CLOSE WINDOW

D4037
བོད་ཡིག

@##/ /rnal 'byor spyod pa'i sa las byang chub sems dpa'i sa/ bam po dang po/ sangs rgyas dang byang chub sems dpa' thams cad la phyag 'tshal lo/ /'phags pa byams pa la phyag 'tshal lo//chos bcu po 'di dag ni/ theg pa chen po byang chub sems dpa'i lam 'bras bu dang bcas pa sdud par byed pa yin no/ /bcu gang zhe na/ gzhi dang / rtags dang / phyogs dang /lhag pa'i bsam pa dang / gnas pa dang / skye ba dang / yongs su 'dzin pa dang / sa dang / spyod pa dang / rab tu gnas pa'o/ /sdom la/ gzhi dang rtags dang phyogs rnams dang / /lhag pa'i bsam dang gnas pa dang //skye dang yongs su 'dzin dang sa/ /spyod dang rab gnas tha ma yin/ /de la gzhi gang zhe na/ 'di la byang chub sems dpa'i rang gi rigs dang / dang po sems bskyed pa dang /byang chub kyi phyogs kyi chos thams cad ni gzhi zhes bya'o/ /de ci'i phyir zhe na/ 'di la byang chub sems dpa' ni rigs la brten cing gnas nas/ bla na med pa yang dag par rdzogs pa'i byang chub mngon par rdzogs par 'tshang rgya ba'i skal ba can du 'gyur zhing /mthu yod par 'gyur ba'i phyir te/ de lta bas na rigs ni skal ba dang ldan pa'i gzhi zhes bya'o/ /de la byang chub sems dpa' ni dang po sems bskyed pa la brten cing gnas nas/sbyin pa la yang sbyor bar byed/ tshul khrims dang / bzod pa dang / brtson 'grus dang / bsam gtan dang / shes rab kyi pha rol tu phyin pa la yang sbyor bar byed do/ /de ltar pha rol tu phyin pa drug po bsod nams kyi tshogs dang /ye shes kyi tshogs dang / byang chub kyi phyogs kyi chos thams cad la sbyor bar byed pa'i phyir te/ de lta bas na dang po sems bskyed pa ni byang chub sems dpa'i spyod pa la sbyor ba de ni gzhi zhes bya'o//'di la byang chub sems dpa' ni byang chub sems dpa'i spyod pa la sbyor ba de nyid la brten cing gnas nas/ bla na med pa yang dag par rdzogs pa'i byang chub yongs su rdzogs par 'gyur ba'i phyir te/ de lta bas na byang chub sems dpa'i spyod pa la sbyor ba de ni/byang chub chen po yongs su rdzogs pa de'i gzhi zhes bya'o/ /gang zag rigs la gnas pa ma yin pa rigs med pa ni sems kyang skyed cing 'bad pa la yang dag par gnas pa yod du zin kyang / bla na med pa yang dag par rdzogs pa'i byang chub yongs su rdzogs par 'gyur ba'i skal ba med do//de lta bas na rnam grangs 'dis ni byang chub sems dpa' byang chub kyi sems kyang ma bskyed la/ byang chub sems dpa'i spyod pa la sbyor ba ma byas kyang / rigs ni gzhi yin par rig par bya'o/ / gal te rigs la gnas kyang sems skyed par mi byed la/ byang chub sems dpa'i spyod pa dag la yang sbyor bar mi byed na ni skal ba yod kyang byang chub myur du 'grub par mi 'gyur ro/ /de las bzlog pa ni myur du 'grub par rig par bya'o/ /rigs de ni gzhi zhes kyang bya/ rton pa dang /rgyu dang / rten pa dang / nyer gnas dang / sngon du 'gro ba dang / gnas zhes kyang bya'o/ /rigs ji lta ba bzhin du dang po sems bskyed pa dang / byang chub kyi phyogs kyi chos thams cad kyang de dang 'dra'o/ /de la rigs gang zhe na/ mdor na rnam pa gnyis te/ rang bzhin gyis gnas pa dang /yang dag par bsgrubs pa'o/ /de la rang bzhin gyis gnas pa'i rigs ni byang chub sems dpa' rnams kyi skye mched drug gi khyad par gang yin pa ste/ de ni gcig nas gcig tu brgyud de 'ongs pa thog ma med pa'i dus can chos nyid kyis thob pa de lta bu yin no/ /de la yang dag par bsgrubs pa'i rigs ni sngon dge ba'i rtsa ba goms par byas pa las thob pa gang yin pa ste/don gyi skabs 'dir ni rnam pa gnyi ga yang 'dod do/ /rigs de ni sa bon zhes kyang bya/ khams de ni rang bzhin zhes kyang bya'o/ /de yang 'bras bu yang dag par ma grub pa ni 'bras bu med pas cha phra ba yin no//'bras bu yang dag par grub pa ni 'bras bu dang bcas par rags pa yin no/ /byang chub sems dpa'i rigs de dang ldan pa rnams ni nyan thos dang / rang sangs rgyas thams cad las kyang 'das pa yin na/ sems can gzhan thams cad lta las ci smos te/ bla na med pa'i khyad par can yin par rig par bya'o//de ci'i phyir zhe na/ mdor na rnam par dag pa ni 'di gnyis te/ nyon mongs pa'i sgrib pa rnam par dag pa dang / shes bya'i sgrib pa rnam par dag pa yin no/ /de la nyan thos dang rang sangs rgyas rnams kyi rigs de ni nyon mongs pa'i sgrib pa rnam par dag pas rnam par dag par 'gyur gyi/shes bya'i sgrib pa rnam par dag pas ni ma yin no/ /byang chub sems dpa'i rigs ni nyon mongs pa'i sgrib pa rnam par dag pa dang / shes bya'i sgrib pa rnam par dag pas kyang / rnam par dag par 'gyur ba'i phyir te/ de lta bas na thams cad las khyad par du 'phags pa bla na med pa zhes bya'o/ /gzhan yang byang chub sems dpa' ni rnam pa bzhis na nyan thos dang rang sangs rgyas rnams las khyad par du 'phags par rig par bya ste/ bzhi gang zhe na/ dbang po las gyur pa dang / sgrub pa las gyur pa dang / mkhas pa las gyur pa dang / 'bras bu las gyur pa'o/ /de la dbang po las gyur pa'i khyad par ni 'di yin te/ byang chub sems dpa' ni rang bzhin gyis dbang po rno ba yin la/ rang sangs rgyas ni dbang po 'bring yin/ nyan thos ni dbang po rtul ba yin no/ /de la sgrub pa las gyur pa'i khyad par ni 'di yin te/nyan thos dang rang sangs rgyas ni bdag la phan pa'i phyir zhugs pa yin la/ byang chub sems dpa' ni bdag la yang phan pa dang / gzhan la yang phan pa dang / skye bo mang po la phan pa dang / skye bo mang po la bde ba dang / 'jig rten la snying brtse ba dang / lha dang mi rnams kyi skye bo phal po che'i don dang /phan pa dang bde ba'i phyir zhugs pa yin no/ /de la mkhas pa las gyur pa'i khyad par ni 'di yin te/ nyan thos dang rang sangs rgyas ni phung po dang / khams dang / skye mched dang / rten cing 'brel par 'byung ba dang / gnas dang gnas ma yin pa dang /bden pa la mkhas par byed cing byang chub sems dpa' ni de dag dang / rig pa'i gnas gzhan thams cad la yang mkhas par byed do/ /de la 'bras bu las gyur pa'i khyad par ni 'di yin te/ nyan thos ni nyan thos kyi byang chub kyi 'bras bu thob par byed do/ /rang sangs rgyas ni rang byang chub kyi 'bras bu thob par byed do//byang chub sems dpa' ni bla na med pa yang dag par rdzogs pa'i byang chub kyi 'bras bu thob par byed do/ /gang dag gis na 'di ni byang chub sems dpa' yin no zhes gzhan dag gis de ltar shes par 'gyur ba byang chub sems dpa'i pha rol tu phyin pa rnams kyi rigs kyi rtags yod pa ni drug po 'di dag yin te/sbyin pa'i pha rol tu phyin pa'i rigs kyi rtags dang / tshul khrims dang / bzod pa dang / brtson 'grus dang / bsam gtan dang / shes rab kyi pha rol tu phyin pa'i rigs kyi rtags so/ /de la byang chub sems dpa'i sbyin pa'i pha rol tu phyin pa'i rigs kyi rtags ni 'di yin te/'di la byang chub sems dpa' ni rang bzhin gyis sbyin pa la dga' ba yin te/ sbyin par bya ba'i chos rnams yod de bdog na rtag tu rgyun mi 'chad par gzhan dag la bgo bsha' byed pa'i ngang tshul can yin te / rab tu dga' ba'i sems kyis sbyin par byed kyi/yid mi dga' bas ni ma yin no/ /nyung ngu las kyang bgo bsha' byed pa yin te/ bzang po sbyin par byed kyi/ ngan pa ni ma yin no/ /sbyin pa mi byed ma byin par len pa la yang 'dzem par byed do zer ro/ /gzhan dag la yang sbyin pa'i bsngags pa rjod par byed do/ / de dag kyang sbyin pa la 'dun pa skyed du 'jug par byed do/ /sbyin phod pa mthong na yang yi rangs pa dang / yid bde bar 'gyur ro/ /bla ma rnams dang / rgan rabs rnams dang / yon gnas rnams dang / bkur sti bya bar 'os pa rnams la yang langs nas stan stobs par byed do/ / sems can gyi bya ba dag la dris kyang rung / ma dris kyang rung ste/ de dang de dag la 'jig rten 'di dang 'jig rten pha rol tu bde bar 'gyur ba'i rigs pa'i man ngag sbyin par byed do/ /rgyal po dang / dgra dang / chom rkun dang / me dang / chu la sogs pas 'jigs skrag pa'i sems can rnams la mi 'jigs pa sbyin par byed cing /de dag la 'jigs pa sna tshogs mang po drag po de las kyang ci nus kyis yongs su skyob par byed do/ /de'i lag tu gzhan gyi nor gtams na yang dor mi byed do/ /gzhan gyi bu lon chags na yang slu bar mi byed cing dor mi byed do / /rang gi rigs brgyud la yang g.yo mi byed cing /klan ka mi tshol lo/ /nor bu dang / mu tig dang / bai DUR+Ya dang / dung dang / man shel dang / byi ru dang / gser dang / dngul dang / rdo'i snying po dang / spug dang / rin po che dmar po dang / g.yas su 'khyil pa la sogs pa yo byad kyi rnam pa dag la rmongs shing sems phyin ci log tu gyur pa la yang /de ci nas gzhan gyis kyang slu bar mi 'gyur bar yang dag par khong du chud par byed na/ de la bdag nyid kyis slu bar lta ga la byed/ rang bzhin gyis longs spyod rgya chen po la mos pa yin la/ de la longs spyod dang yongs su spyod pa rgya chen po thams cad la yang sems 'jug par byed do//las kyi mtha' rgya chen po dag la mos pa yin gyi 'du ba'i sgo chung ngu dag la ma yin no/ /'jig rten na zhugs pa ni 'di dag yin te/ 'di lta ste/ bud med la zhugs pa dang / chang la zhugs pa dang / rgyan po la zhugs pa dang /zlos gar mkhan dang / bro gar mkhan dang / bzhad gad byed pa dang / 'jo sgeg byed pa la sogs pa la lta ba la zhugs pa dang / de lta bu dag la zhugs pa las myur ba myur bar 'dod chags dang bral ba thob par 'gyur te/ ngo tsha shes pa dang / khrel yod pa ston to/ /longs spyod rgya chen po dag rnyed na yang shas cher brkam par mi 'gyur na/chung ngu la lta ci smos te/ de ltar 'di lta bu dag dang mthun pa 'di dag ni/ byang chub sems dpa'i sbyin pa'i pha rol tu phyin pa'i rigs kyi rtags yin par rig par bya'o/ /de la byang chub sems dpa'i tshul khrims kyi pha rol tu phyin pa'i rigs kyi rtags ni 'di dag yin te/'di la byang chub sems dpa' ni rang bzhin gyis lus dang ngag gi las mi dge ba chung ngu dang ldan pa yin gyi/ shin tu drag po dang / sems can la shin tu gnod pa dang ldan pa ma yin te/ sdig pa'i las shig byas su zin kyang myur ba myur bar 'gyod par 'gyur la/de la yang 'dzem bzhin du spyod kyi dga' bzhin pas ma yin no/ /sems can rnams la lag pa dang / bong ba dang / dbyig pa dang / mtshon cha la sogs pas rnam par mi 'tshe ba'i rang bzhin can no/ /rang bzhin gyis mnyes gshin pa dang / sems can rnams la dga' ba yin no/ /bkur sti bya bar 'os pa rnams la yang dus su gus par smra ba dang / phyag bya ba dang / ldang ba dang / thal mo sbyor ba dang / 'dud pa'i las kyis bsnyen bkur byed pa yin/ mthun par 'dzin pa dang / shes nyen can dang / pha rol gyi sems dang mthun par 'jug pa yin/'dzum pa sngon du gtong ba dang / bzhin gyi mdangs 'byin pa dang / khro gnyer med pa dang / gsong por smra ba yin no/ /sems can rnams la phan 'dogs pa rnams la byas pa gzo zhing byas pa shes pa yin/ sems can slong ba rnams la drang por byed kyi/ de dag la g.yo dang sgyus slu bar mi byed do//chos kyis bab che la ma yin par longs spyod sgrub par byed kyi chos ma yin pas ni ma yin no/ /rang bzhin gyis kyang bsod nams la dga' ba yin te/ gzhan bsod nams byed pa dag la yang stod par byed na/ bdag nyid byed pa lta ci smos/ 'di lta ste gzhan dag la gsod pa dang /'ching ba dang / gcod pa dang / rdeg pa dang / smod pa dang / bsdigs pa la sogs pa byed pa mthong yang rung / thos kyang rung ste/ gzhan la gnod pas shin tu gnod par 'gyur ro/ /chos yang dag par blang ba ched cher 'dzin pa dang / tshe phyi ma ched cher 'dzin pa yin te /kha na ma tho ba phra rab tsam dag la yang 'jigs par lta na mang po lta la ci smos/ gzhan gyi las dang gzhan gyi bya ba dag la grogs byed du 'gro ste/ 'di lta ste zhing las dang / tshong bya ba dang / ba lang 'tsho ba dang / rgyal po'i zha 'bring bya ba dang / yi ge bri ba dang / rtsis bya ba dang /shod dgod pa dang / grangs bzung ba dang / lag rtsis bya ba dang / rje bo dang bsdums pa dang / khyim mi dang bsdums pa dang / mdza' bshes dang mi mdza' ba bsdums pa dang / rgyal po dang bsdums pa dang / longs spyod rnams sgrub pa dang / bsrung ba dang / bsdu ba dang / phyir 'gyed pa dang /gtong ba dang / bag ma gtong ba dang / bag ma len pa dang / lhag par za ba dang / 'dus shing za ba rnams dang / de lta bu dang mthun pa dag la grogs byed du 'gro bar byed kyi/ bdag dang gzhan dag la gnod pa dang / sdug bsngal ba dang / phan par mi 'gyur ba gang dag yin pa'i 'thab mo dang /mtshang 'dru ba dang / 'gyed pa dang / rtsod pa rnams dang / pha rol la rnam par 'tshe ba'i las gzhan dag la ni ma yin no/ /bya ba ma yin pa 'di lta ste/ sdig pa mi dge ba bcu'i las kyi lam dag las kyang de dag zlog par byed do/ /gzhan gyi dbang du byed cing / gzhan la rag las par byed de/bzod pa dang / tshul khrims mtshungs pa'i phyir/ gzhan dag gis bdag gi don 'dor du bcug nas/ rang gi don la ci dga' mgur bsko bar byed do/ /sems mnyen zhing sems des pa yin la/ kun nas mnar sems dang / khong khro ba'i sems yun ring du 'dzin par mi byed de/gzhan du na de'i mod la de'i sems bzang por 'gyur ro/ /bden pa ched cher 'dzin pa yin te/ yang dag pa ma yin pa'i tshig gis gzhan la slu bar mi byed do/ /gzhan dag gi mdza' bshes la dbye na bya bar mi dga' zhing mi byed do/ / ma gtsigs pa dang / mi dgos pa dang / don med pa dang / bab chol du yang smra bar mi byed do/ /bdag gi bran la sogs pa g.yog 'khor rnams la yang snyan par smra zhing pha rol gyi zhe gcod pa mi smra na gzhan dag lta la ci smos yon tan la dga' ba yin te/ gzhan dag gi yang dag pa'i bsngags pa rjod par byed de/de ltar 'di lta bu dang mthun pa rnams ni byang chub sems dpa'i tshul khrims kyi pha rol tu phyin pa'i rigs kyi rtags yin par rig par bya'o/ /de la byang chub sems dpa'i bzod pa'i pha rol tu phyin pa'i rigs kyi rtags ni 'di dag yin te/ 'di la byang chub sems dpa' ni gzhan dag gis gnod pa byas kyang rang bzhin gyis kun nas mnar sems su mi byed la gnod par yang mi byed do//gros btab na yang myur du nyan par byed la zhe la mi 'dzin cing / yun ring du 'khon du 'dzin par mi byed de/ de ltar 'di lta bu dang mthun pa rnams ni byang chub sems dpa'i bzod pa'i pha rol tu phyin pa'i rigs kyi rtags yin par rig par bya'o//de la byang chub sems dpa'i brtson 'grus kyi pha rol tu phyin pa'i rigs kyi rtags ni 'di dag yin te/ 'di la byang chub sems dpa' ni rang bzhin gyis 'bad pa dang ldan pa yin te/ nang bar sngar ldang zhing dgongs kar nyal bar byed pa dang /gnyid kyi bde ba dang / nyal ba'i bde ba dang / glos dbab pa'i bde ba ha cang nyams su len par mi byed pa dang / bya ba zhig byung na don de 'grub par bya ba'i phyir byed mi 'dod pa zil gyis mnan te/ le lo la so sor brtags nas/ rtsom par byed pa dang /bya ba thams cad rtsol ba la yang nges par brtan pa yin te/ ma byas sam ma zin gyi bar du/ thams cad kyi thams cad du brtson pa mi 'dor zhing / bar ma dor yang sgyid lug par mi byed pa dang / don gyi mchog rgya chen po dag la yang sems zhum par mi byed cing / bdag la khyad du gsod par mi byed pa dang /bdag gis ni 'di dag rtogs par nus te/ zho sha dang ldan no snyam du spro ba bskyed pa dang / tshogs pa chen po'i nang du 'gro ba'am/ gzhan dag dang 'gyed par ram/ phyir brgal ba'am/ de las gzhan pa'i las dka' ba dag la yang brten pa yin zhing /don dang ldan pa'i brtsal ba chen po dag la yang shas cher skyo bar mi byed na/ chung ngu dag lta la ci smos te/ de ltar 'di lta bu dang mthun pa rnams ni byang chub sems dpa'i brtson 'grus kyi pha rol tu phyin pa'i rigs kyi rtags yin par rig par bya'o/ /de la byang chub sems dpa'i bsam gtan gyi pha rol tu phyin pa'i rigs kyi rtags ni 'di dag yin te/'di la byang chub sems dpa' ni chos kyi don la nges par sems pa na rang bzhin gyis g.yeng ba mi mang ba dang / dgon pa nags tshal gyi gnas/ bas mtha'i gnas mal mi rnams kyis dben par gyur pa sdig pa'i skye bo med pa/nang du yang dag 'jog dang 'tsham pa dag mthong ngam thos pa na/ kye ma mngon par 'byung ba dang / rab tu dben pa ni bde'o zhes mngon par 'byung ba dang / rab tu dben pa la shin tu spro ba skyed do/ /rang bzhin gyis kyang nyon mongs pa shas chung zhing sgrib pa shas chung ba la gnas ngan len shas chung ba yin no//de rab tu dben pa na gnas shing / rang gi don la yongs su rtog pa na/ sdig pa can gyi rtog pa rung ba ma yin pa dag gis shin tu sems 'khrug par mi 'gyur zhing yongs su bzung nas mi gnas so/ /mi mdza' ba'i phyogs la yang myur ba myur bar byams pa'i sems nye bar 'jog par byed na/mdza' bo dang tha mal pa'i phyogs lta la ci smos/ sems can sdug bsngal rnam pa sna tshogs kyis sdug bsngal ba dag mthong ngam thos na snying rje chen po'i sems bskyed de/ sems can de dag gi sdug bsngal bsal ba'i phyir/ ci nus ci lcogs kyis nyams su len par byed do//rang bzhin gyis kyang sems can rnams la phan par 'dod pa dang / bde bar 'dod pa yin no/ /rgud par gyur pa nye dus sdug bsngal ba'am/ longs spyod kyis sdug bsngal ba'am/ bsad pa'am/ bcings pa'am/ spyugs pa'am/ de lta bu dang mthun pa'i rgud pa dag la yang mi dga' ba med pa yin no / /yid kyang gzhungs te/ chos rnams blangs pa dang / gzung ba dang / shin tu 'dzin par nus so/ /dran pa'i stobs dang yang ldan pa yin te/ des byas nas yun ring du lon pa dang / bshad nas yun ring du lon pa yang rjes su dran la/gzhan dag la yang rjes su dran par byed do/ /de ltar 'di lta bu dang mthun pa rnams ni byang chub sems dpa'i bsam gtan gyi pha rol tu phyin pa'i rigs kyi rtags yin par rig par bya'o/ /de la byang chub sems dpa'i shes rab kyi pha rol tu phyin pa'i rigs kyi rtags ni 'di dag yin te/'di la byang chub sems dpa' ni rig pa'i gnas shes bya thams cad la 'jug par bya ba'i phyir lhan cig skyes pa'i shes rab dang ldan pa yin/ yid mi rtul ba yin/ blo mi zhan pa yin/ rmongs pa'i rang bzhin can ma yin no/ /bag med pa'i gnas de dang de dag spong ba la so sor rtog pa'i mthu dang ldan pa yin te/de ltar 'di lta bu dang mthun pa rnams ni byang chub sems dpa'i shes rab kyi pha rol tu phyin pa'i rigs kyi rtags yin par rig par bya ste/ de dag ni byang chub sems dpa'i rigs kyi rtags rags pa dang / rjes su dpag tu rung ba yin par rig par bya'o/ /yang dag pa'i don du nges par bya ba ni sangs rgyas bcom ldan 'das rnams nyid kyis mngon sum du gzigs par zad do/ /gang gi phyir byang chub sems dpa' rnams kyi rigs de ni rang bzhin gyis de ltar yon tan dang ldan zhing bzang la/dge ba dang / dkar po'i chos dang ldan pa de'i phyir de bzhin gshegs pa'i go 'phang de tsam du bskyed par dka' ba/ gtso bor gyur pa/ bsam gyis mi khyab pa/ mi g.yo ba/ bla na med pa de 'thob pa'i rgyur rung gi /de ma yin du zin na ni mi rung ngo / /byang chub sems dpa' ni ji srid du dkar po'i chos dang mi mthun pa nye ba'i nyon mongs pa bzhi las/zad par ram/ kha cig gis nye ba'i nyon mongs pa can du ma gyur pa de srid du/ rang bzhin gyis 'di ltar dge ba'i chos de dag dang ldan par 'gyur ro/ /gang gi tshe nye ba'i nyon mongs pa can du gyur pa de'i tshe/ de dkar po'i chos 'di dag la yang mi snang la/ngan song dag tu yang skabs 'ga' skye bar 'gyur te/ byang chub sems dpa' ni ngan song du skyes na yang / rigs kyis bsgyur bas de las gzhan pa'i sems can ngan song du skyes pa rnams las shas cher khyad par du 'phags par rig par bya'o//'di la byang chub sems dpa' ni yun ring mo zhig nas brgya lam brgya lam na ngan song du skye bar zad de/ skyes par gyur na yang ngan song dag nas myur du yongs su thar bar 'gyur la/ ji ltar sems can gzhan dag ngan song du skyes pa de bzhin du ngan song du sdug bsngal drag po tshor ba myong bar mi 'gyur te/sdug bsngal gyi tshor ba shin tu chung ngu des reg na yang shas cher skyo ba skyed par 'gyur ro/ /der skyes pa'i sems can sdug bsngal ba de dag la yang 'di ltar sangs rgyas kyi snying rje chen po'i rgyu'i rigs de nyid kyis bskul bas/ snying rje'i sems skye bar 'gyur te/'di lta bu dang mthun pa dag gis na/ byang chub sems dpa' ngan song du skyes pa ni de las gzhan pa'i sems can ngan song du skyes pa rnams las khyad par du 'phags par rig par bya'o/ /de la byang chub sems dpa'i dkar po'i chos dang mi mthun pa'i nye ba'i nyon mongs pa bzhi po de dag gang zhe na/sngon bag med par gyur cing nyon mongs pa la goms pas nyon mongs pa drag po dang / nyon mongs pa yun ring ba 'di ni nye ba'i nyon mongs pa dang po'o/ /blun zhing mi mkhas la sdig pa'i grogs po la brten pa 'di ni nye ba'i nyon mongs pa gnyis pa'o//bla ma dang / rje bo dang / rgyal po dang / chom rkun dang / phyir rgol ba la sogs pas nan gyis mnan te/ bdag la dbang med pa dang / sems kyi 'khrul pa 'di ni nye ba'i nyon mongs pa gsum pa'o/ /yo byad med cing 'tsho ba la lta ba 'di ni nye ba'i nyon mongs pa bzhi pa'o/ / byang chub sems dpa'i rigs dang ldan pa yang rgyu bzhis na bla na med pa yang dag par rdzogs pa'i byang chub mngon par rdzogs par 'tshang rgya bar mi nus so/ /bzhi gang zhe na/ 'di la byang chub sems dpa' dang po nyid nas kyang dge ba'i bshes gnyen sangs rgyas sam byang chub sems dpa' byang chub kyi lam phyin ci ma log par ston pa dang ma phrad pa 'di ni rgyu dang po'o//gzhan yang byang chub sems dpa' dge ba'i bshes gnyen dang phrad du zin kyang byang chub sems dpa'i bslab pa dag la phyin ci log tu 'dzin cing / phyin ci log tu slob pa 'di ni rgyu gnyis pa'o//gzhan yang byang chub sems dpa' dge ba'i bshes gnyen dang yang phrad la/ byang chub sems dpa'i bslab pa dag la phyin ci log tu mi slob tu zin kyang / sbyor ba de la sbyor ba g.yel zhing le lo byed pa yin te/ shas cher rgyun du brtson pa dang mi ldan pa 'di ni rgyu gsum pa'o//gzhan yang byang chub sems dpa' dge ba'i bshes gnyen dang yang phrad la byang chub sems dpa'i bslab pa dag la yang phyin ci ma log par slob cing / sbyor ba de la brtson 'grus brtsams su zin kyang / byang chub kyi phyogs kyi chos rnams yun ring du nyams 'og tu chud par ma byas pas dbang po yongs su ma smin pa dang byang chub kyi phyogs yongs su ma rdzogs pa 'di ni rgyu bzhi pa ste/rigs yod du zin kyang rgyu 'di dag dang ldan pa'i phyir byang chub mi thob la/ mi ldan na ni thob par 'gyur ro/ /rigs med na ni thams cad kyi thams cad rnam pa thams cad du byang chub thob par mi 'gyur ba kho nar rig par bya'o//byang chub sems dpa'i sa'i gzhi'i rnal 'byor gyi gnas las/ rigs kyi le'u ste dang po'o// //'di la byang chub sems dpa'i dang po'i sems bskyed pa ni byang chub sems dpa'i yang dge ba'i smon lam thams cad kyi nang na yang dag pa'i smon lam gyi dang po yin te/de las gzhan pa'i yang dag pa'i smon lam rnams sdud pa yin no/ /de lta bas na de ni yang dag pa'i smon lam dang po'i ngo bo nyid yin no/ /byang chub sems dpa' de byang chub tu sems kyis smon lam 'debs pa na/ 'di ltar sems mngon par 'du byed cing /tshig 'di skad ces kyang smras te/ kye ma bdag bla na med pa yang dag par rdzogs pa'i byang chub mngon par rdzogs par 'tshang rgya bar gyur cig /sems can thams cad kyi don yang byed cing shin tu mthar thug pa'i mya ngan las 'das pa dang / de bzhin gshegs pa'i ye shes la 'god par gyur cig ces de de ltar bdag gi byang chub dang sems can gyi don sgrub pa na/sems skyed par byed do/ /de lta bas na sems bskyed pa ni sgrub pa'i rnam pa yin no/ /sems bskyed pa de yang byang chub de dang / sems can gyi don la dmigs nas sgrub par byed kyi/ dmigs pa med par ni ma yin te/ de lta bas na sems bskyed pa de ni byang chub la dmigs pa dang / sems can gyi don la dmigs pa yin no/ /sems bskyed pa de yang byang chub kyi phyogs kyi dge ba'i rtsa ba thams cad sdud pa'i thog mar 'gro ba'i phyir/ dge ba dang / mchog tu dge ba dang /bzang ba dang / mchog tu bzang ba dang / legs pa dang / mchog tu legs pa'i yon tan dang ldan pa dang / sems can thams cad la brten pa'i lus dang ngag dang yid kyi nyes pa spyod pa dang mi mthun pa yin no/ /'di lta ste/ byang chub sems dpa'i dang po sems bskyed pa de ni de las gzhan pa 'jig rten pa dang /'jig rten las 'das pa'i don dag la yang dag pa'i smon lam dge ba de dag thams cad kyi nang na yang dag pa'i smon lam gyi mchog bla na med pa yin no/ /de ltar na dang po sems bskyed pa de ni ngo bo nyid las kyang rig par bya/ rnam pa dang / dmigs pa dang / yon tan dang / khyad par du 'phags pa las kyang mtshan nyid lngar rig par bya'o/ /byang chub sems dpa' ni sems de bskyed ma thag tu bla na med pa'i byang chub theg pa chen po la zhugs pa dang / 'di lta ste/ brda dang / tha snyad kyi tshul gyis byang chub sems dpa' zhes bya ba'i grangs su 'gro ba yang yin te/de lta bas na sems bskyed pa de ni 'jug par bsdus pa yin no/ /byang chub sems dpa' sems de bskyed nas rim gyis bla na med pa yang dag par rdzogs pa'i byang chub mngon par rdzogs par 'tshang rgya bar 'gyur gyi/ ma bskyed par ni ma yin te/de lta bas na sems bskyed pa de ni bla na med pa yang dag par rdzogs pa'i byang chub kyi rtsa ba yin no/ /byang chub sems dpa' sems can sdug bsngal ba rnams la snying rje dang ldan zhing / yongs su bskyab par sems pa yang sems de skyed par byed de/ de lta bas na sems bskyed pa de ni snying rje'i rgyu mthun pa yin no/ /byang chub sems dpa' ni sems bskyed pa de la brten cing gnas nas/ byang chub sems dpa'i bslab pa byang chub kyi phyogs kyi chos rnams dang / sems can gyi don bya ba dag la sbyor bar byed de/ de lta bas/ na sems bskyed pa de ni byang chub sems dpa'i bslab pa rnams kyi rten yin te/ de ltar dang po sems bskyed pa de ni bsdu ba dang / rtsa ba dang / rgyu mthun pa dang / rten du gyur pa las rig par bya'o/ /byang chub sems dpa'i dang po sems bskyed pa de yang mdor na rnam pa gnyis te/nges par 'byin pa dang / nges par 'byin pa ma yin pa'o/ /de la nges par 'byin pa ni gang skyes nas gtan du 'jug la phyir ldog par mi 'gyur ba'o/ /nges par 'byin pa ma yin pa de ni gang skyes nas gtan du mi 'jug la phyir ldog par 'gyur ba'o/ /sems bskyed pa de'i ldog pa la yang rnam pa gnyis te/gtan du ba dang / gtan du ba ma yin pa'o/ /de la gtan du ba ni 'di ltar sems lan cig log nas phyis byang chub kyi phyir mi skye ba'o/ /gtan du ba ma yin pa ni 'di ltar sems log kyang byang chub kyi phyir yang dang yang skye bar 'gyur ba'o/ / sems skye ba de yang rkyen bzhi dang / rgyu bzhi dang / stobs bzhis skye bar rig par bya'o/ /de la rkyen bzhi gang zhe na/ 'di la rigs kyi bu'am/ rigs kyi bu mos de bzhin gshegs pa'am/ byang chub sems dpa'i cho 'phrul dang / mthu bsam gyis mi khyab pa dang / rmad du byung ba mthong ngam/yid brtan pa las thos kyang rung ste/ des mthong ngam thos nas 'di snyam du sems te/ kye ma gang la gnas par 'gyur ba'am/ zhugs par gyur pa'i mthu 'di lta bu de dang / cho 'phrul de lta bu de mthong ba dang / thos pa'i byang chub de ni mthu che ba yin no snyam nas de mthu mthong ba dang thos pa de nyid kyi dbang du byas te/byang chub chen por mos shing byang chub chen por sems skyed par byed pa 'di ni sems skye ba'i rkyen dang po'o/ /des mthu mthong ba'am thos pa med du zin kyang bla na med pa yang dag par rdzogs pa'i byang chub las brtsams te/byang chub kyi sde snod ston pa na dam pa'i chos nyan par byed do/ /mnyan nas kyang mngon par dad par byed do/ /mngon par dad nas kyang dam pa'i chos thos pa'i dbang du byas nas/ de bzhin gshegs pa'i ye shes la mos shing / de bzhin gshegs pa'i ye shes thob par bya ba'i phyir/sems skyed par byed pa 'di ni sems skye ba'i rkyen gnyis pa'o/ /des chos ma thos su zin kyang byang chub sems dpa'i dam pa'i chos nub tu cha bar nye bar gyur pa dag mthong ngo / /mthong nas kyang yang de 'di snyam du sems te/ kye ma byang chub sems dpa'i dam pa'i chos gnas pa ni sems can dpag tu med pa dag gi sdug bsngal sel bar byed pa yin gyis/bdag gis 'di lta ste/ sems can 'di dag nyid kyi sdug bsngal bsal ba'i phyir/ byang chub sems dpa'i dam pa'i chos yun ring du gnas par bya ba'i don du sems bskyed par bya gor ma chag snyam nas/de dam pa'i chos gzung ba nyid kyi dbang du byas te/ de bzhin gshegs pa'i ye shes la mos shing / de bzhin gshegs pa'i ye shes thob par bya ba'i phyir/ sems skyed par byed pa 'di ni sems skye ba'i rkyen gsum pa'o/ /des dam pa'i chos nub tu nye bar gyur pa ma mthong du zin kyang /dus kyi tha ma dus kyi mjug tu bab pa'i tshe/ dus ngan pa'i sems can rnams kyi lus 'di ltar nye ba'i nyon mongs pa bcu po 'di lta ste/ gti mug shas che ba dang / ngo tsha med cing khrel med pa shas che ba dang / phrag dog dang ser sna shas che ba dang /sdug bsngal shas che ba dang / gnas ngan len shas che ba dang / nyon mongs pa shas che ba dang / nyes par spyod pa shas che ba dang / bag med pa shas che ba dang / le lo shas che ba dang / ma dad pa shas che ba rnams kyis nye bar nyon mongs pa mthong ngo / /mthong nas kyang yang 'di snyam du sems te/kye ma snyigs ma'i dus chen po de ni byung gis med do/ /nye ba'i nyon mongs pa can gyi dus 'di'i skabs su ni nyan thos dang / rang sangs rgyas kyi byang chub dman pa la sems bskyed pa yang rnyed par sla ba ma yin na/ bla na med pa yang dag par rdzogs pa'i byang chub tu lta ci smos te/ re zhig bdag gis sems bskyed pa dang / de dag kyang 'di ltar bdag gi rjes su slob cing / gzhan dag gis kyang sems bskyed par 'gyur ro snyam nas/ de dus kyi tha ma'i tshe/ sems bskyed pa rnyed par dka' ba'i dbang du byas te/byang chub chen po la mos shing byang chub chen por sems skyed par byed pa 'di ni sems skye ba'i rkyen bzhi pa'o/ /de la rgyu bzhi gang zhe na/ rigs phun sum tshogs pa ni byang chub sems dpa'i sems skye ba'i rgyu dang po'o/ /sangs rgyas dang / byang chub sems dpa' dang /dge ba'i bshes gnyen gyis yongs su zin pa ni byang chub sems dpa'i sems skye ba'i rgyu gnyis pa'o/ /sems can rnams la snying rje ba ni byang chub sems dpa'i sems skye ba'i rgyu gsum pa'o/ /'khor ba'i sdug bsngal dang / dka' ba spyad pa'i sdug bsngal yun ring po rnam pa sna tshogs pa drag bo bar chad med pas kyang mi 'jigs pa 'di ni byang chub sems dpa'i sems skye ba'i rgyu bzhi pa'o//de la byang chub sems dpa'i rigs phun sum tshogs pa ni/ chos nyid kyis thob pa nyid yin par rig par bya'o/ /byang chub sems dpa'i bshes gnyen phun sum tshogs pa ni rnam pa bzhir rig par bya ste/'di la byang chub sems dpa'i bshes gnyen ni thog ma nas kyang / blun po ma yin zhing / yid rtul ba'i rang bzhin can ma yin te/ mkhas shing mdzangs la lta ba ngan pa la zhugs pa yang ma yin pa 'di ni bshes gnyen phun sum tshogs pa dang po'o//bag med pa la yang de 'jug par mi byed la/ bag med pa'i gnas kyang de la sgrub par mi byed pa 'di ni bshes gnyen phun sum tshogs pa gnyis pa'o/ /nyes par spyod pa la yang de 'jug par mi byed la nyes par spyod pa'i gnas kyang de la sgrub par mi byed pa 'di ni bshes gnyen phun sum tshogs pa gsum pa'o//de dad pa dang / 'dun pa dang / yang dag par blang ba dang / brtson 'grus dang / thabs kyi yon tan ches khyad par du 'phags pa dag las 'dun pa bzlog la/ dad pa dang / 'dun pa dang / yang dag par blang ba dang /brtson 'grus dang / thabs kyi yon tan ches dman pa dag la 'jug par mi byed de/ 'di lta ste/ theg pa chen po las 'dun pa bzlog la/ nyan thos kyi theg pa'am/ rang sangs rgyas kyi theg pa la 'jug par mi byed pa dang / bsgoms pa las byung ba las 'dun pa bzlog la/bsams pa las byung ba la 'jug pa'am/ bsams pa las byung ba las 'dun pa bzlog la/ thos pa las byung ba la 'jug pa 'am/ thos pa las byung ba las 'dun pa bzlog la/ zhal ta byed pa la 'jug par mi byed pa dang / tshul khrims las byung ba las 'dun pa bzlog la/sbyin pa las byung ba la 'jug pa'am/ de ltar 'di lta bu dang mthun pa'i yon tan ches khyad par du 'phags pa dag las 'dun pa bzlog la/ 'di lta bu dang mthun pa'i yon tan ches dman pa dag 'dzin du 'jug par mi byed pa 'di ni bshes gnyen phun sum tshogs pa bzhi pa'o//byang chub sems dpa' ni rgyu rnam pa bzhis na/ sems can rnams la snying rje ba'i shas che ba yin te/ phyogs bcu'i 'jig rten gyi khams mtha' yas mu med pa dag na 'jig rten gyi khams gang na sdug bsngal med pa de lta bu dag kyang yod na/ byang chub sems dpa' de ni gang na sdug bsngal yod cing / sdug bsngal dang bcas pa'i khams su skye bar byed kyi/ sdug bsngal med par ni ma yin te/ gzhan sdug bsngal ci yang rung bas thebs shing gnod par gyur te/ non pa mthong ba dang / bdag kyang sdug bsngal ci yang rung bas thebs shing gnod par gyur te non pa mthong ba dang /gzhan nam bdag gam gnyis ka yang rung ste/ sdug bsngal yun ring ba rnam pa sna tshogs pa drag po bar chad med pas thebs shing gnod par gyur te non pa mthong na 'di ltar byang chub sems dpa' de ni rang gi rigs la brten cing /rang bzhin gyis dge bas na goms pa med par yang dmigs pa rten bzhi po 'di dag gis snying rje chung ngu dang / 'bring po dang / chen po skye bar 'gyur ro/ /byang chub sems dpa' ni sems can rnams la snying rje yang dag par sngon du btang nas/ rgyu bzhi po 'di dag gis 'khor ba'i sdug bsngal yun ring ba rnam pa sna tshogs pa drag po bar chad med pas kyang mi 'jigs shing mi skrag na chung ngus lta ci smos te/ rang bzhin gyis snying stobs che zhing brtan pa dang ldan stobs dang ldan pa yin te/ 'di ni rgyu dang po'o/ /mkhas pa dang / yang dag par sems pa'i ngang tshul can dang / so sor rtog pa'i stobs dang ldan pa yin te/ 'di ni rgyu gnyis pa'o/ /bla na med pa yang dag par rdzogs pa'i byang chub la mos pa chen po dang ldan pa yin te/ 'di ni rgyu gsum pa'o/ /sems can rnams la yang cher snying rje ba dang ldan pa yin te/'di ni rgyu bzhi pa'o/ /stobs bzhi gang zhe na/ nang gi stobs dang / gzhan gyi stobs dang / rgyu'i stobs dang / sbyor ba'i stobs so/ /de la rang gi mthus bla na med pa yang dag par rdzogs pa'i byang chub 'dod par gyur pa gang yin pa de ni byang chub sems dpa'i byang chub tu sems skye ba'i nang gi stobs zhes bya'o//gzhan gyi mthus bla na med pa yang dag par rdzogs pa'i byang chub la 'dod pa skyed pa gang yin pa de ni byang chub sems dpa'i sems skye ba'i gzhan gyi stobs zhes bya'o/ /sngon theg pa chen po dang ldan pa'i dge ba'i chos la goms pas da ltar sangs rgyas dang byang chub sems dpa' mthong ba tsam mam/de dag gi bsngags pa thos pa tsam gyis kyang myur du sems skye bar 'gyur na/ dam pa'i chos thos pa'am/ mthu mthong bas lta ci smos te/ de ni byang chub sems dpa'i sems skye ba'i rgyu'i stobs zhes bya'o/ / tshe 'di nyid la skyes bu dam pa la brten pa dang /dam pa'i chos mnyan pa dang / sems pa la sogs pa dge ba'i chos yun ring du goms par byas pa gang yin pa de ni byang chub sems dpa'i sems skye ba'i sbyor ba'i stobs zhes bya'o/ /de la byang chub sems dpa'i rkyen bzhi dang / rgyu bzhi po dag tshogs pa'am/so so la brten nas/ gal te stobs gnyis po nang gi stobs dang / rgyu'i stobs 'di gnyis tshogs pa'am/ so so las nges par sems de skyes na ni des na de brtan pa dang / snying por gyur pa dang / mi g.yo bar 'gyur ro/ /gzhan gyi stobs dang / sbyor ba'i stobs gnyis las skyes pa'i sems de mi brtan par rig par bya'o//byang chub sems dpa' sems ldog pa'i rgyu ni rnam pa bzhi ste/ bzhi gang zhe na/ rigs dang mi ldan pa yin/ sdig pa'i grogs pos yongs su zin pa yin/ sems can rnams la snying rje chung ba yin/ 'khor ba'i sdug bsngal yun ring po rnam pa sna tshogs pa drag po bar chad med pas 'jigs te/shin tu 'jigs shing skrag la dngangs par 'gyur ba yin te/ sems ldog par 'gyur ba'i rgyu bzhi po 'di dag ni sems skye ba'i rgyu bzhi po 'di dag bzlog pa las snga ma bzhin du rgyas par rig par bya'o//'di gnyis ni byang chub sems dpa' dang po sems bskyed pa brtan pa'i ngo mtshar rmad du byung ba'i chos 'jig rten dang thun mong ma yin pa ste/ gnyis gang zhe na/ sems can thams cad chung ma'i tshul du yongs su 'dzin pa dang / chung ma yongs su 'dzin pa'i nyes pas kyang gos par mi 'gyur ba yin no//de la chung ma yongs su 'dzin pa'i nyes pa ni 'di yin te/ chung ma la phan 'dogs pa dang / gnod pa byed pa las mthun pa dang mi mthun pas nyon mongs pa can du 'gyur ba ste/[ (]da [,]de [)]gnyis ni byang chub sems dpa' la med do/ /'di gnyis ni byang chub sems dpa' dang po sems bskyed pa brtan pa'i sems can rnams la lhag pa'i bsam pa bzang po 'jug par 'gyur ba yin te/gnyis gang zhe na/ phan pa bya ba'i lhag pa'i bsam pa dang bde ba bya ba'i lhag pa'i bsam pa'o/ /de la phan pa bya ba'i lhag pa'i bsam pa ni mi dge ba'i gnas nas bton nas/dge ba'i gnas su 'god par 'dod pa gang yin pa'o/ /bde ba bya ba'i lhag pa'i bsam pa ni sems can phongs pa dang / mgon med pa dang / rten med pa rnams la nyon mongs pa can spangs te/ phan pa'i dngos po sgrub par 'dod pa gang yin pa'o/ /'di gnyis ni byang chub sems dpa' dang po sems bskyed pa brtan pa'i sbyor ba yin te/lhag pa'i bsam pa'i sbyor ba dang / sgrub pa'i sbyor ba'o/ /de la lhag pa'i bsam pa'i sbyor ba ni phan pa bya ba dang / bde ba bya ba'i lhag pa'i bsam pa de nyid nyin gcig bzhin du yang dag par spel ba'o//sgrub pa'i sbyor ba ni nyin gcig bzhin du bdag gis sangs rgyas kyi chos yongs su smin par byed pa'i sbyor ba dang / lhag pa'i bsam pa'i sbyor ba nyid la brten nas ci nus ci lcogs kyis sems can rnams la yang phan pa dang / bde bsgrub pa'i sbyor ba'o/ / 'di gnyis ni byang chub sems dpa' dang po sems bskyed pa brtan pa'i dge ba'i chos chen po 'du ba'i sgo yin te/ bla na med pa yang dag par rdzogs pa'i byang chub yang dag par bsgrub pa'i phyir bdag gi don la sbyor ba dang / sems can thams cad kyi sdug bsngal thams cad bsal ba'i phyir gzhan gyi don la sbyor ba'o //'du ba'i sgo gnyis ji lta ba bzhin du dge ba'i chos kyi tshogs chen po gnyis dang / dge ba'i chos kyi phung po dpag tu med pa gnyis kyang de bzhin du sbyar ro/ /'di gnyis ni byang chub sems dpa' dang po sems bskyed pa brtan pa'i sems bskyed pa nas bzung ste/byang chub kyi phyir dge ba yongs su 'dzin pa ni de las gzhan pa'i dge ba yongs su 'dzin pa las khyad par du 'phags pa yin te/ rgyu khyad par du 'phags pa dang / 'bras bu khyad par du 'phags pa'o/ /byang chub sems dpa'i dge ba yongs su 'dzin pa de ni bla na med pa yang dag par rdzogs pa'i byang chub kyi rgyu yin te/de yang de'i 'bras bu yin no/ /de las gzhan pa nyan thos dang rang sangs rgyas thams cad kyi dge ba yongs su 'dzin pa yang de lta ma yin na/ de las gzhan pa'i sems can rnams kyis lta ci smos/ de lta bas na byang chub sems dpa' rnams kyi dge ba yongs su 'dzin pa ni de las gzhan pa'i dge ba yongs su 'dzin pa thams cad las rgyu dang 'bras bu'i ngo bos khyad par du 'phags pa yin no//'di gnyis ni byang chub sems dpa' dang po'i sems bskyed pa brtan pa'i sems bskyed pa'i phan yon yin te/ sems bskyed ma thag gis kyang sems can thams cad kyi yon gnas su gyur pa dang /bla mar gyur pa dang / bsod nams kyi zhing dang / skye dgu rnams kyi pha dang 'dra bar gyur pa dang / gnod pa med pa'i bsod nams yongs su 'dzin par byed do/ /de las gnod pa med pa'i bsod nams ni gang dang ldan na byang chub sems dpa' 'khor los sgyur ba kun nas bsrung ba'i nyis 'gyur gyis bsrung ba yin te/kun nas bsrung ba de dag de la rtag tu nye bar gnas pas/ gnyid log gam/ myos par gyur pa'am/ bag med par gyur pa na yang / gdug pa'am gnod sbyin nam/ mi ma yin pa gnyug mar gnas pa rnams kyis gtse bar mi nus pa'o//tshe brjes pa'i 'og tu yang byang chub sems dpa' de ni bsod nams yongs su bzung ba des na/ gnod pa nyung zhing rang bzhin gyis gnod pa med pa yin te/ gnod pa yun ring ba dang / drag pos 'debs par mi 'gyur ro/ / de lus dang ngag gis sems can rnams kyi don dang / sems can gyi bya ba dag la rtsol ba dang chos ston pa na shas cher lus ngal bar mi 'gyur zhing / brjed ngas par mi 'gyur la/ sems nyams par mi 'gyur ro/ /byang chub sems dpa'i rigs la gnas pa ni rang bzhin gyis kyang gnas ngan len shas chung ba yin la sems bskyed na ni 'di lta ste/lus kyi gnas ngan len dang / sems kyi gnas ngan len gyi gnas ngan len shin tu chung bar 'gyur ro/ /gsang sngags kyi tshig dang / rig sngags kyi tshig sems can rnams kyi yams kyi nad dang / gnod pa dang /nad 'go ba zhi bar byed pa dag de las gzhan pa'i sems can gyi lag na 'dug pa ma grub pa rnams kyang de'i lag tu 'ongs na 'grub par 'gyur na/ grub pa dag lta ci smos/ lhag par yang bzod pa dang / des pa dang ldan te/ pha rol gyi gnod pa byas pa bzod pa yin no/ /gzhan la yang gnod pa mi byed la/gzhan gyis gzhan la gnod pa byed pa mthong ngam thos na yang shin tu mi dga' bar 'gyur ro/ /de'i nye ba'i nyon mongs pa khong khro ba dang / phrag dog dang / g.yo dang 'chab pa la sogs pa rnams kyang bcom ste/ nyams smad pas brgya la spyod par gyur na yang myur du 'bral bar 'gyur ro//de grong gi gnas gang na gnas pa de yang 'jigs pa dang / 'jigs par 'gyur ba dang / mu ge'i nyes pa rnams dang / mi ma yin pas byas pa'i gnod pa ma byung ba rnams ni 'byung bar mi 'gyur la/ byung ba rnams ni rnam par zhi bar 'gyur ro//gal te byang chub sems dpa' dang po sems bskyed pa de lan 'ga' zhig ngan song gi sems can dmyal ba rnams su skyes su zin kyang de ni gnod pa med pa'i bsod nams yongs su 'dzin pa'i rgyus shas cher shin tu myur bar thar bar 'gyur la/ sdug bsngal gyi tshor ba myong ba yang shin tu tshabs chung ba myong bar 'gyur te/skye ba yang shin tu skye bar 'gyur ro/ /sems can de dag la yang snying rje'i sems bskyed par 'gyur ro/ /de ltar byang chub sems dpa' dang po sems bskyed pas ni gnod pa med pa'i bsod nams yongs su 'dzin pa las 'di lta bu dang /mthun pa'i phan yon mang po nyams su myong bar 'gyur ro/ /byang chub sems dpa'i sa'i gzhi'i rnal 'byor gyi gnas las/ sems bskyed pa'i le'u ste gnyis pa'o// //bam po gnyis pa/ 'di ltar sems bskyed pa'i byang chub sems dpa' rnams kyi byang chub sems dpa'i spyod pa gang zhe na/de la rnam pa gsum du rig par bya'o zhes ston pa/ mdor bsdu na byang chub sems dpa' rnams gang la slob pa dang / ji ltar slob pa dang / gang dag slob pa de dag thams cad gcig tu bsdus pa ni byang chub sems dpa'i spyod pa zhes bya'o/ / byang chub sems dpa' rnams gang la slob ce na/ gnas bdun la slob ste/ gnas bdun po dag gang zhe na/ bdag gi don dang / gzhan gyi don dang / de kho na'i don dang / mthu dang / sems can yongs su smin par bya ba dang / rang gi sangs rgyas kyi chos yongs su smin par bya ba dang / gnas bdun pa ni bla na med pa yang dag par rdzogs pa'i byang chub bo/ /sdom ni/ bdag dang gzhan don de nyid don/ /mthu dang sems can smin byed dang / /rang gi sangs rgyas chos rnams smin/ /byang chub mchog ni bdun pa yin/ /bdag dang gzhan gyi don gang zhe na/ mdor bsdu na bdag dang gzhan gyi don ni rnam pa bcur rig par bya'o//'ba' zhig dang gzhan dang 'brel pa dang / phan pa'i rgyu dang / bde ba'i rgyu dang / rgyur bsdus pa dang / 'bras bur bsdus pa dang / tshe 'di pa dang / tshe rabs gzhan pa dang / gtan du ba dang / gtan du ba ma yin pa'o/ /de la bdag gi don dang gzhan gyi don 'ba' zhig pa gang yin pa de ni byang chub sems dpa'i bya ba las thal zhing 'tsham pa ma yin pa'i phyir/byang chub sems dpas yongs su shes par byas la spang bar bya'o/ /lhag ma rnams ni bslab par bya'o/ /de la des yongs su shes nas spang bar bya ba gang yin pa'i byang chub sems dpa'i bdag gi don ni 'di yin te/bdag nyid bde bar 'dod pa longs spyod pa dang / nye bar spyad pa rnams yongs su tshol ba dang / chos la ser sna byed pa dang / sangs rgyas dang byang chub sems dpas bshad pa rnams yongs su tshol zhing 'dzin par byed pa dang / mtho ris 'dod pa mtho ris kyi don du tshul khrims dang /brtson 'grus rtsom zhing / bsam gtan dang / shes rab yang dag par blangs nas 'dug pa dang / 'jig rten gyi zang zing gi 'bras bu 'dod pa/ 'jig rten gyi zang zing 'thob pa'i rgyur de bzhin gshegs pa'i mchod rten la mchod pa byed pa dang rnyed pa 'dod pa rnyed pa'i rgyu dang /rnyed pa 'grub pa'i yang dag pa ma yin pa'i yon tan sna tshogs don med pa gzhan dag gi spro ba skyed pa dag ston pa dang / bdag la bsnyen bkur bya ba bdag gir bya bar 'dod pas bsnyen bkur bya ba bdag gir bya ba'i don du chos ma yin pas tshogs sdud par byed kyi/chos kyis ma yin pa dang / gzhan gyi bran du gyur pa'i sems can rnams bdag gi bran du bya ba'i ched ka tsam gyi phyir bran byed pa las thar bar byed pa dang / sems can bcing bas bcings pa rnams bdag gi bya ba sgrub pa'i ched tsam gyi phyir bcings pa las thar bar byas te/ bdag nyid kyis 'ching bar byed pa dang / sems can chad pa la sogs pa'i 'jigs pas skrag pa rnams bdag nyid kyis 'jigs par byas pa'i ched tsam gyi phyir/ gzhan gyi chad pa la sogs pa'i 'jigs pa las thar bar byed pa dang / tshe 'di'i bde ba la gnas shing / sems can gyi don la nges par sems pa dang bral ba ni/byang chub sems dpa'i bdag gi don 'ba' zhig yin par rig par bya ste/ de ltar 'di lta bu dang mthun pa rnams ni byang chub sems dpa' yongs su shes par byas nas spang bar bya ba gang yin pa/ byang chub sems dpa'i bdag gi don 'ba' zhig yin par rig par bya'o//byang chub sems dpa'i sbyin pa dang / bzod pa dang / snying rje sngon du 'gro ba'am/ byang chub tu yongs su bsngos pa'am/ mtho ris kyi phyir bsngos pa ni dus thams cad du bdag gi don gzhan dang 'brel pa kho na yin par rig par bya'o/de ltar ji skad bstan pa'i rnam pa de dag la ma gtogs par de ma yin par de las bzlog pa byang chub sems dpa' rnams kyi bdag gi don thams cad ni gzhan gyi don dang 'brel pa yin par rig par bya'o/ /de la byang chub sems dpa'i gzhan gyi don 'ba' zhig yin pas/byang chub sems dpas yongs su shes par byas nas spang bar bya ba ni 'di yin te/ lta ba log par zhugs pa dang / 'ong ba ma mthong ba dang / 'bras bu ma mthong ba'i sbyin pa dang / tshul khrims nyams pa dang / sgrub pa med pa gzhan dag la chos ston pa dang / sa 'og ma las yang dag par 'das pa/sa 'og ma'i dge ba'i chos sgrub pa dang / bsam gtan bsgyur ba la mkhas pa'i byang chub sems dpa' de 'di ltar bsam gtan dag gis gnas nas bsam gtan bsgyur te/ smon lam btab na 'dod pa'i khams gang du 'dod pa der skye bar 'gyur ba dang /byang chub sems dpa' dbang thob pa phyogs bcu dag tu sprul pa sna tshogs pa dag gis sems can sna tshogs dag gi don byed pa dang / thub pa de de bzhin gshegs pa rang gi don mdzad zin pa stobs dang / mi 'jigs pa la sogs pa dang / sangs rgyas kyi chos ma 'dres pa thams cad la brten nas/sems can tshad med pa dag la don tshad med pa mdzad pa de yang gzhan gyi don 'ba' zhig yin par rig par bya'o/ /de la gzhan gyi don 'ba' zhig yin pa ji skad bstan pa snga ma gnyis ni byang chub sems dpas yongs su shes par byas nas spang par bya ba yin no//de ma yin pa'i gzhan gyi don 'ba' zhig pa la ni lhur bslab par bya'o/ /rnam pa de dag las ma gtogs pa dang / de dag las bzlog pa byang chub sems dpa' rnams kyi gzhan gyi don thams cad ni bdag gi don dang 'brel pa yin te/ de la yang byang chub sems dpas bslab par bya'o//byang chub sems dpa'i bdag dang gzhan gyi don phan pa'i rgyu gang zhe na/ mdor bsdu na rnam pa lnga yod par rig par bya ste/ kha na ma tho ba med pa'i mtshan nyid dang / phan 'dogs pa'i mtshan nyid dang / tshe 'di pa dang / tshe gzhan pa dang / zhi bar byed pa'o//de la byang chub sems dpa' ni bdag kyang dge ba yongs su bzung ba dang / dge ba sogs pa che yang rung chung yang rung ste/ gang ci yang rung byed pa dang / gzhan yang dge ba yongs su bzung ba dang / dge ba sogs pa che yang rung chung yang rung ba yang dag par 'dzin du 'jug/'dul bar byed/ 'dzud par byed/ 'jog par byed pa de dag ni byang chub sems dpa'i bdag dang gzhan gyi don phan pa'i rgyu kha na ma tho ba med pa'i mtshan nyid yin par rig par bya'o/ /byang chub sems dpa' bdag gam gzhan la yo byad kyi bde ba'am/ bsam gtan la gnas pa'i bde ba yang rung ste/nyon mongs pa can spangs pa'i bde ba gang ci yang rung / nye bar sgrub pa de ni byang chub sems dpa'i bdag dang gzhan gyi don phan pa'i rgyu phan 'dogs pa'i mtshan nyid yin par rig par bya'o/ /byang chub sems dpa'i bdag dang gzhan gyi don tshe 'di la phan pa la/tshe gzhan na de lta bu ma yin pa yang yod/ tshe gzhan na phan la tshe 'di la de lta ma yin pa yang yod/ tshe gzhan la yang phan la tshe 'di la yang phan pa yang yod/ tshe gzhan na yang gnod la/ tshe 'di la yang gnod pa yang yod de/ bdag dang gzhan gyi don rnam pa bzhi po de yang chos yang dag par blang ba bzhi po dag tu go rims bzhin du ci rigs su blta bar bya'o//chos yang dag par blang ba bzhi po dag gang zhe na/ chos yang dag par blang ba da ltar byung ba na bde la phyi ma la rnam par smin pa sdug bsngal bar 'gyur ba yang yod/ chos yang dag par blang ba da ltar byung pa na sdug bsngal la/phyi ma la yang rnam par smin pa bde ba yang yod/ da ltar byung ba na yang bde la/ phyi ma la yang rnam par smin pa bde ba yang yod/ da ltar byung ba na yang sdug bsngal la/ phyi ma la yang rnam par smin pa sdug bsngal pa yang yod de/ de dag gi rnam par dbye ba ni mdo las ji skad 'byung ba kho na bzhin du blta bar bya'o//de la mya ngan las 'das pa dang / mya ngan las 'das pa yang dag par thob par byed pa dag dang / mya ngan las 'das pa'i phyogs 'jig rten pa dang / 'jig rten las 'das pa'i chos de dag ni mdor bsdu na byang chub sems dpa'i bdag dang gzhan gyi don phan pa'i rgyu zhi bar byed pa zhes bya ba yin te/thams cad las khyad par du 'phags pa bla na med pa yin par rig par bya'o/ /byang chub sems dpa'i bdag dang gzhan gyi don bde ba'i rgyu gang zhe na/ mdor bsdu na bde ba rnam pa lngar bsdu bar rig par bya ste/de la bde ba rnam pa lnga po ni 'di dag yin te/ rgyu bde ba dang / tshor ba bde ba dang / sdug bsngal gyi gnyen po'i bde ba dang / tshor ba'i rgyun chad pa'i bde ba dang / gnod pa med pa'i bde ba dang lnga'o/ /de la bde ba'i phyogs kyi dbang po dang / yul gnyis dang / rgyu de las byung ba'i bde ba'i tshor bar 'gyur ba'i reg pa gang yin pa dang /tshe 'di'am tshe rabs gzhan du 'dod pa'i 'bras bu 'byung ba'i las gang yin pa ci yang rung / de thams cad gcig tu bsdus pa ni rgyu bde ba zhes bya ste/ 'di las gong na yang med/ 'di las lhag pa yang med do/ / sdug bsngal rab tu zhi ba la mi ltos par rgyu bde bar bsdus pa'i rgyu gsum po de dag nyid las byung ba lus dang sems la phan 'dogs pa'i myong ba ni tshor ba bde ba zhes bya ste/ de yang mdor bsdu na rnam pa gnyis te/ zag pa dang bcas pa dang / zag pa med pa'o/ /de la zag pa med pa gang yin pa de ni slob pa dang /mi slob pa'i zag pa dang bcas pa ni khams gsum pa'i ste/ 'dod pa dang / gzugs dang / gzugs med pa dang ldan pa'o/ /de yang ci rigs par khams gsum pa thams cad kyi skye mched rnam pa drug gi bye brag las mig gi 'dus te reg pa las byung ba nas/ yid kyi 'dus te reg pa las byung ba'i bar dag go /rnam pa drug po de dag kyang rnam pa gnyis su 'gyur te/ lus kyi dang sems kyi'o/ /de la rnam par shes pa'i tshogs lnga dang mtshungs par ldan pa'i lus kyi'o/ /yid kyi rnam par shes pa dang mtshungs par ldan pa ni sems kyi'o/ /grang ba dang tsha ba dang /bkres pa dang / skom pa la sogs pa'i sdug bsngal rnam pa du ma dang / sna tshogs pa mang po 'byung ngo cog la/ grang ba dang / tsha ba dang / bkres pa dang / skom pa la sogs pa sdug bsngal gnyen pos zhi bar byas te/ sdug bsngal zhi bar gyur pa tsam po de nyid la bde ba'i blo skye ba gang yin pa de ni sdug bsngal gyi gnyen po'i bde ba zhes bya'o//'du shes dang tshor ba 'gog pa la snyoms par 'jug pa ni tshor ba'i rgyun chad pa'i bde ba zhes bya'o/ /gnod pa med pa'i bde ba ni mdor bsdu na rnam pa bzhir rig par bya ste/ mngon par 'byung ba'i bde ba dang / rab tu dben pa'i bde ba dang /nye bar zhi ba'i bde ba dang / rdzogs par byang chub pa'i bde ba'o/ /de la dad pas khyim nas khyim med par legs pa kho nar rab tu byung ste/ khyim so'i sdug bsngal rnam pa sna tshogs las nges par thar pa ni mngon par byung ba'i bde ba zhes bya'o/ /'dod pa dang / sdig pa mi dge ba'i chos spangs te dben pas bsam gtan dang po la dben pa las skyes pa'i dga' ba dang /bde ba ni rab tu dben pa'i bde ba zhes bya'o/ /bsam gtan gnyis pa la sogs pa la rtog pa dang / dpyod pa nye bar zhi ba ni nye bar zhi ba'i bde ba zhes bya'o/ /nyon mongs pa thams cad dang gtan bral ba dang / shes bya'i dngos po yang dag pa ji lta ba bzhin du mngon par rdzogs par byang chub pas bde ba gang yin pa de ni rdzogs par byang chub pa'i bde ba zhes bya'o/ /de la rgyu bde ba ni bde ba'i rgyur gyur pa'i phyir bde ba yin gyi/ ngo bo nyid kyis ni ma yin no/ /tshor ba'i bde ba ni rgyu'i dngos pos ni ma yin gyi ngo bo nyid kho nas so//sdug bsngal gyi gnyen po'i bde ba ni rgyu'i dngos pos kyang ma yin la/ ngo bo nyid kyis kyang ma yin te/ sdug bsngal zhi bar gyur pa tsam dang / sdug bsngal ba bsal bas bde ba yin no/ /tshor ba'i rgyun chad med pa'i bde ba ni/ rgyu'i dngos pos kyang ma yin/ ngo bo nyid kyis kyang ma yin/ sdug bsngal bsal bas kyang ma yin gyi/ 'di la tshor ba gang ci yang rung ba de ni sdug bsngal ba yin la/ yang dag par sdug bsngal ba/ dus de tsam zhig gnas pas zhi bar gyur pa ni bde ba ste/ gnod pa med pa'i bde bar gtogs so//tha ma rdzogs par byang chub kyi bde ba ni phyi ma la yang yang dag par sdug bsngal ba de ni gtan du zhi bar gyur la tshe 'di la yang nyon mongs pa'i phyogs kyi gnas ngan len rten la yod pa thams cad gtan med par gyur pa'i phyir bde ba yin no/ /gnod pa med pa de'i lhag ma rnams kyang tha ma de dang mthun pa dang /de'i phyogs yin pa dang / de 'dren pa yin pa'i phyir gnod pa med pa'i bde ba yin par rig par bya'o/ /de la byang chub sems dpa' ni phan pa'i phyogs kyi bde ba gang yin pa de nyid sems can rnams la sgrub par byed kyi/ gnod pa'i phyogs ni ma yin no/ /gnod pa'i phyogs kyi bde ba ni yang dag pa ji lta ba bzhin du yang dag pa'i shes rab kyis yongs su shes par byas shing /yongs su shes par byas la/ de la sems can rnams 'dun pa bzlog par bya ste/ ci nus kyis de las bzlog cing bsal ba'i phyir 'bad par bya'o/ /phan par 'gyur ba gang yin pa de ni sdug bsngal dang 'brel du zin kyang byang chub sems dpa' thabs mkhas pa la brten nas sdug bsngal dang bcas pa dang /yid mi bde ba dang bcas par sems can rnams la mi 'dod bzhin du bsgrub par bya'o/ /mi phan par 'gyur ba gang yin pa de ni bde ba dang 'brel du zin kyang thabs mkhas pa la brten nas/bde ba dang bcas pa dang yid bde ba dang bcas par sems can rnams mi dga' bzhin du bzlog par bya zhing drang bar bya'o/ /de ci'i phyir zhe na/ sdug bsngal dang bcas pa'i bde ba sgrub pa gang yin pa de dang bde ba dang bcas pa'i mi phan pa las bzlog pa de ni sems can rnams la phyis bde ba kho na yin par nges par rig par bya ba'i phyir ro//de bas na byang chub sems dpa' sems can rnams la phan par 'dod pa gang yin pa de ni don gyis na bde ba 'dod pa yin par shes par bya'o/ /phan pa'i sbyin pa gang yin pa de ni bde ba sbyin pa yin par shes par bya ste/'di ltar phan pa ni rgyu lta bu yin la/ bde ba ni 'bras bu lta bu yin pa'i phyir ro/ /de lta bas na gang la la sems can rnams la phan pa dang ldan pa de ni bde ba dang ldan pa nyid yin par rig par bya'o/ /de la tshe 'di dang tshe rabs gzhan du 'dod pa'i 'bras bur 'gyur ba'i las rgyu bde bar gtogs pa gang yin pa dang /sdug bsngal gyi gnyen po'i bde ba gang yin pa dang / tshor ba'i rgyun chad pa'i bde ba gang yin pa dang / gnod pa med pa'i bde ba gang yin pa de dag ni phan 'dogs pa dang / kha na ma tho pa med pa yin pas de dag byang chub sems dpas sems can rnams la spyad pa'i phyir dgos par nges par bsgrub par bya'o//tshor ba'i bde ba dang / rgyu bde ba dbang po dang / yul dang reg pas bsdus pa kun nas nyon mongs par 'gyur ba dang / nyon mongs pa can dang / kha na ma tho ba dang bcas pa mi phan pa dang mi 'phrod pa gang yin pa de ni bsgrub par mi bya'o//kun nas nyon mongs par mi 'gyur ba dang / kun nas nyon mongs pa can ma yin pa dang / kha na ma tho ba med pa phan pa dang / 'phrod pa gang yin pa de ni byang chub sems dpas sems can rnams la ci nus ci lcogs pa bzhin du bsgrub par bya'o/ /bdag nyid kyis kyang de bzhin du yang dag par spyad par bya'o//bslab par bya/ nyams su myong bar bya'o/ /'di ni byang chub sems dpa' rnams kyi bdag dang gzhan gyi don phan pa dang bde ba'i rgyu yin par rig par bya ste/ 'di las gong na yang med 'di las lhag pa yang med do/ /de la byang chub sems dpa'i bdag dang gzhan gyi don rgyu dang 'bras bur bsdus pa gang zhe na/mdor bsdu na rgyu yang rnam pa gsum yod la/ 'bras bu yang rnam pa gsum yod par rig par bya ste/ rnam par smin pa'i rgyu dang / rnam par smin pa'i 'bras bu dang / bsod nams kyi rgyu dang / bsod nams kyi 'bras bu dang /ye shes kyi rgyu dang / ye shes kyi 'bras bu'o/ /de la rnam par smin pa gang zhe na/ mdor bsdu na rnam par smin pa ni brgyad de/ tshe phun sum tshogs pa dang / kha dog phun sum tshogs pa dang / rigs phun sum tshogs pa dang / dbang phyug phun sum tshogs pa dang / tshig btsun pa dang /dbang che bar grags pa nyid dang / skyes bu nyid dang / brgyad pa stobs phun sum tshogs pa nyid do/ /de la byang chub pa'i tshe phun sum tshogs pa ni tshe ring zhing yun ring du gnas pa nyid do/ /kha dog phun sum tshogs pa ni gzugs bzang zhing ba lta na sdug la mdzes pa nyid do//rigs phun sum tshogs pa ni rigs mthon po rnams su skye ba'o/ /dbang phyug phun sum tshogs pa ni longs spyod che ba dang / rtsa 'jing che ba dang / 'khor phal che ba yin no/ /tshig btsun pa ni yid brtan du rung zhing yid ches pa yin te/ sems can rnams kyi rtsod pa byung ngo cog du tshad mar gzhog par 'os la/gzhal glugs la g.yo byed pa dang / 'jal ba la g.yo byed pa la sogs pa dang / g.yo sgyu dang nor gtams pa la g.yo mi byed cing slu bar mi byed de/ gzhi des sems can rnams kyis tshig 'dzin par 'gyur ba de ni tshig btsun pa zhes bya'o//dbang che bar grags pa ni de'i grags pa chen po dang snyan pa 'di lta ste/ dpa' ba'am/ brtson pa'am/ brtan pa'am/ mkhas pa'am/ shes nyen che ba'am/ ngang tshul bzang ba'am/ bzo dang las kyi gnas rnam pa sna tshogs dag la lhag par rab dang phul du mkhas pa yan chad kyis 'jig rten du grags pa yin te/gzhi des skye bo'i tshogs chen po'i bla mar gyur zhing / bkur stir bya ba dang / btsun par bya ba dang / ri mor bya ba dang / mchod par bya ba'i gnas su gyur pa de ni dbang che bar grags pa zhes bya'o/ /skyes pa nyid ni pho'i dngos po dang /pho'i dbang po dang ldan pa yin no/ /rang bzhin gyis stobs phun sum tshogs pa ni gnod pa chung ba dang / nad med pa'i rang bzhin can dang / spro ba che ba yin no/ /rnam par smin pa'i rgyu gang zhe na/ sems can rnams la mi 'tshe ba dang / mi 'tshe ba'i bsam pa ni tshe phun sum tshogs pa'i rgyu yin no//snang ba dang gos sar pa sbyin pa ni kha dog phun sum tshogs pa'i rgyu yin no/ /sems can rnams la nga rgyal legs par bcom pa ni rigs phun sum tshogs pa'i rgyu yin no/ /slong ba rnams dang yo byad mi bdog pa rnams la sbyin pa ni dbang phyug phun sum tshogs pa'i rgyu yin no//bden pa'i tshig dang ldan zhing phra ma med pa dang / tshig rtsub po med pa dang / tshig kyal pa med pa la goms pa ni tshig btsun pa'i rgyu yin no/ /tshe phyi ma la bdag nyid la yon tan rnam pa sna tshogs sgrub par smon lam 'debs shing / dkon mchog gsum la mchod pa byed pa dang /bla ma la mchod pa byed pa ni dbang che bar grags pa nyid kyi rgyu yin no/ /skyes pa'i dngos po la mngon par dga' zhing bud med kyi dngos po la mi dga' ste/ de la nyes dmigs su lta ba dang / bud med rnams kyi bud med kyi dngos po la mngon par dga' ba rnams kyang bud med kyi dngos po las 'dun pa bzlog pa dang /pho'i dbang po bcad pa'i phyir bzung ste/ khrid pa'i mi rnams chos dang mthun pas nges par rnam par thar par byed pa'i rgyu gnyis kyis gzhan dag la skyes pa nyid sgrub pa ni skyes pa nyid kyi rgyu yin no / /lus kyis sems can rnams kyi bya ba byung ngo cog la chos dang mthun pa dang /gzu lums med par ci nus ci lcogs pa bzhin du zhal ta byed pa dang / grogs byed pa dang / 'bras chan dang / skyo ma dang / thug pa btung ba dang / brta bar 'gyur ba dang / spro ba skyed par byed pa'i zas dang / skom dag sems can rnams la sgrub pa ni stobs phun sum tshogs pa'i rgyu yin te/de ltar de dag gi rnam par smin pa rnam pa brgyad kyi rgyu rnam pa brgyad yin par rig par bya'o/ /rgyu de dag kyang mdor bsdu na rgyu gsum gyis rnam par smin pa yongs su rdzogs pa dang / brtas pa dang / rgya che ba mngon par 'grub par 'gyur ba'i phyir rgyas par 'gyur te/rgyu gsum po dag gang zhe na/ sems rnam par dag pa dang / sbyor ba rnam par dag pa dang / zhing rnam par dag pa'o/ /de la bla na med pa yang dag par rdzogs pa'i byang chub tu dge ba'i rtsa ba de dag yongs su bsngos pas bsam pa dag par gyur pa gang yin pa dang /snying thag pa nas lhag pa'i bsam pa rgya che zhing dang pas spyod pa'i phyir/ bsam pa drag por gyur pa gang yin pa dang / de dang chos mthun par spyod pa mthong na/ mngon par dga' ba gang yin pa dang / nyin gcig bzhin du skad cig re re la de dang mthun pa'i chos kho na la lan mang du rtog cing dpyod pa gang yin pa de ni sems rnam par dag pa zhes bya'o//de la yun ring por goms par byed cing rgyun du byed la grims par byed pa dang / dge ba de yang dag par ma blangs pa gzhan dag la yang yang dag par len du gzhug pa'i phyir bsngags pa brjod pa dang /yang dag par blangs pa rnams la yang yang dag par dga' ba bskyed pa'i phyir bsngags pa brjod pa dang / de dag nyid dge ba'i rtsa ba de la 'dzud pa dang / 'god par byed pa gang yin pa de ni sbyor ba rnam par dag pa zhes bya'o/ /de la mdor bsdu na sbyor ba yang dag par bsgrub pa dang /yang dag par sbyor ba de nyid kyi 'bras bu la gnas pa'i phyir/ zhing rnam par dag pa yin par rig par bya'o/ /de la rnam par smin pa'i 'bras bu gang zhe na/ byang chub sems dpa' tshe phun sum tshogs par gyur na/ bdag gi don dang / gzhan gyi don las brtsams nas yun ring por dge ba'i phyogs la sbyor ba dang /dge ba'i rtsa ba mang po sogs par byed pa 'di ni tshe phun sum tshogs pa'i 'bras bu yin no/ /byang chub sems dpa' kha dog phun sum tshogs par gyur na/ skye bo'i tshogs chen po'i snying du sdug par 'gyur te/ snying du sdug na drung du 'du bar 'gyur la/gzugs yid du 'ong ba dang / mngon du phrad par gyur pas skye bo'i tshogs chen po dag de'i tshig mnyan pa dang / bya bar sems te/ de ni byang chub sems dpa'i kha dog phun sum tshogs pa'i 'bras bu yin par rig par bya'o/ /byang chub sems dpa'i rigs phun sum tshogs par gyur na/skye bo'i tshogs chen pos bkur ba dang / mchod pa dang bsngags par 'gyur ro/ /bkur zhing mchod la bsngags na/ sems can rnams don gang dang gang la 'dzud pa de dang de la de dag gzi byin gyis non pas myur du 'jug par 'gyur te/ mi bya'o zhes zlog par mi byed/log par mi byed pa de ni byang chub sems dpa'i rigs phun sum tshogs pa'i 'bras bu yin par rig par bya'o/ /byang chub sems dpa' dbang phyug phun sum tshogs par gyur na/ sbyin pas sems can rnams sdud cing yongs su smin par byed de/ de ni byang chub sems dpa'i dbang phyug phun sum tshogs pa'i 'bras bu yin par rig par bya'o//byang chub sems dpa'i tshig btsun par gyur na snyan par smra ba dang / don spyod pa dang / don mthun pas sems can rnams sdud cing yongs su smin par byed de/ de ni byang chub sems dpa'i tshig btsun pa'i 'bras bu yin par rig par bya'o//byang chub sems dpa' dbang che bar grags par gyur na/ bya ba byed pa rnam pa sna tshogs dag gis sems can gyi grogs byed du 'gro zhing phan 'dogs par byed do/ /phan btags pa des na/ sems can rnams kyi sems dang 'brel par 'gyur bas de la gus pa dang /byas pa gzo bar gyur nas / bkur sti dang / gus pa dang bcas pas myur ba myur bar bsgo ba bzhin du nyan par byed de/ de ni byang chub sems dpa'i dbang che bar grags pa'i 'bras bu yin par rig par bya'o/ /byang chub sems dpa' skyes pa nyid du gyur na/ pho'i dbang po dang ldan pas/yon tan thams cad dang btsal ba thams cad dang / shes bya thams cad rab tu rnam par 'byed pa dag gi snod du gyur pa yin te/ 'jigs pa med par gyur la/ dus thams cad du sems can thams cad dang 'gro ba'am/ smra ba'am/ 'grogs pa'am/ longs spyod pa'am/dben pa dben par gnas pa rnams la 'jug pa / sgrib pa med pa de ni byang chub sems dpa'i skyes pa nyid kyi 'bras bu yin par rig par bya'o/ /byang chub sems dpa' stobs phun sum tshogs par gyur na/ dge ba'i chos sgrub pa'i sbyor ba dang sems can la phan gdags pa'i sbyor bas mi skyo bar 'gyur la/brtson 'grus rtsom par 'gyur zhing / brtson 'grus brtan pa dang / mngon par shes pa myur bar 'gyur te/ de ni byang chub sems dpa'i stobs phun sum tshogs pa'i 'bras bu yin par rig par bya'o/ /de ltar 'di ni byang chub sems dpa' rnams kyi rnam par smin pa rnam pa brgyad kyi 'bras bu rnam pa brgyad yin te/de yod na sems can rnams la yang phan pa dang / sangs rgyas kyi chos rnams skye ba la yang mthun cing 'phrod pa yin te/ byang chub sems dpa' rnam par smin pa'i 'bras bu 'di la gnas na/ bdag nyid kyang sems can rnams kyi don sna tshogs mang po bya ba la nus shing lcogs par 'gyur la/des gdul bar bya ba de dag kyang 'di lta ste/ rang gi don bya ba yan chad la ji ltar 'dod pa bzhin du bya ba dag la bsgo ba bzhin du nyan par 'gyur ro/ /gal te byang chub sems dpa' de bdag nyid kyis lcogs su zin kyang gdul byar bya ba des bsgo pa bzhin du mi nyan par gyur na/de lta na yang de'i gzhan gyi don bya ba las don che ba ma yin mthun pa ma yin te/ des na des gzhan gyi don byed mi nus so/ /gal te byang chub sems dpa' de bdag nyid kyis ni mi nus mi lcogs la/des gdul bar bya ba rnams ni rang gi don bya ba yan chad la bsgo ba bzhin du nyan par gyur na/ de lta na yang byang chub sems dpa'i gzhan gyi don bya ba las don che ba ma yin mthun pa ma yin te/ des na des gzhan gyi don byed mi nus so/ /de lta bas na de gnyi ga tshogs la gnyi ga 'byor par gyur na/byang chub sems dpa'i sems can gyi don bya ba la las don che zhing mthun par 'gyur te/ des na gzhan gyi don byed nus par 'gyur ro/ /de ltar gyur na byang chub sems dpa' des bdag nyid kyang sangs rgyas kyi chos rnams dang /sems can rnams kyang theg pa gsum la myur ba nyid du yongs su smin par byed la/ bdag nyid kyang bla na med pa yang dag par rdzogs pa'i byang chub mngon par rdzogs par 'tshang rgya bar 'gyur zhing / sems can yongs su smin pa rnams kyang rnam par grol par byed do/ /de bas na rnam grangs des gang gi phyir byang chub sems dpa' rnams kyi rnam par smin pa'i 'bras bu rnam pa brgyad po dag sems can rnams la phan pa dang /bde bar 'gyur ba de'i phyir sems can thams cad kyi 'khor ba'i tshe 'bras bu med cing don med pa de yang de dag la 'bras bu yod pa dang don che bar 'gyur ro//de la bsod nams ni gang yin/ ye shes ni gang yin zhe na/ bsod nams zhes bya ba ni mdor bsdu na pha rol tu phyin pa gsum ste/ sbyin pa'i pha rol tu phyin pa dang / tshul khrims kyi pha rol tu phyin pa dang / bzod pa'i pha rol tu phyin pa'o/ /ye shes ni pha rol tu phyin pa gcig pu ste/'di lta ste/ shes rab kyi pha rol tu phyin pa'o/ /brtson 'grus kyi pha rol tu phyin pa dang / bsam gtan gyi pha rol tu phyin pa ni bsod nams kyi phyogs dang / ye shes kyi phyogs su rig par bya ste/ brtson 'grus la brten nas sbyin pa sbyin pa dang / tshul khrims yang dag par len cing bsrung ba dang /byams pa la sogs pa tshad med pa rnams bsgom pa 'am/ de lta bu dang mthun pa gang yin pa de ni bsod nams kyi phyogs kyi brtson 'grus so/ /brtson 'grus la brten nas thos pa dang / bsam pa dang / bsgom pa'i shes rab la sbyor bar byed cing phung po la mkhas pa dang /khams la mkhas pa dang / skye mched la mkhas pa dang / rten cing 'brel par 'byung ba la mkhas pa dang / gnas dang gnas ma yin pa la mkhas par byed pa dang / sdug bsngal ba la ni sdug bsngal bar/ kun 'byung ba la ni kun 'byung bar/'gog pa la ni 'gog bar/ lam la ni lam du so sor rtog pa'am/ dge ba dang mi dge ba'i chos rnams dang / kha na ma tho ba dang bcas pa dang / kha na ma tho ba med pa dang / bsten par bya ba dang / bsten par bya ba ma yin pa dang / ngan pa dang / bzang po dang / nag po dang / dkar po'i chos rnams dang / rten cing 'brel par 'byung ba rab tu rnam par dbye ba dang bcas pa'i chos rnams yang dag pa ji lta ba bzhin du rab tu rnam par 'byed cing / so sor rtog pa 'di ni ye shes kyi phyogs kyi brtson 'grus zhes bya'o/ /bsam gtan la brten nas sbyin pa sbyin pa dang / tshul khrims yang dag par len cing bsrung ba'am/ byams pa la sogs pa tshad med pa rnams bsgom pa'am/ de lta bu dang mthun pa gang yin pa de ni bsod nams kyi phyogs kyi bsam gtan yin no/ /bsam gtan la brten nas thos pa dang / bsam pa dang / bsgom pa'i shes rab la sbyor bar byed cing /phung po la mkhas pa nas/ sngar brtson 'grus kyi skabs su ji skad bstan pa de bzhin du thams cad brjod par bya ste/ 'di ni ye shes kyi phyogs kyi bsam gtan yin no/ /bsod nams dang / ye shes de yang mdor bsdu na rnam pa drug yod do/ /de re re'i rnam par dbye ba ni/tshad med par rig par bya'o/ /bsod nams dang ye shes kyi rgyu gang zhe na/ bsod nams dang ye shes kyi rgyu ni mdor bsdu na rnam pa gsum yod par rig par bya ste/ bsod nams dang / ye shes thob pa dang / gnas pa dang 'phel bar 'gyur ba la 'dun pa gang yin pa dang /mthun la mi mthun pa med pa'i rkyen dang / sngon yang bsod nams dang ye shes la goms pa'o/ /de la mi mthun pa med pa'i rkyen ni 'di yin te/ phyin ci log gi rkyen ni nye bar mi gnas shing / nye bar ma gyur la/ phyin ci ma log pa'i rkyen ni nye bar gnas shing / nye bar gyur pa gang yin pa'o/ /de la sdig pa'i grogs po dang phrad nas bsod nams dang ye shes phyin ci log tu bstan pa'am/ phyin ci log gi yid la byed pas/ phyin ci log tu bzung ba de ni phyin ci log gi rkyen nye bar gyur pa zhes bya'o/ /de las bzlog pa dkar po'i phyogs ni phyin ci ma log pa'i rkyen nye bar gyur pa ma yin par rig par bya'o//bsod nams dang / ye shes 'thob pa dang / gnas pa dang 'phel bar bya ba'i phyir sbyor ba la bar du gcod pa gang yin pa de dag spong zhing mi skyed pa 'di yang byang chub sems dpa'i bsod nams dang ye shes kyi mi mthun pa med pa'i rkyen zhes bya'o//rgyu gsum po 'di dag las gang yang rung ba cig ma tshang na yang bsod nams kyang skye bar mi 'gyur la/ ye shes kyang skye bar mi 'gyur bar rig par bya'o/ /bsod nams dang ye shes kyi 'bras bu gang zhe na/ bsod nams la brten nas byang chub sems dpa' gnod pa med par 'khor ba na 'khor zhing sdug bsngal dag gis shin tu gzir ba med pa dang /ci dga' mgur sems can gyi don dang / sems can la phan 'dogs nus par 'gyur ro/ /ye shes la brten nas byang chub sems dpa' yang dag par bsod nams yongs su 'dzin par byed kyi/log pas ma yin pa dang mkhas par bya ba rnam pa sna tshogs dpag tu med pa dag gis kyang bla na med pa yang dag par rdzogs pa'i byang chub mngon par rdzogs par 'tshang rgya ba'i bar du 'gyur ro/ /de ltar bsod nams dang ye shes kyi 'bras bu ni mdor bsdu na ci rigs par rnam pa bzhir rig par bya'o//de dag gi rnam pa rab tu dbye ba ni tshad med do/ /de la rnam par smin pa gang yin pa dang / rnam par smin pa'i rgyu gang yin pa dang / rnam par smin pa'i 'bras bu gang yin pa de dag thams cad ni bsod nams la brten cing / bsod nams las byung ba yin no//bsod nams kyang ye shes la brten cing ye shes las byung ba yin no/ /de bas na 'di gnyi ga yang bla na med pa yang dag par rdzogs pa'i byang chub 'thob par 'gyur ba'i gtso bo yin te/ bsod nams ni gtso bo yin la ye shes ni bla na med pa yin no/ /bsod nams dang ye shes las gang yang rung ba cig med na byang chub sems dpa' de bla na med pa yang dag par rdzogs pa'i byang chub mi 'thob ste/de ltar na 'di ni byang chub sems dpa'i bdag dang gzhan gyi don rgyu dang 'bras bur bsdus pa yin par rig par bya'o/ /de la byang chub sems dpa'i tshe 'di'i bdag dang gzhan gyi don ni gang yin/tshe rabs gzhan gyi bdag dang gzhan gyi don ni gang yin zhe na/ skyes bu'i byed pa rig pa'i bzo'i gnas dang / las kyi gnas kyis longs spyod bsgrub pa gang yin pa dang / bsgrubs pa de dag kyang tshod zin par longs spyod pa dang / 'dod pa'i 'bras bu rnam par smin par 'gyur ba'i sngon gyi las kyi rnam par smin pa'i 'bras bu tshe 'di la longs spyod par 'gyur ba gang yin pa dang / byang chub sems dpa' bsam gtan sgyur ba la mkhas pas tshe 'di nyid la bde ba'i don du bya ba dang / de la brten nas tshe 'di nyid la gzhan gyi don bsgrub pa'i phyir/bsam gtan la brten pa dang / tshe 'di nyid la de bzhin gshegs par gyur pa'i mya ngan las 'das pa gang yin pa dang / tshe 'di nyid la mya ngan las 'das pa thob par byed pa'i chos 'dus byas dang 'dus ma byas 'jig rten pa dang / 'jig rten las 'das pa gang yin pa de ni byang chub sems dpa'i tshe 'di nyid la bdag gi don du 'gyur ba zhes bya ste/byang chub sems dpa' ji lta ba bzhin du/ sems can gzhan gang dag byang chub sems dpas btul ba rnams kyi gzhan gyi don yang yin par rig par bya'o/ /de la phyi ma la 'dod pa'i khams su longs spyod phun sum tshogs par 'gyur ba gang yin pa dang /phyi ma la lus phun sum tshogs par 'gyur ba gang yin pa dang / phyi ma la bsam gtan dang / gzugs med par skye ba gang yin pa dang / tshe 'di la sdug bsngal dang bcas/ yid mi bde ba dang bcas pas/ so sor brtags shing phyi ma la longs spyod dang / lus phun sum tshogs par 'gyur ba dang / bsam gtan dang / gzugs med par skye ba de'i rgyu la brten pa gang yin pa de ni byang chub sems dpa'i tshe rabs gzhan gyi bdag dang gzhan gyi don kho na yin par rig par bya'o//tshe 'di la bde ba dang bcas pa dang / yid bde ba dang bcas pas longs spyod dang / lus phun sum tshogs par 'gyur ba'i rgyu la brten pa gang yin pa dang / tshe 'dir nyams par 'gyur ba'i cha dang mthun pa ma yin pa'i bsam gtan dang / gzugs med pa'i snyoms par 'jug pa gang yin pa de ni tshe 'di nyid dang /tshe rabs gzhan gyi bdag dang gzhan gyi don yin par rig par bya'o/ /bdag dang gzhan gyi don gtan du ba ni gang / gtan du ba ma yin pa de ni gang zhe na/ 'dod pa'i khams su longs spyod dang / lus phun sum tshogs par 'gyur ba rgyu dang 'bras bur bcas pa dang /so so'i skye bo rnams kyi 'jig rten pa'i dag pa rgyu dang 'bras bur bcas pa ni bdag dang gzhan gyi don gtan du ba ma yin no/ /nyon mongs pa thams cad gtan spangs pa dang / 'phags pa'i lam yan lag brgyad pa dang / de la brten nas 'jig rten las 'das pa'i dge ba'i chos rnams thob pa gang yin pa de ni bdag dang gzhan gyi don gtan du ba yin no/ /de la ngo bo nyid dang / yongs su nyams pa dang / 'bras bu longs spyod pas yongs su zad pa/ rgyu rnam pa gsum gyis na gtan du ba dang / gtan du ba ma yin par rig par bya'o//de la mya ngan las 'das pa ni ngo bo nyid kyis gtan du ba yin no/ /'dus byas ni thams cad kyang gtan du ba ma yin no/ /'phags pa'i lam yan lag brgyad pa ni yongs su nyams pa ma yin pa dang / 'bras bu longs spyod pas yongs su zad par mi 'gyur ba'i phyir gtan du ba yin no//de las gzhan pa dge ba'i zag pa dang bcas pa'i chos rnams ni yongs su nyams pa dang / 'bras bu longs spyad nas yongs su zad par 'gyur ba'i phyir gtan du ba ma yin te/ de ltar byang chub sems dpa' rnams kyi bdag dang gzhan gyi don bsdus pa dang /rgyas pa rnam pa bcu po 'di dag ni byang chub sems dpa' rnams kyis ci nus ci lcogs kyis gang la bslab par bya ba yin te/ 'di las gong na yang med/ 'di las lhag pa yang med do/ /'das pa dang ma 'ongs pa'i dus na bdag dang gzhan gyi don la bslabs pa dang /slob par 'gyur ba gang yin pa de dag thams cad kyang bdag dang gzhan gyi don rnam pa bcu po 'di nyid la slob ste/ 'di las gong na yang med/ 'di las lhag pa yang med do/ /byang chub sems dpa' sa'i gzhi'i rnal 'byor gyi gnas las bdag dang gzhan gyi don gyi le'u ste gsum pa'o// //de kho na'i don gang zhe na/ mdor bsdu na rnam pa gnyis te/ ji ltar yod pa las brtsams te/ chos rnams kyi yang dag pa nyid gang yin pa dang / ji snyed yod pa las brtsams te chos rnams kyi thams cad nyid gang yin pa ste/ de ltar yang dag pa nyid dang / thams cad nyid ni chos rnams kyi de kho na'i don mtha' dag yin par rig par bya'o/ /de kho na'i don de yang rab tu dbye na rnam pa bzhi ste/ 'jig rten gyi grags pa dang / rigs pa grags pa dang / nyon mongs pa'i sgrib pa rnam par dag pa'i shes pa'i spyod yul dang / shes bya'i sgrib pa rnam par dag pa'i shes pa'i spyod yul lo//de la brda dang / kun rdzob la 'dris pa'i rjes su 'gro bas zhugs pa'i blos dngos po gang la 'jig rten pa thams cad kyi lta ba mtshungs par gyur pa 'di lta ste/ sa la 'di ni sa kho na yin gyi me ma yin no zhes bya ba dang / sa la ji lta ba bzhin du me dang /chu dang / rlung dang / gzugs rnams dang / sgra rnams dang / dri rnams dang / ro rnams dang / reg bya rnams dang / zas dang / skom dang / bzhon pa dang / gos dang / rgyan du bya ba dang / snod spyad dang / spos dang / me tog phreng dang / byug pa dang / bro gar dang / glu dang / rol mo dang / snang ba dang / skyes pa dang / bud med kyi dga' mgur spyod pa dang / zhing dang / tshong khang dang / khyim gyi dngos po dang / bde ba dang / sdug bsngal ba yang de bzhin te/ 'di ni sdug bsngal ba yin gyi bde ba ma yin no/ /'di ni bde ba yin gyi sdug bsngal ba ma yin no zhes bya ba lta bu ste/mdor bsdu na 'di ni 'di yin gyi/ 'di ma yin no/ /'di ni 'di lta bu yin gyi gzhan du ma yin no zhes 'jig rten pa thams cad kyi nges par mos pa'i spyod yul gcig nas gcig tu 'ongs pa'i ming gis rang gi rnam par rtog pa las grags pa/ / ma bsams ma dpyad ma brtags par bzung ba'i dngos po gang yin pa de ni 'jig rten gyi grags pa'i de kho na zhes bya'o/ /rigs pas grags pa'i de kho na gang zhe na/ dam pa'i rigs pa'i don la mkhas pa/ mdzangs pa/ rtog ge pa / dpyod pa dang ldan pa/ rtog ger rtogs pa'i sa/rang gi spobs pa las byung ba / so so'i skye bo pa/ dpyod pa'i rjes su dpyod pa la gnas pa rnams kyi shes pa shin tu rnam par phye ba nges pa'i spyod yul shes bya'i dngos po mngon sum dang / rjes su dpag pa dang / yid ches pa'i lung gi tshad ma la brten nas/ 'thad pas bsgrubs pa'i rigs pas rab tu bsgrubs shing rnam par gzhag pa gang yin pa de ni rigs pas grags pa'i de kho na zhes bya'o//nyon mongs pa'i sgrib pa rnam par dag pa'i shes pa'i spyod yul gyi de kho na gang zhe na/ nyan thos dang rang sangs rgyas thams cad kyi zag pa med pa dang / zag pa med pa thob par byed pa dang /zag pa med pa'i rjes las thob pa 'jig rten pa'i shes pas spyod yul du bya ba'i yul de ni nyon mongs pa'i sgrib pa rnam par dag pa'i shes pa'i spyod yul gyi de kho na zhes bya ste/ de la dmigs pas nyon mongs pa'i sgrib pa las shes pa rnam par dag par 'gyur zhing /phyis sgrib pa med pa nyid du yang dag par gnas par 'gyur te/ de bas na nyon mongs pa'i sgrib pa rnam par dag pa'i shes pa'i spyod yul gyi de kho na zhes bya'o/ /de kho na de yang gang zhe na/ 'phags pa'i bden pa bzhi ste/ sdug bsngal ba dang / kun 'byung ba dang / 'gog pa dang /lam mo/ /shes pa de ni 'phags pa'i bden pa bzhi po de dag la rab tu rnam par 'byed pa dang / mngon par rtogs pa dang / mngon par rtogs par gyur pa na skye bar 'gyur ro/ /bden pa mngon par rtogs pa de yang nyan thos dang / rang sangs rgyas phung po tsam du dmigs shing / phung po rnams las gud na don gzhan du gyur pa'i bdag mi dmigs pa rnams su gyur pa na/ rten cing 'brel par 'byung ba'i 'du byed skye ba dang / 'jig pa dang ldan pa'i shes rab kyi phung po la ma gtogs pa'i gang zag med par lta ba goms par byas pa las 'byung ngo / /shes bya'i sgrib pa rnam par dag pa'i spyod yul gyi de kho na gang zhe na/shes bya la shes pa'i bgegs byed pa ni sgrib pa zhes bya ste/ shes bya'i sgrib pa de las rnam par grol ba'i shes pa'i spyod yul gyi yul gang yin pa de ni shes bya'i sgrib pa rnam par dag pa'i shes pa'i spyod yul gyi de kho na yin par rig par bya'o//de'ang gang zhe na/ chos thams cad brjod du med pa'i ngo bo nyid las brtsams te/ byang chub sems dpa' rnams dang / sangs rgyas bcom ldan 'das rnams kyi ye shes chos bdag med pa la 'jug pa dang / zhugs par gyur pa shin tu rnam par dag pa 'dogs pa'i tshig gi ngo bo nyid rnam par mi rtog pa dang /mtshungs pas spyod yul gyi yul du bya ba gang yin pa de ni de bzhin nyid mchog bla na med pa/ shes bya'i mthar thug pa yin la/ de las yang dag par chos thams cad rab tu rnam par 'byed pa 'grub par 'gyur te/ 'da' bar mi 'gyur ro/ /de kho na'i mtshan nyid de yang rnam par gzhag pas ni gnyis su med pas rab tu phye ba yin par rig par bya'o//gnyis zhes bya ba ni dngos po dang dngos po med pa'o/ /de la dngos po ni 'dogs pa'i tshig gi ngo bo nyid du rnam par gzhag pa gang yin pa ste/ de kho na bzhin du yun ring po nas 'jig rten gyis mngon par zhen par byas pa dang /'jig rten gyi rnam par rtog pa dang / spros pa thams cad kyi rtsa bar gyur pa ste/ 'di lta ste/ gzugs zhes bya ba'am/ tshor ba dang / 'du shes dang / 'du byed rnams dang / rnam par shes pa zhes bya ba'am/ mig ces bya ba'am/ rna ba dang / sna dang / lce dang / lus dang / yid ces bya ba'am/ sa zhes bya ba 'am/ chu dang / me dang / rlung zhes bya ba'am/ gzugs zhes bya ba 'am/ sgra dang / dri dang / ro dang / reg bya zhes bya ba'am/ dge ba zhes bya ba'am/ mi dge ba zhes bya ba'am/ lung du ma bstan pa zhes bya ba'am/skye ba zhes bya ba'am/ 'jig pa zhes bya ba 'am/ rten cing 'brel par 'byung ba zhes bya ba'am/ 'das pa zhes bya ba'am/ ma 'ongs pa zhes bya ba'am/ da ltar byung ba zhes bya ba'am/ 'dus byas zhes bya ba'am/ 'dus ma byas zhes bya ba 'am/ 'jig rten 'di dang / 'jig rten pha rol dang / nyi ma dang / zla ba 'di gnyis dang / mthong ba dang / thos pa dang / bye brag phyed pa dang / rnam par shes pa gang yin pa dang / thob pa dang / yongs su tshol ba dang / yid kyis rjes su rtog pa dang / rjes su dpyod pa zhes bya ba'am/ tha na mya ngan las 'das pa zhes bya ba'i bar du ste/de lta bu dang mthun pa 'dogs pa'i tshig gi grags pa'i ngo bo nyid kyi chos rnams ni 'jig rten gyi dngos po zhes bya'o/ /de la dngos po med pa ni gzugs zhes bya bar 'dogs pa'i tshig nas/ tha na mya ngan las 'da' ba zhes bya ba'i bar du 'dogs pa'i tshig de nyid dngos po med pa nyid dang /mtshan ma med pa nyid de gang la brten nas 'dogs pa'i tshig 'jug par 'gyur ba'i 'dogs pa'i tshig gi rten thams cad kyi thams cad du med pa dang / yod pa ma yin pa nyid de ni dngos po med pa zhes bya'o/ /dngos po snga ma gang yin pa de dang / dngos po med pa 'di gnyis kyi yod pa dang /med pa las rnam par grol ba'i chos kyi mtshan nyid kyis bsdus pa'i dngos po de ni gnyis su med pa yin no/ /gnyis su med pa gang yin pa de ni dbu ma'i lam mtha' gnyis spangs pa/ bla na med pa zhes bya ste/ de kho na de la sangs rgyas bcom ldan 'das rnams kyi ye shes ni shin tu rnam par dag par rig par bya'o//de la byang chub sems dpa' rnams kyi shes pa ni slob pa'i lam gyis rab tu phye ba yin par rig par byas te/ shes rab de yang byang chub sems dpa'i bla na med pa yang dag par rdzogs pa'i byang chub thob par bya ba'i thabs chen po yin no//de ci'i phyir zhe na/ 'di ltar byang chub sems dpa' ni stong pa nyid la mos pa des na/ skye ba de dang de dag tu sbyor ba na sems can dang / rang gi sangs rgyas kyi chos rnams yongs su smin par bya ba'i phyir 'khor ba na 'khor te/ 'khor ba de yang dag pa ji lta ba bzhin du rab tu shes la/'khor ba de las kyang mi rtag pa la sogs pa'i rnam pa dag gis yid skyo bar mi byed do/ /gal te 'khor ba la yang dag pa ji lta ba bzhin du yongs su ma shes na ni/ /'dod chags dang / zhe sdang dang / gti mug la sogs pa kun nas nyon mongs pa thams cad la sems lhag par btang snyoms su 'jog par mi nus so//lhag par btang snyoms su ma byas na ni/ sems kun nas nyon mongs pa can du gyur la / 'khor ba na 'khor bar 'gyur ro/ /kun nas nyon mongs pa can gyi sems kyis 'khor ba ni/ sangs rgyas kyi chos rnams dang / sems can rnams yongs su smin par byed par mi nus so//gal te mi rtag pa la sogs pa'i rnam pa dag gis 'khor ba las sems skyo bar gyur na/ de lta na ni byang chub sems dpa' myur ba myur bar yongs su mya ngan las 'da' bar 'gyur ro/ /byang chub sems dpa' myur ba myur bar yongs su mya ngan las 'das na/de lta na yang sangs rgyas kyi chos rnams dang / sems can rnams kyang yongs su smin par byed mi nus na/ bla na med pa yang dag par rdzogs pa'i byang chub mngon par rdzogs par 'tshang rgya bar lta ga la 'gyur// //bam po gsum pa/ /byang chub sems dpa' stong pa nyid du mos pa des sbyor ba na/mya ngan las 'das pas skrag par yang mi 'gyur la/ /mya ngan las 'das pa don du gnyer bar yang mi byed do/ /gal te byang chub sems dpa' mya ngan las 'das pas skrag par gyur na ni/ 'di ltar yid skrag pas mya ngan las 'das pa'i phan yon ma mthong ba dang /de la yod pa'i yon tan mthong ba'i dad pa dang / mos pa spangs pa'i byang chub sems dpa' de gong du mya ngan las 'das pa'i tshogs yongs su rdzogs par mi 'gyur ro/ /gal te byang chub sems dpa' mya ngan las 'das pa don du gnyer ba las shas cher gnas par gyur na ni/myur ba nyid du yongs su mya ngan las 'da' bar 'gyur ro/ /myur du yongs su mya ngan las 'das na sangs rgyas kyi chos rnams dang / sems can rnams yongs su smin par byed par mi 'gyur ro/ /de la 'khor ba yang dag pa ji lta ba bzhin du yongs su ma shes te/kun nas nyon mongs pa can gyi sems kyis 'khor ba na 'khor ba gang yin pa dang / 'khor ba la yid skyo ste/ myur du mya ngan las 'da' ba gang yin pa dang / mya ngan las 'das pas yid skrag ste/ de'i tshogs yongs su rdzogs par mi 'gyur ba gang yin pa dang /mya ngan las 'das pa don du gnyer ba la shas cher gnas te/ myur du yongs su mya ngan las 'da' ba gang yin pa de ni byang chub sems dpa'i bla na med pa yang dag par rdzogs pa'i byang chub thob par bya ba la thabs mi mkhas pa yin par rig par bya'o/ /'khor ba yang dag pa ji lta ba bzhin du yongs su shes te/kun nas nyon mongs pa can ma yin pa'i sems kyis 'khor ba na 'khor ba gang yin pa dang / 'khor ba la mi rtag pa la sogs pa'i rnam pa gang gis yid mi skyo ste/ myur du yongs su mya ngan las mi 'da' ba gang yin pa dang / mya ngan las 'das pas yid mi skrag ste/de'i tshogs yongs su rdzogs pa 'gyur ba gang yin pa dang / mya ngan las 'das pa'i yon tan dang / phan yon mthong ste/ ha cang spro bar gyur cing myur du mya ngan las 'da' ba ma yin pa de ni byang chub sems dpa'i bla na med pa yang dag par rdzogs pa'i byang chub thob par bya ba'i thabs chen po yin no//thabs de yang stong pa nyid kyi mchog la mos pa 'di la brten pa yin te/ de bas na stong pa nyid kyi mchog la mos par sgom pa/ byang chub sems dpa'i slob pa'i lam gyis bsdus pa ni 'di lta ste/ de bzhin gshegs pa'i ye shes thob par bya ba'i thabs chen po zhes bya'o//byang chub sems dpa' de ni chos bdag med pa'i ye shes ring du zhugs pa des chos thams cad kyi brjod du med pa'i ngo bo nyid yang dag pa ji lta ba bzhin du rtogs pas dngos po tsam mam/ de bzhin nyid tsam du 'dzin pa ma gtogs par chos gang yang rung ste/ji lta bur yang rnam par rtog par mi byed do/ /'on kyang 'di snyam du 'di ni dngos po tsam mo/ /'di ni de bzhin nyid tsam mo snyam du yang de mi sems la/ byang chub sems dpa' de don ni spyod par byed do/ /don gyi dam pa la spyod na/ chos thams cad de bzhin nyid de dang mtshungs par mnyam par yang dag pa ji lta ba bzhin du shes rab kyis mthong ste/thams cad la mnyam par lta zhing sems snyoms pas btang snyoms kyi mchog thob par 'gyur ro/ /de la brten na byang chub sems dpa' rig pa'i gnas thams cad la mkhas par bya ba la sbyor ba na/ yongs su ngal ba thams cad dang /sdug bsngal gyis thebs pa thams cad kyi sgyid lug par mi 'gyur la/ lus ngal ba med pa dang sems ngal ba med pas de la mkhas pa myur du yang dag par sgrub par byed de/ dran pa'i stobs bskyed pa chen po yang thob par 'gyur ro/ /mkhas par gyur pa des kyang khengs par mi 'gyur la/gzhan dag la yang slob dpon gyi dpe mkhyud mi byed do/ /mkhas par bya ba thams cad la yang sems zhum par mi 'gyur zhing / spro ba dang ldan te/ 'jug pa yang thogs pa med par 'gyur ro/ /go cha'i sbyor ba yang brtan par 'gyur te/ ji lta ji ltar 'khor ba na 'khor ba'i tshe/sdug bsngal ba'i khyad par rnyed pa de lta de ltar bla na med pa yang dag par rdzogs pa'i byang chub spro ba skye bar 'gyur ro/ /ji lta ji ltar lus kyi khyad par thob par gyur pa de lta de ltar sems can rnams la shin tu nga rgyal med par 'gyur ro/ /ji lta ji ltar shes pa'i khyad par thob pa de lta de ltar gzhan la klan ka tshor ba dang /rtsod pa dang / smra ba mang ba dang / nyon mongs pa dang / nye ba'i nyon mongs pa rnams dang / tshul 'khrul pa kun tu spyod pa rnams yongs su shes par byas shing yongs su shes par byas nas/ shas cher sems kyis lhag par btang snyoms su byed de/ji lta ji ltar yon tan dag gis skye ba de lta de ltar dge ba mi spyoms par 'gyur zhing / gzhan las shes kyi khe dang / rnyed pa dang / bkur sti mi tshol te/ byang chub sems dpa' ye shes de la brten pa la ni de lta bu 'di dag dang mthun pa'i phan yon mang po byang chub kyi phyogs dang /byang chub dang mthun pa dag 'byung bar 'gyur ro/ /de bas na gang la la dag byang chub thob par gyur pa dang / gang la la dag thob par 'gyur ba dang / gang dag thob pa de dag thams cad ni ye shes de nyid la brten nas/ dma' ba dang / khyad par can gzhan las ma yin no//byang chub sems dpa' de ltar spros pa med pa'i tshul la zhugs shing / de ltar phan yon mang po dang ldan pa ni/ bdag nyid kyang sangs rgyas kyi chos yongs su smin par bya ba dang / gzhan dag kyang theg pa gsum gyi chos yongs su smin par bya ba'i phyir yang dag par zhugs pa yin no//'di ltar yang dag par zhugs pa yin te/ longs spyod rnams dang / lus la yang sred pa med la/ sems can rnams la longs spyod dang / lus yongs su gtong ba'i phyir yang sred pa med par slob bo/ /sems can rnams kyi don gyi phyir lus dang ngag bsdams shing /shin tu bsdams pa yang yin la/ rang bzhin gyis sdig pa la mi dga' ba dang / rang bzhin gyis bzang zhing dge ba'i phyir sdom pa la yang slob pa'o/ /gzhan la gnod pa dang / log par sgrub pa byung ba thams cad la yang bzod pa yin la/ khro ba chung bar bya ba dang / gzhan la gnod pa mi bya ba'i phyir bzod pa la yang slob bo//sems can rnams kyi the tshom bsal ba dang / phan gdags pa sgrub pa dang / bdag nyid thams cad mkhyen pa nyid kyi rgyu yongs su gzung ba'i phyir rig pa'i gnas thams cad la yang brtson pa'am mkhas pa yin no/ /sems nang na gnas shing sems shin tu mnyam par gzhag pa yang yin la/sems gnas par bya ba dang / tshangs pa'i gnas pa bzhi yongs su dag par bya ba dang / mngon par shes pa lngas rnam par rtse bas sems can gyi bya ba sgrub pa dang / mkhas par bya ba thams cad la mngon par brtson pa las byung ba'i ngal ba bsal ba'i phyir yang slob bo//mdzangs shing de kho na mchog shes pa yang yin la/ phyi ma la bdag nyid theg pa chen pos yongs su mya ngan las 'da' bar bya ba'i phyir/ de kho na mchog shes pa la yang slob bo/ /byang chub sems dpa' de ltar yang dag pa'i sbyor ba byed byed pa de ni sems can yon tan dang ldan pa rnams la ni mchod pa dang /rnyed pa dang / bkur sti byed par nye bar gnas pa yin no/ /sems can skyon can rnams la ni/ mchog tu snying rje'i sems dang / snying brtse ba'i sems kyis nye bar gnas pa yin te/ ci nus ci lcogs su de dag gi skyon bstsal ba'i phyir yang sbyor bar byed do//sems can gnod pa byed pa rnams la ni byams pa'i sems kyis nye bar gnas pa yin te/ gnod pa byed pa de dag gi rang gi bsam pa dang / sbyor ba'i nyes pas 'khon gyi sems su gyur pa spang ba'i phyir/ g.yo dang sgyu med par ci nus ci lcogs su phan pa dang /bde ba nye bar sgrub po/ /sems can phan 'dogs pa rnams la ni byas pa gzo bas lan du phan gdags pa de dang mnyam pa'am/ lhag par nye bar gnas pa yin te/ de dag gi chos dang mthun pa'i bsam pa yang ci nus ci lcogs su yongs su rdzogs par byed do//mthu med na yang ma bcol bar don du bya ba de dang de dag la gus par rtsol ba ston par byed de/ lan 'ga' byas pa tsam gyis mi gtong zhing ci nas bdag gis ma nus pa yin gyi/ byed mi 'dod pa ni ma yin no snyam du des shes par byed de de lta bu dang mthun pa de dag ni byang chub sems dpa' spros pa med pa'i tshul la zhugs shing de kho na mchog shes pa la brten pa'i yang dag pa'i sbyor ba yin par rig par bya'o//de la rigs pa gang gis chos thams cad brjod du med pa'i ngo bo nyid yin par rig par ji ltar khong du chud par bya zhe na/ chos rnams kyi rang gi mtshan nyid du 'dogs pa 'di lta ste/gzugs zhes bya ba'am/ tshor ba zhes bya ba'am/ 'du shes zhes bya ba'am/ 'du byed rnams zhes bya ba'am/ rnam par shes pa zhes bya ba nas/ snga ma bzhin du tha na mya ngan las 'das pa zhes bya ba'i bar gang yin pa de ni btags pa tsam du zad par rig par bya ste/ngo bo nyid kyang ma yin la / de las ma gtogs pa dang de las gud na yang ngag gi spyod yul dang ngag gi yul med do/ /de ltar na chos thams cad kyi ngo bo nyid ni ji ltar brjod pa de bzhin du yod par mi 'gyur la/ thams cad kyi thams cad du med pa yang ma yin no/ /de de ltar yod pa yang ma yin la/thams cad kyi thams cad du med pa yang ma yin na/ ji ltar yod ce na/ rang gi mtshan nyid kyis yod pa ma yin pa la sgro btags pa'i legs par ma zin pa spangs pa dang / yang dag pa la skur ba btab pa'i legs par ma zin pa spangs pa yod do//chos thams cad kyi don dam pa'i ngo bo nyid de yang rnam par mi rtog pa'i ye shes kho na'i spyod yul ma yin par rig par bya'o/ /gal te chos gang dag dang / dngos po gang la ji ltar brjod pa 'jug pa bzhin du chos de dag dang dngos po de de'i bdag nyid du 'gyur na ni/ de ltar na chos gcig pu dang /dngos po gcig pu'i ngo bo nyid rnam pa sna tshogs mang por 'gyur bar rigs so/ /de ci'i phyir zhe na/ 'di ltar chos gcig pu dang / dngos po gcig pu la mang po dag gis rnam pa sna tshogs mang por brjod cing 'dogs te nye bar 'dogs par byed la/ 'dogs pa'i tshig rnam pa sna tshogs mang po dag pas 'dogs pa'i tshig gang yang rung ba gcig cig chos de dang dngos po de la de'i bdag nyid dang de'i rang bzhin gyi ngo bo nyid du 'gyur la/'dogs pa'i tshig lhag ma gzhan dag ni ma yin zhes bya ba'i nges pa ci yang mi dmigs te/ de bas na 'dogs pa'i tshig thams cad ni mtha' dag gam/kha cig kyang rung ste/ chos thams cad dang dngos po thams cad kyi de'i bdag nyid du 'gyur pa yang med la/ de'i rang bzhin gyi ngo bo nyid du 'gyur ba yang med do/ /gzhan yang gal te gzugs la sogs pa'i chos sngar ji skad bstan pa rnams 'dogs pa'i tshig gi ngo bo nyid yin du zin na/de lta na je dngos po sngar byung la/ phyis de la dga' mgur 'dogs pa'i tshig nye bar 'dogs na ni/ 'dogs pa'i tshig gis nye bar 'dogs pa'i snga rol 'dogs pa'i tshig gis nye bar ma btags pa'i tshe/ chos de dang dngos po de ngo bo nyid med pa kho nar 'gyur ro//ngo bo nyid med par gyur na yang dngos po med pa la ni 'dogs pa'i tshig gis nye bar gdags su mi rung ngo / /'dogs pa'i tshig gis nye bar 'dogs pa med na yang / chos dang dngos por 'dogs pa'i tshig gis ngo bo nyid du yod par mi rung ngo / /gal te 'dogs pa'i tshig nye bar 'dogs pa'i snga rol nas/gzugs de gzugs kyi bdag nyid yin te/ phyis kyang gzugs kyi bdag nyid la gdags pa'i tshig gis bsdus pa'i gzugs su nye bar 'dogs par byed na yang / de lta na ni gzugs zhes 'dogs pa'i tshig nye bar 'dogs pa de med bzhin du yang gzugs zhes bya bar 'gyur ba'i chos dang /gzugs zhes bya bar 'gyur ba'i dngos po de la gzugs kyi blo 'jug par 'gyur ba'i rigs na mi 'jug ste/ de bas na gtan tshigs 'di dang / rigs pa 'dis chos thams cad brjod du med pa'i ngo bo nyid du khong du chud par bya'o//gzugs la ji lta ba bzhin du tshor ba la sogs pa nas/ tha na mya ngan las 'das pa'i bar du ji skad bstan pa'i chos rnams la yang de bzhin du rig par bya'o/ /gzugs la sogs pa'i chos rnams la gzugs la sogs pa'i dngos po la 'dogs pa'i tshig gi ngo bo nyid kyi rang gi mtshan nyid yod pa ma yin pa la sgro btags nas mngon par zhen pa gang yin pa dang /'dogs pa'i tshig gi mtshan ma'i gzhi 'dogs pa'i tshig gi mtshan ma'i rten du gyur pa/ brjod du med pa'i bdag nyid kyis don dam par yod pa yang dag pa'i dngos po la thams cad kyi thams cad du med do zhes skur pa 'debs shing chud gzon par byed pa gang yin pa 'di gnyis ni chos 'dul ba 'di las rab tu nyams pa yin par rig par bya'o//yod pa ma yin pa la sgro 'dogs pa'i nyes pa gang yin pa de dag ni thog ma nyid du dpyad cing bsal bar byas la/bkrol zhing bstan zin te nyes pa de dag gis gzugs la sogs pa'i dngos po yod pa ma yin pa la sgro btags pas chos 'dul ba 'di las rab tu nyams pa yin par rig par bya'o/ /gzugs la sogs pa'i chos rnams kyi dngos po tsam la yang skur ba 'debs shing /thams cad chud gzon pa de dag chos 'dul ba 'di las ji ltar rab tu nyams par 'gyur ba de ltar bshad par bya ste/ gzugs la sogs pa'i chos rnams kyi dngos po tsam la skur ba 'debs pa la ni de kho na yang med pa la 'dogs pa yang med de / de gnyi ga yang mi rigs so/ 'di lta ste dper na/ gzugs la sogs pa'i phung po rnams yod na/ gang zag gdags su rung gi /med du zin na ni dngos po med pa la gang zag gdags su med do/ /de bzhin du gzugs la sogs pa'i chos rnams kyi dngos po tsam yod na/ gzugs la sogs pa'i chos 'dogs pa'i tshig nye bar gdags su rung gi /med du zin na dngos po med pa la gdags pa'i tshig gis nye bar 'dogs pa med do/ /de la 'dogs pa'i gzhi med du zin na ni/ gzhi med par gyur pas 'dogs pa'ang med par 'gyur ro/ /de bas na gang dag kha cig shes par dka' ba'i mdo sde theg pa chen po dang ldan pa zab mo stong pa nyid dang ldan pa/dgongs pa'i don bstan pa dag thos na bshad pa'i don yang dag pa ji lta ba bzhin du ma shes na/ tshul bzhin ma yin pa rnam par brtags te/ rigs pa ma yin pas bskyed pa'i rtog ge tsam gyis 'di thams cad ni btags pa tsam du zad de/'di ni de kho na yin no/ /su 'di ltar lta ba de ni yang dag par lta ba yin no zhes de ltar lta zhing de skad smra'o/ /de dag gi ltar na 'dogs pa'i gzhi'i dngos po tsam yang med pas/ 'dogs pa de nyid kyang thams cad kyi thams cad du med par 'gyur na/btags pa tsam gyi de kho na lta yod par ga la 'gyur te/ de bas na rnam grangs des na de dag gis ni de kho na dang btags pa de gnyi ga la yang skur ba btab par 'gyur te/ btags pa dang / de kho na la skur ba btab pas na/ med par lta ba'i gtso bo yin par rig par bya'o//de ltar med par lta ba de ni tshangs pa mtshungs par spyod pa mdzangs pa rnams kyis smos pa'i 'os ma yin pa dang / 'grogs par mi bya ba yin te/ de ni bdag nyid kyang phung bar byed la/ 'jig rten gang de'i lta ba la phyogs pa yang phung bar byed do/ / bcom ldan 'das kyis 'di la dgongs nas/ 'di na la la gang zag tu lta ba ni bla'i/ la la stong pa nyid la log par zin pa ni de lta ma yin no zhes bka' stsal te/ de ci'i phyir zhe na/ gang zag tu lta ba can gyi skye bo ni shes bya la rmongs pa 'ba' zhig tu zad do/ /shes bya thams cad la skur pa 'debs pa ma yin te/gzhi des sems can dmyal ba rnams su skye bar mi 'gyur la/ gzhan chos 'dod pa dang / sdug bsngal las rnam par thar par 'dod pa dag kyang phung bar mi byed cing slu bar mi byed la/ chos dang bden pa la yang 'god par byed do/ /bslab pa'i gzhi dag la yang g.yel bar mi 'gyur ro//stong pa nyid la log par zin pa ni shes bya'i dngos po la yang rmongs la/ shes bya thams cad la skur ba 'debs te/ gzhi des sems can dmyal ba rnams su yang skye bar 'gyur la/ gzhan chos 'dod pa dang / sdug bsngal las rnam par thar par 'dod pa rnams kyang phung bar byed do//bslab pa'i gzhi dag la yang g.yel bar 'gyur te/ de ltar yang dag pa ji lta ba bzhin gyis dngos po la skur pa 'debs pa ni chos 'dul ba 'di las rab tu nyams pa yin no/ /ji ltar na stong pa nyid la log par 'dzin pa yin zhe na/ dge sbyong ngam/ bram ze gang la la gang gis stong pa de yang mi 'dod la gang gis gang stong pa de yang mi 'dod pa 'di lta bu 'di ni stong pa nyid la log par zin pa zhes bya'o/ /de ci'i phyir zhe na/ gang gis stong pa de med pa dang / gang stong pa de yod pa'i stong pa nyid ni rigs pa'i phyir ro//thams cad med na ni gang du ci zhig gang gis stong par 'gyur te/ des na de nyid stong pa nyid du 'gyur du ni mi rung ngo / /de bas na de lta bu ni stong pa nyid la log par zin pa yin no/ /ji ltar na stong pa nyid la log par zin pa yin zhe na/ gang gi phyir gang la gang med pa de ni des stong par yang dag par mthong la/'di la lhag ma gang yin pa de ni 'di ni yang dag par yod do zhes yang dag pa ji lta ba bzhin du rab tu shes pa de ni stong pa nyid la yang dag pa ji lta ba bzhin du phyin ci ma log par zhugs pa zhes bya ste/ 'di lta ste gzugs zhes bya ba la sogs pa ji skad bstan pa'i dngos po rnams la gzugs zhes bya ba la sogs par 'dogs pa'i tshig gi bdag nyid kyi chos med de de lta bas na gzugs zhes bya ba la sogs pa'i dngos po de gzugs zhes bya ba la sogs par 'dogs pa'i tshig gi bdag nyid des stong ngo //gzugs zhes bya ba la sogs pa'i dngos po de'i lhag ma gang zhe na/'di lta ste/ gzugs zhes bya ba la sogs par 'dogs pa'i tshig tsam po 'di yin te/ de gnyi ga yang 'di lta ste/ dngos po tsam yod pa dang / dngos po tsam du 'dogs par yang dag pa ji lta ba bzhin du rab tu shes te/ yod pa ma yin pa la yang sgro mi 'dogs la/ yang dag pa la yang skur pa mi 'debs so/ /lhag par yang mi byed la nyung ngur yang mi byed do/ /'dor bar yang mi byed la/ snon par yang mi byed de/ yang dag pa ji lta ba de bzhin nyid brjod du med pa'i ngo bo nyid du yang dag pa ji lta ba bzhin du rab tu shes pa de ni stong pa nyid legs par zin pa zhes bya ste/yang dag pa'i shes rab kyis shin tu rtogs pa zhes bya'o/ /'di ni re zhig 'thad pas sgrub pa'i rigs pa dang rjes su mthun pa yin te/ 'dis chos thams cad brjod du med pa'i ngo bo nyid du rig par bya'o/ / yid ches pa'i lung gis kyang chos thams cad brjod du med pa'i ngo bo nyid du rig par bya ste/ bcom ldan 'das kyis kyang srid pa 'pho ba'i mdo las/ don 'di nyid tshigs su bcad pa'i dbyangs kyis 'di skad du/ ming ni gang dang gang gis su/ /chos rnams gang dang gang brjod pa//de la de ni yod ma yin/ /'di ni chos rnams chos nyid do/ /zhes gsungs te/ tshigs su bcad pa 'dis don ji ltar bstan ce na/ gzugs la sogs par ming btags pa'i chos kyi gzugs zhes bya ba la sogs pa'i ming gang yin pa gzugs zhes bya ba la sogs pa'i ming des gzugs la sogs par ming btags pa'i chos de dag la gzugs zhes bya ba'am/tshor ba zhes bya ba nas rgyas par mya ngan las 'das pa zhes bya ba'i bar du brjod cing bsnyad pa de la gzugs zhes bya ba la sogs pa'i chos rnams bdag nyid kyis kyang gzugs kyi bdag nyid ma yin la/de dag la yang de las gzhan pa gzugs la sogs pa'i bdag nyid kyi chos med de/ gzugs la sogs par ming btags pa'i chos de dag gis brjod du med pa'i don du yod pa nyid gang yin pa de ni/ yang dag par ngo bo nyid kyi chos nyid yin par rig par bya'o/ /bcom ldan 'das kyis don gyi sde tshan dag las kyang /'jig rten dag na kun rdzob gang ci yod/ /de kun thub pas zhal gyis mi bzhes te/ /gzigs dang gsan la bzhed par mi mdzad pas/ /de ni zhal gyis mi bzhes gang gis 'dzin/ /zhes gsungs te/ tshigs su bcad pa 'dis de'i don ji ltar bstan ce na/gzugs la sogs par ming btags pa'i dngos po la gzugs zhes bya ba la sogs par btags pa gang yin pa de dag ni kun rdzob ces bya ste/ btags pa de dag ni dngos po de de'i bdag nyid yin no zhes bya bar de ltar mi bzhed de/ de dag kun rdzob yin pa'i phyir ro//de ci'i phyir zhe na/ de la ni bskyed pa dang skur ba'i lta ba mi mnga' ste/ de bas na de la phyin ci log nye bar 'jog pa'i lta ba de mi mnga' ba'i phyir/ zhal gyis mi bzhes zhes bya'o/ /de de ltar zhal gyis mi bzhes pas lta ba de med par dngos po de la sgro 'dogs pa'am/skur pa 'debs par gang gis 'dzin/ 'dzin pa mi mnga' na shes bya yang dag par gzigs pa yin te/ de ni de'i gzigs pa yin no/ /shes bya de nyid kyis brjod pa gsan pa gang yin pa de ni de'i gsan pa yin te/ gzigs pa dang gsan pa de la sred pa skyed par mi mdzad 'phel bar mi mdzad kyi/dmigs pa de spong zhing btang snyoms can du gnas te/ de ltar na bzhed par mi mdzad do/ /yang bcom ldan 'das kyis sdums byed ka ta'i bu las brtsams te/ bka' stsal pa/ 'di na dge slong sdums byed ni sa la brten cing bsam gtan mi byed do//chu dang / me dang / rlung dang / nam mkha' dang / rnam shes dang / ci yang med pa'i skye mched dang / 'du shes med 'du shes med min skye mched dang / 'jig rten 'di dang / 'jig rten pha rol dang / nyi ma dang / zla ba 'di gnyis dang / mthong ba dang / thos pa dang / bye brag phyed pa dang / rnam par shes pa dang / rnyed pa dang / btsal ba dang / yid kyis rjes su brtags pa dang / rjes su dpyad pa de dag thams cad la brten cing bsam gtan mi byed do/ /bsam gtan pa ji ltar sa la brten cing bsam gtan mi byed la/ rgyas par thams cad kyi bar la brten cing bsam gtan mi byed ce na/'di na dge slong sdums byed ni sa la sar 'du shes pa gang yin pa de bsal ba yin no/ /chu la chur 'du shes pa nas rgyas par thams cad la thams cad du 'du shes pa gang yin pa de bsal ba yin te/de ltar dge slong bsam gtan pa ni sa la brten cing bsam gtan mi byed la/ rgyas par thams cad la thams cad ces bya ba'i bar du brten cing bsam gtan mi byed do/ /dge slong bsam gtan pa de lta bu la ni dbang po dang bcas pa'i lha rnams dang / dbang bdag dang bcas pa rnams dang /skye dgu'i bdag po dang bcas pa rnams/ skyes bu cang shes khyod la phyag 'tshal lo/ /skyes bu dam pa khyod la phyag 'tshal lo/ /ci la khyod rten bsam gtan mdzad pa yi/ /khyod kyi de ni bdag cag ma 'tshal to/ /zhes rgyang ma nas phyag 'tshal bar byed do//mdo'i tshig der don 'di ji ltar ston ce na/ sa la sogs par ming btags pa'i dngos po las zhes bya ba la sogs pa'i ming du brdar btags pa gang yin pa de ni sa la sogs pa'i 'du shes zhes bya'o/ /'du shes de yang sa la sogs par ming btags pa'i dngos po la sgro 'dogs pa dang skur pa 'debs pa yin te/de'i ngo bo nyid kyis dngos por 'dzin pa ni sgro 'dogs pa yin no/ /dngos po tsam gyi yang dag pa 'jig par 'dzin pa ni skur pa 'debs pa'i 'du shes zhes bya ste/ de'i 'du shes de bsal ba yin no/ /bsal zhes bya ba ni spangs pa dang btang ba'o//de bas na lung gis kyang de bzhin gshegs pa mchog tu yid ches pa'i lung las chos thams cad du brjod du med pa'i ngo bo nyid yin par rig par bya'o/ /de ltar chos thams cad brjod du med pa'i ngo bo nyid yin na/ ci'i phyir brjod pa sbyor bar byed ce na/ 'di ltar brjod pa med na yang brjod du med pa'i chos nyid de gzhan dag la bsnyad pa dang /thos par byed kyang mi nus la/ tshig dang thos pa med na yang brjod du med pa'i ngo bo nyid de shes par mi nus so/ /de bas na thos pa dang shes par bya ba'i phyir brjod par yang sbyor bar byed do/ /de bzhin nyid de de ltar yongs su ma shes pas/gzhi de las byis pa rnams kyi rnam par rtog pa dngos po gsum skyed pa dang / sems can dang / snod kyi 'jig rten thams cad sgrub pa rnam pa brgyad 'byung bar 'gyur te/ 'di lta ste/ ngo bo nyid du rnam par rtog pa dang / bye brag tu rnam par rtog pa dang / ril por 'dzin pa'i rnam par rtog pa dang /bdag go snyam pa'i rnam par rtog pa dang / bdag gi snyam pa'i rnam par rtog pa dang / sdug par rnam