CLOSE WINDOW

D4031
བོད་ཡིག

lo tsA ba shAkya'i dge slong gzhon nu mchog gis bsgyur cing zhus te gtan la phab pa/ /[ ]@#/ /rgya gar skad du/ sru tA laM ka ra paN+DA r+tha/bod skad du/ mdo sde rgyan gyi don bsdus pa/ 'phags pa byams pa la phyag 'tshal lo/ /ma bshad pa'i skyon dang / bshad pa'i skyon dang / phyin ci log tu bshad pa'i skyon gsum dang bral bar bshad par bya'o/ /de ni ston pa dang / ston pa'i tshig dang / bstan par bya ba'i chos dang / bstan par bya ba'i thabs bla na med pa'o/ /dang po la ston pa'i dbye ba dang / ser sna dgag pa dang / chos bstan pa don yod pa dang gsum mo/ /rgyal sras tshig ni mi zhen dang / /zhes bya ba la sogs pa tshig brgyad kyis ston pa'i tshig go/ / rgyal ba byams pas bshad pa'i mdo sde'i rgyan la bstan par bya ba'i chos ni gcig ste/ nyes pa brgyad kyi gnyen por theg pa mchog go/ /de bstan par bya ba'i thabs bla na med pa la gnyis te/ zab pa dang / rgya che ba'o/ /de yang rnam pa gsum dang ldan pa'i dbang du byas nas bshad de/ sgra ni nges par rtogs pa'i dbang du byas nas bshad pa dang / sgrub pa nyams su len pa'i dbang du byas nas bshad pa dang / byang chub sems dpa'i rigs dang ldan pa'i mkhas pa'i dbang du byas te bshad pa'o/ /de yang sde snod gsum du bsdus nas rnam pa bzhi bzhi'i sgo nas bshad pa yin no//de ltar gzhung gi don bsdu na lnga yin te/ bsgrub par bya ba dang / bye brag tu shes par bya ba dang / bsam par bya ba dang / bsam kyis mi khyab pa dang / yongs su grub pa mthar thug pa'i don no/ /ming rgyu mtshan la sogs pa lnga ni mi bzhag ste/ gzhung nas brjod byar ma bzhag pa dang /'byor pa'i don tshul bla na med pa ma yin pa'i phyir ro/ /'o na gang yin zhe na/ 'byor pa'i don tshul bla med gyur pa lnga yi bdag nyid ston par byed/ /ces bya ba de gong ma dang sbyar ba dang / 'og ma dang sbyar ba gnyis byams pa'i dgongs pa yin la/ gong ma dang sbyar ba ni bla ma brgyud pa las shes te/de dbyig gnyen kyis ma bshad do/ /dbyig gnyen gyis 'og ma dang sbyar ba'i bshad pa 'di yin te/ gang la bslab par bya ba'i yul theg pa chen po bkar bsgrub pa dang / sems bskyed kyi yul skyabs su 'gro ba mchog tu bsgrub pa dang nye bar len pa'i rgyu theg pa chen po'i rigs bsgrub pa bstan te bsgrub par bya ba gsum bsdus pa yin no//bye brag tu shes par bya ba ni gnyis te/ sems bskyed dang / rang dang gzhan gyi don phun sum tshogs pa bye brag tu shes par bya'o/ /bsam par bya ba ni gnyis te/ zab pa'i de kho na dang /rgya che ba thabs la mkhas pa'i de kho na'o/ /bsam gyis mi khyab pa la gnyis te/ mngon par shes pa la sogs pa'i mthu bsam gyis mi khyab pa dang / dga' ba dang dad pa la sogs pa bdag dang gzhan yongs su smin pa bsam gyis mi khyab pa'o/ /yongs su grub pa'i don ni gcig ste/mngon par byang chub par mthar thug pa nyid do/ /'di ji ltar shes par byed pa gang yin zhe na/ sgrub pa'i skabs zhes smos pa'i phyir dang / mthar yang / nyes pa kun gyi dri med pa/ /rnam pa