 'bras bu bstan pa ste/ byang chub sems dpa'i dge sbyong gi tshul ni sa bcu po dag la bslab pa gsum gyi sbyor bar gtogs pa'i lam mo/ /mya ngan las 'das pa ni theg pa chen po'i yongs su mya ngan las 'das pa ste/mi gnas pa'i mya ngan las 'das pa yin par rig par bya'o/ /de ltar 'jug pa'i bsam pa'i dbang gis bsam pa phun sum tshogs pa kun nas nyon mongs pa med par bstan to/ /kun nas nyon mongs pa med par gnas pa'i phyir bsam pa phun sum tshogs pa ni le lo med pa zhes bya ba la sogs pas bstan to//le lo med pa zhes bya ba ni dge ba rnams la brtson 'grus brtsams pa'i phyir ro/ /ma 'dres pa ni sdig pa mi dge ba'i chos rnams bar chad pa yod pa dang / bar chad med pa kun du mi spyod pa ste/ de la sdig pa ni smad pa yin pa'i phyir ro//mi dge ba rnams ni dge ba dang mi mthun pa'i phyir ro/ /kun nas nyon mongs pa ni tshe 'di nyid la kun nas nyon mongs pa'i phyir zhing 'grub par 'gyur ba'i phyir ro/ /yang 'byung bas ni tshe phyi ma la yang 'byung ba'i sdug bsngal 'grub pa'i phyir ro/ /rims nad ni kun nas nyon mongs pa yin pa'i phyir ro//rnam par smin pa sdug bsngal ba ni yang 'byung bar 'gyur ba'i phyir te/ de'i nyes dmigs ni tshe 'di la nyon mongs pa kun du spyod pas lus dang sems yongs su gdung bar 'gyur ba dang / tshe phyi ma la ngan 'gro 'grub par 'gyur ba'i phyir yang 'byung ba rnams so// //de bas na phyi ma la skye ba dang rga shir 'gyur ba de ni nyes dmigs yin te/ yun ring por skye ba dang rga shi 'dren pa'i phyir ro/ /bsod nams byas pa ni sbyin pa las byung ba'i bsod nams bya ba'i dngos po kun du bstan pa'i phyir ro/ /dge ba byas pas ni longs spyod chen po'i bar du gcod pa yongs su spong ba'i phyir ro//gzhan yang bsod nams ni bsod nams kyi don gyi phyir ro/ /dge ba ni kha na ma tho ba med pa'i don gyi phyir ro/ /phongs par mi 'gyur zhes bya ba ni mi ldan pa ma yin pa ste/ de dag thob ces bya ba'i tha tshig go/ /phun sum tshogs pa dang po nyin mtshan du dga' zhing mchog tu dga' ba'i shas che ba'i phyir bde ba la reg par gnas so//gnyis pa ste kun nas nyon mongs pa can ma yin par gnas pa'i phyir yang bde ba la reg par gnas so/ /gsum pa ste phongs pa rnam par spangs pa'i phyir yang bde ba la reg par gnas so/ /bsdus pa dang rgyas pa zhes bya ba la mdo ni rnam pa gnyis te/khyim pa'i phyogs su gtogs pa dang rab tu byung ba'i phyogs su gtogs pa'o/ /yang rnam pa gsum ste/ sdom pa yang dag par len pa dang dge ba sdud pa dang / sems can gyi don bya ba'i tshul khrims so/ /rgyas par ni ji skad bstan pa'i rab tu dbye ba bzhin no//de las gzhan pa 'di'i rab tu dbye ba zhes bya ba ni tshul khrims thams cad nyid kyi phyogs gcig ste/ dka' ba'i tshul khrims nas rnam par dag pa'i tshul khrims kyi bar ro/ /de ltar na bstan pas ni tshul khrims kyi ngo bo nyid bstan to/ /bshad pas ni tshul khrims thams cad bstan to//bshad pa'i rab tu dbye bas ni dka' ba'i tshul khrims la sogs pa bstan to/ /dka' ba'i tshul khrims