par rtog pa dang / mi sdug par rnam par rtog pa dang / de gnyi ga las bzlog pa'i rnam par rtog pa'o/ /rnam par rtog pa rnam pa brgyad po de dngos po gsum po gang dag gis skyed pa yin zhe na/ngo bo nyid du rnam par rtog pa gang yin pa dang / bye brag tu rnam par rtog pa gang yin pa dang / ril por 'dzin pa'i rnam par rtog pa gang yin pa'i rnam par rtog pa gsum po 'di dag ni rnam par rtog pa spros pa'i gnas dang / rnam par rtog pa spros pa'i dmigs pa'i dngos po gzugs la sogs pa'i ming btags par skyed do//dngos po de la brten nas spros par byed na/ ming gi 'du shes kyi brjod pa yongs su bzung ba/ ming gi 'du shes kyi brjod pas yongs su bsgoms pa'i rnam par rtog pa sna tshogs mang po rnam pa du ma dngos po de nyid las 'byung bar 'gyur ro//de la bdag go snyam pa'i rnam pa gang yin pa dang / bdag gi snyam pa'i rnam par rtog pa 'di gnyis ni 'jig tshogs la lta ba de las gzhan pa'i lta ba thams cad kyi rtsa bar gyur pa dang / nga rgyal gyi rtsa ba nga'o snyam pa'i nga rgyal de las gzhan pa'i nga rgyal thams cad kyi rtsa bar gyur pa skyed do//de la sdug par rnam par rtog pa dang / mi sdug par rnam par rtog pa dang / de gnyi ga las bzlog pa'i rnam par rtog pa ni ci rigs par 'dod chags dang / zhe sdang dang / gti mug rnams skyed do/ /de ltar na rnam par rtog pa rnam pa brgyad po 'di ni 'di lta ste/ rnam par rtog pa'i gnas spros pa'i dngos po dang / lta ba dang nga'o snyam pa'i nga rgyal dang / 'dod chags dang / zhe sdang dang / gti mug rnams dang / dngos po 'di gsum skyed par 'jug pa yin no/ / de la rnam par rtog pa'i spros pa'i dngos po la ni 'jig tshogs la lta ba dang / nga'o snyam pa'i nga rgyal brten no//'jig tshogs la lta ba dang / nga'o snyam pa'i nga rgyal la ni 'dod chags dang / zhe sdang dang / gti mug rnams brten te/ gzhi gsum po 'di dag gis 'jig rten thams cad kyi 'jug pa'i phyogs ma lus par bstan pa yin no/ /de la ngo bo nyid du rnam par rtog pa gang zhe na/gzugs la sogs pa'i ming btags pa'i dngos po la gzugs zhes bya ba la sogs par rnam par rtog pa gang yin pa de ni ngo bo nyid du rnam par rtog pa zhes bya'o/ /bye brag tu rnam par rtog pa gang zhe na/ gzugs la sogs par ming btags pa'i dngos po de nyid la 'di ni gzugs can no//'di ni gzugs can ma yin no/ /'di ni bstan du yod pa'o/ /'di ni bstan du med pa'o/ /de bzhin du thogs pa dang bcas pa dang / thogs pa med pa dang zag pa dang bcas pa dang / zag pa med pa dang / 'dus byas dang / 'dus ma byas dang /dge ba dang / mi dge ba dang / lung du ma bstan pa dang / 'das pa dang / ma 'ongs pa dang / da ltar byung ba dang / de lta bu dang mthun pa'i tshul gyi dbye ba tshad med pas ngo bo nyid du rnam par rtog pa la brten pa de bye brag tu bya ba'i phyir rnam par rtog pa gang yin pa de ni bye brag tu rnam par rtog pa zhes bya'o//ril por 'dzin pa'i rnam par rtog pa gang zhe na/ gzugs la sogs par ming du btags pa'i dngos po de nyid la bdag dang sems can dang / srog dang / skye ba po'i ming gi brda dang ldan pa/ khyim dang / dmag dang / nags la sogs pa dang / zas dang / skom dang / bzhon pa dang / gos la sogs pa de dag la de dag gi ming gi brda dang ldan la / chos mang po bsdus pa dag la ril por 'dzin pa'i rgyu las byung ba 'jug pa gang yin pa de ni ril por 'dzin pa'i rnam par rtog pa zhes bya'o/ /bdag go snyam pa dang / bdag gi snyam pa'i rnam par rtog pa gang zhe na/dngos po gang zag pa dang bcas pa nye bar len pa dang mthun par bcas pa gang la yun ring po nas bdag tu'am/ bdag gir 'dris shing mngon par zhen pa la goms pas/ log par 'dzin cing 'dris pa de las rang gi lta ba'i gnas dang mthun pa'i dngos po la brten nas/ 'byung ba log pa'i rnam par rtog pa gang yin pa de ni bdag go snyam pa dang / bdag gi snyam pa'i rnam par rtog pa zhes bya'o/ /sdug par rnam par rtog pa gang zhe na/ mdzes pa yid du 'ong ba'i dngos po la dmigs pa'i rnam par rtog pa gang yin pa'o/ /mi sdug par rnam par rtog pa gang zhe na/mi mdzes pa yid du mi 'ong ba'i dngos po la dmigs pa'i rnam par rtog pa gang yin pa'o/ /sdug pa dang mi sdug pa gnyi ga las bzlog pa'i rnam par rtog pa gang zhe na/ mdzes pa dang / mi mdzes pa yid du 'ong ba dang yid du mi 'ong ba de gnyis la ma gtogs pa'i dngos po la dmigs pa'i rnam par rtog pa gang yin pa ste/de yang mdor bsdu na rnam pa gnyis su 'gyur te/ rnam par rtog pa dang rnam par rtog pa'i rten rnam par rtog pa'i dmigs pa'i dngos po'o/ /de gnyi ga yang thog ma med pa dang / gcig gi rgyu las gcig byung ba yin par rig par bya ste/rnam par rtog pa snga ma ni da ltar byung ba'i rnam par rtog pa'i dmigs pa'i dngos po 'byung ba'i rgyu yin no/ /da ltar byung ba'i rnam par rtog pa'i dmigs pa'i dngos po byung ba ni/ da ltar byung ba de la dmigs pa'i rnam par rtog pa 'byung ba'i rgyu yin no/ /de la da ltar gyi rnam par rtog pa yongs su ma shes pa ni/phyi ma la de'i dmigs pa'i dngos po 'byung ba'i rgyu'o/ /de byung na de la gnas pa de la brten pa'i rnam par rtog pa yang nges par 'byung bar 'gyur ro/ /rnam par rtog pa de ji ltar shes par 'gyur zhe na/ yongs su tshol ba rnam pa bzhi dang / yang dag pa ji lta ba bzhin du yongs su shes pa rnam pa bzhis 'gyur te/ yongs su tshol ba rnam pa bzhi gang zhe na/ ming yongs su tshol ba dang / dngos po yongs su tshol ba dang / ngo bo nyid du btags pa yongs su tshol ba dang / bye brag tu btags pa yongs su tshol ba'o/ /de la ming yongs su tshol ba ni byang chub sems dpa' gang ming la ming tsam du lta ba gang yin pa'o //de bzhin du dngos po la dngos po tsam du lta ba ni/ dngos po yongs su tshol ba'o/ /ngo bo nyid du btags pa la ngo bo nyid du btags pa tsam du lta pa ni ngo bo nyid du btags pa yongs su tshol ba'o/ /bye brag tu btags pa la bye brag tu btags pa tsam du lta ba ni bye brag tu btags pa yongs su tshol ba ste/des ming dang dngos po'i mtshan nyid tha dad pa dang / 'brel par yang mthong la/ ming dang dngos po 'brel pa la brten pa ngo bo nyid du btags pa dang bye brag tu btags pa yang khong du chud do//yang dag pa ji lta ba bzhin du yongs su shes pa bzhi po de dag gang zhe na/ ming tshol bar gyur pa yang dag pa ji lta ba bzhin du yongs su shes pa dang / dngos po tshol bar gyur pa dang / ngo bo nyid du btags pa tshol bar gyur pa dang / bye brag tu btags pa tshol bar gyur pa yang dag pa ji lta ba bzhin du yongs su shes pa'o//ming tshol bar gyur pa yang dag pa ji lta ba bzhin du yongs su shes pa gang zhe na/ byang chub sems dpa' des ming la ming tsam du yongs su btsal nas/ ming de la 'di ltar yang dag pa ji lta ba bzhin du yongs su shes te/ 'di ltar ming 'di ni 'di lta bu'i don du dngos po la rnam par 'jog ste/'di ltar 'du byed kyi don dang / lta ba'i don dang / nye bar 'dogs pa'i don du'o/ /gal te gzugs la sogs par ming du btags pa'i dngos po la gzugs zhes bya ba'i ming rnam par mi 'jog na ni/ sus kyang dngos po de la gzugs zhes bya bar de ltar shes par mi 'gyur ro//mi shes na ni sgro 'dogs shing mngon par zhen par mi 'gyur ro/ /mngon par zhen pa med na brjod par mi 'gyur te/ gang gis de ltar yang dag pa ji lta ba bzhin du rab tu shes pa de ni ming tshol bar gyur pa yang dag pa ji lta ba bzhin du yongs su shes pa zhes bya'o//dngos po tshol bar gyur pa yang dag pa ji lta ba bzhin du yongs su shes pa gang zhe na/ 'di ltar byang chub sems dpas dngos po la dngos po tsam du yongs su btsal nas/ gzugs la sogs par ming btags pa'i dngos po de brjod pa thams cad dang ma 'dres shing brjod du med par mthong ste/'di ni dngos po tshol bar gyur pa yang dag pa ji lta ba bzhin du yongs su shes pa gnyis pa'o/ /ngo bo nyid du btags pa tshol bar gyur pa yang dag pa ji lta ba bzhin du yongs su shes pa gang zhe na/ 'di ltar byang chub sems dpa' gzugs la sogs par ming btags pa'i dngos po la ngo bo nyid du btags pa la btags pa tsam du yongs su btsal nas/ngo bo nyid du btags pa des de'i ngo bo nyid ma yin pa'i dngos po la de'i ngo bo nyid du snang bar yang dag pa ji lta ba bzhin du khong du chud cing rab tu shes te/ des de'i ngo bo nyid du sprul pa dang /gzugs brnyan dang / brag ca dang / mig yor dang / chu zla dang / rmi lam dang / sgyu ma lta bur mthong ste/ der snang ba ni de'i bdag nyid ma yin par mthong na de ni shin tu zab pa'i don spyod yul du gyur pa ngo bo nyid du btags pa tshol bar gyur pa yang dag pa ji lta ba bzhin du yongs su shes pa gsum pa'o//bye brag tu btags pa tshol bar gyur pa yang dag pa ji lta ba bzhin du yongs su shes pa gang zhe na/ 'di ltar byang chub sems dpa' bye brag tu btags pa la btags pa tsam du btsal nas/ gzugs la sogs par ming btags pa'i dngos po de la bye brag tu btags pa rnams la gnyis su med pa'i don du mthong la/dngos po de yang yod pa yang ma yin/ med pa yang ma yin te/ brjod pa'i bdag nyid kyis yongs su grub pa ma yin pa'i phyir/ yod pa ma yin la brjod du med pa'i bdag nyid du rnam par gnas pa'i phyir med pa yang ma yin no//de bzhin du don dam pa'i bden pas ni/ gzugs can ma yin la/ kun rdzob kyi bden pas ni/ de la gzugs su nye bar 'dogs pas gzugs can ma yin pa yang ma yin no/ /dngos po yod pa dang / dngos po med pa dang / gzugs can dang / gzugs can ma yin pa ji lta ba de bzhin du bstan du yod pa dang /bstan du med pa la sogs par bye brag tu btags pa'i rnam grangs thams cad la yang tshul du 'dis de ltar rig par bya ste/ de ltar gang gis bye brag tu btags pa ste gnyis su med pa'i don du yang dag pa ji lta ba bzhin du rab tu shes pa 'di ni bye brag tu btags pa tshol bar gyur pa yang dag pa ji lta ba bzhin du yongs su shes pa zhes bya'o//de la byis pa rnams kyi log par rtog pa rnam pa brgyad po gzhi gsum skyed pa 'jig rten 'grub par byed pa gang yin pa de ni yang dag pa ji lta ba bzhin du yongs su shes pa rnam pa bzhi po de med cing /mi gnas na 'byung bar 'gyur ro/ /log pa'i rnam par rtog pa de las ni kun nas nyon mongs pa 'byung bar 'gyur ro/ /kun nas nyon mongs pa las ni 'khor ba na 'khor bar 'gyur ro/ /'khor ba na 'khor ba las ni 'khor ba'i rjes su song ba skye ba dang / rga ba dang / na ba dang / 'chi ba la sogs pa'i sdug bsngal 'byung bar 'gyur ro/ /gang gi tshe byang chub sems dpas yang dag pa ji lta ba bzhin du yongs su shes pa rnam pa bzhi po la brten nas/ rnam par rtog pa rnam pa brgyad po de yongs su shes par gyur pa na/ tshe 'di nyid la de yongs su shes par gyur pas phyi ma la de'i rten dang de'i dmigs pa spros par gtogs pa'i dngos po 'byung bar mi 'gyur ro//de ma skyes shing ma byung bas de la dmigs pa'i rnam par rtog pa yang phyi ma la 'byung bar mi 'gyur ro/ /de ltar na dngos po dang bcas pa'i rnam par rtog pa de'i 'gog pa gang yin pa de ni spros pa thams cad 'gog pa yin par rig par bya'o//spros pa 'gog pa de lta bu ni byang chub sems dpa'i theg pa chen po yongs su mya ngan las 'das pa yin par rig par bya'o/ /tshe 'di nyid la de kho na'i don gyi mchog spyod yul ba'i ye shes de rnam par dag pas byang chub sems dpa' des thams cad la dbang thob pa rnyed par 'gyur te/'di lta ste/ sprul pa sna tshogs la yang sprul pa'i rdzu 'phrul gyis so/ /yongs su bsgyur ba sna tshogs la yang yongs su bsgyur ba'i rdzu 'phrul gyis so/ /shes bya thams cad shes pa yang ngo / /ji srid du 'dod pa de srid du gnas pa dang /gnod pa med par dga' mgur 'chi 'pho ba la yang ngo / /de de ltar dbang thob pas na/ sems can thams cad kyi gtso bo bla na med pa yin no/ /de ltar thams cad la dbang ba'i byang chub sems dpa' de la phan yon gyi mchog rnam pa lnga yod par rig par bya ste/ gnas pa rab tu zhi bas sems zhi ba'i mchog thob par 'gyur te/nyon mongs pa rab tu zhi bas ni ma yin pa dang / rig pa'i gnas thams cad la de'i ye shes mthong ba thogs pa med pa yongs su dag pa/ yongs su byang ba 'jug pa dang / sems can rnams kyi don du 'khor ba na 'khor bas mi skyo bar 'gyur ba dang /de bzhin gshegs pa rnams kyi ldem po'i ngag thams cad la 'jug pa dang / gzhan gyi dring mi 'jog pa'i phyir theg pa chen po la ma snga pa mi bzlog pa yin no/ /phan yon rnam pa lnga po de dag gi las kyang rnam pa lnga kho nar rig par bya ste/ byang chub sems dpa' byang chub kyi phyir sbyor ba tshar phyin pa'i lus dang sems kyis 'bad pa dang ngal ba med par bya ba'i phyir tshe 'di la bde bar gnas pa'i mchog de ni sems zhi ba'i phan yon gyi las yin par rig par bya'o//byang chub sems dpa'i sangs rgyas kyi chos thams cad yongs su smin par byed pa de ni rig pa'i gnas thams cad la shes pa thogs pa med pa'i phan yon gyi las yin par rig par bya'o//byang chub sems dpa'i sems can yongs su smin par byed pa de ni 'khor bas mi skyo ba'i phan yon gyi las yin par rig par bya'o/ /gdul ba rnams kyi the tshom skyes so cog sel ba dang / bstan pa nub par byed pa dam pa'i chos ltar bcos pa rnams yongs su shes pa dang /bstan pa dang bsal bas chos kyi tshul yun ring por yongs su sdud cing / yang dag par 'dzin pa de ni ldem po ngag thams cad la 'jug pa'i phan yon gyi las yin par rig par bya'o/ /phas kyi rgol ba thams cad tshar gcod pa dang /brtson 'grus brtan pa dang / smon lam las mi nyams pa de ni gzhan gyi dring mi 'jog pas mi 'phrogs pa'i phan yon gyi las yin par rig par bya'o/ /de ltar na byang chub sems dpa' rnams kyi byang chub sems dpa'i bya ba gang ci yang rung ba de dag thams cad ni phan yon gyi las rnam pa lnga po 'di dag gis yongs su bsdus pa yin no//bya ba de dag kyang gang zhe na/ bdag gi bde ba la kun nas nyon mongs pa med pa dang / sangs rgyas kyi chos yongs su smin par bya ba dang / sems can yongs su smin par bya ba dang / dam pa'i chos gzung ba dang /smon lam mi 'gyur zhing brtson 'grus drag pos phas kyi rgol ba rnam par tshar gcad pa'o/ /de la de kho na'i don rnam pa bzhi la dang po gnyis ni tha ma'o/ /gsum pa ni 'bring / bzhi pa ni mchog yin par rig par bya'o/ /byang chub sems dpa'i sa'i gzhi'i rnal 'byor gyi gnas las de kho na'i le'u ste bzhi pa'o// //bam po bzhi pa/ de nas sangs rgyas dang byang chub sems dpa' rnams kyi mthu gang zhe na/ mdor bsdu na sems las su rung ba/ sems shin tu yongs su bsgoms pa/ ting nge 'dzin la dbang thob pa/ ting nge 'dzin la brten nas 'dod pa tsam gyis don thams cad 'grub pa ni 'phags pa'i mthu zhes bya'o//chos rnams kyi 'bras bu chen po dang / phan yon chen po gang yin pa yang de dag gi mthu zhes bya'o/ /sangs rgyas rnams dang / byang chub sems dpa' rnams kyi bsod nams kyi tshogs chen po sngon bsags pa las lhan cig skyes pa'i ngo mtshar rmad du byung ba'i chos de yang de dag gi lhan cig skyes pa'i mthu gzhan yin par rig par bya'o//sangs rgyas dang byang chub sems dpa' rnams kyi mthu de yang rnam pa'i rab tu dbye bas rnam pa lngar 'gyur te/ mngon par shes pa'i mthu dang /chos kyi mthu dang / lhan cig skyes pa'i mthu dang / nyan thos dang / rang sangs rgyas rnams dang / thun mong ba dang / thun mong ma yin pa'o/ /de la mngon par shes pa drug po rdzu 'phrul gyi yul dang / lha'i rna ba dang / sems kyi rnam grangs dang / sngon gyi gnas rjes su dran pa dang /'chi 'pho dang / skye ba mthong ba dang / zag pa zad pa zhes pa mngon sum du bya ba ni mngon par shes pa'i mthu zhes bya'o/ /de la pha rol tu phyin pa drug po sbyin pa dang / tshul khrims dang / bzod pa dang / brtson 'grus dang / bsam gtan dang / shes rab ni chos rnams zhes bya ste/ chos de dag gi mthu gang yin pa de ni chos kyi mthu zhes bya'o/ /de la rdzu 'phrul gang zhe na/ mdor bsdu na rnam pa gnyis te/ yongs su bsgyur ba dang / sprul pa'o/ /rnam pa de gnyis la yang rnam pa'i rab tu dbye bas ni rnam pa du ma yod do/ /de la yongs su bsgyur ba'i rdzu 'phrul gyi rnam pa'i rab tu dbye ba gang zhe na/'di lta ste/ g.yo bar byed pa dang / 'bar bar byed pa dang / khyab par byed pa dang / rnam par ston pa dang / gzhan du 'gyur bar byed pa dang / 'gro ba dang / 'ong ba dang / sdud pa dang / rgyas par byed pa dang / gzugs thams cad lus su 'jug par byed pa dang / skal ba mnyam pa'i gan du 'gro ba dang /snang bar byed cing mi snang bar yang byed pa dang / dbang byed pa dang / gzhan gyi rdzu 'phrul zil gyis gnon pa dang / spobs pa sbyin pa dang / dran pa sbyin pa dang / bde ba sbyin pa dang / 'od zer 'byin pa dang / de lta bu dang mthun pa'i rdzu 'phrul ni yongs su bsgyur ba zhes bya'o//de la g.yo bar byed pa ni 'di la de bzhin gshegs pa'am/ ting nge 'dzin la dbang thob pa sems las su rung ba'i byang chub sems dpas gtsug lag khang yang g.yo bar byed/ khyim dang / grong dang / grong khyer dang / zhing dang / sems can dmyal ba'i 'jig rten dang /dud 'gro'i 'jig rten dang / yi dags kyi 'jig rten dang / mi'i 'jig rten dang / lha'i 'jig rten dang / gling bzhi pa dang / stong gi 'jig rten dang / stong gnyis kyi 'jig rten gyi khams dang / stong gsum gyi stong chen po'i 'jig rten gyi khams dang / stong gsum pa brgya dang /stong gsum pa stong dang / stong gsum pa'i 'jig rten gyi khams 'bum nas/ stong gsum pa'i 'jig rten gyi khams dpag tu med pa grangs med pa'i bar du yang g.yo bar byed do/ /de la 'bar bar byed pa ni ro stod nas me 'bar bar byed la/ ro smad nas chu grang mo'i rgyun 'byin pa dang /ro smad nas me 'bar bar byed la/ ro stod nas chu grang mo'i rgyun 'byin pa dang / me'i khams la yang snyoms par 'jug cing lus thams cad nas me 'bar bar byed do/ /lus thams cad nas me 'bar bas na/ lus las 'od zer sna tshogs sngon po dang / ser po dang /dmar po dang / dkar po dang / btsod ka dang / shel gyi kha dog lta bu 'byung ba'o/ /de la khyab par byed pa ni 'di lta ste/ khyim yang 'od kyis khyab par byed/ gtsug lag khang nas snga ma bzhin du 'jig rten gyi khams dpag tu med grangs med pa'i bar du yang khyab par byed pa de lta bu ste/snga ma bzhin du 'di lta ste/ g.yo bar byed pa dang 'dra'o/ /de la rnam par ston pa ni 'di lta ste/ dge sbyong dang / bram ze dang / nyan thos dang / byang chub sems dpa' dang / lha dang / klu dang / gnod sbyin dang / lha ma yin dang / nam mkha' lding dang / mi'am ci dang / lto 'phye chen po lhags shing bde bar 'khod pa'i 'khor du de bzhin gshegs pa'am/byang chub sems dpa' 'og tu ni ngan song dag kyang rnam par ston/ steng du ni lha dang mi rnams kyang rnam par ston pa dang / de ma yin pa sangs rgyas kyi zhing dag kyang rnam par ston pa dang / de dag tu yang sangs rgyas dang /byang chub sems dpa' rnams ston te/ sangs rgyas kyi zhing gang gA'i klung gi bye ma snyed dag las kyang 'da' zhing / sangs rgyas kyi zhing ming ji skad grags pa dang / sangs rgyas kyi zhing de na de bzhin gshegs pa'i mtshan gang yin pa'i sangs rgyas kyi zhing de dang /de bzhin gshegs pa de yang ston la/ sangs rgyas kyi zhing de'i ming de dang / de bzhin gshegs pa'i mtshan de yang ston pa dang / de'i tshu rol dang / de'i pha rol dag kyang gang 'dod pa dang / ji srid du 'dod par rnam par ston cing rjod par byed pa'o/ /de la gzhan du 'gyur bar byed pa ni gal te sa la chur mos na yang de de kho na bzhin du 'gyur gyi gzhan du mi 'gyur ba dang /me dang rlung du mos na yang de de kho na bzhin du 'gyur gyi gzhan du mi 'gyur ba dang / gal te chu la sar mos sam/ me dang rlung du mos na yang de de kho na bzhin du 'gyur gyi gzhan du mi 'gyur ba dang /gal te me la sar mos sam/ chu'am rlung du mos sam/ gal te rlung la sar mos sam/ chu dang mer mos na yang de de kho na bzhin du 'gyur gyi/ gzhan du mi 'gyur ba dang / ji ltar 'byung ba chen po rnams phan tshun du bsgyur zhing gzhan du 'gyur bar byed pa bzhin du gzugs dang /sgra dang / dri dang / ro dang / reg bya rnams la yang de bzhin du rig par bya'o/ /gal te rtswa dang / lo ma dang / ba lang gi lci ba dang / sa la sogs pa'i lha rdzas rnams las zas dang / skom dang / bzhon pa dang / gos dang / rgyan dang / snod spyad dang / spos dang /me tog phreng ba dang / byug par mos sam/ rdo dang / gseg ma dang / gyo dum dang / gyo mo la sogs pa la nor bu dang / mu tig dang / bai DUr+ya dang / dung dang / man shel dang / byi rur mos sam/ ri'i rgyal po gangs la sogs pa ri thams cad la gser du mos na yang de dag thams cad de kho na bzhin du 'gyur gyi/gzhan du mi 'gyur ba dang / de bzhin du sems can mdog bzang po rnams la mdog ngan pa dag tu mos sam/ mdog ngan pa rnams la mdog bzang po dag tu'am/ de gnyi ga la ma gtogs pa rnams la mdog bzang po dag tu 'am/ mdog ngan pa dag tu'am/de gnyi gar ram/ mdog bzang po dang / mdog ngan pa rnams la ji lta ba de bzhin du/ yan lag ma tshang ba dang / yan lag tshang ba dang / rid pa dang / tsho ba la sogs pa rang gi mtshan nyid du yod pa las gzhan du bsgyur ba ci yang rung ba dang / nus pa'i ngo bo la gzhan du mos pa de dag thams cad ji ltar mos pa de bzhin du 'gyur ba yin no//de la 'gro ba dang 'ong ba ni rtsig pa la yang thad kar/ ri brags la yang thad kar/ rab la yang thad kar lus kyis thogs pa med par 'gro ste/ rgyas par tshangs pa'i 'jig rten du yang 'gro zhing phyir yang 'ong ba nas/gong du 'og min la thug pa dang / thad kar yang stong gsum gyi stong chen po'i 'jig rten gyi khams dpag tu med grangs med pa'i bar du yang 'byung ba chen po bzhi las byung ba'i lus rags pas 'gro zhing phyir yang 'ong pa dang / rgyang ring po la nye bar mos na yid dang 'dra bar mgyogs par 'gro ba dang 'ong ba yin no//de la sdud pa dang rgyas par byed pa ni ri'i rgyal po gangs kyang rdul phra rab tsam du sdud la/ rdul phra rab kyang ri'i rgyal po gangs tsam du skyed pa yin no/ /de la gzugs thams cad lus su 'jug par byed pa ni/ 'khor chen po sna tshogs kyi mdun du/ grong dang / grong khyer dang / grong rdal dang / rtswa dang / nags tshal dang / sa gzhi dang / ri'i gzugs kyi tshogs bdag gi lus su 'jug par byed do/ /'khor de thams cad kyis kyang bdag cag lus de nyid kyi nang du song bar shes pa yin no/ / de la skal pa mnyam pa'i gan du 'gro ba ni rgyal rigs kyi 'khor gyi nang du song ste/ phyin nas de dag gi kha dog rgyas pa ji lta bur 'dug pa de bzhin du/ de'i yang de dang 'dra ba dang / de dag gi chu zheng ji lta ba dang / smra ba'i stangs ji lta ba bzhin du de'i yang de dang 'dra ba dang / de dag don gang smra bar byed pa de ni de yang smra bar byed pa dang /de dag don gang smra bar mi byed pa de ni de yang smra bar mi byed pa dang / mjug tu de dag la chos dang mthun pa'i gtam gyis yang dag par bstan/ yang dag par 'dzin du bcug /yang dag par gzengs bstod/ yang dag par rab tu dga' bar byas nas mi snang bar byed la/de mi snang bar gyur pa la mi snang bar gyur pa 'di lha'am/ mi'am su zhig snyam du sems so/ /rgyal rigs kyi 'khor la ji lta ba bzhin du bram ze dang / khyim bdag dang / dge sbyong gi 'khor dang / rgyal chen bzhi'i ris kyi lha rnams dang /sum cu rtsa gsum dang / 'thab bral dang / dga' ldan dang / 'phrul dga' dang / gzhan 'phrul dbang byed kyi lha rnams dang / de bzhin du tshangs ris dang / tshangs pa mdun na 'don dang / tshangs chen dang / 'od chung dang / tshad med 'od dang / 'od gsal dang / dge chung dang / tshad med dge dang / dge rgyas dang / sprin med dang / bsod nams skyes dang / 'bras bu che ba dang / mi che ba dang / mi gdung ba dang / shin tu mthong dang / gya nom snang ba dang / 'og min du yang de bzhin no/ /de la snang bar yang mi byed mi snang bar yang mi byed pa ni 'khor chen po'i mdun du lan brgya'am/lan stong ngam/ de bas lhag par yang mi snang bar byed la/ phyir yang de bzhin du bdag nyid ston cing snang bar byed pa yin no/ /de la dbang byed pa ni sems can gyi khams gang ji snyed yod pa de thams cad 'gro ba dang / 'ong ba dang / gnas pa la sogs pa'i bya ba rnams la yang dbang byed pa ste/gal te des 'di snyam du song zhig snyam na ni 'gro bar 'gyur/ sdod cig snyam na ni sdod par 'gyur / 'ongs shig snyam na ni 'ongs par 'gyur/ smros shig snyam na ni smra bar 'gyur ba yin no/ /de la gzhan gyi rdzu 'phrul zil gyis gnon pa ni de bzhin gshegs pa ni de las gzhan pa rdzu 'phrul dang ldan pa thams cad kyi rdzu 'phrul mngon par 'du byed pa zil gyis mnan nas/ci dgyes par don sgrub par mdzad pa dang / mthar phyin pa'i byang chub sems dpa' skye ba gcig gis thogs pa dang / srid pa tha ma pa ni de bzhin gshegs pa dang mtshungs bar gyur pa'i byang chub sems dpa' ma gtogs par de las gzhan pa thams cad kyi rdzu 'phrul mngon par 'du byed pa zil gyis gnon pa dang /de las gzhan pa'i byang chub sems dpa' rnams ni ches mchog tu gyur pa'i sa la zhugs pa rnams dang mtshungs par gyur pa'i byang chub sems dpa' rnams ma gtogs par de las gzhan pa rdzu 'phrul dang ldan pa thams cad kyi rdzu 'phrul mngon par 'du byed pa zil gyis gnon pa yin no//de la spobs pa sbyin pa ni spobs pa yongs su gtugs pa la/ spobs pa nye bar sgrub pa yin no/ /de la dran pa sbyin pa ni chos rnams la dran pa brjed pa la dran pa nye bar sgrub pa yin no//de la bde ba sbyin pa ni de ston pa na/ gang dag chos nyan pa de dag la shin tu sbyangs pa'i bde ba gang gis de dag sgrib pa med par chos nyan par 'gyur ba de lta bu'i lus dang sems la phan 'dogs pa nye bar sgrub par byed do / /de yang de tsam gyi tshul gyis byed kyi gtam du ni ma yin no//khams ma snyoms pa dang / gnod pa las byung ba dang / mi ma yin pas btang ba'i nad 'go ba yang zhi bar byed pa yin no/ /de la 'od zer 'byin pa ni byang chub sems dpa' 'am/ de bzhin gshegs pas rdzu 'phrul gyi 'od zer 'di lta bu lus las 'byin te/gang dag kha cig phyogs bcu'i 'jig rten gyi khams dpag tu med grangs med pa dag tu dong nas / sems can dmyal ba'i sems can rnams kyi sems can dmyal ba'i sdug bsngal rgyun gcod par byed pa dang / kha cig ni lha'i 'jig rten na gnas pa'i lha dang / klu dang / gnod sbyin dang /lha ma yin dang / nam mkha' lding dang / mi'am ci dang / lto 'phye chen po rgya chen po rnams kyi rang rang gi gnas su dong nas 'dir 'ong bar bya ba'i phyir skul bar byed do/ /de bzhin du phyogs bcu'i 'jig rten gyi khams dpag tu med grangs med pa dag na/ 'jig rten gyi khams gzhan dag na gnas pa'i byang chub sems dpa' dag 'dir 'ong bar bya ba'i phyir skul bar byed do//mdor bsdu na de bzhin gshegs pas 'od zer sna tshogs dpag tu med grangs med pa dag gis sems can tshad med pa dag gi don dpag tu med grangs med pa dag mdzad pa'o/ /yongs su bsgyur ba'i rdzu 'phrul de dag thams cad kyi rnam pa ni re re nas dbye na dpag tu med grangs med par rig par bya ste/rang bzhin de ma yin pa'i dngos po de las gzhan du bsgyur zhing bsgrub pa la ni yongs su bsgyur ba zhes bya ste/ de lta bas na 'di ni yongs su bsgyur ba'i rdzu 'phrul zhes bya'o//de la sprul pa'i rdzu 'phrul gang zhe na/ mdor bsdu na/ dngos po med pa las sprul pa ste/ sprul pa'i sems kyis ji ltar 'dod pa bzhin du mngon par 'dus byas nas 'grub par 'gyur ba de ni sprul pa'i rdzu 'phrul zhes bya'o/ /de yang lus sprul pa dang / ngag sprul pa dang /yul sprul pa rnam pa du ma yod de/ lus sprul pa de yang de bdag dang 'dra ba'am/ mi 'dra ba'am/ gzhan dang 'dra ba'am/ mi 'dra bar sprul pa ste/ lus sprul pa bdag dang / gzhan dang 'dra ba dang / mi 'dra ba de yang dbang po 'dra ba dang / dbang po'i rten sprul par byed kyi dbang po nyid ni ma yin no//yul dang 'dra ba'i sprul pa sprul bar byed pa ni/ 'di lta ste zas dang skom la sogs pa dang / nor bu dang / mu tig dang / bai DUr+ya la sogs pa dang / gzugs dang / sgra dang / dri dang / ro dang / reg byar gtogs pa'i phyi rol gyi yo byad gang ci yang rung ba de dang 'dra ba de ma yin pa thams cad ji ltar 'dod pa bzhin du sprul par byed do//bdag dang 'dra ba de yang rnam pa du ma mang po sna tshogs yod de/ lha dang / klu dang / gnod sbyin dang / lha ma yin dang / nam mkha' lding dang / mi'am ci dang / lto 'phye chen po'i byad gzugs dang / mi'i byad gzugs dang /dud 'gro dang / yi dags dang / sems can dmyal ba'i byad gzugs dang / nyan thos kyi byad gzugs dang / rang sangs rgyas kyi byed gzugs dang / byang chub sems dpa'i byad gzugs dang / de bzhin gshegs pa'i sku byad rnams so/ /de gal te byang chub sems dpa' nyid ci 'dra ba/de 'dra ba nyid du sprul pa sprul pa na/ de'i sprul ba 'di ni bdag dang 'dra ba yin no/ /de lta ma yin pa ni sprul pa bdag dang mi 'dra bar 'gyur ro/ /gal te gzhan dag lhar gyur pa de dang 'dra bar sprul na ni/ de'i gzhan dang 'dra ba'i sprul pa yin no/ /gal te mi 'dra bar sprul na ni/gzhan dang mi 'dra ba yin no/ /lhar gyur pa ji lta ba bzhin du de bzhin gshegs par gyur pa'i bar du yang de bzhin du rig par bya'o/ /de la lus kyi sprul pa mang po gang zhe na/ 'di la de bzhin gshegs pa'am/ byang chub sems dpas phyogs bcu'i 'jig rten gyi khams dpag tu med grangs med pa dag tu sems can dpag tu med grangs med pa dag gi don sprul pa byad gzugs sna tshogs de dag gis cig car mdzad pa dang /byang chub sems dpa' 'am/ de bzhin gshegs pa 'das pa'i 'og tu yang sprul pa la la gnas pa kho nar byin gyis rlob pa dang /sangs rgyas dang / byang chub sems dpa' rnams kyi sprul pa la la ni sems can rnams la rnam par bstan pa tsam du zad de/ sgyu ma lta bu yin pa dang / la la ni nor rdzas gang gis nor rdzas kyi bya ba byed pa yang dag pa'i zas dang / skom dang / bzhon pa dang / gos la sogs pa dang /nor bu dang / mu tig dang / bai DUr+ya dang / dung dang / man shel dang / byi ru la sogs par sprul pa de kho na bzhin du 'byung ba yin te/ gzhan du mi 'gyur ba 'di ni re zhig lus kyi sprul pa yin no/ /ngag gi sprul pa ni gdangs snyan pa dang ldan pa yang yod/ skad gsal ba dang ldan pa dang /bdag dang 'brel pa dang / gzhan dang 'brel pa dang / 'brel pa ma yin pa dang / chos ston par gtogs pa dang / bag med pa las bskul bar gtogs pa yang yod do/ /de la gdangs snyan pa ni sangs rgyas dang byang chub sems dpa' rnams kyi tshig brjod pa'i sprul pa zab pa yin te/'brug sgra lta bu dang / ka la ping ka'i skad yid du 'ong ba 'dra ba dang / dga' bar byed pas snying du 'thad pa dang / ngag sprul pa de grong khyer du 'gro ba yin pa dang / snyan cing 'jebs pa dang / rnar snyan pa dang / zur phyin pa dang / brda phrad pa dang / snyan pa dang / mi mthun pa med pa dang /mi brten pa dang / mi zad pa yin no/ /de la skad gsal ba ni de bzhin gshegs pa'am/ byang chub sems dpa' bzhed na/ lha dang / klu dang / gnod sbyin dang / lha ma yin dang / nam mkha' lding dang / mi'am ci dang / lto 'phye chen po dang / nyan thos dang / byang chub sems dpa'i 'khor sna tshogs 'dus shing 'khod pa'i 'khor gyi dkyil 'khor dpag tshad gcig gi bar gyi mthar thug par gang dag thag ring po na 'dug pa'am/ gang dag drung na 'dug pa yang rung ste/ thams cad la yang gsung ba shin tu yongs su rdzogs pas go bar mdzad pa dang /bzhed na stong chung ngu'i 'jig rten gyi khams su gsung gis go bar mdzad pa dang / stong gnyis pa 'am/ stong gsum pa'am/ phyogs bcu'i 'jig rten gyi khams dpag tu med grangs med pa dag tu gsung gis go bar mdzad de/ sgra de las kyang sems can rnams la chos ston pa/sems can rnams kyi don du 'gyur ba gang yin pa rnam pa du ma 'byung bar 'gyur ba yin no/ /de la bdag dang 'brel ba'i ngag gi sprul pa la ni bdag nyid kyis sprul pa'i tshig gis chos ston pa'am/ bag med pa las bskul ba gang yin pa'o/ / gzhan dang 'brel pa ni gzhan sprul pa'i tshig gis chos ston pa'am/ bag med pa las bskul ba gang yin pa'o/ /de la 'brel pa ma yin pa'i ngag gi sprul pa ni nam mkha' dang / sprul pa sems can gyi sems kyi rgyud ma yin pa las tshig 'byung ba gang yin pa'o/ /de la chos ston pa'i sprul pa ni de dang der rmongs pa rnams la rigs pas yang dag par ston pa'i ched gang yin pa'o//de la sprul pa'i sprul pa ni rmongs pa med cing dad pa rnyed pa bag med par gyur pa rnams bag med pa la ngo tsha ba skyed pa dang / bag yod pa yang dag par 'dzin du 'jug pa'i ched gang yin pa'o//sprul pa rnam pa du ma de yang mdor bsdu na lus kyi sprul pa dang / ngag gi sprul pa dang / yul gyi sprul pa yin par rig par bya'o/ /de ltar na sprul pa'i rdzu 'phrul de dag kyang re re nas rnam par dbye na dpag tu med grangs med par rig par bya ste/ sangs rgyas dang byang chub sems dpa' rnams kyi rdzu 'phrul rnam pa de gnyis kyang mngon par mdor bsdu na don rnam pa gnyis bsgrub pa yin te/sems can rnams rdzu 'phrul gyi cho 'phrul gyis 'dun par byas nas sangs rgyas kyi bstan pa la 'jug par byed pa dang / sems can sdug bsngal ba rnams la phan gdags pa rnam pa du ma mang po sna tshogs nye bar sgrub pa yin no//de la sangs rgyas dang byang chub sems dpa' rnams kyi sngon gyi gnas mkhyen pa gang zhe na/ 'di la de bzhin gshegs pa'am/ byang chub sems dpa' bdag nyid kyis bdag nyid kyi sngon gyi gnas yang dag par dgongs te/gang du sems can che ge mo zhes bya ba de dag gi nang du bdag byung ba na ming 'di zhes bya ba'o zhes rgya cher mdo las 'byung ba bzhin du sems can gyi lus tshogs la sogs pa thams cad kyang rjes su dgongs so/ /ji ltar bdag nyid kyis bdag nyid yang dag par rjes su dgongs pa de bzhin du/gzhan dag la yang dran par mdzad de/ bdag nyid kyis gzhan dag gi yang dgongs so/ /sngon gyi mtha'i sems can gyi tshogs gang yin pa de dag gi bdag nyid kyis dgongs shing / gzhan dag la yang dran par mdzad de/ gang du sems can che ge mo zhes bya ba de dag gi nang du bdag byung ba ni ming 'di zhes bya'o zhes rgya cher sbyar bar bya'o//sems can de dag gi sngon gyi gnas thams cad kyang bdag gi tshe 'di nyid la ji lta ba de kho na bzhin du yang dag par dgongs so/ /cha phra ba yang yang dag par rjes su dgongs so/ /sngon gyi spyod pa nyung ngu'am/ mang po sngon dran pa las brjed pa gang ci yang rung ba yang ngo / /skad cig bar chad med pa'i tshul gyis go rims gang gis rgyun ma chad par byas par rgyun chags pa yang yang dag par rjes su dgongs so/ /gang bskal pa bgrang ba'i tshul gyis grangs su byar nus pa'i tshad kyang rjes su dgongs so//gang bskal pa bgrang ba'i tshul gyis grangs su byar mi nus pa dpag tu med grangs med pa yang rjes su dgongs so/ /de'i sngon gyi gnas mkhyen pa ni mdor bsdu na gang bzhed pa dang / ji ltar bzhed pa dang / ji tsam bzhed pa thogs pa med par 'jug ste/ byang chub sems dpa' dang /de bzhin gshegs pa'i sngon gyi gnas su gtogs pa'i mthu ni de lta bu yin no/ /de sngon gyi gnas rjes su dran pa mkhyen pa des sems can rnams sangs rgyas bcom ldan 'das rnams la dad pa bskyed pa dang / gus pa bskyed pa dang / skyo ba bskyed pa'i phyir byang chub sems dpa'i sngon gyi spyod pa'i mchog tu rmad du byung ba'i spyod pa'i skyes pa'i rabs sna tshogs rnam pa du ma ston to//sems can rnams kyi las kyi 'bras bu rnam par smin pa las brtsams te/ sngon gyi tshul dang ldan pa'i de lta bu byung ba dag kyang ston to/ /'di lta ste/ sngon gyi mthar rtogs pa'i rtag par smra ba rnams dang /kha cig rtag par 'dzin pa'i sems can rtag par lta ba rnams kyi rtag par lta ba yang sel bar mdzad do/ /sangs rgyas dang byang chub sems dpa' rnams kyi lha'i rna ba mkhyen pa gang zhe na/ 'di la de bzhin gshegs pa'am/ byang chub sems dpas lha'i rna bas lha dang mi'i sgra dang /'phags pa rnams dang / 'phags pa ma yin pa rnams dang / sgra chen po rnams dang / sgra chung ngu rnams dang / gsal ba rnams dang / mi gsal ba rnams dang / sprul pa rnams dang / sprul pa ma yin pa rnams dang / rgyang ring po dang / drung na 'dug pa rnams thos pa yin te/ de la lha rnams kyi sgra ni gal te yan chad du 'jug par mi mdzad na/ gong du 'og min gyi gnas man chad du sems can skyes pa rnams kyi'o/ /ji ste 'jug pa mdzad na ni gyen du de las 'das pa'i 'jig rten gyi khams gzhan gyi yang gsan to/ /de la mi rnams kyi sgra ni thad kar gling bzhi pa thams cad du sems can skyes pa rnams kyi'o//de la sgra 'phags pa rnams kyi sangs rgyas rnams dang / sangs rgyas kyi nyan thos rnams dang / byang chub sems dpa' rnams dang / rang sangs rgyas rnams kyi sgra dang / de las gzhan pa'i sems can rnams kyis de dag thos nas rjes su sgrogs par byed de/'di lta ste/ dge ba yang dag par blang ba dang / mi dge ba spang ba las brtsams nas yang dag par ston pa dang / yang dag par len du 'jug pa dang / yang dag par gzengs bstod pa dang / yang dag par dga' bar byed pa rnams kyi gang dag yin pa'o//de bzhin du kun nas nyon mongs pa can ma yin pa'i sems kyis lung nod pa dang / kha ton byed pa dang / gtan la 'bebs pa dang / lags par bskul ba dang / dran par byed pa dang / 'doms pa dang / rjes su ston pa yang ngo / /gzhan yang legs par smras pa dang /legs par brjod pa dang / don dang ldan pa gzhan gang ci yang rung ba de dag ni sgra 'phags pa rnams zhes bya'o/ /sgra 'phags pa ma yin pa rnams ni sems can rnams kyi brdzun du smra ba dang / phra ma dang / ngag rtsub po dang / tshig kyal pa'i sgra gang yin pa rnams dang / 'og tu ngan song du skyes pa rnams dang /gong du lha'i nang du skyes pa rnams dang / thad kar mi'i nang du skyes pa rnams kyi'o/ /de la sgra chen po rnams ni sems can gyi tshogs chen po'i sgra rnams sam/ gnod pa rnam pa sna tshogs kyis gnod par gyur nas/ nyam thag pa'i skad kyis ngu zhing / ku co 'don pa rnams kyi'am/'brug sgra grag pa'am/ dung dang / rnga bo che dang / rnga pa Ta ha'i sgra rnams yin no/ /sgra chung ngu rnams ni tha na rna bar gshug pa'i sgra yan chad do/ /sgra gsal ba rnams ni gang dag gis don go ba yin no/ /sgra mi gsal ba rnams ni gang dag gis don go bar mi 'gyur ba ste/'di lta ste 'gro lding ba'i gsang sngags rnams sam/ rlung dang / nags tshal dang / ne tso dang / ri skegs dang / khu byug dang / shang shang te'u la sogs pa rnams kyi sgra yin no/ /de la sgra sprul pa rnams ni rdzu 'phrul dang ldan pa sems la dbang thob pa rnams kyis rdzu 'phrul mngon par 'dus byas pa gang yin pa rnams so//rgyang ring po'i sgra rnams ni grong gi gnas sam/ gtsug lag khang gang ni de bzhin gshegs pa'am/ byang chub sems dpa' bzhugs pa der sgra byung ba gang yin pa de dag ma gtogs par de las gzhan pa 'jig rten gyi khams grangs med dpag tu med pa dag rab tu byung ba yin no//sangs rgyas dang byang chub sems dpa' rnams kyi 'chi 'pho ba dang / skye ba mkhyen pa gang zhe na/ 'di la de bzhin gshegs pa'am/ byang chub sems dpas lha'i mig rnam par dag pa mi'i las 'das pas sems can rnams 'chi 'pho'i tshe dang /shi 'phos pa na yang gzigs te/ mdog sdug pa dang mdog mi sdug pa dang / ngan pa dang / bzang po dang / phyi ma'i mthar skyes shing rgas pa'i rgyus dbang po rnams yongs su smin pas lus kyi spyod pa sna tshogs dge ba dang / mi dge ba dang / lung du ma bstan pa la 'jug pa rnams dang /de bzhin du snang ba yang gzigs shing mkhyen to/ /cha phra ba yang gzigs shing mkhyen to/ /gzugs sprul pa gang yin pa dang / lha'i gzugs dang ba gang yin pa gzigs so/ /gal te 'og dang steng gi 'jig rten gyi khams dag tu gzugs gzigs pa dag las brtsams te/'jug pa mi mdzad na ni 'og tu mnar med pa la thug pa yan chad gong du 'og min gyi gnas la thug pa man chad gzigs so/ /ji ste ched du gzigs na ni de las 'das pa'i 'og tu steng dang thad kar 'jig rten gyi khams dpag tu med grangs med pa dag na gzugs yod pa thams cad kyang gzigs te/cher na sangs rgyas kyi zhing de dang de dag na de bzhin gshegs pa 'khor sna tshogs kyi dkyil 'khor chen po'i nang na chos ston cing bzhugs pa de dang de dag kyang gzigs so/ /de la de bzhin gshegs pa'am/ byang chub sems dpas lha'i mig gis phyogs bcu'i sems can rnams kyi las kyi spyod pa dge ba dang /mi dge ba dag gzigs nas ci rigs ci 'os par de dag la nan tan mdzad do/ /lha'i rna bas kyang ngag gi spyod pa dag dge ba dang / mi dge ba dag gsan nas sems can de dag la ci rigs ci 'os par nan tan mdzad do//mdor bsdu na byang chub sems dpa' dang / de bzhin gshegs pa rnams ni lha'i mig dang / lha'i rna ba 'dis phrin las mdzad do/ /de la sangs rgyas dang / byang chub sems dpa' rnams kyis sems kyi rnam grangs mkhyen pa gang yin zhe na/ 'di la byang chub sems dpa' 'am/ de bzhin gshegs pa ni phyogs bcu'i 'jig rten gyi khams dpag tu med grangs med pa dag na sems can 'khod pa gzhan dag gi sems nyon mongs pas kun nas dkris pa dang bral ba dang / nyon mongs pa dang 'brel par bcas shing bag la nyal ba dang bcas pa dang / nyon mongs pa dang 'brel pa ma yin zhing bag la nyal ba med pa yang mkhyen to//smon lam log par btab pa'i sems 'di lta ste/ mu stegs can gyi sems dang / zang zing dang bcas pa'i bsam pa can gyi nyon mongs pa ma yin pa'i sems gang yang rung ba yang mkhyen to / /de las bzlog pa smon lam legs par btab pa'i sems kyang mkhyen to//smon pa'i sems 'di lta ste/ 'dod pa'i khams su skyes pa'i sems can tha na ri dwags dang bya yan chad thams cad kyi sems kyang mkhyen to/ /bar ma'i sems 'di lta ste/ gzugs kyi khams su skyes pa'i sems can thams cad kyi yang mkhyen to//gya nom pa'i sems can 'di lta ste/ gzugs med par skyes pa'i sems can thams cad kyi yang mkhyen to/ /bde ba dang ldan pa dang / sdug bsngal dang ldan pa dang / sdug bsngal yang ma yin bde ba yang ma yin pa'i tshor ba dang ldan pa'i sems kyang mkhyen to/ / pha rol gyi sems mkhyen pa gcig gis sems can gcig gang gi sems gang yin pa dang / ji lta bu dang / ci 'dra ba dang / ji snyed pa nye bar gnas pa de yang cig car yang dag pa ji lta ba bzhin du mkhyen to/ /pha rol gyi sems mkhyen pa gcig kho nas sems can mang po gang dag gi sems gang yin pa dang /ji lta bu dang / ci 'dra ba dang / ji snyed nye bar gnas pa de yang cig car yang dag pa ji lta ba bzhin du mkhyen to/ /sangs rgyas dang byang chub sems dpa' rnams kyi mngon par shes pa de yang sems can rnams kyi dbang po mchog dang mchog ma yin pa mkhyen pa dang / mos pa sna tshogs mkhyen pa dang /khams dang / spyod pa sna tshogs mkhyen pa dang / mya ngan las 'das par 'gro ba'i lam sna tshogs dag tu ci rigs par yang dag par sbyor bar byed pa ste/ de ni de'i las yin par rig par bya'o/ /de la sangs rgyas dang byang chub sems dpa' rnams kyi zag pa zad pa mkhyen pa gang zhe na/'di la de bzhin gshegs pa'am/ byang chub sems dpas nyon mongs pa rnams zad pa thob pa zag pa zad pa bdag gis sam gzhan dag gis thob pa'am/ ma thob pa yang yang dag pa ji lta ba bzhin du rab tu mkhyen to/ /bdag dang gzhan dag gi zag pa zad pa 'thob pa'i thabs kyang yang dag pa ji lta ba bzhin du rab tu mkhyen to//thabs ji lta ba bzhin du thabs ma yin pa yang yang dag pa ji lta ba bzhin du rab tu mkhyen to/ /gzhan dag gi zag pa zad pa thob pa'i mngon pa'i nga rgyal yang yang dag pa ji lta ba bzhin du rab tu mkhyen to/ /mngon pa'i nga rgyal med pa yang yang dag pa ji lta ba bzhin du rab tu mkhyen to//byang chub sems dpa' ni de dag thams cad ni mkhyen kyang zag pa zad pa yang bdag nyid kyis mngon sum du mi mdzad do/ /de bas na byang chub sems dpa' ni zag pa dang bcas pa'i dngos po zag pa rnams dang lhan cig tu mi 'dor ro//zag pa dang bcas pa'i dngos po de la yang spyod la kun nas nyon mongs pa can du yang mi 'gyur te/ /de ni de'i mthu thams cad kyi nang na ches mthu che ba yin par rig par bya ste/ zag pa zad pa mkhyen pa des sangs rgyas dang byang chub sems dpa' rnams bdag nyid kyang kun nas nyon mongs pa can du mi 'gyur la/gzhan dag la yang ston cing mngon pa'i nga rgyal yang sel bar mdzad pa 'di ni de'i las yin par rig par bya'o/ /de la chos kyi mthu gang zhe na/ sbyin pa'i mthu dang / tshul khrims dang / bzod pa dang / brtson 'grus dang / bsam gtan dang / shes rab kyi mthu'o//sbyin pa la sogs pa'i chos 'di dag gi mthu de yang mdor bsdu na rnam pa bzhir rig par bya ste/ mi mthun pa'i phyogs spong ba dang / tshogs yongs su smin par byed pa dang / bdag dang gzhan la phan 'dogs pa dang / phyi ma la 'bras bu 'byin par byed pa'o/ /byang chub sems dpa' sbyin pa sbyin pa na sbyin pa'i mi mthun pa'i phyogs ser sna yang spong ngo //de'i sbyin pa de bdag nyid kyi byang chub kyi tshogs su gyur pa yang yin la bsdu ba'i dngos po sbyin pas kyang sems can rnams yongs su smin par byed do/ /sbyin pa'i snga rol du yang yid dga' la/ sbyin pa'i tshe yang sems dang bar byed cing byin pa'i 'og tu yang 'gyod pa med de/dus gsum du rab tu dga' ba'i sems kyis bdag nyid la phan 'dogs pa dang / gzhan dag bkres pa dang / skom pa dang / grang ba dang / tsha ba dang / na ba dang / 'dod pas phongs pa dang / 'jigs pa'i sdug bsngal sel bas gzhan la phan 'dogs pa dang /pha rol tu yang gang dang gang du skyes par phyug pa dang / longs spyod che ba dang / btsan 'gying che ba dang / g.yog 'khor mang bar 'gyur la/ sbyin pa la yang mos par 'gyur te/ de ltar na rnam pa bzhi po 'di dag ni sbyin pa'i mthu yin te/ 'di las gang na yang med do//'di las lhag pa yang med do/ / byang chub sems dpa' lus dang ngag gi sdom pa'i tshul khrims yang dag par len pa na tshul khrims kyi mi mthun pa'i phyogs 'chal pa'i tshul khrims kyang spong ngo / /de'i tshul khrims yang dag par blangs pa de byang chub kyi tshogs su 'gyur ba yang yin la/don mthun pa'i bsdu ba'i dngos pos kyang sems can rnams yongs su smin par byed do/ /'chal pa'i tshul khrims kyi rkyen gyis 'jigs pa dang / kha na ma tho ba dang / 'khon du 'dzin pa spong ba na bdag nyid la phan 'dogs te/ bde bar gnyid kyis log cing bde bar sad par 'gyur la/ de bzhin du tshul khrims dang ldan pa la ni 'gyod pa med cing mchog tu dga' ba nas/ sems kyi ting nge 'dzin pa'i bar du 'gyur te/ de ltar bdag nyid la phan 'dogs so/ /sems can thams cad la yang rnam pa thams cad kyis rnam par tho mi 'tshams pas mi 'jigs pa'i sbyin pa byed de/de ltar gzhan la phan 'dogs so/ /lus zhig nas kyang gzhi des bde 'gro mtho ris kyi 'jig rten du lha rnams kyi nang du skye bar 'gyur zhing / tshul khrims la yang mos par 'gyur te/ de ltar na rnam pa bzhi po 'di dag ni tshul khrims kyi mthu yin te/ 'di las gong na yang med do/ / 'di las lhag pa yang med do/ /byang chub sems dpa' bzod pa dang ldan pa ni bzod pa'i mi mthun pa'i phyogs mi bzod pa yang spong ngo / /de'i bzod pa de byang chub kyi phyogs su gyur pa yang yin la/ don mthun pas kyang sems can rnams yongs su smin par byed do/ /bdag dang gzhan yang 'jigs pa chen po las yongs su skyob par byed pas na/bzod pa des bdag dang gzhan la yang phan 'dogs so/ /gzhi des byang chub sems dpa' phyi ma la 'khon pa mang bar mi 'gyur zhing / 'byed pa mi mang la sdug bsngal ba dang / yid mi bde ba mang bar mi 'gyur te/ tshe 'di nyid la yang 'gyod pa med par 'chi ba'i dus byed par 'gyur zhing /lus zhig nas kyang bde 'gro mtho ris kyi 'jig rten du lha rnams kyi nang du skye bar 'gyur zhing / bzod pa la mos par 'gyur te/ de ltar na rnam pa bzhi po 'di dag ni bzod pa'i mthu yin te/ 'di las gong na yang med do/ /'di las lhag pa yang med do//byang chub sems dpa' brtson 'grus brtsams te/ gnas pa ni brtson 'grus kyi mi mthun pa'i phyogs le lo yang spong ngo / /brtson 'grus de ni byang chub kyi tshogs su gyur pa dang / rten kyang yin la don mthun pas kyang sems can rnams yongs su smin par byed do/ / brtson 'grus brtsams pa sdig pa mi dge ba'i chos rnams dang ma 'dres par bde ba la reg par gnas pa na/ sngon las gong du bogs par gyur pa mthong nas/ dga' zhing mchog tu dga' bas bdag nyid la yang phan 'dogs so/ /dge ba'i phyogs la brtson pas gzhan la lus dang ngag gis rnam par mi 'tshe ba dang /gzhan dag kyang brtson 'grus rtsom pa la 'dun pa skyed de/ de ltar gzhan la yang phan 'dogs so/ /phyi ma la yang rgyu'i stobs dang ldan zhing skyes bu'i rtsal la mngon par dga' bar 'gyur te/ de ltar na rnam pa bzhi po 'di dag ni brtson 'grus kyi mthu yin te/'di las gong na yang med do/ /'di las lhag pa yang med do/ /byang chub sems dpas bsam gtan la snyoms par 'jug pa na/ bsam gtan gyi mi mthun pa'i phyogs kyi nyon mongs pa'i tshig gi rtog pa dang / dga' ba dang / bde ba dang / gzugs kyi 'du shes la sogs pa'i nye ba'i nyon mongs pa rnams kyang spong ngo //de'i bsam gtan de byang chub kyi tshogs su 'gyur ba'i rten du 'gyur ba yang yin la don mthun pas kyang sems can rnams yongs su smin par byed do/ /tshe 'di nyid la bde bar gnas pas bdag la phan 'dogs so/ /zhi zhing rab tu zhi la sems 'dod chags dang bral bas sems can rnams kyi nang na gnod pa med cing rnam par mi 'khrugs pas gzhan la phan 'dogs so//bsam gtan gyi 'bras bu phyi ma la ye shes rnam par dag pa dang / mngon par shes pa mngon par sgrub pa dang / rnam par dag pa'i lhar skye bar 'gyur te/ de ltar na rnam pa bzhi po 'di dag ni bsam gtan gyi mthu yin te/ 'di las gong na yang med do/ /'di las lhag pa yang med do/ /byang chub sems dpa' shes rab dang ldan pa ni shes rab kyi mi mthun pa'i phyogs ma rig pa yang spong ngo / /de'i shes rab de byang chub kyi tshogs su gyur pa yang yin la sbyin pa dang /snyan par smra ba dang / don mthun pa dang / don spyod pas kyang sems can rnams yongs su smin par byed do/ /shes bya'i dngos po don ji lta ba bzhin du/ so sor rtogs pa dang ldan pa'i dga' ba dang / mchog tu dga' ba rgya chen pos bdag nyid la phan 'dogs so//thams cad du rigs par lung 'bogs pas tshe 'di dang tshe phyi ma la phan pa dang / bde bas sems can rnams la yang phan 'dogs so/ /phyi ma la yang des dge ba'i rtsa ba thams cad kyang yang dag par sdud par byed cing / sgrib pa rnam pa gnyis dang bral ba / nyon mongs pa'i sgrib pa dang bral ba dang /shes bya'i sgrib pa dang bral ba mngon sum du byed par 'gyur te/ rnam pa bzhi po 'di dag ni shes rab kyi mthu yin te/ 'di las gong na yang med do/ /'di las lhag pa yang med de/ 'di ni chos kyi mthu zhes bya'o/ /sangs rgyas dang byang chub sems dpa' rnams kyi lhan cig skyes pa'i mthu gang zhe na/rang bzhin gyis tshe rabs dgongs pa dang / sems can rnams kyi don gyi phyir so sor brtags nas sdug bsngal yun ring ba rnam pa sna tshogs mi bzad pa rgyun mi 'chad pas mi mjed pa dang / sems can rnams kyi don kho na'i phyir sems can gyi don sgrub pa'i sdug bsngal bas dga' ba dang /dga' ldan du skyes nas tshe'i tshad ji srid par dga' ldan na gnas pa dang / dga' ldan du skyes pa'i lha'i bu gzhan rnams gnas gsum po lha'i tshe dang / lha'i mdog dang / lha'i grags pas zil gyis gnon pa dang / yum gyi lhums su gshegs pa na snang ba chen pos 'jig rten gyi khams khyab par mdzad pa dang /yang dag par mkhyen bzhin du yum gyi lhums su gshegs pa dang / gnas pa dang / bltam kha dang / bltams pa dang / bltams ma thag tu yang sus kyang ma brten par sa la gom pa bdun 'dor zhing tshig kyang gsung ba dang /bltams pa na lha dang / klu dang / gnod sbyin dang / lha ma yin dang / nam mkha' lding dang / mi'am ci dang / lto 'phye chen po dang che ba dag gis lha'i me tog phreng dang / rol mo'i sgra dang / bdug pa dang / na bza' 'bul ba dang / gdugs dang / rgyal mtshan dang / ba dan la sogs pa dam pa rab mchog dag gis mchod pa'i las byed pa dang /skyes bu chen po'i mtshan bla na med pa sum cu rtsa gnyis kyis sku la mtshan legs par brgyan pa dang / srid pa tha ma sku tshe tha ma la phyir rgol ba dang / bdud kyi sde thams cad dang / gnod pa thams cad kyis mi brdzi ba dang / byang chub kyi snying po la zhugs nas/ bdud kyi dpung thams cad byams pas pham par mdzad pa dang / sku'i tshigs thams cad kyi tshigs re re la yang sred med kyi bu'i stobs mnga' ba dang / sku nas gzhon te bdag nyid kyis mkhas pa la byang bar sbyangs pa ma mdzad bzhin du 'jig rten gyi bzo dang / las kyi gnas thams cad myur ba myur bar thugs su chud pa dang / gcig pu slob dpon med par bdag nyid kyis stong gsum gyi stong chen por byang chub chen po mngon par rdzogs par byang chub pa dang / mi mjed kyi bdag po tshangs pa yang rang 'ongs na / 'jig rten du dam pa'i chos bshad par bskul ba dang /'brug sgra chen po yang mi gsan cing mi bzhengs pas snyoms par 'jug pa zhi ba dang / byang chub sems dpa' la ri dwags dang / bya dang / tha na ri dwags phra mo rnams kyang mchog tu yid rton te/ rtag tu 'ong zhing de'i drung du ci dga' bar 'khod pa dang / de bzhin gshegs pa la ni tha na dud 'gro rnams kyang mchod pa byed de/'di lta ste/ de bzhin gshegs pa la spre'us sbrang rtsi ma bskol ba phul te/ bcom ldan 'das kyis de bzhes nas/ spre'u de yid dga' bar gyur te/ gar byed cing phyir nur du song ba lta bu dang / sprin yang de bzhin gshegs pa khrus mdzad kyis 'di la khrus gsol lo snyam ste/bcom ldan 'das 'ba' zhig gi phyir sdod pa dang / byang chub sems dpa' 'am/ de bzhin gshegs pa shing drung na bzhugs na/ shing thams cad kyi grib ma shar phyogs su song yang shing de'i grib ma sku las mi yol ba dang / byang chub mngon par rdzogs par sangs rgyas pa'i de bzhin gshegs pa la bdud kyis glags btsal kyang lo drug gi bar du glags ma rnyed pa dang /rtag tu dran pa dang ldan pas rtag par rgyun du nye bar gnas pa dang / dran pa dang ldan pas tshor ba rnams dang / 'du shes rnams dang / rtogs pa rnams so sor yang dag par mkhyen bzhin du 'byung ba dang /gnas pa dang / 'gag par 'gyur ba dang / de bzhin du sangs rgyas rnams kyi lhan cig skyes pa'i mthu ni mthong ba dang / 'phags pa'i spyod pa dang / gnas pas bsdus pas kyang phan 'dogs par mdzad de/ de la mthong bas phan 'dogs par mdzad pa ni 'di lta ste/myos pa dang / sems 'khrugs pa rnams kyis de bzhin gshegs pa mthong na rang gi sems thob par 'gyur ba dang / bud med mngal mi mthun par gnas pa rnams mngal mthun par gnas par 'gyur ba dang / long ba rnams mig thob par 'gyur ba dang / 'on pa rnams rna bas thos par 'gyur ba dang /chags pa rnams 'dod chags kyi kun nas dkris pa dang bral bar 'gyur ba dang / zhe sdang ba rnams zhe sdang gi kun nas dkris pa dang bral bar 'gyur ba dang / rmongs pa rnams gti mug gi kun nas dkris pa dang bral bar 'gyur ba dang / de lta bu dang mthun pa rnams ni mthong bas phan 'dogs par mdzad pa'i lhan cig skyes pa'i mthu yin par rig par bya'o//de la 'phags pa'i spyod pa dang / gnas pas bsdus pa lhan cig skyes pa'i mthu ni 'di lta ste/ glo g.yas phyogs kyis seng ge'i nyal stabs kyis gzims te/ de'i rtswa dang lo ma bting ba de yang phyogs gcig tu 'dug pa yin te/de bzhin gshegs pa dgra bcom pa yang dag par rdzogs pa'i sangs rgyas kyi gzims mal mi 'khrugs pa dang / de'i chos gos lus las rlung gis mi bskyod pa dang / seng ge'i stabs su gshegs pa dang / khyu mchog gi stabs su gshegs pa dang / thog mar zhabs g.yas pa 'degs la/ de'i 'og tu zhabs g.yon pa de'i phyi bzhin gtong ba dang / de gshegs pa nas phyogs mthon po ni dma' bar 'gyur la/ dma' ba ni mthon por 'gyur te/ lag mthil ltar mnyam par gyur pa dang / rdo dang / gseg ma dang / gyo mo med pa dang /dben pa la gzhol ba'i sems kyis grong du 'gro ba dang / gshegs pa'i tshe yang sgo dma' ba rnams mthon por 'gyur ba dang / zhal zas gsol ba na 'bras chan 'brum bu gcig kyang legs par ma bcas par mi gsol ba dang / zhal kham phyi ma gsol ba tsam na lhag ma mi lus pa dang /de lta bu dang mthun pa rnams ni 'phags pa'i spyod pa dang gnas pas bsdus pa'i mthu yin par rig par bya'o/ /yongs su mya ngan las 'das pa'i tshe yang sa chen po g.yo ba dang / skar mda' ltung ba dang / phyogs me 'bar ba lta bu dang / bar snang las lha'i rnga sgra dag sgrogs te/de yang de bzhin gshegs pa rnams kyi lhan cig skyes pa'i mthu kho na yin gyi/ mngon par shes pas mngon par 'du byas pa ni ma yin te/ de ni sangs rgyas dang byang chub sems dpa' rnams kyi lhan cig skyes pa'i mthu zhes bya'o/ /de la sangs rgyas dang byang chub sems dpa' rnams kyi mthu nyan thos dang /rang sangs rgyas rnams dang / thun mong ma yin pa ni gang / thun mong ba ni gang zhe na/ thun mong ma yin pa ni mdor bsdu na rnam pa gsum du rig par bya ste/ cha phra ba dang / rnam pa dang / khams so/ /'di la de bzhin gshegs pa'am byang chub sems dpa' ni mthu'i thabs dpag tu med/grangs med pas ji ltar sems can dpag tu med grangs med pa rnams kyi don mdzad pa de yang dag pa ji lta ba bzhin du rab tu mkhyen te/ de lta bu ni cha phra ba'o/ /mngon par shes pa'i mthu dang / chos kyi mthu dang / lhan cig skyes pa'i mthu rnam pa thams cad dang ldan pa yin te/de lta bu ni rnam pa'o/ /'jig rten gyi khams thams cad dang / sems can gyi khams thams cad de'i mthu'i yul yin te/ de lta bu ni khams so/ /nyan thos kyi mngon par shes pa'i yul ni stong gnyis pa'i 'jig rten gyi khams sems can gyi khams dang bcas pa yin no//rang sangs rgyas kyi mngon par shes pa'i yul ni stong gsum pa thams cad kho na'o/ /de ci'i phyir zhe na/ 'di ltar de dag ni bdag gcig pu 'dul ba'i phyir zhugs pa yin gyi/ sems can thams cad kyi phyir ma yin te/ de bas na de dag gi mthu'i yul ni 'jig rten gyi khams gcig pur zad do//rnam pa 'di dag la ma gtogs pa sangs rgyas dang byang chub sems dpa' rnams kyi mthu de las gzhan pa ni nyan thos dang / rang sangs rgyas rnams dang thun mong ma yin par rig par bya'o/ /de'i phyir de ltar nyan thos dang / rang sangs rgyas rnams kyang sangs rgyas dang byang chub sems dpa' rnams dang / mngon par shes pa mnyam pa ma yin na/ lha dang mi dang / mu stegs can so so'i skye bo thams cad dang lta mtshungs re skan/ byang chub sems dpa' rnams kyi rdzu 'phrul dang / kun brjod pa dang / rjes su bstan par gtogs pa'i cho 'phrul gyi mthu gang yin pa de yang mngon par shes pa'i mthu rdzu 'phrul gyi yul dang /sems kyi rnam grangs dang / zag pa zad pa shes pa'i mngon par shes pa'i mthu rnams su ci rigs par 'dus pa kho nar rig par bya'o/ /byang chub sems dpa'i sa'i gzhi'i rnal 'byor gyi gnas las mthu'i le'u ste lnga pa'o// //bam po lnga pa/ de la yongs su smin pa gang zhe na/ yongs su smin pa ni mdor bsdu na rnam pa drug tu rig par bya ste/ ngo bo nyid dang yongs su smin par bya ba'i gang zag dang / yongs su smin pa'i rnam pa'i dbye ba dang / yongs su smin par bya ba'i thabs dang / yongs su smin par byed pa'i gang zag dang / yongs su smin pa'i gang zag gi mtshan nyid do/ /de la yongs su smin pa'i ngo bo nyid ni 'di yin te/ dge ba'i chos kyi sa bon yod na/ dge ba'i chos rnams la kun tu bsten pa'i rgyus nyon mongs pa dang / shes bya'i sgrib pa spang ba rnam par dag pa dang mthun pa'i lus dang sems las su rung ba dang /nyams bde ba yang dag pa'i sbyor ba mthar phyin pa de la gnas na ston pa dang phrad kyang rung / ston pa dang ma phrad kyang rung ste/ de'i mod la nyon mongs pa'i sgrib pa spang ba'am / shes bya'i sgrib pa spang ba mngon sum du bya ba'i skal ba dang ldan zhing mthu yod par 'gyur ro//'di lta ste/ rma ni gang gi tshe brtol la rag par mthar thug par gyur pa na/ de'i mod la brtol ba'i 'os yin te/ de ni yongs su smin pa zhes bya'o/ /bum pa dang / rdze'u dang / kham phor la sogs pa kham pa'i snod ni gang gi tshe spyad la rag par sbyor ba mthar thug par gyur pa na de'i mod la yongs su spyad pa'i 'os yin te/de'i tshe tshos pa zhes bya'o/ /shing thog a mra'am / pa na sa la sogs pa ni gang gi tshe yongs su longs spyod la rag par mthar thug par gyur pa na/ de'i mod la yongs su longs spyod par 'os pa yin te/de'i tshe yongs su smin pa zhes bya'o/ /de bzhin du dge ba'i chos rnams la kun tu bsten pa'i rgyus yang dag pa'i sbyor ba gang yin pa'i mthar thug pa na/ de'i mod la rnam par dag par 'gyur te/ de ni yongs su smin pa'i ngo bo nyid yin no/ /de la yongs su smin par bya ba'i gang zag rnams ni sgrub pa dang 'bras bu'i dbye bas mdor bsdu na rnam pa bzhi ste/byang chub sems dpa' rnams dang / sangs rgyas bcom ldan 'das rnams kyis nyan thos kyi rigs ni nyan thos kyi theg pa la/ rang sangs rgyas kyi rigs ni rang sangs rgyas kyi theg pa la/sangs rgyas kyi rigs ni theg pa chen po la yongs su smin par mdzad pa dang / gang zag rigs med pa yang bde 'gror 'gro bar bya ba'i phyir yongs su smin par mdzad pa yin te/ gang zag rnam pa bzhi po de dag ni gzhi rnam pa bzhi po 'di dag tu yongs su smin par bya ba yin no//de ltar na yongs su smin par bya ba'i gang zag las yongs su smin par rig par bya'o/ /de la yongs su smin pa'i rnam pa'i dbye ba gang zhe na/ mdor bsdu na rnam pa drug ste/ dbang po yongs su smin pa dang / dge ba'i rtsa ba yongs su smin pa dang / shes pa yongs su smin pa dang /yongs su smin pa chung ngu dang / 'bring dang / chen po'o/ /de la dbang po yongs su smin pa ni tshe dang mdog dang / rigs dang / dbang phyug phun sum tshogs pa dang / tshig btsun pa dang / dbang che bar grags pa dang / skyes pa nyid dang / spro ba chen po gang yin pa ste/ rnam par smin pa'i 'bras bu phun sum tshogs pa'i lus de la brten nas brtul ba dang /rjes su sbyor ba'i skal ba can du 'gyur te/ rig pa'i gnas thams cad la yang dag par bsgrub par brtson par bya ba rnams la yid yongs su skyo bar mi 'gyur ba yang yin no/ /dge ba'i rtsa ba yongs su smin pa gang zhe na/rang bzhin gyis nyon mongs pa chung ba de la gnas na de rang bzhin gyis sdig pa mi dge ba'i chos rnams la sems mi 'jug cing / sgrib pa chung ba dang / rtog pa nyung ba dang / drang zhing mthun par 'dzin pa yin no/ /shes pa yongs su smin pa gang zhe na/ dran pa dang ldan pa dang / yid gzhungs pa dang / legs par gsungs pa dang / nyes par bshad pa'i chos rnams kyi don kun tu shes par bya ba dang / blang bar bya ba dang / gzung bar bya ba dang / rab tu rtogs par bya bar nus pa lhan cig skyes pa'i shes rab dang ldan pa yin te/ shes rab de la brten na thams cad nas nyon mongs pa thams cad las sems gtan du rnam par grol bar byed pa'i skal ba dang ldan zhing nus pa yin no//de la dbang po yongs su smin pas ni rnam par smin pa'i sgrib pa las rnam par grol bar 'gyur ro/ /dge ba'i rtsa ba yongs su smin pas ni las kyi sgrib pa las rnam par grol bar 'gyur ro//shes pa yongs su smin pas ni nyon mongs pa'i sgrib pa las rnam par grol bar 'gyur ro/ /yongs su smin pa chung ngu gang zhe na/ rgyu rnam pa gnyis kyis yongs su smin pa chung ngur 'gyur te/ dbang po dang / dge ba'i rtsa ba dang / shes pa yongs su smin pa'i rgyu la yun ring po nas ma goms pa dang /rgyu yongs su ma brtas pa dang / chung ngu la goms pa'o/ /yongs su smin pa 'bring ni rgyu de gnyis las gang yang rung ba zhig med la/ gang yang rung ba zhig yod pa yin par rig par bya'o/ /yongs su smin pa chen po ni rgyu de gnyis ka yod pa yin par rig par bya'o//de la yongs su smin par bya ba'i thabs gang zhe na/ rnam pa nyi shu rtsa bdun du rig par bya ste/ khams brtas pa dang / da ltar gyi rkyen nye bar sgrub pa dang / 'jug pa dang / dga' bar 'dzin pa dang / dang po 'jug pa dang / dang po 'jug pa ma yin pa dang / rnam par dag pa thag ring ba dang /rnam par dag pa thag nye ba dang / sbyor ba dang / bsam pa dang / zang zing nye bar sgrub pa dang / chos nye bar sgrub pa dang / rdzu 'phrul gyis 'dun par byed pa dang / chos ston pa dang / gsang ste chos brjod pa dang / rnam par phye ste chos brjod pa dang / sbyor ba chung ngu dang / sbyor ba 'bring dang /sbyor ba chen po dang / thos pa dang / sems pa dang / bsgom pa dang / sdud pa dang / tshar gcod pa dang bdag nyid kyis byed pa dang / gzhan la bcol ba dang / de gnyi ga'o/ /de la khams brtas pa gang zhe na/ rang bzhin gyis dge ba'i chos kyi sa bon phun sum tshogs pa la brten nas/sngon dge ba'i chos la goms pa las dge ba'i chos kyi sa bon rnams phyir zhing phyir zhing rab tu brtas la/ phul du brtas pa skye zhing gnas pa 'di ni khams brtas pa zhes bya'o/ /de la da ltar gyi rkyen nye bar bsgrub pa gang zhe na/ tshe 'di nyid la phyin ci ma log pa'i chos ston la/de la yang phyin ci ma log par 'dzin pa dang / ji lta ba bzhin du chos kyi rjes su mthun pa'i chos bsgrub pa'o/ /de la khams brtas pa ni sngon gyi rgyus da ltar gyi yongs su smin pa 'grub pa yin no/ /da ltar gyi rkyen nye bar sgrub pa ni rgyu yang da ltar gyi nyid yin la/yongs su smin pa yang da ltar gyi nyid yin par rig par bya'o/ /'jug pa gang zhe na/ dad pa thob pa'i dbang du byas nas/ khyim na gnas na nyes par spyod pa las dben pa'i bslab pa'i gzhi yang dag par len pa dang / khyim na gnas pa ma yin te/ rab tu byung na 'dod pa las dben pa'i bslab pa'i gzhi yang dag par len pa yin no//dga' bar 'dzin pa gang zhe na/ sdug bsngal thams cad las nges par 'byin pa'i lam dang / 'dod pa'i bde ba dang / bdag nyid dub par byed pa'i mtha' spangs pa bde ba'i lam la brten na / legs par gsungs pa'i chos 'dul ba bstan pa la mngon par dga' ba gang yin pa'o//de la dang por 'jug pa gang zhe na/ thog ma kho nar skyo bar bya ba'i chos rnams la yid byung ba la brten nas/ rigs pas don bsgrub pa'i phan yon yang khong du chud nas/ 'jug pa gang yin pa de ni dang po 'jug pa zhes bya'o//dang po 'jug pa ma yin pa gang zhe na/ gang zag zhugs zin pa yongs su smin par bya ba la rag las par gyur pa/ byang chub sems dpa' rnams dang / sangs rgyas rnams kyi btang snyoms mi mdzad par gyur pa la brten cing bkrol ba'i gnas rnams yang dang yang du gsal bar byed pa la yang brten nas/phyir zhing yongs su smin par gyur pa gang yin pa'o/ /de la rnam par dag pa thag ring ba gang zhe na/ le lo'am rkyen dang mi ldan pa la brten nas dus yun ring po 'gyangs pa tshe rabs brjes pa'am/ bskal pa brjes pa mang po zhig gi rnam par dag pa 'gyur ba'i skal ba can du 'gyur ba gang yin pa'o//de las bzlog pa ni rnam par dag pa thag nye ba yin par rig par bya'o/ /de la sbyor ba gang zhe na/ rang gi don thob par bya ba la 'dun pa drag po la yang brten / phyi ma la yang log par ltung ba'i 'jigs pa la brten te /tshe 'di nyid la gzhan pa la mi snyan par grags pa'i 'jigs pa la yang brten nas/ bslab pa'i gzhi dag la rtag tu byed pa dang / gus par byed par bsrungs pa gang yin pa'o/ /de la bsam pa gang zhe na/ chos 'dul ba 'di las mi 'phrogs par bya ba'i phyir/chos rnams la yang dag par rtog pa'i bzod pa la yang brten cing / yon tan srid pa la yang brten nas/ gzhan dag gi thob pa la yid ches zhing / dkon mchog gsum dang bdag gi don thob par bya ba la dad pa mi g.yo ba gang yin pa'o/ /zang zing nye bar sgrub pa gang zhe na/zas dang / skom la sogs pa thams cad kyi thams cad du med pa rnams la/ zas dang skom la sogs pa nye bar sgrub pa dang / mthun pa'i zas dang skom la sogs pa med pa rnams la yang / mthun pa'i zas dang skom la sogs pa nye bar sgrub pa gang yin pa'o//de la chos nye bar sgrub pa gang zhe na/ lung 'bogs pas sam/ don yang dag par 'grel pas chos rnams sbyin par byed pa gang yin pa'o/ /de la rdzu 'phrul gyis 'dun par byed pa gang zhe na/ rdzu 'phrul dang ldan pas sems can 'di dag ni rdzu 'phrul mthong ngam/ thos na bstan pa la bsam pa dag pa thob par 'gyur zhing /yang dag par sbyor bar 'gyur ro snyam ste/ sems can rnams kyi bsam pa dag pa'am/ sbyor ba dag pa'i dbang du byas nas / sems can rnams la snying brtse bas rdzu 'phrul gyi cho 'phrul rnam par ston te/ de dag kyang cho 'phrul des 'dun par byas pa'i yid kyis bsam pa dag pa thob pa'am/yang dag par sbyor bar 'gyur ba gang yin pa'o/ /de la chos ston pa gang zhe na/ bdag nyid kyis rang gi don 'thob par mi nus pa la yang dag par sgrub pa'i grogs su gyur pa'i dam pa'i chos ston pa dang / nus pa la yang myur du mngon par shes par 'gyur ba dang /mthun pa'i dam pa'i chos ston pa'o/ /de la gsang ste chos brjod pa gang zhe na/ sems can byis pa shes rab can rnams la/ shin tu rgya che zhing zab pa'i chos bcabs te/ gsal zhing 'jug par sla la/ thabs sla bas 'jug pa'i chos ston pa gang yin pa'o/ /rnam par phye ste chos brjod pa gang zhe na/ sems can shes rab rgya che zhing sangs rgyas kyi bstan pa'i tshul la legs par zhugs pa rnams la/ shin tu rgya che zhing zab pa'i gnas rnam par 'grel pa gang yin pa'o/ /de la sbyor ba chung ngu gang zhe na/rtag tu sbyor ba med pa dang / gus par sbyor ba med pa gang yin pa'o/ /de la sbyor ba 'bring gang zhe na/ rtag tu sbyor ba med pa dang / gus par sbyor ba med pa'i sbyor ba 'di gnyis las gang yang rung ba med pa gang yin pa'o/ /de la sbyor ba chen po gang zhe na/ sbyor ba de gnyis ka dang ldan pa ste/ rtag tu sbyor ba dang ldan pa dang / gus pas sbyor ba dang ldan pa gang yin pa'o/ /de la thob pa gang zhe na / sangs rgyas kyi gsung rab la mos pas mdo la sogs pa'i chos rnams len pa dang / 'dzin pa dang / kha ton byed pa la mngon par brtson pa gang yin pa'o//de la sems pa gang zhe na/ rab tu dben par chos nges par sems pa la mngon par dga' bas don la mngon par rtog pa dang / kun tu dpyod pa dang / gtan la 'bebs pa gang yin pa'o/ /bsgom pa gang zhe na/ zhi gnas dang / rab tu 'dzin pa dang / btang snyoms kyi rgyu rnams yang dag par rtogs pa sngon du btang bas zhi gnas dang / lhag mthong dang / btang snyoms la goms par byed par dga' ba'o/ /de la sdud pa gang zhe na/ yang dag par zang zing med pa'i sems kyis slob dpon dang / mkhan po'i tshul du rten sbyin par byed pa dang /bsnyen bkur rnam pa sna tshogs kyang byed de/ 'di lta ste/ nad pa la rim gros bsnyen bkur byed pa dang / chos dang mthun par gos dang / zas dang / mal cha dang / stan dang / na ba'i gsos sman gyis bsnyen bkur byed pa dang / mya ngan dang 'gyod pa bsal bas bsnyen bkur byed pa dang /nyon mongs pa bsal bas bsnyen bkur byed pa dang / de lta bu dang mthun pa dag ni bsnyen bkur rnam pa sna tshogs byed pa yin par rig par bya'o/ /tshar gcod pa gang zhe na/ bdag la yod pa'i kun nas nyon mongs pa rnams kun tu bsrungs nas/ nyes pa chung ngu byed pa la ni 'khrul pa gleng bar byed/nyes pa 'bring byed pa la ni spro bar byed/ nyes pa chen po byed pa la ni skod par byed de/ de la gleng pa gang yin pa dang / spyo ba gang yin pa de ni de dag nyid dang / de las gzhan pa dag la yang phan pa dang / bde ba'i don du 'gyur ba yin no/ / slar dgug pa'i phyir bskrad pa gang yin pa de yang de dag nyid dang / gzhan dag la phan pa dang bde bar 'gyur ro/ /slar mi dgug par bskrad pa gang yin pa de ni gzhan dag kho na la phan pa dang bde bar 'gyur ba yin te/ 'di ltar gzhan dag gis nyes par byas pa'i gzhis bskrad pa de/gzhan dag la mthong nas nyes pa mi bya bar sems pa'i phyir ro/ /ji ltar na bdag nyid kyis yongs su smin par byed ce na/ mi dge ba'i gnas nas bslangs te/ dge ba'i gnas su bzhag pa'i phyir mthun pa'i chos kyang ston to/ /ji skad du smras pa de bzhin du byed pa yang yin te/rang gi tshig dang mthun par rjes su zhugs pa ni chos kyi rang nyid rjes su mthun pa'i chos la zhugs nas/ de dang mthun par 'jug pa ste/ ji nas gzhan dag 'di skad du khyod bdag nyid kyang da dung mi dge ba'i gnas nas ma langs shing / dge ba'i gnas la yang gnas par ma gyur na/ci'i phyir khyod kyis gzhan dag de la yang dag par len du 'jug cing bskul ba dang / dran par byed par sems/ khyod bdag nyid kyang da dung gzhan dag gis bskul ba dang / dran par bya ba dang / yang dag par len du gzhug dgos so zhes zer bar mi 'gyur bar bya ba yin no//ji ltar na gzhan dag la bcol ba yin zhe na/ sems can rnams gang la shas cher dga' zhing gus pa yod par gyur la/ de yang chos bstan pa'i thabs shes shing legs par bslab par gyur pa de la bcol zhing yongs su smin par bya ba'i phyir byed du 'jug pa yin no//gnyi gas bya ba ni de gnyis 'dus pa ste/ bdag kyang byed cing gzhan dag la yang bcol nas yongs su smin par byed pa yin par rig par bya ste/ de ltar na yongs su smin par bya ba'i thabs kyi tshul rnam pa nyi shu rtsa bdun po 'dis yongs su smin pa'i rab tu dbye ba rnam pa drug po dbang po yongs su smin pa dang /dge ba'i rtsa ba yongs su smin pa dang / shes pa yongs su smin pa dang / yongs su smin pa chung ngu dang / 'bring dang chen po de phun sum tshogs pa yin par rig par bya'o/ /de la yongs su smin par byed pa'i gang zag rnams gang zhe na/mdor bsdu na byang chub sems dpa' sa drug la gnas pa'i byang chub sems dpa' rnam pa drug po dag sems can rnams yongs su smin par byed de/ mos pas spyod pa'i sa la gnas pa'i byang chub sems dpa' mos pas spyod pa dang lhag pa'i bsam pa dag pa'i sa la gnas pa'i byang chub sems dpa' lhag pa'i bsam pa dag pa dang /spyod pa la 'jug pa'i sa la gnas pa'i byang chub sems dpa' spyod pa la zhugs pa dang / nges pa'i sa la gnas pa'i byang chub sems dpa' nges par gyur pa dang / nges pa'i spyod pa drug pa'i sa la gnas pa'i byang chub sems dpa' nges pa'i spyod pa'i sa la zhugs pa dang /mthar thug par 'gyur ba'i sa la gnas pa'i byang chub sems dpa' mthar thug par 'gyur ba yin no/ /de la rigs med par gnas pa'i gang zag rnams kyi bde 'gror 'gro ba'i yongs su smin pa ni yang dang yang du phyir ldog cing yang dang yang du bya dgos pa yin no//rigs la gnas pa rnams kyi yongs su smin pa ni phyir mi ldog cing yang dang yang du bya mi dgos pa yin no/ /de la yongs su smin pa'i gang zag gi mtshan nyid mtshan ma dang rtags gang gis sems can rnams kyi yongs su smin pa'i bye brag gcod cing nye bar mtshon par byed pa ni smin pa'i mtshan nyid de brjod do// mdor bsdu na rgyu dang 'bras bu'i bye brag gis rnam pa gnyis so/ /rgyur gtogs pa'i mtshan nyid kyang gnyis te/ bsam pa dang las kyi bye brag gis so/ /des na smras pa/ mtshan nyid gang zhe na/ nyan thos ni sngon dge ba la goms pas gang gi tshe smin pa chung ngu la gnas par gyur pa de ni 'dun pa chung ba dang / sbyor ba chung ba yin te/ ngan song rnams su yang 'gro la tshe de nyid la dge sbyong gi 'bras bu yang mi thob cing tshe 'di nyid la mya ngan las 'das pa yang mi 'thob bo/ /gang gi tshe smin pa 'bring la gnas par gyur pa de ni 'dun pa 'bring dang sbyor ba 'bring yin te/ngan song rnams su yang mi 'gro la tshe de nyid la yang dge sbyong gi 'bras bu 'thob par 'gyur te/ tshe de nyid la yongs su mya ngan las 'da' bar mi 'gyur ro/ /yongs su smin pa chen po la gnas pa 'di ni 'dun pa che ba dang /sbyor ba che ba yin te/ ngan song rnams su yang mi 'gro la tshe 'di nyid la yang dge sbyong gi 'bras bu 'thob par 'gyur zhing / tshe de nyid la yongs su mya ngan las 'da' bar yang 'gyur ro/ /rang sangs rgyas ni nyan thos ji lta ba de kho na bzhin du rig par bya'o/ /de ci'i phyir zhe na/de ni nyan thos rnams dang / lam gyi rang bzhin mtshungs pa'i phyir ro/ /nyan thos rnams las rang sangs rgyas rnams kyi bye brag ni 'di yin te/ srid pa tha ma la lus tha ma thob par 'gyur ba ni slob dpon med par sngon goms pa'i dbang gis byang chub kyi phyogs kyi chos sum cu rtsa bdun po rnams bsgoms nas/nyon mongs pa thams cad spangs pa'i dgra bcom pa nyid mngon sum du byed de/ de lta bas na rang sangs rgyas zhes bya'o / /byang chub sems dpa' mos pas spyod pa'i sa la gnas pa ni yongs su smin pa chung ngu yin par rig par bya'o/ /lhag pa'i bsam pa dag pa ni smin pa 'bring po yin no//nges pa dang mthar thug par gyur pa ni smin pa chen po yin no/ /de la smin pa chung ngu la gnas pa'i byang chub sems dpa' ni 'dun pa chung ngu dang / sbyor ba chung ngu yin te/ ngan song rnams su yang 'gro la/ bskal pa grangs med pa dang por gtogs par rig par bya ste/dge ba'i chos byang chub kyi phyogs sbyangs pa dang / mi g.yo ba dang / shin tu rnam par dag pa thams cad dang mi ldan pa kho na yin no/ /smin pa 'bring gi byang chub sems dpa' ni 'dun pa 'bring dang sbyor ba 'bring yin te/ ngan song rnams su yang mi 'gro la/ bskal pa grangs med pa gnyis par gtogs te/ dge ba'i chos byang chub kyi phyogs sbyangs pa dang / mi g.yo ba rnams dang mi ldan la shin tu rnam par dag pa rnams dang ni mi ldan pa yin no/ /yongs su smin pa chen po la gnas pa'i byang chub sems dpa' ni 'dun pa che ba dang sbyor ba che ba yin te/ngan song rnams su yang mi 'gro la/ bskal pa grangs med pa gsum par gtogs te/ dge ba'i chos byang chub kyi phyogs sbyangs pa dang / mi g.yo ba dang / shin tu rnam par dag pa rnams dang ldan pa yin no/ /de la rang bzhin gyis brling ba dang /gsal ba dang 'bras bu shin tu che ba dang phan yon shin tu che ba'i phyir sbyangs pa zhes bya'o/ /phyir mi ldog pa dang / yongs su mi nyams pa dang / khyad par du 'gro ba'i phyir mi g.yo ba zhes bya'o/ /byang chub sems dpa'i sa'i nang na gong na med pa'i phyir shin tu rnam par dag pa zhes bya'o//de la zang zing las gyur pa'i yongs su smin pa gang yin pa dang / rdzu 'phrul gyis 'dun par byas pa las byung ba gang yin pa dang / gsang ste chos brjod pa las gyur pa gang yin pa dang / sbyor ba chung ngu las gyur pa gang yin pa dang / thos pa tsam las gyur pa'i yongs su smin pa gang yin pa dang /yongs su smin pa rnam pa lnga po 'di dag ni dge ba'i chos de dag yun ring por goms par byas kyang chung ngu kho na yin la yun thung ngur goms par byas pa lta ci smos/ yongs su smin pa'i rgyu de las gzhan pa thams cad ni yongs su smin pa rnam pa gsum gyi tshul du rig par bya ste/chung ngu goms pas ni chung ngur 'gyur ro/ /'bring du goms pas ni 'bring / cher goms pas ni yongs su smin pa che bar rig par bya'o/ /yongs su smin pa chung ngu dang 'bring dang / chen po de dag re re la yang rnam pa gsum gsum gyi tshul du rig par bya ste/ chung ngu la yang chung ngu'i chung ngu dang /chung ngu'i 'bring po dang / chung ngu'i chen po dang / 'bring po la yang 'bring po'i chung ngu dang / 'bring po'i 'bring po dang / 'bring po'i chen po dang / chen po la yang chen po'i chung ngu dang / chen po'i 'bring po dang / chen po'i chen po'o/ /de lta bu dang mthun par sangs rgyas dang byang chub sems dpa' gong nas gong du rab tu dbye ba'i tshul gyis sems can rnams kyi yongs su smin pa'i rab tu dbye ba tshad med par mdzad par rig par bya'o//ji skad bstan pa'i thabs de dag gis gzhan gsol ba 'debs pa ma gtogs pa'i bde ba gnyis la rgyud la dbang po yongs su smin pa nas nyes pa smin pa'i bar dang /smin pa chung ngu nas chen po'i bar gyis bud ng+ha'i chos rnams rgyu 'bras smin pa ni gang smin pa'i bdag ces bya ba dang / sems can gzhan rnams thams cad ces pa dang / gang zag gzhan rnams zhes pa gsum mo/ /de bzhin du sems can gzhan dang gang zag gzhan yang dbang po la sogs pa thob pa'o//de la byang chub sems dpa' ni yongs su smin pa'i rgyu ji skad bstan pa 'di dag gi bdag gi sangs rgyas kyi chos yongs su smin par bya ba dang / sems can gzhan rnams dang / gang zag gzhan rnams theg pa gsum gyis nges par 'byung bar bya ba'i phyir dbang po yongs su smin pa dang /dge ba'i rtsa ba yongs su smin pa dang / shes pa yongs su smin pa dang / yongs su smin pa chung ngu dang / 'bring dang / chen po yang dag par sgrub par byed do/ /byang chub sems dpa'i sa'i gzhi'i rnal 'byor gyi gnas las yongs su smin pa'i le'u ste drug pa'o// //de la byang chub gang zhe na/ mdor bsdu na spangs pa rnam pa gnyis dang / ye shes rnam pa gnyis la ni byang chub ces bya ste/ de la spangs pa rnam pa gnyis ni nyon mongs pa'i sgrib pa spangs pa dang / shes bya'i sgrib pa spangs pa'o/ /ye shes rnam pa gnyis ni nyon mongs pa'i sgrib pa spangs nas dri ma med cing nyon mongs pa thams cad dang rjes su 'brel pa med pa'i ye shes gang yin pa dang / shes bya'i sgrib pa spangs nas shes bya thams cad la thogs pa med cing sgrib pa med pa'i ye shes gang yin pa'o//rnam grangs gzhan yang yang dag pa'i ye shes dang / thams cad mkhyen pa dang / chags pa med pa'i ye shes dang / nyon mongs pa'i bag chags thams cad yang dag par bcom pa dang / nyon mongs pa can ma yin pa'i ma rig pa ma lus par spangs pa ni bla na med pa yang dag par rdzogs pa'i byang chub ces bya'o//de la nyon mongs pa'i bag chags dang bcas pa thams cad rnam pa thams cad du gtan spangs pa'i ye shes gang yin pa de ni dag pa zhes bya'o/ /khams thams cad dang / dngos po thams cad dang / rnam pa thams cad dang /dus thams cad du mkhyen pa thogs pa med par 'jug pa gang yin pa de ni thams cad mkhyen pa zhes bya'o/ /de la khams ni rnam pa gnyis te/ 'jig rten gyi khams dang / sems can gyi khams so/ /de la dngos po ni rnam pa gnyis te/ 'dus byas dang / 'dus ma byas so/ /'dus byas dang 'dus ma byas kyi dngos po de gnyis la yang rang gi mtshan nyid kyis phyi ma phyi ma'i rnam pa'i rab tu dbye ba dang / spyi'i mtshan nyid kyis rab tu dbye ba dang / rgyu dang 'bras bu'i rab tu dbye ba dang / khams dang / 'gro ba dang / dge ba dang / mi dge ba dang / lung du ma bstan pa la sogs pa'i rab tu dbye bas rnam pa'i rab tu dbye ba tshad med do//de la dus ni rnam pa gsum ste/ 'das pa dang / ma 'ongs pa dang / da ltar byung ba'o/ /de ltar na khams thams cad dang / dngos po thams cad dang / rnam pa thams cad dang / dus thams cad mkhyen pa de ni thams cad mkhyen pa zhes bya'o//de la chags pa med pa'i ye shes ni dgongs pa tsam kho nas thams cad du thogs pa med cing myur bar ye shes chags pa med par 'jug pa gang yin pa ste/ ye shes de yang dang yang du dgongs par mdzad pa ni ma yin gyi/ lan cig dgongs pa dang 'brel pa kho na yin no//rnam grangs gzhan yang sangs rgyas kyi chos ma 'dres pa brgya bzhi bcu dang / de bzhin gshegs pa'i nyon mongs pa med pa dang / smon nas mkhyen pa dang / so so yang dag par rig pa gang yin pa de ni bla na med pa yang dag par rdzogs pa'i byang chub ces bya'o/ / de la sangs rgyas kyi chos brgya bzhi bcu ni 'di dag yin te/ skyes bu chen po'i mtshan sum cu rtsa gnyis dang / dpe byad bzang po brgyad cu dang / rnam pa thams cad yongs su dag pa bzhi dang / stobs bcu dang / mi 'jigs pa bzhi dang / dran pa nye bar gzhag pa gsum dang / bsrung ba med pa gsum dang /snying rje chen po dang / bsnyel ba mi mnga' ba'i chos nyid dang / bag chags yang dag par bcom pa dang / rnam pa thams cad kyi mchog gi ye shes so / /sangs rgyas kyi chos de dag gi rnam par dbye ba ni rnam par rab tu gnas pa'i le'u las byung ba'o/ /de la byang chub dam pa 'di ni dam pa bdun dang ldan pa yin te/des na 'di ni byang chub thams cad kyi dam pa zhes bya'o/ /dam pa bdun gang zhe na/ sku dam pa dang / sgrub pa dam pa dang / phun sum tshogs pa dam pa dang / ye shes dam pa dang / mthu dam pa dang / spangs pa dam pa dang / gnas pa dam pa'o/ /gang de bzhin gshegs pa skyes bu chen po'i mtshan sum cu rtsa gnyis kyis legs par brgyan pa'i sku dang ldan pa de ni de'i sku dam pa zhes bya'o/ /gang de bzhin gshegs pa bdag la phan pa dang / gzhan la phan pa dang / skye bo mang po la phan pa dang / skye bo mang po la bde ba dang /'jig rten la thugs brtse ba dang / lha rnams dang mi rnams kyi don dang / phan pa dang / bde ba'i phyir zhugs pa de ni de'i sgrub pa dam pa zhes bya'o/ /gang de bzhin gshegs pa phun sum tshogs pa gong na med pa/ zla med pa bzhi po tshul khrims phun sum tshogs pa dang /lta ba phun sum tshogs pa dang / cho ga phun sum tshogs pa dang / 'tsho ba phun sum tshogs pa dang ldan pa ni de'i phun sum tshogs pa dam pa zhes bya'o/ /gang de bzhin gshegs pa so so yang dag par rig pa gong na med pa zla med pa bzhi po chos so so yang dag par rig pa dang / don so so yang dag par rig pa dang /nges pa'i tshig so so yang dag par rig pa dang / spobs pa so so yang dag par rig pa dang ldan pa de ni ye shes dam pa zhes bya'o / /gang de bzhin gshegs pa mngon par shes pa gong na med pa zla med pa drug po sngar ji skad bstan pa rnams dang ldan pa de ni de bzhin gshegs pa'i mthu dam pa zhes bya'o//gang de bzhin gshegs pa nyon mongs pa bag chags dang bcas pa thams cad spangs pa dang / shes bya'i sgrib pa spangs pa gong na med pa zla med pa dang ldan pa de ni de'i spangs pa dam pa zhes bya'o/ /gang de bzhin gshegs pa'i gnas la gong na med pa zla med pa gsum po 'phags pa'i gnas pa dang /lha dang tshangs pa'i gnas pas mang du gnas pa de ni de'i gnas pa dam pa zhes bya'o/ /de la stong pa nyid dang / mtshan ma med pa dang / smon pa med pas gnas pa dang / 'gog pa'i snyoms par 'jug pas gnas pa ni 'phags pa'i gnas pa zhes bya'o//bsam gtan bzhi dang / gzugs med pa'i snyoms par 'jug pa rnams ni lha'i gnas pa zhes bya'o/ /tshad med pa bzhi ni tshangs pa'i gnas pa zhes bya'o/ /gnas pa gsum po de dag las kyang bzhi ni gnas pa dam pa yin te/ gnas pa de dag gis de bzhin gshegs pa mang du gnas par mdzad de/ 'phags pa'i gnas pa las stong pa nyid kyis gnas pa dang / 'gog pa'i snyoms par 'jug pas gnas pa dang / lha'i gnas pa las bsam gtan bzhi pa mi g.yo bas gnas pa dang / tshangs pa'i gnas pa las snying rjes gnas pa ste/des de bzhin gshegs pa rnams sangs rgyas kyi spyan gyis/ su 'phel/ su 'grib/ su'i dge ba'i rtsa ba ma bskyed pa rnams bskyed par bya zhes bya ba nas rgyas par bya ste/ su zhig 'bras bu'i mchog dgra bcom pa nyid la gzhag par bya zhes bya ba'i bar du nyin lan gsum mtshan lan gsum ste/nyin mtshan lan drug 'jig rten la rnam par gzigs par mdzad do/ /de la sku dam pas ni de bzhin gshegs pa rnams skyes bu chen po zhes bya'o/ /grub pa dam pas ni thugs rje chen po dang ldan pa zhes bya'o/ /phun sum tshogs pa dam pas ni tshul khrims chen po dang /chos chen po zhes bya'o/ /ye shes dam pas ni shes rab chen po zhes bya'o/ /mthu dam pas ni mngon par shes pa chen po zhes bya'o/ /spangs pa dam pas ni rnam par grol ba chen po zhes bya'o/ /gnas pa dam pas ni gnas pa chen pos mang du gnas pa zhes bya'o//rnam pa bcus de bzhin gshegs pa de dag gi yon tan brjod pa dang / yon tan rjes su dran pa yin te/ bcu po dag gang dag zhe na/ 'di ltar bcom ldan 'das de ni de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa 'jig rten mkhyen pa/ skyes bu 'dul ba'i kha lo sgyur ba/ bla na med pa/ lha dang mi rnams kyi ston pa/ sangs rgyas bcom ldan 'das zhes bya ste/ de la phyin ci ma log par gsung bas na/ de bzhin gshegs pa zhes bya'o/ /thob par bya ba'i don thams cad brnyes par bya ba dang /bsod nams kyi zhing bla na med pa yin pa'i phyir mchod par 'os pa yang yin pas na dgra bcom pa zhes bya'o/ /chos rnams ji lta ba bzhin du don dam par thugs su chud pas na yang dag par rdzogs pa'i sangs rgyas zhes bya'o/ /rig pa gsum dang / mdo las ji skad gsungs pa'i zhabs lhag mthong dang /zhi gnas dang / de gnyis ka'i phyogs dang shin tu ldan pas na rig pa dang zhabs su ldan pa zhes bya'o/ /mchog tu khyad zhugs par gshegs pa dang / yang phyir mi ldog par gshegs pa na/ bde bar gshegs pa zhes bya'o/ /sems can gyi khams dang /'jig rten gyi khams kyi kun nas nyon mongs pa dang / rnam par byang ba'i rnam pa thams cad mkhyen pas na/ 'jig rten mkhyen pa zhes bya'o/ /sems can 'dul ba'i thabs dam pa mkhyen pa dang / 'jig rten du skyes bur gyur pa gcig pu byung bas na/ skyes bu 'dul ba'i kha lo sgyur ba bla na med pa zhes bya'o/ /mig ltar gyur pa'i phyir dang / ye shes dang don dang chos su gyur pa'i phyir/ don gsal ba gtan la 'bebs pa'i phyir dang / don thams cad ston pa dang / mi rtog pa'i don rtogs par mdzad pa'i phyir dang the tshom skyes pa gcod par mdzad pa dang /zab mo'i gnas rnam par 'grel pa dang / yongs su byang bar mdzad pa dang / de chos thams cad kyi rtsa ba yin pa dang / de 'dren pa yin pa dang / de ston pa yin pas na lha dang mi rnams la sdug bsngal thams cad las byung ba yang dag par ston cing / rnam par brjod pas na de'i phyir lha dang mi rnams kyi ston pa zhes bya'o//don dang ldan pa'i chos kyi tshogs dang / don dang mi ldan pa'i chos kyi tshogs dang / don dang ldan pa yang ma yin/ don dang mi ldan pa yang ma yin pa'i chos kyi tshogs mtha' dag rnam pa thams cad du mngon par rdzogs par thugs su chud pas na sangs rgyas zhes bya'o//bdud dpung dang bcas pa thams cad kyi g.yul chen po bcom pas na/ bcom ldan 'das zhes bya'o/ /de la bskal pa du mar yang sangs rgyas gcig kyang mi 'byung la/ bskal pa gcig la yang sangs rgyas mang po 'byung bar 'gyur te/phyogs bcu'i 'jig rten gyi khams dpag tu med pa grangs med pa de dang de dag tu sangs rgyas dpag tu med grangs med pa dag 'byung bar rig par bya'o/ /de ci'i phyir zhe na/ phyogs bcu dag na byang chub sems dpa' dpag tu med pa grangs med pa gang dag dus gcig tu smon lam btab pa dang /tshogs yang dag par sgrub pa mtshungs pa dag yod pa'i phyir te/ zhag dang zla ba phyed pa dang / zla ba dang lo gang kho na la byang chub sems dpa' gcig gis byang chub sems kyis smon lam btab pa de'i nyin mo dang / zla ba phyed dang /zla ba dang / lo de kho na la thams cad kyis smon lam btab ste/ gcig gis ji ltar spro ba bskyed pa dang / bsgrub pa dang / brtsal ba de bzhin du kun gyis kyang btsal te/ 'di ltar 'jig rten gyi khams 'di nyid na yang byang chub sems dpa' brgya phrag du ma gang dag dus gcig tu smon lam 'debs pa dang /stong pa mtshungs pa dang / tshul khrims mtshungs pa dang / bzod pa mtshungs pa dang / brtson 'grus mtshungs pa dang / ting nge 'dzin mtshungs pa dang / shes rab mtshungs pa dag snang na phyogs bcu'i 'jig rten gyi khams mtha' yas mu med pa dag na lta ci smos/sangs rgyas kyi zhing stong gsum gyi stong chen po yang phyogs bcu dag na dpag tu med grangs med pa dag yod do/ /byang chub sems dpa' tshogs yang dag par sgrub pa mtshungs pa gnyis 'jig rten gyi khams sangs rgyas kyi zhing gcig tu cig car byung ba'i skabs kyang med na dpag tu med grangs med pa dag na lta ci smos/tshogs mtshungs pa rnams rim gyis go rims su byung ba yang mi rigs la/ thams cad kyi thams cad du 'byung bar mi 'gyur bar yang mi rigs te/ de lta bas na phyogs bcu dpag tu med grangs med pa ji ltar yongs su dag par byas pa/de bzhin gshegs pa stong pa de dag tu byang chub sems dpa' tshogs mtshungs pa rnams sangs rgyas kyi zhing tha dad par 'byung bar rig par bya'o/ /de'i phyir rnam grangs 'dis 'jig rten gyi khams mang po dag tu sangs rgyas mang po 'byung ba dag rigs kyi/sangs rgyas kyi zhing gcig tu de bzhin gshegs pa gnyis cig car 'byung bar ni mi 'gyur ro/ /de ci'i phyir zhe na/ byang chub sems dpa' ni yun ring po nas 'di skad du ji nas bdag yongs su 'dren pa med pa'i 'jig rten du yongs su 'dren par gyur nas sems can rnams 'dul zhing sdug bsngal thams cad las rnam par grol bar byas te/yongs su mya ngan las zlo bar gyur cig ces smon lam bskyed pa'i phyir te/ de ltar yun ring po nas smon lam bskyed pa yang dag par bsgrub pa'i yongs su bzung ba de 'grub pa nyid du 'gyur ro//yang de bzhin gshegs pa gcig gis kyang stong gsum gyi stong chen po sangs rgyas kyi zhing gcig tu sangs rgyas kyi phrin las thams cad mdzad par spyod do/ /de'i phyir de bzhin gshegs pa gnyis pa 'byung ba 'di ni don med pa nyid du 'gyur ro/ /yang de bzhin gshegs pa gcig 'jig rten du byung na sems can rnams kyi rang gi don gyi bya ba 'grub pa ches mang bar 'gyur zhing ches mthun par 'gyur ro//de ci'i phyir zhe na/ de dag 'di snyam du sems te/ de bzhin gshegs pa ni 'gro ba ma lus pa la 'di gcig pur zad de/ gnyis su med na 'di ljongs rgyu zhing gshegs sam/yongs su mya ngan las 'das par gyur na ni/ gzhan gang gis thad du bdag cag gis tshangs par spyod pa spyad par bya ba'am/ chos mnyan par bya ba gnyis su yang med do snyam du rig nas tshangs par spyod pa la gnas par bya ba dang / dam pa'i chos mnyan pa'i phyir 'dun pa dang / rtsol ba shin tu drag po myur du byed par 'gyur gyis / de dag gis sangs rgyas mang po mthong du zin na skyen par mi byed de/ de ltar na sangs rgyas gcig byung na de dag ni rang gi don gyi bya ba 'grub pa ches mang bar 'gyur zhing ches mthun par 'gyur ro//de la sangs rgyas thams cad ni gnas bzhi po sku tshe dang / mtshan dang / gdung dang / sku ma gtogs par thams cad mtshungs shing mnyam ste/ khyad par med do/ /sangs rgyas rnams ni chos bzhi po 'di dag gis skyed 'brir 'gyur zhing mi mthun par zad kyi gzhan gang gis kyang ma yin no//bud med kyis kyang bla na med pa yang dag par rdzogs pa'i byang chub mngon par rdzogs par 'tshang mi rgya ste/ de ci'i phyir zhe na/ 'di ltar byang chub sems dpa' ni bskal pa grangs med pa dang po 'das pa nyid nas bud med kyi dngos po spangs pas na/nam byang chub kyi snying po la gnas kyi bar du nams kyang bud med du mi 'gyur ba dang / bud med thams cad ni rang bzhin gyis nyon mongs pa mang ba dang / shes rab 'chal ba yin la rang bzhin gyis nyon mongs pa mang ba'i rgyud dang / shes rab 'chal pa'i rgyud kyis kyang bla na med pa yang dag par rdzogs pa'i byang chub tu mngon par rdzogs par 'tshang rgya bar mi nus pa'i phyir ro//de ltar na bla na med pa yang dag par rdzogs pa'i byang chub 'di ni ngo bo nyid kyis kyang ji skad bstan pa bzhin yang dag pa ji lta ba bzhin du rig par bya'o/ /dam par gyur pa dang / yon tan brjod pa dang / rjes su dran pa dang / 'byung ba dang / khyad par gyis kyang de skad bstan pa bzhin yang dag pa ji lta ba bzhin du rig par bya'o/ /yang rtogs pa'i lam thams cad las yang dag par 'das pa'i phyir bsam gyis mi khyab pa nyid do/ /yon tan dpag tu med pa dang ldan pa'i phyir dpag tu med pa ste/bla na med pa yang dag par rdzogs pa'i byang chub ni nyan thos dang / rang sangs rgyas dang / de bzhin gshegs pa rnams mngon par 'grub par byed pa yin no/ /de lta bas na byang chub 'di ni mchog dang / gtso bo dang / dam pa dang / gya nom pa yin no/ /byang chub sems dpa'i sa'i gzhi'i rnal 'byor gyi gnas las byang chub kyi le'u ste bdun pa'o// //re zhig byang chub sems dpa' gang la bslab par bya ba ni bstan zin te / ji ltar bslab par bya ba de bstan par bya'o/ /sdom ni/ mos pa mang ba nyid dang ni/ / chos 'tshol ba dang ston pa dang / /sgrub pa dang ni de bzhin du/ /legs par gdams dang rjes bstan dang / /lus dang ngag dang yid kyi las/ /thabs dang bcas pa phyi ma yin/ /'di la byang chub sems dpa' byang chub sems dpa'i bslab pa dag la bslab par 'dod pas thog ma kho nar mos pa mang par bya'o//chos yongs su tshol ba dang / chos ston pa dang / chos kyi rjes su mthun pa'i chos bsgrub pa dang / legs par gdams pa dang / rjes su bstan pa dang / legs par gdams pa dang / rjes su bstan pa la gnas pa dang / thabs kyis yongs su zin pa'i lus dang /ngag dang yid kyi las can du bya'o/ /ji ltar na byang chub sems dpa' mos pa mang ba yin zhe na/ 'di la byang chub sems dpa' mos pa'i gnas brgyad po sangs rgyas dang / chos dang / dge 'dun gyi yon tan dkon mchog gsum gyi yon tan rnams dang /sangs rgyas dang / byang chub sems dpa'i mthu ji skad bstan pa dang / de kho na'i don ji skad bstan pa dang / rgyu dang 'bras bu sna tshogs ci rigs par gyur pa dang / thob par bya ba'i don phyin ci ma log pa la bdag gis 'thob par nus so zhes bya ba dang / thob par bya ba'i don la ji lta bar 'thob pa'i thabs la yang de bzhin te/thob par bya ba'i don gyi 'thob pa'i thabs de ni yod do zhes bya ba ste/ de la thob par bya ba'i don ni bla na med pa'i byang chub bo/ /'thob pa'i thabs ni byang chub sems dpa'i slob pa'i lam thams cad do/ /de bzhin du legs par gsungs pa/lags par bsnyad pa/ legs par brjod pa 'di lta ste/ mdo'i sde dang / dbyangs kyis bsnyad pa'i sde dang / lung du bstan pa'i sde la sogs pa'i chos rnams la dad pa dang dang ba sngon du 'gro ba'i nges pa dang 'dod pa dang ldan pa yin no/ /de la mos pa'i gnas rnam pa brgyad po 'di la rgyu gnyis kyis byang chub sems dpa'i mos pa mang bar 'gyur bar rig par bya ste/mos pa la goms pa lan mang du byed pa dang / bzod pa drag po yod pa'o / /de la byang chub sems dpa' chos tshol bas ci zhig tshol/ ji ltar tshol ci'i phyir tshol zhe na/ mdor bsdu na byang chub sems dpa' ni byang chub sems dpa'i sde snod tshol ba'o//nyan thos kyi sde snod dang / phyi rol gyi bstan bcos rnams dang / 'jig rten pa'i bzo dang / las kyi gnas shes pa rnams tshol lo/ /de la gsung rab tu gtogs pa yan lag bcu gnyis las shin tu rgyas pa'i sde snod gang yin pa de ni byang chub sems dpa'i sde snod yin no//lhag ma ni nyan thos kyi sde snod yin par rig par bya'o/ /phyi rol gyi bstan bcos rnams ni mdor bsdu na rnam pa gsum ste/ gtan tshigs kyi bstan bcos dang / sgra'i bstan bcos dang /gso ba'i bstan bcos so/ /de la 'jig rten pa'i bzo dang / las kyi gnas ni rnam pa du ma rnam pa sna tshogs mang po yod de/ gser mgar dang / lcags mgar dang / nor bu mkhan gyi las shes pa la sogs pa ste/ rig pa'i gnas kyis yongs su bsdus pa de dag thams cad ni rig pa'i gnas lnga po dag yin te/nang gi rig pa dang / gtan tshigs kyi rig pa dang / sgra'i rig pa dang / nad gso ba'i rig pa dang / bzo dang las kyi gnas kyi rig pa'o/ /byang chub sems dpas btsal ba gang yin pa de ni rig pa'i gnas lnga po 'di dag yin te/de ltar na des rig pa'i gnas thams cad btsal ba yin no/ /de la sangs rgyas kyi gsung rab ni nang gi bstan bcos zhes bya ste/ de yang rnam pa dus 'jug /de bzhin du 'jig rten pa'i bzo dang / las kyi gnas shes pa'i bar du rnam pa dus 'jug ce na/ sangs rgyas kyi gsung rab ni mdor bsdu na rnam pa gnyis kyis 'jug ste/rgyu dang 'bras bu yang dag par ston pa'i rnam pa dang / byas pa chud mi za zhing ma byas pa dang 'phrad par mi 'gyur bar ston pa'i rnam pa'o/ /gtan tshigs kyi bstan bcos kyang rnam pa gnyis te/ pha rol klan ka tshol ba brjod pa'i phan yon ston pa'i rnam pa dang /gzhan las byung ba de lta bu smra ba las thar pa'i phan yon ston pa'i rnam pa'o/ /sgra'i bstan bcos kyang rnam pa gnyis te/ skad kyi byings kyi ngo bo bsgrub pa rnam par gzhag pa ston pa'i rnam pa dang / tshig legs par sbyor ba'i phan yon ston pa'i rnam pa'o//gso ba'i bstan bcos ni rnam pa bzhis 'jug ste/ nad la mkhas pa ston pa'i rnam pa dang / nad ci las byung ba la mkhas pa ston pa'i rnam pa dang / nad byung ba bsal ba la mkhas pa ston pa'i rnam pa dang / nad bsal nas phyis mi 'byung bar bya ba la mkhas pa ston pa'i rnam pa'o//'jig rten pa'i bzo dang / las kyi gnas shes pa rnams ni rang rang gi bzo dang / las kyi gnas sgrub pa'i 'bras bu yongs su grub pa ston pa'i rnam pa'o/ /ji ltar na sangs rgyas kyi gsung rab rgyu dang 'bras bu phyin ci ma log pa ston ce na/ kun nas nyon mongs pa dang /rnam par byang ba dang / 'jig rten pa rnams kyi log rtog la sogs pa lung du ma bstan pa de dang / de dag 'byung ba'i rgyu bcu po 'di dag ni phyin ci ma log pa'i rgyu rnam par gzhag pa dang rgyu thams cad bsdus pa yin par rig par bya'o/ /rgyu bcu bo dag gang zhe na/ rjes su tha snyad 'dogs pa'i rgyu dang /ltos pa'i rgyu dang / 'phen pa'i rgyu dang / yongs su 'dzin pa'i rgyu dang / mngon par 'grub pa'i rgyu dang / 'dren pa'i rgyu dang / so sor nges pa'i rgyu dang / lhan cig byed pa'i rgyu dang / mi mthun pa'i rgyu dang / mi mthun pa med pa'i rgyu'o/ /de la chos thams cad kyi ming dang /ming sngon du 'gro ba'i 'du shes dang / 'du shes sngon du 'gro ba'i brjod pa gang yin pa de ni chos de dang de dag gi rjes su tha snyad 'dogs pa'i rgyu yin no/ /de la gang la ltos shing rgyu gang las byung ba dngos po gang la 'dod pa dang len par gyur pa de ni de'i ltos pa'i rgyu zhes bya ste/ 'di lta ste/ lag pa la ltos shing lag pa'i rgyu las byung ba ni len pa'i las so/ /rkang pa la ltos shing rkang pa'i rgyu las byung ba ni 'gro ba dang 'ong ba'i las so/ /tshigs la ltos shing tshigs kyi rgyu las byung ba ni bskum pa dang brkyang ba'i las so/ /bkres pa dang skom pa la ltos shing bkres pa dang skom pa'i rgyu las byung ba ni zas dang skom len pa dang tshol ba yin te/de lta bu dang mthun pa tshad med pa'i yul dang ldan pa ni ltos pa'i rgyu yin par rig par bya'o/ /de la sa bon ni rang gi 'bras bu tha ma'i bar gyi 'phen pa'i rgyu yin no/ /sa bon ma gtogs par de las gzhan pa'i rkyen ni yongs su 'dzin pa'i rgyu yin no//sa bon de nyid ni rang gi 'bras bu mngon par 'grub pa'i rgyu yin no/ /sa bon las grub pa'i 'bras bu de ni sa bon gyis 'phangs pa'i 'bras bu phyi ma'i 'dren pa'i rgyu yin no/ /rnam pa sna tshogs rnam pa tha dad pa'i rgyu nyid ni so sor nges pa'i rgyu yin no//ltos pa'i rgyu gang yin pa dang / 'phen pa'i rgyu gang yin pa dang / yongs su 'dzin pa'i rgyu gang yin pa dang / mngon par 'grub pa'i rgyu gang yin pa dang / 'dren pa'i rgyu gang yin pa dang / so sor nges pa'i rgyu gang yin pa'i rgyu de dag thams cad gcig tu bsdus pa ni lhan cig byed pa'i rgyu zhes bya'o//skye ba la bar du gcod pa'i rgyu ni mi mthun pa'i rgyu yin no/ /bar du gcod pa med pa ni mi mthun pa med pa'i rgyu yin no/ /de la mi mthun pa'i rgyu ni mdor bsdu na rnam pa drug ste/ tshig mi mthun pa ni 'di lta ste/ dge sbyong dang / bram ze kha cig gi bstan bcos snga phyi mi mthun pa rnams lta bu yin no//rigs pa dang 'gal ba ni sgrub par byed pa shes par bya ba'i don sgrub pa la 'thad par sgrub pa'i rigs pa mi rung ba yin no/ /skye ba dang mi mthun pa ni 'di lta ste/ skye ba'i rkyen med pa dang / skye ba la bar du gcod pa'i chos yod na/skye bar mi 'gyur ba lta bu yin no/ /lhan cig gnas pa mi mthun pa ni 'di lta ste/ snang ba dang mun pa gnyis dang / 'dod chags dang zhe sdang gnyis dang / bde ba dang sdug bsngal gnyis lta bu yin no/ /mi 'phrod pa'i mi mthun pa ni 'di lta ste/ sbrul dang sre mong gnyis dang / byi la dang /byi ba gnyis dang / gcig la gcig phyir rgol zhing dgrar gyur pa gnyis lta bu yin no/ /mi mthun pa'i phyogs dang gnyen po'i phyogs kyi mi mthun pa ni 'di lta ste/ mi sdug pa bsgom pa dang 'dod pa'i 'dod chags gnyis dang / byams pa bsgom pa dang gnod sems gnyis dang /snying rje bsgom pa dang rnam par 'tshe ba gnyis dang / byang chub kyi yan lag dang lam yan lag brgyad pa bsgom pa dang / khams gsum na spyod pa'i nyon mongs pa thams cad lta bu yin no/ /don gyi skabs 'dir ni skye ba dang mi mthun pa nyid du 'dod do/ /yang rgyu 'di dag thams cad ni rgyu gnyis kyis bsdus te bskyed pa'i rgyu dang /thabs kyi rgyu yin no/ /de la 'phen pa dang mngon par 'grub par byed pa'i sa bon gang yin pa de ni bskyed pa'i rgyu yin no/ /rgyu lhag ma rnams ni thabs kyi rgyu yin par rig par bya'o// //bam po drug pa/ rkyen ni bzhi ste/ rgyu'i rkyen dang / mtshungs pa de ma thag pa'i rkyen dang / dmigs pa'i rkyen dang / bdag po'i rkyen to/ /de la bskyed pa'i rgyu gang yin pa de ni rgyu'i rkyen to/ /thabs kyi rgyu gang yin pa de ni/ bdag po'i rkyen yin par rig par bya'o/ /mtshungs pa de ma thag pa'i rkyen dang / dmigs pa'i rkyen ni/sems dang sems las byung ba pa'i chos rnams kyi yin te/ 'di ltar sems dang sems las byung ba'i chos snga ma skyes pa rnams skabs 'byed pas yongs su zin pa dang / dmigs pas yongs su zin pa la 'byung zhing 'jug par 'gyur ro/ /de lta bas na de ma thag pa'i rkyen dang /dmigs pa'i rkyen ni yongs su 'dzin pa'i rgyus bsdus par rig par bya'o/ /de la rgyu bcu po 'di dag gis 'jig rten pa'i dngos po thams cad ni ji ltar 'byung bar 'gyur/ kun nas nyon mongs pa ni ji ltar 'gyur rnam par byang bar ni ji ltar 'gyur zhe na/ 'di ltar 'jig rten na 'bras bu'i grangs su gtogs pa'i lo tog gang dag gis 'jig rten 'di 'tsho bar byed pa gang yin pa de dag gi ming dang /'du shes dang / tshig tu brjod pa rnam pa sna tshogs 'di lta ste/ nas dang / 'bras sA lu dang / gro dang / til dang / mon sran sde'u dang / mon sran gre'u dang / rgya sran zhes bya ba la sogs pa 'di ni de dag gi tha snyad nas khyer te shog /khyer cig thogs shig zhogs shig ces bya ba la sogs pa'i rjes su tha snyad 'dogs pa'i rgyu yin no/ /nas la ji lta ba bzhin du lhag ma rnams la yang de bzhin du rig par bya'o/ /bkres pa dang / skom pa dang / nyam chung ba dang /lus gnas par bya ba la ltos pa dang / kham gyi zas myong bar byed pa la ltos nas/ de dag 'dod pa dang / tshol ba dang / len pa dang / longs spyod par byed pa 'di ni de dag gi ltos pa'i rgyu yin no/ /rang gi sa bon gang dang gang las lo tog gang dang gang 'byung ba'i sa bon de ni de'i 'phen pa'i rgyu yin no//sa dang char pa la sogs pa'i rkyen las myu gu 'byung bar gyur pa de ni yongs su 'dzin pa'i rgyu yin no/ /sa bon de ni myu gu de'i mngon par 'grub pa'i rgyu yin no/ /myu gu dang sdong po dang lo ma gcig nas gcig tu brgyud pa'i rgyun de ni lo tog de 'grub pa dang lo tog de yongs su smin pa'i 'dren pa'i rgyu yin no//nas kyi sa bon las kyang nas kyi myu gu dang / nas kyi lo tog 'byung bar 'gyur gyi gzhan ni ma yin no/ /de bzhin du lhag ma rnams la yang rig par bya ste/ 'di ni de dag gi so sor nges pa'i rgyu yin no//ltos pa'i rgyu nas bzung ste/ so sor nges pa'i rgyu la thug pa'i rgyu de dag thams cad ni lo tog 'grub pa'i lhan cig byed pa'i rgyu yin no/ /'bru de rgyu gang yang rung ba ma tshang na 'grub par mi 'gyur te/ de lta bas na de dag thams cad tshogs pa ni lhan cig byed pa'i rgyu zhes bya'o//ser ba dang lo tog la gnod pa byung ba la sogs pa bar du gcod pa rnams ni mi mthun pa'i rgyu yin no/ /de dag med de bar du gcod pa med pa ni mi mthun pa med pa'i rgyu yin no/ /de ltar rgyu bcu po de dag ni 'bru bsdus pa rnams la ji lta ba bzhin du de las gzhan pa'i 'jig rten pa'i dngos po dag la yang ci rigs par sbyar bar rig par bya'o//de la 'di ltar rten cing 'brel par 'byung ba thams cad kyi ming dang / 'du shes dang tshig tu brjod pa 'di lta ste/ ma rig pa dang / 'du byed rnams dang / rnam par shes pa dang / ming dang gzugs nas rgyas par rga shi dang /mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa zhes bya ba 'di ni re zhig kun nas nyon mongs pa'i tha snyad ma rig pa'i rkyen gyis 'du byed rnams zhes bya ba nas skye ba'i rkyen gyis rga shi zhes bya ba la sogs pa'i rjes su tha snyad 'dogs pa'i rgyu yin no//yul myong ba la ltos nas srid pa'i yan lag 'di dag 'jug pa de dag ni de'i kun nas nyon mongs pa'i rgyu yin no/ /tshe 'di la skyes shing byung ba'i ma rig pa la sogs pa'i chos rnams kyi sa bon gang dag yin pa de dag ni skye ba gzhan gyi skye ba dang / rga shi'i 'phen pa'i rgyu yin no//skyes bu dam pa ma yin pa la brten pa dang / dam pa'i chos ma yin pa thos pa dang / tshul bzhin ma yin pa yid la byed pa dang / sngon goms pa'i 'phen pa ni ma rig pa la sogs pa dag 'byung ba'i yongs su 'dzin pa'i rgyu yin no/ /ma rig pa la sogs pa'i rang rang gi sa bon ni mngon par 'grub pa'i rgyu yin no//ma rig pa la sogs pa srid pa la thug pa de dag ni phyi ma phyi ma 'dren cing gcig nas gcig tu brgyud pas tshe gzhan gyi skye ba dang / rga shi de'i 'dren pa'i rgyu yin no/ /ma rig pa la sogs pa srid pa'i mthar thug pa rang gi sa bon rnams dang bcas pa gzhan dag sems can dmyal bar skye bar 'gyur ba dang /gzhan dag dud 'gro dang / yi dags dang / lha dang mir 'gyur ba de ni kun nas nyon mongs pa'i so sor nges pa'i rgyu yin no/ /ltos pa'i rgyu la sogs pa so sor nges pa'i rgyu la thug pa yan chad rgyu de dag thams cad lhan cig byed pa'i rgyu zhes bya'o//kun nas nyon mongs pa de'i mi mthun pa'i rgyu ni rigs dang ldan pa dang / sangs rgyas rnams 'byung ba dang / dam pa'i chos bstan pa dang / skyes bu dam pa la brten pa dang / dam pa'i chos mnyan pa dang / tshul bzhin yid la byed pa dang / chos kyi rjes su mthun pa'i chos sgrub pa dang /byang chub kyi phyogs kyi chos thams cad do/ /mi mthun pa med pa'i rgyu ni ji skad bstan pa'i chos 'di dag nyid med pa dang bral ba nyid do/ /de ltar rgyu bcu po 'di dag gis sems can thams cad kyi kun nas nyon mongs pa thams cad rig par bya'o/ /de la rnam par byang ba'i phyogs kyi chos thams cad dang /'gog pa mya ngan las 'das pa la mya ngan las 'das pa'i ming dang / 'du shes dang / tshig tu brjod pa gang yin pa de ni rnam par byang ba'i rjes su tha snyad 'dogs pa'i rgyu yin te/ dran pa nye bar gzhag pa rnams dang / yang dag par spong ba rnams nas /'phags pa'i lam yan lag brgyad pa'i bar dang / ma rig pa 'gags pas 'du byed 'gag pa nas rgyas par skye ba 'gags pas rga shi 'gag pa'i bar de dag dang / de lta bu dang mthun pa rnams ni rjes su tha snyad 'dogs