thams cad mkhyen nyid 'thob/ /rin chen snod ni phye ba ltar/ / sangs rgyas nyid ni yang dag bstan/ /zhes 'byung ba'i phyir ro/ /de nyid kyi phyir na/ sdom ni dang po sgrub skyabs rigs/ /de bzhin du ni sems bskyed dang / /rang gzhan don dang de nyid don/ /mthu dang yongs smin byang chub po/ /zhes tshigs su bcad nas/ gang la bslab par bya ba'i yul yongs su rdzogs pa'i don bstan pa'o//de la ji ltar basbab par bya zhe na/ mos pa mang ba nyid dang ni/ /chos tshol ba dang ston pa dang / /de bzhin sgrub dang yang dag pa'i/ /gdams ngag rjes su bstan pa yin/ /zhes bya ba gsungs te/ mgon pos chu bo'i 'gros lta bu'i bshad pa ni 'di yin te/thog mar theg pa chen po mchog tu grub pa las brtsams nas mos pa 'byung ngo / /mos pa las/ chos tshol ba 'byung ngo / /de ston par byed pa dge ba'i bshes gnyen la rag las pas chos ston pa'o/ /de nas sgrub pa nan tan du bya ba yin/ bsgrub pa'i skabs zhes rang ming nas smos pa'i phyir bsgrub par bya ba'i don yin no//bye brag tu shes par bya ba ni yang dag par gdams ngag dang rjes su bsten pa yin no/ /bsam par bya ba ni de kho na nyid zab pa dang rgya che ba thabs la mkhas pa'i skabs so/ /thabs yang rnam pa gsum ste/ bsdu ba'i dngos po bzhi dang ldan pa'i pha rol tu phyin pa drug dang /tshad med pa bzhis bsdus pa dkon mchog mchod pa la sogs pa bstan pa dang / lam gyis bsdus pa byang chub kyi phyogs dang mthun pa'i chos bstan pa'o/ /bsam gyis mi khyab pa ni yon tan gyi skabs so/ /yongs su grub pa rtogs pa'i don so sor rang gis rig par bya ba ni mthar thug pa'i skabs yin te/de ltar na bstan bcos kyi lus yongs su rdzogs pa mdor gzhag pa dang / dpe lngas mtshon nas bkod pa 'og ma dang sbyar ba yin no/ /gong ma dang sbyar ba rtogs pa brgyud de 'ongs pa ni 'di yin te/ theg pa chen po la 'byor pa'i don tshul bla na med pa lnga ste gang zhe na/rigs mchog dang ldan pa'i gang zag don shes par nus pa la phyin ci ma log par don ston pa dang / ston pa'i tshig dri ma med pa bstan pa dang / 'gro ba lnga po sdug bsngal las bsgral ba'i ched yin pa dang / de'i rgyud snying rje chen po dang ldan pa'i bdag nyid dang /bstan par bya ba'i chos theg pa mchog tu gyur pa'o/ /de lnga ni tshigs bcad dang po'i don te/ dpe lngas mtshon pa'i don lnga ste/ mdor bstan pa'o/ /de lnga'i rgyas par bshad pa ni 'di yin te/ don shes kyi rgyas bshad ni dmigs par bya ba'i yul theg pa chen po'i rgyu 'bras bu dang bcas pa'i byang chub kyi skabs kyi bar ro//don ston byi rgyas bshad ni theg pa chen po la mos pa chos tshol ba ji lta ba bzhin du ston pa'i skabs so/ /rab tu byed pa ngag dang tshig rnams dri med kyi rgyas bshad ni/ rgyal sras tshig ni mi zhan pa nas/ yan lag drug cu bsam mi khyab kyi bar ro//sdug bsngal bsgral phyir gyi rgyas bshad ni/ sgrub pa'i skabs nas tshad med pa rnam par dbye ba'i bar ro/ /'gro la snying rje'i phyir te de'i bdag nyid kyi rgyas bshad ni rnam par dbye ba las brtsams pa