ni rnam pa gsum gyis rnam par gzhag ste/ gtang dka' ba'i dngos po yongs su gtong ba'i tshul khrims len pas na yang dag par len pa dka' ba la brten to//blangs na nyam thag par gyur kyang yongs su mi gtong bas na rjes su bsrung ba dka' ba la brten to/ /rgyu ba dang gnas pa dag la shin tu dran pa nye bar gnas pas na yongs su dag pa dka' pa la brten to/ /gzhan dag ni gzhan du yang 'chad de/ len pa dang srung ba'i sgo nas dka' bar ston to//de la srung ba ni nyams la bab par gyur kyang shin tu yongs su skyong ba dang shin tu rnam par dag pa'i phyir ro/ /longs spyod chen po ni rnam pa bzhi dang lngas rig par bya ste/ bzhi zhes bya ba ni gang gis longs spyod par bya ba'i lus kyis te/ lus kyi 'byor par 'gyur bas na longs spyod che ba'o//gang dag dang lhan cig pa ste/ gnyen 'dab dang rtsa lag sdug cing byams pa nas yid du 'ong ba'i bar dag dang ngo / /de dag kyang mang ba dang che ba'i phyir na che ba'o/ /gang dag gis bsgrub pa ni dran pa la sogs pa rnams kyis te/ de dag kyang mang ba dang / che ba'i phyir che ba'o//gang longs spyod ni zas dang skom la sogs pa ste/ de ltar lus phun sum tshogs pa dang / phyogs chen po dang 'khor chen po dang / nor dang yo byad phal po cher gyur pa'i longs spyod che bar bstan to/ /rnam pa lngas ji ltar zhe na lus gang gis ci'i phyir longs spyod pa ste/'tsho ba'i phyir yin la de gnyis kyang che ba'i phyir che ba'o/ /lhag ma ni snga ma dang 'dra'o/ /nor dang 'bru dang mdzod dang bang ba'i tshogs phal po che spang ba'i phyir dka' ba'o/ /nor dang 'bru mang bas na dbang phyug chen po'o/ /dka' btsan pas de dag la ci dga' dgur dbang byed pa'i tshul gyis na dbang phyug chen po la dbang byed pa ste/gsum po 'di dag ni gtang bar mi nus pa yin la/ de btang bas na tshul khrims yang dag par len pa dka' ba yin te/ mdo gzhan las kyang 'di skad du 'khor los sgyur ba'i rgyal po gling bzhi'i dbang phyug la dbang byed par 'gyur ba de lta bu yang 'dod na/skad cig gcig kho nas btsun mo dang longs spyod thams cad spangs nas de bzhin gshegs pa'i bstan pa la rab tu 'byung bar 'gyur ro zhes rgyas par gsungs so/ /nyams la bab par gyur pa ni srog la thug kyang zhes bya bas bstan te/'chi ba la thug pa'i sdug bsngal gyis thebs na yang srog gi phyir yang zhes bya ba'i tha tshig go/ /rgyu ba dang gnas pa dang yid la byed pa thams cad la zhes bya ba ni 'gro ba la sogs pa la dran pa dang shes bzhin mchog dang ldan pa'i phyir dang / yan lag lnga dang ldan pa'i bag yod par gnas pa'i phyir ro//byang chub sems dpa' ni bsam pa dang sbyor ba dag pas na brgya lam na gnas skabs 'ga' tsam la yang dag par blangs pa'i skad cig phyin chad nas ma shi ba'i bar du yang nyes pa mi byed de/ de ltar na rjes su bsrung ba'i tshul khrims kyi dbang du byas te dka' ba yin no/ / rnam pa bzhi'i sgo nas zhugs pa'i tshul khrims ni thams cad kyi sgo'o/ /sbyor ba'i khyad par gyis bsgrubs pas na yang dag par blang ba byas