pa'i rgyu yin no/ /de la 'du byed kyi nyes dmigs la ltos nas rnam par byang ba tshol ba dang /rnam par byang ba yongs su 'dzin pa dang / rnam par byang ba yongs su grub pa gang yin pa de ni de'i ltos pa'i rgyu yin no/ /gang zag rigs la gnas pa'i rigs dang ldan pa/ phung po lhag ma dang bcas pa dang / phung po lhag ma med pa 'thob pa'i sngon du 'gro ba gang yin pa de ni rnam par byang ba 'phen pa'i rgyu yin no/ /skyes bu dam pa la brten pa dang dam pa'i chos mnyan pa dang / tshul bzhin yid la bya ba dang / sngon dbang po yongs su smin par byas pa ni yongs su 'dzin pa'i rgyu yin no/ /rigs kyis bsdus pa ni zag pa med pa byang chub kyi phyogs kyi chos kyi sa bon de dag ni byang chub kyi phyogs kyi chos de dag gi mngon par 'grub pa'i rgyu yin no//byang chub kyi phyogs kyi chos dang rang gi sa bon las mngon par 'grub pa de dag ni phung po'i lhag ma dang bcas pa dang / phung po lhag ma med pa'i mya ngan las 'das pa'i dbyings kyi rim gyis 'dren pa'i rgyu yin no//de la nyan thos kyi rigs gang yin pa de ni nyan thos kyi theg pas yongs su mya ngan las 'da' bar 'gyur ba dang / rang sangs rgyas kyi rigs ni rang sangs rgyas kyi theg pas yongs su mya ngan las 'da' bar 'gyur ba dang / theg pa chen po'i rigs ni theg pa chen pos yongs su mya ngan las 'da' bar 'gyur ba de ni rnam par byang ba'i so sor nges pa'i rgyu yin no/ /ltos pa'i rgyu rnam par byang ba'i phyogs gang yin pa nas/ so sor nges pa'i rgyu gang yin pa'i bar de ni de'i lhan cig byed pa'i rgyu zhes bya'o/ /rigs dang mi ldan pa dang /sangs rgyas mi 'byung ba dang / mi khom par skyes pa dang / skyes bu dam pa ma yin pa la brten pa dang / dam pa'i chos ma yin pa mnyan pa dang / tshul bzhin ma yin pa yid la byed pa dang / log par sgrub pa ni mi mthun pa'i rgyu yin no/ /mi mthun pa'i rgyu de nyid med pa dang bral ba nyid gang yin pa de ni mi mthun pa med pa'i rgyu zhes bya'o//de la kun nas nyon mongs pa'i phyogs la mi mthun pa'i rgyu gang yin pa de ni rnam par byang ba'i rgyu yin par blta bar bya'o/ /rnam par byang ba'i phyogs la mi mthun pa'i rgyu gang yin pa de ni kun nas nyon mongs pa'i rgyu yin par blta bar bya'o//de ltar na rgyu bcu po de dag gis kun nas nyon mongs par 'gyur la/ bcu po de dag nyid kyis rnam par byang bar 'gyur te/ 'das pa'i dus na byung ba dang / ma 'ongs pa'i dus na 'byung bar 'gyur ba'i kun nas nyon mongs pa'am/ rnam par byang ba'i rgyu gzhan ni 'di las gong na yang med do//'di las lhag pa yang med do/ /de la 'bras bu gang zhe na/ mdor bsdu na/ 'bras bu ni lnga ste/ rnam par smin pa'i 'bras bu dang / rgyu mthun pa'i 'bras bu dang / bral ba'i 'bras bu dang / skyes bu byed pa'i 'bras bu dang / bdag po'i 'bras bu'o/ /mi dge ba'i cho rnams kyi rnam par smin pa ngan song dag tu rnam par smin par 'gyur ba dang /dge ba zag pa dang bcas pa rnams kyi bde 'gror rnam par smin par 'gyur ba de ni rnam par smin pa'i 'bras bu'o/ /mi dge ba la goms pas mi dge ba la dga' zhing mi dge ba mang bar gnas pa dang / dge ba la goms pas dge ba la dga' zhing dge ba mang ba dang /sngon gyi las dang mthun pas phyis 'bras bu rjes su mthun pa gang yin pa de ni rgyu mthun pa'i 'bras bu yin no/ /'phags pa'i lam yan lag brgyad pas nyon mongs pa 'gog pa ni bral ba'i 'bras bu'o/ /so so'i skye bo rnams kyi 'jig rten pa'i lam gyis nyon mongs pa 'gog pa gang yin pa de ni gtan du rjes su 'jug pa ma yin te/de lta bas na de ni bral ba'i 'bras bu ma yin no/ /tshe 'di nyid la la la bzo dang las kyi gnas gang yang rung ba la brten nas/ skyes bu byed pas yang na zhing rmed pa/ yang na tshong byed dam/yang na rgyal po'i zha 'bring byed dam/ yi ge dang rtsis dang / shod dgod pa dang / bgrang ba dang / lag rtsis kyi lo tog la sogs pa dang / rnyed pa la sogs pa'i 'bras bu mngon par 'grub pa gang yin pa de ni skyes bu'i byed pa'i 'bras bu zhes bya'o/ /mig gi rnam par shes pa ni mig gi dbang po'i bdag po'i 'bras bu'o//de bzhin du yid kyi rnam par shes pa ni yid kyi dbang po yin no/ /de bzhin du srog dang ma bral pa ni srog gi dbang po yin no/ /de ltar na dbang po nyi shu rtsa gnyis po thams cad kyi so so'i dbang gis 'bras bu gang grub pa de ni/ bdag po'i 'bras bu yin par rig par bya'o//dbang po nyi shu rtsa gnyis po rnams kyi dbang po de ni 'di lta ste/ gzhi bsdu ba las rig par bya'o/ /de ltar na byang chub sems dpas sangs rgyas kyi gsung rab rgyu dang 'bras bu yang dag par ston pa'i rnam pa rtogs nas gnas dang gnas ma yin pa shes pa'i stobs kyis rigs kun tu bstan pa'i rgyus rim gyis rnam par dag par byed cing rnam par 'phel bar byed do//ma byas pa dang gzhan gyis byas pa ni su la yang rnam par smin par mi 'gyur la/ byas pa dang bdag gis byas pa'i las rnams ni 'bras bu 'byin cing bskal pa brgyar yang chud za bar mi 'gyur ro//de bzhin du ma byas pa dang phrad par mi 'gyur ba dang / byas pa chud mi za ba sangs rgyas kyi gsung rab bstan pa yang byang chub sems dpas yang dag pa ji lta ba bzhin du rtogs nas/ las bdag gir bya ba shes pa'i stobs kyis rigs rim gyis rnam par dag par byed cing rnam par 'phel bar byed do//de la ji ltar byang chub sems dpa' thos pa tshol zhe na/ 'di la byang chub sems dpa' ni gus pa chen po nye bar bzhag nas legs par gsungs pa legs par bsnyad pa'i chos tshol te/ de ni mdor bsdu na 'di lta bu'i tshul gyis kyang legs par gsungs pa la gus pa nye bar gnas pa yin te/ byang chub sems dpa' de ni legs par gsungs pa gcig mnyan pa'i phyir yang gal te de ltar ma byas na legs par gsungs pa thos par mi 'gyur ba lta na lcags kyis gzhi tsha zhing 'bar ba la yang mchog tu dga' ba dang /gus pa'i mchog gis 'gro bar byed na/ legs par gsungs pa mang po'i phyir lta ci smos/ byang chub sems dpa'i lus kyi yo byad zas dang / skom la sogs pa gzhan dag la lta ci smos kyi/ bdag gi lus kyi khog pa la dga' ba dang /gus pa gang yin pa dang / legs par gsungs pa mnyan pa la dga' ba dang / gus pa gang yin pa las dga' ba dang / gus pa snga ma ni dga' ba dang gus pa phyi ma dang sbyar na brgya'i char yang mi phod do/ /stong gi cha dang / grangs dang / cha dang / bgrang ba dang / rgyur yang mi phod do//de de ltar legs par gsungs pa la gus par gyur nas/ legs par gsungs pa nyan pa na skyo bar yang mi 'gyur chog shes par yang mi 'gyur te/ dad pa dang ldan zhing dad pa mang ba dang / rgyud mnyen cing drang ba dang / lta ba drang po yin no/ /de yon tan 'dod pas chos smra ba'i thad du 'gro bar byed kyi/klan ka tshol ba'i sems kyis ni ma yin no/ /gus pa dang bcas pas 'gro'i nga rgyal gyi khengs pas ni ma yin no/ /dge ba ji lta bu zhig btsal snyam pas 'gro'i bdag nyid bsgrags pa'i phyir ni ma yin no/ /bdag dang gzhan dag dge ba'i rtsa ba la yang dag par sbyor bar bya'o snyam gyi rnyed pa dang bkur sti'i phyir ma yin no//de de ltar 'gro ba dang ldan pas kun nas nyon mongs pa med pa dang / rnam par g.yeng ba med par chos nyan to/ /ji ltar kun nas nyon mongs pa med par nyan ce na/ khengs pa'i kun nas nyon mongs pa dang bral ba dang /khyad du gsod pa'i kun nas nyon mongs pa dang bral ba dang / zhum pa'i kun nas nyon mongs pa dang bral bas so/ /de la rnam pa drug gis ni khengs pa'i kun nas nyon mongs pa dang bral bar 'gyur/ rnam pa bzhis ni khyad du gsod pa'i kun nas nyon mongs pa dang bral bar 'gyur/rnam pa gcig gis ni zhum pa'i kun nas nyon mongs pa dang bral bar 'gyur te/ dus su nyan pa dang / bkur sti byed pa dang / srid zhu byed pa dang / mi khro ba dang / rjes su sgrub pa dang / klan ka mi tshol ba dang / rnam pa drug po 'di dag gis ni khengs pa'i kun nas nyon mongs pa dang bral bar 'gyur ro//chos la gus pa nye bar gzhag pa dang / chos smra ba'i gang zag la gus pa nye bar gzhag pa dang / chos la khyad du mi gsod pa dang / chos smra ba'i gang zag la khyad du mi gsod pa dang / rnam pa bzhi po de dag gis ni khyad du gsod pa'i kun nas nyon mongs pa dang bral bar nyan no//bdag nyid la khyad du mi gsod par nyan par byed do/ /rnam pa gcig po 'dis zhum pa'i kun nas nyon mongs pa dang bral bas nyan par byed de/ de ltar na byang chub sems dpa' kun nas nyon mongs pa med par chos nyan pa yin no/ /de la ji ltar na byang chub sems dpa' rnam par mi g.yeng bar chos nyan ce na/rnam pa lnga ste/ kun shes par bya ba'i sems dang ldan pa dang / sems rtse gcig pa dang / rna blags pa dang / yid btud pa dang / sems kun gyis bsams nas chos nyan pa nyan nus te/ byang chub sems dpa' ni de ltar thos pa tshol bar byed do//de la byang chub sems dpa' ci'i phyir thos pa tshol bar byed ce na/ byang chub sems dpa' ni chos kyi rjes su mthun pa'i chos kyi nan tan gyis yang dag par bsgrub par bya ba'i phyir dang / gzhan dag la yang rgya cher yang dag par bstan par bya ba'i phyir sangs rgyas kyi bka' yongs su tshol bar byed do//byang chub sems dpa' ni gtan tshigs kyi rig pa tshol bar byed de/ bstan bcos de nyid la nyes par bshad pa dang / nyes par brjod pa yang dag pa ji lta ba bzhin du yongs su shes par bya ba'i phyir dang / phas kyi rgol ba tshar gcad pa'i phyir dang /bstan pa 'di la ma dad pa rnams dad par bya ba'i phyir dang / dad pa rnams kyang phyir zhing 'phel bar bya ba'i phyir ro/ /byang chub sems dpa' ni sgra'i rig pa tshol bar byed de/ tshig dang yi ge nges pa'i tshig bzang po dpyod pas legs par sbyar te/ brjod pa la mos pa rnams bdag la yid ches pa bskyed pa'i phyir dang /don gcig la yang nges pa'i tshig rnam pa sna tshogs kyis rjes su tha snyad gdags pa la 'jug par bya ba'i phyir ro/ /byang chub sems dpa' ni gso ba'i bstan bcos tshol bar byed de/ sems can rnams kyi nad rnam pa sna tshogs rnam par zhi bar bya ba'i phyir dang /skye bo'i tshogs chen po la phan gdags par bya ba'i phyir ro/ /byang chub sems dpa' ni 'jig rten pa'i bzo dang las kyi gnas shes pa rnams tshol bar byed do/ /sems can rnams kyi don du tshogs chung ngus longs spyod bsgrub pa'i phyir dang /sems can rnams kyis gces par bya ba bskyed pa'i phyir dang / bzo dang las kyi gnas shes pa sbyin pa'i phan 'dogs pas bsdus pa'i phyir ro/ /byang chub sems dpa'i rig pa'i gnas lnga po 'di dag thams cad tshol yang bla na med pa yang dag par rdzogs pa'i byang chub kyi ye shes kyi tshogs chen po yongs su rdzogs par bya ba'i phyir te/thams cad la de ltar ma bslabs na rim gyis thams cad mkhyen pa'i ye shes sgrib pa med pa thob par mi 'gyur ro/ /byang chub sems dpa' gang tshol ba dang / ji ltar tshol ba dang / gang gi phyir tshol ba de ni bshad zin to//de la byang chub sems dpas gzhan dag la ci zhig ston ci ltar ston/ ci'i phyir ston ce na/ de la gang btsal ba de nyid ston to/ /gang gi phyir btsal ba de nyid kyi phyir gzhan dag la ston to/ /rnam pa gnyis kyis ston te/ mthun pa'i phyir gtam brjod pa dang / yongs su dag pas so//de la ji ltar na mthun pa'i gtam brjod ce na/ spyod lam gyi tshul dang mthun pa'i gnas pa la ston gyis / tshul dang mi mthun pa la ma yin te/ min par stan ches mtho ba la 'dug pa la ma yin/ mgo g.yogs pa la ma yin/ mdun du 'gro ba la ma yin te/ rgyas par mdo las ji skad byung ba bzhin du rig par bya'o//de ci'i phyir zhe na/ chos ni sangs rgyas dang byang chub sems dpa' rnams kyi bla ma yin pa'i phyir te/ chos la bkur sti byas na gzhan dag kyang shas cher chos la gus pa bskyed par 'gyur la/ nyan pa'i tshe yang gus par byed cing khyad du gsod par mi byed do//chos la ser sna mi byed pa dang / chos rnams la slob dpon gyis dpe mkhyud mi byed par thams cad la ston cing rgyun mi 'chad par thams cad la ston to/ /tshig dang yi ge go rims bzhin du ston cing / tshig dang yi ge go rims bzhin du bstan nas kyang / go rims kho na bzhin du don rnam par 'byed do//chos kyang don dang ldan pa dang / don yang chos dang ldan par ston cing 'chad kyi/ don dang mi ldan pa ni ma yin no/ /yang dag par bstan par 'os pa rnams la ni yang dag par ston/ yang dag par 'dzin du gzhug par 'os pa rnams la ni yang dag par 'dzin du 'jug /yang dag par gzengs bstod par 'os pa rnams la ni yang dag par gzengs bstod/yang dag par dga' bar bya bar 'os pa rnams la ni yang dag par dga' bar byed do/ /mngon sum dang / rjes su dpag pa dang / yid ches pa'i lung dang ldan pa'i gtam byed kyi/ tshad ma dang mi ldan pa ni ma yin no/ / bde 'gror 'gro ba dang / mthun pa dang / 'jug sla zhing glags glags pa ma yin pas rnam par ma 'khrugs pa dang / 'phags pa'i bden pa bzhi dang ldan pa la yang ngo / /'khor thams cad du yang 'khor gang la gtam gang bya bar 'os pa de nyid la gtam de byed de/ byang chub sems dpa' rnams kyi gtam ni re zhig rnam pa bco lnga po de dag gis sems can rnams la gzhan gyi don thams cad la mthun pa yin par rig par bya'o/ /yang byang chub sems dpa' ni sems can gnod pa byed pa dag la ni byams pa'i sems nye bar gzhag ste gtam byed do//sems can nyes par spyad pa spyod pa rnams la ni phan pa'i sems nye bar gzhag ste gtam byed do/ /sems can skyid pa dang sdug bsngal ba dang / bag med pa rnams dang / zhum pa rnams la phan pa dang / bde ba dang snying brtse ba'i sems nye bar gzhag ste gtam byed do/ / phrag dog gis kun nas dkris pa'i dbang du byas te/ bdag la stod par mi byed/ gzhan la smod par mi byed do/ /zang zing med pa'i sems kyis rnyed pa dang / bkur sti dang / tshigs su bcad pa la mi re bar gzhan dag la chos ston te/ byang chub sems dpa' ni rnam pa lnga po de dag gis yongs su dag pa'i gtam byed do//de dag kyang mdor bsdu na rnam pa nyi shur 'gyur te/ dus dang bkur sti dang / go rims dang / mtshams sbyor ba dang / rjes su mthun pa dang / dga' bar byed pa dang / 'dod par byed pa dang / mgu bar byed pa dang / spro bar byed pa dang / sma mi 'bebs pa dang / rig pa dang 'tsham pa dang / ma 'dres pa dang / chos dang ldan pa dang / 'khor ji lta ba dang byams pa'i sems dang / phan pa'i sems dang / snying brtse ba'i sems dang / rnyed pa dang bkur sti dang tshigs su bcad pa la mi gnas pa dang / bdag la mi bstod cing gzhan la mi smod pa ste/byang chub sems dpa' ni de ltar gzhan dag la chos ston par byed do/ /de la byang chub sems dpa'i chos kyi rjes su mthun pa'i chos sgrub pa gang zhe na/ mdor bsdu na rnam pa lngar rig par bya ste/ ji ltar yongs su btsal ba dang / ji ltar bzung ba'i chos de dag nyid lus dang ngag dang yid kyis rjes su bsgrub pa dang /legs par sems pa dang / sgom par byed pa dang / bcom ldan 'das kyis chos gang dag lus dang / ngag dang yid kyis byed du ma gnang ba dag dang / gang dag lus dang ngag dang yid kyis byed du ma gnang ba lus dang ngag dang yid kyi las de de kho na bzhin du yongs su spong ba dang /so sor bsten cing yang dag par sdud la/ lus dang ngag dang yid kyis rjes su sgrub pa ni chos kyi rjes su mthun pa'i chos sgrub pa zhes bya'o/ /de la byang chub sems dpa'i legs par sems pa gang zhe na/ 'di la byang chub sems dpa' ji skad thos pa'i chos rnams bsam par 'dod pa dang /gzhal bar 'dod pa dang / nye bar brtag par 'dod pa ni gcig pu dben par song ste/ thog ma kho nar bsam par bya ba ma yin pa'i gnas rnams spangs nas/ chos rnams bsam pa brtson par byed do/ /rtag tu gus par byed pa'i sbyor bas rgyun du sems par byed do //lhod par mi byed do/ /byang chub sems dpa' sems pa la zhugs pa ni la la la ni rigs pas dpyad cing rjes su 'jug par byed do/ /la la la ni mos pa kho nar byed do/ /sems pa na yang don la rton par byed kyi/ tshig 'bru la rton par mi byed do //nag po bstan pa dang / chen po bstan pa rnams kyang yang dag pa ji lta ba bzhin du rab tu shes par byed do / /thog ma 'jug pa nas kyang sems pa la 'jug go/ /zhugs nas kyang yang dag yang du yid la byed pas snying po nyid thob par byed do/ /byang chub sems dpa' bsam par bya ba ma yin pa spong ba na rmongs pa dang sems g.yengs par mi 'gyur ro//rtag tu gus par byed pa'i sbyor bas rgyun du sems par byed na sngon ma rtogs pa'i don khong du chud cing thob par 'gyur la/ rtogs shing thob par 'gyur ba'i don yang chud za bar mi 'gyur te brjed par mi 'gyur ro//la la ni rigs pas rnam par dbye zhing brtags na rigs pas brtags pa'i chos de dag la gzhan gyi dring mi 'jog par 'gyur ro/ /la la zhig mos pa'i tshe chos zab mo gang dag la de'i blo 'jug par ma gyur na yang chos de dag ni de bzhin gshegs pa'i spyod yul yin gyi/bdag gi blo'i spyod yul ma yin no zhes de ltar chos de dag mi spong na bdag nyid ma smras ma nyams par bsrung zhing kha na ma tho ba med par 'gyur ro/ /byang chub sems dpa' don la rton gyi tshig 'bru la mi rton na ni sangs rgyas bcom ldan 'das rnams kyis dgongs te gsungs pa thams cad kyi rjes su 'jug par 'gyur ro//byang chub sems dpa' nag po bstan pa dang / chen po bstan pa la mkhas pa ni de kho na'i don la sus kyang rnam par bskyod pa'am/ rnam par bskul bar ji ltar yang mi nus so/ /byang chub sems dpa' thog ma nas sems dpa' la 'jug pa ni bzod pa sngon ma thob pa thob par 'gyur te/byang chub sems dpa'i bzod pa thob pa de nyid snying por byed pa ni bsgom pa la rjes su 'jug pa ste/ bsam par bsdus pa rnam pa brgyad po 'di dag gis byang chub sems dpa'i chos kyi rjes su mthun pa'i chos bsgrub pa la zhugs pa yin no//bsgom pa gang zhe na/ mdor bsdu na rnam pa bzhir rig par bya ste/ zhi gnas dang / lhag mthong dang / zhi gnas dang lhag mthong la goms pa dang / zhi gnas dang lhag mthong la mngon par dga' ba'o/ /de la zhi gnas gang zhe na/ 'di lta ste/ byang chub sems dpa' bsam pa rnam pa brgyad po dag shin tu rdzogs pa'i phyir brjod du med pa'i dngos po tsam dang /don tsam gyi dmigs pa la sems nges par btags nas/ spros pa thams cad dang bral ba dang / sems yongs su g.yeng ba thams cad dang bral ba'i 'du shes yid la byed pas dmigs pa thams cad la mos pas na/nang gi ting nge 'dzin gyi mtshan ma rnams la sems 'jog par byed pa dang / yang dag par 'jog par byed pa na / rgyas par rgyud gcig tu byed pa dang / ting nge 'dzin du byed rtse gcig tu byed cing mnyam par 'jog pa 'di ni zhi gnas zhes bya'o/ /lhag mthong gang zhe na/zhi gnas yongs su bsgom pa'i yid la byed pa de nyid kyis ji ltar bsam pa'i chos de dag nyid kyi mtshan ma yid la byed cing 'byed pa dang / rab tu rnam par 'byed pa dang / chos rab tu rnam par 'byed pa nas/ rgyas par mkhas pa dang / shes rab kyi 'jug pa'i bar gang yin pa 'di ni lhag mthong zhes bya'o//zhi gnas dang / lhag mthong la goms pa gang zhe na/ zhi gnas dang lhag mthong la rtag tu sbyor zhing gus par sbyor ba gang yin pa'o/ /zhi gnas dang lhag mthong la mngon par dga' ba gang zhe na/ zhi gnas dang lhag mthong gi mtshan ma de dag gnyis las sems mi g.yo la rang gi ngang gis mngon par 'du shes med par 'jug cing gnas pa dang /sdud cing mi 'phro ba gang yin pa 'di ni zhi gnas dang / lhag mthong la mngon par dga' ba zhes bya'o/ /de la byang chub sems dpa' ni ji lta ji ltar zhi gnas dang lhag mthong la goms par byed pa de lta de ltar zhi gnas dang lhag mthong la mngon par dga' bar gnas par 'gyur ro//ji lta ji ltar zhi gnas dang lhag mthong la mngon par dga' bar gnas pa de lta de ltar zhi gnas dang lhag mthong yongs su dag par 'gyur ro/ /ji lta ji ltar zhi gnas rnam par dag pa de lta de ltar lus shin tu sbyangs pa dang /sems shin tu sbyangs pa che ba dang / 'phel ba dang rgyas par 'gyur ro/ /ji lta ji ltar lhag mthong rnam par dag pa de lta de ltar ye shes mthong ba che ba dang 'phel ba dang rgyas par 'gyur ro/ /bsgom pa'i bya ba ni 'dir zad de/ 'di lta ste/ rten la yod pa'i gnas ngan len bsal bar bya ba dang /shes bya thams cad la yang ye shes mthong ba rnam par dag par bya ba ste/ byang chub sems dpa'i bsgom pa'i las de dag thams cad kyang bsgom pa rnam pa bzhi po 'dis 'grub par 'gyur ro/ /gdams ngag gang zhe na/ mdor bsdu na rnam pa brgyad du rig par bya ste/'di lta ste/ byang chub sems dpa' ni gang dag la 'doms par 'dod pa'am/ byang chub sems dpa' gzhan nam/ de bzhin gshegs pa de la 'doms par mdzad pa gang yang rung ste/ des thog ma nyid du ting nge 'dzin la brten tam/ 'grogs pa'i rgyus sems btsal nas mkhyen to//sems btsal nas dbang po btsal te mkhyen to/ /dbang po btsal nas bsam pa btsal te mkhyen to/ /bsam pa btsal nas bag la nyal btsal te mkhyen to/ /bag la nyal btsal nas ci rigs ci 'os par 'jug pa'i sgo sna tshogs dag tu yang na ni mi sdug pa 'am/yang na ni byams pa'am/ yang na ni rkyen 'di pa nyid kyis rten cing 'brel par 'byung ba'am/ yang na ni khams rab tu dbye ba'am/ yang na ni dbugs 'byung ba dang rngub pa dran pas 'dzud par mdzad do/ /ci rigs ci 'os par 'jug pa'i sgo dag la btsud nas legs par bzung ba ma yin pa'i rtag pa'i mtha'i gnyen por dbu ma'i lam ston pa dang /legs par bzung ba ma yin pa'i chad pa'i mtha'i gnyen por dbu ma'i lam ston pa dang / ma byas pa la byas so snyam pa'i mngon pa'i nga rgyal 'dor du gzhug pa dang / ma thob pa dang / ma reg pa dang / mngon sum du ma byas pa la mngon sum du byas so snyam pa'i mngon pa'i nga rgyal 'dor du 'jug pa'o/ /gdams ngag rnam pa brgyad po de dag kyang mdor bsdu na gnas gsum gyis bsdus par rig par bya'o/ /gnas gsum po dag gang zhe na/ sems mi gnas pa gnas par bya ba'i phyir thog ma dmigs pa la legs par gtod pa dang /sems gnas pa la rang gi don thob par bya ba'i phyir thabs kyi lam yang dag par ston pa dang / rang gi don dgos pa mthar ma phyin pa la bar ma do'i gnas 'dor du 'jug pa'o/ /de la sems dang dbang po dang / bsam pa dang / bag la nyal shes pa dang / ci rigs pa shes pa sgor 'dzud pas ni sems gnas par bya ba'i phyir dmigs pa la sems legs par gtod par rig par bya'o/ /de la legs par bzung ba ma yin pa'i rtag pa dang chad pa'i mtha'i gnyen por dbu ma'i lam gyis ni sems gnas pa'i rang gi don thob par bya ba'i phyir thabs kyi lam yang dag par ston pa yin par rig par bya'o//de la ma byas pa nas mngon sum du ma byas pa'i bar dag la mngon sum du byas so snyam pa'i mngon pa'i nga rgyal 'dor du bcug pas ni rang gi dgos pa mthar ma phyin pa'i bar ma do'i gnas yongs su spong bar rig par bya ste/de ltar na gnas gsum po 'di dag gis gdams ngag rnam pa brgyad po bsdus pa yin par rig par bya'o/ /de ltar na byang chub sems dpa' gdams ngag gzhan las thos pa'am/ gzhan dag la sbyin pas stobs brgyad po bsam gtan dang / rnam par thar pa dang /ting nge 'dzin dang / snyoms par 'jug pa mkhyen pa'i stobs dang / dbang po mchog dang mchog ma yin pa mkhyen pa'i stobs dang / mos pa sna tshogs mkhyen pa'i stobs dang / khams sna tshogs mkhyen pa'i stobs dang / thams cad du 'gro ba'i lam mkhyen pa'i stobs dang / sngon gyi gnas rjes su dran pa'i mkhyen pa'i stobs dang / 'chi 'pho dang skye ba mkhyen pa'i stobs dang / zag pa zad pa mkhyen pa'i stobs kyi rigs rim gyis rnam par sbyong zhing rnam par 'phel bar byed do/ /de la rjes su bstan pa gang zhe na/ de ni rnam pa lngar rig par bya ste/ kha na ma tho ba dang bcas pa kun tu spyod pa dgag pa dang / kha na ma tho ba med pa kun tu spyod pa gnang ba dang / dgag pa dang / gnang ba'i chos rnams la 'khrul par kun tu spyod pa bskul ba dang / yang dang yang du ma gus par 'gyur te/ 'khrul pa la rnyog pa med pa dang / mi mthun pa med pa dang /snum pa'i bsam pas sma dbab pas dran par byed du gzhug pa dang / yang dag par zhugs pa la dgag pa dang / gnang ba'i chos rnams las yon tan yang dag pa dang dga' ba bsnyad pas yang dag par dga' bar bya'o/ /byang chub sems dpa'i rjes su bstan pa 'di ni mdor bsdu na rnam pa lngar rig par bya ste/'di lta ste/ dgag pa dang / gnang ba dang / bskul ba dang / sma dbab pa dang / yang dag par dga' bar bya ba'o / /de la byang chub sems dpa' rnams kyi lus dang ngag dang yid kyi las thabs kyis zin pa gang zhe na/ mdor bsdu na byang chub sems dpa' rnams kyi bsdu ba'i dngos po bzhi ni thabs zhes bya ste/bcom ldan 'das kyis kyang byang chub sems dpa' bsdu ba'i dngos po bzhis bsdus pa'i thabs dang ldan pa ni byang chub sems dpa' zhes bya'o zhes ji skad gsungs pa lta bu'o/ /ci'i phyir bsdu ba'i dngos po bzhi la thabs zhes bya zhe na/mdor bsdu na sems can rnams gdul ba dang / bsdu ba'i thabs ni rnam pa bzhi ste/ 'di las gong na yang med do/ /'di las lhag pa yang med do/ /'di lta ste/ phan 'dogs pa dang / 'dzin du 'jug pa dang / 'jug par byed pa dang / mthun par bsgrub pa'o//de la sbyin pa ni byang chub sems dpa'i phan 'dogs pa'i thabs yin te/ 'di ltar zang zing gi sbyin pa sna tshogs kyis phan btags na/ sems can rnams tshig nyan pa dang byed par sems so/ /de'i 'og tu byang chub sems dpas snyan par smra bas de dang der kun tu rmongs pa rnams kyi kun tu rmongs pa ma lus pa bsal ba'i phyir rigs pa 'dzin du 'jug cing yang dag par ston par byed de/de ltar na de'i snyan par smra ba ni 'dzin du 'jug pa'i thabs yin no/ /de ltar rigs pas 'dzin du 'jug cing yang dag par bstan pa'i sems can rnams mi dge ba'i gnas nas bslangs nas dag pa'i gnas yang dag par 'dzin du 'jug cing 'dul ba dang /'jog pa dang / 'god pa de ni de'i don spyod pa ste 'jug par byed pa'i thabs yin no/ /de ltar byang chub sems dpa' sems can de dag btsud nas de dag dang mthun pa'i tshul kun tu spyod pas mthun par bsgrub ste/gang gis na de la da dung khyed bdag nyid dad pa dang ldan pa ma yin/ tshul khrims dang ldan pa ma yin/ gtong ba dang ldan pa ma yin/ shes rab dang ldan pa ma yin na / ci'i phyir khyod kyis gzhan dag de la yang dag par 'dzin du 'jug par byed la/des skul bar byed cing dran par byas nas/ 'dul ba rnams smra bar mi 'gyur bar byed do/ /de lta bas na don mthun pa ni byang chub sems dpa' mthun par bsgrub pa'i thabs te/ bzhi pa yin par rig par bya'o/ /de ltar byang chub sems dpa'i lus kyi las dang / ngag gi las dang / yid kyi las thabs bzhi po de dag bsdus pa'am/ so so bas yongs su zin pa gang yin pa de ni sems can rnams yang dag par bsdu ba dang / gdul ba dang / yongs su smin par bya ba la thabs kyis yongs su zin pa zhes bya'o/ /byang chub sems dpa'i sa'i gzhi'i rnal 'byor gyi gnas las stobs kyi rigs kyi le'u ste brgyad pa'o// //sdom ni/ ngo bo nyid dang thams cad dang / /dka' ba dang ni sgo kun dang / /skyes bu dam pa ldan pa dang / /de bzhin rnam pa thams cad dang / /phongs shing 'dod dang ldan pa dang / /'di dang gzhan du bde 'gyur dang //de bzhin rnam dag de mdor na/ /byang chub sems dpa'i sbyin pa yin/ /'di la byang chub sems dpa' ni pha rol tu phyin pa drug rim gyis yongs su rdzogs par byas nas bla na med pa yang dag par rdzogs pa'i byang chub mngon par rdzogs par 'tshang rgya ste/ sbyin pa'i pha rol tu phyin pa dang /tshul khrims kyi pha rol tu phyin pa dang / bzod pa'i pha rol tu phyin pa dang / brtson 'grus kyi pha rol tu phyin pa dang / bsam gtan gyi pha rol tu phyin pa dang / shes rab kyi pha rol tu phyin pa'o/ /de la byang chub sems dpa'i sbyin pa'i pha rol tu phyin pa gang zhe na/sbyin pa rnam pa dgu ni byang chub sems dpa'i sbyin pa'i pha rol tu phyin pa zhes bya ba ste/ sbyin pa'i ngo bo nyid dang / thams cad sbyin pa dang / dka' ba'i sbyin pa dang / thams cad kyi sgo nas sbyin pa dang / skyes bu dam pa'i sbyin pa dang / rnam pa thams cad kyi sbyin pa dang /phongs shing 'dod pa la sbyin pa dang / 'di dang gzhan du bde bar 'gyur ba'i sbyin pa dang / rnam par dag pa'i sbyin pa'o/ /sbyin pa'i ngo bo nyid gang zhe na/ yo byad thams cad dang / rang gi lus la mi lta ba'i byang chub sems dpa' ma chags pa dang lhan cig skyes pa'i sems pa gang yin pa dang /des kun nas bslang ba'i sbyin par bya ba'i dngos po yongs su gtong ba'i lus dang / ngag gi las dang / sbyin par bya ba'i dngos po kha na ma tho ba med pa thams cad yongs su gtong ba dang / sdom pa la gnas pa dang / 'ong ba mthong zhing 'bras bu la lta ba dang /su gang 'dod pa de la dngos po de so sor sbyin par byed pa ni byang chub sems dpa'i sbyin pa'i ngo bo nyid yin par rig par bya'o/ /de la thams cad sbyin pa gang zhe na/ thams cad ces bya ba ni mdor bsdu na sbyin par bya ba'i dngos po rnam pa gnyis te/ nang gi dang phyi rol gyi'o//de la rkang yan chad rang gi lus yongs su gtong ba ni byang chub sems dpa'i nang gi dngos po yongs su gtong ba 'ba' zhig pa zhes bya'o/ /sems can skyugs pa za bas 'tsho ba rnams kyi phyir byang chub sems dpa' zas skom zos 'thungs shing skyug par byed pa gang yin pa de ni byang chub sems dpa'i nang dang phyi rol gyi dngos po 'dres pa'i sbyin pa zhes bya'o//ji skad smos pa 'di la ma gtogs pa'i lhag ma'i sbyin pa bya ba'i dngos po yongs su gtong ba ni phyi rol gyi sbyin par bya ba'i dngos po yongs su gtong ba kho na zhes bya'o//de la byang chub sems dpa' ni pha rol 'dod pa dag la mdor na rnam pa gnyis kyis rang gi lus sbyin par byed de/ ci dga' mgur byed du 'jug pas gzhan la dbang yod pa dang / gzhan la rag las par byed cing bdag nyid gzhan dag la sbyin par byed do/ /dper na la la zhig zas dang skom gyi phyir gzhan dag la bran gyi dngos por khas len pa de bzhin du/byang chub sems dpa' zang zing med pa'i sems dang ldan pa yang byang chub dam pa 'dod do/ /pha rol la phan pa dang / bde bar bya bar 'dod/ sbyin pa'i pha rol tu phyin pa yongs su rdzogs par byed par 'dod de/ci dga' mgur byed du 'jug pas gzhan dag la dbang yod pa dang / rag lus par byed cing / bdag nyid sbyin par byed pa dang / lag pa dang / rkang pa dang / mig dang / mgo bo dang / yan lag dang / nying lag rnams 'dod pa dag dang / sha dang / khrag dang / rgyus pa 'dod pa dang /rkang gi bar du 'dod pa dag la rkang gi bar du sbyin par byed do/ /byang chub sems dpa' ni rnam pa gnyis kyis phyi rol gyi dngos po sems can la yongs su gtong ste/ ci bder longs spyod du gzhug pa'i phyir brnyan por sbyin pa dang / de dbang bar bya ba'i phyir thams cad kyi thams cad du gtong pa'i sems kyis sbyin par byed do//'on kyang byang chub sems dpa' ni nang dang phyi rol gyi dngos po thams cad bye brag med par rnam pa thams cad du sems can rnams la sbyin par ni mi byed do/ /'o na byang chub sems dpa' ni nang dang phyi rol gyi dngos po rnam pa gnyis las ci zhig na sems can rnams la sbyin par byed/ci zhig ni sbyin par mi byed/ ji ltar na sbyin par byed/ ji ltar na sbyin par mi byed ce na/ nang dang phyi rol gyi dngos po de las sbyin pa gang sems can rnams la bde ba kho nar 'gyur gyi/ phan par mi 'gyur ba'am/ yang na bde bar mi 'gyur la/phan par yang mi 'gyur ba de ni byang chub sems dpas gzhan dag la sbyin par mi byed do/ /sbyin pa gang phan par mi 'gyur la/ bde bar 'gyur ba ni ma nges pa'am/ yang na bde bar yang 'gyur la phan par yang 'gyur ba de ni byang chub sems dpas gzhan dag la sbyin par byed do//de ltar 'di ni sbyin pa dang / mi sbyin pa'i mdor bstan pa yin no/ /'di man chad ni rgyas par rnam par dbye ba yin par rig par bya ste/ 'di la byang chub sems dpa' ni pha rol la gnod par bya ba dang / pha rol brid pa dang / mi rigs pas bskyed pas byed du bcug na pha rol dbang yod pa dang /pha rol la rag las par byed par bdag nyid sbyin par mi byed de/ byang chub sems dpa' ni gzhan dag la bdag nyid kyi srog lan brgya'am/ lan stong ngam/ lan 'bum du yongs su gtong bar yang khas len mod kyi/ 'on kyang pha rol gyis bsgo ba dang /pha rol dga' bar bya ba'i phyir pha rol la gnod pa'am/ pha rol gsod pa'am/ pha rol 'drid par mi byed do/ /gal te byang chub sems dpa' sbyin pa las brtsams te/ bsam pa dag pa yin du zin kyang / de yang sems can gyi don mang po bya ba nye bar gnas par gyur na rang gi lus dang /yan lag dang nying lag slong ba byung yang / rang gi lus dang yan lag dang nying lag rnams sbyin par mi byed de / de ci'i phyir zhe na/ byang chub sems dpa' sbyin pa las brtsams te bsam pa dag pa de ni rnam grangs gang gis kyang 'di ni sbyin no/ /'di ni mi sbyin no snyam du sems zhum pa med pa'i phyir te/de lta bas na byang chub sems dpa' de ni gang gi tshe bsam pa dag par bya ba'i phyir ro / /sems can gyi dgos pa 'byung ba btang snyoms su byas te sbyin par mi byed na/ de ni de'i bsam pa dag pa yin pa'i phyir sems can gyi dgos pa byung ba btang snyoms su byas te sbyin par mi byed do//bdud kyi ris kyi lha rnams la ji ltar tho 'tshams pa'i bsam pas slod du 'ong ba rnams la yang de dag nyid la gnod pa dang / phung ba chen por mi 'gyur bar bya ba'i phyir/ rang gi lus dang yan lag gse zhing sbyin par mi byed do/ / bdud kyi rigs kyi lha rnams la ji lta ba bzhin du des byin gyis rlobs pa'i sems can rnams la yang de dang 'dra bar rig par bya'o/ /byang chub sems dpa' ni smyos pa dang / sems 'khrug pa rnams la yang rang gi lus dang yan lag gse zhing sbyin par mi byed do//de dag ni rang gi sems la gnas pa yang ma yin la/ 'dod pa'i phyir slong ba yang ma yin te/ de ni de dag gi sems la rang dbang med pa'i phyir/ brla rdol tsam du zad pas de'i phyir sbyin par mi byed do/ /rnam pa de dag la ma gtogs par de las bzlog pa'i 'dod pa rnams la ni byang chub sems dpas rang gi lus pha rol dbang bar byas pa tsam gyi phyir ram/yan lag dang nying lag gse zhing yongs su gtong bar yang byed do/ /byang chub sems dpa'i nang gi dngos po sbyin pa dang / mi sbyin pa ni de lta bu yin par rig par bya'o/ /phyi rol gyi dngos po las ni byang chub sems dpas dug dang /me dang / mtshon cha dang / chang sems can rnams la gnod par 'gyur ba gang yin pa de dag la gnod par bya ba'am/ pha rol la gnod par bya ba'i phyir 'dod de slong na/ slong ba rnams la sbyin par mi byed do/ /dug dang / me dang / mtshon cha dang / chang sems can rnams la phan par 'gyur ba gang yin pa de dag ni byang chub sems dpas bdag la phan par bya ba 'am/ pha rol la phan par bya ba'i phyir 'dod de/ slong na slong ba rnams la sbyin par byed do/ /byang chub sems dpa' ni pha rol yid brtan pa ma yin pa'i rdzas kyang gzhan dag la sbyin par mi byed do//byang chub sems dpa' ni smyan byed cing pha rol gyi chung ma bkug ste/ gzhan dag la yang sbyin par mi byed do/ /bza' ba dang btung ba srog chags dang bcas pa yang sbyin par mi byed do/ /byang chub sems dpa'i sbyin par bya ba'i dngos po gang dga' ba dang /rtse ba dang ldan pa sems can rnams la gnod pa dang ldan pa de yang byang chub sems dpas slong ba rnams la sbyin par mi byed do/ /de ci'i phyir zhe na/ de byin na de dag byang chub sems dpa' la sems dga' ba tsam skye bar 'gyur mod kyi/ 'on kyang sbyin pa de ni de la gnod pa ches che bar byed pa yin te/de'i rgyus de dag rgyags pa dang / bag med pa dang / nyes pa spyod pa la zhugs pas lus zhig nas ngan song dag tu skye bar 'gyur ba'i phyir ro/ /gal te dga' ba dang / rtsed mo la sogs pa'i dngos po yin la/ ngan song dag tu 'gro bar byed pa yang ma yin mi dge ba'i rtsa ba la sogs par 'gyur ba yang ma yin na ni/de lta bu'i dga' ba dang rtsed mo la sogs pa'i dngos po de sems dga' bar bya ba'i phyir slong ba rnams la sbyin par byed de/ dngos po des kyang sdud pa dang / yongs su smin par byed pa'i phyir ro/ /byang chub sems dpa' slong ba rnams la dga' ba dang /rtsed mo'i dngos po ji lta bu ni sbyin par mi byed/ ji lta bu ni sbyin par byed ce na/ 'di lta ste/ byang chub sems dpa' ni ri dgas bsad pa'i thabs bslab pa sbyin par mi byed do/ /mchod sbyin ngan pa yo lang chen por gang du srog chags mang po bsags nas gsod par 'gyur ba de lta bu'i mchod sbyin dag bdag nyid kyang mi byed la/gzhan dag kyang mchod sbyin byed du mi 'jug go/ /lha rten rnams su phyugs gsod pa sbyin par yang mi byed do/ /srog chags mang po gnas pa'i sa phyogs srog chags chu nas skyes pa'am/skom las skyes pa rnams gnas pa lta bu srog chags de dag la gnod par bya ba'i phyir slong na sbyin par mi byed do/ /rgya dang rngon gyi 'khrul 'khor dang / rgya dang rngon gyi 'khrul 'khor bslab pa yang srog chags rnams la gnod par bya ba'i phyir slong na sbyin par mi byed do//spyo ba dang / gsod pa dang / bcing ba dang / chad pas bcad pa dang / gnod pa byed du gzhug pa'i phyir yang dgra rnams kyi dgra sbyin par mi byed de/ mdor bsdu na byang chub sems dpa' ni sems can rnams kyi dga' ba dang / rtsed mo'i dngos po sems can pha rol la gnod par 'gyur ba dang /sems can pha rol la sdug bsngal bar 'gyur ba gang ci yang rung ba de thams cad slong ba rnams la sbyin par mi byed do/ /glang po che dang / rta dang / shing rta dang / 'deg pa dang / bzhon pa rnams dang / gos dang rgyan rnams dang / bza' ba dang / btung ba dang /bsod pa rnams dang / gar dang / glu dang / rol mo'i sgra bslab pa rnams dang / gar dang / glu dang / rol mo'i sgra'i cha byad rnams dang / spos dang / me tog phreng ba dang / byug pa sna tshogs dang / snod spyad sna tshogs dang / skyed mos tshal dang / khang khyim dang / dga' mgur spyod pa'i bud med rnams dang / bzo dang las kyi gnas rnam pa sna tshogs bslab pa gang yin pa de dag dang / de lta bu'i dga' ba dang / rtsed mo'i dngos po gang yin pa rnams ni byang chub sems dpas sems dga' bar bya ba'i phyir slong ba rnams la sbyin par byed do//byang chub sems dpa' ni nad pa slong du zin kyang kha zas dang btung ba tshod ma zin pa'am gnod par 'gyur ba sbyin par yang mi byed do/ /sems can brkam pa'i rang bzhin can 'brangs pa rnams la bza' ba dang btung ba bsod pa sbyin par yang mi byed do/ / sems can mya ngan gyis gdung ba rnams rang 'geg par byed pa'am/ rdeg par byed pa'am dug 'thung ba'am/ g.yang du mchong ba la yang dga' mgur byed du mi 'jug go/ //bam po bdun pa/ byang chub sems dpa' ni slong ba rnams la pha ma thams cad kyi thams cad du sbyin par yang mi byed de/'di ltar byang chub sems dpa'i pha ma ni bla ma lta bu mchog yin te/ nu ma snun pa dang / gso ba dang / skyed pa yin pas de'i phyir byang chub sems dpas yun ring por spyi bo la khyer na yang skyo bar mi bya ste/ spu gta' dang / gtar gzhug pa dang /btsong ba'i tshul gyis bdag nyid de gnyis la sbyin zhing dbang ba dang / rag lus par bya ba yin na/ byang chub sems dpas gzhan dag la sbyin par ji ltar sems te/ sbyin par lta ga la byed/ byang chub sems dpa' ni rgyal po spyi bo nas dbang bskur ba'i bdag por gyur na yang bdag gis ris su gtogs pa'i sems can yongs su 'dzin pa dang bcas pa rnams kyi gzhan gyi bu dang chung ma gzhan dag las phrogs te/gzhan dag la sbyin par mi byed kyi/ nga la ji ltar gyur pa ltar de dag la'ang de bzhin du gyur cig snyam nas grong ril po 'am/ grong gi phyogs 'ga' 'am/ljongs ril po'am/ ljongs kyi phyogs 'ga' longs spyod du bya bar sbyin par zad do/ /byang chub sems dpa' ni bdag gi bu'am / chung ma dang / bran dang / bran mo dang / las byed pa dang / zho shas 'tsho ba dang / yongs su zin pa rnams legs par brda ma sprad pa'am/mi 'dod pa sbyin pa dang yid mi dga' ba bzhin du gzhan 'dod pa rnams la sbyin par yang mi byed do/ /legs par brda sprad de yid dga' zhing 'dun par gyur du zin kyang mi mdza' ba rnams dang / gnod sbyin dang / srin po rnams dang / brjed ngas pa sbyin par mi byed de /bu dang chung ma skyid de bar 'dug pa rigs kyi mi ni bran du sbyin par yang mi byed do/ /byang chub sems dpa' ni slong ba po shas cher gzhan la gnod pa byed par zhugs shing brjed ngas pa rnams la rgyal srid sbyin par yang mi byed do/ /gal te dbyung ba'i mthu yod na de 'dra ba'i gang zag ni rgyal srid las kyang 'byin par byed do//byang chub sems dpa' ni pha ma'i longs spyod phrogs te/ slong ba rnams la sbyin par yang mi byed do/ /pha ma ji lta ba bzhin du bu dang chung ma dang / bran dang / bran mo dang / las byed pa dang / zho shas 'tsho ba rnams kyi yang de dang 'dra'o//pha ma la gnod pa byas pa nas rgyas par las byed pa dang zho shas 'tsho ba'i bar dag la gnod pa byas nas pha rol slong ba rnams la sbyin par bya ba'i dngos po yongs su gtong bar yang mi byed do/ /byang chub sems dpa' ni chos kyis bab chol ma yin par longs spyod rnams bsgrubs nas sbyin pa sbyin par byed kyi/chos ma yin pas ma yin/ bab chol du ma yin/ pha rol la gnod pa byas shing nyam nga bar byas pas kyang ma yin no/ /sangs rgyas bcom ldan 'das rnams kyi bstan pa la gnas pa'i byang chub sems dpa' ni ji lta bur yang bslab pa las 'gal bar byas te/sbyin pa sbyin par mi byed do/ /byang chub sems dpa' ni sbyin pa byin na yang mdza' bshes dang / dgra dang tha mal pa rnams dang / yon tan can rnams dang / skyon can rnams dang / dma' ba rnams dang / mtshungs pa rnams dang /khyad par du 'phags pa rnams dang / skyid pa rnams dang / sdug pa rnams la yon gnas yin pa'i blo nye bar gzhag ste/ sems can thams cad la snyoms pa'i sems kyis sbyin pa sbyin par byed do/ /byang chub sems dpa' ni ji skad smras pa dang /ji ltar dam bcas pa las bsnyungs te/ slong ba la sbyin pa sbyin par yang mi byed kyi/ mtshungs pa'am lhag pa kho nar byed do/ /byang chub sems dpa' ni dngos po bzang po sbyin par dam bcas na/ ngan pa dang tha chad sbyin par mi byed de/ ngan pa dang / tha chad sbyin par des dam bcas su zin kyang /bzang po yod na bzang po 'ba' zhig sbyin par byed do/ /byang chub sems dpa' ni yid mi dga' ba dang / khros pa dang / yid 'khrugs pas sbyin pa sbyin par yang mi byed do/ /sbyin pa byin nas kyang yang dang yang du brjod cing khyod ni 'di dang 'di lta bur ngas sbyin pas phan btags so zhe'am/bskyed do zhe'am/ drangs so zhes smod par yang mi byed do/ /byang chub sems dpa' ni mi ngan pa la sbyin pa byin na yang brnyas shing ma gus par sbyin pa sbyin par yang mi byed na yon tan can la lta ci smos/ byang chub sems dpa' ni slong ba po log par bsgrub pa rnam pa sna tshogs dag la gnas pa/rgod pa bdag nyid ma bsdams pa/ gshe ba/ khro ba spyod 'dems byed pa rnams kyi log par sgrub pas skyo ba'i yid kyis sbyin par sbyin par yang mi byed kyi/ byang chub sems dpa' ni de dag nyid la shas cher nyon mongs pas brlams pa'i rang bzhin can yin par rtogs nas/snying brtse ba'i sems kho na nye bar gzhag ste/ sbyin pa sbyin par byed do/ /lta ba ngan pa mchog tu 'dzin cing sbyin pa sbyin par yang mi byed do/ /'di lta ste/ gnod pa chen po'i mchod sbyin rnams dang / 'tshe ba'i sbyin pas chos su 'gyur bar mi 'dzin pa dang /dge mtshan dang bkra shis dang sbyar te/ sbyin pa sbyin par yang mi byed do/ /rnam pa thams cad kyi sbyin pa tsam shin tu rnam par dag pas kyang 'jig rten pa dang / 'jig rten las 'das pa'i 'dod chags dang bral ba rnam par dag par 'gyur bar yang mi 'dzin te/sbyin pa ni rnam par dag par 'gyur ba'i tshogs tsam 'ba' zhig yin par 'dzin to/ /'bras bu la lta zhing sbyin par yang mi byed do/ /sbyin pa thams cad kyang bla na med pa yang dag par rdzogs pa'i byang chub tu yongs su sngo bar byed do/ /sbyin pa rnam pa thams cad kyi 'bras bu rnam pa thams cad rnam par smin pa yang dag pa ji lta ba bzhin du mthong zhing mngon par yid ches pa skyes pa'i byang chub sems dpa' ni gzhan gyi dring mi 'jog cing /gzhan gyis bkri ba med par sbyin pa sbyin par byed do/ /dper na/ zas byin pas ni stobs can 'gyur/ /gos byin pas ni kha dog ldan//bzhon pa byin pas bde 'gyur bstan/ /mar me byin pas mig dang ldan/ /zhes bya ba la sogs pa rgyas par rig par bya'o/ /byang chub sems dpa' ni dbul por 'gyur du dogs pa'i 'jigs pas sbyin pa sbyin par yang mi byed do/ /snying rje'i bsam pa 'ba' zhig gis byed do//byang chub sems dpa' ni slong ba rnams dang mi mthun pa'i sbyin pa sbyin par yang mi byed do / /'di lta ste/ sdom pa la brtson pa rnams la zas dang / skom lhag mar gyur pa'am/ phyi sa dang / gcin dang / mchil ma dang / snabs dang / skyugs pa dang / dmyang bu dang / rnag dang / khrag gis 'bags pa dang / zhag lon pa'i khengs bu ma bsnyad ma sbran pa/ 'bras chan dang / nas chan dang / zan dron dor bar 'os pa rnams/ de bzhin du sgog btsong mi za ba dag la sgog btsong gis 'bags pa'am/ de bzhin du sha mi za ba dang /chang mi 'thung ba dag la chang dang 'dres shing chang dang 'bags pa'am/ de bzhin du mi mthun pa'i las byed du mi 'jug cing / byang chub sems dpa' gzhan dag la sbyin pa sbyin par mi byed de/ 'di lta bu dang mthun pa rkyen du mi 'bab pa'i sbyin pa sbyin par mi byed do/ / byang chub sems dpa' ni slong ba po yang dang yang bslang dgos pa dang / song zhing phyir 'ong du gzhug pa dang / bsnyen pas 'tsho ba'i tshul gyis nyon mongs shing sbyin pa sbyin par yang mi byed do/ bslangs ma thag kho nar sbyin par byed do/ /byang chub sems dpa' ni grags pa dang / sgra dang /tshigs su bcad pa la brtan cing sbyin pa sbyin par yang mi byed do/ /pha rol la lan 'ong ba la brten pa dang / brgya byin nyid dang / bdud nyid dang / 'khor los sgyur ba nyid dang / dbang phyug la brten cing sbyin pa sbyin par yang mi byed de/ pha rol rgyal po dang / zhang blon chen po dang / grong rdal gyi mi'am/ ljongs kyi mi rnams dang / bram ze rnams dang / khyim bdag rnams dang / phyug po rnams dang / tshong dpon rnams dang / ded dpon rnams kyis gtong phod pa dang / sbyin bdag yin par shes nas bkur stir byed bla mar byed/ ri mor byed/ mchod par byed par 'gyur yang ci ma rung snyam ste/ gzhan dag la tshul 'chos pa'i phyir yang sbyin par mi byed pa'i phyir ro/ /bkren pa'i tshul du sbyin pa sbyin par yang mi byed de / nyung ngu las kyang phal cher sbyin par byed na/ mang po lta ci smos 'di sbyin pa des brid de/ yid ches par byas la/de'i 'og tu bslu bar bya'o snyam ste/ gzhan dag la glags btsal ba'i phyir sbyin pa sbyin par yang mi byed do/ /'di lta ste/ sbyin pas grong ngam/ grong gi phyogs gcig gam/ ljongs sam/ ljongs kyi phyogs gcig gi dbyen byas te/ bdag po dag las phrogs la bkur bar bya'o snyam du gzhan dag dang dbye ba'i phyir/gzhan dag la dbye ba sbyin pa sbyin par mi byed do/ /byang chub sems dpa' ni mkhas pa dang / le lo med pa dang / sgrub phod pa dang bdag nyid kyis sta gon du bsdogs pa yin te/ sbyin par bya ba'i dngos po yongs su gtong ba'i sngon du 'gro bas/rang gis kyang sbyin par byed la/ gzhan dag kyang sbyin du 'jug cing / bdag nyid snyom las med par bsten / gzhan dag sbyin du 'jug cing mngag par mi byed do / /slong ba'i tshogs chen po 'dus pa/ tshul khrims dang ldan pa dang tshul khrims 'chal pa rnams 'dus shing 'khod par shes nas/rgan rims nas gzhon rims kyi bar du gral rim bzhin du yang dang yang du 'gro zhing 'ong ste/ sbyin par bya ba'i dngos po thams cad sbyin par byed do/ /byang chub sems dpa' ni longs spyod mang po rgya che zhing rgyas pa yod bzhin du sbyin pa nyung du sbyin par mi byed do//gzhan pa dag la gtso ba'i phyir gzhan dag la sbyin pa sbyin par mi byed do / gshe ba'am/ khro ba'am/ brdeg pa'am/ bsdigs pa 'am/ smad pa'am/ gsad pa'am/ bcing ba'am/ chad pas gcad pa'am/ go rar gzhug pa'am/ bskrad pa'i phyir sbyin pa sbyin par mi byed do//byang chub sems dpa' ni sbyin pa'i snga rol nyid nas kyang yid dga' la sbyin pa'i tshe yang sems dga' bar byed cing byin nas kyang 'gyod pa med do/ /nor bu dang / mu tig dang / be+e DUr+ya dang / dung dang / man shel dang / byi ru la sogs pa 'dra bar bcos pa rnams kyang de 'dod pa'i sems can rnams la g.yo sgyu'i sbyin pa sbyin par mi byed do//byang chub sems dpa' ni sbyin par bya ba'i dngos po nyung du'am/ mang po ci yang rung ste/ snga nas sems kyis sems can thams cad la ma btang ba med de/ phyis slong ba pos bdag gi nor brnyan por btang ba/byang chub sems dpa' las phyir 'gugs pa bzhin no/ /byang chub sems dpa' ni dus dus su sbyin pa sbyin par byed kyi dus ma yin par ni ma yin no/ /bdag dang pha rol la rung ba sbyin par byed kyi mi rung ba ni ma yin no/ /tshul bzhin du yid la byed kyi tshul bzhin ma yin par mi byed do//sems ma g.yengs pas sbyin par byed kyi sems g.yengs pas ni ma yin no/ /byang chub sems dpa' ni slong ba la 'phya bar mi byed kyi bsting bar mi byed cing / de spa gong bar yang mi byed do/ /khro gnyer can du yang mi byed do/ / bzhin gyi mdangs gsal zhing sngar 'dzum la gsong por smra bar byed do/ /sbyin pa brgyangs te sbyin par mi byed kyi la gor du myur du sbyin par byed do/ /byang chub sems dpa' ni ma bslangs par bdag nyid kyis skabs bye zhing gzhan dag la su ci 'dod pa de la de sbyin par byed do/ /rang rang gis blangs pa de dag la yang rjes su gnang bar byed do//byang chub sems dpa' ni 'chal ba'i shes rab kyis sbyin par yang mi byed do/ /sbyin pa shes rab can gyi sbyin pa kho na sbyin par byed do/ /byang chub sems dpa' ni shes rab can gyi sbyin pa gang zhe na/ 'di la byang chub sems dpa' ni sbyin par bya ba'i chos dag yod de/bdog na slong ba ma 'ongs pa'i snga rol nyid nas sems 'di snyam du mngon par 'du byed de/ sbyin par bya ba'i chos bdog kyang rung / mi bdog kyang rung / zang zing gi sbyin pa khyim pa dbang du byas pa/ gal te skyid cing bkren pa ma yin la/phongs pa ma yin pa/ mgon dang bcas/ rten dang bcas pa dang / sdug cing bkren la phongs pa mgon med pa/ rten med pa rnam pa gnyis shig bdag la slong du 'ongs na de la bdag gis gal te gnyi ga yang yid tshim par yang bya ba dang / 'dod pa bzhin du yongs su bskang ba'i longs spyod 'byor na ni de'i tshe bdag gis gnyi ga yang tshim par bya zhing gnyi ga'i 'dod pa yongs su bskang bar bya'o//gal te bdag gis gnyi ga tshim par bya ba'am/ 'dod pa bzhin du yongs su bskang bar bya ba'i longs spyod ma 'byor na ni skyid pa shos btang ste/ sdug pa shos la sbyin pa sbyin no//bkren pa ma yin zhing phongs pa ma yin la mgon dang bcas/ rten dang bcas pa btang ste/ bkren zhing phongs pa mgon med pa dang / rten med pa la sbyin pa sbyin par bya'o snyam mo/ /de ltar na sems mngon par 'du byas nas/ ji ltar mngon par 'du byas pa kho na bzhin du las su grub par byed do//gal te slong ba skyid pa shos kyi 'dod pa bzhin du yongs su bskang ba ma nus na yang / des bdag gi sems kyi mngon par 'du byed pa'i rtog pa snga ma de nyid la brten te/ slong ba de la 'di skad du sdug pa nyid la sbyin par bya ba'i dngos po 'di ngas snga nas btang zin te/snga nas yi dam du bcas pa'i phyir ram/ ngas 'di la byin pa yin gyi/ khyod la sbyin mi 'dod pa ni ma yin no/ /de bas na bzhin bzangs khyod ngo bzlog go snyam du nga la ma sems shig ces shad kyis byang bar byas te gtong bar byed do/ /gzhan yang byang chub sems dpa' sbyin pa sbyin par bya ba'i chos dag yod de/bdog na ser sna can gyi khyim dang / mchog tu ser sna can gyi khyim yo byad rnams kun tu 'dzin cing 'jungs la/ lan 'ga' yang dge sbyong dang / bram ze rnams la sbyin par bya ba'i chos rnams gtong ma myong ba'i khyim de dag tu byang chub sems dpa' song nas/yang dag par mgu bar byas shing bag phebs par byas te/ 'di skad du kye tshur shog/ khyod nor 'god pa med par nga la phan gdags pa chen pos nye bar gnas par gyis shig/ nga'i khyim na longs spyod rgya chen po dang / sbyin par bya ba'i chos rgya chen po dag yod de/nga'i sbyin pa'i pha rol tu phyin pa yongs su rdzogs par bya ba'i phyir slong ba po 'dod kyis gal te khyod slong ba dang phrad na bzlog ste ma btang bar yang na ni nga'i nor sbyin par bya ba'i chos las long la de dag la ci bder byin cig /yang na ni slong ba de dag nga'i thad du khrid de shog shig /ngas sbyin pa sbyin pa la rjes su yi rang bar yang gyis shig ces bsgo'o/ /de dag gis kyang de las thos nas/ nor mi 'god cing dga' bar bya bas rigs kyi bu 'di bdag cag la sems dga' bar 'gyur snyam ste de bzhin du byed par 'gyur ro/ /de ltar byang chub sems dpa' des de dag la phyi ma la ser sna'i dri ma bsal ba'i sa bon btab pa yin te/rim gyis goms par byas pa de dag shes rab sngon du 'gro ba'i thabs la mkhas pa des na rang rang gis kyang nor nyung du sbyin pa byed cing ma chags pa nyung du la brten nas 'bring po thob par 'gyur la/ 'bring la brten nas chen po thob par 'gyur ro/ /gzhan yang byang chub sems dpa' de'i mkhan po dang / slob dpon dang / lhan cig gnas pa'i slob ma dang / tshangs pa mtshungs par spyod pa gang dag chags pa'i rang bzhin can dang / brkam pa'i rang bzhin can yin nam/ gang dag brkam pa'i rang bzhin can ma yin yang sbyin par bya ba'i chos med de/'dod pas phongs par gyur na/ de la byang chub sems dpa' sangs rgyas la brten pa'am/ chos dang dge 'dun la brten te/ sbyin pa las byung ba'i bsod nams bya ba'i dngos po byed par 'dod pas sbyin par bya ba'i chos de rnams de dag nyid la sbyin zhing de dag byed du 'jug ste bdag nyid mi byed do//de ltar byas pas byang chub sems dpa' des bdag nyid kyis kyang bsod nams shin tu mang du bskyed pa yin/ tshangs pa mtshungs par spyod pa de kha cig gi nyon mongs pa yang btul ba yin/ kha cig gi chos 'dod pa yang yongs su rdzogs par bya ba yin te/ sems can bsdus pa dang / sems can yongs su smin par byas par yang 'gyur ro/ /gzhan yang byang chub sems dpa' ni sbyin par bya ba'i chos dag yod de/ bdog na slong ba po'i bsam pa mtshan ma tsam gyis rtogs na yang ci 'dod pa sbyin par bya ba'i chos rnams sbyin par byed do//gang zhig 'di sgyu tshong gis brid par bya'o snyam ste/ de'i thad du 'ongs na yang de'i bsam pa rtogs nas de'i nyes par spyod pa gzhan dag la yang 'chab par byed na de nyid lta la ci smos/de'i 'dod pa yongs su rdzogs par byed la/ ci nas kyang de bu skyed par mi 'gyur ba dang / mgu zhing 'jigs pa med pa dang / yid dga' bar 'gyur bas phyir 'gro bar byed do/ /gang gis byang chub sems dpa' g.yo sgyus brid par gyur la/ brid pa de yang des sngar ma rtogs te/phyis rtogs par gyur na yang 'drid pa'i gang zag de la gzhi des gleng pa'am/ dran par mi byed la/ de'i sgyu thabs kyis ma byin par len pa de dag thams cad la yang bsam pas rjes su dga' bar byed de/ de lta bu dang mthun pa yang byang chub sems dpa' sbyin par bya ba'i chos yod de/bdog pa rnams shes rab can gyi sbyin pa yin par rig par bya'o/ /gzhan yang byang chub sems dpa' ni sbyin par bya ba'i chos dag med de/ mi bdog na yang byang chub sems dpa' bzo dang las kyi gnas de dang de dag la sbyangs pa de bzo dang las kyi gnas de lta bu mngon du byed cing /des tshigs chung ngus nor gyi phung po chen po bsgrubs te gnas so/ /yang na byang chub sems dpa' gtam sna tshogs dang / snyan pa'i gtam dang / spobs pa dge ba dang ldan pa ci nas sems can dbul po rnams kyang sbyin par byed 'dod par gyur na/phyug po rnams lta smos kyang ci 'chal ba dang / ser sna can rnams kyang sbyin pa byed par 'dod par gyur na/ stong pa'i rang bzhin can rnams lta smos kyang ci dgos pa de lta bur gzhan dag la chos ston par byed do/ /yang na slong ba po lhags shing lhags pa rnams dad pa dang ldan pa'i khyim gang dag na longs spyod rgya chen po dang ldan pas nyin gcig bzhin du sbyin par bya ba'i chos kho na la 'jug pa'i khyim de dag tu gtong bar byed do//bdag nyid kyang sbyin pa sbyin zhing bsod nams byed pa dag tu song nas mkhas pa dang / le lo med pa dang /sgrub phod pas sems mngon par dga' bar byas nas/ lus dang ngag gis ci nus ci lcogs kyis nyams su len par byed na/ sbyin pa de yang slong ba rnams la legs par sbyin par byed do/ /de ltar na ngo ma snyoms pa dang / tshul ma yin pa'am/ brjed ngas pas zhal ta byed pa dang /mi mthun pa'i phyir sbyin pa de nyes par byin par 'gyur pa gang yin pa de med par 'gyur ro/ /de ltar na byang chub sems dpa' ni ji srid du bsam pa rnam par dag pa ma thob kyi bar du longs spyod dag med de/ mi bdog bzhin du shes rab can gyi sbyin pa sbyin par byed pa yin no//byang chub sems dpa' lhag pa'i bsam pa dag pa ni ji lta bur ngan song las yang dag par 'das pa thob par 'gyur ba de lta bur tshe rabs thams cad du longs spyod zad mi shes pa thob par 'gyur ro/ /gzhan yang byang chub sems dpa' ni mu stegs can glags tshol ba la chos khas 'chad pa'am/glegs bam du byas pa la yang sbyin par mi byed do/ /chags pa'i rang bzhin can glegs bam 'tshong bar 'dod pa'am/ sbed par 'dod pa'am/ de shes pas don du gnyer ba ma yin pa la yang sbyin par mi byed do/ / shes par 'dod pa la ni gal te glegs bam bdag la dgos pa'i don byas zin na/ de la ci bder sbyin par byed do/ /gal te des rang gi don du glegs bam de bsgrub pa'i don ma grub na ni/ 'di ltar byang chub sems dpa' des dpe gzhan mthong na sbyin par byed do/ /yang na ni gzhan bris te sbyin par byed do//gal te dpe gzhan yang ma mthong ngam/ 'dri yang ma nus na ni des thog ma kho nar bdag gi sems la brtag par bya ste/ bdag gi sems chos la ser sna byed pa'i dri mas kun nas dkris par ma gyur grang / bdag chos bris pa snying nas sbyin par mi 'dod pa kho na ma yin grang snyam du brtag par bya'o//gal te des de ltar brtags pa na bdag la chos la ser sna byed pa'i dri ma cung zad kun tu spyod pa yang yod do snyam du shes na ni/ byang chub sems dpa' des 'di snyam du gal te bdag chos kyi sbyin pa 'dis tshe 'di la lkugs pa kho nar 'gyur na yang bdag gis nyon mongs pa dang du blang bar mi bya ste/chos kyi sbyin pa nges par sbyin dgos na/ ye shes kyi tshogs med par 'gyur ba lta ci smos snyam du sems mngon par 'du byas te/ chos kyi sbyin pa des nges pa kho nar sbyin par bya'o/ / gal te de ltar rtog pa na bdag la ni chos la ser sna byed pa'i dri ma cung zad tsam du kun tu spyod pa yang med do snyam du shes na ni byang chub sems dpa' des 'di ltar bslab par bya ste/ bdag gis ni nyon mongs pa gzhom pa'i phyir ram/ ye shes kyi tshogs yongs su rdzogs par bya ba'i phyir ram/sems can dga' bar bya ba'i phyir chos kyi sbyin pa 'di sbyin par bya ba yin na/ ngas nyon mongs pa yang ma mthong la/ ma byin na tshe 'di dang phyi ma la ye shes kyi tshogs ches mang du mthong la/ byin na ni rtogs pa chen por mi 'gyur zhing tshe phyi ma la chos kyi rnyed pa chen por 'gyur gyi chung ba ma yin la/ma byin na ni ngas sems can thams cad la phan pa dang / bde bar bya ba'i phyir ye shes bsgrubs pas sems can 'di dang sems can gzhan thams cad dga' bar byed par 'gyur gyi/ byin du zin na ni sems can 'di gcig pu dga' bar 'gyur ro snyam ste/de ltar yang dag pa ji lta ba bzhin du shes nas gal te byang chub sems dpa' ma byin na ni/ kha na ma tho bar yang mi 'gyur/ 'gyod par yang mi 'gyur/ byang chub sems dpa'i tshul las kyang 'gal bar yang mi 'gyur ro/ /ji ltar mi sbyin ce na/ byang chub sems dpa' ni slong ba la khyod la mi sbyin no zhes tshig brlang pos phyir zlog par mi byed mod kyi/'on kyang thabs mkhas pas de brda sprad de gtong bar byed do/ /de la thabs mkhas pa ni 'di yin te/ byang chub sems dpas ni yo byad thams cad dang / sbyin par bya ba'i chos thams cad thog ma nyid nas phyogs bcu'i sangs rgyas dang /byang chub sems dpa' rnams la bsam pa rnam par dag pas phul zhing bsngos zin te/ dper na dge slong gis slob dpon nam/ mkhan po la chos gos bsngos pa bzhin no/ /des de ltar bsngos pa'i phyir yo byad dang / sbyin par bya ba'i chos sna tshogs rgya chen po thams cad bsags par gyur du zin kyang 'phags pa'i rigs la gnas pa'i byang chub sems dpa' zhes bya'o//bsod nams dpag tu med pa yang 'phel bar 'gyur ro/ /de'i bsod nams de yang rtag tu de lan mang du yid la byed pas/dus thams cad du ldan par mngon par 'phel bar 'gyur ro/ /des sbyin par bya ba'i chos de dag kyang sangs rgyas dang byang chub sems dpa' rnams kyis gtams te gzhag pa dang 'dra bar 'chang bar byed do/ /gal te slong ba po mthong la de la sbyin par bya ba'i chos ci 'dod pa sbyin par 'os pa zhig mthong na ni/de sangs rgyas dang byang chub sems dpa' rnams kyis sems can rnams yongs su ma btang ba de gang yang med do snyam du shes par byas nas/ slong ba po'i 'dod pa yongs su rdzogs par byed do/ /gal te 'os ma yin par mthong na ni des rtog pa de nyid la brten nas/bzhin bzangs dag 'di ni gzhan gyi yin te/ khyed la sbyin pa gnang ba med do zhes de la tshig 'jam pos go bar byas te gtong bar byed do/ /yang na de gzhan de'i nyis 'gyur ram/ sum 'gyur sbyin zhing rim gro dang / bkur sti byas nas gtong par byed do//ci nas de byang chub sems dpa' 'di ni chags pa'i rang bzhin can du gyur te/ bdag cag la sbyin par mi 'dod pa ma yin gyi/ 'di ni glegs bam gyi chos 'di ni sbyin pa'i dbang med pa zhig yin gor ma chag ste de'i phyir sbyin par mi byed do snyam du shes par byed de/ 'di yang byang chub sems dpa'i chos kyi sbyin pa las brtsams te/ shes rab can gyi sbyin pa yin par rig par bya'o/ /gzhan yang byang chub sems dpa' ni chos dang zang zing gi rang bzhin gyi sbyin pa thams cad rnam grangs dang / mtshan nyid dang / nges pa'i tshig dang / rgyu dang 'bras bu dang /rab tu dbye ba las kyang yang dag pa ji lta ba bzhin du rab tu shes nas sbyin par byed de/ 'di yang byang chub sems dpa'i shes rab can gyi sbyin pa yin par rig par bya'o/ /gzhan yang byang chub sems dpa' ni sems can la gnod pa byed pa rnams la byams pa'i bsam pas sbyin pa sbyin par byed do//sdug bsngal ba rnams la ni snying rje'i bsam pa dang / yon tan can rnams la dga' ba'i bsam pa dang / phan 'dogs pa rnams dang / mdza' bshes rnams dang / snying du sdug pa rnams la ni btang snyoms kyi bsam pas sbyin pa sbyin par byed de/'di yang byang chub sems dpa'i shes rab can gyi sbyin pa yin par rig par bya'o/ /gzhan yang byang chub sems dpa' ni sbyin pa'i gegs byed pa dang / sbyin pa'i gegs byed pa'i gnyen po yang yang dag pa ji lta ba bzhin du rab tu shes so//de la sbyin pa'i gegs byed pa ni bzhi ste / sngon ma goms pa dang / sbyin par bya ba'i chos nyung ste mi ldan pa dang / dngos po mchog dang yid du 'ong ba la zhen pa dang / phyi ma longs spyod phun sum tshogs pa'i 'bras bu la lta zhing mngon par dga' ba'o/ /gang gi phyir byang chub sems dpa' sbyin par bya ba'i chos dag yod bzhin du slong ba po legs par 'ongs pa ni sbyin pa la sems mi 'jug na de nyes pa 'di ni bdag ma goms pas lan no snyam du myur ba myur bar shes rab kyis rtogs par 'gyur zhing 'di ltar yang bdag gis ni sngon sbyin pa ma byin pa gor ma chag ste/des na bdag da ltar longs spyod rnams kyang yod la/ slong ba po legs par 'ongs bzhin du sbyin pa la sems mi 'jug go/ /gal te de ltar so sor brtags nas sbyin pa ma byas na phyi ma la yang bdag sbyin pa la zhe sdang bar 'gyur ro snyam du rtogs par byed de/des de ltar rtogs pa nas kyang sbyin pa'i gegs byed pa'i gnyen po la brten nas so sor brtags te sbyin par byed kyi/ ma goms pa las gyur pa'i nyes pa'i rjes su 'brang zhing de'i dbang du 'gro ba ma yin no/ /gzhan yang gal te slong ba po legs par 'ongs pa na longs spyod chung bas sbyin pa la byang chub sems dpa' sems mi 'jug na des sbyin pa'i gegs byed pa'i rgyu phongs pa las gyur pa de myur ba myur bar shes rab kyis rtogs nas/phongs pa las gyur pa'i sdug bsngal de dang du blangs te/ so sor brtags nas snying rjes sbyin pa sbyin par byed de/de 'di snyam du 'khor ba nas pha rol la phan btags pa sngon gyi las kyi nyes pa'am/ gzhan gyi dbang du byas pas bdag gis bkres pa dang / skom pa la sogs pa'i sdug bsngal bzod blags med pa mang du myong bar 'gyur gyis/ gal te tshe 'di'i sdug bsngal gzhan la phan 'dogs pa'i rgyu las byung ba'i sbyin pa des bdag 'chi zhing dus byed par 'gyur du zin nas kyang bdag la ni sbyin pa kho na legs par 'gyur gyi/slong ba po phyir bzlog pa ni de lta ma yin gyi/ de med du zin kyang kha cig sngo rngad ci yang rung btsam gyis 'tsho'o snyam du sems te/de ltar byang chub sems dpas phongs pa las gyur pa'i sdug bsngal de dang du blangs nas sbyin pa sbyin par 'byed do/ /gzhan yang slong ba po legs par 'ongs pa na/ gal te sbyin par bya ba'i dngos po shas cher yid du 'ong zhing mchog tu gyur pa'i phyir sbyin pa la byang chub sems dpa'i sems mi 'jug na/byang chub sems dpas zhen pa las gyur pa'i nyes pa de myur ba myur bar shes rab kyis rtogs nas bdag sdug bsngal la bde'o snyam du bdag gi 'du shes phyin ci log pa 'di ni phyi ma la sdug bsngal bskyed pa yin no snyam du phyin ci log tu yongs su shes nas/de spangs te yongs su so sor brtags nas dngos po de sbyin par byed do/ /gzhan yang byang chub sems dpa' gal te sbyin pa byin nas sbyin pa'i 'bras bu longs spyod chen po'i phan yon la lta bar gyur te/ bla na med pa yang dag par rdzogs pa'i byang chub kyi phan yon la mi lta bar gyur na/byang chub sems dpa' log pa'i 'bras bu la lta ba las gyur pa'i nyes pa de myur ba myur bar shes rab kyis rtogs nas/ 'du byed thams cad snying po med pa nyid du yang dag pa ji lta ba bzhin du so sor rtogs te/ 'du byed thams cad ni skad cig la 'jig pa'i ngang can dang /'bras bu longs spyod pa rnams ni yongs su zad nas/ 'jig pa'i ngang can dang bral bas 'jig pa'i ngang can no snyam ste/ de de ltar so sor rtog pa na 'bras bu la lta ba spangs nas sbyin pa gang ci yang rung ste/ de thams cad byang chub chen por yongs su bsngos pa kho nas sbyin par byed de/'di ni byang chub sems dpa'i sbyin pa la gegs byed pa rnam pa bzhi dang / sbyin pa la gegs byed pa'i gnyen po rnam pa bzhi shes pa yin par rig par bya ste/ rtogs pa dang / sdug bsngal dang du len pa dang / phyin ci log yongs su shes pa dang /'du byed la snying po med pa nyid du lta ba'o/ /de la gnyen po shes pa snga ma rnam pa gsum gyis ni byang chub sems dpa' nges pa dang / legs par sbyin pa sbyin par byed do/ /gnyen po shes pa tha ma gcig gis ni yang dag pa'i bsod nams kyi 'bras bu yongs su 'dzin par byed de/'di yang byang chub sems dpa'i shes rab can gyi sbyin pa yin par rig par bya'o/ /gzhan yang byang chub sems dpa' dben par song ste/ nang du bsdus nas bsam pa dag cing snying thag pa nas dang bas kun tu rtog pa dag gis sbyin par bya ba'i chos rnam pa sna tshogs pa rgya chen po dpag tu med pa dag mos shing sems can rnams sbyin pa stobs par 'dod do//des byang chub sems dpa' tshegs chung dus bsod nams dpag tu med pa 'phel bar 'gyur ro/ /'di yang byang chub sems dpa' shes rab can gyi sbyin pa yin par rig par bya'o/ / 'di ni byang chub sems dpa'i shes rab chen po dang ldan pa'i shes rab can gyi sbyin pa yin no/ /de ltar mdor bsdu na zang zing gi sbyin par gtogs pa'i sbyin par bya ba'i chos bdog pa rnams dang / mi bdog pa rnams dang / de bzhin du chos kyi sbyin pa la brten nas/ so so yang dag par rig pa la brten pa dang /lhag pa'i bsam pa'i sbyin pa la brten pa dang / sbyin pa la gegs byed pa'i gnyen po'i shes pa la brten pa dang / lhag pa'i bsam pas mos pa'i sbyin pa la brten pa na/ byang chub sems dpa' kho na'i ma 'dres pa yin par rig par bya ste/byang chub sems dpa' ni nang dang phyi rol gyi dngos po thams cad sbyin pa'i rab tu dbye ba rgyas pa ni de lta bu yin par rig par bya'o/ /'di man chad dka' ba'i sbyin pa la sogs pa gzhan thams cad ni sbyin pa 'di nyid kyis rab tu dbye bar bya ba yin par rig par bya'o/ /de la byang chub sems dpa'i dka' ba'i sbyin pa gang zhe na/byang chub sems dpa' sbyin par byed pa'i dngos po chung ngu bdog na bdag nyid la gnod par byas te/ sdug bsngal dang du blang nas gzhan dag la sbyin par byed pa gang yin pa de ni byang chub sems dpa'i dka' ba'i sbyin pa dang po'o/ / byang chub sems dpa'i sdug pa'i dngos po rang bzhin gyis byams pa'am/ yun ring po nas 'dris par ram/ shas cher phan pa'am/ sbyin par bya ba'i dngos po mchog dang rab mchog tu gyur pa la zhen pa bsal nas/ gzhan dag la sbyin par byed pa gang yin pa de ni byang chub sems dpa'i dka' ba'i sbyin pa gnyis pa'o//byang chub sems dpa'i sbyin par bya ba'i chos tshegs chen pos bsgrubs pa rnams/ gzhan de dag la sbyin par byed pa gang yin pa 'di ni byang chub sems dpa'i dka' ba'i sbyin pa gsum pa'o/ /de la byang chub sems dpa'i thams cad kyi sgo nas sbyin pa gang zhe na/byang chub sems dpa' bdag nyid kyi'am/ yang na gzhan dag las bslangs nas sbyin par bya ba'i dngos po bdag gi tshal za dang / pha ma dang / bu dang / chung ma dang / bran pho dang / bran mo dang / las byed pa dang / zho shas 'tsho ba dang / mdza' bshes dang / gros grogs dang / nye du dang / rgan rabs rnams sam/ yang na gzhan 'dod pa rnams la sbyin par byed pa gang yin pa rnam pa bzhi po 'di ni mdor bsdu na/ byang chub sems dpa'i thams cad kyi sgo nas sbyin pa zhes bya'o/ /de la byang chub sems dpa'i skyes bu dam pa rnams kyi skyes bu dam pa'i sbyin pa gang zhe na/byang chub sems dpa' ni dad pa dang / bkur sti dang / rang gi lag pa dang / dus la bab pa dang / gzhan la mi gnod pa sbyin pa sbyin par byed pa gang yin pa 'di ni byang chub sems dpa'i skyes bu dam pa rnams kyi skyes bu dam pa'i sbyin pa zhes bya'o/ /de la byang chub sems dpa'i rnam pa thams cad kyi sbyin pa gang zhe na/mi brten par sbyin pa dang / mi bsri bar sbyin pa dang / dga' bas sbyin pa dang / rgyun mi 'chad par sbyin pa dang / snod la sbyin pa dang / snod ma yin pa la sbyin pa dang / thams cad sbyin pa dang /kun la sbyin pa dang / dus thams cad du sbyin pa dang / kha na ma tho ba med pa'i sbyin pa dang / sems can gyi dngos po sbyin pa dang / yul gyi dngos po sbyin pa dang / nor dang 'bru'i dngos po sbyin pa dang / sbyin pa rnam pa bcu gsum po ni byang chub sems dpa'i rnam pa thams cad kyi sbyin pa zhes bya'o//de la byang chub sems dpa'i phongs shing 'dod pa la sbyin pa gang zhe na/ 'di la byang chub sems dpa' zas dang skom gyis phongs shing 'dod pa rnams la zas dang skom sbyin par byed pa dang / bzhon pa 'dod pa rnams la bzhon pa dang / gos 'dod pa rnams la gos dang /rgyan 'dod pa rnams la rgyan dang / snod spyad rnam pa sna tshogs 'dod pa rnams la snod spyad rnam pa sna tshogs sbyin par byed pa dang / spos dang me tog phreng dang / byug pa 'dod pa rnams la spos dang me tog phreng dang / byug pa dang / gnas 'dod pa rnams la gnas dang /snang bas phongs shing 'dod pa rnams la snang ba sbyin par byed pa dang / rnam pa brgyad po 'di dag ni byang chub sems dpa'i phongs shing 'dod pa rnams la sbyin pa yin par rig par bya'o/ /de la byang chub sems dpa' 'di dang gzhan du bde bar 'gyur ba'i sbyin pa gang zhe na/zang zing gi sbyin pa dang / chos kyi sbyin pa dang / mi 'jigs pa'i sbyin pa ni mdor bsdu na sems can rnams kyi 'di dang gzhan dag tu bde bar 'gyur ba'i sbyin pa yin par rig par bya'o/ /zang zing gi sbyin pa de ni ser sna'i dri ma dang / sog 'jog gi dri ma bsal nas bzang po dang /gtsang ba dang / rung ba sbyin par byed pa'o/ /de la ser sna'i dri ma bsal ba ni/ sems kyi kun tu 'dzin pa yongs su btang ba'i phyir ro/ /sog 'jog gi dri ma bsal ba ni longs spyod kun 'dzin pa yongs su btang ba yin par rig par bya'o/ /mi 'jigs pa'i sbyin pa ni seng ge dang /stag dang / chu srin 'dzin khri dang / rgyal po dang / chom rkun dang / chu la sogs pa'i 'jigs pa las yongs su skyob pa yin par rig par bya'o/ /chos kyi sbyin pa ni phyin ci ma log par chos ston pa dang / rigs par chos ston pa dang / bslab pa'i gzhi yang dag par 'dzin du 'jug pa ste/byang chub sems dpa'i sbyin pa'i rnam pa dgu po de dag thams cad gcig tu bsdus pa ni/ sems can rnams kyi 'di dang gzhan du bde bar 'gyur ba'o/ /de la zang zing dang / mi 'jigs pa'i sbyin pa rab tu dbye ba dang bcas pa ni tshe 'di'i bde ba'o/ / chos kyi sbyin pa gang rab tu dbye ba dang bcas pa ni gzhan na bde ba'o/ /de la byang chub sems dpa'i rnam par dag pa'i sbyin pa gang zhe na/ de ni rnam pa bcur rig par bya ste/ thogs pa med pa dang / mchog tu 'dzin pa med pa dang / bsags pa med pa dang / khengs pa med pa dang / mi brten pa dang / zhum pa med pa dang / ngan pa ma yin pa dang / rgyab kyis phyogs pa med pa dang / lan la mi lta ba dang / rnam par smin pa la mi lta ba'o/ /de la thogs pa med pa'i sbyin pa gang zhe na/ 'di la byang chub sems dpa' ni slong ba po legs par 'ongs nas mi skyo bar la gor du skyen par sbyin par byed de/byang chub sems dpa' ni 'di ltar sbyin pa las brtsams te/ skyen du byed pa lta bur ni slong ba pos rnyed pa las brtsams te/ de ltar skyen par mi byed do/ /mchog tu 'dzin pa med pa'i sbyin pa gang zhe na/ byang chub sems dpa' ni 'di ltar sbyin pa 'di'i 'bras bu med do zhe'am/'tshe ba'i sbyin pas chos su 'gyur ro zhe'am/ sbyin pa shin tu rdzogs pa tsam gyis 'jig rten pa dang / 'jig rten las 'das pa'i rnam par dag par 'gyur ro zhes lta bas mchog tu 'dzin par mi byed do/ /bsags pa med pa'i sbyin pa gang zhe na/ byang chub sems dpa' ni sbyin par bya ba'i chos yun ring por bsags shing tshogs byas nas/ phyis cig car sbyin pa sbyin par mi byed do/ /de ci'i phyir zhe na/ byang chub sems dpa' ni sbyin par byed pa'i chos gang dag yod bzhin du slong ba po legs par 'ongs pa phyir bzlog par mi byed la/gang gis phyir bzlog par bya ba'i 'os kyang mi mthong na sogs par lta ga la byed/ byang chub sems dpas ni bsags pa'i sbyin pa las bsod nams 'du ba'i sgo lhag par 'gyur bar ma mthong ste/ sbyin par bya ba'i dngos po yang mtshungs la/ slong ba po snga phyi dang mgo mnyam du 'ongs pa dang mtshungs pa rnams la mthar gyis sbyin pa dang /cig car sbyin pa na/ ci'i phyir bsod nams khyad par yod par yongs su 'dzin par 'gyur snyam du mthong ba'i phyir ro/ /gzhan yang byang chub sems dpa'i bsags pa'i sbyin pa ni kha na ma tho ba dang bcas pa yin gyi longs spyod ji ltar byung ba bzhin du sbyin pa ni kha na ma tho ba med par mthong ngo //de ci'i phyir zhe na/ 'di ltar bsags pa'i sbyin pa sbyin pas ni/ slong ba po rnams kyis bslangs na sngar slong ba brgya phyir bzlog nas de dag gis kun nas mnar sems dang / mi bzod pa dang / yid mi ches pa bskyed pa'i 'og tu ma bslangs par yang kha cig la bsags pa'i sbyin pa sbyin par byed pa'i phyir te/ de lta bas na byang chub sems dpa' ni bsags te sbyin pa sbyin par mi byed do/ /khengs pa med pa'i sbyin pa gang zhe na/ byang chub sems dpa' ni slong ba po la dma' ba'i sems kyis sbyin pa sbyin par mi byed do//gzhan la 'gran pa'i phyir yang sbyin par mi byed do/ /sbyin pa byin nas kyang bdag nyid ni gtong phod cing sbyin pa'i bdag po yin gyi/ gzhan dag de ni lta ma yin no snyam du sbyin pa des rlom sems su mi byed do/ / mi brten pa'i sbyin pa gang zhe na/ byang chub sems dpa' ni grags pa dang / sgra dang / tshigs su bcad pa la brten cing sbyin pa sbyin par mi byed de / grags pa ni rnam par rtog pa'i yi ge las byung ba dang / sgra tsam dang 'brel pa dang / lo ma skam po lta bu yin par 'dzin pa'i phyir ro//zhum pa med pa'i sbyin pa gang zhe na/ 'di la byang chub sems dpa' ni sbyin pa'i snga rol nas yid dga' zhing sbyin pa'i tshe sems dang bar byed la byin nas kyang 'gyod pa med pa yin no/ /byang chub sems dpa' rnams kyi sbyin pa yangs shing mchog tu rgya che ba dag thos na yang bdag nyid la khyad du gsod cing zhum par mi byed do//ngan pa ma yin pa sbyin pa gang zhe na/ byang chub sems dpa' ni sbyin par bya ba'i chos dag las nan tan du gdams shing gdams shing zas dang / skom dang / bzhon pa dang / gos la sogs pa mchog dang / rab mchog gang yin pa de dag sbyin par byed do//rgyab kyis phyogs pa med pa'i sbyin pa gang zhe na/ byang chub sems dpa' ni snyoms pa'i sems kyis mdza' bo dang / dgra dang / tha mal pa rnams la phyogs su 'byed pa med par snyoms pa'i snying rjes sbyin pa sbyin par byed do/ /lan la mi lta ba'i sbyin pa gang zhe na/byang chub sems dpa' snying rje'i sems dang / snying brtse ba'i sems dang ldan par sbyin pa sbyin par ni pha rol las lan du phan 'dogs su re ba med do/ /skye bo bde bar 'dod pa dang / sred pa'i mes tshig pa dang / mthu med pa dang / rang bzhin gyis sdug bsngal ba dag mthong ba'i phyir ro//rnam par smin pa la mi lta ba'i sbyin pa gang zhe na/ byang chub sems dpa' ni sbyin pa byin nas/ phyi ma la longs spyod phun sum tshogs pa'am/ lus phun sum tshogs par gyur par sbyin pa'i 'bras bu rnam par smin pa la re ba med do/ /'du byed thams cad ni snying po med par lta la/byang chub mchog la ni phan yon du lta ba'i phyir ro/ /rnam pa bcu po 'di dag gis byang chub sems dpa' rnams kyi sbyin pa rnam par dag cing shin tu rnam par dag par 'gyur ro/ /de ltar byang chub sems dpa' rnams sbyin pa rnam pa dgu po 'di dag la brten te/sbyin pa'i pha rol tu phyin pa yongs su rdzogs par byas nas/ bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /byang chub sems dpa' sa'i gzhi'i rnal 'byor gyi gnas las sbyin pa'i le'u ste dgu pa'o// //bam po brgyad pa/sdom ni/ ngo bo nyid dang thams cad dang / /dka' ba dang ni sgo kun dang / /skyes bu dam pa ldan pa dang / /de bzhin rnam pa thams cad dang / / phongs shing 'dod pa ldan pa dang / /'di dang gzhan du bde 'gyur dang / /rnam par dag dang rnam dgu ste/ /mdor na tshul khrims de yin no//de la byang chub sems dpa' rnams kyi tshul khrims gang zhe na/ de ni rnam pa dgur rig par bya ste/ tshul khrims kyi ngo bo nyid dang / tshul khrims thams cad dang / dka' ba'i tshul khrims dang / thams cad kyi sgo nas tshul khrims dang / skyes bu dam pa'i tshul khrims dang /rnam pa thams cad kyi tshul khrims dang / phongs shing 'dod pa la tshul khrims dang / 'di dang gzhan du bde bar 'gyur ba'i tshul khrims dang / rnam par dag pa'i tshul khrims so/ /de la tshul khrims kyi ngo bo nyid gang zhe na/ mdor bsdu na yon tan rnam pa bzhi dang ldan pa ni byang chub sems dpa' rnams kyi tshul khrims kyi ngo bo nyid yin par rig par bya ste/bzhi gang zhe na/ pha rol las legs par yang dag par blangs pa dang / bsam pa shin tu rnam par dag pa dang / nyams par gyur na phyir gso bar byed pa dang / mi nyams par bya ba'i phyir gus pa bskyed nas dran pa nye bar gnas pa'o//de la pha rol las tshul khrims yang dag par blangs pas ni/ byang chub sems dpa' bslab pa las nyams par byed pa na pha rol la brten te khrel yod pa skye bar 'gyur ro/ /bsam pa shin tu rnam par dag pas ni byang chub sems dpa' tshul khrims rnams la bslab pa nyams par byed pa na bdag nyid la brten nas ngo tsha shes pa skye bar 'gyur ro//bslab pa'i gzhi nyams pa rnams sor chud nas thog ma nyid nas nyams par mi 'gyur bar gus pa skyes pa'i rgyu 'di gnyis kyis ni byang chub sems dpa' 'gyod pa med par 'gyur te/de ltar byang chub sems dpa' de yang dag par blangs pa dang / bsam pa rnam par dag pa la brten nas/ ngo tsha shes pa dang khrel yod pa skyed do/ /ngo tsha shes pa dang / khrel yod par gyur na/ tshul khrims yang dag par blangs pa bsrung bar 'gyur ro//bsrungs nas 'gyod pa med par 'gyur ro/ /de la pha rol las yang dag par blangs pa gang yin pa dang / lhag pa'i bsam pa rnam par dag pa'i chos gang yin pa 'di gnyis mi nyams pa las phyir gso ba gang yin pa dang / nyams par mi 'gyur bar gus par byed pa gang yin pa'i chos 'di gnyis 'dren pa yin no//de la pha rol las yang dag par blangs pa gang yin pa dang / lhag pa'i bsam pa shin tu rnam par dag pa gang yin pa dang / nyams par mi 'gyur bar gus par byed pa gang yin pa'i chos 'di gsum gyis ni byang chub sems dpa'i tshul khrims nyams par mi 'gyur bar rig par bya'o//nyams pa las phyir gso bar byed pas ni zhig pa las phyir 'chos shing slong bar rig par bya'o/ /byang chub sems dpa' rnams kyi tshul khrims kyi ngo bo nyid yon tan bzhi dang ldan pa de ni yang dag par blangs pa dang / rjes su slob pas bdag la phan pa dang / gzhan la phan pa dang / skye bo mang po la phan pa dang / skye bo mang po la bde ba dang / 'jig rten la snying brtse ba dang / lha dang mi rnams kyi don dang / phan pa dang bde bar 'gyur ba'i phyir dge ba yin par rig par bya'o/ /byang chub sems dpa'i bslab pa'i gzhi dpag tu med pa yongs su bsdus pas dpag tu med par rig par bya'o//sems can thams cad la phan pa dang / bde ba'i phyir nye bar gnas pas sems can thams cad la phan 'dogs pa yin par rig par bya'o/ /bla na med pa yang dag par rdzogs pa'i byang chub kyi 'bras bu yongs su 'dzin cing sbyin par byed pas 'bras bu dang phan yon che bar rig par bya'o//de la byang chub sems dpa'i tshul khrims thams cad gang zhe na/ mdor bsdu na byang chub sems dpa'i tshul khrims khyim pa'i phyogs su gtogs pa dang / rab tu byung ba'i phyogs su gtogs pa ni tshul khrims thams cad ces bya'o//khyim pa'i phyogs la brten pa dang / rab tu byung ba'i phyogs la brten pa'i tshul khrims de yang mdor bsdu na rnam pa gsum ste/ sdom pa'i tshul khrims dang / dge ba'i chos sdud pa'i tshul khrims dang / sems can la phan 'dogs pa'i tshul khrims so//de la byang chub sems dpa'i sdom pa'i tshul khrims ni so sor thar pa'i sdom pa yang dag par blangs pa ris bdun po dge slong dang / dge slong ma dang / dge tshul dang / dge tshul ma dang / dge bsnyen dang / dge bsnyen ma'i tshul khrims gang yin pa ste/ de yang khyim pa dang / rab tu byung ba'i phyogs la ci rigs par rig par bya'o//de la dge ba'i chos sdud pa'i tshul khrims ni byang chub sems dpas sdom pa'i tshul khrims yang dag par blangs pa'i 'og tu byang chub chen po'i phyir lus dang ngag gis dge ba bsags pa gang ci yang rung ba de dag thams cad ni mdor bsdu na/dge ba'i chos sdud pa'i tshul khrims zhes bya'o/ /de yang gang zhe na/ 'di la byang chub sems dpa' ni tshul khrims la brten cing tshul khrims la gnas nas/ thos pa dang / bsam pa dang / zhi gnas dang / lhag mthong bsgom pa dang / gcig tu dga' ba la brtson par byed do//de bzhin du bla ma rnams la dus dus su gus par smra ba dang / phyag 'tshal ba dang / myur du ldang ba dang / thal mo sbyor bar byed pa yin no/ /de bzhin du dus dus su bla ma de dag nyid la gus par rim gro byed pa yin no/ /nad pa rnams la rim gro byas te/ snying rjes nad g.yog byed pa yin no/ /de bzhin du legs par smras pa la legs so zhes bya ba sbyin par byed pa yin no/ /gang zag yon tan dang ldan pa rnams kyi yang dag pa'i bsngags pa kun rjod par byed pa yin no/ /de bzhin du phyogs bcu'i sems can thams cad kyi bsod nams thams cad la bsam pa thag pa nas dga' ba'i sems bskyed nas tshig tu brjod cing rjes su yi rang bar byed pa yin no//de bzhin du gzhan dag gis nyes pa byas pa thams cad la so sor brtags te bzod par byed pa yin no/ /de bzhin du lus dang ngag dang yid kyis dge ba byas pa dang /ma byas pa thams cad bla na med pa yang dag par rdzogs pa'i byang chub tu yongs su sngo bar byed pa yin no/ /dus dus su yang dag par smon lam rnam pa sna tshogs 'debs pa dang / dkon mchog gsum la mchod pa rgya chen po rnam pa thams cad byed pa yin no/ /rtag tu rgyun mi 'chad par dge ba'i phyogs rnams la brtson zhing brtson 'grus rtsom par byed de/bag yod par gnas pa yin no/ /lus dang ngag gis bslab pa'i gzhi rnams la dran pa dang shes bzhin du spyod pas kun nas srung bar byed pa yin no/ /dbang po rnams kyi sgo bsrung shing zas kyi tshod rig pa yin no//nam gyi cha stod dang nam gyi cha smad la mi nyal bar sbyor ba la brtson pa yin no/ /skyes bu dam pa la brten pa dang / dge ba'i bshes gnyen la brten pa yin no/ /bdag gi 'khrul pa rnams kyang yongs su shes shing nyes par lta ba yin te/ shes shing nyes par mthong nas kyang gtong bar byed pa yin no//'khrul pa yang sangs rgyas dang / byang chub sems dpa' rnams dang / chos mthun pa rnams la nyes pa 'chags par byed de/ de lta bu dang mthun pa'i dge ba'i chos rnams sgrub pa dang / srung ba dang / rnam par 'phel bar byed pa'i tshul khrims gang yin pa de ni byang chub sems dpa'i dge ba'i chos sdud pa'i tshul khrims zhes bya'o//de la byang chub sems dpa'i sems can la phan 'dogs pa'i tshul khrims gang zhe na/ de ni mdor bsdu na rnam pa bcu gcig tu rig par bya ste/ rnam pa bcu gcig gang zhe na/ sems can gyi bya ba don dang ldan pa rnam pa sna tshogs la grogs byed cing /sems can rnams la nad la sogs pa'i sdug bsngal byung ngo cog la nad g.yog la sogs pas grogs byed pa dang / de bzhin du 'jig rten pa dang 'jig rten las 'das pa'i don rnams la chos bstan pa sngon du gtong ba dang / thabs bstan pa sngon du gtong ba'i rigs pa ston pa dang /phan 'dogs pa'i sems can rnams la byas pa gzo ba rjes su bsrung zhing 'tsham par lan du phan 'dogs pas nye bar gnas pa dang / seng ge dang / stag dang / rgyal po dang / chom rkun dang / chu dang me la sogs pa'i 'jigs pa'i gnas rnam pa sna tshogs las sems can rnams kun nas bsrung ba dang /longs spyod dang / gnyen gyi sdug bsngal bar gnas pa rnams la mya ngan sel ba dang / sems can yo byad kyis phongs pa rnams la rigs pas yo byad thams cad nye bar sgrub pa dang / yang dag pa'i rten sbyin pas chos kyi tshogs yongs su sdud pa dang /smra ba dang / kun tu smra ba dang / so sor yang dag par dga' bar bya bas dus dus su thad du 'gro ba dang / gzhan las zas dang / skom la sogs pa len pa dang / 'jig rten pa'i don dang mthun par spyod pa dang / bos na 'ong zhing 'gro ba dang / mdor bsdu na don dang ldan pa ma yin pa yid du mi 'ong ba kun tu spyod pa thams cad ma gtogs pa la sems dang mthun par byed pa dang /de nyid kyi yang dag pa'i yon tan rnams lkog gam/ ming sngar bsgrags pas yang dag par dga' bar bya ba dang / 'di lta ste/ mi dge ba'i gnas nas bslang ste/dge ba'i gnas la yang dag par gzung pa'i phyir nang gi sems 'jam zhing phan pa dang / lhag pa'i bsam pa dang ldan pas tshar gcad par bya ba sma dbab pa dang / chad pa'i las byed du gzhug pa'am/ bskrad pa dang / rdzu 'phrul gyi stobs kyis sems can dmyal ba la sogs pa'i 'gro ba mngon sum du bstan pas mi dge ba las skyo bar byed cing sangs rgyas kyi bstan pa la 'jug par bya ba'i phyir 'dun par byed mgu bar byed ya mtshan du 'dzin par byed pa'o//byang chub sems dpa' sdom pa'i tshul khrims la gnas pa dang / dge ba chos sdud pa'i tshul khrims la gnas pa dang /sems can gyi don byed pa'i tshul khrims la gnas pa ji ltar na legs par gdams pa'i tshul khrims can dang / dge ba legs par bsdus pa'i tshul khrims can dang / sems can gyi don gyi rnam pa thams cad bya ba'i tshul khrims can du 'gyur zhe na/'di la byang chub sems dpa' so sor thar pa'i sdom pa la gnas pa/ gal te 'khor los sgyur ba'i rgyal srid kyang bor te rab tu byung bar gyur na/ de 'khor los sgyur ba'i rgyal srid de la 'di ltar mi lta ba yin te/ dper na rtswa'am/ mi gtsang ba la ci lta ba bzhin no//ji ltar byang chub sems dpa' bsam pa rnam par dag pa la brten te/ rab tu byung ba mi 'dod pa thams cad kyi mchog 'khor los sgyur ba'i 'dod pa rnams la mi lta ba de ltar ni mi ngan pa 'tsho ba'i bsam pa can 'dod pa thams cad rnam par spangs te/ rab tu byung ba 'dod pa tha chad de dag la mi lta bar mi 'gyur ro//byang chub sems dpa' ni 'dod pa de dag 'jigs pa chen po sna tshogs gzing gzing bar 'jug pa lta bur yang dag pa ji lta ba bzhin du mthong ba'i phyir/ ma 'ongs pa dag na yang bdud kyi gnas su gtogs pa'i 'dod pa rnams la yang mngon par dga' ba ma yin te/de dag gi don du smon lam btab nas tshangs par spyad par spyod par mi byed na/ de las gzhan pa'i lha rdzas rnams lta la ci smos/ byang chub sems dpa' rab tu byung ba ni da ltar gyi dus na yang sems can rgya chen po dag gi rnyed pa dang bkur sti rgya chen po yang kha zas kyi skyugs pa dang 'dra bar yang dag pa'i shes rab kyis mthong ste/ro myong bar mi byed na/ sems can thams cad bdag gi rnyed pa dang bkur sti tha chad lta la ci smos/ gcig pu rab tu dben par mngon par dga' ba yin la/ dge 'dun tshogs kyi nang na 'dug kyang dus thams cad du sems dben par gnas te/de tshul khrims kyi sdom pa tsam gyis chog par mi 'dzin gyi/ tshul khrims la brten cing gnas nas byang chub sems dpa'i ting nge 'dzin dpag tu med pa gang yin pa de dag mngon par sgrub pa dang / dbang thob par bya ba'i phyir 'bad par byed do/ /'du 'dzi'i nang na 'dug kyang ngan pa'i gtam dang /ngan pa'i tshig cung zad kyang dang du len par mi byed la/ rab tu dben pa na 'dug kyang rtog pa ngan pa cung zad kyang mi sems so/ /brjed ngas pas de kun tu spyod pa'i phyir dus dus su 'gyod pa drag po dang nyes dmigs su lta ba skyed par byed de/ rgyun mi 'chad par 'gyod pa dang nyes dmigs su lta ba de la brten nas ngan pa'i gtam dang /rtogs pa ngan pa byung ma thag tu myur ba myur bar dran pa nye bar gnas shing mi bya ba'i sems kyang thob par 'gyur te/ des na 'dor bar 'gyur ro/ /'dor ba la goms na rim gyis sngon ji ltar de kun tu spyod pa la dga' bar gyur pa de ltar de kun tu mi spyod pa la dga' ba dang /kun tu spyod pa dang mi mthun par yang gnas so/ /de la byang chub sems dpa' sa chen por chud pa rnams kyi byang chub sems dpa' bslab pa'i gzhi rgya che zhing dpag tu med la bsam gyis mi khyab cing / da lta ring du lon pa dang /mchog tu dga' ba thams cad thos na yang sems skrag pa'am/ zhum zhing 'gong bar mi 'gyur te/ de 'di snyam du de dag kyang mir gyur pa yin la/ byang chub sems dpa'i bslab pa dag la rim gyis bslabs pas lus dang ngag gi sdom pa dpag tu med cing bsam gyis mi khyab pa dag dang ldan par gyur par zad pas/bdag kyang mir gyur pa yin te/ rim gyis bslabs na lus dang ngag gi sdom pa phun sum tshogs pa de dag gdon mi za bar thob par 'gyur ro snyam du sems so/ /byang chub sems dpa' tshul khrims kyi sdom pa la gnas pa ni bdag gi nyes pa dang 'khrul pa la rtog par byed kyi/gzhan gyi nyes pa dang 'khrul pa la rtog par mi byed do/ /chos bzhin gyis snying rje chen po la brten nas sems can ma rungs pa dang / tshul khrims 'chal pa thams cad la yang kun nas mnar sems kyi sems dang / khong khro ba'i sems med de/ de dag la byang chub sems dpa' shas cher snying brtse ba'i sems dang / byed 'dod pa'i sems nye bar gnas pa yin no/ /byang chub sems dpa' sdom pa'i tshul khrims la gnas pa ni lag pa dang / bong ba dang / dbyug pa dang / mtshon chas bsnun kyang gzhan dag la sems kyis kyang sdang bar mi byed na/sdig pa'i tshig 'byin pa'am/ phyir rdeg par lta ga la byed de/ spyo ba'am/ khro ba'am/ brgyad bkag pa dag gis sdug bsngal bar 'gyur ba'i gnod pa chung ngu dag gis lta ci smos/ byang chub sems dpa'i sdom pa'i tshul khrims la gnas pa ni yan lag lngas pa sdus pa'i bag yod pa dang ldan pa yin te/sngon gyi mtha' dang ldan pa dang / phyi ma'i mtha' dang ldan pa dang / dbus kyi mtha' dang ldan pa dang / snga nas bya ba dang / lhan cig rjes su spyod pa'o/ /byang chub sems dpa' byang chub sems dpa'i bslab pa dag la slob pa ni 'das pa'i dus la brten nas nyes pa byung ba gang yin pa de des chos bzhin du phyir bcos pa de ni de'i sngon gyi mtha' dang ldan pa'i bag yod pa'o//ma 'ongs pa'i dus la brten nas nyes pa 'byung bar 'gyur ba gang yin pa de yang chos bzhin du phyir 'chos par 'gyur ba de ni de'i phyi ma'i mtha' dang ldan pa'i bag yod pa'o//da ltar byung ba'i dus la brten nas/ nyes pa byung ba gang yin pa de yang chos bzhin du phyir 'chos pa de ni de'i dbus kyi mtha' dang ldan pa'i bag yod pa'o/ /nyes pa ma byung ba ni snga rol nas byang chub sems dpa' bdag ji lta ji ltar spyod cing ji lta ji ltar gnas na nyes pa 'byung bar mi 'gyur ba de lta de ltar spyod cing de lta de ltar gnas kyang ci ma rung snyam du rab tu sgrim par byed pa de ni byang chub sems dpa'i snga nas bya ba'i bag yod pa'o//de snga nas bya ba'i bag yod pa de nyid la brten nas ji lta ji ltar spyod cing ji lta ji ltar gnas na nyes pa 'byung bar mi 'gyur ba de lta de ltar spyod cing de lta de ltar gnas pa de ni de'i lhan cig rjes su spyod pa'i bag yod pa'o//byang chub sems dpa' sdom pa'i tshul khrims la gnas pa ni dge ba mi spyoms shing sdig pa rnam par 'byed pa dang / 'dod pa chung ba dang / chog shes pa dang / sdug bsngal la ji mi snyam pa dang / yongs su gdung ba med pa'i rang bzhin can dang / rgod pa med pa dang / yeng yeng po ma yin pa dang / spyod lam rab tu zhi ba dang / tshul 'chos pa la sogs pa log par 'tsho bar byed pa'i chos thams cad rnam par spangs pa ste/ yan lag bcu po de dag dang ldan pa'i byang chub sems dpa' sdom pa'i tshul khrims la gnas pa 'di lta ste/ 'das pa'i 'dod pa rnams la mi lta ba dang / ma 'ongs pa rnams la mngon par dga' ba med pa dang / da ltar byung ba rnams la lhag par zhen pa med pa dang / rab tu dben pa na gnas par mngon par dga' ba dang /ngag dang rtogs pa yongs su dag par byed pa dang / bdag nyid la khyad du mi gsod pa dang / des pa dang / bzod pa dang / bag yod pa dang / cho ga dang / 'tsho ba rnam par dag pa'i phyir legs par gdams pa'i tshul khrims can yin no/ /yang byang chub sems dpa' dge ba chos sdud pa'i tshul khrims la gnas pa ni lus dang longs spyod la lta ba byung ba chung ngu yang dang du len par mi byed na mang po lta ci smos/'chal ba'i tshul khrims kyi gzhir gyur pa nyon mongs pa dang / nye ba'i nyon mongs pa khro ba dang / khon du 'dzin pa la sogs pa byung ba thams cad dang du len par mi byed do//gzhan dag la kun nas mnar sems dang / khong khro ba dang / 'khon pa'i sems byung ba dang du len par mi byed do/ /snyom las dang le lo skyes pa dang du len par mi byed do/ /snyoms par 'jug pa'i ro myong ba dang / snyoms par 'jug pa'i nyon mongs pa byung ba dang du len par mi byed do//gnas lnga yang dag pa ji lta ba bzhin du rab tu shes te/ dge ba'i 'bras bu'i phan yon yang dag pa ji lta ba bzhin du rab tu shes so/ /dge ba'i rgyu dang / dge ba'i rgyu'i 'bras bu la phyin ci log pa dang /phyin ci ma log pa dang / dge ba sdud pa la bar du gcod pa yang yang dag pa ji lta ba bzhin du rab tu shes so/ /byang chub sems dpa' ni dge ba'i 'bras bu la phan yon du mthong nas/ dge ba sdud pa'i phyir dge ba'i rgyu yongs su tshol lo/ /byang chub sems dpas phyin ci log pa dang /phyin ci ma log pa yang dag pa ji lta ba bzhin du rab tu shes te/ dge ba'i 'bras bu thob nas mi rtag pa la rtag par lta bar mi 'gyur/ sdug bsngal ba la bde bar lta bar mi 'gyur mi gtsang ba la gtsang bar lta bar mi 'gyur/ bdag med pa la bdag tu lta bar mi 'gyur ro/ / dge ba sdud pa'i bar du gcod pa yang rab tu shes nas yongs su spong bar byed do/ /rnam pa bcu gnyis po 'di dag gis dge ba sdud pa'i tshul khrims la gnas pa de myur ba kho nar dge ba sdud bar 'gyur zhing / rnam pa thams cad kyang sdud par 'gyur te/ 'di lta ste/ sbyin pa'i nyer gnas dang /tshul khrims kyi nyer gnas dang / bzod pa'i nyer gnas dang / brtson 'grus kyi nyer gnas dang / bsam gtan gyi nyer gnas dang / shes rab kyi rnam pa lngas sdud do/ /yang byang chub sems dpa' rnam pa bcu gcig gis sems can gyi don bya ba'i tshul khrims rnam pa thams cad la gnas pa ni rnam pa re re yang rnam pa thams cad kyi rnam pa dang ldan pa yin te/'di la byang chub sems dpa' ni sems can rnams kyi bya ba de dang de dag la grogs su 'gro ba na/ bya ba sems pa dang / bya ba gtan la 'bebs pa dang / lam du 'gro zhing 'ong ba dang / yang dag pa'i las kyi mtha' la sbyor ba dang /longs spyod rnams bsrung ba dang / bya ba rnams phan tshun sdum pa dang / dga' ston dang bsod nams bya ba la grogs su 'gro ba'o/ /yang byang chub sems dpa' ni sdug bsngal ba rnams kyi grogs su 'gro bar byed do / /sems can nad kyis thebs pa rnams kyi nad g.yog byed do//long ba rnams khrid cing lam ston par byed do/ /'on pa rnams la ming gi mtshan ma ston pa'i sgo nas lag brdas don go bar byed do/ /rkang lag med pa rnams la mgo bo'am/ bzhon pas bteg ste khyer bar byed do/ /sems can 'dod pa'i 'dun pas kun nas dkris pas sdug bsngal ba rnams kyi 'dod pa'i 'dun pas kun nas dkris pa'i sdug bsngal sel bar byed do//sems can gnod sems dang / rmugs pa dang / gnyid dang / rgod pa dang / 'gyod pa dang / the tshom gyi kun nas dkris pas sdug bsngal ba rnams kyi the tshom gyi kun nas dkris pa sel bar byed do//sems can 'dod pa'i rtog pas kun nas dkris pas sdug bsngal ba rnams kyi 'dod pa'i rtog pa sel bar byed do/ /'dod pa'i rtog pa ci lta ba bzhin du gnod sems dang / rnam par 'tshe ba dang / nye du dang / yul gyi mi dang / mi 'chi ba'i rtog pa dang /khyad du gsod pa dang ldan pa dang / khyim gyi 'byor pa dang ldan pa'i rtog pa yang de dang 'dra bar rig par bya'o/ /sems can gzhan gyis sma phab cing pham par byas pa'i sdug bsngal gyis sdug bsngal ba rnams kyi gzhan gyis sma phab cing pham par byas pa'i sdug bsngal sel bar byed do//lam gyis ngal bar gyur pa rnams la gnas dang stan sbyin pa dang / lus mnye bas ngal dub pa'i sdug bsngal sel bar byed do/ /yang byang chub sems dpa' ni sems can rnams la rigs pas ston par byed do/ /sems can nyes par spyad pa spyod pa rnams kyi nyes par spyad pa spang ba'i phyir tshig 'bru 'byor pa rnams dang /'brel pa rnams dang / rjes su mthun pa rnams dang / rjes su 'phrod pa rnams dang / thabs dang ldan pa rnams dang / 'tsham pa rnams dang / mthun pa rnams dang / 'grus skyong gi yan lag gi tshogs rnams kyis chos ston to//yang na thabs mkhas pas kyang ston par byed do/ /sems can nyes par spyad pa spyod pa rnams kyi nyes par spyod pa spang ba'i phyir/ ji lta ba bzhin du ser sna can rnams kyi ser sna spang ba dang / tshe 'di la yang dag pa dang / tshogs chung ngus longs spyod rnams bsgrub pa dang /bsrung ba dang / bstan pa 'di la lta ba rnams dad pa thob par bya ba dang / lta ba rnam par dag pas ngan song las yang dag par 'da' bar bya ba dang / kun tu sbyor ba thams cad mthar thug pas sdug bsngal thams cad las yang dag par 'da' bar bya ba yang de dang 'dra'o//yang byang chub sems dpa' ni phan 'dogs pa'i sems can rnams la byas pa gzo ba ston pa'i tshe mthong na gus par byas te/ tshur spyon legs par byon to zhes brjod pas smra zhing kun tu smra la/ yang dag par dga' bar byed/ stan dang gnas sbyin pas kyang bsu bar byed do//de'i rnyed pa dang / bkur sti'i lan de dang mnyam pa dang / lhag par nye bar gnas par byed kyi/ chung ngus ni ma yin no/ /de bya ba rnams la ni ma bcol bar grogs su 'gro la bcol na lta ci smos/ bya ba rnams la ji lta ba bzhin du sdug bsngal ba rnams dang / tshul bzhin du bstan pa dang / 'jigs pa'i skyabs bya ba dang / sdug bsngal bar gnas pa mya ngan bsal ba dang / yo byad nye bar sgrub pa dang / gnas sbyin pa dang / sems dang mthun par bya ba dang / yang dag pa'i yon tan gyis dga' bar bya ba dang / nang gi sems 'jam pos tshar gcad pa dang /rdzu 'phrul gyis skrag par bya ba dang / 'dun par bya ba la yang de dang 'dra bar sbyar bar bya'o/ /yang byang chub sems dpa' ni sems can 'jigs pa rnams 'jigs pa dag las srung bar byed do/ /gcan gzan gyi gnod pa'i 'jigs pa las kyang sems can rnams srung ngo //klong dang chu srin 'dzin khri'i 'jigs pa dang / rgyal po'i 'jigs pa dang / chom rkun gyi 'jigs pa dang / phyir rgol bas 'jigs pa dang / rje bo dang bdag po'i 'jigs pa dang / 'tsho ba med pa'i 'jigs pa dang / mi snyan pa'i 'jigs pa dang / 'khor du bag tsha ba'i 'jigs pa dang /mi ma yin pa'i 'jigs pa dang / ro langs kyi 'jigs pa las kyang srung bar byed do/ /yang byang chub sems dpa' ni sems can sdug bsngal zhing 'dug pa rnams kyi mya ngan sel bar byed de/ gnyen bshes kyi sdug bsngal las brtsams te pha ma shi na yang mya ngan sel bar byed do//bu dang chung ma shi ba dang / bran dang bran mo dang / las byed pa dang / zho shas 'tsho ba shi ba dang / mdza' bshes dang / gros grogs dang / nye du dang / rgan rabs shi ba dang / slob dpon dang / mkhan po dang / bla ma lta bu shi na yang mya ngan sel bar byed do//yang longs spyod kyi sdug bsngal las brtsams te/ gal te gzhan dag gi longs spyod rgyal pos phrogs na yang de la mya ngan sel bar byed do/ /chom rkun gyis phrogs par gyur pa'am/ mes tshig gam/ chus khyer ram/ gter dag tu legs par ma sbas pas chud zos pa'am/las rnams nan tan du ma byas pas ma rungs pas gyur pa'am/ bgo skal la spyod pa mi mdza' ba rnams kyis khyer bar gyur ba'am/ khyim du khyim gyi phung khrol byung bar gyur ba'am/ gang gis longs spyod de dag la tshul ma yin pas sdug bsngal byas par gyur te/gzhi de las sems can rnams kyi mya ngan chung ngu dang / 'bring dang / chen po rnams skyes pa yang byang chub sems dpas yang dag par sel bar byed do/ /yang byang chub sems dpa' ni yo byad 'dod pa rnams la yo byad sgrub par byed de / zas 'dod pa rnams la zas sbyin par byed do//skom 'dod pa rnams la skom dang / bzhon pa 'dod pa rnams la bzhon pa dang / gos 'dod pa rnams la gos dang / rgyan 'dod pa rnams la rgyan dang / snod spyad 'dod pa rnams la snod spyad dang / spos dang me tog phreng dang / byug pa 'dod pa rnams la spos dang /me tog phreng dang / byug pa dang / gnas 'dod pa rnams la gnas dang / snang ba 'dod pa rnams la snang ba sbyin par byed do/ /yang byang chub sems dpa' ni yongs su sdud pa'i tshul khrims kyis sems can rnams tshogs yongs su bsdu ba'i tshul gyis yongs su sdud par byed de/snying brtse ba'i sems kho na sngon du btang ste/ zang zing med pa'i sems kyis thog mar je gnas sbyin par byed do/ /de'i 'og tu de dag gi don gyi phyir bram ze dang / khyim bdag dad pa can rnams las chos bzhin du gos dang / zas dang / mal cha dang / stan dang / na ba'i gsos sman dang /yo byad rnams tshol bar byed do/ /rang gi gos dang / zas dang mal cha dang / stan dang / na ba'i gsos sman dang / yo byad chos dang mthun zhing chos bzhin du rnyed pa rnams kyang thun mong du longs spyod par byed de/ sbed cing spyod pa ma yin no/ /dus dus su mthun pa'i gdams ngag rnam pa brgyad kyang sbyin par byed la/rjes su bstan pa rnam pa lnga yang rjes su ston par byed do/ /gdams ngag dang rjes su bstan pa ni stobs kyi rigs kyi le'u las ji skad bstan pa yin te/ 'dir yang de bzhin du rig par bya'o/ /yang byang chub sems dpa' ni sems dang mthun par byed pa'i tshul khrims kyis sems can rnams kyi sems dang mthun par byed pa na/thog ma kho nar sems can rnams kyi bsam pa dang / rang bzhin dang / khams shes so/ /bsam pa dang / rang bzhin dang / khams shes nas sems can gang dag dang ji ltar lhan cig gnas par bya ba ltar de dag dang gnas so//sems can gang dag la ji ltar bsgrub par bya ba de ltar de dag la sgrub par byed do/ /byang chub sems dpa' sems can gang gi sems dang mthun par byed 'dod par gyur pa de la gal te lus dang ngag gi dngos po kun tu spyod pa de lta bu de 'dra bas de'i sdug bsngal dang /yid mi bde ba skye bar mthong la/ sdug bsngal ba dang yid mi bde ba des kyang de mi dge ba'i gnas nas bslangs te / dge ba'i gnas su 'jog par mi 'gyur na ni byang chub sems dpas so sor brtags nas lus dang ngag gis kun tu spyod pa de bsgrims te yongs su spong zhing kun tu spyod par mi byed do//gal te sdug bsngal ba dang / yid mi bde ba des kyang de mi dge ba'i gnas nas bslangs te dge ba'i gnas su 'jog par mthong na ni/ byang chub sems dpa' 'di lta ste/ gzhan la snying brtse ba kho na nye bar bzung nas so sor brtags te/gzhan gyi sems dang mthun par mi byed do/ /gzhan dag las lus dang / ngag gi dngos po kun tu spyod pa gang gis gzhan dag gi sdug bsngal ba dang / yid mi bde ba skye bar 'gyur la de yang gzhan dag dang / de las gzhan pa rnams mi dge ba'i gnas nas bslangs te /dge ba'i gnas su 'jog par mi 'gyur na yang / byang chub sems dpas so sor brtags te/ de las gzhan pa rnams kyi sems dang mthun par mi bya ba'i phyir/ lus dang ngag gi kun tu spyod pa de gtong bar byed do/ /gal te gzhan dag dang de las gzhan pa rnams sam/ de gnyi ga mi dge ba'i gnas nas bslangs te /dge ba'i gnas su 'jog par mthong na ni byang chub sems dpas snying brtse ba'i sems kho na nye bar bzhag ste/ so sor brtags nas lus dang ngag gi kun tu spyod par byed de/ sems can de dag gi sems dang mthun par mi byed do/ /byang chub sems dpa' ni bdag nyid kyi lus dang ngag gis dngos po kun tu spyod pa gang gis pha rol dag gi sdug bsngal ba dang /yid mi bde ba skye bar yang dag par mthong la/ lus dang ngag gi kun tu spyod pa de yang bslab pa'i gzhir gtogs pa yang ma yin/ bsod nams dang ye shes kyi tshogs dang ldan pa yang ma yin la/sdug bsngal ba dang / yid mi bde ba des kyang gzhan dag mi dge ba'i gnas nas zhes bya ba la sogs pa ni snga ma bzhin du rig par bya ste/ gzhan gyi sems bsrung ba'i phyir byang chub sems dpas lus dang ngag gi kun tu spyod pa de gtong bar byed do/ / de las bzlog pa'i kun tu spyod pa yang snga ma bzhin du rigs par bya'o/ /sdug bsngal ba dang yid mi bde ba ji lta ba bzhin du bde ba dang yid bde ba yang de dang 'dra ste/ ci rigs par rgyas par rigs par bya'o/ /byang chub sems dpa' gzhan gyi sems dang mthun par byed pa ni gzhan khro ba'i kun nas dkris pas kun nas dkris pa la khro ba'i kun nas dkris pa med par ma gyur gyi bar du mngon sum du bsngags pa yang mi brjod na bsngags pa ma yin pa lta ci smos te shad kyis sbyang bar mi byed do//yang byang chub sems dpa' gzhan gyi sems dang mthun par byed pa ni/ gzhan mi smra ba la yang smra zhing yang dag par dga' bar byed na/ smra ba dang yang dag par dga' bar byed pa lta la ci smos/ byang chub sems dpa' gzhan gyi sems dang mthun par byed pa ni gzhan dag la 'khrug par mi byed de/ de dag nyid la snying brtse ba'i phyir sma dbab par 'dod par zad de/dbang po rnams rab tu zhi bas sma 'bebs par byed do/ /byang chub sems dpa' gzhan gyi sems dang mthun par byed pa ni gzhan dag la 'phya bar yang mi byed/ bsting bar yang mi byed la/ de bag 'khums par mi byed do/ /bde ba la reg par mi gnas par bya ba'i phyir the tshom slong bar yang mi byed do//chad pas bcad cing sma bab zin pa la yang chad pa'i gnas kyis gleng bar mi byed do/ /dga' ba'i shas chung ba la yang bdag nyid mtho bar mi ston to/ /byang chub sems dpa' gzhan gyi sems dang mthun par byed pa ni gzhan dag la mi bsten par yang mi byed/ha cang bsten par yang mi byed/ dus ma yin par yang bsten par yang mi byed/ de dag gi mdun du mdza' bo la smod par yang mi byed/ mi mdza' ba'i bsngags pa yang mi brjod/ ma 'dris pa la yid rton par yang mi byed/ rgyun du slong bar yang mi byed/ blang ba la yang tshod shes pa yin/zas dang skom la sogs pa la bos na yang spong bar mi byed do/ /yang na chos dang mthun par shad kyis byang bar byed do/ /yang byang chub sems dpa' ni yang dag pa'i yon tan gyis yang dag par dga' bar bya ba'i tshul khrims kyis sems can rnams yang dag par dga' bar byed pa na/dad pa'i yon tan dang ldan pa rnams la ni dad pa'i yon tan gyi 'brel ba'i gtam gyis yang dag par dga' bar byed do/ /tshul khrims kyi yon tan dang ldan pa rnams la ni tshul khrims kyi yon tan gyi 'brel ba'i gtam gyis yang dag par dga' bar byed do/ / thos pa'i yon tan dang ldan pa rnams la ni thos pa'i yon tan gyi 'brel ba'i gtam gyis yang dag par dga' bar byed do/ /gtang ba'i yon tan dang ldan pa rnams la ni gtong ba'i yon tan gyi 'brel ba'i gtam gyis yang dag par dga' bar byed do/ /shes rab kyi yon tan dang ldan pa rnams la ni shes rab kyi yon tan gyi 'brel ba'i gtam gyis yang dag par dga' bar byed do//yang byang chub sems dpa' ni tshar gcod pa'i tshul khrims kyis sems can rnams tshar gcod par byed de/ nyes pa chung ngu dang / 'gal ba chung ngu la ni bsam pa 'jam po dang sdang ba med pas sma dbab pa chung ngus sma 'bebs par byed do//nyes pa 'bring dang / 'gal ba 'bring la ni sma dbab pa 'bring gis sma 'bebs par byed do/ /nyes pa chen po dang 'gal ba chen po la sma dbab pa chen pos sma 'bebs par byed do/ /sma dbab pa ji lta ba bzhin du chad pas bcad pa yang de dang 'dra bar rig par bya'o//nyes pa chung ngu dang / 'bring dang / 'gal ba chung ngu dang / 'bring la ni byang chub sems dpas de dag nyid dang gzhan dag la legs par rjes su bstan pa'i phyir snying brtse ba'i sems dang phan pa'i sems kyis phyir dgug pa'i phyir/ re zhig pa'i tshul gyis skyod par byed do//nyes pa chen po dang 'gal ba chen po la ni de dag nyid la snying brtse bas de dag bstan pa 'di la bsod nams ma yin pa ches mang du yongs su 'dzin par mi 'gyur bar bya ba'i phyir dang / gzhan dag la yang phan par 'dod pas legs par rjes su bstan pa'i phyir