man chad do/ /theg mchog bstan pa'i rnam pa'i chos kyi rgyas bshad ni ngo tsha rnam par dbye ba nas bzung ste/mthar thug pa'i sangs rgyas kyi mtshan nyid rdzogs kyi bar gyis so/ /de ltar lus rnam par gzhag pa dang / yan lag rgyas par bshad pa'i tshul gnyis su bshad pas mdo sde'i don bshad pa yin la/ tshigs bcad gnyis pas rgyan bshad de/ theg pa chen po'i chos ni dga' ba bskyed pa'i phyir mdo sde'i rgyan ces bya ba yin no//gal te lus can dga' ba bskyed pas rgyan yin na/ 'di la dri ba lnga 'byung ste/ dri ba dang po ni theg pa chen po 'di bkar grub na bcom ldan 'das las khyad par du 'phags pa'i sgra dang don ci zhig byams pas bogs dbyung du yod nas dga' ba skyed par byed ce na/lan du/ gzugs rgyan rang bzhin yon tan ldan pa me long nang song na la sogs pa'o/ /dri ba gnyis pa ni theg pa chen po las 'ga' zhig gi tshe rnam par 'tshe ba bshad pa dang / gang yang med pa nyid du ston pa'i phyir dga' ba bskyed pa ma yin no zhe na/lan du/ ji ltar bsnams na rab dku la man chad smos so/ /dri ba gsum pa ni theg pa chen po las bskal pa dpag tu med par dga' ba spyad pa sna tshogs 'byung bas de'i phyir dga' ba bskyed pa ma yin no zhe na/ lan du/ chos dka' rgya chen zhes bya ba smos so/ / dri ba bzhi pa ni rtog pa dang ldan pa ni rang la phan pa tshol ba yin na/ 'di las ni gzhan la phan pa'i phyir rang la sdug bsngal bskyed pas dga' ba ma yin no zhe na/ lan du/ rin chen rigs ldan rin thang med la sogs pa'o/ /dri ba lnga pa ni thun mong du grags pa'i sdud pa po med pa'i phyir dang / bdag cag la grags pa kho na theg pa chen po yin te/ theg pa chen po bka' ma yin no zhe na/ lan du/ sngar lung ma bstan lhan cig byung man chad smos so/ /mdor gzhag pa las 'phros so/ /bstan bcos kyi rnam gzhag gzhan yang tshigs bcad dang po gnyis kyis bstan bcos kyi mtshan bshad pa dang /de las 'phros pas le'u dang pos lus mdor gzhag bstan/ skyabs 'gro bsnan pas rgyas bshad bstan/ nye bar len pa'i rgyu rigs dang / rkyen sems bskyed nas 'bras bu mthar thug gi bar gyis shin tu rgyas par bshad pa bstan to/ /rgyal ba byams pas mdzad pa'i bstan bcos mdo sde'i rgyan gyi thog mar mtshan bshad pa'i sgo nas lus rnam par gzhag pa la gsum ste/byed pa dang / bya ba dang / dgos pa'o/ /byed pa la rnam par dbye ba bdun te/ dbye ba po dang / byed pa'i las dang / byed pa dang / byed pa po'i ched dang / rgyu'i don dang / 'brel pa'i don dang /gnas kyi don no/ /bya ba ni lnga ste/ bsgrub par bya ba dang / bye brag tu shes par bya ba dang / bsam par bya ba dang / bsam gyis mi khyab pa dang / yongs su grub pa rtogs pa'i don so so rang rig par bya ba byang chub kyi phyogs dang mthun pa nyid do/ /de theg pa chen po mdo sde'i rgyan 'dis rim pa bzhin rnam par bkrol bas mkhas pa dga' ba bskyed pa'i phyir rgyan du gzhag go//chos de rang bzhin gyes rgyan dang ldan na bstan bcos 'dis rgyan du byas pa ci yod ce na/ gzugs rgyan rang bzhin la sogs pa smos