pa'o/ /sems dang mngon par 'du byed pa dang / smon pa la mi lta bas na rang bzhin gyis tshul khrims so/ /yun ring po dang rgyun mi 'chad pa'i dus nas zhugs pas na goms pa'o//bsdu ba'i dngos pos yongs su zin pas na thabs dang ldan pa'o/ /rigs la gnas pa zhes bya ba ni sbyin pa la sogs pa phul du phyin pa'i rtags kun du spyod pa'i gnas skabs kyi'o/ /kha na ma tho ba med pa ni lus dang ngag dang yid kyi las te/de yang tshul khrims kyi pha rol tu phyin pa'i rgyu yin pas na pha rol tu phyin pa zhes bya ba 'thob pa'o/ /goms pa'i khyad par gyi sbyor bas gong ma bas kyang ches gong ma dang / gya nom pa bas kyang ches gya nom par tshul khrims la goms par gyur te/ de bas na sngon gyi tshe rabs gzhan dag tu zhes bya ba la sogs pa smos te/de'i phyir dper na rang bzhin gyis gtsang zhing khrus byas la lus byugs pa ni mi gtsang ba dang mi mthun zhing mi 'dod pa de bzhin du rang bzhin gyis sdig pa rnams la zhe sdang la de'i gnyen po dge ba rnams la dga' zhing dge ba 'dod do/ / bslab pa la brtson pa'i byang chub sems dpa' sbyin pa la sogs pa'i sgo nas zhugs pa'i lus la sogs pa'i las ni thabs dang ldan pa'i tshul khrims te/ bsdu ba'i dngos po bzhi'i thabs kyis yongs su zin pa'i phyir ro/ /bdag dang gzhan la mi gnod par sgrub pa'i phyir skyes bu dam pa yin te/sgrub pa de yang bdag nyid dang gzhan dag phan 'dogs pa'i lus dang ngag dang yid kyi las kun du spyod pa'i phyir ro/ /skyes bu dam pa'i tshul khrims rnam par gzhag pa ni bdag nyid kyang yang dag par len pa dang / yongs su bsrung ba'i yan lag phun sum tshogs pas thog ma dang tha mas skyes bu dam pa'i tshul khrims su 'gyur ba dang /gzhan ni tha mal pa dang zhe 'gras pa dang / yang dag par zhugs pa'i bye brag gis tshul khrims rnam pa gsum gyi dbang du byas pa'o/ /de la snga ma rnams ni yang dag par len du 'jug go/ /zhe 'gras pa rnams la ni bsngags pa brjod do//de dag gis bsngags pa dang phan yon thos na kun nas mnar sems kyi sems rtse zhil bar 'gyur du re ba'i phyir ro/ /yang dag par zhugs pa rnams mthong na ni yid dga' bar 'gyur la 'gran par yang mi byed de/ de ltar na tshul khrims kyi dbang du byas nas gzhan dag la lus dang ngag dang yid kyi las kyi khyad par dang ldan pa'i skyes bu dam pa'i tshul khrims nyid du bstan to//rnam grangs gcig gis rnam pa drug yongs su rdzogs par 'gyur bas na rnam pa drug go/ /rnam grangs cig shos kyis rnam pa bdun yongs su rdzogs par 'gyur bas na rnam pa bdun no//gnyi ga bsdoms pas rnam pa bcu gsum yongs su rdzogs par 'gyur bas na rnam pa bcu gsum mo/ /byang chub chen por yongs su bsngos pa ni 'bras bu dang phan yon che ba ste de bas na 'bras bu yongs su rdzogs pas yongs su rdzogs pa'o/ /rgya chen po la bslab pa'i gzhi rgyas par blang ba'i phyir gnas yongs su rdzogs pas yongs su rdzogs pa'o//rgya che ba ni rgya chen du brjod par bya'o/ /'dod pa'i bsod nyams kyi mtha' rnam par spangs pa'i phyir nyon mongs pa can gyi bde