phyin chad 'grogs par mi bya ba dang /longs spyod par mi bya ba dang / ji srid 'tsho'i bar du yang phyir mi dgug pa'i tshul gyis skrod par byed do/ /yang byang chub sems dpa' rdzu 'phrul gyi stobs kyis sems can rnams skrag par byed 'dod pa dang / 'dun par byed 'dod pa ni sems can nyes par spyad par spyod pa rnams la nyes par spyad par spyod pa'i rnam par smin pa'i 'bras bu ngan song sems can dmyal ba rnams dang /sems can dmyal ba chen po rnams dang / grang ba'i sems can dmyal ba rnams dang / nyi tshe ba'i sems can dmyal ba rnams bsnyen cing ston par byed de/mir gyur pa dag gis nyes par spyod pa byas shing bsags pa'i mi sdug pa'i 'bras bu rnam par smin pa mi bzad cing / mchog tu tsha ba so sor nyams su myong ba 'di lta bu 'di dag la khyed ltos zhes bsgo nas/ de dag gis kyang de mthong ste/ skrag cing skyo bar gyur nas nyes par spyod pa spong bar byed do//sems can kha cig byang chub sems dpa' 'khor chen po'i nang na 'dug pa la dri bas sma dbab pas tshig mi btsun par bya bar 'dod pa dag la byang chub sems dpa' lag na rdo rje'am/ gnod sbyin kha dog spa zhing lus che la stobs che ba gang yang rung ba zhig tu mngon par sprul nas 'jigs par byed/skrag par byed de/ rgyu des yid ches pa skyes shing gces par 'dzin par 'gyur la gus pa byed par gyur pa la dri ba legs pa kho nar lung bstan par bya ba dang / skye bo phal po che de dag so sor dris pa lan btab pa des gdul ba'i phyir ro//yang na rdzu 'phrul mngon par 'du byed pa rnam pa sna tshogs 'di lta ste/ gcig tu gyur nas mang por 'gyur ba dang / mang por gyur nas gcig tu 'gyur ba dang / rtsig pa la yang thad kar 'gro ba dang / ri brags la yang thad kar 'gro ba dang / ra ba la yang thad kar 'gro ba la lus kyis thogs pa med par 'gro ba nas/rgyas par tshangs pa'i 'jig rten gyi bar du lus kyis dbang byed pa dang / me'i khams la yang snyoms par 'jug cing cho 'phrul phrugs su ston pa dang / yang na nyan thos dang thun mong pa'i rdzu 'phrul bstan pas 'dun par byas/ mgu bar byas/yang dag par dga' bar byas nas/ ma dad pa ni dad pa phun sum tshogs pa la 'god par byed/ tshul khrims 'chal pa ni tshul khrims phun sum tshogs pa la 'god par byed/ thos pa nyung ngu ni thos pa phun sum tshogs pa la 'god par byed/ ser sna can ni gtong ba phun sum tshogs pa la 'god par byed/shes rab 'chal pa ni shes rab phun sum tshogs pa la 'god par byed do/ /de ltar na byang chub sems dpa' rnam pa thams cad kyis sems can gyi don bya ba'i tshul khrims dang ldan pa yin te/ byang chub sems dpa'i tshul khrims kyi phung po gsum po sdom pa'i tshul khrims su gtogs pa dang /dge ba sdud pa'i tshul khrims su gtogs pa dang / sems can gyi don bya ba'i tshul khrims su gtogs pa'i tshul khrims kyi phung po de dag ni bsod nams kyi phung po dpag tu med pa yin no/ /de la byang chub sems dpa' khyim pa'am rab tu byung ba rnams byang chub sems dpa'i bslab pa tshul khrims kyi phung po rnam pa gsum po 'di dag la slob par 'dod cing /bla na med pa yang dag par rdzogs pa'i byang chub tu smon lam btab pas/ byang chub sems dpa' smon lam btab pa'i chos mthun pa bzhu / sdom pa blangs pa mkhas pa/ngag gi rnam par rig byed kyi don 'dzin pa dang / go bar nus pa de lta bu'i byang chub sems dpa'i rkang pa gnyis la thog mar phyag byas nas gsol ba gdab par bya ste/ 'di skad ces bdag rigs kyi bu khyod las byang chub sems dpa'i tshul khrims kyi sdom pa yang dag par blang ba mnod par 'tshal gyis/de las gnod pa ma mchis na bdag la thugs brtse ba'i slad du cung zad cig gsan cing stsal ba'i rigs so zhes brjod par bya'o/ /de nas byang chub sems dpa' nus pa des/ byang chub sems dpa' 'dod pa de la byang chub sems dpa'i sdom pa'i phan yon rgya cher brjod nas/sdom pa 'dod pa de la bslab pa'i gzhi lci yang dag kyang brjod cing spro ba bskyed par yang bya ste/ 'di skad ces brjod par bya'o/ /rigs kyi bu khyod nyon cig /khyod 'di ltar sems can ma rgal ba rnams bsgral ba dang / ma grol ba rnams dgrol ba dang /dbugs ma phyin pa rnams dbugs dbyung ba dang / yongs su mya ngan las ma 'das pa rnams yongs su mya ngan las 'da' ba dang / sangs rgyas kyi gdung rgyun mi 'chad par 'dod dam/ de la khyod kyis sems bskyed pa brtan pa dang / yi dam brtan par yang bya'o zhes de ltar mi shes pa'i rigs mthong nas/spro ba bskyed pa'i phyir brjod par bya'o/ /de nas 'dod pa des legs par gsol ba btab nas bla gos phrag pa gcig tu gzar te/ 'das pa dang / ma byon pa dang / da ltar byung ba'i sangs rgyas bcom ldan 'das rnams dang / byang chub sems dpa' sa chen po la bzhugs pa ye shes dang /mthu chen po thob pa phyogs bcu na bzhugs pa rnams la mchod pa byas nas/ de dag gi yon tan rnams kyang mngon sum du byas pa la bsam pa thag pa nas dang ba'i sems sam/ yang na des ci nus pa dang / rgyu'i stobs ci yod pas chung ngu yang bskyed la/de bzhin gshegs pa'i sku gzugs mdun du bzhag ste/ legs par mchod par byas nas gdung ba'i tshul gyis pus mo'i lha nga sa la btsugs pa'am/ cog tsog por 'dug kyang rung ste/ byang chub sems dpa' mkhas pa de la 'di skad ces brjod par bya ste/rigs kyi bu'am/ tshe dang ldan pa'am/ btsun pas byang chub sems dpa'i tshul khrims kyi sdom pa yang dag par blangs pa bdag la stsal du gsol zhes smras nas/ dran pa rtse gcig tu bzhag ste/ sems dang po kho na bskyed nas/ nga ni bdag gis ring por mi thogs par bsod nams kyi gter chen po bla na med pa zad mi shes shing /dpag tu med pa thob par 'gyur ro snyam du don de nyid rjes su bsam zhing cang mi smra bar bya'o/ /de ltar zhugs pa'i byang chub sems dpa' de la byang chub sems dpa' mkhas pas 'greng yang rung /stan la 'dug kyang rung ste/ des sems ma yengs par 'di skad ces brjod par bya ste/ rigs kyi bu'am chos kyi spun ming 'di zhes bya ba khyod byang chub sems dpa' yin nam/ byang chub tu smon lam btab bam zhes smros shig /des kyang lags so zhes khas long shig / de'i 'og tu de la yang 'di skad ces brjod par bya ste/ rigs kyi bu ming 'di zhes bya ba byed 'das pa'i byang chub sems dpa' thams cad kyi bslab pa'i gzhir gyur pa gang yin pa rnams dang / tshul khrims su gyur pa gang yin pa dang / ma 'ongs pa'i byang chub sems dpa' thams cad kyi bslab pa'i gzhir gyur pa gang yin pa rnams dang /tshul khrims su gyur pa gang yin pa dang / da ltar na phyogs bcu dag na da ltar byung ba'i byang chub sems dpa' thams cad kyi bslab pa'i gzhi gang yin pa rnams dang / tshul khrims gang yin pa bslab pa'i gzhi gang dag dang /tshul khrims gang dag la 'das pa'i byang chub sems dpa' thams cad kyis bslab par gyur pa dang / ma 'ongs pa'i byang chub sems dpa' thams cad slob par 'gyur ba dang / phyogs bcu dag na da ltar byung ba'i byang chub sems dpa' thams cad da ltar na slob pa byang chub sems dpa'i bslab pa'i gzhi thams cad dang /byang chub sems dpa'i tshul khrims thams cad de/ sdom pa'i tshul khrims dang / dge ba'i chos sdud pa'i tshul khrims dang / sems can gyi don bya ba'i tshul khrims nga las nod dam zhes smros shig /des kyang nod lags so zhes khas long shig /byang chub sems dpa' mkhas pa des kyang de ltar lan gnyis lan gsum du brjod par bya'o/ /dris na nod pa'i byang chub sems dpa' des kyang lan gsum gyi bar du khas blang bar bya'o/ /de ltar byang chub sems dpa' mkhas pa des nod pa'i byang chub sems dpa' de la/byang chub sems dpa'i tshul khrims kyi sdom pa yang dag par blang ba lan gsum gyi bar du phog ste/ khas len du yang bcug nas nod pa'i byang chub sems dpa' de ma langs par de bzhin gshegs pa'i sku gzugs de nyid kyi spyan sngar phyogs bcu'i sangs rgyas dang /byang chub sems dpa' bzhugs shing 'tsho ba thams cad kyi zhabs la gtugs te thal mo sbyar nas 'di ltar mkhyen par mdzad du gsol ba bya ste/ byang chub sems dpa' ming 'di zhes bgyi ba 'dis/ bdag byang chub sems dpa' ming 'di zhes bgyi ba las byang chub sems dpa'i tshul khrims kyi sdom pa yang dag par blang ba lan gsum gyi bar du mnos lags te/bdag ming 'di zhes bgyi ba byang chub sems dpa' ming 'di zhes bgyi ba 'di'i byang chub sems dpa'i tshul khrims kyi sdom pa yang dag par blangs pa la bdag dbang du gyur pa phyogs bcu'i 'jig rten gyi khams mtha' yas mu med pa na bzhugs pa'i 'phags pa'i mchog lkog tu gyur kyang thams cad du sems can thams cad la lkog tu ma gyur pa'i thugs mnga' ba rnams la mkhyen par gsol lo zhes de skad lan gnyis lan gsum gyi bar du brjod par bya'o// //bam po dgu pa/ 'di ni chos nyid yin te/ de ltar tshul khrims kyi sdom pa yang dag par blangs pa'i las yongs su rdzogs ma thag tu phyogs bcu'i 'jig rten gyi khams mtha' yas mu med pa dag na/ de bzhin gshegs pa rnams dang / sa chen po la bzhugs pa'i byang chub sems dpa' bzhugs te/'tsho ba rnams la gang gis de dag 'di snyam du byang chub sems dpa' des byang chub sems dpa'i tshul khrims kyi sdom pa yang dag par blang ba yang dag par mnos so snyam du dgongs par 'gyur ba de lta bu'i ltas 'byung bar 'gyur ro/ / de'i rjes la de dag kyang byang chub sems dpa' de la dgongs par 'gyur te/ dgongs par gyur na ye shes gzigs pa 'jug go /de dag gi ye shes gzigs pa des 'di ltar byang chub sems dpa' ming 'di zhes bya bas 'jig rten gyi khams ga ge mo zhig tu byang chub sems dpa' ming 'di zhes bya ba las byang chub sems dpa'i tshul khrims kyi sdom pa yang dag par blangs pa legs par mnos so zhes bya bar de ltar yang dag pa ji lta ba bzhin thugs su chud par 'gyur te/de dag thams cad kyang de la bu dang 'dra ba dang / spun dang 'dra bar dgongs pa bzang pos so so nas thugs brtse bar mdzad do//de ltar dgongs pa bzang pos so so nas thugs brtse bar mdzad pa'i byang chub sems dpa' de'i dge ba'i chos rnams ni rgya cher 'phel bar 'gyur te/ nyams par mi 'gyur bar shes par bya'o/ /tshul khrims kyi sdom pa yang dag par blangs pa mkhyen par gsol ba de yang de dag gis thugs su chud par rig par bya'o//byang chub sems dpa'i tshul khrims kyi sdom pa yang dag par blang ba'i las de yongs su rdzogs nas/ byang chub sems dpa' de gnyis kas phyogs bcu'i 'jig rten gyi khams mtha' yas mu med pa dag na bzhugs pa'i sangs rgyas dang /byang chub sems dpa' de dag la mchod pa byas la zhabs la gtugs te ldang bar bya'o/ /byang chub sems dpa' de'i tshul khrims kyi sdom pa yang dag par blang ba 'di ni tshul khrims kyi sdom pa yang dag par blangs pa thams cad las khyad par du 'phags pa yin te/bla na med pa dang / bsod nams kyi phung po dpag tu med pa dang ldan pa dang / sems kyi bsam pa mchog tu dge bas bskyed pa dang / sems can thams cad la nyes par spyod pa rnam pa thams cad kyi gnyen por gyur pa yin no//so sor thar pa'i sdom pa yang dag par blangs pa thams cad ni 'di lta ste/ bsod nams yongs su bzung ba la brten nas/ tshul khrims kyi sdom pa yang dag par blang ba de ni/ brgya'i char yang nye bar mi 'gro'o/ /stong gi cha dang / grangs dang / cha dang / bgrang ba dang / dpe dang /rgyur yang nye bar mi 'gro'o/ /byang chub sems dpa'i tshul khrims kyi sdom pa yang dag par blang ba la gnas pa'i byang chub sems dpa' des 'di ltar bdag nyid kyis kyang brtag cing brtag cing 'di ni byang chub sems dpas bya ba'i cha yin no/ /'di ni bya ba'i cha ma yin no snyam nas/de phyin chad de kho na bzhin du las su bsgrub par bya zhing bsrung bar bya'o/ /byang chub sems dpa'i mdo sde'i snod las kyang bsgrims te/ mnyam pa'am/ yang na byang chub sems dpa'i mdo sde'i sde snod kyi ma mo bsdus pa 'di las kyang mnyan te/ 'di ltar bcom ldan 'das kyis mdo sde de dang de dag tu byang chub sems dpa' rnams kyi bslab pa'i gzhi stong phrag du ma gsungs pa dag bsgrub pa'i phyir de kho na bzhin du bslab par bya'o//mkhas pa yin du zin kyang byang chub sems dpa' thams cad las byang chub sems dpas tshul khrims kyi sdom pa yang dag par blang ba de mnod par mi bya ste/dad pa med pa gang thog mar tshul khrims kyi sdom pa yang dag par blang ba 'di la ma mos shing mi 'jug la mi rtog pa las kyang mnod par mi bya'o/ /brkam chags can dang / chags pas zil gyis non pa dang / 'dod pa che ba dang /chog mi shes pa las kyang mnod par mi bya'o/ /tshul khrims nyams pa dang / bslab pa dag la gus par mi byed de/ lhod pa las kyang mnod par mi bya'o/ /khro ba dang / khon du 'dzin pa dang / mi bzod pa'i shas che ba dang / pha rol gyi nyes pa mi bzod pa las mnod par mi bya'o//snyom las can dang / le lo can dang / shas cher nyin mtshan du gnyid kyi bde ba dang / glos 'bebs pa'i bde ba dang / nyal ba'i bde ba nyams su len pa dang / 'du 'dzi'i gtam gyis dus yol bar byed pa las kyang mnod par mi bya'o/ /sems rnam par g.yengs te/tha na 'jos tsam gyi bar du yang dge ba las sems rtse gcig tu bsgom mi nus pa las kyang mnod par mi bya'o/ /yid rtul ba dang / rmongs pa'i rang bzhin can dang / ha cang sems zhum pa dang / byang chub sems dpa'i mdo sde'i sde snod dang / byang chub sems dpa'i sde snod kyi ma mo la skur ba 'debs pa las kyang mnod par mi bya'o//byang chub sems dpas sdom pa yang dag par blang ba'i cho ga 'di bzung zhing kun chub par byas kyang / byang chub sems dpa'i sde snod la sdang zhing ma dad pa'i sems can rnams la gya tshom du bsgrag par mi bya zhing shes par mi bya'o//de ci'i phyir zhe na/ 'di ltar de dag gis thos na ma mos shing mi shes pa'i sgrib pa chen pos bsgribs pas skur ba 'debs par 'gyur ba'i phyir te/ de la skur ba 'debs pa de ni sdom pa la gnas pa'i byang chub sems dpa' bsod nams kyi phung po dpag tu med pa ji tsam dang ldan par 'gyur ba de tsam du/de ni sdig pa'i tshig dang / sdig pa'i lta ba dang / sdig pa'i kun tu rtog pa de dag ji srid du thams cad kyi thams cad du ma spangs pa'i bar du bsod nams ma yin pa'i phung po dpag tu med pa de tsam kho na dang ldan par 'gyur ro//byang chub sems dpa' tshul khrims kyi sdom pa yang dag par blang bar 'dod pa la snga nas byang chub sems dpa'i mdo sde'i sde snod kyi ma mo 'di las byang chub sems dpa'i bslab pa'i gzhi dang / nyes pa'i gnas gang dag bstan pa de dag bsgrag par bya ste/gal te snying nas brtags shing shes rab kyis so sor brtags nas/ spros par gyur la pha rol gyis yang dag par 'dzin du bcug pa'i phyir yang ma yin/ pha rol dang 'gran pa'i phyir yang ma yin na/ byang chub sems dpa' brtan po yin par rig par bya ste/ tshul khrims kyi sdom pa yang dag par blang ba 'di cho ga 'di bzhin du des kyang mnod par bya zhing de la dbog par yang bya'o//de ltar byang chub sems dpa' tshul khrims kyi sdom pa la gnas pa'i phas pham pa'i gnas lta bu'i chos bzhi yod de/ rnyed pa dang bkur sti la lhag par zhen te/ bdag la bstod pa dang /gzhan la smod pa byang chub sems dpa'i phas spu pham pa'i gnas lta bu'i chos dang / longs spyod dag yod de/ bdog bzhin du chags pa'i rang bzhin gyi sdug bsngal ba dang / bkren pa dang / mgon med pa dang / rten med pa'i slong ba po legs par 'ongs pa rnams la snying sra bas zang zing mi gtong ba dang /chos la ser sna byed pa'i phyir don du gnyer ba legs par 'ongs pa rnams la chos kyi bgo bsha' mi byed pa ni byang chub sems dpa'i pham pa'i gnas lta bu'i chos dang / gang gis byang chub sems dpa'i tshig rtsub pos smras pa tsam gyis gtong bar mi byed de/khro ba'i kun nas dkris pa de lta bu 'phel bar byed la/ khro bas zil gyis non nas/ lag pa'am/ bong ba'am/ dbyug pas sems can rnams la rdeg par byed/ rnam par 'tshe bar byed/ rnam par tho 'tshams par byed pa la/ gzhan dag gis 'gal ba shad kyis sbyangs kyang khro ba'i bsam pas bsngo ba'i kho na zhe la bzung ste/mi nyan cing mi bzod la bsam pas mi gtong ba 'di yang byang chub sems dpa'i pham pa'i gnas lta bu'i chos dang / byang chub sems dpa'i sde snod la skur ba btab pas 'debs pa dang / bdag nyid dam/ gzhan dag gis g.yam la dam pa'i chos ltar bcos pa la mos nas dam pa'i chos ltar bcos pa rnams la dga' ba dang /ston pa dang / 'jog pa ni byang chub sems dpa'i pham pa'i gnas lta bu'i chos so/ /bzhi po de dag ni pham pa'i gnas lta bu'i chos rnams yin te/ de dag las byang chub sems dpas chos gang yang rung ba byas na yang tshe 'di la byang chub kyi tshogs rgya chen po sogs pa dang /yongs su 'dzin pa'i skal ba med par 'gyur na thams cad la byas na lta ci smos/ tshe 'di nyid la bsam pa rnam par dag par 'gyur ba'i skal ba yang med de/ de ni byang chub sems dpa' ltar bcos pa yin gyi yang dag pa'i byang chub sems dpa' ma yin no//pham pa'i gnas lta bu bzhi po 'di dag gis kun nas dkris pa chung ngu dang / 'bring gis ni tshul khrims kyi sdom pa yang dag par blangs pa de byang chub sems dpas gtang bar mi 'gyur ro//kun nas dkris pa chen pos ni gtang bar 'gyur te/ gang gi phyir byang chub sems dpas pham pa'i gnas lta bu'i chos bzhi po 'di dag rgyun mi 'chad par kun tu spyod pa dang / ngo tsha shes pa dang / khrel yod pa chung ngu tsam yang mi bskyed pa dang / des mgu bar byed cing de la dga' ba dang /de nyid la yon tan du lta ba can du gyur pa 'di ni kun nas dkris pa chen po yin par rig par bya'o/ /'di lta ste/ pham pa'i chos rnams byas pa'i dge slong gis so sor thar pa'i sdom pa btang bar 'gyur ba bzhin du/ byang chub sems dpa'i pham pa'i gnas lta bu'i chos can lan cig tsam kun tu spyad pas ni byang chub sems dpa'i tshul khrims kyi sdom pa yang dag par blangs pa btang bar mi 'gyur ro//byang chub sems dpa' ni yang dag par blangs pa yongs su btang du zin kyang tshe 'di la byang chub sems dpa'i tshul khrims kyi sdom pa yang dag par blangs pa phyir mnod pa'i skal ba yod de/'di lta ste/ dge slong so sor thar pa'i sdom pa la gnas pa pham pa byung bzhin du skal ba med pa kho nar 'gyur ba ma yin no/ /mdor bsdu na rgyu gnyis kho nas byang chub sems dpa'i tshul khrims kyi sdom pa yang dag par blangs pa gtang bar 'gyur te/bla na med pa yang dag par rdzogs pa'i byang chub tu smon pa yongs su btang ba dang / pham pa'i gnas lta bu'i chos kyi kun nas dkris pa chen pos kun tu spyod pa'o/ /byang chub sems dpa' gang gis smon lam yang ma btang la/pham pa'i gnas lta bu'i chos rnams kyi kun nas dkris pa chen po yang kun tu ma spyad na/ tshe brjes su zin kyang 'og dang steng dang thad ka thams cad du skyes pa nas / byang chub sems dpas byang chub sems dpa'i tshul khrims kyi sdom pa yang dag par blangs pa spong bar mi 'gyur ro//byang chub sems dpa' tshe brjes te brjed na yang dge ba'i bshes gnyen bsten pa la brten nas/ dran pa gso ba'i phyir yang dang yang nod par byed par zad kyi/ gsar du yang dag par len pa ni ma yin no/ /de ltar byang chub sems dpa'i tshul khrims kyi sdom pa la gnas pa'i nyes pa'am /nyes pa ma yin pa dang / nyon mongs pa can dang / nyon mongs pa can ma yin pa dang / chung ngu dang / 'bring dang / chen por yang rig par bya ste/ de ltar byang chub sems dpa' byang chub sems dpa'i tshul khrims kyi sdom pa la gnas pas nyin gcig bzhin du de bzhin gshegs pa'am/de bzhin gshegs pa'i mchod rten nam/ chos sam/ chos kyi glegs bam du byas pa/ byang chub sems dpa'i mdo sde'i sde snod dam/ byang chub sems dpa'i mdo sde'i sde snod kyi ma mo'am/ dge 'dun la yang rung ste/ phyogs bcu dag na sa chen por chud pa'i byang chub sems dpa' rnams kyi dge 'dun gang yin pa la mchod pa'i bya ba chung ngu'am/chen po ci yang rung ste/ tha na lus kyis phyag gcig tsam 'tshal ba dang / tha na sangs rgyas dang / chos dang / dge 'dun rnams kyi yon tan rnams las brtsams te tshig bzhi pa'i tshigs su bcad pa gcig tsam cig tshig tu brjod pa dang /tha na sems kyis sangs rgyas dang / chos dang / dge 'dun gyi yon tan rjes su dran pa sngon du 'gro ba'i dang ba gcig tsam yang ma byas par nyin mtshan 'da' bar byed na/ nyes pa dang bcas shing 'gal ba dang bcas par 'gyur te/gal te ma gus pa dang / snyom las dang / le los nyes pa byung na ni/ nyon mongs pa can gyi nyes par 'gyur ro/ /gal te brjed pas nyes pa byung na ni nyon mongs pa can ma yin pa'i nyes pa 'byung bar 'gyur ro/ /sems 'khrugs pa la ni nyes pa med do/ /bsam pa dag pa'i sar chud pa la nyes pa med de/'di ltar byang chub sems dpa' ni bsam pa dag pa'i phyir te/ dper na dge slong gis shes nas dad pa thob pa ni dus thams cad du yang chos nyid kyis ston pa dang / chos dang dge 'dun la bsnyen bkur byed cing mchod pa dam pas mchod pa byed pa lta bu'o//byang chub sems dpa' 'dod pa che ba dang / chog mi shes pa dang / rnyed pa dang / bkur sti la chags pa byung ba dang du len par byed na/ nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ /de spang pa'i phyir 'dun pa skyes shing brtson 'grus rtsom la de'i gnyen po yongs su 'dzin pas de'i gags la gnas pa rang bzhin gyis nyon mongs pa shas che ba'i phyir zil gyis mnan nas yang dang yang du kun tu spyod pa la nyes pa med do//byang chub sems dpa' ches rgan zhing yon tan dang ldan la/ bkur sti bya bar 'os pa chos mthun pa mthong ba na/nga rgyal gyis non tam/ kun nas mnar sems kyi sems dang ldan nam/ khong khro ba'i sems dang ldan yang rung ste/ langs shing stan mi stobs pa dang / gzhan dag la smra zhing kun tu smra la/ yang dag par dga' bar byed cing 'dri ba la nga rgyal kho nas non tam/kun nas mnar sems kyi sems dang ldan nam/ khong khro ba'i sems dang ldan yang rung ste/ rigs pa'i tshul gyis tshig slar brjod par mi byed na/ nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro//gal te nga rgyal gyis non pa ma yin/ kun nas mnar sems kyi sems dang ldan pa ma yin/ khong khro ba'i sems dang ldan pa ma yin yang rung ste/ snyom las dang / le lo'am/ lung du ma bstan pa'i sems sam/ brjed par byas na / nyes pa dang bcas shing 'gal ba dang bcas pa kho nar 'gyur gyi/nyon mongs pa can gyi nyes par ni mi 'gyur ro/ /nad tshabs che ba'am/ sems 'khrugs pa la nyes pa med do/ /de gnyid kyis log pa las sad pa'i 'du shes kyis 'khyud par byed pa dang / smra ba dang / kun tu smra ba dang / yang dag par dga' bar byed pa dang /'dri ba la nyes pa med do/ /gzhan dag la chos ston pa'am/ 'brel pa'i gtam rnam par gtan la 'bebs pa la brtson pa la nyes pa med do/ /de ma yin pa gzhan dag yang dag par dga' bar byed na nyes pa med do/ /gzhan dag chos ston pa'am/ 'brel pa'i gtam rnam par gtan la 'bebs pa la rna blags te nyan na nyes pa med do/ /chos kyi gtam la mi dga' bar 'gyur ba dang / chos smra ba'i sems bsrung na nyes pa med do/ /thabs des sems can de dag dul bar byed cing 'dul la mi dge ba'i gnas nas bslang ste/ dge ba'i gnas la 'god na nyes pa med do/ /dge 'dun gyi nang khrims bsrung na nyes pa med do/ /gzhan ches mang ba rnams kyi sems bsrung na nyes pa med do/ /byang chub sems dpa' gzhan dag gis khyim mam/ gtsug lag khang gzhan nam/ khyim gzhan du ngas zhu dang skom dang / gos la sogs pa yo byad rnams la bos pa las nga rgyal gyis non tam/ kun nas mnar sems kyi sems dang ldan nam/ khong khro ba'i sems dang ldan yang rung ste/ mi 'gro zhing bos pa bdag gir mi byed na/ nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ /snyom las dang le lo'i dbang gis ma song na ni/ nyon mongs pa can ma yin pa'i nyes par 'gyur ro/ /na ste mi nus pa'am/ sems 'khrugs pa la nyes pa med do/ /yul 'dzang ma ring du gyur pa'am/ lam na 'jigs pa yod na nyes pa med do//thabs des de dul bar byed 'dod cing 'dul bar 'dod la mi dge ba'i gnas nas bslang ste / dge ba'i gnas su 'jog par 'dod na nyes pa med do/ /tshe sngar gzhan la khas blangs na nyes pa med do/ /rgyun du dge ba'i phyogs kyi bar chad du 'gyur ba bsrung ba'i phyir ma song na nyes pa med do//chos kyi don dang ldan pa sngon ma thos pa nyan pa las nyams par 'gyur du dogs pa'i phyir ma song na nyes pa med do/ /chos kyi don mnyan pa ji lta ba bzhin du 'brel pa'i gtam rnam par gtan la 'bebs pa la yang de dang 'dra bar rig par bya'o/ /tho 'tshams pa'i bsam pas bos na nyes pa med do//gzhan ches mang ba dag gi kun nas mnar sems kyi sems bsrung na nyes pa med do/ /dge 'dun gyi nang khrims bsrung na nyes pa med do/ /byang chub sems dpa' gzhan dag la gser dang / dngul dang / nor bu dang / mu tig dang /bai DUr+ya la sogs pa nor gyi sna grangs rnam pa sna tshogs mang po mchog rnams thob cing / dus kyis bstabs pa las kun nas mnar sems kyi sems dang ldan nam/ khong khro ba'i sems dang ldan pas len du mi btub cing spong bar byed na/ nyes pa dang bcas shing 'gal ba dang bcas par 'gyur te/sems can yal bar 'dor ba'i phyir nyon mongs pa can gyi nyes par 'gyur ro/ /snyom las dang le los len par mi byed na/ nyes pa dang bcas shing 'gal ba dang bcas par ni 'gyur la nyon mongs pa can gyi nyes par ni mi 'gyur ro/ /sems 'khrugs pa la nyes pa med do//de blangs pas sems chags par 'gyur bar mthong na nyes pa med do/ /de phyis 'gyod par 'gyur du dogs na nyes pa med do/ /des sbyin pa 'khrul du dogs na nyes pa med do/ /kun tu 'dzin pa btang ba de'i rgyus sbyin bdag dbul zhing phongs par 'gyur du dogs na nyes pa med do//dge 'dun gyi'am/ mchod rten gyi yin du dogs na nyes pa med do/ /gzhan las mi rigs par phrogs pa yin du dogs te/ rgyu des bsad pa'am/ bcing ba'am/ chad pas bcad pa'am/ gnod par 'gyur ba'am/ sad par 'gyur ba zhig yin na nyes pa med do/ /byang chub sems dpa' gzhan chos 'dod pa rnams la kun nas mnar sems kyi sems dang ldan nam/ khong khro ba'i sems dang ldan nam/ rang bzhin gyis phrag dog can yin yang rung ste/ chos sbyin par mi byed na/ nyes pa dang bcas shing 'gal ba dang bcas par 'gyur te/nyon mongs pa can gyi nyes par 'gyur ro/ /snyom las dang le los sbyin par mi byed na nyes pa dang bcas shing 'gal ba dang bcas par ni 'gyur la/ nyon mongs pa can gyi nyes par ni mi 'gyur ro/ /mu stegs can glags tshol ba la ma byin na yang nyes pa med do//nad tshabs che ba dang / sems 'khrugs pa la nyes pa med do/ /thabs des 'dul bar byed 'dod cing 'dul bar 'dod la/ mi dge ba'i gnas nas bslang ste/ dge ba'i gnas su 'god par 'dod na nyes pa med do/ /chos mi shes na nyes pa med do/ / gal te ma gus shing zhes med la spyod lam ngan pas nod pa la ma byin na nyes pa med do//dbang po rtul po chos rgya chen po bstan pas/ chos thos pas skrag cing log par lta ba dang / log par mngon par zhen pa dang / gnod pa dang / nyams par 'gyur du dogs na nyes pa med do/ /de'i lag tu song na gzhan snod du ma gyur pa rnams la chos 'phel du dogs na nyes pa med do//byang chub sems dpa' sems can ma rungs pa rnams dang / tshul khrims 'chal pa rnams ma rungs pa yin pa dang / tshul khrims 'chal pa yin pa'i rkyen gyis kun nas mnar sems kyi sems dang ldan nam/khong khro ba'i sems dang ldan pas yal bar 'dor ba'am/ khyad du gsod na nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ /snyom las dang le los yal bar 'dor ba dang / brjod pas khyad du bsad na nyes pa dang bcas shing 'gal ba dang bcas par ni 'gyur la/nyon mongs pa can gyi nyes par ni mi 'gyur ro/ /de ci'i phyir zhe na/ byang chub sems dpa' ni sems can ma rungs pa rnams dang / tshul khrims 'chal pa rnams dang / sdug bsngal gyi rgyu la gnas pa rnams la ji ltar snying brtse ba'i sems byed 'dod pas nye bar gnas pa lta bur tshul khrims dang ldan zhing /lus dang ngag dang yid kyi las kyi spyod pa zhi ba la ni de ltar ma yin pa'i phyir ro/ /sems 'khrugs pa la ni nyes pa med do/ /thabs des de 'dul bar byed 'dod pa las snga ma bzhin te nyes pa med do//gzhan mang po dag gi sems bsrung na nyes pa med do/ /dge 'dun gyi nang khrims bsrung na nyes pa med do/ /byang chub sems dpa' ni bcom ldan 'das kyis gzhan dag gi sems bsrung ba'i phyir ma dad pa rnams dad par bya ba dang /dad pa rnams phyir zhing dbyung bar bya ba'i phyir/ so so thar pa'i 'dul ba las bcas pa'i kha na ma tho ba dang bcas pa rnam par gzhag pa gang yin pa de la nyan thos rnams dang mtshungs par slob ste/ tha dad par mi byed do/ /de ci'i phyir zhe na/ nyan thos rnams ni bdag gi don lhur len pa tsam du zad na/de dag kyang ma dad pa rnams dad par bya ba dang / dad pa rnams phyir zhing 'byung bar bya ba'i phyir gzhan gyi yid mi srung bar mi byed de/ bslab pa rnams la slob na/ byang chub sems dpa' gzhan gyi don lhur len pa rnams lta ci smos/bcom ldan 'das kyis nyan thos rnams kyi don nyung ba dang / bya ba nyung ba dang / snying las chung ngur gnas par bya ba las brtsams te/ bcas pa'i kha na ma tho ba dang bcas pa de la ni/ byang chub sems dpas nyan thos rnams dang mtshungs par slob par mi byed do/ /de ci'i phyir zhe na/nyan thos bdag gi don lhur byed cing gzhan gyi don la mi lta bas/ gzhan gyi don las brtsams te/ don nyung zhing bya ba nyung la/ snying las chung ngur gnas pa ni mdzes kyi/ byang chub sems dpa' gzhan gyi don lhur len pas/ gzhan gyi don las brtsams te/don nyung zhing bya ba nyung la snying las chung ngur gnas pa ni mdzes pa ma yin te/ 'di ltar byang chub sems dpas gzhan dag gi don du gos brgya snyed dang / gos stong snyed nye dur mi 'ong ba'i bram ze dang khyim bdag rnams las btsal bar bya ste/ skabs 'byed pa zhig yod na yang sems can de dag gi chog gam mi chog brtags nas/ci tsam dgos pa blang bar bya'o/ /gos rnams ji lta ba bzhin du lhung bzed rnams kyang de dang 'dra'o/ /ji ltar btsal bar bya ba de bzhin du bdag nyid kyi rgyu skud pa blangs pa nye dur mi 'ong ba'i thag pa la 'thag tu 'jug pa yang de dang 'dra'o//gzhan dag gi don du mon dar gyi mal stan brgya snyed dang / stan du gdeng ba brgya snyed kyang bstab par bya'o/ /gser dngul srang bye ba phrag 'bum pas lhag pa yang bdag gir bya'o/ /byang chub sems dpa' byang chub sems dpa'i tshul khrims kyi sdom pa la gnas pa de la sogs pa nyan thos rnams kyi don nyung zhing bya ba nyung la snying las chung ngur gnas pa las brtsams te/bcas pa'i kha na ma tho ba dang bcas pa la mtshungs par slob cing sems can gyi don las brtsams te/ kun nas mnar sems kyi sems dang ldan pa dang /khong khro ba'i sems dang ldan pas don nyung zhing bya ba nyung la/ snying las chung ngur gnas par byed na nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ /snyom las dang le los don nyung zhing bya ba nyung la snying las chung ngur gnas par byed na nyes pa dang bcas shing 'gal ba dang bcas par ni 'gyur la nyon mongs pa can gyi nyes par ni mi 'gyur ro//rang bzhin gyis kha na ma tho ba dang bcas pa la la byang chub sems dpa' thabs mkhas pa de lta bus kun tu spyad na des nyes par yang mi 'gyur la/bsod nams mang po yang 'phel bar 'gyur ba yang yod de/ 'di ltar chom po dang rkun pos srog chags che ba'i bdag nyid can nyan thos dang rang sangs rgyas dang / byang chub sems dpa' brgya phrag mang po dag zang zing cung zad kyi phyir gsad par chad de/ mtshams med pa'i las mang po byed pa la zhugs pa/ byang chub sems dpas mthong la/ mthong nas kyang 'di snyam du sems kyis sems mngon par 'du byed de/ srog chags 'di bsad na bdag sems can dmyal ba rnams su skye bar 'gyur mod kyi bdag sems can dmyal bar skye bar 'gyur ba ni mdo med de /sems can 'dis mtshams med pa'i las byas nas/ sems can dmyal bar 'gro na mi rung ngo snyam ste/ de lta bu'i bsam pas byang chub sems dpas dge ba'i sems sam lung du ma bstan pa'i sems su rig nas 'dzem bzhin du phyi ma la snying brtse ba'i sems kho nas srog chags de bsad na/nyes par yang mi 'gyur la bsod nams mang po yang 'phel bar 'gyur ro/ /'di ltar byang chub sems dpa' ni nus na/ sems can rgyal po'am/ blon po chen po gang dag shas cher brlang zhing sems can rnams la snying rje med la/gcig tu nges par pha rol la gnod pa byed pa la zhugs pa dag /gang la gnas na gzhi des bsod nams ma yin pa mang du 'phel bar 'gyur ba de dag snying brtse ba'i sems dang phan pa'i bsam pas rgyal srid kyi dbang phyug la dbang ba de las 'byin par byed do//chom po dang rkun po gzhan gyi nor 'phrogs pa gang dag gis dge 'dun dang mchod rten gyi nor mang po phrogs nas bdag gir byas te/ longs spyod par 'dod pa de dag las byang chub sems dpas nor phyir phrogs te/ nor longs spyod pas des de dag la yun ring por gnod pa dang /phan pa ma yin pa kho nar 'gyur na mi rung ngo snyam nas/ rkyen de kho na'i phyir slar phrogs te/ dge 'dun gyi ni dge 'dun la 'bul bar byed/ mchod sbyin gyi ni mchod rten la 'bul bar byed do/ /zhal ta byed pa'am/ skyed mos tshal bsrung ba gang dag gis dge 'dun nam/mchod rten gyi nor mi rigs par chud gson pa dang / gang zag bdag nyid kyis spyad par byed pa de dag la byang chub sems dpas so sor brtags nas las de dang log par longs spyad pa des de dag la yun ring por gnod pa dang / phan pa ma yin par gyur na mi rung ngo snyam nas dbang byed pa de las 'byin par byed de/de ltar rnam grangs des byang chub sems dpa' ma byin par len bzhin du nyes par yang mi 'gyur la/ bsod nams kyang mang du 'phel bar 'gyur ro/ /'di ltar byang chub sems dpa' khyim pas bud med mgo gtsang mi tshangs par spyad par 'dod pas gzir ba dang /'brel pa'i sems dang ldan pa zhig la kun nas mnar sems kyi sems dang ldan par gyur nas/ bsod nams ma yin pa mang du 'phel bar 'gyur na mi rung ngo snyam nas/ ci dga' dgur dge ba'i rtsa ba la gzud pa dang /mi dge ba'i rtsa ba yongs su gtong du gzhug pa la dbang du 'gyur ro snyam ste/ snying brtse ba'i sems kho na nye bar bzhag ste 'khrig pa'i chos bsten na mi tshang par spyod pa 'khrig pa'i chos bsten kyang nyes par yang mi 'gyur la bsod nams kyang mang du 'phel bar 'gyur ro//byang chub sems dpa' rab tu byung ba nyan thos kyi bstan pa mi 'jig par rjes su bsrung bas ni mi tshangs par spyod pa bsten pa rnam pa thams cad du mi bya'o/ /'di ltar byang chub sems dpas sems can mang po srog thar bar bya ba dang / bcings pa las thar bar bya ba dang /lag pa dang / rkang pa dang / sna dang rna ba bcad pa las thar bar bya ba dang / mig dbyung ba las bskyab pa'i phyir/ byang chub sems dpas bdag gi srog gi phyir yang shes bzhin du brdzun gyi tshig mi smra ba gang yin pa de sems can de dag gi don gyi phyir so sor brtags nas smra bar byed de/de ltar mdor bsdu na byang chub sems dpa' ni ci dang cis kyang sems can rnams kyi don kho na mthong ba'i don ma yin pa ni ma yin te/ bdag nyid kyang zang zing med pa'i sems dang ldan la/ sems can la phan par 'dod pa'i gzhi 'ba' zhig gis 'du shes bsgyur te/shes bzhin du tshig gzhan la smra la/ smra bzhin du nyes par yang mi 'gyur te/ bsod nams mang po yang 'phel bar 'gyur ro/ /'di ltar byang chub sems dpa' ni sems can gang dag mi dge ba'i bshes gnyen gyis yongs su zin pa de dag la snying brtse ba'i sems kho na la brten nas sems can 'di dag sdig pa'i grogs po dang bsten pas yun ring por gnod pa dang /phan pa ma yin par gyur na mi rung ngo snyam ste/ ci nus ci lcogs kyis mi dge ba'i bshes gnyen de dag dang bral ba'i tshig smra bar byed de/ des dag la zhing dbral bar kun tu dga'o//byang chub sems dpas rnam grangs des mdza' ba'i dbyen byas kyang nyes par mi 'gyur la/ bsod nams mang po yang 'phel bar 'gyur ro/ /'di ltar byang chub sems dpa' ni sems can lam log par zhugs shing mi rigs pa rnams byed pa dag la thabs des ci tsam du mi dge ba'i gnas nas bslang ste/dge ba'i gnas su 'god pa'i phyir rtag tu tshig rtsub mo drag pos smra 'beb par byed de/ de ltar byang chub sems dpa' tshig rtsub po smras kyang nyes par mi 'gyur la/ bsod nams kyang mang du 'phel bar 'gyur ro//'di ltar byang chub sems dpa' ni sems can gar dang glu dang rol mo'i sgra la mos pa rnams dang / sems can rgyal po dang / chom rkun dang / zas dang / skom dang / smad 'tshong ma dang / lam srang gi gtam la sogs pa la mos pa rnams la gar dang / glu dang / rol mo'i sgra dang /gtam sna tshogs la mkhas te/ snying brtse ba'i bsam pas gar dang / glu dang / rol mo'i sgra dang / tshig kyal pa dang ldan pa'i gtam rnam pa sna tshogs kyis mgu bar byas shing 'dun par byas te/ dbang du byed cing ngag gnyan du bcug nas/ mi dge ba'i gnas nas bslang ste/dge ba'i gnas su 'god par byed de/ de ltar na byang chub sems dpa' tshig kyal pa smra yang nyes par mi 'gyur la/ bsod nams kyang mang du 'phel bar 'gyur ro/ /byang chub sems dpa' tshul 'chos pa dang / kha gsag dang / gzhogs slong dang / thob kyis 'jal ba dang / rnyed pas rnyed par byed 'dod pa log par 'tsho bar byed pa'i chos byung ba rnams dang du len par byed cing / de dag gis mi 'dzem la sel bar mi byed na/ nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro//de bstsal ba'i phyir 'dun pa skye zhing 'bad pa rtsom la/ nyon mongs pa shas che ba'i phyir sems zil gyis mnan te/ kun tu spyod na ni nyes pa med do/ /byang chub sems dpa' rgod pas yongs su zin pa'i sems kyis rnam par ma zhi zhing / rnam par ma zhi ba la dga' ba rta gad du dgod pa dang /kun tu rtse zhing / kun tu ca co 'don la / dgod cing g.yeng ba ston pa dang / gzhan la la dag dgod du gzhug par 'dod cing dga' bar bya bar 'dod na/ rkyen de nyid kyis nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro//brjed pas byas na ni nyon mongs pa can ma yin pa'i nyes par 'gyur ro/ /de bstsal ba'i phyir 'dun pa skyes pa ni nyes pa med de snga ma bzhin no/ /gzhan dag gi kun nas mnar sems skyes pa thabs des phyir bstsal bar 'dod na nyes pa med do/ / gzhan dag gi mya ngan skyes pa bsal bar 'dod na nyes pa med do/ /gzhan de'i rang bzhin can de la dga' ba rnams bsdu ba'am/ gtsugs pa bsrung ba'am/ de dang mthun par bya ba'i phyir byed na nyes pa med do/ /gzhan dag byang chub sems dpa' la mi dga' bar gyur du dogs pa dang /kun nas mnar sems dang / rgyab kyis phyogs par gyur du dogs pa rnams la dga' ba'i bzhin gyis nang gi bsam pa dag par bstan pa'i phyir byas na nyes pa med do/ /byang chub sems dpa' gang byang chub sems dpa' ni mya ngan las 'das pa la mngon par dga' bas gnas par mi bya'i/mya ngan las 'das pa la rgyab kyis phyogs te gnas par bya'o/ /nyon mongs pa dang nye ba'i nyon mongs pa rnams kyis kyang 'jigs par mi bya'o/ /de dag las sems kyang shin tu dben par mi bya ste/ 'di ltar byang chub sems dpa' ni bskal pa grangs med pa gsum du 'khor ba na 'khor zhing /byang chub yang dag par bsgrub par bya dgos so snyam du de ltar lta zhing de skad smra na nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ /de ci'i phyir zhe na/ byang chub sems dpa' ni nyan thos kyi ji ltar mya ngan las 'das pa la mngon par dga' ba kun tu bsten par bya zhing /nyon mongs pa dang nye ba'i nyon mongs pa rnams la sems skyo bar bya ba de las bye ba phrag 'bum 'gyur du mya ngan las 'das pa la mngon par dga' ba kun tu bsten par bya zhing nyon mongs pa dang / nye ba'i nyon mongs pa rnams las sems skyo ba bsgom par bya dgos te/ 'di ltar nyan thos ni bdag gcig pu'i don la brtson gyi/ byang chub sems dpa' ni sems can thams cad kyi don la brtson pa yin la/ des de ltar sems kun nas nyon mongs pa med pa la goms par bya ba yang dag par bsgrub dgos te/de ni 'di ltar dgra bcom pa ma yin du zin kyang de las khyad par du 'phags pa kun nas nyon mongs pa med pa dang ldan pas zag pa zad pa dang bcas pa'i dngos po la spyod pa'i phyir ro/ /byang chub sems dpa' bdag gi tshig mi btsan par 'gyur ba'i dri ngas dang /mi snyan pa dang / gtam ngan par 'gyur ba bden pa'i dngos po mi srung zhing spel bar mi byed na nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ /bden pa'i dngos po ma yin pa mi srung zhing sel bar mi byed na nyes pa dang bcas shing 'gal ba dang bcas par mi 'gyur la/nyon mongs pa can gyi nyes par ni mi 'gyur ro/ /pha rol mu stegs can yin nam/ gzhan gang yang rung ba mngon par zhen pa zhig yin na nyes pa med do/ /rab tu byung ba dang / slong mo spyod pa dang / dge ba spyod pa'i gzhis mi snyan par brjod na nyes pa med do//khro bas zil gyis non cing sems phyin ci log tu gyur pas brjod na nyes pa med do/ /byang chub sems dpas gnod pa'i thabs dang thabs drag po gang gis sems can gyi don du 'gyur ba mthong bzhin du yid mi dga' bar 'gyur ba bsrung ba'i phyir thabs de mi byed na nyes pa dang bcas shing 'gal ba dang bcas par 'gyur te/nyon mongs pa can ma yin pa'i nyes par 'gyur ro/ /tshe 'di'i don chung ngu zhig tu 'gyur la/ gzhi des yid mi bde ba chen por 'gyur na nyes pa med do/ /byang chub sems dpa' gzhan dag gshe ba la phyir gshe ba dang /khro ba la phyir khro ba dang / rdeg pa la phyir rdog pa dang / mtshang 'bru ba la phyir mtshang 'bru bar byed na nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ /byang chub sems dpas gzhan dag la nyes par byas sam/nyes pa byas su dogs kyang rung ste/ kun nas mnar sems kyi sems dang ldan pa dang / nga rgyal gyis non pas mthun par shad kyis byang bar mi byed de/ yal bar 'dor na nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro//snyom las sam/ le lo'am/ bag med pas shad kyis byang bar ma byas na nyes pa dang bcas shing 'gal ba dang bcas par ni 'gyur la/ nyon mongs pa can gyi nyes par ni mi 'gyur ro/ /thabs des dul bar bya bar 'dod cing / 'dul bar 'dod la mi dge ba'i gnas nas bslang ste/dge ba'i gnas su 'god par 'dod pa na nyes pa med do/ /mu stegs can yin na nyes pa med do/ /rung ba ma yin pa kha na ma tho ba dang bcas pa kun tu spyod pas shad kyis byang ba byed du 'jug par 'dod pa zhig na nyes pa med do/ /gal te rang bzhin gyis 'thab krol ba can zhig yin te/rtsod pa byed la/ shad kyis byang bar byas na shas cher 'khrugs te/ shed skye bar 'gyur na nyes pa med do/ /pha rol bzod pa'i ngang tshul can yin zhing kun nas mnar sems med pa'i ngang tshul can yin du re la gzhan la nyes pa byas pa las brtsams te/shad kyis sbyang ba byed pas shin tu ngo tsha bar byed pa zhig yin na nyes pa med do/ /byang chub sems dpa' rtsod pa gang la gzhan nyes pa byung ba dag chos bzhin du mthun par shad kyis byang bar byed kyang / kun nas mnar sems kyi sems dang ldan zhing gzhan la tho 'tshams pa'i bsam pas shad kyis sbyangs pa mi nyan na nyes pa dang bcas shing 'gal ba dang bcas par 'gyur te/nyon mongs pa can gyi nyes par 'gyur ro/ /gal te kun nas mnar sems kyi sems dang mi ldan gyi/ mi bzod pa'i ngang tshul can yin pas mi nyan na/ nyon mongs pa can gyi nyes pa nyid du 'gyur ro//thabs des pha rol gdul bar 'dod na nyes pa med do/ /snga ma bzhin du thams cad rig par bya'o/ /chos bzhin ma yin pa dang / mthun pa ma yin par shad kyis spyod par byed na nyes pa med do/ /byang chub sems dpa' gzhan dag la khro ba'i bsam pa 'byung zhing 'dzin la byung ba dang du len na nyes pa dang bcas shing 'gal ba dang bcas par 'gyur te/nyon mongs pa can gyi nyes par 'gyur ro/ /de spang ba'i phyir 'dun pa skyes na/ nyes pa med de snga ma bzhin no// //bam po bcu pa / byang chub sems dpa' rim gro bya ba dang / bsnyen bkur bya ba la yongs su zhen pa'i dbang du byas te/zang zing dang bcas pa'i sems kyis 'khor sdud par byed na nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ /zang zing med pa'i bsam pas rim gro bya ba dang / bsnyen bkur bya ba bdag gir byed na nyes pa med do//byang chub sems dpa' snyom las dang le lo skyes te/ gnyid kyi bde ba dang / nyal ba'i bde ba dang / glos 'bebs pa'i bde ba dus ma yin pa dang / tshod ma yin par bdag gir byed na nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro//na ste mi nus na nyes pa med do/ /lam gyis dub na nyes pa med do/ /de spang ba'i phyir 'dun pa skyes pa la nyes pa med do/ /snga ma bzhin du rig par bya'o/ /byang chub sems dpa' 'du 'dzi'i gtam la kun tu chags pa'i sems kyis dus yol bar byed na nyes pa dang bcas shing 'gal ba dang bcas par 'gyur te/nyon mongs pa can gyi nyes par 'gyur ro/ /brjed pas yol bar byas na nyon mongs pa can ma yin pa'i nyes par 'gyur ro/ /pha rol smra zhing 'dug la de yang dran pa la gnas bzhin du pha rol gyi ngor skad cig gcig tsam nyan pa la ni nyes pa med do//ya mtshan du 'dzin te/ 'dri ba tsam dang / dris pa'i lan 'debs pa tsam byed pa la nyes pa med do/ /byang chub sems dpa' sems gnas par bya ba las brtsams te/ sems mnyam par gzhag par 'dod la/ kun nas mnar sems kyi sems dang ldan pa dang /nga rgyal gyis non te/ gdams ngag nod du mi 'gro na nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ /snyom las dang le los byas na/ nyon mongs pa can ma yin pa'i nyes par 'gyur ro//na ste mi nus na nyes pa med do/ /gdams ngag log par 'byung du dogs na nyes pa med do/ /bdag nyid mang du thos pa yin te/ sems mnyam par 'jog nus sam/ des gdams ngag gis gdams pa'i bya ba byas zin na nyes pa med do/ /byang chub sems dpa' 'dod pa la 'dun pa'i sgrib pa byung ba dang du len cing sel bar mi byed na/nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ /de spang ba'i phyir 'dun pa skyes shing 'bad kyang nyon mongs pa drag pos sems zil gyis non te/ kun tu spyod na nyes pa med do//'dod pa la 'dun pa ji lta ba bzhin du/ gnod sems dang / rmugs pa dang / gnyid dang / rgod pa dang / 'gyod pa dang / the tshom yang de dang 'dra bar rig par bya'o/ /byang chub sems dpa' bsam gtan gyi ro myong bar byed cing bsam gtan gyi ro myong ba la yang yon tan du lta na nyes pa dang bcas shing 'gal ba dang bcas par 'gyur te/nyon mongs pa can gyi nyes par 'gyur ro/ /de spang ba'i phyir 'dun pa skyes pa la ni nyes pa med de snga ma bzhin no/ /byang chub sems dpa' gang byang chub sems dpas nyan thos kyi theg pa dang ldan pa'i chos mnyan par mi bya'o//gzung bar mi bya'o/ /de la bslab par yang mi bya'o/ /byang chub sems dpas nyan thos kyi theg pa dang ldan pa'i chos mnyan pa dang / bzung bas ci zhig bya ste/ de la bslab mi dgos so zhes de ltar lta zhing / de skad smra na nyes pa dang bcas shing 'gal ba dang bcas par 'gyur la nyon mongs pa can gyi nyes par 'gyur te/'di ltar byang chub sems dpas ni mu stegs can gyi bstan bcos rnams la yang brtson par bya dgos na/ sangs rgyas kyi gsung rab lta la ci smos/ gcig tu nges pa de lhur len pa'i 'dun pa bzlog pa'i phyir na nyes pa med do//byang chub sems dpa' byang chub sems dpa'i sde snod yod la/ byang chub sems dpa'i sde snod la brtson par ma byas par byang chub sems dpa'i sde snod thams cad kyi thams cad du yang yal bar bor nas/ nyan thos kyi sde snod la brtson par byed na nyes pa dang bcas shing 'gal ba dang bcas par 'gyur te/nyon mongs pa can gyi nyes par 'gyur ro/ /byang chub sems dpa' sangs rgyas kyi gsung rab yod la/ sangs rgyas kyi gsung rab la brtson pa ma byas par mu stegs can gyi bstan bcos/ phyi rol gyi bstan bcos dag la brtson par byed na nyes pa dang bcas shing 'gal ba dang bcas par 'gyur te/nyon mongs pa can gyi nyes par 'gyur ro/ /shin tu yid gzhungs pa dang / lo bas skyen pa dang / yun ring du mi brjed par nus pa dang / don sems pa dang / rtogs par byed nus pa dang /sangs rgyas kyi gsung rab la rig pas rtogs pa dang ldan pas blo mi 'gyur ba dang ldan te/ de las nyis 'gyur du nyin gcig bzhin du sangs rgyas kyi gsung rab la brtson par byed na nyes pa med do/ /byang chub sems dpas de lta bu'i tshul dang yang ma 'gal bar mu stegs can gyi bstan bcos phyi rol gyi bstan bcos dag la mkhas par byed pa na/der mngon par dga' ba'i tshul gyis byed cing des dga' bar 'dzin la des rangs par byed de/ sman tsha ba bsten pa bzhin du mi byed na nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ /byang chub sems dpa' byang chub sems dpa'i sde snod las de kho na'i don nam/ sangs rgyas dang byang chub sems dpa'i mthu las brtsams te/ zab pa mchog tu zab pa'i gnas dag thos nas/ ma mos shing skur pa 'debs te/ 'di dag ni don dang ldan pa ma yin/chos dang ldan pa ma yin/ de bzhin gshegs pas gsungs pa ma yin/ sems can rnams la phan pa dang bde bar 'gyur ba ma yin no zhes zer na/ bdag nyid kyis tshul bzhin ma yin pa yid la byed pa'am/ gzhan gyi rjes su zhugs pas skur ba 'debs kyang rung ste /nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ /byang chub sems dpa' zab cing mchog tu zab pa'i gnas dag thos nas/ sems mos par gyur na/ de la byang chub sems dpas dad pa dang g.yo med pas 'di ltar bdag ni long bar gyur te/mig med la de bzhin gshegs pa'i spyan gyis rjes su spyod par zad pas/ de bzhin gshegs pas dgongs te gsungs pa spangs pa ni bdag gi cha ma yin no zhes yang dag par bslab par bya'o/ /de ltar byang chub sems dpa' des bdag nyid mi shes par brtsis la de bzhin gshegs pa nyid chos de dag la lkog tu ma gyur par yang dag par lta na/de ltar na yang dag par zhugs pa yin no/ /mos pa med du zin kyang skur ba mi 'debs na nyes pa med do/ /byang chub sems dpa' zang zing dang bcas pa'i sems dang /khong khro ba'i sems kyis gzhan dag la bdag la bstod cing gzhan dag la smod par byed na nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ /bstan pa gnas par bya bar 'dod pa'i phyir mu stegs can rnams zil gyis mnan par 'dod pa la nyes pa med do//thabs des gang zag de nyid 'dul bar 'dod pa la nyes pa med do/ /rgyas par snga ma bzhin no/ /ma dad pa rnams dad par bya ba dang / dad pa rnams phyir zhing 'byung bar bya ba'i phyir byed na nyes pa med do/ / byang chub sems dpa' chos sgrogs pa dang / dam pa'i chos kyis 'bel ba'i gtam rnam par gtan la 'bebs pa na/ nga rgyal gyis non pa dang / kun nas mnar sems kyi sems dang ldan pa dang / khong khro ba'i sems dang ldan pas mi 'gro na nyes pa dang bcas shing 'gal ba dang bcas par 'gyur te/nyon mongs pa can gyi nyes par 'gyur ro/ /snyom las dang le los mi 'gro na nyon mongs pa can ma yin pa'i nyes par 'gyur ro/ /ma tshor na nyes pa med do/ /na ste mi nus na nyes pa med do/ /log par ston du dogs na nyes pa med do/ /chos smra ba'i sems bsrung na nyes pa med do//yang dang yang du thos shing bzung la shes zin pa'i don gyi gtam yin par shes na nyes pa med do/ /mang du thos pa dang / thos pa 'dzin pa dang / thos pa bsags pa yin na nyes pa med do/ /rtag tu dmigs pa la sems gnas te/ byang chub sems dpa'i ting nge 'dzin mngon par bsgrub pa la brtson na nyes pa med do//shin tu shes rab rtul te chos len pa la zhan/ 'dzin pa la zhan cing dmigs pa la sems mnyam par 'jog pa la zhan pa zhig yin na nyes pa med do/ /byang chub sems dpa' chos smra ba'i gang zag la bsams bzhin du khyad du gsod cing bkur sti mi byed la/'phya zhing sting bar byed pa dang / tshig 'bru la rton gyi don la rton par mi byed na nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ /byang chub sems dpa' sdom pa la gnas pa'i sems can gyi bya ba 'di lta ste/bya ba gtan la 'bebs pa'am/ lam du 'gro zhing 'ong ba'am/ yang dag pa'i tha snyad dang / las kyi mtha' la sbyor ba'am/ longs spyod bsrung ba'am/ bye ba bsdum pa'am/ dga' ston nam/ bsod nams byed pa la kun nas mnar sems kyi sems dang ldan pa dang /khong khro ba'i sems dang ldan pas grogs byed du mi 'gro na nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ /snyom las dang le los grogs byed du mi 'gro na/ nyon mongs pa can ma yin pa'i nyes par 'gyur ro//na ste mi nus na nyes pa med do/ /rang byed nus pa dang / rten yod de mi 'chol na nyes pa med do/ /gnod pa dang ldan pa dang / chos dang ldan pa ma yin pa'i bya ba la ma song na nyes pa med do/ /thabs des 'dul bar 'dod na nyes pa med de rgyas par snga ma bzhin no/ / gzhan la ches sngar khas blangs zin na nyes pa med do/ /nus pa gzhan la bcol na nyes pa med do/ /rtag tu dge ba'i phyogs la yang dag par brtson na nyes pa med do/ / rang bzhin gyis yid rtul zhing lung 'bogs mi mkhas na nyes pa med de snga ma bzhin no/ / gzhan ches mang ba dag gi sems bsrung bar 'dod na nyes pa med do/ /dge 'dun gyi nang khrims bsrung bar 'dod na nyes pa med do/ /byang chub sems dpa' nad pa nad kyis thebs pa dang phrad pa na kun nas mnar sems kyi sems dang ldan pa dang / khong khro ba'i sems dang ldan pas rim gro dang bsnyen bkur mi byed na nyes pa dang bcas shing 'gal ba dang bcas par 'gyur te/nyon mongs pa can gyi nyes par 'gyur ro/ /snyom las dang le los mi byed na/ nyon mongs pa can ma yin pa'i nyes par 'gyur ro/ /bdag nyid na ste mi nus na nyes pa med do/ /pha rol nus shing mthun pa la bcol na nyes pa med do//nad pa mgon yod cing rten yod na nyes pa med do/ /bdag nyid kyis bdag gi rim gro dang bsnyen bkur byed nus na nyes pa med do/ /nad rgyun rings kyis thebs te so tsam du 'dug na nyes pa med do/ /dge ba'i phyogs rgya chen po la rtag tu brtson te dge ba'i phyogs kyi bar chad du 'gyur ba bsrung ba'i phyir mi byed na nyes pa med do//shin tu shes rab rtul sde zhing legs par chos ston mi nus la/ legs par 'dzin mi nus shing dmigs pa la sems mnyam par 'jog mi nus na nyes pa med do/ / gzhan la ches sngar khas blangs na nyes pa med do/ /nad g.yog la ji lta ba bzhin du sdug bsngal ba'i sdug bsngal bsal ba'i grogs bya ba yang de dang 'dra bar rig par bya'o/ /byang chub sems dpa' tshe 'di dang tshe phyi ma'i don la tshul ma yin par zhugs pa dag mthong na/ kun nas mnar sems kyi sems dang ldan pa dang /khong khro ba'i sems dang ldan pas rigs pa dang tshul bzhin ston par mi byed na nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ /snyom las dang le los ston par mi byed na nyon mongs pa can ma yin pa'i nyes par 'gyur ro//bdag gis mi shes te mi nus na nyes pa med do/ /gzhan nus pa la bcol na nyes pa med do/ /de nyid kyis nus na nyes pa med do/ /dge ba'i bshes gnyen gzhan gyis zin na nyes pa med do/ /thabs des gdul bar 'dod na nyes pa med do//rgyas par snga ma bzhin no/ /gang la rigs pas bstan par bya ba de kun nas mnar sems kyi sems dang ldan zhing bka' blo mi bde bas log par 'dzin pa dang / dga' zhing gus pa med pas dmu rgod kyi rang bzhin can zhig yin na nyes pa med do/ /byang chub sems dpa' sems can phan 'dogs pa rnams la byas pa mi gzo shing byas pa mi tshor te/kun nas mnar sems kyi sems dang ldan pas mthun pa'i phan gdags pas lan du phan mi 'dogs na nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro//snyom las dang le los mi byed na nyon mongs pa can ma yin pa'i nyes par 'gyur ro/ /bsgrims bzhin du ma nus shing ma lcogs na nyes pa med do/ /thabs des 'dul bar 'dod na nyes pa med de/ snga ma bzhin no/ /de nyid lan du phan 'dogs par mi 'dod na nyes pa med do//byang chub sems dpa' sems can nye du dang longs spyod las gyur pa'i sdug bsngal la gnas pa rnams kyi mya ngan byung ba kun nas mnar sems kyi sems dang ldan pas sel bar mi byed na nyes pa dang bcas shing 'gal ba dang bcas par 'gyur te/nyon mongs pa can gyi nyes par 'gyur ro/ /snyom las dang le los sel bar mi byed na/ nyon mongs pa can ma yin pa'i nyes par 'gyur ro/ /nyes par mi 'gyur ba ni 'di lta ste/ bya ba dag la grogs mi byed pa las brtsams te snga ma bzhin du rig par bya'o/ /byang chub sems dpa' zas dang skom la sogs pa 'dod pa rnams yang dag par slong ba la zas dang skom la sogs pa yo byad rnams kun nas mnar sems kyi sems dang ldan pa dang /khong khro ba'i sems dang ldan pas ma byin na nyes pa dang bcas shing 'gal ba dang bcas par 'gyur te/nyon mongs pa can gyi nyes par 'gyur ro/ /snyom las dang le lo dang bag med pas ma byin na nyon mongs pa can ma yin pa'i nyes par 'gyur ro/ /longs spyod dag med de mi bdog na nyes pa med do/ /rung ba ma yin pa dang / mi 'phrod pa slong ba na nyes pa med do//thabs des gdul bar bya bar 'dod cing 'dul bar 'dod na nyes pa med do/ snga ma bzhin no/ /rgyal po la gnod pa bsrung na nyes pa med do/ /dge 'dun gyi nang khrims bsrung na nyes pa med do/ /byang chub sems dpa' 'khor bsdus la kun nas mnar sems kyi sems dang ldan pas dus dus su legs par mi 'doms shing legs par rjes su mi ston pa dang /phongs pa de dag gi phyir bram ze dang khyim bdag dad pa rnams las gos dang / zas dang mal cha dang / stan dang na ba'i gsos sman dang / yo byad rnams chos bzhin du yongs su tshol bar mi byed na/nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ /snyom las sam le lo'am/ bag med pas mi 'doms shing rjes su mi ston la yongs su tshol bar mi byed na/ nyon mongs pa can ma yin pa'i nyes par 'gyur ro//thabs des dul bar bya bar 'dod cing dul bar 'dod na nyes pa med de snga ma bzhin no/ /dge 'dun gyi nang khrims bsrung na nyes pa med do/ /na ste sbyor mi bzod na nyes pa med do/ /nus pa gzhan dag la bcol na nyes pa med do/ /'khor bsod nams chen po dang ldan pa'am/yang na bdag nyid chos gos la sogs pa yongs su tshol nus par shes pa dang / de dag gis gdams ngag rjes su bstan pas gdams ngag dang rjes su bstan pa'i bya ba byas zin na nyes pa med do/ /sngon mu stegs can yin pa las chos rkur 'ongs pa der yang 'dul ba'i skal ba med pa'i rang bzhin can zhig yin na nyes pa med do//byang chub sems dpa' kun nas mnar sems kyi sems dang ldan pas gzhan dag gi sems dang mthun par mi byed na/ nyes pa dang bcas shing 'gal ba dang bcas par 'gyur te/nyon mongs pa can gyi nyes par 'gyur ro / /snyom las dang le lo dang / bag med pas mthun par mi byed na nyon mongs pa can ma yin pa'i nyes par 'gyur ro/ /gzhan dag gi 'dod pa gang yin pa de mi 'phrod par 'gyur ba yin na nyes pa med do/ /na ste sbyor mi bzod na nyes pa med do//dge 'dun gyi nang khrims bsrung na nyes pa med do/ /de'i 'dod pa 'phrod pa yin du zin kyang / gzhan ches mang ba dag gi 'dod pa ma yin zhing mi 'phrod na nyes pa med do/ /mu stegs can tshar gcad pa'i phyir na nyes pa med do/ /thabs des dul bar bya bar 'dod cing dul bar 'dod na nyes pa med de snga ma bzhin no//byang chub sems dpa' kun nas mnar sems kyi sems dang ldan pas gzhan dag gi yang dag pa'i yon tan rjod par mi byed cing / yang dag pa'i bsngags pa mi brjod pa dang / legs par smras pa la legs so zhes bya ba ma byin na nyes pa dang bcas shing 'gal ba dang bcas par 'gyur te/nyon mongs pa can gyi nyes par 'gyur ro/ /snyom las dang le lo dang / bag med pas ma smras na nyon mongs pa can ma yin pa'i nyes par 'gyur ro/ /rang bzhin gyis 'dod pa chung ngu yin par dpags te/de dang mthun par byed na nyes pa med do/ /na ste mi nus na nyes pa med do/ /thabs des 'dul bar bya bar 'dod cing 'dul bar 'dod na nyes pa med de snga ma bzhin no/ /dge 'dun gyi nang khrims bsrung na nyes pa med do/ /gzhi des kun nas nyon mongs pa dang / rgyags pa dang / khengs pa dang / gnod par 'gyur du dogs te/ de bsal ba'i phyir na nyes pa med do/ /yon tan rnams yon tan ltar bcos pa yin te/ yang dag pa ma yin pa dang / legs par smras pa yang legs par smras pa ltar bcos pa yin te/ yang dag pa ma yin na nyes pa med do//mu stegs can tshar gcad pa'i phyir na nyes pa med do/ /gtam rdzogs rdzogs su sdod na nyes pa med do/ /byang chub sems dpa' sems can sma dbab pa'i rigs pa dang / chad pas gcad pa'i rigs pa dang / bskrad pa'i rigs pa rnams nyon mongs pa can gyi sems kyis sma mi 'bebs sam/sma 'bebs su zin kyang chad pas bcad pas mi 'chos sam/ 'chos su zin kyang skrod par mi byed na nyes pa dang bcas shing 'gal ba dang bcas par 'gyur te/ nyon mongs pa can gyi nyes par 'gyur ro/ / snyom las dang le lo dang / bag med pas sma 'bebs par mi byed pa nas/ skrod pa'i bar du mi byed na nyon mongs pa can ma yin pa'i nyes par 'gyur ro/ /bcos su mi rung ba'i rang bzhin can zhig ste/ gtam byar mi rung ba dang / bka' blo mi bde zhing kun nas mnar sems kyi shas che ba la yal bar bor na nyes pa med do//dus las sdod na nyes pa med do/ /gzhi de las 'thab pa dang / mtshang 'bru ba dang / 'gyed pa dang / rtsod par 'gyur bar mthong na nyes pa med do/ /dge 'dun 'khrug cing 'bye bar mthong na nyes pa med do/ /sems can de dag g.yo med de/shas cher ngo tsha shes pa dang / khrel yod pa dang ldan pas myur ba myur bar mthun par byed pa zhig na nyes pa med do/ /byang chub sems dpa' rdzu 'phrul dang rnam par 'phrul pa dang / mthu rnam pa sna tshogs dang ldan la/ sems can skrag par bya ba'i rigs pa rnams skrag par bya ba dang /sems can 'dun par bya ba'i rigs pa rnams 'dun par bya ba dang / dad pas byin pa spong du gzhug pa'i phyir rdzu 'phrul gyis skrag par mi byed 'dun par mi byed na nyes pa dang bcas shing 'gal ba dang bcas par 'gyur te/ nyon mongs pa can ma yin pa'i nyes par 'gyur ro//sems can rnams gang du shas cher mngon par zhen pa mu stegs can 'phags pa la skur ba 'debs pa/ log par lta ba dang ldan pa dag cig na ma bstan kyang nyes pa med do/ /thams cad la yang sems 'khrugs pa dang / sdug bsngal gyi tshor bas nyen pa dang / sdom pa ma mnos pa la ni shin tu nyes pa med par rig par bya'o//byang chub sems dpa' rnams kyi bslab pa'i gzhi 'di dag ni dngos su byung ba sha stag ste/ sdom pa'i tshul khrims dang / dge ba'i chos sdud pa'i tshul khrims dang / sems can gyi don bya ba'i tshul khrims las brtsams nas bcom ldan 'das kyis mdo sde gzhan de dang de dag tu thor bu thor bur gsungs pa de byang chub sems dpa'i sde snod kyi ma mo 'dir tshang bar bshad de/byang chub sems dpa' gus pa skyes pas de dag la slob par 'dod pa'i bsam pa rnam par dag pa dang / byang chub 'dod pa'i bsam pa dang /sems can gyi don bya ba'i bsam pas gzhan las sdom pa yang dag par blang bar byas nas mchog tu gus par bya ste/ bslab par bya'o/ /thog ma nyid nas kyang nyes pa mi 'byung bar gus pa bskyed par bya'o/ /nyes pa byung na yang chos bzhin du gso bas nyes pa las gso bar bya'o//byang chub sems dpa'i nyes pa 'di dag thams cad ni nyes byas su bsdu bar rig par bya'o / /nyan thos kyi theg pa'am/ theg pa chen po pa gang yang rung ste/ gang dag gi rnam par rig byed de dag khong du chud cing 'dzin nus pa la bshags par bya'o/ / gal te kun nas dkris pa chen pos byang chub sems dpa' la pham pa'i gnas lta bu'i chos byung bar gyur na des sdom pa btang ba lan gnyis su slar yang mnod par bya'o/ /gal te kun nas dkris pa 'bring gis nyes pa byung ba na ni des gang zag gsum mam/ de yan chad la nyes byas bshags par bya ste/mdun du 'dug nas thog mar dngos po brjod de/ 'di skad ces tshe dang ldan pa dgongs su gsol/ bdag ming 'di zhes bgyi ba la ji skad yongs su brjod pa'i gzhi las byang chub sems dpa'i 'dul ba dang 'gal ba nyes byas kyi nongs pa byung ste zhes brjod la/lhag ma ni dge slong nyes byas 'chags pa ji lta ba de bzhin du brjod par bya'o/ /kun nas dkris pa chung ngus pham pa'i gnas lta bu'i chos byung ba dang / de las gzhan pa'i nyes pa rnams ni gcig gi mdun du bshags par bya bar rig par bya'o/ /gang gi mdun du bshags par bya ba'i gang zag mthun pa med na/byang chub sems dpas bsam pa thag pa nas phyin chad mi bya bar sems bskyed par bya zhing phyin chad kyang bsdam par bya'o/ /de ltar byas na nyes pa de las byung zhes bya'o/ /byang chub sems dpa'i sdom pa yang dag par blang ba de yang gal te yon tan de dag dang ldan pa'i gang zag med par gyur na/byang chub sems dpas de bzhin gshegs pa'i sku gzugs kyi spyan sngar bdag nyid kyis byang chub sems dpa'i tshul khrims kyi sdom pa yang dag par blang bar bya ste/ 'di ltar spyan sngar bla gos phrag pa gcig la gzar nas pus mo g.yas pa'i lha nga sa la btsugs nas sam/ tsog tsog por 'dug kyang rung ste/ 'di skad du bdag ming 'di zhes bgyi ba phyogs bcu'i de bzhin gshegs pa dang sa chen po la zhugs pa'i byang chub sems dpa' thams cad la gsol ba 'tshal te/de dag gi spyan sngar byang chub sems dpa'i bslab pa'i gzhi thams cad dang / byang chub sems dpa'i tshul khrims thams cad de/ sdom pa'i tshul khrims dang / dge ba'i chos sdud pa'i tshul khrims dang / sems can gyi don bya ba'i tshul khrims gang la 'das pa'i byang chub sems dpa' thams cad kyi bslabs pa dang /ma 'ongs pa'i byang chub sems dpa' thams cad slob par 'gyur ba dang / phyogs bcu na da ltar byung ba'i byang chub sems dpa' thams cad da ltar slob pa rnams bdag gis yang dag par blang ngo zhes brjod par bya ste/lan gnyis lan gsum du brjod nas ldang bar bya'o/ /lhag ma thams cad ni snga ma bzhin du rig par bya'o/ /byang chub sems dpa'i nyes pa'i lam la yang nyes pa lhag ma yang med pa ni med de/ bcom ldan 'das kyis byang chub sems dpa'i nyes pa ni phal cher zhe sdang las 'byung gi/'dod chags las byung ba ni ma yin par shes par bya'o zhes gang gsungs pa de la dgongs pa ni 'di yin par blta bar bya ste/ byang chub sems dpa' sems can la rjes su chags shing sems can la byams pa'i dbang du byas nas gang ci spyod kyang rung de dag thams cad ni byang chub sems dpas bya ba yin te/mi bya ba ma yin pa la bya ba'i rigs pa byed pa ni nyes par 'gyur ba mi rigs so/ /byang chub sems dpa' sems can rnams la sdang ba ni bdag dang gzhan rnams la phan par spyod pa ma yin la/de yang byang chub sems dpa'i bya ba ma yin te/ de ltar bya ba ma yin pa byed pa ni nyes par 'gyur bar rigs so/ /byang chub sems dpa'i nyes pa rnams ni chung ngu dang / 'bring dang / chen por rig par bya ste/ 'di lta ste/ gzhi bsdu ba las 'byung ba bzhin no/ /de ltar byang chub sems dpa' rang gi 'dul ba la bslab pa la brtson pa ni phun sum tshogs pa gsum po sbyor ba phun sum tshogs pa dang /bsam pa phun sum tshogs pa dang / sngon gyi rgyu phun sum tshogs pa dang ldan pas bde ba la reg par gnas so/ /de la sbyor ba phun sum tshogs pa gang zhe na/'di ltar byang chub sems dpa' ni tshul khrims dag 'dral bar mi byed cing lus dang ngag dang yid kyis kun tu spyod pa yongs su dag pa dang / nyes pa rgyun du mi byed pa dang / sdig pa 'chags pa yin te/ 'di ni sbyor ba phun sum tshogs pa zhes bya'o/ /bsam pa phun sum tshogs pa gang zhe na/chos kyi bsam pas rab tu byung ba yin gyi/ 'tsho ba'i bsam pas ma yin/ byang chub sems dpa' chen po don du gnyer ba yin gyi/ don du mi gnyer ba ma yin/ dge sbyong gi tshul dang mya ngan las 'das pa don du gnyer ba yin gyi/ don du mi gnyer ba ma yin pa dang /de de ltar don du gnyer bas le los gnas pa ma yin zhing / brtson 'grus mi zhan pa dang / kun nas nyon mongs pa dang / yang 'byung ba pa dang / rims nad dang bcas pa dang / rnam par smin pa sdug bsngal ba dang / phyi ma la skye ba dang / rga shir 'gyur ba'i sdig pa mi dge ba'i chos rnams dang ma 'dres pa ste/de ni bsam pa phun sum tshogs pa zhes bya'o/ /sngon gyi rgyu phun sum tshogs pa gang zhe na/ 'di lta ste/ byang chub sems dpas sngon tshe rabs gzhan dag tu bsod nams byas shing dge ba byas te/ des da ltar bdag nyid kyang gos dang /zas dang / mal cha dang / stan dang / na ba'i gsos sman dang / yo byad rnams kyis phongs par mi 'gyur la/ gzhan dag la yang bgo bsha' byed nus pa ste/ 'di ni byang chub sems dpa'i sngon gyi rgyu phun sum tshogs pa yin par rig par bya ste/ byang chub sems dpa' 'dul ba la bslab pa brtson pa/phun sum tshogs pa gsum po 'di dag dang ldan pa ni bde ba la reg par gnas so/ /de las bzlog pa'i phongs pa gsum dang ldan pa ni sdug bsngal la reg par gnas par rig par bya ste/ 'di ni byang chub sems dpa' khyim pa'i phyogs su gtogs pa dang /rab tu byung ba'i phyogs su gtogs pa thams cad kyi tshul khrims kyi mdo dang rgyas pa zhes bya'o/ /de las gzhan pa dka' ba'i tshul khrims la sogs pa ni tshul khrims thams cad 'di'i rab tu dbye ba yin par rig par bya'o/ /de la byang chub sems dpa'i dka' ba'i tshul khrims gang zhe na/'di ni rnam pa gsum du blta bar bya ste/ byang chub sems dpa' longs spyod che la dbang phyug chen po la dbang byed cing 'dug pa las longs spyod spangs shing / dbang phyug chen po la dbang byed pa spangs nas/ tshul khrims kyi sdom pa yang dag par len pa ni byang chub sems dpa'i dka' ba'i tshul khrims zhes bya'o//byang chub sems dpa' tshul khrims blangs nas nyam thag ste/ srog la thug kyang tshul khrims kyi sdom pa yang dag par blangs pa de nyams par yang mi byed na med par lta ga la byed de/ 'di ni byang chub sems dpa'i dka' ba'i tshul khrims zhes bya ste gnyis pa'o//ji srid 'tsho'i bar du ci nas nyes pa phra rab kyang mi 'byung zhing / tshul khrims la 'khrul pa yang mi 'byung na lci ba lta 'byung bar ga la 'gyur ba de lta de ltar byang chub sems dpa' spyod pa dang gnas pa thams cad yid la byed pa dag la dran pa nye bar gnas shing bag yod pa yin te/'di ni byang chub sems dpa'i dka' ba'i tshul khrims zhes bya ste gsum pa'o/ /de la byang chub sems dpa' thams cad kyi sgo nas tshul khrims gang zhe na/ 'di ni rnam pa bzhir blta bar bya ste/ yang dag par blangs pa dang /rang bzhin gyi tshul khrims dang / goms pa dang / thabs dang ldan pa'o/ /de la yang dag par blangs pa'i tshul khrims ni gang gis byang chub sems dpa'i tshul khrims rnam pa gsum po sdom pa'i tshul khrims dang / dge ba chos sdud pa'i tshul khrims dang / sems can gyi don byed pa'i tshul khrims yang dag par blang bar byas pa yin no//de la rang bzhin gyi tshul khrims ni byang chub sems dpa'i rigs la gnas pa nyid kyi sems kyi rgyud rang bzhin gyis dge ba kho na yin pas/ lus dang ngag gi las yongs su dag par 'jug pa gang yin pa'o/ / de la goms pa'i tshul khrims ni byang chub sems dpa' gang gis sngon gyi tshe rabs gzhan dag tu ji skad bstan pa'i tshul khrims rnam pa gsum char la goms par byas pa yin te/ de sngon gyi rgyu'i stobs bskyed pa des sdig pa kun tu spyod pa la/ thams cad kyi thams cad du mi dga' zhing sdig pa las yid byung la/dge ba kun tu spyod pa la dga' zhing / dge ba kun tu spyod pa kho na 'dod pa'o/ /de la thabs dang ldan pa'i tshul khrims ni 'di yin te/ byang chub sems dpa' bsdu ba'i dngos po bzhi la brten nas/ sems can rnams la lus dang ngag gi las dge ba la 'jug pa gang yin pa'o//de la byang chub sems dpa'i skyes bu dam pa'i tshul khrims gang zhe na/ de ni rnam pa lngar rig par bya ste/ 'di la byang chub sems dpa' bdag nyid kyang tshul khrims dang ldan pa dang / gzhan dag kyang tshul khrims yang dag par len du 'jug pa dang /tshul khrims kyi bsngags pa yang brjod pa dang / chos dang mthun pa mthong na yid dga' bar 'gyur ba dang / nyes pa byung na chos bzhin du phyir du 'chos pa'o/ /de la byang chub sems dpa'i rnam pa thams cad kyi tshul khrims gang zhe na/ de ni rnam pa drug dang / rnam pa bdun te/ gcig tu bsdoms na rnam pa bcu gsum du rig par bya ste/ bslab pa'i gzhi rgya chen po yongs su bzung ba'i phyir / byang chub chen por yongs su bsngos pa'i phyir rgya che ba dang / 'dod pa'i bsod nams dang / bdag nyid dub par byed pa'i mtha' gnyis spangs pa'i phyir kha na ma tho ba med pa dang /rab tu dga' ba'i gnas dang mthun pa dang / ji srid 'tsho'i bar du yang bslab pa 'bul bar mi byed pa'i phyir rtag tu byed pa dang / rnyed pa dang / bkur sti dang / phas kyi rgol ba dang / nyon mongs pa dang / nye ba'i nyon mongs pa rnams kyis zil gyis mi non cing mi 'phrogs pa'i phyir brtan pa dang /tshul khrims kyi rgyan dang ldan pa ste/ tshul khrims kyi rgyan ni 'di lta ste/ nyan thos kyi sa las byung ba bzhin du rig par bya'o/ /srog gcod pa la sogs pa spangs pa'i phyir ldog pa'i tshul khrims dang / dge ba sdud pa dang / sems can gyi don bya ba'i phyir 'jug pa'i tshul khrims dang /'jug pa dang / ldog pa'i tshul khrims rjes su bsrung ba'i phyir kun nas bsrung ba'i tshul khrims dang / skyes bu chen po'i mtshan rnam par smin par byed pa'i tshul khrims dang / lhag pa'i sems rnam par smin par byed pa'i tshul khrims dang /sdug pa'i 'gro ba rnam par smin par byed pa'i tshul khrims dang / sems can gyi don rnam par smin par byed pa'i tshul khrims so/ /de la byang chub sems dpa'i phongs shing 'dod pa'i tshul khrims gang zhe na/ de ni rnam pa brgyad du rig par bya ste/ 'di la byang chub sems dpa' bdag nyid 'di snyam du rjes su sems te/'di ltar bdag ni bdag la su yang gsod pa dang / ma byin par len pa dang / 'dod pa rnams la log par g.yem pa dang / brdzun gyi tshig smra ba dang / phra ma dang / ngag rtsub po dang / tshig 'khyal pa byed pa dang / lag pa dang / bong ba dang / lcag gis bsnun cing rnam par 'tshe ba'i reg pa mi 'dod pa dag kun tu spyod par byed par ma gyur cig snyam du 'dod la bdag de lta bu 'dod bzhin du/ gal te gzhan gyis log pa byas par gyur na/ des bdag phongs par 'gyur zhing de bdag gi yid du mi 'ong bar 'gyur bas na gzhan yang bdag ci lta ba bzhin du gzhan gyis gsad par ma gyur cig ces bya ba nas rgyas par rnam par 'tshe ba'i reg pa dag byed par ma gyur cig snyam du 'dod de/de dag kyang de ltar 'dod bzhin du gal te bdag gis log par kun tu spyad par gyur na/ des de dag phongs par 'gyur zhing de de dag gi yid du mi 'ong bar 'gyur na/de ltar bdag dang gzhan dag gi yid du mi 'ong ba gang yin pa de dag gis gzhan dag la ci'i phyir kun tu spyad par bya snyam du sems te/ byang chub sems dpas de ltar so sor brtags nas srog gi phyir yang gzhan dag la yid du mi 'ong ba rnam pa brgyad po kun tu spyod par mi byed pa ste/'di ni byang chub sems dpa'i phongs shing 'dod pa'i tshul khrims rnam pa brgyad ces bya'o/ /de la byang chub sems dpa'i 'di dang gzhan du bde bar 'gyur ba'i tshul khrims gang zhe na/ de ni rnam pa dgur rig par bya ste/'di la byang chub sems dpa' sems can dgag par bya ba'i gnas su gyur pa rnams ni 'gog par byed/ gnang bar bya ba'i gnas su gyur pa rnams ni gnang bar byed/ sems can bsdu bar bya ba rnams ni sdud par byed/ sems can tshar gcad par bya ba rnams ni tshar gcod par byed cing /de la byang chub sems dpa'i lus dang ngag gi las yongs su dag par 'jug ste/ 'di ni re zhig tshul khrims rnam pa bzhi'o/ /gzhan yang sbyin pa dang ldan pa'i tshul khrims dang / bzod pa dang ldan pa dang / brtson 'grus dang ldan pa dang / bsam gtan dang ldan pa dang /shes rab dang ldan pa dang rnam pa lnga'o/ /de gnyis gcig tu bsdus na tshul khrims rnam pa dgur 'gyur te/ byang chub sems dpa' de dang gzhan dag la tshe 'di dang tshe phyi ma la bde bar 'gyur bas na de'i phyir 'di dang gzhan du bde bar 'gyur ba zhes bya'o/ /de la byang chub sems dpa'i rnam par dag pa'i tshul khrims gang zhe na/de ni rnam pa bcur rig par bya ste/ dge sbyong gi tshul dang / rdzogs pa'i byang chub 'dod pa'i phyir yin gyi/ 'tsho ba 'dod pa'i phyir ma yin pas dang po nyid nas legs par blangs pa dang 'gal ba byas pa la chung ngu 'gyod pa med pa'i phyir ha cang zhum pa ma yin pa dang /gnas ma yin par 'gyod pa med pa'i phyir ha cang thal ba ma yin pa dang / gnyid kyi bde ba dang / glos 'bebs pa'i bde ba dang / nyal ba'i bde ba nyams su mi len pa dang / nyin mtshan du dge ba'i phyogs la mngon par brtson pa'i phyir le lo med pa dang / snga ma bzhin du yan lag lnga'i bag yod pa la brten pas bag yod pas yongs su zin pa dang / rnyed pa dang / bkur sti la zhen pa med pa dang / lha nyid du smon nas tshangs par spyod pa la gnas par khas blangs pa ma yin pa'i phyir smon lam legs par btab pa dang / spyod lam dang / 'phral gyi bya ba dang / dge ba'i phyogs la sbyor ba rnams la lus dang ngag gi kun tu spyod pa shin tu phun sum tshogs shing 'tsham pa'i phyir cho ga phun sum tshogs pas yongs su zin pa dang / tshul 'chos pa la sogs pa log par 'tsho bar byed pa'i nyes pa thams cad rnam par spangs pa'i phyir 'tsho ba phun sum tshogs pas yongs su zin pa dang /'dod pa'i bsod snyoms dang / bdag nyid dub par byed pa'i rjes su sbyor ba rnam par spangs pa'i phyir mtha' gnyis rnam par spangs pa dang / mu stegs can thams cad kyi lta ba rnam par spangs pa'i phyir nges par 'byin pa dang /nyams par mi byed cing med par mi byed pa'i phyir byang chub sems dpa' rnams kyi tshul khrims yang dag par blangs pa yongs su ma nyams pa ste/ byang chub sems dpa' rnams kyi tshul khrims rnam pa bcu po 'di dag ni rnam par dag pa zhes bya'o/ / de ltar na byang chub sems dpa'i tshul khrims kyi phung po chen po 'di ni byang chub chen po'i 'bras bu bskyed pa ste/ 'di la brten na byang chub sems dpa' tshul khrims kyi pha rol tu phyin pa yongs su rdzogs nas/ bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro//ji srid du mngon par rdzogs par sangs ma rgyas pa de srid du/ byang chub sems dpa'i tshul khrims kyi phung po dpag tu med pa 'di la slob pa na phan yon rnam pa lnga 'thob par 'gyur te/ sangs rgyas rnams kyis dgongs par 'gyur ba dang / mchog tu dga' ba chen po la gnas bzhin du 'chi ba'i dus byed par 'gyur ba dang /lus zhig nas kyang gang na de dang tshul khrims mtshungs pa'am/ lhag pa'i byang chub sems dpa' skal ba 'dra zhing chos mthun pa pa dge ba'i bshes gnyen du gyur pa dag gnas pa der skye bar 'gyur ba dang / tshe 'di la tshul khrims kyi pha rol tu phyin pa yongs su rdzogs par byed pa'i bsod nams kyi phung po tshad med pa dang ldan par 'gyur ba dang /tshe phyi ma la yang rang 'khrungs kyi tshul khrims nyid de/ tshul khrims de'i bdag nyid 'thob par 'gyur ro/ /tshul khrims kyi ngo bo nyid la sogs pa rnam pa dgu po ji skad bstan pa'i tshul khrims de thams cad ni sdom pa'i tshul khrims dang dge ba'i chos sdud pa'i tshul khrims dang /sems can gyi don byed pa'i tshul khrims dang / tshul khrims rnam pa gsum gyis bsdus par rig par bya'o/ /tshul khrims rnam pa gsum po de dag kyang mdor bsdu na byang chub sems dpa'i bya ba rnam pa gsum byed de/sdom pa'i tshul khrims ni sems gnas par byed do/ /dge ba'i chos sdud pa ni bdag gi sangs rgyas kyi chos yongs su smin par byed do/ /sems can gyi don byed pa'i tshul khrims ni sems can yongs su smin par byed do/ / byang chub sems dpa'i bya ba thams cad ni 'di dag tu zad de/ 'di lta ste/ tshe 'di la bde bar gnas par bya ba'i phyir/ sems gnas pa dang / lus dang sems dub pa med par sangs rgyas kyi chos yongs su smin par bya ba dang / sems can yongs su smin par bya ba yin te/ byang chub sems dpa'i tshul khrims ni de dag tu zad do//byang chub sems dpa'i tshul khrims kyi phan yon kyang de dag tu zad do/ /byang chub sems dpa'i tshul khrims kyi bya ba yang de dag tu zad do/ /de las gong na yang med do/ /de las lhag pa yang med do/ /de la ni 'das pa'i byang chub sems dpa' byang chub chen po 'dod pa rnams kyis kyang bslabs so//ma 'ongs pa rnams kyang bslab par 'gyur ro/ /da ltar phyogs bcu'i 'jig rten gyi khams mtha' yas mu med pa na gnas pa dag kyang bslab po/ /byang chub sems dpa'i sa'i gzhi'i rnal 'byor gyi gnas las tshul khrims kyi le'u ste bcu pa'o// //bam po bcu gcig pa/ sdom ni 'di lta ste/ snga ma tshul khrims kyi le'u bzhin du rig par bya'o/ /de la byang chub sems dpa'i bzod pa'i ngo bo nyid gang zhe na/ so sor brtags pa'i stobs la brten nas sam/ yang na rang bzhin gyis gzhan gnod par byed pa la ji mi snyam pa dang /thams cad kyi ji mi snyam pa dang / thams cad la ji mi snyam pa dang / zang zing med pa'i sems dang / snying rje 'ba' zhig gis ji mi snyam pa gang yin pa 'di ni mdor bsdu na byang chub sems dpa'i bzod pa'i ngo bo nyid yin par rig par bya'o/ / de la byang chub sems dpa'i bzod pa thams cad gang zhe na/ de ni rnam pa gnyis su blta bar bya ste/ khyim pa'i phyogs la brten pa dang / rab tu byung ba'i phyogs la brten pa'o/ /phyogs de gnyis la brten pa de yang rnam pa gsum du rig par bya ste/ gzhan gnod pa byed pa la ji mi snyam pa'i bzod pa dang /sdug bsngal dang du len pa'i bzod pa dang / chos la nges par sems pa la mos pa'i bzod pa'o/ /de la ji ltar na byang chub sems dpa' gzhan gnod pa byed pa la ji mi snyam par bzod par byed ce na/ 'di la byang chub sems dpa' ni gzhan gnod pa byed pa las byung ba'i sdug bsngal drag pa rgyun mi 'chad pa sna tshogs yun ring ba mngon du byung na 'di ltar yang dag par slob ste/'di ni rang gi las kyi le lan yin te/ des na bdag rang gis byas pa'i mi dge ba'i las kyi sdug bsngal gyi 'bras bu 'di 'dra ba nyams su myong la/bdag ni sdug bsngal mi bzod de/ mi bzod pa 'di ni phyi ma la yang sdug bsngal gyi rgyu'i gnas su 'gyur la/ bdag gi sdug bsngal gyi rgyur gyur pa'i chos de yang dag par blangs te/ 'dug na ni bdag nyid la mi sdug pa gang yin pa de la bdag nyid kyis bdag nyid sbyor bar byed par nges so//de'i phyir bdag nyid kyis bdag nyid la gnod pa byas par 'gyur te/ gzhan dag la ni de lta ma yin no/ /bdag dang gzhan gyi sems kyi rgyud la yod pa'i 'du byed 'di dag thams cad ni ngo bo nyid kyis kyang sdug bsngal ba'i rang bzhin yin te/ gzhan dag gis ni de ma shes pas bdag rang bzhin gyis sdug bsngal ba la yang sdug bsngal bskyed na bdag shes bzhin du bdag gis kyang gzhan rang bzhin gyis sdug bsngal ba rnams la yang sdug bsngal bskyed pa ni cha ma yin no//gcig tu na nyan thos bdag nyid kyi don la zhugs pa rnams la yang bdag dang gzhan dag gi sdug bsngal bskyed pa mi bzod pa rigs pa'i tshul ma yin na/gzhan gyi don la zhugs pa bdag la lta ci smos snyam du de ltar so sor brtags nas/ byang chub sems dpa' de 'du shes rnam pa lnga sgom zhing sems can mdza' bo dang / mi mdza' ba dang / tha mal pa rnams dang /dma' ba dang mtshungs pa dang / khyad par du 'phags pa rnams dang / skyid pa dang / sdug pa rnams dang / yon tan dang / skyon dang ldan pa rnams la gnod pa thams cad bzod par byed do/ /'du shes lnga gang zhe na/ sngon gyi tshe rabs su snying du sdug par gyur pa'i 'du shes dang /chos tsam gyi rjes su 'brang ba'i 'du shes dang / mi rtag pa'i 'du shes dang / sdug bsngal ba'i 'du shes dang / yongs su bzung ba'i 'du shes so/ /byang chub sems dpa' sems can gnod pa byed pa rnams la snying du sdug pa'i 'du shes ji ltar sgom zhe na/ 'di la byang chub sems dpa' ni 'di ltar yang dag par bslab ste/dus ring po 'das pa sngon gyi tshe rabs gzhan dag tu sems can gang bdag gi pha'am ma'am spun nam/ sring mo'am/ slob dpon nam/ mkhan po 'am/ bla ma'am/ bla ma lta bur ma gyur pa ni tshul gyis rnyed par dka'o snyam du de de ltar tshul bzhin yid la byed pas sems can gnod pa byed pa rnams la dgra'i 'du shes ni med par 'gyur la snying du sdug pa'i 'du shes ni gnas par 'gyur te/de snying du sdug pa'i 'du shes de la brten nas/ gnod pa la ji mi snyam par byed/ bzod par byed do/ / byang chub sems dpa' sems can gnod par byed pa rnams la chos tsam du rjes su 'brang ba'i 'du shes ji ltar sgom zhe na/ 'di la byang chub sems dpa' ni 'di ltar yang dag par slob ste/ 'di ni rkyen la rag las pa dang / 'du byed tsam dang / chos tsam du zad de/ 'di la ni gshe bar byed pa'am/khro bar byed pa'am/ rdeg par byed pa'am/ mtshang 'dru bar byed pa'am/ brgyad bkag byed pa gang yin pa de dang / gshe bar bya ba'am / khro bar bya ba'am/ brdeg par bya ba'am/ mtshang 'dru bar bya ba'am/ brgyad bkag bya ba gang yin pa'i bdag gam/ sems can nam/srog gam/ skye ba po ci yang med do snyam du de ltar tshul bzhin yid la byed pas sems can du 'du shes pa ni med par 'gyur la chos tsam du 'du shes pa ni gnas par 'gyur te/ de chos tsam du 'du shes pa de la brten cing gnas nas/ gzhan gyi gnod pa thams cad la ji mi snyam par byed/bzod par byed do/ /byang chub sems dpa' sems can gnod pa byed pa rnams la mi rtag pa'i 'du shes ji ltar sgom zhe na/ 'di la byang chub sems dpa' ni 'di ltar yang dag par slob ste/ sems can skye zhing 'byung ba gang dag su yang rung ba de dag thams cad ni mi rtag pa dang 'chi ba'i chos can yin la gnod pa'i mchog ni 'di lta ste/srog dang bral bar byed pa 'di yin pas na/ de ltar sems can rang bzhin gyis 'chi ba'i chos can mi rtag pa rnams la skyes bu mkhas pa rnyog pa'i sems bskyed pa yang ma yin na/ lag pa'am/bong ba'am/ dbyug pas bsnun pa lta ci smos te/ gtan du gsad pa lta ci zhig smos snyam nas de de ltar tshul bzhin yid la byed pas rtag pa dang snying por 'du shes pa ni spong la/ mi rtag pa dang snying po med pa'i 'du shes ni gnas par 'gyur te/ de mi rtag pa'i 'du shes de la brten nas/gnod pa thams cad la ji mi snyam par byed bzod par byed do/ /byang chub sems dpa' sems can gnod par byed pa rnams la sdug bsngal ba'i 'du shes ji ltar sgom zhe na/ 'di la byang chub sems dpas ni sems can gang dag phun sum tshogs pa chen po la gnas pa de dag kyang sdug bsngal gsum po 'du byed kyi sdug bsngal dang /'gyur ba'i sdug bsngal dang / sdug bsngal gyi sdug bsngal dang 'brel par mthong na rgud pa la gnas pa rnams lta ci smos te/ des de ltar mthong ba na 'di ltar yang dag par slob ste / de ltar rtag tu sems can sdug bsngal ba dang ldan pa rnams kyi sdug bsngal bsal ba'i phyir /bdag gis btsal bar bya'i sdug bsngal bsgrub pa'i phyir ni mi bya'o snyam ste/ de de ltar tshul bzhin yid la byed pas bde ba'i 'du shes ni med par 'gyur zhing / sdug bsngal gyi 'du shes 'byung bar 'gyur te/ de sdug bsngal ba'i 'du shes de la brten nas/gzhan gnod pa byed pa thams cad la ji mi snyam par byed/ bzod par byed do/ /byang chub sems dpa' sems can gnod pa byed pa rnams la yongs su bzung ba'i 'du shes ji ltar sgom zhe na/ 'di la byang chub sems dpa' ni 'di ltar yang dag par slob ste/ bdag gis byang chub tu sems bskyed pa na/ sems can thams cad kyi don bdag gis bya'o zhes sems can thams cad chung ma'i tshul du bzung ste/ bdag gis 'di ltar sems can thams cad nye bar bzung nas/ de dag gi don bya'o zhes byas pa las gnod pa byed cing / gnod pa byed pa las ji mi snyam par mi byed pa 'di ni bdag gi cha ma yin no snyam ste/de de ltar tshul bzhin yid la byed pas/ sems can gnod pa byed pa rnams la gzhan yin no snyam pa'i 'du shes ni med par 'gyur zhing / yongs su bzung ba'i 'du shes ni gnas par 'gyur te/ de yongs su bzung ba'i 'du shes de la brten nas gzhan gnod par byed pa thams cad la/ji mi snyam par byed bzod par byed do/ /de la bzod pa gang zhe na/ mi 'khrugs pa dang / phyir gnod pa mi byed pa dang / sems la yang kho na du mi 'dzin pa gang yin pa de ni bzod pa zhes bya'o / /de la byang chub sems dpa'i sdug bsngal dang du len pa'i bzod pa gang zhe na/'di la byang chub sems dpa' ni 'di ltar yang dag par slob ste/ bdag sngon 'dod pa spyod pa dag la gnas shing 'dod pa rnams yongs su tshol ba na/ sdug bsngal gyi rgyu yin par tshor bzhin du/ 'dod pa sdug bsngal gyi rang bzhin can rnams kyi phyir/zhing las dang / tshong dang / rgyal po la zho shas 'tsho ba la zhugs nas/ sdug bsngal mang po drag po dag nyams su blangs shing dang du blangs la nyams su myong ba de de ltar don med de/ sdug bsngal kho na'i phyir tshor bzhin du mi shes pa'i nyes pas bdag gis sdug bsngal chen po nyams su blangs nas /da ni bdag bde bsgrub pa'i dge ba la zhugs par tshor bzhin du de las bye ba phrag 'bum 'gyur du sdug bsngal dang du blang zhing nyams su blangs pa ni cha yin na/ de bas chung ngu lta la ci smos snyam ste / byang chub sems dpa' byang chub la zhugs pa de ltar tshul bzhin yid la byed cing /gzhi thams cad las byung ba'i sdug bsngal dang du len par byed do/ /gzhi thams cad las byung ba'i sdug bsngal gang zhe na/ de ni mdor bsdu na rnam pa brgyad du rig par bya ste/ gnas la brten pa dang /'jig rten gyi chos la brten pa dang / spyod lam la brten pa dang / chos yongs su 'dzin pa la brten pa dang / slong mos yongs su 'tsho ba la brten pa dang / mngon par brtson pas dub pa la brten pa dang / sems can gyi don byed pa la brten pa dang / 'phral gyi bya ba la brten pa'o/ /gnas ni gzhi ste/ gang la brten nas legs par gsungs pa'i chos 'dul ba las rab tu byung zhing bsnyen par rdzogs te/ dge slong gi dngos por 'gyur ba 'di lta ste/ chos gos dang / bsod snyoms dang / mal cha dang / stan dang / na ba'i gsos sman dang yo byad rnams te/de dag ngan pa dang / nyung ba dang / ma gus pa dang / brgyangs pas thob par byang chub sems dpa' mi dga' bar mi 'gyur/ yongs su yi chad par mi 'gyur la/ gzhi des brtson 'grus kyang gtong bar mi byed pa ste/ de ltar gnas kyi rten gyi sdug bsngal dang du len par byed do//'jig rten gyi chos ni dgu ste/ ma rnyed pa dang / mi snyan pa dang / smad pa dang / sdug bsngal ba dang / 'jig pa'i chos can 'jig pa dang / zad pa'i chos can zad pa dang / rga ba'i chos can rga ba dang / na ba'i chos can na ba dang / 'chi ba'i chos can 'chi ba ste/ 'jig rten gyi chos 'di dag mtha' dag gam/ so sor 'ong zhing mngon du gyur pa las sdug bsngal 'byung ba gang yin pa de ni 'jig rten gyi chos la brten pa zhes bya ste/ byang chub sems dpa' ni des thebs kyang gzhi des brtson 'grus gtong bar mi byed /so sor brtags nas nyams su len cing dang du len par byed do/ /spyod lam ni bzhi ste/ 'chag pa dang / 'greng ba dang / 'dug pa dang / nyal ba'o/ /de la byang chub sems dpa' ni 'chag pa dang / 'dug pa gnyis kyis bsgribs pa'i chos rnams las nyin mtshan du sems yongs su sbyong bar byed de/gzhi de las ngal ba'i sdug bsngal byung ba dang du len par byed kyi dus ma yin par khri'am/ khri'u 'am/ rtswa bting ba'am/ lo ma bting ba la glos 'bebs par mi byed do/ /chos yongs su 'dzin pa ni rnam pa bdun te/ dkon mchog gsum la mchod pa dang / rim gro bya ba dang / bla ma la mchod pa bya ba dang / rim gro bya ba dang / chos rnams bzung ba dang / bzung ba rnams gzhan dag la rgya cher ston pa dang / gsang bstod de kha ton du bya ba dang / gcig pu dben par gnas te/ yang dag par sems shing 'jal la nye bar rtog pa dang / rnal 'byor yid la byed pas zin pa'i zhi gnas dang lhag mthong bsgom pa'o//chos yongs su 'dzin pa rnam pa bdun po 'di dag la byang chub sems dpa' rtsol ba na/ sdug bsngal ba gang yin pa de yang dang du len cing / gzhi des brtson 'grus gtong bar mi byed do/ /slong mos 'tsho ba yang rnam pa bdun du rig par bya ste/khyim pa'i mtshan ma spangs pa'i phyir/ skra dang kha spu bregs pa la sogs pas gzugs mi sdug pa nyams su blangs pa dang / gos dras pa dang / kha dog ngan pa 'chang ba'i phyir kha dog ngan pa nyams su blangs pa dang / 'jig rten pa'i spyod pa thams cad la gdams nas gnas pa'i phyir tshul gzhan bya ba dang /zhing las la sogs pa'i las kyi mtha' rnam par spangs te/ gzhan las rnyed pas 'tsho bar bya ba'i phyir gzhan la rag las pa'i 'tsho ba can dang / rnyed pa rnams sogs shing longs spyod par mi byed pa'i phyir ji srid 'tsho'i bar du gzhan la chos gos la sogs pa 'tshol ba dang /mi tshangs par spyod pa 'khrig pa'i chos spangs pa'i phyir ji srid 'tsho'i bar du mi'i 'dod pa rnams las ldog par bya ba dang / zlos gar dang / gar thabs dang / bzhad gad dang / sgeg pa la sogs pa lta ba spangs shing / mdza' bo dang / snying du sdug pa dang / chung po grogs dag dang / bgad pa dang / rtses pa dang / dga' ba dang / dga' dgur spyod pa spangs pa'i phyir/ ji srid 'tsho'i bar du mi'i dga' ba dang rtsed mo rnams las ldog par bya ba ste/ de lta bu nyam nga ba dang / gnod pa'i slong mo spyod pa la brten nas/sdug bsngal byung ba de yang byang chub sems dpa' dang du len par byed la/ gzhi des brtson 'grus gtong bar mi byed do/ /byang chub sems dpa' dge ba'i phyogs la mngon par brtson pa la lus kyi dub pa dang / sems kyi 'khrugs pa yongs su ngal ba'i gzhi las gang dag byung yang byang chub sems dpa' gzhi des brtson 'grus gtong bar mi byed do//sems can gyi don gyi las ni snga ma bzhin du rnam pa bcu gcig tu rig par bya ste/ byang chub sems dpa' ni gzhi des sdug bsngal byung ba yang dang du len par byed la/ gzhi des brtson 'grus gtong bar mi byed do/ /'phral gyi bya ba ni rab tu byung ba'i chos gos dang / lhung bzed kyi las la sogs pa'o/ /khyim pa'i ni yang dag pa'i zhing las dang / tshong bya ba dang / rgyal po la zho shas 'tsho ba la sogs pa ste/ byang chub sems dpa' ni gzhi de las byung ba'i sdug bsngal yang dang du len par byed la/gzhi des brtson 'grus kyang gtong bar mi byed do/ /byang chub sems dpa' ni sdug bsngal gang yang rung bas thabs kyang bla na med pa yang dag par rdzogs pa'i byang chub la 'jug pa kho nar byed kyi/ mi 'jug par ni mi byed la/ zhugs nas kyang ldog par mi byed cing / yid mi dga' ba med la/ kun nas nyon mongs pa can ma yin pa'i sems kyis 'jug pa 'di ni de'i sdug bsngal dang du len pa'i bzod pa zhes bya'o/ /de la byang chub sems dpa'i chos la nges par sems pa la mos pa'i bzod pa gang zhe na/ 'di la byang chub sems dpa' ni yang dag pa'i chos rab tu rnam par 'byed pa shin tu brtags pa'i blos mos pa'i gnas rnam pa brgyad po dkon mchog gi yon tan rnams dang /de kho na'i don dang / sangs rgyas dang / byang chub sems dpa' rnams kyi mthu chen po dang / rgyu dang 'bras bu dang / bdag gis thob par bya ba'i don dang / des thob pa'i thabs dang / shes bya'i spyod yul la mos pa shin tu gnas pa yin no/ /mos pa de yang rgyu gnyis kyis legs par gnas pa yin te/ yun ring po nas goms pa dang / shes pa shin tu rnam par dag pa yang dag par thob pas so//'di ni byang chub sems dpa' rnams kyi phyogs rnam pa gnyis la brten pa'i bzod pa thams cad de/ de la brten nas byang chub sems dpa' rnams kyi dka' ba'i bzod pa la sogs pa rgyas par dbye bar rig par bya'o/ /de la byang chub sems dpa'i dka' ba'i bzod pa gang zhe na/de ni rnam pa gsum du blta bar bya ste/ 'di la byang chub sems dpa' sems can nyam chung ba rnams kyis gnod pa byas pa bzod par byed pa 'di ni dka' ba'i bzod pa dang po'o/ /rje dpon du gyur pa la bdag nyid bzod par byed pa 'di ni dka' ba'i bzod pa gnyis pa'o/ / sems can rigs dang rus ches dma' ba dag gis gnod pa mchog tu chen po byas pa bzod pa 'di ni dka' ba'i bzod pa gsum pa'o/ /de la byang chub sems dpa'i thams cad kyi sgo nas bzod pa gang zhe na/ de ni rnam pa bzhir blta bar bya ste/ 'di la byang chub sems dpa' ni mdza' bo dang /mi mdza' ba dang / tha mal pa dang / gsum char gyis dma' ba dang / mtshungs pa dang / lhag pa rnams kyis gnod pa byas pa bzod pa'o/ /de la byang chub sems dpa'i skyes bu dam pa'i bzod pa gang zhe na/ de ni rnam pa lngar blta bar bya ste/ 'di la byang chub sems dpa' ni thog ma kho nar bzod pa la phan yon du lta ba yin te/gang zag bzod pa can ni phyi ma la yang dgra mang bar mi 'gyur ba dang / dbye ba mang bar mi 'gyur ba dang / bde ba dang yid bde ba mang bar 'gyur ba dang / 'gyod pa med par 'chi ba'i dus byed par 'gyur ba dang / lus zhig kyang bde 'gro mtho ris kyi 'jig rten du lha rnams kyi nang du skye bar 'gyur ro snyam ste/de de ltar phan yon du lta bas bdag nyid kyis kyang bzod cing / gzhan yang bzod pa yang dag par 'dzin du 'jug la / bzod pa'i bsngags pa yang brjod cing / gang zag bzod pa can mthong na yang yid dga' zhing kun tu dga' bar 'gyur ba yin no//de la byang chub sems dpa'i rnam pa thams cad kyi bzod pa gang zhe na/ de ni rnam pa drug dang rnam pa bdun te/ gcig tu bsdus na rnam pa bcu gsum du yod par rig par bya ste/ 'di la byang chub sems dpa' ni mi bzod pa mi sdug pa'i rnam par smin par 'gyur bar rig pas 'jig pa las kyang bzod pa dang /sems can rnams la snying brtse ba'i sems dang / snying rje ba'i sems dang / gnyen po'i sems kyi byams pas kyang bzod pa dang / bla na med pa yang dag par rdzogs pa'i byang chub la 'dun pa drag po dang ldan pas bzod pa'i pha rol tu phyin pa yongs su rdzogs par byed par 'dod pas byed rgyu'i rgyus kyang bzod pa dang /bcom ldan 'das kyis rab tu byung ba rnams ni bzod pa'i stobs can yin no zhes gsungs pas rnam grangs des kyang tshul khrims yang dag par blangs shing rab tu byung ba la bzod pa med pa ni rigs pa'i tshul ma yin pas chos yang dag par blangs pas kyang bzod pa dang /rigs phun sum tshogs pa dang / sngon bzod pa goms par byas pa la gnas shing 'dug pas/ rang bzhin gyis kyang bzod pa dang / chos thams cad la sems can med par rig nas brjod du med pa'i chos tsam du mthong bas chos la nges par sems pas kyang bzod pa dang /gnod par byed pa thams cad kyang bzod pa dang / thams cad kyis kyang bzod pa dang / yul thams cad de lkog gam skye bo mang po sngar yang bzod pa dang / dus thams cad de snga dro dang /nyi ma'i gung dang / nyi ma phyed dang / mtshan mo dang / nyin mo dang / 'das pa dang / ma 'ongs pa dang / da ltar byung ba na bzod pa dang / na ba dang / tha mal pa dang / rgud pa dang / dar ba'i tshe yang bzod pa dang / snun par mi byed pa'i phyir lus kyis bzod pa dang / yid du mi 'ong ba'i tshig mi 'byin pa'i ngag gis kyang bzod pa dang /mi 'khrugs pa dang / bsam pa rnyog pa can mi 'dzin pa'i phyir yid kyis kyang bzod pa'o/ /de la byang chub sems dpa' phongs shing 'dod pa'i bzod pa gang zhe na/ de ni rnam pa brgyad du blta bar bya ste/ 'di la byang chub sems dpa' ni slong ba po sdug bsngal ba rnams las slong ba'i gnod pa bzod pa dang /sems can ma rungs pa sdig pa chen po'i las byed pa rnams la chos kyi snying rje chen po la brten nas/ kun nas mnar sems mi byed pa'i bzod pa dang / rab tu byung ba tshul khrims 'chal pa rnams la chos kyi snying rje chen po la brten nas/kun nas mnar sems mi byed pa'i bzod pa dang / btsal ba rnam pa lnga mi brjed pa'i bzod pa ste/ sems can sdug bsngal ba rnams kyi sdug bsngal bsal ba'i phyir 'bad pa dang / chos rnams yongs su btsal ba dang / chos kyi rjes su mthun pa'i chos sgrub pa dang /chos de dag nyid gzhan dag la rgya cher bstan pa dang / sems can gyi don byed pa rnams dang / sems can gyi bya ba rnams la yang dag pa'i grogs su 'gro ba'i btsal ba la mi brjed pa gang yin pa de ni phongs shing 'dod pa'i bzod pa rnam pa brgyad ces bya ste/ sems can rnams gang gis phongs par 'gyur ba de ni bzod pas yongs su spong bar byed la/gang 'dod pa de ni sgrub par byed pa'i phyir ro/ /de la byang chub sems dpa' 'di dang gzhan du bde bar 'gyur ba'i bzod pa gang zhe na/ de ni rnam pa dgur blta bar bya ste / 'di la byang chub sems dpa' bag yod par dge ba'i chos rnams la gnas pa na sems can rnams la snying brtse ba nyid gtso bor byas te/grang ba dang / tsha ba dang / bkres pa dang / skom pa dang / sbrang bus zin pa dang / sha sbrang gis zin pa dang / rlung dang / nyi tshan dang / sdig sbrul gyis zin pa rnams bzod pa dang / ngal ba las byung ba'i lus dang sems dub pa dang / 'khrug pa bzod pa dang / 'khor ba na yod pa'i skye ba dang / rga ba dang na ba dang / 'chi ba la sogs pa'i sdug bsngal rnams bzod pa ste/ de ltar bzod pa'i byang chub sems dpa' ni sdig pa mi dge ba'i chos rnams dang mi 'dre bar bdag nyid kyang tshe 'di la bde ba la reg par gnas shing tshe phyi ma la yang bde ba'i rgyu yang dag par blangs te 'dug la gzhan dag kyang tshe 'di dang /tshe phyi ma la bde bar bya ba'i phyir zhugs pa yin te/ de bas na 'di ni 'di dang gzhan du bde bar 'gyur ba'i bzod pa zhes bya'o/ /de la byang chub sems dpa'i rnam par dag pa'i bzod pa gang zhe na/de ni rnam pa bcur blta bar bya ste/ 'di la byang chub sems dpa' ni gzhan dag gis gnod pa dang / phongs pa dang / 'gal bar byas pa na phyir gnod par yang mi byed pa dang / yid 'khrug par yang mi 'gyur ba dang / dgar bsam par yang mi 'dzin pa dang /sngar ji lta ba bzhin du phyis kyang phan gdags pa'i phyir brtson par byed cing / phan 'dogs pa'i bya ba byed pa la gnod par mi byed pa dang / gnod pa byed pa rnams la yang bdag nyid kyis shad kyis byang bar byed pa dang / mi dga' bar byas na yang mi dga' bar gyur kyang rung zhes gzhan dag la 'chags su mi gzhug pa dang /de nyid rkyen du byas nas mi bzod pa las brtsams te/ shas cher ngo tsha ba shes pa dang / khrel yod pa dang ldan pa dang / bzod pa las brtsams te ston pa la shas cher sdug par 'dzin cing gus pa dang ldan pa dang / sems can la rnam par tho mi 'tshams pa las brtsams te /sems can rnams la shas cher snying rje ba'i bsam pa dang ldan pa dang / yang na mi bzod pa'i chos kyi grogs dang bcas pa thams cad kyi thams cad du spangs pas 'dod pa'i 'dod chags dang bral ba ste/ rnam pa bcu po de dag gis byang chub sems dpa'i bzod pa rnam par dag cing dri ma med par rig par bya'o//bzod pa'i ngo bo nyid la sogs pa rnam par dag pa'i bzod pa la thug pa'i bzod pa rgya che zhing tshad med la byang chub chen po'i 'bras bu 'byung ba 'di dag la brten na byang chub sems dpa' bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro// byang chub sems dpa'i sa'i gzhi'i rnal 'byor gyi gnas las bzod pa'i le'u ste bcu gcig pa'o// //sdom ni/ snga ma bzhin du rig par bya'o/ /de la byang chub sems dpa'i brtson 'grus kyi ngo bo nyid gang zhe na/dge ba'i chos dpag tu med pa bsdu ba dang / sems can gyi don bya ba'i phyir/ byang chub sems dpa'i sems mngon par spro ba sbyangs pa bar chad med pa phyin ci ma log pa dang / de las byung ba'i lus dang ngag dang / yid kyi yongs su g.yo ba gang yin pa ste/'di ni byang chub sems dpa'i brtson 'grus kyi ngo bo nyid du rig par bya'o/ /de la byang chub sems dpa'i brtson 'grus thams cad gang zhe na/ de ni mdor bsdu na rnam pa gnyis su rig par bya'o/ /khyim pa'i phyogs la brten pa dang / rab tu byung ba'i phyogs la brten pa'o/ / phyogs gnyis la brten pa de yang rnam pa gsum du rig par bya ste/ go cha'i brtson 'grus dang / dge ba'i phyogs kyi chos sdud pa dang / sems can gyi don bya ba'o/ /de la byang chub sems dpa'i go cha'i brtson 'grus ni 'di yin te/ 'di la byang chub sems dpa' ni brtson 'grus rtsom pa la sbyor ba'i snga rol nas/sems kyi mngon par spro ba sngon du 'gro ba'i go cha 'di ltar gyon par byed de/ bdag ni gal te sems can gcig sdug bsngal las thar bar bya ba'i phyir yang / nyin mtshan bskal pa chen po stong dang mnyam pa dag gi 'gro ba gzhan du mi gnas par sems can dmyal ba kho nar gnas pas dus ji srid cig gis byang chub sems dpa' rnams bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ba'i dus de nyid bye ba phrag 'bum 'gyur srid kyis bdag gis bla na med pa yang dag par rdzogs pa'i byang chub thob par 'gyur ba lta na yang bdag spro bar byed de/bla na med pa yang dag par rdzogs pa'i byang chub kyi phyir mi brtson par mi byed la/ brtson 'grus la zhugs pa la yang 'dor bar mi byed na/ dus kyi yun ches thung ba dang / sdug bsngal ches thung bas lta la ci smos snyam pa de lta bu ni byang chub sems dpa'i go cha'i brtson 'grus yin te/byang chub sems dpa' gang byang chub sems dpa' rnams kyi go cha'i brtson 'grus de lta bu la mos pa tsam dang / dang ba tsam skyes pa'i byang chub sems dpa' de yang brtan po yin te/ byang chub kyi phyir brtson 'grus rtsom pa dpag tu med pa'i rgyu yongs su brtas par byed pa yin na/byang chub sems dpa' gang go cha'i brtson 'grus de lta bu nyid dang ldan pa lta ci smos/ byang chub sems dpa' de la ni byang chub kyi don dang / sems can rnams kyi don gyi phyir/ las gang la byang chub sems dpa' de'i sems zhum par 'gyur ba'am/ dka' ba bya dgos pa'i bya dka' ba ci yang med do//de la byang chub sems dpa' rnams kyi dge ba'i chos sdud pa'i brtson 'grus gang zhe na/ brtson 'grus gang sbyin pa'i pha rol tu phyin pa yang dag par 'grub par bya ba'i phyir sbyin pa'i pha rol tu phyin pa la sbyor bar byed pa dang / brtson 'grus gang shes rab kyi bar du yang dag par 'grub par bya ba'i phyir tshul khrims dang /bzod pa dang / brtson 'grus dang / bsam gtan dang / shes rab kyi pha rol tu phyin pa la sbyor bar byed pa'o / /de yang mdor bsdu na rnam pa bdun du rig par bya ste/ rtog pa dang / rnam par rtog pa dang / nyon mongs pa dang /nye ba'i nyon mongs pa dang / phas kyi rgol ba dang / sdug bsngal gyi gnod pa thams cad kyis mi g.yos pa'i phyir mi g.yo ba dang / gus par sbyor ba can yin pa'i phyir brtan pa dang / rig pa'i gnas thams cad yang dag par 'grub par nye bar gnas pa'i phyir dpag tu med pa dang /thob par bya ba'i don gyi lam phyin ci ma log pa dang ldan pa'i phyir dang / mnyam pa nyid khong du chud par bya ba'i phyir thabs dang ldan pa dang / thob par bya ba'i don dang ldan pa thob par smon pa'i phyir yang dag pa'i brtson 'grus dang / rtag tu sbyor ba can yin pa'i phyir rgyas pa dang /brtson 'grus rtsom pa des mtho bar sems pa med pa'i phyir nga rgyal med pa ste/ rnam pa bdun po de dag gis byang chub sems dpa' rnams kyi dge ba'i chos sdud pa'i brtson 'grus rtsom par sbyor ba ni myur du pha rol tu phyin pa yongs su rdzogs par byed cing / bla na med pa yang dag par rdzogs pa'i byang chub thob par byed do//gang gi phyir byang chub sems dpa'i dge ba'i chos rnams de ltar yang dag par 'grub par bya ba'i rgyu'i gtso bo dang mchog ni brtson 'grus kho na yin gyi gzhan ni de ltar ma yin pa de'i phyir/ brtson 'grus ni bla na med pa yang dag par rdzogs pa'i byang chub thob par byed pa'o zhes de bzhin gshegs pa rnams kyis bstan pas ston par mdzad do//byang chub sems dpa' rnams kyi sems can gyi don bya ba'i brtson 'grus ni 'di lta ste/ tshul khrims kyi le'u las 'byung ba bzhin du rnam pa bcu gcig tu rig par bya ste/ der tshul khrims zhes brjod pa gang yin pa de 'dir brtson 'grus zhes brjod par bya ste/bye brag ni de yod do / /de la byang chub sems dpa'i dka' ba'i brtson 'grus gang zhe na/ de ni rnam pa gsum du blta bar bya ste/ 'di ltar byang chub sems dpa' ni gos kyi 'du shes dang / zas kyi 'du shes dang / mal cha dang / stan gyi 'du shes dang / bdag tu 'du shes kyang mi byed par dge ba'i chos rnams sgom pa la rtag tu rgyun mi 'chad par zhugs pa yin te/ de ni byang chub sems dpa'i dka' ba'i brtson 'grus dang po'o/ /yang byang chub sems dpa' ni ris mthun pa ma dor gyi bar du dus thams cad du brtson 'grus rtsom pa de lta bu des zhugs pa yin te/de ni byang chub sems dpa'i dka' ba'i brtson 'grus gnyis pa'o/ /yang byang chub sems dpa' ni mnyam pa nyid khong du chud pa'i yon tan dang ldan pa/ ha cang zhum pa yang ma yin/ ha cang brtun ngas pa yang ma yin la/ phyin ci ma log cing don dang ldan pa'i brtson 'grus dang ldan pa yin te/de ni byang chub sems dpa'i dka' ba'i brtson 'grus gsum pa yin par rig par bya'o/ /byang chub sems dpa' rnams kyi dka' ba'i brtson 'grus 'di sdud pa'i rgyu ni stobs dang / sems can rnams la snying rje ba dang / shes rab yin par rig par bya'o//de la byang chub sems dpa' rnams kyi thams cad kyi sgo nas brtson 'grus gang zhe na/ 'di ni rnam pa bzhir blta bar bya ste/ nyon mongs pa can gyi chos rnam par spong bar byed pa dang / dkar po'i chos sgrub par byed pa dang / las yongs su dag par byed pa dang / shes rab rnam par 'phel bar byed pa'o/ /de la byang chub sems dpa'i brtson 'grus nyon mongs pa can gyi chos rnam par spong bar byed pa ni kun tu sbyor ba dang / 'ching ba dang / bag la nyal ba dang / nye ba'i nyon mongs pa dang / kun nas dkris pa ma skyes pa rnams mi skye bar byed pa dang /skyes pa rnams spong bar byed pa'o/ /de la byang chub sems dpa'i brtson 'grus dkar po'i chos sgrub par byed pa ni dge ba'i chos ma skyes pa rnams bskyed pa'i brtson 'grus gang yin pa dang / skyes pa rnams gnas par byed pa dang / mi nyams par byed pa dang / 'phel zhing rgyas par byed pa'i brtson 'grus gang yin pa'o//de la byang chub sems dpa'i brtson 'grus las yongs su dag par byed pa ni las rnam pa gsum po lus kyi las dang / ngag gi las dang / yid kyi las dge ba rnam par dag par byed pa dang / sdud par byed pa gang yin pa'o/ /de la byang chub sems dpa'i brtson 'grus shes pa rnam par 'phel bar byed pa ni thos pa dang /bsam pa dang / bsgom pa las byung ba'i shes rab yang dag par 'grub pa dang / rnam par 'phel bar byed pa gang yin pa'o/ /de la byang chub sems dpa'i skyes bu dam pa'i brtson 'grus gang zhe na/ de ni rnam pa lngar blta bar bya ste/ 'dun pa dang sbyor ba thams cad thams cad du mi gtong ba'i phyir ma btang ba dang / ji ltar blangs pa bzhin du mtshungs pa'am/ lhag par brtson 'grus rjes su 'phel bar byed pa'i phyir nyams pa med pa dang / sbyor ba dang / yun ring ba dang /rgyun mi 'chad par brtson 'grus rtsom pa la sems mi 'gong zhing sgyid lug pa med pa'i phyir zhum pa med pa dang / don dang ldan pa'i thabs kyis yongs su zin pa'i phyir phyin ci ma log pa dang / bla na med pa yang dag par rdzogs pa'i byang chub tu rings pa'i phyir byang chub sems dpa' rnams kyi brtson 'grus brtun te sbyor ba'o//de la byang chub sems