so/ /dgos pa ni phan yon rnam pa gsum ste/ sgrib pa spong ba dang /dbang 'byor pa'i rgyu dang / 'phags pa'i nor la bongs spyod pa'i rgyu'o/ /kha cig 'di skad du/ 'di bka' ma yin na phan yon lta smos kyang ci dgos snyam pa la/ theg pa chen po sangs rgyas kyi bka' nyid du bsgrub par bya ba yin te/ gtan tshigs dang / bsgrub bya bla na med pa'i thabs su grub pa dang /de la skrag pa'i nyes dmigs rgyu dang bcas pa dang / skrag par mi bya ba'i gtan tshigs dang / dgag pa mi 'grub pa'i rgyu mtshan dang / gnas ma yin pa la skrag mi dgos pa dang / ma mos pa nyid kyis grub pa dang / rang gis ma thos pa spang bar mi rigs pa dang /spong ba'i rgyu tshul bzhin ma yin pa yid la byed pa dgag pa dang / khong du ma chud pas spang bar mi rigs pa ste bcu pa'o/ /de la sngar lung ma bstan pa la sogs pa gtan tshigs bdun no/ /sngar lung ma bstan pas sgrub pa ma nges pa spang ba dang / yod med kyis ma grub pa spang ba dang / spyod yul ma yin pa sgrub par byed pa ste gsum mo/ /theg pa chen por grub pa'i dkon mchog la skyabs su 'gro bar mos pa bsgrub par bya ba la dgu ste/ skyabs su 'gro ba mchog gi khyad par dang / de la spro bar bya ba dang / de'i ngo bo dang / rgyu dang / 'bras bu dang / las dang / ldan pa dang / dbye ba dang / phan yon no/ /de la skyabs su 'gro ba'i khyad par ni/ kun tu 'gro ba la sogs pa bzhi'o/ /de'i nye bar len pa'i rgyu bsgrub par bya ba'i phyir rigs yod pa dang / med pa dang / rigs kyi dbye ba dang / 'bras bu khyad par du 'phags pa ste bzhi'o//yod pa yang /yod dang mchog dang mtshan nyid dang / /rtags dang rigs rab dbye ba dang / /nyes dmigs dang ni phan yon dang / /dpe rnams gnyis te rnam pa bzhi ste rnam pa dgu'o/ /de'i rkyen nang gi tshul bzhin yid la byed pa'i bdag nyid sems bskyed pa rnam pa bcu gsum ste/mtshan nyid dang / rab tu dbye ba dang / rnam par gzhag pa dang / yang dag par blangs pa d+ha las byung ba dang / don dam pa dang / dpe'i che ba dang / sems ma bskyed pa smad pa dang / bskyed pa bsngags pa dang / mi byed pa'i sdom pa 'thob pa dang / sems mi ldog pa dang /sdug bsngal gyis mi 'jigs pa dang / sems can yal bar mi 'dor ba dang / le lo mi rigs pa'o/ /bsdu na gnyis te/ mtshan nyid dang / dbye ba'o/ /de la drug ste/ mngon par rtogs pa'i dbye ba dang / rnam par gzhag pa'i dbye ba dang / brdar btags don dam gyi dbye ba dang /dpe'i sgo nas dbye ba dang / skyon dang yon tan gyi sgo nas dbye ba dang / las kyi sgo nas dbye ba'o/ /sgrub pa ni dgu ste/ mtshan nyid dang mnyam pa nyid dang / gzhan gyi don khyad par du bya ba dang / gzhan gyi don sgrub pa'i dbye ba dang / de'i phun sum tshogs pa dang / sgrub pa'i khyad par dang / spyod yul bsngo ba dang /gzhan gyis nyes pa bzod pa dang / sgrub pa'i che ba nyid do/ /bsam par bya ba de kho na nyid zab mo rnam pa drug gis bstan te/ don dam pa'i mtshan nyid dang / bdag tu lta ba phyin ci log dgag pa dang / phyin ci log dmad pa dang / bdag med kyang zhi bar rung ba dang / gnyen po ye shes la 'jug pa dang /ye shes kyi che ba nyid do/ /bsam gyis mi khyab pa'i mthu ni rnam pa bdun gyis bstan te/ mtshan nyid rnam par dbye ba dang / rgyu dang / 'bras bu dang / las dang ldan pa dang / 'jug pa dang / che ba'i yon tan no/ /las la drug ste/ mthong / ston/ 'od zer/ rnam par rol pa/ sprul pa dang / zhing dag go/ /yongs su smin pa ni rnam pa gnyis te/ bdun dang gzhan no/ /de la bdag yongs su smin pa rgya che ba'i bdag nyid dang bcas pa ste/ dga' dang dad dang rab zhi snying brtse dang / /bzod dang yid gzhungs mthu can nyid dang ni/ /mi 'phrogs pa dang yan lag ldan pa rab//de ni rgyal sras yongs su smin pa'i mtshan no/ /sems can yongs su smin pa ni lnga ste/ rang bzhin dang / rab tu dbye ba dang / phan bde'i bsam pa dang / sbyor ba phun sum tshogs pa drug gis bsgrub pa dang / mjug bsdu ba'o/ /yongs su grub pa'i don bla na med pa'i byang chub la gnyis te/mdor bstan pa dang / rgyas par bshad pa'o/ /dang po la bzhi ste/ yang dag par 'grub pa dang / ngo bo nyid dang / dpe dang / sangs rgyas nyid gnyis su med pa'i mtshan nyid mthu dang bcas pa'o/ /rgyas par bshad pa la bcu gnyis te/ de skyabs gnas bla na med pa dang /gnas yongs su gyur pa dang / mdzad pa lhun kyis grub pa dang / rgyun mi 'chad pa dang / zag pa med pa'i dbyings zab pa dang / 'byor pa rnam par dbye ba dang / sems can yongs su smin par mdzad pa'i rgyu dang / chos kyi dbyings rnam par dag pa dang / sku gsum dang ye shes rnam par dbye ba dang /sangs rgyas thams cad gcig pa dang / tha dad pa las grol ba dang / sangs rgyas nyid la 'jug pa'i thabs dang / phan tshun mdzad pa gcig pa dang / sangs rgyas nyid la spro bar bya'o/ /skyabs gnas bla na med pa la gsum ste/nyon mongs pa las skyob pa dang 'tshe ba las skyob pa dang / 'chi ba la sogs pa las skyob pa dang / skyabs chen po bla na med pa'i rgyu mtshan dang / yongs su rdzogs pa dang / yul dus rnam par rdzogs pa'i phyir ro/ /gnas yongs su gyur pa la bzhi ste/ gnyen po phun sum tshogs pa dang ldan pa dang /gzhan las khyad par du 'phags pa dang / yon tan gyi dbye ba dang / dpe rnam pa gsum mo/ /zag med kyi dbyings zab pa la rnam pa gsum ste/ mtshan nyid dang gnas dang / phrin las zab pa'o/ /dang po la bzhi ste/ rnam par dag pa'i mtshan nyid zab pa dang /bdag mchog gi mtshan nyid zab pa dang / lung mi ston pa'i mtshan nyid zab pa dang / rnam par grol ba'i mtshan nyid zab pa'o/ /phrin las zab pa la bcu gcig ste/ yon tan gnas nyid dang / sems can smin mdzad dang / mthar thug gshegs dang / chos ston phrin las dang /mdzad pa gcig dang / ye shes dus gcig 'jug dang / rnam par mi rtog dang / ye shes sna tshogs dang / ye shes mi 'jug dang / ye shes khyad par 'phags dang / bde gshegs snying po can no/ /'byor pa rnam par dbye la gsum ste/ mthu phul du byung ba dang / rnam pa'i rab tu dbye ba dang / gzhan du gyur pa'i 'byor pa'i rab tu