ba dang bral ba yin te/ de bas na kha na ma tho ba med pa'o/ / bdag nyid dub par byed pa'i mtha' rnam par spangs pa'i phyir don med pa'i sdug bsngal rnam par spangs te/ de bas na rab tu dga' ba'i gnas dang mthun pa'o/ /bar du gcod pa yongs su btang bas de ji srid 'tsho'i bar gyi bslab pa dang ldan pas na rgyun du chud pa'o/ /rnyed pa dang bkur sti la mi brten te/de'i sgo nas nyams par mi byed pas de'i phyir zil gyis mi non pa'o/ /de bzhin gshegs pas bcas pa'i tshul khrims phul nas mu stegs can gyi gnas rnams su sdom pa yang dag par len pa'i phyir phas kyi rgol ba la sogs pas zil gyis non par 'gyur te/ de med pas na de dag gis zil gyis non par 'gyur ba ma yin no//dge slong sar pa sar pa rnams ni dge sbyong gi gnod pa rnams kyis gtses so zhes mdo las gsungs pa'i phyir nyon mongs pa'i kun nas dkris pa de lta bus bslab pa phul nas nyams shing ldog pa'i phyir dang / bslab pa 'dral bas nye ba'i nyon mongs pa rnams kyis zil gyis non par 'gyur la//rnam pa de rnams kyis mi 'phrogs pa'i phyir brtan pa'o/ /rgyan dang ldan pa yin pas na/ rgyan dang bcas pa'o/ /'di lta ste nyan thos kyi sa las zhes bya ba ni dad pa dang ldan pa dang / g.yo ba med pa dang nad nyung ba dang /brtson 'grus brtsams pa nyid dang / shes rab can dang 'dod pa chung ba la sogs pa nas sbyangs pa'i yon tan la thug pa rnams ni tshul khrims kyi rgyan yin no zhes de las bstan to/ /tshul khrims ni mdor bsdu na rnam pa gnyis te/ gtan mi bya ba kho nas nyes par ma spyod pa spong ba yang dag par len pa'i phyir ldog pa'i tshul khrims dang /gcig tu nges par bya ba kho nas bslab pa ste/ 'jug pa'i tshul khrims dang / de gnyis rtag tu bag yod par bsrung ba'i phyir kun nas bsrung ba'i tshul khrims te de ltar rnam pa gsum dang rnam par smin pa'i 'bras bu rab tu phye bas na/rnam par smin par byed pa ste/ de yang sa re re la/ ji ltar 'tsham pa'i mtshan 'grub par byed pa'i phyir dang / de bzhin du/ byang chub sems dpa'i ting nge 'dzin 'grub par byed pa'i phyir dang /lha dang mi'i 'gro ba 'grub par byed pa'i phyir dang / sems can gyi don mang po'i 'bras bu 'grub par byed pa'i phyir/ rnam pa bzhir rig par bya ste/ de ltar na rnam pa bdun du 'gyur ro/ /bdag dang gzhan mnyam pa nyid thob pa'i phyir 'dod pa nyid dang /phongs pa nyid la lta zhing so sor brtags nas blangs pa ni/ phongs shing 'dod pa'i tshul khrims so/ /de yang sdug bsngal rnam pa brgyad kyi gnyen po'i phyir rnam pa brgyad de/ sems can thams cad ni/ 'tsho ba 'dod kyi 'chi ba mi 'dod pa'i phyir/'tsho srog 'dod pa rnams dang / longs spyod 'dod pa rnams dang / kha mi phyin pa'i chung ma 'dod pa rnams dang / mi slu ba 'dod pa rnams dang / mi phyed pa'i g.yog 'khor 'dod pa rnams dang / sgra snyan par thos par 'dod pa rnams dang /don dang ldan pa'i 'bel ba'i gtam 'dod pa rnams dang / sdug pa'i 'dus te reg pa 'dod pa rnams so/ /de las bzlog pa ni/ sdug bsngal rnam pa brgyad de/ phongs par