dpa' rnams kyi rnam pa thams cad kyi brtson 'grus gang zhe na/ de ni rnam pa drug dang / rnam pa bdun te gcig tu bsdus na rnam pa bcu gsum du rig par bya ste/ rgyun du sbyor ba'i phyir rtag pa'i brtson 'grus dang /lhur sbyor ba'i phyir gus pa'i brtson 'grus dang / sngon gyi rgyu'i stobs kyis bskyed pa'i phyir rgyu mthun pa'i brtson 'grus dang / so sor brtags shing brtags shing dge ba'i phyogs la sbyor ba'i phyir sbyor ba las byung ba'i brtson 'grus dang / sdug bsngal gyi gnod pa thams cad kyis mi 'khrugs shing gzhan du bsgyur du med pa'i phyir mi 'khrugs pa'i brtson 'grus dang /khyad par thob pa chung ngu dang / ngan don tsam gyis chog mi shes pa'i phyir chog mi shes pa'i brtson 'grus so/ /'di ni re zhig rnam pa thams cad kyi brtson 'grus rnam pa drug ste/ de dang ldan na byang chub sems dpa' dge ba'i chos rnams la brtson 'grus brtsams pa dang /mthu dang ldan pa dang / brtson 'grus dang ldan pa dang / spro ba dang ldan pa dang / brtun pa brtan pa dang / brtson pa mi gtong ba zhes bya'o/ /rnam pa bdun ni phyi phyir zhing bla na med pa yang dag par rdzogs pa'i byang chub tu shas cher 'dun pa dang /smon pa rjes su 'phel bar byed pa'i phyir byang chub sems dpa'i brtson 'grus 'dun pa dang ldan pa dang / brtson 'grus gang gis byang chub sems dpa' dge ba'i chos rnams la mthun zhing rnal 'byor du gnas par 'gyur la/ nyon mongs pa dang nye ba'i nyon mongs pa gang yang rung bas sems nyon mongs pa can du ma gyur zhing /kun nas dkris pa med pa'i byang chub sems dpa'i brtson 'grus gang mthun pa dang ldan pa dang / nye ba'i nyon mongs pa gang yang rung bas sems nye ba'i nyon mongs pa can du gyur cing / sems kun nas dkris pa'i nye ba'i nyon mongs pa de spang ba'i phyir mgo la me 'bar ba gsod pa lta bu'i brtson 'grus gang yin pa byang chub sems dpa'i brtson 'grus khyad par can dang /rig pa'i gnas thams cad yongs su tshol ba'i phyir byang chub sems dpa'i brtson 'grus tshol ba dang / yongs su btsal ba'i chos de dag nyid la ji ltar mthun pa dang / ji ltar 'os par chos kyi rjes su mthun pa'i chos nan tan gyis bsgrub pa'i phyir byang chub sems dpa'i bslab pa'i brtson 'grus dang / byang chub sems dpa'i pha rol gyi don byed pa'i brtson 'grus ni snga ma bzhin du rnam pa bcu gcig tu blta bar bya'o//bdag nyid kyi yang dag pa'i sbyor ba kun nas bsrung ba dang / 'khrul pa chos bzhin du phyir 'chos pa ni byang chub sems dpa'i brtson 'grus bdun pa yin te/ rnam pa bcu gsum po de dag ni byang chub sems dpa'i rnam pa thams cad kyi brtson 'grus zhes bya'o//byang chub sems dpa' rnams kyi phongs shing 'dod pa'i brtson 'grus dang / 'di dang gzhan du bde bar 'gyur ba'i brtson 'grus ni bzod pa bzhin du blta bar bya'o/ /de la bye brag ni 'di yod de/ der bzod pa zhes bya ba gang yin pa de 'dir brtson 'grus mngon par spro ba zhes brjod par bya'o//de la byang chub sems dpa'i rnam par dag pa'i brtson 'grus gang zhe na/ de ni mdor bsdu na rnam pa bcur rig par bya ste/ 'tsham pa dang / goms pa dang / mi g.yel ba dang / legs par zin pa dang / dus su goms par brtson pa dang / mtshan ma rtogs pa dang ldan pa dang /zhum pa med pa dang / mi ldan pa med pa dang / snyoms pa dang / byang chub chen por yongs su bsngo ba ste/ 'di la byang chub sems dpa' nye ba'i nyon mongs pa gang dang gang gis shin tu gnod par gyur pa'i nyes pa'i nyon mongs pa de dang de spang ba'i phyir 'tsham pa'i gnyen po bsten te/'dod pa la 'dod chags kyi gnyen por mi sdug pa sgom pa dang / gnod sems kyi gnyen por byams pa dang / gti mug gi gnyen por rkyen 'di pa nyid kyi rten cing 'brel par 'byung ba sgom pa dang / rnam par rtog pa'i gnyen por dbugs dbyung ba dang /rngub pa dran pa dang / nga rgyal gyi gnyen por khams rab tu dbye ba sgom pa dang / de lta bu dang mthun pa rnams ni byang chub sems dpa'i 'tsham pa'i brtson 'grus zhes bya'o/ /'di lta ste gdams pa dang / rjes su bstan pa la sems gnas par bya ba'i phyir/ byang chub sems dpa' las dang po pa las thog ma pa'i brtson 'grus dang ldan pa ma yin te/ sbyor ba goms pa yin zhing / sbyor ba 'dris pa 'di ni byang chub sems dpa'i goms pa'i brtson 'grus zhes bya'o/ /byang chub sems dpa'i gdams pa dang / rjes su bstan pa la sems gnas pa las brtsams te/sbyor ba la goms pa ma yin zhing / byang chub sems dpa' las dang po pa nyid yin bzhin du/ rtag tu gus par sbyor ba'i phyir/ sbyor ba de la mi g.yel bar sbyor ba yin te/ 'di ni byang chub sems dpa'i mi g.yel ba'i brtson 'grus zhes bya'o/ / yang byang chub sems dpa' bla ma rnams las sam/ bdag nyid kyis mang du thos pa'i stobs bskyed pas phyin ci ma log par zin pas sems gnas par bya ba'i phyir/ brtson 'grus rtsom pa 'di ni byang chub sems dpa'i legs par zin pa'i brtson 'grus zhes bya'o/ /yang byang chub sems dpa' de ltar phyin ci ma log par zin pas zhi gnas kyi dus su ni zhi gnas sgom la/rab tu 'dzin pa'i dus su ni sems rab tu 'dzin cing / btang snyoms kyi dus su ni btang snyoms sgom pa 'di ni de'i dus su brtson pa'i brtson 'grus zhes bya'o/ /yang byang chub sems dpa' zhi gnas dang /rab tu 'dzin pa dang / btang snyoms kyi mtshan ma rnams dang ting nge 'dzin la 'jug pa dang / ting nge 'dzin la gnas pa dang / ldang ba'i mtshan ma rnams shes pa dang / mi brjed pa dang / rtogs par bya ba'i phyir rtag tu byed cing / gus par byed pa 'di ni byang chub sems dpa'i mtshan mar rtogs pa'i brtson 'grus zhes bya'o//yang byang chub sems dpa' rnams kyi brtson 'grus rtsom pa mchog tu rgya che zhing mchog tu zab la/ bsam gyis mi khyab cing / dpag tu med pa dag bstan pa thos na/ bdag nyid la khyad du mi gsod cing / sems zhum par yang mi byed la/khyad par thob pa chung ngu tsam dang / ngan ngon tsam gyis kyang chog par mi 'dzin te/ gong du mi 'bad par mi byed pa 'di ni byang chub sems dpa'i zhum pa med pa'i brtson 'grus zhes bya'o/ /yang byang chub sems dpa' dus dus su dbang po'i sgo rnams srung zhing /zas kyi tshod rig pa dang / nam gyi cha stod dang nam gyi cha smad la mi nyal bar rjes su brtson pa dang / shes bzhin du gnas pa dang / de lta bu dang mthun pa'i ting nge 'dzin gyi tshogs rnams yang dag par blangs te/ 'dug cing de rnams la brtson par yang byed cing phyin ci ma log pa'i don dang ldan pa thams cad la 'bad pa rtsom pa 'di ni byang chub sems dpa'i mi ldan pa med pa'i brtson 'grus zhes bya'o//yang byang chub sems dpa' ha cang yang mi zhum/ ha cang yang brtun mi ngas par brtson 'grus rtsom ste/ sbyor ba snyoms par byed cing / brtsam par bya ba thams cad la snyoms par gus par byed pa 'di ni byang chub sems dpa'i snyoms pa'i brtson 'grus zhes bya'o//yang byang chub sems dpa' brtson 'grus rtsom pa mngon par 'du byed pa thams cad bla na med pa yang dag par rdzogs pa'i byang chub tu yongs su bsngo ba 'di ni byang chub sems dpa'i yang dag pa'i yongs su bsngo ba'i brtson 'grus zhes bya ba ste/byang chub sems dpa' rnams kyi brtson 'grus/ brtson 'grus kyi ngo bo nyid nas rnam par dag pa'i bar gyi brtson 'grus 'di dag ni byang chub chen po'i 'bras bu 'byung ba ste/ de la brten nas byang chub sems dpa' rnams brtson 'grus kyi pha rol tu phyin pa yongs su rdzogs par byas te/bla na med pa yang dag par rdzogs pa'i byang chub mngon par rdzogs par sangs rgyas so/ /mngon par rdzogs par 'tshang rgya bar 'gyur ro/ /mngon par rdzogs par 'tshang rgya'o/ /byang chub sems dpa'i sa'i gzhi'i rnal 'byor gyi gnas las brtson 'grus kyi le'u ste bcu gnyis pa'o// //sdom ni snga ma bzhin du rig par bya'o/ /de la byang chub sems dpa' rnams kyi bsam gtan gyi ngo bo nyid gang zhe na/ byang chub sems dpa'i sde snod thos pa dang / bsam pa sngon du 'gro ba'i byang chub sems dpa' rnams kyi 'jig rten dang 'jig rten las 'das pa'i sems rtse gcig pa dge ba'i sems gnas pa zhi gnas kyi phyogs sam/lhag mthong gi phyogs sam/ zung du 'brel par 'jug pa'i lam de gnyi ga'i phyogs gang yin pa ste/ 'di ni byang chub sems dpa' rnams kyi bsam gtan gyi ngo bo nyid du rig par bya'o//de la byang chub sems dpa' rnams kyi bsam gtan thams cad gang zhe na/ de ni rnam pa gnyis su rig par bya ste/ 'jig rten pa'i dang / 'jig rten las 'das pa'i'o / /de yang ci rigs par rnam pa gsum du rig par bya ste/tshe 'di la bde bar gnas par bya ba'i bsam gtan dang / byang chub sems dpa'i ting nge 'dzin gyi yon tan sgrub pa'i bsam gtan dang / sems can gyi don bya ba'i bsam gtan no/ /de la byang chub sems dpa' rnams kyi bsam gtan rnam par rtog pa thams cad dang bral ba/lus dang sems kyis shin tu sbyangs ba skyed pa/ mchog tu rab tu zhi ba/ rlom sems dang bral ba/ ro myang ba med pa dang / mtshan ma thams cad dang bral ba gang yin pa 'di ni de dag gi tshe 'di la bde bar gnas pa yin par rig par bya'o/ /de la byang chub sems dpa' rnams kyi bsam gtan stobs bcu'i rigs kyis bsdus pa'i ting nge 'dzin rnam pa sna tshogs bsam gyis mi khyab cing tshad med pa sgrub par byed pa gang yin pa dang /ting nge 'dzin gang dag nyan thos dang / rang sangs rgyas rnams kyis kyang ming yang mi shes na snyoms par 'jug par lta ga la 'gyur ba dang /byang chub sems dpa' rnam par thar pa dang / zil gyis non pa'i skye mched dang / zad par gyi skye mched rnams dang / so so yang dag par rig pa dang / nyon mongs pa med pa dang / smon gnas shes pa la sogs pa'i yon tan nyan thos dang / thun mong pa rnams mngon par sgrub par byed pa gang yin pa de ni byang chub sems dpa'i ting nge 'dzin gyi yon tan sgrub pa'i bsam gtan yin par rig par bya'o/ /byang chub sems dpa'i sems can gyi don bya ba'i bsam gtan ni rnam pa bcu gcig ste/ snga ma bzhin du rig par bya'o / /bsam gtan gang la brten na/byang chub sems dpa' sems can rnams kyi bya ba don dang ldan pa dag la grogs su 'gro ba dang / sems can sdug bsngal ba rnams kyi sdug bsngal sel ba dang / rigs par ston pa dang / byas pa gzo zhing byas pa tshor ba ste/ phan 'dogs pa rnams la lan du phan 'dogs pa dang / 'jigs pa rnams las srung ba dang / sdug bsngal bar gnas pa rnams kyi mya ngan sel ba dang / yo byad med pa rnams la yo byad stobs pa dang / yang dag pa'i 'khor legs par sdud pa dang / sems dang mthun par 'jug pa dang / yang dag pa'i yon tan rnams kyis dga' bar byed pa dang / legs par tshar gcod pa dang /rdzu 'phrul gyis skrag par byed pa dang / 'dun par byed pa ste/ 'di dag thams cad gcig tu bsdus pa ni byang chub sems dpa' rnams kyi bsam gtan thams cad ces bya ste/ 'di las gong na yang med do/ /'di las lhag pa yang med do/ /de la byang chub sems dpa' rnams kyi dka' ba'i bsam gtan gang zhe na/de ni rnam pa gsum du blta bar bya ste/ byang chub sems dpa' rnams bsam gtan la gnas pa mngon par sgrub pa rgya chen po rnam pa sna tshogs shin tu 'dres pa dag gis gnas nas/ rang dgar bsam gtan gyi bde ba mchog de bzlog ste/ so sor brtags nas/sems can rnams la snying brtse bas sems can gyi don bya ba mang po dag dang / sems can yongs su smin par bya ba yang dag par mthong nas/ 'dod pa'i khams rnams su skye bar byed pa gang yin pa 'di ni byang chub sems dpa' rnams kyi dka' ba'i bsam gtan dang po yin par rig par bya'o/ / yang byang chub sems dpa' bsam gtan la brten nas/ byang chub sems dpa'i bsam gtan dpag tu med grangs med bsam gyis mi khyab pa nyan thos dang rang sangs rgyas kyi yul thams cad las yang dag par 'das pa mngon par sgrub pa gang yin pa 'di ni/ byang chub sems dpa'i dka' ba'i bsam gtan gnyis pa yin par rig par bya'o//yang byang chub sems dpa' bsam gtan la brten nas/ bla na med pa yang dag par rdzogs pa'i byang chub mngon par rdzogs par 'tshang rgya bar byed pa gang yin pa 'di ni/ byang chub sems dpa'i dka' ba'i bsam gtan gsum pa yin par rig par bya'o//de la thams cad kyi sgo nas bsam gtan gang zhe na/ rnam pa bzhir blta bar bya ste/ rtog pa dang bcas dpyod pa dang bcas pa dang / dga' ba dang ldan pa dang / tshim pa'i bde ba dang ldan pa dang / btang snyoms dang ldan pa'o/ /de la byang chub sems dpa'i skyes bu dam pa'i bsam gtan gang zhe na/de ni rnam pa lngar blta bar bya ste/ ro myang ba med pa dang / byams pa dang ldan pa dang / snying rje dang ldan pa dang / dga' ba dang ldan pa dang / btang snyoms dang ldan pa'o/ /de la byang chub sems dpa'i rnam pa thams cad kyi bsam gtan gang zhe na/de ni rnam pa drug dang rnam pa bdun te/ gcig tu bsdus na rnam pa bcu gsum yod par rig par bya ste/ dge ba'i bsam gtan dang / sprul pa sprul pa'i phyir lung du ma bstan pa'i bsam gtan dang / zhi gnas kyi phyogs dang / lhag mthong gi phyogs dang / bdag dang gzhan gyi don legs par nges par bsam pa'i bsam gtan dang /mngon par shes pa'i mthu yon tan mngon par sgrub pa'i bsam gtan dang / ming la dmigs pa dang / don la dmigs pa dang / zhi gnas kyi mtshan ma la dmigs pa dang / rab tu 'dzin pa'i mtshan ma la dmigs pa dang / btang snyoms kyi mtshan ma la dmigs pa dang /tshe 'di la bde bar gnas pa dang / gzhan gyi don bya ba'i bsam gtan te/ byang chub sems dpa' rnams kyi bsam gtan rnam pa bcu gsum po 'di dag ni rnam pa thams cad kyi bsam gtan zhes bya'o/ /de la byang chub sems dpa'i phongs shing 'dod pa'i bsam gtan gang zhe na/de ni rnam pa brgyad du blta bar bya ste/ dug dang / thog dang / rims drag po dang / 'byung po dang / gdon la sogs pa'i gnod pa yang dag par zhi ba sgrub pa'i gsang sngags rnams byin gyis rlob pa'i bsam gtan dang / khams 'khrugs pa las gyur pa'i nad rnam pa sna tshogs rnam par zhi bar byed pa'i bsam gtan dang /mu ge'i ngu 'bod chen po dag 'byung ba'i tshe char sgrub par byed pa'i bsam gtan dang / mi dang mi ma yin pas byas pa'i 'jigs pa sna tshogs chu dang skam la yod pa rnams las legs par yongs su bskyab pa'i bsam gtan dang / de bzhin du 'brog dgon pa na gnas pa zas dang / skom gyis phongs pa rnams la zas dang skom nye bar sgrub pa'i bsam gtan dang / dbul ba longs spyod med pa rnams kyi longs spyod nye bar sgrub pa'i bsam gtan dang / phyogs bcu dag na sems can bag med pa rnams la legs par bskul ba'i bsam gtan dang /sems can gyi bya ba byung ngo cog legs par bya ba'i bsam gtan no/ /de la byang chub sems dpa'i 'di dang gzhan du bde bar 'gyur ba'i bsam gtan gang zhe na/ de ni rnam pa dgur blta bar bya ste/ rdzu 'phrul gyi cho 'phrul gyis sems can rnams gdul ba'i bsam gtan dang /kun rjod pa'i cho 'phrul dang / rjes su bstan pa'i cho 'phrul gyis sems can rnams gdul ba'i bsam gtan dang / sdig pa byed pa rnams la ngan song gis rnam par ston pa'i bsam gtan dang / sems can spobs pa med par gyur pa rnams la spobs pa nye bar sgrub pa'i bsam gtan dang /sems can brjed ngas pa rnams la dran pa nye bar sgrub pa'i bsam gtan dang / dam pa'i chos yun ring du gnas par bya ba'i phyir phyin ci ma log pa'i bstan bcos dang / snyan dngags dang / ma mo sbyar ba'i rnam par gzhag pa'i bsam gtan dang / 'jig rten pa rnams kyi bzo dang las kyi gnas don dang ldan pa sems can rnams la phan pa rnams dang /yi ge dang rtsis dang shod dgod pa dang grangs dang lag rtsis la sogs pa dang / khri dang khri'u dang / gdugs dang / lham la sogs pa dang / snod spyad rnam pa sna tshogs rnam pa mang po rnams 'byung bar byed pa'i bsam gtan dang /sems can ngan song gi sar skyes pa rnams kyi ngan song gi sdug bsngal de'i mod la bsal ba'i phyir 'od zer 'gyed pa'i bsam gtan no/ /de la byang chub sems dpa'i rnam par dag pa'i bsam gtan gang zhe na/ de ni rnam pa bcur rig par bya ste/ 'jig rten pa'i dag pas rnam par dag pa ro myang ba med pa'i bsam gtan dang /'jig rten las 'das pa'i dag pas rnam par dag pa nyon mongs pa can ma yin pa'i bsam gtan dang / sbyor ba'i dag pas dag pa dang / dngos gzhi dag pas dag pa dang / dngos gzhi las khyad par gong ma rnam par dag pas rnam par dag pa'i bsam gtan dang /'jug pa dang / gnas pa dang / ldang ba la dbang ba rnam par dag pas rnam par dag pa'i bsam gtan dang / bsam gtan bzlog na yang snyoms par 'jug pa la dbang ba dag pas rnam par dag pa'i bsam gtan dang /mngon par shes pas rnam par 'phrul pa la dbang ba dag pas rnam par dag pa'i bsam gtan dang / lta bar gyur pa thams cad dang bral ba rnam par dag pas rnam par dag pa'i bsam gtan dang / nyon mongs pa dang shes bya'i sgrib pa spong ba rnam par dag pas rnam par dag pa'i bsam gtan no//byang chub sems dpa' rnams kyi bsam gtan dpag tu med pa 'di dag ni byang chub chen po'i 'bras bur gyur pa ste/ de dag la brten nas byang chub sems dpa' rnams bsam gtan gyi pha rol tu phyin pa yongs su rdzogs nas/ bla na med pa yang dag par rdzogs pa'i byang chub tu mngon par rdzogs par sangs rgyas so//mngon par rdzogs par 'tshang rgya bar 'gyur ro/ /mngon par rdzogs par 'tshang rgya'o/ / byang chub sems dpa'i sa'i gzhi'i rnal 'byor gyi gnas las bsam gtan gyi le'u ste bcu gsum pa'o// //bam po bcu gnyis pa/sdom ni snga ma bzhin du rig par bya'o/ /de la byang chub sems dpa'i shes rab kyi ngo bo nyid gang zhe na/ shes bya thams cad la 'jug pa dang / shes bya thams cad la zhugs pa dang / chos rnams rab tu rnam par 'byed pa gang yin pa dang / rig pa'i gnas lnga po nang gi rig pa dang /gtan tshigs kyi rig pa dang / gso ba'i rig pa dang / sgra'i rig pa dang / bzo dang las kyi gnas kyi rig pa la dmigs nas 'jug pa 'di ni byang chub sems dpa' rnams kyi shes rab kyi ngo bo nyid yin par rig par bya'o/ /de la byang chub sems dpa' rnams kyi shes rab thams cad gang zhe na/de ni rnam pa gnyis su blta bar bya ste/ 'jig rten pa'i dang / 'jig rten las 'das pa'i'o / /de yang mdor bsdu na rnam pa gsum du rig par bya ste/ shes bya la de kho na khong du chud cing rtogs par bya ba dang / ji skad bstan pa'i rig pa'i gnas lnga po rnams dang / tshogs gsum la mkhas par bya ba dang / sems can gyi don bya ba'o/ /byang chub sems dpa' rnams kyi shes rab gang chos bdag med pa brjod du med pa las brtsams te/ bden pa rtogs par bya ba'am/ bden pa rtogs pa'i dus sam/ bden pa mngon par yang dag par rtogs pa yan chad mchog tu rab tu zhi bar nye bar gnas pa/rnam par mi rtog pa spros pa thams cad dang bral ba/ chos thams cad la mnyam pa nyid kyi rjes su song ba/ spyi'i mtshan nyid chen po la zhugs pa/ shes bya'i mthar phyin pa/ sgro 'dogs pa dang / skur pa 'debs pa'i mtha' gnyis rnam par spangs pa'i phyir/dbu ma'i lam du 'gro ba 'di ni byang chub sems dpa' rnams kyi de kho na khong du chud cing rtogs pa'i shes rab yin par rig par bya'o/ /rig pa'i gnas lnga la mkhas pa ni rgyas par snga ma bzhin du 'di lta ste/ stobs kyi rigs kyi le'u las 'byung ba dang 'dra bar rig par bya'o//tshogs gsum ni don dang ldan pa'i chos rnams kyi tshogs dang don dang mi ldan pa'i chos rnams kyi tshogs dang don dang ldan pa yang ma yin don dang mi ldan pa yang ma yin pa'i chos rnams kyi tshogs te/ gnas brgyad po 'di dag la shes rab kyis mkhas pa yongs su 'dzin na bla na med pa yang dag par rdzogs pa'i byang chub kyi phyir ye shes kyi tshogs chen po gong na med pa yongs su rdzogs par byed do//sems can gyi don bya ba ni snga ma bzhin du rnam pa bcu gcig kho nar rig par bya ste/ gnas de dag gi shes rab gang yin pa de ni sems can gyi don bya ba'i shes rab yin par rig par bya'o//de la byang chub sems dpa'i dka' ba'i shes rab gang zhe na/ de ni rnam pa gsum du blta bar bya ste/ chos bdag med pa zab mo shes par dka' ba dang / sems can rnams 'dul ba'i thabs shes par dka' ba dang / shes bya thams cad la sgrib pa med par shes pa mchog tu dka' ba'o//de la byang chub sems dpa'i thams cad kyi sgo nas shes rab gang zhe na/ de ni rnam pa bzhir blta bar bya ste/ nyan thos kyi sde snod dang / byang chub sems dpa'i sde snod las brtsams te/ thos pa las byung ba'i shes rab dang / bsam pa las byung ba'i shes rab dang /so sor brtags nas byang chub sems dpa'i bya ba la 'jug pa dang / bya ba ma yin pa las ldog pa'o/ /so sor brtags pa'i stobs kyis bsdus pa'i shes rab dang / bsgom pa'i stobs kyis bsdus pa'i mnyam par gzhag pa'i sa'i shes rab tshad med pa'o/ / de la byang chub sems dpa' skyes bu dam pa rnams kyi skyes bu dam pa'i shes rab gang zhe na/ de ni rnam pa lngar blta bar bya ste/ dam pa'i chos mnyan pas yang dag par thob pa dang / so sor nang gi tshul bzhin yid la byed pa dang ldan pa dang / bdag dang gzhan gyi don sgrub pa'i thabs dang ldan pa dang /chos rnams kyi chos gnas pa'i chos rnam par gnas pa phyin ci ma log pa las brtsams te/ shin tu rnam par dag pa gtan la dbab pa'i shes rab dang / nyon mongs pa rnam par spong ba'i shes rab bo/ /rnam grangs gzhan yang shes bya ji lta bar yod pa bzhin du 'jug pa'i phyir cha phra ba dang /shes bya ji snyed yod pa la 'jug pa'i phyir mkhas pa dang / ye shes kyi tshogs sngar yang dag par thob pa'i phyir lhan cig skyes pa dang / sangs rgyas rnams dang / sa chen po la zhugs pa'i byang chub sems dpa' rnams kyis yang dag par bstan pa'i chos dang don len cing 'dzin pa'i phyir lung dang ldan pa dang /bsam pa dag pa'i sa yan chad mthar thug par 'gro ba'i sa man chad yongs su bzung ba'i phyir rtogs pa dang ldan pa'o/ /de la byang chub sems dpa'i rnam pa thams cad kyi shes rab gang zhe na/ de ni rnam pa drug dang rnam pa bdun te/ gcig tu bsdus na rnam pa bcu gsum yod par rig par bya ste/bden pa rnams la sdug bsngal shes pa dang / kun 'byung ba shes pa dang / 'gog pa shes pa dang / lam shes pa dang / mthar thug pa zad pa shes pa dang / mi skye ba shes pa 'di ni shes rab rnam pa drug go/ /rnam pa bdun ni chos shes pa dang /rjes su rtogs pa shes pa dang / kun rdzob shes pa dang / mngon par shes pa shes pa dang / mtshan shes pa dang / stobs bcu sngon du 'gro ba'i shes pa dang / rig pa bzhi po dag la rig pa shes pa'o/ /de la byang chub sems dpa'i phongs shing 'dod pa'i shes rab gang zhe na/ de ni rnam pa brgyad du blta bar bya ste/ chos rnams kyi rnam grangs shes pa las brtsams te/ byang chub sems dpa'i chos so so yang dag par rig pa dang / chos rnams kyi mtshan nyid shes pa las brtsams te/ don so so yang dag par rig pa dang / chos rnams kyi nges pa'i tshig shis pa las brtsams te/nges pa'i tshig so so yang dag par rig pa dang / chos rnams kyi rnam pa'i gzhi'i rab tu dbye ba las brtsams te/ spobs pa so so yang dag par rig pa dang / phas kyi rgol ba thams cad tshar gcod pa byang chub sems dpa'i shes rab dang / bdag gi smra ba rnam par gzhag pa thams cad rnam par 'jog pa'i shes rab dang /khyim brgyud legs par bskyang ba dang / khyim 'byor par bya ba'i shes rab dang / rgyal po'i tshul dang / 'jig rten pa'i tha snyad kyi tshul rnams la byang chub sems dpa'i nges pa'i shes rab bo/ /de la byang chub sems dpa'i 'di dang gzhan du bde bar 'gyur ba'i shes rab gang zhe na/de ni rnam pa dgur rig par bya ste/ nang gi rig pa la shin tu rnam par byang zhing rab tu gnas pa'i shes rab dang / gso ba'i rig pa dang / gtan tshigs kyi rig pa dang / sgra'i rig pa dang / 'jig rten pa'i bzo dang / las kyi gnas kyi rig pa la ni shin tu rnam par byang la/rab tu gnas pa ni ma yin pa'i shes rab dang / rig pa rnam pa lnga po shin tu rnam par byang ba de dag nyid la brten nas/ gdul bya rmongs pa rnams dang / bag med pa rnams dang / zhum pa rnams dang / yang dag par zhugs pa gzhan dag la go rims bzhin du yang dag par bstan pa dang /yang dag par 'dzin du gzhug pa dang / yang dag par gzengs bstod pa dang / yang dag par dga' bar bya ba'i byang chub sems dpa'i shes rab gang yin pa'o/ /de la byang chub sems dpa'i rnam par dag pa'i shes rab gang zhe na/ de ni mdor bsdu na rnam pa bcur rig par bya ste/ de kho na'i don ji snyed yod pa dang / ji ltar yod pa bzhin du 'dzin pa'i phyir de kho na'i don rnam pa gnyis dang / rgyu dang 'bras bu legs par 'dzin pa'i phyir/ 'jug pa'i don rnam pa gnyis dang / phyin ci log dang phyin ci ma log pa yang dag pa ji lta ba bzhin du yongs su shes pa'i phyir len pa'i don rnam pa gnyis dang /bya ba dang bya ba ma yin pa thams cad yang dag pa ji lta ba bzhin du yongs su shes pa'i phyir thabs kyi don rnam pa gnyis dang / kun nas nyon mongs pa la kun nas nyon mongs pa dang / rnam par byang ba la rnam par byang ba yang dag pa ji lta ba bzhin du yongs su shes pa'i phyir mthar thug pa'i don kyang rnam pa gnyis te/byang chub sems dpa' rnams kyi shes rab rnam pa lnga po rab tu dbye ba bcu po 'di dag ni rnam par dag pa mchog gis rnam par dag par rig par bya'o/ /de ltar na byang chub sems dpa' rnams kyi shes rab shin tu rnam par nges shing dpag tu med pa 'di ni byang chub chen po'i 'bras bur 'gyur ba ste/de la brten nas byang chub sems dpa' rnams shes rab kyi pha rol tu phyin pa yongs su rdzogs te/ bla na med pa yang dag par rdzogs pa'i byang chub mngon par rdzogs par 'tshang rgya'o/ /'di ni mdo sde gzhan de dang de dag tu bcom ldan 'das kyis pha rol tu phyin pa drug po dag thor bu thor bu bstan pa rnams kyi mdor bsdus te bstan pa yin par rig par bya'o//de bzhin gshegs pas gsungs pa'i mdo sde gang las sbyin pa'i pha rol tu phyin pa'am/ shes rab kyi pha rol tu phyin pa'i bar dag bstan pa'am/bshad pa 'byung ba de ni sbyin pa'i ngo bo nyid nas/ rnam par dag pa'i sbyin pa'i bar du sbyar bar bya ste/ de'i bsdu ba yang ci rigs par rig par bya'o/ /de bzhin du tshul khrims la sogs pa shes rab la thug pa ji skad bstan pa gzhan dag gi sbyar ba dang bsdu ba yang ci rigs par rig par bya'o//de bzhin gshegs pa rnams kyi byang chub sems dpa'i spyod pa dag tu skyes pa'i rabs dpag tu med pa dka' ba spyod pa dang ldan pa gang yin pa de dag thams cad las sbyin pa dang ldan pa rnams ni sbyin pa las brtsams par rig par bya'o/ /sbyin pa ji lta ba de bzhin du tshul khrims dang /bzod pa dang / brtson 'grus dang / bsam gtan dang / shes rab dang ldan pa thams cad kyang shes rab las brtsams par rig par bya'o/ /kha cig ni sbyin pa kho na las brtsams pa nas/ kha cig ni shes rab kho na las brtsams pa'i bar dang / kha cig ni gnyis 'dres pa dang /kha cig ni gsum 'dres pa dang / kha cig ni bzhi 'dres pa dang / kha cig ni lnga 'dres pa dang / kha cig ni pha rol tu phyin pa drug po thams cad las brtsams par rig par bya'o/ /pha rol tu phyin pa drug po 'di dag gis bla na med pa yang dag par rdzogs pa'i byang chub yang dag par thob par byed pa'i byang chub sems dpa' rnams ni dkar po'i chos kyi chu chen po dang /dkar po'i chos kyi rgya mtsho chen po zhes bya ste/ sems can thams cad kyi rnam pa thams cad phun sum tshogs pa'i rgyu rin po che chen po sbyin pa yin no/ /de ltar de dag gis bsod nams dang ye shes kyi tshogs yang dag par 'grub pa dpag tu med pa de'i 'bras bu ji ltar bla na med pa yang dag par rdzogs pa'i byang chub dang mthun pa lta bu gzhan med do//byang chub sems dpa'i sa'i gzhi'i rnal 'byor gyi gnas las shes rab kyi le'u ste bcu bzhi pa'o// //sdom ni snga ma bzhin du rig par bya'o//de la byang chub sems dpa' rnams kyi snyan par smra ba'i ngo bo nyid gang zhe na/ 'di la byang chub sems dpa' sems can rnams la yid du 'ong ba dang / bden pa dang / chos dang mthun pa don dang ldan pa'i tshig smra ba 'di ni mdor bsdu na byang chub sems dpa' rnams kyi snyan par smra ba'i ngo bo nyid do//de la byang chub sems dpa' rnams kyi snyan par smra ba thams cad gang zhe na/ de ni rnam pa gsum du blta bar bya ste/ 'di la byang chub sems dpa'i ngag gang yang dag par dga' bar byed pa ni/ byang chub sems dpa' khro gnyer med la gsong por smra zhing / bzhin gyi mdangs 'byin pa 'dzum pa sngon du gtong zhing tshig gang gis bde ba dang /bde legs su 'gyur ba yongs su 'dri ba'am/ khams snyoms pa yongs su 'dri ba'am/ mtshan mo dang / nyin mo bde ba yongs su 'dri ba'am/ tshur shog legs par 'ongs so zhes smra ba'am/ rnam pa de lta bu la sogs pa dag gis 'jig rten pa'i tshul grong khyer ba nyid dang /mthun par 'jug cing sems can rnams so sor yang dag par dga' bar byed pa dang / byang chub sems dpa'i ngag gang kun tu dga' bar byed pa ni byang chub sems dpa' sems can gang bdag nyid kyi 'byor pa khong du ma chud pa rnams la bu 'byor pa'am/chung ma 'byor pa'am/ nye du 'byor pa'am/ nor 'byor pa'am/ 'bru 'byor pa mthong na bsnyad cing kun tu dga' bar byed pa'am/ dad pa dang / tshul khrims dang / thos pa dang / gtong ba dang / shes rab 'byor pas kun tu dga' bar byed pa dang /byang chub sems dpa'i ngag gang rnam pa thams cad kyi yon tan dang ldan pa'i chos ston pa dang ldan pa ni sems can rnams la phan pa dang bde ba'i phyir/ rtag tu rgyun mi 'chad par nye bar gnas pa dang / phan pa'i mchog gis phan 'dogs par gyur pa ste/ 'di ni byang chub sems dpa' rnams kyi stan par smra ba rab tu dbye bas thams cad yin par rig par bya'o//de la byang chub sems dpa' rnams kyi snyan par smra ba thams cad ni mdor bsdu na de ni rnam pa gnyis su blta bar bya ste/ 'jig rten gyi tshul dang ldan pa dang / yang dag pa'i chos bstan pa dang ldan pa'o//de la yang dag par dga' bar byed pa'i ngag gang yin pa dang / kun tu dga' bar byed pa gang yin pa de ni 'jig rten gyi tshul dang ldan par rig par bya'o/ /de la ngag gang dag gis phan 'dogs pas mchog tu phan 'dogs par nye bar gnas par bstan pa gang yin pa de ni yang dag pa'i chos bstan pa dang ldan par rig par bya'o//de la byang chub sems dpa'i dka' ba'i snyan par smra ba gang zhe na/ de ni rnam pa gsum du blta bar bya ste/ byang chub sems dpa' gsod pa'i dgra phyir rgol ba rnams la shin tu rnam par dag cing skyon med pa'i sems kyis so sor brtags nas yang dag par dga' bar byed pa'am/kun tu dga' bar byed pa'am/ phan par bya ba'i tshig brjod pa gang yin pa 'di ni byang chub sems dpa'i dka' ba'i snyan par smra ba dang po yin par rig par bya'o/ /yang byang chub sems dpa' sems can shas cher rmongs shing dbang po rtul ba rnams la so sor brtags nas/yongs su yi chad pa med cing / chos dang mthun pa'i gtam brjod cing skyob dang du blangs te/ rig pa'i chos dge ba 'dzin du 'jug pa gang yin pa 'di ni byang chub sems dpa'i dka' ba'i snyan par smra ba gnyis pa yin par rig par bya'o/ /yang byang chub sems dpa' sems can g.yon can dang sgyu ma mkhan po dang /slob dpon dang / bla ma dang / yon gnas slu bar byed pa/ log par zhugs pa rnams la kun nas mnar sems kyi sems med pa dang / khong khro ba'i sems med par yang dag par dga' bar byed pa dang / kun tu dga' bar byed pa dang / phan par bya ba'i tshig brjod pa gang yin pa 'di ni byang chub sems dpa'i dka' ba'i snyan par smra ba gsum pa yin par rig par bya'o/ /de la byang chub sems dpa'i thams cad kyi sgo nas snyan par smra ba gang zhe na/ de ni rnam pa bzhir blta bar bya ste/ sgrib pa spang bar bya ba dang / bde 'gror skye bar bya ba'i phyir snga rol du bya ba'i chos bstan pa dang /sgrib pa dang bral zhing sems kyi nyams bde ba dang ldan te yang dag phul gyi 'phags pa'i bden pa bzhi dang ldan pa'i chos bstan pa dang / sems can khyim pa dang / rab tu byung ba bag med pa rnams bag med pa'i spyod pa las bslang ste/ bag yod pa'i spyod pa la dgod pa'i phyir yang dag par bskul ba dang /the tshom byung ngo cog bsal ba'i phyir chos bstan pa dang / 'brel ba'i gtam rnam par nges par bya ba'o / /de la byang chub sems dpa' skyes bu dam pa rnams kyi skyes bu dam pa'i snyan par smra ba gang zhe na/ de ni rnam pa lngar blta bar bya ste/'di la byang chub sems dpa' byang chub sems dpar gyur pa dang / de bzhin gshegs par gyur pa rnams gleng gzhi dang bcas pa dang / nges par 'byung ba dang bcas pa dang / ston pa dang bcas pa dang / rtul ba dang bcas pa dang / cho 'phrul dang bcas pa'i chos ston pa ste/byung ba dang bcas pa'i bslab pa'i gzhi'i gnas su 'cha' bar byed de/ de lta bas na de dag gi chos gleng gzhi dang bcas pa yin no/ /yang dag par blangs pa'i bslab pa rnams las nyes pa byung ba dag nyes pa las dbyung ba 'cha' bar byed de/ de lta bas na de dag gi chos nges par 'byung ba dang bcas pa yin no//chos 'dul ba 'di la ston pa bzhis bsdus pa phyin ci ma log pa'i sgrub pa 'cha' bar byed de/ de lta bas na de dag ni chos ston pa dang bcas pa yin no/ /sdug bsngal thams cad las nges par 'byin pa'i phyir phyir mi ldog pa'i lam yang dag par ston te/de lta bas na de dag gi chos rtul ba dang bcas pa yin no/ /bstan pa thams cad cho 'phrul gsum po de dag gi don yod par byed de/ de lta bas na de dag gi chos cho 'phrul dang bcas pa yin no/ /de la byang chub sems dpa' rnams kyi rnam pa thams cad kyi snyan par smra ba gang zhe na/ de ni rnam pa drug dang rnam pa bdun te/ gcig tu bsdus na rnam pa bcu gsum du blta bar bya ste/ gnang bar bya ba'i chos rnams la gnang ba'i snyan par smra ba dang / dgag par bya ba'i chos rnams la dgag pa'i snyan par smra ba dang / chos rnams kyi chos kyi rnam grangs rjod par byed pa'i snyan par smra ba dang /chos kyi mtshan nyid phyin ci ma log pa rjod par byed pa dang / chos kyi nges pa'i tshig phyin ci log pa rjod par byed pa dang / chos kyi tshig gi rnam pa bzhi'i rab tu dbye ba'i rjod par byed pa'i snyan par smra ba dang / yang dag par dga' bar byed pa'i snyan par smra ba dang / kun tu dga' bar byed pa'i snyan par smra ba dang /gzhan dag yo byad thams cad la snying las chung bar bya ba dang / yang dag par rtogs pa'i bya ba thams cad la snying las chung bar bya bar rgya cher stobs pa'i snyan par smra ba dang / 'jigs pa rnam pa sna tshogs kyis skrag pa rnams dbugs dbyung ba'i snyan par smra ba dang / rigs pa bstan pas bsdus pa'i snyan par smra ba dang /mi dge ba'i gnas nas bslangs te/ dge ba'i gnas su dgod pa'i phyir legs par mthong ba dang / thos pa dang / dogs pa la gleng zhing smra dbab pa'i snyan par smra ba dang / gzhan nus pa la bcol te sgrub pa'i snyan par smra ba ste/ 'di dag ni byang chub sems dpa' rnams kyi rnam pa thams cad kyi snyan par smra ba rnam pa bcu gsum yin par rig par bya'o//de la byang chub sems dpa' rnams kyi phongs shing 'dod pa'i snyan par smra ba gang zhe na/ de ni rnam pa brgyad du blta bar bya ste/ byang chub sems dpa'i ngag rnam par dag pa rnam pa bzhi la brten nas /'phags pa'i tha snyad brgyad po dag gi ngag gang yin pa de ni/ byang chub sems dpa' rnams kyi phongs shing 'dod pa'i snyan par smra ba zhes bya'o/ /de la ngag rnam par dag pa rnam pa bzhi ni 'di dag yin te/ brdzun du smra ba spangs pa dang / phra ma dang / ngag rtsub mo dang / tshig 'khyal pa spangs pa'o/ / de la 'phags pa'i tha snyad brgyad ni 'di dag yin te/ mthong ba la mthong zhes smra ba dang / thos pa dang / bye brag phyed pa dang / rnam par shes pa la rnam par shes so zhes smra ba dang / ma mthong ba la ma mthong zhes smra ba dang / ma thos pa dang / bye brag ma phyed pa dang / rnam par ma shes pa la rnam par ma shes zhes smra ba'o//de la byang chub sems dpa' rnams kyi 'di dang gzhan du bde bar 'gyur ba'i snyan par smra ba gang zhe na/ de ni rnam pa dgur blta bar bya ste/ nye du las gyur pa'i sdug bsngal gyi mya ngan bsang ba'i phyir snyan par smra ba dang / longs spyod kyis phongs pa'i sdug bsngal gyi mya ngan bsang ba dang /nad med pas phongs pa'i mya ngan bsang ba'i phyir snyan par smra ba dang / tshul khrims kyis phongs pa spangs pa dang / lta bas phongs pa spang ba'i phyir snyan par smra ba dang / tshul khrims phun sum tshogs pa dang / lta ba phun sum tshogs pa dang / cho ga phun sum tshogs pa dang / 'tsho ba phun sum tshogs pa la snyan par smra ba gang yin pa ste/dam pa'i chos ston pa'o/ /de la byang chub sems dpa'i rnam par dag pa'i snyan par smra ba gang zhe na/ de ni rnam pa nyi shur blta bar bya ste/ rnam pa nyi shus chos ston pa gang yin pa'o/ /de yang 'di lta ste/ stobs kyi rigs kyi le'u las sngar bstan pa bzhin du rig par bya'o//de la don spyod pa ni snyan par smra ba ji lta ba de bzhin du yang rgyas par rig par bya'o/ /de las bye brag du gyur pa'i don spyod pa gzhan yang brjod par bya ste/ 'di ltar byang chub sems dpa' ni rnam pa thams cad kyi snyan par smra ba des de dang ldan zhing de dang ldan pa'i don sems can rnams la kun du spyod pa'o//de la byang chub sems dpa' rnams kyi don spyod pa'i ngo bo nyid gang zhe na/ de ltar snyan par smra bas rigs pas yang dag par bstan pa'i sems can rnams la snying rje'i sems nye bar gzhag ste/ zang zing med pa'i sems kyis bslab pa rnams dang / don spyod pa dang / chos kyi rjes su mthun pa'i chos sgrub pa'i tshul ci rigs par yang dag par 'dzin du 'jug pa dang / 'dul ba dang / 'dzud pa dang / 'god pa 'di ni don spyod pa'i ngo bo nyid mdor bstan pa yin no/ /de la byang chub sems dpa' rnams kyi don spyod pa thams cad gang zhe na/de ni rnam pa gnyis su blta bar bya ste/ sems can yongs su ma smin pa rnams yongs su smin par bya ba dang / sems can yongs su smin pa rnams rnam par dgrol ba'o/ /de yang sgo gsum du rig par bya ste/ tshe 'di'i don yang dag par 'dzin du gzhug pa dang / tshe phyi ma'i don yang dag par 'dzin du gzhug pa dang / tshe 'di dang tshe phyi ma'i don yang dag par 'dzin du gzhug pa'o/ /de la chos dang mthun pa'i las kyi yon tan dag gis longs spyod rnams sgrub pa dang / bsrung ba dang / spel ba yang dag par 'dzin du gzhug pas/ tshe 'di'i don yang dag par 'dzin du 'jug pa yin par rig par bya ste/des na de gzhan las bsngags pa yang thob la/ tshe 'di la yang yo byad kyi bde bas phan btags pas bde bar gnas par 'gyur ro/ /de la longs spyod spangs nas slong mo pa'i byed tshul 'tsho ba la rag las pa'i rab tu byung ba yang dag par 'dzin du 'jug pa de ni tshe phyi ma'i don yang dag par 'dzin du 'jug pa yin par rig par bya ste/des na de tshe phyi ma la gdon mi za bar bde bar 'gyur gyi tshe 'di la ni nges pa med do/ /de la khyim pa'am rab tu byung ba yang rung / rim gyis 'dod chags dang bral bar 'gyur ba yang dag par 'dzin du 'jug pa gang yin pa 'di ni tshe 'di dang tshe phyi ma'i don yang dag par 'dzin du 'jug pa yin par rig par bya ste/des na de tshe 'di la yang lus shin tu sbyangs pa dang / sems shin tu sbyangs pa dang / bde ba la reg par gnas par 'gyur la/ tshe phyi ma la yang rnam par dag pa'i lha rnams kyi nang du skye bar 'gyur ba'am/phung po lhag ma med pa'i mya ngan las 'das pa'i dbyings su yongs su mya ngan las 'da' bar 'gyur ro/ /de la byang chub sems dpa' rnams kyi dka' ba'i don spyod pa gang zhe na/ de ni rnam pa gsum du blta bar bya ste/ sems can sngon dge ba'i rtsa ba'i rgyu ma spyad pa rnams la don spyod pa ni byang chub sems dpa' rnams kyi dka' ba yin te/'di ltar de dag ni dge ba yang dag par 'dzin du gzhug pa dka' ba'i phyir ro/ /sems can longs spyod phun sum tshogs pa chen po la gnas shing de la lhag par zhen par gyur pa rnams la don spyod pa ni byang chub sems dpa' rnams kyi dka' ba yin te/'di lta ste de dag ni bdag med pa'i gzhi dang / bag med pa'i gnas chen po la gnas pa'i phyir ro/ /'di las phyi rol pa mu stegs can rnams dang / sngon mu stegs can gyi lta ba spyod spyod pa'i sems can rnams la don spyod pa ni byang chub sems dpa' rnams kyi dka' ba yin te/'di ltar de dag ni bdag nyid kyis blun pa dang / chos 'dul ba 'di la sdang ba'i phyir ro/ /de la byang chub sems dpa' rnams kyi thams cad kyi sgo nas don spyod pa gang zhe na/ de ni rnam pa bzhir blta bar bya ste/ 'di la byang chub sems dpa' ma dad pa ni dad pa phun sum tshogs pa yang dag par 'dzin du 'jug par byed pa nas/'god pa'i bar du byed pa dang / tshul khrims 'chal pa ni tshul khrims phun sum tshogs pa dang / shes rab 'chal pa ni shes rab phun sum tshogs pa dang / sems sna can ni gtong ba phun sum tshogs pa yang dag par 'dzin du 'jug par byed pa nas 'god pa'i bar du byed pa'o//de la byang chub sems dpa'i skyes bu dam pa'i don spyod pa gang zhe na/ de ni rnam pa lngar blta bar bya ste/ 'di la byang chub sems dpa' sems can rnams yang dag pa'i don yang dag par 'dzin du 'jug pa dang / dus su yang dag par 'dzin du 'jug pa dang /don dang ldan pa'i don yang dag par 'dzin du 'jug pa dang / 'jam pos yang dag par 'dzin du 'jug pa dang / byams pa'i sems kyis yang dag par 'dzin du 'jug pa'o/ /de la byang chub sems dpa' rnams kyi rnam pa thams cad kyi don spyod pa gang zhe na/ de ni rnam pa drug dang rnam pa bdun te/ gcig tu bsdus na rnam pa bcu gsum du blta bar bya ste/ 'di la byang chub sems dpa' sems can bsdu bar bya ba rnams legs par sdud pa dang / sems can tshar gcad par bya ba rnams yang dag par tshar gcod pa dang / sems can bstan pa dang zhe 'gras pa rnams kyi zhe 'gras pa sel bar byed pa dang /sems can tha mal par gnas pa rnams bstan pa 'di la 'jug par byed pa dang / sems can zhugs pa rnams theg pa gsum po dag la legs par yongs su smin par byed pa dang / sems can yongs su smin pa rnams rnam par grol bar byed pa dang /de dag kha cig 'di lta ste/ theg pa dman pas nges par 'byung ba las brtsams pa dang / theg pa chen pos nges par 'byung ba las brtsams te/ tshogs bsrung ba dang / bsags pa la yang dag par 'dzud pa dang / tshogs bsrung zhing bsags pa ji lta ba de bzhin du rab tu dben pa nyid dang /sems rtse gcig tu bya ba dang / sgrib pa rnam par dag par bya ba dang / yid la byed pa sgom pa la yang dag par 'dzud pa dang / nyan thos dang / rang sangs rgyas kyi rigs can rnams nyan thos dang / rang sangs rgyas kyi theg pa la yang dag par 'dzud pa dang / de bzhin gshegs pa'i rigs can rnams bla na med pa yang dag par rdzogs pa'i byang chub kyi theg pa la yang dag par 'dzud pa'o/ /de la de byang chub sems dpa' rnams kyi phongs shing 'dod pa'i don spyod pa gang zhe na/ de ni rnam pa brgyad du blta bar bya ste/ sems can ngo tsha bar bya ba'i gnas rnams la ngo tsha ba med pa'i kun nas dkris pas kun nas dkris pa rnams kyi ngo tsha med pa'i kun nas dkris pa sel bar byed/spong bar byed pa dang / ngo tsha med pa'i kun nas dkris pa ji lta ba de bzhin du khrel yod par bya ba rnams la khrel med pa'i kun nas dkris pa dang / rmugs pa'i kun nas dkris pa dang /gnyid kyi kun nas dkris pa dang / rgod pa'i kun nas dkris pa dang / 'gyod pa'i kun nas dkris pa dang / phrag dog gi kun nas dkris pa dang / ser sna'i kun nas dkris pa sel bar byed/ spong bar byed pa'o/ /de la byang chub sems dpa'i 'di dang gzhan du bde bar 'gyur ba'i don spyod pa gang zhe na/de ni rnam pa dgur blta bar bya ste/ sems can gzhan dag gi lus kyi las yongs su dag par bya ba las brtsams te/ srog gcod pa'i rnam pa thams cad spang ba yang dag par 'dzin du 'jug pa dang / ma byin par len pa'i rnam pa thams cad spang ba yang dag par 'dzin du 'jug pa dang /'dod pa la log par g.yem pa'i rnam pa thams cad spang ba yang dag par 'dzin du 'jug pa dang / 'bru'i chang dang / btsos pa'i chang myos par 'gyur ba bag med pa'i gnas rnam pa thams cad spang ba yang dag par 'dzin du 'jug pa dang / ngag gi las yongs su dag par bya ba las brtsams te/brdzun du smra ba'i rnam pa thams cad spang ba yang dag par 'dzin du 'jug pa dang / phra ma'i rnam pa thams cad spang ba yang dag par 'dzin du 'jug pa dang / tshig rtsub pa'i rnam pa thams cad spang ba yang dag par 'dzin du 'jug pa dang / tshig kyal pa'i rnam pa thams cad spang ba yang dag par 'dzin du 'jug pa dang /yid kyi las yongs su dag par bya ba las brtsams te/ brnab sems dang / gnod sems dang / log par lta ba'i rnam pa thams cad spang ba yang dag par 'dzin du 'jug pa'o/ /de la byang chub sems dpa'i rnam par dag pa'i don spyod pa gang zhe na/de ni rnam pa bcur blta bar bya ste/ phyi rol dag pa las brten te rnam pa lnga dang / nang dag pa las brten te rnam pa lnga'o/ /de la phyi rol dag pa las brten te/ byang chub sems dpa' rnams kyi sems can rnams la don spyod pa rnam pa lnga gang zhe na/ kha na ma tho ba med pa dang / phyin ci mi ldog pa dang /rims su 'bab pa dang / kun du 'gro ba dang / mthun mthun du sbyor ba ste/ 'di la byang chub sems dpa' ni nyes par spyod pa dang 'dres shing nyes par spyod pa sngon du 'gro ba kha na ma tho ba dang bcas shing / kun nas nyon mongs pa can gyi mi dge ba la sems can rnams 'dzud par mi byed de/'di ni de'i sems can rnams la don spyod pa kha na ma tho ba med pa yin no/ /yang byang chub sems dpa' ni thar pa ma yin pa dang / gcig tu nges par rnam par dag pa ma yin pa'i gnas la 'di ni thar pa'o/ /'di ni gcig tu nges par rnam par dag pa'o/ /zhes sems can rnams de nyid la yang dag par 'dzin du 'jug par mi byed de 'di ni de'i sems can rnams la don spyod pa phyin ci mi ldog pa yin no//yang byang chub sems dpa' ni rim gyis dge ba'i phyogs yang dag par 'grub par bya ba'i phyir/ sems can byis pa'i shes rab can rnams la thog mar sla ba'i chos ston par byed cing sla ba'i gdams ngag dang /rjes su bstan pa rjes su 'jug par byed do/ /de dag shes rab 'bring dang ldan par gyur par rtogs nas/ chos bstan pa 'bring dang / gdams ngag dang / rjes su bstan pa 'bring rjes su 'jug par byed do/ /de dag shes rab rgya chen po dang ldan par gyur par rtogs nas chos zab mo ston cing /gdams ngag dang rjes su bstan pa phra ba rjes su 'jug par byed de / 'di ni de'i sems can rnams la don spyod pa rims su 'bab pa yin no/ /yang byang chub sems dpa' ni rigs bzhi dang / lha dang mi rnams dang /sems can thams cad kyi don ci nus ci lcogs kyis spyod cing / phan pa dang / bde ba yongs su tshol ba dang / de nyid la yang dag par 'dzud par byed de/ 'di ni de'i sems can rnams la don spyod pa kun du 'gro ba yin no/ /yang byang chub sems dpa' ni sems can gang dag rang gi don dge ba chung ngu'am/'bring ngam/ chen po gang la yang dag par gzung bar nus pa dang / thabs gang gis yang dag par gzung bar nus pa de la de dag mthun mthun du der yang dag par 'dzud par byed de de ni re zhig byang chub sems dpa' rnams kyi sems can rnams kyi don spyod pa'i phyi rol dag pa rnam pa lnga yin no//de la byang chub sems dpa' rnams kyi sems can rnams kyi don spyod pa nang dag pa rnam pa lnga gang zhe na/ 'di la byang chub sems dpa' ni snying rje'i bsam pa rgya chen pos nye bar gnas pas sems can rnams la don kun du spyod do/ /yang byang chub sems dpa' ni sems can rnams kyi don la sdug bsngal thams cad kyis ngal bar gyur kyang yid yongs su mi skyo zhing rab tu dga' ba kho nas sems can rnams kyi don kun du spyod do//yang byang chub sems dpa' ni phun sum tshogs pa mchog dam pa la gnas kyang bran dang 'dra ba dang / mngag gzhug pa dang 'dra ba dang / dbang ba dang 'dra ba dang / bu dang 'dra ba dang / gdol ba'i bu dang 'dra bar rgyags pa dang / khengs pa dang / nga rgyal bcom nas dma' ba'i sems kyis sems can rnams kyi don kun du spyod do/ /yang byang chub sems dpa' ni zang zing med pa dang / bcos ma ma yin pa dang /mchog tu byams pas sems can rnams kyi don kun du spyod do/ /yang byang chub sems dpa' ni gtan du phyir mi ldog pa'i byams pa'i sems kyis sems can rnams kyi don kun du spyod de/ 'di ni byang chub sems dpa'i sems can rnams kyi don spyod pa nang dag pa rnam pa lnga yin par rig par bya ste/phyi rol dag pa rnam pa lnga po gang yin pa dang / nang dag pa rnam pa lnga po gang yin pa de dag thams cad gcig tu bsdus pa ni byang chub sems dpa' rnams kyi rnam par dag pa'i don spyod pa rnam pa bcu zhes bya'o/ /de la byang chub sems dpa'i don mthun pa gang zhe na/'di la byang chub sems dpa' don gang dang / dge ba'i rtsa ba gang la gzhan dag yang dag par 'jud pa'i don de dang / dge ba'i rtsa ba de la mtshungs pa'am/ lhag par bdag nyid yang dag par ston te/ de ltar byang chub sems dpa'i gzhan dag dang don mtshungs pa gang yin pa 'di ni don mthun pa zhes bya'o//byang chub sems dpa'i don mthun pa de lta bu la gzhan dag gis mthong na/ dge ba yang dag par blangs pa de la brten cing nges te/ phyir mi ldog par 'gyur ro/ /de ci'i phyir zhe na/ de dag 'di snyam du sems par 'gyur te/ gang gi phyir byang chub sems dpa' 'dis gang kho na la bdag cag yang dag par btsud pa de nyid la/bdag nyid kyis kyang kun tu spyod par byed pa las na/ byang chub sems dpa' 'dis bdag cag gang la yang dag par btsud pa 'di ni bdag cag la phan pa dang / 'di ni bde ba yin gor ma chag ste/ 'di ni shes bzhin du phan pa ma yin pa dang /bde ba ma yin pa la bdag nyid kun du spyod par byed pa ni mi srid do snyam du sems pa'i phyir ro/ /don mthun pa'i byang chub sems dpa' de la ni pha rol smra ba de dag kyang 'di skad du khyed bdag nyid kyang dge ba yang dag par blangs te/ mi 'dug na ci'i phyir khyod gzhan dge ba la shin tu yang dag par gzung bar bya ba dang /bstan par bya ba dang / gdams par bya bar sems/ khyod nyid kyang re zhig gzhan dag gis bstan cing gdams pa dang bcos dgos so zhes mi zer ro/ /byang chub sems dpa' ni gzhan dag dang don mthun pa kho na yin la/ don mthun pa de gzhan dag la ston par mi byed pa yang yod do//don mthun pa kho na ni ma yin la/ don mthun pa ston pa yang yod do/ /don mthun pa kho na ni yin la/ don mthun par ston par mi byed pa yang yod do/ /de la mu dang po ni byang chub sems dpa' yon tan dang mthu mnyam zhing /byang chub sems dpa'i lam la slob dpon du khas blangs pa rnams la/ byang chub sems dpa' yon tan dang mthu mnyam pas/ dge ba mi spyoms pas yon tan dang mthu ston par mi byed pa'o/ /mu gnyis pa ni sems can dman pa la mos shing / zab mo'i gnas dag la skrag pa rnams la /byang chub sems dpa' so sor brtags nas sems can de dag la thabs des gdul ba'i phyir bdag nyid chos mthun par ston par byed de/ rigs ngan yan chad dang / khyi yan chad kyi don bya bar 'dod/ gnod pa yang dag par zhi bar bya bar 'dod / gdul bar bya bar 'dod de/ rigs ngan yan chad dang / khyi yan chad dag dang / skal ba mnyam par bsams bzhin du skye bar byed pa'o/ /mu gsum pa ni 'dul ba dge ba'i rtsa ba yang dag par blangs par gyur pa rnams bstan par bya ba'i phyir byang chub sems dpa' don mthun pa'am/ don lhag pas don mthun par ston pa'o//mu bzhi pa ni bdag nyid kyang bag med la/ gzhan gyi don yang yal bar 'dor ba'o/ /de la sbyin pa rnam pa du mar bstan pa gang yin pa dang / tshul khrims gang yin pa nas don mthun pa gang yin pa'i bar du rgya cher bstan pa de la pha rol tu phyin pa rnams kyis ni bdag gi sangs rgyas kyi chos yongs su smin par byed do//bsdu ba'i dngos po rnams kyis ni sems can thams cad yongs su smin par byed do / /mdor bsdu na byang chub sems dpa' rnams kyi dge ba'i chos rnams kyi las ni de yin par rig par bya'o/ /de la sbyin pa rnam pa du ma gang yin pa nas snga ma bzhin du don mthun pa'i bar gyi dge ba'i chos byang chub kyi phyogs rnam pa du ma dpag tu med pa de dag ni rgyu gsum gyis kun du spyod par rig par bya'o//rgyu gnyis kyis phul du byung bar rig par bya'o/ /rgyu gsum gyis ni rnam par dag par rig par bya ste/ lus dang ngag dang yid kyis ni kun du spyod par rig par bya'o//rgya che ba'i phyir dang / kun nas nyon mongs pa can ma yin pa'i phyir phul du byung ba dang / bla na med pa dang / thun mong ma yin par rig par bya'o/ /de la sems can la dbye ba med pa dang / dngos po la dbye ba med pa dang / dus la dbye ba med pas ni rgya cher rig par bya'o/ /de la sems can la dbye ba med pa ni/byang chub sems dpa' sems can thams cad la brten cing / sems can thams cad las brtsams nas sbyin pa la sogs pa dge ba'i rtsa ba de dag kun du spyod par byed kyi / bdag kho na 'ba' zhig gi phyir ma yin pa gang yin pa'o/ /de la dngos po la dbye ba med pa ni/byang chub sems dpa' sbyin pa la sogs pa dge ba'i rtsa ba de dag thams cad dang / rnam pa thams cad yang dag par blangs te 'dug pa gang yin pa'o/ /de la dus la dbye ba med pa ni byang chub sems dpa' tshe 'di la mtshan mo'am/ nyin mo rtag tu rgyun mi 'chad par sbyor ba mi gtong zhing brtson pa mi 'dor ba dang /rgyu de nyid kyis tshe phyi ma la yang phyin pa la sogs pa dge ba'i rtsa ba de dag kun du spyod par byed pa gang yin pa'o/ /de la kun nas nyon mongs pa can ma yin pa ni rnam pa bzhir rig par bya ste/ 'di la byang chub sems dpa' ni sems dga' ba dang / sdug bsngal ba med pa dang /yid mi bde ba med pas dge ba'i chos de dag la rten par byed de/ gzhi des 'gyod par yang mi byed do/ /yang byang chub sems dpa' ni gzhan la gnod pa med pa dang / lta bar gyur pa la mngon par zhen pa med par sbyin pa la sogs pa dge ba'i rtsa ba nyes par spyod pa dang ma 'dres pa de dag kun du spyod do//yang byang chub sems dpa' ni gus pa dang / snying thag pa nas de dag nyid la yon tan du lta zhing snying por lta la zhi bar lta ste/ shin tu nges pa dang / gzhan gyi dring mi 'jog cing / gzhan gyis mi bkri bar sbyin pa la sogs pa dge ba'i chos de dag yang dag par blangs te gnas so//yang byang chub sems dpa' ni sbyin pa la sogs pa dge ba'i chos de dag gi rnam par smin pa 'khor los sgyur ba nyid dam / brgya byin nyid dam / bdud nyid dam/ tshangs pa nyid du re ba med do/ /gzhan las lan du phan 'dogs pa la yang re ba med de/ khe dang rnyed pa dang / bkur sti dang / tshigs su bcad pa thams cad la rten par mi byed do/ /tha na lus dang srog la yang rten par mi byed do/ /de ltar rnam pa de dag gis dang ba dang / mchog tu dga' ba dang ldan pa dang / mi mthun pa med pa dang / gus pa dang / mi rten par sbyin pa la sogs pa nas/don mthun pa la thug pa'i dge ba'i chos rnams kun du spyod pa gang yin pa de ni/ kun nas nyon mongs pa can ma yin pa zhes bya'o/ /rnam par dag pa ni sbyangs pa dang / mi g.yo ba dang / shin tu rnam par dag par rig par bya ste / de la bsam pa dag pa'i sa la zhugs pa'i byang chub sems dpa'i dge ba'i rtsa ba de dag ni sbyangs pa dang /mi g.yo ba yin no/ /de la sbyangs pa ni 'di yin te/ 'di ltar bsam pa dag pa'i byang chub sems dpa'i dge ba'i chos de dag thams cad ni so sor ma brtags par byed pa yin no/ /de la mi g.yo ba ni 'di yin te/ 'di ltar bsam pa dag pa'i byang chub sems dpa' ni dge ba'i chos ji ltar thob pa rnams dang / ji ltar bsags pa de dag las yongs su nyams par mi 'gyur zhing / phyis kyang yongs su nyams pa'i skal ba can du mi 'gyur te/ mtshan mo dang nyin mo de dang de dag 'das pa dang / lus de dang de dag 'das pa na zla ba yar gyi ngor gyur pa bzhin du dge ba'i chos rnams kyis 'phel ba kho nar 'gyur te/de dag gis yongs su 'grib par mi 'gyur ro/ /byang chub sems dpa' mthar thug par 'gro ba'i sa la gnas pa dang / byang chub sems dpa' skye ba gcig gis thogs pa dang / srid pa tha ma pa'i dge ba'i chos de dag ni shin tu rnam par dag par rig par bya ste/byang chub sems dpa'i sa la de dag las shas cher yongs su dag pa gong na med do/ /de ltar na sbyin pa la sogs pa nas don mthun pa la thug pa'i dge ba'i chos de dag rgyu gsum pos kun du spyod pa dang / rgyu gnyis kyis phul du byung ba dang /rgyu gsum gyis shin tu rnam par dag par rig par bya'o/ /de la sbyin pa thams cad dang / tshul khrims thams cad nas rgyas par don mthun pa thams cad kyi bar dag kun du brten cing shin tu rnam par dag par byas te/ mtha' dag kun du rtogs par byas pa las ni 'bras bu bla na med pa yang dag par rdzogs pa'i byang chub dang /rdo rje'i snying po'i sku dang / dam pa'i chos yun ring du gnas pa mngon par 'grub bo/ /de la dka' ba'i sbyin pa dang / dka' ba'i tshul khrims nas/ dka' ba'i don mthun pa'i bar du kun du brten cing shin tu rnam par dag par byas pas ni 'bras bu de bzhin gshegs pa'i ngo mtshar rmad du byung ba'i chos mtshungs pa med pa dang ldan pa mngon par 'grub bo//de la thams cad kyi sgo nas sbyin pa dang / thams cad kyi sgo nas tshul khrims nas rgyas par thams cad kyi sgo nas don mthun pa'i bar gyis ni 'bras bu de bzhin gshegs pa'i thams cad las gtso bor gyur pa'i sems can lha dang mi rnams kyis mchod par 'gyur ba nyid mngon par 'grub bo//de la skyes bu dam pa'i sbyin pa dang / skyes bu dam pa'i tshul khrims dang / skyes bu dam pa'i don mthun pa'i bar gyi 'bras bu ni de bzhin gshegs pa'i sems can gang dag su yang rung ba/rkang med dam / rkang gnyis pa 'am/ rkang bzhi pa'am/ rkang mangs sam/ gzugs can nam/ gzugs med pa'am/ 'du shes can nam/ 'du shes med pa'am/ 'du shes med 'du shes med min skye mched du nye bar song ba'i sems can de dag thams cad kyi mchog tu 'gyur ba mngon par 'grub bo//de la rnam pa thams cad kyi sbyin pa dang / rnam pa thams cad kyi tshul khrims nas rgyas par rnam pa thams cad kyi don mthun pa'i bar gyi 'bras bu ni de bzhin gshegs pa'i skyes bu chen po'i mtshan sum cu rtsa gnyis dang / dpe byad bzang po brgyad cu'i sku bsod nams sna tshogs dpag tu med pas yongs su bsdus pa mngon par 'grub bo//de la phongs shing 'dod pa'i sbyin pa dang / phongs shing 'dod pa'i tshul khrims nas rgyas par phongs shing 'dod pa'i don mthun pa'i bar gyi 'bras bu ni de bzhin gshegs pa'i byang chub kyi snying po la bzhugs pa'i bdud dang /phyir rgol ba thams cad kyis gnod par bya ba dang / tho 'tshams pa dang / bskyod par mi nus pa mngon par 'grub bo/ /de la 'di dang gzhan du bde bar 'gyur ba'i sbyin pa dang / 'di dang gzhan du bde bar 'gyur ba'i tshul khrims nas rgyas par 'di dang gzhan du bde bar 'gyur ba'i don mthun pa'i bar gyi 'bras bu ni de bzhin gshegs pa'i bsam gtan dang /rnam par thar pa dang / ting nge 'dzin dang / snyoms par 'jug pa'i bde ba'i mchog mngon par 'grub bo/ /de la rnam par dag pa'i sbyin pa dang / rnam par dag pa'i tshul khrims nas rgyas par rnam par dag pa'i don mthun pa'i bar du kun du brten cing /shin tu rnam par dag par byas te/ mtha' dag kun du rdzogs par byas pa'i 'bras bu ni de bzhin gshegs pa'i rnam pa thams cad yongs su dag pa bzhi ste/ sku rnam par dag pa dang / dmigs pa rnam par dag pa dang /thugs rnam par dag pa dang / ye shes rnam par dag pa mngon par 'grub bo/ /de bzhin du bsrung ba med pa gsum dang / stobs bcu dang / mi 'jigs pa dang / dran pa nye bar gzhag pa dang / sangs rgyas kyi chos ma 'dres pa thams cad rnam par dag pa yang mngon par 'grub ste/'di ni byang chub sems dpa'i sbyin pa la sogs pa dge ba'i chos rnams kyi mthar thug par gyur pa'i 'bras bu bla na med pa'o/ /gzhan yang 'khor ba'i tshe byang chub sems dpa'i spyod pa la de'i 'bras bu tshad med pa dang / sdug pa dang / kha na ma tho ba med par rig par bya'o/ / byang chub sems dpa'i sa'i gzhi'i rnal 'byor gyi gnas las bsdu ba'i dngos po'i le'u ste bco lnga pa'o// //bam po bcu gsum pa/ sdom ni/ dkon mchog mchod dang mdza' rten dang / /tshad med pa ni tha ma yin/ /de la byang chub sems dpa'i de bzhin gshegs pa rnams la de bzhin gshegs pa la mchod pa gang zhe na/de ni mdor bsdu na rnam pa bcur rig par bya ste/ sku la mchod pa dang / mchod rten la mchod pa dang / mngon sum du mchod pa dang / mngon sum ma yin par mchod pa dang / bdag gis byas pa'i mchod pa dang / gzhan byed du 'jug pa'i mchod pa dang /rnyed pa dang / bkur sti'i mchod pa dang / rgya chen po'i mchod pa dang / kun nas nyon mongs pa can ma yin pa'i mchod pa dang / sgrub pa'i mchod pa'o/ /de la byang chub sems dpa' de bzhin gshegs pa'i gzugs kyi sku nyid la mngon sum du mchod pa byed pa de ni de'i sku la mchod pa zhes bya'o//de la byang chub sems dpa' de bzhin gshegs pa'i phyir mchod rten nam/ gtsang khang phyur bu'am/ gtsang khang ngam/ mchod rten rnying pa'am / mchod rten sar pa la mchod pa byed pa de ni de'i mchod rten la mchod pa zhes bya'o/ /de la byang chub sems dpa' de bzhin gshegs pa'i sku'am/de bzhin gshegs pa'i mchod rten la mngon du gyur par dbang po la snang bar mngon sum du mchod pa byed pa de ni mngon sum du mchod pa zhes bya'o/ /de la byang chub sems dpa' de bzhin gshegs pa'am/ de bzhin gshegs pa'i mchod rten la mngon sum du mchod pa byed pa ni/'di ltar lhag pa'i bsam pa dang ldan pa dang / dga' ba dang ldan pa'i sems mngon par 'du byed de/ de bzhin gshegs pa gcig gi chos nyid gang yin pa 'di ni 'das pa dang / ma byon pa dang / da ltar byung ba'i de bzhin gshegs pa thams cad kyi chos nyid yin la/ de bzhin gshegs pa'i mchod rten gcig gi chos nyid gang yin pa de ni de bzhin gshegs pa'i mchod rten thams cad kyi chos nyid yin te/de'i phyir bdag gis de bzhin gshegs pa mngon sum du gyur pa 'di la yang mchod pa bya'o/ /'das pa dang / ma byon pa dang / da ltar byung ba'i de bzhin gshegs pa de dag thams cad la yang mchod pa bya'o//de bzhin gshegs pa'i mchod rten mngon du gyur pa 'di la yang mchod pa bya'o/ /de ma yin pa phyogs bcu'i 'jig rten gyi khams mtha' yas mu med pa dag na mchod rten dang / gtsang khang phyur bu dang / gtsang khang dang / mchod rten rnying pa dang /mchod rten gsar bzhugs pa thams cad la yang mchod pa bya'o snyam pa de ni re zhig byang chub sems dpa'i de bzhin gshegs pa dang / de bzhin gshegs pa'i mchod rten la mngon sum dang / mngon sum ma yin pa'i thun mong gi mchod pa yin par rig par bya'o/ /byang chub sems dpa' de bzhin gshegs pa'am/de bzhin gshegs pa'i mchod rten mngon sum du ma gyur pa la sangs rgyas thams cad kyi phyir dang / de bzhin gshegs pa'i mchod rten thams cad kyi phyir/ de bzhin du sems mngon par 'du byas te/ mchod pa byed pa de ni de'i mngon sum du ma yin pa 'ba' zhig gi mchod pa yin par rig par bya'o//de bzhin gshegs pa yongs su mya ngan las 'das nas/ de bzhin gshegs pa'i phyir byang chub sems dpa' de bzhin gshegs pa'i sku'am/ mchod rten nam/ gtsang khang phyur bu'am/ gtsang khang gcig gam/gnyis sam/ mang po nas bye ba phrag 'bum gyi bar du ci nus ci lcogs kyis byed du 'jug pa de yang byang chub sems dpa'i de bzhin gshegs pa rnams la mngon sum ma yin pa'i mchod pa rgya chen po bsod nams tshad med pa'i 'bras bu can tshangs pa du ma'i bsod nams kyis yongs su zin pa yin te/des byang chub sems dpa'i bskal pa chen po bskal pa du mar yang log par ltung bar 'gro bar mi 'gyur la/ gzhi de las bla na med pa yang dag par rdzogs pa'i byang chub kyi tshogs kyang yongs su rdzogs par mi byed par mi 'gyur ro/ /de la byang chub sems dpa' de'i de bzhin gshegs pa'am/de bzhin gshegs pa'i mchod rten kho na la mchod pa byed pa gang yin pa de ni re zhig bsod nams kyi 'bras bu rgya che bar blta bar bya'o/ /mngon sum ma yin pa 'ba' zhig gi bsod nams kyi 'bras bu ni de bas kyang ches rgya che bar blta bar bya'o//mngon sum dang mngon sum ma yin pa'i spyi'i mchod pa'i bsod nams kyi 'bras bu ni de bas kyang shin tu rgya che bar blta bar bya'o/ /de la byang chub sems dpa' de bzhin gshegs pa'am/ de bzhin gshegs pa'i mchod rten la mchod pa bya bar 'dod pas bdag nyid kyis rang gi lag gis byed de/le lo dang snyom las dang / bag med pa'i gnas la brten te / bran dang bran mo dang / las byed pa dang / zho shas 'tsho ba dang / mdza' bshes dang / gros grogs dang / nye du dang snag gi gnyen mtshams rnams byed du mi 'jug pa de ni byang chub sems dpa'i bdag gis byas pa'i mchod pa yin par rig par bya'o//de la byang chub sems dpa' de bzhin gshegs pa'am/ de bzhin gshegs pa'i mchod rten la mchod pa bya bar 'dod pas/ bdag nyid 'ba' zhig mi byed par pha ma gnyis kyang byed du 'jug pa dang / bu dang chung ma dang / bran dang bran mo dang /las byed pa dang / zho shas 'tsho ba rnams dang / mdza' bshes dang / gros grogs dang / nye du dang / snag gi gnyen mtshams rnams dang / gzhan rgyal po rnams dang / blon po chen po rnams dang / bram ze rnams dang / khyim bdag rnams dang / grong rdal pa rnams dang / yul gyi mi rnams dang / phyug po rnams dang / tshong dpon rnams dang / ded dpon rnams dang / tha na skyes pa dang / bud med dang / khye'u dang / bu mo rnams dang / bkren pa rnams dang / sdug bsngal ba rnams dang / rigs ngan yan chad kyang byed du 'jug pa dang / de bzhin du mkhan po dang /slob dpon rnams dang / lhan cig gnas pa'i slob ma rnams dang / tshangs pa mtshungs par spyod pa rab tu byung ba rnams dang / gzhan mu stegs can rab tu byung ba rnams kyang de bzhin gshegs pa 'am/ de bzhin gshegs pa'i mchod rten la mchod pa byed du 'jug pa de ni byang chub sems dpa'i bdag dang gzhan gyis byas pa'i thun mong gi mchod pa yin par rig par bya'o//byang chub sems dpa' mchod pa bya ba'i sbyin par bya ba'i dngos po chung ngu yod la snying rje dang ldan pa'i sems kyis sems can sdug bsngal ba bsod nams chung zhing mi nus pa 'di dag gis de bzhin gshegs pa'am/de bzhin gshegs pa'i mchod rten la bya ba byas na bde bar 'gyur ro snyam nas/ dngos po de bsams bzhin du gzhan dag kho na la sbyin par byed la/ gzhan dag gis kyang dngos po des de bzhin gshegs pa'am/ de bzhin gshegs pa'i mchod rten la mchod pa byed de/byang chub sems dpa' ni mi byed pa de ni byang chub sems dpa'i gzhan byed du bcug pa'i mchod pa yin par rig par bya'o/ /de la bdag 'ba' zhig gis byas pa gang yin pa de ni bsod nams kyi 'bras bu che ba yin no/ /gzhan 'ba' zhig byed du bcug pa gang yin pa de ni bsod nams kyi 'bras bu ches che ba yin no//thun mong gang yin pa de ni bsod nams kyi 'bras bu shin tu che ba yin te / gong na med par rig par bya'o/ /de la byang chub sems dpa' de bzhin gshegs pa'am/ de bzhin gshegs pa'i mchod rten la na bza' dang / zhal zas dang / gzims cha dang / gdan dang / snyun gyi gsos sman dang / yo byad rnams dang / gus par smra ba dang / phyag 'tshal ba dang / mngon du ldang ba dang / thal mo sbyar ba dang / mchod pa'i las bdug pa'i spos rnams dang / phye ma'i spos rnams dang / byug pa'i spos rnams dang / me tog phreng ba rnam pa sna tshogs dang /rol mo'i sgra rnam pa sna tshogs dang / gdugs dang / rgyal mtshan dang / ba dan dang / mar me rnam pa sna tshogs 'bul ba dang / bstod pa rnam pa sna tshogs brjod pa dang / yan lag lngas phyag bya ba dang / g.yas phyogs su bskor ba dag gis mchod pa byed pa dang / de bzhin du zad mi shes pa can gyi sbyin pa dang / nor bu dang / mu tig dang / bai DUr+ya dang / dung dang / man shel dang / byi ru dang / rdo'i snying po dang / spug dang / gser dang / dngul dang / pad+ma rA ga dang / g.yas su 'khyil pa la sogs pa rin po che rnams 'bul ba dang / nor bus spras pa'i snyan cha gdub kor dang /dpung rgyan la sogs pa rgyan rnams 'bul ba dang / tha na dril bu dbul ba dang / kAr ShA paN gtor ba dang / srad bus dkris pa rnams kyis mchod pa byed pa de ni byang chub sems dpa'i de bzhin gshegs pa'am/ de bzhin gshegs pa'i mchod rten la rnyed pa dang / bkur stis mchod pa yin par rig par bya'o//de la byang chub sems dpa' de bzhin gshegs pa'am/ de bzhin gshegs pa'i mchod rten la rnyed pa dang bkur sti de dag nyid kyis yun ring por mchod pa byed de / dngos po mang po dang / dngos po gya nom pa dang / mngon sum dang / mngon sum pa ma yin pa dang /bdag gis byas pa dang / gzhan gyis byas pa dang / snying thag pa nas dga' ba mngon du gyur cing / mos pa drag pos mchod pa byed pa dang / dge ba'i rtsa ba de yang bla na med pa yang dag par rdzogs pa'i byang chub tu yongs su sngo bar byed pa de ni byang chub sems dpa'i mchod pa rnam pa bdun rgya chen po zhes bya'o//de la byang chub sems dpa' de bzhin gshegs pa'am/ de bzhin gshegs pa'i mchod rten la rang gi lag gis bya ba byed de/ khyad du gsod pa'am/ bag med pa 'am/ le los gzhan dag byed du mi 'jug pa dang / gus par byed de ma gus pas ma yin pa dang /sems mi g.yeng bas byed pa dang / sems kun nas nyon mongs pa can ma yin pas byed pa dang / sangs rgyas la mngon par dad pa'i rgyal po la sogs pa sems can rgya chen po dag las rnyed pa dang / bkur sti'i rgyus tshul 'chos pa'i phyir mi byed pa dang / mthun pa'i dngos pos mchod pa byed de bab las byug pa dang /mar khus bkru ba dang / gu gul gyis bdug pa dang / arga'i me tog la sogs pa dang / gzhan yang yo byad rung ba ma yin pa dag gis mi byed pa de ni/ byang chub sems dpa'i mchod pa rnam pa sna tshogs kun nas nyon mongs pa can ma yin par rig par bya'o//rnyed pa dang bkur sti'i mchod pa rgya che ba dang / kun nas nyon mongs pa can ma yin pa de yang byang chub sems dpa' longs spyod kyi gzhi rang gi zho shas bsgrubs pa rnams sam/ gzhan las yongs su btsal ba rnams sam/ yo byad la dbang thob pa rnams kyis de bzhin gshegs pa'am/de bzhin gshegs pa'i mchod rten la mchod pa byed de/ de la yo byad la dbang thob pa'i byang chub sems dpa' lus gnyis sam/ gsum mam/ lus mang po lus bye ba khrag khrig 'bum phrag du ma'i bar dag mngon par sprul nas/ lus de dag thams cad kyis de bzhin gshegs pa rnams la phyag 'tshal te/lus de dag re re la yang lag pa brgya'am/ lag pa stong ngam/ de bas kyang lhag pa dag sprul nas/ lag pa de dag thams cad kyis lha'i las yang dag par 'das pa'i me tog mchog tu dri zhim pa/ mchog tu yid du 'ong ba dag gis de bzhin gshegs pa de dag la mngon par 'thor ba dang /lus de dag thams cad kyis de bzhin gshegs pa'i yang dag pa'i yon tan ldan pa'i bstod pa shin tu rgya chen po dag brjod cing / lus de dag thams cad kyi dpung rgyan dang / nor bus spras pa'i rna cha gdub kor rnams dang / gdugs dang / rgyal mtshan dang / ba dan rnam pa sna tshogs mchog tu gyur pa gya nom pa dag de bzhin gshegs pa rnams la 'bul zhing 'dogs par byed de/ de lta bu dang mthun pa'i yo byad la dbang thob pa'i byang chub sems dpa' ni rang gi sems la dbang yod pa'i mchod pa byed de/ des ni sangs rgyas 'byung ba la re bar byas shing don du gnyer bar bya mi dgos so//de ci'i phyir zhe na/ 'di ltar de ni phyir mi ldog pa'i sa la zhugs pas sangs rgyas kyi zhing thams cad du thogs pa med par 'gro ba'i phyir ro/ /byang chub sems dpa' longs spyod rang gi zho shas bsgrubs pa yang med la/gzhan las yongs su btsal te rnyed pa yang med/ byang chub sems dpa' longs spyod la dbang thob pa yang ma yin yang / de bzhin gshegs pa'i mchod pa gang ci yang rung ba 'dzam bu gling ngam/ gling bzhi pa'am/ stong ngam/ stong gnyis sam/ stong gsum gyi stong chen po'am/phyogs bcu'i 'jig rten gyi khams mtha' yas mu med pa dag na chung ngu dang / 'bring dang / chen po yod pa de dag thams cad kyang byang chub sems dpa' dad pa can gyis dga' ba dang ldan pa dang / rgya chen po la mos pa dang ldan pa'i sems kyis khyab par byas nas rjes su yi rang bar byed de/de yang byang chub sems dpa'i tshegs chung ngus de bzhin gshegs pa la mchod pa chen po tshad med pa/ byang chub kyi tshogs chen pos yongs su bsdus pa yin te/ de la ni byang chub sems dpa' rtag tu rgyun mi 'chad par sems nyams bde ba dang / sems dga' bas brtson par bya'o//de la byang chub sems dpa' ni cung zad cung zad dang / yud tsam yud tsam du tha na ba 'jos tsam gyi bar du yang sems can srog chags 'byung po thams cad la byams pa'i sems sgom par byed/ snying rje dang ldan pa dang / dga' ba dang ldan pa dang / btang snyoms dang ldan pa'i sems sgom par byed /de bzhin du 'du byed thams cad la mi rtag pa'i 'du shes dang / mi rtag pa la sdug bsngal gyi 'du shes dang / sdug bsngal la bdag med pa'i 'du shes dang / mya ngan las 'das pa la phan yon gyi 'du shes sgom par byed/ de bzhin du de bzhin gshegs pa rjes su dran pa dang /chos dang / dge 'dun dang / pha rol tu phyin pa rjes su dran pa sgom par byed/ de bzhin du cung zad cung zad dang / yud tsam yud tsam la yang chos thams cad la bzod pa chung ngu'i shes pa phyogs gcig pas kyang brjod du med pa'i chos kyi ngo bo nyid de bzhin nyid la mos shing rnam par mi rtog pa dang /mtshan ma med pa'i sems kyis gnas par byed na/ de'i gong dang de las lhag par lta ci smos/ de bzhin du byang chub sems dpas tshul khrims kyi sdom pa yongs su bsrung ba dang / zhi gnas dang / lhag mthong dang / byang chub kyi phyogs kyi chos rnams la brtson par byed pa dang /de bzhin du pha rol tu phyin pa rnams dang / bsdu ba'i dngos po rnams la yang dag par brtson par byed pa de ni byang chub sems dpa'i sgrub par gtogs pas de bzhin gshegs pa la mchod pa'i mchog dam pa gya nom pa/ gong na med pa yin te/ snga ma'i rnyed pa dang / bkur sti'i mchod pa rnam pa thams cad pa yang /mchod pa de'i brgya'i cha dang / stong gi char yang nye bar mi 'gro ba nas rgyas par rgyu'i bar du yang nye bar mi 'gro ste/ de ni rnam pa bcu po de dag gis de bzhin gshegs pa la mchod pa'i bye brag rnam pa thams cad yin par rig par bya'o/ /de bzhin gshegs pa la mchod pa ji lta ba bzhin du chos la mchod pa dang /dge 'dun la mchod pa yang de dang 'dra bar ci rigs par rig par bya'o/ /de la dkon mchog gsum la mchod pa rnam pa bcu po de dag byed pa'i byang chub sems dpa' ni de bzhin gshegs pa la dmigs pa'i lhag pa'i bsam pa drug gis byed de/yon tan gyi zhing bla na med pa'i lhag pa'i bsam pa dang / phan 'dogs pa bla na med pa'i lhag pa'i bsam pa dang / rkang med dang / rkang gnyis pa la sogs pa sems can thams cad kyi mchog tu gyur pa'i lhag pa'i bsam pa dang / u dum wA ra'i me tog bzhin du shin tu dkon pa'i lhag pa'i bsam pa dang /stong gsum gyi stong chen po'i 'jig rten gyi khams na gcig pu 'byung ste/ 'ba' zhig pa'i lhag pa'i bsam pa dang / 'jig rten dang / 'jig rten las 'das pa'i phun sum tshogs pa'i don thams cad ston pa'i lhag pa'i bsam pa ste /de'i lhag pa'i bsam pa drug po 'di dag gis de bzhin gshegs pa'am/ de'i chos sam/ de'i dge 'dun la mchod pa byas pa ni chung ngu yang 'bras bu dpag tu med par 'gyur na/ mang po lta ci smos/ de la rnam pa du dang ldan na byang chub sems dpa' dge ba'i bshes gnyen du rig par bya/rnam pa du zhig gis ni dge ba'i bshes gnyen nyid don yod pa yin/ rnam pa du zhig dang ldan na/ dge ba'i bshes gnyen dad pa'i gzhi'i gnas la gnas pa yin/ byang chub sems dpa'i dge ba'i bshes gnyen du gyur pa'i 'dul ba rnams la dge ba'i bshes gnyen gyi bya ba ni du zhig yod/byang chub sems dpa' dge ba'i bshes gnyen la brten pa ni rnam pa du zhig yod/ 'du shes rnam pa dus ni byang chub sems dpa' dge ba'i bshes gnyen las chos mnyan par bya/ byang chub sems dpa' dge ba'i bshes gnyen las chos nyan pa na/ gang zag chos smra ba de la gnas du zhig la ni yid la mi byed par bya zhe na/de la rnam pa brgyad dang ldan na byang chub sems dpa'i dge ba'i bshes gnyen rnam pa thams cad rdzogs pa yin par rig par bya ste/ byang chub sems dpa'i sdom pa'i tshul khrims rnams la gnas shing ma nyams pa dang / skyon med par byed pas tshul khrims la gnas pa yin/blo ma byang ba ma yin pas mang du thos pa yin/ bsgoms pa las byung ba'i dge ba gang yang rung ba thob cing / zhi gnas dang lhag mthong thob pas rtogs pa dang ldan pa yin/ snying rje dang ldan pas snying rje ba can yin te/ de tshe 'di la rang gi bde bar gnas pa yal bar bor nas gzhan dag gi don la sbyor ba yin/de gzhan dag la chos ston pa ni bag tsha ba'i 'jigs pas dran pa dang / spobs pa nyams pa med pas 'jigs pa med pa yin/ gzhan dag gis brnyas pa rnams dang / 'phya ba dang / bsting ba dang / ngan du brjod pa dang / ngan du smra ba la sogs pa mi 'dod pa'i tshig gi lam rnams dang /sems can gyi log par zhugs pa rnam pa sna tshogs rnams bzod pa yin/ 'khor bzhi po dag la chos bstan pa la stobs dang ldan zhing ngal ba med pas yid yongs su mi skyo ba yin/ tshig chos nyid las ma nyams shing gsal te/ tshig gi bya ba dang ldan pas dge ba'i tshig dang ldan pa yin no//de la byang chub sems dpa' dge ba'i bshes gnyen de lta bu'i yon tan gyi rnam pa thams cad dang ldan pa ni rnam pa lngas dge ba'i bshes gnyen gyi bya ba don yod pa yin te/ de ni snga nas kyang gzhan dag la phan pa dang bde bar 'dod pa yin/phan pa dang bde ba de yang yang dag pa ji lta ba bzhin du rab tu shes pa yin/ de la blo phyin ci log tu mi 'gyur ba yin/ thabs gang dang chos bstan pa'i tshul gang gis sems can gang 'dul nus pa de la nus shing mthu yod pa dang / yid yongs su mi skyo ba yin/ sems can tha ma dang 'bring dang /khyad par du 'phags pa thams cad la phyogs 'dzin pa med de/ snying rje snyoms pa yin no/ /de la dge ba'i bshes gnyen de ni rnam pa lngas dad pa'i gzhi la gnas pa yin te/ gang gi phyir gtam thos pas kyang de la gzhan dag shin tu dang bar byed na/ mngon sum du mthong bas lta smos kyang ci dgos te/spyod lam rab tu zhi ba dang / spyod lam dang ldan pa dang / yan lag dang nying lag thams cad mi 'gyur ba'i spyod lam phun sum tshogs pa yin/ lus dang ngag dang yid kyi las kyi mtha'i rgyu ba la rgod pa med cing 'gyur ba med pas brtan pa yin/ gzhan dag la tshul 'chos pa'i phyir so sor brtags nas spyod lam dang /brtan pa ltar mi 'chos pa'i tshul 'chos pa med pa yin/ gzhan dag gi chos kyi gtam mam/ rnyed pa dang / bkur sti las brtsams te/ mi bzod pa skye bar mi byed kyi gzhan dag gis chos kyi gtam bya bar bdag la gsol ba btab pa dang /rnyed pa dang / bkur sti rgya chen po rnyed na yang g.yo med cing dga' ba'i sems kyis gzhan la gsol ba 'debs su 'jug la chos kyi gtan de dang / rnyed pa dang bkur sti de yang gzhan dag la stobs par byed de/ ji ltar bdag gi rnyed pa dang / bkur stis mgu bar 'gyur ba de bzhin du gzhan gyi rnyed pa dang /gzhan gyi bkur stis ches shin tu mgu bar 'gyur bar phrag dog med pa yin/ snod spyad bsnyungs shing yo byad bsnyungs la 'tshog chas rnyed do cog thams cad yongs su gtong bas yo byad bsnyungs pa yin no/ /de la byang chub sems dpa'i dge ba'i bshes gnyen du gyur pa de ni/rnam pa lngas gdul ba gzhan dag las dge ba'i bshes gnyen gyi bya ba byed de/ gleng bar byed pa yin/ dran par byed pa yin/ 'doms par byed pa yin/ rjes su ston par byed pa yin/ chos ston par byed pa yin te/ tshig de dag gi rgyas par dbye ba ni 'di lta ste/ nyan thos kyi sa las rig par bya'o//gdams ngag dang rjes su bstan pa ni / de bas kyang lhag par 'di lta ste/ stobs kyi rigs kyi le'u las rig par bya'o/ /de la byang chub sems dpa'i dge ba'i bshes gnyen la brten pa ni rnam pa bzhis yongs su rdzogs par rig par bya ste/ dus dus su nad g.yog dang /tha mal pa'i g.yog byed pa byams pa dang / gus pa dang / dga' ba dang ldan pa dang / dus dus su gus par smra ba dang / phyag bya ba dang / mngon du ldang ba dang / thal mo sbyar ba dang / 'dud par bya ba dang / mchod par bya ba dang / chos dang mthun pa'i gos dang / zas dang / mal cha dang / stan dang / na ba'i gsos sman dang / yo byad sbyin pas mchod pa dang / gnas bcas nas yang dag par gzud pa dang / rnam par gzud pa chos dang mthun pa'i don la dbang byed la/ rnam par mi g.yo zhing yang dag pa ji lta ba bzhin du 'chags pa dang / dus shes par bya ba'i bsam pas drung du 'gro ba dang /bsnyen bkur byed pa dang / 'dri ba dang / nyan pa'o/ /de la byang chub sems dpas dge ba'i bshes gnyen las chos nyan par 'dod pas ni 'du shes rnam pa lngas chos mnyan par bya ste/ dkon pa'i don gyis rin po che'i 'du shes dang / lhan cig skyes pa'i shes rab rgya chen po 'thob pa'i rgyu'i rang bzhin gyi don gyis mig gi 'du shes dang /lhan cig skyes pa'i ye shes kyi mig thob nas kyang shes bya yang dag pa ji lta ba bzhin du rnam pa thams cad yang dag par ston pa'i don gyis snang ba'i 'du shes dang / mya ngan las 'das pa dang / rdzogs pa'i byang chub bla na med pa'i go 'phang thob pa'i rgyu'i dngos po'i don gyis 'bras bu dang /phan yon che ba'i 'du shes dang / tshe 'di la mya ngan las 'das pa dang / rdzogs pa'i byang chub kyi chos ma thob pa yang dag pa ji lta ba bzhin du rab tu rnam par 'byed pa'i zhi gnas dang / lhag mthong gi dga' ba chen po kha na ma tho ba med pa'i rgyu'i dngos po'i don gyis dga' ba kha na ma tho ba med pa'i 'du shes so//de la byang chub sems dpa' dge ba'i bshes gnyen las chos nyan pa na/ gang zag chos smra ba de la gnas lngar yid la byed pa mi bya bar rna blags te/ dad pa'i yid kyis chos nyan par bya'o/ /tshul khrims nyams pa la yid la byed par mi bya ste/'di ltar 'di ni tshul khrims nyams shing sdom pa la gnas pa ma yin gyis/ bdag gis 'di las mnyan par mi bya'o snyam du sems mngon par 'du mi bya'o/ /rigs dma' ba la yang yid la byed par mi bya ste/ 'di ltar 'di ni rigs dma' ba yin gyis/ 'di las bdag gis mnyan par mi bya'o snyam du sems mngon par 'du mi bya'o//byad ngan pa la yid la byed par mi bya ste/ 'di ltar 'di ni byad ngan gyis bdag gis 'di las mnyan par mi bya'o snyam du sems mngon par 'du mi bya'o/ /tshig 'bru ngan pa la yang yid la byed par mi bya ste/ 'di ltar 'di ni tshig legs par sbyar ba ma yin gyis/'di las bdag gis mnyan par mi bya'o snyam du sems mngon par 'du mi bya ste/ don la rton par bya'i tshig 'bru la rton par mi bya'o/ /snyan pa med pa yang yid la byed par mi bya ste/ 'di ltar 'di ni tshig rtsub cing khro ba snyan par chos smra ba yang ma yin gyis/ bdag gis 'di las mnyan par mi bya'o snyam du sems mngon par 'du mi bya'o//gnas lnga po 'di dag la yid la byed par mi bya bar byang chub sems dpas gus pa dang bcas pas dam pa'i chos yongs su gzung bar bya ste/ chos ni nams kyang gang zag gi skyon gyis skyon can du mi 'gyur ba'i phyir ro//de la byang chub sems dpa' shes rab rtul po gang / gang zag gi skyon rnams la sems sdang zhing chos nyan par mi 'dod pa de ni/ bdag nyid kho na la gnod cing shes rab yongs su nyams par 'gyur bar zhugs pa yin par rig par bya'o/ /byang chub sems dpa' ji ltar tshad med pa bzhi bsgom zhe na/byams pa dang / snying rje dang / dga' ba dang / btang snyoms te/ mdor bsdu na 'di la byang chub sems dpa' ni tshad med pa bzhi rnam pa gsum du sgom par byed de/ sems can la dmigs pa dang / chos la dmigs pa dang / dmigs pa med pa'o/ /byang chub sems dpa' sems can thams cad bde ba dang ldan pa dang /sdug bsngal ba dang ldan pa dang / sdug bsngal ba yang ma yin/ bde ba yang ma yin pa dang ldan pa'i tshogs gsum du rnam par gzhag nas/ sems can bde ba 'dod pa rnams kyi dbang du byas te/ bde ba sgrub pa'i lhag pa'i bsam pa dang ldan pa'i byams pa'i sems kyis phyogs bcu khyab par byas nas/sems can la mos pas gnas pa de ni de'i sems can la dmigs pa'i byams pa yin par rig par bya'o/ /chos tsam du 'du shes pa dang ldan pa/ chos tsam la sems can du 'dogs par bsam pa thag pa nas mthong ste/byams pa de nyid sgom par byed pa de ni de'i chos la dmigs pa'i byams pa yin par rig par bya'o/ /chos su rnam par mi rtog pa yang med par byams pa de nyid sgom par byed pa de ni de'i dmigs pa med pa'i byams pa yin par rig par bya'o/ /sems can la dmigs pa dang /chos la dmigs pa dang / dmigs pa med pa'i byams pa ji lta ba bzhin du snying rje dang / dga' ba dang / btang snyoms kyang de dang 'dra bar rig par bya'o/ /de la byang chub sems dpa' sems can sdug bsngal dang ldan pa rnams las brtsams te/ phyogs bcu dag tu sdug bsngal bsal ba'i lhag pa'i bsam pa snying rje dang ldan pa'i sems sgom par byed pa de ni de'i snying rje'i yin no//sems can bde ba dang ldan pa rnams las brtsams te/ phyogs bcu dag tu bde ba la rjes su yi rang ba'i lhag pa'i bsam pa dga' ba dang ldan pa'i sems sgom par byed pa de ni de'i dga' ba yin no//de'i phyogs bcu dag tu sems can sdug bsngal ba yang ma yin / bde ba yang ma yin pa dang ldan pa dang / sdug bsngal dang ldan pa dang / bde ba dang ldan pa rnam pa gsum po de dag nyid kyis nyon mongs pa go rims bzhin du gti mug dang zhe sdang dang 'dod chags bsal ba'i lhag pa'i bsam pa btang snyoms dang ldan pa'i sems sgom par byed pa 'di ni de'i btang snyoms yin no//de la byang chub sems dpa' byams pa la sogs pa tshad med pa sems can la dmigs pa gang yin pa de dag ni gzhan mu stegs can dang thun mong ba yin no/ /chos la dmigs pa gang yin pa de dag ni nyan thos dang /rang sangs rgyas dang thun mong ba yin gyi/ mu stegs can dang ni thun mong ma yin par rig par bya'o/ /byang chub sems dpa'i dmigs pa med pa'i tshad med pa gang yin pa de dag ni/ mu stegs can dang / nyan thos dang / rang sangs rgyas thams cad dang thun mong ma yin par rig par bya'o//de la byang chub sems dpa'i tshad med pa byams pa dang / snying rje dang / dga' ba gsum ni bde bar bya ba'i lhag pa'i bsam pas bsdus par rig par bya'o/ /tshad med pa gcig ni phan pa bya ba'i lhag pa'i bsam pas bsdus par rig par bya ste/'di lta ste/ btang snyoms so/ /byang chub sems dpa'i tshad med pa de dag thams cad ni snying brtse bzhes bya ste/ de lta bas na de dag dang ldan pa'i byang chub sems dpa' rnams ni snying brtse ba can zhes bya'o/ /de la byang chub sems dpa' rnams ni sems can gyi khams na sdug bsngal rnam pa brgya rtsa bcu mthong bas sems can rnams la snying rje sgom par byed do//sdug bsngal rnam pa brgya rtsa bcu gang zhe na/ sdug bsngal rnam pa gcig ni bye brag med par 'jug pa'i sdug bsngal las brtsams te/ sems can thams cad 'jug par gtogs pa'i sdug bsngal dang ldan pa'o//sdug bsngal rnam pa gnyis ni 'dun pa'i rtsa ba can te/ dga' ba'i dngos po gang dag 'gyur zhing gzhan du 'gyur ba las sdug bsngal skye ba dang / rnam par smin pa rmongs pa can gyi sdug bsngal te/ lus kyi tshor ba drag po gang dag gis thebs nas / lus de la bdag ces bya ba'am/bdag gi zhes bya bar rmongs nas shin tu mya ngan byed cing gang gis lus dang sems kyi tshor ba'i zug rngu gnyis myong ba'o/ /sdug bsngal rnam pa gsum ni sdug bsngal gyi sdug bsngal dang / 'du byed kyi sdug bsngal dang / 'gyur ba'i sdug bsngal lo sdug bsngal rnam pa bzhi ni 'bral ba'i sdug bsngal te/sdug pa rnams dang bral ba las skye ba gang yin pa dang / rgyun chad pa'i sdug bsngal te/ ris mthun pa 'dor pa 'chi ba las skye ba gang yin pa dang / rgyun gyi sdug bsngal te/ shi ba'i 'og tu skye ba gcig nas gcig tu brgyud pa las skye ba gang yin pa dang /gtan du sdug bsngal ba ste/ yongs su mya ngan las mi 'da' ba'i chos can gyi sems can rnams kyi nye bar len pa'i phung po lnga po gang yin pa rnams so/ /sdug bsngal rnam pa lnga ni 'dod pa la 'dun pa'i kun nas dkris pa'i rkyen can dang / gnod sems dang / rmugs pa dang / gnyid dang / rgod pa dang / 'gyod pa dang / the tshom gyis kun nas dkris pa'i rkyen can gyi sdug bsngal lo/ /sdug bsngal rnam pa drug ni ngan song gi rgyu rten pa'i phyir rgyu'i sdug bsngal dang / ngan song du skyes pa'i phyir 'bras bu'i sdug bsngal dang / longs spyod las brtsams te yongs su tshol ba'i sdug bsngal dang /bsrung ba'i sdug bsngal dang / chog mi shes pa'i sdug bsngal dang / med par 'gyur ba'i sdug bsngal te/ de dag bsdus pa ni sdug bsngal rnam pa drug yin no/ /sdug bsngal rnam pa bdun ni skye ba'i sdug bsngal dang / rga ba dang / na ba dang / 'chi ba dang / mi sdug pa dang phrad pa dang / sdug pa med par 'gyur ba dang / 'dod pa btsal te ma rnyed pa gang yin pa de yang sdug bsngal lo/ /sdug bsngal rnam pa brgyad ni grang ba'i sdug bsngal dang / tsha ba'i sdug bsngal dang / bkres pa'i sdug bsngal dang / skom pa'i sdug bsngal dang / rang dbang med pa'i sdug bsngal dang / bdag la gnod pa byed pa'i sdug bsngal 'di lta ste/ gcer bu pa la sogs pa rnams ni lta bu dang / gnod pa gzhan las byung ba'i sdug bsngal 'di lta ste/ gzhan gyis lag pa dang / bong bas bsnun pa la sogs pa dang / sha sbrang dang / sbrang bu mchu rings la sogs pas zin pa dang /spyod lam sna gcig gis gnas pa'i sdug bsngal lo/ /sdug bsngal rnam pa dgu ni/ bdag nyid rgud pa'i sdug bsngal dang / gzhan rgud pa'i sdug bsngal dang / nye du rgud pa'i sdug bsngal dang / longs spyod nyams pa'i sdug bsngal dang / nad med pa las nyams pa'i sdug bsngal dang /tshul khrims nyams pa'i sdug bsngal dang / lta ba nyams pa'i sdug bsngal dang / tshe 'di'i sdug bsngal dang / tshe phyi ma'i sdug bsngal lo/ /sdug bsngal rnam pa bcu ni lus kyi yo byad kha zas med pa'i sdug bsngal dang / btung ba dang / bzhon pa dang /gos dang / rgyan dang / snod spyad kyi yo byad med pa'i sdug bsngal dang / spos dang / me tog phreng dang / byug pa'i yo byad med pa'i sdug bsngal dang / gar dang glu dang rol mo'i sgra'i yo byad med pa'i sdug bsngal dang / snang ba'i yo byad med pa'i sdug bsngal dang bcu pa ste/ skyes pa dang / bud med dag dga' dgur spyod pa'i lus kyi yo byad med pa'i sdug bsngal lo/ /yang sdug bsngal ni rnam pa dgur rig par bya ste/ sdug bsngal thams cad dang / sdug bsngal chen po dang / thams cad kyi sgo nas sdug bsngal dang / log par zhugs pa'i sdug bsngal dang / 'jug pa'i sdug bsngal dang /mi 'dod pas byas pa'i sdug bsngal dang / phongs pa'i sdug bsngal dang / rjes su 'brel pa las byung ba'i sdug bsngal dang / rnam pa thams cad kyi sdug bsngal lo/ /de la sdug bsngal thams cad ni sngon gyi rgyu las byung ba dang / da ltar gyi rkyen las byung ba'o/ / de la sdug bsngal chen po ni yun ring ba dang / bzod brlag pa dang / sna tshogs pa dang / rgyun mi 'chad pa'o/ /de la thams cad kyi sgo nas sdug bsngal ni sems can dmyal ba pa dang / dud 'gro'i skye gnas dang / yi dags kyi 'jig rten pa dang / bde 'gror gtogs pa'o/ / de la log par zhugs pa'i sdug bsngal ni tshe 'di la gzhan gyis gnod par byas pa dang / gzhan la gnod pa byas pa byung ba dang / kun nas slong ba dang / kha zas mi mthun pa zos pas khams ma snyoms pa las byung ba'i sdug bsngal kun nas slong ba dang / tshe 'di la bdag nyid kyis mi rigs par sdug bsngal bar byas pa las bdag gis byas pa'i sdug bsngal kun nas slong pa dang /tshul bzhin ma yin pa'i yid la byed pa dang / de la shas cher gnas pas nyon mongs pa dang / nye ba'i nyon mongs pa'i kun nas dkris pa'i sdug bsngal nyams su myong bar 'gyur ba dang /lus dang ngag dang yid kyi nyes par spyod pa shas che bas phyi ma la ngan song ba'i sdug bsngal nyams su myong par 'gyur pa'o / /de la 'jug pa'i sdug bsngal ni ma nges pa rnam pa drug las byung ba ste/ 'khor bar 'khor ba na lus ma nges pas rgyal por gyur pa las mi dbul por gyur pa dang /pha ma ma nges pa dang / bu dang chung ma ma nges pa dang / bran dang bran mo dang / las byed pa dang / zho shas 'tsho ba ma nges pa dang / mdza' bshes dang / gros grogs dang / nye du dang snag gi gnyen mtshams ma nges pa las byung ba de 'khor bar 'khor ba na/ pha mar gyur pa nas rgyas par mdza' bshes dang /gros grogs dang / nye du dang / snag gi gnyen mtshams kyi bar du gyur pa las dus gzhan du 'khor bar 'khor ba na/ gsod pa dang / phyir rgol ba dang / dgra bor gyur pa dang / 'khor bar 'khor ba na longs spyod ma nges pas/longs spyod chen por gyur pa las phyis dus gzhan du mchog tu dbul por 'gyur ro/ /de la mi 'dod pas byas pa'i sdug bsngal ni tshe ring bar 'dod pa la mi 'dod bzhin du tshe thung bar 'gyur ba las byung ba dang / byad bzang bar 'dod pa las kyang mi 'dod bzhin du byad ngan par 'gyur ba dang /rigs mthon por skye bar 'dod pa las kyang mi 'dod bzhin du rigs dma' bar skye bar 'gyur ba dang / dbang phyug 'dod pa las kyang mi 'dod bzhin du dbul por 'gyur ba dang / stobs che bar 'dod pa las kyang mi 'dod bzhin du stobs chung ngur 'gyur ba las byung ba dang /shes bya shes par 'dod pa las kyang mi 'dod bzhin du rmongs pa'i shes pa kun du spyod pa las byung ba dang / pha rol pham par 'dod pa las kyang / mi 'dod bzhin du bdag nyid pham pa las byung ba'i sdug bsngal lo/ /de la phongs pa'i sdug bsngal ni khyim pa rnams kyi bu dang chung ma la sogs pa 'grib pa las byung ba dang /rab tu byung ba rnams kyi 'dod chags la sogs pa nyon mongs pa 'phel ba las byung ba'i sdug bsngal dang / sdug bsngal gang mu ges phongs pa'am/ pha rol gyi dmag tshogs kyis phongs pa dang / dgon pa dang /gcong rong du 'gro ba'i nyam nga bas phongs pa las byung ba dang / sdug bsngal gang pha rol la rag las pas 'tsho ba las byung ba dang / sdug bsngal gang yan lag dang nying lag nyams pas phongs par gyur pa las byung ba dang / sdug bsngal gang gsad pa dang / bcing ba dang bcad pa dang /brdeg pa dang / bskrad pa la sogs pas phongs pa las byung ba'o/ /de la rjes su 'brel pa las byung ba'i sdug bsngal ba ni 'jig rten gyi chos brgyad kyi sdug bsngal gang yin pa ste/ 'jig pa'i chos can 'jig pa dang / zad pa'i chos can zad pa dang / rga ba'i chos can rga ba dang /na ba'i chos can na ba dang / 'chi ba'i chos can 'chi ba dang / yang ma rnyed pa'am / mi snyan pa'am/ smad pa las sdug bsngal 'byung ba gang yin pa de / sdug bsngal rnam pa brgyad po 'di dag dang / 'dod pa'i sdug bsngal dang / 'di rnams ni rjes su 'brel pa las byung ba'i sdug bsngal zhes bya'o//de la rnam pa thams cad kyi sdug bsngal ni bde ba rnam pa lnga ji skad bstan pa'i mi mthun pa'i phyogs kyi sdug bsngal gang yin pa ste/ rgyu'i sdug bsngal dang / tshor ba'i sdug bsngal dang / bde ba med pa can gyi sdug bsngal dang / tshor ba rgyun mi 'chad pa'i sdug bsngal dang / mngon par 'byung ba dang / rab tu dben pa dang / nye bar zhi ba dang / rdzogs pa'i byang chub kyi bde ba'i mi mthun pa'i phyogs khyim pa dang / 'dod pa'i khams dang / kun du sbyor ba las byung ba'i rtog pa dang / so so'i skye bo'i sdug bsngal ni lnga pa yin par rig par bya ste/ sdug bsngal rnam pa lnga po 'di dang gnod pa las byung ba dang /yo byad med pa las byung ba dang / khams ma snyoms pa las byung ba dang / dga' ba 'gyur ba las byung ba dang / khams gsum na spyod pa'i nyon mongs pa'i phyogs gnas ngan len gyi sdug bsngal lnga po de dag dang / snga ma'i rnam pa lnga gcig tu bsdus te/sdug bsngal rnam pa bcu ni rnam pa thams cad ces bya'o/ /de ltar snga ma'i rnam pa lnga bcu rtsa lnga po dang / rnam pa lnga bcu rtsa lnga po 'di dag gcig tu bsdus na sdug bsngal rnam pa brgya rtsa bcur 'gyur ba ni byang chub sems dpa'i snying rje'i dmigs pa ste/ dmigs pa des byang chub sems dpa' rnams kyi snying rje skye zhing rnam par 'phel la bsgom pa yongs su rdzogs par 'gyur ro//sdug bsngal gyi phung po chen po de las sdug bsngal rnam pa bcu dgu la dmigs pa las ni snying rje chen po 'jug par 'gyur te/ sdug bsngal rnam pa bcu dgu po gang zhe na/rnam par smin pa rmongs pa can gyi sdug bsngal dang / 'du byed kyi sdug bsngal du gtogs pa'i sdug bsngal dang / gtan du sdug bsngal dang / rgyu'i sdug bsngal dang / skye ba'i sdug bsngal dang / bdag nyid kyis gnod pa byas pa'i sdug bsngal dang / tshul khrims nyams pa'i sdug bsngal dang /lta ba nyams pa'i sdug bsngal dang / sngon gyi rgyu las byung ba'i sdug bsngal dang / sdug bsngal chen po dang / sems can dmyal ba pa'i sdug bsngal dang / bde 'gror gtogs pa'i sdug bsngal dang / log par zhugs pa rnams las byung ba'i sdug bsngal thams cad dang /'jug pa'i sdug bsngal thams cad dang / mi shes pa'i sdug bsngal dang / rgyas pa las byung ba'i sdug bsngal dang / rjes su 'brel pa las byung ba'i sdug bsngal dang / tshor ba'i sdug bsngal dang / gnas ngan len gyi sdug bsngal lo/ /de la snying rje ni rgyu rnam pa bzhis snying rje chen po zhes bya ste/sems can rnams kyi sdug bsngal zab cing cha phra ba la rtogs par dka' ba la dmigs nas skyes pa yin / bskal pa 'bum phrag du ma nas goms pas yun ring po nas 'dris pa yin/ rtsol ba drag pos dmigs pa la zhugs pa yang yin te/ rtsol ba 'di lta bu dang ldan zhing snying rjes zin pa'i byang chub sems dpa' de ni sems can rnams kyi sdug bsngal bsal ba'i phyir/ bdag nyid kyi srog brgya yang yongs su gtong na srog gcig lta ci smos/ lus kyi yo byad lta yang ci smos te/ sdug bsngal gyis gnod pa'i rnam pa thams cad kyang nyams su len par byed pa yin/shin tu rnam par dag pa yang yin te/ 'di lta ste/ mthar thug pa'i byang chub sems dpa' rnams kyi byang chub sems dpa'i sa yang rnam par dag pa'i phyir dang / de bzhin gshegs pa rnams kyi de bzhin gshegs pa'i sa yang rnam par dag pa'i phyir ro//byang chub sems dpa' gang dag sdug bsngal rnam pa brgya rtsa bcu po 'dis sems can rnams la snying rje sgom par byed pa'i byang chub sems dpa' de dag ni byang chub sems dpa'i snying rje thams cad bsgom pa yin no/ /de dag gis ni bsam pa dag pa'i sa la zhugs pa'i snying rje'i bsam pa rnam par dag pa yang myur ba nyid du thob par 'gyur ro//sems can rnams la yang sems shin tu mnyen pa dang / byams pa'i sems dang / byed 'dod pa'i sems dang / skyo ba med pa'i sems dang / sdug bsngal nyams su len pa'i sems dang / las su rung zhing dbang du gyur pa'i sems dang ldan pa yin no//'phags pa nyan thos sdug bsngal gyi bden pa mngon par rtogs pa dang ldan pa mthar thug pa skyo ba dang ldan pa'i sems kyi rgyud thag ring du song bar gyur pa yang ji ltar byang chub sems dpa' sems can rnams la snying rje chen po sngon du 'gro ba'i sems kyis sdug bsngal gyi phung po chen po rnam pa brgya rtsa bcur 'dus pa yang dag par mthong nas 'jug pa de ltar mi 'jug go//byang chub sems dpa' de ltar snying rjes yid yongs su bsgos pa ni nang dang phyi rol gyi dngos po gang ci yang yongs su mi gtong ba med do/ /tshul khrims kyi sdom pa gang yang dag par len par mi byed pa de med do//gzhan gnod pa byed pa la gang mi bzod pa de ci yang med do/ /brtson 'grus gang mi rtsom pa de med do/ /bsam gtan gang la snyoms par mi 'jug pa de med do/ /shes rab gang la mi 'jug pa de med do/ /de lta bas na de bzhin gshegs pa rnams la byang chub sems dpa'i byang chub gang la gnas zhes zhus na/byang chub sems dpa'i byang chub ni snying rje la gnas so zhes yang dag par lung ston pas lung ston par mdzad do/ /de la 'dir byang chub sems dpa'i tshad med pa re re zhing ji skad bstan pa ni tshad med pa phun sum tshogs pas phun sum tshogs par 'jug ste/sdud pa'i 'bras bu tshad med pa yongs su 'dzin cing rnam pa gcig tu nges par dge zhing kha na ma tho ba med pa tshad med pa dag gis 'jug pa'i phyir ro/ /byang chub sems dpa' de ltar tshad med pa bsgom pa la brtson pa la ni phan yon bzhi yod par rig par bya ste/de tshad med pa sgom pa de ni thog ma kho nar tshe 'di la bde ba mchog la gnas par 'gyur ba dang / bsod nams kyi tshogs tshad med pa yongs su 'dzin zhing 'phel bar 'gyur ba dang / bla na med pa yang dag par rdzogs pa'i byang chub la bsam pa brtan par 'gyur ba dang /sems can rnams kyi don gyi phyir 'khor ba na sdug bsngal thams cad nyams su len par 'gyur ba'o/ /byang chub sems dpa'i sa'i gzhi'i rnal 'byor gyi gnas las mchod pa dang / bsten pa dang / tshad med pa'i le'u ste bcu drug pa'o// //bam po bcu bzhi pa/sdom ni/ ngo tsha brtan dang mi skyo dang / /de bzhin bstan bcos 'jig rten shes/ /legs par ston par byed pa dang / /de bzhin so so yang dag rig /tshogs dang byang chub phyogs rnams dang / /zhi gnas dang ni lhag mthong dang / /thabs la yang ni mkhas pa dang //gzungs rnams dang ni smon lam dang / /ting 'dzin gsum du shes par bya/ /chos kyi mdo ni rnam pa bzhi/ /de la byang chub sems dpa' rnams kyi ngo tsha shes pa dang / khrel yod pa gang zhe na/ de ni mdor bsdu na rnam pa gnyis su rig par bya ste/ ngo bo nyid dang gnas so//byang chub sems dpa' kha na ma tho ba kun du spyod pa na bdag gi cha ma yin par shes nas 'dzem pa ni ngo tsha shes pa'o/ /de nyid la gzhan dag la 'jigs shing gus pas 'dzem pa ni khrel yod pa'o/ /byang chub sems dpa'i 'dzem pa de yang rang bzhin gyis shas che ba yin na goms pa lta ci smos te/byang chub sems dpa'i ngo tsha shes pa dang / khrel yod pa'i ngo bo nyid ni de lta bu yin par rig par bya'o/ /gnas ni mdor bsdu na rnam pa bzhi ste/ byang chub sems dpa'i bya ba la nan tan mi byed pa la 'dzem pa gang yin pa de ni gnas dang po'o/ /de bzhin du byang chub sems dpa'i bya ba ma yin pa la nan tan byed pa la 'dzem pa gang yin pa de ni gnas gnyis pa'o//de bzhin du byang chub sems dpa'i bdag nyid kyi sdig pa 'chab pa la 'dzem pa gang yin pa de ni gnas gsum pa'o / /de bzhin du byang chub sems dpa'i bdag nyid kyi 'dod pa skyes pa ston pa dang bcas pa zhar las byung ba la 'dzem pa gang yin pa de ni gnas bzhi pa ste/gnas de ni de lta bu yin par rig par bya'o/ /de la byang chub sems dpa'i brtan pa'i stobs bskyed pa gang zhe na/ de yang rnam pa gnyis su blta bar bya ste/ ngo bo nyid dang gnas so/ /nyon mongs pa can gyi sems yang dag par sdom pa dang /nyon mongs pa'i dbang du mi 'gro ba dang / sdug bsngal dang du len pa'i ngang tshul can nyid dang / 'jigs shing skrag pa rnam pa sna tshogs mang po mi bzad pa mngon du byung ba dag gis kyang yang dag par sbyor ba las mi g.yo ba dang / rang bzhin gyis snying stobs dang ldan pa'am/so sor brtags pas brtan pa 'di ni brtan pa'i stobs bskyed pa'i ngo bo nyid yin par rig par bya'o/ /byang chub sems dpa'i brtan pa'i stobs bskyed pa de'i gnas ni mdor bsdu na rnam pa lnga yod par rig par bya ste / 'khor ba'i sdug bsngal rnam pa sna tshogs dang phrad pa dang /'dul ba las gyur pa'i log par 'jug pa rnam pa sna tshogs dang / yun ring por sems can rnams kyi don gyi phyir 'khor ba khas blangs pa dang / phas kyi rgol ba dag gis nyams bskyod kyang 'khor phal po che'i nang du chos ston pa dang / byang chub sems dpa'i bslab pa'i gzhi thams cad khas blangs te/rgya che zhing zab pa'i chos nyan pa ni gnas lnga par rig par bya'o/ /de la byang chub sems dpa' rnams kyi yang dag pa'i sbyor ba thams cad la rgyu lngas yid yongs su mi skyo bar rig par bya'o/ /'di la byang chub sems dpa' ni rang bzhin gyis stobs dang ldan pa yin te/des na yongs su skyo bar mi 'gyur ro/ /yang des yid yongs su mi skyo ba de nyid yang dang yang du goms par byas pa yin te/ des na yongs su skyo bar mi 'gyur ro/ /yang thabs kyis yongs su zin pa'i brtson 'grus rtsom pa dang ldan pa yin te/ des na snga phyi bye brag yang dag par mthong bas yongs su skyo bar mi 'gyur ro//shes rab kyis so sor rtog pa'i stobs drag po dang ldan pa yin te/ des na yongs su skyo bar mi 'gyur ro/ /sems can rnams la byang chub sems dpa' de'i snying rje'i sems dang snying brtse ba'i sems drag po rtag tu rgyun mi 'chad par nye bar gnas pa yin te/des na yongs su skyo bar mi 'gyur ro/ /de la byang chub sems dpa'i bstan bcos shes pa gang zhe na/ 'di la byang chub sems dpa' rig pa'i gnas lnga po dag las brtsams te/ ming gi tshogs dang / tshig gi tshogs dang / yi ge'i tshogs dang ldan pa'i chos gzhan las legs par bzung ste/kha don legs par byang ba yin/ chos kyi don de nyid kyang gzhan las legs par thos pa yin/ yang na bdag nyid kyis lags par bsams shing / legs par brtags pa yin te/ de ltar byang chub sems dpa' chos shes shing don shes pas chos dang don de nyid mi brjed par bya ba'i phyir dang /chos dang don gyi bye brag sar pa sar pa dag gong nas gong du shes par bya ba'i phyir sbyor ba mi gtong ba yin no/ /thos pa dang bsam pa'i mthar thug pa des chos dang don de la dus gzhan na yongs su smin par byas pa'i dad pa thob pa yang yin te/rnam pa de dag gis na byang chub sems dpa'i bstan bcos shes pa tshad med pa dang / yongs su rdzogs pa dang / phyin ci ma log pa nyid du rig par bya'o/ /de la byang chub sems dpa'i 'jig rten shes pa gang zhe na/ 'di la byang chub sems dpa' sems can gyi 'jig rten las brtsams nas/'di ltar yang dag pa ji lta ba bzhin du rab tu shes te/ kye ma 'jig rten 'di ni nyam nga bar zhugs pa ste/ 'di ltar skye yang skye/ rga yang rga/ 'chi yang 'chi/ 'chi 'pho yang 'chi 'pho/ skye yang skye mod kyi/ 'on kyang sems can 'di dag ni rga shi'i 'og tu nges par 'byung ba yang dag pa ji lta ba bzhin du rab tu mi shes so snyam mo//yang 'di lta ste/ tshe'i snyigs ma dang / sems can gyi snyigs ma dang / nyon mongs pa'i snyigs ma dang / lta ba'i snyigs ma dang / dus kyi snyigs ma ste/ snyigs ma lnga po dag las brtsams nas sems can gyi 'jig rten nyid kyi snyigs ma shas che ba'i dus dang /snyigs ma med pa'i dus dang / snyigs ma shas chung ba'i dus kyang yang dag pa ji lta ba bzhin du rab tu shes te/ 'di lta ste/ da ltar gyi mi rnams ni 'tsho ba'i yun thung ste/ gang yun ring du 'tsho ba des kyang lo brgya thub par zad do/ / 'di lta ste/ da ltar gyi sems can dag ni phal cher phar mi 'dzin pa/ mar mi 'dzin pa/ dge sbyong du mi 'dzin pa/ bram zer mi 'dzin pa / rigs kyi gtso bo la rim gro mi byed pa/ don du 'gyur bar mi byed pa/ bya ba'i rigs pa mi byed pa/ 'jig rten 'di dang 'jig rten pha rol du kha na ma tho ba rnams la 'jigs par mi lta ba/sbyin pa dag mi byed pa/ bsod nams dag mi byed pa/ bsnyen te gnas pa la nye bar mi gnas pa / tshul khrims yang dag par blangs te mi 'dug pa sha stag go/ /'di lta ste/ da ltar phal cher chos ma yin pa la 'dod chags pa dang / mi mthun pas chags pa dang /mtshon cha thogs pa dang / dbyig pa thogs pa dang / 'thab pa dang / mtshang 'bru ba dang / 'gyed pa dang / rtsod pa dang / g.yo ba dang / 'drid pa dang / mi srun pa dang / brdzun du smra ba dang / lag pa'i chos su gtogs pa sdig pa mi dge ba'i chos rnam pa du ma dag snang ngo //'di lta ste/ da ltar dam pa'i chos 'jig par 'gyur ba dang / dam pa'i chos nub par 'gyur ba'i dam pa'i chos ltar bcos pa mang po log pa'i chos kyi don dpyod pa sngon du 'gro ba dag byung ngo / /'di lta ste/ da ltar mu ge'i bar gyi bskal pa dag nye bar 'gyur te/ mu ge phal cher snang ngo //nad kyi bar gyi bskal pa yang nye bar 'gyur te nad rnams phal cher snang ngo / /mtshon gyi bar gyi bskal pa yang nye bar 'gyur te/ mtshon chas byas pa'i srog gcod pa dag phal cher snang ste sngon ni de lta bu ma byung ngo zhes bya ba ste/ de ltar na byang chub sems dpa' ni sems can gyi 'jig rten las brtsams te/'jig rten shes pa yin no/ /yang byang chub sems dpa' snod kyi 'jig rten gyi 'jig pa dang / 'chags pa dang / snod kyi 'jig rten ji ltar 'jig pa dang / 'chags pa yang dag pa ji lta ba bzhin du rab tu shes so/ /yang byang chub sems dpa' ni 'jig rten dang /'jig rten kun 'byung dang / 'jig rten 'gog pa dang / 'jig rten kun 'byung bar 'gyur ba'i lam dang / 'jig rten 'gog par 'gyur ba'i lam dang / 'jig rten gyi ro myang ba dang / nyes dmigs dang / nges par 'byung ba yang dag pa ji lta ba bzhin du rab tu shes so//yang byang chub sems dpa'i mig dang yid kyi bar dang / phung po gzugs can ma yin pa rnams dang / 'byung ba chen po bzhi las gyur pa ni mi'i lus te de tsam la mi nyid ces bya'o/ /de la bdag gam/ sems can zhes bya ba'i 'du shes gang yin pa de ni 'du shes tsam kho nar zad do//de la bdag gis ni mig gis gzugs rnams mthong ngo / /yid kyis chos rnams shes so zhes bya ba'i bar du dam 'cha' ba gang yin pa 'di ni dam 'cha' ba tsam kho nar zad do/ /de la 'di ltar tshe dang ldan pa de ming ni 'di zhes bya/ rigs ni 'di zhes bya/ rus ni 'di zhes bya/kha zas ni 'di lta bu zhig za za/ bde ba dang sdug bsngal ni 'di lta bu zhig myong / tshe ni 'di tsam du ring / yun ni 'di srid du gnas gnas/ tshe'i mtha' ni 'di tsam mo zhes bya ba'i tha snyad gang yin pa 'di ni tha snyad tsam kho nar zad do zhes thams cad yang dag pa ji lta ba bzhin du rab tu shes so//de ltar na byang chub sems dpa' des sems can gyi 'jig rten gyi 'jug pa dang / snod kyi 'jig rten gyi 'jug pa dang / 'jig rten rtag pa'i don brgyad dang / 'jig rten gyi don dam pa yang dag pa ji lta ba bzhin du rab tu shes te/ de lta bas na 'jig rten shes pa zhes bya'o//yang byang chub sems dpa' ni ches rgan pa'am/ ches yon tan gyis khyad par du 'phags pa zhig mthong na legs par kun tu smra bar byed/ langs te stan stobs par byed/ gus par smra zhing phyag 'tshal ba dang / mngon du ldang ba dang / thal mo sbyar ba dang /'dud pa'i las byed do / /yang na na tshod dang yon tan dag gis mtshungs pa zhig mthong na ni/ 'jam pa dang / mnyen pa'i tshig gis lags par smra bar byed/ kun du smra bar byed/ yang dag par dga' bar byed kyi/ nga rgyal la brten nas/ de dang bdag yongs su dpog par ni mi byed do//yang na na tshod dang yon tan dag gis dma' ba zhig mthong na yon tan skyed pa las brtsams te nus pa bzhin du spro ba skyed par byed/ de'i yang dag pa'i yon tan chung ngu yang rjod par byed/ gang gis de gnod par 'gyur ba'i nyes pa yang dag pa