dbye ba'o/ /sems can yongs su smin par mdzad pa'i rgyu la bdun te/ ji ltar smin par mdzad pa dang / ya mtshan che ba nyid dang / smin pa'i thabs mang ba dang / lhun gyis grub cing 'du byed pa dang bral ba dang / de'i dpe dang / gcig nas gcig tu smin pa dang / ngoms pa dang 'phel ba med par bstan pa'o/ /chos kyi dbyings rnam par dag pa la drug ste/ ngo bo nyid dang / rgyu dang / 'bras bu dang / las dang ldan pa dang / 'jug pa'o/ /mos pa'i le'u bdun gyis bstan te/ rnam par dbye ba dang / bar du gcod pa dang /phan yon dang / theg pa chen po la mos pa len du gzhug pa dang / zhum pa dgag pa dang / bsod nams kyi khyad par dang / mos pa'i 'bras bu'o/ /chos tshol ba la bcu dgu ste/ dmigs pa yo bas su tshol ba dang / de rnyed pa dang / yid la byed pa dang / chos kyi de kho na nyid dang / de kho na nyid sgyu ma lta bur yongs su tshol ba dang /shes bya yongs su tshol ba dang / kun nas nyon mongs pa dang rnam byang yongs su tshol ba dang / rnam par rig pa tsam dang / mtshan nyid dang rnam par grol ba dang / ngo bo nyid med pa dang / mi skye ba'i chos la bzod pa dang / theg pa gcig pa nyid dang / rig pa'i gnas dang /khams brtas pa dang / chos tshol ba'i rab tu dbye ba dang / rgyu nyid du dang / spang bya rnam par rtog pa tshol ba dang / mjug bsdu ba phan yon dang bcas pa'o/ /de kho na sgyu ma lta bur tshol ba la bcu gcig ste/ sgyu ma'i mtshan nyid dang / dus gcig tu rtogs par spyod pa dang /dpe dang sbyar ba dang / don dang sbyar ba dang / dgos pa dang sbyar ba dang / rgyu mtshan dang sbyar ba dang / dpe'i dbye ba dang / mi mthun pa dang gnyen po'i dbye ba dang / spang ba'i tshul dang / thar pa'i dpe dang / sgyu ma la sogs pa dpe brgyad kyi don bstan pa'o/ /chos ston pa la bcu gcig ste/ser sna dgag pa dang / chos don med pa ma yin pa dang / ston pa'i rnam par dbye ba dang / ston pa phun sum tshogs pa dang / tshig phun sum tshogs pa dang / yi ge phun sum tshogs pa dang / ston pa'i che ba'i bdag nyid dang / don phun sum tshogs pa dang / ldem por dgongs pa dang / dgongs pa rnam par dbye ba dang / shin tu rgyas pa bsdus pa phan yon dang bcas pa bstan pa dang / chos bstan pa'i phan yon no/ /bsgrub pa'i le'u la brgyad de/ rnam par dbye ba dang / sgrub pa la bag yod par bya ba dang / nyon mongs pa kho nas nyon mongs pa las nges par 'byung ba dang /theg pa dman pa yid la byed pa spang ba dang / rang bzhin gyis dag pa la skrag pa spang ba dang / chags pa las skyes pa'i ltung ba dgag pa dang / ji ltar gang du sgrub pa dang / sgrub pa'i 'khor gsum yongs su dag pa'o/ /bye brag tu shes par bya ba'i gdams ngag dang rjes su bstan pa la bcu gsum ste/mos pa rnam par 'phel ba dang / de bzhin du ni tshogs bsags pa la sogs pa dang / chos kyi rgyun gyi ting nge 'dzin thob pa las gdams ngag rnyed pa dang / de la dmigs pa'i sems drug bstan pa dang / yid la byed pa bcu gcig bstan pa dang / zhi gnas kyi sems dgu bstan