byed pa dang / mi sdug pa dang / yid du mi 'ong ba de las ldog pa'i sgo nas/ phongs shing 'dod pa'i tshul khrims rnam par gzhag go/ /sdug bsngal gyi rgyu la 'jug pa'i dga' ba'i sgo nas 'di dang / phyi ma la bdag dang gzhan rnams la phan 'dogs par byed pa yin pas na/ 'gog pa'i tshul khrims so/ /'di dang phyi ma la bde ba ste/ bde ba'i rgyu la 'jug pa gnang bas na/ gnang ba'i tshul khrims so/ /de bzhin du gnyi gar phan 'dogs par byed pa'i phyir/ /de gnyis la yang dag par zhugs pa'i sems can sdud pas na/sdud pa'i tshul khrims so/ /gzhan dag gi 'di dang phyi ma'i bde ba la log par zhugs pa'i sems can tshar gcod par byed pas na/ tshar gcod pa'i tshul khrims so/ /sbyin pa dang ldan pa kho nas/ phyi ma la longs spyod chen po'i 'bras bur 'gyur ba'i phyir dang /bzod pa dang ldan pa ni/ 'di dang phyi ma la bdag dang / gzhan dag gi bde ba'i rgyur 'gyur ba'i phyir dang / phyi ma la bdag nyid la g.yog 'khor dang ldan pa'i rgyur 'gyur ba'i phyir/ 'di dang phyi ma la bde ba dang /brtson 'grus dang ldan pa ni/ tshe 'di nyid la brtson 'grus brtsams pas sdig pa mi dge ba'i chos rnams dang / mi 'dres pa'i rgyur 'gyur ba'i phyir dang / phyi ma la spro ba chen po'i rgyur 'gyur ba'i phyir dang / phyi ma la bde ba dang / bsam gtan dang ldan pa ni/'di nyid la bde ba la reg pa'i rgyur 'gyur ba'i phyir dang / phyi ma la rnam par dag pa'i lhar skye ba'i rgyur 'gyur ba'i phyir/ gnyi ga bde ba dang / shes rab dang ldan pa ni/ tshe 'di la de dang de dag la mkhas pa skyed pa'i phyir dang / phyi ma la shes rab kyi khyad par gyi rgyur 'gyur ba'i phyir/gnyi gar bde ba ste/ de ltar na tshul khrims rnam pa bzhi ni/ pha rol tu phyin pa drug gis bsdus te/ ci rigs par sbyar ro/ /bdag dang pha rol rnams la gnyi gar phan 'dogs pas na/ 'di dang phyi ma la bde ba'o//nyes pa rnam pa bcu'i gnyen por gyur pas na/ rnam par dag pa ste/ rnam pa bcu ni nyes pa rnam pa bcu'o/ bsam pa nyams pas na/ yang dag par len pa nyams pa'i nyes pa'o/ /de'i gnyen por dge sbyong gi tshul 'dod pa nas/ tha ma rdzogs pa'i byang chub 'dod pa la thug pa rnams smos so/ /bslab pa la sbyor ba'i nyes pa ni/ de bzhin gshegs pas bslab pa'i gzhi bcas pa rnams la gus par mi byed pas na/ de'i phyir ha cang zhum pa ma yin pa zhes smos te/ de nyid ni 'gal bar byas pa zhes bya ba la sogs pas rnam par 'grel to//bslab pa ni gzhi ma bcas pa'i rjes su 'jug pa'i nyes pa yin pas na/ ha cang thal ba nyid do/ /nyes pa de gnyi ga'i gnyen por/ ji ltar bcas pa rnams la yang dag par slob pas na rnam par dag pa'o//le lo'i nyes pas nyams par 'gyur ba de'i gnyen po le lo med pa zhes bya ba la sogs pa smos te/ le lo dang bral ba ni/ nyin mtshan du dge ba'i phyogs la mngon par brtson pa zhes bya bas bstan to/ /bag med pa'i nyes pa'i gnyen por ni/bag yod pas yongs su zin pa zhes bya ba la sogs pa smos so/ /bstan pa'i nyes pa ni/ rnyed pa dang / bkur sti dang / skye ba'i khyad par