yang 'chab par byed de/ sgrogs par mi byed do//de la brnyas par yang mi byed do/ /chos dang zang zing 'ga' zhig 'dod na yang de shes nas/ phyir phyogs shing khro gnyer mi byed do/ /de la 'khrul pa la yang 'phyas mi byed/ dmas pa la yang brnyas par mi byed do/ /de bzhin du dma' ba dang / mtshungs pa dang / khyad par du 'phags pa'i sems can thams cad la yang gsong por smra zhing tshur shog /bde bar 'ongs so zhes smras la/ legs par ngal sor 'jug ste/ yang dag par chos dang zang zing gis ci nus kyis sdud par byed do/ /sems can rnams la gya gyus drod mi zin pa dang ldan par mi byed/ thos pa'i khyad par 'ga' tsam gyis kyang 'gying bar mi byed do/ /sems can bsdus pa bzhin du nad pa'am/ tha mal pa la yang rung ste/ yo byad thams cad dang mthun pa'i lus dang ngag gi las kyis kyang yal bar mi 'dor ro/ /'dris pa la ji lta ba bzhin du ma 'dris pa la yang de kho na bzhin no//thams cad kyang mdza' bo dang 'grogs par byed de / phyir rgol ba med pa bzhin no/ /sems can mgon med cing rten pa med pa thams cad kyis bya ba ci nus ci lcogs kyis byed do/ /'di dag thang cig tsam yang mi bde bar gnas kyang ci ma rung snyam nas / rnam grangs gang gis kyang gzhan dag la sdug bsngal ba dang yid mi bde ba sgrub par mi byed do//de nyid rkyen du byas te gnas dag dang dgod par byed na yang ran par dgod par byed kyi/ ma 'ongs par dgod par mi byed do/ /skyon mi 'byung zhing mchog tu yid brtan par gyur pa'i grogs po dag la yang tshogs par mi dbyung ba'i tshig rjod par mi byed do//gzhan dag la yun ring du khro bar yang mi byed do/ /khros su zin kyang gzhan dag gi mtshang sgrogs par mi byed do/ /gzhan dag gis lus dang ngag gis bstings su zin kyang so sor brtags nas chos nyid la ston tam/ yang na bdag nyid kyi lan bon yin par lta bar byed do//sems brtan zhing mi rgod pa yin/ lus dang ngag dang yid gsum gyi rgyu ba brtan pa yin/ dri ma'i las kyi mtha' bcu bzhi dang bral ba yin phyogs drug gis bkab pa yin/ sdig pa'i grogs po bzhis spangs pa yin/ dge ba'i bshes gnyen bzhis yongs su bzung ba yin te/de dag thams cad kyang mdo las ji skad 'byung ba bzhin du rig par bya'o/ /tshe 'di la phan pa'i phyir longs spyod dang ldan pa las brtsams te/ sgrub phod pa dang / kun nas bsrung ba dang ldan pa dang / mthun pas 'tsho ba dang / 'jig rten pa'i bzo dang /las kyi gnas rnams la mkhas par gyur pa yin no/ /g.yo dang sgyu med pa yin te/ pha rol 'drid pa'i ngang tshul can ma yin no/ /kha na ma tho ba kun du spyod pa rnams la yang ngo tsha dang ldan pa yin no/ /spyod pa de lhur len cing bsrung bas na spyod pa phun sum tshogs pa yin no//gzhan gyi rdzas yid brtan te gtams pa la g.yo mi byed pa yin/ gzhan gyi bu lon chags pa la dor mi byed pa yin/ bgo skal gcig pa la mi 'drid pa yin/ rin po che'am/ rin po cher smos pa man chad kAr ShA pa Na yan chad la rmongs pa de la/ bslu ba dag gis mi bslu ba yin/de bzhin du 'jig rten pa'i tha snyad kyi tshul 'jig rten la phan 'dogs pa rnams la g.yar ba yin/ don bya ba de dang de dag la gzhan dag gis bcol na grogs su 'gro ste/ mi 'gyur zhing gtam rlung la skur bar mi byed pa yin/ las kyi mtha' bzang po dang ldan te/ las kyi mtha' ngan pa dang ldan pa ma yin/yang rgyal po byed na yang chos bzhin du byed kyi/ chos ma yin pas mi byed pa dang / chad pas gcod pa la dga' bar mi byed cing / skye bo phal po che 'chal ba'i tshul khrims las bzlog nas/ tshul khrims dag la yang dag par 'dzud par byed do/ /de bzhin du 'phags pa'i tha snyad brgyad dang ldan pa yin te/mthong ba la mthong ngo zhes smra ba dang / thos pa dang / bye brag phyed pa dang / rnam par shes pa la rnam par shes so zhes smra ba dang / ma mthong ba la mthong ngo zhes smra ba dang / ma thos pa dang / bye brag ma phyed pa dang / rnam par ma shes pa la rnam par ma shes so zhes smra ba ste/de dag dang de lta bu dang mthun pa chos rnams dang ldan pa'i byang chub sems dpa' ni 'jig rten ji ltar shes par bya ba dang 'jig rten na ji ltar gnas par bya ba de dag thams cad yang dag pa ji lta ba bzhin du rab tu shes te/ de lta bas na 'jig rten shes pa zhes bya'o/ /de la byang chub sems dpa' ston pa bzhi po dag la ji ltar sbyor zhe na/'di la byang chub sems dpa' ni don 'dod pa'i phyir gzhan las chos nyan par byed kyi/ tshig 'bru legs par sbyar bar 'dod pa'i phyir ma yin te/ de don 'dod pa'i phyir chos nyan gyi/ tshig 'bru 'dod pa'i phyir ma yin pas na/ phal pa'i skad kyis chos ston na yang byang chub sems dpa' don la rton pa ni gus par byas te nyan par byed do//yang byang chub sems dpa' ni nag po bstan pa dang / chen po bstan pa yang yang dag pa ji lta ba bzhin du rab tu shes te/ rab tu shes nas kyang rigs pa la ston par byed pa yin gyi/ gnas brtan nam/shes pa'i gang zag gam/ de bzhin gshegs pa'am/ dge 'dun gyis chos 'di dag bshad do zhes gang zag la rton pa ma yin no/ /de ltar rigs pa la rton gyi gang zag la mi rton pa de ni de kho na'i don las mi g.yo zhing chos rnams la gzhan gyi dring mi 'jog pa yang yin no/ /yang byang chub sems dpa' ni de bzhin gshegs pa la dad pa zhen cing dga' ba zhen te/gsung la gcig tu nges par mngon par dga' ba dang / de bzhin gshegs pa'i nges pa'i don gyi mdo sde la rton gyi/ drang ba'i don la ma yin te/ nges pa'i don gyi mdo sde la rton na/ chos 'dul ba 'di las mi 'phrogs par 'gyur te/'di ltar drang ba'i don gyi mdo sde ni sgo sna tshogs nas zhugs pa'i don gyi rnam par dbye ba ma nges pas the tshom skyed pa yin pa'i phyir ro/ /gal te byang chub sems dpa' nges pa'i don gyi mdo sde la yang nges pa med par gyur na ni de ltar na de chos 'dul ba 'di las 'phrogs par 'gyur ro//yang byang chub sems dpa' ni rtogs pa'i ye shes la snying po lta ba yin gyi/ thos pa dang bsams pas chos dang don rnam par shes pa tsam la ni ma yin no/ /des bsgoms pa'i shes pas shes par bya ba gang yin pa de ni thos pa dang bsams pas don rnam par shes pa tsam gyis rnam par shes par mi nus par rig nas/de bzhin gshegs pas gsungs pa'i chos mchog tu zab pa dag thos na yang spong bar mi byed cing skur pa mi 'debs te/ de ltar byang chub sems dpa' ston pa bzhi po dag la sbyor bar byed do/ /de ltar na legs par zhugs pa yin no/ / ston pa bzhi po de dag las ni/ mdor bsdu na/ tshad ma nyid bzhi bstan te bstan pa'i don dang / rigs pa dang / ston pa dang / bsgoms pa las byung ba'i rtogs pa'i ye shes so/ /ston pa bzhi po thams cad kyis ni byang chub sems dpa' yang dag pa'i sbyor ba brtson pa la zhugs pa'i nges par 'byin par 'khrul pa med pa mngon par gsal bar byas pa yin no//de la byang chub sems dpa' rnams kyi byang chub sems dpa'i so so yang dag par rig pa bzhi gang zhe na/ chos thams cad kyi rnam grangs thams cad la ji snyed yod pa dang / ji ltar yod pas bsgoms pa las byung pa'i shes pa thogs pa med cing mi zlogs pa gang yin pa de ni de dag gi chos so so yang dag par rig pa'o//chos thams cad kyi mtshan nyid thams cad la ji snyed yod pa dang / ji ltar yod pas bsgoms pa las byung ba'i shes pa thogs pa med cing mi zlogs pa gang yin pa de ni de dag gi don so so yang dag par rig pa'o//chos thams cad kyi nges pa'i ngag thams cad la ji snyed yod pa dang / ji ltar yod pas bsgoms pa las byung ba'i shes pa thogs pa med cing mi zlogs pa gang yin pa de ni de dag gi nges pa'i tshig so so yang dag par rig pa'o/ /chos thams cad nyid kyi rnam pa rab tu dbye ba thams cad la ji snyed yod pa dang /ji ltar yod pas bsgoms pa las byung ba'i shes pa thogs pa med cing mi zlogs pa gang yin pa de ni de dag gi spobs pa so so yang dag par rig pa ste/ byang chub sems dpa'i so so yang dag par rig pa bzhi po de dag la brten na/byang chub sems dpa' rnams kyi gnas lnga la mkhas pa dpag tu med par 'gyur bar rig par bya ste/ phung po la mkhas pa dang / khams dang skye mched dang / rten cing 'brel par 'byung ba dang / gnas dang gnas ma yin pa la mkhas pa'o/ /byang chub sems dpas ni chos rnam pa 'di bzhis chos thams cad bdag nyid kyis legs par mngon par rdzogs par sangs rgyas par 'gyur la/gzhan dag la yang rab tu bstan te/ de las gong na bdag nyid kyis mngon par rdzogs par byang chub pa yang med na/ pha rol dag la rab tu bstan pa lta ga la yod/ /de la byang chub sems dpa'i byang chub kyi tshogs gang zhe na/de ni rnam pa gnyis su blta bar bya ste/ bsod nams kyi tshogs dang / ye shes kyi tshogs so/ /tshogs rnam pa de gnyis kyi rgyas par dbye ba ni 'di lta ste/ bdag dang gzhan gyi don gyi le'u las 'byung ba bzhin du rig par bya'o/ /byang chub sems dpa'i bsod nams dang /ye shes kyi tshogs de yang bskal pa grangs med pa dang po la ni chung bar rig par bya'o/ /gnyis pa la ni 'bring ngo / /gsum pa la ni che bar rig par bya'o/ /byang chub sems dpa' byang chub kyi phyogs kyi chos sum cu rtsa bdun po dag la ji ltar sbyor bar byed ce na/ 'di la byang chub sems dpa' ni byang chub sems dpa'i so so yang dag par rig pa bzhi po dag la brten nas/thabs kyis yongs su zin pa'i ye shes kyis byang chub kyi phyogs kyi chos sum cu rtsa bdun yang dag pa ji lta ba bzhin du rab tu shes la/ de dag mngon sum du ni mi byed do/ /des theg pa'i tshul rnam pa gnyis po nyan thos kyi theg pa dang theg pa chen po'i tshul gyis kyang de dag yang dag pa ji lta ba bzhin du rab tu shes so//de la nyan thos kyi theg pa'i tshul gyis yang dag pa ji lta ba bzhin du rab tu shes pa ni 'di lta ste/ nyan thos kyi sa las thams cad ji skad bstan pa bzhin du rig par bya'o//byang chub sems dpa' theg pa chen po'i tshul gyis byang chub kyi phyogs kyi chos sum cu rtsa bdun ji ltar yang dag pa ji lta ba bzhin du rab tu shes she na/ 'di la byang chub sems dpa' ni lus la lus kyi rjes su lta zhing gnas kyang / lus la lus kyi dngos por rnam par rtog par mi byed la/thams cad kyi thams cad du med par yang 'di lta ste/ lus brjod du med pa'i ngo bo nyid kyi chos nyid de yang yang dag pa ji lta ba bzhin du rab tu shes pa de ni de'i lus la lus kyi rjes su lta ba'i dran pa nye bar gzhag pa don dam pa'o/ /kun rdzob kyi tshul du ni byang chub sems dpa'i rnam par gzhag pa'i tshul du tshad med pa'i shes pa dang ldan pa'i lus la lus kyi rjes su lta ba'i dran pa nye bar gzhag pa yin par rig par bya'o//lus la lus kyi rjes su lta ba'i dran pa nye bar gzhag pa ji lta ba bzhin du/ dran pa nye bar gzhag pa lhag ma rnams dang / byang chub kyi phyogs kyi chos lhag ma rnams kyang de dang 'dra bar rig par bya'o//de ni lus la sogs pa'i chos rnams la sdug bsngal lam/ kun 'byung bar yang rnam par mi rtog la/ des byas pa'i spong ba la yang 'gog par mi rtog go/ /de 'thob pa'i rgyu la yang lam du mi rtog la/ brjod du med pa'i ngo bo nyid kyi sdug bsngal gyi chos nyid dang /kun 'byung gi chos nyid dang / 'gog pa'i chos nyid dang / lam gyi chos nyid kyang yang dag pa ji lta ba bzhin du rab tu shes te/ de ni de'i byang chub kyi phyogs kyi chos bsgoms pa don dam pa la brten nas bden pa bsgom pa yin no/ /kun rdzob tu ni byang chub sems dpa'i bden pa la dmigs pa'i bsgom pa rnam par gzhag pa'i tshul tshad med pa shes pa dang ldan par blta bar bya'o//de la byang chub sems dpa'i chos de dag la de ltar rnam par mi rtog pa gang yin pa de ni de'i zhi gnas yin par blta bar bya'o/ /chos rnams la yang dag pa ji lta ba bzhin du rab tu shes pa don dam pa gang yin pa de dang /rnam par gzhag pa'i tshul tshad med pa shes pa gang yin pa de ni de'i lhag mthong yin par blta bar bya'o/ /de la byang chub sems dpa'i zhi gnas ni mdor bsdu na rnam pa bzhir rig par bya'o/ /don dam pa dang /brdar btags pa'i shes pa sngon du 'gro ba dang / don dam pa dang / brdar btags pa'i shes pa'i 'bras bu dang / spros pa'i 'du shes thams cad la lhun gyis grub par 'jug pa dang / brjod du med pa'i dngos po tsam de la yang / mtshan ma med pa'i phyir rnam par mi rtog pa'i sems zhi bas chos thams cad mnyam pa nyid du ro gcig par 'gro ba can yin te/rnam pa bzhi po 'di dag gis byang chub sems dpa' rnams kyi zhi gnas kyi lam ni bla na med pa yang dag par rdzogs pa'i byang chub kyi ye shes gzigs pa yongs su 'grub pa dang / yang dag par grub pa'i bar du 'jug go/ /de la byang chub sems dpa' rnams kyi lhag mthong yang mdor bsdu na rnam pa bzhi kho nar rig par bya ste/zhi gnas sngon du 'gro ba rnam pa bzhi bo de nyid dang / chos thams cad la sgro 'dogs par 'dzin pa'i ngan pa'i mtha' rnam par spangs pa dang / skur pa 'debs par 'dzin pa ngan pa'i mtha' rnam par spangs pa dang /chos rab tu dbye ba rnam par gzhag pa'i tshul tshad med pa dang ldan pa'i lhag mthong yin te/ rnam pa bzhi po 'di dag gis byang chub sems dpa' rnams kyi lhag mthong gi lam bla na med pa yang dag par rdzogs pa'i byang chub kyi ye shes gzigs pa yongs su 'grub pa dang / yang dag par 'thob pa'i bar du 'jug ste /'di ni byang chub sems dpa' rnams kyi zhi gnas dang lhag mthong mdor bstan pa yin no/ /de la byang chub sems dpa'i thabs la mkhas pa gang zhe na/ de ni mdor bsdu na rnam pa bcu gnyis te/ nang gi sangs rgyas kyi chos yang dag par 'grub pa las brtsams te/ rnam pa drug dang /phyi rol gyi sems can yongs su smin par bya ba las brtsams te/ rnam pa drug nyid do/ /de la nang gi sangs rgyas kyi chos yang dag par 'grub pa las brtsams te/ thabs la mkhas pa rnam pa drug gang zhe na/ byang chub sems dpa'i sems can thams cad la snying rje dang ldan par lta ba gang yin pa dang /'du byed thams cad la yang dag pa ji lta ba bzhin du yongs su shes pa gang yin pa dang / bla na med pa yang dag par rdzogs pa'i byang chub kyi ye shes 'dod pa gang yin pa dang / sems can la lta ba la brten nas/ 'khor ba yongs su mi gtong ba gang yin pa dang / 'du byed rnams la yang dag pa ji lta ba bzhin du yongs su shes pa la brten nas/kun nas nyon mongs pa can ma yin pa'i sems kyis 'khor ba na 'khor ba gang yin pa dang / sangs rgyas kyi ye shes 'dod pa la brten nas brtson 'grus 'bar ba gang yin pa ste / 'di ni nang gi sangs rgyas kyi chos yang dag par 'grub pa las brtsams te/thabs la mkhas pa rnam pa drug yin par rig par bya'o/ /de la phyi rol gyi sems can yongs su smin par bya ba las brtsams te/ thabs la mkhas pa rnam pa drug gang zhe na/ thabs la mkhas pa gang gis byang chub sems dpas sems can rnams kyi dge ba'i rtsa ba chung ngu yang 'bras bu tshad med par sgyur bar byed pa dang /de bzhin du tshegs chung ngus dge ba'i rtsa ba rgya che zhing tshad med pa dag yang dag par skyed par byed cing nye bar sgrub par byed pa dang / de bzhin du sangs rgyas kyi bstan pa la sems can zhe 'gras pa rnams kyi khong khro ba sel bar byed la/ tha mal pa rnams ni 'dzud par byed/ zhugs pa rnams ni yongs su smin par byed/ yongs su smin pa rnams ni rnam par grol bar byed pa'o/ /de la byang chub sems dpa' sems can rnams kyi dge ba'i rtsa ba chung ngu rnams 'bras bu tshad med par ji ltar sgyur bar byed ce na/ 'di la byang chub sems dpa' sems can gang su yang rung bas dngos po thams cad las tha na phye khyor gang tsam yang zhing tha chad kho na la sbyin du 'jug cing /tha na dud 'gro'i skye gnas su skyes pa'i srog chags 'byung po la sbyin du 'jug cing / sbyin du bcug nas kyang bla na med pa yang dag par rdzogs pa'i byang chub tu yongs su bsngor 'jug ste/de ltar dge ba'i rtsa ba de dngos po dang zhing gis kyang chung mod kyi/ de yang yongs su bsngo ba'i dbang gis 'bras bu tshad med par bsgyur ba yin no/ /byang chub sems dpa' tshegs chung ngus sems can rnams kyi dge ba'i rtsa ba rgya che zhing tshad med pa ji ltar skyed ce na/'di la byang chub sems dpa' ni sems can zla bar smyung zhing / kha zas mi za ba la sogs pa la mos pa rnams la 'phags pa'i bsnyen te gnas pa yan lag brgyad pa ston par byed de/ tshegs che zhing mi sdug pa'i 'bras bu can gyi bsnyen te gnas pa de las 'dun pa bzlog cing yang dag par blang ba tshegs chung zhing /'bras bu che ba'i bsnyen te gnas pa la yang dag par 'dzud do/ /de bzhin du sems can bdag nyid dub par bya ba'i sbyor ba la brtson pa/ thar pa 'dod la/ log par zhugs pa rnams la dbu ma'i lam mtha' gnyis dang bral ba ston cing de la 'dzud par byed do//de bzhin du mer 'jug pa dang / g.yang sar mchong ba dang / kha zas mi za bar 'dug pa la sogs pa mtho ris 'dod de/ log par zhugs pa'i sems can rnams la tshe 'di la bde bar gnas par bya ba dang / phyi ma la yang tshegs med pa kho nar bde ba dang bcas/yid bde ba dang bcas pas mtho ris su skye bar bya ba'i phyir bsam gtan yang dag par ston to/ /yang rig byed las 'byung ba'i gsang tshig lung nod cing kha ton du bya bas dag pa'i mthar thug par 'gyur bar mos pa'i sems can rnams sangs rgyas kyi bka' lung nod pa dang /kha don bya ba dang / don sems pa la yang dag par 'dzud do/ /yang de bzhin gshegs pas gsungs pa zab mo stong pa nyid dang ldan pa'i chos rnams gzhan dag gis thos na ci nas shas cher skyo ba dang / ci nas shas cher dad pa skyed par 'gyur ba de lta de ltar gsal bar byed cing ston par byed de/skad cig gcig tsam zhig skyo ba dang / dga' ba dang ldan pa'i sems de yang / dge ba'i rtsa ba rgya chen po sdud pa'i grogs su 'gro na/ rgyun chags su byung ba lta ci smos/ yang byang chub sems dpa' ni dad pa dang ldan pa'i lhag pa'i bsam pas phyogs bcu dag gi 'jig rten na me tog phreng dang /spos rnam pa sna tshogs rab mchog gya nom pa gang ci yang rung ba yod pa de dag gis sangs rgyas dang chos dang / dge 'dun dkon mchog gsum la mchod par mos pa byed pa / gzhan dag kyang mos pa byed du 'jug go/ /yang phyogs thams cad du dad pa dang ldan pa'i lhag pa'i bsam pa de nyid kyis rgyas par byas nas/dkon mchog gsum la mchod pa thams cad la mngon par rjes su yi rang la/ gzhan dag kyang rjes su yi rang bar byed du 'jug go/ /yang sangs rgyas rjes su dran pa dang / chos rjes su dran pa dang / lha rjes su dran pa'i bar du rtag tu rgyun mi 'chad par sgom par byed pa /gzhan dag kyang yang dag par 'dzin du 'jug go/ /yang yid la brjod pa dag gis dkon mchog gsum la phyag 'tshal bas dus don yod par byed cing byed du 'jug go/ /yang sems can thams cad kyi bsod nams thams cad la rjes su yi rang bar byed cing / rjes su yi rang du 'jug go//yang snying rje chen po la zhugs pa'i lhag pa'i bsam pas sems can thams cad kyi sdug bsngal thams cad bdag nyid kyis yang dag par len par byed la/ gzhan yang de nyid la yang dag par 'dzin du 'jug pa'o / /yang 'das pa dang / da ltar byung ba'i 'khrul pa thams cad dang /nyes pa thams cad dge zhing bslab par 'dod pa dang ldan pa'i sems kyis phyogs thams cad du sangs rgyas bcom ldan 'das rnams la so sor 'chags par byed la gzhan dag kyang de nyid yang dag par 'dzin du 'jug go/ /de de ltar rgyun mi 'chad par 'khrul pa so sor bshags na/ tshegs chung ngus las kyi sgrib pa thams cad las rnam par thar bar 'gyur ro/ /yang byang chub sems dpa' rdzu 'phrul can sems la dbang thob pa ni phyogs thams cad du sangs rgyas dang / chos dang / dge 'dun la brten zhing / sems can la brten te/ sprul pa mang po rnam pa sna tshogs kyis bsod nams dpag tu med pa sdud par byed do//yang byang chub sems dpa' ni byams pa dang / snying rje dang / dga' ba dang / btang snyoms sgom par byed la/ gzhan yang de nyid yang dag par 'dzin du 'jug ste/ de ltar na byang chub sems dpa' ni tshegs chung ngus dge ba'i rtsa ba rgya chen po dpag tu med pa'i 'bras bu can dag mngon par 'grub par byed/yang dag par 'grub par byed do/ /byang chub sems dpa' ji ltar sems can zhe 'gras pa rnams kyi khong khro ba ni sel bar byed/ tha mal pa rnams ni 'dzud par byed/ zhugs pa rnams ni yongs su smin par byed/yongs su smin pa rnams ni rnam par grol bar byed ce na/ byang chub sems dpa' de'i sems can gyi don rnam pa bzhi mngon par 'grub par byed pa 'di la yang mdor bsdu na thabs rnam pa drug kho na yod par rig par bya ste/ mthun pa dang / 'khyig cing sdod pa dang / mi mthun pa'i bsam pa dang /nan thur las byung ba dang / byams pa la lan glon pa dang / dag pa ni thabs drug pa'o/ /de la byang chub sems dpa'i mthun pa'i thabs ni 'di yin te/ 'di la byang chub sems dpa' ni sems can gang dag la chos ston par 'dod pa de dag la thog ma kho nar lus dang ngag gi kun du spyod pa 'jam zhing mnyen pa dag dang /nye bar rab tu sbyin pa dang / mthun par 'jug pa'i kun du spyod pa dag gis bdag la spyod pa de dag gi khong khro ba sel bar byed de / khong khro ba bsal nas dga' ba dang gus pa skyed par byed do/ /dga' ba dang gus pa bskyed nas chos la 'dod pa skyed par byed do//de'i 'og tu de dag la chos ston par byed do/ /chos de yang ci rigs pa dang legs par 'jug par 'gyur ba dang / brda phrad par dus su rim gyis phyin ci ma log pa dang / don dang ldan par ston to/ /'khrug pa yang mi 'byed par byed do/ /sems can 'dul ba la mchog tu byed 'dod pa dang /snying brtse ba'i sems dang yang ldan no/ /de rdzu 'phrul dang sems kun brjod pa dang / rigs pa'i tshul gyis chos bstan pas sam/ gzhan la bcol bas sam/ sprul pa rnam pa sna tshogs mang po dag gis sems can rnams 'dul bar byed do//don dang ldan pa'i bstan bcos mdor bsdus pa rnams rab tu rgyas par byed pa dang / ha cang rgya che ba rnams mdor bsdus pa dang / de bzhin du lung dbog pa dang / zlos su gzhug pa dang / 'dri ba'i skabs dbye ba dang / chos bzung ba rnams dang / blangs pa rnams kyi don legs par 'grel pa dang /dmigs pa thams cad dang ldan pa'i ting nge 'dzin la 'jug pa'i sgo rnams dang mthun pa'i gdams ngag dang rjes su bstan pas sems can rnams la phan 'dogs shing sems can rnams kyi don kun du spyod do/ /sems can gang dag de bzhin gshegs pas gsungs pa'i mdo sde zab mo stong pa nyid dang ldan pa rnams kyis de bzhin gshegs pa rnams kyi dgongs pa'i don ma shes te/mdo sde gang dag las chos rnams kyi ngo bo nyid med par ston pa dang / chos rnams dngos po med pa dang / skye ba med pa dang / 'gag pa med pa dang / nam mkha' dang 'dra ba dang /sgyu ma dang rmi lam lta bur ston pa de dag gi don ji lta ba bzhin du ma shes nas/ sems skrag ste/ 'di dag ni de bzhin gshegs pas gsungs pa ma yin no zhes mdo sde de dag thams cad kyi thams cad du spong bar byed pa'i sems can de dag la yang byang chub sems dpa' des mthun par byed pa'i thabs la mkhas pas mdo sde de dag gi de bzhin gshegs pa'i dgongs pa'i don ji lta ba bzhin du mthun par byed cing /sems can de dag kyang 'dzin du 'jug go/ /'di lta bur yang mthun par byed do/ /'di ltar chos 'di dag ni thams cad kyi thams cad du med pa ma yin gyi/'di dag la ni brjod pa'i bdag nyid kyi ngo bo nyid med de/ de'i phyir de dag ngo bo nyid med pa zhes bya'o/ /gang la brten nas brjod pa 'jug pa'i brjod pa'i dngos po yod pa de yang brjod pa gang dag gi ngo bo nyid gang brjod pa yang dag pa de'i ngo bo nyid ma yin te/ de lta bas na dngos po med pa zhes bya'o//de lta yin pas chos rnams kyi brjod par bya ba'i ngo bo nyid de dag kyang thog ma nyid nas thams cad kyi thams cad du med na/ de dag ci zhig skye ba'am/ 'gag par 'gyur ram / de lta bas na mi skye ba dang / mi 'gag ba zhes bya'o/ /dper na nam mkha' la gzugs rnams dang /gzugs kyi bya ba rnam pa sna tshogs mang po dag snang bas na gzugs rnams dang gzugs kyi bya ba de dag thams cad kyi 'gro ba dang / 'ong ba dang / 'greng ba dang / 'phar ba dang / lhung ba dang / bskum pa dang / brkyang ba la sogs pa'i go skabs kyang 'byed la gang gi tshe gzugs de dag dang /gzugs kyi bya ba de dag gsal ba'i tshe/ gzugs med pa tsam gyi bdag nyid kho nas nam mkha' yongs su dag par snang ba bzhin du/ nam mkha' lta bu'i brjod du med pa'i dngos po la brjod pa sna tshogs kyis byas pa'i 'du shes rnams dang /rnam par rtog pa spros pa la chags pa dang ldan pa gzugs dang las lta bu rnams 'byung ste/ brjod pas byas pa'i 'du shes dang / rnam par rtog pa spros pa la chags pa dang ldan pa dang / gzugs dang las lta bu rnam pa sna tshogs de dag thams cad kyi go skabs kyang brjod du med pa'i dngos po nam mkha' lta bu des 'byed par byed de/gang gi tshe byang chub sems dpa' rnams kyi ye shes 'phags pas brjod pa skyes pa'i log pa'i 'du shes dang rnam par rtog pa spros pa la chags pa dang ldan pa de dag rnam pa thams cad kyi thams cad du bsal ba de'i tshe/byang chub sems dpa' 'phags pa'i mchog de dag gi ye shes 'phags pa des brjod du med pa'i dngos po de brjod pa thams cad kyi ngo bo nyid med pa tsam du nam mkha' lta bur yongs su dag par snang mod kyi 'on kyang de'i pha rol tu de'i rang bzhin gzhan tshol bar mi byed de/ de lta bas na chos rnams ni nam mkha' lta bu zhes bya'o/ /dper na sgyu ma ni ji ltar snang ba de bzhin du yod pa yang ma yin la/ sgyu ma byas pa de thams cad kyi thams cad du med pa yang ma yin pa de bzhin du chos 'di dag kyang brjod pa dang / 'dris pa'i dbang gis byis pa rnams la ji ltar snang ba de bzhin du yod pa yang ma yin la/don dam pa brjod du med pa'i bdag nyid du thams cad kyi thams cad du med pa yang ma yin no/ /de dag kyang 'jug pa'i tshul 'dis sgyu ma bzhin du yod pa yang ma yin/ med pa yang ma yin te/ gnyis su med pa de'i phyir sgyu ma lta bu zhes bya'o/ /de ltar na byang chub sems dpa' ni chos kyi dbyings thams cad la ci yang dbri bar yang mi byed/snon par yang mi byed/ nyung ngur yang mi byed/ lhag par yang mi byed/ rnam par 'jug par yang mi byed de/ yang dag pa la yang dag par rab tu shes la/ de kho na bzhin du yang dag par ston pa 'di ni byang chub sems dpa'i mthun pa'i thabs yin par rig par bya'o//de la byang chub sems dpa' 'khyig cing sdod pa'i thabs gang zhe na/ 'di la byang chub sems dpa' ni sems can zas dang skom la sogs pa lus kyi yo byad bcu 'dod pa rnams la gal te khyed par 'dzin pa dang mar 'dzin pa dang /dge sbyong du 'dzin pa dang / bram zer 'dzin pa nas snga ma bzhin du rgyas par gal te khyed rnams tshul khrims yang dag par len pa'i bar du byed na ni de lta na ngas khyed cag la zas dang / skom la sogs pa lus kyi yo byad rnams las ji tsam 'dod pa sbyin par bya'i/ de lta ma yin na ni sbyin mi 'dod zhes 'khyig cing sdod par byed do/ /de bzhin du zhing gi dngos po dang / khyim gyi dngos po dang / zong dgram pa'i khang pa'i dngos po dang / rgyal srid kyi dngos po dang / yul gyi dngos po dang / nor gyi dngos po dang / 'bru'i dngos po 'dod pa rnams dang / de bzhin du bzo dang / las kyi gnas kyi rig pa 'dod pa rnams dang / de bzhin du des grogs bya bar 'dod pa rnams dang / bag ma len pa dang / bag ma gtong bar 'dod pa rnams dang / lhag par za ba rnams dang / 'du zhing za bar 'dod pa rnams dang / bya ba'i grogs 'dod pa'i sems can rnams la gal te khyed rnams par 'dzin par byed na ni/'di ltar ngas khyed cag la zhes bya ba nas rgyas par bya ba dag la grogs su 'gro'o zhes bya ba'i bar du snga ma bzhin du sbyar te/ bya ba la 'khyig cing sdod par byed do/ /yang byang chub sems dpa' ni sems can nyes pa byung ba sun 'byin pa gnod par byed pa gzhan dag gis gsad pa dang /bcing ba dang / gcad pa dang / brdeg pa dang / smad pa dang / bsdigs pa dang / bskrad pa'i phyir zin pa rnams dang / spu gta' dang / gta' dang / btsod pa'i phyir zin pa rnams la gal te phar 'dzin pa dang / mar 'dzin par byed na ni zhes bya ba nas rgyas par snga ma bzhin te/de ltar na ngas khyed cag sdug bsngal 'di las thar bar bya'o zhes nus shing mthu yod bzhin du 'khyig cing sdod par byed do/ /yang byang chub sems dpa' ni sems can rgyal po dang / chom rkun dang / chu dang / me dang mi dang mi ma yin pa dang /'tsho ba med pa dang / mi snyan pa la sogs pa'i 'jigs pas skrag pa rnams la gal te phar 'dzin par byed na ni zhes bya ba nas rgyas par snga ma bzhin te/ de ltar na ngas khyed cag 'jigs pa 'di las yongs su bskyab par bya'o zhes 'khyig cing sdod par byed do//yang byang chub sems dpa' ni sems can sdug pa dang phrad par 'dod pa rnams dang / mi sdug pa dang bral bar 'dod pa rnams gal te phar 'dzin par byed na ni zhes bya ba nas rgyas par snga ma bzhin te/ de ltar na ngas khyed cag sdug pa dang phrad pa dang / mi sdug pa dang bral bar bya'o/ / zhes 'khyig cing sdod par byed do / /yang byang chub sems dpa' ni sems can nad kyis thebs te na ba rnams la gal te phar 'dzin par byed na ni zhes bya ba nas rgyas par snga ma bzhin te/ de ltar na ngas khyed cag nad kyi sdug bsngal 'di las thar bar bya'o zhes 'khyig cing sdod par byed do/ / sems can de dag kyang sdig pa spang ba dang / dge ba yang dag par blang ba de la myur ba myur bar byang chub sems dpa' de ltar 'khyig cing sdod pa'i dga' mgur byed par 'gyur ba de ni byang chub sems dpa'i 'khyig cing sdod pa'i thabs zhes bya ste/ sems can gang dag ji skad brjod pa'i dngos po rnams la/myur ba myur bar byang chub sems dpa' de ltar 'khyig cing sdod pa'i dga' mgur 'jug par mi byed pa de dag la ni byang chub sems dpa' ji skad brjod pa'i dngos po rnams 'dod pa dag la phan par 'dod pa'i phyir dngos po de dag sbyin par mi byed de/ sbyin par mi 'dod pa'i bsam pas ni ma yin no//sems can sdug bsngal bar gnas pa rnams dang / skrag pa rnams dang / sdug pa dang mi sdug pa dang phrad pa dang bral bar 'dod pa rnams dang / nad kyi sdug bsngal gyis nyam thag pa rnams la phan par 'dod pa'i phyir re zhig yal bar 'jog ste/ yal bar 'dod pa'i bsam pa dang /yongs su bskyab par mi bya ba'i bsam pas ni ma yin no/ /sems can de dag kyang de ltar byang chub sems dpa' las drag po la 'jug la/ snying nas ni mi byed na sdig pa spang ba dang / dge ba'i rtsa ba yang dag par blang ba'i phyir/ phyis dga' dgur byed par 'gyur ro/ /sems can gang dag byang chub sems dpa' la slong ba yang med la/sdug bsngal bar gnas pa yang ma yin ba nas rgyas par nad kyis thebs pa'i bar dag kyang ma yin la de dag de dang 'dris shing / mdza' ba de dag kyang byang chub sems dpa' 'di lta ste/ phar 'dzin pa nas rgyas par tshul khrims yang dag par blangs te/gnas par bya ba'i bar gyi phyir/ dge ba'i rtsa ba de nyid yang dag par 'dzin du 'jug go/ /de ltar byang chub sems dpa' yang dag par 'dzin du bcug kyang gal te 'gyur zhing 'jug par mi byed na/ de dag yang byang chub sems dpas phan par 'dod pa'i phyir/ bdag nyid 'khrug par yang ston te/snying nas 'khrug pa ni ma yin no/ /bya ba rnams la yang phan par 'dod pa'i phyir/ rgyab kyis lta bar ston te/ snying nas rgyab kyis lta ba ni ma yin no/ /phan par 'dod pa'i phyir de la 'jig rten pa'i gnod pa 'ga' yang byed de/ snying nas gnod par 'dod pa ni ma yin no//byang chub sems dpa' de'i bsam pa de dang / spyod pa de ni sems can de dag la mi mthun par byed de/ des kyang sems can de dag sdig pa spong ba dang / dge ba yang dag par blang ba de la yang dag par 'dzud do / /de lta bas na byang chub sems dpa'i sems can 'dul ba'i thabs 'di ni mi mthun pa'i bsam pa zhes bya'o//de la byang chub sems dpa'i nan tur las byung ba'i thabs gang zhe na/ 'di la byang chub sems dpa' ni jo bor gyur pa'am/ rgyal por gyur pa yang rung ste/ bdag por gyur nas/ bdag gi bran gnyug ma'am/ phab ste khugs pa la yang rung ba la 'di skad du nga'i 'bangs gnyug ma'am/phab ste khugs pa su yang rung ste/ phar mi 'dzin pa nas rgyas par 'chal ba'i tshul khrims blangs nas/ 'dug pa de la ngas thang gis dbang ba'i zas dang gos kun gcad dam gcod du gzhug go/ /yang na de la brdeg tu gzhug go/ /yang na nor thams cad dang nga dbral lo//yang na thams cad kyi thams cad du yul nas spyug go zhes yang dag par 'chos par byed do/ /las de la yang zho shas 'tsho ba mkhas pa dang / shes nyen can dag sgo bar byed do/ /sems can de dag kyang chad pa chen po des skrag nas/ sdig pa yang spong zhing dge ba yang dag par blangs te gnas so//sems can de dag mi 'dod bzhin du yang nan gyis gnas pa de dang / thabs des dge ba'i las la 'dzud par byed de / de lta bas na 'di ni nan tur las byung ba'i thabs zhes bya'o// //bam po bco lnga pa/ de la byang chub sems dpa'i byas pa la lan ldon pa'i thabs gang zhe na/ 'di la byang chub sems dpas sems can gang dag la sngon sbyin pa'am/ sdug bsngal ba'i skyabs sam/ 'jigs pa'i skyabs sam/ sdug pa dang mi sdug pa dang phrad pa dang bral bar byas pa'am/ nad zhi bar bya ba'i phan pa nyung yang rung /mang yang rung ba byas la byas pa gzo zhing byas pa shes te/ phyir lan du phan gdags par 'dod pa de dag la byang chub sems dpas dge ba yang dag par blangs pa kho nar lan du 'chol bar byed la/ khas len te/ 'jig rten gyi zang zing ni cung zad kyang ma yin no//de skad du gal te khyed kyis phar 'dzin pa dang / mar 'dzin pa nas rgyas par tshul khrims yang dag par blang ba'i bar du byas na / de nyid khyed kyis nga la lan du phan btags pa chen po yin no zhes zer zhing / byas pa'i lan glon pa dge ba yang dag par blangs pa gzhan las re bar byed la/thabs des gzhan dag dge ba de la yang dag par 'dzud par byed de / de lta bas na thabs de ni byas pa la lan glon pa zhes bya'o/ /de la byang chub sems dpa'i rnam par dag pa'i thabs gang zhe na/ 'di la byang chub sems dpa' mthar thug par 'gyur ba'i byang chub sems dpa'i sa la gnas shing /byang chub sems dpa'i lam shin tu rnam par sbyangs pa ni byang chub sems dpa' che ge mo zhig dga' ldan gyi lha'i rigs su skyes te/ de ni ring po mi thogs par 'dzam bu'i gling du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur gyis/ bdag cag gis de mnyes par bya ste / mi mnyes par mi bya'o/ /byang chub sems dpa' de'i drung du yang bdag cag skye bar gyur cig snyam du sems par 'gyur bar sems can dpag tu med pa'i yang dag pa'i 'dun pa bskyed pa dang / 'dun pa che bar bya ba'i phyir dga' ldan gyi lha'i rigs su skye ba'o//yang byang chub sems dpa' dga' ldan gyi lha'i rigs nas shi 'phos nas/ rigs mthon po'am/ kun gyis bkur ba'i khyim 'di lta ste/ rgyal po'i pho brang ngam/ mdun na 'don gyi khyim du skye bar 'gyur te/ der sems can rnams kyis gces par bya ba bskyed pa'i phyir 'dod pa rgya chen po dag spangs nas mngon par 'byung bar byed do//yang sems can dka' ba spyod pa la mos pa rnams kyi 'dun pa bzlog pa'i phyir dka' ba spyod pa nyams su len par byed do/ /yang de las gzhan pa'i sems can rnams byang chub dang rnam par grol ba thun mong du 'gyur ba'i 'dod pa bskyed pa'i phyir/bla na med pa yang dag par rdzogs pa'i byang chub mngon par rdzogs par 'tshang rgya bar byed do/ /yang bla na med pa yang dag par rdzogs pa'i byang chub mngon par rdzogs par sangs rgyas nas/ da ltar gang la chos bstan par bya ba'i phyir tshangs pa nyid bcom ldan 'das la gsol ba 'debs pa las na/kye ma chos bstan pa 'di ni ngan ngon tsam ma yin no snyam ste sems can de dag chos la gus pa bskyed pa'i phyir/ re zhig sems can rnams la chos mi ston par tshangs pas gsol ba btab pa la gzhes par mdzad do/ /yang 'dis ni tshangs pas gsol ba btab pa kho nas tshangs pa'i ngor bya ba dang /gzhan gyis bskul ba'i phyir chos ston par zad kyi/ bdag nyid sems can rnams la snying rje'i sems dang / bdag nyid kyi tshul gyis ni ma yin no snyam du shes nas/ sems can kha cig de ltar log par 'dzin pa btsal ba'i phyir/ sangs rgyas kyi spyan gyis 'jig rten la rnam par gzigs so/ /yang chos kyi 'khor lo 'jig rten du sngon ma bskor ba bskor bar mdzad de/ de ltar chos ston par mdzad/ bslab pa'i gzhi dag kyang 'cha' bar mdzad do/ 'di ni byang chub sems dpa'i rnam par dag pa'i thabs zhes bya ste/ thabs 'di las gong na thabs ches lhag pa dang / ches gya nom pa gzhan med do/ /de ltar na byang chub sems dpa' rnams kyi thabs mkhas pa rnam pa drug po 'di dag mdo dang / rgyas par bstan pas/ sems can zhe 'gras pa rnams kyi khong khro ba ni sel/ tha mal pa rnams ni 'dzud par byed/zhugs pa rnams ni yongs su smin par byed/ yongs su smin pa rnams ni rnam par grol bar byed do/ 'di las gong na yang med do/ /'di las lhag pa yang med do/ /'di ni byang chub sems dpa' rnams kyi thabs la mkhas pa yin no/ /de la byang chub sems dpa' rnams kyi gzungs gang zhe na/de ni mdor bsdu na rnam pa bzhir blta bar bya ste/ chos kyi gzungs dang / don gyi gzungs dang / gsang sngags kyi gzungs dang / byang chub sems dpa' bzod pa 'thob par byed pa'i gzungs so/ /de la chos kyi gzungs gang zhe na/'di la byang chub sems dpa' ni gang gis thos pa tsam kho nas ma goms shing kha ton byang bar ma byas pa'i ming dang / tshig dang yi ger gtogs pa rim bzhin du bsdebs shing / rim bzhin du sbyar ba'i yi ge tshad med pa dag tu tshad med par 'dzin par 'gyur ba de lta bu'i dran pa dang / shes rab kyi stobs bskyed pa thob par 'gyur ro/ /de la don gyi gzungs gang zhe na/ snga ma dang 'dra ba'am / de'i khyad par ni 'di yod do/ /chos de dag nyid kyi don tshad med pa dag ma goms shing / yid kyis byang par ma byas par dus tshad med pa dag tu 'dzin pa'o/ /de la gsang sngags kyi gzungs gang zhe na/'di la byang chub sems dpa' ni gang gis gsang sngags kyi gzhi gang dag sems can rnams kyi yams kyi nad yang dag par zhi bar bya ba'i phyir byin gyis rlob par byed de/ yams kyi nad rnam pa du ma yang dag par zhi bar bya ba la/ de dag grub cing mchog tu grub la don yod pa de lta bu'i ting nge 'dzin gyi dbang thob par 'gyur ba ste/'di ni byang chub sems dpa'i gsang sngags kyi gzungs zhes bya'o/ /de la byang chub sems dpa' rnams kyi byang chub sems dpa'i bzod pa 'thob par byed pa'i gzungs gang zhe na/ 'di la byang chub sems dpa' bdag nyid kyi rgyu la shin tu spyad pa/shes rab dang ldan pa/ dben pa na gnas shing / tshig kyal pa mi smra la/ su dang yang mi phrad cing / de bzhin du ran par za ba dang / bab col du mi za ba dang / kha zas sna gcig za ba dang / sems pa lhur byed pa dang / mtshan mo yun thung du nyal zhing yun ring du mi nyal ba ni byang chub sems dpa'i bzod pa thob par 'gyur ba'i gsang sngags kyi gzhi gang dag de bzhin gshegs pas gsungs pa/tad ya thA/ i Ti/ mi Ti/ ki Ti/ b+hiH k+Shan ti/ pa dA ni swA hA/ zhes bya ba'i gsang sngags kyi gzhi de dag gi don sems shing 'jal la nye bar rtogs te /de gsang sngags kyi gzhi 'di dag la yang dag par zhugs te/ su las kyang ma thos par bdag nyid kyis 'di ltar gsang sngags kyi gzhi 'di dag la ni don yongs su grub pa ci yang med de/ 'di dag ni don med pa kho na'o/ /'di dag gi don ni 'di lta ste/ don med pa 'di kho na nyid do snyam du de lta bu'i don khong du chud par 'gyur te/de'i pha rol du don gzhan tsho la bar yang mi byed de/ de tsam gyis na des gsang sngags gzhi de dag gi don legs par khong du chud pa yin no/ /des gsang sngags gzhi de dag gi don yang dag par khong du chud nas/ don de nyid kyi rjes su 'brang bas chos thams cad kyi don yang legs par khong du chud par 'gyur ro//gzhan las mthos par bdag nyid kyis / don 'di lta bu yang khong du chud par 'gyur te/ brjod pa thams cad kyis chos thams cad kyi ngo bo nyid kyi don yongs su grub pa med do/ /de dag gi brjod du med pa'i ngo bo nyid gang yin pa de ni de dag gi ngo bo nyid kyi don yin no snyam mo//des de ltar chos thams cad kyi ngo bo nyid kyi don legs par khong du chud nas/ de las don gzhan mi tshol la don de khong du chud pas dga' ba dang / mchog tu dga' ba rgya chen po yang thob par 'gyur ro/ /byang chub sems dpa' des gzungs kyi tshig thob pa de dag la brten nas/byang chub sems dpa'i bzod pa zhes bya ste/ de thob pas kyang byang chub sems dpa' de ring por mi thogs par lhag pa'i bsam pa dag pa thob par 'gyur zhing mos pas spyod pa'i sa'i bzod pa chen po la gnas par 'gyur te/'di ni byang chub sems dpa' rnams kyi byang chub sems dpa'i bzod pa thob par byed pa'i gzungs yin par rig par bya'o/ /de la chos kyi gzungs dang / don gyi gzungs ni byang chub sems dpa' bskal pa grangs med pa dang po 'das nas/ lhag pa'i bsam pa dag pa'i sa la zhugs pa'i tshe thob par 'gyur te/nges pa dang / brtan pa dang / rgya che ba yin no/ /de tshun chad ni smon lam gyi dbang ngam/ bsam gtan la brten nas thob par 'gyur te/ nges pa yang ma yin/ brtan pa yang ma yin/ rgya che ba yang ma yin no/ /chos dang don gyi gzungs ji lta ba bzhin du/gsang sngags kyi gzungs kyang de dang 'dra bar rig par bya'o/ /byang chub sems dpa'i bzod pa thob par byed pa'i gzungs ni ji skad brjod pa de kho na bzhin du thob par 'gyur ro/ /byang chub sems dpa' yon tan bzhi dang ldan na gzungs 'di dag thams cad 'thob ste/ gang yang rung ba ma tshang bas ni ma yin no/ /bzhi gang zhe na/ 'dod pa rnams la lhag par zhen pa med pa dang / gzhan ma thos pa dag la phrag dog mi skyed de/ phrag dog med pa dang / bslangs pa thams cad rab tu sbyin zhing 'gyod pa med par sbyin pa dang / byang chub sems dpa'i sde snod dam sde snod kyi ma mo las brtsams te/chos la kun du dga' zhing / chos la dga' ba yin no/ /de la byang chub sems dpa' rnams kyi byang chub sems dpa'i smon lam gang zhe na/ de ni mdor bsdu na rnam pa lngar blta bar bya ste/ sems bskyed pa'i smon lam dang / skye ba'i smon lam dang /spyod yul gyi smon lam dang / yang dag pa'i smon lam dang / smon lam chen po'o/ /de la dang po bla na med pa yang dag par rdzogs pa'i byang chub tu sems bskyed pa ni/ byang chub sems dpa'i sems bskyed pa'i smon lam zhes bya'o/ /phyi ma la sems can gyi don dang mthun pa'i 'gro ba rnams su skye bar smon pa ni/byang chub sems dpa'i skye ba'i smon lam zhes bya'o/ /chos yang dag par rab tu rnam par 'byed par smon pa dang / tshad med pa la sogs pa dge ba'i chos bsgom pa'i yul la smon pa ni/ byang chub sems dpa'i spyod yul gyi smon lam zhes bya'o/ / phyi ma la mdo'am/ rgyas par byang chub sems dpa'i dge ba thams cad bsdus pa dang / yon tan thams cad bsdu ba'i phyir smon pa ni byang chub sems dpa'i yang dag pa'i smon lam zhes bya'o/ /byang chub sems dpa'i smon lam chen po ni yang dag pa'i smon lam de nyid las rig par bya'o/ / de yang rnam pa bcu ste/ phyi ma la de bzhin gshegs pa la mchod pa dang / rim gro bya ba'i rnam pa thams cad dpag tu med par bya ba ni smon lam chen po dang po yin no/ /sangs rgyas bcom ldan 'das rnams kyi dam pa'i chos yongs su gzung zhing bsrung bar bya ba dang / chos kyi tshul yang dag par gzung bar bya ba'i phyir smon lam chen po dang /dga' ldan gyi gnas na bzhugs pa nas/ snga ma bzhin du yongs su mya ngan las 'da' ba'i bar gyi smon lam chen po dang / byang chub sems dpa'i spyod pa'i rnam pa thams cad legs par spyad par bya ba'i smon lam chen po dang /sems can thams cad yongs su smin par bya ba'i smon lam chen po dang / 'jig rten gyi khams thams cad yang dag par bstan par bya ba'i smon lam chen po dang / sangs rgyas kyi zhing yongs su dag par bya ba'i smon lam chen po dang / theg pa chen po la 'jug par bya ba'i phyir byang chub sems dpa' thams cad dang /bsam pa dang sbyor ba gcig par bya ba'i smon lam chen po dang / yang dag pa'i sbyor ba thams cad 'bras bu yod par bya ba'i smon lam chen po dang / bla na med pa yang dag par rdzogs pa'i byang chub mngon par rdzogs par byang chub par bya ba'i smon lam chen po'o//de la byang chub sems dpa'i stong pa nyid kyi ting nge 'dzin gang zhe na/ 'di la byang chub sems dpa'i brjod pa thams cad kyi bdag nyid kyi ngo bo nyid dang bral ba/ brjod du med pa'i ngo bo nyid kyi dngos po mthong nas/ sems gnas pa gang yin pa de ni de'i stong pa nyid kyi ting nge 'dzin ces bya'o//smon pa med pa'i ting nge 'dzin gang zhe na/ 'di la byang chub sems dpa' brjod du med pa'i ngo bo nyid kyi dngos po de nyid la log par rnam par brtags pa las byung ba'i nyon mongs pa dang / sdug bsngal gyis yongs su zin pa'i phyir nyes pa du ma'i skyon chags par yang dag par mthong nas/phyis de la mi smon pa sngon du 'gro ba'i sems gnas pa gang yin pa de ni de'i smon pa med pa'i ting nge 'dzin zhes bya'o/ /mtshan ma med pa'i ting nge 'dzin gang zhe na/ 'di la byang chub sems dpa' brjod du med pa'i ngo bo nyid kyi dngos po de nyid kyi rnam par rtog pa dang /spros pa'i mtshan ma thams cad bsal nas yang dag pa ji lta ba bzhin du zhi bar yid la byed pas sems gnas pa gang yin pa de ni de'i mtshan ma med pa'i ting nge 'dzin zhes bya'o/ /ci'i phyir ting nge 'dzin gsum po 'di dag gzhag gi/ 'di las gong na yang med la 'di las lhag pa yang med ce na/yod pa dang med pa 'di gnyis yin te/ de la 'dus byas dang / 'dus ma byas ni yod pa'o/ /bdag gam bdag gi ni med pa'o/ /de la 'dus byas la mi mthun par bden par smon pa las ni smon pa med pa'i ting nge 'dzin rnam par gzhag go//'dus ma byas mya ngan las 'das pa la smon cing yang dag par mngon par dga' bar 'dzin pa las ni mtshan ma med pa'i ting nge 'dzin rnam par gzhag go/ /med pa kho na'i dngos po gang yin pa de la ni/ byang chub sems dpa' smon pa'am/ mi smon par mi bya bar de med pa kho nar yang dag pa ji lta ba bzhin du blta bar bya ste/lta ba de'i dbang du byas nas/ stong pa nyid kyi ting nge 'dzin rnam par gzhag par rig par bya'o/ /de ltar byang chub sems dpa' ting nge 'dzin gsum po 'di dag la sbyor bar byed de / de ltar rnam par gzhag pa yang yang dag pa ji lta ba bzhin du rab tu shes la/de las gzhan pa'i rnam pa gang dag la nyan thos rnams slob cing / yang dag par 'grub pa'i ting nge 'dzin gsum yang yang dag pa ji lta ba bzhin du rnam par gzhag pa'i tshul la 'jug pa dang / sgom pa'i tshul la 'jug pas yang dag pa ji lta ba bzhin du rab tu shes so//chos kyi mdo bzhi ni 'di dag yin te/ de dag ni sems can rnams rnam par dag par bya ba'i phyir sangs rgyas rnams dang / byang chub sems dpa' rnams ston par mdzad do/ /bzhi gang zhe na/ 'du byed thams cad la mi rtag go zhes bya ba chos kyi mdo dang 'du byed thams cad sdug bsngal ba'o zhes bya ba chos kyi mdo dang /chos thams cad bdag med pa'o zhes bya ba chos kyi mdo dang mya ngan las 'das pa ni zhi ba'o zhes bya ba chos kyi mdo'o/ /sangs rgyas dang byang chub sems dpa' rnams ni sems can rnams la de dag dang ldan pa'i don gyi chos phal cher ston te/de'i phyir de dag ni chos kyi mdo zhes bya'o/ /dus rtag tu 'byung zhing 'byung ba'i phyir yang thub pa thugs zhi ba snga ma rnams kyis rtag tu brjod cing brjod pa'i phyir yang mdo zhes bya'o/ /'di ni 'byor pa chen por 'gyur ba dang / srid pa'i rtse mo'i gong du 'gro ba'i lam yin te de'i phyir mdo zhes bya'o//byang chub sems dpa' 'du byed thams cad mi rtag par ji ltar yang dag par mthong zhe na/ 'di la byang chub sems dpas 'du byed thams cad kyi brjod du med pa'i ngo bo nyid rtag tu med pa kho nar dmigs nas/ 'du byed thams cad mi rtag par mthong ngo //yang brjod du med pa'i dngos po nyid yang dag par yongs su ma shes pa'i phyir/ yongs su ma shes pa'i rgyu las byung ba'i skye ba dang / 'jig pa dmigs nas/ brjod du med pa'i ngo bo nyid kyi 'du byed thams cad mi rtag par yang dag par mthong ste/ des 'das pa'i 'du byed rnams ni skyes nas 'gag par yang dag par mthong la/de dag gi rgyu dang / ngo bo nyid kyang mi dmigs so/ /de lta bas na de dag ni rgyu dang ngo bo nyid kyis kyang yod par yang dag par mthong ngo / /da ltar byung ba rnams ni skyes la ma 'gags par yang dag par mthong ngo / /de dag gi rgyu ni mi dmigs te/'bras bu skyed zin pa'i phyir ro/ /ngo bo nyid ni mi dmigs te/ ma 'gags pa'i phyir ro/ /de lta bas na de dag ngo bo nyid kyis yod par yang dag par mthong gi rgyu las ni ma yin no/ /ma 'ongs pa'i 'du byed rnams ni ma skyes pa dang ma 'gags par mthong ngo / /de dag gi rgyu ni dmigs te/'bras bu ma bskyed pa'i phyir ro/ /ngo bo nyid ni mi dmigs te ma skyes pa'i phyir ro/ /de lta bas na byang chub sems dpa' de dag rgyu las ni yod par mthong gi ngo bo nyid las ni ma yin no/ /des de ltar dus gsum du 'du byed kyi rgyud rgyun mi 'chad par 'jug par mthong nas 'du byed kyi skad cig pa re re la 'dus byas rnams kyi 'dus byas kyi mtshan nyid gsum mthong la skad cig gi 'og tu 'dus byas kyi mtshan nyid bzhi pa yang dag par mthong ngo //de la 'du byed kyi skad cig pa dang po la ngo bo nyid zhig ma thag tu snga nas med pa'i 'du byed kyi skad cig gi ngo bo nyid 'byung ba gang yin pa de ni skye bar mthong ngo //skyes zin pa de nyid kyi tshe na ma zhig pa gang yin pa de ni gnas par mthong ngo / /sngar 'gags pa'i 'du byed kyi skad cig gi ngo bo nyid sngar 'gags pa de la ltos nas skyes pa de gzhan nam gzhan du 'gyur ba gang yin pa de ni rga bar mthong ngo //skye ba'i skad cig de'i 'og tu 'du byed kyi skad cig 'byung ba de nyid kyi ngo bo nyid 'jig pa gang yin pa de ni 'jig par mthong ngo / /des 'du byed kyi skad cig byung ba de'i ngo bo nyid yang dag par mthong ba gang yin pa de'i skye ba dang gnas pa dang / rga ba yang de nyid kyi ngo bo nyid yin gyi/de las gzhan pa'i ngo bo nyid ma yin par mthong ngo / /skad cig de'i 'og tu 'du byed kyi skad cig gi ngo bo nyid med par 'gyur ba gang yin pa de yang skye ba la sogs pa de dag gi yang de nyid yin par yang dag pa ji lta ba bzhin du mthong ngo / /'dus byas kyi mtshan nyid bzhi po de dag bsdus na 'du byed rnams kyi gnas skabs ni mdor bsdu na gnyis kyis rab tu phye ba ste/yod pas rab tu phye ba dang / med pas rab tu phye ba'o/ /de la bcom ldan 'das kyis yod pa gang yin pa de ni 'dus byas kyi mtshan nyid gcig tu rnam par gzhag go/ /ngo bo nyid gang yin pa de ni 'dus byas kyi mtshan nyid gnyis par rnam par gzhag go//'du byed de dag gi yod pa de ni gnas pa las gzhan du 'gyur bas rab tu phye ba'i phyir/ 'dus byas kyi mtshan nyid gsum par rnam par gzhag go/ /de la byang chub sems dpa' ni 'du byed tsam ma gtogs par de'i skye ba dang gnas pa dang /rga ba dang / mi rtag pa'i rdzas kyi ngo bo nyid yongs su grub pa rtag tu ma mthong ngo / /de ci'i phyir zhe na/ des 'du byed tsam zhig 'byung bar dmigs par zad kyi/ de'i skye ba dang / gnas pa dang / rga ba dang / mi rtag pa gzhan ni ma dmigs te/ 'du byed tsam kho na zhig gnas pa dang /rga ba dang 'jig par dmigs par zad kyi de'i skye ba dang / gnas pa dang / rga ba dang / mi rtag pa nyid ni ma dmigs pa'i phyir ro/ /rigs pas dpyad na yang byang chub sems dpas skye ba la sogs pa 'di dag rdzas su mi dmigs so/ /'di ltar dpyad na mi dmigs te/gal te gzugs la sogs pa'i 'du byed ma gtogs par skye ba'i chos gzhan zhig yod par gyur na ni de gzugs la sogs pa'i 'du byed ji skad bdag nyid kyis skye ba de bzhin du de yang skye bar 'gyur ba'i rigs so/ /de lta na ni 'du byed kyi skye ba gang yin pa dang / skye ba'i skye ba gang yin pa'i skye ba gnyis su 'gyur ro//de la 'du byed kyi skye ba'i skye ba de las gzhan ma yin pa zhig gam gzhan zhig tu 'gyur grang na/ gal te gzhan ma yin na ni de ltar na skye ba rdzas su yod par rtag par don med par 'gyur te/ skye ba gzhan zhig rdzas su yod do zhes byar mi rung ngo //ji ste gzhan yin na ni de lta na 'du byed kyi skye ba ni skye ba yin par mi 'gyur te/ 'du byed kyi skye ba la skye ba zhes byar mi rung ngo / /skye ba ji lta ba bzhin du gnas pa dang / rga ba dang / 'jig pa yang rgyas par de dang 'dra bar rig par bya'o/ /gal te 'jig pa zhes bya ba'i chos ngo bo nyid kyis yongs su grub pa zhig yod na ni de yang skye ba'am/'gag par 'gyur ro/ /gang gi tshe 'jig pa skyes par 'gyur ba de'i tshe/ 'du byed thams cad 'gag par 'gyur te/ de lta na ni 'gog pa'i snyoms par zhugs pa ltar tshegs chung ngus sems dang sems las byung ba'i chos rnams 'jug par mi 'gyur ro//'jig pa de 'gag par 'gyur na ni 'du byed 'gags zin pa de dag kyang yang 'byung bar 'gyur te/ de dag gi 'jig pa med pa'i phyir ro/ /de'i phyir 'jig pa skye zhes bya ba'am/ 'gag ces bya bar mi rung ngo / /rigs kyi bu'am/ rigs kyi bu mo rdzas su yod pa dus thams cad na yod pa dang /btags pa'i yod pa yang ngo bo nyid kyis yongs su grub par mthong ba'i skyo ba dang / 'dod chags dang bral ba dang / rnam par grol ba yang mi rung ngo / /de las bzlog pa ni rung ste/ de ltar rnam pa de dag gis byang chub sems dpa' 'du byed thams cad mi rtag par yang dag pa ji lta ba bzhin du rab tu shes so//yang byang chub sems dpas de ltar 'du byed kyi rgyun gyis 'jug ste/ mi rtag pa de dag sdug bsngal rnam pa gsum po 'du byed kyi sdug bsngal dang / 'gyur ba'i sdug bsngal dang / sdug bsngal gyi sdug bsngal gyi gnas kyi dngos por mthong ste/de ltar na byang chub sems dpas 'du byed thams cad sdug bsngal bar yang dag pa ji lta ba bzhin du rab tu shes so/ /yang byang chub sems dpas 'du byed dang / 'dus ma byas kyi chos thams cad bdag med pa rnam pa gnyis su yang dag pa ji lta ba bzhin du rab tu shes te/gang zag la bdag med pa dang / chos la bdag med pa'o/ /de la gang zag la bdag med pa de ni 'di yin te/ 'di ltar chos yod pa 'di dag ni gang zag ma yin la chos yod pa la ma gtogs pa'i gang zag gzhan yang med do/ /de la chos la bdag med pa ni 'di yin te/'di ltar brjod par bya ba'i dngos po thams cad la brjod pa'i ngo bo nyid kyi chos thams cad med pa ste/ de ltar na byang chub sems dpas chos thams cad bdag med par yang dag pa ji lta ba bzhin du rab tu shes so/ /yang 'du byed de dag nyid kyis rgyu sngar yang dag par chad la phyis ma lus par med par gyur nas de las gzhan pa rnams kyang gtan du mngon par mi 'grub cing /'byung bar mi 'gyur ba gang yin pa 'di ni mya ngan las 'das pa zhes bya ste/ de yang nyon mongs pa dang / nye ba'i nyon mongs pa nye bar zhi ba dang / sdug bsngal nye bar zhi ba'i phyir zhi bar rig par bya'o//byang chub sems dpa'i lhag pa'i bsam pa ma dag pa'am/ nyan thos kyi theg pa bden pa ma mthong ba ni de ltar re zhig mya ngan las 'das pa la mos par 'gyur te/ mya ngan las 'das pa ni zhi ba'o zhes de skad kyang zer mod kyi/ 'on kyang de ni mya ngan las 'das pa de la yang dag pa ji lta ba bzhin du rtogs pa'am/ji lta ba bzhin du ye shes mthong ba la 'jug pa ni ma yin no/ /tshul bzhin yid la byed pa de ni yod de/ 'di lta ste/ dper na rgyal po'i bu'am/ khyim bdag gi bu yang rung ste/ rgyal po'am/ khyim bdag gi khyim gyi nang du bskyed par gyur la byis pa gzhon nur 'dug pa de la rgyal po'am/khyim bdag des bcos ma'i ri dgas kyi shing rta'am/ ba lang dang / rta'i shing rta'am/ glang po che'i shing rta byin la rgyal po'i bu'am/ khyim bdag gi bu de yang de dag gis rtse zhing dga' la dga' dgur spyod de/ bcos pa'i ri dgas de dag la ri dgas kyi 'du shes skyed cing bcos ma'i ba lang dang /rta dang glang po che de dag la glang po che'i 'du shes bskyed par bya'o/ /de nas re zhig na/ rgyal po'am khyim bdag des bdag gi bu cher skyes shing dbang po yongs su smin par gyur pas/ yang dag pa'i ri dgas kyi bsngags pa brjod cing /yang dag pa'i glang po che'i bar gyi bsngags pa brjod par byed de/ rgyal po'i bu'am/ khyim bdag gi bu des kyang bsngags pa brjod pa de thos nas 'di snyam du sems te/ rgyal po 'am khyim bdag 'di ni bdag la ri dgas kyi shing rta rnams nas/ glang po che'i shing rta'i bar 'di dag gi bsngags pa brjod do snyam mo//de nas dus gzhan zhig na rgyal po'am/ khyim bdag des bdag gi bu khyim gyi phyi rol du phyung ste/ de la yang dag pa'i ri dgas bstan cing / yang dag pa'i glang po che'i bar du bstan te/ des de dag mthong nas/ de'i tshe bdag nyid kyis so sor rig pa yang dag pa ji lta ba bzhin du skyes te/bdag gi phas yun ring po zhig nas gang dag gi bsngags pa brjod pa'i ri dgas kyi shing rta nas/ rgyas par glang po che'i shing rta'i bar de dag gi yang dag pa'i don ni 'di dag yin par lta zhig na/ bdag nyid ni yang dag pa ma yin pa'i don de lta bur bcos pa tsam gyi gzugs brnyan snang ba tsam de la mos par gyur to snyam ste/sngon gyi mos pa des ngo tsha bar 'gyur ro/ /de bzhin du 'khor ba'i khyim gyi nang nas skyes pa bsam pa ma dag pa'i byang chub sems dpa' rnams dang / nyan thos bden pa ma mthong ba bu dang 'dra ba rnams kyang / pha lta bu'i sangs rgyas rnams dang /sa chen po la zhugs pa'i byang chub sems dpa' mya ngan las 'das pa mngon sum du gzigs pa rnams kyis byang chub sems dpa' dang nyan thos de dag gi mdun du ji ltar gzigs pa'i mya ngan las 'das pa'i bsngags pa brjod la de dag gis kyang / mya ngan las 'das pa de yon tan las sgra tsam gyi rjes su 'brang ba'i blos yun ring mo nas mos la/gang gi tshe de dag gi tshogs yongs su smin cing 'phel bar gyur pa na ni/ bsam pa dag pa'i byang chub sems dpa' rnams dang / nyan thos bden pa mthong ba rnams mya ngan las 'das pa la mngon sum gyi shes pa skye bar 'gyur te/de'i tshe de dag gi so so yang dag par rig pa yang / yang dag pa ji lta ba bzhin du skye bar 'gyur te/ sangs rgyas dang byang chub sems dpa' rnams kyi gang zhig bsngags pa brjod pa de ni/ nyan thos dang rang sangs rgyas thams cad kyi mya ngan las 'das pa 'di yin pa lta zhig na bdag gis ni sngon byis pa'i shes pas yang dag pa ji lta ba bzhin du mos par ma gyur te/de lta bur bcos pa de yang yod la/ snang ba tsam yang yod do snyam ste/ phyi ma'i yang dag pa ji lta ba'i mos pa la brten nas/ snga ma'i mos pa des ngo tsha bar 'gyur ro//dper na mi nad kyis thebs pa la la zhig la sman pa chen po la la zhig gis de la yod pa'i nad zhi bar bya ba'i phyir/ de dang mthun pa'i sman dag gis rim gro byas nas/ mi nad pa des sman de dag yun ring por bsten pas/ de dag la mos shing de dag la dga' bar 'gyur te/ de dag nyid la snying por 'dzin par gyur la/de nas mi nad kyis thebs pa de'i nad snga ma de yang sman bsten pa des zhi bar gyur pa'i 'og tu de ma yin pa'i nad snga na med pa'i sman gzhan dag gis gso dgos pa zhig byung la/ de nas sman pa chen po de la / nad snga ma ni zhi bar gyur la/ phyi ma sman gzhan dag gis gso dgos pa ni byung bar shes nas/sman gyi sbyor ba snga ma de btang ste/ mthun pa gzhan bstan na/ byis pa lta bu'i mi nad pa sman snga ma la mos shing / de dag nyid la phan par 'du shes pa de / sman pa chen po gang gis sman snga ma de dang phyi ma de dag bstan nas/ des mngon sum du sman snga ma de dag ni nad phyi ma la mi phan no zhes de skad du yang ston pa de la yid ches par mi byed cing /de'i tshig la mngon par dad par mi 'gyur ba de bzhin du/ byis pa lta bu'i byang chub sems dpa' dang / nyan thos rnams kyang de dang 'dra bar rig par bya ste/ mi nad kyis thebs pa lta bu nyon mongs pas zin pa de dag kyang /sman pa chen po de bzhin gshegs pa'i chos bstan pa bla ma las kyang ches bla mar gyur cing / shin tu bla mar gyur pa gsal ba bas gsal zhing / zab pa bas ches zab pa shin tu zab pa/ dma' ba bas rgya che la ches rgya che shing shin tu rgya che ba/yang dag par bstan zhing / gtams te rjes su bstan pa la mi 'jug cing / ma mos te/ chos kyi rjes su mthun pa'i chos khong du mi chud do/ /de la byang chub sems dpa' 'am/ nyan thos dad pa dang ldan pa'i de bzhin gshegs pas gsungs pa gang la yang yid gnyis dang /som nyi mi skyed pa de ni/ cang shes dang ldan pa'i shing rta yan lag dang / nying lag dang yo byad thams cad dang shin tu ldan pa dang 'dra ba'i de bzhin gshegs pas gsungs pa'i chos kyi shing rta de la zhon nas/ kha lo pa mkhas pa bzhin du des sa ji srid bgrod par bya ba dang son par bya ba der mi bul bar myur ba myur bar 'gro bar 'gyur ro//byang chub sems dpa'i sa'i gzhi'i rnal 'byor gyi gnas las/ byang chub kyi phyogs kyi le'u ste bcu bdun pa'o// //sdom ni/ ngo mtshar ngo mtshar ma yin dang / /snyoms pa'i sems dang phan 'dogs dang / /lan du phan 'dogs de bzhin smon//sbyor ba 'bras bu yod pa nyid/ /lnga po 'di dag ni bla na med pa yang dag par rdzogs pa'i byang chub kyi theg pa la slob pa'i byang chub sems dpa'i ngo mtshar rmad du byung ba'i chos yin par rig par bya ste/ lnga gang zhe na/ rgyu med par sems can thams cad la mnyes gshin pa dang /sems can rnams kho na'i don du 'khor ba na sdug bsngal dpag tu med pas mi mjed pa dang / sems can nyon mongs pa shas che zhing gdul dka' ba rnams kyi gdul ba'i thabs shes pa dang / mchog tu rtogs par dka' ba'i de kho na'i don la 'jug pa dang / mthu bsam gyis mi khyab pa ste/lnga po de dag ni byang chub sems dpa' rnams kyi ngo mtshar rmad du byung ba'i chos te/ de las gzhan pa'i sems can thams cad dang thun mong ma yin pa'o/ /lnga po 'di dag ni byang chub sems dpa'i ngo mtshar ma yin la gang dag dang ldan na byang chub sems dpa' ngo mtshar rmad du byung ba'i chos dang ldan pa zhes bya ste/lnga gang zhe na/ byang chub sems dpa' ni gzhan la phan pa'i rgyu las byung ba'i sdug bsngal gyis bde ba'i bdag nyid kho nar gyur nas gzhan la phan pa'i rgyu las byung ba'i sdug bsngal zad par nyams su len te/ de ni byang chub sems dpa'i ngo mtshar ma yin pa dang po ste/de dang ldan na byang chub sems dpa' ngo mtshar rmad du byung ba'i chos dang ldan pa zhes bya'o/ /gzhan yang byang chub sems dpa' ni 'khor ba'i nyes pa shes shing mya ngan las 'das pa'i yon tan yang shes bzhin du/ sems can yongs su dag par dga' zhing /de nyid kyis bde ba'i bdag nyid du 'gyur te/ sems can yongs su dag par bya ba kho na'i dbang du byas nas 'khor ba nyams su len te/ de ni byang chub sems dpa'i ngo mtshar ma yin pa gnyis te snga ma bzhin no/ /gzhan yang byang chub sems dpa' ni mi smra ba'i tshul gyis bde ba'i nyams shes bzhin du sems can yongs su dag par dga' zhing de nyid kyis bde ba'i bdag nyid du 'gyur te/sems can yongs su dag par bya ba kho na'i dbang du byas nas sems can rnams la chos ston par sbyor bar byed de/ de ni byang chub sems dpa'i ngo mtshar ma yin pa gsum pa ste/snga ma bzhin no/ /gzhan yang byang chub sems dpa' ni sems can yongs su dag par dga' zhing / de nyid kyis dga' ba'i bdag nyid du 'gyur te/ sems can yongs su dag par bya ba kho na'i dbang du byas nas/ pha rol tu phyin pa drug bsags pa'i dge ba'i rtsa ba sems can thams cad la bsam pa thag pa nas yang dag par gtong la/yang dag par gtang ba de'i rnam par smin pa yang mi 'dod de / de ni byang chub sems dpa'i ngo mtshar ma yin pa bzhi pa ste/ snga ma bzhin no/ /gzhan yang byang chub sems dpa' ni gzhan gyi bya ba bdag gi bya ba nyid du byed cing gzhan gyi bya ba'i don byed pa thams cad la snang ste/de ni byang chub sems dpa'i ngo mtshar ma yin pa lnga pa ste/ de dang ldan na byang chub sems dpa'i ngo mtshar rmad du byung ba'i chos dang ldan pa zhes bya'o/ /byang chub sems dpa' ni rnam pa lngas sems can thams cad la sems snyoms par rig par bya ste/lnga gang zhe na/ dang po byang chub tu sems bskyed pa'i smon lam gyis 'gyur te/ 'di ltar byang chub sems dpa' ni sems can thams cad kyi don la snyoms par sems de bskyed pa yin/ byang chub sems dpa' ni sems can thams cad la snying brtse ba dang ldan pa'i sems kyis sems snyoms pa yin/byang chub sems dpa' ni sems can thams cad la bu gcig pa bzhin du sdug pa dang ldan pa'i sems kyis sems snyoms pa yin/ byang chub sems dpa' ni sems can thams cad la rten cing 'brel bar 'byung ba'i 'du byed rnams la sems can zhes bya bar rig nas sems can gcig gi chos nyid gang yin pa de ni thams cad kyi yin no zhes chos mnyam pa nyid dang ldan pa'i sems kyis sems can thams cad la sems snyoms par gnas pa yin/ji ltar sems can gcig gi don kun du spyod pa bzhin du thams cad la yang de dang 'dra ste/de ltar byang chub sems dpa' don byed pa dang ldan pa'i sems kyis sems can thams cad la sems snyoms par gnas te / rnam pa lnga po de dag gis byang chub sems dpa' sems can rnams la sems snyoms pa yin no/ /sems can rnams la byang chub sems dpa' rnams kyi phan 'dogs pa'i bya ba thams cad ni rnam pa lngar rig par bya ste/lnga gang zhe na/ yang dag pa'i 'tsho ba ston par sgrub pa dang / don dang ldan pa'i bya ba mi mthun pa dag la mthun pa ston par sgrub pa dang / mgon med pa sdug bsngal ba bkren pa/ rten med pa rnams la mgon yod par byed pa dang /bde 'gror 'gro ba'i lam ston par sgrub pa dang / theg pa gsum ston par sgrub pa ste/ sems can rnams la byang chub sems dpa' rnams kyi phan 'dogs pa'i bya ba ni lnga po de dag yin par rig par bya'o/ /rnam pa lngas sems can dag byang chub sems dpa' phan 'dogs 'dogs pa la lan du phan 'dogs par nye bar gnas pa yin te/rnam pa lnga gang zhe na/ bdag nyid yon tan rnams dang yang dag par sbyor ba dang / gzhan gyi yon tan bskyed pa la sbyor ba dang / sems can mgon med pa sdug bsngal ba bkren pa rten med pa rnams la stong bar byed pa dang /de bzhin gshegs pa rnams la mchod pa byed pa dang / de bzhin gshegs pas gsungs pa'i chos kha ton du byed pa dang / 'drir bcug ste/ 'chang zhing de la mchod pa byed pa'o/ /lnga po 'di dag ni byang chub sems dpas rtag tu smon par bya ba yin te/lnga gang zhe na/ sangs rgyas 'byung ba mnyes par bya ba dang / sangs rgyas de dag nyid las pha rol tu phyin pa drug dang / byang chub sems dpa'i sde snod mnyan pa dang / rnam pa thams cad du sems can yongs su smin par bya ba'i mthu yod pa dang / bla na med pa yang dag par rdzogs pa'i byang chub thob par bya ba dang /byang chub mngon par rdzogs par sangs rgyas nas kyang / nyan thos dang mthun par 'gyur ba'o/ /byang chub sems dpa' sems can rnams la don bya ba'i sbyor ba ni rnam pa lngas 'bras bu yod par 'gyur te/ lnga gang zhe na/'di la byang chub sems dpa' ni/ thog ma kho nar sems can rnams la phan pa dang / bde bar 'dod pa yin/ phan pa dang bde ba de yang yang dag pa ji lta ba bzhin du rab tu shes pa yin/ blo phyin ci ma log pa yin te/ 'di lta ste mchod pa dang / brten pa dang / tshad med pa'i le'u las sngar ji skad bstan pa bzhin du rig par bya'o// //sdom ni/ yang dag sbyor dang 'bri ba dang / /de bzhin khyad par 'gro ba dang / /yon tan 'dra bar bcos rnams dang / /yang dag rnams dang de bzhin 'dul/ /byang chub sems dpa'i yang dag pa'i sbyor ba thams cad ni/ sbyor ba rnam pa lngas bsdus par rig par bya ste/lnga gang zhe na/ rjes su bsrung ba'i sbyor ba dang / kha na ma tho ba med pa'i sbyor ba dang / /so sor rtog pa'i stobs kyi sbyor ba dang / /lhag pa'i bsam pa dag pa'i sbyor ba dang / /nges par 'gyur ba'i sbyor ba'o/ /de la byang chub sems dpa' ni rjes su bsrung ba'i sbyor bas yid gzhungs pa bsrung ste/lhan cig skyes pa'i shes pa des chos rnams myur ba myur bar kho nar 'dzin to/ /dran pa srung ste dran pa des ni blangs pa'i chos rnams 'dzin par byed do/ /shes pa srung ste shes pa des ni gzung ba'i chos rnams kyi don la nye bar rtog go/ / yang dag pa'i shes pa srung ste/ de ni yid gzhungs pa dang / dran pa dang blo 'grib pa dang / mthun pa'i gzhi yongs su spang ba dang / gnas pa dang / 'phel ba dang mthun pa'i gzhi so sor brten pas so sor rtogs par 'gyur ro/ /dbang po rnams kyi sgo bsdams pa ni rang gi sems kun du bsrung ngo //legs par gzhan gyi sems dang mthun par 'jug pa ni gzhan gyi sems kun du bsrung ngo / /de la byang chub sems dpa'i kha na ma tho ba med pa'i sbyor ba ni/ dge ba'i chos rnams la phyin ci ma log pa dang / 'bar ba lta bu dang / tshad med pa dang / rtag pa dang / byang chub tu yongs su bsngos pa'o//so sor rtog pa'i stobs kyi sbyor ba ni mos pas spyod pa'i sa ste thams cad las blta bar bya'o/ /lhag pa'i bsam pa dag pa'i sbyor ba ni/ lhag pa'i bsam pa'i sa dang / sbyor ba sgrub pa'i sa las blta bar bya'o/ /nges par gyur pa'i sbyor ba ni/ nges pa'i sa dang / spyod pa nges pa'i sa dang / mthar thug par 'gro ba'i sa las blta bar bya ste/ de ltar na sbyor ba lnga po 'di dag gis byang chub sems dpa'i yang dag pa'i sbyor ba thams cad bsdus so/ /lnga po 'di dag ni byang chub sems dpa'i 'bri ba dang mthun pa'i chos yin par rig par bya ste/ lnga gang zhe na/ chos dang chos smra ba la ma gus pa dang /bag med pa dang / le lo dang / nyon mongs pa la sten pa dang du len pa dang / nyes par spyod pa la sten pa dang du len pa dang / de las gzhan pa'i byang chub sems dpa' rnams dang dpog par byed cing mngon pa'i nga rgyal byed pa dang / chos la phyin ci log tu mngon pa'i nga rgyal byed pa'o//lnga po 'di dag ni byang chub sems dpa'i chos rnams khyad par du 'gro ba dang mthun pa yin par rig par bya ste/ de dag kyang nag po'i phyogs lnga po de dag nyid las go rims bzhin du bzlog pa yin par rig par bya'o/ /lnga po 'di dag ni byang chub sems dpa' rnams kyi yon tan ltar bcos pa'i byang chub sems dpa'i skyon yin par rig par bya ste/lnga gang zhe na/ sems can ma rungs pa tshul khrims 'chal pa dag la gzhi des gnod pa byed pa dang / tshul 'chos shing spyod lam phun sum tshogs par byed pa dang / 'jig rten rgyang 'phen pa'i gsang tshig rnams dang / mu stegs can gyi bstan bcos dang ldan pa dag gis shes kyi khe thob cing /mkhas pa'i grangs su chud par byed pa dang / kha na ma tho ba dang bcas pa'i sbyin pa la sogs pa'i dge ba la lhag par spyod pa dang / dam pa'i chos ltar bcos pa rnams la sred cing ston la rnam par 'jog pa'o/ /lnga po 'di dag ni byang chub sems dpa'i yang dag pa'i yon tan du rig par bya ste/lnga gang zhe na/ sems can ma rungs pa tshul khrims 'chal pa rnams la lhag par snying rje ba'i sems dang / rang bzhin gyis spyod lam phun sum tshogs pa dang / de bzhin gshegs pas gsungs pa'i lung khong du chud pas shes kyi khe 'thob cing mkhas pa'i grangs su chud pa dang /kha na ma tho ba med pa'i sbyin pa la sogs pa'i dge ba byed pa dang dam pa'i chos ston cing dam pa'i chos ltar bcos pa rnams spong ba'o/ /byang chub sems dpa' rnams ni mdor na 'dul ba'i skye bo rnams gnas bcur legs pa kho nar 'dul bar byed de/bcu gang zhe na/ nyes par spyod pa las dben pa dang / 'dod pa las dben pa dang / nyes par mi spyod cing 'byung bar byed pa dang / dbang po rnams kyi sgo bsdams pa dang / shes bzhin du gnas pa dang / 'du 'dzi dben pa dang / rab tu dben par gyur nas rtogs pa ngan pa las dben pa dang /sgrib pa las dben pa dang / nyon mongs pa'i kun nas dkris pa las dben pa dang / nyon mongs pa'i phyogs kyi gnas ngan len las dben pa'o// //bam po bcu drug pa/ sdom ni/ lung bstan pa dang nges par zhugs/ /nges pa kho nar bya ba dang / / rtag par yang ni bya ba dang / /gtso bor bya ba tha ma yin/ /de bzhin gshegs pa rnams ni mdor bsdu na/ rnam pa drug gis byang chub sems dpa' bla na med pa yang dag par rdzogs pa'i byang chub tu lung ston par mdzad de/ drug gang zhe na/ rigs la gnas la sems ma bskyed pa dang / de bzhin du sems bskyed pa dang /mngon sum du 'dug pa dang / lkog na 'dug pa dang / dus dpag tu rung ba la dus de srid cig gis bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro zhes bya ba dang / dus dpag tu mi rung ba la yang lung ston te/ dus nges par ni mi mdzad do//byang chub sems dpa'i nges par zhugs pa ni rnam pa gsum ste/ gsum gang zhe na/ byang chub sems dpa'i rigs la gnas pa nyid la nges par zhugs pa zhes bya'o/ /de ci'i phyir zhe na/ de ni rkyen dang phrad na nges par bla na med pa yang dag par rdzogs pa'i byang chub mngon par rdzogs par 'tshang rgya ba'i skal ba can yin pa'i phyir ro//yang byang chub sems dpa' la la ni/ bla na med pa yang dag par rdzogs pa'i byang chub tu nges par sems bskyed de/ bla na med pa yang dag par rdzogs pa'i byang chub tu mngon par rdzogs par sangs rgyas kyi bar du de las phyir ldog par mi 'gyur ro//yang byang chub sems dpa' dbang thob pa ni/ sems can gyi don spyod pa thams cad la ji ltar 'dod pa dang / ji ltar brtson pa de bzhin du 'bras bu yod par byed do/ /nges par zhugs pa gsum po de dag gi rigs la gnas pa'i nges par zhugs pa dang / sems bskyed pa'i nges par zhugs pa dang /spyod pa 'bras bu yod pa'i nges par zhugs pa'o/ /de la de bzhin gshegs pa rnams ni nges par zhugs pa tha ma las brtsams te/ nges par zhugs par byang chub sems dpa' lung ston pas lung ston par mdzad do/ /byang chub sems dpa'i nges par bya ba ni lnga po 'di dag yin te/de dag ma byas na byang chub sems dpa' bla na med pa yang dag par rdzogs pa'i byang chub tu mngon par rdzogs par 'tshang rgya ba'i skal ba med par 'gyur te/ lnga gang zhe na/ dang po sems bskyed pa dang / sems can rnams la snying brtse ba dang / brtson 'grus 'bar ba dang / rig pa'i gnas thams cad la sbyor ba dang /skyo ba med de / byang chub sems dpa'i rtag par bya ba'i gnas ni lnga po 'di dag yin te/ lnga gang zhe na/ byang chub sems dpa'i rtag par bya ba ni bag yod pa dang / sems can mgon med pa rnams dang / sdug bsngal ba rnams dang / rten med pa rnams la btang bar bya ba dang / de bzhin gshegs pa la mchod pa dang / 'khrul pa yongs su shes pa dang / bya ba dang / spyod pa dang / gnas pa dang / yid la byed pa thams cad la byang chub kyi sems sngon du 'gro ba ni byang chub sems dpa'i rtag par bya ba lnga pa'o/ /byang chub sems dpa' rnams kyi gtso bor 'dod pa ni chos bcu po 'di dag yin te/de dag ni byang chub sems dpa' rnams kyi mchog tu 'dzin cing / mchog tu 'dogs pa rnams la 'dogs par byed pa ste/ bcu gang zhe na/ byang chub sems dpa'i rigs ni rigs thams cad kyi gtso bo yin pa dang / dang po sems bskyed pa ni yang dag pa'i smon lam thams cad kyi gtso bo yin pa dang /brtson 'grus dang shes rab ni pha rol tu phyin pa thams cad kyi gtso bo yin pa dang / snyan par smra ba ni bsdu ba'i dngos po thams cad kyi gtso bo yin pa dang / de bzhin gshegs pa ni sems can thams cad kyi gtso bo yin pa dang / snying rje ni tshad med pa rnams kyi gtso bo yin pa dang /bsam gtan bzhi pa ni bsam gtan thams cad kyi gtso bo yin pa dang / ting nge 'dzin gsum gyi nang na ni stong pa nyid kyi ting nge 'dzin gtso bo yin pa dang / snyoms par 'jug pa thams cad kyi nang na ni 'gog pa'i snyoms par 'jug pa gtso bo yin pa dang / thabs la mkhas pa thams cad kyi nang na ni ji skad bstan pa'i thabs la mkhas pa rnam par dag pa gtso bo yin pa'o// //sdom ni/ gdags pa rnam par gzhag pa dang / /de bzhin chos rnams tshol ba dang / /yang dag ji bzhin yongs su shes/ /de bzhin dpag tu med pa dang / /bstan pa yi ni 'bras bu dang //tshe dang theg pa bsdu ba dang / /byang chub sems dpa' bcur shes bya/ /ming dang gdags pa de bzhin no/ /byang chub sems dpa' rnams kyi gdags pa rnam par gzhag pa ni bzhi po 'di dag yin te/ de dag ni byang chub sems dpa' 'am/ de bzhin gshegs pa kho na yang dag par 'dogs shing /rnam par 'jog par mdzad kyi/ lhar gyur pa'am/ mir gyur pa'am/ dge sbyong dang / bram zer gyur pa gzhan dag gang gis kyang mi nus te/ de dag nyid las thos pa ni ma gtogs so/ /bzhi gang zhe na/ chos gdags pa rnam par gzhag pa dang / bden pa gdags pa rnam par gzhag pa dang /rig pa gdags pa rnam par gzhag pa dang / theg pa gdags pa rnam par gzhag pa'o/ /de la mdo'i sde la sogs pa gsung rab tu gtogs pa yan lag bcu gnyis po go rims bzhin du sbyor ba dang / go rims bzhin du rnam par gzhag cing bsdebs pa gang yin pa 'di ni chos gdags pa rnam par gzhag pa'o//bden pa gdags pa rnam par gzhag pa ni rnam pa du mar yod de/ phyin ci ma log pa'i don gyis ni bden pa gcig kho na ste gnyis su med do/ /bden pa rnam pa gnyis ni kun rdzob kyi bden pa dang / don dam pa'i bden pa'o/ /bden pa rnam pa gsum ni/mtshan nyid kyi bden pa dang / ngag gi bden pa dang / bya ba'i bden pa'o/ /bden pa rnam pa bzhi ni/ sdug bsngal gyi bden pa nas/ lam gyi bden pa'i bar dag go/ /bden pa rnam pa lnga ni rgyu'i bden pa dang / 'bras bu'i bden pa dang / shes pa'i bden pa dang / shes bya'i bden pa dang /mchog gi bden pa'o/ /bden pa rnam pa drug ni/ bden pa'i bden pa dang / brdzun pa'i bden pa dang / yongs su shes par bya ba'i bden pa dang / spang bar bya ba'i bden pa dang / mngon sum du bya ba'i bden pa dang / bsgom par bya ba'i bden pa'o/ /bden pa rnam pa bdun ni ro myong ba'i bden pa dang /nyes dmigs kyi bden pa dang / nges par 'byung ba'i bden pa dang / chos nyid kyi bden pa dang / mos pa'i bden pa dang / 'phags pa rnams kyi bden pa dang / 'phags pa ma yin pa rnams kyi bden pa'o/ /bden pa rnam pa brgyad ni 'du byed kyi sdug bsngal gyi bden pa dang /'gyur ba'i sdug bsngal gyi bden pa dang / sdug bsngal gyi sdug bsngal gyi bden pa dang / 'jug pa'i bden pa dang / ldog pa'i bden pa dang / kun nas nyon mongs pa'i bden pa dang / rnam par byang ba'i bden pa dang / yang dag pa'i sbyor ba'i bden pa'o/ /bden pa rnam pa dgu ni/mi rtag pa'i bden pa dang / sdug bsngal ba'i bden pa dang / stong pa'i bden pa dang / bdag med pa'i bden pa dang / 'byung ba la sred pa'i bden pa dang / 'jig pa la sred pa'i bden pa dang / de spang ba'i thabs kyi bden pa dang / phung po'i lhag ma dang bcas pa'i mya ngan las 'das pa'i bden pa dang /phung po'i lhag ma med pa'i mya ngan las 'das pa'i bden pa'o/ /bden pa rnam pa bcu ni/ gnod pa las byung ba'i sdug bsngal gyi bden pa dang / longs spyod dang mi ldan pa'i sdug bsngal gyi bden pa dang / khams ma snyoms pa'i sdug bsngal gyi bden pa dang / sdug pa 'gyur ba'i sdug bsngal gyi bden pa dang /gnas ngan len gyi sdug bsngal kyi bden pa dang / las kyi bden pa dang / nyon mongs pa'i bden pa dang / de bzhin du thos pa tshul bzhin du yid la byed pa'i bden pa dang / yang dag pa'i lta ba'i bden pa dang / yang dag pa'i lta ba'i 'bras bu'i bden pa ste/'di ni byang chub sems dpa' rnams kyi bden pa gdags pa rnam par gzhag pa zhes bya'o/ /de'i rnam par dbye ba ni tshad med par rig par bya'o/ /rig pa bzhi ni/ rig pa gdags pa rnam par gzhag pa zhes bya ste/ de dag gi rab tu dbye ba yang snga ma bzhin du rig par bya'o//theg pa gsum po dag las/ nyan thos kyi theg pa dang / rang sangs rgyas kyi theg pa dang / theg pa chen po dag ni re re yang rnam pa bdun bdun gyis gdags pa rnam par gzhag pa ni theg pa gdags pa rnam par gzhag pa zhes bya'o/ /'phags pa'i bden pa bzhi po dag las shes rab gang yin pa dang /shes rab de nyid kyi rten dang / dmigs pa dang / grogs dang / las dang / tshogs gang yin pa dang / shes rab de nyid kyi 'bras bu gang yin pa ste/ rnam pa bdun po 'di mtha' dag gis nyan thos kyi theg pa gdags pa rnam par gzhag par rig par bya'o/ /nyan thos kyi theg pa gdags pa rnam par gzhag pa ji lta ba bzhin du rang sangs rgyas kyi theg pa gdags pa rnam par gzhag pa yang de dang 'dra'o//brjod du med pa'i dngos po la dmigs par byas nas/ chos thams cad la de bzhin nyid rnam par mi rtog pa mnyam pa nyid las byung ba'i shes rab gang yin pa dang /shes rab de nyid kyi rten dang / dmigs pa dang / grogs dang / las dang tshogs gang yin pa dang / shes rab de nyid kyi 'bras bu gang yin pa dang / rnam pa bdun po 'di dag gis theg pa chen po'i gdags pa rnam par gzhag pa'ang rig par bya'o/ /'das pa dang / ma 'ongs pa dang /da ltar byung ba'i dus dag na/ byang chub sems dpa' gang yang rung ba de dag thams cad kyis dngos po bzhi po 'di dag gis yang dag par gdags pa rnam par gzhag par rig par byas shing byed par 'gyur la byed de/ 'di las lhag pa yang med do/ /'di las gong na yang med do/ /bzhi po 'di dag ni byang chub sems dpa' rnams kyi chos thams cad yang dag pa ji lta ba bzhin du yongs su shes par bya ba'i phyir yongs su btsal ba'i dngos po yin te/ming yongs su tshol ba dang / dngos po yongs su tshol ba dang / ngo bo nyid du'ang gdags pa yongs su tshol ba dang / bye brag tu gdags pa yongs su tshol ba'o //'di rnams kyi rnam par dbye ba ni 'di lta ste/ de kho na'i don gyi le'u las rig par bya'o/ /bzhi po 'di dag ni byang chub sems dpa' rnams kyi chos thams cad yang dag pa ji lta ba bzhin du yongs su shes pa ste/ bzhi gang zhe na/ ming yongs su tshol bar gyur pa yang dag pa ji lta ba bzhin du yongs su shes pa dang /dngos po yongs su tshol bar gyur pa yang dag pa ji lta ba bzhin du yongs su shes pa dang / ngo bo nyid du gdags pa yongs su tshol bar gyur pa yang dag pa ji lta ba bzhin du yongs su shes pa dang / bye brag gdags pa yongs su tshol bar gyur pa yang dag pa ji lta ba bzhin du yongs su shes pa ste/'di dag gi rnam par dbye ba yang snga ma bzhin du 'di lta ste/ de kho na'i don gyi le'u las rig par bya'o/ /dpag tu med pa lnga po 'di dag ni byang chub sems dpa' rnams kyi thams cad la mkhas par byed par 'gyur ba ste/lnga gang zhe na/ sems can gyi khams dpag tu med pa dang / 'jig rten gyi khams dpag tu med pa dang / chos kyi khams dpag tu med pa dang / 'dul ba'i khams dpag tu med pa dang / 'dul ba'i thabs dpag tu med pa'o/ /de la sems can gyi khams ni sems can gyi rigs drug cu rtsa bzhi ni /'di lta ste/ yid kyis las 'byung ba bzhin te/ rgyud kyi bye brag gis ni dpag tu med pa'o/ /'jig rten gyi khams rnams ni phyogs bcu dag tu dpag tu med cing ming yang dpag tu med de / dper na 'di ni 'jig rten gyi khams mi mdzad de/ de'i ming las mi mjed kyi bdag po tshangs pa zhes bya ba bzhin no//dge ba dang / mi dge ba dang / lung du ma bstan pa'i chos rnams ni rab tu dbye ba'i tshul gyis dpag tu med par rig par bya'o/ /sems can thams cad 'dul ba yin pa'i phyir/ 'dul ba ni gcig tu 'gyur ro/ /rnam pa gnyis kyang yod de/ / mtha' dag gis bcings pa dang / mtha' dag ma yin pas bcings pa'o/ /rnam pa gsum yang yod de/ dbang po rtul po dang / dbang po 'bring dang / dbang po rnon po'o / /rnam pa bzhi ni/ rgyal rigs dang / bram ze dang / rje'u rigs dang / dmangs rigs so/ /rnam pa lnga ni 'dod chags spyod pa dang /zhe sdang spyod pa dang / gti mug spyod pa dang / nga rgyal spyod pa dang / rnam par rtog pa spyod pa'o/ /rnam pa drug ni khyim pa dang / rab tu byung ba dang / yongs su ma smin pa dang / yongs su smin pa dang / rnam par grol ba dang / rnam par ma grol ba'o/ /rnam pa bdun ni zhe 'gras pa dang /tha mal pa dang / spros pas shes pa dang / mgo glengs pas shes pa dang / de'i mod la 'dul bar 'gyur ba dang / phyis 'dul bar 'gyur ba dang / rkyen las gyur pa'i 'dul ba ste/ rkyen ji lta bu dang phrad pa de lta de ltar 'gyur ba'o/ /rnam pa brgyad ni 'khor brgyad de/ rgyal rigs kyi 'khor la sogs pa nas/tshangs pa'i 'khor gyi bar dag go/ /rnam pa dgu ni de bzhin gshegs pas 'dul ba dang / nyan thos dang / rang sangs rgyas kyis 'dul ba dang / byang chub sems dpas 'dul ba dang / bsgrub par dka' ba dang / bsgrub par sla ba dang / 'jam por bsgrub par bya ba dang /tshar gcad pas bsgrub par bya ba dang / rgyang ring po nas 'dul ba dang / drung nas 'dul ba'o/ /rnam pa bcu ni sems can dmyal pa dang / dud 'gro'i skye gnas pa dang / gshin rje'i 'jig rten pa dang / 'dod pa na spyod pa'i lha dang / mi dang / bar ma do'i srid pa dang / gzugs can dang /gzugs med pa dang / 'du shes can dang / 'du shes med pa dang / 'du shes can yang ma yin/ 'du shes can ma yin pa yang ma yin pa ste/ 'di yang rnam pa'i rab tu dbye bas ni rnam pa lnga bcu rtsa lnga'o/ /rgyud kyi rab tu dbye bas ni tshad med par rig par bya'o/ /de la sems can gyi khams dang /'dul ba'i khams la tha dad du bya ba ci yod ce na/ rigs la gnas pa dang / rigs la gnas pa ma yin pa'i sems can thams cad ni sems can gyi khams su bye brag med do/ /rigs la gnas pa gnas skabs de dang de dag tu gnas pa gang dag yin pa de ni 'dul ba'i khams zhes bya'o//'dul ba'i thabs ni sngar ji skad bstan pa bzhin du rig par bya'o/ /de yang rnam par dbye bas dpag tu med de/ /de dag bsdus na dpag tu med pa lngar 'gyur ro/ /de ci'i phyir zhe na/ 'di na byang chub sems dpa' sems can gang dag gi don la sbyor ba de ni/ dpag tu med pa dang po'o/ /sems can de dag gang la gnas pa yang dmigs pa de ni dpag tu med pa gnyis pa'o/ /sems can de dag 'jig rten gyi khams de dang de dag na chos gang dag gis kun nas nyon mongs pa dang rnam par dag par gyur pa dmigs pa de ni dpag tu med pa gsum pa'o//sems can de dag gi nang nas sems can gang dag skal ba dang ldan zhing / gtan du sdug bsngal las rnam par thar par byed nus par mthong ba de ni dpag tu med pa bzhi pa'o/ /sems can de dag nyid rnam par thar par bya ba'i thabs gang yin pa de ni dpag tu med pa lnga pa'o//de lta bas na byang chub sems dpa' rnams kyi dpag tu med pa lnga po de dag ni thams cad la mkhas par byed par 'gyur ro/ /lnga po 'di dag ni sangs rgyas dang byang chub sems dpa' rnams kyis sems can rnams la chos bstan pa'i 'bras bu'i phan yon rgya che ba yin par rig par bya ste/lnga gang zhe na/ de dag las sems can kha cig ni dam pa'i chos bstan pa de nyid kyi tshe/ chos rnams la chos kyi mig rdul med cing dri ma dang bral ba skyed par 'gyur ro/ /de dag las sems can kha cig ni dam pa'i chos bstan pa'i mod la zag pa zad pa thob par 'gyur ro//de dag las sems can kha cig na bla na med pa yang dag par rdzogs pa'i byang chub tu sems skyed par byed do/ /de dag las sems can kha cig ni dam pa'i chos thos pa de nyid kyi mod la byang chub sems dpa'i bzod pa mchog thob par 'gyur ro/ /sangs rgyas rnams dang / byang chub sems dpa' rnams kyis dam pa'i chos bstan pas/lung 'bogs pa dang / kha ton byed pa dang / yang dag par bsgrub pa gcig nas gcig tu brgyud pa'i tshul gyis/ dam pa'i chos kyi tshul yun ring du gnas par byed par 'gyur te/ lnga po 'di dag ni bstan pa'i 'bras bu'i phan yon rgya chen po yin par rig par bya'o//chen po bdun po 'di dag ni gang dang ldan na byang chub sems dpa' rnams kyi theg pa la theg pa chen po zhes bya bar 'gyur ba ste/ bdun gang zhe na/ chos chen po ni 'di lta ste/ gsung rab tu gtogs pa yan lag bcu gnyis las 'byung ba'i byang chub sems dpa'i sde snod shin tu rgyas pa'i sde'o//sems bskyed pa chen po ni 'di lta ste/ 'ga' zhig gis bla na med pa yang dag par rdzogs pa'i byang chub tu sems bskyed par zad pa'o/ /mos pa chen po ni 'di lta ste/ 'ga' zhig ni chos chen po de nyid la mos par zad pa'o//lhag pa'i bsam pa chen po ni 'di lta ste/ 'ga' zhig gis mos pas spyod pa'i sa las yang dag par 'das te/ lhag pa'i bsam pa dag pa'i sa la 'jug par zad do/ /tshogs chen po ni bsod nams kyi tshogs dang / ye shes kyi tshogs gang yang dag par 'grub pas bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba'o//dus chen po ni bskal pa grangs med pa gsum po gang yin pa'i dus des/ bla na med pa yang dag par rdzogs pa'i byang chub mngon par rdzogs par 'tshang rgya ba'o/ /yang dag par 'grub pa chen po ni bla na med pa yang dag par rdzogs pa'i byang chub ste/sku yang dag par 'grub pa de la ni lus yang dag par 'grub pa gzhan mtshungs pa yang med na/ gong du phyin pa lta ga la yod de/ lhag pa lta yang ga la yod/ de la chos chen po gang yin pa dang / sems bskyed pa chen po gang yin pa dang /mos pa chen po gang yin pa dang / lhag pa'i bsam pa chen po gang yin pa dang / tshogs chen po gang yin pa dang / dus chen po gang yin pa dang / chen po drug po 'di dag ni yang dag par 'grub pa chen po'i rgyur gyur pa yin no/ /yang dag par 'grub pa chen po de dag gcig pu ni drug po de dag gi 'bras bu'i gnas yin par rig par bya'o//chos brgyad po 'di dag ni theg pa chen po thams cad sdud par byed pa ste/ byang chub sems dpa'i sde snod bstan pa dang / byang chub sems dpa'i sde snod de nyid du chos thams cad kyi de kho na'i don bstan pa gang yin pa dang / byang chub sems dpa'i sde snod de nyid du sangs rgyas dang byang chub sems dpa' rnams kyi mthu bsam gyis mi khyab cing mchog tu rgya che ba bstan pa gang yin pa dang /de tshul bzhin du nyan pa dang / tshul bzhin du sems pa sngon du 'gro ba'i lhag pa'i bsam pa nyams su blang ba gang yin pa dang / lhag pa'i bsam pa nyams su blang ba sngon du 'gro ba'i bsgom pa'i rnam pas 'jug pa dang / bsgom pa'i rnam pas 'jug pa sngon du 'gro ba'i bsgoms pa'i 'bras bu yongs su 'grub pa dang / bsgoms pa'i 'bras bu yongs su 'grub pa de nyid kyis gtan du nges par 'byin pa ste/ byang chub sems dpa' de ltar slob pa rnams ni bla na med pa yang dag par rdzogs pa'i byang chub mngon par rdzogs par 'tshang rgya'o//byang chub sems dpa' gang dag de ltar slob na/ bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba de dag gang zhe na/ de dag ni mdor bsdu na rnam pa bcur rig par bya ste/ rigs la gnas pa dang / zhugs pa dang / bsam pa ma dag pa dang / bsam pa dag pa dang / yongs su ma smin pa dang / yongs su smin pa dang / nges par zhugs pa ma yin pa dang / nges par zhugs pa dang skye ba gcig gis thogs pa dang / srid pa tha ma pa'o/ /de la rigs la gnas pa'i byang chub sems dpa' slob pa na sems skyed par byed pa de ni zhugs pa zhes bya'o/ /zhugs pa de nyid ji srid du bsam pa dag pa'i sa la ma zhugs pa de srid du ni bsam pa ma dag pa zhes bya'o/ /zhugs pa ni bsam pa dag pa yin no/ / bsam pa dag pa de nyid ji srid du mthar thug par 'gro ba'i sa la ma zhugs pa de srid du ni yongs su ma smin pa zhes bya'o/ /zhugs pa ni yongs su smin pa yin no/ /yongs su ma smin pa de yang ji srid du nges pa dang / spyod pa nges pa'i sa la nges par ma zhugs pa de srid du ni ma nges pa zhes bya'o//zhugs pa ni nges pa yin no/ /yongs su smin pa de yang rnam pa gnyis te/ skye ba gcig gis thogs pa ni tshe phyi ma la bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba gang yin pa dang / srid pa tha ma pa ni tshe 'di nyid la gnas bzhin du bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ba gang yin pa'o//rigs yan chad bla na med pa yang dag par rdzogs pa'i byang chub kyi bar du byang chub sems dpa' bcu po de dag bstan pa gang yin pa dag byang chub sems dpa'i bslab pa rnams la slob pa de dag gi bslab pa ni gang la slob pa dang /ji ltar slob pa de las gong na yang med do/ /de las lhag pa yang med do/ /ji skad bstan pa'i byang chub sems dpa' de dag las gong na yang gang dag byang chub sems dpa'i bslab pa rnams la slob pa'i byang chub sems dpa' med do//yang byang chub sems dpa' de dag thams cad kyi ming dbyer med pa 'di lta bu 'di dag ni yon tan las btags par rig par bya ste/ 'di lta ste/ byang chub sems dpa' sems dpa' che/ /blo dang ldan pa gsal ba'i mchog /rgyal ba'i sras dang rgyal ba'i gzhi//rgyal ba'i myu gu rnam rgyal byed/ /rtsal dang ldan pa 'phags pa'i mchog /ded dpon grags pa chen po ste/ /snying rje can dang bsod nams che/ /dbang phyug de bzhin chos dang ldan/ /yang phyogs bcu mtha' yas mu med pa'i 'jig rten gyi khams dag na byang chub sems dpa' mu med pa gnas pa de dag so so rang gi ming du gdags pa ni dpag tu med par rig par bya'o//de la byang chub sems dpa' gang dag bdag ni byang chub sems dpa'o zhes khas 'che bar gnas la/ byang chub sems dpa'i bslab pa rnams la legs par mi sgrub pa de dag ni byang chub sems dpa' ltar bcos pa yin par rig par bya ste/byang chub sems dpa' yang dag pa ma yin no/ /byang chub sems dpa' gang dag bdag ni byang chub sems dpa' yin no zhes khas 'che bar gnas la byang chub sems dpa'i bslab pa rnams la yang legs par slob pa de dag ni yang dag pa'i byang chub sems dpa' yin par rig par bya'o//byang chub sems dpa'i sa'i gzhi'i rnal 'byor gyi gnas las byang chub sems dpa'i yon tan gyi le'u ste bco brgyad pa'o/ /gzhi'i rnal 'byor gyi gnas rdzogs s+ho/ //sdom ni/ ngo bo nyid dang gnas dang ni/ /'bras bu go rims bsdu ba yin/lnga po 'di dag ni yang dag pa'i byang chub sems dpa' rnams kyi byang chub sems dpa'i rtags yin te/ de dag dang ldan na byang chub sems dpa' byang chub sems dpa' zhes bya ba'i grangs su 'gro'o/ /lnga gang zhe na/ snying brtse ba dang / snyan par smra ba dang / brtan pa dang / lag rkyong ba dang /don dang dgongs pa zab mo nges par 'grel pa'o/ /chos lnga po 'di dag ni lngar bsgre bar rig par bya ste/ ngo bo nyid dang / gnas dang / 'bras bu'i phan yon dang / go rims dang bsdu ba'o/ /de la snying brtse ba'i ngo bo nyid ni rnam pa gnyis te/ bsam par gtogs pa dang / sgrub par gtogs pa'o//de la bsam par gtogs pa ni/ byang chub sems dpa'i phan pa'i bsam pa dang / bde ba'i bsam pa ste/ sems can rnams la snying brtse ba zhes bya'o/ /snying brtse ba'i sgrub par gtogs pa'i ngo bo nyid ni/ sems can rnams la byang chub sems dpa'i bsam pa gang yin pa de nyid ci nus ci lcogs kyis lus dang ngag gis nye bar sgrub pa'o//de la snyen par smra ba'i ngo bo nyid ni snga ma bzhin du yang dag par dga' bar byed pa dang / kun du dga' bar byed pa dang / phan 'dogs pa'i tshig yin te/ 'di lta ste/ bsdu ba'i dngos po'i le'u las rig par bya'o//de la byang chub sems dpa'i snying stobs dang / sran thub pa dang / zhum pa med pa'i stobs dang ldan pa gang yin pa de ni brtan pa'i ngo bo nyid ces bya'o/ /de la byang chub sems dpa'i rgya cher sbyin pa dang / kun nas nyon mongs pa can ma yin pa'i sbyin pa gang yin pa 'di ni lag rkyong ba'i sbyin pa'i ngo bo nyid yin par rig par bya'o//so so yang dag par rig pa bzhi dang / de dag nyid mngon par sgrub pa'i phyir yang dag pa'i sbyor ba las byung ba'i shes pa 'di ni/ byang chub sems dpa' rnams kyi don dang dgongs pa zab mo nges par 'grel ba'i ngo bo nyid yin par rig par bya'o//de la snying brtse ba'i gnas ni lnga ste/ lnga gang zhe na/ sems can sdug bsngal ba rnams dang / nyes par spyad pa spyod pa rnams dang / bag med pa rnams dang / log par zhugs pa rnams dang / nyon mongs pa'i bag la nyal ba dang ldan pa rnams so/ /de la sems can dmyal ba'i sems can yan chad gang su yang rung ba dag gi sdug bsngal gyi tshor ba rgyun du gnas shing /rgyud la zhen par 'dug pa'i sems can de dag ni sdug bsngal ba zhes bya'o/ /gang dag sdug bsngal bar nges pa ni med mod kyi/ shes cher lus kyi nyes par spyod pa lhag par spyod cing /ngag gi nyes par spyod pa dang / yid kyi nyes par spyod pa lhag par spyod de/ de la mngon par dga' ba'i rang bzhin du gnas pa'i sems can de dag ni nyes par spyad pa spyod pa zhes bya ste/ 'di lta ste/ shan pa dang / phag gsod pa dang / bya gad gsod pa la sogs pa lta bu'o//gang dag sdug bsngal ba dang / nyes par spyad pa spyod par nges par med mod kyi/ 'dod pa rnams la lhag par zhen cing spyod pa dang / zlos gar mkhan dang / bro gar mkhan dang / bzhad gad mkhan dang / 'jo sgeg mkhan dang / ltad mo lhur 'dzin par gnas shing /bdag gi byi dor lhur len pa'i sems can de dag ni bag med pa zhes bya ste/ 'di lta ste/ kha cig 'dod pa la longs spyod pa lta bu'o/ /gang dag sdug bsngal ba dang / nyes par spyad pa spyod pa dang / bag med par spyod pa ni med mod kyi/ lta ba nyams pa la brten nas sdug bsngal las rnam par thar par bya ba'i phyir zhugs pa'i sems can de dag ni log par zhugs pa zhes bya ste/'di lta ste/ 'dod pa rnams spangs nas nyes par bshad pa'i chos 'dul ba la rab tu byung ba lta bu'o/ /sems can gang dag sdug bsngal ba nas rgyas par log par zhugs pa'i bar du nges pa ni med mod kyi/nyon mongs pa mtha' dag gis bcings pa dang / mtha' dag ma yin pas bcings pa'i sems can de dag ni nyon mongs pa'i bag la nyal ba dang ldan pa zhes bya ste/ 'di lta ste/ yang dag par zhugs pa'i so so'i skye bo dge ba gang yin pa dag dang / slob pa gang yin pa dag lta bu'o/ /'di dag ni byang chub sems dpa' rnams kyi snying brtse ba'i gnas yin te/ gnas de dang dmigs pa des snying brtse ba 'byung bar 'gyur te/ de las gong na yang med do/ /de las lhag pa yang med do/ /lnga po 'di dag ni byang chub sems dpa' rnams kyi snyan par smra ba'i gnas yin te/lnga gang zhe na/ legs par smra bar bya ba dang / legs par kun du dga' bar bya ba dang / legs par dbugs dbyung ba dang / legs par bstabs pa dang / rigs pas bstan pa'o/ /de rnams kyi rab tu dbye ba ni 'di lta ste/ bsdu ba'i dngos po'i le'u las rig par bya'o//gnas lnga po 'di dag dang dmigs pa 'di dag gis byang chub sems dpa' rnams kyi snyan par smra ba 'byung bar 'gyur te/ 'di las gong na yang med do / /'di las lhag pa yang med do/ /lnga po 'di dag ni byang chub sems dpa'i brtan pa'i gnas yin par rig par bya ste/ lnga gang zhe na/ byang chub kyi phyogs kyi le'u las rnam pa lnga po gang dag gis byang chub sems dpa' rnams kyi brtan pa'i stobs bskyed pa bstan pa de dag nyid byang chub sems dpa'i brtan pa'i gnas yin par rig par bya'o/ /gnas de dag dang / dmigs pa de dag gis byang chub sems dpa'i brtan pa 'byung bar 'gyur te/'di las gong na yang med do/ /'di las lhag pa yang med do/ /lnga po 'di dag ni byang chub sems dpa'i lag rkyong ba'i gnas yin te/ lnga gang zhe na/ rgyun mi chad par sbyin pa dang / dga' bzhin du sbyin pa dang / gus par sbyin pa dang / kun nas nyon mongs pa can ma yin par sbyin pa dang /mi gnas par sbyin pa'o/ /'di rnams kyi rnam par dbye ba ni rgyas par 'di lta ste sbyin pa'i le'u las rig par bya'o/ /gnas 'di dang dmigs pa 'di dag gis byang chub sems dpa' rnams kyi lag rkyong ba 'byung bar 'gyur te/ 'di las gong na yang med do/ /'di las lhag pa yang med do//lnga po 'di dag ni byang chub sems dpa' rnams kyi don dang dgongs pa zab mo nges par 'grel pa'i gnas yin te/ lnga gang zhe na/ de bzhin gshegs pas gsungs pa'i mdo sde nges pa'i don zab mo/ /zab par snang ba / stong pa nyid dang ldan pa/ rkyen 'di nyid kyis rten cing 'brel par 'byung ba dang ldan pa gang yin pa 'di ni gnas dang po'o//'dul ba'i nyes pa la mkhas pa dang / nyes pa las 'byin pa la mkhas pa 'di ni gnas gnyis pa'o/ /ma mo la chos kyi mtshan nyid phyin ci ma log par rnam par gzhag pa 'di ni gnas gsum pa'o/ /dgongs pa can brtag dka' ba'i chos kyi ming dang /don rnam par 'byed pa 'di ni gnas bzhi pa'o/ /chos thams cad kyi chos dang / don dang / nges pa'i tshig dang / rnam par rab tu dbye ba 'di ni gnas lnga pa'o/ /gnas de dag dang dmigs pa des byang chub sems dpa' rnams kyi don dang / dgongs pa zab mo nges par 'grel pa 'byung bar 'gyur te/'di las gong na yang med do/ /'di las lhag pa yang med do/ /byang chub sems dpa'i snying brtse ba ni sems can rnams la thog ma nyid du kho na spong bar 'gyur ba'o/ /de bzhin du snying brtse ba can gyi byang chub sems dpa' ni sems can gyi don bya ba thams cad la yid zhum pa med par sbyor zhing /sbyor ba de la yongs su mi skyo ba dang / snying brtse ba des shas cher gnas par byed de/ de kha na ma tho ba med par tshe 'di la bde bar gnas pa dang / tshe phyi ma la phan par 'gyur ro/ /bcom ldan 'das kyis byams pa'i phan yon gang dag gsungs pa de'i lus la dug gis mi tshugs/mtshon gyis mi tshugs zhes bya ba la sogs pa de dag thams cad ni snying brtse ba'i byang chub sems dpa' la yang yod par rig par bya ste de ltar 'di ni byang chub sems dpa' rnams kyi snying brtse ba'i 'bras bu'i phan yon yin par blta bar bya'o//byang chub sems dpa'i snyan par smra ba ni tshe 'di la ngag gi nyes pa rnam pa bzhi/ brdzun du smra ba dang / phra ma dang / ngag rtsub mo dang / tshig kyal pa rnams spong ste/ de'i tshig de yang bdag la phan 'dogs pa dang / gzhan la phan 'dogs par zhugs pa yin no/ / snyan par smra ba'i byang chub sems dpa' ni tshe 'di dang / tshe phyi ma la tshig btsun zhing tshig gzung bar 'os par 'gyur te/ de lta na 'di ni byang chub sems dpa' rnams kyi snyan par smra ba'i 'bras bu'i phan yon yin par rig par bya'o/ /byang chub sems dpa' brtan pa ni tshe 'di nyid la yang thams cad kyi thams cad du snyom las dang /le lo dang bral bar 'gyur ro/ /sems rab tu dga' bas byang chub sems dpa'i tshul khrims kyi sdom pa yang dag par len par byed do/ /blangs nas kyang sgyid lug par mi 'gyur ro/ /bdag dang gzhan la yang bzod pas phan 'dogs par byed do/ / phyi ma la yang byang chub sems dpa'i bya ba yang dag par brtsoms pa dag la rang bzhin gyis yang dag par rtsom pa brtan par 'gyur te / ma byas par phyir mi ldog go/ /de lta na 'di ni byang chub sems dpa' rnams kyi brtan pa'i 'bras bu'i phan yon yin par rig par bya'o/ /lag rkyong ba dang / don dang / dgongs pa zab mo nges par 'grel pa'i 'bras bu'i phan yon ni 'di lta ste/ mthu'i le'u las sbyin pa'i mthu dang / shes rab kyi mthu bstan pa bzhin du rig par bya ste/ 'di ni byang chub sems dpa'i rtags de dag gi 'bras bu'i phan yon yin no/ /de dag gi go rims gang zhe na/thog ma kho nar ni byang chub sems dpa'i snying brtse bas sems can rnams la phan 'dogs te/ de dag la lta zhing don byed 'dod par 'gyur ro/ /de nas mi dge ba'i gnas nas bslangs te/ dge ba'i gnas su dgod pa'i phyir/ rigs pa smra zhing 'dzin du 'jug la ston par byed do//de bzhin du sems can yang dag par sgrub pa dang / log par sgrub pa la gnas pa rnams mi gtong ba'i phyir sems can zhugs par gyur la nyon mongs pas rnam par gnod pa log par sgrub pa rnam pa sna tshogs dang ldan pa dag la 'khrul pa bzod par 'gyur ro/ /de de ltar brtan pas sems can kha cig ni zang zing gi bsdu bas yongs su smin par byed do//kha cig ni chos kyi bsdu bas yongs su smin par byed do/ /kha cig ni chos dang zang zing gi bsdu ba gnyis kas yongs su smin par byed do/ /'di ni byang chub sems dpa'i rtags lnga po dag gi go rims yin par rig par bya'o//byang chub sems dpa'i rtags lnga pa de dag ni pha rol tu phyin pa drug po dag ste/ pha rol tu phyin pa drug po de dag las pha rol tu phyin pa gang dang gang gis byang chub sems dpa'i rtags gang dang gang bsdus she na/ snying brtse ba ni bsam gtan gyi pha rol tu phyin pas bsdus so//snyan par smra ba ni tshul khrims kyi pha rol tu phyin pa dang / shes rab kyi pha rol tu phyin pas bsdus so/ /brtan pa ni brtson 'grus kyi pha rol tu phyin pa dang / bzod pa'i pha rol tu phyin pa dang / shes rab kyi pha rol tu phyin pas bsdus so / /lag rkyong ba ni sbyin pa'i pha rol tu phyin pa kho nas bsdus so//don dang dgongs pa zab mo nges par 'grel pa ni bsam gtan gyi pha rol tu phyin pa dang / shes rab kyi pha rol tu phyin pas bsdus te/ de ltar na byang chub sems dpa'i rtags lnga po 'di dag ni lngar bsgre bar rig par bya ste/ ngo bo nyid dang / gnas dang / 'bras bu'i phan yon dang / go rims dang / bsdu ba dang lngar bsgre bar rig par bya'o/ /byang chub sems dpa'i sa'i gzhi'i mthun pa'i chos kyi rnal 'byor gyi gnas las / byang chub sems dpa'i rtags kyi le'u ste dang po'o// //sdom ni/ las mtha' legs par byas pa dang //mkhas dang gzhan la phan 'dogs dang / /yongs su bsngo ba tha ma yin/ /byang chub sems dpa' khyim pa'i phyogs sam/ rab tu byung ba'i phyogs la gnas pa'i chos ni mdor bsdu na/ rnam pa bzhir rig par bya ste/ de dag la byang chub sems dpa' khyim pa dang / rab tu byung bas bslabs na myur ba kho nar bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro//bzhi gang zhe na/ las kyi mtha' legs par byas pa dang / mkhas pa dang / gzhan la phan 'dogs pa dang / yongs su bsngo ba'o/ /de la byang chub sems dpa'i las kyi mtha' legs par byas pa gang zhe na/gang pha rol tu phyin pa rnams la nges par byed pa dang / byang bar byed pa dang / rtag tu byed pa dang / kha na ma tho ba med par byed pa ste/ byang chub sems dpa'i nges par byed pa ji lta bu yin zhe na/ 'di lta ste/ sbyin pa la byed pa ni 'di la byang chub sems dpa' sbyin par bya ba'i chos kyang bdog la/slong ba po yang legs par 'ongs nas / gnod par byas kyang rung / phan par byas kyang rung / yon tan can yang rung / skyon can yang rung ba la nges par sbyin par byed de/ de'i sbyin pa'i sems ni mi'am/ mi ma yin pa'am/ dge sbyong ngam/bram ze'am/ su yang rung ste/ 'jig rten na su yang rung bas chos dang mthun pas bskyod par mi nus so/ /byang chub sems dpa'i byang bar byed pa ji lta bu yin zhe na/ 'di lta ste/ sbyin pa la byed pa ni 'di la byang chub sems dpa' sbyin par bya ba'i chos kyang bdog la/ slong ba po yang legs par 'ongs na/thams cad sbyin par byed de/ de'i nang gi dngos po yang sems can rnams la mi gtang bar bya ba ci yang med na/ phyi rol lta ci smos/ byang chub sems dpa'i rtag tu byed pa ji lta bu yin zhe na/ 'di lta ste/ sbyin pa la byed pa ni 'di la byang chub sems dpa' sbyin pas yongs su skyo ba med par rtag tu rgyun mi 'chad pa kho nar dus thams cad du sbyin par bya ba'i ci bdog pa sbyin par byed pa'o//byang chub sems dpa'i kha na ma tho ba med par byed pa ji lta bu yin zhe na/ 'di lta ste/ sbyin pa la byed pa ni 'di la byang chub sems dpa' kun nas nyon mongs pa can gyi sbyin pa sbyin pa'i le'u las bstan pa gang yin pa'i kun nas nyon mongs pa can de spangs na/kun nas nyon mongs pa can ma yin pa'i sbyin pa sbyin par byed de/ de ltar na byang chub sems dpa' ni 'di lta ste/ sbyin pa legs par sbyin par byed pa yin no/ /sbyin pa la ji lta ba bzhin du tshul khrims dang /bzod pa dang / brtson 'grus dang / bsam gtan dang / shes rab kyi pha rol tu phyin pa rnams la yang nges par byed pa dang / byang bar byed pa dang / rtag par byed pa dang / kha na ma tho ba med pa rnam pa bzhi po 'di dag ci rigs par rig par bya'o/ /de la byang chub sems dpa'i mkhas pa gang zhe na/de ni mdor bsdus na rnam pa bcur rig par bya ste/ sems can zhe 'gras pa rnams kyi sdang ba bsal ba'i thabs la mkhas pa dang / tha mal pa rnams 'jug par bya ba dang / zhugs pa rnams yongs su smin par bya ba dang / yongs su smin pa rnams rnam par grol bar bya ba'i thabs la mkhas pa dang /'jig rten pa'i bstan bcos thams cad la mkhas pa dang / byang chub sems dpa'i sdom pa yang dag par blangs pa la/ 'khrul pa byung ba la rtog pa la mkhas pa dang / yang dag pa'i smon lam la mkhas pa dang / nyan thos kyi theg pa la mkhas pa dang /rang sangs rgyas kyi theg pa la mkhas pa dang / theg pa chen po la mkhas pa ste/ mkhas pa 'di dag thams cad kyang snga ma bzhin du/ byang chub sems dpa'i sa 'di nyid kyi rnam par dbye ba de dang / de dag las ci rigs par rig par bya'o/ /byang chub sems dpa'i mkhas pa bcu po 'di dag ni bya ba lnga byed pa yin te/mkhas pa gong ma bzhis ni byang chub sems dpas sems can rnams rang gi don la 'dzud do/ /'jig rten pa'i bstan bcos thams cad la mkhas pas ni byang chub sems dpas phas kyi rgol ba thams cad zil gyis gnon par byed do//byang chub sems dpa'i tshul khrims kyi sdom pa yang dag par blangs pa la 'khrul pa byung ba la rtog pa la mkhas pas ni byang chub sems dpas nyes pa mi 'byung ba'am/ nyes pa byung na yang chos bzhin du phyir 'chos par byed cing / tshul khrims kyi sdom pa yang dag par blangs pa shin tu yongs su dag pa srung bar byed do//yang dag pa'i smon lam la mkhas pa ni/ byang chub sems dpa' phyi ma la 'dod pa'i don thams cad 'grub par 'gyur bar byed do/ /theg pa gsum la mkhas pas ni byang chub sems dpas rigs dang / dbang po dang /mos pa ji lta ba rnams la de dang mthun par chos ston cing / 'tsham pa dang / rigs par ston te/ de ltar na mkhas pa bcu po 'di dag gis byang chub sems dpas bya ba lnga byed de/ de'i bya ba lnga po de dag gis tshe 'di dang tshe phyi ma'i don las brtsams te/ bya ba thams cad yongs su rdzogs par 'gyur ro//de la byang chub sems dpa'i gzhan la phan 'dogs pa gang zhe na/ 'di la byang chub sems dpa' ni bsdu ba'i dngos po bzhi po sbyin pa dang / snyan par smra ba dang / don spyod pa dang / don mthun pa rnams la brten nas de dag las sems can kha cig la ni phan pa nye bar sgrub pa bde bar yang nye bar sgrub /phan pa dang bde ba yang nye bar sgrub ste/ 'di ni byang chub sems dpa' rnams kyi gzhan la phan 'dogs pa mdor bstan pa'o/ /rgyas par bstan pa ni snga ma bzhin du 'di lta ste/ bdag dang gzhan gyi don gyi le'u las rig par bya'o//de la byang chub sems dpa'i yongs su bsngo ba gang zhe na/ 'di la byang chub sems dpa' ni las kyi mtha' legs par byas pa dang / mkhas pa dang / gzhan la phan 'dogs pa'i sgo gsum po 'di dag gis 'das pa dang / ma 'ongs pa dang / da ltar byung ba'i dge ba'i rtsa ba gang ci yang bsags so cog de dag thams cad snying thag pa nas dad pas bla na med pa yang dag par rdzogs pa'i byang chub tu yongs su sngo bar byed cing dge ba'i rtsa ba de'i 'bras bu rnam par smin pa gzhan mi 'dod de/bla na med pa yang dag par rdzogs pa'i byang chub kho na 'dod do/ / bcom ldan 'das kyis byang chub sems dpa' khyim pa rnams dang / rab tu byung ba rnams kyi bslab pa'i chos bstan pa gang ci yang rung ba de dag thams cad ni las kyi