pa dang / de las rim gyis bsam gtan las su rung ba can yon tan dang bcas pa thob pa dang / nges par 'byed pa'i cha dang mthun pa dang / mthong ba'i lam dang / de'i mtshan nyid rnam par gzhag pa dang /che ba'i bdag nyid dang / bsgom pa'i lam dang / gdams ngag gi che ba'i bdag nyid bstan pa'o/ /thabs dang ldan pa'i las rnam par dbye ba la gsum ste/ kun nas slong ba'i thabs dang / lta ba'i thabs dang / 'khor gsum yongs su dag pa'i thabs so//pha rol tu phyin pa drug la/ grangs dang dpe'i mtshan nyid go rims dang / /nges pa'i tshig dang goms bya yon tan dang / /de dag rab dbye bsdu dang mi mthun phyogs/ /yon tan phan tshun rnam nges yin shes bya'o/ /bsdu ba'i dngos po bzhi la drug ste/ngo bo dang byed pa dang / las dang / grangs nges pa dang / rab tu dbye ba dang / phan yon no/ /mchod la sogs pa bzhi ni/ sangs rgyas lam chod pa dang / dge bshes bsten pa dang / tshad med pa bsgom pa dang / de dag mjug bsdu ba'o/ /mchod pa la rgyu mtshan dang ni yongs bsngo dang //rten dang dngos dang rgyu dang ni/ /ye shes dang ni zhing dag dang / /gnas kyi sgo nas rab tu bstan/ /dge bshes bsten pa bzhi dang ni/ /rgyu mtshan dang ni yongs bsngo dang / /rgyu dang ye shes zhing dag dang / /gnas kyi sgo nas rab tu bstan/ /tshad med pa la gsum ste/ khyad par dang / rab tu dbye ba dang / snying rje'i rnam par dbye ba'o/ /snying rje'i rnam par dbye ba la nyi shu rtsa gnyis te/ dmigs pa'i rab tu dbye ba dang / 'bras bu lnga dang / srid pa dang zhi bar mi gnas pa dang / 'khor ba yongs su shes pa dang / snying rje'i rgyu rnam par dbye ba dang / ljon shing gi dpe dang /phan yon dang / snying rje chags pa dang bral ba dang / snying rje byams pas khyad par du 'phags pa dang skrag pa dang dga' ba'i rgyu mtshan dang / snying rje'i sdug bsngal gyis bde ba zil gyis gnon pa dang / snying rjes byin pa'i phan yon dang / sdug bsngal khas len pa dang / rnam pa gsum po dang /de'i 'bras bu 'phel ba dang / sbyin pa la spro ba bskyed pa dang / gzhan bde bas bde ba nyams su myong ba dang / sbyin pa la rjes su ston pa dang / brtse bas sbyin pa khyad par du 'phags pa dang / nye bar spyad pa'i khyad par gyis dga' ba dang / pha rol tu phyin pa nye bar bsgrub pa dang /snying rje'i rkyen rnam pa bzhi dang / snying rje chen po mchog gi rnam pa'o/ /byang chub kyi phyogs dang mthun pa la nyi shu rtsa bzhi ste/ ngo tsha'i rnam par dbye ba dang / brtan pa dang / mi skyo ba dang / bstan bcos shes pa dang / 'jig rten shes pa dang / rton pa dang / so so yang dag par rig pa dang /tshogs gnyis dang / dran pa nye bar gzhag pa dang / yang dag par spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag dang / 'phags pa'i lam dang / zhi gnas dang / lhag mthong dang / thabs la mkhas pa dang /gzungs dang / smon lam dang / ting nge 'dzin dang / chos kyi sdom dang / de'i skad cig ma dang / bdag med pa dang / ngo tsha la sogs pa'i las mdor bsdus pa