la brten pa'i phyir te/ de'i gnyen por smon lam legs par btab pa zhes bya ba la sogs pa smos so//gzhan dag 'dun par mi byed pa'i nyes pa de'i gnyen por ni/ cho ga phun sum tshogs pa zhes bya ba la sogs pa smos so/ /log par 'tsho ba'i nyes pa de'i gnyen por ni/ 'tsho ba phun sum tshogs pa zhes bya ba la sogs pa smos so//mtha' gnyis su ltung ba'i nyes pa de'i gnyen por ni/ mtha' gnyis rnam par spangs pa zhes bya ba la sogs pa smos so/ /mchog tu 'dzin pa'i nyes pa de'i gnyen por ni/ nges par 'byin pa zhes bya ba la sogs pa smos so/ /nyams par byed pa de'i nyes pa ni/bslab pa las 'gal bar byed pa ste/ de'i gnyen por ni/ ma nyams pa zhes bya ba la sogs pa smos so/ /tshul khrims kyi phung po chen po ni/ yangs shing rgya che la bsod nams che ba'i phyir ro/ /byang chub chen po'i 'bras bu bskyed pa ni/'bras bu che ba'i phyir te/ de gnyis ni tshul khrims kyi pha rol tu phyin pa zhes bya ba la sogs pa rnam par 'grel to/ /byang chub sems dpa'i sdom pa'i tshul khrims la slob pa'i phan yon/ nyan thos la sogs pa dang thun mong ma yin pa bstan te/ de la slob pas ni sangs rgyas dang byang chub sems dpa' rnams dgongs par 'gyur gyi nyan thos kyi sdom pa la slob pa ma yin no/ /'chi ba'i tshe 'di nas shi 'phos nas sangs rgyas dang byang chub sems dpa' rnams dang phrad pa yid la byed pas 'chi ba'i 'jigs pa las 'das pa'i phyir mchog tu dga' ba chen po 'thob po//phyi ma la sangs rgyas dang byang chub sems dpa' dge ba'i bshes gnyen dang phrad pa ni phan yon gsum pa'o/ /pha rol tu phyin pa bsdus pa'i bsod nams yongs su 'dzin pa'i phyir bzhi pa'o/ /gtan du ba'i tshul khrims yin pas chos nyid kyi tshul khrims 'thob pa'i phyir lnga pa'o//rnam pa re re yang tshul khrims rnam pa gsum du bsdu ba ni/ de thams cad ni sdom pa'i tshul khrims dang zhes bya ba la sogs pas bstan to/ /ci'i phyir byang chub sems dpa' rnams kyi tshul khrims rnam pa gsum las mi nyung mi mang zhes rgol ba'i lan gyi sgo nas tshul khrims rnam pa gsum du gzhag par bstan pa'i phyir gsum zhes bya ba la sogs pa smos so//sdom pa'i tshul khrims kyis ni sems gnas pa bstan te/ kun nas nyon mongs pa med pa'i chos kyi bde ba la gnas pa'i phyir ro/ /lus dang sems kyi mngon par 'dus byas pa yang de dang 'dra'o//dge ba sdud pa'i tshul khrims kyis ni/ sangs rgyas kyi chos yongs su smin pa'i sgo nas bdag la phan pa bsgrub po/ /sems can gyi don bya ba'i tshul khrims kyi sgo ste/ sems can yongs su smin par byed pa'i sgo nas ni gzhan la phan pa sgrub po//byang chub sems dpa'i bya ba ni 'di dag tu zad de 'di lta ste/ bdag nyid kyi snod du gyur par bya ba dang gnyi ga la phan par bsgrub pa'o/ /byang chub sems dpa'i tshul khrims kyi le'u rgya cher 'grel pa slob dpon rgyal ba'i sras kyis mdzad pa rdzogs so// //rgya gar gyi mkhan po dzi na mi tra dang / pradz+nyA warma dang / zhu chen gyi lo tsA ba ban de ye shes sde la sogs pas bsgyur cing zhus te gtan la phab pa// //