mtha' legs par byas pa dang / mkhas pa dang / gzhan la phan 'dogs pa la zhugs pa dang / gzhan la phan 'dogs pa dang /yongs su bsngo ba bzhi po 'di dag tu bsdu bar rig par bya'o/ /de lta bas na byang chub sems dpa' de ltar las kyi mtha' legs par byas pa dang / mkhas pa dang / gzhan la phan 'dogs pa la zhugs pa dang / yongs su sngo bar byed pa la ni 'di ltar 'thob par dka' zhing rtogs par dka' ba'i byang chub kyang nye bar gyur cing /yang dag par nye bar gyur par rig par bya'o/ /byang chub sems dpa' gang su yang rung ba de dag thams cad kyis khyim pa dang / rab tu byung ba'i phyogs rnams la bslab nas/ chos bzhi po de dag kho nas 'das pa dang / ma 'ongs pa dang /da ltar byung ba'i dus dag tu bla na med pa yang dag par rdzogs pa'i byang chub mngon par rdzogs par sangs rgyas/ mngon par rdzogs par 'tshang rgya bar 'gyur/ mngon par rdzogs par 'tshang rgya ste/ 'di las gong na yang med do/ /'di las lhag pa yang med do/ /de ltar chos bzhi po de dag las byang chub sems dpa' khyim pa'am rab tu byung ba dag yang dag par sbyor du zin kyang /byang chub sems dpa' khyim pa bas/ byang chub sems dpa' rab tu byung ba ni shin tu bye brag cher 'phags pa dang / shin tu khyad che bar rig par bya ste/ 'di ltar byang chub sems dpa' rab tu byung ba ni thog ma kho nar pha ma dang /bu dang chung ma la sogs pa bu smad yongs su 'dzin pa'i nyes pa las yongs su grol ba yin gyi/ khyim pa ni yongs su ma grol bar rig par bya'o/ /yang byang chub sems dpa' rab tu byung ba ni yongs su bzung ba de dag nyid kyi don du zhing las dang /nyo tshong dang / rgyal po la zho shas 'tsho ba la sogs pas nyon mongs pa dang / rnam par chags pa'i sdug bsngal ba rnams las yongs su grol ba yin gyi / khyim pa ni yongs su ma grol ba yin par rig par bya'o/ /yang byang chub sems dpa' rab tu byung ba ni tshangs par spyod pa gcig tu nges par lu gu rgyud bzhin du brtan par spyod nus kyi/byang chub sems dpa' khyim pas ni mi nus so/ /yang byang chub sems dpa' rab tu byung ba ni byang chub kyi phyogs kyi chos thams cad la mngon par shes pa myur ba yin te/ dge ba gang dang gang rtsom pa de dang de nyid la myur ba myur bar mthar phyin par 'gyur gyi/byang chub sems dpa' khyim pa ni de lta ma yin no/ /yang byang chub sems dpa' rab tu byung ba ni brtul zhugs la nges par gnas pa'i phyir/ gzhan dag la tshig btsun pa yin gyi/ byang chub sems dpa' khyim pa ni de lta ma yin no/ /byang chub sems dpa' khyim pa dang /rab tu byung ba gnyis ni de lta bu dang mthun pa'i chos rnams kyis shin tu khyad cher zhugs par rig par bya'o/ /byang chub sems dpa'i sa'i gzhi'i mthun pa'i chos kyi rnal 'byor gyi gnas las phyogs kyi le'u ste gnyis pa'o// //bam po bcu bdun pa/sdom ni/ sems can rnams la blo ldan gyi/ /mnyes gshin pa ni rnam bdun dang / /de dag bsam pa bco lnga ste/ /bya ba bcu ni byed par bstan/ /sems can rnams la byang chub sems dpa' rnams kyi mnyes gshin pa rnam pa bdun 'byung ste/ mnyes gshin pa de dang ldan pa'i byang chub sems dpa' rnams ni/dge ba'i bsam pa can mchog tu dge ba'i bsam pa can zhes bya'o/ /mnyes gshin pa rnam pa bdun gang zhe na/ 'jigs pa med pa dang / rigs pa dang / mi skyo ba dang / gsol ba ma btab pa dang / zang zing med pa dang / rgya che ba dang / mnyam pa'o/ /byang chub sems dpa' ni su la yang 'jigs pa'i phyir mnyes gshin par byed pa ma yin te/mthun pa'i lus dang ngag dang yid kyi las yid du 'ong zhing phan pa dang / bde ba dang ldan pa kun du spyod par byed kyi byang chub sems dpa' ni sems can rnams la rigs pa ma yin pas bskyed pa'i mnyes gshin pa/'di lta ste/ chos ma yin pa dang / 'dul ba ma yin pa dang / tshogs par kun du spyod par mi 'os pa gnas ma yin pa la 'dzud pa'i phyir 'byung ba ma yin no/ /byang chub sems dpa' ni ci nas de dag gi don las brtsams la/ thams cad yongs su mi skyo bar de ltar sems can rnams la mnyes gshin pa yin no//byang chub sems dpa' ni gsol ba ma btab par sems can rnams la mnyes gshin pa yin gyi/ la la zhig gis gsol ba btab pa ni ma yin no/ /zang zing med pa'i sems kyis mnyes gshin pa yin gyi/ gzhan las lan du phan 'dogs su re ba'am/ tshe phyi ma la sdug pa'i rnam par smin pa la re ba'i phyir ni ma yin te/de ltar na byang chub sems dpa' ni sems can rnams la rgyu med par mnyes gshin pa yin no/ /byang chub sems dpa'i mnyes gshin pa de ni rgya che ba yin te/ chung ba ma yin no/ /byang chub sems dpa' ni sems can de dag las ji ltar gnod pa byed pa'i rnam pa thams cad dang phrad kyang spong bar mi byed de/bdag nyid la dga' dgur mi sdug par byed kyang srid kyi/ gzhan dag la ni rnam grangs gang gis kyang sdig pa byed par ni mi 'dod de/ de ltar rgya che ba yin no/ /byang chub sems dpa' rnams kyi mnyes gshin pa de lta bu'i mtshan nyid dang /de lta bu'i yon tan dang ldan pa de ni sems can thams cad kho na la mtshungs pa mnyam pa yin gyi/ sems can gyi khams la nyi tshe ba ni ma yin te/ de ltar na mnyes gshin pa rnam pa bdun po de dag dang ldan pa'i byang chub sems dpa' rnams ni dge ba'i bsam pa can mchog tu dge ba'i bsam pa can zhes bya'o//de la sangs rgyas kyi chos rnams la mos pa dang / so sor rtog pa dang / nges par 'byed pa dang / dad pa sngon du 'gro ba dang / chos rnam par 'byed pa sngon du 'gro ba gang yin pa de ni byang chub sems dpa' de'i lhag pa'i bsam pa zhes bya'o/ /byang chub sems dpa'i lhag pa'i bsam pa de dag kyang mdor bsdu na rnam pa bco lngar rig par bya ste/bco lnga gang zhe na/ mchog gi bsam pa dang / tshul khrims kyi bsam pa dang / pha rol tu phyin pa'i bsam pa dang / de kho na'i don gyi bsam pa dang / mthu'i bsam pa dang / phan pa'i bsam pa dang /bde ba'i bsam pa dang / lhag pa'i bsam pa dang / brtan pa'i bsam pa dang / mi slu ba'i bsam pa dang / ma dag pa'i bsam pa dang / dag pa'i bsam pa dang / shin tu dag pa'i bsam pa dang / tshar gcad pa'i bsam pa dang / lhan cig skyes pa'i bsam pa'o/ /de la sangs rgyas dang / chos dang /dge 'dun dkon mchog rnams la byang chub sems dpa'i lhag pa'i bsam pa gang yin pa de ni mchog gi bsam pa zhes bya'o/ /byang chub sems dpa'i tshul khrims kyi sdom pa yang dag par blangs pa la lhag pa'i bsam pa gang yin pa de ni tshul khrims kyi bsam pa zhes bya'o//sbyin pa dang / bzod pa dang / brtson 'grus dang / bsam gtan dang / shes rab yang dag par 'grub par bya ba'i lhag pa'i bsam pa gang yin pa de ni pha rol tu phyin pa'i bsam pa zhes bya'o/ /chos dang gang zag la bdag med pa don dam pa chos kyi de bzhin nyid zab mo la lhag pa'i bsam pa gang yin pa de ni de kho na'i don gyi bsam pa zhes bya'o//sangs rgyas dang byang chub sems dpa' rnams kyi mngon par shes pa'i mthu'am/ lhan cig skyes pa'i mthu bsam gyis mi khyab pa la lhag pa'i bsam pa gang yin pa de ni mthu'i bsam pa zhes bya'o/ /sems can rnams la dge ba nye bar sgrub par 'dod pa ni phan pa'i bsam pa zhes bya'o//sems can rnams la phan gdags pa nye bar sgrub par 'dod pa ni bde ba'i bsam pa zhes bya'o/ /sems can rnams la zang zing med pa'i sems dang sdug pa'i rnam par smin pa dang 'brel pa med pa'i sems ni lhag pa'i bsam pa zhes bya'o//bla na med pa yang dag par rdzogs pa'i byang chub tu sems gcig tu nges pa ni brtan pa'i bsam pa zhes bya'o/ /sems can gyi don thabs dang / byang chub kyi thabs la phyin ci ma log pa'i shes pa dang ldan pa'i mos pa ni mi slu ba'i bsam pa zhes bya'o/ / mos pas spyod pa'i sa thams cad la byang chub sems dpa' rnams kyi lhag pa'i bsam pa gang yin pa de ni ma dag pa'i bsam pa zhes bya'o/ /bsam pa dag pa'i sa nas bzung ste/ spyod pa nges pa'i sa'i bar la byang chub sems dpa' rnams kyi lhag pa'i bsam pa ni dag pa'i bsam pa zhes bya'o//mthar thug par 'gro ba'i sa la byang chub sems dpa' rnams kyi lhag pa'i bsam pa ni shin tu dag pa'i bsam pa zhes bya'o/ /de la ma dag pa'i lhag pa'i bsam pa gang yin pa de nyid ni tshar gcad pa zhes bya ste/ so sor brtag par bya ba yin pa'i phyir ro/ /dag pa dang / shin tu dag pa'i lhag pa'i bsam pa gang yin pa de ni lhan cig skyes pa'i bsam pa zhes bya ste/ rang bzhin gyis de'i bdag nyid du gyur pa dang / brten pa shin tu gnas pa'i phyir ro/ /byang chub sems dpa' rnams ni mdor bsdu na lhag pa'i bsam pa dag pas thams cad du gtogs pa bco lnga po 'di dag gis bya ba bcu byed de/bcu gang zhe na/ mchog gi bsam pas ni dkon mchog la mchod pa byang chub kyi tshogs thams cad kyi mchog tu gyur pa'i rnam pa thams cad la sbyor bar byed do/ /tshul khrims kyi bsam pas ni byang chub sems dpa'i tshul khrims kyi sdom pa yang dag par blangs pa la srog gi phyir yang bsams bzhin du nyes pa 'byung bar mi byed la/nyes pa byung na yang myur ba myur bar so sor 'chags par byed do/ /pha rol tu phyin pa'i bsam pas ni dge ba'i chos rnams bsgom pa rtag tu byed pas bag yod par gnas shing mchog tu bag yod par gnas par byed do/ / de kho na'i don gyi lhag pa'i bsam pas ni sems can gyi phyir kun nas nyon mongs pa can ma yin pa'i sems kyis 'khor ba na 'khor bar yang byed la/ mya ngan las 'das pa'i lhag pa'i bsam pa mi gtong bar yang byed do/ /mthu'i lhag pa'i bsam pas ni brtan pa la snying thag pa nas dad cing ston par yang byed la/bsgom pa la yang gces par 'dzin te/ 'dod pa skyes pas shas cher gnas la/ thos pa dang / bsam pa tsam gyis chog par mi 'dzin to/ /phan pa'i bsam pa dang / bde ba'i bsam pa dang / lhag pa'i bsam pas ni sems can gyi don bya ba'i rnam pa thams cad la sbyor bar byed de/sbyor ba byas nas kyang yongs su mi skyo'o/ /brtan pa'i lhag pa'i bsam pas ni/ brtson 'grus 'bar ba dang / brtson 'grus rgya chen po yang dag par rtsom par gnas te/ sbyor ba lhod par mi 'gyur zhing / sbyor ba nyams par mi 'gyur ro/ /mi slu ba'i lhag pa'i bsam pas ni dge ba'i chos mngon par sgrub pa de dang de dag la mngon par shes pa myur bar 'gyur te/khyad par 'thob pa dma' ba dang / chung ngu tsam dang / ngan ngon tsam gyis kyang chog par mi 'dzin to/ /tshar gcad pa'i lhag pa'i bsam pas ni/ lhan cig skyes pa'i lhag pa'i bsam pa 'dren to/ /lhan cig skyes pa'i lhag pa'i bsam pas ni lha dang /mi rnams kyi don dang phan pa dang bde ba'i phyir myur du bla na med pa yang dag par rdzogs pa'i byang chub mngon par rdzogs par 'tshang rgya bar byed do/ /de la bcom ldan 'das kyis skabs de dang de dag tu byang chub sems dpa' rnams kyi lhag pa'i bsam pa brtan pa dang /brtags pa dang / bshad pa gang yang rung ba de dag thams cad ni lhag pa'i bsam pa bco lnga po 'di dag gis bsdus par rig par bya'o/ /de lta bas na byang chub sems dpa' gang dag lhag pa'i bsam pa dge ba rnams kyis 'das pa dang /ma 'ongs pa dang / da ltar byung ba'i dus dag tu bla na med pa yang dag par rdzogs pa'i byang chub mngon par rdzogs par sangs rgyas pa dang / mngon par rdzogs par 'tshang rgya bar 'gyur ba dang / mngon par rdzogs par 'tshang rgya ba de dag thams cad ni lhag pa'i bsam pa bco lnga po 'di dag lo na ste/'di las gong na yang med do/ /'di las lhag pa yang med do/ /de ltar na byang chub sems dpa'i lhag pa'i bsam pa bco lnga po 'di dag ni byang chub chen po'i 'bras bu'i phan yon can yin te/ de lta bas na byang chub sems dpas de dag la brten nas bla na med pa yang dag par rdzogs pa'i byang chub 'thob par 'gyur ro//byang chub sems dpa'i sa'i gzhi'i mthun pa'i chos kyi rnal 'byor gyi gnas las lhag pa'i bsam pa'i le'u ste gsum pa'o// //sdom ni/ rigs dang de bzhin mos pa dang / /rab tu dga' dang lhag khrims dang / /lhag pa'i sems dang shes rab gsum//mtshan ma med pa rnam pa gnyis/ /rtsol dang bcas dang lhun gyis grub/ /so so yang dag rig dang mchog /de bzhin gshegs pa'i gnas pa mchog de ltar rigs phun sum tshogs pa nas bzung ste/ ji skad du bstan pa'i byang chub sems dpa'i bslab pa la slob cing ji skad bstan pa'i byang chub sems dpa'i rtags rnams la yang dag par snang ba dang /byang chub sems dpa'i phyogs kyi sbyor ba rnams la yang dag par zhugs pa dang / ji ltar brtan pa'i byang chub sems dpa'i lhag pa'i bsam pa rnam par sbyor ba'i byang chub sems dpa'i gnas pa ni mdor bsdu na/ bcu gnyis yod de/byang chub sems dpa'i gnas rnams kyis/ byang chub sems dpa'i spyod pa thams cad bsdus par rig par bya'o/ /bcu gsum pa ni de bzhin gshegs pa'i gnas pa ste/ de ni byang chub mngon par rdzogs par sangs rgyas pa de'i gnas pa bla na med pa'o/ /de la byang chub sems dpa'i gnas pa bcu gnyis gang zhe na/rigs la gnas pa dang / mos pas spyod pa la gnas pa dang / rab tu dga' ba la gnas pa dang / lhag pa'i tshul khrims la gnas pa dang / lhag pa'i sems la gnas pa dang / lhag pa'i shes rab la gnas pa gsum po byang chub kyi phyogs dang ldan pa dang /bde ba dang ldan pa dang / rten cing 'brel par 'byung ba la 'jug pa dang / ldog pa dang ldan pa'o/ /de ltar byang chub sems dpas gang gis de ltar mthong ba dang / de kho na gang mthong ba dang / de kho na de ma shes pas sems can rnams kyi sdug bsngal ji ltar 'jug pa dang / shes pas sdug bsngal mi 'jug pa de ni sgo gsum nas shes rab kyis rnam par dpyod pa'i byang chub sems dpa'i lhag pa'i shes rab la gnas pa rnam pa gsum yin pa dang /mtshan ma med pa la gnas pa mngon par 'du byed pa dang bcas shing rtsol ba dang bcas pa la rgyun chags kyi lam la 'jug pa dang /mtshan ma med pa la gnas pa nyid mngon par 'du byed pa med cing lhun gyis grub pa'i lam la 'jug pa dang / so so yang dag par rig pa la gnas pa dang / byang chub sems dpa'i gnas mchog yongs su grub pa ste/ bcu gnyis po 'di dag ni byang chub sems dpa' rnams kyi byang chub sems dpa'i gnas pa yin no//de rnams kyis de dag gis gnas pa thams cad bsdus te/ byang chub sems dpa'i spyod pa thams cad bsdus so/ /de bzhin gshegs pa'i gnas pa ni byang chub sems dpa'i gnas pa thams cad las yang dag par 'das pa gang yin pa ste/ byang chub mngon par rdzogs par sangs rgyas pa de'i gnas pa yin no//de la de bzhin gshegs pa'i gnas pa tha ma ni rab tu gnas pa'i rnal 'byor gyi gnas tha ma las ril gyis ston to/ /byang chub sems dpa'i gnas pa bcu gnyis ni ji ltar rnam par gnas pa de bzhin du bstan par bya ste/ byang chub sems dpa'i rigs la gnas pa ni gang yin/byang chub sems dpa'i rigs la gnas pa ni ji ltar gnas she na/ 'di la byang chub sems dpa'i rigs la gnas pa ni rang bzhin gyis sems kyi rgyun dge ba'i phyir rang bzhin gyis byang chub sems dpa'i yon tan byang chub sems dpa' la 'os pa'i dge ba'i chos rnams dang ldan pa yin te/de yang dag par spyod pa la yang dag par snang la/ rang bzhin gyis dge ba kho nas ngang gis dge ba de la 'jug gi so sor brtags te/ gags dang bcas par gyur pa ni ma yin no/ /rigs la gnas pa'i byang chub sems dpa' ni sangs rgyas kyi chos thams cad kyi sa bon 'dzin pa yin te/sangs rgyas kyi chos thams cad kyi sa bon thams cad de'i lus la gnas shing / rten la gnas par yod do/ /rigs la gnas pa'i byang chub sems dpa' ni dri ma rags pa dang bral ba yin te/ de ni kun nas dkris pa gang gis kun nas dkris na mtshams med pa gang yang rung ba'i las kun du spyod par 'gyur ba 'am/dge ba'i rtsa ba rgyun chad par 'gyur ba de lta bu'i nyon mongs pa'i kun nas dkris par mngon du byed pa'i cha ma yin no/ /rigs kyi le'u las rigs la gnas pa'i bya ba brtan pa gang yin pa des yang rgyas par rigs la gnas pa'i byang chub sems dpa' yin par rig par bya ste/'di ni byang chub sems dpa'i rigs la gnas pa zhes bya'o/ /de la byang chub sems dpa'i mos pas spyod pa la gnas pa gang zhe na/ 'di la byang chub sems dpa' dang po sems bskyed pa nas bzung ste/ lhag pa'i bsam pa ma dag pa'i byang chub sems dpa'i spyod pa gang ci yang rung ba de ni de'i mos pas spyod pa la gnas pa zhes bya'o//de la rigs la gnas pa'i byang chub sems dpa' ni de las gzhan pa byang chub sems dpa'i gnas pa bcu gcig po thams cad dang / de bzhin gshegs pa'i gnas pa'i rgyu tsam la 'jug cing /rgyu yongs su 'dzin par zad kyi/ des byang chub sems dpa'i gnas pa gzhan ci yang brtsams pa yang med/ thob pa yang med/ rnam par sbyangs pa yang med na de bzhin gshegs pa'i gnas pa lta ci smos/ mos pas spyod pa la gnas pa'i byang chub sems dpas ni byang chub sems dpa'i gnas thams cad dang /de bzhin gshegs pa'i gnas pa yang brtsams pa yin te/ thob pa ni ma yin zhing rnam par sbyangs pa yang ma yin no/ /mos pas spyod pa la gnas pa de nyid ni thob pa yin te/ de nyid rnam par sbyangs pa la zhugs so/ /mos pas spyod pa la gnas pa yongs su dag na/ rab tu dga' ba la gnas pa sngon du brtsams pa nyid thob par 'gyur te/de nyid rnam par sbyangs pa la yang zhugs so/ /rab tu dga' ba la gnas pa yongs su dag na/ lhag pa'i tshul khrims la gnas pa sngon brtsams pa nyid thob par 'gyur te/ de nyid rnam par sbyangs pa la yang zhugs so/ /de bzhin du rgyas par byang chub sems dpa'i gnas pa mchog yongs su grub pa'i bar du yang rig par bya'o//byang chub sems dpa'i gnas pa mchog yongs su grub pa yongs su dag na/ de ma thag tu sngon brtsams pa'i de bzhin gshegs pa'i gnas pa cig car du 'thob cing / rnam par dag par yang rig par bya'o//'di ni de bzhin gshegs pa'i gnas pa dang / byang chub sems dpa'i gnas pa rnams kyi khyad par yin par rig par bya'o/ /de la byang chub sems dpa'i rab tu dga' ba la gnas pa gang zhe na/ lhag pa'i bsam pa dag pa'i byang chub sems dpa'i gnas pa gang yin pa'o/ / de la byang chub sems dpa'i lhag pa'i tshul khrims la gnas pa gang zhe na/ lhag pa'i bsam pa dag pa'i gzhis rang bzhin gyi tshul khrims dang ldan pa'i gnas pa gang yin pa'o/ /de la byang chub sems dpa'i lhag pa'i sems la gnas pa gang zhe na/ lhag pa'i tshul khrims la gnas pa rnam par dag pa'i gzhi dag gis 'jig rten pa'i bsam gtan dang /ting nge 'dzin dang / snyoms par 'jug pa rnams kyis gnas pa gang yin pa'o/ /de la byang chub sems dpa'i byang chub kyi phyogs dang ldan pa'i lhag pa'i shes rab la gnas pa gang zhe na/ 'jig rten pa'i shes pa rnam par dag pa'i gnas su gyur pa'i ting nge 'dzin la brten nas/bden pa rtogs par bya ba'i phyir dran pa nye bar gzhag pa la sogs pa byang chub kyi phyogs kyi chos sum cu rtsa bdun yang dag par rab tu rnam par 'byed pa'i gnas pa gang yin pa'o/ /de la byang chub sems dpa'i bden pa dang ldan pa'i lhag pa'i shes rab la gnas pa gang zhe na/byang chub kyi phyogs rab tu rnam par 'byed pa la brten nas ji lta ba bzhin du bden pa rtogs pa'i gnas pa gang yin pa'o/ /de la byang chub sems dpa'i rten cing 'brel par 'byung ba la 'jug pa dang ldog pa dang ldan pa'i lhag pa'i shes rab la gnas pa gang zhe na/bden pa rtogs pa de nyid kyi dbang du byas nas/ de ma shes pas sdug bsngal 'byung ba rgyu dang bcas par rab tu rnam par 'byed pas rab tu phye ba dang / de shes pas sdug bsngal rgyu dang bcas pa'i 'gog pa rab tu rnam par 'byed pas rab tu phye ba'i gnas pa gang yin pa'o/ /de la byang chub sems dpa' rnams kyi mtshan ma med pa la gnas pa mngon par 'du byed pa dang bcas shing rtsol ba dang bcas pa gang zhe na/lhag pa'i shes rab la gnas pa rnam pa de gsum gyi dbang du byas nas/ mngon par 'du byed pa dang / rtsol bas rgyun chags su bar chad med par chos thams cad la de bzhin nyid rnam par mi rtog pa'i shes rab bsgom pa dang ldan pa'i gnas pa gang yin pa'o//de la byang chub sems dpa' rnams kyi mtshan ma med pa la gnas pa mngon par 'du byed pa med cing lhun gyis grub pa gang zhe na/ mtshan ma med pa la gnas pa snga ma de nyid shas cher bsgoms pas/ rang gi rang nyid kyis rgyun chags su bar chad med par 'jug pa'i lam dang ldan pa'i gnas pa gang yin pa'o//de la byang chub sems dpa' rnams kyi so so yang dag par dmigs pa la gnas pa gang zhe na/ shes rab dang ldan pa'i ting nge 'dzin shin tu yongs su dag cing mi g.yo ba de nyid la brten nas blo gros chen po rgya che ba rjes su thob ste/gzhan dag la chos yang dag par ston pa bla na med pa las brtsams nas chos rnams kyi rnam grangs dang don dang / nges pa'i tshig dang / rab tu dbye ba rab tu rnam par 'byed pa'i gnas pa gang yin pa'o/ /de la byang chub sems dpa' gnas pa mchog gang zhe na/ byang chub sems dpa' gang la gnas nas byang chub sems dpa'i lam gyi mthar thug ste/bla na med pa yang dag par rdzogs pa'i byang chub tu chos kyi dbang bskur ba chen po thob pa skye ba gcig gis thogs pa'am/ yang na srid pa tha ma pa yin te/ gnas pa de'i mjug thogs su bar chad med pa kho nar bla na med pa yang dag par rdzogs pa'i byang chub mngon par rdzogs par sangs rgyas kyi phrin las thams cad mdzad do//de la mos pas spyod pa la gnas pa la ni byang chub sems dpas byang chub sems dpa'i bsgom pa la chung ngur byed pa dang / rgyun chags ma yin par byed pa dang / nges par mi byed pa dang /thob pa las kyang yongs su nyams par 'gyur ro/ /rab tu dga' ba la gnas pa la ni/ byang chub sems dpa' byang chub sems dpa'i bsgom pa de nyid la rgya cher byed pa dang / rgyun chags su byed pa dang / nges par byed pa dang / ji ltar thob pa las yongs su nyams par mi 'gyur ro/ / rab tu dga' ba la gnas pa la ji lta ba bzhin du lhag pa'i shes rab la gnas pa gsum gyi bar du yang de dang 'dra'o / /mtshan ma med pa la gnas pa dang po nas bzung ste/ byang chub sems dpa'i gnas pa mchog gi bar du byang chub sems dpas byang chub sems dpa'i bsgom pa la tshad med par byed pa dang /rgyun chags su byed pa dang / nges par byed pa yin no/ /de la mos pas spyod pa la gnas pa la ni byang chub sems dpa'i mtshan ma med pa bsgom pa yang dag par rtsom par rig par bya'o/ /rab tu dga' ba la gnas pa dang / lhag pa'i tshul khrims dang / lhag pa'i sems dang / lhag pa'i shes rab la gnas pa rnams la ni byang chub sems dpa'i mtshan ma med pa bsgom pa de 'thob par rig par bya'o//mtshan ma med pa la gnas pa dang po la ni yang dag par 'grub bo/ /mtshan ma med pa la gnas pa gnyis pa la ni byang chub sems dpa'i mtshan ma med pa bsgom pa yongs su dag par rig par bya'o//so so yang dag par rig pa la gnas pa dang / gnas pa mchog la ni byang chub sems dpa'i mtshan ma med pa'i bsgom pa de nyid kyi 'bras bu so sor myong bar rig par bya'o/ /mos pas spyod pa la gnas pa'i byang chub sems dpa'i rnam pa ni gang dag yin/ rtags ni gang dag yin/mtshan ma ni gang dag yin zhe na/ mos pas spyod pa la gnas pa'i byang chub sems dpa' ni so sor rtog pa'i stobs can yin te/ byang chub sems dpa'i bya ba'i sbyor ba dag la so sor brtags shing brtags shing shes rab kyis sbyor bar byed kyi/ rang bzhin gyis de'i bdag nyid du gyur pas byang chub sems dpa'i bsgom pa mi 'gyur ba dang /brtan pa dang / phyir mi ldog pa 'thob pa ni ma yin no/ /bsgom pa ji lta ba bzhin du/ bsgom pa'i 'bras bu so so yang dag par rig pa dang / mngon par shes pa dang / rnam par thar pa dang / ting nge 'dzin dang / snyoms par 'jug pa rnam pa sna tshogs kyang de dang 'dra'o//'jigs pa rnam pa lnga po 'tsho ba med pa'i 'jigs pa dang / tshigs su bcad pa med pa'i 'jigs pa dang / 'chi ba'i 'jigs pa dang / ngan 'gro'i 'jigs pa dang / 'khor gyi nang du bag tsha ba'i 'jigs pa rnams las kyang 'das pa ma yin no//sems can gyi don rnams la yang so sor brtags te sbyor gyi rang bzhin gyis snying brtse zhing byams pas ni ma yin no/ /ched 'ga' ni sems can rnams la lus dang ngag dang yid kyis log par sgrub bo/ /ched 'ga' ni yul rnams la yang lhag par zhen par 'gyur ro/ /ched 'ga' ni yo byad rnams la kun du 'dzin par yang snang ngo //sangs rgyas dang byang chub sems dpa' gzhan dag la yang dad pas 'gro bar 'gyur gyi/ 'di lta ste/ de bzhin gshegs pa'am/ chos sam/ dge 'dun nam/ de kho na'i don nam/ sangs rgyas dang / byang chub sems dpa'i mthu'am/ rgyu'am/ 'bras bu'am/ thob par bya ba'i don nam/ thob par bya ba'i thabs sam/ spyod yul las brtsams te/ so sor rang la de kho nar shes pa ni ma yin no/ /thos pa las byung ba dang / bsams pa las byung ba'i shes rab chung ngu dang ldan pa yin gyi/ tshad med pa dang ldan pa ni ma yin no/ /de nyid kyang des ched 'ga' brjod par 'gyur te/brjed ngas pa'i chos can yin no/ /byang chub sems dpa'i lam mngon par shes pa bul ba dka' ba dang ldan pa yang yin no/ /byang chub chen po la yang 'dun pa drag po med do/ /brtson 'grus 'bar ba ma yin no/ /zab mo la dga' ba legs par gnas pa ma yin no/ / gnas pa gsum po rnams su yang brjed ngas pa yin te/ yul gzugs dang / sgra dang / dri dang / ro dang / reg bya dang / chos yid du 'ong ba dang / yid du mi 'ong ba rnams la ched 'ga' phyin ci log tu sems pa dang / skye ba lus dang tha dad pa de dang / der skyes pa nas lus snga ma brjed pa dang / chos lung mnos pa dang /bzung ba dang / byas nas yun ring du lon pa dang / smras nas yun ring du lon pa dag kyang ched 'ga' brjed pas na/ de ltar gnas gsum po de dag tu brjed ngas pa yin no/ /ched 'ga' ni yid gzhungs par yang 'gyur te/ chos rnams len pa dang / 'dzin pa dang / don 'jug par nus la/ ched 'ga' ni de lta ma yin no//ched 'ga' ni dran pa dang ldan par 'gyur la/ ched 'ga' ni brjed ngas pa'i rang bzhin can du 'gyur ro/ /sems can rnams 'dul ba'i thabs kyang ji lta ba bzhin du mngon par mi shes la/ rang gi sangs rgyas kyi chos sgrub pa'i thabs kyang mngon par mi shes so/ /gzhan dag la yang nan gyis chos ston cing gdams pa dang rjes su brtan pa la 'jug par byed de/des nan gyis 'jug par byas pa de yang / yang dag pa ji lta ba bzhin du shes pas ma yin te/ mtshan mo mda' 'phangs pa bzhin du dbang du 'grub par zad pas na/ ched 'ga' ni 'bras bu med par 'gyur/ ched 'ga' ni 'bras bu yod par 'gyur ro/ /ched 'ga' ni byang chub chen por sems bskyed pa las kyang gtong bar 'gyur/ ched 'ga' ni byang chub sems dpa'i tshul khrims kyi sdom pa yang dag par blangs kyang ldog pa'am/ yang na spro ba med par 'gyur ro/ /ched 'ga' ni sems can gyi don bya ba zhugs pa las kyang bar ma dor skye bar gyur nas/sems can gyi don bya ba'i sbyor ba de las phyir ldog par 'gyur ro/ bsam pa thag pa nas bdag nyid bde bar 'dod la gzhan gyi bde ba ni so sor brtags te 'dod par zad do/ /byang chub sems dpa'i 'khrul pa rnams la yang yongs su shes pa mang mod kyi/yang dang yang du 'khrul pa lhag par spyod pas yongs su shes shing / ma lus par spong ba dang ldan pa ni ma yin no/ /ched 'ga' ni byang chub sems dpa'i sde snod kyi chos 'dul ba 'di las khrid par 'gyur ro/ /ched 'ga' ni chos bstan pa zab cing rgya che ba thos nas skrag par 'gyur zhing de'i sems g.yo ba dang /yid gnyis dang / the tshom za bar 'gyur ro/ /sems can rnams la snying rje chen po kun du spyod pa yang thams cad kyi thams cad du rnam par spong bar 'gyur ro/ /sems can rnams la phan pa dang bde ba chung ngu bsgrub pas nye bar gnas pa yin te/ rgya che ba dang / tshad med pa ni ma yin no//ji skad bstan pa'i byang chub sems dpa'i bslab pa yongs su rdzogs pa thams cad la yang slob par mi byed do/ /ji skad bstan pa'i byang chub sems dpa'i rtags yongs su rdzogs pa thams cad dang ldan pa yang ma yin no/ /ji skad bstan pa'i byang chub sems dpa'i phyogs kyi sbyor ba yongs su rdzogs pa thams cad la yang dag par mi snang ngo bdag nyid kyang bla na med pa yang dag par rdzogs pa'i byang chub las ring bar 'dzin to//de ni 'khor ba na 'khor ba la ji ltar lhag pa'i bsam pa gnas pa ltar mya ngan las pa la de lta ma yin no/ / dge ba dang byang chub kyi phyogs kyi chos sbyangs shing mi g.yo ba rnams dang ldan pa yin no / /de dag dang de lta bu dang mthun pa'i rtags dang mtshan ma dang / rnam pa de dag ni mos pa spyod pa la gnas pas gnas pa'i byang chub sems dpa' yin par rig par bya'o/ /mos pas spyod pa la gnas pa la bzod pa chung ngu la gnas pa'i byang chub sems dpa' la ni rnam pa dang /rtags dang / mtshan ma ji skad bstan pa de dag shas che bar rig par bya'o/ /bzod pa 'bring la gnas pa la ni 'bring du rig par bya'o/ /bzod pa chen po la gnas pa'i byang chub sems dpa' la ni rnam pa dang /rtags dang / mtshan ma de dag chung zhing srab par rig par bya'o/ /bzod pa chen po la gnas pa nyid kyi byang chub sems dpa' ni rnam pa dang / rtags dang / mtshan ma de dag kyang ma lus par spong la/ de ma thag tu rab tu dga' ba'i gnas pa la yang 'thob pa'i tshul gyis 'jug par rig par bya'o//rab tu dga' ba'i gnas pa la gnas pa de la ni mos pas spyod pa la gnas pas gnas pa la yod par bstan pa gang yin pa'i chos de dag thams cad kyi thams cad du med do/ /de las bzlog pa'i dkar po'i phyogs kyi chos thams cad ni yod de/ de dag dang ldan na byang chub sems dpa' lhag pa'i bsam pa dag pa zhes bya'o//mos pas spyod pa la gnas pa la gnas pa'i byang chub sems dpa' la yang chung ngu dang / 'bring dang / chen po'i tshul gyis gong nas gong du mos pa dag pa yod mod kyi/ de la ni lhag pa'i bsam pa dag pa zhes mi bya'o/ /de ci'i phyir zhe na/ 'di ltar mos pa de ni nye ba'i nyon mongs pa rnam pa du ma de dag gis nye ba'i nyon mongs pa can du gyur pas 'jug la/rab tu dga' ba'i gnas pa la gnas pa'i byang chub sems dpa' ni mos pa'i nye ba'i nyon mongs pa de dag thams cad spang ba'i phyir kun nas nyon mongs pa med cing dag pa'i mos pa 'jug pa'i phyir ro//de la rab tu dga' ba'i gnas pa la gnas pa'i byang chub sems dpa'i rnam pa ni gang dag yin/ rtags ni gang dag yin/ mtshan ma ni gang dag yin par rig par bya zhe na/ 'di la byang chub sems dpa' mos pas spyod pa'i sa la gnas pa las rab tu dga' ba'i gnas pa la 'jug pa na/ byang chub sems dpa'i bla na med pa yang dag par rdzogs pa'i byang chub kyi smon lam snga ma byang chub legs par ma rtogs pa/ byang chub par bya ba'i thabs legs par ma rtogs pa phal cher gzhan gyi rkyen gyis 'gro ba nges pa ma yin pa spangs nas/ byang chub sems dpa'i smon lam shin tu rnam par nges pa so so rang gi bsgoms pa las byung ba'i sar pa gzhan rnam pa drug po de las gzhan pa'i dkar po'i smon lam thams cad las yang dag par 'das pa mtshungs pa med cing 'bras bu thun mong ba ma yin pa dang /de 'jig rten pa dang 'jig rten pa thams cad kyi yul las kyang yang dag par 'das pa dang /sems can thams cad sdug bsngal las yongs su bskyab pa dang ldan pa'i phyir/ nyan thos dang rang sangs rgyas thams cad dang thun mong ma yin pa dang / smon lam de skad cig tsam skyes na yang byang chub sems dpa' rnams kyi dkar po'i chos kyi sdug bsngal ba'i 'bras bu dpag tu med par 'gyur ba gang dag yin pa de dag lta bu'i chos kyi rang bzhin de dang /smon lam de 'gyur ba med cing zad mi shes pa yin te/ de thob pa la rnam grangs gang gis kyang yongs su nyams par 'gyur ba'am/ gzhan du 'gyur ba mi dmigs pa dang / de khyad par du 'gro ba'i cha dang mthun zhing phyi ma'i mthar phyin pa la/byang chub chen po'i mthar thug pa dag gis skyed par byed de/ byang chub sems dpa'i smon lam shin tu rnam par nges pa de ni sems bskyed pa zhes bya'o/ /byang chub sems dpa'i sems bskyed pa de ni mdor bsdu na rnam pa bzhir rig par bya ste/ bzhi gang zhe na/ thog ma kho nar byang chub sems dpa' ji lta bu dag la sems de skyed pa dang / ci la dmigs nas skye ba dang / ji lta bu'i mtshan nyid ci 'dra zhing gang gi bdag nyid du skye ba dang / sems de skyes na phan 'dogs cir 'gyur ba rnam pa bzhi po de dag gis sems skye ba de rig par bya'o//de la mdor bsdu na mos pas spyod pa la gnas pa la rnam pa thams cad du dge ba'i rtsa ba shin tu bsags shing / byang chub sems dpa'i spyod pa yang dag pa la nges par 'byung ba'i byang chub sems dpa' rnams la sems de skye'o/ /mdor bsdu na phyi ma la yang dag par myur du rdzogs pa'i byang chub kyi tshogs thams cad yongs su rdzogs par bya ba dang /byang chub sems dpa' thams cad kyis sems can gyi don bya ba yongs su rdzogs par bya ba dang / bla na med pa yang dag par rdzogs pa'i byang chub dang / rnam pa thams cad du sangs rgyas kyi chos thams cad yongs su rdzogs par bya ba dang /sangs rgyas kyi phrin las mdzad pa yongs su rdzogs par bya ba la dmigs pa byas nas byang chub sems dpa' rnams kyi sems de skye'o/ /yang dag par myur du rnam pa thams cad du byang chub kyi tshogs thams cad dang mthun pa dang / sems can rnams la rnam pa thams cad du byang chub sems dpa'i bya ba dang mthun pa dang /bla na med pa yang dag par rdzogs pa'i byang chub rang byung gi ye shes 'thob pa dang / mthun pa dang / rnam pa thams cad du sangs rgyas kyi phrin las mdzad pa dang mthun pa'i sems de skye'o/ /sems de skyes pas byang chub sems dpa' byis pa'i byang chub sems dpa' so so'i skye bo'i sa las 'das pa yin/byang chub sems dpa'i skyon med pa la zhugs pa yin/ de bzhin gshegs pa'i rigs su skyes pa yin/ de bzhin gshegs pa'i thugs kyi sras yin/ rdzogs pa'i byang chub tu nges par 'gro ba dang /de bzhin gshegs pa'i rigs su nges pa yin no/ /de ltar gyur pa de shes nas dad pa thob nas mchog tu dga' ba mang ba yin/ gzhan dag la shas cher nyes rtsom med pa yin/ rnam par 'tshe ba med pa yin/ khro ba med pa mang ba yin no/ /rnam pa thams cad du byang chub sems dpa'i sems can gyi don bya ba dang /rnam pa thams cad du byang chub kyi tshogs yongs su rdzogs pa dang / rnam pa thams cad du byang chub dang / sangs rgyas kyi chos rnams dang / sangs rgyas kyi phrin las sgrub pa la lhag pa'i bsam pa dag pas dmigs pa byas shing mos pas 'jug pa chos 'di la myur du yang dag par 'grub pa dang /mthun pa dag nyid yang dag par mthong zhing khong du chud nas mchog tu dga' ba mang bar 'gyur ro/ /bdag nyid dge ba rgya chen po mngon par 'gyur pa dang ldan pa zang zing med pa mtshungs pa med pa/ lus dang sems la phan 'dogs pa'i mchog tu dga' ba dang /dge ba'i chos 'bar ba dag dang ldan no/ /bdag ni bla na med pa yang dag par rdzogs pa'i byang chub dang nye bar gyur to/ /byang chub chen po la bdag gi lhag pa'i bsam pa ni rnam par dag go/ /bdag ni 'jigs pa thams cad dang bral lo snyam nas/ de'i phyir yang mchog tu dga' ba mang ba yin no//'di ltar byang chub sems dpa' sems shin tu rnam par nges par bskyed pa ni 'jigs pa lnga spangs pa yin te/ bdag med pa'i ye shes shin tu yongs su bsgoms pa la ni bdag tu 'du shes pa yang mi 'byung na de la bdag la chags pa'am/ yo byad la chags pa lta ga la 'byung ste/de'i phyir de la 'tsho ba med pa'i 'jigs pa med do/ /gzhan dag las kyang ci yang re ba med la/ 'di lta bur yang 'dod de/ bdag nyid kyis sems can 'di rnams kyi don thams cad sgrub bo snyam ste/ de'i phyir de la tshigs su bcad pa med pa'i 'jigs pa med do//bdag tu lta ba dang bral ba'i phyir na de la bdag tu 'du shes pa mi 'byung ste/ de'i phyir de la 'chi ba'i 'jigs pa med do/ /bdag ni shi ba'i 'og tu phyi ma la sangs rgyas dang byang chub sems dpa' rnams dang nges par phrad par 'gyur ro snyam ste/ de ltar nges par gyur pas na/ de'i phyir de la ngan 'gro'i 'jigs pa med do//'jig rten thams cad na bdag dang bsam pa mtshungs shing mnyam pa su yang ma mthong na/ ches lhag pa lta ga la yod snyam ste/ de'i phyir nge la 'khor gyi nang du bag tsha ba'i 'jigs pa med do/ /de de ltar 'jigs pa thams cad dang bral ba dang / zab mo ston pa thams cad kyis skrag pa dang bral ba dang /thos pa'i nga rgyal gyis khengs pa dang bral ba dang / gzhan gyis gnod pa dang log par sgrub pa thams cad la zhe sdang dang bral ba dang / 'jig rten gyi 'du 'dzi'i dga' ba thams cad dang bral ba dang / nyon mongs pa can ma yin pa'i phyir nyams pa med pa dang /shin tu sbyangs pa'i phyir phal pa ma yin pa'i bsam pas dge ba'i chos thams cad yang dag par 'grub par bya ba'i phyir/ tshe 'di la yang rnam pa thams cad du byang chub sems dpa'i brtson 'grus rtsom par byed do/ /dad pa'i dbang du bya ba sngon du btang ste/ phyi ma la yang byang chub kyi phyogs kyi le'u las sngar bstan pa'i smon lam chen po bcu po gang yin pa de dag bsam pa dag pa la brten nas rab tu dga' ba la gnas pa 'di la mngon par 'grub par byed do// //bam po bco brgyad pa/ sems can gyi mchog yon gyi gnas ston pa chos kyi mnga' bdag la mchod pa bya ba'i smon lam chen po dang gnyis pa ste des gsungs pa'i dam pa'i chos yang dag par bzung ba dang /gsum pa ste dam pa'i chos go rims bzhin du 'byung bar bya ba dang / bzhi pa ste de dang mthun pa'i byang chub sems dpa'i spyod pa spyad pa dang / lnga pa ste de'i snod kyi sems can yongs su smin par bya ba dang /drug pa ste sangs rgyas kyi zhing rnams su 'gro ba dang / de bzhin gshegs pa lta ba dang / dam pa'i chos mnyan pa dang / bdun pa ste rang gi sangs rgyas kyi zhing yongs su dag par bya ba dang / brgyad pa ste tshe rabs thams cad du sangs rgyas dang byang chub sems dpa' rnams dang mi 'bral bar bya ba dang /byang chub sems dpa' rnams dang bsam pa dang sbyor ba gcig par bya ba dang / dgu pa ste sems can gyi don bya ba thams cad 'bras bu yod par bya ba dang / bcu pa ste bla na med pa yang dag par rdzogs pa'i byang chub mngon par rdzogs par 'tshang rgya bar bya ba dang /sangs rgyas kyi mdzad pa bya ba'i smon lam chen po mngon par sgrub po/ /sems can gyi khams gcig nas gcig tu brgyud pa rgyun mi 'chad pa lta bu dang / 'jig rten gyi chos rgyun mi 'chad pa bzhin du byang chub kyi mthar thug par 'gro ba'i bar du/tshe rabs thams cad du bdag gi smon lam chen po 'di thob pa dang / mi brjed pa dang / mi 'bral bar gyur cig ces sems kyis yang dag par smon par byed do/ /snga ma ni smon par bya ba'i don la smon pa'o/ /phyi ma ni smon lam nyid la smon par rig par bya ste/de smon lam chen po 'di dag la sogs pa byang chub sems dpa' de'i yang dag pa'i smon lam rnams kyi smon lam grangs med pa 'bum phrag bcu skye bar 'gyur ro/ /de ni 'di ltar phyi ma la yang smon lam dang ldan par 'gyur la/ tshe 'di la yang brtson 'grus brtsams pa ni gnas pa yongs su sbyangs pa'i chos bcus rab tu dga' ba'i gnas pa yongs su dag par byed do //sangs rgyas kyi chos thams cad la mngon par dad pa dang / rten cing 'brel par 'byung ba'i tshul gyis sems can rnams kyi sdug bsngal gyi phung po 'ba' zhig pa yang dag par 'grub par lta ba'i snying rje dang /bdag gis sems can 'di dag sdug bsngal gyi phung po 'ba' zhig pa 'di las rnam par grol bar bya'o snyam du lta ba'i byams pa dang / sems can thams cad sdug bsngal las yongs su bskyab pa'i bsam pas bdag nyid la mi lta ste/ de la mi lta bas sems can rnams la nang dang phyi rol gyi dngos po yongs su gtong ba dang /sems can de dag nyid kyi don du 'jig rten pa dang / 'jig rten las 'das pa'i chos gzhan las yongs su tshol ba la mi skyo ba dang / mi skyo bas bstan bcos thams cad shes pa yang dag par 'grub pa rnam par dag pas bstan bcos shes pa dang /bstan bcos shes pas sems can tha ma dang 'bring dang / khyad par du 'phags pa rnams la ci nus ci 'os su de bzhin nyid du bsgrub pas 'jig rten shes pa dang / sbyor ba de dag nyid la dus dang dus tshod la sogs pa'i spyod pa las brtsams te/ ngo tsha shes shing khrel yod pa dang /sbyor ba de dag nyid la phyir mi ldog pas sran thub pa'i stobs bskyed pa dang / rnyed pa dang bkur sti dang bsgrub pas de bzhin gshegs pa la mchod pa dang / rim gro byed pa ste/ 'di lta ste dad pa dang snying rje dang / byams pa dang / gtong ba dang / mi skyo ba dang / bstan bcos shes pa dang / 'jig rten shes pa dang /ngo tsha shes shing khrel yod pa dang / sran thub pa'i stobs bskyed pa dang / de bzhin gshegs pa la mchod pa dang / rim gro byed pa'i chos bcu po 'di dag ni gnas pa yongs su dag par byed pa'o/ /byang chub sems dpa' de yang chos de yang dag par blangs te 'dug cing lan mang du byed do//de ma yin pa'i byang chub sems dpa'i gnas pa lhag pa'i tshul khrims la sogs pa dgu po rnams kyi lam gyi yon tan dang skyon gyi rnam pa thams cad sangs rgyas dang byang chub sems dpa' rnams las yongs su tshol bar byed do/ /de shes nas kyang lam chud mi za zhing rnam pa dang /thob pa dang rgyu mthun pa'i mtshan ma legs par bzung la/ bdag nyid kyis kyang gnas pa thams cad mnan nas/ byang chub chen po bde blag tu 'thob par 'gyur ro/ /sems can gyi 'dron po phal po che yang 'khor ba'i dgon pa'i lam las sgrol lo/ / rnam pa gang dag gis 'jug par byed pa de dag ni rnam pa dag go/ /'jug pa gang yin pa de ni 'thob pa'o/ /zhugs nas kyang 'bras bu chen po'i phan yon 'grub pa de ni rgyu mthun pa yin par rig par bya'o/ /gnas pa de la gnas pa'i rgyu gnyis kyis sangs rgyas mang po bltar snang bar 'gyur te/des byang chub sems dpa'i sde snod las thos pa gang yin pa dag dang / phyogs bcu'i 'jig rten gyi khams kyi ming sna tshogs pa dag na/ de bzhin gshegs pa mtshan sna tshogs pa dag bzhugs par sems kyis mos pa gang yin pa de dag la dad pa rgya chen po dang ldan pa'i sems kyis mthong bar bya ba'i phyir 'dod par byed la/de lta bur gyur pa de'i 'dod pa don 'grub pa kho nar 'gyur te/ 'di ni rgyu gcig go/ /sangs rgyas gang du 'byung ba der bdag skye bar gyur cig ces de ltar yang sems kyis smon par byed de/ de lta bur gyur pa de'i smon lam de ni 'grub pa kho nar 'gyur te/des de ltar dad pa rgya chen pos mthong ba dang / smon lam gyi stobs kyis de bzhin gshegs pa de dag mthong nas mchod pa dang / bde ba'i yo byad kyi rnam pa thams cad sgrub par byed do/ /ci nus ci lcogs kyis dge 'dun la yang bkur sti byed do/ /de bzhin gshegs pa de dag las chos kyang nyan pa dang /len pa dang 'dzin par byed do/ /chos kyi rjes su mthun pa'i chos kyang nan tan gyis sgrub par byed do/ /de dge ba'i rtsa ba de thams cad kyang byang chub chen por yongs su sngo bar byed do/ /bsdu pa'i dngos po bzhis kyang sems can rnams yongs su smin par byed do//de bzhin gshegs pa dang / dge 'dun dang chos la mchod pa yongs su 'dzin pa dang / bsdu ba'i dngos po rnams kyis sems can yongs su smin par byed pa dang / dge ba'i rtsa ba rnams kyang byang chub tu yongs su bsngo ba ste/ de'i rnam par dag pa'i rgyu gsum po de dag gis bskal pa du ma bye ba khrag khrig 'bum gyi bar du dge ba'i rtsa ba de dag rgya cher rnam par dag par 'gyur te/dper na gser rang bzhin du gnas pa ni gser mgar mkhas pas ji lta ji ltar mer bcug pa de lta de ltar ches rnam par dag par 'gyur ro/ /de bzhin du bsam pa dag pa'i byang chub sems dpa' dge ba'i rtsa ba de dag kyang rnam par dag pa'i rgyu de dag gis ches rnam par dag par 'gyur ro//de la gnas pa de ni skye ba las phal cher 'khor los sgyur bar 'gyur te/ tshe rabs tshe rabs su 'dzam bu gling gi dbang phyug ser sna'i dri ma thams cad dang bral ba sems can rnams kyi ser sna'i dri ma thams cad sel ba'i bdag por 'gyur ro//bsdu ba'i dngos po bzhi las gang ci rtsom yang rung / de dag thams cad kyang dkon mchog dang / byang chub yang dag par 'grub pa'i rnam pa thams cad yid la byed pa rnams dang mi 'bral te/ bdag sems can thams cad kyi mchog don thams cad ston par gyur kyang ci ma rung snyam mo//'dod na khyim dang / chung ma dang / longs spyod thams cad spangs nas de bzhin gshegs pa'i bstan pa la rab tu 'byung ste/ skad cig dang thang cig dang / yud tsam cig la byang chub sems dpa'i ting nge 'dzin brgya la snyoms par 'jug pa dang lha'i mig gis sangs rgyas kyi zhing tha dad pa dag tu de bzhin gshegs pa brgya mthong ba dang /de dag gi sprul pa dang / byin gyis brlabs pa dang / byang chub sems dpa' rnams kyi byin gyi rlabs kyang shes pa dang / 'jig rten gyi khams brgya yang g.yo bar byed pa dang /de bzhin du lus kyis kyang 'gro bar byed pa dang / 'od kyis rgyas par byas nas gzhan dag la ston par byed pa dang / sprul pa brgyas 'dul ba'i sems can brgya yongs su smin par byed pa gang yin pa de lta bu'i brtson 'grus rtsom par byed do/ /'dod na bskal pa brgyar yang gnas par byin gyis rlob bo//sngon gyi mtha' dang phyi ma'i mtha'i bskal pa brgyar yang ye shes mthong bas 'jug par byed do/ /phung po dang khams dang / skye mched la sogs pa'i chos kyi sgo rnams kyis chos kyi sgo brgya yang rab tu rnam par byed do/ /lus brgya yang sprul par byed do / lus re re zhing yang byang chub sems dpa' 'khor brgya brgya ston to//de las lhag par yang rab tu dga' ba'i gnas pa 'di la gnas pa'i byang chub sems dpa' rnams kyi smon lam gyi stobs kyi mthu'i rnam par 'phrul pa ni tshad med par rig par bya ste/ de dag ni smon lam gyi stobs can yin pas smon lam gyi khyad par gyis rnam par 'phrul par byed do//yang dag pa'i smon lam de dag gi grangs ni bskal pa bye ba khrag khrig phrag 'bum gyi bar du yang gcad par sla ba ma yin no/ /de ltar na byang chub sems dpa' rnams kyi rab tu dga' ba la gnas pa 'di ni sems bskyed pa rnam pa bzhi dang yang dag pa'i smon lam gyi brtson 'grus brtsams pa mngon par sgrub pa dang /gnas pa yongs su sbyong ba dang / de ma yin pa'i gnas pa la yang byang ba dang / sangs rgyas mthong ba dang / dge ba'i rtsa ba yongs su dag par byed pa dang / skye ba dang mthus shin tu rnam par nges pa yin te/ de ni mdor bstan pa yin par rig par bya'o//rgyas par bstan pa ni sa bcu'i mdo las ji skad 'byung ba bzhin no/ /sa rab tu dga' ba la gnas pa nas bzung ste/ sa bcu'i mdo las byang chub sems dpa'i sa bcu gang yin pa de dag ni/ byang chub sems dpa'i sde snod kyi ma mo bstan pa 'di la byang chub sems dpa'i gnas pa bcu ste/rab tu dga' ba la gnas pa nas bzung ste/ gnas pa mchog gi bar du go rims bzhin du sbyar bar rig par bya'o/ /de la byang chub sems dpa' rnams kyi yongs su bzung ba'i don gyis ni sa zhes bya'o/ /longs spyod pa'i gnas kyi don gyis ni gnas pa zhes bya'o//de la byang chub sems dpa' rnams kyi lhag pa'i tshul khrims la gnas pa'i rnam pa ni gang dag yin/ rtags ni gang dag yin/ mtshan ma ni gang dag yin par rig par bya zhe na/ 'di la byang chub sems dpas thog ma nyid du rab tu dga' ba la gnas pa la sems kyi bsam pa rnam pa bcus bsam pa dag pa thob pa yin te/slob dpon dang / bla ma dang / sbyin gnas thams cad la mi bslu ba'i lhag pa'i bsam pa dang / chos mthun pa'i byang chub sems dpa' la nges pa dang 'grogs na bde ba'i bsam pa dang / nyon mongs pa dang / nye ba'i nyon mongs pa dang /bdud kyi las thams cad zil gyis mnan cing / rang gi sems la dbang bya ba'i bsam pa dang / 'du byed thams cad la nyes pa'i bsam pa dang / mya ngan las 'das pa la phan yon gyi bsam pa dang / byang chub kyi phyogs dang mthun pa'i chos dge ba rnams bsgom pa la rtag tu bya ba'i bsam pa dang /sgom pa de dag nyid kyi rjes su mthun pa'i rab tu dben pa'i bsam pa dang / 'jig rten gyi zang zing dang / thos pa dang / rnyed pa dang / bkur sti thams cad la mi lta ba'i bsam pa dang / theg pa dman pa spangs te theg pa chen po rtogs par bya ba'i bsam pa dang / sems can thams cad kyi don thams cad bya ba'i bsam pa ste/yang dag pa'i bsam pa bcu po 'di dag ni sems de la 'jug pa yin te/ de dag gi lhag pa'i bsam pa dag pa zhes bya'o/ /bsam pa de dag nyid che ba'i phyir dang / yongs su rdzogs pa'i phyir byang chub sems dpa'i lhag pa'i tshul khrims la gnas pa sa gnyis pa la 'jug cing gnon to//de lhag pa'i tshul khrims la gnas pa las rang bzhin gyis tshul khrims can yin te/ log pa'i las kyi lam du gtogs pa'i 'chal ba'i tshul khrims chung ngu yang kun du mi spyod na/ 'bring ngam chen po lta ci smos/ dge ba'i las kyi lam bcu yongs su rdzogs pa dag la yang rang bzhin gyis yang dag par snang ngo //des de ltar rang bzhin gyis tshul khrims can gyi shes rab kyis ngan 'gro rnams dang / bde 'gro rnams dang / theg pa gsum po dag la nyon mongs pa can dang / nyon mongs pa can ma yin pa'i las kyi lam rnams kyi las kun du spyod pa'i rgyu las 'bras bu yang dag par 'grub pa rnam par gzhag pa yang dag pa ji lta ba bzhin du rab tu shes so//rnam par smin pa dang / rgyu mthun pa'i 'bras bu las kyang las de dag yang dag pa ji lta ba bzhin du rab tu shes so/ /bdag nyid kyang mi dge ba'i las spong ba dang /dge ba'i las yang dag par len par yang dag par snang la/ gzhan dag kyang de nyid la yang dag par 'dzud par 'dod cing / yang dag par 'dzud par byed do/ /phongs pa rnam pa sna tshogs kyis phongs par gnas pa la snying brtse zhing / snying brtse ba rgya chen po thob nas las mi mthun pa kun du spyod pa'i nyes pa'i skyon chags pa'i sems can gyi khams dar ba'am rgud par gnas pa thams cad la bye brag med par don dam par sdug bsngal ba yin par so sor rtog go//lhag pa'i tshul khrims la gnas pa de la gnas pa'i sangs rgyas mthong ba dang / dge ba'i rtsa ba rnam par dag par 'gyur ba ni snga ma bzhin du rig par bya'o//de la bye brag ni 'di yod de/ dper na gser de nyid gser mgar mkhas pas nag tshur gyis bskus nas mer bcug na/ shas cher ches rnam par dag par 'gyur ba de bzhin du byang chub sems dpa' de'i dge ba'i rtsa ba de shas cher rnam par dag par rig par bya'o//gnas pa de la sems kyi bsam pa dag pa sgrub pa la 'jug pa ni skye bas phal cher gling bzhi pa'i 'khor los sgyur bar 'gyur te/ shas cher sems can rnams 'chal pa'i tshul khrims dang / mi dge ba'i las kyi lam rnams las zlog par byed cing / dge ba'i las kyi lam rnams la yang yang dag par 'dzud par byed do//de'i mthu ni snga ma las bcu 'gyur du rig par bya ste/ de ltar na byang chub sems dpa' rnams kyi lhag pa'i tshul khrims la gnas pa 'di ni rang bzhin gyi tshul khrims dang / tshul khrims 'chal pa'i dri ma'i rnam pa thams cad sel ba dang / las kyi lam thams cad kyi rgyu dang /'bras bu'i rnam pa thams cad shes pa so sor rtogs pa dang / dge ba'i las la gzhan yang dag par 'dzud par 'dod pa dang / snying brtse ba rgya chen po thob pa dang / sems can gyi khams kyi las las skyes pa'i sdug bsngal ba dang / phongs pa la rtog pa dang / dge ba'i rtsa ba rnam par dag pa dang /skye ba dang mthu las mdor bstan par rig par bya'o/ /rgyas par bstan pa ni 'di lta ste/ mdo nyid las sa bcu'i sa dri ma med pa'i sa las ji skad 'byung ba bzhin no/ /'chal pa'i tshul khrims kyi dri ma dang bral ba'i phyir/ dri ma med pa'i sa zhes bya ba la 'chal ba'i tshul khrims kyi dri ma dang bral ba nyid kyi phyir lhag pa'i tshul khrims la gnas pa zhes bya ste/de la dri ma med pa'i sa gang yin pa de 'dir lhag pa'i tshul khrims la gnas pa yin par rig par bya'o/ /de la byang chub sems dpa' rnams kyi lhag pa'i sems la gnas pa'i rnam pa ni gang dag yin/ rtags ni gang dag yin/mtshan ma ni gang dag yin zhe na/ 'di la byang chub sems dpa' thog ma nyid du lhag pa'i tshul khrims la gnas pa la bsam pa dag pa bcu po gang dag yid la byas shing brten te/ rtogs par gyur pa'i sems kyi bsam pa yid la byed pa de dag gzhan rnam pa bcus che ba'i phyir dang / yongs su rdzogs pa'i phyir lhag pa'i tshul khrims la gnas pa las yang dag par 'das nas/ lhag pa'i sems kyi gnas pa la 'jug ste/ rnam pa bcus bdag gi sems kyi bsam pa dag par gyur to snyam pa'i yid la byed pa dang / bdag gi bsam pa dge ba rnam pa bcu po 'di las yongs su nyams par 'gyur ba'i cha ma yin no snyam pa'i yid la byed pa dang /zag pa dang bcas pa'i chos rnams la sems mi 'jug cing mi mthun par yang gnas so snyam pa'i yid la byed pa dang / de'i gnyen po bsgom pa la yang bdag gi rnam par shes pa yang dag par gnas so snyam pa'i bsam pa yid la byed pa dang /bdag ni gnyen po 'di las yongs su nyams par 'gyur ba'i cha ma yin no snyam pa'i yid la byed pa dang / bdag ni 'di ltar gnyen po brtan por gyur pas zag pa dang bcas pa'i chos de dag thams cad dang / bdud thams cad kyis zil gyis non par 'gyur ba'i cha ma yin no snyam pa'i yid la byed pa dang /bdag gi yid ni sangs rgyas kyi chos thams cad la zhum pa med par 'jug go snyam pa'i yid la byed pa dang / dka' ba spyod pa thams cad kyang bdag la gnod pa med do snyam pa'i yid la byed pa dang / bdag ni sems rtse gcig tu nges pas theg pa chen po la mos kyi/ de ma yin pa'i theg pa dman pa rnams la ni ma yin no snyam pa'i yid la byed pa dang /bdag gi sems ni sems can thams cad kyi don thams cad bya ba la mngon par dga'o snyam pa'i yid la byed pa ste/ sems kyi bsam pa bcu po de dag gis 'jug par bya'o / / lhag pa'i sems la gnas pa la gnas pa'i byang chub sems dpa' ni 'du byed thams cad la nyes dmigs kyi rnam pa sna tshogs kyis sun 'byin par byed de/ de dag las yid skyo bar byed do/ /sangs rgyas kyi ye shes la phan yon rnam pa sna tshogs kyis phan yon du lta zhing de la 'dod pa skyes pa yin no//snying thag pa nas 'dun pas sems can gyi khams la sdug bsngal rnam pa sna tshogs kyis sdug bsngal bar rnam par blta'o/ /sems can de dag la lta ba'i sems dang ldan pa yin no/ /'du byed thams cad la bag yod pa dang / don la rton pa'i sems dang / byang chub kyi phyir brtson 'grus 'bar ba yin/sems can rnams la snying rje'i bsam pa rgya chen po dang ldan pa yin no/ /sems can de dag gtan du sdug bsngal las rnam par grol bar bya ba'i thabs ni nyon mongs pa thams cad kyis ma bsgribs pa'i ye shes kho na yin par mthong ba yin/ rnam par thar pa de yang dag par 'grub par bya ba'i chos kyi dbyings la rnam par rtog pa'i rgyu kun nas nyon mongs pa skye ba thams cad kyi gnyen po ni shes rab yin par mthong ba yin/ye shes kyi snang ba de 'grub par byed pa ni yang dag par ting nge 'dzin yin par mthong ba yin/ bsam gtan dang / rnam par thar pa dang /ting nge 'dzin dang / snyoms par 'jug pa de dag sgrub pa ni byang chub sems dpa'i sde snod nyan pa sngon du 'gro ba dang / nyan pa'i gzhi yin par mthong ba yin no/ /mthong nas kyang brtson 'grus chen po rtsom pas thos pa yongs su tshol bar byed do/ /dam pa'i chos nyan pa'i phyir rdzas dang yo byad dang /nang dang phyi rol gyi dngos po gang yongs su mi gtong ba de med do/ /bla ma la bsnyen bkur bya ba gang nyams su mi len pa de med do/ /'dun pa gang nyams su mi len pa de med do/ /lus kyi gnod pa gang nyams su mi len pa de med do/ /de ni tshig bzhi pa'i tshigs su bcad pa gcig thos pas kyang ches dga' bar 'gyur gyi /stong gsum po gang ba dang mnyam pa'i rin po che'i phung po chen pos ni de lta ma yin no/ /yang dag par rdzogs pa'i sangs rgyas kyis gsungs pa byang chub sems dpa'i spyod pa yongs su dag par byed pa'i chos kyi tshig gcig tsam thos pas ni ches dga' bar 'gyur gyi brgya byin nyid dang /tshangs pa nyid dang / bdud nyid dang / 'jig rten skyong ba nyid dang / 'khor los sgyur ba nyid kyi lus thob pa rnams kyis ni de lta ma yin no/ /gal te de la la la zhig 'di skad du ji ste khyed me dong chen por bdag nyid 'dor bar byed dam/ sdug bsngal gyi gnod pa chen po nyams su len par byed na ni/'di ltar ngas yang dag par rdzogs pa'i sangs rgyas kyis gsungs pa byang chub sems dpa'i spyod pa yongs su dag par byed pa'i chos kyi tshig 'di khyod la bsgrags so zhes zer ba thos na yang de 'di snyam du sems te/ bdag gis chos kyi tshig 'di'i phyir snga ma bzhin du stong gsum gyi stong chen po gang ba dang mnyam pa'i me dong du yang tshangs pa'i 'jig rten nas bdag nyid dor bar spro na/ngan ngon gyi nang du lta ci smos/ bdag gis sems can dmyal ba'i sdug bsngal la gnas pa dang yang bsngos te/ sangs rgyas kyi chos rnams yongs su btsal dgos na/sdug bsngal gyi gnod pa phal pa lta ci smos te/ de lta bu'i brtson 'grus brtsams pas chos rnams yongs su btsal nas/ sangs rgyas kyi chos rnams ni 'di ltar chos kyi rjes su mthun pa'i chos sgrub pa la brten pa yin gyi/ tshig 'bru dang sgra tsam gyis rnam par dag pa ni ma yin no snyam du de ltar tshul bzhin yid la byed do//de ltar rig nas thos pa de nyid la brten te/ chos kyi mtshan ma rnams la yang dag par dmigs pa byas nas/ 'dod pa rnams las dben pa dang / rgyas par 'jig rten pa'i bsam gtan dang po dang / gnyis pa dang / gsum pa dang / bzhi pa dang / 'jig rten pa'i gzugs med pa'i snyoms par 'jug pa bzhi dang /tshad med pa bzhi dang / mngon par shes pa lnga bsgrubs te gnas so/ /de de dag gis lan mang du gnas te/ bsam gtan dang / rnam par thar pa dang / ting nge 'dzin dang / snyoms par 'jug pa de dag las bzlog na / smon lam gyi dbang gis 'dod pa'i khams gang du sems can gyi don byang chub kyi phyogs dang mthun pa'i chos yongs su rdzogs par 'gyur ba mthong ba der skye bar 'gyur la/de de dag gi dbang gis skye bar mi 'gyur ro/ /de ni 'dod pa'i 'dod chags dang bral ba'i phyir 'dod pa'i 'ching ba rnams spangs pa yin la/bsam gtan dang / rnam par thar pa dang / ting nge 'dzin dang / snyoms par 'jug pa las bzlog pa'i phyir srid pa'i 'ching ba rnams spangs pa yin no/ /de ni thog ma mos pas spyod pa'i sa nyid nas chos kyi de bzhin nyid la mos pa'i phyir lta ba las gyur pa'i 'ching ba rnams spangs pa yin no//log pa'i 'dod chags dang / zhe sdang dang / gti mug ni de la gtan mi 'byung ngo / de'i sangs rgyas mthong ba nas rgyas par dge ba'i rtsa ba rnam par dag pa ni snga ma bzhin du rig par bya'o/ /de la bye brag ni 'di yod de/ dper na gser mgar mkhas pa'i lag na yod pa'i gser de nyid dri ma dang skyon bag kyang zad la skye bri med par tshad mnyam pa de bzhin du de'i dge ba'i rtsa ba de rnam par dag par rig par bya'o//skye bas ni phal cher lha'i dbang po brgya byin du 'gyur te/ sems can rnams kyi 'dod pa'i 'dod chags bzlog pa la mkhas pa'o/ /mthu ni gnas pa snga ma gang la stong du bstan pa de 'dir 'bum du rig par bya'o//byang chub sems dpa' rnams kyi lhag pa'i sems la gnas pa 'di ni sems kyi yid la byed pa 'grub pa la 'jug pa dang / 'du byed dang / sems can gyi khams dang / byang chub chen po yang dag par so sor rtogs pa dang / sems can sdug bsngal las rnam par thar par bya ba'i thabs yang dag par yongs su tshol ba dang /gus pa chen pos yongs su tshol ba dang / chos kyi rjes su mthun pa'i chos nan tan du sgrub pa dang / 'jig rten pa'i bsam gtan dang / rnam par thar pa dang / ting nge 'dzin dang / snyoms par 'jug pa dang / mngon par shes pa mngon par sgrub pa la gnas pa dang /de las bzlog nas smon lam gyis gang du 'dod par skye ba dang / dge ba'i rtsa ba rnam par dag pa dang / skye ba dang / mthu las mdor bstan par rig par bya'o/ /rgyas par bstan pa ni 'di lta ste/ sa bcu'i mdo sa'i 'od byed pa las 'byung ba bzhin no/ / sa de ni thos pa'i rnam pa'i chos kyi snang ba gsal ba dang / ting nge 'dzin gyi snang ba gsal bas rab tu phye ba'i phyir 'od byed pa zhes bya'o/ /nang gi sems rnam par dag pa la brten nas de 'od dang ldan pa yin te/ de lta bas na gnas pa de lhag pa'i sems zhes bya'o/ /gang gi don gyis 'od byed pa'i sa zhes bya ba'i don de nyid kyis lhag pa'i sems la gnas pa yin par rig par bya'o//de la byang chub sems dpa' rnams kyi byang chub kyi phyogs dang mthun pa dang ldan pa'i lhag pa'i shes rab la gnas pa gang zhe na/ 'di la byang chub sems dpa' thos pa yongs su btsal ba'i dbang du byas nas/lhag pa'i sems la dbang du gnas pa la thog ma nyid du chos la snang ba 'jug pa bcu po thob pa yin te/ de dag che ba dang yongs su rdzogs pa'i phyir lhag pa'i sems la gnas pa las 'das nas/ lhag pa'i shes rab la gnas pa dang po la 'jug pa'o / /chos la snang ba 'jug pa bcu po de dag kyang gzhung ni mdo las ji skad 'byung ba de kho na bzhin du rig par bya ste/gang dag 'dogs pa dang gang du 'dogs pa dang de dag kyang don dam par gang dang mnyam pa dang / kun nas nyon mongs pa dang / rnam par byang bas gang kun nas nyon mongs pa can du 'gyur ba dang / rnam par dag par 'gyur ba dang /gang dang ldan pa'i kun nas nyon mongs pas kun nas nyon mongs pa can du 'gyur ba dang / rnam par dag pa bla na med pa gang gis rnam par dag par 'gyur ba zhes bya ba 'di ni/ chos la snang ba bstan pa de dag gi don gyi mdo yin par rig par bya'o/ /gnas pa de la gnas pa de ni mi phyed pa'i bsam pa la sogs pa ye shes yongs su smin par byed pa'i chos mdo sde las ji skad 'byung ba rnam pa bcu dang ldan pas ye shes yongs su smin pa'i phyir/de'i bdag nyid kyi chos rab tu thob pas de bzhin gshegs pa'i rigs su rab tu grub pa yin no/ /byang chub sems dpa'i lta ba rnam pa thams cad kyi dbang du byas nas dran pa nye bar gzhag pa la sogs pa byang chub kyi phyogs dang mthun pa'i chos sum cu rtsa bdun mdo nyid las ji skad 'byung ba bzhin du bsgom mo//des chos de dag thabs kyis yongs su zin pas bsgom pa'i phyir/ de 'jig tshogs la lta ba shin tu cha phra ba dang / phung po dang / khams dang / skye mched la sogs pa la mngon par zhen pa dang / g.yo ba thams cad kun du mi spyod pas gtan du spong bar byed do/ /de rnams spangs pas de bzhin gshegs pas smad pa'i las gang yin pa de dag thams cad kyi thams cad du mi spyod do/ /de bzhin gshegs pas bsngags pa gang yin pa de dag thams cad ni ji lta ba bzhin du 'jug par byed do//de ltar gyur na de bas kyang shas cher sems 'jam pa dang / mnyen pa dang / las su rung bar yang 'gyur ro/ /de ltar rnam pa sna tshogs kyis sems shin tu rnam par dag par gyur na byas pa gzo ba dang /byas pa tshor ba la sogs pas de'i bsam pa dang mthun pa'i dkar po'i chos rnam pa sna tshogs dang ldan par 'gyur ro/ /sa gong ma yongs su sbyong bar byed pa'i las rnams kyang yang dag par yongs su tshol zhing brtson 'grus rtsom pa chen po thob ste gnas so/ /gzhi des de'i bsam pa dang /lhag pa'i bsam pa dang / mos pa'i khams yongs su rdzogs par 'gyur ro/ /gzhi des kyang bstan pa'i dgrar gyur pa mu stegs can dang bdud thams cad kyis kyang mi 'phrogs shing mi bskyod par 'gyur ro/ /sangs rgyas mthong ba nas rgyas par dge ba'i rtsa ba rnam par dag pa ni snga ma bzhin du rig par bya'o//de la bye brag ni 'di yod de/ dper na gser de nyid gser mgar mkhas pas rgyan gyi rnam par byas pa ni rgyan du ma byas pa'i gser rnams kyis mi 'phrogs pa de bzhin du byang chub sems dpa' de'i dge ba'i rtsa ba de dag ni de las gzhan pa'i byis pa'i gnas la gnas pa'i byang chub sems dpa'i dge ba'i rtsa ba rnams kyis mi 'phrogs pa yin no//dper na nor bu rin po che snang ba rab tu gtong ba ni de ma yin pa'i nor bu rnams kyis mi 'phrogs shing / rlung dang chu dang char pa rnams kyis 'od mi chod pa de bzhin du byang chub sems dpa' de yang nyan thos dang rang sangs rgyas thams cad kyis mi 'phrogs shing /shes rab kyi snang ba yang bdud dang phyir rgol ba thams cad kyis mi chod pa yin no/ /skye bas ni lha'i rgyal po rab 'thab bral du 'gyur te/ sems can rnams kyi 'jig tshogs la lta ba rnam par bzlog pa la mkhas so/ /mthu ni gnas pa snga ma gang du 'bum 'gyur du bstan pa de 'dir bye bar bstan par rig par bya ste/byang chub sems dpa' rnams kyis byang chub kyi phyogs dang mthun pa'i lhag pa'i shes rab la gnas pa 'di ni chos la snang ba 'jug pa 'grub pa thob pa dang / ye shes yongs su smin par 'gyur ba dang / byang chub kyi phyogs dang mthun pa'i chos brten pa dang /'jig tshogs la lta ba la sogs pa la mngon par zhen pa dang / g.yo ba thams cad spangs pa dang / bkag pa dang / gnang ba'i las rnam par spong ba dang / brten pa dang gzhi des sems mnyen par 'gyur ba dang / de dang mthun pa'i yon tan yang dag par 'grub pa dang /sa yongs su dag par byed pa'i las yongs su tshol ba las brtsams te/ brtson 'grus chen po brtsams pa dang / gzhi des bsam pa dang lhag pa'i bsam pa dang mos pa rnam par dag par byed pa dang / gzhi des bstan pa'i dgra thams cad kyis mi 'phrogs pa dang / dge ba'i rtsa ba rnam par dag pa dang /skye ba dang mthu las mdor bstan pa yin par rig par bya'o/ /rgyas par bstan pa ni sa bcu'i 'od 'phro can las ji skad bstan pa bzhin te/ sa de la byang chub kyi phyogs dang mthun pa'i chos rnams ye shes kyi 'od 'phro bar gyur pa dang / yang dag pa'i chos ston pas 'jig rten rnams la shes rab kyi snang ba byed pas na de'i phyir sa de la 'od 'phro can zhes bya ste/de nyid 'dir byang chub kyi phyogs dang mthun pa'i lhag pa'i shes rab kyi gnas pa zhes bya'o/ /de la byang chub sems dpa' rnams kyi bden pa dang ldan pa'i lhag pa'i shes rab la gnas pa gnyis pa gang zhe na/'di la byang chub sems dpas lhag pa'i shes rab la gnas pa snga ma la rnam par dag pa la bsam pa mnyam pa nyid bcu thob pa gang yin pa de dag che ba'i phyir dang / yongs su rdzogs pa'i phyir lhag pa'i shes rab la gnas pa gnyis pa la 'jug go/ /rnam par dag pa las bsam pa mnyam pa nyid bcu'i gzhung ni mdo las ji skad 'byung ba bzhin du rig par bya ste/sangs rgyas rnams ni mnyam pa med pa'i sangs rgyas rnams dang / mnyam pa de ma yin pa'i sems can gyi khams las yang dag par 'das pa dang / chos gang dag dang ji ltar mnyam pa 'di ni rnam par dag pa la bsam pa mnyam pa nyid rnams kyi don gyi mdo yin par rig par bya'o//gnas pa de la gnas pa de ni phyir zhing ye shes khyad par can 'dod pas 'phags pa'i bden pa bzhi la rnam pa bcur yang dag pa ji lta ba bzhin du rab tu shes te/ gzhung ni mdo nyid las ji skad 'byung ba bzhin du thams cad rig par bya'o//gzhan la go bar byed pa dang / so sor rang gis shes pa dang / de gnyi ga'i gnas las brtsams te gang bstan pa dang / mdo sde dang / 'dul ba dang / ma mo las brtsams te gang gis bstan pa dang / da ltar byung ba'i sdug bsngal gyi bdag nyid dang / rgyu las ma 'ongs pa'i sdug bsngal 'byung ba dang / rgyu zad pas de zad de mi skye ba dang / de spang ba'i thabs la brten pa las brtsams nas ji ltar bstan pa ste/ de ltar na 'di ni 'phags pa'i bden pa bzhi shes pa rnam pa bcu'i don gyi mdo yin par rig par bya'o/ /de ltar bden pa la mkhas pa de ni 'du byed du gyur pa thams cad shes rab kyis yang dag par rnam par sun 'byin par byed do//sems can gyi khams la yang snying rje'i bsam pa rnam par 'phel bar 'gyur ro/ /sems can byis pa'i log par sgrub pa yang sngon gyi mtha' dang phyi ma'i mtha' las yang dag par rab tu rtogs so/ /de dag rnam par thar par bya ba'i phyir bsod nams dang ye shes kyi tshogs chen po yongs su bzung ba la sems kyis smon par byed cing de la gnas pa'i bsam pa yang dag par 'grub po//dran pa dang / blo gros dang / rtogs pa la sogs pa yon tan mang po rnam pa sna tshogs pa dang ldan pa dang / yid la byed pa gzhan dang bral ba dang /yongs su smin par bya ba'i thabs sna tshogs kyis kyang sems can rnams yongs su smin par byed do/ /sems can rnams la phan 'dogs pa'i 'jig rten pa'i yi ge dang bstan bcos dang / rgya dang / rtsis dang shod thabs la sogs pa bzo dang las kyi gnas mdo las ji skad 'byung ba gang dag yin pa de dag thams cad kyang sems can rnams la 'jig rten pa'i tha snyad dang mthun par bya ba dang dbul ba bsal bar bya ba dang /khams ma snyoms pa dang mi dang mi ma yin pas byas pa'i gnod pa zhi bar bya ba dang / kha na ma tho ba med pa'i rtsed mo dang / dga' ba'i dngos po bsgrub pas chos ma yin pa la dga' ba las bzlog par bya ba dang /khyim gyi yo byad 'dod pa rnams la tshegs chung ngus khyim gyi yo byad bsgrub par bya ba dang / rgyal po dang chom rkun la sogs pa'i gnod pa las yongs su bskyab par bya ba dang / gnas dang gnas ma yin pa'i sbyor ba la gnang ba dang dgag par bya ba dang /bkra shis pa bya ba dang / bkra mi shis pa'i dngos po blang ba dang dor ba la gzung pa dang / tshe 'di la gcig la gcig mi 'khu ba dang / tshe phyi ma la phyin ci ma log pa'i mngon par mtho bar 'gyur ba'i lam bstan pa dang / snying rje dang ldan pas mthar gyis byang chub la dgod par bya ba'i phyir mngon par sgrub pa ste/de lta na 'di ni sems can rnams la phan 'dogs pa'i bzo dang las kyi gnas de dag gi don gyi mdo yin par rig par bya'o/ /gzhan thams cad ni snga ma bzhin no/ /de la bye brag ni 'di yod do / /dper na gser de nyid gser mgar mkhas pas spug byi dor byas pas spras pa ni mtshungs pa med pa'i phyir de ma yin pa'i gser dag gis mi 'phrogs so//de bzhin du byang chub sems dpa' de yang nyan thos dang rang sangs rgyas thams cad dang / de ma yin pa'i sa la gnas pa'i byang chub sems dpa' rnams kyis mi 'phrogs pa yin no/ / dper na zla ba dang / nyi ma dang rgyu skar rnams kyi 'od ni rlung gi dkyil 'khor thams cad kyis mi 'phrogs la rlung dang 'gro bar ni 'dra'o/ /de bzhin du byang chub sems dpa' de'i shes rab de yang nyan thos dang rang sangs rgyas thams cad kyis mi 'phrogs la/ 'jig rten pa'i bya ba byed par ni 'dra'o//skye ba ni lha'i rgyal po yongs su dga' ldan du 'gyur te/ mu stegs can thams cad bzlog pa la mkhas so/ /mthu ni bye ba phrag stong gi grangs su bstan par rig par bya'o/ /byang chub sems dpa' rnams kyi bden pa dang ldan pa'i lhag pa'i shes rab la gnas pa 'di ni rnam par dag pa la bsam pa nyid du grub pa la 'jug pa dang /thabs dang bden pa spyod pa so so rnam par 'phel ba dang / 'du byed rnam par sun 'byin cing sems can la snying rje rnam par 'phel ba dang / de'i don du bsod nams dang ye shes kyi tshogs bsags pa'i smon lam la sbyor ba dang / dran pa dang / blo gros dang rtog pa la sogs pa yon tan 'phel ba dang / gzhan yid la mi byed pa dang / rnam pa thams cad du sems can yongs su smin par bya ba la brtson pa dang / 'jig rten pa'i bzo sgrub pa dang / dge ba'i rtsa ba rnam par dag pa dang / skye ba dang mthu las mdor bstan par rig par bya'o//rgyas par bstan pa ni 'di lta ste/ sa bcu'i sa shin tu sbyang dka' ba las 'byung ba bzhin no/ /bden pa rnams la rnam par nges pa'i shes pa ni shin tu sbyang dka' ba zhes bya ste/ 'dir yang de bstan pas na de'i phyir sa de la shin tu sbyang dka' ba zhes bya ste/don de nyid kyi bden pa dang ldan pa'i lhag pa'i shes rab la gnas pa yin par blta bar bya'o/ /de la byang chub sems dpa' rnams kyi rten cing 'brel par 'byung ba dang ldan pa'i lhag pa'i shes rab la gnas pa gang zhe na/ 'di la byang chub sems dpa' bden pa dang ldan pa'i lhag pa'i shes rab la gnas pa la thog ma nyid du chos mnyam pa nyid bcu thob ste/gzhung ni mdo las ji skad 'byung ba bzhin du rig par bya'o/ /de dag che ba'i phyir dang yongs su rdzogs pa'i phyir gnas pa 'di la 'jug ste/ chos thams cad la don dam par yod pa'i ngo bo nyid kyi mtshan ma med pa'i mnyam pa nyid dang /brjod pa mngon par 'du byed pa snang ba mtshan nyid med pa'i mnyam pa nyid dang / de nyid mtshan nyid med pas bdag nyid ma skyes pa'i mnyam pa nyid dang / rgyu las kyang ma skyes pa'i mnyam pa nyid dang / rang dang rgyu las kyang ma skyes pas gzod ma nas shin tu zhi ba'i mnyam pa nyid dang / yod pa'i dngos po 'dzin pa'i shes pa spros pa med pa'i mnyam pa nyid dang /blang ba dang dor ba'i mngon par 'du byed pa dang bral ba'i mnyam pa nyid dang / de nyid nyon mongs pa dang sdug bsngal gyi kun nas nyon mongs pa dang bral ba'i phyir dben pa'i mnyam pa nyid dang / rnam par brtags pa'i shes bya'i ngo bo nyid sgyu ma dang sprul pa lta bu'i mnyam pa nyid dang /rnam par mi rtog pa'i ye shes kyi spyod yul gyi ngo bo nyid kyi dngos po dang dngos po med pa gnyis su med pa'i mnyam pa nyid de ni chos mnyam pa nyid bcu po de dag gi don rnam par dbye ba yin par rig par bya'o// //bam po bcu dgu pa/ gnas pa de la gnas pa de byang chub la 'dun pa drag pos 'dod pa skyes shing sems can rnams la snying rje rgyas pas 'jig rten rnams kyi 'byung ba dang /'jig pa la rten cing 'brel par 'byung ba'i legs par dpyod pa'i rnam pa thams cad kyis dpyod par byed cing rab tu shes so/ /rten cing 'brel par 'byung ba'i shes pa la brten nas de'i rnam par thar pa'i sgo gsum po stong pa nyid dang /mtshan ma med pa dang / smon pa med pa skye ba'o/ /gzhi des kyang de la bdag dang gzhan pa dang / byed pa po dang / tshor ba po dang / dngos po dang / dngos po med pa'i 'du shes mi 'byung ngo / /de ltar don dam pa la mkhas pa dang /sems can la lta ba de ni nyon mongs pa dang ldan pa dang / rkyen tshogs pa las ni 'dus byas rang bzhin gyis nyam chung ba bdag dang bdag gi dang bral zhing nyes pa du ma'i skyon chags pa 'byung ba nyon mongs pa dang mi ldan pa dang / rkyen ma tshogs pa las ni mi 'byung ste/ de bas na bdag gis nyon mongs pa dang ldan pa dang /rkyen tshogs pa ni bdag nyid bsrung ba'i phyir tshogs par mi bya'o/ /sems can rnams la phan gdags pa'i don du ni thams cad kyi thams cad du 'dus byas rnam par zhi bar mi bya'o snyam du tshul bzhin du rtog par byed do/ /de ltar ye shes dang snying rje dang ldan pa de ni gnas pa de la chags pa med pa'i ye shes la mngon du phyogs pa zhes bya ba'i shes rab kyi pha rol tu phyin pa la gnas pa mngon du 'gyur te/des na de 'jig rten pa'i spyod pa thams cad la chags pa med par spyod de/ gnas pa de yang sa bdun pa la sbyor ba las 'byung ba'i spyod pa mthar thug pa'i byang chub sems dpa' bzod pa rjes su mthun pa'i bzod pa rnon po gang yin pa des bsdus par rig par bya'o//de chags pa med pa'i ye shes la mngon par phyogs pa zhes bya ba shes rab kyi pha rol tu phyin pa la gnas pa mngon du gyur pas byang chub 'dren par byed pa'i rkyen rnams kyang 'dren par byed pa 'jig rten pa rnams kyi 'dus byas kyi gnas pas kyang gnas par mi byed do//rab tu zhi ba la yang zhi bar lta ba de yang mi gnas so/ /de ltar thabs dang shes rab kyi ye shes dang ldan pa de la ni 'jug pa stong pa nyid kyi ting nge 'dzin la sogs pa'i ting nge 'dzin gyi sgo 'bum phrag bcu po mngon du 'gyur ro//stong pa nyid kyi ting nge 'dzin la ji lta ba bzhin du smon pa med pa dang / mtshan ma med pa'i ting nge 'dzin gnyis la yang de dang 'dra bar rig par bya'o/ /de dag mngon du gyur pa na mi phyed pa'i bsam pa can du 'gyur ro/ /bstan pa'i dgra mu stegs can dang /bdud thams cad kyis kyang rnam pa thams cad du bstan pa las mi 'phrogs par 'gyur ro/ /lhag ma ni snga ma bzhin no/ /de la bye brag ni 'di yod de/ dper na gser de nyid gser mgar mkhas pas nor bu rin po che bai DUr+ya byi dor byas pas spras pa ni de ma yin pa'i gser thams cad kyis mi 'phrogs pa de bzhin du byang chub sems dpa' de'i dge ba'i rtsa ba de dag ches rnam par dag pa dang mi 'phrogs par 'gyur ro//snga ma bzhin du dper na zla ba'i 'od ni sems can rnams kyi lus kyang sim par byed la/ rlung gi dkyil 'khor bzhis kyang mi chod pa de bzhin du byang chub sems dpa' de'i shes rab kyi 'od de yang sems can thams cad kyi nyon mongs pa'i yongs su gdung ba thams cad kyang rab tu zhi bar byed la/bdud dang phyir rgol ba thams cad kyis kyang mi chod pa yin no/ /skye bas na lha'i rgyal po rab 'phrul du 'gyur te/ sems can rnams kyi mngon pa'i nga rgyal thams cad bzlog pa la mkhas so//mthu yang bye ba phrag 'bum gyi grangs su bstan par blta bar bya'o/ /rten cing 'brel par 'byung ba dang ldan pa'i lhag pa'i shes rab la gnas pa 'di ni chos mnyam pa nyid yongs su grub pa la 'jug pa dang / rten cing 'brel par 'byung ba rtogs pa'i rnam par thar pa'i sgo 'byung ba dang /log pa'i 'du shes thams cad kun du mi 'byung ba dang / thabs kyis 'khor ba yongs su 'dzin pa dang / chags pa med pa'i ye shes la mngon du phyogs pa'i shes rab kyi pha rol tu phyin pa la gnas pa mngon du gyur pa dang / ting nge 'dzin tshad med pa thob pa dang /mi phyed pa'i bsam pa 'thob pa dang / bstan pa las mi 'phrogs pa dang / dge ba'i rtsa ba rnam par dag pa dang / skye ba dang mthu las mdor bstan par rig par bya'o/ /rgyas par bstan pa ni 'di lta ste/ sa mngon du gyur pa las 'byung ba bzhin no/ /chags pa med pa'i ye shes la mngon du phyogs pa'i shes rab kyi pha rol tu phyin pa la gnas pa mngon du gyur pas na mngon du gyur pa zhes bya ste/don de nyid kyis 'di gnas pa yin par rig par bya'o/ /de la byang chub sems dpa' rnams kyi mtshan ma med pa la gnas pa mngon par 'du byed pa dang bcas shing rtsol ba dang bcas pa gang zhe na/'di la byang chub sems dpa' lhag pa'i shes rab la gnas pa 'das ma thag pa la thabs dang shes rab kyis mngon par sgrub pa/ sems can thams cad dang thun mong ma yin pa'i 'jig rten pa/ 'jig rten thams cad dang thun mong ma yin pa'i lam gzhan brtsams pa'i khyad par bcu po thob par 'gyur ba de dag che ba'i phyir dang /yongs su rdzogs pa'i phyir gnas pa bdun pa la 'jug pa ste/ de dag gi gzhung ni rgyas par mdo nyid las 'byung ba bzhin du rig par bya ste/ 'jig rten pa'i phun sum tshogs pa 'grub par byed pa'i bsod nams yongs su 'dzin pa las brtsams pa dang /sems can rnams la phan pa dang bde ba'i bsam pa las brtsams pa dang / byang chub kyi phyir bsod nams kyi tshogs byang chub kyi phyogs dang mthun pa'i chos gong nas gong du yang skye ba las brtsams pa dang / nyan thos dang thun mong ma yin pa las brtsams pa dang / rang sangs rgyas dang thun mong ma yin pa las brtsams pa dang /sems can gyi khams las brtsams pa dang / 'jig rten gyi khams las brtsams pa dang / de bzhin gshegs pa'i sku dang / gsung dang / thugs shes pa las brtsams te/ de ltar 'di ni thabs dang shes rab kyis sgrub pa'i lam gzhan brtsams pa'i khyad par de dag gi dbang du byas pa'i don gyi mdo yin par rig par bya'o//de de dag dang ldan pas de bzhin gshegs pa'i yul tshad med grangs med pa khong du chud par 'gyur ro/ /de yang dag par bskyed pa'i phyir yang lhun gyis grub cing mtshan ma med pa dang / rtog pa med pa dang / rnam par rtog pa med pas sangs rgyas kyi yul tshad med pa yang dag par skyed par mthong nas/rgyun mi 'chad pa dang / bar chad med par sbyor bar byed do/ /spyod lam dang / spyod pa dang / gnas pa dang / yid la byed pa thams cad dang / gnas skabs thams cad na gnas la de lam dang bral bar mi 'gyur ro/ / de ni sems kyi skad cig re re la pha rol tu phyin pa bcu la sogs pa byang chub kyi phyogs dang mthun pa'i chos thams cad khyad par du 'phags par yongs su rdzogs par 'gyur ro/ / gzhan dag la ni de lta ma yin te/ dang por rab tu dga' ba la gnas pa la ni smon lam la lhag par dmigs pa dang /gnyis pa la ni sems kyi 'chal pa'i tshul khrims kyi dri ma sel ba dang / gsum pa ni smon lam rnam par 'phel zhing chos la snang ba thob pa dang / bzhi pa la ni lam la 'jug pa dang / lnga pa la ni 'jig rten pa'i bya ba la 'jug pa dang / drug pa la ni zab mo la 'jug pa yin la/gnas pa bdun pa 'di la ni sangs rgyas kyi chos thams cad yang dag par bskyed pas byang chub kyi phyogs kyi chos rnams yongs su rdzogs par 'gyur ba'i phyir ro/ /gnas pa 'di ni byang chub sems dpa'i sbyor ba las byung ba'i spyod pa yongs su rdzogs pas bsdus pa dang /ye shes dang / mngon par shes pa dang / spyod pa rnam par dag pa'i gnas pa brgyad pa la 'jug pa yin te/ 'di ltar byang chub sems dpa' ni gnas pa 'di'i mjug thogs su gnas pa brgyad pa la 'jug cing / gnas pa de ni gcig tu nges par rnam par dag pa yin pa'i phyir ro/ / gnas pa bdun po 'di dag ni 'dren pa yin te/ gnas pa rnam par dag pa'i sngon du 'gro ba'i phyir ni kun nas nyon mongs pa can ma yin la/ de ma thob pa'i phyir ni kun nas nyon mongs pa can gyi spyod par gtogs par brjod do/ /gnas pa de dag la de'i 'dod chags la sogs pa nyon mongs pa thams cad spong bar 'gyur te/de ni nyon mongs pa dang bcas pa yang ma yin la/ nyon mongs pa med pa yang ma yin par rig par bya ste/ kun du mi spyod pa dang / sangs rgyas kyi ye shes 'dod pa'i phyir ro/ /de ltar gyur pa de ni lhag pa'i bsam pa yongs su dag cing / lus dang ngag dang yid kyi las tshad med par 'jug go//de las gang dag de bzhin gshegs pas ma bsngags pa rnams ni snga ma bzhin no/ /de'i gnas pa lnga par 'jig rten pa'i bzo shes pa mngon par sgrub pa rnams ni 'dir yongs su rdzogs par 'gyur ro/ /stong gsum gyi stong chen po na gnas pa gong ma la gnas pa'i byang chub sems dpa' rnams dang //de bzhin gshegs pa rnams ma gtogs pas slob dpon du bkur bar 'gyur ro/ /lhag pa'i bsam pa dang sbyor ba mtshungs pa 'ga' yang med do/ /bsam gtan la sogs pa byang chub kyi phyogs dang mthun pa'i chos rnams bsgom pa'i rnam pas mngon du 'gyur te/gnas pa brgyad pa la ji lta ba bzhin du rnam par smin pas gnas pa ni ma yin no/ /de ltar zhugs pa de ni byang chub sems dpa'i ting nge 'dzin rnam par 'byed pa shin tu rnam par phye ba'i ting nge 'dzin la sogs pa ting nge 'dzin 'bum phrag bcu mngon par sgrub bo / /de dag thob pas nyan thos dang rang sangs rgyas kyi ting nge 'dzin gyi yul las yang dag par 'das par 'gyur ro//de de ltar lus dang ngag dang yid kyi las nyon mongs pa thams cad la dben pa rtogs par dka' ba/ rnam par rtog pa'i spyod pa thams cad dang bral bas gnas la sems can la lta ba dang / byang chub yongs su rdzogs par bya ba'i phyir gong du khyad par yongs su tshol ba la mngon par brtson pa yang mi gtong ngo //de'i lus dang ngag dang yid kyi las mtshan ma thams cad dang bral ba shin tu yongs su sbyangs pa mi skye ba'i chos la bzod pa snang bar gyur pa tshad med pa 'byung bar 'gyur ro/ /gnas pa 'di la ni rang gi blo'i yul yin pas nyan thos dang rang sangs rgyas kyi yul thams cad las yang dag par 'das pa yin te/de ma yin pa drug po dag la ni sangs rgyas kyi chos la lhag par dmigs pas yin no/ /gnas pa drug pa la ni byang chub sems dpa' 'gog pa la snyoms par 'jug go/ /'di la ni skad cig re re la snyoms par 'jug go//yang dag pa'i mtha' la gnas par byed/ 'gog pa yang mngon du mi byed pa gang yin pa 'di ni de'i shin tu rmad du byung ba'i chos bsam gyis mi khyab pa'o/ /de thabs dang ye shes mngon par sgrub pa de nyid kyi dbang du byas nas/ byang chub sems dpa'i spyod pa sems can thams cad dang thun mong ma yin la/'jig rten par yang snang zhing / de'i rang bzhin yang ma yin pa spyod de/ mdo nyid las ji skad 'byung ba bzhin no/ /de'i bsdus pa'i don ni bsod nams bya ba las brtsams pa dang / chung ma dang 'khor yongs su 'dzin pa dang mngon par grub pa'i khyad par 'dod pa yang dag par brtsams pa dang /rnam par thar pa gsum la gnas pa dang / theg pa dman pa la mos pa thabs kyis 'dul ba dang / 'dod pa yongs su spyod pa dang / 'dod pa'i khyad par don du gnyer ba dang / mu stegs can bzlog pa dang / gzhan gyi sems dang mthun par 'jug pa dang / skye bo'i tshogs chen po dang mthun par 'jug pa las brtsams pa'o/ /lhag ma ni snga ma bzhin no/ /de la bye brag ni 'di yod de/ dper na gser de nyid gser mgar mkhas pas nor bu rin po che byi dor byas pa thams cad kyis spras pa shin tu mdzes la de ma yin pa 'dzam bu'i gling pa'i rgyan thams cad kyis kyang mi 'phrogs pa de bzhin du/de'i dge ba'i rtsa ba de dag ches rnam par dag la nyan thos dang rang sangs rgyas thams cad kyi dge ba'i rtsa ba rnams dang / de ma yin pa gnas ches dma' ba la gnas pa'i byang chub sems dpa'i dge ba'i rtsa ba rnams kyis kyang mi 'phrogs pa yin no/ /dper na nyi ma'i 'od kyis ni 'dzam bu'i gling gi rlan phal cher yongs su skem par byed la/de ma yin pa'i 'od thams cad kyis kyang mi 'phrogs pa de bzhin du/ byang chub sems dpa' de'i shes rab kyi 'od kyis ni sems can rnams kyi nyon mongs pa'i dug thams cad skem par byed la/ snga ma bzhin du nyan thos la sogs pa'i shes rab kyi 'od rnams kyis kyang mi 'phrogs pa yin no//skye bas ni lha'i rgyal po dbang byed du 'gyur te/ nyan thos dang rang sangs rgyas kyi mngon par rtogs pa sgrub pa rnams la mkhas so/ /mthu ni bye ba khrag khrig 'bum gyi grangs su bstan par rig par bya ste/ mtshan ma med pa la gnas pa la rtsol ba dang bcas pa 'di ni thabs dang shes rab kyis mngon par bsgrubs pa'i lam gzhan brtsams pa'i khyad par 'grub pa la 'jug pa dang /de bzhin gshegs pa'i yul yang dag par skyed pa khong du chud pa la rgyun du sbyor ba dang / skad cig re re la byang chub kyi phyogs dang mthun pa'i chos thams cad yang dag par 'grub par byed pa dang /nyon mongs pa can dang nyon mongs pa can ma yin par rnam par gzhag pa dang / sbyor ba las byung ba'i spyod pa yongs su rdzogs par bsdus pa dang / bsam pa dag pa'i las la 'jug pa'i dbang du byas pa dang / 'jig rten pa'i bzo dang las la sogs pa thams cad yongs su rdzogs par byed pa dang /nyan thos dang rang sangs rgyas dang thun mong ma yin pa'i ting nge 'dzin dpag tu med pa 'thob pa dang / skad cig re re la 'gog pa la snyoms par 'jug pa dang / sems can thams cad dang thun mong ma yin pa'i 'jig rten pa'i spyad pa spyod pa dang /dge ba'i rtsa ba rnam par dag pa dang / skye ba dang mthu las mdor bstan par rig par bya'o/ /rgyas par ni snga ma bzhin du 'di lta ste/ sa ring du song ba las 'byung ba bzhin no/ /byang chub sems dpa'i sbyor ba las byung ba'i spyod pa yongs su rdzogs pas bsdus pa'i phyir ring du song ba zhes bya ste/ don de nyid kyis gnas pa yin par rig par bya'o/ /de la byang chub sems dpa' rnams kyi mtshan ma med pa la gnas pa lhun gyis grub pa gang zhe na/ 'di la byang chub sems dpa' gnas pa snga ma 'das ma thag pa la chos thams cad kyi don dam pa 'jug pa'i ye shes rnam pa bcu 'thob ste/ dus gsum du ci rigs par gzod ma nas ma byung ba dang /ma skyes pa dang / mtshan nyid med pa las brtsams pa dang / de ma yin pa'i rgyu'i dngos po 'byung ba med cing rnam par 'jig pa med pa las brtsams pa dang / don dam par brjod du med pa'i ngo bo nyid kyi dngos po la brjod pa mngon par 'du byed par snang ba'i ngo bo nyid mtshan nyid dang rgyu'i dngos po med pa dang /kun nas nyon mongs pa'i bdag nyid du 'jug pa yang med la/ ldog pa yang med pa las brtsams pa dang / yod pa'i dngos po brjod du med pa de la de ma shes pa log par mngon par zhen pa'i rgyu las byung ba'i kun nas nyon mongs pa thog ma dang / bar dang / tha ma'i dus thams cad du mnyam pa nyid las brtsams pa dang /de bzhin nyid la yang dag par zhugs pa rnam par mi rtog pa'i mnyam pa nyid kyis kun nas nyon mongs pa de bsal ba las brtsams pa ste/ de ltar de'i ye shes rnam pa bcu che ba'i phyir dang / yongs su rdzogs pa'i phyir gnas pa brgyad pa yongs su dag pa dang /'di la 'jug ste/ 'di la gnas pa ni mi skye ba'i chos la byang chub sems dpa'i bzod pa mchog shin tu rnam par dag pa 'thob par 'gyur ro/ /de yang gang zhe na byang chub sems dpa' des yongs su tshol ba rnam pa bzhis chos thams cad yongs su btsal nas/ gang gi tshe yang dag pa ji lta ba bzhin du yongs su shes pa bzhis yongs su shes pa de'i tshe/log par rtog pa la mngon par zhen pa thams cad bsal ba na/ tshe 'di la yang chos thams cad kyi kun nas nyon mongs pa thams cad mi skye ba dang mthun par mthong la/ tshe phyi ma la sngon gyi log par rnam par rtog pa la mngon par zhen pa'i rgyu las yang dag par skyes pa'i chos de dag nyid ma lus par thams cad kyi thams cad du mi skye bar mthong ngo //yongs su tshol ba bzhi po de dag dang / yang dag pa ji lta ba bzhin du yongs su shes pa bzhi po dag ni de kho na'i don gyi le'u las sngar ji skad bstan pa bzhin te/ de dag mos pas spyod pa la gnas pa yan chad mtshan ma med pa la gnas pa rtsol ba dang bcas pa'i bar du ni shin tu rnam par dag pa ma yin no//gnas pa 'di la ni yongs su dag pa yin te/ de bas na byang chub sems dpa' de ni mi skye ba'i chos la bzod pa thob pa zhes bya'o/ /des bzod pa de thob pas byang chub sems dpa' gnas pa zab mo thob pa yin te/mtshan ma med pa la gnas pa snga ma la de'i skyon rnam pa bzhi po gang yin pa de dag kyang spangs pa yin te/ rtsol ba'i mngon par 'du shes pa gang yin pa de yang spangs pa yin/ rnam par dag pa'i gnas pa gong ma la snying las su gyur pa yang spangs pa yin/ rnam pa thams cad du sems can gyi don bya nus pa la snying las su gyur pa yang spangs pa yin/'du shes phra mo kun du 'byung ba yang spangs pa yin te/ de lta bas na gnas pa de shin tu yongs su dag pa zhes bya'o/ /zab mo'i gnas pa de la mngon par dga' ba de'i chos kyi sgo'i rgyun de la de bzhin gshegs pas bskul ba dang /yang dag par 'dzin du 'jug pa dang / mngon par sgrub pa'i sgo dang / ye shes dang / mngon par shes pa'i las dpag tu med pa de nye bar bsgrub ste/ de ltar bskul bas lus rnam par dbye ba shes pa tshad med pa mngon par sgrub pa dang / dbang bcu yang thob par 'gyur te/ rgyas par mdo nyid las ji skad 'byung ba bzhin du rig par bya'o//dbang thob pa de ni ji srid du 'dod pa de srid du gnas par 'gyur ro/ /bsam gtan dang / rnam par thar pa la sogs pa sems kyi gnas pa gang gis gnas par 'dod pa des gnas par byed do/ /bsam pa tsam gyi mod la de'i kha zas la sogs pa yo byad thams cad 'grub par 'gyur ro//bzo dang las kyi gnas thams cad la yang de ji ltar 'dod pa bzhin du spyod par 'gyur ro/ /skye bar 'gyur ba'i las thams cad dang / skye ba'i gnas thams cad la yang de dga' mgur skye bar 'gyur ro/ /rdzu 'phrul gyi bya ba thams cad kyang / ji ltar 'dod pa bzhin du byed do//de'i smon lam thams cad ji ltar 'dod pa bzhin du 'grub po/ /dngos po gang dang gang la ji ltar mos pa de yang de kho na bzhin du 'gyur gyi gzhan du ma yin no/ /shes bya gang shes par 'dod pa de la yang ji lta ba bzhin du shes so/ /ming gi tshogs dang / tshig gi tshogs dang / yi ge'i tshogs rnams kyang ji ltar 'dod pa bzhin du thob par 'gyur ro/ /chos thams cad yang dag par rnam par gzhag pa la yang mkhas te/ byang chub sems dpa' de ltar dbang thob pa las byung ba'i phan yon gzhan ni rgyas par mdo nyid las 'byung ba bzhin du rig par bya'o//sangs rgyas mthong ba rags pa yang spangs nas/ rtag tu rgyun mi 'chad par sangs rgyas mthong ba dang mi 'bral lo/ /lhag ma dge ba'i rtsa ba rnam par dag pa ni gser gyi dpe dang 'od kyi dpe dang bcas te/ mdo las ji skad 'byung ba bzhin du rig par bya'o/ /gnas pa de la byang chub sems dpa' de'i skye ba dang /mthu'i khyad par yang mdo nyid las ji skad 'byung ba bzhin du rig par bya'o/ /mtshan ma med pa la gnas pa lhun gyis grub pa 'di ni don dam pa la 'jug pa'i ye shes 'grub pa la 'jug pa dang / mi skye ba'i chos la bzod pa thob pa dang / byang chub sems dpa'i gnas pa skyon thams cad dang bral ba zab pa thob pa dang /chos kyi sgo'i rgyun las sangs rgyas rnams kyis mngon par sgrub pa'i sgo dang / ye shes dang mngon par shes pa'i las dpag tu med pa nye bar sgrub pa dang / lus rnam par dbye ba shes pa tshad med pa la 'jug pa dang dbang thob pa dang / dbang gi phan yon so sor nyams su myong ba dang /dge ba'i rtsa ba rnam par dag pa dang / skye ba dang / mthu las mdor bstan par rig par bya'o/ /rgyas par bstan pa ni 'di lta ste/ mdo'i sa mi g.yo ba las ji skad bstan pa bzhin te/ snga ma'i mngon par 'du byed pa dang bral ba'i phyir/ sa de la sems de lhun gyis grub cing mi g.yo bar 'jug pa'i lam la yang dag par zhugs pa 'byung ngo //de lta bas nas de la mi g.yo ba zhes bya ste/ don de nyid kyis 'di gnas pa yin par blta bar bya'o/ /de la byang chub sems dpa' rnams kyi so so yang dag par rig pa la gnas pa gang zhe na/ 'di la byang chub sems dpa' ni gnas pa zab mo des kyang chog par mi 'dzin te/gong du ye shes khyad par du 'phags pa'i rjes su 'gro la/ chos shes pa mngon par 'du byed pa gang gis byang chub sems dpas gzhan dag la chos kyi rnam pa thams cad bstan par bya ba dang / chos bstan pa'i bya ba gang yin pa de dag thams cad kyang yang dag pa ji lta ba bzhin du rab tu shes so//de la chos yang dag par bstan pa'i bya ba ni 'di yin te/ thibs po rgyu ba dag la gang dag kun nas nyon mongs par 'gyur ba dang / rnam par dag par 'gyur ba dang / gang gis kun nas nyon mongs par 'gyur ba dang / gang gis rnam par dag par 'gyur ba dang /kun nas nyon mongs pa dang / rnam par byang ba gang yin pa dang / de'i gnas gcig tu ma nges pa gang yin pa dang / de'i gcig tu nges pa dang gcig tu ma nges pa gang yin pa de yang dag pa ji lta ba bzhin du shes so/ /de ltar chos bstan pa la mkhas pa dang / bstan pa'i bya ba la mkhas pa dang /gzungs dpag tu med pa thob pa dang / tshig gi yan lag rnam par dbye ba thams cad la mkhas pa dang / spobs pa mi zad pa'i rnam pa thams cad du chos smra ba chen po nyid gang yin pa dang / chos 'dzin pa dang / len nus pa ji lta bu dang ldan pa dang / byang chub sems dpa'i so so yang dag par rig pas mngon par sgrub pa'i tshig gang yin pa dang /chos kyi stan ji lta bu la 'dug pa dang / gang du gang dag la chos ston pa dang / chos kyi sgo ji snyed pa dang / gang gis sems can go bar byed cing / mgu bar byed pa'i bya ba la yang dag par 'dzud nus pa dang ldan pa de dag thams cad ni rgyas par mdo nyid las bstan pa bzhin du rig par bya'o//dge ba'i rtsa ba rnam par dag pa dang / skye ba dang / mthu'i khyad par yang mdo nyid las 'byung ba bzhin du rig par bya'o/ /byang chub sems dpa' rnams kyi so so yang dag par rig pa la gnas pa 'di ni zhi ba'i rnam par thar pas chog par mi 'dzin pa la 'jug pa dang /chos yang dag par bstan pa'i mngon par 'du byed pa shes pa dang / de'i bya ba shes pa dang / bsam gyis mi khyab pa'i chos smra ba chen po nyid 'thob pa dang / dge ba'i rtsa ba rnam par dag pa dang / skye ba dang mthu las mdor bstan par rig par bya'o/ /rgyas par bstan pa ni 'di lta ste/mdo nyid las legs pa'i blo gros las 'byung ba bzhin te/ sems can thams cad la phan pa dang bde bar bya ba'i phyir byang chub sems dpa'i so so yang dag par rig pa'i blo gros chen po yongs su dag pas chos yang dag par bstan pa'i skabs yin pas na/ sa de la legs pa'i blo gros zhes bya ste/don de nyid kyis 'di ni gnas pa yin par blta bar bya'o/ /de la byang chub sems dpa' rnams kyi gnas pa mchog gang zhe na/ 'di la byang chub sems dpa' so so yang dag par rig pa'i gnas pa rnam pa thams cad kyis yongs su dag pa la chos kyi rgyal por 'os shing chos la dbang bskur ba thob pa dang /ting nge 'dzin dri ma med pa la sogs pa dpag tu med pa thob cing / de'i bya ba byed pa dang / thams cad mkhyen pa'i ye shes kyi khyad par la dbang bskur ba'i tha ma'i ting nge 'dzin mngon du gyur pas sangs rgyas thams cad las de dang 'tsham pa'i stan dang lus dang 'khor thob pa dang /bdag nyid kyi 'od zer 'gro ba dang / phyir 'ong ba rnams kyis thams cad mkhyen pa'i ye shes rnam pa thams cad dang ldan par dbang bskur ba thob pa dang / dbang bskur nas kyang 'dul ba thams cad yang dag par sdud cing / de dag rnam par thar par bya ba'i thabs sangs rgyas kyi mdzad pa shes pa dang /rnam par thar pa dang / ting nge 'dzin dang / gzungs dang / mngon par shes pa dpag tu med pa thob pa dang / de'i dbang gis dran pa dang / shes pa chen pos mngon par sgrub pa'i nges pa'i tshig rnam par gzhag pa dang / mngon par shes pa chen po mngon par sgrub pa dang /dge ba'i rtsa ba rnam par dag pa dang / skye ba dang / mthu'i khyad par las gnas pa mchog mdor bstan par rig par bya'o/ /rgyas par bstan pa ni 'di lta ste/ mdo nyid kyi byang chub sems dpa'i sa chos kyi sprin las 'byung ba bzhin no/ /byang chub sems dpa'i lam yongs su rdzogs shing /byang chub kyi tshogs shin tu yongs su rdzogs pa'i byang chub sems dpa' de ni de bzhin gshegs pa rnams las chos kyi sprin lta bu shin tu rgya che zhing / de ma yin pa'i sems can thams cad kyis bzod par dka' ba'i dam pa'i chos kyi char yang dag par nod do/ / bdag nyid byang chub mngon par rdzogs par sangs rgyas pa dang / byang chub mngon par rdzogs par sangs rgyas pa na yang sprin chen po lta bu'i dam pa'i chos kyi char dpe med pas sems can dpag tu med pa dag gi nyon mongs pa'i rdul rnams rab tu zhi bar byed do/ /sa de la gnas nas dge ba'i rtsa ba'i lo tog rnam pa sna tshogs kyang skyed par byed/rnam par 'phel bar byed/ yongs su smin par byed do/ /de lta bas na sa de chos kyi sprin ces bya ste/ don de nyid kyis gnas pa mchog yin par blta'o/ /gnas pa gong ma gong ma rnams su yan lag gang dag bstan pa de dag ni gnas pa snga ma rnams la thams cad kyi thams cad du med pa ma yin mod kyi/'on kyang chung ba'i phyir grangs su mi brtsi'o/ /de dag nyid 'bring dang che ba'i phyir ni de ma yin pa sa gong ma 'thob pa 'grub pa rnam par gzhag par rig par bya'o/ /de la gnas pa re re yang bskal pa chen po bye ba 'bum phrag du ma'am/yang na de bas kyang ches mang bas 'thob cing 'grub par 'gyur ro/ /gnas pa de dag thams cad ni bskal pa chen po grangs med pa gsum gyis yang dag par 'grub ste/ bskal pa chen po grangs med pa dang pos ni mos pas spyod pa la gnas pa las yang dag par 'das nas rab tu dga' ba la gnas pa 'thob ste/de yang rtag tu 'bad pas 'thob kyi mi 'bad pas ni ma yin no/ /bskal pa chen po grangs med pa gnyis pas ni rab tu dga' ba la gnas pa nas/ mtshan ma med pa la gnas pa la rtsol ba dang bcas pa'i bar las 'das te/ mtshan ma med pa la gnas pa lhun gyis grub pa thob par 'gyur ro//de ni nges pa kho na ste/ 'di ltar bsam pa dag pa'i byang chub sems dpa' de ni nges par 'bad pa'i phyir ro/ /bskal pa chen po grangs med pa'i gsum pas ni mtshan ma med pa lhun gyis grub pa dang / so so yang dag par rig pa la gnas pa las yang dag par 'das nas byang chub sems dpa'i gnas pa mchog thob par 'gyur ro//de la bskal pa grangs med pa ni gnyis su rig par bya ste/ bskal pa chen po gang yin pa de yang nyin mtshan dang / zla ba dang / zla ba phyed du bgrang ba'i tshul gyis dus dpag tu med pa'i phyir/grangs med pa zhes bya'o/ /bskal pa chen po de dag gi bgrang ba'i tshul gyis bgrang ba thams cad las 'das pa'i grangs gang yin pa de yang grangs med pa zhes bya ste/ bskal pa grangs med pa snga ma shos kyis bskal pa grangs med pa mi nyung ba zhig gis byang chub thob par 'gyur ro/ / bskal pa grangs med pa phyi ma shos kyis ni gsum kho nas 'thob kyi lhag pas ni ma yin te/ su brtson 'grus rtsom pa chen po'i yang chen pos sbyor ba de'i nang na la la ni bar gyi bskal pa mang po zhig 'dums par byed do/ /la la ni bskal pa chen po dag gi bar du 'dums par byed kyi grangs med pa 'dums par byed pa ni 'ga' yang med par rig par bya'o//byang chub sems dpa'i gnas pa bcu gnyis po de dag gis bskal pa grangs med pa gsum po de dag gi nyon mongs pa'i sgrib pa'i phyogs dang mthun pa'i gnas ngan len spong bar 'gyur ro/ /shes bya'i phyogs dang mthun pa'i gnas ngan len spong bar 'gyur ro// de la gnas pa gsum po de dag la ni nyon mongs pa'i sgrib pa'i phyogs dang mthun pa'i gnas ngan len spong bar rig par bya ste/ rab tu dga' ba la ni ngan song ba'i nyon mongs pa'i phyogs dang mthun pa thams cad kyi thams cad du spong ngo / /kun du spyod pa las ni nyon mongs pa'i phyogs dang mthun pa'i chen po dang 'bring thams cad do//mtshan ma med pa lhun gyis grub pa la gnas pa la ni mi skye ba'i chos la bzod pa rnam par dag pa la bgegs byed pa'i nyon mongs pa'i phyogs dang mthun pa'i gnas ngan len thams cad kyi thams cad du spong bar rig par bya'o/ / kun du spyod pa la ni nyon mongs pa thams cad do/ /gnas pa mchog la ni nyon mongs pa dang / bag chags dang / bag la nyal gyi sgrib pa thams cad spong bar rig par bya ste/ de yang de bzhin gshegs pa'i gnas pa la 'jug pa'o/ /shes bya'i sgrib pa'i phyogs dang mthun pa'i gnas ngan len ni rnam pa gsum du rig par bya ste/lpags shun la yod pa dang / spri la yod pa dang / snying po la yod pa lta bu'o/ /de la lpags shun la yod pa lta bu ni rab tu dga' ba'i gnas pa la spong ngo / /spri la yod pa lta bu ni mtshan ma med pa lhun gyis grub pa la spong ngo / /snying po la yod pa lta bu ni de bzhin gshegs pa'i gnas pa la spong ste/sgrib pa thams cad rnam par dag pa'i ye shes nyid kyang yin no/ /gnas pa gsum po de dag la nyon mongs pa dang / shes bya'i sgrib pa spong ba de'i tshogs su gyur pa ni go rims bzhin du de ma yin pa'i gnas pa rnams yin no/ /gnas pa bcu gsum po de dag la rnam par dag pa ni mdor bsdus na bcu gcig tu rig par bya ste/dang po la ni rigs rnam par dag go/ /gnyis pa la ni dad pas mos pa rnam par dag go/ /gsum pa la ni lhag pa'i bsam pa rnam par dag go/ /bzhi pa la ni tshul khrims rnam par dag go/ /lnga pa la ni sems rnam par dag go//drug pa dang bdun pa dang brgyad pa la ni yang dag pa'i ye shes la kun du rtsom pa rnam par dag go/ /dgu pa la ni sbyor ba las byung ba'i spyod pa yongs su rdzogs pa rnam par dag go/ /bcu pa la ni de kho na shes pa'i mngon par shes pa sgrub pa rnam par dag go/ /bcu gcig pa la ni de'i don yang dag par gzhan la bstan pa'i so so yang dag par rig pa rnam par dag go//bcu gnyis pa la ni rnam pa thams cad du shes bya thams cad kyi rjes su 'jug pa'i ye shes rnam par dag go/ /bcu gsum pa ste/ de bzhin gshegs pa'i gnas pa la ni nyon mongs pa dang / shes bya'i sgrib pa bag chags dang bcas pa thams cad rnam par dag go/ /gnas pa bcu gsum po 'di dag ni sngar bstan pa'i theg pa chen po sdud pa'i chos brgyad po dag tu 'dus par rig par bya'o/ /gnas pa dang po dang gnyis pa la ni dad pa skyes shing mos par gyur pa byang chub sems dpa'i sde snod nyan cing sems so//gnas pa gsum po la ni bsgom pa'i rnam pa thob pa sngon du 'gro ba'i lhag pa'i bsam pa nyams su len to/ /de las gzhan pa'i gnas pa rnams la ni mtshan ma med pa'i rtsol ba dang bcas pa'i bar du sgom pa mang du byed do/ /de'i gong ma byang chub sems dpa'i gnas pa spyod pa yongs su dag pas bsdus pa gsum po dag la ni bsgom pa'i 'bras bu yongs su 'grub po//de bzhin gshegs pa'i gnas pa la ni gtan du nges par 'byung bar rig par bya'o/ /byang chub sems dpa'i gnas pa bcu gnyis po 'di dag ni go rims bzhin du nyan thos kyi gnas pa dang 'dra bar rig par bya ste/nyan thos kyi rang gi rigs la gnas pa ji lta ba de bzhin du ni 'di'i gnas pa dang po yin par rig par bya'o/ /de'i yang dag par skyon med pa la 'jug pa'i sbyor ba'i gnas pa ji lta ba de bzhin du ni 'di'i gnas pa gnyis pa'o/ /de'i skyon med pa la 'jug pa'i gnas pa ji lta ba de bzhin du ni 'di'i gnas pa gsum pa'o//de'i shes nas dad pa thob pa'i gong du zag pa zad par bya ba'i phyir 'phags pa dgyes pa'i lhag pa'i tshul khrims la gnas pa ji lta ba de bzhin du ni 'di'i gnas pa bzhi pa'o/ /de'i lhag pa'i tshul khrims la brten nas/ lhag pa'i sems kyi bslab pa la gnas pa ji lta ba de bzhin du ni 'di'i gnas pa lnga pa'o//de'i ji ltar thob pa'i bden pa shes pa'i lhag pa'i shes rab kyi bslab pa la gnas pa ji lta ba de bzhin du ni 'di'i gnas pa drug pa dang bdun pa dang brgyad par rig par bya'o/ /de'i shes bya shin tu brtags nas mtshan ma med pa'i ting nge 'dzin la sbyor ba la gnas pa ji lta ba de bzhin du ni 'di'i gnas pa dgu pa'o//de'i mtshan ma med pa la gnas pa yongs su grub pa ji lta ba de bzhin du ni 'di'i gnas pa bcu pa'o/ /de'i langs nas rnam par grol ba'i skye mched la gnas pa ji lta ba de bzhin du ni 'di'i gnas pa bcu gcig pa'o//de'i rnam pa thams cad du dgra bcom pa nyid kyi gnas pa ji lta ba de bzhin du ni 'di'i gnas pa bcu gnyis pa yin par rig par bya'o/ /byang chub sems dpa'i sa'i gzhi'i mthun pa'i chos kyi rnal 'byor gyi gnas las/ gnas pa'i le'u ste bzhi pa'o// //rnal 'byor gyi gnas gnyis pa rdzogs s+ho// //gnas pa thams cad la byang chub sems dpa' thams cad kyi byang chub sems dpa' rnams kyi skye ba sems can thams cad la phan pa dang / bde ba'i phyir kha na ma tho ba med pa thams cad ni mdor bsdu na rnam pa lnga ste/ gnod pa yang dag par zhi bar byed pa dang / de dang skal ba mnyam par mthun par 'jug pa dang chen por skye ba dang /bdag por skye ba dang / tha ma'i skye ba'o/ /de la gnod pa yang dag par zhi bar byed pa'i skye ba gang zhe na/ 'di la ni byang chub sems dpa' ni mu ges phongs shing gnod pa chen po byung ba'i dus dag tu smon lam btab nas/sems can rnams tshegs chung ngus 'tsho bar 'gyur ba'i rgyur/ nya chen po la sogs pa'i skye gnas rnams su lus chen po dag tu skye bar 'gyur te/ der skyes pa'i 'gro ba mtha' dag rang gi shas tshim par byed do/ /sems can nad kyis gnod pa rnams la nad de dag rab tu zhi bar bya ba'i phyir smon lam btab nas/rig sngags 'chang grub pa'i sman pa chen po'i lus yongs su 'dzin par byed do/ /pha rol gyi dmag tshogs kyis shin tu gnod par gyur pa'i sems can dag la ni chos bzhin du snyoms par thabs mkhas pas pha rol gyi dmag tshogs kyi gnod pa rab tu zhi bar bya ba'i phyir/stobs dang ldan pa'i rgyal por 'gyur ro/ /sems can phan tshun mi mthun pa rnams la ni sdums bya ba dang / 'khon gyi bsam pa spang ba'i phyir tshig brtsan par 'gyur ro/ /rgyal po 'bangs rnams la chad pa dang / bcing ba dang / gnod pa sna tshogs byed pa la zhugs pa dag la ni/sems can gyi gnod pa de dag nyid bsal ba'i phyir/ de lta bu'i rgyal po'i pho brang dag tu skye ste/ rgyal po chos dang ldan zhing sems can la snying brtse ba can du 'gyur ro/ /sems can gang lha'i gnas 'ba' zhig la mos nas log par lta zhing sdig pa byed pa dag la ni/de dag la snying brtse bas log par lta ba dang / nyes par spyod pa spang ba'i phyir/ lha'i gnas de nyid du skye bar 'gyur te/ smon lam dang dbang gi stobs kyis snying brtse ba'i sngon du 'gro ba 'di ni dpag tu med par rig par bya ste/ rgyas par bstan pa ni skye gnas rnam pa sna tshogs su de dang de dag tu skye ba ste/'di ni de'i mdor bstan pa'o/ /de dang skal ba mnyam par mthun par 'jug pa'i skye ba gang zhe na/ 'di la byang chub sems dpa' ni smon lam gyis sam/ dbang thob pas sems can dud 'gro'i skye gnas rnam pa sna tshogs su skyes pa rnams dang / lha dang / klu dang / gnod sbyin dang /lha ma yin la sogs pa gcig la gcig 'khu zhing mi mthun pa rnams dang / de bzhin du bram ze log par lta ba rnams dang / de bzhin du nyes par spyad pa spyod cing des 'tshol/ der mngon par dga' ba rnams dang / de bzhin du 'dod pa rnams la ha cang lhag par zhen cing 'dod pa la mos pa rnams la nyes pa de bzlog pa'i phyir/sems can de dag dang skal ba 'dra bar gtso bor skye bar 'gyur te/ de gtso bor gyur nas/ sems can de dag gang kun du spyod pa de ni de kun du mi spyod do/ /de dag dge ba gang kun du mi spyod pa de ni de kun du spyod de / dge ba kun du spyad par bya ba'i phyir/ yang de dag la chos ston te de dag kyang chos bstan pa de dang /mi mthun par kun du spyod pa de dang / thabs mkhas pa des / nyes pa de dag las ldog par 'gyur ro/ /skye ba 'di yang dpag tu med de snga ma bzhin du rig par bya'o/ /de la chen por skye ba gang zhe na/ 'di la byang chub sems dpa' ni skye ba na rang bzhin gyis 'jig rten thams cad khyad par du 'phags pa'i tshe dang kha dog dang rigs dang /dbang phyug la sogs pa'i rnam par smin pa mngon par 'grub par 'gyur te/ rnam par smin pa des kyang bdag dang gzhan gyi don gyi le'u las ji skad bstan pa'i las byed do/ /byang chub sems dpa'i skye ba de yang dpag tu med de/skye gnas de dang de dag tu skye bar rig par bya'o/ /de la byang chub sems dpa'i bdag por skye ba gang zhe na/ byang chub sems dpa'i rab tu dga' ba la gnas pa dang po nas bzung ste/ gnas pa bcu pa'i bar dag gi skye ba brjod pa 'dzam bu gling gi dbang phyug nas bzung ste/ 'og min las 'das nas skye ba'i gnas thams cad las khyad par du 'phags pa gang du gnas pa mchog thob pa kho na'i byang chub sems dpa' rnams skye bar 'gyur ba dbang phyug chen po'i bar de dag ni bdag por skye ba zhes bya ste/ de ni de dag gi las kyi dbang gis grub pa yin no/ /de la byang chub sems dpa'i tha ma'i skye ba gang zhe na/skye ba gang du byang chub sems dpa'i byang chub kyi phyogs kyi tshogs yongs su rdzogs nas/ mdun na 'don gyi khyim mam/ rgyal po'i pho brang du skyes te/ bla na med pa yang dag par rdzogs pa'i byang chub mngon par rdzogs par 'tshang rgya zhing / sangs rgyas kyi phrin las thams cad kyang mdzad pa 'di ni tha ma'i skye ba yin te/phyi ma zhes bya'o/ /byang chub sems dpa' 'das pa dang ma 'ongs pa dang / da ltar byung ba'i dus dag tu dge ba dang / bzang ba dang shis pa'i skye ba rnams su skyes pa dang / skye bar 'gyur ba dang / skye ba gang su dag kyang rung ba de dag thams cad kyang skye ba lnga po 'di dag tu skye bar zad de/ 'di las gong na yang med do/ /'di las lhag pa ya med do/ /byis pa'i sar skye ba ni ma gtogs te/ 'di ltar skye ba lnga po 'di dag ni/ byang chub sems dpa' mkhas pa rnams kyi yin par 'dod pa'i phyir ro//skye ba de dag ni byang chub chen po'i 'bras bu can yin te/ de dag la brten nas byang chub sems dpa' rnams myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /byang chub sems dpa'i sa'i gzhi'i rnal 'byor gyi gnas tha ma las skye ba'i le'u ste dang po'o// //bam po nyi shu pa/ de la byang chub sems dpa' rnams kyi gnas pa la gnas pa'i byang chub sems dpa'i spyod pa