bstan pa'o/ /bsam gyis mi khyab pa'i yon tan nyi shu rtsa bzhi ste/ ngo mtshar che ba dang mi che ba rnam par dbye ba dang /sems mnyam pa nyid dang / phan 'dogs pa dang / lan du phan 'dogs pa dang / smon pa dang / sbyor ba chud mi za ba dang / yang dag pa'i sbyor ba dang / yongs su nyams pa dang / khyad par can gyi chos rnam par dbye ba dang / bcos ma dang bcos ma min pa'i yon tan dang /'dul ba rnam par dbye ba dang / lung bstan pa dang / nges par 'gyur ba dang / gdon mi za bar bya dgos pa dang / rtag par bya ba dang / gtso bo'i dngos po dang / gdags pa rnam par gzhag pa dang / yongs su tshol ba dang / yang dag pa ji lta ba bzhin du shes pa dang /dpag tu med pa dang / bshad pa'i 'bras bu dang / theg pa chen po dang / de'i 'bras bu dang / byang chub sems dpa' rnam par dbye ba dang / de'i mtshan kyi rnam par dbye ba'o/ /yongs su grub pa mthar thug pa'i skabs la bco brgyad de/ rtags dang / phyogs dang / lhag pa'i bsam pa dang / yongs su 'dzin pa dang / skye ba dang gnas pa dang / sa rnam par dbye ba mdor bstan pa dang / sa'i mtshan nyid dang / de'i gang zag dang / de la bslab pa rnam par gzhag pa dang / phung po rnam par gzhag pa dang / grub pa dang / sa la zhugs pa'i rtags dang / pha rol tu phyin pa thob pa'i rtags dang / de'i phan yon dang / sa'i nges pa'i tshig dang / thob pa dang / spyod pa dang / sangs rgyas kyi yon tan rnam par dbye ba'o/ /de yang bsdu zhun gnyis te/ rgyu'i khyad par dang / ngo bo'i sgo nas so/ /rgyu la drug ste/ rtags dang / phyogs dang / bsam pa dang / yongs su 'dzin pa dang / skye ba dang / sa'i sgo nas so/ /ngo bo'i sgo nas sangs rgyas kyi yon tan bco brgyad de/ tshad med pa dang / rnam thar la sogs pa dang / nyon mongs pa med pa dang / smon nas mkhyen pa dang / so so yang dag par rig pa dang /mngon par shes pa dang / mtshan dang / dpe byad dang / yongs su dag pa dang / stobs dang / mi 'jigs pa dang / bsrung med dran pa nyer gnas dang / bag chags bcom pa dang / bsnyel ba mi mnga' ba dang / thugs rje chen po dang / ma 'dres pa'i yon tan dang / thams cad mkhyen pa'i yon tan dang / pha rol tu phyin pa rdzogs pa dang / sangs rgyas kyi mtshan nyid rnam par dbye ba'o// //rgyal sras mi pham mgon las mngon sum du/ /rna ba'i snyim pas bdud rtsi'i rgyun 'thungs pas/ /skal ldan gang+gA d+ha ra'i slob ma ni/ /bram ze rin chen rdo rjes legs bzung nas//theg chen mdo sde ma lus pa yi don/ /mkhas pa dag par byed pa'i rgyan bshad pa/ /mkhas pa dz+nyA na shrI yis rna rgyan ltar/ /legs bzung des ni bshad pa mngon sum du/ /dge slong chos kyi brtson 'grus kyis mnyan nas/ /ma nor don tshig phreng ba ltar byung 'di//byams pa nyid las mkhas pa bzhis brgyud nas/ /phyi ma dag la snang bar bya phyir bris/ /theg pa chen po mdo sde'i rgyan gyi don bsdus pa/ slob dpon mkhas pa chen po dz+nyA na shrIs mdzad pa rdzogs so// //bod kyi lo tsA ba dge slong chos kyi brtson 'grus kyis bsgyur ba'o/