thams cad la ni mdor bsdu na/ sems can thams cad yang dag par yongs su 'dzin pa rnam pa drug yod par rig par bya ste/sems can thams cad cig car yongs su 'dzin pa dang / bdag pos yongs su 'dzin pa dang / 'dzin pas yongs su 'dzin pa dang / yun ring po dang / yun ring po ma yin pa dang / yongs su 'dzin pa tha ma'o/ /de la byang chub sems dpas ni thog ma sems bskyed pa'i tshe nyid du sems can gyi khams thams cad chung ma'i tshul du yongs su bzung ste/bdag gis 'di dag la ci nus ci lcogs kyis rnam pa thams cad du phan pa dang bde ba bsgrub par bya'o snyam ste/ de kho na nyid bzhin du yang byed pa 'di ni byang chub sems dpa' sems can thams cad cig car yongs su 'dzin pa yin no//bdag por gyur pa na pha ma dang / bu dang chung ma dang / bran dang bran mo dang / las byed pa dang / zho shas 'tsho ba yongs su 'dzin pa dang / rgyal por gyur pa na 'bangs la byang chub sems dpa'i bdag pos yongs su 'dzin pa'i 'du shes 'byung ste/ de yang yongs su 'dzin pa de la yongs su 'dzin pa dang 'tsham pa'i bya ba byang chub sems dpa'i tshul dang mthun pas 'jug go//pha ma ni thabs rnam pa sna tshogs kyis dge ba la yang dag par 'dzud par byed do/ /thabs sna tshogs kyis dus dus su mchod pa dang / rim gro yang byed do/ /byas pa gzo ba dang byas pa tshor bar yang byed do//pha ma'i sems dang mthun par yang byed do/ /chos kyi don dag la yang de'i dbang du 'gyur bar yang byed do/ /bu dang chung ma dang / bran dang bran mo la sogs pa la ni dus dus su zas dang gos la sogs pa legs par sbyin par byed do/ /de dag la las kyi mtha' rnams kyis gnod par mi byed do//de dag ni nyes pa yang bzod par byed do/ /na ba rnams la yang legs par nad g.yog byed do/ /de dag dge ba la yang dag par 'dzud par byed do/ /dus dus su lhag par bya dga' sbyin pa dang / tshig snyan pas tshig 'jam par byed do/ /de la bran dang bran mo'i 'du shes kyang mi skyed de/de dag la bdag nyid dang 'dra ba'am lhag par yongs su skyong bar byed do/ /byang chub sems dpa' rgyal por gyur pas ni rgyal srid dang 'bangs la chad pa med pa dang / mtshon cha med pas rgyal srid byed de / chos bzhin du longs spyod sgrub par byed do/ / rgyud kyis byung ba'i rgyal srid la spyod par byed kyi pha rol gyi yul 'khor gyi tshom du mthus 'phrog par mi byed do/ /ci nus ci lcogs kyis sems can rnams sdig pa las zlog par byed de / 'bangs rnams kyi pha dang 'dra ba yin no/ /sems can gzhan dag la yang bgo bsha' byed pa'i ngang tshul can yin na/bdag gi tshal za ba rnams la lta ci smos/ mi 'khu ba dang bden par smra ba yin te/ bsad pa dang bcing ba dang chad pas gcod pa dang / gtub pa dang brdeg pa la sogs pa sems can la gnod pa rnams rnam par spangs pa yin no/ /de la tshogs yang dag par sdud pa ni byang chub sems dpa'i 'dzin pas yongs su 'dzin pa zhes bya'o//de ni rgyu gnyis kyis 'khor legs par yongs su 'dzin par byed de / zang zing med pa'i sems kyis yongs su 'dzin pa dang / rang gi don la legs par 'dzud par byed de/ log pa'i sbyor bas slu bar mi byed pa'o/ /yongs su 'dzin pa thams cad la yang sems snyoms pa yin te/phyogs 'dzin par mi byed do/ /de dag la chos kyi ser sna yang mi byed la slob dpon gyi dpe mkhyud kyang mi byed do/ /de dag las rim gro dang bsnyen bkur byed par yang mi re la/ dge ba 'dod pa'i phyir rang byed pa la yang de dag nyid kyi bsod nams kyi tshogs sogs su gzhug pa'i phyir zlog par mi byed do//dus la bab na bdag nyid de dag la rim gro dang / bsnyen bkur yang byed do/ /de dag gis ma rtogs pa'i don yang rtogs par byed la/ rtogs pa yang gsal bar byed do/ /the tshom skyes so cog kyang sel bar byed do//'gyod pa yang sel bar byed de / don zab mo'i tshig kyang shes rab kyis rtogs par byas nas/ dus dus su ston par byed do/ /sdug bsngal ba dang bde ba yang de dag dang mtshungs par byed do/ /bdag nyid las de dag gis zang zing thob par bya ba'i phyir yang lhag pa'i don du sgrub pa dang ldan no//dus dus su de rnams kyi nyes pa yang legs par gleng bar byed de / dus dus su rigs par smod par byed do/ /de dag na ba'am mi dga' bas thebs na yang nad zhi bar bya ba dang / yid mi dga' ba bsal ba'i phyir rnam pa thams cad du yal bar mi 'dor ro//de dag gzugs dang dran pa dang / brtson 'grus dang / shes pa la sogs pas dman pa la yang brnyas par mi byed do/ /dus dus su de dag la skyo ba dang du blangs te/ rigs pa'i tshul gyis chos ston par byed do/ /dus dus su de dag la dmigs pa'i yang dag pa'i gdams ngag kyang sbyin par byed do//de bzhin du 'khor rjes su bsrung bar bya ba'i phyir dang / bdag nyid khyad par du 'gro bar bya ba'i phyir dkrugs pa yang bzod cing 'khrugs par mi 'gyur ro/ /de dag dang tshul dang kun du spyod pa mtshungs pa'am/ lhag par byed de dman par yang mi byed do/ / rnyed pa dang bkur sti la yang chags par mi byed do / /snying rje dang ldan pa yin te/ rgod bag med cing 'phyar ba ma yin la/ tshul khrims dang lta ba dang spyod pa dang 'tsho ba phun sum tshogs pa yin no/ /bzhin gyi mdangs ston cing khro gnyer med la/ nges pa dang snyan par smra ba dang / gsong por smra ba dang /'dzum pa sngon du gtong ba yin no/ /dge ba'i phyogs la rtag tu rgyun mi 'chad par brtson te/ bag med pa dang / le lo dang bral ba yin no/ /byang chub sems dpa' ni dus thams cad du 'khor yongs su 'dzin par mi byed do/ /mi 'dzin par yang mi byed do/ /gzhan du yang mi byed do//de la sems can gang dag yongs su smin pa chung ngu la gnas pa de dag ni byang chub sems dpa'i yun ring por 'dzin pa zhes bya ste/ yun ring mo zhig gis rnam par dag par gyur pa'i skal ba can yin pa'i phyir ro/ /gang dag yongs su smin pa 'bring la gnas pa de dag ni yun ring po ma yin par 'dzin pa zhes bya ste/ring por mi thogs par rnam par dag par 'gyur ba'i skal ba can yin pa'i phyir ro/ /sems can gang dag yongs su smin pa chen po la gnas pa de dag ni byang chub sems dpa'i 'dzin pa'i tha ma zhes bya ste/ tshe 'di nyid la rnam par dag par 'gyur ba'i skal ba can yin pa'i phyir ro//de ltar na rnam pa drug po 'di dag ni byang chub sems dpa' rnams kyi sems can legs par yongs su 'dzin pa yin te/ yongs su 'dzin pa des 'das pa dang / ma 'ongs pa dang / da ltar byung ba'i byang chub sems dpa' rnams kyis sems can rnams yongs su gzung ngo / / yongs su 'dzin par 'gyur ro/ /yongs su 'dzin par byed de/ de las gong na yang med do/ /de las lhag pa yang med do/ /de ltar sems can legs par yongs su 'dzin pa la zhugs pa'i byang chub sems dpa' rnams ni gnod cing nyam nga ba bcu gnyis dang phrad par 'gyur bar rig par bya ste/ de dag la byang chub sems dpa' mkhas par bya'o/ /sems can 'gal bar gnas pa rnams la yang na ni gnod pa bya dgos yang na ni yal bar 'dor dgos pa ni byang chub sems dpa'i gnod cing nyam nga ba dang phrad pa yin no/ /sems can la sbyor ba drag po yang kun du spyod la/ bdag gi bsam pa'i nyon mongs pa yang srung bar byed pa ni gnod cing nyam nga ba dang phrad pa yin no//sbyin par bya ba'i chos ni nyung ngu zhig yod la/ slong ba po ni mang po zhig slong du 'ongs pa ni gnod cing nyam nga ba dang phrad pa yin no/ /de ni gcig pu yin la sems can mang po zhig gis bya ba rnam pa sna tshogs byung ba la grogs bya bar bcol ba ni gnod cing nyam nga ba dang phrad pa yin no//sems las su mi rung zhing / bag med pa'i gnas 'jig rten pa'i snyoms par 'jug pa dge ba dang / snyoms par 'jug pa'i 'bras bu len pa / lha'i 'jig rten du skye ba la sems las su mi rung ba ni gnod cing nyam nga ba dang phrad pa yin no//sems can gyi don bya bar 'dod la/ sems can gyi don bya bar mi nus pa 'di gnod cing nyam nga ba dang phrad pa yin no/ /sems can blun po dang / g.yon can dang / dmu rgod rnams la chos bstan ba'am/ yal bar 'dor ba ni gnod cing nyam nga ba dang phrad pa yin no//'khor ba la rtag tu nyes par yang lta la/ 'khor ba gtong bar yang mi byed pa ni gnod cing nyam nga ba dang phrad pa yin no/ /lhag pa'i bsam pa rnam par ma dag cing dran pa nyams bzhin du 'chi ba ni gnod cing nyam nga ba dang phrad pa yin no/ / bsam pa rnam par ma dag bzhin du gzhan dag gis dam pa mchog tu sdug pa'i dngos po slong ba ni gnod cing nyam nga ba dang phrad pa yin no//sems can bsam pa tha dad pa sna tshogs can dang mos pa sna tshogs can dag la brda sprad par bya ba 'am/ yal bar 'dor ba ni gnod cing nyam nga ba dang phrad pa yin no/ /shin tu bag yod par yang bya dgos la/nyon mongs pa rnams kyang thams cad du spang bar mi bya ba ni gnod cing nyam nga ba dang phrad pa yin te/ de ltar gnod cing nyam nga ba dang phrad pa'i byang chub sems dpa' ni kha cig tu gnod pa che chung brtags la de kho na bzhin du sbyar bar bya'o/ /kha cig tu ni gang zag la brtag par bya'o/ /kha cig tu ni brtan por dmigs shing rgyu yang dag par blangs te/'dug par byas la smon lam dag kyang legs par gdab par bya'o/ /kha cig tu ni sems 'jug par mi bya'o/ /kha cig tu ni shas cher so sor brtags te/ gnas par byas la mi skyo ba dang / bzod par bya'o/ /kha cig tu ni btang snyoms su gzhag par bya'o//kha cig tu ni brtson 'grus brtsam zhing brtul te bya'o/ /kha cig tu ni thabs la mkhas par bya ste/ de ltar yang dag pa'i gnyen po la mkhas pa'i byang chub sems dpa' ni gnod cing nyam nga ba thams cad dang phrad cing mngon sum du gyur kyang yi chad par mi 'gyur te/ bdag nyid kyang legs par srung bar byed do//byang chub sems dpa'i sa'i gzhi'i rnal 'byor gyi gnas tha ma las/ yongs su 'dzin pa'i le'u ste gnyis pa'o// //ji skad bstan pa'i gnas pa bcu gsum po 'di dag dang ldan pa'i sa bdun yod par rig par bya ste/ byang chub sems dpa'i sa drug dang / byang chub sems dpa' dang de bzhin gshegs pa'i sa 'dren ma gcig ste/rigs kyi sa dang / mos pas spyod pa'i sa dang / lhag pa'i bsam pa dag pa'i sa dang / spyod pa sgrub pa'i sa dang / nges pa'i sa dang / spyod pa nges pa'i sa dang / mthar thug par 'gro ba'i sa'o/ /'di dag ni byang chub sems dpa'i sa bdun yin te/de dag las tha ma ni 'dren ma yin no/ /de la rigs la gnas pa dang / mos pas spyod pa la gnas pa ni sa gnyis so/ /rab tu dga' ba la gnas pa ni lhag pa'i bsam pa dag pa'i sa'o/ /lhag pa'i tshul khrims la gnas pa dang / lhag pa'i sems la gnas pa dang / lhag pa'i shes rab la gnas pa gsum dang mtshan ma med pa la gnas pa rtsol ba dang bcas pa ni spyod pa sgrub pa'i sa'o/ /mtshan ma med pa la gnas pa lhun gyis grub pa ni nges pa'i sa ste/ sa de la byang chub sems dpa'i nges par 'jug pa gsum pa la zhugs pa yin no/ /so so yang dag par rig pa la gnas pa ni spyod pa nges pa'i sa'o//gnas pa mchog dang de bzhin gshegs pa'i gnas pa mthar thug par 'gro ba'i sa ste/ de bzhin gshegs pa'i gnas pa dang sa ni sangs rgyas kyi chos kyi gnas pa'i le'u las 'og nas 'chad do/ /de la byang chub sems dpa' mos pas spyod pa'i sa las lhag pa'i bsam pa dag pa'i sa la 'jug pa na/ngan song rnams las ji ltar yang dag par 'da' bar 'gyur zhe na/ 'di la byang chub sems dpa' ni 'jig rten pa'i yongs su dag pa'i bsam gtan la brten nas mos pas spyod pa'i sa la byang chub kyi tshogs legs par brtsams te/ sngar bstan pa'i rnam pa brgya rtsa bcus gzhan yid la mi byed par sems can rnams la snying brtse ba sgom par byed de/des bsgoms pa'i rgyus sems can rnams la de lta bu'i snying brtse ba'i bsam pa dang / snying rje ba'i bsam pa thob par 'gyur te/ des na sems can rnams kyi don du ngan song rnams la khyim gyi gnas kyi tshul du gnas par byed de/gal te bdag 'di dag nyid na gnas bzhin du bla na med pa yang dag par rdzogs pa'i byang chub yang dag par 'grub par 'gyur ba lta na yang bdag sems can rnams kyi sdug bsngal bsal bar spro'o snyam ste/ sems can rnams kyi ngan song ba'i las thams cad bsam pa dag pa des bdag nyid la rnam par smin par 'dod la/mi dge ba'i las thams cad gtan du kun du mi spyod par yang yid la smon par byed do/ /des de ltar 'jig rten pa'i yongs su dag pa'i bsam gtan de yongs su bsgoms pas ngan song ba'i nyon mongs pa'i phyogs dang mthun pa'i gnas ngan len gnas las sel bar byed de/de spangs pas sdig pa ngan song ba'i las gtan mi byed pa dang / ngan song du mi 'gro ba'i phyir ring po mi thogs par byang chub sems dpa' de'i gnas 'gyur te/ de tsam gyis ni byang chub sems dpa' ngan song du 'gro ba thams cad las yang dag par 'das shing mos pas spyod pa'i sa las kyang yang dag par 'das la/lhag pa'i bsam pa dag pa'i sa la yang zhugs pa yin no/ /gnas pa'i le'u las dad pa la sogs pa gnas pa rnam par sbyong ba'i chos bcu po gang dag bstan pa de dag ni 'dir yang sa rnam par sbyong ba yin par rig par bya ste/de dag ni mi mthun pa'i phyogs kyi gnyen por rnam par gzhag par rig par bya'o/ /don gyi mdo dang go rims kyang rig par bya'o/ /de la bcu po 'di dag ni sa rnam par sbyong ba'i chos bcu po de dag gi mi mthun pa'i phyogs kyi chos yin te/ de dag gi gnyen por 'di dag rnam par gzhag pa yin no//bcu gang zhe na/ thams cad kyi thams cad du sems bskyed pa mi rtsom zhing / byang chub sems dpa' bslab pa'i gzhi yang dag par mi len pa 'di ni dad pa'i mi mthun pa'i phyogs kyi chos yin te/ de'i gnyen po ni dad pa'o/ /sems can rnams la rnam par 'tshe ba'i sems ni snying rje'i mi mthun pa'i phyogs yin te/de'i gnyen po ni snying rje'o/ /sems can rnams la gnod sems byed pa ni byams pa'i mi mthun pa'i phyogs yin te/ de'i gnyen po ni byams pa'o/ /longs spyod dang srog la lta ba ni sbyin pa'i mi mthun pa'i phyogs yin te/ de'i gnyen po ni gtong ba'o/ /sems can rnams la gnod par byed pa dang / log par sgrub pa rnyed pa dang / bya ba mang po mi skyo ba'i mi mthun pa'i phyogs yin te/ de'i gnyen po ni mi skyo ba'o/ /thabs med pa'i sbyor ba ni bstan bcos shes pa'i mi mthun pa'i phyogs yin te/ de'i gnyen po ni bstan bcos shes pa'o//mi des shing gzhan gyi sems dang mthun par mi byed pa ni 'jig rten shes pa'i mi mthun pa'i phyogs yin te/ de'i gnyen po ni 'jig rten shes pa'o/ /dge ba'i chos sgom pa la bag med cing le lo byed pa ni ngo tsha shes pa dang khrel yod pa'i mi mthun pa'i phyogs yin te/ de'i gnyen po ni ngo tsha shes pa dang khrel yod pa'o/ /'khor ba'i sdug bsngal yun ring po sna tshogs mi bzad cing / rgyun mi 'chad pa dag gis nyen pa ni brtan pa'i stobs bskyed pa'i mi mthun pa'i phyogs yin te/ de'i gnyen po ni brtan pa'i stobs bskyed pa'o/ /ston pa la som nyi dang yid gnyis dang the tshom za ba ni de bzhin gshegs pa la mchod pa dang /rim gro byed pa mi mthun pa'i phyogs yin te/ de'i gnyen po ni de bzhin gshegs pa la mchod pa dang / rim gro byed pa'o/ /de ltar na de dag ni mi mthun pa'i phyogs kyi gnyen por rnam par gzhag pa yin no/ /de dag gi don gyi mdo gang zhe na/mdor bsdu na chos bcu po 'di dag gis bsam pa dag pa dang / sbyor ba dag par yongs su bstan te / de la dang po gsum gyis ni bsam pa dag par bstan/ lhag ma rnams kyis ni sbyor ba dag par bstan par rig par bya'o/ /byang chub sems dpa' byang chub la mngon par dad pa ni sems can sdug bsngal ba rnams la snying rje'o//snying rje bar gyur na bdag gis 'di dag yongs su bskyab par bya'o snyam du byams par 'gyur ro / /de ltar byams pa'i sems su gyur na/ longs spyod dang / srog la mi lta bas de dag la yongs su gtong bar 'gyur ro/ /mi lta bas de dag gi don la sbyor ba na yongs su mi skyo ba'o//yongs su mi skyo na bstan bcos shes par 'gyur ro/ /bstan bcos shes na des ji ltar 'jig rten du 'jug par bya ba de bzhin du shes te/ de ltar na 'jig rten shes pa yin/ /bdag nyid kyang nyon mongs pa kun du spyod pas ngo tsha zhing khrel yod par byed do//ngo tsha shes pa dang ldan zhing khrel yod pa dang ldan na nyon mongs pa'i dbang du mi 'gyur zhing brtan pa'i stobs bskyed pa thob par 'gyur ro/ /brtan pa'i stobs bskyed pa thob na yang dag pa'i sbyor ba las yongs su nyams par mi 'gyur zhing / dge ba'i chos rnams kyis rnam par 'phel la/sgrub pa'i mchod pa dang / rnyed pa dang / bkur sti'i mchod pas de bzhin gshegs pa la mchod pa dang / rim gro byed par 'gyur te/ de ltar na 'di ni chos bcu po de dag go rims bzhin du yang dag par 'grub pa yin par rig par bya'o/ /chos bcu po 'di rnams kyis ni sa thams cad rnam par sbyong bar 'gyur ro//byang chub sems dpa'i sa'i gzhi'i rnal 'byor gyi gnas tha ma las/ sa'i le'u ste gsum pa'o// //mos pas spyod pa'i sa yan chad byang chub sems dpa'i sa thams cad la ni mdor bsdu na/ byang chub sems dpa' rnams kyi spyod pa bzhi yod par rig par bya ste/bzhi gang zhe na/ pha rol tu phyin pa'i spyod pa dang / byang chub kyi phyogs dang mthun pa'i spyod pa dang / mngon par shes pa'i spyod pa dang / sems can yongs su smin par bya ba'i spyod pa'o/ /de la sngar bstan pa'i pha rol tu phyin pa drug dang / thabs la mkhas pa'i pha rol tu phyin pa dang /smon lam gyi pha rol tu phyin pa dang / stobs kyi pha rol tu phyin pa dang / ye shes kyi pha rol tu phyin pa dang / pha rol tu phyin pa bcu po 'di dag bsdus pa la ni pha rol tu phyin pa'i spyod pa zhes bya'o/ /de ltar sngar bstan pa'i thabs la mkhas pa rnam pa bcu gnyis ni thabs la mkhas pa'i pha rol tu phyin pa'o//sngar bstan pa'i smon lam rnam pa lnga ni smon lam gyi pha rol tu phyin pa'o/ /stobs bcu'i sbyor ba rnam par dag pa ni stobs kyi pha rol tu phyin pa'o/ /chos thams cad la ci lta ba bzhin du rnam par gzhag pa shes pa ni ye shes kyi pha rol tu phyin pa'o/ / de la don dam par 'dzin pa la zhugs pa'i shes rab ni shes rab kyi pha rol tu phyin pa'o/ /kun rdzob 'dzin pa la zhugs pa ni ye shes kyi pha rol tu phyin pa ste/ 'di gnyis kyi bye brag ni de yin no/ /rnam grangs gzhan yang ye shes tshad med pa ni thabs la mkhas pa'i pha rol tu phyin pa'o/ / gong nas gong du ye shes khyad par can don du gnyer ba ni smon lam gyi pha rol tu phyin pa'o/ /bdud thams cad kyis lam mi chod pa ni stobs kyi pha rol tu phyin pa'o/ /ji lta ba bzhin du shes bya rtogs pa ni ye shes kyi pha rol tu phyin pa'o/ /sngar ji skad bstan pa'i dran pa nye bar gzhag pa yan chad byang chub kyi phyogs dang mthun pa'i chos sum cu rtsa bdun dang /yongs su tshol ba bzhi dang / yang dag pa ji lta ba bzhin du yongs su shes pa bzhi po de dag bsdus pa la ni byang chub sems dpa' rnams kyi byang chub kyi phyogs dang mthun pa'i spyod pa zhes bya'o/ /mthu'i le'u las ji skad bstan pa'i mngon par shes pa drug ni byang chub sems dpa' rnams kyi mngon par shes pa'i spyod pa zhes bya'o//sngar bstan pa'i dpag tu med pa gnyis te/ 'dul ba dpag tu med pa dang / 'dul ba'i thabs dpag tu med pa dang / sems can yongs su smin par bya ba'i le'u las ji skad bstan pa'i sems can yongs su smin par bya ba thams cad bsdus pa ni byang chub sems dpa'i sems can yongs su smin par bya ba'i spyod pa zhes bya ste/byang chub sems dpa'i spyod pa 'di bzhis ni/ byang chub sems dpa'i spyod pa thams cad bsdus par rig par bya'o/ /de la sbyin pa la sogs pa'i chos bcu po 'di dag ni yun ring po bskal pa grangs med pa gsum gyis yang dag par 'grub pa dang /de ma yin pa'i 'jig rten pa dang / nyan thos dang rang sangs rgyas kyi dge ba'i rtsa ba thams cad pas rang bzhin gyis rnam par dag pa'i khyad par dang / byang chub mchog gi 'bras bu yongs su 'dzin pa'i phyir/dus kyi mchog gis yang dag par 'grub pa dang / rang bzhin rnam par dag pa'i mchog gis rnam par dag pa dang / 'bras bu mchog sbyin par byed pas na/ de'i phyir pha rol tu phyin pa zhes bya'o / /pha rol tu phyin pa rnams ni rgyu gsum gyis go rims su gzhag par rig par bya ste/gsum gang zhe na/ gnyen po dang / 'byung ba dang / rnam par smin pa'i 'bras bus so/ /de la ser sna dang / nyes par spyod pa dang / sems can rnams la 'khon gyis gnod par byed pa dang / le lo dang / rnam par g.yeng ba dang / mod dma' zhing ha 'dang can dang / chos drug po 'di dag ni zang zing dang / chos dang / byang chub la sgrib pa'i gnas yin te/ chos drug po 'di dag gi gnyen por pha rol tu phyin pa drug ci rigs par bya'o/ /de ma yin pa'i pha rol tu phyin pa rnams kyang 'di dag nyid du 'dus te/ de ltar na gnyen por rnam par gzhag pa yin no//'byung bas ji lta bu zhe na/ 'di la thog ma kho nar byang chub sems dpa' longs spyod la mi lta na/ khyim gyi 'dod pa rnams btang nas/ tshul khrims yang dag par len par byed do/ /tshul khrims la gus na gzhan gyis rnam par mtho btsams pa bzod de gzhan la rnam par mtho mi btsams so //de yang dag par len pa dang / bzod pas tshul khrims rnam par dag na mi 'gyur ba dang / rgyun mi 'chad par dge ba'i phyogs la sbyor bas sbyor ro/ /de de ltar brtson 'grus kyis bag yod par gyur na/ sems rtse gcig pa dge ba la reg par 'gyur ro/ /de de ltar sems mnyam par gzhag na yang dag pa ji lta ba bzhin du shes bya shes shing mthong bar bya ba mthong ste/de ltar na de rnams 'byung ba'i go rims kyis rnam par gzhag par rig par bya'o/ /rnam par smin pa'i 'bras bu ji lta bu zhe na/ 'di la byang chub sems dpa' tshe 'di la sbyin pa la sogs pa dge ba'i chos 'di yang dag par blangs te 'dug pa ni/gzhi des phyi ma la sbyin pa las gyur pa'i phyi rol gyi longs spyod phun sum tshogs pa thob par 'gyur la/ de ma yin pa tshul khrims la sogs pa'i pha rol tu phyin pa las gyur pa'i nang gi lus kyi phun sum tshogs pa rnam pa lnga thob par 'gyur te/lus kyi phun sum tshogs pa rnam pa lnga gang zhe na/ bde 'gror gtogs pa'i lha dang / mi dang / de ma yin pa'i sems can rnams las tshe la sogs pa khyad par du 'phags pa dang ldan pa 'di ni phun sum tshogs pa dang po'o/ /rang bzhin gyis dge ba la sbyor ba la mi skyo ba dang / gzhan gyi nyes pa bzod pa dang / gzhan la gnod pa mi dga' ba 'di ni phun sum tshogs pa gnyis pa'o/ /rang bzhin gyis brtsams pa thams cad la 'bang pa brtan pa 'di ni phun sum tshogs pa gsum pa'o/ /rang bzhin gyis nyon mongs pa shas chung zhing don thams cad la mngon par shes pa myur bar bya ba la rang gi sems la dbang zhing sems las su rung ba 'di ni phun sum tshogs pa bzhi pa'o//rang bzhin gyis blo rgya che ba dang / don thams cad la mkhas shing mdzangs pa 'di ni phun sum tshogs pa lnga pa ste/ 'bras bu rnam par smin pa las gyur pa 'di dag ni pha rol tu phyin pa drug po rnams kyi go rims su rnam par gzhag pa gzhan yin par rig par bya'o//de la pha rol tu phyin pa bzhi tshogs dang / rang bzhin dang 'khor dang / kun du bsrung ba dang bcas pas ni byang chub sems dpa' rnams kyi lhag pa'i tshul khrims kyi bslab pa yongs su rdzogs par rig par bya'o//bsam gtan gyi pha rol tu phyin pas ni lhag pa'i sems kyi bslab pa'o/ /shes rab kyi pha rol tu phyin pas ni lhag pa'i shes rab kyi bslab pa ste/ byang chub sems dpa'i bslab pa'i lam ni gsum las lhag pa med do/ /de bas na byang chub sems dpa'i bslab pa'i lam thams cad 'dus pa'i phyir/pha rol tu phyin pa ni drug po kho nar rnam par gzhag pa yin te/ 'di las gong na yang med do/ /'di las lhag pa yang med do/ /byang chub sems dpa'i bya ba ni mdor bsdu na bzhi po 'di dag yin te/ de dag gis de rnams kyi bya ba thams cad bsdus te/ byang chub kyi phyir dge ba la goms par byed pa dang /de'i sngon du 'gro ba'i de kho na'i don rtogs par byed pa dang / mthu yang dag par 'grub par bya ba dang / sems can yongs su smin par bya ba'o / /byang chub sems dpa' rnams kyi ni bya ba bzhi po 'di dag spyod pa bzhi po dag gi go rims bzhin du byed cing rjes su sgrub po//de lta bas na de'i gong du spyod pa rnam par gzhag pa med do/ /byang chub sems dpa'i sa'i gzhi'i rnal 'byor gyi gnas tha ma las spyod pa'i le'u ste bzhi pa'o// //de la de bzhin gshegs pa'i gnas pa dang / de bzhin gshegs pa'i mthar thug par 'gro ba'i sa las brtsams te/sangs rgyas bcom ldan 'das rnams kyi sangs rgyas kyi chos ma 'dres pa brgya bzhi bcu yod de/ skyes bu chen po'i mtshan sum cu rtsa gnyis dang / dpe byad bzang po brgyad cu dang / rnam pa thams cad yongs su dag pa bzhi dang / de bzhin gshegs pa'i stobs bcu dang /mi 'jigs pa bzhi dang / dran pa nye bar gzhag pa gsum dang / bsrung ba med pa gsum dang / thugs rje chen po dang / bsnyel ba mi mnga' ba'i chos nyid dang / bag chags yang dag par 'joms pa dang / rnam pa thams cad dang mchog mkhyen pa'o/ /skyes bu chen po'i mtshan sum cu rtsa gnyis po dag gang zhe na/skyes bu chen po'i zhabs shin tu gnas pa ste/ sa la mnyam par 'bab pa 'di ni skyes bu chen po'i mtshan yin no/ /phyag dang zhabs gnyis kyi mthil nas 'khor lo rtsibs stong dang ldan pa mu khyud can lte ba dang bcas pa rnam pa thams cad yongs su rdzogs pa byung ba dang /skyes bu chen po'i zhabs sor mo ring ba dang / zhabs kyi rting pa yangs pa dang / phyag dang zhabs 'jam zhing gzhon sha chags pa dang / phyag dang zhabs dra bas 'brel pa dang / zhabs 'bar 'bur med pa dang / byin pa ri dgas a na ya'i lta bu dang / sku ma btud pa dang /mdoms kyi sba ba sbubs su nub pa dang / shing n+ya gro d+ha ltar chu zheng gab pa dang / sku'i spu gyen du phyogs pa dang / spu re re ste de'i sku'i spu re re nas skye la 'jam zhing mthon mthing la lcang lo ltar g.yas su 'khyil pa dang / sku mdog gser 'dra zhing 'od 'dom gang dang ldan pa dang /pags pa srab ste pags pa srab pa'i phyir de'i sku la rdul dang dri ma mi chags pa dang / sku'i bdun mtho bas te/ de'i sku'i bdun mtho bar gyur pa ni phyag la gnyis dang / zhabs la gnyis dang / phrag pa la gnyis dang / mgul la gcig go / /ro stod seng ge'i 'dra ba dang / dpung mgo legs par grub pa dang /thal gong rgyas pa dang / sku che zhing drang ba dang / tshems bzhi bcu mnga' ba dang / tshems mnyam pa dang / tshems thags bzang ba dang / tshems shin tu dkar ba dang / 'gram pa seng ge'i 'dra ba dang / ljags ring zhing srab pa dang / ljags ring bas zhal nas ljags brkyang na zhal thams cad dbu skra'i mtshams la thug par khebs pa dang /ro bro ba'i mchog dang ldan pa brnyes pa dang / tshangs pa'i dbyangs dang ldan te/ bya ka la ping ka bzhin du gsung yid du 'ong zhing / gsung gi gdangs rnga sgra lta bu dang / spyan mthon mthing dang / rdzi ma ba'i lta bu dang / dbu gtsug tor dang ldan pa dang /de'i mdzod spu dung gi mdog 'dra ba la g.yas su 'khyil pa smin mtshams su byung ba 'di ni skyes bu chen po'i mtshan yin no/ /dpe byad bzang po brgyad cu gang zhe na/ phyag dang zhabs kyi sor mo nyi shu tshigs dang bcas pa dang / sen mo dang bcas pa rnams dpe byad bzang po nyi shu dang /phyag dang zhabs gnyis la mthil rgyab brgyad de/ phyag gnyis la bzhi dang / zhabs gnyis la bzhi ste dpe byad bzang po brgyad dang / long bu dang / pus mo dang / brla rnam pa drug rgyas pa dpe byad bzang po drug dang / phyag gi rnam pa drug rgyas pa dpe byad bzang po drug dang / sta zur dang / rked pa dang / 'bras bu gnyis la dpe byad bzang po gnyis dang / mdoms dang / snam gtsos gnyis la dpe byad bzang po gnyis dang / dku do dang / phyal dang / lte ba dang / rtsib logs gnyis dang / mchan khung gnyis dang / nu ma gnyis dang bsdus pa la dpe byad bzang po drug dang / brang dang / thugs ka dang / mgur dang / rgyab dang / dpe byad bzang po drug cu po 'di rnams ni mgur yan chad ma gtogs par sku man chad du gtogs pa yin no/ /tshems kyi phreng ba gnyis la dpe byad bzang po gnyis dang / rkan thon kor dang bcas pa dang / sgros gnyis dpe byad bzang po gnyis dang / mkhur ba shin tu rgyas pa dang / 'gram pa rgyas shing dbyibs legs pa dpe byad bzang po gnyis dang / spyan gnyis thon kor dang bcas pa dpe byad bzang po gnyis dang / smin ma gnyis dpe byad bzang po gnyis dang / shangs kyi bu ga gnyis dpe byad bzang po gnyis dang / dpral ba dang / spyan gyi grwa gnyis dang / snyan gnyis ni dpe byad bzang po bzhi dang / dbu skra dang bcas pa'i dpe byad bzang po dang / 'di rnams ni mgur yan chad kyi dpe byad bzang po nyi shu yin te/ snga ma'i drug cu dang / phyi ma'i nyi shu gcig tu bsdoms nas dpe byad bzang po brgyad cur 'gyur te/ mtshan dang dpe byad bzang po 'di dag ni lhag pa'i bsam pa'i sa la zhugs pa ni skyes pas thob pa'i rnam par smin pa las byung ba'i mtshan rnams thob par 'gyur ro// byang chub sems dpa' rnam par smin pas 'thob po/ /de yan chad nas byang chub kyi snying po la zhugs pa'i bar du ni de dag gong nas gong du rnam par dag par 'gyur bar rig par bya'o//lhag ma ma 'dres pa rnam pa thams cad yongs su dag pa la sogs pa shin tu rnam par dag cing yongs su rdzogs pa rnams kyang thob par 'gyur ro/ /ma rdzogs pa ni lhag pa'i bsam pa dag pa'i sa yan chad nas sngon byang chub sems dpar 'gyur ba na yang de dag dang ldan par yod do//byang chub kyi tshogs thams cad ni bye brag med par mtshan dang dpe byad bzang po thams cad 'grub par byed pa yin no/ /byang chub kyi tshogs de yang rnam pa gnyis te byang chub dang nye ba dang ring ba'o/ /de la ring ba ni rnam par smin pas ma thob pa'i mtshan dang dpe byad bzang po rnams la gang yod pa'o//nye ba ni rnam par smin pas dang po thob pa'i mtshan dang dpe byad bzang po rnams dang / de las gong nas gong du rnam par dag pa'i khyad par du gyur pa'i tshe gang yin pa'o/ /mtshan dang dpe byad bzang po 'di dag ni las rnam pa sna tshogs mngon par 'du byed pa'i 'bras bu yin te/'dul bar 'dod pa rnams kyi dbang du mdzad nas bcom ldan 'das kyis gsungs so/ /de ci'i phyir zhe na/ sems can sdig pa'i las rnam pa sna tshogs kun du spyod pa la dga' ba de dag ci ltar na sdig pa'i las mi mthun pa'i phyogs su gyur pa rnam pa sna tshogs de'i gnyen po dge ba rnam pa sna tshogs mtshan dang dpe byad bzang po 'grub par byed pa'i las gang yin pa de'i 'bras bu'i phan yon rnam pa sna tshogs de thos na/'bras bu'i phan yon chen po de 'dod ches nas sdig pa de las kyang ldog par 'gyur zhing /dge ba de yang dag par blangs te gnas par 'gyur zhig gu snyam du dgongs pa'i phyir ro/ /mtshan gyi mdo las ci skad gsungs pa bzhin te/ tshul khrims dang / bzod pa dang / brtul zhugs dang / gtong ba rnams la shin tu gnas pas ni zhabs shin tu gnas pa brnyes so/ / 'gro ba dang 'ong ba la sogs pa yongs su g.yo ba las brten te/ pha ma la bsnyen bkur sna tshogs byas pa dang / rnam pa sna tshogs kyis sems can gnod pa las bsrungs pa ni phyag dang zhabs 'khor lo'i mtshan dang ldan pa brnyes so/ /gzhan la rnam par mi 'tshe ba dang / ma byin par len pa spangs pa dang /bla ma rnams la gus par smra ba dang / phyag 'tshal ba dang / mngon du ldang ba dang / thal mo sbyor zhing 'dud pa'i las byas pas gzhan dag gi yid mgu bar byas pa dang / dga' ba'i longs spyod nyams par ma byas pa dang / nga rgyal nges par bcom pas ni skyes bu chen po'i mtshan sor mo ring ba brnyes so//las gsum po gang dag gis skyes bu chen po'i mtshan gsum po gang dag bstan pa de dag thams cad mtha' dag gis ni zhabs kyi rting pa yangs pa brnyes so / /de la mtshan gsum po dag brten pa'i phyir ro/ /bsdu ba'i dngos po bzhis bla ma rnams bsdus pas ni phyag dang zhabs dra bas 'brel ba brnyes so//bla ma rnams la snum bsku ba dang mnye ba dang / dril ba dang / khrus dang / gos byin pas ni phyag dang zhabs 'jam zhing gzhon sha chags pa brnyes so/ /dge ba'i chos rnams la chog mi shes shing dge ba'i chos rnams gong nas gong du spel bas ni zhabs 'bar 'bur med pa brnyes so//ji lta ba bzhin du chos blangs shing kun chub par byas nas/ gzhan dag la bstan pa dang / gzhan dag gis 'phrin pa legs par byas pas ni byin pa ri dgas e na ya'i lta bu brnyes so/ /go rims bzhin du chos yang dag par bstan pas tshul gnas par byas pa dang /lus dang ngag dang yid kyi sdig pa'i las legs par bsdams shing der mi gzhol ba dang / nad pa rnams la nad g.yog byas shing sman byin pa dang / nad kyis thebs pa gso ba dang / zas kyi tshod shes pa dang / 'dod pa rnams la mi gzhol bas ni sku ma btud pa brnyes so//gzhan dag gis spangs pa'i sems can rnams chos bzhin du mthun par bsdus pa dang / ngo tsha dang ldan zhing khrel yod pa dang ldan pa dang / gos byin pas ni mdoms kyi sba ba sbubs su nub pa brnyes so/ /bdag nyid kyi lus dang ngag dang yid bsdams pa dang /blang ba dang / kha zas kyi tshod shes pa dang / nad pa rnams la sman sbyin pa dang / las yang ba dang / blang ba dang / longs spyod ma 'ongs pa la mi 'jug pa dang / khams ma snyoms pa mthun par byas pas ni shing n+ya gro d+ha ltar chu zheng gab pa brnyes so/ /las gang gis zhabs 'bar 'bur med pa brnyes pa de nyid kyis ni sku'i spu gyen du phyogs pa brnyes so//bdag nyid kyis dge ba spyad pa dang / mkhas pa dang / shes pa la brten pa dang / cha phra ba'i don la sems pa dang / bla ma rnams kyi gnas byi dor byas pa dang / mnye zhing dril ba dang / khrus byas te gcig pur gnas pa dang /bshes gnyen gcig la brten pa dang / cha phra ba'i don la 'jug pa dang / rtswa dang lo ma la sogs pa'i nyal nyil bsal ba dang / glo bur gyi dri ma bsal bas ni spu nyag re re nas skyes shing g.yas su 'khyil pa brnyes so/ /yid du 'ong zhing dga' bar byed pa'i zas dang / skom dang / bzhon pa dang /gos dang / rgyan la sogs pa lus kyi yo byad byin pa dang / khro ba med pas ni sku mdog gser 'dra ba dang 'od 'dom gang dang ldan pa brnyes so/ /las gang gis spu re re nas skye zhing g.yas su 'khyil pa bstan pa de nyid kyis ni pags pa srab cing 'jam pa brnyes par rig par bya'o/ /zas dang skom mang po gya nom pa phal po ches skye bo'i tshogs mang po tshim par byas pas ni/sku'i bdun mtho ba brnyes so/ /sems can rnams kyi chos kyi bya ba byung ngo cog la gtso bor gnas pa dang / nga rgyal mi byed pa dang / brlang bar mi byed pa dang / sems can rnams gnod pa las ni bzlog /phan pa la ni btsud pas sems can gyi don dag la seng ge bzhin du brtul ba'i ngang tshul can yin pas ni ro stod seng ge'i 'dra ba brnyes so//las de kho nas ni dpung mgo legs par grub pa dang thal gong rgyas pa brnyes par rig par bya'o/ /las gang gis sor mo ring ba brnyes pa de nyid kyis ni sku che zhing drang ba brnyes so//mdza' bshes 'byed pa'i phra ma'i tshig ni spangs/ sems can mi mthun pa rnams mthun par byas pas ni tshems bzhi bcu dang mnyam pa dang thags bzang ba brnyes so/ /'dod pa na spyod pa'i byams pa bsgom pa dang / chos kyi don sems pas ni chems shin tu dkar ba brnyes so//sems can 'dod pa rnams la ci 'dod pa'i nor legs par btang bas ni 'gram pa seng ge'i lta bu brnyes so/ /sems can rnams bdag gi bu bzhin du legs par bsrungs pa dang / dad pa dang ldan pa dang / snying brtse ba dang ldan pa dang / sman byin pa dang / dang ba dang phan pas ni ro bro ba'i mchog dang ldan pa brnyes so//chos kyi bcud byin pa dang / chos kyi bcud kyi ro myangs pa dang / ro nyams pa bcos pa dang / srog gcod pa spong ba la sogs pa bslab pa'i gzhi lnga bo rnams bdag nyid kyis kyang yang dag par blangs te/ legs par bsrungs shing gzhan rnams kyang de dag la yang dag par btsud pa dang /snying rje'i sems la brten te chos yang dag par blang ba chen po la zhugs pas ni dbu gtsug tor dang ldan pa dang / ljags ring zhing srab pa brnyes so/ /bden par smras pa dang / snyan par smras pa dang / dus su smras pa dang / chos smras pas ni tshangs pa'i dbyangs brnyes so//sems can mtha' dag la pha ma bzhin du byams pa'i sems kyis snying brtse bas ni spyan mthon mthing dang rdzi ma ba'i lta bu brnyes so/ /yon tan can rnams kyis bden pa'i bsngags pa brjod cing bsgrags pas ni smin mtshams kyi mdzod spu dung gi mdog ltar dkar la g.yas su 'khyil pa brnyes so zhes gsungs so//skyes bu chen po'i mtshan sum cu rtsa gnyis po thams cad kyang bye brag med par tshul khrims kyi rgyus thob par rig par bya'o/ /de ci'i phyir zhe na/ byang chub sems dpa' tshul khrims nyams pa ni mir 'gyur ba nyid kyang mi 'thob na /skyes bu chen po'i mtshan lta ga la 'thob pa'i phyir ro/ /de la dbu gtsug tor dang ldan pa dang / spyi gtsug bltar mi mthong ba ni skyes bu chen po'i mtshan gcig yin par rig par bya ste/ de las gud na yang med pa'i phyir ro/ /'di ni mtshan mngon par 'grub pa dang / mthun pa'i las rnam pa sna tshogs rgyas par rnam par gzhag pa yin no/ /mdor bsdu na ni las kyi mtha' legs par byas pa phyogs gnyis su gyur pa rnam pa bzhis mtshan thams cad mngon par 'grub par rig par bya'o/ /de la nges par 'byed pas ni zhabs shin tu gnas pa 'grub par 'gyur ro//byang bar byed pas ni phyag dang zhabs 'khor lo'i mtshan dang ldan pa dang / zhabs 'bar 'bur med pa dang / phyag dang zhabs dra bas 'brel pa dang / pags pa srab pa dang / sku'i bdun mtho ba dang / thal gong rgyas pa dang / dpung mgo legs par grub pa dang / sku che zhing drang ba dang /ljags ring zhing srab pa 'grub bo/ /rtag tu byed pas ni sor mo ring ba dang / zhabs kyi rting pa yangs pa dang / sku ma btud pa dang / shing n+ya gro d+ha ltar chu zheng gab pa dang / tshems thags bzang ba 'grub po/ /kha na ma tho ba med par byed pas ni mtshan lhag ma rnams mngon par 'grub ste/de la sems can rnams la gnod pa med par sbyor bas ni phyag dang zhabs 'jam zhing gzhon sha chags pa dang / pags pa srab cing 'jam pa 'grub po/ /dge ba la go rims bzhin du sbyor ba dang / dus su sbyor bas ni byin pa ri dgas e na ya'i lta bur 'grub po//mchog tu dga' ba dang / dga' ba dang / 'od gsal ba'i sems kyis dge ba kun du spyod pas ni sku mdog gser 'dra zhing 'od 'dom gang dang ldan pa dang / tshems dkar ba dang / mdzod spu dkar po 'grub po/ /grags pa dang / sgra dang / tshigs su bcad pa la mi rten pa dang /dge ba mi spyoms pas ni mdoms kyi sba ba sbubs su nub pa 'grub po/ /dge ba'i rtsa ba byang chub tu yongs su bsngos pas ni sku'i spu gyen du phyogs pa dang / tshems bzhi bcu dang mnyam pa dang / ro bro ba mkhyen pa dang / dbu gtsug tor dang ldan pa 'grub po/ /dge ba la 'bad cing mi zhum par brtson pas ni ro stod seng ge'i 'dra ba dang /'gram pa seng ge'i 'dra ba 'grub po/ /sems can rnams la phan pa'i sems kyis snyoms par lta bas ni tshems mnyam pa dang / spyan mthon mthing dang / rdzi ma ba'i lta bu 'grub po/ /dman pas chog par mi 'dzin par sbyor bas ni tshangs pa'i dbyangs 'grub po//de ltar na las kyi mtha' legs par byas pa rnam pa 'di bzhis byang chub sems dpa' rnams kyi skyes bu chen po'i mtshan sum cu rtsa gnyis po 'di dag 'thob pa dang / rnam par dag par 'gyur ro/ /de la rigs kyi sa la ni byang chub sems dpa' rnams kyi mtshan 'di dag sa bon tsam zhig gnas par zin par rig par bya'o//mos pas spyod pa'i sa la ni de dag thob par bya ba'i thabs la zhugs par rig par bya'o/ /lhag pa'i bsam pa dag pa'i sa la ni de dag thob par rig par bya'o/ /de ma yin pa'i byang chub sems dpa'i sa de'i gong ma rnams la ni de dag rnam par dag par rig par bya'o//de bzhin gshegs pa'i mthar thug par 'gro ba'i sa la ni de dag shin tu rnam par dag cing shin tu bla na med par rig par bya'o/ /de la mtshan 'di rnams ni gzugs can yin pa'i phyir sems can tha ma dang / 'bring dang / rab rnams kyis rtogs par sla bas na sangs rgyas kyi chos skyes bu chen po'i mtshan yod pa thams cad kyi nang na 'di dag kho na skyes bu chen po'i mtshan rnams su rnam par gzhag go//skyes bu chen po'i mtshan sum cu rtsa gnyis po 'di dag rten gyi tshul gyis 'dzin cing / gzugs bzang pos mdzes par byed pas de'i phyir dpe byad bzang po zhes bya'o//de la mdor bsdu na sems can thams cad kyi bsod nams dang mnyam pa'i bsod nams kyi phung pos ni de bzhin gshegs pa'i sku'i khung bu re re mngon par 'grub po/ /ba spu thams cad du zhugs pa'i bsod nams kyi phung po ji snyed pa de snyed kyi bsod nams kyi phung pos ni dpe byad bzang po gcig mngon par 'grub po//dpe byad bzang po thams cad du zhugs pa'i bsod nams kyi phung po ji snyed pa de las brgya 'gyur du bsgres pa'i bsod nams kyi phung pos ni de bzhin gshegs pa'i mtshan gcig mngon par 'grub po//mdzod spu dang gtsug tor ma gtogs par mtshan thams cad du zhugs pa'i bsod nams kyi phung po ji snyed pa de dag las stong 'gyur du bsgres pa'i bsod nams kyi phung pos ni mdzod spu mngon par 'grub po/ /mdzod spur zhugs pa bsod nams kyi phung po ji snyed pa de dag las 'bum 'gyur du bsgres pas ni dbu'i gtsug tor dang ldan zhing spyi gtsug bltar mi mngon par 'grub po//mdzod spur zhugs pa'i bsod nams kyi phung po ji snyed pa de dag las bye ba phrag 'bum 'gyur du bsgres pa'i bsod nams kyi phung pos ni de bzhin gshegs pa'i mtshan dang dpe byad bzang po la ma gtogs pa'i chos kyi dung zhes bya ba gzhan mngon par 'grub ste/des na de bzhin gshegs pa bzhed na 'jig rten gyi khams mtha' yas mu med pa dag tu gsung gis go bar mdzad de/ de ltar na de bzhin gshegs pa'i sku bsam gyis mi khyab cing bla na med pa phun sum tshogs pa rnam pa thams cad kyis yongs su bsdus pa bsod nams kyi tshogs dpag tu med pas yang dag par grub pa 'grub po//mtshan dang dpe byad bzang po 'grub par byed pa'i dge ba'i chos de dag ni mdor bsdu na rgyu rnam pa gsum gyis dpag tu med par rig par bya ste/ bskal pa grangs med pa gsum du goms par byas pas 'grub pas na/ dus dpag tu med pa dang / sems can dpag tu med pa la phan pa dang / bde ba'i bsam pas dbang byed pas na/ bsam pa dpag tu med pa dang / dge ba'i las rnam pa sna tshogs dpag tu med pa dang / rnam pa dpag tu med pa ste/de lta bas na de bzhin gshegs pa rnams kyi mtshan dang dpe byad bzang po 'byor pa ni bsod nams kyi tshogs dpag tu med pa las yang dag par 'grub pa zhes bya'o/ /byang chub sems dpa'i sa'i gzhi'i rnal 'byor gyi gnas tha ma las mtshan dang dpe byad bzang po'i le'u ste lnga pa'o// //bam po nyi shu rtsa gcig pa/ de la rnam pa thams cad yongs su dag pa bzhi gang zhe na/ gnas yongs su dag pa dang / dmigs pa yongs su dag pa dang / sems yongs su dag pa dang / ye shes yongs su dag pa'o/ /de la gnas yongs su dag pa gang zhe na/nyon mongs pa thams cad kyi phyogs dang mthun pa'i gnas ngan len bag chags dang bcas pa rnams gnas las ma lus par gtan med par 'gyur la/ rang gi lus kyang ji ltar 'dod pa bzhin du len pa dang / gnas pa dang / 'chi 'pho ba rang la dbang yod pa ni gnas rnam pa thams cad yongs su dag pa zhes bya'o//de la dmigs pa yongs su dag pa gang zhe na/ sprul pa dang / bsgyur ba dang / bstan pa dmigs pa thams cad la dbang yod pa gang yin pa 'di ni dmigs pa rnam pa thams cad yongs su dag pa zhes bya'o/ /de la sems yongs su dag pa gang zhe na/ snga ma bzhin du sems gnas ngan len thams cad dang bral la/sems la dge ba'i rtsa ba thams cad bsags pas na/ sems rnam pa thams cad yongs su dag pa zhes bya'o/ /de la ye shes yongs su dag pa gang zhe na/ snga ma bzhin du ma rig pa'i phyogs dang mthun pa'i gnas ngan len thams cad dang bral la/shes bya thams cad la yang ye shes kyi sgrib pa med de/ ye shes la dbang byed pa ni ye shes rnam pa thams cad yongs su dag pa zhes bya'o/ /de la de bzhin gshegs pa'i stobs bcu po dag gang zhe na/ gnas dang gnas ma yin pa mkhyen pa'i stobs dang / las bdag gir bya ba mkhyen pa'i stobs dang /bsam gtan dang / rnam par thar pa dang / ting nge 'dzin la snyoms par 'jug pa mkhyen pa'i stobs dang / dbang po'i mchog dang mchog ma yin pa mkhyen pa'i stobs dang / mos pa sna tshogs mkhyen pa'i stobs dang / khams sna tshogs mkhyen pa'i stobs dang / thams cad du 'gro ba'i lam mkhyen pa'i stobs dang / sngon gyi gnas rjes su dran pa mkhyen pa'i stobs dang / shi 'pho dang skye ba mkhyen pa'i stobs dang / zag pa zad pa mkhyen pa'i stobs te/ stobs bcu po 'di dag ni stobs bcu'i mdo las rgyas par ci skad bstan pa bzhin du rig par bya'o//de la des gang ci bstan pa dang / brjod pa dang / gsungs pa de dag thams cad ni de bzhin te/ phyin ci ma log pas na de'i phyir de bzhin gshegs pa zhes bya'o/ /de la 'bras bu dge ba dang / mi dge ba'i rgyu byung bar gyur pa mi mthun pa med pa gang yin pa de ni de'i gnas dang gzhi dang / rten dang mngon par 'grub par byed pa zhes bya'o/ /de las bzlog pa rgyu mi mthun pa ni 'bras bu dge ba dang / mi dge ba nyid kyi gnas ma yin pa zhes bya'o/ /mngon pa'i nga rgyal med pa'i ye shes ni yang dag pa ji lta ba bzhin zhes bya ste/ thams cad mkhyen pa dang / chags pa med pa'i ye shes dang / dag pa de ni mngon pa'i nga rgyal med pa'i ye shes yin par rig par bya'o/ /thams cad mkhyen pa la sogs pa'i tshig 'di dag ni snga ma bzhin du 'di lta ste/ byang chub mchog gi le'u las bstan pa bzhin du rig par bya'o/ /dang po ni go rims kyis bgrang ba'i dang po'o/ /bla na med pa'i phyir dang / sems can thams cad kyi don bya ba'i rnam pa thams cad byed nus pa dang ldan pa'i phyir dang / bdud thams cad kyi stobs gtan du zil gyis mnan pa'i phyir stobs zhes bya'o/ /ji lta ba bzhin du yang dag par 'grub pa'i rgyu yongs su 'dzin pa'i phyir/ ji ltar 'dod pa bzhin du yang dag par spyod pa la dbang byed pa ni ldan pa zhes bya'o//mya ngan las 'das pa ni bla na med pa yin pas na rlabs po che zhes bya'o/ /'phags pa'i lam yan lag brgyad pa 'thob pa'i phyir dang / gnod pa dang 'jigs pa thams cad dang bral ba'i phyir khyu mchog ces bya'o/ /bdag nyid kyis de rtogs par zhal gyis 'che bas dam bcas pa zhes bya'o//bdag nyid kyi thugs su chud nas gzhan dag la yang thugs brtse bas rgyas par bstan pas na tshangs pa'i 'khor lo bskor zhes bya'o/ /de ci'i phyir zhe na/ 'di lta ste tshangs pa zhes bya ba dang / zhi ba zhes bya ba dang / bsil bar gyur pa zhes bya ba de ni de bzhin gshegs pa'i tshig bla dgas yin pa'i phyir te/de bas na de ni thog mar des bskor ro / /tshangs pas bskyod nas de ma yin pa gzhan dag gis kyang de las gzhan pa dag la ste/ 'di ltar gcig nas gcig tu brgyud de/ sems can gyi ris thams cad du 'khor bas de'i phyir tshangs pa'i 'khor lo zhes bya'o//mchog tu gdags par gtogs pa dang / ston pa phun sum tshogs pa bla na med pas bsdus par bdag nyid rnam par bsgrags pa'i phyir dang / de'i lam bstan pas kyang de ma yin pa'i ya mtshan can thams cad spangs pa'i phyir dang / lam de dang mi mthun par smra ba 'ongs pa rnams la bag 'khums pa med pa'i phyir dang / phas kyi rgol ba rnams zil gyis mnan pa'i phyir rgya che zhing bla na med pa'i gsung mngon par brjod pa'i phyir 'khor gyi nang du seng ge'i sgra yang dag par sgrog ces bya'o/ /mdor bsdu na ni bdag la phan pa'i sgrub pa phun sum tshogs pa dang /bdag dang gzhan la phan pa'i sgrub pa phun sum tshogs pa thun mong ma yin pa de dag gsal bar byas shing bkrol te brtags shing bstan pa yin no/ /don gyi mdo'i rnam grangs gzhan yang thob par bya ba dang / de thob par bya ba'i thabs dang /thabs de yang skye bo thams cad la phan pa yin te/ lhar gyur pa'am/ mir gyur pa gang su yang rung ba thabs des 'dod pa de dag thams cad kyis ni nga nyid las thob par 'gyur ro zhes bstan to/ /de la khyu mchog rlabs po che'i gnas ni nad rab tu zhi ba dang 'dra bar blta bar bya'o/ /tshangs pa'i 'khor lo bskor ba ni nad rab tu zhi bar bya ba'i thabs lta bur blta bar bya'o//'khor gyi nang du seng ge'i sgra yang dag par bsgrags pa ni sman pa ngan pa thams cad kyis dam bcas pa spangs pa lta bu dang / bdag nyid kyis nges par nad rab tu zhi bar dam bcas pa lta bur blta bar bya'o/ / las gang dag byas shing bsags la 'gags pa de dag ni 'das pa zhes bya'o/ /gang dag byas pa yang ma yin 'gag pa yang ma yin pa/ byed pa yang ma yin mod kyi/ phyis byed par 'gyur ba de dag ni ma 'ongs pa zhes bya'o/ /las gang dag byas pa yang ma yin/ 'gag pa yang ma yin mod kyi/bya ba kho nar bsams shing brtsal ba de dag ni da ltar byung ba zhes bya'o/ /de dag kyang rnam pa'i dbye ba'i sgo nas ni lus kyi las dang / ngag gi las dang / yid kyi las gsum dang / chos yang dag par blangs shing sngar ji ltar bstan pa ste/ chos yang dag par blang pa da ltar bde la phyi ma la rnam par smin pa sdug bsngal ba yang yod ces bya ba nas rgyas par sbyar ro//de dag kyang tshe 'di dang tshe phyi ma la phan pa dang / gnod pa'i sbyor ba las ni ci rigs par rig par bya'o/ /yul gang du byed pa de ni de dag gi gnas zhes bya'o/ /sems can du bgrang ba'am/sems can du bgrang ba ma yin pa'i dngos po gang la brten nas byed pa de ni de dag gi dngos po zhes bya'o/ /mi dge ba'i rtsa ba'am/ dge ba'i rtsa ba gang rung zhig gang gis byed pa de ni de dag gi rgyu zhes bya'o/ /sdug pa dang mi sdug pa dang / nyes dmigs dang / phan yon dang ldan pa'i 'bras bu mngon par 'bras bu 'grub pa gang yin pa de ni de dag gi rnam par smin pa zhes bya'o//de bas na de dag bsdus nas dus thams cad dang / rnam pa thams cad dang / gnas skabs thams cad du sbyor ba dang / yul thams cad dang / gnas thams cad dang / gzhi thams cad dang / nyes dmigs dang /phan yon thams cad la de bzhin gshegs pa rnams kyi las mkhyen pa'i rnam pa thams cad dang ldan pa yin te/ de las gong na yang med do/ /de las lhag pa yang med do/ /bsam gtan bzhi dang / rnam par thar pa brgyad dang / bsam gtan dang / rnam par thar pa rnams kyis sems las su rung zhing /sems la dbang thob pa ji ltar 'dod pa'i don rab tu grub par bya ba'i phyir de dang mthun pa'i ting nge 'dzin de dang de la snyoms par 'jug pa gang yin pa de ni ting nge 'dzin la snyoms par 'jug pa zhes bya ste/ ji skad du bcom ldan 'das ting nge 'dzin de lta bu la snyoms par zhugs te/ji ltar thugs mnyam par gzhag pas tshangs pa'i 'jig rten thams cad snang ba chen pos khyab par gyur to/ /des gsungs pa'i sgra yang thos la/ de ni sus kyang mi mthong ngo zhes rgyas par gsungs pa lta bu ste/ de ltar na de bzhin gshegs pa ni 'jig rten dang thun mong pa'am/thun mong ma yin pa'i don gang dang gang kho na sgrub par bzhed pa na/ de dang de lta bu'i ting nge 'dzin la zhugs nas myur ba myur ba kho nar 'grub par 'gyur ro/ /de la bsam gtan dang / rnam par thar pa dag gis sems la dbang thob pas 'dod pa'i don thams cad 'grub pa sems kyi kha na las pa yin te/bsam gtan pa rnams kyi bya ba ni de kho nar zad de/ de las gong na yang med do/ /de las lhag pa yang med do/ /bsam gtan pa'i bya ba rnam pa thams cad 'di ni de bzhin gshegs pa rnams la mnga' bas na/ de'i phyir bsam gtan dang / rnam par thar pa dang / ting nge 'dzin la snyoms par 'jug pa kho nar brjod do//bsam gtan la sogs pa 'di rnams la yang mdor bsdu na kun nas nyon mongs pa gnyis yod de/ de dag ma thob pa'i tshe/ thob par bya ba la bgegs byed pa'i kun nas nyon mongs pa 'di lta ste/ thabs med pa'i sbyor ba dang / sgrib pa gang yang rung ba kun du spyod pa dang /de dag thob zin pa la yang de'i sa pa'i nyon mongs pa kun nas dkris pa'am/ bag la nyal yod pa'o/ /rnam par byang ba ni de las bzlog pa las rnam pa gnyis kho nar rig par bya'o/ /bsam gtan la sogs pa sna tshogs mngon par bsgrubs pa de dag nyid ming dang brdas 'tsham par ci rigs par rnam par gzhag pa zhes bya'o//bsam gtan la sogs pa thob par gyur pa de dag nyid gong du bsgom pas yongs su rdzogs shing ci 'dod pa bzhin du thob pa dang / ngan ngon ma yin par thob pa dang / tshegs med par thob pa gang yin pa de ni de dag gi rnam par dag pa zhes bya'o//de la de dag ci ltar ma thob pa dang / ci ltar thob pa dang / thob nas nyams pa gang yin pa dang / gya nom pa gang yin pa dang / de dag gi ming gang yin pa dang / mchog gi mthar thug pa gang yin pa de dag thams cad mkhyen te/ de'i phyir de ni de bzhin gshegs pa rnams kyi bsam gtan dang /rnam par thar pa dang / ting nge 'dzin la snyoms par 'jug pa mkhyen pa bla na med pa zhes bya'o/ /ci ltar yongs su smin pa yang dag par 'grub pa las dad pa la sogs pa dbang po lnga po dag gi chung ngu dang / 'bring dang / chen po ni dbang po mchog dang mchog ma yin pa zhes bya ste/gzhan las yid ches pa sngon du 'gro ba dang / chos spyod pa sngon du 'gro ba'o/ /'dod cing rtogs pa chung ngu dang / 'bring dang chen po ni mos pa sna tshogs zhes bya'o/ /rigs la gnas pa sna tshogs nyan thos dang / rang sangs rgyas dang / de bzhin gshegs pa'i rigs rnams dang / 'dod chags la sogs pa la spyod pa rab tu dbye ba'i tshul gyis sems can gyi spyod pa brgyad khri'i bar rnams ni khams sna tshogs pa zhes bya'o//de dag nyid kyi 'jug pa'i sgo dang 'tsham pa'i lam dper na 'dod chags spyod pa rnams la mi sdug pa lta bu nas rgyas par 'di lta ste/ nyan thos kyi sa las 'byung ba bzhin du sbyar ba ni thams cad du 'gro ba'i lam zhes bya'o//rnam grangs gzhan yang 'gro ba lngar 'gro ba'i lam thams cad ni thams cad du 'gro ba zhes bya'o/ /rnam grangs gzhan yang phan tshun mi mthun zhing phyogs sna tshogs la brten nas/ lta ba dang 'dod pa phan tshun mi mthun par smra ba tha dad pa 'di las phyi rol pa'i dge sbyong dang /bram ze rnams las lam gang rnam pa thams cad du 'di dang phyi ma la kha na ma tho ba med pa'i 'gro ba gang yin pa de ni thams cad du 'gro ba zhes bya ste/ 'di lta ste/ sgyu rtsal shes kyi bu'i mdo la sogs pa las 'byung ba bzhin no/ / sems can gyi ris rnam pa sna tshogs 'di lta ste/ shar phyogs rnams dang / lho phyogs rnams dang / byang phyogs rnams dang / nub phyogs rnams dang / ming dang / brda sna tshogs rnam par gzhag pa tha dad pa rnams kyis sngon 'das pa'i lus rnams la sngon gyi gnas rnam pa du ma rjes su dran pa'i mdor bsdu na/tha snyad kyi gzhi brgyad la brten pa'i spyod pa drug rjes su dran no/ /tha snyad kyi gzhi rnam pa brgyad rnams gang zhe na/ ming ni 'di zhes bya/ rigs ni 'di zhes bya/ rus ni 'di zhes bya/ kha zas ni 'di lta bu zhig za za/ bde ba dang sdug bsngal 'di lta bu zhig myong /tshe ring khyad ni 'di lta bu zhig /yun ni 'di srid cig gnas gnas / tshe ni 'di tsam zhig thub ces bya'o/ /tha snyad kyi gzhi brgyad la brten pa'i spyod pa drug gang zhe na/ bod pa'i brda dang / rgyal rigs la sogs pa'i rigs rnams dang / pha ma dang zas skom la sogs pa'i bya ba dang / dar ba dang / rgud pa dang / tshe'i rnam pa sna tshogs te/ 'di ltar 'jig rten tha snyad kyi gzhi brgyad po 'di dag la brten nas/ bdag dang gzhan rnams kyi spyod pa drug po dag tha snyad 'dogs pa na/ bdag gi ming ni 'di zhes bya ba'am/ 'di'i ming ni 'di zhes bya ba dang / bdag gam yang na 'di ni rgyal rigs so//bram ze'i rigs so/ /rje'u'i rigs so/ /bdag gam yang na 'di ni dmangs rigs so zhes bya ba dang / 'di ni bdag gam yang na 'di'i pha yin no zhes bya ba dang / pha ji lta ba bzhin du ma la yang de dang 'dra ba dang / bdag gam yang na 'di'i kha zas ni 'de khu 'am / snum khur ram/ 'bras chan nam/ zan dron nam gang yang rung ba de lta bu zhig za'o zhes bya ba dang / bdag gam yang na 'di dar ba'am / rgud pa ni 'di lta bu zhig tu gyur to zhes bya ba dang / bdag gam yang na 'di na tshod kyis ni gzhon pa'am/ bar ma'am/ rgan pa 'di tsam zhig tu rnam par gnas so zhes tha snyad 'dogs par byed pa'i phyir ro//de ltar na 'di dag ni tha snyad kyi gzhi brgyad la brten pa'i spyod pa drug yin te/ de las gong na yang tha snyad kyi gzhi dang de'i spyod pa med do/ /de lta bas na 'di kho na rjes su dran gyi/ de las gong na yang med do/ /de las lhag pa yang med do/ /de la tha snyad kyi gzhi brgyad la brten pa'i spyod pa drug ni rnam pa'o//tha snyad kyi gzhi brgyad ni dan rtags so/ /de rjes su dran pas na rnam pa dang bcas/ dan rtags dang bcas par rjes su dran pa zhes bya'o/ /de la lha'i gnas pa ni bsam gtan rnams zhes bya'o/ /mig de ni de la brten pa dang / de'i 'bras bu dang / de bsdus pa'i phyir lha'i mig ces bya'o//shin tu yongs su rdzogs pa dang / shin tu yongs su dag pa'i bsam gtan gyi 'bras bu yin pas na/ shin tu rnam par dag pa zhes bya'o/ /mi rnams la tha na ming 'dra ba yang med pa'i phyir na/ mi las 'das pa zhes bya ste/ 'dod pa na spyod pa'i lha rnams la ni skyes nas thob pa'i lha'i mig de dang ming mthun par 'dug pa tsam yang yod mod kyi/mi rnams la ni de yang med do/ /sems can 'chi ba rnams la ni 'chi 'pho ba zhes bya'o/ /bar ma do'i srid pa la gnas pa ni skye ba zhes bya'o/ /rnam pa gnyis kyis mun khrod du 'gro ba rnams ni 'di lta bur yid las skyes pa'i bar ma do'i srid pa 'grub par 'gyur te/dper na phyar ba nag po'i kha dog 'dra ba'am/ mtshan mo'i mun pa 'thibs po 'dra bas na/ de'i phyir kha dog ngan pa zhes bya'o/ /rgyu rnam pa gnyis kyis snang bar 'gro ba gang yin pa de dag ni 'di lta bu yid las skyes pa'i bar ma do'i srid pa 'grub par 'gyur te/dper na mtshan mo zla ba'i 'od yod pa'am/ bA rA Na sI'i ras phun sum tshogs pa 'dra bas na/ de'i phyir kha dog bzang po zhes bya'o/ /de la kha dog ngan pa gang yin pa de dag ni ngan pa yin no/ /kha dog bzang po gang yin pa de dag ni bzang po yin no/ /ngan pa gang yin pa de dag ni ngan 'gror 'gro ba'o //bzang po gang yin pa de dag ni bde 'gror 'gro ba'o/ /tshul khrims nyams pa kun nas slong ba dang bcas pa la ni lus dang ngag dang yid kyi nyes par spyod pa dang ldan pa zhes bya'o/ /log par lta zhing lta ba nyams pa dang ldan pa rnam pa gnyis te/ thams cad la skur pa 'debs pa dang /de la dga' ba'i mi mthun pa'i phyogs la gnas pa'i 'phags pa la skur pa 'debs pas na log par lta ba 'phags pa rnams la skur pa 'debs pa zhes bya'o/ /log par lta ba des na rgyu dang 'bras bu la log par mngon par zhen to/ /des na de'i rkyen gyis log pa'i las mngon par 'du byed do//log pa'i las mngon par 'du byed na chos yang dag par blangs pa da ltar bde la/ phyi ma la rnam par smin pa sdug bsngal ba gang yin pa dang / da ltar yang sdug bsngal la phyi ma la yang rnam par smin pa sdug bsngal ba gang yin pa de yang dag par len to/ / de lta bas na log par lta ba'i las kyi chos yang dag par len pa'i rgyus zhes bya'o/ /de ma yin pa'i dge ba'i chos rnam pa du ma dang ldan yang / de nyid kyis ngan 'gror 'gro ba'i phyir rgyu de dang rkyen des zhes bya'o/ /ming dang gzugs gcig la gcig mi 'brel bar gyur pas na lus zhig pa zhes bya'o//'chi ba thams cad kyi nang na shi ba de mchog tu ngan pa yin pas na shi ba'i 'og tu zhes bya'o/ /sems can dmyal ba rnams kyi ming bstan pa'i phyir/ ngan song ngan 'gro log par ltung ba zhes bya'o/ /rang bzhin dang lus dang dngos po bstan pa'i phyir sems can dmyal ba zhes bya'o//de la ngan par song ba zhes bya ba ni chos ngan par spyod pa dang / ya nga ba spyod pa ste / des der 'gro bar 'gyur bas de lta bas na ngan song zhes bya'o/ /sdug bsngal gyi 'dus te reg pa dang / sdug bsngal yun ring ba sna tshogs mi bzad pa rgyun mi 'chad pa myong bar 'gro bas na ngan 'gro zhes bya'o//'og gi phyogs na gnas pa dang / g.yang sa chen po lta bu yin pa dang / nyam nga ba dang / snying rje ba dang / zhan pa'i sgra chen po 'byin pa'i tshul gyis sgra 'byin pa'i phyir na log par ltung ba zhes bya'o/ /shas cher skyo ba skyed pas na/ sems can dmyal ba kho na smos te/de ltar na gang gis skye ba dang / skyes nas kyang gang nyams su myong ba dang / de nyams su myong nas kyang bdag gis byas pa'i sdug bsngal de ma yin pa gzhan yang mngon par 'grub pa ste/ 'di dag ni ming de dag gis bstan to/ /dge ba'i phyogs thams cad ni de las bzlog pa ci rigs par rig par bya'o//de la bye brag ni 'di yod de/ legs par spyod pa sngon du 'gro ba'i 'gro ba ni bde 'gro zhes bya'o/ /bde ba la longs spyod pa mchog yin pa'i phyir mtho ris kyi 'jig rten zhes bya'o/ /zag pa thams cad kyi bag la nyal ma lus par spangs pa'i phyir/de'i gnyen por gyur pa zag pa med pa'i sems dang / zag pa med pa'i shes rab lhag pa'i sems dang / lhag pa'i shes rab mchog gis bsdus pa ni zag pa rnams zad pas/ zag pa med pa'i sems rnam par grol ba dang / shes rab rnam par grol ba zhes bya'o/ /sems rnam par grol ba dang /shes rab rnam par grol ba de yang srid pa tha ma de nyid la mthong ba'i lam la yang brten/ bsgom pa'i lam la yang brten te thob nas srid pa tha ma nyid de la bdag gis thob po snyam du mngon par shes pa drug pas/ rang gis yang dag pa ji lta ba bzhin du shes so/ / 'dod na gzhan dag la yang ston te/ de lta bas na tshe 'di nyid la rang gi mngon par shes pas mngon sum du byas te bsgrubs nas rjod par byed ces bya'o/ /bdag gi skye ba zad do zhes bya ba la sogs pa'i tshig rnams kyi dbye ba ni rnam grangs bsdu ba las rig par bya'o// //sdom ni/ rang bzhin dang ni rab dbye dang //ma 'dres pa dang mnyam pa nyid/ /las byed pa dang go rims dang / /tha ma pa ni bye brag yin/ /de bzhin gshegs pa'i stobs bcu po 'di dag gi rang bzhin yang rig par bya/ rab tu dbye ba yang rig par bya/ ma 'dres pa yang rig par bya/ mnyam pa nyid kyang rig par bya/las byed pa yang rig par bya/ go rims kyang rig par bya/ bye brag kyang rig par bya ste/ mdor bsdu na rnam pa bdun po 'di dag gis de bzhin gshegs pa'i stobs bcu rig par bya'o/ /de la de dag gi rang bzhin gang zhe na/ de dag gi rang bzhin ni dbang po lnga yin te/ 'on kyang shes rab gtso bo yin pa'i phyir shes rab kyi rang bzhin zhes bya ste/'di ltar gnas dang gnas ma yin pa mkhyen pa'i stobs zhes bya ba'i dad pa'i stobs she'am/ de ma yin pa'i stobs zhes ni mi bya'o/ /gnas dang gnas ma yin pa mkhyen pa'i stobs ci lta ba bzhin du lhag ma rnams kyang de dang 'dra bar blta bar bya'o//de la de dag gi rab tu dbye ba gang zhe na/ mdor bsdu na rab tu dbye ba rnam pa gsum gyis de dag tshad med par rig par bya ste/ dus kyi rab tu dbye bas ni 'das pa dang / ma 'ongs pa dang / da ltar gyi dus su gtogs pa'i shes bya thams cad la 'jug pa'i phyir ro//rnam pa'i rab tu dbye bas ni 'dus byas kyi dngos po re re'i rang gi mtshan nyid dang / spyi'i mtshan nyid kyis rnam pa thams cad mkhyen pa nyid la 'jug pa'i phyir ro/ /sems kyi rgyud kyi rab tu dbye bas ni phyogs bcu'i 'jig rten gyi khams thams cad rgyud thams cad kyi re re'i don thams cad la 'jug pa'i phyir ro//de ltar na rab tu dbye ba gsum po 'di dag gis de bzhin gshegs pa'i stobs bcu po 'di dag dpag tu med par rig par bya ste/ 'di ni de rnams kyi rab tu dbye ba yin no/ /de la de rnams kyi ma 'dres pa gang zhe na/ stobs bcu po 'di dag ni de bzhin gshegs pa kho na'i yin te/'ba' zhig pa ma 'dres pa yin gyi/ nyan thos dang rang sangs rgyas thams cad kyi ni ma yin te/ 'di ni de dag gi ma 'dres pa zhes bya'o/ /stobs bcu 'di dag ni de bzhin gshegs pa thams cad kyi mtshungs shing khyad par med de/ 'di ni de dag gi mnyam pa nyid do//gnas pa'i bye brag gis ni de bzhin gshegs pa rnams gzhan dang gzhan du yang 'gyur te/ de bzhin gshegs pa gzhan stobs gzhan gyi gnas pas shas cher gnas la gzhan ni gzhan gyis so/ /de bzhin gshegs pas stobs bcu po de dag las gang gis las gang mdzad ce na/gnas dang gnas ma yin pa mkhyen pa'i stobs kyis ni de bzhin gshegs pas rgyu la yang rgyur / 'bras bu la yang 'bras bur yang dag pa ji lta ba bzhin du rab tu mkhyen te/ rgyu med pa dang / 'bras bu med pa rgyu mi mthun par smra ba'i dge sbyong dang / bram ze rnams kyang tshar gcod par mdzad do//las bdag gir bya ba mkhyen pa'i stobs kyis ni de bzhin gshegs pas bdag gis byas pa'i 'bras bu la spyod pa'i las rnams yang dag pa ji lta ba bzhin du rab tu mkhyen te/ sbyin pa dang / bsod nams 'pho bar smra ba'i dge sbyong dang / bram ze rnams kyang tshar gcod par mdzad do//bsam gtan dang / rnam par thar pa dang / ting nge 'dzin la snyoms par 'jug pa mkhyen pa'i stobs kyis ni de bzhin gshegs pas 'dul ba rnams la cho 'phrul gsum gyis legs par 'doms te/ so sor 'gal ba dang mi mthun pa'i phyogs mi mthun par smra ba la gnas pa'i dge sbyong dang /bram ze rnams kyang tshar gcod par mdzad do/ /dbang po mchog dang mchog ma yin pa mkhyen pa'i stobs kyis ni de bzhin gshegs pas sems can rnams kyi dbang po chung ngu dang / 'bring dang / chen po yang rnam par phye nas/ yang dag pa ji lta ba bzhin du rab tu mkhyen te/de dag la yang ci rigs pa dang / ci 'os par chos ston par mdzad de/ mos pa sna tshogs mkhyen pa'i stobs kyis ni de bzhin gshegs pas dge ba dang mi dge ba la mos pa chung ngu dang / 'bring dang / chen po yang dag pa ji lta ba bzhin du rab tu mkhyen te/ dge ba'i mos pa ni 'phel bar mdzad do//mi dge ba'i mos pa ni 'dor du 'jug go/ /khams sna tshogs mkhyen pa'i stobs kyis ni de bzhin gshegs pas khams ngan pa dang 'bring dang / bzang po rnam par phye nas yang dag pa ci lta ba bzhin du rab tu mkhyen te/ dbang bo ji lta ba dang / bsam pa ji lta ba dang /bag la nyal ci lta ba bzhin du sems can rnams 'jug pa'i sgo de dang de dag tu gdags pa'i bya bas yang dag par ci rigs par legs par 'dzud par mdzad do/ /de la de bzhin gshegs pa rnams kyis ci ltar nyan thos rnams la 'jug pa'i sgo de dang de dag tu gdams ngag sbyin par mdzad pa de lta bu ni nyan thos kyi sa las thams cad kyi thams cad du rgyun chags su bstan cing gsal bar byas te/bkrol zhing brtags nas bshad zin to/ /de bzhin gshegs pa rnams kyis byang chub sems dpa' las dang po pa las thog ma pa ting nge 'dzin gyi tshogs yongs su 'dzin pa la gnas par gyur pa sems gnas par 'dod pa de la byang chub sems dpa'i sems gnas par bya ba'i phyir/ci ltar gdams ngag ston par mdzad ce na/ 'di la de bzhin gshegs pas byang chub sems dpa' g.yo ba med pa'i ting nge 'dzin gyi tshogs lhur len pa dang las dang po pa las thog ma pa de la thog ma kho nar 'di ltar gdams ngag ston par mdzad do //rigs kyi bu tshur shog /rab tu dben pa'i gnas mal du gcig pu gnyis su med par 'dug la/ khyod kyi pha ma gnyis sam/ mkhan po dang / slob dpon gnyis kyis ming btags pa gang yin pa'i ming de nyid nang du yid la byas la/'di snyam du yang ci bdag gi skye mched la ma gtogs pa'i chos rang bzhin gyis yongs su grub pa 'ba' zhig nang ngam phyi rol na yod dam/ gnyis ka med pa la yang yod dam/ gang la ming dang 'du shes dang gdags pa dang nye bar gdags pa 'jug pa yod dam snyam du yid la byos shig dang /khyod de ltar yid la byed pa na/ khyod kyi chos de mi dmigs kyi khyod 'di kho na snyam du glo bur gyi chos rnams kho na la glo bur gyi ming 'byung ngo snyam du sems par 'gyur te/ rigs kyi bu khyod gang gi tshe rang gi ming de las glo bur ba yin par 'du shes skyes shing thob par gyur pa dang /khyod kyis khyod kyi mig la mig ces bya ba dang / mig tu 'du shes pa dang / mig tu 'dogs pa gang yin pa de yang nang du tshul bzhin du yid la byos la/ 'di snyam du yang mig 'di la gnyis dmigs te/ mig ces bya ba'i ming dang 'du shes dang gdags pa 'di dang /gang la ming dang 'du shes dang gdags pa 'di yod pa'i dngos po tsam 'di yod par zad de/ 'di las gong na yang med do/ /'di las lhag pa yang med de/ de la mig gi ming dang / 'du shes dang / gdags pa gang yin pa de yang mig ma yin la/ gang la mig gi 'du shes 'byung ba'i dngos po gang yin pa de yang rang bzhin gyis mig ma yin no//de ci'i phyir zhe na/ de la mig gi ming dang / mig gi 'du shes dang / mig gi gdags pa med par ni su yang mig gi blo 'jug par mi 'gyur ba'i phyir ro / /gal te dngos po de ming gang gis brjod pa de'i bdag nyid kho nas yongs su grub pa zhig yin na ni der yang de la ltos nas gzod mig ces bya ba'i blo de lta bu mi 'jug gi /ming ma thos pa dang / yongs su ma brtags pa'i rang bzhin kho na 'ba' zhig gis dngos po de la mig ces bya ba'i blo 'jug pa'i rigs na / 'jug pa yang mi dmigs so/ /de lta bas na mig gi ming dang mig gi 'du shes 'di yang glo bur ba'i chos la glo bur du byung ba yin par yid la gyis shig /de ltar khyod nang gi mig 'di la tshul bzhin yid la byed pa na/ mig gi 'du shes la yang glo bur gyi 'du shes skye zhing 'thob par 'gyur ro/ /mig la ji lta ba bzhin du rna ba dang / sna dang / lce dang /lus rnams nas rgyas par mthong ba dang / thos pa dang / bye brag phyed pa dang / rnam par shes pa rnams dang / thob pa rnams dang / btsal ba rnams dang / yid kyis rjes su brtags pa rnams dang / rjes su dpyad pa rnams kyi bar du yang de dang 'dra ste/ mdor bsdu na chos rnams kyi 'du shes rnams la glo bur gyi 'du shes skye zhing thob par 'gyur ro//de ltar gyur na khyod rang gi de dag la 'du shes gang yin pa de dang bral bar bya ba'i sbyor ba'i lam yang dag par yongs su bzung bar 'gyur te/ rgyas par chos thams cad kyi bar gyi 'du shes gang yin pa de dang bral bar bya ba'i sbyor ba'i lam yongs su bzung bar 'gyur ro//de ltar khyod kyis shes bya thams cad shin tu dpyad pa'i blos chos thams cad kyi 'du shes rnams la glo bur du 'du shes nas/ chos thams cad la spros pa thams cad kyi 'du shes sol la/ rnam par mi rtog pa'i sems mtshan ma med pa don tsam 'dzin pa la zhugs pas dngos po de la lan mang du gnas par gyis shig /de ltar byas pa dang khyod de bzhin gshegs pa'i ye shes rnam par dag pa'i ting nge 'dzin gyi rigs pas sems rtse gcig pa thob par 'gyur ro/ /khyod gal te mi sdug pa yid la byed pa na yang yid la byed pa 'di nyid ma btang shig /gal te byams pa'am/ rkyen 'di pa nyid kyi rten cing 'brel par 'byung ba dang / khams rab tu dbye ba dang / dbugs dbyung ba dang / rngub pa dran pa dang / bsam gtan dang po nas rgyas par 'du shes med 'du shes med min skye mched dang / byang chub sems dpa'i bsam gtan dang /mngon par shes pa dang / ting nge 'dzin dang / snyoms par 'jug pa tshad med pa'i bar du yid la byed pa na yang / yid la byed pa 'di nyid ma btang shig /de ltar byas na khyod kyi byang chub sems dpa'i yid la byed pa 'di mthar gyis bla na med pa yang dag par rdzogs pa'i byang chub kyi bar du nges par 'byung bar 'gyur ro zhes gdams ngag ston par mdzad do//'di ni byang chub sems dpa' rnams kyi thams cad du 'gro ba'i lam yin par rig par bya ste/ 'das pa'i dus kyi de bzhin gshegs pa rnams kyis kyang byang chub sems dpa' las dang po la de ltar gdams so//ma 'ongs pa'i dus na yang de ltar 'doms par 'gyur ro/ /da ltar byung ba'i dus na yang de ltar 'doms so/ /gal te nyan thos kyang yid la byed pa 'dis sbyor bar byed la/ yid la byed pa 'di ji lta ba bzhin du rtogs par gyur na ni chos rnams mngon par rtogs par bya ba la mngon par shes pa shin tu myur bar 'gyur ro//thams cad du 'gro ba'i lam mkhyen pa'i stobs kyis ni de bzhin gshegs pas sdug bsngal thams cad las nges par 'byin pa dang / nges par 'byung ba ma yin pa'i lam yang dag pa ji lta ba bzhin du rab tu mkhyen to/ / nges par 'byung ba ma yin pa'i lam spangs nas nges par 'byung ba'i lam sgrub par mdzad do/ /sngon gyi gnas rjes su dran pa mkhyen pa'i stobs kyis ni de bzhin gshegs pas sngon gyi mtha'i rjes de lta bu byung ba dang / skyes pa'i rabs rnams dgongs shing 'dul ba rnams kyi sems skyo bar bya ba dang /sems dad par bya ba'i phyir ston te/ rtag par smra ba'i dge sbyong dang / bram ze rnams kyang tshar gcod par mdzad do/ /'chi 'pho ba dang skye ba mkhyen pa'i stobs kyis ni de bzhin gshegs pas nyan thos las brtsams te/ 'das pa'i dus na shi ba'i dus byas pa dang / skye ba yang lung ston pa/chad par smra ba'i dge sbyong dang / bram ze rnams kyang tshar gcod par mdzad do/ /zag pa zad pa'i mkhyen pa'i stobs kyis ni de bzhin gshegs pa nyid kyi rnam par thar pa la yang som nyi mi mnga' zhing / the tshom mi mnga' la/ dgra bcom pa nyid du mngon pa'i nga rgyal 'dzin pa'i dge sbyong dang /bram ze rnams kyang tshar gcod par mdzad de/ 'di ni de bzhin gshegs pa'i stobs bcu'i las yin par rig par bya'o/ /de la de bzhin gshegs pa'i stobs bcu po 'di dag gi go rims gang zhe na/ bla na med pa yang dag par rdzogs pa'i byang chub mngon par rdzogs par sangs rgyas ma thag tu de bzhin gshegs pas stobs bcu thams cad cig car brnyes te/cig car brnyes nas kyang de dag rim gyis mngon sum du 'gyur te/ mngon par rdzogs par sangs rgyas pa nyid kyi mod la/ de bzhin gshegs pas gnas dang gnas ma yin pa mkhyen pa'i stobs kyis chos rnams kyi rgyu dang 'bras bu rnam par gzhag pa la legs pa kho nar rnam par gzigs so//rnam par gzigs nas 'dod pa'i khams nyid du skal ba mnyam pa'i khams kyi sdug pa'i 'bras bu'i khyad par 'dod pa rnams la ni las bdag gir bya ba mkhyen pa'i stobs kyis mi dge ba'i las yongs su spangs pa dang /dge ba'i las spyod par bya ba rnam par ston to/ /'jig rten pa'i 'dod chags dang bral ba 'dod pa'i sems can rnams la ni/ bsam gtan dang / rnam par thar pa dang / ting nge 'dzin la snyoms par 'jug pa mkhyen pa'i stobs kyis 'jig rten pa'i 'dod chags dang bral bar 'gyur bar bya ba dang /ji lta ba bzhin du lam thob par bya ba'i gdams ngag sbyin par mdzad do/ /'jig rten las 'das pa'i 'dod chags dang bral bar 'dod pa rnams la ni de ma yin pa'i de bzhin gshegs pa'i stobs bdun gyis 'jig rten las 'das pa'i 'dod chags dang bral bar 'gyur ba'i lam rnam par ston to//de la thog mar ni dbang po mchog dang mchog ma yin pa mkhyen pa'i stobs kyis 'jig rten las 'das pa'i 'dod chags dang bral bar 'dod pa rnams kyi dbang po rnam par gzigs so/ /de'i 'og tu mos pa sna tshogs mkhyen pa'i stobs kyis ni dbang po sngon du 'gro ba'i bsam pa la rnam par gzigs so//de'i 'og tu khams sna tshogs mkhyen pa'i stobs kyis ni bsam pa sngon du 'gro ba'i bag la nyal rnam par gzigs so/ /de ltar dbang po dang / bsam pa dang / bag la nyal mkhyen pa des/ thams cad du 'gro ba'i lam mkhyen pa'i stobs kyis ci rigs par dmigs pa la 'jug pa'i sgo rnams la 'dzud par mdzad do//de'i 'og tu yang sngon gyi gnas rjes su dran pa mkhyen pa'i stobs dang / 'chi 'pho ba dang / skye ba mkhyen pa'i stobs kyis ni nyon mongs pa thams cad spang bar bya ba'i phyir mtshan ma'i dmigs pa la 'jug pa'i sgo'i sbyor ba sems gnas pa yang 'dzin du 'jug la/spyod pa rnams kyang rnam par dag par mdzad nas/ 'jig tshogs la lta ba'i rtsa ba dang rtag pa dang / chad pa dang mthar 'dzin pa rnam par spangs pa'i dbu ma'i lam rnam par ston to/ /de'i 'og tu de ltar yang dag par brtson zhing zhi gnas kyis nye bar brten te/nyon mongs pa ma spangs pa kun du mi spyod pa dang ldan pas ma byas pa la byas pas mngon pa'i nga rgyal 'dzin pa'i nga rgyal zag pa zad pa mkhyen pa'i stobs kyis 'dor du 'jug ste/ 'di ni stobs rnams kyi go rims kyi rnam grangs gcig go/ //bam po nyi shu rtsa gnyis pa ste tha ma'o//rnam grangs gzhan yang 'di la de bzhin gshegs pa ni bla na med pa yang dag par rdzogs pa'i byang chub mngon par rdzogs par sangs rgyas nas/ thog ma kho nar gnas dang gnas ma yin pa mkhyen pa'i stobs mngon sum du mdzad de/ rten cing 'brel par 'byung ba'i chos rnams la chos gnas pa'i ye shes dam pa rnam par spyod par mdzad do//chos gnas pa'i ye shes de la brten nas las bdag gir bya ba mkhyen pa'i stobs kyis khyim pa'i phyogs la rnam par gzigs te/ las rnam pa sna tshogs gang dang gang gis khyim pa'i phyogs la gnas pa de dag yang dag par grub par gyur pa dang /grub par 'gyur ba dang / 'grub par gzigs so/ /khyim pa'i phyogs la gzigs nas/ bsam gtan dang / rnam par thar pa dang / ting nge 'dzin la snyoms par 'jug pa mkhyen pa'i stobs kyis rab tu byung ba'i phyogs la rnam par gzigs te/ci rab tu byung ba'i phyogs 'di la sdug bsngal las byung ba dang / sdug bsngal las 'byung ba'i lam ston pa 'ga' lta yod dam/ 'on te med zhig gu snyam ste/ des med par mkhyen nas skyabs med cing skyob pa med pa'i 'jig rten thams cad la brtags te snying rje chen po la brten nas sangs rgyas kyi spyan gyis 'jig rten la rnam par gzigs so//des rnam par gzigs te dbang po mchog dang mchog ma yin pa mkhyen pa mngon sum du mdzad nas rab tu mkhyen te/ 'jig rten na sems can byung ba dang / 'jig rten na sems can skyes pa dang dbang po rtul po dang dbang po 'bring po dang dbang po rnon po dag kyang yod par thugs su chud nas de chos bstan pa la sems 'jug go//de'i 'og tu snga ma'i go rims bzhin du de ma yin pa mkhyen pa'i stobs mos pa sna tshogs mkhyen pa la sogs pa thams cad kyang 'byung bar rig par bya ste/ 'di ni stobs rnams kyi go rims kyi rnam grangs gnyis pa'o//rnam grangs gzhan yang thog ma kho nar de bzhin gshegs pa mngon par rdzogs par sangs rgyas ma thag tu gnas dang gnas ma yin pa mkhyen pa'i stobs kyis rten cing 'brel par 'byung ba'i chos kyi khams dpyod par mdzad do/ /de'i 'og tu las bdag gir bya ba mkhyen pa'i stobs kyis rten cing 'brel par 'byung ba'i chos gang dag la sems can du ming du btags pa'i sems can gyi khams de la sems can 'di dag ni rang gis byas pa'i las 'di lta bu'i 'bras bu 'di 'dra ba so sor nyams su myong ngo snyam du rnam par dpyod par mdzad de/chos kyi khams dang / sems can gyi khams ci lta ba bzhin du rnam par dpyad nas bsam gtan dang / rnam par thar pa dang / ting nge 'dzin la snyoms par 'jug pa mkhyen pa'i stobs kyis sems can de dag nyid sdug bsngal las rnam par thar par bya ba'i phyir cho 'phrul gsum gyis legs par gdams par mdzad do//gdams nas kyang snga ma'i go rims bzhin du stobs lhag ma rnams kyis dbang po la sogs pa yang mkhyen/ lam la yang btsud nas sems can de dag sdug bsngal las rnam par thar par mdzad de/ 'di ni stobs rnams kyi go rims kyi rnam grangs gsum pa'o/ /de la gnas dang gnas ma yin pa mkhyen pa'i stobs dang /las bdag gir bya ba mkhyen pa'i stobs la bye brag ci yod ce na/ dge ba dang mi dge ba'i las kyi 'bras bu sdug pa dang mi sdug pa 'grub pa gang yin pa 'di ni gnas dang gnas ma yin pa mkhyen pa'i stobs kyis mkhyen to/ /dge ba dang mi dge ba'i las byed pa gang yin pa de nyid kyis sdug pa dang mi sdug pa'i 'bras bu de so sor nyams su myong bar 'gyur ba gang yin pa 'di ni/las bdag gir bya ba mkhyen pa'i stobs kyis mkhyen to/ /bsam gtan dang rnam par thar pa la sogs pa snyoms par 'jug pa gang yin pa de nyid la de dag 'byung bar 'gyur gyi / gzhan la ma yin pa gang yin pa de ni las bdag gir bya ba mkhyen pa'i stobs kyis so//bsam gtan la sogs pa de dag nyid la brten nas gdul ba rnams la cho 'phrul gsum gyis 'doms par mdzad pa gang yin pa de ni bsam gtan dang / rnam par thar pa dang / ting nge 'dzin la snyoms par 'jug pa mkhyen pa'i stobs kyis so//dad pa la sogs pa dang lhan cig skyes shing mtshungs par ldan pa'i sems thugs su chud pa gang yin pa 'di ni bsam gtan dang / rnam par thar pa dang / ting nge 'dzin la snyoms par 'jug pa mkhyen pa'i stobs kyis so/ /dbang po de dag nyid chung ngu dang /'bring dang / chen po'i bye brag 'byed pa gang yin pa 'di ni dbang po mchog dang mchog ma yin pa mkhyen pa'i stobs kyis so/ /chos de dang de dag la dbang po sngon du 'gro ba'i bsam pa thugs su chud pa gang yin pa 'di ni dbang po mchog dang mchog ma yin pa mkhyen pa'i stobs kyis so//bsam pa de nyid sna tshogs su bye brag 'byed pa gang yin pa 'di ni mos pa sna tshogs mkhyen pa'i stobs kyis so/ /bsam pa de yang mdor bsdu na rnam par dbye ba rnam pa drug yod par rig par bya ste/ nges par 'byung ba ma yin pa'i bsam pa ni 'di lta ste/ dbang phyug chen po dang / sred med kyi bu dang / tshangs pa'i 'jig rten la sogs pa la mos pa tha dad pa rnams kyi'o/ /nges par 'byung ba'i bsam pa ni 'di lta ste/ theg pa gsum po dag la mos pa rnams kyi'o/ /rnam par dag pa las ring ba'i bsam pa ni 'di lta ste/ yongs su smin pa chung ngu dang /'bring la gnas pa rnams kyi'o/ /rnam par dag pa dang nye ba'i bsam pa ni 'di lta ste yongs su smin pa chen po la gnas pa rnams kyi'o/ /tshe 'di nyid la mya ngan las 'das pa 'thob par mos pa rnams kyi'o/ /tshe 'di nyid la mya ngan las 'das pa 'thob pa'i bsam pa ni 'di lta ste nyan thos kyi theg pas mya ngan las 'das pa 'thob par mos pa rnams kyi'o//phyis mya ngan las 'das pa thob pa'i bsam pa ni 'di lta ste theg pa chen pos yongs su mya ngan las 'da' pa 'thob par mos pa rnams kyi'o/ /mos pas bskyed pa de dang 'dra ba'i sa bon thugs su chud pa gang yin pa 'di ni mos pa sna tshogs mkhyen pa'i stobs kyis so//sa bon de nyid bye brag phye nas rnam pa du mar thugs su chud pa gang yin pa 'di ni khams sna tshogs mkhyen pa'i stobs kyis so/ /khams rab tu dbye ba de yang mdor bsdu na rnam pa bzhir rig par bya ste/ rang bzhin du gnas pa'i sa bon dang / sngon goms pa las byung ba'i sa bon dang / rnam par dag par byar rung ba'i sa bon ni 'di lta ste yongs su mya ngan las 'da' bar 'gyur ba'i chos can rnams kyi'o/ /rnam par dag par byar mi rung ba'i sa bon ni 'di lta ste mya ngan las 'da' bar 'gyur ba'i chos can ma yin pa rnams kyi'o/ / khams ji lta ba bzhin du 'tsham pa'i lam la 'jug pa rab tu mkhyen pa gang yin pa 'di ni khams sna tshogs mkhyen pa'i stobs kyis so/ /lam de nyid rnam pa thams cad du rab tu rnam par 'byed do / lam 'di ni kun nas nyon mongs par 'gyur ba'o/ /'di ni rnam par byang bar 'gyur ba'o//'di ni gtan du rnam par byang bar 'gyur ba'o/ /'di ni gtan du rnam par byang bar 'gyur ba ma yin no zhes bya ba gang yin pa de ni thams cad du 'gro ba'i lam mkhyen pa'i stobs kyis so/ /sngon gyi mtha' rjes su dran te 'gro ba thams cad kyi rgyu sngon gyi mtha' dang ldan pa rnams yang dag pa ci lta ba bzhin du rab tu mkhyen pa gang yin pa 'di ni thams cad du 'gro ba'i lam mkhyen pa'i stobs kyis so//rnam par phye nas snga ma bzhin du tha snyad kyi gzhi la brten pa'i spyod pa rnam pa drug rab tu mkhyen pa gang yin pa 'di ni sngon gyi gnas rjes su dran pa mkhyen pa'i stobs kyis so/ / sngon gyi mtha' las brtsams te sems can rnams kyi 'chi 'pho dang / skye ba rab tu mkhyen pa gang yin pa 'di ni sngon gyi gnas rjes su dran pa mkhyen pa'i stobs kyis so/ /phyi ma'i mtha'i sems can rnams kyi shi 'pho dang skye ba mkhyen pa gang yin pa 'di ni shi 'pho dang skye ba mkhyen pa'i stobs kyis so//sems can rang gi don mthar phyin pa ma yin pa rnams kyi phyi ma'i mthar skye ba dang / nying mtshams sbyor ba rab tu mkhyen pa gang yin pa 'di ni shi 'pho dang skye ba mkhyen pa'i stobs kyis so/ /rang gi don mthar phyin te sems shin tu rnam par grol ba rnams kyi tshe 'di la mya ngan las 'das pa 'thob pa rab tu mkhyen pa gang yin pa 'di ni zag pa zad pa mkhyen pa'i stobs kyis te/'di ni de bzhin gshegs pa'i stobs bcu po dag phan tshun bye brag yod pa dang / bye brag med pa yin par rig par bya'o/ /mi 'jigs pa bzhi'i gzhung ni mdo 'di nyid las ji skad 'byung ba bzhin du rig par bya'o//de la gnas bzhi po 'di dag ni de bzhin gshegs pa rnams kyi 'khor gyi nang du dam bca' bar bya ba yin te/ nyan thos dang thun mong ma yin pa shes bya'i sgrib pa las rnam par thar par bya ba'i phyir rnam pa thams cad du chos thams cad mngon par rdzogs par byang chub pa 'di ni gnas dang po'o//nyan thos dang thun mong pa nyon mongs pa'i sgrib pa las rnam par thar pa 'di ni gnas gnyis pa'o/ /rnam par thar pa 'dod pa'i sems can rnam par sdug bsngal las yang dag par 'da' bar 'gyur ba'i nges par 'byin pa'i lam 'di ni gnas gsum pa'o//lam de nyid thob par bya ba la gags su gyur pa bar du gcod par byed pa'i chos rnams yongs su spang bar bya ba 'di ni gnas bzhi pa'o/ /gnas bzhi po 'di dag la de bzhin gshegs pas don ji lta ba bzhin du dam bca' ba yin te/ de bas na gnas snga ma gnyis kyi dam bca' ba dang mi mthun pa'i sku dang /gsung dang / thugs kyi spyod pa dang / gnas phyi ma gnyis kyis dam bca' ba dang / mi mthun pa'i snga phyi 'gal ba dang / mi rigs par 'gyur ba yod do zhes dam bcas pa'i gnas kyi gnyen por lha'i mig dang ldan pa dang / lha'i mig dang ldan pa ma yin pa dang /pha rol gyi sems shes pa dang / pha rol gyi sems shes pa ma yin pa gzhan dag gis brgal ba'i rgyur 'gyur ba yang dag par rjes su ma gzigs te/ gnas 'di dag la mi bsnyengs pa dang / thugs zhum pa mi mnga' ba dang / dogs pa mi mnga' ba dang /bag tsha ba mi mnga' bar dam bca' bar mdzad do/ /ston pas dam bca' bar bya ba ni 'di yin te/ 'di lta ste/ bdag la phan pa sgrub pa dang / gzhan la phan pa sgrub pa yongs su rdzogs pa'o/ /de la gnas dang po gnyis kyis ni bdag la phan pa sgrub pa yongs su rdzogs par dam bcas pa yin no//gnas phyi ma gnyis kyis ni gzhan la phan pa sgrub pa yongs su rdzogs par dam bcas pa yin no/ /de la bdag nyid kyis chos thams cad mngon par rdzogs par byang chub pas yang dag par rdzogs par sangs rgyas pa ni theg pa chen po la yang dag par zhugs pa'i byang chub sems dpa' rnams kyi dbang du mdzad nas/de bzhin gshegs pas dam bcas pa yin no/ /zag pa thams cad zad pa ni/ nyan thos dang / rang sangs rgyas kyi theg pa la yang dag par zhugs pa'i sems can rnams kyi dbang du mdzad de dam bcas pa yin no/ / nges par 'byin pa'i lam dang / bar du gcod pa'i chos rnams ni de gnyi ga'i dbang du mdzad de dam bcas pa yin no/ /de bzhin gshegs pas mdo'i tshig 'di skad du/ ngas byang chub sems dpa' rnams dang / nyan thos rnams kyi nges par 'byung ba'i lam bstan pa gang yin pa zhes rgyas par gsungs pa las byang chub sems dpa' zhes bya ba'i tshig de yang dag par sdud par byed pa rnams kyis nyan thos kyi sde snod kyi skabs nas byung ngo //byang chub sems dpa'i sde snod las kyang byang chub sems dpa'i tshig kho na 'ba' zhig smos so/ /dran pa nye bar gzhag pa gsum gyi gzhung ni mdo las ji skad 'byung ba bzhin te/de bzhin gshegs pa ni yun ring po nas 'di ltar ngas legs par bstan pa'i chos 'dul ba rnams la nan tan byed cing / ji lta ba bzhin du gnas kyang ci ma rung snyam du bzhed de/ yun ring po nas de ltar bzhed pa chos kyi mnga' bdag tshogs yongs su sdud pa de'i bzhed pa de dag grub pa dang /ma grub pa dag gis kun nas nyon mongs pa med pa ni mdor bsdu na dran pa nye bar gzhag pa gsum gyis rab tu phye ba yin no/ /de dag kyang 'khor gsum gyi bye brag gis gsum du rnam par gzhag ste/ 'khor gsum po gang zhe na/ thams cad kyang gcig tu nges par yang dag par sgrub par byed pa 'di ni 'khor gcig go//thams cad kyang gcig tu nges par log par sgrub par byed pa 'di ni 'khor gnyis pa'o/ /'khor gsum pa ni gang las kha cig ni yang dag par sgrub la/ kha cig ni log par sgrub pa'o/ /bsrung ba med pa gsum gyi gzhung ni mdo nyid las ji skad 'byung ba bzhin du rig par bya ste/mdor bsdu na rnam pa thams cad du nyes pa byas pa 'chab pa spangs pa 'di ni de bzhin gshegs pa'i bsrung ba med pa gsum gyis bstan te/ dgra bcom pa la yang brjed pa'i phyir brgya la brgya lam na lung du ma bstan pa'i nyes pa byas pa tsam cung zad 'byung ba gang yin pa 'di ni de bzhin gshegs pa la de yang thams cad du mi mnga'o//de bas na de bzhin gshegs pa ni ji ltar dam bcas pa de lta bu'i rang bzhin yin te/ nyan thos rnams tshar bcad cing tshar bcad cing bka' stsal to/ /thibs kyis mnan cing thibs kyis mnan cing kha cig la ni sma 'bebs mdzad/kha cig la ni spangs par mdzad cing brlang por yang mdzad de/ 'grogs pa'i rgyu las nga'i nyan thos rnams kyi lus dang / ngag gi kun du spyod pa yongs su ma dag par shes nas/ dngos po des yid du mi 'ong zhing mi dga' bar gyur nas gleng ba'am/gzhan dag la sgrogs par mi 'gyur grang snyam du de dag la rjes su bsrung ba de la mi mnga'o/ /de la de bzhin gshegs pa rnams kyi thugs rje chen po ni rnam pa thams cad du mchod pa dang / brten pa dang / tshad med pa'i le'u las sngar ji skad bstan pa bzhin du rig par bya ste/ de bzhin gshegs pa'i thugs rje chen po de ni tshad med pa dang bla na med par rig par bya'o/ /de la de bzhin gshegs pa'i nan tan du mdzad pa ni gang dang gang du dang / ji ltar dang / gang gi tshe ste de dang / der dang / de ltar dang / de'i tshe yang dag par nan tan mdzad pas na/ 'di ni de bzhin gshegs pa'i bsnyel ba mi mnga' ba'i chos nyid ces bya ste/'di ltar de bzhin gshegs pa'i mdzad pa thams cad dang / yul thams cad dang / mdzad pa'i thabs thams cad dang / dus thams cad du bsnyel ba mi mnga' ste/ rtag tu dgongs pa nye bar gnas pa 'di ni bsnyel ba mi mnga' ba'i chos nyid yin par blta bar bya'o//de la de bzhin gshegs pa'i bskyod pa'am/ gzigs pa'am/ srung ba'am/ gnas pa la nyon mongs pa mnga' ba 'dra ba'i kun du spyod pa mi mnga' ba 'di ni de bzhin gshegs pa'i bag chags yang dag par bcom pa zhes bya'o/ /dgra bcom pa rnams ni nyon mongs pa spangs pa yin mod kyi/gzigs pa'am/ srung ba'am/ nyon mongs pa yod pa 'dra ba'i spyod pa dang / bskyod pa dang / lta ba dang / smra ba dang / gnas pa yang yod do/ /mdor bsdu na de bzhin gshegs pa ni chos rnams kyi tshogs gsum mngon par rdzogs par sangs rgyas te/gsum gang zhe na/ don dang ldan pa'i chos rnams dang / don dang ldan pa ma yin pa rnam pa dang / don dang ldan pa yang ma yin don dang mi ldan pa yang ma yin pa rnams so/ /de la de bzhin gshegs pa'i don dang ldan pa ma yin pa dang / don dang ldan pa yang ma yin don dang mi ldan pa yang ma yin pa'i chos thams cad mkhyen pa gang yin pa 'di ni de bzhin gshegs pa'i rnam pa thams cad mkhyen pa zhes bya'o//de la de bzhin gshegs pa'i don dang ldan pa'i chos thams cad mkhyen pa gang yin pa 'di ni de bzhin gshegs pa'i mchog mkhyen pa zhes bya'o//de la rnam pa thams cad mkhyen pa gang yin pa dang / mchog mkhyen pa gang yin pa de gnyis gcig tu bsdus pa ni rnam pa thams cad dang mchog mkhyen pa zhes bya'o/ /de dag thams cad bsdoms pa ni sangs rgyas kyi chos ma 'dres pa brgya bzhi bcu yin no//de la mtshan dang dpe byad bzang po rnams ni byang chub sems dpar gyur pa des srid pa tha ma la shin tu yongs su dag par thob par 'gyur ro/ /gang gi tshe byang chub sems dpa' byang chub kyi snying po la bzhugs te/ byang chub kyi tshogs kyi lam shin tu yongs su rdzogs pa des ni srid pa tha ma de'i tshe slob dpon med par phyi ma la byang chub kyi phyogs kyi chos sum cu rtsa bdun bsgoms nas/skad cig gcig gis sgrib pa med pa'i ye shes sbyin par byed pa zhes bya ba'i ting nge 'dzin thob par 'gyur te/ slob par gyur pa'i byang chub sems dpa'i rdo rje lta bu'i ting nge 'dzin tu gtogs pa de'i mjug thogs su skad cig gnyis pa la lhag ma stobs bcu la sogs pa sangs rgyas kyi chos rnams rnam pa thams cad dang mchog mkhyen pa la thugs shin tu rnam par dag cing bla na med pa rnams cig car thob par 'gyur ro//de dag thob pas chags pa med cing sgrib pa med la shin tu rnam par dag cing dri ma med pa'i ye shes btsal ba tsam la thogs pa med pa shes bya thams cad la 'jug go/ /brnag pa yang yongs su rdzogs so/ /de ltar thugs la dgongs pa yongs su rdzogs nas byang chub sems dpa'i spyod pa dang /byang chub sems dpa'i sa las yang dag par 'das nas/ de bzhin gshegs pa'i spyod pa dang / de bzhin gshegs pa'i sa la bzhugs pa yin no/ /shes bya'i sgrib pa'i phyogs gnas ngan len snying po yod pa lta bu yang ma lus par spangs nas de'i gnas gyur pa yin no//de'i gnas gyur pa de ni bla na med pa yin no/ /byang chub sems dpa' gnas pa mchog la thug pa man chad rnams kyi gnas gyur pa gzhan thams cad ni bla na med pa nyid du rig par bya'o/ /de la mthar thug par 'gro ba'i sa la gnas pa'i byang chub sems dpa' dang /de bzhin gshegs pa'i ye shes khyad par yod pa ye shes ji lta bu zhig gis bye brag tu gyur par rig par bya zhe na/ 'di la mthar thug par 'gro ba'i sa la gnas pa'i byang chub sems dpa'i ye shes ni shes bya thams cad la mig dang ldan pa seng ras kyis bar du chod pa'i gzugs la lta ba dang 'dra bar rig par bya'o//de bzhin gshegs pa'i ye shes ni cis kyang bar du mchod pa dang 'dra bar blta bar bya'o/ /dper na ri mo rnam pa thams cad du tshon tshang bar bkye la/ mjug gi tshon gyis gcad pa shin tu rnam par dag pas yongs su dag par ma byas pa dang 'dra bar ni byang chub sems dpa' de'i ye shes blta bar bya'o//de bzhin gshegs pa'i ye shes ni shin tu rnam par dag par byas pa dang 'dra bar blta bar bya'o/ /dper na mig dang ldan pa'i mi mun pa mi gnag pa'i nang na gzugs la lta ba dang 'dra bar ni byang chub sems dpa'i snga ma bzhin du sbyar ro//de bzhin gshegs pa'i ye shes ni rnam pa thams cad du mun pa med pa dang 'dra bar blta bar bya'o/ /dper na mig dang ldan pa thag ring po nas gzugs la lta ba dang 'dra bar ni byang chub sems dpa'i snga ma bzhin no//de bzhin gshegs pa'i ni nye ba nas lta ba dang 'dra ste snga ma bzhin no/ /byang chub sems dpa'i ni rab rib tshabs chung ngu gzugs la lta ba dang 'dra ste snga ma bzhin no/ /de bzhin gshegs pa'i ni mig shin tu rnam par dag pa dang 'dra ste snga ma bzhin no/ /mthar thug par 'gro ba'i sa la gnas pa'i byang chub sems dpa' ni mngal na 'dug pa'i lus dang 'dra bar blta bar bya'o//de bzhin gshegs pa ni skye ba'i srid par skye ba'i lus dang 'dra bar blta bar bya'o/ /dgra bcom pa'i rmi lam gyi sems kyi rgyu ba ci 'dra ba de lta bur ni mthar thug par 'gro ba'i sa la gnas pa'i byang chub sems dpa'i blta bar bya'o//de nyid sad pa'i sems kyi rgyu ba ci 'dra ba de lta bur ni de bzhin gshegs pa blta bar bya'o/ /mar me rnam par ma dag pa'i rang bzhin ci 'dra ba de lta bur ni mthar thug par 'gro ba'i sa la gnas pa'i byang chub sems dpa'i ye shes kyi rang bzhin blta bar bya'o//shin tu rnam par dag pa'i mar me'i rang bzhin ci 'dra ba de lta bur ni de bzhin gshegs pa'i ye shes kyi rang bzhin blta bar bya ste/ de bas na de bzhin gshegs pa dang mthar thug par 'gro ba'i sa la gnas pa'i byang chub sems dpa' gnyis ni ye shes kyi khyad par dang /sku'i khyad par dang / dgongs pa'i khyad par khyad che bar reg par bya'o/ /de ltar byang chub mngon par rdzogs par sangs rgyas pa'i de bzhin gshegs pa ni phyogs bcu'i sangs rgyas kyi zhing thams cad du sangs rgyas kyi mdzad pa thams cad mdzad do//de la sangs rgyas kyi mdzad pa gang zhe na/ mdor bsdu na bcu po 'di dag ni de bzhin gshegs pa rnams kyi de bzhin gshegs pa'i mdzad pa dang / de bzhin gshegs pa'i phrin las su mdzad pa yin te/ de bzhin gshegs pa'i mdzad pa re re yang sems can tshad med pa dag gi don mdzad pa yin te/de las gong na yang med do/ /de las lhag pa yang med do/ /bcu gang zhe na/ thog ma kho nar bdag nyid kyi skyes bu chen po'i sku la sems dga' bar byed/ skyes bu chen po'i dngos po la yid ches pa bskyed pa ni de bzhin gshegs pa'i mdzad pa dang po ste/de ni de bzhin gshegs pas mtshan dang dpe byad bzang po rnams kyis sgrub par mdzad do/ /sems can thams cad la rnam pa thams cad du gdams pa'i sbyor ba ni de bzhin gshegs pa'i mdzad pa gnyis pa ste/ de ni de bzhin gshegs pas rnam pa thams cad yongs su dag pa bzhis sgrub par mdzad do//de sems can thams cad kyi dgos pa byed nus pa dang / the tshom thams cad gcod nus pa ni/ de bzhin gshegs pa'i mdzad pa gsum pa ste/ de ni de bzhin gshegs pas de bzhin gshegs pa'i stobs bcus sgrub par mdzad do//'di ltar de bzhin gshegs pa ni sngar bstan pa'i stobs bcu po dag gis sems can rnams kyi don sgrub par spyod de/ gang gis de bzhin gshegs pa'i stobs bcu las brtsams te/ de la zhus na ji ltar gang dag de bzhin gshegs pas mkhyen pa dang /gzigs pa dang / bye brag phyed pa dang / rnam par mkhyen pa de ltar de dag de bzhin gshegs pas de dag gi zhu ba zhus pa lan 'debs par mdzad do/ /pha rol gyi smra ba thams cad tshar gcod cing rang gi gzhung 'dzugs pa ni de bzhin gshegs pa'i mdzad pa bzhi pa ste/de ni de bzhin gshegs pa'i mi 'jigs pa rnams kyis sgrub par mdzad do/ /de bzhin gshegs pas bka' stsal pa la gnas pa dang / mi gnas pa'i gdul ba rnams la yang thugs kun nas nyon mongs pa can du 'gyur ba med pa ni de bzhin gshegs pa'i mdzad pa lnga pa ste/de ni de bzhin gshegs pas dran pa nye bar gzhag pa rnams kyis sgrub par mdzad do/ /ji skad gsungs pa de bzhin du mdzad pa ni de bzhin gshegs pa'i mdzad pa drug pa ste/ de bzhin gshegs pas bsrung ba med pa rnams kyis sgrub par mdzad do/ /sangs rgyas kyi spyan gyis nyin mtshan du 'jig rten thams cad la rnam par gzigs pa ni de bzhin gshegs pa'i mdzad pa bdun pa ste/ de ni de bzhin gshegs pas thugs rje chen pos sgrub par mdzad do//sems can thams cad kyi bya ba thams cad las mi nyams pa ni de bzhin gshegs pa'i mdzad pa brgyad pa ste/ de ni de bzhin gshegs pas bsnyel ba mi mnga' ba'i chos nyid kyis sgrub par mdzad do/ /de bzhin gshegs pa'i tshul ji lta ba bzhin du nyams su blangs shing nyams su spyad par bya ba ni de bzhin gshegs pa'i mdzad pa dgu pa ste/de ni de bzhin gshegs pas bag chags yang dag par bcom pas sgrub par mdzad do/ /chos gang don dang ldan pa ma yin pa rnams dang / gang don dang ldan pa yang ma yin don dang ldan pa ma yin pa rnams gtan spangs nas/chos gang don dang ldan pa de dag yang dag par ston cing 'grel la gsal bar mdzad pa ni/ de bzhin gshegs pa'i mdzad pa bcu pa ste/ de ni de bzhin gshegs pas rnam pa thams cad dang / mchog mkhyen pas sgrub par mdzad de/de ltar na de bzhin gshegs pas sangs rgyas kyi chos ma 'dres pa brgya bzhi bcu po 'di dag gis de bzhin gshegs pa'i mdzad pa bcu mdzad cing / sangs rgyas kyi phrin las thams cad mdzad do/ /rgyas par dbye ba ni bskal pa bye ba khrag khrig phrag 'bum gyi bar du yang sangs rgyas kyi phrin las 'di nyid kyi grangs bcad par sla ba ma yin no//'di ni de bzhin gshegs pa'i gnas pa dang / de bzhin gshegs pa'i sa 'di ni rab tu gnas pa zhes bya'o/ /de ci'i phyir zhe na/ 'di la brten 'di la rab tu gnas nas 'di 'dod pa'i byang chub sems dpa' rnams byang chub sems dpa'i bslab pa dag la slob pa dang /rab tu gnas pa de thob nas kyang de nyid la brten/ de nyid la rab tu gnas nas/ sems can thams cad kyi don thams cad sgrub par mdzad de/ de lta bas na rab tu gnas pa zhes bya'o/ /de bzhin gshegs pa rnams kyi sangs rgyas kyi chos 'di dag thams cad ni shin tu gzhan gyi don bya ba dang /mthun pa dang / gzhan gyi don bya bas rab tu phye ba yin gyi/ nyan thos dang / rang sangs rgyas rnams kyi ni de lta ma yin te/ de lta bas na de'i de dag la ma 'dres pa zhes bya'o/ /sangs rgyas kyi gang dag thams cad kyi thams cad du nyan thos dang /rang sangs rgyas thams cad la dmigs pa de dag kyang yod de/ 'di lta ste/ thugs rje chen po dang / bsnyel ba mi mnga' ba'i chos nyid dang / bag chags yang dag par bcom pa dang / rnam pa thams cad dang mchog mkhyen pa'o/ /gang dag dmigs pa de dag kyang /rnam pa thams cad du yongs su rdzogs pa ma yin no/ /de bzhin gshegs pa la ni thams cad kyang dmigs la/ rnam pa thams cad yongs su rdzogs pa dang / shin tu 'das pa dang / ches gya nom pa yin no/ /de lta bas na de'i ma 'dres pa zhes bya'o/ /'ba' zhig gi don ni ma 'dres pa'i don yin par rig par bya'o//de ltar na 'dis ni byang chub sems dpa' rnams kyi bslab pa'i lam yongs su rdzogs pa dang / bslab pa'i lam gyi 'bras bu yang bstan te / byang chub sems dpa'i bslab pa'i lam thams cad dang /bslab pa'i lam gyi 'bras bu rnam pa thams cad kyis bstan pa'i gnas su gyur pa yang yin no/ /byang chub sems dpa'i sa 'di ni byang chub sems dpa'i sde snod kyi ma mo zhes kyang bya'o/ /theg pa chen po bsdus pa zhes kyang bya'o/ /chud za ba dang chud za ba ma yin pa'i lam 'grel pa zhes kyang bya'o//sgrib pa med pa'i ye shes rnam par dag pa'i rtsa ba zhes kyang bya'o/ /lha dang mir bcas pa'i 'jig rten gyi nang nas lhar gyur pa'am/ mir gyur pa'am/ dge sbyong ngam/ bram ze gang la las byang chub sems dpa'i sa 'di la brtan por mos pa bskyed nas/ 'di nyan pa'am/ len pa dang / 'dzin pa'am/ bsgom pa'i rnam pas sbyor bar byed dam/ gzhan dag la rgyas par ston par byed dam/ tha na yi ger 'drir bcug ste/ 'chang ba dang / mchod pa dang / bkur sti yang byed pa de la ni mdor bsdu na byang chub sems dpa'i sde snod du gtogs pa'i mdo sde nyan pa la sogs pa'i las kyi bsod nams kyi phung po bcom ldan 'das kyis gsungs shing gsal bar mdzad de/bkrol zhing brtags nas bstan pa ji snyed pa de snyed kyi bsod nams kyi phung por gyur par re bar bya'o/ /de ci'i phyir zhe na/ 'di ltar byang chub sems dpa'i sa 'dir ni byang chub sems dpa'i sde snod du bstan pa dang /bshad pa'i sgo rnams bsdus shing bshad pa'i phyir te/ byang chub sems dpa'i sa 'dir chos 'dul ba rgyas par bstan pa gang yin pa de lung nod pa dang / kha ton byed pa dang / chos kyi rjes su mthun pa'i chos nan tan du sgrub pa dag gis ji srid du yun ring du gnas shing rgya cher 'phel la/rgyas par 'gyur ba de srid du dam pa'i chos nub bar byed pa'i dam pa'i chos ltar bcos pa rnams 'phel bar mi 'gyur ro/ /nam dam pa'i chos ltar bcos pa rnams 'phel bar gyur pa de phyin chad ni de'i dam pa'i chos yang dag par don dang ldan pa de nub par 'gyur ro//byang chub sems dpa'i sa'i gzhi'i rnal 'byor gyi gnas tha ma las/ rab tu gnas pa'i le'u ste drug pa'o// //gzhi'i rnal 'byor gyi gnas tha ma rdzogs te byang chub sems dpa'i sa rdzogs s+ho/ //de la byang chub sems dpa'i sa'i go rims ni 'di yin te/ rigs la gnas pa'i byang chub sems dpa' ni bla na med pa yang dag par rdzogs pa'i byang chub tu sems skyed par byed do/ /sems bskyed nas bdag dang gzhan gyi don la sbyor ro/ /bdag dang gzhan gyi don la sbyor ba kun nas nyon mongs pa med par bya ba'i thabs rnyed par 'gyur ro/ /kun nas nyon mongs pa med na mi skyo bar bya ba'i thabs rnyed par 'gyur ro//skyo ba med pa'i dge ba'i rtsa ba 'phel bar bya ba'i thabs rnyed par 'gyur ro/ /dge ba'i rtsa ba rnams kyis rgyas par gyur na/ bla na med pa yang dag par rdzogs pa'i byang chub mngon par rdzogs par 'tshang rgya bar 'gyur te/ bdag dang gzhan gyi don la sbyor ba dang / kun nas nyon mongs pa med par bya ba'i thabs dang / mi skyo ba'i thabs dang / dge ba'i rtsa ba 'phel ba'i thabs dang / byang chub thob par bya ba la sgrub pa na/ thog ma kho nar zab cing rgya che ba'i chos rnams la mos pa 'jog go/ /de la mos na chos de dag yongs su tshol lo//yongs su bcal nas gzhan dag la yang ston cing / bdag nyid kyis kyang nan tan gyis sgrub par byed do/ /bsgrubs nas kyang gang gis dang / gang du dang / gang gi phyir bsgrub par bya ba des der de'i phyir sgrub po/ /des der de'i phyir sgrub pa na ci nas bsod nams sogs pa dang /ye shes sogs par gyur pa de lta bur sgrub po/ /bsod nams dang ye shes bsags nas 'khor ba mi spang ba'i thabs sgrub po/ /de la sgrub pa na 'khor ba'i kun nas nyon mongs pa med par sgrub bo/ /de la sgrub pa ni bdag gi bde ba la lhag par chags pa med par sgrub po//de la sgrub pa ni 'khor ba'i sdug bsngal gyis yongs su mi skyo bar sgrub po/ /des yongs su mi skyo na bstan bcos rnams la brten nas/ bstan bcos thams cad la mi 'jigs par 'gyur ro/ /bstan bcos shes na su la gang ci ltar bstan par bya ba de shes pas/ 'jig rten shes par 'gyur ro//de ltar bstan bcos shes shing 'jig rten shes na/ tshul bzhin du chos rnams yongs su tshol bar byed do/ /de ltar tshol bas sems can thams cad kyi the tshom thams cad gcod nus par 'gyur ro/ /de ltar nus na gzhan gyi the tshom gcod pas bsod nams kyis mngon par skye zhing bsod nams kyi tshogs yongs su rdzogs par byed do//bdag nyid kyang ye shes las mngon par skye bas ye shes kyi tshogs yongs su rdzogs par byed do/ /tshogs yongs su rdzogs na bden pa'i rnam pas byang chub kyi phyogs dang mthun pa'i chos bsgom pa la sbyor bar 'gyur zhing bsgom pa'i thabs rab tu shes so//de ltar brtson na bsgom pa des theg pa chen po'i yongs su mya ngan las 'das par yongs su sngo bar byed de/ nyan thos dang rang sangs rgyas kyi theg pas yongs su mya ngan las 'das par ni ma yin no/ / de ltar thabs la mkhas pas sangs rgyas dang / byang chub sems dpa' thams cad kyis gsungs pa thos pa yang 'dzin par 'gyur la/ sngon ma thos pa'i chos rnams kyang bsgom pa'i stobs kyis de la rnam pa thams cad du snang bar 'gyur ro/ /de la gzungs dang spobs pa dang ldan pas rnam par thar pa'i sgo gsum gyis dmigs pa thams cad spangs pa'i phyir sgrub bo//de la sgrub na bdag dang gzhan rnams kyi phyin ci log gi mngon pa'i nga rgyal spong ba la zhugs pa yin te/ 'di ni de'i rnam pa thams cad du sgrub pa phun sum tshogs pa yin no/ /de ltar zhugs pa de ni sgrub pa'i yon tan gyi khyad par dang /phan yon gyi yon tan gyi khyad par gyis sems can thams cad dang / nyan thos dang / rang sangs rgyas rnams la khyad par du 'phags par 'gyur ro/ /de la sgrub pa'i yon tan gyi khyad par ni byang chub sems dpa' ni bdag dang gzhan la phan pa'i phyir zhugs pa dang / gzhan gyi don rang gis dgos pa yin te/nyan thos dang / rang sangs rgyas ni de ltar gzhan gyi don bdag gis dgos pa ma yin no/ /sems can thams cad la sems snyoms pa yin te/ sems snyoms pas na rtag tu phan 'dogs pa'i phyir 'jug la/ lan du phan 'dogs pa la yang re ba med do/ /de ltar brtson pa ni rtag tu de dag la phan pa dang bde bar 'dod do//de ltar phan pa dang / bde ba'i bsam pa dang ldan pa ni de dag la 'bras bu yod par sbyor bar byed do/ /de ltar na 'dis ni gong nas gong du sgrub pa'i yon tan gyi khyad par bsgrubs so/ /de la phan yon gyi yon tan gyi khyad par ni byang chub sems dpa' ni sangs rgyas rnams lung bstan pa 'thob kyi/nyan thos dang / rang sangs rgyas rnams ni ma yin no/ /lung bstan na phyir mi ldog pa'i sa la gnas par 'gyur te/ de la gnas na nges par bya ba dang / rtag tu bya dgos pa la brjed pa med pa'i chos nyid thob par 'gyur ro/ /de ltar brjed pa med pa'i chos nyid du gyur pa ni/sangs rgyas dang byang chub sems dpa' rnams kyis sems can thams cad kyi mchog tu gdags pas 'dogs par mdzad do/ /bya ba thams cad kyang yongs su nyams par mi byed do/ /ma thob pa'i yongs su nyams pas kyang yongs su nyams par mi 'gyur ro//yongs su ma nyams na rtag tu rgyun mi 'chad par dge ba'i chos rnams kyis rtag tu skye bar 'gyur te/ zla ba yar gyi ngo bzhin du skye ba na yang dag pa'i byang chub sems dpar 'gyur te/ byang chub sems dpa' ltar bcos pa ma yin no/ /yang dag pa'i byang chub sems dpar gyur na rnam pa thams cad du 'dul ba'i thabs thams cad shes so//shes par gyur na gang la yongs su btsal ba dang / gang yongs su btsal ba dang / gang gis yongs su btsal ba rnam par gzhag pa thams cad la mkhas par 'gyur ro/ /yongs su btsal ba yang gang gis mthar thug par gyur pa de rnam par 'jog par mdzad do//rnam par gzhag pa la mkhas na gdams ngag la mkhas par 'gyur ro/ /gdams ngag la mkhas pa na dmigs pa tshad med pa'i ting nge 'dzin gyi rgyal po thob par 'gyur ro/ /ting nge 'dzin de thob pas 'bras bu yod pa'i chos ston par 'gyur ro//rnam pa sna tshogs kyis ston pa 'bras bu dang bcas par byed do/ /theg pa chen pos nges par 'byung bar yang 'gyur ro/ /theg pa chen pos nges par 'byung na theg pa chen po sdud par yang 'gyur ro/ /theg pa chen pos nges par 'byung ba'i gnas skabs de dang der ming de dang de thob par 'gyur la/'jig rten thams cad dang / sangs rgyas dang byang chub sems dpa' rnams kyis kyang / byang chub sems dpa' thams cad dang thun mong du gyur pa'i ming 'dogs shing bstod par yang mdzad de/'di dag ni phan yon gyi khyad par yin par rig par bya'o/ /de lta bu'i ming can ni byang chub sems dpa'i rtags rnams yin te rtags gang dag gis rtags de dang ldan na sgrub pa de khyim pa'i phyogs dang / rab tu byung ba'i phyogs la yang rnam pa thams cad du sgrub par byed do/ / gnyi ga'i phyogs la yang sgrub par byed na sgrub pa snying por byed pa gcig tu nges par dge ba'i phyogs la lhag pa'i bsam pa can du 'gyur te/ de lta bu'i bsam pas ji srid gnas kyi bar du khyim pa yongs su gzung ba'am/ rab tu byung ba yongs su gzung ba dge ba'i phyogs la 'dzud par byed do//de phyin chad ni gang du sangs rgyas dang / byang chub sems dpa' rnams dang 'grogs par 'gyur ba dang / sems can gyi don du bsams bzhin du skye ba 'dzin to/ /de la sangs rgyas dang / byang chub sems dpa' rnams kyis rtag tu rgyun mi 'chad par gdams ngag gis nye bar brten te dge ba'i phyogs kyi khyad par thob pa'i gnas skabs nyams su myong bar 'gyur ro//de nyams su myong ba'i phan yon gzung bas khyad par thob pa'i gnas skabs der khyim gyi tshul gyis 'jug go/ /gnas skabs der blo gnas na gong nas gong du mthar thug par 'gro ba'i bar du khyad par gyi gnas skabs rnams la rnam pa thams cad du rtul bar byed cing chog mi shes so//de ltar brtul na mthar thug pa'i gnas thob par 'gyur te/ de phyin chad yang yongs su btsal du med de bla na med pa thob pa yin no/ /byang chub sems dpa'i sa'i go rims rdzogs so// //rgya gar gyi mkhan po pra dz+nyA warma dang / zhu chen gyi lo tsA ba ban de ye shes sdes bsgyur cing zhus te gtan la phab pa// //sh+lo ka drug stong bdun brgya lnga bcu yod do//